Kinh tạng Tây Tạng (Kangyur Đại Học) — 070_མདོ་སྡེ།_ལ

རབ་ཏུ་རངས་ཤིང་གང་བར་རྒྱས་པ། འདབ་མ་དང་ཟེ་བ་རྣམས་འཇོམ་པས་རེག་ན་ཤིན་ཏུ་བདེ་བ་འོད་ཟེར་ཐམས་ཅད་ཀྱིས་རྣམ་པར་བརྒྱན་པ། ས་གཞི་ལ་བལྟ་བས་ངོམས་པ་མེད་པ་འདོད་པ་བཞིན་དུ་
དགའ་བ་རྣམ་པ་དེ་ལྟ་བུའི་ཐང་ལས་སྐྱེས་པའི་མེ་ཏོག་རྣམས་རབ་ཏུ་འབྱུང་ངོ་། །ཡང་ནགས་རྣམས་ལ་ལྗོན་ཤིང་ལས་གྱུར་པའི་མེ་ཏོག་རྣམས་ནི། འདི་ལྟ་སྟེ་མན་དཱ་ར་བའི་མེ་ཏོག་ཀྱང་བཏོག་པར་སླ་བ་དང་རེག་བྱ་དང་རོ་དང་དྲི་དང་ཁ་དོག་ཀྱང་དགའ་བར་གྱུར་པ་དང་ཀེ་ཏ་ཀ་དང་

ཙམ་པ་ཀའི་མེ་ཏོག་དང་ཀླུ་གཞོན་ནུའི་ལྕེ་དང་རྙིང་པ་དང་གསར་པའི་མ་ལི་ཀ་དང་ཡིད་བདེ་བ་དང་འོད་བྱེད་པ་དང་། དྲིས་ཚིམ་པར་བྱེད་པ་དང་ཐམས་ཅད་ལས་དགའ་བར་གྱུར་པའི་རིའི་ཕྲེང་བ་དང་རྩེ་མོ་དགའ་བར་གྱུར་པ་རྣམས་ལས། རྣམ་པ་དེ་ལྟ་བུའི་མེ་ཏོག་དང་ཤིང་ལྗོན་པ་དང་འཁྲི་ཤིང་དང་
ཤིང་གེལ་པ་རྣམས་ལས་རབ་ཏུ་སྐྱེས་ཤིང་ལེགས་པར་བྱུང་བར་གྱུར་པ་ནི། པད་མའི་ནང་གི་འདབ་མ་རྣམས་ལ་ཞུགས་ནས་རྩེ་བར་གྱུར་པའི་ལྷ་དེ་དག་རྣམས་ཀྱི་ལེགས་པར་བྱས་པའི་ལས་ཀྱི་མཐུ་ལས་ཡིན་ནོ། །དེ་ནས་ལྷ་དེ་དག་ལྷན་ཅིག་སྤྱོད་པའི་འཁོར་དང་བཅས་པ་རྣམས་
ནགས་དེ་དག་རྣམས་དང་པད་མའི་ཚལ་གྱི་འདབ་མའི་ནང་དུ་སོང་ནས་དེ་ལྟར་དགའ་བར་བྱེད་པ་དང་རྩེ་བར་ཡང་བྱེད་པའི་མཐུ་སྟོབས་འདི་ནི། པད་མ་ཆེན་པོའི་ནགས་དེ་དང་པད་མའི་ནགས་དེ་དང་རྣམ་པར་རྒྱས་པའི་མཚོ་དེའི་ཡང་ཡིན་ཏེ། ཀུན་བརྟག་པར་རྣམ་པར་ཁ་བྱེ་བ་དེའི་ཡིན་
ནོ། །དེ་ལྟར་ལྷ་དེ་དག་རྣམས་པད་མ་ཆེན་པོའི་འདབ་མའི་ནང་དུ་སོང་ནས་དུས་རིང་དུ་དགའ་བར་བྱེད་པ་དང་ལྷ་རྫས་ཀྱི་འདོད་པའི་ཡོན་ཏན་ལྔ་དང་ཉེ་བར་ལྡན་པས་རྩེ་བར་ཡང་བྱེད་དོ། །དེ་ནས་དེ་ལྟར་རྩེ་བར་བྱེད་པ་དེ་དག་རྣམས་དེ་ལྟར་པད་མ་ཆེན་པོའི་འདབ་མའི་ནང་དུ་སོང་བ་
རྣམས་འདི་སྙམ་དུ་སེམས་ཏེ། གང་མ་ཐང་ཡང་བདག་ཅག་འདི་ན་གནས་ནས་རྩེད་མོས་རྒྱུ་བ་རྣམས་ལ་རི་དག་འབྱུང་བར་འགྱུར་ན་རུང་སྟེ། རིན་པོ་ཆེ་སྣ་ཚོགས་པའི་རྩེ་མོ་ཅན་འོད་ཟེར་གྱིས་སྣང་བར་བྱས་པ་དང་བྱའི་ཚོགས་ཀྱི་སྒྲ་རྣམ་པར་བརྗོད་པས་མངོན་པར་དགའ་བ་
དང་རི་ཕུག་དང་ཁྲོད་དང་ཆུ་ཀླུང་དང་ངོས་དང་ལྗོངས་དག་གིས་དགའ་བར་གྱུར་པའི་ས་གཞི་ཆ་ཤས་རྣམས་ལེགས་པར་རྣམ་པར་ཕྱེ་བ་ཐམས་ཅད་ནས་རྩེད་མོ་རྩེ་བར་འོང་བ་ལྷ་བདག་ཅག་རྣམས་ལ་བདག་ཅག་ལྷ་རྣམས་ཀྱི་ཡང་ལྷ་བདག་ཅག་པད་མ་ཆེན་པོའི་འདབ་མའི་གསེབ་ཏུ་ཞུགས་
པ་རྣམས་ལ་དེ་ལྟ་བུའི་རི་དག་ལེགས་པར་འབྱུང་བར་གྱུར་ན་རུང་ངོ་། །དེ་ནས་སེམས་བསྐྱེད་པ་དང་ལྷན་ཅིག་ཁོ་ནར་ལྷ་དེ་དག་རྣམས་ལ་འབྱུང་བར་འགྱུར་ཏེ། ལྷ་དེ་དག་གི་ལེགས་པར་བྱས་པའི་ལས་ཀྱི་རྐྱེན་གྱི་དབང་དང་རྐྱེན་གྱི་དབང་གིས་རབ་ཏུ་ཕལ་ཆེ་བར་གྱུར་པའི་ནགས་དང་

ཉེ་བའི་ནགས་དང་རྫིང་བུ་དང་རིའི་རྩེ་མོ་དང་ཁོང་གསེང་གི་གསེབ་དང་དགའ་བར་གྱུར་པའི་རི་ངོས་རྣམས་དང་ཚང་ཚིང་དང་ཕུག་དགའ་བར་གྱུར་པ་རིན་པོ་ཆེ་བདུན་གྱིས་རྣམ་པར་སྤྲས་པས་ཀུན་ཏུ་འབར་བ་འོད་ཟེར་དང་ལྡན་པས་དགའ་བར་བྱེད་པ་དེ་འཁྲི་ཤིང་ཀུན་ནས་འཕྱང་བ་དང་
སྨན་ལྗོངས་དང་རི་ཁྲོད་རྣམས་ཡིད་ཀྱི་རྗེས་སུ་འཐུན་པ་རྟག་ཏུ་མཐོང་བ་ན་དགའ་བར་འགྱུར་བའི་རི་བརྒྱ་ཕྲག་རབ་ཏུ་བྱུང་བར་གྱུར་པ་རྣམས་ལ་ལྷ་རྫས་ཀྱི་མེ་ཏོག་དང་འབྲས་བུ་དང་འཁྲི་ཤིང་ཀུན་ཏུ་འཕྱང་བས་ལེགས་པར་འཁྲིལ་བ་རྣམས་ཀྱིས་དགའ་བར་གྱུར་པའི་ཕུག་དང་
ངོས་དང་ལྗོངས་བརྒྱ་སྟོང་དང་ལྡན་པ་རྣམས་འབྱུང་བར་གྱུར་ཏོ། །དེ་ནས་ལྷ་དེ་དག་རྣམས་འདབ་མའི་གོང་བུ་དེ་ཡོངས་སུ་སྤངས་ནས། དེ་ཁོ་ན་བཞིན་དུ་ལྷ་བརྒྱ་སྟོང་གིས་ཡོངས་སུ་བསྐོར་བས་ལྷ་རྫས་ཀྱི་མདོག་དང་དྲི་དང་རེག་བྱ་དང་ལྡན་པ་རྣམས་ཀྱི་རྙིང་པ་མེད་པའི་མེ་ཏོག་གི་ཕྲེང་བ་
རྣམས་ཀྱིས་ཉེ་བར་ཁྱབ་པ། ལྷའི་གླུ་མཁན་གྱི་སྐད་སྙན་པ་རྣམས་དང་བཅས་པའི་དལ་ཞིང་བརྒྱུད་པས་ཡིད་འཕྲོག་པའི་སྒྲ་མཛེས་པ་རྣམས་ཀྱིས་རིང་དུ་ཡང་རྣ་བའི་བུ་ག་ཚིམ་པ་མེད་པར་ལྷ་རྫས་ཀྱི་འདོད་པའི་ཡོན་ཏན་ལྔ་དང་ལྡན་པའི་རི་དེ་ལ་དལ་བུས་དལ་བུས་འགྲིམ་པར་བྱེད་དོ། །ཐོ་
ཕྱི་ཀུན་ཏུ་རྒྱ་བསྐྱེད་ནས་མིག་ལེགས་པར་བསྒྱུར་ཞིང་ལྟ་བར་བྱེད་པའི་མིག་སྔ་ན་མངོན་པར་དགའ་བ་རྣམས་ལྷ་དེ་དག་རྣམས་དགའ་བར་བྱེད་ཅིང་གཡོག་གི་བྱ་བ་རྣམས་ཀྱང་བྱེད་དོ། །ཟས་དང་སྐོམ་གྱི་ཀླུང་རྣམས་ལ་ཡང་བཏུང་བ་དང་བཟའ་བ་དགའ་བར་གྱུར་པ་དག་ལ་ཟ་བ་དང་འཐུང་
བར་བྱེད་དོ། །དེ་རྣམ་པ་སྣ་ཚོགས་པ་རྣམ་པ་དུ་མ་དང་ལྡན་པའི་བཏུང་བ་དང་བཟའ་བའི་བྱ་བ་རྣམས་བྱས་ནས་རི་ཁྲོད་ཀྱི་གསེབ་རྣམས་སུ་མན་དཱ་ར་བ་དང་པད་མ་ཀུ་ཤེ་ཥ་ཡཱ་མཆོག་གིས་རང་གི་ལུས་ལ་ཡང་བཅིངས་པ་དང་། དེ་བཞིན་དུ་ལྷ་མོ་རྣམས་ཀྱིས་ཀྱང་ལྷ་རྫས་ཀྱི་ཕྲེང་བ་མཆོག་གིས་
བྱས་ནས་གར་བྱེད་པ་དང་། གླུ་ལེན་པས་ཀྱང་དུས་རིང་དུ། ལྷ་རྫས་ཉིད་ཀྱི་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པར་གྱུར་པས། སླར་ཡང་དེ་ཁོ་ན་བཞིན་དུ་ཡུལ་རྣམས་ལ་ཆགས་པའི་ཡིད་ཀྱིས་ཐམས་ཅད་ཉིད་དུ་ངོམས་པར་མ་གྱུར་ནས། སྲེད་པའི་གཙང་

པོས་ངེས་པར་ཁྱེར་བར་གྱུར་པས། གཟུགས་དང་རྒྱན་དང་ཆ་ལུགས་སྣ་ཚོགས་པ་ཅན་གྱི་ལྷ་དེ་དག་རྣམས་ལྷ་མོའི་ཚོགས་ཀྱིས་ཡོངས་སུ་བསྐོར་ནས་ལན་བརྒྱ་ཕྲག་རྣམས་སུ་དང་། ཡང་ན་ལན་སྟོང་ཕྲག་རྣམས་སུ་སླར་ཉིད་ཀྱང་གང་ན་རྣམ་པར་རྒྱས་པའི་མཚོ་ཆེན་པོ་ལ་པད་
མ་ཆེན་པོས་ལེགས་པར་རྒྱས་པ་དེར་ཉེ་བར་འགྲོའོ། །ཕྱིར་ཞིང་ཡང་མཚོ་ཆེན་པོ་དེ་ཉིད་དུ་ཀུན་ནས་ཉེ་བར་འཇུག་པར་བྱེད་པ་དང་ཀུན་ཏུ་ཉེ་བར་བགྲོད་པར་ཡང་བྱེད་ལ། སླར་ཡང་དེ་ཁོ་ན་བཞིན་དུ་དེ་ཁོ་ན་ཉིད་ཀྱི་པད་མའི་འདབ་མ་རྣམས་ལ་དེ་བཞིན་ཉིད་དུ་སོ་སོ་སོ་སོར་ཆེས་
དགའ་བར་གྱུར་པའི་རྩེད་མོ་རྣམས་ཉམས་སུ་མྱོང་བར་བྱེད་དེ། རང་གི་ལས་རྣམས་དང་ཆ་འདྲ་བ་རྒྱས་བཏབ་པའི་རྗེས་དོད་པ་བཞིན་ནོ། །དེ་ནས་གཞན་ཡང་ལྷ་དེ་དག་རྣམས་ཉིད་འདི་སྙམ་དུ་སེམས་ཏེ། ཐ་མར་ན་ཡང་བདག་ཅག་རྣམས་ཀྱི་རི་སུལ་སྣ་ཚོགས་པ་རྣམས་
ནས་རྣམ་པ་དུ་མ་རྣམ་པ་སྣ་ཚོགས་པའི་བྱ་གཟུགས་དང་། ཆ་བྱད་དང་རྩེད་འཇོ་དང་དབྱིབས་དང་ཟས་དང་གནས་དང་སྤྱོད་ལམ་རྣམས་མཐོང་ན་དགའ་བ་སྙན་པར་གྱུར་པའི་སྒྲ་དུ་མ་རྣམས་ཀྱིས་རྩེ་སྒྲོགས་པས་ལྷག་པར་དགའ་བར་གྱུར་པ། རིན་པོ་ཆེ་བདུན་གྱི་ཐིག་ལེས་རྣམ་པར་
སྤྲས་པའི་རིན་པོ་ཆེ་བདུན་རྣམ་པར་བཀྲ་བའི་ཐིག་ལེ་རྣམས་སྐྱེས་པའི་ལུས་རྒྱ་ཆེན་པོ་ཐམས་ཅད་དུ་ཐོགས་པ་མེད་པའི་འགྲོས་ཀྱིས་ལེགས་པར་སྤྱོད་པ། ཆུ་དང་ཐང་དང་བར་སྣང་རྣམས་ལ་ཡང་བདེ་བའི་འགྲོས་ཀྱིས་འགྲོ་བར་བྱེད་པ་གང་དག་གིས་བདག་ཅག་རྣམས་ནུས་པར་
འགྱུར་བ་བལྟ་ན་སྡུག་པའི་བྱ་དེ་དག་རྣམས་བྱུང་ན་རུང་ན། ངེད་རང་རྣམས་ཀྱིས་ཀྱང་ནམ་མཁའི་དཀྱིལ་དུ་འགྲོ་བར་ནི་ནུས་ན། འོན་ཀྱང་བདག་ཅག་རྣམས་འདོད་པ་ནི་ཐ་མར་ན་ཡང་བདག་ཅག་བྱ་དེ་དག་རྣམས་ཀྱི་རྒྱབ་ཏུ་ཞོན་ལ་ལྷ་མོའི་ཚོགས་རྣམས་ཐམས་ཅད་ཀྱིས་ཡོངས་སུ་
བསྐོར་ནས་ཤིན་ཏུ་བདེ་བས་ནམ་མཁའི་དཀྱིལ་དུ་རབ་ཏུ་བགྲོད་པས་བདེ་བ་རྒྱ་ཆེན་པོའི་ས་མ་ལུས་པ་འདི་དག་རྣམས་ཀུན་ནས་གནོད་པ་མེད་པའི་འགྲོས་ཀྱིས་ཀུན་དུ་བལྟ་བར་བྱའོ། །ཉེ་འཁོར་ཀུན་ལ་རྣམ་པར་བལྟས་ཤིང་རྣམ་པར་བལྟས་ནས་སླར་ཉིད་ཀྱང་ཆེས་ལྷག་པར་ལྷན་

ཅིག་སྤྱོད་པའི་འཁོར་དང་བཅས་ནས་རྩེད་མོ་བྱེད་པར་གྱུར་པ་ན། དེ་ལྟར་ལྷ་དེ་དག་རྣམས་ཀྱི་སེམས་བསྐྱེད་པ་དང་ལྷན་ཅིག་ཁོ་ནར་སྣ་ཚོགས་པའི་རིའི་ཁྲོད་དང་ཕུག་དང་འཁྲི་ཤིང་འཕྱང་བ་རྣམས་དང་རིའི་རྩེ་མོ་རྣམས་དང་རྣམ་པ་སྣ་ཚོགས་པའི་ཚང་ཚིང་དང་རི་སུལ་
དང་ལྗོན་ཤིང་རྣམས་ལ་གནས་པའི་བྱ་རྣམས་ལེགས་པའི་ལས་ཀྱིས་བོས་པར་གྱུར་པ་ན་འོང་བར་འགྱུར་བ་ནི། སྣ་ཚོགས་པའི་གཟུགས་དང་ཆ་བྱད་དང་སྣ་ཚོགས་པའི་མདོག་དང་སྐད་ཀྱི་དབྱངས་རྣམས་དང་ལྡན་པ་དང་། རིན་པོ་ཆེ་བདུན་གྱི་ཐིག་ལེ་རྣམས་ཀྱིས་སྤྲས་པས་
རྣམ་པར་བཀྲ་བ། ལྷ་མོ་རྣམས་ཐམས་ཅད་ཀྱང་ངོ་མཚར་བསྐྱེད་པ་དང་། ཡིད་མངོན་པར་དགའ་བ་དང་ནམ་མཁའི་དཀྱིལ་མ་ལུས་པ་དེ་དག་རྣམས་ཀུན་ནས་ཁྱབ་པར་གྱུར་པ་དང་། རྩེ་སྒྲོགས་པས་ཀྱང་གང་བར་བྱས་ནས་པད་མ་ཆེན་པོའི་འདབ་མའི་གོང་བུ་རྣམས་གང་ན་
ལྷ་དེ་དག་རྣམས་རྩེ་བ་དེར་ཀུན་ཀྱང་འོང་བར་འགྱུར་རོ། །དེ་དག་རྣམས་ནི་ནམ་མཁའ་ལ་འགྲོ་བ་ཡིན་པས་ནམ་མཁའ་མ་ལུས་པ་རྣམས་ཐམས་ཅད་དུ་ཁྱབ་པར་བྱེད་དོ། །དེ་ནས་ལྷ་དེ་དག་གིས་བྱ་དེ་དག་མངོན་པར་མཐོང་ནས་ལྷ་མོ་དང་བཅས་པ་རྣམས་སླར་ཉིད་ཀྱང་ཆེས་རབ་ཏུ་
རངས་པར་གྱུར་པའི་ཡིད་ཀྱིས་ལྷན་ཅིག་སྤྱོད་པ་དང་བཅས་པ་རྣམས་ནམ་མཁའི་དཀྱིལ་དུ་འཕགས་པར་འདོད་པར་གྱུར་ཏོ། །དེ་ནས་བྱ་དེ་དག་རྣམས་གང་གི་ཚེ་ཉེ་བར་འོངས་པ་དེའི་ཚེ་ལྷན་ཅིག་སྤྱོད་པ་རྣམས་དང་བཅས་པ་དེ་དག་ཉིད་ཀྱི་རྒྱབ་ཏུ་ངེས་པར་ཞོན་ཏེ།
ནམ་མཁའི་དབྱིངས་ཀུན་ཏུ་འཕགས་པར་གྱུར་ནས་ཉེ་འཁོར་དུ་ཡང་དེ་དག་གིས་ཁྱབ་པར་བྱས་སོ། །དེ་ནས་གླུ་ལེན་པར་གྱུར་པས་ལག་ན་པི་བང་དང་གསེར་གྱི་དགུ་པོ་རྒྱུད་མངས་དང་། གླིང་བུ་དང་རྔ་མུ་ར་བ་དང་ལྷ་རྫས་ཀྱི་རོལ་མོ་མཁན་དགའ་བར་གྱུར་པ་རྣམས་ཀྱིས་རྣ་བའི་
བུ་གར་གཏད་པར་གྱུར་པ་ཕན་ཚུན་ལྷན་ཅིག་ཏུ་བདེ་བའི་ས་དེ་དག་རྣམས་ལ་ཀུན་དུ་ལྟ་བར་བྱེད་དོ། །དགའ་བ་རྣམས་ལ་ཉེ་བར་ལོངས་སྤྱོད་པར་བྱེད་དོ། །ལྷ་དེ་དག་རྣམས་བདེ་བའི་འདོད་ཆགས་ཀྱིས་ཆགས་པར་གྱུར་པ་དགའ་བའི་འདོད་ཆགས་ཀྱིས་རབ་ཏུ་རྣམ་པར་ཉམས་

པའི་ཡིད་ཅན་རྣམས་ཀྱིས་ཕ་རོལ་ཏུ་ཡང་ལོག་པར་ལྟུང་བར་འགྱུར་བ་ནི་མཐོང་བ་མ་ཡིན་ནོ། །དེ་ནས་དེའི་དུས་ན་ལེགས་པར་བྱས་པའི་ལས་རྣམས་ཀྱིས་ལེགས་པར་བསྐུལ་བས། དེ་ཁོ་ན་ཉིད་བརྗོད་པ་ཞེས་བྱ་བའི་བྱས་ལྷ་བག་མེད་པ་དེ་དག་རྣམས་ལ་རྗེས་སུ་འདོམས་པར་
བྱེད་པའི་ཚིགས་སུ་བཅད་པ་བཤད་པ། ཇི་ལྟར། ཇི་ལྟར་ལུས་ཅན་རྣམས་ཀྱི་ནི། །སྲོག་ནི་ཤིན་ཏུ་མྱུར་འགྲོ་བ། །བྱ་རྣམས་འགྲོས་དང་རླུང་པོ་ཡང་། །དེ་བཞིན་མྱུར་དུ་འགྲོ་བ་མིན། །རླུང་དེ་ལས་ནི་ཕྱིར་ཟློགས་ཤིང་། །བྱ་དེ་རྣམས་ཀྱང་ཕྱིར་ལ་ཟློགས། །
འགག་པར་འགྱུར་བའི་སྲོག་ཀྱང་ནི། །དེ་ནི་སླར་ཡང་འོངས་པ་མེད། །ལས་ནི་མྱུར་བར་ཟད་པ་དང་། ཐ་མ་ཡང་ནི་མྱུར་བར་འབྱུང་། །ཅིས་ཀྱང་འབྱུང་བའི་འདུ་འབྲལ་བ། །ལྷ་རྣམས་ཀྱིས་ཀྱང་གོ་བ་མིན། །བཟློག་པར་མི་ནུས་ཤུགས་ཆེན་པོ། །གཏུམ་པོ་
ཐམས་ཅད་བརླག་པར་ནུས། །ངེས་པར་མྱོང་བའི་སྟོབས་ལྡན་པ། །འཆི་བདག་འདི་ཡང་མ་རིག་གོ། །ཤིན་ཏུ་བག་མེད་པ་ཡི་ལྷ། །བདེ་བས་ཡོངས་སུ་བསླུས་པ་ཡིན། །གང་ཞིག་ངེས་པར་འབྱུང་བ་ཡི། །སྡུག་བསྔལ་ཆེན་པོ་མ་རིག་གོ། །འདུས་བྱས་ཀྱང་ནི་
ཐམས་ཅད་ཀྱང་། །འཇིགས་དང་བཅས་པའི་ཁྱད་པར་གྱིས། །འདི་ནི་རྣམ་པར་འཇིག་པར་འགྱུར། །སྲིད་ནས་སྲིད་པར་ཆོས་ཉིད་ཀྱང་། །འདི་ནི་རྒ་བས་ལང་ཚོ་འཇོམས། །སྲོག་ནི་འཆི་བའི་ཐ་མ་སྟེ། །རྒུད་པར་གྱུར་པའི་འཇིགས་བྱེད་ཀྱིས། །གནས་པ་
རྣམས་ནི་འཇིག་པའི་རྒྱུ། །འཇིགས་ཆེན་རྣམ་པ་དེ་ལྟ་བུ། །སྡུག་བསྔལ་གྱིས་ཀྱང་འཇིགས་པ་ཆེ། །བག་མེད་པ་ཡི་ལྷ་གང་ཡང་། །བསམ་པ་དེ་དག་ཅུང་ཟད་མེད། །གང་ཡང་བློ་ཡི་མིག་གིས་ནི། །མ་འོངས་པ་ཡི་འཇིགས་པ་མཐོང་། །དེ་ནི་མཁས་པ་
ཡིན་ཞེས་བྱ། །བྱིས་པ་རྣམས་ནི་བཟློག་པ་ཡིན། །རྣམ་རྨོངས་ཡིད་ཅན་ཐམས་ཅད་ནི། །རང་གི་སེམས་ནི་བསླུས་པ་ཡིན། །མར་མེའི་སྣུམ་ནི་ཟད་ལྟ་བུའི། །ལས་ཟད་པ་ནི་མ་མཐོང་ངོ་། །དགའ་བའི་ཡུལ་ནི་དུ་མ་རྣམས། །བདེ་བ་བླ་ན་མེད་པ་འདི། །

ལོངས་སྤྱོད་ནས་ནི་ལས་ཟད་པས། །སླར་ཡང་ལོག་པར་ལྟུང་བར་འགྱུར། །དེ་ལྟར་བྱ་དེས་ལེགས་པར་བྱས་པའི་ལས་ཀྱི་ཚིག་གིས་ལྷ་དེ་དག་རྣམས་ལ་རྗེས་སུ་སྟོན་པར་བྱེད་དོ། །བག་མེད་པའི་ཡུལ་གྱིས་ཀུན་ནས་རྨོངས་པའི་ལྷ་དེ་དག་རྣམས་ཀྱིས་
གོ་བར་མི་འགྱུར་ཞིང་། བརྗོད་པ་དེ་དག་རྣམས་ལ་ཡང་རྩིས་བཏབ་མ་བྱས་པར་ཕྱིར་ཉིད་ཀྱང་། བདེ་བ་རྒྱ་ཆེན་པོའི་ས་གཞི་མ་ལུས་པ་དེ་དག་རྣམས་ཀུན་ཏུ་ལྟ་བར་བྱེད་དེ། ཐམས་ཅད་ལས་མངོན་པར་དགའ་བར་གྱུར་པའི་རི་རྣམས་དང་ཆུ་ཀླུང་དང་། སྨན་ལྗོངས་
དང་འབབ་ཆུ་དང་རྫིང་བུ་དང་ལྗོན་ཤིང་དང་ནགས་དང་ཉེ་བའི་ནགས་དང་ལེགས་པར་འབྲེལ་པ་རྣམས་དང་། དེ་ལྟ་དེ་ལྟར་པད་མའི་ཚལ་རྣམས་དང་རི་བོའི་མཆོག་རྣམས་ཀྱིས་ཡོངས་སུ་གང་བ་རྣམས་ན་ལྷའི་ཚོགས་རྩེ་དགའ་བ་རྣམས་ཀྱིས་ལེགས་པར་འབྲེལ་བ་རྣམས་དང་ཡང་
གཞན་རྣམས་ལ་བྱ་རྣམས་ཀྱིས་བརྗོད་པའི་ཁྱད་པར་དགའ་བར་འགྱུར་བའི་བར་དུ་གླུ་བླངས་པ་ལྟ་བུར་ཐམས་ཅད་ནས་རྣ་བས་དང་དུ་ལེན་པར་བྱེད་པའི་སྒྲ་རྣམས་དང་། གཞན་ཡང་དེ་མ་ཡིན་པ་རྣམས་མཐོང་བར་གྱུར་པ་ལ། ལྷ་དང་ལྷ་མོའི་ཚོགས་ཀྱིས་ཡོངས་སུ་
བསྐོར་ནས། པད་མའི་བར་མཚམས་རྣམས་ནས་རིན་པོ་ཆེའི་རྩི་དག་འཐུང་བར་བྱེད་དོ། །དཔག་བསམ་གྱི་ཤིང་གི་ནགས་རྣམས་ལ་ཡང་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་ཏུ་དགའ་བར་བྱེད་དོ། །གཞན་ཡང་གཞན་དག་རྣམས་སུ་རྒྱུ་བར་གྱུར་པ་ན། ཁང་
བུ་ནམ་མཁའི་དཀྱིལ་དང་འདྲ་བ་རྣམས་ལ་ཞོན་པའི་ལྷ་དང་ལྷ་མོ་རྣམས་ལྷན་ཅིག་ཏུ་ལྷ་རྫས་ཀྱི་མེ་ཏོག་གི་ཕྲེང་བའི་རྒྱན་དང་ལྷ་རྫས་ཀྱི་ཡུལ་ལྔ་པོ་རྣམས་ཉིད་ལྷ་རྫས་ཀྱི་རྔ་རྣམས་ཉིད་ཀྱིས་རྩེ་བར་གྱུར་པ་རྣམས་མཐོང་ངོ་། །ལྷ་དང་ལྷ་མོ་དེ་དག་རྣམས་ཉིད་ཀྱིས་ཀྱང་མཐོང་
ནས་ཕན་ཚུན་ལྷན་ཅིག་ཏུ་ཚོགས་པར་གྱུར་ཏེ་རྩེ་བར་བྱེད་དོ། །རིན་པོ་ཆེ་བདུན་དང་རིན་པོ་ཆེ་མ་ར་ཀ་ཏ་ཡིས་རྣམ་པར་བཀྲ་ཞིང་འཚེར་བག་དང་ལྡན་པར་ནམ་མཁའི་དཀྱིལ་ནས་འོངས་པའི་བྱ་དེ་དག་རྣམས་ཀྱི་རྒྱབ་ཏུ་ལེགས་པར་ཞོན་པ་རྣམས་དང་ལྷ་གཞན་གང་

དག་དགའ་བའི་ཚལ་ན་ཀུན་དུ་གནས་པའི་དེ་དག་རྣམས་ཁང་བུའི་སྟེང་དུ་ལེགས་པར་ཞོན་པ་རྣམས་དང་དེ་དག་ཐམས་ཅད་དང་ཡང་དག་པར་ལྡན་པར་གྱུར་ནས་ནམ་མཁའ་ཉིད་ལ་རྩེ་དགའ་བར་བྱེད་པ་དང་། ཕན་ཚུན་དུ་གྲོགས་ཀྱི་བྱ་བ་དང་ལྡན་པས་དགའ་བར་ཡང་བྱེད་དོ། །
དུས་ཤིན་ཏུ་རིང་བར་འདོད་པའི་མཆོག་རྣམས་ལ་དེ་དག་རྣམས་ཀྱིས་ལྷན་ཅིག་ཏུ་རྩེ་དགའ་བར་བྱས་ནས་སླར་ཡང་རིའི་རྩེ་མོ་དག་ལ་འཁོད་པར་བྱེད་དོ། །ནགས་དང་ཉེ་བའི་ནགས་རྣམས་ལ་དེ་དག་རྣམས་ཀྱིས་རྣམ་པ་སྣ་ཚོགས་པའི་རྩེད་འཇོ་རྣམས་བྱས་ནས་སླར་ཡང་རྣམ་པར་
རྒྱས་པའི་མཚོ་ཆེན་པོ་དེར་འགྲོའོ། །བྱ་དེ་དག་རྣམས་ཉིད་ཀྱི་རྒྱབ་ཏུ་ལེགས་པར་ཞོན་ནས་ནམ་མཁའ་བཞིན་དུ་ཁྱབ་པར་བྱས་པས། ལྷ་རྫས་ཀྱི་རོལ་མོ་རྣམས་ལ་ཆགས་པར་གྱུར་པའི་ཡིད་ཀྱིས་ནགས་དང་ཉེ་བའི་ནགས་རྣམས་ལས་སླར་ཡང་རྣམ་པར་རྒྱས་པའི་མཚོ་ཆེན་
པོ་དེ་ཉིད་དུ་ལེགས་པར་འགྲོ་བར་བྱེད་དོ། །གཞན་ཡང་རྣམ་པར་རྒྱས་པའི་མཚོ་དེ་ཉིད་ཐམས་ཅད་ལས་དགའ་བར་གྱུར་པར་གོ་ནས། གཞན་ཡང་དེ་དག་རྣམས་བྱ་དེ་དག་གི་རྒྱབ་དག་ལས་མུ་ཏིག་གི་སྟན་རྣམས་ལ་ལེགས་པར་བབས་སོ། །དེ་ནས་ཡང་ཐམས་ཅད་དང་
ལྡན་པར་གྱུར་པ་རྣམས་ཕྱིར་ཞིང་ཉིད་དུ་དེ་དག་རྣམས་པད་མའི་འདབ་མ་ལ་རབ་ཏུ་འདུག་ནས་དགའ་བར་བྱེད་པ་རྣམས་ནི་སྔ་མ་བཞིན་ནོ། །དེ་ནས་པད་མའི་འདབ་མ་དེ་ལ་དུས་རིང་དུ་དགའ་བར་གྱུར་ནས། དུས་གཞན་ན་འདི་ལྟ་བུའི་བློ་སྐྱེས་པར་གྱུར་ཏེ། གང་བདག་
ཅག་རྣམས་འདི་ཁོ་ན་ལྟར་གནས་བཞིན་དུ་མ་ཐང་ཡང་འཁྲི་ཤིང་གི་ཁང་བུ་རྣམས་ལ་རྒྱགས་པའི་ཁུ་བྱུག་གི་སྒྲ་དགའ་བར་གྱུར་པ་རྣམས་དང་། མེ་ཏོག་གི་ཚར་ཀ་ཀུན་དུ་འཕྱང་བ་རྣམས་དང་རིན་པོ་ཆེ་སྣ་ཚོགས་པ་རྣམ་པར་བཀྲ་བ་ཆེས་རབ་ཏུ་ཕལ་ཆེ་བ་སྣ་ཚོགས་
པའི་ལོ་མ་དང་འདབ་མ་ཆགས་པར་འགྱུར་བ་རྣམས་དང་ཡང་དག་པར་ལྡན་པས་ཉེ་བར་བཀོད་པའི་འཁྲི་ཤིང་གི་ཁང་བུ་དག་བདག་ཅག་རྣམས་ཀྱི་རྩེད་མོའི་དོན་དུ་རབ་ཏུ་འབྱུང་བར་གྱུར་མོད། དེ་ནས་སེམས་བསྐྱེད་པ་དང་ལྷན་ཅིག་ཉིད་དུ་ལྷ་དེ་དག་རྣམས་ཀྱི་

ལེགས་པར་བྱས་པའི་ལས་ཀྱིས་དེ་དག་གི་འཁྲི་ཤིང་གི་ཁང་བུ་རྣམས་རིན་པོ་ཆེ་སྣ་ཚོགས་པའི་འོད་དང་ལྡན་པ། མེ་ཏོག་གི་མཆོག་གིས་ཀུན་ཏུ་སྤུད་པ་གསེར་བཟང་པོའི་རང་བཞིན་དང་དངུལ་གྱི་རང་བཞིན་དང་བཻ་ཌཱུརྱའི་རང་བཞིན་དང་སྔོན་པོ་ཆེན་
པོའི་རང་བཞིན་དང་། པད་མ་རཱ་གའི་རང་བཞིན་དང་དེ་བཞིན་དུ་ཤེལ་གྱི་རང་བཞིན་དང་དེ་བཞིན་དུ་གསེར་བཙོ་མའི་རང་བཞིན་གྱི་མཆོག་ཏུ་མཐོང་ནས་དགའ་བར་འགྱུར་བ་རྣམས་དང་། དེ་བཞིན་དུ་རྣམ་པར་འདྲེས་པ་པོའི་རྣམ་པར་བཀྲ་བའི་འཁྲི་ཤིང་གི་ཁང་པ་དེ་རང་འབྱུང་
བར་འགྱུར་ཏེ། ལེགས་པར་བྱས་པའི་ལས་རྣམས་ཀྱིས་དུས་མི་རིང་བ་ཉིད་ན་འབྱུང་བར་འགྱུར་བ་ཡིན་ནོ། །དེ་ནས་ལྷ་དེ་དག་རྣམས་ཀྱིས་འཁྲི་ཤིང་གི་ཁང་པ་དེ་དག་མངོན་པར་ཀུན་ནས་ལེགས་པར་མཐོང་བས་མཆོག་ཏུ་རབ་ཏུ་དགའ་བའི་ཡིད་ཀྱིས་སླར་ཡང་དེ་ཁོ་ན་བཞིན་
དུ་རྩེ་བར་བྱེད་ཅིང་དགའ་བར་ཡང་བྱེད་དོ། །ལྷ་མོའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་བ་དང་བཅས་ནས། ལྷ་རྫས་ཀྱི་ཕྲེང་བས་བརྒྱན་པ་འདོད་པ་ཐམས་ཅད་ཕུན་སུམ་ཚོགས་པ་གནོད་པ་མེད་པ་དང་ལྡན་པའི་ཡིད་ཀྱིས་ཕྲག་དོག་དང་སེར་སྣ་དང་བྲལ་བ།
འཐབ་མོ་དང་ཡིད་མི་བདེ་བའི་སྐྱོན་རྣམས་དང་བྲལ་བ། བདེ་ལེགས་སུ་རྣམ་པར་རྒྱུ་བ་ལེགས་པར་བྱས་པའི་ལས་རྣམས་ཀྱིས་དེ་དག་རྣམས་ལ་དགའ་བར་བྱེད་པའི་རྔ་སྐད་ཡན་ལག་ལྔ་དང་ལྡན་པའི་རྣམས་ལ་མ་ཉམས་པ་དང་སྙན་པ་དང་། དལ་ཞིང་རྒྱུན་ཆགས་པའི་དབྱངས་ཀྱིས་
བརྒྱན་དུ་བྱས་པ་འཁྲི་ཤིང་གི་ཁང་བུ་དེ་དག་རྣམས་སུ་ལྷན་ཅིག་སྤྱོད་པ་དེ་དག་ཉིད་དང་ངོམས་པ་མེད་པའི་ཡིད་ཀྱིས་ལྷན་ཅིག་ཏུ་དགའ་བར་བྱེད་པ་རྣམས་ཐམས་ཅད་ཀྱང་སྲེད་པའི་དུག་གིས་བསྲེགས་པར་གྱུར་པས་འདོད་པའི་ཡོན་ཏན་ལྔ་མཚུངས་པ་མེད་པ་རྣམས་ཀྱིས་རྣམ་པར་
ངོམས་པ་མེད་པར་གྱུར་པ། མི་རྟག་པ་དང་ཆ་འདྲ་བའི་དཔེ་མེད་པའི་འཁྲི་ཤིང་གི་ཁང་པར་དགའ་བར་གྱུར་པས་ཆེས་ལྷག་པར་ཆགས་པས་བསྒོས་པར་གྱུར་པའི་དགའ་བ་རྣམས་ཉམས་སུ་མྱོང་བར་བྱེད་དོ། །འཁྲི་ཤིང་གི་ཁང་པ་དེ་དག་ཀུན་ཡང་རྣམ་པ་སྣ་ཚོགས་པའི་འཁྲི་

ཤིང་འཕྱང་བས་དགའ་བར་གྱུར་པ་རྣམས་ལ། འདི་ལྟ་སྟེ་བཻ་ཌཱུརྱའི་རང་བཞིན་གྱི་འཁྲི་ཤིང་རྣམས་ལ་ནི་གསེར་གྱི་འདབ་མ་རྣམས་དང་པད་མ་རཱ་ག་དང་མཚུངས་པའི་མདོག་གི་འབྲས་བུ་རྣམས་སོ། །ཨིན་དྲ་ནཱི་ལའི་འཁྲི་ཤིང་རྣམས་ལ་ནི་དངུལ་གྱི་རང་བཞིན་གྱི་ཁ་དོག་གི་འདབ་
མ་རྣམས་དང་ཤེལ་དང་ཁ་དོག་མཚུངས་པའི་འབྲས་བུ་རྣམས་སོ། །གསེར་གྱི་འཁྲི་ཤིང་རྣམས་ལ་ནི་ཨིན་དྲ་ནཱི་ལ་དང་མདོག་མཚུངས་པའི་ལོ་མ་རྣམས་དང་། པད་མ་རཱ་ག་དང་མདོག་མཉམ་པའི་འབྲས་བུ་རྣམས་སོ། །རིན་པོ་ཆེ་བདུན་རྣམ་པར་འདྲེས་པའི་འཁྲི་ཤིང་རྣམས་ལ་ནི་
འདབ་མ་དང་འབྲས་བུ་རྣམས་ཀྱང་རྣམ་པར་འདྲེས་པའོ། །གསེར་གྱི་འཁྲི་ཤིང་རྣམས་ལ་ནི་དངུལ་གྱི་རང་བཞིན་གྱི་འདབ་མ་དང་། དངུལ་གྱི་ཁ་དོག་གི་འབྲས་བུ་རྣམས་སོ། །རྣམ་པ་དེ་སྲིད་ཀྱི་འདབ་མ་རྣམས་ཉིད་ཡིན་ཏེ། གསེར་དེ་དག་དང་མཚུངས་པའི་ཁ་དོག་རྣམས་ལ་དེ་དང་
མཚུངས་པའི་འདབ་མ་དང་དེ་དང་མཚུངས་པའི་འབྲས་བུའོ། །དེ་ལྟར་ལྷ་དེ་དག་རྣམས་ཀྱི་འཁྲི་ཤིང་གི་ཁང་པ་རྣམས་དེ་དག་རྣམས་ཀྱི་ལེགས་པར་བྱས་པའི་ལས་ཀྱིས་སེམས་བསྐྱེད་པ་དང་ལྷན་ཅིག་ཉིད་དུ་འབྱུང་བར་འགྱུར་རོ། །དེ་ནས་ལྷ་དེ་དག་རབ་ཏུ་དགའ་བའི་བདེ་བས་འཁྲི་
ཤིང་གི་ཁང་བུ་དེ་དག་ཏུ་ལེགས་པར་ཞུགས་ནས་ལྷ་མོ་རྣམས་དང་ལྷན་ཅིག་ཏུ་རྩེ་བར་བྱེད་པ་དང་། དགའ་བར་ཡང་བྱེད་ཅིང་གཡོག་གི་བྱ་བ་རྣམས་ཀྱང་བྱེད་དེ། རྣམ་པ་སྣ་ཚོགས་པའི་ལྷ་ཡུལ་གྱི་བདེ་བ་རྣམས་ཀྱིས་མྱོས་ཤིང་ངོམས་པ་ཡང་མེད་ལ་བདེ་བས་ཆུ་ལ་ཉ་བཞིན་
དུའོ། །དེ་དེ་ལྟར་ལྷ་དེ་དག་རྣམས་ཉིད་ཀྱང་ཤིན་ཏུ་ངོ་མཚར་བར་སྐྱེད་པར་བྱེད་པའི་རྒྱུར་གྱུར་པའི་འཁྲི་ཤིང་གི་རྣམ་པར་འཕྱང་བས་ཀུན་ནས་གཡོགས་པ་རྣམས་སུ་ལེགས་པར་ཞུགས་ནས་དགའ་བར་བྱེད་ཅིང་གླུ་ཡང་ལེན་པར་བྱེད་ལ་རྔ་སྐད་ཡན་ལག་ལྔ་པས་དེ་ལྟར་ཡང་
དགའ་བར་གྱུར་པ་ན། འདི་ལྟར་སེམས་པར་བྱེད་དེ། ཇི་ལྟར་ཆུང་ངུ་ན་འཁྲི་ཤིང་གི་ཁང་བུ་འདི་ཉིད་དུ་རབ་ཏུ་བདེ་བར་ཞུགས་པའི་བདག་ཅག་འདི་དག་རྣམས་ཉིད་ལ་རབ་ཀྱི་མཆོག་གི་མདོག་དང་དྲི་དང་། རོ་དང་བདེ་བའི་རེག་བྱ་ཕུན་སུམ་ཚོགས་པའི་ཆུ་ཀླུང་གང་ཞིག་འདབ་

མའི་གསེབ་དག་ནས་བབ་པར་གྱུར་ན་ཅི་མ་རུང་། ཞུ་གསོལ་བྱེད་པའི་ལྷན་ཅིག་རྗེས་སུ་སྤྱོད་པ་དང་བཅས་པ་རྣམས་ཕྱིར་ཞིང་ཆེས་ལྷག་པ་ཉིད་དུ་ཞུ་བར་བྱ་བའི་དོན་དུ་དེ་བཞིན་དུ་སེམས་པར་བྱེད་དོ། །དེ་དག་རྣམས་སེམས་བསྐྱེད་པ་ཙམ་ཉིད་ན། ཆུ་ཀླུང་དེ་
དག་རོ་དང་དྲི་དང་རེག་བྱ་རབ་ཀྱི་མཆོག་དང་ལྡན་པར་ཡང་ལེགས་པར་བྱས་པའི་ལས་རྣམས་ཀྱིས་བྱུང་བར་གྱུར་པ་རྣམས་ནི་འདབ་མའི་གསེབ་དག་ནས་རྒྱུན་འབབ་པར་གྱུར་པས། རབ་ཏུ་རྡོལ་བར་གྱུར་པ་ན། དེ་དེ་ལྟར་ལྷན་ཅིག་རྗེས་སུ་སྤྱོད་པ་རྣམས་དང་བཅས་པ་རྨད་དུ་
གྱུར་པས་རྒྱགས་ཤིང་མྱོས་ནས་འདོད་པའི་སྲེད་པ་རྣམས་ཀྱིས་རྣམ་པར་ངོམས་པ་མེད་པས་དུས་ཡུན་རིང་དུ་གླུ་ལེན་པའི་རྒྱགས་པས་རྒྱགས་པའི་སེམས་ཀྱིས་དགའ་བར་བྱེད་པ་དང་རྩེ་འཇོ་བར་ཡང་བྱེད་དེ། བག་མེད་པའི་ས་རྣམས་སུ་སྐྱེས་པར་གྱུར་པ་དེ་དག་རྣམས་ནི་
རང་བཞིན་གྱིས་ལེགས་པར་བྱས་པའི་ལས་རྣམས་ཟད་པར་བྱེད་པ་ཡིན་ལ་འཆི་འཕོ་བའི་དུས་ན་ནི་ལེགས་པར་མཐོང་བར་འགྱུར་རོ། །ཡུལ་གྱི་སྲེད་པ་རྣམས་ཀྱིས་ངོམས་པ་མེད་པར་དེ་ལྟར་རྩེ་རབ་ཏུ་འཇོ་བར་བྱེད་པ་རྣམས་ནི་འདི་ལྟར་འགྱུར་བ་ཡིན་ཏེ། གང་ཆུང་ངུ་ན་བདག་
ཅག་རྣམས་ལ་དྲི་དང་རོ་དང་མདོག་དང་རེག་བྱ་རབ་ཀྱི་མཆོག་དང་ལྡན་པའི་བདུད་རྩི་དག་འདབ་མའི་གསེབ་རྣམས་ནས་བར་དུ་གཟགས་པར་གྱུར་མོད། དེ་ནས་ལྷ་དེ་དག་རྣམས་ཀྱི་ལེགས་པར་བྱས་པའི་ལས་དག་གིས་སེམས་བསྐྱེད་པ་ཙམ་ཉིད་ཀྱིས་རོ་དང་མདོག་དང་
དྲི་དང་རེག་བྱ་མཆོག་གི་རབ་ཏུ་གྱུར་པའི་བདུད་རྩི་དེ་དག་ཇི་ལྟར་ལས་དང་མཁོས་འདྲ་ཞིང་། རྗེས་སུ་འཐུན་པ་རྣམས་རབ་ཏུ་བབ་པར་གྱུར་པ་ན། དེ་ལྟར་དེ་དག་རྣམས་ཉིད་དུས་ཡུན་རིང་པོར་མིད་པར་བྱེད་དོ། །དེ་ནས་ལྷ་དེ་དག་རྣམས་འདི་ལྟར་ཡང་སེམས་པར་བྱེད་དེ། གང་
མ་ཐང་ཡང་བདག་ཅག་རྣམས་ལ་དོ་ཤལ་དང་ཅོད་པན་ནོར་བུས་སྤྲས་པ་རྣམས་དང་། དཔུང་རྒྱན་དང་མེ་ཏོག་གི་ཕྲེང་བ་དང་ལྷ་རྫས་རྣམས་ཇི་ལྟར་མཐོ་རིས་ཀྱི་རྗེས་སུ་འཐུན་པ་ཆེས་ལྷག་པར་དགའ་བར་གྱུར་པ་རྣམས་འཁྲི་ཤིང་གི་གསེབ་དག་ནས་རྙེད་ན་ཅི་མ་རུང་སྙམ་ན། དེ་ལྟར་

ལྷ་དེ་དག་རྣམས་ཀྱི་སེམས་བསྐྱེད་པ་དང་དུས་གཅིག་ཉིད་དུ་ལེགས་པར་བྱས་པའི་ལས་རྣམས་ཀྱིས་མཐོ་རིས་ཀྱི་རྗེས་སུ་འཐུན་པར་དགའ་བར་གྱུར་པའི་རྒྱན་དེ་དག་རྣམས་རབ་ཏུ་བྱུང་བར་གྱུར་ཏོ། །དེ་ནས་ལྷ་དེ་དག་རྒྱན་དེ་དག་རྣམས་ཀྱིས་རྒྱན་དུ་བྱས་ནས། འདོད་པའི་བདེ་བ་རྣམས་
ཀྱིས་དུས་རིང་དུ་ཡང་ངོམས་པ་མེད་པར་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་བ་དང་བཅས་པས་དུས་རིང་པོར་དགའ་བར་བྱས་ཀྱང་། ཡུལ་གྱི་སྲེད་པ་རྣམས་ཀྱིས་རྣམ་པར་ངོམས་པ་ནི་མེད་པ་ཡིན་ནོ། །དེ་དག་དེ་ལྟར་རྣམ་པར་གནས་པ་རྣམས་འདི་ལྟར་སེམས་པར་འགྱུར་ཏེ།
གང་ཆུང་ངུ་ན་རོལ་མོ་མཁན་རྣམས་ལས་ཀྱང་ལྷག་པའི་དབྱངས་གཞན་དུ་གྱུར་པ་རྣམ་པ་སྣ་ཚོགས་པའི་མེ་ཏོག་གི་དྲི་རྣམས་དང་ཡང་དག་པར་ལྡན་པའི་ཡོན་ཏན་དེ་ལྟ་བུ་དང་ལྡན་པར་འདབ་མ་རླུང་གིས་བསྐྱོད་པར་བྱེད་ན་རུང་ངོ་སྙམ་ན། དེ་ནས་ལྷ་དེ་དག་རྣམས་ཀྱི་ལེགས་པར་བྱས་
པའི་ལས་དག་གིས། སེམས་བསྐྱེད་པ་ཙམ་ཉིད་ན་རྣམ་པ་དེ་ཙམ་ཉིད་ཀྱི་རླུང་རྣམས་ཀྱི་ཁམས་ལེགས་པ་དལ་བུས་འབྱུང་བ་རྩོམ་སྟེ། གང་གིས་དེ་དག་རྣམས་ལ་རབ་ཏུ་བསྐྱོད་ཅིང་ཕན་ཚུན་དུ་དཀྲོལ་བས་བྱས་པའི་རྣམ་པ་དེ་ལྟ་བུའི་དབྱངས་འདི་དག་རབ་ཏུ་འབྱུང་བའི་ཁྱད་པར་གང་གིས།
གླུ་མཁན་གྱི་གླུ་དེ་དག་ནི་བཅུ་དྲུག་ཆར་ཡང་ཆོག་པ་མ་ཡིན་ནོ། །དེ་ནས་ལྷ་དེ་དག་རྣམས་ལྷ་མོ་དེ་དག་དང་སྟབས་ཅིག་ཏུ་དུས་ཡུན་རིང་པོར་དགའ་བར་བྱེད་པ་དང་། འགྱིང་བར་ཡང་བྱེད་ལ་གླུ་ལེན་པ་དང་དགོད་པར་ཡང་བྱེད་དེ། འོན་ཀྱང་འདོད་པ་རྣམས་ཀྱིས་ནི་ངོམས་པར་འགྱུར་
བ་ལྟ་ག་ལ་ཡོད། དེ་དག་རྣམས་ནི་གཞན་ཡང་འདི་སྙམ་དུ་སེམས་པར་བྱེད་དོ། །གང་ཆུང་ངུ་ན་ཡང་བདག་ཅག་རྣམ་པར་གནས་པ་རྣམས་ཉིད་ལ་རྣམ་པ་སྣ་ཚོགས་པའི་ཁ་དོག་ཅན་རིན་པོ་ཆེ་སྣ་བདུན་གྱིས་རྣམ་པར་སྤྲས་པ་འདོད་པ་ཐམས་ཅད་ཕུན་སུམ་ཚོགས་པར་གྱུར་པའི་
ཁང་བུ་དག་རབ་ཏུ་བྱུང་བར་གྱུར་ན་རུང་སྟེ། གང་གིས་སླར་ཡང་བདག་ཅག་རྣམས་མཚོ་ཆེན་པོ་འདིའི་ཉེ་འཁོར་རྣམས་སུ་ཡོངས་སུ་བསྐོར་ནས་ནམ་མཁའ་ལ་གནས་པས་དེ་ལྟར་རྩེད་འཇོ་དག་བྱེད་པར་འགྱུར་བ་དང་། བདག་ཅག་རྣམས་ཡོངས་སུ་སྤྱོད་པར་ཡང་བྱ་བ་དང་དགོད་

པར་འགྱུར་བ་དང་འགྱིང་བར་འགྱུར་བ་དང་གླུ་ལེན་པར་གྱུར་པར་ཡང་ངོ་སྙམ་ན། དེ་ལྟར་དེ་དག་གིས་སེམས་བསྐྱེད་པ་ཙམ་ཉིད་ན་ལྷ་རྣམས་ཀྱི་དྲུང་དུ་ཁང་བུ་དག་རབ་ཏུ་འབྱུང་བར་འགྱུར་བ་རྣམས་ལ། རིན་པོ་ཆེ་བདུན་གྱི་རང་བཞིན་ལས་རྣམ་པ་སྣ་ཚོགས་པའི་
རིན་པོ་ཆེའི་ཆ་ཤས་རྣམས་ཀྱིས་རྣམ་པར་བཀྲ་བར་གྱུར་པ། མུ་ཏིག་གི་ཕྲེང་བ་དང་བཅས་པ་ལན་ཀན་དགའ་བར་གྱུར་པ་རྣམས་ཆེས་མཆོག་ཏུ་མཐོང་ན་དགའ་བར་གྱུར་པ་ཡིན་ཏེ། ཁ་ཅིག་ནི་ངང་པས་འདྲེན་པ། ཁ་ཅིག་ནི་རྨ་བྱས་འདྲེན་པ། ཁ་ཅིག་ནི་ཤང་ཤང་
ཏེའུ་ཡིས་འདྲེན་པ་དང་། ལ་ལ་ནི་རྣམ་པར་བཀྲ་བའི་བྱ་རྣམས་ཐམས་ཅད་ཀྱིས་འདྲེན་པ་ཡིན་ཞིང་། ལྷ་དེ་དག་རྣམས་ཀྱི་མདུན་ཉིད་ན་ཇི་ལྟར་འདོད་པའི་བཞོན་པ་དེ་དག་རྣམས་ཡིན་པར་དེ་ལྟར་ལེགས་པར་ཤེས་སོ། །དེ་དག་རྣམས་མཐོང་བར་གྱུར་ནས་གཞན་ཡང་
ལྷ་དེ་དག་ཁོ་ན་བཞིན་དུ་མཉམ་པོར་ཞོན་པར་གྱུར་ནས་དེ་ཁོ་ན་བཞིན་དུ་འགྱིང་བར་ཡང་གྱུར་པ་དང་། རྩེ་བར་གྱུར་པས་ཀྱང་དེ་དག་ཐམས་ཅད་གང་ན་རྣམ་པར་རྒྱས་པའི་མཚོ་ཡོད་པ་དེར་ལེགས་པར་འགྲོ་བར་བྱེད་དོ། །དེ་དག་རྣམས་ཀྱིས་མཚོ་དེ་མཐའ་དག་དང་། པད་མ་
ཆེན་པོ་དེ་ཡང་མཐོང་བར་གྱུར་ནས་དེ་དག་རྣམས་རྒྱུ་བར་བྱེད་པ་ན། པད་མ་ཆེན་པོ་དེ་མ་ལུས་པ་མཐོང་ན་ཤིན་ཏུ་ངོ་མཚར་བར་གྱུར་པ་ཡིན་ཏེ། དེ་ཡང་རྣམ་པ་སྣ་ཚོགས་པའི་རིན་པོ་ཆེའི་རང་བཞིན་གྱི་འདབ་མ་རྣམས་རྣམ་པར་བཀྲ་བའི་འོད་ཟེར་འཕྲོ་བར་གྱུར་པས་རྣམ་
པར་གསལ་བར་བྱས་པ་དེའི་ཁ་དོག་སྣ་ཚོགས་པ་རྣམས་ལ་འདི་ལྟ་སྟེ། རྡོ་རྗེ་དང་། ཨིན་དྲ་ནཱི་ལ་དང་། མ་ར་ཀ་ཏ་དང་། པད་མ་རཱ་ག་དང་། བཻ་ཌཱུརྱ་དང་། སྔོན་པོ་ཆེན་པོ་དང་། དངུལ་དང་། གསེར་དང་མཚུངས་པའི་ཁ་དོག་རྣམས་དང་དེ་དག་རྣམས་ཀྱི་འོད་ཀྱིས་ཀུན་
ནས་གསལ་བར་བྱེད་པ་དང་འདབ་མ་རྣམས་མཚུངས་པ་དང་། མཆོག་ཏུ་བལྟ་ན་སྡུག་པར་གྱུར་པ་དག་མཐོང་ངོ་། །ནམ་མཁའི་དཀྱིལ་ན་ཁང་བུ་རྣམས་ལ་ལེགས་པར་གནས་པའི་ལྷ་དེ་དག་རྣམས་དང་། པད་མའི་འདབ་མ་དེ་དག་ལ་ལྷ་གཞན་དག་ལྷན་ཅིག་སྤྱོད་པའི་འཁོར་

དང་བཅས་པ་གནས་པ་རྣམས་རྩེ་བར་བྱེད་པ་དང་། ཕན་ཚུན་གྲོགས་སུ་གྱུར་པས་མྱོས་པ་ལ་དོན་གཅིག་པ་རྣམས་མཚོ་དེའི་པད་མའི་འདབ་མ་རྣམས་ཀྱི་གསེབ་ཏུ་སོང་ནས། གླུ་ལེན་པ་དང་གར་ཡང་བྱེད་དོ། །དེ་ནས་ནམ་མཁའི་དཀྱིལ་ན་རྒྱུ་བར་བྱེད་པའི་ལྷ་དེ་དག་རྣམས་དང་གང་
ཡང་པད་མ་ཆེན་པོའི་འདབ་མའི་ནང་ན་གནས་པ་དེ་དག་དང་དེ་དག་རྣམས་ཐམས་ཅད་ཀྱང་རྣམ་པ་དུ་མར་རྩེ་དགའ་བ་ཆེན་པོ་ཉིད་ཀྱིས་རྣམ་པར་རྒྱུ་ཞིང་རྩེད་འཇོས་རྣམ་པར་རྒྱུ་བར་བྱེད་པ་གང་ཡིན་པ་ལ་ནི་དཔེ་རྣམས་ཀྱིས་ཉེ་བར་འཇལ་བར་བྱ་བར་སླ་བ་ཡང་མ་ཡིན་ནོ། །དེ་དག་རྣམས་
དེ་ལྟར་རྩེ་བར་གྱུར་པའི་གླུ་དང་རོལ་མོའི་སྒྲ་དབྱངས་རྣམས་ནི་དཔག་ཚད་ལྔ་བརྒྱར་རྣམ་པར་གནས་པར་གྱུར་པ་དང་། དེ་དག་ནི་འདོད་པའི་ཡོན་ཏན་ལྔ་ཕུན་སུམ་ཚོགས་པར་གྱུར་པའི་རྔ་སྐད་ཡན་ལག་ལྔ་དང་ལྡན་པའི་ཆེན་པོ་རྣམས་རྣམ་པ་དུ་མར་ཉེ་བར་ལོངས་སྤྱོད་པར་བྱེད་དོ། །
དེ་དག་རྣམས་ནི་རང་གི་ལས་ཀྱི་ཁྱད་པར་གང་ཡིན་པ་རྣམས་སྤྱད་ཅིང་བྱས་ལ་ཡོངས་སུ་བསགས་པ་དེ་སྐྱེལ་བར་བྱེད་ལ། འོན་ཀྱང་དྲན་པར་འགྱུར་བ་ཡང་མ་ཡིན་ནོ། །ཇི་ལྟར་ན་ལས་རྣམས་ཟད་པར་འགྱུར་བ་ཡིན་པ་དང་ལེགས་པར་བྱས་པ་རྣམས་ནི་གཏུགས་པར་འགྱུར་
བ་ཡིན་པ་དང་། འཆི་འཕོ་བའི་དུས་ན་གང་དུ་འགྲོ་བར་བྱ་དགོས་པ་ཡིན་པ་དང་། འགྲོ་བ་གང་རྗེས་སུ་བསྒྲུབ་པ་འབྱུང་བ་ཡིན་པ་དང་རྣམ་པ་ཇི་ལྟ་བུའི་བདེ་བ་དང་སྡུག་བསྔལ་རྣམས་ལ་ཉེ་བར་ལོངས་སྤྱད་པར་བྱ་བ་འབྱུང་བ་དང་འབྱུང་བར་མི་འགྱུར་བ་ནི་གང་ཡིན་པ་དང་། ལེགས་
པར་བྱས་པ་དང་ཉེས་པར་བྱས་པའི་ལས་རྣམས་ཀྱི་ལམ་ལེགས་པར་སྟོན་པ་པོ། དམྱལ་བ་དང་ཡི་དགས་དང་དུད་འགྲོ་དང་མིའི་གནས་རྣམས་སུ་འཇིགས་པ་དང་བཅས་པ་དང་། འཇིགས་པ་མེད་པར་སྒྲུབ་པའི་འཇིགས་པ་མེད་པའི་དབང་དུ་བྱས་ནས་སྐྱེ་བ་གཞན་གྱི་གནས་
རྣམས་ལ་དེ་ལྟར་ཀུན་ཏུ་གོ་བར་མ་ཡིན་ཏེ། མུན་པར་བྱེད་པའི་བག་མེད་པར་ནུབ་པར་གྱུར་པ་དེའི་ཚེ་གོ་བ་མ་ཡིན་ནོ། །གང་གི་ཚེ་ལེགས་པར་བྱས་པའི་ལས་རྣམས་ཡོངས་སུ་ཟད་པར་གྱུར་ནས། མི་རྟག་པ་ཉིད་ཀྱི་རླུང་གིས་ངེས་པར་ལྟུང་བར་བྱེད་པ་དེའི་ཚེ། བག་མེད་པ་དེ་

བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པ་རྣམས་གྲོགས་པོ་མ་ཡིན་པ་གྲོགས་པོའི་གཟུགས་ཅན་དང་། ཕན་པ་མ་ཡིན་པར་ཕན་པའི་གཟུགས་འཛིན་པ་རྣམས་ཀྱིས། རིམ་པ་ཕྱིན་ཅི་ལོག་ཏུ་བྱེད་པའི་འབྲས་བུ་ཉེ་བར་རིག་པར་འགྱུར་རོ། །གང་
བདག་ཅག་གིས་བག་མེད་པ་རྣམས་ཀུན་ནས་བསྟེན་ཅིང་བསྒོམས་ལ་ལན་མང་དུ་བྱས་པ་གང་ཡིན་པ་རྣམས་ནི། ལེགས་པར་བསྒྲུབས་པ་ཡང་མ་ཡིན་པར་དེ་ལྟར་འབྲས་བུ་རྣམས་ཤེས་པར་འགྱུར་ན། བག་མེད་པའི་དགྲ་བོས་ཇི་ལྟར་བྱས་པ་དེ་དག་རྣམས་ལ་བརྩི་བགྲང་མེད་པར་ལྷ་དེ་
དག་རྣམས་ཕྱིར་ཞིང་ཉིད་ཀྱང་དགའ་བར་བྱེད་ཅིང་། གླུ་ལེན་པར་བྱེད་ལ་མཚོ་དེ་ཡང་ལེགས་པར་བྱས་པའི་ལས་རྣམས་ཐམས་ཅད་ཀྱི་སྙིང་པོ་དང་འདྲ་བས་ཆེས་དགའ་བར་གྱུར་པར་པད་མའི་རྒྱལ་པོའི་འདབ་མ་རྣམས་ལ་རྩེ་དགའ་བར་བྱེད་པ་དེ་དག་རྣམས་དང་གང་ཡང་ནམ་
མཁའི་དཀྱིལ་ན་ཁང་བུ་རྣམས་ཀྱིས་འགྲོ་བ་དག་གི་མཚོ་དེ་མཚུངས་པར་མཐོང་ངོ་། །དེ་ནས་དེ་ལྟར་བག་མེད་པ་རྣམས་ལ་ཆུའི་རླབས་ལ་རྩེ་བ་ཞེས་བྱ་བའི་བྱས་ལྷ་དེ་དག་རྣམས་ཀྱི་ལེགས་པར་བྱས་པའི་ལས་ཀྱིས་ཚིགས་སུ་བཅད་པ་རྗོད་པར་བྱེད་པ་རྣམས་ལ། ཇི་ལྟར།
ལུས་ཅན་རྣམས་ཀྱི་གསོན་པ་ནི། །ཆུ་ཡི་རླབས་ལྟར་གཡོ་བ་ཡིན། །སྙིང་པོ་མེད་པའི་ཆུའི་ཆུ་བུར། །ལྷ་རྣམས་ཀྱིས་ནི་གོ་བའང་མིན། །དབུ་བའི་ཕུང་པོ་རིང་གནས་ཀྱི། །ཚེ་འདི་ཡང་ནི་མདོར་སྡུད་པའི། །ལྷ་ཡི་ཡུན་རིང་གནས་མིན་ཏེ། །མི་རྟག་པ་ཡིས་
སྐལ་བ་སྤངས། །ཇི་ལྟར་མར་མེ་རྣམས་ཞིག་པས། །འོད་རྣམས་ཞིག་པར་འདོད་པ་ཡིན། །དེ་བཞིན་ལས་ནི་རྣམ་ཟད་པས། །ལྷ་རྣམས་ཀྱི་ནི་བདེ་བ་འཇིག །བྱས་པའི་ལས་གང་མི་འཇིག་པ། །ཅུང་ཟད་ཡོད་པ་མ་ཡིན་ནོ། །དེ་ལྟར་ན་ཡང་རྨོངས་པའི་རྣམས། །
སྐྱེ་འདི་རྣམས་ནི་རྟག་ཉིད་མིན། །དངོས་གང་འགའ་ཞིག་སྐྱེ་བ་ནི། །དེ་ཡི་འཇིག་པ་རྟག་པར་གནས། །འདུས་བྱས་ཀྱང་ནི་ཐམས་ཅད་ཀྱི། །ཆོས་ཉིད་འདིར་ནི་རྣམ་པར་གནས། །གལ་ཏེ་འཁོར་བའི་སྲོག་ཆགས་རྣམས། །རང་གི་ལས་ཀྱིས་འཁོར་བྱེད་ན། །

འཇིག་རྟེན་འདི་ཅིའི་དོན་དུ་རྨོངས། །བག་མེད་པས་ནི་རྣམ་པར་བཅོམ། །བག་མེད་པས་ནི་བདེ་ལེགས་འཇོམས། །བག་མེད་པས་ནི་འཆིང་བའི་མཆོག །བག་མེད་ལོག་པར་ལྟུང་བ་དང་། །བག་མེད་པས་ནི་དམྱལ་བར་འཚེད། །སྡུག་བསྔལ་འདི་ཡི་རྒྱུ་
གཅིག་པུ། །བག་མེད་ཡིན་པར་ཡོངས་སུ་བསྒྲགས། །དེ་ཕྱིར་བདེ་དོན་གཉེར་སྐྱེས་བུས། །བག་མེད་ཡོངས་སུ་སྤང་བར་གྱིས། །གང་གིས་བག་མེད་ཡོངས་སྤངས་པ། །དེ་ཡིས་གོ་འཕང་འཕོ་མེད་འཐོབ། །གང་ཡང་བག་ཡོད་ལ་དགའ་བ། །དེ་ནི་མྱ་ངན་
འདས་མཐའ་ཉིད། །བག་ཡོད་གོ་འཕང་དེ་དག་ཀྱང་། །མྱ་ངན་འདས་མཆོག་འགྲོ་བ་ཡིན། །བག་མེད་ལོག་པར་ལྟུང་བ་ཡི། །རྒྱུ་དེ་དག་ཏུ་རབ་ཏུ་བསྒྲགས། །སྐྱེས་བུ་བག་མེད་ཐམས་ཅད་ནི། །དེ་ནི་སྨྱོན་པ་བཞིན་དུ་སྣང་། །འཇིག་རྟེན་འདིར་ནི་སླད་སླ་ཞིང་། །
ཕྱི་མ་ལ་ནི་སྡིག་པས་འཚེད། །བག་མེད་པ་ཡི་སྐྱེས་བུ་ཀུན། །ཕྱིན་ཅི་ལོག་ལ་འཇུག་པར་བྱེད། །རྒྱུ་རྣམས་ལས་ཀྱི་རྣམ་སྨིན་དང་། །འཆི་འཕོ་སྐྱེ་བ་དེ་བཞིན་ཏེ། །བག་མེད་མེ་ནི་གདུག་པ་འདིས། །དམྱལ་བར་རྗེས་སུ་འཁྲིད་པར་བྱེད། །དེ་ཕྱིར་དམྱལ་
ལས་གྲོལ་དོན་དུ། །བག་མེད་རྣམ་པར་སྤང་བར་གྱིས། །གང་གིས་བག་མེད་ངེས་རྣམ་རྒྱལ། །རྟག་ཏུ་ཤེས་རབ་ལ་དགའི་མི། །དེ་ནི་ཉོན་མོངས་འཆིང་བཅད་ནས། །བདེ་བའི་གོ་འཕང་འཆར་བར་འགྲོ། །སྒོ་ལྔ་ནས་ནི་དྲི་མ་གསུམ། །སྐྱེ་བས་ཁམས་གསུམ་
རྟག་འཇུག་པ། །བག་མེད་ལས་ནི་རྣམ་རྒྱལ་བའི། །སངས་རྒྱས་རྣམས་ཀྱིས་བག་མེད་གསུངས། །བག་མེད་མུན་པའི་སྐྱེ་གནས་ཡིན། །བག་ཡོད་པ་ནི་བདེ་བ་ཡིན། །དེ་ཕྱིར་བདེ་དོན་གཉེར་སྐྱེས་བུས། །བག་མེད་རྣམ་པར་སྤང་བར་གྱིས། །དེ་ལྟར་ཆུའི་
རླབས་ལ་རྩེད་མོ་རྩེ་བ་ཞེས་བྱ་བའི་བྱས་ལྷ་བག་མེད་པར་གྱུར་པ་དེ་དག་རྣམས་ཀྱི་བག་མེད་པ་ཀུན་དུ་ཞི་བར་བྱ་བའི་དོན་དུ་རྗེས་སུ་སྟོན་པའི་ཚིགས་སུ་བཅད་པ་རྣམས་བཤད་དོ། །ལྷ་དེ་དག་རྣམས་ཀྱང་ཀུན་དུ་རྨོངས་པར་གྱུར་པའི་ཕྱིར་ན་ཇི་ལྟར་དེ་ཁོ་ན་ཉིད་དེ་དག་རྣམས་བརྗོད་

པར་གྱུར་པ་ན། དེ་ལྟར་ཀུན་དུ་མི་རྟོགས་སོ། །སླར་ཡང་དེ་ཁོ་ན་བཞིན་དུ་གང་དག་ནམ་མཁའི་དཀྱིལ་དུ་སོང་བ་རྣམས་དང་། མཚོ་ཆེན་པོ་རྣམ་པར་རྒྱས་པའི་པད་མའི་འདབ་མ་རྣམས་ལ་ལྟ་བ་གང་ཡིན་པ་དེ་དག་རྣམས་ཕན་ཚུན་ཀུན་དུ་ལྟ་བ་ལ་ཆེད་ཆེར་
བྱེད་པས། རྩེ་འཇོ་བར་བྱེད་ཅིང་དགའ་བར་ཡང་བྱེད་དེ། མཆོག་ཏུ་སྙན་པར་གྱུར་པའི་ལྷ་རྫས་ཀྱི་རྔ་སྐད་ཡན་ལག་ལྔ་པ་རྣམས་ཀྱིས་སོ། །ཡུལ་གཞན་རྣམས་ཀྱི་གཟུགས་དང་དྲིས་ཀྱང་ཕན་ཚུན་དུ་ཡིད་འཕྲོག་པར་གྱུར་པའི་བདེ་བ་རྣམས་ཀྱིས་ཀྱང་རྣམ་པར་ངོམས་པ་མེད་
པའི་ཡུལ་རྣམས་ནི་ལན་ཚྭའི་ཆུ་བཞིན་དུ་ལན་ཅིག་མ་ཡིན་པ་དང་ལན་ཅིག་མ་ཡིན་པར་ཡང་ནགས་རྣམས་ཉིད་དུ་རྣམ་པར་ངོམས་པ་མེད་པར་འགྱུར་ཏེ། ལྷ་དེ་དག་རྣམས་དེ་ཁོ་ན་བཞིན་དུ་རྣམ་པ་དུ་མར་དགའ་བར་བྱེད་ཅིང་བདེ་བ་ཡང་ཉམས་སུ་མྱོང་བར་བྱེད་དོ། །དེ་ནས་
དུས་ཤིན་ཏུ་རིང་བར་ལྷ་དེ་དག་གིས་ནམ་མཁའི་དཀྱིལ་དུ་རྩེད་སྒྲོགས་དག་བྱས་ནས། སླར་ཡང་གང་ན་རྣམ་པར་རྒྱས་པའི་མཚོ་དེ་དང་པད་མ་ཆེན་པོའི་ནགས་ཡོད་པ་དེར་ལེགས་པར་འབབས་པར་བྱེད་དོ། །ལྷ་གང་ཡང་པད་མ་ཆེན་པོ་དེའི་འདབ་མ་རྣམས་ལ་ལྷན་ཅིག་
རྗེས་སུ་སྤྱོད་པ་དང་བཅས་ནས། རྔ་སྐད་ཡན་ལག་ལྔ་དང་ལྡན་པས་གླུ་ལེན་པར་བྱེད་པ་དང་དགའ་བར་བྱེད་པ་དང་། ཀུན་དུ་གཡོག་བྱེད་པ་དེ་དག་རྣམས་ནི་ཕན་ཚུན་དུ་གཡོག་གི་བྱ་བས་བགྲོད་ཅིང་འཐུན་པར་འཇུག་པས་རྒྱགས་པ་ལ་དོན་གཅིག་པ་འདོད་པ་དྲུག་ལ་
རྣམ་པར་ཆགས་པའི་ཡིད་ཀྱིས། དུས་རིང་དུ་གླུ་ལེན་པར་བྱེད་པ་དང་མཆོག་ཏུ་རྩེད་མོ་རྩེ་བར་ཡང་བྱེད་དེ། དེ་དག་རྣམས་རྣམ་པ་དུ་མ་དང་རྣམ་པར་རྟོག་པ་དུ་མས་བདེ་བ་རྣམས་ཉམས་སུ་མྱོང་བར་བྱེད་དོ། །དེ་དག་གི་བདེ་བ་དེ་དག་རྣམས་ཀྱང་སེམས་བསྐྱེད་པ་དང་།
ལྷན་ཅིག་ཏུ་སྐྱེ་བ་དང་། ཀུན་དུ་རྟོག་པ་ཙམ་གྱིས་རབ་ཏུ་འགྲུབ་པར་འགྱུར་བ་ནི། དགེ་བའི་ལས་རྣམས་ཀྱིས་དེ་ལྟར་ཡང་ཕུན་སུམ་ཚོགས་པར་འགྱུར་རོ། །ལྷ་དེ་དག་དེ་ལྟར་ཀུན་དུ་རྟོག་པའི་ཆུའི་ཤུགས་ལ་རྣམ་པར་རྟོག་པའི་རླབས་ཀྱི་ཕྲེང་བ་དང་ལྡན་པའི་ཆུ་

ཀླུང་ཆེན་པོས་ཀུན་དུ་ཁྱེར་བར་གྱུར་པ་དེ་དག་རྣམས་ནི། མཆོག་ཏུ་བག་མེད་པའི་ཡིད་ཀྱིས་དུས་རིང་དུ་འདའ་བར་བྱེད་དོ། །མཚོ་ཆེན་པོ་དེའི་པད་མའི་འདབ་མ་རྣམས་ལ་སོང་བའི་ལྷུ་རྣམས་ལ་ནི། ལྷ་རྫས་ཀྱི་བདེ་བ་རྣམ་པ་དུ་མ་རྣམས་དང་རྣམ་པར་འདྲེས་པ་དུ་མ་རྣམས་ཉམས་སུ་
མྱོང་བར་བྱེད་དོ། །དེ་དག་དེ་ལྟར་རྣམ་པར་འཕྱན་པས་བག་མེད་པར་སྤྱོད་པ་དེ་དག་རྣམས་ལ་རྗེས་སུ་བརྩེ་བའི་དོན་དང་། བག་མེད་པ་ཀུན་དུ་སྤང་བར་བྱ་བའི་དོན་དུ་ཡང་འཐབ་བྲལ་གྱི་བདག་པོ་མུ་སུ་ལུན་དྷ་དེས། སྤྲུལ་པ་འདི་དག་རྣམས་བྱེད་པ་ཡིན་ཏེ། གཟུགས་དང་ལང་ཚོའི་
རྒྱགས་པ་རྣམས་ཀུན་དུ་ཞི་བར་བྱ་བའི་དོན་དུ་ཡང་ཡིན་ནོ། །དེ་བཞིན་དུ་ཡང་མཚོ་ཆེན་པོ་རྣམ་པར་རྒྱས་པ་དེའི་དྲུང་དེ་ན་གྲིབ་མ་སྔོན་པོ་ཞེས་བྱ་བའི་རི་ཐམས་ཅད་ནས་ཀྱང་ཤིན་ཏུ་རབ་ཏུ་དང་བའི་བཻ་ཌཱུརྱའི་རང་བཞིན་ལ་གསེར་དང་དངུལ་གྱི་ཁམས་ཀྱི་འབྱུང་ཁུངས་རྣམས་དང་ལྡན་པ་
ཐམས་ཅད་དུ་བཀྲ་ཞིང་བཀྲ་བར་གྱུར་པའི་ནགས་འབར་བའི་ཕྲེང་བ་རྣམས་དང་ལྡན་པ། འབབ་ཆུ་སྟོང་ཕྲག་བརྒྱ་གསེར་ཤིན་ཏུ་བསིལ་བ་དང་རིན་པོ་ཆེའི་འོད་ཀྱིས་ཀུན་ཏུ་སྣང་བར་གྱུར་པའི་རྩེ་མོ་ཐམས་ཅད་ལ་ཡང་ལྗོན་ཤིང་གི་ཚལ་དང་ལྡན་པ་དང་པད་མའི་རྫིང་བུ་རྣམས་ཀྱིས་
ཉེ་བར་མཛེས་པ་དང་། མེ་ཏོག་གི་འབྱུང་གནས་རྣམ་པ་དུ་མ་སྣ་ཚོགས་པ་རྣམས་ཀྱིས་ཉེ་བར་མཛེས་པ། འཁྲི་ཤིང་གི་ཁང་པ་སྟོང་གིས་རྣམ་པར་བརྒྱན་པ། ཉེ་འཁོར་རྣམ་པ་དེ་ལྟ་བུར་རྣམ་པར་མཛེས་པའི་རིའི་མཆོག་དེ་ལ། འཐབ་བྲལ་བའི་མངའ་བདག་དེས་
བདེ་བ་རྒྱ་ཆེན་པོའི་ས་ན་གནས་པའི་ལྷ་རྣམས་དང་། ལྷ་གཞན་རྣམས་ལ་ཡང་ཕན་པར་བྱ་བའི་དོན་དུ་རྫུ་འཕྲུལ་བྱས་པ་རྣམས་ནི་ལྷ་རྫས་ཀྱི་བསམ་གྱིས་མི་ཁྱབ་པའི་ངོ་བོའི་སྤྲུལ་པ་རྣམས་ཡིན་ཏེ། བདེ་བ་རྒྱ་ཆེན་པོའི་ས་ལ་གནས་པའི་ལྷ་དེ་དག་རྣམས་ལས། ཐབས་
ཐམས་ཅད་ནས་བཅུ་འགྱུར་གྱིས་གཟུགས་དང་ལང་ཚོ་དང་མདངས་དང་མགྱོགས་པ་དང་སྤྲོ་བ་དང་གར་དང་གླུ་དང་རྒོད་པ་དང་འགྱིང་བག་དང་རྩེད་འཇོ་ལ་སྤྲོ་བ་ལ་སོགས་པ་རྣམས་ཀྱིས་ཆེས་ལྷག་པའི་ལྷ་རྫས་ཀྱི་ཡུལ་གྱི་རྣམ་པ་དེ་སྲིད་པ་རྣམས་སྤྲུལ་པ་གང་ཡིན་པ་འདི་དག་གི་

ཁྱད་པར་གྱིས་ལྷ་གཞན་དེ་དག་རྣམས་ནི་བཅུར་བྱས་པའི་ཆ་ཙམ་དུ་ཡང་འགྱུར་བ་མ་ཡིན་ནོ། །རིམ་པ་ཐམས་ཅད་ཀྱིས་གཟུགས་དང་ལང་ཚོ་དང་ཚད་དང་མདོག་དང་དབྱིབས་དང་དགོད་པ་དང་འགྱིང་བག་དང་གླུ་དང་གར་དང་རྩེད་མོའི་ཡང་རིམ་པ་རྣམས་ཀྱི་རིམ་པ་
རྣམས་ཐམས་ཅད་ཀྱིས་ཀྱང་ཅུང་ཟད་མཛེས་པ་མ་ཡིན་ནོ། །རྣམ་པ་དེ་སྲིད་དུ་སྤྲུལ་པ་དེ་དག་རྣམས་ཕལ་ཆེར་ནི་གྲིབ་མ་སྔོན་པོའི་རི་དེ་ལ་སྟེ། ཉེ་འཁོར་ཀུན་ནས་བཻ་ཌཱུརྱའི་རང་བཞིན་ཡིན་པ་རྣམས་ནི་སྔ་མ་བཞིན་ནོ། །དེ་ནས་རིའི་མཆོག་གང་ཡིན་པ་དེའི་རྩེ་མོ་དང་། ཐམས་ཅད་
མཆོག་ཏུ་གྱུར་པ་དེ་དག་རྣམས་ལས་སྤྲུལ་པའི་ལྷ་དེ་དག་རྣམས་དང་། ལྷ་མོ་དག་ཀྱང་གླུ་ལེན་པར་གྱུར་པས་ཡན་ལག་ལྔ་དང་ལྡན་པར་གྱུར་པའི་རོལ་མོ་རྣམས་ཀྱང་མཉམ་པ་དང་ཆགས་པར་བྱེད་པ་དང་། སྙན་པར་གྱུར་པ་རྣམས་བྱེད་ཅིང་། གང་ན་རང་བཞིན་གྱི་ལྷ་དེ་དག་
རྣམས་གར་བྱེད་པ་དང་། འགྱིང་བར་བྱེད་པས་སྐྱེད་མོས་ཚལ་གྱི་ལྟད་མོ་བྱེད་པ་དེར་ལྷ་མོ་དེ་དག་རྣམས་དང་ལྷ་དེ་དག་རྣམས་རིམ་གྱིས་འཇུག་གོ། །དེ་ནས་ལྷ་དེ་དག་རྣམས་ཀྱིས་སྤྲུལ་པ་དེ་དག་གི་གླུའི་སྒྲ་རྣམས་ཐོས་པར་གྱུར་པ་དང་། བཅུ་འགྱུར་གྱིས་ཤིན་ཏུ་སྙན་པར་
གྱུར་པ་ནི། སྔ་མ་བཞིན་ཏེ་རང་བཞིན་གྱི་ལྷ་དེ་དག་རྣམས་རྩེ་དགའ་བ་ལ་མཆོག་ཏུ་ཡང་ཞུགས་པ་དང་། ལྷ་མོ་དེ་དག་རྣམས་ཀྱིས་ཀྱང་དེ་ཁོ་ན་བཞིན་དུ་རྩེས་པར་གྱུར་ཏོ། །དེ་ནས་སྤྲུལ་པའི་ལྷ་དེ་དག་རྣམས་ཀྱིས་དལ་བུ་དལ་བུས་ལེགས་པར་བབས་ཏེ། དེ་ནས་ཕན་ཚུན་དུ་གང་
གི་ཚེ་ཁྱད་པར་ཞུགས་པར་མཐོང་བར་གྱུར་པ་དེའི་ཚེ་རང་བཞིན་གྱི་ལྷ་དེ་དག་རྣམས་ནི་སྤྲུལ་པ་དེ་དག་རྣམས་ཀྱི་ཁྱད་པར་གྱིས་ཚུལ་ཐམས་ཅད་ཀྱིས་མི་མཛེས་སོ། །གཟུགས་ལྷག་པས་ནི་གཟུགས་ཀྱི་རྒྱགས་པ་ཉེ་བར་བཅོམ་མོ། །དེ་དག་རྣམས་ཀྱིས་བྱས་པའི་ཆ་བྱད་དུ་བྱས་པ་རྣམས་
བཅོམ་མོ། །འོད་རྣམས་ཀྱིས་ནི་རང་གི་ལུས་ལས་ཀུན་དུ་འབྱུང་བའི་འོད་རྣམས་བཅོམ་མོ། །སྤྲུལ་པའི་གླུའི་དབྱངས་རྣམས་ཀྱིས་ནི་ངོ་བོ་ཉིད་ཀྱི་གླུའི་གདངས་རྣམས་ཉེ་བར་བཅོམ་མོ། །དྲི་རྣམས་ཀྱིས་ནི་དྲི་རྣམས་བཅོམ་མོ། །སྤྲུལ་པའི་ཚད་དང་ཁ་དོག་དང་དབྱིབས་རྣམས་ཀྱིས་

ནི་ལྷ་དེ་དག་རྣམས་ལྷ་མོ་དང་ལྷན་ཅིག་ཏུ་བཅས་པ་རྣམས་ཀྱི་ཚད་དང་ཁ་དོག་དང་དབྱིབས་རྣམས་ཉེ་བར་བཅོམ་མོ། །དེ་བཞིན་དུ་ཡན་ལག་ལྔ་དང་ལྡན་པའི་ཡུལ་གྱི་བདེ་བ་རྣམས་ཀྱིས་ནི་ཡན་ལག་ལྔ་དང་ལྡན་པའི་ཡུལ་གྱི་བདེ་བ་རྣམས་ཉེ་བར་བཅོམ་མོ། །ཇི་ལྟ་ཇི་ལྟར་ངོ་བོ་ཉིད་ཀྱི་ལྷ་རྣམས་
ཀྱི་རྒྱགས་པ་ཆེན་པོ་ཐམས་ཅད་ཆུང་ངུན་དུ་བྱས་པར་འགྱུར་ཏེ། ཐབས་རྣམས་ཐམས་ཅད་ཀྱིས་གང་གི་ཚེ་ལྷ་དེ་དག་དང་ངོ་བོ་ཉིད་ཀྱི་ལྷ་དེ་དག་རྣམས་རྣམ་པར་འདྲེ་བར་འགྱུར་བ་དེའི་ཚེ་ནའོ། །དེ་ལྟར་དེ་དག་རྣམས་ཀྱིས་ངོ་བོ་ཉིད་ཀྱི་ལྷ་རྣམས་ཀྱི་གཟི་བརྗིད་དེ་དག་དེ་བཞིན་དུ་ཟིལ་གྱིས་
གནོན་ཏེ། ཇི་ལྟར་འཛམ་བུའི་གླིང་དུ་ཉི་མ་ཤར་བར་གྱུར་ན། གཟའ་དང་སྐར་མ་དང་རྒྱུ་སྐར་རྣམས་ཀྱི་གཟི་བརྗིད་ཉམས་པར་བྱེད་དོ། །དེ་བཞིན་དུ་སྤྲུལ་པའི་ལྷ་དེ་དག་རྣམས་ཀྱིས་ལྷ་རྣམས་ཐམས་ཅད་ཀྱི་འོད་ཟེར་ཟིལ་གྱིས་གནོན་ནོ། །ཇི་ལྟར་ལྷ་རྫས་ཀྱི་རོལ་མོ་རྣམས་
ཀྱིས་མི་རྣམས་ཟིལ་གྱིས་གནོན་པར་བྱེད་པ་དེ་བཞིན་དུ་རོལ་མོ་རྣམས་ཀྱང་མངོན་པར་ཟིལ་གྱིས་གནོན་ནོ། །གླུ་རྣམས་ཀྱང་དེ་བཞིན་དུ་ཟིལ་གྱིས་གནོན་ནོ། །ཚད་དང་མདོག་དང་དབྱིབས་རྣམས་ཀྱང་དེ་བཞིན་དུ་ཟིལ་གྱིས་གནོན་ཏེ། ཇི་ལྟར་འཐབ་བྲལ་བས་མི་རྣམས་ཟིལ་
གྱིས་གནོན་པ་བཞིན་ནོ། །དེ་ནས་ངོ་བོ་ཉིད་ཀྱི་ལྷ་དེ་དག་རྣམས་ངོ་ཚ་བ་དང་བཅས་པས་གང་ན་དེ་མཚོ་ཆེན་པོ་དེ་ཡོད་པའི་འགྲམ་དེར་ཉེ་བར་འགྲོ་བར་བྱེད་དེ། ངོ་ཚ་བ་དང་ངོ་མཚར་བར་གྱུར་པ་དང་བཅས་པའི་ཡིད་ཀྱིས་སོ། །དེ་ནས་སྤྲུལ་པའི་ལྷ་དེ་དག་རྣམས་མཚོ་དེའི་གང་ན་
པད་མ་ཆེན་པོ་ཡོད་པ་ཡིན་པ་དེ་དང་ཉེ་བར་མངོན་པར་གནས་ནས་གླུ་ལེན་པར་བྱེད་པར་གྱུར། གར་བྱེད་པར་གྱུར། དགོད་པར་གྱུར་པས་ཀྱང་ལྷ་རྫས་ཀྱི་འདོད་པའི་ཡོན་ཏན་ལྔ་ཕུན་སུམ་ཚོགས་པར་གྱུར་པའི་བདེ་བ་རྣམས་དང་ཡང་དག་པར་ལྡན་པས་མཚོ་དེའི་སྟེང་གི་པད་མ་ཆེན་
པོའི་འདབ་མ་རྣམས་ཀྱི་བར་དུ་སོང་ནས་གར་བྱེད་པ་དང་། དགོད་པར་བྱེད་པ་དང་། འགྱིང་བར་བྱེད་པ་དང་། ཕན་ཚུན་གྲོགས་བྱེད་པས་ཀྱང་རྒྱགས་པ་ལ་དོན་གཅིག་པ་རྣམས་ཡིན་ཏེ། འཐབ་བྲལ་བ་རྣམས་ལས་ཆེས་ལྷག་པའི་ལུས་ཅན་དེ་དག་རྣམས་ཀྱིས་རང་བཞིན་གྱི་

ལྷ་རྣམས་ལ་ཕན་པར་བྱ་བའི་དོན་དུ་དེའི་ཚེ། ཚིགས་སུ་བཅད་པ་མངོན་པར་བསྙད་པ་གླུ་དང་ལེགས་པར་འདྲེས་པ་རྣམས་བཤད་པ། ཇི་ལྟར། ལྷ་ཡི་བདེ་བ་ཐམས་ཅད་ནི། །ལས་དང་ཆ་འདྲ་མཐོང་བ་ཡིན། །གསོན་པ་དང་ནི་བདེ་བ་ཡང་། །ལས་ཟད་
པས་ནི་འཇིག་པ་ཡིན། །དེ་ཕྱིར་རྣམ་པ་དུ་མའི་བདེ། །ཇི་སྲིད་ཟད་པར་མ་གྱུར་པ། །དེ་སྲིད་དུ་ནི་བསོད་ནམས་ཀྱིས། །བསོད་ནམས་མ་བྱས་ལས་སྡུག་བསྔལ། །གསོན་ཚེ་མྱུར་བ་ཉིད་དུ་འགྲོ། །ལང་ཚོ་མྱུར་བར་འགྲོ་བ་ཡིན། །འཆི་བདག་མྱུར་བ་ཉིད་འོང་གིས། །
བག་མེད་པ་ལ་དགའ་མ་བྱེད། །ལུས་ཅན་ཀུན་གྱི་བདེ་བ་ཀུན། །འཇིག་པའི་རྒུད་པར་འགྱུར་བ་ཡིན། །གསོན་པ་ཡང་ནི་མཐར་འཇོམས་ན། །བག་མེད་ལ་ནི་དགའ་མ་བྱེད། །དབང་པོ་རྣམས་ཀྱི་སྤྱོད་ཡུལ་ལ། །མི་སྐྱེ་བར་ནི་བྱ་མི་ནུས། །དབང་རྣམས་རང་གི་སྤྱོད་
ཡུལ་ལས། །གང་ཕྱིར་ཤེས་པས་ཟློག་པར་བྱེད། །དེ་ཕྱིར་རྟག་ཏུ་ཤེས་པ་བསྟེན། །ཤེས་པ་ཡོངས་སུ་སྤོང་བ་དང་། །སྐྱོན་རྣམས་རྟག་ཏུ་སྤོང་མི་འགྱུར། །དེ་ནི་དོན་མིན་མྱུ་གུ་ཡིན། །བག་མེད་པ་ལས་འདོད་ཆགས་སྐྱེ། །འདོད་ཆགས་ལས་ནི་སྡུག་བསྔལ་འབྱུང་། །
སྡུག་བསྔལ་གྱིས་བསྒྲུབས་སྐྱེ་བ་འདི། །དེ་དག་འཁོར་བའི་ལམ་ཡིན་ནོ། །བག་མེད་ཡོངས་སུ་སྤངས་པ་གང་། །ཡུལ་འདི་སྟེན་པར་མི་བྱེད་པ། །དེ་ལ་སྐྱོན་ནི་མི་དམིགས་ལ། །སྐྱོན་གྱི་དངོས་པོ་གྲོལ་བ་ཡིན། །སྡུག་བསྔལ་ལྗོན་ཤིང་རྩ་བར་ནི། །བག་མེད་
འདི་གཅིག་རྣམ་པར་གནས། །བག་མེད་པ་ལ་མཆོག་གྱུར་པས། །སྐྱེ་འདི་ལམ་ནི་ཐམས་ཅད་འཇོམས། །གཟུགས་ནི་རྟག་པ་མཐོང་བ་མེད། །མཉམ་དུ་འགྲོ་བའི་བདེ་བ་མེད། །སྲིད་ནས་སྲིད་པར་དངོས་པོ་འདིའི། །ཀུན་ཐོབ་པ་ཡང་རྣམ་འཇིག་འགྱུར། །ཡུལ་
ནི་འཆིང་བ་རྣམས་ཀྱི་རྒྱུ། །ཇི་ལྟ་ཇི་ལྟར་བསྟེན་བྱས་པ། །དེ་ལྟ་དེ་ལྟར་རྣམ་འཕེལ་ཏེ། །བུད་ཤིང་ལས་ནི་མེ་ཇི་བཞིན། །ངོམས་པ་མེད་པའི་སྡུག་བསྔལ་འདི། །འདི་ནི་བདེ་བར་འདིར་མི་བརྗོད། །འཁོར་བ་ལས་ནི་ཁ་ལོག་པའི། །གང་ཞིག་སྲེད་བྲལ་དེ་བདེ་ཡིན། །

དེ་ཕྱིར་གང་ཞིག་མཐར་ཐུག་བདེ། །བདེ་བ་དེ་ནི་བདེ་བར་བརྗོད། །འདོད་པ་འབྱུང་མིན་བདེ་བ་ནི། །མཐར་ཐུག་པ་ཡི་བདེ་བ་ཡིན། །དེ་ལྟར་བག་མེད་པ་རྣམས་ཀྱིས་ཤིན་ཏུ་བཅོམ་པར་མ་གྱུར་པའི་མུ་སུ་ལུན་དྷ་ཡིས་སྤྲུལ་པའི་ལྷ་དེ་དག་རྣམས་ཀྱིས་ལྷ་དེ་དག་རྣམས་ལ་གླུ་
བསྙད་ནས་མཆོག་ཏུ་སྙན་པ། སྔ་ན་མ་ཐོས་པའི་གླུ་རྣམས་ལེན་པར་བྱེད་ལ། ཇི་ལྟར་བསྟན་པ་དང་ཀུན་ཏུ་བསྲེས་པའི་སྤྲུལ་པའི་དེ་ཁོ་ན་ཉིད་རྣམས་ངོ་བོ་ཉིད་ཀྱི་ལྷ་དག་གིས་ཐོས་ནས་ཉན་པར་བྱེད་དོ། །དེ་ནས་ལྷ་དེ་དག་གིས་ཚིགས་སུ་བཅད་པའི་དབྱངས་ཀྱིས་བསྙད་པ་ཐོས་ནས།
སྲེད་པ་སྔ་མ་ལ་གོམས་པར་བྱས་པར་གྱུར་པ་ཡོངས་སུ་དག་པའི་རྒྱུད་གང་ཡིན་པ་ཇི་ལྟར་ལྷ་དེ་དག་གིས་ཆེས་གཙོ་བོར་གྱུར་པ་རྣམས་ཀྱིས་གླུ་དབྱངས་ཀྱི་དོན་ཀུན་དུ་རྟོགས་ནས་སྐྱོ་བ་སྐྱེ་བར་འགྱུར་རོ། །དེ་ནས་ཡང་བདག་ཅག་རྣམས་ཀྱི་དྲུང་ན་རིམ་པ་རྣམས་ཐམས་ཅད་ཀྱིས་ཁྱད་པར་དུ་འཕགས་
པར་གྱུར་པ་དེ་དག་གང་གིས་ཚིགས་སུ་བཅད་པའི་དབྱངས་འདི་དག་རྣམས་ལེགས་པར་བཤད་པ་ཡིན་ཡང་དེ་དག་རྣམས་གང་ཡིན་པའི་དྲུང་ན། བདག་ཅག་རྣམས་ཅིའི་ཕྱིར་ཐམས་ཅད་དུ་ཤིན་ཏུ་དམན་པར་གྱུར་ཞེས། དེ་ལྟར་ཐབས་དེ་དག་རྣམས་ཀྱིས་འཐབ་བྲལ་གྱི་བདག་པོས་སྙིང་ལ་
ལེགས་པར་གོ་བར་བྱས་ཏེ། བག་མེད་པ་རྣམས་དང་བྲལ་བར་ཡང་བྱས་སོ། །ཐབས་གཞན་རྣམས་ཀྱིས་ཀྱང་ཕན་པར་བྱས་པ་ཡིན་ལ། དེ་ལྟར་ལྷ་དེ་དག་རྣམས་གཟུགས་ལ་སོགས་པའི་བདེ་བའི་རྒྱགས་པ་དག་གིས་རྒྱགས་པར་གྱུར་ནས། ལོག་པར་ལྟུང་བར་འགྱུར་བ་རབ་ཏུ་མ་མཐོང་
བ་དེ། ཕྱིས་འཆི་འཕོ་བའི་དུས་ན་འགྱོད་པའི་མེས་བསྲེགས་ནས་ཕྱི་ནས་ཡང་དམྱལ་བའི་མེས་སྲེག་པར་འགྱུར་བ་ཡིན་ནོ། །དེ་ལ་ཐབས་འདི་དག་གིས་རང་བཞིན་པའི་ལྷ་དེ་དག་རྣམས་ལ་ཕན་པར་འདོད་པས་མུ་སུ་ལུན་དྷ་དེས་ཀུན་སྐྱོ་བ་སྐྱེད་དོ། །དེ་ནས་ལྷ་དེ་དག་རྣམས་ཡིད་བྱུང་བར་
གྱུར་པ་རྟོགས་ནས། ཡང་སྤྲུལ་པ་གཞན་ཡང་ཤིན་ཏུ་ཡིད་འབྱུང་བའི་རྒྱུར་གྱུར་པའི་སྤྲུལ་པ་རྣམས་བྱེད་དེ། ཇི་ལྟར་པད་མའི་འདབ་མ་རྣམས་ཉིད་ལ་རྣམ་གྲངས་དུ་མ་རྣམས་ཀྱིས་དགའ་བར་བྱེད་པ་དང་། ཡོངས་སུ་གླུ་ལེན་པར་བྱེད་པ་དང་། རྣམ་གྲངས་དུ་མར་འགྱིང་བར་

ཡང་བྱེད་པ་དེ་ལྟར་བྱེད་དོ། །ཇི་ལྟར་རང་བཞིན་གྱི་ལྷ་དེ་དག་རྣམས་ཀྱིས་ནམ་ཡང་འགའ་ཞིག་ཏུ་ཡང་མཐོང་མ་མྱོང་བའི་རྩེད་མོ་དེ་དག་རྣམས་དེ་ལྟར་རྣམ་པ་དུ་མ་རྣམས་སུ་དང་རྣམ་པར་རྟོག་པ་དུ་མ་རྣམས་སུ་དང་ཆེས་དགའ་བ་དུ་མ་རྣམས་སུ་ངོ་བོ་ཉིད་ཀྱི་ལྷ་དེ་དག་
རྣམས་ཀྱི་བག་མེད་པ་དང་ངེས་པར་བྲལ་བར་བྱ་བའི་དོན་དུ་དང་། ཇི་ལྟར་དེ་དག་རྣམས་ཀྱི་རྒྱགས་པ་ཀུན་ནས་སྤངས་པར་འགྱུར་བར་རོ། །ངོ་བོ་ཉིད་ཀྱི་ལྷ་དེ་དག་རྣམས་ཀྱིས་སྤྲུལ་པའི་ལྷ་དེ་དག་རྣམས་ཀྱི་གླུ་ཤིན་ཏུ་སྙན་པར་གྱུར་པ་རྣམས་ཇི་ལྟ་བ་བཞིན་དུ་ཐོས་པས་ངོ་ཚ་བར་
གྱུར་ནས། གླུ་ལེན་པར་མི་བྱེད་པ་དང་གར་ཡང་མི་བྱེད་འགྱིང་བར་ཡང་མི་བྱེད་དགའ་བར་ཡང་མི་བྱེད་ཀུན་ཏུ་སྤྱོད་པར་ཡང་ནི་མི་བྱེད་ཀྱི་སྤྲུལ་པ་དེ་དག་རྣམས་ཀྱི་ལ་ལྟ་བར་འདོད་པའི་ཡིད་རྩེ་གཅིག་པས་ཐམས་ཅད་ཉིད་གནས་པར་གྱུར་ཏོ། །དེ་དག་རྣམས་ཀྱིས་ཀྱང་རྣམ་པ་དུ་
མར་གར་དང་གླུ་དང་དགོད་པ་དང་འགྱིང་བག་དང་རྣམ་པར་རྟོག་པ་དུ་མར་དང་། དགའ་བར་འགྱུར་བ་དུ་མར་གཞན་རྣམས་དང་འདྲ་བ་མ་ཡིན་པའི་རྣམ་པ་དུ་མ་རྣམས་ཀྱང་པད་མའི་འདབ་མ་རྣམས་ལ་སོང་ནས་ལྷ་དེ་དག་རྣམས་གླུ་ལེན་པར་བྱེད་པ་དང་གར་ཡང་བྱེད་དོ། །དེ་ནས་
གང་གི་ཚེ་རང་བཞིན་གྱི་ལྷ་དེ་དག་རྣམས་ཀྱིས་ཡིད་ལས་སུ་རུང་བར་བྱས་པར་གོ་ནས། མུ་སུ་ལུན་དྷ་དེས་སྤྲུལ་པ་གཉིས་པ་བྱེད་པ་རྣམས་ནི་ཇི་ལྟར་པད་མའི་འདབ་མ་རྣམས་ལ་གནས་ནས་གླུ་ལེན་པར་བྱེད་པའི་ལྷ་དེ་དག་རྣམས་ཉིད་ཀྱི་པད་མའི་འདབ་མ་གཅིག་སྤྲུལ་པའི་
ལྷ་རྣམས་ཀྱིས་ལེགས་པར་གང་བ་རབ་ཏུ་ལྟུང་ངོ་། །དེ་ནས་མཚོ་དེ་ལ་ལྷ་དེ་དག་རྣམས་ལས་ཁ་ཅིག་ནི་ནུབ་པར་གྱུར་ཏོ། །ཁ་ཅིག་ནི་བྱུང་ནས་ཡང་ནུབ་བོ། །ལ་ལ་དག་ནི་ལུས་རྣམས་ཆུ་ལ་བརྟེན་ནས་རྐྱལ་བར་བྱེད་དོ། །ཁ་ཅིག་ནི་ཕན་ཚུན་ཀུན་དུ་འཁྱུད་པར་བྱེད་པ་དང་ནུབ་པར་
ཡང་གྱུར་ནས། ཇི་ལྟ་བ་བཞིན་དུ་སྐྱོབས་དང་བསྐྱབ་པར་གྱིས་དང་ཞེས་དེ་ལྟར་ཕན་ཚུན་དུ་འབོད་པར་བྱེད་ཅིང་། འབོད་པར་བྱེད་པས་ཀྱང་ཕན་ཚུན་དུ་རྟེན་པར་བྱེད་པ་དང་། ངུ་བར་ཡང་བྱེད་པ་དང་ལྟུང་བ་དང་བྱིང་བར་ཡང་གྱུར་པའི་ཉམ་ང་བ་ཆེན་པོ་དང་འཇིགས་པ་ཆེན་པོ་དང་སྡུག་

བསྔལ་ཆེན་པོ་རྣམ་པ་དུ་མ་དེ་དག་རྣམས་མཚོ་ཆེན་པོ་དེའི་འགྲམ་དུ་སོང་བར་གྱུར་པའི་ལྷ་དེ་དག་རྣམས་ཀྱིས་ཁྱད་པར་དུ་མཐོང་ངོ་། །དེ་ནས་འདབ་མ་གཅིག་དེ་དག་ཏུ་ཟགས་པ་དང་མཉམ་པ་ཐབས་ཀྱི་རྗེས་ཐོགས་སུ་འདབ་མ་གཞན་སྤྲུལ་པའི་ལྷ་རྣམས་ཀྱིས་ཀུན་དུ་གང་བར་གྱུར་པའི་
འདབ་མ་དེ་དང་དེ་དག་རྣམས་ཟགས་ཤིང་ཟགས་ཤིང་རྣམ་པར་རྒྱས་པའི་མཚོ་ཆེན་པོར་ལྷུང་ལ། སྤྲུལ་པའི་ལྷ་དེ་དག་གང་ཡིན་པ་དེ་དག་རྣམས་ཐམས་ཅད་ཀྱང་འཇིགས་པ་ཆེན་པོ་རྣམས་སུ་ལྷུང་བར་གྱུར་ཏེ་ཁ་ཅིག་ནི་ཆུར་ནུབ་བོ། །ཁ་ཅིག་འགྱུར་ལྡོག་བྱས་པས་ཤེད་སྨད་པར་གྱུར་ནས་
རྣམ་པར་ཁྲོ་བར་བྱེད་དོ། །ཁ་ཅིག་ནི་དེ་ན་གར་སོང་བ་མཐོང་བར་གྱུར་པ་ཉིད་ཀྱང་མ་ཡིན་ནོ། །ཁ་ཅིག་ནི་ཆུར་འགྱུར་ལྡོག་བྱས་པས་ཤི་བར་གྱུར་ཏོ། །ཁ་ཅིག་ནི་རྣམ་པར་ཁྲོ་འཚིག་གོ། །དེ་བཞིན་དུ་ལྷའི་བུ་མོ་རྣམས་ཀྱང་ཤིན་ཏུ་རྣམ་པར་ཉམས་པར་གྱུར་ཅིང་རྣམ་པར་ཁྲོས། འཁྲུགས་
པ་དང་བྱིང་བར་གྱུར་པས་ལྷ་དེ་དག་རྣམས་ལ་འཇུས་འཕྱངས་ནས་ནུབ་པར་འགྱུར་རོ། །ཇི་ལྟར་གང་གི་ཚེ་གྲུ་ཞིག་པར་གྱུར་ན་དེའི་ཚེ་གང་དག་དེར་ཞུགས་པ་དེ་དག་རྣམས་མེད་པ་དང་བྱིང་བར་འགྱུར་རོ། །དེ་བཞིན་དུ་མི་དགེ་བའི་ཆུ་རྣམས་ཀུན་དུ་རྒལ་བར་བྱེད་པ་ན། སྤྲུལ་པའི་ལྷ་དེ་
དག་རྣམས་ཀྱང་འདབ་མ་རྣམས་ལས་ལྷུང་བས་ངེས་པར་ནུབ་པར་འགྱུར་རོ། །དེའི་རྗེས་ལ་རྣམ་པར་རྒྱས་པའི་མཚོ་ཆེན་པོར་པད་མའི་འདབ་མ་གསུམ་པ་ལྷུང་བར་གྱུར་པས་དེ་ན་ཡང་ལྷ་གང་དག་གནས་པ་དེ་དག་རྣམས་ཐམས་ཅད་ཀྱང་། རྡོ་བ་བཞིན་དུ་འོག་ཏུ་བྱིང་ཞིང་ནུབ་ནས་ཐམས་
ཅད་ཀྱང་མ་མཐོང་བར་སོང་ངོ་། །དེའི་རྗེས་ཐོགས་ལ་སྤྲུལ་པའི་ལྷས་ཀུན་ནས་གང་བའི་འདབ་མ་གཞན་དག་ཀྱང་རབ་ཏུ་ལྷུང་བར་གྱུར་ཏེ། དེ་དག་ན་ཡང་དེའི་ལྷ་གང་དག་དེ་ལ་ཀུན་ཏུ་འདུས་ཤིང་ལེགས་པར་ཚོགས་པ་དེ་དག་རྣམས་ཀྱང་མཚོ་རྣམ་པར་རྒྱས་པ་དེ་དག་ཏུ་ངེས་པར་ལྷུང་
བར་གྱུར་ཏོ། །ལྷུང་བར་གྱུར་ནས་ཀྱང་ཕན་ཚུན་ཀུན་དུ་ཆགས་པར་གྱུར་ཅིང་རྣམ་པར་ཁྲོས་པས་ཀྱང་ཕན་ཚུན་དུ་འབོད་པར་བྱེད་ཅིང་ཀུན་དུ་འབྱིང་བར་གྱུར་པས་ཀྱང་། དུས་རིང་དུ་རྣམ་པར་རྗོད་པར་བྱེད་ཅིང་རྣམ་པར་བརྗོད་པས་ཀྱང་མཚོ་དེའི་ནང་དུ་ལྷུང་བར་འགྱུར་བ་ནི། དེ་

ལྟར་ལན་བརྒྱ་ཕྲག་རྣམས་སུ་དང་ཇི་སྟེ་ན་ལན་སྟོང་ཕྲག་རྣམས་སུ་ཡང་བྱེ་བྲག་མང་དུ་རྣམ་པར་བརྗོད་ཅིང་། མཚོ་དེའི་ནང་དུ་ངེས་པར་ལྷུང་ཞིང་ངེས་པར་བྱིང་བ་ནི་རྡོ་བ་བཞིན་ཏེ། ལན་དུ་མར་ཡང་འོག་གི་ཡང་སྲིད་པ་རྣམས་སུ་འགྲོ་བར་འགྱུར་རོ། །དེའི་
རྗེས་ཐོགས་ལ་ལྷ་རྣམས་ཉིད་ཀྱིས་ཀུན་ནས་གང་བའི་པད་མའི་འདབ་མ་གཞན་རྣམས་ཀུན་ཏུ་ལྷུང་བར་གྱུར་ཏོ། །དེ་དག་རྣམས་ལྷུང་བར་གྱུར་པ་དེའི་རྩ་བ་ལས་ཀྱང་སྒྲ་ཆེན་པོ་རྣམ་པ་དུ་མར་ཀུན་ཏུ་བྱུང་བར་གྱུར་པ་རྣམས་ནི། དཔེར་ན་རིའི་རྩེ་མོ་ཀུན་ཏུ་ཉིལ་བའམ་ས་གཞི་
གཡོས་པའམ་རྒྱ་མཚོ་འཁྱོམས་པར་གྱུར་པ་རྣམས་ཀྱང་ཀུན་ཏུ་འབྱུང་བར་གྱུར་ཏེ། དེ་ལྟར་འདིར་ཏུག་ཅོམ་གྱི་སྒྲ་དེ་དག་རྣམས་རབ་ཏུ་བྱུང་བར་གྱུར་ཏོ། །སྒྲ་དེ་དག་རྣམས་ཐོས་ནས་ཀྱང་གང་དག་རང་བཞིན་དུ་གནས་པའི་ལྷ་དེ་དག་རྩ་བ་ནས་འགྱེལ་ཞིང་གནས་པར་གྱུར་ཏེ། རྣམ་
པ་དུ་མར་ཁྱད་པར་དུ་མི་རིགས་པ་དེ་དག་རྣམས་དེ་དག་གིས་མཐོང་བར་གྱུར་ནས། ཤིན་ཏུ་ཡི་མུག་ཅིང་འཇིགས་པ་དང་མཆོག་ཏུ་སྐྱོ་བའི་ཡིད་དུ་གྱུར་ཏོ། །གཞན་ཡང་གང་ན་མཚོར་སོང་བའི་སྤྲུལ་པའི་ལྷ་དེ་དག་རྣམས་རབ་ཏུ་ལྷུང་བར་གྱུར་པའི་དེ་དག་འཁོར་རྣམས་ཀྱིས་
ཡོངས་སུ་བསྐོར་ནས་ཤིན་ཏུ་སྡུག་བསྔལ་བའི་ཡིད་ཀྱི་གནས་པས་གནས་ཏེ། སྔ་ན་མ་མཐོང་བ་འདི་རྣམས་ཅི་ཡིན་ལྷ་རྣམས་ཐམས་ཅད་ཀྱིས་ཀྱང་སྔར་ནམ་ཡང་དེ་ལྟར་ཉམས་སུ་མྱོང་བར་མ་གྱུར་པ། ཤིན་ཏུ་མི་བཟད་པའི་སྡུག་བསྔལ་བའི་གོ་འཕང་ལྷ་རྣམས་ཀྱིས་ཉམས་
སུ་མྱོང་བ་ཡིན་ནོ་ཞེས་རྣམ་པ་དེ་ལྟ་བུའི་མཆོག་ཏུ་འཇིགས་པར་གྱུར་པའི་ཤིན་ཏུ་མི་རིགས་པ་རྣམས་དེ་སྐད་དུ་རྗོད་པར་ཡང་བྱེད་དོ། །དེ་ལྟར་དེ་དག་རྣམས་སེམས་པར་བྱེད་པ་ཉིད་དང་ཕན་ཚུན་དུ་གླེང་བར་ཡང་བྱེད་པ་དང་མཆོག་ཏུ་སྐྱོ་བའི་ཡིད་དུ་ཡང་འགྱུར་རོ། །འདབ་མ་གཞན་
ཉིད་ཀྱང་རབ་ཏུ་ལྷུང་བར་གྱུར་པས་ལྷ་མོ་རྣམས་ཐམས་ཅད་ཀྱང་ཤིན་ཏུ་ཉམས་སྨས་པར་གྱུར་ནས་ཕན་ཚུན་དུ་རྣམ་པར་ཁྲོ་བར་བྱེད་པ་དང་། ཧཱ་ཡོངས་སུ་སྐྱོབས་དང་ཞེས་བྱ་བ་དེ་ལྟར་ཕན་ཚུན་དུ་རྗོད་པར་ཡང་བྱེད་དོ། །ཇི་ལྟར་གང་དག་བག་མེད་པར་གྱུར་པས་བག་མེད་པར་རྒྱུ་

བར་བྱེད་པ་དེ་དག་རྣམས་ཀྱི་ནི་གནས་སྐབས་འདི་ཡིན་ལ། རྣམ་པར་ལྷུང་བའི་རྣམ་པ་རྣམས་ཀྱང་འདི་འདྲ་བ་ཡིན་ནོ། །དེ་ལྟར་ཕན་ཚུན་རྣམ་པར་ཁྲོ་བ་རྣམས་ལས་རང་བཞིན་པའི་ལྷ་དེ་དག་རྣམས་ཀྱི་ཡིད་ལས་སུ་རུང་བར་བྱས་ཏེ། བག་མེད་པ་ཉམས་དམའ་བར་གྱུར་པ་རྣམས་
ནི་མྱ་ངན་ལས་འདས་པའི་ཆོས་རྣམས་བསྒྲུབ་པ་ལ་ལས་སུ་རུང་བ་ཡིན་པར་མཐོང་ནས། མཆོག་ཏུ་གཞན་ལ་ཕན་པ་ལ་རབ་ཏུ་ཞུགས་པའི་མུ་སུ་ལུན་དྷ་དེས་དེ་དག་རྣམས་ལ་ཡང་ཕན་པའི་དོན་དུ་ཡང་ལྷ་དེ་དག་དང་བཅས་པའི་པད་མའི་སྙིང་པོ་དེ་ཉིད་མི་མཐོང་བར་བསྒྱུར་རོ། །
དེ་ཡིས་འགྲོ་བའི་ཚོགས་ཆེན་པོ་བག་མེད་པས་ན་བག་མེད་པར་རྣམ་པར་སྤྱོད་པར་བྱེད་པ་གང་ཡིན་པ་དེ་དག་རྣམས་ཀྱི་ཡིད་དགེ་ལེགས་དང་ལྡན་པར་གྱུར་ཏོ། །དེ་ལྟར་ལེགས་པར་སྐྱེས་པར་གྱུར་ནས་དུས་འདི་ཉིད་དུ་ནི་འདི་དག་རྣམས་དམ་པའི་ཆོས་བསྒྲགས་པ་རབ་ཏུ་འཛིན་
པར་འགྱུར་ཏེ་དམ་པའི་ཆོས་བསྒྲག་པར་བྱའོ། །དེ་ནས་དེར་དེ་ལྟར་རིག་ནས་མཚོ་དེར་འཇིགས་པ་ཆེན་པོའི་རིམ་པ་དུ་མ་གཞན་ཉིད་ཀྱང་སྤྲུལ་པར་བྱེད་པ་ཡིན་ཏེ། འདབ་མ་བརྒྱ་ཡང་འཇིག་པ་དང་སྤྲུལ་པའི་ལྷ་རྣམས་ཀྱང་འཇིགས་པ་ཆེན་པོ་རྣམ་པ་དུ་མ་དང་། ཕུང་ཉེས་
རྣམས་དང་མཚོ་ལ་ཡང་འབྱིང་བར་འགྱུར་བ་དང་། དེ་བཞིན་དུ་རྣམ་པ་དུ་མར་ཀུན་དུ་རྗོད་པར་བྱེད་པ་དང་ཡིད་ཉམས་སྨས་པ་ཀུན་དུ་འབྱུང་བ་དང་། འཆི་བར་འགྱུར་བ་དུ་མ་ཡང་སྤྲུལ་པར་གྱུར་ཏོ། །དེ་དུས་རིང་དུ་རྟོགས་པར་བྱེད་དེ། དེ་དག་གིས་ཀྱང་རང་བཞིན་
གྱིས་ལྷ་དེ་དག་གི་འགྲོས་བཅོམ་ཞིང་། ཇི་ལྟ་བ་བཞིན་དུ་ཡིད་ཉམས་སྨད་ནས་གཞན་དུ་འགྲོ་བར་བྱེད་པ་ན་ཡང་དེ་ལྟར་བྱུང་བའི་འགྲོས་བཅོམ་ནས་ཇི་ལྟར་དེ་དག་གིས་མཐོང་བར་འགྱུར་བར་བྱེད་དོ། །མཐོང་བའི་རྗེས་ཐོགས་ཉིད་ལ་ཡིད་ཤིན་ཏུ་ཉམས་དམས་ཤིང་སྐྱོ་བ་སྐྱེ་བ་
འབྱུང་བར་འགྱུར་རོ། །དེ་ལྟར་ཐམས་ཅད་བྱས་ནས་པད་མའི་ནང་གི་སྙིང་པོ་ལ་རྗེས་སུ་ཞུགས་ཏེ། བག་མེད་པའི་ལྷ་དེ་དག་རྣམས་ཉིད་དང་ལྷན་ཅིག་ཏུ་ལྟ་བར་བྱེད་པ་དང་ལྷན་ཅིག་ཏུ་སྤྱོད་པར་ཡང་གྱུར་པ་ན་ཡང་། ཤར་བར་གྱུར་པ་ལེགས་པར་མངོན་པར་མཐོང་བ་དང་གཞན་

ལ་ཕན་པ་དང་རྗེས་སུ་འཛིན་པ་ལ་རབ་ཏུ་ཞུགས་པ་དང་། མཆོག་ཏུ་སྙིང་རྗེ་ཆེ་བ་དང་གཞན་རྣམས་ལ་ཕན་པ་དང་རབ་ཏུ་ལྡན་པས་ལེགས་པར་ཞུགས་པས་ཀྱང་ལྷ་དེ་དག་རྣམས་ཀྱིས་རྗེས་སུ་འབྲང་བ་དང་བཅས་པས་པད་མའི་སྙིང་པོ་དེ་ཀུན་དུ་བཏང་བར་གྱུར་ཏོ། །
སྤྲུལ་པ་དེ་དག་རྣམས་ཀྱང་མི་སྣང་བར་བྱས་ནས་དབུགས་འབྱིན་པར་བྱེད་དོ། །ཇི་ལྟར་ཤིན་ཏུ་བར་ཡང་འཇིགས་པའི་གནས་རྣམས་སུ་ལྷ་དག་འགྲོ་བར་བྱེད་པ། ཤིན་ཏུ་འཇིགས་པར་གྱུར་པའི་གནས་རྣམས་སུ་རབ་ཏུ་འགྲོ་བ་ན་བག་མེད་པས་འཇིགས་པའི་གནས་རྣམས་སུ་
འགྲོ་བར་མ་བྱེད་ཅིག །བག་མེད་པས་རྣམ་པར་རྒྱུ་བ་རྣམས་ཀྱི་གནས་སྐབས་ནི་འདི་དག་ཡིན་ནོ། །བག་མེད་པས་རྒྱུ་བར་བྱེད་པ་རྣམས་ནི་བག་མེད་པའི་རྩ་བ་ལས་ཤིན་ཏུ་འཇིགས་པར་འགྱུར་བ་ཡིན་ཏེ། བག་མེད་པ་ལ་སྡུག་བསྔལ་རྣམས་མི་འབྱུང་བ་ནི་འགའ་ཡང་མེད་དོ། །
དེ་ནས་དུས་དེ་དག་ཏུ་མུ་སུ་ལུན་དྷས་ཚིགས་སུ་བཅད་པའི་དབྱངས་རྣམས་བརྗོད་པ། ཇི་ལྟར། བག་མེད་ལ་ནི་མངོན་དགའི་བྱིས། །རྟག་ཏུ་སྡུག་བསྔལ་སྐལ་ལྡན་ཡིན། །གང་ཡང་བག་མེད་རྣམ་པར་སྤངས། །རྟག་ཏུ་བདེ་བའི་སྐལ་ལྡན་དེ། །སྡུག་བསྔལ་ལྗོན་ཤིང་
ཐམས་ཅད་ཀྱི། །རྩ་བ་བག་མེད་པར་བརྗོད་དོ། །དེ་ཕྱིར་སྡུག་བསྔལ་ཡོངས་སྤོང་བས། །བག་མེད་པ་ནི་རྣམ་པར་སྤོངས། །དེ་ནས་ལྷ་རང་བཞིན་པ་དེ་དག་གིས་ཀྱང་མུ་སུ་ལུན་དྷ་དེ་མངོན་པར་མཐོང་ནས། དེ་དག་རྣམས་ཡིད་རྣལ་དུ་ཕེབས་པ་དང་ཆེས་རབ་ཏུ་དགའ་བར་གྱུར་
ནས། གང་ན་འཐབ་བྲལ་གྱི་མངའ་བདག་དེ་ཡོད་པ་དེར་ཐམས་ཅད་ཉིད་ཉེ་བར་བརྒྱུགས་སོ། །ཇི་ལྟར་ལྷ་བདག་ཅག་རྣམས་ཀྱི་མགོན་པོ་དེ་བདག་ཅག་རྣམས་ཀྱི་མགོན་པོ་བདག་ཅག་འཐབ་བྲལ་བ་རྣམས་ཀྱི་མངའ་བདག་དེ་ནི་པད་མའི་སྙིང་པོ་ལ་ལྷའི་ཚོགས་རྣམས་ཐམས་ཅད་ཀྱིས་ཡོངས་
སུ་བསྐོར་ནས་ལེགས་པར་གནས་ཏེ། བདག་ཅག་རྣམས་རྗེས་སུ་འཛིན་པར་བྱེད་པའི་རྒྱུ་མཚན་དུ་འདིར་བྱོན་ནོ། །དེ་ལྟར་ཕན་ཚུན་དུ་རིག་པར་གྱུར་ནས་གང་ན་པད་མའི་སྙིང་པོ་ཡོད་པ་དེར་ཐམས་ཅད་ཉིད་ཉེ་བར་འགྲོ་བར་བྱེད། དེ་ནས་ཉེ་བར་སོང་བ་དང་པད་མའི་སྙིང་པོ་ལ་རང་ཉིད་ལེགས་པར་

གནས་པ་གང་ཡིན་པ་འདི་ནི་མུ་སུ་ལུན་དྷ་ཀུན་དུ་གནས་པ་ཡིན་ནོ། །པད་མའི་སྙིང་པོའི་སེང་གེའི་ཁྲི་ལ་ཁ་དོག་མཚུངས་པའི་གཟུགས་དང་ལྡན་པ་རྣམས་ཀྱི་ལྷ་གཞན་གྱིས་ཞབས་འབྲིང་བྱས་ནས་ཉེ་བར་འགྲོ་བ་ན་ལྷ་དེ་དག་གིས་མུ་སུ་ལུན་དྷ་དེ་ལ་འདི་སྐད་ཅེས་བརྗོད་དེ། ལྷ་ལགས་ལྷ་འདི་
དག་རྣམས་གང་ཡིན་པ་ལ་དེ་ལྟར་མཐོ་འཚམ་པར་བྱེད་པ་འདི་དག་ཅི་ལགས། འཆིང་བར་བྱེད་པ་དང་ཀུན་དུ་སྐོར་བར་བྱེད་པ་དང་། ཆུ་རྣམས་ལ་ཡང་ཀུན་དུ་ནུབ་པར་བྱེད་པར་གྱུར་པ་དང་རྣམ་པར་ཁྲོ་བར་ཡང་བྱེད་པ་དང་རྣམ་པ་མང་པོའི་གནས་སྐབས་རྣམས་ཀྱང་བྱེད་དུ་འཇུག་ལགས་ན། དེ་ནས་མུ་སུ་ལུན་དྷ་དེས་
ལྷ་དེ་དག་རྣམས་ལ་འདི་སྐད་ཅེས་བརྗོད་དེ། ཇི་ལྟར་སྲོག་ཆགས་སུ་གྱུར་པ་རྣམས་ཐམས་ཅད་ཀྱིས་ནི་ཅི་ནས་ཀྱང་མྱོང་བར་བྱ་བ་གང་ཡིན་པ་ནི་བག་མེད་པའི་སྐྱོན་འདི་དག་རྣམས་ཡིན་པར་ཁྱེད་རྣམས་ཀྱིས་ལེགས་པར་མ་གོའོ། །དེ་ནས་དེའི་དུས་ན་མུ་སུ་ལུན་དྷས། ཚིགས་སུ་བཅད་
པའི་དབྱངས་ཀྱིས་བསྙད་པ། ཇི་ལྟར། འབྱུང་པོ་ཐམས་ཅད་ཀྱིས་མི་མཐོང་། །ལས་རྣམས་ཀུན་གྱིས་རྒྱལ་བ་མིན། །འཇིག་རྟེན་ཐམས་ཅད་རྣམ་འཇིག་པ། །འཆི་བདག་ཅེས་ནི་མངོན་པར་བརྗོད། །དེ་ཡིས་སྐྱེ་བོ་འདི་དག་འཇོམས། །ཕུང་པོ་སྐྱེ་མཆེད་འཇོམས་བྱེད་
པོ། །འཇིག་རྟེན་འདི་ནས་ཕ་རོལ་ཏུ། །འཆི་བདག་རྒྱལ་པོས་ཀུན་ཏུ་འཁྲིད། །འདི་ཡིས་འཁྲིད་པར་གྱུར་པ་ན། །དེ་འགའ་ཞིག་ལའང་སྟོབས་མི་དམིགས། །ཆོས་མ་གཏོགས་པ་དེ་ཡི་ཕྱིར། །ཆོས་ནི་སྐྱོབ་པའི་མཆོག་ཏུ་བརྗོད། །གསོན་པ་ཡང་ནི་མྱུར་བར་
འགྲོ། །མྱུར་བར་ལང་ཚོ་འགྲོ་བ་ཡིན། །འཆི་བདག་མྱུར་བར་འོང་བ་ཡིན། །བག་མེད་པ་ཡིས་དགའ་མ་བྱེད། །ལུས་ཅན་རྣམས་ཀྱི་བདེར་གྱུར་པ། །ཐམས་ཅད་འཇིག་པའི་རྒུད་པ་ཡིན། །གསོན་པ་ཡང་ནི་མཐར་འཇོམས་ཀྱི། །བག་མེད་པ་ལ་དགའ་མ་བྱེད། །
དམྱལ་བ་ཡི་དགས་དུད་འགྲོར་ནི། །ལས་ཀུན་ཟད་ནས་འགྲོ་དགོས་ཀྱི། །ཤེས་ཀྱིས་སྡུག་བསྔལ་མི་བཟད་འདི། །དགའ་བར་མ་བྱེད་བག་མེད་ལ། །སྲིད་གསུམ་ངམ་གྲོག་སྲིད་འདི་གང་། །མི་རྟག་པ་ཡི་ཐབས་འོག་ཡིན། །སྐྱེ་ཞིང་འཆི་བ་དེ་ལྟ་ལ། །བག་

མེད་པ་ལ་དགའ་མ་བྱེད། །འཆི་བདག་གིས་ནི་ལུས་འཇོམས་ལ། །རྒས་པ་ཡིས་ནི་གཞོན་པ་འཇོམས། །སོ་གསོད་པ་ནི་ནད་ཀྱིས་འཇོམས། །བག་མེད་པས་ནི་དགའ་མ་བྱེད། །ལས་ཀྱི་ཐག་པས་རྣམ་བཅིངས་ནས། །སེམས་ཀྱི་འཕྱང་མོ་ལ་
ལེགས་རྟེན། །སེམས་ཅན་སྲིད་པ་གསུམ་ན་འཁྱམ། །དགའ་བར་མ་བྱེད་བག་མེད་ལ། །སྐྱིད་དེ་བ་ཡང་སྡུག་བསྔལ་འགྱུར། །སྡུག་བསྔལ་ཅན་ཡང་རྣལ་ཕེབས་གནས། །རྗེ་དཔོན་ཡང་ནི་བྲན་འགྱུར་གྱི། །བག་མེད་པ་ལ་དགའ་མ་བྱེད། །མ་ཡང་ཆུང་
མར་འགྱུར་བ་དང་། །ཆུང་མ་ཡང་ནི་དགྲ་འདི་ཉིད། །འགྱུར་ལྡོག་ཆེན་པོ་འདི་འདྲ་ལ། །བག་མེད་པ་ལ་དགའ་མ་བྱེད། །ནགས་དང་ཉེ་ནགས་བྲག་རྣམས་ལ། །ལྷ་ཡི་ཚོགས་ཀྱིས་བརྒྱན་པ་ཡི། །འཇིག་རྟེན་འདི་ནི་མེད་འགྱུར་གྱི། །བག་མེད་པ་ལ་
དགའ་མ་བྱེད། །ལུས་ཅན་རྣམས་ཀྱི་བདེ་བ་ནི། །གཡོ་ཞིང་འཚེ་དང་བཅས་པ་ཡིན། །ཡིད་ཆེས་མེད་དང་སྟོང་པ་ལ། །བག་མེད་པ་ལ་དགའ་མ་བྱེད། །སྡུག་བསྔལ་གྱིས་གཟིར་སྐྱེ་འདི་ཡང་། །རྒ་དང་ནད་ཀྱི་སྣོད་ཡིན་ནོ། །སྐྱེ་བ་ངེས་པར་འཆི་བ་ཡང་། །
གང་གིས་ཐམས་ཅད་དུ་ནུས་མིན། །སྐྱེ་བ་ཐམས་ཅད་འཆི་བའི་མཐའ། །དེ་བཞིན་ལང་ཚོ་རྒས་པའི་མཐའ། །རྨི་ལམ་ལྟ་བུའི་འདོད་པ་ལ། །བག་མེད་པས་ནི་དགའ་མི་བྱ། །ཆུ་ཤིང་ལོ་མ་དང་མཚུངས་དང་། །གློག་རྣམས་དང་ཡང་རབ་ཏུ་
མཚུངས། །སླུ་བར་བྱེད་པ་ཐམས་ཅད་ལ། །བག་མེད་པས་ནི་དགའ་མ་བྱེད། །ཡུལ་གྱི་སྤྱོད་ཡུལ་ཅན་དབང་པོ། །རྒྱལ་བར་བྱ་བར་ནུས་མ་ཡིན། །དབང་པོ་རྣམས་ཀྱི་རང་ཡུལ་ལས། །གང་ཕྱིར་ཤེས་པས་ཟློག་པར་བྱེད། །དེ་ལྟར་མུ་སུ་ལུན་དྷ་དེས་ལྷ་དེ་དག་རྣམས་
ཀྱི་ཡིད་སྐྱོ་བར་གྱུར་པ་ལ་གཞན་ལ་ཕན་པའི་དོན་དུ་ཚིགས་སུ་བཅད་པ་རྣམས་ཇི་ལྟ་བར་རྗོད་དོ། །གཞན་ཡང་འཐབ་བྲལ་བའི་བདག་པོ་དེ་ཉིད་ཀྱིས་ལྷ་རྣམས་ཀྱི་བག་མེད་པ་ལ་རྣམ་པར་གཤེའོ། །ཇི་ལྟར་བག་མེད་པའི་མུན་པར་འོག་ཏུ་ནུབ་པ་དེ་དག་མ་མཐོང་བ་རྣམས་ནི་སྡུག་

བསྔལ་ཆེན་པོར་གྱུར་པ་དང་རྒས་པ་དང་འཆི་བ་རྣམས་འབྱུང་བར་གྱུར་ཏོ། །ཇི་ལྟར་ལྷ་དེ་དག་ནི་ཁྱེད་རྣམས་ཉིད་དང་མཚུངས་པ་ཡིན་ཏེ། ཕྱིན་ཅི་ལོག་རྣམས་ལ་ཇི་ལྟ་བར་ཞུགས་ནས་བག་མེད་པ་ལ་མངོན་པར་དགའ་བ་རྣམས་ཡིན་ཏེ། ཕྱིན་ཅི་ལོག་ཉིད་ལ་ཞུགས་པ་རྣམས་
ཐམས་ཅད་ལ་ཡོངས་སུ་སྐྱོབ་པར་བྱེད་པ་ནི་འགའ་ཡང་མེད་དོ། །གང་ཁྱེད་རྣམས་ཀྱི་ཁྱད་པར་ལས་ཚུལ་ཐམས་ཅད་ཀྱིས་ཁྱད་པར་དུ་འཕགས་པ་རྣམས་བག་མེད་པས་བརླག་པར་གྱུར་ནས། ཚད་དང་། མདོག་དང་། དབྱིབས་དང་། ཉེ་བར་ལོངས་སྤྱོད་པ་དང་། ཁང་བུ་དང་།
འོད་ཟེར་དང་། ལྷ་མོ་དང་། སྐྱེ་བོ་རྣམས་ཀྱིས་ཡོངས་སུ་སྤངས་པ་དེ་དག་རྣམས་ཁྱེད་རྣམས་ཀྱིས་མངོན་སུམ་དུ་འགྱུར་བ་ཡིན་ན། ཇི་ལྟར་ན་ཡོངས་སུ་སྤྱད་པར་འགྱུར་བ་ཡིན། ཇི་ལྟར་ནི་འཁོར་རྣམས་དང་བཅས་པ་ཡིན། ཕྱིན་ཅི་ལོག་ལ་ཞུགས་པ་དེའི་ཚེ། དེ་དག་ནི་བག་
མེད་པའི་སྐྱོན་གྱིས་ཡིན་པར་མངོན་པར་མཐོང་བའི་ཕྱིར་ན། ཐམས་ཅད་ལ་དུས་ཐམས་ཅད་དུ་ཐབས་རྣམས་ཐམས་ཅད་ཀྱིས་བག་མེད་པ་ཡོངས་སུ་སྤང་བར་བྱའོ། །གང་ཅུང་ཟད་ཅིག་འཚོ་བ་འདི་འཛིན་པ་དང་བཅས་པའི་བག་མེད་པའི་འཚོ་བ་དེ་དག་རྣམས་ནི་དུག་གིས་ཟིན་པ་རྣམས་
ལས་ཀྱང་ཤིན་ཏུ་ཁྱད་པར་དུ་འཕགས་པ་ཡིན་ནོ། །གང་འགའ་ཞིག་མེ་རླུང་དང་བཅས་པར་གྱུར་པ་དེ་དག་རྣམས་ཀྱི་དྲུང་ན་བག་མེད་པའི་མེ་ཀུན་དུ་རྟོག་པའི་རླུང་དང་བཅས་པ་ནི་ཤིན་ཏུ་བར་ཡང་ལྷག་པ་ཡིན་ནོ། །གང་ཅུང་ཟད་ཅིག་མུན་པ་དུས་རིང་དུ་འཐིབས་པ་རྣམས་ལས་
བག་མེད་པའི་རང་བཞིན་གྱི་མུན་པ་ནི་དེ་དག་རྣམས་ལས་ཟླ་མེད་པར་ཁྱད་པར་དུ་གྱུར་པ་ཡིན་ཏེ། ཐོག་མ་མེད་པའི་དུས་ནས་ཀུན་ལ་རིང་དུ་འབྱུང་བ་ཡིན་པའི་ཕྱིར་རོ། །གང་འགའ་ཞིག་དགྲ་བོ་གླགས་གཅོད་པར་བྱེད་པ་རྣམས་ཀྱི་ནང་ནས། བག་མེད་པའི་དགྲ་ནི་དེ་དག་རྣམས་
ཀྱི་དྲུང་ན་ཁྱད་པར་དུ་འཕགས་པ་ཡིན་ཏེ། ཡུལ་གྱི་གྲོགས་རྣམས་ཀྱིས་ཀུན་ནས་གླགས་གཅོད་པ་ཡིན་པའི་ཕྱིར་རོ། །གང་ཅུང་ཟད་མཚོན་ཆར་བརྗོད་པར་བྱ་བ་སོ་རྣོན་པོ་དེ་དག་རྣམས་ཀྱི་ནང་ནས་བག་མེད་པའི་མཚོན་གྱི་སོ་རྣམས་ནི་ལྷག་པར་རྣོ་བ་ཡིན་ཏེ་ངན་སོང་དུ་ལོག་པར་ལྟུང་

བའི་རྩེ་མོ་རྣོན་པོ་རྣམས་ཡོད་པའི་ཕྱིར་རོ། །གང་འགའ་ཞིག་སྦྲུལ་དུག་ཅན་དུ་གྱུར་པ་དེ་དག་རྣམས་ཀྱི་དྲུང་ནས་བག་མེད་པའི་སྦྲུལ་གྱི་དུག་གིས་སེམས་ཅན་ཐམས་ཅད་ཀྱི་སྲོག་ངེས་པར་འཕྲོག་པར་བྱེད་པའི་དུག་ཆེན་པོ་དེ་ནི་ཁྱད་པར་དུ་འཕགས་པ་ཡིན་ཏེ་བྱིས་པའི་
སྐྱེ་བོ་རྣམས་ཐམས་ཅད་ཀྱི་སེམས་སྟོབས་ངེས་པར་འཇོམས་པའི་ཕྱིར་རོ། །གང་ཅུང་ཟད་གྲོགས་པོའི་གཟུགས་ཅན་གྲོགས་པོ་མ་ཡིན་པ་རྣམས་ལས་བག་མེད་པ་ནི་དེ་དག་རྣམས་ཀྱི་ནང་ན་བླ་ལྷག་པ་ཡིན་ཏེ་དགའ་བའི་འདོད་ཆགས་དང་ཀུན་དུ་འདྲེས་པའི་ཕྱིར་རོ། །གང་ཅུང་ཟད་
འཆིང་བར་གྱུར་པ་ལྕགས་སྒྲོག་གམ་ཤིང་གདོས་སམ། ཐག་པ་ལས་བྱས་པ་དེ་དག་རྣམས་ཀྱི་ནང་ནས་བག་མེད་པ་ནི་བླ་ལྷག་པ་ཡིན་ཏེ་ཞེ་སྡང་འཐུག་པོ་དང་ཀུན་དུ་འདྲེས་པའི་ཕྱིར་རོ། །གང་འགའ་ཞིག་པས་བླ་ལྷག་པར་གྱུར་པ་ནི་དགོན་པར་རྣམ་པར་འཁྱམས་པར་གྱུར་པ་རྣམས་ལ་ཆུ་
དག་དང་། ཤིང་ལྗོན་པ་དང་། འབྲས་བུ་དང་། གྲིབ་མ་དང་བཞོན་པ་ཡང་མེད་པས་སེམས་ཅན་རྣམས་ཐམས་ཅད་སྡུག་བསྔལ་བར་བྱེད་པ་པོ་དེ་དག་རྣམས་ཀྱི་ནང་ནས་བག་མེད་པའི་དགོན་པ་ནི་ཤིན་ཏུ་བླ་ལྷག་པ་ཡིན་ཏེ། བདེ་བའི་ཆུ་དག་དང་། སྐྱེས་བུ་དམ་པ་རྣམས་ཀྱི་ཚུལ་ཁྲིམས་ཀྱི་
ལྗོན་ཤིང་གི་གྲིབ་མ་རྣམས་ལས་ཐ་མར་སེམས་ཅན་རྣམས་ཐམས་ཅད་སྡུག་བསྔལ་བར་བྱེད་པའི་ཕྱིར་རོ། །གང་འགའ་ཞིག་རྣམ་པར་སླུ་བར་བྱེད་པ་པོའི་ངོ་བོ་དོན་མེད་པར་གྱུར་པ་མཐོང་བ་རྣམས་ལས། འདི་དག་གི་ཇི་ལྟ་བའི་དོན་ནི་འདི་ལྟ་སྟེ། ཟོ་ཆུན་འཁོར་མོ་དང་། དྲི་ཟའི་གྲོང་
ཁྱེར་དང་། སྨིག་རྒྱུ་རྣམས་སོ། །དེ་དག་རྣམས་ཀྱི་དྲུང་ན་ཡང་བག་མེད་པ་ནི་ཤིན་ཏུ་ལྷག་པ་ཡིན་ཏེ། ཡུལ་གྱི་ཉེ་བར་ལོངས་སྤྱོད་པ་རྣམས་ནི་གཡོ་བར་གྱུར་པ་ཇི་ལྟ་བའི་དོན་དང་བྲལ་བས་ན་ཟོ་ཆུན་འཁོར་མོ་དང་། དྲི་ཟའི་གྲོང་ཁྱེར་དང་། སྨིག་རྒྱུ་རྣམས་ལས་ཀྱང་བླ་ལྷག་པར་
སྟོང་པ་ཡིན་ནོ། །གཞན་ཡང་ཅུང་ཟད་རབ་ཏུ་ལྟུང་བར་བྱེད་པ་གང་ཡིན་པའི་ཡུལ་དུ་གྱུར་པ་རྣམས་ཅུང་ཟད་ཡོད་པའི་ངམ་གྲོག་དང་གཡང་ས་དང་འདྲ་བ་དེ་དག་རྣམས་ཀྱི་དྲུང་ན་ཡང་བག་མེད་པ་ཤིན་ཏུ་ལྷག་པ་ཡིན་ཏེ། ངན་སོང་དུ་ལོག་པར་ལྟུང་བ་རྣམས་ངེས་པར་ཡང་ཉམས་སུ་

མྱོང་བར་བྱེད་པའི་ཕྱིར་རོ། །དེ་ལྟར་བག་མེད་པ་འདིས་ནི་ལྷ་རྣམས་དང་། སྲོག་ཆགས་སུ་གྱུར་པའི་རྣམས་ཐམས་ཅད་དང་། འགྲོ་བ་ལྔར་སྐྱེས་པར་གྱུར་པ་རྣམས་དང་། ཁམས་གསུམ་དུ་གཏོགས་པ་རྣམས་ཀྱང་ལོག་པར་ལྟུང་བར་བྱེད་པའི་ཕྱིར་རོ། །དེའི་ཕྱིར་ཐམས་ཅད་ཀྱིས་
ཐམས་ཅད་ཀྱང་རབ་ཏུ་བརྩོན་པ་ཐམས་ཅད་ཀྱིས། གནས་སྐབས་ཐམས་ཅད་དུ་སྡུག་བསྔལ་གྱི་འཇིགས་པ་རྣམས་དང་། བདེ་བ་འདོད་པ་རྣམས་ཀྱིས་ཀྱང་སྡུག་བསྔལ་རྣམས་ཀྱི་རྩ་བ་འདི་ཡོངས་སུ་སྤང་བར་གྱིས་དང་། འདི་ལྟ་སྟེ་བག་མེད་པའོ། །དེ་ནས་ཡང་དེའི་ཚེ་ན་མུ་སུ་ལུན་དྷ་
དེས་ཚིགས་སུ་བཅད་པ་བརྗོད་པ། ཇི་ལྟར། བག་ཡོད་པ་ནི་དགའ་བར་བརྗོད། །བག་མེད་སྡུག་བསྔལ་སྐལ་ལྡན་ཡིན། །བག་ཡོད་བག་མེད་པ་དག་གི། །འདི་ནི་རང་གི་མཚན་ཉིད་བརྗོད། །དེ་ལྟར་ལྷ་རྣམས་ཀྱི་མངའ་བདག་དམ་པའི་ལམ་ཇི་ལྟ་བ་བཞིན་དུ་སྟོན་པར་བྱེད་པ་པོ་
དེས་ལྷ་དེ་དག་རྣམས་ལ་རྗེས་སུ་འདོམས་པར་བྱེད་དོ། །དེ་ལ་ལྷ་དེ་དག་རྣམས་ཐམས་ཅད་ཀྱང་ཡིད་ལས་སུ་རུང་བར་བྱས་པ་དང་། དབང་པོ་རྣམས་རྒྱས་པ་དང་། དབང་པོ་རྣམས་རབ་ཏུ་དང་བ་དང་། ཡིད་རྩེ་གཅིག་ཏུ་གྱུར་པས་ཉན་པར་བྱེད་ཅིང་། མུ་སུ་ལུན་དྷ་པད་མའི་སྙིང་པོ་ལ་སེང་གེའི་
ཁྲི་ལ་གནས་པ་དེ་ལ་འདི་ལྟར་ཡང་རྗོད་པར་བྱེད་དེ། བདག་ཅག་རྣམས་ལ་ཤིན་ཏུ་ཕན་པར་གྱུར་པ་དང་མཐར་ཐུག་པར་བདེ་བ་གང་ཡིན་པ་དེ་དག་ཀྱང་འདིར་བརྗོད་ལགས་ན། བདག་ཅག་རྣམས་ལ་ཕན་པ་དང་བདེ་བ་རྣམས་ཀྱང་ཁྱེད་ཉིད་ཀྱིས་བཀའ་སྩལ་དུ་གསོལ། བདག་ཅག་རྣམས་
ཀྱིས་ཅི་བགྱི་བ་ཡང་ལྷ་ཉིད་ཀྱི་ཞལ་སྔ་ནས་བཀའ་སྩལ་དུ་གསོལ། ཇི་ལྟར་ཚིག་འདི་དག་རྣམས་བརྗོད་པ་དང་འཐབ་བྲལ་གྱི་བདག་པོ་དེས་འདི་སྐད་ཅེས་བརྗོད་དོ། །ཇི་ལྟར་བཅོམ་ལྡན་འདས་གང་ཡིན་པ་འདི་ནི་ཐར་པའི་སྤྱོད་པ་རྣམས་རིག་ཅིང་རྟོགས་ལ་མཁྱེན་པ། སྐྱོན་རྣམས་ཐམས་
ཅད་ལས་རྣམ་པར་གྲོལ་བ། ཡོན་ཏན་རྣམས་ཐམས་ཅད་དང་ལྡན་པ་སེམས་ཅན་རྣམས་ཐམས་ཅད་ཀྱི་ཡང་གཙོ་བོར་གྱུར་པའི་སངས་རྒྱས་དེ་ལ་སྐྱབས་སུ་སོང་དང་། སྡུག་བསྔལ་རྣམས་ཐམས་ཅད་དང་བྲལ་བར་འགྱུར་གྱིས། དེ་ནི་བག་མེད་པ་རྣམས་དང་བྲལ་བ་ཡིན་པས་དེ་ལ་སྐྱབས་

སུ་སོང་ན་གོང་ན་མེད་པའི་འཁོར་བའི་འཇིགས་པ་རྣམས་ཐམས་ཅད་ལས་ཡོངས་སུ་སྐྱོབ་པར་འགྱུར་རོ། །དེ་ནས་ཡང་ངེས་པར་མུ་སུ་ལུན་དྷའི་དྲུང་ནས་ལྷ་དེ་དག་རྣམས་ཀྱིས་ཚིག་འདི་དག་ཐོས་པ་དང་། ཐམས་ཅད་ཉིད་ཀྱིས་པུས་མོ་རྣམས་ས་གཞི་ལ་བཙུགས་ཏེ། འཁོར་
དང་བཅས་པ་རྣམས་གུས་པ་ལེགས་པར་སྐྱེས་པ་དང་དོན་ལ་དབང་པོ་རྣམས་རྒྱས་ཤིང་། སངས་རྒྱས་བཅོམ་ལྡན་འདས་ལ་ལེགས་པར་གུས་པ་སྐྱེས་པས་མགོ་བོ་ཀུན་ཏུ་བཏུད་པར་གྱུར་པས་རབ་ཏུ་ཕྱག་འཚལ་ཏེ། གསུམ་ལ་སྐྱབས་སུ་འགྲོ་བར་བྱེད་པས་ཀྱང་སྐྱབས་སུ་སོང་ངོ་། །ཐམས་ཅད་
ཀྱང་སངས་རྒྱས་དང་ཆོས་དང་དགེ་འདུན་རྣམས་ལ་ཡང་ལེགས་པར་སྐྱབས་སུ་འགྲོ་བར་བྱེད་དོ། །ཡིད་ཤིན་ཏུ་རབ་ཏུ་དང་བ་དང་། བག་མེད་པ་རྣམས་ལ་ཡང་རྣམ་པར་སྨོད་པར་བྱེད་ཅིང་བཤགས་པར་བྱེད་དེ། གང་དག་བག་མེད་པའི་ལྷ་དེ་དག་རྣམས་ཀྱིས་བཟོད་པར་མི་ནུས་པ་རྣམ་པ་མང་
པོར་མི་བཟད་པ་རྣམ་པ་དུ་མ་རྣམས་ཐམས་ཅད་ཀྱིས་ཤིན་ཏུ་སྡུག་བསྔལ་བ་རྣམས་མཐོང་བའི་ཕྱིར་རོ། །དེ་ནས་མུ་སུ་ལུན་དྷ་ཡང་ལྷ་དེ་དག་རྣམས་ཀྱི་ཡིད་ཀུན་དུ་སྐྱོ་བར་གྱུར་པ་དེ་དག་རྣམས་ལེགས་པར་མཐོང་ནས། སླར་ཉིད་ཀྱང་ཆོ་འཕྲུལ་རྣམ་པ་དུ་མ་རྣམས་བྱེད་དེ། ཡུད་ཙམ་
ཅིག་ལ་ཡང་རྣམ་པ་དུ་མར་གཅིག་ཏུ་གྱུར་ནས་བརྒྱར་འགྱུར་རོ། །སྟོང་དུ་འགྱུར་རོ། །སྟོང་ཕྲག་བརྒྱར་ཡང་འགྱུར་རོ། །ཡུད་ཙམ་ལ་ཡང་ཆ་བྱད་དུ་མ་དག་ཏུ་བྱས་པའི་དབྱིབས་རྣམས་སུ་འགྱུར་རོ། །ཡུད་ཙམ་ཅིག་ལ་རྣམ་པ་དུ་མའི་ཆ་བྱད་དག་གིས་མཚུངས་པར་བྱས་པའི་
དབྱིབས་རྣམས་སུ་འགྱུར་རོ། །ཡུད་ཙམ་ཉིད་ལ་ནམ་མཁའི་དཀྱིལ་དུ་འཕགས་ནས་རིན་པོ་ཆེའི་ཁང་བུ་སྣ་ཚོགས་པ་རྣམས་ཀྱིས་ཀུན་ཏུ་གང་བ་རྣམས་ན་གཟུགས་དང་ཆ་བྱད་སྣ་ཚོགས་པ་རྣམས་འཛིན་པར་བྱེད་པར་འགྱུར་རོ། །ཡུད་ཙམ་ལ་ཡང་ཆུར་འབྱིང་བར་འགྱུར་རོ། །མགོ་
བོ་སྟོང་དུ་གྱུར་ནས་ཀྱང་རིན་པོ་ཆེ་སྣ་ཚོགས་པའི་དབུ་རྒྱན་དང་དཔུང་རྒྱན་འབར་བ་རྣམས་ཀྱིས་བརྒྱན་པ་དང་། ཉི་མ་སྟོང་བས་ལྷག་པའི་གཟི་བརྗིད་ཅན་ལྷའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་ནས། ཉེ་བའི་ནགས་རྣམས་ཐམས་ཅད་དུ་ལེགས་པར་མཐོང་ངོ་། །སྟོང་

ཕྲག་བརྒྱར་གསལ་བར་བྱེད་པའི་གཟི་བརྗིད་དང་ལྡན་པའི་ལྷ་རྣམས་ཀྱི་ཚོགས་ཐམས་ཅད་ཀྱིས་ཡོངས་སུ་བསྐོར་ནས། པད་