Luận tạng Tây Tạng (Tengyur) — Tập 10

་ཡོ་ག་ཙིཏྟ་ཨུཏྤཱ་ད་ཡཱ་མི་སུ་ར་སྟྭཾ། ཡ་ཐཱ་སུ་ཁཾ། སློབ་མ་ཀུན་ལ་དེ་བཞིན་བྱ། །དེ་ལྟར་སེམས་བསྐྱེད་དང་པོ་
དང་། །ཁྱད་པར་རྡོ་རྗེ་འཆང་བའི་རིགས། །ཇི་ལྟར་བདེ་ལས་གྱུར་པ་དེ། །སངས་རྒྱས་ཉིད་དང་སངས་རྒྱས་སྲས། །དེ་བཞིན་གཤེགས་པ་ཀུན་གྱི་ཡབ། །དེ་བཞིན་གཤེགས་པ་ཀུན་གྱི་སྲས། །བདེ་གཤེགས་སྲས་ཀྱི་ཐུ་བོའོ། །བདེ་གཤེགས་བཀའ་བཞིན་བྱེད་ལ་
སོགས། །སེམས་བསྐྱེད་ཡོན་ཏན་ལྡན་དག་ལ། །མགོ་ལ་མེ་ཏོག་སྦྱིན་པར་བྱ། །མདུན་དུ་སྤོས་སྦྱིན་མར་མེ་དང་། །དྲི་ཡི་མཆོད་པ་སྙིང་གར་སྦྱིན། །དེ་བཞིན་བཤོས་གཙང་ལ་སོགས་པ། །ཅི་རིགས་སྔགས་དང་ཕྱག་རྒྱས་དབུལ། །དེ་ནས་སོ་ཤིང་ཡིད་དུ་འོང་། །ཨུ་དུམྺཱ་

ར་ཨ་ཤྭཏྠ། །བྷ་བ་ཏ་སོགས་ཤིང་བཟང་པོས། །མི་ཡོ་མ་ཆག་འབུས་མ་ཟོས། །མ་རྙིངས་སྲོག་ཆགས་སྤངས་པ་ནི། །སོར་ནི་བཅུ་གཉིས་ཚད་དུ་བྱ། །རྩེ་མོར་མེ་ཏོག་ལྡན་བཅིངས་ལ། །ལྕི་བ་ལ་སོགས་བ་བྱུང་ལྔས། །ས་གཞི་བྱུགས་པ་བ་ཀོ་ཙམ། །མཎྜལ་དེ་ཡི་དྲུང་
དུ་ནི། །སློབ་མ་ལངས་ཏེ་འདུག་བྱས་ནས། །ལངས་ཏེ་ཁ་ཏོན་དག་བྱས་ནས། །ལྟོས་པ་མེད་པར་ཐལ་སྦྱར་གཟུང་། །ཤར་བལྟས་མི་དམའ་ལུས་མི་ཡོ། །ཕན་ཚུན་མི་དོར་མདུན་དྲང་པོར། །དོར་བ་དེ་ལ་མཚན་མ་བརྟག །དེ་ཡང་བླ་མའི་གདམས་ངག་གིས། །དངོས་གྲུབ་ཕྲིན་ལས་
བར་ཆོད་གསུམ། །དངོས་གྲུབ་རབ་འབྲིང་ཐ་མ་གསུམ། །དངོས་གྲུབ་རབ་ནི་ཤར་ཕྱོགས་དང་། །རང་ལ་བལྟས་པ་ལས་ཤེས་བྱ། །འབྲིང་པོ་གཞན་དག་ཐ་མ་ཡང་། །འོག་བལྟས་འདམ་ལ་མེ་ཏོག་ཟུག །དེ་བཞིན་གཉིས་པོ་བླ་མ་ཡི། །ཞལ་གྱི་གདམས་ངག་ལས་ཤེས་བྱའོ། །དེ་ནས་ཁ་ཡི་ཉེས་
བསལ་བ། །དྲི་ཆུ་ལག་པའི་ཁྱོར་མོར་སྦྱིན། །ཨོཾ་དེ་བི་ཤོདྷ་ན་དྷརྨཱ། སརྦ་པཱ་པ་ནིཤྩ་སཾ་ཤོ་དྷ་ཡ། སརྦ་བི་ཀལྤ་ན་ཡ་ཧཱུྃ། ཞེས་པའི་སྔགས་བརྗོད་ཧུབ་གསུམ་བཏུང་། དེ་རྗེས་སློབ་མས་སེམས་སྤུངས་བསྐྱེད། །ཟབ་ཅིང་རྒྱ་ཆེ་བ་ཡི་ཆོས། །བཤད་ཅིང་བླ་མས་འདི་སྐད་བརྗོད། །འཇིག་རྟེན་ཁམས་རྣམས་
ཐམས་ཅད་དུ། །ཐམས་ཅད་མཁྱེན་པ་འབྱུང་མི་འགྱུར། །མེ་ཏོག་ཨུ་དུམྺཱ་ར་བཞིན། །བརྒྱ་ལམ་ན་ནི་རེས་འགའ་འབྱུང་། །དེ་སྲིད་ཕྲད་དཀའ་འབྱུང་བ་ཡི། །གཉིས་མེད་ཟབ་མོའི་སྤྱོད་ཚུལ་འདི། །སེམས་ཅན་སངས་རྒྱས་བྱེད་པ་ཡི། །བསྐལ་པ་གྲངས་མེད་མང་པོར་ནི། །སྔོན་དུ་བྱས་
པའི་རྣམ་སྨིན་གང་། །དེ་ཀུན་ཟད་པར་གྱུར་པ་ནི། །ཟབ་མོའི་དཀྱིལ་འཁོར་མཐོང་བས་སོ། །དེ་བཞིན་གཞན་ལས་གསུངས་པའང་བརྗོད། །དེ་ནས་ཨོཾ་ཨཱཿཧཱུྃ་ཞེས་པས། ཀུ་ཤ་བྱིན་གྱིས་བརླབས་བྱས་ལ། །སྔས་དང་སྟན་དུ་བྱ་བའོ། །དེ་ནས་སྲུང་སྐུད་གདགས་པ་ནི། །སྲུང་
སྐུད་དཀར་པོའམ་དམར་པོའམ། །རཀྵའི་སྔགས་བརྗོད་མདུད་པ་དྲུག །དཔུང་པ་གཡས་སམ་གཡོན་དུ་བཅིང་། །དེ་ནས་མེ་ཡི་མཆོད་སྦྱིན་ཏེ། །སྦྱིན་སྲེག་ཆོ་གའི་རིམ་པ་ནི། །བླ་མའི་གདམས་ངག་ལ་བརྟེན་པའི། །ཡི་གེར་བྲིས་པ་གཞན་དུ་བལྟའོ། །དེ་ནས་ཚོགས་མཆོད་

སྔར་བཞིན་བྱའོ། །བ་ལིཾ་ཆེན་པོའང་དེ་བཞིན་ནོ། །གདོལ་པ་ཁྱི་དང་བྲམ་ཟེ་སོགས། །མཉམ་པོར་གསོལ་བའི་ལྷག་མ་བསྡུ། །ཕུད་དང་བསྲེས་ལ་མཁའ་འགྲོ་མའི། །ཕྱི་རོལ་དཀྱིལ་འཁོར་ཚིམ་པར་བྱ། །ལག་པ་གཡས་གཡོན་པདྨའམ། །འཁོར་ལོ་ལྟ་བུར་བཅིངས་བྱས་ལ། །
རྐང་པས་མནན་ཅིང་སྟེང་དུ་བལྟ། །གྱེན་དུ་ཕེཾ་གྱི་སྒྲ་སྒྲོགས་ཤིང་། །སྤྱན་དྲངས་དབྱངས་དང་སྔགས་ཀྱིས་སོ། །ཨོཾ་ཤིང་གཅིག་དང་ནི་དུར་ཁྲོད་དང་། །རི་བོ་དང་ནི་རི་སུལ་དང་། །གྲོང་དང་བཞི་མདོ་ཞིང་དང་ནི། །ཁྱད་པར་དུ་ནི་ཁང་སྟོང་དང་། །སེམས་ཅན་གནོད་དང་ཐང་དང་ནི། །
ཁྱད་པར་དུ་ནི་ཆུ་ལ་གནས། །ནག་པོ་དྲག་པོ་དྲག་ཆེན་པོ། །ལྷ་སྦྱིན་མཉམ་དུ་བསྟེན་པ་དང་། །ནག་པོ་འཇིགས་དང་འཇིགས་བྱེད་པ། །བཀའ་ལས་འདས་དང་ལོག་འདྲེན་རྣམས། །རྒན་བྱད་མ་དང་དྲག་མོ་དང་། །འཇིགས་བྱེད་མ་དང་ཨུ་མ་དང་། །རྒྱལ་དང་རྣམ་པར་རྒྱལ་
མ་དང་། །མི་ཐུབ་གཞན་གྱིས་མི་ཐུབ་པ། །ནག་མོ་བཟང་མོ་དྲག་ཆེན་མོ། །ནག་སྦོམ་མ་དང་རྣལ་འབྱོར་མ། །དབང་མོ་དང་ནི་ཟླ་བ་མོ། །དྲག་མོ་སྡང་མོ་ཟ་བ་མོ། །སུམ་ཅུའི་དབང་མོ་འཕྲོག་བྱེད་མོ། །མར་མེ་འཛིན་བྱེད་རྣལ་འབྱོར་མ། །དྲག་མོའི་གཟུགས་དང་གཟུགས་
ཅན་མོ། །མཆེ་བ་གཙིགས་དང་ཐོད་ཆེན་མ། །ཐོད་པའི་ཕྲེང་ཅན་ཁ་ཊྭཱཾ་མ། །སྦྲུལ་ཆེན་རལ་གྲི་དགྲ་སྟ་མ། །རྡོ་རྗེ་དེ་བཞིན་གཞུ་ཅན་མ། །དེ་ཉིད་ཆེན་མོ་མཁའ་འགྲོ་མ། །ལས་ཀུན་རྗེས་སུ་སྒྲུབ་བྱེད་མ། །སྦྱོར་བའི་དཀྱིལ་འཁོར་རྒྱལ་ཆེན་མོ། །དེ་བཞིན་རྡོ་རྗེ་དབང་ཕྱུག་གཙོ། །
དེ་བཞིན་གཤེགས་པའི་སྐུ་ཆེན་ཏེ། །རྡུལ་མེད་རྣལ་འབྱོར་འབྱིན་མ་མོ། །རྡོ་རྗེ་དབང་མོ་བཀའ་འདི་ཡིས། །ཐམས་ཅད་ཀུན་ནས་འདིར་སྤྱོན་ཅིག །ཨོཾ་ཀཀྐ་ཌྷ་ན། བབྦནྡྷ་ན། ཁཁྑཱ་ད་ན། སརྦ་དུཥྚཱན་ཧ་ན་ཧ་ན་གྷ་གྷ་གྷཱ་ཏ་ཡ། ཨ་མུ་ཀ་ཤཱནྟིཾ་ཀུ་རུ་ཧཱུྃ་ཧཱུྃ་ཧཱུྃ་ཕཊ་བཛྲ་སྭཱ་ཧཱ། དེ་ནས་ཧ་ཧོ་ཧྲིཿཞེས་
བརྗོད། ཧ་ཡིས་མདངས་དང་ཁ་དོག་འཕྲོག །ཧོ་ཡིས་དྲི་ནི་ཞིམ་པ་བསྡུས། །ཧྲཱིཿཡིས་ཕ་རོལ་ནུས་པ་འཇོམས། །ཀྱེའི་རྡོ་རྗེ་མཁའ་འགྲོ་མའི་ཚོགས། །ལས་འདི་དག་ལ་བརྩོན་པར་གྱིས། །བདག་ལ་བདེ་ལེགས་སྡུད་པ་དང་། །ཚེ་རིང་བདེ་བ་ཕུན་སུམ་ཚོགས། །ཕན་

དང་ཡིད་ལ་བདེ་བ་དང་། །གྲོང་དང་ཡུལ་འཁོར་ཤིས་པར་གྱིས། །བུ་དང་ཚ་བོ་རྣམས་འཕེལ་ཏེ། །རང་རང་གནས་སུ་ལེགས་པར་སྡུད། །གཞན་ཡང་ཕ་རོལ་རྒོལ་བ་དག །ཞི་ཞིང་དབང་དུ་བྱ་བའམ། །དགུག་དང་དབྱེ་དང་བསྐྲད་པ་དང་། །གསད་པ་ཚར་གཅད་ལ་
སོགས་པ། །ཅི་རིགས་པ་ཡིས་ཚར་གཅོད་བརྗོད། །ཀྱེའི་རྡོ་རྗེ་མཁའ་འགྲོ་མའི་ཚོགས། །དུས་ནི་མྱུར་བ་ཉིད་དུ་བརྗོད། །ཨོཾ་བཛྲ་ཌཱ་ཀི་ནཱི། ཨ་ཀ་ལོ་བ་སི་མ་ས། ཏྲ་ཡོ་རཏྣ་ཨཱ་པ་ཀ་རི་ཎོ། །སརྦ་ཤ་ཏྲཱུཾ། གྲྀཧྞ་གྲྀཧྞཱ་ཧཱུྃ་མཱ་ར་ཡ་མཱ་ར་ཡ། ཧ་ན་ཧ་ན་ཧཱུྃ། མཱ་ར་ན་མཱ་ར་ན་ཕཊ། ཧེ་ཧེ་བཛྲ་ཌཱ་ཀི་ནཱི་
དུཥྚཱན། ཁ་ཁ་ཁཱ་ཧི་ཞེས་པས་མངོན་སྤྱོད་བྱས་ནས་བསྡུ། །སྔགས་འདིས་གཏོར་མ་དབུལ་བར་བྱ། །ཨོཾ་བཛྲ་ཌཱ་ཀི་ནཱི་བ་ལིཾ་ཏ་པྲ་ཏཱིཙྪ། ཁ་ཁ་ཁཱ་ཧི་ཁཱ་ཧི་བྷུཉྫ་བྷུཉྫ་ཧོཿ། དེ་བཞིན་གཞན་ཡང་སྦྱར་བར་བྱའོ། །ཕྱོགས་སྐྱོང་གཏོར་མ་སྔར་བཞིན་དུ། །བཏང་སྟེ་སྨོན་ལམ་གདབ་པར་བྱ། དགེ་འདིས།
སེམས་ཅན་ཐམས་ཅད་སྡིག་མེད་ཅིང་། །སངས་རྒྱས་ཉིད་དང་ཕྲད་འགྱུར་བའི། །ལམ་དེ་ཉིད་ནས་ཞུགས་ནས་ཀྱང་། །མ་བརྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་དགྲོལ་བར་ཤོག །རྣལ་འབྱོར་གཙུག་ལག་དམ་ཚིག་ལ། །ད་ལྟ་ཉིད་དུ་གནས་པར་ཤོག །དེ་བཞིན་
གཞན་ལ་འདི་སྐད་བརྗོད། །དགེ་བ་གང་ཐོབ་དེ་དག་གིས། །སངས་རྒྱས་ཀུན་དོན་ཐམས་ཅད་ནི། །རྡོ་རྗེ་འཆང་གི་གོ་འཕང་དེ། །སེམས་ཅན་ཀུན་གྱིས་ཐོབ་པར་ཤོག །བྱང་ཆུབ་རྡོ་རྗེ་བསྔགས་པ་ཡང་། །རྫོགས་པའི་སངས་རྒྱས་སེམས་སྤྱོད་དང་། །རྫོགས་པའི་བྱང་ཆུབ་སྤྱོད་པ་
དང་། །རྫོགས་སངས་རྒྱས་ཀྱི་སྤྱོད་པ་གང་། །བདག་ནི་དེ་གཉིས་སྤྱོད་པར་ཤོག །གང་དང་གང་དུ་སྐྱེ་བ་དེར། །མ་ཉམས་ཀྱེ་ཡི་རྡོ་རྗེ་སྟོན། །བླ་མ་ལྷ་དང་མཆོག་གསུམ་དང་། །ཟླ་བའི་རིགས་ལ་དགའ་བ་དང་། །དེ་དང་དེར་ནི་སྐྱེ་གྱུར་ཅིག །ཡེ་ཤེས་འཁོར་ལོ་གཤེགས་པ་ན། །ཨོཾ་
ཛྙཱ་ན་མཎྜལ་མུཿ། ཞེས་པ་ལན་གསུམ་བརྗོད་བྱ་ཞིང་། །ཁུ་ཚུར་གཡོན་པ་སྙིང་གར་གཞག །ལག་པ་གཡས་པ་ས་ལ་བརྐྱང་། །སེ་གོལ་ལན་གསུམ་བརྡབས་པ་ཡིས། །ཕྱི་རོལ་ལྷ་རྣམས་གཤེགས་སུ་གསོལ། །དེ་ནས་དམ་ཚིག་བདག་ལ་བསྡུ། །བརྟེན་པའི་འཁོར་ལོ་

གཞལ་ཡས་ཁང་། །འབྱུང་བཞི་དེ་ལ་ནམ་མཁའ་ཐིམ། །ལྷ་མོ་བརྒྱད་ནི་སྙིང་གའི་ཧཱུྃ། །ཐིམ་ནས་ལྷ་ཡི་ང་རྒྱལ་གནས། །དེ་ནས་བླ་མས་དཀྱིལ་འཁོར་གྱི། །ནང་དུ་ཞུགས་ལ་ལྷ་རྣམས་མཆོད། །ཕྱོགས་སྐྱོང་རྣམས་ལ་གཏོར་མ་སྦྱིན། །སློབ་མ་རྣམས་ལ་སྟ་གོན་གྱི། །
གནས་དེའམ་ཉལ་ཁང་གཞན་ཡང་རུང་། །སེང་གེའི་ཉལ་སྟབས་རྨི་ལམ་བརྟག །སྨྲ་བརྗོད་གཞན་དག་མི་བྱ་བར། །དགྱེས་རྡོར་ཡིད་ལ་བྱས་ཏེ་ཉལ། །དེ་ནས་སྔར་ལངས་མཎྜལ་བྱ། །བླ་མས་དྲི་ཞིང་སློབ་མས་བརྗོད། །བཟང་ངན་རབ་འབྲིང་ཐ་མ་ནི། །བླ་མས་ཤེས་པར་
བྱས་པ་སྟེ། །ངན་ན་རྟོག་པ་ཞི་ཐབས་བྱ། །བཟང་ན་ཡིད་དགའ་སྤྲོ་བསྐྱེད་དོ། །དེ་དག་ནི་ལྷག་པར་གནས་པ་སྟ་གོན་གྱི་ཆོ་གའོ། །དེ་ནས་ནུབ་གསུམ་པ་ལ་འཇུག །འཇུག་པའི་ཡན་ལག་འཇུག་དངོས་ཉིད། །ཡན་ལག་དང་པོ་ཐིག་གདབ་པོ། །སློབ་མར་བཅས་པས་སྔར་
ལངས་ཏེ། །ཞི་བའམ་རྒྱས་པའི་སྦྱིན་སྲེག་བྱ། །དེ་ཡང་སློབ་དཔོན་མཚན་ཉིད་ནི། །ཡང་དག་དེ་ཡི་དེ་ཉིད་ཤེས། །ཁྲོ་བ་མེད་ཅིང་སྐྱོ་བ་བཟོད། །རིག་བཅས་ཕྱག་རྒྱར་ལྡན་པ་ཡིས། །ལྷ་རྣམས་བདུན་དུ་ནམ་མཁའ་ལ། །ཟླ་བ་ཁ་སྦྱར་ནང་དུ་གཞུག །དབྱངས་ཡིག་བཅུ་
དྲུག་རྒྱ་ཡིས་གདབ། །དེ་ལྟར་བར་གྱི་མཚམས་སྦྱར་ནས། །ཐིག་གདབ་པ་ཡི་ལས་བརྩམ་བྱ། །རིན་ལ་མ་རྩེག་རས་བལ་གཟུང་། །ཤེས་རབ་མཚན་དང་ལྡན་པས་བཀལ། །འཇུར་མདུད་མེད་ཅིང་གྲོག་རྐེད་སྤང་། །རིང་ཐུང་དཀྱིལ་འཁོར་ཉིས་འགྱུར་ལ། །སྦོམས་སུ་
སྒོ་ཡི་ཉི་ཤུ་ཆ། །སྲད་བུ་བརྐྱང་བ་སོ་སོར་བསོག །པད་སྣོད་དྲི་ཞིམ་ནང་དུ་གཞག །དེ་ནས་དང་པོར་སྲད་བུ་ནི། །སོ་སོ་རང་བཞིན་མེད་པར་སྒོམ། །དེ་ལ་བྷྲཱུཾ་ཁཾ་ལ་སོགས་པ། །ཡིག་འབྲུ་ལྔར་གྱུར་དེ་དག་ལ། །རིགས་ལྔའི་རྒྱུའམ་ངོ་བོར་བསམ། །དེ་ནས་རྣལ་འབྱོར་ཉི་ཟླའི་མིག །
འབར་བའི་ལྕགས་ཀྱུའི་འོད་ཟེར་གྱིས། །ཡེ་ཤེས་ལྷ་ཡི་ཐུགས་ཀ་ནས། །ཡེ་ཤེས་སྐུད་པ་གནས་པ་རྣམས། །གཙོ་བོ་དགྱེས་པའི་རྡོ་རྗེ་དང་། །ལྷ་རྣམས་སྔགས་དང་གཉིས་མེད་བཞུགས། །སྤྱན་དྲངས་ཐིམ་པས་ཐིག་སྐུད་བསྐྱེད། །བྷྲཱུཾ་ཁཾ་ལ་སོགས་ས་བོན་ལྔ། །ཨོཾ་ཧཱུྃ་

སོགས་ཀྱིས་སྔགས་བརྗོད་ལ། །ལག་པར་ཕྱག་རྒྱ་དང་བཅས་པས། །ཨོཾ་ཨ་ནྱོ་ནྱཱ་ནུ་ག་ཏ་པ་ར་སྤ་ར་སརྦ་དྷརྨཱ། ཨ་ནྱོ་ནྱཱ་ནུ་ག་ཏ་པྲ་བིཥྚ་སརྦ་དྷརྨཱ། ཨ་ཏྱནྟ་ཨ་ནུཏྟ་ར་སརྦ་དྷརྨཱ་ཞེས་པ་བརྗོད་ཅིང་བསྒྲིལ་བར་བྱའོ། །དེ་ནས་ཐིག་སྐུད་མཐའ་གཉིས་དབུས། །ཨོཾ་ཨཱཿཧཱུྃ་གསུམ་
བཀོད་པ་ཡིས། །བྱིན་བརླབས་ནས་ནི་སྔགས་འདི་བརྗོད། །ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུྃ་ཞེས་པའི་བཟླས་བརྗོད་བརྒྱ་རྩ་བརྒྱད། །གུང་མོ་གཉིས་སྦྱར་གཟུང་སྟེ་བཟླས། །དེ་ལྟར་ཐིག་སྐུད་བསྐྱེད་པ་དང་། །དེ་ནས་བླ་མས་གཙོ་བོར་བསམ། །གྲོགས་མཆོག་དེ་ཡི་ཐུགས་ཀ་ནས། །
གཽ་རཱིའམ་རིག་མ་ཡུམ་དུ་སྤྲུལ། །དེ་ནས་བླ་མས་ཐིག་སྐུད་ནི། །ཛྫཿཛྫཿཞེས་བརྗོད་དེ་ལ་གཏད། །དེས་ཀྱང་ཛྫཿཛྫཿབརྗོད་བླང་བར་བྱ། །དེ་ནས་གནམ་ཐིག་གདབ་པར་བྱ། །སྟེང་ནས་བཟུང་ཞིང་གྱེན་དུ་བཟློག །ཚངས་ཐིག་དང་པོ་ཟུར་ཐིག་སོགས། །ཅི་རིགས་པ་རུ་གདབ་པར་བྱ། །
དེ་ཚེ་ངག་ཏུ་སྔར་གྱི་སྔགས། །བརྗོད་པའམ་ཡང་ན་ཚིག་བཅད་འདིའོ། །འཇིག་རྟེན་ཁམས་ནི་མ་ལུས་པའི། །སངས་རྒྱས་སྲས་དང་བཅས་ལ་སོགས། །འགྲོ་བའི་དོན་དུ་རྣམ་པར་སྤྲུལ། །ཁྱེད་རྣམས་ཀྱི་ནི་ཐུགས་ཉིད་ཡིན། །ཞེས་པ་བརྗོད་ནས་ས་ཐིག་གདབ། །དེ་རྗེས་
དཀར་པོས་གཞལ་བྱ་སྟེ། །ཚངས་ཐིག་དང་པོར་གདབ་པ་ཡང་། །སློབ་དཔོན་ཤར་བལྟས་སློབ་མ་ནུབ། །བལྟས་ཏེ་ཚངས་ཐིག་དང་པོ་གདབ། །སློབ་དཔོན་བྱང་བལྟས་ཚངས་ཐིག་གཉིས། །སློབ་དཔོན་ཤར་ལྷོའི་མཚམས་སུ་གནས། །སློབ་མ་བྱང་ཤར་ཤར་ངོས་
གདབ། །དེ་བཞིན་བླ་མ་བྱང་ནུབ་གནས། །སློབ་མ་ལྷོ་ནུབ་ནུབ་ངོས་གདབ། །བླ་མ་རླུང་མཚམས་དེ་ཉིད་གནས། །སློབ་མ་བྱང་ཤར་བྱང་ངོས་གདབ། །དེ་བཞིན་སྐོར་ཕྱོགས་རིམ་གྱིས་གདབ། །བླ་མ་ཤར་ལྷོ་སློབ་མ་སྲིན། །གནས་ལ་ལྷོ་ཡི་ངོས་ཐིག་གདབ། །དེ་བཞིན་
ཟུར་ཐིག་རིམ་བཞིན་གདབ། །དེ་ལ་ཐིག་གི་ཆ་བགོ་བ། །སྐུད་པས་བགོ་བར་མི་བྱ་སྟེ། །འཕེལ་འགྲིབ་གཉིས་ཀྱི་ཉེན་ཡོད་པས། །ཤིང་བུ་ལ་སོགས་དྲང་ཞིང་སྲ། །ཁ་ཏི་ཁ་ཡི་རི་མོས་གདོད། །ཕྱོགས་བཞིར་བཞི་བཅུ་རྩ་གཉིས་པའི། །ཐིག་རྐང་ལས་ནི་རེའུ་མིག་གོ། །

སྒོ་ཁྱུད་ཐིག་གི་ནང་རོལ་དུ། །པདྨ་འདབ་མ་བརྒྱད་པར་བཅས། །ལྷ་ཡི་སྣམ་བུས་ཅི་རིགས་བསྐོར། །ཆ་རེ་རྡོ་རྗེ་ར་བ་དང་། །མེ་འོད་ལ་ནི་བསྐོར་བའོ། །དེ་ཡི་ནང་དུ་རྟ་བབས་དང་། །འདོད་ཡོན་སྣམ་བུ་ལ་སོགས་པས། །ཅི་རིགས་པར་ནི་བྲི་བར་བྱ། །དེ་ལྟར་ཐིག་ཟིན་ཐིག་སྐུད་
མཆོད། །འབར་བའི་ལྟ་བས་སྒོ་དབྱེ་ཞིང་། །ལྷ་རྣམས་བཅས་པ་གཤེགས་སུ་གསོལ། །དེ་དག་ནི་ཐིག་གདབ་པའི་ཆོ་གའོ། །དེ་ནས་ཚོན་ནི་རབ་འབྲིང་ཐ། །རིན་ཆེན་ལྔའམ་འབྲས་ལ་སོགས། །ཚོན་བསྒྱུར་དུར་ཁྲོད་སོ་ཕག་གམ། །སོལ་བ་རུལ་པའི་ཕྱེ་མ་སོགས། །
བྷྲཱུཾ་ཁཾ་སོགས་པའི་ཡིག་འབྲུ་ལྔ། །ཡོངས་གྱུར་ཚོན་རྩི་ལྔ་རུ་བསམ། །དེ་ནས་འབར་བའི་ལྟ་བ་ཡིས། །དགྱེས་པ་རྡོ་རྗེ་འཁོར་བཅས་ལ། །སྤྱན་དྲངས་མཆོད་པ་ཐིམ་པར་བྱ། །ཨོཾ་བཛྲ་ཙི་ཏྲ་ས་མ་ཡ་ཧཱུྃ། ཞེས་པའང་མང་དུ་བཟླས་པས་ཚོན། །བྱིན་གྱིས་བརླབས་ལ་མཆོད་པ་
འབུལ། །ཤིས་པར་བྱ་ཕྱིར་དབང་ལྡན་མཚམས། །བླ་མས་རེ་ཁཱ་མཛུབ་གང་རང་། །དཀར་དང་སེར་དང་དམར་དང་ལྗང་། །སྔོན་པོ་ནང་དུ་མཉམ་ཞིང་དྲང་། །དེ་མཆོད་མེ་ཏོག་སིལ་མ་གཏོར། །དེ་ཚེ་བླ་མས་འདི་སྐད་བརྗོད། །འདི་ནི་ཆོས་དབྱིངས་དག་པ་སྟེ། །སེམས་ཅན་
ཁམས་ནི་སྒྲོལ་མཛད་པ། །དཔལ་ལྡན་ཁྲག་འཐུང་རྒྱལ་པོ་ཉིད། །དེ་བཞིན་གཤེགས་པ་ཀུན་གྱི་གནས། །ཞེས་སོ། །དེ་ལྟར་བྱ་བའི་རིམ་པ་ནི། །གཞུང་ལས་འདི་སྐད་འབྱུང་བ་སྟེ། །ཉེས་པ་ཀུན་ལས་རྣམ་གྲོལ་བས། །ཚོན་གྱི་ལས་ནི་ཡང་དག་བརྩམ། །སློབ་དཔོན་གྱིས་ནི་
དང་པོར་དགྱེ། །ཕྱི་ནས་ཀུན་ནས་སློབ་མས་སོ། །ཞེས་པས་སོ། །རེ་ཁཱ་དྲང་བའི་རིམ་པ་ཡང་། །མཉམ་དང་དྲང་དང་མ་ཆད་སོགས། །དེ་བཞིན་རིགས་པས་ཤེས་པར་བྱའོ། །དེའང་ལུང་ལས་འདི་སྐད་དུ། །བར་ཆད་ཐམས་ཅད་རབ་འཇོམས་པ། །ཞེས་པ་དང་། གཞན་
ཡང་། །མཐེ་བོང་དང་ནི་མཐེའུ་ཆུང་དཔངས། །དྲང་ལ་མཐོ་བར་ཡང་དག་བྲི། །གལ་ཏེ་རི་མོ་མི་མཉམ་ན། །ཡོ་ཞིང་དམའ་དང་བཅས་པ་དང་། །རི་མོ་དམའ་བས་མི་འགྲུབ་ཅིང་། །ཡོན་པོས་སྡུག་བསྔལ་སྐྱེད་བྱེད་ལ། །ཆད་པས་སློབ་དཔོན་སློབ་མ་དག །གཉི་ག་འཆི་

བར་ཤེས་པར་བྱ། །ཞེས་པའོ། །ཕྱོགས་དང་སྒོ་ཡི་རིམ་པ་ཡང་། །ཤར་དུ་དཀར་དང་ལྷོར་སེར་པོ། །ནུབ་དམར་བྱང་དུ་ལྗང་གུ་སྟེ། །དབུས་སྔོ་རྒྱུད་གཞན་དག་ལས་གསལ། །དབུས་སུ་པདྨ་འདབ་བརྒྱད་ནི། །དམར་པོ་གདན་དང་བཅས་པ་བྲི། །འདབ་མ་འཕར་མ་
གཅིག་པ་ལ། །སྒོ་དང་གྲྭ་རུ་ཁྱབ་པ་རུ། །ལྷ་ཡི་སྣམ་བུ་བྲི་བར་བྱ། །ཕྱི་རོལ་རྟ་བབས་ལ་སོགས་པ། །དཀྱིལ་འཁོར་གཞན་དང་ཐུན་མོང་བས། །གཞན་དང་འདྲ་བར་ཅི་རིགས་བྱ། །དེ་ལྟར་དཀྱིལ་འཁོར་བྲི་བྱས་ནས། །འཇུག་པའི་རྟེན་དུ་ཕྱག་མཚན་དགོད། །དེ་ཡང་དང་པོར་སློབ་
དཔོན་གྱིས། །དགོངས་མོའི་དུས་སུ་འཆག་སར་འགྲོ། །སླར་ལོག་ཁྲུས་དང་བྱུག་པ་དང་། །གོས་དང་རྒྱན་ནི་ལྷ་མོས་བསྐྱེད། །རོལ་མོའི་སྒྲ་དང་བཅས་པ་ཡིས། །སྟ་གོན་ཟླ་བ་ཁ་སྦྱར་ཏེ། །དབྱངས་ཡིག་རྒྱ་བཀྲོལ་ནམ་མཁའ་ནས། །སྔགས་ནི་སོ་སོའི་སྔགས་བརྗོད་ཅིང་། །
དེ་ལ་དབུས་ཀྱི་གདན་སྟེང་དུ། །སྐྱེས་པའི་ཐོད་པའི་རྒྱ་གྲམ་བྲི། །སྒོ་བཞིར་པདྨ་འདབ་མ་ལ། །གྲི་གུག་ཅང་ཏེའུ་རུས་སྦལ་སྦྲུལ། །སྔོ་དང་དམར་སེར་ལྗང་གོ་རིམས། །མཚམས་བཞིའི་པདྨ་འདབ་མ་རུ། །སེང་གེ་དགེ་སློང་འཁོར་ལོ་རྡོ་རྗེ་ནི། །སྔོ་དཀར་ལྗང་ཁྲ་རིམ་བཞིན་
དགོད། །དེ་ཚེ་ཀུན་ལ་སྔགས་བརྗོད་ཅིང་། །བཀོད་པས་དཀྱིལ་འཁོར་ཉིས་བསྲེས་འགྱུར། །དེ་ནས་བླ་རེ་རྒྱལ་མཚན་གདུགས། །བ་དན་རྒྱན་སོགས་འཕེན་རྣམས་བྲི། །ཕྱི་རོལ་མཚམས་དང་རོལ་མོ་བརྡུང་། །སྤོས་དང་བཅས་པས་བུམ་པ་རྣམས། །སྟ་གོན་གནས་ནས་
སྤྱན་དྲངས་ཏེ། །ཆུ་དང་རིན་ཆེན་སྨན་ལ་སོགས། །བསམ་པ་གཞུག་ཅིང་ཏིང་འཛིན་བསྐྱེད། །རོལ་མོར་བཅས་པས་དཀྱིལ་འཁོར་ལ། །ལག་ཏུ་ཐོགས་ཏེ་ལན་གསུམ་བསྐོར། །རྣམ་རྒྱལ་བུམ་པ་གཙོ་བོའི་མདུན། །ཤར་སྒོའི་གཡས་སུ་ལས་ཐམས་ཅད། །གཞན་དག་
སྒོ་དང་མཚམས་བཞིར་དགོད། །དེ་ནས་བསྐོར་བ་ལན་གསུམ་རྗེས། །མེ་ཏོག་ཕྲེང་བ་ལྷ་ལ་དབུལ། །ནང་པར་ལྷས་སྦྱིན་མེ་ཏོག་ཕྲེང་། །དེ་ཉིད་དཀར་བཅས་མགོ་ལ་བཅིངས། །ལས་ཀྱི་བྱེད་པའམ་ཁང་སྐྱོང་གིས། །དཀྱིལ་འཁོར་ཉེ་བའི་ས་ཕྱོགས་སུ། །ཆག་ཆག་

མེ་ཏོག་སིལ་མ་དཀྲམ། །སྤོས་སོགས་མཆོད་ཡོན་ཐམས་ཅད་དགོད། །རྟག་ཏུ་བླ་མ་ལ་གསོལ་གདབ། །དེ་ནས་བླ་མས་ཉེ་རེག་དང་། །བདུད་རྩི་རི་ལུ་ཁ་རུ་གཞུག །སྟན་དེར་འདུག་ནས་དཀྱིལ་འཁོར་བསྒྲུབ། །རིག་དང་བཅས་པས་ཡན་ལག་དྲུག །བསམ་རྒྱུད་ཏིང་འཛིན་
གསལ་བ་དང་། །ལས་ཀྱི་རྡོ་རྗེས་སྔར་བཞིན་དུ། །རཀྵས་བསྲུང་བ་ནས་བཟུང་ནས། །མཆོད་བསྟོད་བདུད་རྩི་མྱང་བའི་བར། །བདག་ཉིད་ལྡན་པ་ཕུན་སུམ་ཚོགས། །བླ་མས་ཀྱང་ནི་སྔར་བཞིན་དུ། །མོས་པས་འཕོ་དང་ཏིང་འཛིན་ནི། །གཟུགས་བརྙན་ལ་བརྟེན་ས་བོན་ནམ། །
ཕྱག་མཚན་ཙམ་གྱིས་ལྷ་རྣམས་བསྐྱེད། །དེ་ལྟར་དཀྱིལ་འཁོར་སུམ་བསྲེས་ལ། །རང་གི་སྙིང་གའི་ས་བོན་ལས། །འོད་ཟེར་ཕྱུང་སྟེ་ལྷ་རྣམས་བསྡུ། །དེ་ལ་མཆོད་དགུག་གཞུག་ལ་སོགས། །སྔར་བཞིན་ཐིམ་པས་ཡེ་ཤེས་འབར། །ཆུ་དང་འོ་མ་འདྲེས་པ་བཞིན། །
སངས་རྒྱས་བྱང་ཆུབ་སེམས་དཔའ་ནི། །བསྒྲུབས་ཏེ་གཞན་དུ་ཡང་མ་ཡིན། །དེ་ལྟར་དཀྱིལ་འཁོར་བཞི་བསྲེས་ལ། །བླ་མས་མཆོད་དང་བསྟོད་པ་དང་། །བདུད་རྩི་མྱང་དང་བཟླས་བརྗོད་བྱ། །དེ་ཚེ་བླ་མས་བཟླས་དང་བསྒོམ། །རྣལ་འབྱོར་ལྡན་ལ་སློབ་མ་ཡིས། །མཎྜལ་
སྔོན་འགྲོ་གསོལ་བ་གདབ། །དེ་ཡི་ངོར་བྱས་བླ་མ་ཉིད། །ཇི་ལྟར་སློབ་མས་འཇུག་པ་བཞིན། །རིམ་གྱིས་བྱས་ཏེ་དབང་ཡང་ཡིན། །ཆུ་དང་དབུ་རྒྱན་ལ་སོགས་པ། །རྗེས་གནང་མཐར་ཐུག་རིམ་བཞིན་ནོ། །ལྷ་ཡིས་རྗེས་གནང་བྱིན་པ་ཡང་། །ཁྱོད་ཀྱིས་སེམས་ཅན་བསྡུ་བ་དང་། །
ཕན་འདོགས་དཀྱིལ་འཁོར་འཇུག་པ་དང་། །དབང་བསྐུར་དམ་ཚིག་ལྡན་པར་གྱིས། །ཞི་སོགས་ལས་ཀྱིས་རྗེས་གཟུང་དང་། །ཚར་གཅོད་པ་ཡི་སེམས་ཅན་ཀུན། །དོན་རྣམས་མ་ལུས་ཀུན་གྱིས་ཤིག །དམན་དང་མཆོག་གི་དངོས་གྲུབ་ལ། །སྐལ་བ་བཞིན་དུ་རིམ་པར་སྦྱོར། །
དེ་ནས་སྔོན་དུ་བརྟགས་པ་ཡི། །སློབ་མ་མཚན་ཉིད་ལྡན་པ་ཡིས། །འཇུག་དང་དབང་ཐོབ་བྱ་ཕྱིར་བརྗོད། །དགའ་ཆེན་ཁྱོད་བདག་སྟོན་པ་པོས། །ཞེས་སོགས་སྔར་བཞིན་བརྗོད་པ་དང་། །བླ་མས་བརྩེ་དང་ལྡན་པ་ཁྱོད། །སུ་ཡིན་ཅི་འདོད་གང་ལ་དགའ། །ཞེས་པ་བརྗོད་

ནས་སློབ་མ་ཡིས། །སྐལ་ལྡན་བདག་ལགས་རྣམ་གྲོལ་འཚལ། །བདེ་བ་ཆེ་ལ་བདག་དགའོ། །ཞེས་བརྗོད་ཡང་ནི་འདི་སྐད་བརྗོད། །སངས་རྒྱས་ཀུན་གྱི་ཡེ་ཤེས་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་
འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་གསོལ། །ཞེས་པས་སློབ་དཔོན་ལ་གསོལ་བ་གདབ་པར་བྱའོ། །དེ་ནས་སློབ་དཔོན་གྱིས་འདི་སྐད་བརྗོད་པར་བྱའོ། །དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་
པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །དེ་ནས་དཀྱིལ་འཁོར་གྱི་ལྷ་ལ་ལུས་ངག་ཡིད་གསུམ་གྱི་སྒོ་ནས་ཕྱག་བྱ་སྟེ། ཨོཾ་ན་མ་ཏེ་ཧཱུྃ། ཨོཾ་ན་མཿམི་ཧཱུྃ། ཨོཾ་ན་མོ་ན་མ་ཧཱུྃ། ཞེས་བྱ་བ་དང་། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི། ཞེས་
པས་ཀྱང་། སྒོ་གསུམ་གུས་པས་ཕྱག་བྱས་ལ། །དེ་ནས་སྔར་བཞིན་སློབ་མ་ཡིས། །གཙོ་བོ་བདག་ལ་སྡོམ་པ་གསོལ། །ཐུབ་པ་ཉི་མ་ལ་སོགས་བརྗོད། །དེ་བཞིན་སྡོམ་པ་དམ་ཚིག་ནི། །སྟ་གོན་གནས་པ་སྔར་བཞིན་བྱ། །དེ་ནས་བླ་མས་འདི་སྐད་བརྗོད། །དེང་ཁྱོད་དཔའ་བོ་
དང་རྣལ་འབྱོར་མ་རྣམས་ཀྱི་ནང་དུ་ཞུགས་ཀྱི། ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་སྟེ། ཁྱོད་དེ་བཞིན་གཤེགས་པ་ཐམས་ཅད་དང་། དཔའ་བོ་དང་། རྣལ་འབྱོར་མ་ཐམས་ཅད་ཀྱི་དངོས་གྲུབ་ཐོབ་པར་འགྱུར་ན། དངོས་གྲུབ་གཞན་སྨོས་ཀྱང་ཅི་དགོས།
དེ་ལྟ་བུའི་ཡེ་ཤེས་བསྐྱེད་པར་བྱ་ཡི། ཁྱོད་ཀྱིས་དཀྱིལ་འཁོར་མ་མཐོང་བའི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་གཞུག་པ་ནི། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །དེ་ནས་
ཀ་པཱ་ལའི་ནང་དུ་བདུད་རྩི་ལྔ་དང་ལྡན་པའི་དམ་ཚིག་གི་ཆུ་བླུད་པ་ནི་ཀྱེའི་རྡོ་རྗེ་གཟི་མདངས་དང་ལྡན་པས་འདི་སྐད་བརྗོད་དོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་གྲུབ། །ཨོཾ་སརྦ་བཛྲ་པཉྩ་ཨ་མྲྀ་ཏ་ཨུ་ད་ཀ་ཧཱུྃ། དེང་

ནས་བརྩམས་ནས་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི་གང་ངས་འདི་བྱོས་ཤིག་ཅེས་བསྒོ་བ་དེ་ཁྱོད་ཀྱིས་བྱ་དགོས་ཏེ། ད་ཁྱོད་ངལ་བརྙས་པའི་ལས་མ་བྱེད་ཅིག །བྱས་ན་ཁྱོད་ཀྱི་མི་བདེ་བ་མ་སྤངས་པར། ཚེའི་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་འདི་སྐད་བརྗོད་དོ། །
དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱང་འགྲུབ་པར་དཀའ་བ་མ་ལགས་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཞེས་པས་ཡོལ་བའི་ནང་དུ་དྲངས་ཏེ། ཡེ་ཤེས་དབབ་པ་བླ་མའི་མན་ངག་བཞིན་བྱའོ། །དེ་ནས་མཐོང་བ་དྲི་བ་དང་མེ་ཏོག་གི་ཕྲེང་བ་ཐོགས་
ཏེ། པྲ་ཏཱིཙྪ་བཛྲ་ཧོ། །ཞེས་བརྗོད་ཅིང་ཕྲེང་བ་དོར་བ་དང་། མིག་དབྱེ་བར་བྱ་སྟེ། ཨོཾ་རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པ་ནི་བརྩོན་པ་སྟེ། །མིག་ནི་ཐམས་ཅད་འབྱེད་མཛད་པས། །རྡོ་རྗེའི་མིག་ནི་བླ་ན་མེད། །ཧེ་བཛྲ་པ་ཤྱ། དེ་ཉིད་སྔགས་སུ་བརྗོད་པ་ནི། །ཨོཾ་བཛྲ་
སཏྭ་སྭ་ཡཾ་དྱ་ཡ། ཙཀྵུ་ངྒྷཊྚ་ཡ་ཏཏྤ་ར། ཨུདྒྷ་ཊ་ལ་ཏི་སརྦཱཀྵོ། བཛྲ་ཙཀྵུ་རཱ་ནུཏྟ་ར། ཧེ་བཛྲ་པྲེ་བེ་ཤ །དེ་ནས་གདོང་གཡོགས་ཕུད་ཅིང་འདི་སྐད་བརྗོད་དོ། །ད་ནི་དད་པ་རབ་ཏུ་བསྐྱེད། །དཀྱིལ་འཁོར་བཟང་པོ་འདི་ལ་ལྟོས། །ཁྱོད་ནི་རྣལ་འབྱོར་མ་རིག་སྐྱེས། །སྔགས་དང་ཕྱག་རྒྱས་བྱིན་
གྱིས་བརླབས། །འགྲོ་བའི་ཕུན་སུམ་ཚོགས་ཀུན་དང་། །དངོས་གྲུབ་ཐམས་ཅད་མངོན་དུ་གྱུར། །དམ་ཚིག་ཐམས་ཅད་བསྐྱེད་པ་དང་། །གསང་སྔགས་ལ་ཡང་བརྩོན་པར་གྱིས། །ཞེས་བརྗོད་པ་དང་། མེ་ཏོག་གང་ལ་ལྟུང་བའི་ལྷ་ངོ་བསྟན་ཅིང་ལྷག་པར་དབོག །སྔགས་བསླབ་ཅིང་
དེ་ཁོ་ན་ཉིད་བཤད་པར་བྱའོ། །དེ་ལ་གཞལ་ཡས་ཁང་གྲུ་བཞིར་བྱུང་བ་ནི་ཚད་མེད་པའི་རང་བཞིན་གྱིས་རྣམ་པར་དག་པའོ། །སྒོ་བཞི་ནི་དྲན་པ་ཉེ་བར་གཞག་པ་བཞི་རྣམ་པར་དག་པའི་རང་བཞིན་ནོ། །རྟ་བབས་བཞི་ནི་ཡང་དག་པར་སྤོང་བ་བཞི་རྣམ་པར་དག་པའི་རང་བཞིན་ནོ། །
དྲ་བ་ནི་ཉོན་མོངས་པ་ཆེན་པོ་རྣམ་པར་དག་པའོ། །དྲ་བ་ཕྱེད་པ་ནི་ཉོན་མོངས་པ་ཆུང་ངུ་རྣམ་པར་དག་པའོ། །ཀ་བ་བརྒྱད་ནི། འཕགས་པའི་ལམ་ཡན་ལག་བརྒྱད་རྣམ་པར་དག་པའོ། །དར་གྱི་པ་ཏི་ལ་སོགས་པའི་རྒྱན་རྣམས་ནི་ཚུལ་ཁྲིམས་རྣམ་པར་དག་པའི་མཚན་ཉིད་དོ། །

འདོད་པའི་ཡོན་ཏན་ལྔ་རྣམས་ནི་གཟུགས་དང་སྒྲ་ལ་སོགས་པ་རྣམ་པར་དག་པའོ། །རྡོ་རྗེ་ར་བ་ནི་ཟབ་མོའི་ཆོས་ཀྱི་འཁོར་ལོ་བསྐོར་བའི་རྟགས་སོ། །མེ་འོད་ནི་ཕྱི་རོལ་གྱི་བགེགས་ལ་སོགས་པས་མི་ཚུགས་པའི་རྟགས་སོ། །བུམ་པ་བརྒྱད་ནི་ཆེ་བའི་ཡོན་ཏན་གྱིས་རྒྱས་ཤིང་
ཐུགས་རྗེ་ཆེན་པོའི་ངོས་ཡོངས་སུ་གང་བའི་རྟགས་སོ། །དེ་ནས་ལྷའི་དེ་ཁོ་ན་ཉིད་བསྟན་ཏེ། དེ་ལ་བཅོམ་ལྡན་འདས་དགྱེས་པའི་རྡོ་རྗེ་ནི་རྣམ་པར་ཤེས་པའི་ཕུང་པོ་དང་ཞེ་སྡང་རྣམ་པར་དག་པའི་རང་བཞིན་ནོ། །གཽ་རཱི་ནི་ཞེ་སྡང་དང་གཟུགས་རྣམ་པར་དག་པའི་རང་བཞིན་ནོ། །ཆོམ་རྐུན་མ་ནི་
གཏི་མུག་དང་སྒྲ་རྣམ་པར་དག་པའི་རང་བཞིན་ནོ། །རོ་ལངས་མ་ནི་ང་རྒྱལ་དང་དྲི་རྣམ་པར་དག་པའི་རང་བཞིན་ནོ། །གྷསྨ་རཱི་ནི་འདོད་ཆགས་དང་རོ་རྣམ་པར་དག་པའི་རང་བཞིན་ནོ། །པུཀྐ་སཱི་ནི་ཞེ་སྡང་དང་ས་རྣམ་པར་དག་པའི་རང་བཞིན་ནོ། །རི་ཁྲོད་མ་ནི་གཏི་མུག་དང་ཆུ་རྣམ་པར་
དག་པའི་རང་བཞིན་ནོ། །གཏུམ་མོ་ནི་ང་རྒྱལ་དང་མེ་རྣམ་པར་དག་པའི་རང་བཞིན་ནོ། །གཡུང་མོ་ནི་འདོད་ཆགས་དང་རླུང་རྣམ་པར་དག་པའི་རང་བཞིན་ནོ། །བདག་མེད་རྣལ་འབྱོར་མ་ནི་ཡབ་དང་མཐུན་ནོ། །དེ་ལྟར་དེ་ཁོ་ན་ཉིད་བཤད་ནས་སློབ་མས་མཎྜལ་སྔོན་དུ་འགྲོ་བས་བླ་མའི་
ཞབས་ལ་གཏུགས་ཤིང་ཡོན་གྱི་མཆོག་ཕུལ་ནས་དབང་བསྐུར་བའི་དོན་དུ་གསོལ་བ་གདབ་པར་བྱའོ། །དེ་ཡང་ཐུན་མོང་གི་དབང་ནོད་པ་ཡིན་ན། འདི་སྐད་བརྗོད་དོ། །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་མཛད་པ་བཞིན། །བདག་ཀྱང་རབ་ཏུ་བསྒྲལ་སླད་དུ། །ནམ་
མཁའི་རྡོ་རྗེ་བདག་ལ་གསོལ། །འཁོར་བ་འདམ་གྱི་ཚོགས་དག་ཏུ། །བྱིང་བ་སྐྱབས་མེད་བདག་ལ་སྐྱོབས། །མགོན་པོ་ཁྱོད་ཀྱི་བཀའ་དྲིན་གྱིས། །རིག་པའི་དབང་བསྐུར་བདག་ལ་གསོལ། །ཞེས་པ་དང་། ཁྱད་པར་སློབ་དཔོན་གྱི་དབང་ཡིན་ན་འདི་སྐད་བརྗོད་པར་བྱ་སྟེ།
ཧེ་རུ་ཀ་དཔལ་དབང་བསྐུར་བ། །འགྲོ་བ་བསྐྱབ་ཕྱིར་གཟི་བརྗིད་ཅན། །ཅི་ལྟར་ཡོན་ཏན་འབྱུང་གནས་སོགས། །དེ་བཞིན་བདག་ལ་དེ་གསོལ་ཅིག །དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་གསོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་

སློབ་དཔོན་བགྱིས། །ཞེས་པའོ། །དེ་ནས་ཐུན་མོང་དང་ཁྱད་པར་གྱི་སློབ་མ་རྣམས་ཐ་མལ་གྱི་སྟན་དང་། ཁྱད་པར་གྱི་གདན་སེང་གེའི་ཁྲིའམ། པདྨས་མཚན་པ་གཞག་པར་བྱའོ། །གདུགས་དཀར་པོ་གསེར་གྱི་ཡུ་བ་ཅན་ཕུབ་ནས། སློབ་དཔོན་གྱིས་ཀྱང་ལྷ་རྣམས་ཅི་རིགས་
པར་མཆོད་ནས། བདུད་རྩི་དང་དྲིའི་ཆུ་དང་ཉུངས་ཀར་ལག་ཏུ་ཐོགས་ནས་བདག་ཉིད་ང་རྒྱལ་དང་བཅས་པས་འདི་སྐད་བརྗོད། །ཉོན་ཅིག་བར་ཆད་བགེགས་ཀྱི་ཚོགས། །ང་ནི་དཔལ་ལྡན་རྡོ་རྗེ་འཆང་། །མཚོན་ཆ་སྣ་ཚོགས་འབར་བའི་བདག །གདུག་པ་མ་ལུས་འཇོམས་པར་
བྱེད། །དེངས་ཤིག་བར་ཆད་བགེགས་ཀྱི་ཚོགས། །ང་ཡི་བཀའ་ལས་འདའ་མ་བྱེད། །ཅི་སྟེ་བཀའ་ལས་འདས་གྱུར་ན། །རྡུལ་ཕྲན་བཞིན་དུ་རླག་པར་བྱེད། །ཅེས་དང་། བདག་ཉིད་བདུད་རྩི་འཁྱིལ་པའི་སྔགས་དང་ཏིང་ངེ་འཛིན་དུ་གནས་པས་བསྐྲད་པའམ། །རཀྵ་ལ་
སོགས་པའི་སྔགས་བརྗོད་ཅིང་ར་བ་དང་གུར་ལ་སོགས་པས་བསྲུང་བའོ། །དེ་ནས་སློབ་མས་ཁྲུས་བྱས་ཤིང་། སྟོད་གཡོགས་ལ་སོགས་གོས་བཟངས་ལྡན། །དྲུག་པ་རྫོགས་སངས་རྒྱས་ཀྱི་དབང་། །ནོད་ཕྱིར་སྙིམ་པ་མེ་ཏོག་གིས། །དཀྱིལ་འཁོར་ལྷ་ཡི་གཙོ་ལ་འབུལ། ཨོཾ་
པྲ་ཏཱིཙྪ་བཛྲ་ཧོ། །ཞེས་པའི་སྔགས་བརྗོད་པས་སོ། །དེ་རྗེས་བླ་མས་མེ་ཏོག་བླངས། །སློབ་མའི་མགོ་ལ་བཅིངས་བྱས་ལ། །ཨོཾ་དྷརྨཱཿཀུཎྜ་ཨ་བྷི་ཥིཉྩ་ཞེས་བརྗོད་པར་ནི། །ཆོས་ཀུན་བསྡུས་ཤིང་འཁྱིལ་བས་ནི། །ལྷག་པའི་ལྷ་ཡིན་དེ་སྐད་དུ། །ཕྲེང་བ་ཡི་དམ་རྒྱལ་བའི་དབང་། །
སྒོམ་ཕྱིར་དབང་བསྐུར་དམ་ཚིག་ལྡན། །དེ་རྗེས་ལས་ཀྱི་རྡོ་རྗེ་ཡིས། །བུམ་པའི་ཆུ་རྣམས་བསྡུས་ནས་ནི། །བཟང་པོ་རྣམ་རྒྱལ་བུམ་པར་བསྡུས། །དེ་རྗེས་དུང་ཆོས་ཉིད་དུའོ། །དེ་ནས་རྣམ་རྒྱལ་ཆུ་རྒྱུན་གྱིས། །དྲིལ་བུའི་སྒྲ་དང་དབྱངས་བཅས་པས། །དབང་སྐུར་བ་ནི་འདི་སྐད་བརྗོད། །
གསང་གསུམ་གནས་ལས་བྱུང་བ་ཡི། །ཁམས་གསུམ་པ་ཡིས་དབང་བསྐུར་བ། །སངས་རྒྱས་ཀུན་གྱི་ཆུ་ཡི་དབང་། །དེང་འདིར་ཁྱོད་ལ་སྦྱིན་པར་བྱ། །སངས་རྒྱས་ཀུན་ནི་རབ་བསྒྲུབ་ཕྱིར། །ཆུ་དབང་དམ་པ་ཁྱེད་ཀྱིས་ལོང་། །ཨོཾ་སརྦ་ཏ་ཐཱ་ག་ཏ་ཨུ་ད་ཀ་ཨ་བྷི་ཥིཉྩཱ་མི་བཛྲ་སྭ་བྷཱ་བ་

ཨཱཏྨ་ཀོ྅ཧཾ། དེས་ནི་རྣམ་པར་རྟོག་པ་དང་། །ཉོན་མོངས་པའི་དྲི་མ་འཁྲུ་བར་བྱེད་དོ། །དེ་ནས་གསེར་ལ་སོགས་པའི་རིན་པོ་ཆེ་དང་ཤིང་དང་བ་སོ་ལ་སོགས་པའི་འབུར་མར་བརྐོས་པའམ། །ཐང་ཀའི་རི་མོའམ་དབུ་རྒྱན་དུ་བྱས་ཏེ། ཏྲཱཾ་ལས་རིན་ཆེན་འབྱུང་ལྡན་དུ་
བསམ་ཞིང་དགུག་པ་དང་གཞུག་པ་ལ་སོགས་པས་ཡེ་ཤེས་སེམས་དཔའ་བསྟིམས་ལ། མཆོད་པ་དང་བསྟོད་པ་དང་སྔགས་བཟླས་པ་བྱས་ལ་འདི་སྐད་བརྗོད་དོ། །གསང་གསུམ་གནས་ལས་བྱུང་བ་ཡི། །ཁམས་གསུམ་པ་ཡིས་དབང་བསྐུར་བ། །སངས་རྒྱས་ཀུན་གྱི་དབུ་རྒྱན་
དབང་། །ཐོར་ཚུགས་ཅོད་པན་གྱིས་བརྒྱན་པའི། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། །ཨོཾ་བཛྲ་པ་རཱ་ཧ་ཀ་བཛྲ་ཨ་རལླི་ཧོཿ། །དེ་ནས་ཡང་རྡོ་རྗེ་ཨཱཿལས་སྣང་བ་མཐའ་ཡས་སུ་བསྐྱེད་ལ་འདི་སྐད་བརྗོད་དོ། །
འདི་ནི་སངས་རྒྱས་ཐམས་ཅད་ཀྱི། །ཧེ་རུ་ཀ་དཔལ་རྒྱལ་པོ་དང་། །མཁའ་འགྲོ་རྣམས་ཀྱི་དབང་མཆོག་ནི། །དེ་རིང་ཁྱོད་ལ་དབང་སྐུར་རོ། །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཏིཥྛ་བཱི་ར་ས་མ་ཡ་སྟྭཾ། དེ་ནས་དེ་ཉིད་བརྗོད་པ་ནི། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་
ཆེ། །ཀུན་དུ་བཟང་པོ་ཀུན་གྱི་བདག །རྡོ་རྗེ་བསྙེམས་ཚུལ་བདག་པོའི་བདག །ཅེས་པ་སྟེ། །རྡོ་རྗེའི་དབང་བསྐུར་བ་ལག་པ་གཡས་པར་སྦྱིན་ནོ། །དེ་ནས་དྲིལ་བུ་ཁཾ་ལས་དོན་ཡོད་གྲུབ་པར་བསྐྱེད་ལ་འདི་སྐད་བརྗོད་དོ། །འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་
ནི་རྟག་ཏུ་ཟུང་། །བྱང་ཆུབ་མཆོག་ཏུ་རྒྱལ་བས་བཞེད། །དེ་ཡི་དེ་ཉིད་བཤད་པ་ནི། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་དངོས་མེད་བྱས། །དེ་བཞིན་དག་པའི་སེམས་དཔའ་ནི། །སྲིད་པའི་དམ་པ་བྱེད་པར་འགྱུར། །བཛྲ་ས་ཏྭ་སྟྭཾ་ཨ་བྷི་ཥིཉྩཱ་མི། ཞེས་པས་ལག་པ་གཡོན་པར་དུང་བྱིན་ལ། དེ་ནས་མིང་
གི་དབང་བསྐུར་བར་བྱ་སྟེ། བྷྲཱུཾ་ལས་རྣམ་པར་སྣང་མཛད་དུ་བསམ། སངས་རྒྱས་ཀུན་གྱི་མིང་གི་དབང་། །ཞེས་པ་ལ་སོགས་པ་བརྗོད་ལ། ཨོཾ་བཛྲ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི། ཤྲཱི་ཧེ་རུ་ཀ་ནཱ་མ་ཨ་བྷི་ཥེ་ཀ་ཏ། ཞེས་བརྗོད་ཅིང་རྡོ་རྗེ་དྲིལ་བུ་མགོའི་ཐད་ཀར་སྦྱིན་ནོ། །དེ་ནས་བརྟུལ་ཞུགས་ཀྱིས་བརྟན་

པར་བྱའོ། །འདི་དེ་སངས་རྒྱས་ཐམས་ཅད་ཉིད། །ཧེ་རུ་ཀ་དཔལ་ཕྱག་ན་བསྣམས། །ཁྱོད་ཀྱིས་ཀྱང་ནི་རྟག་ཏུ་བཅང་། །ཧེ་རུ་ཀ་དཔལ་བརྟུལ་ཞུགས་བརྟན། །རྡོ་རྗེའི་རྩེ་མོ་ནས་སློབ་མ་འཛིན་དུ་བཅུག་ལ་སྔགས་འདི་བརྗོད་དོ། །ཨོཾ་སརྦ་ཏ་ཐཱ་ག་ཏ་སིདྡྷ་བཛྲ་ས་མ་ཡ་སྟྭཾ། ཨེ་ཥ་སྟྭཾ་དྷ་ར་ཡཱ་མི་ཧཱུཾ་སྭཱ་ཧཱ་ཧ་ཧ་ཧི་ཧི་
ཞེས་བརྗོད་ལ་ལག་པར་རྡོ་རྗེ་རྒྱ་གྲམ་སྦྱིན་ནོ། །དེ་ནས་ཧེ་རུ་ཀ་དཔལ་གཟུགས། །རང་གི་དཀྱིལ་འཁོར་ཆོ་གས་སྦྱིན། །རྡོ་རྗེ་སློབ་དཔོན་གོ་འཕང་ཐོབ། །ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌ་མ་རུ། །རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོགས་ཤིང་། །ཚངས་པའི་སྐུད་ཐོགས་རྣལ་
འབྱོར་བདག །གྲི་གུག་དང་ནི་ཀ་པཱ་ལ། །དཔའ་བོ་ཆེན་པོས་བླང་བར་གྱིས། །ཞེས་བརྗོད་ལ། སློབ་མ་དེ་གཡས་བརྐྱང་གཡོན་བསྐུམ་པས་གནས་ལ། རྡོ་རྗེ་གྲི་གུག་གཡས་སུ་སྦྱིན་ཞིང་། དྲིལ་བུ་དང་ཌ་མ་རུ་དང་ཀ་པཱ་ལ་གཡོན་དུ་སྦྱིན་ཞིང་། ཁ་ཊྭཱཾ་ག་གཡས་ཕྱོགས་སུ་བརྟེན་པ་སྦྱིན་པར་བྱ་སྟེ།
དེ་ལྟ་བུའི་ཆེ་བའི་བདག་ཉིད་དག་དང་ལྡན་པར་བརྗོད་དོ། །འདིས་ནི་རྡོ་རྗེ་སློབ་དཔོན་གྱི་དབང་རྗེས་སུ་གནང་བ་དང་། ལུང་བསྟན་པ་དང་། དབུགས་དབྱུང་བ་དང་ལྡན་ཞིང་ཕྲིན་ལས་ཀྱང་རྫོགས་པར་འགྱུར་ཏེ། ཞི་བ་དང་། རྒྱས་པ་དང་། དབང་དང་། དྲག་པོ་དང་། རེངས་པ་དང་། བསྒྲག་པ་དང་། མྱོས་པར་
བྱ་བ་དང་། གསད་པ་ལ་སོགས་པ་དང་། དེ་རྣམས་ལ་ཐོགས་པ་མེད་པར་འགྲུབ་པར་བསླབ་པར་བྱོས་ཤིག །དངོས་གྲུབ་འདི་དག་རྫོགས་པར་འགྱུར་ཏེ། མཆིལ་ལྷམ་བགོ་བ་དང་། ཆར་དབབ་པ་དང་། ཉི་ཟླ་གཟུང་བ་ལ་སོགས་པ་འཇིག་རྟེན་པའི་དངོས་གྲུབ་དང་། འཇིག་རྟེན་ལས་འདས་པའི་དངོས་
གྲུབ་ཐམས་ཅད་འགྲུབ་པར་བྱོས་ཤིག་ཅེས་རྗེས་གནང་སྦྱིན་ནོ། །དེ་དག་ནི་བུམ་པའི་དབང་ངམ། རྡོ་རྗེ་སློབ་དཔོན་གྱི་དབང་རྫོགས་པ་སྟེ། ལུས་ཀྱི་དྲི་མ་དག་པར་བྱེད་ཅིང་བྱང་ཆུབ་སེམས་དཔའ་ཚོགས་ཀྱི་ལམ་མཐར་ཕྱིན་པ་དང་སྐལ་བ་མཉམ་པར་འགྱུར་རོ། །དེ་ནས་དབང་བསྐུར་བ་གཉིས་པས་ནི་
ངག་དྲི་མ་དག་པར་བྱེད་པ་དང་། སྦྱོར་བའི་ལམ་གྱི་ནུས་པ་འཇོག །དབང་བསྐུར་གསུམ་པས་སེམས་ཀྱི་དྲི་མ་དག་ཅིང་མཐོང་ལམ་གྱི་ནུས་པ་འཇོག །དབང་བསྐུར་བ་བཞི་པས་ནི་ཉོན་མོངས་པ་དང་། ཉེ་བའི་ཉོན་མོངས་པ་དག་བསྒོམ་པའི་ལམ་དང་ཁྱད་པར་གྱི་ལམ་ལ་གནས་པའི་ནུས་པ་

འཇོག །དབང་བསྐུར་བ་དེ་དག་གིས་དབང་བསྐུར་བའི་རིམ་པ་ནི་བླ་མའི་ཞལ་ལ་ལྟོས་པར་བྱ་བའི་ཕྱིར་དེ་བཞིན་གཤེགས་པས་ཀྱང་དགོངས་པ་སྦས་པ་ཡིན་ལ། དེ་བས་ནི་དགོངས་དོན་ཉམས་པ་སྤང་བའི་ཕྱིར། བདག་གིས་ཀྱང་འདིར་ཡི་གེར་བཀོད་པ་མ་ཡིན་སྙམ་དུ་
དགོངས་སོ། །དེ་དག་གིས་དབང་བསྟན་ནས། གང་གི་ཚེ་རབ་ཏུ་གནས་པར་བྱེད་པར་འདོད་ན། དེའི་དོན་ཡང་འདི་ཡིན་ཏེ། སྡོམ་ནི། ཤེས་པར་བྱ་དང་ཉམས་སུ་བླང་། །འབྲས་བུ་དང་ནི་རྣམ་པ་གསུམ། །དེ་ལ་ཤེས་པར་བྱ་བ་ནི་འདི་ཡིན་ཏེ། རབ་ཏུ་གནས་པ་ཐུན་མོང་དང་ཁྱད་པར་དུ་ཤེས་པར་
བྱའོ། །མངའ་དབུལ་ལྷ་ལྟར་མཆོད་པ་དང་། །སློབ་མ་ལྟ་བུར་དབང་བསྐུར་བ། །སྤྱན་དབྱེ་ཐུན་མོང་གསེར་ཐུར་གྱིས། །ཚིགས་བཅད་སྔགས་དང་བཅས་པར་བརྗོད། །ཁྱད་པར་སྤྱན་ནི་དབྱེ་བའོ། །ཞལ་བསྲོ་བ་ནི་སྦྱིན་སྲེག་གིས། །སློབ་མ་ཤིས་པར་བྱ་ཕྱིར་དང་། །ལྷ་རྣམས་ཚིམ་པའི་
དོན་དུའོ། །དེའི་རྗེས་ལ་ཉམས་སུ་བླང་བ་ནི་འདི་ཡིན་ཏེ། སྔར་བཞིན་བླ་མར་འོས་པ་ལ། སློབ་དཔོན་མཚན་ཉིད་དང་ལྡན་པས་གསོལ་བ་གདབ་པ་དང་། བསྙེན་པ་དང་། ས་ཆོ་ག་སྔར་བཞིན་བྱས་ལ། དཀྱིལ་འཁོར་མེ་ལོང་གི་ངོས་ལྟར་མཉམ་པའི་སྟེང་དུའམ། སྟེགས་བུ་གྲུ་བཞིའི་སྟེང་དུའོ། །
ལྟ་གོན་ཡོ་བྱད་ཐམས་ཅད་ཉེ་བར་བསགས་ལ། དེ་ལ་སློབ་དཔོན་དུ་འོས་པ་ནི་འདི་ཡིན་ཏེ། བརྟན་ཞིང་དུལ་བ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ཉིད་བཅུ་ནི་ལེགས་པར་ཤེས། །འདི་ནི་སློབ་
དཔོན་ཡིན་ཞེས་བྱ། །དེ་ཡིས་བསྟན་པའི་གསང་སྔགས་རྣམས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་ནི། དེས་ཀྱང་ཆོ་ག་ཆད་པ་མེད་པར་ཕུན་སུམ་ཚོགས་པར་བྱ་སྟེ། འདི་སྐད་དུ། ཆོ་ག་ཉམས་པར་མི་བྱ་སྟེ། །རབ་གནས་རྟག་ཏུ་སྨད་པ་དང་། །ཚེ་འདིའི་སྡུག་བསྔལ་ཆེན་པོ་
དང་། །འཇིག་རྟེན་གཞན་དུ་འཇིགས་ཆེན་འབྱུང་། །དེ་བས་དངོས་གྲུབ་འདོད་པ་ཡིས། །བདག་ཉིད་ཀྱིས་ནི་ཅི་ནུས་ལས། །དེ་བཞིན་ཆོ་གར་གསུངས་ཚུལ་དུ། །ཀུན་ནས་རབ་ཏུ་འབད་དེ་བྱ། །ཞེས་པ་དང་། དེ་ནས་དང་པོ་སློབ་མའམ། སྒྲུབ་པའི་གྲོགས་པོ་རང་ཉིད་རྒྱན་དང་བྱུག་པ་

ལ་སོགས་པ་དང་། མཆོད་ཡོན་བྱིན་གྱིས་བརླབ་པ་དང་། ཡན་ལག་དྲུག་གི་རྣལ་འབྱོར་བདུད་རྩི་མྱང་བའི་བར་དུ་བདག་ཉིད་ལ་ལྡན་པ་ཕུན་སུམ་ཚོགས་པ་བྱས་ལ། དེ་ནས་བླ་མས་ཀྱང་ཕུན་སུམ་ཚོགས་མོས་པ་འཕོ་བ་དང་ལྡན་པས་རྣལ་འབྱོར་སྒྲུབ་པའི་གྲོགས་མཆོག་བཞིན་དུ་ཏིང་ངེ་འཛིན་
བསྐྱེད་པ་དང་། རང་བཞིན་སྤྱན་དྲངས་པ་གཉིས་བསྲེས་སམ་གསུམ་བསྲེས་བྱས་ལ། མཆོད་པ་དང་བསྟོད་པ་དང་བདུད་རྩི་མྱང་བའི་བར་དུ་སྔར་བཞིན་བྱས་ནས་སྐུ་གཟུགས་ལ་སོགས་པ་དག་ཀྱང་བྱི་དོར་བྱས་ལ་སྔར་གྱི་གནས་སུ་གཞག་གོ། །དེ་ནས་མེ་དང་ཆུ་ནང་དུ་ཡུངས་ཀར་བླུགས་
ཤིང་སྔགས་འདི་བཟླས། ལན་གསུམ་བསྐོར་ཞིང་གཏོར་བར་བྱ། །སྦྱང་ཞིང་བསྲུང་བ་དག་ཏུ་བྱ། །ཨོཾ་ཧེ་བཛྲ་ཨ་དྷི་ཏིཥྛཱ་ན་སརྦ་པཱ་པཾ་ད་ཧ་ན་ཧེ་བཛྲཱ་ཡ་ཧཱུྃ་ཕཊ་སྭཱ་ཧཱ། དེ་ནས་འབྲུ་མར་ལ་དཱུར་བའི་པིར་གྱིས་བྱུག་ཅིང་། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། རཀྵ་རཀྵ་ཧཱུཾ་ཧཱུཾ་ཕཊ་སྭཱ་ཧཱ།
དེ་ནས་ཤུན་ལྤགས་ལྔས་དྲིལ་ཕྱིས་དང་། ཁྲུས་ལ་སོགས་པ་བྱས་ཀྱང་རུང་། མ་བྱས་ཀྱང་རུང་སྔར་གྱི་དེ་དག་གིས་རྟེན་སྦྱང་བའོ། །བདུག་སྤོས་ཐོགས་ཤིང་རོལ་མོ་དབྱངས་དང་བཅས་པས་སངས་རྒྱས་ཐམས་ཅད་མདུན་གྱི་ནམ་མཁའ་ལ་དཀྱིལ་འཁོར་ལྷའི་རྣམ་པར་བསྡུས་ལ་འདི་སྐད་
བརྗོད་དོ། །དགྱེས་མཛད་རྡོ་རྗེ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་ལ་ཡང་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །ཐུགས་རྗེའི་བདག་ཉིད་ཅན་རབ་གནས། །མགོན་པོ་བདག་ནི་བགྱིད་པར་འཚལ། །བཅོམ་ལྡན་བདག་ནི་གུས་པ་ལ། །
དེ་བས་གནང་བ་མཛད་པར་རིགས། །བདག་གི་མིང་བརྗོད་འདི་ཞེས་པས། །རིག་པའི་རྒྱལ་པོ་འདི་ཞེས་བྱ། །ཡོ་བྱད་ཅི་འབྱོར་པ་ཡིས་ནི། །ནང་པར་རབ་གནས་བགྱིད་པར་འཚལ། །བདག་དང་སློབ་མར་བཅས་པ་ལ། །ཐུགས་བརྩེ་བར་ནི་ཉེར་དགོངས་ནས། །ཚོགས་པ་ཐམས་ཅད་རབ་
གནས་ལ། །བྱིན་གྱིས་བརླབ་པ་མཛད་དུ་གསོལ། །ཞེས་པ་དང་། ཡང་ན། ཕྱོགས་བཅུར་བཞུགས་པའི་སངས་རྒྱས་དང་། །སྲས་བཅས་འཇིག་རྟེན་རྣམ་གྲངས་དང་། །ཞེས་པ་ལ་སོགས་པས་གསོལ་བ་གདབ་ཅིང་སྙིམ་པའི་མེ་ཏོག་གཏོར་ཞིང་འདི་སྐད་དོ། །ནམ་མཁར་བཞུགས་

པའི་རྫོགས་སངས་རྒྱས། །མེ་ཏོག་བཟང་པོ་རིན་ཆེན་ཆར། །སྐུ་ལ་རབ་ཏུ་འབབ་འགྱུར་བས། །ཀྱེ་ཀྱེ་སོ་སོར་བཞེས་སུ་གསོལ། ཨོཾ་པ་ར་མ་སུ་ཁཱ་ཤ་ཡ་སུ་ལ་ལི་ཏི་བི་ལཱ་ས་མི་ཏེ། ན་མཱ་མི་བྷ་ག་ཝཱན་ཛཿཧཱུཾ་བཾ་ཧོཿཧི་ཧི་ཧི་ཧི། པྲ་ཏཱིཙྪ་བཛྲ་ཀུ་སུ་མཱཉྫ་ལི་ནཱ་ཐ་ཧོ། །ཇི་ལྟར་སངས་རྒྱས་
ཐམས་ཅད་ནི། །དགའ་ལྡན་ན་ནི་བཞུགས་པ་ལས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་འདིར་ཁྱོད་བཞུགས་མཛོད། །འདིར་བཞུགས་རྟག་ཏུ་མགོན་པོ་ནི། །གྱུར་ནས་མེ་ཏོག་ལ་སོགས་འདི། །བྱང་ཆུབ་སེམས་ནི་འཕེལ་བའི་ཕྱིར། །བདག་ཅག་དོན་དུ་བཞེས་སུ་
གསོལ། །ཞེས་བརྗོད་དེ། དེ་ཡང་དཀྱིལ་འཁོར་དུ་འཇུག་ཅིང་དབང་ནོད་པ་ཡིན་ན། སྔར་བཞིན་དུ་ལྷ་སྟ་གོན་དུ་གནས་པ་ཉིད་བྱས་པ་མ་ཡིན་ན། དགོན་པོ་བསྡུ་བ་དག་ཙམ་གྱིས་བྱའོ། །དེ་བཞིན་དུ་དབང་ཡིན་ན་སློབ་མ་ལྷག་གནས་ལ་སྔར་བཞིན་དུ་བྱ་བ་ཡིན་ལ། མ་ཡིན་ན་འདི་ཙམ་གྱིས་
སློབ་མ་ལྷག་པར་གནས་པར་བྱ་སྟེ། དེང་དུས་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་མཉམ་པ་རུ། །འབྱུང་བར་བདག་ཉིད་ཐེ་ཚོམ་མེད། །བྱང་ཆུབ་སེམས་དང་སེམས་གཅིག་ལས། །མི་ལྡོག་པར་ནི་བདག་གྱུར་ཏེ། །དེ་བཞིན་གཤེགས་
པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉིད་མ་དམ་པ་སྟེ། །བདག་གིས་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །ཞེས་བརྗོད་དོ། །དེ་ནས་གལ་ཏེ་རྡུལ་ཚོན་མ་བྲིས་པའི་ལྷག་གནས་ཡིན་ན་ཤིན་ཏུ་
སྔ་བར་ཐིག་དང་ཚོན་ལ་སོགས་པ་སྔར་བཞིན་དུ་བྱས་ལ། ཉི་མ་བཟང་པོ་ལ་རབ་གནས་འདི་ལྟར་བྱ་སྟེ། ཡང་སློབ་དཔོན་གྲོགས་དང་བཅས་པས་ཆོ་ག་ཉམས་པར་མི་བྱ་སྟེ་ཞེས་བྱ་བ་ལ་སོགས་པ་ཚིགས་སུ་བཅད་པས་ཡོ་བྱད་ཐམས་ཅད་བསོག་ཅིང་བསྟར་བ་དང་། རྒྱན་ཐམས་ཅད་བྲི་བ་
དང་། ཡང་རང་ཉིད་གྲོགས་དང་བཅས་པས་ཁྲུས་དང་བྱུག་པ་ནས་གཟུང་སྟེ། བདུད་རྩི་མྱང་བའི་བར་དུ་བདག་ཉིད་ལ་ལྡན་པ་ཕུན་སུམ་ཚོགས་པ་སྔར་བཞིན་དུ་བྱ་ཞིང་། སྐུ་གཟུགས་ལ་སོགས་བྱི་དོར་བྱ་བ་ནས། ཤུན་ལྤགས་ལྔ་སྟེ། ཛམྦུ་ཀ་དང་། ཀ་ཏ་དང་། བིལ་བ་དང་། ཨ་མྲ་དང་།

པི་ཙུ་པུ་རི་ལས་བྱུང་བའི་དྲིལ་ཕྱིས་བྱ་བ་དང་། དེ་བཞིན་དུ་སྔར་གྱི་ཚིགས་སུ་བཅད་པ་དང་། དེ་རིང་རབ་གནས་བགྱིད་པར་འཚལ། །ཞེས་པ་བཅུག་ལ། དེང་བདག་འདུས་པའི་མཆོག་ཡིན་ནོ། །ཞེས་པའི་བར་དུའོ། །ཞེས་བརྗོད་དོ། །དེ་ནས་བ་བྱུང་རྣམ་པ་ལྔ་དང་ལྡན་པའི་བུམ་པའི་ཆུ་ལ།
ཨོཾ་བི་ཤུདྡྷེ་བཛྲ་ཀྲོ་དྷ་ཧཱུཾ་ཨཱཾ་བྷྲཱུཾ་ཛྲཱྀཾ་ཁཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པས་མངོན་པར་བཟླས་པའི་ཆུས་ཁྲུས་བྱ་ཞིང་། རོལ་མོ་དབྱངས་དང་བཅས་པས་འདི་སྐད་བརྗོད་པར་བྱའོ། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་
གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་སྭཱ་ཧཱ། གཞན་ཡང་སྤྱན་ལ་སོགས་པའི་སྔགས། ཨོཾ་རུ་རུ་སྥུ་རུ་ལ་སོགས་པ་ཡང་བརྗོད་ཅིང་། བཀྲ་ཤིས་ཀྱི་ཚིགས་སུ་བཅད་པ་གང་ཡང་རུང་བ་ཅིག་གིས་དབྱངས་སུ་བརྗོད་དོ། །དེ་ནས་རས་ཀྱིས་སྐུ་ཕྱི་བར་བྱ་སྟེ།
བདེ་གཤེགས་སྐུ་གཟུགས་དཔེ་དང་བྲལ་གྱིས་ཀྱང་། །འགྲོ་བའི་དོན་དུ་སྐུ་གཟུགས་ཅིར་ཡང་གདའ། །རིན་ཆེན་དབྱིག་ལྟར་ཉེས་པའི་སྐྱོན་བྲལ་ཞིང་། །འཇིག་རྟེན་བསྙེན་བཀུར་རི་མོའི་ཚུལ་གྱིས་ནི། །དྲི་མེད་རྒྱལ་བ་རྣམས་ཀྱིས་རབ་བསྔགས་པའི། །རས་མཆོག་འདི་ཡིས་རྒྱལ་བའི་སྐུ་ཕྱི་
བས། །ཉོན་མོངས་སྒྲིབ་པ་མ་ལུས་ཀུན་བྱང་ནས། །སྐུ་གསུམ་ངང་དུ་བདག་ཅག་གྲུབ་པར་ཤོག །ཨོཾ་སརྦ་ཏ་ཐཱ་ག་ཏ་བཛྲ་ཝ་སྟྲ་ཡེ་སྭཱ་ཧཱ། ཨོཾ་ཙ་ཏྲི་གནྡྷེ་སྭཱ་ཧཱ། ཨོཾ་བཛྲ་ཨ་བྷི་ཥིཉྩ་ནི་སྭཱ་ཧཱ། དེ་རབ་ཏུ་གནས་པའི་དངོས་གཞི་ཉིད་ཡིན་ཏེ། དེ་ཡང་སངས་རྒྱས་ཐམས་ཅད་གཅིག་བསྡུས་དང་། །
རབ་གནས་མཚན་ཉིད་བཟང་པོ་ཉིད། །ཅེས་པ་དང་། སྐུ་གཟུགས་སྙིང་གར་རབ་ཏུ་གཞུག །ཅེས་པ་དང་། བསྡུ་བའི་ཚིག་འདིས་ཤེས་པར་བྱ་སྟེ། ཏིང་འཛིན་ཡེ་ཤེས་བྱིན་བརླབས་དང་། །དབང་བསྐུར་བ་ཡི་རབ་གནས་བཟང་། །དེ་ལ་དཀྱིལ་འཁོར་གྱི་ཏིང་ངེ་འཛིན་ནི། སྐུ་གཟུགས་ས་བོན་
ཕྱག་མཚན་ནམ། །སྐད་ཅིག་སོགས་ཀྱིས་ལྷ་ཡི་སྐུ། །དཀྱིལ་འཁོར་ལྷ་རྣམས་ལུགས་བཞིན་བསྐྱེད། །སྙིང་གའི་ས་བོན་འོད་ཟེར་གྱིས། །ནམ་མཁར་བསྡུས་ལ་མཆོད་ཅིང་བསྟིམ། །དེ་ནས་བྱིན་གྱིས་བརླབ་པ་ནི། །སྐྱེ་མཆེད་དྲུག་དང་སྐུ་གསུང་ཐུགས། །བྱིན་གྱིས་བརླབ་པ་སྔར་

བཞིན་བྱ། །དེ་ནས་དབང་བསྐུར་བ་ནི། ཆུ་དང་དབུ་རྒྱན་ནས་གཟུང་སྟེ། །རྗེས་སུ་གནང་བའི་བར་དུ་སྦྱིན། །གཞན་ཡང་རིན་ཆེན་བདུན་ལ་སོགས། །ཅི་རིགས་པར་ཡང་དབང་བསྐུར་བྱ། །མངའ་དབུལ་བ་ཡང་དབང་དེར་གཏོགས། །དེ་ནས་སྤྱན་དབྱེ་བའི་ཆོ་ག་བྱ་སྟེ།
གསེར་གྱི་ཐུར་མ་ལ་སོགས་པ་མར་དང་སྦྲང་རྩི་ལ་བསྲེས་ཏེ། སྤྱན་དབྱེ་ཞིང་འདི་སྐད་ཅེས་བརྗོད་དོ། །ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །ཁྱོད་ཀྱིས་ཀྱང་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཞེས་པ་དང་། ཨོཾ་སརྦ་ཏ་ཐཱ་ག་ཏ་ཙཀྵུ་
ཙཀྵུ་བི་ཤོ་དྷ་ཡ་སྭཱ་ཧཱ། ཁྱད་པར་དུ་སྤྱན་དབྱེ་བ་ནི་སློབ་མ་ལ་ཡེ་ཤེས་འབེབས་པ་ལྟར་འདིར་བྱའོ། །དེ་ནས་མདའ་དབུལ་བར་བྱ་སྟེ། དང་པོར་གདུགས་དང་རྒྱལ་མཚན་དབུལ་བར་བྱ་སྟེ། འདི་སྐད་དོ། །བདེ་བར་གཤེགས་པའི་སྐུ་གསུང་ཐུགས་རྣམ་པར་དག་པའི་གཟུགས་བརྙན་ལ་
གདུགས་ཕུལ་བས་བདེ་བར་གཤེགས་པའི་སྐུ་གསུང་ཐུགས་རྣམ་པར་དག་པ་ནི་ཞལ་དྲོ་ཞིང་བྱིན་ཆེ། འགྲོ་བ་སྐྱོབ་པའི་ནུས་པ་དང་ལྡན་པ་ཡོན་གྱི་བདག་པོ་ལ་སོགས་པ་ཁམས་གསུམ་གྱི་སེམས་ཅན་ཐམས་ཅད་ཉོན་མོངས་པ་དང་། ཉེ་བའི་ཉོན་མོངས་པ་ཐམས་ཅད་ཀྱིས་གདུངས་པ་
སེལ་ཞིང་འགྲོ་བ་སྐྱོབ་པའི་སྐལ་བ་དང་ལྡན་པར་གྱུར་ཅིག །ཇི་ལྟར་སྔོན་གྱི་སངས་རྒྱས་ལ། །གདུགས་མཛེས་གསེར་གྱི་ཡུ་བར་ལྡན། །ཕུལ་བ་དེ་བཞིན་བདག་འབུལ་གྱི། །ཅི་བདེ་བར་ནི་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་ཚ་ཏྲཾ་ཤྲཱི་ས་མ་ཡེ་ཧཱུཾ་ཞེས་གསུམ་མམ་བདུན་གྱི་
བར་དུ་བརྗོད་དོ། །དེ་བཞིན་དུ་གཞན་དག་ལ་ཡང་བསྒྲེ་ཞིང་སྦྱར་བར་བྱའོ། །རྒྱལ་མཚན་ཡང་སྔར་བཞིན་མཛད་ནས། ཇི་ལྟར་སྔོན་གྱི་སངས་རྒྱས་ལ། །བར་ཆོད་བདུད་ལས་རྒྱལ་བའི་རྟགས། །ཕུལ་བ་དེ་བཞིན་བདག་འབུལ་གྱི། །ཅི་བདེ་བར་ནི་བཞེས་སུ་གསོལ། །ཨོཾ་
སརྦ་ཏ་ཐཱ་ག་ཏ་དྷྭ་ཛ་ཀེ་ཏུ་ཤྲཱི་ས་མ་ཡེ་ཧཱུཾ། དེ་ནས་འཕན་དང་བ་དན་དབུལ་ཏེ། །ཇི་ལྟར་སྔོན་གྱི་སངས་རྒྱས་ལ། །སྙན་པའི་བ་དན་ཕྱོགས་བཅུར་སྒྲོགས། །ཕུལ་བ་དེ་བཞིན་བདག་འབུལ་གྱི། །ཅི་བདེ་བར་ནི་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་པ་ཏཱ་ཀ་ཤྲཱི་ས་མ་ཡེ་ཧཱུཾ།

དེ་བཞིན་བླ་རེ་ལ་སོགས་པ་ལ་ཡང་ངོ་། །ཡང་ཁྲུས་བྱས་ཏེ་མཆོད་པ་རྣམ་པ་ལྔ་འབུལ་ལོ། །དེ་ནས་ཞལ་ཟས་འབུལ་ལོ། །དེ་ནས་མཆོད་པའི་ཚིག་སྔར་བཞིན་སྦྱར་ལ། སེམས་ཅན་ཐམས་ཅད་བཀྲེས་སྐོམ་དང་། མུ་གེ་ལ་སོགས་པའི་བསྐལ་པ་ལས་ཐར་བར་གྱུར་ཅིག །ཨོཾ་སརྦ་ཏ་ཐཱ་
ག་ཏ་ཨ་ཧ་ར་བྲུཾ་ཛ་ཤྲཱི་ས་མ་ཡེ་ཧཱུཾ། དེ་ནས་ན་བཟའ་དབུལ་ཏེ། སེམས་ཅན་ཐམས་ཅད་གོས་དང་བགོ་བ་ལ་སོགས་པའི་སྡུག་བསྔལ་དང་བྲལ་ཏེ། ལྷའི་ན་བཟའ་པཉྩ་ལི་ཀ་རེག་ན་བདེ་བ་གྱོན་པའི་སྐལ་བ་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཝསྟྲ་ནཱ་ནཱ་ཤྲཱི་ས་མ་ཡེ་ཧཱུཾ། དེ་ནས་ཞལ་བསྲོ་
བྱ་སྟེ། དེ་ཡང་སྦྱིན་སྲེག་གིས་བྱའོ། །སློབ་མ་ཤིས་པར་བྱ་ཕྱིར་དང་། །ལྷ་རྣམས་ཚིམ་པའི་དོན་དུ་སྟེ། །དེ་ཡང་སྔར་བཞིན་ཆོ་ག་ལྟར། །དེ་ནས་ཁྱད་པར་དུ་ཡང་ནང་གི་སྐུ་གཟུགས་ལ་སོགས་ཀྱི་མཆོད་པ་དང་ཙཱརུའི་སྟོན་མོ་ཡང་བྱའོ། །དེའི་རྗེས་ལ་མཆོད་གནས་སུ་གཏད་པ་ནི། །ཁྱོད་
ཀྱིས་ང་ལ་གསོལ་བཏབ་པ། །སྐུ་གཟུགས་དག་ནི་ཁྱད་པར་དུ། །ཇི་སྐད་གསུངས་བཞིན་རབ་གནས་པ། །དེ་ནི་ངས་བྱས་བྱེད་དུ་བཅུག །ཁྱེད་ཀྱིས་དེ་ནི་ཀུན་རྫོགས་པར། །ཅི་བདེ་བར་ནི་མཆོད་པར་གྱིས། །དེ་ནས་སྲུང་མ་བསྒོ་བ་ནི། །བདག་ཉིད་ལྷག་པའི་ལྷར་སྦྱོར་བས། །ནག་
པོ་ཆེན་པོ་དགུག་པ་དང་། །གཞུག་དང་བཅིང་དང་དབང་དུ་བྱ། །དེ་ལ་མཆོད་དང་གཏོར་མ་སྦྱིན། །དེ་ལ་བཀའ་ལུང་བསྒོ་བྱ་བ། །ང་ཡིས་རབ་གནས་བྱས་པ་ཡི། །གཙུག་ལག་ཁང་ལ་སོགས་པ་འདི། །ཇི་སྲིད་གནས་པ་དེ་སྲིད་དུ། །བསྲུང་ཞིང་ཁྱོད་ཀྱིས་ལེགས་པར་སྐྱོངས། །
དཀོན་མཆོག་འཕགས་པའི་དགེ་འདུན་གྱི། །བཀའ་སྩལ་ཁྱོད་ཀྱིས་བསྲུང་བ་དང་། །སྟོན་པའི་བཀའ་དང་སློབ་དཔོན་གྱི། །བཀའ་ལུང་བསྒོ་བ་ལེགས་པར་སྲུངས། །དེ་ནས་བཟོད་གསོལ་བྱ་སྟེ། རྫོགས་སངས་རྒྱས་དང་ལྷ་རྣམས་དང་། །དེ་སྲས་ཚངས་སོགས་ལྷ་ཚོགས་ཀུན། །
གང་ཞིག་ཆོ་ག་བྱས་པ་ནི། །ནོངས་གྱུར་དེ་དག་བཟོད་མཛད་རིགས། །དེ་ནས་གཤེགས་གསོལ་བྱེད་འདོད་ན། །འདི་ཙམ་བརྗོད་པར་བྱ་བ་སྟེ། །སྦྱིན་བདག་རྣམས་ལ་ཞི་བ་དང་། །བདེ་ལེགས་ཆེན་པོ་ཀུན་མཛད་པར། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་

འགྲོ་བའི་དོན་ལ་གཤེགས། །དེ་ནས་བྱིན་བརླབས་བརྟན་པ་བརྗོད། །གང་འདི་སྐུ་གཟུགས་བསྐལ་པའམ། །བསྐལ་པ་བརྒྱ་ལས་ལྷག་གནས་ཤིང་། །ས་དང་མེ་དང་ཆུ་དང་ནི། །རླུང་ལས་ལྷ་རྣམས་ཀུན་གྱིས་སྲུངས། །སློབ་དཔོན་སློབ་མར་བཅས་པ་དང་། །བུ་དང་ཚ་
བོ་རྣམས་འཕེལ་ཏེ། །རབ་དགའ་ཡིད་བདེར་གྱུར་ནས་ནི། །རང་གནས་བཟང་པོར་རྟག་ཏུ་བཞུགས། །རབ་གནས་སྤྱི་ཡི་ཤེས་བྱས་ན། །གལ་ཏེ་གླེགས་བམ་རས་རིས་སོགས། །ཡིན་ན་གཞན་ལས་གསུངས་པ་བཞིན། །ཡིག་འབྲུར་སྒྱུར་དང་ཁྲུས་ལ་སོགས། །སྔགས་ལ་སོགས་པ་
ཅི་རིགས་བྱ། །གཞུང་མངས་དོགས་ནས་འདིར་མ་བརྗོད། །དེ་རྗེས་གཞུང་རྫོགས་ཚིགས་བཅད་བརྗོད། །གང་གིས་འདི་རྩོམ་པ་ཡང་བདག་མིང་ནི། །མི་མཐུན་ཕྱོགས་ཀྱིས་ཐུབ་དཀའ་མི་བསྐྱོད་ལ། །མཐའ་ན་རྡོ་རྗེ་ལྡན་པས་བཙས་པའི་མིང་། །མ་བཙས་གྲགས་པས་བསོད་ནམས་ཀུན་
ལ་ཁྱབ། །མཐའ་ན་རྒྱལ་མཚན་ལྡན་པས་སྙན་པའི་གསུང་། །གང་བརྩམས་གཞུང་དེ་རབ་ཏུ་གྲུབ་པ་ཡང་། །སྒྲུབ་པ་པོ་ཡི་ལག་ཏུ་བྱ་བ་ཡང་། །མཐའ་རུ་བླང་བ་ལྡན་པས་དོན་ཀུན་རྫོགས། །ཚིགས་བཅད་རྐྱང་བ་རྣམས་སྤྲས་རིམ་པ་ལ། །མཐའ་ན་ཞེས་བྱ་ལྡན་པས་གྲགས་ཆེན་པོ། །
གང་ལྟར་དོན་དེ་རབ་ཏུ་རྫོགས་པ་ཡང་། །མངོན་རྟོགས་སྒྲུབ་ཐབས་དབང་དང་རབ་གནས་ཡིན། །སྒྲུབ་ཐབས་དང་མཐུན་བླ་མའི་མངོན་རྟོགས་ལ། །མཐའ་རུ་སྒྲུབ་པ་དང་ལྡན་དཀྱིལ་འཁོར་ཆོ་ག་རྫོགས། །དྲི་མ་དག་ཅིང་ནུས་འཇོག་དབང་ལ་ཡང་། །མཐའ་རུ་རབ་གནས་ལྡན་པས་གཞན་དོན་
རྫོགས། །གང་ཕྱིར་སྦྱིན་པའི་འབྲས་བུ་འགྲུབ་པ་ཡང་། །ཕྲིན་ལས་དངོས་གྲུབ་རང་གཞན་དོན་དུ་ཡིན། །དེ་ལས་ཅུང་ཞིག་གོ་བཟློག་འདི་ཤེས་བྱ། །བསྟེན་པ་མངོན་རྟོགས་རིམ་པ་རང་དོན་ལས། །མཐའ་ནས་གཞན་དོན་ལྡན་པས་སྒྲུབ་པའི་དོན། །དབང་བསྐུར་བ་ལས་འབྱུང་བའི་དངོས་གྲུབ་
ལ། །ཕྲིན་ལས་ལྡན་པས་རབ་གནས་བཟང་པོ་ཡིན། །བོད་ཀྱི་ལོ་ཙཱ་བསོད་ནམས་རྒྱལ་མཚན་གྱིས། །གཞུང་དག་ལས་ནི་གསུངས་པ་ཡིན་མོད་ཀྱང་། །བླ་མས་རང་ལ་རང་གིས་གཞན་ལ་སྟེ། །མཛད་པའི་རིམ་པ་བསྡུས་ཤིང་ལེགས་པར་བསྒྱུར། །རྫོགས་སོ།། །།

༄༅༅། །རྒྱ་གར་སྐད་དུ། བ་ལིཾ་བི་དྷིཿ བོད་སྐད་དུ། གཏོར་མའི་ཆོ་ག །བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བགེགས་རྣམས་འཚེ་བ་ཞི་བྱ་དང་། །ལས་རྣམས་ཐམས་ཅད་བསྒྲུབ་པའི་ཕྱིར། །འབྱུང་པོ་ཐམས་ཅད་གཏོར་མ་
དག །སྦྱིན་པའི་ཆོ་ག་ཡང་དག་བྲི། །དེ་ལ་དང་པོ་རྣལ་འབྱོར་པ་སྟན་བདེ་བ་ལ་འདུག་སྟེ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བྱ་བའི་སྔགས་འདི་ལན་གསུམ་དུ་ཡོངས་སུ་བཟླས་ཏེ། ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ལ་ལྷག་པར་མོས་པར་བྱའོ། །
ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བའི་སྔགས་བརྗོད་དོ། །ཁམས་གསུམ་པོ་ཐོག་མ་ནས་མ་སྐྱེས་ཤིང་རང་བཞིན་གྱིས་འོད་གསལ་བ་རྣམ་པར་མི་རྟོག་པ། གཉིས་སུ་མེད་པའི་དེ་བཞིན་ཉིད་ཀྱི་རང་གི་སེམས་ཀྱི་སྣང་བ་ཙམ་དུ་དམིགས་ལ། ནམ་མཁའི་ཁམས་རྒྱ་ཆེན་པོའི་
དབུས་སུ། ཆོས་འབྱུང་གི་ཕྱག་རྒྱ་གྱེན་དུ་གནས་པར་རྣམ་པར་བསྒོམ་ཞིང་། དེའི་དབུས་ན་སྣ་ཚོགས་པདྨ་རྒྱ་ཆེན་པོ་དང་། ཟླ་བ་ལ་སོགས་པའི་དཀྱིལ་འཁོར་གྱི་སྟེང་དུ་རང་གི་ཡི་དམ་གྱི་ལྷའི་རྣལ་འབྱོར་བསྐྱེད་པར་བྱའོ། །དེའི་འོག་ཏུ་སྙིང་གའི་ས་བོན་ལས་བྱུང་བའི་འོད་ཟེར་གྱིས། འགྲོ་བ་
མ་ལུས་པ་སྣང་བར་བྱས་པ་སྔོན་དུ་འགྲོ་བ་ཅན་གྱིས་སྟོང་གསུམ་གྱི་སྟོང་ཆེན་པོའི་བདག་པོ་གཟུགས་ན་སྤྱོད་པ་ཚངས་པ་ལ་སོགས་པ་དང་། དབང་བསྒྱུར་གྱི་ལྷའི་རྒྱལ་པོ་ལ་སོགས་པ་དང་། ཟླ་བ་དང་ཉི་མ་དང་ཉེ་དབང་ལ་སོགས་འཇིག་རྟེན་སྐྱོང་བ་ཐམས་ཅད་དང་། མི་དང་མི་མ་ཡིན་པ་
ཐམས་ཅད་དང་། ཐགས་བཟངས་རིས་དང་སའི་ལྷ་ལ་སོགས་པ་དང་། ཀླུ་ལ་སོགས་པ་སེམས་ཅན་ཡང་དག་པར་དྲངས་ཏེ། ཆོས་འབྱུང་གི་དབུས་སུ་རྣམ་པར་བསམ་མོ། །དེ་ལ་དང་པོར་སྟེང་གི་ཕྱོགས་ཀྱི། གཟུགས་ཀྱི་ཁམས་ན་གནས་པའི་ལྷ། །རལ་པ་ཅོད་པན་དག་དང་དཀར། །ཏིང་ངེ་འཛིན་
གྱི་ཕྱག་རྒྱ་དང་། །འོད་ཟེར་དཀར་པོ་ཕྲེང་བར་ལྡན། །འདོད་པའི་ཁམས་ན་གནས་པ་ཡི། །འདོད་པའི་ཁམས་ཀྱི་དབང་ཕྱུག་སོགས། །ལྷ་རྣམས་རིན་ཆེན་ཅོད་པན་འཆང་། །སྣ་ཚོགས་རྒྱན་དང་འོད་ལྡན་པའོ། །སྟེང་གི་ཉི་ཟླ་སོགས་དེ་བཞིན། །རང་རང་ཕྱོགས་ཀྱི་ཕྱོགས་བདག་པོ། །

རང་རང་མདོག་དང་ཕྱག་མཚན་སོགས། །ལྡན་པ་གོ་རིམས་བཞིན་དུ་བསྒོམ། །ཐགས་བཟངས་རིས་དང་ས་ལ་སོགས། །ཀླུ་ཡི་བདག་པོ་བརྒྱད་རྣམས་ཀྱང་། །རང་གི་ཡེ་ཤེས་སེམས་སྙིང་གའི། །ས་བོན་ལས་བྱུང་རིགས་གསུམ་གྱིས། །ཡེ་ཤེས་རྣམ་
པར་སྣང་མཛད་སོགས། །གཟུགས་སུ་རིམ་གྱིས་བསྒྲུབ་པར་བྱ། །དེ་ལ་ད་ནི་སེམས་ཅན་ཐམས་ཅད་ཡོངས་སུ་སྦྱོང་བར་བྱེད་པའི་ཆོ་ག་བསྟན་པར་བྱ་སྟེ། རང་གིས་ཡེ་ཤེས་སེམས་དཔའི་ཐུགས་ཀའི་ས་བོན་ལས་ཟླ་བ་བྱེ་བའི་འོད་དང་མཚུངས་པའི་ཡི་གེ་ཨོཾ་མདོག་དཀར་པོ་ཟླ་བའི་དཀྱིལ་
འཁོར་ལ་གནས་པ། འོད་ཀུན་ནས་འཕྲོ་བ་མགོ་བོའི་སྟེང་དུ་རྣམ་པར་བསམས་ལ། དེའི་འོད་ཟེར་གྱིས་ཚངས་པ་ལ་སོགས་པ་གཟུགས་ན་སྤྱོད་པའི་ལྷ་རྣམས་རྣམ་པར་སྣང་མཛད་ཀྱི་རྣམ་པར་བསྒྲུབ་པར་བྱའོ། །དེའི་འོག་ཏུ་རང་གི་ཡེ་ཤེས་སེམས་དཔའི་ཐུགས་གའི་ས་བོན་དེ་ཉིད་ལས་རྣལ་
འབྱོར་པའི་ཡི་གེ་ཧཱུཾ་ནོར་བུ་མཐོན་ཀའི་མདོག་ཅན་ལ་ནོར་བུ་མཐོན་ཀའི་འོད་འཕྲོ་བ། ཟླ་བའི་དཀྱིལ་འཁོར་དབུས་གནས་པའི། །དེ་ལ་འོད་འཕྲོས་རྣམ་བསམས་ཏེ། །འོད་ཟེར་སྤྲིན་དེས་བཀུག་ནས་ནི། །འདོད་ན་སྤྱོད་པའི་ལྷ་རྣམས་དང་། །འཇིག་རྟེན་སྐྱོང་བ་སྦྱང་བྱས་ཏེ། །
སངས་རྒྱས་མི་བསྐྱོད་གཟུགས་དག་ཏུ། །གྲུབ་པར་ཡོངས་སུ་བསྒོམ་པར་བྱ། །དེ་མ་ཐག་ཏུ་རང་གིས་ཡེ་ཤེས་སེམས་དཔའི་ཐུགས་ཀ་དེ་ཉིད་ལས་ཡི་གེ་ཨ་དམར་པོ་འོད་ཟེར་དམར་པོའི་ཚོགས་རབ་ཏུ་འཕྲོ་བ་ཟླ་བའི་དཀྱིལ་འཁོར་ལ་གནས་པ། ཀུན་ནས་སྤྲོས་པ་དེའི་འོད་ཟེར་དམར་པོ་སྤྲོས་པས་
ཐགས་བཟངས་རིས་དང་། སའི་ལྷ་དང་། ཀླུའི་རྒྱལ་པོ་བརྒྱད་ཡོངས་སུ་སྦྱངས་ཏེ། དེ་བཞིན་གཤེགས་པ་འོད་དཔག་ཏུ་མེད་པའི་རྣམ་པར་བསྒྲུབ་པར་བྱའོ། །འཇིག་རྟེན་སྐྱོང་བ་ལ་སོགས་པ་འཁོར་དང་བཅས་པ་དེ་དག་ཐམས་ཅད་རང་གི་རིགས་ཀྱི་དེ་བཞིན་གཤེགས་པའི་གཟུགས་
སུ་བསྒྲུབ་པ་དེ་ལ་གཟུགས་ན་སྤྱོད་པ་རྣམས་ནི་དེ་བཞིན་གཤེགས་པ་རྣམ་པར་སྣང་མཛད་ཀྱི་རིགས་སོ། །འདོད་པ་ན་སྤྱོད་པའི་ལྷ་རྣམས་དང་། འཇིག་རྟེན་རྣམས་ནི་མི་བསྐྱོད་པའི་རིགས་སོ། །ཐགས་བཟངས་རིས་ལ་སོགས་པ་རྣམས་ནི་འོད་དཔག་ཏུ་མེད་པའི་རིགས་སོ། །དེ་བས་ན་

གཟུགས་ན་སྤྱོད་པ་ལ་སོགས་པ་ནས་ཀླུའི་རྒྱལ་པོ་བརྒྱད་ཀྱི་བར་དེ་དག་རང་རང་གི་རིགས་ཀྱི་དེ་བཞིན་གཤེགས་པའི་གཟུགས་སུ་བསྒྲུབས་ལ། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བས་དབང་བསྐུར་ཏེ། མགོ་བོ་ལ་རྡོ་རྗེ་སེམས་དཔའི་ཕྱག་རྒྱར་བྱས་ལ། དེ་དག་གིས་ལུས་དང་ངག་
དང་ཡིད་བྱིན་གྱིས་བརླབ་པར་བྱའོ། །དེ་ནས་དེ་རྣམས་ཀྱི་མདུན་དུ་བཟའ་བ་དང་བཅའ་བ་ལ་སོགས་པའི་དངོས་པོ་ཅི་འབྱོར་བ་བཙལ་ལ། དང་པོར་ཡཾ་ཡོངས་སུ་གྱུར་པའི་རླུང་གི་དཀྱིལ་འཁོར་གཞུའི་དབྱིབས་ལྟ་བུ་རྒྱལ་མཚན་གྱིས་མཚན་པ་རྣམ་པར་བསམས་ལ། དེའི་སྟེང་དུ་རཾ་དམར་པོ་
ཡོངས་སུ་གྱུར་པའི་མེའི་དཀྱིལ་འཁོར་ཟུར་གསུམ་རབ་ཏུ་འབར་བའི་གཟུགས་ཅན་དང་། དེའི་སྟེང་དུ་ཡི་གེ་ཨ་ཡོངས་སུ་གྱུར་པའི་ཀ་པཱ་ལ་ཡོངས་སུ་བསྒོམས་ལ། ཀ་པཱ་ལ་དེའི་དབུས་སུ་བདུད་རྩི་ལྔ། བྷྲཱུཾ་ཨཱཾ་ཛྲཱྀཾ་ཁཾ་ཧཱུཾ་ཞེས་དེ་བཞིན་གཤེགས་པ་ལྔའི་ས་བོན་བྱིན་གྱིས་བརླབ་པར་བསམས་
ལ། དེའི་འོག་ཏུ་སྦར་བ་དང་དྲོས་པ་ལ་སོགས་པའི་ཚོགས་ཡང་དག་པར་བསྒྲུབས་ལ། ཡི་གེ་ཨོཾ་གྱིས་བྱིན་གྱིས་བརླབས་པར་བལྟའོ། །དེའི་སྟེང་དུ་ཡི་གེ་ཧཱུཾ་ལས་གྲུབ་པའི་རྡོ་རྗེ་བསམས་ལ། དེ་ནས་ཡི་གེ་ཨོཾ་གྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་
དྲངས་ནས། བདུད་རྩི་ལྔ་པོ་དེའི་སྟེང་དུ་རབ་ཏུ་བསྟིམས་ལ། དེ་མ་ཐག་ཏུ་འབར་བ་དང་དྲོས་པ་དང་། ཡི་གེ་ཨོཾ་དང་རྡོ་རྗེ་དེ་ཉིད་དུ་ཞུ་བར་གྱུར་པར་བསམས་ལ། ཨརྒྷཾ་ལ་སོགས་པ་འབུལ་ཞིང་། དེ་ལྟར་བསྒྲུབས་པའི་བདུད་རྩི་དེ་བཞིན་གཤེགས་པའི་ཚོགས་ཐམས་ཅད་ཀྱི་ལྗགས་རྡོ་རྗེ་ལས་འཕྲོས་
པའི་འོད་ཟེར་གྱི་སྦུ་གུས་རབ་ཏུ་དྲངས་པས་ཚིམ་པར་བྱའོ། །དེ་ནས་རྡོ་རྗེ་དང་དྲིལ་བུ་ཡང་དག་པར་བླངས་ཏེ། འབྱུང་པོ་ཐམས་ཅད་པའི་གཏོར་མའི་སྔགས་ཀྱིས་དངོས་པོ་དེ་དག་ལན་བདུན་གྱི་བར་དུ་བྱིན་གྱིས་བརླབས་ལ། དེ་ནས་དེ་རྣམས་ལ་དབུལ་ཏེ། རྡོ་རྗེ་མྱུར་དུ་གསོར་བྱས་ནས། །རྡོ་རྗེ་སྦྱོར་
ནས་ཀུན་བརྟགས་ཀྱི། །རི་བོ་ཐམས་ཅད་ངེས་བསལ་བྱ། །དེ་ནས་དྲིལ་བུ་གསིལ་བྱས་ལ། །རྒྱལ་བས་སྟོང་ཉིད་རྟོགས་འགྱུར་བའི། །མཆོག་ཏུ་དགྱེས་པའི་སྒྲ་ཡིས་ནི། །ཚིགས་བཅད་འདི་ནི་ལན་གསུམ་བརྗོད། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་

བཞིན་དག་པའི་སེམས་དཔའ་མཆོག །སྲིད་པའི་མཆོག་ནི་སྒྲུབ་པར་བྱེད། །དེ་ལ་གཏོར་མ་བྱིན་གྱིས་བརླབ་པའི་སྔགས་ནི་འདི་ཡིན་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱཏ། ཨོཾ་ཨཱཿཧཱུཾ་ཕཊ་སྭཱ་ཧཱ། དེ་ཁོ་ན་ཉིད་ཀྱི་སྔགས་འདི་ལན་གསུམ་མམ་བདུན་བརྗོད་དོ། །
རྫོགས་པའི་བྱང་ཆུབ་སེམས་དག་ནི། །རྗེས་དྲན་གཏོར་མ་བྱིན་གྱིས་བརླབས། །ཇི་ལྟར་བདུད་རྩི་རོ་དག་གིས། །དེ་ལྟར་ཐམས་ཅད་ཚིམ་པར་བྱ། །ཡང་དག་འཐོར་འཐུང་བྱིན་ནས་ནི། །བཟོད་བྱ་གཤེགས་སུ་གསོལ་བར་བྱ། །དེ་ལ་གཤེགས་སུ་གསོལ་བའི་སྔགས་ནི་འདི་ཡིན་ཏེ། ཨོཾ་
ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་གཤེགས་པར་མཛད་དུ་གསོལ། །ཨོཾ་ཨཱཿཧཱུཾ་མུཿ། སྐྱེ་བ་མེད་དང་འགག་པ་མེད། །ཐོག་མ་ནས་ནི་རང་བཞིན་དག །འགྲོ་ཀུན་འདི་དག་མཐོང་ནས་ནི། །གཤེགས་
ཆེན་འདི་ནི་བྱ་བ་ཡིན། །གཏོར་སྦྱིན་ཆོ་ག་ལེགས་བྲིས་ནས། །བདག་གིས་བསོད་ནམས་གང་གཉེར་བསགས། །དེས་ནི་འགྲོ་བ་འདི་དག་ཀུན། །རྫོགས་པའི་བྱང་ཆུབ་སྣོད་འགྱུར་ཤོག །བྷཾ་ག་ལར་སྐྱེས་དགེ་སློང་ནི། །མར་མེ་མཛད་དཔལ་ཡེ་ཤེས་ཀྱིས། །བླ་མ་མཉེས་ལས་ཐོབ་གྱུར་པ། །
གཏོར་མ་འདི་ཉིད་རབ་ཏུ་བཤད། །འབྱུང་པོ་ཐམས་ཅད་པའི་གཏོར་མའི་ཆོ་ག །སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་ཧེ་བཛྲ་མཎྜལ་བི་དྷི་ནཱ་མ། བོད་སྐད་དུ། དཔལ་དགྱེས་པ་རྡོ་རྗེའི་དཀྱིལ་
འཁོར་གྱི་ཆོ་ག་ཞེས་བྱ་བ། དཔལ་དགྱེས་པའི་རྡོ་རྗེ་ལ་ཕྱག་འཚལ་ལོ། །བཅོམ་ལྡན་འདས་དགྱེས་མཛད་རྡོ་རྗེའི་བསྙེན་པ་འབུམ་དང་ཁྲི་སོང་བས། གནས་དབེན་པར་རིགས་ཅན་སྨིན་པར་བྱས་ཏེ། དེར་མཎྜལ་འདབ་བརྒྱད་དམར་པོ་རྡོ་རྗེས་བསྐོར་བ། ཁྱམས་དང་བཅས་པ་བྱས་ནས་མེ་ཏོག་གི་ཚོམ་
བུ་དགུ་དགོད་དོ། །བུམ་པ་གཉིས་ལ་རྫས་དང་། རྒྱན་ཆ་དང་ལྡན་པའི་དབུས་དང་བྱང་ཤར་དུ་བཀོད་ནས། དེ་ལ་བླ་རེ་དང་ཡོལ་བ་ལ་སོགས་པས་བརྒྱན་ནོ། །དཀྱིལ་འཁོར་གྱི་ཕྱོགས་བཞིར་མཆོད་པ་ལྔ་ཚན་བཞི་དང་། གཏོར་མ་ལྔ་དང་། ཚོགས་ཀྱི་ཡོ་བྱད་ཀྱིས་བསྐོར་བར་བྱའོ། །དེ་ནས་

རྡོ་རྗེ་སློབ་དཔོན་ཁྲུས་བྱས། སྟན་བདེ་བ་ལ་བསྐྱེད་རྫོགས་བསྒོམས་ནས། སྐད་ཅིག་གིས་བུམ་པ་སྟོང་པའི་ངང་ལས་བྷྲཱུཾ་ལས་གཞལ་ཡས་ཁང་གི་དབུས་སུ། པཾ་ལས་པདྨའི་སྡོང་པོའི་སྟེང་དུ། པདྨ་དམར་པོ་འདབ་བརྒྱད། དེའི་ལྟེ་བ་ལ་ཉི་མ་དང་བདུད་བཞིའི་རོའི་སྟེང་དུ་ཆོ་ག་ལྔའམ།
གསུམ་མམ། སྐད་ཅིག་གིས་ཧེ་རུ་ཀ་ཞལ་བརྒྱད་ཕྱག་བཅུ་དྲུག་པའམ། ཞལ་གཅིག་ཕྱག་གཉིས་པ་ཡུམ་དང་བཅས་པ་བསྐྱེད། པད་འདབ་བརྒྱད་ལ་ཨ་ལས་བདག་མེད་མ་ཞལ་གཅིག་ཕྱག་གཉིས་པ་བརྒྱད་བསྐྱེད་དོ། །དེ་ནས་རང་གི་ཧཱུཾ་གི་འོད་ཀྱིས་ཡེ་ཤེས་པ་སྤྱན་དྲངས་ལ། མཆོད་བསྟོད་
དང་ཡབ་ཡུམ་གྱི་སྔགས་བཞི་ལ་བསྙེན་པ་ཅི་འགྲུབ་བྱས་ནས་ཡང་མཆོད་དེ། ལྷ་རྣམས་བདུད་རྩིར་བཞུའོ། །ལས་བུམ་དུ་བདུད་རྩི་འཁྱིལ་པ་བསྐྱེད་ནས། བསྙེན་པ་བྱས་ལ་དེས་སློབ་མ་ལ་ཁྲུས་བྱའོ། །དེ་ནས་སློབ་མ་གྲལ་ལ་འཁོད་པ་ལ་སྐྱབས་འགྲོ་སེམས་བསྐྱེད། གསོལ་བ་གདབ་པ།
གནང་བ་སྦྱིན་པ་རྟོག་པ་བསྡུ་བ། ཡན་ལག་ལྔ་བྱ་བ། སྡོམ་པ་གཟུང་བ་དང་། དམ་པ་བསྒྲག་པ་རྣམས་གཞུང་བཞིན་བྱས་ལ་ཡེ་ཤེས་དབབ་པར་བྱའོ། །དེ་ནས་བླ་མ་ལ་དབང་བསྐུར་ཞུ་བའི་གསོལ་བ་གདབ་པ་ནི། ཧེ་རུ་ཀ་དཔལ་དབང་བསྐུར་བ། །འགྲོ་སྐྱོབ་ཕྱིར་ན་གཟི་བརྗིད་ཅན། །དེ་ལྟར་
ཡོན་ཏན་འབྱུང་གནས་རྫོགས། །དེ་བཞིན་བདག་ལ་དེང་གསོལ་ཅིག །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཅེས་གསོལ་བ་བཏབ་པ་དང་། དཀྱིལ་འཁོར་དང་ནམ་མཁའི་ལྷ་
ཚོགས་ཀྱི་ཐུགས་ཀ་ནས་ལྷ་མོ་བདུད་རྩིའི་བུམ་ཆུ་ཐོགས་པ་དང་། གསང་བའི་ཆུ་རྒྱུན་གྱིས་དབང་བསྐུར་བས། ལུས་ཀྱི་སྡིག་སྒྲིབ་དག་པར་བསམས་ནས། དབང་བསྐུར་རྡོ་རྗེ་ཆེན་པོ་ལ། །ཁམས་གསུམ་ཀུན་གྱིས་ཕྱག་བྱས་པའི། །སངས་རྒྱས་ཀུན་གྱི་གསང་གསུམ་ལས། །རབ་ཏུ་
བྱུང་བས་སྦྱིན་པར་བྱ། །ཞེས་བརྗོད་པས་བུམ་དབང་ཐོབ་པར་བསམ། དེ་བཞིན་མགྲིན་པར་གསང་དབང་། སྙིང་གར་ཤེས་རབ་ཡེ་ཤེས། ལྟེ་བར་དབང་བཞི་པའོ། །གཞན་དོན་འབའ་ཞིག་གི་དབང་ངོ་། །དེ་ནས་རང་གཞན་རྣམས་ལ་རྒྱུན་དུ་དབང་བཞི་བསྐུར་བ་བཤད་པར་བྱ་སྟེ།

རང་གི་སྤྱི་བོར་པཾ་ལས་གྱུར་པའི་པདྨའི་སྡོང་པོའི་སྟེང་དུ། པདྨ་དམར་པོ་འདབ་བརྒྱད་ཀྱི་ལྟེ་བར་ཉི་མ་དང་། རོའི་སྟེང་དུ་ཆོ་ག་གསུམ་མམ། སྐད་ཅིག་ལ་ཧེ་བཛྲ་ཡུམ་མེད་ཅིག་བསམ། པདྨ་འདབ་བརྒྱད་ལ་ཉི་མ་དང་རོའི་སྟེང་དུ། ཨ་ལས་བདག་མེད་མ་བདེ་བ་རྒྱས་པ་
བརྒྱད་བསམ་མོ། །དེ་ནས་གོང་བཞིན་གསོལ་བ་བཏབ་ལ། སྤྱི་བོའི་ལྷ་ཚོགས་རྣམས་ལས་འོད་ཟེར་དཔག་ཏུ་མེད་པ་བྱུང་ནས། རང་གི་ལུས་ཕྱི་ནང་ཐམས་ཅད་འོད་ཀྱིས་ཁྱབ་པ་ལས། ལས་དང་ཉོན་མོངས་པའི་སྒྲིབ་པ་ཐམས་ཅད་སངས་དག་ནས། ལུས་འོད་ཀྱི་རང་བཞིན་དུ་བསམ།
དེས་བདག་ཉིད་ཧེ་བཛྲ་ཡུམ་མེད་པ་ཅིག་ཏུ་གྱུར་པ་ནི་བུམ་པའི་དབང་ངོ་། །དེ་ནས་ཡང་གསོལ་བ་བཏབ་པས། སྤྱི་བོའི་ལྷ་མོ་བདེ་བ་རྒྱས་ནས་འོད་དུ་འདུས་ཏེ། ཡབ་ལ་འཁྱུད་ནས་ཡབ་ཡུམ་གཉིས་སྦྱོར་བ་བྱས་པས། སྦྱོར་མཚམས་ནས་བྱང་སེམས་དཀར་དམར་གཉིས་བདེ་ཕྲི་ལི་ལི་བྱུང་
ནས་ལྕེ་ཐོག་ཏུ་བབས་པས། བདེ་བ་སྐྱེས་པ་ནི་གསང་བའི་དབང་ངོ་། །ལྷ་ཚོགས་ལ་ཡང་གསོལ་བ་བཏབ་པས། །གཙོ་བོའི་ཡུམ་ལས་བདག་མེད་མ་ཅིག་ཆད་ནས་བྱུང་སྟེ། རང་ཧེ་བཛྲ་ལ་འཁྱུད་ནས་བསྲུབ་པའི་སྦྱོར་བ་བྱས་པས། ལུས་ལ་ཟག་མེད་ཀྱི་བདེ་བ་ཆེན་པོ་སྐྱེས་པ་
ནི། ཤེས་རབ་ཡེ་ཤེས་ཀྱི་དབང་ངོ་། །དེ་ནས་སྤྱི་བོའི་ལྷ་ཚོགས་ལ་མཆོད་པས་ལྷ་གདན་དང་བཅས་པ་སྤྱི་བོར་ཐིམ་ནས། ལྷ་སྐུ་མངའ་བས་གསལ་བའི་གསལ་སྟོང་འཛིན་མེད་བདེ་བ་ཆེན་པོ་ལ་མཉམ་པར་གཞག་གོ། །མདོར་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་ངོ་
བོ་རྣམ་པར་དག་པ། སྤྲོས་པ་ཐམས་ཅད་དང་བྲལ་བ། རང་བཞིན་གྱིས་འོད་གསལ་བའི་ཕྱག་རྒྱ་ཆེན་པོ་འབའ་ཞིག་ལ་གཞག་པར་བྱའོ། །དེ་ནི་དབང་བཞི་པའོ། །དེ་ནས་ཡཾ་རཾ་ཀཾ །ཨ་ལས་བྱུང་བའི་ནང་དུ་སྣ་ཚོགས་རྫས་རྣམས་ཤ་ལྔ་བདུད་རྩི་ལྔར་ལེགས་པར་སྦྱངས་ནས། ལྷ་ཚོགས་
རྣམས་མཆོད་ཅིང་། རྣལ་འབྱོར་པ་རྣམས་རོལ་པར་བྱའོ། །གཏོར་མ་ལྔ་ནི་གོང་བཞིན་སྦྱངས་ལ་འབྱུང་པོ་ཐམས་ཅད་པའི་སྔགས་ཀྱིས་བླ་མ་དང་། དགྱེས་མཛད་དང་། ཆོས་སྐྱོང་དང་། གཞི་བདག་དང་། གནོད་བྱེད་རྣམས་ཚིམ་པར་བྱས་ནས། རྡོ་རྗེའི་གླུ་བླང་། ལྷ་ཚོགས་ལ་མཆོད་

བསྟོད་དང་བཤགས་པ་བྱས་ནས། བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །བཅོམ་ལྡན་དགྱེས་མཛད་རྡོ་རྗེ་མཉེས་བྱས་ཏེ། །ཕ་རོལ་ཕྱིན་དྲུག་ཡོངས་སུ་རྫོགས་བྱས་ནས། །འགྲོ་ཀུན་རྡོ་རྗེ་རྒྱལ་པོ་ཐོབ་པར་ཤོག །ཅེས་པ་བསྔོ་བ་བྱའོ། །དེ་ནས་སློབ་དཔོན་དང་ཐམས་
ཅད་མགྲིན་གཅིག་ཏུ་སྨོན་ལམ་གདབ་པ་ནི། རིགས་སུ་སྐྱེ་དང་དམ་ཚིག་ཅན། །མཉམ་མེད་ཀྱེ་ཡི་རྡོ་རྗེ་སྟོན། །བླ་མ་ལ་གུས་སྙིང་རྗེར་ལྡན། །སྐྱེ་ཞིང་སྐྱེ་བར་འགྱུར་བར་ཤོག །ལག་པ་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང་། བཙུན་མོའི་ཞུ་བ་མཉམ་ཟ་ཞིང་། །སྐྱེ་ཞིང་
སྐྱེ་བར་འགྱུར་བར་ཤོག །ཅེས་བརྗོད་དོ། །དེ་ནས་དཀྱིལ་འཁོར་ལ་བསྐོར་བ་བྱ་ཞིང་བཟོད་གསོལ་བྱ། བཀྲ་ཤིས་བརྗོད། ཡེ་ཤེས་པ་གཤེགས། དམ་ཚིག་པ་སྤྱི་བོར་བསྡུ། རྡོ་རྗེ་སློབ་དཔོན་ཡོན་གྱིས་མཉེས་པར་བྱའོ། །དཔལ་དགྱེས་མཛད་རྡོ་རྗེས་དབང་བསྐུར་བའི་ཆོ་ག་མདོར་
བསྡུས་པ། ཡེ་ཤེས་ཀྱི་མཁའ་འགྲོ་མ་ནི་གུ་མས་མཛད་པ་རྫོགས་སོ། །རྡོ་རྗེ་ཡེ་ཤེས་མཁའ་འགྲོ་མ་དེ་ཉིད་དང་། ལོ་ཙཱ་བ་རླན་དར་མ་བློ་གྲོས་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཧེ་བཛྲ་ཥོ་ཌ་ས་བྷུ་ཛ་སཱ་དྷ་ནི། བོད་སྐད་དུ། ཀྱེའི་རྡོ་རྗེ་ཕྱག་བཅུ་དྲུག་
པའི་སྒྲུབ་པའི་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྡོ་རྗེ་མཁའ་འགྲོ་ལ་ཕྱག་འཚལ་ལོ། །གང་ཞིག་གོམས་པའི་རོ་མྱོང་བ། །ཙམ་གྱིས་དངོས་པོར་འཛིན་པ་འདི། །རིང་དུ་སྤོང་ཞིང་ཡོན་ཏན་རྣམས། །འོད་གྱུར་ཧེ་རུ་ཀ་དེ་འདུད། །ཐོ་རངས་མལ་ནས་ལངས་
ལ། སྙིང་གར་རཾ་ལས་བྱུང་བའི་ཉི་མའི་དཀྱིལ་འཁོར་བལྟས་ལ། དེའི་འོད་ཀྱིས་བདག་ཉིད་དྲི་མ་མེད་པར་བྱས་ནས། ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་ལན་གསུམ་བརྗོད་ནས། གནས་དང་། བདག་ཉིད་དང་། རྣལ་འབྱོར་སྲུང་བ་བྱས་ལ། བསམ་གཏན་གྱི་ཁང་པར་ཞུགས་ནས།
སྟན་བདེ་བ་ལ་འདུག་སྟེ། ཨོཾ་བཛྲ་རེ་ཁེ་ཧྲི་ཞེས་བྱ་བས་མཎྜལ་བྱས་ལ། ཨོཾ་བཛྲ་མི་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ་ཞེས་བྱ་བས་བྱིན་གྱིས་བརླབས་པའི་དཀྱིལ་དུ། ཨོཾ་ཨཱཿཧཱུཾ། ཞེས་བྱ་བ་བརྗོད་ནས་མེ་ཏོག་གཞག་པར་བྱའོ། །ཤར་དུ་ནི་གཾ་གཽ་རི་ན་མཿཞེས་བྱ་བས་སོ། །ལྷོར་ནི་ཙཾ་ཙཽ་རཱི་ན་མཿཞེས་བྱ་

བས་སོ། །ནུབ་ཏུ་ནི་བཾ་བེ་ཏཱ་ལཱི་ན་མཿཞེས་བྱ་བས་སོ། །བྱང་དུ་ནི་གྷཾ་གྷསྨ་རཱི་ན་མཿཞེས་བྱ་བས་སོ། །དབང་ལྡན་དུ་ནི་པཾ་པུཀྐ་སཱི་ན་མཿཞེས་བྱ་བས་སོ། །མེའི་མཚམས་སུ་ཤཾ་ཤ་བ་རཱི་ན་མཿཞེས་པས་སོ། །བདེན་བྲལ་དུ་ནི་ཙཾ་ཙཎྜ་ལཱི་ན་མཿཞེས་བྱ་བས་སོ། །རླུང་མཚམས་
སུ་ནི་ཌི་ཌོམྦི་ཎཱི་ན་མཿཞེས་བྱ་བས་སོ། །ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བྱ་བས་བཅོམ་ལྡན་འདས་ཡང་དག་པར་མཆོད་ལ། བདག་མེད་མ་ལ་ཡང་། ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ་ཨཾ་སྭཱ་ཧཱ། ཞེས་བྱ་བའི་སྔགས་ཀྱིས་མཆོད་དོ། །ཡང་བཅོམ་
ལྡན་འདས་ལ། ཨོཾ་ཨཥྚཱ་ན་ནཱ་ཡ་ན་མཿ། ཨོཾ་པིངྒ་ཨུརྡྷ་ཀེ་ཤ་བརྟ་ས་ནེ་ན་མཿ། ཨོཾ་ཙ་ཏུར་བིཾ་ཤ་ཏི་ནེ་ཏྲཱ་ཡ་ན་མཿ། ཨོཾ་ཥོ་ཌ་ཤ་བྷུ་ཛཱ་ཡ་ན་མཿ། ཨོཾ་ཀྲྀཥྞ་ཛི་མཱུ་ཏ་ཝ་པུ་ཥེ་ན་མཿ། ཨོཾ་ཀ་པཱ་ལ་མཱ་ལཱ་ཨ་ནེ་ཀ་དྷ་རི་ཎེ་ན་མཿ། ཨོཾ་ཨཱདྷྨཱ་ཏ་ཀྲཱུ་ར་ཙིཏྟཱ་ཡ་ན་མཿ། ཨརྡྷན་དུ་དཾཥྚི་ཎེ་ན་མཿ། ཞེས་བྱ་བའི་
ཚིག་བརྒྱད་ཀྱིས་མཆོད་པར་བྱ་སྟེ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱཿཧཱུཾ། ཨོཾ་བཛྲ་གྷནྡྷེ་ཨཱཿཧཱུཾ། ཨོཾ་བཛྲ་ནཻ་བི་དྱེ་ཨཱཿཧཱུཾ། ཞེས་བྱ་བས་བྱིན་གྱིས་བརླབས་པའི་མེ་ཏོག་ལ་སོགས་པ་ཕུལ་ལ། ལན་གསུམ་གྱི་བར་དུ་སྐྱབས་གསུམ་གྱི་ཚིགས་སུ་བཅད་པ་བརྗོད་དོ། །ཡང་མཆོད་པ་བྱས་
ནས་ཕྱག་བཙལ་ལ། གཏོར་མ་བྱིན་ནས་བཛྲ་མུཿཞེས་བྱ་བས་གཤེགས་སུ་གསོལ་བར་བྱའོ། །དེའི་རྗེས་ལ་སེམས་ཅན་ཐམས་ཅད་ལྷའི་བདེ་བ་ལ་དགོད་པར་འདོད་པའི་བྱམས་པ་དང་། སྡུག་བསྔལ་ཐམས་ཅད་བསལ་བར་འདོད་པའི་སྙིང་རྗེ་དང་། ལྷའི་བདེ་བ་རྒྱུན་མི་འཆད་པར་ངེས་
པར་འདོད་པའི་དགའ་བ་དང་། བླ་ན་མེད་པའི་ལམ་ཉེ་བར་དགོད་པར་འདོད་པའི་བཏང་སྙོམས་བསྒོམ་པར་བྱའོ། །ཡང་ཡིད་ཀྱིས་ཆོས་ཐམས་ཅད་ལ་དམིགས་ནས་དཔྱད་ན་སྟོང་པ་འོད་གསལ་བའི་ངོ་བོར་བལྟས་ལ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བ་འདིས་བྱིན་
གྱིས་བརླབ་པར་བྱའོ། །དེ་མ་ཐག་ཏུ་རཾ་ལས་བྱུང་བའི་ཉི་མ་ལ་ཨཾ་དང་ཧཱུཾ་བལྟས་ལ། དེའི་འོད་ཀྱིས་དཔག་ཏུ་མེད་ཅིང་མཐའ་ཡས་པའི་འཇིག་རྟེན་གྱི་ཁམས་ན་གནས་པའི་སེམས་ཅན་རྣམས་ཡང་དག་པར་རྫོགས་པའི་བྱང་ཆུབ་ཏུ་བཀོད་ནས། ཡི་གེ་གཉིས་པོ་དེ་ཉིད་དུ་ཡང་དག་

པར་བསྡུས་ནས་ཞུགས་པར་བསམས་པས། ཡུད་ཙམ་གྱིས་ཡོངས་སུ་རྫོགས་པར་བཅོམ་ལྡན་འདས་མ་དང་བཅས་པའི་བཅོམ་ལྡན་འདས་ཕྱག་བཅུ་དྲུག་པ། ཞལ་བརྒྱད་པ། ཕྱག་རྒྱ་ལྔ་འཛིན་པ། ཞབས་བཞིས་གཤེགས་པ། བདུད་བཞིའི་སྙིང་གར་སྐྱིལ་ཀྲུང་ཕྱེད་པའི་གར་གྱིས་
མནན་པ། མགོ་བོའི་ཕྲེང་བ་འཕྱང་བ། འཇིག་པའི་དུས་ཀྱི་སྤྲིན་སྔོན་པོའི་མདོག་གི་ལུས་ཅན་ཁྲོ་བ་དང་བཅས་པ། དབུ་སྐྲ་དམར་སེར་གྱེན་དུ་འབར་བ། སྤྱན་ཉི་ཤུ་རྩ་བཞི་མངའ་བ། ཕྱག་བཅུ་དྲུག་ན་བསྣམས་པའི་ཐོད་པ། གཡས་ཀྱི་རྣམས་ན་གླང་པོ་ཆེ་དང་། རྟ་དང་། བོང་བུ་
དང་། གླང་དང་། རྔ་མོ་དང་། མི་དང་། ཤ་ར་བ་དང་། བྱི་ལ་རྣམས་གནས་པའོ། །གཡོན་པའི་བརྒྱད་ན། ས་དང་། ཆུ་དང་། རླུང་དང་། མེ་དང་། ཟླ་བ་དང་། ཉི་མ་དང་། གཤིན་རྗེ་དང་། ནོར་སྦྱིན་རྣམས་འཛིན་པའོ། །སྤྱི་བོར་སྣ་ཚོགས་རྡོ་རྗེ་འཛིན་པ། འཁོར་བའི་སྡུག་བསྔལ་འཕྲོག་པ།
གྲི་གུག་དང་ཐོད་པ་བསྣམས་པའི་བདག་མེད་མས་འཁྱུད་པའི་བདག་ཉིད་ཅན་བསྒོམ་པར་བྱའོ། །དེའི་རྗེས་སྙིང་གར་ཉི་མ་ལ་ཧཱུཾ་བལྟས་ལ། བདག་མེད་མའི་སྙིང་གར་ཡང་ཟླ་བ་ལ་ཡི་གེ་ཨཾ་བལྟ་ཞིང་སྤྱི་བོར་ནི་ཡི་གེ་ཨོཾ་མོ། །མགྲིན་པར་ནི་ཨཱཿའོ། །སྙིང་གར་ཡི་གེ་ཧཱུཾ་བཀོད་ལ། མིག་
ལ་གཏི་མུག་རྡོ་རྗེ་མ། རྣ་བ་ལ་ཞེ་སྡང་རྡོ་རྗེ་མ། སྣ་ལ་སེར་སྣ་རྡོ་རྗེ་མ། ཁ་ལ་འདོད་ཆགས་རྡོ་རྗེ་མ། ལུས་ལ་ཕྲག་དོག་རྡོ་རྗེ་མ། ཡིད་ལ་བདག་མེད་མ་བཀོད་ལ། སྙིང་གའི་འོད་ཀྱིས་སངས་རྒྱས་རྣམས་སྤྱན་དྲངས་ནས། ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་བྱ་བས་དབང་བསྐུར་བར་གསོལ་
བ་གདབ་པར་བྱའོ། །དེ་ནས་སངས་རྒྱས་རྣམས་ཀྱིས་དབང་བསྐུར་བས། མེ་ཏོག་དང་། གུར་གུམ་གྱི་ཆར་ཡང་དབབ་པར་བསམ། ལྷ་མོ་རྣམས་ཀྱིས་ཀྱང་བདག་ཉིད་ལ་བསྟོད་པ་བསྒོམ་པར་བྱའོ། །བསྒོམས་པས་དུབ་པར་གྱུར་ན་ཡང་སྔགས་བཟླས་པར་བྱ་སྟེ། ཨོཾ་དེ་ཝ་པི་ཙུ་བཛྲ་ཧཱུཾ་
ཧཱུཾ་ཧཱུཾ་ཕཊ་སྭཱ་ཧཱ། ཞེས་བྱའོ། །ལངས་པའི་དུས་སུ་ལྷ་མོ་རང་གི་སྙིང་གའི་ས་བོན་གྱི་ནང་དུ་བསྒོམས་ལ། ལྷའི་གཟུགས་ཀྱིས་གནས་པར་བྱའོ། །བསྒོམ་པའི་དང་པོར་ཡང་གཏོར་མ་སྦྱིན་པར་བྱའོ། །དེའི་རིམ་པ་ནི་འདི་ཡིན་ཏེ། ཡཾ་ལས་རླུང་གི་དཀྱིལ་འཁོར་བསམས་ལ།

དེའི་སྟེང་དུ་རཾ་ལས་མེའི་དཀྱིལ་འཁོར་རོ། །དེའི་སྟེང་དུ་ཨ་ལས་ཐོད་པའོ། །དེའི་སྟེང་དུ་གོ་ཀུ་ད་ཧ་ན། མ་ར་མུ་སུ་བི། ཞེས་བྱ་བའི་རྫས་རྣམས་ཨོཾ་གྱིས་བྱིན་གྱིས་བརླབས་ལ་བསྒོམས་ནས། སྟེང་དུ་ཡི་གེ་ཧཱུཾ་ཡོངས་སུ་གྱུར་པ་ལས་རྡོ་རྗེ་དཀར་པོ་སྟེ། རྡོ་རྗེ་དང་པདྨ་
སྙོམས་པར་ཞུགས་པ་ལས་མེ་འབར་བས་ཚོས་ཤིང་ཁུ་བར་གྱུར་པ་དེའི་འོད་ཀྱིས། དེ་བཞིན་གཤེགས་པ་ཐམས་ཅད་ཀྱི་གཟུགས་མཐོང་བ་ལས། དེ་དག་གི་ཐུགས་ཀྱི་ས་བོན་གྱི་བདུད་རྩི་བསྡུས་ནས། དེར་ཆུད་པར་བྱས་ནས། ཨོཾ་ཨཱཿཧཱུཾ་ཞེས་པའི་སྔགས་ཀྱིས་བྱིན་གྱིས་བརླབ་པར་བྱའོ། །
འདི་ལྟ་བུ་ནི་གཏོར་མ་ལ་སོགས་པའི་རྫས་དག་པར་བྱ་བའི་ཆོ་གའོ། །ནམ་མཁའ་ལས་ཆོས་འབྱུང་གི་ནང་དུ་པདྨ་འདབ་མ་བརྒྱད་པའི་ལྟེ་བ་ལ། བཅོམ་ལྡན་འདས་ཀྱི་དཀྱིལ་འཁོར་གྱི་འཁོར་ལོའམ། དཔའ་བོ་གཅིག་པུའམ། ཕྱོགས་ཀྱི་འདབ་མ་ལ་དབང་པོ་ལ་སོགས་པ་རང་རང་གི་རིག་
མས་མགུལ་ནས་འཁྱུད་པ། ཞབས་གཡོན་བརྐྱང་བས་གནས་པ། ཁ་དོག་ནག་པོ་མི་བསྐྱོད་པའི་ཅོད་པན་ཅན། རྡོ་རྗེ་དང་དྲིལ་བུ་བསྣམས་པ་བལྟས་ལ། དེའི་སྟེང་དུ་ཚངས་པ་དེ་བཞིན་དུ་ཁ་དོག་དཀར་པོ། རྣམ་པར་སྣང་མཛད་ཅོད་པན་དུ་འཛིན་པར་བལྟ་བར་བྱའོ། །འོག་ཏུ་ས་འོག་ན་
གནས་པའི་ཀླུ་ལ་སོགས་པ་རྣམས་ལ། ཁ་དོག་དམར་པོ་སྣང་བ་མཐའ་ཡས་ཀྱི་ཅོད་པན་བྱས་ལ་བལྟ་བར་བྱའོ། །ཐམས་ཅད་ཀྱི་ལྕེ་པདྨའི་འདབ་མ་ལ་ཧཱུཾ་ལས་རྡོ་རྗེ་དཀར་པོར་བསྒོམས་ལ། སྙིང་གའི་ས་བོན་ལས་བྱུང་བའི་གཽ་རཱི་ལ་སོགས་པའི་ལྷ་མོ་རྣམས་ཀྱིས་ཡོངས་སུ་དག་
པའི་བདུད་རྩིས་དགང་བར་བྱའོ། །དེའི་སྔགས་ནི་འདི་ཡིན་ཏེ། ཨིནྡ་ཛ་མ་ཛ་ལ་ཛཀྑ་བྷཱུ་ཏ་བཧྣི་བ་ཡུ་རཀྑ་ཙནྡ་སཱུཛྫ་མཱ་ད་པཔྤ་ཏཱ་ལེ། ཨ་ཋ་སབྤ་སྭཱ་ཧཱ། ཨཾ་དཾ་བ་ལིཾ་བྷུཾ་ཛ་ཛི་གྷ་ཕུལླ་དྷཱུ་པ་མཱཾ་ས་པིཾ་གྷ་ཨམྦྷ་སཔྤ་ཀཱཛྫ་སཱ་དྷ་ཁཱནྟི་ཁུ་ཎེ་ཕེ་ཌ་གཱ་ད། ཨོཾ་ཨ་ཀཱ་རོ་མུ་ཁཾ་སརྦ་དྷརྨྨཱ་ཎཱཾ་ཨཱདྱ་ནུཏྤནྣ་
ཏཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་ལན་གསུམ་བརྗོད་ནས། བསང་གཏོར་སྦྱིན་པར་བྱ་སྟེ། ཨོཾ་ཧྲཱིཿབི་ཤུདྡྷཿདྷརྨཱ་སྶརྦ་པཱ་པཾ་བི་ཤོ་དྷ་ཡ་སརྦ་བི་ཀལྤ་ན་ཡ་ཧཱུཾ། ཞེས་བྱ་བའི་སྔགས་འདིས་སོ། །ཡ