Kinh tạng Tây Tạng (Kangyur Đại Học) — 094_རྒྱུད་འབུམ།_ཚ

ཅད་འཇིག་པ་ཡིན་ནོ། །དེ་ནས་རང་གི་ཁང་པ་བཞིན་དུ་འཇུག་པར་བྱའོ། །གང་འདོད་པའི་རྫས་དེས་སྟེར་བར་འགྱུར་རོ། །གལ་ཏེ་མི་འདོད་ན་བུ་གའི་སྒོ་དེ་ཉིད་དུ་ཨརྒའི་ཡམ་ཤིང་ངམ། སེང་ལྡེང་གི་ཡམ་ཤིང་ལ་མེ་རབ་ཏུ་སྦར་ཏེ་ཡུངས་ཀར་སྐྱ་བོ་རྣམས་དང་། རང་གི་ཁྲག་བསྲེས་

ལ་སྟོང་ཕྲག་བརྒྱད་སྲེག་བླུགས་བྱའོ། །དེ་ནས་གཞོན་ནུ་མ་རྣམས་འོང་ངོ་། །འོངས་ནས་ཀྱང་ལག་ནས་བཟུང་སྟེ་འཇུག་པར་བྱེད་དོ། །ཇི་ལྟར་འདོད་པའི་རྫས་རྣམས་སྟེར་རོ། །གཞན་དུ་ན་བུད་མེད་དེ་རྣམས་འཆི་བར་འགྱུར་རོ། །ཚོན་སྣ་ལྔའི་སྲད་བུས་དཀྱིལ་འཁོར་
གདབ་པར་བྱའོ། །རྡོ་རྗེ་ས་འོག་གི་རྒྱུད་ལས་རྒྱས་པའི་ལེའུ་སྟེ་ཉི་ཤུ་པའོ།། །།དེ་ནས་བཅོམ་ལྡན་འདས་ཁྲོ་བོའི་རྒྱལ་པོ་དེས་ས་འོག་ཆེན་པོའི་ཆོ་གར་གྱུར་པ་ནི། གཞོན་ནུ་མས་བཀལ་བའི་སྲད་བུ་ལ་བ་ལང་གི་གཅིན་གྱིས་བཀྲུས་ཏེ་གསོ་སྦྱོང་དང་ལྡན་པའི་ཐགས་མཁན་གྱིས་ནག་
པོའི་ཕྱོགས་ཀྱི་བཅུ་བཞི་པའམ་བརྒྱད་པའམ་ཡང་ན་ཉ་ལ་རྣམ་པར་བྲལ་བའི་ཕྱོགས་སུ་དེ་བཞིན་གཤེགས་པ་ལ་གསོལ་བ་བཏབ་སྟེ། དྲི་དང་། མེ་ཏོག་དང་། བདུག་པ་ལ་སོགས་པ་རྣམས་ཀྱིས་མཆོད་ལ། རྒྱ་ཆེན་པོའི་གཏོར་མ་དང་ལྷ་བཤོས་བྱས་ཏེ། བདེ་བར་གཤེགས་པའི་མཐོ་
གང་ལས་ལྷག་པ་ཇི་ཙམ་འདོད་པའི་ཚད་ཀྱི་བྲིས་སྐུ་འཚམ་པར་བྱས་ལ། དེ་ལ་རིན་ཆེན་དང་། སྨན་དང་། འབྲུས་བྱིན་གྱིས་བརླབས་པའི་བུམ་པས་མཆོད་ཡོན་སྦྲེངས་ལ། གཏོར་མ་དང་ལྷ་བཤོས་རྒྱ་ཆེན་པོ་བྱས་ཏེ། ཇི་ལྟར་འབྱོར་པའི་དགེ་སློང་ལ་གྱ་ནོམ་པའི་བཟའ་བས་ཚིམ་པར་
བྱས་ནས་ཇི་ལྟར་འདོད་པའི་དངོས་གྲུབ་ཏུ་སྨོན་ཏེ། ཡན་ལག་བརྒྱད་པའི་གསོ་སྦྱོང་དང་ལྡན་པའི་རི་མོ་མཁན་ལ་བསྲུང་བ་བྱས་ལ་དཔའ་བོས་རིན་ཐང་ངེས་པ་མི་བཟུང་བར་ཡོན་བྱིན་ཏེ། ཁ་དོག་མ་འདྲེས་པས་བཅོམ་ལྡན་འདས་ཁྲོ་བོའི་རྒྱལ་པོ་དཔའ་བོ་གཅིག་པ་རྡོ་རྗེ་ས་འོག་ཆེན་པོ་བྲི་བར་
བྱའོ། །བཻ་ཌཱུརྱ་སྔོན་པོ་དང་སྤྲིན་ཆེན་པོ་འདྲ་བ། སྦྲུལ་གྱི་མཆོད་ཕྱིར་ཐོགས་འཆང་བ། ཀླུའི་རྒྱལ་པོ་ནོར་རྒྱས་ཀྱི་སྐ་རགས་བྱས་པ། དགའ་བོ་དང་སྟོབས་ཀྱི་རྒྱུས་རྣ་བ་བརྒྱན་པ། ཨ་ཤི་བི་ཤས་ལག་པ་དང་རྐང་པ་བརྒྱན་པ། སྟག་གི་པགས་པའི་ཤམ་ཐབས་ཅན། སྤྱན་
གསུམ་པ་འཇིགས་བྱེད་ཆེན་པོ་ཊ་ཊས་བཞད་པ་མཆེ་བ་གཙིགས་ཤིང་འབར་བས་འཁྲུགས་པ་ཐམས་ཅད་རབ་ཏུ་འབར་བའི་འོད་ཀྱི་ཚོགས་ཅན་ཕྱག་བཞི་པ། ཕྱག་གཡས་པར་འོད་ཟེར་ཆེན་པོའི་དཀྱིལ་འཁོར་ཅན་གྱི་རྡོ་རྗེ་རྩེ་གསུམ་པའོ། །གཞན་པར་ཆུ་སྲིན་གྱི་གདོང་གི་རྣམ་པའི་ལྕགས་ཀྱུའི་

སོར་མོས་མེ་ཏོག་གི་སྡོང་བུ་ལྟར་འགུགས་པའོ། །གཡོན་པར་ལྟོ་འཕྱེ་ཆེན་པོ་བསྐྱིལ་བའི་ཞགས་པའོ། །གཉིས་པའི་འོག་ཏུ་སོན་པར་བགེགས་རྣམས་དང་། ལྷ་མ་ཡིན་རྣམས་དང་། ཀླུ་དང་། གནོད་སྦྱིན་ལ་སོགས་པ་རྣམས་ལ་བསྡིགས་པའོ། །འོག་ཏུ་རྒྱ་མཚོ་ཆེན་པོ་བྲི་
བར་བྱའོ། །དེའི་དབུས་སུ་རི་བོ་ཆེན་པོའི་སྟེང་དུ་པདྨ་ཆེན་པོ་ལ་བཞུགས་པ་ནི་བཅོམ་ལྡན་འདས་སོ། །རྒྱ་མཚོ་ཆེན་པོ་དེའི་ནང་དུ་ལུས་ཕྱེད་ནུབ་པའི་འོག་ཏུ་ལྟ་བའི་ལྷ་མ་ཡིན་ཆེན་པོ་བརྒྱད་བྲི་བར་བྱའོ། །བཅོམ་ལྡན་འདས་ཀྱི་སྟེང་དུ་འོད་ཀྱི་དཀྱིལ་འཁོར་གྱི་དྲུང་དུ་པདྨའི་གདན་ལ་
བཞུགས་པ་དང་། ཁྲོ་བོའི་གདན་ལ་བཞུགས་པ་སྟེང་དུ་ཕྱག་བརྐྱང་ནས་ཁྲོ་བོ་ཆེན་པོ་དབུགས་འབྱིན་པར་མཛད་པ་དེ་བཞིན་གཤེགས་པའི་སྐུ་འོད་དཔག་ཏུ་མེད་པ་དང་། མི་བསྐྱོད་པ་དག་བྲི་བར་བྱའོ། །དེ་ལྟ་བུའི་བྲིས་སྐུ་ཡོངས་སུ་རྫོགས་པ་དང་། རིག་པ་འཛིན་པ་གཅིག་པུས་
མི་སྨྲ་བའམ། གྲོགས་བཟང་པོ་དང་བཅས་ཏེ། རི་བོའམ་སྒྲ་མེད་པའི་ཕུག་རྙིང་པའམ། ཤིང་གཅིག་པའི་གནས་ཇི་ལྟར་རྙེད་པར་ལོ་མ་དང་། འབྲས་བུ་དང་། འོ་མ་དང་། སློང་བ་ཟ་ཞིང་སྡིག་པ་བཤགས་ལ་བསོད་ནམས་ལ་རྗེས་སུ་ཡི་རང་བ་དང་། ཆོས་ལ་དགའ་བས་བྲིས་སྐུ་
རབ་ཏུ་གནས་པ་བྱ་སྟེ་འབུམ་ཕྲག་བཅུ་བཟླའོ། །ཆོ་ག་འདིས་ཧཱུཾ་ཞེས་བརྗོད་པས་རི་རབ་ཀྱང་ཕྱེ་མར་རློག་ཅིང་རྒྱ་མཚོ་ཡང་སྐེམས་སོ། །ལྷའི་གནས་རྣམས་ལྟུང་བར་བྱེད་དོ། །དེ་ལྟ་བུས་སྔོན་དུ་བསྙེན་པ་བྱ་སྟེ། དཔལ་གྱི་སྒོའི་སྒོར་བྲིས་སྐུ་བཞག་ལ་སྟོང་ཕྲག་བཅུ་བཟླའོ། །གང་
དེའི་ཉེ་བར་གནས་པ་རྣམས་དེར་འོང་ངོ་། །ཐམས་ཅད་ལ་བཀའ་བསྒོ་བར་བྱའོ། །དངུལ་ཆུ་དང་། བཅུད་ལེན་དང་། མིག་སྨན་དང་། གྲུབ་པའི་རྫས་ལ་སོགས་པ་སྟེར་རོ། །སྒོ་འབྱེད་པར་འགྱུར་རོ། །སྦྱིན་ཐམས་ཅད་ཀྱིས་གོས་པར་མི་འགྱུར་རོ། །སྒྲ་མེད་པར་བྱེད་དོ། །ཆུ་རྒྱུན་
སྐེམས་པར་འགྱུར་རོ། །འཁྲུལ་འཁོར་ཐམས་ཅད་ལྟུང་བར་འགྱུར་རོ། །སྡིག་པ་ཐམས་ཅད་བྲལ་བར་འགྱུར་རོ། །མར་དང་འབྲས་ཡོས་ཀྱི་སྦྱིན་སྲེག་གིས་ཞི་བར་བྱེད་དོ། །མར་དང་འོ་མའི་སྦྱིན་སྲེག་གིས་སྟོབས་འཕེལ་པར་བྱེད་དོ། །མར་དང་ཏན་ཏུ་ལེའི་སྦྱིན་སྲེག་གིས་

ནད་ཆེན་པོ་ཞི་བར་བྱེད་དོ། །དུག་དང་ཁྲག་གི་སྦྱིན་སྲེག་གིས་ལོག་པར་འདྲེན་པ་རྣམས་གསོད་པར་བྱེད་དོ། །ནིམ་པའི་ལོ་མའི་སྦྱིན་སྲེག་གིས་སྐྲོད་པར་བྱེད་དོ། །བྱི་བའི་སྤུ་དང་རང་གི་ཁྲག་བསྲེས་པའི་སྦྱིན་སྲེག་གིས་ལྷ་མ་ཡིན་ཆེན་པོའི་བུ་མོ་འགུགས་པར་བྱེད་དོ། །
སྲེ་མོའི་སྤུའི་སྦྱིན་སྲེག་གིས་ཀླུ་རྣམས་འགུགས་པར་བྱེད་དོ། །འདིའི་ཆོ་གས་རྟོག་པ་གཞན་དུ་བཤད་པ་ཐམས་ཅད་ཀྱང་འགྲུབ་པར་འགྱུར་རོ། །འདི་ནི་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །འཕགས་པ་རྡོ་རྗེ་ས་འོག་གི་རྒྱུད་ལས་ཐམས་ཅད་སྒྲུབ་པར་བྱེད་པའི་ལེའུ་སྟེ་ཉི་ཤུ་
གཅིག་པའོ།། །།དེ་ནས་འཁྲུལ་འཁོར་འཇོམས་པར་བྱེད་པ་རྒྱལ་བའི་རིམ་པར་ཕྱེ་བར་གྱུར་པ་ནི། སེང་གེ་དང་། སྟག་དང་། གླང་པོའི་དབང་པོ་དང་། རྟ་དང་། ཁྱུ་མཆོག་དང་། ལུག་དང་། བསེ་རུ་དང་། དོམ་དང་། སྤྲེའུ་དང་། ཕག་དང་། མ་ཧེ་དང་། རི་དགས་
ཏེ་འཁྲུལ་འཁོར་བཅུ་གཅིག་སྤྲུལ་པ་ལེགས་པར་སྦྱངས་པ། ས་འོག་གི་སྒོ་གཏན་གྱི་འཁྲུལ་འཁོར་བསྡམས་པ་ལ་ཁུ་ཚུར་འཕྱར་བས་བསྣུན་པར་བྱའོ། །རྡོ་རྗེས་བསྣུན་པ་ལྟར་འཇིག་པར་འགྱུར་རོ། །འུག་པ་བྱ་རོག་བྱ་རྒོད་དང་། ཁྲ་དང་ལོ་མ་བརྒྱ་པ་དང་། །མཁའ་ལྡིང་བཞད་དང་
གཙུག་ཕུད་ཅན། །འཁྲུལ་འཁོར་འདི་དག་རབ་གྲགས་པ། །ས་ཆེན་པོ་ལ་བསྡིགས་པ་ཡིས། །ཐེ་ཙོམ་མེད་པར་བསྣུན་པར་བྱ། །རལ་གྲི་མུ་སཎྜི་སྒོ་གླེགས། །འཁོར་ལོ་སྦྲུལ་དང་དབྱུག་གུ་དང་། །སྐྱེས་བུ་གཞུ་ཡི་ལག་པ་དང་། །སྤུ་གྲི་ཞགས་པ་འཛིན་པ་ལ། །མདའ་
ཆེན་བློ་གྲོས་ལྡན་པས་བསྣུན། །རླུང་གི་འཁྲུལ་འཁོར་མེའི་འཁྲུལ་འཁོར། །བཀྲེས་དང་གཉིད་དང་འདར་བ་དང་། །མགོ་ནད་དང་ནི་མིག་ནད་ལ། །འཁོར་ལོའི་གུར་གྱིས་བསྣུན་པར་བྱ། །བཞི་པའི་འོད་ལི་ཆུ་བོའི་རྒྱུན། །དུག་གི་རླུང་དང་མུན་ནག་དང་། །ཆུ་སྲིན་རུས་སྦལ་བྱི་
བ་དང་། །སྦལ་པ་སྡིག་པ་དེ་བཞིན་དུ། །ཀ་ཀ་རུ་ཡིས་གཅོད་པ་ལ། །རྫ་རྔ་བརྡུང་བའི་སྐྱེས་བུ་ཡིས། །རྡོ་རྗེ་བསྡིགས་པས་བསྣུན་པར་བྱ། །གར་གྱི་སྦྱོར་བའི་དེ་ཉིད་ཀྱིས། །གཞན་ཡང་འཁྲུལ་འཁོར་དུ་མ་ནི། །རླུང་དང་མེ་རུ་རབ་གྲགས་པ། །ས་དང་ཆུ་ཡི་ཟུག་རྔུ་དང་། །

ནམ་མཁའ་དུག་དང་ལྷན་ཅིག་པ། །ཐམས་ཅད་རྐང་འོག་རྡོ་རྗེ་ཡིས། །གར་གྱི་སྦྱོར་བས་བསྣུན་པར་བྱ། །རྡོ་རྗེ་བསྡིགས་པའི་སྦྱོར་བ་ཡིས། །རྡོ་རྗེ་ཁུ་ཚུར་གྱིས་ནི་བསྣུན། །བསྣུན་པས་འཁྲུལ་འཁོར་ཐམས་ཅད་ནི། །གདོན་མི་ཟ་བར་ལྟུང་བར་འགྱུར། །ཉི་མ་དང་ནི་
རྡོར་འཛིན་ཡང་། །དཔལ་ལྡན་གྱིས་བསྣུན་གཡོ་འགྱུར་ན། །ཕལ་པའི་འཁྲུལ་འཁོར་སྨོས་ཅི་དགོས། །ལྷ་མིན་བུ་མོ་རྙེད་དཀའ་མིན། །རལ་གྲི་འཁོར་ལོ་དབྱུག་གུ་སོགས། །འོད་ལི་ཨ་ཛ་ག་ར་དང་། །གསང་བའི་མཚམས་ཀྱི་སྒོ་གླེགས་དང་། །བུང་བའི་ཕྲེང་བ་དེ་
བཞེན་དུ། །དྲག་པོའི་སྒྲ་དང་གད་རྒྱངས་ཆེ། །ཚར་གཅོད་པ་རུ་གང་གྱུར་པ། །ཕྱི་རོལ་དུ་ནི་ཆོ་ག་དེས། །ཇི་ལྟར་འཇོམས་པ་དེ་བཞིན་བསྣུན། །ཁྲོས་པས་མཆེ་བས་མཆུ་མནན་ཏེ། །ས་འོག་བཟླས་པས་བསྣུན་པར་བྱ། །ཁྲོན་པར་འཇུག་པའི་འཁྲུལ་འཁོར་ནི། །
དེ་ནི་འོག་གི་འཁྲུལ་འཁོར་བཤད། །དཔལ་གྱི་སྒོ་ནི་གང་ཚེ་མཐོང་། །བཟང་ཡང་མཚན་ཉིད་ཉམས་པ་དང་། །སྲ་བའི་མཚམས་དང་སྦས་པ་དང་། །རི་མོ་ཡིས་ནི་ཡོངས་བྲེས་པ། །དེ་ལ་ས་གའི་ཆོ་ག་ཡིས། །ལག་པ་སྟེང་དུ་བྱས་ནས་སུ། །རྡོ་ལ་བརྒྱད་བརྒྱ་བཟླས་
ནས་ཀྱང་། །མཚམས་ལ་དྲག་ཏུ་བརྡེག་པར་བྱ། །བསྣུན་པ་ཙམ་གྱིས་འཁྲུལ་འཁོར་དེ། །གདོན་མི་ཟ་བར་མཐོང་བར་འགྱུར། །བྱ་རོག་མཆུ་དང་དབྱུག་གུ་དང་། །ཐོབ་འཆིང་བའང་དེ་བཞིན་ཏེ། །རུས་སྦལ་ཕྱག་རྒྱའི་ཆོ་ག་ཡིས། །གཡས་ལས་གཞན་པས་རེག་པར་བྱ། །
ཕུར་བུ་བཅིང་བར་བྱས་ནས་སུ། །བྱ་རོག་མཆུ་ལ་གཟེར་བར་བྱ། །གཡོན་བརྐྱང་པ་འམ་མཉམ་པ་ཡིས། །གཡས་པ་ཡིས་ནི་དེ་བསྐོར་རོ། །འཁྲུལ་འཁོར་གྱི་ནི་མཚམས་རྙེད་འགྱུར། །དེ་ནི་མྱུར་བས་གདོན་པར་བྱ། །དེ་ནས་པུས་མོ་གཡས་བསྐུམས་ཏེ། །རྐང་པ་
གཡོན་པ་བརྐྱང་བར་བྱ། །ཐོ་བས་ཕུར་བུ་ལ་བསྣུན་པས། །མཚམས་ཀྱི་འཁྲུལ་འཁོར་བསྐྱོད་པར་འགྱུར། །རྡོ་རྗེ་ཁྲོ་བོ་དེ་མ་ཐག །གསང་སྔགས་བཟླས་པས་གདོན་པར་བྱ། །དེར་ནི་དུ་བ་འབྱུང་བ་ན། །རླུང་གི་འཁྲུལ་འཁོར་གྱིས་བྱས་ཡིན། །གེ་སར་རྒྱ་སྤོས་རུ་རྟ་

དང་། །པུ་ནར་ན་བ་ཁྱབ་འཇུག་གནོན། །དེ་དག་རྣམས་ལས་བདུག་པ་བྱ། །རླུང་གི་འཁྲུལ་འཁོར་བཟློག་པར་འགྱུར། །འདི་ནི་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་ཏོ། །འཕགས་པ་རྡོ་རྗེ་ས་འོག་གི་རྒྱུད་ལས་འཁྲུལ་འཁོར་འཇོམས་པ་རྒྱལ་བ་ཞེས་བྱ་
བའི་ལེའུ་སྟེ་ཉི་ཤུ་གཉིས་པའོ།། །།དེ་ནས་རྡོ་རྗེ་ཁྲོ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཉིད་ཀྱིས་རྣམ་པར་རྒྱལ་བ་རྡོ་རྗེའི་རྒྱུད་ཆེན་པོ་བཀའ་སྩལ་ལགས་ན། བདག་ཀྱང་རིག་པ་འཛིན་པ་རྣམས་ལ་སྨན་པའི་སླད་དུ་བཤད་པས་བཅོམ་ལྡན་
འདས་ལ་ཞུའོ། །བཅོམ་ལྡན་འདས་རིག་པ་འཛིན་པ་ཇི་ལྟར་གནས་པར་བགྱི། ཇི་ལྟར་རིག་པ་བསྒྲུབ་པར་བགྱི། །དེ་སྐད་ཅེས་གསོལ་པ་དང་། བཅོམ་ལྡན་འདས་ཕྱག་ན་རྡོ་རྗེ་གསང་བ་པའི་བདག་པོས་རྡོ་རྗེ་ཁྲོ་བོ་ལ་འདི་སྐད་ཅེས་བཀའ་སྩལ་ཏོ། །རྡོ་རྗེ་ཁྲོ་བོ་ཁྱོད་ཀྱིས་སེམས་ཅན་
ཐམས་ཅད་ལ་ཕན་པའི་ཕྱིར་རིག་པ་འཛིན་པ་འགྲུབ་པའི་རྒྱུ་དྲིས་པ་ལེགས་སོ་ལེགས་སོ། །རིག་པ་འཛིན་པས་ཇི་ལྟར་རིག་པ་བསྒྲུབ་པ་རྡོ་རྗེ་ཁྲོ་བོ་ཉོན་ཅིག །དེ་ལ་རེ་ཞིག་དང་པོར་རིག་པ་འཛིན་པས་བསླབ་པའི་གནས་ལྔ་ཡོངས་སུ་བཟུང་ལ་བྱང་ཆུབ་ཀྱི་སེམས་བསྐྱེད་དེ། བྱམས་པ་ཆེན་
པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ལ་གནས་པ་དེའི་རིག་པ་འཛིན་པའི་འདུལ་བ་ངས་བཤད་པར་བྱའོ། །དང་པོར་རེ་ཞིག་བཟླས་པའི་ཕྲེང་བ་ཡོངས་སུ་བཟུང་སྟེ། ནོར་བུ་དང་། བུ་ཡིས་འཚོ་བ་དང་། དྲག་པོའི་རིལ་བུ་དང་། ཙནྡན་
དམར་པོ་དང་། རྡོ་རྗེའི་མིག་རྣམས་ལས་དྲག་པོའི་མིག་ཁྱད་པར་དུ་འཕགས་པས་དེ་བརྒྱུ་བའི་སྔགས་སུ་གྱུར་པ་ནི། ན་མོ་བཛྲ་པཱ་ཎ་ཡེ། ཨོྃ་ཀི་རི་ཀི་རི་རཽཾ་དྲི་ཎི་སྭཱ་ཧཱ། སྔགས་འདིས་ཕྲེང་བ་བརྒྱུ་བར་བྱའོ། །དེ་ནས་སློབ་དཔོན་ལས་གནང་བ་ནོད་དེ། སློབ་དཔོན་ལ་ཕུལ་དུ་བྱུང་བའི་ཡོན་
ཕུལ་ལ་སྔགས་བཟླ་བར་བྱའོ། །དེ་ལྟ་བུའི་བྱ་བ་དང་ལྡན་པས་སྔགས་བསྒྲུབས་པས་ངེས་པར་འགྲུབ་པར་འགྱུར་རོ། །བགེགས་རྣམས་ཀྱིས་བར་དུ་གཅོད་པར་མི་འགྱུར་རོ། །དཀྱིལ་འཁོར་དུ་མ་ཞུགས་ན་ཚིག་ཙམ་ཡང་སྦྱིན་པར་མི་བྱ་ན། སྔགས་འགྲུབ་པ་ལྟ་ཅི་སྨོས། དེ་ལྟ་

བུའི་ཡོན་ཏན་དང་ལྡན་པ་ལ་སྔགས་འགྲུབ་པ་གསང་བ་བཤད་པར་བྱའོ། །རིག་པ་འཛིན་པས་ཞི་བ་དང་། རྒྱས་པ་དང་། མངོན་སྤྱོད་དང་། དབང་དུ་བྱ་བ་དང་། གསོད་པ་དང་། བསྐྲད་པ་རྣམས་བསྒྲུབ་པའི་དོན་དུ་གནས་ཡོངས་སུ་གཟུང་བར་བྱའོ། །དེ་ལ་རེ་ཞིག་གནས་
སུ་གྱུར་པ་ནི་རིའི་རྩེ་མོ་དང་། ཤིང་གཅིག་པ་དང་། དུར་ཁྲོད་དང་། རིང་བསྲེལ་ཅན་གྱི་མཆོད་རྟེན་རྣམས་སུ་བུམ་པ་རྩ་བ་ནག་པོ་མེད་པར་ནོར་བུ་དང་། འབྲུ་དང་། སྨན་ཐམས་ཅད་ཀྱིས་ཡོངས་སུ་བཀང་ལ་བཅོམ་ལྡན་འདས་ཀྱི་མདུན་དུ་བརྒྱད་བརྒྱ་བཟླའོ། །ཨོཾ་ཨ་མྲྀ་ཏེ་ཧཱུྃ་ཕཊ་
འཁྲུལ་འཁོར་གྱི་གནས་སུ་སྔགས་འདིས་བཟླ་བར་བྱའོ། །དེ་ནས་སའི་ཕྱོགས་སུ་བུམ་པ་ལ་ཁྲོ་བོས་བསྔགས་ཏེ་ཐམས་ཅད་ལ་བསང་གཏོར་བྱའོ། །ཆུའི་རྒྱུན་མ་ཆད་པས་ཐམས་ཅད་ལ་བསྐོར་བར་བྱའོ། །དུག་དང་། ཁྲག་དང་། ཡུངས་ཀར་བསྲེས་པས་ཨརྒའི་ཤིང་ལ་མེ་སྦར་
ལ་སྟོང་ཕྲག་བརྒྱད་བསྲེགས་ལ་འདི་སྐད་ཅེས་ཁོ་བོས་གནས་འདི་ཡོངས་སུ་བཟུང་ངོ་ཞེས་བརྗོད་པར་བྱའོ། །དེ་ནས་རིག་པ་འཛིན་པ་དེའི་རིག་པ་རྣམས་དང་། གཞན་ཡང་གླགས་ལྟ་བ་འཇུག་པའི་གོ་སྐབས་རྙེད་པར་མི་འགྱུར་རོ། །ཇི་ལྟར་འདོད་པར་སེམས་པ་བསྒྲུབ་པར་བྱའོ། །
ཆོ་ག་གང་བསྒྲུབ་ན་དེ་ནས་རིག་པ་འཛིན་པས་བ་ལང་གི་འོ་མ་དང་། ནས་དང་། ལོ་མ་དང་། སློང་བ་ཟ་ཞིང་དེ་བཞིན་གཤེགས་པ་ལ་ཕྱོགས་པས་འབུམ་ཕྲག་གཅིག་བཟླ་བར་བྱའོ། །སྔགས་ཀྱི་མཐར་གསོལ་བ་གདབ་པར་བྱ་སྟེ། གང་གི་ཚེ་བཅོམ་ལྡན་འདས་བདག་གིས་བསྒྲུབ་པ་
འདི་གདོན་མི་ཟ་བར་འགྲུབ་པར་འགྱུར་བ་དེ་བདག་ལ་བཀའ་སྩལ་དུ་གསོལ་ཞེས་བརྗོད་ལ། དེ་ནས་རྗེ་བཙུན་སངས་རྒྱས་ཀྱི་མདུན་དུ་ནག་པོའི་བརྒྱད་པའི་ཉིན་མཚན་གསོ་སྦྱོང་དང་ལྡན་པས་དགོངས་ཀའི་དུས་སུ་ཇི་ལྟར་ནུས་པས་མཆོད་པ་བྱ་སྟེ། ཀུ་ཤའི་ཆུན་པོའི་སྟེང་དུ་བསྡད་ལ་དེ་བཞིན་
གཤེགས་པ་ལ་མངོན་དུ་ཕྱོགས་ཏེ་རིག་པ་ཁོར་མོར་ཇི་སྲིད་གཉིད་མ་བྱུང་བ་དེ་སྲིད་བཟླ་བར་བྱའོ། །དེ་ནས་དེར་ཀུ་ཤ་སྡོམ་པ་ལ་ཉལ་ཏེ་གཉིད་ཀྱི་མཚན་མོའི་ཐུན་ཚོད་ཕྱི་མ་ལ་ལྷ་དེ་ཉིད་གྲུབ་པ་ཡང་བཀའ་སྩོལ་བར་འགྱུར་རོ། །གལ་ཏེ་མི་གསུང་ན་ཉི་མ་ཕྱི་མ་ལ་དེ་བཞིན་དུ་མཆོད་པའི་ཆོ་

གས་བཅོམ་ལྡན་འདས་སྤྱན་དང་ལྷན་ཅིག་པ་མཆོད་དེ། སྣ་མའི་མེ་ཏོག་ལ་བརྒྱད་བརྒྱ་ཡོངས་སུ་བཟླས་ལ་ཕྱོགས་བཞིར་གཏོར་ཏེ། ཇི་སྲིད་གཉིད་མ་བྱུང་བ་དེ་སྲིད་ཀྱི་བར་དུ་བཟླ་བར་བྱའོ། །ངེས་པར་གསུང་བར་འགྱུར་རོ། །དེ་ནས་ཐེ་ཙོམ་མེད་པར་སླར་ཡང་སྔར་
བཤད་པའི་ཆོ་ག་བཞིན་དུ་གསང་སྔགས་ཆེན་པོ་འབུམ་ཕྲག་གསུམ་དང་སྟོང་ཕྲག་བརྒྱད་བཟླ་བར་བྱའོ། །དེ་ནས་སྦྱིན་སྲེག་གི་ཆོ་ག་ནི་མངོན་སྤྱོད་ལ་སྟེགས་བུ་གྲུ་གསུམ་པ་བྱའོ། །རྒྱས་པ་ལ་གྲུ་བཞིའོ། །ཞི་བ་ལ་ཟླུམ་པོའོ། །སྒྲུབ་པ་ཆེན་པོ་ལ་པདྨའི་རྣམ་པའོ། །དབང་
དུ་བྱ་བ་ལ་ལྕགས་ཀྱུའི་རྣམ་པའོ། །རིག་པ་དང་ལྷན་ཅིག་ཏུ་དྲི་ཞིམ་པོའི་མེ་ཏོག་དང་ཡམ་ཤིང་བསྲེག་པར་བྱའོ། །མངོན་སྤྱོད་ལ་དུར་ཁྲོད་ཀྱི་ཤིང་ལ་ཚ་བ་གསུམ་དང་། སྐྱེ་ཚེ་དང་། ཡུངས་ཀར་དང་། ལན་ཚྭ་དང་། ཐལ་བ་དང་། ཁྲག་ལ་སོགས་པས་ཁྲོ་བོ་ལ་སྲེག་བླུགས་བྱའོ། །
ཞི་བ་ལ་སྨན་གྱི་ལྗོན་པའི་ཡམ་ཤིང་གིས་སོ། །རྒྱས་པ་ལ་འོ་མ་ཅན་གྱི་ཡམ་ཤིང་གིས་སོ། །ཞི་བ་ལ་མེ་ཏོག་དང་དྲི་དཀར་པོས་སོ། །རྒྱས་པ་ལ་མེ་ཏོག་དང་དྲི་སེར་པོས་སོ། །མངོན་སྤྱོད་ལ་མེ་ཏོག་དང་དྲི་དམར་པོས་སོ། །དཀོན་མཆོག་གསུམ་ལ་ཕྱག་འཚལ་བ་དང་ལྡན་པའི་
སྔགས་ཀྱིས་ཐུན་གསུམ་དུ་ལས་བྱའོ། །སྒྲུབ་པ་ཆེན་པོ་ལ་དཀོན་མཆོག་གསུམ་ལ་ཕྱག་འཚལ་བ་དང་ལྡན་པས་ལས་བྱའོ། །ཞི་བ་ལ་སྐྱིལ་ཀྲུང་གིས་སོ། །རྒྱས་པ་ལ་ཙོག་པུས་སོ། །མངོན་སྤྱོད་ལ་རྐང་པས་རྐང་པ་མནན་པས་སོ། །ཟས་མི་ཟ་བར་སྲེག་བླུགས་བྱའོ། །སྒྲུབ་
པ་ཆེན་པོ་དང་ཞི་བ་ལ་ཧཱུྃ་གི་ཡི་གེ་བཟླའོ། །མངོན་སྤྱོད་ལ་ཕཊ་ཀྱི་ཡི་གེའོ། །ཞི་བ་ལ་སྲོད་ཀྱི་ཐུན་ལའོ། །རྒྱས་པ་སྔ་དྲོའི་ཐུན་ལའོ། །མངོན་སྤྱོད་ཉི་མ་གུང་ངམ་ནམ་གུང་གི་དུས་སུ་ཁ་ལྟོར་བལྟས་ཏེ་ལས་བྱའོ། །སྒྲུབ་པ་ཆེན་པོ་དང་ཞི་བ་ལ་ཁ་ཤར་དུ་ཕྱོགས་པས་སོ། །རྒྱས་པ་ལ་
བྱང་དུ་ཕྱོགས་པས་སོ། །དབང་དུ་བྱ་བ་ལ་བྱང་དུ་ཕྱོགས་པས་སོ། །སངས་རྒྱས་བཅོམ་ལྡན་འདས་ཀྱི་སྤྱན་སྔར་ལྷ་ལ་མཆོད་པ་བྱས་ཏེ་རྒྱས་པའི་ལས་བྱའོ། །དུར་ཁྲོད་དང་། རྟགས་གཅིག་པར་དབང་དུ་བྱ་བ་དང་མངོན་སྤྱོད་དོ། །ཞི་བ་ལ་སོགས་པ་ལ་མེ་སྦར་ཏེ་བྱའོ། །གང་གི་ཚེ་

དེར་མེ་བཟང་པོར་གྱུར་ན་དེ་ནས་ལས་འགྲུབ་པར་འགྱུར་རོ། །ཐོག་མཁོ་ནར་སྔགས་ཀྱིས་ལྷ་སྤྱན་དྲངས་ཏེ་ཕྱིས་བཅིང་བར་བྱའོ། །ཐོག་མར་དེ་ལྟར་མ་བྱས་ན་རིག་པ་འགྲུབ་པར་མི་འགྱུར་རོ། །སྤྱན་དྲངས་ནས་དྲིའི་ཆུས་གང་བའི་སྣོད་དུ་མེ་ཏོག་དཀར་པོ་དང་ལྡན་པ་ལ་སངས་རྒྱས་
བཅོམ་ལྡན་འདས་ཀྱི་སྤྱན་སྔར་ཕྱོགས་ཏེ། གསང་སྔགས་བརྒྱད་བརྒྱ་བགྲང་བར་བྱའོ། །སྒྲུབ་པ་ཆེན་པོ་འབྱུང་བའི་མཚན་མ་རྣམས་འབྱུང་སྟེ། གློ་བུར་དུ་དུང་གི་སྒྲའམ། འབྲུག་གི་སྒྲ་ཐོས་པ་དང་། དྲི་ཞིམ་པོ་བྱུང་ན་དེ་ནས་རིག་པའི་ལྷ་འོངས་པར་ཤེས་པར་བྱའོ། །གལ་ཏེ་མ་
འོངས་ན་བཅོམ་ལྡན་འདས་སྤྱན་དང་ལྷན་ཅིག་པ་ལ་སྔར་བཞིན་དུ་མཆོད་ཡོན་བཟུང་སྟེ་བརྒྱད་བརྒྱ་བཟླའོ། །འོང་བར་འགྱུར་རོ། །བྱོན་པ་དང་དཀྱིལ་འཁོར་བཅིང་བ་དང་། ཕྱོགས་བཅིངས་ལ་གཏོར་མ་དང་ལྷ་བཤོས་དབུལ་བར་བྱའོ། །དེ་ནས་མིག་སྨན་དང་ལྡོང་རོས་ལ་སོགས་པ་
རྣམས་བསྒྲུབ་པར་བྱའོ། །སྔོན་དུ་སྦྱངས་ཏེ་ཕྱིས་བསྒྲུབ་པར་བྱའོ། །མིག་སྨན་དང་ལྡོང་རོས་ལ་སོགས་པ་རྣམས་ལ་ཉིན་མཚན་དུ་འོ་མས་བྲན་ཞིང་གཞག་གོ། །དེ་ནས་བཏོན་ལ་ཇི་ལྟར་ནུས་པས་དགེ་འདུན་ལ་དགའ་སྟོན་བྱའོ། །སྐར་མ་རྒྱལ་ལ་སངས་རྒྱས་བཅོམ་ལྡན་འདས་ཀྱི་
སྤྱན་སྔར་མཆོད་པས་མཆོད་ལ་རས་དཀར་པོ་མ་ཉམས་པས་གཡོགས་ཏེ། བསོད་ནམས་མཆོད་ལ་བརྟག་པར་བྱའོ། །བརྟགས་པ་ན་སྔོན་གྱི་མཚན་མ་བྱུང་ན་ལས་འགྲུབ་པར་ཤེས་པར་བྱའོ། །མཚན་མ་གཞན་ཡང་སིལ་སྙན་གྱི་སྒྲ་དང་། དུང་གི་སྒྲ་དང་། རྒྱལ་བའི་སྒྲ་བྱུང་
ན་སིལ་སྙན་གྱིས་སྒྲས་རིག་པ་འཛིན་པ་ཆེན་པོ་འགྲུབ་པར་འགྱུར་རོ། །རྒྱལ་བའི་སྒྲས་མཁའ་ལ་འགྲོ་བ་འགྲུབ་པར་འགྱུར་རོ། །དུང་གི་སྒྲས་དབང་དུ་བྱེད་པ་འགྲུབ་པར་འགྱུར་རོ། །རྫས་བཏགས་ཏེ་མིང་མེད་ཀྱིས་རི་ལུ་ལྔ་བྱའོ། །རས་མ་ཉམས་པའི་སྟེང་དུ་བཞག་སྟེ། གྲིབ་
མ་ལ་བསྐམ་པར་བྱའོ། །དེ་ནས་ཨ་ཤྭཏྠའི་ཤིང་གི་སྟེང་དུ་བཞག་ནས་ཞག་བདུན་དུ་ལྷག་པར་གནས་པར་བྱའོ། །དེ་ནས་ཐོག་མ་སྒྲུབ་པའི་ཉིན་མོ་སྔ་དྲོའི་ཚེ་ཡོངས་སུ་ལྟུང་བས་བསྣུན་པ་ལ་ལན་སྟོང་ཕྲག་གཅིག་བསྔགས་ཏེ་དེ་ནས་ཕྱེ་མ་རེད་སྒྲུབ་པ་ལ་འཇུག་པར་བྱ་སྟེ། ཨ་ཤྭཏྠའི་ལོ་མ་

བཞི་གཡས་བསྐོར་དུ་བསྐོར་བ་ལ་བཞག་སྟེ་གསུམ་གྱིས་དགབ་བོ། །ཨ་ཤྭཏྠའི་ལོ་མ་རྣམས་འདི་ལྟ་བུའི་གནས་ནས་བླང་བར་བྱ་སྟེ། ལྗོན་ཤིང་གཞན་གྱི་གྲིབ་མས་མ་ཕོག་པ་དང་། ལྷའི་ཁང་པས་མ་ཕོག་པ་དང་། དུར་ཁྲོད་དུ་སྐྱེས་པ་རྣམས་ཀྱི་ཨ་ཤྭཏྠའི་ལོ་མ་ཡོངས་སུ་
གཟུང་བར་མི་བྱའོ། །དེ་དག་ལས་གཞན་གནས་བསྔགས་པའི་ཨ་ཤྭཏྠའི་ཤིང་གི་ལོ་མ་རྩེ་མོ་དཀར་པོ་རྣམས་ཀྱི་སྟེང་དུ་གྲུབ་པའི་རྫས་ཆ་གསུམ་དུ་བྱས་ཏེ། བླ་མ་དང་བདག་ཉིད་དང་ལྷན་ཅིག་པ་རྣམས་ཀྱིའོ། །རྡོ་རྗེ་དང་འཁོར་ལོ་དང་རལ་གྲི་རྣམས་སུ་བློས་བརྟགས་ནས་དེ་དག་ཐུན་
ཚོད་ལྔར་ཡོངས་སུ་བསྐམས་ཏེ། དེ་ནས་བ་ལང་གི་ལྕི་བའི་ཚོགས་ཀྱི་དབུས་སུ་བཅུག་ལ་ཞག་ཉི་ཤུ་རྩ་གཅིག་ཏུ་བཞག་གོ། །དེ་ནས་བཏོན་ཏེ་བའི་རྣམ་ལྔས་བཀྲུས་ལ་དེ་ཉིད་དུ་ཞག་བདུན་ལྷག་པར་གནས་པར་བྱས་ཏེ་ཡོངས་སུ་ལྟུང་བས་བསྣུན་པ་ལ་སྟོང་ཕྲག་བརྒྱད་ཡོངས་སུ་བཟླས་
ལ་དེ་ནས་སྒྲུབ་པ་ལ་འཇུག་གོ། །མིག་སྨན་དེ་དང་། རུ་རྟ་དང་། རྒྱ་སྤོས་དང་། ལོ་དྲ་རྣམས་བསྲེས་ལ་བཅོམ་ལྡན་འདས་སྤྱན་མའི་སྙིང་པོ་སྟོང་ཕྲག་བརྒྱད་མངོན་པར་བསྔགས་ཏེ། སྒྲུབ་པའི་དུས་སུ་མིག་ལ་བྱུགས་པས་གཉིད་མི་འབྱུང་ངོ་། །གཞན་ཡང་སྨན་དུ་གྱུར་པ་ནི་ཨ་
པ་མཱརྒ་དཀར་པོའི་རྩ་བ་དང་། ཤུ་དག་སྐྱ་བོ་དང་། རུ་རྟ་དང་། རྒྱ་སྤོས་དང་། གི་ཝང་དང་། གུར་གུ་མ་དང་། ཙནྡན་དཀར་པོ་དང་། ཐོག་མར་རིང་བསྲེལ་ཅན་གྱི་མཆོད་རྟེན་གྱི་མདུན་དུ་ཞག་གསུམ་དུ་སྨྱུང་བར་བྱས་ཏེ་རྡོ་རྗེ་གོ་ཆའི་སྔགས་སྟོང་ཕྲག་བརྒྱད་མངོན་པར་བསྔགས་སོ། །
དེ་ནས་སྒྲུབ་པའི་དུས་སུ་བ་ལང་གི་གཅིན་དང་བཏགས་ཏེ་ལུས་ལ་ཡོངས་སུ་བསྐུས་ནས་སྒྲུབ་པ་ལ་འཇུག་གོ། །ལྷ་དང་། ཀླུ་དང་། གནོད་སྦྱིན་དང་། རིག་པ་འཛིན་པ་དང་། ལོག་འདྲེན་ཐམས་ཅད་ཀྱིས་རྒྱང་ནས་འོད་དང་ལྡན་པའི་མེའི་ཕུང་པོ་ལྟར་འབར་བར་མཐོང་སྟེ། མཐོང་ནས་
ཕྱག་འཚལ་བར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་རིགས་རྣམས་མཚུངས་བར་འགྲུབ་པར་འགྱུར་རོ། །གང་གི་ཚེ་རིག་པ་འཛིན་པས་རྫས་གྲུབ་པར་གྱུར་ན་དེ་ནས་སྔོན་བཞིན་བཅོམ་ལྡན་འདས་སྤྱན་མའི་སྔགས་ཀྱིས་མེ་ཏོག་དཀར་པོ་ལ་བརྒྱད་བརྒྱ་བཟླས་

ལ་རྫས་ཀྱི་དབུས་སུ་བཅུག་པས་རྫས་བརྟན་པར་འགྱུར་རོ། །གཞན་དུ་ན་དངོས་གྲུབ་འཕྲོག་པར་འགྱུར་རོ། །གལ་ཏེ་རིག་པ་འཛིན་པས་གསང་སྔགས་གྲུབ་པར་མ་གྱུར་ན་རིག་པ་འཛིན་པ་དེས་འདི་ལྟར་བྱ་སྟེ། རྒྱ་མཚོ་ཆེན་པོར་འབབ་པའི་ཆུ་བོའི་འགྲམ་དུ་རྟེན་ཅིང་འབྲེལ་པར་འབྱུང་བའི་
སྙིང་པོ་ཅན་གྱི་མཆོད་རྟེན་ཁྲུ་གང་པ་བརྒྱད་བརྒྱ་བྱས་ལ་མཆོད་རྟེན་རེ་རེ་ལ་ཇི་ལྟར་ནུས་པའི་དྲི་དང་མེ་ཏོག་དང་བདུག་སྤོས་ཕུལ་ཏེ། དུས་གསུམ་དུ་བྱང་ཆུབ་ཀྱི་སེམས་བསྐྱེད་ལ་སྡིག་པ་བཤགས་ཏེ་རེ་རེའི་མདུན་དུ་སྟོང་ཕྲག་བརྒྱད་དམ་བརྒྱད་བརྒྱ་བཟླའོ། །གལ་ཏེ་མཚན་མ་མ་བྱུང་ན་ཆོ་ག་འདིས་
མཆོད་རྟེན་སྟོང་ཕྲག་གཅིག་བྱས་ཏེ་དེའི་ནུབ་ཕྱོགས་མ་ཡིན་པའི་མཆོད་རྟེན་འབར་ན་ལས་ཀྱི་སྒྲིབ་པ་ཟད་པར་ཤེས་པར་བྱའོ། །དེ་ནས་གང་ཅི་བསྒྲུབ་པ་དེ་ཐམས་ཅད་འགྲུབ་པར་འགྱུར་རོ། །སྒྲུབ་པ་ཆེན་པོ་བརྩམས་ནས་ལས་གཞན་དབབ་པ་དང་། གསོད་པ་ལ་སོགས་པ་རྣམས་མི་བྱའོ། །
གལ་ཏེ་བྱས་ན་རིག་པ་འགྲུབ་པར་མི་འགྱུར་རོ། །ལོང་བ་དང་། སྒུར་པོ་དང་། རླིག་རླུགས་དང་། འོན་པ་དང་། སེན་མོ་ངན་པ་དང་། ཤ་བཀྲ་ཅན་དང་། ལུས་ཞ་བ་དང་། སྦོ་ག་ནག་པ་རྣམས་ཀྱིས་སྒྲུབ་པ་ཆེན་པོ་འགྲུབ་པར་མི་འགྱུར་རོ། །གཞན་གཟའ་ལ་སོགས་པ་འགྲུབ་
པར་འགྱུར་རོ། །མི་གང་སངས་རྒྱས་དང་། ཆོས་ལ་དད་པ་དང་ལྡན་པ་དང་། འདུད་པ་དང་ལྡན་པ་དང་། སེན་མོ་ཟངས་ཀྱི་མདོག་ཅན་དང་ལྡན་པ་དང་། ཕ་མ་ལ་གུས་པ་དང་། བླ་མ་ལ་སྲི་ཞུ་ཆེ་བ་དེས་ཐམས་ཅད་འགྲུབ་པར་འགྱུར་རོ། །རིག་པ་འཛིན་པས་སྔགས་སྒྲུབ་པ་སྔོན་
བཞིན་སྒྲུབ་པ་དང་ལྡན་ན་ཚེའི་དུས་བྱས་ཀྱང་གང་འདོད་པ་སེམས་ཤིང་ཤི་བས་དེ་ཤི་བ་ཙམ་གྱིས་དེ་དང་དེར་སྐྱེ་བར་འགྱུར་ཏེ། རིག་པ་འཛིན་པའི་འཁོར་ལོས་སྒྱུར་བ་ཆེན་པོའམ། ཡང་ན་རིག་པ་འཛིན་པའི་རིགས་སམ། དབང་ཕྱུག་ཆེན་པོའི་རིགས་སམ། གདོལ་པའི་རིག་པ་འཛིན་པའི་
རིགས་དེ་ལྟ་བུའི་རིམ་པ་གང་འདོད་པའི་བསམ་པས་སྔགས་བསྒྲུབས་པས་དེ་ལྟ་བུའི་རིགས་སུ་འགྲུབ་པར་འགྱུར་རོ། །སྒྲུབ་པ་ཆེན་པོ་ལ་འབད་པའི་རིག་པ་འཛིན་པས་རྡོ་རྗེ་དང་། འཁོར་ལོ་དང་། རྩེ་གསུམ་དང་། དབྱུག་གུ་དང་། ཞགས་པ་དང་། མདུང་ཐུང་དང་། དབྱུག་ཐོ་དང་།

པདྨ་དང་། དུང་དང་། ལྕགས་ཀྱུ་དང་། སྤྱི་བླུགས་ལ་སོགས་པ་རྣམས་ལ་རྐང་པས་བརྫི་བར་མི་བྱའོ། །ས་ལ་བྲིས་པ་ལ་ཡང་དེ་བཞིན་དུ་བྱའོ། །འདི་ལྟར་རྡོ་རྗེ་འཆང་བའི་རྡོ་རྗེ་དང་། ཁྱབ་འཇུག་གི་འཁོར་ལོ་དང་། ལྷ་ཆེན་པོའི་རྩེ་གསུམ་དང་། གཤིན་རྗེའི་
དབྱུག་གུ་དང་། ཆུ་ལྷའི་ཞགས་པ་དང་། གཞོན་ནུའི་མདུང་ཐུང་དང་། སྟོབས་ཤའི་དབྱུག་ཐོ་དང་། བྱང་ཆུབ་སེམས་དཔའ་རྣམས་ཀྱི་པདྨ་དང་། རྡོ་རྗེ་ལྕགས་ཀྱུའི་ལྕགས་ཀྱུ་དང་། ཚངས་པའི་སྤྱི་བླུགས་ཏེ། ཕྱག་རྒྱ་ཆེན་པོའི་དངོས་གྲུབ་གང་ཐོབ་པར་འདོད་པ་བདག་ཉིད་
ཀྱིས་རྡོ་རྗེ་ལ་སོགས་པ་དེ་དང་དེ་དག་ཕྱག་རྒྱ་ཆེན་པོའི་རྐང་པས་བརྫི་བར་མི་བྱའོ། །གང་གི་ཚེ་རིག་པ་འཛིན་པའི་གསང་སྔགས་བསྒྲུབ་པ་ན་རིག་པའི་ལྷ་དངོས་གྲུབ་མི་སྟེར་ན་དེས་ལས་འདིས་རིག་པ་མཉེས་པར་བྱ་སྟེ། དྲི་ཐམས་ཅད་ཀྱིས་རིག་པའི་ལྷའི་གཟུགས་བརྙན་བྱས་ལ།
བཅོམ་ལྡན་འདས་ཕྱག་ན་རྡོ་རྗེའི་ཞབས་ཀྱི་དྲུང་དུ་བཞག་སྟེ་ཞག་གསུམ་དུ་སྨྱུང་བར་གནས་ལ་ནག་པོའི་བརྒྱད་པའམ། ནག་པོའི་བཅུ་བཞི་ལ་སྤྱན་དང་ལྷན་ཅིག་པའི་རིག་སྔགས་ཀྱིས་སྣ་མའི་མེ་ཏོག་སྟོང་ཕྲག་བརྒྱད་དེའི་གཟུགས་བརྙན་གྱི་སྙིང་གར་བརྡེག་པར་བྱ་ཞིང་། མར་ནག་
དང་མར་བསྲེས་པས་སྟོང་ཕྲག་བརྒྱད་སྲེག་བླུགས་བྱས་ལ་དེ་ཉིད་དུ་འཁོད་དེ། ཇི་ལྟར་ནུས་པའི་མཆོད་པ་དང་གཏོར་མའི་ཆོ་ག་བྱའོ། །དེ་ནས་རིག་པ་འཛིན་པ་དེ་རངས་པས་གཉིད་ལོག་པ་དང་། སྟོན་པར་འགྱུར་བའམ་རྗེས་སུ་གདམས་པ་སྟོན་པར་འགྱུར་རོ། །གལ་ཏེ་མ་འོངས་
ན་ཉི་མ་ཕྱི་མ་ལ་དེ་བཞིན་དུ་གཏོར་མའི་ཆོ་ག་བྱས་ཏེ་རྡོ་རྗེ་ཁྲོ་བོ་དང་ལྷན་ཅིག་ཏུ་སྟོང་ཕྲག་བརྒྱད་བཟླའོ། །དེ་ནས་རིག་པའི་ལྷ་དེ་ཉིད་ཁྲོ་བོ་དང་ལྷན་ཅིག་ཏུ་རྨི་ལམ་དུ་མཐོང་ནས་ཆད་པ་དང་། ལྷག་པ་དང་ཕྱི་མོ་དམན་པ་དང་། ཡི་གེ་གཞན་དུ་གྱུར་པ་ཡང་སྟོན་པར་འགྱུར་རོ། །གལ་ཏེ་
ཡོངས་སུ་རྫོགས་པར་གྱུར་ན་དེ་ནས་དངོས་གྲུབ་སྟེར་བར་འགྱུར་རོ། །སྒྲུབ་པ་དང་པོ་ལ་ལས་འདི་མི་བྱ་ལ་ཇི་སྲིད་ལན་བདུན་བསྒྲུབས་ཀྱང་མ་གྲུབ་ན་དེ་ནས་ལས་འདི་བྱའོ། །དེ་ནས་རྫས་སྒྲུབ་པའི་དུས་སུ་གྱུར་ན་དེའི་མཐར་སྲོད་དམན་མ་གུང་དང་། ཉི་མ་ཤར་བ་ན་རིག་པ་འཛིན་པས་

རྨི་ལམ་ལྟ་བུར་གསང་སྔགས་གང་འདོད་པ་ཡིད་ལ་སེམས་ཤིང་བཟླ་བར་བྱའོ། །གཞན་དུ་ན་ལོག་པར་འདྲེན་པ་རྣམས་ཞུགས་པར་གྱུར་ནས་རིག་པའི་ལྷ་མངོན་དུ་མི་འགྱུར་རོ། །གཞན་གྱི་གོས་ལ་རེག་པར་མི་བྱ་ཞིང་བགོ་བ་གསུམ་བྱས་ཏེ། གཅིག་གྱོན་ལ་ཁྲུས་བྱའོ། །གཉིས་
པས་བཟླ་བར་བྱའོ། །གསུམ་པས་མཚན་མོ་གྱོན་པར་བྱའོ། །སྐྱིལ་ཀྲུང་གིས་གནས་ཏེ་རིག་པའི་ལྷའི་མཚན་མ་མཐོང་ནས་ཏིལ་དང་མར་བསྲེས་པའི་སྲེག་བླུགས་བྱའོ། །རིག་པའི་སྟོབས་འཕེལ་བར་འགྱུར་རོ། །ཏིལ་མེད་ན་དན་ཏུ་ལ་དང་། སྲན་མ་ཤ་དང་། མུད་
ག་རྣམས་ཀྱིས་བྱའོ། །ཉ་དང་ཤ་དང་ཆང་བཏུང་བར་མི་བྱ་སྟེ། ཉེས་པ་དེས་ལོག་པར་འདྲེན་པ་རྣམས་ཀྱིས་ཟིལ་གྱིས་གནོན་པར་འགྱུར་རོ། །རྟག་ཏུ་སངས་རྒྱས་དང་། ཆོས་དང་། དགེ་འདུན་ལ་བསྙེན་བཀུར་བ་དང་ལྡན་པས་བྱང་ཆུབ་ཀྱི་སེམས་ཆེན་པོ་བསྐྱེད་པར་
བྱའོ། །དམ་ཚིག་ཤེས་པར་གྱུར་པས་འདི་ལྟར་བྱས་ན་རིང་པོ་མི་ཐོགས་པར་འགྲུབ་པར་འགྱུར་རོ། །རིག་པ་འཛིན་པས་སྔར་བཤད་པ་བྱའོ། །རྟག་ཏུ་ལྷ་ཐམས་ཅད་ལ་བདུག་པ་དང་། ལྷ་བཤོས་ཀྱི་འབྲས་ཆན་རང་གི་ལག་གིས་དབུལ་བར་བྱའོ། །ཟློས་པ་ན་ཁ་ཤར་དུ་
ཕྱོགས་ཏེ་བྲིས་སྐུ་བྲིས་པའི་སྔོན་དུ་བཟླས་པར་བྱའོ། །བྲིས་སྐུའི་ཚད་ཆེན་པོ་ཁྲུ་བཅུ་པའི་རས་ལའོ། །དེའི་ཕྱེད་དང་ཕྱེད་ལ་འབྲིང་དང་ཐ་མར་འགྱུར་རོ། །སྐབས་འདིར་རིག་པ་འཛིན་པས་སྔར་བཤད་པ་རྣམས་བྱའོ། །གལ་ཏེ་བརྒྱ་ལ་རྫས་སམ། གོས་སམ། རྒྱན་
སྟེར་ན་དེ་གཟུང་བར་མི་བྱ་སྟེ། འབྲས་བུ་ཙམ་བཟུང་ན་ཡང་གསང་སྔགས་འགྲུབ་པར་མི་འགྱུར་རོ། །ཆུ་ཉུང་དུས་བཀྲུ་བར་མི་བྱ་ཞིང་རྐང་པས་མེ་ལ་རེག་པར་མི་བྱ་ལ་སེན་མོས་ས་ལ་རི་མོ་བྲི་བར་མི་བྱ་ཞིང་། ལྷའི་ཁང་པའི་གྲིབ་མ་ལ་འགོམ་པར་མི་བྱ་སྟེ། འདི་ལྟ་བུའི་ཡོན་ཏན་
དང་ལྡན་ཞིང་དེ་དག་དོར་བའི་སྔགས་པས་མྱུར་དུ་རིག་སྔགས་འགྲུབ་པར་འགྱུར་རོ། །འཕགས་པ་རྡོ་རྗེ་ས་འོག་གི་རྒྱུད་ལས་རིག་སྔགས་ཀྱིས་འདུལ་བ་ཞེས་བྱ་བ་རྡོ་རྗེ་ཁྲོ་བོས་ཡོངས་སུ་ཞུས་པའི་ལེའུ་སྟེ་ཉི་ཤུ་གསུམ་པའོ།། །།དེ་རུ་འབད་པས་འཇུག་པ་ན། །ཁང་བཟངས་

དམ་པ་རྙེད་པ་ཡིས། །བསྟན་བཅོས་ལས་ནི་ངེས་བཞིན་པའི། །ཕྱོགས་ཀྱི་ཆ་ནི་རབ་བཤད་བྱ། །ཤར་ན་ནྱ་གྲོ་དྷ་ཡི་ཤིང་། །དབང་ལྡན་དུ་ནི་པ་ལཀྵ། །ལྷོ་རུ་ཡང་ནི་ཨ་ཤྭཏྠ། །ནུབ་ཏུ་དེ་བཞིན་པ་ལཀྵ། །བྱང་དུ་ལྗོན་ཤིང་མ་དུ་ཀ །གནས་རྣམས་སུ་
ནི་གདོན་མི་ཟ། །གང་དག་ཏུ་ནི་ཤིང་མེད་ན། །དེ་ལ་ཡང་ནི་མཚན་བཟང་པོ། །ཤར་ན་གཞན་པའི་ལུས་གཅིག་སྟེ། །ལྷོ་རུ་ཡང་ནི་བཞི་རུ་འགྱུར། །ནུབ་ཏུ་གསུམ་དུ་བསྟན་པ་སྟེ། །བྱང་དུ་གཉིས་སུ་བསྒྲགས་པའོ། །མཛེས་པའི་བུ་མོ་རྟག་ཏུ་གནས། །གྲུབ་པའི་རྫས་དང་
དངུལ་ཆུ་ནི། །ལྷ་ཡི་བྱང་ན་རྟག་ཏུ་ཡང་། །དངུལ་ཆུ་རུ་ནི་ཤེས་པར་བྱ། །དབང་ལྡན་དུ་ཡང་དངུལ་ཆུ་སྟེ། །དབང་པོར་རྫས་ནི་དེ་བཞིན་ནོ། །ཆུ་ལྷར་རྟག་ཏུ་རྫས་བཟང་པོ། །གྲུབ་པའི་རྫས་ནི་བླ་ན་མེད། །བདེན་བྲལ་དུ་ནི་རལ་གྲིར་འགྱུར། །གཤིན་རྗེར་དེ་བཞིན་མིག་
སྨན་ཉིད། །རླུང་གི་ཕྱོགས་སུ་རྟག་གནས་པ། །ཡིད་བཞིན་ནོར་བུ་ཞེས་བྱའོ། །ལྷ་ཉིད་ཀྱི་ནི་མདུན་དུ་ཡང་། །འབབ་སྟེགས་ཅན་གྱི་རྫིང་བུར་བསྟན། །ཁང་བཟངས་ཀྱི་ནི་ནང་ན་ཡང་། །གྲུབ་པའི་རྫས་ལ་ཐེ་ཚོམ་མེད། །ལྷོ་ཡི་སྒོ་རུ་གང་གྱུར་པ། །ལྷོ་ཡི་ཕྱོགས་སུ་
མངོན་ཕྱོགས་པ། །དེ་ན་རྫས་རྣམས་ཐམས་ཅད་དེ། །ལྷ་ཡི་ཁང་པར་རྣམ་པར་བསྟན། །དབང་པོའི་ཕྱོགས་སུ་མངོན་ཕྱོགས་པ། །དེ་ནས་རྫས་རྣམས་ཀུན་བསྡུས་པའོ། །བྱང་དུ་ཕྱོགས་ཏེ་ལེགས་གནས་པ། །བྲིས་སྐུས་བཀབ་པའི་རྫས་སུ་བཤད། །ནུབ་ཏུ་ཕྱོགས་
ཏེ་ལེགས་གནས་པ། །དེ་ན་ཡང་ནི་བསྒྲིབས་ནས་གནས། །རིག་སྔགས་བཀླགས་པས་འགྲུབ་འགྱུར་ཏེ། །འཇིག་རྟེན་གསུམ་ཤེས་བླ་ན་མེད། །རིན་ཆེན་རྣམ་པ་སྣ་ཚོགས་པའི། །ལྷ་ཡི་གནས་སུ་རྣམ་པར་བསྟན། །ཤར་ནས་ཤར་དུ་མངོན་ཕྱོགས་པའི། །འཁྲུལ་
འཁོར་དུ་ནི་རྣམ་པར་བཤད། །ལྷོ་རུ་མངོན་པར་ཕྱོགས་གནས་པ། །ལྷོ་ཡི་ཕྱོགས་ཀྱིས་རྣམ་པར་བསྟན། །ནུབ་ཀྱི་ཕྱོགས་སུ་མངོན་ཕྱོགས་པ། །ནུབ་ཀྱི་ཕྱོགས་པར་རྣམ་པར་བསྟན། །འདི་ཡིས་བྱང་དུ་བཤད་པ་དང་། །དབང་ལྡན་གྱི་ཡང་དེ་བཞིན་ནོ། །ཕྱོགས་རྣམས་

ཀྱི་ཡང་མཚན་ཉིད་ནི། །བསྟན་པ་འདི་ལ་ཐེ་ཚོམ་མེད། །འདི་ལྟར་ཤེས་པའི་མཁས་པ་ཡིས། །ཕྱོགས་ཀྱི་འཁྲུལ་འཁོར་མཚོན་པར་བྱ། །སྔོན་བཞིན་ལེགས་པར་ཤེས་པ་ཡིས། །རྫས་རྣམས་ཀྱང་ནི་བློ་ལྡན་གྱིས། །དེ་འདྲའི་ཕྱོགས་སུ་འཁོད་ནས་ནི། །དེ་
ཡིས་ལམ་ནི་བལྟ་བར་བྱ། །གཉིས་པ་ཡི་ནི་ལམ་གྱུར་པ། །འཁྲུལ་འཁོར་མེད་པས་བརྟག་མི་དགོས། །གསུམ་པ་ཡང་ནི་ཤེས་བྱ་སྟེ། །བཞི་པ་ཡང་ནི་མཚུངས་པའོ། །ལམ་ནི་རྣམ་པ་བཞིར་བཤད་པས། །འདོད་ལྡན་ལ་ནི་འབྲས་བུ་སྟེར། །དང་པོ་རུ་ནི་མི་དཔྱད་
པར། །བཟའ་བར་བྱ་བ་མ་ཡིན་ནོ། །གཉིས་པ་རུ་ནི་བཟའ་བར་བྱ། །གསུམ་པ་ལ་ཡང་དེ་བཞིན་ནོ། །བཞི་པར་ཡང་ནི་བཟའ་བར་བྱ། །དེ་དག་འཁྲུལ་འཁོར་མེད་པར་བསྟན། །ཕྱོགས་ཀྱི་ཆ་ནི་ཐམས་ཅད་དུ། །ཡོངས་སུ་གང་བར་ཤེས་པར་བྱ། །
ཕྱི་མ་ཡི་ནི་ཆོ་ག་ཡིས། །ཚོང་འདུས་ཟེ་འབྲུ་རྒྱུ་བའོ། །འཕགས་པ་རྡོ་རྗེ་ས་འོག་གི་རྒྱུད་ལས་ཕྱོགས་ཀྱི་མཚན་ཉིད་ཀྱི་ལེའུ་སྟེ་ཉི་ཤུ་བཞི་པའོ།། །།འཕགས་པ་རྡོ་རྗེ་ས་འོག་ཅེས་བྱ་བའི་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།
ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ནས་ལྷ་མ་ཡིན་གྱི་དབང་པོ་གཞན་ལེན་གྱིས་སླར་ཡང་བཅོམ་ལྡན་འདས་དཔལ་རྡོ་རྗེ་འཛིན་པའི་མགོན་པོ་ལ་གུས་པས་ཕྱག་འཚལ་ནས་ཐལ་མོ་སྦྱར་ཏེ་གསོལ་པ། སྦྱོར་བ་བཅུ་པོ་གཉིས་པོ་འདི་རྣམས་གང་ལ་གང་བྱུང་བ་དང་། བུ་ག་ཐམས་ཅད་
ཀྱི་འཁྲུལ་འཁོར་ནམ་མེད་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ཏེ་དབྱར་ཟླ་ཐ་ཆུངས་ཀྱི་ནག་པོའི་བཅུ་བཞི་ལ་གཟའ་ཕུར་བུའི་ཉི་མ་དང་སྐར་མ་རྒྱལ་འཛོམ་པ་ལ་ངེས་པར་བུ་གའི་སྒོ་འབྱེད་པར་འགྱུར་རོ། །སྟོན་ཟླ་ཐ་ཆུངས་ཀྱི་གནམ་སྟོང་ལ་ཕུར་
བུའི་ཉི་མ་དང་རྒྱུ་སྐར་ས་རི་འཛོམ་པ་ལ་ངེས་པར་བུ་གའི་སྒོ་གྲོལ་བར་འགྱུར་རོ། །གཞོན་ནུ་མ་རང་ཉིད་འོངས་ནས་འཇུག་པར་བྱེད་དོ། །སྟོན་ཟླ་ཐ་ཆུངས་ཀྱི་ཉ་ལ་ཕུར་བུའི་ཉི་མ་དང་སྐར་མ་བྲ་ཉེ་འཛོམ་པ་ལ་བུ་ག་ཐམས་ཅད་ཀྱི་འཁྲུལ་འཁོར་མེད་པར་འགྱུར་རོ། །དགུན་ཟླ་འབྲིང་པོ་

ནག་པོའི་བཅུ་བཞི་ལ་ཕུར་བུའི་ཉི་མ་དང་སྐར་མ་རྒྱལ་འཛོམ་པ་ལ་འཁྲུལ་འཁོར་ཐམས་ཅད་གྲོལ་བར་འགྱུར་རོ། །དགུན་ཟླ་ཐ་ཆུངས་ཀྱི་ནག་པོའི་བཅུ་བཞི་ལ་ཕུར་བུ་དང་སྐར་མ་གྲོ་བཞིན་ལ་བུ་ག་ཐམས་ཅད་ཀྱི་འཁྲུལ་འཁོར་མེད་པར་འགྱུར་རོ། །དགུན་ཟླ་ཐ་
ཆུངས་ཀྱི་དཀར་པོའི་བཅུ་བཞི་ལ་ཕུར་བུའི་ཉེ་མ་དང་སྐར་མ་རྒྱལ་འཛོམ་པ་ན་འཁྲུལ་འཁོར་མ་ལུས་པ་གྲོལ་བར་འགྱུར་རོ། །སྟོན་ཟླ་ར་བའི་ནག་པོའི་ཚེས་བརྒྱད་ལ་ཕུར་བུའི་ཉིན་པར་དང་སྐར་མ་ནམ་གྲུ་འཇོམ་པ་ན་བུ་གའི་སྒོ་ཐམས་ཅད་གྲོལ་བར་འགྱུར་རོ། །དབྱར་ཟླ་འབྲིང་པོའི་ནག་པོའི་
བཅུ་བཞི་ལ་ཕུར་བུའི་ཉིན་པར་དང་སྐར་མ་རྒྱལ་ལམ་ནམ་གྲུ་འཛོམ་པ་ལ་བུ་ག་ཐམས་ཅད་ངེས་པར་གྲོལ་བར་འགྱུར་རོ། །གྲོང་གི་མི་འཁོར་དང་བཅས་པ་ཐམས་ཅད་འཇུག་པར་བྱའོ། །སྟོན་ཟླ་ར་བའི་ནག་པོའི་བཅུ་བཞི་ལ་ཕུར་བུའི་ཉིན་པར་དང་སྐར་མ་ཕལ་གུ་ནི་འཛོམ་པ་ན་ངེས་པར་བུ་
གའི་སྒོ་གྲོལ་བར་འགྱུར་རོ། །ལྷ་མ་ཡིན་གྱི་དབང་པོ་གཞན་ལེན་གྱིས་རྗེ་བཙུན་འཕགས་པ་ཕྱག་ན་རྡོ་རྗེ་རབ་ཏུ་དགྱེས་པའི་དོན་དུས་འོག་གི་གསང་བ་ཆེན་པོ་སྨྲས་པའོ། །སྔགས་དང་སྦྱིན་སྲེག་རྣམ་པར་སྤང་ངོ་། །ས་འོག་གི་གསང་བ་ཆེན་པོ་ཡོངས་སུ་རྫོགས་སོ།། །།འཕགས་
པ་ཕྱག་ན་རྡོ་རྗེའི་རྒྱུད་ཀྱི་རྒྱལ་པོ་ཆེན་པོ་རྡོ་རྗེ་ས་འོག་ཅེས་བྱ་བ་ཇི་སྙེད་པ་ཡོངས་སུ་རྫོགས་སོ།། །།རྒྱ་གར་གྱི་པཎྜི་ཏ་བརྡ་སྤྲོད་པ་ཆེན་པོ་བདེ་བར་གཤེགས་པའི་དཔལ་ཞེས་བྱ་བ་དང་། སྒྲ་སྒྱུར་གྱི་མཁས་པ་སྒྲའི་གཙུག་ལག་ལམ་རྨོངས་པ་གསང་སྔགས་འཛིན་པ་ཀུན་དགའ་རྒྱལ་
མཚན་དཔལ་བཟང་བོས་དཔལ་ས་སྐྱའི་དབེན་གནས་དམ་པར་བསྒྱུར།། །།ལྷ་མིན་དབང་པོའི་སྒོ་གླེགས་འཇོམས་བྱེད་པ། །གསུང་རབ་དམ་པ་དཔལ་ལྡན་ཀུན་དགའ་ཡི། །རྒྱལ་མཚན་གྱིས་བསྒྱུར་འདི་ལ་སྒྲ་ཉམས་པ། །གང་ལགས་དེ་ལ་མཁས་རྣམས་བཟོད་པ་མཛོད། །
ས་འོག་འཁྲུལ་འཁོར་བདེ་ལེགས་རིན་ཆེན་གཏེར། །གསང་བདག་རྡོ་རྗེ་འཛིན་པ་དམ་པའི་བཀའ། །གངས་ཅན་འགྲོ་ལ་ཕན་པའི་བློ་གྲོས་ཀྱིས། །བསྒྱུར་བའི་བསོད་ནམས་འཛིན་བཅས་རྣམས་ལ་བྱིན།། །།

༄༅། །རྒྱ་གར་སྐད་དུ། ཨཱརྒྨ་ཏཱ་རཱ་བྷནྣཱ་རི་ཀཱ་ནཱ་མཱ་ཥྚ་ཤ་ཏ་ཀཾ། བོད་སྐད་དུ། རྗེ་བཙུན་མ་འཕགས་མ་སྒྲོལ་མའི་མཚན་བརྒྱ་རྩ་བརྒྱད་པ་ཞེས་བྱ་བ། རྗེ་བཙུན་འཕགས་མ་སྒྲོལ་མ་ལ་ཕྱག་འཚལ་ལོ། །དཔལ་ལྡན་ཡིད་འོང་པོ་ཊ་ལ། །སྣ་ཚོགས་ཁམས་ཀྱིས་རྣམ་པར་སྤྲས། །
སྣ་ཚོགས་ལྗོན་པ་འཁྲི་ཤིང་བཀྲམ། །འདབ་ཆགས་དུ་མ་སྒྲ་འབྱིན་པ། །འབབ་ཆུ་སྣ་ཚོགས་ལྷུང་ལྷུང་སྒྲོགས། །རི་དྭགས་མང་པོས་ཀུན་ཏུ་དཀྲིག །མེ་ཏོག་སྣ་ཚོགས་རིགས་རྣམས་ཀྱིས། །ཀུན་ཏུ་དྲི་ཡིས་བཀང་བ་སྟེ། །སྣ་ཚོགས་ཡིད་འོང་འབྲས་བུར་ལྡན། །རྐང་དྲུག་པ་རྣམས་གླུ་སྒྲ་འབྱིན། །མིའམ་
ཅི་རྣམས་དབྱངས་སྙན་ལེན། །གླང་པོ་མྱོས་པས་རབ་ཏུ་གཏམས། །གྲུབ་པ་རིག་འཛིན་ཚོགས་དང་ནི། །དྲི་ཟ་རྣམས་ཀྱིས་གླུ་བླངས་པ། །ཐུབ་པ་འདོད་ཆགས་བྲལ་རྣམས་ཀྱིས། །རྟག་ཏུ་ལེགས་པར་བསྟེན་པ་ན། །བྱང་ཆུབ་སེམས་དཔའི་ཚོགས་གཞན་དང་། །ས་བཅུའི་དབང་ཕྱུག་རྣམས་ཀྱང་སྟེ། །
འཕགས་མ་སྒྲོལ་སོགས་ལྷ་མོ་རྣམས། །རིག་པའི་རྒྱལ་མོ་སྟོང་རྣམས་དང་། །ཁྲོ་བོའི་རྒྱལ་པོའི་ཚོགས་གཞན་དང་། །རྟ་མགྲིན་ལ་སོགས་ཀྱིས་བསྐོར་བའི། །སེམས་ཅན་ཀུན་ལ་ཕན་བརྩོན་པ། །བཅོམ་ལྡན་འདས་ནི་སྤྱན་རས་གཟིགས། །བཞུགས་ཏེ་དེ་ནས་དཔལ་དང་ལྡན། །པདྨའི་སྙིང་
པོའི་གདན་བཞུགས་པའི། །དཀའ་ཐུབ་ཆེན་པོ་དང་ལྡན་པ། །བྱམས་དང་སྙིང་རྗེ་ལྡན་པ་ཡིས། །ལྷ་ཡི་འཁོར་ནི་ཆེན་པོ་ལ། །དེ་ཡི་ཆོས་ནི་སྟོན་པར་བཞེད། །ལག་ན་རྡོ་རྗེ་སྟོབས་ཆེན་པོ། །དེར་ནི་ཉེ་བར་འོང་ནས་སུ། །མཆོག་ཏུ་སྙིང་རྗེ་དང་ལྡན་པ། །དེས་ནི་སྤྱན་རས་གཟིགས་ལ་ཞུས། །གླང་པོ་སྦྲུལ་དང་སེང་གེ་མེ། །གླང་པོ་སྟག་
དང་ཆུས་དཀྲིགས་པར། །འཕྱན་པའི་སེམས་ཅན་འདི་དག་རྣམས། །འཁོར་བའི་རྒྱ་མཚོར་བྱིང་བ་རྣམས། །འཁོར་བའི་ཞགས་པས་བཅིངས་པ་རྣམས། །ཆགས་སྡང་གཏི་མུག་རང་བཞིན་ལས། །གང་གིས་སེམས་ཅན་གྲོལ་བྱེད་པ། །ཐུབ་ཆེན་བདག་ལ་དེ་གསུངས་ཤིག །དཔལ་ལྡན་དེ་ནི་སྤྱན་རས་གཟིགས། །
འཇིག་རྟེན་མགོན་པོས་འདི་སྐད་གསུངས། །ཕྱག་ན་རྡོ་རྗེས་རྟོགས་བྱེད་པ། །སྙན་པའི་ཚིག་ནི་གསུངས་པའོ། །ཉོན་ཅིག་གསང་བའི་རྒྱལ་དབང་པོ། །སྐྱོབ་པ་འོད་དཔག་མེད་པ་ཡི། །སྨོན་ལམ་དབང་གིས་བྱུང་བ་སྟེ། །བདག་གི་བཀའ་ཡིས་འཇིག་རྟེན་མ། །སྙིང་རྗེ་ཆེ་དང་ལྡན་པ་ཡིས། །འགྲོ་བ་འདོན་པར་བརྩོན་པ་མོ། །ཉི་མ་ཤར་བ་

དང་འདྲ་བ། །ཟླ་བ་ཉ་འདྲ་བྱད་ཀྱི་འོད། །ལྷ་དང་ལྷ་མིན་མིར་བཅས་པ། །འདི་རྣམས་སྒྲོལ་ཞིང་སྣང་བར་བྱེད། །འཇིག་རྟེན་གསུམ་པོ་གཡོ་བར་བྱེད། །གནོད་སྦྱིན་སྲིན་པོ་འཇིགས་པར་བྱེད། །ལྷ་མོ་ཨུཏྤལ་སྔོན་པོའི་ཕྱག །མ་འཇིགས་མ་འཇིགས་ཞེས་བརྗོད་མ། །འགྲོ་བ་ཡང་དག་བསྲུང་དོན་དུ། །རྒྱལ་པོ་རྣམས་ཀྱིས་
བདག་བསྐྱེད་པས། །འབྲོག་དགོན་མཚོན་ཆ་ལྟུང་ཏ བ་དང་། །སྣ་ཚོགས་འཇིགས་པ་འཁྲུགས་པའི་ཚེ། །མིང་རྣམས་དྲན་པ་ཉིད་ཀྱིས་ནི། །བདག་གིས་རྟག་ཏུ་སེམས་ཅན་བསྲུང་། །སྣ་ཚོགས་འཇིགས་པའི་རྒྱ་མཚོ་ལས། །སེམས་ཅན་ཐམས་ཅད་བདག་གིས་བསྒྲལ། །དེས་ན་བདག་ལ་འཇིག་རྟེན་དུ། །ཐུབ་པའི་ཚོགས་ཀྱིས་སྒྲོལ་མར་
སྒྲོགས། །དེ་ནས་གུས་བཅས་ལེགས་གནས་ཤིང་། །ཐལ་མོ་སྦྱར་བར་བྱས་ནས་ནི། །འབར་བཞིན་བར་སྣང་ལ་གནས་ཏེ། །འདི་སྐད་ཚིག་ནི་གསོལ་བར་གྱུར། །གང་ཞིག་རྒྱལ་དང་ས་བཅུ་ཡི། །དབང་ཕྱུག་མགོན་པོ་བྱང་ཆུབ་སེམས། །རྫུ་འཕྲུལ་ཆེ་རྣམས་སྔོན་བསྒྲགས་པའི། །སྡིག་ཀུན་འཕྲོག་ཅིང་བསོད་ནམས་དང་། །བཀྲ་ཤིས་གྲགས་པ་
འཕེལ་བྱེད་པ། །ནོར་དང་འབྲུ་དང་དང་དཔྱ་ཉིད་དང་། །ནད་མེད་འབྱོར་པ་འཕེལ་བར་བྱེད། །ཚེ་དང་ནད་མེད་བདེ་སྐྱེད་པ། །སེམས་ཅན་ཐམས་ཅད་བདེ་འཐོབ་ཅིང་། སེམས་ཅན་ཀུན་གྱི་དཔལ་དང་ནི། །ཤིས་པ་འཇོག་ཅིང་རྣམས་སྤེལ་བ། །མཚན་བརྒྱ་རྩ་བརྒྱད་པ་གསུངས་ཤིག །སེམས་ཅན་རྣམས་ལ་བྱམས་མཛད་ནས། །ཐུབ་པ་ཆེན་པོ་དེ་སྒྲོགས་ཤིག །
འདི་སྐད་ཞུས་ལ་བཅོམ་ལྡན་འདས། །སྤྱན་རས་གཟིགས་ནི་རབ་ཏུ་བཞད། །བྱམས་པ་འཕྲོ་བའི་སྤྱན་རས་ཀྱིས། །ཕྱོགས་རྣམས་ཀུན་ཏུ་རྣམ་གཟིགས་ནས། །བསོད་ནམས་མཚན་གྱིས་བརྒྱན་པ་ཡི། །གཡས་པའི་བྱག་གི་བསྐྱོད་མཛད་ནས། །དེ་གསུངས་ཤེས་རབ་ཤིན་ཏུ་ཆེ། །ལེགས་སོ་ལེགས་སོ་དཀའ་ཐུབ་ཆེ། །སེམས་ཅན་ཀུན་ལ་
གཅིག་ཏུ་བརྩེ། །སྐལ་བ་ཆེན་པོའི་མིང་རྣམས་ཉོན། །མི་རྣམས་གང་ཞིག་འདི་སྒྲོགས་པ། །ནོར་གྱི་དབང་ཕྱུག་ཡང་དག་འགྱུར། །ནད་རྣམས་ཀུན་ལས་རྣམ་པར་གྲོལ། །དབང་ཕྱུག་ཡོན་ཏན་ཐམས་ཅད་ལྡན། །དུས་མིན་འཆི་བ་ངེས་པར་བསྲེགས། །ཤི་བ་བདེ་བ་ཅན་འགྲོ་བ། །དེ་རྣམས་བདག་གིས་བཤད་པར་བྱ། །ལྷ་ཡི་དགེ་འདུན་བདག་ལ་ཉོན། །
འདིར་ཁྱོད་རྗེས་སུ་ཡི་རང་བྱོས། །ལེགས་པར་བསྡམས་པ་མཆིས་པར་མཛོད། །ཨོཾ་ལོ་ཙ་ནི་སུ་ལོ་ཙ་ནི། ཏ་རེ། ཏཱ་རོདྦྷ་བེ། སརྦྦ་སཏྭཱ་ནུ་ཀམྤེ་ནི། སརྦྦ་ས་ཏྭོཏྟ་རི་ཎི། ས་ཧ་སྲ་བྷུ་ཛེ། ས་ཧ་སྲ་ནེ་ཏྲེ། ཨོཾ་ན་མོ་བྷ་ག་ཏཱི་ཨ་བ་ལོ་ཀ་ཡ། ཨ་བ་ལོ་ཀ་ཡ། མཱཾ་སརྦྦ་ས་ཏྭཱྃ་ཤྩ་ཧཱུྃ་ཕཊ་སྭཱ་ཧཱ། ཨོཾ་སིདྡྷེ་སུ་སིདྡྷེ། སུ་ག་ཏཱཏྣ་ཛེ་མཾ་ཏྲཱཾ་ཀྲྀ་བཱ་ནི་རྨྨ་ལེ། ཤྱཱ་མེ་དྱཱ་མ་རཱུ་བེ་མ་ཧཱ་

པྲ་ཛྙཱེ་པྲ་བ་རེ་བ་ར་བེ་བྷཱ་ཥི་ཏེ། ཨོཾ་ཨ་པ་རཱ་ཛི་ཏཱ་མ་ཧཱ་རཽ་དྲཱི་བི་ཤྭ་རཱུ་བཱི་མ་ཧཱ་བ་ལཱ། ཨོཾ་སཿཤྲཱི་ཏདྱ་ཐཱ། ཨོཾ་དགེ་བ་མ་ནི་གཟི་བརྗིད་ཆེ། །འཇིག་རྟེན་གསོ་བྱེད་སྙན་པ་ཆེ། །མཚོ་ལྡན་མ་དང་སྤྱན་ཡང་སམ། །ཤེས་རབ་དཔལ་དང་བློ་འཕེལ་མ། །བརྟན་སྦྱིན་གསོ་སྦྱིན་མ་སྭཱ་ཧཱ། །ཨོཾ་ཡིག་འདོད་པའི་གཟུགས་ཅན་མ། །སེམས་ཅན་ཀུན་ལ་ཕན་བརྩོན་མ། །
གཡུལ་ལས་སྒྲོལ་བྱེད་རྒྱལ་བ་མོ། །ལྷ་མོ་ཤེས་རབ་ཕར་ཕྱིན་མ། །འཕགས་མ་སྒྲོལ་མ་ཡིད་འོང་མ། །གང་མ་རྔ་ཆེན་དུང་ཅན་མ། །རིག་པའི་རྒྱལ་མོ་ཚིག་སྙན་མ། །ཟླ་བའི་གདོང་ཅན་དཀར་མོ་ཆེ། །མི་ཕམ་མ་དང་གོས་སེར་མ། །སྒྱུ་མ་ཆེན་མོ་དཀར་ཆེན་མོ། །སྟོབས་ཆེན་ཕ་རོལ་གནོན་པ་མོ། །དྲག་མོ་ཆེན་མོ་གཏུམ་ཆེན་མོ། །སྡང་བའི་སེམས་
ཅན་རླག་བྱེད་མ། །རབ་ཏུ་ཞི་མ་ཞི་གཟུགས་མ། །རྣམ་པར་རྒྱལ་མ་འབར་འོད་མ། །གློག་གི་ཕྲེང་མ་རྒྱལ་མཚན་མ། །རལ་གྲི་འཁོར་ལོ་གཞུ་ཐོགས་མཚོན། །རྨུག་བྱེད་རེངས་བྱེད་ནག་མོ་དང་། །དུས་མཚན་མ་དང་མཚན་སྤྱོད་མ། །སྲུང་བྱེད་རྨོངས་བྱེད་ཞི་བ་མོ། །ཞུ་མ་དགེ་མ་སུ་སྒྲོལ་མ། །ཚངས་རིག་མ་དང་རིག་བྱེད་ཡུམ། །གསང་ལེན་མ་དང་ཕུག་གནས་མ། །
བཀྲ་ཤིས་བདེ་བྱེད་ཞི་བྱེད་མ། །སྐྱེས་པ་རིག་བྱེད་ཡིད་མགྱོགས་མ། །ཐོད་པ་ཅན་མ་ཤུགས་ཆེན་མ། །མཚམས་མ་བདེན་མ་གཞན་ལས་རྒྱལ། །དེད་དཔོན་ཆེན་མོ་སྙིང་རྗེས་འཇུག །ཉམས་ལ་ལམ་ནི་རབ་སྟོན་མ། །མཆོག་སྟེར་འཆོས་བྱེད་སྟོན་པ་མོ། །བུད་མེད་གཟུགས་ལ་དཔག་མེད་གནོན། །གྲུབ་མ་རི་ཁྲོད་རྣལ་འབྱོར་མ། །གདོལ་མ་
ངེས་མ་བདུད་རྩི་མ། །ནོར་ཅན་བསོད་ནམས་སྐལ་ཆེན་མ། །སྐལ་བཟང་མ་དང་གྲོགས་སྟོན་མ། །གཤིན་རྗེ་སྐྲག་བྱེད་འཇིགས་བྱེད་མ། །དྲག་ཤུལ་དྲག་ཤུལ་དཀའ་ཐུབ་ཆེ། །འགྲོ་ལ་གཅིག་ཏུ་ཕན་བརྩོན་མ། །སྐྱོབ་མ་གུས་ལ་མཉེན་གཤིན་མ། །ཞི་མ་ཕྲ་མོ་ངག་དབང་ཕྱུག །རྟག་མ་ཀུན་གྱི་མར་གྱུར་མ། །དོན་ཀུན་སྒྲུབ་བྱེད་བཟང་
པོ་མ། །སྦས་མ་མ་མ་ནོར་སྦྱིན་མ། །འཇིགས་མེད་གཽ་ཏ་མཱ་རབ་བཤད། །དཔལ་ལྡན་འཇིག་རྟེན་དབང་སྲས་མོ། །ཡོན་ཏན་མཐའ་ཡས་སྒྲོལ་མའི་མཚན། །བསམ་པ་ཐམས་ཅད་རྫོགས་བྱེད་པའོ། །ཨོཾ་ཏཱ་རེ་ཀྲྀ་པཱ་བ་ལཾ་བ་ནི། མཻ་ཏྱཱཏྨ་ཀེ་ཤྲི་བ་ཎཱི་ཡེ་སྭཱ་ཧཱ། མཚན་བརྒྱ་རྩ་བརྒྱད་འདི་དག་ནི། །ཕན་པར་འདོད་པས་བསྒྲགས་པ་སྟེ། །གསང་བ་ལས་ནི་མཆོག་
ཏུ་གསང་། །ལྷས་ཀྱང་རྙེད་པར་ཤིན་ཏུ་དཀའ། །སྐལ་བཟང་སྐལ་བ་ཅན་དུ་བྱེད། །སེམས་ཅན་ཐམས་ཅད་བདེ་བར་འཇུག །སྡིག་པ་ཀུན་འཕྲོག་བསོད་ནམས་ཏེ། །ཉེས་པ་ཐམས་ཅད་འཇོམས་བྱེད་པའོ། །བློ་ལྡན་གང་ཞིག་གཙང་བྱས་ནས། །མཉམ་བཞག་དུས་གསུམ་ཀློག་བྱེད་པ། །དེ་ནི་མི་རིང་དུས་ཉིད་དུ། །རྒྱལ་སྲིད་དཔལ་ནི་ཐོབ་པར་འགྱུར། །སྡུག་

ཅན་རྟག་ཏུ་བདེ་བར་འགྱུར། །དབུལ་པོ་རྣམས་ནི་ནོར་ལྡན་འགྱུར། །འདིར་ནི་བླུན་པོ་ཤེས་རབ་ཆེ། །ཡིད་གཞུངས་ཅན་འགྱུར་ཐེ་ཚོམ་མེད། །བཅིངས་པ་འཆིང་ལས་གྲོལ་བར་འགྱུར། །ཐ་སྙད་ལས་ནི་རྒྱལ་བར་འགྱུར། །དགྲ་བོ་རྣམས་ནི་བཤེས་སུ་འགྱུར། །རྭ་ཅན་དང་ནི་མཆེ་བ་ཅན། །བགྲོད་དཀའ་དོག་དང་འཐབ་མོ་ཡང་། །སྣ་ཚོགས་
འཇིགས་པ་འཁྲུགས་པའི་ཚེ། །མཚན་ནི་འདི་རྣམས་དྲན་པ་ཡིས། །འཇིགས་པ་ཐམས་ཅད་སེལ་བར་འགྱུར། །དུས་མིན་འཆི་ལས་སྒྲོལ་བར་བྱེད། །སྙན་གྲགས་རོལ་མོ་འཐོབ་པར་འགྱུར། །དེ་གཅིག་པུས་ནི་བདག་ཉིད་ཆེ། །མི་རྣམས་སྐྱེ་བ་འབྲས་བུར་བཅས། །གང་ཞིག་མི་ནི་སྔར་ལངས་ནས། །འདི་ཉིད་སྒྲོགས་པར་བྱེད་པ་དེ། །དུས་རིང་པོར་ཡང་
ཚེ་དང་ལྡན། །མི་ཡི་དཔལ་ཡང་རྙེད་པར་འགྱུར། །ལྷ་དང་ཀླུ་དང་གནོད་སྦྱིན་དང་། །དེ་བཞིན་དྲི་ཟ་ལུས་སྲུལ་པོ། །ཤ་ཟ་སྲིན་པོ་འཇིགས་རུང་དང་། །མ་མོ་དྲག་པོའི་སེམས་ལྡན་པ། །གནོན་པོ་མཁའ་འགྲོ་མ་ཡི་དྭ་གས། །སྐེམ་བྱེད་སྨྱོ་བྱེད་གཟའ་དེ་བཞིན། །རོ་ལངས་སེམས་སྒྱུར་སྦོད་གཏོང་གང་། །གདུག་པའི་སེམས་ལྡན་གཞན་གྱིས་ཀྱང་། །
གྲིབ་མ་ཡང་ནི་འགོང་མི་ནུས། །སླར་ཡང་དེ་ཡི་སྨོས་ཅི་དགོས། །སེམས་ཅན་གདུག་པས་གསོད་མི་འགྱུར། །གྲིབ་གནོན་དང་ནི་བརྗེད་བྱེད་ཉིད། །གཤེད་བྱེད་བྱད་ལྟེམ་ལ་སོགས་དང་། །ནད་རྣམས་ཀྱིས་ཀྱང་ཐེབ་མི་འགྱུར། །ལྷ་དང་ལྷ་མིན་འཐབ་པ་ཡང་། །རྫུ་འཕྲུལ་ཆེན་པོས་ཉམས་སུ་མྱོང་། །ལོངས་སྤྱོད་དབང་ཕྱུག་ཡོན་ཏན་ལྡན། །
བུ་དང་ཚ་བོ་རྣམ་པར་འཕེལ། །བློ་ལྡན་སྐྱེ་བ་དྲན་པར་འགྱུར། །རིགས་དང་ལྡན་ཞིང་མཐོང་ན་དགའ། །གཉེན་དང་ལྡན་ཞིང་སྨྲ་མཁས་ཆེ། །བསྟན་བཅོས་ཀུན་ལ་འཇིགས་པ་མེད། །དགེ་བའི་བཤེས་ལ་ཡང་དག་བསྟེན། །བྱང་ཆུབ་སེམས་ཀྱི་རྒྱན་དང་ལྡན། །རྟག་ཏུ་སྐྱེ་བ་གང་གང་དུ། །སངས་རྒྱས་རྣམས་དང་མི་འབྲལ་ལོ། །རྗེ་བཙུན་མ་
འཕགས་མ་སྒྲོལ་མའི་མཚན་བརྒྱ་རྩ་བརྒྱད་པ་སངས་རྒྱས་ཀྱིས་གསུངས་པ་རྫོགས་སོ།། །།ཞེས་པ་འདི་ནི་རྗེ་བཙུན་བླ་མ་རིག་པ་འཛིན་པ་ཆེན་པོས་ནེ་པཱ་ལའི་ཡུལ་ནས་བྱུང་བའི་རྒྱ་དཔེ་སྩལ་ནས་གསེར་གྱི་ཀཱཪྵཱ་པ་ཎའི་གནང་སྐྱེས་དང་བཅས་ཏེ་སྒྱུར་ཅིག་ཅེས་མངའ་རིས་སྟོད་ནས་བྱ་མ་རྟའི་ལམ་བརྒྱུད་དེ་བཀའ་
ཕེབ་པ་བཞིན་སི་ཏུ་པ་བསྟན་པའི་ཉིན་བྱེད་ཀྱིས་དཔལ་གདོང་གི་ལོ་ཐ་སྐར་ཅན་གྱི་ཡར་ཚེས་བརྒྱད་ཀྱི་ཉིན་མདོ་སྨད་སྡེ་དགེའི་མངའ་རིས་ཐུབ་བསྟན་ཆོས་འཁོར་གླིང་གི་གཙུག་ལག་ཁང་དུ་བསྒྱུར་བ་སྟེ། སྔར་བསྒྱུར་བ་རྣམས་དང་མི་མཚུངས་པ་དང་ལྷག་པ་འགའ་ཞིག་འདུག་ཀྱང་ཚིག་དོན་གྱི་ཆར་འདི་ཉིད་ལེགས་ཚང་ཕུལ་དུ་བྱུང་བར་རྟོགས་སོ།། །།