Kinh tạng Tây Tạng (Kangyur Đại Học) — 094_རྒྱུད་འབུམ།_ཚ

ར་བྱ། །ཐམས་ཅད་དུ་ནི་བྱང་གི་ཆར། །ཟབ་མོ་སྤྲིན་གྱི་མདོག་འདྲ་བའི། །དངུལ་ཆུ་དེར་ནི་ཤེས་པར་བྱ། །གང་ན་མེ་ཏོག་དྲི་ཡོད་ཅིང་། །ཁྱད་པར་དུ་ནི་སྤང་སྤོས་དྲི། །
བུ་ག་དེ་ཡི་ནང་ན་ནི། །བུད་མེད་གནས་པར་རྣམ་པར་བསྟན། །འཇུག་པ་པོས་ནི་ཁྱད་པར་དུ། །དེར་ནི་ཐེ་ཚོམ་མི་བྱའོ། །དེ་ནས་ར་བ་རྣམ་ལྔ་དང་། །རྒྱལ་པོའི་སྒོ་དང་རྟ་བབས་དང་། །གསེར་གྱི་རང་བཞིན་ཀ་བ་ནི། །བུད་མེད་རིན་ཆེན་རྣམས་ཀྱིས་སྤྲས། །བཅུད་ལེན་
རྣམས་དང་རིན་ཆེན་རྣམས། །གདོན་མི་ཟ་བར་དེ་ན་གནས། །བུ་གའི་སྒོ་རུ་ཁྱད་པར་དུ། །གང་ན་པདྨའི་དྲི་ཡོད་པ། །གཞན་ལེན་བུ་གར་དེར་ཤེས་བྱ། །འདོད་པ་ཀུན་གྱིས་རྣམ་པར་བརྒྱན། །བརྟུལ་ཞུགས་ཅན་གྱིས་དེར་འཇུག་གོ། །བརྟུལ་ཞུགས་མེད་པས་ནམ་ཡང་མིན། །
དེ་ན་རྣམ་པ་དུ་མ་གནས། །གང་འདོད་དེ་ནི་བརྟག་པར་བྱ། །བུ་གའི་སྒོ་རུ་ཁྱད་པར་དུ། །གང་ན་སྦྲང་རྩིའི་དྲི་ཡོད་ན། །བུ་གའི་ལོགས་ནི་ཐམས་ཅད་ལ། །དེ་ན་བུང་བ་ཡོད་པ་སྟེ། །དེ་ལ་ཐེ་ཚོམ་མི་བྱའོ། །དེ་ན་གནས་པའི་བུང་བ་སོགས། །རིག་པ་འཛིན་པ་ཁྱད་པར་དུ། །
སྔགས་གྲུབ་པ་ལ་རྩེད་མི་འགྱུར། །བུ་གའི་སྒོ་ནི་ཐམས་ཅད་དུ། །གང་ནས་ཡི་དྲི་ཡོད་པ། །ས་ལའི་ན་ཆེན་ཇི་སྙེད་པ། །རྒྱ་མཚོ་ཡང་ནི་ཁྱད་པར་དུའོ། །ལྷ་མ་ཡིན་རྣམས་ཀུན་གྱི་དང་། །མི་ཡི་གཙོ་བོ་རྣམས་ཀྱི་དང་། །གནོད་སྦྱིན་དག་ནི་རྣམས་ཀྱི་ཡང་། །བུ་གའི་མཆོག་
དེར་ཐམས་ཅད་གནས། །རིག་པ་འཛིན་པས་དེར་ཞུགས་པས། །འདོད་པ་ཐམས་ཅད་ཐོབ་པར་འགྱུར། །བུ་གའི་ནང་ན་ལུག་གི་དྲི། །གང་དག་ཡོད་ན་བུ་ག་དེ། །འཁྲུལ་འཁོར་མེད་པར་ཤེས་པར་བྱ། །འདོད་པ་ཀུན་གྱིས་རྣམ་པར་བརྒྱན། །ཆུ་སྐྱར་དང་ནི་ཆུ་སྐྱར་མོ། །

མཉམ་དུ་སྤྱོད་ཅིང་ལྷན་ཅིག་ཏུ། །བུ་གའི་ནང་ན་གནས་ན་ནི། །བུ་ག་དེ་ཡི་འཁྲུལ་འཁོར་མེད། །དེ་ན་དངུལ་ཆུ་བཅུ་གཅིག་ཡོད། །དེ་ནི་བུ་གའི་དམ་པའོ། །བུ་ག་དག་ནི་བརྐོས་པ་ན། །གང་དུ་ལུགས་ཀོང་མཐོང་གྱུར་ན། །བུ་ག་དེ་ནི་རིན་ཆེན་གང་། །མཁས་པ་ཡིས་ནི་འཇུག་པར་
བྱ། །ཞུགས་པ་ཙམ་ན་མཐོང་འགྱུར་བ། །དཀྱུས་སུ་དཔག་ཚད་ཕྱེད་པ་ཡི། །དེ་ན་ཐང་ནི་ལེགས་པར་ཡོད། །འཛམ་བུ་ཆུ་བོ་འདྲ་བའི་འོད། །དེར་ནི་མི་ཡིས་འབྲས་ཐོབ་སྟེ། །ལོ་ནི་ཁྲི་ཕྲག་བརྒྱར་འཚོའོ། །གང་ན་མི་མོ་སྒྲོན་མའི་ལག །བུ་གའི་ནང་ན་གནས་པ་ན། །འདི་ནི་དེ་
ཡི་བུ་གར་ཤེས། །གདོན་མི་ཟ་བར་དངུལ་ཆུས་གང་། །བུ་གའི་སྒོ་རུ་ཁྱད་པར་དུ། །གང་ན་ཤ་ཡི་དྲི་ཡོད་པ། །སྲིན་པོ་རྣམས་ཀྱི་བུ་གར་ཤེས། །བློ་དང་ལྡན་པས་དེར་མི་འཇུག །བུ་གའི་དྲུང་ན་གར་བྱེད་པའི། །རྨ་བྱ་མཐོང་ན་བུ་ག་དེ། །འཁྲུལ་འཁོར་མེད་པར་ཤེས་པར་བྱ། །
འདོད་པ་ཀུན་གྱིས་རྣམ་པར་བརྒྱན། །བུ་གའི་སྒོ་རུ་ཁྱད་པར་དུ། །གང་ན་ཁྲག་ནི་མཐོང་བ་ན། །གཅིག་པུ་ཉིད་དུ་དེར་འཇུག་སྟེ། །རང་གི་ཁྱིམ་བཞིན་འཇིགས་པ་མེད། །གང་ན་ཉ་ཡི་དྲི་ཡོད་ཅིང་། །ཁྱད་པར་དུ་ཡང་ཞག་དྲི་ཡོད། །དེ་དང་དེར་ནི་བརྩོན་པ་ཡིས། །མཁས་པ་ཡིས་ནི་
འཇུག་པར་བྱ། །ཞུགས་པས་ཆུ་རྒྱུན་མཐོང་གྱུར་ན། །འདོད་པ་ཀུན་གྱི་འབྲས་བུ་སྟེར། །དེ་ཡི་འགྲམ་དུ་བཟང་ལྡན་པའི། །ཁང་པ་རབ་ཏུ་སྦྱངས་གྱུར་པ། །ལྷ་ཁང་དང་ནི་ཤིང་ཁང་ལ། །བ་དན་རྣམས་ཀྱིས་མངོན་པར་སྤྲས། །དེ་ན་རིན་ཆེན་བཟང་པོ་དང་། །དགའ་མ་འདྲ་བའི་བུད་
མེད་དང་། །དེ་ན་དངུལ་ཆུ་མང་ཡོད་པར། །ཐམས་ཅད་དུ་ནི་ཐེ་ཚོམ་མེད། །བུ་ག་གང་དག་བརྐོས་པ་ན། །ཁྲག་གི་ཆར་པ་བབ་གྱུར་ན། །དེར་ནི་འཇུག་པར་མི་བྱ་སྟེ། །དེ་མ་ཐག་ཏུ་སྲོག་འཕྲོག་བྱེད། །བུ་ག་བརྟགས་ཤིང་དཔྱད་པ་ན། །གང་ན་མུན་པ་ཡོད་གྱུར་ན། །དེར་ནི་འཇིགས་
པ་མེད་པར་འཇུག །བུ་ག་དེ་ནི་རང་ཁྱིམ་མཚུངས། །བུ་གའི་སྒོ་རུ་ཁྱད་པར་དུ། །གང་ན་རས་ཀྱི་དྲི་ཡོད་པ། །དེ་ན་རིན་ཆེན་དུ་མ་དང་། །དངུལ་ཆུ་ལྡོང་རོས་དེ་བཞིན་དུ། །མིག་སྨན་བཟང་པོ་རྣམས་དང་ནི། །རིན་ཆེན་རྣམས་ཀྱི་རྒྱན་དག་ནི། །དུ་མ་རྣམ་པ་སྣ་ཚོགས་དང་། །གསེར་

ནི་རྣམ་པ་དུ་མ་ཡོད། །བུ་གའི་ནང་ནི་གང་དག་ན། །སྒྲོན་མ་ཡི་ནི་དྲི་ཡོད་པ། །དེ་རུ་ཡང་ནི་འཇུག་པར་བྱ། །འདོད་པ་ཐམས་ཅད་ཐོབ་པར་འགྱུར། །བུ་ག་ཡི་ནི་འགྲམ་ལོགས་ན། །གང་ན་གདུག་པ་གནས་གྱུར་ན། །དེ་ནི་ཤ་ཟའི་གནས་ཡིན་ཞིང་། །འདབ་བཟངས་
གནས་པར་གདོན་མི་ཟ། །གང་ན་ཧ་ཧའི་སྒྲ་སྒྲོགས་པ། །དབང་ལྡན་གྱི་ནི་ཕྱོགས་ལ་བརྟེན། །བུ་ག་དེ་ནི་འཇིགས་ཤེས་བྱ། །དེ་བས་མྱུར་བར་འབྲོས་པར་བྱ། །གང་ན་སྒྲ་དག་གིས་གང་བར། །ཤར་གྱི་ཕྱོགས་ལ་ཡང་དག་བརྟེན། །དེར་ནི་འབད་པར་བྱས་ན་ནི། །བུ་ག་དེ་
ཡང་ལས་ཀུན་བྱེད། །བུ་ག་དེ་ཡི་ཐོན་འཁོར་དུ། །གང་ན་རྡོ་རྗེའི་ཆར་འབབ་ན། །དེར་ནི་དངུལ་ཆུར་ཤེས་བྱ་སྟེ། །སེམས་ཅན་ཐམས་ཅད་གྲུབ་པར་བྱེད། །བུ་ག་དེ་ཡི་ཐོན་འཁོར་དུ། །མེ་ཏོག་དྲི་ལྡན་བུ་ག་དེ། །འཁྲུལ་འཁོར་མེད་པར་ཤེས་པར་བྱ། །འདོད་པ་ཐམས་ཅད་
སྒྲུབ་པར་བྱེད། །བུ་ག་དེ་ཡི་ནང་ན་ནི། །གང་ན་རྒྱལ་བའི་སྒྲ་ཡོད་པ། །བུ་ག་འཁྲུལ་འཁོར་མེད་ཤེས་བྱ། །དེར་ནི་མཁས་པས་འཇུག་པར་བྱ། །བུ་ག་ཡི་ནི་ཐོན་འཁོར་དུ། །གང་ན་ཁྱུ་མཆོག་མཐོང་བ་ན། །དེར་ཡང་དཔའ་བོས་འཇུག་པར་བྱ། །བུ་ག་དེ་ཡི་རིན་ཆེན་གང་། །གང་
ན་སྐྱེས་བུ་གཅེར་བུ་ནི། །ནག་པོ་ཤ་ཁྱིམ་ཆེན་པོ་དག །མཐོང་ནས་ཡང་ནི་མ་མཐོང་ན། །བུ་ག་དེ་ཡང་ལས་ཀུན་བྱེད། །གང་ན་དགེ་སྦྱོང་གཅེར་བུ་དང་། །སྤྱི་ཅེར་དང་ནི་སྣ་རིང་པོའམ། །གང་དག་ཏུ་ནི་ཁྱི་མཐོང་ན། །དེར་ནི་གྲུབ་པར་བསྟན་པའོ། །བུ་ག་གང་གི་ཐོན་འཁོར་དུ། །
རྔ་མོ་ཡི་ནི་དྲི་ཡོད་པ། །བུ་ག་དེ་ཡི་ལམ་གྱི་རྒྱུད། །དཔག་ཚད་བརྒྱ་རུ་ཤེས་པར་བྱ། །གང་ན་རྩེ་གསུམ་མཚན་ཉིད་ནི། །ཐམས་ཅད་དུ་ནི་མཐོང་བ་ན། །མི་རྣམས་ཀྱིས་ནི་ཁྱད་པར་དུ། །བུ་ག་དེར་འཇུག་ནུས་མ་ཡིན། །གང་དུ་མེ་ཏོག་དྲིས་བརྒྱན་པའི། །བྲམ་ཟེ་མཐོང་ན་བུ་ག་དེ། །
འཁྲུལ་འཁོར་མེད་པར་ཤེས་བྱ་སྟེ། །འདོད་པ་ཀུན་གྱི་འབྲས་བུ་འགྲུབ། །བུ་གའི་སྒོ་རུ་ཡང་དག་བརྟེན། །གང་ན་དཀར་པོའི་སྦྲུལ་ཡོད་ན། །དེར་ཡང་བརྩོན་པར་བྱས་ནས་སུ། །མཁས་པ་ཡིས་ནི་འཇུག་པར་བྱ། །བུ་གའི་སྒོ་ཡི་ཐོན་འཁོར་ནི། །གང་དུ་དོམ་ནི་མཐོང་བ་ན། །

བུ་ག་འཁྲུལ་འཁོར་མེད་ཤེས་བྱ། །འདོད་པ་ཀུན་གྱི་དོན་གྲུབ་བྱེད། །བུ་གའི་ལས་ནི་བྱེད་པ་ན། །གང་དུ་ཕག་ནི་མཐོང་གྱུར་ན། །བུ་ག་འཁྲུལ་འཁོར་མེད་ཤེས་བྱ། །གདོན་མི་ཟ་བར་རིན་ཆེན་གང་། །བུ་གའི་སྒོ་ཡི་ཐོན་འཁོར་ན། །གང་ན་ཆུ་ཡི་དྲི་ཡོད་པ། །
དེར་ནི་དངུལ་ཆུར་ཤེས་བྱ་སྟེ། །སེམས་ཅན་ཀུན་ལ་ཕན་པར་བྱེད། །བུ་ག་དེ་ཡི་ཐོན་འཁོར་ན། །གང་ལ་བདུག་པའི་དྲི་ཡོད་པ། །བུ་ག་འཁྲུལ་འཁོར་མེད་ཤེས་བྱ། །གདོན་མི་ཟ་བར་རིན་ཆེན་གང་། །བུ་གའི་སྒོ་ལ་གནས་པ་ཡི། །གང་ན་བུར་ཆང་དྲི་ཡོད་ན། །བུད་
མེད་རིན་ཆེན་གཟུགས་མཛེས་དང་། །བཟའ་དང་བཏུང་བར་ཤེས་པར་བྱ། །བུ་ག་ཡི་ནི་ཐོན་འཁོར་ན། །གང་ན་ར་ཡི་དྲི་ཡོད་པ། །དེར་ཡང་དཔའ་བོས་འཇུག་བྱ་སྟེ། །འགའ་ཞིག་དང་ནི་འཇུག་མ་ཡིན། །མ་མྱོས་པར་ནི་ཞུགས་ནས་སུ། །དེར་ནི་ཇི་ལྟར་འདོད་པར་བསྡད། །
དད་ལྡན་གཙང་ཞིང་མཁས་པ་དང་། །བྱ་བ་བྱས་པས་ཁྱད་པར་དུ། །དཀོན་མཆོག་གསུམ་ལ་ཕྱག་བྱའོ། །དེ་བཞིན་རིག་པའི་བདག་པོ་དང་། །རིག་པའི་རྒྱལ་པོ་ལྷ་མོ་དང་། །རིག་པའི་ཚོགས་ལའང་ཁྱད་པར་དུའོ། །ཨོྃ་བ་ར་བཛྲ་ཧཱུྃ་ཕཊ། འཕགས་པ་རྡོ་རྗེ་ས་འོག་གི་
སྙིང་པོའོ། །ལས་ཐམས་ཅད་པའི་ཉེ་བའི་དབང་པོའང་དེ་ཉིད་དོ། །ཨོཾ་ཧྲཱིཿཧཱུྃ་ཕཊ། ཨོཾ་བི་བྷིནྡ་བི་བྷིནྡ་ཧཱུྃ་ཕཊ། འདིས་སྒོ་དང་འཁྲུལ་འཁོར་གྱི་ཕྱོགས་སམ། མཆོད་པའི་དུས་སུ་བསྲུང་བར་བྱའོ། །འདི་ནི་རྡོ་རྗེ་ས་འོག་གི་རྒྱུད་ལས་བུ་གའི་མཚན་ཉིད་མཚོན་པའི་ལེའུ་སྟེ་
བཞི་པའོ།། །།སྔགས་པས་དཔལ་གྱི་སྒོར་འཇུག་པར་འདོད་ན་དེས་བརྗོད་པ་དང་སྦྱང་བ་བྱས་ལ་འཇུག་པར་བྱའོ། །དེ་ལ་བརྗོད་པ་ནི་གང་། སྦྱང་བ་ནི་གང་ཞེ་ན། དེ་ལ་ཐོག་མར་ས་རྙིང་པ་དང་། ཆུ་དང་སྨན་གྱིས་ལུས་ཉེ་བར་བྱུགས་ལ། ཀུ་མུ་ད་དང་། ཨུཏྤ་ལ་དང་།
རུ་རྟ་དང་། ནིར་གུཎྜི་དང་། ལྡོང་རོས་མཉམ་པོར་སྦྱར་བའི་སྨན་གྱི་དམ་པ་འདིས་སྲིན་པོ་འཇོམས་པ་དང་། དུག་འཇོམས་ཤིང་གཞོན་ནུ་རྣམས་བསྐྱེད་འཕེལ་བ་དང་། མཆོད་སྦྱིན་གྱི་བགེགས་སེལ་བ་དང་། ཚངས་པའི་སྲིན་པོ་བསྲུང་བ་དང་། དྲག་པོ་དང་། སྐེམ་བྱེད་ཀྱིས་

བཟུང་བ་དང་། གང་དག་ལུས་སྲུལ་པོས་བཟུང་བ་དང་། བུད་མེད་མངལ་ཉམས་པ་རྣམས་ཀྱི་ཉེར་གནས་ལ་བྱུགས་པས་བཟང་པོར་འགྱུར་བ་དང་། དེ་དག་གིས་ཡན་ལག་བྱུགས་པ་གང་ཡིན་པས་ནི་དུག་ཧ་ལ་ཧ་ལ་ཡང་འཐུང་བར་བྱེད་དོ། །དེ་དག་གིས་འདིར་ཡན་
ལག་བྱུགས་ནས་ཞུགས་པས་སྒོ་གྲོལ་བར་འགྱུར་ལ། སྒོ་བསྒྲིབས་པ་དེ་གྲོལ་ནས་གང་དག་མཚམས་རིང་དུ་སྦྱར་བའི་རླུང་ཡང་འབྱུང་བར་འགྱུར་རོ། །དེ་དག་ནི་བརྗོད་པའོ། །སྦྱོར་བ་ཡང་མ་ཏུ་ལུང་ཀ་དང་། ཀ་རཉྫ་དང་། ནྱ་གྲོ་དྷའི་ཡལ་ག་ལ་སོགས་པའི་ཤིང་རྣམས་ཀྱིས་བུ་
གའི་སྒོ་བཀག་ལ་མཚམས་མེད་པར་བྱས་ཏེ། སྒོ་འཕར་གྱིས་ཀུན་ནས་བསྒྲིབས་ལ་མེ་སྦར་བར་བྱའོ། །གང་དག་ནང་ན་གནས་པའི་མེ་རབ་ཏུ་ཞི་བ་ནི་སྦྱོར་བའོ། །དེ་ནས་སྐྱེས་བུ་དཔའ་བོས་བསེར་སྐྱའི་ལྕི་བས་ལ་མ་ལྷུང་བས་དཀྱིལ་འཁོར་ཉེ་བར་བྱུགས་ལ་བུ་གའི་སྒོར་མཆོད་པ་དང་།
གཏོར་མའི་ཆོ་ག་བྱས་ཏེ། ཨ་པ་མཱརྒའི་ཡམ་ཤིང་ལ་མེ་རབ་ཏུ་སྦར་ལ། ཨ་པ་མཱ་རྒའི་འབྲས་བུ་དང་མར་དང་། སྦྲང་རྩི་བཏགས་ཏེ། སྲེག་བླུགས་བརྒྱ་རྩ་བརྒྱད་ཁྲོ་བོ་འཁྲུལ་འཁོར་གྱི་བླ་མས་དབུལ་བར་བྱའོ། །འདིས་འཁྲུལ་འཁོར་ཐམས་ཅད་ལྟུང་བ་དང་བརླག་པར་
འགྱུར་རོ། །དེ་ནས་རའི་པགས་པའི་རལ་གུ་གྱོན་ལ་ཉི་མ་ཤར་བ་ན་འཁོར་དང་བཅས་པ་ཐམས་ཅད་སྨན་གྱིས་ལུས་བྱུགས་ཏེ། བྱ་བ་བྱས་ལ་གྲོགས་བཟང་པོ་དང་འཇུག་པར་བྱའོ། །ཤིང་མངར་དང་ཀོ་བི་དར་དཀར་པོ་དང་། ཀ་ཌུ་ཀ་བླུགས་པའི་ཡུང་བ་གཉིས་ཀྱིས་སྦྲུལ་གྱི་དཔའ་བ་
འཇོམས་པ་དང་། མངོན་པར་འདོད་པའི་དོན་སྒྲུབ་པ་དང་། སྐྱེས་བུ་གཞོན་ནུ་བསྲུང་བ་དང་། བུད་མེད་སྐལ་བ་བཟང་པོར་བྱེད་པ་དང་། འདོད་པའི་གདུང་བ་ཐམས་ཅད་སེལ་བ་དང་། རྩོད་པ་ཞི་བར་བྱེད་པ་དང་། སའི་བདག་པོ་རྒྱས་པ་སྟེར་བ་དང་། དགྲ་ཐམས་ཅད་རྟག་ཏུ་
འཇོམས་པ་དང་། ཉི་མ་ཤར་བ་ན་དབང་དུ་བྱེད་པར་བརྗོད་དོ། །འདིར་འདི་དག་གིས་ལུས་ལ་བྱུགས་ལ་རའི་པགས་པའི་རལ་གུ་གྱོན་ཏེ། ཆུ་གྲི་བཟུང་ལ་མུན་པའི་ཕྱིར་སྒྲོན་མ་ཤལ་མ་ལིའི་དོག་པ་ལས་སྡོང་བུ་བྱས་ཏེ། འཁྲུལ་འཁོར་གྱི་བླ་མ་ལན་ཉི་ཤུ་རྩ་གཅིག་ཡོངས་སུ་

བཟླས་ལ་རབ་ཏུ་སྦར་ཏེ། བྱི་བའི་རྣམ་པ་ཡིན་ན་བྱི་བའི་ཞག་དང་། ཆུ་སྲིན་གྱི་ཞག་སྔ་མ་བཞིན་ནོ། །ཇི་ལྟར་གླང་པོའི་གདོང་གི་རྣམ་པ་ཡིན་ན་སྔ་མ་བཞིན་དུ་གླང་པོའི་ཞག་གིས་སོ། །ཇི་ལྟར་ལྟོས་འཕྱེའི་རྣམ་པ་ཡིན་ན་སྔ་མ་བཞིན་དུ་ལྟོས་འཕྱེའི་ཞག་གིས་སོ། །མིའི་གདོང་གི་རྣམ་པ་
ཡིན་ན་མིའི་ཞག་གིས་ཤལ་མ་ལིའི་དོག་བའི་སྡོང་བུ་སྟེང་དུ་བཞག་ལ་མུན་པའི་ཕྱོགས་སུ་གཟུང་བར་བྱ། གང་གི་གདོང་གི་རྣམ་པར་འདུག་པ་དེའི་ཞག་གིས་བསྐུས་ལ་འཁྲུལ་འཁོར་གྱི་བླ་མ་ཉི་ཤུ་རྩ་གཅིག་བཟླས་ལ་མེ་སྦར་རོ། །མུན་པ་མུན་ནག་ཐམས་ཅད་འཇོམས་པར་འགྱུར་རོ། །
འཇུག་པ་ན་ལྷན་ཅིག་པ་རྣམས་ལ་ཡང་ཉེ་བར་བྱུག་གོ། །ཏ་ཀ་རའི་མེ་ཏོག་དང་། རུ་རྟ་དང་། སྤང་སྤོས་དང་། སུག་སྨེལ་དང་། ཨུཏྤ་ལ་ཝ་ཏི་དང་། སིང་གྷྲི་དང་། བྱཱ་གྷྲི་དང་། ན་མ་སྐཱ་རི་དང་། ཨ་ནན་ཏཱ་དང་། ཛ་ཡན་ཏི་དང་། རྨ་བྱའི་གཙུག་ཕུད་དང་། དུང་གི་མེ་ཏོག་སྟེ་དེ་དག་
གི་ཕྱེ་མས་སྒྱུ་མ་ཐམས་ཅད་འཇོམས་པ་དང་། འབྱེད་པ་དང་སྲེག་པར་བརྗོད་དོ། །ཆུ་དང་སྦྱིན་དང་དེ་བཞིན་དུ་བཅུད་དང་། བཅུད་ལེན་དང་། རྔའི་ཁང་བུ་དང་། དུག་གི་གདུག་པ་དང་། པདྨའི་མཚོ་དང་། ལྷ་མ་ཡིན་གྱི་བུ་མོ་འགུགས་པ་དང་། དབང་དུ་བྱེད་པ་དང་། བུད་མེད་འབེབས་
པ་དང་། དེ་དག་གི་གནས་རྣམས་སམ། གཞན་དུ་ཡང་སྐྱེས་བུ་དཔའ་བོས་འཁྲུལ་འཁོར་གྱི་བླ་མ་ཉི་ཤུ་རྩ་གཅིག་བཟླས་ལ་བསྣུན་པར་བྱའོ། །ཆུར་འཇུག་པ་དང་། དུག་གི་དུ་བ་དང་། དུག་གི་རླུང་གིས་རང་གི་རྐང་མཐིལ་དང་སྤྱི་གཙུག་གི་བར་དུ་ཡོངས་སུ་བྱུགས་ལ་འཇུག་གོ། །དེ་དག་
ཐམས་ཅད་ལས་བསྲུང་བ་བྱས་པར་འགྱུར་རོ། །འཇུག་པ་ན་འཁྲུལ་འཁོར་གྱི་བླ་མ་བཟླའོ། །ཟློས་ཤིང་འཇུག་པར་བྱའོ། །རྡོ་རྗེ་འཛིན་པའི་གཟི་བརྗིད་ལྟ་བུར་ཐམས་ཅད་ཀྱིས་ཚུགས་པར་མི་ནུས་ཏེ་རང་གི་ཁྱིམ་དུ་འཇུག་པ་བཞིན་ནོ། །རའི་འོ་མ་དང་ཀ་ར་ལྷན་ཅིག་ཏུ་བཛྲ་ཏན་ཏུ་ལ་དང་།
བསླགས་ལ་ཁྲོ་བོ་ལན་ཉི་ཤུ་རྩ་གཅིག་བཟླས་ཏེ་ཟོས་ལ་འཇུག་གོ། །གང་གི་ཚེ་ལྷ་ཆེན་པོའི་ཁང་བའི་ལྷ་བཤོས་ཡོད་པ་ལས་ཕྱོགས་ཏེ། གཡས་ཕྱོགས་ནས་བསྐོར་ལ་འཁྲུལ་འཁོར་གྱི་བླ་མ་ཟློས་ཤིང་འཇུག་པར་བྱའོ། །ཞུགས་པ་དང་རྔའི་དབྱུག་གུ་ལ་ལན་ཉི་ཤུ་རྩ་གཅིག་བཟླས་ལ་

བརྡུང་བར་བྱའོ། །གང་གི་ཚེ་རྔའི་སྒྲ་གྲག་པ་ལ་བུད་མེད་ཀྱི་ཚོགས་མ་འོངས་ན་དེ་ནས་ལྷ་ཆེན་པོའི་ལྷོའི་ས་ལ་བསྡད་ལ་འཁྲུལ་འཁོར་གྱི་བླ་མ་བཟླའོ། །དེའི་སྐད་ཅིག་ལ་བུད་མེད་ཀྱི་ཚོགས་ཐམས་ཅད་ཐད་དུ་འོངས་ཏེ། མཆོད་ཡོན་སྦྲེངས་ནས་སྐྱེས་བུ་དཔའ་བོ་རྣམས་འཇུག་པར་བྱེད་དོ།
ཞུགས་པ་དང་ཇི་སྲིད་འཚོའི་བར་དུ་བཞུགས་ཤིག་ཅེས་ཕྲིན་ཡིག་གདས་པར་བྱེད་དོ། །དཀོན་མཆོག་གསུམ་དང་འཕགས་པ་ཕྱག་ན་རྡོ་རྗེ་རྟག་ཏུ་རྗེས་སུ་དྲན་པས་བཟླས་པར་བྱའོ། །འདི་ལྟར་བུད་མེད་ཀྱི་དབུས་སུ་ཉི་མ་དང་ཟླ་བ་དང་སྐར་མ་གནས་ཀྱི་བར་དུ་སྡོད་དོ། །ཇི་སྲིད་འགྲོ་བར་འདོད་
ན་དེས་སྦྱར་སྨན་གྱིས་བསྐུ་བ་བྱུགས་ལ། དངུལ་ཆུ་དང་། བཅུད་ལེན་དང་། གྲུབ་པའི་རྫས་གང་འདོད་པ་དེ་གཟུང་བར་བྱའོ། །གཞུའི་འཁྲུལ་འཁོར་ལས་བྱོལ་ལ་ཡུངས་ཀར་ལ་ལན་བདུན་བཟླས་ལ་བསྣུན་པར་བྱའོ། །དེ་ལྟ་ན་ཡང་མི་ལྟུང་ན་དེ་ནས་འཁྲུལ་འཁོར་དེ་ལ་ལྷོའི་རྩ་ནས་
བསྣུན་པར་བྱའོ། །དེ་ནས་ལྟུང་ངོ་། །ཐོག་མར་འཁོར་རྣམས་སྔོན་དུ་བཏང་བདག་ཉིད་ཕྱི་ནས་འཇུག་པར་བྱའོ། །མར་མེའི་མཆོད་སྡོང་ལ་སྦྱིན་སྲེག་གི་ཐབ་ནས་མེ་སྦར་ལ་འཇུག་གོ། །ཁྲོན་པ་རྣམས་སུ་འཁྲུལ་འཁོར་གྱི་བླ་མ་སྟོང་ཕྲག་བརྒྱད་བཟླས་པས་སྒོ་འབྱུང་ངོ་། །ཁྲོན་པ་དེ་
ན་ཡང་ཏ་ལའི་ཤིང་སྦྲུལ་གྱི་རྣམ་པར་སྣང་བ་ལ་དྲི་མ་མེད་པའི་མིག་སྨན་དང་། རྒྱ་སྤོས་དང་། རུ་རྟ་དང་། བཱ་ལཱ་དང་། སྤང་སྤོས་དང་། ལྡོང་རོས་དང་། གི་ཝང་རྣམས་མཉམ་པོར་སྐར་མ་རྒྱལ་ལ་སྦྱར་བའི་རིལ་བུ་བྱས་ལ་སྨན་གྱི་མཆོག་དུག་འཇོམས་པ་དེ་ཤེས་རབ་ཅན་གྱིས་བསྣུན་
པར་བྱའོ། །དེ་ནས་ཏ་ལའི་ཤིང་ཉིད་དུ་འགྱུར་རོ། །འདི་ནི་བཅོམ་ལྡན་འདས་ཕྱག་ན་རྡོ་རྗེས་བཀའ་སྩལ་ཏོ། །འཕགས་པ་ཕྱག་ན་རྡོ་རྗེས་བཀའ་སྩལ་པའི་འཁྲུལ་འཁོར་འབའ་ཞིག་པའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པའི་སྤྱོད་ཡུལ་གྱི་
གནས་ན་གསང་བ་པའི་བདག་པོ་ལག་ན་རྡོ་རྗེ་དང་ཐབས་ཅིག་ཏུ་བ་ཞུགས་སོ། །དེ་ནས་བཅོམ་ལྡན་འདས་ཀྱིས་གསང་བའི་བདག་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཇི་ལྟར་ལྷ་མ་ཡིན་ཐམས་ཅད་ཀྱི་དྲེགས་པ་གཞོམ་པ་དང་། དམ་ཚིག་ལ་གནས་པར་བྱ་བའི་

ཕྱིར། །རྡོ་རྗེ་ཁྲོ་བོའི་དམ་ཚིག་འདི་སྒྲོགས་ཤིག །དེ་ནས་ལག་ན་རྡོ་རྗེ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ལ་བཏུད་ནས་ཐལ་མོ་སྦྱར་ཏེ་ཕྱག་བྱས་ནས་རྡོ་རྗེ་ཁྲོ་བོས་སྨྲས་སོ། །སྨྲས་པ་ཙམ་
གྱིས་རྡོ་རྗེ་ཁྲོ་བོའི་རྒྱལ་པོ་མེ་ལྕེ་གཅིག་ཏུ་འབར་ཏེ། འཇིག་རྟེན་གསུམ་བཀང་ནས་སྒྲ་ཆེན་པོ་ཕྱུང་ངོ་། །དེ་ནས་དེ་ལྟ་བུའི་མཚན་མ་ཆེན་པོ་དེས་ལྷ་མ་ཡིན་འཁོར་དང་བཅས་པ་ཐམས་ཅད་འདིར་ལྷ་དང་ལྷ་མ་ཡིན་རྣམས་གཡུལ་འགྱེད་པར་གྱུར་ཏོ་སྙམ་དུ་སེམས་ཏེ། ལྷ་མ་ཡིན་རྣམས་
ལ་ཐགས་ཟངས་རིས་དང་། སྟོབས་ཅན་དང་། རྣམ་པར་སྣང་བྱེད་དང་། རབ་བདེ་དང་། བདེ་མཆོག་དང་། དུས་ཀྱི་མུ་ཁྱུད་དང་། དབྱིག་ཟ་དང་། རུས་སྦལ་ལ་སོགས་པ་འཁོར་དང་བཅས་པ་དང་། གཞན་ཡང་བགྲོད་དཀའ་ཆེན་པོ་དང་། གློག་གི་ལྕེ་དང་། སྒྲ་གཅན་
དང་། སྣང་བའི་ཕྲེང་བ་ཅན་དང་། འཕྲོག་བྱེད་སེར་སྐྱལ་སོགས་པ་དང་། ཡི་དགས་དང་། ལྷ་མ་ཡིན་གྱི་རྗེས་སུ་དཔྱོད་པ་དཔུང་དང་བཅས་པ་བཞོན་པ་དང་བཅས་པ་འདུས་ཏེ། བཅོམ་ལྡན་འདས་ག་ལ་བ་དེར་ལྷགས་སོ། །ལྷ་རྣམས་ཀྱིས་ཀྱང་དེ་ལྟ་བུའི་མཚན་མ་ཆེན་པོ་དེ་
མཐོང་ནས་ལྷའི་ཚོགས་གཞན་རྣམས་དང་རང་རང་གི་རྣམ་པར་རྟོག་པ་ཇི་ལྟ་དེ་ལྟར་ལྷ་རྣམས་ཀྱེ་དབང་པོ་ལ་སྨྲ་ཞིང་། བཅོམ་ལྡན་འདས་ག་ལ་བ་དེར་ལྷགས་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་བཀའ་སྩལ་
པ། ལག་ན་རྡོ་རྗེ་གང་འདིར་དུས་ལ་བབ་པར་ཤེས་ན་དེང་འདིར་ས་འོག་གི་དབང་བསྐུར་བ་རྔའི་སྒྲ་དབྱངས་ཞེས་བྱ་བས་བྱིན་གྱིས་རློབས་ཤིག །སྐྱེ་བོ་མང་པོ་ལ་ཕན་པ་དང་དོན་དང་བདེ་བར་འགྱུར་རོ། །བཅོམ་ལྡན་འདས་བདག་གིས་ཐེག་པ་ཆེན་པོ་ལ་དད་པ་དང་ལྡན་པའི་རིགས་ཀྱི་
བུའི་དོན་དུ་དམ་ཚིག་བསྟན་པས་བྱིན་གྱིས་བརླབས་ལགས་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱིན་གྱིས་བརླབ་ཏུ་གསོལ། དེ་བཞིན་གཤེགས་པ་གཞན་གྱིས་ཀྱང་བྱིན་གྱིས་བརླབས་ལགས་སོ། །དེ་བདག་

གིས་ཀྱང་བྱིན་གྱིས་བརླབ་པར་བགྱིའོ། །དབང་ལྡན་གྱི་ཕྱོགས་སུ་བསྡད་ལ་གནས་མཆོག་དེར་མགལ་དུ་མ་དང་། རྡོ་བ་དོར་ཏེ། འཁྲུལ་འཁོར་དང་ཤིང་སྡོང་སྤངས་ལ་གཞན་ཡང་བསང་གཏོར་དང་། ལྷའི་མཆོད་སྦྱིན་དང་། དཀྱིལ་འཁོར་དང་དབང་བསྐུར་བ་བྱས་
པ་དང་། བགེགས་དང་། ལོག་འདྲེན་དང་། གནོད་སྦྱིན་མཆོད་པ་བྱས་པ་དང་། དགེ་འདུན་དབང་བསྐུར་བའི་གནས་རྣམས་དོར་ལ། དེར་ཡང་ཆུ་སྣུམ་པ་དང་། མཚོ་དང་། མཚེའུ་དང་། རི་བོ་དང་སྣུམ་པའི་ཕྱོགས་མཚོན་པར་བྱས་ལ་དེ་རྣམས་སུ་སྔོན་བཞིན་དུ་བྱི་དོར་དང་ཡོངས་སུ་
སྦྱང་བ་བྱས་ཏེ། ཚོན་སྣ་ལྔས་གྲུ་བཞི་པ་སྒོ་བཞི་པའི་རི་མོ་བྲིས་ལ་དཀྱིལ་འཁོར་གྱི་དབུས་ཆ་བརྒྱད་པར་བྱས་ཏེ། ཡུངས་ཀར་དཀར་པོས་བྱིན་གྱིས་བརླབས་པའི་རྡོ་རྗེ་གྲྭ་བཞིར་གཞག་པར་བྱའོ། །དེའི་དབུས་སུ་སངས་རྒྱས་བཅོམ་ལྡན་འདས་བྲི་བར་བྱའོ། །བཅོམ་ལྡན་འདས་ཀྱི་
གཡས་ཀྱི་དྲུང་དུ་འཕགས་པ་ཕྱག་ན་རྡོ་རྗེ་འབར་བའི་ཕྱག་ཅན་གཞག་པར་བྱའོ། །དེའི་དྲུང་དུ་ཁྲོ་བོའི་རྒྱལ་པོ་རྡོ་རྗེ་ས་འོག་རྡོ་རྗེ་ས་འོག་རྡོ་རྗེ་དགྲ་སྟའི་ཕྱག་ཅན་གཞག་པར་བྱའོ། །བཅོམ་ལྡན་འདས་ཀྱི་གཡོན་གྱི་དྲུང་དུ་བྱང་ཆུབ་སེམས་དཔའ་དྲི་མ་མེད་པའི་བློ་གྲོས་རྔ་ཡབ་ཀྱི་ཕྱག་ཅན་གཞག་པར་བྱའོ། །
བཅོམ་ལྡན་འདས་ཀྱི་མདུན་དུ་ལྷ་ཆེན་པོ་ཆུང་མ་དང་བཅས་པ་གཞག་པར་བྱའོ། །དེའི་མདུན་དུ་ཁྱུ་མཆོག་ཁ་འོག་ཏུ་ལྟ་བ་ནག་པོའི་གོས་ཅན་གཞག་གོ། །ཤར་གྱི་སྒོར་སྨན་ཐམས་ཅད་གཞག་པར་བྱ་སྟེ། ཨེ་ར་བ་ཏི་དང་། མེ་ཥ་བ་ཏི་དང་། ཛྱོ་ཏི་ར་ས་དང་། བེ་ག་བ་ཏི་དང་། སཱུརྱ་བ་ཏི་དང་
ཨ་ཛ་གནྡྷ་དང་། ཡཀྵ་ཀ་ནྱ་སྟེ། སྨན་ཆེན་པོ་འདི་བརྒྱད་གཞག་པར་བྱའོ། །དེའི་གཟུགས་ནི་སེང་གེ་དང་། ཁྱུ་མཆོག་དང་། བྱ་རྒོད་དང་། རུས་སྦལ་དང་། སྦལ་པ་དང་། རྩངས་པ་དང་། མེ་འབར་བ་དང་། དངུལ་ཆུ་རྣམས་གནས་རྣམས་སུ་གོ་རིམས་བཞིན་དུ་བྲི་བར་བྱའོ། །སྨན་
རྣམས་དངུལ་ཆུ་དང་། བཅུད་ལེན་དང་། རིགས་ཀྱི་བུད་མེད་ཀྱི་དབྱིབས་སུ་གཞག་པར་བྱའོ། །རྒྱན་རྣམས་དང་། གྲུབ་པའི་རྫས་རྣམས་དང་། ལྡོང་རོས་དང་། མིག་སྨན་དང་། གི་ཝང་དང་བུམ་པ་བཟང་པོ་དང་། རྐང་བྱུག་དང་། མཆོད་ཕྱིར་ཐོགས་དང་། འཁོར་ལོ་དང་། རལ་གྲི་

དང་། དབྱུག་གུ་དང་། རྩེ་གསུམ་དང་། ཞགས་པ་ལ་སོགས་པ་བྲི་བར་བྱའོ། །དེའི་ལྷོའི་སྒོར་ལྷ་མ་ཡིན་བརྒྱད་བྲི་སྟེ། སྟོབས་ཅན་དང་། སྟོབས་ཅན་གྱི་བུ་དང་། བདེ་མཆོག་དང་། དུས་ཀྱི་མུ་ཁྱུད་དང་། ཐགས་ཟངས་རིས་དང་། རབ་བདེ་དང་། གཞན་ལེན་དང་། དབྱིག་
ཟའོ། །ནུབ་ཀྱི་སྒོར་འཁྲུལ་འཁོར་སུམ་ཅུ་ལྷག་པའི་སྟོང་གཞག་པར་བྱའོ། །དེ་ལ་འཁྲུལ་འཁོར་ཆེན་པོ་བརྒྱད་རྣམ་པ་དང་བཅས་པ་གཞག་པར་བྱ་སྟེ། དེ་ལ་སྲད་བུ་དང་། གྲི་གུག་དང་། བུད་མེད་དང་། གཞིའི་འཁྲུལ་འཁོར་དང་། འཕང་འཛིན་པའི་ལག་པ་དང་། འོག་
ཏུ་ལྟ་བའི་ཚུལ་དང་། གཞིའི་འཁྲུལ་འཁོར་ལ་ལྟ་བ་བྲི་བར་བྱའོ། །དེ་ནས་སེང་གེ་དང་། ལུག་དང་། ཆུ་སྲིན་དང་། གླང་པོ་ཆེ་དང་། ལྟོ་འཕྱེའི་རྣམ་པ་དང་། དཀྱིལ་འཁོར་གྱི་རྣམ་པ་དང་མ་བྱས་པའི་གདོང་དང་། དཔལ་གྱི་སྒོ་འདི་བརྒྱད་རྣམ་པ་དང་བཅས་པ་བྲི་བར་བྱའོ། །གདོང་
གི་འཁྲུལ་འཁོར་མཆུ་བཙུམས་པ་བྲི་བར་བྱའོ། །ལུག་གི་སྤྱི་བོར་ཕུར་བུའི་འཁྲུལ་འཁོར་བྲི་བར་བྱའོ། །མདའ་དང་བཅས་པའི་གཞུ་དང་། ཆུ་རྒྱུན་གྱི་ལྟེ་བར་ཕུར་བུ་གཞག་པར་བྱའོ། །སྦྱིན་དང་འོད་ལི་གྲུ་བཞི་པ་དང་། བསྐོར་བའི་འཁྲུལ་འཁོར་བྲིའོ། །གཉིད་དང་། འོད་འཕྲོ་བའི་
རྣམ་པ་བྲི་བར་བྱའོ། །དེ་ཡང་གོ་རིམས་བཞིན་དུ་རྣམ་པ་དང་བཅས་པའི་འཁྲུལ་འཁོར་ལ་ཕུར་བུས་བསྣུན་པ་བྲི་བར་བྱའོ། །དེ་ནས་བྱང་གི་སྒོར་བུ་ག་རྣམ་པ་དང་བཅས་པ་བྲི་བར་བྱ་སྟེ། སེང་གེ་དང་། ལུག་དང་། ཆུ་སྲིན་དང་། གླང་པོ་ཆེའི་གདོང་དང་། ལྟོས་འཕྱེའི་གདོང་དང་། བ་
ལང་གི་གདོང་དང་། དཀྱིལ་འཁོར་དང་། མ་བྱས་པའི་གདོང་གི་རྣམ་པ་སྟེ། དཔལ་གྱི་སྒོ་བརྒྱད་ཕུར་བུས་བསྣུན་པའི་རྣམ་པ་དང་བཅས་པ་བྲི་བར་བྱའོ། །དེའི་དབུས་སུ་ཆུ་རྒྱུན་དབྱུག་གུ་དང་བཅས་པ་བྲི་བར་བྱའོ། །གྲྭ་བཞིར་སྒོ་བྲལ་བཞི་བྲི་བར་བྱའོ། །མེར་མེའི་ཐབ་ཁུང་ངོ་། །
བདེན་བྲལ་དུ་དུ་བའི་ཐབ་ཁུང་ངོ་། །རླུང་དུ་ཆུའི་ཐབ་ཁུང་ངོ་། །དབང་ལྡན་དུ་སྦྲུལ་གཞག་པར་བྱའོ། །དེ་ནས་རས་དཀར་པོ་ཕྲ་བ་དྲི་ཞིམ་པའི་གདུགས་བཞི་དང་། དབྱིག་དང་བཅས་པའི་ནོར་བུས་བྱིན་གྱིས་བརླབས་ལ་ཤིན་ཏུ་དྲི་ཞིམ་པའི་ཆུ་གཙང་མས་ཡོངས་སུ་བཀང་བའི་བུམ་པ་

རྩ་བ་ནག་པོ་མེད་ཅིང་དྲི་ཞིམ་པོས་ཡོངས་སུ་བྱུགས་པ་བཞག་གོ། །ཕྱིའི་དཀྱིལ་འཁོར་གྱི་ཕྱོགས་གྲྭ་བཞི་པའི་ཤར་གྱི་སྒོར་གནས་གཅིག་ཏུ་ལྷ་མ་ཡིན་གྱི་དབང་པོ་ཆེན་པོ་སྟོབས་ཅན་དང་། བགྲོད་དཀའ་ཆེན་པོ་བྲི་བར་བྱའོ། །དེའི་ལྷོར་རྣམ་པར་སྣང་བྱེད་དང་ཧ་རི་ཏའི་པི་གི་ལ་
ཞེས་བྱ་བ་བྲི་བར་བྱའོ། །དེའི་ནུབ་ཀྱི་སྒོར་སྣང་བའི་ཕྲེང་བ་ཅན་དང་རྔ་བོ་ཆེ་སྟེ། ལྷ་མ་ཡིན་གྱི་དབང་པོ་དེ་དག་བྲི་བར་བྱའོ། །དེ་ནས་མཆོད་པ་ཤ་མེད་པའི་ལྷ་བཤོས་བཞི་བྱ་སྟེ། གཅིག་ནི་སངས་རྒྱས་བཅོམ་ལྡན་འདས་ལའོ། །གཉིས་པ་ནི་དྲི་མ་མེད་པའི་བློ་གྲོས་ལའོ། །གསུམ་པ་ནི་རྡོ་རྗེ་
འཛིན་པ་ལའོ། །བཞི་པ་ནི་ཁྲོ་བོའི་རྒྱལ་པོ་ལའོ། །ལྔ་པ་ནི་ལྷ་ཆེན་པོ་ལའོ། །དེ་ནས་ཇི་ལྟར་འབྱོར་པས་ལྷ་མ་ཡིན་གྱི་དབང་པོ་རྣམས་ཀྱི་གཏོར་མ་དང་། འབྱུང་པོ་ཐམས་ཅད་པའི་གཏོར་མ་སྦྱིན་པར་བྱའོ། །དེ་ནས་དྲི་ཐམས་ཅད་དང་མེ་ཏོག་དང་ཕྱེ་མ་ལ་སོགས་པའི་ལྷ་བཤོས་སྦྱིན་ནོ། །
དེ་ནས་ལྷ་རྣམས་ས་འཆིང་བར་བྱེད་པའི་སྔགས་ནི། ཨོཾ་བཛྲ་གརྦྷེ་བཛྲ་གརྦྷེ་ཕཊ་ཧཱ་དྷི་ཀི་རི་ཎི་སྭཱ་ཧཱ། དེ་ནས་མཚམས་བཞི་རུ་ལག་པ་ཕྱག་རྒྱས་བྱིན་གྱིས་བརླབས་པས་ལོག་འདྲེན་བཅིང་བར་བྱའོ། །དེའི་སྔགས་ནི་ན་མཿས་མནྟ་བཛྲཱཎཱཾ། ཨོཾ་བཛྲ་པཱ་ལ་ཡེ་སྭཱ་ཧཱ་ཞེས་ལན་གསུམ་དུ་བརྗོད་
དོ། །རྡོ་རྗེ་ལྕགས་སྒྲོག་གིས་བཅིང་བ་དང་དགུག་པར་བྱའོ། །སངས་རྒྱས་དང་བྱང་ཆུབ་སེམས་དཔའ་རྣམས་དང་ལྷ་ཐམས་ཅད་མེ་ཏོག་གིས་དགུག་པར་བྱའོ། །ན་མ་སྟྲཻ་ཡ་དྷྭི་ཀྵ་ནཱཾ་སརྦ་ཏ་ཐཱ་ག་ཏཱ་ནཱཾ་ཨ་ན་ལ་བྷཱ་ཀཱ་ནཱཾ་ན་མཿསྭཱ་ཧཱ། དེ་ནས་སྐྱེས་བུ་དཔའ་བོས་སྔགས་འདིས་བསྲུང་བར་བྱ་སྟེ།
ཨོཾ་དཱུརྦཱ་རེ་ཛྭ་ལ་ཛྭ་ལ་ན་མོ་བཛྲ་སཱ་ག་རཱ་ཡ་སྭཱ་ཧཱ། འདིས་བསྲུངས་ནས་རས་དཀར་པོ་ཕྲ་བ་དྲི་ཞིམ་པོས་གདོང་གཡོགས་ཏེ་འཁྲུལ་འཁོར་གྱི་བླ་མ་བཟླས་ལ་སྐྱེས་བུ་དཔའ་བོས་ཆོས་ཀྱི་གྲུ་ལྟ་བུའི་ཤིང་ལྷ་མ་བསྐོན་ཏེ། ལག་པ་གཡས་པ་རུས་སྦལ་གྱི་ཕྱག་རྒྱའམ། ལྷ་མ་ཡིན་གྱི་
ཕྱག་རྒྱ་བཅིངས་ལ། རྩ་བ་ནག་པོ་མེད་པའི་བུམ་པ་ལོ་མ་བཟང་པོ་དང་ལྡན་པའི་ཆུས་ཤར་གྱི་སྒོར་འཁྲུལ་འཁོར་གྱི་བླ་མ་ཟློས་ཤིང་དབང་བསྐུར་བར་བྱའོ། །དེ་ལྟར་དབང་བསྐུར་བ་དེའི་རྗེས་སུ་ལག་པ་རྡོ་རྗེའི་ཕྱག་རྒྱས་མེ་ཏོག་དོར་རོ། །མེ་ཏོག་གང་ལ་ལྟུང་བ་དེའི་ལྷའི་རིགས་

འགྲུབ་བོ། །དེ་ནས་གདོང་བཅིངས་པ་བཀྲོལ་ལ་དབང་བསྐུར་བ་དེ་ལ་སྐྱེས་བུ་དཔའ་བོས་དཀྱིལ་འཁོར་བསྟན་པར་བྱའོ། །ལྷ་མ་ཡིན་གྱི་དབང་པོ་རྣམས་ཀྱི་གནས་དང་། མཚོན་ཆ་དང་། དངུལ་ཆུ་དང་། བཅུད་ལེན་དང་། བུད་མེད་ཀྱི་ཚོགས་དང་། གྲུབ་པའི་རྫས་དང་དེ་དག་གི་
དཀྱིལ་འཁོར་མཐོང་ན། ལྷ་དང་ལྷ་མ་ཡིན་གྱི་དམ་ཚིག་གི་ཚོགས་སུ་འགྲོ་བར་འགྱུར་རོ། །སྔོན་དུ་བསྙེན་པ་མ་བྱས་ཀྱང་འཁྲུལ་འཁོར་འཇིག་པར་འགྱུར་རོ། །དེ་དག་གིས་ཉེ་བར་མི་རྩེད་དོ། །ལྷ་མ་ཡིན་ཐམས་ཅད་ཀྱི་ཁང་པ་དང་། དངུལ་ཆུ་དང་། བཅུད་ལེན་དང་། བུད་མེད་དང་།
མཚོན་ཆ་དང་། རྒྱན་དང་། སྒྱུ་མ་ལ་སོགས་པའི་འཁྲུལ་འཁོར་རྣམ་པ་སྣ་ཚོགས་པ་དེས་དབང་དུ་འགྱུར་རོ། །སྒྱུ་མས་སྤྲུལ་པའམ། ལྷ་མ་ཡིན་གྱི་སྤྲུལ་པ་རྣམས་སམ། གཞན་ཡང་དྲང་སྲོང་དང་། གྲུབ་པས་རབ་ཏུ་སྦྱར་བའི་འཁྲུལ་འཁོར་ལ་སོགས་པ་ལྟུང་བ་དང་དབང་དུ་བྱེད་
ནུས་པར་འགྱུར་རོ། །གང་དག་དཔལ་གྱི་སྒོར་འཇུག་པར་འདོད་ན་སྔོན་དུ་རྡོ་རྗེ་ཁྲོ་བོས་བཟླས་ལ་དཔལ་གྱི་སྒོར་བརྗོད་པ་དང་སྦྱོང་བས་བསྲེག་པ་ལ་སོགས་པ་བྱས་ཏེ། བ་སེར་སྐྱའི་ལྕི་བས་དཀྱིལ་འཁོར་བྱུགས་ལ་གཏོར་མའི་ཆོ་ག་བྱས་ནས་ཁའི་རྣམ་པའི་ཐབ་ཁུང་གི་སྟེང་དུ་ཨ་པ་མཱ་རྒའི་
ཡམ་ཤིང་ལ་མེ་སྦར་ལ། ཨ་པ་མཱརྒའི་འབྲས་བུ་སྟོང་ཕྲག་བརྒྱད་སྦྱིན་སྲེག་བྱའོ། །དེས་འཁྲུལ་འཁོར་ཐམས་ཅད་ལྟུང་བར་འགྱུར་རོ། །དེ་ནས་རའི་པགས་པའི་རལ་གུ་གྱོན་ལ་ལག་ཏུ་མཚོན་ཆ་ཐོགས་ཏེ། མར་མེའི་མཆོད་སྡོང་བ་ལང་གི་མའི་པགས་པ་བཅིངས་ལ་ཤལ་མ་ལིའི་
དོག་པས་བཀང་སྟེ། ཛྱོ་ཏི་སྨ་ཏིའི་འབྲུ་མར་ལ་སྔགས་འདིས་མེ་སྦར་རོ། །ཨོཾ་དཱུ་པི་དཱུ་པི་པྲ་ཛྭ་ལི་ནི་སྭཱ་ཧཱ། ཡང་ན་བུ་ག་གང་གི་རྣམ་པར་གྱུར་པ་དེའི་ཞག་ལ་སྔགས་འདིས་མེ་སྦར་ཏེ། འཁྲུལ་འཁོར་གྱི་བླ་མ་བཟླའོ། །མུན་པ་མུན་ནག་ཐམས་ཅད་འཇོམས་པར་འགྱུར་རོ། །བདག་
དང་ལྷན་ཅིག་སྤྱོད་པ་ཐམས་ཅད་སྨན་གྱིས་ལུས་བྱུག་གོ། །སྨན་ནི་འདི་དག་སྟེ་རྒྱ་སྤོས་དང་། གུར་གུམ་དང་། རུ་རྟ་དང་། སྤང་སྤོས་དང་། སུག་སྨེལ་དང་། མུ་ལི་ཀ་དང་། དཎྜ་ཨུཏྤལ་དང་། སིང་གྷྲི་དང་། བྱཱ་གྷྲི་དང་། ན་མ་སྐ་རི་དང་། ཨ་ནན་ཏ་དང་། ཛ་ཡན་ཏི་དང་། རྨ་བྱའི་

གཙུག་ཕུད་དག་སྟེ། འདི་རྣམས་ཀྱི་ཕྱེ་མ་སྒྱུ་མ་ཐམས་ཅད་འཇོམས་པར་བྱེད་པ་ཞེས་བྱ་སྟེ། ཆུའི་འཁྲུལ་འཁོར་དང་། སྦྱིན་དང་། དངུལ་ཆུ་དང་། བཅུད་ལེན་དང་། བུད་མེད་ཀྱི་དབུས་སུ་འཇུག་པ་དང་། ལྷ་མ་ཡིན་གྱི་བུ་མོ་འགུགས་པ་ན་ཆོ་ག་ཕྲ་མོ་བྱས་ཏེ། འཁྲུལ་
འཁོར་གྱི་བླ་མ་བཟླས་ནས་དེའི་རྐང་པ་ལེགས་པར་བྱུགས་པས་སྦྱིན་ལ་སོགས་པའི་འཁྲུལ་འཁོར་ཐམས་ཅད་འབྱུང་བར་འགྱུར་རོ། །དེར་འཇུག་པ་ན་སྔོན་དུ་བཛྲ་ཏན་ཏུ་ལི་བསླགས་ལ་ཀ་ར་དང་ལྷན་ཅིག་ཏུ་ཟོས་ལ་འཇུག་གོ། །ལྷའི་ཁང་པའི་ལྷ་བཤོས་མི་བྱའོ། །ལྷའི་གྲོང་ལ་གཡས་
ཕྱོགས་ནས་བསྐོར་ལ་འགྲོའོ། །རྔའི་ཁང་པར་འཇུག་གོ། །རྔའི་འོག་ཏུ་རུས་སྦལ་གྱི་ཕྱག་རྒྱ་བྲིའོ། །དབྱུག་གུ་ལ་འཁྲུལ་འཁོར་གྱི་བླ་མ་བརྒྱ་རྩ་བརྒྱད་བཟླས་ཏེ། རྐང་པ་གཡོན་པས་མནན་ལ་ཁྲོ་བོའི་རྒྱལ་པོ་ཟློས་ཤིང་བརྡུང་ངོ་། །འཇུག་པའི་སྔོན་དུ་མཆོད་ཡོན་དང་། ཞབས་
བསིལ་དང་། འཐོར་འཐུང་བཟུང་ནས་མ་འོངས་ན་ཐམས་ཅད་དེར་འཆི་བར་འགྱུར་རོ། །ཅི་ནས་ཀྱང་འོང་བར་འགྱུར་རོ། །འདི་ནི་བཅོམ་ལྡན་འདས་རྡོ་རྗེ་འཛིན་པ་ཉིད་ཀྱིས་གསུངས་སོ། །ཡང་ན་ཕྱག་རྒྱའི་སྟེང་དུ་རྐང་པས་རྐང་པ་མནན་ལ་ཁ་བྱང་དུ་ཕྱོགས་ཏེ། ཕྱག་རྒྱ་བཅིངས་ལ་ཅུང་ཟད་ཅིག་
བཟླའོ། །རྐང་འོག་གི་ནང་ན་གནས་པ་ཐམས་ཅད་དང་། ལྷ་མ་ཡིན་གྱི་བུ་མོ་ངེས་པར་འོང་བར་འགྱུར་རོ། །ཇི་ལྟར་འདོད་པའི་དངུལ་ཆུ་དང་། བཅུད་ལེན་དང་། གྲུབ་པའི་རྫས་རྣམས་སྟེར་རོ། །དེ་ནས་ཇི་ལྟར་འདོད་པའི་དུས་དེ་སྲིད་དུ་དེ་རྣམས་དང་ལྷན་ཅིག་ཏུ་གནས་སོ། །དེ་
ནས་འོང་བར་འདོད་ན་སེམས་ཅན་ལ་ཕན་པར་བྱེད་པའི་རྫས་མཛེས་པ་ཇི་ལྟར་འདོད་པ་བཟུང་ལ་གང་འདོད་པ་དེར་གདོན་མི་ཟ་བར་དོང་བར་བྱའོ། །དེ་ནས་འཁྲུལ་འཁོར་གྱི་དབྱིབས་ཀྱི་རྣམ་པ་སེམས་ལ་བྲིས་ལ་ལྷ་མ་ཡིན་གྱི་ཕྱག་རྒྱའམ་གཞན་གྱི་ཕྱག་རྒྱ་བཅིངས་ལ་བཟླའོ། །དེའི་སྐད་ཅིག་
ལ་སྣང་བ་ཆེན་པོ་བྱུང་ནས་སྒོ་གྲོལ་བར་འགྱུར་རོ། །སོམ་ཉི་མེད་པར་ཇི་ལྟར་འདོད་པར་འགྲོའོ། །དཔག་ཏུ་མེད་པའི་སྟོབས་ཀྱིས་ཕ་རོལ་གནོན་པར་འགྱུར་རོ། །ཡིད་ལྟར་མགྱོགས་པ་དང་། ཇི་ལྟར་འདོད་པའི་རྒྱལ་པོ་གདུལ་དཀའ་བ་འདུལ་བར་འགྱུར་རོ་ཞེས་བཅོམ་ལྡན་འདས་

རྡོ་རྗེ་འཛིན་པས་བཀའ་སྩལ་ཏོ། །རྡོ་རྗེ་རྔ་བོ་ཆེ་ས་འོག་གི་དཀྱིལ་འཁོར་ཞེས་བྱ་བ་དོན་ཡོད་པ་ལྷ་མ་ཡིན་གྱི་གཙོ་བོ་སྐྱེས་བུ་དཔའ་བོ་རྣམས་དབང་བསྐུར་བ་འདི་ལས་གཞན་པ་མེད་དོ། །རྡོ་རྗེ་རྔ་བོ་ཆེ་ས་འོག་གི་ཕྱག་རྒྱ་དང་དཀྱིལ་འཁོར་ཞེས་བྱ་བ་ལས་དོན་ཡོད་པའི་ལེའུ་སྟེ་དྲུག་པའོ།། །།དེ་
ནས་རྡོ་རྗེ་ས་འོག་ལས། །གསུངས་པའི་དབང་བསྐུར་རབ་བཤད་བྱ། །ས་འོག་དཀྱིལ་འཁོར་གསང་བ་ཡི། །རྔ་ཡི་སྒྲ་དབྱངས་བྲི་བར་བྱ། །དེ་ནས་རུས་སྦལ་ཕྱག་རྒྱ་བཞག །ཡུངས་ཀར་དཀར་པོའི་སྟེང་དུའོ། །མཆོད་པའི་ཆོ་ག་བྱས་ནས་སུ། །ཕྲ་བའི་རས་ཀྱིས་བརྒྱན་པ་
ཡི། །བུམ་པ་རྩ་བ་མི་གནག་པ། །རིན་ཆེན་སྨན་གྱིས་ཡོངས་བཀང་ལ། །གཏོར་མ་གཡས་བསྐོར་བྱིན་ནས་སུ། །ཕྱག་རྒྱའི་སྟེང་དུ་གཞག་པར་བྱ། །སྔོན་དུ་བཤད་པའི་ཆོ་ག་ཡིས། །དཀྱིལ་འཁོར་བྱིན་གྱིས་བརླབ་པར་བྱ། །ལྷ་དག་སྤྱན་དྲངས་བྱས་ནས་སུ། །ཇི་ལྟར་
རིགས་པའི་མཆོད་པ་བྱ། །བྱང་ཆུབ་སེམས་ནི་བསྐྱེད་ནས་སུ། །སྡིག་པ་ཡང་ནི་བཤགས་པར་བྱ། །དེ་ནས་རྡོ་རྗེའི་ཕྱག་རྒྱ་བཅིང་། །གསང་བའི་དཀྱིལ་འཁོར་ཕྱི་རོལ་ཏུ། །གྲུབ་པའི་རྡོ་རྗེའི་ཆུ་ཡིས་སུ། །དེ་ནས་དབང་བསྐུར་བ་ནི་བྱ། །ཇི་ལྟ་བ་ཡི་དབང་བསྐུར་ལ། །དེ་ལྟ་
བུ་ཡི་བུམ་པ་དགོད། །གང་གི་དཀྱིལ་འཁོར་ཆོ་ག་ལ། །ཕྱག་རྒྱ་གཏོར་མའི་ཆོ་གར་བཤད། །དབང་བསྐུར་ཕྱིར་ནི་འབད་པ་ཡིས། །ཕྱག་རྒྱ་བཅིངས་ལ་གནས་པར་བྱ། །སྔོན་དུ་བསྙེན་པ་བྱས་ནས་སུ། །དངུལ་ཆུའི་བྱ་བ་སྤང་བར་བྱ། །མདོ་སྡེའི་རྗེས་འབྲང་ཆོག་ཡིས། །
མཆོད་རྟེན་གྱི་ནི་ལས་བྱའོ། །གྲོགས་རྣམས་ཀུན་དང་རྣམ་གྲོལ་ཏེ། སློང་མོ་ཟ་ཞིང་མཉམ་གཞག་པས། །མྱུར་དུ་དངོས་གྲུབ་ཐོབ་པར་འགྱུར། །ཕྱག་ན་རྡོ་རྗེས་བྱིན་གྱིས་རློབ། །འཕགས་པ་རྡོ་རྗེས་འོག་གི་སྒྲུབ་པར་བྱེད་པའི་དབང་བསྐུར་བའི་ལེའུ་སྟེ་བདུན་པའོ། །དེ་ནས་
འདིར་བཅོམ་ལྡན་འདས་འཇིག་རྟེན་གསུམ་གྱིས་ཞབས་ལ་རྗེད་པ། ཁྲོ་བོ་ཆེན་པོ་རྡོ་རྗེ་ས་འོག་གི་བྲིས་སྐུའི་ཆོ་ག་བརྗོད་པར་བྱའོ། །གཞོན་ནུ་མས་བཀལ་བའི་སྲད་བུ་བ་ལང་གི་ཆུས་བཀྲུས་ཏེ། ཡན་ལག་བརྒྱད་པའི་གསོ་སྦྱོང་ལ་གནས་པའི་ཐགས་མཁན་གྱིས་བཏག་བར་བྱའོ། །རས་

སུ་གྱུར་པ་དང་སྔགས་པའི་ཁྲུ་དོ་པའི་སྲིད་ལ་ཞེང་དུ་ཁྲུ་གང་དང་སོར་བརྒྱད་པ་ལ་རི་མོ་མཁན་ཡན་ལག་བརྒྱད་པའི་གསོ་སྦྱོང་དང་ལྡན་པ་ལ་བསྲུང་བ་བྱས་ཏེ། མཆོད་ཡོན་ཕུལ་ལ་བཅོམ་ལྡན་འདས་ཨུཏྤ་ལ་སྔོན་པོའི་ཁ་དོག་ཅན་ཁྲོ་བོ་སྤྱན་དམར་པོ་ཡ་སོས་མ་མཆུ་
མནན་པ། གནས་གསུམ་གཡོ་བ། ཁྲོ་གཉེར་བསྡུས་པ། གདུ་བུ་དང་། སྐ་རགས་དང་། རྐང་གདུབ་དང་། དཔུང་རྒྱན་དང་། རིན་པོ་ཆེའི་ཅོད་པན་གྱིས་སྤྲས་པའི་རལ་པའི་ཐོར་ཚུགས་ཅན་མི་མགོ་རློན་པའི་ཕྲེང་བས་བརྒྱན་པའི་མཆོད་ཕྱིར་ཐོགས་འཆང་བ་གདུ་བུ་དང་། འཁྱིལ་
པས་རྣ་བ་བརྒྱན་པ་རལ་པའི་ཐོར་ཚུགས་ཀྱི་སྟེང་དུ་པདྨའི་སྐྱིལ་ཀླུང་གིས་བཞུགས་པ་ཆོས་འཆད་པའི་ཚུལ་ཅན་བཅོམ་ལྡན་འདས་མི་འཁྲུགས་པ་བྲི་བར་བྱའོ། །ལག་པ་གཡས་པར་རབ་ཏུ་འབར་བའི་རྡོ་རྗེའོ། །གཉིས་པར་ལྕགས་ཀྱུའོ། །གཡོན་པར་པདྨའི་མཛོད་ཀྱི་ནང་དུ་ཡིད་བཞིན་
གྱི་ནོར་བུས་གང་བ་འཛིན་པའོ། །གཡོན་པའི་གཉིས་པ་ལྷ་མ་ཡིན་བསྡིགས་པའི་མཛུབ་མོའོ། །རྒྱ་མཚོ་ཆེན་པོའི་ནང་དུ་པདྨ་ཆེན་པོའི་སྟེང་ན་བཞུགས་པ་འགྲན་ཟླ་དང་བྲལ་བ་གཅིག་པུའོ། །གཡས་པའི་ལག་པའི་འོག་ཏུ་སྒྲུབ་བྱེད་པདྨའི་སྟེང་དུ་པུས་མོ་བཙུགས་པ་པདྨའི་སྡོང་བུས་བརྒྱན་
པའི་ལག་པ་ཅན་བྲི་བར་བྱའོ། །དེ་ནས་སྔར་བཤད་པའི་གནས་རྣམས་སུ་རྗེས་སུ་མཐུན་པའི་རབ་ཏུ་གནས་པ་དང་མཆོད་པ་བྱས་ལ་རིང་བསྲེལ་ཅན་གྱི་མཆོད་རྟེན་གྱི་མདུན་དུ་འབུམ་ཕྲག་བཅུ་བཟླས་པར་བྱའོ། །དེ་ནས་ལས་ཐམས་ཅད་བྱེད་པར་འགྱུར་རོ། །དཔལ་གྱི་སྒོར་བྲིས་སྐུ་བཞག་
པར་བྱའོ། །ཇི་ལྟར་འདོད་པར་རོ། །དཔལ་དང་ལྡན་པས་བ་ལང་གི་པགས་པའི་སྟན་ལ་གོས་དམར་པོ་གྱོན་ཏེ། དུག་དང་ཁྲག་བསྲེས་ལ་མིའི་རུས་པའི་ལག་པས་བཅུས་ཤིང་བརྒྱ་ཕྲག་བརྒྱད་སྲེག་བླུགས་བྱའོ། །བུ་གའི་འཁྲུལ་འཁོར་ཐམས་ཅད་འཇོམས་པར་འགྱུར་རོ། །
བཅོམ་པ་དང་། དངུལ་ཆུ་དང་། བཅུད་ལེན་དང་། བུད་མེད་ཀྱི་གྲོང་དུ་འཇུག་པར་འགྱུར་རོ། །འཁྲུལ་འཁོར་རྣམས་བཀའ་བཞིན་དུ་སྒྲུབ་པར་འགྱུར་རོ། །ཕྱག་རྒྱས་ལྷ་ཐམས་ཅད་འགུགས་པར་བྱེད་དོ། །འདི་ལྟ་བུས་གང་ཇི་ལྟར་སེམས་པའི་བསམ་པ་དང་། གང་ཇི་ལྟར་

སེམས་པའི་ལས་དང་། གང་ཇི་ལྟར་སེམས་པའི་ཆོ་ག་ཐམས་ཅད་བཀའ་བཞིན་དུ་བྱེད་པར་འགྱུར་རོ། །བསྒོ་བ་ཉན་པར་འགྱུར་རོ། །གང་ཞིག་ཀླུའི་རྒྱལ་པོ་བྲིས་ནས་དེའི་མདུན་དུ་བྲིས་སྐུ་བཀྲམ་སྟེ། རྐང་པ་གཡོན་པས་མནན་ལ། སྟོང་ཕྲག་བརྒྱ་བཟླས་པར་བྱའོ། །ཀླུའི་
རྒྱལ་པོ་དེ་འོངས་ནས་ཅི་བགྱི་ཞེས་སྨྲ་བར་འགྱུར་རོ། །དེས་སྨྲས་པ། ངའི་བཀའ་བཞིན་དུ་གྱིས་ཤིག་ཅེས་བརྗོད་དོ། །དེས་ཅི་བསྒོ་བ་ཉན་པར་འགྱུར་རོ། །ཀླུ་ཐམས་ཅད་ཀྱི་ཁང་པ་རྣམས་སུ་འཇུག་པར་འགྱུར་རོ། །དེ་དག་ལ་འདི་དག་ཐམས་ཅད་གྱིས་ཤིག་ཅེས་བཀའ་བསྒོ་བ་ཉན་ནོ། །
དེ་བཞིན་དུ་ལུས་ངན་རྣམས་དང་། གནོད་སྦྱིན་རྣམས་དང་། འབྱུང་པོ་རྣམས་དང་། སྲིན་པོ་རྣམས་དང་། བྱར་འདབ་རྣམས་ཀྱི་གནོད་སྦྱིན་མོ་ལ་སོགས་པ་ཐམས་ཅད་བཀའ་བཞིན་བྱེད་པར་འགྱུར་རོ། །ཅི་བསྒོ་བ་ཉན་ནོ། །གྲོག་མཁར་བདུན་གྱི་རྩེ་མོའི་ས་བསྡུས་ཏེ། དེ་ལས་
ནམ་མཁའ་ལྡིང་བྱས་ལ་རིང་བསྲེལ་གྱི་སྙིང་པོ་ཅན་གྱི་དྲུང་དུ་བྲིས་སྐུ་བཀྲམ་སྟེ། དགོན་པའམ་གཞན་གང་ཡང་རུང་བར་དེའི་སྟེང་དུ་བསྡད་ལ་སྟོང་ཕྲག་བརྒྱ་བཟླའོ། །དེའི་སྟེང་དུ་འགྲོའོ། །སྲེད་མེད་ཀྱི་བུ་ཆེན་པོའི་སྟོབས་སུ་འགྱུར་རོ། །སྤྲུལ་པ་ཆེན་པོ་བྱེད་དོ། །ཐམས་ཅད་གྲུབ་
པའི་རིག་པ་འཛིན་པ་རྣམས་ཀྱི་འཁོར་ལོས་སྒྱུར་བར་འགྱུར་རོ། །ལས་ཐམས་ཅད་པ་ལྟ་བུར་ཚེ་དཔག་ཏུ་མེད་པ་དང་། འཆི་བ་ལ་དབང་ཐོབ་པ་དང་། འདོད་ན་སངས་རྒྱས་ཀྱི་ཞིང་རྣམས་སུ་སྐྱེ་བ་དང་དེ་ནས་ཡང་ཤི་འཕོས་ནས་ཏིང་ངེ་འཛིན་གྱི་སྟོབས་ཀྱིས་བྱང་ཆུབ་སེམས་དཔའི་དགེ་བའི་
བཤེས་གཉེན་གྱིས་རྗེས་སུ་འཛིན་པར་འགྱུར་རོ། །འཕགས་པ་རྡོ་རྗེ་ས་འོག་གི་རྒྱུད་ཀྱི་སྤྲིན་ཆེན་པོ་འབེབས་པར་བྱེད་ཅིང་རྐང་འོག་ཐམས་ཅད་ཀྱི་ནང་དུ་རིག་པ་དང་སྤྱོད་པ་དང་། རིན་པོ་ཆེའི་འབྱུང་ཁུངས་ཐམས་ཅད་ཀྱི་གཙོ་བོ་དང་། མཆོག་སྟེར་བ་དང་། འཁོར་ལོ་འཛིན་པ་ལྟར་
གཅིག་ཏུ་དཔའ་བའི་རྒྱལ་པོ་ཆེན་པོར་འགྱུར་རོ། །འདི་ནི་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །འཕགས་པ་རྡོ་རྗེ་ས་འོག་གི་རྒྱུད་ལས་ཐམས་ཅད་སྒྲུབ་པར་བྱེད་པའི་ལེའུ་སྟེ་བརྒྱད་པའོ།། །།དེ་ནས་ལྷ་མ་ཡིན་ཐམས་ཅད་ཀྱིས་མཆོད་པ་མཆོག་ཏུ་གསང་བའི་བྲིས་

སྐུ་བཤད་པར་བྱའོ། །གཞོན་ནུ་མས་བཀལ་བའི་ཁ་ཚར་མ་བཅད་ཅིང་སྐྲ་མེད་པའི་རས་ལ་རི་མོ་མཁན་གསོ་སྦྱོང་དང་ལྡན་པས་ཁ་དོག་མ་འདྲེས་པ་སྣོད་གསར་པར་བཞག་ལ་ཁ་དོག་དམར་པོ་ཕྱག་བཞི་པ། སྦྲུལ་གྱི་སྐ་རགས་ཀྱིས་བརྒྱན་པ་སྦྲུལ་གྱི་མཆོད་ཕྱིར་
ཐོགས་པ་ཅན་སྤྲིན་གསར་པ་ལྟ་བུ་མཆུ་སྦྱར་བ་དཔྲལ་བར་ཁྲོ་གཉེར་བསྡུས་པ་རྡོ་རྗེ་དང་བཅས་པའི་མགོ་བོའི་ཕྲེང་བ་ཅན་གཡས་པར་དགྲ་སྟ་དང་ཡང་རྡོ་རྗེའོ། །གཡོན་པའི་སྡིགས་མཛུབ་ཀྱིས་དཔལ་གྱི་སྒོའི་བུ་ག་གསལ་བར་བྱེད་པ་གཡོན་པའི་གཉིས་པར་ལྟོས་འགྲོ་ཆེན་པོ་བསྐྱིལ་
བའི་ཞགས་པ་འཆང་བའོ། །འོག་ཏུ་གཟིགས་པ། ཞལ་མཆེ་པ་གཙིགས་པ་དྲག་པོའི་གཟུགས་ཅན་མ་མོས་པར་གྱུར་པས་བྲི་བར་བྱའོ། །རྣམ་པར་བྲལ་བའམ་སྟོང་པའི་ཕྱོགས་མེ་ཏོག་དང་འབྲས་བུ་ལྡན་པའམ་བུ་གའི་སྒོར་འབུམ་ཕྲག་དྲུག་བཟླའོ། །དེའི་སྔོན་དུ་ཇི་ལྟར་བྲིས་སྐུ་དེ་གདུག་
པ་ཅན་འགའ་ཡིས་ཀྱང་མ་མཐོང་བ་དེ་ལྟར་བྱའོ། །དེ་ནས་རྡོ་རྗེས་བསྣུན་པའི་ཤིང་གིས་ས་བསྲེགས་ལ་ཕྱོགས་དེར་ཡུངས་ཀར་དཀར་པོ་ལ་རྡོ་རྗེ་ཁྲོ་བོས་ཡོངས་སུ་བསྔགས་ཏེ་གདབ་པར་བྱའོ། །དེ་ནས་སྐྱེས་པའི་ས་བོན་དེ་གཟུང་བར་བྱའོ། །དེ་ནས་རྡོ་རྗེས་བསྣུན་པའི་ཤིང་ལ་མེ་སྦར་ཏེ། རྡོ་
རྗེའི་རྣམ་པའི་ཐབ་ཁུང་དུ་ཡུངས་ཀར་དེ་དང་ཙནྡན་དམར་པོ་བསྲེས་ལ་སྟོང་ཕྲག་བརྒྱད་སྲེག་བླུགས་བྱའོ། །ཉི་མ་བཞི་པ་ལ་ལྷ་མ་ཡིན་གྱི་གྲོང་ན་གནས་པའི་བུད་མེད་ལས་དྲོ་བ་དང་ལྡན་པས་ངེས་པར་འོངས་ནས་སྟོན་པར་འགྱུར་རོ། །དེ་རྣམས་དང་ལྷན་ཅིག་ཏུ་འཇུག་པར་མི་བྱའོ། །དེ་
རྣམས་དང་སྨྲ་བར་མི་བྱའོ། །ཉི་མ་ལྔ་པ་ལ་སྲེག་བླུགས་བྱས་པའི་མཐར་འཁྲུལ་འཁོར་ཐམས་ཅད་ལ་དུ་བ་འབྱུང་བར་འགྱུར་རོ། །དེ་ནས་བུད་མེད་དེ་དག་འོངས་ཏེ། སྐྱེས་བུ་དཔའ་བོ་བྱོན་པར་ཞུ་ཞེས་སྨྲ་བར་འགྱུར་རོ། །དེར་ཡང་འཇུག་པར་མི་བྱའོ། །སྲེག་བླུགས་བྱས་པ་
དང་ཉི་མ་དྲུག་པ་ལ་ཁང་པ་ཐམས་ཅད་ལ་དུ་བ་འཐུལ་བར་འགྱུར་རོ། །འཁྲུལ་འཁོར་གྱི་གནས་སུ་ཀི་ཊི་ཀི་ཊ་ཞེས་སྒྲོག་པར་འགྱུར་རོ། །དེ་ནས་བུད་མེད་དེ་རྣམས་མིག་མཆི་མས་གང་བཞིན་དུ་གྲུབ་པའི་རྫས་དང་། རིན་པོ་ཆེ་ཐམས་ཅད་བཟུང་ནས་འོང་བར་འགྱུར་རོ། །རང་གི་ཕྱག་རྒྱ་

བསྟན་ལ་བླང་བར་བྱའོ། །གལ་ཏེ་མི་འདོད་ན་ཡང་ཉི་མ་བདུན་པ་ལ་སྦྱིན་སྲེག་བྱའོ། །གང་སྔོན་དུ་ཞུགས་པ་དེ་ཐམས་ཅད་འཆི་བར་འགྱུར་རོ། །འཁྲུལ་འཁོར་ཐམས་ཅད་ལྟུང་བ་དང་འཇོམས་པར་འགྱུར་རོ། །ཆོ་ངེས་འདེབས་ཤིང་ངེས་པར་འོང་བར་འགྱུར་རོ། །དེ་དག་ལ་མི་
འཇིགས་པ་བྱིན་ལ་ཕྱི་ནས་འཇུག་པར་བྱའོ། །འཕགས་པ་རྡོ་རྗེ་ས་འོག་གི་རྒྱུད་ལས་ལྷ་མ་ཡིན་གྱི་བུ་མོ་ལ་དྲག་ཤུལ་སྤྱོད་པའི་ལེའུ་སྟེ་དགུ་པའོ།། །།དེ་ནས་གཞན་ཡང་རིམ་པར་ཕྱེ་བར་གྱུར་པ་ནི་བཅོམ་ལྡན་འདས་དེ་ཉིད་རྣམ་པར་འགྱུར་བ་སྟག་གི་པགས་པའི་ཤམ་ཐབས་ཅན་
ཕྱག་བཞི་པ། ལྷ་མ་ཡིན་ཆེན་པོ་གཞན་ལེན་གྱི་མགོ་ལ་ཕྱག་གཉིས་ཀྱིས་རྡོ་རྗེས་བསྣུན་ནས་གསོད་པར་མཛད་དོ། །ཕྱག་གཡས་པར་ཆུ་སྲིན་གྱི་མཆེ་བའི་རྣམ་པའི་སོར་མོའི་རྩེ་མོ་ལྕགས་ཀྱུས་མེ་ཏོག་འདོན་པ་ལྟར་བསྣུན་པའོ། །གཡོན་པ་སྡིགས་མཛུབ་མཛད་པའོ། །དེའི་མདུན་དུ་
རྡོ་རྗེས་བསྣུན་པའི་ཤིང་ལ་མེ་རབ་ཏུ་འབར་ལ། མེ་ཏོག་དང་འབྲས་བུ་ལྡན་པར་རྡོ་རྗེ་རྩེ་མོ་དྲུག་པ་ཉི་མ་གཅིག་ཏུ་ཕཊ་ཀྱི་ཡི་གེ་དང་ལྡན་པར་བསྲེག་པར་བྱའོ། །དེ་བསྲེགས་པས་ལྷ་མ་ཡིན་ཐམས་ཅད་ཀྱི་རིགས་ཀྱི་བུད་མེད་ཆོ་ངེས་འདེབས་ཤིང་སྐྱབས་མེད་པར་འོང་བར་འགྱུར་རོ། །དེ་རྣམས་དང་ལྷན་
ཅིག་ཏུ་འཇུག་པར་འགྱུར་རོ། །དེ་ན་ལྷ་མོ་གཡོན་ཕྱོགས་པ་ཞེས་འཇིག་རྟེན་དུ་གྲགས་པའི་རྣམ་པ་སྦ་ཚིལ་དང་། ཚ་བ་གསུམ་དང་ལུགས་ཕྱེ་བསྲེས་པ་ལས་གཟུགས་བརྙན་བྱས་ལ་རྡོ་རྗེས་བསྣུན་པའི་ཤིང་ལ་མེ་སྦར་ཏེ། རྡོ་རྗེས་སྙིང་གར་གཟེར་ལ་ཇི་སྲིད་ལངས་ཀྱི་བར་དེ་སྲིད་དུ་བསྲོ་
བར་བྱའོ། །གལ་ཏེ་མི་ལྡང་ན་རྡོ་རྗེའི་རྣམ་པའི་ཐབ་ཁུང་དུ་ཤིང་དེ་ཉིད་ལ་མེ་སྦར་ལ་དུམ་བུར་གཏུབས་ཏེ་སྦྱིན་སྲེག་བྱའོ། །འཁྲུལ་འཁོར་ཐམས་ཅད་ལ་དུ་བ་དེས་རེག་པ་ཙམ་གྱིས་ལྟུང་སྟེ། སླར་འབྱུང་བའི་མཐུ་མེད་པར་འགྱུར་རོ། །གསང་བ་ཆེན་པོ་འདི་དཀྱིལ་འཁོར་མ་མཐོང་བ་དང་།
ཆོ་ག་མི་ཤེས་པ་དང་། ལས་ཀྱི་སྒྲིབ་པ་མ་སྦྱངས་པ་དང་། དམ་ཚིག་མེད་པ་ལ་སྦྱིན་པར་མི་བྱའོ། །བསོད་ནམས་བྱས་པ་དང་། བུ་གའི་འཁྲུལ་འཁོར་འཇོམས་པ་དང་། སྤྲོ་བའི་སེམས་དང་ལྡན་པ་དང་། ཁ་ན་མ་ཐོབ་མེད་པའི་ཡིད་དང་། ཕ་དང་མ་ལ་གུས་པ་དང་། བྱང་ཆུབ་ཀྱི་

སེམས་བསྐྱེད་པ་དང་། དེ་བཞིན་གཤེགས་པ་ལ་བསམ་པ་མི་ཕྱེད་པ་དག་ལ་སྦྱིན་པར་བྱའོ། །འཕགས་པ་རྡོ་རྗེ་ས་འོག་གི་རྒྱུད་ལས་ལྷ་མ་ཡིན་གྱི་དབང་པོ་གཞན་ལེན་གྱི་གཙུག་ཏུ་བྲི་བའི་ལེའུ་སྟེ་བཅུ་པའོ།། །།དེ་ནས་གཞན་ཡང་རིམ་པས་ཕྱེ་བར་
གྱུར་པ་ནི། ཧཱ་ཡང་ཙའི་དབུས་སུ་ཡུངས་ཀར་སྐྱ་བོས་སྟོང་ཕྲག་བརྒྱད་སྲེག་བླུགས་བྱའོ། །དེ་ནས་བུད་མེད་རྣམས་འོང་བར་འགྱུར་རོ། །ལག་པ་ཡོངས་སུ་བཟུང་ནས་འཇུག་པར་བྱེད་དོ། །ཡང་ན་གང་འདོད་པ་དེ་སྟེར་རོ། །འབུམ་ཕྲག་ཉི་ཤུ་རྩ་གཅིག་བཟླས་པས་རི་
བོ་དང་བགེགས་རྣམ་པ་སྣ་ཚོགས་པ་རྣམ་པར་འཇོམས་པར་བྱེད་དོ། །འདི་ནི་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །འཕགས་པ་རྡོ་རྗེ་ས་འོག་གི་རྒྱུད་ལས་རྡོ་རྗེ་ཉིང་ཁུའི་ལེའུ་སྟེ་བཅུ་གཅིག་པའོ།། །།དེ་ནས་འདིར་རྟོག་པ་གཞན་ཡང་བཤད་པར་བྱ་
སྟེ། ལོ་མ་དང་ནས་ཀྱི་བཟའ་བ་དང་། སློང་མོའི་ཟས་ཟ་ཞིང་སྔར་བཤད་པའི་ཚུལ་གྱིས་འབུམ་ཕྲག་གསུམ་བཟླ་བར་བྱའོ། །བཟླས་པ་ཡོངས་སུ་རྫོགས་པ་དང་། རྡོ་རྗེས་བསྣུན་པའི་ཤིང་ལ་རྡོ་རྗེ་ཁྲོ་བོ་ཚོན་གང་ཁྲོ་གཉེར་བསྙེར་ཞིང་མཆུ་བསྡམས་པ་འཇིགས་པར་བྱེད་
པ། རྡོ་རྗེ་འཕྱར་བའི་ལག་པ་ཅན། གཡོན་པའི་མཛུབ་མོ་སྡིགས་མཛུབ་ཏུ་བྱས་པ་དེ་ནས་ཟླ་བ་ཆེར་གཟས་བཟུང་ནས་མི་མཐོང་བ་ན་དུར་ཁྲོད་དུ་ཙནྡན་དམར་པོའི་སྟན་ནམ། ཆུ་བོའི་འགྲམ་གྱི་འཇིམ་པ་ལ་གཞུག་པར་བྱའོ། །དེ་ལ་རྒྱ་ཆེན་པོའི་མཆོད་པ་བྱས་ནས་དེའི་མདུན་
དུ་རྡོ་རྗེས་བསྣུན་པའི་ཤིང་ལ་སོར་དྲུག་པའི་རྡོ་རྗེ་རྩེ་མོ་ལྔ་པ་བྱས་ཏེ་དྲི་དང་། མེ་ཏོག་གིས་མཆོད་ལ་ཇི་ལྟར་འབྱོར་པའི་མཆོད་པ་དང་། གཏོར་མ་བྱས་ཏེ་ཨ་ཤྭཏྠའི་འདབ་མ་བཞིའི་སྟེང་དུ་བཞག་ལ། ལོ་མ་གསུམ་གྱིས་དགབ་པར་བྱའོ། །ལག་པ་གཡོན་པའི་མཐིལ་དུ་དུར་
ཁྲོད་ཀྱི་སོལ་བས་རྡོ་རྗེ་བྲིས་ལ་ལག་པ་དེས་བཀབ་སྟེ། དེ་ཉིད་ཇི་སྲིད་ས་མི་འགུལ་བ་དེ་སྲིད་ཀྱི་བར་དུ་བཟླས་པས་དེ་ནས་འགྲུབ་པར་འགྱུར་རོ། །རྡོ་རྗེ་དེ་ཉིད་ལག་པར་བཟུང་བས་བུ་ག་ཐམས་ཅད་ཀྱི་འཁྲུལ་འཁོར་འཇོམས་པར་བྱེད་དོ། །འདི་ནི་བཅོམ་ལྡན་འདས་རྡོ་རྗེ་འཛིན་པས་

བཀའ་སྩལ་ཏོ། །དེ་ནས་བུད་མེད་རྣམས་ཕྱི་རོལ་དུ་དགུག་པར་འདོད་ན་དཔལ་གྱི་བུ་གའི་སྒོར་རྡོ་རྗེ་ཁྲོ་བོ་དེ་ཉིད་བཞག་ལ་དུར་ཁྲོད་ཀྱི་ཤིང་ལ་མེ་སྦར་ཏེ། རྡོ་རྗེ་དེ་ལག་པ་གཡོན་པར་བཟུང་ལ་གཡས་པ་མ་ཡིན་པའི་ལག་པས་ཡུངས་ཀར་སྐྱ་བོ་རྣམས་སྟོང་ཕྲག་བརྒྱད་དུ་སྦྱིན་སྲེག་
བྱའོ། །དེ་ནས་བུད་མེད་རྣམས་འོང་བར་འགྱུར་རོ། །ལག་པ་ནས་བཟུང་སྟེ་འཇུག་པར་བྱེད་དོ། །ཡང་ན་གང་འདོད་པ་དེ་སྟེར་བར་འགྱུར་རོ། །འབུམ་ཕྲག་ཉི་ཤུ་རྩ་གཅིག་ཏུ་བཟླས་པས་རི་མོ་མཁྲང་པོ་རྣམ་པ་སྣ་ཚོགས་འཇོམས་པར་འགྱུར་རོ། །འདི་ནི་བཅོམ་ལྡན་
འདས་རྡོ་རྗེ་འཛིན་པས་བཀའ་སྩལ་ཏོ། །འཕགས་པ་རྡོ་རྗེས་འོག་གི་རྒྱུད་ལས་རྡོ་རྗེ་སྒྲུབ་པར་བྱེད་པའི་ལེའུ་སྟེ་བཅུ་གཉིས་པའོ།། །།སྨན་འདི་སྒྲུབ་པ་པོས་ཅི་ནས་ཀྱང་བསྒྲུབ་པར་བྱའོ། །བགེགས་རྣམས་དང་ལོག་པར་འདྲེན་པ་མེད་པར་བྱེད་དོ། །ཟླ་བ་ཤར་བ་དང་།
དབང་པོ་ལག་པ་དང་། སིང་གྷྲི་དང་། བྷྱཱ་གྷྲི་དང་། ལག་པ་བཞི་པ་དང་། བྷ་ར་ཧ་ཀརྣི་ཀ་དང་། ག་ཛཱ་ད་ཀ་དང་། ར་ཙ་ནི་དང་། རུ་རྟ་དང་། གུར་གུམ་དང་། དུང་གི་ཕྱེ་མ་རྣམས་གླང་པོའི་གཅིན་གྱིས་སྦྲུས་ལ། ཇི་ལྟར་འདོད་པའི་རིལ་བུ་བྱའོ། །དྲི་དང་། མེ་ཏོག་
དང་། གཏོར་མ་དང་། བདུག་པ་རྣམས་གནས་རྣམས་སུ་བཞག་ལ་ཆུ་འཆག་པ་དང་། དྲི་མ་འདོར་བ་ན་རས་ཀྱིས་བཅིང་བར་བྱའོ། །དྲི་དང་མེ་ཏོག་ལ་སོགས་པ་རྣམས་ཀྱིས་མཆོད་པར་བྱའོ། །གཞན་དུ་ན་ལོག་པར་འདྲེན་པ་རྣམས་ཞུགས་ཏེ་མ་རུང་བར་བྱེད་པར་འགྱུར་རོ། །
བཤད་མ་ཐག་པའི་སྨན་གྱིས་ལོག་པར་འདྲེན་པ་ལ་སོགས་པ་ཐམས་ཅད་རྣམ་པར་ཉམས་ནས་ཕན་ཚུན་ལྟ་ཞིང་འདི་སྐད་ཅེས། འདི་ནི་ཇི་སྲིད་སྨན་ཡོད་པ་དེ་སྲིད་འགྲོ་བར་མི་བྱའོ་ཞེས་སྨྲ་ཞིང་ཕྱོགས་དང་ཉེ་བའི་ཕྱོགས་རྣམས་སུ་འབྱེར་བར་འགྱུར་རོ། །དཔག་ཚད་གཅིག་གི་
ཁོངས་སུ་བགེགས་ལྡང་བར་མི་འགྱུར་རོ། །ལས་ཐམས་ཅད་ཀྱང་འགྲུབ་པར་འགྱུར་རོ། །གང་ཡང་རིག་པ་འཛིན་པས་དུས་གསུམ་དུ་ཉེ་བར་བྱུགས་ན་དེ་ལ་འགའ་ཞིག་གིས་ཀྱང་འཇུག་པར་མི་ནུས་སོ། །བཱ་ལ་ཀ་དང་། སཱ་རི་བ་དང་། ལོ་བྲ་མ་དང་། ལཱ་ངག་ལི་དང་།

སྒོག་པ་དང་། བྱི་བའི་སྤུ་རྣམས་སྦྱར་བའི་བདུག་པ་འབད་པས་བྱས་ན་བུ་གའི་སྒོར་འགྲོ་བ་ན་ཐིགས་པ་ཞི་བར་བྱེད་དོ། །ཨུཏྤལ་སྔོན་པོ་དང་། དྲི་ཞིམ་པོའི་མར་དང་། རུ་རྟ་དང་། ས་ར་བི་དང་། ཙནྡན་དང་། བོ་ལ་ཀ་དང་། བ་ལང་གི་གཅིན་གྱིས་སྦྲུས་པའི་སྨན་
གྱིས་དུག་འཇོམས་པར་བྱེད་ཅིང་དཔལ་གྱི་སྒོའི་དྲོད་གཤེར་ལས་སྐྱེས་པ་འཇོམས་པར་བྱེད་དོ། །ཆུ་ཤིང་དང་། གླ་སྒང་དང་། བཱ་ཎ་དང་། ཀོཥྛ་དང་། ཨུ་དུམ་བཱ་ར་དང་། བ་ལ་དང་། ཨ་ཤྭ་གནྡྷ་དང་། ཤུ་དག་དང་། གེ་རི་ཀརྞྞི་ཀ་དཀར་པོ་སྟེ། འདི་རྣམས་སྦྱར་བས་
ཐམས་ཅད་ཀྱི་གཉིད་དང་། འཁྲུལ་འཁོར་དང་། མུན་པ་འཇོམས་པར་བྱེད་དོ། །ཤི་བྷ་ཨཉྫ་བའི་ས་བོན་དང་། ཨུཏྤལ་དང་། ནཱ་ག་གེ་སར་དང་། ག་བུར་རྣམས་མཉམ་པོར་སྦྱར་བའི་མིག་སྨན་གྱིས་གཉིད་མེད་པར་བྱེད་དོ། །ཀ་ར་དང་། རྟའི་ཁ་ཆུ་དང་། ནཱ་ག་གེ་
སར་དང་། ས་རི་པས་མིག་སྨན་བྱས་ལ་ཁྲོ་བོ་བཟླས་པས་ཉིད་ཀྱི་འཁྲུལ་འཁོར་ཟློག་པར་བྱེད་དོ། །རྨ་བྱའི་གཙུག་ཕུད་དང་མཉམ་པོར་སྦྱར་ལ། ན་ལེ་ཤམ་དཀར་པོ་དང་བཏགས་ཏེ་ལན་བདུན་བཟླས་པས་རྩོད་པ་ཟློག་པར་བྱེད་དོ། །སེམས་རྣམ་པར་གཡེང་བ་མེད་པ་དང་།
བརྩེ་བ་དང་ལྡན་པ་དང་། ཆོས་ཤེས་པ་དང་། རིང་དུ་མཐོང་བ་གང་གི་ཁྱིམ་དུ་ཆོ་ག་དང་ལྡན་པས་སྨན་བཞག་ནས་ཁྲོ་བོ་རྡོ་རྗེ་ས་འོག་ལ་མཆོག་ཏུ་གུས་པར་གྱུར་ན། དེས་རྐང་འོག་གི་དཔལ་གྱི་སྒོ་འགྲུབ་པར་འགྱུར་ཏེ། འདི་ལ་ཐེ་ཚོམ་མེད་དོ། །ཡ་བའི་མེ་ཏོག་དང་། རྒྱ་སྲན་གྱི་ཕྱེ་
མ་དང་། ཡུངས་ཀར་དང་། བཱ་ལ་དང་། ཨིང་གུ་རྣམས་སྲང་རེ་རེ་སི་ཏ་དང་ལྷན་ཅིག་བསྲེས་ལ་ལན་ཉི་ཤུ་རྩ་གཅིག་བཟླས་པས་བཀྲེས་པའི་འཁྲུལ་འཁོར་ཟློག་པར་བྱེད་དོ། །ཨ་པ་མཱ་རྒའི་ས་བོན་དང་། བི་ཛ་ཨཀྵའི་ས་བོན་དང་། ཨུ་དུམ་བཱ་རའི་རིལ་བུ་ལ་ལན་བདུན་བཟླས་
ན་བཀྲེས་པ་སེལ་བར་བྱེད་དོ། །གླང་པོའི་རྣ་བའི་པ་ལ་ཤའི་ཁུ་བ་བླངས་ལ་རྡོ་རྗེའི་གདོང་སྐྱེས་དང་། རྡོ་རྗེའི་འོ་མ་དང་མཉམ་པོར་སྦྱར་ལ་ཏིལ་མར་དང་བསྐོལ་ཏེ་སྦྱིན་རྣམས་ཐམས་ཅད་ལ་མར་ཁུའི་མཆོག་དེས་བྱུག་པར་བྱའོ། །རྡོ་རྗེ་ལྗོན་པའི་ཁྲག་དང་ནི། །དེ་བཞིན་རྡོ་རྗེ་སྡོང་བུའི་

བཅུད། །སེ་བ་ལ་ཡི་བཅུད་དང་སྦྱར། །གསེར་གྱི་མར་དང་བཙོ་བར་བྱ། །ཐོག་མར་དེ་དག་བཅངས་ནས་སུ། །མཁས་པ་ཡིས་ནི་འབད་པས་བསྡད། །འབྲུ་མར་གྱིས་ནི་ལུས་བྱུགས་ནས། །སྦྱིན་གྱི་སྟེང་ནས་འགྲོ་བར་བྱ། །ཨིང་གུ་བི་ལའི་མར་ཁུ་དང་། །ཁ་བ་
ཡི་ནི་ནས་དག་ནི། །རྟ་ཡི་དྲི་དང་མཉམ་བསྲེས་ནས། །རྟ་ཡི་གཅིན་དང་བསྐོལ་བར་བྱ། །འདི་དག་གིས་ནི་ལུས་བྱུགས་ན། །སྦྱིན་གྱིས་གོས་པར་མི་འགྱུར་རོ། །འཕགས་པ་རྡོ་རྗེ་ས་འོག་གི་རྒྱུད་ལས་སྨན་དང་རྩིའི་ལེའུ་སྟེ་བཅུ་གསུམ་པའོ།། །།དེ་
ནས་སེང་གེའི་ལྟ་སྟངས་ཀྱིས་བུ་གར་འཇུག་པར་བྱའོ། །མཁས་པས་མཚན་མ་མཚོན་པར་བྱ་སྟེ། དཔལ་གྱི་སྒོར་རྐང་བཞི་པ་དང་། དངུལ་ཆུ་དང་། བཅུད་ལེན་དང་། བུད་མེད་དང་། གྲུབ་པའི་རྫས་ཀྱིས་ཡང་དག་པར་ཁྱབ་པ་དང་། བུ་ག་གང་དག་ཤང་ཤོང་ཅན། །ལ་ལ་
རྡོ་བས་ཁྱབ་པ་ནི། །དེ་ནི་རད་རོད་ཅན་ཞེས་བྱ། །ས་ནི་འབར་བས་ཆུ་སྐེམས་ཤིང་། །ཕྱི་རོལ་བཤང་བའི་དྲི་མནམ་ཞིང་། །ཀེང་རུས་ཀྱི་ནི་རུས་པས་ཁྱབ། །གདུག་པའི་རྡོ་བ་དག་གིས་གང་། །དེ་ནི་རད་རོད་ཅན་དུ་བསྟན། །འགའ་ཞིག་འཇིམ་པ་དག་གིས་ཁྱབ། །
ལ་ལ་རྡོ་དང་ཆུ་ཡིས་གང་། །དྲི་མི་ཞིམ་པའི་ཤིང་མང་བ། །རད་རོད་འཇིགས་པ་ཉིད་དུ་འགྱུར། །བཤད་དང་ལྗན་ལྗིན་དྲི་མནམ་ཞིང་། །ཁ་ཅིག་ན་ནི་སྦྲུལ་གྱི་དྲི། །པགས་པ་དང་ནི་བྱ་ཡིས་ཁྱབ། །དེ་ནི་ངེས་པར་ཅེ་སྦྱང་གནས། །ཡང་ན་རྡོ་རྗེ་ས་འོག་ལས་བསྟན་
པའི་ཇི་ལྟ་བུས་རྣམ་པའི་སྒོ་མཁས་པས་ཕྱི་རོལ་དུ་བརྟགས་ནས་འཇུག་པར་བྱའོ། །ཡོ་བྱད་ཐམས་ཅད་དང་ལྡན་པས། །ཁྲོ་བོའི་དམ་པ་ལེགས་པར་བཟླས། །དབང་བསྐུར་བས་ནི་དབང་བསྐུར་ལ། །བློ་དང་ལྡན་པས་བསྲུང་བར་བྱ། །འདི་ཡི་ཚུལ་གྱིས་དཔའ་བོ་ཡིས། །
ས་འོག་མཐོ་རིས་དཔལ་གྱི་སྒོ། །དེར་ནི་སོམ་ཉི་མེད་པར་འཇུག །དེ་ཡིས་འདོད་འབྲས་ཐོབ་པར་འགྱུར། །དཔའ་བོ་དེ་ཡིས་ཆེར་སྤྲོ་བས། །གཏོང་དང་བརྩེ་ལྡན་གཙང་བ་དང་། དྲེགས་མེད་མངོན་པའི་ང་རྒྱལ་བྲལ། །འཇིགས་བྲལ་ཁྱད་པར་འཕགས་པའི་ཡིད། །

མེ་འོད་དང་ནི་ལྟས་ཆེན་པོ། །མཐོང་ནས་ཟུག་རྔུ་མེད་པའི་སེམས། །རྡོ་རྗེ་ལྟ་བུར་བརྟན་པ་ཡིས། །བསྒྲུབ་པར་དཀའ་ཡང་བསྒྲུབ་པར་བྱ། །འཕགས་པ་རྡོ་རྗེ་ས་འོག་གི་རྒྱུད་ལས་འཁྲུལ་འཁོར་བརྟག་པའི་ལེའུ་སྟེ་བཅུ་བཞི་པའོ།། །།དེ་ནས་གཞན་ཡང་
དཔལ་གྱི་སྒོར་འཇུག་པའི་རིམ་པར་ཕྱེ་བར་གྱུར་པ་ནི། འཁྲུལ་འཁོར་གྱི་ནི་དྲུང་འགྲོ་བ། །ཤིན་ཏུ་མྱུར་དང་བུལ་མིན་པར། །རྐང་པ་འཇོག་ཅིང་འབད་པ་ཡིས། །ཀུན་ནས་འཁྲུལ་འཁོར་བལྟ་བར་བྱ། །གང་ཚེ་འཁྲུལ་འཁོར་གཡོ་བ་དང་། །འགུལ་བ་དང་ནི་ལྡེག་
པའམ། །ཡང་ན་མཚོན་ཆ་ཐོགས་པ་སྟེ། །མདའ་དང་ཤག་ཏི་དབྱུག་གུ་དང་། །རལ་གྲི་འཁོར་ལོ་མཚོན་ཆ་ཡི། །འཁྲུལ་འཁོར་གྱིས་ནི་གང་མཐོང་ཞིང་། །གྲི་གུག་སྤུ་གྲིའི་སོ་དག་དང་། །དེ་བཞིན་ལུག་ལས་སོགས་འགྲོ་བ། །དེ་ལྟའི་རྣམ་པ་མཐོང་ན་ནི། །ཕྱག་
རྒྱ་ལེགས་པར་བཅིང་བར་བྱ། །ཡུངས་ཀར་སྐྱ་བོ་ཉིད་དམ་ནི། །ཐལ་བ་ལ་ཡང་ཁྲོས་པ་ཡིས། །ཁྲོ་བོ་ལན་བདུན་བཟླས་ནས་སུ། །འཁྲུལ་འཁོར་ལ་ནི་མཁས་པས་བསྣུན། །གདོན་མི་ཟ་བར་དེ་ལྟུང་ངོ་། །ལྷ་ཡི་ཁང་པར་འཇུག་པར་བྱ། །གང་དག་ལྷ་ཆེན་པོར་
གྱུར་པ། །དེར་ནི་ཡི་དགས་གཏོར་མ་མཐོང་། །ཇི་ལྟར་བཀྲེས་ཀྱང་མི་བཟའོ། །དེ་ཉིད་དུ་ནི་ངེས་མཐོང་བ། །སྐད་ཅིག་ཙམ་ཡང་མི་འགུལ་ཞིང་། །དེ་ཚེ་དེ་ནི་མི་སྨྲ་སྟེ། །ལྷ་མིན་སྟོང་གིས་རྒྱས་བཏབ་པས། །དེ་མཐོང་ནས་ནི་རུས་སྦལ་གྱི། །རྒྱ་ལྡན་ལན་བདུན་
བཟླས་པས་གཡོ། །དེ་ནི་རང་བཞིན་དང་བ་ཡིས། །གུས་དང་བཅས་པས་ཕྱག་འཚལ་ཏེ། །ལེགས་པར་བྱོན་ཏམ་དཔའ་བོ་རྣམས། །ཅི་བདེ་བར་ཡང་འཇུག་པར་མཛོད། །གྲུབ་པའི་ཆོ་གའི་སྦྱོར་བ་རྣམས། །རིན་ཆེན་རྣམ་པ་དུ་མ་དང་། །དངུལ་ཆུ་དང་ནི་བཅུད་ལེན་
དང་། །ནོར་བུ་རྣམས་དང་བུད་མེད་དང་། །གཞན་ཡང་ནང་ན་གང་བ་ཡི། །རལ་གྲི་དང་ནི་མཚོན་ཆ་རྣམས། །དེ་དག་གི་ནི་ལག་པ་ནས། །བཟུང་ནས་ཇི་ལྟར་བདེ་བར་སྟོན། །ཕྱག་ན་རྡོ་རྗེའི་བྱིན་བརླབས་ཀྱིས། །དེར་ནི་ཇི་ལྟར་འདོད་པར་བྱ། །དེར་ནི་ཇི་ཙམ་

སྡོད་ཀྱི་བར། །ལྷ་མིན་བུ་མོ་རྣམས་དང་རྩེ། །དེ་རྣམས་ཀྱིས་བསྟན་ལམ་ནས་ནི། །ཅི་བདེ་བར་ནི་ངེས་པར་འདོང་། །ལྷ་མིན་གྲོང་དུ་བདེ་བར་འགྲོ། །ཇི་ལྟར་བདེ་བར་སླར་ཡང་འོང་། །གང་དག་དེར་ནི་སྔོན་སོང་བ། །རྡོ་རྗེ་ས་འོག་གིས་གཟིར་བས། །གལ་ཏེ་འོངས་
པར་མ་གྱུར་ན། །དེར་ནི་རྨོངས་ནས་འཆི་བར་འགྱུར། །དེས་ན་སྔོན་རྒྱུ་ཞུགས་རྣམས་ལ། །བློ་གྲོས་ལྡན་པས་གཟིར་མི་བྱ། །འཕགས་པ་རྡོ་རྗེ་ས་འོག་གི་རྒྱུད་ལས་དཔལ་གྱི་སྒོར་འཇུག་པའི་ལེའུ་སྟེ་བཅྭ་ལྔ་པའོ།། །།དེ་ནས་དཔལ་གྱི་སྒོའི་རྟོགས་པ་བརྗོད་པའི་
རིམ་པར་ཕྱེ་བར་གྱུར་པ་ནི། དཔལ་གྱི་སྒོ་ཡི་ཕྱིར་གནས་པའི། །མཚན་ཉིད་མཐོང་ནས་ཤེས་པ་ཡིས། །སྨྲ་སྤངས་སློང་བ་ཟ་བ་དང་། །འཁྲུག་པ་མེད་པའི་སེམས་ལྡན་པས། །བློ་གྲོས་ཅན་གྱིས་འབུམ་ཕྲག་གསུམ། །དཔལ་གྱི་སྒོ་ལ་བརྟེན་ཏེ་བཟླས། །འབུམ་ཕྲག་
དང་པོ་བཟླས་པ་ཡིས། །འཁྲུལ་འཁོར་རྣམས་ནི་ལྟུང་བར་འགྱུར། །གཉིས་པ་ཡིས་ནི་ས་གཡོ་ཞིང་། །དུ་བ་ཆེན་པོ་འཁྲུག་པར་འགྱུར། །གསུམ་པ་ཡིས་ནི་དྲོ་ལྡན་པའི། །རྒྱན་དང་སྐེ་རགས་གྲོལ་བ་ཡིས། །ལྷ་མིན་བུ་མོ་ངེས་པར་འོང་། །ཁྲོ་བོ་མེ་ཡིས་བསྲོས་
པ་ན། །བསྐལ་པའི་མེ་སྙམ་སེམས་པ་ཡིས། །ཅ་ཅོ་འདོན་ཞིང་རྣམ་པར་འབྲོས། །དེར་ནི་ཞི་བར་བྱ་དོན་དུ། །ཙནྡན་ལྡན་མར་སྦྱིན་སྲེག་གིས། །དེ་ཡི་ལུས་ནི་རྣལ་མར་གནས། །བསམ་པ་ཐག་པས་འདུད་པར་འགྱུར། །དཔལ་གྱི་སྒོ་དེར་ནོར་རྣམས་དང་། །རལ་
གྲི་ལྡོང་རོས་མིག་ལ་སོགས། །དངུལ་ཆུ་བཅུད་ལེན་བཟང་པོ་དང་། །བུད་མེད་སྟོང་ཕྲག་བརྒྱ་རྣམས་གནས། །བདག་གི་བདག་པོ་ཁྱོད་ཀྱིས་མཛོད། །མཐོ་རིས་ས་འོག་བཟང་པོ་སྟེ། །གལ་ཏེ་དེར་ནི་མི་འཇུག་ནའང་། །ཇི་ལྟར་བཞེད་པ་དེ་བཞིན་མཛོད། །རལ་གྲི་གྲུབ་པའི་
མིག་སྨན་སོགས། །དེ་ཡི་མདུན་དུ་བཞག་ནས་ཀྱང་། །རྡོ་རྗེ་ཁྲ་བོས་གཟིར་བས་ན། །ཡིད་ལ་གཅགས་བཞིན་སྟེར་བར་འགྱུར། །ཇི་ལྟར་འདོད་པ་དེ་བཟུང་སྟེ། །དེ་ནི་བཏང་བ་ཉིད་དུ་བྱ། །དེར་ནི་དཀྱིལ་འཁོར་བསྡུ་བྱས་ཏེ། །ལྷ་དག་མཉེས་པར་བྱས་ནས་སུ། །

ཁྲོ་བོ་དེ་ཡང་གཤེགས་སུ་གསོལ། །བརྒྱ་རྩ་བརྒྱད་བཟླས་ཅི་བདེར་འགྲོ། །གོ་ཆ་ཆེན་པོ་གྱོན་པ་ཡིས། །བློ་དང་ལྡན་པས་དབང་བླངས་ཏེ། །སེར་སྣ་ཁྲོ་དང་འགྱོད་པ་དང་། །ཕྲག་དོག་ལ་སོགས་དོར་ནས་སུ། །རྟག་ཏུ་སྤྲོ་བར་འགྱུར་པ་ཡིས། །བྱ་བ་བྱས་
ན་ལེགས་པར་འགྲུབ། །འདི་ནི་བཅོམ་ལྡན་རྡོར་འཛིན་གསུང་། །འཕགས་པ་རྡོ་རྗེ་ས་འོག་གི་རྒྱུད་ལས་དཔལ་གྱི་སྒོར་དྲག་ཤུལ་སྤྱོད་པའི་ལེའུ་སྟེ་བཅུ་དྲུག་པའོ།། །།དེ་ནས་མཚན་ཉིད་གཞན་གྱིས་རིམ་པར་ཕྱེ་བར་གྱུར་པ་ནི། སྔོན་དུ་འབུམ་ཕྲག་གསུམ་བཟླས་
ལ། དེ་ནས་བུ་གའི་སྒོར་ལུས་དྲི་ཞིམ་པོས་འོ་མ་དང་ནས་ཟན་ཟ་ཞིང་འབུམ་ཕྲག་གསུམ་བཟླའོ། །དེ་ནས་བུ་གའི་འཁྲུལ་འཁོར་ཐམས་ཅད་འཇོམས་པར་འགྱུར་རོ། །དེ་ནས་ཐེ་ཚོམ་མེད་པར་གྱུར་པའི་ཡིད་ཀྱིས་སྒོ་དྲུང་དུ། སྲེག་བླུགས་བརྒྱ་རྩ་བརྒྱད་བྱས་ལ་འཇུག་པར་བྱ་སྟེ་རང་
གི་ཁྱིམ་བཞིན་ནོ། །ལྷ་མ་ཡིན་གྱི་དབང་པོ་གཞན་ལེན་གྱིས་བསྒྲགས་པའི་གསང་བ་ཆེན་པོ་བཅོམ་ལྡན་འདས་རྡོ་རྗེ་འཛིན་པས་སེམས་ཅན་ཐམས་ཅད་ཀྱི་ཕྱིར་ས་འོག་གི་གསང་བ་ཆེན་པོའི་དཔལ་གྱི་སྒོ་བཀའ་སྩལ་པ། རྡོ་རྗེ་འཁོར་ལོ་དེ་བཞིན་དུ། །རྩེ་གསུམ་ཀུ་མུད་པདྨ་དང་། །
བཀྲ་ཤིས་དང་ནི་དུང་ཉིད་དང་། །ཆུ་སྲིན་དུ་ནི་མཚོན་པར་བྱ། །རྡོ་རྗེས་གནོད་སྦྱིན་རྣམས་སུ་འགྲོ། །འཁོར་ལོས་སྲིན་པོ་རྣམས་འགྲོ་སྟེ། །ཀླུ་ཡི་ཁང་པར་རྩེ་གསུམ་གྱིས། །རྐང་འོག་ཏུ་ནི་ཀུ་མུ་དས། །ལམ་པོ་ཆེར་ནི་པདྨས་འགྲོ། །བཀྲ་ཤིས་ཁྱིམ་གྱིས་མཛོད་ཁྱིམ་དོང་། །
ཆུ་སྲིན་གྱིས་ནི་བུད་མེད་ཁྱིམ། །འཕགས་པ་རྡོ་རྗེ་ས་འོག་གི་རྒྱུད་ལས་མཚན་ཉིད་ཀྱི་ལེའུ་སྟེ་བཅུ་བདུན་པའོ།། །།དེ་ནས་རིག་པ་འཛིན་པའི་རྣལ་འབྱོར་གྱི་རིམ་པར་ཕྱེ་བར་གྱུར་པ་ནི། མུན་པ་ལས་ནི་འདས་པ་ན། །གང་ཚེ་སྒྲོན་མའི་འོད་གསལ་བ། །དེ་ནི་འཁྲུལ་འཁོར་
གནས་ཞེས་བྱ། །གནས་དེར་བློ་ལྡན་འགྲོ་མི་བྱ། །འཁྲུལ་འཁོར་གཞོམ་པར་བྱ་བའི་ཕྱིར། །རྡོ་རྗེ་འཕྱར་བ་སྦྱར་བར་བྱ། །རྐང་པ་གཡས་པ་བཏེག་ནས་སུ། །གཡོན་པའི་སྟེང་དུ་སྦྱར་བར་བྱ། །ལྟེ་བའི་གནས་སུ་ཁུ་ཚུར་གྱིས། །གར་གྱི་སྦྱོར་བས་བསྐོར་བར་བྱ། །ལག་

པ་གཡས་པ་བསྒྲེང་ནས་སུ། །གཡོན་པ་ལ་ནི་བསྣུན་པར་བྱ། །སྟེང་དུ་ལག་པ་འོག་ཏུ་བལྟ། །ཕྱི་རུ་འདི་ཡིས་བསྣུན་པར་བྱ། །ཡུངས་ཀར་དང་ནི་ཐལ་བ་ཡིས། །བསྣུན་པས་ས་ནི་གཡོ་འགྱུར་ཏེ། །འཁྲུལ་འཁོར་ལྷོད་པ་ཉིད་དུ་འགྱུར། །སླར་ཡང་དེ་ཡིས་བསྣུན་པ་
ཡིས། །གདོན་མི་ཟ་བར་ལྟུང་བར་འགྱུར། །རྐང་པ་མཉམ་པར་གནས་བྱས་ནས། །ལག་པ་གཡོན་པ་སྙིང་གར་བཞག །གནས་དེ་ཕྱི་རུ་གར་བྱས་ཏེ། །གང་ཡང་རུང་བས་བསྣུན་པར་བྱ། །ཧཱུྃ་དང་ལྡན་པའི་ཁྲོ་བོ་ཡིས། །ཕྱེ་མར་གྱུར་ནས་ས་ལ་ལྟུང་། །རྡོ་རྗེ་འཕྱར་
བའི་ཆོ་ག་ཡིས། །ས་ལ་ལྟུང་བའི་འཁྲུལ་འཁོར་རྣམས། །སླན་ཆད་དེར་ནི་འབྱུང་མི་འགྱུར། །འཁྲུལ་འཁོར་མེད་པའི་བུ་གར་ཤེས། །ནམ་མཁའི་འཁྲུལ་འཁོར་གང་བཤད་དང་། །གང་ཡང་དུག་གི་རླུང་འབྱུང་བ། །དེ་ཡང་ཆོ་ག་འདི་ཡིས་སུ། །མཐོང་བ་ཙམ་གྱིས་
ལྟུང་བར་འགྱུར། །དམ་ཚིག་ཤེས་པ་བླ་ལྡན་དེས། །ཡང་ན་ལྷ་ཡི་གནས་མཐོང་ན། །འཕྱར་བའི་ཕྱག་རྒྱས་ལེགས་བསྣུན་ཞིང་། །བསྐོར་ཞིང་རབ་ཏུ་འཕེན་པ་ཡིས། །འབྱུང་པོ་རྣམས་ནི་དགུག་པར་བྱ། །དེ་བཞིན་དམ་ཚིག་ཉིད་ཀྱང་བསྟན། །སྒྲུབ་པ་དབང་བསྐུར་
ལྡན་པ་དང་། །ལས་ཀྱི་ཆོ་ག་མཐོང་བ་ཡིས། །དེ་ཉིད་འདི་ནི་བསྟན་པར་བྱ། །གཞན་དུ་ན་ནི་འཆི་བར་འགྱུར། །དཔལ་གྱི་སྒོ་ཡི་སྨན་རྣམས་དང་། །དངུལ་ཆུ་གྲུབ་པའི་མིག་སྨན་སོགས། །དེ་བཞིན་བུད་མེད་རྣམས་དང་ནི། །དེ་ཉིད་དུ་ནི་མི་སྣང་འགྱུར། །གཏེར་དང་
གསེར་འགྱུར་བུ་གའི་སྒོར། །དབང་དུ་བྱེད་པའང་དེ་བཞིན་དུ། །དབང་བསྐུར་མེད་པའི་བློ་ལྡན་གྱིས། །མཐོང་ཡང་ཐོབ་པར་མི་འགྱུར་རོ། །ལྷ་མ་ཡིན་གྱི་ཆོ་ག་དང་། །རྡོ་རྗེ་ས་འོག་དཀྱིལ་འཁོར་དུ། །ཇི་ལྟར་ཞུགས་པར་གྱུར་པ་ཡི། །དཀྱིལ་འཁོར་བསྲུང་བ་བྱས་ནས་
སུ། །བླ་མ་ལ་ནི་ཡོན་ཕུལ་ཏེ། །དྲི་དང་མེ་ཏོག་མཆོད་པ་བྱ། །རྡོ་རྗེ་ཆུ་ཡི་ཆུས་བཀང་ནས། །ཕྲ་བའི་རས་ཀྱིས་མགྲིན་བཅིངས་པའི། །བུམ་པ་ལྡན་པའི་གཞན་དག་གིས། །མཚན་ཉིད་དེ་ཡིས་དབང་བསྐུར་བྱ། །དེ་ནས་རུས་སྦལ་ཕྱག་རྒྱ་བཅིང་། །བྱིན་བརླབས་ཕྱག་

རྒྱའམ་དེ་བཞིན་དུ། །ལྷ་མིན་ཕྱག་རྒྱས་རྗེས་གནང་ནི། །བླ་མས་བྱིན་པས་དོན་ཀུན་འགྲུབ། །ལྷ་མིན་རྣམས་དང་འཁྲུལ་འཁོར་རྣམས། །སྒྱུ་མ་ཡིས་ནི་བརྒྱན་པ་རྣམས། །འབྱེད་དང་རབ་ཏུ་འབྱེད་པ་ནི། །རིག་པ་འཛིན་པ་དེ་ཡིས་འགྲུབ། །འཁྲུལ་འཁོར་
གྱིས་མིན་དུག་གིས་མིན། །ཆུ་ཡིས་མ་ཡིན་མེས་ཀྱང་མིན། །གླང་པོ་སོགས་མིན་ལྟོ་འཕྱེས་མིན། །དེ་ལ་འཁྲུལ་འཁོར་བཞིས་ཀྱང་མིན། །རལ་གྲི་དབྱུག་གུ་མུ་སཎྜ། །ཆུ་བོ་ཨཉྫ་ག་སྤྲུལ་མིན། །གཞན་ཡང་འཁྲུལ་འཁོར་སྣ་ཚོགས་པ། །གསང་བའི་མཚམས་ན་རྟེན་
རྣམས་ཀྱང་། །དབང་བསྐུར་དམ་ཚིག་དག་གིས་ནི། །བྱིན་བརླབས་དེ་ལ་བསྣུན་མི་འགྱུར། །དེ་ཡི་མཐུ་ཡིས་ཅུང་ཟད་ཅིག །བཟླས་པས་འཁྲུལ་འཁོར་ཐམས་ཅད་འཇོམས། །དེ་ནི་རིག་པ་འཛིན་པ་ཡིས། །རིགས་ཀྱིས་བྱིན་གྱིས་བརླབས་པར་འགྱུར། །དེས་ན་འབད་
པ་ཐམས་ཅད་ཀྱིས། །དབང་བསྐུར་བ་ནི་སྦྱར་བར་བྱ། །དོན་ཀུན་གྲུབ་པ་ཐོབ་འགྱུར་ཞིང་། །དེ་ལ་ལྷས་ཀྱང་བྱིན་གྱིས་རློབ། །དམན་པའི་བྱ་བ་དོར་བར་བྱ། །མངོན་སྤྱོད་ཀྱི་ནི་ལས་ཀྱང་སྤངས། །འབེབས་དང་དབང་དུ་བྱ་བ་དང་། །གདོན་གྱི་ལས་ཀྱང་དོར་བར་བྱ། །
བློ་དང་ལྡན་པས་རྒྱུན་དུ་བཟླས། །ཉོན་མོངས་བྲལ་བའི་སྙོམས་འཇུག་གིས། །འཕགས་པ་རྡོ་རྗེ་ས་འོག་གི་རྒྱུད་ལས་རིག་པ་འཛིན་པའི་ལེའུ་སྟེ་བཅྭ་བརྒྱད་པའོ།། །།དེ་ནས་ཁྲོ་བོའི་རྒྱལ་པོ་རྡོ་རྗེ་ས་འོག་གིས་བྱིན་གྱིས་བརླབས་པ་མཆོག་ཏུ་གསང་བའི་དཀྱིལ་འཁོར་
བཤད་པར་བྱའོ། །དབང་ལྡན་གྱི་ཕྱོགས་སུ་བལྟས་ཏེ་འཁོད་ལ། གྲོང་གི་མཐའ་མ། གྲོང་ཁྱེར་གྱི་ཕྱོགས་ཀྱི་མཐར་རྡོ་དང་། རུས་པ་དང་། གསེག་མ་དང་། དམན་པའི་སོལ་བ་དང་། ཐལ་བ་དང་། གྱོ་མོ་དང་། སོ་ཕག་དང་། གནོད་སྦྱིན་ལ་བཙུགས་པའི་ཤིང་དང་།
མགལ་དུ་མ་རྙིང་པ་དང་། ཆུ་འཇག་པ་དང་། ཁམ་ཕོར་གྱི་ཕུང་པོ་དོར་ཏེ། བཀྲ་ཤིས་ཀྱི་ཉིན་པར་བསྲུང་བ་བྱས་ལ་ཁ་དོག་ལྔས་ཁྲུ་བཞི་པ། གྲྭ་བཞི་པ། སྒོའི་མཚམས་སུ་སྒོ་ཁང་དང་། དཀྱིལ་འཁོར་དབུས་ཟླུམ་པོར་གནས་པ། གནས་གཡས་བསྐོར་དུའོ། །ཕྱོགས་

བྲལ་གྱི་མཚམས་སུ་ཟླུམ་པོ་མ་ཡིན་པའི་དཀྱིལ་འཁོར་རོ། །ཆེར་བརྟགས་ཏེ་རི་མོ་རྡོ་རྗེས་བྱིན་གྱིས་བརླབ་བོ། །གོ་རིམས་བཞིན་དུ་ལྷ་མ་ཡིན་གྱི་རྒྱལ་པོ་རྣམས་ཀྱི་གནས་རྒྱ་མཚོ་ཆེན་པོ་བྲི་བར་བྱའོ། །བློ་གྲོས་དང་ལྡན་པས་དཔལ་གྱི་སྒོ་བྲི་བར་བྱའོ། །རིན་པོ་ཆེའི་རྣམ་
པ་མཚན་ཉིད་དང་ལྡན་པ་དང་། འཁྲུལ་འཁོར་གྱི་གནས་དང་། སྨན་དང་། དངུལ་ཆུ་དང་། བཅུད་ལེན་དང་། གྲུབ་པའི་རྫས་དང་། ཉེ་བར་སྤྱོད་པ་དང་། གཏོར་མ་དང་། བུམ་པ་གང་བ་སྟེ། དེ་རྣམས་ཀྱི་གནས་རྣམས་ཐིག་གིས་གདབ་པར་བྱའོ། །དེ་ནས་དཀྱིལ་
འཁོར་གྱི་དབུས་སུ་སངས་རྒྱས་བཅོམ་ལྡན་འདས་གཞག་པར་བྱའོ། །དེའི་གཡས་སུ་ལག་ན་རྡོ་རྗེའོ། །དེ་དང་ཉེ་བར་ཁྲོ་བོ་རྡོ་རྗེ་ས་འོག་ལག་པར་རྡོ་རྗེ་དགྲ་སྟ་ཅན་གཞག་པར་བྱའོ། །བཅོམ་ལྡན་འདས་ཀྱི་གཡོན་གྱི་དྲུང་དུ་བྱང་ཆུབ་སེམས་དཔའ་དྲི་མ་མེད་པའི་བློ་གྲོས་རྔ་ཡབ་
འཛིན་པ་གཞག་པར་བྱའོ། །དེ་ནས་རྡོ་རྗེ་འཛིན་པའི་འོག་ཏུ་ཆུང་མ་དང་བཅས་པའི་དབང་ཕྱུག་གི་མདུན་དུ་ཁྱུ་མཆོག་དང་ལྡན་པ་གཞག་པར་བྱའོ། །དེ་ནས་ཤར་གྱི་སྒོར་འཕར་མ་དང་པོ་ལ་སྨན་ཐམས་ཅད་དང་། དངུལ་ཆུ་དང་། བཅུད་ལེན་དང་། རྒྱན་དང་། གཞོན་ནུ་མ་ལ་སོགས་པ་
གཞག་པར་བྱའོ། །དེ་ནས་ལྷོའི་སྒོར་ལྷ་མ་ཡིན་བརྒྱད་གཞག་པར་བྱ་སྟེ། སྟོབས་ཅན་དང་། སྟོབས་ཅན་གྱི་བུ་དང་། བདེ་མཆོག་དང་། གཞན་ལེན་དང་། དུས་ཀྱི་མུ་ཁྱུད་དང་། ཐགས་ཟངས་རིས་དང་། རབ་སིམ་དང་། དབྱིག་ཟའོ། །དེ་ནས་ནུབ་ཀྱི་སྒོར་
འཁྲུལ་འཁོར་སྟོང་སུམ་ཅུ་གཞག་པར་བྱ་སྟེ། དེ་ལ་འཁྲུལ་འཁོར་བརྒྱད་རྣམ་པ་དང་བཅས་པ་བྲིའོ། །སྲད་བུ་དང་། གྲི་གུག་དང་། བུད་མེད་དང་། སེང་གེ་དང་། ལུག་དང་། མདའ་དང་བཅས་པའི་གཞུ་དང་། ཆུ་རྒྱུན་དང་། སྦྱིན་དང་། གཉིད་ཀྱི་འཁྲུལ་འཁོར་
རྣམས་སོ། །དེ་ནས་བྱང་གི་སྒོའི་འཕར་མར་བུ་ག་བརྒྱད་རྣམ་པ་དང་བཅས་པ་བྲི་བར་བྱ་སྟེ། ལུག་གི་གདོང་དང་། ཆུ་སྲིན་གྱི་གདོང་དང་། གླང་པོ་ཆེའི་གདོང་དང་། ལྟོ་འཕྱེའི་གདོང་དང་། བྱི་བའི་གདོང་དང་། སྐྱེས་བུའི་གདོང་དང་། དཀྱིལ་འཁོར་གྱི་རྣམ་པ་དང་། མ་

བྱས་པའི་གདོང་གི་རྣམ་པ་རྣམས་སོ། །དེ་ནས་མཚམས་རྡོ་རྗེས་བྱིན་གྱིས་བརླབས་པའི་འོག་ཏུ་སྒོ་བྲལ་བཞི་གཞག་པར་བྱའོ། །མེའི་མཚམས་སུ་མེའི་ཐབ་ཁུང་ངོ་། །རླུང་དུ་ཆུའི་ཐབ་ཁུང་ངོ་། །བདེན་བྲལ་དུ་བདུག་སྤོས་ཀྱི་ཐབ་ཁུང་ངོ་། །དབང་ལྡན་དུ་སྦྲུལ་
གྱི་རྣམ་པ་གཞག་པར་བྱའོ། །དེ་ནས་དེ་རྣམས་སྤྱན་དྲངས་ལ། རྡོ་རྗེ་ཁྲོ་བོ་འབེབས་པ་ཆེན་པོས་བྱིན་གྱིས་བརླབ་པར་བྱའོ། །བུམ་པ་རྩ་བ་ནག་པོ་མེད་པ་བཞི་ལྗོན་པ་ལྔ་དང་། སྨན་ལྔ་དང་། རིན་པོ་ཆེ་ལྔ་དང་ལྡན་པ་ལ་རས་ཕྲ་བ་དྲི་ཞིམ་པ་སྐྲ་མེད་པས་མགུལ་པ་བཅིངས་ཏེ།
མཚམས་བཞི་པོ་རྣམས་སུ་རྡོ་རྗེས་བྱིན་གྱིས་བརླབས་པ་ལ། ཡུངས་ཀར་གྱིས་བྱིན་གྱིས་བརླབས་ཏེ་གཞག་པར་བྱའོ། །དེ་ནས་རྡོ་རྗེའི་ཆུ་དང་། ཕྱག་རྒྱས་བྱིན་གྱིས་བརླབས་པའི་མེ་ཏོག་དང་། བདུག་པ་དང་། མར་མེ་དང་། དྲིལ་སོགས་པ་དང་། ལྷ་བཤོས་དབུལ་བར་
བྱའོ། །དེ་ནས་སྣ་ཚོགས་པའི་རོ་དང་། འབྲས་བུ་དང་། འབྲས་ཀྱི་རྒྱལ་པོའི་འབྲས་བུ་ལེགས་པར་སྦྱར་བ་ཆང་དང་ཤ་མེད་པའི་ལྷ་བཤོས་དང་། གཏོར་མ་ཡིད་དུ་འོང་བ་དམ་པ་རྒྱ་ཆེན་པོས་འབྱུང་པོ་ཐམས་ཅད་ལ་ཕྱོགས་དང་མཚམས་རྣམས་སུ་བྱིན་ལ་ཉེ་རེག་བྱའོ། །ཆོ་ག་
བཞིན་དུ་ཕྱག་རྒྱ་དང་དཀྱིལ་འཁོར་གྱི་བྱ་བ་བྱས་ལ། ཁྲོ་བོའི་རྒྱལ་པོ་དཔའ་བོ་གཅིག་པ་རྡོ་རྗེས་འོག་རྗེས་སུ་དྲན་པས་བཟླས་པར་བྱའོ། །སྐྱེས་བུ་དཔའ་བོས་བྱིན་གྱིས་བརླབ་པའི་དོན་གྱི་ཕྱིར་ལྷ་མ་ཡིན་གྱི་ཕྱག་རྒྱའི་འོག་ཏུ་སོན་པར་རྐང་མཐིལ་ནས་སྤྱི་གཙུག་གི་བར་དུ་གོ་ཆས་
བྱིན་གྱིས་བརླབ་བོ། །ཇི་ལྟར་མི་འབབ་ན་དེ་ནས་དྲི་བཟང་པོ་དང་། བདུག་སྤོས་ཀྱིས་བདུགས་ལ་རས་དཀར་པོ་ཕྲ་བས་གདོང་གཡོགས་ཏེ། ལག་པ་རྡོ་རྗེ་ཐལ་མོའི་ཕྱག་རྒྱ་སྦྱར་ལ། ལས་ཀྱི་གྲུ་ལ་རྐང་པ་གཉིས་བཞག་སྟེ་ཡོན་ཕུལ་ལ། རྣ་བ་དམ་ཚིག་གིས་བྱིན་གྱིས་བརླབས་པས་
སངས་རྒྱས་དང་། ཆོས་དང་། དགེ་འདུན་དང་། བྱང་ཆུབ་སེམས་དཔའི་རིགས་རྣམས་ཀྱི་དམ་ཚིག་ཕྱེ་བ་རྣམས་དང་། དམ་ཚིག་མཚུངས་པར་འགྱུར་རོ། །འདི་ལྟ་བུའི་དམ་ཚིག་ཐོས་ནས་མེ་ཏོག་དོར་བར་བྱའོ། །གང་གི་སྟེང་དུ་ལྷུང་བ་དེའི་ལྷའི་རིགས་སོ། །

ཐོག་མར་ཕྱག་རྒྱ་བཅིངས་པས་བྱིན་ཀྱིས་བརླབས་ནས་དེ་ལ་ཡོན་འབུལ་བར་བྱའོ། །དེ་ནས་རྡོ་རྗེ་ཞགས་པའི་ཕྱག་རྒྱས་དཀྱིལ་འཁོར་བསྡུས་ཏེ། ཆོ་ག་བཞིན་དུ་ཕྱག་རྒྱ་དང་སྔགས་ལྷ་རྣམས་གཤེགས་སུ་གསོལ་བར་བྱའོ། །དེ་ནས་དཀྱིལ་འཁོར་མཐོང་ནས་དམ་ཚིག་དམ་པས་
བྱིན་གྱིས་བརླབས་པ་དང་། གསང་སྔགས་ཐམས་ཅད་ཀྱིས་བྱིན་གྱིས་བརླབས་པ་དང་། ལེགས་པར་བགྲོད་པ་དང་། འདོད་པའི་དོན་ཐམས་ཅད་ཀྱི་དངོས་གྲུབ་ཐོབ་པ་དང་། འདུལ་བ་རྣམས་ལ་རབ་ཏུ་སྦྱོར་བ་དང་། རྒྱུད་རྣམས་ཀྱི་འགོག་པ་དང་། འཆིང་བ་དང་། སྟོན་པ་
དང་། བྱེད་པ་དང་། བསྐྱོད་པ་དང་། ཕུར་བུས་བསྣུན་པ་དང་། འབྱེད་པ་དང་། རྒྱུད་ཐམས་ཅད་ཀྱི་དོན་ཐོབ་པ་དང་། སྒྲོགས་པ་དང་། དཔྱོད་པ་དང་། ཟློས་པ་དང་། སྒོམ་པ་དང་། རྣལ་འབྱོར་དུ་བྱེད་པ་དང་། གདུག་པ་ཐམས་ཅད་ལ་དྲག་ཤུལ་སྤྱོད་པ་དང་། གཞོན་
ནུ་མ་རྣམས་དང་། འཁྲུལ་འཁོར་རྣམས་འབྱེད་པ་དང་། གཅོད་པ་དང་། སྒྲུབ་པ་དང་། རྣམ་པ་ཐམས་ཅད་དུ་དོན་ཐམས་ཅད་གྲུབ་པ་རྙེད་པ་འདི་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །འཕགས་པ་རྡོ་རྗེས་འོག་གི་རྒྱུད་ལས་གྲུབ་པའི་དཀྱིལ་འཁོར་གྱི་བྱ་བས་
འོག་གི་རྡོ་རྗེ་དཔའ་བོ་གཅིག་པའི་ལེའུ་སྟེ་བཅུ་དགུ་པའོ།། །།དེ་ནས་གཞན་ཡང་ལས་རྒྱས་པའི་རིམ་པར་ཕྱེ་བ་ནི་རྡོ་རྗེས་བསྣུན་པའི་ཤིང་ལས་རྡོ་རྗེ་བྱས་ལ་འབུམ་ཕྲག་གསུམ་བཟླ་བར་བྱའོ། །དེ་ནས་ཟླ་བ་ཉ་བ་ལ་མཆོད་པ་བྱ་སྟེ། ལག་མཐིལ་དུ་བཟུང་ལ་ཇི་སྲིད་ཙི་ཊི་ཙི་ཊི་ཞེས་
སྒྲོགས་ཀྱི་བར་དུ་བཟླ་བར་བྱའོ། །དེ་ནས་འགྲུབ་པར་འགྱུར་རོ། །འཁྲུལ་འཁོར་ཐམས་ཅད་འཇོམས་པར་འགྱུར་རོ། །སྲེག་པར་འགྱུར་རོ། །དེ་ནས་བུད་མེད་རྣམས་མཆོད་ཡོན་བཟུང་ནས་འོང་བར་འགྱུར་རོ། །དེ་ནས་འཁྲུལ་འཁོར་མེད་པར་འཇུག་པར་བྱེད་དོ། །གང་འདོད་པའི་
རྫས་དེ་ལ་སྟེར་རོ། །བཅོམ་ལྡན་འདས་ལྷའི་ལྷ་ལྷ་ཡིས་ཕྱག་བྱས་ཤིང་མཆོད་པ་རིག་པའི་རྒྱལ་པོ་ཆེན་པོའི་བདག་པོ་དཔལ་དང་ལྡན་པའི་ཁྲོ་བོའི་རྒྱལ་པོ་འདི་མ་བསྒྲུབས་ཀྱང་ལས་རྣམས་བྱེད་པར་འགྱུར་རོ། །ལྷ་མ་ཡིན་གྱི་བུ་མོ་ལ་དམིགས་ཏེ། བུ་གའི་སྒོར་སྟོང་ཕྲག་བརྒྱ་

བཟླས་པར་བྱའོ། །ལྷ་མ་ཡིན་གྱི་བུ་མོ་བསྐྱོད་པར་འགྱུར་རོ། །ནད་མི་བཟད་པས་བཟུང་ནས་སྟོང་ཕྲག་བརྒྱ་པོ་ཡོངས་སུ་རྫོགས་པར་འོང་བར་འགྱུར་རོ། །གལ་ཏེ་མི་འོང་ན་དུག་དང་བསྲེས་པ་ལ་ཡུངས་ཀར་སྐྱ་བོས་སྦྱར་བའི་སྲེག་བླུགས་སྟོང་ཕྲག་བརྒྱད་སེང་ལྡེང་གི་སོལ་
བ་ལ་བྱའོ། །འོང་བར་འགྱུར་རོ། །གལ་ཏེ་མི་འོང་ན་ཀ་ར་བཱི་རའི་མེ་ཏོག་དམར་པོས་སྲེག་བླུགས་སྟོང་ཕྲག་བརྒྱད་བྱའོ། །དེ་ནས་རྡོ་རྗེ་ལ་བསྣུན་པས་ཅི་ནས་ཀྱང་འོང་བར་འགྱུར་རོ། །དེ་ནས་སྐྱེས་བུ་དཔའ་བོའི་ལག་པ་ནས་བཟུང་ནས་འཇུག་པར་བྱེད་དོ། །རྡོ་རྗེ་ལག་པར་བཅངས་ལ་
འཇུག་པར་བྱའོ། །ཡང་ན་རྡོ་རྗེས་བསྣུན་པའི་ཤིང་ལ་འཁོར་ལོ་བྱས་ལ་དུར་ཁྲོད་དུ་ནིམ་པའི་སོལ་བ་ལ་ཚ་བའི་མར་ཁུ་དང་བསྲེས་ཏེ། སྭཱ་ཧཱའི་ཡི་གེ་དང་ལྡན་པས་སྟོང་ཕྲག་བརྒྱད་སྲེག་བླུགས་བྱའོ། །དེ་ཉིད་དུ་འགྲུབ་པར་འགྱུར་རོ། །དུག་དང་། ཁྲག་དང་། ཡུངས་ཀར་སྐྱ་བོ་
བསྲེས་ཏེ། སྟོང་ཕྲག་བརྒྱད་སྲེག་བླུགས་བྱས་པས་བུ་གའི་སྒོ་འབྱེ་བར་འགྱུར་རོ། །དེ་ནས་བུ་གའི་སྒོར་བ་གླང་གི་ལྕི་བས་དཀྱིལ་འཁོར་ཉེ་བར་བྱུགས་ལ། སྟེང་དུ་དྲིས་བྱུགས་ཏེ། དེ་ནས་རྡོ་རྗེས་དེས་དེའི་སྟེང་དུ་རྡོ་རྗེ་བྲི་བར་བྱའོ། །དེ་ནས་རྡོ་རྗེ་དེ་ལག་པ་གཡས་པར་བཟུང་ལ་ཡུངས་
ཀར་ལ་ཅུང་ཟད་ཅིག་བསྔགས་ཏེ་སྟོང་ཕྲག་བརྒྱད་སྲེག་བླུགས་བྱའོ། །ཅི་བདེ་བར་རྫས་བཟུང་ནས་འོང་བར་འགྱུར་རོ། །དེ་གཟུང་བར་བྱའོ། །གལ་ཏེ་མི་འདོད་ན་དེ་རྣམས་དང་ལྷན་ཅིག་ཏུ་འཇུག་པར་བྱའོ། །ཡང་ན་གཏེར་འདོན་པར་འདོད་པས་ལྕགས་ལས་བྱས་པའི་ཕུར་བུ་བཞི་
ལ་ལན་ཉི་ཤུ་རྩ་གཅིག་བཟླས་ཏེ། ཕྱོགས་བཞིར་བཏབ་ལ་གསང་སྔགས་བཟླས་པར་བྱའོ། །དེ་ནས་དེར་གཏེར་འབྱུང་བར་འགྱུར་རོ། །འདི་ནི་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་
བཛྲེ་བཛྲི་ཎི། བཛྲོཏྟ་རེ། བཛྲ་བི་ཛ་ཡེ། བཛྲཱ་པ་ར་ཛི་ཏི། བཛྲ་པཱ་ཏཱ་ལི་ནི་ཧཱུྃ་ཕཊ་ཧཱུྃ་ཕཊ་སྦཱ་ཧཱ། རྡོ་རྗེས་བསྣུན་པའི་ཤིང་ལ་སོར་བརྒྱད་པའི་རྡོ་རྗེ་རྩེ་གཅིག་པ་བྱས་ཏེ། ཙནྡན་དམར་པོ་ལས་བྱས་པའི་རྡོ་རྗེའི་རྣམ་པ་སོར་བཅུ་དྲུག་པའི་སྟན་བྱས་ལ་དེའི་སྟེང་དུ་རྡོ་རྗེ་བཞག་ལ་གསོ་སྦྱོང་དང་ལྡན་

པས་ཐམས་ཅད་ལ་ཙནྡན་གྱི་རང་བཞིན་དུ་བྱས་ཏེ། དཔལ་གྱི་སྒོར་གཞག་པར་བྱའོ། །ལོ་མ་དང་ནས་ཟན་དང་། སློང་བ་ཟ་ཞིང་འབུམ་ཕྲག་གསུམ་བཟླ་བར་བྱའོ། །དེ་ནས་འཁྲུལ་འཁོར་ཐམས་ཅད་ལྟུང་བར་འགྱུར་རོ། །དེ་རྣམས་རང་ཉིད་འོངས་ནས་འཇུག་པར་བྱེད་དོ། །གལ་
ཏེ་དེ་རྣམས་མ་འོངས་ན་ལས་གཞན་ཡང་བཤད་པར་བྱ་སྟེ། ཡུངས་ཀར་སྐྱ་བོ་དང་། དུག་དང་། ཁྲག་བསྲེས་པས་སྟོང་ཕྲག་བརྒྱད་བཟུང་ལ་རེ་རེ་ལ་ཡོངས་སུ་བཟླས་ཏེ་རྡོ་རྗེ་ལ་བསྣུན་པས་དེ་ནས་འོངས་ཏེ། ལག་ནས་བཟུང་ནས་འཇུག་པར་བྱེད་དོ། །སྐྱེས་བུ་དཔའ་བོས་ལས་
སུ་གྱུར་པ་གཞན་ཡང་དུག་དང་ཁྲག་བསྲེས་པས་སྟོང་ཕྲག་བརྒྱད་སྲེག་བླུགས་བྱས་པས་དེ་ནས་འོང་བར་འགྱུར་རོ། །རྡོ་རྗེ་བཟུང་ལ་འཇུག་པར་བྱའོ་ཞེས་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །དེ་ནས་ལས་གཞན་ཡང་བཤད་པར་བྱ་སྟེ། ལོ་མ་ལ་སོགས་པ་ཟ་ཞིང་དུས་
གསུམ་དུ་ཁྲུས་བྱས་ལ་མི་སྨྲ་བའི་བརྟུལ་ཞུགས་ཀྱིས་འབུམ་ཕྲག་གསུམ་བཟླས་པར་བྱའོ། །དེ་ནས་རྡོ་རྗེས་བསྣུན་པའི་ཤིང་ལ་མཐེ་བོང་ཙམ་གྱི་རྡོ་རྗེ་ཆ་ཤས་བཅུ་དྲུག་པ་རྩེ་མོ་གསུམ་པ་བྱས་ཏེ། ཙནྡན་དམར་པོའི་ཁྲི་ལ་རྡོ་རྗེ་དེ་གཞག་པར་བྱའོ། །མེ་ཏོག་དམར་པོ་དང་དྲི་ལ་སོགས་པ་རྣམས་
ཀྱིས་མཆོད་དེ། གཏོར་མ་བྱིན་ལ་ཉིན་མཚན་དུ་གསོ་སྦྱོང་དང་ལྡན་པས་ཀ་ར་བཱི་རའི་མེ་ཏོག་གིས་རྡོ་རྗེ་ལ་བརྒྱད་བརྒྱར་བསྣུན་པར་བྱའོ། །དེ་ནས་རྣམ་པ་གསུམ་འགྲུབ་པར་འགྱུར་ཏེ། །རྡོ་རྗེ་ལ་ཙི་ཊི་ཙི་ཊི་འབྱུང་བ་དང་། བུ་གར་དུ་བའི་སྡོང་བུ་འབྱུང་བ་དང་གཞོན་ནུ་མ་རྣམས་འོང་བར་འགྱུར་
རོ། །གང་གི་ཚེ་ཞུགས་ཤིག་ཅེས་སྨྲ་ན། དེ་ནས་འཇུག་པའི་དུས་སུ་ཉིན་མཚན་དུ་གསོ་སྦྱོང་ལ་གནས་པས་ལྟས་བརྟག་པར་བྱ་སྟེ། གང་གི་ཚེ་རྡོ་རྗེ་ལ་ཙི་ཊི་ཙི་ཊི་ཞེས་སྒྲོགས་ན་འཁྲུལ་འཁོར་རྣམས་འབྱེད་པ་ཡིན་ནོ། །གང་གི་ཚེ་དུ་བ་འབྱུང་བར་མཐོང་ན་དེ་ནས་འཁྲུལ་འཁོར་ཐམས་