Luận tạng Tây Tạng (Tengyur) — Tập 10

།ཡང་སྣ་ཚོགས་རྡོ་རྗེའི་འོད་ཟེར་འཇིག་པའི་དུས་ཀྱི་མེ་ལྟ་བུ་བཟོད་པར་དཀའ་བ་ཕྱོགས་ཐམས་ཅད་དུ་ཚན་ཆེར་སྤྲོས་པས། ཐད་
ཀར་ནི་རྡོ་རྗེ་ར་བ་གྲུ་བཞི་འབར་བས་གཏམས། སྟེང་དུ་ནི་རྡོ་རྗེའི་གུར། འོག་ཏུ་ནི་རྡོ་རྗེའི་རང་བཞིན་གྱི་ས་གཞི་དང་། འོག་ཐམས་ཅད་གཏམས་པར་བལྟའོ། །དེ་ནས་ཉི་མ་དང་སྣ་ཚོགས་རྡོ་རྗེའི་འོད་ཀྱིས་ཡང་ཕྱོགས་མཚམས་སུ་ཐུག་པར་སྤྲོས་པས། ཡང་ཕྱིའི་སྒོའི་མཚམས་བཅིང་
བར་བྱའོ་ཞེས་པ་ནི་ཚིགས་བཅད་ཀྱི་དོན་ཏོ། །དེའི་དབུས་སུ་འབྱུང་བ་ཆེན་པོ་ནམ་མཁའི་རང་བཞིན་ཆོས་ཀྱི་འབྱུང་གནས་ཞེས་པ། རྡོ་རྗེ་འཆང་ཆེན་པོའི་རང་བཞིན་སྟོན་ཀའི་རི་བོང་འཛིན་ལྟར་དཀར་བ། འོག་ཕྲ་བ། སྟེང་ཡངས་པ། ཟུར་གསུམ་པ། ནང་ནམ་མཁའི་རང་བཞིན་ནོ། །དེའི་དབུས་
སུ་སྣ་ཚོགས་པདྨའི་འདབ་མའི་ལྟེ་བ་ལ་གནས་པའི་སྣ་ཚོགས་རྡོ་རྗེ་ཡངས་པའོ། །དེའི་གཞི་མ་ལ་འབྱུང་བ་ཆེན་པོ་བཞིའི་དཀྱིལ་འཁོར་གྱི་རྣམ་པ་བཞི་པོ་ལྷ་མོ་བཞིའི་རང་བཞིན་རྣམས་སྟེང་ནས་སྟེང་དུ་བལྟའོ། །དེ་ལ་དང་པོ་ཡཾ་གི་ཡི་གེ་ལས་རླུང་གི་དཀྱིལ་འཁོར་གཞུའི་དབྱིབས་ཅན་ནག་
པོ་དུ་བའི་མདོག་ཅན། རྩེ་ཟུར་གཉིས་སུ་གཡོ་བའི་བ་དན་གྱིས་མཚན་པའོ། །དེའི་སྟེང་དུ་རཾ་ཡིག་ལས་མེའི་དཀྱིལ་འཁོར་གྲུ་གསུམ་པ་དམར་པོ་ཟུར་དུ་རཾ་གྱིས་མཚན་པའོ། །དེའི་སྟེང་དུ་བཾ་ཡིག་ལས་ཆུའི་དཀྱིལ་འཁོར་ཟླུམ་པོ་དཀར་པོ་བུམ་པས་མཚན་པའོ། །དེའི་སྟེང་དུ་ལཾ་ཡིག་

ལས་དབང་ཆེན་གྱི་དཀྱིལ་འཁོར་གྲུ་བཞི་སེར་པོ་ཟུར་རྣམས་སུ་རྡོ་རྗེ་རྩེ་གསུམ་པས་མཚན་པའོ། །དེའི་སྟེང་དུ་བྷྲཱུཾ་ཡིག་ལས་སྐྱེས་པའི་འཁོར་ལོའོ། །ད་ནི་སྒོམ་པ་པོ་དེ་ཉིད་འཇིག་རྟེན་ལས་འདས་པའི་ཡེ་ཤེས་ཁྱབ་པ་པོ་ཉིད་དུ་གནས་ཏེ། དེ་ནས་སྣ་ཚོགས་རྡོ་རྗེའི་གཞིའི་
དབུས་ཀྱི་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་སྐྱེས་པའི་སངས་རྒྱས་ཀྱི་ཞིང་ཡོངས་སུ་དག་པ་བསྡུས་པའི་གཟུགས་ཐར་པ་ཆེན་པོའི་གྲོང་རྣམ་པར་སྣང་མཛད་ཀྱི་རང་བཞིན་རིན་པོ་ཆེ་སྣ་ཚོགས་པའི་རང་བཞིན་གྱི་ཁང་པ་བརྩེགས་པ། གྲུ་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་ཉེ་བར་
མཛེས། །སྟེགས་བུ་བཞི་ཡིས་ཡོངས་སུ་བསྐོར། །རྟ་བབས་བཞི་ཡིས་བརྒྱན་པ་སྟེ། །དྲ་བ་དྲ་ཕྱེད་མེ་ལོང་དང་། །དར་དང་མེ་ཏོག་བླ་བྲེས་དང་། །རྔ་ཡབ་རྡོ་རྗེའི་སྲད་བུས་མཛེས། །སངས་རྒྱས་འོད་ཚོགས་འཕྲོ་བ་སྟེ། །བ་དན་སྣ་ཚོགས་གཡོ་བའི་རྩེར། །དྲིལ་བུའི་སྒྲ་ནི་
ཕྱོགས་སུ་སྒྲོགས། །མཆོག་ཏུ་གྱུར་པའི་འདོད་པ་ལྔ། །ཉེ་བར་སྤྱོད་པས་དགྱེས་པའོ། །རིམ་གཉིས་གཅིག་ལ་པདྨ་བསྒོམ། །གཉིས་པ་གྲུ་གསུམ་དག་ཏུ་ཤེས། །དེའི་དབུས་སུ་ཨཱ་ལི་ཉིས་འགྱུར་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེའི་སྟེང་དུ་ཏཱཾ་ཡིག་
ཡོངས་སུ་གྱུར་པ་ལས་རྡོ་རྗེ། དེའི་ལྟེ་བ་ལ་ཏཱཾ་ཡིག་གོ། །དེ་ནས་ཡང་ཌ་ཌྷ་ད་དྷ་ཉིས་འགྱུར་དང་ལྡན་པའི་ཀཱ་ལི་ཉིས་འགྱུར་ཡོངས་སུ་གྱུར་པ་ལས་ཉི་མའོ། །གཉིས་ཀ་འདུས་པ་བདེ་བ་ཆེན་པོ་མཆོག་ཏུ་དགའ་བ་དང་ལྡན་པ་ཟླ་བའོ། །ཟླ་བ་མེ་ལོང་ཡེ་ཤེས་ལྡན། །རྟ་བདུན་པ་ནི་
མཉམ་ཉིད་ལྡན། །རང་ལྷའི་ས་བོན་མཚན་མ་དག་གོ། །སོ་སོར་རྟོག་པར་བརྗོད་པའོ། །ཐམས་ཅད་གཅིག་གྱུར་བྱ་ནན་ཏན། །རྫོགས་པ་ཆོས་ཉིད་དག་པའོ། །འདི་ནི་མངོན་པར་བྱང་ཆུབ་པ་རྣམ་པ་ལྔའོ། །དེ་ནས་ས་བོན་གྱི་འོད་ཟེར་གྱིས་སེམས་ཅན་རྣམས་རང་གི་ཡི་
དམ་ལྷའི་འཁོར་ལོའི་རྣམ་པར་བཀུག་སྟེ་དེ་ཉིད་ལ་ཞུགས་པ་དང་། མཚན་མ་དང་ས་བོན་ཡོངས་སུ་གྱུར་པ་ལས་རྣལ་འབྱོར་པས་ལྷ་མོ་སྒྲོལ་མ་བསྒོམ་པར་བྱ་སྟེ། ཕྱག་བརྒྱད་མ་ལ་ཞལ་བཞི་མ། །རྒྱན་རྣམས་ཀུན་གྱིས་རྣམ་པར་བརྒྱན། །གཞོན་ནུ་མ་ཡི་མཚན་གྱིས་འབར། །

ཁ་དོག་གསེར་དང་མཚུངས་པར་བསྒོམ། །དབང་བསྐུར་རྡོ་རྗེ་ཉི་མ་འཁྲུངས། །སངས་རྒྱས་བཞི་ཡི་དབུ་རྒྱན་ཆེ། །ལང་ཚོ་གཞོན་ལ་བབ་པའི་དུས། །གསེར་གྱི་རྣ་ཆ་གཡོ་བག་ཅན། །སྣ་ཚོགས་པདྨའི་གདན་ལ་བཞུགས། །འོད་ཟེར་དམར་པོས་རྣམ་པར་བརྒྱན། །རྡོ་རྗེ་དེ་བཞིན་
ཞགས་པ་དང་། །དུང་དང་མདའ་ནི་གཡས་ན་འཛིན། །རྡོ་རྗེ་ལྕགས་ཀྱུ་ཨུཏྤ་ལ། །གཞུ་དང་སྡིགས་མཛུབ་གཡོན་ན་འཛིན། །རྡོ་རྗེ་སྒྲོལ་མའི་རྣལ་འབྱོར་དག །སེམས་ཅན་དོན་ཀུན་ཕ་རོལ་ཕྱིན། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ས་གསུམ་པོ་ནི་བསྒྲུབ་པར་བྱ། །པདྨའི་
ཕྱོགས་བཞིའི་འདབ་མ་ལ། །ཤར་དུ་མེ་ཏོག་སྒྲོལ་མ་སྟེ། །ཁ་དོག་དཀར་པོ་ཡིད་འོང་མ། །ཨོཾ་ཡིག་ཡེ་ཤེས་ལས་རྫོགས་མ། །ཕྱག་ན་མེ་ཏོག་ཕྲེང་བ་འཛིན། །ཞལ་གཅིག་ཕྱག་ནི་གཉིས་མ་སྟེ། །རྒྱན་རྣམས་ཀུན་གྱིས་རྣམ་པར་བརྒྱན། །ལྷོར་ནི་སྤོས་ཀྱི་སྒྲོལ་མ་སྟེ། །མདོག་
ནག་མོ་ལ་གཟུགས་མཛེས་མ། །བདུག་སྤོས་སྣོད་ཀྱིས་ཕྱག་བྲེལ་མ། །རྒྱན་རྣམས་ཀུན་གྱིས་རྣམ་པར་བརྒྱན། །ནུབ་ཏུ་མར་མེའི་སྒྲོལ་མ་སྟེ། །ཕྱག་ན་མར་མེའི་ཀོང་བུ་འཛིན། །ཁ་དོག་སེར་ཞིང་ཆེར་བརྒྱན་མ། །གསེར་གྱི་རྣ་ཆ་གཡོ་བག་ཅན། །བྱང་དུ་དྲི་ཡི་སྒྲོལ་མ་སྟེ། །དྲི་
ཡི་དུང་ཕོར་ཕྱག་ན་བསྣམས། །ལྷ་མོ་ཁ་དོག་འོད་དམར་མཚུངས། །སྙིང་པོའི་དཀྱིལ་འཁོར་དུ་བསྒོམ་བྱ། །དེ་ནས་སྒོ་སྐྱོང་མ་རྣམས་བསམ། །ལྕགས་ཀྱུ་སོགས་ཀྱིས་རབ་ཕྱེ་བའོ། །གཡས་པའི་ཕྱག་ན་ལྕགས་ཀྱུ་སྟེ། །གཡོན་པས་སྡང་ལ་སྡིགས་མཛུབ་མཛད། །
ཉི་མའི་དཀྱིལ་འཁོར་དབུས་སུ་བཞུགས། །ཁ་དོག་དཀར་མོ་ཡིད་འོང་མ། །ལྕགས་ཀྱུ་མའོ། །གཡས་ཀྱི་ཕྱག་ན་ཞགས་པ་སྟེ། །གཡོན་གྱིས་སྡང་ལ་སྡིགས་མཛུབ་མཛད། །དཀྱིལ་འཁོར་དམར་པོའི་དབུས་སུ་བཞུགས། །གཟུགས་ནི་དཀར་སྐྱ་ཡིད་འོང་མ། །ཞགས་
པ་མའོ། །གཡས་ཀྱི་ཕྱག་ན་ལྕགས་སྒྲོག་སྟེ། །གཡོན་གྱིས་སྡང་ལ་སྡིགས་མཛུབ་མཛད། །རྡོ་རྗེ་དཀྱིལ་འཁོར་དབུས་སུ་བཞུགས། །ཁ་དོག་དམར་པོར་བསྒོམ་པར་བྱ། །རྡོ་རྗེ་ལྕགས་སྒྲོག་གོ། །རྡོ་རྗེ་དྲིལ་བུས་ཕྱག་བྲེལ་ཞིང་། །གཡོན་གྱིས་སྡང་ལ་སྡིགས་མཛུབ་མཛད། །

འོད་ཀྱི་དཀྱིལ་འཁོར་དབུས་སུ་བཞུགས། །མ་རྒད་དང་ནི་ཨུཏྤལ་མཚུངས། །རྡོ་རྗེ་དྲིལ་བུ་མའོ། །ཆོ་གའི་སྦྱོར་བས་མཚམས་རྣམས་ཀྱི། །ཆར་ནི་མཚན་མ་བཞི་རྣམས་ཏེ། །བྱང་སེམས་སྣོད་དང་རི་རབ་དང་། །མེ་ཐབ་དང་ནི་རྒྱལ་མཚན་ཆེ། །སྟེང་དུ་གཙུག་
ཏོར་རྣམ་རྒྱལ་ཏེ། །ཁ་དོག་དཀར་ལ་གཟུགས་མཛེས་མ། །གཡས་ཀྱི་ཕྱག་ན་འཁོར་ལོ་སྟེ། །གཡོན་གྱིས་སྡང་ལ་སྡིགས་མཛུབ་མཛད། །འོག་ཏུ་གནོད་མཛེས་རྣམ་བསྒོམ་བྱ། །གཡས་ཀྱི་ཕྱག་ན་སྦྲུལ་ཞགས་ཏེ། །གཡོན་གྱིས་གདུག་ལ་སྡིགས་མཛུབ་མཛད། །མདོག་ནག་དྲག་
ཤུལ་ཆེ་བའོ། །དེ་ལྟར་བསམས་ཏེ་སྔགས་སྤྲོ་ཞིང་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །ཕ་རོལ་ཕྱིན་པ་བཅུ་ཡི་གནས། །ཡི་གེ་བཅུས་ནི་ལྷ་མོ་བཅུར། །འབད་པ་ཡིས་ནི་བསྒོམས་གྱུར་ན། །ལས་ཀུན་རབ་ཏུ་སྒྲུབ་པར་བྱེད། །མིག་ལ་གཏི་མུག་རྡོ་རྗེ་དགོད། །རྣ་བར་
ཞེ་སྡང་རྡོ་རྗེ་སྟེ། །དེ་བཞིན་ཕྲག་དོག་རྡོ་རྗེ་སྣར། །ཁ་ལ་འདོད་ཆགས་རྡོ་རྗེའོ། །རེག་ལ་སེར་སྣ་རྡོ་རྗེ་སྟེ། །སྙིང་གར་བདག་མེད་རྣལ་འབྱོར་མའོ། །སྐྱེ་མཆེད་རྣམས་སུ་ཤེས་བྱ་སྟེ། །ཉོན་མོངས་མུན་པ་ཀུན་སེལ་བའོ། །འདི་ནི་མིག་སོགས་བྱིན་བརླབས་ཏེ། །ཞལ་གཅིག་
ཕྱག་ནི་གཉིས་པར་ཤེས། །སྣ་ཚོགས་གཟུགས་ལྡན་བཙུན་མོ་ནི། །གྲི་གུག་ཐོད་པས་ཕྱག་རྣམས་བྲེལ། །སྲོག་སོང་སྟེང་ན་ཡང་དག་བཞུགས། །དེ་ནས་ལུས་ངག་ཡིད་བྱིན་བརླབ། །ཨོཾ་ཡིག་སྐུ་ཡི་རྡོ་རྗེ་སྟེ། །རྒྱལ་པོ་ཆེན་པོས་རྣམ་པར་བརྒྱན། །ཧཱུཾ་ཡིག་ཐུགས་ཀྱི་རྡོ་རྗེ་
སྟེ། །རྒྱལ་ཆེན་རྡོ་རྗེ་སེམས་དཔའ་བཞུགས། །ཨཱཿཡིག་དེ་ཉིད་དམ་པ་སྟེ། །ངག་ལམ་གསལ་བར་བྱེད་པར་འདོད། །མ་མོ་འདི་ཀུན་ཉིད་ཀྱི་ནི། །སྙིང་གར་ཡེ་ཤེས་རང་བཞིན་དགོད། །ཡེ་ཤེས་སེམས་དཔའི་སྦྱོར་བ་ཡིས། །སངས་རྒྱས་བྱང་ཆུབ་ཐོབ་པར་འགྱུར། །རང་
སྔགས་ཡི་གེ་ལས་བྱུང་བའི། །ཕྱག་རྒྱ་མཚན་མ་ཡོངས་སུ་བརྟག །སྤྲོ་དང་བསྡུ་བ་བྱས་པ་ཡིས། །དཀྱིལ་འཁོར་པ་ཡི་རྣམ་པར་བྱུང་། །ནམ་མཁའི་དབྱིངས་ཀྱི་དབུས་བཞུགས་པ། །ཡེ་ཤེས་དཀྱིལ་འཁོར་བསྒོམ་པར་བྱ། །ཀུན་ནས་སྣ་ཚོགས་གཟུགས་སུ་ནི། །ཡེ་ཤེས་ལྔ་

ཡི་ཡོན་ཏན་བཀོད། །མཆོད་པ་ཆེན་པོས་མཆོད་བྱ་ཞིང་། །བསྙེན་བཀུར་ཆེན་པོས་བཀུར་སྟི་བྱ། །སྒོ་སྐྱོང་མ་ཡི་སྦྱོར་བ་ཡིས། །ཡེ་ཤེས་རྒྱ་མཚོ་བསྒྲུབ་བྱ་སྟེ། །ཡེ་ཤེས་འཁོར་ལོ་ལ་མཉམ་གཞུག །རྣལ་འབྱོར་སངས་རྒྱས་ཀུན་མཉམ་པར། །སྐད་ཅིག་གིས་ནི་གཉིས་མེད་འགྱུར། །
ཨོཾ་བཛྲ་ཨཾ་ཀུ་ཤཱི་ཨཱ་ཀཪྵ་ཡ་ཛཿཨོཾ་བཛྲ་པཱ་ཤཱི་པྲ་བེ་ཤ་ཡ་ཧཱུཾ། ཨོཾ་བཛྲ་སྥོ་ཊ་བནྡྷ་ཡ་བཾ། ཨོཾ་བཛྲ་ཨཱ་བེ་ཤ་བ་ཤིཾ་ཀུ་རུ་ཧོཿརང་གི་སྙིང་གའི་ས་བོན་ལས་འཐོན་པའི་འོད་ཟེར་ལྕགས་ཀྱུ་ལྟ་བུ་རྣམས་ཀྱིས་ཁམས་གསུམ་ན་བཞུགས་པའི་སངས་རྒྱས་རྣམས་སྤྱན་དྲངས་ཏེ་མ་མོ་བརྒྱད་རྣམས་
ཀྱིས་ཡང་དག་པར་མཆོད་ལ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྦྱིན་པ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའ་རྡོ་རྗེ་དེང་བདག་སྩོལ། །དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ་ཞེས་དབང་བསྐུར་ཞུ་བས། དབང་
བསྐུར་བ་ནི་རྡོ་རྗེ་ཆེ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཞེས་འདོན་ཅིང་སངས་རྒྱས་ཧེ་རུ་ཀའི་གཟུགས་ཅན་རྣམས་ཀྱིས་དེ་བཞིན་གཤེགས་པ་ལྔའི་བདག་ཉིད་བདུད་རྩི་ལྔ་འཛིན་པའི་བུམ་པ་ལྔས་དབང་
བསྐུར་རོ། །དབང་བསྐུར་བ་ན་མེ་ཏོག་གི་ཆར་འབབ་པར་འགྱུར་རོ། །རྔ་བོ་ཆེའི་སྒྲ་སྒྲོགས་སོ། །གུར་གུམ་གྱི་ཆར་འབེབས་སོ། །གཟུགས་རྡོ་རྗེ་མ་ལ་སོགས་པས་མཆོད་པར་བྱེད་དོ། །སྤྱན་མ་ལ་སོགས་པས་རྡོ་རྗེའི་གླུས་སྟོད་པར་བྱེད་དོ། །དབང་བསྐུར་བས་སྤྱི་བོར་རྡོ་རྗེ་ཉི་མ་
བསྐྱེད་དོ། །དབུ་རྒྱན་གྱི་ཕྱོགས་བཞིར་དེ་བཞིན་གཤེགས་པ་རྣམ་པར་སྣང་མཛད་དང་། མི་བསྐྱོད་པ་དང་། འོད་དཔག་མེད་དང་། དོན་ཡོད་གྲུབ་པ་རྣམས་སོ། །རིམ་པ་དབུས་མའི་ལྷ་མོ་བཞི་དང་། སྒོ་སྐྱོང་མ་རྣམས་ཀྱི་དབུ་རྒྱན་ལ་ཡང་རིམ་པ་བཞིན་ནོ། །གཙུག་ཏོར་ལ་ནི་རིན་ཆེན་
དབང་ཕྱུག་གོ། །གནོད་མཛེས་ཀྱི་དབུ་རྒྱན་ལ་ནི་མི་བསྐྱོད་པའོ། །ཞེ་སྡང་རྡོ་རྗེ་ཕྱག་འཚལ་འདུད། །གཏི་མུག་རྡོ་རྗེ་ཕྱག་འཚལ་བསྟོད། །སེར་སྣ་རྡོ་རྗེས་བདག་ལ་སྐྱོབས། །འདོད་ཆགས་རྡོ་རྗེ་བདག་ལ་སྩོལ། །ང་རྒྱལ་ཆེ་དང་ཕྲག་དོག་ཆེ། །མགོན་པོ་དམ་ཚིག་རྡོ་རྗེ་ཀུན། །

ལས་ཀུན་རབ་ཏུ་སྒྲུབ་པ་པོ། །རྡོ་རྗེ་ཅན་ཀུན་བདག་དགྱེས་མཛོད། །བསྟོད་པའོ། །གཙང་ཞིང་གཙང་མ་ལས་བྱུང་བའི། །ལྷ་རྫས་དགེ་བའི་མེ་ཏོག་འདི། །བདག་ནི་གུས་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །མེ་ཏོག་གོ། །ནགས་ཚལ་
བཅུད་འདི་ཡིད་འོང་བ། །གང་ཞིག་དྲི་བཟང་བདུག་སྤོས་མཆོག །བདག་ནི་གུས་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །བདུག་སྤོས་སོ། །སྲིན་པོ་འཇོམས་ཤིང་དག་བྱེད་ལ། །དགེ་ཞིང་མུན་པ་རྣམ་སེལ་བ། །བདག་ནི་གུས་པས་འབུལ་ལགས་
ཀྱིས། །བཞེས་ནས་བདག་ལ་དགྱེས་པར་མཛོད། །མར་མེའོ། །གཙང་ཞིང་སྐྱེ་གནས་གཙང་ལས་བྱུང་། །ལྷ་རྫས་དགེ་བའི་དྲི་བཟང་འདི། །བདག་ནི་གུས་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །དྲི་བཟང་ངོ་། །དེའི་རྗེས་སུ་ཡཾ་ཡིག་སྔོན་པོ་
ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུ་ལྟ་བུ་བ་དན་གྱིས་མཚན་པའོ། །ས་བོན་རཾ་དམར་པོ་ལས་བྱུང་བའི་མེའི་དཀྱིལ་འཁོར་གྲུ་གསུམ་པའོ། །སྟེང་དུ་ཨཿཡིག་དམར་པོ་ལས་བྱུང་བའི་པདྨའི་སྣོད་དོ། །ས་བོན་བྷྲཱུཾ་ཨཱཾ་ཛྲཱིཾ་ཁཾ་ཧཱུཾ་རྣམས་ཡོངས་སུ་གྱུར་པ་ལས། དྲི་དང་ཉི་
མ་དང་ཟླ་བ་དང་སྨན་དང་ཆུའི་མཚན་ཉིད་ཅན་ས་བོན་དེ་རྣམས་ཀྱིས་བྱིན་གྱིས་བརླབས་པ་གྲངས་ཇི་བཞིན་དུ་དེ་བཞིན་གཤེགས་པ་ལྔའི་རང་བཞིན་བདུད་རྩི་ལྔའོ། །ས་བོན་གོ་ཀུ་ད་ཧ་ན་ཞེས་པ་ལྔ་ཡང་བསམ་མོ། །དེའི་སྟེང་མཐོ་གང་ཙམ་འཕགས་པར་ཟླ་བ་ལ་གནས་པའི་ཧཱུཾ་ཡིག་ལས་
བྱུང་བའི་རྡོ་རྗེ་རྩེ་ལྔ་པ་ཆེན་པོ་དཀར་བ་བསམ། དེའི་འོག་མ་ཨོཾ་ཡིག་རྣམ་པར་བསམ་མོ། །རླུང་གིས་བསྐུལ་བས་མེའི་དཀྱིལ་འཁོར་གྱི་མེའི་སྟེང་གི་རྡོ་རྗེའི་མེས་དེ་དག་ཐམས་ཅད་བསྐོལ་བར་བསམས་ཏེ། དེའི་རླངས་པས་ཨོཾ་དང་རྡོ་རྗེ་ཞུ་བས་དེ་ཉིད་དུ་བདུད་རྩི་མར་ཁུ་ལྟ་བུར་རོ་མཉམ་
པར་གྱུར་པར་བསམས་ནས། དེའི་སྟེང་དུ་ཨོཾ་ཡིག་དཀར་པོ་བསམས་པའི་འོད་ཀྱིས་འཇིག་རྟེན་གསུམ་གྱི་ཁོངས་ན་གནས་པའི་བདུད་རྩི་ཐམས་ཅད་བཀུག་སྟེ་དེའི་ནང་དུ་ཆུད་པར་བསྒོམ། ཆོས་ཀྱི་དབྱིངས་དང་མཉམ་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་

གནས་པའི་ཡེ་ཤེས་ཀྱི་བདུད་རྩི་བཀུག་སྟེ། དེ་ཉིད་དང་ལྷན་ཅིག་ཏུ་བྱས་ནས། དེའི་སྟེང་དེ་ཉིད་གསུམ་བསམ་ཞིང་དེ་ཉིད་ཀྱིས་མངོན་པར་བསྔགས་ཏེ། དཀྱིལ་འཁོར་པ་ཐམས་ཅད་ཀྱི་ཐུགས་ཀར་དཀྱིལ་འཁོར་གྱི་འཁོར་ལོ་བསམས་ནས། དེ་དག་གི་ལྗགས་ལ་ཤིན་ཏུ་དཀར་བའི་ཧཱུཾ་
ལས་སྐྱེས་པའི་རྡོ་རྗེ་དཀར་པོ་ནས་འབྲུའི་ཚད་ཙམ་པ་བསམས་ཏེ། བདུད་རྩི་ལྔ་པོ་དེས་དཀྱིལ་འཁོར་པ་རྣམས་དང་བདག་ཉིད་མཆོད་པར་བྱའོ། །དེས་དཀྱིལ་འཁོར་རྫོགས་པའོ། །ཐུན་མཚམས་གསུམ་དུ་བསྒོམ་ཞིང་ལྡང་བར་བྱ་སྟེ། རྟག་ཏུ་ལྷའི་སྐུར་གནས་པར་བྱའོ། །དེ་ལ་
འདི་ནི་བཟླས་པའི་སྔགས་སོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྔགས་འདི་མཆོག་དང་གཙོ་བོ་སྟེ། །སངས་རྒྱས་ཀུན་གྱིས་ཕྱག་མཛད་པ། །བཀླགས་པས་འགྲུབ་བྱེད་དྲག་པོ་སྟེ། །རྡོ་རྗེ་གུར་གྱིས་གསུངས་པའོ། །དེ་ནས་གཞན་ཡང་གཟུངས་སྔགས་ནི། །ན་མཿཨཱརྱཱ་བ་ལོ་ཀི་
ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚ་པྲ་དུཥྚ། ན་མ་ཀྲྀ་ཏེ་ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚ་སྟཾ་བྷ་ནི་ཏཱ་རེ་སྭཱ་ཧཱ། སྔགས་འདིས་བླ་གོས་ཀྱི་གྲྭ་ཟུར་ལ་ལན་བདུན་མངོན་པར་
བསྔགས་ཏེ་མདུད་པ་བཅིངས་ནས་འབྲོག་དགོན་པར་སོང་ཡང་གང་གིས་ཀྱང་བག་ཚ་བར་མི་འགྱུར་ཏེ། སྟག་དང་ཆོམ་རྐུན་དང་། ཆུ་སྲིན་དང་སྦྲུལ་དང་། གླང་པོ་ཆེ་དང་། མ་ཧེ་དང་། དོམ་དང་། བ་མེན་ལ་སོགས་པ་རྣམས་མཚན་དྲན་པ་ཙམ་གྱིས་རླག་པ་དང་ཞུམ་པར་བྱེད་
དོ། །སྔགས་འདིས་ཨུཏྤ་ལའི་སྦྱིན་སྲེག་ཇི་སྲིད་ལན་བརྒྱ་རྩ་བརྒྱད་དུ་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་མེ་བ་ཤ་མཱ་ན་ཡ་སྭཱ་ཧཱ། ཡང་སྔགས་དེ་ཉིད་ཀྱིས་ཁྲའི་སྒྲོ་ལ་ལན་སུམ་ཅུ་རྩ་གཉིས་སུ་བཟླས་ཏེ། དགྲའི་ཁྱིམ་དུ་སྦས་ན་ཉི་མ་བདུན་གྱིས་སྐྲོད་པར་བྱེད་དོ། །ཨོཾ་ཏཱ་རེ་ཏུཏྟཱ་རེ་
ཏུ་རེ་ཙ་ལ་པྲ་ཙ་ལ་སཱི་གྷྲ་གཱ་མི་ནི་དེ་བ་ཏངྟ་ཨུཙྪཱ་ཊ་ཡ་ཧཱུཾ་ཕཊ། དེ་ནས་གཞན་ཡང་སྦྱོར་བ་འབྱུང་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཾ་ཀུ་མཱ་རེ་མ་ཧཱ་མུད་བ་བཱི་ཧེ་ན་སྱཿཔྲ་ཏི་པྲ་ཡཙྪ་ཏུ་སྭཱ་ཧཱ། མྱོས་བྱེད་གཏུམ་པོའི་ས་བོན་དང་། །སྨྱོ་བར་བྱེད་པ་ཉིད་དང་ནི། །ཨ་ཤོ་ཀ་ཡི་ལོ་མ་

དང་། །མེ་ཏོག་སྟོང་ཕྲག་ལྔར་བསྲེག་པའམ། །སྦྲང་རྩི་བུ་རམ་མར་བཅས་པའི། །སྦྱིན་སྲེག་བུ་མོ་འགྲུབ་པར་བསྔགས། །ཞག་བདུན་ཚེ་ན་རྣལ་འབྱོར་པས། །རང་འདོད་པ་ཡི་བུ་མོ་ཐོབ། །དེ་ནས་གཞན་ཡང་སྦྱོར་བ་འབྱུང་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཾ་
སྭ་སྭཱ་ན་དཱ་ཀཪྵ་ཡ་མཱ་ན་ཀེ་ཛཿསྔགས་འདིས་རྒྱ་ཤུག་གི་ཚེར་མ་རང་བྱུང་གི་མེ་ཏོག་ཏུ་སྦགས་ཏེ་སྟོང་ཕྲག་ལྔ་སྦྱིན་སྲེག་བྱས་ན། མིའི་བདག་པོའི་བུ་མོ་ཡང་འགུགས་པར་འགྱུར་རོ། །དེ་ནས་གཞན་ཡང་སྦྱོར་བ་འབྱུང་སྟེ། ཟླ་མཚན་གྱིས་གོས་པའི་རས་ལ། བཅོམ་ལྡན་འདས་མ་ཞལ་
གཅིག་ཕྱག་གཉིས་མ་ལྕགས་ཀྱུ་དང་ཨུཏྤ་ལ་དང་ཞགས་པ་ཕྱག་ན་བསྣམས་པའི་རྣམ་པར་བྲིས་ཏེ། དེའི་མདུན་དུ། ལྷ་རྫས་དགེ་བའི་མེ་ཏོག་འདི། །ཞེས་པ་ལ་སོགས་པས་མཆོད་པར་བྱའོ། །ཕྱི་ནས་བསྒོམ་པ་དང་ལྡན་པར་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱཾ་ཀ་ནྱཾ་མ་མེ་
པི་ས་ཏཾ་སྭ་པ་ནཱཾ་ཀ་ཐ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་རོ། །ཞགས་པ་ཡིས་ནི་མགུལ་བཅིངས་ཏེ། །ལྕགས་ཀྱུ་ཡིས་ནི་རྣམ་དྲངས་ནས། །བསྒྲུབ་བྱ་རྐང་འོག་ཏུ་བསམས་ནས། །བྲན་མོའི་ཚུལ་དུ་སྤྱོད་པར་བྱེད། །དེ་ནས་གཞན་ཡང་རབ་ཏུ་སྦྱོར་བ་འབྱུང་སྟེ། སྒྲོལ་
མའི་གཟུངས་ཀྱིས་ལན་བདུན་མངོན་པར་བསྔགས་པ་བྱས་ནས། བདག་གི་མིག་གཉིས་ལ་མིག་སྨན་བཞིན་དུ་བྱུགས་ཏེ། རྒྱལ་པོའི་ཁྱིམ་དུ་ཞུགས་ན་རྒྱལ་པོ་དེས་སློབ་མ་བཞིན་དུ་བསྙེན་བཀུར་བྱེད་པར་འགྱུར་རོ། །འགལ་བ་མི་སྨྲ་ཞིང་བཀའ་དྲིན་སྩོལ་བར་འགྱུར་རོ། །སྙན་
པར་སྨྲ་བར་བྱེད་ཅིང་བྲན་བཞིན་དུ་ཉེ་བར་འགྲོ་སྟེ། ཁྲོས་པ་ཡང་དབང་དུ་འགྱུར་རོ། །འདི་ནི་མངོན་སུམ་དུ་མཐོང་བ་ངོ་མཚར་དང་བཅས་པའོ། །དེ་ནས་གཞན་ཡང་རབ་ཏུ་སྦྱོར་བ་འབྱུང་སྟེ། སྒྲོལ་མའི་གཟུངས་ལན་བརྒྱར་བརྗོད་ནས། སྦྲུལ་ཁ་གཉིས་པའི་སོ་དུག་ཐལ་བར་བྱ་སྟེ།
བ་དམར་མོའི་མར་ཁུར་ཨརྐའི་ཤིང་བལ་གྱི་སྡོང་བུ་བྱས་ནས་རབ་ཏུ་སྦར་ཞིང་མིག་སྨན་དབབ་པར་བྱའོ། །མིག་སྨན་རྡོ་རྗེ་ཉི་མ་དང་། རྡོ་རྗེ་ཆོས་དག་དང་མཉེས་ལ་རྟ་མཆོག་གི་ཤ་ཆེན་གྱིས་བདུག་པར་བྱའོ། །ཐལ་བ་དང་ལྷན་ཅིག་མིག་ལ་བསྐུས་ཏེ། རྡོ་རྗེའི་མིག་གིས་

གང་ལ་བལྟས་པ་དེ། གལ་ཏེ་པདྨ་གར་གྱི་དབང་ཕྱུག་མི་འབབ་ན་དེའི་ཚེ་བདག་སྒྲོལ་མ་མ་ཡིན་ཞིང་། བདག་གིས་སངས་རྒྱས་བཅོམ་ལྡན་འདས་རྣམས་བཀྲོངས་པར་འགྱུར་བ་ལགས་སོ། །དེ་ནས་གཞན་ཡང་རབ་ཏུ་སྦྱོར་བ་འབྱུང་སྟེ། བྱིས་པ་སོ་མ་སྐྱེས་པའི་ལྕེ་བླངས་ལ། སྒྲོལ་མའི་
གཟུངས་ལན་བདུན་མངོན་པར་བསྔགས་པ་བྱས་ནས། ཤིང་བྷྲྀངྒ་ར་ཛའི་རྩ་བ་གི་ཝང་དང་ལྷན་ཅིག་ཏུ་བྱས་ནས། དཔྲལ་བར་ཐིག་ལེ་ཡོངས་སུ་བྱས་ན། གང་དང་གང་ལ་བལྟས་པ་དེ་དང་དེ་དབང་དུ་བྱེད་དོ། །དེ་ནས་གཞན་ཡང་རབ་ཏུ་སྦྱོར་བ་འབྱུང་སྟེ། ལྟོ་བའི་སྲིན་བུ་ལ་
གཟུངས་ལན་བདུན་མངོན་པར་བསྔགས་པ་བྱས་ནས། རྡོ་རྗེ་ཆོས་དང་ལྷན་ཅིག་གོ་ལ་ལྡན་པར་བུ་མོ་གང་ལ་བྱིན་ན་སྦྱིན་པ་མཆོག་འདི་ཟོས་པ་ཙམ་གྱིས་མི་སྤོང་བ་དང་། གཞན་ལ་མི་དགའ་བ་དང་། གཞན་དུ་མི་འགྲོ་བ་དང་། སྐྱེས་པ་གཞན་མི་འདོད་པ་དང་། རང་གི་བདག་
པོ་ཡང་སྤོང་ངོ་། །དེ་ནས་གཞན་ཡང་སྦྱོར་བ་འབྱུང་སྟེ། མར་ཁུ་ཆེན་པོས་བདག་ཉིད་ལ་བྱུགས་ཏེ། འོད་དཔག་མེད་བསྒོམས་ནས་སྒྲོལ་མའི་གཟུངས་བཟླས་པར་བྱའོ། །བཟླས་པའི་མཐར་འབྲས་སཱ་ལུ་བཏགས་པས་བསྐུས་ཏེ། དྲིལ་ཕྱིས་བྱས་པའི་དྲི་མ་ལ་སྣུམ་ཁུར་
བྱས་ནས་གང་ལ་བྱིན་པ་དེ་འཚོ་ཆས་ལྔ་དང་བྲལ་ཡང་མི་སྤོང་ངོ་། །དེ་ནས་གཞན་ཡང་སྦྱོར་བར་འགྱུར་ཏེ། ཟླ་བ་གཟས་གཟུང་བའི་དུས་སུ་སྒྲོལ་མའི་གཟུངས་བཟླས་པ་བྱེད་ཅིང་བསྙེན་པར་བྱས་ཏེ། དེ་ལས་བྱུང་བའི་འཇིག་རྟེན་དབང་ཕྱུག་བླངས་ལ། དུང་གི་ཕྱེ་མ་དང་བསྣོལ་
ཏེ་རབ་ཏུ་མྱོས་མ་གང་ཞིག་ལ་བྱིན་ན། ཇི་སྲིད་ལྔ་དང་བྲལ་ཡང་དེ་རྗེས་འབྲང་ངོ་། །དེ་ནས་གཞན་ཡང་སྦྱོར་བ་འབྱུང་སྟེ། སྒྲོལ་མའི་གཟུངས་སྔགས་ཀྱིས་མ་ད་ནའི་འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ལ། མྱོས་བྱེད་ཀྱི་འབྲས་བུ་དེ་དང་རྟ་མགྲིན་ལྷན་ཅིག་བྱས་ཏེ་
གང་ལ་བསྐུས་པ་དེ་དབང་དུ་འགྱུར་རོ། །དེ་ནས་གཞན་ཡང་རབ་ཏུ་སྦྱོར་བ་འབྱུང་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་སྱ་བནྡྷ་ན་མུག་ཏིཾ་ཀུ་རུ་མུཿསྭཱ་ཧཱ་ཞེས་བྱ་བའི་སྔགས་འདིས། ཤིང་ཨརྐའི་ལོ་མ་ལ་བསྒྲུབ་བྱའི་མིང་ནང་དུ་ཆུད་པར་བྲིས་ལ། ཉ་ཁྱི་བའི་ཁྱིམ་དུ་སྦས་ན་དེ་

བཅིངས་པ་ལས་ངེས་པར་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་འདི། །བྲིས་པས་བསོད་ནམས་གང་བསགས་པ། །དེ་ཡིས་འཇིག་རྟེན་འདི་རྣམས་ནི། །བདེ་གཤེགས་ཉིད་དུ་འགྲོ་བར་ཤོག །འདི་ནི་དཔལ་རིན་ཆེན་འབྱུང་གནས་ཞི་བའི་ཞབས་ཀྱིས་
མཛད་པའོ། །པཎྜི་ཏ་ཆེན་པོ་བུདྡྷ་ཤྲཱི་ཛྙཱ་ན་དང་། པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲ་ལ་ཞུས་ཤིང་མཉན་ནས། ཡུལ་དབུས་ཀྱི་སྒྲ་བསྒྱུར་བ་ཆག་ལོ་ཙཱ་བ་དགེ་སློང་དགྲ་བཅོམ་གྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཨཱརྱ་བཛྲ་ཏཱ་ར་སཱ་དྷ་ནཾ། བོད་སྐད་དུ། འཕགས་
མ་རྡོ་རྗེ་སྒྲོལ་མའི་སྒྲུབ་ཐབས། བཅོམ་ལྡན་འདས་མ་འཕགས་མ་རྡོ་རྗེ་སྒྲོལ་མ་ལ་ཕྱག་འཚལ་ལོ། །ཕུན་སུམ་ཚོགས་ཀུན་སྐྱེད་བྱེད་པའི། །སྒྲོལ་མ་ལ་བཏུད་གུས་པས་དེ། །མན་ངག་བཞིན་དུ་བསྡུས་ནས་སུ། །དེ་ཡི་སྒྲུབ་ཐབས་བྲི་བར་བྱ། །ཐོག་མར་རེ་ཞིག་རྣལ་འབྱོར་པས་དྲི་
ཞིམ་པོའི་མེ་ཏོག་ལ་སོགས་པ་ཐོགས་ཏེ། ཡིད་དུ་འོང་བའི་བསམ་གཏན་གྱི་ཁང་པར་རབ་ཏུ་ཞུགས་ཏེ། བདེ་བའི་སྟན་ལ་འདུག་ནས་སྐྱིལ་ཀྲུང་བཅས་ཏེ། སྣ་ལ་བལྟ་ཞིང་ལྟེ་བའི་རྩ་བ་ལ་སེམས་རྩེ་གཅིག་ཏུ་བྱ་ཞིང་། རང་གི་སྙིང་གར་ཨོཾ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་
སྟེང་དུ་ཡི་གེ་ཏཱཾ་སེར་པོ་ཡོངས་སུ་གྱུར་པ་ལས་བྱུང་བའི་རྡོ་རྗེ་ལ་གནས་པའི་ཏཱཾ་ཡིག་བསྒོམ་པར་བྱའོ། །དེ་ལས་འོད་ཟེར་དྲ་བ་ལྕགས་ཀྱུ་ལྟ་བུ་སྤྲོས་པས་འོག་མིན་གྱི་གནས་ཀྱི་བར་དུ་གནས་པའི་བཅོམ་ལྡན་འདས་མའི་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་རྣམ་པར་བལྟས་ཏེ།
དེ་ནས་རང་གི་སྙིང་ག་ན་གནས་པའི་ས་བོན་ལས་འཕྲོས་པའི་མེ་ཏོག་མ་ལ་སོགས་པའི་ལྷ་མོ་རྣམས་ཀྱིས་མེ་ཏོག་ལ་སོགས་པས་དཀྱིལ་འཁོར་ལ་གནས་པའི་ལྷ་མོའི་ཚོགས་ལ་མཆོད་ཡོན་ཕུལ་ལ་མཆོད་པར་བསམས་ཏེ། ཨོཾ་ཨཱཿབཛྲ་པུཥྤེ་ཏཾ་བཛྲ་ཏཱ་རེ་བཛྲ་པུཥྤཾ་པྲ་ཏཱི་ཙྪ་ཧཱུཾ་
སྭཱ་ཧཱ། ཨོཾ་ཨཱཿབཛྲ་པུཥྤེ་ཨོཾ་རཏྣ་སཾ་བྷ་བ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། དབུས་སུའོ། །ཨོཾ་ཨཱཿབཛྲ་པུཥྤེ་ཨོཾ་བཛྲ་པུཥྤ་ཏཱ་རེ་བཛྲ་པུཥྤཾ་པྲ་ཏཱིཙྪ་སྭཱ་ཧཱ། ཨོཾ་ཨཱཿབཛྲ་པུཥྤེ་ཨོཾ་བཻ་རོ་ཙ་ན་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཤར་དུའོ། །ཨོཾ་ཨཱཿབཛྲ་པུཥྤེ་ཏ་དྷཱུ་པ་ཏཱ་རེ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་

ཧཱུཾ། ཨཀྵོ་བྷྱ་བཛྲ་པུཥྤེ་ཛ་པྲ་ཏཱིཙྪ་ཧཱུཾ་སྭཱ་ཧཱ། ལྷོ་རུའོ། །ཨོཾ་ཨཱཿབཛྲ་པུཥྤེ་རེ་དཱི་པ་ཏཱ་རེ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཧྲིཿཨ་མི་ཏཱ་བྷཱ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ནུབ་ཏུའོ། །ཨོཾ་ཨཱཿབཛྲ་པུཥྤེ་རུ་གནྡྷ་ཏཱ་རེ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཁཾ་ཨ་མོ་གྷ་སིདྡྷེ། བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ།
བྱང་དུའོ། །ཨོཾ་ཨཱཿབཛྲ་པུཥྤེ་ཏ་བཛྲཱཾ་ཀུ་ཤི་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཨོཾ་བཻ་རོ་ཙ་ན་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། དཀྱིལ་འཁོར་རིམ་པ་གཉིས་པའི་ཤར་དུའོ། །ཨོཾ་ཨཱཿབཛྲ་པུཥྤེ་རེ་བཛྲ་པཱ་ཤི་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཧཱུཾ་ཨཀྵོ་བྷྱ་བཛྲ་པུཥྤཾ་པྲ་ཏཱི་ཙྪ་ཧཱུཾ་
སྭཱ་ཧཱ། ལྷོ་རུའོ། །ཨོཾ་ཨཱཿབཛྲ་པུཥྤེ་ཏུ་བཛྲ་སྥོ་ཊ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཧྲཱིཿཨ་མི་ཏཱ་བྷཱ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ནུབ་ཏུའོ། །ཨོཾ་ཨཱཿབཛྲ་པུཥྤེ་རེ་བཛྲ་གྷཎྜེ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཁཾ་ཨ་མོ་གྷ་སིདྡྷེ་བཛྲ་པུཥྤེ་པྲ་ཏཱི་ཙྪ་ཧཱུཾ་སྭཱ་ཧཱ། བྱང་དུའོ། །
ཨོཾ་ཨཱཿབཛྲ་པུཥྤེ་སརྦ་ཨུཥྞཱི་ཥ་བི་ཛ་ཡེ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཨོཾ་རཏྣ་སཾ་བྷ་བ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། དཀྱིལ་འཁོར་གྱི་སྟེང་དུའོ། །ཨོཾ་ཨཱཿབཛྲ་པུཥྤེ་ཧཱ་སུཾ་བྷ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཧཱུཾ་ཨཀྵོ་བྷྱ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། དཀྱིལ་འཁོར་
གྱི་འོག་ཏུའོ། །ཨོཾ་ཨཱཿབཛྲ་པུཥྤེ་གྷ་བོ་དྷི་ཙིཏྟ་གྷ་ཊ་བཛྲ་པུཥྤཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཧཱུཾ་ཨ་ཀྵོ་བྷྱ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། མེའི་མཚམས་སུའོ། །ཨོཾ་ཨཱཿཔུཥྤེ་པུཾ་སུ་མེ་རོ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཨོཾ་བཻ་རོ་ཙ་ན་བཛྲ་པུཥྤཾ་པྲ་ཏཱི་ཙྪ་ཧཱུཾ་
སྭཱ་ཧཱ། སྲིན་པོ་རུའོ། །ཨོཾ་ཨཱཿབཛྲ་པུཥྤེ་བཾ། བཧྣི་ཀུཎྜ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཧྲཱིཿཨ་མི་ཏཱ་བྷཱ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། རླུང་དུའོ། །ཨོཾ་ཨཱཿབཛྲ་པུཥྤེ་དྷྭཾ་མ་ཧཱ་དྷྭ་ཛ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། ཨོཾ་ཨཱཿབཛྲ་པུཥྤེ་ཁཾ་ཨ་མོ་གྷ་སིདྡྷེ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། དབང་
ལྡན་དུའོ། །གོང་བཞིན་དུ་བདུག་སྤོས་དང་མར་མེ་དང་ལྷ་བཤོས་ལ་སོགས་པ་ཉེ་བར་བཤམས་ཏེ། དེ་ནས་བཅོམ་ལྡན་འདས་མའི་འཁོར་ལོའི་མདུན་ཕྱོགས་ཙམ་དུ་ཕྱག་འཚལ་བ་དང་། སྡིག་པ་བཤགས་པ་དང་། ཕྱིས་མི་བྱེད་པར་དམ་བཅའ་བ་དང་། བསོད་ནམས་

ལ་རྗེས་སུ་ཡི་རང་བ་དང་། སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་རྒྱུད་ལ་བསྟེན་པ་དང་། བདག་དབུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། ཆོས་ཀྱི་འཁོར་ལོ་བསྐོར་བ་ལ་སོགས་པ་བླ་ན་མེད་པའི་མཆོད་པའི་ཡན་
ལག་བདུན་པ་བྱ་བའི་ཚིག་ནི། རྣམ་རྟོག་མ་ལུས་ནུབ་པའི་རྒྱུར་གྱུར་པའི། །རྟག་ཏུ་སྲིད་ཞི་མཉམ་ཉིད་ལྟ་ལྡན་པའི། །བདེ་བ་དཔེ་མེད་རོ་ནི་ཤར་བ་ཡི། །རྣལ་འབྱོར་མ་ཡི་འཁོར་ལོ་ཕྱག་འཚལ་ལོ། །ཐོག་མ་མེད་པའི་དུས་ནས་ཡང་ཡང་འཁོར་བར་སྐྱེས་པར་གྱུར་ཅིང་། གང་དང་
གང་དུ་སྐྱེས་པར་གྱུར་པ་དེ་དང་དེར་སྡིག་པ་གང་ཞིག་བགྱིས་པའི་ལས་ཐམས་ཅད་སོ་སོར་བཤགས་སོ། །བཅོམ་ལྡན་འདས་མའི་མདུན་དུ་ཡང་ཕྱིས་མི་བྱེད་པར་དམ་བཅའ་བའི་ཆེད་དུ། བདག་གིས་སྡིག་པ་མི་དགེ་བའི་ལས་དེ་དག་ཐམས་ཅད་བཤགས་པར་བྱས་པས། དེ་བྱང་
ཆུབ་ཆེན་པོའི་བར་དུ་ཕྱིས་མི་བྱེད་པར་བགྱིའོ། །ཕྱིས་མི་བྱེད་པར་དམ་བཅའོ། །འཁོར་བ་འདིར་སྐྱེས་པ་དང་། སྐྱེ་བ་ཐོག་མ་མེད་པ་ནས་སེམས་ཅན་ཀུན་གྱིས་གང་བསོད་ནམས་བགྱིས་པ་དང་། བགྱིད་དུ་སྩལ་བ་དང་། རྗེས་སུ་ཡི་རང་བ་ལ་རྗེས་སུ་ཡི་རང་ངོ་། །དེ་དག་
ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ་ཞེས་བསྔོ་བའོ། །འདི་ནི་བདག་བྱང་ཆུབ་སྙིང་པོ་ལ་མཆིས་ཀྱི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །ཐེག་པ་ཆེན་པོའི་ཆོས་མ་ལུས་པ་ལ་སྐྱབས་སུ་མཆིའོ། །ཕྱིར་
མི་ལྡོག་པའི་བྱང་ཆུབ་སེམས་དཔའི་ཚོགས་དགེ་འདུན་ལ་སྐྱབས་སུ་མཆིའོ། །གསུམ་ལ་སྐྱབས་སུ་འགྲོ་བའོ། །ཨེ་མའོ། །བདག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བགྱི་བ་ནི། སེམས་ཅན་ཐམས་ཅད་ཀྱི་དོན་དུ་ཕན་པ་དང་།
ཇི་སྲིད་དུ་མཐར་ཕྱིན་པའི་མྱ་ངན་ལས་འདས་པའི་དབྱིངས་ལ་རབ་ཏུ་གནས་པའི་ཕྱིར་རོ། །དེ་སྲིད་དུ་བྱང་ཆུབ་མཆོག་ཏུ་སེམས་བསྐྱེད་དོ། །བདག་བླ་ན་མེད་པའི་བྱང་ཆུབ་ཀྱི་རྡོ་རྗེ་ཐེག་པའི་ལམ་བསྟེན་པར་བགྱིའོ། །སེམས་ཅན་གྱི་དོན་དུ་ལམ་རྒྱུད་ལ་བསྟེན་པའོ། །དེ་ནས་

བདག་མིང་འདི་ཞེས་བྱ་བ་ཆོས་ཀྱི་དབྱིངས་ན་གནས་པའི་ལྷ་མོའི་ཚོགས་དང་བཅས་པའི་སྒྲོལ་མ་ལ་བདག་དབུལ་བར་བགྱིའོ། །བདག་དབུལ་བའོ། །ཐུགས་རྗེ་ཆེན་པོ་དེ་དག་གིས་དུས་དང་རྣམ་པ་ཐམས་ཅད་དུ་བདག་ལ་བྱིན་གྱིས་རློབ་ཅིང་ཡོངས་སུ་སྐྱོང་བ་དང་གྲུབ་པའི་མཆོག་བདག་ལ་སྩོལ་
བར་གྱུར་ཅིག་ཅེས་གསོལ་བ་གདབ་པོ། །སྲིད་ཞི་མཉམ་ཉིད་ལ་ཆགས་ཀུན་རྟོག་རླབས། །དངོས་ཀུན་མ་ལུས་མཁའ་ལྟར་གཟིགས་གྱུར་པའི། །བརྩེ་བའི་ཆུ་ཡིས་རབ་རྒྱས་ཐུགས་ནི་རྒྱ་མཚོའི་མཆོག །ལྷ་མོ་རྣམས་ཀྱིས་བདག་ལ་བརྩེ་བར་མཛད་པར་ཞུ་ཞུ་བའོ། །དེ་ནས། བདག་ནི་
བསོད་ནམས་མི་ལྡན་བཀྲེན་ཆེན་ཏེ། །བདག་ལ་མཆོད་པའི་ཡོ་བྱད་གཞན་གང་མེད། །དེ་ཕྱིར་བདག་དོན་གཞན་དོན་སེམས་རྣམས་ནི། །མགོན་པོས་འདི་ནི་བདག་ལ་གཟུང་དུ་གསོལ། །ཞེས་འདི་ནི་བཟོད་པར་གསོལ་བའོ། །དེ་ནས་ཨོཾ་ན་མཿཨཱརྱཱ་བ་ལོ་ཀི་ཏེ། ཤྭ་རཱ་ཡ། བོ་དྷི་སཏྭཱ་ཡ་
མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཧི་རི་ཧི་རི། སུ་རུ་སུ་རུ། མུ་རུ་མུ་རུ། སརྦ་སཏྭཱརྠ་ཀཱ་རུ་ཎི་ཀེ་ཤཱི་གྷྲཾ་གཙྪ། དེ་བ་ཏྭཱ་བྷུ་པ་ནཾ། ཨཱརྱཱ་བ་ལོ་ཀི་ཏེ་ཤྭ་རཱ་ཡ། ས་མ་ཡ། མ་ནུ་སྨཱ་ར་སྭཱ་ཧཱ། ཞེས་པ་འདིས་སྙིམ་པ་མེ་ཏོག་གིས་བཀང་བ་ཕུལ་ལ་གཤེགས་སུ་གསོལ་ལོ། །དེའི་རྗེས་
ལ་ཚངས་པའི་གནས་བཞི་བསྒོམ་སྟེ། སེམས་ཅན་ཐམས་ཅད་ལ་བུ་གཅིག་པ་ལྟར་ཆགས་པ་ནི་བྱམས་པའི་མཚན་ཉིད་དོ། །ངན་སོང་གི་མཚན་ཉིད་རྒྱ་མཚོ་ཆེན་པོའི་ནང་དུ་ལྷུང་བའི་སེམས་ཅན་རྣམས་མཐོང་ནས་བདག་གི་གྲོགས་པོ་རྣམས་ཡིན་པར་ཤེས་ནས་སྡུག་བསྔལ་
ཅན་རྣམས་བསྒྲལ་ཏེ་ཞེས་པ་ནི་སྙིང་རྗེའོ། །རྫོགས་པའི་བྱང་ཆུབ་ཏུ་སེམས་ཆེན་པོ་བསྐྱེད་དེ་འདི་ལྟར་བདག་གིས་སྒྲོལ་མའི་གཟུགས་ཐོབ་པར་བྱས་ལ། སེམས་ཅན་ཐམས་ཅད་རྫོགས་པའི་བྱང་ཆུབ་ལ་རབ་ཏུ་གནས་པར་བགྱི་སྙམ་པ་ནི་དགའ་བའོ། །བླ་ན་མེད་པའི་མྱ་ངན་ལས་
འདས་པའི་བདེ་བའི་ཡེ་ཤེས་བྱེད་པར་མི་ནུས་པས། དེ་བས་ན་སེམས་ཅན་ཐམས་ཅད་ལ་ཕན་པའི་དོན་དུ་རྙེད་པ་དང་། མ་རྙེད་པ་དང་། སྙན་པ་དང་། མི་སྙན་པ་དང་། བསྟོད་པ་དང་། སྨད་པ་དང་། བདེ་བ་དང་། སྡུག་བསྔལ་ལ་སོགས་པ་དངོས་པོ་རྣམས་ལ་མ་ཆགས་པར་གྱུར་པས་ཇི་

ལྟར་འདོད་པའི་དོན་མངོན་པར་བསྒྲུབ་པ་ནི་བཏང་སྙོམས་སོ། །དེ་ནས་ཆོས་ཐམས་ཅད་ཀྱང་ཡིད་ཀྱིས་དམིགས་པ་རྣམ་པར་དཔྱད་དེ། འདི་ནི་བདག་གི་སེམས་ཁོ་ན་ཉིད་ཀྱི་རྣམ་པ་དང་དེས་དེ་འཁྲུལ་པས་སོ་སོར་སྣང་སྟེ་རྨི་ལམ་ཇི་བཞིན་ནོ། །སེམས་ལས་ཐ་དད་སེམས་
ཀྱི་གཟུང་བ་མེད་པས་འཛིན་པ་ཡང་མེད་དོ། །དེ་ལྟར་སེམས་ཀྱི་རང་བཞིན་གྱི་ཆོས་རྣམས་སོ། །དེ་དག་གི་གཟུང་བ་དང་འཛིན་པ་དང་བྲལ་བ་འདི་དག་རྣམས་སྟོང་པ་ཉིད་དོན་དམ་ཡིན་ལ། འདི་ལྟར་མཐའ་གཅིག་པས་ཤིན་ཏུ་བརྟེན་པ་འཁྲུལ་པས་ཀུན་ཏུ་གཞག་པ་རང་འཁྲུལ་པའི་
རྟགས་ཆོས་ཐམས་ཅད་ཀྱི་རྣམ་པ་སྤངས་ཏེ། དེ་དག་གི་རང་བཞིན་སྟོང་པ་ཁོ་ན་འབའ་ཞིག་སེམས་ཉིད་གཉིས་མེད་ཀྱི་མཚན་ཉིད་ཤེལ་ལྟར་དག་པ་དང་གསལ་བ་དྲི་མ་མེད་པ་སྟོན་ཀའི་ནམ་མཁའ་ཕྱེད་པ་ལྟ་བུ་མཐའ་ཡས་པར་དམིགས་ཏེ། འདི་ལྟར་དོན་དམ་བྱང་ཆུབ་ཀྱི་སེམས་དང་
འཇིག་རྟེན་ལས་འདས་པའི་སྟོང་ཉིད་ཀྱི་ཡེ་ཤེས་སྤྲོས་པ་མེད་པ་དང་རྟོག་པ་དང་བྲལ་བའོ། །དེ་ནས་འདི་ལ་སྔགས་ཀྱི་བྱིན་གྱིས་བརླབ་པ་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་བྱིན་གྱིས་བརླབས་ལ། བདག་དང་གཞན་གྱི་སྟོང་པ་ཉིད་ལ་ལྷག་པར་མོས་ཏེ་དེ་ཁོ་ན་ཤེས་རབ་
ཀྱི་ཕ་རོལ་ཏུ་ཕྱིན་པ་སྟེ། དེ་ཁོ་ན་སྲུང་བའི་མཆོག་གོ། །དེ་ནས་དེ་དང་མཐུན་པའི་རྣམ་པ་དང་བཅས་པ་འཇིག་རྟེན་དག་པའི་རང་བཞིན་བསྲུང་བ་ཆོས་འབྱུང་ཡེ་ཤེས་ཀྱི་རྗེས་སུ་དྲན་པས་བསྒོམ་པར་བྱ་སྟེ། སྟོང་པ་ཉིད་ཀྱི་ངང་ལས་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་
ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེའི་འོད་ཟེར་ལས་བྱུང་བའི་འདོད་པ་ཇི་ལྟ་བས་རྒྱས་པར་ཤིན་ཏུ་འབར་བ་རྡོ་རྗེའི་ར་བ་རྒྱ་གྲམ་གྲུ་བཞི་པ། དེའི་སྟེང་དུ་འོད་ཟེར་དེས་སྤྲུལ་པའི་རྡོ་རྗེའི་གུར་དང་དེའི་འོག་ཏུ་རྡོ་རྗེའི་རང་བཞིན་གྱི་ས་གཞི་ས་འོག་གི་བར་དུ་བལྟ་བར་བྱ་སྟེ། དེ་ནས་ཉི་མ་
དང་སྣ་ཚོགས་རྡོ་རྗེ་གཉིས་འོད་ཟེར་དུ་གྱུར་པས་ཕྱོགས་དང་ཕྱོགས་ལ་སྤྲོས་ལ་གཅིག་ཏུ་གྱུར་པས་ཕྱི་རོལ་དུ་མཚམས་བཅིང་བར་བྱའོ། །དེའི་འོད་ཟེར་གྱིས་བགེགས་བསྐྲད་ནས། ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ། ཨོཾ་བཛྲ་བྲཱ་ཀ་ར་ཧཱུཾ་བཾ་ཧཱུཾ། ཨོཾ་བཛྲ་པཉྫ་ར་ཧཱུཾ་ཡཾ་ཧཱུཾ། ཨོཾ་བཛྲ་བིཏཱ་ན་

ཧཱུཾ་ཁཾ་ཧཱུཾ། ཨོཾ་བཛྲ་ཤ་ར་ཛཱ་ལ་ཏྲཱཾ་ཤཾ་ཏྲཱཾ། ཨོཾ་བཛྲ་ཛྭ་ལཱ་ན་ལཱརྐ་ཧཱུཾ་ཧཱུཾ་ཧཱུཾ། རྡོ་རྗེ་གུར་གྱི་དབུས་སུ་འབྱུང་བ་ཆེན་པོ་ནམ་མཁའི་རང་བཞིན། ཆོས་འབྱུང་རྡོ་རྗེ་འཆང་ཆེན་པོའི་རང་བཞིན་སྟོན་ཀའི་ཟླ་བ་ལྟར་དཀར་བ་འོག་ཏུ་ཕྲ་བ་སྟེང་དུ་རྒྱས་པ། ཨེའི་རྣམ་པ་ཅན་གྱི་ནང་དུ་ནམ་མཁའི་གཟུགས་ནང་དུ་
བཅུག་པ་ཅན། འོད་ཟེར་གྱི་ཁྱམས་དང་ལྡན་པར་བསྒོམས་ཏེ། དེའི་དབུས་སུ་ནམ་མཁའི་རང་བཞིན་ཅན། སྣ་ཚོགས་པདྨའི་ཟེ་འབྲུ་ལ་གནས་པའི་རྡོ་རྗེ་རྒྱ་གྲམ་རྒྱས་པ། དེའི་དཀྱིལ་དུ་ཁྱབ་པར་བྱེད་པའི་འབྱུང་བ་ཆེན་པོ་བཞིའི་དཀྱིལ་འཁོར་རྣམས་ལྷ་མོ་བཞིའི་རང་བཞིན་ཏེ་གོང་དང་གང་
དུ་བལྟའོ། །དེ་ལ་དང་པོར་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུའི་དབྱིབས་ལྟ་བུ་རྩེ་མོ་གཉིས་ལ་གཡོ་བའི་བ་དན་ཅན་ནོ། །དེའི་སྟེང་དུ་རཾ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་པ་དམར་པོ་རཾ་ཡིག་གིས་མཚན་པའོ། །དེའི་སྟེང་དུ་བཾ་ཡོངས་སུ་གྱུར་པ་
ལས་ཆུའི་དཀྱིལ་འཁོར་དཀར་ལ་ཟླུམ་པ་བུམ་པས་མཚན་པའོ། །དེའི་སྟེང་དུ་ལཾ་ཡོངས་སུ་གྱུར་པ་ལས་སའི་དཀྱིལ་འཁོར་སེར་པོ་གྲུ་བཞི་པ་ཟུར་ལ་རྩེ་གསུམ་པའི་རྡོ་རྗེས་མཚན་པའོ། །དེའི་སྟེང་དུ་བྷྲཱུཾ་དང་ལྡན་པའི་འཁོར་ལོ་ཡོངས་སུ་གྱུར་པ་ལས་བདག་ཉིད་འཇིག་རྟེན་ལས་འདས་པའི་
ཡེ་ཤེས་སྒྱུ་མ་ལྟ་བུས་ཁྱབ་ནས་གནས་པ་ཐམས་ཅད་ཁྱབ་པར་བྱེད་པར་ཤེས་ནས། རྡོ་རྗེ་རྒྱ་གྲམ་གྱི་དབུས་སུ་སེམས་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་འབྱུང་བ་ཡོངས་སུ་དག་པའི་སངས་རྒྱས་ཀྱི་ཞིང་བསྡུས་པ་རང་བཞིན་ཐར་པའི་སྒོ་ཆེན་པོ་ལྟ་བུ་རྣམ་པར་སྣང་མཛད་ཀྱི་རང་
བཞིན་ཅན། རིན་ཆེན་སྣ་ཚོགས་ཀྱི་གཞལ་ཡས་ཁང་ཟུར་བཞི་པ་སྒོ་བཞི་པ་ཀ་བ་བརྒྱད་ཀྱིས་བརྒྱན་པ། འདོད་ཡོན་གྱི་སྣམ་བུ་བཞི་དང་ལྡན་པ། རྟ་བབས་བཞི་དང་ལྡན་པ། དྲ་བ་དྲ་ཕྱེད་དང་ལྡན་པ། དར་དང་མེ་ལོང་དང་། རྔ་ཡབ་དང་། བ་དན་སྣ་ཚོགས་དང་། དྲིལ་བུ་ལ་སོགས་
པས་བརྒྱན་པའོ། །འདོད་ཡོན་མཆོག་གིས་ཉེ་བར་མཛེས་པ། དགའ་བྱེད་རིམ་པ་གཉིས་པ་དང་། །ཟེ་འབྲུ་གཅིག་པར་གྱུར་པ་དང་། །ཟུར་གསུམ་གྱིས་ནི་གཞན་ཉིད་དྲན། །རིམ་པའི་དབུས་སུ་པདྨ་ཡིན། །འདབ་མ་བརྒྱད་པ་ཟེ་འབྲུར་བཅས། །དེའི་དབུས་སུ་གདན་གྱི་

སྟེང་དུ་དབྱངས་ཡིག་བཅོ་ལྔ་གྱུར་པ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས་ཀྱི་རང་བཞིན་ནོ། །དེའི་སྟེང་དུ་གསལ་བྱེད་སུམ་ཅུ་རྩ་བཞི་ཡོངས་སུ་གྱུར་པ་ལས། ཉི་མའི་དཀྱིལ་འཁོར་མཉམ་ཉིད་ཡེ་ཤེས་ཀྱི་རང་བཞིན་ནོ། །དེའི་དབུས་སུ་ཏཱཾ་ལས་
བྱུང་བའི་གསེར་གྱི་མདོག་ལྟ་བུའི་རྡོ་རྗེ་རྩེ་དགུ་པའི་ལྟེ་བ་ལ་ས་བོན་གྱིས་མཚན་པ་སོ་སོར་རྟོག་པའི་རང་བཞིན་ཅན་དུ་བསྒོམས་ཏེ། ས་བོན་དེ་ལས་སྤྲོས་པའི་འོད་ཟེར་གྱིས་བཅོམ་ལྡན་འདས་མའི་འཁོར་ལོའི་རྣམ་པས་དེ་བཞིན་གཤེགས་པ་ཐམས་ཅད་སྤྲོས་ལ་སེམས་ཅན་གྱི་དོན་བྱས་ཏེ།
དེ་དག་དང་ལྷན་ཅིག་ཏུ་བྱས་པ་བཀུག་ནས་ས་བོན་དང་ཕྱག་མཚན་ལ་ཐིམ་པར་བསམ་པ་ནི་བྱ་བ་གྲུབ་པའི་རང་བཞིན་ནོ། །དེ་ནས་ཟླ་བ་དང་ཉི་མ་དང་ས་བོན་ཡོངས་སུ་གྱུར་པ་ལས་བཅོམ་ལྡན་འདས་མ་ཆོས་དབྱིངས་རྣམ་པར་དག་པའི་རང་བཞིན་འཁོར་ལོ་དང་བཅས་པའི་རྡོ་རྗེ་སྒྲོལ་མ་
བསྒོམ་པར་བྱ་སྟེ། ཞལ་བཞི་པ་ཕྱག་བརྒྱད་པ་རྒྱན་ཐམས་ཅད་ཀྱིས་བརྒྱན་པ། གསེར་ལྟ་བུའི་མདོག་ཅན་མ་ཤིན་ཏུ་མཛེས་མ། གཞོན་ནུ་མའི་ལྷའི་མཚན་ཉིད་ཀྱིས་འབར་ཞིང་སངས་རྒྱས་བཞིའི་ཅོད་པན་ཅན། ཉི་མའི་རྡོ་རྗེ་དབང་བསྐུར་བ་ལས་བྱུང་བའི་ལང་ཚོ་ལ་བབ་པ། གསེར་གྱི་རྣ་
ཆ་གཡོ་བ་ཅན། །སྣ་ཚོགས་པདྨ་ལ་གནས་པ། །འོད་ཟེར་དམར་པོའི་རྒྱབ་ཡོལ་ཅན། །རྡོ་རྗེ་དང་། ཞགས་པ་དང་། མདའ་དང་། དུང་དཀར་པོ་རྣམས་ནི་ཕྱག་གཡས་ནའོ། །དེ་བཞིན་དུ་གཡོན་པ་རྣམས་ཀྱིས་ཨུཏྤལ་སེར་པོ་དང་། གཞུ་དང་། ལྕགས་ཀྱུ་དང་། སྡིགས་མཛུབ་པོ། །
རྡོ་རྗེ་སྐྱིལ་ཀྲུང་རྣལ་འབྱོར་གྱིས། །སྲིད་པ་གསུམ་ནི་བསྒྲུབ་པར་བྱ། །དང་པོའི་ཞལ་ནི་གསེར་མདོག་སྟེ། །གཡས་པ་དཀར་པོ་ཁོ་ནའོ། །བྱང་གི་ཞལ་ནི་དམར་པོ་སྟེ། །ནུབ་ཀྱི་སྔོན་པོ་ཁོ་ན་ཉིད། །དཀྱིལ་འཁོར་བདག་པོའི་ཞལ་ནས་སུ། །སྙིང་གའི་ས་བོན་ལས་བྱུང་བའི། །
སྔགས་ལས་བྱུང་བའི་ལྷ་མོ་བཅུ། །ས་བོན་དབྱེ་བས་སྤྲོས་པ་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཤར་གྱི་ལ་སོགས་པ་ཕྱོགས་ཀྱི་པདྨའི་འདབ་མ་རྣམས་ལ་ནི་ཟླ་བའི་དཀྱིལ་འཁོར་ལ་གནས་པའི་ཨོཾ་ཏཱ་རེ་ཏུཏ་ཡིག་གནས་སོ། །ཤར་ལ་སོགས་པའི་སྒོ་རྣམས་སུ་ཉི་མའི་དཀྱིལ་འཁོར་

ལ་གནས་པའི་ཏཱ་རེ་ཏུ་རེའི་ཡི་གེ་རྣམས་སོ། །སྟེང་དུ་ཉི་མའི་དཀྱིལ་འཁོར་ལ་གནས་པའི་ཡི་གེ་སྭཱའོ། །འོག་ཏུ་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱའོ། །ས་བོན་དེ་དག་ཡོངས་སུ་གྱུར་པ་ལས་ས་བོན་གྱིས་མཚན་པའི་ཕྱག་མཚན་རྣམས་བསྒོམས་ཏེ། དེ་ལས་འོད་ཟེར་སྤྲོ་
བ་དང་བསྡུ་བ་བྱས་ལ། དེའི་ས་བོན་ཡོངས་སུ་གྱུར་པ་ལས་ལྷ་མོ་རྣམས་སོ། །ས་བཅུ་པོ་ཡི་རང་བཞིན་གྱིས། །ལྷ་མོ་བཅུར་ནི་ཡོངས་ཤེས་བྱ། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ཞལ་གཅིག་ཕྱག་གཉིས་དེ་རྣམས་སུ། །ཤར་དུ་ཟླ་བ་གནས་པ་ཡི། །ཡིད་དུ་འོང་བ་སྐུ་
མདོག་དཀར། །མེ་ཏོག་ཕྱག་དང་ལྡན་པ་ཡིན། །ཨོཾ་ལས་བྱུང་བའི་སྒྲོལ་མ་བསྒོམ། །དེ་བཞིན་རྣམ་སྣང་ཅོད་པན་ཅན། །སའི་ཁམས་དང་། སྦྱིན་པའི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །ལྷོ་རུ་སྤོས་ཀྱི་སྒྲོལ་མ་ནི། །ཏཱ་ལས་བྱུང་བ་སྐུ་མདོག་གནག །སྤོས་ཕོར་ཕྱག་ན་
འཛིན་པ་ལ། །རྒྱན་རྣམས་ཀུན་གྱིས་བརྒྱན་པ་སྟེ། །དེ་བཞིན་མི་བསྐྱོད་ཅོད་པན་ཅན། །ནམ་མཁའི་ཁམས་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །ནུབ་ཏུ་མར་མེའི་སྒྲོལ་མ་ནི། །སྐུ་མདོག་དམར་མོ་རྒྱན་དང་ལྡན། །མར་མེའི་གོང་བུ་འཛིན་པ་ནི། །
ཟླ་བར་གནས་པ་རེ་ལས་བྱུང་། །དེ་བཞིན་མཐའ་ཡས་ཅོད་པན་ཅན། །མེའི་ཁམས་དང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །དེ་བཞིན་བྱང་དུ་ཟླ་བར་གནས། །ཏུ་ཡིག་ལས་བྱུང་དྲི་སྒྲོལ་མ། །དྲི་ཆབ་དུང་ཕོར་ཕྱག་ན་འཕྱར། །སྐུ་མདོག་སྔོན་མོ་རྒྱན་
གྱིས་བརྒྱན། །དེ་བཞིན་དོན་གྲུབ་ཅོད་པན་ཅན། །རླུང་གི་ཁམས་དང་བཟོད་པའི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །མི་བསྐྱོད་ལ་སོགས་རབ་དབྱེ་བས། །མཚམས་ཀྱི་འདབ་མར་ཕྱག་མཚན་ནི། །རྡོ་རྗེ་འཁོར་ལོ་པདྨ་བསྣམས། །རལ་གྲི་དེ་བཞིན་ཁ་དོག་དབྱེ། །དེ་ནས་
སྒོ་སྐྱོང་མ་རྣམས་བསྒོམ། །ལྕགས་ཀྱུ་ལ་སོགས་རབ་དབྱེ་བས། །ཤར་སྒོའི་ཕྱོགས་ཀྱི་རིམ་པ་ཡིས། །ཉི་མར་གནས་པ་རྒྱན་གྱིས་བརྒྱན། །ལྕགས་ཀྱུ་དཀར་མོ་ཤར་སྒོ་རུ། །ས་བོན་ཏཱ་ལས་བྱུང་བ་ནི། །གཡས་པ་ལྕགས་ཀྱུ་འཛིན་པ་སྟེ། །གཡོན་པ་སྡང་ལ་

སྡིགས་མཛུབ་མཛད། །དེ་བཞིན་རྣམ་སྣང་ཅོད་པན་ཅན། །སའི་ཁམས་དང་བསམ་གཏན་གྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །ལྷོ་རུ་ཞགས་པ་སྐུ་མདོག་སེར། །ས་བོན་རེ་ལས་བྱུང་བ་ཡིན། །ཞགས་པ་སྡིགས་མཛུབ་བཅས་པའི་ཕྱག །དཀྱིལ་འཁོར་དམར་
པོ་ཀུན་དུ་བསྟན། །དེ་བཞིན་མི་བསྐྱོད་ཅོད་པན་ཅན། །ནམ་མཁའི་ཁམས་དང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །ནུབ་ཏུ་དམར་མོ་ལྕགས་སྒྲོག་མ། །ས་བོན་ཏུ་ཡིག་ལས་བྱུང་བའི། །ལྕགས་སྒྲོག་སྡིགས་མཛུབ་བཅས་པའི་ཕྱག །རྡོ་རྗེ་དཀྱིལ་འཁོར་ཀུན་དུ་
གནས། །དེ་བཞིན་མཐའ་ཡས་ཅོད་པན་ཅན། །མེའི་ཁམས་དང་ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །བྱང་དུ་དྲིལ་བུ་ལྗང་གུ་མའོ། །ས་བོན་རེ་ལས་བྱུང་བ་ཡིས། །རྡོ་རྗེ་དྲིལ་བུའི་ཕྱག་དང་ལྡན། །གཡོན་དུ་སྡིགས་མཛུབ་འོད་ལ་གནས། །དེ་བཞིན་དོན་ཡོད་ཅོད་
པན་ཅན། །རླུང་གི་ཁམས་དང་སྨོན་ལམ་གྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །ཟུར་གྱི་ཆ་ལ་ཕྱག་མཚན་རྣམས། །བདག་མལ་སོགས་རྣམ་དག་པས། །བྱང་སེམས་བུང་བ་རི་རབ་དང་། །མེ་ཐབ་དང་ནི་རྒྱལ་མཚན་བསྣམས། །སྟེང་དུ་གཙུག་ཏོར་རྣམ་རྒྱལ་མ། །ཉི་མར་
གནས་པ་སྭཱ་ལས་བྱུང་། །དཀར་མོ་འཁོར་ལོ་སྐོར་འཛིན་མ། །གཡོན་པས་སྡང་ལ་སྡིགས་མཛུབ་མཛད། །དེ་བཞིན་རིན་འབྱུང་ཅོད་པན་ཅན། །ཆུའི་ཁམས་དང་སྟོབས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །ཉི་མར་གནས་པ་ཧཱ་ལས་བྱུང་། །ཀླུ་ཞགས་འཛིན་པ་སྐུ་
མདོག་སྔོ། །གཡོན་པས་སྡིགས་མཛུབ་འཇིགས་བྱེད་པ། །གནོད་མཛེས་མ་ནི་འོག་ཏུ་བསྒོམ། །དེ་བཞིན་མི་བསྐྱོད་ཅོད་པན་ཅན། །ནམ་མཁའི་ཁམས་དང་ཡེ་ཤེས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ནོ། །དེ་ལྟར་དཀྱིལ་འཁོར་ཡོངས་སུ་རྫོགས་པར་བལྟ་སྟེ། ཐམས་
ཅད་མིག་ལ་སོགས་པར་བྱིན་གྱིས་བརླབ་པར་བྱ་སྟེ། མིག་ཏུ་གཏི་མུག་རྡོ་རྗེ་བསྐྱེད། །ཞེ་སྡང་རྡོ་རྗེ་སྙན་གཉིས་ལ། །དེ་བཞིན་སྣ་ལ་སེར་སྣ་མ། །ཁ་རུ་འདོད་ཆགས་རྡོ་རྗེ་མ། །ཕྲག་དོག་རྡོ་རྗེ་དེ་བཞིན་དུ། །ཉོན་མོངས་ཀུན་གྱི་མུན་སེལ་མ། །སྐྱེ་མཆེད་ལ་ནི་རྣམ་པར་

ཤེས། །ཡིད་ལ་བདག་མེད་རྣལ་འབྱོར་མ། །ཞེས་པས་མིག་ལ་སོགས་པ་བྱིན་གྱིས་བརླབས་པའི་རྗེས་ལ་སྐུ་གསུང་ཐུགས་བྱིན་གྱིས་བརླབ་པར་བྱ་སྟེ། ཨོཾ་ཡིག་གིས་སྐུ་བྱིན་གྱིས་བརླབ་པ་དང་། ཨཱཿཡིག་གིས་གསུང་བྱིན་གྱིས་བརླབ་པ་དང་། ཧཱུཾ་ཡིག་གིས་ཐུགས་བྱིན་གྱིས་བརླབ་པར་
བྱའོ། །དེ་ནས་ལྷ་མོ་ཀུན་གྱི་སྙིང་གར་གནས་པའི་ཟླ་བའི་དཀྱིལ་འཁོར་ལ་རང་རང་གི་ས་བོན་བལྟ་སྟེ། དེ་ནས་རང་རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའི་གཟུགས་ཀྱི་སྒྲོལ་མ་མདུན་གྱི་ནམ་མཁའ་ལ་སྤྱན་དྲངས་ལ། སྔར་བཞིན་དུ་ཨརྒྷ་ལ་སོགས་པ་ཕུལ་
ནས། མེ་ཏོག་སྒྲོལ་མ་ལ་སོགས་པ་ལྷ་མོ་རྣམས་སྤྲོས་པས་དེ་རྣམས་ཀྱི་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པས་མཆོད་དེ། དེ་ནས་དམ་ཚིག་གི་ཕྱག་རྒྱ་བསྟན་པར་བྱ་སྟེ། དེ་ནས་ཡེ་ཤེས་ཀྱི་དཀྱིལ་འཁོར་སྒོ་སྐྱོང་གི་རྣལ་འབྱོར་གྱིས་དམ་ཚིག་གི་དཀྱིལ་འཁོར་དུ་ཨོཾ་བཛྲ་ཨཾ་ཀུ་
ཤི་ཨཱ་ཀཪྵ་ཡ་ཛཿཨོཾ་བཛྲ་པཱ་ཤེ་ཨཱ་བེ་ཤ་ཡ་ཧཱུཾ། ཨོཾ་བཛྲ་སྥོ་ཊེ་བནྡྷཱཡ་བཾ། ཨོཾ་བཛྲ་ཨཱ་བེ་ཤེ་བ་ཤི་ཀུ་རུ་ཧོ། ཨོཾ་བྷ་ག་བ་ཏི་ས་མ་ཡེ་ཤྭ་རི་སརྦ་བུདྡྷ་མ་ཏེ་ཏཱ་རི་ནི་ཨ་དྷིཥྛ་ན་མེ་ཀུ་རུ་སྭཱ་ཧཱ། ཞེས་པའི་སྔགས་འདི་རྣམས་ཀྱིས་དགུག་པ་དང་། གཞུག་པ་དང་། བཅིང་བ་དང་། དགྱེས་པར་བྱའོ། །ཆུ་
དང་འོ་མའི་རིག་པས་གཅིག་ཏུ་བྱས་ལ་ཐ་མི་དད་པར་བྱའོ། །དེ་ནས་ཡང་རང་གི་སྙིང་གའི་ས་བོན་གྱི་འོད་ཟེར་གྱིས། བདེ་བ་ཅན་གྱི་ཞིང་ཁམས་ན་གནས་པའི་དེ་བཞིན་གཤེགས་པ་ལྔ་དང་། གཞན་ཡང་བདུད་རྩི་ལྔས་ཡོངས་སུ་གང་བའི་གསེར་གྱི་བུམ་པ་དང་། རོལ་མོ་ལ་སོགས་པས་ཡོངས་སུ་
བརྒྱན་པ་བཀུག་ལ། མཆོད་དེ་དབང་བསྐུར་བར་གསོལ་བ་གདབ་པ་ནི། བདེ་གཤེགས་ཚིག་མཆོད་བདུད་རྩི་དབང་བསྐུར་གྱིས། །དེ་བཞིན་གཤེགས་པ་ཐམས་ཅད་བདག་ལ་དབང་བསྐུར་དུ་གསོལ། གསོལ་བ་གདབ་པ་ནི། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་ཆེ་བའི་ཆེ་
སྦྱིན་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའ་རྡོ་རྗེ་དེང་བདག་སྩོལ། །གསོལ་བའོ། །ད་ནས་དེ་བཞིན་གཤེགས་པ་དེ་དག་གིས་དཔལ་ཧེ་རུ་ཀའི་གཟུགས་སུ་སྤྲུལ་པས་བདུད་རྩི་རྣམ་པ་ལྔའི་རང་བཞིན་དེ་བཞིན་གཤེགས་པ་ལྔའི་བདག་ཉིད་ཅན་བུམ་པ་རྣམ་པ་ལྔ་

ཡིས་བདག་ལ་དབང་བསྐུར་བར་བསམ་མོ། །ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་མ། །
སངས་རྒྱས་ཀུན་གྱི་གསང་གསུམ་པའི། །གནས་ལས་བྱུང་བ་སྦྱིན་པར་བྱ། །ཞེས་པ་ལ་སོགས་པ་འདིས་དབང་བསྐུར་བ་བྱས་ལ། མེ་ཏོག་གུར་ཀུམ་གྱི་ཆར་དབབ་པ་དང་། ལྷའི་རོལ་མོའི་སྒྲ་དང་། སྤྱན་མ་ལ་སོགས་པས་གླུ་བླང་བ་དང་། གཟུགས་ཀྱི་རྡོ་རྗེ་མ་ལ་སོགས་པས་བསྟོད་པ་
དང་། །ལྷ་རྣམས་ཀྱིས་མཆོད་པ་དང་། རྣམ་པར་སྣང་མཛད་ལ་སོགས་པས་རྗེས་སུ་གནང་བར་བྱས་པའོ། །དེ་ནས་སྤྱན་མ་ལ་སོགས་པས་བུམ་པ་རྣམས་བཟུང་སྟེ། རང་གི་དཀྱིལ་འཁོར་དུ་རབ་ཏུ་བཞུགས་སོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། ཞེས་བརྗོད་པས་
རིན་ཆེན་འབྱུང་ལྡན་ཏེ། གཞན་རྣམས་ལ་རིམ་པ་ཇི་ལྟ་བས་སོ། །མེ་ཏོག་སྒྲོལ་མ་ལ་སོགས་པ་བཞི་ལ་རྣམ་པར་སྣང་མཛད་དང་། མི་བསྐྱོད་པ་དང་། སྣང་བ་མཐའ་ཡས་དང་། དོན་ཡོད་གྲུབ་པ་རྣམས་སོ། །དེ་བཞིན་དུ་རྡོ་རྗེ་ལྕགས་ཀྱུ་མ་ལ་སོགས་པ་བཞི་ལའོ། །གཙུག་ཏོར་
རྣམ་པར་རྒྱལ་མ་དང་གནོད་མཛེས་མ་གཉིས་ལ་རིན་ཆེན་དབང་ཕྱུག་དང་། དེ་བཞིན་གཤེགས་པ་མི་བསྐྱོད་པ་གཉིས་སོ། །དེའི་རྗེས་སུ་མགོ་བོ་ལ། ཨོཾ་ཏཱ་རེ་འོ། །ཁ་ལ་ཨོཾ་ཏཱ་རེ་འོ། །མིག་ལ་ཨོཾ་ཏཱ་རེའོ། །མགྲིན་པ་ལ་ཨོཾ་ཏཱ་རེའོ། །སྙིང་ལ་ཨོཾ་ཏཱ་རེ་ཎི། ཞེས་པ་འདིས་སྦྱར་བས་མེ་ལོང་གི་
གཟུགས་བརྙན་ལྟར་ཤིན་ཏུ་གསལ་བ་སྤྲོས་པའི་འོད་ཟེར་གྱི་ཚོགས་ཀྱི་ནམ་མཁའ་ལ་རི་མོ་བྲིས་པ་ལྟ་བུ་བདག་ཉིད་གསལ་བར་བསྒོམས་ཏེ། སྤྲོ་བ་དང་བསྡུ་བའི་སྦྱོར་བ་བྱའོ། །དེ་ནས་སེམས་ཅན་ཐམས་ཅད་ཀྱི་དོན་ཆེད་དུ་འཐོར་འཐུང་དང་གཏོར་མ་བྱིན་གྱིས་བརླབ་པ་ལ་
སོགས་པ་བྱ་སྟེ། གདན་ལ་སྐྱིལ་ཀྲུང་བཅས་ལ་ཐབས་དང་ཤེས་རབ་ཀྱི་སྙོམས་པར་འཇུག་པས་ཡི་དམ་ལྷའི་རྣལ་འབྱོར་དུ་དམིགས་ཏེ། ཆང་གི་སྣོད་ལས་མཐེ་བོང་དང་། སྲིན་ལག་གཉིས་ཀྱིས་ཨཱ་ལི་ཐིགས་པ་གཅིག་བླངས་ལ། ལག་པ་གཉིས་མཉེས་ཏེ། སྣོད་ཀྱི་ནང་

དུ་ལག་པ་གཡོན་པ་བཞག་ལ། ཧ་ཡིག་གིས་མདོག་བསྒྱུར་བར་བྱ་སྟེ། ལག་པ་གཡས་པ་ཡང་དེའི་སྟེང་དུ་བཀབ་ལ་ཧོཿཡིག་གིས་དྲི་ངན་པ་བསལ་བར་བྱའོ། །དེ་བཞིན་དུ་ལག་པ་གཉིས་ཀ་གཞག་པའི་འོག་ཏུ་ཧྲཱིཿཡིག་ཞུ་བས་བདུད་རྩིར་གྱུར་ནས་རྫོགས་པར་བྱས་ཏེ་སྦྱང་ངོ་། །དེ་
ནས་ལག་པ་གཡོན་པའི་མཐེ་བོང་དང་སྲིན་ལག་གཉིས་ཀྱིས་ཐིགས་པ་བླངས་ཏེ། ཆོས་ཀྱི་དབྱིངས་ཀྱི་ཕྱག་རྒྱར་ལྷག་པར་མོས་པས་ཟུར་གསུམ་པའི་མཎྜལ་བྱ་སྟེ། དེའི་དཀྱིལ་འཁོར་དུ་བཾ་བྲིས་ལ་བྱང་སེམས་སྤྲོ་བའི་རིམ་པ་ལྟར་རྟེན་དང་བརྟེན་པའི་རང་བཞིན་གྱི་དཀྱིལ་འཁོར་རྣམ་པར་
བསམས་ཏེ། མཆོད་པ་ལ་སོགས་པའི་སྔགས་དང་ཨཱ་ལིའི་རྫས་ཀྱིས་ཡང་དག་པར་མཆོད་ཅིང་བསྟོད་དོ། །ཨོཾ་ཧ་ཧོཿཧྲཱིཿསྭཱ་ཧཱ། ཞེས་པའི་སྔགས་འདིས་ལན་གསུམ་བརྗོད་དེ། མགོ་ལ་གཏོར་བ་དང་། དཔྲལ་བར་ཐིག་ལེ་དང་། ལྕེ་ལ་སྔགས་ཀྱིས་འཐོར་འཐུང་བྱ་སྟེ། གཏོར་མའི་
སྣོད་ནས་བཅོམ་ལྡན་འདས་མ་ལ་ལན་གསུམ་ཕུལ་ལ། ལས་ཀྱི་དབྱེ་བ་དང་། ཁ་དོག་གི་དབྱེ་བས་གཏོར་མ་བྱིན་གྱིས་བརླབ་པར་བྱ་བ་ནི་ཧཱུཾ་ལས་བྱུང་བའི་ཆོས་འབྱུང་གི་ནང་དུ་བཾ་ལས་སྐྱེས་པའི་སྣ་ཚོགས་པདྨའི་སྟེང་དུ། ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུ་ལྟ་བུ། དེའི་
སྟེང་དུ་རཾ་དམར་པོ་ཡོངས་སུ་གྱུར་པ་ལས་མེའི་དཀྱིལ་འཁོར་ཟུར་གསུམ་པ་སྟེང་དུ་འབར་བས་མཚན་པ། དེའི་སྟེང་དུ་ཨཿལས་བྱུང་བའི་པདྨའི་སྣོད་ཀྱི་དབུས་སུ་བྷཱུཾ་ཨཱཾ་ཛྲཱི་ཁཾ་ཧཱུཾ་ལཱཾ་མཱཾ་པཱཾ་ཏཱཾ་བཱཾ་ཞེས་པའི་ས་བོན་བཅུ་པོ་དེ་དག་གོ་ཀུ་ད་ཧ་ན། བི་ར་ཤུ་མ་མུའི་ས་བོན་བཅུ་པོ་དེ་དག་
གིས་བྱིན་གྱིས་བརླབས་པ་ཅན་དུ་རྣམ་པར་བལྟས་ལ། ཨོཾ་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་བྱུང་བའི་རྡོ་རྗེ་ཧཱུཾ་གིས་མཚན་པ་བསྒོམས་ཏེ། དེའི་སྟེང་དུ་ཨོཾ་དཀར་པོའི་ཁ་ཆོད་བལྟས་ཏེ། རླུང་གཡོས་པས་མེ་འབར་ཞིང་། རྡོ་རྗེ་ལས་གཞན་པའི་རྫས་རྣམས་
ཞུ་ནས་ཐོད་པར་གནས་ཏེ། དེ་ནས་རྡོ་རྗེས་ལན་བཞིའམ་ལྔ་དཀྲུགས་པས་དེ་ཡང་རྣམ་པར་ཞུ་ནས་གནས་ཏེ། དེའི་རྗེས་སུ་དེ་ཉིད་རྣམ་པ་གསུམ་གྱིས་མཐའ་ཡས་ཤིང་མཐར་ཐུག་པའི་འཇིག་རྟེན་གྱི་ཁམས་ན་གནས་པའི་བྱང་ཆུབ་སེམས་དཔའ་རྣམས་རྗེས་སུ་ཆགས་ནས་དེ་དག་

གིས་ཡེ་ཤེས་ཀྱི་བདུད་རྩི་བཀུག་ནས་རབ་ཏུ་ཞུགས་ཏེ། དེ་ཉིད་གསུམ་གྱིས་བྱིན་གྱིས་བརླབས་པས་བདུད་རྩིར་གྱུར་ཏེ། བསིལ་བར་འགྱུར་བར་བལྟའོ། །དེ་ནས། ཨོཾ་ཨཱཿསརྦ་ཏ་ཐཱ་ག་ཏ་ཛྙཱ་ན་ཨ་མྲྀ་ཏེ་ཧཱུཾ་ཞེས་པའི་སྔགས་འདིས་རྡོ་རྗེ་དང་ལྡན་པའི་ཕྱག་གིས་གཏོར་སྣོད་ལ་རེག་
སྟེ། རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ལྷ་མོའི་འཁོར་ལོ་ལ་གནས་པའི་ལྷ་རྣམས་ལ་བསྟན་པར་བྱས་ལ། ཨོཾ་པྲ་བ་ར་སཏྐཱ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་པའི་སྔགས་འདིས་དུང་གི་ཕྱག་རྒྱས་མདུན་དུ་མཆོད་ཡོན་དབུལ་ལོ། །ཨོཾ་པྲ་བ་ར་སཏྐཱ་རཾ་པཱ་ཏྱ་པྲ་ཏཱིཙྪ་སྭཱ་ཧཱ། ཞེས་པའི་སྔགས་
འདིས་སྐམ་པའི་ཕྱག་རྒྱས་ཞབས་གཉིས་ལ་ཞབས་བསིལ་དབུལ་ལོ། །གོང་བཞིན་དུ་བདུད་རྩི་མྱང་བའི་ཆོ་གས་གཏོར་མ་ཉེ་བར་བྱ་བ་ལ་སོགས་པ་བདུད་རྩིར་བྱས་ལ། ཨོཾ་བཛྲ་ཏཱ་རེ་བྷ་ཡ་ཧ་རེ་བིགྷྣཱཾ་ཤཱནྟི་ཀ་རེ། པྲ་ཀྲྀ་ཏེ་བྷ་སྭཱ་རེ། སརྦ་དུཥྚ་སཱ་དྷ་ནི་ཨི་མཾ་བ་ལིཾ་པྲ་ཏཱིཙྪ་མཾ་སརྦ་ས་ཏྭཱ་ནཱཉྩ་ར་ཀྵཾ་
ཀུ་རུ། ཤཱནྟིཾ་ཀུ་རུ། པུཥྚིཾ་ཀུ་རུ། བ་ལིཾ་ཀུ་རུ། རཀྵ་རཀྵ་མཾ་སརྦ་སཏྭཱཾཥྩ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཞེས་པས་གཏོར་མ་ཉེ་བར་བཤམས་ཏེ། ཧཱུཾ་དཀར་པོ་ཡོངས་སུ་གྱུར་པ་ལས་བྱུང་བའི་ལྗགས་རྡོ་རྗེའི་འོད་ཟེར་གྱི་སྦུ་གུ་ནས་འབྲུ་ཙམ་གྱིས་གསོལ་བས་དཀྱིལ་འཁོར་གྱི་བདག་པོ་འཁོར་དང་
བཅས་པ་ཚིམ་པར་བསམ་མོ། །དེ་ནས་ཁ་བཤལ་བ་ལ་སོགས་པ་བྱས་ལ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲི་ཌྷོ་མེ་བྷ་བ། སུ་པོཥྱོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿ། ཀུ་རུ་ཧཱུཾ་
ཧ་ཧ་ཧ་ཧ་ཧོཿབྷ་ག་ཝཱཾ་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཿཞེས་བརྗོད་པས་འདོད་པའི་དོན་ལ་གསོལ་བ་གདབ་སྟེ། ལྷ་མོ་ཚད་མ་དམ་ཚིག་ཚད་མ་དང་། །དེ་རྣམས་གསུང་ཡང་ཚད་མ་མཆོག་དང་ནི། །བདེན་པ་དེས་ནི་ལྷ་མོ་འདི་རྣམས་ཀྱིས། །བདག་ལ་
རྗེས་སུ་འཛིན་པའི་རྒྱུར་གྱུར་ཤོག །སྲིད་དང་ཞི་ལ་ཆགས་ཀུན་རྟོགས་པའི་རླབས་བཅོམ་ཞིང་། །དངོས་ཀུན་མ་ལུས་རང་བཞིན་ནམ་མཁའ་ལྟར་གཟིགས་པ། །བརྩེ་བའི་ཆུ་ཡིས་རབ་རྒྱས་ཐུགས་ནི་རྒྱ་མཚོའི་མཆོག །ལྷ་མོ་རྣམས་ཀྱིས་བདག་ལ་ཤིན་ཏུ་བརྩེར་མཛད་གསོལ། །ཞེས་

པ་འདི་རྣམས་བརྗོད་ལ་བཟོད་པར་གསལ་ཏོ། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །སངས་རྒྱས་ཡུལ་དུ་གཤེགས་སུ་གསོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་སེམས་ཅན་དོན་ལ་བྱོན། །ཞེས་པ་འདིས་གཡས་པའི་རྒྱབ་ཏུ་གཡོན་པའི་མཐེ་བོང་དང་།
སྲིན་ལག་གིས་སེ་གོལ་ལན་གསུམ་བརྡབས་པའོ། །དེ་ནས་ལམ་གྱི་བཞི་མདོར་གཏོར་མ་བཏང་ངོ་། །གཏོར་མ་དབུལ་བའི་ཆོ་གའོ། །དེའི་རྗེས་སུ་གཞན་ཡང་བཟའ་བའི་ཆོ་ག་ནི། འདིས་བཟའ་བར་བྱས་ཏེ། ལྟོ་བའི་མེ་ཐབ་ཀྱི་སྟེང་དུ་མེའི་ས་བོན་ལས་བྱུང་བའི་མེ་ལ་བཟའ་བ་ལ་
སོགས་པའི་རྫས་ལག་པའི་གཟར་བུས་སྦྱིན་སྲེག་བྱའོ། །ཧཱུཾ་དཀར་པོ་ལས་བྱུང་བའི་ལྗགས་རྡོ་རྗེ་ནས་འབྲུ་ཙམ་གྱིས་འཁོར་ལོ་དང་བཅས་པའི་སྒྲོལ་མའི་གཟུགས་ཀྱི་སྦྱར་བས་དགང་བླུགས་ཀྱིས་སྦྱིན་སྲེག་དབུལ་བར་བྱའོ། །མགྲིན་པའི་ལམ་དེ་དག་ཐམས་ཅད་ལྟོ་བའི་ཐབ་
ལ་རབ་ཏུ་ཞུགས་ཏེ། ལྟོ་བའི་མེས་ཞུ་ནས་བདུད་རྩིར་གྱུར་ཏེ། བདུད་རྩི་དེས་བཅོམ་ལྡན་འདས་མ་འཁོར་དང་བཅས་པ་ཚིམ་པར་གྱུར་པར་བསམ་མོ། །ཁྱད་པར་ནང་གི་སྦྱིན་སྲེག་གི་ཆོ་གའོ། །དེ་ནས་བདུད་རྩི་མྱངས་ནས་ལྷའི་བདག་ཉིད་ཅན་རྫོགས་པའི་རྣལ་འབྱོར་པ་སྤྲོ་བསྡུ་སྔོན་དུ་འགྲོ་བས།
བསྒོམས་པས་སྐྱོ་ན་མྱུར་བ་དང་། བུལ་བ་དང་། མི་གསལ་བ་དང་། ཆད་ལྷག་དང་། རྟོག་པ་ངན་པ་སྤངས་ལ་བཟླས་པ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བརྗོད་པ་ནི་རང་གི་སྙིང་གའི་ས་བོན་ལས་སྤྲོས་པའི་སྔགས་འཁོར་ལོ་བསྐོར་བའི་སྦྱོར་བས་ཁ་ནས་འཐོན་ཏེ། སངས་རྒྱས་ཀྱི་
ཡོན་ཏན་གྱི་ཚོགས་དང་། ནོར་བུ་དང་། སྔགས་དང་། སྨན་དང་། ཟླ་བ་དང་། སྐར་མ་དང་། བྲི་བ་བསྟན་བཅོས་དང་། སྒྱུ་རྩལ་གྱི་ཡོན་ཏན་ལ་སོགས་པའི་ནུས་པ་བླངས་ནས། ཡང་སྙིང་གའི་ཟླ་བ་ལ་རབ་ཏུ་ཞུགས་ཏེ། རང་དང་གཞན་ཐམས་ཅད་ཀྱིས་མི་ཤེས་པའི་མུན་པ་
བསྲེག་པའི་བདག་ཉིད་དུ་བསམ་པར་བྱ་སྟེ་སྔགས་བཟླས་པར་བྱའོ། །ཐུན་གསུམ་དུ་བསྒོམ་པར་བྱའོ། །སྐྱོ་ན་ལངས་ཏེ་རྟག་ཏུ་ལྷའི་རྣམ་པར་བསམ་པར་བྱའོ། །གང་གི་ཚེ་སྔགས་བཟླས་པ་ལས་ལྡང་བར་འདོད་པ་དེའི་ཚེ་སྔགས་ཀྱི་ཕྲེང་བ་རང་གི་སྙིང་གའི་ས་བོན་ལ་ཐིམ་

པར་བྱས་ལ། མཆོད་པ་སྔོན་དུ་འགྲོ་བས་སྨོན་ལམ་བཏབ་སྟེ། བསོད་ནམས་ཡོངས་སུ་བསྔོས་ལ་ཡི་གེ་བརྒྱ་པ་ལན་གསུམ་བརྗོད་དོ། །དེ་ནས་ལྷ་མོའི་ང་རྒྱལ་བྱ་སྟེ། ཆོས་ཐམས་ཅད་ཀྱང་དེའི་གཟུགས་སུ་བལྟས་ལ། ཇི་ལྟར་བདེ་བར་གནས་པར་བྱའོ། །
ཉལ་བའི་དུས་སུ་ཡང་བླ་མ་དང་། སངས་རྒྱས་དང་། སེམས་ཅན་དེ་རྣམས་སངས་རྒྱས་སུ་བལྟས་ལ་ཡང་དག་པར་མཆོད་དེ། བརྐྱང་ཕྱག་གིས་འདུད་པའི་བསམ་པས་སེང་གེའི་ཉལ་སྟབས་ཀྱི་ཚུལ་གྱིས་འོད་གསལ་དུ་སྙོམས་པར་འཇུག་པའི་རྣལ་འབྱོར་གྱིས་བསམ་པས་ཉལ་བར་བྱའོ། །
དེ་ནས་ཐོ་རངས་ཀྱི་ཐུན་ལ་ལྷ་མོའི་གླུའི་སྒྲས་རབ་ཏུ་བསྐུལ་བས་ལངས་ཏེ། ཐམས་ཅད་སྔ་མ་བཞིན་དུ་བྱའོ། །འདི་ནི་སྔགས་མཆོག་དམ་པ་ཡིན། །སངས་རྒྱས་ཀུན་གྱིས་ཕྱག་བྱས་པའི། །བཀླགས་པས་འགྲུབ་བྱེད་བཟང་པོ་ནི། །རྡོ་རྗེ་གུར་ལས་གསུངས་པའོ། །རྡོ་རྗེ་སྒྲོལ་མའི་བདག་རྣལ་འབྱོར། །སེམས་ཅན་དོན་
ཀུན་མཐར་ཕྱིན་པ། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ཁམས་གསུམ་འདི་ནི་བསྒྲུབ་པར་བྱ། །དེ་ནས་གཞན་ཡང་གཟུངས་སྔགས་འདི། །ཨོཾ་ན་མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚ་པྲ་དུཥྚཱཾ་མ་མ་ཀྲྀ་ཏ། ཛཾ་བྷ་
ཡ་ཛཾ་བྷ་ཡ། སྟཾ་བྷ་ཡ་སྟཾ་བྷ་ཡ། མེ་ཧ་ཡ། མོ་ཧ་ཡ། བནྡྷ་ཡ་བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚ་སྟཾ་བྷ་ནི་ཏཱ་རེ་སྭཱ་ཧཱ། སྔགས་འདིའི་ཉེ་བར་སྤྱོད་པའི་ཆོ་ག་བཤད་པར་བྱའོ། །སྔགས་འདིས་གོས་ཀྱི་ཐུ་བ་ལ་ལན་བདུན་མངོན་པར་བཟླས་ལ་མདུད་པ་བྱས་ཏེ་ནགས་འཐུག་
པོར་ཕྱིན་ཀྱང་གང་གིས་ཀྱང་འཇིགས་པར་མི་འགྱུར་ཏེ། སྟག་དང་། ཆུ་སྲིན་དང་། ཆོམ་རྐུན་དང་། སེང་གེ་དང་། སྦྲུལ་དང་། གླང་པོ་ཆེ་དང་། མ་ཧེ་དང་། དོམ་དང་། བ་མེན་ལ་སོགས་པ་རྣམས་ཀྱང་འདིའི་མཚན་དྲན་པ་ཙམ་གྱིས་རྣམ་པར་འཇིག་པར་འགྱུར་རོ། །དེ་ནས་མེ་
ཏོག་སྒྲོལ་མའི་རབ་སྦྱོར་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་བདག་གི་དབང་དུ་གྱིས་ཤིག་སྭཱ་ཧཱ། ཞེས་པའི་སྔགས་འདིས་ཨུཏྤལ་དམར་པོ་བརྒྱ་རྩ་བརྒྱད་ལ་སྦྱིན་སྲེག་བྱས་ན་གང་འདོད་པ་དེ་དབང་དུ་འདུ་བར་འགྱུར་རོ། །སྤོས་ཀྱི་སྒྲོལ་མའི་རབ་སྦྱོར་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་

པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟ་ཨུཙྪ་ཊ་ཡ་ཧཱུཾ། ཞེས་པའི་སྔགས་འདིས་བྱ་རོག་གི་སྒྲོ་ལ་ལན་སུམ་ཅུ་རྩ་གཅིག་བཟླས་ནས་དགྲ་པོའི་སྒོ་ལ་སྦས་པས་ཞག་བདུན་གྱིས་སྐྲོད་པར་འགྱུར་རོ། །མར་མེའི་སྒྲོལ་མའི་རབ་སྦྱོར་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་ཨ་བྷི་དྷ་ནཾ་ཀུ་མཾ་རཾ་མི་ཧྱཾ་བི་བྷ་ཧེ་ན་
ཡ་སྱ་སི་ཏྭ་པྲ་ཡཙྪ་ཏུ་སྭཱ་ཧཱ། མ་ད་ན་དང་གཏུམ་པའི་ས་བོན་དང་། དེ་བཞིན་སྨྱོན་བའི་འབྲས་བུ་དང་། །མྱ་ངན་མེད་པའི་མེ་ཏོག་ལ། །སྟོང་ཕྲག་ལྔ་རུ་སྦྱིན་སྲེག་བྱ། །བུ་རམ་སྦྲང་རྩི་མར་སྦྱིན་སྲེག །བུ་མོ་བསྒྲུབས་ལ་ཁྱད་པར་འཕགས། །དེ་ནས་རྣལ་འབྱོར་ཞག་བདུན་
བར། །བདག་འདོད་བུ་མོ་རྙེད་པར་འགྱུར། །ཞེས་སོ། །དྲིའི་སྒྲོལ་མའི་རབ་སྦྱོར་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་སྭསྠཱ་ནཱ་ད་མ་མ་ར་ཥ་ཨཱ་ཀཪྵ་ཡ་ཛཿཞེས་པའི་སྔགས་འདིས་ཁཾ་ཁྲིའི་ཚེར་མ་དང་། རང་བྱུང་གི་མེ་ཏོག་སྦྱིན་སྲེག་བྱའོ། །སྔགས་འདིས་རྒྱལ་པོའི་བུ་མོ་ཡང་དབང་
དུ་འགྱུར་རོ། །རྡོ་རྗེ་ལྕགས་ཀྱུ་མའི་རབ་སྦྱོར་ནི། ར་ཛ་ས་ལའི་རས་ལ་ཞལ་གཅིག་ཕྱག་གཉིས་པ་ལྕགས་ཀྱུ་དང་ཞགས་པ་འཛིན་པ་བྲིས་ལ། དེའི་མདུན་དུ་མཆོད་པ་བྱ་སྟེ། གཙང་ཞིང་གཙང་མ་ལས་བྱུང་བའི། །ལྷ་ཡི་མེ་ཏོག་དགེ་རྣམས་ནི། །གུས་པས་བདག་ནི་འབུལ་
ལགས་ན། །བཞེས་ཏེ་བདག་ལ་དགོངས་སུ་གསོལ། །སྤོས་བཟངས་དྲི་དང་ལྡན་པ་ཡིས། །འདི་ལྟར་ནགས་ཚལ་ཡིད་འོང་བ། །གུས་པས་བདག་ནི་འབུལ་ལགས་ན། །བཞེས་ཏེ་བདག་ལ་དགོངས་སུ་གསོལ། །གཙང་ཞིང་དགེ་ལ་མུན་པ་སེལ། །སྲིན་པོ་
འཇོམས་པའི་མར་མེ་འདི། །བདག་གིས་གུས་པས་འབུལ་ལགས་ན། །བཞེས་ནས་བདག་ལ་དགོངས་སུ་གསོལ། །གཙང་ཞིང་གཙང་མ་ལས་བྱུང་བའི། །དགེ་བའི་ལྷ་རྫས་དྲི་རྣམས་འདི། །བདག་གིས་གུས་པས་འབུལ་ལགས་ན། །བཞེས་ནས་བདག་ལ་དགོངས་སུ་
གསོལ། །ཞེས་བརྗོད་པས་བསྒོམ་པ་དང་ལྡན་པས་སྔགས་བརྗོད་པ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་སྭཱ་བ་ནཾ་ཨ་མུ་ཀི་དཪྵ་ཡ་ཧཱུཾ་ཕཊ། ཅེས་སྟོང་ཕྲག་ལྔ་བཟླས་ལ་ཞགས་པས་སྐེ་ལ་བཅིངས་པ་དང་ལྕགས་ཀྱུས་སྙིང་ལ་ཕུག་སྟེ། ཨུཏྤལ་དེ་ཉིད་ཀྱིས་རྐང་པ་གཉིས་བཅིངས་ལ་

བཀུག་སྟེ། རྐང་འོག་བསྒྲུབ་བྱ་བསམས་ནས་སུ། །ཁོལ་མོ་ལྟ་བུར་ལོངས་སྤྱད་བྱ། །ཞེས་སོ། །རྡོ་རྗེ་ཞགས་པའི་རབ་སྦྱོར་ནི། སྒྲོལ་མའི་གཟུངས་ཀྱིས་སྲིན་ལག་ལ་ལན་བདུན་བཟླས་པ་བྱས་ལ་བདག་གི་མིག་གཉིས་ལ་ཕྱིས་ཏེ། དེ་ནས་རྒྱལ་པོའི་དྲུང་དུ་ཕྱིན་ན་
རྒྱལ་པོ་དེ་སློབ་མ་ལྟ་བུར་འགྱུར་བས་དད་པར་བྱེད་པ་དང་། ངན་དུ་མི་སྨྲ་བར་སྦྱིན་པ་སྟེར་ཏེ། མཐུན་པའི་གཏམ་སྨྲ་བ། ཁོལ་པོ་ལྟ་བུར་འགྱུར་བ་དང་། ཁྲོས་ཀྱང་དབང་དུ་འགྱུར་རོ། །འདི་ནི་ཡིད་ཆེས་པར་མཐོང་བར་གྱུར་པས་ངོ་མཚར་ཆེའོ། །རྡོ་རྗེ་ལྕགས་སྒྲོག་མའི་རབ་སྦྱོར་ནི།
སྒྲོལ་མའི་གཟུངས་སྔགས་ལན་བརྒྱ་རྩ་བརྒྱད་བཟླས་ལ། མགོ་གཉིས་པའི་སྦྲུལ་གྱི་ཐལ་བ་བྱས་ལ། བ་དམར་མོའི་མར་དང་། ཤིང་ཨརྐའི་བལ་གྱིས་སྡོང་བུ་བྱས་ལ། དེ་ལས་མར་མེ་བྱས་ལ་སྣག་ཚ་བྱས་ཏེ། སྣག་ཚ་དེ་རྡོ་རྗེ་ཉི་མ་དང་། རྡོ་རྗེ་ཆོས་རྣམས་ཀྱིས་བསྲེས་ལ་
མཉེས་ཏེ་རྟ་མཆོག་གི་སྤོས་བཏང་ངོ་། །ཐལ་བ་དེ་དང་བཅས་པས་མིག་གཉིས་ལ་བྱུགས་ལ། རྡོ་རྗེའི་མིག་དེས་གང་མཐོང་བ་དེ་ལ་གལ་ཏེ་པདྨ་གར་གྱི་དབང་ཕྱུག་འཛག་པར་མ་གྱུར་ན། དེའི་ཚེ་བདག་སྒྲོལ་མ་མ་ཡིན་ཞིང་། སངས་རྒྱས་བཅོམ་ལྡན་འདས་ཐམས་ཅད་བདག་
གིས་གསད་པར་འགྱུར་རོ་ཞེས་སོ། །རྡོ་རྗེ་ལྕགས་སྒྲོག་མའི་རབ་སྦྱོར་གཉིས་པ་ནི། བུ་ཆུང་སོ་མ་སྐྱེས་པའི་ལྕེ་བླངས་ལ། སྒྲོལ་མའི་གཟུངས་སྔགས་ལན་བདུན་བཟླས་ཏེ། སྔོ་བྷྲྀངྒ་རཱ་ཛ་དང་གི་ཝང་དང་གཉིས་ལྷན་ཅིག་ཏུ་བྱས་ཏེ། དཔྲལ་བར་ཐིག་ལེ་བྱས་ན། གང་དང་གང་
མཐོང་བ་དེ་དབང་དུ་འགྱུར་རོ། །རྡོ་རྗེ་དྲིལ་བུའི་རབ་སྦྱོར་ནི། ལྟོ་བའི་སྲིན་བུ་ལ་སྒྲོལ་མའི་གཟུངས་སྔགས་ལན་བདུན་བཟླས་ཏེ། རྡོ་རྗེ་ཆོས་དང་ལྷན་ཅིག་བྱས་ཏེ། ཏཾ་པུ་ལ་དང་བཅས་པ་སྦྱིན་པར་བྱའོ། །རྣལ་འབྱོར་མཆོག་དེ་མིད་ན་མི་སྤོང་ཞིང་། གཞན་ལ་ཡང་མི་ཆགས་
ཏེ་གཞན་དུ་ཡང་མི་འགྲོ་ཞིང་རང་གི་བདག་པོ་ཡང་སྤངས་ཏེ། རང་གི་ཆུང་མ་ལྟ་བུར་སྤྱད་པར་འགྱུར་རོ། །རྡོ་རྗེ་དྲིལ་བུ་མའི་རབ་སྦྱོར་གཉིས་པ་ནི། བདག་ཉིད་སྒྲོལ་མར་བསྒོམས་ལ་ཚིལ་ཆེན་གྱི་བྱུག་པ་བྱ་ཞིང་སྔགས་ཁྲི་ཚོ་གཅིག་བཟླས་པ་བྱས་ལ། བཟླས་པའི་རྗེས་སུ་

འབྲས་མཁར་མ་ཅན་གྱི་འདག་པས་དྲི་མས་ཐོན་ལ། དེས་སྣུམ་ཁུར་དུ་བྱས་ལ། གང་ལ་སྦྱིན་པ་དེ་འཚོག་ཆས་ལྔ་དང་བྲལ་ཡང་མི་སྤོང་ངོ་། །གཙུག་ཏོར་རྣམ་པར་རྒྱལ་མའི་རབ་སྦྱོར་ནི། ཟླ་བ་གཟས་ཟིན་པའི་དུས་སུ་སྒྲོལ་མའི་གཟུངས་སྔགས་བཟླས་ཤིང་བརྟན་པར་བྱ་སྟེ། དེ་ལས་བྱུང་
བའི་འཇིག་རྟེན་དབང་ཕྱུག་དང་། དུང་དཀར་གྱི་ཐལ་བ་དང་བསྲེས་ཏེ་རབ་ཏུ་མོས་ནས་འཚོག་ཆས་ལྔ་དང་བྲལ་ཡང་མི་སྤོང་ངོ་། །གཙུག་ཏོར་རྣམ་པར་རྒྱལ་མའི་རབ་སྦྱོར་གཉིས་པ་ནི། སྒྲོལ་མའི་གཟུངས་སྔགས་ཀྱིས་ཤིང་ཐོག་མ་ངན་ལ་ལན་བརྒྱ་རྩ་བརྒྱད་བཟླས་ཏེ། རྡོག་མའི་འབྲུ་
དང་རྟ་མགྲིན་གཉིས་ལྷན་ཅིག་ཏུ་བྱས་ནས་གང་ལ་བྱུགས་པ་དེ་དབང་དུ་འདུ་བར་འགྱུར་རོ། །སྣོད་མཛེས་མའི་རབ་སྦྱོར་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་སྱ་བནྡྷ་ན་མུཀྟི་ཀུ་རུ་མུ་སྭཱ་ཧཱ། ཤིང་ཨརྐའི་འོ་མ་ལ་བསྒྲུབ་བྱའི་མིང་དང་བཅས་པ་བྲིས་ལ། ཀུ་ལི་རྟའི་ཚང་ལ་སྦས་ན། བཅིངས་པ་
ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་འདི། །བདག་གིས་བྱས་པའི་བསོད་ནམས་གང་། །ཐོབ་དེས་ཀུན་ཀྱང་འཇིག་རྟེན་འདིར། །བདེ་གཤེགས་གོ་འཕང་ཐོབ་པར་ཤོག །རྡོ་རྗེ་གུར་ལས་བྱུང་བ་གྲུབ་ཐོབ་ཆེན་པོ་སྣ་ཚོགས་དམར་པོ་ཞབས་ཀྱིས་མཛད་པ་རྫོགས་
སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་དཱ་ན་ཤཱི་ལས་རང་འགྱུར་དུ་མཛད་པའོ།། ༄༅། །རྒྱ་གར་སྐད་དུ། བཛྲ་ཏཱ་ར་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། བཅོམ་ལྡན་འདས་སྒྲོལ་མ་ལ་ཕྱག་འཚལ་ལོ། །སྦྱིན་སྲེག་དང་ནི་
ལས་ཀྱི་ཆོ་ག་ཡིས། །འདོད་པའི་དོན་ཀུན་སྒྲུབ་པར་བྱེད་པ་ཡི། །རྡོ་རྗེ་སྒྲོལ་མ་སྒྲུབ་པའི་ཐབས། །དེ་ནས་ཡང་དག་བཤད་བྱ་བ། །དེ་ལ་སྔགས་ཀྱི་ཚིག་འདི་ཡིན་ཏེ། འདི་ལྟ་སྟེ། ན་མོ་རཏྣ་ཏྲ་ཡཱ་ཡ། ན་མཿཨཱརྱཱ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་
རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚ་པྲ་དུཥྚཱཾ་མ་མ་ཀྲྀ་ཏེ་ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། སརྦ་དུཥྚ་སྟཾ་བྷ་ནི་ཏཱ་རེ་སྭཱ་ཧཱ། དེ་ལ་ཡང་དང་པོ་རེ་ཞིག་རང་གི་སྙིང་གར་ཟླ་བ་ལ་ས་བོན་ཏཱཾ་བསམས་ཏེ། དེའི་འོད་ཟེར་གྱིས་བླ་མ་དང་སངས་རྒྱས་དང་བྱང་

ཆུབ་སེམས་དཔའ་སྤྱན་དྲངས་ཏེ། མཆོད་པ་རྣམ་པ་སྣ་ཚོགས་ཀྱིས་ཡང་དག་པར་མཆོད་ལ། སྡིག་པ་བཤགས་པ་ལ་སོགས་པ་བྱ་ཞིང་། གསུམ་ལ་སྐྱབས་སུ་འགྲོ་བའི་ཚིགས་བཅད་རྫོགས་པར་བྱའོ། །དེ་ནས་ཚངས་པའི་གནས་བཞི་བསྒོམས་ལ། ཨོཾ་ཤཱུ་
ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ་ཞེས་བྱ་བའི་སྔགས་བརྗོད་པར་བྱའོ། །དེ་ནས་པཾ་ལས་སྐྱེས་པའི་པདྨ་དང་ཟླ་བའི་སྟེང་དུ་ཏཱཾ་གི་ས་བོན་བསམས་ཏེ། དེ་ཡོངས་སུ་གྱུར་པ་ལས། མ་མོའི་དཀྱིལ་འཁོར་དབུས་གནས་པའི། །ལྷ་མོ་སྒྲོལ་མ་བསྒོམ་པར་བྱའོ། །ཞལ་བཞི་མ་ལ་ཕྱག་བརྒྱད་མ། །
རྒྱན་རྣམས་ཀུན་གྱིས་བརྒྱན་པ་ཡི། །གསེར་གྱི་མདོག་ཅན་བསྒོམ་པར་བྱ། །གཞོན་ནུ་མ་ཡི་མཚན་ཉིད་འབར། །སྣ་ཚོགས་པདྨར་མཉམ་གནས་པའི། །ཟླ་བའི་གདན་ལ་ཡང་དག་བཞུགས། །སེར་དང་དཀར་དང་དམར་དང་གནག །གཡས་སྐོར་གྱི་ནི་ཞལ་བཞིའོ། །སྤྱན་གསུམ་
རྡོ་རྗེ་སྐྱིལ་ཀྲུང་གནས། །འོད་དམར་སངས་རྒྱས་བཞིས་དབུ་བརྒྱན། །རྡོ་རྗེ་མདའ་དུང་མཆོག་སྦྱིན་ནི། །གཡས་པའི་ཕྱག་ན་བསྣམས་པའོ། །ཨུཏྤལ་གཞུ་དང་རྡོ་རྗེ་ལྕགས་ཀྱུ་ཞགས། །སྡིགས་མཛུབ་གཡོན་པའི་ཕྱག་ན་འཕྱར་བའོ། །རྡོ་རྗེ་སྐྱིལ་ཀྲུང་རྣལ་འབྱོར་གྱིས། །ས་གསུམ་པོ་ཡང་
བསྒྲུབ་པར་བྱ། །དེ་མདུན་མེ་ཏོག་སྒྲོལ་མ་ནི། །མདོག་ནི་དཀར་ཞིང་ཡིད་འོང་མ། །ཨོཾ་ཡིག་ལས་ནི་ཡང་དག་རྫོགས། །མེ་ཏོག་སྣོད་ནི་ཕྱག་ན་བསྣམས། །ཞལ་གཅིག་ཕྱག་ནི་གཉིས་པ་སྟེ། །རྒྱན་རྣམས་ཀུན་གྱིས་རྣམ་བརྒྱན་པའོ། །ལྷོ་ཕྱོགས་བདུག་སྤོས་སྒྲོལ་མ་ནི། །གཟུགས་མཛེས་
མདོག་ནི་གནག་པ་སྟེ། །བདུག་སྤོས་སྣོད་ནི་ཕྱག་བསྣམས་ཤིང་། །རྒྱན་རྣམས་ཀུན་གྱིས་རྣམ་པར་བརྒྱན། །ནུབ་ཕྱོགས་མར་མེ་སྒྲོལ་མ་ཡང་། །མདོག་ནི་སེར་ཞིང་ཡིད་འཕྲོག་མ། །བཟང་པོ་མར་མེའི་སྣོད་བསྣམས་ཤིང་། །གསེར་གྱི་རྣ་ཆ་རབ་ཏུ་གཡོ། །བྱང་ཕྱོགས་དྲི་ཡི་སྒྲོལ་
མ་ནི། །དྲི་ཡི་དུང་ཆོས་ཕྱག་ན་བསྣམས། །ལྷ་མོ་མདོག་ནི་དམར་འདྲ་བ། །སྙིང་པོའི་དཀྱིལ་འཁོར་ལ་བསྒོམ་བྱའོ། །འདི་ཀུན་ཞལ་གཅིག་ཕྱག་གཉིས་མ། །རྒྱན་རྣམས་ཀུན་གྱིས་རྣམ་པར་བརྒྱན། །རྡོ་རྗེ་སྐྱིལ་མོ་ཀྲུང་གིས་ནི། །ལྷ་མོ་དྲུག་པོ་འདི་ཀུན་བཞུགས། །ཅུང་ཟད་ཞལ་

ནི་གཙིགས་པ་སྟེ། །འགྱིང་བག་བཅས་པས་ཡང་དག་གནས། །འདི་ལྟར་དཀྱིལ་འཁོར་ཀུན་བསམས་ལ། །རང་གི་སྙིང་གའི་ས་བོན་གྱི། །འོད་ཀྱིས་ཡེ་ཤེས་སྤྱན་དྲངས་ཏེ། །ཛཿ་ཧཱུཾ་བཾ་ཧོཿའི་སྔགས་ཀྱིས་ནི། །དགུག་པ་ལ་སོགས་བྱ་བའོ། །ཤར་གྱི་སྒོ་རུ་བསམ་པ་ནི། །རྡོ་རྗེ་ལྕགས་ཀྱུ་འོད་
དཀར་མ། །ཕྱག་ན་རྡོ་རྗེ་ལྕགས་ཀྱུས་མཚན། །ཡིད་དུ་འོང་བའི་བདག་ཉིད་དོ། །ལྷོ་སྒོར་རྡོ་རྗེ་ཞགས་པ་མ། །གནག་ཅིང་ཤིན་ཏུ་འདོད་ལ་དགའ། །བཟང་པོའི་རྒྱན་གྱིས་བརྒྱན་པའི་ལུས། །རྡོ་རྗེ་ཞགས་པ་འཆང་བའི་མཆོག །རྡོ་རྗེ་ལྕགས་སྒྲོག་དམར་སེར་མ། །རྡོ་རྗེ་ལྕགས་
སྒྲོག་ཕྱག་བསྣམས་ཤིང་། །སྣ་ཚོགས་རྒྱན་གྱིས་བརྒྱན་པ་ནི། །ནུབ་ཀྱི་སྒོ་རུ་བསམ་པར་བྱ། །བྱང་སྒོར་རྡོ་རྗེ་དྲིལ་བསྣམས་མ། །མདོག་དམར་བཟང་པོ་ཡི་ནི་གཟུགས། །དགེ་ཞིང་བརྟན་པར་བལྟ་བར་བྱ། །སྟེང་དུ་གཙུག་ཏོར་རྣམ་རྒྱལ་མ། །གཟུགས་བཟང་མདོག་ནི་སེར་
བ་སྟེ། །བྱང་ཆུབ་འབྲས་བུ་སྦྱིན་བྱེད་པས། །དེ་ནས་སྔགས་པས་འཁོར་ལོ་འཆང་། །སྙིང་པོའི་དཀྱིལ་འཁོར་འོག་ཏུ་ནི། །དགེ་ཞིང་འོད་འབར་བ་ཡི་གཟུགས། །ཀླུ་ཡི་ཞགས་པ་ཕྱག་ན་བསྣམས། །ཞལ་གཅིག་ཕྱག་ནི་གཉིས་མ་སྟེ། །ཐམས་ཅད་མཁྱེན་པའི་ཡིད་འོང་མ། །
མདོག་གནག་རྣམ་པར་བསྒོམ་པར་བྱའོ། །ཡི་གེ་བཅུ་པ་འདི་ཡིས་ནི། །ལྷ་མོ་བཅུ་ནི་རྣམ་པར་སྤྲུལ། །ཕ་རོལ་ཕྱིན་བཅུ་དག་པ་སྟེ། །ཆོས་ཀུན་རབ་ཏུ་སྒྲུབ་པར་བྱེད། །དེ་ལ་ཡི་གེ་བཅུ་པ་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་བཞིན་དུ་སྐུ་གསུང་ཐུགས་བྱིན་གྱིས་བརླབ་པ་དང་། དབང་བསྐུར་བ་
དང་། ཐིག་ལེ་དང་། ཕྲ་མོ་དང་། བཟླས་པ་ལ་སོགས་པ་བསྒོམ་པར་བྱའོ། །སངས་རྒྱས་ཀུན་གྱིས་ཕྱག་བྱས་པ། །སྔགས་མཆོག་འདི་ནི་གཙོ་བོ་སྟེ། །བཟང་པོ་བརྗོད་པས་འགྲུབ་པར་འགྱུར། །རྡོ་རྗེ་གུར་ལས་གསུངས་པའོ། །འདིར་སྔགས་འདི་ཉེ་བར་སྤྱོད་པ་ནི་སྔགས་འདི་
ཡིས་གོས་ཀྱི་ཐུ་བ་བཟུང་སྟེ། ལན་བདུན་བསྔགས་ལ་མདུད་པ་བྱ་སྟེ། འཇིགས་པ་དང་བཅས་པའི་ས་གང་དུ་འགྲོ་ཡང་འཇིགས་པར་མི་འགྱུར་རོ། །སྟག་དང་རྐུན་མ་དང་ཆུ་སྲིན་དང་སེང་གེ་དང་སྦྲུལ་དང་གླང་པོ་ཆེ་དང་མ་ཧེ་དང་དྲེད་དང་བ་ལང་ལ་སོགས་པས་ཀྱང་གནོད་པ་བྱེད་མི་ནུས་སོ། །

དེ་བཞིན་དུ་སྔགས་འདིས་ཨུཏྤ་ལ་ལན་བརྒྱ་རྩ་བརྒྱད་སྦྱིན་སྲེག་བྱས་ན་གང་འདོད་པ་དེ་དབང་དུ་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་མེ་བ་ཤ་མ་ནཱ་ཡ་སྭཱ་ཧཱ། དེ་བཞིན་དུ་སྔགས་འདིས་ཁྭའི་སྒྲོ་ལ་ལན་སུམ་ཅུ་རྩ་གཉིས་བཟླས་ནས་དགྲ་བོའི་ཁང་པར་སྦས་ན། དེ་ཞག་བདུན་
གྱིས་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟ་ཡ་ཨུཙྪ་ཊ་ཡ་ཧཱུཾ་ཕཊ། ཅེས་པ་ནི་བསྐྲད་པའི་ཆོ་གའོ།། །།དེ་བཞིན་དུ་སྦྱོར་བ་གཞན་ཡང་ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་ཨ་བྷི་ནཾ་དྷ་ནཾ་ཀུ་མ་རི་མ་ཧྱ་མུ་དྲ་ཐ་ཧེ་ན་ཧ་སྱེཿཔི་ཏ་པ་ཏཱ་ཡཙྪ་རུ་སྭཱ་ཧཱ། མྱོས་བྱེད་གཏུམ་
པོའི་ས་བོན་དང་། །དེ་བཞིན་སྨྱོ་བྱེད་འབྲས་བུ་དང་། །མྱ་ངན་མེད་ཀྱི་མེ་ཏོག་ལ། །སྟོང་ཕྲག་ལྔ་ནི་སྦྱིན་སྲེག་བྱ། །མར་དང་སྦྲང་རྩི་བུ་རམ་གྱིས། །སྦྱིན་སྲེག་བུ་མོ་བསྒྲུབས་ལ་བསྔགས། །དེ་ནས་ཞག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་སྦྱོར་བ་གཞན་ཡང་ཨོཾ་ཏཱ་
རེ་ཏུཏྟཱ་རེ་ཏུ་རེ་ཨ་མུ་ཀཾ་ཨ་མུ་ཀཱ་ཨ་བྷི་དྷཱ་ནཱཾ་སྭ་ན་ཏ་ཨཱ་ཀཪྵ་ཡཱ་མ་མ་ཨནྟི་ཀེ་ཛཿཞེས་བྱ་བའི་སྔགས་འདིས་རྒྱ་ཤུག་གི་ཚེར་མ་ལ་སྟོང་ཕྲག་ལྔ་རང་བྱུང་གི་མེ་ཏོག་ལ་བསྙུགས་ཤིང་སྦྱིན་སྲེག་བྱས་ན་འདིས་ནི་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ཡང་སྦྱོར་བ་འདི་ཡིན་ཏེ།
རང་བྱུང་གི་མེ་ཏོག་གིས་བསྐུས་པའི་རས་ལ་བཅོམ་ལྡན་འདས་ཞལ་གཅིག་ཕྱག་གཉིས་མ། ལྕགས་ཀྱུ་དང་ཨུཏྤ་ལའི་ཞགས་པ་ཕྱག་ན་བསྣམས་པ་བྲིས་ལ། དེའི་མདུན་དུ་ལྷ་རྫས་བཟང་པོ་འདི་ཞེས་བྱ་བ་ལ་སོགས་པས་མཆོད་པ་བྱས་ལ་བཅོམ་ལྡན་འདས་ལ་བཟླས་པ་བྱའོ། །ཨོཾ་
ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀི་མི་པ་སིང་ཧཾ་སྭ་པ་ནཾ་ཀ་ཐ་ཨ་ཧཱུཾ་ཕཊ། སྟོང་ཕྲག་ལྔ་བཟླས་པས་འོང་བར་འགྱུར་རོ། །ཞགས་པས་སྐེ་ནས་བཅིངས་ཏེ། ལྕགས་ཀྱུས་ཕུག་ལ་རྐང་པ་གཉིས་ནས་ཨུཏྤ་ལ་ཡིས་བཅིངས་ལ། བསྒྲུབ་བྱ་ཀུན་ཏུ་བཀུག་སྟེ། རྐང་པའི་འོག་ཏུ་བསམས་ལ། བྲན་མོའི་
གཟུགས་ཀྱིས་ལོངས་སྤྱད་པར་བྱའོ། །དེ་ནས་སྦྱོར་བ་གཞན་ཡང་སྒྲོལ་མའི་གཟུངས་ཀྱིས་ལན་བདུན་བསྔགས་ཏེ། བདག་ཉིད་ཀྱི་མིག་གཉིས་ལ་བྱུགས་ལ། རྒྱལ་པོའི་རིགས་ཀྱི་ནང་དུ་ཞུགས་ན་རྒྱལ་པོ་དང་བཅས་པས་བླ་མར་བྱེད་དོ། །དབང་དུ་བྱེད་པར་འགྱུར་རོ། །དེ་ནས་གཞན་

ཡང་སྦྱོར་བ་ནི་སྒྲོལ་མའི་གཟུངས་ཀྱིས་བརྒྱ་རྩ་བརྒྱད་བརྗོད་དོ། །སྦྲུལ་གྱི་རྒྱལ་པོ་མགོ་གཉིས་པའི་མགོ་ཐལ་བར་བྱས་ཏེ། བ་དམར་མོའི་མར་ལ་ཨརྐའི་སྤྲ་བའི་སྡོང་བུ་བྱས་ཏེ། མེ་སྦར་ལ་དུད་པ་བསག་པར་བྱའོ། །དུད་པ་དེ་དང་རྡོ་རྗེ་ཉི་མ་དང་། རྡོ་རྗེ་ཆོས་དང་བསྲེས་ཤིང་མཉེས་ལ་རྟ་མཆོག་
གིས་བདུག་པར་བྱའོ། །དེ་ནས་ཐལ་བ་དང་ལྷན་ཅིག་ཏུ་མིག་ལ་བསྐུས་ནས་གང་རྡོ་རྗེ་མིག་གིས་བལྟས་པ་དེའི་པདྨ་རཱ་ག་འཛག་པར་འགྱུར་རོ། །གལ་ཏེ་དེ་ལྟར་མ་གྱུར་ན་ནི་བདག་ཉིད་སྒྲོལ་མས་སངས་རྒྱས་བཅོམ་ལྡན་འདས་ངེས་པར་སྤོང་བ་ཡིན་ནོ། །དེ་ནས་སྦྱོར་བ་གཞན་ཡང་ལྟོ་བའི་སྲིན་བུ་ལ་
གཟུངས་ཀྱིས་ལན་བདུན་བཟླས་ལ་རྡོ་རྗེ་ཆོས་དང་ལྷན་ཅིག་ཏུ་བྱས་ལ་སག་རྩི་དང་སྦྱར་ལ་སྦྱིན་ནོ། །དེ་ལོངས་སྤྱད་ན་ཆོ་ག་མཆོག་འདིས་རང་གི་ཆུང་མ་བཞིན་དུ་གཏོང་བར་མི་འགྱུར་རོ། །དེ་ནས་སྦྱོར་བ་གཞན་ཡང་སོ་མ་བརྗེས་པའི་བུ་ཆུང་གི་ལྕེ་བླངས་ལ་སྒྲོལ་མའི་གཟུངས་ཀྱིས་ལན་བདུན་བསྔགས་
ལ། །བྷྲྀངྒ་རཱ་ཛ་དང་གི་ཝང་གཅིག་ཏུ་བྱས་ཏེ་དཔྲལ་བར་ཐིག་ལེ་བྱས་ལ་དེ་གང་ལ་བསྟན་པ་དེ་དབང་དུ་འགྱུར་རོ། །སྦྱོར་བ་གཞན་ཡང་ཞག་ཆེན་པོས་རང་གི་ལུས་ལ་བྱུགས་ཏེ་བསྒོམ་པ་དང་ལྡན་པས་སྒྲོལ་མའི་གཟུངས་ཁྲི་ཚོ་གཅིག་བཟླས་པར་བྱའོ། །བཟླས་པའི་མཐར་འབྲས་སཱ་ལུའི་ཟན་གྱིས་
དྲིལ་ཕྱིས་བྱས་ལ་དེ་གང་ལ་བྱིན་པ་དེ་ཇི་སྲིད་འཚོའི་བར་དུ་དབང་དུ་འགྱུར་རོ། །སྦྱོར་བ་གཞན་ཡང་ཟླ་བ་གཟས་ཟིན་པའི་དུས་སུ་སྒྲོལ་མའི་གཟུངས་བཟླས་ཤིང་སྔོན་དུ་བསྙེན་པ་བྱས་ལ་དེ་ལས་བྱུང་བའི་སྤྱན་རས་གཟིགས་ཀྱི་དབང་ཕྱུག་ཏུ་དུང་གི་ཕྱེ་མས་དགང་བར་བྱའོ། །དེ་གང་ལ་བྱིན་པ་དེ་ཇི་
སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །སྦྱོར་བ་གཞན་ཡང་སྒྲོལ་མའི་གཟུངས་སྨྱོ་བྱེད་ཀྱི་འབྲས་བུ་ལ་ལན་བརྒྱ་རྩ་བརྒྱད་བསྔགས་ཏེ། འབྲས་བུ་དེ་དང་རྟ་མགྲིན་དང་ལྷན་ཅིག་ཏུ་གང་ལ་བྱིན་པ་དེ་དབང་དུ་འགྱུར་རོ། །སྦྱོར་བ་གཞན་ནི་ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀ་ས་བནྡྷ་ན་མུཀྟི་ཀུ་རུ་སྭཱ་ཧཱ། སྔགས་
འདིས་ཨརྐའི་འདབ་མ་ལ་བསྒྲུབ་བྱའི་མིང་བར་དུ་བཅུག་སྟེ་བྲིས་ལ་སྲིན་བུ་ཀ་ཀ་རུའི་ཁུང་བུར་སྦས་ན་བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་བཛྲི་ཏཱ་རེ་སཱ་དྷ་ནཾ།