Kinh tạng Tây Tạng (Kangyur Đại Học) — 092_རྒྱུད་འབུམ།_མ

ུ་བར་འགྱུར་ཏེ། གང་དུ་འཚལ་བ་དེར་འབྱུང་བར་འགྱུར་རོ། །མ་མོའི་གནས་སམ། ནག་པོ་ཆེན་པོ་ལ་བསྟན་ཏེ། སྤྱི་བོའི་གཙུག་ཏུ་བཞག་ན་ནག་པོ་ཆེན་པོ་མ་མོའི་ཚོགས་ཀྱི་འཁོར་དང་བཅས་པ་རང་གི་གཟུགས་ཀྱིས་མདུན་ན་མཆིས་ནས།
དབང་དུ་འགྱུར་ཞིང་དགོས་པ་ཐམས་ཅད་དང་ལས་ཐམས་ཅད་བགྱིད་པར་འགྱུར་རོ། །རྒྱལ་པོའི་མངོན་སུམ་དུ་བསྟན་ན་ཡན་ལག་བཞིའི་དཔུང་དང་བཅས་པ། བློན་པོའི་ཚོགས་དང་བཅས། བཙུན་མོའི་འཁོར་དང་བཅས་པ། དབྱིག་དང་། གསེར་དང་། ནོར་བུ་དང་། མུ་ཏིག་
དང་། བཻ་ཌཱུརྱ་དང་། ཤང་ཀ་ཤིལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། གོས་དང་། རྒྱན་དང་། ལྷབ་ལྷུབ་དང་། རྒྱན་འཆང་བ་དང་། ཁང་པ་དང་། ངོ་མཚར་དུ་བཅས་པ་དབང་དུ་གྱུར་ནས། ཇི་སྲིད་འཚོའི་བར་དུ་བསྙེན་བཀུར་བགྱིད་པར་འགྱུར་རོ། །སྐྱེ་བོའི་ཚོགས་ཆེན་
པོའི་ནང་དུ་ཞགས་པ་འཕངས་ཏེ། དོན་ཡོད་པའི་ཡིད་བཞིན་གྱི་ནོར་བུའི་གཟུངས་བཟླས་ན། ཅི་ལྟར་འཚལ་བ་ཡིད་ལ་བསམས་པ་བཞིན། མེ་ཏོག་དང་འབྲས་བུ་དང་། གཞལ་མེད་ཁང་གི་ཆར་འབབ་པར་འགྱུར་རོ། །རྒྱལ་མཚན་བསྒྲེང་བའི་རྩེ་མོར་བཞག་སྟེ། རྒྱལ་རིགས་སྤྱི་བོར་
དབང་བསྐུར་བ་ཁྱིམ་གྱི་སྟེང་ངམ་ཁྱམས་སུ་བཞག་ལ། འཕགས་པའི་ལམ་ཡན་ལག་བརྒྱད་ཀྱི་བསྙེན་གནས་ཀྱིས་སེམས་ཅན་ཐམས་ཅད་ལ་མཆོག་ཏུ་བརྩེ་བར་བགྱིད་དོ། །དོན་ཡོད་རྒྱལ་པོའི་སྙིང་པོ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས། ཁྲོ་བོའི་རྒྱལ་པོ་ལན་ཉི་ཤུ་རྩ་

གཅིག་བཟླས་པར་བགྱིའོ། །དེ་ནས་དོན་ཡོད་པའི་ཡིད་བཞིན་ནོར་བུའི་གཟུངས་ལན་བརྒྱ་རྩ་བརྒྱད་གསང་བསྟོད་དེ་བཟླས་བརྗོད་བགྱིའོ། །ལན་བརྒྱ་རྩ་བརྒྱད་ཚང་ནས། ཅི་ལྟར་ཡིད་ལ་བསམས་པ་བཞིན་ཆར་དུ་འབབ་པར་འགྱུར་རོ། །ནོར་དང་། འབྲུ་དང་། གོས་དང་། ལྷབ་ལྷུབ་ལ་
སོགས་པ། མེ་ཏོག་དང་འབྲས་བུའི་ཆར་འབབ་པར་འགྱུར་རོ། །འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། མུ་གེའི་དགོན་པའི་འཇིགས་པ་དང་། ཡམས་དང་། གནོད་པ་དེ་དག་ཐམས་ཅད་འཕགས་པ་སྤྱན་རས་གཟིགས་དབང་ཕྱུག་གི་མཐུས་བབས་པར་འགྱུར་རོ། །
ཐམས་ཅད་རབ་ཏུ་ཞི་བར་འགྱུར་རོ། །སེམས་ཅན་ཐམས་ཅད་ལ་མི་འཇིགས་པ་སྩོལ་བར་འགྱུར་རོ། །འཇིགས་པ་དང་ཤ་ཁོ་ན་ཐམས་ཅད་ལས་ཐར་བར་འགྱུར་རོ། །གདུག་པ་ནས་གཅན་གཟན་ཁྲོ་བོ་ཐམས་ཅད་ཀྱི་བར་དུ་ཡང་བྱམས་པ་ལ་གནས་པར་འགྱུར་རོ། །སེམས་ཅན་ཐམས་ཅད་
མཐུན་པར་བགྱིད་པར་འགྱུར་རོ། །ཡིད་ཀྱི་བརྣག་པ་ཐམས་ཅད་ཡོངས་སུ་རྫོགས་པར་འགྱུར་རོ། །དོན་ཡོད་ཡིད་བཞིན་ནོར་བུའི་ཞགས་པ་ཆེན་པོ་སྒྲུབ་པའི་ཆོ་གའོ།། །།དེ་ནས་རིག་སྔགས་འཆང་རལ་གྲི་དང་ཞགས་པ་བསྒྲུབ་པར་འཚལ་ན། རིག་སྔགས་འཆང་གིས་ལྕགས་
ཆེན་པོ་ལས་རལ་གྲི་སོར་བཅུ་དྲུག་གི་ཚད་དུ་བགྱིས་ལ་ལག་ཟུངས་ཀྱི་ངོས་ལ་དངུལ་ལས་བགྱིས་ཏེ། གསེར་གྱིས་འབར་བར་བྲིའོ། །ཤིང་ཤུན་གྱི་སྐུད་པའམ། ཨརྐའི་སྐུད་པ་དང་། ཁ་ཆེ་དར་གྱི་སྐུད་པ་ལྷན་ཅིག་ཏུ་སྒྲིལ་ལ་ཁྲུ་བཅུ་དྲུག་བྱུང་བ་ཤིན་ཏུ་ཚད་ལ་བབ་པར་བཀུམ་པ། བསྒྲུབ་
པའི་དགོས་པ་ཡོངས་སུ་རྫོགས་པ་ལ་སུམ་སྒྲིལ་དུ་བཀལ་བར་བགྱིའོ། །དེ་ནས་རིག་སྔགས་འཆང་གིས་ལེགས་པར་ཁྲུས་བགྱིས་ཏེ། གཙང་མས་གོས་གཙང་མ་བགོས་ཏེ། ཞགས་པ་དང་། རལ་གྲི་མནན་ལ། ལག་པ་གཡས་པས་དཀྱིལ་འཁོར་ལ་བཞག་སྟེ་གཟུང་བར་
བགྱིའོ། །ཁྲོས་པའི་གཉེར་གྱི་བཞིན་གྱིས་སྐྱིལ་མོ་ཀྲུང་བཅས་ཏེ་མཆིས་ནས། འཕགས་པ་སྤྱན་རས་གཟིགས་དབང་ཕྱུག་གི་རི་མོའི་གཟུགས་ཀྱི་མདུན་དུ་ཁྲོ་བོའི་རྒྱལ་པོ་ལན་སྟོང་རྩ་བརྒྱད་བཟླས་པར་བགྱིའོ། །བཟླས་བརྗོད་ལན་སྟོང་རྩ་བརྒྱད་ཚང་ནས། རལ་གྲི་འབར་བར་གྱུར་ནས། རིག་

སྔགས་འཆང་ནམ་མཁའ་ལ་འཕུར་བར་འགྱུར་ཞིང་། རལ་གྲི་གྲུབ་པའི་རིག་སྔགས་འཆང་ཐམས་ཅད་ཀྱི་གཙོ་བོ་འཁོར་ལོས་སྒྱུར་བར་འགྱུར་རོ། །གཞན་གྱི་མཐུས་ཟིལ་གྱིས་ནོན་པར་མི་འགྱུར་རོ། །ལོ་ཁྲི་བརྒྱད་སྟོང་དུ་འཚོ་བར་འགྱུར་རོ། །འོན་ཏེ་ལག་པ་གཡོན་
པས་ཞགས་པ་བཟུང་ལ་གཡས་པས་རལ་གྲི་བཟུང་སྟེ། ཁྲོས་པས་ཧཱུྃ་ཞེས་བགྱི་བས་མནན་ན། མི་གདའ་བར་གྱུར་ནས། མི་གདའ་བ་དང་། ཞགས་པ་དང་། རལ་གྲི་གྲུབ་པའི་རིག་སྔགས་འཆང་ཐམས་ཅད་ཀྱི་གཙོ་བོ་རྒྱལ་པོ་འཁོར་ལོས་སྒྱུར་བར་འགྱུར་རོ། །ཚེ་ལོ་ཁྲི་ཐུབ་པར་
འགྱུར་རོ། །འོན་ཏེ་རིག་སྔགས་འཆང་ཁྲོས་པས་རལ་གྲི་བསྐོར་ན། བགེགས་དང་། ལོག་འདྲེན་དང་། གནོད་སྦྱིན་དང་། སྲིན་པོ་གདུག་པ་ཐམས་ཅད་དང་། འབྱུང་པོ་ཐམས་ཅད་ཀྱི་རིག་སྔགས་གཅད་པར་འགྱུར་རོ། །གཡུལ་གྱི་དབུས་སུ་ལན་ཅིག་བསྐོར་ན། གཡུལ་
འགྱེད་པའི་མཚོན་ཆ་ཐམས་ཅད་བཅད་པར་འགྱུར། རེངས་པར་བགྱིས་པར་འགྱུར་ཏེ། ཐམས་ཅད་ཕྱོགས་བཅུར་འབྱེར་བར་འགྱུར་རོ། །དུར་ཁྲོད་ཀྱི་ནང་དུ་བསྐོར་ན། དུར་ཁྲོད་ན་གནས་པའི་གདུག་པ་རྒྱུ་བ་ཐམས་ཅད་ཀྱི་རིག་སྔགས་གཏུབས་པར་འགྱུར་ཞིང་། གནས་ཐམས་ཅད་
སྟོངས་པར་འགྱུར་རོ། །ཕུག་གི་སྒོར་བསྐོར་ན། འཁྲུལ་འཁོར་དང་སྒོ་གླེགས་ཐམས་ཅད་དཀྲུགས་པར་འགྱུར་རོ། །སྒོ་དང་གཏན་པ་ཐམས་ཅད་གཏུབས་པར་འགྱུར་རོ། །གདུག་པའི་མི་མ་ཡིན་པ་བར་ཆད་བགྱིད་པ་ཐམས་ཅད་བཅོམ་པར་འགྱུར། ཐལ་བར་བརླག་པར་
འགྱུར་རོ། །གཞན་ཡང་དགོས་པ་ཐམས་ཅད་དུ་ཅི་ལྟར་འཚལ་བ་བཞིན་དུ་བགྱིད་པར་འགྱུར་རོ། །རལ་གྲི་སྒྲུབ་པའི་ཆོ་གའོ།། །།དེ་ནས་ཡང་རིག་སྔགས་འཆང་སྦྲུལ་གྱི་ཞགས་པ་བསྒྲུབ་པར་འཚལ་ན། རིག་སྔགས་འཆང་དེས་སྐུད་པ་ལྔ་ལས་བསྒྲུབས་ཏེ། ཚོན་རྩིས་ཁ་བསྒྱུར་
བའི་སྐུད་པ་ཚད་བཞིན་དུ་གཏུབས་ལ། བསྒྲུབ་པར་ཤིན་ཏུ་འོས་པ་ལས་བསྒྲུབ་པར་བགྱིའོ། །དེ་ནས་ཟས་བཟང་པོའི་ཕྱེ་མ་དང་། མ་དྷུའི་མེ་ཏོག་དང་། ར་སའི་མེ་ཏོག་དང་། ལྡོང་རོས་དང་། པདྨ་གེ་སར་དང་། ནཱ་ག་པུཥྤ་དང་། ཤིང་ཨརྐའི་འོ་མ་དེ་ལྷན་ཅིག་ཏུ་སྦྱར་བ་དེར་བཙག་

བཙལ་ཏེ། དུས་གཅིག་ཏུ་ལྷན་ཅིག་མཉམ་དུ་བཏགས་ཤིང་སྤྱི་བོར་ལེགས་པར་བསྐུ་སྟེ། དེ་ལ་དོན་ཡོད་རྒྱལ་པོ་ལན་སྟོང་རྩ་བརྒྱད་བཟླས་བརྗོད་བགྱིས་ནས། སྦྲུལ་འཁྱིལ་པ་མགོ་གསུམ་གྱི་གདེངས་ཀ་ཅན་ཡོངས་སུ་འཁྱིལ་པ་གསེར་གྱིས་གཡོགས་པ། ལེགས་པར་སྦྲེལ་
བ་ནི་ཞགས་པའི་མཆོག་ལགས་སོ། །རིག་སྔགས་འཆང་གིས་ལེགས་པར་ཁྲུས་བགྱིས་ལ། གཙང་མས་གོས་གཙང་མ་བགོས་ཏེ། བའི་ལྕི་བའི་དཀྱིལ་འཁོར་གྲུ་བཞི་ཚད་བཞིན་བགྱིས་ཏེ། དྲིས་མཆོད་པར་བགྱིའོ། །མེ་ཏོག་གི་སིལ་མ་དང་། བུམ་པ་གང་བས་བརྒྱན་པར་
བགྱིའོ། །བ་དན་གྱིས་ཀུན་ནས་བརྒྱན་པར་བགྱིའོ། །དཀྱིལ་འཁོར་གྱི་དབུས་ཀྱི་གནས་སུ་སྟན་བཟང་པོ་བཤམས་ཏེ། དེའི་སྟེང་དུ་ཀླུའི་ཞགས་པ་བསྐྱིལ་ནས་གཞག་པར་བགྱིའོ། །སྦྲུལ་གྱི་མགོའི་གདེངས་ཀ་དབུས་མ་ནི་ཁ་ཤར་ཕྱོགས་སུ་བསྟན་ནོ། །དཀར་གསུམ་གྱི་གཏོར་
མ་གཞག་པར་བགྱིའོ། །མཆོད་ཡོན་ཞབས་བསིལ་དཀར་པོའི་སྣོད་དང་། བདུག་པ་རྣམ་པ་གསུམ་པོ་ཙནྡན་དང་། ཨ་ག་རུ་དང་། དུ་རུ་སྐ་རྣམས་བསྲེག་གོ། །འབྲས་ཡོས་དང་། ཡུངས་ཀར་བཀྲམ་པའི་དཀྱིལ་འཁོར་བགྱིས་ལ། འཕགས་པ་སྤྱན་རས་གཟིགས་དབང་
ཕྱུག་མངོན་སུམ་དུ་བཞག་ལ་མཆོད་པ་རྒྱ་ཆེན་པོ་བགྱིས་ཏེ། རིག་སྔགས་འཆང་གིས་སྐྱིལ་མོ་ཀྲུང་བཅས་ཏེ། མཆིས་ནས་བཟླས་བརྗོད་མང་དུ་བགྱིའོ། །ཐོག་མར་དོན་ཡོད་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་བརྗོད་བགྱིས་ནས། ཚངས་པ་དང་། ཁྲོ་བོའི་རྒྱལ་པོ་ལན་སྟོང་
རྩ་བརྒྱད་བཟླས་པའི་ཡུངས་ཀར་རེ་རེ་ནས་སྦྲུལ་གྱི་མགོ་ལ་གཏོར་བར་བགྱིའོ། །སྒྲུབ་པ་ཐམས་ཅད་ཚང་ནས་ནི། །རྒྱུན་དུ་སྦྲུལ་ནི་འབར་བར་འགྱུར། །སྟན་ལས་ཞགས་པ་གཡོ་བ་ནི། །སོར་བཞི་ཙམ་གྱི་ཚད་ཙམ་དུ། །སྟན་ལས་གྱེན་དུ་འཕར་བར་འགྱུར། །དེ་ནས་རིག་སྔགས་
འཆང་གིས་བཟུང་ནས་མི་གདའ་བར་གྱུར་ནས། ཀླུའི་གནས་སུ་མཆིས་ཏེ། ཀླུའི་མཚོར་མཆིས་ན། ཀླུའི་གནས་ཀྱི་སྒོ་རྣམས་འབྱེ་བར་འགྱུར་རོ། །རིག་སྔགས་འཆང་གིས་ཞུགས་ཏེ་དོན་ཡོད་རྒྱལ་པོ་བཟླས་ནས། སྦྲུལ་གྱི་ཞགས་པ་ལན་གསུམ་དུ་བསྐོར་བར་བགྱིའོ། །

དེ་ནས་ཀླུའི་རྒྱལ་པོ་བཙུན་མོའི་འཁོར་དང་བཅས་པ་མཆིས་ནས་རིག་སྔགས་འཆང་ལ་མངོན་སུམ་དུ་སྨྲ་བས་རིག་སྔགས་འཆང་ཞུགས་ཤིག་ཅེས་སྨྲ་བར་འགྱུར་རོ། །དེ་ནས་རིག་སྔགས་འཆང་གིས་སྦྲུལ་གྱི་ཞགས་པ་བཟུང་སྟེ་བསྐོར་ནས་འཇུག་པར་བགྱིའོ། །དེ་ནས་རིགས་
སྔགས་འཆང་གིས་ཀླུའི་སྐྱོན་དེ་མི་མཐོང་ཞིང་ནུབ་པར་འགྱུར་རོ། །འཁྲུལ་འཁོར་དང་། སྒོ་གླེགས་དང་། གཏན་པ་ཐམས་ཅད་གཏུབས་ཤིང་བཅད་པར་འགྱུར་རོ། །ཞུགས་པ་ཙམ་གྱི་མོད་ལ་ཀླུའི་བུ་མོ་གཟུགས་བཟང་མོ་མཛེས་མ་རྒྱན་ཐམས་ཅད་ཀྱིས་བརྒྱན་ཅིང་བཀླུབས་མ་མཛེས་མ་
མཆིས་ནས། རིན་པོ་ཆེའི་ཕྲེང་བ་ཐོགས་ཏེ། རིགས་སྔགས་འཆང་ལ་དབུལ་བར་བགྱིད་དོ། །རིགས་སྔགས་འཆང་གིས་བླངས་ནས་སྤྱི་བོ་ལ་བཞག་སྟེ། བཞག་པ་ཙམ་གྱི་མོད་ལ་ཀླུའི་བུ་མོ་ནམ་མཁའ་ལ་འཕུར་ནས་ནུ་མ་གཉིས་ནས་འོ་མ་ཟགས་པ་དང་། རིག་སྔགས་འཆང་གིས་
བཟེད་ནས་བཏུང་བར་བགྱི་སྟེ། ཚེ་ཉི་ཁྲི་ཐུབ་པར་འགྱུར་རོ། །སྐྲ་ཅུང་ཟད་འཁྱིལ་བར་ཡང་འགྱུར་རོ། །ཀླུའི་རྒྱལ་པོ་ཞེས་བགྱི་བ་ཐམས་ཅད་ཀྱི་བདག་པོ་འཁོར་ལོས་སྒྱུར་བར་འགྱུར་རོ། །མཐུ་དང་བརྩོན་འགྲུས་ཆེན་པོས་ཕ་རོལ་གནོན་པར་འགྱུར་རོ། །དེ་ནས་རིག་སྔགས་འཆང་
གིས་སྦྲུལ་གྱི་ཞགས་པ་བཞག་ལ། དོན་ཡོད་རྒྱལ་པོའི་སྙིང་པོ་ཤིང་ཀ་ར་བཱི་རའི་ལྕུག་མ་ལ་བཟླས་ནས་བྱ་བ་པར་བགྱི་སྟེ། གང་དང་གང་གི་མིང་ནས་དྲངས་ཤིང་ཡིད་ལ་བསམས་པས་མོད་ལ་ཐམས་ཅད་འགྲུབ་པར་འགྱུར་རོ། །ཆར་མི་འབབ་པའི་དུས་སུ་སྦྲུལ་གྱི་ཞགས་པ་གནས་མཐོན་
པོར་བསྐོར་བར་བགྱི་སྟེ། ལན་ཅིག་བསྐོར་བ་ཙམ་གྱིས་ཆར་གྱི་རྒྱུན་ཆེན་པོ་འབབ་པར་འགྱུར་རོ། །ཧ་ཅང་ཆར་ཆེས་པའི་དུས་སུ་སྦྲུལ་གྱི་ཞགས་པ་གནས་མཐོན་པོར་བཞག་ན་ཆར་ཧ་ཅང་ཆེ་བ་ལས་འཆད་པར་འགྱུར་རོ། །གྲང་བའམ། རླུང་ངམ། སེར་བ་འབབ་པའི་དུས་སུ་ནང་པར་སྔར་
ཀླུའི་ཞགས་པ་ཕྱོགས་བཞིར་བསྐོར་ན། དཔག་ཚད་བརྒྱ་ཁོར་ཁོར་ཡུག་ཏུ་སེར་བ་འབབ་པར་མི་འགྱུར་རོ། །གྲང་བའི་རླུང་དང་སེར་བ་ཐམས་ཅད་བཅིངས་པར་འགྱུར་རོ། །ལོ་ཁྱུད་འཁོར་ཚང་བར་མཚམས་ཆེན་པོ་བཅིངས་པར་འགྱུར་རོ། །ཉིན་གཅིག་བཞིན་དོན་ཡོད་རྒྱལ་པོའི་སྙིང་

པོ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས་ཞགས་པ་ལག་པ་གཡས་པས་བརྡོགས་ལ། ལག་པ་གཡོན་པས་བསྐྲད་པ་བགྱིས་ན། ཉིན་གཅིག་བཞིན་ལྷའི་ཞལ་ཟས་དང་། བཏུང་བ་འདོད་དགུ་ཐམས་ཅད་ཀླུའི་གནས་ནས་བྱུང་ནས་སྐྱེ་བོ་སྟོང་སྟོང་ཙམ་ལ་སྩོལ་བར་འགྱུར་རོ། །
དེའི་དུག་ཐམས་ཅད་མཐོང་བ་ཙམ་གྱིས་དུག་མ་ལགས་པར་འགྱུར་རོ། །སྦྲུལ་གྱི་ཞགས་པ་ལག་པ་གཡས་པས་བཟུང་ལ། ལག་པ་གཡོན་པས་ཀླུ་བཟུང་ནས། དཔྱིད་དམ། སྟོན་ཀའམ། སྤྲིན་ཆགས་པའི་དུས་སུ་ཞགས་པ་བསྐོར་ལ་ཁྲོ་བོའི་རྒྱལ་པོ་བཟླས་བརྗོད་བགྱིས་ཏེ། ནམ་
མཁའ་ལ་འཕངས་ན་མེ་ཏོག་དང་། འབྲས་བུ་དང་། ལོ་ཏོག་བཟང་པོ་གང་ཅི་ཡང་རུང་བ་བཟང་པོ་ཤིན་ཏུ་སྨིན་པ། ཁ་ཟས་ཤིན་ཏུ་བཟང་པོ་ཐམས་ཅད་ནམ་མཁའི་ངོས་ལས་ས་ལ་འབབ་པར་འགྱུར་རོ། །གལ་ཏེ་ལན་ཉི་ཤུ་རྩ་གཅིག་བསྐོར་ནས། ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་
བཟླས་བརྗོད་བགྱིས་ན། ཀླུའི་གཞལ་མེད་ཁང་དང་། གོས་དང་། ལྷབ་ལྷུབ་དང་། རྒྱན་འཕྱང་དང་། རྒྱན་ཐམས་ཅད་ས་ལ་འབབ་པར་འགྱུར་རོ། །གལ་ཏེ་རིག་སྔགས་འཆང་གིས་ལན་ཉི་ཤུ་རྩ་གཅིག་ལས་ལྷག་པར་བསྐོར་ཅིང་ཁྲོ་བོའི་རྒྱལ་པོ་བཟླས་བརྗོད་བགྱིས་ན་དེའི་ཚེ་ཀླུ་
འཁོར་དང་བཅས་པ་གཞལ་མེད་ཁང་དང་བཅས་པར་སའི་སྟེང་དུ་ལྟུང་བར་འགྱུར་རོ། །གལ་ཏེ་རིག་སྔགས་འཆང་གིས་རྒྱལ་པོ་བཙུན་མོའི་འཁོར་དང་བཅས་པ་དབང་དུ་བགྱི་བར་འཚལ་ན། ཞགས་པ་བཞག་ལ་ཡུངས་ཀར་ལ་དོན་ཡོད་རྒྱལ་པོ་ལན་སྟོང་རྩ་བརྒྱད་བཟླས་བརྗོད་བགྱིས་ནས་བསྣུན་
ལ། དེ་ནས་སྦྲུལ་གྱི་ཞགས་པ་བླངས་ཏེ། རྒྱལ་པོའི་ཁྱིམ་གྱི་ཕྱོགས་གང་ལགས་པ་དེར་ལྷག་པར་ཞགས་པ་བསྐོར་ན། རྒྱལ་པོའི་བཙུན་མོ་འཁོར་དང་བཅས་པ་དབང་དུ་གྱུར་ནས། ཇི་སྲིད་འཚོའི་བར་དུ་མཆིས་པར་འགྱུར་རོ། །གཡུལ་འགྱེད་པ་ན་ཁྲོ་བོའི་རྒྱལ་པོ་བཟླས་བརྗོད་
བགྱིས་ནས་ཞགས་པ་གཡུལ་གྱི་དབུས་སུ་འཕངས་ན་སྦྲུལ་གདུག་པ་མིག་བགྲད་པ། ལྕེ་བསྒྱུར་བ་མིག་མེ་མདག་ལྟར་དམར་བ་འབྱུང་བར་འགྱུར་ཏེ། མཐོང་བ་ཙམ་གྱི་མོད་ལ་དཔུང་གི་ཚོགས་ཡན་ལག་བཞི་པ་ཕྱོགས་བཅུར་འབྱེར་བར་འགྱུར་རོ། །གཞན་ཡང་ཇི་ལྟ་ཇི་ལྟར་ཡིད་ལ་

བསམས་པའི་དོན་དེ་ལྟ་དེ་ལྟ་བུར་ཐམས་ཅད་སྒྲུབ་པར་བྱེད་པར་འགྱུར་རོ། །སྦྲུལ་གྱི་ཞགས་པ་སྒྲུབ་པའི་ཆོ་གའོ།། །།དེ་ནས་འབྱུང་པོའི་དབང་ཕྱུག་གི་ཞགས་པ་བསྒྲུབ་པར་འཚལ་ན། འབྲིའི་རྩིད་པ་དང་། རྩིད་པ་ཆེན་པོ་ལྷན་ཅིག་ཏུ་བཀལ་བ་དང་། ལྕགས་
ལས་མདུང་རྩེ་གསུམ་པ་སོར་བཞིའི་ཚད་ཙམ་དུ་བགྱིས་ལ། དེ་ནས་དོན་ཡོད་རྒྱལ་པོའི་སྙིང་པོ་ལན་སྟོང་རྩ་བརྒྱད་བཟླས་བརྗོད་བགྱིས་ནས་ཁྲོ་བོའི་རྒྱལ་པོ་ལན་སྟོང་རྩ་བརྒྱད་བཟླས་ཏེ། ཉིན་ཞག་གཅིག་མཆིས་ལ་ལེགས་པར་ཁྲུས་བགྱིས་ཏེ། གཙང་མས་གོས་གཙང་མ་བགོ་བར་
བགྱིའོ། །ཟླ་བ་མར་གྱི་ངོའི་ཚེས་བཅུ་བཞིའི་ཉིན་ཞག་གཅིག་གིས་བསྒྲུབ་པར་བགྱིའོ། །དེ་ནས་མདུང་རྩེ་གསུམ་པའི་ཞགས་པ་བླངས་ནས་འབྱུང་པོའི་དབང་ཕྱུག་གི་གཟུགས་འདྲ་བར་འགྱུར་རོ། །འབྱུང་པོ་ཐམས་ཅད་ཀྱི་བདག་པོ་ལོ་བརྒྱ་སྟོང་དུ་འཚོ་བར་འགྱུར་རོ། །འབྱུང་པོའི་
གནས་ཀྱི་གཞལ་མེད་ཁང་ཐམས་ཅད་ཀྱི་བདག་པོར་འགྱུར་རོ། །ཞགས་པ་ལག་པར་ཐོགས་ནས། དུར་ཁྲོད་དུ་ཞུགས་ན། དུར་ཁྲོད་ན་གནས་པ་ཐམས་ཅད་མདུན་དུ་མཆིས་ཏེ། གནས་ཀྱི་སྒོ་ཐམས་ཅད་འབྱེ་བར་འགྱུར་ཞིང་ཁྱོད་ཅི་དགར་ཞུགས་ཤིག་ཅེས་ཅི་འཚལ་བདེ་བགྱིད་པར་
འགྱུར་རོ། །རོའི་མགུལ་དུ་བཏགས་ནས་ཁྲོ་བོའི་རྒྱལ་པོ་བཟླས་ན་དེ་ནས་རོ་ལངས་ནས་ཅི་དྲིས་པ་དེ་སྨྲ་བར་འགྱུར་ཞིང་། ཅི་བསྒོ་བ་དེ་བགྱིད་པར་འགྱུར་རོ། །བཀྲོལ་ན་འཆི་བར་འགྱུར་རོ། །གནོད་སྦྱིན་གྱི་མགུལ་དུ་བཏགས་ནས་ཁྲོ་བོའི་རྒྱལ་པོ་བཟླས་ལ་ཁྲོས་པས་དྲངས་ནས།
གནོད་སྦྱིན་དེ་ཡང་མདུན་དུ་མཆིས་ནས། རིགས་སྔགས་འཆང་ལ་རྗེ་བཙུན་བཀའ་སྩོལ་ཅིག་དང་། ཐམས་ཅད་བགྱིའོ་ཞེས་སྨྲ་བར་འགྱུར་རོ། །རིག་སྔགས་འཆང་གིས་ཁྱོད་ཇི་སྲིད་འཚོའི་བར་དུ་ཁྲོ་བོའི་རྒྱལ་པོ་མངག་གཞུག་པའི་ལས་གྱིས་ཤིག་ཅེས་སྨྲ་བར་བགྱི་སྟེ། བཀའ་བཞིན་
འཚལ་ཞེས་དེ་ནས་ཉིན་གཅིག་བཞིན་བསྒོ་བ་བགྱིས་ན། ལས་ཐམས་ཅད་བགྱིད་པར་འགྱུར་རོ། །གནོད་སྦྱིན་མོའི་མགུལ་དུ་བཏགས་ཏེ། ཁྲོ་བོའི་རྒྱལ་པོ་བཟླས་ན། གནོད་སྦྱིན་མོ་མཆིས་ནས། རིག་སྔགས་འཆང་གི་མདུན་དུ་མཆིས་ཏེ། རིག་སྔགས་འཆང་ལ་མིག་མི་འཛུམས་

པར་བལྟ་ཞིང་། རིག་སྔགས་འཆང་ཅི་ཞིག་དོན་དུ་གཉེར་ཞེས་སྨྲ་བར་འགྱུར་རོ། །རིག་སྔགས་འཆང་གིས་ཁོ་བོ་ལ་མ་དང་། ཆུང་མ་དང་། སྲིང་མོས་བསྒྲུབ་པར་བྱ་བའི་དགོས་པ་གསུམ་བྱོས་ཤིག་ཅེས་བསྒོ་བར་བགྱིའོ། །གལ་ཏེ་མ་ཞིག་ཏུ་བགྱིད་ན་བུ་གཅིག་པ་བཞིན་དུ་བཟའ་
བ་དང་། བཏུང་བ་དང་། མལ་ཆ་དང་། གོས་དང་། ནོར་དང་། འབྲུས་ཡོངས་སུ་སྐྱོང་བར་བགྱིད་དོ། །ཆུང་མ་ཞིག་ཏུ་བགྱིད་ན། མཁོ་བའི་ཡོ་བྱད་ཐམས་ཅད་ཀྱི་དབང་ཕྱུག་དང་བདག་པོར་བགྱིད་ཅིང་། དེ་དང་ལྷག་པར་དགའ་བར་རྩེ་བས་ཕྱེ་བཞིན་འབྲང་བར་འགྱུར་རོ། །གལ་
ཏེ་སྲིང་མོ་ཞིག་ཏུ་བགྱིད་ན། ཡིད་ལ་བརྣག་པའི་འདོད་པ་ཐམས་ཅད་ཡོངས་སུ་རྫོགས་པར་བགྱིད་དོ། །དགོས་པ་ཐམས་ཅད་བགྱིད་པར་འགྱུར་རོ། །ཐམས་ཅད་དུ་རྒྱུག་ཅིང་སླར་ཡང་ལྡོག་པར་འགྱུར་རོ། །ཉིན་གཅིག་བཞིན་ལྷབ་ལྷུབ་དང་། གོས་དང་། རྒྱན་ཐམས་ཅད་སྩོལ་བར་
བགྱིད་དོ། །ཉིན་གཅིག་བཞིན་གཞན་ཡང་ལྷའི་བུ་མོ་དག་རྩེད་མོའི་དོན་དུ་དགུག་པར་བགྱིད་དོ། །རྣམ་ཐོས་ཀྱི་མགུལ་དུ་བཏགས་ཏེ། ཁྲོས་པས་དྲངས་ནས་ཁྲོ་བོའི་རྒྱལ་པོའི་བཟླས་བརྗོད་བགྱིས་ན། དེ་ནས་རྣམ་ཐོས་མཆིས་ནས། ཉིན་གཅིག་བཞིན་དོང་ཙེ་སྟོང་སྩོལ་བར་འགྱུར།
གསེར་སྟོང་སྩོལ་བར་འགྱུར་ཏེ། དེས་ཉིན་གཅིག་བཞིན་སྦྱིན་པ་ཡང་སྩོལ། བསོད་ནམས་ཀྱང་བགྱིའོ། །ནག་པོ་ཆེན་པོའི་མགུལ་དུ་བཏགས་ལ་ཁྲོ་བོའི་རྒྱལ་པོ་ལན་བདུན་བཟླས་བརྗོད་བགྱིས་ཏེ། ཁྲོས་པས་ལག་པ་གཡས་པའི་ཐལ་ལྕག་གིས་བརྡེག་པར་བགྱིའོ། །ནག་པོ་
ཆེན་པོས་སྒྲ་ཕྱུང་བ་དང་། རིག་སྔགས་འཆང་སྐྲག་པར་མི་བགྱི་བར་སླར་ཡང་ཁྲོས་པས་བརྡེག་པར་བགྱིའོ། །དེ་ནས་མཆི་མ་ཟགས་པ་དང་། རིག་སྔགས་འཆང་གིས་མ་བཟེད་དེ། ཐིག་ལེ་བགྱིས་ན་མི་གདའ་བར་གྱུར་ནས་གཏེར་ཐམས་ཅད་མཐོང་བར་འགྱུར་རོ། །དེ་ནས་རིག་
སྔགས་འཆང་གིས་སླར་ཡང་ཐལ་མོས་བརྡེག་པར་བགྱིས་ཏེ། དེ་ནས་ནག་པོ་ཆེན་པོ་ཁྲག་ཏུ་སྐྱུགས་པ། རིག་སྔགས་འཆང་གིས་བྱུགས་ན་ནམ་མཁའ་ལ་མཆིས་ནས། གནོད་སྦྱིན་གྱི་སྡེ་དཔོན་ཆེན་པོར་འགྱུར་རོ། །གུ་གུལ་གྱི་བདུག་པས་བདུགས་ནས་ཁྲོ་བོའི་རྒྱལ་པོ་བཟླས་ན། ནག་

པོ་ཆེན་པོ་རང་གི་གཟུགས་ཀྱིས་མདུན་ན་མཆིས་ནས་ཅི་འཚལ་བའི་མཆོག་ཐམས་ཅད་སྩོལ་བར་བགྱིད་ཅིང་། མ་མོའི་ཚོགས་དང་བཅས་པ་ཐམས་ཅད་དབང་དུ་མཆི་བར་འགྱུར་རོ། །གཞན་ཡང་ཅི་འཚལ་བ་བགྱིད་པ་པ་དགོས་པ་ཐམས་ཅད་བགྱིད་པར་འགྱུར་རོ། །
མདུང་རྩེ་གསུམ་པའི་ཞགས་པ་བསྒྲུབ་པའི་ཆོ་གའོ།། །།དེ་ནས་གཞན་ཡང་ཞགས་པ་དང་རྗེས་སུ་མཐུན་པའི་རི་མོའི་ཆོ་ག་དེ་ཁོ་ན་ཉིད་སྒྲུབ་པའི་ཆོ་ག་བླ་ན་མེད་པ་བརྗོད་པར་བགྱི་སྟེ། འཇིག་རྟེན་མགོན་པོས་སྣ་ཚོགས་པའི། །རྣམ་པའི་ཁ་དོག་གཟུགས་བསྟན་པ། །སྒྱུ་མ་
ལྟ་བུའི་ཏིང་འཛིན་གྱིས། །ཆོ་འཕྲུལ་སྣ་ཚོགས་གཟུགས་བསྟན་ཏེ། །ལག་པ་སྟོང་དང་མིག་སྟོང་དང་། །མཐའ་ཡས་པ་ཡི་ཕྱག་རྒྱ་བསྟན། །རྣམ་པ་སྣ་ཚོགས་པ་ཡི་གཟུགས། །ཁམས་གསུམ་དག་ཏུ་བསྟན་པ་ནི། །གདུལ་བྱ་གདུལ་ཕྱིར་གཟུགས་བསྟན་ཏོ། །གསང་བ་
འདི་ཡི་གཟུགས་བསྟན་པ། །སེམས་ཅན་ཀུན་ལ་ཕན་པའི་ཕྱིར། །རིག་སྔགས་སྒྲུབ་པ་བླ་ན་མེད། །དེ་ཉིད་ཞགས་པ་བསྒྲུབས་ཕྱིར་རོ། །དེ་བས་རིག་འཛིན་ཤེས་རབ་ཅན། །འཇིག་རྟེན་ཕ་རོལ་རྗེས་མཐུན་པ། །སངས་རྒྱས་ཉིད་དོན་གཉེར་བ་དང་། །དེ་བཞིན་གཤེགས་ཀུན་ལྟ་བ་
དང་། །བདེ་ཅན་བལྟ་བར་འཚལ་བ་དང་། །དེ་ཉིད་འཇིག་རྟེན་འདས་པ་ཡི། །འཇིག་དབང་མགོན་པོ་མཐོང་འཚལ་བ། །མཆོག་ཏུ་གུས་པར་བགྱི་བ་ཡི། །ཆོ་གའི་རྒྱལ་པོ་འདི་བརྗོད་ཀྱིས། །དེ་ཉིད་གུས་པར་དང་བ་དང་། །ཤིན་ཏུ་དང་བ་ཉིད་དུ་བགྱི། །གྲོལ་བ་སྣ་ཚོགས་འཚལ་བ་
ལ། །སྣ་ཚོགས་པ་ཡི་གཟུགས་བསྟན་ཏེ། །སྣ་ཚོགས་ཐབས་ཀྱིས་གྲོལ་བར་འགྱུར་རོ། །དོན་ཡོད་རྒྱལ་པོ་ཆོ་གའི་མཆོག །དོན་ཡོད་གྲུབ་པའི་འཇིག་རྟེན་འདས། །དོན་ཡོད་འབྲས་བུ་དམ་པ་པོ། །དོན་ཡོད་ཀུན་དུ་གྲུབ་པ་འཐོབ། །སངས་རྒྱས་ཀུན་གྱིས་བྱིན་གྱིས་བརླབས། །དོན་
ཡོད་འཇིག་རྟེན་འཇིག་རྟེན་མགོན། །འཇིག་རྟེན་དབང་ཕྱུག་མཆོད་སྦྱིན་པ། །དོན་ཡོད་འཇིག་རྟེན་ཅི་འཚལ་བ། །མཆོག་འཚལ་བ་ནི་གྲུབ་པར་འགྱུར། །དོན་ཡོད་རྒྱ་ཆེན་རྫུ་འཕྲུལ་གྱི། །ཆོ་འཕྲུལ་རྣམ་འཕྲུལ་རྒྱུན་མི་འཆད། །དེ་ལྟ་བས་ན་ཀུན་བསྒྲིམས་ཏེ། །བདག་ཉིད་ཡོངས་

སུ་དག་བགྱིས་ནས། །ཇི་ལྟར་ཆོ་ག་བཀོད་པ་བཞིན། །རྗེས་སུ་མཐུན་པར་རི་མོའི་གཟུགས། །རྟག་ཏུ་རི་མོའི་གཟུགས་བལྟ་ཞིང་། །ཞགས་པའི་གཟུགས་ནི་སྣ་ཚོགས་དང་། །དེ་བཞིན་ཁྲོ་བོའི་རྒྱལ་པོ་དང་། །རིག་སྔགས་རྒྱལ་པོ་དེ་བཞིན་དུ། །དཀྱིལ་འཁོར་ལྷ་དང་མེ་ལྷ་
དང་། །སྦྱིན་སྲེག་རླུང་ལྷ་ཆུ་ལྷ་དང་། །ཁྲོ་བོའི་གཟུགས་དང་ཞི་བ་དང་། །ལྷ་དང་ཀླུ་དང་སྟོན་པ་དང་། །གནོད་སྦྱིན་སྲིན་པོའི་གཟུགས་དང་ནི། །འབྱུང་པོ་ལྷ་མིན་དྲི་ཟ་དང་། །ནམ་མཁའ་ལྡིང་དང་མིའམ་ཅི། །ལྟོ་འཕྱེ་ཆེན་པོའི་གཟུགས་ཀུན་དུ། །འཇིག་རྟེན་མགོན་པོ་མཆོག་
སྦྱིན་བསྟན། །གཤིན་རྗེ་དང་ནི་ལུས་ངན་དང་། །ཚངས་པ་ཁྱབ་འཇུག་དབང་ཕྱུག་ཆེ། །གཞོན་ནུ་དབང་ཕྱུག་ལྷ་དང་ནི། །དབང་ཕྱུག་ཆེན་པོ་ཉི་མ་དང་། །ཟླ་གཟུགས་རྒྱུ་སྐར་ཚེས་གྲངས་ལྷ། །འདི་དག་རྣམ་པ་སྣ་ཚོགས་པའི། །གཟུགས་སུ་འཇིག་རྟེན་མགོན་པོས་བསྟན། །སེམས་
ཅན་རྣམས་ལ་ཕན་འཚལ་བས། །གདུལ་བའི་དོན་དུ་གྲོལ་བའི་ལམ། །སེམས་ཅན་རྣམས་ལ་བསྟན་པས་ན། །དེ་བས་སོམ་ཉི་ཉིད་མི་བགྱི། །མཆོག་ཏུ་དང་བར་བགྱི་བ་ལགས། །ཅི་ལྟར་མཐུན་པའི་དགོས་པ་རྣམས། །ཅི་ལྟར་མཐུན་པ་བཞིན་དུ་འགྲུབ། །ཅི་ལྟར་མཐུན་པ་རི་མོའི་
གཟུགས། །ཅི་ལྟར་མཐུན་པའི་ཞགས་པ་སྒྲུབ། །གནས་འདི་གང་དུ་འོས་པ་དང་། །གང་དུ་སེམས་ནི་དགའ་བར་འགྱུར། །གོམས་པ་གང་གི་ཕྱག་རྒྱ་དང་། །གང་གི་དཀྱིལ་འཁོར་ཆར་དབྱེ་བ། །འཕགས་པ་སྤྱན་རས་གཟིགས་དབང་མགོན། །ཀུན་དུ་སྒྲོལ་བ་འདྲེན་པའི་གཙོ། །
དོན་ཡོད་འབྲས་བུ་སྩོལ་བའོ། །དོན་ཡོད་པ་ཡི་གྲུབ་པ་ཐོབ། །དོན་ཡོད་དགོས་པ་ཐམས་ཅད་དང་། །གྲུབ་པའི་ཆོས་ཀྱི་འཁོར་ལོ་ནི། །མཆོག་ཉིད་ལ་ཡང་རེག་པར་འགྱུར། །ཞགས་པ་དང་རི་མོ་བསྒྲུབ་པའི་ཆོ་གའོ།། །།དེ་ནས་དོན་ཡོད་པའི་ལས་དང་དགོས་པ་སྒྲུབ་པ་ཐམས་ཅད་ཀྱི་སྦྱིན་སྲེག་གི་ཆོ་ག་བཤད་
པར་བྱ་སྟེ། སྡིག་པ་ཐམས་ཅད་མོད་ལ་འཕྲོག་པ། སྒྲིབ་པ་ཐམས་ཅད་འཇིག་པར་བགྱིད་པ། དགྲ་ཐམས་ཅད་འཇོམས་པ། བགེགས་ཐམས་ཅད་རྣམ་པར་འཇོམས་པ། གདུག་བ་ཐམས་ཅད་བཟློག་པའི་མཆོག་སྡིག་པ་ཐམས་ཅད་འཇིག་པར་བགྱིད་པ། དམྱལ་བའི་སྡུག་བསྔལ་

བཅུ་དྲུག་ལས་གྲོལ་བར་བགྱིད་པ། འཇིགས་པ་མི་བཟད་པ་བརྒྱད་རྟག་ཏུ་འཕྲོག་པ། མི་མཛའ་བ་རྣམས་འཇོམས་པ། ཕ་རོལ་གྱི་དཔུང་ལྡོག་པའི་མཆོག །ནད་ཐམས་ཅད་འཇོམས་པ། མོད་ལ་འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་ཞི་བར་བགྱིད་པ།
མུ་གེའི་དགོན་པ་འཇིག་པར་བགྱིད་པ། ཡམས་ཀྱི་ནད་དང་གནོད་པ་འཇོམས་པ། ལྷའི་བདེ་བ་འདྲེན་པར་བགྱིད་པའི་མཆོག་དེ་ཁོ་ན་ཉིད་ཀྱི་སངས་རྒྱས་སྒྲུབ་པ། སངས་རྒྱས་ཀྱི་བྱང་ཆུབ་བླ་ན་མེད་པའི་མཆོག་ཐམས་ཅད་སྒྲུབ་པར་བགྱིད་པ། སེམས་ཅན་ཐམས་ཅད་ཀྱི་ཐུན་མོང་མཆོག་
སྦྱིན་ཤིན་ཏུ་རྙེད་པར་དཀའ་བ་ལྷ་རྣམས་རྟག་ཏུ་མགུ་བར་འགྱུར་བ། ཀླུ་རྣམས་དགའ་བ་འཐོབ་པར་འགྱུར་བ། དེ་བཞིན་གཤེགས་པ་རྣམས་རྟག་ཏུ་ཉིན་མཚན་དུ་གཟིགས་པར་སོམ་ཉི་མ་མཆིས་པ། བྱང་ཆུབ་སེམས་དཔའ་རྣམས་དགའ་བར་འགྱུར་བ། དུས་ཀུན་དུ་ཤིན་ཏུ་མཉམ་
པར་བཞག་པས། འཇིག་རྟེན་དབང་ཕྱུག་མཆོག་སྦྱིན་རྟག་ཏུ་མཆིས་པར་སོམ་ཉི་མ་མཆིས་པར་རྒྱལ་པོ་ཆེན་པོ་བཞི་འཁོར་དང་བཅས་བློན་པོ་དང་བཅས་པ་བསྲུང་བའི་དོན་དུ་ཐམས་ཅད་དུ་རྟག་ཏུ་རྗེས་སུ་འབྲང་བར་འགྱུར་ལགས་སོ། །དེ་ནས་རིག་སྔགས་འཆང་ཤེས་རབ་དང་ལྡན་པས།
གཙང་མའི་གནས་སུ་མཆིས་ནས་སྦྱིན་སྲེག་བགྱི་སྟེ། གཙང་མ་ཡི་ནི་ས་ཕྱོགས་སམ། །ཅ་ཅོ་མ་མཆིས་དབེན་པར་ནི། །ཞི་བ་དང་ནི་རྒྱས་པ་དང་། །དྲག་ཤུལ་སྤྱོད་པ་རྣམས་བགྱིའོ། །ཞི་བ་སེམས་ཅན་ཐམས་ཅད་ཀྱི། །དོན་དུ་སྡིག་པ་ཐམས་ཅད་འཇོམས། །རྒྱས་པ་རྒྱས་པ་ཐོབ་
འགྱུར་ཏེ། །ཐམས་ཅད་ཕུན་སུམ་ཚོགས་པར་འགྱུར། །དགྲ་དང་ལོག་འདྲེན་གདུག་པ་དང་། །གནོད་སྦྱིན་སྲིན་པོ་གསང་བ་པ། །གདུག་སེམས་ཅན་རྣམས་བྲེད་པ་དང་། །སྐྲག་པར་སྡིགས་པ་དྲག་ཤུལ་སྤྱོད། །གསང་སྔགས་སྒྲུབ་པའི་སྦྱིན་སྲེག་སྟེ། །གསང་སྔགས་
སྒྲུབ་པ་བླ་ན་མེད། །འཇིག་རྟེན་འཇིག་རྟེན་ཕ་རོལ་གྱི། །སྦྱིན་སྲེག་གི་ནི་ལས་བགྱིའོ། །མེ་ལྷའི་ལྷ་དང་ཀླུ་དག་དང་། །དེ་བཞིན་རིག་པ་འཛིན་པའང་དགུག །ཁུང་བརྐོས་དེ་ལ་པདྨའི་ཚུལ། །པདྨ་རྟག་ཏུ་བྲི་བར་བགྱི། །ཆོ་ག་ཅི་བཞིན་ཁུང་ནང་གི། །པདྨ་ལ་ནི་གེ་སར་

བགྱི། །གྲུ་བཞིའམ་ནི་ཟླུམ་པོ་སྟེ། །དེ་ལྟ་བུ་ནི་བརྐོ་བར་བགྱི། །ལེགས་པར་བྱུགས་ཤིང་ཤིན་ཏུ་གནག །ཤིན་ཏུ་སྦས་ཤིང་ཚད་ལ་དབབ། །ཚེས་གྲངས་རྒྱུ་སྐར་ཉིད་དག་དང་། །ཤིན་ཏུ་བཀྲ་ཤིས་དག་ལ་བགྱི། །བཀྲ་ཤིས་ཕྱག་རྒྱ་ཆེན་པོ་སྟེ། །བཟང་པོས་གཏོར་མའི་
ལས་བགྱིའོ། །བདུག་པ་མེ་ཏོག་ལ་སོགས་པ། །བཟང་པོ་དག་ནི་འཁོར་བར་དགོད། །ཐོག་མར་མེ་ལྷ་བཀུག་ནས་ནི། །དེ་ནས་སྦྱིན་སྲེག་ལས་རྣམས་བགྱི། །རིག་སྔགས་འཆང་བ་གཙང་གྱུར་པ། །ལེགས་བཀྲུས་གཙང་མའི་གོས་བགོས་ནས། །གསང་སྔགས་བཟླས་
པའི་ཆོ་ག་བགྱི། །དེ་ལ་མཚམས་ཀྱང་བཅིང་བར་བགྱི། །བདག་བསྲུང་གཙུག་ཏོར་བཅིང་བ་དང་། །གཞན་བསྲུང་དཀྱིལ་འཁོར་བཅིང་བ་དང་། །དེ་བཞིན་གྲོགས་བགྱིད་བསྲུང་བ་དང་། །རྒྱུན་དུ་ཨརྐའི་ཤིང་སྤར་ཏེ། །དྲི་ཡི་ཤིང་རྣམས་ཉིད་དག་དང་། །མར་དང་ཡུངས་ཀར་
འབྲས་ཡོས་དག །ཉི་ཤུ་གཅིག་དབུལ་མེ་སྟོན་བགྱི། །དེ་ནས་མེའི་ལྷ་དགུག་གོ། །ཨོཾ་ན་མོ྅་གྣི་ཛྭ་ལ། མ་ཧཱ་ཛྭ་ལ། ཛྱོད་སྣཱ་པྲ་བྷཱ་མཎྜལ། སརྦ་བིད་ཨཱཧུ་ཏི་རཀྟི་ནི་རཏ་ཏུཥྞ་ཛྭ་ལ། དྷུ་མ་ཤྭ་ས། ཨརྩི་ཥཱ་མུ་ཁ་ཏྲིཥྞ། རཤྨི་ད་བ་ཨག་ནིཤྩ་བིད་ཏུ་ཏཤྩ་ཧཱུ་ཏ་ཤ་ན་མུ་ཁ་ན་ཏེ། སརྦ་
དེ་བཱ་ནཱཾ། སརྦ་ཡཀྵ་མ་ཧཱ་བཱིརྱ་མ་ཧཱ་ཛ་ཡ། མ་ཧཱ་བཱ་ལ། ནིར་མ་རི་ཤན། སརྦ་ད་ཧཱ་ན་པྲ་བུ་ལ་ཨཱ་ཀཱ་ཤ་ས་མུག་གང་ཀཤྩ་ཨ་བ་པྲས་ད་ཀཱ་ཤན། མན་ཌ་ལ་པཱུ་ཛི་ཏོ། མ་ཎི་ཏ་སརྦ་ཏྲ་དི་བ་བྱ་རུ་པ། བི་ཤཱ་ར་དང་། ཨཱ་བཱ་ཧཱ་ན་སརྦ་ད་ཏྲ་གཱན། དེ་བ་ཧཱུ་ཏ། ཤ་ན་ཧུ་ཏྲ། ཤ་ན་ཏ་མ་སི་བི་
དྷ་མ་ཀ་ན། ཨན་དྷ་ཀཱ་རཱ་ན། མུག་ཏེ་རཤྨི་མ་པྲི་ཡང་ཀུ་གྷ་ན་དྷ་ཕ་ལཱ་ཧ་ར། ས་ར་ས་ར། ཨ་གྲ་ཛ། སཱུཀྵྨ་སུ་ཏཱིཀྵྞཤྩ་མྲྀ་ཏི་ས་ན་ཙི་བི་ན། པྲི་ཡོ་པཤྨི་པུཤྨི་པུཤྤ་བྷ་སྨ་བྷསྟ་ཙ་བྷ་སྨ་བསྟྲ་ནི། སེ་བ་ཀྃ །བྷ་སྨ་སཉྩ་དྷ་ནིད་ཏྱན་དྷུ་མ་མཱ་ཀུ་ལ། ཛཱ་ཡ་སེ་པཱ་ཀ་སིད་དྷ་རས་གྲཱ་ཙ་ར་ས་རྦད་ཏྲ་པྲ་དྷ་པ་རི་ཤཱ།
ས་རྦད་ཏྲ་ནི་ར་མ་རི་ཤ་ཎོ། ནིར་ཏྱ་སྤྲིཥྚ་དྷཤྚ་ན་མུཉྩ་སི། དྭ་ཏྲིང་ཤ །བྷ་བ་ནོ་དེ་བ་ཨག་ནི་མུ་ཁ་དེ་བཱ་ཏ། ཨེ་རུ་ཙི་རུ་ཛཱ་བ་ལ་བ་ད་ཀ་མ་ཧཱ་ན་ཏ། ཨ་ཐ་པར་ཎོ། དེ་བ་དེ་བ་ན། བི་ཤཱ་ར་ད། ཨ་ཡཱ་ན་ཏུ་སཱ་དྷ་ཤི་གྷྲཾ་ཀར་མ་སཱ་དྷ་ཡ་ཏད་ཏྭ་ཏ། ཨོཾ་ཛྭ་ལ་ཛྭ་ལ། ཏིཥྛ་ས་མ་ཡན། ཧུ་རུ་ཧུ་རུ་ཧཱུྃ་ཕཊ་སྭཱ་ཧཱ། གསང་

སྔགས་འདིས་ནི་ལན་བདུན་དུ། །བཟླས་ནས་མེ་ནི་དགུག་པར་བགྱི། །གུ་གུལ་ཡུངས་ཀར་མར་སྦྱར་ལ། །སྤར་བདུན་སྤར་བས་མེ་ལ་དབུལ། །མཆོད་ཡོན་སྣོད་རྣམས་དབུལ་བ་ཡང་། །དེ་བཞིན་སྤར་བའི་སྤར་བས་སོ། །དྲི་རྣམས་དང་ནི་བྱུག་པ་དང་། །བདུག་པ་རྒྱ་
ཆེར་དབུལ་བར་བགྱི། །དེ་བཞིན་འབྲས་བུ་སྤར་བར་འབུལ། །དེ་ནས་ཆབ་ཀྱིས་བསང་བ་བགྱི། །ཅི་ལྟར་ལྷ་རྣམས་རིམ་བཞིན་དུ། །ཉེ་རེག་དག་ཀྱང་དབུལ་བར་བགྱི། །དེ་ནས་རིག་སྔགས་འཆང་གིས་སུ། །སྦྱིན་སྲེག་ལས་ནི་ཡང་དག་བརྩམ། །དྲི་ཞིམ་ཤིན་ཏུ་དག་པ་དང་། །
བླག་ཤ་ཨུ་དུམ་བཱ་ར་དང་། །སྣ་མའི་མེ་ཏོག་ཙམ་པ་དང་། །ཀར་ནི་ཀ་ར་ཉིད་དག་དང་། །པདྨ་ཨུཏྤལ་ཐང་ཤིང་དང་། །དེ་བཞིན་དྲི་བདའི་ཙནྡན་དང་། །བྱང་ཆུབ་ལྗོན་ཤིང་ཤིང་དག་དང་། །དེ་བཞིན་གཞན་ཡང་དྲི་བདའི་ཤིང་། །འོན་ཏེ་འབྲས་བུའི་ཤིང་མང་དང་། །ཤ་མི་ཤི་
བའི་ལས་ལགས་པས། །མཆོད་ཡོན་དེ་བཞིན་རྩྭ་དག་སྟེ། །དེ་དག་གིས་ནི་མེ་སྤར་ནས། །སྦྱིན་སྲེག་གི་ནི་ལས་རྣམས་བགྱིའོ། །འབྲས་ཡོས་ཙནྡན་ཕྱེ་མ་དང་། །ཨ་གུ་རུ་དང་དུ་རུ་སྐ། །ཀུན་དུ་རུ་ལ་སོགས་པ་དང་། །དུ་རུ་སྐར་བཅས་སྤྲི་ཀ་དང་། །སྤང་སྤོས་པྲི་ཡང་
ཀུ་བླངས་ཏེ། །དེ་དག་ལྷན་ཅིག་སྦྱར་བསྲེས་ཤིང་། །མར་རམ་མར་སར་ལྷན་ཅིག་བརྫི། །དོན་ཡོད་རྒྱལ་པོའི་གསང་སྔགས་ནི། །བརྒྱ་རྩ་བརྒྱད་བཟླས་མེ་ལ་དབུལ། །འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་ལན་སྟོང་རྩ་བརྒྱད་ཀྱི་སྦྱིན་སྲེག་བགྱིའོ། །ལན་སྟོང་
རྩ་བརྒྱད་ཚང་བ་དང་། ནམ་ཕྱེད་ན་མེ་ལྷ་རང་གི་གཟུགས་འབར་བར་ཤིན་ཏུ་གནས་པ་ལགས་ནས་ཕྱོགས་བཅུར་བལྟ་ཞིང་ཀུན་དུ་བརྟགས་ནས། རིག་སྔགས་འཆང་ལ་ལེགས་སོ་ཞེས་བགྱི་བ་སྩོལ་བར་འགྱུར་ཏེ། རིག་སྔགས་འཆང་ལེགས་སོ་ལེགས་སོ། །བདག་ཚིམ་པར་
བྱས་པས་རིག་སྔགས་འཆང་ཁྱོད་ཀྱིས་སྦྱིན་སྲེག་གི་ཆོ་ག་གྲུབ་ཀྱིས་མཆོག་སློངས་ཤིག་དང་། ཐམས་ཅད་སྦྱིན་ནོ། །དེ་ནས་རིག་སྔགས་འཆང་གིས་ཅི་ལྟ་བུའི་འདོད་པའི་མཆོག་རྣམས་བླང་བར་བགྱི་སྟེ། ཅི་ལྟར་བླངས་པ་བཞིན་ཐམས་ཅད་སྩོལ་བར་འགྱུར་རོ། །དེ་ནས་རིག་སྔགས་འཆང་

གིས་མཆོད་ཡོན་གྱི་སྣོད་དག་འབུལ་ཞིང་གཏོར་མ་དབུལ་བའི་ལས་བགྱིའོ། །དེ་ནས་རིག་སྔགས་འཆང་གིས་མར་དང་བསྲེས་པའི་གོང་བུ་ཆེན་པོ་དག་གིས་སྦྱིན་སྲེག་བགྱི་ཞིང་། འབྲས་བུའི་ཤིང་སྤར་ནས། དོན་ཡོད་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་བརྗོད་བགྱིའོ། །
སྟོང་རྩ་བརྒྱད་ཚང་བ་དང་། ཐབ་ཀྱི་དབུས་ནས་སྐྱེས་པ་ཞིག་ལུས་ཕྱེད་ཙམ་ཕྱུང་ནས། དངུལ་གྱི་གཞོང་པ་ཁ་ཟས་ཀྱིས་བཀང་སྟེ། པུས་མོ་ནུབ་ཙམ་དུ་འབུལ་བར་བགྱིད་དོ། །རིག་སྔགས་འཆང་གིས་བླང་བར་བགྱི་སྟེ། བླངས་པ་ཙམ་གྱིས་ནམ་མཁའ་ལ་འཕུར་བར་འགྱུར་ཞིང་།
རིག་སྔགས་འཆང་གི་ལུས་ལ་མེ་འབར་བའི་འོད་ཟེར་འབྱུང་བར་འགྱུར་རོ། །དེ་འཚལ་ན་ཚེ་ལོ་ཁྲིར་འགྱུར་རོ། །ནམ་མཁའི་རིག་སྔགས་འཆང་གི་འཁོར་ལོས་སྒྱུར་བར་འགྱུར་རོ། །བསྐལ་པ་བཅུ་ཚུན་ཆད་ཀྱི་སྔོན་གྱི་སྐྱེ་བ་དྲན་པར་འགྱུར་རོ། །དོན་ཡོད་རྒྱལ་པོའི་ཆོ་ག་ཞིབ་མོ་རྣམ་
པར་གྲོལ་བའི་དཀྱིལ་འཁོར་ཁ་ཏོན་དུ་གནས་པར་འགྱུར་རོ། །གལ་ཏེ་སྣོད་མི་ལེན་ན་དེའི་ཚེ་ཡང་ལན་ཉི་ཤུ་རྩ་གཅིག་སྦྱིན་སྲེག་བགྱིས་ན། ཆེར་གཡོ་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་གཟུགས་ཀྱི་མདུན་དུ་མཆིས་ན། རིག་སྔགས་འཆང་ལ་དབུགས་
འབྱིན་པར་བགྱིས་ཏེ། རིག་སྔགས་འཆང་ལེགས་སོ་ལེགས་སོ། །རིག་སྔགས་འཆང་ཁྱོད་ཀྱིས་སྦྱིན་སྲེག་གི་ཆོ་ག་དེ་བསྒྲུབས་ཟིན་གྱིས། མཆོག་སློངས་ཤིག་དང་སྦྱིན་ནོ་ཞེས་དེའི་ཚེ་རིག་སྔགས་འཆང་གིས་ཅི་བསམས་པའི་མཆོག་སྨྲས་པ། དེའི་ཚེ་ཐམས་ཅད་སྩོལ་བར་བགྱིའོ། །
འཕགས་པ་སྤྱན་རས་གཟིགས་དབང་ཕྱུག་གིས་སྐྱེས་པ་དེ་ལ་སྣོད་བླངས་ཏེ། རང་གི་ལག་ནས་རིག་སྔགས་འཆང་ལ་སྩོལ་བར་བགྱིད་དོ། །རིག་སྔགས་འཆང་གིས་བླངས་ནས་ཟས་ཀྱི་གོང་བུ་དེ་བཟའ་བར་བགྱིའོ། །འཚལ་བ་ཙམ་གྱི་མོད་ལ་ནམ་མཁའ་ལ་རྫུ་འཕྲུལ་གྱིས་མཆི་བར་འགྱུར་རོ། །
ལུས་ལས་མེའི་སྙིང་པོ་འབར་བའི་ཁ་དོག་སྣ་ཚོགས་འབྱུང་བར་འགྱུར་རོ། །དོན་ཡོད་པའི་རྒྱལ་པོའི་རིག་སྔགས་འཛིན་འཁོར་ལོས་སྒྱུར་བར་འགྱུར་རོ།། །།འཕགས་པ་དོན་ཡོད་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་དྲུག་པ། གང་གཱའི་ཀླུང་གི་བྱེ་བ་ཁྲག་ཁྲིག་

བརྒྱ་སྟོང་དགུ་བཅུ་རྩ་གཉིས་ཀྱི་བྱེ་མ་སྙེད་དང་མཉམ་པའི་རིག་སྔགས་འཆང་བའི་འཁོར་ལོས་སྒྱུར་བ་རྣམས་ཀྱི་རིག་སྔགས་འཆང་གིས་ཡོངས་སུ་བསྐོར་བར་འགྱུར་རོ། །གང་གཱའི་ཀླུང་བྱེ་བ་ཁྲི་ཕྲག་བརྒྱ་སྟོང་དགུ་བཅུ་རྩ་གཉིས་ཀྱི་བྱེ་མ་དང་མཉམ་པའི་གནས་ཀྱི་གཞལ་མེད་
ཁང་དོན་ཡོད་རབ་ཏུ་གནས་པའི་གནས་རྣམས་འབྱུང་བར་འགྱུར་རོ། རིན་པོ་ཆེ་སྣ་བདུན་གྱི་གཞལ་མེད་ཁང་རི་དང་། ཚལ་དང་ནགས་ཚལ་དང་བཅས་པ་མེ་ཏོག་དང་འབྲས་བུའི་ཤིང་རྣམ་པ་སྣ་ཚོགས་ཡལ་ག་དང་། སྦལ་མིག་དང་། ལོ་མ་དང་། རྩ་བ་དང་། མྱུ་གུར་
བཅས་པ་ཁ་ཅིག་ནི་གསེར་གྱི་མེ་ཏོག་ཁ་ཅིག་ནི་དངུལ་གྱི་མེ་ཏོག །ཁ་ཅིག་ནི་རིན་པོ་ཆེ་སྣ་བདུན་ལས་བྱུང་བའི་མེ་ཏོག་དག་གོ། །གཞན་ཡང་ལྷའི་མེ་ཏོག་རྣམ་པ་སྣ་ཚོགས་པ་དག་དང་། ཏ་མ་ལ་དང་། ཙམ་པ་ཀ་དང་། ལྕུག་མའི་མེ་ཏོག་དང་། ཏ་ལ་དང་། གྷན་དྷ་པར་ཤི་ཀ་
དང་། སྣ་མ་དང་། ཡུ་ཏི་ཀ་དང་། ཏ་ར་ན་དང་། ཀུབ་བྱ་ཀའི་མེ་ཏོག་དག་དང་། ཚལ་དང་། ནགས་ཚལ་དང་། སྐྱེད་མོས་ཚལ་དགའ་བར་འགྱུར་བའི་གནས་ཀྱི་གཞལ་མེད་ཁང་གིས་མཛེས་པར་བགྱིས་པའི་གཞལ་མེད་ཁང་ཐམས་ཅད་འབྱུང་བར་འགྱུར་ཞིང་དགའ་བ་དང་ཡིད་
མགུ་བ་དང་། ཡིད་དུ་མཆི་བར་འགྱུར་རོ། །ལྷའི་ཆུ་ཀླུ་དང་། འབབ་ཆུ་དང་། ལྟེང་ཀ་དང་། རྫིང་ལྷའི་ཙན་དན་གྱི་དྲིའི་ཆབ་ཀྱིས་ཡོངས་སུ་གང་བ་དེ་ལ་རིན་པོ་ཆེ་སྣ་བདུན་ལས་བྱུང་བའི་གཞལ་མེད་ཁང་དང་། ལྷའི་པདྨ་དང་། ཨུཏྤལ་དང་། ཀུ་མུ་ད་དང་། པདྨ་དཀར་པོས་
ལེགས་པར་བརྒྱན་པའི་ཆབ་གསེར་གྱི་བྱེ་མ་ལེགས་པར་བདལ་བའི་གཞལ་མེད་ཁང་དག་འབྱུང་བར་འགྱུར་རོ། །ལྷའི་བུ་མོ་དང་། མིའམ་ཅིའི་ཚོགས་དང་། དྲི་ཟའི་ཚོགས་ཀྱིས་དགའ་བར་བགྱིས་པ། ལྷ་དང་། ལྷ་མ་ཡིན་དང་། དྲི་ཟ་དང་། ཀླུ་དང་། རིག་འཛིན་དང་། མིའམ་ཅིའི་
ཚོགས་ཀྱིས་ཡོངས་སུ་བསྐོར་ཅིང་། ལྷའི་འབྱོར་པ་གཞལ་མེད་ཁང་ལེགས་པར་བསྟབས་པའི་གནས་ན་ཐམས་ཅད་དུ་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་པ་ནས་བྱང་ཆུབ་ལ་མཆིས་ཀྱི་བར་དང་། ཆོས་ཀྱིས་འཁོར་

ལོ་བསྐོར་བ་ནས་ཡོངས་སུ་མྱ་ངན་ལས་འདས་པའི་བར་དུ་ཚེའི་ཚད་གཅིག་ཙམ་དུ་སྐྱོང་བར་བགྱིད་དོ། །དེ་བཞིན་དུ་གྲུབ་པ་བླ་ན་མེད་པ་ཆེན་པོ། འཕགས་པ་སྤྱན་རས་གཟིགས་དབང་ཕྱུག་ཉིད་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་རྟག་ཏུ་རྗེས་སུ་འབྲང་བར་འགྱུར་ཏེ། དེ་ལྟར་ཟས་ཀྱི་གོང་
བུ་སྒྲུབ་པའི་ཆོ་ག་ཤིན་ཏུ་རྙེད་པར་དཀའ་ལགས་སོ། །ཕྱོགས་བཅུ་མཐའ་དག་གི་སངས་རྒྱས་ཀྱི་ཞིང་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་དང་ལྷན་ཅིག་འགྲོགས་ནས་མཆི་བར་འགྱུར། དེ་བཞིན་གཤེགས་པ་ཐམས་ཅད་ལས་མངོན་སུམ་དུ་ཆོས་ཉན་པ་ཐོས་པར་འགྱུར་རོ། །དེའི་
འོད་ཟེར་འབར་བའི་སྙིང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བར་འགྱུར་རོ། །དོན་ཡོད་པའི་ཞགས་པ་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བགྱིས་པ་རྣམ་པར་གྲོལ་བའི་དཀྱིལ་འཁོར་གྱི་གསང་སྔགས་དང་ཕྱག་
རྒྱ་རིང་བར་ཕྱེ་བའི་ཆོ་ག་ཞིབ་མོ་མཐའ་དག་རྫོགས་པར་བསྒྲུབ་པའི་ཆོ་ག་ཐམས་ཅད་དང་། ཆོ་ག་ཞིབ་མོ་རྒྱ་ཆེན་པོ་མཐའ་དག་གི་དཀྱིལ་འཁོར་འདི་ཁོ་ན་ཉིད་དུ་གནས་པར་འགྱུར་ལགས་སོ། །ཀླུའི་རྒྱལ་པོ་བྱེ་བ་ཕྲག་བརྒྱ་སྟོང་རྣམས་དེའི་དབང་དུ་གྱུར་ནས་རྟག་པར་རྒྱུན་དུ་མཆི་བར་འགྱུར་རོ། །
ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ཐམས་ཅད་དབང་དུ་གྱུར་ནས་མཆིས་པར་འགྱུར་རོ། །འོག་མིན་གྱི་གནས་ཀྱི་ལྷ་རྣམས་རིག་སྔགས་འཆང་དེའི་ཕྱི་བཞིན་རྟག་ཏུ་འབྲང་ཞིང་རྟག་པར་རྒྱུན་དུ་
ཡོངས་སུ་བསྐོར་བར་འགྱུར་རོ། །ལྷའི་རོ་བྲོ་བའི་མཆོག་དང་ལྡན་པའི་གཞལ་མེད་ཁང་རྣམ་པ་སྣ་ཚོགས་དག་ལྷུན་གྱིས་གྲུབ་པར་འབྱུང་བར་འགྱུར་རོ། །དེ་བཞིན་དུ་གོས་དང་། ལྷབ་ལྷུབ་དང་། རྒྱན་སྣ་ཚོགས་དང་ལྡན་པའི་གཞལ་མེད་ཁང་དག་འབྱུང་བར་འགྱུར་ཏེ། དེ་ལ་
སོགས་པ་སྦྱིན་སྲེག་གི་ཆོ་ག་དོན་ཡོད་པ་སྒྲུབ་པ་དག་འབྱུང་བར་འགྱུར་བའི་གྲུབ་པ་འཐོབ་པར་འགྱུར་རོ། །འོན་ཏེ་སྐལ་བ་ཆུང་བ་སངས་རྒྱས་དང་བྱང་ཆུབ་སེམས་དཔའི་ས་བོན་མ་མཆིས་པ་ཞིག་མཆིས་ལ་དེས་སྣོད་དེ་བླངས་པ་ཙམ་གྱི་མོད་ལ་རྒྱལ་སྲིད་ཀྱི་དབང་ཕྱུག་ཐོབ་པར་འགྱུར་ཏེ། ལྷ་

དང་མིའི་དཔལ་ཉམས་སུ་མྱོང་བར་འགྱུར་རོ། །རེག་པ་ཙམ་གྱི་མོད་ལ་ཚེ་ལྷའི་ལོ་བརྒྱ་ཁྲི་བཞི་སྟོང་ཐུབ་པར་འགྱུར་རོ། །དེ་ལ་ཕྱིས་ཀྱང་ནད་འབྱུང་བར་མི་འགྱུར་ཏེ། སྡིག་པ་དང་སྒྲིབ་པ་ཐམས་ཅད་ཀྱིས་ཉོན་མོངས་པར་མི་འགྱུར་རོ། །ཕས་ཀྱི་རྒོལ་བ་དང་། མི་མཛའ་བ་
དང་། གདུག་པ་དང་། རབ་ཏུ་གདུག་པ་ཐམས་ཅད་ནུབ་པར་འགྱུར་རོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་ཀྱི་ཡུལ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །སེམས་ཅན་ཐམས་ཅད་ཀྱི་མཆོད་གནས་གཅིག་
པུར་འགྱུར་རོ། །བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། སེམས་ཅན་ཐམས་ཅད་བལྟ་འཚལ་བར་འགྱུར་རོ། །ཐམས་ཅད་དུ་རྒྱས་པར་འགྱུར་རོ། །ཚིག་བཙན་ཞིང་དོན་ཡོད་པ་ཐོབ་པར་འགྱུར་རོ། །འགུམ་པའི་དུས་སུ་དེ་བཞིན་གཤེགས་པ་ཐམས་ཅད་གཟིགས་པ་
བཞེད་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་བར་འགྱུར་རོ། །དྲན་པ་ཤིན་ཏུ་ཉེ་བར་བཞག་ནས་དུས་བགྱིད་པར་འགྱུར་རོ། །དུས་བགྱིས་ནས་སྐལ་བ་མཉམ་པར་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། པདྨ་ལས་རྫུས་ཏེ་སྐྱེ་
བར་འགྱུར་ཞིང་སྐྱེ་བ་དྲན་པར་འགྱུར་རོ། །ལན་འགའ་ཡང་ཕྱིར་ངན་སོང་དུ་མཆི་བར་མི་འགྱུར་ཏེ། ཕྱིར་ཡང་མའི་མངལ་དུ་སྐྱེ་བར་མི་འགྱུར་རོ། །དེ་བཞིན་གཤེགས་པ་ཐམས་ཅད་བལྟ་བ་དང་། བྱང་ཆུབ་སེམས་དཔའ་ཐམས་ཅད་བལྟ་བའི་ཕྱིར་སངས་རྒྱས་ཀྱི་ཞིང་ནས་སངས་
རྒྱས་ཀྱི་ཞིང་དུ་རྟག་ཏུ་མཆི་བར་འགྱུར་རོ། །དཔྲལ་བར་ཐིག་ལེ་བགྱིས་ན། ཐམས་ཅད་དུ་མི་གདའ་བར་འགྱུར་རོ། །མེ་ལྷ་རྟག་པར་རྒྱུན་དུ་དྲན་པར་བགྱིས་པ་ཙམ་གྱིས། རང་གི་གཟུགས་ཀྱིས་མདུན་ན་མཆིས་ནས་མཆོག་ཐམས་ཅད་སྩོལ་བར་བགྱིད་དོ། །དགོས་པ་ཐམས་ཅད་བགྱིད་
པར་འགྱུར་རོ། །དེ་ནས་དོན་ཡོད་བསྒོངས་པ་བསྒྲུབ་པར་འཚལ་ན། རིག་སྔགས་འཆང་དེས་འབྲས་དང་སྲན་མ་མ་ཤར་བསྲེས་ཏེ་བསྒྲིལ་ལ་བསྒོངས་ནས། མར་དང་བུ་རམ་དང་། ཤ་ཁ་ར་དང་། སྦྲང་རྩི་ལྷན་དུ་བརྫིས་ནས། བིལ་བའི་ཚད་ཙམ་དུ་བགྱིས་ཏེ། དེའི་འོག་ཏུ་ཤིད་ཀ་ར་

བཱི་རའི་མེ་སྦར་ནས། བསྒོངས་པ་རེ་རེ་ལ་ལན་བདུན་བཟླས་བརྗོད་བགྱིས་ནས། མེའི་ནང་དུ་སྦྱིན་སྲེག་བགྱིས་ཏེ། ཉིན་ལན་གསུམ་མཚན་ལན་གསུམ་དུ་བརྒྱ་རྩ་བརྒྱད་ཙམ་སྦྱིན་སྲེག་བགྱིའོ། །དེ་ནས་རིག་སྔགས་འཆང་ཡུངས་ཀར་དང་མེ་ཏོག་ཅི་རྙེད་པ་དང་བསྲེས་ཏེ། ལན་ཉི་ཤུ་རྩ་
གཅིག་བཟླས་བརྗོད་བགྱིས་ནས་མེའི་དབུས་སུ་སྩལ་བར་བགྱིའོ། །འབྲས་ཡོས་དང་། ཡུངས་ཀར་ལ་ཁྲོ་བོའི་རྒྱལ་པོ་ལན་བརྒྱ་རྩ་བརྒྱད་བཟླས་ནས་གཏོར་བར་བགྱིའོ། །དེ་ནས་མེའི་དབུས་ནས་མེ་ལྷ་ལུས་ཕྱེད་ཙམ་ཕྱུང་ནས། རིན་པོ་ཆེ་སྣ་བདུན་ལས་བགྱིས་པའི་སྣོད་ཟས་བསྒོངས་
པས་བཀང་ནས། རིག་སྔགས་འཆང་ལ་རིག་སྔགས་འཆང་ཁྱོད་ཀྱིས་ཟས་བསྒོངས་པ་བསྒྲུབ་པའི་ཆོ་ག་གྲུབ་ཟིན་གྱིས། ལྷའི་ཟས་བསྒོངས་པ་ཆེན་པོ་ལོང་ཤིག་ཅེས་སྟོབས་པར་བགྱིད་དོ། །དེ་ནས་རིག་སྔགས་འཆང་གིས་ཟས་བསྒོངས་པའི་སྣོད་དེ་བླང་བར་བགྱིའོ། །བླངས་པ་
ཙམ་ཁོ་ནས་བཅུད་ཀྱིས་ལེན་དུ་གྱུར་ནས། ནམ་མཁའ་ལ་འཕུར་བར་འགྱུར་རོ། །སྐྲ་ཅུང་ཟད་འཁྱིལ་བར་ཡང་འགྱུར་རོ། །པགས་པ་ཡོངས་སུ་དག་པར་འགྱུར་རོ། །རིག་སྔགས་འཆང་འཁོར་ལོས་སྒྱུར་བར་འགྱུར་རོ། །རིག་སྔགས་འཆང་གིས་འཁོར་ལོས་སྒྱུར་བ་དྲུག་ཁྲི་བརྒྱད་
སྟོང་གིས་ཡོངས་སུ་བསྐོར་བར་འགྱུར་རོ། །མེ་ལྷ་གནས་དང་གཞལ་མེད་ཁང་དང་བཅས། འཁོར་དང་བཅས་པ་དབང་དུ་མཆིས་ནས། ལས་ཐམས་ཅད་བགྱིད་པར་འགྱུར་རོ། །གང་དང་གང་གིས་ཟས་བསྒོངས་པ་ལ་རེག་པ་དེ་ཡང་ཐོས་པ་བསགས་པའི་རྒྱ་མཚོ་ཆེན་པོར་འགྱུར་རོ། །
དོན་ཡོད་ཞགས་པའི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བགྱིས་པ་རྣམ་པར་གྲོལ་བའི་དཀྱིལ་འཁོར་ཕྱག་རྒྱ་དང་། གསང་སྔགས་རིམ་པར་དབྱེ་བ་དང་བཅས་པ་ཆོ་ག་ཞིབ་མོ་མཐའ་དག་རྫོགས་པར་ཁ་ཏོན་དུ་གནས་པ་འདི། ཉིན་གཅིག་བཞིན་ཤློ་ཀ་སྟོང་ཀློག་གམ་འཆང་
བར་བགྱིད་ན། ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །པདྨ་ལས་བརྫུས་ཏེ་སྐྱེས་ནས་སྐྱེ་བ་དྲན་པར་འགྱུར་རོ། །ལན་འགའ་ཡང་ཕྱིས་དྲན་པ་བརྗེད་པར་མི་འགྱུར་རོ། །ཚིག་བཙན་པར་འགྱུར་ཏེ། སེམས་ཅན་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །

མཆོད་པ་ཆེན་པོའི་འོས་སུ་ཡང་འགྱུར་རོ། །དཔྲལ་བ་ལ་ཐིག་ལེ་བགྱིས་ན་མི་གདའ་བར་གྱུར་ནས། འབྱུང་པོ་དང་། གནོད་སྦྱིན་དང་། སྲིན་པོ་ཐམས་ཅད་དབང་དུ་གྱུར་ནས། གནས་ཀྱི་སྒོ་ཐམས་ཅད་འབྱེད་པར་འགྱུར་རོ། །བུད་མེད་གང་ཞིག་བུའི་ཆེད་དུ་ཟས་བསྒོངས་
པ་དེ་འཚལ་ན། བུ་གཟུགས་བཟང་བ་མཛེས་པ། བལྟ་ན་སྡུག་པ་ཁ་དོག་བཟང་པོ་རྒྱས་པ་མཆོག་དང་ལྡན་པ་རྙེད་ནས། ཡུན་རིང་དུ་འཚོ་ཞིང་ཡིད་གཞུངས་པ་དང་། མཁས་པ་དང་། བསྟན་བཅོས་ཐམས་ཅད་ལ་བག་ཚ་བ་མ་མཆིས་པར་འགྱུར་རོ། །དེ་ནས་སྐྱེ་བོ་འབུམ་ཟས་བཙལ་བར་
སེམས་ན། འོ་མའི་ཐུག་པ་བསྒྲུབ་པར་བགྱི་སྟེ། གནས་གཙང་མ་བཅོམ་སྐྱུངས་པར་ཤིང་ཀ་ར་བཱི་རའི་ལྕུག་མས་དཀྲུག་ཅིང་དོན་ཡོད་ཞགས་པའི་སྙིང་པོ་གསང་སྔགས་བཟླས་བརྗོད་བགྱིས་ཏེ། དེ་ནས་ཁྲོ་བོའི་རྒྱལ་པོ་ཆབ་དང་ཡུངས་ཀར་ལ་བཟླས་བརྗོད་བགྱིས་ནས་གཏོར་བར་
བྱའོ། །དེ་ནས་ཟས་བསྒོངས་པ་གཅིག་སྣོད་ཀྱི་ནང་ནས་ཕྱུང་ནས། འོ་ཐུག་གི་ནང་དུ་བསྩལ་ལོ། །དེ་ནས་ཆར་བགོས་ཏེ་ཐོག་མར་དཀོན་མཆོག་གསུམ་ལ་བསོད་སྙོམས་དབུལ་བར་བགྱིའོ། །དེའི་འོག་ཏུ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་དབུལ་བར་བགྱིའོ། །དེའི་
འོག་ཏུ་འཕགས་པ་འཇམ་དཔལ་ལ་དབུལ་བར་བགྱིའོ། །དེའི་འོག་ཏུ་དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་རྣམས་དང་། བཀྲེན་པ་དང་། སྡུག་ཕོངས་པ་དང་། ལམ་གྱིས་
དུབ་བ་དང་། སློངས་མོ་པ་རྣམས་ལ་རབ་ཏུ་སྩལ་བར་བགྱིའོ། །ཇི་ཙམ་དུ་སྐྱེ་བོ་འབུམ་ཅི་འཚལ་བར་ཁ་ཟས་འཚལ་དུ་སྩལ་ཀྱང་། སྣོད་དེ་གང་བའམ་བྲི་བར་མི་མངོན་ཞིང་དེ་བས་པར་མི་འགྱུར་རོ། །གང་དག་ཟས་དེ་འཚལ་བ་དེ་དག་སྔོན་གྱི་སྡིག་པ་དང་། སྒྲིབ་པ་དང་། རྩོད་པ་ཐམས་
ཅད་དང་བྲལ་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །དགྲ་ཐམས་ཅད་དང་། ཕས་ཀྱི་རྒོལ་བ་ཐམས་ཅད་དང་། མི་མཛའ་བའི་འཇིགས་པ་ཐམས་ཅད་ཀྱིས་ཚུགས་པར་མི་འགྱུར་རོ། །འབྱུང་པོ་དང་། གནོད་སྦྱིན་དང་། སྲིན་པོའི་འཇིགས་པ་ཐམས་ཅད་ཀྱིས་མི་

ཚུགས་པར་འགྱུར་རོ། །ལུས་མཉེན་ཅིང་འཇམ་པར་འགྱུར་རོ། །ང་རོ་ལྷ་ལྟར་མཉེན་ཅིང་སྙན་ལ་དགའ་བར་བགྱིད་པ་མ་ཡིན་པའི་དབྱངས་སུ་མི་འགྱུར་རོ། །རྟག་ཏུ་དུབ་པའི་སྡུག་བསྔལ་ཐམས་ཅད་ཡོངས་སུ་སྤངས་པར་འགྱུར་རོ། །རྟག་ཏུ་ཇི་སྲིད་འཚོའི་བར་དུ་བདེ་བ་ཡང་དག་པར་
སྟོབས་པར་འགྱུར་རོ། །ཚེ་བརྗེས་ནས་བདེ་འགྲོ་ཐམས་ཅད་དུ་འགྲོ་བར་འགྱུར་རོ། །འོ་མའི་ཐུག་པས་ལྷུང་བཟེད་བཀང་ནས། དེ་གནས་མཐོན་པོ་བླ་གབ་མེད་པར་དཀྱིལ་འཁོར་བགྱིས་ཏེ། དཀྱིལ་འཁོར་གྱི་སྟེང་དུ་བཞག་ནས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ལྷུང་
བཟེད་དེ་དབུལ་བར་བགྱིའོ། །ཕུལ་བ་ཙམ་གྱི་མོད་ལ་ཆུ་བོ་གང་གཱའི་བྱེ་མ་འབུམ་ཕྲག་བརྒྱ་སྟོང་གི་བྱེ་མ་སྙེད་ཀྱི་ཕྱོགས་བཅུའི་སངས་རྒྱས་ཀྱི་ཞིང་དེ་བཞིན་གཤེགས་པ་ཐམས་ཅད་ཀྱི་དེ་བཞིན་གཤེགས་པ་རེ་རེའི་སྤྱན་སྔར་ལྷའི་ཞལ་ཟས་རོ་བརྒྱ་དང་ལྡན་པའི་ལྷའི་ཟས་བསྒོངས་པ་དང་། ལྷའི་
འོ་ཐུག་གིས་ལྷུང་བཟེད་བཀང་བ་དང་། ལྷའི་ཙནྡན་གྱི་དཀྱིལ་འཁོར་ལྷའི་མེ་ཏོག་སིལ་མ་བཀྲམ་པ་ཡང་འབྱུང་བར་འགྱུར་རོ། །ཕྱོགས་བཅུའི་སངས་རྒྱས་ཀྱི་ཞིང་དུ་གཏོགས་པའི་དེ་བཞིན་གཤེགས་པའི་འཁོར་གྱི་དཀྱིལ་འཁོར་དང་བཅས་པ་བྱང་ཆུབ་སེམས་དཔའི་ཚོགས་དང་ཉན་
ཐོས་ཀྱི་དགེ་འདུན་དང་བཅས་པ་ལ་ལྷའི་ཞལ་ཟས་རོ་བརྒྱ་དང་ལྡན་པའི་མཆོག་གིས་བསྟབས་པར་འགྱུར་རོ། །དེ་བཞིན་གཤེགས་པའི་འཁོར་གྱི་དཀྱིལ་འཁོར་དང་བཅས་པ་བྱང་ཆུབ་སེམས་དཔའི་ཚོགས་དང་། ཉན་ཐོས་ཀྱི་དགེ་འདུན་དང་བཅས་པ་དེ་དག་ཐམས་ཅད་ཀྱིས་རིག་
སྔགས་འཆང་ཡོན་བདག་དེའི་ཡོན་སྦྱོང་བར་མཛད་དོ། །གང་གི་ཕྱིར་ཡོན་སྤྱངས་ནས། སྐལ་བ་དང་མཐུན་པའི་ཚེ་འདི་ཉིད་དང་། གཞན་དུ་དབང་ཕྱུག་ཆེན་པོ་ཐོབ་པར་འགྱུར་རོ། །གྲུབ་པ་ཆེན་པོའི་གསེར་གྱིས་འབྱོར་བར་འགྱུར་རོ། །མཛོད་དང་བང་མཛོད་མང་པོས་རྒྱས་པར་འགྱུར་
རོ། །དེ་བཞིན་གཤེགས་པ་ཐམས་ཅད་ཀྱིས་དགོངས་པར་འགྱུར་རོ། །བྱང་ཆུབ་སེམས་དཔའ་ཐམས་ཅད་བལྟ་འཚལ་བར་འགྱུར་རོ། །ལྷ་ཐམས་ཅད་ཀྱིས་དེ་ལ་སྲུང་བ་དང་། སྐྱོབ་པ་དང་། སྦ་བ་བགྱིད་པར་འགྱུར་རོ། །དེ་ནས་རྒྱལ་པོ་བཙུན་མོའི་འཁོར་དང་དཔུང་གི་ཚོགས་ཡན་ལག་

བཞི་དང་བཅས་པ་དབང་དུ་བགྱི་བར་འཚལ་ན། རིག་སྔགས་འཆང་དེས་ལེགས་པར་ཁྲུས་བགྱིས་ཏེ། གཙང་མས་གོས་གཙང་མ་བགོས་ནས། འོ་ཐུག་མར་དང་བསྲེས་པ་འདིས་ལན་བརྒྱ་རྩ་བརྒྱད་སྦྱིན་སྲེག་བགྱིའོ། །སྒྲོན་ཤིང་དང་ཨརྐའི་ཤིང་གི་ཡམ་སྲེག་ཤིང་
གིས་མེ་སྦར་བར་བགྱིའོ། །སྦྱིན་སྲེག་ལན་སྟོང་རྩ་བརྒྱད་ཚང་བ་དང་། རྒྱལ་པོ་བཙུན་མོའི་འཁོར་དང་དཔུང་གི་ཚོགས་ཡན་ལག་བཞི་དང་བཅས་པ་བདག་ཉིད་དམ། ནོར་དབང་དུ་གྱུར་ནས་མཆིས་པར་འགྱུར་རོ། །ནུབ་གསུམ་དུ་བགྱིས་ན། ཀླུའི་རྒྱལ་པོ་ཐམས་ཅད་གནས་དང་འཁོར་
དུ་བཅས་པ་དབང་དུ་གྱུར་ནས་མཆིས་པར་འགྱུར་རོ། །ནུབ་ལྔར་བགྱིས་ན་འབྱུང་པོ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་མ་ལགས་པ་ཐམས་ཅད་དང་། མི་ཐམས་ཅད་འཁོར་དང་
བཅས་པར་དབང་དུ་གྱུར་ནས་མཆིས་པར་འགྱུར་རོ། །ནུབ་བདུན་དུ་བགྱིས་ན་རིག་སྔགས་འཛིན་ཐམས་ཅད་དབང་དུ་གྱུར་ནས་མཆིས་པར་འགྱུར་རོ། །ནུབ་ཐམས་ཅད་དུ་བགྱིས་ན། བརྒྱ་བྱིན་ལ་སོགས་པ་སུམ་ཅུ་རྩ་གསུམ་རིས་ཀྱི་ལྷ་རྣམས་དང་། ལྷའི་བུ་མོའི་ཚོགས་ཐམས་ཅད་དང་
གཙང་མའི་ལྷའི་བུ་མོ་ཐམས་ཅད་བབས་ནས་དབང་དུ་འགྱུར་ཏེ། ཇི་སྲིད་འཚོའི་བར་དུ་བསྙེན་བཀུར་བགྱིད་ཅིང་མཆིས་པར་འགྱུར་རོ། །ཟླ་བ་ཉ་ནས་བརྩམས་ཏེ་མར་གྱི་ངོའི་ཚེས་ཉི་ཤུ་གསུམ་མམ་གནམ་སྟོང་གི་བར་དུ་དུས་གསུམ་དུ་ལན་ཉི་ཤུ་རྩ་གཅིག་སྦྱིན་སྲེག་བགྱིས་ལ། ཨརྐའི་
ཤིང་གི་ཡམ་སྲེག་ཤིང་གིས་མེ་སྦར་ནས་གནམ་སྟོང་གིས་རྫོགས་པ་དང་། འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་མདུན་དུ་མཆིས་ནས། རིག་སྔགས་འཆང་ལེགས་སོ་ཞེས་བགྱི་བ་སྩོལ་བར་འགྱུར་ཏེ། རིག་སྔགས་འཆང་ལེགས་སོ་ལེགས་སོ། །
ང་མཉེས་པར་བྱས་ཀྱིས། རིག་སྔགས་འཆང་སྨྲོས་ཤིག་དང་། མཆོག་སྦྱིན་ཏེ་གང་གཉེར་བ་དེ་ཐམས་ཅད་སྦྱིན་ནོ། །གཏེར་སྨྲ་བའམ། ནོར་བསྒྱུར་བར་སྨྲ་བའམ། ཞིང་སྨྲ་བའམ། ནམ་མཁའ་ལ་འགྲོ་བའམ། མི་སྣང་བར་བྱ་བའམ། གསང་སྔགས་སྨྲ་བའམ། ཆོ་ག་

ཞིབ་མོ་འགྲུབ་པ་དེ་དག་ཐམས་ཅད་སྦྱིན་ནོ། །རྒྱལ་བོ་ཉིད་དམ། བློན་པོ་ཉིད་དམ། ཡུལ་བདག་ཉིད་དམ། ཕྱུག་པ་ཉིད་དམ། གྲོང་རྡལ་འཐོབ་པའམ། གོས་འཐོབ་པའམ། བ་ལང་དང་། རྟ་དང་། མ་ཧེ་དང་། རྔ་མོ་དང་། ལུག་འཐོབ་པའམ། ནོར་འཐོབ་པའམ།
འབྲུ་འཐོབ་པ་དེ་དག་ཐམས་ཅད་སྦྱིན་ནོ། །ནམ་མཁའ་ལ་འགྲོ་བའམ། མི་སྣང་བར་བྱ་བའམ། རྫུ་འཕྲུལ་འཐོབ་པའམ། ཏིང་ངེ་འཛིན་འཐོབ་པའམ། གཟུངས་འཐོབ་པའམ། ཕྱག་རྒྱ་དང་དཀྱིལ་འཁོར་གྱི་ཆོ་ག་ཞིབ་མོ་བསྒྲུབ་པ་དང་རོ་ལངས་བསླངས་པའམ། རིག་འཛིན་སྒྲུབ་
པ་ཉིད་དམ། རལ་གྲིའི་རིག་འཛིན་ཉིད་དམ། ནམ་མཁའི་རིག་འཛིན་ཉིད་དམ། ཕུག་ཏུ་འཇུག་པའམ། དུར་ཁྲོད་དུ་འཇུག་པའམ། ནགས་སུ་འཇུག་པའམ། རིལ་རྒྱུ་བ་དེ་དག་ཐམས་ཅད་སྦྱིན་ནོ། །དེ་ནས་རིག་སྔགས་འཆང་གིས་ཇི་ལྟར་ཡིད་ལ་བསམས་ཤིང་སྨྲས་པ་དེ་དག་
ཐམས་ཅད་སྩོལ་བར་བགྱིད་དོ། །རིག་སྔགས་འཆང་ལ་བསྟན་པ་ཙམ་གྱི་མོད་ལ་དྲི་མེད་དོན་ཡོད་ལྟ་བ་ཞེས་བགྱི་བ་ལུས་ཡོངས་སུ་དག་པ་འཐོབ་པར་འགྱུར་རོ། །ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། པདྨ་ཟེ་བའི་དབུས་ནས་རྫུས་ཏེ་པདྨ་ལས་སྐྱེས་ནས་སྐྱེ་
བའི་སྐྱེ་བ་དྲན་པར་འགྱུར་རོ། །དོན་ཡོད་ཞགས་པའི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བགྱིས་པ་རྣམ་པར་གྲོལ་བའི་དཀྱིལ་འཁོར་ཕྱག་རྒྱ་དང་། དཀྱིལ་འཁོར་རིམ་པར་དབྱེ་བ་དང་བཅས་པ། ཆོ་ག་ཞིབ་མོ་མཐའ་དག་དང་བཅས་པ་འདི་རྫོགས་ཏེ། བྱང་ཆུབ་ཀྱི་སྙིང་པོ་ལ་
ཐུག་གི་བར་དུ་ཁ་ཏོན་དུ་གནས་པར་བགྱིའོ། །དེ་ནས་ལ་དུའི་སྦྱིན་སྲེག་གི་ཆོ་ག་བསྒྲུབ་པར་འཚལ་ན། རིག་སྔགས་འཆང་དེས་ཁ་ཟས་ལ་ལ་དུ་སྟོང་རྩ་བརྒྱད་བགྱིས་ལ། དེ་ནས་རིག་སྔགས་འཆང་གིས་དོན་ཡོད་པའི་ཞགས་པའི་སྙིང་པོ་ལན་སྟོང་རྩ་བརྒྱད་བཟླས་བརྗོད་བགྱིའོ། །
དེ་ནས་ལེགས་པར་ཁྲུས་བགྱིས་ཏེ། གཙང་མས་གོས་གཙང་མ་བགོ་བར་བགྱིའོ། །དེ་ནས་ལ་དུ་མར་དང་བསྲེས་ཏེ་སྦྱིན་སྲེག་བགྱིའོ། །ཤིན་ཏུ་དྲི་ཞིམ་པོའི་ཤིང་གི་ཡམ་སྲེག་ཤིང་གིས་མེ་སྦར་བར་བགྱིའོ། །སྟོང་རྩ་བརྒྱད་ཚང་བ་དང་མེའི་དབུས་ནས་ཁྱེའུ་ཞིག་བྱུང་ནས་སྣོད་

ལྷའི་ལ་དུས་བཀང་ནས་དབུལ་བར་བགྱིད་དོ། །དེ་ནས་རིག་སྔགས་འཆང་གིས་ཡུངས་ཀར་ལ་ལན་བདུན་བཟླས་ཏེ། ཁྱེའུ་དེའི་ལག་ཏུ་གཏོར་རོ། །ཁྱེའུ་དེས་རིག་སྔགས་འཆང་ལ་སྨྲས་པ། རིག་སྔགས་འཆང་ཁྱོད་ཅི་ཞིག་དོན་དུ་གཉེར། རིག་སྔགས་
འཆང་གིས་འདོད་པ་ཐམས་ཅད་བྱིན་ཅིག་ཅེས་བརྗོད་པར་བགྱིའོ། །དེས་སྨྲས་པ། རིག་སྔགས་འཆང་སྣོད་ཀྱི་ལ་དུ་ཁྱེར་ཅིག་དང་། འདིས་ཁྱོད་ཀྱི་དགོས་པ་དཔག་ཏུ་མེད་པ་འགྲུབ་པར་འགྱུར་རོ། །འདི་ནི་ཁྱོད་ཀྱི་བཅུད་ཀྱི་མཆོག་ཡིན་ནོ། །རིག་སྔགས་འཆང་ལོང་ཤིག །
འདི་ནི་ཁྱོད་ཀྱི་གྲུབ་པའི་མཆོག་ཡིན་ནོ། །དེ་ནས་རིག་སྔགས་འཆང་གིས་སྣོད་གང་བ་དེ་བླངས་ཏེ། ཁྱེའུ་ལ་ཡང་ཁྱེད་ཀྱིས་ཁོ་བོའི་གྲོགས་གྱིས་ཤིག་ཅེས་བརྗོད་པར་བགྱིའོ། །ཁྱེའུ་ཡིས་སྨྲས་པ། དགོས་པ་ཐམས་ཅད་སྒྲུབ་པའི་གྲོགས་བགྱིའོ། །རིག་སྔགས་འཆང་གང་གི་ཚེ་
དགོས་པ་བྱུང་བ་དེའི་ཚེ། གུ་གུལ་དང་། ཙནྡན་ལྷན་ཅིག་བསྲེས་ལ་མར་དང་ཡུངས་ཀར་སྦྱར་ནས། དོན་ཡོད་ལྕགས་ཀྱུས་ལན་བདུན་བཟླས་ཏེ་སྦྱིན་སྲེག་བགྱིའོ། །ཨརྐའི་ཤིང་གི་མེ་སྦར་རོ། །སྦྱིན་སྲེག་བགྱིས་པ་ཙམ་གྱི་མོད་ལ། བདག་བཀུག་པས་མོད་ལ་མཆིས་ནས་དགོས་
པ་ཐམས་ཅད་བསྒྲུབ་པར་བགྱིའོ། །ལས་ཐམས་ཅད་བགྱིའོ། །ཇི་སྲིད་འཚོའི་བར་དུ་བསྙེན་བཀུར་བགྱིས་མཆིས་ཤིང་བཀུར་སྟིར་སྤྱད་པར་བགྱིའོ། །བགེགས་དང་ལོག་འདྲེན་དང་། འབྱུང་པོ་དང་གནོད་སྦྱིན་དང་། སྲིན་པོ་ཐམས་ཅད་བཟློག་པར་བགྱིའོ། །དེ་ནས་རིག་སྔགས་འཆང་གིས་
ལ་དུ་དེ་ལ་རེག་པར་བགྱིས་ན། ནམ་མཁའ་ལ་འཕུར་ནས། རིག་སྔགས་འཆང་གི་རིགས་ཐམས་ཅད་ཟིལ་གྱིས་གནོན་པར་འགྱུར་རོ། །རིག་སྔགས་འཆང་ཐམས་ཅད་ཀྱི་འཁོར་ལོས་སྒྱུར་བར་འགྱུར་རོ། །རིག་སྔགས་འཆང་གི་འཁོར་ལོས་སྒྱུར་བ་ས་ཡ་ཕྲག་གཉིས་དང་། བྱེ་
བ་ཕྲག་བདུན་གྱིས་ཡོངས་སུ་བསྐོར་བར་འགྱུར་རོ། །ཚེའི་ཚད་ལྷའི་བསྐལ་པ་དྲུག་ཁྲིར་འགྱུར་རོ། །སྐྲ་ཅུང་ཟད་འཁྱིལ་བར་ཡང་འགྱུར་རོ། །ལ་དུ་ལྷུང་བཟེད་ཀྱི་ནང་དུ་སྩལ་ཏེ། འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་བཞག་ནས། དོན་ཡོད་རྒྱལ་པོའི་ཁྲོ་བོས་དབང་

བསྐུར་ཏེ། དེ་ནས་དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ལ་སྩལ་བར་བགྱིའོ། །ལོངས་སྤྱོད་དུ་སྩལ་ཀྱང་བས་པར་མི་འགྱུར་གྱི། སླར་ཞིང་འཕེལ་བར་འགྱུར་
རོ། །ཇི་སྲིད་དུ་ལྷུང་བཟེད་ན་ལ་དུ་མཆིས་པ་དེ་སྲིད་དུ་འཕེལ་བར་འགྱུར་ཏེ། ཇི་སྲིད་དུ་སྐྱེ་བོ་འབུམ་འབུམ་མང་ཞིང་ཕལ་ཆེ་བར་སྩལ་ཀྱང་། གཏུགས་པར་མི་འགྱུར་རོ། །ལ་དུ་ལ་དོན་ཡོད་པའི་ཞགས་པའི་སྙིང་པོ་ལན་བདུན་བཟླས་བརྗོད་བགྱིས་ན། དེའི་འོག་ཏུ་གང་དུ་རེག་པ་དེར་ཡང་
གསེར་བཟང་པོར་འགྱུར་རོ། །ལ་དུ་ལ་ལན་བདུན་བཟླས་བརྗོད་བགྱིས་ཏེ། ཀླུའི་གནས་སུ་འཕངས་ན་དེའི་ཚེ་རྒྱ་མཚོ་ཆེན་པོ་མཐར་གཏུགས་པའི་ཀླུའི་རྒྱལ་པོ་འཁོར་དང་བཅས་པ་ཐམས་ཅད་དབང་དུ་གྱུར་ནས་མཆིས་པར་འགྱུར་ཏེ། སྒོ་ན་ཆར་མི་འབབ་པ། བསྒོ་བ་བཞིན་ཆར་
འབེབས་པར་བགྱིད་དོ། །ཅི་བསྒོ་བ་བཞིན་བགྱིད་པར་འགྱུར་རོ། །ཧ་ཅང་ཆར་ཆེས་ན་བསྒོ་བ་བཞིན། ཧ་ཅང་ཆར་ཆེན་པོ་འགུམས་པར་བགྱིད་དོ། །རླུང་དང་། གྲང་བ་དང་། ཚ་བ་དང་། སེར་བ་ཐམས་ཅད་བསྒོ་བ་ཙམ་གྱིས་གཅོད་པར་བགྱིད་དོ། །ཕུག་གི་སྒོར་ལ་དུ་ལ་ལན་
བདུན་བཟླས་བརྗོད་བགྱིས་ནས། ཕུག་གི་སྒོར་བསྣུན་ན་ཕུག་གི་སྒོ་ཐམས་ཅད་འབྱེ་བར་འགྱུར་རོ། །འཁྲུལ་འཁོར་དང་གཏན་པ་དང་། སྒོ་གླེགས་ཐམས་ཅད་དུམ་བུར་བཅག་པར་འགྱུར་རོ། །གནས་ན་གནས་པ་ཐམས་ཅད་ཕྱིར་བྱུང་ནས། རིག་སྔགས་འཆང་གི་མདུན་དུ་མཆིས་ཏེ།
བསྒོ་བ་བཞིན་དུ་བགྱིད་པར་འགྱུར་རོ། །ནགས་ཚང་ཚིང་གི་དབུས་སུ་འཕངས་ན། ནགས་ཚང་ཚིང་གི་གནས་ཀྱི་སྒོ་ཐམས་ཅད་ཕྱེ་ནས་སྨན་གྱི་རྫས་ཐམས་ཅད་རང་གི་གཟུགས་ཀྱིས་མདུན་ན་མཆིས་པར་འགྱུར་རོ། །ལ་དུ་ལ་ལན་བདུན་བཟླས་བརྗོད་བགྱིས་ཏེ། དུར་ཁྲོད་ཆེན་པོའི་དབུས་སུ་
འཕངས་ན་འབྱུང་པོ་དང་། གནོད་སྦྱིན་དང་། སྲིན་པོ་དང་བཅས་པའི་གནས་ཀྱི་སྒོ་ཐམས་ཅད་འབྱེ་བར་འགྱུར་རོ། །གནོད་སྦྱིན་དང་། སྲིན་པོ་དང་། འབྱུང་བ་ཐམས་ཅད་སྒྲེན་མོར་གྱུར་ན། ཐམས་ཅད་དབང་དུ་མཆིས་པར་འགྱུར་ཞིང་། ཇི་སྲིད་འཚོའི་བར་དུ་བསྒོ་བ་བཞིན་མཆིས་པར་

འགྱུར་རོ། །རྨ་མ་བྱུང་བའི་མི་རོ་ལ། དྲི་ཆབ་ཀྱིས་ཁྲུས་བགྱིས་ལ་ལ་དུ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ། ལག་པ་གཉིས་སུ་ལ་དུ་སྩལ་ལ། གོས་དཀར་པོས་རོ་གཡོགས་ནས། ཁྲོ་བོའི་རྒྱལ་པོ་ཆབ་དང་ཡུངས་ཀར་ལ་ལན་བདུན་བཟླས་ནས་དབང་བསྐུར་
ན་ཅི་དྲིས་པ་དེ་དག་ཐམས་ཅད་སྨྲ་བར་འགྱུར་ཏེ། བདེ་བ་དང་ལོ་ལེགས་པ་དང་། ལོ་ནོངས་པ་དང་། ནད་དང་། གནོད་པ་དང་། འཚེ་བ་དང་། ཕ་རོལ་གྱི་དཔུང་དང་། ཕས་ཀྱི་དགྲ་བོ་དང་། མི་མཛའ་བའི་འཇིགས་པ་དང་། མི་ངས་དང་། ཡམས་ཀྱི་ནད་དེ་དག་ཐམས་ཅད་སྨྲ་བར་
འགྱུར་རོ། །ལྷའི་འཇིག་རྟེན་དུ་སྐྱེ་བའམ། སངས་རྒྱས་ཀྱི་ཞིང་དུ་སྐྱེ་བ་སྨྲ་བར་འགྱུར་ཞིང་། དམྱལ་བར་སྐྱེ་བ་སྨྲ་བར་འགྱུར་རོ། །ཚེ་རིང་བའམ་ཚེ་ཐུང་བ་སྨྲ་བར་འགྱུར་རོ། །དུས་མ་ལགས་པའི་འཆི་བ་སྨྲ་བར་འགྱུར་རོ། །གཏེར་གྱི་གཏམ་སྨྲ་བར་འགྱུར་ཏེ། ནོར་བསྒྱུར་བའི་གཏམ་
མམ། ཞིང་གི་གཏམ་མམ། མིག་འཕྲུལ་གྱི་གཏམ་སྨྲ་བར་འགྱུར་རོ། །ཆོ་ག་ཞིབ་མོ་འགྲུབ་པ་དང་། གསང་སྔགས་འགྲུབ་པ་དང་། ཕྱག་རྒྱའི་དཀྱིལ་འཁོར་འགྲུབ་པ་སྨྲ་བར་འགྱུར་རོ། །མིག་སྨན་འགྲུབ་པ་དང་རིལ་བུ་འགྲུབ་པ་སྨྲ་བར་འགྱུར་རོ། །ནམ་མཁའ་ལ་མཆི་བ་དང་།
མི་གདའ་བར་བགྱི་བ་དང་། རོ་ལངས་བསླང་བ་དང་། རིགས་མ་དག་པ་དང་། དགྲ་ཆད་པས་བཅད་ཅིང་དབང་དུ་བགྱི་བ་དེ་དག་ཐམས་ཅད་སྨྲ་བར་འགྱུར་རོ། །སྒྱུ་ཐབས་སྨྲ་བར་འགྱུར་རོ། །ཉམས་པ་སྨྲ་བར་འགྱུར་རོ། །འཕེལ་བ་སྨྲ་བར་འགྱུར་བ་ནས་བསྐལ་པ་ལས་འདས་པའི་འདས་པ་
དང་། མ་འོངས་པའི་དང་། ད་ལྟར་བྱུང་བའི་བར་དུ་སྨྲ་བར་འགྱུར་རོ། །དེ་ནས་རིག་སྔགས་འཆང་གིས་ཆབ་ཀྱི་ཁར་སྩལ་ལ་ལ་དུ་བླངས་ན་རོ་འགྱེལ་བར་འགྱུར་རོ། །ལ་དུ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས། རྒྱལ་པོའི་སྒོར་བསྣུན་ན། རྒྱལ་པོའི་བཙུན་མོ་འཁོར་དང་
བཅས་པ་བདག་ཉིད་དམ། ནོར་དབང་དུ་གྱུར་ནས་མཆིས་པར་འགྱུར་རོ། །གྲོང་ཁྱེར་གྱི་སྒོར་བསྣུན་ན། གྲོང་ཁྱེར་ན་གནས་པའི་སྐྱེས་པའམ། བུད་མེད་དམ། ཁྱེའུ་དང་བུ་མོ་ཐམས་ཅད་དབང་དུ་གྱུར་ནས་མཆིས་པར་འགྱུར་ཞིང་། ནོར་ཆེན་པོ་འདུ་བ་འགྲུབ་པ་ཐོབ་པར་འགྱུར་རོ། །

མཆོད་པའི་གནས་ཆེན་པོར་འགྱུར་རོ། །ལ་དུ་ལ་ལན་བདུན་བཟླས་བརྗོད་བགྱིས་ཏེ། དཔལ་ལྷ་མོ་ཆེན་མོའི་ལག་པར་སྩལ་ན། དཔལ་ལྷ་མོ་ཆེན་མོ་དབང་དུ་གྱུར་ནས། ནོར་ཆེན་པོ་སྩོལ་ཅིང་ཇི་སྲིད་འཚོའི་བར་དུ་མཆིས་པར་འགྱུར་རོ། །ལ་དུ་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་
ནས། ཁུག་མའི་ནང་དུ་སྩལ་ཏེ། མཆན་ཁུང་དུ་བསྲེལ་བར་བགྱིས་ཏེ། ཅི་ཙམ་དུ་བསྲེལ་བ་དེ་སྲིད་དུ་མི་གདའ་བར་གྱུར་ནས། གང་དུ་སྩལ་བ་དེར་འཇུག་པར་འགྱུར་རོ། །གང་ན་ཤིང་གཅིག་པའམ། འབབ་ཆུ་གཅིག་པར་ལ་དུ་ལ་ཁྲོ་བོའི་རྒྱལ་པོ་ལན་བརྒྱ་རྩ་བརྒྱད་བཟླས་
བརྗོད་བགྱིས་ཏེ། དབང་བསྐུར་ནས་ཤིང་གི་དྲུང་དུ་བརྡེགས་ན། འདོད་དགུར་སྒྱུར་བ་དབང་དུ་གྱུར་ནས་མཆིས་པར་འགྱུར་རོ། །ཅི་ལྟར་བསམས་པའི་འདོད་པ་ཐམས་ཅད་ཉེ་བར་མཆིས་ནས་ཡོངས་སུ་སྤྱོད་པ་དང་། ཇི་སྲིད་འཚོའི་བར་དུ་མཆིས་པར་འགྱུར་རོ། །ལ་དུ་ལ་ལན་ཉི་ཤུ་རྩ་
གཅིག་བཟླས་བརྗོད་བགྱིས་ཏེ། མ་མོའི་གནས་སུ་ནག་པོ་ཆེན་པོའི་སྤྱི་བོའི་གཙུག་ཏུ་བཞག་ལ། ཁྲོ་བོའི་རྒྱལ་པོ་ལན་བདུན་བཟླས་ཏེ། ཆབ་དང་ཡུངས་ཀར་གྱིས་དབང་བསྐུར་བ་བགྱིས་ན། དེ་ནས་སྦྱོར་བ་མོ་ཐམས་ཅད་དང་། མཁའ་འགྲོ་མ་ཐམས་ཅད་དབང་དུ་གྱུར་ནས་
མངག་གཞུག་པ་ལས་ཐམས་ཅད་བགྱིད་པར་འགྱུར་རོ། །ལ་དུ་ལ་ལན་ཉི་ཤུ་རྩ་གཅིག་བཟླས་ཏེ། ནག་པོ་ཆེན་པོའི་ལྟེ་བའི་ཕྱོགས་སུ་བཞག་ན་མ་མོའི་ཚོགས་ཐམས་ཅད་རང་གི་གཟུགས་ཀྱིས་མདུན་དུ་མཆིས་ནས། མཆོག་ཐམས་ཅད་སྩོལ་བར་འགྱུར་རོ། །ལས་ཐམས་ཅད་
བགྱིད་པར་འགྱུར་རོ། །ལ་དུ་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ནས། འཕགས་པ་འཇམ་དཔལ་གྱི་ལྷུང་བཟེད་ཀྱི་ནང་དུ་སྩལ་ཏེ། ཁྲོ་བོའི་རྒྱལ་པོས་དབང་བསྐུར་བགྱིས་ན། ཇི་སྲིད་དུ་ལྷུང་བཟེད་ན་ལ་དུ་མཆིས་པ་དེ་སྲིད་དུ་ཕྱོགས་བཅུའི་དེ་བཞིན་གཤེགས་པ་ཐམས་
ཅད་ཀྱི་སྤྱན་སྔར། ལྷའི་ཞལ་ཟས་རོ་སྣ་ཚོགས་ཀྱི་རོའི་མཆོག་དང་ལྡན་པ་དག་འབྱུང་བར་འགྱུར་ཞིང་། ཉན་ཐོས་དང་བྱང་ཆུབ་སེམས་དཔའི་ཚོགས་ཀྱི་འཁོར་གྱི་དཀྱིལ་འཁོར་ཆེན་པོ་དང་བཅས་པ་ཚིམ་པར་བགྱིས་པར་འགྱུར་རོ། །དེ་བཞིན་གཤེགས་པ་དེ་དག་ཐམས་ཅད་དང་།

བྱང་ཆུབ་སེམས་དཔའི་ཚོགས་དང་ཉན་ཐོས་ཀྱི་དགེ་འདུན་དང་བཅས་པ་དེ་དག་ཐམས་ཅད་ཀྱིས་རིག་སྔགས་འཆང་དེའི་ཡོན་སྦྱོང་བ་མཛད་པར་འགྱུར་རོ། །ལ་དུ་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ། ཁྲོ་བོའི་རྒྱལ་པོའི་དབང་བསྐུར་ལ། ལྕགས་ཀྱུའི་རྒྱལ་
པོས་ཆབ་ལ་བཟླས་བརྗོད་བགྱིས་ནས། མེ་ཐབ་ཀྱི་མཚམས་བཅིང་བར་བགྱིའོ། །དེ་ནས་ཨ་རྐའི་ཡམ་སྲེག་ཤིང་གི་མེ་སྦར་ལ། ལ་དུ་དེ་མེ་ཐབ་ཀྱི་དབུས་སུ་བཞག་སྟེ། མར་དང་ཡུངས་ཀར་དང་ཞོ་དང་སྦྲང་རྩི་བསྲེས་ལ་ལན་བརྒྱ་རྩ་བརྒྱད་སྦྱིན་སྲེག་བགྱིའོ། །ལན་བརྒྱ་རྩ་བརྒྱད་
ཚང་བ་དང་། མེ་ལྷ་མེའི་རང་བཞིན་གྱི་གཟུགས་ཀྱིས་བྱུང་ནས། རིག་སྔགས་འཆང་ལ་སྨྲས་པ། རིག་སྔགས་འཆང་ལེགས་སོ་ལེགས་སོ། །བདག་ཚིམ་པར་བྱས་སོ། །བདག་དགའ་བར་གྱུར་ཏོ། །རིག་སྔགས་འཆང་བདག་གིས་མཆོག་ཏུ་དགའ་བ་ཐོབ་ཀྱིས་རིག་སྔགས་
འཆང་ཅི་ལྟར་ཡིད་ལ་བསམས་པ་བཞིན་འདོད་པ་སྨྲོས་ཤིག་དང་། མཆོག་སྦྱིན་ནོ། །རིག་སྔགས་འཆང་གིས་ཇི་ལྟར་ཡིད་ལ་བསམས་པ་བཞིན་མཆོག་བརྗོད་པར་བགྱིའོ། །མེ་ལྷ་དེས་ཡང་ཐམས་ཅད་སྩོལ་ཅིང་དབང་དུ་གྱུར་ནས་མཆིས་པར་འགྱུར་རོ། །ལས་ཐམས་ཅད་གྲུབ་པ་
སྩོལ་བར་འགྱུར་རོ། །མེའི་ཕུང་པོའི་དབུས་སུ་ཞུགས་ནས་འོད་ཟེར་སྟོང་འཕྲོ་བ་རྣམས་གངས་བཞིན་དུ་བསིལ་བར་འགྱུར་ཏེ། ཆབ་ནས་འབྱུང་བ་བཞིན་ནོ། །ལག་པས་མེ་རྣམས་ཚུགས་པར་བགྱིད་དོ། །འབར་བཞིན་དུ་ཀླད་པའི་སྤྱི་བོར་བཞག་ན། སྐྲ་ཉག་མ་གཅིག་ཀྱང་འཚིག་པར་
མི་བགྱིད་དེ། མེའི་དབང་དུ་མཆི་བར་མི་འགྱུར་རོ། །འབར་བཞིན་དུ་གཡར་གྱི་ནང་དུ་བསྲེ་ལན་ཅུང་ཟད་དྲོ་བ་ཙམ་དུ་ཡང་མི་འགྱུར་རོ། །ལུས་ལ་བབ་ན་ཅི་ལྟར་ཙནྡན་བཞིན་དུ་བསིལ་ཞིང་བདེ་བར་འགྱུར་རོ། །གཞན་ཡང་དགོས་པ་སྣ་ཚོགས་བགྱིད་པར་འགྱུར་རོ། །གོས་ཀྱི་མཐའ་མར་ཐུམ་
པོ་བགྱིས་ན་ཚིག་པར་མི་འགྱུར་རོ། །ཆབ་ཀྱི་ནང་དུ་སྩལ་ན་འགུམ་པར་མི་འགྱུར་རོ། །སྦྱིན་སྲེག་ཐམས་ཅད་ཀྱི་ཆོ་ག་སོ་སོའི་གཟུགས་སུ་མཆིས་པར་འགྱུར་རོ། །ཐམས་ཅད་དུ་དགོས་པ་གྲུབ་པ་སྩོལ་བར་འགྱུར་རོ། །དགོས་པ་གང་དང་གང་དུ་བསྐོས་པ་དེ་དང་དེར་དགོས་པ་ཐམས་ཅད་

གྲུབ་པ་སྩོལ་བར་འགྱུར་རོ། །ཐམས་ཅད་དུ་གསང་སྔགས་དང་དཀྱིལ་འཁོར་དང་ཆོ་ག་གྲུབ་པ་ཐམས་ཅད་ལུང་འབོག་པར་འགྱུར་རོ། །དུ་བ་དང་རླུང་དང་མེ་འབར་བའི་ཤུགས་ཀྱིས་དཔག་ཚད་སྟོང་དུ་མཆིས་ཤིང་སླར་ཡང་ལྡོག་པར་འགྱུར་རོ། །དགོས་པ་ཐམས་ཅད་ཉེ་བར་སྟོན་པར་འགྱུར་
རོ། །དགོས་པ་ཐམས་ཅད་བགྱིད་པར་འགྱུར་རོ། །ཐམས་ཅད་དུ་གྲུབ་པ་སྩོལ་བར་འགྱུར་རོ། །དེ་ནས་དོན་ཡོད་མེ་འབར་བ། །བླ་མེད་འབར་བཟང་བསྒྲུབ་འཚལ་ན། །ཡིད་བཞིན་ནོར་བུ་ལྟ་བུ་དང་། །གཟི་བརྗིད་ཉི་མ་དང་མཉམ་པས། །ཕྱོགས་བཅུ་ཁོར་ཁོར་ཡུག་གི། །
ཀུན་ནས་སུ་ནི་གསལ་བར་བགྱིད། །སྒྲུབ་པ་རྣམ་པ་སྣ་ཚོགས་དང་། །འཚེད་པ་བླ་ན་མེད་པ་འགྲུབ། །བཅུད་ཀྱི་མཆོག་དེ་དམ་པ་ལགས། །ནོར་སྒྱུར་སྨྲ་བ་བླ་ན་མེད། །གཞན་ཡང་འཚེད་པ་སྣ་ཚོགས་པ། །སྒྲུབ་པ་བླ་ན་མེད་པ་ལགས། །ཅི་ལྟར་ཉིན་བཞིན་མཚན་གདའ་བས། །
ཉིན་པར་གྱི་ནི་གདུགས་དང་མཚུངས། །ལན་ཅིག་དགོས་པ་སྒྲུབ་པ་ན། །ལེགས་པར་ལས་བགྱིས་ནོར་བུ་དང་། །རྫས་བསྲེས་ལེགས་པར་བགྱིས་པ་ལ། །གཙང་མས་བཟླས་པའི་ལས་རྣམས་དང་། །གཙང་མས་སྤྱད་པས་སྒྲུབ་པ་དང་། །དོན་ཡོད་ཆུ་དང་མེ་དང་ནི། །མེ་ཡི་ཤིང་
རྣམས་བརྗོད་པར་བགྱི། །མེ་འབར་འོད་དང་མཚུངས་པ་སྟེ། །དེ་དག་ཐམས་ཅད་གཅིག་སྤུངས་པའི། །ཡམ་སྲེག་ཆོ་ག་བླ་ན་མེད། །ཙནྡན་དང་ནི་སེང་ལྡེང་དང་། །པ་ཏང་ཀ་ར་བཱི་ར་དང་། །ཨརྐ་ཤ་མི་སྨྱུག་མ་དག །ཤྀར་ཤ་ཀ་ནཱ་ཀི་ར་ཀ །འོ་མའི་ཤིང་དང་བྱང་ཆུབ་ཤིང་། །
བླག་ཤ་དང་ནི་སྣ་མ་དང་། །གན་དྷ་བར་ཤི་པདྨ་ཡི། །རྩ་བ་དང་ནི་ལོ་མར་བཅས། །པདྨ་དཀར་པོ་ཀུ་མུ་ད། །ཨུཏྤལ་མེ་ཏོག་ལོ་མ་རྩ། །བཱི་ཛ་པཱུ་ར་བིལ་བ་ཤིང་། །སིན་དུ་བ་ར་ཙམ་པ་ཀ། །དྲེ་ཀ་པི་ཙུ་མརྡྷ་དང་། །ས་ཧ་བ་ལ་ཙི་ཏྲ་ཀ །ཤིང་དེ་ཀུན་ག་བསྡུས་པ་ཡིས། །ཡམ་སྲེག་
ཤིང་གིས་ལས་བགྱིས་ཏེ། ཡུངས་ཀར་མར་དང་ཞོ་དང་ནི། །སྦྲང་རྩི་འབྲས་ཡོས་སྦྱིན་སྲེག་བགྱི། །བཟང་པོའི་ཟངས་ལས་སྲང་གསུམ་དང་། །མཚལ་ལས་གཉིས་འགྱུར་གང་བསྐུས་ཀྱང་། །སྲང་གཅིག་ཙནྡན་དཀར་པོ་ཉིད། །སྲང་བཅུ་ལྡོང་རོས་སྲང་གཅིག་སྟེ། །དེ་དག་

བསྲེས་པའི་རྫས་རྣམས་དང་། །དེ་བཞིན་ཡུང་ནི་ཉིས་འགྱུར་དག །ཞི་ག་དག་ནི་བཀང་ནས་སུ། །མེ་ཐབ་དབུས་སུ་གཞུག་པར་བགྱི། །སྦྱིན་སྲེག་སྟོང་ནི་རྩ་བརྒྱད་དུ། །ཤིན་ཏུ་མཉམ་གཞག་ལེགས་གསལ་བ། །གཙང་མ་གཙང་མར་སྤྱོད་པ་ཡི། །གོས་གཙང་
ལེགས་པར་ཁྲུས་བགྱིས་པ། །དྲི་ཞིམ་དྲི་ཡིས་བསྒོས་པར་བགྱི། །རོ་སྣ་ཚོགས་པའི་གཏོར་མ་དང་། །མེ་ཏོག་འབྲས་བུ་ཉིད་ཀྱང་དགོད། །བཟླས་བརྗོད་ཀྱི་ནི་སྦྱིན་སྲེག་ཉིད། །སྟོང་རྩ་བརྒྱད་ནི་ཚང་བ་དང་། །དེ་ནས་ལྷ་བཤོས་གཏོར་མ་དང་། །མེ་ཏོག་བདུག་པ་མཆོད་ཡོན་
སྣོད། །དབུལ་ཏེ་འོ་མས་མདག་མ་དགུམ། །འོ་མས་ཞི་ག་ཞི་བར་བགྱི། །དེ་ནས་རིག་སྔགས་འཆང་གིས་བཟླས་བརྗོད་སྟོང་རྩ་བརྒྱད་བགྱིས་ནས་ཡུངས་ཀར་གྱིས་བསྣུན་པར་བགྱིའོ། །ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་ཏུ་དབང་བསྐུར་བར་བགྱིའོ། །དེ་ནས་ཞིག་འབར་བར་
འགྱུར་རོ། །དེ་ནས་རིག་སྔགས་འཆང་གིས་ཞི་ག་དེ་ལ་མཆོད་པར་བགྱིའོ། །དེ་ནས་ཟངས་ཀྱི་སྒྲོམ་བུའམ། དངུལ་གྱི་སྒྲོམ་བུར་ཞིག་ནས་ནོར་བུ་བླངས་ཏེ། སྒྲོམ་བུ་དེར་གཞག་པར་བགྱི་སྟེ། ཡིད་བཞིན་གྱི་ནོར་བུ་ཅི་ལྟ་བ་བཞིན་དུ། འདི་ཡང་དོན་ཡོད་པ་འབར་བ་མཐུ་ཆེན་
པོའི་མཐུ་དང་ལྡན་པར་འགྱུར་རོ། །མཚན་མོ་ནི་ཟླ་བའི་འོད་བཞིན་དུ་གདའ་བར་འགྱུར་རོ། །ཉིན་མོ་ནི་ཉི་མའི་འོད་བཞིན་དུ་གདའ་བར་འགྱུར་རོ། །ནམ་འཚེད་པའི་དུས་ཀྱི་ཚེ་ནོར་བུ་དེ་བཞག་ན་འཚོ་བ་དང་། སྲེག་པ་དང་། འཚེད་པ་ཐམས་ཅད་འགྲུབ་པར་འགྱུར་རོ། །ནམ་
ཧོམ་བགྱིད་པ་དེའི་ཚེ། ཐབ་ཀྱི་དབུས་སུ་བཞག་སྟེ། སྲེག་བླུགས་ཀྱིས་སྦྱིན་སྲེག་བགྱིས་ན། མེ་ཆེན་པོ་འབར་བར་འགྱུར་རོ། །ཐམས་ཅད་ཀྱི་ཐམས་ཅད་དུ་དགོས་པ་རྣམས་སྒྲོན་མས་གསལ་བར་བགྱིས་པ་བཞིན་དུ་འགྱུར་རོ། །གཡུལ་ངོ་ཆེན་པོར་གཡུལ་འགྱེད་པའི་དབུས་སུ་སྐྱེས་པ་
དཔའ་བོ་ལེགས་པར་ཁྲུས་བགྱིས་པ། གོས་གཙང་མ་བགོས་པ། ཡ་ལད་དང་གོ་ཆར་གཏམས་པས་ཡིད་བཞིན་གྱི་ནོར་བུ་ཆེན་པོ་དེ་སྤྱི་བོའི་གཙུག་ཏུ་བཞག་ནས། གཅིག་པོ་གཡུལ་གྱི་དབུས་སུ་ཞུགས་ན། དེ་ནས་སྐྱེས་པ་དེ་མེ་འབར་བ་གཅིག་པུར་འགྱུར་རོ། །དེ་ནས་གཡུལ་འགྱེད་

པའི་ཕ་རོལ་གྱི་དཔུང་རྣམས་ཕམ་པར་གྱུར་ནས། ཕྱོགས་བཅུར་འཁྲུགས་ནས་འབྱེར་བར་འགྱུར་རོ། །ཕྱི་ནས་ལན་འགའ་ཡང་ཕ་རོལ་གྱི་དཔུང་དང་། དགྲའི་འཇིགས་པ་འབྱུང་བར་མི་འགྱུར་རོ། །ཕ་རོལ་གྱི་དགྲ་དང་མི་མཛའ་བའི་འཇིགས་པ་འབྱུང་བར་མི་འགྱུར་རོ། །ལག་པས་ནོར་
བུ་བཟུང་ནས་ཕུག་གི་གནས་སུ་ཞུགས་ན། གནས་ཀྱི་སྒོ་ཐམས་ཅད་འབྱེ་བར་འགྱུར་རོ། །གནས་ན་གནས་པ་ཐམས་ཅད་མདུན་དུ་མཆིས་པར་འགྱུར་རོ། །ཀླུའི་གནས་ཐམས་ཅད་དུ་མཆིས་ནས། ལག་པས་ནོར་བུ་བཟུང་སྟེ། གནས་ཀྱི་ནང་དུ་ཞུགས་ན། ཆབ་ཐམས་ཅད་ཀྱིས་ཕྱིར་མི་
ཚུགས་པར་འགྱུར་རོ། །དེ་ནས་ཀླུ་ཐམས་ཅད་མདུན་ན་མཆིས་ནས། བདེན་པར་དམ་བཅའ་བར་འགྱུར་རོ། །དབང་དུ་གྱུར་ནས་ཇི་སྲིད་འཚོའི་བར་དུ་ལས་བགྱིད་པར་འགྱུར་རོ། །བསྒོ་བ་བཞིན་བགྱིད་པར་འགྱུར་རོ། །ལོ་ཏོག་དང་རྩྭ་དང་། ཤིང་གེལ་བ་དང་། ནགས་ཚལ་ཐམས་ཅད་
བདེ་བར་འཕེལ་བར་འགྱུར་རོ། །མཉེན་ཅིང་མདངས་དང་ལྡན་པ་དང་མཉེན་པར་འགྱུར་རོ། །གཟི་བརྗིད་དང་ལྡན་པ་དང་། དྲན་པ་དང་ལྡན་པ་དང་མི་བདེ་བ་ཡང་ཆུང་བར་འགྱུར་རོ། །སེམས་ཅན་གང་དག་གིས་ཀྱང་ལོ་ཏོག་དང་། མེ་ཏོག་དང་། འབྲས་བུ་ལ་ལོངས་སྤྱོད་པར་འགྱུར་བ་
དེ་དག་ཐམས་ཅད་དང་། གཞན་ཆེས་མང་པོ་དག་གིས་དགོས་པ་མང་པོ་བགྱིད་པར་འགྱུར་བ་ནི། ནོར་བུ་ཆེན་པོ་དོན་ཡོད་འབར་བའི་ནོར་བུ་མེ་འབར་བ་ཆེན་པོ་ལགས་སོ། །དེ་ནས་དོན་ཡོད་སྣང་བ་རྣམ་པར་བལྟ་བས། འཕགས་པ་སྤྱན་རས་གཟིགས་དབང་ཕྱུག་བཀུག་སྟེ། རང་གི་གཟུགས་
སུ་ལྟ་བར་འཚལ་ན། དེ་ནས་རིག་སྔགས་འཆང་གཙང་མས་གོས་གཙང་མ་བགོ་བར་བགྱིའོ། །ལུས་ལེགས་པར་བཀྲུས་ཏེ། སྤོས་ཆབ་ཀྱིས་བྱུག་པར་བགྱིའོ། །ཤིང་ཨརྐའི་ཡམ་སྲེག་ཤིང་གིས་མེ་སྦར་བར་བགྱིའོ། །ཡུངས་ཀར་དང་། ཨ་ག་རུ་དང་། ཙནྡན་དང་། ཞོ་དང་། སྦྲང་
རྩི་དང་མར་སྦྱར་བས་སྟོང་རྩ་བརྒྱད་སྦྱིན་སྲེག་བགྱིའོ། །དེ་ནས་དོན་ཡོད་ལྕགས་ཀྱུ་གུ་གུལ་ལ་ལན་ཉི་ཤུ་རྩ་གཅིག་གི་སྲེག་བླུགས་ཀྱིས་སྦྱིན་སྲེག་བགྱིས་ན། འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་མདུན་ན་མཆིས་ནས། མཆོག་ཐམས་ཅད་བསམས་པ་བཞིན་

ཡོངས་སུ་རྫོགས་པར་བགྱིད་དོ། །ཇི་ལྟར་ཡིད་ལ་བགྱིད་ཅིང་བསམས་པའི་མཆོག་སྩོལ་བར་བགྱིད་དོ། །དེ་ནས་རིག་སྔགས་འཆང་གིས་ཅི་ལྟར་ཡིད་ལ་བགྱིས་ཤིང་བསམས་པའི་མཆོག་སྨྲས་པ་དང་། དེའི་འོག་ཏུ་འཕགས་པ་སྤྱན་རས་གཟིགས་དབང་ཕྱུག་གིས་
ཐམས་ཅད་སྩོལ་བར་བགྱིད་དོ། །དེ་ནས་མིག་སྨན་བསྒྲུབ་པར་འཚལ་ན། རིག་སྔགས་འཆང་དེ། ལེགས་པར་བཀྲུས་ཏེ། གཙང་མས་གོས་གཙང་མ་བགོ་བར་བགྱིའོ། །ནུབ་གཅིག་སྨྱུང་བ་བགྱིས་ཏེ། དེས་ཟངས་ཀྱི་ཟ་མ་ཏོག་བགྱིས་ལ་དེ་ནས་མིག་སྨན་སོའི་བིར་དང་ཡུངས་ཀར་
ཉིས་འགྱུར་དུ་བསྲེས་པས་དགང་བར་བགྱིའོ། །དེ་ནས་སྟོང་རྩ་བརྒྱད་བཟླས་བརྗོད་བགྱིས་ནས། ཐབ་ཀྱི་དབུས་སུ་གཞག་པར་བགྱིའོ། །དེའི་སྟེང་དུ་ཨུ་ཤྀ་ར་དང་། ཡུངས་ཀར་དང་། ཙནྡན་དང་། ཞོ་དང་སྦྲང་རྩི་དང་། མར་བསྲེས་པས་ལན་སྟོང་རྩ་བརྒྱད་སྦྱིན་སྲེག་བགྱིའོ། །ཤིང་ཨརྐའི་མེ་
སྦར་བར་བགྱིའོ། །ལན་སྟོང་རྩ་བརྒྱད་ཚང་བ་དང་། དེ་ནས་མིག་སྨན་བླངས་ལ་གཏུན་གྱི་སྟེང་དུ་ལེགས་པར་ཞིབ་ཏུ་བཏགས་ལ་ལྡོང་རོས་དང་། ག་པུར་དང་གླ་རྩིར་བསྲེས་ནས་སླར་ཡང་དོན་ཡོད་པའི་ཞགས་པའི་སྙིང་པོ་ལན་བརྒྱ་རྩ་བརྒྱད་བཟླས་བརྗོད་བགྱིས་ལ་དོན་ཡོད་ལྕགས་ཀྱུའི་རིག་
སྔགས་རྒྱལ་པོ་ལན་ཉི་ཤུ་རྩ་གཅིག་བཟླས་བརྗོད་བགྱིས་པ་ནི་ཐམས་ཅད་དུ་མགུལ་ལ་ལེགས་པར་སྦྱར་ཏེ། དེ་ནས་དོན་ཡོད་རྒྱལ་པོས་དབང་བསྐུར་བར་བགྱིའོ། །དོན་ཡོད་ཞགས་པའི་ཕྱག་རྒྱས་ལན་བདུན་ཕྱག་རྒྱ་བཅིང་ངོ་། །དེ་ནས་མིག་སྨན་གྱིས་བྱུགས་ན་ནམ་མཁའ་ལ་འཕུར་ནས་རིག་
སྔགས་འཆང་ཐམས་ཅད་ཀྱི་དཔོན་པོར་འགྱུར་རོ། །སྐྲ་ཅུང་ཟད་འཁྱིལ་བར་ཡང་འགྱུར་རོ། །བསྐལ་པ་ཁྲིར་འཚོ་བར་འགྱུར་རོ། །དབྲལ་བར་ཐིག་ལེ་བགྱིས་ན་མི་གདའ་བར་འགྱུར་རོ། །མིག་ལ་བསྐུས་ཏེ་ཚིག་གཞན་མི་སྨྲ་བར་རྒྱལ་པོའི་ཕོ་བྲང་དུ་ཞུགས་ན། རྒྱལ་པོ་བཙུན་མོའི་འཁོར་
དང་བཅས་པ་དབང་དུ་གྱུར་ནས་མཆིས་པར་འགྱུར་རོ། །མཆོད་པ་ཕལ་པོ་ཆེས་ཆེར་མཆོད་པར་འགྱུར་རོ། །ནོར་འདུ་པ་གྲུབ་པ་ཆེན་པོ་ཐོབ་པར་འགྱུར་རོ། །སྒྲུབ་པའི་དུས་སམ། བཟླས་བརྗོད་ཀྱི་དུས་སུ་མིག་ལ་བསྐུས་ན་བགེགས་དང་ལོག་འདྲེན་དང་། བདུད་ཀྱི་རིས་ཀྱི་ལྷ་རྣམས་ཐམས་ཅད་ཀྱིས་

མི་མཐོང་བར་འགྱུར་རོ། །ཕྱིས་ཀྱང་བགེགས་བྱེད་པར་མི་ནུས་ཏེ་བར་ཆད་བགྱིད་པར་མི་འགྱུར་རོ། །བདེ་བ་སྒྲུབ་པའི་ཆོ་ག་དང་བཟླས་བརྗོད་ཀྱི་ཆོ་ག་འགྲུབ་པར་འགྱུར་རོ། །མིག་ལ་བྱུགས་ཏེ་སྐྱེ་བོ་མང་པོའི་ནང་དུ་ཞུགས་ན་དེ་དག་ཐམས་ཅད་དབང་དུ་གྱུར་ཏེ། ནོར་དང་། འབྲུ་དང་། གོས་
དང་། ལྷབ་ལྷུབ་རྒྱན་ཕལ་པོ་ཆེ་འགྲུབ་པར་འགྱུར་རོ། །བུད་མེད་ཀྱང་མིག་མི་འཛུམས་པར་ལྟ་བཞིན་དུ་བདག་ཉིད་དམ་ནོར་དབང་དུ་འགྱུར་རོ། །མིག་ལ་བྱུགས་ཏེ་དགོན་པོ་ཆེན་པོར་ཞུགས་ན། ཆོམ་པོ་དང་། གཡོན་ཅན་དང་། རྐུན་པོ་དང་། གཅན་གཟན་གདུག་པ་དང་། སྦྲུལ་
དང་། དབྱིག་དུག་དང་། སྦྲུལ་གྱི་དུག་གི་འཇིགས་པ་ཐམས་ཅད་འབྱུང་བར་མི་འགྱུར་ཏེ། བདེ་ལེགས་སུ་སླར་མཆི་བར་འགྱུར་རོ། །འཐབ་མོ་དང་རྩོད་པ་དང་འགྱེད་པ་ཐམས་ཅད་ལ་མིག་སྨན་བསྐུས་ན། སྨྲ་བ་རྣམས་ཀྱི་བླ་ན་མེད་པར་འགྱུར་ཏེ། ཐམས་ཅད་དུ་རྒྱལ་བར་འགྱུར་རོ། །
གཡུལ་ངོར་གཡུལ་འགྱེད་པའི་ནང་དུ་མཆིས་ནས་མིག་ལ་བྱུགས་ན། ཐམས་ཅད་ལས་རྒྱལ་བར་འགྱུར་ཞིང་། འཇིགས་པ་ཐམས་ཅད་ལས་བསྒྲལ་བར་འགྱུར་རོ། །གདུག་པས་ཟིན་པ་ཐམས་ཅད་ལ་མིག་ལ་བསྐུས་ན། གདུག་པ་མ་མཆིས་པར་འགྱུར་རོ། །རིམས་ཞག་གཅིག་པ་
དང་། ཞག་གཉིས་པ་དང་། ཞག་གསུམ་པ་དང་། རིགས་ཞག་བཞི་བ་ཐམས་ཅད་ལ་མིག་ལ་བསྐུས་ན། རིམས་ཐམས་ཅད་ལས་གྲོལ་བར་འགྱུར་རོ། །དུག་མི་བཟད་པར་འཚལ་བ་ལ་མིག་ལ་བསྐུས་ན་དུག་མ་མཆིས་པར་འགྱུར་རོ། །གདོན་ཐམས་ཅད་ཀྱིས་ཟིན་པ་ལ་མིག་ལ་བསྐུས་
ན། གདོན་བརྒྱད་ཁྲི་བཞི་སྟོང་ལས་ཐར་བར་འགྱུར་རོ། །མིག་བྲོ་འཚལ་བ་ལ་བསྐུས་པ་ཙམ་གྱི་མོད་ལ་བྱང་བར་འགྱུར་རོ། །ཀླད་པ་ཆེར་བྲོ་འཚལ་བ་ཡང་མིག་ལ་བསྐུས་པ་ཙམ་གྱིས་བྱང་བར་འགྱུར་རོ། །ཚངས་པའི་སྲིན་པོའི་གདོན་དང་། བརྗེད་བྱེད་ཀྱིས་ཟིན་པ་ལ་ཡང་མིག་ལ་བསྐུས་
པ་ཙམ་གྱིས་ཐར་བར་འགྱུར་རོ། །རྒྱལ་པོ་ཁྲོས་པས་གསོད་པར་འོས་པ་གང་སུ་ཡང་རུང་བ་ཁྲིད་པ་ལ་མིག་ལ་བསྐུས་པ་ཙམ་གྱིས་འཇིགས་པ་ཐམས་ཅད་སྤངས་པའི་ཐར་བར་འགྱུར་རོ། །ནག་པོ་ཆེན་པོའི་མིག་ལ་བསྐུས་ན་རང་གི་གཟུགས་ཀྱིས་དུས་སུ་མདུན་ན་མཆིས་ནས་མཆོག་ཐམས་ཅད་སྩོལ་

ཅིང་དགོས་པ་ཐམས་ཅད་བགྱིད་པར་འགྱུར་རོ། །མ་མོའི་ཚོགས་ཐམས་ཅད་དབང་དུ་གྱུར་ནས་མཆིས་པར་འགྱུར་རོ། །དཔལ་ལྷ་མོའི་མིག་ལ་བསྐུས་ཏེ། མིག་མི་འཛུམས་པར་དོན་ཡོད་རྒྱལ་པོའི་སྙིང་པོ་ལན་བདུན་བཟླས་ན། དཔལ་ལྷ་མོ་ཆེན་མོ་མཆིས་ནས་དགོས་པ་ཐམས་
ཅད་དང་། །འབྲུ་མང་པོ་རབ་ཏུ་སྩོལ་བར་འགྱུར་རོ། །ཉལ་བའི་ཚེ་མིག་ལ་བསྐུས་ནས་ཉལ་ན། རྨི་ལམ་བཟང་པོ་མང་ཞིང་ཕལ་ཆེ་བ་མཐོང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་མཐོང་བ་སྩོལ་བར་འགྱུར་རོ། །མཆོག་ཐམས་ཅད་སྩོལ་བར་འགྱུར་རོ། །དྲན་
པ་དང་བློ་གྲོས་རྒྱ་ཆེན་པོར་འགྱུར་རོ། །མིག་ལ་བསྐུས་ཏེ་ཚོགས་ཀྱི་དབུས་སུ་ཞུགས་ན་མཆོད་པ་ཆེན་པོ་ཐོབ་པར་འགྱུར་