Kinh tạng Tây Tạng (Kangyur Đại Học) — 092_རྒྱུད་འབུམ།_མ

་རྣམ་
པར་གཟིགས་པ། བྱང་ཆུབ་ཆེན་པོའི་དཀྱིལ་འཁོར་གསང་བ། རྣམ་པར་གྲོལ་བའི་དཀྱིལ་འཁོར་གསང་བ། རས་ཀྱི་སྐུ་གཟུགས་ཆེན་པོ་མཐོང་བ་ནི་སྐུ་གཟུགས་མཐོང་བ་ཙམ་གྱི་མོད་ལ་སྡིག་པ་དང་སྒྲིབ་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །མཚམས་མེད་པ་ལྔ་བྱེད་
པ་དང་། མཚམས་མེད་པ་ལ་གཞོལ་བ་དང་། དམ་པའི་ཆོས་ཡོངས་སུ་སྤོང་བ་དང་། འཕགས་པ་ལ་སྐུར་པ་འདེབས་པ་དང་། སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཐམས་ཅད་སྤོང་བར་བྱེད་པ་རྣམས་ཀྱང་མཐོང་བ་ཙམ་ལ་སོགས་

པས་སྡིག་པ་ཐམས་ཅད་ཕྱེ་མར་རློག་གོ། །རྣམ་པར་གྲོལ་བར་འགྱུར་རོ། །སྡོམ་པ་ཆེན་པོ་ཡང་དག་པར་འཛིན་པར་འགྱུར་རོ། །གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་སྙེད་ཀྱི་དེ་བཞིན་གཤེགས་པ་བྱང་ཆུབ་སྙིང་པོ་ལ་མངོན་དུ་གཤེགས་པ་དང་། ཆོས་
ཀྱི་འཁོར་ལོ་བསྐོར་བ་མཐོང་བ་དང་འདྲ་བར་རིག་པར་བྱའོ། །རས་ཀྱི་སྐུ་གཟུགས་འདི་མཐོང་བ་ནི་གཞལ་མེད་ཁང་དང་བཅས་པའི་རི་བོ་པོ་ཊ་ལན་འཕགས་པ་སྤྱན་རས་གཟིགས་དབང་ཕྱུག་འཁོར་གྱི་དཀྱིལ་འཁོར་དང་བཅས་ཏེ་མངོན་དུ་བཞུགས་པ་མངོན་དུ་མཐོང་བ་དང་འདྲ་སྟེ། འདི་ལ་ཐེ་ཚོམ་མི་
བྱའོ། །ཡིད་གཉིས་བསྐྱེད་པར་མི་བྱའོ། །སེམས་ཀྱིས་སྐད་ཅིག་གཅིག་རབ་ཏུ་དང་བ་བྱས་ན། བསོད་ནམས་ཀྱི་ཕུང་པོ་ཆེན་པོ་ཡོངས་སུ་གཟུང་བར་འགྱུར་རོ། །དགེ་བའི་རྩ་བ་ཆེན་པོ་སོགས་པ་དང་ལྡན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གིས་དགོངས་ཏེ་མཆོག་སྦྱིན་
པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་གཟུང་བར་འགྱུར་རོ། །ལུས་དང་སེམས་ཡིད་ལས་བྱུང་བའི་ཡོངས་སུ་དག་པར་འགྱུར་རོ། །དབང་པོ་ཐམས་ཅད་ཡོངས་སུ་དག་པར་འགྱུར་རོ། །དྲི་མ་དང་བྲལ་ཞིང་སེར་སྣ་དང་། ཕྲག་དོག་དང་བྲལ་བར་འགྱུར་རོ། །
འཇིག་རྟེན་པ་ཐམས་ཅད་དགའ་བ་དང་། བླ་མར་ལྟ་བར་འགྱུར་རོ། །ཚེ་རིང་པོར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐལ་བ་མཉམ་པར་སྐྱེ་བར་འགྱུར་རོ། །ཚེ་རབས་དྲན་པར་འགྱུར་རོ། །པདྨའི་ནང་ནས་རྫུས་ཏེ་སྐྱེ་བར་
འགྱུར་རོ། །མཐོང་བ་ཙམ་གྱི་མོད་ལ་ཕྱིར་མི་ལྡོག་པར་འགྱུར་རོ། །དེ་བཞིན་གཤེགས་པ་འོད་དཔག་ཏུ་མེད་པའི་སྐུ་གཟུགས་འདི་གང་གིས་མཆོད་པ་དེ་ནི་ཕྱོགས་བཅུའི་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །འདི་ནི་མངལ་ན་གནས་པའི་ཐ་མ་ཡིན་ཏེ། ཕྱིས་མ་རིག་
པའི་མུན་པའི་ནང་དུ་ལྟུང་བར་མི་འགྱུར་རོ། །དེ་ལྟར་ན་མི་མཉམ་པ་དང་འདྲ་བ་ཡིན་ཏེ། རས་ཀྱི་སྐུ་གཟུགས་ཀྱི་ཆོ་ག་འཇིག་རྟེན་ལས་འདས་པ་སྒྲུབ་པའི་ཆོ་ག་འདི་ནི་དམ་པ་ཡིན་ནོ། །དེ་ནས་གསང་སྔགས་ཀྱི་ཆོ་ག་འཇིག་རྟེན་ལས་འདས་པ་སྒྲུབ་པ་བརྗོད་པར་བྱའོ། །གང་གིས་དྲན་པ་

ཙམ་གྱི་མོད་ལ་དེ་བཞིན་གཤེགས་པ་ཐམས་ཅད་མངོན་སུམ་དུ་མཐོང་ནས་འདུག་པ་དང་། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་སྒོ་ཕྱེ་སྟེ་འདུག་པ་དང་། བྱང་ཆུབ་སེམས་དཔའ་ཐམས་ཅད་ཀྱིས་མངོན་དུ་མཐོང་བ་སྦྱིན་པར་མཛད་པ་དང་། དཀྱིལ་འཁོར་གྱི་ལྷ་ཐམས་
ཅད་མངོན་དུ་བསྲུང་བ་དང་། སྐྱོབ་པ་དང་། སྦེད་པར་མཛད་པ་དང་། དཀྱིལ་འཁོར་དང་། ཕྱག་རྒྱ་དང་། གསང་སྔགས་དང་། སྙིང་པོ་དང་། ཆོ་ག་ཞིབ་མོ་ཐམས་ཅད་མངོན་དུ་འགྱུར་རོ། །འཇིག་རྟེན་ལས་འདས་པའི་ལུས་སུ་འགྲོ་བ་ཡོངས་སུ་དག་པར་འགྱུར་རོ། །དུས་གསུམ་
དུ་གཤེགས་ཤིང་སོ་སོ་ན་བཞུགས་པའི་དེ་བཞིན་གཤེགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་འཕགས་པའི་ཚོགས་མཆོག་ཐམས་ཅད་ལ་ཕྱག་འཚལ་ལོ། །འཕགས་པ་རྡོ་རྗེ་འཆང་བ་དང་། དཀྱིལ་འཁོར་གྱི་ལྷ་ཐམས་ཅད་དང་། རིག་པའི་རྒྱལ་པོ་ལ་
ཕྱག་འཚལ་ལོ། །ཨོཾ་ཨ་མོ་གྷ་ཨ་བ་ལོ་ཀི་ཏེ་མ་ཧཱ་མཎྜལ་པདྨ་སརྦ་བོ་དྷི་ས་ཏྭ་ན་མ་སྐྲྀ་ཏེ། བྷ་ར་བྷ་ར། ས་མནྟ་ཨ་བ་ལོ་ཀི་ཏེ། ཨ་མོ་གྷ་མ་ཧཱ་བྲཧྨ། བེ་ཥ་དྷ་ར། དྷ་ར་དྷ་ར། མ་ཧཱ་ཀཱ་རུ་ཎི་ཀ་བོ་དྷ་ཡ། བོ་དྷ་ཡ། མ་ཧཱ་བོ་དྷ་ནི། བོ་དྷི་བོ་དྷི། པདྨ་བི་བོ་དྷ་ནི། སརྦ་པཱ་པ་ཨན་དྷ་ཀཱ་ར།
པྲ་ཤ་མ་ནི། སརྦ་དུརྒ་ཏི། བྷ་ར་ཀ །མ་ཧཱ་ཀཱ་རུ་ཎི་ཀ །བ་ཧུ་བི་བི་དྷ། བེ་ཥ་དྷ་ར། སརྦ་ཏ་ཐཱ་ག་ཏ་གརྦྷེ། ཧུ་རུ་ཧུ་རུ། ཨ་མོ་གྷ་གརྦྷེ། ཏུ་རུ་ཏུ་རུ། ཨ་མོ་གྷ་པཱ་ཤ་ཧ་སྟེ། མུ་རུ་མུ་རུ། བི་མོ་ཀྵ་བྷུ་ཛེ། ཀྵི་ཎི་ཀྵི་ཎི། སརྦ་ཨཱ་བ་ར་ཎ་བི་ཤུད་དྷེ། བྷ་ར་བྷ་ར། སརྦ་ཏ་ཐཱ་ག་ཏ།
པ་རི་པཱུ་ར་ཎི། ཏ་ར་ཏ་ར། ཏཱ་ར་ཡ་མཱ་ན། ཨ་བ་ལོ་ཀཱ་ཡ། པདྨ་བྷུ་ཛེ། མ་ཎི་ཀ་ན་ཀ །བི་བྷུ་ཥི་ཏ། བཱ་ཧུ། ད་མ་ད་མ། དུར་དཱ་ན་ཏཱ་ནཱ་ན། མ་ཧཱ་བོ་དྷི་ས་ཏྭ་བ་ར་ད། མ་ཧཱ་ཀཱ་ར་ཎི་ཀ །སརྦ་དེ་བ་ག་ཎ་ན་མ་སྐྲྀ་ཏ། རྀ་ཥི་ག་ཎ། སྟ་བི་ཏ། ཤ་ཏ་ས་ཧ་སྲ་ཙནྟྲ་སཱུརྱ། ཨ་ཧི་རེ་ཀ །
ར་ཤྨི། ཨ་བ་བྷཱ་སི་ཏ། མ་ཧཱ་པ་ཤུ་པ་ཏི། བེ་ཥ་དྷ་ར། པ་ར་མ། ཤུད་དྷ་སཏྭ། ཨ་བ་ལོ་ཀི་ཏེ། ལོ་ཀེ་ཤྭ་ར། མ་ཧེ་ཤྭ་ར། པ་ར་མ། ཀཱུ་རུ་ཎི་ཀ །མཎྜ་ལེ་ཤྭར། སུ་པྲ་བུད་དྷ། མ་ཧཱ་པདྨ། བྷུ་ཛེ་ཤྭ་ར། མ་ཧཱ་བིདྱཱ་དྷ་རེ་ཤྭ་ར། དྷི་རི་དྷི་རི། མ་ཧཱ་ཀཱ་རུ་ཎི་ཀ །མ་ཧཱ་ཀཱ་རུ་ཎི་ཀ །མ་ཧཱ་བི་མོ་ཀྵ།

མཎྜ་ལ་དྷ་ར། སརྦ་ཏ་ཐཱ་ག་ཏ་གུ་ཧྱ། མུ་དྲཱ་ས་མ་ཡ་དྷ་ར། མ་ཧཱ་བ་ལ་བིདྱཱ་དྷ་ར། མ་ཧཱ་མ་ཎི། མཽ་ཁི་དྷ་ར། ཨ་མི་ཏཱ་བྷ། མུ་ཀུ་ཊ་དྷ་ར། དྷུ་རུ་དྷུ་རུ། ས་མནྟ། ཨ་བ་ལོ་ཀི་ཏ། ལོ་ཀེ་ཤྭ་ར། མ་ཧེ་ཤྭ་ར། པཱ་ཤ་དྷ་རེ་ཤྭ་ར། པ་ར་པ་ར། པ་ར་མ། མ་ཧཱ་མཻ་ཏྲི། ཨ་བ་ལོ་ཀི་ཏེ།
སརྦ་སཏྭ། སནྟ་རཱ་ག །སིད་དྷི། སི་དྷཱ་ཤཱ། པ་རི་པཱུ་ར་ཀ །མ་ཧཱ་བ་ར། པྲ་མོ་ད། ན་མོ་སྟུ་ཏེ་སྭཱ་ཧཱ། འདི་ནི་ཐམས་ཅད་རྣམ་པར་གྲོལ་བའི་དཀྱིལ་འཁོར་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བྱས་པ། དེ་བཞིན་གཤེགས་པ་ཐམས་ཅད་ཀྱི་གསང་བ། འཕགས་པ་སྤྱན་
རས་གཟིགས་དབང་ཕྱུག་གི་སྙིང་པོའི་མཆོག །གསང་བ་སྡིག་པ་དང་། སྒྲིབ་པ་ཐམས་ཅད་ཡོངས་སུ་སྦྱོང་བ། འཇིག་རྟེན་ལས་འདས་པའི་ལམ་རྣམ་པར་སྦྱོང་བ། དེ་བཞིན་གཤེགས་པ་ཐམས་ཅད་ཀྱི་རིགས་འཇུག་པ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །དུས་
གསུམ་དུ་གཤེགས་པའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨོཾ་བཱི་ར་བཱི་ར། མ་ཧཱ་མཎྜལ། བི་ཤྭ་རཱུ་པ་ཥ་ཊ་པཱ་ར་མི་ཏཱ། པ་རི་པཱུ་ར་ཀ །སརྦ་བོ་དྷི་ས་ཏྭ། ན་མ་སྐྲྀ་ཏ། བ་ར་མ་བི་པུ་ལ། བི་མོ་ཀྵ་དྷ་ར། མ་ཧཱ་པཱ་ཤ །བི་ལོ་ཀི་ཧ། ཨ་མོ་གྷ་
པཱ་ཤ་ཛྭ་ལི་ཏ་མ་ཧཱ་ཛྭ་ལ་ཨ་བ་ལོ་ཀི་ཏཱ། མ་ཧཱ་མ་ཎི་བིཥྚ་དྷ་ར། ས་མནྟ་ཨ་བ་བྷཱ་སི་ཏ། ཛྭ་ལ་ཛྭ་ལ། མ་ཧཱ་གམ་བྷཱི་ར། བི་མོ་ཀྵ་པཱ་ཤ་དྷ་ར། བ་ལ་བོ་དྷྱང་ག །ཨཱ་ཀརྵ་ཀ །ཨོཾ་པྲཧྨ་རཱུ་པ། མ་ཧཱ་ཨ་མོ་གྷ་པྲ་ཤ་ཧཱུཾ་ཧཱུཾ། ཕཊ་ཕཊ། སརྦ་ས་ཏྭ། བི་ལོ་ཀི་ཏ། བ་ར་པྲ་ད། ན་མོ་སྟུ་ཏེ་
སྭཱ་ཧཱ། འདི་ནི་རྣམ་པར་གྲོལ་བའི་དཀྱིལ་འཁོར་དོན་ཡོད་པའི་ཞགས་པའི་སྙིང་པོ་འཇིག་རྟེན་ལས་འདས་པའི་རྣམ་པར་འཕྲུལ་པའོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་
རྗེ་ཆེན་པོ་ལ་ཕྱག་འཚལ་ལོ། །ཨོཾ་བི་བུད་དྷྱ། བི་བུད་དྷྱ། མ་ཧཱ་ཀཱ་རུ་ཎི་ཀ །ཏ་ར་ཏ་ར་ཏཱ་ར་ཡ། མ་ཧཱ་ཨརྣ་བ་པ་ར་ན། མ་ཧཱ་བྷུ་ཛ་བི་ལོ་ཀཱ་ཡ་ཧཱུཾ་ཕཊ་སྭཱ་ཧཱ། ཉེ་བའི་སྙིང་པོའོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་

པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་པཱ་ཤ །མ་ཧཱ་དཱ་ན་པཱ་ར་མི་ཏཱ། པ་རི་པཱུ་ར་ཡ། ཧཱུཾ་ད་ར་ད་ར། བི་བིདྷ། བི་ཙི་ཏྲེ། སརྦ་ས་ཏྭ་ཨུ་པ་བྷོ་ག །སརྦ་ཏ་ཐཱ་ག་ཏ། མ་ཧཱ་དཱ་ན། པཱུ་ཛཱ་མེ་གྷ། པྲ་བརྟ་ཡ། ཏ་ར་ཏ་ར།
ཏཱ་ར་ཡ། མ་ཧཱ་པདྨ་པཱ་ཎི་ཧཱུཾ་ཕཊ་སྭཱ་ཧཱ། འདི་ནི་སྦྱིན་པའི་ཕ་རོལ་ཏུ་ཕྱིན་པའི་ཞགས་པ་ཆེན་པོའི་སྙིང་པོ་སྟེ། གང་གིས་ཡུངས་འབྲུ་ཙམ་ཡང་སྦྱིན་པ་བྱིན་ཏེ་དྲན་པ་ཙམ་གྱིས་ལན་བདུན་བཟླས་བརྗོད་བྱས་ན་མཆོད་སྦྱིན་སྦྱིན་པ་རྣམ་པར་འཕྲུལ་པ་ཆེན་པོ་ཤིན་ཏུ་རྒྱས་པ་ཆེན་པོའི་སྦྱིན་པའི་ཕ་རོལ་
ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་ཤཱི་ལ། སཾ་བྷ་ར་སཾ་བྷ་ར། བྷ་ར་བྷ་ར། མ་
ཧཱ་ཤུད་དྷ་སཏྭ། པདྨ་བི་བྷཱུ་ཥི་ཏ་བྷུ་ཛ་དྷ་ར་དྷ་ར། ས་མནྟ། ཨ་བ་ལོ་ཀི་ཏེ། ཧཱུྃ་ཕཊ་སྭཱ་ཧཱ། གཟུངས་འདི་སྨྱུང་བ་བྱས་ཏེ། གསོ་སྦྱོང་གི་ཡན་ལག་བརྒྱད་བཟུང་ནས་མི་སྨྲ་བར་ལན་ཉི་ཤུ་རྩ་གཅིག་དྲན་པར་བྱའོ། །དེ་ནས་དོན་ཡོད་པའི་ཞགས་པའི་སྙིང་པོ་བཟླས་བརྗོད་བྱའོ། །བཟླས་བརྗོད་
བྱས་པ་ཙམ་གྱི་མོད་ལ་ཚུལ་ཁྲིམས་ཡོངས་སུ་དག་པ་ཆེན་པོ་དང་ལྡན་པར་འགྱུར་རོ། །ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་པར་འགྱུར་རོ། །ཚུལ་ཁྲིམས་ཀྱི་དྲི་ཞིམ་པོའི་དྲི་མང་པོ་ལུས་ལས་འབྱུང་ཞིང་ཕྱོགས་བཅུའི་འཇིག་རྟེན་དུ་གྲགས་པར་འགྱུར་རོ། །གང་ཞིག་ཉི་མ་རེ་
རེ་ཞིང་གཟུངས་འདི་དྲན་ན་དེ་ནི་རྟག་ཏུ་ཚུལ་ཁྲིམས་ཡོངས་སུ་དག་པར་འགྱུར་རོ། །དགེ་སློང་གང་ལ་ལ་ཞིག་ཚུལ་ཁྲིམས་ཞིག་ཅིང་ཉམས་པས་སྨྱུང་བ་བྱས་ཏེ། འདི་བཟླས་བརྗོད་བྱས་པ་ཙམ་གྱི་མོད་ལ་ཚུལ་ཁྲིམས་ཡོངས་སུ་དག་པར་འགྱུ་རོ། །ཚུལ་ཁྲིམས་མང་པོ་དང་ལྡན་པར་
འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་མ་ཧཱ་བཱིརྱ། ཨ་མོ་གྷ་བི་ལོ་ཀི་ཏེ། བ་ར་བ་ར། དྷི་ཌྷ། བཱིརྱ། མ་ཧཱ་བ་ལ།

བ་ལ་བ་ལ། མ་ཧཱ་བོ་དྷྱངྒ། བ་ལ་བོ་དྷ་ནི། ཧཱུཾ་ཕཊ་སྭཱ་ཧཱ། གཟུངས་འདི་དུས་རྟག་ཏུ་ཡོངས་སུ་དག་པའི་ཡིད་ཀྱིས་དྲན་པར་བྱས་ན་དྲན་པ་ཙམ་གྱི་མོད་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ནམ་ཡང་བརྩོན་འགྲུས་ཀྱི་
ཕ་རོལ་ཏུ་ཕྱིན་པ་དང་བྲལ་བར་མི་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ་ཀྵཱ་ན་ཏི། སརྦ་བོ་དྷི་ས་ཏྭ་ཀྵ་མི་ཎ། ཀྵ་ཎ་
ཀྵ་ཎ། མ་ཧཱ་མཻ་ཏྲི། ཀཱ་རུ་ཎ། སརྦ་སཏྭ། བཏ་ས་ལ། མ་ཧཱ་ཀཱ་རུ་ཎི་ཀ །སརྦ་ས་ཏྭ་ཀྵ་མི་ཎ། ཧཱུྃ་ཕཊ་སྭཱ་ཧཱ། གཟུངས་འདི་སེམས་ཅན་དུ་གྱུར་པ་ཐམས་ཅད་ལ་བཟོད་པ་ཆེན་པོ་དང་། སྙིང་རྗེ་ཆེན་པོ་དང་། བརྩེ་བའི་སེམས་ཀྱིས་དམྱལ་བ་ན་གནས་པ་དང་། བྱོལ་སོང་གི་སྐྱེ་གནས་སུ་
གཏོགས་པ་རི་དགས་དང་། བྱ་གང་དག་འདས་པ་གང་ཡིན་པ་དང་། གནས་པ་གང་ཡིན་པ་དང་། སྐྱེ་བ་གང་ཡིན་པ་དེ་རྣམས་ལ་སྙིང་རྗེ་བའི་ཕྱིར་གང་ཞིག་གཟུངས་ཀྱི་མཆོག་དྲན་པར་བྱེད་ན། དམྱལ་བའི་སེམས་ཅན་ལས་ཐར་བར་འགྱུར་ཞིང་སྐྱེ་བོ་མང་པོ་གནས་པ་གང་ཡིན་པ་
རྣམས་གྲོལ་བར་འགྱུར་རོ། །ནམ་སངས་རྒྱས་ཀྱི་ཞིང་ལ་གནས་ཀྱི་བར་དུ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་
ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་སརྦ་ཏཱ་ཐཱ་ག་ཏ། མ་ཧཱ་ཨ་མོ་གྷ། ཀཱ་རུ་ཎཱ། དྷྱཱན་ས་མཱ་དྷི། སརྦ་བི་མོ་ཀྵ། ཨ་པྲ་ཀམ་པྱ་ཀ །ཙུ་རུ་ཙུ་རུ་ཧཱུྃ་ཕཊ་སྭཱ་ཧཱ། གཟུངས་འདི་འཕགས་པ་སྤྱན་རས་གཟིགས་དབང་ཕྱུག་ལ་དམིགས་ནས་ཡིད་རྩེ་གཅིག་ཏུ་བྱས་ཏེ་དྲན་པར་བྱས་ན།
དྲན་པ་ཙམ་གྱི་མོད་ལ་དེས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །གཞན་ཡང་ཏིང་ངེ་འཛིན་སྟོང་ཕྲག་བརྒྱ་སོ་སོར་ཐོབ་པར་འགྱུར་རོ། །སངས་རྒྱས་ཀྱི་ཞིང་ཐམས་ཅད་དུ་བཞུགས་པར་འགྱུར་རོ། །བཟླས་བརྗོད་བྱས་པ་ཙམ་གྱིས་ཏིང་ངེ་འཛིན་ཐམས་ཅད་ལ་དབང་སྒྱུར་བར་འགྱུར་

རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་མོ་གྷ། མ་ཧཱ་པྲཛྙཱ། ཨ་བ་བྷཱ་ས། སྥ་ར་ཎ། བུད་དྷི། པྲ་ས་ར་པྲ་ས་
ར། ས་མནྟ་བུད་དྷི། ཨ་བ་ལོ་ཀི་ཏ། བྷ་ག་བཱ་ན་པྲ་ཛྙཱ། ཨ་བ་ལོ་ཀི་ཏ། ཙཀྵུ་ཥེ་མ་ཧཱ་པྲཛྙཱ། བ་ར་དཱ། པཱ་ཎི། མ་ཧཱ་པྲཛྙཱ། པདྨ་དྷ་རི་ཎ། བྷུ་ཛེ་ཧཱུྃ་ཕཊ་སྭཱ་ཧཱ། གཟུངས་འདི་དྲན་པ་ཙམ་གྱི་མོད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །ཐབས་དང་ཤེས་རབ་
སྣ་ཚོགས་ཀྱི་དགེ་བ་ཆེན་པོའི་བློ་འཕེལ་བར་འགྱུར་རོ། །རྟག་ཏུ་རྒྱུན་མི་འཆད་པར་ཕ་རོལ་ཏུ་ཕྱིན་པ་བཅུའི་བློ་དང་ལྡན་པར་འགྱུར་རོ། །ཕྱོགས་བཅུའི་དེ་བཞིན་གཤེགས་པ་ཐམས་ཅད་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་རྗེས་སུ་དྲན་པའི་ཤེས་
རབ་དང་བློར་འགྱུར་རོ། །ལན་འགའ་ཡང་ཕ་རོལ་ཏུ་ཕྱིན་པ་དྲུག་དང་བྲལ་བར་མི་འགྱུར་རོ། །སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་བློ་ཉམས་པར་མི་འགྱུར་རོ། །བྱང་ཆུབ་ལ་ཐུག་གི་བར་དུ་རབ་ཏུ་རྨོངས་པར་མི་
འགྱུར་རོ། །དོན་ཡོད་པའི་ཕྱིར་ཕ་རོལ་ཏུ་ཕྱིན་པ་དྲུག་གི་གཟུངས་ཆེན་པོ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་བི་
མོ་ཀྵ། མཎྜལ་མ་ཧཱ་ད་བྷཱུ་ཏ་བི་མ་ལེ། དྷ་ར་དྷ་ར། དྷི་རི་དྷི་རི། མ་ཧཱ་ད་བྷུ་ཏ། ཨ་མི་ཏཱ་བྷ། མ་ཀུ་ཊ། དྷ་ར་ཧཱུྃ་ཕཊ་སྭཱ་ཧཱ། དཀྱིལ་འཁོར་དེར་ཡུངས་ཀར་དང་། དྲི་ཆབ་དང་ལྡན་པའི་བུམ་པ་ལ་སྔགས་བཟླས་བརྗོད་བྱས་ནས། ཆུས་ཀུན་ཏུ་ཆག་ཆག་བཏབ་ན་ཆག་ཆག་བཏབ་པ་ཙམ་གྱི་
མོད་ལ་དཀྱིལ་འཁོར་ཀུན་ཏུ་དཔག་ཚད་གཅིག་གི་ནང་དུས་སྦྱངས་ཏེ་ཡོངས་སུ་དག་པར་འགྱུར་རོ། །ཇི་ལྟར་ཤེལ་གོང་དང་། རིན་པོ་ཆེ་སྣ་ཚོགས་པ་དག་པ་དྲི་མ་མེད་པ་མཛེས་པ་དེ་འདྲ་བའི་ས་གཞིར་འགྱུར་རོ། །ཤིན་ཏུ་དག་པ་དང་། ཤིན་ཏུ་དྲི་མ་མེད་པ་དང་། ཤིན་ཏུ་ཉམས་དགའ་

པ་དང་། ཤིན་ཏུ་ཡིད་དུ་འོང་བའི་ས་གཞིར་འགྱུར་རོ། །ཤིན་ཏུ་ས་གཞི་སྤ་བར་འགྱུར་རོ། །ས་ཕྱོགས་དེའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་གང་དག་འཁོད་པ་དེ་དག་
ཐམས་ཅད་ཕྱིར་མི་ལྡོག་པའི་ས་ལ་རབ་ཏུ་གནས་པར་འགྱུར་རོ། །དེ་དག་ཐམས་ཅད་ཕྱིར་མི་ལྡོག་པར་འགྱུར་རོ། །ཤི་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །ཚེ་རབས་དྲན་པར་འགྱུར་རོ། །ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་
རྫོགས་པར་འཚང་རྒྱའི་བར་དུ་བསོད་ནམས་ཀྱི་ཕུང་པོ་ཆེན་པོའི་དགེ་བའི་རྩ་བ་ཆེན་པོ་སོགས་པར་འགྱུར་རོ། །གང་དག་བྱོལ་སོང་གི་སྐྱེ་གནས་སུ་གཏོགས་པའི་རི་དགས་དང་། བྱ་དེ་དག་ཕྱོགས་དེར་འགྲོ་ཞིང་རབ་ཏུ་འཇུག་པ་དེ་དག་ཐམས་ཅད་ཡོངས་སུ་གྲོལ་བར་འགྱུར་རོ། །
བདེ་འགྲོའི་ལམ་ལ་རབ་ཏུ་གནས་པར་འགྱུར་རོ། །གང་གིས་དེའི་ས་ལག་པར་འོངས་ཏེ་རེག་པ་དེ་དག་ཐམས་ཅད་ནད་དང་བྲལ་བ་དང་། ཉོན་མོངས་པ་དང་བྲལ་བ་དང་། རིམས་དང་བྲལ་བ་དང་། སྒྲིབ་པ་མེད་པ་དང་། སྡིག་པ་དང་བྲལ་བར་འགྱུར་རོ། །དེ་དག་ཕྱིས་ལུས་
ལ་ཚོར་བའི་ནད་འབྱུང་བར་མི་འགྱུར་རོ། །རྟག་ཏུ་བདེ་བས་ཚིམ་པའི་ལུས་སུ་འགྱུར་རོ། །ས་ཡོངས་སུ་སྦྱོང་བའི་རིག་སྔགས་སོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་
པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་དྲུ་མ། ལ་ཏ་བྲྀ་ཀྵ། ཤ་ཁ་པ་ཏྲ་པུཥྤ་ཕ་ལ། བ་ཊི་པ་ཨཱ་རོ་ཧ་ན་ཧི་ཌཱ་ག །པུཤྐ་རི་ཎ། ཨུ་ཏ་ས་ཧྲྀ་ད། སུན་ད་ར་པྲ་སྲ་བ་ཎི། བི་བི་དྷ། བི་ཙི་ཏྲ། པ་རི་ཤོ་དྷ་ཡ། པདྨ་བྷུ་ཛེ། ས་མ་ས་མ། ས་མནྟེ་ན། པ་རི་མཎྜལ། པ་རི་ཤོ་དྷ་
ཡ། མ་ལ་མ་ལ། བི་མ་ལ་བི་མ་ལ། ནི་རྨ་ལ་སུ་པ་རི་ཤུད་དྷ། པདྨ་ཨུཏྤ་ལི་བྷ་ཛ་ལ་མ་ལཱ་ན་བི་ཤུད་དྷ། ཤོ་དྷ་ཡ་ཤོ་དྷ་ཡ། པ་ར་མ་མ་ཧཱ་ཤུད་དྷཱ་ཡ་ས་ཏྭཱ་ཧཱུྃ་ཕཊ། ན་མོ་ཏྲི་བྷུ་བ་ནེ་ཧཱུྃ་ཕཊ་སྭཱ་ཧཱ། འདིས་ཙནྡན་དང་། པདྨ་དང་། ཆུ་དང་ཡུངས་ཀར་ལ་ཡོངས་སུ་བཟླས་ཏེ། ལྗོན་པའི་

སྡོང་པོ་དང་། མེ་ཏོག་གི་ཤིང་དང་། འབྲས་བུའི་ཤིང་དང་། སྣ་ཚོགས་པའི་ལྕུག་མ་དང་། རྩྭ་དང་། ཤིང་གེལ་བ་དང་། སྨན་དང་། ཆུ་ཀླུང་དང་། མཚོ་བྲན་དང་། ལྟེང་ཀ་དང་། རྫིང་བུ་དང་། འབབ་ཆུ་མཛེས་པའི་སྟེང་དུ་གཏོར་བར་བྱ་སྟེ། དེ་རྣམས་ཐམས་ཅད་ལ་
བདུད་རྩི་བླུག་པར་འགྱུར་རོ། །དེ་རྣམས་ཐམས་ཅད་ལ་ལྷ་རྫས་ཀྱི་མེ་ཏོག་དང་འབྲས་བུར་འགྱུར་རོ། །ཐ་ན་ལྷའི་རྩྭ་དང་། ཤིང་གེལ་བ་དང་། སྨན་དང་ནགས་ཀྱི་བདག་པོར་འགྱུར་རོ། །གང་ལ་རེག་པ་ཙམ་གྱིས་རེག་པ་དེ་ཐམས་ཅད་སེར་སྣའི་དྲི་མ་དང་བྲལ་ཞིང་། ཕྲག་དོག་སྤངས་
པར་འགྱུར་རོ། །མཁྲིས་པ་དང་། བད་ཀན་དང་། མཆིལ་མ་དང་བྲལ་ཞིང་། ལུས་ཀྱི་ཕྱི་དང་ནང་གི་དྲི་མི་ཞིམ་པ་ཐམས་ཅད་ཡོངས་སུ་དག་པར་འགྱུར་རོ། །གང་ཡང་ལུས་ཀྱི་ནང་གི་ནད་དང་། གནོད་པ་སྣ་ཚོགས་པ་དེ་ཐམས་ཅད་ཡོངས་སུ་གྲོལ་བར་འགྱུར་ཞིང་། རྣམ་པར་དག་པ་དང་།
རྣམ་པར་ཉམས་པ་དང་། ལེགས་པར་ཡོངས་སུ་དག་པ་དང་། དྲི་མ་མེད་པར་འགྱུར་རོ་ཞེས་སོ། །དེ་ལ་ཆུས་ཁྲུས་བྱས་པ་གང་ཡིན་པ་དེ་རྣམས་ཀྱང་ལྷའི་ཆུ་དང་། བྱང་ཆུབ་ཀྱི་ཡན་ལག་གི་ཆུས་ཁྲུས་བྱས་པར་འགྱུར་རོ། །སྡིག་པ་དང་སྒྲིབ་པའི་དྲི་མ་ཐམས་ཅད་བཀྲུས་པར་འགྱུར་རོ། །
ཡན་ལག་བརྒྱད་དང་ལྡན་པའི་ཆུས་བཀྲུས་པར་འགྱུར་རོ། །དེས་སོ་ཤིང་ཟོས་པ་གང་ཡིན་པ་དེ་རྣམས་ཀྱང་སངས་རྒྱས་ཀྱི་ཡེ་ཤེས་རྗེས་སུ་དྲན་པ་ཆེན་པོ་འཕེལ་བར་འགྱུར་རོ། །མྱ་ངན་ཐམས་ཅད་དང་བྲལ་བར་འགྱུར་ཞིང་ཞགས་པ་ཐམས་ཅད་ཡོངས་སུ་སྤངས་པ་དང་། རྟག་ཏུ་ཁ་
ནས་ཨུཏྤ་ལའི་དྲི་བྲོ་བར་འགྱུར་རོ། །ངག་འཇམ་ཞིང་སྙན་པར་ཡང་འགྱུར་ཞིང་ངག་མཉེན་པར་ཡང་འགྱུར་རོ། །དགའ་བའི་གཏམ་བྱེད་པར་འགྱུར་ཞིང་། སྐྱེ་བོ་ཐམས་ཅད་ཡིད་དགའ་བར་ཡང་འགྱུར་རོ། །མིའམ་ཅིའི་དབྱངས་སུ་ཡང་འགྱུར་རོ། །བསྟན་བཅོས་དང་། ཆོ་ག་
ཞིབ་མོ་དང་། གསང་སྔགས་དང་། ཐེག་པ་ཆེན་པོ་ཐམས་ཅད་ཐོས་པ་ཙམ་གྱིས་ཀུན་ཏུ་འཛིན་པར་བྱེད་ཅིང་ཁ་ཏོན་དུ་ཡང་གནས་པར་བྱེད་དོ། །མེ་ཏོག་དེ་ལ་མནམས་པ་དང་། ཕྲེང་བ་མགུལ་པར་འཆིང་བར་བྱེད་པ་གང་ཡིན་པ་དེ་རྣམས་ཀྱང་བྱང་ཆུབ་ཡན་ལག་གི་མེ་ཏོག་གི་ཕྲེང་བ་བཅིངས་

པར་འགྱུར་རོ། །དེ་བཞིན་གཤེགས་པའི་དབང་གིས་མངོན་པར་དབང་བསྐུར་བར་ཡང་འགྱུར་རོ། །སྣ་ཚོགས་སུ་དག་པར་ཡང་འགྱུར་ཏེ། ལྷའི་དྲི་དང་། རེག་པ་དང་། ཡང་དག་པར་ལྡན་པར་འགྱུར་རོ། །ལྕེ་པདྨའི་འདབ་མ་དང་མཚུངས་པར་ཡོངས་སུ་དག་པར་འགྱུར་རོ། །
ལྷའི་སོ་དང་མཚུངས་པའི་ཁ་དོག་ཏུ་འགྱུར། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་གང་ལ་གཏམ་སྨྲས་པ་དེ་རྟག་ཏུ་དབང་དུ་འགྱུར་རོ། །ཤི་འཕོས་ཤིང་སྐྱེ་བ་བརྗེས་ནས་བདེ་བ་ཅན་གྱིས་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། པདྨ་ལས་རྫུས་ཏེ་སྐྱེ་བར་འགྱུར་རོ། །ཚེ་
རབས་དྲན་པར་ཡང་འགྱུར་རོ་ཞེས་པའོ། །འབྲས་བུ་དང་། མེ་ཏོག་དང་། ཆུ་དང་། ནགས་ཀྱི་བདག་པོ་དང་། རྩྭ་དང་། ཤིང་གེལ་པ་དང་། སྨན་ཡོངས་སུ་སྦྱོང་བའི་སྔགས་སོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་
འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཏདྱ་ཐཱ། ཨོཾ་ཨ་མོ་གྷ་ཨ་མ་ལེ་ཏྲི་མ་ལེ། བི་མ་ལེ། ནི་རྨ་ལེ། དི་བྱ་པ་རི་ཤུདྡྷེ་སརྦྦ་མ་ལོ་པ་ཀརྵི་ཏེ། མ་ཧཱ་བོ་དྷི་ས་ཏྭ་བ་ར་དེ་པྲ་བ་ར་པ་རི་ཤུདྡྷེ། མ་ཧཱ་མ་ཎི་རཏྟ་ཀཱ་ཡ་པ་རི་ཤུདྡྷེ་མ་ཎི་མ་ཎི་ཤོ་དྷ་ནི་མ་ཧཱ་
ཨ་མོ་གྷ་ཙིནྟཱ་མ་ཎི་ཤུདྡྷེ། ཧྲྀ་ད་ཡ་ཤུདྡྷེ། ཀཱ་ཡ་ནི་རྨ་ལ་མ་ཧཱ་མ་ཎི་པ་རི་ཤུདྡྷེ། ཧུ་རུ་ཧུ་རུ་པྲ་བ་ར་པཱ་ཎི་མ་ཧཱ་བྷུ་ཛ་བ་ར་དེ། ཏུ་རུ་ཏུ་རུ། མ་ཧཱ་ས་ཏྭ་བ་ཏ་ས་ལེ་པ་རི་ཤོ་དྷ་ཡ་མཱཾ་སརྦ་པཱ་སུ་བི་ཤུདྡྷ་མ་ལེ་སྭཱ་ཧཱ། རིག་སྔགས་འདིས་རིག་སྔགས་འཆང་གི་བདག་ཉིད་ཀྱི་ལུས་ཡོངས་
སུ་སྦྱང་བར་བྱ་སྟེ། ཙནྡན་གྱི་ཆུ་དང་། གུར་གུམ་པ་དང་། གླ་རྩིའི་ཆུ་དང་། ག་པུར་གྱི་ཆུ་དང་། ཡུངས་ཀར་དང་བ་བྱུང་ལྔ་བསྲེས་པས། རྫ་གསར་པའི་བུམ་པ་བཀང་སྟེ་རིག་སྔགས་འདི་སྟོང་རྩ་བརྒྱད་བཟླས་པར་བྱའོ། །རས་དཀར་པོས་བཀྲུ་བར་བྱ་ཞིང་ལན་བདུན་དུ་བཏུང་བར་བྱའོ། །
ཁྲུས་བྱས་པ་ཙམ་གྱི་མོད་ལ་ཁྲོ་བོའི་རྒྱལ་པོས་བདག་ཉིད་དབང་བཀུར་བར་བྱའོ། །ཁྲུས་བྱས་པ་ཙམ་དང་། དབང་བསྐུར་བ་ཙམ་གྱིས་བདག་རང་གི་ཕྱི་ནང་ཡོངས་སུ་དག་ཅིང་དྲི་མ་མེད་པར་འགྱུར་རོ། །སྡིག་པ་དང་། སྒྲིབ་པ་དང་། དུག་དང་བྲལ་བར་འགྱུར་རོ། །ཉོན་མོངས་

པ་དང་ནད་དང་བྲལ་བར་འགྱུར་རོ། །རྒ་བ་ལ་སོགས་པ་དང་བྲལ་བར་འགྱུར་རོ། །བགེགས་དང་། ལོག་འདྲེན་དང་། བདུད་ལ་སོགས་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ལ་སོགས་པ་ཐམས་
ཅད་ཡོངས་སུ་སྤངས་པར་འགྱུར་ཞིང་བར་ཆད་བྱ་བའི་ཕྱིར་རིག་སྔགས་འཆང་བའི་དྲུང་དུ་སླར་འོང་ནུས་པར་མི་འགྱུར་རོ། །རིག་སྔགས་འཆང་བདེ་བར་སྒྲུབ་པ་དང་། བདེ་བར་ཉལ་བ་དང་། བདེ་བར་སད་པ་དང་། ནམ་འཚོའི་བར་དུ་བདེ་བར་གནས་པ་དང་། དྲི་མ་ཐམས་ཅད་སྤང་བ་དང་། དེ་བཞིན་
གཤེགས་པ་ཐམས་ཅད་མཐོང་བ་དང་། བྱང་ཆུབ་སེམས་དཔའ་མཐོང་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་སྟེ་ཤི་བའི་དུས་བྱེད་པར་འགྱུར་རོ། །བདེ་བ་ཅན་གྱི་འཇིག་རྟེན་གྱི་ཁམས་སུ་སྐལ་བ་མཉམ་པར་སྐྱེ་བར་འགྱུར་རོ། །པདྨོའི་ནང་
ནས་རྫུས་ཏེ་སྐྱེས་ནས་དེ་བཞིན་གཤེགས་པ་འོད་དཔག་མེད་མངོན་སུམ་དུ་མཐོང་བར་འགྱུར་རོ། །རྒྱན་ཐམས་ཅད་ཀྱིས་བརྒྱན་པ་དང་། ལུས་མཚན་དང་དཔེ་བྱད་ཀྱིས་བརྒྱན་པ་དང་། ཚེ་རབས་དྲན་པར་འགྱུར་རོ། །མཐར་བྱང་ཆུབ་ལ་ཐུག་གི་བར་དུ་སངས་རྒྱས་ཀྱི་ཞིང་ནས་སངས་
རྒྱས་ཀྱི་ཞིང་དུ་འགྲོ་བར་འགྱུར་རོ། །རྣམ་པར་གྲོལ་བའི་དཀྱིལ་འཁོར་དོན་ཡོད་པའི་ཞགས་པའི་སྙིང་པོ་ཆོ་ག་ཞིབ་མོ་འདི་མཐའ་དག་རྫོགས་པར་ཁ་ཏོན་བྱེད་པར་འགྱུར་རོ། །གཞན་ཡང་དེ་བཞིན་གཤེགས་པས་བཀའ་སྩལ་པའི་མདོ་སྡེ་གཞུང་སྣ་ཚོགས་རྣམ་པ་དུ་མ་ཁ་ཏོན་བྱེད་པར་
འགྱུར་རོ། །བསྐལ་པ་སྟོང་ཕྲག་བརྒྱ་ཚུན་ཆད་དུ་སྐྱེ་བ་དྲན་པར་འགྱུར་རོ། །ཨོཾ་ཨ་མོ་གྷ་པདྨ། བི་མ་ལེ། པྲ་ས་ར། ས་མནྟ། མུ་ཁེ་སྭཱ་ཧཱ། དཀྱིལ་འཁོར་ཆར་ཕྱེ་སྟེ་ཐིག་གདབ་པའི་སྔགས་སོ། །ཨོཾ་ཨ་མོ་གྷ་བི་བི་དྷི། རཱུ་པ་བི་ཙི་ཏྲ། གན་དྷ་ར་སན་དྷ་ར། པྲ་བ་ར། བྷུ་ཛེ་སཱ་ཧཱ།
ཚོན་རྩིའི་སྔགས་དང་། སྐུ་གཟུགས་གཞག་པ་དང་། མཚོན་ཆའི་རྟགས་བྲི་བའི་སྔགས་སོ། །ཨོཾ་ཨ་མོ་གྷ་ས་མནྟ་པ་རི་མཎྜ་ལ། བཱ་ཤ་བནྡྷེ་ཧཱུྃ། ཡུངས་ཀར་ལ་ལན་བདུན་བཟླས་བརྗོད་བྱས་པས་དཀྱིལ་འཁོར་བསྡམ་པར་བྱའོ། །ཨོཾ་ཨ་མོ་གྷ། ས་མནྟ། ད་ཤ་དིག་མ་ཧཱ་སཱི་

མན། བན་དྷ་ཡ། དྷུ་རུ་དྷུ་རུ། ཧཱུྃ་ཕཊ་སྭཱ་ཧཱ། ཡུངས་ཀར་དང་ཆུ་ལ་ལན་བདུན་བཟླས་བརྗོད་བྱས་པས་མཚམས་གཅད་པའོ། །ཨོཾ་ཨ་མོ་གྷ་རཀྵ་ཎ། པཱ་ཤ་ཧ་སྟེ། བྷུ་རུ་བྷུ་རུ་སྭཱ་ཧཱ། ཡུངས་ཀར་དང་དྲི་ཆབ་ལ་ལན་བདུན་བཟླས་བརྗོད་བྱས་པས་བདག་བསྲུང་བའོ། །ཨོཾ་ཨ་མོ་གྷ་
ཙཱུ་ཌ་མ་ཎི། ཧཱུ་རུ་ཧཱུ་རུ། ནཱ་ག་བཱ་ཤ་བ་ན་དྷེ་ཧཱུྃ་སྭཱ་ཧཱ། ལན་ཉི་ཤུ་རྩ་གཅིག་བཟླས་བརྗོད་བྱས་པས་སྤྱི་གཙུག་བཅིང་བའི་སྔགས་སོ། །ཨོཾ་ཨ་མོ་གྷ་རཀྵ། ས་མནྟེ་ན། མ་ཧཱ་པཱ་ཤེ །དྷུ་རུ་དྷུ་རུ་སྭཱ་ཧཱ། སློབ་མ་དང་གྲོགས་རྣམས་བསྲུང་བ་སྟེ་ཡུངས་ཀར་དང་། ཐལ་བ་ལ་ལན་ཉི་
ཤུ་རྩ་གཅིག་བཟླས་བརྗོད་བྱས་ཏེ་བསྲུང་བར་བྱའོ། །ཨོཾ་ཨ་མོ་གྷ། ཛ་ལ་བི་མ་ལེ། སུ་རུ་སུ་རུ་སྭཱ་ཧཱ། དྲི་ཆུ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་པས་ཁྲུས་བྱ་བའི་སྔགས་སོ། །ཨོཾ་ཨ་མོ་གྷ་ཨ་མྲྀ་ཏ་བིན་དུ་ཙ་ར་ཙ་ར་སྭཱ་ཧཱ། ཉེ་རེག་བྱ་བའི་སྔགས་སོ། །ཨོཾ་ཨ་མོ་གྷ་དི་པྱ་བ་སྟྲེ་ཙུ་
རུ་ཙུ་རུ་སྭཱ་ཧཱ། གོས་ཀྱི་སྔགས་སོ། །ཨོཾ་ཨ་མོ་གྷ་བྷུ་ཛ་ཀ །ཀ་བ་ཙ། བ་ར་དེ། ཙི་རི་ཙི་རི་སྭཱ་ཧཱ། གོ་ཆའི་སྔགས་ཡིན་ཏེ་ཡུངས་ཀར་དང་གུར་གུམ་གྱི་ཆུས་བྱའོ། །ཨོཾ་ཨ་མོ་གྷ་བྲཧྨ་བྷུ་ཛ་པཱ་རྱ་ན་ཏེ་ན་པྲ་ས་ར་སྭཱ་ཧཱ། མཆོད་ཕྱིར་ཐོགས་ཀྱི་སྔགས་སོ། །ཨོཾ་ཨ་མོ་གྷ་ཙཱུ་ཌཱ་མ་ཎི་པདྨེ། ཨ་
བྷི་ཥིཉྩ་ཡ། མ་མ་སརྦ་ཏ་ཐཱ་ག་ཏ་ཨ་བྷི་ཥེ་ཀ་མ་ཎི་མ་ཎི་སྭཱ་ཧཱ། དབང་བསྐུར་བའི་སྔགས་སོ། །ཨོཾ་ཨ་མོ་གྷ་པདྨ་བ་སུན་དྷ་ར། དྷ་ར་དྷ་ར། དྷ་ར་ཎི། ཧཱུྃ། སྟན་གྱི་གསང་སྔགས་སོ། །ཨོཾ་ཨ་མོ་གྷ་ས་མནྟ་པརྱ་ང་ཀེ །བྷུ་བི་སྭཱ་ཧཱ། སྐྱིལ་མོ་ཀྲུང་བཅའ་བའི་སྔགས་སོ། །
ཨོཾ་ཨ་མོ་གྷ་སུ་ར་དྷི། པདྨ་པ་ར་པ་ར་ཧཱུྃ། མེ་ཏོག་གི་སྔགས་སོ། །ཨོཾ་ཨ་མོ་གྷ་བི་བི་དྷ། གནྡྷ། པྲ་ས་རེ། པཱུ་རྞ་བྷུ་ཛེ་སྭཱ་ཧཱ། དྲིའི་སྔགས་སོ། །ཨོཾ་ཨ་མོ་གྷ་བི་བི་དྷ་ལེ་པ་ན་པྲ་བ་རེ་པི་རི་པི་རི་སྭཱ་ཧཱ། བྱུག་པའི་སྔགས་སོ། །ཨོཾ་ཨ་མོ་གྷ་ག་གན་སྥར་ཎ། མ་ཡཻ་བྷུ་རུ་བྷུ་རུ་ཧཱུྃ།
བདུག་པའི་སྔགས་སོ། །ཨོཾ་ཨ་མོ་གྷ་ཤུ་ཀླ་ས་ར་ས་ར་ས་ཨ་གྲ་དྷ་ར་བི་དྷ་ར་ཧཱུྃ། གཏོར་མའི་སྔགས་ཏེ་ཐམས་ཅད་དུ་བྱའོ། །ཨོཾ་ཨ་མོ་གྷ་པྲ་བ་ར། ནུ་པི་ལོ་ཀི་ནི། ཀི་རི་ཀི་རི་ཧཱུྃ། ཟས་དང་གཏོར་མའི་སྔགས་སོ། ཨོཾ་བི་བི་དྷ། ཨ་མོ་གྷ། ཕ་ལ། པ་ར་པ་ར་ཧཱུྃ། འབྲས་བུའི་སྔགས་

སོ། །ཨོཾ་ཨ་མོ་གྷ་ཨ་ད་བྷུ་ཏ་གྷ་ན་དྷ་བ་རེ་ཧཱུྃ། མཆོད་ཡོན་གྱི་སྔགས་སོ། །ཨོཾ་ཨ་མོ་གྷ། བི་བི་དྷ། མ་ཎི། བྷཱུ་ཥ་ཎ། བ་རེ། ཛྭ་ལ་ཛྭ་ལ་ཧཱུྃ། རྒྱན་དང་། ཐོད་དང་། དར་དཔྱང་བ་དང་། མདའ་དང་། ཚོན་སྣ་ལྔ་དང་། ཐིག་སྐུད་ཀྱི་སྔགས་སོ། །ཨོཾ་ཨ་མོ་གྷ། བི་བི་བྷ། བྷཱ་ཛ་ནི། ཛ་ཡ་ཛ་ཡ་
སྭཱ་ཧཱ། སྣོད་ཀྱི་སྔགས་ཏེ་ཐམས་ཅད་དུ་སྦྱར་རོ། །ཨོཾ་ཨ་མོ་གྷ་པྲ་བ་ར་བྷ་བ་ན་བྷུ་བེ་ཐ་ར་ཐ་ར་སྭཱ་ཧཱ། གཞུག་པའི་སྔགས་སོ། །ཨོཾ་ཨ་མོ་གྷ་ན་མ་སྐ་ར་ཎ། སརྦ་ཏ་ཐཱ་ག་ཏ། ཨོཾ་ཛ་ལེ་ཧཱུྃ། ཕྱག་འཚལ་བ་དང་ཐལ་མོ་སྦྱར་བའི་སྔགས་སོ། །ཨོཾ་ཨ་མོ་གྷ་ཙཀྲེ་དུ་རུ་དུ་རུ་པྲ་དུ་རུ་སྭཱ་ཧཱ། བསྐོར་
བའི་སྔགས་སོ། །ཨོཾ་ཨ་མོ་གྷ་ས་མནྟ་བྷ་བ་ནེ་བྷ་བ་བྷ་བ་སྭཱ་ཧཱ། སྤྱན་དྲང་བའི་སྔགས་སོ། །ཨོཾ་ཨ་མོ་གྷ་ཙིནྟ་མ་ཎི་ཨ་ཀཪྵ་ཡ་དུ་རུ་དུ་རུ་སྭཱ་ཧཱ། གསོལ་བ་གདབ་པའི་སྔགས་སོ། །ཨོཾ་ཨ་མོ་གྷ་ནི་རྨནྟྲ་ཎ་བི་མོ་ཀྵ་མཎྜ་ལེ་མི་ལི་མི་ལི་སྭཱ་ཧཱ། སྙན་གསན་དབབ་པའི་སྔགས་སོ། །ཨོཾ་ཨ་མོ་གྷ་མ་ཧཱ་རཤྨི་ཛྭ་
ལ་ས་ཧ་སྲ་ཛྭ་ལ་ཛྭ་ལ་ས་མནྟི་སྭཱ་ཧཱ། མ་ར་མེའི་སྔགས་སོ། །ཨོཾ་ཨ་མོ་གྷ་པཱ་ཤ་ཧ་སྟེ་པྲ་ས་ར་གཙྪ་སྦ་བྷཱ་བ་ནཾ་བི་ས་རྫི་ཏོ་སི་ས་ར་ས་ར་ཧཱུྃ་ཕཊ་སྭཱ་ཧཱ། སླར་གཤེགས་སུ་གསོལ་བའི་སྔགས་སོ། །ཨོཾ་ཨ་མོ་གྷ་པཱ་ཤ་བ་ན་དྷ་ས་མནྟ་མ་ཧཱ་ས་མ་ཡ་དྲྀ་ཌྷེ་ཧཱུྃ་ཕཊ་སྭཱ་ཧཱ། དམ་ཚིག་གི་སྔགས་སོ། །ཨོཾ་ཨ་མོ་གྷ་ས་
མནྟེ། པྲ་བ་ར། ས་ར་ས་ར། པྲ་ས་ར་མ་ཧཱ་ད་བྷུ་ཏེ་ཤྭ་ར། དྷི་རི་དྷི་རི་ཧཱུྃ་ཧཱུྃ་ཕཊ་སྭཱ་ཧཱ། གསང་སྔགས་འདིས་ལ་དུ་དང་། མོ་ད་ཀ་ར་དང་། ཟན་དང་། རྩ་བ་དང་། སྡོང་བུ་དང་། གཏོར་མ་དཀར་པོ་དང་། ཚོགས་ཆེན་པོའི་བདག་པོའི་གཏོར་མ་སྦྱིན་པ་དང་། མེ་ཏོག་དང་། བདུག་པའི་སྦྱིན་པ་
བྱས་ན་ཕྱིས་བགེགས་བྱེད་ནུས་པར་མི་འགྱུར་རོ། །འཇིག་རྟེན་འདས་པའི་དཀྱིལ་འཁོར་གྱི། །ཕྱག་རྒྱ་དེ་ནས་བརྗོད་བྱ་སྟེ། །གང་གིས་གཟུང་བ་ཙམ་གྱིས་ནི། །སྡིག་པ་ཐམས་ཅད་ཞི་བར་འགྱུར། །ལས་དང་ཉོན་མོངས་སྒྲིབ་པ་དང་། །དུག་རྣམས་ཐམས་ཅད་རྣམ་པར་བཅོམ། རྣམ་གྲོལ་
དཀྱིལ་འཁོར་རིགས་ཀྱི་ནི། །དམ་ཚིག་ཕྱག་རྒྱ་ཡང་དག་ཡིན། །ལག་གཉིས་པདྨ་འདྲར་བྱས་ལ། །སོར་མོ་རྣམས་ནི་མཉམ་གཞག་སྟེ། །གུང་མོ་ལྕགས་ཀྱུ་འདྲ་བར་བྱ། །ལག་གཉིས་མཉམ་པར་གཞག་པ་ཡི། །ཕྱག་རྒྱ་རྣམ་གྲོལ་དམ་ཚིག་འདི། །དོན་ཡོད་ཞགས་པར་བྱིན་གྱིས་

བརླབས། །འཇིག་རྟེན་འདས་པ་ཁྱད་པར་གྱི། །ལམ་གྱི་འབྲས་བུ་ཐོབ་པར་བྱེད། །ཨོཾ་པདྨ་བྷུ་ཛེ་པདྨ་བི་མ་ལེ་སྭཱ་ཧཱ། དམ་ཚིག་རྩེ་མོའི་རྩེ་ཤེས་པས། །རྡོ་རྗེ་པདྨ་རྟག་ཏུ་བྱ། །གུང་མོ་ཅུང་ཟད་བསྐུམས་ནས་ནི། །ལག་གཉིས་པདྨོ་འདྲ་བར་བྱ། །གང་གིས་ཕྱག་རྒྱ་འདི་མཐོང་བ། །འཇིག་རྟེན་
རྣམས་ཀྱི་དབང་ཕྱུག་དག །མཚུངས་པ་མེད་པར་འགྱུར་བ་ཡིན། །རྣམ་གྲོལ་ཕྱག་རྒྱས་དོགས་མེད་པར། །སངས་རྒྱས་མཚུངས་མེད་འགྱུར་བ་ཡིན། །བྱང་ཆུབ་སེམས་དཔའ་ཀུན་གྱིས་ནི། །ཕྱག་བྱས་པ་ཡི་ཕྱག་རྒྱ་འདི། །རྣམ་གྲོལ་དཀྱིལ་འཁོར་རྨད་དུ་བྱུང་། །ཨོཾ་པདྨེ་སུང་པདྨེ་
བི་མོ་ཀྵ་མཎྜ་ལ། པདྨ་བྷུ་ཛེ་སྭཱ་ཧཱ། རྡོ་རྗེ་བཅིང་བ་མཉམ་གཞག་སྟེ། །རྡོ་རྗེ་པདྨོ་གུང་མོ་ནི། །བསྐུམས་ན་དེ་བཞིན་གཤེགས་ཀུན་གྱི། །རྣམ་གྲོལ་གསུང་བའི་ཕྱག་རྒྱ་འདི། །ཡང་དག་གྲོལ་བར་རབ་ཏུ་བསྟན། །ཕྱག་རྒྱ་འདི་ནི་བསྟན་པས་ནི། །ངན་པར་བྱས་པ་ཐམས་ཅད་འཇིག །
ཨོཾ་ཨ་མོ་གྷ་བཛྲ་པདྨ་བྷུ་ཛེ་མི་ལི་མི་ལི་སྭཱ་ཧཱ། ལག་གཉིས་ཐལ་མོ་ཁོང་སྟོང་ལས། །མདོར་ན་ནོར་བུ་འདྲ་བར་བཅིང་། །ནོར་བུའི་ཕྱག་རྒྱ་རྡོ་རྗེ་འདྲ། །ཡིད་བཞིན་ནོར་བུར་བརྗོད་པ་ཡིན། །ལས་ནི་དོན་ཡོད་ཐམས་ཅད་བྱེད། །དོན་ཡོད་མཆོད་པའི་ཆར་འབེབས་ཤིང་། །དོན་ཡོད་ཕ་
རོལ་ཕྱིན་དྲུག་རྫོགས། །དོན་ཡོད་སངས་རྒྱས་རྣམས་དང་ནི། །བྱང་ཆུབ་སེམས་དཔའ་མཐོང་བ་ཡིན། །དོན་ཡོད་རྣམ་གྲོལ་དཀྱིལ་འཁོར་གསང་། །མཚམས་མེད་ལྔ་པོ་སྦྱོང་བར་མཛད། །ཨོཾ་ཨ་མོ་གྷ་མ་ཎི་མ་ཎི། མ་ཧཱ་མ་ཎི་པདྨ་མ་ཎི་སྭཱ་ཧཱ། རྡོ་རྗེ་པདྨའི་ཐལ་མོ་སྦྱར། །པདྨ་ཁ་བྱེ་
འདྲ་བར་རྒྱས། །གུང་མོ་ལྕགས་ཀྱུ་འདྲ་བ་ཡི། །ཕྱག་རྒྱ་འདི་ནི་མཆོག་ཏུ་བཟང་། །ཕྱག་རྒྱ་འདི་ནི་མཐོང་ཙམ་གྱིས། །འབྲས་བུ་ཆེན་པོ་རྨད་དུ་བྱུང་། །འཇིག་རྟེན་འདས་པ་ཁྱད་པར་འཕགས། །དུས་གསུམ་སངས་རྒྱས་མཐོང་བ་ཡིན། །ཨོཾ་ཨ་མོ་གྷ། བཛྲེ་མ་ཧཱ་པདྨེ། ཛ་ལེ་སུ་ཛ་ལེ་ལ་
མ་ཧཱ་ཛ་ལེ་སྭཱ་ཧཱ། སྙིང་གར་རྡོ་རྗེ་པདྨ་ཉིད། །རྡོ་རྗེ་བཅིང་བ་ཕུན་སུམ་ཚོགས། །མཛུབ་མོ་ལྕགས་ཀྱུ་འདྲ་བ་ནི། །བཅིང་བར་བྱ་བ་ཕྱག་རྒྱ་འདི། །གཟི་བརྗིད་ཆེན་པོ་དག་དང་ནི། །སྟོབས་ཆེན་ཕ་རོལ་གནོན་པ་དང་། །ཐམས་ཅད་གྲུབ་པར་བྱེད་པའི་གནས། །ཐམས་ཅད་གྲུབ་པར་རབ་ཏུ་

སྦྱིན། །འཇིག་རྟེན་འདས་པ་གྲུབ་པ་ཆེ། །སངས་རྒྱས་ཉིད་ཕྱིར་བླ་ན་མེད། །སྡིག་པ་ཐམས་ཅད་འཕྲོག་པ་གྲུབ། །གསང་སྔགས་གྲུབ་པ་བླ་ན་མེད། །ཨོཾ་ཨ་མོ་གྷ་སིད་དྷི། སརྦ་ཏ་ཐཱ་ག་ཏ་སིད་དྷི། ཨ་བ་ལོ་ཀཱ་ཡ་སིད་དྷི། །མ་ཧཱ་བི་བུ་ལ་སིད་དྷི། ཀུ་རུ་ཀུ་རུ་སྭཱ་ཧཱ། རྡོ་རྗེ་ཐལ་
མོ་མཉམ་བཞག་སྟེ། །གུང་མོ་གཤིབས་ཏེ་བསྒྲེང་བ་དང་། །སྲིན་ལག་མཐེ་བོ་སོ་སོར་འགྱེད། །གུང་མོ་ཡིད་ཙམ་དགུག་ཕྱ་བ། །པདྨའི་དབང་ཕྱུག་སེམས་དཔའ་ཆེ། །འཇིག་རྟེན་དབང་ཕྱུག་བླ་མ་སྟེ། །རྟག་ཏུ་རྣམ་གྲོལ་དཀྱིལ་འཁོར་ནི། །བྱང་ཆུབ་སེམས་དཔའ་ཐམས་ཅད་ཀྱིས། །
ཕྱག་རྒྱ་བྱས་པ་འདི་ཡིན་ནོ། །ཕྱག་རྒྱ་འདི་དང་དོན་ཡོད་པའི་ཞགས་པའི་སྙིང་པོའི་ཕྱག་རྒྱ་དང་། ཕྱག་རྒྱ་དེ་དག་མཐོང་བ་ནི་འཇིག་རྟེན་དབང་ཕྱུག་མཐོང་བ་དང་འདྲ་བ་ཡིན་ནོ། །ཕྱག་རྒྱ་མཆོག་འདི་མཐོང་བ་ནི་རྣམ་པར་གྲོལ་བའི་དཀྱིལ་འཁོར་མཐོང་བ་དང་འདྲ་བ་ཡིན་ཏེ། ཕྱིར་མི་ལྡོག་
པ་ཐོབ་པར་འགྱུར་རོ། །ཕྱག་རྒྱ་འདི་བཅིངས་པ་ཙམ་མཐོང་བའི་མོད་ལ་དམ་ཚིག་ཐམས་ཅད་ཤེས་པར་འགྱུར་རོ། །མཐོང་བ་དང་གཟུང་བ་ཙམ་གྱི་མོད་ལ་འབྲས་བུ་ཆེན་པོ་འཐོབ་ཅིང་མོད་ལ་སངས་རྒྱས་དང་བྱང་ཆུབ་བླ་ན་མེད་པ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །
བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །ཨོཾ་ཨ་བ་ལོ་ཀི་ཏ་མ་ཧཱ་ཤུད་དྷ་ས་ཏྭ་ས་ར་ས་ར། ས་མནྟ། ཨ་བ་བྷཱ་ས། ཀུཎྜ་ལ། དྷ་ལ། ཨ་མི་ཏཱ་བྷ། མ་ཀུ་ཊ་དྷ་ར། ཛ་ཊ་མ་ཀུ་ཊ། ན་བ་བཛྲེནྡྲ། མཎྜི་ཏ། ཙ་ར་ཙ་ར།
སམྦྷ་ར། བྷུ་བ་ནེ་ཤྭ་ར་པདྨ་བྷུ་ཛེ་སྭཱ་ཧཱ། ཕྱག་རྒྱ་ཆེན་པོ་བདུན་པོ་དེ་དག་ནི་འཇིག་རྟེན་ལས་འདས་པའི་བྱང་ཆུབ་སྙིང་པོའི་ལམ་གྱི་འབྲས་བུ་སྟོན་པ། རྟག་ཏུ་འཇིག་རྟེན་དབང་ཕྱུག་བླ་མ། འཇིག་རྟེན་མགོན་པོའི་ཆོས་ཀྱི་འཁོར་ལོ་བསྐོར་བ་ཡིན་ནོ། །ཕྱག་རྒྱ་བདུན་ནི་ཕྱག་རྒྱ་ཆེན་པོ་བྱེ་བ་ཕྲག་བདུན་
གྱིས་ཡོངས་སུ་བསྐོར་བ་ཡིན་ཏེ། ཕྱག་རྒྱ་ཆེན་པོ་བདུན་པོ་དེ་གང་དུ་བཅིངས་ཤིང་ཕྱག་རྒྱ་མཆོག་གཟུང་བ་ནི་ཕྱག་རྒྱ་ཆེན་པོ་བྱེ་བ་ཕྲག་བརྒྱ་བཅིངས་བར་འགྱུར་རོ། །གཟུང་བར་འགྱུར་རོ། །དེ་དག་ཐམས་ཅད་མཆོད་པ་དང་། བསྙེན་བཀུར་བྱས་པར་འགྱུར་རོ། །བསྟོད་པར་འགྱུར་རོ། །

མིང་འཛིན་པ་བྱས་པར་འགྱུར་རོ། །ཕྱག་རྒྱ་བདུན་པོ་དེ་དག་ནི་གསང་སྔགས་སྒྲུབ་པ་ཐམས་ཅད་དང་། ཀུན་དུ་ལས་ཐམས་ཅད་ལ་སྦྱར་བར་བྱའོ། །ལས་ཐམས་ཅད་བྱེད་པའི་ཕྱག་རྒྱ་འཇིག་རྟེན་ལས་འདས་པའི་ལམ་བླ་ན་མེད་པ་ཡིན་ནོ། །གང་ཞིག་ཕྱག་རྒྱ་དེ་དག་བཅིངས་པ་མཐོང་ཞིང་ཁྲུས་
ལེགས་པར་བྱས་ཏེ། གཙང་མས་སྒྲུབ་པར་བྱེད་པ་འདི་ནི་ངན་འགྲོར་འགྲོ་བར་མི་འགྱུར། སྔོན་གྱི་སྒྲིབ་པས་དམྱལ་བ་མཐོང་བར་མི་འགྱུར། །ཕྱག་རྒྱ་བཅིངས་པ་ཙམ་གྱི་མོད་ལ་ཡང་དག་པར་རྫོགས་པའི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་བདུན་གྱི་དྲུང་དུ་དགེ་བའི་རྩ་བ་བསགས་པར་
འགྱུར་རོ། །བསོད་ནམས་ཀྱི་ཕུང་པོ་ཆེན་པོ་ཀུན་དུ་གཟུང་བར་འགྱུར་རོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ས་བཅུ་ལ་རབ་ཏུ་གནས་པར་འགྱུར་རོ། །ཕྱིར་མི་ལྡོག་པའི་གནས་རབ་ཏུ་ཐོབ་པར་འགྱུར་རོ། །མཚམས་མེད་པ་ལྔ་བྱེད་པ་དང་། དམ་པའི་ཆོས་སྤོང་བ་
དང་། འཕགས་པ་ལ་སྐུར་བ་འདེབས་པ་དང་། མནར་མེད་པ་ལ་གཞོལ་བ་རྣམས་ཀྱིས་ཇི་སྟེ་ཕྱག་རྒྱ་གཟུང་བ་ཙམ་དང་། བསྟན་པ་ཙམ་གྱི་མོད་ལ་སྡིག་པ་དེ་དག་ཐམས་ཅད་རྣམ་པར་ཞིག་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་གཟུང་བར་འགྱུར་
རོ། །ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ལ་སོགས་པ་རྣམས་ལས་ལེགས་པར་བསྲུངས་པར་འགྱུར་རོ། །དབང་ཕྱུག་དང་དབང་ཕྱུག་ཆེན་པོ་དང་། རྒྱལ་པོ་ཆེན་པོ་བཞི་དང་། གཤིན་རྗེ་དང་། ཆུ་ལྷ་དང་། ལུས་ངན་དང་། གཞོན་ནུ་རྣམས་རྟག་ཏུ་
རྒྱུན་མི་འཆད་པར་བསྲུང་བ་དང་། བསྐྱབ་པ་དང་། སྦ་བའི་ཕྱིར་རྒྱུན་དུ་རྗེས་སུ་འབྲང་བ་བྱེད་པར་འགྱུར་རོ། །སེམས་ཅན་ཐམས་ཅད་དགའ་བ་མཐོང་བར་འགྱུར་རོ། །མཆོད་རྟེན་དུ་གྱུར་པ་ཡིན་པར་འདོད་པ་དང་། ལུས་རིང་བསྲེལ་གྱི་སྙིང་པོ་ཡིན་པར་འགྱུར་རོ། །རྡོ་རྗེ་ལྟར་མཁྲེགས་པའི་
ལུས་སུ་འགྱུར་རོ། །དུག་གིས་མི་ཚུགས། མེས་མ་ཡིན། མཚོན་གྱིས་མ་ཡིན། ཆུས་མ་ཡིན། དབྱིག་དུག་གི་འཇིགས་པས་མ་ཡིན། སེང་གེས་མ་ཡིན། གཅན་གཟན་གཏུམ་པོས་མ་ཡིན། དུག་མི་བཟད་པས་མ་ཡིན། རྐུན་པོ་དང་། མི་རྒོད་ཀྱིས་མ་ཡིན། ཁྱིམ་རྡིབ་པས་

མ་ཡིན། གནོད་སྦྱིན་དང་། སྲིན་པོའི་གདོན་ཡང་འོང་བར་མི་འགྱུར་རོ། །ནད་ཐམས་ཅད་འཇུག་པར་མི་འགྱུར། ལུས་ལ་དུག་སྦྱར་མ་དང་། བྱད་དང་སྦོད་གཏོང་གི་འཇིགས་པ་འབྱུང་བར་མི་འགྱུར་རོ། །རྟག་ཏུ་སྡིག་པ་ཅན་གྱི་རྨི་ལམ་མཐོང་བར་མི་འགྱུར་རོ། །རྟག་ཏུ་
དེ་བཞིན་གཤེགས་པ་ལྟ་བ་མཐོང་བར་འགྱུར་རོ། །བྱང་ཆུབ་སེམས་ལྟ་བ་མཐོང་བར་འགྱུར་རོ། །རྟག་ཏུ་འཕགས་པ་སྤྱན་རས་གཟིགས་དབང་ཕྱུག་མཐོང་སྟེ། རྟག་ཏུ་མཆོག་སྦྱིན་པ་མཛད་པར་འགྱུར་རོ། །ལྷ་ཐམས་ཅད་ཀྱང་རྟག་ཏུ་རྒྱུན་མི་འཆད་པར་འདིས་མཐོང་བར་དགྱེས་པར་
འགྱུར་རོ། །རྟག་ཏུ་ཡོན་ཏན་དང་བསོད་ནམས་འབར་རོ། །དཔལ་གྱིས་ལུས་ལ་ཤིན་ཏུ་འབར་བའི་ལུས་སུ་འགྱུར་རོ། །ཐམས་ཅད་དུ་འདི་མཆོད་པར་འོས་པ་ཆེན་པོར་འགྱུར་ཏེ། རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། བཙུན་མོའི་འཁོར་གྱིས་མཆོད་པར་འོས་པ་
ཆེན་པོར་འགྱུར་རོ། །ལྷའི་གནས་སུམ་ཅུ་རྩ་གཉིས་ཀྱི་བར་དུ་ཡང་དགྱེས་པར་འགྱུར་ཏེ། མཆོད་པར་བྱེད་དོ། །ལྷ་རྣམས་ཀྱི་དབང་པོ་བརྒྱ་བྱིན་ལྷའི་བདག་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། ལུས་ངན་པོ་དང་། གཞོན་
ནུ་དང་། དྲང་སྲོང་གི་ཚོགས་རྣམས་ཀྱིས་མཆོད་པར་འོས་པ་ཆེན་པོར་འགྱུར་རོ། །སེམས་ཅན་ཐམས་ཅད་ཀྱང་རྟག་ཏུ་དེ་མཐོང་བར་འདོད་པར་འགྱུར་རོ། །རྟག་ཏུ་དགྱེས་པར་སྟོན་པ་བཞེད་པར་འགྱུར་རོ། །རིག་སྔགས་འཆང་བས་ཁྲུས་བྱས་གོས་གཙང་མ་བགོས་ཏེ་གཙང་མར་བྱས་ལ་
དྲི་སྣ་ཚོགས་ཀྱིས་ལུས་བསྐུ་བ་དང་། བདུག་པ་སྣ་ཚོགས་ཀྱིས་བདུག་པ་བྱས་ལ། ཙནྡན་དཀར་པོ་དང་། གུར་གུམ་གྱིས་ལག་པ་གཉིས་བསྐུས་ཏེ། ག་པུར་དང་། གླ་རྩིས་བསྒོས་པའི་ས་ཕྱོགས་གཙང་མར་རས་ཀྱི་སྐུ་གཟུགས་ཀྱི་སྤྱན་སྔ་འམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔའམ། །
འཕགས་པ་སྤྱན་རས་གཟིགས་དབང་ཕྱུག་གི་སྐུ་གཟུགས་ཀྱི་སྤྱན་སྔར་སྐྱིལ་མོ་ཀྲུང་བཅས་ཏེ་འདུག་ནས་ཕྱག་རྒྱ་འདི་བཅིང་བར་བྱའོ། །མཆོད་རྟེན་རིང་བསྲེལ་ཅན་གྱི་དྲུང་དུ་ཕྱག་རྒྱ་བཅིང་བར་བྱའོ། །སངས་རྒྱས་ལ་མཆོད་པའི་ཚོགས་ཡོན་ཆབ་ལ་སོགས་པ་དབུལ་བར་བྱའོ། །བྱམས་

པ་དང་སྙིང་རྗེའི་སེམས་སུ་བྱའོ། །སེམས་ཅན་ཐམས་ཅད་ལ་ལྷག་པར་བརྩེ་བ་དང་། སྙིང་རྗེའི་སེམས་བསྒོམ་པར་བྱའོ། །སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་ཤེས་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་ཡིད་ལ་དྲན་པར་བྱའོ། །སངས་རྒྱས་ཡིད་ལ་བྱེད་
པ་དྲན་པ་བསྒོམ་པར་བྱ་སྟེ། ཕྱག་རྒྱ་ཆེན་པོ་བདུན་པོ་དེ་དག་བཅིང་བ་བྱས་ན་ཕྱག་རྒྱ་བྱེ་བ་ཕྲག་བདུན་བཅིངས་པར་འགྱུར་རོ། །དེ་ནས་མཐུ་བརྗོད་པར་བྱའོ། །མཐུ་ནི་འཇིག་རྟེན་ལས་འདས་པ་ཡང་དག་པར་མཐོང་བ་དང་། དོན་ཡོད་པའི་ཞགས་པའི་ཆོ་འཕྲུལ་དང་། རང་བཞིན་གྱི་
སྐུ་མངོན་དུ་མཐོང་བ་ཡིན་ནོ། །རྒྱལ་པོའམ། བཙུན་མོའི་ནང་དུའམ། སྐྱེ་བོ་མང་པོའི་ནང་དུ་ཚོགས་པ་དང་། དགེ་སློང་གི་ཚོགས་ཀྱི་དགེ་འདུན་གྱི་ནང་དུའམ། འཁོར་དུ་བཅད་པའི་ནང་དུའམ། རིག་བྱེད་བཞི་ཚོགས་པ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་།
བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། རྗེའུ་རིགས་དང་། དམངས་རིགས་དང་བཅས་པ་དེ་དག་གི་ནང་དུ་དེ་དག་དོན་ཡོད་པའི་ཞགས་པའི་ཆོ་འཕྲུལ་འཇིག་རྟེན་ལས་འདས་པ་མོད་ལ་མངོན་དུ་མཐོང་བ་དང་། འདས་པའམ། མ་འོངས་པ་དང་། ད་ལྟར་བྱུང་བའི་འཆི་བ་
དང་། སྐྱེ་བ་དང་། སྐྱེས་ནས་ཡང་དག་པར་དགེ་བ་དང་། མི་དགེ་བའི་འབྲས་བུ་དང་། དགེ་བ་དང་མི་དགེ་བས་ཤི་བ་དང་། སྐྱེས་ནས་ཕྱུག་པོའམ། དབུལ་པོའམ། རྒྱལ་པོ་ཐོབ་པའམ། ལྷའི་ལོངས་སྤྱོད་དང་། ལྷའི་གནས་སུམ་ཅུ་རྩ་གཉིས་དང་། བརྒྱ་བྱིན་དང་། ཚངས་པ་དང་།
ཁྱབ་འཇུག་དང་། རྟག་ཏུ་དབང་ཕྱུག་ཆེན་པོར་འགྱུར་བ་དང་། ཀླུའི་སྐྱེ་གནས་དང་། ཡི་དགས་དང་། གནོད་སྦྱིན་དང་། སྲིན་པོ་གསང་བ་པ་རྣམས་ཀྱིས་དམྱལ་བ་མི་བཟད་པར་སྐྱེ་བ་དང་། མཚམས་མེད་པ་ལ་ཐུག་གི་བར་དུ་མཐོང་བ་དང་། བྲམ་ཟེའི་རིགས་སམ། རྒྱལ་རིགས་སམ་
གཞན་ཡང་རིགས་དུ་མ་སྣ་ཚོགས་པར་སྐྱེ་བར་མཐོང་བ་དག་འཇིག་རྟེན་མགོན་པོའི་མཐུས་མངོན་སུམ་དུ་མཐོང་བར་འགྱུར་རོ། །འཇིག་རྟེན་པའི་ལས་བསྒྲུབ་པར་བྱ་བ་དེ་དག་ཐམས་ཅད་བསྟན་པར་བྱ་སྟེ། རྒྱལ་བ་དང་། རྣམ་པར་རྒྱལ་བ་དང་། བདེ་བ་དང་། ལོ་ལེགས་པ་དང་། མི་ངས་

དང་། ཡམས་ཀྱི་ནད་དང་། ཕ་རོལ་གྱི་འཁོར་རམ། རང་གི་འཁོར་ལ་གནོད་པ་དང་། དགྲ་དང་། ཕྱིར་རྒོལ་བ་དང་། འགྱེད་པ་དང་། གཡུལ་སྤྲོད་པ་དང་། ཚེ་རིང་བ་དང་། ཚེ་ཐུང་བ་དང་། ནད་འབྱུང་བ་དང་། ནད་མེད་པ་དང་། ཆར་འབབ་པ་དང་། ཤིན་ཏུ་ཆར་འབབ་
པ་དང་། ཆར་མི་འབབ་པ་དང་། དུས་མ་ཡིན་པར་འབབ་པ་དང་། དར་བ་དང་། རྒུད་པ་དང་། འབྱོར་པ་དང་། མི་འབྱོར་པ་དང་། འོང་བ་དང་། འགྲོ་བ་དང་། ནོར་དང་། འབྲུ་རྙེད་པ་དང་། འཕེལ་བ་དང་། འབྲི་བ་དང་། ལོ་ཉེས་པ་མཐོང་བ་དང་། འཁོར་བ་ན་ད་ལྟར་གྱི་ལས་གང་ཅུང་ཟད་
ལེགས་པར་བྱེད་པ་དང་། ཉེས་པར་བྱེད་པ་དང་། དགེ་བའམ། མི་དགེ་བའམ། འབྲི་བའམ། འཕེལ་བའམ། སྐྱེ་བ་ལེགས་པར་སྐྱེ་བའམ། ངན་པར་སྐྱེ་བ་དང་། བུ་འབྱུང་བ། བུ་ཕོའམ། བུ་མོའམ། བུ་བཟང་པོའམ། བུ་ངན་པའམ། བསོད་ནམས་ཅན་ནམ། བསོད་ནམས་མེད་པ་
མངལ་ན་གནས་པ་དེ་དག་བདེན་པ་ཉིད་དུ་མཐོང་སྟེ། ལས་ཀྱི་ཆོ་ག་ལེགས་པར་བྱས་པས་ཐེ་ཚོམ་མི་བྱའོ། །ཚེས་གྲངས་དང་། རྒྱུ་སྐར་དང་། ཉིན་མཚན་བརྗོད་པར་བྱ་མི་དགོས་ཀྱི་བཟླས་བརྗོད་དང་། གཏོར་མ་དང་། གཙང་སྦྲ་དང་། བཀྲུ་བཤལ་དང་། ཤིན་ཏུ་ཁྲུས་བྱ་བ་དང་།
གོས་གཙང་མ་བཅང་བ་དང་། བདེན་པར་སྨྲ་བ་དང་། བྱམས་པའི་སེམས་དང་། བླ་མ་ལ་ལེགས་པར་མཉན་པ་དེ་གཟུང་བ་ཁོ་ནར་བྱའོ། །ཟས་དང་། སྐོམ་གཙང་མ་དང་། ཆང་དང་། ཤ་དང་། བེག་བཙོང་དང་། སྒོག་སྐྱ་དང་། ཀེའུ་དང་། འདྲེས་པར་བྱས་པའི་འདྲེས་པའི་ཟས་ཡོངས་
སུ་སྤང་བ་དང་། ཤིན་ཏུ་སྤགས་པ་དང་། དེ་དག་ནི་ཁྱད་པར་འདོད་པས་ཡོངས་སུ་སྤང་བར་བྱས་ན་ལས་འདི་ནི་མོད་ལ་ཐམས་ཅད་མངོན་དུ་མཐོང་བར་འགྱུར་རོ། །དཀའ་ཐུབ་སྤྱོད་པ་ལ་བརྙས་སེམས་མི་བྱ། མ་གུས་པ་མི་བྱའི་ལྐོག་ཏུའང་མི་བྱའོ། །རྗེས་སུ་བསྟན་པ་དེ་དག་ནི་མཆོག་
ཡིན་ནོ། །བསྒྲུབ་པར་བྱ་བ་མཆོག་དེ་དག་ནི་འཇིག་རྟེན་དབང་ཕྱུག་མགོན་པོས་བཀའ་སྩལ་པ་ཡིན་ནོ། །དངུལ་ལས་མེ་ལོང་ཆུ་ཞེང་དུ་སོར་བཅུ་དྲུག་པ་བྱས་ལ་ཟངས་ལས་པདྨོའི་གདན་ཁྲུ་གང་གི་ཚད་སྡོང་བུ་དང་བཅས་པར་བྱའོ། །མེ་ལོང་གི་གོང་དུ་དངུལ་ལམ། གསེར་ལས་

འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པ་བྱ་སྟེ་ཚད་སོར་བཞི་པ། གདན་པདྨོ་ཕྱག་བཞི་ལ་མདུང་རྩེག་སུམ་པ་དང་། ཞགས་པ་དང་། པདྨ་དང་། ནོར་བུའི་རིན་པོ་ཆེ་ཐོགས་པར་བྱ་བ་ནི་འཇོག་སྦྱོང་ལེགས་པར་བྱས་པ། འཇམ་པོ་འོད་ཕྱིན་པ་ཙམ་དུ་སྦྱང་བར་བྱའོ། །
དེ་ནས་རིག་སྔགས་འཆང་བས་མེ་ལོང་གི་གོང་གི་འཇིག་རྟེན་དབང་ཕྱུག་གི་སྐུ་ལ་རིང་བསྲེལ་གཞག་པར་བྱའོ། །ག་པུར་དང་། གླ་རྩིས་སྐུ་ལ་མཆོད་པར་བྱའོ། །མེ་ལོང་གི་ཉེ་འཁོར་ཐོག་ཐག་ཏུ་དངུལ་གྱི་མེ་ཏོག་དང་། གསེར་གྱི་མེ་ཏོག་རིན་པོ་ཆེ་སྣ་ཚོགས་ཀྱིས་སྤྲས་པའི་ཕྲེང་བ་གདགས་པར་
བྱའོ། །དབང་བསྐུར་བའི་དར་གདགས་པར་བྱའོ། །དེ་ནས་རིག་སྔགས་འཆང་བས་མེ་ལོང་དེ་ལ་ཉི་མ་རེ་རེ་ཞིང་དུས་གསུམ་དུ་དོན་ཡོད་པའི་ཞགས་པའི་སྙིང་པོ་བརྒྱ་རྩ་བརྒྱད་བཟླས་བརྗོད་བྱ་སྟེ། ཇི་ཙམ་བརྒྱ་སྟོང་ཚང་གི་བར་དུ་བྱའོ། །ཁྲོ་བོའི་རྒྱལ་པོས་དབང་བསྐུར་བར་བྱའོ། །དེ་ནས་མེ་ལོང་
འབར་བར་འགྱུར་རོ། །གཅིག་ཁོ་ནར་ཁ་དོག་སྣ་ཚོགས་པར་འབར་བར་འགྱུར་རོ། །འཇིག་རྟེན་དབང་ཕྱུག་གི་སྐུ་གཟུགས་དེ་ལས་ལྷ་རྫས་ཀྱི་ཆུ་འཛག་གོ། །འོད་ཟེར་སྣ་ཚོགས་འབྱུང་ངོ་། །དེ་ནས་རིག་སྔགས་འཆང་བའི་ལུས་འབར་ཞིང་དགའ་བར་འགྱུར་རོ། །དོན་ཡོད་པར་དགའ་བ་
དྲི་མ་མེད་པ་ཞེས་བྱ་བ་དོན་ཡོད་པའི་ཞགས་པའི་སྙིང་པོ་ཆོ་ག་ཞིབ་མོ་གྲུབ་པ་འཐོབ་པར་འགྱུར་རོ། །ལུས་ཤིན་ཏུ་དྲི་མ་མེད་ཅིང་ཡོངས་སུ་དག་པར་འགྱུར་རོ། །དེ་ནས་རིག་སྔགས་འཆང་བས་འཇིག་རྟེན་ཐམས་ཅད་ཀྱི་མངོན་སུམ་དོན་ཡོད་པའི་ཞགས་པ་རྣམ་པར་འཕྲུལ་པ་འགྲུབ་པ་བསྟན་
པར་བྱ་དགོས་པས། དེ་ནས་རིག་སྔགས་འཆང་བས་ས་དང་བའི་ལྕི་བ་བསྲེས་པའི་དཀྱིལ་འཁོར་རྒྱར་ཁྲུ་བཞི་འཕང་དུ་ཁྲུ་དོ་པ་བྱས་ལ་ཤིན་ཏུ་མཁྲེགས་པ་ཤིན་ཏུ་འཇོམ་པར་བྱའོ། །ཐིག་སྐུད་ཀྱིས་རྣམ་པར་ཕྱེ་སྟེ། ཚོན་སྣ་ཚོགས་རྣམ་པར་དབྱེ་ཞིང་སྒོ་བཞི་རྣམ་པར་ཕྱེ་ནས་དཀྱིལ་འཁོར་
གྱི་སྒོ་རྣམ་པར་ཕྱེ་སྟེ། པདྨ་འདབ་མ་བརྒྱད་ཚོན་གྱིས་གསལ་བར་བྲི་ཞིང་པདྨའི་དཀྱིལ་དུ་གེ་སར་དང་ཟེ་བ་བྱའོ། །སྟེགས་བུ་གྲུ་བཞི་ལ་རིན་པོ་ཆེ་སྣ་ཚོགས་ཀྱིས་བརྒྱན་པ་དང་། སྟེགས་བུ་གྲྭ་བཞིར་རྒྱལ་པོ་ཆེན་པོ་བཞི་གོ་ཆ་བགོས་པ་གཏུམ་པ་འཇིགས་པར་བྱེད་པའི་གཟུགས་བྲི་བར་

བྱའོ། །སྟེགས་བུའི་དབུས་ཀྱི་གནས་པར་བར་དུ་ལྷ་དབང་ཕྱུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། གཞོན་ནུ་དང་། ལུས་ངན་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ལྷ་དབང་ཕྱུག་དང་། ཕྱག་ན་རྡོ་རྗེ་དང་། རལ་
པ་གཅིག་པ་དང་། སྒྲོལ་མ་དང་། དཀར་མོ་དང་། ཁྲོ་གཉེར་མ་དང་། རྡོ་རྗེ་ཕོ་ཉ་མོ་རྣམས་ཚོན་སྣ་ཚོགས་ཀྱིས་བྲི་ཞིང་རྒྱན་ཐམས་ཅད་ཀྱིས་བརྒྱན་པ། མེ་ཏོག་སྣ་ཚོགས་ཐོགས་པ་བྱའོ། །སྟེགས་བུའི་ཕྱི་རོལ་དུ་མདུང་རྩེ་གསུམ་པའི་ཕྲེང་བ་དང་། རྡོ་རྗེའི་ཕྲེང་བ་དང་། པདྨའི་ཕྲེང་
བ་ཀུན་དུ་བྱའོ། །ཕྲེང་བའི་བར་དབུས་དང་། གྲྭའི་བར་དུ་ལྷ་མོ་བརྒྱད་དང་འཇིགས་བྱེད་མ་དང་། དཔེ་མེད་མ་དང་། བ་སན་ཏི་དང་། དཔལ་སྒྲ་དབྱངས་དང་། སའི་ལྷ་མོ་དང་། དུང་ཅན་མ་དང་། པུས་པ་དན་ཏི་རྣམས་རྒྱན་ཐམས་ཅད་ཀྱིས་བརྒྱན་པ། མེ་ཏོག་སྣ་ཚོགས་དང་རིན་པོ་
ཆེའི་སྣོད་ཐོགས་པར་བྱའོ། །ཕྱི་རོལ་ཐོག་ཐག་ཏུ་ཕྲེང་བའི་བར་བར་དུ་དྲི་སྣ་ཚོགས་ཀྱིས་དཀྱིལ་འཁོར་བསྐུ་ཞིང་ཙནྡན་དཀར་པོ་དང་། གུར་གུམ་གྱིས་མཆོད་པ་སྣ་ཚོགས་བྱའོ། །ག་པུར་དང་། གླ་རྩིས་མཆོད་ཅིང་། དཀྱིལ་འཁོར་ཀུན་དུ་དར་སྣ་ཚོན་སྣ་ལྔའི་རྒྱལ་མཚན་དང་། མདའ་
དང་། རྟ་བབས་ཀྱིས་བརྒྱན་པར་བྱའོ། །དངུལ་གྱི་སྣོད་བཞི་ཅུང་པེང་གིས་བཀང་སྟེ་གཞག་པར་བྱའོ། །དངུལ་གྱི་སྣོད་བཞི་གཏོར་མ་དཀར་གསུམ་གྱིས་དགང་བར་བྱའོ། །དངུལ་གྱི་སྣོད་བཞིར་མཆོད་ཡོན་གྱི་ཆུ་གཞག་པར་བྱའོ། །སྣོད་བརྒྱད་རོ་སྣ་ཚོགས་ཀྱི་གཏོར་མས་དགང་བར་
བྱའོ། །འབྲས་བུ་རྣམ་པ་སྣ་ཚོགས་གཞག་པར་བྱའོ། །ཁ་ཟས་བཟའ་བ་དང་། གཏོར་མ་རྣམ་པ་སྣ་ཚོགས་གཞག་པར་བྱའོ། །དྲི་སྣ་ཚོགས་དང་། བྱུག་པས་དངུལ་གྱི་སྣོད་བཀང་སྟེ་གཞག་པར་བྱའོ། །དངུལ་གྱི་པོག་ཕོར་བརྒྱད་ཙནྡན་དང་། ཨ་ག་རུ་དང་། ཏུ་རུ་སྐ་དང་། ག་པུར་
དང་། གླ་རྩི་དང་། གུར་གུམ་དང་། སྲ་རྩི་པོག་དང་། པོག་གིས་གང་བར་བྱ་ཞིང་བདུག་སྤོས་སྣ་ཚོགས་པ་སྲེག་གོ། །དངུལ་དང་། ཟངས་དང་། གསེར་གྱི་མེ་ཏོག་གི་སྙིང་པོའི་དཀྱིལ་འཁོར་དུ་གཅལ་དུ་དགྲམ་མོ། །ཕྱིའི་དཀྱིལ་འཁོར་དུ་ཇི་ལྟར་རྙེད་པའི་མེ་ཏོག་གཙལ་དུ་དགྲམ་པར་བྱ་

སྟེ། ཕྲེང་བ་རྣམས་ཁོར་ཡུག་ཏུ་བསྐོར་ནས་བཞག་སྟེ། དེ་ལ་ཡང་མེ་ལོང་ལེགས་པར་བརྒྱན་པར་བྱས་ནས། དབུས་ཀྱི་དཀྱིལ་འཁོར་གྱི་པདྨའི་གེ་སར་དང་ཟེའུ་འབྲུ་ལ་ཤར་དུ་ཕྱོགས་པར་གཞག་པར་བྱའོ། །རིག་སྔགས་འཆང་གཙང་མ་ཁྲུས་བྱས་གོས་གཙང་མ་བགོ་བར་བྱ་སྟེ།
དཀྱིལ་འཁོར་གྱི་ལས་དང་། བྱ་བ་ཐམས་ཅད་བྱས་ནས་མེ་ལོང་ལ་མངོན་དུ་ཕྱོགས་ཏེ། སྐྱིལ་མོ་ཀྲུང་དུ་འདུག་པར་གྱུར་ནས་འཕགས་པ་དོན་ཡོད་པའི་ཞགས་པའི་སྙིང་པོ་བཟླས་བརྗོད་དབུལ་བར་བྱ་སྟེ། བཟླས་བརྗོད་བརྒྱ་རྩ་བརྒྱད་རྫོགས་པ་དང་། ཁྲོ་བོའི་རྒྱལ་པོས་དབང་བསྐུར་རོ། །
དབང་བསྐུར་བ་ཙམ་གྱི་མོད་ལ་འཇིག་རྟེན་ཐམས་ཅད་ཀྱི་མངོན་སུམ་དང་། འཁོར་ཆེན་པོའི་དབུས་སུ་མེ་ལོང་གི་དབུས་དེར་འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་མཐོང་སྟེ། མེ་ལོང་གི་དབུས་དེ་ནས་རིག་སྔགས་འཆང་དེ་ལ་ལེགས་སོ་ཞེས་བྱ་བ་སྦྱིན་པར་མཛད་དོ། །
རིག་སྔགས་འཆང་ཆེན་པོ་ལེགས་སོ་ལེགས་སོ། །བདག་ལ་དོན་ཡོད་པའི་མེ་ལོང་ལ་འབེབས་པའི་དེ་ཁོ་ན་ཉིད་དམ་པར་གྱུར་པ་འདི་ཐམས་ཅད་ཡང་དག་པར་མཐོང་སྟེ། འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་འབྲས་བུ་བླ་ན་མེད་པ་ཞེས་བྱ་བ་ཡོངས་སུ་དག་པ་ཉིད་དོ། །རིག་
སྔགས་འཆང་ཁྱོད་ཀྱིས་འབྲས་བུ་ཆེན་པོའི་འཇིག་རྟེན་ལས་འདས་པའི་ལམ་མཚུངས་པ་མེད་པ་ཐོབ་བོ། །ཁྱོད་ཀྱིས་དོན་ཡོད་པའི་ཞགས་པའི་སྙིང་པོའི་འཇིག་རྟེན་དང་འཇིག་རྟེན་ལས་འདས་པའི་སྒྲུབ་པའི་ཆོ་ག་དང་། ཆོ་ག་ཞིབ་མོ་དང་། དཀྱིལ་འཁོར་དང་ཕྱག་རྒྱ་གྲུབ་བོ། །རིག་སྔགས་
འཆང་འཇིག་རྟེན་དང་འཇིག་རྟེན་ལས་འདས་པའི་མཆོག་གང་འདོད་པ་སྨྲོས་ཤིག །དེ་ཐམས་ཅད་སྦྱིན་པར་བྱའོ་ཞེས་སོ། །དེ་ནས་རིག་སྔགས་འཆང་གིས་མཆོག་གང་དོན་དུ་གཉེར་བ་དེ་བླངས་ནས་ཐམས་ཅད་འཕྲལ་ཉིད་དུ་སྦྱིན་པར་བྱེད་དོ། །འཁོར་གྱི་དཀྱིལ་འཁོར་གང་ཡིན་པ་དེར། ཀུན་
ནས་འོངས་པའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། དམངས་རིགས་དང་། རྗེའུ་རིགས་དང་། རྒྱལ་པོ་དང་། བློན་པོ་དང་། བཀྲབས་པ་དང་། མདུན་ན་འདོན་དང་། བཙུན་མོའི་འཁོར་དུ་ཀུན་འོངས་པ་དང་། བསོད་

ནམས་དང་ལྡན་པའམ། བསོད་ནམས་དང་མི་ལྡན་པའམ། ཡོངས་སུ་དག་པའམ། ལྟ་བ་ངན་པའམ། གཞན་དམྱལ་བ་བའི་སེམས་ཅན་གཏི་མུག་གི་མུན་པ་ལྷུད་བ། མནར་མེད་པ་ལ་གཞོལ་བ། མཚམས་མེད་པ་ལྔ་བྱེད་པ། འཕགས་པ་ལ་སྐུར་པ་འདེབས་པ། དམ་པའི་
ཆོས་སྤོང་བ་གང་ཡིན་པ་དེ་རྣམས་ཐམས་ཅད་ལའང་འཕགས་པ་སྤྱན་རས་གཟིགས་དབང་ཕྱུག་གི་ལུས་དེ་ལ་སྟོན་པར་བྱེད། ཐམས་ཅད་དུ་སྨྲ་བར་བྱེད། ཡང་དག་པར་དབུགས་འབྱིན་པར་བྱེད། ཐམས་ཅད་དུ་རང་གི་ལས་ལ་དགེ་བའམ། མི་དགེ་བའི་འབྲས་བུ་རྣམ་པར་སྨིན་པ་དེ་ཐམས་
ཅད་སྟོན་པར་བྱེད་དོ། །རིག་སྔགས་ཀྱིས་ཆོམ་རྐུན་དང་། གདོལ་པ་དང་། རིག་སྔགས་སྤོང་ཞིང་ཉམས་པར་བྱེད་པ་དང་། རིག་སྔགས་སུན་འབྱིན་པར་བྱེད་པ་དང་། རིག་སྔགས་ལ་མ་དད་ཅིང་གུས་པས་མི་ཉན་པ་དེའི་མི་མཐོང་བ་ནི་མ་གཏོགས་ཏེ། གཞན་དུ་ན་རང་གི་ལས་ཀྱི་འབྲས་བུ་
སྡུག་བསྔལ་རྣམ་པ་སྣ་ཚོགས་ངེས་པར་འབྱུང་བར་མཐོང་ངོ་། །དེ་ནས་སེམས་ཅན་དེ་རྣམས་གང་འདོད་པའི་དོན་ཡིད་ལ་བྱེད་པ་འཇུག་སྟེ། འཇིག་རྟེན་པའམ་འཇིག་རྟེན་ལས་འདས་པ་དེ་ཐམས་ཅད་འཁོར་གྱི་དཀྱིལ་འཁོར་ཆེན་པོ་རུ་རང་རང་གི་འབྲས་བུ་ངེས་པར་འབྱུང་བ་བསོད་ནམས་དང་།
བསོད་ནམས་མ་ཡིན་པའི་འབྲས་བུ་མཐོང་བར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་མཐོང་ངོ་། །དེ་བཞིན་གཤེགས་པའི་སྐུ་ཆེན་པོ་དང་། ཁང་པ་བརྩེགས་པ་དང་བཅས་པའི་གཞལ་ཡས་ཁང་མཐོང་ངོ་། །པོ་ཊ་ལ་ཀའི་རི་བོའི་གཞལ་ཡས་ཁང་རྣམས་བཅོམ་
ལྡན་འདས་ཀྱི་རྣམ་པར་འཕྲུལ་པ་དང་བཅས་པ་དང་། འཕགས་པ་སྤྱན་རས་གཟིགས་དབང་ཕྱུག་འཁོར་དང་བཅས་པ་གཞལ་ཡས་ཁང་ན་ལྷ་དང་ཀླུས་ཡོངས་སུ་བསྐོར་བ་མཐོང་ངོ་། །གཞན་ཇི་ལྟར་ད་ལྟར་གྱི་དགེ་བ་དང་མི་དགེ་བའམ། ལོ་ལེགས་པ་དང་། ལོ་ཉེས་པའམ། ནད་དང་།
འཆི་བ་དང་། ཚེ་ཐུང་བ་དང་། ཚེ་རིང་བ་དང་། རང་གི་དམག་ཚོགས་དང་། ཕ་རོལ་གྱི་དམག་ཚོགས་དང་། གཡུལ་དང་། འཁྲུག་པ་དང་། འཇིགས་པ་དང་། རྒྱལ་བའམ། འཕམ་པའམ། རླག་པའམ། མ་བརླགས་པའམ། ཡམས་དང་། ཆར་ཆེས་པའམ། དུས་མ་ཡིན་པའི་

ཆར་རམ། ཆར་མེད་པའམ། རླུང་ངམ། སད་དམ། ཚངས་པ་ཡང་རུང་སྟེ་དེ་དག་ཐམས་ཅད་མཐོང་ངོ་། །ནོར་དང་ལྡན་པའམ། ཉམས་པའམ། འཕེལ་བའམ། ལོ་ཐོག་གམ། མེ་ཏོག་གམ། འབྲས་བུ་འཕེལ་བ་ཡང་རུང་སྟེ། དེ་དག་ཐམས་ཅད་མཐོང་ངོ་། །ཆོམ་རྐུན་དང་། རྐུན་
པོ་དང་། དུག་དང་། མཚོན་ཆའི་འཇིགས་པའམ། རྒྱལ་པོའི་འཇིགས་པའམ། གནོད་སྦྱིན་དང་། སྲིན་པོ་དང་། འབྱུང་པོ་དང་། མཁའ་འགྲོ་མ་དང་། བརྗེད་བྱེད་ཀྱི་འཇིགས་པ་དེ་ཐམས་ཅད་མཐོང་ངོ་། ནོར་ཆེན་པོའམ། ནོར་མེད་པ་དེ་ཐམས་ཅད་མཐོང་ངོ་། །འཆི་འཕོ་བ་དང་།
སྐྱེ་བ་མཐོང་ངོ་། །བུ་ཐོབ་པ་དང་། གྲོང་དང་། གྲོང་ཁྱེར་དང་། ཡུལ་དང་། ལྗོངས་ཐོབ་པ་དང་། བུད་མེད་ཐོབ་པ་དེ་ཐམས་ཅད་མཐོང་སྟེ། འདི་ལ་དོགས་པ་དང་། ཡིད་གཉིས་དང་། ཐེ་ཙོམ་བསྐྱེད་པར་མི་བྱ་ཞིང་། མཆོག་ཏུ་དད་པ་དང་གུས་པས་ཤིན་ཏུ་འབད་དེ་ཆོ་ག་འདི་བསྒྱུར་བར་བྱའོ། །
དོན་ཡོད་ཞགས་པའི་རྣམ་པར་ཐར་པའི་དཀྱིལ་འཁོར་དུ་འཇིག་རྟེན་ལས་འདས་པའི་སྒྲུབ་ཐབས་ཀྱི་ཆོ་ག་རྫོགས་སོ།། །།དེ་ནས་ཡང་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་
དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་དོན་ཡོད་པའི་ཞགས་པའི་སྙིང་པོ་གསུངས་པ་ཆོ་ག་ཞིབ་མོའི་ཉེ་བར་སྤྱོད་པ་དང་བཅས་པ་དང་། དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་། རས་རིས་ཤིན་ཏུ་ཟབ་པ། ཤིན་ཏུ་གཏིང་དཔག་དཀའ་ཞིང་། ཤིན་ཏུ་རྒྱ་
ཆེ་ལ། ཤིན་ཏུ་སྒྲུབ་དཀའ་བ་དང་། དཀྱིལ་འཁོར་མང་པོ་དང་། ཕྱག་རྒྱ་མང་པོ་དང་། གསང་སྔགས་མང་པོ་དང་། རས་རིས་མང་པོ་ཡོངས་སུ་བསྒྲགས་པ་རྣམས་ནི་རབ་རིབ་དང་བྲལ་བར་མཐོང་སྟེ། བཅོམ་ལྡན་འདས་རྒྱ་མཚོ་ཆེན་པོ་དུག་ཅན་པ་ཟབ་པ་ལྟ་བུ། ལྷུན་པོ་ཆེན་
པོ་དང་མཚུངས་པ་ལྟ་བུ། སྨིག་རྒྱུ་ལྟ་བུ། རྡུལ་ཕྲ་རབ་ལྟ་བུ་དེ་བཞིན་གཤེགས་པའི་ཡེ་ཤེས་དང་མཚུངས་པ་ལྟ་བུ། བགྲང་བ་ལས་ཡང་དག་པར་འདས་པ། མཚུངས་པ་མེད་པ། གཞལ་དུ་མེད་པ། ཚད་མེད་པ། བསྐལ་པའི་གྲངས་ཀྱིས་བགྲང་བར་བྱ་བ་མེད་པའི་བསྐལ་པའི་ཚད་

མ་དང་། བསྐལ་པ་བསམ་གྱིས་མི་ཁྱབ་པའི་ཚད་མ་དང་། ལྷའི་ཡུལ་གྱི་ཚད་མ་དང་། ཀླུའི་ཡུལ་གྱི་ཚད་མ་དང་། སེམས་ཅན་གྱི་ཚད་མ་དང་། དེ་བཞིན་གཤེགས་པའི་བསམ་གྱིས་མི་ཁྱབ་པའི་ཚད་མ་དང་། དེ་བཞིན་གཤེགས་པའི་སྤྱན་ལ་སྣང་བའི་ཚད་མ་དང་།
དེ་བཞིན་གཤེགས་པའི་ཡེ་ཤེས་ལ་ཀུན་དུ་སྣང་བའི་ཚད་མ་དང་། བྱང་ཆུབ་སེམས་དཔའི་ཡེ་ཤེས་ཀྱི་ཚད་མ་དང་། བདུད་ཀྱི་ཡུལ་གྱི་ཚད་མ་རྣམས་ཀྱིས་ཐོག་མར་དམིགས་པ་མ་ལགས་སོ། །བཅོམ་ལྡན་འདས་བར་དུ་ཡང་དམིགས་པ་མ་ལགས། བཅོམ་ལྡན་འདས་བར་དུ་ཡང་
དམིགས་པ་མ་ལགས་སོ། ཐ་མར་ཡང་མ་ལགས་ན། བཅོམ་ལྡན་འདས་དེ་ཅི་ལྟར་ཡོངས་སུ་ཤེས་པར་བགྱི། སྒྲུབ་ཐབས་ཀྱི་ཆོ་གས་བསྒྲུབ་པར་བྱ་བ་ནི་དུ་ཞིག་ལགས། གསང་སྔགས་ནི་དུ་ཞིག །ཕྱག་རྒྱ་ནི་དུ་ཞིག །དཀྱིལ་འཁོར་ནི་དུ་ཞིག །བྲི་བར་བྱ་བའི་ཕྱག་རྒྱ་ནི་དུ་ཞིག་
ལག་པའི་ཕྱག་རྒྱ་ནི་དུ་ཞིག །བདུག་པའི་སྦྱོར་བ་ནི་དུ་ཞིག །མིག་སྨན་ནི་དུ་ཞིག །རིལ་བུ་ནི་དུ་ཞིག །བདུག་པ་ནི་དུ་ཞིག །རས་རིས་ནི་དུ་ཞིག །རྩ་བའི་གསང་སྔགས་ནི་དུ་ཞིག །སྙིང་པོ་ནི་དུ་ཞིག །ཉེ་བའི་སྙིང་པོ་ནི་དུ་ཞིག །ཁྲོ་བོའི་གསང་སྔགས་ནི་དུ་ཞིག །དྲག་པོ་ནི་དུ་ཞིག །
ཞི་བ་ནི་དུ་ཞིག །ཡི་གེ་གཅིག་པ་ནི་དུ་ཞིག །ཡི་གེ་གཉིས་པ་ནི་དུ་ཞིག །ཡི་གེ་གསུམ་པ་ནི་དུ་ཞིག །ཡི་གེ་བཞི་པ་ནི་དུ་ཞིག །ཡི་གེ་ལྔ་པ་ནི་དུ་ཞིག །ཡི་གེ་དྲུག་པ་ནི་དུ་ཞིག །ཡི་གེ་བདུན་པ་ནི་དུ་ཞིག །ཡི་གེ་བརྒྱད་པ་ནི་དུ་ཞིག །ཡི་གེ་དགུ་པ་ནི་དུ་ཞིག །ཡི་གེ་བཅུ་པ་ནི་དུ་ཞིག་ལགས།
སྨྱུང་བར་གནས་པ་ཅི་ལྟར་ལགས། ཉིན་མོ་དང་མཚན་མོ་ནི་ཅི་ལྟར། ཁྲུས་ཀྱི་ཆོ་ག་ནི་ཅི་ལྟར། གོས་བགོ་བ་ནི་ཅི་ལྟར། ཕྱོགས་བཅིང་བ་ནི་ཅི་ལྟར། དཀྱིལ་འཁོར་བཅིང་བ་ནི་ཅི་ལྟར། གཙུག་ཏོར་བཅིང་བ་ནི་ཅི་ལྟར། བདག་སྲུང་བ་ནི་ཅི་ལྟར། གཞན་སྲུང་བ་ནི་ཅི་ལྟར། གྲོགས་སྲུང་བ་ནི་
ཅི་ལྟར། སློབ་མ་སྲུང་བ་ནི་ཅི་ལྟར། རབ་ཏུ་འཇུག་པ་ནི་ཅི་ལྟར། ཕྱག་བྱ་བ་ནི་ཅི་ལྟར། བསྐོར་བ་བྱ་བ་ནི་ཅི་ལྟར། མཆོད་ཡོན་དང་། ཞབས་བསིལ་འབུལ་བ་ནི་ཅི་ལྟར། གཏོར་མ་འབུལ་བ་ནི་ཅི་ལྟར། མེ་ཏོག་འབུལ་བ་ནི་ཅི་ལྟར། བདུག་པ་ནི་ཅི་ལྟར། དྲི་ནི་ཅི་ལྟར། མར་མེ་ནི་ཅི་ལྟར།

ཉེ་རེག་ནི་ཅི་ལྟར། ལྷ་བཤོས་ནི་ཅི་ལྟར། ཐམས་ཅད་དུ་སྤྱན་དྲང་བ་ནི་ཅི་ལྟར། སྙན་གསན་དབབ་པ་ནི་ཅི་ལྟར། རྨི་ལམ་བསྐུལ་བ་ནི་ཅི་ལྟར། སྦྱིན་སྲེག་གི་ཆོ་ག་ནི་ཅི་ལྟར་ལགས། ཞི་བ་ཅན་ནི་དུ་ཞིག་ལགས། རྒྱས་པ་ཅན་ནི་དུ་ཞིག །མངོན་སྤྱོད་ཅན་ནི་དུ་ཞིག །ཞགས་པ་ནི་དུ་ཞིག །རྡོ་རྗེ་ནི་དུ་ཞིག །པདྨ་
ནི་དུ་ཞིག །གཤེགས་སུ་གསོལ་བ་ནི་དུ་ཞིག །ཉེ་བར་འཕོ་བར་བྱེད་པའི་བྱ་བ་ནི་དུ་ཞིག་ལགས། བཅོམ་ལྡན་འདས་དེ་དག་གི་མཚན་ཉིད་ཅི་འདྲ་བ་དང་། རྒྱུ་མཚན་ཅི་འདྲ་བ་དང་། ཀུན་ཏུ་སྤྱོད་པར་འགྱུར་བ་ནི་མི་ཤེས་སོ། །བཅོམ་ལྡན་འདས་བདག་ལས་སྒྲུབ་པའི་ཆོ་ག་དུ་ཞིག་གི་རྗེས་སུ་
འབྲང་བར་བགྱི། བཅོམ་ལྡན་འདས་ཅི་ལྟར་ཕྱི་མའི་དུས་ཕྱི་མའི་ཚེ་ན། སེམས་ཅན་རྣམས་ཀྱི་རྗེས་སུ་འབྲང་བར་འགྱུར། དངོས་གྲུབ་དུ་ཞིག་རྗེས་སུ་སྩལ་བར་བགྱི། ཅི་ལྟར་སེམས་ཅན་བླ་ན་མེད་པར་འགྱུར་བར་བགྱི། བཅོམ་ལྡན་འདས་འདི་དག་ལ་བདག་འཁྲུགས་པར་གྱུར་
ཅིང་། བདག་ལ་སྤོབས་པ་མེད་དོ། །བཅོམ་ལྡན་འདས་བདག་གིས་ཤེས་པར་མི་ནུས་ན། བཅོམ་ལྡན་འདས་ཀྱིས་ཆོ་གའི་མཚན་ཉིད་ཇི་ལྟ་བ་དེ་དག་བདག་ལ་གསུང་དུ་གསོལ། བཅོམ་ལྡན་འདས་བདག་ལ་ཐེ་ཚོམ་མཆིས་པས། བཅོམ་ལྡན་འདས་ཀྱིས་བདག་གི་ཐེ་ཚོམ་བཅད་
དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཞུ་བ་ཡོངས་སུ་ཞུས་པར་གྱུར་པ་གསན་ནས། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་མཆོག་ཏུ་རྙེད་
པར་དཀའ་བ་འདི་དྲི་བ་ཡོངས་སུ་དྲིས་པ་ནི་ལེགས་སོ། །ལེགས་སོ། །ལག་ན་རྡོ་རྗེ་ཁྱོད་ལ་ཡོངས་སུ་འདྲི་བར་བྱེད་པའི་སྤོབས་པ་སྐྱེས་པ་ནི་ལག་ན་རྡོ་རྗེ་སེམས་ཅན་ཐམས་ཅད་ལ་ཕན་པའི་ཕྱིར་དོན་གྱི་ཆེད་ཡོངས་སུ་ཞུས་པའི་ཕྱིར་དང་། རིག་སྔགས་འཆང་ཐམས་ཅད་ཀྱི་མཆོག་འགྲུབ་པའི་
དོན་དུ་ཡོངས་སུ་ཞུས་པའི་ཕྱིར་དང་། ལག་ན་རྡོ་རྗེ་འདི་ནི་མཆོག་ཏུ་རྨད་དུ་བྱུང་བས་ཏེ། ཕྱི་བཞིན་དུ་རྗེས་སུ་འབྲང་ངོ་། །ལག་ན་རྡོ་རྗེ་འདི་ནི་སྒྱུ་མ་ལྟ་བུའི་ཏིང་ངེ་འཛིན་དང་མཚུངས་པའོ། །ལག་ན་རྡོ་རྗེ་དོན་ཡོད་ཞགས་པའི་སྙིང་པོའི་ཆོ་ག་ཞིབ་མོའི་རྒྱལ་པོ་ཆེན་པོའི་ཆོ་ག །རྒྱ་མཚོ་ཆེན་པོ་

དུག་ཅན་པ་དང་། ཟབ་བར་མཚུངས་པས་ཏེ། འདི་ནི་གཏིང་དཔག་དཀའ་བའོ། །ལག་ན་རྡོ་རྗེ་རྒྱ་མཚོ་ཆེན་པོ་ཐིགས་པའི་གྲངས་ཀྱིས་བགྲང་བར་ནུས་ཀྱི། ལག་ན་རྡོ་རྗེ་དོན་ཡོད་ཞགས་པའི་སྙིང་པོའི་ཚད་ནི་གཟུང་བར་མི་ནུས་སོ། །ལག་ན་རྡོ་རྗེ་རིའི་རྒྱལ་པོ་རི་རབ་ནི་
རྡུལ་ཕྲ་རབ་ཏུ་གཏོར་བའི་གྲངས་ཀྱིས་མཐར་ཐུག་པར་བྱ་བར་ནུས་ཤིང་། སླར་ཡང་རིའི་རྒྱལ་པོ་རི་རབ་ཏུ་གནས་པར་འདོད་པས་རང་གི་གནས་སུ་རབ་ཏུ་བཞག་པར་ནུས་ཀྱི་དོན་ཡོད་ཞགས་པའི་སྙིང་པོའི་ཆོ་ག་ཞིབ་མོའི་ཚད་ནི་གཟུང་བར་མི་ནུས་སོ། །དེ་ལྟར་རྒྱ་ཆེ་བ། དེ་ལྟར་གཏིང་དཔག་
དཀའ་བ། དེ་ལྟར་ཟབ་པ་སྟེ། ལག་ན་རྡོ་རྗེ། འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱིས་མཁྱེན་པ་དང་། གཏིང་དཔག་པར་མི་ནུས་སོ། །དོན་ཡོད་ཞགས་པའི་སྙིང་པོའི་ཆོ་ག་ཞིབ་མོའི་ཆེད་འཛིན་པར་ནི་མི་ནུས་སོ། །
ལག་ན་རྡོ་རྗེ་སྒྱུ་མ་ལྟ་བུ་གང་ཡིན་པ་དེ་དང་། སྙིང་པོ་དང་། ཏིང་ངེ་འཛིན་གང་ཡིན་པ་དེ་དང་། ཞགས་པ་དང་། སྒྱུ་མ་ལྟ་བུའི་ཏིང་ངེ་འཛིན་གྱི་རྣམ་པར་འཕྲུལ་པ་འདི། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་སེམས་ཅན་རྣམས་ཀྱི་
གཟུགས་དང་། ཁ་དོག་དང་། དབྱིབས་སྣ་ཚོགས་པ་དང་། ཚུལ་སྣ་ཚོགས་སུ་མཐོང་བར་བྱེད་དེ། སེམས་ཅན་ཐམས་ཅད་བསྒྲལ་བའི་ཆེད་དང་། རིག་སྔགས་འཆང་ཐམས་ཅད་ཀྱི་དངོས་གྲུབ་ཀྱི་མཆོག་སྒྲུབ་པར་བྱེད་པའོ། །ལག་ན་རྡོ་རྗེ་འདི་ནི་བྱང་ཆུབ་སེམས་དཔའ་སེམས་
དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐམས་ཅད་དུ་མཉམ་པར་འགྲོ་བ་སྟེ། གང་དུ་ཆུ་དང་འོ་མ་མཉམ་པས་མཉམ་པ་བཞིན་ནོ། །ཐམས་ཅད་དུ་མཉམ་པས་བྱམས་པ་དང་སྙིང་རྗེ་ཆེན་པོ་རྒྱས་པར་བྱེད་དོ། །དོན་ཡོད་པའི་ཞགས་པས་འགུགས་པར་བྱེད་ལ་སྒྲོལ་བར་བྱེད་
དོ། །འཆི་བ་མེད་པའི་ཐད་རྡོ་རྗེའི་དཀྱིལ་འཁོར་དུ་འཇོག་པར་བྱེད་དོ། །དམན་པ་དང་། མཆོག་དང་། བར་མ་དང་། རིགས་མཐོན་པོ་དང་། དམའ་བ་དང་། དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་ལ་སོགས་པ་རྣམས་ཐམས་ཅད་དུ་མཉམ་པར་དྲན་པར་

བྱེད་ཅིང་མིང་སྨོས་པ་ཙམ་གྱིས་འཛིན་པར་བྱེད་ཅིང་། སེམས་ཅན་ཐམས་ཅད་བླ་ན་མེད་པར་བྱེད་ལ་དུབ་པ་དང་། ངལ་བ་དང་། ཡིད་ལ་གཅགས་པར་འགྱུར་བ་མེད་དོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་
ཆེན་པོ་དང་། སྲིན་པོ་དང་། འབྱུང་པོ་དང་། བརྗེད་བྱེད་དང་། ཡི་དགས་དང་། ནགས་དང་། གཤིན་རྗེའི་གནས་ཇི་སྲིད་དུ་ས་འོག་གི་ནང་དུ་སོན་པ་རྣམས་དང་། སྲིད་པའི་རྩེ་མོ་ནས་མནར་མེད་པའི་མཐར་ཐུག་པ་དང་། ཇི་སྲིད་དུ་འོག་མིན་གྱི་སྲིད་པའི་བར་དུ་གཅིག་ཏུ་སེམས་
བསྐྱེད་པས་ཡོངས་སུ་རྒྱུག་གོ། །ལྷ་དང་། ཀླུ་དང་བཅས་པ་ནས་ཇི་སྲིད་དུད་འགྲོའི་སྐྱེ་གནས་ཀྱི་བར་ཐམས་ཅད་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་རྣམས་བླ་ན་མེད་པར་བྱེད་དོ། །དཔེར་ན་ཉི་མའི་འོད་ཟེར་ནི་མུན་པས་མདོངས་པ་ཐམས་ཅད་སེལ་བར་བྱེད་དེ། འཛམ་
བུའི་གླིང་ཐམས་ཅད་དུ་མཉམ་པར་སྣང་བར་བྱེད་དོ། །དེ་བཞིན་ཉིད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཐམས་ཅད་དུ་སྙིང་རྗེ་ཆེན་པོས་ཀུན་དུ་སྣང་བར་བྱེད་ཅིང་ཐམས་ཅད་ལ་ཐམས་ཅད་དུ་མཉམ་པར་གནས་ཏེ། སྡུག་བསྔལ་གྱི་
ཚོར་བ་དང་། འཇིགས་པ་མི་བཟད་པ་དང་། ནད་དང་། མྱ་ངན་དང་། སྡུག་བསྔལ་གྱི་འཆི་བ་རྣམས་ཐམས་ཅད་ཡོངས་སུ་གྲོལ་བར་བྱེད་དོ། །སྐྱེ་བ་དང་། རྒ་བ་དང་། འཆི་བའི་སྡུག་བསྔལ་ཡོངས་སུ་གྲོལ་བར་བྱེད་དོ། །མཐོ་རིས་ལ་གཞོལ་བ་ལ་སོགས་པའི་ལམ་ཐམས་ཅད་
དུ་འགོད་པར་བྱེད་དོ། །དེ་ལྟར་ན་སྙིང་རྗེ་ཆེན་པོ་དང་། བྱམས་པ་ཆེན་པོས་ཐམས་ཅད་དུ་མཉམ་པར་རྗེས་སུ་འགྲོ་སྟེ། ཐམས་ཅད་དུ་མཉམ་པར་མཆོག་ཏུ་བྱེད་ཅིང་། ཐམས་ཅད་དུ་མཉམ་པར་བྱང་ཆུབ་ཀྱི་ལམ་ལ་རབ་ཏུ་འགོད་པར་བྱེད་དོ། །ཐམས་ཅད་དུ་མཉམ་པར་སྐྱབས་དང་།
དཔུང་གཉེན་དུ་འགྱུར་རོ། །ལག་ན་རྡོ་རྗེ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ནི། བརྟན་པ་དང་། གོ་ཆ་དང་། སྤྲོ་བ་ཆེན་པོས་རིག་སྔགས་འཆང་ཐམས་ཅད་དང་། སེམས་ཅན་ཐམས་ཅད་ཀྱི་དོན་གྱི་ཆེད་དུ་ཞུགས་པའོ། །ལག་

ན་རྡོ་རྗེ་འདི་ནི་ཐབས་ཅིག་ཏུ་འཇུག་པ་ཆེན་པོ་སྟེ། སེམས་ཅན་ཐམས་ཅད་འཇིགས་པ་ཆེན་པོའི་ལམ་ལས་སོ་སོར་ལྡོག་པར་བྱེད་པའོ། །བདེ་བ་ནས་བདེ་བར་གཤེགས་པའི་ལམ་དུ་འགོད་པར་བྱེད་པའོ། །རྟོག་པ་མེད་ཅིང་རྣམ་པར་རྟོག་པ་མེད་ལ་བསམ་པ་རྣམ་པ་གཞན་དུ་འགྱུར་བ་མེད་དོ། །
སེམས་ཀྱིས་ཡིད་ལ་གཅགས་པར་འགྱུར་བ་མེད་དོ། །དེ་ནས་ཡང་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་སྤྱན་སྔ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཡོན་ཏན་བསྔགས་པ་ཆེན་པོ་འདི་ཐོས་ནས་དགའ་བ་དང་། མགུ་
བ་དང་། ཡི་རངས་པ་དང་། རབ་ཏུ་རངས་པ་དང་། དགའ་བ་དང་། ཡིད་བདེ་བ་སྐྱེས་ནས་ཆེད་དུ་བརྗོད་པ་ནི་ཆེད་དུ་བརྗོད་པར་གྱུར་ཏོ། །ཨེ་མ་མགོན་པོ་འཇིག་རྟེན་དབང་ཕྱུག །ཨེ་མ་འཇིག་རྟེན་དབང་ཕྱུག་བླ་མ། །ཁྱོད་ཀྱི་མིང་གི་ཡོན་ཏན་བསྐྱེད་པས། །ངན་འགྲོ་ཐམས་ཅད་གྲོལ་བར་བྱེད་དོ། །ཕྱག་ན་
རྡོ་རྗེས་བྱང་ཆུབ་སེམས་དཔའ་ལ་སྨྲས་པ། འདི་ནི་འཇིག་རྟེན་གྱི་བླ་མ་མགོན་པོ། འདི་ནི་འཇིག་རྟེན་གྱི་ཡབ་ཆེན་པོ། འདི་ནི་འཇིག་རྟེན་སྒྲོལ་བར་བྱེད་པའི་མགོན་པོ། ཐུབ་པ་ཉིན་མོའི་ཉི་མའོ། །བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་ལྟ་བུར་ལག་ན་རྡོ་རྗེ་ཇི་ལྟར་སྨྲ་བར་བགྱིད། བཅོམ་ལྡན་འདས་ཀྱིས་
བཀའ་སྩལ་པ། ལག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅན་སོང་ལ། མངོན་པར་ཕྱག་འཚལ་ནས་ཡོངས་སུ་ཞུས་ཤིག །མཆོག་ཏུ་གྱུར་པའི་ཚིག་གིས་ཆོ་ག་ཇི་ལྟ་བ་བཞིན་དུ་སྙིང་པོ་དང་། དེ་ཁོ་ན་ཉིད་ཀྱི་རང་བཞིན་དེ་རྣམས་སྟོན་པར་བྱེད་དོ། །དོན་ཡོད་
ཞགས་པའི་སྙིང་པོའི་ཆོ་ག་ཞིབ་མོ་སྒྲུབ་པའི་དངོས་གྲུབ་ཇི་ལྟ་བ་བཞིན་དུ་སྟོན་པར་འགྱུར་ཞིང་ལུང་འབོགས་པར་བྱེད་དོ། །དེ་ནས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེས་ཟབ་མོ་ཟབ་པ་རྟོགས་ཤིང་ཁོང་དུ་ཆུད་དེ་སེང་གེའི་རྩལ་གྱིས་འགྲོ་ཞིང་། རྡོ་རྗེ་བསྐོར་བར་བྱེད་བཞིན་པས་ཟླ་བ་མཛེས་པ་དྲི་མ་མེད་
པའི་མེ་ཏོག་བཟུང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ག་ལ་བ་དེར་དོང་སྟེ་ལྷགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་ཞབས་གཉིས་ལ་མགོ་བོས་ཕྱག་འཚལ་ནས། ལན་གསུམ་

བསྐོར་བ་བྱས་ཏེ། ཟླ་བ་མཛེས་པ་དྲི་མ་མེད་པའི་མེ་ཏོག་ཕུལ་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཤིན་ཏུ་རྨོངས་པ་དང་ལྡན་པ་དྲན་པ་ཡོངས་སུ་
ཉམས་པ་བློའི་དཔའ་ཞུམ་པ་སྟེ། དོན་ཡོད་ཞགས་པའི་སྙིང་པོའི་གསང་སྔགས་དང་ཕྱག་རྒྱ་མང་པོ་དང་། རས་རིས་ཀྱི་སྒྲུབ་པའི་ཆོ་ག་ཤིན་ཏུ་རྒྱས་པ་འདི་དང་དེ་དག་མི་ཤེས་སོ། །སྔོན་མ་ནི་དུ་ཞིག །བར་མ་ནི་དུ་ཞིག །ཐ་མ་ནི་དུ་ཞིག །རྩ་བའི་གསང་སྔགས་ནི་དུ་ཞིག །སྙིང་པོ་ནི་དུ་ཞིག །ཉེ་བའི་
སྙིང་པོ་ནི་དུ་ཞིག །ཇི་སྲིད་དུ་ཡི་གེ་བཅུ་པའི་བར་གྱི་གསང་སྔགས་ནི་དུ་ཞིག །དཀྱིལ་འཁོར་དང་། ཆོ་ག་ཞིབ་མོ་དང་། རས་རིས་ནི་དུ་ཞིག་ལགས། བཅོམ་ལྡན་འདས་བདག་ལ་སྐབས་དབྱེ་བར་གསོལ་ཞེས་སོ། །དེ་ནས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཕྱག་ན་
རྡོ་རྗེ་ལ་བརྩེ་བའི་དོན་དུ་ཟླ་བ་མཛེས་པ་དྲི་མ་མེད་པའི་མེ་ཏོག་བླངས་ནས། བཅོམ་ལྡན་འདས་ལ་མཆོད་པའི་དོན་དུ་ནམ་མཁའི་དབྱིངས་སུ་གཏོར་རོ། །གཏོར་མ་ཐག་ཏུ་བཅོམ་ལྡན་འདས་ཀྱི་དབུའི་སྟེང་གི་མཚམས་སུ་འཁོར་ལོའི་རྣམ་པར་གནས་སོ། །དཔག་ཚད་ལྔ་བརྒྱར་ཁྱབ་ཅིང་ས་གཞི་ལས་གྱེན་དུ་
འཕགས་པ་ཉིད་ཀྱི་ཇི་སྲིད་འོག་མིན་གྱི་གནས་ཀྱི་བར་དུ་གནས་ཏེ། བཻ་ཌཱུརྱ་སྔོན་པོ་ཆེན་པོའི་སྡོང་བུ་ལ་འཛམ་བུ་ཆུ་བོའི་གསེར་གྱི་དྲིལ་བུ་དཔྱངས་པའི་བ་དན་བཅིངས་པས་མཛེས་ཤིང་འབར་བར་ཡོངས་སུ་གྱུར་ཏོ། །འཁོར་ལོའི་རྣམ་པ་ལེགས་པར་ཡོངས་སུ་འཁོར་བ་ནི་ཉི་མ་བྱེ་བ་བརྒྱ་སྟོང་ཕྲག་པས་ལྷག་པའི་ཀུན་
ཏུ་སྣང་བ་ལེགས་པར་ཡོངས་སུ་དག་པ། ཡོངས་སུ་བྱང་བ་ཤིན་ཏུ་དྲི་མ་མེད་པའི་གསེར་གྱི་མཆོད་སྡོང་རྣམ་པར་མཛེས་པར་ཤིན་ཏུ་གནས་པ། ནོར་བུ་རིན་པོ་ཆེ་ཆེན་པོ་སྣ་ཚོགས་པས་སྤྲས་པ་དགའ་བར་བྱ་བ། ཡིད་ཀྱི་ཤིང་རྟ་རབ་ཏུ་ཚིམ་པར་བྱེད་པ་དང་། དགའ་བར་བྱ་བ་མཐོང་བ་ལྷ་དང་། ལྷ་མ་ཡིན་གྱིས་
ཕྱག་བྱ་བར་འོས་པ་དང་། རྗེད་པར་བྱ་བར་འོས་པ་དང་། དྲང་སྲོང་རྣམས་ཀྱིས་བསྟོད་པར་འོས་པ་དང་། སངས་རྒྱས་བཅོམ་ལྡན་འདས་རྣམས་ཀྱིས་ལུང་བསྟན་པར་འོས་པ་སྟེ། ཐམས་ཅད་དུ་ཟླ་བ་མཛེས་པ་དྲི་མ་མེད་པའི་མེ་ཏོག་གི་གེ་སེར་ལ། དེ་བཞིན་གཤེགས་པའི་སྐུ་བཞུགས་པའི་རིན་པོ་ཆེ་སྣ་བདུན་

གྱི་ཁང་པ་བརྩེགས་པ་འཁོར་གྱི་དཀྱིལ་འཁོར་གྱིས་ཡོངས་སུ་བསྐོར་ནས་བཞུགས་པ་ལ། གདུགས་ཀུན་ནས་ཡོངས་སུ་འཁོར་བའི་ལྷ་རྫས་ཀྱི་གཞལ་མེད་ཁང་དང་། ལྷ་དང་། ཀླུ་དང་། ཆུས་བྱུང་དང་། ལྷའི་བུ་མོ་དང་། ཀླུའི་བུ་མོ་དང་། མིའམ་ཅིའི་བུ་མོ་དང་། ལྷ་དང་། ཀླུ་དང་། གནོད་སྦྱིན་དང་།
དྲི་ཟ་དང་། ལྷ་མ་ཡིན་དང་། མིའམ་ཅི་དང་། ལྟོ་འཕྱེ་ཆེན་པོ་དང་། རིག་སྔགས་འཆང་དང་། རིག་པ་འཛིན་པ་བརྒྱ་སྟོང་ཕྲག་གིས་ལྷ་རྫས་ཀྱི་མེ་ཏོག་སྣ་ཚོགས་པའི་གཞལ་མེད་ཁང་དང་། ལྷ་རྫས་ཀྱི་རྒྱན་དང་། གོས་དང་། ལྷབ་ལྷུབ་ཀྱིས་བརྒྱན་ཅིང་། དར་དཔྱངས་དང་། བ་དན་དང་། དྲི་དང་། ཕྲེང་བ་དང་། བྱུག་པ་
དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་རྣམས་ཐོགས་ཏེ། བཅོམ་ལྡན་འདས་དང་འཁོར་གྱི་དཀྱིལ་འཁོར་ལ་མཆོད་པ་བྱེད་པར་གྱུར་ཏེ། ལྷ་རྫས་སྣ་ཚོགས་པའི་མཆོད་པའི་སྤྲིན་གྱི་ཆར་འབབ་པར་གྱུར་ཅིང་ལྷའི་དྲི་ཟའི་གླུ་དབྱངས་ཡང་དག་པར་ལེན་ཅིང་། རྔ་དང་། ཕེག་
རྡོབ་རྣམས་ཀྱིས་མཆོད་པའི་དོན་དུ་རོལ་མོ་བྱེད་པར་གྱུར་ཏོ། །པོ་ཊ་ལའི་རི་བོར་གཞལ་མེད་ཁང་འཁོར་གྱི་དཀྱིལ་འཁོར་དང་བཅས་པ་རུ། ཅ་ཅོའི་སྒྲ་ཆེན་པོ་སྒྲོགས་པར་གྱུར་ཏོ། །པོ་ཊ་ལ་ཀར་གནས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་།
ལྟོ་འཕྱེ་ཆེན་པོ་གང་ཡིན་པ་རྣམས་ཀྱང་སེམས་ཚིམ་པ་ཐོབ་ཅིང་། རྨད་དུ་བྱུང་བ་ཐོབ་བོ། །དེ་བཞིན་གཤེགས་པའི་རིགས་ཀྱི་དཀྱིལ་འཁོར་བའི་ལྷ་གང་ཡིན་པ་རྣམས་དང་། པདྨའི་རིགས་ཀྱི་དཀྱིལ་འཁོར་གྱི་ལྷ་གང་ཡིན་པ་རྣམས་དང་། རྡོ་རྗེའི་རིགས་ཀྱི་དཀྱིལ་འཁོར་བའི་ལྷ་གང་ཡིན་པ་རྣམས་དང་། ནོར་
བུའི་རིགས་ཀྱི་དཀྱིལ་འཁོར་གྱི་ལྷ་གང་ཡིན་པ་རྣམས་དང་། གླང་པོའི་རིགས་ཀྱི་དཀྱིལ་འཁོར་བའི་ལྷ་གང་ཡིན་པ་རྣམས་དང་། དཀྱིལ་འཁོར་ཆེན་པོའི་ལྷ་གང་ཡིན་པ་དེ་རྣམས་ཐམས་ཅད་མཆོག་ཏུ་ཡ་མཚན་པ་དང་ལྡན་ཞིང་། རྨད་དུ་བྱུང་བ་ཐོབ་སྟེ། སེམས་ཚིམ་པ་སྐྱེས་ལ་ངོ་མཚར་བ་ཐོབ་ནས། བཅོམ་
ལྡན་འདས་ལ་ལྟ་བར་བྱེད་བཞིན་དུ་ཀུན་དུ་གནས་པར་གྱུར་ཏོ། །ཟླ་བ་དང་། ཉི་མ་དང་། རྒྱུ་སྐར་དང་། སྐར་མའི་ཚོགས་དང་། ལྷ་དང་། མཚན་མོའི་ལྷ་དང་། དབང་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཞོན་ནུ་དང་། དགའ་བྱེད་དབང་ཕྱུག་དང་། ཚོགས་ཀྱི་དབང་ཕྱུག་དང་།

ནག་པོ་ཆེན་པོ་དང་། དབང་ཕྱུག་དང་། དབང་ཕྱུག་ཆེན་པོ་དང་ཚངས་རིས་ཀྱི་ལྷའི་བུ་དང་། རྒྱལ་པོ་ཆེན་པོ་བཞི་དང་། ནོར་བུ་བཟང་པོ་དང་། གང་བ་བཟང་པོ་དང་། སྟོབས་ཀྱི་ལྷ་དང་། གཤིན་རྗེ་དང་། ཆུ་ལྷ་དང་། ལུས་ངན་གྱི་ལྷ་རྣམས་དང་། གཞོན་ནུའི་ལྷ་རྣམས་གདུགས་ཀྱི་ཡུབ་ནས་བཟུང་ནས། བཅོམ་ལྡན་
འདས་ལ་མཆོད་པ་བྱེད་པར་གྱུར་ཏོ། །ལྷའི་གཞལ་མེད་ཁང་ཆེན་པོ་ལྷའི་རྣམ་པར་སྤྲུལ་པའི་མཆོད་པའི་སྤྲིན་གྱིས་མཆོད་པ་བྱེད་དོ། །གདུགས་ཀྱི་རྣམ་པའི་ཁོར་ཡུག་གི་ནང་དུ་དགའ་ལྡན་གྱི་ལྷ་དང་། འོག་མིན་གྱི་ལྷ་དང་། ལྷའི་གནས་ཐམས་ཅད་དུ་ལྷའི་བུས་ཡོངས་སུ་བསྐོར་བ་གང་ཡིན་པ་དེ་ནམ་མཁའ་ལ་མཆོད་པའི་
སྤྲིན་ཆེན་པོས་བཅོམ་ལྡན་འདས་ཤཱཀྱ་ཐུབ་པ་དང་། སྤྱན་རས་གཟིགས་ཀྱི་དབང་ཕྱུག་འཁོར་གྱི་དཀྱིལ་འཁོར་ལ་མཆོད་པ་བྱེད་དོ། །སའི་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་གང་ཡིན་པ་རྣམས་དང་། ས་གཞིའི་ལྷ་དང་། ཆུའི་ལྷ་དང་། ནགས་ཀྱི་ལྷ་དང་། ལོ་ཐོག་གི་ལྷ་དང་། སྨན་