Kinh tạng Tây Tạng (Kangyur Đại Học) — 093_རྒྱུད་འབུམ།_ཙ

ུགས་ཀྱི་ནང་དུ་དོར་བར་བགྱི་ཞིང་
ཐམས་ཅད་བས་པར་གྱུར་ན་དེའི་ཚེ་ས་ཆེན་པོ་རྣམས་རབ་ཏུ་གཡོ་བར་འགྱུར་ལ་དེའི་དབང་གིས་སྐུ་གཟུགས་བགྱིས་པ་དེ་ཡང་རབ་ཏུ་གཡོ་ཞིང་ནང་གི་གོང་ན་མཆིས་པའི་གདོང་གི་ཁ་ནས་སྒྲ་བྱུང་ནས་རྣལ་འབྱོར་པ་དེ་ལ་འདི་སྐད་དུ་རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་འདི་

ལྟར་ནན་ཏན་བརྩོན་འགྲུས་ཀྱིས་སྨོན་པ་རྣམས་ཡོངས་སུ་གཉེར་བས་བདག་གིས་ཁྱོད་ཀྱི་སྨོན་པ་ཡོངས་སུ་རྫོགས་པར་བགྱིའོ། །ཁྱོད་འདི་ནས་ནམ་མཁའ་ལ་འཕུར་ཏེ་འགྲོ་བའམ། ཡང་ན་ཁྱོད་རྒྱུ་ཞིང་འགྲོ་བ་ལ་ཐོགས་པ་མེད་པའམ། ཡང་ན་དྲང་སྲོང་རིག་འཛིན་གྱི་རྒྱལ་པོ་
བྱེད་པར་འགྱུར་བའམ། ཡང་ན་བདག་ཅི་ལྟ་བ་བཞིན་དུ་རང་དབང་ཐོགས་པ་མེད་པ་ཉིད་དུ་བྱའོ་ཞེས་བསྔགས་པ་བརྗོད་པར་འགྱུར་ལགས་སོ། །གཞན་ཡང་རྣལ་འབྱོར་པས་ཟླ་བ་དཀར་པོ་ཡར་གྱི་ངོ་ཚེས་བཅྭ་ལྔ་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་
གི་གཟུགས་གདོང་བཅུ་གཅིག་པ་དེ་སངས་རྒྱས་ཀྱི་རིང་བསྲེལ་དང་བཅས་པའི་མཆོད་རྟེན་གྱི་ནང་དུ་བཞག་སྟེ། གོས་སར་པ་གཙང་མ་བགོས་ལ་གསོ་སྦྱོང་དང་སྡོམ་པ་ཡང་དག་པར་བླངས་ཏེ་གདུགས་མཚན་གཅིག་ལ་རབ་ཏུ་སྨྱུང་བར་བགྱིས་ནས། སུ་མ་ནའི་མེ་ཏོག་སྟོང་
རྩ་བརྒྱད་བླངས་ཏེ། མེ་ཏོག་རེ་རེ་བླངས་ནས་སྔགས་ལན་རེ་བཏབ་སྟེ། ཐམས་ཅད་བས་པའི་བར་དུ་བགྱིས་ན་དེའི་ཚེ་གཟུགས་བགྱིས་པ་དེའི་མདུན་དུ་གདོང་གཅིག་གི་ཁ་ནས་འབྲུག་སྒྲ་ལྟ་བུའི་སྒྲ་བྱུང་བར་གྱུར་ལ། དེའི་དབང་གིས་ས་ཆེན་པོ་ཡང་རབ་ཏུ་གཡོ་བར་གྱུར་
པས་རྣལ་འབྱོར་པས་དེའི་ཚེ་རང་གི་སེམས་བདེ་བར་བཞག་ནས་སྐྲག་ཅིང་འཇིགས་པ་མི་བསྐྱེད་པར་རིག་སྔགས་དང་། སྨོན་ཅིང་སྒྲུབ་པ་གང་ལགས་པ་འབའ་ཞིག་རྗེས་སུ་དྲན་པར་བགྱིས་ཏེ། འདི་སྐད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་
སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་དང་ལྡན་པ་ལ་གུས་པར་ཕྱག་འཚལ་ལོ། །བདག་ནམ་ཞིག་ན་སེམས་ཅན་ཐམས་ཅད་ཀྱི་མགོན་དང་སྐྱབས་སུ་གྱུར་ནས་སེམས་ཅན་ཐམས་ཅད་ཀྱི་སེམས་ཀྱི་སྨོན་པ་རྣམས་ཡོངས་སུ་བསྐོང་བར་འགྱུར་ཞེས་བརྗོད་པར་གྱུར་ན།
དེའི་ཚེ་སྤྱན་རས་གཟིགས་དབང་ཕྱུག་གིས་ཅི་ལྟར་སྨོན་པ་རྣམས་སྩོལ་བར་འགྱུར་ཏེ། སྨོན་པ་རྣམས་སྩོལ་བའི་ཚེ་ལྷ་དང་ཀླུ་ལ་སོགས་པ་གང་གིས་ཀྱང་བར་ཆད་དང་བགེགས་བགྱིད་པར་མི་འགྱུར་ལགས་སོ། །གཞན་ཡང་རྣལ་འབྱོར་པས་ཟླ་བ་ལ་གཟའ་ཞུགས་པའི་ཚེ་ཆབ་

མར་སྲང་གཅིག་བླངས་ཏེ། དངུལ་གྱི་སྣོད་ཀྱི་ནང་དུ་སྩལ་ནས་གཟུགས་བགྱིས་པའི་མདུན་དུ་བཞག་སྟེ། སྔགས་འདིས་བཟླས་བརྗོད་བགྱིས་ན་ཟླ་བ་ཡང་སྔ་མ་ཁོ་ན་བཞིན་དུ་སྐྱབས་འོག་ཏུ་གྱུར་པས་དེ་ནས་བླངས་ཏེ་འཚལ་ན་ལུས་ཀྱི་བྲོ་ནད་རྣམས་མི་འབྱང་བ་གང་ཡང་མ་མཆིས་
ལགས་སོ། །གཞན་ཡང་རྣལ་འབྱོར་པས་ལྡོང་རོས་དང་གི་ཝང་ཆ་མཉམ་པར་བགྱིས་ཏེ། གཟུགས་བགྱིས་པ་དེའི་མདུན་དུ་བཞག་ནས་སྔགས་འདི་ལན་སྟོང་རྩ་བརྒྱད་བཟླས་ཏེ་ཆབ་ཀྱིས་སྦྲུས་ནས་དཔྲལ་བ་ལ་ཐིག་ལེ་བགྱིས་ན། དོན་རྣམ་པ་གསུམ་འགྲུབ་པར་འགྱུར་ལགས་སོ། །
སྔར་བསྟན་པ་བཞིན་དུ་ཆབ་དྲོན་པོ་དང་སྦྱར་ཏེ་ཁྲུས་བགྱིས་ན་བགེགས་ཐམས་ཅད་དང་བྲོ་ནད་མ་རུངས་པ་ཐམས་ཅད་བསལ་ཞིང་འབྱང་བར་འགྱུར་ལགས་སོ། །གཞན་ཡང་གལ་ཏེ་ཕ་རོལ་གྱི་དམག་ཚོགས་ཀྱིས་གཡུལ་འཕྲོག་པར་གྱུར་ན། ཨྱན་ཅི་དམར་རྩི་འབྲས་བུ་ཅིག་བླངས་ཏེ་སྔགས་
འདི་ལན་བརྒྱ་རྩ་བརྒྱད་ཀྱིས་བཏབ་ནས། གཟུགས་བགྱིས་པ་དེའི་གཡོན་ཕྱོགས་ཀྱི་ཁྲོ་བོའི་གདོང་ལ་བྱུགས་ཏེ། དགྲའི་ཕྱོགས་སུ་ཁ་བསྟན་ན་དགྲའི་དམག་ཚོགས་རྣམས་དྲུང་དུ་མཆི་བར་མི་འགྱུར་ལགས་སོ། །གཞན་ཡང་གལ་ཏེ་ཡུལ་ཕྱོགས་སུ་མི་དང་ཕྱུགས་ལ་རིམས་ནད་བྱུང་བར་
གྱུར་ན། གཟུགས་བགྱིས་པ་དེའི་མདུན་དུ་ཤིང་ཤུག་པའི་ཞུགས་བུས་ལ་གཞན་ཡང་ཤིང་དེ་བླངས་ནས་དུམ་བུ་སྟོང་རྩ་བརྒྱད་དུ་གཏུབས་ཏེ་དུམ་བུ་གཅིག་བླངས་ནས་ཡུངས་འབྲུའི་མར་གྱིས་བསྐུས་ཏེ། སྔགས་ལན་རེ་བཟླས་ནས་ཞུགས་ཀྱི་ནང་དུ་དོར་བར་བགྱི་ཞིང་ཐམས་ཅད་བས་པའི་
བར་དུ་བགྱིའོ། །གཞན་ཡང་སྐུད་པ་དམར་པོ་ལས་མདུད་པ་བདུན་མདུད་དེ་མདུད་པ་ལན་རེ་མདུད་ཅིང་སྔགས་ལན་རེ་བཟླས་ནས་ནང་གི་གོང་ན་མཆིས་པའི་གདོང་གི་སྤྱི་བོ་ལ་བཏགས་ན་རིམས་ནད་ཐམས་ཅད་རབ་ཏུ་ཞི་བར་འགྱུར་ཏེ། རིམས་ནད་ཞི་ནས་སྔགས་ཐག་ཀྱང་དགྲོལ་བར་
འགྱུར་ལགས་སོ། །གཞན་ཡང་བློ་བུར་དུ་མཁའ་འགྲོ་མ་དང་། འབྱུང་པོ་ལ་སོགས་པའི་གདོན་གྱིས་ཟིན་ཏེ་བྲོ་འཚལ་བར་གྱུར་ན། སྐུད་པ་དཀར་པོ་ལ་སྔགས་མདུད་ཉི་ཤུ་རྩ་གཅིག་མདུད་དེ་སྔགས་ལན་རེ་བཟླ་ཞིང་མདུད་པ་རེ་རེ་མདུད་ནས་མདུན་གྱི་བྱམས་པ་དང་སྙིང་རྗེ་དང་

ལྡན་པའི་གདོང་གི་སྤྱི་བོ་ལ་བཏགས་ནས་ཞག་ལོན་ཏེ་སླར་བཀྲོལ་ནས་ནད་པའི་མགུལ་དུ་བཏགས་ན་བྲོ་ནད་སོས་པར་འགྱུར་ལགས་སོ། །གལ་ཏེ་ལས་ཀྱི་སྒྲིབ་པ་ལྕི་བ་ཞིག་ལགས་ཏེ་སོས་པར་མ་གྱུར་ན་སྔགས་ཐག་དེ་བླངས་ནས་ཡང་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་སྔ་མའི་
གཟུགས་ཀྱི་སྤྱི་བོ་ལ་བཏགས་ནས། ཞག་ལོན་ཏེ་སླར་བཀྲོལ་ནས་ནད་པའི་མགུལ་དུ་བཏགས་ན་ངེས་པར་འཚོ་བར་འགྱུར་ལགས་སོ། །གཞན་ཡང་གང་ལ་ལ་ཞིག་བྲོ་ནད་རྒྱུན་རིམས་ཀྱིས་བཏབ་ནས་སྡུག་བསྔལ་ཞིང་སོས་པར་མ་གྱུར་ཏམ། འདྲེ་གདོན་མ་རུངས་པ་ཁྱིམ་དུ་
ཞུགས་པར་གྱུར་ན། ཧུན་ལུག་ཐང་འབྲུམ་བུ་བརྒྱ་རྩ་བརྒྱད་བླངས་ཏེ་གཟུགས་བགྱིས་པ་དེའི་མདུན་དུ་འབྲུམ་བུ་རེ་རེ་བླངས་ལ་སྔགས་ལན་རེ་བཏབ་ནས་ཞུགས་ཀྱི་ནང་དུ་དོར་བར་བགྱི་ཞིང་ཐམས་ཅད་པས་པའི་བར་དུ་བགྱིའོ། །གཞན་ཡང་སྐུད་པ་དཀར་པོ་ལ་སྔགས་མདུད་ཉི་ཤུ་རྩ་
གཅིག་མདུད་དེ་སྔགས་ལན་རེ་བཟླ་ཞིང་མདུད་པ་རེ་རེ་མདུད་ནས། མདུན་གྱི་བྱམས་པ་དང་སྙིང་རྗེ་དང་ལྡན་པའི་གདོང་གི་སྤྱི་བོ་ལ་བཏགས་ནས་ཞག་ལོན་ཏེ་སླར་བཀྲོལ་ནས་ནད་པའི་མགུལ་དུ་བཏགས་ན་བྲོ་ནད་རྣམས་འབྱང་ཞིང་གདོན་བགེགས་མ་རུངས་པ་རྣམས་འབྱེར་ཞིང་འགྱེས་
པར་འགྱུར་ལགས་སོ། །གཞན་ཡང་མི་མཛའ་བདག་གིས་གླགས་བཙལ་བར་གྱུར་ཏམ། འཐབ་ཅིང་རྩོད་པ་དང་། བྱད་སྟེམས་ཀྱིས་གནོད་པ་བགྱིད་པར་གྱུར་ན་མེ་ཏོག་དང་པོག་སྤོས་ལ་སོགས་པ་སྣ་ཚོགས་ཀྱིས་གཟུགས་བགྱིས་པ་དེ་ལ་མཆོད་ཅིང་བི་ན་ཡ་ཀའི་གཟུགས་
ཀྱི་མདུན་དུ་ཞུགས་སྦར་ནས། འུན་ཏེའི་འབྲས་བུ་འབྲུམ་བུ་བརྒྱ་རྩ་བརྒྱད་བླངས་ཏེ་སྔགས་ལན་རེ་བཏབ་ནས་ཞུགས་ཀྱི་ནང་དུ་དོར་བར་བགྱིའོ། །གཞན་ཡང་སྐུད་པ་དཀར་པོ་ལ་མདུད་པ་བརྒྱ་རྩ་བརྒྱད་མདུད་དེ། སྔགས་ལན་རེ་བཟླ་ཞིང་མདུད་པ་རེ་རེ་མདུད་ནས་གཟུགས་དེའི་གཡོན་ཕྱོགས་ཀྱི་
ཁྲོ་བོའི་གདོང་གི་སྤྱི་བོ་ལ་བཏགས་ནས་ཞག་བཞི་ལོན་ཏེ་སླར་བཀྲོལ་ལ། སྐུད་པ་དེ་བླངས་ཏེ་མི་མཛའ་བ་དེའི་མིང་ནས་བརྗོད་དེ་མདུད་པ་རེ་རེ་ནས་སོ་སོ་ཐ་དད་པར་སྦས་ནས་རེ་རེ་ལ་ཡང་སྔགས་ལན་རེ་བཟླ་ཞིང་རེ་རེ་ནས་གཏུབས་ཏེ་ཐམས་ཅད་བས་པའི་བར་དུ་བགྱིས་ན། མི་མཛའ་

བ་དེ་དག་ཅི་བགྱིའོ་འཚལ་མི་འབྱོར་ཅིང་རང་ཉིད་སྐྱབས་སུ་མཆི་བར་འགྱུར་ལགས་སོ། །གཞན་ཡང་གང་ལ་ལ་ཞིག་ལེགས་པའི་དངོས་པོ་གྲུབ་པར་འཚལ་ན། ཚོན་སྣ་ལྔའི་སྐུད་པ་ལ་སྔགས་མདུད་བརྒྱ་རྩ་བརྒྱད་མདུད་དེ། སྔགས་ལན་རེ་བཟླ་ཞིང་མདུད་པ་
རེ་རེ་མདུད་ནས། གཞན་ཡང་གཟུགས་བགྱིས་པའི་མདུན་དུ་སྔགས་ལན་བདུན་གྱིས་བཏབ་སྟེ། བྱམས་པ་དང་སྙིང་རྗེ་དང་ལྡན་པའི་གདོང་གི་སྤྱི་བོ་ལ་བཏགས་ནས་ཞག་ལོན་ཏེ་སླར་བཀྲོལ་ནས་བདག་ཉིད་ཀྱི་ལུས་ལ་བཏགས་ན་སྨོན་པ་རྣམས་ཡིད་བཞིན་དུ་འགྲུབ་པར་འགྱུར་ལགས་
སོ། །གཞན་ཡང་གང་ལ་ལ་ཞིག་སྒྲིབ་པའི་བགེགས་དང་ལྡན་པས། ལེགས་པའི་དངོས་པོ་རྣམས་ཕལ་ཆེར་སྨོན་པ་ཡིད་བཞིན་དུ་གྲུབ་པར་མ་གྱུར་ཏམ། བཀྲ་མི་ཤིས་པའི་དངོས་པོ་དག་དུས་དུས་སུ་རྒྱུ་མ་མཆིས་པར་ལངས་པར་གྱུར་ན་སྤོས་ཆབ་ཀྱིས་གཟུགས་བགྱིས་པ་དེ་བཀྲུ་
བར་བགྱིའོ། །གཞན་ཡང་ཆབ་ལ་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་བི་ནཱ་ཡ་ཀའི་གཟུགས་བཀྲུ་བར་བགྱིའོ། །གཞན་ཡང་ཆབ་ལ་ལན་བརྒྱ་རྩ་བརྒྱད་སྔགས་ཀྱིས་བཏབ་སྟེ་རང་ཉིད་ཀྱི་ལུས་ལ་གཏོར་ན། སྒྲིབ་པ་དང་བགེགས་ཐམས་ཅད་རང་གི་ངང་གིས་ཞུ་བྱང་ནས།
སྨོན་པ་རྣམས་ཡིད་བཞིན་དུ་འགྲུབ་པར་འགྱུར་ལགས་སོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་དེ་སྐད་ཅེས་སྨྲས་པ་དང་། འཁོར་མང་པོ་ཐམས་ཅད་ཀྱིས་མཐུན་པར་སྐྱེས་བུ་ཆེན་པོ་ལེགས་སོ་ལེགས་སོ། །སེམས་ཅན་ཐམས་
ཅད་ལ་ཕན་པར་འདོད་པའི་ཕྱིར་རིག་སྔགས་འདི་སྨྲས་པས། བདག་ཅག་ཀྱང་རྗེས་སུ་ཡི་རང་ཞིང་ཡོངས་སུ་འཛིན་པར་སྨོན་ཏོ་ཞེས་བསྔགས་པ་བརྗོད་པར་གྱུར་ཏོ། །དེ་ནས་འཁོར་མང་པོ་ཐམས་ཅད་དགའ་མགུ་རངས་པར་གྱུར་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་
ཕྱག་བྱས་ཏེ་གྱེས་པར་གྱུར་ཏོ། །འཕགས་པ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པ་ཞེས་བྱ་བའི་གཟུངས་རྫོགས་སོ།། །།ཞུ་ཆེན་གྱི་མཁན་པོ་ལོ་ཙྪ་བ། བཅོམ་ལྡན་འདས་ཀྱི་རིང་ལུགས་པ་བནྡེ་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པ།།

༄༅། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་ཀྱི་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕྱག་འཚལ་ལོ། །དེ་རྣམས་ལ་ཕྱག་འཚལ་ནས་རིག་པ་འདི་བརྗོད་ཀྱིས་
རིག་པ་འདི་བདག་ལ་གྲུབ་པར་གྱུར་ཅིག །ཏདྱ་ཐཱ། ཧ་ཧ་ཧ་ས་ནེ་ནི་པ་ས་ནེ། ཏ་པ་ཏ་པ་ནེ། ཛྭ་ལ་ཛྭ་ལ་ནེ། ཙ་ལ་ཙ་ལ་ནེ། པཱུརྦ་ཡོ་ག་སྨ་ར་པདྨ་ཧ་སྟཱ་ཡ་སྭཱ་ཧཱ། གང་གིས་རིག་པ་འདི་བཀླགས་པ་དེ་ཚེ་རབས་བརྒྱ་སྟོང་དུ་སྐྱེ་བ་དྲན་པར་འགྱུར་ཏེ། འདི་ནས་ཤི་འཕོས་ནས་ཀྱང་
བདེ་བ་ཅན་གྱི་འཇིག་རྟེན་དུ་སྐྱེ་བར་འགྱུར་རོ། །འཕགས་པ་སྤྱན་རས་གཟིགས་ཀྱི་སྙིང་པོ་རྫོགས་སོ།།༄༅། །རྒྱ་གར་སྐད་དུ། ཨཱརྱ་ཨ་བ་ལོ་ཀི་ཏེ་ཤྭ་ར་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སྤྱན་རས་གཟིགས་
དབང་ཕྱུག་གི་གཟུངས་ཞེས་བྱ་བ། འཕགས་པ་སྤྱན་རས་གཟིགས་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་ཕྱུག་བྱམས་པའི་ངང་ལས་སྙིང་རྗེའི་ཤུགས་ཀྱིས་བྱང་ཆུབ་ཀྱི་སེམས་རབ་ཏུ་བསྐྱེད་ནས། པདྨ་དང་། ཉི་མ་དང་། ཟླ་
བའི་གདན་ལ་ཧྲཱིཿའི་འཕྲོ་འདུ་ལས་ཞལ་གཅིག་པ་ལ་ཕྱག་བཞི་པ། དང་པོ་གཉིས་ཐལ་མོ་སྦྱར་བ། གཡས་འོག་མ་ན་བགྲང་ཕྲེང་མུ་ཏིག་དཀར་པོ། གཡོན་འོག་མ་ན་པདྨ་དཀར་པོ་བསྣམས་པ། སྐུ་མདོག་དཀར་པོ་ཞབས་རྫོགས་པའི་སྐྱིལ་ཀྲུང་བཅས་པ། རིན་པོ་ཆེའི་རྒྱན་
སྣ་ཚོགས་དང་། རིན་པོ་ཆེའི་དབུ་རྒྱན་གྱིས་མཛེས་པ། མ་ལྷ་མོ་དྲུག་མ་དང་། ཡབ་ནོར་བུ་རིན་པོ་ཆེས་བརྟེན་པ། བྱང་ཆུབ་སེམས་དཔའ་དང་། སེམས་མ་རབ་ཏུ་མང་པོས་བསྐོར་ཏེ་འདི་སྐད་ཅེས་གསུངས་སོ། །རིགས་ཀྱི་བུའམ། རིགས་ཀྱི་བུ་མོས་སྔགས་འདི་
ལན་ཅིག་ཙམ་བརྗོད་དམ་དྲན་ཞིང་ཡིད་ལ་བྱས་སམ། བྲིས་ནས་ལུས་ལ་བཅངས་སམ། མོས་ཤིང་གུས་པར་བྱས་ན་མཚམས་མེད་པ་ལྔ་དང་། དེ་དང་ཉེ་བའི་སྡིག་པའི་ལས་ཐམས་ཅད་བྱང་ཞིང་། ངན་སོང་གསུམ་དང་། མི་ཁོམ་པ་བརྒྱད་དང་། སྡུག་བསྔལ་དང་

བཅས་པར་མི་སྐྱེའོ། །མི་དང་མི་མ་ཡིན་པ་དང་། གཅན་གཟན་གྱིས་འཇིགས་པ་ཐམས་ཅད་ལས་གྲོལ་བར་འགྱུར་རོ། །ནད་དང་། གདོན་ཐམས་ཅད་ལས་ཐར་བར་འགྱུར་རོ། །ཨོཾ་མ་ཎི་པདྨེ་ཧཱུྃ་ཞེས་བརྗོད་པས་འཕགས་པ་སྤྱན་རས་གཟིགས་ཀྱི་ཞལ་མཐོང་
བར་འགྱུར་ཞིང་། ཚེ་འཕོས་ནས་ཀྱང་བདེ་བ་ཅན་དུ་སྐྱེ་སྟེ། འདི་ལ་ཐེ་ཚོམ་མམ། སོམ་ཉིའམ། ཡིད་གཉིས་མ་ཟ་ཅིག །འཕགས་པ་སྤྱན་རས་གཟིགས་དབང་ཕྱུག་གི་གཟུངས་རྫོགས་སོ།། །།
༄༅། །རྒྱ་གར་སྐད་དུ། ཨཱརྱ་ནཱི་ལ་ཀཎྛ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ནཱི་ལ་ཀཎྛ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་
དཔག་མེད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ་ལ་ཕྱག་འཚལ་ལོ། །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་ཤེས་རབ་ཆེན་པོའི་མིག་ཐོབ་པར་གྱུར་ཅིག །བཙུན་པ་སྤྱན་
རས་གཟིགས་དབང་ཕྱུག་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །བདག་ངེས་པར་སེམས་ཅན་ཐམས་ཅད་ཡོངས་སུ་སྐྱོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་ཐབས་ལ་མཁས་པ་
ཐོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་ཤེས་རབ་ཆེན་པོའི་གྲུར་ཞུགས་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་
མྱུར་དུ་སྡུག་བསྔལ་གྱི་རྒྱ་མཚོ་ལས་རྒལ་བར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་རྫུ་འཕྲུལ་གྱི་རྐང་པ་དང་ལྡན་ཞིང་ལམ་མྱུར་དུ་ཐོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཅན་ཁྱོད་ལ་

ཕྱག་འཚལ་ལོ། །བདག་ངེས་པར་མྱུར་དུ་མྱ་ངན་ལས་འདས་པའི་རི་ལ་འཛེག་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་ཐུགས་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་འདུས་མ་བྱས་ཀྱི་ཁྱིམ་དུ་འདུག་པར་གྱུར་ཅིག །བཙུན་པ་སྤྱན་རས་གཟིགས་དབང་
ཕྱུག་ཐུགས་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་ཆོས་ཀྱི་སྐུ་དང་གཅིག་པར་གྱུར་ཅིག །གང་གི་ཚེ་བདག་རལ་གྲིའི་རི་ལ་མཆི་བ་ན་རལ་གྲིའི་རི་དེ་རང་སྙིལ་ཞིང་ཞིག་པར་གྱུར་ཅིག །གང་གི་ཚེ་བདག་མེ་མ་མུར་གྱི་ནང་དུ་མཆི་བ་ན་མེ་མ་མུར་དེ་རང་མེད་པར་གྱུར་ཅིག །
གང་གི་ཚེ་བདག་སེམས་ཅན་དམྱལ་བའི་ལམ་དུ་མཆི་བ་ན་སེམས་ཅན་དམྱལ་བ་རྣམས་རང་བཞིན་གྱིས་སྟོངས་པར་གྱུར་ཅིག །གང་གི་ཚེ་བདག་གཤིན་རྗེའི་འཇིག་རྟེན་དུ་མཆི་བ་ན། ཡི་དགས་རྣམས་རང་ཚིམ་པར་གྱུར་ཅིག །གང་གི་ཚེ་བདག་ལྷ་མ་ཡིན་གྱི་གནས་སུ་མཆི་བ་ན་དེ་དག་གི་
སེམས་རང་དུལ་བར་གྱུར་ཅིག །གང་གི་ཚེ་བདག་དུད་འགྲོ་རྣམས་སུ་མཆི་བ་ན་དེ་དག་ཡེ་ཤེས་ཆེན་པོ་རང་ཐོབ་པར་གྱུར་ཅིག །ན་མོ་རཏྣ་ཏྲ་ཡཱ་ཡ། ན་མོ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སརྦ་བན་དྷ་ན། ཙྪེ་ད་ན་ཀཱ་རཱ་ཡ། སརྦ་པཱ་པ་
ས་མུ་དྲོཙྪོཥ་ཎ་ཀ་རཱ་ཡ། སརྦ་བྱཱ་དྷི་པྲ་ཤ་མ་ན་ཀ་རཱ་ཡ། སརྦ་ཨིཏྱུ་པ་དྲ་བ། བི་ནཱ་ཤ་ན་ཀ་རཱ་ཡ། སརྦ་བྷ་ཡེ་ཥུ་ཏཱ་ར་ཎཱ་ཡ། ཏ་སྱ་ན་མ་སྐྲྀ་ཏྭཱ། ཨི་དཾ་ཨཱརྱ་ཨ་བ་ལོ་ཀི་ཏེ་ཤྭརཱ་ཡ། ཏ་བ་ནཱི་ལ་ཀཎྛ། ནཱ་མ་པ་ར་མ་ཧྲྀ་ད་ཡཾ། ཨཱ་བཪྟ་ཡི་ཥྱཱ་མི། སརྦ་ཨརྠ་སཱ་དྷ་ནན། ཤུ་བྷ་ཙེ་ཏ་ནཾ།
ཡན། སརྦ་བྷཱུ་ཏཱ་ནཱཾ། པཱ་པ་མཱརྒ་བི་ཤོ་དྷ་ཀཾ། ཏདྱ་ཐཱ། ཨཱ་ལོ་ཀེ། ཨཱ་ལོ་ཀེ། ཨཱ་ལོ་ཀ། ཨ་དྷི་བ་ཏི། ལོ་ཀཱ་ཏི་ཀྲཱ་ན་ཏེ། ཨེ་ཧྱེ་ཧི་མ་ཧཱ་བོ་དྷི་སཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་ས་ཏྭ། ཧེ་པྲི་ཡ་བོ་དྷི་ས་ཏྭ། ཧེ་མ་ཧཱ་ཀཱ་རུ་ཎི་ཀ། མ་ཧཱ་སྨ་ར་ཧྲྀ་ད་ཡཾ་ཨེ་ཧྱེ་ཧི་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡབ་
ར་མ་མཻ་ཏྲྀ་ཙིཏྟ་ཀཱ་རུ་ཎི་ཀ། ཀུ་རུ་ཀུ་རུ། ཀརྨ་སཱ་དྷ་ཡ། སཱ་དྷ་ཡ། བིདྱཱ་ན། དེ་ཧི་དེ་ཧི་མེ། རཾ་ག་མཾ་ག་མ། བི་ཧཾ་ག་མ། སིདྡྷ་ཡོ་གཱི་ཤྭ་ར། དྷུ་རུ་དྷུ་རུ། བཱིརྱན་ཏེ། མ་ཧཱ་བཱིརྱན་ཏེ། དྷ་ར་དྷ་ར། དྷ་རེནྡྲེ་ཤྭ་ར། ཙ་ལ་ཙ་ལ། བི་མ་ལ་མཱུརྟེ། ཨཱརྱ་ཨ་བ་ལོ་ཀི་ཏེ་ཤྭ་ར།

ཀྲྀཥྞཱ་ཛི་ན། ཛ་ཊཱ་མུ་ཀུ་ཊཱ། ཨ་ལཾ་ཀྲྀ་ཏ། ཤ་རཱི་ར་ལམྦ། པྲ་ལམྦ། བི་ལམྦ། མ་ཧཱ་སིདྡྷ་བདྱཱི་དྷ་ར། བ་ལ་བ་ལ་མ་ཧཱ་བ་ལ། མ་ལ་མ་ལ་མ་ཧཱ་མ་ལ། ཙ་ལ་ཙ་ལ་མ་ཧཱ་ཙ་ལ། ཀྲྀཥྞ་བརྞ། ཀྲིཥྞ་པཀྵ་ཀྲྀཥྞ་པཱ་ཤ་ནིརྒྷཱ་ཏ་ན། ཧེ་པདྨ་ཧཱ་སྟ། ཙ་ར་ཙ་ར་
ནིཤྩ་རེ་ཤྭ་རེ་ཀྲྀཥྞ་སརྦ་ཀྲྀ་ཏ་ཡཛྙོ། བ་བཱི་ཏ། ཨེ་ཧྱེ་ཧི་མ་ཧཱ་བཱི་ར། མ་ཧཱ་བཱ་རཱ་ཧ་མུ་ཁ་ཏྲི་པུ་ར་ད་ཧ་ནེ་ཤྭ་ར། ནཱ་རཱ་ཡ་ཎ། རཱུ་པ་བ་ལ་བེ་ག་དྷ་རི། ཧེ་ནཱི་ལ་ཀཎྛ། ཨེ་ཧྱེ་ཧི་མ་ཧཱ་ཧ་ལ་ཧ་ལ། བི་ཥ་ནི་རྫི་ཏ། ལོ་ཀ་སྱ་རཱ་ག་བི་ཥ་བི་ནཱ་ཤ་ན། དྭེ་ཥ་བི་ཥ་བི་ནཱ་ཤ་ན། མོ་ཧ་བི་ཥ་བི་ནཱ་ཤ་ན།
ནིརྨོཀྵ་ན་ཎ་ཧུ་ལུ་ཧུ་ལུ། མ་ཧཱ་ཧུ་ལུ་ཧ་རེ། མ་ཧཱ་པདྨ་ནཱ་བྷི། ས་ར་ས་ར། སི་རི་སི་རི། སུ་རུ་སུ་རུ། བུདྡྷྱ་བུདྡྷྱ། བོ་དྷ་ཡ་བོ་དྷ་ཡ། བོ་དྷ་ཡཱ་མི་ཏ་བ་ནཱི་ལ་ཀཎྛ། ཨེ་ཧྱེ་ཧི། བཱ་མ་སྠིཏ་མ་ཧཱ་སིདྷ་མུ་ཁ། ཧ་ས་ཧ་ས། མུཉྩ་མུཉྩ་མ་ཧཱཊྚཱཊྚཱ་ཧཱ་སྱ། ཨེ་ཧྱེ་ཧི་མ་ཧཱ་སིདྡྷ།
ཡོ་གཱི་ཤྭ་ར། བྷ་ཎ་བྷ་ཎ། བཱ་ཙ་ན། སཱ་དྷ་ཡ་སཱ་དྷ་ཡ། བིདྷྱཾ་སྨ་ར་སྨ་ར་ཏྭམྦྷ་ག་བཾ་ཏན། ལོ་ཀཱ་ནུ་བི་ལོ་ཀི་ཏན། ཏ་ཐཱ་ག་ཏན། དེ་ཧི་དེ་ཧི་མེ་དིཪྴ་ནཾ་ཀཱ་མ་སྱ། དཪྴ་ནཾ། པྲ་སཱདྷ་ཡ་མེ་སྭཱ་ཧཱ། སིདྡྷཱ་ཡ་སྭཱ་ཧཱ། མ་ཧཱ་སིདྡྷཱ་ཡ་སྭཱ་ཧཱ། སིདྡྷཱ་ཡོ་གི་ཤྭ་རཱ་ཡ་སྭཱ་ཧཱ། ནཱི་ལ་ཀཎྛཱ་ཡ་སྭཱ་ཧཱ།
བཱ་རཱ་ཧ་མུ་ཁཱ་ཡ་སྭཱ་ཧཱ། སིདྷ་མུ་ཁཱ་ཡ་སྭཱ་ཧཱ། མ་ཧཱ་ན་ར་སིཾ་ཧ་མུ་ཁཱ་ཡ་སྭཱ་ཧཱ། བཛྲ་ཧསྟཱ་ཡ་སྭཱ་ཧཱ། མ་ཧཱ་བཛྲེ་ཧ་སྟཱ་ཡ་སྭཱ་ཧཱ། སིདྡྷི་བིདྱཱ་དྷ་རཱ་ཡ་སྭཱ་ཧཱ། མ་ཧཱ་སིདྡྷ་བིདྱཱ་དྷ་རཱ་ཡ་སྭཱ་ཧཱ། པདྨ་ཧ་སྟཱ་ཡ་སྭཱ་ཧཱ། མ་ཧཱ་པདྨ་ཧ་སྟཱ་ཡ་སྭཱ་ཧཱ། ཀྲྀཥྞ་སརྦ་ཀྲྀ་ཧ་ཡ་ཛྙོ་དྷ་ར་བི་ཏཱ་ཡ་སྭཱ་ཧཱ།
མ་ཧཱ་མཱ་ལ་མུ་ཀུ་ཊ་དྷ་རཱ་ཡ་སྭཱ་ཧཱ། ཙཀྲཱ་ཡུ་དྷ་དྷ་རཱ་ཡ་སྭཱ་ཧཱ། ཤདྑ་ཤབྡ་ནི་རྞྞ་ད་ན་ཀ་རཱ་ཡ་སྭཱ་ཧཱ། བོ་དྷ་ན་ཀ་རཱ་ཡ་སྭཱ་ཧཱ། བཱ་མ་སྠི་ཏ་སྐནྡྷ་དེ་ཤ་ཀྲྀ་ཥྞཱ་ཛི་ནཱ་ཡ་སྭཱ་ཧཱ། བྱཱ་གྷྲ་ཙརྨ་ནི་བཱ་ས་ནཱ་ཡ་སྭཱ་ཧཱ། ལོ་ཀེ་ཤྭ་རཱེ་ཡ་སྭཱ་ཧཱ། མ་ཧཱ་ཡོ་གི་ནཱི་ཤྭ་རཱ་ཡ་སྭཱ་ཧཱ། སརྦ་སིད་དྷེ་ཤྭ་རཱ་ཡ་སྭཱ་ཧཱ། རཀྵ་རཀྵ་མཾ་
སྭཱ་ཧཱ། ཀུ་རུ་རཀྵ་མཱུརྟི་ནཱཾ་སྭཱ་ཧཱ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སིད་དྷྱན་ཏུ་མེ་མནྟྲ་པ་དཻ་ནི་སྭཱ་ཧཱ། འཕགས་པ་ནཱི་ལ་ཀཎྛའི་གཟུངས་རྫོགས་སོ།།

༄༅། །རྒྱ་གར་སྐད་དུ། ཨཱརྱ་ཀཱ་རུ་ཎ་ཨ་ན་བི་ལཾ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སྙིང་རྗེས་མི་བཤོལ་བ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་ལ་ཕྱག་འཚལ་ལོ། །བྱང་ཆུབ་སེམས་
དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་མངའ་བ་གནོད་པ་ཐམས་ཅད་ལས་རབ་ཏུ་ཐར་བར་མཛད་པ་ནད་ཐམས་ཅད་རབ་ཏུ་ཞི་བར་མཛད་པ་འབྱུང་པོ་ཐམས་ཅད་ངེས་པར་བཟློག་པ་སེམས་ཅན་མི་ཁོམ་པ་བརྒྱད་དུ་ལྟུང་བ་རྣམས་ཡང་དག་པར་སྒྲོལ་བ་
ལ་ཕྱག་འཚལ་ལོ། །དེ་ལ་ཕྱག་འཚལ་ནས་འཕགས་པ་སྤྱན་རས་གཟིགས་དབང་ཕྱུག་གིས་བཤད་པའི་གཟུངས་སྙིང་རྗེ་ཆེན་པོ་མི་བཤོལ་བ་ཞེས་བྱ་བ་འདི་བརྗོད་ཀྱིས་ཐུགས་རྗེ་ཆེན་པོ་མངའ་བ་བདག་ལ་དགོངས་སུ་གསོལ། དགོངས་སུ་གསོལ། ཏདྱ་ཐཱ། ཨོཾ་ཛ་ཏ་ཛ་ཏ།
ཛི་ཏི་ཛི་ཏི། ཛུ་ཏུ་ཛུ་ཏུ། ཏ་ར་ཏ་ར། ཏི་རི་ཏི་རི། ཏུ་རུ་ཏུ་རུ། ཀ་ལ་ཀ་ལ། ཀི་ལི་ཀི་ལི། ཀུ་ལུ་ཀུ་ལུ། ཐུགས་རྗེ་ཆེན་པོ་མངའ་བ་དེ་བཞིན་གཤེགས་པ་ཐམས་ཅད་ཀྱི་འདུས་པ་ཆེན་པོ་རྗེས་སུ་དགོངས་ཏེ་གཤེགས་སུ་གསོལ། གཤེགས་སུ་གསོལ། ཙ་ཏ་ཙ་ཏ། ཙི་ཏི་
ཙི་ཏི། ཙུ་ཏུ་ཙུ་ཏུ། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་རྗེས་ཀྱི་སྤྲིན་གྱི་རྗེས་སུ་དགོངས་ཏེ་ཐུགས་རྗེ་ཆེན་པོ་མངའ་བ་མྱུར་དུ་གཤེགས་སུ་གསོལ། མྱུར་དུ་གཤེགས་སུ་གསོལ། ར་ལ་ར་ལ། རི་ལི་རི་ལི། རུ་ལུ་རུ་ལུ། བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་།
སྙོམས་པར་འཇུག་པའི་གཞི་ལས་བཞེངས་སུ་གསོལ། བཞེངས་སུ་གསོལ། ཙ་ལ་ཙ་ལ། ཙི་ལི་ཙི་ལི། ཙུ་ལུ་ཙུ་ལུ། བོ་དྷི་བོ་དྷི། ཨེ་ཧི་ཨེ་ཧི། བུ་དྷ་བུ་དྷ། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པས་བཞེངས་སུ་གསོལ།
བཞེངས་སུ་གསོལ། བྱམས་པ་ཆེན་པོས་འབྱུང་པོ་ཐམས་ཅད་བཟློག་ཏུ་གསོལ། ཐུགས་རྗེ་ཆེན་པོའི་སྤྲིན་གྱིས་བདག་གི་ནད་ཐམས་ཅད་རབ་ཏུ་ཞི་བར་མཛད་དུ་གསོལ། དྷུ་ན་དྷུ་ན། བི་དྷུ་ན་བི་དྷུ་ན། མ་ཐཱ་མ་ཐཱ། པྲ་མ་ཐ་པྲ་མ་ཐ། བཞེངས་སུ་གསོལ། བཞེངས་སུ་

གསོལ། ཚུར་གཤེགས་ཚུར་གཤེགས། བདག་གི་བསམ་པ་རྫོགས་པར་མཛད་དུ་གསོལ། ལས་སྦྱང་དུ་གསོལ། མ་ཧཱ་ཀཱ་རུ་ཎི་ཀཱ་ཡ་སྭཱ་ཧཱ། མ་ཧཱ་པདྨ་ཧསྟཱ་ཡ་སྭཱ་ཧཱ། པདྨ་ཨཱ་ས་ནཱ་ཡ་སྭཱ་ཧཱ། ཤྭེ་ཏཱ་ཛྙཱ་ཨུ་པ་བཱི་ཏི་ཡ་སྭཱ་ཧཱ། ཀི་རི་ཏ་ནི་སྭཱ་ཧཱ། ཤཱུ་ལ་ནེ་སྭཱ་ཧཱ།
ཙཀྲ་ནེ་སྭཱ་ཧཱ། བཛྲ་ནེ་སྭཱ་ཧཱ། ཏྲི་ནེ་ཏྲེ་ཡ་པྲ་ཧཾ་རཱུ་པཱ་ཡ་སྭཱ་ཧཱ། ཨཱ་ཀཱ་ཤཱ་ཡ་སྭཱ་ཧཱ། ཤི་ནི་ཤི་ནི་སྭཱ་ཧཱ། པྲ་ཙ་བ་ཏ་ཡེ་སྭཱ་ཧཱ། ཡ་མ་ཡེ་སྭཱ་ཧཱ། ཡ་མ་བྷུད་ཡ་སྭཱ་ཧཱ། ཨཱཎྜ་ཛེ་བྷྱོ་བྷུ་ཏེ་བྷྱཿསྭཱ་ཧཱ། ཛ་ར་ཡུ་ཛེ་བྷྱོ་བྷུ་ཏེ་བྷྱཿསྭཱ་ཧཱ། སཾ་སྭེ་ད་ཚེ་བྷྱོ་བྷུ་དེ་བྷྱཿསྭཱ་ཧཱ། ཨ་པ་ཡུ་པ་པ་དུཿཁེ་བྷྱོ་བྷུ་ཏེ་
བྷྱཿསྭཱ་ཧཱ། བི་ཏི་ཀ་བྷྱོ་བྷྱ་དྷྱི་བྷྱཿསྭཱ་ཧཱ། བཻ་དྷི་ཏ་ཀེ་བྷྱོ་བྷྱ་དྷྱི་བྷྱཿསྭཱ་ཧཱ། ཥྥ་ཥྞ་ཀེ་བྷྱོ་བྷྱ་དྷྱི་བྷྱཿསྭཱ་ཧཱ། ས་ན་ནི་པ་ཏི་ཀེ་བྷྱོ་བྷྱ་དྷྱི་བྷྱཿསྭཱ་ཧཱ། སརྦ་བུདྡྷོ་སྭཱ་ཧཱ། སརྦ་བྷྱ་ཏི་བྷྱཿསྭཱ་ཧཱ། བྷུ་མེ་ཨ་ན་ཏ་རྀ་ཥི་ཙརྱེ་བྷྱོ་བྷྱཿསྭཱ་ཧཱ། ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲི་ཊི་ཏྲི་ཊི། ཏྲུ་ཊུ་ཏྲུ་ཊུ། བདག་འཇིགས་པ་ཐམས་ཅད་དང་།
འཚེ་བ་ཐམས་ཅད་དང་། ནད་ཐམས་ཅད་ལས་སྲུངས་ཤིག་སྲུངས་ཤིག་སྭཱ་ཧཱ། གྲ་ས་གྲ་ས། མ་ཐ་མ་ཐ། པྲ་མ་ཐ་པྲ་མ་ཐ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ན་མཿཨཱརྱཱ་བ་ལོ་ཀི་ཏོ་ཤྭ་ར་ཨཱཛྙ་པ་ཡ་ཏི་སྭཱ་ཧཱ། འཕགས་པ་སྤྱན་རས་གཟིགས་ཀྱི་དབང་པོ་ཐུགས་རྗེ་ཆེན་པོ་སྙིང་
རྗེས་མི་བཤོལ་བ་ཞེས་བྱ་བའི་གཟུངས་རྫོགས་སོ།། ༄༅། །རྒྱ་གར་སྐད་དུ། ཨཱརྱས་མནྟ་བྷ་དྲ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ཀུན་ཏུ་བཟང་པོ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་
ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་བརྒྱད་སྟོང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་དང་ཐབས་ཅིག་ཏུ་བཞུགས་ཏེ།
གནས་གཙང་མའི་རིས་ཀྱི་ལྷའི་བུ་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་

པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེང་བདག་ནི་བདག་གིས་དེ་བཞིན་གཤེགས་པ་ཟླ་བ་བླ་མའི་འོད་ལས་བླངས་པ་ཀུན་ཏུ་བཟང་པོའི་གཟུངས་ཡང་དག་པར་སྟོན་
པར་འཚལ་ཏེ། གཟུངས་དེ་ཐོས་མ་ཐག་ཏུ་བྱང་ཆུབ་སེམས་དཔའི་ཐེག་པ་པ་རྣམས་ཕྱིར་མི་ལྡོག་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །ལས་ཀྱི་སྒྲིབ་པ་ཐམས་ཅད་ཀྱང་སེལ་ཏོ། །ལོངས་སྤྱོད་ཆེན་པོ་ཕུན་སུམ་ཚོགས་པ་ཡང་ཡོངས་སུ་
འཛིན་ཏོ། །ལུས་རྣམ་པར་དག་པ་ཡང་འཐོབ་བོ། །ངག་རྣམ་པར་དག་པ་ཡང་འཐོབ་བོ། །སེམས་རྣམ་པར་དག་པ་ཡང་འཐོབ་བོ། །ཕ་རོལ་ཏུ་ཕྱིན་པ་རྒྱ་མཚོ་ཐམས་ཅད་ཀྱང་ཡོངས་སུ་རྫོགས་པར་བགྱིད་དོ། །གཟུངས་རྒྱ་མཚོ་ཐམས་ཅད་ཀྱང་འཐོབ་བོ། །དེ་བཞིན་གཤེགས་
པ་མཐོང་བ་ཐམས་ཅད་ཀྱང་མཉེས་པར་བགྱིད་དོ། །བཅོམ་ལྡན་འདས་བདག་གིས་གཟུངས་འདི་ཐོས་མ་ཐག་ཏུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དཔའ་བར་འགྲོ་བའི་ཏིང་ངེ་འཛིན་ཀྱང་ཐོབ། རིན་ཆེན་ཕྱག་རྒྱའི་ཏིང་ངེ་འཛིན་ཀྱང་ཐོབ། འབར་བའི་སྒྲོན་མའི་ཏིང་ངེ་འཛིན་
ཀྱང་ཐོབ། རྒྱ་མཚོའི་ཕྱག་རྒྱའི་ཏིང་ངེ་འཛིན་ཀྱང་ཐོབ། རྡོ་རྗེ་དཀྱིལ་འཁོར་གྱི་ཏིང་ངེ་འཛིན་ཀྱང་ཐོབ། མི་ཟད་པའི་ཟ་མ་ཏོག་གི་ཏིང་ངེ་འཛིན་ཀྱང་ཐོབ། སྒྱུ་མ་ལྟ་བུའི་ཏིང་ངེ་འཛིན་ཀྱང་ཐོབ། ཕྱོགས་བཅུ་རྒྱས་པར་འགེངས་པའི་ཏིང་ངེ་འཛིན་ཀྱང་ཐོབ་སྟེ། བཅོམ་ལྡན་འདས་དེ་ལ་
སོགས་པ་ཏིང་ངེ་འཛིན་བྱེ་བ་ཁྲག་ཁྲིག་འབུམ་ཕྲག་གང་གཱའི་ཀླུང་གི་བྱེ་མ་སྙེད་བདག་ལ་མངོན་སུམ་དུ་གྱུར་ཏོ། །བཅོམ་ལྡན་འདས་དེས་ན་བདག་ད་ལྟར་དྲན་པ་འདི་ལྟ་བུ་དང་ལྡན། བློ་གྲོས་འདི་ལྟ་བུ་དང་ལྡན། ཆགས་པ་མ་མཆིས་པའི་ཡེ་ཤེས་འདི་ལྟ་བུ་དང་ལྡན་ཞིང་། མཐོང་བ་
དང་ཐོས་པ་དང་བསྙེན་བཀུར་བགྱིས་པའི་དོན་མཆིས་པར་གྱུར་ཏེ། བཅོམ་ལྡན་འདས་བདག་ཐོས་པ་དོན་མཆིས། གཟུངས་འདི་ཐོས་པ་དོན་མཆིས་ན། བཅོམ་ལྡན་འདས་ཀྱིས་གནང་བར་མཛད་ཅིང་འཁོར་བཞི་པོ་དེ་ཡང་ཡོངས་སུ་དགོད་དུ་གསོལ། བཅོམ་ལྡན་འདས་ཀྱིས་

བཀའ་སྩལ་པ། སེམས་ཅན་དག་པ་དེའི་དུས་ལ་བབ་པར་ཤེས་ན་སྨྲོས་ཤིག །དེ་བཞིན་གཤེགས་པས་འཁོར་བཞི་པོ་འདི་བྱིན་གྱིས་བརླབས་ཟིན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་སྐད་ཅིག་ཐང་
ཅིག་ཡུད་ཙམ་དེ་ཉིད་ལ་རྡོ་རྗེའི་དཀྱིལ་འཁོར་གྱི་ཏིང་ངེ་འཛིན་ལ་སྙོམས་པར་ཞུགས་ནས་གཟུངས་འདི་སྨྲས་སོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་
འཚལ་ལོ། །ཏདྱ་ཐཱ། ཁ་ག་མེ་ཁ་ག་མེ། ཙཀྵུ་ཁ་བེ། ཤྲོ་ཏྲ་ཁ་བེ། གྷྲཱ་ཎ་ཁ་བེ། ཛི་ཧྭ་ཁ་བེ། ཀཱ་ཡ་ཁ་བེ། མ་ན་ཁ་བེ། ས་ར་ཁ་བེ། ས་ར་ཁ་བེ། ས་ར་ཁ་བེ། ཤཱུ་ན་ཏྲ་ཁ་བེ། ཨ་ན་མི་ཏ་ཁ་བེ། ཨ་པྲ་ཎི་ཧི་ཏ་ཁ་བེ། ས་མཱ་དྷི་ཁ་བེ་པཱ་ར། མི་ཏཱ་ཁ་བེ། བོ་དྷི་
ཁ་བེ། ས་ར་ས་ར་ས་ར། སརྦ་བུདྡྷ་ཨ་དྷིཥྛི་ཏེ། བྷ་ར་བྷ་ར་བྷ་ར་དྷརྨ་ཨ་དྷིཥྟི་ཏེ། ཀ་ལ་ཀ་ལ་ཀ་ལ། སངྒྷ་ཨ་དྷིཥྛི་ཏེ། ན་མོ་དྭཱ་ན་བ་ཏི་ནཱཾ། བུདྡྷ་ཀོ་ཊཱི་ནཱཾ། ཨ་དྷིཥྛནྟུ་མན། ཙ་ཏ་སྲ་པཪྵ་དོ་ཨཱ་ཡུར་བ་ལན་ཙ་ད་དནྟུ། ཏདྱ་ཐཱ། སུ་ར་བྷི་སུ་ར་བྷི། མ་ཧཱ་སུ་ར་བྷི། མུ་ནི་མུ་ནི། མ་ཧཱ་
མུ་ནི། མ་ཏི་མ་ཏི་མ་ཧཱ་མ་ཏི། ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ས་མྲྀ་དཱནྟུ་མཱན། ས་མནྟ་བྷ་དྲ་དྷཱ་ར་ཎཱི་སྭཱ་ཧཱ། གཟུངས་འདི་ཐོས་མ་ཐག་ཏུ་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་རྩ་གཉིས་པོ་
དེ་དག་གིས་དཔའ་བར་འགྲོ་བའི་ཏིང་ངེ་འཛིན་ཐོབ་པར་གྱུར་ཏོ། །བྱང་ཆུབ་སེམས་དཔའ་དཔག་ཏུ་མེད་པ་དག་ནི་གཟུངས་སྣ་ཚོགས་ཐོབ་པར་གྱུར་ཏོ། །གཟུངས་འདིའི་ཆོ་ག་ནི་འདི་ལགས་ཏེ། ནང་པར་ལངས་ནས་ལན་བརྒྱ་རྩ་བརྒྱད་བཟླས་བརྗོད་བགྱིའོ། །ལན་ཉི་ཤུ་རྩ་གཅིག་བཟླས་
བརྗོད་བགྱིས་ན་འཕགས་པ་སྤྱན་རས་གཟིགས་དབང་ཕྱུག་མཐོང་བར་འགྱུར་རོ། །ཕོངས་པར་གྱུར་པའི་ཚེ་ལན་བདུན་ཡིད་ལ་བགྱིས་ན་ཐར་བར་འགྱུར་རོ། །རིམས་ནད་ཐམས་ཅད་ལ་རྣ་བར་བཟླས་བརྗོད་བགྱིའོ། །རླུང་གིས་ཟིན་ན་མར་དང་འབྲུ་མར་ལ་ལན་ཉི་ཤུ་རྩ་གཅིག་

བཟླས་བརྗོད་བགྱིས་ཏེ་བསྐུ་བར་བགྱིའོ། །སོ་ན་ན་སོ་ཤིང་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ་བཅའ་བར་བགྱིའོ། །རྣ་བ་ན་ན་རས་བལ་གྱི་ས་བོན་འབྲུ་མར་དང་ལྷན་ཅིག་ཏུ་བསྐོལ་བ་ལ་ལན་བདུན་བཟླས་བརྗོད་བགྱིས་ཏེ། ཟངས་ཀྱི་སྣོད་ཀྱིས་རྣ་བར་བླུགས་པར་
བགྱིའོ། །ཀླད་པ་ན་བ་ལ་འབྲུ་མར་རོ། །ལྟོ་ན་བ་ལ་བྱབ་བར་བགྱིའོ། །གདོན་གྱིས་བཏབ་པ་ལ་ཚོན་སྐུད་སྣ་ལྔ་ལ་ལན་བརྒྱ་རྩ་བརྒྱད་བཟླས་ཏེ་མགུལ་དུ་གདགས་སོ། །མཁའ་འགྲོ་མའི་གདོན་གྱིས་བཏབ་ན་འབྲུ་མར་ལ་ལན་བདུན་བཟླས་ཏེ་གཤིས་ཐམས་ཅད་དུ་བྱུག་གོ། །ནད་
ཐམས་ཅད་ལ་བྱབ་པར་བགྱིའོ། །འདི་ནི་སྒྲུབ་པ་མ་མཆིས་པའི་ཆོ་གའོ། །ཇི་སྟེ་སངས་རྒྱས་དང་བྱང་ཆུབ་སེམས་དཔའ་མཐོང་བ་དང་། གཟུངས་དང་། ཏིང་ངེ་འཛིན་འཐོབ་པ་དང་། རྫུ་འཕྲུལ་གྱིས་འགྲོ་བ་དང་། མི་སྣང་བར་བགྱི་བ་དང་། མིག་བསྐུ་བ་དང་། ལྡོང་རོས་ལ་སོགས་
པ་སྒྲུབ་པར་འཚལ་ན། དེས་སྐུ་གདུང་དང་བཅས་པའི་མཆོད་རྟེན་དང་སྐུ་གཟུགས་ཀྱི་སྤྱན་སྔར་དཀྱིལ་འཁོར་བགྱིས་ཏེ། བུམ་པ་གང་བ་བརྒྱ་རྩ་བརྒྱད་བཞག་ལ། གདུགས་དང་། རྒྱལ་མཚན་དང་། བ་དན་བྲེས་ཏེ། མེ་ཏོག་སྣ་ཚོགས་ཀྱིས་ཆལ་པར་བཀང་ལ་ཙནྡན་དང་། ཨ་
ག་རུ་དང་། ཀུན་དུ་རུའི་བདུག་པས་བདུགས་ཏེ། མར་མེ་བརྒྱ་རྩ་བརྒྱད་བུད་ཅིང་མཆོད་པ་ཆེན་པོ་བགྱིས་ཏེ། ཚངས་པར་སྤྱོད་པ་གཙང་བས་གོས་གཙང་མ་བགོས་ལ་གཟུངས་ཀྱི་གསང་སྔགས་འདི་དག་གིས་མཚམས་གཅད་པར་བགྱིའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་
བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཏི་ལི་བྷ་ན་དྷཱ་མི། མི་ལི་བྷ་ན་དྷཱ་མི། ཙི་ལི་མི་ལི་བྷན་དྷཱ་མི། སཱི་མི་བྷན་དྷཱ་མི། བདག་གི་མཚམས་ལས་སུ་ཡང་འདའ་བར་མ་གྱུར་ཅིག་སྭཱ་ཧཱ། ཆུ་ལ་ལན་ཉི་ཤུ་རྩ་གཅིག་ཡོངས་སུ་བཟླས་ཏེ།
ཕྱོགས་བཅུར་མཚམས་གཅད་པར་བགྱིའོ། །གང་གིས་འགུགས་པར་འགྱུར་བའི་གཟུངས་འདི་དག་ཀྱང་ཐོག་མར་བརྗོད་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཙི་ལི་ཙི་ལི། མི་ལི་མི་

ལི། ཙི་ལེ་ལི། ཨེ་ཧི་བྷ་ག་བཱ་ན། ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ་སྭཱ་ཧཱ། འདི་ནི་བདག་གི་སྙིང་པོ་བཤད་པ་སྟེ། དེས་བདག་དགུག་པར་འགྱུར་རོ། །དེའི་འོག་ཏུ་ཟླ་བ་ཡར་གྱི་ངོས་ཚེས་བརྒྱད་ནས་བཟུང་སྟེ་ཉའི་བར་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ། དུས་
གསུམ་དུ་བཟླས་བརྗོད་བགྱི་དུས་གསུམ་དུ་ཁྲུས་བགྱི། དུས་གསུམ་དུ་གོས་བརྗེ་བར་བགྱིའོ། །དེ་ནས་ཚེས་བཅྭ་ལྔ་ལ་མཆོད་པ་ཆེན་པོ་བགྱིས་ཏེ། བཟླས་བརྗོད་དཔག་ཏུ་མ་མཆིས་པར་བགྱིའོ། །འོན་ཀྱང་ནམ་གྱི་གུང་ཐུན་ལ་འཕགས་པ་སྤྱན་རས་གཟིགས་དབང་ཕྱུག་གསེར་
གྱི་ཁ་དོག་གི་ལུས་དང་ལྡན་པ། མཚན་དང་དཔེ་བྱད་བཟང་པོས་ལེགས་པར་བརྒྱན་པ། ལུས་ལས་འོད་ཟེར་བྱེ་བ་སྟོང་འབྱིན་ཅིང་མཆི་བར་འགྱུར་རོ། །དེ་ལ་རིག་སྔགས་འཆང་གིས་སྐྲག་པར་མི་བགྱི་ཞིང་བརྟན་པར་བགྱིས་ན་མཐོང་མ་ཐག་ཏུ་ས་ཐོབ་པར་འགྱུར་རོ། །གཟུངས་དང་ཏིང་
ངེ་འཛིན་ཀྱང་ཐོབ་པར་འགྱུར་རོ། །ཤར་ཕྱོགས་སུ་དེ་བཞིན་གཤེགས་པ་མི་འཁྲུགས་པ་མཐོང་བར་འགྱུར་རོ། །ལྷོ་ཕྱོགས་སུ་རིན་ཆེན་ཏོག་དང་། ནུབ་ཕྱོགས་སུ་འོད་དཔག་མེད་དང་། བྱང་ཕྱོགས་སུ་དེ་བཞིན་གཤེགས་པ་རྔ་སྒྲ་མཐོང་བར་འགྱུར་རོ། །དེ་ལ་སོགས་པ་ཕྱོགས་
བཅུའི་དེ་བཞིན་གཤེགས་པ་གྲངས་མེད་དཔག་ཏུ་མེད་པ་དག་རིགས་པའི་ཚུལ་གྱིས་མཐོང་བར་འགྱུར་རོ། །འདི་ནས་ཤི་འཕོས་ནས་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་ཏེ། ཐམས་ཅད་དུ་ཡང་སངས་རྒྱས་བཅོམ་ལྡན་འདས་རྣམས་མཉེས་པར་བགྱིད་པར་འགྱུར་
རོ། །དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་དེ་དག་དང་། གནས་གཙང་མའི་རིས་ཀྱི་ལྷའི་བུ་རྣམས་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་།
ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཀུན་ཏུ་བཟང་པོ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོཙྪ་བ་

བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། ༄༅། །རྒྱ་གར་སྐད་དུ། ལོ་ཀེ་ཤྭ་ར་ཀལྤ། བོད་སྐད་དུ། འཇིག་རྟེན་དབང་ཕྱུག་གི་རྟོག་པ། བཅོམ་ལྡན་འདས་འཕགས་
པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །འཇིག་རྟེན་མགོན་པོའི་རྟོག་པ་ནི། །མདོར་བསྡུས་འདིར་ནི་བརྗོད་བྱ་སྟེ། །སངས་རྒྱས་ཐམས་ཅད་རྒྱུད་ཆེན་པོ། །
འདོད་པའི་དོན་ཀུན་རབ་སྟེར་བ། །དང་པོར་རེ་ཞིག་རིག་པ་འཛིན་པས་གཙང་ཞིང་དབེན་པའི་ས་ཕྱོགས་སུ་ཧཱུྃ་གིས་དག་པར་བྱས་པར་ཉེ་བར་འདུག་ཅིང་པདྨའི་ཕྱག་རྒྱ་བཅིངས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ་ཞེས་བརྗོད་ལ། ཐམས་ཅད་སྟོང་པའི་རྣམ་པར་བསམ་པར་
བྱའོ། །དེའི་རྗེས་ལ། ཨོཾ་ཙིཏྟ་པྲ་ཏི་བྷོ་དྷཾ་ཀ་རོ་མི། དེ་ལྟར་བརྗོད་ལ་སྣ་ཚོགས་པདྨ་འདབ་མ་བརྒྱད་པར་བསྒོམས་ནས། པདྨའི་སྟེང་དུ་ཟླ་བའི་དཀྱིལ་འཁོར་བསམ་པར་བྱའོ། །ཟླ་བའི་སྟེང་དུ་ཧྲཱིཿའི་སྔགས་གྱུར་པ་ལས་བདག་ཉིད་འཇིག་རྟེན་དབང་ཕྱུག་ཏུ་བསྒོམ་པར་བྱ་སྟེ། སེམས་
དཔའི་སྐྱིལ་མོ་ཀྲུང་གིས་བཞུགས་པ། ཕྱག་གཉིས་པ། མདོག་དམར་བ། མཆན་དུ་ནི་གོས་དཀར་མོ་དེ་ལ་འཁྱུད་པ། པདྨ་དམར་པོ་ཁ་འབྱེད་ཅིང་གར་གྱི་ཚུལ་ཅན་ཁབ་ཀྱི་ཕྱག་རྒྱས་ཁ་འབྱེད་པར་བསྒོམས་ལ། འདི་བརྗོད་པར་བྱ་སྟེ། ཇི་ལྟར་པདྨ་དམར་པོ་ནི། །འདོད་ཆགས་སྐྱོན་
གྱིས་མི་གོས་ཤིང་། །དེ་བཞིན་སྣ་ཚོགས་བག་ཆགས་སྐྱོན། །ཁམས་གསུམ་རྣམ་པར་དག་པའོ། །དབུ་རྒྱན་ལ་འོད་དཔག་ཏུ་མེད་པ་བསྒོམ་པར་བྱའོ། །དེ་ནས་འདི་བརྗོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ལྟར་བསྒོམས་ནས་ཕྱོགས་
བརྒྱད་དུ་ལྷ་མོ་རྣམས་བསམ་མོ། །ཨོཾ་བི་ལོ་ཀི་ནི། ཨ་བ་ལོ་ཀི་ནི། ཨ་བ་ལོ་ཀཱ་ཡ་སྭཱ་ཧཱ། ཤར་གྱི་འདབ་མ་ལ་ནི་རྣམ་པར་གཟིགས་མ་ཞེས་བྱ་བའི་ལྷ་མོ་པདྨ་དམར་པོ་བསྣམས་པའོ། །ཨོཾ་ཏཱ་རེ་ཏུ་ཏྟཱ་རེ་ཏུ་རེ་སྭཱ་ཧཱ། ལྷོའི་པདྨ་ལ་བཅོམ་ལྡན་འདས་མ་སྒྲོལ་མ་པ་ལ་ཤའི་འདབ་

མ་ལྟ་བུའི་པདྨ་བསྣམས་པའོ། །ཨོྃ་བྷུ་རི་ཎི་མ་ཧཱ་ཙཀྲ་བརྟི་ནི་ཧཱུྃ། ནུབ་ཀྱི་པདྨ་ལ་བྷུ་རི་ནི་ཞེས་བྱ་བའི་ལྷ་མོ་ཨུཏྤ་ལ་སྔོན་པོ་ལྟ་བུའི་པདྨ་ཕྱག་ན་བསྣམས་པའོ། །ཨོྃ་བྷྲྀ་ཀུ་ཊཱི་ཏཱ་རེ་ཏུཏྟ་མ་ཏ་ཧཱུྃ། བྱང་གི་འདབ་མ་ལ་ཁྲོ་གཉེར་ཅན་ཞེས་བྱ་བའི་ལྷ་མོ་པདྨ་སེར་པོ་
བསྣམས་པའོ། །ཨོྃ་མ་ཧཱ་ཤྲཱི་ཡེ་མ་ཎི་པདྨེ་ཧཱུྃ། འདི་ནི་པདྨའི་གོས་ཅན་ཤར་ཕྱོགས་ཀྱི་མཚམས་སུ་བཙོད་ལྟ་བུའི་པདྨ་བསྣམས་པའོ། །ཨོྃ་བཛྲ་པདྨེ་ཤྭ་ར་མ་ར་པདྨེ་ཧཱུྃ། ལྷོ་ཕྱོགས་ཀྱི་མཚམས་སུ་པདྨ་དཀར་པོ་བསྣམས་པའོ། །ཨོྃ་བི་ཤྭ་པདྨེ་ཧཱུྃ། འདི་ནི་སྣ་ཚོགས་ཀྱི་པདྨ་
སྟེ། ནུབ་ཕྱོགས་ཀྱི་མཚམས་སུ་པདྨ་ནག་པོ་བསྣམས་པའོ། །ཨོྃ་བི་ཤྭ་བག་ཏྲེ་ཧཱུྃ། འདི་ནི་སྣ་ཚོགས་ཀྱི་ཞལ་ཅན་ཏེ། བྱང་ཕྱོགས་ཀྱི་མཚམས་སུ་སྣ་ཚོགས་པདྨ་བསྣམས་པའོ། །ཨོྃ་ཧྲཱིཿཔདྨ་ནཪྟེ་ཤྭ་ར་ཧཱུྃ་ཟེ་འབྲུའི་དབུས་སུ་འདོད་ཆགས་ཆེན་པོའི་བཅོམ་ལྡན་འདས་སྤྱན་
རས་གཟིགས་ཀྱི་དབང་ཕྱུག་གོ། །དེ་ལྟར་གང་བསྒོམ་པ་དང་ལྡན་ཞིང་ཏིང་ངེ་འཛིན་ལ་གོམས་པར་བྱེད་ན་དངོས་གྲུབ་བརྟན་པོར་འགྱུར་རོ། །དེའི་སངས་རྒྱས་ཉིད་དང་འདོད་པའི་ལོངས་སྤྱོད་ཐམས་ཅད་སྟེར་རོ། །སངས་རྒྱས་ཕ་རོལ་ཕྱིན་གྲུབ་ཅིང་། །གཟུངས་དང་ས་ཡང་དེ་བཞིན་ནོ། །
འཇིག་རྟེན་ཀུན་གྱི་བདེ་སྟོན་ཅིང་། །སོ་སོ་རང་ཉིད་རྗེས་སུ་སྒྲུབ། །སངས་རྒྱས་ཉིད་ནི་བྱང་སེམས་ཉིད། །རང་རྒྱལ་ཉིད་ཀྱང་དེ་བཞིན་ནོ། །ཡིད་འོང་སངས་རྒྱས་གོ་འཕང་ནི། །སྤྱད་མི་དགོས་པར་འགྲུབ་པར་འགྱུར། །བྱང་ཆུབ་སེམས་དང་ག་པུར་བཅས། །ཙནྡན་དམར་
དང་རབ་སྦྱར་ཏེ། །རྡོ་རྗེ་ཆུ་དང་ཡང་དག་ལྡན། །སངས་རྒྱས་ཀུན་གྱི་བཅུད་ལེན་ཡིན། །སྦྱོར་བ་བཟང་པོ་འདི་ཡིས་ནི། །བཅུད་ཀྱིས་ལེན་ནི་བདེ་བར་ཡང་། །འགྲུབ་འགྱུར་འཇིག་རྟེན་མགོན་པོ་ཡི། །གཞོན་ཞིང་ནད་མེད་དམ་བདེ་ཞིང་། །ཚེ་དང་སྟོབས་དང་བརྩོན་འགྲུས་དང་། །
སྐལ་བཟང་ཡེ་ཤེས་བླ་ན་མེད། །སྐྱེ་བ་འདི་ལ་འགྲུབ་པའོ། །མ་ལུས་ལུས་པ་མེད་པ་འགྲུབ། །དབང་དང་དགུག་དང་དབྱེ་བ་དང་། །གསད་དང་བསྐྲད་པ་ལ་སོགས་པ། །རེངས་དང་ཕུར་བུས་གདབ་ཉིད་དང་། །ནམ་མཁར་འགྲོ་བ་དེ་བཞིན་ནོ། །ས་བཅུའི་དབང་ཕྱུག་ཐོབ་

འགྱུར་ཞིང་། །ཏིང་ངེ་འཛིན་ལ་གནས་པར་འགྱུར། །དེ་ཕྱིར་ཏིང་འཛིན་ལྡན་པ་ཡི། །རྡོ་རྗེ་དམ་ཚིག་དེ་ཡིས་ནི། །རིག་པ་དང་ནི་བཅས་པའི་མཆོག །འཇིག་རྟེན་མགོན་པོར་འགྲུབ་པར་འགྱུར། །ཨོྃ་ཧྲཱིཿཔདྨ་ནརྟེ་ཤྭ་ར་ཧཱུྃ། རྩ་བའི་སྔགས་འདི་བརྒྱ་རྩ་བརྒྱད་བཟླས་ན་ཉིན་མོ་དང་ནུབ་
མོ་བྱས་པའི་སྡིག་པ་ཉམས་པར་འགྱུར་རོ། །ཡང་ན་ལྔ་བརྒྱ་བཟླས་བརྗོད་བྱས་ན་ནད་ཐམས་ཅད་ལས་གྲོལ་བར་འགྱུར་རོ། །ཡང་ན་སྟོང་བཟླས་བརྗོད་བྱས་ན་དུས་མ་ཡིན་པར་འཆི་བ་མེད་པར་འགྱུར་རོ། །ཡང་ན་སྟོང་ཕྲག་གཉིས་བཟླས་བརྗོད་བྱས་ན། ཐམས་ཅད་ཀྱི་མཆོད་པའི་
འོས་སུ་འགྱུར་རོ། །གཞན་ཡང་སྟོང་ཕྲག་གསུམ་བཟླས་བརྗོད་བྱས་ན་སྐལ་བ་བཟང་བ་དང་། གཡང་རབ་ཏུ་འཕེལ་བར་འགྱུར་རོ། །གཞན་ཡང་སྟོང་ཕྲག་བཞི་བཟླས་བརྗོད་བྱས་ན་དབུལ་བ་མེད་པར་འགྱུར་རོ། །སྟོང་ཕྲག་ལྔ་བཟླས་བརྗོད་བྱས་ན་དགྲ་ཐམས་ཅད་ཀྱི་སྙིང་
འཁྲུག་པར་བྱེད་དོ། །སྟོང་ཕྲག་དྲུག་བཟླས་བརྗོད་བྱས་ན་དགྲ་ཐམས་ཅད་མེད་པར་འགྱུར་རོ། །སྟོང་ཕྲག་བདུན་བཟླས་བརྗོད་བྱས་ན་བདུད་བཞི་ལས་མཆོག་ཏུ་རྒྱལ་བར་འགྱུར་རོ། །སྟོང་ཕྲག་བརྒྱད་བཟླས་བརྗོད་བྱས་ན་རིག་འཛིན་མ་གྲུབ་པར་འགྱུར་རོ། །སྟོང་ཕྲག་དགུ་བཟླས་བརྗོད་
བྱས་ན་གནོད་སྦྱིན་མོ་གྲུབ་པར་འགྱུར་རོ། །ཁྲི་ཚོ་གཅིག་བཟླས་བརྗོད་བྱས་ན་ལྷ་དང་ཀླུ་དང་། མིའི་བུ་མོ་རྣམས་འགྲུབ་པར་འགྱུར་རོ། །སྟོང་ཕྲག་ཉི་ཤུ་བཟླས་བརྗོད་བྱས་ན་བར་སྣང་ལ་འགྲོ་བའི་རྣལ་འབྱོར་མ་རྣམས་འགྲུབ་པར་འགྱུར་རོ། །སྟོང་ཕྲག་སུམ་ཅུ་བཟླས་བརྗོད་བྱས་ན་བསམ་
པ་ཐམས་ཅད་རྫོགས་པར་འགྱུར་རོ། །སྟོང་ཕྲག་བཞི་བཅུ་བཟླས་བརྗོད་བྱས་ན་མཁའ་ལ་སྤྱོད་པའི་རིག་པ་འཛིན་པར་འགྱུར་རོ། །སྟོང་ཕྲག་ལྔ་བཅུ་བཟླས་བརྗོད་བྱས་ན་རལ་གྲིའི་རིག་པ་འཛིན་པར་འགྱུར་རོ། །སྟོང་ཕྲག་དྲུག་ཅུ་བཟླས་བརྗོད་བྱས་ན་གྲུབ་པའི་རིག་འཛིན་དུ་
འགྱུར་རོ། །སྟོང་ཕྲག་བདུན་ཅུ་བཟླས་བརྗོད་བྱས་ནས་གསུམ་གྱི་བདག་པོར་འགྱུར་རོ། །སྟོང་ཕྲག་བརྒྱད་ཅུ་བཟླས་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །འབུམ་ཕྲག་གཅིག་བཟླས་བརྗོད་བྱས་ན་བྱང་ཆུབ་སེམས་དཔའ་ཉིད་དུ་འགྱུར་རོ། །འབུམ་ཕྲག་བཅུ་བཟླས་བརྗོད་

བྱས་ན་རང་དགའི་གཟུགས་སུ་འགྱུར་རོ། །བཞི་ཆ་དང་བཅས་པའི་འབུམ་ཕྲག་བཟླས་བརྗོད་བྱས་ན་སངས་རྒྱས་ཉིད་དུ་འགྱུར་རོ། །བྱེ་བ་ཕྲག་གཅིག་བཟླས་བརྗོད་བྱས་ན། ཐམས་ཅད་དུ་རྗེས་སུ་འཛིན་པར་བྱེད་པའི་ནུས་པ་ཅན་སྤྱན་རས་གཟིགས་དབང་ཕྱུག་ལྟ་བུ་
འགྲུབ་པར་འགྱུར་ཞིང་ལུས་དང་ངག་དང་ཡིད་ཀྱང་བྱིན་གྱིས་རློབ་བོ། །འདི་ནི་བཅོམ་ལྡན་འདས་གསུང་རྡོ་རྗེས་གསུངས་པའོ། །ཨོྃ་པཎྜ་རི་བ་སི་ནི་བ་རི་དེ་ཧཱུྃ། འདི་ནི་གོས་དཀར་མོའི་སྔགས་ཏེ་ལན་ཅིག་བརྗོད་པས་སྡིག་པའི་རིགས་ཀྱི་ཚོགས་སྲེག་པར་བྱེད་དོ། །ནུབ་བདུན་གྱི་ནང་
རོལ་དུ་རྒྱལ་པོ་བློན་པོ་དང་བཅས་པ་མདུན་ན་འདོན་དང་། སྐྱེ་འགྲོའི་ཚོགས་དང་བཙུན་མོའི་ཚོགས་དང་བཅས་པ་དབང་དུ་འགྱུར་རོ། །བཟླས་པ་ཙམ་གྱིས་ཕུན་སུམ་ཚོགས་པ་ཐམས་ཅད་ཀྱི་སྐལ་བ་དང་ལྡན་པར་འགྱུར་རོ། །དེ་ལྟ་བུའི་རིམ་པས་འབུམ་ཕྲག་གཅིག་བཟླས་ན་གང་
ཡང་སངས་རྒྱས་དང་། བྱང་ཆུབ་སེམས་དཔའ་དང་ནུས་པ་མཉམ་ཞིང་། དངོས་སུ་འཕགས་པ་སྤྱན་རས་གཟིགས་དབང་ཕྱུག་འགྲུབ་པར་འགྱུར་རོ། །ཨོྃ་བི་ལོ་ཀི་ནི་ཨ་བ་ལོ་ཀཱ་ཡ་སྭཱ་ཧཱ། འདིའི་སྦྱོར་བ་ནི་སྟོང་ཕྲག་བཅུ་བཟླས་བརྗོད་བྱས་ན་མེ་ལོང་དང་། མཐེབ་ཆེན་དང་།
ནམ་མཁའ་ལ་སོགས་པ་ལ་གསལ་པོར་པྲ་དབབ་པ་འགྲུབ་པར་འགྱུར་རོ། །གང་སྔོན་བྱུང་བ་དང་ད་ལྟར་དང་ཕྱིས་འོང་བ་དེ་སྟོན་པར་བྱེད་དོ། །ཡང་ན་སོ་ཤིང་ལ་ལན་ཉི་ཤུ་རྩ་གཅིག་མངོན་པར་བསྔགས་པར་བྱས་ལ། ནུབ་མོ་ཉལ་བའི་དུས་སོ་ཤིང་འཆོས་ནས་མི་སྨྲ་བར་ཉལ་ན་
དགོས་པ་གང་ཡིན་པ་རྨི་ལམ་ན་སྟོན་པར་བྱེད་དོ། །དེ་ཡང་འཁྲུལ་པ་མེད་པར་སྟོན་ནོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། བཅོམ་ལྡན་འདས་སྒྲོལ་མ་འདི་འབུམ་ཕྲག་གཅིག་བཟླས་ན་འཇིག་རྟེན་གསུམ་གྲུབ་པར་འགྱུར་རོ། །ལྷའི་བུ་མོ་དང་། ཀླུའི་བུ་མོ་དང་། མིའམ་ཅིའི་བུ་མོ་དང་། གནོད་
སྦྱིན་གྱི་བུ་དང་། མིའི་བུ་མོ་སྟེ། འདི་རྣམས་ཀྱི་ནང་ནས་གང་འདོད་པ་དེའི་ཆོས་འབྱུང་དུ་གུར་གུམ་དང་། རྒྱ་སྐྱེགས་དང་། རང་བྱུང་གི་མེ་ཏོག་དང་། བྱང་ཆུབ་ཀྱི་སེམས་དང་ཡང་དག་པར་ལྡན་པས་རྩིབས་དྲུག་པ་ཤིན་ཏུ་རྣོ་བའི་འཁོར་ལོ་དམར་པོ་འཁོར་བཞིན་པ་རྣམ་པར་བྲིས་པ་བསམས་

ལ། ཆོས་འབྱུང་དེ་སྒྲུབ་པ་པོས་རི་སུལ་ཆུ་ངོགས་གསང་བའི་གནས་སུ་བསམ་པར་བྱའོ། །དེ་ཡང་མྱོས་ཤིང་སྒྲུབ་པ་པོའི་སྟེང་དུ་ལྟུང་བའི་རྣམ་པ་བསྒོམ་པར་བྱའོ། །དེ་བཀུག་ལ་རང་ལ་ཆུ་ཤིང་ནོར་དང་བཅས་པ་དབང་དུ་འགྱུར་བར་བལྟའོ་ཞེས་བྱའོ། །ཡང་ན་ལྷ་དང་། ཀླུ་
དང་ལྷ་མ་ཡིན་དང་། མིའམ་ཅི་དང་། རིག་པ་འཛིན་པ་དང་། གནོད་སྦྱིན་དང་། འཁོར་ལོས་སྒྱུར་བ་དང་། བློན་པོ་དང་། སྐྱེས་བུའམ་གང་འདོད་པ་དེ་དམར་པོར་རྣམ་པར་བསམས་ལ། དེའི་སྙིང་གར་རྡོ་རྗེ་ལྕགས་ཀྱུ་འོད་འབར་བའི་ཕྲེང་བ་འཁྲུག་པའི་ལྕགས་ཀྱུས་འབིགས་
བཞིན་པ་དང་། ཞགས་པས་སྐེ་བ་ནས་བཅིངས་ལ་དགུག་བཞིན་པ་འདོད་པས་མྱོས་པར་གྱུར་པར་རབ་ཏུ་གསལ་པོར་བསམ་པར་བྱའོ། །བདག་ཉིད་ནོར་དང་བཅས་པ་འགུགས་ཤིང་དབང་དུ་འགྱུར་རོ། །ཞེས་བྱའོ། །ཨོཾ་བྷུ་རི་ནི་མ་ཧཱ་ཙཀྲ་བརྟི་ནི་ཧཱུྃ། འདིའི་སྦྱོར་བ་ནི་དྲི་ཆེན་དང་།
རྡོ་རྗེ་ཆུ་ལ་སོགས་པས་དཀྱིལ་འཁོར་བྱས་ལ་ཇི་ལྟར་རྙེད་པའི་མེ་ཏོག་གིས་མཉམ་པར་མཆོད་ལ། དེ་ན་གནས་པའི་སྒྲུབ་པ་པོས་གླིང་ངམ་གླིང་གཞན་དང་། གྲོང་ཁྱེར་དང་གྲོང་དང་། ཡུལ་འཁོར་གྱི་རྒྱལ་པོར་བསམ་ཞིང་བཟླས་པ་བྱའོ། །དེ་ཡིས་བདག་པོ་ཉིད་དུ་འགྱུར་ཞིང་ལོངས་
སྤྱོད་ལ་ལོངས་སྤྱད་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བ་ཐོབ་པར་འགྱུར་རོ། །ཨོྃ་བྷྲྀ་ཀུ་ཊཱི་ཏཱ་རེ་ཏུ་ཏ་མ་ཏ་ཧཱུྃ། ལྷ་མོ་ཁྲོ་གཉེར་ཅན་ཞེས་བྱ་བ་འདི་ནི་དགྲའི་རྐང་རྗེས་ཀྱི་རྡུལ་བླངས་ལ། དུག་དང་། ཚྭ་དང་། སྐེ་ཚེ་དང་། ཁྲག་དང་། ཆུ་བོའི་འགྲམ་གཉིས་ཀྱི་ས་དང་། དྲི་
ཆེན་རྡོ་རྗེ་ཆུས་བསྣོས་ལ་གཟུགས་བརྙན་བྱས་ལ་མིའི་རུས་པའི་རང་བཞིན་གྱི་ཕུར་བུས་ཚིགས་དང་གནད་ཀུན་ལ་བཏབ་ལ། ཐོད་པ་ཁ་སྦྱར་གྱི་ནང་དུ་བཞག་སྟེ། དུར་ཁྲོད་ཀྱི་མེ་ལ་གདུང་བར་བྱའོ། །ཞག་བདུན་དུ་སྦྱོར་བ་བྱས་པས་འཆི་བར་འགྱུར་རོ། །གལ་ཏེ་སེམས་ལ་སྡིག་པ་མེད་པར་
གྱུར་ན་ཞག་ཉི་ཤུ་རྩ་གཅིག་གིས་ནི་སངས་རྒྱས་ཀྱང་འཆི་བར་འགྱུར་རོ། །ཨོྃ་མ་ཧཱ་ཤྲཱི་ཡེ་མ་ཎི་པདྨེ་ཧཱུྃ། ལྷ་མོ་འདི་ལ་དྲི་དང་། མེ་ཏོག་དང་། མར་མེ་དང་། བསོད་སྙོམས་ཀྱི་ཟས་ཀྱིས་སོ་སོར་མཆོད་ལ་བཟླས་པ་བྱས་ན་ཐམས་ཅད་དུ་བསྲུངས་པར་འགྱུར་རོ། །ཡུལ་ཆོས་ཀྱི་རྩོད་པ་

ལས་རྒྱལ་བར་འགྱུར་རོ། །སྤྱན་རས་གཟིགས་དབང་ཕྱུག་དང་མཉམ་པར་འགྱུར་རོ། །ནོར་ཆེན་པོའི་བདག་པོར་འགྱུར་རོ། །ཡང་ན་པདྨ་སྟོང་ཕྲག་བཅུ་སྦྱིན་སྲེག་བྱས་ན་རྒྱལ་པོར་འགྱུར་རོ། །ཨོྃ་བཛྲ་པདྨེ་ཤྭ་རི་མ་ར་པདྨེ་ཧཱུྃ། རྡོ་རྗེ་པདྨའི་དབང་ཕྱུག་
མ་འདི་ཡིད་ཀྱིས་བཟླས་ན་དབང་དང་དགུག་པ་ལ་སོགས་པ་བྱེད་དོ། །ལན་བདུན་མངོན་པར་བསྔགས་ཏེ། གཙུག་ཕུད་མདུད་ན་རང་བསྲུང་ཞིང་རིམས་དང་། ལྐོག་ནད་དང་། ནད་ཐམས་ཅད་དང་། མཚོན་དང་། མེ་དང་། རྐུན་པོ་དང་། སེང་གེ་དང་། གླང་པོ་ཆེ་དང་། སྦྲུལ་དང་།
འཆིང་བ་དང་། རྒྱ་མཚོ་དང་། ཤ་ཟའི་ནད་སྟོང་ཕྲག་གཅིག་བཟླས་པས་ཞི་བར་འགྱུར་རོ། །ལན་ཅིག་གི་ལས་ཀྱིས་བརྗེད་བྱེད་ཀྱི་གདོན་དང་། ཟད་བྱེད་དང་། སྐྱུག་པ་དང་། བྲི་བར་དཀའ་བ་དང་། བསྒོམ་པར་དཀའ་བའི་གདུག་པ་ཅན་གྱི་སེམས་ཅན་ཐམས་ཅད་ཉམས་པར་བྱེད་
དོ། །འབུམ་ཕྲག་གཅིག་བཟླས་ན་ལུས་འཕེལ་ཞིང་སྐལ་བ་བཟང་བ་དང་། ལུས་གཞོན་ཞིང་ནད་མེད་པར་བྱེད་ཅིང་དུས་མ་ཡིན་པའི་འཆི་བ་ཉམས་པར་བྱེད་དོ། །ཡང་ན་ཀླུ་ཐབ་ཁུང་དུ་བྲིས་ལ་དེར་དུག་དང་། སྐེ་ཚེ་དང་ཚ་བའི་སྦྱིན་སྲེག་བྱ་ཞིང་ཀླུའི་མིང་དང་སྤེལ་བས་འབུམ་ཕྲག་
གཅིག་སྦྱིན་སྲེག་བྱས་ན་ཆར་ཆེན་པོ་ཕབ་ནས་མུ་གེ་མེད་པར་འགྱུར་རོ། །ཨོྃ་བི་ཤྭ་པདྨ་ཧྲཱིཿསྣ་ཚོགས་པདྨེ་འདི་ནི་རྨོངས་པ་དང་། རེངས་པ་དང་། མནན་པ་དང་། ཕུར་བུས་གདབ་པ་དང་། གཞན་གྱི་ནོར་འཕྲོག་པ་དང་། ཕུར་བུ་དང་། མིག་འཕྲུལ་དང་། ངོ་མཚར་དང་མི་མཐོང་
བར་བྱེད་པ་དང་། ཕུག་ཏུ་འཇུག་པ་དང་། ནམ་མཁའ་ལ་འགྲོ་བ་དང་། ལྕགས་སྒྲོག་གཅོད་པ་དང་། རིལ་པོར་དགུག་པ་གང་དང་གང་ཡིན་པ་རྒྱུད་ལས་བསྟན་པ་དང་། རྒྱུད་གཞན་དང་ཡང་དག་པར་ལྡན་པའི་ལས་ཐམས་ཅད་བྱེད་དོ། །ལུས་དང་ངག་དང་ཡིད་གསུམ་གྱི་
དངོས་གྲུབ་སྟེར་རོ། །བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་འགྲུབ་ཅིང་གང་འདོད་པའི་ལས་ཐམས་ཅད་ནི་འགྲུབ་པར་འགྱུར་རོ་ཞེས་བྱའོ། །ཨོྃ་བི་ཤྭ་པདྨེ་ཧཱུཾ། སྣ་ཚོགས་རྡོ་རྗེ་ཞེས་བརྗོད་པའི་ལྷ་མོ་འདིས་ནི་ངག་གི་དངོས་གྲུབ་སྟེར་རོ། །ཚིག་

ཤད་མཁན་དུ་བྱེད་ཅིང་གཞན་གྱི་ངག་རེངས་པར་བྱེད་དོ། །རང་ཉིད་བསྲུང་བ་དང་། གཞན་ཡང་བསྲུང་བར་འགྱུར་རོ། །རང་སྐལ་བ་བཟང་ཞིང་གཞན་པོ་ཡང་སྐལ་བ་བཟང་པོའི་རང་དོན་དང་གཞན་དོན་བྱེད་དོ། །ཇི་ལྟར་འདིར་ནི་འཕགས་པ་སྤྱན་རས་གཟིགས་དབང་ཕྱུག་སེམས་
ཅན་གྱི་དོན་ལ་སྤྲོ་ཞིང་བརྩོན་པ་དེ་བཞིན་དུ། འདིར་བཅོམ་ལྡན་འདས་མས་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་སུ་གཏོགས་པའི་སེམས་ཅན་རྣམས་སྒྲོལ་བར་བྱེད་དོ། །བདེ་བར་གཤེགས་པའི་བསྟན་པ་ལ་དད་པ་རྣམས་ལ་མ་ཉིད་ཀྱིས་བསྲུང་ངོ་ཞེས་ཐུགས་
ཀྱི་རྡོ་རྗེ་དེ་བཞིན་གཤེགས་པས་གསུངས་སོ། །དེ་ལྟར་རྟོགས་པའི་རྒྱལ་པོ་བསྡུས་པ་རབ་ཏུ་བསྟན་ཏོ། །སེམས་བརྟན་རྟོག་པ་མེད་པ་ཡི། །བློ་དང་ལྡན་པས་འགྲུབ་པར་འགྱུར། །གང་ཞིག་སྤྱོད་ལམ་བསྟན་པ་ཡི། །སངས་རྒྱས་ཀུན་རྒྱུ་ཇི་ལྟ་བར། །དེ་ལྟར་འདིར་ནི་
རབ་སྦྱར་ནས། །དེ་ནས་རྟག་པའི་གོ་འཕང་འགྲུབ། །ཇི་ལྟར་འདོད་པར་གནས་བྱེད་ཅིང་། །ཀུན་ལ་ལོངས་སྤྱོད་ཀུན་བྱེད་ལྟར། །ཇི་ལྟར་འདོད་པའི་སྙིང་རྗེས་སྤྱོད། །ཇི་ལྟར་འདོད་པའི་སྤྱོད་པ་ཡིས། །འདུག་པའམ་ནི་ལངས་ཀྱང་རུང་། །འཆག་པའམ་ནི་གང་དང་དེ། །
རྒོད་པའམ་ནི་བརྗོད་པའམ། །གང་དེ་ཇི་བཞིན་དོན་བཞིན་ནོ། །དཀྱིལ་འཁོར་དུ་ནི་མ་ཞུགས་པའམ། །སྒྲིབ་པ་ཀུན་དང་ལྡན་པ་ཡང་། །རང་མོས་ལྷ་ཡི་རྣལ་འབྱོར་བདག །བསོད་ནམས་ཆུང་བའམ་འགྲུབ་པར་འགྱུར། །འདི་ཡིས་སངས་རྒྱས་ཐམས་ཅད་ཉིད། །ཐམས་
ཅད་མཁས་པ་ཉིད་དང་ནི། །ཐམས་ཅད་རྡོ་རྗེ་འཆང་ཉིད་ཀྱང་། །སྐྱེ་བ་འདི་ལ་འགྲུབ་པར་འགྱུར། །ཡང་གསུངས་པ། རྣལ་འབྱོར་དག་ནི་གཟུགས་བརྙན་གྱི། །བཅོས་མའི་སྐུ་ལས་འགྱུར་བ་མིན། །བྱང་ཆུབ་སེམས་ཆེན་ལ་བརྩོན་ན། །རྣལ་འབྱོར་དག་ནི་དེ་ལྟ་ཡིན། །ཁྲག་
ཆེན་པོ་དང་ག་པུར་བཅས། །ཙནྡན་དམར་དང་བསྲེས་པ་ནི། །ཚོགས་ཀྱི་ནང་དུ་ཞུགས་པ་ན། །ཀུན་ལས་མཆོག་གྱུར་བཅུད་ལེན་ནོ། །སྦྱོར་བ་བཟང་པོ་འདི་ཡིས་ནི། །བཅུད་ཀྱིས་ལེན་ནི་སླ་བ་རུ། །དཔལ་རྡོ་རྗེ་སེམས་དཔའི་ཚེ་བཟང་དང་། །ནད་མེད་བདེ་བ་བཟང་པོ་འཐོབ། །

གྲུབ་པའི་མཚན་ཉིད་ཇི་ལྟར་གསུངས། །སངས་རྒྱས་ཕ་རོལ་ཕྱིན་པ་དང་། །གཟུངས་དང་ས་ཡང་དེ་བཞིན་འགྲུབ། །བདེ་སྟོན་ཐམས་ཅད་ཐོབ་འགྱུར་ཞིང་། །རང་ཉིད་སོ་སོ་རྗེས་སུ་འགྲུབ། །སངས་རྒྱས་ཐམས་ཅད་མཉམ་སྦྱོར་བས། །སངས་རྒྱས་ཐམས་ཅད་
ཉིད་དུ་འགྱུར། །སངས་རྒྱས་ཀུན་གྱི་དངོས་ཉིད་ཀྱང་། །སངས་རྒྱས་ཀུན་ནི་རབ་གྲུབ་འགྱུར། །གཞན་ཡང་རྣལ་འབྱོར་གྱི་སྤྱོད་པ་བྱེད་པར་འདོད་ཅིང་སེམས་ཡོངས་སུ་དག་པ་མེད་ན་དེའི་ཚེ་ཐང་སྐུའི་སྒྲུབ་པ་བཤད་དེ། བསྙེན་གནས་དང་ལྡན་ཞིང་སྨྱུང་བར་གནས་པའི་ལྷ་བཟོས་
ཚོན་སྣ་མ་འདྲེས་པར་རས་གསར་པ་དེ་ཡང་རང་རང་གི་ཀུན་ཏུ་ཁྲུ་རེའི་ཚད་ཀྱིས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་བྲི་བར་བྱ་སྟེ། སྣ་ཚོགས་ཀྱི་པདྨ་འདབ་མ་བརྒྱད་པ། ཟེ་འབྲུའི་དཀྱིལ་དུ་ཟླ་བའི་དཀྱིལ་འཁོར་གྱི་དབུས་སུ་བཅོམ་ལྡན་འདས་མདོག་དམར་བ་
མི་བསྐྱོད་པའི་དབུ་རྒྱན་ཅན། ཞལ་གསུམ་པ། ཞལ་གྱི་གཙོ་བོ་ནི་དམར་བ་སྟེ། འདོད་ཆགས་ཆེན་པོ་ཉིད་ཀྱི་ཕྱིར་རོ། །གཡས་པ་གནག་པ་སྟེ་ཞེ་སྡང་ཆེན་པོ་ཉིད་ཀྱི་ཕྱིར་རོ། །གཡོན་པ་དཀར་བ་སྟེ་གཏི་མུག་ཉིད་ཀྱི་ཕྱིར་རོ། །ཕྱག་དྲུག་པ་བྱའོ། །གཡོན་པའི་ཕྱག་གཅིག་
གིས་གོས་དཀར་མོའི་མགྲིན་པ་ནས་འཁྱུད་པ་དང་། པདྨ་དམར་པོ་བསྣམས་པ་དང་གཡོན་པ་གཉིས་ཀྱིས་མེ་ཏོག་གི་གཞུ་བསྣམས་པའོ། །གཡས་པ་གསུམ་དུ་ཁབ་ཀྱི་ཕྱག་རྒྱས་པདྨ་ཁ་འབྱེད་པ་དང་། མེ་ཏོག་གི་མདའ་དང་། ལྕགས་ཀྱུ་བསྣམས་པའོ། །སེམས་དཔའི་སྐྱིལ་
མོ་ཀྲུང་གིས་གནས་པ་བྱའོ། །ཤར་གྱི་འདབ་མ་ལ་རྣམ་པར་གཟིགས་མ་མདོག་དཀར་མོ། །པདྨ་དམར་པོ་དང་རྡོ་རྗེ་ཕྱག་ན་བསྣམས་པའོ། །ལྷོ་ཕྱོགས་ཀྱི་འདབ་མ་ལ་ལྷ་མོ་སྒྲོལ་མ་ལྗང་གུ་རྒྱ་སྐྱེགས་ཀྱི་ཤིང་གི་ལོ་མ་དང་རིན་པོ་ཆེ་ཕྱག་ན་བསྣམས་པའོ། །ནུབ་ཕྱོགས་ཀྱི་འདབ་
མ་ལ་བྷུ་རི་ནི་སེར་མོ་ཨུཏྤ་ལ་སྔོན་པོ་དང་འཁོར་ལོ་བསྣམས་པའོ། །བྱང་ཕྱོགས་ཀྱི་འདབ་མ་ལ་ཁྲོ་གཉེར་ཅན་ནི་པདྨ་དཀར་སེར་ལྟ་བུ་པདྨ་སེར་པོ་དང་རལ་གྲི་ཕྱག་ན་བསྣམས་པའོ། །ཤར་གྱི་མཚམས་སུ་པདྨའི་གོས་ཅན་མ་གསེར་ལྟ་བུའི་མདོག་བཙོད་ལྟ་བུའི་པདྨ་བསྣམས་

པའོ། །ལྷོ་ཕྱོགས་ཀྱི་མཚམས་སུ་རྡོ་རྗེ་པདྨའི་དབང་ཕྱུག་མ་ནམ་མཁའི་མདོག་ཅན་དཀར་མོ་པདྨ་དང་ཤེལ་གྱི་ཕྲེང་བ་བསྣམས་པའོ། །ནུབ་ཕྱོགས་ཀྱི་མཚམས་སུ་སྣ་ཚོགས་ཀྱི་པདྨ་སྟོན་ཀའི་ཟླ་བ་ལྟ་བུ་དཀར་སེར་གྱི་མདོག་པདྨ་ནག་པོ་དང་པོ་ཏི་ཕྱག་ན་བསྣམས་པའོ། །བྱང་ཕྱོགས་ཀྱི་མཚམས་སུ་
སྣ་ཚོགས་རྡོ་རྗེ་མ་སྣ་ཚོགས་ཀྱི་མདོག་ཅན་དུ་བྱས་ལ། སྣ་ཚོགས་ཀྱི་རྡོ་རྗེ་དང་། སྣ་ཚོགས་ཀྱི་པདྨ་བསྣམས་པའོ། །དེ་ལྟར་པདྨ་ལ་བཀོད་ཅིང་བྲིས་ལ། སྒེག་མོ་ལ་སོགས་པ་རྣམས་མཚམས་སུའོ། །ཛཿཧཱུྃ་བཾ་ཧོཿའི་ཡི་གེ་ལས་ཡང་དག་པར་བྱུང་བའི་ལྕགས་ཀྱུ་དང་། ཞགས་པ་དང་།
ལྕགས་སྒྲོག་དང་། དྲིལ་བུ་རྣམས་ནི་ཤར་ལ་སོགས་པའི་ཕྱོགས་རྣམས་སུའོ། །ཡང་ཐང་སྐུ་གཞན་བརྗོད་པར་བྱ་སྟེ། སྟོན་ཀའི་ཟླ་བ་ལྟ་བུའི་དཀར་སེར་གྱི་བཅོམ་ལྡན་འདས་གཡས་ན་སྐུད་པ་དང་། དབྱུག་པ་དང་། རྩེ་གསུམ་དང་། མཆོག་སྦྱིན་པའི་ཕྱག་ཅན། གཡོན་ན་
པདྨ་དང་། རིལ་བ་སྤྱི་བླུགས་དང་། ཞགས་པ་དང་། ཐམས་ཅད་མཁྱེན་པའི་དམ་ཚིག་གི་པོ་ཏི་བསྣམས་པའི་ཕྱག་ཅན། སྟག་གི་པགས་པའི་ཤམ་ཐབས་འཆང་བ། སྦྲུལ་མཆོད་ཕྱིར་ཐོགས་པ། རལ་པའི་ཅོད་པན་ལ་འོད་དཔག་མེད་བཞེངས་པའམ་སྐྱིལ་ཀྲུང་ཕྱེད་པས་
གནས་པ་དབུ་རྒྱན་དུ་བྱས་པའོ། །དེའི་གཡས་ཕྱོགས་ཀྱི་ཆ་རུ་སྒྲུབ་པ་པོ། །མཆོད་ཡོན་གྱི་སྣོད་དང་བདུག་སྤོས་ཀྱི་སྣོད་ལག་པས་གཟུང་བ་བྱའོ། །གཞན་ཡང་བཅོམ་ལྡན་འདས་ཕྱག་གཉིས་པ་རི་གྲུ་འཛིན་ལ་གནས་ཤིང་སེང་གེའི་ཁྲི་ལ་བཞུགས་པ། གཡོན་པ་ས་ལ་
གནས་ཤིང་ཞབས་གཡས་པ་པདྨའི་སྟེང་གི་གདན་སྟེངས་སུ་བཞུགས་པའོ། །ཕྱག་རེ་རེ་ན་ཕྲེང་བ་བསྣམས་པར་སེམས་པ་པོས་ཕྲེང་བའི་འོག་ཏུ་འདྲེན་པའི་ཚུལ་འདིས་བསམ་པར་བྱ་བ་ནི་སེམས་པ་ལྟ་བུར་གནས་པ་ཞེས་བྱའོ། །ཆོ་ག་གཞན་ཡང་བཅོམ་ལྡན་འདས་དཀར་ཞིང་
དམར་བ་ཕྱག་བཅུ་པ་རི་དགས་སེང་གེའི་གདན་ལ་པདྨའི་སྟེང་དུ་སྐྱིལ་ཀྲུང་ཕྱེད་པས་བཞུགས་པ། གཡས་ན་ཕྲེང་བ་བསྣམས་པའོ། །སེང་གེ་དང་། གླང་པོ་ཆེ་དང་། མེ་དང་། སྦྲུལ་གྱིས་འཇིགས་པ་རྣམས་ལས་གྲོལ་བའི་ཆ་བྱད་ཅན་ནོ། །གཡོན་ན་པདྨ་དམར་པོ་སྡོང་བུ་གཉིས་པ་

སྟེང་དུ་པོ་ཏི་ཅན་ཏེ་རྐུན་མ་དང་། ལྕགས་སྒྲོག་གིས་བཅིངས་པ་དང་། མཚོ་དང་། ཐོག་ཆེན་པོ་དང་། ཤ་ཟས་ཟ་བ་རྣམས་སྒྲོལ་བའི་ཆ་བྱད་ཅན་ནོ། །གནས་དེ་བརྒྱད་དུ་སྒྲུབ་པ་པོ་རྒྱན་ཐམས་ཅད་ཀྱིས་བརྒྱན་པ། ཡན་ལག་ཐམས་ཅད་ཡོངས་སུ་རྫོགས་པ་སྔོན་བཞིན་དུ་ལངས་
པའམ། འདུག་པ་བསམ་པར་བྱའོ། །གཞན་ཡང་ཆོ་ག་ནི་ཟླ་བའི་དཀྱིལ་འཁོར་གྱི་དབུས་སུ་བཅོམ་ལྡན་འདས་སྣ་ཚོགས་ཀྱི་གཟུགས་འཆང་བ། དབུ་བཅུ་གསུམ་པ། སྤྱི་བོའི་མགོ་བོ་ནི་ལྗང་ཁུའི་རྟ་ཞལ་ལོ། །ཡང་ན་ཞི་བ་སངས་རྒྱས་ཤཱཀྱ་ཐུབ་པའི་ཞལ་ལོ། །ཕྱག་བརྒྱ་པའི་
བཅོམ་ལྡན་འདས་འདི་ནི་སྣ་ཚོགས་ཀྱི་མཚོན་ཆ་བསྣམས་པའོ། །ཡང་ན་ཞལ་བརྒྱ་པ་ཕྱག་སྟོང་པ་ཡང་བྱའོ། །ཁ་ཅིག་ཏུ་རྡོ་རྗེ་སྐྱིལ་མོ་ཀྲུང་གིས་གནས་པའམ། བཞེངས་པ་ཡང་བྱའོ། །ཙམ་པ་ཀ་ལྟ་བུའི་དཀར་སེར་གྱི་བཅོམ་ལྡན་འདས་སོ། །ཐང་སྐུ་དེ་ཀུན་གྱི་གཡས་ཕྱོགས་ཀྱི་བར་དུ་སྒྲུབ་པ་
པོ་མེ་ཏོག་དང་། མཆོད་ཡོན་གྱི་སྣོད་དང་། བདུག་སྤོས་ཀྱི་སྣོད་ལག་པ་ན་གཟུང་བ་བྱའོ། །དེ་རྣམས་ཀྱི་དབུ་ལ་དབུ་རྒྱན་དུ་འོད་དཔག་མེད་པའམ། ཆོས་ཀྱི་རྒྱལ་པོའི་མཆོད་རྟེན་བྲི་བར་བྱའོ། །འདི་ནི་ཐང་སྐུའི་ཆོ་གའོ། །ཐང་སྐུའི་མདུན་དུ་རྩ་བའི་སྔགས་ཇི་ལྟ་བ་འདོད་པ་དེ་བཟླ་ཞིང་བསམ་གཏན་ཡང་བྱས་ནས།
མཆོད་པ་རྣམ་པ་ལྔས་མཆོད་ལ། མཆོད་ཡོན་སྣོད་དང་། ཡོངས་སུ་གང་བའི་བདུད་རྩི་ལྟ་བུའི་ཟས་དང་། སྒྲོན་མའི་ཟས་ལ་བྱས་ནས་མཆོད་ཡོན་བྱིན་ཏེ། སྔགས་གང་འདོད་པ་དེ་བཟླས་པ་བྱས་ན་དེ་ལ་གསུངས་པའི་དངོས་གྲུབ་ཏུ་འགྱུར་རོ། །གསང་བ་པོ་ནི་སྔགས་འདི་ཉིད། །ཁ་
ཅིག་ལ་ཡང་མི་སྦྱིན་ནོ། །བློ་ལྡན་སེམས་ཅན་དོན་བརྩོན་པའི། །སེམས་བརྟན་པ་ལ་སྦྱིན་པར་བྱ། །མཆོད་རྟེན་ལས་བྱེད་ཉིད་ལ་ནི། །བློ་ལྡན་འབད་པས་སྦྱིན་པར་བྱ། །རང་ཉིད་དང་ནི་ནོར་དག་གིས། །བླ་མ་ལ་རྟག་གུས་པར་བྱ། །རྡོ་རྗེ་སློབ་དཔོན་རྣལ་འབྱོར་ལ། །མཆོག་
ཏུ་གྱུར་པའི་ཡོན་ཡང་དབུལ། །གང་དང་གང་ནི་བཏང་དཀའ་བ། །མཆོག་ཏུ་གྱུར་བར་འདིར་ནི་བསྔགས། །ཆུང་མ་སྲིང་མོ་དང་ཡང་ནི། །བུ་མོ་དང་ནི་ཚ་མོ་དག །བུ་མོ་རྒྱན་ཀུན་བརྒྱན་པར་བྱ། །གླང་ཆེན་རྟ་དང་ཤིང་རྟ་དང་། །ཕྱུགས་དང་གྲོང་ཁྱེར་རྒྱལ་སྲིད་དང་། །ཡུལ་འཁོར་རྒྱལ་

སྲིད་ལྡན་པ་དང་། །རིན་ཆེན་སྣ་ཚོགས་དག་ཀྱང་ནི། །གཞན་ཡང་རྡོ་རྗེ་སློབ་དཔོན་དབུལ། །རྡོ་རྗེ་སློབ་དཔོན་དགྱེས་གྱུར་པ། །ཐམས་ཅད་རབ་སྦྱིན་དབུལ་བར་བྱ། །འཇིག་རྟེན་དབང་ཕྱུག་གི་རྟོག་པ་རྫོགས་སོ།། །།རྒྱ་གར་གྱི་མཁན་པོ་ཛམ་བྷ་ལ་དང་། བོད་ཀྱི་
ལོཙྪ་བ་དགེ་སློང་པ་རིས་བསྒྱུར་ཅིང་གཏན་ལ་ཕབ་པ།། ༄༅། །རྒྱ་གར་སྐད་དུ། པདྨ་མུ་ཀུ་ཊནྟྲ་ནཱ་མ། བོད་སྐད་དུ། པདྨ་ཅོད་པན་ཞེས་བྱ་བའི་རྒྱུད། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་ལྷའི་གཞལ་མེད་ཁང་ན་ལོངས་སྤྱོད་རྫོགས་པའི་སྐུར་སངས་རྒྱས་ནས་བྱང་ཆུབ་སེམས་དཔའི་འཁོར་དཔག་ཏུ་མེད་པ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཐུགས་རྗེ་ཆེན་པོའི་སྒོ་ཀུན་ནས་འཕྲོ་བ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ཏེ། འོད་ཟེར་གྱིས་རྣམ་པར་སྣང་མཛད་གང་ཆེན་མཚོའི་ཞིང་གི་རྡུལ་ལ་རེག་པས་རེག་མ་ཐག་ཏུ་བསྐལ་པ་བཟང་པོའི་སངས་རྒྱས་སྟོང་རྩ་གཉིས་ལ་མཆོད་ནས། འོད་ཟེར་དེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །ནུབ་མ་ཐག་ཏུ་ཐུགས་རྗེ་ཆེན་པོ་
ཕྱག་སྟོང་སྤྱན་སྟོང་དང་ལྡན་པ་སྐུ་མདོག་གངས་ཀྱི་རྩེ་ལ་ཉི་མ་ཤར་བ་ལྟར་དཀར་བ་ཞལ་བཅུ་གཅིག་གི་རྩ་བའི་ཞལ་དཀར་པོ། །སྟེང་ཞལ་སེར་བ། གཡས་ལྗང་གུ། གཡོན་དམར་བ། སྟེང་གི་གསུམ་ནག་པོ། །བཅོམ་ལྡན་འདས་ཀྱི་དབུ་ནི་བྱི་རུ་བཅག་པ་ལྟ་བུར་གྱུར་ཏེ། འཛུམ་
པ་མཛད་ནས་ཐུགས་རྗེ་ཆེན་པོའི་བདག་པོ་འཕགས་པ་སྤྱན་རས་གཟིགས་དབང་ཕྱུག་ལ་གཟིགས་སོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཐལ་མོ་སྦྱར་ཏེ་བཅོམ་ལྡན་འདས་ལ་གསོལ་པ། སྐུ་དང་སྔགས་དང་ལས་རྣམས་དང་། །ཁྱད་པར་
ཆོ་ག་བསྟན་པར་གྱིས། །ཞེས་གསོལ་བ་བཏབ་ནས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས་བཀའ་སྩལ་པ། སྐུ་ཡི་རྣམ་པ་འདི་ལྟ་སྟེ། །ཐུགས་རྗེ་དག་པས་ཆུ་ཤེལ་ཏེ། །མཉམ་པར་བཞེངས་

པས་འགྲོ་དོན་མཛད། །ཆུ་ཤེལ་མདོག་འདྲ་ཞལ་གསུམ་དཀར། །ལྗང་གུའི་མདོག་ཅན་ནག་པོ་ཆེ། །སེར་པོ་དེ་བཞིན་བཅོམ་ལྡན་དམར། །དྲང་སྲོང་རྟག་ཏུ་རི་དགས་བརྒྱན། །ཞི་བ་འཛུམ་དང་བཞད་པ་དང་། །ཁྲོས་པའི་ཞལ་མངའ་སྤྱན་གསུམ་མཛེས། །བཅུ་
པ་སེམས་དཔའི་རྟགས་ཅན་དེ། །བཅུ་གཅིག་བཅོམ་ལྡན་འདས་ཀྱི་བདག །ཡོན་ཏན་ནོར་བུ་མུ་ཏིག་ཕྲེང་། །ཕྲིན་ལས་སྣ་ཚོགས་སྨད་དཀྲིས་པ། །དང་པོའི་ཕྱག་ནི་ཐལ་སྦྱར་ཏེ། །གཡས་པ་རིན་ཆེན་ཕྲེང་བ་འཛིན། །གཡོན་པ་དྲི་མེད་པདྨ་འཛིན། །གཡས་པ་མཆོག་སྦྱིན་
མཛད་པ་པོ། །གཡོན་པ་རིལ་བ་སྤྱི་བླུགས་ཏེ། །གཡས་པ་འཁོར་ལོ་རབ་ཏུ་འཛིན། །གཡོན་པ་ན་ནི་མདའ་གཞུ་སྟེ། །ལྷག་མ་མཆོག་སྦྱིན་སྤྱན་ལྡན་པའོ། །དེ་ནས་ཡང་བཅོམ་ལྡན་འདས་ཀྱིས་འཛུམ་པ་མཛད་དེ། ཅོད་པན་གཉིས་ནས་འོད་ཟེར་རབ་ཏུ་འཕྲོས་པ་དང་། བཅོམ་ལྡན་
འདས་ལ་སངས་རྒྱས་ཐམས་ཅད་ཀྱི་བྱིན་གྱིས་བརླབས་ལས་བྱུང་བའི་པདྨའི་སྟེང་དུ་རིགས་ལྔ་བྱུང་བ་འདི་ལྟ་སྟེ། རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་དང་། མི་བསྐྱོད་པའོ། །ཁང་བུ་བརྩེགས་པ་རིན་པོ་ཆེ་དེའི་ནང་དུ་
སེང་གེ་དང་། རྟ་དང་། རྨ་བྱ་དང་། ནམ་མཁའ་ལྡིང་དང་། གླང་པོ་ཆེ་དེ་དག་ནི་ཅོད་པན་ལས་བྱུང་བའོ། །ཡང་ཡུམ་ནི་སྐུ་མདོག་སྔོན་མོ་སྟེ། །པདྨ་ལས་བྱུང་པདྨའི་སྟེང་། །ཚད་མེད་བཞི་སྟེ་ཕྱག་བཞི་མཛེས། །སེམས་དཔའི་རྒྱན་དུ་ལྡན་པ་ཡི། །མཉམ་པ་ཡི་ནི་སྐྱིལ་
ཀྲུང་བཅས། །ཡབ་ནི་སྐུ་མདོག་སེར་པོ་སྟེ། །པདྨ་ལས་བྱུང་པདྨའི་སྟེང་། །ཐལ་སྦྱར་ནོར་བུ་བགྲང་ཕྲེང་འཛིན། །རྒྱན་རྣམས་ཡོངས་སུ་འཛིན་པའོ། །ཡང་ན་འོད་ཟེར་རབ་བཀྱེ་སྟེ། །ཟླ་བ་ཉི་མ་ལས་བྱུང་བའི། །ཉི་མའི་མདོག་ཅན་ཉི་མ་ནི། །གཞོན་ནུ་ཨུཏྤལ་མཆོག་
སྦྱིན་མཛད། །ཟླ་བ་ལས་སྐྱེས་ནམ་མཁའི་མདོག །ཅུང་ཞིག་ཁྲོས་པ་རྡོ་རྗེ་ཅན། །དཀར་པོ་གངས་ལྟར་དཀར་བ་སྟེ། །ཉི་ཟླའི་སྟེང་ན་པདྨ་འཛིན། །དྲག་པོ་གཉིས་དང་ཧྲཱིཿཡིག་ལས། །གཉིས་མེད་ཚུལ་གྱིས་འབྲས་བུ་རྫོགས། །ཧ་ཡ་གྲི་བ་ཁམས་གསུམ་སྡུད། །ཁྲོ་

གཉེར་ཅན་གྱི་ཕྲིན་ལས་མཛད། །གཤིན་རྗེ་གཤེད་པོ་གཏེར་འཛིན་ཅིང་། །ཁམས་གསུམ་རྣམ་རྒྱལ་བདུད་སྡེ་འཇོམས། །འཁོར་ལོ་དཀར་པོ་དག་པའི་སྟེང་། །གྲུ་བཞི་སྒོ་བཞི་རྟ་བབས་བཅས། །དང་པོར་དཀོན་མཆོག་རབ་དད་ཅིང་། །ཚད་མེད་བཞི་ནི་རབ་ཏུ་རྫོགས། །བྱང་ཆུབ་
ཡན་ལག་རྫོགས་པ་དང་། །ཆོས་དབྱིངས་རང་བཞིན་སྟོང་ཉིད་དོ། །གླེང་གཞི་དང་སྐུ་བསྟན་པའི་ལེའུ་སྟེ་དང་པོའོ།། །།དེ་ནས་གསང་སྔགས་བསྟན་པའི་ཕྱིར། བཅོམ་ལྡན་འདས་ཀྱིས་རྣམ་པར་སྣང་མཛད་གང་ཆེན་མཚོའི་ཞིང་ཁམས་ཐམས་ཅད་དུ་འོད་བཀྱེ་ནས་གཙུག་ཏུ་ནུབ་པར་
གྱུར་ཏོ། །དེ་ནས་ཡང་གསུངས་པ། ཨོྃ་ཧཱུྃ་ཏྲཱཾ་ཧྲཱིཿཨཿ། ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཛྙཱ་ན་སཱ་ག་རཱ་ཡ། བཻ་རོ་ཙ་ནཱ་ཡ། བྱཱུ་ཧ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ་སམྱཀྶཾ་བུདྡྷཱ་ཡ། ན་མཿསརྦ་ཏ་ཐཱ་ག་ཏེ་བྷྱཿ། ཨཪྷད་བྷྱཿསམྱཀྶམ་བུད་དྷེ་བྷྱཿ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭ་
ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ། བཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མ་བ་རེ། ཨི་ལི་མི་ལི། ཙི་ཏི་ཛྭ་ལ་མ་པ་ན་ཡ་སྭཱ་ཧཱ། སྔགས་འདི་འདོན་པར་བྱེད་པའི་རིགས་ཀྱི་བུའམ་རིགས་ཀྱི་
བུ་མོས་ལན་ཅིག་བརྗོད་དམ་དྲན་ཞིང་ཡིད་ལ་བྱས་སམ་ལུས་ལ་བཅངས་ན་མཚམས་མེད་པ་ལྔ་དང་། དེ་དང་ཉེ་བའི་སྡིག་པའི་ལས་བྱང་ཞིང་སེམས་ཅན་དམྱལ་བ་དང་ཡི་དགས་དང་དུད་འགྲོའི་སྐྱེ་གནས་སུ་མི་སྐྱེ་ཞིང་མི་ཁོམ་པ་བརྒྱད་དུ་སྡུག་བསྔལ་དང་བཅས་པར་མི་འགྱུར་རོ། །གཅན་
གཟན་དང་། སྲིན་པོ་དང་། མི་མ་ཡིན་པ་དང་། ནད་དང་འཇིགས་པ་ཐམས་ཅད་ལས་གྲོལ་བར་འགྱུར་རོ། །ཨོྃ་རཀྵ་རཀྵ་ཞེས་པས་ཀྱང་བསྲུང་བར་བྱའོ། །ཨོྃ་ཨ་ཀཱ་རོ་མུ་ཁཾ་སརྦ་དྷརྨཱ་རྞཱཾ། ཨཱདྱ་ནུད་པནྣ་ཏྭཱཏ་ཞེས་པས་གཏོར་མའི་ཆུས་ཡི་དགས་ལ་མཆོད་པར་བྱ་སྟེ།
ཨོྃ་ཨཱཿཧཱུྃ་ཞེས་པས་སོ། །དེ་རྣམས་ཀྱི་སྔགས་བསྡུས་པ་ནི། ཨོྃ་མ་ཎི་པདྨེ་ཧཱུྃ་ཞེས་པའོ། །འདི་ནི་རིགས་གསུམ་གྱི་བདག་པོར་འགྱུར་ཏེ། དེའི་ཕན་ཡོན་ནི་འདིའོ། །ཆོས་ཀྱི་སྐུ་དང་གཟུགས་ཀྱི་སྐུའི་ཐུགས་རྗེ་ཆེན་པོར་མཐོང་བར་འགྱུར་རོ། །ཨོྃ་ན་མཿསརྦ་ཏ་ཐཱ་ག་ཏ་དྷཱུ་པེ་

པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་ན་མཿསརྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་ན་མཿསརྦ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་ན་མཿསརྦ་ཏ་ཐཱ་ག་ཏ་ག་ན་དྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་ན་མཿསརྦ་ཏ་ཐཱ་ག་ཏ་ནཻ་
ཝི་དྱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་ན་མཿསརྦ་ཏ་ཐཱ་ག་ཏ་ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་མཆོད་པས་ཡང་དག་མཆོད། །སྟོང་ཉིད་ཡེ་ཤེས་ལས་བྱུང་བའི། །ཐབས་དང་ཤེས་རབ་
གཉིས་ལྡན་པའི། །ཧྲཱིཿཡིག་དཀར་པོ་ཡང་དག་བཟླས། །སྔགས་ཀྱི་ལེའུ་སྟེ་གཉིས་པའོ།། །།ལས་དང་ཆོ་ག་བསྟན་པའི་ཕྱིར། །དང་པོ་ཞི་བའི་ལས་སྒྲུབ་ན། །ཡིད་དུ་འོང་བའི་ལྗོངས་དག་ཏུ། །དཀར་པོ་དང་པོ་གསལ་དུས་སུ། །དྲི་ཞིམ་ཆུ་ཡིས་ལེགས་བྱུགས་ཏེ། །མེ་
ཏོག་དཀར་པོ་བཀྲམ་བྱས་ནས། །ཁྲུས་དང་ཁ་ཟས་ཕྱོགས་མཐུན་པའི། །བདེ་བའི་སྟན་ལ་ཉེར་འདུག་སྟེ། །བུམ་པ་དཀར་པོ་ཙནྡན་དཀར། །དྲིས་བཀང་ཤིང་གོས་ལེགས་པར་དཀྲི། །མཎྜལ་དབུས་སུ་ལེགས་པར་བཞག །ཧྲཱིཿལས་བྱུང་བའི་སེམས་དཔའི་སྐུ། །ཞལ་
གཅིག་ཕྱག་གཉིས་སྐུ་མདོག་དཀར། །རྒྱན་རྣམས་རྫོགས་པ་པདྨ་བསྣམས། །ཟླ་བའི་གདན་ལ་ལེགས་བཞུགས་པ། །ཧྲཱིཿལས་འོད་ཟེར་འཕྲོ་བ་བསྒོམ། །ཕྱག་སྟོང་སྤྱན་ཡང་དེ་བཞིན་ཏེ། །རྒྱས་པའི་སྐུ་ནི་མདུན་བསམས་ནས། །ཧྲཱིཿཡི་འཕྲོ་འདུ་གསལ་བ་ནི། །བཟླས་
བ་རབ་ཏུ་གསལ་བ་སྟེ། །གསང་སྔགས་འདི་ནི་བརྗོད་པར་བྱ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཛྙཱ་ན། སཱ་གར། བཻ་རོ་ཙ་ན། བྱཱུ་ཧ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ། སམྱཀྶཾ་བུད་དྷཱ་ཡ། ན་མཿསརྦ་ཏ་ཐཱ་ག་ཏེ་བྷྱཿ། ཨཪྷད་བྷྱཿ། སམྱཀྶཾ་བུདྡྷ་ཡ། ན་མ་ཨཱརྱཱ་བ་ལོ་
ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨ་མི་ཏ་བྷ་ལ་ཆེ་གེ་མོ་ཤནྟི་དྐུ་རུ་སྭཱ་ཧཱ། ཞེས་བཟླས་པར་བྱའོ། །བྲུྃ། རྣམ་པར་སྣང་མཛད་བུམ་པའི་ཆུས། །གང་ཞིག་ལེགས་པར་ཁྲུས་བྱེད་པ། །དྲི་མ་ཐམས་ཅད་ཡོངས་དག་ནས། །འབྲས་བུ་བདེ་བ་

དེ་ཐོབ་འགྱུར། །འཇིགས་པ་ཀུན་ལས་རབ་གྲོལ་ཏེ། །མྱུར་དུ་ཆུ་སྐྱེས་ཐོབ་པར་འགྱུར། །དེ་ནས་རྒྱས་པ་སྒྲུབ་འདོད་ན། །ནགས་ཚལ་ཤིན་ཏུ་མཐུག་པོ་རུ། །དྲི་ཞིམ་ཆུ་ཡིས་ལེགས་བྱུགས་ལ། །འབྲས་བུར་བཅས་པའི་མེ་ཏོག་དགྲམ། །རྒྱན་རྣམས་ཡོངས་སུ་བརྟགས་
ནས་ནི། །བདེ་བའི་སྟན་ལ་ཉེར་འདུག་སྟེ། །རིན་ཆེན་སྣ་ལྔ་འབྲུ་སྣར་བཅས། །རིན་ཆེན་ག་འུར་བླུགས་བྱས་ལ། །མཎྜལ་དབུས་སུ་ལེགས་པར་གཞག །ཧྲཱིཿལས་བྱུང་བ་སེམས་དཔའི་སྐུ། །ཞལ་གཅིག་ཕྱག་གཉིས་སྐུ་མདོག་སེར། །རྒྱན་རྣམས་རྫོགས་པ་པདྨ་
བསྣམས། །ཕྱག་སྟོང་སྤྱན་ཡང་དེ་བཞིན་ཏེ། །རྒྱས་པའི་སྐུ་ནི་མདུན་བསམས་ནས། །མཆོད་པ་ལྔ་ཡིས་ཡང་དག་མཆོད། །ཧྲཱིཿཡི་འཕྲོ་འདུ་གསལ་བར་བཟླས། །ན་མོ་རཏྣ་ཏྲ་ཡཱ་ཡ། ན་མཿཨཱརྱ་ཛྙཱ་ན་སཱ་ག་རཱ་ཡ། བཻ་རོ་ཙ་ནཱ་ཡ། བྱཱུ་ཧ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཪྷ་ཧེ།
སམྱཀྶཾ་བུདྡྷ་ཡ། ན་མཿསརྦ་ཏ་ཐཱ་ག་ཏེ་བྷྱཿ། ཨཪྷད་བྷྱཿསམྱཀྶཾ་བུདྡྷེ་བྷྱཿ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། རཏྣ་ཀུ་ན་པུཥྚིཾ་ཀུ་རུ་སྭཱ་ཧཱ། བང་མཛོད་སྟོང་པའི་སྟེང་གཞག་སྟེ། །འབྲུ་ཡིས་ཡོངས་སུ་ཁེངས་པར་འགྱུར། །དེ་ནས་
དབང་གི་ལས་བྱེད་ན། །སྡུད་པར་བྱེད་པའི་ཆུ་ཀླུང་འགྲམ། །པ་ལ་ཤ་དང་ཨ་ཤྭཏྠ། །མེ་ཏོག་དམར་པོར་རིལ་བུ་བྱས། །བསེ་གབ་དམར་པོའི་ནང་དུ་གཞུག །མེ་ཏོག་དམར་པོས་རབ་ཏུ་མཆོད། །ཧྲཱིཿཡིག་ལས་བྱུང་སྒྲོལ་མ་ནི། །ལྗང་གུ་ཕྱག་ན་ལྕགས་ཀྱུ་འཛིན། །ཕྱག་
སྟོང་སྤྱན་ཡང་དེ་བཞིན་ཏེ། །རྒྱས་པའི་སྐུ་ནི་མདུན་བསམས་ནས། །མཆོད་པ་ལྔ་ཡིས་ཡང་དག་མཆོད། །ཧྲཱིཿཡི་འཕྲོ་འདུ་གསལ་བར་བཟླས། །ན་མོ་རཏྣ་ཏྲ་ཡཱ་ཡ། ན་མཿཨཱརྱ་ཛྙཱ་ན། སཱ་ག་རཱ་ཡ། བཻ་རོ་ཙ་ནཱ་ཡ། བྱཱུ་ཧ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ། སམྱཀྶཾ་བུདྡྷཱ་ཡ། ན་མཿ
སརྦ་ཏ་ཐཱ་ག་ཏེ་བྷྱཿ། ཨཪྷད་བྷྱཿསམྱཀྶཾ་བུདྡྷེ་བྷྱཿ། ན་མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཨ་མོ་གྷ་བྷ་སྨིཾ་ཀུ་རུ། ཨོྃ་ཏཱ་རེ་ཏུཏྟཱ་རེ་ཏུ་རེ་ཨ་མོ་གྷ་བྷ་སྨིཾ་ཀུ་རུ་སྭཱ་ཧཱ། རྫས་ཀྱི་ལྡེ་གུས་ལུས་བྱུགས་ནས། །བྱུགས་པ་དེ་ཡིས་ཁུགས་པར་འགྱུར། །དེ་ནས་

ཕྲིན་ལས་བྱ་འདོད་ན། །དུར་ཁྲོད་ཤིང་གཅིག་དག་ཏུ་ནི། །བ་ཡི་ལྕི་བས་ལེགས་བྱུགས་ནས། །མེ་ཏོག་སྔོན་པོ་ནི་མ་པ་ཡི། །སྤོས་ཀྱི་ཚོམ་བུ་ལྔ་བྱས་དགྲམ། །བྱང་དུ་འདུག་སྟེ་ལས་འདི་བརྩམ། །གཅན་གཟན་སྟེང་དུ་ཆུ་ཤེལ་
ཏེ། །ཧྲཱིཿཡི་ཡི་གེ་ལས་བྱུང་བའི། །མདོག་དཀར་རལ་པའི་ཐོར་ཚུགས་ཅན། །ཞལ་གཅིག་སྤྱན་ནི་གསུམ་པ་སྟེ། །རི་དགས་པགས་པ་འཛིན་པ་ཡི། །དྲང་སྲོང་ཁྲོས་པའི་ཆ་བྱད་ཅན། །ཕྱག་བཞི་དང་པོ་མཆོག་སྦྱིན་པ། །གཡོན་པ་པད་སྟེང་རལ་གྲི་ཅན། །
གཡས་པ་ལྟོས་འགྲོས་བརྒྱན་པའི་མདུང་། །རྩེ་གསུམ་དཀར་པོས་བརྒྱན་པའོ། །གཡོན་པ་ཐོད་པ་དཀར་པོ་སྟེ། །དྲི་ཞིམ་མེ་ཏོག་དག་གིས་བཀང་། །རྒྱལ་པོ་ཆེན་པོའི་རོལ་པ་ལྟར། །ཅུང་ཞིག་ཟུར་གྱིས་གཟིགས་པའོ། །ཕྱག་སྟོང་སྤྱན་ཡང་དེ་བཞིན་ཏེ། །བསྐལ་པ་བཟང་པོའི་
སངས་རྒྱས་སྟོང་། །པདྨའི་གདན་ལ་ལེགས་བཞུགས་པའི། །རྒྱས་པའི་སྐུ་ནི་ལེགས་བསམས་ནས། །ཧྲཱིཿཡི་འཕྲོ་འདུ་ལས་བྱུང་བའི། །གསང་སྔགས་རྒྱལ་པོ་བཟླས་པར་བྱ། །ན་མོ་རཏྣ་ཏྲ་ཡཱ་ཡ། ན་མཿཨཱརྱ་ཛྙཱ་ན་སཱ་ག་རཱ་ཡ། བཻ་རོ་ཙ་ནཱ་ཡ། བྱཱུ་ཧ་རཱ་ཛཱ་ཡ། ཏ་ཐཱ་ག་
ཏཱ་ཡ། ཨཪྷ་ཏེ། སམྱཀྶཾ་བུདྡྷ་ཡ། ན་མཿསརྦ་ཏ་ཐཱ་ག་ཏེ་བྷྱཿ། ཨཪྷད་བྷྱཿ། སམྱཀྶཾ་བུདྡྷེ་བྷྱཿ། ན་མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་ཨ་ཀ་ཊེ། ནི་ཀ་ཊེ། ཀི་ཊ་ཀ་ཊེ། ཀ་རོ་ཊེ་ཀ་རོ་ཊ། བཱིརྱེ་སྭཱ་ཧཱ། ཨོྃ་ཀརྨ་
ཨ་མོ་གྷ། བི་བཛྲ་སིཾ་ཧ་ནཱ་དི་ཧཱུྃ་ཕཊ། དྲིའམ་བྱུག་པ་དག་ལ་ནི། །བཏབ་ལ་ལུས་ལ་བྱུག་པར་བྱ། །མེ་ཏོག་སྔོན་པོ་མགོ་ལ་གཞག །མཎྜལ་ཆུ་ཡིས་ལུས་ལ་བྱུག །ཉི་ཤུ་རྩ་ལྔ་བཟླས་ནས་ནི། །ལས་རྣམས་ཐམས་ཅད་གྲུབ་པར་འགྱུར། །དེ་ནས་བཞི་ཀ་
སྒྲུབ་འདོད་ན། །བཀྲ་ཤིས་དུས་གསུམ་རྫོགས་དུས་སུ། །རི་བོ་ཡིད་འོང་གནས་དག་ཏུ། །ས་གཞི་ཆག་ཆག་ལེགས་བཏབ་སྟེ། །མཎྜལ་ལེགས་བྱས་མེ་ཏོག་ནི། །དྲི་ཞིམ་དཀར་པོས་ཡོངས་གཏོར་ཏེ། །གཙང་ཞིང་དག་པའི་རྫས་རྣམས་དགྲམ། །གཙང་མ་བྲམ་ཟེ་

བྱས་ཏེ་གཞག །ཁྲུས་དང་ཀུ་ཤའི་སྟེང་གནས་ཏེ། །ཧྲཱིཿལས་བྱུང་བའི་ཆུ་སྐྱེས་སྟེང་། །ཆུ་ཤེལ་མདོག་འདྲ་ཞལ་གསུམ་ཡང་། །འཛུམ་དང་ཞི་བའི་བདག་ཉིད་ཅན། །ལྗང་གུ་བཞད་པའི་ཞལ་གསུམ་སྟེ། །ནག་པོ་ཁྲོས་པ་དམར་སེར་སྐྲ། །སེར་པོའི་ཞལ་ནི་འཛུམ་པ་སྟེ། །
དམར་པོ་བཅོམ་ལྡན་འདས་ཀྱི་དབུ། །རི་དགས་པགས་པས་སྟོད་གཡོགས་ཤིང་། །སྣ་ཚོགས་ཤམ་ཐབས་མནབས་པ་ཡི། །ཞབས་གཉིས་ཕྱག་དྲུག་མཉམ་པར་བཞེངས། །གཡས་གཡོན་དང་པོ་ཐལ་མོ་སྦྱར། །བར་མ་པདྨ་བགྲང་ཕྲེང་འཛིན། །ཐ་མ་མཆོག་སྦྱིན་སྤྱི་
བླུགས་འཛིན། །བུམ་པ་རྣམ་སྣང་ལྷ་མོ་ནི། །ལ་སེ་མ་ལེ་གཱི་རྟི་སྟེ། ནི་རྟི་ནང་གི་ལྷ་མོ་དག །ཟླ་བའི་གདན་ལ་ལེགས་པར་བཞུགས། །ཧྲཱིཿཡི་ཡི་གེ་ལས་བྱུང་བའི། །གསང་སྔགས་རྒྱལ་པོ་བཟླས་པར་བྱ། །ན་མོ་རཏྣ་ཏྲ་ཡཱ་ཡ། ན་མཿཨཱརྱ་ཛྙཱ་ན་སཱ་ག་རཱ་ཡ། བཻ་རོ་ཙ་ནཱ་
ཡ། བྱཱུ་ཧ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ། སམྱཀྶཾ་བུདྡྷ་ཡ། ན་མཿསརྦ་ཏ་ཐཱ་ག་ཏེ་བྷྱཿ། ཨཪྷད་བྷྱཿ། སམྱཀྶཾ་བུདྡྷེ་བྷྱཿ། ན་མཿཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་བཊྚེ།
ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མ་བ་རེ། ཨི་ལི་མི་ལི་ཙི་ཏི་ཛྭ་ལ་མ་པ་ན་ཡེ་སྭཱ་ཧཱ། བུམ་པའི་ཆུ་ལ་ལེགས་བསྒྲུབས་ནས། །ལུས་ལ་བྱུགས་པས་གྲུབ་པར་འགྱུར། །ཆོ་གས་བསྒྲུབས་པའི་ལེའུ་སྟེ་གསུམ་པའོ།། །།དེ་ནས་ཐབས་ཀྱི་རིམ་པ་ནི། །གྲོ་
གའམ་རས་སམ་ཤིང་ཤུན་ལ། །ར་ཡི་འོ་མས་བྲིས་པ་ཡི། །ཚོམ་བུ་ལྔ་ཡི་འཁོར་ལོ་ལ། །དབུས་སུ་སྐུ་ཡི་ས་བོན་ཏེ། །ལྔ་པ་ཡི་ནི་ལྔ་པ་སྟེ། །ཤར་དུ་དེ་ཡང་བྲི་བར་བྱ། །བཞི་པའི་ལྔ་པས་དབུས་སུ་མཚན། །ལྷོ་རུ་དེ་ནི་ཡང་དག་དགོད། །ལྔ་པའི་དང་པོ་བཞི་པའི་
གསུམ། །ནུབ་ཏུ་དེ་ནི་ཡང་དག་དགོད། །ལྔ་པ་ཡི་ནི་ལྔ་པ་ལ། །ཨེ་ཡིས་རྣམ་པར་སྦྱར་བས་ཏེ། །བྱང་དུ་དེ་ནི་ཡང་དག་དགོད། །དབུས་སུ་ཐུགས་ཀྱི་ས་བོན་ཏེ། །ཤཱནྟིཾ་ཀུ་རུ་མཚམས་སུའོ། །སྭཱ་ཧཱ་དབུས་སུ་དགོད་པར་བྱ། །དེ་ལྟར་འཁོར་ལོ་གསལ་བཀོད་

ནས། །དངུལ་ལམ་དཀར་པོའི་ག་འུར་གཞུག །ཐམས་ཅད་ལས་ཀུན་ཞི་བར་འགྱུར། །ཡུང་བའི་ཆུ་ཡིས་བྲིས་པ་ཡི། །པུཥྚིཾ་ཀུ་རུ་མཚམས་སུའོ། །ཙནྡན་དཀར་པོ་དྲི་ཞིམ་ཞིང་། །ཁམ་ཕོར་སེར་པོར་ལེགས་པར་གཞུག །རྒྱས་པའི་ལས་རྣམས་གྲུབ་
པར་འགྱུར། །པ་ལ་ཤ་ཡིས་ལེགས་པར་བྲིས། །བ་ཤཾ་ཀུ་རུ་མཚམས་སུ་དགོད། །ཁམ་ཕོར་དམར་པོར་ལེགས་པར་གཞུག །དབང་གི་ལས་རྣམས་འགྲུབ་པར་འགྱུར། །ནིམ་པའི་ཆུ་ཡིས་ལེགས་པར་བྲི། །མཱ་ར་ཡ་ནི་མཚམས་སུ་དགོད། །ལྕགས་སམ་ཐོད་པར་
ཡང་དག་གཞུག །ཕྲིན་ལས་ཐམས་ཅད་གྲུབ་པར་འགྱུར། །ཙནྡན་དཀར་པོ་དྲི་ཞིམ་ཞིང་། །ཞི་བས་དེ་ནི་མེ་ལ་བསྲེག །འབྲས་བུ་མངར་དང་བཅས་པའི་ཤིང་། །རྒྱས་པས་དེ་ནི་མེ་ལ་བསྲེག །དབང་ནི་པ་ལ་ཤ་ཡི་ཤིང་། །དེ་ལ་བསྲེགས་ན་ཁུགས་པར་འགྱུར། །
ནིམ་པའི་ཤིང་ལ་ཚར་གཅད་པའི། །བསྲེགས་པས་ཕྲིན་ལས་འགྲུབ་པར་འགྱུར། །འཁོར་ལོའི་ལེའུ་སྟེ་བཞི་པའོ།། །།དེ་ནས་ལས་ཀྱི་རིམ་པ་ནི། །དཱུར་བའི་རྩྭ་དང་འབྲས་ཀྱི་འདབ། །ཏིལ་དང་ཡུངས་ཀར་ཅི་ཙེ་ལ། །གསང་སྔགས་བཟླས་ནས་གྲུབ་པ་ནི། །ད་ལིའི་
ཤིང་ལ་ལེགས་བསྲེགས་ནས། །ཐམས་ཅད་རབ་ཏུ་ཞི་བར་ནུས། །ཀུ་ཤ་སྟར་བུ་ཤུག་འབྲུམ་དང་། །སྟག་མའི་མེ་ཏོག་དམར་པོ་ལ། །གསང་སྔགས་བཟླས་པར་རབ་བྱ་སྟེ། །ཙནྡན་ཤིང་ལ་ལེགས་བསྲེགས་ནས། །རྒྱས་པར་བྱ་བའི་ལས་གྲུབ་ཅིང་། །ནུས་པ་མཆོག་
ནི་ཐོབ་པར་འགྱུར། །པ་ལ་ཤ་ཡི་ཤིང་དག་དང་། །ཁྲེ་