Kinh tạng Tây Tạng (Kangyur Đại Học) — 093_རྒྱུད་འབུམ།_ཙ

དང་ཅི་ཙེ་མོན་སྲན་ལ། །གསང་སྔགས་བཟླས་པ་རབ་བྱ་སྟེ། །པདྨ་ཀ་ཡི་ཤིང་ལ་བསྲེག །ནུས་པ་མཆོག་ནི་ཐོབ་པར་འགྱུར། །ཐམས་ཅད་དབང་དུ་འདུ་བར་འགྱུར། །གྲོ་དང་སོ་བ་འབྲས་དང་ནི། །བྲ་བོ་མོན་
སྲན་ཏིལ་ནག་པོ། །གསང་སྔགས་རབ་ཏུ་བཟླས་བྱ་སྟེ། །ཁ་ཏི་ར་ཡི་ཤིང་ལ་བསྲེག །ནུས་དང་ལྡན་དེ་ལས་རྣམས་ནི། །མྱུར་བ་ཉིད་དུ་འགྲུབ་པར་འགྱུར། །པྲ་ཧ་ཁ་ཚའི་ཤིང་དག་ལ། །ལོ་མ་འབྲས་བུར་བཅས་པ་དང་། །རྡོ་རྗེའི་ཤིང་ལ་སྔགས་བཟླས་ནས། །མྱ་ངན་

འཚང་གི་ཤིང་ལ་བསྲེག །ནུས་པ་ཐོབ་ནས་མྱུར་དུ་ནི། །མི་རྣམས་ཐམས་ཅད་དབང་དུ་སྡུད། །ལྡོང་རོས་པདྨའི་རྩ་བ་དང་། །མུ་ལ་པ་ཏྲའི་ཤིང་དག་ལ། །གསང་སྔགས་རབ་ཏུ་བཟླས་བྱས་ནས། །ཨ་རུ་ར་ཡི་ཤིང་ལ་བསྲེག །འཁོར་ལོའི་འོག་ཏུ་བཅུག་པ་ཡིས། །
རྒྱལ་པོ་དབང་དུ་བྱེད་པར་འགྱུར། །པ་ལ་ཤ་ཡི་ཤིང་དག་དང་། །ཀ་ར་བཱི་རའི་འབྲས་བུ་ལ། །གསང་སྔགས་རབ་ཏུ་བཟླས་བྱས་ཏེ། །འཛམ་བུའི་ཤིང་ལ་རབ་བསྲེགས་ནས། །རལ་གྲིའི་འོག་ཏུ་བཅུག་ནས་ནི། །གཡུལ་དབང་ཡང་ནི་དབང་དུ་འགྱུར། །ཚེ་རབས་བརྒྱ་རུ་
ལོན་པའི་རུས། །མཚོན་གྱིས་བསྣུན་པའི་རུས་པ་དག །གསང་སྔགས་རབ་ཏུ་བཟླས་བྱས་ནས། །སྐྱེར་པའི་མེ་ལ་རབ་བསྲེགས་ཏེ། །ལྕགས་ཀྱུའི་འོག་ཏུ་རབ་བཅུག་ན། །གླང་པོ་དབང་དུ་འདུ་བར་འགྱུར། །བ་ལེ་ཏ་དང་ཏ་ལེ་ཤ། །ཁ་ཏི་ར་ད་དྷ་ཏི་མ། །
དུར་ཁྲོད་ཤིང་ལ་ལེགས་བསྲེགས་ནས། །སྟག་ལ་སོགས་པ་དབང་དུ་འདུ། །ནས་དང་འབྲས་དང་སོ་བ་དང་། །སྨན་དང་རིན་ཆེན་སྣ་ཚོགས་ཀྱིས། །མཎྜལ་ཟླུམ་པོ་ལེགས་བྱས་ཏེ། །རྒྱན་རྣམས་རྫོགས་པའི་སངས་རྒྱས་ནི། །པདྨ་ཆུ་ཤེལ་ལས་སྐྱེས་
པའི། །ཆུ་ཤེལ་མདོག་ཅན་འཛུམ་པ་ཅན། །རྡོ་རྗེའི་སྐྱིལ་མོ་ཀྲུང་བཞུགས་པ། །ཀུ་ཤའི་སྟན་བཅས་ཤར་དུ་འདུག །པདྨའི་ཕྱག་རྒྱ་བཅས་པ་ཡིས། །བྱམས་པའི་སེམས་ཀྱིས་དབུལ་བྱའོ། །ནད་དང་རིམས་དང་འབྲུམ་བུ་དང་། །ཤུ་བ་གཡན་པ་མེ་
དཔལ་དང་། །ནད་དང་གདོན་ནི་ཐམས་ཅད་བཟློག །མཚམས་མེད་ལྔ་དང་མི་དགེ་བའི། །འབྲས་བུ་སྡུག་བསྔལ་ནད་རྣམས་ཟློག །མེའི་ལས་བྱ་བའི་ལེའུ་སྟེ་ལྔ་པའོ།། །།དེ་ནས་རྒྱལ་པོའི་འཇིགས་པ་ལ། །མཎྜལ་དཀར་པོ་ལེགས་བྱས་ལ། །
ཙནྡན་དཀར་པོའི་དྲིས་བསྒོས་ཏེ། །མཆོད་ཡོན་མེ་ཏོག་དཀར་པོ་དང་། །ཅི་འབྱོར་པ་ཡི་མཆོད་པ་ཡིས། །རྒྱལ་པོ་ལྟ་བུའི་གཟུགས་ལ་མཆོད། །སྡིག་པ་ཐམས་ཅད་དེ་མདུན་དུ། །བཤགས་ནས་མྱུར་དུ་སྐྱབས་སུ་འགྲོ། །གྲོ་ག་དག་གམ་ཤིང་ཤུན་ལ། །རྒྱལ་

པོ་དག་གི་གཟུགས་བྱས་ཏེ། །ཡིག་འབྲུ་ལྔ་པོ་བཏབ་པ་ཡིས། །ཚོན་སྣ་ལྔ་ཡིས་རབ་ཏུ་བཅིང་། །བྱམས་པའི་སེམས་ཀྱིས་ཆུ་བོ་ལ། །བསྐུར་ན་རྒྱལ་པོའི་ཆད་ལས་ཐར། །ཨོྃ་ཧཱུྃ་ཏྲཱྃ་ཧྲཱིཿཨཿཤོ་ན་ཧ་རི་མ་ཀ་ཏོ། །ས་ར་ས་ར་ཀ་ར་ཀ་ར་སྭཱ་ཧཱ། གཅན་གཟན་འཇིགས་པ་
འོང་བའི་ཚེ། །མཎྜལ་དཀར་པོ་ལེགས་བྱས་ལ། །མེ་ཏོག་དཀར་པོ་རབ་ཏུ་གཏོར། །མཆོད་པ་ལྔ་ཡིས་རྒྱལ་པོ་མཆོད། །སྡིག་བཤགས་མྱུར་དུ་སྐྱབས་སུ་འགྲོ། །འབྲུ་སྣ་ལྔ་དང་རིན་ཆེན་ལྔ། །ཚོན་སྣ་ལྔ་ཡི་ཕུར་མ་ལྔ། །བྱས་པ་ལུས་ལ་བཏགས་པ་ན། །གཅན་
གཟན་འཇིགས་པ་ཐམས་ཅད་ལས། །མྱུར་བ་ཉིད་དུ་གྲོལ་བར་འགྱུར། །ཨོྃ་ཨཱཿཧཱུྃ་ཏྲཱྃ་ཧྲཱིཿཤོ་ཤ་ན་ཧ་རི་ཧ་ཏིརྨ་ཀ་རོ་ས་ར་ས་ར་ཀ་ར་ཀ་ར་སྭཱ་ཧཱ། ཆོམ་རྐུན་དག་གི་འཇིགས་པ་ལ། །མེ་ཏོག་སྔོན་པོ་རྡོ་རྗེ་ཅན། །མཐིང་ནག་ས་གནོན་ཕྱག་རྒྱ་ཅན། །མཆོད་གནས་བདག་ཉིད་
སྐྱབས་སུ་འགྲོ། །ཨོྃ་ཨཀྵོ་བྷྱཿཏ་ཀ་ཀ་ར་ན་ག་ར་ཁ་ཏི་པ་སྭ་དྷི་ཙ་ཀྲི་ཏ་ཡ་རི་ཀ་ཙེ་ཙ་ཏྲ་ཏི་ན་དུར་ཏ་ན། ས་ར་ས་ར་ཀ་ར་ཀ་ར་སྭཱ་ཧཱ། སྦྲུལ་གྱི་གདུག་པས་འཇིགས་པ་ལ། །བལ་པོ་སེའུའི་ལྕུག་མ་ཡིས། །བྲམ་ཟེའི་གཟུགས་ཀྱི་རྒྱན་བསྒོམས་ཏེ། །རིན་ཆེན་འབྱུང་ལྡན་སྐུར་བསྒོམས་ནས། །
སྤྱི་བོར་མུ་ཏིག་བྱི་རུ་དང་། །མན་ཤེལ་པདྨ་རཱ་ག་དང་། །ཨིནྡྲ་ནཱི་ལ་དུང་གཡས་འཁྱིལ། །གསེར་དང་དངུལ་དང་དཱུར་བ་དང་། །རིན་ཆེན་བརྒྱད་དང་འབྲུ་སྣར་བཅས། །ཀུ་ཤ་གླ་རྩི་ཙནྡན་དང་། །བ་ལུ་སྐྱེར་པ་ཨུཏྤ་ལ། །གུར་གུམ་དྲི་ཞིམ་ལུས་ལ་བྱུག །ཨོཾ་རཏྣ་སཾ་བྷ་བ་ས་
ཏི་བི་ཤ་ས་ར་ས་ར་ཀ་ར་ཀ་ར་སྭཱ་ཧཱ། ལྕེ་འབབ་པ་ཡི་འཇིགས་པ་ལ། །སྟག་དང་འབྲུག་གི་རུས་པ་དང་། །འཁར་བའི་ཕྱེ་མ་ལྕགས་ཕྱེ་དང་། །ཟངས་ཕྱེ་ར་གན་ཕྱེ་མ་དང་། །གསེར་གྱི་ཕྱེ་མ་གྲོ་བར་བཏུམས། །སྣང་བ་མཐའ་ཡས་སྐུར་བསྒོམས་ཏེ། །བྱམས་པས་ཕྱོགས་
མཚམས་ཀུན་ཏུ་བསྟན། །དུག་རྣམས་སྣ་ཚོགས་དུད་པས་བདུགས། །ཨོྃ་ཨ་མྲྀ་ཏ་བ་བཛྲ་ཛྭ་ལ་བཛྲ་ཛྭ་ལ། །གརྫ་གརྫ། ས་ར་ས་ར། ཀ་ར་ཀ་ར་སྭཱ་ཧཱ། མེ་ཡི་འཇིགས་པ་དག་ལ་ནི། །འབྲུག་རུས་སེན་ཏ་ཝ་ཤ་དང་། །ཏིལ་དང་སཱ་ལུ་ཅི་ཙེ་དང་། །ནས་དང་གྲོ་དང་རྒུན་འབྲུམ་

གྱི། །ཐང་ཕྲོམ་དག་ལ་སྔགས་བཏབ་སྟེ། །མེ་ཡི་ཕྱོགས་སུ་གཏོར་བར་བྱ། །ཨོྃ་བཻ་རོ་ཙ་ན་པྲ་བྷཱ་ཛྭ་ལ་ཛྭ་ལ། ས་ར་ས་ར། ཀ་ར་ཀ་ར་སྭཱ་ཧཱ། རྣམ་པར་སྣང་མཛད་སྐུར་བསྒོམས་ཏེ། །མེ་ལ་གཏོར་ནས་ས་ཡིས་གསོད། །ཆུ་བོ་དག་གིས་འཇིགས་པ་ལ། །མཛེ་ཅན་ཕོ་མོའི་ཐོད་
པར་ནི། །ར་དང་ཁྱི་དང་ཕག་གི་ཁྲག །ས་བདག་སྡེ་བརྒྱད་གཟུགས་དང་བཅས། །ནང་དུ་བཅུག་སྟེ་ཆུ་བོར་དོར། །དོན་ཡོད་གྲུབ་པའི་སྐུ་རུ་བསྒོམ། །ཨོྃ་ཨ་མོ་གྷ་སིད་དྷི། ཨོྃ་ཀ་བཻ་ཏཱ་ར་ཎི་ས་ར་ས་ར། ཀ་ར་ཀ་ར་སྭཱ་ཧཱ། ཕྱག་སྟོང་སྤྱན་ཡང་དེ་བཞིན་ཏེ། །ཐུགས་རྗེ་ཆེན་
པོའི་སྐུ་མཆོག་ནི། །སོ་སོར་གསལ་ཞིང་བསྒོམ་པར་བྱ། །སོ་སོའི་དབུ་ལ་སོ་སོར་བསམ། །བྱམས་པས་ཀུན་ལ་རབ་ཏུ་ལྟ། །འཇིགས་པ་ཀུན་ལས་གྲོལ་བར་འགྱུར། །འཇིགས་པ་ཀུན་ལས་ཡོངས་སུ་བསྲུང་བའི་ལེའུ་སྟེ་དྲུག་པའོ།། །།སྐུ་གདུང་མེ་ཏོག་དཀར་
པོས་མཆོད། །ས་གཞི་དྲི་ཡིས་ཆག་ཆག་གདབ། །སྙིང་པོ་གཟུགས་དང་བཅས་པ་འམ། །ཁྲུ་གང་ཚད་ཀྱི་མཆོད་རྟེན་ལ། །ལེགས་པར་མཆོད་ཅིང་བསྟོད་པར་བྱ། །སྟོང་ཉིད་ཡེ་ཤེས་ལས་བྱུང་བའི། །ཐུགས་རྗེའི་གཟུགས་ཀྱི་རྟེན་དུ་ཤར། །རྫུ་འཕྲུལ་ཚད་མེད་བཞི་དང་ལྡན། །
བྱང་ཆུབ་ཕྱོགས་རྣམས་ཡོངས་སུ་རྫོགས། །དྲི་མེད་དུང་འདྲ་དཀར་པོ་སྟེ། །རྒྱལ་ཆེན་བཞི་ཡང་དེ་བཞིན་ནོ། །བྱང་ཆུབ་ཆེན་པོའི་མཆོད་རྟེན་ནི། །ཁྲི་འཕང་བཅུ་གསུམ་ཏོག་དང་ལྡན། །ལྷ་ཡི་རོལ་མོ་ཆར་དུ་འབབ། །ཆོས་སྒྲ་རྒྱུན་མི་འཆད་པའི་གཏེར། །རིན་ཆེན་ལྔ་ཡི་བདག་
ཉིད་དེ། །ཕུར་བུས་གདབ་ཅིང་ཡོངས་སུ་གཟུང་། །སངས་རྒྱས་ཀུན་གྱི་བྱིན་རླབས་ཆེ། །དེ་ཡི་བསོད་ནམས་བསྟན་པ་ནི། །མཚམས་མེད་ལྔ་དང་མི་དགེ་བཅུ། །ཉོན་མོངས་དབང་གྱུར་སྡིག་པ་རྣམས། །སྐད་ཅིག་ཙམ་གྱིས་དག་པར་འགྱུར། །ཤིན་ཏུ་གཙང་བའི་གནས་དག་
ནི། །བྱམས་དང་སྙིང་རྗེ་ཅན་གྱིས་བྱ། །བྲམ་ཟེའི་རིགས་ལས་བྱུང་བ་ཡི། །འདྲི་མཁན་སྙིང་རྗེ་ཅན་གྱིས་བྱ། །རང་བསམ་ལྷག་པར་གནས་པ་ཡིས། །མདུན་དུ་བདར་ཏེ་མཆོད་པ་བྱ། །ཚད་དང་ཁ་དོག་ཡོངས་དག་གསལ། །ཡིད་དུ་འོང་བ་དག་ལའོ། །ཟས་དག་

ཡིད་དུ་འོང་བའམ། །དཀར་གསུམ་འབགས་པ་སྤངས་པ་ཡིས། །ཤ་དང་སྒོག་པ་ལ་ཕུག་དང་། །ཟྭ་དང་ཆང་ནི་ཤིན་ཏུ་སྤང་། །ཤེལ་ཕྲེང་པདྨའི་སྙིང་པོ་དང་། །བོ་དྷི་ཙེ་དང་མུ་ཏིག་ཤིས། །གླལ་དང་སྦྲིད་པ་མི་ཚིག་རྣམས། །ནམ་ཡང་ཆོད་པར་མི་བྱའོ། །
ཡོ་བྱད་དང་དམ་ཚིག་ལ་བརྟེན་པའི་ལེའུ་སྟེ་བདུན་པའོ།། །།ལས་རྣམས་སྣ་ཚོགས་སྒྲུབ་བྱེད་ན། །པོ་ཏིའམ་ལུགས་མ་རས་རིས་ལ། །བརྟེན་ནས་བདག་ཉིད་བྱམས་སེམས་ལྡན། །མུྃ་ལས་འཕགས་པ་འཇམ་དཔལ་ནི། །དམར་སེར་པོ་ཏི་ཨུཏྤལ་འཛིན། །མཉམ་པའི་
སྐྱིལ་མོ་ཀྲུང་གིས་བཞུགས། །བུམ་པ་ཁ་དོག་སེར་པོའི་ནང་། །རིན་ཆེན་ལྔ་དང་འབྲུ་ལྔར་བཅས། །ཏདྱ་ཐཱ། ཨོྃ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་བཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ་བ་རེ། ཨི་ལི་མི་ལི། ཙི་ཏེ་ཛྭ་ལ་མ་པ་ན་ཡེ་སྭཱ་ཧཱ། ལན་
བདུན་ཡོངས་སུ་བཟླས་བྱས་ན། །གཏི་མུག་ཐམས་ཅད་ཞི་བར་འགྱུར། །ཤེས་རབ་ཆེན་པོ་ཐོབ་པར་འགྱུར། །རས་རིས་མཆོད་རྟེན་ལ་བརྟེན་ནས། །མཎྜལ་དྲི་ཞིམ་མེ་ཏོག་དགྲམ། །དཀར་གསུམ་མངར་གསུམ་དག་ཏུ་ནི། །འབྲས་དང་ཏིལ་དང་ཡུངས་ཀར་དང་། །པདྨའི་རྩ་
བ་དཀར་པོ་ལ། །རིལ་བུ་རྒྱ་ཤུག་འབྲུམ་བུ་ཙམ། །སྤྱན་རས་གཟིགས་ཀྱི་དབང་ཕྱུག་ནི། །ཧྲཱིཿལས་བྱུང་བའི་སྐུ་མདོག་དཀར། །ཕྱག་ན་པདྨ་མཆོག་སྦྱིན་མཛད། །སེམས་དཔའི་སྐྱིལ་མོ་ཀྲུང་གིས་བཞུགས། །ཏདྱ་ཐཱ། ཨོྃ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་བཊྚེ། ཙ་
ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ་བ་རེ། ཨི་ལི་མི་ལི། ཙི་ཏི་ཛྭ་ལ་མ་པ་ན་ཡེ་སྭཱ་ཧཱ། རིལ་བུ་དག་ལ་སྔགས་བཏབ་སྟེ། །བྱམས་པའི་སེམས་དང་ལྡན་པས་བཟའ། །སྲིད་པའི་འདོད་ཆགས་ཞི་གྱུར་ནས། །རབ་ཏུ་བདེ་བ་ཐོབ་པར་འགྱུར། །མཎྜལ་སྔོན་པོ་
ལེགས་ནས། །ཨུཏྤལ་སྔོ་དང་ནིམ་པ་དང་། །ཨ་ག་རུ་དང་ཙནྡན་དང་། །དྲི་ཡི་ཆུ་ཡིས་བུམ་པ་དགང་། །ཕྱག་ན་རྡོ་རྗེ་གོས་སྔོན་ཅན། །སྐུ་མདོག་ལྗང་སྔོན་ཅུང་ཞིག་ཁྲོ། །དེ་ནི་རྡོ་རྗེ་ཕྱག་ན་བསྣམས། །སེམས་དཔའི་སྐྱིལ་མོ་ཀྲུང་གིས་བཞུགས། །ཏདྱ་ཐཱ། ཨོཾ་དྷ་ར་དྷ་ར།

དྷི་རི་དྷི་རི། དྷུ་རུ་དྷུ་རུ། ཨིཊྚེ་བཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ་བ་རེ། ཨི་ལི་མི་ལི། ཙི་ཏི་ཛྭ་ལ་མ་པ་ན་ཡེ་སྭཱ་ཧཱ། ཧཱུྃ་སྐྱེས་ཕྱག་ན་རྡོ་རྗེ་ཡིས། །བུམ་པའི་ཆུ་ཡིས་ཁྲུས་བྱས་ན། །ཞེ་སྡང་རབ་ཏུ་ཞི་བྱས་ནས། །བཟོད་པ་ཆེན་པོ་ཐོབ་པར་འགྱུར། །
དུག་རྣམས་རབ་ཏུ་ཞི་བར་བྱེད་པའི་ལེའུ་སྟེ་བརྒྱད་པའོ།། །།རས་སམ་གྲོ་གའམ་ཤིང་ཤུན་ལ། །འཁོར་ལོ་རྩིབས་བཞི་མུ་ཁྱུད་བཅས། །དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཆེ་གེ་མོ་ལ་རཀྵ་རཀྵ་ཞེས་པའོ། །སྲུང་བ་ལུས་ལ་བཏགས་བྱས་ན། །ནད་དང་གདོན་དང་རིམས་དང་ནི། །
འཇིགས་པའི་ནད་དང་གདོན་ལས་ཐར། །བདེ་བ་ཡོངས་སུ་རྫོགས་པར་འགྱུར། །སྐུད་པ་དག་ནི་དཀར་པོ་ལ། །མདུད་པ་དག་ནི་རབ་བྱས་ཏེ། །བདུན་ནམ་ཉི་ཤུ་རྩ་གཅིག་གམ། །བརྒྱ་རྩ་བརྒྱད་དུ་ལེགས་བཟླས་ནས། །བསྲུང་བའི་དམ་པ་འདི་བྱས་ན། །བསྲུང་བ་ཡི་
ནི་དམ་པ་འདིས། །བསྲུང་བའི་མཆོག་ཏུ་འགྱུར་བའོ། །མུ་ཏིག་བྱི་རུ་རིན་ཆེན་གསེར། །ག་བུར་གུར་གུམ་གླ་རྩི་དང་། །ཨ་ག་རུ་དང་དུ་རུ་སྐ། །ཕུར་མ་སྙིང་གར་གདགས་པར་བྱ། །ཙནྡན་གླ་རྩི་གུར་གུམ་དང་། །གུ་གུལ་ནག་པོ་རུས་པའི་ཕྱེ། །བ་ཡི་འོ་མས་ལྡེ་གུ་
བྱས། །གནས་གསུམ་དག་ཏུ་བྱུགས་པས་ནི། །གདོན་དང་ནད་ཀྱིས་འཇིགས་ཀུན་ལ། །བྱུགས་པས་དེ་ནི་བསྲུང་བར་འགྱུར། །བསྲུང་བ་འཁོར་ལོའི་ལེའུ་སྟེ་དགུ་པའོ།། །།སེར་བ་ཡོངས་སུ་བསྲུང་བ་ནི། །སེང་ལྡེང་ལྷང་ཏིའི་ཕུར་བུ་ལ། །གཟུངས་
སྔགས་བཟླས་ནས་དབུས་སུ་ནི། །ཧཱུྃ་ལས་བྱུང་བའི་སྐུ་བསྐྱེད་དོ། །ཕྱོགས་བཞིར་ཁྲོ་བོ་ཆེན་པོ་ནི། །ཤར་དུ་ཁམས་གསུམ་རྣམ་རྒྱལ་ནི། །སྐུ་མདོག་དཀར་པོ་མེ་དཔུང་འབར། །རྡོ་རྗེ་འཁོར་ལོ་སྡིགས་མཛུབ་མཛད། །ཨོྃ་པྲཛྙཱནྟ་ཀྲྀ་ཏ་ཧ་ན་ཧ་ན་ཧཱུྃ་ཕཊ། ལྷོ་རུ་གཤིན་
རྗེ་གཤེད་པོ་ནི། །དམར་ནག་རིན་ཆེན་བེ་ཅོན་འཛིན། །ཨོྃ་ཡ་མཱནྟ་ཀྲྀཏ་ཏིཥྛ་ཏིཥྛ་ཧཱུྃ་ཕཊ། ནུབ་ཏུ་རྟ་མགྲིན་དམར་པོ་ནི། །མེ་དཔུང་རྡོ་རྗེ་དབྱུག་པ་འཛིན། །ཨོྃ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། བྱང་ཕྱོགས་ཁྲོ་གཉེར་ཅན་གྱི་སྐུ། །ལྗང་སྔོན་རལ་གྲི་འཛིན་པ་སྟེ། །

ཨོྃ་ཨ་མོ་གྷ་ཀབྷྲྀ་ཀུ་ཊི་བན་དྷ་བན་དྷ་ཧཱུྃ་ཕཊ། ཕྱོགས་བཞིའི་ཕུར་བུ་དག་ལ་ནི། །བདུན་ནམ་ཉི་ཤུ་རྩ་གཅིག་བཟླས། །གཅན་གཟན་དྲི་མ་ཡུངས་ཀར་བསྲེས། །གསང་སྔགས་བཟླས་ཤིང་མཁའ་ལ་གཏོར། །ཨོྃ་བཛྲ་ཀྲོ་དྷ་ཧུ་ལུ་ཧུ་ལུ། ཏིཥྛ་ཏིཥྛ། བན་དྷ་བན་དྷ།
ཧ་ན་ཧ་ན་ཧཱུྃ་ཕཊ། སེར་བ་བསྲུང་བའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་ཀྱིས་འོད་ཟེར་རབ་ཏུ་བཀྱེ་སྟེ། ཕྱག་སྟོང་དང་སྤྱན་སྟོང་ལས་འོད་ཟེར་བྱུང་བ་འདི་ལྟ་སྟེ། དཀར་པོ་དང་། དམར་པོ་དང་། ནག་པོ་དང་། ལྗང་གུ་དང་། སེར་པོ་སྟེ། འོད་ཟེར་དེ་དག་གིས་འགྲོ་
བ་རིས་དྲུག་པོ་དེ་དག་ལ་ཁྱབ་སྟེ། དབུགས་དབྱུང་བར་མཛད་དོ། །དེ་ནས་རྒྱལ་ཆེན་རིགས་བཞི་དང་། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པ་ཀུན་འཁོར་དང་། ཚངས་པ་
མདུན་ན་འདོན་དང་། ཚངས་པ་ཆེན་པོ་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་།
གྱ་ནོམ་སྣང་དང་། འོག་མིན་ལ་སོགས་པ་ལྷའི་བུ་དེ་དག་གིས་མཆོད་པའི་སྤྲིན་གྱི་ཆར་ཕབ་ནས་ལྷའི་བུ་རྣམས་ཀྱིས་ཚིགས་སུ་བཅད་པས་བསྟོད་པ། སྤྱན་རས་གཟིགས་དབང་ཐུགས་རྗེའི་སྐུ། །ཕྱག་སྟོང་ཉོན་མོངས་སྒྲོལ་བའི་ཕྱག །སྤྱན་སྟོང་ཤེས་རབ་འོད་གསལ་ཏེ། །འགྲོ་དོན་མཛད་
ལ་ཕྱག་འཚལ་བསྟོད། །ཅེས་བསྟོད་ནས། བཅོམ་ལྡན་འདས་ཐུགས་རྗེ་ཆེན་པོའི་སྐུ་དེ་མི་སྣང་བར་གྱུར་ནས། བཅོམ་ལྡན་འདས་ཤཱཀྱ་ཐུབ་པར་གྱུར་ཏོ། །དེ་ནས་ལྷ་ཡི་བུས་གསོལ་པ། འདི་ཡི་ཕན་ཡོན་ཅི་ཡིན་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། །གང་ཞིག་
རྒྱུད་འདི་ཡིད་བྱེད་ན། །ནད་དང་གདོན་དང་རིམས་དང་ནི། །རྒྱལ་པོ་གཅན་གཟན་འཇིགས་པ་དང་། །འཇིགས་པ་ཀུན་ལས་གྲོལ་བར་འགྱུར། །འདོད་ཆགས་ཞེ་སྡང་གཏི་མུག་དང་། །མཚམས་མེད་མི་དགེའི་སྡིག་པ་ཀུན། །རབ་ཏུ་ཞི་བར་བྱེད་པར་འགྱུར། །དམྱལ་བ་ངན་

སོང་སྡུག་བསྔལ་དང་། །མི་ཁོམ་བརྒྱད་ལས་རྣམ་གྲོལ་ཏེ། །ཉན་དང་འཆང་དང་བསྒོམ་པར་འགྱུར། །དྲི་མེད་ནམ་མཁའི་དཀྱིལ་ལྟ་བུའི། །བཅོམ་ལྡན་འདས་ཀྱང་མཐོང་བར་འགྱུར། །ཞེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་
དབང་ཕྱུག་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་བཏུད་ནས་ལེགས་སོ་ལེགས་སོ་ཞེས་བྱ་བ་གསུངས་ནས་སྟན་ལ་འཁོད་དོ། །བྱང་ཆུབ་སེམས་དཔའ་འབུམ་ཕྲག་ལྔ་སྟོང་དང་ལྷ་དང་མི་དང་། ལྷ་མ་ཡིན་དང་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་
གསུངས་པ་ལ་མངོན་པར་བསྟོད་དོ། །པདྨ་ཅོད་པན་ཞེས་བྱ་བའི་རྒྱུད་ལེའུ་བཅུ་གཅིག་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་དྷརྨ་ཤྲཱི་མི་ཏྲ་དང་། བོད་ཀྱི་ལོཙྪ་བ་དགེ་སློང་ཆོས་ཀྱི་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།
༄༅། །རྒྱ་གར་སྐད་དུ། སིཾ་ཧ་ནཱ་ད་ཏནྟྲ་ནཱ་མ། བོད་སྐད་དུ། སེང་གེ་སྒྲའི་རྒྱུད་ཅེས་བྱ་བ། བཅོམ་ལྡན་འདས་པདྨ་གསུང་གི་ལྷ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་པདྨའི་དབང་ཕྱུག་དུ་བསྒྱུར་ཏེ་རྡོ་རྗེའི་གདན་ལ་
བཞུགས་སོ། །དེ་ནས་གསང་བའི་བདག་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བསོད་ནམས་དང་ཡེ་ཤེས་ཀྱི་ཚོགས་དང་ལམ་རྣམས་ཇི་ལྟར་སྦྱང་། ཨེ་མ་ཧོ་སེམས་ཅན་རྣམས་ལ་སྙིང་བརྩེ་བའི་མཆོག་སྤྱན་རས་གཟིགས་སེང་གེ་སྒྲ་ཞེས་བྱ་བ་ཡོད་དེ། །
དེ་ཡིས་སྨོན་ལམ་སྦྱང་བ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་པར་ཡིད་ལ་བྱས་སོ། །དེ་ནས་བཅོམ་ལྡན་འདས་པདྨའི་དབང་ཕྱུག་ལངས་ཏེ། གསང་སྔགས་ཀྱི་ཚིག་འདི་དག་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་
སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་ཨ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ། ཀ་རོ་ཀཾ་ཊེ། བཱི་རྱཻ་སྭཱ་ཧཱ། ཨོྃ་ཨཱཿཧྲཱིཿསིཾ་ཧ་ནཱ་ད་ཧཱུྃ། བྲུྃ་ཨཱྃ་ཛྲཱིཾ་ཁྃ་ཧཱུྃ། ཨོྃ་ཨཱཿཧཱུྃ། ཨོྃ་བ་ལི་ན་བྷུཉྫ་ཛི་བ་པུཥྤེ་དྷཱུ་པེ་ཧཱུྃ། སརྦ་ཨ་མྲྀ་ཏེ་ཧཱུྃ། ཨོྃ་བ་ཏ་ལི། མ་ཧཱ་བ་ཏ་ལི། ཧཱུྃ་

ཧཱུྃ་ཧཱུྃ་ཛཿསྭཱ་ཧཱ། ཨོྃ་བྷཀྵ་བྷཀྵ། ས་མ་ཡ་ཏིཥྛ་ཛཾ་ཧཱུྃ་ཕཊ་སྭཱ་ཧཱ། ཨོྃ་ཨ་ཏ་པྲ་ཏི་ཧཱུྃ་ཕཊ། སྲི་ཏི་ཀ་ར་ཧཱུྃ་ཕཊ། ཨོྃ་བ་རུ་ཎ་ཨཱ་གཙྪ་ཡ། ཨཱགཙྪ་ཡ། མ་ཧཱ་ནཱ་ག་གི་ས་ཏི་སརྦེ་བྷུར་ཕུཿཕུཿཕུཿསྭཱ་ཧཱ། ཨོྃ་བྷ་ག་བ་ཏི་ཤྲུ་ཏི་སྨྲྀ་ཏི་ས་མ་བ་ཏི། ས་ར་མ་ཏི་སིདྡྷི་སྭཱ་ཧཱ། ཨོྃ་
ཨཱཿཧྲཱིཿཧཱུྃ་སྭཱ་ཧཱ། ཕུཿཧྲཱིཿཨོྃ་སིཾ་ཧ་ནཱ་ད་ཧཱུྃ་ཕཊ་ཕཊ། ནཱ་ག་དུ་པ་ལ་མཱ་ར་ཡ་ཕཊ། ཛྭཱ་ལ་ཛྭཱ་ལ་ཧཱུྃ་ཕཊ། ཨོྃ་ཨ་བིགྷྣནྟ་ཀྲྀ་ཏ་ཧཱུྃ། ཨོྃ་ཨགྣ་ཡེ་ཨ་ཏི་བྱ། ཨ་བྷི་ས་མ་ཡ་བི་ཤ། མ་ཧཱ་ཤྲི་ཡེ་ཧ་བྱ། ཀ་བྱ་མ་ཧཱ་ནི་ཡ་སྭཱ་ཡཱ། ཨོྃ་བྷ་བ་ཀ་ཨགྣ་ཡེ། ཤཱནྟིཾ་ཀུ་རུ་ཡ་སྭཱ་ཧཱ། ཨཱཿཧྲཱིཿསིཾ་ཧ་ནཱ་ད་བཛྲ་ཙཀྲ་བརྟ་
ལོ་ཀི་ཀ་བྲུྃ་བྲུྃ་བྲུྃ། ལོ་ཀོཏྟ་ར་ཎི་སིཾ་ཧ་ནཱ་ད་བྲུྃ་བྲུྃ་བྲུྃ་ཧཱུྃ་ན་ཧཱུྃ་ན། སིཾ་ཧ་ནཱ་ད་བྲུྃ་བྲུྃ་བྲུྃ་ཧཱུྃ་ཧཱུྃ་ཧཱུྃ་སྭཱ་ཧཱ། གསང་བའི་བདག་པོ་འདི་ནི་མཎྜལ་གྱི་བསྒྲུབ་པ་ཞེས་བྱ་བའོ། །གསད་པ་དང་། ཕྱིར་ལྡོག་པ་དང་། དགུག་པ་དང་། བཅིང་བ་དང་། ཞི་བའི་ལས་ཡིན་ཏེ། ནང་པར་བའི་ལྕི་བས་ལམ་
ལྷུང་བས་མཎྜལ་བྱས་ཏེ། མངར་གསུམ་ལག་པའི་མཐིལ་དུ་མཉེས་པས་ཀླུའི་ཞེ་སྡང་ཞི་བར་འགྱུར་རོ། །འདི་ནི་ཀླུའི་སྡེ་དཔོན་ཞེས་བྱ་སྟེ། །སེང་གེའི་སྟེང་དུ་ཟླ་བ་ལ། །རྒྱལ་པོ་རོལ་བའི་སྟབས་ཀྱིས་བཞུགས། །གཡས་ན་ཐོད་མཚན་རྩེ་གསུམ་ལ། །དྲག་པོའི་རྒྱལ་རིགས་དབང་
དུ་བསྡུས། །པདྨའི་རྩེ་ལ་ཐོད་པ་ནི། །འཕྲིན་ལས་བཞི་ལྡན་ཀུ་མུ་ད། །ཤེས་རབ་སྦྱོར་བའི་རལ་གྲིར་བཅས། །དཀའ་ཐུབ་ལྡན་པའི་སྐུ་དེ་ལ། །རིགས་ལྔས་རྣམ་པར་བརྒྱན་པའོ། །གསུམ་དང་ལྔ་ནི་མདུན་དུ་འཕྱང་། །རྩེ་མོར་འོད་དཔག་མེད་པས་བརྒྱན། །སེང་གེའི་
ཆ་ལས་བྱུང་བ་ཡིན། །འདམ་སྐྱེས་དམར་པོའི་ལོ་མ་གཉིས། །པདྨ་བཞི་ལ་སྔགས་བཞི་ལྡན། །རང་ལུས་འོག་ནས་ཐལ་མོ་སྦྱོར། །སྐུ་ལ་འདུད་ཅིང་འཕྲིན་ལས་བྱེད། །རྡོ་རྗེའི་གདན་ལ་མི་བསྐྱོད་པའི། །ཐུགས་ཀ་ནས་ནི་སྔགས་འོད་འདོན། །སྤྲོ་བ་གསུམ་དུ་ལྡན་པའི་སྔགས། །
ཉི་ཤུ་རྩ་གཅིག་གདོན་པར་བྱའོ། །གསང་བའི་བདག་པོ་རྒྱུད་འདི་ལ་སྨོད་པའི་སེམས་ཅན་དེ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སྨོད་པ་ཡིན་ནོ། །གསང་བའི་བདག་པོ་རྒྱུད་འདི་ཉན་པ་དང་། སེམས་པ་དང་། མཆོད་པ་དང་། འཆང་བ་དང་། ཐ་ན་འདི་ལ་མོས་

པའི་སེམས་ཅན་དེ་དག་ལ་རྒྱལ་ཆེན་བཞིའི་ལྷ་དང་། སུམ་ཅུ་རྩ་གསུམ་གྱི་ལྷ་དང་། ཚངས་པའི་བུ་དང་། ཚངས་ཆེན་རྣམས་ཀྱིས་བསྲུང་བ་དང་། བསྐྱབ་པ་དང་། སྦ་བ་དང་། ཀུན་ཏུ་རྗེས་སུ་འབྲང་བར་བྱེད་དེ། དེ་བས་ཆེས་ལྷག་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་
བུ་ལ་མས་སྲུང་བ་བཞིན་དུ་བསྲུང་བར་འགྱུར་རོ། །བདུད་ཀྱི་བར་དུ་གཅད་པར་མི་ནུས་སོ། །གང་ཤི་འཕོས་ནས་ནུབ་ཕྱོགས་བདེ་བ་ཅན་དུ་པདྨོ་ལས་སྐྱེ་བར་འགྱུར་རོ། །མངལ་གྱི་སྡུག་བསྔལ་ལས་ཐར་བར་འགྱུར་རོ། །ཚེ་འདིར་མེ་དང་ཆུའི་འཇིགས་པ་ལས་ཐར་བར་འགྱུར་
རོ། །འདིར་ནི་མདོ་ཙམ་སྨོས་སུ་ཟད་ཀྱི། དེ་མ་ཡིན་པ་གང་འདོད་པ་ཐམས་ཅད་བསམ་པ་ཡིད་བཞིན་དུ་འགྲུབ་པར་འགྱུར་རོ། །གང་རྒྱུད་འདི་ལ་གནོད་པ་དང་། འཚེ་བ་དང་། ཚུལ་བཞིན་མ་ཡིན་པ་ཡིད་ལ་བྱེད་ན། དེ་ལ་ལྷའི་བུ་དང་། ཀླུའི་བུ་ཁྱེད་རྣམས་ཀྱིས་བསྲུང་བར་གྱིས་ཤིག་
ཅེས་བཀའ་སྩལ་ཏོ། །དེ་ནས་གསང་བའི་བདག་པོ་དང་། ཚངས་རིས་ཀྱི་ལྷའི་བུ་དེ་དག་རབ་ཏུ་དགའ་ནས་ཚུལ་བཞིན་དུ་ཁས་བླང་བར་བྱས་སོ། །དེ་ནས་གཞན་བསྲུང་བའི་ཕྱིར་བདག་ས་དཀར་པོ་ལ་ལན་དུ་མར་བསྔགས་ན་བར་ཆད་ཐམས་ཅད་ཞི་བར་འགྱུར་རོ། །སེང་གེ་སྒྲའི་རྒྱུད་
ཅེས་བྱ་བ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་པྲཛྙཱ་ཀཱ་ར་དང་། བོད་ཀྱི་ལོཙྪ་བ་འགོས་ཁུག་པ་ལྷས་བཙས་ཀྱིས་ཞུས་ཤིང་བསྒྱུར་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་རཱ་ཡ་སིདྷ་ནཱ་ད་ན་མ་དྷཱ་ར་ཎཱི།
བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་སེང་གེ་སྒྲའི་གཟུངས་ཞེས་བྱ་བ། བཅོམ་ལྡན་འདས་རྡོ་རྗེ་འཆང་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་ཕོ་བྲང་རི་པོ་ཊ་ལའི་
རྩེ་མོ་ན། རིན་པོ་ཆེའི་ཁང་བཟངས་རིན་པོ་ཆེ་དང་། མུ་ཏིག་དང་། ནོར་བུ་དཔག་མེད་ཀྱིས་སྤྲས་པ། འོད་ཀྱིས་སྟོང་གསུམ་ཁྱབ་པ། མེ་ཏོག་དྲི་ཞིམ་པོ་སྣ་ཚོགས་ཀྱིས་ཀུན་ནས་བརྒྱན་པའི་ས་ཕྱོགས་དེ་ན་བྱམས་པ་ལ་སོགས་པའི་བྱང་ཆུབ་སེམས་དཔའ་དཔག་ཏུ་

མེད་པ་དང་། ཉན་ཐོས་ཆེན་པོ་ཤ་ར་དྭ་ཏིའི་བུ་ལ་སོགས་པ་དགེ་སློང་རབ་ཏུ་མང་པོས་ཡོངས་སུ་བསྐོར་ཞིང་། བཅོམ་ལྡན་འདས་སེང་གེའི་གདན་བཤམས་པ་ལ་བཞུགས་སོ། །འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ཞེས་བྱ་བ་འདུག་
སྟེ། འདུག་པར་གྱུར་པ་དེ་རང་གི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡུལ་
མ་ག་དྷཱ་ན་རྒྱལ་པོ་དབང་ཕྱུག་འོད་ཅེས་བགྱི་བ་འཁོར་དང་བཙུན་མོ་དང་། ལོངས་སྤྱོད་ཕུན་སུམ་ཚོགས་པ་དང་ལྡན་པ་ལས་རྒྱལ་པོ་དེ་མཛེ་དང་། ཕོལ་མིག་དང་། དབུགས་མི་བདེ་བ་སྙིང་ནད་འབར་བ་བྱུང་སྟེ་དེ་ཇི་ལྟར་བསལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་
དཔའ་སེམས་དཔའ་ཆེན་པོ་འཇམ་དཔལ་སྔོན་འཇིག་རྟེན་གྱི་ཁམས་འདི་ཉིད་ལ་འཇམ་དཔལ་ཁྱེད་ཉིད་བྱང་ཆུབ་སེམས་དཔའ་ཤེས་རབ་ཆེན་པོ་ཞེས་བྱ་བ་ཡིན་ལ། འཕགས་པ་སྤྱན་རས་གཟིགས་དབང་ཕྱུག་སེང་གེ་སྒྲ་འདི་ཉིད་བྱང་ཆུབ་སེམས་དཔའ་སྙིང་རྗེའི་མཆོག་ཅེས་བྱ་བ་
ཡིན་པས། བྱང་ཆུབ་སེམས་དཔའ་དེ་གཉིས་སྟོང་གསུམ་དུ་སེམས་ཅན་གྱི་དོན་ལ་གཤེགས་པ་ལ་སེང་གེ་དཀར་པོ་ཅིག་དབང་དུ་བསྡུས་ཏེ་ཆིབས་པ་བྱས། སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན། མདུང་རྩེ་གསུམ་པ་དང་། རལ་གྲི་དང་། པདྨ་དང་། ཨུཏྤལ་
ཐོགས་ནས་ཕྱིན་པ་ལ། རྒྱ་མཚོ་ཆེན་པོ་ལས་རྒལ་བའི་དུས་སུ་སེང་གེ་བཞག་ནས་ཁུར་རེས་བྱས་ཤིང་བྱོན་པ་ལ། བྱང་ཆུབ་སེམས་དཔའ་ཤེས་རབ་ཆེན་པོ་ཁྱོད་ཉིད་ནི་གྲོགས་ལ་ཕན་པའི་སེམས་ཀྱིས་རང་གི་རལ་གྲིས་རང་བཀུམ་མོ། །བྱང་ཆུབ་སེམས་དཔའ་སྙིང་རྗེ་མཆོག་
གི་བསམ་པ་ལ་སྟེང་འོག་བར་སྣང་གི་ཀླུ་དང་ལྷ་ལ་སོགས་པས་བསད་དམ་སྙམ་ནས་བཏུང་བའི་སྣོད་བྲམ་ཟེའི་ཐོད་པ་ལག་ན་ཐོགས། ཏྲི་ཤཱུ་ལ་རྩེ་གསུམ་པ་ལག་ན་ཐོགས། སེང་གེ་དཀར་པོ་ལ་ཞོན། མྱ་ངན་དུ་རལ་པ་ཐོད་དུ་བཅིངས་ནས་སྟེང་གི་ལྷ་ལ་བསྡིགས་ཏེ། སྙིང་རྗེའི་སྟོབས་

ཀྱིས་སེམས་ཅན་དོན་བྱས་པས། །རང་གི་གྲོགས་པོས་སྤངས་ནས་གཅིག་པུ་ལུས། །ལྷ་རྣམས་ཀུན་གྱིས་ཉེས་ན་ཆད་པའི་ལས། །གྲོང་ཁྱེར་འཇོམས་ཤིང་ལྷ་རྣམས་འགུམས་པར་བགྱིད། །ཅེས་སྨྲས་ཏེ། ལྷ་རྣམས་ལ་ཏྲི་ཤཱུ་ལ་གདེངས་པ་དང་། རྒྱལ་པོ་ཆེན་པོ་བཞི་དང་། ལྷའི་
དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། ཁམས་གསུམ་གྱི་ལྷ་དགའ་བའི་མདངས་ཕྱུང་སྟེ། ལྷའི་མེ་ཏོག་པདྨ་དང་། ཀུ་མུ་ད་དང་། པུཎྜ་རཱི་ཀ་དང་། ཙམ་པ་ཀ་ལ་སོགས་པ་ཕུལ་ཏེ་ཐོད་པ་བཀང་ངོ་། །དེ་ནས་བར་སྣང་གི་ལྷ་དང་། ཀླུ་དང་། དྲི་ཟ་དང་། གནོད་སྦྱིན་
དང་། ལྷ་མ་ཡིན་དང་། གྲུལ་བུམ་དང་། ནམ་མཁའ་ལྡིང་དང་། མིའམ་ཅི་ལ་སོགས་པ་ལ་བསྡིགས་པ། ཏྲི་ཤཱུ་ལ་གདེངས་ནས། སྙིང་རྗེའི་སྟོབས་ཀྱིས་སེམས་ཅན་དོན་བྱས་པས། །རང་གི་གྲོགས་པོས་སྤངས་ནས་གཅིག་པུ་ལུས། །སྡེ་བརྒྱད་ཚོགས་ཀྱིས་ཉེས་ན་ཆད་པའི་
ལས། །གྲོང་ཁྱེར་འཇོམས་ཞིང་སྡེ་བརྒྱད་འགུམས་པར་བགྱིད། །ཅེས་སྨྲས་ཏེ། སྡེ་བརྒྱད་ལ་ཏྲི་ཤཱུ་ལ་གདེངས་པ་དང་། ཀླུའི་རྒྱལ་པོ་གཙུག་ན་རིན་ཆེན་དང་། དྲི་ཟའི་རྒྱལ་པོ་ཟུར་ཕུད་ལྔ་མ་དང་། གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་དང་། ལྷ་མ་ཡིན་གྱི་རྒྱལ་པོ་ཐགས་བཟངས་
རིས་དང་། མིའམ་ཅིའི་རྒྱལ་པོ་ལྗོན་པ་རྟ་མགོ་ཅན་དང་། གྲུལ་བུམ་གྱི་རྒྱལ་པོ་སྦྲུལ་མགོ་དགུ་པ་དང་། ནམ་མཁའ་ལྡིང་གི་རྒྱལ་པོ་གསེར་མིག་ཅན་ལ་སོགས་པ་འཁོར་མང་པོ་དང་བཅས་པ་དགའ་བའི་མདངས་ཕྱུང་སྟེ། སེང་གེ་ལ་རིན་པོ་ཆེའི་རྒྱན་ཕུལ་ལོ། །དེ་ནས་སའི་འོག་ན་
གནས་པའི་ཀླུ་ལ་བསྡིགས་ཏེ། སྙིང་རྗེའི་སྟོབས་ཀྱིས་སེམས་ཅན་དོན་བྱས་པས། །རང་གི་གྲོགས་པོས་སྤངས་ནས་གཅིག་པུ་ལུས། །ཀླུ་ཚོགས་རྣམས་ཀྱིས་ཉེས་ན་ཆད་པའི་ལས། །གྲོང་ཁྱེར་འཇོམས་ཤིང་ཀླུ་རྣམས་འགུམས་པར་བགྱིད། །ཅེས་སྨྲས་ཏེ། རྒྱ་མཚོ་ཆེན་པོ་ཏྲི་ཤཱུ་ལས་
དཀྲུགས་པ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་བ་རུ་ཎ་དང་། ཀླུའི་རྒྱལ་པོ་འཇོག་པོ་དང་། དེ་དག་ལ་སོགས་པ་རྫུ་འཕྲུལ་དང་ལྡན་པ། འོད་དང་ལྡན་པ། ལྷ་དང་ལྷ་མ་ཡིན་གྱི་གཡུལ་མྱོང་བར་བྱེད་པ། ཀླུའི་རྒྱལ་པོ་འབུམ་ཕྲག་དྲུག་གཡོག་དང་འཁོར་དུ་བཅས་པ་འདུས་ཏེ། དགའ་བའི་

མདངས་ཕྱུང་ནས་ཀླུའི་རྒྱལ་པོ་བ་རུ་ཎ་སྦྲུལ་དཀར་པོ་གཅིག་ཏུ་བྱས་ནས་ཕྱག་འཚལ། བསྐོར་བ་ལན་གསུམ་བྱས་ཏེ། བྱང་ཆུབ་སེམས་དཔའ་སྙིང་རྗེ་ཅན། །ཁྱོད་ལ་བདག་ནི་སྐྱབས་སུ་མཆི། །ཀླུ་རྣམས་ཀུན་གྱི་མགོན་མཛོད་ཅིག །ཉམས་ན་ཀླུ་ཡི་གཤེད་མ་མཛོད། །
ཅེས་སྨྲས་ནས་ཏྲི་ཤཱུ་ལ་ལ་ལན་གསུམ་དཀྲིས་ཁ་བྱང་ཆུབ་སེམས་དཔའ་ལ་བསྒྱུར་ཕུཿཕུཿཞེས་བརྗོད་ཅིང་གུས་པས་ཁ་ནས་ཁྲག་འབྱིན་ཅིང་གནས་སོ། །ཀླུའི་རྒྱལ་པོ་གཞན་རྣམས་ཀྱང་ཐལ་མོ་སྦྱར་ནས། བསྐོར་བ་ལན་གསུམ་གསུམ་བྱས་ནས། །བྱང་ཆུབ་སེམས་དཔའ་སྙིང་རྗེ་ཅན། །
ཁྱོད་ལ་བདག་ཅག་སྐྱབས་སུ་མཆིའོ། །ཀླུ་རྣམས་ཐམས་ཅད་སྐྱབས་སུ་ཟུང་། །ཉམས་ན་ཀླུ་ཡི་གཤེད་མ་མཛོད། །ཅེས་སྨྲས་ནས་ཀླུ་ཆེན་པོ་བརྒྱད་སྦྲུལ་དཀར་པོ་གཅིག་ཏུ་བྱས་ནས་ཚངས་སྐུད་ལ་འཁྲིས་སོ། །ཀླུའི་རྒྱལ་པོ་དེ་རྣམས་ཀྱང་བདག་ཅག་ནི་བྲན་བགྱིད་དོ། །ཅི་བཀའ་
སྩལ་པ་ཉན་ནོ་ཞེས་སྨྲས་ནས་ཀླུ་རྣམས་སོ་སོའི་གནས་སུ་དེངས་སོ། །འཇམ་དཔལ་བྱང་ཆུབ་སེམས་དཔའ་དེ་ནི་སྙིང་རྗེ་ཀླུ་འདུལ་ཞེས་བྱའོ། །སྙིང་ནད་སེལ་བ་ཞེས་བྱ་བའོ། །འཇམ་དཔལ་དེ་ལྟར་སྔོན་གྱི་བྱང་ཆུབ་སེམས་དཔའ་ཤེས་རབ་ཆེན་པོ་དེ་འཇམ་དཔལ་སྨྲ་བའི་སེང་གེ་ཁྱོད་ཉིད་ཡིན་ནོ། །
དེའི་དུས་ཀྱི་བྱང་ཆུབ་སེམས་དཔའ་སྙིང་རྗེ་མཆོག་དེ་ནི་ད་ལྟའི་འཕགས་པ་སྤྱན་རས་གཟིགས་དབང་ཕྱུག་སེང་གེ་སྒྲ་ཀླུའི་དེད་དཔོན་ཆེན་པོ་འདི་ཉིད་ཡིན་ནོ། །འཇམ་དཔལ་ངས་རྒྱལ་པོ་ཆེན་པོ་དེའི་དོན་དུ་ཐུགས་རྗེ་ཆེན་པོའི་སྔགས་བརྗོད་པར་བྱའོ། །ཡིད་ལ་ཟུང་ཤིག །ན་མོ་རཏྣ་ཏྲ་ཡཱ་ཡ། ན་མ་
ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་དྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ་བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ་ཀ་རོ་ཊེ། ཙི་ཏི་ཛྭ་ལ་ཀ་རོ་ཏི་བཱི་ར་ཡེ་སྭཱ་ཧཱ། གཟུངས་འདི་ནི་སངས་རྒྱས་བྱེ་བ་ཕྲག་བརྒྱད་ཅུས་གསུངས་ལ། ད་ལྟ་རང་ཉིད་ཀྱིས་བརྗོད་པའོ། །འདིའི་
ཆོ་ག་ནི་མི་དགོས་པས་ལས་ཐམས་ཅད་འགྲུབ་པའོ། །བཅོམ་ལྡན་འདས་སྤྱན་རས་གཟིགས་དབང་ཕྱུག་སེང་གེ་སྒྲའི་སྐུ་ལུགས་མའམ་བྲིས་སྐུའི་སྤྱན་སྔར་བའི་ལྕི་བ་ས་ལ་མ་ལྷུང་བས་སོ་སོར་མ་འདྲེས་པར་མཎྜལ་བརྒྱད་བྱས་ཏེ། མཎྜལ་རེ་རེ་ལ་མེ་ཏོག་ཚོམ་བུ་ལྔ་ལྔ་བཀྲམ་སྟེ། མེ་ཏོག་དང་།

བདུག་པ་དང་། སྤོས་དང་། ཕྲེང་བ་དང་། ཕྱེ་མ་རྣམས་ཀྱིས་མཆོད་ནས། མཎྜལ་རེ་རེ་ལ་གཟུངས་ལན་བཅུ་གསུམ་བཅུ་གསུམ་གྱི་བར་དུ་བཟླས་ལ་ལྕི་བ་དེ་བསྡུས་ཏེ། ལྕི་བ་ལྷག་མ་ལ་བསྔགས་ཤིང་ནད་པ་ལ་བྱུགས་ན་ནད་ཐམས་ཅད་ཉེ་བར་ཞི་བར་འགྱུར་རོ། །ལྷ་དང་ཀླུ་ལ་སོགས་
པའི་དུག་གི་ནད་ཐམས་ཅད་ཞི་བར་འགྱུར་རོ། །ཞག་ཉི་ཤུ་རྩ་གཅིག་ལ་གྲུབ་པར་མ་གྱུར་ན། འཇམ་དཔལ་ཐུགས་རྗེ་ཆེན་པོ་ཉིད་ཀྱིས་མཚམས་མེད་པ་ལྔའི་ལས་བྱས་པ་ཡིན་ནོ། །འཇམ་དཔལ་ཐུགས་རྗེ་ཆེན་པོ་ཉིད་ཀྱིས་དམ་བཅས་པའི་ཚིག་གོ། །འཇམ་དཔལ་རྒྱལ་པོ་ཆེན་པོའི་
གནོད་པ་ནི་གཟུངས་འདིས་སྙིང་ནད་འབར་བ་ལས་གྲོལ་ནས་སྐྱེ་བ་ཕྱི་མ་ལ་བདེ་བ་ཅན་གྱི་ཞིང་ཁམས་སུ་སྐྱེ་བར་འགྱུར་རོ། །འཇམ་དཔལ་ཉོན་ཅིག །སངས་རྒྱས་འོད་དཔག་མེད་ལ་སོགས་པ་སངས་རྒྱས་བྱེ་བ་ཕྲག་དགུ་བཅུ་རྩ་དགུས་སྙིང་པོ་འདི་གསུངས་སོ། །ཨོྃ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ།
ད་ལྟ་ང་ཉིད་ཀྱིས་བརྗོད་དེ། རིག་སྔགས་ཀྱི་སྙིང་པོ་འདི་ལན་ཅིག་བརྗོད་པས་སྡིག་པ་ཀུན་ལས་གྲོལ་བར་འགྱུར་རོ། །སྲིད་པ་ཉམ་ངར་འགྲོ་མི་འགྱུར། །ལུས་ལ་མཚོན་གྱིས་ཚུགས་མི་འགྱུར། །དགྲ་དང་ཆོམ་པོས་མི་ཚུགས་ཤིང་། །ཀླུ་ལ་སོགས་པས་འཚེ་མི་འགྱུར། །རྟག་ཏུ་
དཔལ་དང་ལྡན་པར་འགྱུར། །བུད་མེད་ལུས་སུ་མི་འགྱུར་ཞིང་། །རྟག་ཏུ་སྐྱེ་བ་དྲན་པར་འགྱུར། །ཤི་ནས་བདེ་བ་ཅན་དུ་འགྲོ། །འཇམ་དཔལ་དེ་བཞིན་གཤེགས་པ་རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། ལོག་པར་དད་སེལ་དང་། གསེར་ཐུབ་
དང་། འོད་སྲུང་གིས་ཀྱང་གསང་སྔགས་འདི་གསུངས་ལ། ད་ལྟ་ཤཱཀྱ་ཐུབ་པ་ངས་ཀྱང་བརྗོད་པ་སྟེ། ན་མོ་རཏྣ་ཏྲ་ཡཱ་ཡ། ན་མོ་ཧ་ཡ་གྲཱི་བཱ་ཡ། ན་མོ་ལོ་ཀི་ཤྭ་རཱ་ཡ། ཏདྱ་ཐཱ། ཨོྃ་ཧྲཱིཿཀུ་ལུ་ཡུ་ལུ་ནཱི་ལ་ཀདྛ། ཧུ་ལུ་ཧུ་ལུ། ཏིཥྛ་ཏིཥྛ། བན་དྷ་བན་དྷ། མཱ་ར་ཡ་མཱ་ར་ཡ། ཧཱ་ཧཱ་
ཧཱ་ཧཱ། བཛྲ་ཀྲོ་དྷ་ཧ་ཡ་གྲཱི་བ་ཧྲཱིཿཧཱུྃ་ཕཊ། འཇམ་དཔལ་གཟུངས་འདི་འཕགས་པ་སྤྱན་རས་གཟིགས་དབང་ཕྱུག་ཉིད་པདྨ་ཧ་ཡ་གྲཱི་བའི་སྔགས་ཡིན་ཏེ། ལན་ཅིག་ཀློག་པར་བྱེད་པའི་མི། །སྡིག་པ་ཀུན་ལས་གྲོལ་འགྱུར་ཞིང་། །ངན་སོང་སྒོ་རྣམས་གཅོད་པར་འགྱུར། །ཀླུ་སོགས་

གདོན་གྱིས་འཚེ་མི་འགྱུར། །བྱད་དང་དུག་ལས་གྲོལ་འགྱུར་ཞིང་། །སངས་རྒྱས་ཀུན་གྱི་གསུང་ཡིན་ནོ། །བྱེ་བ་གྲངས་མེད་མཐུ་ལས་བྱུང་། །དེ་ཡི་ཡོན་ཏན་དཔག་ཏུ་མེད། །ལན་ཅིག་བཀླགས་ན་སྡིག་པ་སེལ། །ལན་གཉིས་བཀླགས་པས་དཔལ་དང་ལྡན། །
གསུམ་གྱིས་ཚེ་རྣམས་རིང་བར་འགྱུར། །འབུམ་ཕྲག་བཅུ་ཡིས་ཞལ་མཐོང་འགྱུར། །པདྨ་ཅན་གྱི་ཞིང་དེར་འགྲོ། །འཇམ་དཔལ་མི་གཞན་དག་ལ་ནི། །ཁྲག་དང་མཁྲིས་པ་ལས་གྱུར་པ་དང་། །རླུང་དང་གྲང་བ་ལས་གྱུར་པ་དང་། །ཀླུ་རྒྱལ་རིགས་ཀྱིས་ཟིན་པ་དང་། །ཀླུ་བྲམ་ཟེའི་
རིགས་ཀྱིས་ཟིན་པ་དང་། ཀླུ་གདོལ་པ་དང་ད་མངས་རིགས་ཀྱིས་ཟིན་པ་ནི་སྙིང་མི་དགའ་བ་དང་། སྙིང་ན་བ་དང་། དབུགས་མི་བདེ་བ་དང་། ལྟོ་རྒྱབ་ཏུ་ན་བ་དང་། ཀླད་ཀོར་དུ་ན་བ་དང་། གཞོགས་ཕྱེད་ན་བ་དང་། མ་ཞུ་བ་དང་། སྦོས་པ་དང་། ཞ་གྲུམ་གྱིས་བཏབ་པ་དང་། སྦྲུམ་པ་ལྟ་
བུར་ན་བ་དང་། སྲོག་ཆགས་སུ་ན་བ་དང་། ཚིགས་དང་ཤ་ཁོལ་བུར་ན་བ་དང་། ཟ་ཁུ་ཅན་དང་། ལུད་པ་གློ་ཅན་དང་། རུས་ཁོལ་དུ་ན་བ་དང་། འཕྲེས་པ་དང་། ཞ་བ་དང་། ཡིག་མི་བདེ་བ་དང་། ཐོར་པ་ལྟ་བུའི་ནད་དང་། སྐྲན་ཅན་དང་། དམུ་ཆུ་ཅན་དང་། འབྲས་དང་།
མེ་དཔལ་དང་། ལྷོག་པ་དང་། གག་པ་དང་། ཆུ་ཐིག་ཅན་དང་། གྲང་ལྷང་ལྷང་དང་། ཚ་ཙག་ཙག་ལ་སོགས་པའི་མཛེ་རིགས་ཅན་དང་། ཕོལ་མིག་དང་བཅས་པ་དང་། ལྷ་དང་། བདུད་དང་། ཚངས་པ་དང་། གཤིན་རྗེ་དང་། བྲག་སྲིན་དང་། སེམས་འཁྲུག་གི་
གདོན་དང་། ཐབ་གཞོབ་དང་། མཚོ་སྨན་དང་། ཀླུ་ལ་སོགས་པས་ཟིན་པ་དང་། གནོད་སྦྱིན་དང་། འབྱུང་པོ་དང་། ལོག་འདྲེན་དང་། ཤ་ཟའི་གདོན་རྣམས་ཀྱིས་ཟིན་པ་དང་། ནད་སྣ་ཚོགས་འབྱུང་སྟེ། དེ་ཡང་མི་དགེ་བ་ལས་སྡུག་བསྔལ་འབྱུང་བ་ཡིན་ནོ། །བཅོམ་ལྡན་འདས་
ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ཉོན་ཅིག །སྙིང་པོ་གཟུངས་ཀྱི་ཆོ་ག་འདི། །དང་པོ་ཐུགས་རྗེ་ཆེན་པོ་ལ། །གུས་ཤིང་དད་པའི་སེམས་བསྐྱེད་ནས། །སྣུམ་པའི་ས་ལ་དཀྱིལ་འཁོར་བྱ། །ལྕི་བ་དྲིར་བཅས་བྱུགས་ནས་ནི། །ཚོན་

རྩི་ཁ་དོག་སྣ་ལྔ་ཡིས། །དཀྱིལ་འཁོར་པདྨ་ལྟ་བུ་བྲི། །བུམ་པ་གང་བ་ལྔ་དག་ཀྱང་། །ཕྱོགས་བཞི་དབུས་དང་ལྔ་རུ་གཞག །གང་བའི་གཏོར་མ་ལྔ་ཡང་བཤམས། །སེང་ལྡེང་ཕུར་བུ་ལྔ་ཡང་དགོད། །དར་གྱིས་དཀྲིས་པའི་མདའ་བཞི་དགོད། །ཚོན་སྐུད་ལྔ་ཡི་དྲ་བ་བྲེ། །འཕགས་པ་སྤྱན་རས་གཟིགས་
དབང་ཕྱུག་སེང་གེ་སྒྲ་ལ་ཕྱག་འཚལ་ལོ། །ཁྲོ་བོའི་རྒྱལ་པོ་རྟ་མགྲིན་ལ་ཕྱག་འཚལ་ལོ། །བཅོམ་ལྡན་འདས་མ་གོས་དཀར་མོ་ལ་ཕྱག་འཚལ་ལོ། །བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀླུའི་རྒྱལ་པོ་བ་རུ་ཎ་ལ་ཕྱག་འཚལ་ལོ། །ཨཱ་ཧྲཱིཿཧྲི་པྃ་རྟྃ་ནོྃ། ཡི་གེ་དྲུག་པའི་སྔགས་
འདི་ནི། བརྗོད་པས་སྡིག་པ་སྡུག་བསྔལ་སེལ་སྭཱ་ཧཱ། སངས་རྒྱས་མཆོད་ལ་བརྩོན་པར་བྱ། མེ་ཏོག་དང་། བདུག་པ་དང་། སྤོས་དང་། མེ་ཏོག་གི་ཕྲེང་བ་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། ཕྱེ་མ་དང་། རྒྱན་ཐམས་ཅད་ཀྱིས་མཆོད་ནས། སེང་ལྡེང་རྒྱ་ཤུག་མེ་བཏང་ལ། །ཚོན་
སྐུད་བཅང་ཞིང་འབྲུ་རྣམས་བསྲེག །རྨ་བྱ་རྨག་ཤད་ལྕུག་མ་ཡིས། །ཀླུ་ཡི་དུག་རྣམས་སེལ་བར་བྱེད། །ཧྲཱིཿནཱ་ག་ལེ་ལེ། ནཱ་ག་དུམ་བ་ལེ་ལེ། ནཱ་ག་ཕུཏ་ཕུཏ་ཧ་ལེ་ཧ་ལེ། ཧཱ་ལ་ཧཱ་ལ། སྥུ་ཊ་སྥུ་ཊ། ནཱ་ག་ཁྲོལ་ཁྲོལ་ཤིག་ཤིག་སྭཱ་ཧཱ། ཀླུ་དང་ལོག་འདྲེན་ཐམས་ཅད་ཀྱི་ཡིད་ཀྱི་དུག་དང་། མཐོང་བའི་དུག་དང་།
བཅིངས་པའི་དུག་དང་། ཁ་རླངས་ཀྱི་དུག་དང་། རེག་པའི་དུག་དང་། དུག་ཐམས་ཅད་ཕྱིར་ཕུད་ཅིག་སྭཱ་ཧཱ། དུག་འདིར་མ་འདུག་ཅིག །སྦྱིན་པར་བྱེད་པའི་གན་དུ་སོང་ཤིག །འཛིན་པའི་གན་དུ་སོང་ཤིག །མེའི་ནང་དུ་སོང་ཤིག །ཆུའི་ནང་དུ་སོང་ཤིག་ཞི་བར་གྱུར་ཅིག་སྭཱ་ཧཱ། འཇམ་དཔལ་འདི་དག་ནི་
དེ་བཞིན་གཤེགས་པས་སྤྱི་བོ་ནས་དབང་བསྐུར་བའོ། །ཧྲིཿབྲུྃ་ཨོཾ་ཧཱུྃ་ཁྃ། རིགས་ལྔས་དབང་བསྐུར་བའོ། །རྡོ་རྗེ་བསྲུང་བའི་མཆོག་ཏུ་འགྱུར། །བཀྲ་ཤིས་ལྷ་མོ་དཔལ་དང་ལྡན། །བསྙེན་གནས་ལ་ནི་གནས་གྱུར་ནས། །དཀོན་མཆོག་རྗེས་དྲན་སེམས་བསྐྱེད་ནས། །བུམ་ཆུ་དག་པས་ལས་སྒྲིབ་
སེལ། །ལུས་ངག་སེམས་ཀྱི་དག་པ་ཐོབ། །ཕ་རོལ་ཕྱིན་དྲུག་གནས་འགྱུར་ཞིང་། །སངས་རྒྱས་སེམས་ཅན་མཁྱེན་པར་འགྱུར། །ཏིང་འཛིན་ཐམས་ཅད་མངོན་དུ་འགྱུར། །བུ་མོ་གཞོན་ནུས་བཀལ་བ་ཡི། །སྐུད་པ་དཀར་པོ་སུམ་སྒྲིལ་ལ། །བཟླས་བརྗོད་ཉི་ཤུ་བརྒྱད་བྱས་ནས། །མགུལ་དུ་

བཏགས་ན་ནད་ལས་གྲོལ། །ནད་ལ་ཕན་པའི་སྨན་རྣམས་ལ། །གཟུངས་སྔགས་བཟླས་ཤིང་བཏབ་གྱུར་ན། །ནད་རྣམས་ཀུན་ལས་གྲོལ་བར་འགྱུར། །ཆུ་ལ་གཟུངས་སྔགས་མང་བཟླས་ན། །ཀླུ་ནད་ཁོང་དུ་སེལ་བར་འགྱུར། །ལོ་ཏོག་ཟ་བ་ཁ་བཅིངས་ན། །བྱེ་མ་
ས་དང་ཐལ་བས་སེལ། །ཧ་ཅང་ཆར་པ་ཆེས་པ་ན། །ལྷ་ལ་ཕུལ་བའི་རྙིང་པ་ལ། །ཁམ་ཕོར་སར་པའི་ནང་དུ་ཡང་། །མེ་ཏོག་གཙང་མ་བླངས་ནས་ནི། །བསྲེགས་ན་ཆར་པ་འཆད་པར་འགྱུར། །སེར་བ་དྲག་པོ་འོང་བ་ན། །ཐལ་ཆེན་ཡུངས་ཀར་བཟླས་བརྗོད་ཀྱིས། །
སེར་བ་ཉ་ལྕིབས་ལྕུག་མ་དང་། །ལྕུམ་པོ་བཏགས་ཏེ་བཙུགས་གྱུར་ན། །སེར་བ་འཆད་པར་འགྱུར་བ་ཡིན། །ལྷ་ཀླུ་དྲི་ཟ་ལ་སོགས་པའི། །གདོན་ནི་གནོད་པར་གྱུར་པ་ལ། །དཀྱིལ་འཁོར་འདོམ་གང་གྲུ་བཞི་ལ། །བུམ་པ་གཙང་མ་ལྔ་བཞག་སྟེ། །སྨན་སྦྱར་ཆུས་ནི་གང་བ་ལ། །བཟླས་
བརྗོད་བརྒྱ་ནི་རྩ་བརྒྱད་བཟླས། །སློབ་མ་གོས་ཟས་དཀར་པོར་སྦྱར། །དཀྱིལ་འཁོར་དེ་ཡི་ནང་དུ་གཞུག །བུམ་པའི་ཆུ་ཡིས་བཀྲུ་བར་བྱ། །ནད་དང་གནོད་པ་ཀུན་ལས་ཐར། །ཀླུ་སོགས་གདོན་རྣམས་དཔག་མེད་ཀྱིས། །གླགས་ཀྱང་རྙེད་པར་མི་འགྱུར་རོ། །བུས་པ་གདོན་གྱིས་འཇིགས་
པ་ལས། །གི་ཝང་གིས་ནི་སྲུང་འཁོར་བྲི། །ཡུངས་ཀར་དག་དང་བཅས་ཏེ་གདགས། །བུས་པ་གདོན་དང་ནད་ལས་ཐར། །ལམ་དུ་ཞུགས་ཏེ་འགྲོ་བ་ན། །ཐུ་བ་གཡས་པའི་གོས་ཀྱི་གྲྭར། །བཟླས་བརྗོད་བདུན་བྱས་མདུད་པ་བོར། །སོང་ན་བདེ་ཞིང་དོན་ཡང་འགྲུབ། །
རྟ་ལ་སོགས་པའི་ཕྱུགས་རྣམས་ལ། །ཆུ་དང་ཡུངས་ཀར་བཅས་པ་ལ། །བཟླས་ནས་གཏོར་ན་བདེ་བར་འགྱུར། །མི་ནད་ཕྱུགས་ནད་ཐམས་ཅད་ལ། །ཡུངས་ཀར་དང་ནི་བུམ་པའི་ཆུས། །བཀྲུ་ཞིང་བཏགས་ན་མི་ནད་ཞི། །ཨ་མྲ་རི་ཡི་གཟུངས་སེལ་ལྟར། །ལས་
རྣམས་ཐམས་ཅད་འགྲུབ་པར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་རྒྱལ་པོ་འདིའི་ཁོང་ན་ཀླུའི་དུག་གིས་གང་ནས་འདུག་སྟེ། འདི་ནི་ཀླུའི་རྒྱལ་པོ་བ་རུ་ཎ་འདི་ཡིས་ཀླུ་ཐམས་ཅད་ལ་དབང་བྱེད་པ་

ཡིན་པས་འདིས་དབྱུང་བར་བྱའོ། །བཅོམ་ལྡན་འདས་འཇིག་རྟེན་དབང་ཕྱུག་སེང་གེ་སྒྲ་ལ་ཕྱག་འཚལ་ལོ། །ཀླུའི་རྒྱལ་པོ་བ་རུ་ཎ་ལ་ཕྱག་འཚལ་ལོ། །ཀླུའི་རྒྱལ་པོ་ཏཀྵ་ཀ་ལ་ཕྱག་འཚལ་ལོ། །ཀླུའི་རྒྱལ་པོ་མཐའ་ཡས་ལ་ཕྱག་འཚལ་ལོ། །ཀླུའི་རྒྱལ་པོ་པདྨ་ལ་ཕྱག་འཚལ་
ལོ། །ཀླུའི་རྒྱལ་པོ་པདྨ་ཆེན་པོ་ལ་ཕྱག་འཚལ་ལོ། །ཀླུའི་རྒྱལ་པོ་དུངསྐྱོང་ལ་ཕྱག་འཚལ་ལོ། །ཀླུའི་རྒྱལ་པོ་རིགས་ལྡན་ལ་ཕྱག་འཚལ་ལོ། །ཀླུའི་རྒྱལ་པོ་དགའ་བོ་ལ་ཕྱག་འཚལ་ལོ། །ཀླུའི་རྒྱལ་པོ་ནོར་རྒྱས་ལ་ཕྱག་འཚལ་ལོ། །ཨོྃ་བ་རུ་ཎཱ་ཡ་སྭཱ་ཧཱ། ཨོྃ་ཨ་ནནྟ་ཡ་
སྭཱ་ཧཱ། ཨོྃ་བཱ་སུ་ཀཱ་ཡ་སྭཱ་ཧཱ། ཨོྃ་ཏཀྵ་ཀཱ་ཡ་སྭཱ་ཧཱ། ཨོྃ་ཀར་ཀོ་ཊཱ་ཡ་སྭཱ་ཧཱ། ཨོྃ་པདྨཱ་ཡ་སྭཱ་ཧཱ། ཨོྃ་མ་ཧཱ་པདྨཱ་ཡ་སྭཱ་ཧཱ། ཨོྃ་ཤརྑ་པཱ་ལཱ་ཡ་སྭཱ་ཧཱ། ཨོྃ་ཀུ་ལི་ཀཱ་ཡ་སྭཱ་ཧཱ། ཀླུ་ཡི་གཟུགས་ནི་མང་པོ་ཡང་། །དཀར་གསུམ་མངར་གསུམ་འབྲས་ཟན་ལ། །ལེགས་བྱས་ཁ་དོག་
བསྒྱུར་བྱས་ལ། །མེ་ཏོག་སྤོས་དང་བྱུག་པ་དང་། །མར་མེ་ཞལ་ཟས་སྒྲ་སྙན་དང་། །གདུགས་དང་རྒྱལ་མཚན་མེ་ཏོག་ཕྲེང་། །ཚངས་པའི་སྐུད་པས་མཉེས་པར་བྱ། །རྩ་བ་ལོ་མ་སྡོང་བུ་དང་། །མེ་ཏོག་འབྲས་བུ་སྨན་གྱིས་མཆོད། །རྨ་བྱ་གཟུངས་མོ་མེ་ལོང་གིས། །རྒྱལ་
པོ་ཁོང་གི་དུག་ཐོན་ཅིག །རིན་ཆེན་རྨག་ཤད་མཆོད་པའི་རྟེན། །མི་ལྡོག་པ་ཡི་རྫས་སུ་ཆོངས། །བུམ་པ་གཏེར་གྱིས་གང་བ་མཛེས། །སྲོག་ཆགས་ཡིད་འོང་གཟུགས་ཀྱིས་མཆོད། །ཞི་འགྱུར་འདི་ལ་ཐེ་ཚོམ་མེད། །ཀླུ་ཡི་རྒྱལ་པོ་འཇོག་པོ་ཡིས། །ཟིན་ཀྱང་སྐད་ཅིག་
གཅིག་ལ་ཐོན། །འཇམ་དཔལ་འདི་གཞན་གྱི་མཐུ་མ་ཡིན་ཏེ། འཕགས་པ་སྤྱན་རས་གཟིགས་དབང་ཕྱུག་དེའི་མཐུའོ། །སྟོབས་སོ་བྱིན་གྱིས་བརླབས་སོ། །ཐུགས་རྗེ་དང་ལྡན་པ་འདིའི་ཡོན་ཏན་བརྗོད་ཀྱིས་མི་ལང་ཡང་བདག་གིས་ཆ་ཤས་ཙམ་ཞིག་བརྗོད་ན། ཨོྃ་བཅོམ་ལྡན་
འདས། བྱ་བ་བྱས་ཤིང་བྱེད་པ་བྱས། །ཁུར་བོར་བདག་དོན་རྗེས་སུ་བརྙེས། །སྲིད་པར་སྦྱོར་བ་ཡོངས་སུ་ཟད། །ཡང་དག་བཀའ་ལས་རྣམ་པར་གྲོལ། །སེམས་དཔའ་དབང་བསྒྱུར་ཐམས་ཅད་ཀྱི། །མཆོག་ཏུ་ཕ་རོལ་ཕྱིན་ཐོབ་པ། །སྲིད་ལས་རྒལ་ཞིང་ཚོགས་གཉིས་རྫོགས། །

ཨཱཿགཞན་ལ་ཕན་བརྩོན་ཐུགས་རྗེ་ཅན། །སེམས་ཅན་ཀུན་ལ་མཆོག་ཏུ་བྱམས། །ཁམས་གསུམ་ཀུན་གྱི་གཉེན་གཅིག་པུ། །མཐའ་ཡས་སེམས་ཅན་སྒྲོལ་ལ་མཁས། །ཧྲཱིཿའགྲོ་བ་ཉམ་ཐག་ཀུན་ཏུ་སྐྱོབ། །དྲི་མ་གསུམ་སྤངས་ཕ་རོལ་ཕྱིན། །མངོན་ཤེས་
དྲུག་བརྙེས་ནྱ་གྲོ་བུ། །སྐྱེས་བུ་ཆེན་པོའི་མཚན་རྣམས་ནི། །སུམ་ཅུ་རྩ་གཉིས་དག་དང་ལྡན། །དཔེ་བྱད་བཟང་པོ་བརྒྱད་ཅུས་མཛེས། །སྐུ་མདོག་ཤེལ་གྱི་ཁ་དོག་འདྲ། །གངས་རི་ཉི་ཤར་ལྟ་བུར་མཚོན། །སྐུ་ཚད་ཆེ་ལ་འོད་ཟེར་འབར། །རིགས་ལྔ་སངས་རྒྱས་སྐུ་ལ་འཕྲོ། །
དབུ་སྐྲ་ཐོར་ཚུགས་གྱེན་ལ་བརྫེས། །དབུ་ལ་འོད་དཔག་མེད་པ་བཞུགས། །ཀླུ་རྣམས་ཐམས་ཅད་འདུལ་མཛད་པ། །རྩེ་གསུམ་སྦྲུལ་གྱིས་རབ་ཏུ་དཀྲིས། །རིགས་གསུམ་མགོན་པོའི་བྱིན་རླབས་འཛིན། །དུག་གསུམ་རྩད་ནས་གཅོད་ལ་བསྟོད། །སྐྱོན་གྱིས་མ་གོས་པདྨ་བསྣམས། །
ཤེས་རབ་ཕུན་སུམ་རལ་གྲི་འབར། །ཉོན་མོངས་དག་པ་བྲམ་ཟེའི་མགོ། །མེ་ཏོག་དྲི་ཞིམ་ཚོགས་ཀྱིས་བཀང་། །ཀླུ་རྣམས་ཀུན་ནས་དབང་བསྡུས་པས། །སྦྲུལ་གྱི་ཚངས་སྐུད་མཛེས་ལ་བསྟོད། །སིཾ་ཧ། པདྨ་དག་གི་གདན་ལ་བཞུགས། །བདུད་བཞི་ཟིལ་གྱིས་གནོན་མཛད་པ། །
སེང་གེ་དཀར་པོའི་གདན་ལ་བཞུགས། །འདོད་པའི་དོན་རྣམས་བསྒྲུབ་པའི་ཕྱིར། །རིན་ཆེན་སྣ་ཚོགས་རྒྱན་གྱིས་བརྒྱན། །བ་སྤུ་ཉག་མ་རེ་རེ་ཡང་། །སེམས་ཅན་ཀུན་གྱི་མཆོག་ཏུ་འགྱུར། །ཕྱག་འཚལ་ཐུགས་རྗེ་ཅན་ལ་བསྟོད། །ཏཱ། དམ་ཆོས་རྒྱལ་ཚབ་དབང་བསྐུར་བ། །
ལྷ་མོ་སྒྲོལ་མ་རྗེས་སུ་འབྲང་། །འཇིགས་པ་བརྒྱད་སྐྱོབ་སྐུ་མདོག་ལྗང་། །གནོད་པ་སེལ་བ་མི་འཇིགས་སྦྱིན། །ཨུཏྤལ་ཐུགས་རྗེའི་བདག་ཉིད་ཅན། །བཏུད་དེ་སྤྲུལ་པ་མང་པོ་འགྱེད། །ཧཱུྃ། གོས་དཀར་མ་ནི་བཀའ་བཞིན་བྱེད། །ཡིད་བཞིན་འཁོར་ལོ་བདེ་བར་བསྐོར། །འདོད་
པའི་དོན་ཡོད་སྡུག་བསྔལ་ཞི། །འཇིགས་པ་བརྒྱད་པོ་སེལ་བ་བསྟོད། །ཕཊ། ཧ་ཡ་གྲཱི་བ་ཁྲོ་བོའི་སྐུ། །འཕགས་པ་རྟ་མགྲིན་བདུད་བཞི་འཇོམས། །ཀྲོ་དྷ་མགྲིན་སྔོན་གདུག་པ་འདུལ། །ཀླུ་བདུད་འདུལ་མཛད་ཧཱུྃ་གིས་བསྟོད། ནཱ །ནམ་མཁའ་ཀླུ་རྒྱལ་པ་རུ་ཎ། །ཆུ་ལྷ་སྟོན་

པའི་ཞལ་མཐོང་ཞིང་། །བསྟན་ལ་རབ་དགའ་ཀླུ་རྣམས་འདུལ། །ས་དང་པོ་ཡི་བདེན་པ་མཐོང་། །བདེ་བར་གཤེགས་པའི་རིང་བསྲེལ་འཛིན། །ཀླུ་རྒྱལ་བྱང་ཆུབ་སེམས་ལ་བསྟོད། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨོྃ་ཀ་ཊེ་བི་ཀ་ཊེ་ནི་ཀ་ཊེ། ཀ་ཏཾ་ཀ་ར་སྭཱ་ཧཱ། གང་གིས་བསྟོད་
ཅིང་ཟློས་པ་དེ་མཚམས་མེད་པ་ལྔ་བྱས་པའི་ལས་ཀྱི་སྒྲིབ་པ་ཡང་ཡོངས་སུ་བྱང་བར་འགྱུར་རོ། །དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །གསང་སྔགས་ཐམས་ཅད་བཟླས་པར་འགྱུར་རོ། །བསྐལ་པ་སྟོང་གི་བར་དུང་ན་སོང་དུ་མི་སྐྱེའོ། །བུད་མེད་ལུས་སུ་མི་སྐྱེའོ། །
སུ་ཞིག་ནང་པར་ལངས་ནས་ཆུ་དྲི་ཞིམ་པོས་ཁྲུས་བྱས་ཏེ། གཙང་སྦྲ་ལ་གནས་ནས། ཐུགས་རྗེ་ཆེན་པོ་སེང་གེ་སྒྲའི་སྤྱན་སྔར་གཟུངས་འདི་ཀློག་གམ། འདྲི་འམ། འཆང་ངམ། ཀློག་ཏུ་འཇུག་གམ་ཁ་ཏོན་ཏུ་བཏོན་ནས་སྙིང་པོ་དང་གཟུངས་སྔགས་ཟློས་ན་ནི་དེའི་ལུས་ལ་མཛེ་
དང་། ཤུ་བ་དང་། ཕོལ་མིག་དང་། འབྲས་དང་། བས་ལྡགས་དང་། མེ་དཔལ་དང་། གཡན་པ་དང་། ལྷོག་པ་དང་། གག་པ་དང་། སྤོས་པ་དང་། དམུ་ཆུ་དང་། སྐེམ་པ་དང་། མཁལ་མ་རྡོལ་བ་དང་། དོན་སྣོད་འདུས་པ་དང་། བྱད་ཀྱི་དཀྱིལ་འཁོར་ལ་
ནད་སྣ་ཚོགས་འདུས་པ་དང་། གློ་བ་ན་བ་དང་། དབུགས་མི་བདེ་བ་དང་། རླུང་མཁྲིས་བད་ཀན་འདུས་པ་ཐམས་ཅད་ལས་ཐར་བར་འགྱུར་རོ། །འཇམ་དཔལ་གཟུངས་འདི་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའོ། །སུ་ཞིག་གམ་རྒྱལ་པོ་ཆེན་པོ་
དེས་གཟུངས་འདི་གླེགས་བམ་ལ་བྲིས་ཏེ་འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། མཆོད་པ་དང་། ཡི་གེར་འདྲི་བ་དང་། གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རྒྱལ་པོ་ཡུལ་འཁོར་དང་བཅས་པའམ། གཙུག་ལག་
ཁང་དུ་གླེགས་བམ་འདི་འཆང་ན། དཔལ་ནག་པོ་ཆེན་པོ་དང་། རྒྱལ་པོ་ཆེན་པོ་བཞི་དང་། ཀླུའི་རྒྱལ་པོ་བ་རུ་ཎ་དང་། ཀླུ་ཆེན་པོ་བརྒྱད་རྣམས་སླད་བཞིན་འབྲང་ཞིང་། དཔག་ཚད་སྟོང་ཚུན་ཆད་དུ་སླར་རྒོལ་བ་དང་། ལྷ་དང་། ཀླུ་དང་། གནོད་སྦྱིན་དང་། གདོན་མ་རུངས་པ་

ཐམས་ཅད་དང་། ལོག་པར་འདྲེན་པ་དང་། ཕྱིར་རྒོལ་བ་ཐམས་ཅད་འཇོམས་པར་འགྱུར་རོ། །བསྒོམ་ཉེས་པ་དང་། བྲི་ཉེས་པ་དང་། སྔགས་ནོར་བ་དང་། ཕྱག་རྒྱ་ནོར་བ་དང་། བཤད་ཉེས་པ་དང་། མཉན་པ་ནོར་བ་ཡང་གཟུངས་འདི་བཀླགས་པས་དག་པར་འགྱུར་རོ། །
གཟུངས་འདིས་སུ་ལ་བསྲུང་བ་བྱས་པ་དང་། ཡོངས་སུ་བསྐྱབ་པ་བྱས་པ་དང་། བསྐྱང་བ་དང་། ཞི་བ་དང་། བདེ་ལེགས་སུ་བྱས་པ་དེ་ལ་མཚོན་དང་། དུག་དང་། དབྱིག་དུག་དང་། བྱད་དང་གཤེད་མ་དང་། རིམས་དང་། གནོད་པ་ཐམས་ཅད་དང་། དུས་མ་ཡིན་པར་འཆི་བས་མི་
ཚུགས་སོ། །གནོད་པར་བྱེད་པ་ཚར་གཅོད་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་འཇམ་དཔལ་དང་། ཉན་ཐོས་ཆེན་པོ་ཤ་ར་དྭ་ཏིའི་བུ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་
ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྤྱན་རས་གཟིགས་དབང་ཕྱུག་སེང་གེ་སྒྲ་ཞེས་བྱ་བའི་གཟུངས་རྫོགས་སོ།། །།ཁ་ཆེའི་ཡུལ་དུར་ཁྲོད་འབྲིས་ཀ་རང་བྱུང་གི་མཆོད་རྟེན་རྩར། དངོས་གྲུབ་བརྙེས་པའི་རྗེ་བཙུན་མ་རྡོ་རྗེ་སེམས་མ་དང་།
སྒྲ་བསྒྱུར་གྱི་ལོཙྪ་བ་འགར་ཤེས་རབ་འབྱུང་གནས་ཞེས་བྱ་བས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོྃ་ཨ་ཀ་ཊེ། བི་ཀ་
ཊེ། ནི་ཀ་ཊེ། ཀ་ཏཾ་ཀ་ཊེ། ཀ་རོ་ཊེ། ཀ་རོ་ཊ། བཱིརྱེ་སྭཱ་ཧཱ། བཅོམ་ལྡན་འདས་དེའི་སྤྱན་སྔར་བའི་ལྕི་བ་ས་ལ་མ་ལྷུང་བས་སོ་སོར་མཎྜལ་བརྒྱད་བྱས་ལ་མཎྜལ་རེ་རེ་ལ་ལན་བཅུ་གསུམ་གྱི་བར་དུ་བཟླས་ལ། ལྕི་བ་ལྷག་མ་ལ་སྔགས་བཟླས་ཏེ་ནད་པ་ལ་ཉེ་བར་བྱུགས་ན་ནད་ཐམས་ཅད་ཞི་བར་
འགྱུར་རོ། །གལ་ཏེ་ཉི་མ་བདུན་ནམ། བཅུ་གསུམ་མམ། ཉི་ཤུ་རྩ་གཅིག་གིས་འགྲུབ་སྟེ། མཚམས་མེད་པ་ལྔ་བྱས་པ་ནི་མ་ཡིན་ནོ། །དེ་ལྟར་མ་གྲུབ་ན་བདག་གིས་མཚམས་མེད་པ་ལྔ་བྱས་པར་འགྱུར་རོ། །སེང་གེ་སྒྲའི་གཟུངས་རྫོགས་སོ།། །།རྒྱ་གར་གྱི་མཁན་

པོ་ངག་གི་དབང་ཕྱུག་དང་། ཀློགས་སྐྱ་ཤེས་རབ་བརྩེགས་ཀྱིས་བསྒྱུར་བའོ།། ༄༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་སྱ་ནཱ་མ་ཨཥྚ་ཤ་ཏ་ཀཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་མཚན་བརྒྱ་རྩ་བརྒྱད་པ། སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་གནས། ཕོ་བྲང་རི་པོ་ཊ་ལའི་རྩེ་མོ་ན། མེ་ཏོག་དྲི་ཞིམ་པོ་སྣ་ཚོགས་ཀྱིས་བཀྲམ་པ། འཛམ་བུ་ན་དའི་གསེར་
གྱི་ཁ་དོག་དང་འདྲ་བ། རིན་པོ་ཆེ་སྣ་ཚོགས་ཀྱིས་ཀུན་ཏུ་འབར་བའི་ས་ཕྱོགས་ན་བཞུགས་ཏེ། དེ་ན་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་
བྱེ་བ་ཁྲག་ཁྲིག་བརྒྱ་སྟོང་དུ་མས་བཅོམ་ལྡན་འདས་ལ་བསྟི་སྟང་དུ་བྱས། བླ་མར་བྱས། རིམ་གྲོར་བྱས། མཆོད་ཅིང་བཀུར་སྟིར་བྱས་ཏེ། ཡོངས་སུ་བསྐོར་ནས་མདུན་དུ་བྱས་པ་ལ་ཆོས་སྟོན་ཏེ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་
འབྲུ་བཟང་པོ། ཡོངས་སུ་བྱང་བ། ཡོངས་སུ་དག་པ། མ་འདྲེས་པ་ཡོངས་སུ་རྫོགས་པ། ཡོངས་སུ་གསལ་བ། ཚངས་པར་སྤྱོད་པ་འབའ་ཞིག་ཡང་དག་པར་རབ་ཏུ་སྟོན་ཏོ། །དེ་ནས་ཚངས་པ་ལ་སོགས་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་
རས་གཟིགས་དབང་ཕྱུག་ལ་བསྟོད་པ། ཀྱེ་ཀྱེ་སངས་རྒྱས་བཅོམ་ལྡན་འདས། བྱ་བ་བྱས་ཤིང་བྱེད་པ་བྱས། །ཁུར་བོར་བདག་དོན་རྗེས་སུ་བརྙེས། །སྲིད་པར་སྦྱོར་བ་ཡོངས་སུ་ཟད། །ཡང་དག་བཀའ་ལ་རྣམ་གྲོལ་སེམས། །ཤེས་རབ་ཤིན་ཏུ་རྣམ་པར་གྲོལ། །ཀླུ་ཆེན་པོ་
ནི་ཅང་ཤེས་པོ། །སེམས་ལ་དབང་སྒྱུར་ཐམས་ཅད་ཀྱི། །མཆོག་ཏུ་ཕ་རོལ་ཕྱིན་པ་ཐོབ། །ཡེ་ཤེས་ཚོགས་ནི་ཡོངས་སུ་རྫོགས། །སྲིད་པའི་དགོན་པ་རབ་ཏུ་རྒལ། །གཞན་ལ་ཕན་པ་མཛད་ལ་བརྩོན། །ཐུགས་རྗེ་དང་ནི་འབྲེལ་པའི་ཐུགས། །སྐྱེ་དགུ་ཀུན་ལ་རབ་ཏུ་བྱམས། །

དགེ་བ་རབ་བརྩོན་བྱམས་ལས་བྱུང་། །མཐའ་ཡས་སེམས་ཅན་སྒྲོལ་ལ་མཁས། །བདེ་བར་གཤེགས་པ་ཉིད་ལས་སྐྱེས། །བདེ་བར་གཤེགས་པ་ཉིད་ཀྱི་བཀའ། །ཁམས་གསུམ་གྱི་ནི་གཉེན་གཅིག་པོ། །འདོད་ཆགས་ཞེ་སྡང་གཏི་མུག་མེད། །དྲི་མ་གསུམ་ནི་རབ་ཏུ་
སྤངས། །རིག་པ་གསུམ་གྱི་ཕ་རོལ་ཕྱིན། །མངོན་པར་ཤེས་པ་དྲུག་ཀྱང་བརྙེས། །ནྱ་གྲོ་དྷ་ནི་ལྟ་བུར་ཟླུམ། །སྐྱེས་བུ་ཆེན་པོའི་མཚན་རྣམས་ནི། །སུམ་ཅུ་རྩ་གཉིས་དག་དང་ལྡན། །དཔེ་བྱད་བཟང་པོ་བརྒྱད་ཅུས་ཀྱང་། །སྐུ་ནི་རྣམ་པ་ཀུན་ཏུ་བརྒྱན། །སྐུ་མདོག་གསེར་གྱི་ཁ་
དོག་འདྲ། །སྐུ་ཚད་ཆེ་ཞིང་དཀར་ཤམ་པོ། །ནཱ་ག་གེ་སར་གཞོན་ནུ་ལྟར། །ཅུང་ཟད་དམར་བ་འདྲ་བའི་མདོག །དབུ་ཡི་ཐོར་ཚུགས་དག་དང་ལྡན། །ཐོར་ཚུགས་མང་པོས་ཉེ་བར་གཡོགས། །དབུ་ལ་འོད་དཔག་མེད་པ་བཞུགས། །འོད་ཟེར་དག་ནི་རྣམ་པར་འཕྲོ། །འདོམ་གང་
འོད་ནི་རབ་ཏུ་འབར། །གསེར་གྱི་རི་འདྲ་གྲགས་པས་ཁྱབ། །གཟི་བརྗིད་དག་ཀྱང་རབ་ཏུ་ཆེ། །ཤར་གྱི་རི་ལ་འཆར་བ་ཡི། །ཉི་མའི་གཙུག་ཏོར་དག་དང་ལྡན། །ནོར་བུ་རིན་ཆེན་འབར་བ་ཡི། །སེར་ལ་ཁས་ནི་སྐུ་ཕྱེད་བརྒྱན། །ས་དག་ལ་ནི་རབ་ཏུ་མཁས། །ཕ་རོལ་ཕྱིན་པ་
བཅུ་རྣམས་སྤྱོད། །ཚུལ་ཁྲིམས་མ་ཉམས་རལ་བ་མེད། །ཐོང་ཀ་སེང་གེ་འཕྱོང་བ་འདྲ། །སྐུ་ནི་འཇམ་ཞིང་ལྡེམ་བག་ཅན། །གཟིགས་ཤིང་གཤེགས་པས་ཁྱུ་མཆོག་འདྲ། །གཡས་སུ་འཁྱིལ་བའི་དུང་ཡང་འདྲ། །དཔྲལ་བ་ཟླ་བ་ཁམ་པ་འདྲ། །དཔྲལ་བའི་དབྱིབས་
ཀྱི་རྒྱ་ཡང་ཆེ། །སྨིན་མཚམས་བར་ཡང་ཡོང་མ་ཆད། །སྤྱན་ནི་ནོར་བུ་རིན་ཆེན་འབར། །ཤངས་ཀྱི་དབྱིབས་ནི་ཅུང་ཟད་མཐོ། །ཚེམས་ཀྱི་སྒྲོས་ཀྱིས་རྣམ་པར་གནོན། །ལྗགས་ཀྱིས་སྟོང་གསུམ་ཁེབས་མཛད་ཅིང་། །སྙན་གྱི་ཁུང་ཡང་རབ་ཏུ་ཟབ། །མགུར་ཡང་བུམ་པའི་
མགྲིན་པ་འདྲ། །དཔུང་བ་དག་ཀྱང་རབ་ཏུ་ཟླུམ། །ཕྱག་སོར་རྣམས་ཀྱི་ཚིགས་ཀྱང་རིང་། །སེན་མོ་འཇམ་ཞིང་ཅུང་ཟད་དམར། །ཕྱག་སོར་རྣམས་ཀྱི་བར་ཡང་འབྲེལ། །ཕྱག་དང་ཞབས་ཀྱི་མཐིལ་རྣམས་ལ། །འཁོར་ལོ་དག་གིས་རབ་ཏུ་བརྒྱན། །སྟོན་ཀའི་པདྨ་འདྲ་

བར་མཛེས། །སྐུ་མདོག་འཇམ་ཞིང་ཤ་ཡང་རྒྱས། །གསུང་ནི་ཚངས་པའི་དབྱངས་ལྟར་ཟབ། །ཡིད་དུ་འོང་ཞིང་དགའ་བར་འགྱུར། །བལྟ་ན་སྡུག་ཅིང་མདངས་དགའ་བ། །པདྨ་ལས་བྱུང་པདྨའི་མདོག །པདྨ་དག་ལས་ཀུན་དུ་སྐྱེས། །པདྨ་དག་གི་གདན་ལ་བཞུགས། །
ཕྱག་ན་པདྨ་བཟང་པོ་བསྣམས། །རིལ་བ་སྤྱི་བླུགས་ཕྱག་ན་བསྣམས། །ཀྲྀཥྞ་ས་རིའི་པགས་པ་བསྣམས། །དབྱུག་པ་དང་ནི་བགྲང་ཕྲེང་འཛིན། །བཀྲ་ཤིས་དག་གིས་གཙང་མར་འགྱུར། །སྔ་ནས་གསུང་ཞིང་གསོང་པོར་སྨྲ། །བདུད་རྩིའི་ཆར་ནི་རབ་ཏུ་འབེབས། །ཡིད་བཞིན་
ནོར་བུ་རིན་ཆེན་ལྟར། །སེམས་ཅན་ཐམས་ཅད་དགའ་བར་བྱེད། །བཟང་པོར་སྣང་བའི་ལྗོན་ཤིང་ལྟར། །སེམས་ཅན་ཀུན་གྱི་གསོས་སུ་གྱུར། །སངས་རྒྱས་ཀུན་གྱི་སྤྲུལ་པ་ལགས། །བདེ་བར་གཤེགས་པའི་ཆ་ལུགས་མངའ། །བདེ་བར་གཤེགས་པའི་རིང་བསྲེལ་འཛིན། །
བ་སྤུ་ཉག་མ་རེ་རེ་ཡང་། །སེམས་ཅན་ཀུན་གྱི་གཙོ་བོར་འགྱུར། །བསོད་ནམས་མཛད་ཅིང་དགེ་བ་མཛད། །བཤོལ་བ་མེད་ཅིང་ངེས་པ་སྟེ། །རབ་ཏུ་གྲགས་པའི་བརྩོན་འགྲུས་ཅན། །འཁོར་བ་དག་ལས་ཀུན་ཏུ་རྒལ། །དམ་ཆོས་རྒྱལ་ཚབ་མངའ་གསོལ་བ། །ཡིད་བཞིན་
འཁོར་ལོ་བདེ་བར་སྐོར། །དོན་ཡོད་ཞགས་པས་ཉོན་མོངས་འདྲེན། །འཕགས་པ་རྟ་མགྲིན་བདུད་བཞི་འཇོམས། །ཀྲོ་དྷ་མགྲིན་སྔོན་གདུག་པ་སེལ། །ཆུ་སྲིན་འཛིན་ཁྲིའི་འཇིགས་ལས་སྒྲོལ། །ལྷ་མོ་སྒྲོལ་མ་རྗེས་སུ་འབྲང་། །ཁྲོ་གཉེར་ཅན་ནི་བཀའ་བཞིན་བྱེད། །རྒྱལ་
བ་ཅན་ནི་ཚུལ་དང་ལྡན། །མཐུ་ཆེན་ལྡན་ཞིང་དྲན་དང་ལྡན། །ཡོན་ཏན་ལྡན་ཞིང་བྱམས་དང་ལྡན། །ཤེས་རབ་ལྡན་ཞིང་དཔལ་དང་ལྡན། །ཚུལ་ཁྲིམས་ལྡན་ཞིང་དོན་དང་ལྡན། །དོན་རྣམས་ཀུན་ནི་རིག་པ་པོ། །ཐེ་ཚོམ་ཐམས་ཅད་གཅོད་པ་པོ། །ཆོས་རྣམས་ཐམས་ཅད་སྨྲ་བ་པོ། །
འཇིག་རྟེན་ཀུན་གྱི་སྟོན་པ་པོ། །ཞལ་བཟངས་ཟླ་བ་ཉ་བ་འདྲ། །སྐུ་སྨད་རིན་ཆེན་ཀུན་གྱིས་བརྒྱན། །གསེར་གྱི་མཆོད་སྡོང་འདྲ་བར་གནས། །འོད་ཟེར་ཉི་མ་སྟོང་བས་ལྷག །ཚངས་ལ་སོགས་པས་ཕྱག་བགྱིས་པའི། །འཇིག་རྟེན་མགོན་ལ་ཕྱག་འཚལ་ལོ། །གང་ལ་ལ་

ཞིག་འཕགས་པ་སྤྱན་རས་གཟིགས་དབང་ཕྱུག་ལ་མཚན་བརྒྱ་རྩ་བརྒྱད་ཀྱིས་བསྟོད་པ་བྱས་པ་དེའི་མཚམས་མེད་པ་ལྔ་བྱས་པའི་ལས་ཀྱི་སྒྲིབ་པ་ཡོངས་སུ་བྱང་བར་འགྱུར་རོ། །དཀྱིལ་འཁོར་ཐམས་ཅད་དུ་འཇུག་པར་འགྱུར་རོ། །སྔགས་ཐམས་ཅད་ཀྱང་འགྲུབ་པར་འགྱུར་རོ། །བསྐལ་
པ་སྟོང་གི་བར་དུ་ཡང་ངན་འགྲོར་མི་སྐྱེའོ། །མནར་མེད་པར་མི་ལྟུང་ངོ་། །སུ་ཞིག་ནང་པར་ལངས་ནས། ཀློག་གམ་ཀློག་ཏུ་འཇུག་པ་དང་། ཁ་ཏོན་དུ་བྱེད་པ་དེའི་ལུས་ལ་མཛེ་དང་ཤུ་བ་དང་གློ་ན་བ་དང་དབུགས་མི་བདེ་བ་ལ་སོགས་པ་ནད་ཐམས་ཅད་དང་བྲལ་བར་འགྱུར་རོ། །སྐྱེས་སོ་ཅོག་ཏུ་སྐྱེ་བ་དྲན་པར་འགྱུར་རོ། །
ལྷའི་སྲས་པོ་དང་འདྲའོ། །འཆི་བའི་དུས་ཀྱི་ཚེ་ན་ཡང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །གར་སྐྱེས་གར་གནས་ཀྱང་འཕགས་པ་སྤྱན་རས་གཟིགས་དབང་ཕྱུག་དང་མི་འབྲལ་བར་འགྱུར་རོ། །རྟག་ཏུ་བཟླས་བརྗོད་བྱས་ན་ཡིད་གཞུངས་པར་འགྱུར་རོ། །སེམས་དཔའ་བར་
འགྱུར་རོ། །དབྱངས་སྙན་པར་འགྱུར་རོ། །སྐལ་བ་བཟང་པོར་འགྱུར་རོ། །གཙུག་ལག་ཐམས་ཅད་ལ་མཁས་པར་འགྱུར་རོ། །ཚིག་བཙུན་པར་འགྱུར་རོ། །བསྟོད་པ་འདིས་བསྟོད་ན་སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་ཅུ་རྩ་གཉིས་སྙེད་ཀྱི་བྱེ་མ་སྙེད་དག་ལ་མཆོད་པ་བྱས་
པར་འགྱུར་ཏེ། རྣམ་པར་སྨིན་པ་འདྲ་བས་ན་བྱེ་བྲག་མེད་དོ། །རྒྱལ་བ་ཐམས་ཅད་ཀྱི་རིང་བསྲེལ་རིན་པོ་ཆེ་ཟ་མ་ཏོག་ཅེས་བྱ་བ། འཕགས་པ་སྤྱན་རས་གཟིགས་དབང་ཕྱུག་གི་མཚན་བརྒྱ་རྩ་བརྒྱད་པ་རྫོགས་སོ།། །།
༄༅། །རྒྱ་གར་སྐད་དུ། ཨཱརྱཱ་བ་ལོ་ཀི་ཏེ་ཤྭ་ར་སྱ་ནཱ་མ་ཨཥྚ་ཤ་ཏ་ཀ །བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་གི་མཚན་བརྒྱ་རྩ་བརྒྱད་པ་ཞེས་བྱ་བ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་
པ་དུས་གཅིག་ན། བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གི་གནས། རི་གྲུ་འཛིན་གྱི་རྩེ་མོ་མེ་ཏོག་དྲི་ཞིམ་པོ་སྣ་ཚོགས་བཀྲམ་པ། འཛམ་བུ་ཆུ་བོའི་གསེར་ཁ་དོག་བཟང་པོ་ལྟར་སྣང་བ། རིན་པོ་ཆེ་སྣ་ཚོགས་སྣང་བའི་ས་ཕྱོགས་ན་བཞུགས་ཏེ། ལྷ་དང་།

ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས། བཅོམ་ལྡན་འདས་ལ་བསྟི་སྟང་དུ་བྱས། བླ་མར་བྱས། རི་མོར་བྱས་ཏེ། མཆོད་ཅིང་རྗེད་ནས།
ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ནས་ཚངས་པ་ལ་
སོགས་པས་འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ། ཀྱེ་བཅོམ་ལྡན་འདས། དགོངས་པ་མཛད་པ། མཛད་རྒྱུ་མཛད་པ། ཁུར་བོར་བ། བདག་གི་དོན་རྗེས་སུ་བརྙེས་པ། སྲིད་པར་ཀུན་ཏུ་སྦྱོར་བ་ཡོངས་སུ་བསལ་བ། ཡང་དག་པའི་མཁྱེན་པས། ཐུགས་ཤིན་ཏུ་རྣམ་
པར་གྲོལ་བ། ཅང་མཁྱེན་པ། གླང་པོ་ཆེ་ཆེན་པོ་དང་། སེམས་ཅན་ཐམས་ཅད་ཀྱི་དབང་དམ་པའི་ཕ་རོལ་ཏུ་བྱོན་པ། ཡེ་ཤེས་ཀྱི་ཚོགས་ཡོངས་སུ་རྫོགས་པ། སྲིད་པའི་དགོན་པ་ལས་རྒལ་བ། གཞན་ལ་སྨན་པ། ཐུགས་རྗེ་དང་འབྲེལ་བའི་ཐུགས་མངའ་བ། སྐྱེ་དགུ་ལ་མཆོག་ཏུ་མཉེས་
གཤིན་པ། བདེ་བ་རབ་ཏུ་སྩོལ་བར་མཛད་པ། བྱམས་པས་ཞུགས་པ། སེམས་ཅན་མཐའ་ཡས་པ་སྒྲོལ་བ་ལ་མཁས་པ། བདེ་བར་གཤེགས་པའི་སྲས་པོ། སྲིད་པ་གསུམ་གྱི་རྩ་ལག་གཅིག་པུ། འདོད་ཆགས་མི་མངའ་བ། ཞེ་སྡང་མི་མངའ་བ། གཏི་མུག་མི་མངའ་བ། དྲི་མ་
གསུམ་སྤངས་པ། རིག་པ་གསུམ་གྱི་ཕ་རོལ་དུ་གཤེགས་པ། མངོན་པར་ཤེས་པ་དྲུག་བརྙེས་པ། ཤིང་ནྱ་གྲོ་དྷ་ལྟར་ཆུ་ཞེང་གབ་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མངའ་བ། དཔེ་བྱད་བཟང་པོ་བརྒྱད་ཅུས་བརྒྱན་པ། པགས་པ་སྲབ་ཅིང་མདོག་སེར་བ། སྐུ་རིང་རྒྱུ་
བཟང་ཞིང་དཀར་བ། སྐུ་ཤིང་གི་མེ་ཏོག་སར་པ་དང་། དམར་རིང་ལྟ་བུའི་དབུ་ཐོར་ཚུགས་མངའ་བ། ལྕང་ལོ་འཁྱིལ་པ་མང་པོས་དབུ་ཁེབས་པ། འོད་དཔག་མེད་ཀྱིས་འོད་ཟེར་བཏང་བ། འབར་བའི་འོད་འདོམ་གང་གིས་གསེར་གྱི་རི་བོ་ལྟར་སྙན་པར་གྲགས་པ། གཟི་བརྗིད་

རྒྱ་ཆེ་བ། གཟུགས་འཆར་ཀའི་རི་ལྟ་བུ་གཙུག་ཏོར་མངའ་བ། ནོར་བུ་རབ་ཏུ་འབར་བ། མཆོད་ཕྱིར་ཐོགས་སྐུ་ལ་སེ་རལ་དུ་ཐོགས་པ། ས་རབ་ཏུ་རྣམ་པར་འབྱེད་པ། ཕ་རོལ་ཏུ་ཕྱིན་པ་བཅུའི་ཞབས་དང་ལྡན་པ། ཚུལ་ཁྲིམས་མཉམས་པ། ཚུལ་ཁྲིམས་མ་ཞིག་པ།
སེང་གེ་ལྟར་ཐོང་ཀ་ཕེལ་ཀ་ཆེ་བ། སྐུ་འཇམ་ཞིང་མཛེས་པ། གཟིགས་པ་དང་གཤེགས་ཐབས་ཁྱུ་མཆོག་གི་དབང་པོ་འདྲ་བ། མཁུར་བ་གཡས་སུ་འཁྱིལ་པ། དཔྲལ་བ་ཆེ་ཞིང་ཟླ་བ་ཁམ་པ་འདྲ་ལ་ཐིག་ལེ་མངའ་བ། ཕྱག་པུས་མོར་སླེབས་པ། སྨིན་མ་བར་མ་ཆད་པ། ཤངས་
མཐོ་བ། མགུར་བུམ་པའི་མགྲིན་པ་འདྲ་བ། ཕྱག་སོར་མོ་དང་ཚིགས་རིང་བ། སེན་མོ་འཇམ་ཞིང་ཟངས་ཀྱི་མདོག་དང་འདྲ་བ། ཕྱག་དྲ་བས་འབྲེལ་པ། ཕྱག་དང་ཞབས་ཀྱི་མཐིལ་འཁོར་ལོས་བརྒྱན་པ། སྟོན་ཀའི་པདྨ་འདྲ་བ། སྐུ་འཇམ་ཞིང་རྒྱས་པ། ཚངས་པ་ལྟར་དབྱངས་
ཟབ་པ། ཡིད་དུ་མཆི་བ་སྡུག་པ། བལྟ་ན་སྡུག་པ། ཉམས་དགའ་བར་བགྱིད་པ། འོད་པདྨ་འདྲ་བ། པདྨ་ལས་འཁྲུངས་པ། པདྨ་ལས་བྱུང་བ། པདྨའི་གདན་ལ་བཞུགས་པ། ཕྱག་ན་པདྨ་མངའ་བ། ཕྱག་ན་རིལ་བ་སྤྱི་བླུགས་བསྣམས་པ། རི་དགས་ནག་པོའི་
པགས་པ་མནབས་པ། ཕྱག་མཁར་བསྣམས་པ། བགྲང་བའི་ནོར་བུ་བསྣམས་པ། གཙང་བ་སྩངས་པ། གསོང་པོར་གསུང་བ། བདུད་རྩིའི་ཆར་འབེབས་པ། ཡིད་བཞིན་གྱི་ནོར་བུ་ལྟ་བུ། བལྟ་ན་སྡུག་པའི་ཤིང་འདྲ་བ། སེམས་ཅན་
ཐམས་ཅད་མོས་པར་མཛད་པ། དགའ་བར་མཛད་པ། སེམས་ཅན་ཐམས་ཅད་ཉེ་བར་འཚོ་བ། སངས་རྒྱས་ཀྱི་སྤྲུལ་པ། བདེ་བར་གཤེགས་པའི་ཆ་བྱད་མངའ་བ། བདེ་བར་གཤེགས་པའི་རིང་བསྲེལ་འཛིན་པ། སྤུ་རེ་རེ་སྐྱེས་པ། སེམས་ཅན་གྱི་སྙིང་པོ། བསོད་ནམས་
མཛད་པ། དགེ་བ་མཛད་པ། ངེས་པར་མཛད་པ། བརྩོན་འགྲུས་འབར་བ། འཁོར་བ་ལས་ཤིན་ཏུ་འདས་པ། དམ་པའི་ཆོས་ལ་རྒྱལ་ཚབ་ཏུ་དབང་བསྐུར་བ། སྒྲོལ་མ་ཞབས་དྲུང་ན་གནས་པ། ཁྲོ་གཉེར་ཅན་བཀའ་བཞིན་བགྱིད་པ། རྒྱལ་བ་དང་ལྡན་པ། ཚུལ་

དང་ལྡན་པ། དྲན་པ་དང་ལྡན་པ། མཐུ་རྩལ་ཆེ་བ། ཡོན་ཏན་དང་ལྡན་པ། བྱམས་པ་དང་ལྡན་པ། ཞི་བ་དང་ལྡན་པ། ཚུལ་ཁྲིམས་དང་ལྡན་པ། སྐལ་པ་དང་ལྡན་པ། དོན་དང་ལྡན་པ། དོན་རྣམས་ཐུགས་སུ་ཆུད་པ། ཐེ་ཙོམ་རྣམས་གཅོད་པ། ཆོས་རྣམས་
གསུང་བ། འཇིག་རྟེན་རྣམས་ཀྱི་སྟོན་པ། ཞལ་གྱི་དཀྱིལ་འཁོར་ཡོངས་སུ་རྒྱས་པ། སྐུ་རྐེད་པའི་ཕྱོགས་རིན་པོ་ཆེ་ཐམས་ཅད་ཀྱིས་སྤྲས་པ། གསེར་གྱི་མཆོད་སྡོང་ལྟ་བུ། སྐུ་ཉི་མ་སྟོང་བས་ལྷག་པར་མཛེས་པ། ཚངས་པའི་དབང་པོ་ལ་སོགས་པས་ཕྱག་བགྱིས་པ་
ལགས་སོ། །གང་ལ་ལ་ཞིག་འཕགས་པ་སྤྱན་རས་གཟིགས་དབང་ཕྱུག་གི་མཚན་བརྒྱ་རྩ་བརྒྱད་པས་བསྟོད་པ་སྒྲུབ་པ་བྱེད་པ་དེའི་མཚམས་མེད་པ་ལྔའི་ལས་ཀྱི་སྒྲིབ་པ་རྣམ་པར་བྱང་བར་འགྱུར་རོ། །དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །དེ་ལ་གསང་སྔགས་
ཐམས་ཅད་གྲུབ་པར་འགྱུར་རོ། །བསྐལ་པ་བྱེ་བ་འབུམ་ཕྲག་དུ་མར་ངན་འགྲོར་འགྲོ་བར་མི་འགྱུར་རོ། །མཚམས་མེད་པར་འཇུག་པར་མི་འགྱུར་རོ། །སུ་ཞིག་ནང་པར་ལངས་ནས་འདོན་ཏམ། ཀློག་གམ། ཁ་ཏོན་བྱེད་ན་དེའི་ལུས་ལ་མཛེ་དང་། རྐང་ཤུ་དང་། ལུད་པ་དང་།
མི་བདེ་བ་མི་འབྱུང་ཞིང་ནད་ཐམས་ཅད་ལས་ཐར་བར་འགྱུར་རོ། །ཚེ་རབས་སོ་ཅོག་ཏུ་ཚེ་རབས་དྲན་པར་འགྱུར་རོ། །ལྷའི་བུ་དང་འདྲ་བར་འགྱུར་རོ། །འཆི་བའི་དུས་ཀྱི་ཚེ་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །ཚེ་རབས་སོ་ཅོག་ཏུ་འཕགས་པ་སྤྱན་རས་
གཟིགས་དབང་ཕྱུག་དང་མི་འབྲལ་བར་འགྱུར་རོ། །རྟག་ཏུ་བཟླས་བརྗོད་བྱས་ན་ཡིད་གཞུངས་པར་འགྱུར། དཔའ་བར་འགྱུར། སྐད་སྙན་པར་འགྱུར། སྐལ་བ་བཟང་པོར་འགྱུར་རོ། །བསྟན་བཅོས་ཐམས་ཅད་ལ་འཇིགས་པ་མེད་པར་འགྱུར། ཚིག་བཙུན་པར་འགྱུར་རོ། །
བསྟོད་པ་སྒྲུབ་པ་འདིས་བསྟོད་པ་བྱས་ན། སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་ཅུ་རྩ་གཉིས་སྙེད་ཀྱི་བྱེ་མ་སྙེད་དག་ལ་མཆོད་པ་བྱས་པར་འགྱུར་ཏེ། རྣམ་པར་སྨིན་པ་མཚུངས་ཤིང་བྱེ་བྲག་མེད་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་མཚན་

བརྒྱ་རྩ་བརྒྱད་པ་རྒྱལ་བ་ཐམས་ཅད་ཀྱི་རིང་བསྲེལ་གྱི་ཟ་མ་ཏོག་ཅེས་བྱ་བ་རྫོགས་སོ།། ༄༅། །རྒྱ་གར་སྐད་དུ། ཨཱརྱ་རུ་ཙི་ར་ཨྃ་ག་ཡཥྛི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་ལུས་ཀྱི་དབྱིབས་མཛེས་པ་ཞེས་བྱ་
བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ན་མོ་བི་པུ་ལ་བི་མ་ན་སུ་པྲ་ཏིཥྛི་ཏེ་ཨ་སྃ་ཁེ་ཡ། སཱུརྱ་ཤ་ཏ་ས་ཧ་སྲ་ཨ་ཏི་རེ་ཀ་ཏེ་ཛ། པྲ་བྷ་ཨ་བ་བྷ་སི་ཏ་མཱུརྟ་ཡེ། མ་ཧཱ་མ་ཎི་མུ་ཀུ་ཊ་ཀུཎྜ་ལ། ཨ་ལཾ་ཀ་ར་དྷ་རི་ཎེ་བྷ་ག་བ་ཏེ་པདྨ་པཱ་ཎ་ཡེ། སརྦ་ལོ་ཀ་ཨ་
པ་ཡ་ཤ་མ་ནཱ་ཡ། བི་བི་དྷ་ཁུ་ཁ་ས་མ་བཱ་ཤ་ཨ་བིཥྛ། སརྦ་སཏྭ་པ་རི་མོ་ཙ་ཀཱ་ཡ། ཏདྱ་ཐཱ། ཨོྃ་བྷུ་ར་བྷུ་བ་སྭཱ་ཧཱ། མ་ཧཱ་ཨ་ལོ་ཀ་ཀ་ར་ཎ་ཏ་མ་སྟི་མི་ར་པ་ཏ་ལ་བི་ནཱ་ཤ་ཀ །རཱ་ག་དྭེ་ཥ་མ་ཧཱ་མོ་ཧ་ཛྭ་ལ་ཤ་མ་ཀ །ཤ་ས་ཀ་རཀྵ་ཀ །སརྦ་ཨ་པཱ་ཡ་དུརྒ་ཏི་པྲ་ཤ་མ་ཀ །སརྦ་སཏཱ་ས་མཱ་
ཤྭཱ་ས་ན་ཀ་ར། སརྦ་ཨཱ་ཤ་བ་རི་པཱུ་ར་ཀ །སརྦ་ཏ་ཐཱ་ག་ཏ་སཾ་བྷ་ན་ཀ་ར། ཧེ་ཧེ་མ་ཧཱ་བོ་དྷི་སཏྭ། བ་ར་བ་ར་དཱ་ཡ་ཀ །པདྨ་ཨ་ལོ་ཀ་སཾ་བྷ་ཏ། མ་ཧཱ་ཀཱ་རུ་ཎི་ཀ །ཛ་ཊཱ་མུ་ཀུ་ཊ། ཨ་ལཾ་ཀྲྀ་ཏ་ཤི་རཱ། མ་ཎི་ཀ་ན་ཀ་རཱ་ཛ། ཤ་ཏ་བཛྲ་བཻ་ཌཱུརྱ་ཨ་ལཾ་ཀྲྀ་ཏ་ཤ་རཱི་ར། ཨ་མི་ཏཱ་བྷ་ཛི་ན་ཀ་
མ་ལ་ཨ་ལཾ་ཀྲྀ་ཏ། པྲ་བྷ་ར་ཎ་རཱ་ཛ་ན་ཤ་ཏ་ས་ཧ་སྲ་ཨ་བྷི་ལ་ཥི་ཏ་ཀཱ་ཡ། མ་ཧཱ་བོ་དྷི་སཏྭ་བར། བི་དྷ་མ་བི་དྷ་མ། བི་ནཱ་ཤ་ཡ། བི་ནཱ་ཤ་ཡ། མ་ཧཱ་ཡཱཾ་ཏྲ་ཀླེ་ཤ་ཀ་བ་ཊཱ། ཨ་བ་བད་དྷ་བི་བོ་དྷི་སཏྭ་སཾ་ས་ར་ཙ་ར་ཀ་པྲ་མ་ཐཱ་ན། པུ་རུ་ཥ་པདྨ། པུ་རུ་ཥ་ནཱ་ག །པུ་རུ་ཥ་སཱ་ག་ར། པུ་རུ་
ཥ་སིཾ་ཧ། བཾ་ཧི། བི་ར་བི་ར་ཛ། སུ་དཱནྟ་པ་རི་པྲི་ཏ། དྷ་མ་དྷ་མ། ས་མ་ས་མ། དྷུ་རུ་དྷུ་རུ། པྲ་ཤཱ་སཡཱ་པྲ་ཤཱ་ས་ཡཱ། པྲ་དྷྭན་སཱ་ཡ། པྲ་དྷྭན་སཱ་ཡ། གྷི་རི་གྷི་རི། དྷི་རི་དྷི་རི། བི་དྷི་རི་བི་དྷི་རི། བི་རི་བི་རི། བི་བི་རི་བི་བི་རི། ཙི་རི་ཙི་རི། སི་རི་སི་རི། སུ་རུ་སུ་རུ། མུ་རུ་
མུ་རུ། མུ་ཡ་མུ་ཡ། མུཉྩ་མུཉྩ། དྷུ་ན་དྷུ་ན། བི་དྷུ་ན་བི་དྷུ་ན། དྷུ་རུ་དྷུ་རུ། གྷ་ཡ་གྷ་ཡ། གྷཱ་དྷ་ཡ། གྷཱ་དྷ་ཡ། ཧ་ས་ཧ་ས། པྲ་ཧ་ས་པྲ་ཧ་ས། ནཱ་ནཱ་བི། བི་དྷ་ཀླེ་ཤ་བཱ་ས་ནཱ། ཧ་ར་ཧ་ར། སཾ་ཧ་ར་སཾ་ཧ་ར། དྷུ་རུ་ཊི། དྷུ་རུ་ཊི། མ་ཧཱ་མཎྜ་ཨ་ལཾ་ཀ་ར་ཎ། ཤ་ཏ་པྲ་སེ་

ཀ །ཨ་བ་བཱ་སི་ཏ་མ་ཧཱ་བི་ཥ་ཤ་མ་ཀ །མ་ཧཱ་བོ་དྷི་སཏྭ་བར་ད་སྭཱ་ཧཱ། བཅོམ་ལྡན་འདས་ལག་ན་པདྨའི་ལུས་ཀྱི་དབྱིབས་མཛེས་པ་ཞེས་བྱ་བའི་གཟུངས། བྱང་ཆུབ་སེམས་དཔའི་ཁང་བཟངས་དམ་པ། རྡོ་རྗེ་ཆེན་པོས་བགེགས་པར་གསུངས་པ། ལྷ་དང་། ཀླུ་དང་། སྦྱིན་བྱེད་
མའི་བུ་དང་། མི་འམ་ཅི་དང་། ལྷ་མ་ཡིན་ཆེན་པོས་བསྟོད་པ། རེ་བ་ཐམས་ཅད་ཕུན་སུམ་ཚོགས་པར་བྱེད་པ་འདི་སྒྲིབ་པ་ཆན་པོ་མང་པོས་བསྒྲིབས་པ་གང་ལ་ལ་ཞིག་ཉན་ཏམ། འཆང་ངམ། འདོན་ཏམ། ཀློག་གམ། མཐོང་ནས་ལེགས་པར་རྟོགས་པར་བྱེད་ན། དེའི་ལས་
དང་། ཉོན་མོངས་པའི་སྒྲིབ་པ་ཐམས་ཅད་ཡོངས་སུ་བྱང་བར་འགྱུར་རོ། །ནང་པར་ལངས་ནས་ལན་ཅིག་འདོན་ན་ལག་ན་པདྨ་ཕྱི་བཞིན་འབྲང་བར་འགྱུར་རོ། །ཡིད་ལ་གང་དག་འདོད་པའི་དགོས་པ་བསམས་པ་ཙམ་གྱིས་འགྲུབ་པར་འགྱུར་རོ། །གཅིག་པུ་རབ་ཏུ་དབེན་པར་
འདུག་སྟེ། སངས་རྒྱས་ཡིད་ལ་བྱ་བ་མངོན་དུ་དམིགས་ནས། བཅོམ་ལྡན་འདས་ལག་ན་པདྨ་རྗེས་སུ་དྲན་པར་བྱས་ལ། ལན་བདུན་བརྗོད་ན་དམ་པ་ཅི་འདོད་པ་ཐོབ་པར་འགྱུར་རོ། །སེམས་ཅན་ཐམས་ཅད་ཀྱི་ཡིད་དུ་འོང་བར་འགྱུར་རོ། །དེའི་ངན་འགྲོ་ཐམས་ཅད་འགག་པར་
འགྱུར་རོ། །ཡིད་ཙམ་ཞིག་འཆག་ཅིང་འདུག་ལ་ཡིད་ལ་བརྗོད་ན་བསྐལ་པ་བྱེ་བ་འབུམ་ཕྲག་དུ་མར་བསགས་པའི་ལས་བྱང་བར་འགྱུར་རོ། །འཁོར་ལོས་སྒྱུར་བ་སྟོང་གིས་བསགས་པའི་བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །ཚེ་རབས་ཚེ་རབས་སུ་ཡང་པདྨའི་
རིགས་ཆེན་པོར་སྐྱེ་བར་འགྱུར་རོ། །སྐྱེ་བོ་ཁྱད་དུ་འཕགས་པས་བཀུར་བར་འགྱུར་རོ། །མེ་ཏོག་དྲི་ཞིམ་པོས་སྙིམ་པ་བཀང་སྟེ། འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་ལན་བདུན་བརྗོད་ན་ཡོན་ཏན་ཆེན་པོ་སྟོང་ཐོབ་པར་འགྱུར་རོ། །སྙིང་རྗེ་ཆེན་པོའི་ཆོས་ཉིད་
སྣང་བ་ཡང་དེ་ལ་སྐྱེ་བར་འགྱུར། དམ་པ་ཆེན་པོ་དང་ལྡན་པར་འགྱུར་རོ། །དེ་ཉིད་ཀྱི་གདོང་དུ་བལྟས་ཏེ་བཟླས་བརྗོད་བྱས་ན། བཅོམ་ལྡན་འདས་ཞལ་རྟག་ཏུ་བཞད་པ་འཕགས་པ་སྤྱན་རས་གཟིགས་དབང་ཕྱུག་མཐོང་བར་འགྱུར་ཞིང་། ཆོས་སྣང་བའི་གསལ་བ་དང་པོ་དྲི་མ་

མེད་པར་བྱེད་པ་ཞེས་བྱ་བ་འཐོབ་པར་འགྱུར་རོ། །ཚེ་འདི་ཉིད་ལ་སངས་རྒྱས་རྗེས་སུ་དྲན་པ་ཐོབ་པར་འགྱུར། སེམས་མཉམ་པར་བཞག་བཞིན་དུ་འཆི་བའི་དུས་བྱེད་པར་འགྱུར། ཚེ་རབས་ཐམས་ཅད་དུ་ཚེ་རབས་དྲན་པར་འགྱུར་རོ། །ཇི་ལྟར་འདོད་པ་བཞིན་དུ་ལས་ཀྱི་
སྒྲིབ་པ་ཐམས་ཅད་ཟད་པར་བྱེད་པར་འདོད་ན། ཚེས་བཅྭ་ལྔའི་ཟླ་བ་ཉ་བ་ལ་སྨྱུང་བ་བྱས་ལ་གོས་དཀར་པོ་བགོས་ཏེ། རིང་བསྲེལ་དང་བཅས་པའི་མཆོད་རྟེན་ནམ། སྐུ་གཟུགས་ཀྱི་སྤྱན་སྔར་ཙནྡན་དཀར་པོས་དཀྱིལ་འཁོར་བསྐུས་ལ། དཀྱིལ་འཁོར་དེ་དང་བཅོམ་ལྡན་འདས་ལ་མེ་ཏོག་
སྣ་ཚོགས་གཏོར་ཏེ། བཅོམ་ལྡན་འདས་དང་འཕགས་པ་སྤྱན་རས་གཟིགས་དབང་ཕྱུག་ལ་དྲི་ཞིམ་པོའི་བདུག་པ་དང་། མར་མེ་དང་། སྤོས་ཀྱིས་བསྟི་སྟང་བྱས་ཏེ་དེ་ཉིད་དུ་འདུག་ལ་ལན་བརྒྱ་རྩ་བརྒྱད་བརྗོད་ན། དེས་སྡིག་པ་ཐམས་ཅད་དང་བྲལ་བར་འགྱུར་རོ། །མཚམས་མེད་པ་
བྱེད་པ་ཡང་སྡིག་པ་བྱང་ཞིང་། ཤིན་ཏུ་ཡོངས་སུ་དག་པའི་སེམས་ཀྱི་རྒྱུད་དང་ལྡན་པ་དང་། ཤིན་ཏུ་ཡོངས་སུ་དག་པའི་ལུས་དང་། ངག་དང་། ཡིད་ཀྱི་སྤྱོད་པ་དང་ལྡན་པར་འགྱུར་རོ། །དེ་བཞིན་གཤེགས་པ་རྣམས་ཀྱིས་རྟག་པར་རྒྱུན་དུ་ཏིང་ངེ་འཛིན་གྱི་སྟོབས་དང་། དབང་བསྐུར་
བའི་སྟོབས་དང་། ས་དང་ཕ་རོལ་ཏུ་ཕྱིན་པའི་སྟོབས་དང་། ཡེ་ཤེས་ཁྱད་པར་ཅན་གྱི་སྟོབས་བསྒྲུབ་པར་མཛད་དོ། །གནམ་ལ་གྱེན་དུ་བལྟས་ཏེ་བཟླས་བརྗོད་བྱས་ན་ཆར་འབབ་བོ། །ས་ལ་བལྟས་ཏེ་བཟླས་བརྗོད་བྱས་ན། ལོ་ཏོག་ཐམས་ཅད་ལེགས་པར་འགྱུར་རོ། །འབབ་ཆུ་
དང་། མཚེའུ་དང་། རྫིང་བུའི་ཤུལ་དུ་བལྟས་ཏེ་བཟླས་བརྗོད་བྱས་ན་ཆུ་འབྱུང་བར་འགྱུར་རོ། །ནད་ཐམས་ཅད་ལ་ལག་པས་བྱབ་ཅིང་བཟླས་བརྗོད་བྱས་ན་སོས་པར་འགྱུར་རོ། །དྲན་པ་ཉམས་པའི་མདུན་དུ་བཟླས་བརྗོད་བྱས་ན་དྲན་པ་རྙེད་པར་འགྱུར་རོ། །བཀྲེས་པ་དང་། སྐོམ་པའི་གདོང་
དུ་བལྟས་ཏེ་བཟླས་བརྗོད་བྱས་ན་ཕྱིད་པར་འགྱུར་རོ། །མི་ངས་ཆེན་པོ་བྱུང་ན་རས་ལ་བྲིས་ཏེ་རྒྱལ་མཚན་གྱི་རྩེ་མོར་བཏགས་ན། དཔག་ཚད་ཚུན་ཆད་མཚམས་གཅད་པ་དང་། བསྲུང་བ་བྱས་པར་འགྱུར་རོ། །འཕགས་པ་ལུས་ཀྱི་དབྱིབས་མཛེས་པ་ཞེས་བྱ་བའི་གཟུངས་རྫོགས་སོ།། །།

རྒྱ་གར་གྱི་མཁན་པོ་པྲཛྙཱ་བར་མ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅། །རྒྱ་གར་སྐད་དུ། ཨཱརྱ་ཨ་བྷ་ཡ་པྲ་དཱ་ནཱ་མ་ཨ་པ་རཱ་ཛི་ཏ། བོད་སྐད་དུ། འཕགས་པ་གཞན་གྱིས་མི་ཐུབ་པ་མི་འཇིགས་པ་སྦྱིན་
པ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གྲུབ་པ་ཐམས་ཅད་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་
པོ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །སེམས་ཅན་ཐམས་ཅད་ཀྱི་སྡུག་བསྔལ་སེལ་བ་ལ་ཕྱག་འཚལ་ལོ། །སེམས་ཅན་ཐམས་ཅད་ཀྱི་སྡུག་བསྔལ་ལས་གྲོལ་བར་མཛད་པ་ལ་ཕྱག་འཚལ་ལོ། །སེམས་ཅན་ཐམས་ཅད་ཀྱི་འཆིང་བ་གཅོད་པ་ལ་
ཕྱག་འཚལ་ལོ། །སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ལ་ཕྱག་འཚལ་ལོ། །དེ་ནས་འཇིགས་པ་མེད་པ་འཕགས་པ་སྤྱན་རས་གཟིགས་དབང་ཕྱུག་གི་གཞན་གྱིས་མི་ཐུབ་པའི་སྙིང་པོ་བརྗོད་པར་བྱའོ། །ལས་ཀུན་བྱེད་པ་དགེ་བ་སྟེ། །འབྱུང་པོ་ཀུན་གྱིས་འཇིགས་པ་མེད། །
བདུད་རྩི་ལས་ནི་བདུད་རྩི་འབྱུང་། །འདི་ནི་ལས་ཀུན་བྱེད་པ་ཡིན། །དགྲ་ཀུན་འཇིགས་པར་བྱེད་པ་སྟེ། །རྩོད་དང་དེ་བཞིན་འཐབ་པ་དང་། །གཞན་དང་དགྲས་ནི་འཁོར་བ་དང་། །རྩོད་པའི་ནང་དུ་རྩོད་བྱེད་དང་། རྟག་ཏུ་དགྲ་དང་ཕྲད་པ་དང་། །རྨུགས་པར་བྱེད་ཅིང་རེངས་པར་བྱེད། །
རྨོངས་པར་བྱེད་ཅིང་སྡིག་པ་སེལ། །དུག་དང་མེ་ནི་རེངས་བྱེད་དང་། །རིམས་དང་ཉེས་སྡིག་ཐམས་ཅད་སེལ། །ཆོམ་རྐུན་དང་ནི་ཆུ་དང་སྦྲུལ། །རྨི་ལམ་ངན་པ་ཐམས་ཅད་སེལ། །འབྱུང་པོ་ཐམས་ཅད་ཟློག་པ་ཡིན། །སངས་རྒྱས་བྱང་ཆུབ་འདྲེན་པ་དང་། །ཆོམ་རྐུན་རབ་ཏུ་སྟོན་པ་སྟེ། །
འདི་ནི་རིག་སྔགས་མཐུ་སྟོབས་ཅན། །གཞན་གྱིས་མི་ཐུབ་སྲིན་པོ་འཇོམས། །གང་ཚེ་རིག་སྔགས་འདི་བཤད་པ། །དེ་ནས་འདི་གཡོ་བར་འགྱུར། །འཇིགས་མེད་ལྡན་པ་ཞེས་བྱ་བའི། །རིག་སྔགས་རྒྱལ་པོ་བླ་ན་མེད། །འཇིག་རྟེན་མགོན་པོས་གསུངས་པ་སྟེ། །འཇིག་

རྟེན་གསུམ་པོ་ཀུན་གྱིས་མཆོད། །དེ་ནས་འཇིགས་པ་མེད་པ་སྤྱན་རས་གཟིགས་དབང་ཕྱུག་གིས་དེ་བཞིན་གཤེགས་པ་རྗེས་སུ་དྲན་པར་བྱས་ནས་རང་གི་སྙིང་པོ་གཞན་གྱིས་མི་ཐུབ་པ་དེ་བཞིན་གཤེགས་པ་ཐམས་ཅད་ཀྱིས་གསུངས་པ་འདི་སྨྲས་སོ། །ཨོྃ་ཏ་ར་ཏ་ར། ཏཱ་རེ་ཏཱ་རེ།
མོ་རི་ཀེ། ཙནྡྲ་པྲབྷེ། བྷི་རི་བྷི་རི། ཙི་རི་ཙི་རི། སཱུརྱ་ཀཱ་ན་ཏེ། ཧེ་མ་པྲ་བྷེ། བུད་དྷྱ་བུད་དྷྱ། བོ་དྷ་ནི། སརྦ་པཱ་པ་པྲ་ཤ་མ་ནི། ཙ་ར་ཙ་ར། པི་ཥ་པྲ་ཤ་མ་ནི། ཙི་རི་ཙི་རི། ཙུ་རུ་ཙུ་རུ། སརྦ་བིདྱཱ་དྷ་ར་ན་མ་སྐྲི་ཏེ། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། སརྦ་ཏ་ཐཱ་ག་ཏ་བྷཱ་ཥིཏ། པ་ར་པ་
ར། པི་རི་པི་རི། པུ་རུ་པུ་རུ། པྲཛྙཱ་པཱ་ར་མི་ཏ། ཨ་ནུ་ཛྙཱ་ཏེ། ཥཊྤཱ་ར་མི་ཏཱ་པ་རི་པཱུ་རེ། གཾ་གཱ་ན་ངཱི་བཱ་ལུ་ཀོ་པ་མཱ། ཏ་ཐཱ་ག་ཏ་བྷཱ་ཥི་ཏ། པྲི་ཡཾ་ཀ་རི། དྷ་ན་ཀ་རི། པྲི་ཏི་ཀ་རི། ཤུ་བྷ་ཀ་རི། པ་བི་ཏྲ། མཾ་ག་ལ་དྷཱ་རི་ཎི། སརྦ་དེ་བ་ཏཱ། ཨདྷིཥྛི་ཏེ། སརྦ་མ་ཧོ་ར་ག་ཨ་དྷིཥྛི་ཏེ། སརྦ་
ཀིན་ནར་ཨདྷིཥྛི་ཏེ། སརྦ་ཡཀྵ་རཀྵ་ས། ཨ་དྷིཥྛི་ཏེ། པྲཧྨ་བྷཱ་ཥི་ཏེ། ཨིནྡྲ་བྷཱ་ཥི་ཏེ། ཙ་ཏུར་མ་ཧཱ་རཱ་ཛ་བྷཱ་ཥི་ཏེ། ཙནྡྲ་སཱུརྱ་བྷཱ་ཥི་ཏེ། ཨོཾ་ཏི་རི་ཏི་རི། ཙནྡྲ་ཀཱི་ར་ཎེ། ཀི་ལི་ཀི་ལི། སརྦ་ཤ་ཏྲཱུཾ་བི་ནཱ་ཤ་ནི་ཧཱུྃ་ཕཊ་སྭཱ་ཧཱ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་
པ་དང་ལྡན་པ་འཕགས་པ་སྤྱན་རས་གཟིགས་དབང་ཕྱུག་གིས། བྱང་ཆུབ་སེམས་དཔའ་མི་འཇིགས་པ་སྦྱིན་པ་ལ་འདི་སྐད་ཅེས་སྨྲས་སོ། །མི་འཇིགས་པ་སྦྱིན་པ་སྔོན་བྱུང་བ་འདས་པའི་དུས་ན་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདས་པ་ན། དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། སེམས་ཅན་ཐམས་ཅད་ལ་ཕན་འདོགས་པ། གཞན་གྱིས་མི་ཐུབ་པའི་དབང་ཕྱུག་འོད་ཅེས་བྱ་བ་འཇིག་རྟེན་དུ་བྱུང་སྟེ། དེ་ལས་བདག་གིས་འདི་དག་ཐོས་སོ། །དེ་ལས་བཟུང་ནས་བྱང་ཆུབ་སེམས་དཔའ་
རྣམས་དང་། སེམས་ཅན་ཐམས་ཅད་ལ་ཡང་བསྙད་དོ། །མི་འཇིགས་པ་སྦྱིན་པ་གཞན་གྱིས་མི་ཐུབ་པའི་སྙིང་པོ་འདི་ནི་ཡང་དག་པར་རྫོགས་པའི་སངས་རྒྱས་བདུན་པོ་རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། འཁོར་བ་འཇིག་དང་། གསེར་ཐུབ་

དང་། འོད་སྲུང་དང་། ཤཱཀྱ་ཐུབ་པ་རྣམས་ཀྱིས་གསུངས་སོ། །གཞན་གྱིས་མི་ཐུབ་པའི་སྙིང་པོ་འདི་ནི་བདག་སྲུང་བ་དང་། གཞན་སྲ