Kinh tạng Tây Tạng (Kangyur Đại Học) — 093_རྒྱུད་འབུམ།_ཙ

འཁོར་ཆེན་པོ་དེ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། ལྷ་དང་ཀླུ་དང་། འབྱུང་པོ་གནས་པ་རྣམས་བཅོམ་
ལྡན་འདས་ཀྱི་སྙིང་པོ་འདིའི་བསྔགས་པ་བརྗོད་པ་ཐོས་ནས། ཐམས་ཅད་རབ་ཏུ་དགའ་སྟེ། བཀའ་བཞིན་དུ་འཛིན་ཏོ། །དེ་ནས་བྱང་ཆུབ་སེམས་དཔའ་ཉི་འོད་ཀྱིས་རིག་སྔགས་དེ་སྲུང་བའི་ཕྱིར། གསང་སྔགས་འདི་སྨྲས་སོ། །སངས་རྒྱས་གཙོ་ལ་ཕྱག་འཚལ་ལོ། །སྐྱོབ་
བའི་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་ལ་རྟག་ཏུ་ཕྱག་འཚལ་ལོ། །སུས་ཚིགས་སུ་བཅད་པ་འདི་བརྗོད་ན། དེ་སྡིག་པ་ཐམས་ཅད་འབྱང་བར་འགྱུར་རོ། །བགེགས་བྱེད་པ་བདུད་དང་མི་ཕྲད་པར་འགྱུར་རོ། །ཡམས་ཀྱི་ནད་
རྣམས་ཞི་བར་འགྱུར་རོ། །ཉིན་གཅིག་ལ་དུས་གསུམ་དུ་བརྗོད་ཅིང་། དཀོན་མཆོག་གསུམ་ལ་ཕྱག་འཚལ་ན། དགེ་བའི་རྩ་བ་དེས་ཚེ་རབས་གཞན་ན་གཟུགས་དང་ལྡན་པར་སྐྱེ་བར་འགྱུར་རོ། །སེམས་ཅན་རྣམས་དགའ་བར་འགྱུར་རོ། །དེའི་ཚེ་བྱང་ཆུབ་སེམས་དཔའ་ཟླ་འོད་
ཀྱིས་རིག་སྔགས་འཆང་དེ་སྲུང་བའི་ཕྱིར་གསང་སྔགས་འདི་སྨྲས་སོ། །ཤ་མ་ཏ་ཏེ་ཏ་ཏུ་སུ་ཏེ། ཨཱཛྙཱ་བ་ཏེ། ཨུ་ཏུ་ཏེ། ཤཾ་ཁྲི་སྟེ། བརྨ་ནྱ་ཏེ། ཨ་ཏུ་ཊེ། ཀུ་ལ་ཏ་ཏེ། ཁི་མ་ཊེ་སྭཱ་ཧཱ། གསང་སྔགས་འདི་ནི་ཞལ་ནས་གསུངས་པའོ། །གསང་སྔགས་འདི་ལན་ལྔ་བཟླས་བརྗོད་
བྱས་ལ། ཚོན་སྣ་བདུན་པའི་སྐུད་པས་བཅིང་བ་བྱ་སྟེ། གསང་སྔགས་འཆང་གང་དུ་ན་བར་གྱུར་པ་དེར་བཅིང་བར་བྱའོ། །གསང་སྔགས་འདི་ནི་སྔོན་གྱི་སངས་རྒྱས་གང་གཱའི་ཀླུང་བཞི་བཅུའི་བྱེ་མ་སྙེད་ཀྱིས་གསུངས་ཏེ། བདག་གིས་ཀྱང་ད་རིག་སྔགས་འཆང་རྣམས་སྲུང་བའི་ཕྱིར་

སྨྲས་སོ། །བགེགས་དང་ཡམས་ཀྱི་ནད་ཐམས་ཅད་ཞི་བར་བྱེད་དོ། །སྡིག་པ་ཐམས་ཅད་དང་ནད་ཐམས་ཅད་བྱང་བར་བྱེད་དོ། །འཇིགས་པ་ཐམས་ཅད་དང་བྲལ་བར་འགྱུར་རོ། །དགེ་བ་ཐམས་ཅད་ཀྱང་ཡོངས་སུ་རྫོགས་པར་འགྱུར་རོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་
དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་སྤྱན་རས་གཟིགས་དབང་ཕྱུག་གིས་སྨྲས་པའི་གསང་སྔགས་འདི་ནི་དེ་བཞིན་ནོ། །མ་ནོར་བ་དེ་བཞིན་ནོ། །དོན་ཡོད་པའོ། །སུ་བྱང་ཆུབ་སེམས་དཔའ་འགུགས་པར་འདོད་པ་དེས། གུ་གུལ་གྱི་བདུག་པ་ལ་ལན་ཉི་ཤུ་རྩ་གཅིག་
བཟླས་བརྗོད་བྱས་ཏེ་བསྲེགས་ན། བྱང་ཆུབ་སེམས་དཔའ་དེར་འོང་བར་འགྱུར་རོ། །སུ་ཞིག་བྱི་ལའི་གདོན་གྱིས་ཟིན་པར་གྱུར་ན། བྱི་ལའི་མགོ་རུས་བླངས་ཏེ་བསྲེགས་ལ་ས་གཙང་མ་དང་། ཐལ་བ་ཞིབ་མོ་དང་བསྲེས་ཏེ་ཆུས་སྦྲུས་ལ་བྱི་ལའི་གཟུགས་བྱས་ཏེ། བྱང་ཆུབ་སེམས་དཔའ་
མིག་སྟོང་ལྡན་གྱི་མདུན་དུ་ཨུར་མོའི་རལ་གྲི་ལ་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། རལ་གྲི་དེས་བྱི་ལའི་གཟུགས་དེ་བརྒྱ་རྩ་བརྒྱད་དུ་གཏུབས་ལ་དུམ་བུ་རེ་རེ་ལ་ཡང་ལན་རེ་བཟླས་བརྗོད་བྱས་ཤིང་མིང་ནས་ཀྱང་བརྗོད་ན། ཇི་སྲིད་འཚོའི་བར་དུ་མི་ལྡང་ངོ་། །སུ་ཞིག་ཧ་ལ་ཧ་ལའི་དུག་ཟོས་ན།
དེས་གུ་གུལ་གྱི་བདུག་པ་དང་། ག་བུར་ཆ་བསྙམས་ཏེ་ཁྲོན་པའི་ཆུ་ལྷག་མར་མ་གྱུར་པ་དང་། བསྐོལ་བ་ཁྱོར་གང་ཙམ་ལུས་པ་དང་། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་ལན་བརྒྱ་རྩ་བརྒྱད་བཟླས་བརྗོད་བྱས་ཏེ་འཐུངས་ན། དུག་ལས་སོས་པར་འགྱུར་རོ། །སུ་ཞིག་སྦྲུལ་
དང་། སྲོག་ཆགས་ཨུ་ཙི་ལིང་གས་ཟིན་པར་གྱུར་ན། སྒ་ཕྱེ་ལ་ལན་བདུན་བཟླས་བརྗོད་བྱས་ཏེ། རྨ་ཁར་བཏབ་ན་སོས་པར་འགྱུར་རོ། །སུ་ཞིག་སྡིག་པའི་འཆི་བ་དང་། སྐུར་བ་འདེབས་པས་མི་གཞན་ལ་འཆི་ན། དེས་ས་གཙང་མའམ། བག་ཕྱེའམ། སྦྲ་ཚིལ་ལས་དེའི་གཟུགས་
བྱས་ལ། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་ཨུར་མོའི་རལ་གྲི་ལ་ལན་བརྒྱ་རྩ་བརྒྱད་དུས་གཅིག་ཏུ་བཟླས་བརྗོད་བྱས་ཏེ། སྙིང་པོ་བརྗོད་ལ་དུམ་བུར་གཏུབས་ཏེ། དེའི་མིང་ནས་བརྗོད་ཅིང་ལན་བརྒྱ་རྩ་བརྒྱད་སྦྱིན་སྲེག་བྱས་ན། དགའ་བར་འགྱུར་ཏེ། ཇི་སྲིད་འཚོའི་བར་

དུ་མཛའ་བར་འགྱུར་རོ། །སུ་ཞིག་མིག་ཉམས་ཏེ་ལྡོངས་པའི་བར་དུ་གྱུར་པ་དང་། སུ་ཞིག་མིག་གི་འབྲས་བུའི་སྟེང་དུ་ལིང་ཐོག་བྱུང་བ་དང་། མིག་ཏུ་སྐྱེས་ཏེ་མི་མཐོང་བར་གྱུར་བ་དེས་ཨ་རུ་ར་གཅིག་དང་། བ་རུ་ར་གཅིག་དང་། སྐྱུ་རུ་ར་གཅིག་ཞིབ་ཏུ་བཏགས་ལ་སྦྲང་རྩི་དཀར་
པོ་དང་། ཁྱེའུ་ནུ་བའི་འོ་མ་དང་སྦྱར་བར་བྱ་སྟེ། སྦྱོར་བའི་ཚེ་སངས་རྒྱས་ཀྱི་མཚན་ནས་བརྗོད་ཅིང་། བུ་གསར་དུ་བཙས་པའི་བུད་མེད་དང་། ཁྱི་དང་། ཕག་གིས་མ་མཐོང་བར་བྱས་ལ་རིལ་བུར་བྱས་ཏེ། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་ལན་སྟོང་རྩ་བརྒྱད་བཟླས་
བརྗོད་བྱས་ལ། གནས་དབེན་པ་རླུང་མི་འོང་བར་འདུག་སྟེ། ཉི་མ་བདུན་གྱི་བར་དུ་སྨན་དེ་མིའི་འོ་མ་དང་། སྦྲང་རྩི་དང་བརྡར་བ་མིག་ཏུ་བླུགས་ན། མིག་གི་འབྲས་བུ་སྐྱེའོ། །ལིང་ཐོག་མེད་པར་འགྱུར་ཞིང་ལེགས་པར་མཐོང་བར་འགྱུར་རོ། །སུ་གྲང་བའི་རིམས་ཀྱིས་བཏབ་པའི་ཆེད་དུ།
སྟག་ལྤགས་སམ། གཟིགས་ལྤགས་སམ། དྲེད་ལྤགས་སམ། དོམ་ལྤགས་སམ། སྤྱང་ལྤགས་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། གྲང་བའི་རིམས་ཀྱིས་བཏབ་པ་ལ་བསྐོན་ན་རིམས་སོས་པར་འགྱུར་རོ། །སེང་གེའི་པགས་པ་ནི་ཐམས་ཅད་ཀྱི་མཆོག་གོ། །གལ་
ཏེ་སྦྲུལ་གྱིས་ཟིན་ན་མི་དེ་ཉིད་ཀྱི་སྐྲ་བཅད་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། དུག་གི་རྨ་ཁར་བཞག་ན་སོས་པར་འགྱུར་རོ། །སུ་ཞིག་སྙིང་ན་ཞིང་མི་དྲན་ནམ། འཆི་འདོད་པར་གྱུར་ན། ཤིང་སླེ་མ་ཏ་ཀའི་ཐང་ཆུ་སྟར་ཀ་ཙམ་ཆུ་གཙང་མ་དང་བསྐོལ་ཏེ་ཕྱེད་དུ་བ་དང་ལན་བདུན་བཟླས་
བརྗོད་བྱས་ལ་འཐུངས་ན། ཐམས་ཅད་བདེ་བར་འགྱུར་རོ། །བུད་མེད་ཀྱིས་བསྐོལ་བར་མི་བྱའོ། །སུ་ཞིག་འབྱུང་པོའི་གདོན་གྱིས་ཟིན་ཏམ། མི་མ་ཡིན་པས་བཏབ་པའི་ནད་ཀྱིས་བཏབ་པར་གྱུར་ན། གུ་གུལ་གྱི་བདུག་པ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་སྣར་
བླུགས་སོ། །ཡང་ན་རི་བོང་གི་རྟུག་པ་ཙམ་གྱི་རིལ་བུར་བྱས་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་བཟའོ། །ཤ་དང་། ཆང་དང་། སྒོག་པ་དང་། འཐབ་མོ་སྤང་ངོ་། །འོན་དང་སོས་པར་འགྱུར་རོ། །ཡང་ན་ལྡོང་རོས་དང་། ཡུངས་ཀར་དང་། ལན་ཚྭ་དཀར་པོ་

བསྲེས་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། ནད་པའི་མལ་གྱི་འོག་ནས་བདུགས་ན། ནད་གཏོང་བའི་འབྱུང་པོ་མྱུར་དུ་འབྲོས་ཏེ། ལུས་འཇིག་ཅིང་དེར་འདུག་མི་ནུས་པར་འགྱུར་རོ། །གལ་ཏེ་གཞོགས་ཕྱེད་ནའམ། གཞོགས་ཕྱེད་ཉམས་སམ། རྣ་བ་འོན་ནམ། རྐང་ལག་འགུལ་མི་
ནུས་པར་གྱུར་ན། ཏིལ་མར་གྱི་ནང་དུ་རུ་རྟ་བཙོས་ལ། ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་བསྐུས་ན་སོས་པར་འགྱུར་རོ། །ཡང་ན་བ་མར་གཅིག་པུ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། བསྐུས་ན་སོས་པར་འགྱུར་རོ། །བུད་མེད་ལ་ལ་ཞིག་བུ་འབྱུང་ཤིན་ཏུ་དཀའ་
ན། ཏིལ་མར་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། ལྟོ་བའམ། ལྟེ་བར་བསྐུས་ན་མྱུར་དུ་འབྱུང་ངོ་། །གང་གི་མངལ་དུ་བུ་འཆི་ན་ཤིང་ཨ་པ་མརྒ་སྲང་གཅིག་ཆུ་ཁྱོར་དོའི་ནང་དུ་བསྐོལ་ལ་ཕྱེད་ལུས་པ་དང་། དེ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་འཐུངས་ན།
གནོད་པ་མེད་པར་འབྱུང་བར་འགྱུར་རོ། །ཤ་མ་མི་འབྱུང་ན་ཡང་སྨན་དེ་ལ་བཟླས་བརྗོད་བྱའོ། །ལ་ལ་ཞིག་ཤི་ལ་ཐུག་པ་ཙམ་དུ་སྙིང་ན་སྟེ། མནགས་མི་བཟོད་ན་ཏུ་རུ་སྐ་དང་། དབྱི་མོ་ཆ་བསྙམས་ཏེ་བསྲེས་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་སོ་ལ་བསྐུ་ཞིང་མིད་ལ་སྐྱུགས་
སྐྱུགས་ཀྱི་བར་དུ་བྱས་ན་སོས་པར་འགྱུར་རོ། །སྒོག་པ་རྣམ་དགུ་དང་། ཤ་དང་། ཆང་སྤང་བར་བྱའོ། །མེས་ཚིག་ན་བ་ནག་མོའི་ལྕི་བ་དྲོན་པོ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། རྨ་ཁར་གླན་ན་སོས་པར་འགྱུར་རོ། །ལ་ལ་ཞིག་སྲོག་ཆགས་རིང་པོ་སྙིང་ལ་ཟ། རྟ་དཀར་
པོའི་གཅིན་ཁྱོར་ཕྱེད་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་འཐུངས་ན། སྲོག་ཆགས་དེ་འབྱུང་ངོ་། །གལ་ཏེ་ནད་ཚབས་ཆེ་ན་ཁྱོར་གང་འཐུངས་ན། སྲོག་ཆགས་ཐག་པ་སྲིག་འབྱུང་ངོ་། །གལ་ཏེ་འབྲས་དྲག་པོ་བྱུང་ན། རམས་ཀྱི་ལོ་མ་བརྡུངས་ཏེ་ཁུ་བ་བཙིར་ལ་དེ་ལ་ལན་
ཉི་ཤུ་རྩ་གཅིག་ཏུ་བཟླས་བརྗོད་བྱས་ཏེ་རྨ་ཁར་གཏོར་ན་རྩ་བ་དང་བཅས་ཏེ་འབྱུང་ངོ་། །ལ་ལ་ཞིག་མིག་ལ་སྦྲང་བུས་ཟོས་པར་གྱུར་ན། བོང་བུའི་རྟུག་པ་གསར་དུ་བྱུང་བ་བཙིར་ཏེ། ཁུ་བ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། དགོངས་སུ་ཉལ་ཀར་མིག་ཏུ་བླུགས་ན་སོས་

པར་འགྱུར་རོ། །ལ་ལ་ཞིག་ལྟོ་ན་ན་ཁྲོན་པའི་ཆུ་ལྷག་མར་མ་གྱུར་པ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་པའི་ནང་དུ་ལན་ཚྭ་དཀར་པོ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་བཏབ་སྟེ། ཁྱོར་ཕྱེད་འཐུངས་ན་སོས་པར་འགྱུར་རོ། །སུའི་མིག་ལ་མིག་ནག་ཆགས་སམ། རབ་རིབ་བམ།
རྩ་དམར་པར་གྱུར་ན། ཤིང་ཤམ་མྱ་ཀའི་ལོ་མ་བཙིར་ཏེ། དེའི་ཁུ་བ་ལ་ལན་བདུན་བཟླས་བརྗོད་བྱས་ལ་ནང་དུ་འགྲོན་བུ་བཅུག་སྟེ། ཞག་གཅིག་བཞག་ལ་ནང་པར་ཡང་ལན་བདུན་བཟླས་བརྗོད་བྱས་ཏེ། མིག་ཏུ་བླུགས་ན་ཕན་ནོ། །སུ་ཞིག་མཚན་མོ་འཇིགས་ཤིང་མི་བདེ་ལ་སྐྲག་ན། སྐུད་
པ་དཀར་པོ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། མདུད་པ་ཉི་ཤུ་རྩ་གཅིག་བོར་ལ་མགུལ་དུ་བཏགས་ན་འཇིགས་པར་མི་འགྱུར་རོ། །ལས་རྣམས་ཀྱང་བྱང་བར་འགྱུར་རོ། །ཁྱིམ་ཞིག་ཏུ་གློ་བུར་དུ་གནོད་པ་དག་བྱུང་ན། བལ་པོ་སེའུའི་ཤིང་གི་ལྕུག་མ་སོར་གཉིས་ཀྱི་ཚད་དུ་གཏུབས་པ་
སྟོང་རྩ་བརྒྱད་བྱས་ལ། བ་མར་དང་། ཞོ་དང་། སྦྲང་རྩི་སྣོད་ཅིག་ཏུ་བླུགས་པ་དྲུང་དུ་བཞག་སྟེ། ལྕུག་མའི་དུམ་བུ་ཅིག་བླངས་ལ་ལན་ཅིག་བསྔགས་ཏེ། རྩེ་མོ་གཉིས་མར་དུ་སྨྱུགས་ལ་སྲེག་གོ། །དེ་བཞིན་དུ་ལྕུག་མའི་དུམ་བུ་ཐམས་ཅད་བསྲེགས་ན། ཡམས་ཀྱི་ནད་ཐམས་ཅད་
མེད་པར་འགྱུར་རོ། །ལས་འདི་ནི་སངས་རྒྱས་ཀྱི་སྤྱན་སྔར་བྱའོ། །ཤུ་དག་དཀར་བོ་ལ་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། དཔུང་པ་གཡས་པར་ཐོགས་ན་ཐབ་མོའམ། འགྱེད་པའི་ཚེ་རྒྱལ་བར་འགྱུར་རོ། །ཤིང་ཤམ་མྱ་ཀའི་ལོ་མ་དང་བཅས་པ་སོར་གཉིས་ཀྱི་ཚད་གཏུབས་ལ་ཆོ་ག་གོང་
མ་བཞིན་དུ་སྦྱིན་སྲེག་བྱའོ། །ཉི་མ་གཅིག་ལ་དུས་གསུམ་དུ་ལན་སྟོང་རྩ་བརྒྱད་སྦྱིན་སྲེག་བྱའོ། །གལ་ཏེ་ཉི་མ་བདུན་དུ་དེ་བཞིན་བྱས་ན། དངོས་གྲུབ་འཐོབ་བོ། །འཕགས་པའི་ལམ་ཡང་སྐྱེའོ། །གལ་ཏེ་འབྱུང་པོ་རྫུ་འཕྲུལ་ཆེན་པོ་ལས་རྒྱལ་བར་འདོད་ན། ལུང་ཏང་གི་ཤིང་ལ་ལན་
བཞི་བཅུ་རྩ་དགུ་བཟླས་བརྗོད་བྱས་ལ་བ་མར་དང་། ཞོ་དང་། སྦྲང་རྩི་དང་སྦྱིན་སྲེག་བྱས་ཏེ། བྱང་ཆུབ་སེམས་དཔའི་མདུན་དུ་བྱའོ། །གླང་དཀར་པོའི་གིའུ་ཝང་སྲང་གཅིག་མཐིང་བུའི་སྣོད་དུ་བཅུག་ལ། བྱང་ཆུབ་སེམས་དཔའི་མདུན་དུ་ལན་སྟོང་རྩ་བརྒྱད་བཟླས་བརྗོད་བྱ་སྟེ། ཡན་ལག་

རྣམས་ལ་བསྐུས་ལ། དཔྲལ་བར་ཐིག་ལེ་བྱས་ན། ལྷ་ཀླུ་དང་འབྱུང་པོ་དང་། མི་ཐམས་ཅད་དགའ་བར་འགྱུར་རོ། །གང་དག་ཉེས་བྱུང་སྟེ་ལྕགས་སྒྲོག་དང་། ཤིང་སྒྲོག་ཏུ་བཅུག་ན། ཕུག་རོན་གྱི་རྟུག་པ་ལ་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། ལག་པ་ལ་ཡང་བསྐུའོ། །
ལྕགས་སྒྲོག་དང་། ཤིང་སྒྲོག་ལ་ཡང་རེག་པར་བྱས་ན་ཐར་བར་འགྱུར་རོ། །གལ་ཏེ་ཁྱོ་ཤུག་མེ་དང་ཆུ་ལྟར་མི་མཐུན་པར་གྱུར་ན། བྱང་ཆུབ་སེམས་དཔའི་མདུན་དུ་ངུར་པའི་མཇུག་སྒྲོ་ལ་ལན་སྟོང་རྩ་བརྒྱད་བཟླས་བརྗོད་བྱས་ཏེ། ལུས་ལ་ཐོགས་ན་ཇི་སྲིད་འཚོའི་བར་དུ་འདུམ་
བར་འགྱུར་རོ། །གལ་ཏེ་སྲོག་ཆགས་དག་ལོ་ཏོག་ཕུང་བར་བྱེད་ན། ཐལ་བ་གཙང་མའམ། བྱེ་མ་གཙང་མ་ལ་ལན་སྟོང་རྩ་བརྒྱད་བཟླས་བརྗོད་བྱས་ལ། མེ་ཏོག་ཀུན་ཏུ་གཏོར་ན། སྲོག་ཆགས་རྣམས་ཕྱིར་ལྡོག་པར་འགྱུར་རོ། །གལ་ཏེ་སྲོག་ཆགས་དག་ཤིང་ཏོག་ལ་ཟ་ན།
ཆུ་ལ་བཟླས་བརྗོད་བྱས་ཏེ། ཤིང་རྣམས་ལ་གཏོར་ན་འབྲས་བུ་ལ་མི་ཟའོ། །དེའི་ཚེ་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཚེ་རབས་སྔ་
མའི་བསོད་ནམས་ཀྱི་རྒྱུས། བཅོམ་ལྡན་འདས་ཀྱིས་བདག་ལ་ཁྱོད་སེམས་ཅན་གྱི་ཁམས་ཐམས་ཅད་ལ་སྙིང་རྗེ་ཆེན་པོ་བསྐྱེད་ནས། བཅིང་བ་དང་། འཇིགས་པ་ཐམས་ཅད་གཅོད་ནུས་པར་འགྱུར་ཏེ། དེའི་མཐུས་སེམས་ཅན་ཐམས་ཅད་སྡུག་བསྔལ་རྣམས་ལས་ཐར་བར་
འགྱུར། ཞི་བ་དང་། བདེ་བ་ཐོབ་བར་འགྱུར་རོ། །ཞེས་ལུང་བསྟན་པར་གྱུར་ཏོ། །མ་འོངས་པའི་དུས་ལྔ་བརྒྱ་པ་ཐ་མར་གྱུར་པ་ན། རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་སྙིང་པོ་ཆོས་ཀྱི་སྒོ་འདི་ཉིན་ལན་གསུམ་མཚན་ལན་གསུམ་འཛིན་ནུས་ན། དེའི་ལས་ཀྱི་སྒྲིབ་
པ་ཐམས་ཅད་འབྱང་བར་འགྱུར་རོ། །ཆོས་ཐམས་ཅད་ཀྱི་ཆོས་ཉིད་འགྲུབ་པར་འགྱུར་རོ། །བདག་གིས་སངས་རྒྱས་ཀྱི་བཀའ་དྲིན་དྲན་པར་བགྱི་སྟེ། གྲོང་ཁྱེར་རམ་གྲོང་ངམ། གྲོང་རྡལ་ལམ། ནགས་ཚལ་གང་ན་རིག་སྔགས་འཆང་གནས་པ་ལ། གལ་ཏེ་དེ་ན་གནས་པའི་

འབྱུང་པོ་རྣམས་འཚེ་བར་བགྱིད་ན། བདག་རྟག་ཏུ་དེར་མཆི་ཞིང་ཀུན་ཏུ་བསྲུང་བར་བགྱི་སྟེ། ཡོངས་སུ་སྤོང་བར་མི་བགྱིད་དོ། །དེའི་ཚེ་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་
ཅེས་གསོལ་ཏོ། །བཙུན་པ་བཅོམ་ལྡན་འདས་སླད་མའི་དུས་ལྔ་བརྒྱ་པ་ཐམས་ཅད་སེམས་ཅན་ཕལ་ཆེར་རྙོག་པ་ཅན་དུ་འགྱུར་ཏེ། དགེ་བའི་རྩ་བ་ཆུང་ཞིང་རྟག་པར་རྒྱུན་དུ་དགེ་བའི་ཕྱོགས་བགྱིད་མི་ནུས་པ་དང་། གལ་ཏེ་འཛིན་ན་ཡང་དེའི་ཚེ། ལྷ་དང་། འབྱུང་པོ་འཚེ་བར་འགྱུར་བས། བདག་
གིས་ལྷ་དང་མི་དང་ལྷ་མ་ཡིན་ལ་སོགས་པ་སེམས་ཅན་ཐམས་ཅད་ལ་སྨན་པ་དང་། བདེ་བ་དང་། ཞི་བར་བགྱིད་པའི་སླད་དུ། སངས་རྒྱས་བཅོམ་ལྡན་འདས་ཀྱི་མཐུ་དང་། རྫུ་འཕྲུལ་གྱི་སྟོབས་ཀྱིས་གཟུངས་འདིའི་ཆོ་ག་ད་བཤད་པར་བགྱིའོ། །བདག་གིས་ཀྱང་འདས་པའི་བསྐལ་པ་དུ་མར་གཟུངས་
འདི་ལ་མཆོད་པ་བགྱིས་སོ། །འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཇི་སྙེད་པ་རྣམས་ཀྱིས་ཀྱང་གཟུངས་འདི་ལ་བརྟེན་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་སོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་
རྟག་ཏུ་གཟུངས་འདི་འཛིན་ཅིང་འཆང་ན། དེའི་ཚེ་འདི་ཉིད་ལ་ཚིག་གི་རྒྱུན་ཐོགས་པ་མེད་པར་འགྱུར། དབང་པོ་རྣོ་ཞིང་མཁས་པར་འགྱུར། སྤོབས་པ་མྱུར་བར་འགྱུར། ལྷ་དང་། མི་ཐམས་ཅད་ཀྱི་མཆོག་ཏུ་འགྱུར་རོ། །གང་སུའི་སྒྲ་དང་། ཚིགས་སུ་བཅད་པ་དང་། གྲགས་
པ་ཡང་ཐོས་ཤིང་བདེ་བ་དང་། དགའ་བར་ཡང་འགྱུར་རོ། །ཕྱག་བྱ་བའི་འོས་སུ་ཡང་འགྱུར་རོ། །གང་དང་གང་དུ་སྐྱེས་པར་ཡང་སངས་རྒྱས་དང་། ཆོས་དང་། དགེ་འདུན་ཡང་མཐོང་བར་འགྱུར། ཚིག་ལ་ཡང་ཡིད་ཆེས་ཤིང་ཡིད་རྟོན་པར་འགྱུར་རོ། །དེ་ཡང་འདི་ལྟར་སངས་
རྒྱས་བཅོམ་ལྡན་འདས་རྣམས་ཀྱི་མཐུ་ལགས་པར་བགྱི་ཡི། བདག་ཉིད་ཀྱི་ནི་མ་ལགས་སོ། །དེ་ནས་བཅོམ་ལྡན་འདས་ཀྱིས། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་བསྟོད་ནས། ལེགས་སོ་ཞེས་བྱ་བ་ཡང་བྱིན་ཏེ། ཁྱོད་ནི་ལྷ་དང་མི་ལ་སོགས་པ་ལ་

ཕན་པ་དང་། བདེ་བ་དང་། ཞི་བས་ལས་ཀྱི་ལམ་ལ་སྦྱོར་བར་ནུས་སོ། །གལ་ཏེ་ཡུན་རིང་པོར་ཕྱིར་མི་ལྡོག་པ་ལྟ་ན། ད་ངས་ཡེ་ཤེས་ཀྱི་ཕྱག་རྒྱས་གདབ་བོ། །དེ་ནས་བཅོམ་ལྡན་འདས་ལ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཙུན་པ་
བཅོམ་ལྡན་འདས་བདག་གིས་དྲན་པ་བདག་རི་གྲུ་འཛིན་ལ་གནས་ཤིང་། འདས་པའི་བསྐལ་པ་དུ་མར་གཟུངས་སྔགས་ཀྱི་ཆོས་ཀྱི་སྒོ་འདི་བརྗོད་དོ། །དེའི་ཚེ་བདུད་དེར་མཆིས་ནས་བདུད་དེས་འཁོར་བསྡུས་ནས། ཅི་ནས་ཀྱང་གསང་སྔགས་ཀྱི་གཞི་འདིའི་འགྲུབ་པར་བདག་གིས་ཆོས་དེ་
ལ་མཐོ་བཙམ་པར་བསམས་པ་དང་། དེའི་ཚེ་བདག་གིས་གསང་སྔགས་ཀྱི་ཆོས་དེའི་ཆོ་གས་བདུད་ཕམ་པར་བགྱིས། རྣམ་པར་ཕམ་པར་བགྱིས་སོ། །གསང་སྔགས་འདིའི་མཐུ་ནི་བརྟག་མི་ནུས་ཤིང་བསམ་གྱིས་མི་ཁྱབ་པར་རིག་པར་བགྱིའོ། །དེའི་ཚེ་བྱང་ཆུབ་སེམས་དཔའ་
འཕགས་པ་སྤྱན་རས་གཟིགས་དབང་ཕྱུག་གིས་ལྷ་དང་མི་རྣམས་ལ་ཕན་པ་དང་། བདེ་བ་ཐོབ་པར་བྱ་བའི་ཕྱིར་སྙིང་རྗེས་རྩ་བའི་གསང་སྔགས་འདི་སྨྲས་སོ། །ན་མཿསརྦ་ཛྙཱ་ཡ། ན་མོ་རཏྣ་ཏྲ་ཡཱ་ཡ། ན་མོ྅་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨཪྷ་ཏེ་སམྱཀྶཾ་བུད་དྷཱ་ཡ། ན་མ་ཨཱརྱཱ་བ་ལོ་
ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱ་སྠཱ་མ་པྲཱཔྞཱ་ཡ། བོ་དྷི་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་བི་པུ་ལ། བི་མ་ན་སུ་པྲ་ཏིཥྛི་ཏཱ་སཾ་གྷཱ་ཡ། སཱུརྱ་ཤ་ཏ་ས་ཧ་སྲ་ཨ་ཏི་རེ་ཀ། པྲ་བྷཱ་ཨ་བ་བྷཱ་སི་ཏ་མཱུརྟ་ཡེ། མ་ཧཱ་མ་ཎི་མུ་ཀུ་ཊ་
ཀུཎྜ་ལ། ཨ་ལཾ་ཀཱ་ར་དྷཱ་རི་ཎེ། བྷ་ག་བ་ཏེ། པདྨ་པཱ་ཎ་ཡེ། སརྦ་ལོ་ཀ་ཨ་པཱ་ཡ་པྲ་ཤ་མེ་ནཱ་ཡ། བི་བི་དྷ་མུ་ཁ་ས་མཱ་བེ་ཤ། ཨ་བྷཥྚ་སརྦ་སཏྭཱ་པ་རི་མོ་ཙ་ཀཱ་ཡ། ཏདྱ་ཐཱ། ཨོཾ་བྷུར་བྷུ་བ་སྭཱ་ཧཱ། མ་ཧཱ་ཨཱ་ལོ་ཀ་ཀ་ར་ཎ་ཏ་མ་སྟི་མིར་པ་ཊ་ལ་བི་ནཱ་ཤ་ཀ་རཱ་ག་དྭེ་ཥ་མོ་ཧ་ཛྭ་ལ་ཤ་མ་ཀ།
ཤཱ་ས་ཀ །ས་མཱ་ཤྭཱ་ས་ན་ཀ་ར། རཀྵ་ཀ །སརྦ་ཨ་པཱ་ཡ་དུརྒ་ཏི་པྲ་ཤ་མ་ན་ཀ་ར། སརྦ་ས་ཏྭཱཾ་ས་མཱ་ཤྭཱ་ས་ན་ཀ་ར། སརྦ་ཨཱ་ཤཱ་པ་རི་པཱུ་ར་ཀ །སརྦ་ཏ་ཐཱ་ག་ཏ། ས་མ་པ་དཱ་ན་ཀ་ར། ཨེ་ཧྱེ་ཧི་མ་ཧཱ་བོ་དྷི་སཏྭ་བ་ར་པདྨ་ཨཱ་ལོ་ཀ་སཾ་བྷུ་ཏ་མ་ཧཱ་ཀཱ་རུ་ཎི་ཀ །ཛ་ཊཱ་མ་ཀུ་ཊ། ཨ་ལང་ཀྲྀ་ཏ། ཤི་

རོ་མ་ཎི་ཀ་ན་ཀ །རཱ་ཛ་ཏ་བཛྲ་བཻ་ཌཱུརྱ་ཨ་ལང་ཀྲྀ་ཏ། ཤ་རཱི་ར་ཨ་མི་ཏཱ་བྷ་ཛི་ན་ཀ་མ་ལ། ཨ་ལང་ཀྲྀ་ཏ་པྲ་བྷ་ར་ཎ་ར་ཛ་ན་ཤ་ཏ་ས་ཧ་སྲ་ཨ་བྷི་ལ་ཥཱི་ཏ་ཀཱ་ཡ། མ་ཧཱ་བོ་དྷི་སཏྭཱ་ཡ་བར་བ་ར་ད། བི་དྷ་མ་བི་དྷ་མ། བི་ནཱ་ཤ་ཡ། བི་ནཱ་ཤ་ཡ། མ་ཧཱ་ཡ་ན་ཏྲཾ། ཀླེ་ཤ་ཀབྷཱ་
ཏ། ཨ་བ་བ་དྷ་བི་བིདྷ་སཏྭཱཾ། སང་སཱ་ར་ཙཱ་ར་ཀ །པྲ་མ་ཐ་ན་ཀ་ར། པུ་རུ་ཥ་པདྨ། པུ་རུ་ཥ་ནཱ་ག །པུ་རུ་ཥ་སཱ་ག་ར། པུ་རུ་ཥ་སིང་ཧ། བཱི་ར་བཱི་རཱ་ཛ་སུ་དཎྚ་ཏཱ་པ་རི་བི་ཏི། དྷ་མ་དྷ་མ། ས་མ་ས་མ། དྷུ་རུ་དྷུ་རུ། པྲ་ཤཱ་ས་ཡ་པྲ་ཤཱ་ས་ཡ། གྷི་རི་གྷི་རི། བི་བི་རི་བི་བི་རི། ཙི་
རི་ཙི་རི། སི་རི་སི་རི། སུ་རུ་སུ་རུ། དྷི་རི་དྷི་རི། བི་དྷི་རི་བི་དྷི་རི། བི་རི་བི་རི། མུ་རུ་མུ་རུ། མུ་ཁ་མུ་ཁ། མུ་ཡ་མུ་ཡ། མུ་ཉྩ་མུཉྩ། དྷུ་ན་དྷུ་ན། བི་དྷུ་ན་བི་དྷུ་ན། དྷུ་རུ་དྷུ་རུ། གཱ་ཡ་གཱ་ཡ། ག་དྷ་ཡ་ག་དྷ་ཡ། ས་ཧ་ས་ཧ། པྲ་ས་ཧ་པྲ་ས་ཧ།
ནཱ་ནཱ་བི་བིདྷ་ཀླེ་ཤཱི་བཱ་ས་ན། ཧ་ར་ཧ་ར། སཾ་ཧ་ར་སཾ་ཧ་ར། དྷུ་རུ་ཏུ་དྷུ་རུ་ཏུ། མ་ཧཱ་མཎྜ་ལ་ཀ་ར་ཎ་ཤ་ཏ་པྲ་སེ་ཀ །ཨ་བ་བྷཱ་སི་ཏ་བི་བི་དྷ་བཱ་ས་ན་ཤ་མི་ཀ །ཤཱ་ས་ཀ །རཀྵ་ཀ །མ་ཧཱ་བོ་དྷི་སཏྭ་བ་ར་བ་ར་ད་སྭཱ་ཧཱ། གཟུངས་སྔགས་འདི་ནི་དེ་བཞིན་གཤེགས་པ་པདྨའི་
ཕྱག་གི་རྒྱན་གྱི་ཡུ་བ་ཞེས་བྱ་སྟེ། སངས་རྒྱས་བཅོམ་ལྡན་འདས་ལྷ་དང་། ཀླུ་དང་། མིའམ་ཅི་དུ་མས་ཡོངས་སུ་བསྐོར་བས། རྡོ་རྗེ་ཆེན་པོ་དང་ལྡན་ཞིང་དགའ་བའི་རྒྱུ་ལས་བྱུང་བའི་ཁང་བཟངས་སུ་ཐམས་ཅད་ཀྱིས་མཆོག་གི་བྱང་ཆུབ་སེམས་དཔའ་རྣམས་ཀྱི་དོན་དུ་གསུངས་ཏེ། སྒྲིབ་
པའི་རི་ཆེན་པོ་རྣམ་པར་འཇོམས་པའོ། །གང་ལ་ལ་ཞིག་གིས་མཉན་པ་དང་། བལྟ་བ་དང་། བཀླག་པ་དང་། བརྗོད་པ་ཐོབ་ན། མི་དེའི་ཉོན་མོངས་པའི་སྒྲིབ་པ་ཇི་སྙེད་མཆིས་པ་ཐམས་ཅད་འབྱང་བར་འགྱུར་རོ། །སུ་ཞིག་དད་པར་གུས་པས་སྔ་དྲོ་བརྗོད་ན། བྱང་ཆུབ་སེམས་དཔའ་
འཕགས་པ་སྤྱན་རས་གཟིགས་དབང་ཕྱུག་རྟག་ཏུ་དེའི་སླད་བཞིན་འབྲང་ཞིང་སྲུང་བ་བགྱིད་དོ། །གང་ཅི་འཚལ་བ་དག་ཀྱང་དེ་བཞིན་དུ་འགྲུབ་བོ། །སུ་ཞིག་གལ་ཏེ་བདག་གི་བསམ་པ་ཐམས་ཅད་ཡོངས་སུ་རྫོགས་པར་ཐོབ་པར་འཚལ་བ་དེས། གཅིག་པུ་ཕྱོགས་དབེན་པར་མཆིས་

ལ། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ཡིད་ལ་དྲན་པར་བགྱི་ཞིང་གཞན་བསམ་པར་མི་བགྱི་བར་གཟུངས་སྔགས་འདི་ལན་བདུན་བརྗོད་ན། ཡིད་ལ་བསམས་པ་གང་རྫོགས་པར་མི་འགྱུར་བ་དེ་གང་ཡང་མ་མཆིས་སོ། །སེམས་ཅན་ཐམས་ཅད་དགའ་བར་འགྱུར་
རོ། །ངན་འགྲོར་མཆི་བར་མི་འགྱུར་རོ། །སངས་རྒྱས་བཅོམ་ལྡན་འདས་རྟག་ཏུ་རྗེས་སུ་མངོན་དུ་དྲན་ན། བསྐལ་པ་བྱེ་བ་ཕྲག་དུ་མ་བསགས་པའི་ལས་ཀྱི་སྒྲིབ་པ་ཐམས་ཅད་འབྱང་བར་འགྱུར་རོ། །འཁོར་ལོས་སྒྱུར་བའི་རྒྱལ་པོ་སྟོང་དུ་ཚང་བའི་བསོད་ནམས་དག་ཀྱང་ཐོབ་པར་འགྱུར་རོ། །
གར་སྐྱེས་གར་སྐྱེས་ཀྱང་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་མཐོང་བར་འགྱུར་རོ། །རིགས་ཆེན་པོར་སྐྱེ་བར་འགྱུར་རོ། །སུ་ཞིག་སྙིམ་པ་སྤོས་ཀྱིས་བཀང་སྟེ། འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་གཏོར་ལ། གཟུངས་སྔགས་འདི་ཡང་ལན་
བདུན་བརྗོད་ན། སྟོང་གི་བསོད་ནམས་ཀྱི་མཆོག་དང་། སྙིང་རྗེ་ཆེན་པོའི་རང་བཞིན་ཡང་འཐོབ་བོ། །དེ་མིའི་འཇིག་རྟེན་འདིར་ཡང་སྟོབས་ཆེན་པོ་ཡོངས་སུ་རྫོགས་པ་འཐོབ་བོ། །སུ་ཞིག་འཕགས་པ་སྤྱན་རས་གཟིགས་དབང་ཕྱུག་གི་གདོང་དུ་བལྟ་ཞིང་། གཟུངས་སྔགས་འདི་བརྗོད་པ་
དེ་བྱང་ཆུབ་སེམས་དཔའ་མཚན་རྒྱས་པ་མཐོང་ནས། ས་དྲི་མ་མེད་པ་ཡང་འཐོབ་བོ། །འཇིག་རྟེན་ན་ཡང་སྣང་བ་བགྱིད་དོ། །ཚེ་གཅིག་གིས་སངས་རྒྱས་བཅོམ་ལྡན་འདས་རྣམས་ཀྱང་མཐོང་ངོ་། །ཇི་ལྟར་བསམ་གཏན་ལ་སྙོམས་པར་ཞུགས་པ་དེ་ལྟ་བུར་མཆི་བར་འགྱུར་རོ། །གར་
སྐྱེས་གར་སྐྱེས་ཀྱང་སྔོན་གྱི་ཚེ་རབས་དྲན་པར་འགྱུར་རོ། །ལས་ཀྱི་སྒྲིབ་པ་ཐམས་ཅད་འབྱང་བར་འགྱུར་རོ། །སུ་ཞིག་གཟུངས་སྔགས་འདི་འཛིན་པ་དེས། ཚེས་བཅོ་ལྔའི་ཟླ་བ་ཉ་བ་ལ་བསླབ་པའི་གཞི་བརྒྱད་བཟུང་སྟེ། གོས་གཙང་མ་བགོས་ལ་རིང་བསྲེལ་དང་བཅས་པའི་མཆོད་རྟེན་
གྱི་མདུན་དུའམ། སངས་རྒྱས་ཀྱི་གཟུགས་ཀྱི་སྤྱན་སྔར་ཙནྡན་དཀར་པོའི་དཀྱིལ་འཁོར་བགྱིས་ལ། དེར་མེ་ཏོག་སྣ་ཚོགས་གཏོར་བར་བགྱི། བདུག་པས་ཀྱང་བདུགས་པར་བགྱི། མར་མེ་ཡང་བུད་པར་བགྱིའོ། །སངས་རྒྱས་བཅོམ་ལྡན་འདས་ལ་གུས་པ་བསྐྱེད་པར་བགྱིའོ། །

དེའི་ཚེ་གཟུངས་སྔགས་འདི་ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ན། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དཀྱིལ་འཁོར་དེར་འདུག་སྟེ། མཚམས་མེད་པ་ལ་སོགས་པ་ལས་ཀྱི་སྒྲིབ་པ་མི་དགེ་བ་ཇི་སྙེད་མཆིས་པ་ཐམས་ཅད་འབྱང་བར་
འགྱུར་རོ། །ལུས་དང་ངག་དང་ཡིད་ཀྱི་ལས་རྣམས་ཀྱང་ཡོངས་སུ་དག་པར་འགྱུར་རོ། །སངས་རྒྱས་ཀྱི་ཏིང་ངེ་འཛིན་གྱི་སྟོབས་ཀྱང་འཐོབ་བོ། །འོད་ཟེར་གྱིས་དབང་བསྐུར་བའི་སྟོབས་ཀྱང་འཐོབ་བོ། །ས་དང་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་པར་འགྱུར་རོ། །གལ་ཏེ་ཆར་
དབབ་པར་འཚལ་ན། གྱེན་དུ་ནམ་མཁའ་ལ་བལྟས་ལ་གཟུངས་སྔགས་ལན་ཉི་ཤུ་རྩ་གཅིག་བརྗོད་ན་ཆར་འབབ་བོ། །གལ་ཏེ་ས་ལ་བལྟས་ཏེ་གཟུངས་སྔགས་བརྗོད་ན། ས་བོན་ཐམས་ཅད་རྣམ་པ་བརྒྱར་ཕུན་སུམ་ཚོགས་པར་འགྱུར་རོ། །གལ་ཏེ་འབབ་ཆུ་སྐམས་པའི་ཤུལ་
ལམ་འབབ་ཆུ་ཆེན་པོའམ། འབབ་ཆུའི་དངོའམ་མཚོའམ་མཚེའུའམ། མཚོ་བྲན་གྱི་འགྲམ་དུ་མཆིས་ཏེ་བརྗོད་ན། ཆུ་ཐམས་ཅད་ཡོངས་སུ་རྫོགས་པར་འགྱུར་རོ། །ནད་ཐམས་ཅད་ཀྱི་དོན་དུ་གཟུངས་སྔགས་བརྗོད་དེ་ལག་པས་བྱབས་ན་སོས་པར་འགྱུར་རོ། །དྲན་པ་ཉམས་
པའི་མིའི་མདུན་དུ་བརྗོད་ན། དྲན་པ་སླར་འཐོབ་བར་འགྱུར་རོ། །བྲུ་བས་ཉེན་པའམ། སྐོམ་པས་ཉེན་པའི་མིའི་གདོང་དུ་བལྟས་ཏེ་བརྗོད་ན། བཀྲེས་པའམ་སྐོམ་པ་ཞི་བར་འགྱུར་རོ། །གལ་ཏེ་མཚམས་བཅད་པར་འཚལ་ན། དེས་མཚེའུ་ཆུའི་ནང་དུ་ཞུགས་ཏེ་དེར་མཆིས་ལ།
གཟུངས་སྔགས་འདི་ཡི་གེར་བྲིས་ཏེ། རྒྱལ་མཚན་གྱི་རྩེ་མོ་ལ་བཏགས་ན། དཔག་ཚད་བརྒྱར་མཚམས་བཅད་པར་འགྱུར་ཏེ། དེར་ཉེས་པ་རྣམས་མི་འབྱུང་ངོ་། །མཚམས་ཀུན་ཏུ་སྲུང་བ་རྫོགས་སོ།། །།ད་ནི་ལུས་ཐམས་ཅད་བསྡུ་བའི་ཕྱག་རྒྱ་བརྗོད་པར་བགྱིའོ། །
ལུས་དྲང་པོར་འགྲེང་སྟེ། རྐང་པ་ཉེ་བར་མཉམ་དུ་གཞིབས་ལ། རྐང་པ་གཡས་པ་ཡིད་ཙམ་བསྐུམས་ཏེ། ལག་པ་གཡོན་པ་ཐུར་དུ་བརྐྱང་། གུང་མོ་དང་སྲིན་ལག་གཉིས་ལག་མཐིལ་དུ་དགུག །མཛུབ་མོ་དང་། མཐེ་བོང་དང་། མཐེའུ་ཆུང་བརྐྱང་ལ་ལག་མཐིལ་བཀན་

ཏེ་བཞག་གོ། །ལག་པ་གཡས་པ་ཡང་དེ་བཞིན་དུ་བགྱིའོ། །ལག་པ་གཉིས་ཀའི་གུང་མོ་བཀུག་པ་ལག་པ་ཕྲག་པ་དང་མཉམ་པར་བཞག་གོ། །ལག་མཐིལ་ནི་མདུན་དུ་བསྟན་ཏེ་བཞག་གོ། །འདི་ནི་ལུས་བསྡུ་བའི་ཕྱག་རྒྱ་དང་པོའོ། །སུ་ཞིག་བདུད་དང་། གཞན་མུ་
སྟེགས་ཅན་དང་། དགྲ་རྣམས་ཕམ་པར་བགྱི་བ་དང་། ལམ་དང་པོ་ལ་གནས་པར་འཚལ་ན། ཕྱག་རྒྱ་འདི་བཅིངས་ལ་གཟུངས་འདི་ཡང་ལན་ཉི་ཤུ་རྩ་གཅིག་བརྗོད་པར་བགྱིའོ། །ན་མོ་རཏྣ་ཏྲ་ཡཱ་ཡ། ན་མོ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་
ཡ། ཏདྱ་ཐཱ། ཨ་བཏྟ། ཨ་བཏྟེ་པ་རི་བཏྟེ། ཨེ་ཧྱེ་ཧི་སྭཱ་ཧཱ། གང་གོང་དུ་ཕྱག་རྒྱ་ཇི་སྐད་སྨོས་པ་དེ་བཞིན་དུ་ལུས་གནས་པར་བགྱིས་ལ། སྙིང་གར་ཐལ་མོ་སྦྱར་ཏེ། སོར་མོ་ཐམས་ཅད་ཕན་ཚུན་ཐད་ཀར་བསྣོལ་ལ། གཡོན་པའི་སོར་མོ་རྣམས་ཀྱིས་གཡས་པ་རྣམས་ལ་འཁྱུད་
བར་བགྱི། མཛུབ་མོ་གཉིས་གྱེན་དུ་སྒྲེང་ལ། རྩེ་མོ་གཉིས་སྤྲད་དོ། །མཐེ་བོང་གཉིས་མཛུབ་མོ་གཉིས་ཀྱི་ཚིགས་དང་པོ་ལ་རེག་པར་བགྱིའོ། །ལག་མཐིལ་ནི་མ་འབྱར་བར་བགྱིའོ། །འདི་ནི་གཟུངས་ཐམས་ཅད་ཀྱི་ཕྱག་རྒྱ་སྟེ་གཉིས་པའོ། །བསྐལ་པ་དུ་མར་ཚེ་རབས་
སུ་བསགས་པའི་ལས་ཀྱི་སྒྲིབ་པ་མི་དགེ་བ་ཐམས་ཅད་འབྱང་བར་འགྱུར་རོ། །ཚེ་ཕྱི་མ་ལ་འགྱུར་རོ། །གང་གི་ཚེ་སངས་རྒྱས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་བརྙེས་པར་མཛད་པར་བརྩམས་པའི་ཚེ་བདུད་ཀྱིས་མཐོ་བཙམས་པ་ན། ཕྱག་རྒྱ་འདིས་བཏུལ། དེའི་ཚེ་ཞི་བའི་བདེ་
བ་དང་། བསམ་གཏན་དང་། སྙོམས་པར་འཇུག་པ་ཡང་བརྙེས་པར་འགྱུར་རོ། །གཟུངས་སྔགས་འདི་ཡང་བརྗོད་པར་བགྱིའོ། །ཏདྱ་ཐཱ། སརྦ་དྷཱ་ར་ཎི། མཎྜ་ལཱ་ཡ། ཨེ་ཧྱེ་ཧི་པ་ར་མ་ཤུད་དྷ་སཏྭཱ་ཡ་སྭཱ་ཧཱ། ཡང་ཐོག་མར་ལག་པ་གཡས་པ་འབྱིན་པ་ལྟར་
བགྱིས་ལ། པུས་མོ་གཡས་པའི་ལྷ་ང་ས་ལ་བཙུགས་ཏེ། མགོ་བོར་ཐལ་མོ་སྦྱར་ལ་མཛུབ་མོ་གཉིས་བཀུག་སྟེ་རྩེ་མོ་སྤྲད། མཐེ་བོང་གཉིས་མཛུབ་མོ་གཉིས་ཀྱི་ཚིགས་གཉིས་པ་ལ་སྦྱར་རོ། །འདི་ནི་ཆོས་ཀྱི་ཕྱག་རྒྱ་སྟེ། རྣམ་པར་གྲོལ་བར་བགྱི་བའི་སླད་དུ། བསམ་

གཏན་དང་། སྙོམས་པར་འཇུག་པ་ཐོབ་པར་འགྱུར་རོ། །འདི་ནི་ཕྱག་རྒྱ་གསུམ་པའོ། །སྔོན་དེ་བཞིན་གཤེགས་པ་རྣམས་ཀྱིས་ཀྱང་མཐུན་པར་བསྒོམས་ཏེ། དེའི་ཚེ་བསམ་གཏན་རྣམས་དང་། སྙོམས་པར་འཇུག་པ་རྣམས་དང་། རྣམ་པར་གྲོལ་བ་
བརྙེས་སོ། །ཡང་འདི་ནི་གཞན་ཏེ་འགྲེང་ལ་རྐང་པ་གཉིས་མཉམ་པར་གཞིབ་བོ། །ལག་པའི་གུང་མོ་དང་། སྲིན་ལག་དང་། མཐེའུ་ཆུང་རྒྱབ་སྦྱར་ཏེ། སེན་མོ་ཕྲད་པར་བགྱི། མཛུབ་མོ་གཉིས་བརྐྱང་སྟེ་རྩེ་མོ་ཕྲད་པར་བགྱི། མཐེ་བོ་གཉིས་མཛུབ་མོའི་ཚིགས་གཉིས་པ་
ལ་རེག་པར་བགྱི། ལག་མཐིལ་ནང་ནས་སོར་བཅུ་ཙམ་གྱིས་བསྐྱེད་ལ་སྨིན་མཚམས་སུ་གཟུགས་སོ། །འདི་ནི་མིག་སྟོང་གི་ཕྱག་རྒྱ་སྟེ་བཞི་པའོ། །གལ་ཏེ་ཕྱག་རྒྱ་འདི་བཅིངས་ལ་གཟུངས་སྔགས་བརྗོད་ན། སྐད་ཅིག་དེ་ཉིད་ལ་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཡོངས་
སུ་དག་པ། དཀྲིགས་པ་བྱེ་བ་ཕྲག་སྟོང་མཐོང་བར་འགྱུར་རོ། །གང་དག་རིག་སྔགས་འཆང་དེ་དང་ལྷན་ཅིག་སྤྱོད་ཅིང་གྲོགས་སུ་གྱུར་པ་ནི་ཞིང་རེ་རེ་ན་ཡང་བྱང་ཆུབ་སེམས་དཔའ་དཀྲིགས་པ་བྱེ་བ་ཕྲག་འབུམ་དང་། བཞི་སྟོང་ཉི་ཤུ་མཆིས་སོ། །གང་དཀྱིལ་འཁོར་དུ་མ་
ཞུགས་པ་དེས་ནི་བལྟ་བར་མི་རིགས་ཏེ། ཕྱག་རྒྱ་དེའི་ཆོས་ཉིད་དོ། །སུ་ལ་རིགས་ཞེ་ན་གང་དཀྱིལ་འཁོར་དུ་ཞུགས་པ་དེ་ཉིད་ལའོ། །འདི་ལྟར་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་སྦྱིན་པ་ཡེ་ཤེས་ཀྱིས་རྟོགས་པར་འཚལ་བ་ཐམས་ཅད་ཡོངས་སུ་རྫོགས་པར་འགྱུར་
རོ། །གཟུངས་སྔགས་ནི་འདི་ལགས་ཏེ། ཏདྱ་ཐཱ། ཨོཾ་བྷུ་སརྦ་ཙཀྵུཿཀཱ་རཱ་ཡ་དྷཱ་ར་ཎཱི་ན་དྲཱ་ཡ་སྭཱ་ཧཱ། ཡང་འགྲེང་ལ་རྐང་པ་མཉམ་པར་གཞིབས་ཏེ། ལག་པ་གཡས་པ་བཀན་ལ་སོར་མོ་ལྔ་གཞིབས་ཏེ་བརྐྱང་ལ། ལག་པ་གཡོན་པ་ཡང་དེ་བཞིན་དུ་བགྱིས་ཏེ་བཀན་
ལ་ལག་པ་གཡས་པའི་རྒྱབ་ལ་སྦྱར་ཏེ་སྙིང་གར་བཞག་གོ། །འདི་ནི་ལག་པ་སྟོང་ཐམས་ཅད་བསྡུས་པའི་ཕྱག་རྒྱ་སྟེ་ལྔ་པའོ། །འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། བདུད་དང་དགྲ་མཆིས་པ་རྣམས་ཐུལ་ལོ། །གཟུངས་སྔགས་འདི་ལགས་ཏེ།

ན་མོ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། ཏདྱ་ཐཱ་སརྦ་དུཥྚ་ཨོྃ་ཧ་ཡ་མེ་སྭཱ་ཧཱ། ཡང་འགྲེང་སྟེ་རྟིང་པ་ཕྲད་པར་བགྱིས་ལ། ལག་པ་གཡོན་པ་མི་འཇིགས་པ་སྦྱིན་པར་བགྱིས་ཏེ། ལག་པ་གཡས་པ་ཡང་དེ་བཞིན་དུ་བགྱིས་ལ། ལག་མཐིལ་བདག་ལོགས་སུ་བསྟན་པར་བགྱིའོ། །འདི་
ནི་ཏིང་ངེ་འཛིན་རབ་ཏུ་རྟོགས་པར་འགྱུར་བའི་ཕྱག་རྒྱ་སྟེ་དྲུག་པའོ། །འདིས་ཏིང་ངེ་འཛིན་ཐམས་ཅད་དང་། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དང་། སངས་རྒྱས་ཀྱི་བྱང་ཆུབ་རབ་ཏུ་རྟོགས་པར་འགྱུར་རོ། །ཕྱག་རྒྱ་འདིས་ནི་ཐམས་ཅད་ཀྱང་འཐོབ་བོ། །གཟུངས་ཀྱི་རྩ་བའི་
གསང་སྔགས་སྔ་མ། ན་མཿསརྦ་ཛྙཱ་ཞེས་བགྱི་བ་ལགས་སོ། །ཡང་འགྲེང་ལ་རྐང་པ་ཉེ་བར་གཞིབས་ཏེ། ལག་པ་གཡོན་པའི་སྲིན་ལག་གིས་མཐེ་བོའི་སེན་མོ་མནན་ཏོ། །གཡས་པ་ཡང་དེ་བཞིན་ཏེ་མཐེའུ་ཆུང་དང་། གུང་མོ་རྣམས་རྩེ་མོ་སྤྲད་ལ། ལག་རྟིང་དྲང་པོར་བསྲང་སྟེ། དགུག་
པ་ནི་མཛུབ་མོ་གཉིས་དགུག་གོ། །སླར་བཏང་ན་ནི་བརྐྱང་ངོ་། །དེ་ལྟར་མཆིས་ལ་སྔགས་བརྗོད་པར་བགྱིའོ། །ལག་པ་གཡས་པའི་མཛུབ་མོ་གཉིས་ནི་དགུག་གོ། །གཡོན་པའི་མཛུབ་མོ་གཉིས་ནི་སླར་གཏང་ངོ་། །མགོའི་ཐོན་འཁོར་གཡས་ནས་བསྐོར་བར་བགྱི་སྟེ་བོད་པའོ། །
གཡོན་པས་ནི་བསལ་བ་ལྟར་བགྱིས་ཏེ་སླར་བཏང་ངོ་། །ཕྱག་རྒྱ་འདིས་ནི་ལྷ་དང་ཀླུ་ལ་སོགས་པ་འཁོར་བརྒྱད་བསྡུ་བའི་སླད་དུ་དགུག་པའི་ཕྱག་རྒྱ་སྟེ་བདུན་པའོ། །གསང་སྔགས་ནི་འདི་ལགས་ཏེ། ཨོཾ་སརྦ་དེ་བ་ནཱ་ག་ཨ་ན་ལེ་སྭཱ་ཧཱ། ཕྱག་རྒྱ་སྔ་མ་ལ་རྩེ་མོ་བསྐྱེད་དེ། ལག་རྟིང་
གཉིས་སྦྱར་བ་ལས་ཡུད་ཙམ་བཟུང་མཛུབ་མོས་གཡབ་སྟེ་སྔ་མ་བཞིན་ནོ། །འདི་ནི་བརྒྱ་བྱིན་དང་། ཚངས་པ་ཆོས་མཉན་པའི་སླད་དུ་དགུག་པའི་ཕྱག་རྒྱ་སྟེ་བརྒྱད་པའོ། །གསང་སྔགས་ནི་འདི་ལགས་ཏེ། ཨོཾ་མ་ཧཱ་པྲཧྨ་ཡེ། ཨེ་ཧྱེ་ཧི་སྭཱ་ཧཱ། ཕྱག་རྒྱ་འདི་དང་། གསང་སྔགས་འདི་ནི་
གཟུངས་སྔགས་དང་། ཕྱག་རྒྱ་དང་། ཆོས་ཀྱི་སྒོ་དུ་མ་གཟུང་བའི་སླད་དུ་བསྡུ་བའོ། །ཉི་མ་སྤྱང་ཀིས་ཟིན་པ་དང་། ཟླ་བ་སྤྱང་ཀིས་ཟིན་པའི་ཚེ། བ་མར་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ། ཕྱག་རྒྱ་འདིས་ཕྱག་རྒྱས་བཏབ་ལ་འཐུངས་ན་དབང་པོ་རྣོ་བར་འགྱུར་རོ། །ཉིན་གཅིག་

བཞིན་དུ་ཆོས་ཀྱི་ཚིགས་སུ་བཅད་པ་ཁྲི་ལོབས་ནུས་པར་འགྱུར་རོ། །ཕྱག་རྒྱ་འདི་དང་། ཆོས་ཀྱི་སྒོ་འདི་ནི་དེ་བཞིན་གཤེགས་པ་ཉི་མའི་སྙིང་པོས། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་ཆེད་དུ་གསུངས་པའོ། །ཡང་འགྲེང་སྟེ་
རྐང་པ་ཉེ་བར་གཞིབས་ལ། ལག་པ་ཐལ་མོ་སྦྱར་ཏེ། སྙིང་གར་བཞག་ལ་མཐེ་བོང་གཉིས་ལག་མཐིལ་དུ་བཀུག་སྟེ། རྩ་བའི་སྔགས་ཆེན་པོ་ལན་ཉི་ཤུ་རྩ་གཅིག་བརྗོད་པར་བགྱིའོ། །འདི་ནི་བྱང་ཆུབ་སེམས་དཔའ་རྣམས་ཀྱི་རང་རང་གི་ནོར་བུའི་ཡིད་བཞིན་ལྟ་བུའི་ཕྱག་
རྒྱ་སྟེ་དགུ་བའོ། །འདིས་ངེས་པར་ལྷའི་གཞལ་མེད་ཁང་རྣམས་སུ་འཇུག་གོ། །ཕྱོགས་བཅུའི་སངས་རྒྱས་ཀྱི་ཞིང་རྣམས་སུ་ཡང་མཆིའོ། །མཆོད་པའི་དོན་དུ་རིན་པོ་ཆེ་བརྒྱ་སྟོང་དག་ཀྱང་བསམས་པ་བཞིན་རྙེད་པར་འགྱུར་རོ། །སུ་ཞིག་ཆོས་ཀྱི་སྒོ་འདིའི་ལས་བགྱིད་ནུས་ན། དེ་ནང་
པར་སྔར་ལངས་ལ་ཁྲུས་བགྱི་ཞིང་ཁ་གདོང་བཀྲུས་ཏེ། ཕྱག་རྒྱ་དེའི་དམ་ཚིག་བགྱིས་ན། དེས་ཕྱོགས་བཅུའི་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་མངོན་སུམ་དུ་མཐོང་བར་འགྱུར་རོ། །བསྐལ་པ་དུ་མར་ཚེ་རབས་སུ་བསགས་པའི་སྡིག་པ་མི་དགེ་བའི་ལས་ལྕི་བ་
རྣམས་འབྱང་བར་འགྱུར་རོ། །ཕྱག་རྒྱ་དེའི་ཡོན་ཏན་དང་། བསྔགས་པ་ནི་རབ་ཏུ་མང་ངོ་། །ཡང་སྔ་མ་བཞིན་དུ་ཐལ་མོ་སྦྱར་ཏེ། མཛུབ་མོ་གཉིས་བཀུག་ལ་མཐེ་བོའི་སེན་མོ་ལ་བཅར་ཏེ། མཛུབ་མོ་གཉིས་ཀྱི་སེན་མོ་ཡང་ཕན་ཚུན་དུ་རྒྱབ་སྤྲད་ལ་རྩ་བའི་གསང་སྔགས་
བརྗོད་པར་བགྱིའོ། །འདི་ནས་བྱང་ཆུབ་སེམས་དཔའ་རྣམས་ཀྱི་སེམས་ལ་འདོད་པའི་ཕྱག་རྒྱ་སྟེ་བཅུ་པའོ། །ཅི་འཚལ་བ་དེ་བཞིན་དུ་འགྲུབ་བོ། །ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ཡང་ཐལ་མོ་སྔ་མ་ལས་མཐེ་བོང་དང་།
མཛུབ་མོ་སོ་སོར་བརྐྱང་སྟེ་ལག་མཐིལ་དབྱེ་བར་བགྱིའོ། །འདི་ནི་རྒྱུའི་གནས་སྐབས་ཀྱི་ཚེ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་བདག་ལ་སྩལ་བ་སྟེ། འདིས་བདག་བྱང་ཆུབ་ཀྱི་ལམ་རབ་ཏུ་རྟོགས་སོ། །འདིས་རྩ་བའི་གསང་སྔགས་བརྗོད་པར་བགྱིའོ།

འདི་ནི་བྱང་ཆུབ་སེམས་དཔའ་རྣམས་འགོག་པ་ལ་སྙོམས་པར་འཇུག་པའི་ཕྱག་རྒྱ་སྟེ། བཅུ་གཅིག་པའོ། །ཡང་ཐལ་མོ་སྔ་མ་ལས་མཛུབ་མོ་གཉིས་བསྐུམ་ཞིང་བརྐྱང་བས་བསྐུལ་བར་བགྱིའོ། །འདི་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱི་ཏིང་ངེ་འཛིན་རྣམས་འཐོབ་པའི་
ཕྱག་རྒྱ་སྟེ། བཅུ་གཉིས་པའོ། །གཟུངས་སྔགས་ནི་འདི་ལགས་ཏེ། ཨོྃ་སརྦ་བུད་དྷ་ས་མ་ཡ་ཨེ་ཧྱེ་ཧི་པ་ར་མ་ཤུད་དྷ་སཏྭ་སྭཱ་ཧཱ། དེ་ནི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་མིག་སྟོང་དང་ལྡན་པ། ལག་པ་སྟོང་དང་ལྡན་པའི་དཀྱིལ་འཁོར་ཁྲུ་བཅུ་དྲུག་
པའི་ཆོ་ག་བརྗོད་པར་བགྱིའོ། །ཐོག་མར་རི་རྣམས་དང་ཉེ་བ། ས་གཞི་བཀྲ་ཤིས་པའི་ཕྱོགས་བཙལ་བར་བགྱིའོ། །དེར་ས་བརྐོས་ཏེ། གསེག་མ་དང་། གྱོ་མོ་དང་། རུས་པ་དང་། མི་གཙང་བ་རྣམས་བསལ་ལ། དྲི་ཞིམ་པོ་དང་བསྲེས་པའི་བའི་གཅིབ་དང་། འཇིམ་པར་བསྲེས་
ཏེ་བྱུག་པར་བགྱིའོ། །དེར་ཆུ་ཞེང་དུ་ཁྲུ་བཅུ་དྲུག་པའི་སྟེགས་བུ་བགྱིའོ། །འཕང་དུ་ནི་མཐོ་གང་གི་ཚད་དུ་བགྱིས་ལ། སྒོ་བཞི་བཏོད་དེ། ཤར་གྱི་སྒོར་ནི་ཡུལ་འཁོར་སྲུང་། ལྷོའི་སྒོར་ནི་འཕགས་སྐྱེས་པོའོ། །ནུབ་ཀྱི་སྒོར་ནི་མིག་མི་བཟང་། བྱང་གི་སྒོར་ནི་རྣམ་ཐོས་
ཀྱི་སྲས་ཏེ། དེ་དག་གི་གམ་ཡོར་རང་རང་གི་འཁོར་ཐམས་ཅད་བྲིའོ། །དཀྱིལ་འཁོར་གྱི་དབུས་སུ་ནི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་མིག་སྟོང་དང་ལྡན་པ་ལག་པ་སྟོང་དང་ལྡན་པ་གཞག་པར་བགྱིའོ། །དེའི་མདུན་དུ་ཁྲིའུ་བཞག་སྟེ། ཁྲིའུའི་
སྟེང་དུ་གཟུངས་སྔགས་ཀྱི་ཆོ་ག་གཞག་པར་བགྱིའོ། །དེ་ལ་བདུག་པ་སྣ་ཚོགས་ཀྱིས་བདུག་གོ། །མེ་ཏོག་སྣ་ཚོགས་བཀྲམ་མོ། །ལྷ་བཤོས་སྣ་ཚོགས་དབབ་བོ། །དེར་མཆོད་པ་དེ་རྣམས་བཞག་སྟེ། སྒོག་པ་རྣམ་དགུ་དང་། ཤ་དང་ཆང་མི་དབབ་བོ། །གལ་ཏེ་རྒྱུན་མི་
འཆད་པར་བགྱི་ན་ཉིན་གཅིག་བཞིན་མཆོད་པ་ཐམས་ཅད་ཀྱང་སར་པ་གཞན་གྱིས་བརྗེའོ། །ཆོ་ག་འདིས་ཉི་མ་ཉི་ཤུ་རྩ་གཅིག་ཏུ་དངོས་པོ་ཐམས་ཅད་ཀྱིས་མཆོད་པར་བགྱིའོ། །སྒྲུབ་པ་པོ་གང་དག་སྔོན་མཐོང་བ་དེ་དག་གིས་བྲི་བར་བགྱིའོ། །དེ་སྒྲུབ་པ་པོ་ཤར་ཕྱོགས་སུ་བལྟས་ཏེ།

འགྲེང་ལ་གཟུངས་སྔགས་སྔ་མ་དང་པོ་ནས་བཅུ་གཉིས་ཀྱི་བར་དུ་བརྗོད་པར་བགྱིའོ། །སངས་རྒྱས་ཀྱི་མཐར་ཕྱིན་གྱི་བར་དུ་སྐྱོ་བར་མི་བགྱིའོ། །ཐོག་མར་ཕྱག་རྒྱ་དང་པོ་ལན་ཅིག་བཅིངས་ལ་གསང་སྔགས་ཀྱང་ལན་བདུན་བརྗོད་པར་བགྱིའོ། །བཅུ་གཉིས་པའི་བར་
དུ་ཡང་དེ་བཞིན་དུ་བགྱིའོ། །དེར་དེའི་ཚེ་ཕྱིར་མི་ལྡོག་པ་བརྟན་པོའི་སེམས་བསྐྱེད་པར་བགྱིའོ། །ཆོ་ག་འདིས་དེ་བཞིན་དུ་དགུག་པ་བགྱིས་ན། ཐམས་ཅད་འདུ་བར་འགྱུར་རོ། །དེའི་ཚེ་སངས་རྒྱས་ཉིད་ཀྱི་ཆེད་དུ་ངེས་པར་དྲང་པོའི་སེམས་ཀྱིས་དྲང་པོར་མཆིས་པར་བགྱིའོ། །གསང་
སྔགས་དང་ལྷ་ཐམས་ཅད་རྗེས་སུ་དྲན་པར་བགྱི་སྟེ། ཇི་ལྟར་ན་མདུན་ན་མིག་ལམ་ན་གནས་པ་ལྟ་བུ་དང་ཕན་ཚུན་གནོད་པ་བགྱིད་པ་མ་མཆིས་པར་བགྱིའོ། །དམིགས་པ་གཞན་ལ་དམིགས་པར་མི་བགྱིའོ། །དེའི་ཚེ་རྩ་བའི་གསང་སྔགས་ལན་སྟོང་བརྒྱད་ཅུ་བཟླས་བརྗོད་
བགྱིའོ། །འོན་ཏང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཀུན་དགའ་བོའི་གཟུགས་ཀྱིས་དེར་མཆིས་ཏེ། སྒྲུབ་པ་པོ་ལ་ཅི་འདོད་ཅི་སློང་ཞེས་འདྲི་ཞིང་ཕན་ཚུན་སྨྲ་བར་འགྱུར་རོ། །སྒྲུབ་པ་པོས་བདག་ཉིད་ཀྱིས་མཆོད་པ་བགྱི་བར་བསམས་ལ། བདག་ལ་ཇི་སྐད་
དྲིས་པ་ལན་གདབ་པར་བགྱི་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དོན་དུ་གཟུངས་སྔགས་ཀྱི་རང་བཞིན་འཚལ་ལོ་ཞེས་བརྗོད་པར་བགྱིའོ། །ཡང་ན་འདི་སྐད་དུ་འདི་ནི་ལུང་བསྟན་པའི་དུས་ལགས་པ་སྙམ་བགྱིད་ན། ཐུགས་རྗེ་དང་ལྡན་པས་བདག་ལ་ངེས་པར་
ཐུགས་རྗེ་ཆེན་པོ་བསྐྱེད་དུ་གསོལ། བདག་ནི་རྙེད་པ་དང་། བཀུར་སྟི་དང་། གྲགས་པ་མི་འཚལ་གྱི། ནམ་ཞིག་ན་སེམས་ཅན་ཐམས་ཅད་ལ་བུ་གཅིག་པ་བཞིན་དུ་ལྟ་བ་དང་། ཡོངས་སུ་སྐྱོབ་པར་འགྱུར་སྙམ་དུ་སེམས་སོ། །ཡང་འབྱུང་པོ་གཉུག་མར་གནས་པ་ཐམས་
ཅད་བདག་གིས་བསྒོ་བ་བཞིན་དུ་གནས་པར་གྱུར་ཅིག་སྙམ་དུ་སེམས་སོ་ཞེས་བརྗོད་པར་བགྱིའོ། །གལ་ཏེ་ཡིད་ལ་བསམས་པ་འདི་ཐོབ་ཅིང་དངོས་གྲུབ་དེ་ཐོབ་ན་གཞན་ལ་མི་བརྗོད་པར་བདག་ཉིད་ཀྱིས་འཚལ་བར་བགྱིའོ། །གལ་ཏེ་ཆོ་ག་འདི་གྲུབ་ན་བཟླས་པར་བགྱི། གཅིག་ཏུ་

གཟུང་བར་བགྱིའོ། །འདི་ནི་བསླབ་པ་གཅིག་ཏུ་གསང་ངོ་། །སུ་ཞིག་སྣ་ཚོགས་འཚལ་བ་དེས་ཨ་ག་རུ་ནག་པོའི་ཆབ་ཀྱིས་དཀྱིལ་འཁོར་གྲུ་བཞི་པ་བགྱིས་ལ། རྩ་བའི་གསང་སྔགས་ལན་བརྒྱ་རྩ་བརྒྱད་བཟླས་བརྗོད་བགྱིའོ། །ཡིད་ལ་བསམས་པ་ཡོངས་སུ་རྫོགས་པར་བགྱིད་
པའི་ཕྱག་རྒྱ་བཅུ་པ་ཡང་བཅིང་བར་བགྱིའོ། །འོན་ཏང་འཚལ་བ་ཡོངས་སུ་རྫོགས་པར་རྙེད་པར་འགྱུར་རོ། །དེའི་ཚེ་གླེགས་བམ་འདི་བཞིན་དུ་སེམས་ཤིང་། སུ་ཞིག་འདི་བཞིན་དུ་མཆོད་པ་བགྱིད་ན་གཞན་དུ་མི་འགྱུར་རོ། །གཟུངས་སྔགས་ཀྱི་ཆོ་ག་རྫོགས་སོ།། །།
ཡང་ཆོ་ག་གཞན་ཏེ་སུ་ཞིག་བདེ་བ་ཐམས་ཅད་ཐོབ་པར་འཚལ་བ་དེས། ཡིད་བཞིན་གྱི་ནོར་བུ་རིན་པོ་ཆེ་ལྟ་བུའི་ཕྱག་རྒྱ་དགུ་པ་བཅིངས་ལ་རྩ་བའི་གསང་སྔགས་བཟླས་བརྗོད་བགྱིའོ། །ཏིལ་ནག་པོ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ། མེར་བསྲེགས་ན་ཅི་འཚལ་བ་
བཞིན་དུ་འགྲུབ་བོ། །ཅི་ནས་རྒྱལ་པོ་དགའ་བར་བགྱི་འཚལ་ན་དེས་རྒྱལ་པོ་གནས་པ་ན་མཆིས་པའི་ཤིང་ལས་ལྕུག་མ་བླངས་ཏེ། ལན་ཉི་ཤུ་རྩ་གཅིག་བཟླས་བརྗོད་བགྱིས་ལ། རྒྱལ་པོའི་ཀུན་དགའ་ར་བ་དེར་བོར་ན་དགའ་བར་འགྱུར་རོ། །གལ་ཏེ་སེམས་ཅན་སྡིག་པ་ཅན་
རྣམས་དང་། དགྲ་རྣམས་ཚར་གཅོད་པར་འཚལ་ན། དེས་ཤིང་ནི་མ་པ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ། མེར་བསྲེགས་ན་དབང་དུ་འགྱུར་རོ། །ཡང་ཆོ་ག་གཞན་ཏེ་ལྷ་དང་། འབྱུང་པོ་མ་དུལ་བ་དེའི་སླད་དུ། གུ་གུལ་དང་ཡུངས་ཀར་ལ་ལན་ཉི་ཤུ་རྩ་གཅིག་བཟླས་བརྗོད་
བགྱིས་ཏེ་མེར་བསྲེགས་ན། འབྱུང་པོ་ཐམས་ཅད་བདག་ཉིད་ཚུལ་བཞིན་དུ་གནས་པར་འགྱུར་རོ། །གང་དུ་ནད་བྱུང་ན་ཆབ་ཀྱིས་དཀྱིལ་འཁོར་གྲུ་བཞི་པ་བགྱིས་ཏེ། དེར་བ་མར་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ལ། མེར་བསྲེགས་ན་ནད་ཞི་བར་འགྱུར་རོ། །མར་དེ་ཉིད་
ལས་ཉུང་ཞིག་ནད་པ་ལ་བླུད་ན་འཚོ་བར་འགྱུར་རོ། །སྔོན་ཡུལ་ཀོ་བི་ནར་ནད་བྱུང་སྟེ། ནད་པ་རྣམས་གདུགས་གཅིག་གཉིས་བྲོ་འཚལ་ནས་གུམ་མོ། །དེའི་ཚེ་དབུས་ཀྱི་ཡུལ་གྱི་མི་བདེན་གྱུར་ཅེས་བགྱི་བ་དེར་མཆིས་ཏེ། དེས་གཟུངས་སྔགས་འདིའི་ཆོ་ག་བགྱིས་ནས་བསྒྲགས་པ་

དང་། ནད་ཆད་དོ། །འབྱུང་པོའི་རྒྱལ་པོ་ཡང་ཡུལ་དེ་ནས་བྱུང་ངོ་། །ཐམས་ཅད་ཀྱིས་ཀྱང་འདིའི་སྟོབས་འཚལ་ཏེ། གང་དུ་རང་གི་འཁོར་དུ་ཕ་རོལ་གྱི་དམག་ཚོགས་མཆི་བ་དེར་ཐོག་མའི་རྩ་བའི་གསང་སྔགས་བཅིངས་ལ་བཅངས་ལ། གསང་སྔགས་ལན་
བརྒྱ་རྩ་བརྒྱད་བཟླས་བརྗོད་བགྱིས་ན། དགྲ་བོ་ཆོམ་རྐུན་རྣམས་བདག་ཉིད་མི་རུང་བར་འགྱུར་རོ། །སུ་ཞིག་ཚེ་ཟད་པ་དེས་འགོག་པ་ལ་སྙོམས་པར་འཇུག་པའི་ཕྱག་རྒྱ་བཅིང་བར་བགྱི། ཉིན་གཅིག་བཞིན་མཆོད་པ་བགྱི། ཨ་ག་རུ་ནག་པོའི་བདུག་པས་བདུགས་པར་བགྱི་
ཞིང་། གསང་སྔགས་ལན་སྟོང་རྩ་བརྒྱད་བཟླས་བརྗོད་བགྱིས་ན་དེ་ཚེ་རིང་བར་འགྱུར་རོ། །བུད་མེད་གང་ཞིག་བུ་མི་ཕྱིན་ན་བ་མར་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ། དེ་ལ་བླུད་ན་ཞི་བ་དང་བདེ་བར་འགྱུར་རོ། །གང་བསྐྱེད་པའི་བུ་དང་། བུ་མོ་དག་ཀྱང་ཡོངས་སུ་
རྫོགས་པར་འགྱུར་རོ། །མཚན་མོ་བཟང་པོ་སྔོན་གྱི་བསོད་ནམས་རྣམས་ཀྱིས་བརྒྱན་ཅིང་། སེམས་ཅན་རྣམས་དགའ་བ་དང་། མིར་སྐྱེས་པ་ན་རྟག་ཏུ་མཆོད་པའི་འོས་སུ་འགྱུར་ཞིང་བདེ་བ་མཆོག་རྣམས་མྱོང་བར་འགྱུར་རོ། །སུ་ཞིག་མིག་ན་བ་དེས་མིག་སྟོང་དང་ལྡན་པའི་ཕྱག་རྒྱ་བཅིངས་
ལ་གཟུངས་སྔགས་ཐམས་ཅད་ཀྱི་ཕྱག་རྒྱས་མིག་ལ་ཕྱག་རྒྱས་བཏབ་ན་སོས་པར་འགྱུར་རོ། །ཇི་ལྟར་སྟེང་གི་ཕྱོགས་ཀྱི་ལྷ་བདེ་བ་མྱོང་བ་རྣམས་མཐོང་བ་དེ་ལྟ་བུའི་མཐོང་བ་དང་ལྡན་པར་འགྱུར་རོ། །ད་ནི་རི་མོ་བྲི་བའི་ཆོ་ག་བརྗོད་པར་བགྱི་སྟེ། རི་མོ་བྲི་བའི་ཆེད་དུ་རས་དཀར་པོ་
བགྱིས་ལ། བྱང་ཆུབ་སེམས་དཔའ་མདོག་འཛམ་བུའི་གསེར་ལྟ་བུ་བྲི་བར་བགྱིའོ། །ལག་པ་སྟོང་དང་ལྡན་པར་བགྱིའོ། །ལག་པ་སོ་སོའི་ལག་མཐིལ་ན་མིག་རེ་རེ་མཆིས་པར་བགྱི་སྟེ། སྤྱིན་མ་མཆིས་པའི་ཚོན་གྱིས་བྲི་བར་བགྱིའོ། །ཚོན་རྩི་ཡང་ཀ་པིད་ཐ་དང་
བསྲེ་བར་བགྱིའོ། །མགོ་ལ་རིན་པོ་ཆེ་སྣ་བདུན་གྱི་ཅོད་པན་བྲི་བར་བགྱིའོ། །ཡན་ལག་དང་། ཉིང་ལག་རྣམས་སུ་རྒྱན་གྱིས་བརྒྱན་པར་བྲི་བར་བྱའོ། །ཡང་ན་རས་ལ་བྱང་ཆུབ་སེམས་དཔའ་སྲིད་དུ་ཁྲུ་གང་པ་བྲིས་ཏེ། ལག་པ་གཉིས་བྲི་བར་བགྱིའོ། །གོང་དུ་སྨོས་པའི་

ལག་པ་སྟོང་དང་ལྡན་པའི་ཕྱག་རྒྱ་ལྔ་པས། རིག་སྔགས་འཆང་གིས་མཆོད་པ་བགྱིའོ། །གལ་ཏེ་ལག་པ་དང་། མིག་སྟོང་དང་ལྡན་པར་མ་གྱུར་ན། དཔྲལ་བར་མིག་གཅིག་བགྱིའོ། །ཡང་འདི་ནི་ཆོ་ག་གཞན་ཏེ། སུ་ཞིག་ཆོས་ཀྱི་སྒོ་འདི་མཆོད་པར་འཚལ་ན། ཐོག་
མར་རས་ལ་བྲི་བར་བྱའོ། །དེ་ནི་འདི་ལྟར་བྲི་བར་བགྱི་སྟེ། ཆོ་ག་སྔ་མ་བཞིན་དུ་དཀྱིལ་འཁོར་བགྱིའོ། །དེ་ནས་རི་མོ་མཁན་བསླབ་པ་བརྒྱད་བཟུང་བ་ཆབ་ཁུང་སར་མཆིས་ཏེ། སླར་ལོག་ནས་ལེགས་པར་བཀྲུས་པ་གཙང་མས་བྲི་བར་བགྱིའོ། །ཚོན་རྩི་རུང་བས་
ཆོ་ག་བཞིན་བྲིས་ལ། དེའི་ཚེ་དཀྱིལ་འཁོར་གྱི་དབུས་སུ་མཆིས་ཏེ། དེར་སྨྱུང་བ་བགྱིས་ལ་ཉི་མ་ཉི་ཤུ་རྩ་གཅིག་ཏུ་མཆོད་པའི་ལས་རྒྱ་ཆེར་བགྱིས་ན། དེ་ན་གནས་བྱང་ཆུབ་སེམས་དཔའ་འོད་ཟེར་གཏོང་སྟེ། དེ་ལ་ཐེ་ཚོམ་མི་བགྱིའོ། །སླད་ཀྱིས་ཟླ་བ་དང་། ཉི་མ་ལྟ་བུའི་
འོད་ཀྱང་བགྱིད་དོ། །གང་དགེ་བ་དང་དད་པས་མི་བགྱིད་པ་དེས་མ་གཏོགས་སོ། །བྱང་ཆུབ་སེམས་དཔའ་ལག་པ་སྟོང་དང་ལྡན་པའི་ཆོ་གའོ། །དེ་བཞིན་གཤེགས་པ་རྣམ་པར་གཟིགས་བྱུང་བའི་ཚེ་ཡང་བདག་གིས་བདུད་འདུལ་བའི་ལུས་མིག་སྟོང་དང་ལྡན་པ་སྤྲུལ་པའོ། །
མིག་རེ་རེ་ལས་ཀྱང་སངས་རྒྱས་རེ་རེ་སྤྲུལ་ཏེ། དེ་དག་ནི་བསྐལ་པ་བཟང་པོ་ལ་སངས་རྒྱས་སྟོང་འབྱུང་བ་ལགས་སོ། །ལག་པ་སྟོང་ལས་ལག་པ་རེ་རེ་ལ་ཡང་འཁོར་ལོས་སྒྱུར་བའི་རྒྱལ་པོ་རེ་རེ་སྤྲུལ་ཏོ། །དེ་དག་ནི་འཁོར་ལོས་སྒྱུར་བའི་རྒྱལ་པོ་སྟོང་འབྱུང་བ་ལགས་སོ། །བདུད་
འདུལ་བའི་ཚོགས་ཀྱི་ནང་ན། བྱང་ཆུབ་སེམས་དཔའི་ལུས་ནི་ཐམས་ཅད་ཀྱི་མཆོག་གོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །ངས་གསང་སྔགས་འདི་སངས་རྒྱས་ཀྱི་མཐུས་རྒྱས་
པར་བཤད་ན། བསྐལ་པ་འདས་ཀྱང་མཐར་ཐུག་པར་མི་འགྱུར་རོ། །བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས། བཅོམ་ལྡན་འདས་ལ་གསང་སྔགས་འདི་ཐོས་ནས་རབ་ཏུ་དགའ་སྟེ། ཡི་རངས་ནས་བཟུང་སྟེ། སངས་རྒྱས་ཀྱི་ཞབས་

ལ་ཕྱག་འཚལ་ནས་གཟུངས་སྔགས་འདི་བརྗོད་དོ། །ན་མོ་རཏྣ་རཤྨི་ཙནྡྲ་ཨ་ལཾ་ཀཱ་ར་མཱརྒ་ཏེ་ཛ་པུཎྱ་ཙཀྵུ་ར་པི་ཥ་ཡ་རཱ་ཛཱ་ཡ་ཏ་ཐཱ་ག་ཏཱ་ཡ། ཏདྱ་ཐཱ། རཏྣ་རཏྣ། ཏ་ཏ་ཤ་རཏྣ། རཏྣ་པྲ་ཏི་མ་ཏེ། རཏྣ་པྲ་བྷཱ་རཏྣ་ད་ཀ་ཏེ་སྭཱ་ཧཱ། བྱང་ཆུབ་སེམས་དཔའ་འཕགས་
པ་སྤྱན་རས་གཟིགས་དབང་ཕྱུག་གིས་གཟུངས་སྔགས་འདི་བརྗོད་ནས། དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་ཐུག་གི་བར་དུ། རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །འོག་མིན་གྱི་ལྷའི་རིས་ན། དབང་
ཕྱུག་ཆེན་པོ་ཡང་མི་བདེ་བར་གྱུར་ཏོ། །ལྷའི་གནས་དེར་འཇིགས་པ་ཆེན་པོ་ཡང་བྱུང་ངོ་། །ངན་སོང་དུ་གྱུར་པ་ཐམས་ཅད་ཀྱང་སྡུག་བསྔལ་ཆེན་པོ་རྙེད་དོ་ཞེས་སྒྲ་ཆེན་པོ་འབྱིན་ཅིང་། ཕར་འབྲོས་ཚུར་འབྲོས་ཏེ། གར་སོང་མི་ཤེས་སོ། །དེའི་ཚེ་སྤྲུལ་པས་ངན་སོང་དུ་གྱུར་པའི་
འཁོར་ཆེན་པོ་ལ་འདི་སྐད་ཅེས་སྨྲས་སོ། །གལ་ཏེ་གསང་སྔགས་འདི་ལས་འདའ་ཞིང་འགྲས་པར་བྱེད་ན་མགོ་བོ་རྡུལ་ཕྲ་རབ་བཞིན་དུ་འགྱེས་སོ། །གསང་སྔགས་འདིའི་མཐུས་ནི་རི་འཐོར་རོ། །རྒྱ་མཚོ་ཆེན་པོ་སྐེམས་སོ། །ལྷ་མ་ཡིན་གྱི་དམག་ཕམ་པར་བགྱིད་དོ། །འབྱུང་
པོ་རྣམས་ཚར་གཅོད་དོ། །སྡིག་པ་ཅན་གྱི་མི་རྣམས་ཀྱང་ཚར་གཅོད་དོ། །ནད་ཆེན་པོ་དག་ཀྱང་ཆད་པར་བགྱིད་དོ། །ཡུལ་བསྲུངས་པར་ཡང་འགྱུར་རོ། །སུམ་ཅུ་རྩ་གསུམ་གྱི་ལྷ་རྣམས་ཀྱང་ཕྱག་འཚལ་ལོ། །རིགས་ཀྱི་བུ་གང་ལ་ལ་ཞིག་གསང་སྔགས་འདི་བརྗོད་ཅིང་
འཛིན་པ་དེའི་གཟི་བརྗིད་དང་། སྟོབས་ཡུན་ཐུང་དུས་བཤད་པར་མི་ནུས་སོ། །གཟུངས་སྔགས་འདི་འཆང་ཞིང་བརྗོད་པ་ནི་དཔའ་བར་འགྱུར་རོ། །ཕྱུག་པ་དང་། སྟོབས་དང་ལྡན་པ་དང་། དབང་དང་ལྡན་པར་འགྱུར་རོ། །ཇི་སྲིད་འཚོའི་བར་དུ་རྒྱལ་པོ་བྱམས་པར་འགྱུར་རོ། །ཅི་
འཚལ་བ་ཐམས་ཅད་འགྲུབ་བོ། །སུ་ཞིག་བདུད་ཕམ་པར་བགྱིད་པར་འཚལ་བ་དེས་བདུག་པ་གཙང་མ་ལ་རྩ་བའི་གསང་སྔགས་ལན་ཉི་ཤུ་རྩ་གཅིག་བཟླས་བརྗོད་བགྱིའོ། །སུ་ཞིག་འདི་སྙམ་དུ་བདག་ལ་སེམས་ཅན་ཐམས་ཅད་བྱམས་པར་འཚལ་བ་དེས། སོ་ཤིང་ལ་ལན་ཉི་

ཤུ་རྩ་གཅིག་བཟླས་བརྗོད་བགྱིས་ཏེ་མཆོད་ན་བྱམས་པར་འགྱུར་རོ། །སུ་ཞིག་བདག་གི་ཚིག་ཐོགས་པ་མེད་པར་འགྱུར་བར་འཚལ་བ་དེས། ཤུ་དག་ལ་ལན་སྟོང་རྩ་བརྒྱད་བཟླས་བརྗོད་བགྱིས་ལ་སྙིང་གར་བསྐུས་ན་འགྲུབ་བོ། །ལས་དེ་དག་ལ་ཡང་རྩ་བའི་གསང་སྔགས་བརྗོད་
དོ། །ཕྱག་རྒྱ་ཡང་བཅིང་བར་བགྱིའོ། །ལག་པ་གཉིས་རྒྱབ་སྤྲད་དེ་སྦྱར་ལ་མཐེ་བོང་གཉིས་བརྐྱང་ངོ་། །ཕྱག་རྒྱ་འདི་ནི་ཇི་ལྟར་བདག་སྲུང་བ་དེ་བཞིན་དུ་གཞན་ཡང་སྲུང་ངོ་། །མཚམས་བཅད་པ་ཡང་བགྱིའོ། །གང་ཞིག་ཏུ་མཆིན་ཆབ་བམ། ཐལ་པ་ལག་པར་བླངས་ཏེ་ལན་
བདུན་བཟླས་བརྗོད་བགྱིས་ལ། བདག་གི་སྟེང་དུ་གཏོར་ན། ཕྱོགས་བཞིར་མཚམས་བཅད་པར་ཡང་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་འབྱུང་པོ་རྣམས་སམ། བགེགས་དང་། ལོག་འདྲེན་རྣམས་ཀྱིས་མཐོ་བཙམས་པར་གྱུར་ན། བལ་པོ་སེའུ་
ཤིང་གི་ལྕུག་མ་ལ་གསང་སྔགས་བཟླས་བརྗོད་བགྱིས་ཏེ། དལ་གྱིས་བཞུས་ན་སོས་པར་འགྱུར་རོ། །འདི་ནི་བྱང་ཆུབ་སེམས་དཔའི་སོ་སོའི་རིག་པའི་ཕྱག་རྒྱ་ཐོགས་པ་མེད་པ་སྟེ། བཅུ་གསུམ་པའོ། །གསང་སྔགས་ནི་འདི་ལགས་ཏེ། ནམཿསརྦ་བུད་དྷ་དྷརྨ་སཾ་གྷཱ་ཡ། ན་མ་
ཨཱརྱཱ་བ་ལོ་ཀི་ཏེ་ཤྭ་ར་སྱ་བོ་དྷི་སཏྭ་སཏྭ་སྱ། ན་མོ་བཛྲ་པཱ་ཎི་སྱ། བོ་དྷི་སཏྭ་སྱ། ཏདྱ་ཐཱ། དྷུ་པི་དྷུ་པི། ཀཱ་ཡ་དྷུ་པི། པྲ་ཤ་མ་ནི་སྭཱ་ཧཱ། ལོག་པར་ལྟ་བ་གཞན་མུ་སྟེགས་ཅན་རྣམས་འདུལ་བར་ནུས་སོ། །སུ་ཞིག་དུས་གསུམ་དུ་གསང་སྔགས་འདི་ལན་ཉི་ཤུ་རྩ་རེ་རེ་བརྗོད་པ་དེས། སངས་
རྒྱས་བཅོམ་ལྡན་འདས་བྱེ་བ་ཕྲག་བཅུ་ལ་མཆོད་པའི་ལས་རྣམ་པ་སྣ་ཚོགས་ཀྱིས་མཆོད་པ་བགྱིས་པར་འགྱུར་རོ། །བུད་མེད་དུ་སྐྱེ་བར་མི་འགྱུར་རོ། །འཆི་བའི་དུས་ཀྱི་ཚེ་ངན་འགྲོ་གསུམ་པོ་དག་ལས་ཡོངས་སུ་ཐར་བར་འགྱུར་རོ། །འཇིག་རྟེན་གྱི་ཁམས་བདེ་བ་ཅན་དུ་མཆི་
བར་འགྱུར་རོ། །དེ་བཞིན་གཤེགས་པ་འོད་དཔག་མེད་ཀྱིས་དེའི་སྤྱི་བོར་ཕྱག་བཞག་སྟེ། འདི་སྐད་དུ་བུ་མ་འཇིགས་ཤིག །ངའི་སངས་རྒྱས་ཀྱི་ཞིང་འདིར་འོངས་སོ། །འདིར་སྐྱེས་ནས་དུས་མ་ཡིན་པར་འཆི་བས་འཆི་བར་མི་འགྱུར་རོ། །འདིར་འབྱུང་པོ་རྣམས་ཀྱིས་གླགས་

རྙེད་པར་མི་འགྱུར་རོ་ཞེས་གསུང་ངོ་། །འགྲེང་སྟེ་ལག་པ་གཡོན་པ་གྲུ་མོ་བཀུག་པ་དྲང་པོར་བརྐྱང་སྟེ། མི་འཇིགས་པ་སྦྱིན་པར་བགྱི། ལག་པ་གཡས་པའི་མཐེ་བོང་ལག་མཐིལ་དུ་བཀུག་ལ་སོར་མོ་བཞིས་མནན་ཏེ། ཁུ་ཚུར་འདི་རྣ་བ་གཡས་པའི་གོང་དུ་བཞག་ལ་
མཛུབ་མོ་སྒུལ་བར་བགྱི། བརྐྱང་བར་བགྱི། བསྐུམ་པར་བགྱིའོ། །ཕྱག་རྒྱ་འདི་ནི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་ལས་རྣམས་འབྱང་བར་བགྱི་བའི་སླད་དུ་སྨྲས་པ་སྟེ་བཅུ་བཞི་པའོ། །ཕྱག་རྒྱ་འདི་ནི་ཉིན་གཅིག་བཞིན་དུས་གསུམ་དུ་བཅིངས་ལ་གསང་
སྔགས་ཀྱང་ལན་བདུན་བདུན་བརྗོད་ན། མཚམས་མེད་པ་ལྔ་པོ་དག་དང་། རྩ་བའི་ལྟུང་བ་བཞི་པོ་དག་ཀྱང་འབྱང་བར་བགྱིད་ནུས་པར་འགྱུར་རོ། །སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་ན། ལས་ཀྱི་རྩ་བ་ཐམས་ཅད་ཚིག་པར་འགྱུར་རོ། །གང་གི་ཚེ་ཚེ་འདི་འདོར་
བ་ན། སངས་རྒྱས་དང་ཕྲད་པར་འགྱུར་རོ། །འཁོར་ལོས་སྒྱུར་བའི་རྒྱལ་པོར་འགྱུར་རོ། །དཔག་ཏུ་མེད་ཅིང་མི་ཟད་པའི་སྙིང་པོའི་གཟུངས་འཐོབ་པར་འགྱུར་རོ། །མཉམ་པ་ཉིད་ཀྱི་ཏིང་ངེ་འཛིན་འཐོབ་པར་འགྱུར་རོ། །ལུས་ལ་ལྟས་རྣམ་པ་ཉི་ཤུ་རྩ་བརྒྱད་འབྱུང་བར་
འགྱུར་རོ། །ལུས་ལ་གནོད་པ་མི་འབྱུང་ངོ་། །མིག་ནད་དང་། རྣ་བའི་ནད་དང་། སྣའི་ནད་དང་། ལྕེ་ནད་མི་འབྱུང་ངོ་། །ཕྱི་དང་ནང་གི་ནད་ཐམས་ཅད་ཞི་བར་འགྱུར་རོ། །སྔོན་གྱི་ལས་མི་དགེ་བ་རྣམས་ཀྱང་འབྱང་བར་འགྱུར་རོ། །གལ་ཏེ་ཆར་མི་འབབ་ན་ཏིལ་ནག་པོ་
ལ་ཨེ་རཎྜའི་མར་གྱིས་སྦྲུས་ཏེ། རིལ་བུར་བགྱིས་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ། མཚེ་འུར་སྩལ་ན། དེའི་མོད་ལ་ཆར་དབབ་བོ། །གལ་ཏེ་ཆར་ཆེས་ན་ཡུངས་ཀར་གྱི་མར་གྱིས་སྣ་མའི་མེ་ཏོག་སྦྲུས་ལ་རིལ་བུར་བགྱིས་ཏེ། ལན་བརྒྱ་རྩ་བརྒྱད་བཟླས་བརྗོད་
བགྱིས་ལ་མཚེའུར་སྩལ་ན་ཆར་འཆད་པར་འགྱུར་རོ། །སོར་མོ་ལྔ་ཕན་ཚུན་བསྣོལ་ཏེ། གཡོན་པའི་སོར་མོ་རྣམས་ཀྱིས་གཡས་པའི་སོར་མོ་རྣམས་དམ་དུ་འཁྱུད་ལ་མགོ་བོའི་སྟེང་དུ་བཞག་སྟེ། རྩ་བའི་གསང་སྔགས་བཟླས་བརྗོད་བགྱིའོ། །འདི་ནི་སྟོང་གསུམ་གྱི་སྟོང་

ཆེན་པོའི་འཇིག་རྟེན་དུ་བདུད་འདུལ་བའི་ཕྱག་རྒྱ་སྟེ་བཅོ་ལྔ་པའོ། །ཕྱག་རྒྱ་འདིས་རིང་བསྲེལ་དང་བཅས་པའི་མཆོད་རྟེན་གྱི་མདུན་དུ་སྨྱུང་བར་བགྱི། གདུགས་ཉི་ཤུ་རྩ་དགུའི་བར་དུ་ཙནྡན་དཀར་པོའི་འདག་གུས་དཀྱིལ་འཁོར་བྱུག །མེ་ཏོག་གཙང་མ་དགྲམ་མོ། །དེའི་ཚེ་ཁྲུས་
བགྱིས་ལ་གོས་གཙང་མ་བགོས་ཏེ། ཨ་ག་རུ་ནག་པོའི་བདུག་པས་བདུག་པར་བགྱིའོ། །རྩ་བའི་གསང་སྔགས་ལན་བརྒྱ་རྩ་བརྒྱད་བཟླས་བརྗོད་བགྱིའོ། །འདི་ནི་ངར་སྙེམས་པ་བགྱིའོ། །དེ་ནས་ཡུངས་ཀར་དང་། ཏིལ་ནག་པོ་ལྷན་ཅིག་བཏགས་ལ། ཕོ་གསུམ་གང་ཙམ་ལ་
ལན་ཅིག་བཟླས་བརྗོད་བགྱིས་ཏེ་ཞུགས་སུ་དོར་རོ། །དེ་ལྟར་གདུགས་བདུན་གྱི་བར་དུ་གདུགས་གཅིག་ཅིང་། ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ན། ཅི་འཚལ་བ་ཐམས་ཅད་འགྲུབ་པར་འགྱུར་རོ། །འགྲེང་ལ་རྐང་པ་མཉམ་པར་ཉེ་བར་གཞིབས་ཏེ། ལག་པ་གཡས་པ་ཐུར་དུ་
ཐམས་ཅད་བརྐྱང་ལ་བཀན་ཏེ། པུས་མོའི་སྟེང་དུ་བཞག །ལག་པ་གཡོན་པ་ཡང་དེ་བཞིན་དུ་བགྱིའོ། །འདི་ནི་བྱང་ཆུབ་སེམས་དཔའི་མི་འཇིགས་པ་སྩོལ་བའི་ཕྱག་རྒྱ་སྟེ་བཅུ་དྲུག་པའོ། །ཕྱག་རྒྱ་འདི་རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ་བཅིངས་ལ། རྩ་བའི་གསང་
སྔགས་ལན་བརྒྱ་རྩ་བརྒྱད་བཟླས་བརྗོད་བགྱིས་ན། སེམས་ཅན་ཐམས་ཅད་ལ་མི་འཇིགས་པ་སྩོལ་བར་འགྱུར་རོ། །ཡང་ན་ཤུ་ཏིའི་ས་བོན་དང་། ཡུངས་ཀར་དང་། ཤུ་དག་དང་། ཉེའུ་ཤིང་དང་། འདི་དག་སངས་རྒྱས་ཀྱི་སྤྱན་སྔའམ། བླ་གབ་མེད་པའི་ཕྱོགས་སུ་སྦྱིན་སྲེག་བགྱིའོ། །
གསང་སྔགས་ལན་སུམ་ཅུ་གཉིས་བཟླས་བརྗོད་བགྱིའོ། །མེ་ཏོག་དང་། བདུག་པས་མཆོད་པར་བགྱིའོ། །འདི་ནི་གསང་སྔགས་ཀྱི་ཆོ་ག་ལགས་ཏེ། ཅི་རྩོམ་པ་ཐམས་ཅད་དེ་བཞིན་དུ་འགྲུབ་བོ། །གསང་སྔགས་གང་མི་འགྲུབ་ན། གསང་སྔགས་འདི་བཟླས་བརྗོད་བགྱིས་ན་
འགྲུབ་བོ། །རྨི་ལམ་མཐོང་བར་འཚལ་ན། གསང་སྔགས་འདི་ཡང་བརྗོད་ཅིང་ཕྱག་རྒྱ་འདི་ཡང་བཅིངས་ན་ཅི་འཚལ་བ་རྨི་ལམ་དུ་མཐོང་བར་འགྱུར་རོ། །མི་བསོད་ནམས་དང་མི་ལྡན་པ་གང་ཞིག་དངོས་གྲུབ་མི་ཐོབ་ན། གསང་སྔགས་འདི་གདུགས་བདུན་གྱི་བར་དུ་གདུགས་གཅིག་ཀྱང་

དུས་གསུམ་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་ན། ཅི་འཚལ་བ་དེ་བཞིན་དུ་འགྲུབ་བོ། །དེའི་ཚེ་ཡང་བྱང་ཆུབ་སེམས་དཔའ་རྒྱ་མཚོ་ཆེན་པོའི་ནང་དུ་ཀླུའི་རྒྱལ་པོ་རྒྱ་མཚོའི་ཁང་པར་འདུག་སྟེ་ཆོས་བཤད་དོ། །དེར་ཀླུ་སྡུག་བསྔལ་ཆེན་པོ་མྱོང་བ་དག་མཐོང་ནས།
སྙིང་རྗེ་ཆེན་པོ་སྐྱེས་ཏེ། གལ་ཏེ་ཡོངས་སུ་སྐྱོབ་པ་ཞིག་ཡོད་ན། སྡུག་བསྔལ་གྱི་གནོད་པ་རྣམས་ལས་ཐར་བར་འགྱུར་རོ་སྙམ་མོ། །དེའི་ཚེ་དེར་ཀླུའི་བུ་མོ་ཆོས་འདོད་པ་གཅིག་གིས་རིན་པོ་ཆེ་འཇིག་རྟེན་གྱི་ཁམས་མི་མཇེད་གཅིག་རིབ་ཅིག་ཕུལ་བ་དང་། དེས་ཀྱང་སྡུག་བསྔལ་
ཐམས་ཅད་ཡོངས་སུ་ཐར་བར་བྱེད་པའི་ཆོས་བཤད་དོ། །དེའི་ཚེ་དེར་གསང་སྔགས་འཛིན་པའི་བྱང་ཆུབ་སེམས་དཔའ་ཆུའི་སྙིང་པོས་ཀུན་ཏུ་སྲུང་བའི་ཕྱིར་གསང་སྔགས་འདི་སྨྲས་སོ། །བི་མ་ལེ་མ་ཧཱ་བི་མ་ལེ། ཨོ་ཧ་རེ་མ་ཧཱ་ཨོ་ཧ་རེ། ཧུ་མ་རེ་མ་ཧཱ་ཧུ་མ་རེ་སྭཱ་ཧཱ། རིགས་ཀྱི་བུའམ་
རིགས་ཀྱི་བུ་མོ་གང་ལ་ལ་ཞིག་གསང་སྔགས་འདི་འཛིན་ན། དེ་གར་མཆི་བར་བདུད་ཀྱི་འཁོར་གྱིས་སྡུག་བསྔལ་བར་བགྱིད་པའི་བར་དུ་བདག་གིས་རྟག་ཏུ་ཀུན་ཏུ་བསྲུང་བར་བགྱིའོ། །གང་ལ་ལ་ཞིག་གློ་བུར་དུ་འཇིགས་པར་གྱུར་ཏམ། རང་གི་ཡུལ་ལམ་གཞན་གྱི་ཡུལ་ལམ།
ཆོམ་རྐུན་དང་ཕྱིར་རྒོལ་བ་དག་བྱུང་ན། དེས་ཚོན་སྐུད་སྣ་ལྔ་པ་བཅིང་བར་བགྱི་སྟེ། མདུད་པ་ཉི་ཤུ་རྩ་གཅིག་བོར་ལ། མདུད་པ་རེ་རེ་ཞིང་ཡང་གསང་སྔགས་ལན་རེ་རེ་བཟླས་བརྗོད་བགྱིས་ཏེ། ལག་པ་གཡོན་པ་ལ་བཅིང་བར་བགྱིའོ། །ལག་པ་གཡོན་པའི་སྲིན་ལག་དང་།
གུང་མོ་དང་། མཛུབ་མོ་རྣམས་ཁུ་ཚུར་བཅངས་ལ། མཐེ་བོས་དེ་དག་མནན། མཐེའུ་ཆུང་བརྐྱང་སྟེ། དགྲ་ལོགས་སུ་བསྟན་ལ་གསང་སྔགས་ཀྱང་ལན་བདུན་བཟླས་བརྗོད་བགྱིའོ། །འདི་ནི་བྱང་ཆུབ་སེམས་དཔའ་མིག་སྟོང་དང་ལྡན་པའི་ཀུན་ཏུ་སྲུང་བའི་ཕྱག་རྒྱ་སྟེ་བཅུ་བདུན་
པའོ། །གསང་སྔགས་ལན་བཅུ་བདུན་བཟླས་བརྗོད་བགྱིས་ན། དགྲ་ཐམས་ཅད་ལྡོག་པར་འགྱུར་ཞིང་། གནོད་པར་བགྱིད་མི་ནུས་སོ། །དེའི་ཚེ་ཡང་བྱང་ཆུབ་སེམས་དཔའ་གངས་ཀྱི་རི་ལ་གནས་ཏེ་ཆོས་ཀྱང་འཆད་དོ། །དེར་གནོད་སྦྱིན་དང་སྲིན་པོ་རྣམས་ཀྱི་ཡུལ་ན་

སེམས་ཅན་རྣམས་ཕན་ཚུན་ཟ་ཞིང་། དེ་དག་ལ་དགེ་བའི་སེམས་མེད་པར་མཐོང་ནས། བྱང་ཆུབ་སེམས་དཔའ་འདི་སྙམ་དུ་ནམ་ཞིག་ན་འདུལ་བར་འགྱུར་སྙམ་ནས་དེའི་ཚེ་དེར་སོང་སྟེ། ཡུལ་དེར་དེ་དག་གི་དོན་གྱི་ཕྱིར་ལག་པ་སྟོང་དང་ལྡན་ཞིང་མིག་སྟོང་དང་ལྡན་པའི་ལུས་སྤྲུལ་ནས་
དེས་བདུད་རྣམས་ཕམ་པར་བྱས་སོ། །དེར་གཟུངས་སྔགས་འདི་ཡང་སྨྲས་སོ། །དེ་ནས་སྲིན་པོའི་རྒྱལ་པོ་བྱང་ཆུབ་སེམས་དཔའི་གན་དུ་སོང་སྟེ། ལས་དེ་བཤགས་ནས་ཕྱག་བྱས་སོ། །བྱང་ཆུབ་སེམས་དཔས་ཀྱང་ཕྱག་རྒྱ་བཅུ་བདུན་གྱིས་ཕྱག་རྒྱས་བཏབ་པ་དང་། དེའི་མོད་
ལ་བྱང་ཆུབ་ཀྱི་ལམ་ཐོབ་བོ། །འགྲེང་སྟེ་རྐང་པ་ཕན་ཚུན་ཉེ་བར་གཞིབས་ལ་སྙིང་གར་ཐལ་མོ་སྦྱར་ཏེ་མཐེའུ་ཆུང་ཕན་ཚུན་བསྣོལ་ལོ། །གཡོན་པས་གཡས་པ་ལ་འཁྱུད་པར་བགྱི། རྩ་བའི་གསང་སྔགས་ཀྱང་ལན་ཉི་ཤུ་རྩ་གཅིག་བཟླས་བརྗོད་བགྱིའོ། །བྱང་ཆུབ་སེམས་
དཔའ་འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱ་ཡོངས་སུ་རྫོགས་པ་སྟེ་བཅྭ་བརྒྱད་པའོ། །ཡིད་ལ་བསམ་པ་རྣམས་རྫོགས་པར་འགྱུར་རོ། །སུ་ཞིག་ངན་འགྲོ་དྲུག་པོ་དག་གི་སེམས་ཅན་རྣམས་སྐྱོབ་པར་འཚལ་བ་དེས། འཁོར་ལོའི་ཕྱག་རྒྱ་བཅིང་བར་བགྱི་སྟེ། སོར་མོ་བཅུ་རྩེ་
སྤྲད་ལ་ལག་རྟིང་དབྱེ། སོར་མོའི་བར་ཡང་སོར་གཉིས་གཉིས་ཙམ་གྱིས་མ་ཕྲད་པར་བགྱིའོ། །ཕྱག་རྒྱ་འདིས་བྱང་ཆུབ་སེམས་དཔའ་སེམས་ཅན་རྣམས་ཡོངས་སུ་ཐར་བར་བགྱིད་ཅིང་། འགྲོ་བ་དྲུག་པོ་དག་ཏུ་ཞུགས་པ་དང་འདྲ་བར་རིག་པར་བགྱི་སྟེ། ཕྱག་རྒྱ་དེའི་ཆོ་གའོ། །ཡང་
སྐྱིལ་མོ་ཀྲུང་བཅས་ཏེ་མཆིས་ལ་ལག་པ་གཡོན་པ་པུས་མོའི་སྟེང་དུ་ལག་མཐིལ་བཀན་ཏེ་བཞག་པར་བགྱིའོ། །གཡས་པ་ཡང་དེ་བཞིན་དུ་བགྱིས་ལ། ལག་མཐིལ་པུས་མོའི་སྟེང་དུ་ཁ་ཕུབ་སྟེ་གཞག་པར་བགྱིའོ། །འདི་ནི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་
དབང་ཕྱུག་གི་དམ་ཚིག་ཡོངས་སུ་རྫོགས་པ་ཡང་དག་པའི་བྱང་ཆུབ་ཀྱི་ཕྱག་རྒྱ་སྟེ་བཅུ་དགུ་པའོ། །འདི་ནི་རང་བཞིན་གྱིས་འགོག་པ་དང་མཚུངས་ཏེ། དུས་གསུམ་གྱི་སངས་རྒྱས་བཅོམ་ལྡན་འདས་རྣམས་ཕྱག་རྒྱ་འདི་གཅིག་པུས་སངས་རྒྱས་ཀྱི་བྱང་ཆུབ་བརྙེས་སོ། །ཕྱག་རྒྱ་

འདིས་ལས་མི་དགེ་བ་ཐམས་ཅད་འབྱང་བར་འགྱུར་རོ། །གལ་ཏེ་སྒྲུབ་པ་པོ་སྐྱིལ་མོ་ཀྲུང་བཅས་ཏེ་མཆིས་པ་ལ་ཆོས་རྣམས་མངོན་དུ་གདའ་བར་མ་གྱུར་ན། གདུགས་བདུན་གྱི་བར་དུ་དགོན་པའི་ཕྱོགས་ཀྱི་གནས་སུ་ཕྱག་རྒྱ་འདིས་གཟུངས་འདི་བརྗོད་ལ་ཤིན་ཏུ་དད་པས་
སངས་རྒྱས་ལ་ཕྱག་བགྱི་ཞིང་། གདུགས་མཚན་དྲུག་ཏུ་ལས་རྣམས་སོ་སོར་བཤགས་ན། དེའི་ཚེ་ཆོས་མདུན་དུ་གདའ་བར་འགྱུར་རོ། །བསོད་ནམས་དཔག་ཏུ་མ་མཆིས་ཤིང་གྲངས་མ་མཆིས་པར་འགྱུར་རོ། །ཡང་ལག་པ་གཡོན་པའི་སོར་མོ་བཞི་ཁུ་ཚུར་བཅངས་ལ་གཡས་པའི་
སོར་མོ་བཞིས་གཡོན་པའི་མཐེ་བོང་བཅངས་ཏེ། ཅུང་ཞིག་མཆིས་ལ་གཡས་པའི་མཛུབ་མོས་གཡབ་བོ། །འདི་ནི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་སུམ་ཅུ་རྩ་གསུམ་གྱི་ལྷའི་རྣམ་པ་རྣམས་དགུག་པའི་ཕྱག་རྒྱ་སྟེ་ཉི་ཤུ་པའོ། །གསང་སྔགས་ནི་འདི་
ལགས་ཏེ། ཨོཾ་ཀུ་ཊེ་ཀུ་ཊེ། ཀུ་ན་རེ་ཙི་ལེ་ཙི་ལེ། ཙི་ལི་ལེ་སྭཱ་ཧཱ། གསང་སྔགས་འདི་དང་། ཕྱག་རྒྱ་འདི་ནི་ལྷག་པར་རྒྱ་ཆེ་བའོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཅི་རྩོམ་པ་རྨི་ལམ་དུ་མཐོང་བར་འཚལ་ན། གསང་སྔགས་འདི་ལན་བརྒྱ་རྩ་བརྒྱད་བཟླས་བརྗོད་
བགྱིས་ན། ཡིད་ལ་ཅི་བསམས་པ་རྨི་ལམ་དུ་མཐོང་བར་འགྱུར་རོ། །སུ་ཞིག་གདུགས་གཅིག་བཞིན་དུ་གོམས་པར་བགྱིད་ན། ལས་རྣམས་བྱང་བར་འགྱུར་རོ། །བྱང་ཆུབ་ཀྱི་སེམས་མི་བསྐྱུད་དོ། །རྨི་ལམ་བཟང་པོ་དཔལ་དུ་འགྱུར་བ་དང་། བྱང་ཆུབ་ཀྱི་ཤིང་དྲུང་ན་བཞུགས་
པའི་སངས་རྒྱས་ཀྱི་བར་དུ་མཐོང་ཞིང་། བྱང་ཆུབ་ཏུ་ལུང་སྟོན་པར་རྨི་བར་འགྱུར་རོ། །བརྒྱ་བྱིན་དང་། ཚངས་པ་ལ་སོགས་པ་ལྷ་རྣམས་ཀྱང་ཀུན་ཏུ་སྲུང་བར་འགྱུར་རོ། །ཡང་འགྲེང་སྟེ་རྐང་པ་ཕན་ཚུན་བསྙེན་ལ། ལག་པ་གཡོན་པའི་མཐེ་བོང་ལག་མཐིལ་དུ་བཀུག་སྟེ། སོར་མོ་
བཞིས་ཁུ་ཚུར་བཅངས་ལ་སྙིང་གར་བཞག །གཡས་པ་ཡང་དེ་བཞིན་བགྱིས་ལ། རྣ་བ་གཡས་པའི་སྟེང་དུ་བཞག་སྟེ། མཛུབ་མོས་གཡབ་བོ། །འདི་ནི་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་ལྷ་དང་། ཀླུ་ལ་སོགས་པ་འཁོར་བརྒྱད་པོ་དག་

དགུག་པའི་ཕྱག་རྒྱ་སྟེ། ཉི་ཤུ་རྩ་གཅིག་པའོ། །གསང་སྔགས་ནི་འདི་ལགས་ཏེ། ན་མོ་ནི་གནྡྷ། ན་མོ་དརྴ་ན་སྭཱ་ཧཱ། ན་མོ་ནི་རྫ་ལ་སྭཱ་ཧཱ། ཨེ་ཧྱེ་ཧི་སྭཱ་ཧཱ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཕྱག་རྒྱ་འདི་དང་། གསང་སྔགས་འདི་འཛིན་ཏམ། འདོན་ཏམ།
ཀློག་པ་ཚེ་རབས་བདུན་དྲན་པར་འགྱུར་རོ། །སྦྲུལ་གདུག་པས་ཟིན་པར་མི་འགྱུར་རོ། །དུག་ཀྱང་གདུག་པར་མི་འགྱུར་རོ། །ལུས་ལ་མཚོན་གྱིས་མི་ཚུགས་སོ། །རྒྱལ་པོའི་ཆད་པས་འཇིགས་པ་མི་འབྱུང་ངོ་། །བསྐལ་པ་མང་པོར་སེམས་ཅན་དམྱལ་བར་མི་མཆིའོ། །སྡུག་
བསྔལ་ཉམས་སུ་མི་མྱོང་ངོ་། །གང་བརྗོད་པར་འབྱུང་པོ་རྣམ་པ་ཉི་ཤུ་རྩ་གཅིག་ལྷགས་ཏེ། གསང་སྔགས་འདི་ཉན་པར་འགྱུར་རོ། །གང་གི་དྲུང་དུ་འབྱུང་པོ་མཆི་བ་དེར་སྐུད་པ་དཀར་པོ་གདགས་པར་བགྱི་སྟེ། མདུད་པ་བཞི་བཅུ་རྩ་དགུ་བོར་ལ། མདུད་པ་རེ་རེ་ལ་ཡང་ལན་
རེ་བཟླས་བརྗོད་བགྱིས་ཏེ་མགུལ་དུ་བཏགས་ན་བདེ་བར་འགྱུར་རོ། །གལ་ཏེ་ཡུལ་དུ་ཡམས་ཀྱི་ནད་བྱུང་སྟེ། སེམས་ཅན་མང་དུ་འགུམ་ན། རྒྱལ་པོའི་སྐྱེད་མོས་ཚལ་ནས་པདྨ་དག་བསླངས་ལ། པདྨ་རེ་རེ་ལ་ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ། བསྲེགས་པ་
བགྱིས་ན། ཡམས་ཀྱི་ནད་འཆད་པར་འགྱུར་རོ། །ཡང་སྐྱིལ་མོ་ཀྲུང་བཅས་ཏེ་མཆིས་ལ་ལག་པ་གཡོན་པའི་མཐེ་བོང་དང་། གུང་མོ་རྩེ་མོ་སྤྲད་དེ། ལག་མཐིལ་བཀན་ལ་པུས་མོ་གཡོན་པའི་སྟེང་དུ་བཞག །གཡས་པ་ཡང་དེ་བཞིན་དུ་བགྱིས་ལ། པུས་མོ་གཡས་པའི་སྟེང་
དུ་ཁ་ཕུབ་སྟེ་བཞག་གོ། །སོར་མོ་གཞན་བསྐྱེད་ལ། རྩ་བའི་གསང་སྔགས་ལན་ཉི་ཤུ་རྩ་གཅིག་བཟླས་བརྗོད་བགྱིའོ། །འདི་ནི་བྱང་ཆུབ་སེམས་དཔའི་རྣམ་པར་གྲོལ་བའི་ཕྱག་རྒྱ་སྟེ། ཉི་ཤུ་རྩ་གཉིས་པའོ། །ཅི་འཚལ་བ་དེ་བཞིན་དུ་འགྲུབ་བོ། །སྡུག་བསྔལ་ལས་
ཐར་བར་འགྱུར་རོ། །གང་གིས་མཚམས་མེད་པ་ལྔ་པོའི་ལས་དག་བགྱིས་པ། སྡིག་པ་རེ་རེའི་ཕྱིར་ཡང་། དཔེར་ན་འཛམ་བུའི་གླིང་གི་སའི་རྡུལ་ཕྲ་རབ་མཐའ་དག་རེ་རེའི་བསྐལ་བར་སེམས་ཅན་དམྱལ་བར་མཆི་འཚལ་ལ། འབྱུང་བ་ནི་ངེས་པར་མཆིས་པར་གྱུར་ན། དེས་

དེའི་ཚེ་རིང་བསྲེལ་དང་བཅས་པའི་མཆོད་རྟེན་གྱི་མདུན་དུ་ཚེས་བཅོ་ལྔའི་ཟླ་བ་ཉ་ལ། ཟས་མི་འཚལ་བར་ཕྱག་རྒྱ་འདི་བཅིངས་ལ། གསང་སྔགས་འདི་ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ན། སྔོན་གྱི་ལས་ཀྱི་སྡུག་བསྔལ་ཐམས་ཅད་འབྱང་བར་
བགྱིད་ནུས་པར་འགྱུར་ཏེ། ལྷག་མ་ལུས་པ་ནི་གནས་མ་ལགས་ཤིང་སྐབས་མ་མཆིས་སོ། །ཡང་འགྲེང་སྟེ་ལག་པ་གཡོན་པས་རྐང་པ་གཡོན་པའི་མཐེ་བོང་ཆང་པར་བཅུག་ལ། ལག་པ་གཡས་པས་གཡོན་པའི་ལག་མཐིལ་ནས་བཟུང་སྟེ། རྩ་བའི་གསང་སྔགས་
བརྒྱ་རྩ་བརྒྱད་བཟླས་བརྗོད་བགྱིའོ། །འདི་ནི་བྱང་ཆུབ་སེམས་དཔའི་དབང་དང་། རྫུ་འཕྲུལ་གྱི་རྐང་པའི་ཕྱག་རྒྱ་སྟེ། ཉི་ཤུ་རྩ་གསུམ་པའོ། །དཔག་ཚད་སྟོང་གི་ཕྱོགས་སུ་མཆི་འཚལ་ན་ཡང་དཀའ་བ་མ་མཆིས་སོ། །གསང་སྔགས་ནི་དབེན་པར་མཆིས་
ལ་བཟླས་བརྗོད་བགྱིའོ། །ཡང་ལག་པ་གཡོན་པའི་མཐེ་བོས་མཐེའུ་ཆུང་གི་སེན་མོ་མནན་ལ། གཡས་པ་ཡང་དེ་བཞིན་དུ་བགྱིས་ཏེ། སོར་མོ་ལྷག་མ་གསུམ་གསུམ་མཆིས་པ་བརྐྱང་ལ། ལག་མཐིལ་དུ་བཀུག་སྟེ། སྤྱི་བོར་བཞག་ལ་རྩ་བའི་གསང་སྔགས་
ལན་ཉི་ཤུ་རྩ་གཅིག་བཟླས་བརྗོད་བགྱིའོ། །འདི་ནི་བྱང་ཆུབ་སེམས་དཔའི་རྫུ་འཕྲུལ་གྱི་ཆོ་འཕྲུལ་དང་། དབང་གི་ཕྱག་རྒྱ་སྟེ། ཉི་ཤུ་རྩ་བཞི་པའོ། །འགྲོ་བ་ལ་དབང་བ་འཐོབ་བོ། །ཡང་ཐལ་མོ་རེག་པར་སྦྱར་ཏེ། ཐལ་མོའི་ནང་ཁོག་སྟོང་དུ་བགྱིས་ལ་མཛུབ་
མོ་གཉིས་ཀྱིས་གཡབ་བོ། །འདི་ནི་བྱང་ཆུབ་སེམས་དཔའི་རྒྱལ་པོའི་སྙིང་པོ་ལས་སྤྱན་དྲང་བའི་ཕྱག་རྒྱ་སྟེ། ཉི་ཤུ་རྩ་ལྔ་པའོ། །གསང་སྔགས་ནི་འདི་ལགས་ཏེ། ཨོཾ་ཨཱ་རོ་ལི་ཀ་ཏྲཻ་ལོ་ཀྱ་བི་ཛ་ཡ། སརྦ་ཤ་ཏྲུཾ་པྲ་མ་ཐ་ན་ས་ར་ཡ་སུ་ཝཾ་ཕཊ་མྟ་སྭཱ་ཧཱ། བྱང་
ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལག་པ་སྟོང་དང་། མིག་སྟོང་དང་ལྡན་པའི་ཆོ་ག་ཞིབ་མོ་རྫོགས་སོ།། །།

༄༅༅། །འཕགས་པ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཕྱག་སྟོང་སྤྱན་སྟོང་དང་ལྡན་པ་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་
འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱ་ཐུབ་པའི་པོ་ཊ་ལའི་སྟེང་། འཕགས་པ་སྤྱན་རས་གཟིགས་དབང་ཕྱུག་གི་གཞལ་མེད་ཁང་རིན་པོ་ཆེ་བཀོད་པའི་དཀྱིལ་འཁོར་ན་ནོར་བུ་རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པའི་རིན་པོ་ཆེའི་སེང་
གེའི་གདན་རིན་པོ་ཆེའི་རྒྱལ་མཚན་དང་བ་དན་དག་གིས་འཁོར་བར་བཀོད་ཅིང་དཔྱངས་པ་ལ་བཞུགས་ཏེ། དེའི་ཚེ་དེ་བཞིན་གཤེགས་པ་གདན་དེ་ལ་བཞུགས་ནས། ཀུན་འཛིན་ཞེས་བྱ་བའི་གཟུངས་སྔགས་བཤད་པར་བཞེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་
མེད་པ་དང་། ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་དང་། བྱང་ཆུབ་སེམས་དཔའ་རིན་པོ་ཆེའི་རྒྱལ་པོ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་། བྱང་ཆུབ་སེམས་དཔའ་སྨན་མངོན་པར་འཕགས་པ་དང་། བྱང་ཆུབ་
སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་པ་དང་། བྱང་ཆུབ་སེམས་དཔའ་པདྨའི་བཀོད་པ་དང་། བྱང་ཆུབ་སེམས་དཔའ་བཀོད་པ་ཆེན་པོ་དང་། བྱང་ཆུབ་སེམས་དཔའ་རིན་ཆེན་སྙིང་པོ་དང་། བྱང་ཆུབ་སེམས་དཔའ་དཔལ་གྱི་
སྙིང་པོ་དང་། བྱང་ཆུབ་སེམས་དཔའ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་ཀྱི་རྒྱལ་པོ་ཆེན་པོར་དབང་བསྐུར་བ་ཐོབ་པ་ཤ་སྟག་དང་ཐབས་ཅིག་གོ། །གཞན་ཡང་ཉན་ཐོས་ཀྱི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པའི་ས་བཅུ་སྤྱད་པ་ཚད་མེད་གྲངས་མེད་པ་དག་དང་ཐབས་ཅིག་སྟེ། ཚེ་དང་ལྡན་པ་འོད་སྲུང་ཆེན་པོ་ནི་གཙོ་བོར་གྱུར་ཏོ། །གཞན་ཡང་

ཚངས་རིས་ཀྱི་ལྷ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་ཀྵཎྜ་མ་ར་ནི་གཙོ་བོར་གྱུར་ཏོ། །གཞན་ཡང་ལྷ་དང་ལྷའི་བུ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་ཀུཾ་བྷ་ཀ་ནི་གཙོ་བོར་གྱུར་ཏོ། །གཞན་ཡང་འཇིག་རྟེན་སྐྱོང་བ་དང་། རྒྱལ་ཆེན་རིས་བཞིའི་ལྷའི་
རྒྱལ་པོ་ཚད་མེད་པ་སྙེད་དང་ཐབས་ཅིག་སྟེ། ལྷའི་རྒྱལ་པོ་ཡུལ་འཁོར་སྲུང་ནི་གཙོ་བོར་གྱུར་ཏོ། །གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་
ལ་སོགས་པ་ཚད་མེད་པ་སྙེད་དང་ཐབས་ཅིག་སྟེ། ཀླུའི་རྒྱལ་པོ་ཆེན་པོ་རིའི་དཔལ་ནི་གཙོ་བོར་གྱུར་ཏོ། །གཞན་ཡང་འདོད་པའི་ཁམས་ཀྱི་ལྷའི་བུ་མོ་ཚད་མེད་པ་སྙེད་དང་ཐབས་ཅིག་སྟེ། ལྷའི་བུ་མོ་གཞོན་ནུའི་མིག་ཅེས་བྱ་བ་ནི་གཙོ་མོར་གྱུར་ཏོ། །གཞན་ཡང་ནམ་མཁའི་ལྷ་དང་།
ཆུ་བོ་དང་། རྒྱ་མཚོའི་ལྷ་དང་། ཆུ་མིག་གི་ལྷ་དང་། ཆུ་ཀླུང་གི་ལྷ་དང་། སྨན་གྱི་ལྷ་དང་། ལྗོན་ཤིང་གི་ལྷ་དང་། ནགས་ཚལ་གྱི་ལྷ་དང་། ཁང་ཁྱིམ་གྱི་ལྷ་དང་། ཆུའི་ལྷ་དང་། མེའི་ལྷ་དང་། རླུང་གི་ལྷ་དང་། སའི་ལྷ་དང་། རིའི་ལྷ་དང་། གཞལ་མེད་ཁང་ལ་
སོགས་པའི་ལྷ་ཚད་མེད་པ་སྙེད་ཀྱང་སོ་སོ་ནས་འདུས་ཤིང་ལྷགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འཁོར་མང་པོའི་ནང་དུ་གསང་སྟེ། རྫུ་འཕྲུལ་གྱིས་འོད་ཟེར་བཀྱེ་བས་ཕྱོགས་བཅུའི་འཇིག་རྟེན་གྱི་ཁམས་རྣམས་དང་། སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་གསེར་གྱི་ཁ་དོག་ཅན་དུ་གྱུར་ཏོ། །ལྷའི་གཞལ་མེད་ཁང་རྣམས་དང་། ཀླུའི་ཁང་ཁྱིམ་རྣམས་དང་། ལྷའི་གཙོ་བོ་རྣམས་ཀྱི་གཞལ་མེད་ཁང་རྣམས་ཀྱང་རབ་ཏུ་གཡོས་པར་གྱུར། ཆུ་བོ་དང་། མཚོ་དང་། རྒྱ་མཚོ་ཆེན་པོ་
དང་། རི་ཁོར་ཡུག་དང་། རི་རབ་ལྷུན་པོ་དང་། སའི་རི་དང་། རི་ནག་པོ་རྣམས་ཀྱང་རབ་ཏུ་གཡོས་པར་གྱུར་ཏོ། །ཉི་མ་དང་། ཟླ་བ་དང་། ནོར་བུ་དང་། མེ་དང་། རྒྱུ་སྐར་དང་། གཟའི་འོད་རྣམས་ཀྱང་ཟིལ་གྱིས་མནན་ཏེ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་

དཔའ་ཀུན་འཛིན་གྱི་རྒྱལ་པོས་ངོ་མཚར་རྨད་དུ་བྱུང་བའི་མཚན་མ་དེ་དག་མཐོང་བ་དང་། སྔོན་ཆད་ནམ་ཡང་དེ་ལྟ་བུ་མ་བྱུང་ངོ་ཞེས་ངོ་མཚར་དུ་གྱུར་ནས། སྟན་ལས་ལངས་ཏེ་ཐལ་མོ་སྦྱར་ནས་འདི་སྐད་ཅེས་བཅོམ་ལྡན་འདས་རྫུ་འཕྲུལ་གྱི་མཚན་མ་འདི་ལྟ་བུ་འདི་དག་སུས་བཀྱེ་ལགས་ཞེས་
གསོལ་ནས། ཚིགས་སུ་བཅད་དེ་ཞུ་བ་ཞུས་པ། དེང་ནི་སུ་ཞིག་མངོན་པར་སངས་རྒྱས་ན། །འདི་ལྟར་འོད་ཟེར་ཆེན་པོ་རབ་བཀྱེ་བས། །ཕྱོགས་བཅུའི་འཇིག་རྟེན་གསེར་གྱི་མདོག་ཏུ་གྱུར། །སྟོང་ཆེན་འཇིག་རྟེན་ཁམས་ཀྱང་དེ་བཞིན་ལགས། །དེང་ནི་སུ་ཞིག་རང་དབང་
ཐོབ་གྱུར་ན། །ཡ་མཚན་རྫུ་འཕྲུལ་ཆེན་པོ་མཐུ་བཀྱེ་ནས། །མཐའ་མེད་སངས་རྒྱས་ཞིང་རྣམས་རབ་གཡོས་ཤིང་། །ལྷ་ཀླུ་གཞལ་མེད་ཁང་རྣམས་མི་བདེར་གྱུར། །སུ་ཡི་མཐུ་ལགས་རྒྱུ་རྐྱེན་མ་རྟོགས་པས། །འཁོར་མང་འདི་དག་ཐེ་ཚོམ་འཚལ་གྱུར་ན། །བཅོམ་ལྡན་
འདས་ཀྱི་ཐུགས་རྗེ་ཆེན་པོ་ཡིས། །རྫུ་འཕྲུལ་འདི་ཡི་རྒྱུ་རྐྱེན་བཀས་བཤད་གསོལ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་འཛིན་གྱི་རྒྱལ་པོ་ལ་བཀའ་སྩལ་པ། རིགས་ཀྱི་བུ་ཁྱེད་ཀྱིས་འདི་རིག་པར་བྱ་སྟེ། དེང་འཁོར་གྱི་དཀྱིལ་འཁོར་འདུས་པ་འདིར་བྱང་ཆུབ་
སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་ཞིག་ཡོད་པ་དེ། སྔོན་བསྐལ་པ་ཚད་མེད་པ་ནས་བྱམས་པ་ཆེན་པོ་དང་སྙིང་རྗེ་ཆེན་པོ་ཕུན་སུམ་ཚོགས་པར་གྱུར་པ། གཟུངས་ཀྱི་སྒོ་ཚད་མེད་པ་སྙེད་ཤིན་ཏུ་བསྒོམས་ཤིང་མངོན་པར་བསྒྲུབས་པར་གྱུར་པས། སེམས་
ཅན་རྣམས་ལ་ཕན་པ་དང་བདེ་བར་འདོད་པའི་ཕྱིར་གསང་སྟེ་འདི་ལྟ་བུའི་རྫུ་འཕྲུལ་གྱི་མཐུ་ཆེན་པོ་བསྟན་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ་གོས་ཚགས་བཅོས་ནས་
བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་རྗེ་ཆེན་པོའི་སེམས་ཞེས་བགྱི་བའི་གཟུངས་སྔགས་མཆིས་ཏེ། སེམས་ཅན་མང་པོ་རྣམས་ལ་སྨན་པ་དང་བདེ་བ་འཐོབ་པར་བགྱི་པ་དང་།

བྲོ་ནད་ཐམས་ཅད་བསལ་བར་བགྱི་བ་དང་། ཚེ་རིང་བར་འགྱུར་བ་དང་། ཕྱུག་ཅིང་འབྱོར་པ་དང་ལྡན་པར་བགྱི་བ་དང་། སྡིག་པ་མི་དགེ་བའི་ལས་དང་ཁ་ན་མ་ཐོ་བ་ལྕི་བ་རྣམས་ཡོངས་སུ་སྦྱང་ཞིང་བསལ་བ་དང་། སྒྲིབ་པའི་བགེགས་རྣམས་དང་འབྲལ་བ་དང་། ཆོས་དཀར་
པོའི་ཡོན་ཏན་ཐམས་ཅད་འཕེལ་བར་བགྱི་བ་དང་། དགེ་བའི་ས་བོན་ཐམས་ཅད་ཕུན་སུམ་ཚོགས་པར་བགྱི་བ་དང་། འཇིགས་ཤིང་སྐྲག་པ་ཐམས་ཅད་ཡོངས་སུ་སྤང་བར་བགྱི་བ་དང་། རེ་བ་ཐམས་ཅད་མྱུར་དུ་ཡོངས་སུ་རྫོགས་པར་བགྱི་བའི་སླད་དུ་དེང་བཤད་པར་འཚལ་ན།
བཅོམ་ལྡན་འདས་ཐུགས་བརྩེ་བར་དགོངས་ཏེ་གནང་བར་མཛད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་སྙིང་རྗེ་ཆེན་པོས་སེམས་ཅན་རྣམས་ལ་ཕན་པ་དང་། བདེ་བ་འདོད་པའི་ཕྱིར་རིག་སྔགས་བཤད་པར་འདོད་པས་དེང་དུས་ལ་བབ་ཀྱིས་མྱུར་
དུ་སྨྲོས་ཤིག་དང་། དེ་བཞིན་གཤེགས་པ་ང་དང་སངས་རྒྱས་བཅོམ་ལྡན་འདས་རྣམས་ཀྱང་རྗེས་སུ་ཐུགས་དགྱེས་པར་མཛད་དོ། །བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ག