Luận tạng Tây Tạng (Tengyur) — Tập 10

ིད་ཀྱིས་མཆོད་པ་བྱས་ལ། ཨོཾ་བཛྲ་མུཿཞེས་བྱ་བ་འདིས་གཤེགས་སུ་གསོལ་ལོ། །

ཟས་ཀྱི་དུས་སུ་ཡང་དེ་བཞིན་དུ་ཟས་ཀྱི་རྫས་རྣམས་སྦྱར་ནས། བདག་ཉིད་ཀྱི་ལྕེ་ལ་ཧཱུཾ་ལས་རྡོ་རྗེ་དཀར་པོར་བྱས་ལ། སྙིང་གར་བཅོམ་ལྡན་འདས་བལྟས་ལ་དེ་ཉིད་དུ་དེ་བཞིན་གཤེགས་པ་ཐམས་ཅད་བསྡུས་ནས། ཡེ་ཤེས་སེམས་དཔའི་ཐུགས་ཀའི་ས་བོན་ལས་བྱུང་བའི་མེས། ཁ་
ཟས་ཀྱི་རྫས་རྣམས་སྦྱངས་ཤིང་སྦྱིན་སྲེག་བྱེད་དོ། །ཆགས་པའི་དུས་སུ་ཡང་ཤེས་རབ་མ་བདག་མེད་མའི་གཟུགས་སུ་མོས་པ་བྱས་ནས། དེའི་མགོ་བོ་ལ་ཨོཾ། སྙིང་གར་ཧཱུཾ། པདྨའི་ལྟེ་བ་ལ་ཨཱཿབསམས་ནས། ཨོཾ་པདྨ་སུ་ཁ་དྷ་ར་མ་ཧཱ་རཱ་ག་སུ་ཁཾ་དཏྟ་ཙ་ཏུར་ཨཱ་ནནྡ་བྷ་ག་བི་ཤྭ་ཧཱུཾ་ཧཱུཾ་ཧཱུཾ་ཀརྱཾ་ཀུ་
རུ་ཥྭ་མེ་ཞེས་བྱ་བ་འདིས་པདྨ་བྱིན་གྱིས་བརླབས་ལ། བདག་ཉིད་ལ་ཡི་གེ་གསུམ་བཀོད་ལ། ཧཱུཾ་ལས་རྡོ་རྗེ་བསྒོམས་ནས། ཨོཾ་ལས་དེའི་ནོར་བུའོ། །ཨོཾ་བཛྲ་མ་ཧཱ་དྭེ་ཥ་ཙ་ཏུར་ཨཱ་ནནྡ་ད་ཡ་ཀ་ཁ་ག་མུ་ཁེ་ཨེ་ཀ་རཱ་སོ་ནཱ་ཐ་ཧཱུཾ་ཧཱུཾ་ཧཱུཾ་ཀ་རྱཾ་ཀུ་རུ་ཥྭ་མེ། ཞེས་བྱ་བ་འདིས་རྡོ་རྗེ་བྱིན་གྱིས་བརླབས་ནས། སིཾ་
སིཾ་སིཾ། ཧ་ཧ་ཧ་ཞེས་བྱ་བས་ཆགས་པ་བརྩམ་པར་བྱའོ། །བླ་མའི་མན་ངག་གིས་སྐད་ཅིག་མ་མཚོན་པར་བྱས་ནས། རྫོགས་པ་དང་བདུད་རྩི་ལེན་གྱིས་བླངས་ལ་བདག་ཉིད་ཚིམ་པར་བྱའོ། །ཉལ་བའི་དུས་སུ་ལྷན་ཅིག་སྐྱེས་པའི་རང་བཞིན་དུ་སྣ་ཚོགས་འདིས་མོས་པར་བྱས་ལ་གཉིད་ལོག་
པར་བྱའོ། །བྱིས་པ་རྣམས་ཀྱིས་རྟོགས་བྱའི་ཕྱིར། །སྟོན་པ་མགོན་པོ་ཞལ་བརྒྱད་པའི། །བདག་གིས་སྒྲུབ་ཐབས་བྱས་པ་དེས། །འགྲོ་ཀུན་རྡོ་རྗེ་འཛིན་གྱུར་ཅིག །དཔལ་དགྱེས་པ་རྡོ་རྗེ་ཕྱག་བཅུ་དྲུག་པའི་སྒྲུབ་ཐབས། པཎྜི་ཏ་ཨཱ་ཙརྱ་ཀྲྀཥྞའི་ཞལ་སྔ་ནས་མཛད་པ་རྫོགས་སོ།། །།
༄༅༅། །རྒྱ་གར་སྐད་དུ། ཤྲཱི་ཧེ་བཛྲ་བ་ལིཾ་ཀྲ་མ། བོད་སྐད་དུ། དཔལ་དགྱེས་པའི་རྡོ་རྗེའི་གཏོར་མའི་རིམ་པ། དཔལ་ངག་གི་དབང་ཕྱུག་ལ་ཕྱག་འཚལ་ལོ། །ཐབས་དང་ཤེས་རབ་བདག་ཉིད་ཅན། །ཡི་གེ་གཉིས་ལས་ཡང་དག་འབྱུང་། །སྐུ་གསུང་ཐུགས་ཀྱི་དབང་ཕྱུག་
གཙོ། །ཧེ་རུ་ཀ་ལ་ཕྱག་འཚལ་ཏེ། །སྐུ་གསུང་ཐུགས་ཀྱི་དབྱེ་ལྡན་པའི། །དགྱེས་པའི་རྡོ་རྗེའི་དཀྱིལ་འཁོར་ལ། །བདུད་རྩི་གཏོར་མ་དབུལ་བ་ཡི། །ཆོ་གའི་ཐབས་ཀྱི་རིམ་པ་བཤད། །དེ་ལ་གཏོར་མའི་དགོས་པ་ནི། །དཔལ་ཀྱེའི་རྡོ་རྗེའི་དཀྱིལ་འཁོར་དང་། སྦྱིན་སྲེག་དང་མཆོད་

པ་དང་། སྒྲུབ་པའི་དུས་སུ་རྣལ་འབྱོར་པས་ཕན་གདགས་པ་དང་། ཚར་གཅད་པ་དང་། རིགས་ཀྱི་བུ་དག་ཚེ་རིང་བར་འདོད་པ་དང་། ཡམས་དང་ནད་མེད་པར་འདོད་པ་དང་། མུ་གེ་ཞི་བར་འདོད་པ་དང་། གནོད་པ་ཞི་བར་འདོད་པ་དང་། དཔལ་དང་གྲགས་པ་འཕེལ་བར་
འདོད་པ་དང་། དུས་མ་ཡིན་པར་འཆི་བ་ཟློག་པར་འདོད་པ་དང་། ལོངས་སྤྱོད་དང་འབྱོར་པ་འདོད་པ་དང་། ཕས་ཀྱི་རྒོལ་བ་བཟློག་པར་འདོད་པ་དང་། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐོབ་པར་འདོད་པ་མཁས་པས་གཏོར་མའི་ལས་ལ་བརྩོན་པར་བྱའོ། །དེ་ཡང་གང་
ཞིག་ཅེ་ན་གཞུང་ལས། བགེགས་རྣམས་ཞི་བར་བྱ་བ་དང་། ལྷ་རྣམས་འགོ་བར་བྱ་བ་དང་། དམ་ཚིག་ཉམས་པ་བསྐང་བའི་ཕྱིར། །གཏོར་མའི་ལས་འདི་ཅི་ནུས་བརྩམ། །ཞེས་འབྱུང་ངོ་། །ཡང་ཁ་ཅིག་ལས། འབྱུང་པོ་ཀུན་ལ་གཏོར་མ་འདི་དག་གིས། །རྣལ་འབྱོར་པ་ཡིས་མཆོད་
པ་ལེགས་བྱས་ནས། །དུས་ཀུན་རྙེད་པས་བདེ་བར་འགྱུར་བ་དང་། །ལྷ་རྣམས་དགའ་ཞིང་འགྲོ་བ་འབྱོར་བར་འགྱུར། །འབྱུང་པོའི་ཚོགས་ལ་གཏོར་མ་གཅིག་སྦྱིན་ན། །སྡང་དང་མངོན་སྤྱོད་དགྲ་ཡི་སྡེ་འཇོམས་ཤིང་། །དགར་དང་གསད་དང་དགུག་པར་བྱེད་པ་དང་། །ཞི་ཞིང་
བདེ་དང་རྒྱས་པར་བྱེད་པ་ཡིན། །ཞེས་འབྱུང་ངོ་། །ཡང་སློབ་དཔོན་ཁ་ཅིག་གིས། །འཇིག་རྟེན་འཇིག་རྟེན་ལས་འདས་པའི། །དངོས་གྲུབ་ཆོ་ག་ཐམས་ཅད་ལ། །དཔལ་ལྡན་རྫོགས་པའི་སངས་རྒྱས་ཀྱིས། །གཏོར་མའི་ལས་འདི་ཤིན་ཏུ་བསྔགས། །ཞེས་འབྱུང་བས།
གཏོར་མའི་ལས་འདི་ཤིན་ཏུ་ཕན་ཡོན་ཆེའོ། །དེ་ལ་འདིར་ནི་སྔགས་པས་འབྱུང་པོ་ཉི་ཤུ་རྩ་བཞི་ལ་གཏོར་མ་སྦྱིན་དགོས་ཏེ། ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་དང་ཕྱོགས་སྐྱོང་བརྒྱད། །འཁོར་དུ་གཏོགས་པའི་བརྒྱད་པོ་རྣམས། །རང་རང་འཁོར་དང་བཅས་རྣམས་
ལ། །རྒྱུན་དུའམ་ནི་ཟླ་བའམ། །དེ་བཞིན་ལོ་གཅིག་རྒྱུན་འཁོར་རམ། །ཟླ་བ་ཡར་ངོའི་ཚེས་བཅུ་དང་། །མར་ངོ་ཡི་ནི་ཚེས་བཅུ་ལ། །དཀྱིལ་འཁོར་སྦྱིན་སྲེག་བཟླས་པ་དང་། །དེ་བཞིན་གནོད་བྱུང་དུས་དག་གམ། །ཇི་ལྟར་འོས་ཤིང་རིགས་པ་དང་། །རང་གིས་ཇི་ལྟར་རྗེས་མཐུན་པར། །

ཅི་འབྱོར་པ་ཡི་ཡོ་བྱད་ཀྱིས། །ནན་ཏན་དུ་ནི་གཏོར་མ་སྦྱིན། །ཞེས་འབྱུང་ངོ་། །དེ་ལ་གཏོར་མའི་གཡོས་ཀྱང་ཇི་ལྟར་ཞེ་ན། མེ་ཏོག་བདུག་སྤོས་མར་མེ་བྱུག་པ་དང་། །སྨན་རྣམས་དང་ནི་དྲི་དང་ལྷ་བཤོས་དང་། །ཚོད་མ་དག་དང་ལ་དུ་ཁུར་བ་དང་། །ཟས་དྲོན་དང་ནི་དྲུག་ཅུ་པར་བཅས་དང་། །
ཕྱེ་སོགས་བྱས་པ་བསྲེས་ནས་ནི། །འབྲས་ཆན་འབྲས་ཀྱི་ཕྱི་ནང་འབྲུ་བདུན་དང་། །ཞོ་དང་འབྲུ་མར་འོ་ཐུག་སོགས་པ་བསྲེ། །ཁྲག་དང་ཤ་དང་སྲན་མ་ཉ་ཤ་སོགས། །སྦྱར་ཆང་འབྲུ་ཆང་སྣ་ཚོགས་ཆན་ལ་སོགས། །བཙོས་དང་རྗེན་དང་རྙིང་དང་བཅས་པ་རྣམས། །ཇི་བཞིན་བདུད་
རྩི་ལྔ་དང་བསྲེས་བྱས་ནས། །དེ་དག་ཀུན་གྱིས་སྣོད་རྣམས་བཀང་ནས་སུ། །བུམ་པ་ཆུས་བཀང་བ་ཡི་སྟེང་དུ་གཞག །ཁུར་བ་ཟན་དུ་མར་མེ་སྟེང་དུ་བལྟམ། །མཚན་མོའི་དུས་སུ་དེ་དག་ལ་ཡང་དབུལ། །ཞེས་འབྱུང་བས། དྲག་པོ་ལ་ནི་དགྲ་བོའི་གཟུགས་བརྙན་སྟེང་དུ་གཞག་གོ། །
གཏོར་མ་ཁ་དོག་ལས་ཀྱིས་བསྒྱུར་རོ། །དེ་ནས་གཏོར་མ་བྱིན་གྱིས་བརླབ་པའི་རིམ་པ་ནི། དེ་དང་པོར་བདག་ཉིད་ལྷའི་སྐུ་ཕྱག་རྒྱ་ཆེན་པོར་གསལ་བར་བསྒོམས་ནས། ཐོག་མ་ནམ་མཁའ་ལྟ་བུ་ལ། །ཡཾ་ལས་རླུང་གི་དཀྱིལ་འཁོར་ཡཾ་གིས་མཚན་པ། རཾ་ལས་མེའི་དཀྱིལ་འཁོར་རཾ་
གྱིས་མཚན་པ། དེའི་སྟེང་དུ་ཨ་ལས་ཐོད་པ། དེའི་ནང་དུ་ཉི་མའི་སྟེང་དུ་ཧཱུཾ་བྷྲཱུཾ་ཨཱཾ་ཛྲཱྀཾ་ཁཾ་དང་གོ་ཀུ་ད་ཧ་ན་ལས། ལྕགས་ཀྱུ་ལྔ་དང་། བདུད་རྩི་ལྔར་བསྐྱེད་དོ། །དེའི་སྟེང་དུ་ཧཱུཾ་ལས་རྡོ་རྗེ་ཨ་ལས་ཟླ་བ་ལ་ཕྱེད་ནུབ་པའོ། །དེའི་སྟེང་དུ་ཨོཾ་གྱིས་ཡེ་ཤེས་ཀྱི་བདུད་རྩི་སྤྱན་དྲངས། ཨཱཿས་
གཟི་བརྗིད་བསྐྱེད། ཧཱུཾ་གིས་ཡེ་ཤེས་ཀྱི་བདུད་རྩི་དང་། དམ་ཚིག་གི་བདུད་རྩི་གཉིས་སུ་མེད་པར་བྱའོ། །དེ་ལྟར་བྱིན་གྱིས་བརླབས་ནས་མདུན་དུ་གྲུ་གསུམ་ཆོས་འབྱུང་ནང་དུ་པདྨ་སུམ་བརྩེགས་བསམ་སྟེ། དང་པོ་པདྨ་དཀར་པོའི་དབུས་སུ་དགྱེས་པའི་རྡོ་རྗེ་དཀར་པོ་ལས་ལྷ་བརྒྱད་
ཨོཾ་ལས་བསྐྱེད་པས་བསྐོར། བར་དུ་པདྨ་སྔོན་པོའི་དབུས་སུ་དགྱེས་པའི་རྡོ་རྗེ་སྔོན་པོ་ལ་ཧཱུཾ་ལས་བསྐྱེད་པའི་ཕྱོགས་སྐྱོང་བཅུ་སྔོན་པོས་བསྐོར། འོག་ཏུ་པདྨ་དམར་པོའི་དབུས་སུ་དགྱེས་པའི་རྡོ་རྗེ་དམར་པོ་ལ་ཨ་ལས་བསྐྱེད་པའི་ཀླུ་ཆེན་པོ་བརྒྱད་ཀྱིས་བསྐོར་རོ། །མགྲོན་སྤྱན་དྲང་

བའི་ཕྱིར་རྡོ་རྗེ་པདྨའི་ཕྱག་རྒྱ་བཅིངས་ཏེ། ཨོཾ་ཨེ་ཨ་ར་ལི་ཧོཿ། ཧྲིཾ་ཧྲིཾ་ཧྲིཾ། ཛཿ་ཧཱུཾ་བཾ་ཧོཿ། བཛ་ཌཱ་ཀ་ཌཱ་ཀི་ནཱི། བཛྲ་དྲྀ་ཤྱ་ཧོཿ། བཛྲ་ས་མ་ཡ་ཧོཿ། བཛྲ་ས་མ་ཡ་སྟྭཾ། ཕེཾ་གསུམ་བརྗོད་པ་དང་བཅས་པ་ལས། སྙིང་གའི་ས་བོན་འོད་ཟེར་གྱིས་བཀུག་ལ། ཨོཾ་ཨཱཿཧཱུཾ་ལྷ་
བརྒྱད་འཁོར་དང་བཅས་པ་དང་། ཕྱོགས་སྐྱོང་བརྒྱད་དང་ཀླུ་ཆེན་བརྒྱད། །བཀའ་བཞིན་འཁོར་དུ་གཏོགས་པ་རྣམས། །དམ་ཚིག་དགོངས་ཏེ་གནས་འདིར་གཤེགས། །གཞན་ཡང་གྲུ་གསུམ་ཁོངས་གཏོགས་པའི། །ཞིང་སྐྱོང་ཚོགས་ལ་འདི་ལྟ་སྟེ། །ཨོཾ་ཤིང་གཅིག་དང་
ན་དུར་ཁྲོད་དང་། །རི་བོ་དང་ནི་རི་སུལ་ཕུག །གྲོང་དང་བཞི་མདོ་ཞིང་དང་ནི། །ཁྱད་པར་དུ་ནི་ཁང་སྟོང་དང་། །གདོལ་པའི་སྣོད་དང་ཐང་དང་ནི། །ཁྱད་པར་དུ་ནི་མཚོ་ལ་གནས། །མ་མོ་ཡི་ནི་གནས་རྣམས་ནས། །ནག་པོ་དྲག་པོ་དྲག་ཆེན་པོ། །ལྷ་སྦྱིན་མཉམ་དུ་བསྟེན་པ་དང་། །
ནག་པོ་གཙིགས་དང་མི་སྡུག་དང་། །བཀའ་ལས་འདས་དང་ལོག་འདྲེན་རྣམས། །རྒན་བྱེད་མེ་དང་དྲག་མོ་དང་། །བརྗེད་བྱེད་མ་དང་ཨུ་མ་དང་། །རྒྱལ་དང་རྣམ་པར་རྒྱལ་བ་དང་། །མི་ཐུབ་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་མོ། །ནག་སྦོམ་མ་དང་རྣལ་འབྱོར་
མ། །དབང་མོ་དང་ནི་ཟླ་བ་མོ། །དྲག་མོ་སྡང་མོ་འཆང་བ་མོ། །འཕྲོག་བྱེད་མ་དང་མར་མེ་མོ། །སུམ་ཅུ་མ་དང་དབང་མོ་དང་། །འཇིགས་བྱེད་གྲོང་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མོ། །མཆེ་བ་གཙིགས་དང་ཐོད་ཆེན་མ། །ཐོད་ཕྲེང་ཕྲེང་ཆེན་ཁ་ཊྭཱཾ་མ། །
སྦྲུལ་ཆེན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་གཞུ་ཆེན་མ། །དེ་བཞིན་ཆེན་མོ་མཁའ་འགྲོ་ལྔ། །དེ་བཞིན་རྡོ་རྗེ་དབང་ཕྱུག་གཙོ། །ལས་ཀུན་རྗེས་སུ་སྒྲུབ་བྱེད་མ། །སྦྱོར་བའི་དཀྱིལ་འཁོར་རྒྱལ་ཆེན་མོ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་ཏེ། །
རྡུལ་མེད་རྣལ་འབྱོར་འབྱིན་བ་མོ། །རྡོ་རྗེ་དབང་མོའི་བཀའ་འདི་ཡིས། །ཐམས་ཅད་མ་ལུས་འདིར་འདུས་ཤིག །ཨོཾ་ཀཀྐ་ཌྷ་ན། བབྤནྡྷ་ན། ཁཁྑ་དཱ་ན་སརྦ་དུཥྚ་ནཾ་ཧ་ན་ཧ་ན། གྷཱ་ཏ་ཡ། གྷཱ་ཏ་ཡ། ཧེ་བཛྲ་མཎྜ་ལ་ས་བ་རི་ཝཱ་རེ་བྷྱོ་ཨཱ་ཀཪྵ་ཡ་ཧཱུཾ་ཛཿ། ཞེས་པས་བཀུག་ལ་པདྨའི་

གདན་ལ་བཞུགས་པར་བསམས་ལ། དེ་ནས་མཆོད་པས་མཆོད་དེ། །ཨོཾ་ཀུ་རུ་ཀུ་རུ་ཨ་དྷི་པ་ཏི་ཏིཥྛ་ས་མ་ཡ་ཧཱུཾ་ཛཿ། གཉིས་སུ་མེད་པར་བྱའོ། །དེ་ནས་དམ་ཚིག་གི་ལྷ་ལ་ཐིམ་པའི་རྗེས་སུ། ལྕེ་པདྨའི་སྟེང་དུ་ཧཱུཾ་ལས་རྡོ་རྗེར་བྱིན་གྱིས་བརླབ་པོ། །དེ་ནས་པདྨའི་ལག་པ་ཁ་ཕྱེ་སྟེ།
གཏོར་མ་ལ་གཏད་ནས་གཏོར་མ་འབུལ་བའི་སྔགས་བརྗོད་དོ། །ཨོཾ་ཨཱཿཧཱུཾཿཧོཿབཛྲ་བྷཻ་ར་བཱ་ཡ། བཛྲ་བྷཻ་ར་བི་ཡ། ཛོ་ག་ཛོ་གི་ནི། སརྦ་ལོ་ཀི་ཀ་ལོ་ཀོཏྟ་ར། སརྦ་ཌཱ་ཀ་ཌཱ་ཀི་ནཱིཤྩ་བྷྱོ། བཛྲ་གཽ་རཱི། བཛྲ་ཙཽ་རཱི། བཛྲ་བི་ཏཱ་ལཱི། བཛྲ་གྷསྨ་རཱི། བཛྲ་པུཀྐ་སཱི། བཛྲ་ས་བ་རཱི། བཛྲ་ཙཎྜ་ལཱི། བཛྲ་
ཌོཾ་བི་ནཱི། ཨ་ཏི་ཀཾ །ས་པ་རི་ཝཱ་རེ་བྷྱོ། ཨི་དཾ་བ་ལིཾ། གནྡྷ། པུཥྤ། དྷཱུ་པ། དཱི་པ། ཨཀྵ་ཏཾ། ད་ད་མ་ཧི་ཏེ་ཛ། ཨ་ཀསྟྱ། ས་པ་རི་ཝཱ་རེ་བྷྱོ། ཨི་དཾ་བ་ལིཾ། གྲྀཧྞན་ཏུ་ཛཿཧཱུཾ་བཾ་ཧོཿ། སཾ་ཏྲིཔྟ། སརྦ་སཏྭཱ་ནི་ཤཱནྟིཾ་ཀུ་རུ། པུཥྚིཾ་ཀུ་རུ། རཀྵ་ཏཾ་ཀུ་རུ། ཨ་བ་ན་ཀུ་རུ། གུཔྟིཾ་ཀ་རོ་དུ། ཀུརྦནྡུ་ཧཱུཾ་ཧཱུཾ་ཕཊ་
སྭཱ་ཧཱ། ཨི་དཾ་བ་ལིཾ་ཁ་ཁ་ཁཱ་ཧི་ཁཱ་ཧི། བྷྱོ་བྷྱོ་བྷྱོ་བྷྱོ། ཛ་ཛ་ཛ་ཛ། བཛྲ་དྷ་རོཏྸཱཛྙཱ་པ་ཡ་ཏི་སྭཱ་ཧཱ། ཨོཾ་ཨཱཿ་ཧཱུཾ་ཧོཿ། སརྦ་དེ་བ། ནཱ་ག །ཡཀྵ། རཱཀྵ་ས། མ་ནུ་ཥ། ཨ་མ་ནུ་ཥ། ཨ་སུ་ར། གནྡྷ་རྦྷ། ཀུཾ་བྷི་ར། གྷི་དྷ་རི། ག་རུ་ཌ། བྷཱུ་ཏ། པྲེ་ཏ། པི་ཤཱ་ཙ། ཨ་པསྨ་ར། ཨུ་མནྟ། སརྦ་ལོ་ཀི་ཀ་ལོ་ཀོཏྟ་ར།
བཛྲ་ཌཱ་ཀ་ཌཱ་ཀི་ནི་ས་པ་རི་ཝཱ་རེ་བྷྱོ། །ཨི་མཾ་སརྦ་པཱུ་ཛ་གནྡྷ། པུཥྤ། དྷཱུ་པ། དཱི་པཾ། ནཻ་བི་དྱཾ། ཨཀྵ་ཏཾ་ད་ད་མ་ཧི་ཏེ་ཙ། ཨ་གཏྟྱཱ་ས་པ་རི་ཝཱ་རེ་བྷྱོཿ། ཨི་དཾ་བ་ལིཾ་གྲྀཧྞནྡུ། ཁ་དནྡུ། པི་བནྟུ། ཛཿ་ཧཱུཾ་བཾ་ཧོཿ། ས་མ་ཡ་རཀྵནྟུ། མ་མ་སིདྡྷིམྨེ་པྲེ་ཡ་ཙྪནྟུ། ཡ་ཐཻ་བཾ། ཡ་ཐེཥྚཾ་བྷུཉྫ་ཧོ། །མཱ་ཏི་ཀྲ་མ་ཐ།
མ་མ་སརྦ་ཀརྟྱ་སད་སུ་ཁཾ། བི་ཤུདྡྷ་ཡེ་ས་ཧ་ཀ་ཡི་ཀ །བྷ་བནྟུ། ཧཱུཾ་ཧཱུཾ་ཕཊ། བཛྲ་དྷ་རོ་ཨཱཛྙཱ་པ་ཡ་ཏི། ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བ་ཨུ། རཀྑ། ཙནྡྲ། སཱུཛྫ། མ་ཏ། པཔྤ། ཏ་ལ། པཱ་ཏཱ་ལ། ཨ་ཋ། སཔྤ། སཱ་དྷ། ཨི་དཾ་བ་ལིཾ་བྷུཉྫ། ཛི་གྷཾ། པུཥྤ། དྷཱུ་པ། དཱི་པཾ། མཱཾ་ས།
ཨམྦ། ཀཱཙྪ། སཱ་དྷ། ཁནྟི། ཁུ་ཎི། ཕེ་ཊ། གཱ་ད། ཨོཾ་ཨ་ཀཱ་རོ་མུ་ཁཾ་སརྦྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ། ཨོཾ་ཨཱཿཧཱུཾ་ཕཊ་སྭཱ་ཧཱ། དེ་ནས་ཚིགས་སུ་བཅད་པ་འདིས་ཡང་བསྔོ་བ་ནི། ཨོཾ་ལྷ་ཆེན་བརྒྱད་པོ་འཁོར་བཅས་དང་། །འཇིག་རྟེན་སྐྱོང་བ་འཁོར་བཅས་དང་། །ཀླུ་ཆེན་བརྒྱད་

པོ་འཁོར་བཅས་དང་། །གནོད་སྦྱིན་ཚོགས་རྣམས་མ་ལུས་དང་། །སྲིན་པོའི་ཚོགས་རྣམས་མ་ལུས་དང་། །འབྱུང་པོའི་ཚོགས་རྣམས་མ་ལུས་དང་། །ཡི་དགས་ཚོགས་རྣམས་མ་ལུས་དང་། །ཤ་ཟའི་ཚོགས་རྣམས་མ་ལུས་དང་། །སྨྱོ་བྱེད་ཚོགས་
རྣམས་མ་ལུས་དང་། །བརྗེད་བྱེད་ཚོགས་རྣམས་མ་ལུས་དང་། །མཁའ་འགྲོའི་ཚོགས་རྣམས་མ་ལུས་དང་། །དེ་ལ་སོགས་པའི་འབྱུང་པོའི་ཚོགས། །མ་ལུས་ཚོགས་བཅས་ཇི་སྙེད་རྣམས། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་
འདི་སྣོམས་ལ། །བདག་མིང་འདི་ཞེས་བྱ་བ་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །
དངོས་གྲུབ་ཀུན་གྱིས་བསྟོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་ཞི་བར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་ཞི་བར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་རྒྱས་ཤིང་འཕེལ་བར་མཛོད། །བདེ་
ལེགས་ཐམས་ཅད་འགྲུབ་པ་དང་། །ཡིད་ལ་འདོད་པ་འགྲུབ་པར་ཤོག །མཁའ་འགྲོའི་ཚོགས་རྣམས་མ་ལུས་ཀུན། །དེ་ལ་སོགས་པའི་གནོད་སྦྱིན་ཚོགས། །དྲག་ཅིང་གཏུམ་པའི་འབྱུང་པོའི་ཚོགས། །མ་རུངས་སེམས་ཅན་མིང་འདི་ལོང་། །དག་ཅིང་སྙིང་རྗེ་མེད་པ་ཡི། །རྣལ་འབྱོར་
མ་དང་མ་མོ་དང་། །མཁའ་འགྲོ་གནོད་སྦྱིན་ཤ་ཟ་དང་། །ལྟོ་འཕྱེ་དང་ནི་སྲིན་པོ་དང་། །གཞན་ཡང་ཤ་ཟ་ཁྲག་འཐུང་བའི། །ཁྱི་དང་ཁྲ་དང་ཀཾ་ཀ་དང་། །འོལ་བ་བྱ་རྒོད་ལ་སོགས་པའི། །གཟུགས་ཅན་ཐམས་ཅད་འདིར་གཤེགས་ཤིག །བདག་མིང་འདི་ཞེས་བྱ་བ་ལ། །གནོད་
པར་བྱེད་པ་འདི་ཞེས་པ། །ཆུང་མ་ནོར་དང་སྲོག་དང་ནི། །འདོད་པ་རྣམས་ནི་འཕྲོག་པར་མཛོད། །རང་གི་ཡུལ་ནས་འབྱུང་བ་དང་། །དགར་བ་དང་ནི་བསྐྲད་པར་བགྱིས། །བདག་གི་དཔུང་ནི་སྟོབས་མེད་ལ། །དགྲ་ནི་སྟོབས་ལྡན་ཁོ་ན་སྟེ། །འདི་ཉིད་ཁྱོད་ཀྱིས་བཟའ་བའི་ཕྱིར། །ཤ་དང་

ཁྲག་དང་ཞག་དང་རྐང་། །བཟའ་བ་སྐོམ་དང་བཅས་པ་མཛོད། །དགྲ་ལུས་གསོལ་བ་དགྲ་མདངས་ཕྲོགས། །རང་གི་རྣལ་འབྱོར་ཅི་རིགས་པར། །ལོང་ལ་ཟ་བ་ཉིད་དུ་གྱིས། །ཐམས་ཅད་ཚིམ་པར་བཞེས་སུ་གསོལ། །གང་གིས་བདག་ལ་མི་ཚུགས་ཤིང་། །དགྲ་འདི་ཐམས་ཅད་
ཆོམས་པར་མཛོད། །བདག་ལ་ལས་ཀྱི་དངོས་གྲུབ་ནི། །རྒྱ་ཆེན་ཡོངས་སུ་སྩལ་ནས་ཀྱང་། །ཉིད་ཀྱི་གནས་དང་ཡུལ་དུ་གཤེགས། །ཅི་ནུས་འབྱོར་པའི་མཆོད་པ་འདི་བཞེས་ལ། །བདག་གི་ལས་འདི་འབྲས་བུ་མཆིས་པར་མཛོད། །པུས་མོ་ལྷ་ང་ས་ལ་བཙུགས་ནས་ནི། །ཐལ་མོ་
སྦྱར་ནས་ཁྱོད་ལ་གསོལ་བ་ནི། །བཙུན་མོ་དང་ནི་སྲས་དང་གཡོག་ཏུ་བཅས། །གསན་ཅིང་འདིར་གཤེགས་བདག་ལ་བཀའ་དྲིན་སྐྱོབས། །བདག་གི་བསོད་ནམས་སྟོབས་དང་ནི། །དེ་བཞིན་གཤེགས་པའི་བྱིན་རླབས་དང་། །གསང་སྔགས་རིག་སྔགས་མཐུ་དག་དང་། །ཆོས་ཀྱི་
དབྱིངས་ཀྱི་སྟོབས་ཀྱི་མཐུས། །སེམས་ཅན་རྣམས་ལ་ཕན་གདགས་པས། །དོན་རྣམས་ཡང་དག་བསམས་པ་ཀུན། །སེམས་ཅན་ཁམས་ནི་མ་ལུས་པར། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །སྔགས་པ་གང་ཞིག་དགྲ་བགེགས་ཚར་
གཅད་པར་འདོད་པ་དེས། གཟུགས་གཏོར་མའི་སྟེང་དུ་བཞག་ལ། གནོད་སྦྱིན་མ་ལ་སོགས་པ་མི་སྡུག་པའི་གཟུགས་ཅན། ཕོ་ཉ་གྲངས་མེད་པས་ཟོས་འཐུངས་པར་བསམ་ཞིང་། གཏོར་མ་བསྟབས་ཤིང་འདི་སྐད་ལས་བཅོལ་ལོ། །ཨོཾ་མ་ལུས་ཞིང་ན་བཞུགས་པའི་རྒྱལ་བ་དང་།
དཔལ་ཆེན་ཁྲག་འཐུང་ཁྲོ་རྒྱལ་འཇིགས་བྱེད་ཚོགས། །ཡེ་ཤེས་མཁའ་འགྲོ་མཁའ་འགྲོ་མ་ཡི་ཚོགས། །དམ་ཅན་རྒྱ་མཚོ་མ་ལུས་དགོངས་སུ་གསོལ། །ཐུགས་རྗེ་ཆེན་པོས་འགྲོ་བའི་དོན་མཛད་ཅིང་། །གདུལ་དཀའ་དྲག་པོའི་ཚོགས་རྣམས་འདུལ་བའི་ཕྱིར། །སྒྱུ་མ་ལྟ་བུར་
ཅིར་ཡང་སྟོན་མཛད་པ། །གཏུམ་ཆེན་རབ་རྔམ་ཚོགས་ལ་ཕྱག་འཚལ་ལོ། །སྙིགས་མ་ལྔ་ལྡན་བསྟན་པ་འཇིག་དུས་འདིས། །བདུད་དང་མུ་སྟེགས་ལོག་པར་ལྟ་བ་རྣམས། །ཞི་བའི་ལས་ཀྱིས་འདུལ་བར་མི་འགྱུར་བས། །ཚམ་ངམ་དྲག་པོའི་ཕྲིན་ལས་མྱུར་དུ་མཛོད། །

རྒྱལ་བའི་སྤྱན་སྔར་ཁས་བླངས་ཤིང་། །བསྟན་པ་བསྲུང་བར་ཞལ་བཞེས་པ། །འཇིགས་བྱེད་ཆེན་པོའི་བཀའ་བཞིན་དུ། །ཤིན་ཏུ་གདུག་པ་འདུལ་མཛད་པའི། །ཚངས་པ་དབང་ཕྱུག་ཆེན་པོ་དང་། །ལྷ་ཡི་དབང་པོ་འདོད་པའི་ལྷ། །ཁྱབ་འཇུག་ཚོགས་ཀྱི་
བདག་པོ་དང་། །བྷྲྀཾ་གི་རི་ཏི་གཞོན་ནུ་དང་། །དགའ་བྱེད་དབང་ཕྱུག་འདོད་ལྷ་དང་། །ཉི་མ་ཟླ་བ་གཟའ་ཆེན་དང་། །སྨིན་དྲུག་ལ་སོགས་ཁྱུང་གི་མགོ །མགྱོགས་པའི་གཤོག་པས་གདེངས་ཀ་བྱས། །རྡོ་རྗེ་སྐུ་ཡི་དམ་ཚིག་ཅན། །དཀར་པོ་རྟག་པའི་དབུ་རྒྱན་ཅན། །ཞལ་གཅིག་པ་ལ་
ཕྱག་གཉིས་ཏེ། །འཁོར་ལོ་དང་ནི་དྲིལ་བུས་བྲེལ། །རིག་མ་དང་ནི་མཉམ་དུ་སྦྱོར། །འཇིགས་པའི་ཚུལ་གྱིས་བརྐྱང་བསྐུམ་གནས། །ཕྱག་རྒྱ་དྲུག་གིས་ལུས་ལ་བརྒྱན། །དུས་མཐའི་མེ་ཆེན་ཀློང་དཀྱིལ་ན། །ཧཱུཾ་ཕཊ་ཕེཾ་ཕེཾ་འཇིགས་པར་སྒྲོགས། །སྟེང་གི་ལྷ་ཚོགས་བཅས་པ་ཡི། །
ནམ་མཁའི་རོ་ཞོན་ཁྱོད་ཀྱིས་ནི། །དམ་ཚིག་ཕྲིན་ལས་དུས་ལ་བབ། །ཧཱུཾ་ཧེ་རུ་ཀ་ཡི་བཀའ་བཞིན་དུ། །ཨིནྡྲ་རུ་དྷི་རཀྟ་དང་། །ཡེ་ཤེས་དམ་ཚིག་བདུད་རྩི་དང་། །སྣ་ཚོགས་གཏོར་མ་འདི་ལོང་ལ། །བདག་ཅག་རྣལ་འབྱོར་སྒྲུབ་པ་པོ། །རྡོ་རྗེ་སློབ་དཔོན་སློབ་མ་དང་། །རྡོ་རྗེ་སྤུན་དང་མིང་
སྲིང་ལ། །གནོད་པར་བྱེད་པའི་དགྲ་བགེགས་ནི། །སྔགས་རྒྱུད་ཡེ་ཤེས་སུན་འབྱིན་ཅིང་། །སློབ་དཔོན་སྨོད་ཅིང་སྤུན་ལ་འཁུ། །བྱང་ཆུབ་སེམས་སྤོང་དམ་ཚིག་ཉམས། །ཞི་བའི་ལས་ཀྱིས་མི་འདུལ་བས། །གདུག་ཅིང་སྡང་སེམས་ལྡན་པ་རྣམས། །རབ་ཏུ་དྲོངས་ཤིག་འདིར་ཁུག་ལ། །
རྡུལ་དང་ཐལ་བ་བཞིན་དུ་ལྷོགས། །མངོན་སྤྱོད་ཕྲིན་ལས་དུས་ལ་བབ། །ཤ་དང་ཁྲག་དང་རུས་པ་རོལ། །རྒྱུ་མ་གློ་སྙིང་ནང་གྲོལ་དྲོངས། །སྔོན་གྱི་དམ་ལས་མ་འདའ་བར། །བཅོལ་བའི་ལས་རྣམས་གྲུབ་པར་མཛོད། །རྒྱལ་བའི་སྤྱན་སྔར་ཁས་བླངས་ཤིང་། །བསྟན་པ་བསྲུང་བར་ཞལ་
བཞེས་པ། །འཇིགས་བྱེད་ཆེན་པོའི་བཀའ་བཞིན་དུ། །ཤིན་ཏུ་གདུག་པ་འདུལ་མཛད་པའི། །བརྒྱ་བྱིན་གཤིན་རྗེ་ཆུ་བདག་དང་། །གནོད་སྦྱིན་དབང་བདག་མེ་ཡི་ལྷ། །སྲིན་པོ་རླུང་ལྷ་ལ་སོགས་པ། །སྲིན་པོའི་མགོ་ཅན་འཇིགས་པའི་གཟུགས། །མགྱོགས་པའི་གཤོག་པས་གདེངས་

ཀ་བྱས། །རྡོ་རྗེ་ཐུགས་ཀྱི་དམ་ཚིག་ཅན། །ནག་པོ་མི་བསྐྱོད་དབུ་རྒྱན་ལྡན། །ཞལ་གཅིག་ཕྱག་ནི་གཉིས་པ་སྟེ། །རྡོ་རྗེ་དང་ནི་དྲིལ་བུས་བྲེལ། །རིག་མ་དང་ནི་མཉམ་དུ་སྦྱོར། །འཇིགས་པའི་ཚུལ་གྱིས་བརྐྱང་བསྐུམ་གནས། །ཕྱག་ཅུ་དྲུག་གིས་ལུས་ལ་བརྒྱན། །དུས་མཐའི་མེ་ཆེན་ཀློང་དཀྱིལ་
ན། །ཧཱུཾ་ཕཊ་ཕེཾ་ཕེཾ་འཇིགས་པར་སྒྲོགས། །བར་གྱི་མི་ཚོགས་བཅས་པ་ཡིས། །བར་སྣང་རོ་ཞོན་ཁྱོད་ཀྱི་ནི། །དམ་ཚིག་ཕྲིན་ལས་དུས་ལ་བབ། །ཧཱུཾ་ཧེ་རུ་ཀ་ཡི་བཀའ་བཞིན་དུ། །ཨིནྡྲ་རུ་དྷི་རཀྟ་དང་། །ཡེ་ཤེས་དམ་ཚིག་བདུད་རྩི་དང་། །སྣ་ཚོགས་གཏོར་མ་འདི་ལོང་ལ། །བདག་ཅག་རྣལ་
འབྱོར་སྒྲུབ་པ་པོ། །རྡོ་རྗེ་སློབ་དཔོན་སློབ་མ་དང་། །རྡོ་རྗེ་སྤུན་དང་མིང་སྲིང་ལ། །གནོད་པར་བྱེད་པའི་དགྲ་བགེགས་ནི། །སྔགས་རྒྱུད་ཡེ་ཤེས་སུན་འབྱིན་ཅིང་། །སློབ་དཔོན་སློད་ཅིང་སྤུན་ལ་འཁུ། །བྱང་ཆུབ་སེམས་སྤོང་དམ་ཚིག་ཉམས། །ཞི་བའི་ལས་ཀྱིས་མི་འདུལ་བས། །གདུག་
ཅིང་སྡང་སེམས་ལྡན་པ་རྣམས། །རབ་ཏུ་དྲོངས་ཤིག་འདིར་ཁུག་ལ། །རྡུལ་དང་ཐལ་བ་བཞིན་དུ་ལྷོགས། །མངོན་སྤྱོད་ཕྲིན་ལས་དུས་ལ་བབ། །ཤ་དང་ཁྲག་དང་རུས་པར་རོལ། །རྒྱུ་མ་གློ་སྙིང་ནང་གྲོལ་དྲོངས། །སྔོན་གྱི་དམ་ལས་མ་འདའ་བར། །བཅོལ་བའི་ལས་རྣམས་གྲུབ་
པར་མཛོད། །རྒྱལ་བའི་སྤྱན་སྔར་ཁས་བླངས་ཤིང་། །བསྟན་པ་བསྲུང་བར་ཞལ་བཞེས་པ། །འཇིགས་བྱེད་ཆེན་པོའི་བཀའ་བཞིན་དུ། །ཤིན་ཏུ་གདུག་པ་འདུལ་མཛད་པ། །སྟོབས་རྒྱུ་དུང་སྐྱོང་མཐའ་ཡས་དང་། །ནོར་རྒྱས་བུ་དང་འཇོག་པོ་དང་། །རིགས་ལྡན་པདྨ་ཆེན་པོ་
དང་། །པདྨ་ལ་སོགས་ཆུ་སྲིན་མགོ །མགྱོགས་པའི་གཤོག་པས་གདེངས་ཀ་བྱས། །རྡོ་རྗེ་གསུང་གི་དམ་ཚིག་ཅན། །དམར་པོ་གར་དབང་དབུ་རྒྱན་ལྡན། །ཞལ་གཅིག་པ་ལ་ཕྱག་གཉིས་ཏེ། །པདྨ་དང་ནི་དྲིལ་བུས་བྲེལ། །རིག་མ་དང་ནི་མཉམ་དུ་སྦྱོར། །འཇིགས་པའི་
ཚུལ་གྱིས་བརྐྱང་བསྐུམ་གནས། །ཕྱག་རྒྱ་དྲུག་གིས་ལུས་ལ་བརྒྱན། །དུས་མཐའི་མེ་ཆེན་ཀློང་དཀྱིལ་ན། །ཧཱུཾ་ཕཊ་ཕེཾ་ཕེཾ་འཇིགས་པར་སྒྲོགས། །འོག་གི་ཀླུ་ཚོགས་བཅས་པ་ཡིས། །ས་འོག་རོ་ཞོན་ཁྱོད་ཀྱི་ནི། །དམ་ཚིག་ཐུགས་དམ་དུས་ལ་བབ། །ཧཱུཾ་ཧེ་རུ་ཀ་ཡི་བཀའ་བཞིན་དུ། །

ཨིནྡྲ་རུ་དྷི་རཀྟ་དང་། །ཡེ་ཤེས་དམ་ཚིག་བདུད་རྩི་དང་། །སྣ་ཚོགས་གཏོར་མ་འདི་ལོང་ལ། །བདག་ཅག་རྣལ་འབྱོར་སྒྲུབ་པ་པོ། །རྡོ་རྗེ་སློབ་དཔོན་སློབ་མར་བཅས། །རྡོ་རྗེ་སྤུན་དང་མིང་སྲིང་ལ། །གནོད་པར་བྱེད་པའི་དགྲ་བགེགས་ནི། །སྔགས་རྒྱུད་ཡེ་ཤེས་
སུན་འབྱིན་ཅིང་། །སློབ་དཔོན་སྨོད་ཅིང་སྤུན་ལ་འཁུ། །བྱང་ཆུབ་སེམས་སྤོང་དམ་ཚིག་ཉམས། །ཞི་བའི་ལས་ཀྱིས་མི་འདུལ་བས། །གདུག་ཅིང་སྡང་སེམས་ལྡན་པ་རྣམས། །རབ་ཏུ་དྲོངས་ཤིག་འདིར་ཁུག་ལ། །རྡུལ་དང་ཐལ་བ་བཞིན་དུ་ལྷོགས། །མངོན་སྤྱོད་ཕྲིན་ལས་དུས་
ལ་བབ། །ཤ་དང་ཁྲག་དང་རུས་པ་རོལ། །རྒྱུ་མ་གློ་སྙིང་ནང་གྲོལ་དྲོངས། །སྔོན་གྱི་དམ་ལས་མ་འདའ་བར། །བཅོལ་བའི་ལས་རྣམས་གྲུབ་པར་མཛོད། །རྒྱལ་བའི་སྤྱན་སྔར་ཁས་བླངས་ཤིང་། །བསྟན་པ་བསྲུང་བར་ཞལ་བཞེས་པ། །འཇིགས་བྱེད་ཆེན་པོའི་བཀའ་བཞིན་
དུ། །ཤིན་ཏུ་གདུག་པ་འདུལ་མཛད་པ། །ཕྱི་རོལ་དུར་ཁྲོད་འཇིགས་པ་ན། །དཔའ་བོ་དཔའ་མོ་རྣལ་འབྱོར་ཚོགས། །ཞིང་སྐྱོང་དྲག་པོ་རོ་ལངས་དང་། །མ་མོ་མཁའ་འགྲོ་ལ་སོགས་ཚོགས། །ཤ་ཟ་བརྗེད་བྱེད་སྲུལ་པོ་དང་། །ནམ་གྲུ་ལོག་འདྲེན་ལ་སོགས་པ། །གནོད་སྦྱིན་ས་
བདག་གདུག་པའི་འདྲེ། །ལ་ལ་སྲིན་པོའི་ཞལ་ཅན་ལ། །མི་ཡི་ལུས་ཅན་འཇིགས་པའི་གཟུགས། །ལ་ལ་སྟག་གི་མགོ་ཅན་ལ། །མི་ཡི་ལུས་ཅན་རྔམ་པའི་གཟུགས། །ལ་ལ་སེང་གེའི་མགོ་ཅན་ལ། །སྲིན་པོའི་གཟུགས་ཅན་ཤིན་ཏུ་ཁྲོ། །ལ་ལ་མཁའ་ལྡིང་མགོ་ཅན་ལ། །ཀླུ་
ཡི་ལུས་ཅན་འཇིགས་པའི་གཟུགས། །དེ་བཞིན་བྱ་ཡི་མགོ་ཅན་དང་། །གཅན་གཟན་ལུས་ཅན་སྣ་ཚོགས་རྣམས། །ལ་ལ་ཁྲོ་ཞིང་ལ་ལ་རྔམ། །ལ་ལ་ཞི་ཞིང་ལ་ལ་གཏུམ། །ལ་ལ་འགྱིང་ཞིང་ལ་ལ་ལྡིང་། །ལ་ལ་ཤ་ཟ་ཁྲག་འཐུང་བརྩོན། །ལ་ལ་ཁྲོ་གཏུམ་འཇིགས་པའི་གཟུགས། །
ལ་ལ་རབ་བརྩོན་ཁྲོ་གཉེར་ཅན། །ལ་ལ་བཞད་གད་ཧ་ཧ་སྒྲོག །ལ་ལ་འབྲུག་སྐད་བཞིན་དུ་ལྡིར། །ལ་ལ་རྔམ་སྐད་ཕེཾ་ཕེཾ་སྒྲོགས། །ལ་ལ་མཁའ་སྟོང་གར་གྱིས་འགེངས། །ལ་ལ་རྩུབ་ཅིང་ལ་ལ་གནག །ལ་ལ་དཀར་ཞིང་རྣམ་པར་གསལ། །ལ་ལ་དམར་ཞིང་ཆགས་པའི་

མདོག །ལ་ལ་སྔོ་ཞིང་སྡང་བའི་ཚུལ། །ལ་ལ་སེར་པོ་དབྱིབས་མདོག་རྒྱས། །ལ་ལ་ཁྲོ་གཉེར་སྨིན་བུ་རྩུབ། །ལ་ལ་སྨིན་བུ་གྱེན་དུ་འཁྱིལ། །སྐྲ་འཁྱིལ་ནམ་མཁའི་དབྱིངས་སུ་ཁྱབ། །ཞལ་གདངས་མཆེ་གཙིགས་ཁྲག་འཐུང་བའི། །ལྗགས་དྲིལ་མཆེ་བ་དམར་པོ་གཙིགས། །སྤྱན་
གསུམ་སྡང་མིག་ཁྲོ་གཉེར་ཅན། །རུས་པའི་བསྟར་ཕྲེང་སྦྲུལ་གྱིས་བརྒྱན། །ཁྲག་ཞག་ཚིལ་གྱི་ཚོམ་བུས་བརྒྱན། །གླང་ཆེན་ཀོ་རློན་རྣམ་པར་བཤལ། །སྟག་གི་པགས་པས་ཤམ་ཐབས་བྱས། །ན་བཟའ་མི་ཡི་ལྤགས་རློན་གསོལ། །ལ་ལ་རྡོ་རྗེ་གཏུན་ཤིང་དང་། །རལ་གྲི་ཆུ་གྲི་ལ་སོགས་
པའི། །ལག་ན་མཚོན་ཆ་སྣ་ཚོགས་འཛིན། །ལ་ལ་གར་གྱི་ཕྱག་རྒྱས་སྦྱོར། །ཕྱི་ཡི་དཀྱིལ་འཁོར་ཆེན་པོ་འདིར། །ཕྱི་རོལ་འབྱུང་པོའི་ཚོགས་བཅས་རྣམས། །ས་སྟེངས་རོ་ཞོན་ཐམས་ཅད་ཀྱི། །དམ་ཚིག་ཕྲིན་ལས་དུས་ལ་བབ། །ཧཱུཾ་ཧེ་རུ་ཀ་ཡི་བཀའ་བཞིན་དུ། །ཨིནྡྲ་རུ་དྷི་རཀྟ་དང་། །
ཡེ་ཤེས་དམ་ཚིག་བདུད་རྩི་དང་། །སྣ་ཚོགས་གཏོར་མ་འདི་ལོང་ལ། །བདག་ཅག་རྣལ་འབྱོར་སྒྲུབ་པ་པོ། །རྡོ་རྗེ་སློབ་དཔོན་སློབ་མ་དང་། །རྡོ་རྗེ་སྤུན་དང་མིང་སྲིང་ལ། །གནོད་པར་བྱེད་པའི་དགྲ་བགེགས་ནི། །སྔགས་རྒྱུད་ཡེ་ཤེས་སུན་འབྱིན་ཅིང་། །སློབ་དཔོན་སྨོད་ཅིང་སྤུན་ལ་འཁུ། །
བྱང་ཆུབ་སེམས་སྤོང་དམ་ཚིག་ཉམས། །ཞི་བའི་ལས་ཀྱིས་མི་འདུལ་བས། །གདུག་པའི་སྡང་སེམས་ལྡན་པ་རྣམས། །རབ་ཏུ་དྲོངས་ཤིག་འདིར་ཁུག་ལ། །རྡུལ་དང་ཐལ་བ་བཞིན་དུ་ལྷོགས། །མངོན་སྤྱོད་ཕྲིན་ལས་དུས་ལ་བབ། །ཤ་དང་ཁྲག་དང་རུས་ལ་རོལ། །རྒྱུ་མ་གློ་སྙིང་ནང་གྲོལ་
དྲོངས། །སྔོན་གྱི་དམ་ལས་མ་འདའ་བར། །བཅོལ་བའི་ལས་རྣམས་གྲུབ་པར་མཛོད། །དེ་ནས་གསད་པའི་ལས་བཞི་བྱ། དེ་ནས་རྡོ་རྗེའི་གླུ་བརྗོད། དེ་ནས་ཆོས་བཤད་དེ། ཨོཾ་ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །རྒྱུ་དང་ལས་ལས་ཀུན་དུ་
འབྱུང་། །དེ་བཞིན་ཉིད་ལས་ངེས་པར་སྐྱེས། །བདེན་པ་འདིས་ནི་དཀྱིལ་འཁོར་དུ། །ཀུན་གྱིས་དྲི་མ་མེད་མཐོང་ཤོག །སེམས་ཅན་ཐམས་ཅད་བདེ་གྱུར་ཅིག །གང་གི་ལམ་ནས་འགྲོ་བ་དེར། །སངས་རྒྱས་ཉིད་དང་ཕྲད་པར་ཤོག །དེ་ནས་སྨོན་ལམ་གདབ་པ་ནི། །ཨོཾ་ཤཱི་ལ་

ཙཎྜ་ན་ལེ་པེ་ཏཾ་ཨ་གངྡྱ་ནཾ་པྲ་བྷ་ར་ཎ། པོ་ཏཾ་ཀ་ཀུ་མུ་མི་ཀཱི་ར་ཎཾ་བི་ཧ་ར་ཏཾ། བུདྡྷ་བི་ཤ་ཡ། པུ་ན་རཱ་ག་མ་ན་ཡ་མུཿ། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ་
སརྦ་ཀརྨ་སུཙྪ་མེ། ཙིཏྟཾ་ཤྲེ་ཡཿ། ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། དེ་ནས་བཀྲ་ཤིས་བརྗོད། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་
ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་པས་རང་བཞིན་གྱི་མགྲོན་གཤེགས་སུ་གསོལ་ལོ། །དམ་ཚིག་གི་མགྲོན་ཡི་གེ་གསུམ་དུ་བྱས་ནས་བདག་གི་སྙིང་གའི་ས་བོན་ལ་བསྡུའོ། །རྣལ་འབྱོར་པ་ཡི་སེར་སྣ་དང་། །དབུལ་བའི་དྲི་མ་སྦྱང་བ་དང་། །དངོས་གྲུབ་མྱུར་དུ་ཐོབ་
པ་དང་། །འགྲོ་རྣམས་བཀོད་པར་འཕེལ་ཕྱིར་བྱས། །དགེ་བས་འགྲོ་ཀུན་བྱང་ཆུབ་མཆོག །རིན་ཆེན་གླིང་དུ་མྱུར་འགྲོ་ཤོག །དཔལ་དགྱེས་པའི་རྡོ་རྗེའི་གཏོར་མའི་ཆོ་གའི་རིམ་པ། སློབ་དཔོན་ཆེན་པོ་ཨ་ལ་ལ་བཛྲས་མཛད་པ་རྫོགས་སོ།། །།པཎྜི་ཏ་ཀསྠ་པ་ག་ཐཱ་ག་
ཡ་དྷ་ར་དང་། བོད་ཀྱི་ལོ་ཙཱ་བ་གྱི་ཇོ་ཟླ་བའི་འོད་ཟེར་གྱིས་བསྒྱུར་བའོ།། ༄༅༅། །རྒྱ་གར་སྐད་དུ། བ་ལིཾ་ཀརྨ་ཀྲ་མ་ནཱ་མ། བོད་སྐད་དུ། གཏོར་མའི་ལས་ཀྱི་རིམ་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བླ་མེད་དཀོན་མཆོག་གསུམ་པོ་དང་། །
དེ་ཡི་ཆོས་སྐྱོང་སྲུང་མ་ལ། །བཟོད་གསོལ་དོན་དུ་འདུད་པ་དང་། །རྒྱུ་ཡི་ཕྱིར་ཀྱང་ཕྱག་འཚལ་ལོ། །ཚོགས་གཉིས་རྫོགས་པར་བྱ་བ་དང་། །སྔ་མའི་ལན་ཆགས་བྲལ་བ་དང་། །འཕྲལ་གྱི་བར་ཆད་ཉེར་ཞིའི་ཕྱིར། །གཏོར་མ་རྒྱུན་དུ་གཏང་བར་བྱ། །ཚོགས་ཀྱི་འཁོར་ལོ་ཆེན་པོ་དང་། །
ཕྲིན་ལས་རྣམ་བཞི་རྩོམ་པ་དང་། །དབང་བསྐུར་ཆེན་པོ་བྱེད་པའི་ཚེ། །གཏོར་མའི་རིམ་པ་འདི་ལྟར་བྱ། །ཡོ་བྱད་དང་ནི་བཅའ་ཐབས་དང་། །དགོད་རིམ་དང་ཡང་བྱིན་རླབས་དང་། །དབུལ་དང་དབང་བསྐུར་དགྱེ་བ་བདུན། །ལས་ཀྱི་རིམ་པ་མདོར་བསྡུས་པའོ། །ཤ་དང་བདུད་རྩི་ཟས་ལྔ་དང་། །

གཞན་ཡང་བཟའ་བཏུང་སྣ་ཚོགས་ཏེ། །གྲོ་གའམ་རས་སམ་ཤིང་ཤུན་ལ། །མཆོད་པའི་བྱེ་བྲག་སྣ་ཚོགས་བྱ། །མདོར་ན་སྣ་ཚོགས་པ་ཡི་རྫས། །སྡིག་པ་མེད་ཅིང་གནོད་པ་མེད། །ཡོ་བྱད་དམ་པར་འདི་བཤད་དོ། །གཞན་ཡང་གཏོར་མ་ཆེན་པོ་ནི། །ཤིན་ཏུ་ཆེ་བའི་སྣོད་དག་ཏུ། །
མཆོད་པའི་བྱེ་བྲག་ཁ་ཟས་ཀྱིས། །ཁེངས་པར་བཀང་བའི་སྟེང་དག་ཏུ། །ཨ་ཤྭདྠ་ཡི་ཤིང་དག་ལ། །གྲུ་གསུམ་ཕྱག་རྒྱ་བྱས་ཏེ་གཞག །གྲུ་གསུམ་རྩེ་ལ་མར་མེ་གསུམ། །ཉིན་མཚན་རྟག་ཏུ་གཏང་བར་བྱ། །དེ་རུ་འཕན་དང་རྒྱལ་མཚན་དང་། །གདུགས་དང་ཕྱག་རྒྱ་སྣ་ཚོགས་གཞག།།
དེ་ཡི་དབུས་སུ་ཟན་ཁམ་གསུམ། །སྟེང་དུ་བྷནྡྷ་མཚན་བཟངས་དག །ཁྲག་ཆེན་དག་གིས་གང་བ་གཞག །གཞན་ཡང་མཛེས་པའི་སྣོད་དག་ཏུ། །ཁེངས་པར་བཀང་བའི་སྟེང་དག་ཏུ། །འཕན་དང་རྒྱལ་མཚན་གདུགས་རྣམས་གཟུགས། །མར་མེ་གཅིག་ཀྱང་རྟག་ཏུ་གཏང་། །མཁའ་
འགྲོ་མ་དང་ཕྱོགས་སྐྱོང་ནི། །མཛེས་པའི་སྣོད་དུ་རྫས་རྣམས་ཀྱིས། །ལེགས་པར་བཀང་སྟེ་གཞག་པར་བྱ། །ཚོགས་དང་ཚོགས་ཀྱི་རོལ་པ་ཡིན། །ལྷག་མ་དག་ལ་ལྷག་མ་བྱ། །ཀུན་ཀྱང་གཅན་གཟན་རྗེས་བཞིན་ནམ། །ལས་ཀྱི་དབྱིབས་དང་སྦྱར་བར་བྱ། །ཆང་དང་ཁྲག་དང་ཆུ་ཡིས་
སྦྱང་། །གཏོར་ཆེན་རྩ་བའི་དབུས་སུ་གཞག །ཡང་ན་བྱང་ཤར་མཚམས་སུ་གཞག །ལྷག་མ་ལྷོ་ཡི་ཕྱོགས་སུའོ། །ཕྱོགས་སྐྱོང་ཤར་ཏེ་མཁའ་འགྲོ་ནུབ། །ཤིན་ཏུ་ལྷག་མ་མདུན་ནམ་བྱང་། །ཡཾ་ལས་རླུང་དང་རཾ་ལས་མེ། །ཨ་ལས་སྣོད་ཀྱི་ནང་དག་ཏུ། །ཨཾ་ལས་ཉི་མའི་དཀྱིལ་
འཁོར་བསམ། །དེ་ཡི་དབུས་དང་ཕྱོགས་མཚམས་སུ། །ཧཱུཾ་བྷྲཱུཾ་ཨཱཾ་ཛྲཱྀཾ་ཁཾ། ན་གོ་ཀུ་ད་ཧ། དྲི་ཆུ་དྲི་ཆེན་ཁྲག་དང་ག་བུར་ཤེལ། །མི་དང་བ་ལང་ཁྱི་གླང་རྟ། །དེ་ཡི་སྟེང་དུ་ཡིག་འབྲུ་བསམ། །དེ་ལས་རིགས་ལྔ་ཡབ་ཡུམ་བསམ། །དེ་སྟེང་ཨོཾ་ལས་ཟླ་བ་སྟེ། །དེ་སྟེང་ཧཱུཾ་ལས་རྡོ་རྗེ་བསམ། །
ཕཊ་ཀྱིས་བུད་ཅིང་འབར་བ་དང་། །བསྲོས་ཏེ་དྲོས་པས་ཡབ་ཡུམ་རོལ། །བྱང་ཆུབ་སེམས་ཀྱི་འོད་ཟེར་གྱིས། །ཕྱོགས་བཅུ་དག་ན་གནས་པ་ཡི། །བདེ་གཤེགས་ཡེ་ཤེས་བྱང་ཆུབ་སེམས། །སེམས་ཅན་རྣམས་ཀྱི་བཀྲག་གཟི་མདངས། །རྩི་ཤིང་ནགས་ཚལ་བཅུད་བསྡུས་ཏེ། །

སླར་ཡང་ཇི་བཞིན་དགུག་པར་བྱ། །ཐིམ་ནས་ཐམས་ཅད་འོད་དུ་ཞུ། །ཨོཾ་ཨཱཿཧཱུཾ་གིས་བྱིན་གྱིས་བརླབ། །ལས་ཀྱི་སྐབས་ལ་བབ་པ་དང་། །གཏོར་ཆེན་བྷནྡྷའི་ནང་དུ་ནི། །སྒྲུབ་ཐབས་གཞུང་བཞིན་བསྒོམས་ནས་སུ། །དེ་ཡི་ཕྱི་རིམ་བར་ཁྱམས་ལ། །ལྷ་བརྒྱད་
འཁོར་བཅས་མོས་པས་བསྒོམ། །གཉིས་པ་ལ་ནི་ཕྱོགས་སྐྱོང་དང་། །དེ་བཞིན་གསུམ་པར་ཀླུ་ཆེན་བརྒྱད། །འཁོར་དང་བཅས་པ་མོས་པས་སོ། །ཚོགས་ཀྱི་རྫས་རྣམས་དྲངས་པ་ལ། །བསང་གཏོར་བྱས་ཏེ་བྱིན་གྱིས་བརླབ། །ཕུད་སྤྲོས་པདྨའི་ཕྱག་རྒྱས་བླང་། །སྔགས་འདི་བརྗོད་ཅིང་
དབུལ་བར་བྱ། །ཨོཾ་ཨེ་ཧྱེ་ཧི་བཛྲ་ཨི་དཾ་བ་ལིཾ་ཁཱ་ཧི། ལྷ་རྣམས་ཀུན་ལ་དེ་བཞིན་དབུལ། །བསྲུང་བའི་དབང་སྔགས་བརྗོད་ཅིང་དབུལ། །བསྟོད་ཅིང་རྡོ་རྗེ་གླུ་ཡང་བླང་། །དེ་ནས་ལྷག་མའི་ཕུད་སྤྲོས་ཏེ། །གྲུ་གསུམ་ཟླ་བའི་སྟེང་དག་ཏུ། །བདག་ཉིད་ཀྱེ་ཡི་རྡོ་རྗེར་བསྒོམ། །དེ་ཡི་ཁྱམས་
ལ་མཁའ་འགྲོ་མ། །འཁོར་དང་བཅས་པ་མོས་པས་བསམ། །གཉིས་པ་ལ་ནི་དབང་ཕྱུག་མ། །གཞན་ཡང་འགྲོ་བ་རིས་དྲུག་དང་། །དམིགས་ཀྱི་ཡུལ་གྱི་ལྷ་འདྲེ་རྣམས། །ལྕགས་ཀྱུའི་ཕྱག་རྒྱ་བཅས་ནས་སུ། །ཨོཾ་ཨེ་ཧྱེ་ཧི། སརྦ་ཡོ་གི་ནི། སརྦ་ཌཱ་ཀི་ནི། པྲཧྨ་ཎི། རུ་ཏྲ་ནི།
མ་ཧེ་ཤྭ་རི། བེཥྞ་བེ། བཱ་རཱ་ཧི། ན་ཡ་སིཾ་ག །ཨ་ཡ་ཏེ། ཨགྣ་ཡེ། བ་རུ་ཎ་ཡེ། བ་ཡ་བེ། ཀུ་མཱ་རི། ཀོ་བེ་ར། ག་རུ་ཎི། པསྣ་ཀི །བྱི་ན་ཡ་ཀི །བྷི་པ་ས་ཏྲི། བྷེ་པྲ་མ་ནི། བྷེ་སྐ་རི། ཙ་མུཎྜི། སརྦ་དེ་བ། སརྦ་ཨ་སུ་ར། སརྦ་མ་ནུ་ཥ། སརྦ་ཏིརྱ་ཀ །སརྦ་པྲེ་ཏ་ཀ །སརྦ་ན་ར་ཀ །
སརྦ་བྷཱུ་ཏ། པི་ཤཱ་ཙ། ཨུཥྨནྡ། ཨ་པསྨ་ར་ཏ་ཡ། མོས་པའི་ཚུལ་དུ་སྤྱན་དྲངས་མཆོད། །པདྨའི་ཕྱག་རྒྱས་བླངས་ལ་དབུལ། །པུཥྤ། དྷཱུ་པ། དཱི་པ། གནྡྷ། ནཻ་བི་ཏྱེ། པཉྩ་ཨ་མྲྀ་ཏེ། མ་ཐ། དྲ་རྩ། བ་ཏ་ག་ཏེ། ཙ་ཏྲ་ཙ་མ་ར། ས་ཡོ་ཐ། མ་ཙ་མ་ས། མ་ཧཱ་རཀྟ། ན་ན་ཁཱ་ཧི། སཾ་པུརྞཾ། ཨི་དཾ་བ་
ལིཾ་བྷུཾ་ཛ་ཐ། གྲྀཧྞ་ཐ་ས་མ་ཡ་རཀྵ་ཐ་མ་མ་སརྦ་ཨ་ཐེ། ཧ་ས་ཡཾ། ཀུ་རོ་ཐ། ཨ་ཏྲ། སཱ་དྷ་ནི། ཡི་ཤྲ་ཏྲཥྚ་ཤཾ། རཀྵ་སརྦཾ། ཨརྠཾ། ཡ་ཐཻ་བཾ། ཡ་ཐེཥྚཾ། བྷུཾ་ཇ་ཐ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། པི་བ་ཐ། མ་ཏི་ཀྲ་མ་ཐ། མ་མ་སརྦ་ས་པ་རི། ས་ཏ་སུ་ཁཾ་བི་ཤོ་དྷ་ན་ཡེ་སྭཱ་ཧཱ། ཡི་ཀ་བྷ་བནྟུ། ཨོཾ་ཨཱཿཧཱུཾ།

ཧཱུཾ་ཧཱུཾ་ཕཊ་ཕཊ་སྭཱ་ཧཱ། རོལ་མོའི་སྒྲ་དང་རྡོ་རྗེ་གླུ་བླངས་ཏེ། ལྷག་མའི་གཏོར་མ་དབུལ་བར་བྱའོ། །བདག་ཉིད་དགྱེས་རྡོར་རྣལ་འབྱོར་གྱིས། །ཆོས་འབྱུང་ནང་དུ་འདབ་བརྒྱད་གསུམ། །རིམ་པར་དཀར་ནག་དམར་པོའོ། །དེ་ཡང་ཡིག་འབྲུ་གསུམ་ལས་བསྒོམ། །ལྷ་དང་ཕྱོགས་སྐྱོང་
ཀླུ་ཆེན་བརྒྱད། །ཨོཾ་ཨཱཿཧཱུཾ་ལས་པད་མདོག་བཞིན། །ཞལ་གཅིག་ཕྱག་གཉིས་རྡོར་དྲིལ་འཆང་། །རང་གི་ཡུམ་ཡང་དེ་བཞིན་ཏེ། །བརྐྱང་བསྐུམ་ཚུལ་གྱིས་ཀུན་ཀྱང་གནས། །ས་བོན་ལས་ནི་འོད་ཟེར་སྤྲོ། །གཟུགས་དང་གཟུགས་མེད་ལྷ་བརྒྱད་ལ། །འདོད་ཁམས་ལྷ་མི་ཕྱོགས་
སྐྱོང་སྟེ། །ངན་སོང་གསུམ་དང་ལྷ་མ་ཡིན། །ཀླུ་ཆེན་བརྒྱད་ལ་བསྟིམ་པར་བྱ། །བདག་གི་ཐུགས་ཀའི་ས་བོན་ལས། །ཕྱག་རྒྱ་བཞི་ཡིས་སྐུ་གསུང་ཐུགས། །རང་བཞིན་གནས་ནས་སྤྱན་དྲངས་ཏེ། །ཕྱི་ནང་གསང་བས་མཆོད་བྱ་སྟེ། །ལྷ་དང་ཕྱོགས་སྐྱོང་ཀླུ་བརྒྱད་ལ། །རྣམ་སྣང་
མི་བསྐྱོད་མཐའ་ཡས་ཀྱིས། །རིམ་པ་ཇི་བཞིན་དབང་བསྐུར་བྱ། །དེ་ལ་སྔགས་འདིས་རབ་ཏུ་འབུལ། །པདྨའི་ཕྱག་རྒྱས་བླངས་ནས་སུ། །ཨོཾ་ཨིནྡ་ཡ་མ་ཛ་ལ། ཡཀྵ་ཛཿཧཱུཾ་བཾ་ཧོཿབྷཱུ་ཏ་བཧྣི། བཱ་ཡུ། རཀྑ། ཙནྡ། སུརྫ་མཱ་ཏ། པཔྤ། ཏ་ལ། པཱ་ཏཱ་ལ། ཨ་ཋ་སཔྤ་སྭཱ་ཧཱ། ཨི་དཾ་བ་
ལིཾ་བྷུཾ་ཛ། ཛི་གྷ་མཾ་ས་དྷཱུ་པཾ་པུཥྤེ་དཱི་པཾ། གནྡྷེ། པིཾ་གྷ། ཨཾ་བ། ཀཙྪ། ཁནྟི། ཁུ་ཎི། ཕེ་ཊ། ག་ད། ཨོཾ་ཨ་ཀཱ་རོ་མུ་ཁཾ། སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ། ཨོཾ་ཨཱཿཧཱུཾ་སྭཱ་ཧཱ། རྡོ་རྗེ་གླུ་དང་རོལ་མོའི་སྒྲས། །མཆོད་དེ་ཉིན་མོ་ལན་གསུམ་གཏང་། །ཡི་དམ་ལྷ་ཡི་རྣལ་འབྱོར་གྱིས། །མཆོད་
པའི་རྫས་ལ་བསང་གཏོར་བརླབ། །འདབ་བརྒྱད་དབུས་ཀྱི་ལྟེ་བ་ལ། །མཁའ་འགྲོ་འཁོར་བཅས་དམིགས་བྱས་ཏེ། །བཛྲ་ཌཱ་ཀི་ནི། སིཾ་གི་ནི། བྱཱ་གྷྲི་ནི། ཛཾ་བུ་གི་ནི། ལུ་ཀི་ནི། ཌཱ་ཀི་ནི། དཱི་པི་ནི། ཙུ་པི་ནི། ཀཾ་པོ་ཛི་ནི། བརྗོད་པ་ཙམ་གྱིས་དམིགས་བྱས་ཏེ། །འདབ་བརྒྱད་ལ་ནི་
མཁའ་འགྲོ་མ། །གྲུ་ཆད་ལ་ནི་ཁམས་གསུམ་གྱི། །གཙོ་བོ་ཐམས་ཅད་བསམ་པར་བྱ། །ཁྱམས་ལ་འཁོར་རྣམས་ཐམས་ཅད་དོ། །ཨོཾ་ཨཱཿཧཱུཾ། ཀུན་ཀྱང་སྐུ་གསུང་ཐུགས་དང་ལྡན། །བྷ་གའི་ཕྱག་རྒྱ་མགོ་སྟེང་བཅའ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ། སྤྱན་

དྲངས་བསྟིམས་ལ་བར་ཆོད་བགེགས། །འོང་བ་བསྲུང་ཕྱིར་འདི་སྐད་དོ། །ཨོཾ་ན་མཿས་མནྟ་ཀཱ་ཡ་ཝཱ་ཀ་ཙིཏྟ་བཛྲ་ཎཾ། ན་མོ་བཛྲ་ཀྲོ་དྷ་ཡ། མ་ཧཱ་དཾཥྚྲོ་ཏ་ཀ་ཊ། བྷཻ་ར་བཱ་ཡ། ཨ་སི་མུ་ཤཱུ་ལ་པཪྴུ་པཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི། ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ།
བནྡྷ་བནྡྷ། ཧ་ན་ཧ་ན། མ་ཐ་མ་ཐ། གརྫ་གརྫ། སྥོ་ཊ་ཡ་སྥོ་ཊ་ཡ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱ་ན་བི་ནཱ་ཡ་ནཱཾ། མ་ཧཱ་ཀ་བི་དེ། བི་བི་ཏནྟ་ཀ་རཱ་ཡ། སརྦ་གཽ་རཱི་ཨུ་པ་ཐ་བ་ས་མ་ནཾ། ཀུ་རུ་ཀུ་རུ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། དེ་ལྟར་བདུད་རྩིས་མཚམས་བཅད་ནས། །པདྨའི་ཕྱག་རྒྱས་གཏོར་མ་
དབུལ། །བ་ལིཾ་ག་ཐ། ཨོཾ་ཨཱ་ར་ལི་ཧོཿཛཿ་ཧཱུཾ་བཾ་ཧོཿ། བཛྲ་ཌཱ་ཀི་ན་མཿས་མ་ཡ་སྟྭཾ། དྲྀ་ཤྱ་ཧོཿ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་བྷཱུ་ཏ། པྲེ་ཏ་རཱཀྵ་ས། པི་ཤཱ་ཙ་ཨུཥྨནྡ་ཨ་པ་སྨ་ར། ཌཱ་ཀི་ནྱེ་ད་ཡ། ཨི་དཾ་བ་ལིཾ་གྲྀཧྞནྟུ། སརྦ་སིདྡྷི་མྨེ་པྲ་ཡཙྪནྟུ། ས་མ་ཡ་རཀྵནྟུ། ཡ་ཐ་བཾ། ཡ་ཐེཥྚེ། བྷུཉྫ་ཐ། པི་པ་ཐ།
མ་ཏི་ཀྲ་མ་ཐ། མ་མ་སརྦ་པ་རི་པུ་ཀ །ཏ་ཏ་སུ་ཀ་བི་ཤོ་དྷ་ཡ་སྭཱ་ཧཱ། ཨོཾ་ཨ་ཀྲ་བི་ཀྲེ། སྨ་ཤ་ནེ་པ། པརྦ་དེ། ཀནྡྷ་རེ། གྷུ་ཧེ་གྲ་མེ། པརྦ་སྱེ། པ་ཐེ། ཁེ་དྲ། སོརྞ་མ་ཀ་ར། བི་སེ་ས་ཏ་བ་ཛ་ནེ། ཐང་ལ་ག་ཏེ་བུ་མོ། མ་ཏཾ་ག་ཏ། བི་སེ་སྭཱ་ཧཱ། ཀྲྀཥྞ་རུ་ཏྲ། མ་ཧཱ་རུ་ཏྲ། དེ་བ་ཏྭཏ་ཏྲ། ས་མ་སྲེད་ཏ། ཀྲེ་ན་ཀར་
ལ་པི་པ་ཛི། ནན་ཏ་ཏི་ཏ། བི་ན་ཡ་ཀ །ཙ་མུཎྜི། གོ་ར་པི་པ་ཙི། ཨུ་མ་དེ་བི་ཏུ། སྟ་པ་ཛ་ཡཤྩ། བི་ཛ་ཡ། ཙི་བུ་བ། ཨ་ཙི་ཏ། ཨ་པ་ར་ཙི་ཏ། ཛི་ཀ་ལི། ཀཱ་ཡ་བྷ་བཱནྟུ། ཨོཾ་ཨཱཿམཾ་ཧཱུཾ་ཕཊ་སྭཱ་ཧཱ། དེ་ལྟར་ཕུལ་ཏེ་གསོལ་བ་དང་། །སེ་གོལ་བརྡབ་ཅིང་གཤེགས་སུ་གསོལ། །ཨོཾ་ཀྲྀ་ཏོ་བ་སརྦྦ་སཏྭཱ་རྠ།
སིདྡྷི་མ་དཏྟཱ་ཐཱ་ནུ་ག །གཙྪ་ཏྭཱཾ་བུདྡྷཱ་བི་ཥ་ཡཾ། པུ་ན་ར་ག་མ་ན་ཡཙྪ། རང་རང་གནས་སུ་ཡུད་ཙམ་གྱིས། །ཕྱིན་ཏེ་རྣལ་འབྱོར་བསྒོ་བ་ཉན། །དེ་ལྟར་མཚན་མོ་ལན་གསུམ་གཏང་། །ཡི་དམ་ལྷ་ཡི་རྣལ་འབྱོར་གྱིས། །ལྕེ་ལ་རྡོ་རྗེ་བསྒོམ་བྱས་ཏེ། །ལྷའམ་ཆོས་ཉིད་རོལ་བསམས་ན། །
དངོས་གྲུབ་རིམ་པར་འགྲུབ་པར་འགྱུར། །རྣལ་འབྱོར་རོལ་པའི་ལྷག་མ་ལ། །ཤིན་ཏུ་ལྷག་མའི་གཏོར་མ་བྱ། །ལྟེ་བར་བདག་ཉིད་ཡི་དམ་བསྒོམ། །པྲེ་ཏ་བརྗོད་ཅིང་ཟུར་དྲུག་ལ། །ཡི་དགས་ཐམས་ཅད་བསྡུ་བར་བྱ། །ཨོཾ་ཨུ་ཙིཥྚ་ཨ་དྷི་ཏིཥྛ་བྷུཾ་ཛ་དི་བི་ཐ་ཧཱུཾ་ཧཱུཾ་ཕཊ། སྡུག་བསྔལ་

བྲལ་ཞིང་ཚིམ་པར་བསམ། །སྒྲུབ་པའི་ཞག་གྲངས་ཐོན་པ་དང་། །སློབ་མའི་མགོ་སྟེང་གཏོར་མ་གཞག །རྟག་ཏུ་བསྲུང་ཞིང་སྐྱོབ་པ་དང་། །ཕྲིན་ལས་བཞི་ཡི་དབང་ཐོབ་བསམ། །སུམ་མདོའམ་ལམ་ཀའི་བཞི་མདོའམ། །དུར་ཁྲོད་ཡང་ན་ཆུ་འགྲམ་དུ། །ནམ་ཕྱེད་ན་ནི་གཏོར་མ་
གཏང་། །བྱང་ཤར་མཚམས་སུ་གཏོར་ཆེན་བསྐྱལ། །མདོར་ན་གནས་པའི་གོ་རིམས་ཀྱིས། །སྐྱེལ་བའི་ས་རུ་ཕྱིན་པ་དང་། །ཕྱོགས་ཕྱོགས་གདོན་རྣམས་ཟིལ་མནན་ཕྱིར། །ཕྱོགས་བཞི་དག་ཏུ་ཁ་བལྟས་ཏེ། །རྡོ་རྗེ་གསོར་ཞིང་དྲིལ་བུ་དཀྲོལ། །ལག་པ་གཡོན་ནས་གཡས་སུ་
བསྒྱུར། །རྐང་པ་གཡོན་ནས་གཡས་སུ་བརྡབ། །ལག་པ་བརྐྱང་སྟེ་འཕྱང་ཞིང་འཕུར། །ལོང་མོ་གཤིབས་ཏེ་འགྱིང་བག་གིས། །འགྱུར་ཞིང་གཡོན་དུ་བགྲད་ཅིང་བལྟ། །རང་སྔགས་གདོན་ཅིང་དགྱེ་བར་བྱའོ། །རྡོ་རྗེའི་གླུ་ཡང་དྲག་ཏུ་བླང་། །རོལ་མོའི་སྒྲ་ཡང་དྲག་ཏུ་བརྡུང་། །འདི་
ནི་མཁས་པ་རྣམས་ཀྱི་གཞུང་། །རྒྱུད་རྣམས་དང་ནི་འགལ་བ་མེད། །གདམས་ངག་རིམ་པ་འདི་བྲིས་པས། །ལྷག་ཆད་ནོར་བ་ཅི་མཆིས་པ། །དཀོན་མཆོག་བླ་མ་ཆོས་སྐྱོང་དང་། །མཁས་པ་རྣམས་ལ་བཟོད་པར་གསོལ། །རྨོངས་པ་རྣམས་ལ་མིག་ཕྱེ་བས། །ལས་ཀྱི་གཞུང་བསྲངས་
དགེ་རྩ་གང་། །བདག་དང་རྣལ་འབྱོར་ཐམས་ཅད་དང་། །སེམས་ཅན་ཀུན་གྱི་དོན་དུ་བསྔོ། །སློབ་དཔོན་ཆེན་པོ་ཁ་ཆེ་རིན་ཆེན་རྡོ་རྗེས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། སརྦ་བྷཱུ་ཏ་བ་ལིཾ་བི་དྷི་ནཱ་མ། བོད་སྐད་དུ། འབྱུང་པོ་ཐམས་ཅད་ཀྱི་གཏོར་མའི་ཆོ་ག་
ཞེས་བྱ་བ། དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །ཨེ་ཝཾ་རྣམ་པར་ངེས་བཞུགས་པའི། །རྡོ་རྗེ་སེམས་དཔར་ཕྱག་བྱ་སྟེ། །རྣམ་འཚེ་ལོག་འདྲེན་ལ་སོགས་ལས། །སེམས་ཅན་བསྲུང་ཕྱིར་གཏོར་མ་བརྩམ། །ཀྱེ་ཡི་རྡོ་རྗེར་ལྡན་པ་ཡི། །རྣལ་འབྱོར་པ་ཡིས་བསྒོམ་བྱ་བ། །ཆོས་ཀྱི་
འབྱུང་གནས་ནང་དུ་ནི། །པདྨ་འདབ་བརྒྱད་སུམ་བརྩེགས་ལ། །དཀར་ནག་དམར་པོའི་ཨོཾ་ཧཱུཾ་ཨཱཿ། །རིམ་པར་ལྷ་ཆེན་བརྒྱད་དང་ནི། །ཕྱོགས་སྲུང་བརྒྱད་དང་ཀླུ་ཆེན་བརྒྱད། །པདྨའི་འདབ་ལྟར་བསྐྱེད་བྱ་སྟེ། །མདུན་དུ་དབང་ཕྱུག་ཆེན་པོ་བསྐྱེད། །གཡས་སུ་ལྷ་ཡི་དབང་པོ་བསམ། །

རྒྱབ་ཏུ་ཚངས་པ་བསྐྱེད་བྱ་སྟེ། །གཡོན་གྱི་ཕྱོགས་སུ་ཁྱབ་འཇུག་གོ། །མེ་རུ་འདོད་པའི་དབང་ཕྱུག་བསྐྱེད། །སྲིན་པོར་ཚོགས་ཀྱི་བདག་པོ་སྟེ། །བྷྲྀཾ་གི་རི་ཏི་རླུང་མཚམས་སུ། །དབང་ལྡན་མཚམས་སུ་ཀརྟི་ཀ །མདུན་གྱི་འདབ་མར་བརྒྱ་བྱིན་བསམ། །གཡས་སུ་མཐར་
བྱེད་དགོད་པར་བྱའོ། །ཆུ་ལྷ་རྒྱབ་ཀྱི་འདབ་མ་ལའོ། །དེ་ལྟར་གཡོན་དུ་ནོར་སྦྱིན་དགོད། །མེ་ཡི་མཚམས་སུ་མེ་ལྷ་ཆེ། །བདེན་བྲལ་དུ་ནི་སྲིན་པོའོ། །རླུང་གི་མཚམས་སུ་རླུང་ལྷའོ། །དབང་ལྡན་མཚམས་སུ་འབྱུང་པོའི་བདག །སྟོབས་ཀྱི་རྒྱུ་དང་དུང་སྐྱོང་དང་། །མཐའ་ཡས་ནོར་རྒྱས་
དེ་བཞིན་ཏེ། །འཇོག་པོ་དང་ནི་རིགས་ལྡན་དང་། །པད་ཆེན་ཤིན་ཏུ་པད་ཆེན་པོ། །ཐམས་ཅད་ཞལ་གཅིག་ཕྱག་གཉིས་ཏེ། །རྡོ་རྗེ་དྲིལ་བུ་ཕྱག་ན་འཆང་། །རང་འོད་རིག་མས་ཡང་དག་འཁྱུད། །གདན་ལ་གཡས་བརྐྱང་བ་ཡིས་བཞུགས། །རང་རང་ཐུགས་ཀའི་ས་བོན་ལས། །འོད་ཟེར་
ལྕགས་ཀྱུ་ལྟར་འཕྲོས་པས། །ལྷ་ཆེན་བརྒྱད་ལ་གཟུགས་ཁམས་དང་། །གཟུགས་མེད་གནས་པའི་ལྷ་བསྡུའོ། །འདོད་པའི་ཁམས་ཀྱི་ལྷ་དང་མི། །ཕྱོགས་སྲུང་བརྒྱད་ལ་རབ་ཏུ་བསྡུ། །ངན་འགྲོ་གསུམ་དང་ལྷ་མ་ཡིན། །ཀླུ་ཆེན་བརྒྱད་ལ་བསྡུ་བར་བྱ། །རང་བཞིན་གནས་ལ་
བཞུགས་པ་ཡི། །དཀྱིལ་འཁོར་བ་རྣམས་སྤྱན་དྲང་ཕྱིར། །གཽ་རཱི་ཡིས་ནི་དགུག་བྱས་ལ། །ཙཽ་རཱི་ཡིས་ནི་ཞགས་པས་བཅིངས། །བེ་ཏཱ་ལཱི་ཡིས་ལྕགས་སྒྲོག་བསྡམ། །དྲིལ་བུས་མཉེས་བྱེད་གྷསྨ་རཱི། །རྣལ་འབྱོར་པ་ཡི་ཐུགས་ཀ་ནས། །འོད་ཟེར་ལྕགས་ཀྱུ་ལྟར་འཕྲོས་ནས། །ཕྱོགས་
བཅུའི་རྒྱལ་བ་སྲས་བཅས་དགུག །དེ་ལ་ཕྱི་ནང་གསང་མཆོད་དེ། །དེ་རྣམས་ཀྱིས་ནི་དབང་བསྐུར་མཐར། །རང་རང་བདག་པོས་དབུ་ལ་བརྒྱན། །ལྷ་ཆེན་བརྒྱད་ལ་རྟག་པ་ཡིས། །རྡོ་རྗེ་ཡིས་ནི་ཕྱོགས་སྐྱོང་བརྒྱད། །གར་དབང་གིས་ནི་ཀླུ་ཆེན་བརྒྱད། །དེ་ལ་ཆོ་གས་གཏོར་མ་བསྒྲུབ། །
རླུང་དང་མེ་ཡི་དཀྱིལ་འཁོར་ལས། །ཨཱཿལས་བྱུང་བའི་པད་སྣོད་བསམ། །དེར་ནི་བྷྲཱུཾ་ཨཱཾ་ཛྲཱྀཾ་ཁཾ་ཧཱུཾ། །གོ་ཀུ་ད་ཧ་ན་ལས་ནི། །སངས་རྒྱས་ལྔ་དང་སེམས་ཅན་ལྔ། །ཟླ་བ་ཉི་མའི་བར་དུ་བསམ། །ཉི་དབུས་ཧཱུཾ་བྱུང་རྡོ་རྗེ་སྟེ། །འབར་བ་དང་ནི་སྤྲོས་པ་ཡིས། །འཆི་མེད་རབ་ཏུ་བསྒྲུབ་

པར་བྱ། །ཆང་གི་རང་བཞིན་འདི་བསྒོམས་ནས། །ཨོཾ་ཨཱཿཧཱུཾ་གིས་བྱིན་བརླབས་དབུལ། །དེ་ནས་གཏོར་མ་གཏང་བའི་སྔགས། །ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བ་ཨུ། རཀྑ། ཙནྡ། སཱུཛྫ། མཱ་མ། པཔྤ། ཏ་ལ། པཱ་ཏཱ་ལི། ཨཱཿགྷ་སྭཱ་ཧཱ། དེ་ནི་གཏོར་མའི་མགྲོན་ནོ། །
ཨི་དཾ། བ་ལིཾ། བྷུཉྫ། ཛི་གྷ། ཕུལླ། དྷཱུ་པྤ། མཱཾ་ས། བཾ་གྷ། དེ་ནི་གསོལ་བར་ཞུ་བའོ། །ཨམྦ་སརྦ་ཀཱཛྫ་སཱ་དྷ་ཁནྟི་ཁུཎྞི་ཕེ་ཊ་ག་ད། དེ་ནི་དོན་ཞུ་བའོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱ་ཏ། ཨོཾ་ཨཱཿཧཱུཾ་ཕཊ་སྭཱ་ཧཱ། དེ་ནི་བྱིན་གྱིས་བརླབས་པའི་སྔགས་སོ། །དེ་ནས་དགྱེས་པར་
བྱས་ནས་གཤེགས་སུ་གསོལ། ཡི་གེ་བརྒྱ་པ་བརྗོད་པར་བྱ་སྟེ། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུཙྪ་མེ། ཙིཏྟཾ་ཤྲེ་ཡཿ། ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན།
སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། གཏོར་མ་འདི་སྦྱིན་ཞིང་རབ་ཏུ་མཆོད་པར་བྱེད་ན། རྣལ་འབྱོར་པ་ལ་འབྱུང་པོ་ཐམས་ཅད་ཀྱིས་ལེགས་པར་བྱེད་པར་འགྱུར་རོ། །དེ་ཚེ་དེ་ལ་བདེ་བ་རྙོག་པ་མེད་པ་ཉིད་དང་། ལྷ་མཉེས་པ་དང་། འཁོར་དགེ་བར་འགྱུར་རོ། །གལ་
ཏེ་འབྱུང་པོའི་ཚོགས་དེ་ལ་གཏོར་མ་བྱིན་ན། དབང་དང་མངོན་སྤྱོད་དང་དགྲའི་སྡེ་གཞིག་པ་དང་། བསྐྲད་པ་དང་། དགུག་པ་དང་། ཞི་བ་དང་། བདེ་བ་དང་། རྒྱས་པར་བྱེད་པར་འགྱུར་རོ། །འབྱུང་པོ་ཐམས་ཅད་ཀྱི་གཏོར་མའི་ཆོ་ག་སློབ་དཔོན་ནག་པོ་ཞབས་ཀྱིས་མཛད་པ་རྫོགས་སོ།། །།
ལོ་ཙཱ་བ་ཤཱ་ཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། དཔལ་ཐར་པ་གླིང་གི་གཙུག་ལག་ཁང་ཆེན་པོར་ལེགས་པར་བསྒྱུར་ཅིང་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཧེ་བཛྲ་སཱ་དྷ་ནོ་པི་ཀ །བོད་སྐད་དུ། ཀྱེའི་རྡོ་རྗེའི་སྒྲུབ་པའི་ཐབས། དཔལ་ཧེ་རུ་ཀ་ལ་
ཕྱག་འཚལ་ལོ། །ཡེ་ཤེས་གཉིས་མེད་རྒྱུ་དང་བྲལ། །དེ་བཞིན་ཚོགས་བྲལ་གང་གི་གནས། །དཔལ་ལྡན་ཁྲག་འཐུང་ཕྱག་འཚལ་ཏེ། །དེ་བསྟེན་ཆོ་ག་བསྟན་པར་བྱ། །གསང་བའི་དོན་ལྡན་སྒྲུབ་པ་པོས། །ཡང་དག་དོན་ལྡན་དམ་ཚིག་དང་། །ཕྱི་ནང་གསང་བའི་སྡོམ་པ་ཤེས། །

སློབ་དཔོན་གསང་དང་ཤེས་རབ་དང་། །དེ་བཞིན་བཞི་པའི་དབང་ལྡན་པས། །བསྒོམ་པའི་མཆོག་ནི་བསྒྲུབ་པར་འགྱུར། །ཤིང་གཅིག་དྲུང་ངམ་དུར་ཁྲོད་དུ། །བསྒོམ་པ་དག་ནི་དགེ་བར་གསུངས། །ཡང་ན་དབེན་ཞིང་དགོན་པ་དང་། །མ་མོའི་གནས་ལ་སོགས་དེ་
བཞིན། །ཡང་ན་བདེ་ཞིང་ཉམས་དགའ་བར། །རང་གི་འདོད་པ་བསྒྲུབ་པར་བྱ། །དེར་ནི་བདེ་ཞིང་རྒྱ་ཆེ་བའི། །སྟན་ལ་རྣམ་པར་འདུག་ནས་ནི། །མེ་ཏོག་ལ་སོགས་བྱེ་བྲག་དང་། །བདུད་རྩི་ཡིས་ནི་བསང་གཏོར་བྱ། །རྡོ་རྗེས་མཁའ་སྙིང་དབུས་གནས་པར། །ཉི་མའི་དཀྱིལ་འཁོར་བསམ་
པར་བྱ། །དེ་ལ་ཧཱུཾ་ཡིག་འབར་བ་ཡིས། །མཚོན་ཆ་མཆོག་ནི་སྤྲོ་བར་བྱ། །མཁའ་དབྱིངས་ཏིལ་གང་བཞིན་རྒྱས་པའི། །རང་གི་དཀྱིལ་འཁོར་མཆོག་བཀུག་སྟེ། །རང་སྙིང་ས་བོན་མཆོག་སྐྱེས་པའི། །ལྷ་མོ་རྣམས་ཀྱིས་མཆོད་པར་བྱ། །གཽ་རཱི་ཟླ་བའི་མཚན་མ་དང་། །ཙཽ་རཱི་ཉི་མའི་སྣོད་
འཛིན་ཏེ། །བེ་ཏཱ་ལཱི་ཡི་ལག་ན་ཆུའོ། །གྷསྨ་རཱི་ནི་སྨན་འཛིན་ཏེ། །པུཀྐ་སཱི་ནི་རྡོ་རྗེའོ། །ས་བ་རཱི་ནི་དེ་བཞིན་བཅུད། །ཙཎྜ་ལཱི་ནི་རྔེ་ཆུང་འཁྲོལ། །ཌོམྦི་ཆགས་ཆེན་རྗེས་ཆགས་པས། །སྙིང་གར་ཡོངས་སུ་འཁྱུད་པ་སྟེ། །འདི་རྣམས་ཀྱིས་ནི་གཙོ་བོ་མཆོད། །དེ་རྗེས་བསོད་ནམས་ཡན་
ལག་གོ། །གསུམ་གྱི་སྐྱབས་འགྲོ་སོགས་བྱ་སྟེ། །འདི་ལྟར་ཕྱག་འཚལ་སྐྱབས་འགྲོ་དང་། །སྡིག་བཤགས་བསོད་ནམས་རྗེས་ཡི་རང་། །བྱང་ཆུབ་མཆོག་ཏུ་སེམས་བསྐྱེད་དང་། །དམ་བཅའ་བདག་ལུས་དབུལ་བར་བྱ། །དེ་ནས་དང་པོར་བྱམས་པ་སྟེ། །དེ་རྗེས་སྙིང་རྗེ་རྣམ་པར་
བསྒོམ། །གསུམ་པར་དགའ་བ་བསྒོམ་པར་བྱ། །ཀུན་གྱི་ཐ་མར་བཏང་སྙོམས་སོ། །དེ་ནས་ཡེ་ཤེས་བལྟ་བའི་ཕྱིར། །ཕྱི་དང་ནང་གི་དངོས་འདི་ཀུན། །རྣམ་དག་སྟོང་པར་རྣམ་དཔྱད་དེ། །སྤྲིན་མེད་ནམ་མཁའ་ལྟར་བསམས་ནས། །གསང་སྔགས་འདི་ནི་བརྗོད་པར་བྱ། །ཨོཾ་ཤཱུ་ནྱ་ཏཱ་
ཛྙཱ་ན་བཛྲ་སྭ་བྷཱ་ཨཱཏྨ་ཀོ྅ཧཾ། །སེམས་བརྟན་བྱེད་པའི་གསང་སྔགས་འདིས། །སྟོང་པ་ཉིད་ལས་སེམས་ཀྱི་དངོས། །ཨ་ཧཾ་ཨོ་དང་ལྡན་པ་ནི། །ཨོཾ་དབུས་ཧཾ་གིས་འབྲེལ་པ་ལས། །རཾ་ལ་ཉི་མ་བདུན་བསམས་ཏེ། །དེ་ལ་ཧཱུཾ་ལས་བྱུང་བ་ཡི། །སྣ་ཚོགས་རྡོ་རྗེ་བསྒོམ་པར་བྱ། །རྡོ་རྗེ་དེས་ཀྱང་ར་

བ་དང་། །དྲ་བ་འཆིང་བའང་བསྒོམ་པར་བྱ། །དེ་དབུས་མཁའ་དབྱིངས་བདག་ཉིད་ཀྱིས། །ཤེས་རབ་ཨེ་གཟུགས་བསྒོམ་པར་བྱ། །དེ་སྟེང་ས་དང་ཆུ་དང་ནི། །མེ་དང་རླུང་གི་དཀྱིལ་འཁོར་རྣམས། །ལྗང་གུ་དཀར་པོ་དམར་པོ་དང་། །དུ་བའི་མདོག་ཏུ་བསམ་པར་བྱ། །གྲུ་བཞི་ཟླུམ་པོ་གྲུ་
གསུམ་དང་། །ཟླ་ཁམ་དབྱིབས་སུ་རྣམ་པར་བསམ། །དེ་སྟེང་ཨོཾ་ལྡན་ཨ་ཧཾ་ནི། །བདག་ཉིད་ངོ་བོ་གནས་བསམས་ཏེ། །ཨེ་གཟུགས་ནས་ནི་ཨ་ཧཾ་བར། །ཐམས་ཅད་འདྲེས་གྱུར་འཁོར་ལོར་འགྱུར། །གྲུ་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་ཉེ་བར་བརྒྱན། །དྲ་བ་དྲ་ཕྱེད་
ཡང་དག་ལྡན། །རྡོ་རྗེ་ཐིག་གིས་ཡོངས་བརྒྱན་པའོ། །དེ་སྟེངས་ཆོས་དབྱིངས་བདག་ཉིད་ཀྱི། །རོ་ནི་མཁས་པས་རབ་བསྒོམས་ཏེ། །དེ་ལ་ཨཱ་ལི་ཀཱ་ལི་ལས། །འབྱུང་བ་ཉི་མ་ཟླ་བ་བསམ། །དེ་དག་རབ་ཏུ་ས་བོན་ནི། །ཨ་དང་ཧཱུཾ་ལས་གྱུར་པ་ཡི། །རྡོ་རྗེ་གྲི་གུག་བསྒོམ་པར་བྱ། །
དེ་ལ་རང་སེམས་བདག་ཉིད་ཀྱི། །ཨ་ཧཾ་ཡོངས་སུ་ཞུགས་པ་ནི། །དམ་པའི་དགའ་བའི་རང་བཞིན་གྱིས། །སེམས་དཔར་འདི་དེ་བརྗོད་པའོ། །དེ་རྣམས་གཅིག་ཏུ་འདྲེས་པ་ལས། །ཡེ་ཤེས་ལྔ་ཡི་བདག་ཉིད་ཀྱི། །ཧེ་རུ་ཀར་ནི་རྣམ་པར་བསྒོམ། །ཟླ་བ་མེ་ལོང་ཡེ་ཤེས་ཏེ། །དེ་
བཞིན་ཉི་མ་མཉམ་པ་ཉིད། །ས་བོན་ལས་བྱུང་མཚན་མ་ནི། །སོ་སོར་རྟོག་པར་གསུངས་པའོ། །དབྱེར་མེད་འདྲེས་པ་ནན་ཏན་ཏེ། །སྐུར་གྱུར་ཆོས་དབྱིངས་ཡེ་ཤེས་ཡིན། །སྐུ་མདོག་སྔོ་རེངས་ཤར་བའི་འོད། །བིནྡུ་དམར་པོ་འདྲ་བའི་སྤྱན། །དབུ་སྐྲ་ཁམ་པ་གྱེན་དུ་འཁྱིལ། །ཕྱག་
རྒྱ་ལྔ་ཡིས་རྣམ་པར་བརྒྱན། །འཁོར་ལོ་སྙན་ཆ་ཕྱག་གདུབ་དང་། །མགུར་ཆུ་དང་ནི་སྐེ་རགས་རྣམས། །སངས་རྒྱས་ལྔར་ནི་དག་པ་ཡིས། །འདི་རྣམས་ཕྱག་རྒྱར་རབ་ཏུ་བསྒྲགས། །ལོ་གྲངས་བཅུ་དྲུག་ལྟ་བུ་ལ། །རབ་ཏུ་ཁྲོས་པའི་ལྟ་སྟངས་ཅན། །གཡོན་ན་རྡོ་རྗེ་ཐོད་པ་དང་། །གཉིས་
པ་ཡུམ་གྱི་བདག་ཉིད་ཀྱིས། །ཁ་ཊྭཱཾ་ག་ཡང་འཁྱུད་པའོ། །གཡས་ན་རྡོ་རྗེ་ནག་པོ་སྟེ། །ཧཱུཾ་གི་སྒྲ་འབྱིན་བདག་ཉིད་ཅན། །ཞེ་སྡང་བདག་ཉིད་བསྒོམ་པར་བྱ། །གལ་ཏེ་ཕྱག་རྒྱ་བྱེད་འདོད་ན། །གཡོན་གྱི་དང་པོ་ཀ་པཱ་ལ། །ལྷ་དང་ལྷ་མིན་ཁྲག་གིས་བཀང་། །གཡས་ཀྱི་དང་པོ་རྡོ་རྗེ་སྟེ། །

ལྷག་པའི་ཕྱག་གཉིས་ཇི་ལྟ་བ། །རང་དང་འདྲ་བའི་ཕག་མོས་འཁྱུད། །གཞན་ཡང་སྔོན་ཉིད་ཇི་ལྟ་བའོ། །གཞན་ཡང་ཞལ་གསུམ་ཕྱག་དྲུག་སྟེ། །གཡས་པའི་ཞལ་ནི་སྐྱ་རེངས་འདྲ། །གཡོན་པ་དམར་པོ་གཅེར་བུ་སྟེ། །གཡོན་གྱི་དང་པོ་ཏྲི་ཤཱུ་ལ། །གཡས་ཀྱི་དང་པོ་
རྡོ་རྗེའོ། །གཡོན་པ་གཉིས་པ་དྲིལ་བུ་དང་། །གཡས་པ་གཉིས་པ་ཀརྟ་རི། །ལྷག་མས་རྡོ་རྗེ་ལུ་གུ་རྒྱུད། །གྲི་དང་ཐོད་པ་བསྣམས་པས་འཁྱུད། །གཞན་ནི་སྔོ་བཞིན་ཡུམ་དེ་བཞིན། །གཞན་ཡང་བསྒོམ་པར་བྱ་བ་ནི། །ཞལ་བརྒྱད་པ་ལ་ཞབས་བཞི་པ། །བཅུ་དྲུག་ཕྱག་གིས་རྣམ་པར་
བརྒྱན། །བདུད་བཞི་ཞབས་ཀྱིས་རྣམ་པར་མནན། །འཇིགས་པ་དག་ཀྱང་འཇིགས་པར་བྱེད། །མགོ་བོའི་ཕྲེང་བས་རྣམ་བརྒྱན་ཅིང་། །ཉི་མ་ལ་བཞུགས་གར་གྱིས་སྟབས། །སྣ་ཚོགས་རྡོ་རྗེ་སྤྱི་བོར་འཆང་། །ཁ་དོག་ནག་པོ་འཇིགས་པར་བྱེད། །རང་ཞལ་ནས་ནི་ཧཱུཾ་འཕྲོ་ཞིང་། །སྐུ་
ལ་ཐལ་བས་རྣམ་པར་བྱུགས། །བདག་མེད་མ་དང་མཉམ་ལྡན་པའི། །དགའ་བའི་སྦྱོར་བས་སྙོམས་པར་འཇུག །རྣམ་པར་མི་རྟོག་བདེ་བ་ཡི། །མི་རྟོག་རང་བཞིན་བདེ་བར་གནས། །དང་པོའི་ཞལ་ནི་ནག་པོ་ཆེ། །གཡས་པ་མེ་ཏོག་ཀུནྡ་འདྲ། །དཔའ་བོ་གཡོན་པ་དམར་བ་ཆེ། །སྟེང་གི་
ཞལ་ནི་རྣམ་པར་གཙིགས། །ཉི་ཤུ་རྩ་བཞིའི་སྤྱན་དང་ལྡན། །ལྷག་མའི་ཞལ་ནི་བུང་བ་འདྲ། །གཡས་ཀྱི་འབར་བའི་ཕྱག་བརྒྱད་ན། །པདྨ་བྷནྡྷ་བརྒྱད་ནང་དུ། །གླང་པོ་རྟ་དང་བོང་བུ་དང་། །བ་ལང་རྔ་མོ་མི་དག་དང་། །བྱི་ལ་དང་ནི་སེང་གེ་རྣམས། །རིམ་པ་བཞིན་དུ་ཤེས་པར་བྱ། །ས་དང་
ཆུ་དང་རླུང་དང་མེ། །ཟླ་བ་ཉི་མ་དེ་བཞིན་ཡང་། །གཤིན་རྗེ་དང་ནི་གནོད་སྦྱིན་རྣམས། །གཡོན་གྱི་བྷནྡྷ་བརྒྱད་དུའོ། །སྒེག་དང་དཔའ་དང་མི་སྡུག་དང་། །རྒོད་དང་ཁྲོ་དང་འཇིགས་པར་བྱེད། །སྙིང་རྗེ་ངོ་མཚར་ཞི་ལ་སོགས། །འབར་བའི་གར་དགུ་ཉམས་དང་ལྡན། །ཞབས་ཀྱིས་ས་ལ་
བརྡབས་མཛད་ཅིང་། །ལྷ་མིན་ལྷ་ལ་བསྡིགས་མཛད་པའི། །རང་གི་སྙིང་གར་ར་ཡིག་ལས། །བྱུང་བའི་ཉི་མའི་དཀྱིལ་འཁོར་བསྒོམ། །དེ་ནས་ཐབས་དང་ཤེས་རབ་ཀྱི། །ངོ་བོ་ཉིད་ཀྱི་ཧཱུཾ་ཡིག་གོ། །རྡོ་རྗེ་ཡི་གེ་ཧཱུཾ་ལས་བྱུང་། །ཁ་དོག་ནག་པོ་དྲག་པོ་ཆེ། །རྡོ་རྗེ་ལྟེ་བའི་དབུས་གནས་པར། །

དེ་ཉིད་ཧཱུཾ་དུ་བསྒོམ་པར་བྱ། །གཞན་ཡང་ཧཱུཾ་ཡིག་ཡོངས་གྱུར་པའི། །ཞེ་སྡང་བདག་ཉིད་རྣམ་པར་བསྒོམ། །རྡོ་རྗེ་ལས་བྱུང་ནག་པོ་ཆེ། །འདམ་སྐྱེས་སྔོན་པོ་རབ་འདྲ་བའི། །ཡང་ན་སྔོ་རེངས་ཤར་བ་འདྲ། །དད་པས་ངེས་པར་བསྒོམ་པར་བྱ། །དེ་ནས་གཞལ་ཡས་ཡིད་འོང་བའི། །
མ་མོའི་འཁོར་ལོ་བསྒོམ་བྱ་སྟེ། །ཡབ་ཡུམ་གཉིས་སུ་མེད་པ་ཡི། །ཡིད་འོང་སྦྱོར་བའི་དགྱེས་པ་ལས། །བྱུང་བའི་གཽ་རཱི་དབང་པོའི་ཕྱོགས། །ཤར་གྱི་སྒོར་ནི་རྣམ་པར་གནས། །གཉིས་སུ་མེད་པའི་སྦྱོར་བ་ལས། །བྱུང་བའི་ཙཽ་རཱི་ཡང་སྤྲོས་ཏེ། །ལྷོ་ཕྱོགས་སྒོ་སྐྱོང་ཙཽ་རཱི་གནས། །འཇམ་
པོ་འཇུག་པ་སྦྱོར་བ་ལས། །བེ་ཏཱ་ལཱི་ཡང་དབྱུང་བར་བྱ། །སྤྲོས་ནས་བདུད་འཇོམས་ནུབ་སྒོར་རོ། །སྙོམས་འཇུག་སྦྱོར་བ་ཆེན་པོ་ལས། །གྷསྨ་རཱི་ཡང་དབྱུང་བར་བྱ། །སྤྲོས་ནས་བྱང་གི་སྒོ་རུ་ནི། །ཁྲོ་མོའི་གཟུགས་སུ་རྣམ་པར་གནས། །གཉིས་སྤྲད་པ་ཡི་སྦྱོར་བ་ཡིས། །པུཀྐ་སཱི་ཡང་
དབྱུང་བར་བྱ། །སྤྲོས་ནས་དབང་ལྡན་གྲྭ་རུ་ནི། །འཁྲུག་པའི་གཟུགས་སུ་རྣམ་པར་གནས། །གཞན་ཡང་གཉིས་མེད་སྦྱོར་བ་ལས། །ཤ་བ་རཱི་ནི་མེ་ཡི་གྲྭ ། ཙཎྜ་ལཱི་ནི་སྲིན་པོའི་ཕྱོགས། །ཌོམྦི་རླུང་གི་གྲྭ་རུའོ། །གཽ་རཱི་གཡས་ན་གྲི་གུག་སྟེ། །གཡོན་པ་ན་ནི་དེ་བཞིན་ཉ། །ཙཽ་རཱི་གཡས་
ན་རྔེའུ་ཆུང་སྟེ། །གཡོན་པའི་ཕྱག་ན་ཕག་པའོ། །པེ་ཏཱ་ལཱི་གཡས་རུས་སྦལ་ཏེ། །གཡོན་ན་པདྨ་བྷནྡྷའོ། །གྷསྨ་རཱི་ནི་གཡས་ན་སྦྲུལ། །གཡོན་པ་ན་ནི་རྣལ་འབྱོར་སྣོད། །པུཀྐ་སཱི་གཡས་སེང་གེ་སྟེ། །གཡོན་ན་དེ་བཞིན་དགྲ་སྟའོ། །ས་བ་རཱི་གཡས་དགེ་སློང་སྟེ། །གཡོན་ན་དེ་བཞིན་
བསྲེག་ཤང་ངོ་། །ཙཎྜ་ལཱི་གཡས་འཁོར་ལོ་སྟེ། །གཡོན་པ་ན་ནི་དེ་བཞིན་གཤོལ། །ཌོམྦི་གཡས་ན་རྡོ་རྗེ་སྟེ། །གཡོན་ན་དེ་བཞིན་སྡིགས་འཛུབ་པོ། །གཽ་རཱི་ལ་སོགས་ཕྱག་གཉིས་གསུངས། །སྐྱིལ་ཀྲུང་ཕྱེད་མ་གར་གྱི་སྟབས། །སྤྱན་གསུམ་སྐྲ་ནི་གྱེན་དུ་བརྫེས། །ཕྱག་རྒྱ་ལྔ་
ཡིས་རྣམ་པར་བརྒྱན། །གཽ་རཱི་སྐུ་མདོག་ནག་པོར་འགྱུར། །ཙཽ་རཱི་བཙོད་དང་འདྲ་བ་སྟེ། །བེ་ཏཱ་ལཱི་ནི་གསེར་བཙོ་མ། །གྷསྨ་མརྐཏ་ལྟ་བུ་སྟེ། །པུཀྐ་ཨིནྡྲ་ནཱི་ལ་འདྲ། །ཟླ་འོད་ལྟ་བུའི་ས་བ་རཱི། །ཙཎྜ་ལཱི་ནི་ནམ་མཁའི་མདོག །ཌོམྦི་སྣ་ཚོགས་དག་ཏུ་བཤད། །ཚངས་དང་དབང་བོ་ཉེ་

དབང་པོ། །དྲག་པོ་གཤིན་རྗེ་གནོད་སྦྱིན་དང་། །བདེན་བྲལ་ན་ནི་ཐགས་བཟངས་རིས། །གཽ་རཱི་ལ་སོགས་ལྷ་མོ་ཡི། །རིམ་བཞིན་གདན་དུ་ཤེས་པར་བྱ། །དེ་རྣམས་ས་བོན་འདི་ཡིན་ནོ། །གཾ་ཙཾ་བཾ་གྷཾ་པཾ་སཾ་ལཾ་ཌཾ། །བདག་པོས་ས་བོན་འདི་དག་ལས། །དེ་
རྣམས་གདོན་པ་ཉིད་དུ་བྱ། །དེ་ནས་རང་གི་རིག་མ་དང་། །རྡོ་རྗེ་འཛིན་མ་འདོད་ཆགས་ཆེས། །འོད་དུ་ཞུ་བར་གྱུར་པ་ལས། །མཚམས་ཀྱི་ལྷ་མོ་བཤེས་གཉེན་མོས། །སྣ་ཚོགས་གླུ་ཡིས་མཆོད་དེ་བསྐུལ། །ཀྱེ་ཡི་རྡོ་རྗེ་ཐུགས་རྗེས་གཟིགས་ཏེ་པུཀྐ་བདག་ལ་སྐྱོབས། །བདེ་བ་ཆེན་པོ་སྦྱར་
བ་བདག་འདོད་སྟོང་པའི་རང་བཞིན་བསལ་ཏེ་བཞེངས་སུ་གསོལ། །སྟོང་པའི་རང་བཞིན་བསལ་ནས་ས་ཡི་དངོས་གྲུབ་དགོས་དོན་དུ། །གལ་ཏེ་གསོན་པར་མཆིས་བཞེད་ཀྱེ་ཡི་རྡོ་རྗེ་བཞེངས་སུ་གསོལ། །ཙཎྜ་བདག་གིས་ཁྱོད་མེད་ཕྱོགས་མ་མཐོང་ནས་གསོལ་འདེབས་ན། །ལྷ་ལ་སོགས་
པའི་འཇིག་རྟེན་བསྒྲལ་བར་དམ་བཅས་ཅི་སླད་བཞུགས། །བདག་ནི་ཌོམྦིའི་མཚན་མ་མེད་པ་ཁྱོད་ཀྱི་སེམས་ནི་ཤེས་པ་སྟེ། །ཐུགས་རྗེ་མེད་པ་དེ་མི་རུང་བས་རྫུ་འཕྲུལ་ལྟ་བུར་བཞེངས་སུ་གསོལ། །དེ་དག་གསན་ནས་སྔོན་བཞིན་དུ། །ཨཱཿཧཱུཾ་དག་ལས་རྡོ་རྗེ་འཛིན། །ཆེན་པོ་འོད་དུ་ཞུ་ལས་
བཞེངས། །དེ་ནས་ཞེ་སྡང་བདག་ཉིད་ཀྱི། །རང་སྙིང་ས་བོན་ལས་བྱུང་བའི། །འབར་བ་ནག་པོ་ལྕགས་ཀྱུ་ཡིས། །ཁམས་གསུམ་གནས་པའི་སངས་རྒྱས་རྣམས། །སྤྱན་དྲངས་མ་མོ་བརྒྱད་རྣམས་ཀྱིས། །སྔོན་བཞིན་མཆོད་དེ་གསོལ་བ་གདབ། །བདག་ཉིད་ཆེན་པོ་བཅོམ་ལྡན་
འདས། །བཅོམ་ལྡན་རྣམས་ཀྱིས་དབང་བསྐུར་བ། །དེ་བཞིན་གཤེགས་པ་ཐམས་ཅད་ཀྱིས། །བདག་ལ་དབང་བསྐུར་རབ་ཏུ་སྩོལ། །ཨོཾ་ཨ་བྷི་ཥིཉྩ་ཏུ་མཱཾ་སརྦ་བཛྲ་ཏ་ཐཱ་ག་ཏ་ཨ་དྷིཥྛཱ་ན། དེ་སྐད་གསོལ་བ་བཏབ་པ་ཡིས། །བདེ་གཤེགས་དེ་དག་ཐམས་ཅད་ཀུན། །ཧེ་རུ་ཀ་ཡི་སྐུར་གྱུར་
ཏེ། །བདེ་གཤེགས་ལྔ་ཡི་བདག་ཉིད་ཀྱི། །བདུད་རྩི་བུམ་པས་དབང་བསྐུར་ཏེ། །དེ་ཚེ་མེ་ཏོག་གུར་གུམ་ཆར། །འབབ་དང་རྔ་ཡི་སྒྲ་གྲག་ཅིང་། །གཟུགས་ཀྱི་རྡོ་རྗེ་མ་སོགས་དང་། །སྤྱན་སོགས་རྡོ་རྗེ་དབྱངས་རྣམས་ཀྱིས། །དབང་བསྐུར་རབ་ཏུ་བྱས་པ་ཡིས། །ཐུགས་ཀྱི་དབང་ཕྱུག་

སོགས་སངས་རྒྱས། །དབུ་རྒྱན་དུ་ནི་གྱུར་པར་བྱ། །མི་བསྐྱོད་རྟག་དང་རིན་ཆེན་དབང་། །མཐའ་ཡས་དེ་བཞིན་གཤེགས་རྣམས་ཀྱིས། །པུཀྐ་སཱི་སོགས་མཚམས་གནས་པ། །རིམ་པ་བཞིན་དུ་རྒྱ་ཡིས་གདབ། །ཞེ་སྡང་གཏི་མུག་སེར་སྣ་དང་། །འདོད་ཆགས་རྡོ་རྗེ་མ་ཡིས་ནི། །སྒོ་
གནས་ཀཻ་རི་ལ་སོགས་པ། །རིམ་བཞིན་དུ་ནི་གདབ་པར་བྱ། །རྒྱ་ཡིས་གདབ་ཅིང་མཚན་པས་ན། །དེས་འདིར་རྒྱས་ཞེས་བྱ་བ་ཡིན། །རང་སྙིང་ས་བོན་འོད་ཟེར་གྱིས། །སངས་རྒྱས་རྣམས་ནི་གཞུག་བྱས་ཏེ། །བདུད་རྩི་མྱང་བའི་སྦྱོར་བ་ཡིས། །དེ་དག་ཚིམ་པ་ཉིད་དུ་བྱ། །རླུང་དང་
མེ་ཡི་དཀྱིལ་འཁོར་ནི། །ཟླ་གམ་གྲུ་གསུམ་ཁ་དོག་གཉིས། །ཡི་གེ་ཡཾ་དང་རཾ་གྱིས་མཚན། །བ་དན་དང་ནི་རྡོ་རྗེས་མཛེས། །དེ་སྟེང་བྷནྡྷ་ཨ་ལས་བྱུང་། །དེར་ནི་ཡེ་ཤེས་བདུད་རྩིས་བཀང་། །ཡི་གེ་ཧཱུཾ་ལས་རབ་བསྐྱེད་པའི། །རྡོ་རྗེ་ལས་བྱུང་ཨོཾ་གྱིས་མཚན། །དེ་ཉིད་གསུམ་གྱིས་
བྱིན་བརླབས་པའི། །བདུད་རྩི་ལྷ་ཡི་སྦྱོར་བས་བསང་། །མཆོད་དང་བསྟོད་པ་ཉིད་དུ་བྱ། །དག་པའི་རང་བཞིན་ཤེས་པར་བྱ། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་ཤེས་ཕུང་པོར་ནི། །རྡོ་རྗེ་མ་དང་གཽ་རཱི་དང་། །ཆུ་ཡི་ལྷ་མོ་མཁའ་འགྲོ་མ། །བདག་མེད་རྣལ་འབྱོར་མར་དག་
གོ། །ས་ཆུ་མེ་རླུང་འབྱུང་བ་བཞི། །པུཀྐ་སཱི་ལ་སོགས་པའི་དངོས། །གཟུགས་སྒྲ་དྲི་རོ་རེག་བྱ་ཆོས། །གཽ་རཱི་ཙཽ་རཱི་བེ་ཏཱ་ལཱི། །གྷསྨ་ས་སྤྱོད་མཁའ་སྤྱོད་དོ། །མིག་དང་རྣ་བ་སྣ་དང་ལྕེ། །ལུས་དང་ཡིད་ཀྱི་དབང་པོ་ནི། །གཏི་མུག་ཞེ་སྡང་སེར་སྣ་དང་། །འདོད་ཆགས་ཕྲག་དོག་རྡོ་རྗེ་དང་། །
བདག་མེད་རྣལ་འབྱོར་མར་ཤེས་བྱ། །འཁོར་ལོ་སྙན་ཆ་མགུར་ཆུ་དང་། །ཕྱག་གདུབ་སྐ་རགས་ཕྱག་རྒྱ་ལྔ། །མི་བསྐྱོད་མཐའ་ཡས་རིན་ཆེན་དབང་། །སྣང་མཛད་དོན་གྲུབ་བདག་ཉིད་དོ། །ཕྱག་གཉིས་ཐབས་དང་ཤེས་རབ་སྟེ། །ཕྱག་བཞི་བདུད་བཞི་རྣམ་པར་དག །ཕྱག་དྲུག་ཕ་རོལ་
ཕྱིན་དྲུག་གོ། །བཅུ་དྲུག་ཕྱག་ཏུ་གསུངས་པ་ནི། །སྟོང་པ་བཅུ་དྲུག་བདག་ཉིད་དོ། །ཞལ་གཅིག་སྟོང་པ་ཉིད་ཀྱི་སྒོ། །ཞལ་གསུམ་རྣམ་པར་ཐར་པ་གསུམ། །ཞལ་བརྒྱད་རྣམ་པར་ཐར་པ་བརྒྱད། །ཞབས་བཞི་བདུད་བཞི་དག་པ་ཉིད། །སྤྱན་ནི་དག་པའི་རྡོ་རྗེ་གསུམ། །དབང་པོ་དྲུག་

དང་ཕུང་པོ་ལྔ། །སྐྱེ་མཆེད་དྲུག་དང་འབྱུང་བ་རྣམས། །ངོ་བོ་ཉིད་ཀྱིས་རྣམ་དག་པས། །སྣ་ཚོགས་དག་ཅིང་རྣམ་པར་གྲོལ། །གཟུགས་ཡུལ་ལ་སོགས་གང་གི་ཡང་། །རྣལ་འབྱོར་པ་ཡིས་མིག་ཡོར་ཚུལ། །ཐམས་ཅད་རང་བཞིན་གྱིས་དག་ཕྱིར། །སངས་རྒྱས་རྫུ་
འཕྲུལ་སྣ་ཚོགས་སོ། །རྣམ་པར་དག་པ་བྱས་ནས་ནི། །རྣལ་འབྱོར་སྡོམ་པའི་བདག་ཉིད་དང་། །ཕྱི་ནང་བཟླས་པ་བརྩམ་པར་བྱ། །དེ་ལ་འདི་ནི་སྡོམ་པ་སྟེ། །ཨེ་ཝཾ་མ་ཡཱའི་བདག་ཉིད་ཀྱིས། །འཁོར་ལོ་བཞི་ནི་ལུས་ལ་གནས། །འདི་ལྟར་སྤྲུལ་པའི་ཆོས་དང་ནི། །ལོངས་སྤྱོད་བདེ་ཆེན་
འཁོར་ལོ་རྣམས། །ལྟེ་བ་སྙིང་ག་མགུལ་པ་དང་། །སྤྱི་བོར་རིམ་བཞིན་ཤེས་པར་བྱ། །འཁོར་ལོ་རྣམས་ཀྱི་པདྨ་ནི། །དྲུག་ཅུ་རྩ་བཞི་དེ་བཞིན་བརྒྱད། །བཅུ་དྲུག་སུམ་ཅུ་གཉིས་སུ་ཤེས། །ས་བོན་ཨོཾ་དང་ཧཱུྃ་དང་ནི། །ཨོཾ་དང་ཧཾ་སྟེ་རིམ་བཞིན་ནོ། །ཨཱ་ལི་ཀཱ་ལི་སྤྲུལ་པ་ལ། །ཡོངས་སུ་
བསྐོར་བར་ཤེས་པར་བྱ། །བདེ་གཤེགས་ཡབ་ཡུམ་ས་བོན་གྱིས། །ཆོས་ཀྱི་འཁོར་ལོ་དེ་བཞིན་བསྐོར། །ཡི་གེ་ཨི་ཨེ་འདྲེན་བཅས་པས། །ལོངས་སྤྱོད་འཁོར་ལོ་བསྐོར་བ་ཡིན། །སྤྲུལ་པའི་སྐུ་དང་ཆོས་ཀྱི་སྐུ། །དེ་བཞིན་ལོངས་སྤྱོད་རྫོགས་པ་དང་། །སྐུ་གསུམ་ཡོངས་སུ་ཤེས་པ་
རྣམས། །འཁོར་ལོ་བཞི་རུ་འདོད་པ་ཡིན། །འཁོར་ལོ་འདི་རྣམས་རང་བཞིན་ནི། །ལྷ་མོ་བཞི་དང་ཕྱག་རྒྱ་བཞི། །ཡི་གེ་འབྲུ་བཞིར་འདོད་པ་སྟེ། །སངས་རྒྱས་སྤྱན་དང་མཱ་མ་ཀཱི། །དཀར་མོ་སྒྲོལ་མ་དེ་བཞིན་དུ། །ལས་དང་ཆོས་དང་དམ་ཚིག་དང་། །ཕྱག་རྒྱ་ཆེན་པོར་བརྗོད་པའོ། །ཡི་གེ་
ཨེ་དང་ཝཾ་དག་དང་། །མ་དང་ཡཱ་ཡང་འདི་ཡི་དངོས། །དེ་བཞིན་སྐུ་གསུང་ཐུགས་རྣམས་དང་། །ཨཱ་ལི་ཀཱ་ལིའང་འདི་ཉིད་ཡིན། །ཡེ་ཤེས་སྐད་ཅིག་བཞིར་གྲགས་པ། །སྣ་ཚོགས་དང་ནི་རྣམ་སྨིན་དང་། །རྣམ་པར་འཇོམས་དང་མཚན་ཉིད་བྲལ། །འཁྱུད་དང་མྱོང་དང་སྤྱོད་པ་དང་། །ཅི་ཡང་
མ་ཡིན་པ་ཡི་སེམས། །འཁོར་ལོ་བཞི་ལ་གནས་པ་ཡིན། །སྡུག་བསྔལ་ཀུན་འབྱུང་འགོག་པ་ལམ། །ཕུང་པོ་ཉོན་མོངས་བཞི་འབྱིན་པ། །བདེན་པ་བཞི་ཡང་འདི་ཉིད་དོ། །བདག་དང་སྔགས་དང་ལྷ་དང་ནི། །ཡེ་ཤེས་རྣམས་ཀྱི་དེ་ཉིད་རྣམས། །རང་རང་ཡང་དག་གང་ཡིན་པའམ། །

འཁོར་ལོ་བཞི་ཡི་ངོ་བོའོ། །དགའ་དང་དམ་པའི་དགའ་བ་དང་། །བྲལ་དང་རང་བཞིན་དགའ་བ་རྣམས། །བདེ་བའི་ཡེ་ཤེས་ཆ་བཞི་སྟེ། །དྲོད་ཐོབ་པ་དང་འཕེལ་བ་དང་། །ཆགས་བྲལ་བདེ་དང་མི་གཉིས་བདེ། །དེ་ཡང་འཁོར་ལོ་བཞི་ལ་གནས། །གནས་བརྟན་ཐམས་ཅད་ཡོད་པར་སྨྲ། །
དེ་བཞིན་མང་པོས་བཀུར་བ་དང་། །དགེ་འདུན་ཕལ་ཆེན་སྡེ་ཞེས་པ། །སྡེ་པ་བཞི་ཡང་དེ་ཉིད་ཡིན། །རྣལ་འབྱོར་གསང་སྔགས་སྡོམ་པ་དང་། །ཡེ་ཤེས་སྡོམ་པའང་བསྟན་པར་བྱ། །སྨེ་ཤ་ལྟེ་བར་འབར་བ་ཡིས། །དེ་བཞིན་གཤེགས་ལྔ་བསྲེགས་པ་དང་། །སྤྱན་ལ་སོགས་པ་བསྲེགས་པ་
དང་། །ཧཾ་བསྲེགས་ཟླ་བ་འབབ་པའོ། །དེ་ནི་འདི་ལྟར་ཤེས་བྱ་སྟེ། །རྣལ་འབྱོར་གསང་སྔགས་སྡོམ་པ་ཡིས། །བསྲེག་པའི་མཚན་ཉིད་ཤེས་པར་བྱ། །བསྲེག་པ་མེ་དང་རླུང་ཡིན་ཏེ། །ཡེ་ཤེས་མེ་ཡི་སྣང་བ་གང་། །ལས་ཀྱི་རླུང་གིས་བསྐུལ་བ་ཡིན། །ལས་ཀྱང་བཅོམ་ལྡན་ཤེས་རབ་མའི། །
རླུང་གི་དེ་ཉིད་འདི་ཡིན་ཏེ། །ལྟེ་བའི་དབུས་ལས་འཕྲོ་ཞིང་ཕྲ། །ཆོས་དང་ལོངས་སྤྱོད་བདེ་ཆེན་བཞི། །བརྟན་དང་གཡོ་བ་ཀུན་གྱི་བདག །ཡི་གེ་ཨཾ་གི་བདག་ཉིད་ནི། །ལས་ཀྱི་རླུང་གི་གཞི་ཡིན་ཏེ། །འདི་ལས་ཀུན་དུ་འབྱུང་བ་ཡིན། །འདི་དག་རྒྱུ་བའི་རིམ་པ་ནི། །ཉི་མ་གཅིག་ལ་ཐུན་
བཞི་སྟེ། །དེ་བཞིན་ཆུ་ཚོད་སུམ་ཅུ་གཉིས། །རིམ་པ་བཅུ་དྲུག་དེ་བཞིན་དུ། །དྲུག་ཅུ་རྩ་བཞིའི་ཆ་དང་ལྡན། །ཟླ་བ་ཉི་མ་ཞེས་བྱ་བའི། །ཨཱ་ལི་ཀཱ་ལིའི་ངོ་བོ་ནི། །སྣ་བུག་གཡས་དང་གཡོན་དུ་རྒྱུ། །དེ་ཡང་ས་དང་ཆུ་དང་ནི། །མེ་དང་རླུང་གི་བདག་ཉིད་ཅན། །འབྱུང་བ་བཞི་ཡི་ངོ་བོར་འདོད། །
འདི་རྣམས་དུས་སུ་རྒྱུ་བ་སྟེ། །ནམ་མཁའི་རང་བཞིན་དུས་མ་ཡིན། །ལྕི་ཞིང་མཁྲང་བ་ས་ཡི་ཁམས། །ཐུར་དུ་རྒྱུ་བ་དང་པོར་འདོད། །གྲང་ཞིང་རྩུབ་པ་ཆུ་ཡི་ཁམས། །མདུན་དུ་རྒྱུ་བ་གཉིས་པ་ཡིན། །དྲོ་ཞིང་འཇམ་པ་མེ་ཡི་ཁམས། །འདི་ནི་ཕྱིར་ལ་ཉེ་བར་རྒྱུ། །ཡང་ཞིང་སྟོབས་ཅན་རླུང་
གི་ཁམས། །གྱེན་དུ་རྒྱུ་བར་ཤེས་པར་བྱ། །དེ་བཞིན་ཆུ་ཚོད་རིམ་པ་དང་། །ཐུན་ཞེས་བྱ་བར་གྲགས་པ་ཡང་། །འདིར་ནི་འདི་ཉིད་གཟུང་བྱ་སྟེ། །གཡས་སུ་ཇི་བཞིན་གཡོན་དེ་བཞིན། །དེ་ནས་ཀྱང་ནི་གཡས་ཡིན་ཏེ། །བར་ཆད་ཡོད་པ་མ་ཡིན་ནོ། །དུས་མིན་རྒྱུ་བ་གང་ཞེ་ན། །

གང་ཞིག་འཆི་བའི་དུས་ཉིད་དང་། །བྱང་ཆུབ་སེམས་རྒྱུན་འབབ་པ་དང་། །ནད་ཆེན་འབྱུང་བའི་སྔ་ལྟས་ལ། །དེ་དག་དུས་གཅིག་འབྱུང་བ་སྟེ། །འདི་ནི་ནམ་མཁའི་ཁམས་སུ་བརྗོད། །རླུང་དང་ཡེ་ཤེས་རྣམ་ཤེས་དང་། །དུག་རྣམས་ལྷན་ཅིག་རྒྱུ་བ་སྟེ། །ནམས་ཀྱང་
འབྲལ་བ་མ་ཡིན་ནོ། །རེག་པའི་རླུང་ཞེས་བྱ་བ་ནི། །ལུས་ལས་ནམ་ཡང་མི་འདའ་སྟེ། །གལ་ཏེ་འདས་ན་འཆི་བར་འགྱུར། །རླུང་གི་དེ་ཉིད་ཤེས་པ་ཡིས། །མེ་ཡི་དེ་ཉིད་བསྐུལ་བར་བྱ། །དབུགས་དང་དྲོད་ཀྱི་ཁམས་དག་ཀྱང་། །ཐ་དད་འཇུག་པ་མ་ཡིན་ནོ། །དེ་ལ་མེ་ཡི་དེ་ཉིད་ནི། །
དབང་པོ་གཙུབས་པའི་སྦྱོར་བ་ལས། །ཡེ་ཤེས་མེ་ནི་འབྱུང་འགྱུར་ཏེ། །ཇི་ལྟར་ཕྱི་རོལ་མེ་བཞིན་ནོ། །དེ་ཡང་དབང་པོའི་ལམ་ནས་ནི། །ལྟེ་བའི་རྩ་རུ་རབ་ཏུ་འབར། །འོད་ཆེན་དུ་བར་བཅས་པ་ཡིས། །ཙཎྜ་ལཱི་ནི་འབར་བར་འགྱུར། །ཡེ་ཤེས་མེ་ཡི་སྣང་བ་དེ། །ཤིན་ཏུ་འབར་བར་གྱུར་པ་དང་། །
ཆོས་ཀྱི་འཁོར་ལོ་ལ་གནས་པའི། །བདེ་གཤེགས་ལྔ་དང་དེ་བཞིན་དུ། །ལྷ་མོར་བཅས་པ་ཚིག་པར་འགྱུར། །ལོངས་སྤྱོད་འཁོར་ལོ་བྱུང་ནས་ནི། །གཡས་ནས་བསྐོར་བ་ལན་གསུམ་བྱས། །སྨིན་ཕྲག་མཛོད་སྤུར་བྱུང་ནས་ཀྱང་། །དེ་ནས་རྣ་བ་གཡས་སུ་བྱུང་། །ཕྱོགས་བཅུའི་
སངས་རྒྱས་བསྐུལ་བྱས་ནས། །སྤྱི་བོའི་གཙུག་ཏུ་ཞུགས་པར་གྱུར། །ཆོས་ཀྱི་འཁོར་ལོ་ལ་བབས་ཏེ། །ཤིན་ཏུ་ཚིག་པར་གྱུར་པ་འདི། །སྔགས་ཀྱི་སྡོམ་པར་འདོད་པ་ཡིན། །ཡེ་ཤེས་སྡོམ་པའི་བྱེ་བྲག་ནི། །སྙིང་གར་སངས་རྒྱས་བཀའ་བགྲོས་ནས། །རྣམ་དག་བདུད་རྩི་བསྡུས་བྱས་ཏེ། །
སྔོན་གྱི་ལམ་ནས་བྱུང་ནས་ཀྱང་། །ཕྱོགས་བཅུ་བདུད་རྩི་བསྡུ་བྱས་ཏེ། །སྔོན་བཞིན་ཧཾ་ལ་ཞུགས་གྱུར་པས། །སེམས་ཀྱི་ཟླ་བ་ཞུ་ནས་ནི། །སོ་ཡི་སྦུ་གུ་ནས་བྱུང་ནས། །ལོངས་སྤྱོད་འཁོར་ལོར་བབས་པར་གྱུར། །དེར་ནི་ཅུང་ཟད་ངལ་སོ་ནས། །སྔོན་བཞིན་ཕྱིར་ཡང་བསྐོར་ནས་ནི། །ཆོས་ཀྱི་
འཁོར་ལོར་བབས་པར་གྱུར། །བདེ་བར་གཤེགས་རྣམས་གང་བར་བྱས། །སྔོན་བཞིན་ཕྱིར་ཡང་བསྐོར་ནས་ནི། །སྤྲུལ་པའི་འཁོར་ལོར་བབས་པར་གྱུར། །དེ་བཞིན་ཀུན་དུ་འགྲོ་བར་བྱེད། །སྐྲ་ཡི་རྩེ་མོ་འབུམ་གྱི་ཆ། །ཡེ་ཤེས་སྣང་བའི་བྱེ་བྲག་དག །མིག་གིས་མཐོང་བ་མ་ཡིན་ནོ། །འདི་ནི་

སྡོམ་པར་བརྗོད་པའོ། །ནང་གི་བཟླས་པ་བསྟན་པ་ནི། །འོག་ཏུ་རླུང་གི་དཀྱིལ་འཁོར་ཏེ། །གྲུ་གསུམ་གནས་ནི་དེ་བཞིན་མེ། །ལྟོ་བ་ཆུ་ཡི་དཀྱིལ་འཁོར་ཏེ། །དེ་སྟེང་དབང་ཆེན་རི་རབ་བཅས། །རླུང་གི་དཀྱིལ་འཁོར་སྟེང་དུ་ནི། །རྟག་པའི་འཁོར་ལོ་བསྒོམ་བྱ་སྟེ། །དེ་ལ་མི་གཉིས་བདག་ཉིད་
ཀྱི། །ཡི་གེ་ཨ་ཡི་སྡོམ་པ་གཟུང་། །བྱང་ཆུབ་སེམས་ཀྱི་རང་བཞིན་འདི། །ལུས་དང་ངག་ཡིད་གང་ཡང་མིན། །འདོད་ཆགས་ཞེ་སྡང་གཏི་མུག་མིན། །ཁ་དོག་དབྱིབས་སོགས་མ་ཡིན་ཞིང་། །ཁྲོ་ཞི་ལ་སོགས་རྣམ་པར་སྤངས། །མཚན་མ་ཀུན་དང་བྲལ་བ་ཡི། །དབུ་མ་ཆེན་པོ་བསྒོམ་པར་བྱ། །
གཞན་ནི་སྡོམ་པ་ཇི་ལྟ་བའོ། །འདི་ནི་ཅི་ཡང་མ་ཡིན་ཕྱིར། །མ་ནིང་བཟླས་པ་ཞེས་འདོད་དེ། །བཟླས་པའི་མཆོག་ཏུ་གྱུར་པ་ཡིན། །གལ་ཏེ་སྐྱོ་བར་གྱུར་ན་ནི། །ཕྱི་རོལ་བཟླས་པ་བརྩམ་པར་བྱ། །རང་སྙིང་ས་བོན་འོད་ཟེར་གྱིས། །ཡེ་ཤེས་སེམས་དཔའི་གནས་ཉིད་དང་། །སྐུ་གསུང་ཐུགས་
ཀྱི་གནས་རྣམས་ནས། །ཇི་ལྟར་འདོད་པ་སྤྲོ་བར་བྱ། །ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཧེ་བཛྲ་གྱི་སྙིང་པོའོ། །ཨོཾ་ཏྲཻ་ལོཀྱཱ་ཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་གཉིས་པའོ། །ཨོཾ་ཛྭ་ལ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་བཞི་པའིའོ། །ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱག་དྲུག་པའིའོ། །ཨོཾ་
ཨཥྚཱ་ན་ནཱ་ཡེ། པིཾ་གོརྡྷ་ཀེ་ཤ་བརྟ་མ་ནེ། ཙ་ཏུ་རྦིཾ་ཤ་ཏི་ནེ་ཏྲཱ་ཡ་ཥོ་ཌ་ཤ་བྷུ་ཛཱ་ཡ་ཀྲྀཤྞ་ཛཱི་མཱུ་ཏ་ཝ་པུ་ཥེ་ཀ་པཱ་ལཱ་མཱ་ལ་ཨ་ནེ་ཀཾ་དྷ་རི་ཎེ་ཨཱདྷྨ་ཏ་ཀྲཱུ་ར་ཙིཏྟཱ་ཡ། །ཨརྡྷེན་དུ་དཾ་ཥྚྲཱི་ཎེ་མཱ་ར་ཡ་མཱ་ར་ཡ། ཀཱ་ར་ཡ་ཀཱ་ར་ཡ། གརྫ་ཡ་གརྫ་ཡ། ཏརྫ་ཡ་ཏརྫ་ཡ། ཤོ་ཥ་ཡ་ཤོ་ཥ་ཡ། སཔྟ་སཱ་ག་རཱ་ན། བནྡྷ་བནྡྷ། ནཱ་ག་
ཨཥྚ་ཀཱན། གྲྀཧྞ་གྲྀཧྞ། ཤ་ཏྲཱུཾ་ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧཿ་ཕཊ་སྭཱ་ཧཱ། །ཕྱག་བཅུ་དྲུག་པའིའོ། །བཟླས་པས་སྐྱོ་བར་གྱུར་པ་ན། །རྡོ་རྗེ་དྲིལ་བུ་གསིལ་བྱས་ཏེ། །མཆོད་དང་བསྟོད་དང་སྨོན་ལམ་དག། །ལེགས་པར་བཏབ་སྟེ་ཕྱག་རྒྱ་དགྲོལ། །དབྱིངས་སུ་བསྡུ་དང་གཤེགས་གསོལ་བ། །
ཇི་ལྟ་ཇི་བཞིན་བྱ་བ་ཡིན། །དེ་ནས་རྣལ་འབྱོར་ཆེན་པོ་ཡིས། །སྤྱོད་ལམ་ཀུན་དུ་ལྷ་ཉིད་ཀྱི། །ཏིང་ངེ་འཛིན་ལས་ཉམས་མི་བྱ། །འདི་ལྟར་ཉལ་བའི་ཚེ་ན་ཡང་། །རྡོ་རྗེ་འཛིན་ཆེན་ཏིང་འཛིན་གྱིས། །ཆགས་ཆེན་རྗེས་སུ་ཆགས་བྱས་ཏེ། །ཡེ་ཤེས་མེ་ཡིས་ལུས་ཞུ་ནས། །ཆོས་སྐུ་སེམས་

སུ་གྱུར་པར་ཉལ། །གང་ཚེ་ལྡང་བའི་ཚེ་ན་ཡང་། །ཚད་མེད་བཞི་ཡིས་བསྐུལ་བ་ཡིས། །སྔོན་གྱི་སྨོན་ལམ་རྗེས་དྲན་ནས། །སྒྱུ་མ་ལྟ་བུའི་སྦྱོར་བ་ཡིས། །ཏིང་འཛིན་རིམ་པར་ལྡང་བར་བྱ། །གང་ཞིག་ཟ་བའི་ཚེ་ན་ཡང་། །སྡོམ་པའི་དངོས་པོ་ཇི་ལྟ་བའི། །ལུས་
ནི་ལྷ་ཡི་དཀྱིལ་འཁོར་ཏེ། །ཟས་ནི་བདུད་རྩིར་བྱིན་བརླབ་བྱ། །ཟོས་པས་དབྱེར་མེད་ཚིམ་པར་བྱ། །ཡང་ན་སྦྱིན་སྲེག་མཆོད་པ་བྱ། །ར་ས་ཡ་ན་མེ་ཡི་ཁམས། །གཡས་སུ་འབར་ཞིང་འཕྲོ་བ་སྟེ། །ཨཱ་ལིའི་ངོ་བོར་ཤེས་པར་བྱ། །ལ་ལ་ནཱ་ནི་རླུང་གི་ཁམས། །གཡོན་དུ་གཙུབས་ཤིང་གཡོ་བ་
སྟེ། །ཀཱ་ལིའི་ངོ་བོར་ཤེས་པར་བྱ། །དེ་དབུས་ལུས་ཀྱི་བདག་ཉིད་ལ། །བཟའ་སོགས་འོ་མའི་སྦྱིན་སྲེག་བྱ། །གལ་ཏེ་འགྲོ་འཆག་བྱེད་པ་ན། །རིགས་ལྔ་རྣམས་ལ་བསླང་བ་དང་། །ཕྱག་རྒྱ་ལ་སོགས་རྒྱན་རྣམས་དང་། །རྡོ་རྗེ་ཐོས་པའི་སྤྱོད་པ་དག །ཇི་སྐད་གསུངས་པ་དེ་བཞིན་བྱ། །
འདིས་ནི་བྱང་ཆུབ་རྙེད་མི་དཀའ། །གལ་ཏེ་གཏོར་མ་གཏོང་འདོད་ན། །ཧེ་རུ་ཀ་ཡི་སྦྱོར་བ་ཡིས། །འབྱུང་པོ་ལ་ནི་མངོན་དམིགས་ཏེ། །ཟས་རྣམས་བདུད་རྩིར་བྱིན་བརླབས་ནས། །སྔགས་འདི་ཡིས་ནི་ཚིམ་པར་བྱ། །ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བ་ཨུ། རཀྵ། ཙནྡ།
སུཛྫ། མཱ་ད། པཔྤ། པཱ་ཏཱ་ཡེ། ཨཥྛ་སཔྤ་སྭཱ་ཧཱ། ཨེ་དཾ། བ་ལིཾ། བྷུཾ་ཛ། ཛི་གྷ། ཕུལླ། དྷཱུཔྤ། མཱཾ་ས། བིཾ་གྷ། ཨམྦ། ཀཛྫ། སཱ་དྷ། ཁཱནྟི། ཁུ་ཎི། ཕེ་ཊ། གཱ་ད། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱ་ཏ། ཨོཾ་ཨཱཿཧཱུཾ་ཕཊ་སྭཱ་ཧཱ། གང་ཞིག་རྟག་ཏུ་འདུ་བྱེད་པ། །ལས་རྣམས་ཐམས་ཅད་
འགྲུབ་པ་དང་། །འབྱུང་པོའི་ཚོགས་རྣམས་དགའ་ནས་ནི། །དེ་ལ་དངོས་གྲུབ་མྱུར་བར་འགྱུར། །ལས་རྣམས་དག་གི་མཇུག་ཏུ་ཡང་། །མཆོད་དང་བསྟོད་ཅིང་སྨོན་ལམ་གདབ། །དེ་ལ་སྨོན་ལམ་འདི་ཡིན་ཏེ། །རིགས་ལྡན་སྐྱེ་ཞིང་བློ་གྲོས་རྗེས་སུ་ལྡན། །དམ་ཚིག་ལྡན་ཞིང་ཀྱེ་ཡི་རྡོ་རྗེ་སྟོན། །
སྙིང་རྗེ་ལྡན་ཞིང་བླ་མ་རྣམས་ལ་གུས། །སྐྱེ་བ་ཀུན་དུ་འདི་ལྟར་སྐྱེ་གྱུར་ཅིག །རྡོ་རྗེ་དྲིལ་བུ་ལག་གིས་འཁྲོལ་བྱེད་ཅིང་། །ཟབ་མོའི་དམ་ཆོས་རབ་ཏུ་ཀློག་པ་དང་། །དམ་ཚིག་བཙུན་མོའི་ཁུ་བ་ཟ་བྱེད་པར། །སྐྱེ་བ་ཀུན་དུ་འདི་ལྟར་སྐྱེ་གྱུར་ཅིག །དེ་ནས་སྤྲུལ་པ་རང་ལ་བསྡུ། །ཡེ་ཤེས་དཀྱིལ་འཁོར་

སླར་གཤེགས་གསོལ། །སྤྱོད་ལམ་ལ་སོགས་སྔོན་བཞིན་དུའོ། །སློབ་དཔོན་ཆེན་པོ་འཇམ་དཔལ་ཡེ་ཤེས་ཞབས་ཀྱིས་མཛད་པ། ཧེ་བཛྲའི་སྒྲུབ་ཐབས་ཧེ་རུ་ཀ་མཉེས་པར་བྱ་བའི་ཆོ་ག་རྫོགས་སོ།། རྒྱ་གར་གྱི་མཁན་པོ་མཉྫུ་ཤྲཱི་ཛྙཱ་ན་དང་། རོང་ཟོམ་དྷརྨ་བྷ་དྲས་བསྒྱུར་ཅིང་ཞུས་ཏེ་གཏན་ལ་
ཕབ་པའོ།། ༄༅༅། །རྒྱ་གར་སྐད་དུ། ཤྲཱི་ཧེ་བཛྲ་ནཱ་མ་སཱ་དྷ་ནོ་པི་ཀ །བོད་སྐད་དུ། དཔལ་ཀྱེའི་རྡོ་རྗེའི་སྒྲུབ་པའི་ཐབས་ཀྱི་མན་ངག །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཤེས་རབ་ཐབས་དག་བདག་ཉིད་ཅན། །ཀྱེ་རྡོར་བདག་མེད་མ་ལ་ཡང་། །བླ་
མར་བཅས་ལ་ཕྱག་འཚལ་ནས། །རིམ་པ་གསུམ་པའི་སྒྲུབ་ཐབས་བརྩམ། །མི་ཉིད་རྙེད་དཀའ་དེ་བས་ཀྱང་། །བླ་མ་དགའ་བསྟེན་རྙེད་པར་དཀའ། །བདག་གཞན་དོན་འབྱུང་སྔགས་ཀྱི་ཚུལ། །འགྲོ་ཕན་ལམ་ལ་བརྟེན་པར་གྱིས། །ཡོན་ཏན་ལྡན་ཞིང་བརྩོན་པར་ལྡན། །བླ་མར་གུས་ཤིང་
དད་ལྡན་པ། །རྒྱལ་བའི་ཆོས་ལ་ཐེ་ཚོམ་མེད། །དབང་དང་དབྱེ་བ་ངེས་ཚིག་ལས། །སྣོད་ཡིན་ཕྱིར་ན་དྲིན་སྦྱིན་བྱ། །ཆུ་སོགས་བུམ་པའི་དབང་བསྐུར་དང་། །རིམ་བཞིན་གསང་བའི་དབང་བསྐུར་དང་། །ཤེས་རབ་ཡེ་ཤེས་དབང་བསྐུར་ལ། །དེ་སྲིད་བླ་མའི་མན་ངག་མཐའ། །ཡིད་དུ་
འོང་བའི་ས་ཕྱོགས་སུ། །རི་དང་ནགས་ཚལ་དང་ནི་ཕུག །ཆུ་འགྲམ་བཞི་མདོ་མཚོ་དང་ནི། །ཤིང་གཅིག་དབེན་པ་དུར་ཁྲོད་རྣམས། །བསམ་གཏན་ཁང་པ་བྱས་ནས་ནི། །བདུད་རྩི་སོགས་ཀྱིས་བྱུག་པར་བྱ། །བྲིས་སྐུ་སོགས་མཆོད་དགྲམ་བྱས་ལ། །ནང་པར་སྔར་ལངས་སེམས་
བདག་ཉིད། །ཕྱི་རོལ་ཁྲུས་སོགས་ཀུན་བྱས་ལ། །བདེ་བའི་སྟན་ལ་ཉེར་འདུག་སྟེ། །སྦྱོང་བྱེད་དག་པ་ལ་སོགས་ཀྱིས། །འདོད་པ