Kinh tạng Tây Tạng (Kangyur Đại Học) — 093_རྒྱུད་འབུམ།_ཙ

་གནས་སུ་རབ་ཏུ་གཞོལ་
བར་འགྱུར་ཞིང་། ཕྱིན་ཆད་ནམ་ཡང་སེམས་ཅན་ཐམས་ཅད་དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་སུ་སྐྱེ་བར་མི་འགྱུར་རོ། །གཟུངས་སྔགས་ཡི་གེ་བཅུ་པ་འདི་ཉིད་གྲོ་ག་དང་། རས་སམ་ཤོག་བུ་ལ་བྲིས་ཏེ་མཆོད་རྟེན་གྱི་ནང་དུ་བཅུག་ན། གནས་དེར་སྲོག་ཆགས་
རྐང་གཉིས་པ་དང་། རྐང་བཞི་པ་དང་། རྐང་མངས་པ་དང་། རྐང་མེད་པ་གང་དག་ཉེ་བར་འོངས་པ་དེ་དག་ཐམས་ཅད་མཆོད་རྟེན་དེའི་གྲིབ་མ་ཕོག་པ་ཙམ་གྱིས་དེ་དག་གི་སྡིག་པ་དང་། སྒྲིབ་པ་ཐམས་ཅད་རྣམ་པར་དག་ཅིང་མཐོ་རིས་སུ་གཞོལ་བར་འགྱུར་རོ། །རི་དགས་དང་། བྱ་
དང་། ཝ་དང་། ཁྱི་དང་། ནེའུ་ལེ་དང་། གྲོག་སྦུར་དང་། སྦྲུལ་དང་། རུས་སྦལ་དང་། ལག་འགྲོ་ལ་སོགས་པ་སྲོག་ཆགས་ཕྲ་མོ་གང་དག་གིས་མཆོད་རྟེན་དེའི་གྲིབ་མ་ལ་འགྲིམས་པ་ཐམས་ཅད་ཀྱང་གྲིབ་མ་ཕོག་པ་ཙམ་གྱིས་དེ་དག་རྣམས་ཀྱི་སྡིག་པ་དང་། སྒྲིབ་པ་ཐམས་ཅད་
རྣམ་པར་དག་པར་འགྱུར་ཞིང་དེ་དག་ཐམས་ཅད་ཀྱང་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་རོ། །བུད་དུང་ལ་སོགས་པ་ལ་ལན་བདུན་བཟླས་བརྗོད་བྱས་ནས་གནས་མཐོན་པོའི་རྩེ་མོ་ནས་དུང་དེ་བུས་ན། སེམས་ཅན་གང་དག་གིས་དུང་དེའི་སྒྲ་ཐོས་པའི་སྐྱེས་པའམ། བུད་མེད་དམ།
ཁྱེའུའམ། བུ་མོའམ། ལྷའམ། ཡི་དགས་སམ། དུད་འགྲོའི་སྐྱེ་གནས་སུ་གཏོགས་པ་དེ་དག་ཐམས་ཅད་བདེ་འགྲོ་མཐོ་རིས་ཀྱི་འཇིག་རྟེན་དུ་གཞོལ་བར་འགྱུར་ཞིང་དགེ་བའི་བཤེས་གཉེན་རྣམས་དང་ཕྲད་ནས་ཆོས་ཐོས་ཏེ་རིམ་གྱིས་མྱ་ངན་ལས་འདའ་བའི་བར་དུ་འགྱུར་རོ། །སེམས་
ཅན་གང་དག་སྦྱིན་པ་ལ་དགའ་བ་དང་། གང་དག་བསྙེན་གནས་ལ་ཉེ་བར་གནས་པ་དང་། གང་དག་སྐྱབས་གསུམ་ཉེ་བར་གཟུང་བ་དང་། གང་དག་ཚུལ་ཁྲིམས་ཡོངས་སུ་དག་པ་དང་ལྡན་པ་དང་། གང་དག་བྱང་ཆུབ་སེམས་དཔའི་སྡོམ་པས་ཡང་དག་པར་བསྡམས་པ་དེ་

དག་གིས་སྒྲ་དེ་ཐོས་ན། དེ་དག་ཐམས་ཅད་བྱང་ཆུབ་ལས་ཕྱིར་མི་ལྡོག་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །ཚེ་དེ་བརྗེས་མ་ཐག་ཏུ་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཙནྡན་དཀར་པོ་ལ་ལན་བདུན་བཟླས་
བརྗོད་བྱས་ནས་དགེ་འདུན་གྱི་ཀུན་དགའ་ར་བའམ། དཀོར་སའམ། སྐྱེ་བོའི་དབུས་སམ། རྒྱལ་པོའི་ཕོ་བྲང་དུ་བདུག་པར་བྱས་ན། གང་དག་དེའི་དྲི་ལ་བསྣམས་པའི་སེམས་ཅན་དེ་དག་ཐམས་ཅད་ཀྱང་ལས་དང་ཉོན་མོངས་པའི་སྒྲིབ་པ་ཐམས་ཅད་རྣམ་པར་བྱང་བར་འགྱུར་ཏེ། སངས་
རྒྱས་ཀྱི་སྐུ་ཡོངས་སུ་རྫོགས་པ་རབ་ཏུ་འཐོབ་པའི་བར་དུ་འགྱུར་རོ། །ཆོས་གོས་ལ་རབ་ཏུ་བདུགས་ནས་ལུས་ལ་གྱོན་ན་གང་ཟག་དེའི་སྡིག་པ་དང་། སྒྲིབ་པ་ཐམས་ཅད་མ་ལུས་པར་རྣམ་པར་དག་པར་འགྱུར་རོ། །ལུས་ལ་བབ་པ་ཙམ་གྱིས་བག་ཆགས་ཀྱི་དྲི་མ་དང་། སེར་སྣ་
དང་ཉོན་མོངས་པའི་སྐྱོན་ཐམས་ཅད་སྤངས་པར་འགྱུར་རོ། །གོས་ལ་བདུགས་ཏེ་བཅངས་པ་ཙམ་གྱིས་འཇིག་རྟེན་ཐམས་ཅད་དབང་དུ་འགྱུར་རོ། །བདག་གི་གོས་ལ་རབ་ཏུ་བདུགས་ཏེ་རྒྱལ་པོའི་ཕོ་བྲང་དུ་ཞུགས་ན་རྒྱལ་པོ་དང་། བཙུན་མོར་བཅས་པ་རྣམས་དབང་དུ་འགྱུར་རོ། །ཀུན་
གྱི་མཆོད་གནས་ཆེན་པོར་འགྱུར་རོ། །འཇིག་རྟེན་ཐམས་ཅད་ཀྱི་བླ་མར་འགྱུར་རོ། །འཕགས་པའི་དགེ་འདུན་གྱི་དབུས་སུ་ཞུགས་ན་དགེ་འདུན་ཐམས་ཅད་ཀྱི་མཆོད་གནས་ཆེན་པོར་འགྱུར་རོ། །སྐྱེ་བོའི་ཚོགས་ཆེན་པོའི་ནང་དུ་ཞུགས་ན་ནོར་དང་། ལོངས་སྤྱོད་ཆེན་པོ་འཕེལ་
བར་འགྱུར་ཞིང་མཆོད་གནས་ཆེན་པོའི་འོས་སུ་ཡང་འགྱུར་རོ། །ཙནྡན་གྱི་བདུག་པའི་ཆོ་གའོ། །དོན་ཡོད་པའི་ཞགས་པའི་རྟོག་པ་ལས་པདྨའི་གཙུག་ཏོར་དྲི་མ་མེད་པའི་སྙིང་པོའི་ལེའུ་སྟེ་བཞི་པའོ།། །།དེ་ནས་ཁྲོ་བོའི་རྒྱལ་པོ་ཆེའི། །རྟོག་པ་རབ་ཏུ་བཤད་བྱ་སྟེ། །
དོན་ཡོད་རྒྱལ་པོ་རྨད་བྱུང་ཚེ། །ཀུན་ཏུ་དངོས་གྲུབ་ཐོགས་མེད་ཅིང་། །དཀྱིལ་འཁོར་ཀུན་ཏུ་དབང་བསྐུར་བས། །སྡང་བ་ཐམས་ཅད་རབ་ཏུ་འཇོམས། །བདུད་དང་བགེགས་དཔུང་རྣམ་པར་འཇིག །གནོད་སྦྱིན་སྲིན་པོ་གསང་བ་པ། །འབྱུང་པོ་ཐམས་ཅད་རབ་ཏུ་འབྲོས། །

བསམ་པ་ཐམས་ཅད་རབ་རྫོགས་བྱེད། །ཨོཾ་བྷྲྀ་ཀུཊིདཾཥྚེ་ཨ་མོ་གྷ་ས་མ་ཡེ། ཨ་བྷི་ཥིཉྩ་མཱཾ་སརྦ་བིད་ཨ་མོ་གྷ་ཨཾག་ཨབྷི་ཥེ་ཀ་ཧཱུྃ། མི་ལི་མི་ལི་སྭཱ་ཧཱ། ཁྲོ་བོའི་རྒྱལ་པོའི་སྙིང་པོའོ། །དེ་ནས་སྐུ་གཟུགས་ཀྱི་ཆོ་ག་ནི་དངུལ་ལ་ཁྲོ་བོའི་རྒྱལ་པོ་སོར་བཅུ་གཉིས་ཀྱི་ཚད་
ཙམ་ཤིན་ཏུ་མཛེས་ཤིང་ཚད་དང་ལྡན་པ། གདོང་གསུམ་པ། རལ་པའི་ཐོར་ཚུགས་ཅན། རྒྱལ་བ་འོད་དཔག་ཏུ་མེད་པས་སྤྱི་བོར་བརྒྱན་པ། ཟླ་བ་ཚེས་པ་མགོ་ལ་ཐོགས་པ། གདོང་གསུམ་གྱི་དང་པོ་ཁྲོ་བ། གཡས་ཅུང་ཟད་འཛུམ་པ། གཡོན་གད་མོ་དགོད་པ། ལག་པ་བཞི་པ།
གཡས་དང་པོ་ན་པདྨ། འོག་མ་ན་རལ་གྲི་འཕྱར་བ། གཡོན་དང་པོ་ན་ཞགས་པ། འོག་མ་མདུང་རྩེ་གསུམ་པ། རྒྱན་ཐམས་ཅད་ཀྱིས་བརྒྱན་པ་པདྨ་དང་ཟླ་བའི་གདན་ལ་རྒྱལ་པོའི་རོལ་སྟངས་ཀྱིས་འདུག་པ། གཅན་གཟན་ཁྲོ་བོའི་པགས་པས་སྨད་དཀྲིས་པའོ། །གཡས་ཕྱོགས་སུ་
ནི་ལྷ་མོ་སྒྲོལ་མ་ཨུཏྤ་ལ་ཐོགས་པ་རྒྱན་ཐམས་ཅད་ཀྱིས་རབ་ཏུ་བརྒྱན་པའོ། །གཡོན་ཕྱོགས་སུ་ནི་ལྷ་མོ་རིག་སྔགས་ཀྱི་རྒྱལ་མོ་ནོར་བུ་རིན་པོ་ཆེ་ཐོགས་པ། རྒྱན་ཐམས་ཅད་ཀྱིས་རབ་ཏུ་བརྒྱན་པའོ། །འཇིག་རྟེན་དབང་ཕྱུག་གི་དྲུང་དུ་རིག་སྔགས་འཆང་པུས་མོ་བཙུགས་པ་ལག་ན་
སྤོས་ཕོར་ཐོགས་ཤིང་བགྲང་ཕྲེང་འཛིན་པ་བཅོམ་ལྡན་འདས་ལ་གྱེན་དུ་བལྟ་བའོ། །ཡང་ན་ནི་རི་མོར་བྲི་བར་བྱ་སྟེ་ཆོ་ག་བཞིན་ནོ། །གཟུགས་བརྙན་དེ་དག་གི་དྲུང་དུ་བའི་ལྕི་བས་བྱུག་པ་བྱས་ལ། ཙནྡན་དཀར་པོའི་དཀྱིལ་འཁོར་བྱ་ཞིང་གུར་གུམ་གྱིས་མཆོད་ཡོན་བྱ་སྟེ། མེ་ཏོག་ལ་
སོགས་པས་ཡང་དག་པར་མཆོད་པར་བྱའོ། །དཀྱིལ་འཁོར་དེའི་སྟེང་དུ་ཁྲོ་བོའི་རྒྱལ་པོ་བཞུགས་སུ་གསོལ་ཏེ། དེའི་དྲུང་དུ་བཟླས་བརྗོད་སྟོང་ཕྲག་བརྒྱད་བྱའོ། །དེ་ནས་གཟུགས་བརྙན་དེ་འགུལ་ཞིང་གཡོ་བར་འགྱུར་རོ། །རྐང་པས་ཕན་ཚུན་དུ་འཆག་པར་འགྱུར། གཟུགས་
ལས་འོད་ཟེར་འབྱུང་བར་འགྱུར། ཚིག་འབྱིན་པར་འགྱུར། ལེགས་སོ་ཞེས་སྒྲ་འབྱིན་པར་འགྱུར། ལག་པ་གཡས་པ་རིག་སྔགས་འཆང་གི་སྤྱི་བོར་འཇོག་པར་འགྱུར། ཡིད་ལ་བསམས་སོ་ཅོག་ཐམས་ཅད་དང་། མཆོག་ཐམས་ཅད་ཡོངས་སུ་རྫོགས་པར་འགྱུར་རོ། །བཟླས་

བརྗོད་རྫོགས་པའི་མོད་ལ་འཕགས་པ་སྤྱན་རས་གཟིགས་དབང་ཕྱུག་ཁྲོ་བོའི་རྒྱལ་པོ་རང་གི་མདུན་ན་བཞུགས་པར་འགྱུར་རོ། །དྲན་པ་ཙམ་གྱི་མོད་ལ་དངོས་གྲུབ་ཐམས་ཅད་འགྲུབ་པར་འགྱུར་རོ། །ལས་ཐམས་ཅད་ཀྱང་བྱེད་པར་འགྱུར་རོ། །བཀླགས་པས་ལས་ཐམས་ཅད་
དང་། དངོས་གྲུབ་ཐམས་ཅད་འགྲུབ་པར་འགྱུར་བ་དང་། གྲུབ་པ་ཐམས་ཅད་སྟོན་པར་འགྱུར་རོ། །ཁྲོ་བོའི་རྒྱལ་པོ་ཆེན་པོའི་ཞགས་པ་ནས་བཟུང་སྟེ། བཟླས་བརྗོད་སྟོང་རྩ་བརྒྱད་བྱས་ན་སྔོན་ཆད་བསགས་པའི་བསོད་ནམས་དང་། ལས་ཀྱི་བགོ་སྐལ་ཐམས་ཅད་མངོན་སུམ་དུ་
འགྱུར་རོ། །ཚེའི་མཐར་ཐུག་གི་བར་དུ་དཔལ་ཆེན་པོ་ཐོབ་པ་དང་། ཆེ་བ་ཉམས་སུ་མྱང་བར་འགྱུར་རོ། །གདོང་དུ་བལྟས་ཏེ་བཟླས་བརྗོད་སྟོང་རྩ་བརྒྱད་བྱས་ན་དབང་ཕྱུག་ཆེན་པོའི་དངོས་གྲུབ་ཐོབ་པར་འགྱུར་རོ། །པདྨ་ནས་བཟུང་སྟེ་བཟླས་བརྗོད་སྟོང་རྩ་བརྒྱད་བྱས་ན་ཉོན་
མོངས་པ་དང་། ཉེ་བའི་ཉོན་མོངས་པ་ཐམས་ཅད་དང་བྲལ་བར་འགྱུར་རོ། །རལ་གྲི་ནས་བཟུང་སྟེ། བཟླས་པ་སྟོང་རྩ་བརྒྱད་བྱས་ན་ནམ་མཁའ་ལ་འགྲོ་བའི་དངོས་གྲུབ་ཐོབ་པར་འགྱུར་རོ། །རྩེ་གསུམ་ནས་བཟུང་སྟེ། སྟོང་རྩ་བརྒྱད་བཟླས་བརྗོད་བྱས་ན། འཇིག་རྟེན་
གསུམ་གྱི་དབང་ཕྱུག་ཏུ་འགྱུར་རོ། །འགྲོ་བ་ཐམས་ཅད་དབང་དུ་འགྱུར་རོ། །རྐེད་པ་ནས་བཟུང་སྟེ་བཟླས་པ་སྟོང་རྩ་བརྒྱད་བྱས་ན་སྔོན་གྱི་ཚེ་རབས་དྲན་པར་འགྱུར་རོ། །རྒྱལ་པོ་དང་བཙུན་མོ་འཁོར་དང་བཅས་པ་རྣམས་དབང་དུ་འགྱུར་ཏེ། བདག་ཉིད་ཇི་སྲིད་འཚོའི་བར་དུ་ནོར་
རྣམས་ཉེ་བར་གནས་པར་འགྱུར་རོ། །ཅོད་པན་ལ་ལན་བརྒྱ་རྩ་བརྒྱད་བཟླས་ཏེ། ཁྲོ་བོའི་རྒྱལ་པོའི་དབུ་ལ་བཅིངས་ན་ངེས་པར་དབང་བསྐུར་བ་ཐོབ་པར་འགྱུར་ཏེ། འདི་ལ་ཐེ་ཚོམ་དང་ཡིད་གཉིས་བསྐྱེད་པར་མི་བྱའོ། །བཟླས་བརྗོད་དང་། སྒྲུབ་པ་འདི་དག་གིས་ནི་འཕགས་པ་སྤྱན་རས་
གཟིགས་དབང་ཕྱུག་ཁྲོ་བོའི་རྒྱལ་པོའི་གཟུགས་ཀྱིས་རིག་སྔགས་འཆང་གི་མདུན་དུ་བྱོན་ཏེ། ཅི་དགོས་པ་ཐམས་ཅད་བྱེད་པར་འགྱུར་རོ། །འཕགས་པ་དོན་ཡོད་ཞགས་པའི་རྟོག་པའི་རྒྱལ་པོའི་ཆོ་ག་ལས་ཕྱུང་བ་རྫོགས་སོ།། །།པཎྜི་ཏ་མཉྫུ་ཤྲཱི་ཝརྨ་དང་།

ལོ་ཙྪ་བ་དགེ་སློང་བློ་ལྡན་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལག་པ་སྟོང་དང་། མིག་སྟོང་དང་།
ལྡན་པའི་ཆོ་ག་ཞིབ་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱ་ཐུབ་པ། རི་གྲུ་འཛིན་ན་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་
གནས་ན། རིན་པོ་ཆེ་བཀོད་པའི་འཁོར་གྱི་ཁྱམས་ན་བཞུགས་ཤིང་། བཅོམ་ལྡན་འདས་རིན་པོ་ཆེའི་སེང་གེའི་ཁྲི་ལ་བཞུགས་ཏེ། ཁྲི་དེ་ནི་རིན་པོ་ཆེའི་མཆོག་སྣ་ཚོགས་དུ་མས་སྤྲས་པ། རིན་པོ་ཆེ་སྣ་བདུན་གྱི་རྒྱལ་མཚན་རྣམས་ཀྱིས་ཡོངས་སུ་བརྩེགས་པ་ལྷའི་བ་དན་
དཔྱངས་པ་སྟེ། དེའི་ཚེ་སངས་རྒྱས་བཅོམ་ལྡན་འདས་སེང་གེའི་ཁྲི་དེ་ཉིད་ལ་བཞུགས་ནས་འདི་སྙམ་དགོངས་ཏེ། ངས་བྱང་ཆུབ་སེམས་དཔའ་ཐམས་ཅད་འཛིན་པའི་གཟུངས་བཤད་གོར་མ་ཆག་སྙམ་དུ་དགོངས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དུ་མ་དང་།
ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་རྒྱལ་པོ་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་། བྱང་ཆུབ་སེམས་དཔའ་སྨན་གྱི་སྡེ་དང་། བྱང་ཆུབ་
སེམས་དཔའ་འཕགས་པ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་པ་དང་། བྱང་ཆུབ་སེམས་དཔའ་པདྨའི་སྤྱན་དང་། བྱང་ཆུབ་སེམས་དཔའ་བཀོད་པ་ཆེན་པོ་དང་། བྱང་ཆུབ་སེམས་དཔའ་རིན་པོ་ཆེའི་སྙིང་པོ་དང་། བྱང་ཆུབ་སེམས་
དཔའ་དཔལ་གྱི་སྙིང་པོ་དང་། བྱང་ཆུབ་སེམས་དཔའ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་འཇམ་དཔལ་ལ་སོགས་པ།

བྱང་ཆུབ་སེམས་དཔའ་ཆེན་པོ་རྣམས་ཀྱང་། དེ་བཞིན་གཤེགས་པ་ཐམས་ཅད་ཀྱིས་སྤྱི་བོ་ནས་དབང་བསྐུར་བ། ཆོས་ཀྱི་རྒྱལ་པོ་ཆེན་པོ་རྣམ་ཐོས་ཀྱི་སྲས་ཤ་སྟག་དང་ཐབས་ཅིག་གོ། །འོད་སྲུང་ཆེན་པོ་ལ་སོགས་གང་དག་གིས་ཉན་ཐོས་དག་གིས་བཅུ་སྤྱད་པར་གྱུར་པ། ཉན་ཐོས་ཀྱི་
དགེ་འདུན་དཔག་ཏུ་མེད་པ། གྲངས་མེད་པ། ཚངས་པ་དུང་ལ་སོགས་པ་ཚངས་རིས་ཀྱི་ལྷའི་བུ་དུ་མ་དང་། ལྷའི་བུ་ས་འཚོ་ལ་སོགས་པ་ལྷའི་བུ་དུ་མ་དང་། རྒྱལ་པོ་ཆེན་པོ་བཞི་འཕགས་སྐྱེས་པོ་ལ་སོགས་པ་དུ་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་།
ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དུ་མ་དང་། ཀླུའི་རྒྱལ་པོ་ནུས་པའི་དྲ་བ་ལ་སོགས་པ་ཀླུའི་རྒྱལ་པོ་དུ་མ་དང་། ལྷའི་བུ་མོ་གཞོན་ནུའི་མིག་ལ་སོགས་པ། འདོད་པ་ན་སྤྱོད་པའི་ལྷ་དུ་མ་དང་། དགོན་པའི་ལྷ་དུ་མ་ཡང་ཐབས་ཅིག་
གོ། །འབབ་ཆུ་དང་། མཚོ་དང་། མཚོ་བྲན་དང་། ཁྲོན་པ་དང་། ཆུ་ཀླུང་དང་། ཆུ་ཀླུང་ཆེན་པོ་དང་། སྨན་དང་། རྩྭ་དང་། ཤིང་གེལ་བ་དང་། ནགས་ཚལ་དང་། ནགས་ཁྲོད་དང་། གཙུག་ལག་ཁང་དང་། ཁྱིམ་དང་། ཆུ་དང་། མེ་དང་། རྡུལ་གྱི་རི་དང་།
ས་དང་། རྒྱལ་པོའི་ཁབ་དང་། མཆོད་རྟེན་དང་། དྲི་གཙང་ཁང་ལ་སོགས་པ་ན་གནས་པའི་ལྷ་ཐམས་ཅད་ཀྱང་དེར་འདུས་སོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་འཁོར་ཆེན་པོ་དེའི་ནང་ན་འདུག་པས། རྫུ་འཕྲུལ་མངོན་པར་ཤེས་པའི་འོད་ཟེར་
རྣམས་ཀྱིས་མ་ཚོར་བར་ཕྱོགས་བཅུའི་སངས་རྒྱས་ཀྱི་ཞིང་རྣམས་ཁྱབ་པར་སྣང་བར་བྱས་ཤིང་། སྟོང་གསུམ་གྱི་སྟོང་པོའི་འཇིག་རྟེན་གྱི་ཁམས་འདི་ཡང་གསེར་གྱི་ཁ་དོག་ལྟ་བུར་བྱས་སོ། །ལྷ་དང་ཀླུ་ཐམས་ཅད་དང་། ལྷ་མཆོག་ཐམས་ཅད་ཀྱི་ཁང་པ་དག་ཀྱང་ཁྲོལ་ཞེས་གཡོས་སོ། །
ཆུ་ཀླུང་དང་། ཆུ་ཀླུང་ཆེན་པོ་དང་། རྒྱ་མཚོ་ཆེན་པོ་དང་། རི་ཁོར་ཡུག་དང་། རི་བོ་རི་རབ་དང་། རྡུལ་གྱི་རི་དང་། རི་ནག་པོ་ཐམས་ཅད་ཀྱང་ཤིན་ཏུ་གཡོས་སོ། །ཟླ་བ་དང་། ཉི་མ་དང་། རིན་པོ་ཆེ་དང་། མེ་དང་། གཟའ་དང་། རྒྱུ་སྐར་གྱི་འོད་ཀྱང་མོག་མོག་པོར་བྱས་

སོ། །བྱང་ཆུབ་སེམས་དཔའ་གཟུངས་ཀྱི་དབང་ཕྱུག་རྒྱལ་པོས་ལྟས་རྨད་དུ་བྱུང་བ་དེ་མཐོང་ནས། ལྟས་སྔོན་མ་མཐོང་བ་ལ་ཐེ་ཚོམ་སྐྱེས་ཏེ། དེ་སྟན་ལས་ལངས་ཏེ་ཐལ་མོ་སྦྱར་ཏེ། རྫུ་འཕྲུལ་མངོན་པར་ཤེས་པའི་ལྟས་འདི་སུས་བགྱིས་ཞེས། སངས་
རྒྱས་བཅོམ་ལྡན་འདས་ལ་ཚིགས་སུ་བཅད་པས་ཞུས་པ། །དེང་སུ་བྱང་ཆུབ་ཡང་དག་མཐར་ཐུག་གྱུར། །ཐམས་ཅད་ལྡན་པའི་འོད་ཟེར་སུ་ཡིས་བཏང་། །འཇིག་རྟེན་མགོན་པོ་ཅི་སླད་ཕྱོགས་བཅུ་ཡི། །ཞིང་རྣམས་གསེར་མཆོག་འདྲ་བར་གནས་པར་གྱུར། །སྟོང་གསུམ་འདི་ནི་ཅི་
སླད་ཚིག་པ་འདྲ། །དེང་འདིར་སུ་ཞིག་གིས་ནི་དབང་ཐོབ་ལགས། །སྔོན་ཆད་མ་བྱུང་རྫུ་འཕྲུལ་སྟོབས་སུས་བསྟན། །སུ་ཡིས་འདིར་ནི་ཞིང་མང་གཡོས་པར་བགྱིས། །ཅི་སླད་ལྷ་དང་ཀླུ་རྣམས་ཁྱིམ་འཁྲུགས་ཤིང་། །གཞལ་མེད་ཁང་མཆོག་དག་ཀྱང་རབ་འགུལ་དང་། །
ཐམས་ཅད་སྐྲག་ནས་རྣམ་པར་བལྟ་ཞིང་མཆིས། །ཅི་ཡི་སླད་དུ་སྟོང་གསུམ་གཡོས་པ་དང་། །གང་གིས་འཁོར་འདིར་ཐེ་ཚོམ་སྐྱེས་གྱུར་དེའི། །རྒྱུ་དང་སུ་ཡི་མཐུ་ལགས་མ་འཚལ་ན། །ཅི་སླད་རྫུ་འཕྲུལ་མངོན་ཤེས་བསྟན་བགྱིས་པ། །རྒྱལ་བ་བྱམས་པའི་ཐུགས་ཅན་བཀའ་
སྩལ་གསོལ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་རྒྱལ་པོ་ལ་བཀའ་སྩལ་པ། །ཀྱེ་རིགས་ཀྱི་བུ་ཁྱོད་ལ་སོགས་པ་འདི་ལྟར་ཤེས་པར་གྱིས་ཤིག །ད་ལྟར་འཁོར་གྱི་དཀྱིལ་འཁོར་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་མིང་འཕགས་
པ་སྤྱན་རས་གཟིགས་དབང་ཕྱུག་ཅེས་བྱ་བ་ཞིག་ཡོད་དེ། འདི་ནི་བསྐལ་པ་དུ་མ་ནས་འགྲོ་བའི་དོན་མཐར་ཕྱིན་པ། བྱམས་པ་དང་། སྙིང་རྗེ་དང་ཐབས་ལ་མཁས་པ། བསྒོམས་པས་སྒྲུབ་པ་དང་། གཟུངས་ཀྱི་སྒོ་རྣམས་ལ་ནུས་པ་དང་ལྡན་པ་སྟེ། སེམས་ཅན་
གྱི་ཁམས་ཐམས་ཅད་ལ་ཞི་བ་དང་། བདེ་བར་འདོད་པས་རྫུ་འཕྲུལ་གྱི་སྟོབས་ཆེན་པོ་འདི་ཕྱུང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དེ་ནས་དེའི་ཚེ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ། གོས་

ལེགས་པར་བགོས་ནས། སངས་རྒྱས་བཅོམ་ལྡན་འདས་ལ་ཐལ་མོ་སྦྱར་ཏེ། འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ལ་སྙིང་རྗེ་ཆེན་པོའི་རང་བཞིན་གྱིས་གསང་སྔགས་སྙིང་ལྟར་བཟུང་བ་མཆིས་ཏེ། སེམས་ཅན་གྱི་ཁམས་ཐམས་ཅད་ཀྱི་ཕན་པ་དང་།
བདེ་བ་ཐོབ་པར་བགྱི་བ་དང་། སྡིག་པའི་ལས་ཐམས་ཅད་དང་། ལས་ལྕི་བ་རྣམས་འབྱང་བར་བགྱི་བ་དང་། བགེགས་དང་མི་ཁོམ་པ་རྣམས་ཡོངས་སུ་སྤང་བར་བགྱི་བ་དང་། དགེ་བའི་ཕྱོགས་བསོད་ནམས་ཐམས་ཅད་འཕེལ་བར་བགྱི་བ་དང་། དགེ་བའི་རྩ་བའི་ས་བོན་ཐམས་ཅད་ཡོངས་སུ་
རྫོགས་པར་བགྱི་བ་དང་། འཇིགས་པ་དང་། གནོད་པ་ཐམས་ཅད་ཡོངས་སུ་སྤང་བ་དང་། མཆོག་ཐམས་ཅད་མྱུར་དུ་ཡོངས་སུ་རྫོགས་པར་བགྱི་བའི་སླད་དུ། བདག་ད་དེ་བརྗོད་པར་འཚལ་ན། བཅོམ་ལྡན་འདས་ཐུགས་བརྩེ་བའི་སླད་དུ། ཐུགས་རྗེས་བདག་ལ་ངེས་པར་གནང་
བར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་རིགས་ཀྱི་བུ་ཤིན་ཏུ་སྙིང་རྗེ་ཆེན་པོ་དང་ལྡན་པ་ཁྱོད། སེམས་ཅན་རྣམས་ལ་ཕན་པ་དང་། བདེ་བའི་ཕྱིར། གསང་སྔགས་གང་བརྗོད་པར་འདོད་པ་འདི། ད་ལྟར་ལེགས་པར་ཁྱོད་ཀྱིས་དུས་ལ་བབ་ཀྱིས་མྱུར་དུ་
སྨྲོས་ཤིག །སངས་རྒྱས་བཅོམ་ལྡན་འདས་དང་། དེ་བཞིན་དུ་སངས་རྒྱས་བཅོམ་ལྡན་འདས་ཐམས་ཅད་ཀྱང་རྗེས་སུ་ཐུགས་རང་ངོ་། །སངས་རྒྱས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཡང་འདི་སྐད་ཅེས་གསོལ་ཏོ། །བཅོམ་
ལྡན་འདས་བདག་གིས་དྲན་པ་བསྐལ་པ་དུ་མ་འདས་པར་གྱུར་པ་ན། འདིར་སངས་རྒྱས་བཅོམ་ལྡན་འདས་འོད་ཟེར་སྟོང་གི་རྒྱལ་པོ་དག་པར་གནས་པ་ཞེས་བགྱི་བ་བྱུང་སྟེ། སངས་རྒྱས་བཅོམ་ལྡན་འདས་འགྲོ་བའི་བླ་མ་དེས་བདག་ལ་བྱམས་པས་དྲན་པར་བགྱི་བ་དང་། སེམས་ཅན་
ཐམས་ཅད་ལ་ཕན་པར་བགྱི་བའི་སླད་དུ། །ཐུགས་རྗེ་ཆེན་པོས་སྙིང་ལྟ་བུ་འདི་ཡོངས་སུ་རྫོགས་པ་དང་། མི་ཟློགས་པ་དང་། རྒྱས་པར་བཤད་དེ། གསེར་གྱི་ཁ་དོག་ལྟ་བུའི་ཕྱག་བདག་གི་མགོ་ལ་བཞག་ན། འདི་སྐད་ཅེས་ཀྱེ་རིགས་ཀྱི་བུ་ཁྱོད་ཀྱིས་མ་འོངས་པའི་སྡིག་པ་ཅན་

གྱི་དུས་ཀྱི་སེམས་ཅན་ཐམས་ཅད་ལ་ཕན་པ་དང་། བདེ་བ་ཆེན་པོ་བྱ་བའི་ཕྱིར། སྙིང་ལྟ་བུའི་གསང་སྔགས་འདི་ཟུང་ཤིག །ཅེས་བཀའ་སྩལ་ཏོ། །བདག་ནི་དེའི་ཚེ་ཐོག་མ་ཉིད་དུ་ས་དང་པོ་ལ་གནས་པར་གྱུར་ཏོ། །འདི་ལྟར་བདག་གིས་གསང་སྔགས་འདི་ལན་ཅིག་ཐོས་
པས་དེ་ཉིད་ན་གནས་བཞིན་དུ་ས་བརྒྱད་པ་ངེས་པར་རྟོགས་པར་གྱུར་ཏོ། །བདག་གིས་དེའི་ཚེ་སྙིང་ལ་བབ་པ་དང་། དགའ་བ་དང་། ཡིད་བདེ་བ་ཐོབ་ནས། དེ་ཉིད་དུ་བདག་གིས་སྨོན་ལམ་འདི་སྐད་བཏབ་སྟེ། འདི་ལྟར་བདག་མ་འོངས་པའི་དུས་ན། སེམས་ཅན་ཐམས་ཅད་ལ་ཕན་པ་དང་།
བདེ་བ་དང་། ཞི་བར་བགྱིད་ནུས་པར་འགྱུར་ཞེ་ན། ད་ངེས་པར་བདག་གི་ལུས་ལ་ལག་པ་སྟོང་དང་། མིག་སྟོང་ཡོངས་སུ་རྫོགས་པར་གྱུར་ཅིག་ཅེས་བགྱིས་པ་དང་། སྨོན་ལམ་དེ་སྐད་བཏབ་མ་ཐག་ཏུ་དེ་ཉིད་ན་མཆིས་བཞིན་དུ། ལག་སྟོང་དང་། མིག་སྟོང་ཡོངས་སུ་རྫོགས་པར་
གྱུར་ཏོ། །ཕྱོགས་བཅུ་དག་ཏུ་ས་ཆེན་པོ་ཡང་རྣམ་པ་དྲུག་ཏུ་གཡོས་སོ་ཕྱོགས་བཅུ་ནས་སངས་རྒྱས་བཅོམ་ལྡན་འདས་ཐམས་ཅད་ཀྱིས་འོད་ཟེར་སྟོང་སྟོང་བདག་གི་སྟེང་དུ་བཀྱེ་ནས། ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པ་སྣང་བར་གྱུར་ཏོ། །དེ་སླན་ཆད་སངས་རྒྱས་བཅོམ་
ལྡན་འདས་དུ་མའི་འཁོར་གྱི་དཀྱིལ་འཁོར་རྣམས་སུ་ཡང་དང་ཡང་དུ་རྙེད་ཅིང་ཐོས་ཏེ། དེ་དག་གི་སྤྱན་སྔར་གཟུངས་སྔགས་འདི་བཟུང་ངོ་། །ཡང་དགའ་བ་དང་མགུ་བ་དུ་མ་སྐྱེས་པར་གྱུར་ཏོ། །བདག་གིས་བསྐལ་པ་དུ་མར་སྐྱེ་བ་དང་། འཆི་བ་ངེས་པར་རྟོགས་པ་ཕྲ་མོ་ཐོབ་པར་གྱུར་ཏེ།
དེ་སླན་ཆད་རྟག་ཏུ་བརྗོད་ཅིང་བཟུང་སྟེ། བསྐྱུད་པར་མ་གྱུར་ཏོ། །གཟུངས་སྔགས་འདི་གཟུང་བའི་དོན་དུ་བདག་གང་དང་གང་དུ་སྐྱེས་པར་རྟག་ཏུ་སངས་རྒྱས་བཅོམ་ལྡན་འདས་རྣམས་ཀྱི་སྤྱན་སྔར་པདྨ་ལས་རྫུས་ཏེ་སྐྱེས་ནས། མའི་མངལ་དུ་སྐྱེ་བ་གཟུང་བར་མ་གྱུར་ཏོ། །དགེ་སློང་ངམ།
དགེ་སློང་མའམ། དགེ་བསྙེན་ནམ། དགེ་བསྙེན་མའམ། ཁྱེའུ་འམ། བུ་མོ་གང་ལ་ལ་ཞིག་བརྗོད་ཅིང་འཛིན་པར་འཚལ་བ་དེས། སེམས་ཅན་ཐམས་ཅད་ལ་བྱམས་པའི་བསམ་པ་དང་། སྙིང་རྗེའི་བསམ་པའི་སེམས་བསྐྱེད་པར་བགྱིའོ། །ཐོག་མར་བདག་བརྗོད་པའི་

འོག་ཏུ་སྨོན་ལམ་ཆེན་པོ་འདི་སྐད་གདབ་པར་བགྱི་སྟེ། བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་ཤེས་རབ་ཆེན་པོའི་མིང་ཐོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་
པར་སེམས་ཅན་ཡོངས་སུ་སྐྱོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་ཐབས་ལ་མཁས་པ་ཐོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཅན་ཁྱོད་ལ་ཕྱག་འཚལ་ལོ། །བདག་ངེས་
པར་ཤེས་རབ་ཀྱི་གྲུར་ཞུགས་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཆེན་པོ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་སྡུག་བསྔལ་གྱི་རྒྱ་མཚོ་ལས་རྒལ་བར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཆེན་པོ་ཅན་ཁྱོད་ལ་ཕྱག་འཚལ་
ལོ། །བདག་ཚུལ་ཁྲིམས་ཀྱི་རྐང་པ་དང་ལྡན་ཞིང་ལམ་མྱུར་དུ་ཐོབ་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཆེན་པོ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་མྱ་ངན་ལས་འདས་པའི་རི་ལ་འཛེག་པར་གྱུར་ཅིག །བཙུན་པ་སྤྱན་རས་གཟིགས་
དབང་ཕྱུག་སྙིང་རྗེ་ཆེན་པོ་ཅན་ཁྱོད་ལ་ཕྱག་འཚལ་ལོ། །བདག་ངེས་པར་མྱུར་དུ་འདུས་མ་བྱས་ཀྱི་ཁྱིམ་དུ་འཇུག་པར་གྱུར་ཅིག །བཙུན་པ་སྤྱན་རས་གཟིགས་དབང་ཕྱུག་སྙིང་རྗེ་ཅན་ཁྱོད་ལ་ཕྱག་འཚལ་ལོ། །བདག་མྱུར་དུ་ཆོས་ཀྱི་སྐུ་དང་གཅིག་ཏུ་གྱུར་ཅིག །གང་གི་ཚེ་བདག་
རལ་གྲིའི་རི་དེ་ལ་འགྲོ་བ་ན་རལ་གྲིའི་རི་དེ་བསྙིལ་ཞིང་ཞིག་པར་གྱུར་ཅིག །གང་གི་ཚེ་བདག་མེ་མ་མུར་གྱི་ནང་དུ་འགྲོ་བ་ན། མེ་མ་མུར་དེ་རང་མེད་པར་གྱུར་ཅིག །གང་གི་ཚེ་བདག་སེམས་ཅན་དམྱལ་བའི་ལམ་དུ་འགྲོ་བ་ན། སེམས་ཅན་དམྱལ་བ་རྣམས་རང་བཞིན་གྱིས་སྟོངས་པར་
གྱུར་ཅིག །གང་གི་ཚེ་བདག་གཤིན་རྗེའི་འཇིག་རྟེན་དུ་འགྲོ་བ་ན། ཡི་དགས་རྣམས་རང་ཚིམ་པར་གྱུར་ཅིག །གང་གི་ཚེ་བདག་ལྷ་མ་ཡིན་གྱི་གནས་སུ་འགྲོ་བ་ན། དེ་དག་གི་སེམས་རང་དུལ་བར་གྱུར་ཅིག །གང་གི་ཚེ་བདག་དུད་འགྲོ་རྣམས་སུ་འགྲོ་བ་ན། དེ་དག་ཡེ་

ཤེས་ཆེན་པོའི་དེ་ཁོ་ན་རང་ཐོབ་པར་གྱུར་ཅིག་ཅེས་དེ་ལྟར་སྨོན་ལམ་དེ་སྐད་བཏབ་ནས། དད་པ་ལྡན་ཞིང་སེམས་ཀྱིས་དྲན་པར་བགྱིས་ལ། བདག་གི་མིང་བརྗོད་པར་བགྱིའོ། །དེ་ནས་ཡང་བདག་སློབ་དཔོན་འདི་ལྟ་སྟེ། དེ་བཞིན་གཤེགས་པ་འོད་དཔག་མེད་
རྟག་ཏུ་དྲན་པར་བགྱིའོ། །དེ་ནས་གསང་སྔགས་འདི་བརྗོད་པར་རིགས་སོ། །ནུབ་གཅིག་ལ་འདི་ལན་ལྔ་བརྗོད་ན། བདག་ཉིད་ཀྱི་སྐྱེ་བ་དང་། འཆི་བ་བསགས་པའི་ལས་ལྕི་བ་སྟོང་ཕྲག་བརྒྱ་དང་། བྱེ་བ་སྟོང་ཕྲག་བཅུ་བསགས་པ་རྣམས་སྤོང་བར་འགྱུར། བྱང་བར་འགྱུར་
རོ། །ཡང་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ལྷ་དང་མི་ཐམས་ཅད་སྙིང་རྗེ་ཆེན་པོའི་རང་བཞིན་གྱི་གཟུངས་སྔགས་གཞི་འདི་ཇི་ལྟ་བ་བཞིན་དུ་བརྗོད་ཅིང་འཛིན་ན། གལ་ཏེ་དེ་དག་འགུམ་པའི་དུས་ཀྱི་ཚེ། ཕྱོགས་བཅུ་ནས་སངས་རྒྱས་བཅོམ་ལྡན་འདས་
རྣམས་དེའི་སྟེང་དུ་ཕྱག་རྐྱོང་ཞིང་འདི་སྐད་ཅེས་ཁྱོད་གང་དུ་སྐྱེ་བར་འདོད། །གང་དང་གང་དུ་སྨོན་ལམ་བཏབ་པ་དེར་སོང་ཤིག་ཅེས་གསུང་ངོ་། །ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མིའམ་མི་མ་ལགས་པ་གང་ཞིག་སྙིང་རྗེ་
ཆེན་པོའི་རང་བཞིན་གྱི་གསང་སྔགས་འདི་བརྗོད་ཅིང་འཛིན་ལ། དེ་གལ་ཏེ་ངན་སོང་གསུམ་དུ་ལྷུང་བར་གྱུར་ན། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག །གང་ཞིག་གིས་གསང་སྔགས་འདི་བརྗོད་ཅིང་བཟུང་
ལ། སངས་རྒྱས་བཅོམ་ལྡན་འདས་ཐམས་ཅད་ཀྱི་འཇིག་རྟེན་གྱི་ཁམས་སུ་སྐྱེ་བ་མ་ཐོབ་ན་བདག་སངས་རྒྱས་སུ་མ་གྱུར་ཅིག །ཡང་སུ་ཞིག་གིས་གསང་སྔགས་འདི་བརྗོད་ཅིང་བཟུང་ལ། དེས་ཏིང་ངེ་འཛིན་དང་། སོ་སོ་ཡང་དག་པར་རིག་པ་དུ་མ་མ་ཐོབ་ན། བདག་སངས་རྒྱས་
སུ་མ་གྱུར་ཅིག །ཡང་སུ་ཞིག་གིས་གསང་སྔགས་འདི་བརྗོད་ཅིང་བཟུང་ལ། ཚེ་གཅིག་གིས་ཡིད་ལ་བསམས་པ་ཐམས་ཅད་ཡོངས་སུ་མ་རྫོགས་ན། འདི་སྙིང་རྗེ་ཆེན་པོའི་རང་བཞིན་གྱི་སྙིང་པོ་ཞེས་བགྱི་བའི་མིང་ཐོབ་པར་མི་འགྱུར་རོ། །སུ་སྡིག་པ་བགྱིད་པ་དང་། མ་དད་

པ་ནི་མ་གཏོགས་སོ། །བུད་མེད་སུ་ཞིག་བུད་མེད་ཀྱི་ཆོས་ལ་ཡིད་བྱུང་ནས། བདག་སྐྱེས་པར་གྱུར་ཅིག་ཅེས་འཚལ་ཏེ། སྙིང་རྗེ་ཆེན་པོའི་རང་བཞིན་གྱི་གཟུངས་སྔགས་གཞི་འདི་བརྗོད་ཅིང་བཟུང་ལ་དེ་བུད་མེད་ཀྱི་ལུས་ལས་མ་གྱུར་ཅིང་། སྐྱེས་པའི་ལུས་མ་ཐོབ་ན། བདག་བྱང་
ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག །གལ་ཏེ་འཛིན་པར་བགྱིད་པས། དེ་ལ་ཐེ་ཚོམ་ཅུང་ཟད་ཙམ་ཞིག་བགྱིས་ན། གདོན་མི་འཚལ་བར་ཡིད་ལ་བསམས་པ་བཞིན་དུ་མི་འགྲུབ་བོ། །གང་གིས་དགེ་འདུན་གྱི་བཟའ་བ་དང་། ཐུག་པ་དང་། ནོར་དང་། འབྲུ་
ཕྲོགས་སམ། ཆུད་གསན་ཏེ། གང་ལ་སངས་རྒྱས་སྟོང་གི་བཤགས་སུ་གནང་བས་བཤགས་སུ་ལགས་ཀྱང་བཤགས་པར་མ་གྱུར་ལ། གལ་ཏེ་གསང་སྔགས་འདི་བརྗོད་ཀྱང་། སྡིག་པ་ཐམས་ཅད་འབྱང་བར་མ་གྱུར་ན། དེའི་སླད་དུ་དགེ་འདུན་གྱི་རྫས་ཅི་སྤྱད་པ་དང་། ཆུད་
གསན་པ་དང་། ཕྲོགས་པ་དང་། ཕྱོགས་བཅུ་དག་ན། རབ་ཏུ་བྱུང་བ་ཐམས་ཅད་ཀྱི་སོ་སོའི་མདུན་དུ་མཆིས་ལ་བཤགས་ན། དེའི་ཚེ་དེའི་བཤགས་པར་འགྱུར་རོ། །གལ་ཏེ་དེ་ལྟར་གསང་སྔགས་འདི་བརྗོད་པར་གྱུར་ན། ཕྱོགས་བཅུ་དག་ཏུ་གཏོགས་པའི་རབ་ཏུ་བྱུང་བའི་
འདུས་པ་རྣམས་དེ་ལ་དབང་ཡིན་ནོ་ཞེས་སྨྲ་ཞིང་ལས་ཐམས་ཅད་ཀྱང་བཤགས་པར་ཆུད་པར་འགྱུར་རོ། །སྡིག་པ་བཅུ་པོ་ཐམས་ཅད་དང་། མཚམས་མེད་པ་ལྔ་དང་། འཕགས་པའི་གང་ཟག་རྣམས་ལ་མི་སྙན་པ་བརྗོད་པ་དང་། དམ་པའི་ཆོས་སྤང་བ་དང་། དུས་མ་ལགས་པར་ཟས་
འཚལ་བ་དང་། བསླབ་པ་ཉམས་པ་དང་། མཆོད་རྟེན་དང་། དགེ་འདུན་གྱི་ཀུན་དགའ་ར་བ་དང་། དགེ་འདུན་གྱི་རྫས་ཆུད་གཟོན་པ་དང་། ཚུལ་ཁྲིམས་ཡོངས་སུ་དག་པར་གནས་པའི་སེམས་ཅན་རྣམས་ཀྱི་ཚུལ་ཁྲིམས་ཉམས་པར་བགྱིད་པ་དང་། དེ་ལ་སོགས་པའི་སྡིག་
པའི་ལས་ཤིན་ཏུ་ལྕི་བ་ཐམས་ཅད་དང་། སྡིག་པ་ཐམས་ཅད་མ་ལུས་པར་བྱང་བར་འགྱུར་རོ། །གང་ཐེ་ཚོམ་འཚལ་བ་ནི་མ་གཏོགས་ཏེ། དེའི་སྡིག་པ་ཆུང་ངུ་དང་། ལས་ཡང་བ་ཡང་འབྱང་བར་མི་འགྱུར་ན། ཤིན་ཏུ་ལྕི་བ་ལྟ་སྨོས་ཀྱང་ཅི་འཚལ། སྡིག་པའི་ལས་ཤིན་ཏུ་ལྕི་བ་

རྣམས་བྱང་བར་མ་གྱུར་དུ་ལགས་ཀྱང་། ཡུན་རིང་མོ་ཞིག་ན། སངས་རྒྱས་ཀྱི་རྒྱུར་འགྱུར་བར་བགྱིད་ནུས་པར་འགྱུར་རོ། །ཡང་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གལ་ཏེ་མིའམ། མི་མ་ལགས་པ་ཞིག་གིས་སྙིང་རྗེ་ཆེན་པོའི་རང་བཞིན་གྱི་སྙིང་
པོ་འདི་བརྗོད་པར་གྱུར་ན། དེ་སྐྱེ་བ་བཟང་པོ་རྣམ་པ་བཅོ་ལྔ་ཐོབ་པར་འགྱུར་རོ། །གཤིས་ངན་དུ་འགུམ་པ་རྣམ་པ་བཅོ་ལྔ་ནི་མྱོང་བར་མི་འགྱུར་ཏེ། བཅོ་ལྔ་གང་ཞེ་ན། དང་པོ་ནི་གང་ལྟོགས་པས་སྡུག་བསྔལ་ཏེ་འགུམ་པར་མི་འགྱུར་བའོ། །གཉིས་པ་ནི་གང་ཆད་པ་ངན་པས་
བཅད་པའི་ཚོར་བས་ཉམ་ཐག་པའི་གནོད་པ་དག་གིས་འགུམ་པར་མི་འགྱུར་བའོ། །གསུམ་པ་ནི་དགྲ་དང་། ཁོན་མཆིས་པ་དང་། ཕྱིར་བཟློག་པ་རྣམས་ཀྱི་དུག་དང་། མཚོན་གྱིས་འགུམ་པར་མི་འགྱུར་བའོ། །བཞི་པ་ནི་གང་དམག་གི་གཡུལ་འགྱེད་པར་ཞུགས་པའི་
ཚེ་འགུམ་པར་མི་འགྱུར་བའོ། །ལྔ་པ་ནི་གང་སྟག་དང་། སྤྱང་ཀི་ལ་སོགས་པ་གཅན་གཟན་མ་རུངས་པ་རྣམས་ཀྱིས་བསད་པས་འགུམ་པར་མི་འགྱུར་བའོ། །དྲུག་པ་ནི་གང་སྦྲུལ་གདུག་པ་དང་། རྩངས་པ་དང་། སྲོག་ཆགས་ཨུ་ཙི་ལིང་གས་ཟིན་ནས་འགུམ་པར་མི་འགྱུར་
བའོ། །བདུན་པ་ནི་གང་མེ་དང་། ཆུས་འགུམ་པར་མི་འགྱུར་བའོ། །བརྒྱད་པ་ནི་གང་དུག་ཏུ་འགྱུར་རོ་འཚལ་བས། འགུམ་པར་མི་འགྱུར་བའོ། །དགུ་པ་ནི་གང་སྲོག་ཆགས་སྣ་ཚོགས་ཀྱི་དུག་གིས་འགུམ་པར་མི་འགྱུར་རོ། །བཅུ་པ་ནི་གང་རྨོངས་པ་དང་། རྣམ་
པར་གཡེངས་པ་དང་། བརྗེད་པ་དང་། ཉལ་བས་འགུམ་པར་མི་འགྱུར་བའོ། །བཅུ་གཅིག་པ་ནི་གང་རི་དང་། ཤིང་དང་། གཡང་ས་དང་། གད་པ་ལས་ལྟུང་བས་འགུམ་པར་མི་འགྱུར་བའོ། །བཅུ་གཉིས་པ་ནི་གང་བྱད་ཀྱིས་འགུམ་པར་མི་འགྱུར་བའོ། །བཅུ་གསུམ་
པ་ནི་གང་དག་ལྷ་གཡོན་ཅན་རྣམས་དང་། འབྱུང་པོ་སྡིག་པ་ཅན་རྣམས་ཀྱིས་གླགས་བལྟས་པས་འགུམ་པར་མི་འགྱུར་བའོ། །བཅུ་བཞི་པ་ནི་གང་གསོར་མི་རུང་བའི་ནད་རྣམས་ཀྱིས་བཏབ་ནས་འགུམ་པར་མི་འགྱུར་རོ། །བཅོ་ལྔ་པ་ནི་གང་བདག་ལ་བདག་གསོད་པས་འགུམ་

པར་མི་འགྱུར་བ་སྟེ། གང་སྙིང་རྗེ་ཆེན་པོའི་རང་བཞིན་ཅན་ཏེ། གང་སྙིང་རྗེ་ཆེན་པོའི་རང་བཞིན་གྱི་སྙིང་པོ་འདི་བརྗོད་ཅིང་འཛིན་པ་དེ་ལ། གཤིས་ངན་དུ་འགུམ་པ་རྣམ་པ་བཅོ་ལྔ་འབྱུང་བར་མི་འགྱུར་རོ། །སྐྱེ་བ་བཟང་པོ་རྣམ་པ་བཅོ་ལྔ་ཡང་ཐོབ་པར་འགྱུར་ཏེ། དང་པོ་ནི་གང་དང་གང་དུ་
སྐྱེ་བ་ཐམས་ཅད་དུ་ཆོས་དང་མཐུན་པའི་རྒྱལ་པོ་རྣམས་དང་ཕྲད་པར་འགྱུར་བའོ། །གཉིས་པ་ནི་གང་འཕགས་པའི་ཡུལ་དུ་སྐྱེ་བ་ཐོབ་པར་འགྱུར་བའོ། །གསུམ་པ་ནི་དུས་བཟང་པོ་དང་ཕྲད་པར་འགྱུར་བའོ། །བཞི་པ་ནི་གང་རྟག་ཏུ་དགེ་བའི་བཤེས་གཉེན་རྣམས་དང་ཕྲད་པར་འགྱུར་བའོ། །
ལྔ་པ་ནི་གང་དབང་པོ་མཐའ་དག་ཚང་བའི་ལུས་འཐོབ་པར་འགྱུར་བའོ། །དྲུག་པ་ནི་གང་དགེ་བའི་ཕྱོགས་ལ་སེམས་ཡོངས་སུ་སྨིན་པར་འགྱུར་བའོ། །བདུན་པ་ནི་གང་ཚུལ་ཁྲིམས་ཉམས་པར་མི་འགྱུར་བའོ། །བརྒྱད་པ་ནི་གང་གཉེན་བཤེས་རྣམས་དང་། བྲན་གཡོག་རྣམས་ཀྱིས་བྱེ་བྲག་
ཤེས་ཤིང་མཐུན་པར་འགྱུར་བའོ། །དགུ་པ་ནི་གང་ཡོ་བྱད་དང་། ནོར་དང་། ཟས་རྟག་ཏུ་རྒྱུན་མི་འཆད་པར་རྙེད་པར་འགྱུར་བའོ། །བཅུ་པ་ནི་གང་གཞན་གྱིས་གོ་འཕང་བསྟོད་པ་དང་། མཆོད་པ་དང་། བཀུར་སྟི་རྙེད་པར་འགྱུར་བའོ། །བཅུ་གཅིག་པ་ནི་གང་ནོར་དང་། ཡོ་བྱད་མི་འཕྲོགས་
པར་འགྱུར་བའོ། །བཅུ་གཉིས་པ་ནི་གང་བསམས་པ་སེམས་དང་མཐུན་པར་འགྱུར་བའོ། །བཅུ་གསུམ་པ་ནི་གང་ལྷ་དང་ཀླུ་དང་། ལྷ་མ་ཡིན་རྣམས་ཀྱིས་ཀྱང་རྟག་ཏུ་སྲུང་བར་འགྱུར་བའོ། །བཅུ་བཞི་པ་ནི་གང་སངས་རྒྱས་བཅོམ་ལྡན་འདས་རྣམས་མཐོང་ཞིང་ཆོས་ཀྱང་ཐོབ་པར་འགྱུར་
བའོ། །བཅོ་ལྔ་པ་ནི་གང་ཆོས་ཐོས་པ་དང་། དོན་ཟབ་མོ་ཤེས་རབ་ཀྱིས་རྟོགས་པར་འགྱུར་བ་སྟེ། གང་ལ་ལ་ཞིག་སྙིང་རྗེ་ཆེན་པོའི་རང་བཞིན་གྱི་སྙིང་པོ་འདི་བརྗོད་ཅིང་འཛིན་པ་དེས་གོང་དུ་སྨོས་པ་སྐྱེ་བ་རྣམ་པ་བཅོ་ལྔ་པོ་དེ་དག་འཐོབ་པར་འགྱུར་རོ། །དེའི་སླད་དུ་ལྷ་དང་མི་ཐམས་ཅད་ཀྱིས་རྟག་ཏུ་བརྗོད་
ཅིང་གཟུང་བར་བགྱི་སྟེ། དེ་ལ་སྐྱོ་བ་བསྐྱེད་པར་མི་བགྱིའོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་ཚིག་དེ་སྐད་སྨྲས་ནས། དེའི་རྗེས་ལ་འཁོར་མང་པོའི་དབུས་དེ་ཉིད་དུ་འདུག་སྟེ། ལག་པ་གཉིས་མཉམ་པར་ཐལ་མོ་སྦྱར་ནས། སེམས་ཅན་

ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་དེ། འཛུམ་པའི་བཞིན་རྒྱས་པར་བྱས་ནས། རྒྱས་པ་ཆེན་པོ་ཀུན་ནས་ཡོངས་སུ་རྫོགས་པ་ཐོགས་པ་མེད་པ་སྙིང་རྗེ་ཆེན་པོའི་རང་བཞིན་གྱི་སྙིང་པོ་གཟུངས་སྔགས་ཆེན་པོ་གཞི་མཛེས་པ་འདི་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མ་
ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་སརྦ་བན་དྷ་ན་ཙྪེ་ད་ན་ཀ་རཱ་ཡ། སརྦ་པཱ་པ་ས་མུ་དྲོཙྪོ་ཥ་ཎ་ཀ་རཱ་ཡ། སརྦ་བྱཱ་དྷི་པྲ་ཤ་མ་ན་ཀ་རཱ་ཡ། སརྦ་ཨི་ཏྱུ་པ་དྲ་བ་བི་ནཱ་ཤ་ན་ཀ་རཱ་ཡ། སརྦ་བྷ་ཡེ་ཥུ་ཏཱ་ར་ཎ་ཀ་རཱ་ཡ། ཏ་སྱ་ན་མསྐྲྀ་ཏྭ། ཨི་དཾ་
ཨཱརྱ་ཨ་བ་ལོ་ཀི་ཏེ་ཤྭ་ར། ཏ་བ་ནཱི་ལ་ཀཎྛ་ནཱ་མ་པ་ར་མ་ཧྲྀ་ད་ཡ་མཱ་བརྟ་ཡི་ཥྱཱ་མི། སརྦ་ཨཪྠ་སཱ་དྷ་ནཾ། ཤུ་བྷ་ཙེ་ཏ་ནཾ། སརྦ་བྷཱུ་ཏཱ་ནཱཾ་པཱ་པ་མཱ་རྒ་བི་ཤོ་དྷ་ཀཾ། ཏདྱ་ཐཱ། ཨཱ་ལོ་ཀེ། ལོ་ཀ་མ་ཏི། ལོ་ཀཱ་ཏི་ཀྲཱནྟ། ཨེ་ཧྱེ་ཧི་མ་ཧཱ་བོ་དྷི་སཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་སཏྭ། ཧེ་པྲི་ཡ་བོ་དྷི་
སཏྭ། ཧེ་མ་ཧཱ་ཀཱ་རུ་ཎི་ཀ །སྨ་ར་ཧྲྀ་ད་ཡཾ། ཨེ་ཧྱེ་ཧི། ཨཱརྱཱ་བ་ལོ་ཀི་ཏེ་ཤྭ་རཱ་ཡ། པ་ར་མ་མཻ་ཏྲི་ཙིཏྟ་ཀཱ་རུ་ཎི་ཀ །ཀུ་རུ་ཀུ་རུ་ཀརྨ། སཱ་དྷ་ཡ་སཱ་དྷ་ཡ་བི་དྱཱ་ན། དེ་ཧི་དེ་ཧི། མེ་ཨ་རཾ་ག་མཾ་ག་མཾ་བི་ཧཾ་ག་མ། སིད་དྷ་ཡོ་གཱི་ཤྭ་ར། དུ་ཧུ་དུ་ཧུ་མ་ཧཱ་བཱིརྱ་ནྟེ། དྷ་ར་དྷ་ར་དྷཱ་རེནྡྲེ་ཤྭ་ར་ཛྭ་ལ་ཛྭ་
ལ་བི་མ་ལ་མཱུ་རྟེ། ཨཱརྱ་ཨ་བ་ལོ་ཀི་ཏེ་ཤྭ་ར། ཀྲྀཥྞཱ་ཛི་ན་ཛ་ཊཱ་མུ་ཀུ་ཊ། ཨ་ལཾ་ཀྲྀ་ཏ། ཤ་རཱི་ར་ལམྦ་པྲ་ལམྦ་བི་ལམྦ། མ་ཧཱ་སིད་དྷ་བིདྱཱ་དྷ་ར། བ་ལ་བ་ལ། མ་ཧཱ་བ་ལ། མ་ལ་མ་ལ་མ་ཧཱ་མ་ལ། ཛྭ་ལ་ཛྭ་ལ་མ་ཧཱ་ཛྭ་ལ། ཀྀཥྞ་པཀྵ། ཀྲྀཥྞ་བརྞ། ཀིཥྞ་པཱ་ཤ། ནི་རྒྷཱ་ཏ་ན།
ཧེ་པདྨ་ཧ་སྟ། ཛ་ཡ་ཀ་ར། ནི་ཤཱ་ཙ་རེ་ཤྭ་ར། ཀྀཥྞ་སརྦ་ཀྲི་ཏ་ཡཛྙོ་པ་བཱི་ཏ། ཨེ་ཧྱེ་ཧི་མ་ཧཱ་བཱི་ར། མ་ཧཱ་བ་ར་མ་ཧཱ་བཱ་རཱ་ཧ་མུ་ཁ། ཏྲི་པུ་ར་ད་ཧ་ནེ་ཤྭ་ར། ནཱ་རཱ་ཡ་ཎ་རཱུ་པ། བ་ལ་བེ་ག་དྷཱ་རི། ཧེ་ནཱི་ལ་ཀཎྛ། ཨེ་ཧྱེ་ཧི། མ་ཧཱ་ཧ་ལ་ཧ་ལ། བི་ཥ་ནི་རྫི་ཏ་ལོ་ཀ་སྱ་རཱ་ག་བི་ཥ་ནཱ་ཤ་
ན། དྭེ་ཥ་བི་ཥ་བི་ནཱ་ཤ་ན། མོ་ཧ་བི་ཥ་བི་ནཱ་ཤ་ན། ནི་ར་མོཀྵ་ཎ་ཧུ་ལུ་ཧུ་ལུ། མུཉྩ་མཉྩ། མུ་ཧུ་མུ་ཧུ། ཧ་ལཱ་ཧ་ར། མ་ཧཱ་པདྨ་ནཱ་བྷི། ར་ས་ར་ས། སི་རི་སི་རི། སུ་རུ་སུ་རུ། བུ་དྷྱ་བུ་དྷྱ། བོདྷ་ཡ་བོ་དྷཡ། བོདྷ་ཡཱ་མི། ཏ་བ་ནཱི་ལ་ཀཎྛ། ཨེ་ཧྱེ་ཧི། བཱ་མ་སྠི་ཏ། མ་ཧཱ་

སིང་ཧ་མུ་ཁ། ཧ་ས་ཧ་ས། མུཉྩ་མུཉྩ། མ་ཧཱ་ཊྚཊྚ་ནིརྞཱ་དེ་ན། ཨེ་ཧྱེ་ཧི་བྷོ་བྷོ་མ་ཧཱ་སིད་དྷ་ཡོ་གཱི་ཤྭ་ར། བནྡྷ་བནྡྷ། བཱ་ཙ་ན་སཱ་དྷ་ཡ། སཱ་དྷ་ཡ། བིདྱཱ་ན། སྨ་ར་སྨ་ར་སྟྭཾ། ཧེ་བྷ་ག་བཱན། ལོ་ཀི་བི་ལོ་ཀི་སྟྭཾ། ཏ་ཐཱ་ག་ཏ། དེ་ཧི་དེ་ཧི་མེ་དར་ཤ་ནཾ། ཀཱ་མ་སྱ་དར་ཤ་ནཾ། པྲ་སཱ་དྷ་ཡ་
མེ་སྭཱ་ཧཱ། སིད་དྷཱ་ཡ་སྭཱ་ཧཱ། མ་ཧཱ་སིད་དྷཱ་ཡ་སྭཱ་ཧཱ། སིད་དྷ་ཡོ་གཱི་ཤྭ་རཱ་ཡ་སྭཱ་ཧཱ། ནཱི་ལ་ཀཎྛཱ་ཡ་སྭཱ་ཧཱ། བཱ་རཱ་ཧ་མུ་ཁཱ་ཡ་སྭཱ་ཧཱ། སིཾ་ཧ་མུ་ཁཱ་ཡ་སྭཱ་ཧཱ། མ་ཧཱ་ན་ར་སིཾ་ཧ་མུ་ཁཱ་ཡ་སྭཱ་ཧཱ། བཛྲ་ཧ་སྟཱ་ཡ་སྭཱ་ཧཱ། མ་ཧཱ་བཛྲ་ཧ་སྟཱ་ཡ་སྭཱ་ཧཱ། སིད་དྷ་བིདྱཱ་དྷ་རཱ་ཡ་སྭཱ་ཧཱ། མ་ཧཱ་སིད་དྷ་བིདྱཱ་
དྷ་རཱ་ཡ་སྭཱ་ཧཱ། པདྨ་ཧ་སྟཱ་ཡ་སྭཱ་ཧཱ། མ་ཧཱ་པདྨ་ཧ་སྟཱ་ཡ་སྭཱ་ཧཱ། ཀྲྀཥྞ་སརྦ་ཀྲི་ཏ་ཡཛྙོ་པ་བཱི་ཏཱ་ཡ་སྭཱ་ཧཱ། མ་ཧཱ་མཱ་ལ་མ་ཀུ་ཊ་དྷ་རཱ་ཡ་སྭཱ་ཧཱ། ཙཀྲཱ་ཡུ་དྷ་དྷ་རཱ་ཡ་སྭཱ་ཧཱ། ཤདྑ་ཤབྡ་ནིརྣཱ་ད་ན་ཀ་རཱ་ཡ་སྭཱ་ཧཱ། བོ་དྷ་ན་ཀ་རཱ་ཡ་སྭཱ་ཧཱ། བཱ་མསྠི་ཏ་སྐནྡྷ་དེ་ཤ་ཀྲྀཥྞཱ་ཛི་ནཱ་ཡ་སྭཱ་ཧཱ།
བཱ་མ་ཧསྟ་བྱཱ་གྷྲ་ཙརྨ་ནི་བཱ་ས་ནཱ་ཡ་སྭཱ་ཧཱ། ལོ་ཀེ་ཤྭ་རཱ་ཡ་སྭཱ་ཧཱ། མ་ཧཱ་ལོ་ཀེ་ཤྭ་རཱ་ཡ་སྭཱ་ཧཱ། སརྦ་སིདྷེ་ཤྭ་རཱ་ཡ་སྭཱ་ཧཱ། རཀྵ་རཀྵ་མཱཾ་སྭཱ་ཧཱ། ཀུ་རུ་རཀྵ་མཱུ་རྟཱི་ནཱཾ་སྭཱ་ཧཱ། ན་མོ་བྷ་ག་བ་ཏེ། ན་མ་ཨཱརྱ་ཨ་བ་ལོ་ཀི་ཏེ་ཤྭ་རཱ་ཡ་བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ་སིད་
དྷྱན་ཏུ་མེ། མནྟྲ་པ་དཱ་ནི་སྭཱ་ཧཱ། ཨོྃ་ཧྲཱི་ཏྲཻ་ལོཀྱ་བི་ཛ་ཡ། ཨ་མོ་གྷ་པཱ་ཤ །ཨ་པྲ་ཏི་ཧ་ཏེ་ཧྲཱིཿཧ་ཧཱུཾ་ཕཊ་སྭཱ་ཧཱ། དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་སྙིང་པོ་འདི་བརྗོད་ནས་ས་ཆེན་པོ་ནི་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །འགུལ་
ལོ། །འུར་འུར་རོ། །བར་སྣང་ལས་རིན་པོ་ཆེ་དང་འདྲེས་པའི་མེ་ཏོག་གི་ཆར་མངོན་པར་བབ་བོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཐམས་ཅད་རྗེས་སུ་ཐུགས་རང་ངོ་། །བདུད་དང་གཞན་མུ་སྟེགས་ཐམས་ཅད་སྔངས་སྐྲག་སྟེ། སྤུ་ཟིང་ཞེས་བྱེད་པར་གྱུར་ཏོ། །འཁོར་དེ་ཐམས་ཅད་
ནི་སོ་སོར་འབྲས་བུ་ཐོབ་སྟེ། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པའི་འབྲས་བུ་ཐོབ་བོ། །ཁ་ཅིག་ནི་ས་དང་པོ་ཐོབ་བོ། །ཁ་ཅིག་ནི་ས་གཉིས་པ། ཁ་ཅིག་ནི་ས་གསུམ་པ། ཁ་ཅིག་ནི་ས་བཞི་པ། ཁ་ཅིག་

ནི་ས་ལྔ་པ་ནས། ཁ་ཅིག་ས་བཅུ་པའི་བར་དུ་ཐོབ་བོ། །གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་སེམས་ཅན་དེ་དག་ཀྱང་དཔག་ཏུ་མེད་དོ། །དེ་ནས་ཚངས་པ་ཆེན་པོ་སྟན་ལས་ལངས་ཏེ། གོས་ལེགས་པར་བགོས་ནས། གུས་པའི་
སེམས་ཀྱིས་ཐལ་མོ་སྦྱར་ཏེ། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །ཀྱེ་ཀྱེ་ལས་མཛད་པ་ལེགས་སོ་ལེགས་སོ། །བདག་ཀྱང་འདས་པའི་དུས་ན། དེ་བཞིན་གཤེགས་པ་དཔག་ཏུ་མེད་པ་དག་གི་འཁོར་རྣམས་སུ་འདུས་པར་གྱུར་
ཏེ། བདག་གིས་དེ་དག་ཏུ་ཆོས་ཀྱི་རྣམ་གྲངས་དང་། གཟུངས་ཀྱི་སྒོ་སྣ་ཚོགས་དག་ཀྱང་ཐོབ་ན། བདག་གིས་སྙིང་རྗེ་ཆེན་པོའི་རང་བཞིན་གྱི་གཟུང་སྔགས་གཞི་ཐོགས་པ་མེད་པ་རྒྱ་ཆེན་པོ་འདི་མ་ཐོས་ཀྱིས། ད་བྱང་ཆུབ་སེམས་དཔའ་ལས་མཛད་པ་ཆེན་པོ་དེའི་ལུས་དང་། རྟགས་དང་།
ཚུལ་དང་། མཚན་ཉིད་ངེས་པར་བཤད་དུ་གསོལ། བདག་ལ་སོགས་པ་འཁོར་ཆེན་པོ་འདི་ཐོས་པར་འཚལ་ཞིང་སྨོས་སོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས། ཚངས་པ་ཆེན་པོ་ལ་འདི་སྐད་ཅེས་སྨྲས་སོ། །ཀྱེ་ཁྱོད་ཀྱིས་ཐབས་མཁས་
པས། སེམས་ཅན་གྱི་ཁམས་ཐམས་ཅད་ལ་ཕན་པ་དང་། བདེ་བའི་ཕྱིར་དྲི་བ་འདི་བྱས་སོ། །ད་ཉོན་ཅིག་དང་མདོར་ཅུང་ཟད་ཅིག་ཁོ་བོས་ཁྱོད་ལ་བཤད་པར་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་སྨྲས་སོ། །འདི་ནི་སྙིང་རྗེ་ཆེན་པོའི་སེམས་
སོ། །འདི་ནི་མཚུངས་ཤིང་མཉམ་པའི་སེམས་སོ། །འདི་ནི་འདུས་མ་བྱས་ཀྱི་སེམས་སོ། །འདི་ནི་ཆགས་ཤིང་ཞེན་པ་མེད་པའི་སེམས་སོ། །འདི་ནི་སྟོང་པ་ཉིད་དུ་བལྟ་བའི་སེམས་སོ། །འདི་ནི་བསྟི་སྟང་དུ་བྱས་ཤིང་གུས་པའི་སེམས་སོ། །འདི་ནི་མ་འཁྲུགས་ཤིང་སྐྱོན་
མེད་པའི་སེམས་སོ། །འདི་ནི་བླ་ན་མེད་པའི་བྱང་ཆུབ་ཀྱི་སེམས་ཏེ། སེམས་དེ་དག་ལ་སོགས་པ་ནི་སྙིང་པོ་འདིའི་མཚན་ཉིད་དང་། ཚུལ་ཡིན་པར་དེ་ལྟར་ཞེས་བྱའོ། །དེ་ལྟར་ཚུལ་འདིས་སྤྱད་པར་བྱའོ། །བསྒོམ་པར་བྱའོ། །ཚངས་པ་ཆེན་པོས་འདི་སྐད་ཅེས་སྨྲས་སོ། །

བདག་ལ་སོགས་པ་འཁོར་འདིས་སྙིང་པོ་འདིའི་ཚུལ་དང་། མཚན་ཉིད་དེ་དང་སླན་ཆད་མ་འཚལ་ཏོ། །ད་སླན་ཆད་ནི་བླང་ངོ་། །མི་བསྐྱུད་པར་བགྱིའོ། །བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུའམ།
རིགས་ཀྱི་བུ་མོ་གང་ལ་ལ་ཞིག་སྙིང་པོ་འདི་བརྗོད་ཅིང་འཛིན་ན། དེས་བྱང་ཆུབ་སེམས་དཔའ་ཆེན་པོ་ཡངས་པ་བསྐྱེད་པའོ། །དེ་ལྟར་ཡི་དམ་བཅས་ནས། བདག་གིས་སེམས་ཅན་ཐམས་ཅད་ཀྱི་ལུས་གཟུང་བར་བྱའོ། །ཟས་དུས་དུས་སུ་བཟའ་བ་དང་། ཚུལ་ཁྲིམས་དང་ལྡན་
པར་བྱའོ། །སེམས་ཅན་ཐམས་ཅད་ལ་མཉམ་པའི་སེམས་བསྐྱེད་པར་བྱའོ། །རྟག་པར་རྒྱུན་དུ་རྒྱུན་མི་འཆད་པར་གསང་སྔགས་འདི་བརྗོད་པར་བྱའོ། །གཙང་མར་གནས་པས་གནས་པར་བྱའོ། །ཁྲུས་ལེགས་པར་བྱའོ། །གོས་གཙང་མ་བགོས་ལ་ལྷའི་བ་དན་དང་།
མར་མེ་དང་། བདུག་པ་དང་། མེ་ཏོག་དང་། གཏོར་མ་ལ་སོགས་པས་མཆོད་པར་བྱའོ། །སེམས་རྩེ་གཅིག་ཏུ་གཟུང་བར་བྱའོ། །ཡང་དག་པར་མ་ཡིན་པ་ལ་བརྟག་པར་མི་བྱའོ་ཞེས་དེ་སྐད་ཅེས་བརྗོད་པར་བྱའོ། །དེ་ལྟར་གཟུང་བར་བྱའོ། །འོན་ཏང་བྱང་ཆུབ་སེམས་དཔའ་
ཉི་འོད་དང་། བྱང་ཆུབ་སེམས་དཔའ་ཟླ་འོད་དང་། ལྷའི་དྲང་སྲོང་དུ་མ་ཡང་དེར་འགྲོ་སྟེ། དབང་བྱེད་ཅིང་དངོས་གྲུབ་ཀྱང་སྦྱིན་པར་འགྱུར་རོ། །ཁོ་བོས་ཀྱང་དེའི་ཚེ་མིག་སྟོང་གིས་སྒྲུབ་པ་པོ་དེ་ལ་བལྟའོ། །ལག་པ་སྟོང་གིས་སྦ་ཞིང་བཟུང་ངོ་། །འཇིག་རྟེན་གྱི་མདོ་དང་། ཡི་གེ་
རྣམས་ལེན་ཅིང་འཛིན་ཀྱང་ནུས་པར་འགྱུར་རོ། །གཞན་མུ་སྟེགས་ཅན་ཐམས་ཅད་ཀྱི་ཆོས་དབང་དུ་བྱ་བ་དང་། རིག་བྱེད་རྣམས་ཀྱང་ངེས་པར་རྟོགས་པར་འགྱུར་རོ། །གང་ལ་ལ་ཞིག་གསང་སྔགས་འདི་བརྗོད་ཅིང་འཛིན་པས་ནི་འཇིག་རྟེན་ན་འབྱུང་པོས་ཕྱུང་བའི་ནད་ཀྱི་རྣམ་
པ་བརྒྱད་ཁྲི་བཞི་སྟོང་གང་སུ་ལ་བྱུང་ཡང་རུང་སོས་པར་བྱེད་དོ། །དེས་ཞི་བར་མི་འགྱུར་བའི་ནད་གང་ཡང་མེད་དོ། །ཡང་འབྱུང་པོའམ། ལྷ་རྣམས་ལ་ཡང་རྒོལ་བའི་མཐུ་ཡོད་པར་འགྱུར་རོ། །བདུད་ཀྱང་ཕམ་པར་བྱེད་དོ། །གཞན་མུ་སྟེགས་ཅན་རྣམས་ཀྱི་ཕྱོགས་ཀྱང་

ལྐུགས་པར་བྱེད་དོ། །གལ་ཏེ་རི་ལ་གནས་པའམ། དགོན་པ་ན་གནས་པ་གང་ཞིག་ཁ་ཏོན་པ་ལ་དེ་ན་གནས་པ་སྡིག་པ་བྱེད་པ་དང་། བགེགས་བྱེད་པ་དང་། གནོད་པ་བྱེད་པའི་ལྷ་དང་། འབྱུང་པོ་སྣ་ཚོགས་གང་དག་སེམས་འཁྲུགས་པར་བྱེད་ན། སྙིང་པོ་འདི་ལན་
ཅིག་བརྗོད་པས་དེ་དག་ཐམས་ཅད་བཅིངས་པར་འགྱུར་རོ། །གང་ལ་ལ་ཞིག་ཚུལ་འདི་བཞིན་དུ་གསང་སྔགས་འདི་བརྗོད་ཅིང་འཛིན་ན། སྲོག་ཆགས་ཐམས་ཅད་ལ་སྙིང་རྗེ་བསྐྱེད་པར་བྱའོ། །དེའི་ཚེ་ཁོ་བོས་ཀྱང་ལྷ་དང་། ཀླུའི་རྒྱལ་པོ་ཐམས་ཅད་དང་། གསང་བའི་བདག་པོ་
ལག་ན་རྡོ་རྗེ་ལ་རྟག་ཏུ་དེའི་ཕྱི་བཞིན་འབྲངས་ལ་བསྲུང་བ་བགྱིས་ཏེ། ཕྲད་པར་གྱིས་ཤིག་ཅེས་བསྒོ་བར་བྱའོ། །མིག་གི་འབྲས་བུ་དང་། རང་གི་སྲོག་ཇི་ལྟ་བ་བཞིན་དུ་སྲུང་བར་འགྱུར་རོ། །ཚིགས་སུ་བཅད་པ་དག་ཀྱང་སྨྲས་པ། གང་ཞིག་དད་པས་སྙིང་པོ་འདི། །ཁ་ཡིས་རྟག་ཏུ་
འཛིན་པ་ཡི། །སྒྲུབ་པ་པོ་ལ་དུས་ཀུན་ཏུ། །སོམས་ལ་སྲུང་བགྱིས་ཤིག་ཅེས། །ཁུང་བུ་མིག་དང་དེ་བཞིན་དུ། །སྟོབས་པོ་ཆེ་དང་ལུ་གུ་རྒྱུད། །ལྷ་ཡི་དམ་པ་ལྕགས་ཀྱུ་དང་། །ལག་ན་རྡོ་རྗེ་བསྒོ་བར་བྱ། །ཁོ་བོའི་སྙིང་པོ་མཆོག་འདི་ནི། །དད་པས་རྟག་ཏུ་འཛིན་པ་ཡི། །
སྒྲུབ་པ་སྡིག་དང་བྲལ་བ་ལ། །ཁྱེད་ཅག་སྲུངས་ཤིག་སྐྱོངས་ཤིག་ཅེས། །དབང་ཕྱུག་ཆེ་དང་ཁྱབ་འཇུག་དང་། །ནོར་གྱི་བུ་དང་དྲག་པོ་དང་། །ཀུམ་བི་ར་དང་སེར་སྐྱ་དང་། །དེ་དག་རྣམས་ལ་ཁོ་བོ་བསྒོ། །གང་ཞིག་རྟག་ཏུ་དད་པ་ཡིས། །གསང་སྔགས་འདི་བརྗོད་འཛིན་བྱེད་པའི། །
རིག་སྔགས་འཆང་ལ་མི་གཡེལ་བར། །སོམས་ཤིག་སྲུང་བ་གྱིས་ཤིག་ཅེས། །ལྔས་རྩེན་དང་ནི་བདེ་མཆོག་དང་། །ཙིན་ད་ལ་དང་སུ་མ་ལ། །བིང་ག་ལ་དང་གཤིན་རྗེ་ལ། །ཁོ་བོས་ལུང་གིས་བསྒོ་བར་བྱ། །གང་ཞིག་རྟག་ཏུ་དད་པ་ཡི། །ཁོ་བོའི་གསང་སྔགས་འདི་
འཛིན་ཅིང་། །རྟག་བརྗོད་རིག་སྔགས་འཆང་བ་ལ། །བསམ་པ་གྱིས་ཤིག་སྲུང་བ་གྱིས། །སྒྲུབ་པ་པོ་ལ་སྲུངས་ཤིག་ཅེས། །བདེན་པ་པོ་དང་སོ་བརྩེགས་དང་། །མི་མཇེད་བདག་དང་ལྷ་མོ་དཔལ། །དེ་དག་ཀུན་ལ་ཁོ་བོས་བསྒོ། །གང་ཞིག་དད་པས་ཁོ་བོ་ཡི། །

གསང་སྔགས་འདི་ནི་རྟག་འཛིན་ཅིང་། །རྗོད་བྱེད་རིག་སྔགས་འཆང་བ་ལ། །སོམས་ཤིག་སྲུང་བ་གྱིས་ཤིག་ཅེས། །ལྷ་མོ་ཆེན་མོ་དབྱངས་ཅན་དང་། །ལྷ་ཡི་དབང་པོ་བརྒྱ་བྱིན་དང་། །སུམ་ཅུ་གསུམ་དབང་རོ་ལངས་དང་། །མང་པོ་འཛིན་ལ་ཁོ་བོས་བསྒོ། །ཁོ་བོའི་རིག་སྔགས་འདི་
འཆང་ལ། །སོམས་ཤིག་སྲུང་བ་གྱིས་ཤིག་ཅེས། །གནས་ལྔ་དག་ན་གནས་པ་ཡི། །གཙང་མའི་གནས་ཀྱི་ལྷ་རྣམས་དང་། །ཡང་དག་ཤེས་དང་ནོར་བུ་བཟང་། །དེ་དག་རྣམས་ལ་ཁོ་བོས་བསྒོ། །གང་ཞིག་དད་པས་ཁོ་བོ་ཡི། །གསང་སྔགས་འདི་ནི་རྟག་འཛིན་ཅིང་། །
རྗོད་བྱེད་རིག་སྔགས་འཆང་བ་ལ། །སོམས་ཤིག་སྲུང་བ་གྱིས་ཤིག་ཅེས། །རྒྱལ་པོ་རྣམ་ཐོས་བུ་དང་ནི། །འཕྲོག་མ་བུ་དང་བཅས་པ་དང་། །ཡུལ་འཁོར་སྲུང་དང་སྐྱོང་བྱེད་དང་། །མིག་མི་བཟང་དང་འཕགས་སྐྱེས་དང་། །སྐེམ་བྱེད་གཞོན་ནུར་གྱུར་པ་དང་། །དེ་དག་རྣམས་ལ་ཁོ་
བོས་བསྒོ། །གང་ཞིག་རྟག་ཏུ་དད་པ་ཡིས། །རྟག་ཏུ་གསང་སྔགས་འདི་འཛིན་ཅིང་། །རྗོད་བྱེད་རིག་སྔགས་འཆང་བ་ལ། །སོམས་ཤིག་སྲུང་བ་གྱིས་ཤིག་ཅེས། །དགའ་བོ་ཉེ་དགའ་ཀླུ་གཉིས་དང་། །སྟོབས་ཀྱི་ལྷ་དང་རྒྱ་མཚོ་དང་། །དྲང་སྲོང་ཉི་ཤུ་རྩ་བརྒྱད་དང་། །དེ་དག་
རྣམས་ལ་ཁོ་བོས་བསྒོ། །གང་ཞིག་རྟག་ཏུ་དག་པ་ཡིས། །རྟག་ཏུ་གསང་སྔགས་འདི་འཛིན་ཅིང་། །རྗོད་བྱེད་རིག་སྔགས་འཆང་བ་ལ། །སོམས་ཤིག་སྲུང་བ་གྱིས་ཤིག་ཅེས། །ཀླུ་ཡི་རྒྱལ་པོ་ཨུཏྤལ་དང་། །འཕྲུལ་ཆེན་ལྟོ་འཕྱེ་ཆེ་རྣམས་དང་། །ལྷ་མིན་མི་ཅི་དྲི་ཟ་དང་། །
དེ་དག་རྣམས་ལ་ཁོ་བོས་བསྒོ། །གང་ཞིག་རྟག་ཏུ་དད་པ་ཡིས། །རྟག་ཏུ་གསང་སྔགས་འདི་འཛིན་ཅིང་། །རྗོད་བྱེད་རིག་སྔགས་འཆང་བ་ལ། །སོམས་ཤིག་སྲུང་བ་གྱིས་ཤིག་ཅེས། །ཆུ་དང་མེ་ཡི་ལྷ་རྣམས་དང་། །ཤ་ཟ་རྣམས་དང་གློག་དང་སྤྲིན། །གྲུལ་བུམ་དག་དང་
མཁའ་ལྡིང་དང་། །དེ་དག་ཀུན་ལ་ཁོ་བོས་བསྒོ། །བདེ་བར་བྱེད་པའི་ལྷ་གཡོག་འཁོར་ལྔ་བརྒྱ་དང་ལྡན་པ་ཁྱེད་ཐམས་ཅད་དང་། དེ་བཞིན་དུ་ལྷ་དང་། །ཀླུའི་རྒྱལ་པོ་རྣམས་དང་། ལྷ་དང་། ལྷའི་བུ་མོ་ལ་སོགས་པ་དང་། གནོད་སྦྱིན་སྟོབས་དང་ལྡན་པ་རྣམས་ཀྱང་གང་སྙིང་རྗེ་ཆེན་

པོའི་རང་བཞིན་གྱི་སྙིང་པོ་འདི་བཟླས་བརྗོད་བྱེད་པ་དེའི་ཕྱི་བཞིན་དུ་འབྲོངས་ཤིག །གནོད་པ་སོལ་ཅིག །སྲུང་བ་གྱིས་ཤིག །གལ་ཏེ་སྔགས་པ་མི་ཞིག་རི་དང་། ནགས་ཚལ་སྟོང་པ་ཐིབས་པོ་དག་ན། གཅིག་པུར་གྲོགས་མེད་པར་ཉལ་ན་ཡང་། བདེ་
བར་བྱེད་པའི་ལྷ་དེ་དག་རང་གི་འཁོར་དང་བཅས་ཏེ་སྲུང་བར་བྱེད་དོ། །ཡམས་ཀྱི་ནད་རྣམས་དང་། བགེགས་རྣམས་ཀྱང་ཞི་བར་བྱེད་དོ། །གལ་ཏེ་རི་ཁྲོད་དུ་ལམ་སྟོར་བར་གྱུར་ན། གསང་སྔགས་འདི་བཟླས་བརྗོད་བྱས་པ་དང་། བདེ་བར་བྱེད་པའི་ལྷ་དང་། ཀླུའི་རྒྱལ་པོ་དེ་དག་མི་
གཟུགས་ཀྱིས་དེ་ལ་ལམ་སྟོན་པར་བྱེད་དོ། །གལ་ཏེ་རི་དང་། ནགས་དང་། དགོན་པར་སོན་ལ་ཆུ་དང་མེ་མེད་པར་གྱུར་ན། ཀླུའི་རྒྱལ་པོ་རྣམས་ཀྱིས་དེ་ལ་སྲུང་བའི་ཕྱིར་ཆུ་དང་མེ་སྟོན་པར་བྱེད་དོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་
གིས་ཡང་རིག་སྔགས་འཆང་དེ་ལ་ཡམས་ཀྱི་ནད་དང་། གནོད་པ་གཞིག་ཅིང་བསལ་བའི་ཕྱིར། ཞི་བར་བྱེད་པའི་ཚིགས་སུ་བཅད་པ་འདི་དག་སྨྲས་སོ། །གལ་ཏེ་འབྲོག་དང་རི་ཁྲོད་རྣམས་ཞིག་ཏུ། །སྟག་དང་སྤྱང་ཀི་གཅན་གཟན་ཁྲོ་རྣམས་དང་། །སྦྲུལ་དང་རྩངས་པ་དང་
ནི་མཁའ་འགྲོ་མ། །འོང་ཡང་འདི་ཐོས་སྔགས་མཐུས་ལྡོག་པར་འགྱུར། །རྒྱ་མཚོ་ཆུ་ཀླུང་མཚོ་བྲན་འགྲམ་གནས་ན། །དུག་ལྡན་སྦྲུལ་དང་སྦྲུལ་འཛིན་བྱེད་པ་དང་། །ཆུ་སྲིན་གནོད་སྦྱིན་ཉ་དང་ཀུམ་བི་ར། །འོངས་ནའང་གསང་སྔགས་ཐོས་ན་འཇིགས་པར་འགྱུར། །དམག་
དཔུང་ཆེན་པོའི་དགྲ་དང་འཐབ་པ་དང་། །ནོར་འཕྲོག་ཆོམ་རྐུན་རྣམས་དང་ཕྲད་ན་ཡང་། །དད་པས་རྩེ་གཅིག་སེམས་དང་བྱམས་པ་ཡིས། །གསང་སྔགས་བཟླས་ན་སྡིག་བྱེད་མི་ནུས་ལྡོག །རྒྱལ་པོའི་ཁྲིམས་ཅན་གོ་རར་བཅུག་པ་དང་། །བཙོན་རར་ལྕགས་དང་ཤིང་སྒྲོག་
བཅུག་ན་ཡབ། །དད་པས་གསང་སྔགས་འདི་ནི་བརྗོད་བྱས་ན། །རྒྱལ་པོ་བདག་ཉིད་དེ་ལ་དགའ་བར་འགྱུར། །གལ་ཏེ་དུག་ཅན་ནགས་སམ་ཁྱིམ་གང་ན། །དུག་ཅན་ཟས་ཡོད་དེར་ནི་སོན་གྱུར་ལ། །དད་དང་ལྡན་པས་གསང་སྔགས་མཆོག་བརྗོད་ན། །དུག་རྣམས་

ཐམས་ཅད་གྱུར་ནས་བདུད་རྩིར་འགྱུར། །གལ་ཏེ་བུད་མེད་བུས་ཐོགས་མི་ཕྱིན་ཅིང་། །གཡོན་ཅན་བགེགས་ཀྱིས་ན་བར་བྱེད་ན་ཡང་། །དད་པ་དྲག་པོས་གསང་སྔགས་འདི་བརྗོད་ན། །འབྱུང་པོ་འབྲོས་ཤིང་བདེ་བར་བཙའ་བར་འགྱུར། །འབྱུང་པོ་སྡང་དང་གནོད་སེམས་ཀླུ་རྣམས་
ཀྱིས། །བསད་པའི་ཆེད་དུ་གནོད་པ་བྱས་ན་ཡང་། །དད་པས་གསང་སྔགས་འདི་ནི་བརྗོད་བྱས་ན། །ཚེ་ཡང་འཕེལ་ཞིང་ནད་རྣམས་འབྱང་བར་འགྱུར། །གལ་ཏེ་འབྱུང་པོས་སྐྲངས་ནད་བྱས་པ་དང་། །བས་ལྡགས་ནད་དང་ཤུ་བ་རྣག་ཁྲག་ཅན། །དད་པས་རྟག་ཏུ་གསང་སྔགས་
འདི་བཟླས་ན། །གསང་སྔགས་མཐུ་ཡིས་ཐམས་ཅད་མེད་པར་འགྱུར། །སེམས་ཅན་རབ་ཏུ་སྡང་བས་བསད་པའི་ཕྱིར། །གཡོ་དང་སྒྱུ་ཡི་ལས་རྣམས་བྱེད་ན་ཡང་། །དད་པ་དྲག་པོས་གསང་སྔགས་འདི་བརྗོད་ན། །དེ་དྲུང་སྒྱུ་མའི་མཁན་པོ་འགྲོ་མི་འགྱུར། །དམ་པའི་
ཆོས་ཉམས་སེམས་ཅན་རྙོག་པ་ཅན། །འདོད་ཆགས་བཅིངས་ཤིང་ལོག་པས་རྨོངས་རྣམས་དང་། །ཉིན་མཚན་མི་དྲང་མ་ཞི་རྟོག་ལྡན་ཞིང་། །ཁྱོ་དང་ལྷན་ཅིག་མི་དགའ་བུད་མེད་རྣམས། །གསང་སྔགས་བཟླས་བརྗོད་བྱས་པས་འབྱིན་ནུས་ཏེ། །འདོད་ཆགས་མེ་ཞི་སེམས་
ནི་དྲང་བར་འགྱུར། །གལ་ཏེ་སྙིང་པོ་འདི་ཡི་མཐུ་བརྗོད་ན། །བསྐལ་པ་གཅིག་གི་མཐའ་མིར་ཕྱིན་མ་འགྱུར། །ཚོན་སྐུད་སྣ་ལྔ་པ་ལ་སྙིང་པོ་འདི་ལན་ལྔ་བཟླས་བརྗོད་བྱས་ཏེ། མདུད་པ་ཉི་ཤུ་རྩ་གཅིག་བཟླས་པ་མགུལ་དུ་གདགས་སོ། །སྙིང་པོ་འདི་ནི་སྔོན་གྱི་སངས་རྒྱས་
བཅོམ་ལྡན་འདས་གང་གཱའི་ཀླུང་དགུ་བཅུ་རྩ་དགུའི་བྱེ་མ་སྙེད་ཀྱིས་སེམས་ཅན་རྣམས་ཀྱི་དོན་གྱི་ཕྱིར་གསུངས་པའོ། །གང་དག་ཕ་རོལ་ཏུ་ཕྱིན་པ་དྲུག་སྒོམ་པར་བྱེད་ལ་ཡོངས་སུ་རྫོགས་པར་མི་འགྱུར་བ་དེ་དག་ལ། མྱུར་དུ་ཡོངས་སུ་རྫོགས་པར་བྱ་བའི་ཕྱིར་གསུངས་སོ། །གང་དག་
སངས་རྒྱས་ཉིད་དུ་སེམས་མ་བསྐྱེད་པ་དེ་དག་ཀྱང་། བྱང་ཆུབ་ཏུ་སེམས་སྐྱེད་པར་བྱེད་དོ། །གང་ཉན་ཐོས་ཀྱི་འབྲས་བུ་མ་ཐོབ་པ་དེ་དག་ཀྱང་མྱུར་དུ་ཐོབ་པར་བྱེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། ལྷའི་དྲང་སྲོང་གང་དག་བྱང་ཆུབ་ཏུ་སེམས་མ་བསྐྱེད་པ་ཇི་

སྙེད་འཁོད་པ་དེ་དག་ཀྱང་སེམས་སྐྱེད་པར་བྱེད་དོ། །གང་ཐེག་པ་ཆེན་པོའི་ཆོས་ལ་དབང་པོ་རྣམས་དད་པ་མ་རྙེད་པ་དེ་དག་ཀྱང་ཐོབ་པར་བྱེད་དོ། །སྙིང་པོ་འདིའི་མཐུས་ཐེག་པ་ཆེན་པོ་ལ་ཐར་པའི་ས་བོན་གྱི་མྱུ་གུ་འཕེལ་བར་འགྱུར་རོ། །གལ་ཏེ་དགོས་པ་ཞིག་ཡོད་ན་
ཡང་ཁོ་བོའི་སྙིང་རྗེ་དང་། ཐབས་ལ་མཁས་པས་ཐམས་ཅད་འགྲུབ་བོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། མུན་པ་མུན་ནག་གི་སེམས་ཅན་དམྱལ་བ་དག་ན། སེམས་ཅན་གང་དག་གནས་པ་རྣམས་ཀྱང་། གལ་ཏེ་སྙིང་པོ་འདི་ཐོས་ན། སྡུག་བསྔལ་
རྣམས་ལས་ཡོངས་སུ་ཐར་བར་འགྱུར་རོ། །བྱང་ཆུབ་སེམས་དཔའ་གང་དག་ས་དང་པོ་མ་ཐོབ་པ་དེ་དག་ཀྱང་། ས་བཅུ་ནས་སངས་རྒྱས་ཀྱི་བྱང་ཆུབ་ཀྱི་བར་དུ་འཐོབ་པར་འགྱུར་རོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་རྣམས་ཀྱང་རང་ཡོངས་
སུ་རྫོགས་པར་འགྱུར་རོ། །ཉན་ཐོས་ཀྱི་ཐེག་པ་ཅན་གྱི་སེམས་ཅན་གང་དག་གིས་སྙིང་པོ་འདི་ལན་ཅིག་ཐོས་ན། དྲང་པོའི་སེམས་ཀྱི་བསམ་པས་མོས་ཤིང་སྒོམ་པར་འགྱུར་རོ། །དགེ་སྦྱོང་གི་འབྲས་བུ་བཞི་ཡང་ཇི་ལྟར་འདོད་པ་བཞིན་དུ་འཐོབ་བོ། །གལ་ཏེ་དེ་ལྟར་བཟོད་ན། སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་ན་ཡོད་པའི་རི་དང་། རྡོ་དང་རྩིག་པ་དང་རི་རབ་དང་། རི་ཁོར་ཡུག་རྣམས་ཀྱང་གཡོ་ཞིང་རྡུལ་ཕྲ་རབ་བཞིན་དུ་ཕྱེ་མར་འགྱུར་རོ། །རྒྱ་མཚོ་ཆེན་པོ་བཞི་ཡང་ཁོལ་ཞིང་འཐོར་བར་འགྱུར་རོ། །གལ་ཏེ་དེ་དང་དེའི་གམ་ཡོ་ན་སེམས་
ཅན་གང་དག་འཁོད་པ་དེ་དག་ཐམས་ཅད་ཇི་ལྟར་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་འགྱུར་རོ། །གང་གི་ཚེ་འདི་ལ་དམ་པར་གྱུར་པ་དེ་དག་གིས། ཉི་མ་ཉི་ཤུ་རྩ་གཅིག་ཏུ་ཚུལ་ཁྲིམས་དང་ལྡན་པར་བྱས་ལ། སྙིང་པོ་འདི་བཟླས་བརྗོད་བྱས་ན། ཡིད་ལ་བསམས་པ་ཡོངས་སུ་རྫོགས་
པར་འགྱུར་རོ། །ཐོག་མ་མེད་པའི་ཐ་མའི་མཐའི་བར་གྱི་སྡིག་པའི་ལས་གང་ཡིན་པ་དེ་དག་ཐམས་ཅད་འབྱང་བར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་གི་སངས་རྒྱས་དང་། བྱང་ཆུབ་སེམས་དཔའ་དང་། བརྒྱ་བྱིན་དང་། ཚངས་པ་དང་།

འཇིག་རྟེན་སྐྱོང་བ་དང་། ལྷའི་དྲང་སྲོང་དང་། ཀླུའི་རྒྱལ་པོ་ཐམས་ཅད་དབང་དུ་འགྱུར་རོ། །མིའམ་ལྷ་གང་ལ་ལ་ཞིག་གསང་སྔགས་འདི་ཁ་ཏོན་བྱེད་པ་དེ་འབབ་ཆུའམ། རྒྱ་མཚོར་ཁྲུས་བྱས་ན། དེ་ན་སྲོག་ཆགས་གང་དག་འཁོད་པ་ལ་དེས་རེག་པ་དེ་དག་གི་ལས་ཤིན་ཏུ་ལྕི་བ་
ཐམས་ཅད་འབྱང་བར་འགྱུར། ཚེ་ཕྱི་མ་ལ་སངས་རྒྱས་ཀྱི་ཞིང་ཡོངས་སུ་དག་པར་པདྨ་ལས་བརྫུས་ཏེ་སྐྱེ་བར་འགྱུར། མངལ་ནས་སྐྱེ་བ་དང་། དྲོད་གཤེར་ལས་སྐྱེ་བ་དང་། སྒོ་ང་ལས་སྐྱེ་བའི་སྐྱེ་བ་འཛིན་པར་མི་འགྱུར་ན། གང་འདི་འཛིན་པ་དང་། བརྗོད་པ་དང་། ཀློག་པ་ལྟ་ཅི་
སྨོས། འདོན་ཅིང་བརྗོད་པ་ལྟ་ཡང་ཅི་སྨོས། རླུང་གང་གིས་རིག་སྔགས་འཆང་ལ་རེག་པའི་རླུང་དེས་སེམས་ཅན་གང་ལ་ལ་ལ་རེག་པར་གྱུར་པའི་ལས་ལྕི་བ་ཐམས་ཅད་འབྱང་བར་འགྱུར་རོ། །ཡང་དང་ཡང་ངན་སོང་གསུམ་དུ་འགྲོ་བར་མི་འགྱུར་རོ། །རྟག་ཏུ་སངས་རྒྱས་
འབྱུང་བར་སྐྱེ་བར་འགྱུར་རོ། །འདི་ལྟར་ཡང་ཤེས་པར་བྱ་སྟེ། གང་འཛིན་པ་དང་། འཆང་བའི་བསོད་ནམས་ཀྱི་རྣམ་པར་སྨིན་པ་ནི། བསམ་གྱིས་མི་ཁྱབ་ཅིང་དཔག་ཏུ་མེད་དོ། །གང་ལ་ལ་སྙིང་པོ་འདི་བརྗོད་པ་དེའི་ཁ་ནས་ཚིག་དགེ་བའམ། མི་དགེ་བ་ཅི་བྱུང་ཡང་
རུང་སྟེ། དེ་ཐམས་ཅད་བདུད་དང་གཞན་མུ་སྟེགས་ཅན་དང་། སྲུང་བའི་ལྷ་དང་ཀླུ་དང་། འབྱུང་པོ་རྣམས་ཀྱིས་ཡོངས་སུ་དག་པའི་ཆོས་སུ་ཐོས་པར་འགྱུར་རོ། །སུ་སྙིང་པོ་འདི་ཁ་ཏོན་བྱེད་པ་དེ་ལ་ཐམས་ཅད་སངས་རྒྱས་སུ་འདུ་ཤེས་བསྐྱེད་ཅིང་གུས་པར་འགྱུར་རོ། །
སངས་རྒྱས་བཅོམ་ལྡན་འདས་གང་གཱའི་ཀླུང་དགུ་བཅུ་རྩ་དགུའི་བྱེ་མ་སྙེད་ཀྱི་རྡུལ་ཕྲ་རབ་སྙེད་དག་གིས་སྡུག་པར་དགོངས་ཤིང་ཡོངས་སུ་བཟུང་བ་དེ་ནི་སངས་རྒྱས་ཀྱི་སྐུའི་མཛོད་དུ་ཤེས་པར་བྱའོ། །དེ་ནི་སངས་རྒྱས་ཐམས་ཅད་ཀྱི་འོད་ཟེར་གྱི་སྣང་བས་སྣང་བར་འགྱུར་བས། ལུས་
འོད་ཟེར་དང་ལྡན་པར་ཤེས་པར་བྱའོ། །གང་སྙིང་པོ་འདིས་སེམས་ཅན་རྣམས་ཡོངས་སུ་སྐྱོབ་པ་དེ་སྙིང་རྗེའི་མཛོད་དུ་ཤེས་པར་བྱའོ། །གང་གཟུངས་ཀྱི་སྒོ་རྣམས་སྡུད་པ་དེ་ཆོས་ཀྱི་མཛོད་དུ་ཤེས་པར་བྱའོ། །གང་ལ་ཏིང་ངེ་འཛིན་བརྒྱ་སྟོང་མངོན་དུ་སྣང་བ་དེ་བསམ་གཏན་

དང་། སྙོམས་པར་འཇུག་པའི་མཛོད་དུ་ཤེས་པར་བྱའོ། །གང་སྟོང་པ་ཉིད་ཀྱི་ཡེ་ཤེས་ཀྱིས་སེམས་ཅན་རྣམས་ལ་བལྟ་བ་དེ་ནམ་མཁའི་སྙིང་པོའི་མཛོད་དུ་ཤེས་པར་བྱའོ། །གང་ལ་རྟག་ཏུ་ལྷ་དག་དང་ལྷ་རྣམས་ཀྱིས་ཀུན་ཏུ་བསྲུངས་པ་དེ་མི་འཇིགས་པའི་
མཛོད་དུ་ཤེས་པར་བྱའོ། །གང་གི་ཁ་ནས་གཟུངས་ཀྱི་སྒྲ་རྒྱུན་མི་འཆད་པ་དེ་གཏམ་སྣ་ཚོགས་ཀྱི་མཛོད་དུ་ཤེས་བར་བྱའོ། །གང་ཡམས་ཀྱི་ནད་རྣམ་གསུམ་དང་། དུས་ངན་པས་ཆུད་མི་ཟོས་པ་དེ་རྟག་ཏུ་གནས་པའི་མཛོད་དུ་ཤེས་པར་བྱའོ། །གང་བདུད་དད་གཞན་
མུ་སྟེགས་ཅན་གྱིས་བར་དུ་གཅོད་ཅིང་བཟློག་མི་ནུས་པ་དེའི་མིའི་ཤའི་མཛོད་ཇི་ལྟ་བ་བཞིན་མ་ཡིན་པར་ཤེས་པར་བྱའོ། །གང་རྟག་ཏུ་སྙིང་པོ་འདིས་སེམས་ཅན་ཐམས་ཅད་གསོ་བར་བྱེད་པ་དེ་སྨན་གྱི་རྒྱལ་པོའི་མཛོད་དུ་ཤེས་པར་བྱའོ། །གང་སངས་རྒྱས་ཀྱི་ཞིང་དུ་འགྲོ་བ་ལ་འབྱུང་
བ་དེ་ནི་མངོན་པར་ཤེས་པར་བྱ་སྟེ། དེའི་བསོད་ནམས་ཀྱི་བསྔགས་པ་ནི་མཐའ་ཡས་སོ། །གལ་ཏེ་རིགས་ཀྱི་བུ་མིར་གྱུར་པ་ཞིག་ཡུན་རིང་པོར་འཁོར་བའི་སྡུག་བསྔལ་གྱིས་སྐྱོ་ཞིང་བདེ་བ་འདོད་ན། དེས་ཐོག་མར་བས་མཐའ་དབེན་པའི་གནས་བཙལ་བར་བྱ་སྟེ། དེར་འདུག་པར་བྱའོ། །
གཙང་མར་མཚམས་ལེགས་པར་བྱའོ། །གལ་ཏེ་ཆུ་ལ་བཟླས་བརྗོད་བྱས་སམ། ཡང་ན་ཟས་སམ་ཐུག་པའམ། སྨན་ནམ། བདུག་པ་ལ་སོ་སོར་ལན་བརྒྱ་རྩ་བརྒྱད་བཟླས་བརྗོད་བྱས་ཏེ་སྤྱད་ན་ཚེ་རིང་བར་འགྱུར་རོ། །མཐུ་ཡོད་པར་འགྱུར་རོ། །མཚམས་གཅོད་ནུས་པར་འགྱུར་རོ། །རྗེས་
སུ་མཐུན་པའི་ཆོས་ལེན་པའམ། འཛིན་ནུས་པར་འགྱུར་རོ། །ཐམས་ཅད་འགྲུབ་པར་འགྱུར་རོ། །དེ་ལ་མཚམས་བཅད་པའི་ཆོ་ག་ནི་འདི་ཡིན་ཏེ། ཐོག་མར་རལ་གྲི་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་དཀྱིལ་འཁོར་གཅད་པར་བྱའོ། །ཡང་ན་ཆུ་གཙང་མ་ལ་ལན་ཉི་
ཤུ་རྩ་གཅིག་བཟླས་བརྗོད་བྱས་ལ། ཕྱོགས་བཞིར་གཏོར་བར་བྱ་སྟེ། འདི་ནི་མཚམས་སོ། །ཡང་ན་ཡུངས་ཀར་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་ཕྱོགས་བཞིར་གཏོར་ན་མཚམས་བཅད་པར་འགྱུར་རོ། །ཡང་ན་ཇི་ཙམ་འདོད་པ་སེམས་ཀྱིས་བྱིན་གྱིས་བརླབ་པར་

བྱའོ། །ཡང་ན་ཐལ་བ་གཙང་མ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ། མཚམས་བཅད་དོ། །ཡང་ན་ཚོན་སྐུད་སྣ་ལྔ་པ་ལས་བཟླས་བརྗོད་བྱས་ལ་ཕྱོགས་བཞིར་བྲེས་ན། ཐམས་ཅད་དུ་མཚམས་བཅད་པར་འགྱུར་རོ། །ཆོ་ག་འདིས་ལེན་ཅིང་འཛིན་ནུས་པར་གྱུར་ན་བདག་ཉིད་འབྲས་
བུ་ཐོབ་པར་འགྱུར་རོ། །སུས་སྙིང་པོ་འདིའི་མིང་ཐོས་པ་དེའི་བསྐལ་པ་དུ་མའི་སྐྱེ་བ་དང་འཆི་བ་བསགས་པའི་ལས་ལྕི་བ་རྣམས་ཀྱང་བྱང་བར་འགྱུར་ན། སུ་འདི་བརྗོད་ཅིང་འཛིན་པ་ལྟ་ཅི་སྨོས། གང་ཞིག་འདི་བརྗོད་ཅིང་སྨྲ་བར་ནུས་པ་དེ་སྔོན་གྱི་དེ་བཞིན་གཤེགས་པ་དུ་མ་ལ་མཆོད་ཅིང་བསོད་
ནམས་དང་དགེ་བའི་རྩ་བ་བསགས་པ་ཡིན་པར་རིག་པར་བྱའོ། །གལ་ཏེ་ཆོ་ག་འདིས་སེམས་ཅན་གྱི་ཁམས་སྡུག་བསྔལ་ལ་གནས་པ་ཐམས་ཅད་གདོན་པར་བྱེད་ནུས་པར་གྱུར་ན། མི་དེ་ནི་སྙིང་རྗེ་ཆེན་པོ་དང་ལྡན་ཞིང་རིང་པོ་མི་ཐོགས་པར་སངས་རྒྱས་ཀྱི་བྱང་ཆུབ་འཐོབ་པར་རིག་པར་བྱའོ། །
རིག་སྔགས་འཆང་དེས་སེམས་ཅན་ཇི་སྙེད་མཐོང་བ་དང་། སེམས་ཅན་སོ་སོ་ལ་བརྗོད་པ་དང་། དེ་ལ་གང་དག་གིས་ཐོས་པ་ཡང་བྱང་ཆུབ་ཀྱི་རྒྱུར་འགྱུར་རོ། །རིག་སྔགས་འཆང་དེའི་བསོད་ནམས་དང་དགེ་བའི་མཐའ་ནི་བརྗོད་མི་ནུས་པར་དཔག་ཏུ་མེད་པར་འགྱུར་རོ། །གལ་
ཏེ་ལུས་བསྡམས་ཤིང་ཟས་དུས་སུ་ཟ་བར་གནས་ལ་དགེ་ཞིང་དྲང་པོའི་སེམས་ཀྱིས་བརྗོད་པར་ནུས་ན། དེས་དེའི་ཚེ་སེམས་ཅན་གྱི་ཁམས་ཐམས་ཅད་ཀྱི་ཆེད་དུ། སྔོན་གྱི་ལས་རྣམས་བཤགས་པར་བྱའོ། །བདག་ཉིད་ཀྱང་དེ་བཞིན་དུ་བཤགས་པར་བྱའོ། །གལ་ཏེ་དེ་ལྟར་གོམས་
ཤིང་རྒྱུན་མི་འཆད་པར་སྙིང་པོ་འདི་བརྗོད་ན། དེས་ཚེ་འདི་ལ་དགེ་སྦྱོང་གི་འབྲས་བུ་བཞི་ཐོབ་པར་འགྱུར། དབང་པོ་རྣོ་བ་དང་། བློ་དང་ལྡན་པ་དང་། བསམ་གཏན་ལ་བློ་སྐྱེ་བར་འགྱུར། ས་བཅུའི་འབྲས་བུ་ཐོབ་པ་ལ་མི་དཀའ་བར་གྱུར་ན། འཇིག་རྟེན་པའི་བསོད་ནམས་ཀྱི་འབྲས་
བུ་ཆུང་ངུ་འཐོབ་པ་ལྟ་ཅི་སྨོས། །ཅི་དང་ཅི་འདོད་པ་རྣམས་དེ་ལ་ཡོངས་སུ་རྫོགས་པར་མི་འགྱུར་བ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་སྙིང་རྗེ་ཆེན་པོ་དང་། སྨོན་ལམ་ཆེན་པོ་ཟབ་ཅིང་རྒྱ་ཆེ་བའི་སྟོབས་ཀྱིས་སོ། །

དེ་ནས་བཅོམ་ལྡན་འདས་ཀྱིས་སྙིང་པོ་འདིའི་མཐུ་སྟོབས་རྒྱ་ཆེན་པོ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཡུལ་གང་དང་གང་དུ་ཡམས་ཀྱི་ནད་བྱུང་ལ། ཡུལ་དེར་གལ་ཏེ་རྒྱལ་པོས་ཆོས་ཀྱིས་ཡུལ་སྲུང་ཞིང་རྒྱ་ཆེ་བ་དང་། གཙང་མར་བྱ་ན་སེམས་ཅན་
རྣམས་སྟམས་ལས་མི་གཅོད་དོ། །ཉེས་པར་བྱུང་བ་རྣམས་ལ་བཟོད་པར་བྱའོ། །རྒྱལ་པོ་དེས་ལུས་དང་སེམས་ཀྱི་བརྩོན་འགྲུས་དང་ལྡན་པར་བྱས་ལ། ཞག་བདུན་སྙིང་རྗེ་ཆེན་པོའི་རང་བཞིན་གྱི་སྙིང་པོ་འདི་བཟླས་བརྗོད་བྱས་ན། ཡུལ་དེར་ཡམས་ཀྱི་ནད་ཅི་བྱུང་བ་ཐམས་ཅད་ཞི་བར་འགྱུར་
རོ། །ལོ་ཏོག་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །སེམས་ཅན་ཐམས་ཅད་བདེ་བར་འགྱུར་རོ། །གལ་ཏེ་ས་རིས་སོ་སོར་དག་རྒྱུན་དུ་འོང་ཞིང་ཡུལ་དུ་གནས་པའི་སེམས་ཅན་རྣམས་ལ་གནོད་པ་བྱེད་པ་དང་། མི་ཡོངས་མི་དགའ་བར་གྱུར་པ་དང་། དེར་ནད་བྱུང་བ་དང་།
ཆུ་དུས་སུ་མི་འབབ་པ་དང་། དེར་ཟླ་བ་དང་ཉི་མ་ལམ་དྲང་པོར་མི་འགྲོ་བ་དང་། གལ་ཏེ་སྡིག་པའི་ལས་དེ་སྙེད་བྱུང་ན། རྒྱལ་པོ་དེས་སྤྱན་རས་གཟིགས་དབང་ཕྱུག་ལག་པ་སྟོང་དང་། མིག་སྟོང་དང་ལྡན་པའི་གཟུགས་བྱས་ལ། གང་དུ་ཡམས་ཀྱི་ནད་བྱུང་བ་དེ་ལོགས་སུ་བཞིན་བསྟན་ཏེ་
བཞག་གོ། །ཤིན་ཏུ་དད་པས་བདུག་པ་དང་། མེ་ཏོག་དང་། གདུགས་དང་། རྒྱལ་མཚན་དང་། ལྷའི་བ་དན་སྣ་ཚོགས་དང་། ཞལ་ཟས་རོ་བརྒྱ་པས་མཆོད་པར་བྱའོ། །དེ་ནས་རྒྱལ་པོ་དེས་སྙིང་པོ་འདི་བརྗོད་པའི་ཕྱིར། ཉིན་ཞག་བདུན་དུ་བརྩོན་འགྲུས་བརྟན་པོར་གནས་པར་
བྱས་ན། ས་རིས་སོ་སོར་དགྲ་ཐམས་ཅད་དེ་ལ་ཕྱག་འཚལ་བར་འགྱུར། །རང་རང་གི་ཡུལ་ལ་དགའ་བར་འགྱུར། སེམས་མཐུན་པར་འགྱུར། ཕན་ཚུན་གྲོགས་སུ་འགྱུར། མི་ཡོངས་དང་རྒྱལ་བུ་ཐམས་ཅད་ཀྱང་བྱས་པ་གཟོ་ཞིང་། ལེགས་པར་བྱེད་པར་འགྱུར་རོ། །རྒྱལ་
པོའི་བཙུན་མོའི་འཁོར་རྣམས་ཀྱང་དེ་ལ་དགའ་བ་བསྐྱེད་པར་འགྱུར་རོ། །ལྷ་དང་ཀླུ་རྣམས་ཀྱང་ཡུལ་སྲུང་བར་བྱེད་དོ། །ཆར་ཡང་དུས་སུ་འབབ་པར་འགྱུར་རོ། །འབྲས་བུ་དང་། ལོ་ཏོག་རྣམས་ཀྱང་མང་ཞིང་གྲུབ་པར་འགྱུར་རོ། །ཡུལ་ན་གནས་པ་རྣམས་ཀྱང་བདེ་བ་དང་། ཡིད་

བདེ་བ་སྐྱེ་བར་འགྱུར་རོ། །གལ་ཏེ་ཁྱིམ་གཅིག་ཏུ་ནད་དང་། གནོད་པ་སྣ་ཚོགས་བྱུང་ངམ། བདུད་དང་འབྱུང་པོ་གཡོན་ཅན་གནས་པས་འཁྲུགས་ཤིང་སྨྲའམ། སྐུར་པ་འདེབས་སམ། གནོད་པ་དག་བྱུང་ངམ། ཕྱི་ནང་གི་མི་མཐུན་པ་ཆེན་པོའམ། ཆུང་ངུ་དག་བྱུང་ན་དེའི་ཚེ་
སྤྱན་རས་གཟིགས་དབང་ཕྱུག་ལག་པ་སྟོང་དང་། མིག་སྟོང་དང་ལྡན་པ་དེའི་མདུན་དུ་མཆོད་པ་བྱས་ལ། ཤིན་ཏུ་དད་པས་སྙིང་པོ་འདི་ལན་སྟོང་བཟླས་བརྗོད་བྱས་ན། གོང་དུ་སྨོས་པའི་གནོད་པ་དེ་དག་ཞི་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་
ཅེས་གསོལ་ཏོ། །བཙུན་པ་བཅོམ་ལྡན་འདས་སྙིང་པོ་འདིའི་མིང་ཅི་ཞེས་བགྱི། ཇི་ལྟར་བླང་བར་བགྱི། ཇི་ལྟར་གཟུང་བར་བགྱི། ཀུན་དགའ་བོ་སྙིང་པོ་འདིའི་མིང་ནི་མང་དུ་ཡོད་དེ། གཅིག་ནི་རྒྱ་ཆེར་དྲི་མ་མེད་པ་ཡོངས་སུ་རྫོགས་པ་ཞེས་བྱའོ། །སྙིང་རྗེ་ཆེན་པོ་ཐོགས་པ་མེད་པ་ཞེས་
ཀྱང་བྱའོ། །སྡུག་བསྔལ་ལས་ཡོངས་སུ་སྐྱོབ་པ་ཞེས་ཀྱང་བྱའོ། །ཚེ་འཕེལ་བར་བྱེད་པ་ཞེས་ཀྱང་བྱའོ། །ངན་འགྲོའི་ལམ་རྣམ་པར་འཇིག་པ་ཞེས་ཀྱང་བྱའོ། །ལས་ཀྱི་སྒྲིབ་པ་འཇོམས་པ་ཞེས་ཀྱང་བྱའོ། །བསམ་པ་ཡོངས་སུ་རྫོགས་པར་བྱེད་པ་ཞེས་ཀྱང་བྱའོ། །སེམས་
ཀྱི་རྗེས་སུ་མཐུན་པར་དབང་བ་ཞེས་ཀྱང་བྱའོ། །ས་གོང་མར་མྱུར་དུ་ངེས་པར་རྟོགས་པར་བྱེད་པ་ཞེས་ཀྱང་བྱ་སྟེ། ཀུན་དགའ་བོ་དེ་ལྟར་ཟུང་ཤིག །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་སྙིང་པོ་དྲང་
པོ་འདི་སྟོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདིའི་མིང་ཅི་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱའོ། །མདོ་འཛིན་པ་ཞེས་ཀྱང་བྱའོ། །འོད་ཟེར་དང་མིག་དང་། ལག་
པ་སྟོང་ཡོད་པ་ཞེས་ཀྱང་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དེའི་རྫུ་འཕྲུལ་གྱི་མཐུ་ནི་དཔག་ཏུ་མེད་ཅིང་བསམ་གྱིས་མི་ཁྱབ་བོ། །འདི་ནི་འདས་པའི་བསྐལ་པ་དཔག་ཏུ་མེད་པའི་སྔ་ལོགས་སུ་བྱང་ཆུབ་མངོན་པར་རྫོགས་པར་སངས་རྒྱས་ཏེ།

ཆོས་སྣང་བའི་སངས་རྒྱས་བཅོམ་ལྡན་འདས་ཞེས་བྱའོ། །དེ་ནི་སྙིང་རྗེ་ཆེན་པོ་དང་། སྨོན་ལམ་གྱི་དབང་གིས་སེམས་ཅན་ལ་ཕན་པ་དང་། བདེ་བའི་ཕྱིར་འདིར་བྱང་ཆུབ་སེམས་དཔའི་གཟུགས་སུ་སྣང་ངོ་། །བྱང་ཆུབ་སེམས་དཔའ་རྣམས་དང་། མི་མཇེད་ཀྱི་བདག་པོ་
ཚངས་པ་དང་། ལྷའི་དབང་པོ་བརྒྱ་བྱིན་དང་། ཀླུའི་འཁོར་དང་ཁྱེད་ཐམས་ཅད་ཀྱིས་དེ་ལ་མཆོད་པ་གྱིས་ཤིག །དེ་ལ་བརྙས་པར་མ་བྱེད་ཅིག །ལྷ་དང་མི་ཐམས་ཅད་ཀྱིས་རྟག་ཏུ་མཆོད་པ་གྱིས་ཤིག །མིང་ཡང་བརྗོད་ཅིག་དང་། དགེ་བའི་རྩ་བ་སྐྱེ་ཞིང་སྡིག་པ་དུ་མ་ཡང་
འབྱང་བར་འགྱུར་རོ། །ལུས་ཞིག་སྟེ་ཤི་བའི་འོག་ཏུ་དེ་བཞིན་གཤེགས་པ་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བ་འཛིན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །སུ་ནོར་བུ་དང་།
འབྲས་བུ་དང་། རིན་པོ་ཆེ་དང་ཡོ་བྱད་འདོད་པ་དེས། ཡིད་བཞིན་གྱི་ནོར་བུ་རིན་པོ་ཆེ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ནད་སྣ་ཚོགས་ཀྱིས་བཏབ་སྟེ། ནད་མེད་པར་འདོད་པ་དེས་དོན་ཡོད་པའི་ཞགས་པ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་
ལྟོ་ན་བ་དེས་རིན་པོ་ཆེའི་ལྷུང་བཟེད་ཐོགས་པའི་ལག་པ་ལ་བལྟས་ཏེ་བསམ་པར་བྱའོ། །སུ་འབྱུང་པོ་རྣམས་དང་བགེགས་བྱེད་པའི་ལྷ་ལ་སོགས་པ་གདུལ་བར་འདོད་པ་དེས། རིན་པོ་ཆེའི་རལ་གྲི་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་འདོད་པའི་དབང་ཕྱུག་བདུད་འདུལ་
བར་འདོད་པ་དེས། རྡོ་རྗེ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་དགྲ་ཚར་གཅོད་པར་འདོད་པ་དེས། རྡོ་རྗེ་ཅན་གྱི་གཏུན་ཤིང་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཐམས་ཅད་དུ་འཇིགས་པར་གྱུར་ཏེ། བདེ་བ་མ་ཐོབ་པ་དེས་མི་འཇིགས་པ་སྦྱིན་པའི་
ལག་པ་ལ་བལྟ་བར་བྱའོ། །སུ་མིག་ན་ཞིང་མཐོང་བ་ཉམས་པ་དེས་ནོར་བུ་རིན་པོ་ཆེ་མེ་ཤེལ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཚ་བའི་ནད་ཀྱིས་བཏབ་པ་དང་། དུག་འཐུངས་པ་དེས་ནོར་བུ་རིན་པོ་ཆེ་ཆུ་ཤེལ་ཐོགས་པའི་ལག་པ་ལ་བལྟ་བར་བྱའོ། །སུ་བདག་

པོ་དང་། རྙེད་པ་དང་། གོ་འཕང་འདོད་པ་དེས། རིན་པོ་ཆེའི་གཞུ་ཐོགས་པའི་ལག་པ་ལ་བསམ་པར་བྱའོ། །སུ་གྲོགས་པོ་སྡུག་པ་མྱུར་དུ་ཕྲད་པར་འདོད་པ་དེས། རིན་པོ་ཆེའི་མདའ་ཐོགས་པའི་ལག་པ་ལ་དམིགས་པར་བྱའོ། །སུ་ལུས་ལ་ནད་སྣ་ཚོགས་ཀྱིས་བཏབ་པ་དེས། མེ་ཏོག་
གི་སྙེ་མ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ལུས་ལ་ལས་ཀྱི་སྒྲིབ་པའི་སྡིག་པ་རྣམས་ཟད་པར་འདོད་པ་དེས། རྔ་ཡབ་དཀར་པོ་ཐོགས་པའི་ལག་པ་ལ་བལྟ་བར་བྱའོ། །སུ་ཉེ་དུ་དང་། གཉེན་འདབ་དང་། བུ་དང་། ཆུང་མ་རྣམས་དང་། སེམས་མཐུན་པར་འདོད་
པ་དེས། རིལ་བ་བྷྲྀང་གར་ཐོགས་པའི་ལག་པ་ལ་བལྟ་བར་བྱའོ། །སུ་སྟག་དང་། སྤྱང་ཀི་དང་། གཅན་གཟན་མ་རུངས་པ་སྤོང་བར་འདོད་པ་དེས། ཕུབ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཕྱོགས་ཐམས་ཅད་དུ་དབང་ཕྱུག་རྣམས་ཀྱིས་གླགས་ལྟ་བ་ཡོངས་སུ་སྤོང་
བར་འདོད་པ་དེས། དགྲ་སྟ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཁྱེའུ་དང་། བུ་མོ་དང་། བསྐོལ་བར་འདོད་པ་དེས། སོར་མོ་ལ་རི་ཐོགས་པའི་ཕྱག་རྒྱའི་ལག་པ་ལ་བལྟས་ཏེ་འདུག་པར་བྱའོ། །སུ་བསོད་ནམས་དང་དགེ་བའི་ཚོགས་བྱེད་མི་ནུས་པ་དེས། པདྨ་
དཀར་པོ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འདོད་པ་དེས། པདྨ་སྔོན་པོ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཡེ་ཤེས་ཆེན་པོ་ཐོབ་པར་འདོད་པ་དེས་རིན་པོ་ཆེའི་མེ་ལོང་ཐོགས་པའི་ལག་པ་ལ་
བལྟས་ཏེ་འདུག་པར་བྱའོ། །སུ་ཕྱོགས་བཅུའི་སངས་རྒྱས་མངོན་སུམ་དུ་མཐོང་བར་འདོད་པ་དེས། པདྨ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་སའི་འོག་གི་གཏེར་རྣམས་ཐོབ་པར་འདོད་པ་དེས་རིན་པོ་ཆེ་ཟ་མ་ཏོག་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །
སུ་དྲང་སྲོང་གི་ལམ་ཚོལ་བར་འདོད་པ་དེས། ཚོན་སྣ་ལྔའི་སྤྲིན་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཚངས་རིས་ཀྱི་ལྷའི་ནང་དུ་སྐྱེ་བར་འདོད་པ་དེས། རིལ་བ་སྤྱི་བླུགས་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ལྷའི་ནང་དུ་སྐྱེ་བར་འདོད་པ་དེས།

མེའི་མདོག་ལྟ་བུའི་པདྨ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཡུལ་གཞན་གྱི་དགྲ་ཕྱིར་ཕྱོགས་པར་འདོད་པ་དེས། རིན་པོ་ཆེ་མདུང་རྩེ་གསུམ་པ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ལྷ་དག་དང་། ལྷ་དང་། ཡོངས་སུ་སྐྱོང་བ་ཐམས་ཅད་
དགུག་པར་འདོད་པ་དེས། དུང་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ལྷ་རྣམས་དང་། འབྱུང་པོ་རྣམས་ལ་བསྒོ་བ་བྱེད་པར་འདོད་པ་དེས། ཁྲིའི་ཟུར་ཤིང་ལྟ་བུ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ཀྱིས་
མྱུར་དུ་ལུང་བསྟན་པར་འདོད་པ་དེས། བགྲང་བའི་ནོར་བུ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་སྐད་སྙན་ཅིང་ཚངས་པའི་སྒྲ་ལྟ་བུ་འདོད་པ་དེས། རིན་པོ་ཆེའི་དྲིལ་བུ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་དགོས་པ་ཐམས་ཅད་དག་པར་འདོད་པ་དང་། ལྕེ་བདེ་
བ་དང་། མཁས་པར་འདོད་པ་དེས། ཕྱག་རྒྱ་རིན་པོ་ཆེ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ལྷ་རྣམས་དང་། ཀླུ་རྣམས་དང་། རྒྱལ་པོ་རྣམས་ཀྱིས་ཡོངས་སུ་སྲུང་བར་འདོད་པ་དེས། ལྕགས་ཀྱུ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་སེམས་ཅན་ཐམས་ཅད་
ལ་བྱམས་པ་དང་། སྙིང་རྗེས་ཁྱབ་པར་འདོད་པ་དེས། འཁར་གསིལ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་སེམས་ཅན་ཐམས་ཅད་ཀྱིས་བསྟི་སྟང་བྱ་བ་དང་། དྲན་པར་འདོད་པ་དེས། ཐལ་མོ་སྦྱར་བའི་ལག་པ་ལ་བལྟས་ཏེ་འདུག་པར་བྱའོ། །སུ་ཚེ་རབས་ཚེ་རབས་སུ་
སངས་རྒྱས་དང་མི་འབྲལ་བར་འདོད་པ་དེས། སངས་རྒྱས་ཀྱི་སྤྲུལ་བ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་སྐྱེ་ཞིང་སྐྱེ་བ་ན་སངས་རྒྱས་རྒྱལ་པོའི་གནས་དང་། ཁང་བཟངས་སུ་སྐྱེ་ཞིང་མའི་མངལ་དུ་མི་སྐྱེ་བར་འདོད་པ་དེས། སྤྲུལ་པའི་གཞལ་མེད་ཁང་ཐོགས་པའི་ལག་པ་
ལ་བལྟས་ཏེ་འདུག་པར་བྱའོ། །སུ་མང་དུ་ཉན་པ་དང་། མང་དུ་སློབ་པར་འདོད་པ་དེས། གླེགས་བམ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །སུ་ཚེ་འདི་ནས་བཟུང་སྟེ། སངས་རྒྱས་ཉིད་ཀྱི་བར་དུ་ཡིད་མི་ལྡོག་པར་འདོད་པ་དེས། འཁོར་ལོ་ཐོགས་པའི་ལག་པ་ལ་བལྟས་ཏེ་

འདུག་པར་བྱའོ། །སུ་མི་འཇིགས་པ་ལ་སོགས་པ་སྦྱིན་པ་རྣམ་པ་བཞིས་འགྲོ་བ་ཚིམ་པར་འདོད་པས་མཆོག་སྦྱིན་པའི་ཕྱག་ལ་བལྟས་ཏེ་འདུག་པར་བྱའོ། །སུ་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་མྱུར་དུ་བྱོན་ཏེ། ཕྱག་གིས་མགོ་ལ་ཉུག་ཅིང་ལུང་སྟོན་པར་འདོད་པ་དེས། མགོ་
ལ་སངས་རྒྱས་སྤྲུལ་པ་བཞུགས་པ་ལ་བལྟས་ཏེ་འདུག་པར་བྱའོ། །སུ་འབྲུ་དང་། འབྲས་བུ་ལ་སོགས་པ་བཏབ་ཅིང་བསྐྱེད་པ་རྣམས་ཕུན་སུམ་ཚོགས་པར་འགྱུར་བར་འདོད་པ་དེས། དགུན་གྱི་སྙེ་མ་ཐོགས་པའི་ལག་པ་ལ་བལྟས་ཏེ་འདུག་པར་བྱའོ། །དེ་ལ་སོགས་པ་འདོད་པའི་དངོས་
པོ་རྣམས་རྣམ་པ་སྟོང་དུ་རིག་པར་བྱ་སྟེ། མདོ་ཙམ་ཞིག་བསྟན་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་སྙིང་པོ་འདི་ཅི་ནམ་འཛམ་བུའི་གླིང་འདིར་རྒྱུན་མི་འཆད་པར་འགྱུར་བར་དགེ་བའི་སེམས་ཀྱིས་ཟུང་
ཤིག་ལོང་ཤིག་རྒྱས་པར་སྟོན་ཅིག །དེ་ལྟར་ན་སྙིང་པོ་འདི་དོན་ཆེན་པོ་བྱེད་པ་ཡིན་ནོ། །ཁམས་གསུམ་ན་སེམས་ཅན་ཇི་སྙེད་འཁོད་པའི་ལུས་ལ་ནད་གང་དག་ཡོད་པ་དེ་གལ་ཏེ་གསང་སྔགས་འདིས་གསོ་བར་བྱེད་ན། ནད་མེད་པར་མི་འགྱུར་བ་དེ་གང་ཡང་མེད་དོ། །སྙིང་པོ་འདིས་
ཤིང་སྐམ་པོ་ལ་བཟླས་བརྗོད་བྱས་ན། དེ་ལ་ཡལ་ག་དང་། མེ་ཏོག་གི་སྙེ་མ་དང་། ལོ་མ་དང་། འབྲས་བུ་རྣམས་འབྱུང་བར་འགྱུར་ན། སེམས་ཡོད་པའི་སེམས་ཅན་བདེ་བར་འགྱུར་བ་ལྟ་ཅི་སྨོས་ཏེ། འདི་ལ་ཐེ་ཚོམ་ཟ་བར་མི་བྱའོ། །ཀུན་དགའ་བོ་སྙིང་པོ་འདིའི་མཐུ་སྟོབས་ནི་
བརྟག་པར་མི་ནུས་ཤིང་བསམ་གྱིས་མི་ཁྱབ་སྟེ། དེ་བས་ན་ཡོན་ཏན་རྣམས་ཀྱི་ཕ་རོལ་ཏུ་ཕྱིན་ཏོ། །སྔོན་གྱི་དུས་དག་ན་དགེ་བའི་རྩ་བ་མ་སྐྱེས་པས་ནི་མིང་ཡང་མི་ཐོས་ན་མཐོང་བ་ལྟ་ཅི་སྨོས། ཁྱོད་ལ་སོགས་པའི་འཁོར་ཆེན་པོ་འདི་དང་། ལྷ་དང་། ཀླུ་དང་། མི་རྣམས་ཀྱི་སྙིང་པོ་
འདི་ལ་རྗེས་སུ་ཡི་རང་བར་བྱའོ། །གང་གིས་ཐོས་ལ་སྤོང་བ་དེ་ནི། གང་གཱའི་ཀླུང་དགུ་བཅུ་རྩ་དགུའི་བྱེ་མའི་རྡུལ་ཕྲ་རབ་སྙེད་ཀྱི་སངས་རྒྱས་བཅོམ་ལྡན་འདས་རྣམས་སྤོང་བར་འགྱུར་རོ། །སུ་ཞིག་སྙིང་པོ་འདི་ལ་ཐེ་ཚོམ་བསྐྱེད་ཅིང་ཡིད་མི་ཆེས་པའི་མི་དེ་ནི། ཡུན་རིང་པོ་ནས་

རྙེད་པ་ལས་རབ་ཏུ་ཉམས་ནས་བསྐལ་པ་ཆེན་པོ་བརྒྱད་སྟོང་དུ་ངན་འགྲོ་རྣམས་སུ་འཁྱམས་པར་འགྱུར་བ་དང་། མངོན་པར་འབྱུང་བར་མི་འཐོབ་པ་དང་། རྟག་ཏུ་སངས་རྒྱས་མི་མཐོང་བ་དང་། ཆོས་མི་མཐོང་བ་དང་། ཆོས་མི་ཐོས་པ་དང་། དགེ་སློང་གི་དགེ་
འདུན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མི་མཐོང་བར་ཤེས་པར་བྱའོ། །དེ་ནས་ལག་ན་རྡོ་རྗེ་ལ་སོགས་པ་