Luận tạng Tây Tạng (Tengyur) — Tập 57

ྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས། དེ་བཞིན་གཤེགས་པ་ཐམས་ཅད་དེ། རྣམ་པར་སྣང་མཛད་ལ་སོགས་

པ་ནས་རྡོ་རྗེ་འབེབས་པའི་བར་རོ། །དེ་རྣམས་ཀྱི་ཕྱག་རྒྱ་ནི་དཀྱིལ་འཁོར་བཞི་ལས་གསུངས་པའི་ཕྱག་རྒྱ་ཆེན་པོའོ། །དེ་རྣམས་ཀྱི་དམ་ཚིག་ནི་གཞུང་ལུགས་སུ་གཞག་པ་འདའ་བར་མི་བྱ་བའི་དོན་ཏོ། །སྨྲོས་ཤིག་ཅེས་བྱ་བ་ནི་བརྗོད་པར་བྱའོ། །བདག་ཉིད་ཆེན་པོ་གང་གང་གི །ཞེས་བྱ་བ་ནི་རྣམ་པར་
སྣང་མཛད་ལ་སོགས་པ་གང་དང་གང་གིའོ། །ཕྱག་རྒྱ་གང་དང་གང་བཅིངས་པ། །ཞེས་བྱ་བ་ནི་ཇི་སྐད་དུ་བཤད་པའི་དཀྱིལ་འཁོར་བཞི་ལས་གསུངས་པའི་ཕྱག་རྒྱ་ཆེན་པོ་གང་དང་གང་བཅིངས་པ་དེ། དེའི་བཟླས་པ་བཛྲ་དྷཱ་ཏུ་ཞེས་བྱ་བ་ནས་བཛྲ་ཨཱ་བེ་ཤ་ཞེས་བྱ་བའི་སྙིང་པོ་ཟློས་ཤིང་། དོན་གྱིས་
ནི་ཞེས་བྱ་བ་བཤད་མ་ཐག་པའི་བཛྲ་དྷཱ་ཏུ་ཞེས་བྱ་བ་ལ་སོགས་པ་སྒྲའི་དོན་ནི་སྙིང་པོའི་དོན་ཏེ། སྙིང་པོའི་དོན་དེས་སྙིང་པོའི་དོན་ལ་ལྷག་པར་མོས་པས་བཛྲ་དྷཱ་ཏུ་ཞེས་བྱ་བ་ལ་སོགས་པའི་སྙིང་པོ་ཟློས་ཤིང་ཕྱག་རྒྱ་བཅིང་བར་བྱའོ་ཞེས་བྱ་བའི་ཐ་ཚིག་གོ། །རྣམ་པར་སྣང་མཛད་ལ་སོགས་པ་བསྒྲུབ་
པར་བྱ་བ་དེ་དག་ཀྱང་རང་གི་བདག་ཉིད་ཡིན་པར་བསྒོམ་གྱི་མདུན་དུ་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར། དེར་ནི་བདག་ཉིད་བསྒོམ་པར་བྱ། །ཞེས་བྱ་བ་གསུངས་སོ། །དེ་ལྟར་བྱས་པས་ཅིར་འགྱུར་ཞེ་ན། ཡེ་ཤེས་འདི་ཡི་ཚུལ་གྱིས་ནི། །ཞེས་བྱ་བ་གསུངས་ཏེ། བཟླས་པའི་དོན་སྒོམ་པའི་
ངེས་པའི་ཚུལ་འདིས་དངོས་གྲུབ་འགྲུབ་ཅིང་རྫོགས་པར་འགྱུར་རོ། །གང་གི་ཞེ་ན། བདག་ཉིད་ཆེན་པོ་ཐམས་ཅད་ཀྱི་སྟེ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིའོ། །ཕྱག་རྒྱ་ཐམས་ཅད་ནི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་ཀྱི་དཀྱིལ་འཁོར་ལས་
གསུངས་པའི་ཕྱག་རྒྱ་ཆེན་པོ་རྣམས་སོ། །དེ་ནས་ཕྱག་རྒྱ་ཐམས་ཅད་ཀྱི་གསང་བ་བརྗོད་པར་བྱའོ་ཞེས་བྱ་བ་ནི་ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་རིགས་ཐམས་ཅད་ཀྱི་དམ་ཚིག་གི་ཕྱག་རྒྱའོ། །དེའི་གསང་བ་ནི་ཆོས་ཀྱི་དབྱིངས་ལས་བྱུང་བའི་ངོ་བོ་སྟེ་དེ་བརྗོད་པར་བྱའོ། །རང་གི་
དབང་པོ་བཤིག་ནས་གཟུང་། །ཞེས་བྱ་བ་ནི་ཆོས་བདག་མེད་པར་བསྒོམས་པས་ཆོས་ཐམས་ཅད་བསྡུས་པ་བཤིག་ཅིང་གསལ་ལ་རང་གི་དབང་པོ་སྟེ་རང་གི་ལྷའི་སྐུ་དེ་གཟུང་བར་བྱ་སྟེ། བདག་ནི་རྣམ་པར་སྣང་མཛད་དོ། །ཞེས་བྱ་བ་ནས། བདག་ནི་རྡོ་རྗེ་འབེབས་པའོ། །ཞེས་བྱ་བའི་བར་གྱི་རང་གི་

ལྷའི་ང་རྒྱལ་བསྒོམས་པའི་ཚུལ་གྱིས་སོ། །དོན་འདི་ཉིད་བསྟན་པ་ནི། རྡོ་རྗེ་ཁུ་ཚུར་འཛིན་པས་ན། །ཞེས་བྱ་བ་ཡིན་ཏེ། ཡང་དག་དེ་ཉིད་བདེན་གང་ཡིན། །རྡོ་རྗེ་ཁུ་ཚུར་དེ་བཤད་དོ། །ཞེས་གསུངས་པས། རྡོ་རྗེ་ཁུ་ཚུར་བཟུང་བའི་སྒྲས་ནི་དེ་ཁོ་ན་ཉིད་བསྒོམ་པ་ལ་བྱ་བར་བཤད་
དེ་དེ་བཞིན་ཉིད་ཀྱི་སྦྱོར་བ་དེས་རིགས་ཐམས་ཅད་ཀྱི་ཕྱག་རྒྱ་གང་ལ་རེག་ཅིང་བཟུང་བ་དེ་མ་ཐག་ཏུ་དབང་དུ་འགྱུར་ཞེས་བྱ་བའོ། །དེ་ནས་ཕྱག་རྒྱ་ཐམས་ཅད་ཀྱི་ཆོས་ཉིད་བརྗོད་པར་བྱའོ་ཞེས་བྱ་བ་ནི་ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ཕྱག་རྒྱ་ཐམས་ཅད་དེ། དཀྱིལ་འཁོར་བཞི་
ལས་གསུངས་པའི་ཆོས་ཀྱི་ཕྱག་རྒྱ་ཐམས་ཅད་དོ། །དེ་རྣམས་ཀྱི་ཆོས་ཉིད་ནི་དངོས་གྲུབ་ཀྱི་རྒྱུ་སྟེ་བརྗོད་པར་བྱ་ཞིང་བསྟན་པར་བྱའོ། །རྡོ་རྗེ་ཕྲ་མོའི་ཚུལ་ལམ་ཆོ་ག་ནི་བཤད་ཟིན་ཏོ། །དེ་ནས་སྦྱར་བ་ནི་རྡོ་རྗེ་ཕྲ་མོ་བསྒོམ་པར་བྱས་པ་ལའོ། །ཡེ་ཤེས་ཕྱག་རྒྱ་ནི་དཀྱིལ་འཁོར་ཆེན་པོ་དང་། གཟུངས་
དང་། ཆོས་དང་། ལས་ཀྱི་དཀྱིལ་འཁོར་ལས་གསུངས་པའི་ཆོས་ཀྱི་ཕྱག་རྒྱ་ཐམས་ཅད་དེ། དེ་རྣམས་ཀྱི་ཆོ་ག་འདིས་ཚུལ་གྱིས་བཅིངས་ན་འཕྲལ་དུ་དབང་དུ་འགྱུར་ཞིང་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །དེ་ནས་ཕྱག་རྒྱ་ཐམས་ཅད་ཀྱི་ལས་བརྗོད་པར་བྱའོ་ཞེས་བྱ་བ་ནི་རྡོ་རྗེ་དབྱིངས་ལ་
སོགས་པའི་དཀྱིལ་འཁོར་བཞི་ལས་གསུངས་པའི་ལས་ཀྱི་ཕྱག་རྒྱ་ཐམས་ཅད་ནི་ཕྱག་རྒྱ་ཀུན་ནོ། །དེ་རྣམས་ཀྱི་ལས་ནི་བྱ་བ་སྟེ། དེ་རྣམས་ཀྱིས་མངོན་པར་འདོད་པའི་དོན་གྲུབ་པར་འགྱུར་རོ་ཞེས་བྱ་བའི་ཐ་ཚིག་སྟེ་དེ་བརྗོད་པར་བྱའོ། །གླུ་དང་ཞེས་བྱ་བ་ལ་སོགས་པ་ལ། གླུ་དང་། གར་དང་།
རོ་དང་། ཟས་དང་། སྤྱོད་ལམ་ནི་གླུ་དང་། གར་དང་། རོ་དང་། ཟས་དང་། སྤྱོད་ལམ་ཞེས་བྱ་སྟེ། དེ་ལ་སོགས་པ་ལས་བདེ་བ་གང་ཞིག་སྐྱེས་པར་གྱུར་པ་དེ་ལ་དེ་སྐད་ཅེས་བྱ་སྟེ། དེ་རྣམས་སངས་རྒྱས་ཏེ་དེ་བཞིན་གཤེགས་པ་ཐམས་ཅད་ལ་ཕུལ་ན་ལས་ཀྱི་ཕྱག་རྒྱ་དབང་དུ་འགྱུར་རོ། །དེ་
ལ་གླུ་ནི་རྡོ་རྗེ་གླུ་ལ་སོགས་པའོ། །གར་ནི་རྡོ་རྗེ་གར་ལ་སོགས་པའོ། །རོ་ནི་ལྷ་དང་ལྷན་ཅིག་ཏུ་གྱུར་པའི་ཞི་བ་དང་སྒེག་མོ་ལ་སོགས་པ་རང་བཞིན་ཅན་གྱི་ཉམས་སོ། །ཟས་ནི་ཁ་ཟས་རོ་བརྒྱ་པ་ལ་སོགས་པའོ། །སྤྱོད་ལམ་ནི་འདུག་པ་དང་། འཆག་པ་དང་། སྡོད་པ་དང་། ཉལ་བའི་

མཚན་ཉིད་ཅན་ནམ། སེམས་ཀྱི་སྤྱོད་པ་སྙིང་རྗེ་ཆེན་པོ་ལ་སོགས་པ་ལ་གནས་པའོ། །འདི་སྐད་སྟོན་པ་ཡིན་ཏེ། ལས་ཀྱི་ཕྱག་རྒྱའི་སྒྲུབ་པ་པོས། རྡོ་རྗེ་གླུ་ལ་སོགས་པས་དེ་བཞིན་གཤེགས་པ་ཐམས་ཅད་ལ་མཆོད་པ་བྱས་ལ། འཚང་རྒྱ་བ་ཉིད་ལ་སོགས་པའི་སྦྱིན་པས་སེམས་ཅན་གྱི་
ཁམས་ཐམས་ཅད་ཚིམ་པར་བྱས་ལ་བཟླས་བརྗོད་བྱའོ། །དེ་ཡང་། འགྲོ་ཀུན་སངས་རྒྱས་ཉིད་དང་ནི། །བྱང་ཆུབ་སེམས་དཔའ་ཉིད་ཁོ་ནར། །ཇི་བཞིན་དུ་ནི་བཏུལ་བ་ཉིད། །ལས་ཀྱི་དོན་ཀུན་གྲུབ་བྱེད་པའོ། །ཞེས་གསུངས་པ་ཡིན་ནོ། །དེ་ལྟར་དཀྱིལ་འཁོར་བཞི་ལས་གསུངས་པའི་ཕྱག་རྒྱ་
ཐམས་ཅད་ཀྱི་དམ་ཚིག་དང་། གསང་བ་དང་། ཆོས་ཉིད་དང་། ལས་གསུངས་ནས། དེ་ནས་ཞེས་བྱ་བ་ལ་སོགས་པས་རྡོ་རྗེ་དབྱིངས་ལ་སོགས་པའི་དཀྱིལ་འཁོར་བཞི་བསྒྲུབ་པར་བྱ་བའི་ཕྱིར་གསང་བའི་ཕྱག་རྒྱ་གསུངས་པ་ཡིན་ཏེ། དཀྱིལ་འཁོར་ཡང་ཡིན་ལ་ཐམས་ཅད་ཀྱང་ཡིན་པས་
དཀྱིལ་འཁོར་ཐམས་ཅད་དེ། དེ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་། གཟུངས་དང་། ཆོས་དང་། ལས་ཀྱི་དཀྱིལ་འཁོར་རོ། །དེ་རྣམས་བསྒྲུབ་པ་ནི་རྫོགས་པར་བྱེད་པའོ། །གསང་བའི་ཕྱག་རྒྱ་གང་ཡིན་པ་དེ་ནི། དཀྱིལ་འཁོར་ཐམས་ཅད་བསྒྲུབ་པའི་གསང་བའི་ཕྱག་རྒྱའི་
ཡེ་ཤེས་བསླབ་ཅིང་བསྟན་པར་བྱའོ། །མཚན་མ་བརྟན་པར་རང་གྱུར་ནས། །ཞེས་བྱ་བ་ལ། མཚན་མ་སྟེ། བྱང་ཆུབ་ཀྱི་སེམས་དང་། ཕ་རོལ་ཏུ་ཕྱིན་པ་དྲུག་གི་སྤྱོད་པའི་ཚུལ་བརྟན་ཞིང་ཡོངས་སུ་རྫོགས་པ་གང་ཡིན་པ་དེ་ནི་མཚན་མ་བརྟན་པ་སྟེ། སྲིད་པ་ཐ་མ་པའི་བྱང་ཆུབ་སེམས་
དཔའོ། །དེའི་གཟུགས་སུ་རང་སྟེ་བདག་ཉིད་དུ་གྱུར་ནས། དཀར་པོར་འགྱུར་བའི་རས་ལ་གནས། །ཞེས་བྱ་བ། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི། ཞེས་ཟློས་ཤིང་། ཆོས་ཐམས་ཅད་བདག་མེད་པར་བསྒོམས་པས་གཟུང་བ་དང་འཛིན་པའི་རྣམ་པར་རྟོག་པ་ལ་མི་བསྐྱོད་པའི་མཚན་ཉིད་ཅན་གྱི་བྱང་ཆུབ་
ཀྱི་སེམས་ཆེན་པོ་བག་ཆགས་དང་བཅས་པའི་དྲི་མ་ནག་ནོག་དང་བྲལ་བའི་རས་དཀར་པོ་དེའི་རང་བཞིན་རྟོགས་པས་གནས་ཤིང་རྣལ་འབྱོར་གྱི་བདག་ཉིད་བྱས་ནས་ཞེས་བྱ་བའི་ཐ་ཚིག་གོ། །དེ་ལྟར་རས་དཀར་པོར་གྱུར་པའི་རས་ལ་གནས་པའི་རྗེས་ལ། མཚན་མ་མཆོད་རྟེན་བྱིན་བརླབས་ཏེ། །

ཞེས་བྱ་བ་མཚན་མ་བརྟན་པ་དེ་མཆོད་རྟེན་ཏུ་བྱིན་གྱིས་བརླབ་པ་ནི་བདག་ཉིད་ནི་རྡོ་རྗེ་དབྱིངས་སོ་ཞེས་ང་རྒྱལ་བསྐྱེད་པར་བྱའོ། །འདི་སྐད་སྟོན་པ་ཡིན་ཏེ། བྱང་ཆུབ་ཀྱི་སེམས་དང་། ཤེས་རབ་ལ་སོགས་པའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་མཚན་མ་སྟེ་རྟགས་
ཡིན་པར་བཤད་ལ་མཚན་མ་དེར་བདག་ཉིད་ཀྱི་ཡོངས་སུ་རྫོགས་པའི་ལྷག་པར་མོས་པའི་རྗེས་སུ་མི་བསྐྱོད་པ་ལ་སོགས་པའི་རང་བཞིན་དུ་རྣམ་པར་བསྒོམ་པ་ཟླ་བའི་དཀྱིལ་འཁོར་ལ་སོགས་པའི་ཚུལ་དུ་བསྒོམས་པས་དེ་བཞིན་གཤེགས་པའི་སྐུའམ། རྡོ་རྗེ་སེམས་དཔའ་ལ་སོགས་པའི་
སྐུར་བདག་ཉིད་བརྟན་པའི་མཆོད་རྟེན་དུ་བསྒོམ་པར་བྱའོ། །དེ་ནས་དེ་བཞིན་གཤེགས་པའི་ཡེ་ཤེས་སེམས་དཔའ་གཞུག་པས་བྱིན་གྱིས་བརླབ་པར་བྱའོ། །དེ་ལྟར་མཚན་མ་དེ་མཆོད་རྟེན་དུ་བྱིན་གྱིས་བརླབས་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ནི་བདག་གོ་ཞེས་ང་རྒྱལ་བསྐྱེད་པ་
ནི་བདག་ཉིད་རྡོ་རྗེ་དབྱིངས་སུ་བསྒོམ་པའོ། །དེ་ཡང་། མཚན་མ་མཆོད་རྟེན་ཞེས་བཤད་དོ། །བརྟན་པ་ཏིང་འཛིན་ཅན་འགྱུར་ཡིན། །ཕ་རོལ་ཕྱིན་དྲུག་སྤྱོད་པ་ནི། །མཚན་མ་འདི་ནི་ཡིན་པར་བཤད། །བྱང་ཆུབ་སེམས་གང་དེ་རྡོ་རྗེ། །རྡོ་རྗེ་མཚན་མར་འདི་བཤད་དོ། །བྱང་ཆུབ་
སེམས་ཀྱི་སྦྱོར་བ་ཡིས། །མཚན་མ་བརྟན་པར་ཤེས་པར་བྱ། །ཤེས་རབ་ཕ་རོལ་ཕྱིན་པདྨ། །དཀར་པོར་གྱུར་པའི་རས་ལ་གནས། །ཤེས་རབ་ཕར་ཕྱིན་རྣལ་འབྱོར་པས། །ཡང་དང་ཡང་དུ་མཉམ་གཞག་བྱ། །བྱང་ཆུབ་སེམས་དང་ཤེས་རབ་ནི། །ཡང་དང་ཡང་དུ་བརྟེན་
གྱུར་ན། །བྱང་ཆུབ་ངེས་པར་འབྱུང་བར་འགྱུར། །ཤེས་རབ་ཕ་རོལ་ཕྱིན་ཚུལ་ལས། །མཆོད་རྟེན་གྱུར་པའི་ཆོས་འདི་ནི། །ལུས་ཅན་ཀུན་གྱིས་རྙེད་པར་དཀའ། །བྱང་ཆུབ་སེམས་དང་ཤེས་རབ་ཆེའི། །མཚན་མ་མཆོད་རྟེན་བྱིན་བརླབ་པོ། །ཞེས་གསུངས་པ་ཡིན་ནོ། །དེ་ལྟར་
ཐབས་ཀྱི་ཕ་རོལ་ཏུ་ཕྱིན་པའི་ཚུལ་རང་གི་ལྷའི་རྣལ་འབྱོར་མཆོད་རྟེན་དུ་གྱུར་པར་བྱིན་གྱིས་བརླབས་ལ། དེའི་འོག་ཏུ། བཛྲ་དྷཱ་ཏུ་ར་ཧཾ་ས་ཡཾ། ཞེས་བྱ་བས་རང་གི་སྙིང་གའི་ཟླ་བ་ལ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་བསྒྲུབས་ཏེ། ང་རྒྱལ་བསྐྱེད་ལ་བསྒོམ་པར་བྱ་སྟེ། བསྒོམ་པ་

གཉིས་པ་འདི་ནི་བཅོམ་ལྡན་འདས་ཀྱིས་རྡོ་རྗེ་རྩེ་མོ་ལས་གསུངས་པས་ཐེ་ཚོམ་མི་བྱའོ། །འདི་ནི་རེ་ཞིག་དོན་མདོར་བསྡུས་པ་ཡིན་ནོ། །ཡང་དོན་རྒྱས་པ་ནི་གང་རྒྱ་ཆེ་བས་འཇིགས་ཤིང་སྐྲག་པ་ཏིང་ངེ་འཛིན་གསུམ་བསྒོམས་པས། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་བརྟུལ་ཞུགས་སྤྱོད་
པར་སྤྲོ་བ་མེད་པ་དེ་ནི་རེ་ཞིག་ཉིན་རེ་ཞིང་བདག་བསྲུང་བ་ལ་སོགས་པ་སྔོན་དུ་འགྲོ་བའི་བསྡུ་བ་བྱས་ལ། ཕྱག་རྒྱ་ཇི་ལྟ་བ་བཞིན་དུ་བཀྲོལ་ནས་སྡིག་པ་དྲལ་བ་ཡང་བྱའོ། །དེ་ནས་མངོན་པར་བྱང་ཆུབ་པ་རྣམ་པ་ལྔའི་རིམ་པས་མངོན་པར་སངས་རྒྱས་ནས། རང་གི་སྙིང་གར་རྡོ་རྗེ་རྒྱུའི་ལས་ཀྱི་ཕྱག་
རྒྱས་རྡོ་རྗེ་དབྱིངས་ཀྱི་དཀྱིལ་འཁོར་ཇི་ལྟ་བ་བཞིན་དུ་སྤྲུལ་ལ། བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ཏེ། སེམས་མ་རྡོ་རྗེ་མའི་ཕྱག་རྒྱ་བཅིངས་ནས། རང་གི་སྙིང་གར་རྟོགས་པའི་དཀྱིལ་འཁོར་དེར་ཡིད་ཀྱིས་ཞུགས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་སློབ་དཔོན་གྱི་
ལས་ཀྱི་ཆོ་ག་རྣམས་ཇི་ལྟ་བ་བཞིན་དུ་རྗེས་སུ་སྤྱད་ནས། རྣལ་འབྱོར་ཆེན་པོ་བྱས་ལ་རང་གི་སྙིང་གར་ཟླ་བའི་དཀྱིལ་འཁོར་སྟོང་གསུམ་པའི་སངས་རྒྱས་ཀྱི་ཞིང་གི་ཚད་ཙམ་བསམས་ཏེ། དེའི་སྟེང་དུ། ཨོཾ་སརྦ་ཏ་ཐཱ་ག་ཏ་མུཥྚི་བཾ། ཨོཾ་བཛྲ་ས་ཏྭ་མུཥྚི་ཏྲུཾ། ཨོཾ་བཛྲ་རཏྣ་མུཥྚི་ཏྲཱཾ། ཨོཾ་བཛྲ་
དྷརྨྨ་མུཥྚི་ཁཾ། ཨོཾ་བཛྲ་ཀརྨྨ་མུཥྚི་ཧཾ། ཞེས་བྱ་བའི་དེ་བཞིན་གཤེགས་པའི་རིགས་ཀྱི་སྙིང་པོ་འདིས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་ཕྱག་རྒྱ་ཆེན་པོ་དང་བཅས་པས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་གོ་རིམས་ཇི་ལྟ་བ་བཞིན་དུ་སྤྲུལ་ལ། ཨོཾ་བཛྲ་དྷཱ་ཏུ། ཨོཾ་
སཏྭ་བཛྲི། ཨོཾ་རཏྣ་བཛྲི། ཨོཾ་དྷརྨྨ་བཛྲི། ཨོཾ་ཀརྨྨ་བཛྲི། ཨོཾ་བཛྲ་སཏྭ། ཨོཾ་བཛྲ་རཱ་ག །ཨོཾ་བཛྲ་སཱ་དྷུ། ཞེས་བྱ་བ་ནས། ཨོཾ་བཛྲ་ཨ་བེ་ཤ་ཞེས་བྱ་བའི་སྙིང་པོ་ཟློས་ཤིང་། རྡོ་རྗེ་སེམས་དཔའི་ང་རྒྱལ་གྱིས་རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་གྱིས་རང་རང་གི་
གནས་སུ་བཀོད་ནས། ཨོཾ་བཛྲ་ཨཱཏྨ་ཀོ྅ཧཾ་ཞེས་ལན་གསུམ་ཟློས་ཤིང་། རྣམ་པར་སྣང་མཛད་ལ་སོགས་པའི་སྐུ་དང་། གསུང་དང་། ཐུགས་རྡོ་རྗེའི་རང་བཞིན་དུ་བདག་ཉིད་བསྒོམ་པར་བྱའོ། །དེ་ནས། སྭ་བྷཱ་ཝ་ཤུདྡྷོ྅ཧཾ། ཞེས་ལན་གསུམ་ཟློས་ཤིང་བདག་ཉིད་རང་བཞིན་གྱིས་

རྣམ་པར་དག་པ་བསྒོམ་པར་བྱའོ། །དེ་ནས་སརྦྦ་ས་མོ྅་ཧཾ། ཞེས་བྱ་བ་འདི་ལན་གསུམ་ཟློས་ཤིང་བདག་མེད་པའི་མཉམ་པ་ཉིད་ཀྱིས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་དང་། སེམས་དཔའ་ཐམས་ཅད་དང་བདག་ཉིད་མཉམ་པར་བསྒོམ་པར་བྱའོ། །དེ་ནས་
རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་རང་བཞིན་ནི་བདག་ཡིན་ནོ་ཞེས་ང་རྒྱལ་བསྐྱེད་ལ། རྡོ་རྗེའི་ཚིག་གིས་བཛྲ་སཏྭ་ཞེས་ཟློས་ཤིང་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་རང་བཞིན་བདག་ཡིན་ནོ་ཞེས་ཐུན་བཞིའི་སྦྱོར་བས་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གམ། དུས་ཇི་
སྲིད་ཀྱི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་གཟུགས་སུ་བདག་ཉིད་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ་ཞེས་བཅོམ་ལྡན་འདས་ཀྱིས་གསུངས་ཏེ། རྣལ་འབྱོར་ཆེན་པོ་ཉིན་རེ་ཞིང་ལན་ཅིག་བྱས་པ་དེས་འཇིག་རྟེན་དང་འཇིག་རྟེན་ལས་འདས་པའི་སྔགས་ཀྱི་བཟླས་པ་བྱས་ལ་དཀྱིལ་
འཁོར་ཆེན་པོ་དང་། གཟུངས་དང་། ཆོས་དང་། ལས་དང་། ཕྱག་རྒྱ་བཞི་དང་། ཕྱག་རྒྱ་གཅིག་པའི་དཀྱིལ་འཁོར་རྣམས་བྲི་བར་བྱའོ་ཞེས་བཅོམ་ལྡན་འདས་ཀྱིས་གསུངས་ཏེ། རྣལ་འབྱོར་ཆེན་པོ་སྙིང་པོ་ཆེ། །མེད་ན་དངོས་གྲུབ་མེད་པས་ན། །དེ་བས་འབད་པ་ཐམས་ཅད་ཀྱིས། །
རྣལ་འབྱོར་ཆེན་པོ་བརྩམ་པར་བྱ། །ཞེས་བྱ་བ་འདི་ཡང་གསུངས་པ་ཡིན་ནོ། །ཡང་རྡོ་རྗེ་སེམས་དཔའ་ལ་སོགས་པ་སེམས་དཔའ་ཆེན་པོ་ཐམས་ཅད་ཀྱི་རྣལ་འབྱོར་བྱས་ལ་རྣལ་འབྱོར་ཆེན་པོ་བསྒྲུབ་པར་བྱའོ། །དེ་ནས་རང་གི་སྙིང་གར་དཀྱིལ་འཁོར་ཇི་ལྟ་བ་བཞིན་དུ་བསྒོམ་པར་བྱའོ། །
དཀྱིལ་འཁོར་བྲི་བའི་དུས་སུ་ཡང་ཞག་བདུན་གྱི་བར་དུ་རྡོ་རྗེ་སེམས་དཔའི་སྦྱོར་བས་རྣལ་འབྱོར་ཆེན་པོ་བྱས་ལ། ཏིང་ངེ་འཛིན་གསུམ་བསྒོམས་ནས་དེ་ནས་དཀྱིལ་འཁོར་བྲི་བར་བྱའོ། །དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སྒྲུབ་པར་བྱེད་པའི་གསང་བའི་ཕྱག་རྒྱ་བསྟན་ནས། ད་ནི།
རྡོ་རྗེ་བཅིང་བ་དམ་བྱས་ཏེ། །ཞེས་བྱ་བ་ལ་སོགས་པས་གཟུངས་ཀྱི་དཀྱིལ་འཁོར་སྒྲུབ་པར་བྱེད་པ་གསུངས་པ་ཡིན་ཏེ། རྡོ་རྗེ་བཅིང་བ་དམ་བྱས་ཏེ། །ཞེས་བྱ་བ་ལ་སོགས་པ་བཤད་ཟིན་ཏོ། །མཐེ་ཆུང་དང་ནི་མཛུབ་རྩེ་བསྒྲེང་། །ཞེས་བྱ་བ་ནི་ཇི་སྐད་དུ་བཤད་པའི་མཚན་ཉིད་ཅན་གྱི་

རྡོ་རྗེ་བསྡམས་པ་བཅིངས་ལ། མཐེ་ཆུང་གཉིས་གཤིབས་ལ་སྦྱར། མཛུབ་མོ་གཉིས་ཀྱང་གཤིབས་ལ་སྦྱར་བར་བྱའོ། །འདི་ནི་གཟུངས་ཀྱི་དཀྱིལ་འཁོར་སྒྲུབ་པར་བྱེད་པའི་གསང་བའི་ཕྱག་རྒྱའོ། །དམ་ཚིག་ཅེས་བྱ་བ་ནི་དམ་ཚིག་གི་ཕྱག་རྒྱའོ། །དམ་ཚིག་མཆོག་ཅེས་བྱ་བ་ནི་
དེ་བཞིན་གཤེགས་པ་ལྔའི་ཞེས་བྱ་བའི་ཐ་ཚིག་གོ། །འདི་སྐད་སྟོན་པ་ཡིན་ཏེ། དེ་བཞིན་དུ་རྣལ་འབྱོར་ཆེན་པོ་བྱས་ལ་དམ་ཚིག་གི་ཕྱག་རྒྱ་འདི་ཉིད་བཅིངས་ཏེ་སྔར་བཤད་པའི་རིགས་ཀྱི་སྙིང་པོ་རྣམས་ཀྱི་སྙིང་གར་གཟུངས་ཀྱི་དཀྱིལ་འཁོར་སྤྲུལ་ལ། གཟུངས་ཀྱི་རིག་པ་རྣམས་
ཀྱིས་རྡོ་རྗེ་དབྱིངས་ཀྱི་དབང་ཕྱུག་མ་ནས་བརྩམས་ཏེ་རྡོ་རྗེ་འབེབས་པའི་བར་གྱི་གཟུངས་རྣམས་གནས་ཇི་ལྟ་བ་བཞིན་དུ་བཀོད་དེ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་ཝ་ཤུདྡྷོ྅ཧཾ། ཨོཾ་སརྦྦ་ས་མོ྅ཧཾ། ཞེས་བྱ་བས་གཟུངས་ཀྱི་དཀྱིལ་འཁོར་གྱི་རང་བཞིན་དུ་བདག་ཉིད་བསམས་ནས།
བདག་ཉིད་གཟུངས་ཀྱི་དཀྱིལ་འཁོར་གྱི་རང་བཞིན་ཡིན་ནོ་ཞེས་ང་རྒྱལ་བསྐྱེད་ལ། ཉིན་རེ་ཞིང་ཐུན་བཞིའི་སྦྱོར་བས་གཟུངས་ཀྱི་རིག་པ་རེ་རེ་ཞིང་ཁྲི་ཁྲི་བཟླས་པར་བྱའོ། །དེ་ལྟ་བུས་ནི་གཟུངས་ཀྱི་དཀྱིལ་འཁོར་འགྲུབ་པར་འགྱུར་རོ། །དེ་ལྟར་གཟུངས་ཀྱི་དཀྱིལ་འཁོར་སྒྲུབ་པར་བྱེད་པའི་
གསང་བའི་ཕྱག་རྒྱ་བཤད་ནས། ད་ནི་ཆོས་ཀྱི་དཀྱིལ་འཁོར་སྒྲུབ་པར་བྱེད་པའི་གསང་བའི་ཕྱག་རྒྱ་བསྟན་པར་བྱ་བའི་ཕྱིར། རྡོ་རྗེ་ཕྲ་མོའི་ཚུལ་དུ་ནི། །རབ་ཏུ་མཉམ་པར་བཞག་པས་བསྒོམ། །རྡོ་རྗེ་ཕྲ་མོའི་དཀྱིལ་འཁོར་ནི། །ཏིང་འཛིན་དབང་དུ་འགྱུར་བའི་ཚུལ། །ཞེས་བྱ་བ་
གསུངས་ཏེ། དེ་ལ་རྡོ་རྗེ་ཕྲ་མོའི་ཚུལ་ནི། །ལྕེ་ནི་རྐན་ལ་གཞར་བྱ་ཞིང་། །ཞེས་བྱ་བ་ལ་སོགས་པ་སྤྲོ་བ་དང་བསྡུ་བ་བསྒོམ་པ་དང་། བརྟན་པར་བྱས་པ་ནི་རྡོ་རྗེ་ཕྲ་མོའི་ཞེས་བཤད་དེ། རྡོ་རྗེ་ཕྲ་མོའི་ཚུལ་དེས་རབ་ཏུ་མཉམ་པར་བཞག་པས་སེམས་རྩེ་གཅིག་ཏུ་བསྡུས་ཏེ་བསྒོམ་
པར་བྱའོ། །ཅི་ཞིག་བསྒོམ་པར་བྱ་ཞེ་ན། རྡོ་རྗེ་ཕྲ་མོའི་དཀྱིལ་འཁོར་ནི། །ཞེས་བྱ་བ་སྟེ། རྡོ་རྗེ་ཕྲ་མོས་ཉེ་བར་མཚོན་པ་སྟེ། རྡོ་རྗེ་ཕྲ་མོ་ནི་ཆོས་ཀྱི་དཀྱིལ་འཁོར་ཞེས་བྱ་བའི་ཐ་ཚིག་གོ། །གང་ཞིག་བྱེད་ཅིང་བསྒོམ་ཞེ་ན། རྡོ་རྗེ་ཕྲ་མོའི་དཀྱིལ་འཁོར་ནི། །ཞེས་བྱ་བ་གསུངས་

ཏེ། ཏིང་ངེ་འཛིན་དབང་དུ་བྱེད་ཅིང་ཞེས་བྱ་བའི་ཐ་ཚིག་གོ། །འདིས་ནི་དོན་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྣལ་འབྱོར་ཆེན་པོ་བྱས་ལ་སྔར་བཤད་པའི་རིགས་ཀྱི་སྙིང་པོ་རྣམས་ཀྱིས་རང་གི་སྙིང་གར་ཆོས་ཀྱི་དཀྱིལ་འཁོར་བསྐྱེད་ལ་རྡོ་རྗེ་ཕྲ་མོའི་ཚུལ་གྱིས་
རང་གི་སྙིང་ག་ནས་བཏོན་ཏེ། སྣའི་རྩེ་མོར་བསམ་པར་བྱའོ། །དེ་ནས་ཆོས་ཀྱི་དཀྱིལ་འཁོར་ལས་གསུངས་པའི་སྔགས་ཀྱིས་རྣམ་པར་སྣང་མཛད་ལ་སོགས་པ་བཀོད་ལ། སྔ་མ་བཞིན་དུ་བདག་ཉིད་ཆོས་ཀྱི་དཀྱིལ་འཁོར་ཡིན་ནོ་ཞེས་ཆོས་ཀྱི་དཀྱིལ་འཁོར་གྱི་ང་རྒྱལ་ཇི་ལྟ་བ་
བཞིན་དུ་བསྐྱེད་ལ་ཆོས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་སེམས་དཔའི་སྔགས་ཟློས་ཤིང་ཟླ་བ་གཉིས་ཀྱི་བར་དུ་ཉིན་རེ་ཞིང་ཆོས་ཀྱི་འཁོར་ལོ་སྣ་རྩེར་བསྒོམ་པར་བྱའོ། །བསྒོམས་པས་དུབ་ན་སྣ་བུག་ནས་རང་གི་སྙིང་གར་བཅུག་ལ། བཛྲི་དྲྀ་ཌྷ་ཏིཥྚ་ཞེས་བྱ་བས་བརྟན་པར་
བྱའོ། །དེ་ཡང་ཟླ་བ་གཅིག་ཙམ་སྤྲོ་བ་དང་བསྡུ་བའི་ཚུལ་གྱིས་བསྒོམ་པར་བྱའོ། །དེ་ལྟ་བུས་ནི་ཆོས་ཀྱི་དཀྱིལ་འཁོར་འགྲུབ་པར་འགྱུར་རོ། །དེ་ལྟར་ཆོས་ཀྱི་དཀྱིལ་འཁོར་གྲུབ་པར་བྱེད་པའི་གསང་བའི་ཕྱག་རྒྱ་གསུངས་ནས། ད་ནི་ལས་ཀྱི་དཀྱིལ་འཁོར་སྒྲུབ་པར་བྱེད་པ་ཡང་བརྟན་
པར་བྱ་བའི་ཕྱིར་རོ། །རྡོ་རྗེའི་ཕྱག་རྒྱ་གཉིས་བཅིངས་ལ། །དེ་གཉིས་རྡོ་རྗེ་དམ་དུ་བཟུང་། །མཛུབ་མོ་མཐེ་ཆུང་བསྣོལ་བ་ནི། །རྡོ་རྗེ་དགོས་མཆོག་དཀྱིལ་འཁོར་རོ། །ཞེས་བྱ་བ་གསུངས་ཏེ། དེ་ལ་རྡོ་རྗེའི་ཕྱག་གཉིས་ནི་རྡོ་རྗེ་ཁུ་ཚུར་གཉིས་ཏེ་དེ་བཅིངས་ལ་གཟུང་བར་བྱའོ། །
ཅི་ཞིག་གཟུང་བར་བྱ་ཞེ་ན། རྡོ་རྗེ་སྟེ་སྣ་ཚོགས་རྡོ་རྗེའོ། །དེ་ཡང་དེ་གཉིས་དང་འབྲེལ་པའི་མཛུབ་མོ་དང་མཐེའུ་ཆུང་བསྣོལ་བ་སྟེ། མཛུབ་མོ་གཉིས་བཅིངས་པ་དང་། མཐེའུ་ཆུང་གཉིས་བཅིངས་པས་དམ་དུ་གཟུང་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། རྡོ་རྗེ་ཁུ་
ཚུར་གཉིས་བཅིངས་ལ་མདུན་དུ་ཕྱོགས་པར་སྦྱར་ཏེ། རང་རང་གི་མཛུབ་མོ་དང་མཐེའུ་ཆུང་མདུད་པས་སྣ་ཚོགས་རྡོ་རྗེ་གཟུང་བར་བྱ་ཞིང་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེའི་དབང་བསྐུར་བའི་སྔགས་ཀྱིས་སྣ་ཚོགས་རྡོ་རྗེ་གཟུང་བར་བྱའོ། །དེ་ལྟར་སྣ་ཚོགས་རྡོ་རྗེ་ཐོགས་

པ་ནི་རྡོ་རྗེ་དགོས་མཆོག་གི་དཀྱིལ་དུ་ལས་ཀྱི་དཀྱིལ་འཁོར་བསྒྲུབ་པའི་མཚན་མ་ཡིན་ནོ་ཞེས་བྱ་བའི་དོན་ཏོ། །འདི་ཡང་སྔ་མ་བཞིན་དུ་རྣལ་འབྱོར་ཆེན་པོ་བསྐྱེད་ལ། སྔར་བཤད་པའི་རིགས་ཀྱི་སྙིང་པོ་ལྔས་རང་གི་སྙིང་གར་ལས་ཀྱི་དཀྱིལ་འཁོར་སྤྲུལ་ལ། ལས་ཀྱི་དཀྱིལ་འཁོར་
ལས་གསུངས་པའི་རིག་པ་རྣམས་ཀྱིས་ལྷ་རྣམས་ཇི་ལྟ་བ་བཞིན་དུ་དགོད་པ་བྱས་ན་ཆོ་ག་ཐམས་ཅད་རྗེས་སུ་སྤྱད་དེ་བདག་ཉིད་ལ་ནི་ལས་ཀྱི་དཀྱིལ་འཁོར་གྱི་རང་བཞིན་ཡིན་ནོ་ཞེས་ང་རྒྱལ་བསྐྱེད་ལ་ཉིན་རེ་ཞིང་ཐུན་བཞིའི་སྦྱོར་བས་རིག་པ་ཐམས་ཅད་ཁྲི་ཁྲི་བཟླ་བར་བྱ་བ་སྟེ། དེ་
ལྟ་བུས་ནི་ལས་ཀྱི་དཀྱིལ་འཁོར་འགྲུབ་པར་འགྱུར་རོ། །ད་ནི་དེ་ནས་ཞེས་བྱ་བ་ལ་སོགས་པས་རྡོ་རྗེ་དབྱིངས་ཀྱི་དུམ་བུ་ལས་གསུངས་པའི་དངོས་གྲུབ་རྣམས་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཕྱག་རྒྱ་བཞིས་རང་གི་ལྷའི་རྣལ་འབྱོར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་
ལས་གསུངས་པ་ཉིད་ཀྱིས་བྱས་ལ་བསྒྲུབ་པར་བྱའོ་ཞེས་གསུངས་ཏེ། ཇི་ལྟ་བ་བཞིན་དུ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པ་གང་ཡིན་པ་སྟེ། རྡོ་རྗེ་རྒྱལ་པོ་ལ་སོགས་པ་ནས་རྡོ་རྗེ་འབེབས་པའི་བར་
དེ་རྣམས་ནི་རྡོ་རྗེ་སེམས་དཔའ་ལ་སོགས་པའོ། །དེ་རྣམས་ཀྱི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་སྟེ། དམ་ཚིག་དང་ཆོས་དང་ལས་ཀྱི་ཕྱག་རྒྱ་ཆེན་པོ་ཡིན་པས། ཕྱག་རྒྱ་ཡང་ཡིན་ལ་ཆེན་པོ་ཡང་ཡིན་པའི་ཕྱིར་ཕྱག་རྒྱ་ཆེན་པོ་ཞེས་བྱའོ། །
དེ་རྣམས་ཀྱི་བཅིང་བ་བཞི་པོ་བསླབ་པ་ནི་བསྟན་པ་སྟེ། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་བཅིང་བའི་མཚན་ཉིད། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པ་ཉིད་བརྟན་པར་བྱ་བའི་ཐ་ཚིག་གོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཆོ་ག་རྒྱས་
པ་ཇི་ལྟ་བ་བཞིན་དུ་ཞེས་བྱ་བ་ནི། དེ་ནས་གསང་བའི་མཆོད་པ་བརྗོད་ཅིང་རྡོ་རྗེ་བསྟོད་པའི་གླུ་བླངས་ནས། གསང་བའི་མཆོད་པ་བཞི་བྱའོ། །ཞེས་བྱ་བ་ནས་བརྩམས་ཏེ། བཛྲ་སཏྭ་མུཿཞེས་བྱ་བའི་བར་གྱི་ཆོ་ག་བྱའོ་ཞེས་བྱ་བའི་ཐ་ཚིག་གོ། །རྡོ་རྗེའི་དངོས་གྲུབ་ནི་བཅོམ་ལྡན་འདས་

རྣམ་པར་སྣང་མཛད་ཀྱིའོ། །ཕྱག་རྒྱ་བཞིའི་དཀྱིལ་འཁོར་ནི་རྡོ་རྗེ་སེམས་མ་ལ་སོགས་པ་རང་གི་ཕྱག་རྒྱ་བཞི་དང་བཅས་པར་བྲི་བ་ཇི་ལྟ་བ་བཞིན་དུ་སྟེ། དེ་བཞིན་དུ་མི་གཡོ་བའི་དཀྱིལ་འཁོར་ལ་སོགས་པ་ཞེས་བྱ་བ་དེ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་
ཚུལ་དུ་དཀྱིལ་འཁོར་བྲིས་ལ། དབུས་སུ་རྣམ་པར་སྣང་མཛད་ཀྱི་གནས་སུ་གླང་པོ་ཆེའི་གདན་ལ་བཛྲ་དྷཱ་ཏུ་ཞེས་བྱ་བས་མི་བསྐྱོད་པ་དགོད་པར་བྱའོ། །མི་བསྐྱོད་པའི་གནས་སུ་ཟླ་བའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་རྩེ་ལྔ་པ། རིན་ཆེན་འབྱུང་ལྡན་
གྱི་གནས་སུ་རྡོ་རྗེ་རྒྱལ་པོའི་ལྕགས་ཀྱུ། དོན་ཡོད་པར་གྲུབ་པའི་གནས་སུ་རྡོ་རྗེ་ཆགས་པའི་མདའ་དང་གཞུ། འོད་དཔག་ཏུ་མེད་པའི་གནས་སུ་བཅོམ་ལྡན་འདས་རྡོ་རྗེ་ལེགས་པའི་མགུ་བའི་ཕྱག་རྒྱ་བཛྲ་སཏྭ་ཞེས་བྱ་བའི་སྙིང་པོའམ། ཕྱག་རྒྱ་བཞིའི་དཀྱིལ་འཁོར་ལས་གསུངས་པའི་
རིགས་ཀྱི་སྙིང་པོ་ཟློས་ཤིང་བྲི་བར་བྱའོ། །མི་བསྐྱོད་པའི་དཀྱིལ་འཁོར་བཞིན་དུ་དཀྱིལ་འཁོར་བྲིས་ལ། དབུས་སུ་རྟའི་ཁྲི་ལ་རིན་ཆེན་འབྱུང་ལྡན། མི་བསྐྱོད་པའི་གནས་སུ་ཟླ་བའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་རྡོ་རྗེ་རིན་པོ་ཆེ། རིན་ཆེན་འབྱུང་ལྡན་གྱི་གནས་སུ་རྡོ་རྗེ་གཟི་
བརྗིད་ཀྱི་ཉི་མའི་ཕྱག་རྒྱ། དོན་ཡོད་པར་གྲུབ་པའི་གནས་སུ་དཔལ་གྱི་རྡོ་རྗེ་རྒྱལ་མཚན་གྱི་ཕྱག་རྒྱ། འོད་དཔག་ཏུ་མེད་པའི་གནས་སུ་བཞད་པའི་སོའི་ཕྲེང་བ་རྡོ་རྗེ་གཉིས་ཀྱི་བར་དུ་ཆུད་པ་རྡོ་རྗེ་དབྱིངས་ཀྱི་དཀྱིལ་འཁོར་ལས་གསུངས་པའི་རང་གི་སྙིང་པོའམ། རིགས་ཀྱི་སྙིང་པོས་བྲི་བར་
བྱའོ། །རིན་ཆེན་འབྱུང་ལྡན་གྱི་དཀྱིལ་འཁོར་དང་འདྲ་བར་དཀྱིལ་འཁོར་བྲིས་ལ། དབུས་སུ་རྨ་བྱའི་གདན་ལ་བཅོམ་ལྡན་འདས་འོད་དཔག་ཏུ་མེད་པ། མི་བསྐྱོད་པའི་གནས་སུ་རྡོ་རྗེ་ཆོས་ཀྱི་པདྨའི་ཕྱག་རྒྱ། རིན་ཆེན་འབྱུང་ལྡན་གྱི་གནས་སུ་རྣོན་པོའི་ཕྱག་རྒྱ། དོན་ཡོད་པར་གྲུབ་
པའི་གནས་སུ་རྒྱུའི་འཁོར་ལོའི་ཕྱག་རྒྱ། འོད་དཔག་ཏུ་མེད་པའི་གནས་སུ་སྨྲ་བ་ལྕེའི་ཕྱག་རྒྱ་རང་གི་སྙིང་པོའམ་རིགས་ཀྱི་སྙིང་པོས་བྲི་བར་བྱའོ། །འོད་དཔག་ཏུ་མེད་པའི་དཀྱིལ་འཁོར་དང་འདྲ་བར་དཀྱིལ་འཁོར་བྲིས་ལ། དབུས་སུ་ནམ་མཁའ་ལྡིང་གི་གདན་གྱི་སྟེང་དུ་བཅོམ་ལྡན་

འདས་དོན་ཡོད་པར་གྲུབ་པའོ། །མི་བསྐྱོད་པའི་གནས་སུ་ཟླ་བའི་དཀྱིལ་འཁོར་གྱི་སྟེང་དུ་སྣ་ཚོགས་རྡོ་རྗེ། རིན་ཆེན་འབྱུང་ལྡན་གྱི་གནས་སུ་གོ་ཆ། དོན་ཡོད་པར་གྲུབ་པའི་གནས་སུ་མཆེ་བ་གཉིས། འོད་དཔག་ཏུ་མེད་པའི་གནས་སུ་ཁུ་ཚུར་གྱི་ཕྱག་རྒྱ་སྔར་བཤད་པའི་རང་གི་སྙིང་
པོའམ། རིགས་ཀྱི་སྙིང་པོས་བྲི་བར་བྱ་སྟེ། འདི་ནི་དོན་ཡོད་པར་གྲུབ་པའི་དཀྱིལ་འཁོར་རོ། །འདི་དག་ཀྱང་རང་རང་གི་ཕྱག་རྒྱ་རྣམས་སུ་བྲིས་ན་ཞེས་གསུངས་པ་ཡིན་ནོ། །དངོས་གྲུབ་ཐམས་ཅད་ཀྱང་འགྲུབ་བོ། །ཞེས་བྱ་བ་ནི་རྣམ་པར་སྣང་མཛད་ཀྱི་ཕྱག་རྒྱ་བཞིའི་དཀྱིལ་འཁོར་དུ་དངོས་
གྲུབ་གང་གསུངས་པ། དེ་ཐམས་ཅད་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པའི་ཕྱག་རྒྱ་བཞིའི་དཀྱིལ་འཁོར་དུ་ཡང་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ། །དེ་ལྟར་ཞེས་བྱ་བ་ལ་སོགས་པས་ནི་ཕྱིའི་ཡོ་བྱད་མེད་པར་
ཤིན་ཏུ་སྦྱངས་པ་གསུངས་པ་ཡིན་ཏེ། དེ་ལྟར་ཞེས་བྱ་བ་ནི་ས་ལ་ཇི་ལྟ་བ་བཞིན་དུ་རས་དང་། རྩིག་པ་དང་། ནམ་མཁའ་དང་གནས་ཐམས་ཅད་དུ་མངོན་པར་བྲིས་པ་རྣམས་སོ། །དངོས་གྲུབ་ཐམས་ཅད་འགྲུབ་པོ་ཞེས་བྱ་བ་ནི། སྒྲུབ་པ་པོ་སྤྲོ་བ་བསྐྱེད་པར་བྱ་བའི་ཕྱིར་རོ། །
དུས་ངེས་པའི་འབྲས་བུ་གསུངས་པ་ནི། དཀྱིལ་འཁོར་རྟག་པ་ནས་བརྩམས་ཏེ། །ཞེས་བྱ་བ་ལ་སོགས་པ་ཡིན་ཏེ། དེ་ལ་དཀྱིལ་འཁོར་རྟག་པ་ནི་ཀུན་དུ་བྲིས་པ་སྟེ། དཀྱིལ་འཁོར་བྲིས་པ་དེ་ནས་བརྩམས་ཤིང་དེ་ནས་མགོ་བཟུང་ནས་སོ། །ལ་ལ་ནི་དཀྱིལ་འཁོར་དུ་ཞུགས་
པ་དེ་ཉིད་ཀྱི་ཚེ་ཞེས་བྱ་བ་ལ་འཇུག་པའི་རྗེས་ཐོགས་ཉིད་ཀྱི་མཚན་མའོ། །ལ་ལ་ནི་ཉིན་ཞག་གཅིག་གིས་ཞེས་བྱ་བ་ནི་ཉིན་མཚན་གཅིག་གིས་སོ། །མཚམས་མེད་པ་ལྔ་བྱས་པ་ཡང་ཞེས་བྱ་བ། ཕ་དང་མ་དང་དགྲ་བཅོམ་པ་གསོད་པ་དང་། དགེ་འདུན་གྱི་དབྱེན་བྱེད་པ་དང་། དེ་བཞིན་
གཤེགས་པ་ལ་ངན་སེམས་ཀྱིས་ཁྲག་ཕྱུང་བ་བྱས་པ་སྤང་ངོ་། །འདིས་ནི་འདི་སྐད་སྟོན་པ་ཡིན་ཏེ། སྡིག་པ་ཆེན་པོ་བྱེད་པ་རྣམས་ཀྱང་འགྲུབ་པར་འགྱུར་ན་གཞན་ལྟ་སྨོས་ཀྱང་ཅི་དགོས། །དེ་བས་ན་ཐམས་ཅད་བསྒྲུབ་པ་ལ་འབད་པར་བྱའི། བདག་ནི་སྡིག་པ་བྱེད་པའོ། །བདག་ནི་བསོད་

ནམས་ཆུང་བའོ། །ཞེས་བྱ་བ་ལ་སོགས་པས་བདག་ཉིད་ལ་བརྙས་པར་མི་བྱའོ། །ཇི་ལྟར་འདོད་པར་ཞེས་བྱ་བ་ནི་དུས་ཇི་ཙམ་བསྒོམ་པར་ནུས་པར་གྱུར་པའི་དུས་དེ་སྲིད་དུ་བྱེད་པའོ། །བདེ་བླག་ཏུ་ཞེས་བྱ་བ་ནི་བྱ་བའི་རྒྱུད་ལས་གསུངས་པའི་བསྡམས་པའི་སྡུག་བསྔལ་
ཡོངས་སུ་སྤངས་ལ། རྣལ་འབྱོར་དང་རྗེས་སུ་མཐུན་པའི་བཟའ་བ་དང་བཏུང་བ་ལ་སོགས་པ་བསྟེན་པས་སོ། །དེ་ཡང་། དཀའ་ཐུབ་དཀའ་སྤྱད་མི་བཟད་པས། །ལུས་སྐམས་འགྱུར་ཞིང་སྡུག་བསྔལ་ལ། །སྡུག་བསྔལ་གྱིས་ནི་སེམས་གཡེང་བ། །རྣལ་འབྱོར་ལ་ནི་སྦྱོར་མི་འགྱུར། །
ཞེས་བྱ་བ་ལ་སོགས་པ་གསུངས་པ་ཡིན་ནོ། །དོན་ཐམས་ཅད་བྱེད་ཅིང་ཞེས་བྱ་བ་ནི་སྒྲུབ་པའི་ཡན་ལག་ཐམས་ཅད་ནི་དོན་དམ་ཐམས་ཅད་དེ། དེ་རྣམས་རྒྱུན་མི་འཆད་པར་ཉམས་སུ་ལེན་པའོ། །དེ་ཡང་གང་གི་ཕྱིར་བཅོམ་ལྡན་འདས་ཀྱིས་གང་ཞིག་ཇི་སྐད་དུ་གསུངས་པའི་ཆོ་ག་མི་བྱེད་
པ་དེ་ནི་དངོས་གྲུབ་ཐོབ་པར་མི་འགྱུར་རོ་ཞེས་གསུངས་པ་ཡིན་ནོ། །ཐམས་ཅད་རྗེས་སུ་དགའ་བ་དང་། །ཞེས་བྱ་བ་ནི་ཐམས་ཅད་ཀྱང་ཡིན་ལ་རྗེས་སུ་དགའ་བ་ཡང་ཡིན་པས་ན་ཐམས་ཅད་རྗེས་སུ་དགའ་བ་སྟེ། དཀྱིལ་འཁོར་ཐམས་ཅད་སྒྲུབ་པར་བྱེད་པའི་གསུངས་པའི་ཕྱག་རྒྱ་
བསྒོམ་པའམ། རྡོ་རྗེ་སེམས་དཔའ་ལ་སོགས་པ་ཐམས་ཅད་བསྒོམ་པ་ནི། ཐམས་ཅད་དུ་དགའ་བའོ། །རེ་བ་ཐམས་ཅད་དེ་སྒེག་པ་ལ་སོགས་པའོ། །ཐམས་ཅད་རྗེས་སུ་དགའ་བའི་རོ་དང་། ཟས་དང་། སྤྱོད་ལམ་ཐམས་ཅད་ལས་བདེ་བ་གང་ཞིག་སྐྱེས་པ་དེ་ནི་ཐམས་ཅད་རྗེས་
སུ་དགའ་བ་དང་། རོ་དང་། ཟས་དང་། སྤྱོད་ལམ་ཐམས་ཅད་ཀྱི་བདེ་བའོ། །དེ་རྣམས་ཉམས་སུ་མྱོང་བ་ནི་ཉམས་སུ་ཚོར་བའོ། །ལོ་གཅིག་གིས་ནི་མཆོག་གྲུབ་པོ། །ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའི་གནས་རྫོགས་པར་འགྱུར་རོ་ཞེས་བཅོམ་ལྡན་འདས་ཀྱིས་
གསུངས་སོ། །ཕྱག་རྒྱ་བཞི་པའི་དཀྱིལ་འཁོར་གྱི་འགྲེལ་པ་རྫོགས་སོ།། །།དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་ནི། སེམས་ཅན་མདོར་བསྡུས་པ་ལ་དགའ་བ་རྣམས་རྗེས་སུ་གཟུང་བར་བྱ་བའི་ཕྱིར། རྡོ་རྗེ་དབྱིངས་ཀྱི་དུམ་བུ་ལས་གསུངས་པའི་དངོས་གྲུབ་

ཐམས་ཅད་བསྡུས་པར་གྱུར་པའི་ཕྱག་རྒྱ་གཅིག་པའི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོ་སྦྱོར་བའི་རྗེས་ཐོགས་ཉིད་ལ་ཞེས་བྱ་བའི་ཐ་ཚིག་གོ། །དེ་ལ་ཡང་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་
པ་ཉིད་ཡིན་པར་གཟུང་ངོ་། །ཡང་ཞེས་བྱ་བའི་སྒྲ་ནི་ཕྱག་རྒྱ་བཞི་པའི་དཀྱིལ་འཁོར་ལ་ལྟོས་ནས་ཡང་ཞེས་བྱ་བའི་དོན་ཏོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་
མཉམ་པའི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་དངོས་གྲུབ་དམ་པ་ནི་རྡོ་རྗེ་སེམས་དཔའ་ལ་སོགས་པའོ། །དེའི་དམ་ཚིག་ནི་དཀྱིལ་འཁོར་ཏེ། དེ་ལ་དམིགས་པ་དེ་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མི་འདི་ཉིད་ཅེས་བྱ་བའི་ཏིང་ངེ་འཛིན་དེ་ལ་སྙོམས་
པར་ཞུགས་པ་ནི་རྡོ་རྗེ་སེམས་དཔའི་དཀྱིལ་འཁོར་སྤྲུལ་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ། །འདི་ཞེས་བྱ་བ་ནི་ཐུགས་ལ་གནས་པ་སྟེ། ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་དེའི་མངོན་པར་རྟོགས་པ་ནི་ཐུགས་
སུ་ཆུད་པ་སྟེ། མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པ་སྟོན་པར་བྱེད་པའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པ་དེར་རང་གི་ཐུགས་ཀ་ནས་ཕྱུང་བ་ནི་བཛྲ་སཏྭ་ཞེས་བྱ་བ་སྟོན་པའོ། །གཞུང་འདི་ཙམ་གྱིས་ནི་
རྡོ་རྗེ་སེམས་དཔའི་ཕྱག་རྒྱ་གཅིག་པའི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་བྱས་ནས་ལས་ཀྱི་མཆོག་དེ་བཞིན་དུ་བསྒོམ་པར་བྱའོ་ཞེས་བྱ་བ་ནི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་ནོ། །རྡོ་རྗེ་
དབྱིངས་ཀྱི་དུམ་བུ་ལས་གསུངས་པའི་དངོས་གྲུབ་རྣམས་ནི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་སྟེ། རྡོ་རྗེ་

སེམས་དཔའི་རྣལ་འབྱོར་ཆེན་པོ་བྱས་ནས་བཛྲ་སཏྭ་ཞེས་བྱ་བ་བཟླས་བརྗོད་བྱེ་བ་བྱས་པའམ། ཕྱག་རྒྱ་གཅིག་པའི་དཀྱིལ་འཁོར་བསྒོམས་པས་མཚན་མ་ཐོབ་པའི་རྗེས་ཐོགས་ལ་ཕྱག་རྒྱ་གཅིག་པའི་དཀྱིལ་འཁོར་བྲི་བར་བྱའོ། །དེ་བཞིན་གཤེགས་པ་ཐམས་
ཅད་ཀྱི་དངོས་གྲུབ་དམ་པ་འགྲུབ་པར་བྱ་བའི་བར་དུ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་དམ་པ་ནི་རྡོ་རྗེ་སེམས་དཔའི་དངོས་གྲུབ་སྟེ། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་ཏིང་ངེ་འཛིན་རྫོགས་པར་བྱ་བ་གྲུབ་པར་བྱ་བའི་ཕྱིར་ཞེས་བྱ་བའི་ཐ་ཚིག་གོ། །
བར་དུ་ཞེས་བྱ་བའི་སྒྲས་ནི་དེ་བཞིན་གཤེགས་པའི་རིགས་ཀྱི་དངོས་གྲུབ་རྣམས་བསྡུའོ། །དེ་ནས་ཞེས་བྱ་བ་ནི་གང་གི་ཕྱིར་མདོར་བསྡུས་པ་ལ་དགའ་བའི་གདུལ་བྱ་རྣམས་ཀྱང་ཕྱག་རྒྱ་གཅིག་པའི་དཀྱིལ་འཁོར་དུ་ཞུགས་པས་རྡོ་རྗེ་དབྱིངས་ཀྱི་དུམ་བུ་ལས་གསུངས་པའི་དངོས་གྲུབ་
འགྲུབ་པར་འགྱུར་བས། དེ་བས་ན་རྡོ་རྗེ་སེམས་དཔའི་ཕྱག་རྒྱ་གཅིག་པའི་དཀྱིལ་འཁོར་དུ་འཇུག་པ་དེས་དེའི་དངོས་གྲུབ་འགྲུབ་པའི་སྐལ་བ་ཅན་དུ་བྱ་བའི་ཕྱིར། ཡང་དག་ཅིང་ཕྱིན་ཅི་མ་ལོག་པར་རབ་ཏུ་ཕྱེ་སྟེ་བཤད་པར་བྱའོ། །སེམས་དཔའི་དཀྱིལ་འཁོར་ནི་རྡོ་རྗེ་སེམས་
དཔའི་དཀྱིལ་འཁོར་རོ། །རྡོ་རྗེ་སེམས་དཔའི་དཀྱིལ་འཁོར་ཡིན་པ་ཉིད་ཀྱིས་ནི་མཆོག་ཡིན་པས་དཀྱིལ་འཁོར་དམ་པ་སྟེ། གང་གི་ཕྱིར་འདིར་ཞུགས་པ་དང་། དབང་བསྐུར་བས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་ཀྱི་སློབ་དཔོན་དུ་འགྱུར་ཞིང་རང་
ཉིད་ཀྱིས་ཀྱང་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་བྲིས་ནས་བདག་ཉིད་འཇུག་པ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་བཞིན་གཤེགས་པ་ལ་སོགས་པའི་སློབ་དཔོན་གཞན་དག་ནི། རང་གི་རིགས་འབའ་ཞིག་གི་སློབ་དཔོན་
ཡིན་ནོ་ཞེས་བསྟན་པར་བྱ་བའི་ཕྱིར་རོ། །རྡོ་རྗེ་དབྱིངས་དང་འདྲ་བས་ན། །ཞེས་བྱ་བ་ནི་རྡོ་རྗེ་སེམས་དཔའི་སྤྲུལ་པའི་དཀྱིལ་འཁོར་དང་འདྲའོ། །མིང་ཇི་སྐད་ཅེས་བྱ་ཞེ་ན། རྡོ་རྗེ་སེམས་དཔའ་ཞེས་ཀྱང་བཤད། །ཅེས་བྱ་བ་གསུངས་སོ། །དཀྱིལ་འཁོར་ཆེན་པོའི་ཚུལ་དུ་ནི། །དཀྱིལ་

འཁོར་ཕྱི་རིམ་ཐིག་གདབ་པོ། །ཞེས་བྱ་བ་ནི་ཕྱིའི་དཀྱིལ་འཁོར་དབྱིབས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་འདྲའོ། །དེ་ལྟར་རྡོ་རྗེ་དབྱིངས་ཀྱི་དཀྱིལ་འཁོར་དང་འདྲ་བར་དཀྱིལ་འཁོར་འདི་བྲིས་ལ་དཀྱིལ་འཁོར་དེའི་སྟེང་དུ་ཟླ་བའི་དཀྱིལ་འཁོར་བྲི་བར་བྱ་སྟེ། གང་གི་ཕྱིར། ཟླ་
བའི་དཀྱིལ་འཁོར་དབུས་སུ་ནི། །རྡོ་རྗེ་སེམས་དཔའ་གཞག་པར་བྱ། །ཞེས་གསུངས་པས། ཟླ་བའི་དཀྱིལ་འཁོར་གྱི་སྟེང་དུ། རྡོ་རྗེ་སེམས་དཔའ་ལུགས་མའམ། འབུར་དུ་བརྐོས་པའམ། གཟུགས་སུ་བྱས་པའམ། རིས་སུ་བྲིས་པ་ལ་བཛྲ་སཏྭ་ཞེས་ཟློས་ཤིང་གཞག་པར་བྱའོ། །
དེ་ནས་དགུག་པ་དང་གཞུག་པ་ལ་སོགས་པ་ཇི་ལྟ་བ་བཞིན་དུ་བྱས་ཏེ་ཞེས་བྱ་བ་ནི་རྡོ་རྗེ་སེམས་དཔའི་རྣལ་འབྱོར་ཉིད་ཀྱིས་རྣལ་འབྱོར་ཆེན་པོ་བྱས་ལ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་འཇུག་པའི་ཆོ་ག་དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱི་བར་དུ་ཇི་ལྟ་བ་
བཞིན་དུ་བྱ་བས་བདག་ལ་བྱིན་གྱིས་བརླབས་པ་ལ་སོགས་པ་བྱས་ལ། དེ་ནས་རང་གི་མིང་ནས་བརྗོད་ལ་ཕྱག་རྒྱ་གཅིག་པའི་དཀྱིལ་འཁོར་བསྒྲུབས་ནས། རྡོ་རྗེ་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །སེ་གོལ་མང་པོ་བརྡབས་བགྱིས་པ། །སངས་
རྒྱས་ཐམས་ཅད་བསྡུ་བར་བྱ། །ཞེས་བྱ་བ་ལ་སོགས་པ་སྔར་བཤད་པའི་ཆོ་ག་རྗེས་སུ་སྤྱད་པར་བྱའོ་ཞེས་བྱ་བ་ནི་ཇི་ལྟ་བ་བཞིན་དུ་བྱས་ཏེ། ཞེས་བྱ་བའི་སྒྲའི་དོན་ཡིན་ནོ། །དེ་ལ་དགུག་པ་ནི་རྡོ་རྗེ་ལྕགས་ཀྱུས་ལས་ཀྱི་ཕྱག་རྒྱའོ། །གཞུག་པ་ནི་རྡོ་རྗེ་ཞགས་པའི་ལས་ཀྱི་ཕྱག་
རྒྱས་སོ། །དགུག་པ་དང་གཞུག་པ་ལ་སོགས་པ་གང་ཡིན་པ་དེ་ནི་དགུག་པ་དང་གཞུག་པ་ལ་སོགས་པ་སྟེ། རྡོ་རྗེ་ལྕགས་སྒྲོག་གིས་བཅིངས་པ་དང་། འབེབས་པ་དང་། དབང་དུ་བྱ་བ་ནས་བརྩམས་ཏེ། དཀྱིལ་འཁོར་ཐམས་ཅད་དུ་འཇུག་པའི་ཆོ་ག་རྒྱས་པའོ་ཞེས་བྱ་བའི་
བར་གྱིས་བསྟན་པའི་ཆོ་ག་རྒྱས་པར་གསུངས་པ་གང་ཡིན་པ་དེ་ཐམས་ཅད་དོ། །དེ་ལྟར་བྱས་ནས་ཇི་ལྟར་ཞུགས་པ་དེ་རྣམས་ལ་དངོས་གྲུབ་ཀྱི་ཡེ་ཤེས་ཀྱི་མན་ངག་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི། །ཞེས་བྱ་བ་སོགས་པ་གསུངས་ཏེ། དེ་བཞིན་གཤེགས་

པ་ཐམས་ཅད་ཀྱི་དངོས་གྲུབ་ནི་རྡོ་རྗེ་སེམས་དཔའ་གྲུབ་པ་སྟེ། དེའི་ཡེ་ཤེས་ནི་ཕྱག་རྒྱ་ཆེན་པོར་ངེས་པའི་ཚུལ་ཏེ། དེ་བསྐྱེད་པར་བྱ་བ་ནི་བསླབ་པ་བྱ་ཞིང་ཉེ་བར་བསྟན་པར་བྱའོ་ཞེས་བྱ་བའི་ཐ་ཚིག་གོ། །དེ་ལ་དང་པོ་ཁོ་ནར་མནའི་སྙིང་པོ་སྦྱིན་པར་བྱ་སྟེ། འདི་ནི་ཁྱོད་ཀྱི་ཞེས་
གསུངས་པ་ཡིན་ནོ། །དམ་ཚིག་མ་མཐོང་བ་ཞེས་བྱ་བ་ནི་ཕྱག་རྒྱ་གཅིག་པའི་དཀྱིལ་འཁོར་མ་མཐོང་བའོ། །ཁོང་དུ་མ་ཆུད་པ་ཞེས་བྱ་བ་ནི་མངོན་པར་མི་མཁས་པ་སྟེ། གསང་བ་དེ་རྣམས་ཀྱི་སྐལ་བ་དང་མི་ལྡན་ཞིང་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་མ་
ཐོབ་པའི་བར་དུའོ། །གསང་བ་འདི་ཞེས་བྱ་བ་ནི། ཟླ་རྒྱས་དཀྱིལ་འཁོར་ལ་འདུག་སྟེ། །ཞེས་འོག་ནས་བཤད་པ་གང་ཡིན་པ་དེ་ལྟ་བུ་དེ་ནི། སྐྱེ་བོ་ཐམས་ཅད་ལ་བསྟན་དུ་མི་རུང་བས་གསང་བ་ཡིན་ནོ། །དེ་ལ་གསང་བ་འདི་སྨྲས་ན་ཉེས་པ་ཅིར་འགྱུར་ཞེ་ན། ཁྱོད་ངན་སོང་ཐམས་ཅད་
དུ་ལྟུང་བའམ་ཞེས་བྱ་བ་ལ་སོགས་པ་གསུངས་ཏེ། ཁྱོད་ཤི་ནས་ངན་སོང་དུ་འགྲོ་བར་འགྱུར་བ་དང་། ཚེའི་ལྷག་མ་ཡོད་དུ་ཟིན་ཀྱང་དེ་བཞིན་གཤེགས་པའི་བཀའ་ལས་འདས་པར་གྱུར་པས་དུས་མ་ཡིན་པར་འཆི་བར་འགྱུར་རོ། །དེ་ནས་ཞེས་བྱ་བ་ནི་མནའ་བསྒགས་པའི་རྗེས་ཐོགས་
ལའོ། །རྡོ་རྗེ་སེམས་དཔའི་དངོས་གྲུབ་དམ་པ་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའི་དངོས་གྲུབ་དམ་པ་ནི་རྡོ་རྗེ་སེམས་དཔའི་དངོས་གྲུབ་དམ་པ་སྟེ། དངོས་གྲུབ་ཀྱི་དམ་པ་དེའི་སྒྲུབ་པ་ནི་འདིས་བསྒྲུབས་པས་ན་སྒྲུབ་པ་སྟེ། ཟླ་རྒྱས་དཀྱིལ་འཁོར་ལ་འདུག་སྟེ། །ཞེས་བྱ་
བ་ལ་སོགས་པ་བསྒོམ་པ་དེའི་ཡེ་ཤེས་བསླབ་པོ། །ཟླ་བ་ཡང་ཡིན་ལ་རྒྱས་པ་ཡང་ཡིན་པས་ན་ཟླ་རྒྱས་སོ། །དེའི་དཀྱིལ་འཁོར་ནི་ཟླ་རྒྱས་དཀྱིལ་འཁོར་རོ། །དེ་ལ་གནས་པས་ནི། ཟླ་རྒྱས་དཀྱིལ་འཁོར་ལ་འདུག་སྟེ། །ཞེས་བྱའོ། །ཇི་ལྟར་འདུག་ཅེ་ན། ཕྱག་རྒྱ་ཆེན་པོ་
ཡོངས་བཟུང་ནས། །ཞེས་བྱ་བ་གསུངས་ཏེ། ཕྱག་རྒྱ་ཡང་ཡིན་ལ་ཆེན་པོ་ཡང་ཡིན་པས་ན་ཕྱག་རྒྱ་ཆེན་པོ་སྟེ། བྱང་ཆུབ་ཀྱི་སེམས་ཀྱི་རང་བཞིན་བཅོམ་ལྡན་འདས་རྡོ་རྗེ་སེམས་དཔའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་ཡིན་གྱི་ཕྱག་རྒྱ་ཆེན་པོ་འབའ་

ཞིག་ཙམ་ནི་མ་ཡིན་ཏེ། གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་རྣམས་བསྐྱེད་པར་བྱའོ་ཞེས་ཚིག་མང་པོ་ལྟར་བསྟན་པར་བྱ་བའི་ཕྱིར་རོ། །དེ་རྣམས་གང་གིས་ཡོངས་སུ་བཟུང་ཞིང་བཅིངས་པ་དེ་ནི་ཕྱག་རྒྱ་ཆེན་པོ་ཡོངས་སུ་བཟུང་བས་ཞེས་བྱ་སྟེ། དེ་རྣམས་
ཀྱི་ནང་ནས་ཕྱག་རྒྱ་གང་ཡང་རུང་བ་ཅིག་ལ། བདག་ཉིད་དེ་རང་ཉིད་རྡོ་རྗེ་སེམས་དཔའ་བསྒོམས་ནས། མྱུར་ཞིང་རིང་པོར་མི་ཐོགས་པར་འགྲུབ་པར་འགྱུར་རོ། །འདིའི་དོན་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཚུལ་གྱིས། རྡོ་རྗེ་
སེམས་དཔའི་རྣལ་འབྱོར་བྱས་ལ། དེའི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་བཅིངས་ཏེ། དེའི་སྙིང་པོ་རྡོ་རྗེའི་ཚིག་གིས་ཟློས་ཤིང་བཟླས་པའི་དོན་གྱིས་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་སེམས་དཔའ་བདག་ཉིད་བསྒོམས་ན། ཤིན་ཏུ་མྱུར་
བ་ཉིད་དུ་རྡོ་རྗེ་སེམས་དཔར་འགྱུར་རོ། །དམ་ཚིག་ཡོངས་སུ་བསྲུངས་པས་མངོན་པར་འདོད་པའི་དོན་འགྲུབ་པར་འགྱུར་རོ་ཞེས་རབ་ཏུ་བསྟན་པའི་ཕྱིར། དེ་ནས་དཀྱིལ་འཁོར་ཐམས་ཅད་ཀྱི་གསང་བའི་དམ་ཚིག་གི་ཡེ་ཤེས་བསླབ་བོ་ཞེས་བྱ་བ་གསུངས་ཏེ། དེ་བཞིན་
གཤེགས་པ་ལ་སོགས་པ་རིགས་ཀྱི་དཀྱིལ་འཁོར་རྣམས་ནི་དཀྱིལ་འཁོར་ཐམས་ཅད་དེ། དེ་རྣམས་ཀྱི་དམ་ཚིག་ནི་དཀྱིལ་འཁོར་ཐམས་ཅད་ཀྱི་གསང་བའི་དམ་ཚིག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རྗེས་སུ་ཆགས་ཤིང་ཤིན་ཏུ་ཞེན་པ་དེའི་ཡེ་ཤེས་ལ་
བསླབ་པར་བྱའོ། །འདོད་ཆགས་བྲལ་བ་ལྟ་བུའི་སྡིག །ཅེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རྒྱབ་ཀྱིས་ཕྱོགས་པའི་སེམས་ནི་འདོད་ཆགས་དང་བྲལ་བ་སྟེ། དེ་དང་འདྲ་བའི་སྡིག་པ་གཞན་ནི་མེད་དོ། །གང་ན་མེད་ཅེ་ན། ཁམས་གསུམ་ན་མེད་ཅེས་བྱ་བ་
སྟེ། འདོད་པ་དང་། གཟུགས་དང་། གཟུགས་མེད་པའི་མཚན་ཉིད་ཅན་གྱི་ཁམས་གསུམ་པ་ནའོ། །གང་གི་ཕྱིར་དེ་ལྟར་བཤད་པ་ཡིན་པས། དེ་བས་ན་འདོད་ཆགས་དང་བྲལ་བ་ཁྱོད་ཀྱིས་ཀྱང་ནི་མ་བྱེད་ཅིག་ཅེས་བྱ་བ་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་

ཀྱི་མཚན་ཉིད་ཅན། བཅོམ་ལྡན་འདས་རྡོ་རྗེ་སེམས་དཔའ་ནི། གདུལ་བྱ་རྣམས་ཀྱིས་འདོད་ཅིང་མངོན་པར་དགའ་བར་བྱ་བ་ཡིན་པས་ན་འདོད་པ་ཞེས་བྱ་སྟེ། དེ་ལ་ཁྱོད་ཀྱིས་ཀྱང་ཆགས་པ་དང་བྲལ་བར་མ་བྱེད་ཅིག་ཅེས་པ་སྟེ་དེ་སྤངས་པ་ནི་ཉན་ཐོས་དང་རང་སངས་
རྒྱས་ཀྱི་སར་ལྟུང་བ་མ་ཡིན་ནོ་ཞེས་སྟོན་པ་ཡིན་ནོ། །མ་ཧཱ་ས་མ་ཡ་ཧ་ན་ཕཊ། ཅེས་བྱ་བ་ནི་དེ་ལྟར་དཀྱིལ་འཁོར་ཐམས་ཅད་ཀྱི་དམ་ཚིག་བྱིན་ནས། སློབ་དཔོན་གྱིས་སློབ་མ་རྣམས་ཀྱི་ཉན་ཐོས་དང་རང་སངས་རྒྱས་ཀྱི་བྱང་ཆུབ་མངོན་པར་འདོད་པའི་སེམས་དང་བྲལ་བའི་བསམ་པས་
སྔགས་འདི་གདོན་པར་བྱའོ། །དེ་ནས་མནའི་སྙིང་པོ་སྦྱིན་ནོ་ཞེས་བྱ་བ་ནི་ཁྱེད་ཀྱིས་དཀྱིལ་འཁོར་ཆེན་པོ་མ་མཐོང་བ་ལ་སྨྲ་བར་མ་བྱེད་ཅིག །དམ་ཚིག་ཉམས་པར་གྱུར་ཏ་རེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །
དེ་མ་ཐག་ཏུ་དྲལ་ནས་གཤེགས། །ཞེས་བྱ་བའོ། །དེ་ལྟར་རྡོ་རྗེའི་རིགས་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་དུ་བྱང་ཆུབ་ཀྱི་སེམས་ཡོངས་སུ་མི་སྤང་བའི་མཚན་ཉིད་ཀྱིས་དམ་ཚིག་དང་སྡོམ་པ་སྦྱིན་པར་བྱ་སྟེ། གང་གི་ཕྱིར་དངོས་གྲུབ་ཐམས་ཅད་ནི་བྱང་ཆུབ་ཀྱི་སེམས་
དང་འབྲེལ་པ་ཡིན་ནོ། །དེ་ནས་ཞེས་བྱ་བ་ལ་སོགས་པས་ནི་ཇི་སྐད་དུ་བཤད་པའི་དངོས་གྲུབ་རྣམས་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་དུ་བྱིན་གྱིས་བརླབས་ནས་བསྒྲུབ་པར་བྱའོ་ཞེས་སྟོན་པ་ཡིན་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་ལ་
སོགས་པ་བཞི་བཅིངས་ཏེ་བསླབ་པར་བྱའོ་ཞེས་བྱ་བ་ནི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་རྣམས་ཀྱི་མཚན་ཉིད་བསྟན་པར་བྱ་བའོ། །དངོས་གྲུབ་ཀྱང་དེ་བཞིན་ནོ་ཞེས་བྱ་བ་ནི་ཇི་ལྟར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་ཕྱག་རྒྱ་བཞིས་འགྲུབ་པར་འགྱུར་
བ་འདིར་ཡང་དེ་བཞིན་ནོ་ཞེས་བྱ་བའི་ཐ་ཚིག་གོ། །རི་མོ་ལ་སོགས་པ་དང་ཞེས་བྱ་བ་ནི་ཇི་ལྟར་ས་ལ་བྲིས་པའི་དཀྱིལ་འཁོར་དུ་ཇི་སྐད་བཤད་པའི་དངོས་གྲུབ་འདི་རྣམས་འགྲུབ་པར་འགྱུར་བ་དེ་བཞིན་དུ་རས་རིས་ལ་སོགས་པ་བརྟགས་པ་རྣམས་ལ་ཡང་འགྲུབ་པར་འགྱུར་རོ་ཞེས་བརྟན་པར་བྱ་

བའི་ཕྱིར་གསུངས་སོ། །ཇི་ལྟར་འདོད་པའི་ཆོ་ག་བཞིན་བྱས་ན། །ཞེས་བྱ་བ་ནི། ཇི་སྐད་དུ་བསྟན་པའི་ཆོ་ག་འདི་རྣམས་ཀྱི་ནང་ནས། གང་ཞིག་གང་ལ་སྲེད་པ་དེ་ལ་ཆོ་ག་དེ་ཉིད་ཀྱིས་བྱས་ན་དངོས་གྲུབ་ཐམས་ཅད་འགྲུབ་པར་འགྱུར་རོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཆོ་ག་རྒྱས་
པ་ཇི་ལྟ་བ་བཞིན་བྱའོ་ཞེས་བྱ་བ་ནི། དེ་ནས་ཅི་ཁྱོད་དོན་འབྱུང་བའི་དངོས་གྲུབ་ཀྱི་ཡེ་ཤེས་དང་། རྫུ་འཕྲུལ་གྱི་དོན་དངོས་གྲུབ་ཀྱི་ཡེ་ཤེས་དང་ཞེས་བྱ་བ་ནས་བརྩམས་ཏེ། གཤེགས་སུ་གསོལ་བའི་བར་གྱི་ཆོ་ག་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཇི་ལྟ་བ་བཞིན་འདིར་ཡང་དེ་བཞིན་དུ་
བྱའོ། །རྡོ་རྗེ་སེམས་དཔས་གསུངས་པའི་རྟོགས་པ་སངས་རྒྱས་ཀྱི་གསུང་ཉིད་ཡིན་པར་བསྟན་པའི་ཕྱིར་དང་། དཀྱིལ་འཁོར་གཤེགས་སུ་གསོལ་ཞིང་ཉེ་བར་བསྡུ་བར་བྱས་ནས། སློབ་དཔོན་གྱིས་རང་གི་སྙིང་གར་གནས་པའི་རྡོ་རྗེ་སེམས་དཔའ་ལ་ལེགས་སོ་ཞེས་བྱ་བས་
མཉེས་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། ཡང་དེ་བཞིན་གཤེགས་པ་ཐམས་ཅད་འདུས་ནས་ཞེས་བྱ་བ་ལ་ཡང་ཞེས་བྱ་བའི་སྒྲ་ནི་སླར་ཡང་ཞེས་བྱ་བའི་དོན་ཏོ། །དཀྱིལ་འཁོར་བྲི་བའི་ཕྱིར་གསོལ་བ་བཏབ་ཅིང་འདུས་པར་
མཛད་ནས། ད་ནི་དེ་སྐད་དུ་བཤད་པའི་དོན་གཉིས་པོ་རྫོགས་པར་བྱ་བའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་གཙོ་བོ་ནི་རྣམ་པར་སྣང་མཛད་ཆེན་པོའི་རང་བཞིན་ཡིན་པའི་ཕྱིར་རོ། །དེ་ཉིད་ཀྱིས་ན་བྱང་ཆུབ་ཀྱི་སེམས་ཆེན་པོ་ནི་རྡོ་རྗེ་སེམས་དཔའོ། །སྟོང་པ་ཉིད་
སྟོན་པར་བྱེད་པའི་རྡོ་རྗེ་རྩེ་ལྔ་དེའི་ཕྱག་ན་མངའ་བས་ན་ཕྱག་ན་རྡོ་རྗེ་ཆེན་པོའོ། །དེ་ལ་རྡོ་རྗེ་དགྱེས་པའི་ལེགས་སོ་ཞེས་བྱ་བའི་ཕྱག་རྒྱ་སྙིང་པོ་འདི་ཞེས་བྱ་བ་ཐུགས་ལ་གནས་པས་སོ། །ད་ནི་སྙིང་པོ་སྟོན་ཏེ། ལེགས་སོ་རྡོ་རྗེ་སེམས་དཔའ་ཁྱོད། །ཅེས་བྱ་བ་ནི་གང་རྡོ་རྗེ་སེམས་དཔའི་
ཚུལ་གྱིས་བསྟན་པ་དེ་ནི་ཁྱེད་ལེགས་སོ། །དེ་བཞིན་དུ་གང་རྡོ་རྗེ་རིན་ཆེན་དང་། ཆོས་དང་ལས་ཀྱི་ཚུལ་གྱིས་བཤད་པ་དེ་ཁྱེད་ལེགས་སོ། །གང་གི་ཕྱིར་ཐམས་ཅད་ལེགས་ཤིང་མཛེས་པ་ཉིད་ཡིན་པས་ན་མདོ་སྡེ་འདི་ནི་ལེགས་པར་བཤད་པ་ཡིན་ཏེ། སྒྲོ་བཏགས་པ་དང་། སྐུར་

པ་འདེབས་པའི་ཉེས་པ་དང་བྲལ་བ་ཡིན་ནོ། །རྡོ་རྗེ་ཐེག་པ་ཞེས་བྱ་བ་ནི། རྡོ་རྗེ་ཐེག་པ་ཡིན་པས་ན། རྡོ་རྗེ་ཐེག་པ་སྟེ། དེ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སེམས་དཔའི་རྡོ་རྗེ་ལས་བྱུང་བ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་
སེམས་དཔའི་རྡོ་རྗེ་རྣམ་པར་སྣང་མཛད་ཆེན་པོའི་རང་བཞིན་ལས། རྡོ་རྗེ་སེམས་དཔའ་ལ་སོགས་པ་ཐམས་ཅད་བྱུང་བས། དེའི་ཕྱིར་རྡོ་རྗེ་ཐེག་པ་ཞེས་བྱའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་ཡིན་པས་དེ་བཞིན་གཤེགས་པ་ཀུན་གྱི་གསང་བ་ཞེས་བྱ་བ་སྟེ། ཐེག་པ་ཆེན་
པོ་ནི་སྐྱེ་བོ་ཐམས་ཅད་ཀྱི་ཐུན་མོང་མ་ཡིན་པར་སྟོན་ཏོ། །དེ་གཙོ་བོར་གྱུར་པ་འདིར་མདོར་བསྡུས་པས་ན་མདོར་བསྡུས་པ་སྟེ། དེ་བས་ན་ཐེག་པ་ཆེན་པོ་མངོན་པས་བསྡུས་པ་ཞེས་བྱའོ། །རྡོ་རྗེ་སེམས་དཔའི་མཚན་གྱིས་ཀྱང་། །དངོས་གྲུབ་ཀུན་གྱི་མཆོག་ཏུ་འགྱུར། །ཞེས་བྱ་
བ་ནི་གང་གི་རྡོ་རྗེ་ཐེག་པ་སྟོན་པར་མཛད་པ་ནི། བཅོམ་ལྡན་འདས་རྡོ་རྗེ་སེམས་དཔའ་ནམ་མཁའ་དང་མཉམ་པ་དང་མི་མཉམ་པ་ཐམས་ཅད་དུ་རྟོགས་པའི་སྐུ་དང་། གསུང་དང་། ཐུགས་རྡོ་རྗེའི་རྣམ་པར་འཕྲུལ་པ་བསམ་གྱིས་མི་ཁྱབ་པ་ནམ་མཁའ་ཐམས་ཅད་དུ་སྤྲོས་པས་
སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་བསམ་པ་ཐམས་ཅད་ཡོངས་སུ་རྫོགས་པར་མཛད་པ་ཡིན་ཏེ། དེ་ལྟ་བུའི་རྡོ་རྗེ་སེམས་དཔའི་མཚན་ཉིད་ཀྱིས་ཀྱང་ཞེས་པ། མཚན་ཙམ་ཞིག་བརྗོད་པ་དངོས་གྲུབ་ཐམས་ཅད་བྱེད་པའི་མཆོག་ཡིན་ཏེ། འཇིག་རྟེན་དང་འཇིག་
རྟེན་ལས་འདས་པའི་དངོས་གྲུབ་ཐམས་ཅད་སྐྱེད་པར་མཛད་པའི་མཆོག་སྟེ། དམ་པ་ཡིན་པས་མཚན་ཙམ་འཛིན་པ་ཡང་འབྲས་བུ་དོན་ཡོད་པར་སྩལ་བ་ཡིན་ནོ་ཞེས་སྟོན་ཏོ། །ཀྱང་ཞེས་བྱ་བའི་སྒྲས་ནི་སྒོམ་པར་བྱེད་པ་ལྟ་སྨོས་ཀྱང་ཅི་དགོས་ཏེ། དེ་ནི་ངེས་པ་ཁོ་ནར་ཐམས་ཅད་འགྲུབ་
པར་འགྱུར་རོ། །ཀྱང་ཞེས་བྱ་བའི་སྒྲ་འདི་ཉིད་ཀྱི་དོན་བསྟན་པ་ནི། དག་པར་བྱས་ནས་བསྒྲུབས་ན་ནི། །སངས་རྒྱས་ཉིད་ཀྱང་བདེ་བ་ཐོབ། །ཅེས་བྱ་བ་ཡིན་ཏེ་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བྱ་བ་འདིས་སྒྲིབ་པ་རྣམ་པར་དག་པས་ན་དག་པར་བྱས་པའོ། །

རྡོ་རྗེ་སེམས་དཔའ་འབའ་ཞིག་བསྒྲུབས་ཤིང་བསྒོམས་ན། སངས་རྒྱས་ཉིད་བདེ་ཞིང་དཀའ་བ་སྤྱོད་པ་མེད་པར་ཚེ་འདི་ཉིད་ཀྱིས་བདེ་བ་མི་ཟད་ཅིང་མེད་པར་མི་འགྱུར་རོ། །དེ་ཡང་སྒྲུབ་པ་པོས་རྡོ་རྗེ་སེམས་དཔའ་བདེ་བས་བསྒྲུབས་པས་ན་སྒྲུབ་པ་པོའི་ཚེ་འདི་ཉིད་ལ་བྲི་བ་མེད་པས་མི་ཟད་པ་
དང་། རྒྱུན་ཆད་པའི་འཇིགས་པ་མེད་པས་མེད་ཅིང་གོད་པར་མི་འགྱུར་བའི་ཟག་པ་མེད་པའི་བདེ་བ་འགྲུབ་པར་འགྱུར་རོ། །ཡང་ཅིའི་ཕྱིར་སྒྲུབ་པ་པོས་དགའ་བ་དང་བདེ་བ་བསྒྲུབས་པས་ན། ཇི་སྐད་དུ་བཤད་པའི་རྡོ་རྗེ་སེམས་དཔའི་བདེ་བ་སྒྲུབ་པ་པོ་ལ་འགྲུབ་པར་འགྱུར་ཞེ་ན།
རྡོ་རྗེ་ཆོས་ཀྱི་སྦྱོར་བ་ནི། །ཞེས་བྱ་བ་གསུངས་ཏེ། གང་གི་ཕྱིར་ཇི་སྐད་དུ་བཤད་པའི་རང་བཞིན་གྱིས་རྣམ་པར་དག་པའི་བསྒོམ་པའི་མཚན་ཉིད་ཅན་གྱི་རྡོ་རྗེ་ཆོས་ཀྱི་སྦྱོར་བ་འདིས། འདོད་པ་ཀུན་གྱི་བདེ་བའི་བདེ་བས་སངས་རྒྱས་ཉིད་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །དེ་
ལ་འདོད་པ་ཡང་ཡིན་ལ་ཀུན་ཀྱང་ཡིན་པས་འདོད་པ་ཀུན་ཏེ། མཆོད་པ་ཆེན་པོ་དང་། དབང་བསྐུར་བའི་མཆོད་པ་དང་། ཆོས་ཀྱི་མཆོད་པ་དང་། ལས་ཀྱི་མཆོད་པ་དང་། རྣལ་འབྱོར་དང་རྗེས་སུ་མཐུན་པའི་རོ་ལ་སོགས་པ་སྟེ། དེ་རྣམས་ལས་སྐྱེས་པའི་བདེ་བ་རྣམས་ནི་
འདོད་པ་ཀུན་གྱི་བདེ་བའོ། །འདོད་པ་ཀུན་གྱི་བདེ་བ་དེ་དང་། རྡོ་རྗེ་ཆོས་ཀྱི་སྦྱོར་བ་དང་བཅས་པས་འགྲུབ་པར་འགྱུར་གྱི། དངོས་པོ་ལ་མངོན་པར་ཞེན་པའི་བདེ་བས་སྒྲུབ་པ་པོས་སངས་རྒྱས་ཐོབ་ཅིང་བཅོམ་ལྡན་འདས་ཀྱིས་རྗེས་སུ་གཟུང་བ་ནི་མ་ཡིན་ནོ་ཞེས་བྱ་བར་ཤེས་པར་བྱའོ། །
དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པ་སྟོན་པར་བྱེད་པའི་སྒྲའི་ཚོགས་དང་པོ་སྦྱོར་བ་ལ་སོགས་པ་སྟོན་པར་བྱེད་པ་ནི་བརྟགས་པ་ལས་བྱུང་བ་ཡིན་པའི་ཕྱིར་རྟོགས་པ་ཞེས་
བྱའོ། །དེ་ཡང་རྟོག་པ་གཞན་ལས་ཤིན་ཏུ་མཆོག་ཏུ་གྱུར་པ་ཡིན་པས་རྒྱལ་པོའོ། །རྫོགས་པ་ནི་རྩ་བའི་རྒྱུད་ཀྱི་རང་བཞིན་གྱིས་མཐར་ཐུག་པའོ། །རྡོ་རྗེ་དབྱིངས་ཀྱི་དུམ་བུ་འདི་ཐམས་ཅད་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་

རྗེའི་དབྱིངས་ནི་རྣམ་པར་སྣང་མཛད་ལ་སོགས་པ་ནས། རྡོ་རྗེ་འབེབས་པའི་བར་རེ་རེ་ཞིང་འདིར་སྐྱེས་པས་ན། དེ་རྣམས་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་དབྱིངས་ཀྱི་རང་བཞིན་དུ་བསྐྱེད་པས་འགྲུབ་པའི་ཕྱིར་རྡོ་རྗེའི་དབྱིངས་
སོ། །དེ་བས་ན་རྡོ་རྗེ་དབྱིངས་ཀྱི་དུམ་བུ་ནི་རྡོ་རྗེ་དབྱིངས་ཀྱི་དུམ་བུ་མ་ལུས་པ་དེ་ལས་ཕྱོགས་གཅིག་ཅེས་བྱ་བའི་ཐ་ཚིག་གོ། །འདི་ནི་རྒྱུད་ཕྱི་མ་ལས་ཕྱག་རྒྱ་ཆེན་པོ་ཞེས་བྱ་བར་ཡང་སྟོན་ཏེ། དེ་ལ་ཕྱག་རྒྱ་ཡང་ཡིན་ལ་ཆེན་པོ་ཡང་ཡིན་པས་ཕྱག་རྒྱ་ཆེན་པོ་སྟེ། མི་བསྐྱོད་པའི་རང་བཞིན་བྱང་
ཆུབ་ཀྱི་སེམས་ཆེན་པོའི་ཕྱག་རྒྱ་ནི། ཆོས་བདག་མེད་པའི་ཡེ་ཤེས་ཀྱི་རང་བཞིན་གྱིས་འདི་ནི་ཐམས་ཅད་དུ་ཁྱབ་པའི་ཕྱིར་ཆེ་བ་ཉིད་དོ། །དེ་ལས་བྱུང་བ་རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་ལ་ཉེ་བར་གདགས་པས་ཕྱག་རྒྱ་ཆེན་པོ་ཞེས་བྱའོ། །རྣམ་པར་སྣང་
མཛད་ལ་སོགས་པ་དེ་བཞིན་གཤེགས་པ་རྣམས་ལས་བྱུང་བས་ན། འདི་ནི་དེ་བཞིན་གཤེགས་པའི་རིགས་ཏེ། སྐྱེས་པས་རིགས་ཞེས་བཤད་པ་ཡིན། །ཞེས་གསུངས་པ་དང་། སྒེག་པ་རྡོ་རྗེ་སེམས་དཔའ་ཞེས་བཤད་པས། འདི་ནི་འདོད་ཆགས་ཀྱིས་འདོད་ཆགས་སྤང་པའི་ཕྱིར་
གསུངས་སོ། །དེ་ཡང་འདིར། ཤེས་རབ་ཐབས་ཀྱི་དེ་ཉིད་ཆེ། །བྱང་ཆུབ་ཆེན་པོ་རབ་གྲུབ་ཕྱིར། །བློ་ལྡན་རྡོ་རྗེ་སེམས་དཔའ་ཡིས། །རྟོག་པའི་རྒྱལ་པོ་འདི་གསུངས་སོ། །ཞེས་གསུངས་པ་ཡིན་ནོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ལས།
དེ་བཞིན་གཤེགས་པ་ཐམས་ཅད་དང་མཉམ་པར་འཇུག་པ་ཉིད་ཀྱི་སྦྱོར་བས། དེ་བཞིན་གཤེགས་པ་ཐམས་ཅད་ཀྱི་རང་བཞིན་རྡོ་རྗེ་དབྱིངས་ཐམས་ཅད་དུ་ཐུགས་སུ་ཆུད་པའི་ཡེ་ཤེས་སེམས་དཔའི་ཚུལ་དེ་བཞིན་གཤེགས་པའི་རིགས་ཀྱི་ངོ་བོ། དེ་བཞིན་གཤེགས་པ་ཐམས་
ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བ། རྣམ་པར་སྣང་མཛད་ཆེན་པོའི་རང་བཞིན་གྱི་རྟོག་པའི་རྒྱལ་པོ་ཆེན་པོ་བསྟན་ནས། ད་ནི་དེ་བཞིན་གཤེགས་པ་ཐམས་ཅད་ཀྱི་བཀའི་རྗེས་སུ་འཇུག་པའི་རང་བཞིན་གྱི་དམ་ཚིག་གི་ཕྱག་རྒྱའི་ངོ་བོ། རྡོ་རྗེའི་

རིགས་ཆེན་པོ་ཁྲོ་བས་ཁྲོ་བ་སྤངས་པའི་ཕྱིར་སྟོན་པར་བཞེད་པས། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པ་སྟེ། དང་པོ་སྦྱོར་བའི་རྗེས་ཐོགས་ལ། །ཞེས་བྱ་བའི་ཐ་ཚིག་གོ། །འདིར་དང་པོ་སྦྱོར་བའི་ཏིང་ངེ་འཛིན་ནི།
རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་གསུངས་པ་ཉིད་ཡིན་ལ། ཁྱད་པར་ནི་འདི་ཡོད་དེ་འདི་ལྟར་རྡོ་རྗེ་སེམས་དཔའ་སྤྲུལ་པ་དང་ལྷན་ཅིག་ཅེས་བྱའོ། །ཡང་གཅིག་ཏུ་འདུས་པར་གྱུར་ཏེ་ཞེས་བྱ་བ་ཡང་ཞེས་བྱ་བའི་སྒྲ་ནི་ལེགས་སོ་ཞེས་བྱ་བའི་སྦྱིན་པ་འདུས་པར་མཛད་པ་ལ་ལྟོས་
ནས་ཡང་ཚོགས་པར་མཛད་པས་ན། ཡང་གཅིག་ཏུ་འདུས་པར་གྱུར་ཏེ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོ་བསྐོར་བ་ལ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོ་ནི་རིགས་ཐམས་ཅད་ཀྱི་དཀྱིལ་འཁོར་ཏེ། དེ་རྣམས་
དཔག་ཏུ་མེད་པ་སྤྲུལ་པ་དང་། བྲི་བ་དག་གིས་བསྐོར་ཞིང་རབ་ཏུ་འཇུག་པའི་ངང་ཚུལ་འདི་ལ་མངའ་བས་ན། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོ་བསྐོར་བ་སྟེ། རྣམ་པར་སྣང་མཛད་ཆེན་པོའི་རང་བཞིན་རྡོ་རྗེ་སེམས་དཔའོ། །ཡོན་ཏན་གྱི་ཁྱད་པར་དེ་ལྟ་བུ་དང་
ལྡན་པ་དེ་ལ་འོག་ནས་བཤད་པའི་མཚན་བརྒྱ་ལས་རྩ་བརྒྱད་ལྷག་པ་འདིས་གསོལ་བ་བཏབ་པའོ། །ད་ནི་རྡོ་རྗེ་སེམས་དཔའ་ཞེས་བྱ་བ་ལ་སོགས་པས་མཚན་བརྒྱ་རྩ་བརྒྱད་པ་དེ་གསུངས་པ་ཡིན་ཏེ། དེ་ལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཛྲ་སཏྭ་ཞེས་སྙིང་པོའི་སྒོ་ནས་གང་
གསུངས་པ་དེ་ལ་ཁྱོད་ཅེས་སྙིང་པོའི་སྒོ་ནས་བོད་པའོ། །རྡོ་རྗེ་ཆེ་ཞེས་བྱ་བ་ནི་རྡོ་རྗེ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་ཆེ་སྟེ། བྱང་ཆུབ་ཀྱི་སེམས་ཀྱི་ལྕགས་ཀྱུའི་ཚུལ་གྱིས་ཐམས་ཅད་དུ་ཁྱབ་པ་རྡོ་རྗེ་རྒྱལ་པོའོ། །འདིས་ནི་དོན་གྱིས་བསྟན་པའི་སྒོ་ནས་བཛྲ་རཱ་ཛ་ཞེས་སྙིང་པོ་
གསུངས་པ་ཡིན་ནོ། །རྡོ་རྗེ་མགོན་པོ་ཞེས་བྱ་བ་ལ་རྡོ་རྗེ་ནི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་མགོན་པོ་ནི་ཆོས་བདག་མེད་པའི་འདོད་ཆགས་ཀྱི་རང་བཞིན་རྡོ་རྗེ་ཆགས་པ་སྟེ། གང་གི་ཕྱིར་འདི་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རང་བཞིན་

གྱི་གདུལ་བྱ་ཉན་ཐོས་དང་རང་སངས་རྒྱས་རྣམས་ཀྱི་བྱང་ཆུབ་ཏུ་ཡོངས་སུ་མྱ་ངན་ལས་འདས་པའི་སེམས་ཀྱི་འཇིགས་པ་ལས་གྲོལ་བར་མཛད་པས། དེའི་ཕྱིར་རྡོ་རྗེ་མགོན་པོའོ། །འདིས་ཀྱང་བཛྲ་རཱ་ག་ཞེས་བྱ་བའི་སྙིང་པོའི་དོན་གྱི་སྒོ་ནས་སྟོན་པ་ཡིན་ལ། གང་ལ་
ཁྱད་པར་དུ་བསྟན་པ་མེད་པ་གཞན་དག་ཏུ་ཡང་དེ་བཞིན་དུ་ཤེས་པར་བྱའོ། །རབ་ཏུ་ལེགས་སོ་ཞེས་བྱ་བས་ཤིན་ཏུ་སྒྲུབ་པར་མཛད་པས་ན། རབ་བསྒྲུབ་མཛད་ཅེས་བྱ་སྟེ་ཕ་རོལ་ཏུ་ཕྱིན་པ་དྲུག་གི་སྤྱོད་པའི་ངོ་བོ་རྡོ་རྗེ་ལེགས་པའོ། །རྡོ་རྗེ་དབང་བསྐུར་ཞེས་བྱ་བ་ནི། །རྡོ་རྗེ་མིང་གི་
དབང་བསྐུར་བ་ནི་རྡོ་རྗེ་དབང་བསྐུར་ཏེ། རྡོ་རྗེ་རིན་ཆེན་ནོ། །དེས་ན་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་བདུད་རྩིའི་ཆུའི་རང་བཞིན་ཅན་གྱིས་གདུལ་བྱ་རྣམས་ཀྱི་གཟུང་བ་དང་འཛིན་པའི་རྣམ་པར་རྟོག་པའི་དྲི་མ་འཁྲུད་པར་མཛད་པས་ན་དབང་བསྐུར་བའོ། །རྡོ་རྗེ་འོད་ཅེས་བྱ་བ་ནི་རྡོ་རྗེ་
ལྟར་མི་ཕྱེད་པའི་འོད་དེ། འོད་ཟེར་འདི་ལ་མངའ་བས་ན་རྡོ་རྗེ་འོད་དང་། རྡོ་རྗེ་ཉི་མའོ། །རྡོ་རྗེ་དབལ་ཞེས་བྱ་བ་ནི་བཛྲ་ཧེ་རུ་ཀ་ཞེས་བྱ་བའི་སྙིང་པོའོ། །རྡོ་རྗེ་བཞད་པ་ཞེས་བྱ་བ་ལ་བཞད་པ་ནི་འཛུམ་པ་སྟེ། རྡོ་རྗེ་ལྟར་དབྱེར་མི་ཕྱེད་པའི་བཞད་པ་འདི་ལ་མངའ་བས་ན་རྡོ་རྗེ་བཞད་པའོ། །
ཆོས་ཆེན་པོ་ཞེས་བྱ་བ་ནི་ཆོས་ཆེན་པོ་འདི་ལ་མངའ་བས་ན་ཆོས་ཆེན་པོ་སྟེ། སྟོང་པ་ཉིད་ཀྱི་ཏིང་ངེ་འཛིན་གྱི་རྡོ་རྗེ་ཆོས་དེའི་ངོ་བོ་ཐམས་ཅད་སེམས་ཅན་གྱི་དོན་དུ་ཡེ་ཤེས་ཀྱིས་གཟིགས་པས་ན་ཆོས་སོ། །རྡོ་རྗེ་རལ་གྲི་ཞེས་བྱ་བ་ནི། རྡོ་རྗེ་ཤེས་རབ་ཀྱི་ཡེ་ཤེས་འདི་ལ་མངའ་བས་ན་
རྡོ་རྗེ་རལ་གྲི་ནི་རྡོ་རྗེ་རྣོན་པོ་སྟེ། མཚན་བཅུའོ། །དེ་བཞིན་དུ་མཆོག་ཆེན་པོ་ཞེས་བྱ་བ་ནི་མཆོག་ཀྱང་ཡིན་ལ་ཆེན་པོ་ཡང་ཡིན་པས་ན་མཆོག་ཆེན་པོ་སྟེ་རྡོ་རྗེ་རལ་གྲིའོ། །དཀྱིལ་འཁོར་ཆེན་པོ་ཞེས་བྱ་བ་ནི། དཀྱིལ་འཁོར་ཡང་ཡིན་ལ་ཆེན་པོ་ཡང་ཡིན་པས་ན། དཀྱིལ་འཁོར་ཆེན་པོ་སྟེ།
རྡོ་རྗེ་དབྱིངས་ལ་སོགས་པའི་གང་ཡིན་པའི་དཀྱིལ་འཁོར་ཐམས་ཅད་འདི་ལ་མངའ་བས་ན་རྡོ་རྗེ་རྒྱུའོ། །རྒྱལ་པོ་མཆོག་ལ་ཞེས་བྱ་བ་ནི་དཀྱིལ་འཁོར་ཐམས་ཅད་རང་བཞིན་དེ་ཉིད་ཀྱིས་གསལ་ཞིང་། རྒྱལ་པོ་ལྟར་བྱེད་པས་ན་རྒྱལ་པོའོ། །མཆོག་ནི་དེ་བཞིན་གཤེགས་པ་ལས་སྐྱེས་

པས་ན་མཆོག་སྟེ། རྒྱལ་པོ་ཡང་ཡིན་པས་ན་རྒྱལ་པོ་མཆོག་གོ། །སྤྲོས་མེད་ཅེས་བྱ་བ་ནི་ངག་གི་རྣམ་པར་རྟོག་པའི་སྤྲོས་པ་མེད་པའི་ཕྱིར་རྡོ་རྗེ་བསྲུང་བའོ། །རྡོ་རྗེ་ལས་ཞེས་བྱ་བ་ནི་རྡོ་རྗེ་ལས་ཀྱི་སྙིང་པོའོ། །བསྲུང་བ་ཆེ་ཞེས་བྱ་བ་ནི་བསྲུང་བ་ཡང་ཡིན་ལ་ཆེན་པོ་ཡང་ཡིན་པས་ན་
བསྲུང་བ་ཆེན་པོ་སྟེ། ཕྱིར་མི་ལྡོག་པའི་བརྩོན་འགྲུས་ཀྱི་བསྲུང་བའི་ངོ་བོ་ནི་རྡོ་རྗེ་བསྲུང་བའོ། །གནོད་སྦྱིན་གཏུམ་པ་ཞེས་བྱ་བ་ནི་གནོད་སྦྱིན་ཡང་ཡིན་ལ་གཏུམ་པ་ཡང་ཡིན་པས་ན་རྡོ་རྗེ་གནོད་སྦྱིན་ནོ། །གདོན་ཆེན་པོ་ཞེས་བྱ་བ་ནི་ཆེན་པོ་ཉིད་ནི་དེ་བཞིན་ཉིད་ཀྱིས་ཐམས་ཅད་དུ་
སོང་བའི་ཕྱིར། དེ་བཞིན་གཤེགས་པ་ལ་སོགས་པའི་གཟུགས་དེ་ཡིས་འཛིན་པས་ན་གདོན་ནོ། །གདོན་ཡང་ཡིན་ལ་ཆེན་པོ་ཡང་ཡིན་པས་གདོན་ཆེན་པོ་སྟེ། རྡོ་རྗེ་གནོད་སྦྱིན་ནོ། །རྡོ་རྗེ་ཁུ་ཚུར་ཞེས་བྱ་བ་ནི། སངས་རྒྱས་བཅོམ་ལྡན་འདས་ལ་སོགས་པ་ཐམས་ཅད་དེ་བཞིན་
ཉིད་ཀྱི་ངོ་བོར་དོན་གཅིག་ཏུ་མི་ཕྱེད་པར་བྱེད་པས་ན་རྡོ་རྗེ་ཁུ་ཚུར་རོ། །ཕྱག་རྒྱ་ཆེ་ཞེས་བྱ་བ་ནི་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱའོ། །ཆེན་པོ་ནི་དེ་བཞིན་ཉིད་ཐམས་ཅད་དུ་སོང་བ་ལས་སྐྱེས་པ་ནི་ངོ་བོ་གང་ཡིན་པ་འདི་ལ་མངའ་བས་ན་ཕྱག་རྒྱ་ཆེན་པོ་
སྟེ་རྡོ་རྗེ་ཁུ་ཚུར་དེ་མཚན་བཅུ་དང་ཕྱག་རྒྱ་ཀུན་ལ་ཞེས་བྱ་བ་ལ། དེ་བཞིན་ཉིད་ཀྱི་རྡོ་རྗེ་ཁུ་ཚུར་གྱི་ངོ་བོ་ཡིན་པ་དང་། ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་དེ་ཡིས་བསྡུས་པས་ན། ཕྱག་རྒྱ་ཀུན་ཞེས་བྱ་བ་ནི་རྡོ་རྗེ་ཁུ་ཚུར་ཉིད་དོ། །དེ་ལྟར་བཤད་པའི་དོན་གྱིས་སེམས་དཔའ་བཅུ་
དྲུག་གི་སྙིང་པོའི་རང་བཞིན་གྱི་སྒོ་ནས་བཅོམ་ལྡན་འདས་རྡོ་རྗེ་འཆང་བ་ལ་བསྟོད་ནས། སྐུའི་གསང་བའི་དོན་གྱི་ངོ་བོའི་སྒོ་ནས་བསྟོད་པ་ནི། བྱང་ཆུབ་སེམས་དང་ཞེས་བྱ་བ་ལ་སོགས་པ་སྨོས་ཏེ། དེ་ལ་བྱང་ཆུབ་ཀྱི་ངོ་བོའི་སེམས་ནི་བྱང་ཆུབ་སེམས་དཔའ་སྟེ་རྡོ་རྗེ་སེམས་
དཔའོ། །བྱང་ཆུབ་ཆེ་ཞེས་བྱ་བ་ནི་རྡོ་རྗེ་སེམས་དཔའ་དེ་ཉིད་བྱང་ཆུབ་ཆེན་པོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་བའི་དོན་ཏོ། །སངས་རྒྱས་ཞེས་བྱ་བ་ནི་སངས་རྒྱས་སྤྱན་འདྲེན་པའི་མཚན་ཉིད་དང་ལྡན་པས་ན་རྡོ་རྗེ་རྒྱལ་པོའོ། །དེ་བཞིན་གཤེགས་པ་ཐམས་

ཅད་ཅེས་བྱ་བ་ནི། རྡོ་རྗེ་རྒྱལ་པོ་དེ་ཉིད་དང་དེ་བཞིན་གཤེགས་པ་ཐམས་ཅད་འགུགས་པའི་སངས་རྒྱས་ཐམས་ཅད་ལས་ལྷག་པའི་མཚན་ཉིད་ཅན་ཡིན་པ་དེའི་ཕྱིར་དེ་བཞིན་གཤེགས་པ་ཐམས་ཅད་དོ། །རྡོ་རྗེ་རིགས་ཞེས་བྱ་བ་ནི་གཟུང་བ་དང་འཛིན་པའི་
རྟོག་པས་གཡོ་བ་མེད་པའི་མི་དམིགས་པའི་ཐུགས་རྗེ་ཆེན་པོའི་མཚན་ཉིད་ཀྱི་ཡེ་ཤེས་ནི་རྡོ་རྗེ་ཡེ་ཤེས་ཏེ། རྡོ་རྗེ་ཆགས་པའོ། །དེ་སྐད་དུ་ཡང་། ཆོས་བདག་མེད་པའི་ཆགས་པ་འདི། །དགྱེས་པ་བསྲུང་བ་འདི་ཡིན་ནོ། །ཞེས་གསུངས་པ་དང་། ཡང་དག་པའི་ལམ་གྱི་ངོ་བོ་
ཡིན་པ་དེ་བས་ན་རྡོ་རྗེ་ཆགས་པའོ། །སངས་རྒྱས་དང་བྱང་ཆུབ་སེམས་དཔའི་རྒྱུན་ཐམས་ཅད་དུ་སོང་བ་དེའི་ཕྱིར། ཡེ་ཤེས་ཆེ་ཞེས་བྱ་བ་སྨོས་སོ། །ཐེག་པ་ཆེ་ཞེས་བྱ་བ་ནི་ཐེག་པ་ཡང་ཡིན་ལ་ཆེན་པོ་ཡང་ཡིན་པས་ན་ཐེག་པ་ཆེན་པོ་སྟེ། ཕ་རོལ་ཏུ་ཕྱིན་པའི་སྤྱོད་པའི་རང་བཞིན་ནི་
རྡོ་རྗེ་ལེགས་པའོ། །དོན་ཀུན་ཞེས་བྱ་བ་ནི་དོན་ཡང་ཡིན་ལ་ཀུན་ཀྱང་ཡིན་པས་ན་དོན་ཀུན་ཏེ། དོན་ཀུན་ནི་ནམ་མཁའི་སྙིང་པོ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་དབང་བསྐུར་བ་ཞེས་བྱ་བའི་དོན་ཏོ། །ཀུན་གྱི་དེ་བཞིན་ཉིད་ཀྱི་དོན། །ཞེས་བྱ་བ་ནི་བག་ཆགས་དང་
བཅས་པའི་ཉོན་མོངས་པའི་མུན་པ་སེལ་བར་བྱེད་པའི་ཉི་མར་གྱུར་པའི་ཡེ་ཤེས་ཏེ་དོན་ཐམས་ཅད་ཀྱི་དེ་ཁོ་ན་ཉིད་ལ་དམིགས་པ་ནི་ཀུན་གྱི་དེ་ཁོ་ན་ཉིད་རྡོ་རྗེ་གཟི་བརྗིད་དེ་མཚན་བཅུའོ། །སེམས་ཅན་དོན་ཞེས་བྱ་བ་ནི་བྱམས་པའི་སྦྱིན་པ་ཆེན་པོས་སེམས་ཅན་གྱི་ཁམས་ཀྱི་དོན་བྱེད་པས་ན་སེམས་
ཅན་དོན་ཏེ་རྡོ་རྗེ་དཔལ་ལོ། །ཀུན་རིག་པ་ཞེས་བྱ་བ་ནི། ཀུན་རིག་པས་ན་ཀུན་མཁྱེན་ཏེ། འཛུམ་པའི་དུས་གསུམ་པའི་དོན་ཐམས་ཅད་སྟོན་པར་མཛད་པའི་ཕྱིར་ན་རྡོ་རྗེ་བཞད་པའོ། །ཀུན་མཁྱེན་ཞེས་བྱ་བ་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་བརྙེས་པའི་
ཕྱིར་རྡོ་རྗེ་ཆོས་ནི་ཀུན་མཁྱེན་པའོ། །ཀུན་མཛད་ཅེས་བྱ་བ་ནི། ཤེས་རབ་ཀྱི་ཡེ་ཤེས་ཀྱིས་བྱང་ཆུབ་ཀྱི་སེམས་ལ་སོགས་པ་ཡོངས་སུ་རྫོགས་པར་མཛད་པའི་ཕྱིར། ཀུན་མཛད་ནི་རྡོ་རྗེ་རྣོན་པོའོ། །ཐམས་ཅད་དེ་ཞེས་བྱ་བ་ནི་ཐམས་ཅད་ཀྱི་རང་བཞིན་ཡིན་པའི་ཕྱིར་ཐམས་ཅད་ཀྱི་རྒྱུའོ། །

ཀུན་གཟིགས་ཞེས་བྱ་བ་ནི། ཆོས་དང་། དོན་དང་། ངེས་པའི་ཚིག་དང་སྤོབས་པ་སོ་སོར་ཡང་དག་པར་རིག་པའི་ཡེ་ཤེས་སྟོན་པས། ཆོས་དང་དེའི་དོན་དང་ངེས་པའི་ཚིག་དང་སྤོབས་པ་སོ་སོར་གཟིགས་པ་ནི་ཀུན་གཟིགས་ཏེ་རྡོ་རྗེ་བསྲུང་བའོ། །རྡོ་རྗེ་བདག་ཅེས་བྱ་བ་ནི་འཁོར་བ་ཡོངས་
སུ་དག་པའི་བརྩོན་འགྲུས་ཀྱི་ངོ་བོའི་རྡོ་རྗེའོ། །དེ་ཉིད་ཀྱི་རང་བཞིན་གྱི་བདག་ཉིད་གང་ཡིན་པ་འདི་ནི་རྡོ་རྗེ་བདག་སྟེ། རྡོ་རྗེ་ལས་སོ། རབ་རྡོ་རྗེ་མཆོག་ཅེས་བྱ་བ་ནི། རབ་རྡོ་རྗེ་སེམས་དཔའ་ལ་སོགས་པ་དེ་རྣམས་ཀྱི་མཆོག་ཡིན་ཏེ། རྩོམ་པའི་བརྩོན་འགྲུས་ཀྱི་རང་བཞིན་མཚུངས་
པ་མེད་པའི་ཕྱིར་ན་རྡོ་རྗེ་ལས་སོ། །རྡོ་རྗེ་བརྩོན་འགྲུས་ཞེས་བྱ་བ་ནི། ཡོངས་སུ་སྦྱོར་བའི་བརྩོན་འགྲུས་ནི་རྡོ་རྗེ་ལྟ་བུར་མི་ཕྱེད་པས་ན་རྡོ་རྗེ་བརྩོན་འགྲུས་ཏེ་རྡོ་རྗེ་བསྲུང་བའོ། །རབ་རྡོ་རྗེ་འཆང་ཞེས་བྱ་བ་ནི་སོ་སོར་རྟོག་པའི་བརྩོན་འགྲུས་ཀྱི་རབ་རྡོ་རྗེ་འཛིན་པར་བྱེད་པས་ན་རྡོ་རྗེ་འཆང་བ་སྟེ།
རྡོ་རྗེ་གནོད་སྦྱིན་ཏེ་མཚན་བཅུའོ། །དམ་ཚིག་ཆེན་པོ་དེ་ཉིད་དོན། །ཞེས་བྱ་བ་ནི་འཁོར་གསུམ་རྣམ་པར་དག་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་མཁྱེན་པ་ནི་དམ་ཚིག་ཆེན་པོ་སྟེ། སོ་སོར་རྟོག་པའི་བརྩོན་འགྲུས་ཀྱི་རང་བཞིན་ནོ། །དེའི་དེ་ཁོ་ན་ཉིད་ནི་དེ་ལས་བྱུང་བའི་ཟག་པ་མེད་
པའི་བདེ་བ་དང་། ཡིད་བདེ་བའམ། ལྷ་ཆེན་པོ་ལ་སོགས་པའི་གཟུགས་ཀྱིས་ཆགས་པ་དང་། སྡང་བ་དང་། རྨོངས་པ་ལ་སོགས་སེམས་ཅན་གྱི་དོན་མཛད་པ་སྟེ། དེ་སྐད་དུ་ཡང་དམ་ཚིག་ཆེན་པོའི་དེ་ཁོ་ན་ཉིད་གང་ཡིན་ཞེ་ན། འདི་ལྟ་སྟེ། ཀུན་དུ་བཟང་པོ་རབ་དགྱེས་པ། །ཞེས་
གསུངས་ཏེ། དམ་ཚིག་ཆེན་པོའི་དེ་ཁོ་ན་ཉིད་ཀྱི་དོན་འདི་ནི། བཅོམ་ལྡན་འདས་ཀྱི་རྡོ་རྗེ་ཁུ་ཚུར་ཏེ་ཕྱག་རྒྱ་ཆེན་པོའོ། །བདེ་ཆེན་ཁྱོད་ཅེས་བྱ་བ་ནི་དེ་མ་ཐག་པའི་རྡོ་རྗེ་ཁུ་ཚུར་དེ་ཉིད་དེ་ནི་དམ་ཚིག་ཆེན་པོའི་རང་བཞིན་ཡིན་པའི་ཕྱིར་བདེ་ཆེན་ཉིད་དོ། །དེ་ལྟར་རྡོ་རྗེ་སེམས་དཔའ་ལ་སོགས་
པ་སེམས་དཔའ་བཅུ་དྲུག་གི་སྐུའི་གསང་བའི་དོན་གྱི་སྒོ་ནས་རྡོ་རྗེ་འཆང་བ་ཆེན་པོ་ལ་བསྟོད་ནས། གཞན་ཡང་མཚན་མའི་ཕྱག་རྒྱའི་སྒོ་ནས་བསྟོད་པ་ནི། རྡོ་རྗེ་ཞེས་བྱ་བ་ལ་སོགས་པ་སྨོས་ཏེ། དེ་ལ་བཅོམ་ལྡན་འདས་རྡོ་རྗེ་སེམས་དཔའི་རྡོ་རྗེ་རྩེ་ལྔ་པའི་མཚན་མའི་ངོ་བོ་གང་ཡིན་པ་དེ་

ཉིད་ནི་དམ་པར་གྱུར་པའི་ཡོན་ཏན་འབྱུང་བ་ཡིན་ནོ། །རྡོ་རྗེ་ལྕགས་ཀྱུ་ཞེས་བྱ་བ་ནི། རྡོ་རྗེ་རྒྱལ་པོའོ། །འདོད་པ་ཆེ་ཞེས་བྱ་བ་ནི། རྡོ་རྗེ་ཆགས་པའི་མདའ་གཞུའི་ཕྱག་རྒྱ་སྟེ། ཆེན་པོ་ཡང་ཡིན་ལ་ཆགས་པ་ཡང་ཡིན་པས་ན།
ཆགས་པ་ཆེན་པོ་ནི་བྱང་ཆུབ་ཆེན་པོ་མངོན་སུམ་དུ་བྱེད་པའི་ངོ་བོ་ཡིན་ཏེ། དེ་སྐད་དུ་ཡང་། ཕྲ་བར་འབིགས་པས་མདའ་ཡིན་ནོ། །ཞེས་གསུངས་པས་ན། དེ་ཁོ་ན་ཉིད་མངོན་སུམ་དུ་མཛད་ཅེས་བྱ་བའི་དོན་ཏེ་མཚན་ལྔའོ། །རབ་ཏུ་དགའ་བ་ཞེས་བྱ་བ་ནི། རྡོ་རྗེ་ལེགས་པའི་
མགུ་བའི་ཕྱག་རྒྱ་དེ་ནི་བཟང་པོ་ལ་དགའ་བས་ན་རབ་ཏུ་དགའ་སྟེ། ཕ་རོལ་ཏུ་ཕྱིན་པ་དྲུག་གི་སྤྱོད་པ་ལས་བྱུང་བའི་ཟག་པ་མེད་པའི་མགུ་བ་ནི་དགའ་བ་ཞེས་བྱ་བའི་དོན་ཏོ། །བདེ་བ་ཆེན་པོ་ཞེས་བྱ་བ་ནི། རྡོ་རྗེ་རིན་ཆེན་གྱི་རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུ་རིན་པོ་ཆེའི་ཕྱག་རྒྱ་ནི་
རབ་ཏུ་ཆེ་བའི་འོད་འདི་ལ་མངའ་བས་ན་རབ་ཏུ་འོད་ཆེན་པོ་སྟེ། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པའི་འོད་ཅེས་བྱ་བའི་དོན་ཏོ། །རྡོ་རྗེ་འོད་ཅེས་བྱ་བ་ནི། རྡོ་རྗེ་གཟི་བརྗིད་ཀྱི་རྡོ་རྗེ་ཉི་མའི་ཕྱག་རྒྱ་སྟེ། རྡོ་རྗེ་ལྟ་བུའི་མི་ཕྱེད་པའི་འོད་འདི་ལ་མངའ་བས་ན་རྡོ་རྗེ་འོད་དོ། །
འོད་སྣང་བ་ཞེས་བྱ་བ་ནི། རྡོ་རྗེ་དཔལ་གྱི་ཡིད་བཞིན་གྱི་ནོར་བུའི་རྒྱལ་མཚན་གྱི་ཕྱག་རྒྱ་སྟེ། བྱམས་པ་སྦྱིན་པའི་མཚན་ཉིད་ཀྱི་འོད་ཀྱི་སྣང་བའི་ནུས་པ་འདི་ལ་མངའ་བས་ན་འདི་སྣང་བའོ། །སངས་རྒྱས་འོད་ཅེས་བྱ་བ་ནི། བཞད་པའི་འཛུམ་པའི་ཕྱག་རྒྱ་སྟེ། སངས་རྒྱས་རྣམས་
ཀྱི་འཛུམ་པས་སེམས་ཅན་གྱི་དོན་མཛད་པའི་འོད་འདི་ལ་མངའ་བས་ན་སངས་རྒྱས་འོད་དེ། མཚན་ལྔ་བཅུའོ། །རྡོ་རྗེ་རྒྱལ་མཆོག་ཅེས་བྱ་བ་ནི། ཆོས་ཀྱི་པདྨའི་ཕྱག་རྒྱ་སྟེ། རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱི་རྡོ་རྗེ་དེ་ཉིད་ནི། དག་པས་ན་རྒྱལ་པོ་ཡིན་པ་དེ་
ཉིད་ཀྱི་ཕྱིར་རྒྱལ་མཆོག་གོ། །རྡོ་རྗེ་མཆོག་ཅེས་བྱ་བ་ནི། རྡོ་རྗེ་རྣོན་པོའི་རལ་གྲིའི་ཕྱག་རྒྱ་སྟེ། ཤེས་རབ་ཀྱི་ཡེ་ཤེས་ཀྱི་རྡོ་རྗེ་དེ་ཉིད་ཀྱི་མཆོག་ནི། རྡོ་རྗེ་མཆོག་གོ། །རིག་པ་མཆོག་ཅེས་བྱ་བ་ནི། རྒྱུའི་འཁོར་ལོའི་ཕྱག་རྒྱ་སྟེ། སྤྲུལ་པའི་སེམས་དེ་རིག་པའི་མཆོག་ནི།

རིག་པའི་མཆོག་ཡིན་ལ། དཀྱིལ་འཁོར་སྤྲུལ་པ་ལ་དེ་དང་མཚུངས་པ་མེད་ཅེས་བྱ་བའི་དོན་ཏོ། །མཆོག་ཅེས་བྱ་བ་ནི། རྡོ་རྗེ་བསྲུང་བའི་ལྕེའི་ཕྱག་རྒྱ་སྟེ། སྒྲ་བརྙན་དང་མཚུངས་པའི་སྒྲ་ཡིན་པས་བརྗོད་པ་འདི་དང་མཚུངས་པ་གཞན་མེད་པས་ན་མཆོག་གོ། །མིའི་
མཆོག་ཅེས་བྱ་བ་ནི། ལས་ཀྱི་སྣ་ཚོགས་རྡོ་རྗེའི་ཕྱག་རྒྱ་སྟེ། མིའི་འཇིག་རྟེན་དུ་དེ་བཞིན་གཤེགས་པ་ལ་སོགས་པའི་གཟུགས་ཀྱིས་མི་ཐམས་ཅད་ཀྱི་གཟུགས་ལས་མཆོག་ཏུ་གྱུར་པས་ན་མིའི་མཆོག་གོ། །རྡོ་རྗེ་དམ་པ་ཞེས་བྱ་བ་ནི། རྡོ་རྗེ་བསྲུང་བའི་གོ་
ཆའི་ཕྱག་རྒྱ་སྟེ། རྡོ་རྗེ་རྣམས་ཀྱི་དམ་པ་དེས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་ཀུན་དུ་བསྲུང་བའི་ཕྱིར་རོ། །མཆོག་ཆེན་མཆོག་ཅེས་བྱ་བ་ནི། ཆེན་པོ་ཡང་ཡིན་ལ་མཆོག་ཀྱང་ཡིན་པས་ན་མཆོག་ཆེན་པོ་ནི། རྡོ་རྗེ་གནོད་སྦྱིན་ཡིན་པ་
དེའི་ཕྱིར་ཡང་མཆོག་ཆེན་མཆོག་ནི་རྡོ་རྗེ་གནོད་སྦྱིན་ཏེ། རྡོ་རྗེ་མཆེ་བའི་མཚོན་ཆའི་ངོ་བོ་དེས་སྲུང་ཞིང་ཡོངས་སུ་སྐྱོང་བའི་ཕྱིར་རོ། །རིག་མཆོག་ཅེས་བྱ་བ་ནི། རིག་པའི་མཆོག་ནི་རིག་པའི་མཆོག་སྟེ། རྡོ་རྗེ་ཁུ་ཚུར་ཡིན་ལ། དེ་བཞིན་གཤེགས་པ་ཐམས་ཅད་ཀྱི་
རིགས་ཀྱི་སྐུ་དང་། གསུང་དང་། ཐུགས་ཀྱི་རྡོ་རྗེའི་ཕྱག་རྒྱ་དེ་ཉིད་ཀྱི་ཁུ་ཚུར་འཆིང་བའི་སྦྱོར་བ་དེས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱ་སྒྲུབ་པར་མཛད་པ་དེའི་ཕྱིར་རིག་པ་མཆོག་གོ། །འདིས་ནི་རྡོ་རྗེ་ཁུ་ཚུར་གྱི་མཚན་མའི་ཕྱག་རྒྱ་གསུངས་པ་ཡིན་ནོ། །
རྡོ་རྗེ་དབྱིངས་ཞེས་བྱ་བ་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཡིན་ནོ་ཞེས་བྱ་བའི་དོན་ཏོ། །གསང་བ་ཆེ་ཞེས་བྱ་བ་ནི། ཆེན་པོ་ཡང་ཡིན་ལ་གསང་བ་ཡང་ཡིན་པས་གསང་བ་ཆེ་སྟེ། གཟུངས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོའི་ངོ་བོ་དེ་འདི་ཡིན་པས་ན་གསང་བ་
ཆེན་པོའོ། །དེ་སྐད་དུ་ཡང་། རྡོ་རྗེ་ཐལ་མོ་ལས་བྱུང་བ། །ཕྱག་རྒྱ་ཆེན་པོ་ཞེས་སུ་གྲགས། །ཞེས་གསུངས་པའི་ཕྱིར་ཏེ། མཚན་དྲུག་ཅུའོ། །རྡོ་རྗེ་གསང་བ་ཞེས་བྱ་བ་ནི། རྡོ་རྗེའི་ཕྱག་རྒྱ་རྣམས་ཀྱི་དཀྱིལ་འཁོར་གྱི་གསང་བའི་རྡོ་རྗེ་ཡིན་ཏེ། དེ་སྐད་དུ་ཡང་། རྡོ་རྗེ་

གསང་བ་ཞེས་བྱ་བ་ནི། རྡོ་རྗེའི་དཀྱིལ་འཁོར་རོ་ཞེས་གསུངས་སོ། །རབ་ནི་ཤིན་ཏུ་གསང་བ་འཛིན་པས་ན་རབ་གསང་འཆང་ཞེས་བྱ་སྟེ། རང་ཉིད་ཀྱི་ཕྱག་རྒྱ་ཆེན་པོ་ལ་སོགས་པ་རབ་ཏུ་གསང་བའི་ངོ་བོ་འཆང་བ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་ཕྲ་བ་ཞེས་བྱ་བ་ནི་ཆོས་
ཀྱི་དཀྱིལ་འཁོར་གསུངས་པ་ཡིན་ཏེ། དེ་སྐད་དུ་ཡང་། རྡོ་རྗེ་དབྱིངས་དང་འདྲ་བས་ན། །རྡོ་རྗེ་ཕྲ་མོ་ཞེས་སུ་གྲགས། །ཞེས་གསུངས་སོ། །བསམ་གཏན་ཆེ་ཞེས་བྱ་བ་ནི། ཆེན་པོ་ཡང་ཡིན་ལ་བསམ་གཏན་ཡང་དེ་ཡིན་པས་ན་བསམ་གཏན་ཆེ་སྟེ། ཕྲ་མོའི་རྡོ་རྗེའི་བསམ་གཏན་གྱིས་
དངོས་གྲུབ་ཐམས་ཅད་རབ་ཏུ་སྒྲུབ་པ་ལ། ཀུན་དུ་ཁྱབ་པའི་ཕྱིར་རོ། །དེ་སྐད་དུ་ཡང་། བཅོམ་ལྡན་འདས་ཀྱིས། དེ་ནས་ཤིན་ཏུ་མཉམ་པར་གཞག །གང་ཡང་རུང་སྟེ་བསྒོམ་བྱ་བ། །དེ་དག་ཐམས་ཅད་བརྟན་པར་འགྱུར། །ཏིང་ངེ་འཛིན་ཞེས་བརྟག་པའོ། །ཞེས་གསུངས་སོ། །
རྡོ་རྗེ་དགོངས་པ་ཞེས་བྱ་བ་ནི། རྡོ་རྗེ་རྣམས་ཀྱི་དགོངས་པ་ནི་རྡོ་རྗེའི་དགོངས་པ་སྟེ། སེམས་ཅན་གྱི་དོན་ཚད་མེད་པ་བཞི་བསྒོམས་པས་ན། བྱམས་པ་ཆེན་པོ་ལ་སོགས་པ་ཚད་མེད་པ་བཞིའི་ངོ་བོ་བསྒོམས་པས་འདི་ཉིད་ཁྱོད་ཡིན་ནོ་ཞེས་སྟོན་ཏོ། །སངས་རྒྱས་མཆོག་ཅེས་བྱ་བ་ནི་
སངས་རྒྱས་རྗེས་སུ་དྲན་པ་སྒོམ་པའི་སེམས་ནི་སངས་རྒྱས་ཀྱི་གཟུགས་བརྙན་ཡིན་པའི་ཕྱིར། དེ་སངས་རྒྱས་ཀྱི་མཆོག་ཏུ་བསྒོམ་པ་ལས་མཚུངས་པ་གཞན་མེད་པའོ། །དེས་ན་དེ་བཞིན་གཤེགས་པ་ཐམས་ཅད་རྗེས་སུ་དྲན་པའི་ཡེ་ཤེས་གསུངས་པ་ཡིན་ཏེ། དེ་སྐད་དུ་ཡང་
དེ་ཡི་རང་བཞིན་ཁྱོད་ཡིན་ནོ། །ཞེས་འདི་གསུངས་པས་བསྟན་པ་ཡིན་ནོ། །སངས་རྒྱས་རྡོ་རྗེ་མཆོག་ཅེས་བྱ་བ་ནི། སངས་རྒྱས་རྡོ་རྗེ་ནི་དེ་བཞིན་གཤེགས་པའི་རྗེས་སུ་དྲན་པའི་ཡེ་ཤེས་རྣམ་པ་བཞིའི་ངོ་བོ་དེ་དག་གི་མཆོག་ནི་སངས་རྒྱས་ཀྱི་མཆོག་གོ། །ཟླ་བའི་གཟུགས་བརྙན་
བསྒོམས་ནས་ནི། །བདག་གི་སྙིང་གར་རྡོ་རྗེ་ཡི། །སེམས་དཔའི་རྡོ་རྗེ་གཟུགས་བརྙན་བསྒོམ། །ཞེས་གང་གསུངས་པ། གཅིག་ནས་གཅིག་ཏུ་བརྟན་པར་བྱེད་པའི་བསྒོམ་པའི་ངོ་བོ་མཚུངས་པ་གཞན་མེད་པའི་ཕྱིར་རོ། །སངས་རྒྱས་བྱང་ཆུབ་ནི་སངས་རྒྱས་ཀྱི་བྱང་ཆུབ་སྟེ། དེ་ཡི་

རང་བཞིན་ཁྱོད་ཡིན་ནོ། །ཞེས་བྱ་བ་འདི་ནི། རྣམ་པ་ཀུན་གྱི་མཆོག་ལྡན་པ། །སངས་རྒྱས་གཟུགས་སུ་བདག་ཉིད་ནི། །བདག་ཉིད་ཀྱིས་ནི་བསྒོམ་བྱ་བ། །སངས་རྒྱས་བྱང་ཆུབ་བསྒོམ་པའོ། །ཞེས་གསུངས་པ་དེས་བཤད་པ་ཡིན་ནོ། །མཁས་པ་ཆེ་ཞེས་བྱ་བ་ནི་ལྷ་དང་གཅིག་ཏུ་
གྱུར་པའི་ཤེས་པའི་ངོ་བོ་དེས་ནི། མཁས་པ་ཡང་ཡིན་ལ་ཆེན་པོ་ཡང་ཡིན་པས་ན་འདི་མཁས་པ་ཆེ་སྟེ། བདག་ནི་དེ་བཞིན་གཤེགས་དང་མཉམ། །རྡོ་རྗེའི་ཚིག་ཏུ་ལན་ཅིག་བརྗོད། །དབང་པོ་གཉིས་ནི་མཉམ་སྦྱར་བས། །སངས་རྒྱས་ཐམས་ཅད་ཆགས་པར་བྱེད། །ཅེས་
བྱ་བ་ལ་སོགས་པ་འདིས་གསང་བའི་ཕྱག་རྒྱའི་ཡེ་ཤེས་རྣམ་པ་བཞི་གསུངས་པ་ཡིན་ནོ། །སངས་རྒྱས་ཡེ་ཤེས་ཞེས་བྱ་བ་ནི་དེ་བཞིན་གཤེགས་པ་རྣམ་པ་ལྔ་ནི་སངས་རྒྱས་ཏེ། དེ་དག་གི་ཆོས་ཀྱི་དཀྱིལ་འཁོར་དུ་གསུངས་པའི་ཕྱག་རྒྱ་ཆེན་པོ་ངེས་པའི་སངས་རྒྱས་ཀྱི་ཡེ་ཤེས་འདི་
ཡང་། རྡོ་རྗེ་ཕྲ་མོའི་ཚུལ་