Kinh tạng Tây Tạng (Kangyur Đại Học) — 070_མདོ་སྡེ།_ལ

ང་།
དུད་འགྲོའི་སྐྱེ་གནས་རྣམས་སུ་བདག་ཅག་གི་ལྷའི་རིས་ནས་ཤི་འཕོས་ནས་འགྲོ་བར་འགྱུར་བ་ན་ཡང་སྟེ། དེ་ལྟར་དེ་སྐད་དུ་བརྗོད་པ་དང་། ལྷ་དེ་དག་རྣམས་ཐམས་ཅད་ཀྱིས་མུ་སུ་ལུན་དྷ་ལ་འདི་སྐད་ཅེས་བརྗོད་པ། ཇི་ལྟར་བདག་ཅག་རྣམས་ལ་ཕན་པར་འགྱུར་བ་དང་། བདེ་བར་འགྱུར་བ་དེ་ལྟར་
མཛོད་ཅིག །དེ་ནས་ལྷའི་བདག་པོས་ལྷ་དེ་དག་རྣམས་ལ་འདི་སྐད་ཅེས་བརྗོད་དོ། །ཁྱེད་རྣམས་ཐམས་ཅད་ཉིད་ཀྱིས་ཀྱང་མཆོད་རྟེན་བཞི་པ་འདི་ལ་བལྟ་བར་གྱིས་དང་། རིན་པོ་ཆེ་སྣ་ཚོགས་ཀུན་ཏུ་འབར་བ་འོད་ཟེར་བརྒྱ་སྟོང་ཕྲག་དུ་མས་རྣམ་པར་སྣང་བར་བྱས་པ་རིན་པོ་ཆེ་འབར་བ་རྣམ་པ་སྣ་

ཚོགས་པ་རྣམས་ཀྱིས་སྤྲས་པས་ཤིན་ཏུ་བར་ཡང་མཛེས་པར་གྱུར་པའི་ཡོན་ཏན་རྣམས་ཀྱིས་བརྒྱན་པ་ལྷའི་འཇིག་རྟེན་འདི་དག་ཐམས་ཅད་འོད་ཀྱིས་ཁྱབ་པར་བྱས་ནས་གནས་པ་ཡིན་ནོ། །དེ་ནས་ལྷའི་བདག་པོ་དེས་ཡང་འདི་སྐད་ཅེས་སྨྲས་ཏེ། ཇི་ལྟ་བ་བཞིན་དུ་
ངས་ནི་མཐོང་ངོ་། །དེ་ནས་ལྷ་དེ་དག་རྣམས་ཀྱིས་འདི་སྐད་ཅེས་བརྗོད་དེ། བདག་ཅག་རྣམས་ཐམས་ཅད་ཉིད་མཆི་བར་བགྱིའོ། །མུ་སུ་ལུན་དྷ་ཐོག་མར་གྱུར་པའི་ལྷ་དེ་དག་རྣམས་ཐམས་ཅད་ཀྱང་གང་ན་དེ་བཞིན་གཤེགས་པའི་མཆོད་རྟེན་བཞུགས་པར་སྔར་བཞིན་དུ་དེར་ཉེ་བར་སོང་ངོ་། །ཉེ་
བར་སོང་ནས་ཀྱང་དད་པས་མགོ་ཀུན་ནས་བཏུད་པས་ཕྱག་འཚལ་བར་བྱེད་པ་ཡང་གཅིག་ཏུ་དད་པས་ཁྱབ་པའི་ཡིད་ཀྱིས་དེ་ལ་རབ་ཏུ་ཕྱག་འཚལ་ནས་ལངས་ཏེ། ཁྱེད་རྣམས་ཀྱིས་ཐམས་ཅད་སྐྱོབ་པའི་མཆོད་རྟེན་སྣ་ཚོགས་པའི་རིན་པོ་ཆེ་རྣམས་ཤིན་ཏུ་འབར་བ་ལ་ལྟོས་ཞེས་བྱ་བ་རྣམས་
ནི་སྔ་མ་བཞིན་ནོ། །དེ་ནས་མཆོད་རྟེན་དེའི་རྩིག་པའི་ལོགས་ལ་རིན་པོ་ཆེ་འབར་བ་མཆོག་གི་ཡི་གེ་རྣམ་པ་སྣ་ཚོགས་པ་རྣམས་ཀྱི་མདོ་མངོན་པར་བྲིས་པ་ཡོད་པ་ལ་དེ་དག་ཐམས་ཅད་ཀྱང་མཆོག་ཏུ་དགེ་ལེགས་སུ་གྱུར་པ། ལྷ་དང་མི་རྣམས་ལ་ཕན་པ་དང་བདེ་བར་གྱུར་པ་ནི་འདི་ལྟ་སྟེ། ཆོས་
བདུན་དང་ཡང་དག་པར་ལྡན་པའི་སྐྱེས་བུ་རྣམས་ནི་ལྷར་སྐྱེ་བར་འགྱུར་རོ། །བདུན་པོ་རྣམས་གང་ཞེ་ན། འདི་ན་རིགས་ཀྱི་བུ་དག་ཐོས་པ་དང་ལྡན་པར་གྱུར་པ་དང་། ཐོས་པའི་དོན་དང་ལྡན་པ་དང་། ཐོས་པའི་ཆོས་རྣམས་ལ་སྤྱོད་པར་བྱེད་པ་དང་། བློ་ཐོས་པས་ལེགས་པར་སྦྱངས་
པ་དང་། ཐོས་པ་ལ་སྐྱབས་སུ་བྱེད་པ་དང་། ཐོས་པ་ལ་སྙིང་པོར་བྱེད་པའི་བློས་གཅིག་ཏུ་སྙིང་པོར་གྱུར་པའི་ཐོས་པ་རྣམས་ཆེད་དུ་འཛིན་པ་དང་། དེ་དག་གིས་དགེ་བའི་བཤེས་གཉེན་ལ་དགའ་བའི་སྐྱེས་བུ་རྣམས་ནི་ཡོན་ཏན་བདུན་དང་ལྡན་པར་འགྱུར་རོ། །འདི་ལྟ་སྟེ། ཇི་སྐད་
སྨྲས་པ་དེ་ལྟར་བྱེད་པ་དང་། ཇི་སྐད་སྨྲས་པ་བརྟན་པོར་འཛིན་པ་དང་། དེ་བརྟན་པོར་འཛིན་པ་དེ་སྙིང་པོར་བྱེད་པ་དང་། སོ་སོར་རྣམ་པར་དཔྱོད་པའི་བློ་གྲོས་དང་། དེ་ཁོ་ན་ཉིད་ལ་མངོན་པར་འཇུག་པ་དང་། བློ་གྲོས་བརྟན་པས་མང་པོ་རྣམས་ཆུད་འཛའ་བར་མི་འགྱུར་བ་དང་། གཞན་

རྣམས་ཀྱང་དེ་དང་ངང་ཚུལ་མཚུངས་ན་རྗེས་སུ་སྟེན་པར་བྱེད་པ་ཡིན་ཏེ། གཞན་གྱི་ཆོས་ཀྱིས་མི་འཕྲོགས་ཤིང་དེ་བཞིན་དུ་ཡོན་ཏན་བདུན་དང་ལྡན་པའི་གྲོགས་པོ་རྣམས་ལ་སྟེན་པར་བྱེད་པའོ། །ཇི་ལྟར་ན་ཇི་སྐད་སྨྲས་པ་དེ་བཞིན་བྱེད་པ་ཡིན་ཞེ་ན་འདི་ན་དེ་བཞིན་དུ་དགེ་བའི་བཤེས་གཉེན་དགེ་
བའི་རང་བཞིན་ཅན་དེ་དག་གིས་གང་དང་གང་དག་ཁོ་ན་རིག་པར་གྱུར་པ་རྣམས་འདིར་རྗོད་པར་བྱེད་པ་དང་། ཕན་པ་དང་། དུས་དང་ལྡན་པར་གྱུར་པ་དང་། ཡུལ་དང་རིགས་པ་རྣམས་བརྗོད་པ་དང་། ཤིན་ཏུ་མྱུར་བ་དང་བུལ་བ་མ་ཡིན་པ་དང་། དོན་མང་པོ་རྣམས་ཡི་གེ་ཉུང་ངུ་ན་
གྱིས་དང་། སྙན་པ་དང་གོ་བ་དང་། ཆོས་ཀྱི་སྦྱིན་པ་དང་ལྡན་པ་དང་། རང་དང་གཞན་རྣམས་ལ་ཕན་པའི་དོན་དུ་ཉེ་བར་གནས་པ་རྣམས་དགེ་ལེགས་སུ་རྗོད་པར་བྱེད་པ་རྣམས་ཀྱིས་གཉི་གར་གནས་པ་ལ་ཕན་པར་སྨྲ་བར་བྱེད་དོ། །འདི་ལྟ་སྟེ། ཇི་ལྟར་བརྗོད་པ་དེ་ཁོ་ན་བཞིན་
དུ་སྒྲུབ་པར་བྱེད་པའོ། །གཞན་དག་དེ་དང་ལྷན་ཅིག་ཏུ་སྤྱོད་པ་རྣམས་ལ་ཡང་དེ་དག་རྣམས་སྡོམ་དུ་འཇུག་གོ། །རྟག་པར་རྒྱུན་དུ་ཡང་ལུས་དང་ངག་དང་། ཡིད་རྣམས་ལེགས་པར་སྤྱོད་པར་བྱེད་དོ། །ཕྱི་རོལ་དང་ནང་ཀུན་ནས་ཡོངས་སུ་དག་པའི་གསེར་དང་མཚུངས་པར་གྱུར་
པ་སྟེ། དེ་ལྟར་ན་ཇི་སྐད་སྨྲས་པ་དེ་བཞིན་བྱེད་པ་ཡིན་ནོ། །ཇི་ལྟར་ནི་ཇི་སྐད་སྨྲས་པ་དེ་བརྟན་པོར་འཛིན་པ་ཡིན་ཞེ་ན། འདི་གང་དག་བྱེད་པ་དེ་ཀུན་ནས་མཆོག་ཏུ་རྣམ་པར་དག་པར་བྱེད་དོ། །ཆོས་རྣམ་པ་གསུམ་པོ་དེ་དག་རྣམས་མཆོག་ཏུ་རྣམ་པར་དག་པར་མངོན་པར་མཐོང་ཞིང་
ལྷ་དང་མི་རྣམས་ཀྱི་སྐྱེ་བ་སྐྱེད་པ་པོ་ཐ་མར་མྱ་ངན་ལས་འདས་པའི་མཐར་ཐུག་པ་ཡིན་པ་བདག་ཉིད་རང་གིས་ཀྱང་རྟོགས་པ་དང་། གཞན་རྣམས་ལས་ཀྱང་ཐོས་ནས་རྣམ་པར་སྨིན་པ་བདེ་བ་ལ་བརྟན་པས་མངོན་པར་འཇུག་གོ། །དེ་བརྟན་པོར་འཛིན་པར་བྱེད་དེ། དེ་ལྟར་བརྟན་པོར་འཛིན་
པར་བྱེད་པ་ཡིན་ལ། དེ་ནི་དགེ་བའི་བཤེས་གཉེན་ལ་ཉེ་བར་སྟེན་པར་ཡང་བྱེད་དོ། །ཇི་ལྟར་གང་དག་བརྟན་པོར་བཟུང་བ་དེ་དག་སྙིང་པོར་མངོན་པར་འཇུག་པ་ཡིན་ནོ། འཇུག་པ་ཡང་དགེ་བའི་འབྲས་བུ་རྣམས་གང་གི་ཕྱིར་གཙང་མ་བརྟན་པོར་འཛིན་པ་ཡིན་ནོ། །འཇིག་རྟེན་གཉིས་

ལ་ཕན་པར་འགྱུར་བའི་དོན་དུ་ཡང་མངོན་པར་མཐོང་ནས་རྟོག་མི་བཞིན་དུ་བློས་རྣམ་པར་དཔྱོད་པར་བྱེད་དོ། །དེ་ལྟར་དེ་ནི་སྙིང་པོ་རབ་ཏུ་རྣམ་པར་དཔྱོད་པའི་བློ་ཡིན་ནོ། །དགེ་བའི་ལས་ཀྱི་འབྲས་བུའི་སྙིང་པོ་དེ་དག་གཞན་ལས་ཐོས་པའམ། དེ་གལ་ཏེ་ཤེས་ན་རང་ཉིད་
ཀྱིས་ཀྱང་རབ་ཏུ་རྣམ་པར་དཔྱད་ནས་དེ་ཁོ་ན་ཉིད་ལ་མངོན་པར་འཇུག་གོ། །དེ་ལྟ་བུ་ནི་དེ་ཁོ་ན་ཉིད་ལ་མངོན་པར་འཇུག་པ་ལ་སྤྱོད་པ་ཡིན་ནོ། །བློ་གྲོས་བརྟན་པ་རྣམས་ནི་འདིར་མང་དུ་ཐོས་པར་གྱུར་ནས་སྙིང་པོ་མེད་པས་མི་ཁྲིད་དོ། །དེ་ལྟར་ན་བློ་གྲོས་བརྟན་པ་ཡིན་ནོ། །འདི་ན་ཡོན་
ཏན་དེ་དག་དང་མཚུངས་པའི་བདག་ཉིད་ཅན་གཞན་རྣམས་ལ་ཡང་སྟེན་པར་བྱེད་ལ། གཞན་དག་རྣམས་ཀྱི་ཆོས་སུ་གྱུར་པ་ཆོས་ལྟར་འཆོས་པས་ཁྲིད་པར་མི་བྱེད་དོ། །དེ་ལྟར་ཡོན་ཏན་བདུན་དང་ལྡན་པའི་གྲོགས་པོ་སྟེན་པའི་སྐྱེས་བུ་རྣམས་ནི་བདག་ཅག་གི་འཇིག་རྟེན་ལས་ཤི་འཕོས་
ནས་ལྷའི་འཇིག་རྟེན་དག་ཏུ་སྐྱེ་བར་འགྱུར་རོ། །ཆོས་འདི་དག་ནི་དང་པོར་བསྟེན་པ་ཡིན་ནོ། །ཡང་ལྷ་དག་ཆོས་གཞན་བདུན་པོ་གང་དག་གིས་ལྷའི་འཇིག་རྟེན་རྣམས་འཕེལ་བར་བྱེད་པ་ཡིན་ཞེ་ན། འདི་ལྟ་སྟེ། དགེ་བའི་བཤེས་གཉེན་སྟེན་པ་དང་། ཐོས་པ་དང་ལྡན་པར་གྱུར་པ་
དང་། སྒྲུབ་པ་དང་ལྡན་པར་གྱུར་པ་དང་། ལེ་ལོ་མེད་པར་གྱུར་པ་དང་། དྲན་པ་དང་ལྡན་པ་དང་། གཞན་ལ་གདུང་བར་མི་བྱེད་པ་དང་། ཚུལ་འཆོས་པ་མེད་པ་དང་སྟེ། ཇི་ལྟར་བསྟན་པའི་ཆོས་བདུན་པོ་དེ་དག་རྣམས་ཀྱིས་སྐྱེས་བུ་ལུས་ཞིག་པ་ན་བདེ་འགྲོ་མཐོ་རིས་ཀྱི་འཇིག་རྟེན་
ལས་ལྷ་རྣམས་ཀྱི་ནང་དུ་སྐྱེའོ། །འདི་ལྟ་སྟེ། ཤིང་རྟ་ཆེན་པོ་བདུན་དང་ལྡན་པས་ནི་རྒྱལ་པོའམ། རྒྱལ་པོའི་བློན་པོ་ཡང་རུང་སྟེ་བདེ་བས་སྐྱེད་མོས་ཚལ་གྱི་ལྟད་མོ་ལ། གླུ་དང་། རྔ་སྒྲ་དང་། ཕྲེང་བ་དང་བཅས་པས་ཇི་ལྟ་བ་བཞིན་འགྲོ་བར་བྱེད་དོ། །དེ་བཞིན་དུ་ཆོས་བདུན་པོ་དེ་
དག་དང་ཡང་དག་པར་ལྡན་པའི་སྐྱེས་བུ་རྣམས་ནི་ལྷའི་འཇིག་རྟེན་དུ་འགྲོ་བར་འགྱུར་རོ། །རྣམ་པ་དེ་ལྟ་བུར་གྱུར་པའི་ཐོས་པ་དེ་ཡང་གང་ཡིན་ཞེ་ན། འདི་ན་ཐོས་པ་དང་ལྡན་པར་གྱུར་པའི་མི་ནི་གང་སྙིང་པོར་གྱུར་པ་ཉན་པའོ། །དེ་དག་ཐོས་ནས་ཀྱང་རྒོད་བག་དང་ལྡན་པར་མི་འགྱུར་རོ། །

ཇི་ལྟ་ཇི་ལྟར་ཐོས་པ་དེ་ལྟ་དེ་ལྟར་ཆེས་རབ་ཏུ་ཆོས་ལ་རྟོན་པས་བག་དང་ལྡན་པར་འགྱུར་རོ། །ཤེས་པ་རྣམས་ཀྱིས་ཆོག་ཤེས་པར་མི་བྱེད་པར་འགྱུར་རོ། །གཞན་དག་རྣམས་ལ་ཡང་ལན་ཅིག་མ་ཡིན་ཞིང་ལན་ཅིག་མ་ཡིན་པར་འདྲིའོ། །རང་ཉིད་ཀྱིས་ཀྱང་གཞན་རྣམས་ལ་
བསྙད་པའི་དོན་དུ་རབ་ཏུ་བརྗོད་དོ། །དེ་ལྟ་བུའི་ཐོས་པ་དང་ལྡན་པའི་སྐྱེས་བུ་རྣམས་ནི་ལུས་ཞིག་ནས་མཐོ་རིས་བདེ་འགྲོ་ལྷའི་འཇིག་རྟེན་དུ་སྐྱེའོ། །གཉིས་པ་ནི་ཆོས་ལ་སྒྲུབ་པ་དང་ལྡན་པ་ཡིན་ཏེ །ཇི་ལྟར་ན་སྒྲུབ་པ་དང་ལྡན་པ་ཡིན་ཞེ་ན། འདིར་ཆོས་རྣམས་ཐོས་ནས་ཆོས་འདུལ་
བ་ལ་དེ་ཁོ་ན་བཞིན་དུ་སྒྲུབ་པར་བྱེད་དོ། །ཐོས་པ་དང་ལྡན་པར་གྱུར་ནས་ཀྱང་ཆོས་འདུལ་བ་ལ་སྒྲུབ་པར་མི་བྱེད་པ་དེ་ནི་ཐོས་པ་རྣམས་ཁུར་འབའ་ཞིག་ཡིན་པ་ཁོ་ནར་ཟད་དོ། །འབྲས་བུ་ལ་སྟེན་པར་བྱེད་པ་མ་ཡིན། ཤེས་རབ་དང་། དགེ་བ་ལ་སྦྱོར་བ་དང་། ཚུལ་ཁྲིམས་དང་།
ཤེས་རབ་རྣམས་ཡིད་ལ་འབབ་པ་ཡང་མ་ཡིན་ནོ། །དེའི་ཚེ་ནི་འོད་དང་རྣམ་པར་བྲལ་བའི་རི་མོའི་མར་མེའི་བཞིན་དུ་སྙིང་པོ་མེད་པ་ཡིན་ནོ། །གང་ཡང་ཤེས་རབ་དང་། ཚུལ་ཁྲིམས་ལ་སྦྱོར་བར་བྱེད་པ་དེ་ནི་མེའི་མར་མེ་རྣམས་འོད་བྱེད་པ་བཞིན་ནོ། །ཐོས་པ་དེ་དག་རྣམས་ནི་དོན་
ཡོད་པ་ཡིན་ནོ་སྒྲུབ་པའི་ཆོས་རྣམས་ཀྱི་སྙིང་པོ་ཡིན་གྱི་ངག་ནི་སྙིང་པོ་མ་ཡིན་ནོ། །ལུས་དང་ངག་གི་ལས་ཀྱི་མཐའ་རྣམས་ནི་ཞི་བ་དེ་དག་ནི་ལུས་ཞིག་ནས་མཐོ་རིས་བདེ་འགྲོ་ལྷའི་འཇིག་རྟེན་དུ་སྐྱེའོ། །ཆོས་གསུམ་པར་གྱུར་པ་ལེ་ལོ་ཇི་ལྟ་བུ་ཡིན་ཞེ་ན། འདི་ན་སྙོམ་ལས་སུ་གྱུར་པས་སྒྲུབ་
པ་བྱེད་པ་མ་ཡིན་ནོ། །སྒྲུབ་པ་ཞེས་བྱ་བ་ནི་ཇི་སྐད་བཤད་པའི་དོན་རྣམས་བྱེད་པའམ། གཏན་ལ་འབེབས་པའོ། །དེ་ཡང་ཉེ་བར་རྩོམ་པ་དང་སྤྲོ་བར་མི་བྱེད་དེ་སྒྱུ་སྙོམ་དང་། བརྩོན་འགྲུས་དམན་པ་དང་། རྩོམ་པ་ཞན་པར་གྱུར་པའི་སྐྱེས་བུ་རྣམས་ཀྱིས་ནི་འཇིག་རྟེན་པའི་དོན་
ཐམས་ཅད་ལ་ཡང་ནུས་པ་མེད་པར་འགྱུར་རོ། །འཇིག་རྟེན་ལས་འདས་པ་ལ་ཡང་བརྩོན་འགྲུས་དམན་པ་རྣམས་དང་སྤྲོ་བ་མེད་པ་རྣམས་ཀྱིས་ནི་དགོས་པ་ཐམས་ཅད་ལས་ཡོངས་སུ་ཉམས་པར་འགྱུར་རོ། །འཇིག་རྟེན་པ་རྣམས་ཀྱིས་ཀྱང་ཐོ་བཙམས་པའི་གནས་སུ་འགྱུར་རོ། །

བདག་ཉིད་རང་ཡང་སྐྱིད་པར་འགྱུར་བ་ཡང་མ་ཡིན་ནོ། །ལེ་ལོས་ཉེ་བར་བཅོམ་པའི་མི་རྣམས་ནི་ལུས་ཞིག་ནས་ཀྱང་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །དེའི་ཕྱིར་ན་ལེ་ལོ་རྣམས་ཐམས་ཅད་ནས་གནས་སྐབས་ཐམས་ཅད་དུ་དུག་དང་།
མེ་དང་། མཚོན་ཆ་དང་། གཡང་ས་དང་འདྲ་བར་ཡང་ཡོངས་སུ་སྤང་བར་གྱིས་ཤིག །བདག་ཉིད་ཐམས་ཅད་ཀྱིས་གནས་སྐབས་ཐམས་ཅད་དུ་སྙོམ་ལས་ཀྱིས་ཉེ་བར་བཅོམ་པའི་སྐྱེས་བུ་བརྩོན་འགྲུས་དམན་པ་རྣམས་ནི་གཟི་བརྗིད་ཀྱང་ཕྱུགས་རྣམས་དང་མཚུངས་པར་འགྱུར་
རོ། །ཤེས་པ་དང་རྣམ་པར་ཤེས་པ་དང་། ཆོས་དང་། ཆོས་མ་ཡིན་པ་དང་། བགྲོད་པར་བྱ་བ་དང་། བགྲོད་པར་མི་བྱ་བ་རྣམས་ཀྱང་རྣམ་པར་མི་ཤེས་སོ། །དེ་ཅིའི་ཕྱིར་ཞེ་ན། དཔྱད་པར་བྱ་བ་ལེ་ལོའི་སྐྱོན་གྱིས་བསྟན་བཅོས་ལ་བློ་ཟུམ་པར་གྱུར་པའི་སྐྱེས་བུ་ནི་ཆོས་ཐམས་ཅད་
རྣམ་པར་མི་ཤེས་སོ། །དོན་དང་དོན་མ་ཡིན་པ་རྣམས་ལ་ཡང་དེ་ཁོ་ན་བཞིན་ཏེ། དེ་ལྟར་ཡང་མར་མེ་ལྟ་བུའི་ཤེས་རབ་ཀྱིས་ཐམས་ཅད་རྟོགས་པར་འགྱུར་བ་ཡིན་ནོ། །ཤེས་པ་དེ་ཡང་བརྩོན་འགྲུས་དམན་པ་རྣམས་དང་ལེ་ལོ་ཅན་རྣམས་ལ་མེད་པ་ཡིན་ནོ། །དམུས་ལོང་དང་མཚུངས་
པར་གྱུར་པ་དེ་ལུས་ཞིག་པ་ན་ངན་སོང་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བའོ། །དེ་བཞིན་དུ་འཇིག་རྟེན་པའི་དོན་རྣམས་ཐམས་ཅད་ལ་ཡང་སྟེ། དོན་ཐམས་ཅད་ཉམས་པར་བྱེད་པར་འགྱུར་རོ། །དེ་དོན་རྣམས་ཐམས་ཅད་ཉམས་པས་མཆོག་ཏུ་སྡུག་བསྔལ་
བར་འགྱུར་རོ། །གཞན་གྱི་ཁྱིམ་ལ་ཉེ་བར་སྟེན་པར་བྱེད་པ། གཞན་གྱི་ལུས་ཉེ་བར་འདོད་པ། གཞན་གྱི་བདེ་བ་རྣམས་ཉེ་བར་རྟོགས་པ་ལ་ཆེད་ཆེར་བྱེད་པ། མཆོག་ཏུ་གོས་ཧྲུལ་བ། སྐྲ་རྣམས་ཀྱིས་མིག་གཡོགས་པ། ཁ་དང་མིག་དང་སྐམས་པར་གྱུར་པས་བཞི་མདོ་ནས་
བཞི་མདོ་རྣམས་སུ་དང་། སུམ་མདོ་ནས་སུམ་མདོར་དང་། ཁྱིམ་ནས་ཁྱིམ་དུ་སློངས་མོས་འཚོ་བར་གྱུར་པ། ཤིན་ཏུ་རིད་པ། གསོན་པ་ལ་ཡང་སྐྱེ་བོ་རྣམས་ཐམས་ཅད་སྐྱུག་བྲོ་བར་གྱུར་པའོ། །རྒྱུ་འདི་དག་གིས་ན་སྐྱེས་བུ་རྣམས་ཐམས་ཅད་ཀྱིས་ཀྱང་གནས་སྐབས་ཐམས་ཅད་དུ་

ཡང་ལེ་ལོ་ཡོངས་སུ་སྤང་བར་བྱའོ། །གཞན་དུ་ནི་བརྩོན་འགྲུས་བརྩམས་པའི་བརྩོན་འགྲུས་དང་ལྡན་པ་སྤོང་བ་དང་ལྡན་པ་རྣམས་ནི་དོན་ཐམས་ཅད་ཕུན་སུམ་ཚོགས་པར་འགྱུར་རོ། །མྱ་ངན་ལས་འདས་པའི་མཐར་ཐུག་པར་ཡང་འགྱུར་ན་གཞན་འཇིག་རྟེན་པའི་རྣམས་དང་། ལུས་
ཞིག་ནས་ཀྱང་མཐོ་རིས་ཀྱི་འཇིག་རྟེན་བདེ་འགྲོ་ལྷར་སྐྱེ་བར་འགྱུར་བ་ལ་ལྟ་སྨོས་ཀྱང་ཅི་དགོས། དེའི་ཕྱིར་ལྷའམ་མི་རྣམས་ཀྱིས་ཀྱང་རུང་སྟེ། གནས་སྐབས་ཐམས་ཅད་དུ་ལེ་ལོ་ཡོངས་སུ་སྤང་བར་བྱའོ། །དེ་ནས་དེའི་ཚེ་བཅོམ་ལྡན་འདས་ཐམས་ཅད་སྐྱོབ་དེས་ཚིགས་སུ་བཅད་པ་གསུངས་
པ། ཇི་ལྟར། བློ་ནི་ལེ་ལོའི་རང་བཞིན་དང་། །དྲེགས་པ་དང་ནི་རྩུབ་པ་དང་། །ཤེས་རབ་ཡོངས་སུ་སྤངས་ཕྱིར་ཡང་། །ལོག་པར་ལྟུང་བའི་ས་མི་མཐོང་། །དམ་པ་རྣམས་དང་འདིར་འགྲོགས་ཤིང་། །དམ་པ་མིན་པ་སྤང་བར་བྱ། །ཆུད་གསོན་རྒྱུར་ནི་རབ་ཏུ་བཤད། །ལོག་པར་
ལྟ་བ་ཉིད་ཀྱང་སྟེ། །ཡུལ་དུས་ལེགས་པར་རྩོམ་མིན་ཞིང་། །བརྗོད་དང་མ་བརྗོད་རྣམ་མི་ཤེས། །ཕྱིར་ཞིང་དོན་མེད་འགྱུར་དེ་དག །ངལ་སོ་བ་ཡང་བུད་མེད་རྣམས། །གང་དང་དེ་ཡིས་འཐུན་འཛིན་པའི། །ཟས་རྣམས་དེ་དང་དེ་ལའོ། །དེ་དག་ཡང་མོར་བྱེད་པ་དང་། །བདག་ཉིད་ཞོར་
འཕྱང་དང་དེ་བཞིན། །བརྟན་པ་འཇིག་དང་དྲན་པ་ཉམས། །ས་བདག་དང་ཡང་འགལ་བར་བྱེད། །དེ་དག་དུས་མིན་འཆི་བ་དང་། །དེ་བཞིན་དུ་ནི་ཁྲོ་བའི་ཡིད། །ལས་འབྲས་དེ་ཁོ་ན་མི་ཤེས། །ཆོས་དང་ཆོས་མིན་ཕྱི་རོལ་བྱས། །ལེགས་པའི་སྐྱེས་བུ་རྣམས་ཀྱིས་སྤངས། །ཀུན་
ཏུ་འགྲོ་བས་འགྲོས་ཀྱིས་ངལ། །ལེ་ལོའི་བློ་ནི་གཉིད་དང་ཡང་། །དེ་བཞིན་རོ་རྣམས་ལ་ཡང་བརྐམ། །རྣམ་པར་སྤངས་པས་གང་ལ་ཡང་། །སྐྱེ་གནས་ལ་ནི་རབ་སྡང་བརྗོད། །འདོད་ཆེན་དང་ནི་མངོན་ང་རྒྱལ། །རྐོ་ཏྲོག་ཅན་དང་ཆོས་སྤངས་པོ། །འདོད་པ་ལ་ནི་ལེགས་སྟེན་ཉིད། །ལུས་
ལ་ཡོངས་སུ་གདུང་བྱེད་ཡིན། །སྐྱོན་ནི་གསུམ་པོ་འདི་རྣམས་ཀྱི། །རྩ་བ་ལེ་ལོ་ཡིན་པར་བརྗོད། །མི་རྣམས་སྐྱོན་ནི་རྗེས་འབྲེལ་བཅས། །བརྩོན་འགྲུས་བརྩམས་པས་འཇོམས་པ་ཡིན། །བརྩོན་འགྲུས་བརྩམས་པ་ཅི་ནས་ཀྱང་། །འབྲས་བུ་ཐམས་ཅད་ཉེར་ལོངས་སྤྱོད། །རིགས་

པ་དེ་ཉིད་བརྩམས་པ་ནི། །ཆོས་བཞིན་དུ་ནི་འབྲས་བུ་མཐོང་། །ལས་རྣམས་གསུམ་པོ་འདི་ལ་ནི། །འབྲས་བུ་རྣམ་པ་གསུམ་དུ་འདོད། །ཕུང་པོ་གསུམ་དང་ངེས་དེ་ཡང་། །གསུམ་རྩས་སྲིད་གསུམ་རྗེས་སུ་འགྲོ། །དེ་ལྟར་བཅོམ་ལྡན་འདས་ཐམས་ཅད་
སྐྱོབ་དེའི་མཆོད་རྟེན་དེ་ལ་ལེ་ལོ་ལ་རྣམ་པར་སྨོད་པའི་ཚིགས་སུ་བཅད་པ་རྣམས་མངོན་པར་བྲིས་པའི་རྣམ་པ་དེ་སྲིད་པ་ཉིད་ལེགས་པར་མངོན་པར་མཐོང་བས་ངེས་པར་གཅིག་ཏུ་ལེ་ལོ་སྤང་བར་བྱའོ། །གང་གི་ཕྱིར་ཇི་སྐད་དུ་བཤད་པའི་ལེ་ལོ་གཅིག་པུ་ཞིག་ལས་ཀྱང་ཡན་ལག་དེ་རྣམས་
ཙམ་ཞིག་ཡིན་ནོ། །ལེ་ལོ་མེད་པ་བརྩོན་འགྲུས་བརྩམས་པར་གྱུར་པའི་ལྷའམ་མི་རྣམས་ཡང་རུང་སྟེ། དོན་རྣམས་ཐམས་ཅད་མེད་པར་མི་འགྱུར་རོ། །ཐམས་ཅད་ལས་དུས་ཐམས་ཅད་ཀྱི་ཚེ་ཐམས་ཅད་དུ་ཡོངས་སུ་ཉམས་པར་མི་འགྱུར་རོ། །ལེ་ལོ་མེད་པར་གྱུར་པའི་སེམས་ཅན་
རྣམས་ནི་མྱ་ངན་ལས་འདས་པའི་མཐར་འགྲོ་བ་དེ་ཁོ་ནའོ། །དེ་ལ་གཅེས་པར་གྱུར་པའི་ཆོས་བཞི་ནི་བསྟན་ནོ། །ཆོས་གཞན་གང་དག་མི་རྣམས་ལ་གཅེས་པར་གྱུར་པ་ཡིན་ཞེ་ན། འདི་ལྟ་སྟེ་དྲན་པའོ། །དེ་ལྟར་ཡང་ཆོས་ཐམས་ཅད་ཀྱི་བར་ཆད་བྱེད་པ་ལེ་ལོ་ཡིན་པ་དེ་བཞིན་དུ་ཆོས་
ཐམས་ཅད་ཀྱང་སྟེ། མྱ་ངན་ལས་འདས་པའི་རྣམ་པར་སྨིན་པ་ཅན་ཡང་དྲན་པ་གཅིག་ཏུ་བསྒོམས་ཤིང་ལེགས་པར་བསྒོམས་པའི་རྩ་བ་ལས་བསྒོམ་པར་བྱ་བའི་དོན་འཐོབ་པར་འགྱུར་རོ། །ཁྱིམ་པའམ་རབ་ཏུ་བྱུང་བ་ཡང་རུང་སྟེ། དྲན་པ་དང་ལྡན་པ་རྣམས་ནི་བག་མེད་
པར་མི་འགྱུར་རོ། །བག་དང་ལྡན་པ་ཡང་དོན་བརྩམས་པ་རྣམས་ཆུད་མི་ཟའོ། །དེ་ཡང་ནས་ཡང་དུ་ཡང་དོན་གཞན་རྣམས་རྩོམ་པར་བྱེད་དོ། །རིགས་པ་དང་རབ་ཏུ་བརྩོན་པ་དང་མངོན་པར་འདོད་པས་ཀྱང་དེ་རྟག་ཏུ་དྲན་པ་དང་ཤེས་བཞིན་དང་ལྡན་པས་ཤེས་བཞིན་གྱིས་
གནས་པར་འགྱུར་རོ། །དབང་པོ་ལྔ་པོ་རྣམས་ཡང་སྤྱོད་ཡུལ་ལྔ་ལས་སྲུང་ལ་འཕོ་བ་དང་གཏོང་བ་ཡང་མ་ཡིན་ཏེ། རྟག་ཏུ་ཡང་རྐྱེན་རྣམས་ལས་མིག་གིས་གཟུགས་མཐོང་བ་ན་དེའི་ཚེ་འདུན་པའི་འདོད་ཆགས་ཀྱིས་དགའ་བར་མི་བྱེད་དོ། །རང་བཞིན་རྣམས་མཐོང་བར་འགྱུར་

རོ། །རྐྱེན་གྱི་རྩ་བ་ཅན་དུ་མཐོང་བར་འགྱུར་རོ། །རྒྱུ་ལས་ཀུན་འབྱུང་བའི་གཟུགས་རྣམས་མཐོང་བ་ན་རྙོག་པ་ཅན་དུ་མི་བྱེད་དོ། །དེ་ལས་སྐྱེས་པའི་ཡིད་ལ་བྱེད་པས་ཁྲིད་པར་མི་འགྱུར་རོ། །དགའ་བའི་འདོད་ཆགས་དྲན་པ་ཉམས་པས་ཀུན་ནས་བཅིངས་ནས་སྐྱེས་བུའམ།
རབ་ཏུ་བྱུང་བ་རྣམས་སམ། ལྷའམ། ལྷ་གཞན་དག་གང་ཡང་རུང་བ་རྣམས་ཀྱང་རུང་སྟེ། ཉོན་མོངས་པ་བདུད་ཀྱི་སྤྱོད་ཡུལ་རྣམས་ལ་དགའ་བར་མི་འགྱུར་རོ། །དེས་སྐྱེས་པའི་འཇིགས་པ་རྣམས་ཀྱང་ཀུན་ནས་ཤེས་སོ། །སྐྱོན་ལས་སྐྱེ་བར་འགྱུར་བར་གྱུར་པ་རྣམས་ཀྱང་ཤེས་
སོ། །འགགས་པ་རྣམས་ཀྱང་དྲན་པས་ཡོངས་སུ་ཤེས་ཏེ། ལེགས་པར་དྲན་ནས་ཇི་ལྟར་ཆེ་གེ་མོ་ཞིག་གི་ཡུལ་ན་དམིགས་པ་འདི་དག་གིས་དང་། རྒྱུ་འདིས་དང་། རྐྱེན་འདིས་དང་། རྣམ་པ་དེ་འདྲ་བའི་ཡུལ་ལས་ཀུན་ཏུ་བྱུང་བའི་མིག་གི་རྣམ་པར་ཤེས་པ་དང་ལྷན་ཅིག་ཏུ་
འགྲོགས་པའི་ཡུལ་གྱི་རླན་གྱིས་ཀུན་ཏུ་བསྐྱེད་པར་གྱུར་པའི་དུས་དེའི་ཡིད་ལ་བྱེད་པའི་ཉོན་མོངས་པ་ངེས་པར་འཇོམས་པ་པོ་རང་གི་ངང་གིས་ནུས་པ་དང་ལྡན་པས་ཉོན་མོངས་པ་ངེས་པར་འཇོམས་པས་རབ་ཏུ་འཇོམས་པར་གྱུར་པ། རྒྱུ་དང་རྐྱེན་རྣམས་ལས་ཀུན་ཏུ་འབྱུང་བ་ཡུལ་
དེས་ཤིན་ཏུ་ཡང་ཆགས་པ་སྐྱེད་པར་བྱེད་པས་དེས་ཞེན་པ་དྲན་པར་གྱུར་ན་དྲན་པ་ཉེ་བར་གནས་པའི་ཕྱིར་ན་སླར་ཡང་རབ་ཏུ་འཇོམས་པར་བྱེད་དོ། །དེ་གཟུགས་དམིགས་པས་ཟིལ་གྱིས་མནན་ན་དྲན་པས་འཇིགས་པ་དང་བཅས་པས་རྣམ་པ་དུ་མར་རབ་ཏུ་སྤོང་བར་བྱེད་དོ། །དལ་བུས་
དལ་བུས་ལས་བྱེད་པ་སྤྱང་པོར་གྱུར་པའི་ལྕགས་མགར་མེར་བཅུག་ནས་དྲོས་པར་གྱུར་པའི་ལྕགས་ཀྱི་སྣོད་རྡུང་བ་དེ་བཞིན་དུ་ལུས་དབེན་པ་ལ་སྤྲོ་བ་རྣམས་ཡང་དལ་བུས་དལ་བུས་དྲི་མ་རྣམས་སྦྱོང་བར་བྱེད་དོ། །ཞིབ་མོར་བྱེད་ཅིང་དྲི་མ་མེད་པར་བྱེད་དོ། །དེ་བཞིན་དུ་འདི་
ན་མཛེས་པར་གྱུར་པ་རྣམས་ཀྱིས་དྲན་པས་སེམས་ཀྱི་རྒྱུད་དལ་བུས་དལ་བུས་དྲི་མ་རྣམས་མེད་དོ། །ཇི་ལྟར་མཛེས་པའི་རྫ་མཁན་བརྩོན་འགྲུས་བརྩམས་པར་གྱུར་པ་རྒྱུ་རྐྱེན་དང་གོམས་པ་རྣམས་ཀྱིས་འཇིམ་པའི་གོང་བུ་བུམ་པར་སྒྱུར་བར་བྱེད་དེ། གཟུགས་བཟང་

པོ་རྩོམ་པའི་དྲན་པས་བརྩམས་པའི་ཕྱིར་རོ། །དེ་བཞིན་དུ་དྲན་པ་དང་ལྡན་པའི་སྐྱེས་བུས་འདིར་ཡང་འཇིམ་པའི་གོང་བུ་ལྟ་བུར་གྱུར་པའི་དམིགས་པ་དང་། རྒྱུ་རྐྱེན་གཉིས་དང་ཡིད་ཀྱི་དྲན་པ་མཛེས་པ་བསྟེན་པ་ངེས་པར་རྫོགས་པ་ལས་གང་ཡོངས་
སུ་རྫོགས་ན་དྲན་པ་བརྩམས་པས་ཚུལ་བཞིན་ཡིད་ལ་བྱེད་པ་བུམ་པ་བཞིན་དུ་སྐྱེད་དོ། །ལྷ་དག་ཇི་ལྟར་བདག་ཅག་རྣམས་ཀྱི་གོས་རྣམས་གསར་པ་གྱོན་པར་གྱུར་པའི་དུས་དེ་ཉིད་ནས་བཟུང་ནས་དེ་དག་རྣམས་རིམ་གྱིས་ཟད་པར་འགྱུར་རོ། །ཡང་གང་གི་ཚེ་ཤེས་པར་གྱུར་པ་དེའི་ཚེ་ནས་
སྐད་ཅིག་པ་རྣམས་ཤེས་པར་འགྱུར་རོ། །དེ་ཁོ་ན་བཞིན་དུ་གང་ཁོ་ནའི་ཚེ་ནས་མཛེས་པའི་དྲན་པ་ཉེ་བར་འཇོག་པར་གྱུར་པ་དེའི་དུས་དེ་ནས་བཟུང་ནས་སྐྱོན་ཐམས་ཅད་ཟད་པར་འགྱུར་རོ། །དེ་ཉིད་མངོན་པར་རྟོགས་པར་འགྱུར་བ་ཡང་གང་གི་ཚེ་འཕགས་པའི་རྒྱས་བཏབ་པར་གྱུར་
པའི་སེམས་ཀྱི་རྒྱུད་ལ་སྐྱོན་རྣམས་ཟད་པ་མཚོན་པར་འགྱུར་ཞིང་དེའི་ཚེ་ན་ཡོངས་སུ་ཤེས་སོ། །དེའི་ཕྱིར་ན་སྐྱེས་བུ་དམ་པ་རྣམས་དགེ་བ་འདོད་པས་རྟག་པ་ཉིད་དུ་མིག་དང་ཕྲད་པའི་གཟུགས་དམིགས་པར་གྱུར་པ་ན་ཡང་དག་པ་ཇི་ལྟ་བའི་དྲན་པའི་ཐག་པས་ཡོངས་སུ་བཅིངས་ན་སེམས་
ཡོངས་སུ་འཁྱམ་པར་མི་འགྱུར་རོ། །རྟ་རྒོད་བཞིན་དུ་བསྲིངས་ནས་འཛིན་པར་བྱེད་དེ་འདས་པ་དྲན་པ་དང་ལྡན་པའི་སྐྱེས་བུ་རྣམས་ནི་དགའ་བའི་འདོད་ཆགས་མི་བཟད་པ་རྣམས་དམིགས་པ་སྤངས་ནས་གནས་སོ། །དྲན་པས་དེ་བཞིན་དུ་ད་ལྟར་གྱི་ཡུལ་རྣམས་ལ་མིག་རྒྱུ་བར་བྱེད་པ་ན་སྒྲུབ་
པས་ཟློག་པར་བྱེད་དོ། །དྲན་པ་དང་དྲན་པ་མ་ཡིན་པ་དག་ལ་རྗེས་སུ་སྒྲུབ་པས་ཇི་ལྟར་ལེགས་པར་རྟོགས་པར་བྱ་ཞེ་ན། འདི་ལྟ་སྟེ། སྐྱེས་པར་གྱུར་པའི་དགའ་བའི་འདོད་ཆགས་ལ་ཚུལ་བཞིན་མ་ཡིན་པའི་རླུང་གིས་ཀུན་ནས་ཁྱེར་བ་ན་དྲན་པས་ཀུན་ཏུ་འཛིན་པར་བྱེད་དོ། །འདིར་གང་
གི་ཚེ་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་གང་ཡིན་པའི་འཕགས་པའི་བདེན་པ་བཞི་པོ་རྣམས་ཀྱིས་གཟུགས་དེ་ཉིད་ལ་ཡང་དག་པ་ཇི་ལྟ་བ་བཞིན་དུ་རྣམ་པ་དུ་མ་དང་དབྱིབས་དུ་མར་རྣམ་པར་དཔྱོད་པར་བྱེད་པ་དེའི་ཚེ་འདུན་པའི་འདོད་ཆགས་འདི་ཐམས་ཅད་དུའམ།

གནས་སྐབས་ཐམས་ཅད་དུ་ཡང་རབ་ཏུ་ཉམས་པར་འགྱུར་རོ། །གལ་ཏེ་ཤེད་ན་ཡང་ཆུང་ངུར་འགྱུར་རོ། །འདི་ནི་དེའི་དགེ་བའི་ཆོས་ཀྱི་གཟི་བརྗིད་ཡིན་ཏེ་འདི་ལྟ་སྟེ། དྲན་པས་རྗེས་སུ་སྦྲེལ་བའི་རྩ་བ་ཡིན་ནོ། །དགེ་བའི་ཆོས་རྣམས་ཐམས་ཅད་ནི་དེའི་གཞིས་རབ་ཏུ་འཇུག་གོ། །དེ་ལྟ་བུ་ནི་ད་
ལྟར་བྱུང་བའི་དྲན་པ་ཡིན་ནོ། །ཇི་ལྟར་ན་མ་འོངས་པའི་ཡུལ་ཉམས་སུ་མ་མྱོང་བ་རྒྱུ་མཚན་གྱི་དབང་དུ་བྱས་པས་ཡུལ་ཉེ་བར་དམིགས་པའི་དྲན་པ་ཡིན་ཞེ་ན། དྲན་པས་མ་འོངས་པ་རྣམས་ལ་ཡང་ལེགས་པར་དྲན་ཏེ། འབྲས་བུའི་རྒྱུ་མཚན་དམིགས་པས་མ་འོངས་པ་རྣམས་ཡང་དྲན་ཞིང་ཀུན་
ཏུ་དྲན་ནོ། །འདི་ལྟ་སྟེ། ལུས་དང་། ངག་དང་། ཡིད་ལེགས་པར་སྤྱད་པ་སྤྱོད་པའི་སྐྱེས་བུ་རྣམས་མངོན་པར་མཐོང་བར་གྱུར་ནས་ལྷ་དང་ལྷ་ཙམ་དུ་འབྱུང་བར་འགྱུར་རོ་ཞེས་འདི་དག་དྲན་ནོ། །དེ་ལྟར་དམ་པར་བྱས་པའི་ལས་རྣམས་མངོན་པར་མཐོང་ནས་ལེགས་པར་དྲན་ནོ། །ཉེས་པར་
སྤྱད་པའི་ལས་ཀྱི་མཐའ་སྤྱད་པ་རྣམས་ལས་དམྱལ་བ་རྣམས་འབྱུང་བ་ཡང་ཀུན་ཏུ་དྲན་ནོ། །དེ་ལ་དྲན་པ་ཞེས་བྱ་བའི་ཆོས་ལྔ་པ་འདི་དེ་ལྟར་ལྷ་དང་མི་རྣམས་ལ་གཅེས་པར་གྱུར་པ་ཡིན་ནོ། །གཞན་ཡང་ཆོས་དྲུག་པ་ལྷ་དང་མི་རྣམས་ལ་གཅེས་པར་བྱ་བ་ཡོད་དེ། གང་ཞེ་ན་འདི་ལྟ་སྟེ།
གཞན་ལ་གདུང་བར་མི་བྱེད་པའོ། །འདི་ན་ལ་ལ་ཉེ་བར་གདུང་བར་མི་བྱེད་པར་གྱུར་པ་བློ་ཤིན་ཏུ་རབ་ཏུ་དང་བ། གང་ཟག་རྣམས་ལ་རབ་ཏུ་དཔྱོད་པར་ཡང་མི་བྱེད་ལ་ཚངས་པར་སྤྱོད་པ་རྣམས་ལ་རབ་ཏུ་དཔྱོད་པར་ཡང་མི་བྱེད་པ་དང་། སེམས་འདུལ་བར་མི་བྱེད་པ་མ་ཡིན་པ་གནས་
མལ་དང་། ནད་ཀྱི་རྐྱེན་སྨན་དང་། ཡོ་བྱད་རབ་ཏུ་མང་པོ་མངོན་པར་མཐོང་བ་ན་གཞན་ལ་སྨོད་པར་མི་བྱེད། བདག་ལ་སྟོད་པར་མི་བྱེད་དོ། །རང་གི་དབང་དུ་བྱས་པའི་ཚུལ་ཁྲིམས་བསྔགས་པར་མི་བྱེད་ཅིང་། གཞན་གྱི་ཚུལ་ཁྲིམས་ཀྱང་དགེ་བ་མ་ཡིན་པར་ཐོས་ནས་སྦྱིན་པ་པོ་དང་སྦྱིན་
བདག་རྣམས་ལ་སོ་སོར་གོ་བར་མི་བྱེད། གྲོགས་པོ་དང་གྲོགས་པོ་མ་ཡིན་པ་རྣམས་དང་བྲལ་བས་མཚུངས་པའི་བློར་གྱུར་པ། དེའི་ཡིད་དཀོན་མཆོག་གསུམ་ལ་སོང་བར་གྱུར་པའི་དོན་གྱིས་ཚུལ་ཁྲིམས་འཆལ་བར་མི་བྱེད། ཚུལ་ཁྲིམས་དང་བཅས་པ་ལ་སྐུར་པར་མི་བྱེད་དོ། །ཞབས་འབྲིང་བར་

ཀུན་ཏུ་སྟོན་པ་མ་ཡིན་གྱི་སྙིང་རྗེས་སེམས་འཇུག་པར་འགྱུར་རོ། །འདྲི་བར་བྱེད་པའི་རང་བཞིན་ཅན་མ་ཡིན་ལ་དགོན་པ་དང་རི་ཁྲོད་དང་ཕུག་རྣམས་སུ་མངོན་པར་དགའ་བར་འགྱུར་རོ། །ཀུན་ནས་འདྲེ་བས་ཉེ་བར་འགྲོ་བར་ནི་ཚངས་པ་མཚུངས་པར་སྤྱོད་པ་དག་དང་ལྷན་ཅིག་
ཏུའོ། །ཤིན་ཏུ་ངོ་མཚར་སྐྱེ་བའི་ཡོན་ཏན་དེ་ལྟ་བུ་རྣམས་དང་ལྡན་པའི་སྐྱེས་བུ་ནི་གཞན་ལ་ཉེ་བར་གདུང་བར་བྱེད་པ་མ་ཡིན་ནོ། །དེའི་ཕྱིར་ན་གཞན་རྣམས་ལ་ཉེ་བར་གདུང་བར་མི་བྱེད་པ་ནི་ལྷ་དང་མི་རྣམས་ལ་གཅེས་པར་གྱུར་པ་ཡིན་ནོ། །གཞན་ཡང་གཅེས་པར་གྱུར་པའི་ཆོས་བདུན་པ་ལྷ་དང་
མི་རྣམས་ཀྱི་བར་དུ་གཅོད་པར་བྱེད་པ་ནི་འདི་ལྟ་སྟེ། ཚུལ་འཆོས་པས་རབ་ཏུ་འཆབ་པར་བྱེད་པའི་ཕྱིར་ཏེ། དགེ་བར་གྱུར་པ་སྡིག་པ་རྣམས་བཅོམ་པ་ཡིད་ཤིན་ཏུ་རྣམ་པར་དག་པ། ལྷུང་བཟེད་དང་ཆོས་གོས་ཀྱིས་ཆོག་ཤེས་པ། བསླངས་ནས་ཟ་བ། རི་ཁྲོད་དང་རི་ཕུག་དག་ཏུ་
སྟེན་པ། ཆོག་ཤེས་པ། དབེན་པར་གནས་པར་དགའ་བ། བསྟོད་པ་དང་། སྨད་པས་མཐོ་བ་དང་དམའ་བའི་བློ་མེད་པ། དོན་དང་དོན་མ་ཡིན་པ་རྣམས་ལ་ལྟོས་པ་མེད་པར་ལྗོངས་རྒྱུ་བར་བྱེད་པས་ལེགས་པར་རྒྱུའོ། །མི་རྣམས་ཀྱང་སྲིན་བུའི་གནས་ཡིན་པའི་ཕྱིར་དང་། ལྟེང་
ཀའི་ཆུར་གྱུར་པའི་ཆུ་ཙམ་ལ་ཡང་འཇིགས་པས་ཉེ་བར་མི་འགྲོ་སྟེ་སྲིན་བུ་གསོད་པའི་སྐྱོན་གྱི་འཇིགས་པས་འཇིགས་པའི་ཕྱིར་རོ། །རི་ལུ་དང་རི་ལུའི་ཕྲེང་བ་དང་གློག་འཁྱུག་པ་ལ་ལྟ་བར་མི་བྱེད་དོ། །ས་གཡོ་བ་དང་ཟླ་བ་གཟས་འཛིན་པ་ཡང་སྟོན་པར་མི་བྱེད་དོ། །རྙེད་པ་དང་
བཀུར་སྟིའི་དོན་དུ་གཅིག་པུ་ཞིག་ཁྱིམ་ནས་ཁྱིམ་དུ་ཉེ་བར་འཚོ་བར་བྱེད་པ་ཡང་མ་ཡིན་ནོ། །མགོ་བོ་གཅོགས་པས་ས་གཞི་གཡོ་བའི་རང་བཞིན་མ་ཡིན་ནོ། །ཤིན་ཏུ་དམན་པ་དང་ཆེ་བར་སྨྲ་བ་མ་ཡིན་ནོ། །བཀྲ་བར་བྱས་པའི་མཆིལ་ལྷམ་དང་ཤིང་ལེབ་ཀྱི་སྟན་བཟང་པོ་དང་སྔས་ནང་
ཚངས་ཅན་ཟླུམ་པོ་འཛིན་པ་མ་ཡིན་ནོ། །ཚུལ་ཁྲིམས་དང་ཡོན་ཏན་མཚུངས་པའི་གོང་མ་དག་རྙེད་ཀྱང་ཉེ་བར་སྟེན་པ་མ་ཡིན་ནོ། །གཞན་གྱི་རྗེས་སུ་འཚོ་བ་ནི་མ་ཡིན་གྱི་དེ་བཞིན་དུ་གྲོང་དང་། གྲོང་ཁྱེར་དང་། ཚོང་དུས་དག་ཏུ་སོང་ནས་རྙེད་པ་དང་བཀུར་སྟིའི་རྒྱུས་བདག་གི་ཚུལ་ཁྲིམས་དང་

ཡོན་ཏན་སྙིང་པོར་བྱས་ཏེ་བརྗོད་པར་ནི་མི་བྱེད་དོ། །བློ་རྣམ་པ་སྣ་ཚོགས་པར་གཡེང་བར་བྱེད་པ་ཡང་མ་ཡིན་ནོ། །བརྐམ་ཞིང་ཆགས་པ་ཡང་མ་ཡིན་ནོ། །གྲོང་དང་ཐག་ཉེ་བར་གནས་པར་བྱེད་པས་དགའ་བར་འགྱུར་བ་མ་ཡིན་ནོ། །སྔོན་གྱི་གཉེན་བཤེས་དང་མཛའ་བོ་རྣམས་དང་འཚོག་ཅིང་
བལྟ་བའི་དོན་དང་། དེའི་ཁྱིམ་དུ་འཇུག་པ་བློ་ལ་མང་དུ་རྒྱུ་བར་མི་འགྱུར་རོ། །ཡོད་པ་མ་ཡིན་པའི་ཡོན་ཏན་རྣམས་རྗོད་པར་མི་བྱེད་ལ་ཡོད་པའི་ཡོན་ཏན་རྣམས་ཡང་རྗོད་པར་མི་བྱེད་དོ། །ཡོད་པའི་ཡོན་ཏན་རྣམས་སྤོང་བར་ཡང་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་ཡོན་ཏན་དང་སྐྱོན་
རྣམས་སྟོན་པར་གྱུར་ནས་རྒྱབ་ཀྱི་ཤ་སྦྱིན་པར་བྱེད་པ་ཡང་མ་ཡིན་ནོ། །མཐོང་བ་དུག་ཅན་བཞིན་དུ་རྣམ་པ་དུ་མར་ཡང་བུད་མེད་ཀྱི་འགྲོ་བ་རྣམས་ཡོངས་སུ་སྤོང་བར་བྱེད་དོ། །དེ་དང་ལྷན་ཅིག་ཏུ་སྨྲ་གླེང་བྱེད་པས་གནས་པའི་རང་བཞིན་ཅན་ཡང་མ་ཡིན་ནོ། །ལྗོན་ཤིང་དང་། ནགས་དང་།
མེ་ཏོག་ཀུན་ཏུ་རྒྱས་པ་རྣམས་སུ་རྒྱུ་བའི་རང་བཞིན་ཅན་མ་ཡིན་ནོ། །བདག་དགའ་བར་འགྱུར་བའི་ཡིད་དོན་དུ་གཉེར་བས་ཉེ་བར་བགྲོད་པ་མ་ཡིན་ནོ། །དགའ་བར་འགྱུར་བའི་བྱའི་སྒྲ་ཀུན་ཏུ་སྒྲོགས་པ་རྣམས་ལ་ཉན་པའི་འདོད་ཆགས་ཀྱི་སྐྱོན་གྱི་འཇིགས་པས་གང་གི་ཕྱིར་དེའི་སྙིང་
གིས་སེམས་པ་དང་རྣ་བ་དང་ཡིད་གཏོད་པར་བྱེད་པ་མ་ཡིན། སྒྲ་དེ་དག་རྣམས་གང་ཡིན་པའི་སྐྱོན་གྱིས་འཇིགས་པས་བྱ་རྣམས་ཀྱི་སྒྲ་དང་གཞན་གྱི་སྒྲ་རྣམས་ཀྱང་ཉན་པར་མི་བྱེད། ཆུ་ཀླུང་གི་སྒྲས་གང་བའི་ཡུལ་ཕྱོགས་སུ་སྒོམ་པར་མི་བྱེད། སྒྲའི་སྐྱོན་གྱིས་ཡིད་འཕྲོགས་པར་
མི་འགྱུར་རོ། །དྲི་དང་ལྡན་པའི་མེ་ཏོག་མང་བ་དང་། འཁྲི་ཤིང་རྣམས་དང་། ལྗོན་ཤིང་རྣམས་ཤིན་ཏུ་ཕལ་ཆེ་བ་དང་། ཉེ་བར་བསམ་གཏན་བྱེད་པ་དང་། ཉེ་བར་འགྲོ་བ་དང་། ཉེ་བར་འགྲོ་བ་ཡང་མ་ཡིན་ཏེ། ཡིད་དུ་འོང་ཞིང་ཡིད་དུ་འོང་བར་གྱུར་པའི་དྲི་རྣམས་ལ་ཡང་སྣ་ཕྱོགས་
པར་འགྱུར་བའི་སྐྱོན་གྱིས་ཡིད་ཁྱེར་བའི་ཕྱིར་རོ། །སྒྲོ་རྣམས་རྣམ་པར་བཀྲ་བར་གྱུར་པས་དགའ་བའི་ཁ་དོག་སྣ་ཚོགས་པའི་བྱ་རྣམས་འདོད་ཆགས་ལ་ཆེད་ཆེར་བྱེད་པར་གྱུར་པའི་ངང་ངུར་དང་། ཤང་ཤང་ཏེའུ་དང་། རྨ་བྱ་རྣམས་ཀྱང་ལྟ་བར་བྱེད་པས་རྣམ་པར་རྒྱུ་བ་མ་ཡིན་ནོ། །

གང་གི་ཕྱིར་ཡིད་འཕྲོག་པར་བྱེད་པ་དུད་འགྲོའི་སྐྱེ་གནས་པ་རྣམས་སམ། བུད་མེད་དག་གམ། ཤིང་ཏོག་ནཱ་ཌི་ཀེ་ར་དང་། པ་ན་ས་དང་། ཆུ་ཤིང་གི་འབྲས་བུ་དང་། ཨ་མྲ་དང་། དཔལ་འབྲས་དང་། ཀ་པིད་ཐ་དང་། པ་རུ་ཥ་དང་། ཁ་རྫུ་རའི་ནགས་རྣམས་སུ་ཡང་
བསམ་གཏན་མི་བྱེད་དེ། ཡིད་རོས་འཕྲོག་པ་ཡིན་པའི་ཕྱིར་རོ། །དེ་བཞིན་དུ་དབང་པོའི་དོན་རྣམས་ལ་མཐོང་བ་དང་བྲལ་བར་གྱུར་པའི་ཞི་བའི་ཉེ་བའི་ནགས་རྣམས་ལ་བརྐམ་ཆགས་མེད་པས་མ་འདྲེས་པའི་བདེ་བར་རྒྱུ་བའི་དགའ་ཚལ་ལ་གཅིག་ཏུ་ཕྱོགས་པའི་ཡིད་ཀྱིས་བསམ་གཏན་དུ་
བྱེད་དེ། དེས་རྟག་ཏུ་བརྩོན་འགྲུས་བརྩམས་པ་ཕྱིར་རྒོལ་བ་ལྟ་བུར་གྱུར་པ་དང་། ལྷན་ཅིག་ཏུ་གཡུལ་འགྱེད་དོ། །སྐྱོན་ཆུང་ངུ་ཡང་མ་ཡིན་པ་ཡང་བར་དུ་གཅོད་པར་འགྱུར་བའི་ཡིད་ཀྱིས་རབ་ཏུ་འབད་པར་བྱེད་དོ། །རྩབ་ཧྲལ་ཅན་རྣམས་ཀྱིས་ཐོང་གཤོལ་གྱིས་གློགས་པ་མ་ཡིན་
པའི་ས་ཕྱོགས་ཀྱི་ཕྱག་དར་ཁྲོད་པ་རྣམས་ཀྱང་རྣམ་འགྱུར་བསྟན་པའི་དོན་དུ་མི་ལེན་ནོ། །སྲིད་པ་ལ་སོགས་པ་རྣམས་ཀྱི་བཞིན་བདེ་བར་གནས་པར་འགྱུར་བ་ནི་མ་ཡིན་ནོ། །འདི་ནི་གཙང་བ་དང་བཅས་པའི་ལྷུང་བཟེད་ཀྱིས་རྒྱུ་བ་དེ་ཡང་ཟས་སྐོམ་རྣམས་མི་འཛིན་ཏོ། །དངུལ་དང་གསེར་ལ་
སོགས་པ་རྣམས་ཀྱང་ཡིད་ཀྱིས་སེམས་པར་མི་བྱེད་དོ། །དགའ་བར་འགྱུར་བའི་ལྷུང་བཟེད་འཛིན་པར་འགྱུར་རོ། །བརྗེ་བསོར་ཅན་གྱི་ཆོས་གོས་རྣམས་འཛིན་པར་མི་འགྱུར་རོ། །སྒྲ་བརྡ་དང་བྲལ་བས་གོམ་པ་གཅིག་ཀྱང་རྗེས་སུ་མི་འགྲོའོ། །སྲོག་ཆགས་འཆི་བའི་སྐྱོན་དོགས་པར་བྱས་པ་མ་
གཏོགས་པར་ཚུལ་འཆོས་སྟེན་པ་པོ་ཐམས་ཅད་དུ་འགྲོ་བར་མི་བྱེད་དོ། །ལྒང་བུ་དང་། འབྲས་སོ་བ་དང་། རུལ་པར་གྱུར་པའི་འབྲས་བུ་བ་ད་ར་དང་། ཤིན་ཛི་ཏཱ་དང་། འབྲས་བུ་པ་རུ་ཥ་ཀ་དང་། ཁ་རྫུ་ར་དང་། ཀ་ཌཱ་པ་དང་། རྒྱལ་པོའི་འབྲས་སོ་བ་དང་། མོན་སྲན་གྲེའུ་རྣམས་
མ་བཏགས་པར་ཟ་བར་མི་བྱེད་དེ། སྲིན་བུ་དག་འདི་དག་གི་ནང་ན་གནས་པ་ཡིན་པའི་ཕྱིར་རོ། །སྐྲ་ཤད་པའི་སོ་མངས་མ་ཡིན། རྔུལ་བ་ལས་བྱུང་ཞིང་རང་གི་ལུས་ལས་ལངས་པའི་སྲིན་བུ་རྣམས་སྤོང་བར་མི་བྱེད་དོ། །ཆོས་གོས་དག་ལ་ཡང་གནོད་པའི་འཇིགས་པས་ཀྱང་གོམ་པ་

གཅིག་ཙམ་དང་། སྟན་གཅིག་ལ་འདུག་པ་དང་། གཞན་གྱི་ལྷུང་བཟེད་ལ་ལྟ་བར་ཡང་མི་བྱེད་དོ། །ཟས་ལ་བརྐམ་ཞིང་ཆགས་པས་དང་བསོད་པའི་འབྲས་སོ་བ་ལ་ཡང་ལྟ་བར་མི་བྱེད་དེ། རང་གི་དོན་ལུས་ཀྱི་ངོར་བྱེད་པ་ཀུན་ཏུ་སྤོང་ངོ་། །སྲིན་བུས་ཀུན་ཏུ་གང་བས་བསླད་
པའི་ས་ཕྱོགས་སུ་གཅིན་དང་གཅི་བ་གཏོང་བར་མི་བྱེད་དེ། སྲིན་བུ་ལ་གནོད་པའི་འཇིགས་པས་འཇིགས་པའི་ཕྱིར་རོ། །བསོད་སྙོམས་ལ་འཇུག་པར་བྱེད་པ་ན་ཡང་གཉའ་ཤིང་གང་ཙམ་དུ་ལྟ་བར་འགྱུར་རོ། །དྲང་པོ་དང་དྲང་པོ་ལ་སྟེན་པར་གྱུར་པའི་དགེ་སློང་འདུས་པ་རྣམས་
ལ་མི་སྟེན་པ་ཞེན་པ་མེད་པ་སྙིང་ལས་ཆུང་བར་གྱུར་པ་རྟག་ཏུ་བསམ་གཏན་གྱི་དབང་དུ་བྱས་ཏེ་དགའ་བས་བརྩོན་འགྲུས་བརྩམས་པར་གྱུར་པའོ། །དེ་ལ་སྙིང་ཉིད་ནི་ཚུལ་འཆོས་པ་མེད་པ་དང་། དེ་ཉིད་ཚུལ་ཁྲིམས་རྣམ་པར་དག་པ་དང་། དེ་ཉིད་འཚོ་བ་རྣམ་པར་དག་པ་དང་།
གཅིག་ཏུ་ཕན་པ་གཙང་ཞིང་དག་པར་གྱུར་པ་ཡིན་ཏེ། དེ་ཉིད་ཇི་སྐད་དུ་བཤད་པའི་བསླབ་པའི་གཞི་ལ་གནས་པ་རྣམས་ཀྱི་ཡིན་ནོ། །དེ་ཇི་ལྟ་ཇི་ལྟར་བདག་ཉིད་ཀྱི་འགྲོ་བ་འདོད་པར་གྱུར་པ་དེ་ཁོ་ན་བཞིན་དུ་སྐྱེ་བར་འགྱུར་རོ། །ཐམས་ཅད་དུ་ཡང་འཚོ་བ་དག་པ་འདིའི་རྣམ་པར་རྟོག་
པ་རྣམས་ཀྱང་དགེ་བའི་སེམས་ཀྱིས་ཀུན་ནས་བསླང་བ་རྣམས་སྐྱེ་བར་འགྱུར་རོ། །དེ་ནས་དེའི་དུས་ན་བཅོམ་ལྡན་འདས་ཐམས་ཅད་སྐྱོབ་དེས་ཚིགས་སུ་བཅད་པ་གསུངས་པར་གྱུར་པ། ཇི་ལྟར། འཚོ་བ་དག་པ་རྣམ་དག་པའི། །ལུས་ངག་ལས་ནི་ཞི་བ་ཡིན། །རབ་ཏུ་དབེན་
པའི་བསམ་གཏན་པའི། །ཤིན་ཏུ་མྱ་ངན་འདས་རིང་མིན། །བག་མེད་པས་ནི་གཟུང་དཀའ་བའི། །དུར་ཁྲོད་དང་ནི་ནགས་རྣམས་སྟེན། །རྟག་ཏུ་ས་གཞིའི་མལ་སྟན་ཅན། །ཤིན་ཏུ་མྱ་ངན་འདས་རིང་མིན། །གོས་ཧྲུལ་ཕྱག་དར་ཁྲོད་ཀྱི་མལ། །ལྷུང་བཟེད་གོག་པོ་གཅིག་
དེ་དང་། །འབྲས་བུ་རྩ་བས་ཆོག་ཤེས་པ། །དེ་ནི་བདེ་བར་སངས་རྒྱས་བཞེད། །འདོད་པ་ལྡན་པ་མི་རྣམས་ཀྱིས། །ཆོག་ཤེས་དང་ནི་མངོན་དགའ་བ། །བརྟན་པ་ལེགས་པར་དཔྱོད་པ་པོ། །ཤིན་ཏུ་མྱ་ངན་འདས་རིང་མིན། །ཚུལ་འཆོས་དྲི་མ་དང་བྲལ་བའི། །རྡུལ་

གྱི་འཆིང་བ་ལས་སྐྱོབ་པ། །སེམས་ནི་ནམ་མཁའ་དང་མཚུངས་པའི། །མྱ་ངན་འདས་པ་རིང་བ་མིན། །དེ་ལྟར་བཅོམ་ལྡན་འདས་དེས་ཚུལ་འཆོས་པ་མེད་པའི་དགེ་སློང་ལ་རབ་ཏུ་བསྔགས་པར་མཛད་དོ། །དེ་ལ་ཆོས་བདུན་པོ་དེ་དག་རྣམས་དང་གང་
ཡང་དག་པར་ལྡན་པའི་སྐྱེས་བུ་དེ་དག་ནི་སྐྱེས་བུ་དམ་པ་ཡིན་ནོ། །གང་ཡང་འདོད་པ་རྣམས་སྟེན་པས་རྣམ་པར་རྒྱུ་བར་གྱུར་པ་འཁོར་བར་བྱིང་བ་རྣམས་ནི་དུད་འགྲོ་དང་མཚུངས་པར་གྱུར་པའི་མིའི་མིང་ཅན་ནོ། །དེ་ལ་ཆོས་བདུན་པོ་དེ་དག་རྣམས་དང་ཡང་དག་པར་ལྡན་པའི་
སྐྱེས་བུ་དེ་ནི་རབ་ཏུ་བསྔགས་པ་ཡིན་ནོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་གྱི་ལྷ་རྣམས་སུ་སྐྱེ་བར་འགྱུར་རོ། །ཡོངས་སུ་ལྷག་པར་གྱུར་པ་རྣམས་ཀྱིས་ཀྱང་མྱ་ངན་ལས་འདས་པ་ཐོབ་པར་འགྱུར་རོ། །མཆོག་ཏུ་དགེ་བར་གྱུར་པའི་ཆོས་བདུན་པོ་དེ་དག་
རྣམས་ཡང་འདི་ལྟ་སྟེ། དགེ་བའི་བཤེས་གཉེན་བསྟེན་པ་དང་། ཐོས་པ་དང་ལྡན་པ་དང་། སྒྲུབ་པ་དང་ལྡན་པ་དང་། ལེ་ལོ་མེད་པ་དང་། དྲན་པ་དང་ལྡན་པ་དང་། གཞན་རྣམས་ལ་གདུང་བར་མི་བྱེད་པ་དང་། ཚུལ་འཆོས་པ་མེད་པ་དང་སྟེ། རིན་པོ་ཆེ་ཆེན་པོ་དེ་བདུན་གྱི་
ནོར་རྣམས་ཀྱིས་ལྷ་ཉིད་འཐོབ་པར་ཡང་འགྱུར་རོ། །དགའ་བ་རྣམས་ཐོབ་ནས་བག་མེད་པས་ཟད་པར་བྱེད་དོ། །དེ་རྣམས་སླར་ཡང་འཁོར་བ་ཁོ་ནར་ཁ་མངོན་དུ་ཕྱོགས་པར་འགྱུར་ལ། དམྱལ་བ་དང་། ཡི་དགས་དང་། དུད་འགྲོ་རྣམས་ཉིད་དུ་ཕལ་ཆེར་སྐྱེ་བར་འགྱུར་རོ། །དེའི་
ཕྱིར་ན་ལྷས་བག་མེད་པར་བྱ་བར་མི་འོས་ཏེ་བདག་ཉིད་ཀྱིས་ལེགས་པར་གོ་བར་གྱིས། སྲིད་པ་རྣམས་ན་ནམ་ཡང་བག་མེད་པ་རྣམས་ཀྱིས་བདེ་བར་འགྱུར་བ་ནི་འགའ་ཡང་མེད་དོ། །དེ་ལ་ཆོས་བདུན་པོ་དེ་རྣམས་ཀྱིས་མི་རྣམས་ལྷར་སྐྱེའོ། །རྒྱུ་རྣམ་པ་གསུམ་གྱིས་ལྷའི་འཇིག་རྟེན་པ་
རྣམས་ལས་ཤི་འཕོས་ནས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་ཏེ། གསུམ་པོ་རྣམས་གང་ཞེ་ན། འདི་ལྟ་སྟེ། དམ་པའི་ཆོས་བསྒྲགས་པ་ན་མི་ཉན་པ་དང་། སྡིག་པ་ལ་སྙེན་པ་དང་། དགེ་བའི་བཤེས་གཉེན་མ་ཡིན་པར་དགེ་བའི་བཤེས་

གཉེན་ལྟར་འཆོས་པ་དེ་དག་རྣམས་ལ་དད་པར་བྱེད་པ་སྟེ། ཆོས་དེ་དག་རྣམས་ཀྱིས་ལྷའི་འཇིག་རྟེན་རྣམས་ནས་ཤི་འཕོས་ནས་དམྱལ་བ་ཡི་དགས་དུད་འགྲོ་རྣམས་སུ་སྐྱེའོ། །འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་དེས་ལྷ་དེ་དག་རྣམས་ལ་འདི་སྐད་ཅེས་བརྗོད་
དོ། །གང་བཅོམ་ལྡན་འདས་དེས་གསུངས་པ་དེ་དག་ཐམས་ཅད་ཁྱེད་ཀྱིས་ཐོས་སམ། དེ་ནས་ལྷ་དེ་དག་རྣམས་ཐམས་ཅད་ཀྱིས་རྗོད་པར་གྱུར་པ་ནི་ཇི་ལྟ་བ་བཞིན་དུ་མདོ་དེ་དག་རྣམས་ཐོས་སོ། །བཅོམ་ལྡན་འདས་ཐུགས་བརྩེ་བ་དང་ལྡན་པ་འཇིག་རྟེན་ལ་ཕན་པར་མཛད་
པས་བག་མེད་པ་རྣམས་གདུལ་བར་བྱ་བའི་དོན་དུ་མདོ་འདི་བསྟན་པ་ཡིན་ལ། དེ་དག་ཐོས་ནས་ཀྱང་ཇི་ལྟར་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སླར་ཡང་སྐྱེ་བར་མི་འགྱུར་བ་དེ་ལྟར་གྱིས་ཤིག །ནོར་ཆེན་པོ་རྣམས་གང་གི་རྒྱུས་ལྷའི་སྐྱེ་བར་གྱུར་པ་ཁྱེད་ཀྱི་
རྩེད་མོ་འདི་དག་ཡིན་གྱིས་དེ་ནི་བག་མེད་པས་འདའ་བར་མི་འོས་སོ། །རབ་ཏུ་ལྷུང་བར་གྱུར་ཏ་རེ། བཅོམ་ལྡན་འདས་དེས་ལྷའི་མཆོག་རྣམས་ལ་མདོ་འདི་ཇི་ལྟ་བ་བཞིན་དུ་བསྟན་པ་ཡིན་ནོ། །སྟོང་ཕྲག་སུམ་ཅུ་རྩ་དྲུག་པའི་མདོ་ལས་བཅོམ་ལྡན་འདས་ཐམས་ཅད་སྐྱོབ་ཀྱིས་
གསུངས་པ་སྟེ་བཞི་པ་རྫོགས་སོ།། །།དེ་ནས་ལྷ་རྣམས་ཀྱི་མངའ་བདག་མུ་སུ་ལུན་དྷས་དེ་ལྟར་ལྷ་རྣམས་ལ་བསྟན་ཞིང་སྐྱོ་བ་ཡང་ངེས་པར་བསྐྱེད་ནས་གཞན་ཡང་འཁོར་བ་ན་སྡུག་བསྔལ་བརྒྱ་སྟོང་དུ་མ་རྣམས་ཀྱིས་ཡོངས་སུ་གང་བར་གྱུར་པ། སྡུག་པ་དང་རྣམ་པར་
བྲལ་བ་རྣམས་དང་། མི་སྡུག་པ་དང་ཕྲད་པ་རྣམས་དང་། རྒ་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དུ་མ་རྣམས་ཀྱིས་ཀུན་ཏུ་གང་བར་གྱུར་པ་དང་། ཕུན་སུམ་ཚོགས་པ་དང་། རྒུད་པའི་མི་ལམ་ལོག་གི་སྡུག་བསྔལ་གྱི་རང་བཞིན་རྣམས་ཀྱིས་གང་བར་
གྱུར་པའི་ཕྱིར་ན། དེ་ནས་ཡང་ལྷ་དེ་དག་རྣམས་ཀྱི་ཡིད་ལས་སུ་རུང་བར་གྱུར་པ་ལེགས་པར་མངོན་པར་མཐོང་བར་གྱུར་ནས། གཞན་ཡང་ཕན་པར་བྱེད་པས་རྗེས་སུ་འཛིན་པའི་ཕྱིར་ན་འདི་སྐད་བརྗོད་པ། སྦྱིན་པར་འགྲོ་བར་འདོད་པའི་ལྷ་རྣམས་བག་མེད་པས་བག་མེད་པར་

གནས་པ་རྣམས་སྲིད་པ་གཞན་གྱི་དུས་ཀྱི་གནས་སྐབས་སྟེང་དུ་གནས་པར་གྱུར་པ་ན། འགྱོད་པའི་དུས་སུ་ཕྱིན་པ་སྡུག་བསྔལ་ཆེན་པོ་སྐྱེས་པར་གྱུར་པ་ཀུན་ཏུ་ཉེ་བར་གནས་པ་རྣམས་ལ་ཅི་ཡང་བྱར་མེད་པའི་དུས་སུ་སོང་བ་ན་ལས་ཀྱི་ཐག་པས་ཀུན་ནས་
བཅིངས་ནས་གཅིག་པུ་ཞིག་གྲོགས་མེད་པར་ཁྲིད་པར་གྱུར་པ་ན། ལྷའམ། མིའམ། ཀླུའམ། དམྱལ་བ་པ་རྣམས་ཀྱང་རུང་སྟེ། འཆི་བདག་གི་ཞགས་པས་ཁྲིད་པར་གྱུར་པ་ལ་ཆོས་མ་གཏོགས་པའི་གྲོགས་སུ་གྱུར་པ་ནི་འགའ་ཞིག་ཀྱང་ཡོད་པ་མ་ཡིན་ནོ། །ལྷའི་
བདག་པོ་ཆོས་རྣམས་ནི་སེམས་ཅན་གྱི་རྒྱ་མཚོ་ཐམས་ཅད་ལགས་སོ། །སླར་ཡང་འཐབ་བྲལ་གྱི་བདག་པོ་དེ་ཉིད་ཀྱིས་འདི་སྐད་ཅེས་བརྗོད་དེ། དེ་དེ་བཞིན་ཏེ། ཆོས་དང་ཆོས་མ་ཡིན་པ་རྣམས་མ་གཏོགས་པ་འགའ་ཞིག་ཀྱང་འགའ་ཞིག་གི་གྲོགས་སུ་མི་འགྱུར་རོ། །དེ་དག་
གང་ཡིན་པ་ལྷ་དག་གིས་ངེས་པར་གོ་བར་གྱིས་ཤིག །དེ་ལ་གཞན་ལ་དད་པའི་ས་བོན་འཕེལ་བར་བྱ་བའི་རྒྱུ་མཚན་དུ་དང་། བདེ་ལེགས་ཐོབ་པར་བྱ་ཞིང་ཐོབ་པའི་དོན་དུ་དང་། སྡུག་བསྔལ་མཐར་ཐུག་པར་གཞོམ་པའི་དོན་དུ་འཛམ་བུའི་ཆུ་བོའི་གསེར་གྱི་རང་བཞིན་
གཞན་འདི་མུ་ཏིག་གི་དྲ་བས་གཡོགས་པ། རིན་པོ་ཆེ་བདུན་གྱི་ཀ་བས་ཉེ་བར་མཛེས་པར་གྱུར་པ། རིན་པོ་ཆེ་སྣ་ཚོགས་པས་རབ་ཏུ་གསལ་བར་བྱས་པ་དེའི་དེར་བདག་ཅག་རྣམས་ཐམས་ཅད་ཉིད་ཉེ་བར་ལེགས་པར་འགྲོ་བར་བྱ་སྟེ། བཅོམ་ལྡན་འདས་གསེར་ཐུབ་འདིའི་
མཆོད་རྟེན་དེར་འཇུག་པར་བྱ་བ་དང་། ཇི་ལྟ་བ་བཞིན་དུ་བདག་ཅག་གིས་བལྟ་བར་བྱའོ། །དེ་དག་ཐམས་ཅད་ཇི་ལྟ་བ་བཞིན་དུ་བདག་ཅག་གིས་བྱ་སྟེ། །རང་ཉིད་ལ་ཕན་པ་དང་། འཁོར་བ་ལས་ངེས་པར་འབྱུང་བ་དང་། མྱ་ངན་ལས་འདས་པ་ཐོབ་པར་བྱའོ། །དེ་ནས་ལྷ་དེ་དག་
རྣམས་ཀྱིས་འཐབ་བྲལ་གྱི་བདག་པོའི་ཚིག་ཉེ་བར་ཐོས་པ་དང་གུས་པ་ལེགས་པར་སྐྱེས་པར་གྱུར་པས་རྒྱགས་པ་དང་ང་རྒྱལ་རྣམས་དང་རྣམ་པར་བྲལ་བ། དབང་པོ་རབ་ཏུ་གསལ་བར་གྱུར་པས་གང་ན་བཅོམ་ལྡན་འདས་དྲང་སྲོང་གི་མཆོག་གསེར་ཐུབ་དེའི་མཆོད་རྟེན་འདི་ཀུན་ཏུ་ལྷམ་

མེ་བ་བཞུགས་པ་དེར་ཏེ་སྔར་བཞིན་ནོ། །དེ་ནས་ལྷ་དེ་དག་ཉིད་ཐམས་ཅད་མུ་སུ་ལུན་དྷ་དང་བཅས་པ་རྣམས་གང་གི་ཚེ་དྲང་སྲོང་མཆོག་གི་སྐུ་གདུང་དེའི་དྲུང་དུ་ཉེ་བར་ལེགས་པར་འགྲོ་བའོ། །ཉེ་བར་ལེགས་པར་ཕྱིན་པ་དེ་དག་རྣམས་ལ་གཞན་ཡང་འཐབ་བྲལ་བའི་བདག་པོ་དེས་འདི་
སྐད་ཅེས་སྨྲས་སོ། །མཆོད་རྟེན་འདིའི་ནང་དུ་ཡང་དེ་བཞིན་གཤེགས་པ་གསེར་ཐུབ་དེས་འཇིག་རྟེན་པ་རྣམས་ལ་ཕན་པ་དང་། འཇིག་རྟེན་ལ་བྱམས་ཤིང་རྗེས་སུ་བརྩེ་བར་གྱུར་པས་མི་རྟག་པ་ཉིད་རྣམ་པ་ཐམས་ཅད་ཀྱི་སྒོ་ནས་བསྟན་པ་ཡིན་ལ། དེ་མངོན་སུམ་དུ་ལེགས་པར་མཐོང་ནས་
ཀྱང་ལྷ་ཁྱེད་རྣམས་ཐམས་ཅད་ཤིན་ཏུ་ཡིད་འབྱུང་བར་འགྱུར་བ་དང་། རྩིག་པ་འདི་དག་གི་ལོགས་ལ་གང་དག་དེ་བཞིན་གཤེགས་པ་དེས་བསྟན་ཅིང་སྤྲུལ་པ་མཛད་པ་རྣམས་ལ་རྟག་པར་རྒྱུན་དུ་བལྟ་བར་ཡང་གྱིས་ཤིག །དེས་དེ་སྐད་ཅེས་སྨྲས་ནས་ལྷ་རྣམས་ཁྲིད་ནས་
མཆོད་རྟེན་དུ་ཞུགས་སོ། །མཆོད་རྟེན་དེ་ཡང་རྒྱར་དཔག་ཚད་བཅུ་པའོ། །མཆོད་རྟེན་དེའི་ནང་ན་ཡང་འདུས་བྱས་མ་ལུས་པ་མི་རྟག་པ་དང་། ཕུན་སུམ་ཚོགས་པ་རྣམས་རྒུད་པར་འགྱུར་བ་དང་། ལས་བདག་གིར་བྱ་བ་དང་། རང་དབང་མེད་པ་སྟེ། སོ་སོ་སོ་སོར་འགྲོ་བ་ལྔ་པོ་རྣམས་ཡོངས་སུ་སྤྲུལ་པ་
རྣམས་ཤིན་ཏུ་དྲི་མ་མེད་པ་གཟུགས་བརྙན་གྱི་གཟུགས་རྣམས་སོ་སོར་མཐོང་བ་ཡིན་ཏེ། མཆོད་རྟེན་གྱི་རྩིག་ལོགས་ལ་གཟུགས་དེ་དག་རྣམས་ཡོངས་སུ་རྫོགས་པ་དང་བཅས་པ་ཤིན་ཏུ་གསལ་བ་སོ་སོ་སོ་སོར་གྱུར་པ་དང་། རྣམ་པ་སྣ་ཚོགས་པར་གྱུར་པ་རྣམས་གསལ་བར་མཐོང་
ངོ་། །དེ་དག་རྣམས་ལས་ཡུལ་ཕྱོགས་གཅིག་ན་དམྱལ་བ་བརྒྱད་མཐོང་བ་ལ་འདི་ལྟ་སྟེ། ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པའི་དམྱལ་བ་རྣམས་སུ་ཡང་རབ་ཏུ་ལྟུང་
བར་འགྱུར་བའི་ལྷ་རྣམས་མངོན་པར་མཐོང་བ་ལ་རང་གི་ལས་ཀྱི་རླུང་གིས་རབ་ཏུ་ལྟུང་བར་གྱུར་པ་མགོ་བོ་ནི་ཐུར་ལ་རྐང་པ་ནི་གྱེན་ལ་བསྟན་པ། ཉེ་འཁོར་ཀུན་ནས་རབ་ཏུ་འབར་བའི་ལུས་ཅན་རྣམས་ཐམས་ཅད་དུ་ཀིང་ཤུ་ཀའི་ཤིང་འདྲ་བར་གྱུར་པ་དེ་སྲིད་དུ་མཐོང་བར་གྱུར་པ།

ལྷའི་རིས་ནས་དེ་སྲིད་དུ་འོག་ཏུ་རབ་ཏུ་ལྟུང་བར་གྱུར་པ། རྣམ་པར་ཁྲོས་པའི་ཡིད་ཀྱིས་ཀུན་ཏུ་ངུ་བར་བྱེད་པ། རང་གི་སེམས་ཀྱིས་ཡོངས་སུ་བསླུས་པ། ལེགས་པར་བྱས་པའི་ལས་རྣམས་ཡོངས་སུ་ཟད་པ། བག་མེད་པས་རྣམ་པར་རྒྱུ་བས་བསླུས་པར་
གྱུར་པ། བདེ་བའི་མཆོག་རྣམས་ལ་ལོངས་སྤྱད་ནས་སྡུག་བསྔལ་གྱི་མཆོག་ལ་ལོངས་སྤྱོད་པ་ལ་གཅིག་པུ་ཞིག་གྲོགས་དང་གཉེན་རྣམས་ཀྱིས་ཡོངས་སུ་སྤངས་ནས་སྐྱབས་མེད་པའི་དམྱལ་བར་ལྟུང་ངོ་། །འདི་ལ་དང་པོ་ཁོ་ནར་རེ་ཞིག་རྒྱལ་ཆེན་བཞིའི་རིས་ཀྱི་ལྷ་རྣམས་རབ་ཏུ་ལྟུང་བར་
གྱུར་པ་རྣམས་མངོན་པར་མཐོང་སྟེ། དེ་དག་ལ་སྲོག་གཅོད་པ་ཡང་ཡོད་དེ། སྲོག་གཅོད་པའི་སྐྱོན་དང་མ་བྱིན་པར་ལེན་པས་ཀྱང་ངོ་། །ཇི་ལྟར་སྲོག་གཅོད་པར་བྱེད་པ་ཡིན་ན། རྒྱལ་ཆེན་རིས་བཞིའི་ལྷ་དེ་དག་རྣམས་ཡང་ལྷ་དང་ལྷ་མ་ཡིན་རྣམས་ཀྱི་འཁྲུག་པ་ལ་སྲོག་གཅོད་པར་
བྱེད་དོ། །རྟག་ཏུ་ཡང་རྣམ་པར་རྒྱལ་བར་འགྱུར་ཏེ། ཅོད་པན་འཕྲོག་པ་དང་མཚོན་རྣམས་འཕེན་པར་བྱེད་དོ། །ལས་དུ་མའི་རྐྱེན་རྣམས་ཀྱིས་ཀྱང་སྟེ། ལན་གྲངས་གཞན་ལ་མྱོང་བར་འགྱུར་བའམ། ལས་གཞན་རྣམས་ཀྱིས་ཀྱང་ལྷ་རང་གི་སེམས་ཀྱིས་བསླུས་པ་རྣམས་ནི་ཅི་ནས་
ཀྱང་ལྟུང་བར་འགྱུར་རོ། །གང་གི་ཚེ་ལྷ་རྣམས་འཆི་འཕོ་བར་འགྱུར་བ་ན་ཕུང་པོ་རྣམས་འགག་པར་འགྱུར་རོ། །དེའི་ཚེ་ན་དམིགས་པ་རྣམས་འཇུག་པ་དང་། དམྱལ་བ་པ་རྣམས་ཀྱི་སྲིད་པ་བར་མ་དོར་རབ་ཏུ་འབྱུང་བར་འགྱུར་ཏེ། དེས་བདེ་བ་ལས་སྡུག་བསྔལ་ལ་མཚམས་སྦྱོར་བ་ཐོབ་
པར་འགྱུར་ན་འཁོར་བ་པ་གཞན་རྣམས་གང་དག་རྣམ་པ་དུ་མའི་སྒོ་ནས་དམྱལ་བར་སྐྱེ་བར་འགྱུར་བའི་ཟུག་གཟེར་གྱི་སྡུག་བསྔལ་དུ་གྱུར་པ་རྣམས་ལ་སྨོས་ཀྱང་ཅི་ཞིག་དགོས། དེ་ལ་ལས་ཆེན་པོ་འདིས་ཤིན་ཏུ་མནར་བ་གང་ཡིན་པའི་སེམས་ཅན་རྣམས་ལྷ་རྣམས་ནས་ཤི་འཕོས་ནས་དམྱལ་
བ་རྣམས་སུ་སྐྱེའོ། །དེ་ལྟར་ལྷ་དེ་དག་རྣམས་ཀྱིས་བཅོམ་ལྡན་འདས་དེས་སྤྲུལ་པ་གང་ཡིན་པའི་སྤྲུལ་པ་རྣམས་མཐོང་ངོ་། །གཞན་ཡང་ཡུལ་ཕྱོགས་གཞན་ན་རྒྱལ་ཆེན་བཞིའི་རིས་ཀྱི་ལྷ་རྣམས་ལྷའི་འཇིག་རྟེན་ནས་ཤི་འཕོས་ནས་ཡི་དགས་སུ་སྐྱེས་པ་རྣམས་མཐོང་སྟེ། རྣམ་པ་དེ་སྲིད་

ཀྱི་ཟས་བདེ་བ་དེ་དག་རྣམས་ལས་རྣམ་པ་དེ་སྲིད་ཀྱི་བཀྲེས་པ་དང་སྐོམ་པ་ཤིན་ཏུ་ཆེ་བའི་དགོན་པ་རྣམས་སུ་སྐྱེ་བར་འགྱུར་རོ། །རྣམ་པ་དེ་སྲིད་ཀྱི་གོས་རྣམས་ཀྱིས་བཀབ་པར་གྱུར་པའི་རྣམ་པ་དེ་སྲིད་ཀྱི་སྐྲས་གདོང་མི་མངོན་པ་མུན་པར་གྱུར་པར་ཀུན་ཏུ་སྐྱེད་དོ། །དེ་ནགས་ཀྱི་
ཤིང་ད་བ་ཚིག་པ་དང་འདྲ་བར་གྱུར་ནས་ཁ་ཅིག་ནི་ཀུན་ནས་སྲེག་ལ། ཁ་ཅིག་ནི་རབ་ཏུ་འབར་བའི་ལྕགས་བསྲེགས་གཅལ་དུ་བཀྲམ་པའི་དགོན་པར་བཀྲེས་པ་དང་སྐོམ་པ་དག་གི་མྱ་ངན་གྱིས་གདུངས་པར་གྱུར་ཀྱང་བད་འབབ་པར་གྱུར་པའི་རླན་གྱི་ཚད་ཙམ་གྱི་ཆུ་ཡང་མི་རྙེད་
དོ། །ལྷའི་འཇིག་རྟེན་ལ་རྣམ་པར་རྒྱུ་བར་གྱུར་པ་ལས་ཤི་འཕོས་ནས་ཡི་དགས་ཀྱི་ས་གཞི་རྣམ་པ་སུམ་ཅུ་རྩ་དྲུག་ན་ཉེ་བར་འཚེད་པར་འགྱུར་བ་རྣམས་ལེགས་པར་མཐོང་ན་བྱ་རོག་དང་། འུག་པ་དང་། བྱ་རྒོད་རྣམས་ཀྱིས་ཁ་གདོང་དང་མིག་དག་ཀུན་ནས་ཟ་བ་རྣམས་མཐོང་བར་
འགྱུར་ཏེ། མནན་ན་ནེམ་པ་བཏེག་ན་འཕར་བས་རབ་ཏུ་ལྟེམ་པ། མཉེན་པ་ཤིན་ཏུ་འཇམ་པར་གྱུར་པའི་རྣམ་པ་དེ་སྲིད་ཀྱི་མཐོ་རིས་ཀྱི་ས་རྣམས་ལ་སྤྱད་ནས་སླར་ཡང་ཡི་དགས་ཀྱི་སྲིད་པར་སྐྱེ་བར་གྱུར་ནས་མེ་མ་མུར་བདུན་གྱིས་ཤིན་ཏུ་རྩུབ་པ་དང་ལྡན་པ། རྡོ་རྗེའི་མཆུ་
རྣམས་ཀྱིས་རྐོ་བར་བྱེད་པར་གྱུར་པ། རྩྭ་དཱུར་བའི་ཚེར་མ་རྒྱ་ཆེན་པོ་རྣམས་ཀྱིས་ཀུན་ནས་གང་བར་གྱུར་པ་མཐོང་ངོ་། །གཞན་ཡང་རྣམ་པ་དེ་སྲིད་ཀྱི་དྲི་རྣམས་བསྣམས་པར་གྱུར་པ་ལ་མན་དཱ་ར་བ་དང་། ཀུ་ཤེ་ཤ་ཀ་དང་། དྲིའི་འབྱུང་གནས་རྒྱ་ཆེན་པོར་གྱུར་པ་རྣམ་པ་བརྒྱ་སྟོང་
ཕྲག་དུ་མ་རྣམས་བསྣམས་ནས་ཕྱིས་ཡང་མི་གཙང་བ་རྣམ་པར་སྨེ་བར་གྱུར་པའི་བཤང་གཅི་དང་མི་རོའི་དཀྱིལ་དུ་དུར་ཁྲོད་ན་རྒྱུ་བའི་ཡི་དགས་སུ་གྱུར་ནས་རྣམ་པ་དུ་མ་དེ་སྲིད་ཀྱིས་མི་གཙང་བའི་དྲི་རྣམས་སྣོམ་པར་བྱེད་དོ། །དེ་དག་རྣམས་ཀྱི་སྣ་བུག་ན་ནི་རབ་ཏུ་འབར་བར་གྱུར་པའི་གྲོག་
མ་རྣམས་ཀྱིས་ཀུན་ཏུ་གང་བར་འགྱུར་ཏེ། ཡི་དགས་དེ་དག་རྣམས་ཡི་དགས་ཀྱི་སྐྱེ་གནས་སུ་སྐྱེས་པར་གྱུར་པ་རྣམས་ལ་ཡིན་ནོ། །དེ་བཞིན་དུ་ཡང་སྔོན་གྱི་སྐྱེ་གནས་སུ་སྐྱེས་པ་རྣམས་རྣམ་པ་སྣ་ཚོགས་པའི་བདེ་བའི་ཡོ་བྱད་ཀྱི་ཟས་དག་འདོད་པར་གྱུར་པའི་མདོག་དང་།

རོ་དང་། དྲི་དང་། བདེ་བའི་རེག་པ་རྣམས་ཕུན་སུམ་ཚོགས་པར་གྱུར་པ་ལས། ཡང་ཕྱིས་ཡི་དགས་ཀྱི་སྐྱེ་གནས་སུ་སྐྱེས་པ་རྣམས་ལ་ཐོ་བཙམས་པ་ལས་ཀྱང་ཐོ་བཙམས་པར་གྱུར་པའི་ཤིན་ཏུ་ཡང་མི་གཙང་བར་གྱུར་པ་རོ་དང་དྲི་རྣམས་བླ་ལྷག་པར་
དམན་པར་གྱུར་པ་ལ། གལ་ཏེ་ཤེད་ན་ལོ་བརྒྱ་ཕྲག་དུ་མའི་ཤིན་ཏུ་མི་གཙང་བའི་བཤང་བ་རྣམས་སོ། །ཡང་ན་ལུས་ཤིན་ཏུ་རིད་པར་གྱུར་པ་ཉིད་ཀྱིས་རྟུག་པ་རྣམས་ཟ་བར་བྱེད་པ་དེ་བཞིན་དུ་མཆོད་རྟེན་གྱི་ལོགས་ལ་མཐོང་བར་གྱུར་ལ་ལུས་ལ་ཡང་མཆོག་ཏུ་འཇམ་པར་གྱུར་
པ། མཆོག་ཏུ་སྲབ་པ། མ་བཏགས་པ། རིན་པོ་ཆེ་དུ་མས་ཉེ་བར་མཛེས་པར་གྱུར་པ། མཐོ་རིས་ཀྱི་རྗེས་སུ་འཐུན་པ་མཆོག་ཏུ་དགའ་བར་གྱུར་པའི་གོས་རྣམས་གྱོན་པར་གྱུར་པ་ན་ཡང་རླུང་གིས་བསྐྱོད་པ། མེ་ཏོག་སྣ་ཚོགས་པའི་ཀུ་སུ་མའི་དྲི་དང་ཡང་དག་པར་ལྡན་པ་
རྣམས་ལ་ཉེ་བར་བསྟེན་པར་བྱས་པའི་ལས་རྣམས་ཡོངས་སུ་ཟད་ནས། ཕྱིས་ཡང་ཡི་དགས་ཀྱི་འཇིག་རྟེན་དུ་སྐྱེས་པ་ན་ཤིན་ཏུ་ཡང་གཅེར་བུར་གྱུར་པས་ལངས་པའི་ལུས་ཤིན་ཏུ་འཐུག་ཅིང་རྩུབ་པ། སེར་པོའི་སྐྲས་ཀུན་ཏུ་བཀབ་པའི་ལུས་ལ་སྲིན་བུ་བརྒྱ་སྟོང་གིས་བསྐོར་བར་
གྱུར་པ་དང་བཅས་པས་གང་བར་གྱུར་པ་རྣམས་ཀྱིས་རབ་རབ་ཀྲུམ་ཀྲུམ་ཟ་བ་བྱེད་པས་སྣུམ་ཁུར་འདྲ་བར་ཟ་བར་བྱེད་པའི་ཡི་དགས་ཀྱི་འཇིག་རྟེན་དུ་སྐྱེས་པའི་བཀྲེས་པ་དང་། སྐོམ་པས་བསྲེགས་པའི་ལུས་ཅན་རྣམས་ཉི་མ་རེ་རེ་ཞིང་ངུ་བ་མཆི་མ་འཛག་པས་ངུ་བར་བྱེད་པའི་བཞིན་
གྱིས་དུས་རིང་དུ་རྣམ་པ་དུ་མར་ཤིན་ཏུ་རྩུབ་པའི་ཡི་དགས་ཀྱི་སྡུག་བསྔལ་རྣམས་ཉེ་བར་ལོངས་སྤྱོད་པ་ཡིན་ཏེ། བག་མེད་པས་བསླུས་ནས་ལྷའི་འགྲོ་བ་ནས་ཡོངས་སུ་ཉམས་པར་གྱུར་པས་ཡི་དགས་ཀྱི་སྲིད་པར་སོང་བ་ཡིན་ནོ། །གཞན་ཡང་མཆོད་རྟེན་གྱི་རྩིག་
ལོགས་ཀྱི་ཡུལ་ཕྱོགས་གཞན་ཞིག་ན་ཚོགས་པ་རྒྱུ་བ་ན་རྣམ་པར་རྒྱུ་བའི་ལྷ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་འཆི་འཕོ་བར་གྱུར་པ་ན་དུད་འགྲོའི་སྐྱེ་གནས་པ་རྣམ་པ་དུ་མར་ཉེ་བར་སྐྱེ་བར་འགྱུར་བ་སྣ་ཚོགས་པའི་ཡུལ་དང་། ས་དང་། རིགས་རྣམས་དང་གནས་

གསུམ་དུ་འགྲོ་བ་ལ་འདི་ལྟ་སྟེ། ཆུ་ན་ནི་ཆུ་ལ་རྒྱུ་བ་རྣམས་ཕན་ཚུན་ཟ་བར་གྱུར་པ་ཤིན་ཏུ་འཇིགས་པར་གྱུར་པའི་གྲང་བ་དང་ཚ་བས་བྱས་པའི་ཤིན་ཏུ་རྩུབ་པར་གྱུར་པའི་གནས་སྐབས་རྣམས་ལ་ཉེ་བར་ལོངས་སྤྱོད་པར་གྱུར་པའོ། །ཐང་ལ་ནི་ཐང་ལ་འགྲོ་བ་རྣམས་ཉི་མའི་
འོད་ཀྱིས་བསྲེགས་པར་གྱུར་པས་ཡོངས་སུ་ཉམ་ཐག་པར་བྱེད་པའི་བཀྲེས་སྐོམ་གྱིས་ལུས་རྣམ་པར་བསྲེགས་པར་གྱུར་པ་རྣམས་ཕན་ཚུན་དུ་གསོད་ཅིང་འཆིང་བར་བྱེད་པའི་འཇིགས་པ་རྣམས་ཀྱིས་འཇིགས་པར་གྱུར་པ། མཆོག་ཏུ་སྡུག་བསྔལ་བར་གྱུར་པ་རྣམ་
པ་བརྒྱ་སྟོང་དུ་མའི་གནས་སྐབས་ཉེ་བར་ལོངས་སྤྱོད་པར་བྱེད་པ། མི་དགེ་བའི་ལས་རྣམས་ཀྱིས་ཡོངས་སུ་བསྐུལ་ནས་རྣམ་པ་དེ་སྲིད་དུ་ནགས་དང་ཉེ་བའི་ནགས་རྣམས་ན་དུད་འགྲོ་རྣམས་ཉེ་བར་ལོངས་སྤྱོད་པར་བྱེད་པ་རྣམས་བརྗོད་པར་སླ་བ་ཡང་མ་ཡིན་ནོ། །
དེ་བཞིན་དུ་ནམ་མཁའ་ལ་ཡང་ནམ་མཁའ་ལ་འགྲོ་བར་གྱུར་པའི་ཆེན་པོ་རྣམས་དང་། ཤིན་ཏུ་ཕྲ་བ་རྣམས་དང་། ཚོགས་པར་གྱུར་པ་དང་། ཚོགས་པ་མ་ཡིན་པ་རྣམས་ཀྱི་ལུས་ཅན་གྱི་བྱ་རྣམས་ཕན་ཚུན་དུ་གནོད་པ་བྱ་བར་སེམས་པས་བསྐྱེད་པའི་ཤིན་ཏུ་སྡུག་བསྔལ་བར་གྱུར་པའི་མི་བཟད་
པའི་གནས་སྐབས་རྣམས་ལ་ཉེ་བར་ལོངས་སྤྱོད་དེ། ལྷ་བག་མེད་པས་ཡོངས་སུ་བསླུས་ནས་དུད་འགྲོར་སྐྱེས་པར་གྱུར་པ་རྣམས་ཡིན་ནོ། །དེ་བཞིན་དུ་གཞན་གང་དག་མངོན་པར་བག་མེད་པས་ཉེ་བར་བཅོམ་པ་རྣམས་ལས་ཁྱད་པར་དུ་འཕགས་པ་དགེ་བའི་ལས་ཅན་དེ་དག་
རྣམས་ནི་ལྷའི་འཇིག་རྟེན་ནས་རབ་ཏུ་ཤི་འཕོས་ནས་མི་རྣམས་ཀྱི་འཇིག་རྟེན་དུ་སྐྱེས་པར་གྱུར་ནས་ལེགས་པར་བྱས་པའི་ལས་རྣམས་ཟད་པས་ཇི་ལྟ་བའི་དགེ་བའི་ལས་རྣམས་ལ་ལོངས་སྤྱོད་པར་བྱེད་དོ། །དགེ་བ་དང་མི་དགེ་བའི་ལས་རྣམས་ལ་ལོངས་སྤྱོད་པར་བྱེད་པས་མིའི་
འཇིག་རྟེན་དུ་སྐྱེས་པ་ནི་ཐམས་ཅད་ཉིད་ཀྱང་ཡོངས་སུ་ཚོལ་བའི་སྡུག་བསྔལ་དུ་བྱིང་བར་གྱུར་པ་དམན་པ་དང་། བར་མ་དང་། ཁྱད་དུ་འཕགས་པ་རྣམས་འབྱོར་པ་ཇི་ལྟ་བ་བཞིན་དུ་ཡུལ་དང་དུས་རྣམས་སུ་ཆོས་སྒྲུབ་པ་དང་རྗེས་སུ་འཐུན་པར་གྱུར་པའི་འཕེལ་བ་དང་འགྲིབ་པ་རྣམས་

མཆོད་རྟེན་གྱི་རྩིག་ལོགས་ལ་གསལ་བར་མཐོང་བར་གྱུར་ཏོ། །དེ་ལ་གལ་ཏེ་ཤེད་ན་ལེགས་པར་བྱས་པའི་ལས་དེ་དག་རྣམས་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་བསྙེན་གནས་འཕགས་པའི་ལམ་ཡན་ལག་བརྒྱད་ཀྱི་ལས་བྱས་པར་
གྱུར་པ་མ་ཆད་པ། མ་གོལ་བ། མ་ཟགས་པ་དང་། བརྟན་པ་དང་། སེམས་ཀྱིས་ཤིན་ཏུ་ལེགས་པར་སྦྱངས་པའི་ལས་དེ་དག་རྣམས་སམ། གཞན་ཡང་ལས་རྣམ་པ་གསུམ་མཆོག་ཏུ་ཕལ་ཆེ་བའི་ལེགས་པར་བྱས་པའི་ལས་ཀྱིས་འཕངས་པ་ངེས་པར་འདོད་པའི་རྣམ་པར་སྨིན་པ།
དཀོན་མཆོག་གསུམ་ལ་སྐྱབས་སུ་འགྲོ་བས་འཕངས་པར་གྱུར་པའམ། སེམས་ཅན་རྣམས་ལ་ཡང་མི་འཇིགས་པའི་སྦྱིན་པ་དང་ཆོས་ཀྱི་སྦྱིན་པ་དག་གིས་འཕངས་པར་གྱུར་པའམ། གཞན་ཡང་དེ་དག་དང་རྗེས་སུ་འཐུན་པར་གྱུར་པ་རྣམས་ཀྱང་རུང་སྟེ། རྣམ་པ་འདི་ལྟ་བུ་དག་གིས་
ལེགས་པར་བྱས་པ་ཤིན་ཏུ་རྣམ་པར་དག་པའི་སེམས་ཀྱིས་བསྒོམས་པར་གྱུར་པའི་ཡིད་རབ་ཏུ་དང་བས་འཕངས་པར་གྱུར་པས་སམ། ལས་དེ་དག་རྣམས་ཀྱིས་ཀྱང་གཅིག་ཏུ་རབ་ཏུ་དང་བའི་ཡིད་ཀྱིས་ཕ་དང་མ་དག་ལའམ། སྦྱིན་པ་དང་། ཚུལ་ཁྲིམས་དང་། ཤེས་རབ་རྣམས་ལ་
ལེགས་པར་སྤྱད་ཅིང་ལེགས་པར་བྱས་པའི་ལས་རྣམས་སམ། དེ་ཡང་ན་ནད་པ་དང་། མགོན་མེད་པ་དང་། དབུལ་བ་རྣམས་དང་། ནད་ཀྱིས་ཉེ་བར་གཙེས་པ་རྣམས་ལ་སྨན་པ་དང་། སྨན་དང་། གཡོག་བྱེད་པ་དང་བྲལ་བ་རྣམས་ལ་དུས་ཡུན་རིང་དུ་ནད་ཀྱི་རྐྱེན་སྨན་དག་བྱིན་པས་
འཕངས་པར་གྱུར་པའམ། ཡང་ན་དེས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་སྤྱོད་པ་དང་། ཆང་འཐུང་བ་ལ་སོགས་པ་རྣམས་རྣམ་པར་སྤངས་པས་སམ། ཡང་ན་དེས་གཡང་ས་དང་དོང་རྣམས་ལས་འབྲོག་དགོན་པ་རྣམས་སུ་རྫིང་བུ་དང་ཆུ་མིག་རྣམས་རབ་
ཏུ་སྦྱིན་པའི་དགེ་བའི་ལས་ཀྱིས་འཕངས་པས་སམ། ཡང་ན་དེས་དཀོན་མཆོག་གསུམ་མཆོད་པ་དང་། ཕྱག་འཚལ་བ་ཐལ་མོ་སྦྱོར་བའི་ལས་ལེགས་པར་བྱས་པས་སམ། རྒྱ་ཆེན་པོར་འབར་བ་དང་། རྐང་དྲུག་གི་འཇིགས་པ་ཆེན་པོ་དང་བཅས་པ་དགོན་པ་རྣམས་དང་། གསོད་

པར་གྱུར་པ་དང་། མཚོན་ཆའི་འཇིགས་པས་འཇིགས་པར་གྱུར་པ་རྣམས་ལ་རབ་ཏུ་མི་འཇིགས་པ་བྱིན་པས་སམ། ཡང་ན་དེས་རང་སངས་རྒྱས་རྣམས་དང་དགྲ་བཅོམ་པ་རྣམས་ལ་གནས་མལ་དང་། ནད་ཀྱི་རྐྱེན་སྨན་དང་། ཉེ་བར་མཁོ་བ་རྣམས་བྱིན་པས་སམ། དེས་ཡང་ན་
བུ་དང་བུ་མོ་རྣམས་ཡང་དག་པའི་བདེ་བས་ཡོངས་སུ་བསྐྱངས་པར་གྱུར་པས་སམ། མུ་གེའི་འཇིགས་པས་གཟིར་བའི་ཚོགས་རྣམས་ལ་ཡང་སྟེ། མཆོག་ཏུ་དགའ་བར་གྱུར་པ་མྱ་ངན་ལས་འདས་པ་མཐར་ཐུག་པར་བྱེད་པའི་ལས་དེ་དག་རྣམས་ནི་ཇི་ལྟར་བསྔོས་པའི་འབྲས་བུ་རྣམས་
འབྱུང་བར་འགྱུར་ཏེ། ཇི་སྲིད་དུ་བྱང་ཆུབ་ཀྱི་བར་དུ་ཡང་འགྱུར་ན་ལྷའི་སྐྱེ་གནས་རྣམས་སུ་ལྟ་སྨོས་ཀྱང་ཅི་དགོས། དེ་གལ་ཏེ་ལྷ་རྣམས་ཉིད་དུ་སྐྱེ་བར་གྱུར་ན། དེ་ཡང་ལྷའི་སྐྱེ་གནས་ལས་ཉམས་ནས་སྐྱེ་གནས་འདིར་ཡང་སྐྱེ་བར་མཐོང་ངོ་། །དེ་ལྟར་སོང་བའི་ལྷ་དེ་དག་རྣམས་ཀྱིས་
རྣམ་པ་སྣ་ཚོགས་པའི་ལས་ཀྱི་དྲ་བར་རྒྱུ་དུ་མ་སྣ་ཚོགས་པའི་ཐག་པས་སྟེང་དུ་བཅིངས་པར་གྱུར་པ། སེམས་ཅན་དུ་མ་ཉེ་བར་བསྡུས་པའི་འཁོར་བར་སེམས་ཀྱི་འཁོར་ལོ་དེས་སེམས་ཅན་རྣམས་ངེས་པར་མནན་ཅིང་ཉེ་བར་སྦྲེལ་བར་གྱུར་པ་རྣམས་ཇི་ལྟ་བ་བཞིན་དུ་མཐོང་ངོ་། །དེ་ནས་
འཐབ་བྲལ་བའི་ལྷ་རྣམས་དང་། རྒྱལ་ཆེན་རིས་བཞི་པའི་དེ་དག་རྣམས་ཀྱི་ལྷ་རྣམས་འཆི་འཕོ་བ་དང་སྐྱེ་བའི་རང་བཞིན་གྱི་སྡུག་བསྔལ་ཆེན་པོ་རྣམ་པ་དུ་མར་གྱུར་པ་དེ་དག་རྣམས་མཐོང་སྟེ། གང་བཅོམ་ལྡན་འདས་གསེར་ཐུབ་དེས་སྤྲུལ་པ་རྣམས་མངོན་པར་མཐོང་བར་གྱུར་ནས་
སུམ་ཅུ་རྩ་གསུམ་པའི་ལྷ་རྣམས་ཀྱང་དེ་བཞིན་དུ་ལྟ་བར་བྱེད་དེ། དེ་ལ་ཅི་འདིར་ཡང་རྒྱལ་ཆེན་བཞིའི་རིས་ཀྱི་སྡུག་བསྔལ་འདི་དག་རྣམས་ཇི་ལྟ་བ་ཁོ་ནར་མཆོད་རྟེན་གྱི་ལོགས་ལ་མཐོང་བ་ཡིན་ལ། དེ་ཁོ་ན་བཞིན་དུ་སུམ་ཅུ་རྩ་གསུམ་པ་རྣམས་ཀྱི་ཡང་ཡིན་ནོ། །དེ་ནས་རབ་ཏུ་
བལྟ་བར་བྱ་བའི་དོན་དུ་ལྷ་དེ་དག་རྣམས་ཡུལ་ཕྱོགས་གཞན་དུ་ཉེ་བར་འགྲོ་བར་བྱེད་དོ། །དེ་ནས་བཅོམ་ལྡན་འདས་དེ་ཉིད་ཀྱིས་ཡང་དག་པ་ཇི་ལྟ་བར་འཁོར་བའི་ཉོན་མོངས་པ་དང་། ལས་དང་སྐྱེ་བ་རྒྱ་ཆེ་བར་བརྒྱུད་མར་སྦྲེལ་བ་རྣམས་མཐོང་བར་གྱུར་པ་ལ་ལོངས་སྤྱོད་རྣམས་

གཞན་འཕྲུལ་དབང་བྱེད་པ་རྣམས་དང་། སུམ་ཅུ་རྩ་གསུམ་པའི་ལྷ་རྣམས་ནི་ཇི་ལྟར་པད་མ་རྣམས་ལ་ཉེ་བར་ལོངས་སྤྱོད་པར་བྱེད་པ། རང་གི་ལས་ལ་རྣམ་པར་སྤྱད་པ། དགེ་བ་དང་། མི་དགེ་བའི་ལས་རྣམས་ལ་ཉེ་བར་ལོངས་སྤྱོད་པར་བྱེད་དོ། །དེ་དག་རྣམས་
ཇི་ལྟར་ལས་ལ་སྤྱོད་པ་ཡང་བདེ་བ་དང་བདེ་བ་མ་ཡིན་པ་རྣམས་ཀྱི་སྐལ་བ་ཅན་དུ་འགྱུར་ཏེ། དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་ཀྱི་སྐྱེ་གནས་རྣམས་སུ་ལས་ཀྱི་ཞགས་པས་ཀུན་ནས་བཅིངས་ནས་སོ་སོ་ཐ་དད་པ་དུ་མར་རྣམ་པར་རྒྱུ་བ་ཡིན་
ལ་སུམ་ཅུ་རྩ་གསུམ་པའི་ལྷ་རྣམས་ཀྱང་ལས་ཀྱི་རླུང་གིས་བསྐྱོད་ནས་འཁོར་བ་ན་ཀུན་ཏུ་འཁྱམ་པ་ཡིན་པའི་ཕྱིར་དང་། གང་ན་སྐྱེ་གནས་གསུམ་པ་རྣམས་ན་དམྱལ་བའི་ལས་ཀྱི་འབྲས་བུ་ལ་ཡོངས་སུ་ལོངས་མ་སྤྱད་པར་གྱུར་པ་ནི་འགའ་ཞིག་ཀྱང་ཡོད་པ་མ་ཡིན་ན། དེ་དག་
རྣམས་འགྲོ་བ་ལྔར་འགྲོ་བར་འགྱུར་བ་རྣམས་མཐོང་བ་ལ་ལྟ་སྨོས་ཀྱང་ཅི་དགོས། ལེགས་པར་བྱས་པའི་ལས་ཀྱི་ཞགས་པས་སྦྲེལ་དུ་ཟིན་ཀྱང་། དེ་དག་རྣམས་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ཚ་བ་ལ་སོགས་པའི་མནར་མེད་པ་
མ་གཏོགས་པའི་དམྱལ་བ་ཆེན་པོ་བདུན་པོ་རྣམས་སུ་སྐྱེ་བར་འགྱུར་རོ། །མནར་མེད་པའི་ལས་རྣམས་གང་ཡིན་པའི་རྒྱུ་རྣམས་ལྷ་རྣམས་ལ་མེད་པའི་རྒྱུ་འདིའི་ཕྱིར་ན་ལྷ་རྣམས་མནར་མེད་པ་པར་འགྱུར་བ་ནི་མ་ཡིན་ནོ། །དམྱལ་བ་བདུན་པོ་རྣམས་སུ་ནི་སྐྱེ་བར་འགྱུར་བ་ཡང་ཡིན་ནོ། །
སུམ་ཅུ་རྩ་གསུམ་པའི་ལྷ་རྣམས་ཡང་སོས་དེར་སྐྱེ་བར་མི་འགྱུར་བ་ཡང་མ་ཡིན་ཏེ། ལན་གྲངས་གཞན་ལ་མྱོང་བར་འགྱུར་བའི་སྲོག་གཅོད་པའི་ལས་རྣམས་ཀྱིས་སམ། ལྷ་དང་ལྷ་མ་ཡིན་རྣམས་ཀྱི་འཁྲུག་པས་གསོད་པའི་ལས་ཀྱིས་ཀྱང་རུང་སྟེ། ཡུལ་གྱི་ལས་ཀྱི་ས་རྣམས་
ལ་གནས་པའི་ལྷ་རྣམས་ཐམས་ཅད་ལ་ཡང་སྲོག་གཅོད་པ་དང་མ་བྱིན་པར་ལེན་པ་ཡོད་ལ། རྒྱལ་ཆེན་བཞིའི་རིས་ཀྱི་ལྷ་རྣམས་དང་། སུམ་ཅུ་རྩ་གསུམ་པ་རྣམས་ལ་ནི་ཤིན་ཏུ་ཕལ་ཆེ་བ་ཡིན་ལ། དེ་བཞིན་དུ་ལྷ་རྣམས་ཀྱི་གནས་གཞན་བཞི་པོ་གཞན་རྣམས་ན་ཡང་ཡིན་ནོ། །

དེ་ལ་སུམ་ཅུ་རྩ་གསུམ་པ་རྣམས་ཀྱི་ལས་ཀྱི་འགྲོས་ཕྲ་མོ་འདི་དག་རྣམས་ཡང་འཐབ་བྲལ་བ་རྣམས་ཀྱིས་ཤེས་པར་བྱེད་ལ། སུམ་ཅུ་རྩ་གསུམ་པ་རྣམས་ཀྱི་འཆི་འཕོ་བ་དང་སྐྱེ་བས་བྱས་པའི་ལས་ཀྱི་འབྲས་བུ་རྣམས་ཡུལ་ཕྱོགས་འདིར་ཚོགས་པ་རྒྱུ་བ་ན་སྤྱོད་པའི་ལྷ་རྣམས་
ཀྱིས་མཐོང་ངོ་། །དགའ་བའི་ཚལ་དང་། ཡོངས་འདུ་དང་། རྩུབ་འགྱུར་དང་། ཤིང་རྟ་སྣ་ཚོགས་རྣམས་སུ་ཁང་བུར་རྩེད་མོ་རྩེ་བ་ལ་ཆེད་ཆེར་བྱེད་པར་འགྱུར་ཞིང་ཡུལ་རྣམས་ལ་ཡོངས་སུ་ལོངས་སྤྱོད་པས་ངོམས་པ་མེད་པ་རྣམས་ལེགས་པར་བྱས་པའི་ལས་ཟད་ནས་མེའི་
ཞགས་པས་ངེས་པར་བཅིངས་ནས་དམྱལ་བ་རྣམས་སུ་ལྟུང་ངོ་། །རྒྱུ་གང་དག་གིས་རྒྱལ་ཆེན་རིས་བཞི་པ་རྣམས་ལ་འགྱུར་བའི་ཟུག་གཟེར་དེ་དག་རྣམས་བཅུ་འགྱུར་གྱིས་སུམ་ཅུ་རྩ་གསུམ་པ་རྣམས་འགྱུར་རོ། །རྒྱུ་གང་གིས་ཞེ་ན། འདི་ལྟ་སྟེ། ཁ་ན་མ་ཐོ་བ་གང་དང་ལྡན་པས་ལྷ་
ཡུལ་གྱི་བདེ་བ་རྣམས་ཕལ་ཆེ་བར་འགྱུར་བ་དེ་སྲིད་དུ་འབྲལ་བའི་སྡུག་བསྔལ་ཆེན་པོ་ཤིན་ཏུ་མི་བཟད་པར་འགྱུར་རོ། །ལས་རྣམས་ནི་དཔག་ཏུ་མེད་པའི་ཕྱིར་དང་། ཤིན་ཏུ་ཡང་རྣམ་པ་སྣ་ཚོགས་པའི་ཕྱིར་རོ། །ཇི་ལྟར་ལུས་འདི་ཉིད་ཀྱི་མིག་ལ་སོགས་པའི་གནས་གང་དག་
ཡིན་པ་རྣམས་ཤིན་ཏུ་གཞོན་ཤ་དང་ལྡན་པར་གྱུར་པ་རྣམས་ནི་ཆེས་གཞོན་ཤ་དང་ལྡན་པའི་ཕྱིར་ན་གཟེར་ཟུག་ཆེས་དེ་དག་རྣམས་ལ་ལྷག་པར་འགྱུར་རོ། །དེ་བཞིན་དུ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ཁྱད་པར་གྱིས་སུམ་ཅུ་རྩ་གསུམ་པ་རྣམས་ཆེས་ལྷག་པར་སྐྱེད་པ་ཡིན་ཞིང་དེ་
དག་རྣམས་ཡུལ་དེ་ཡོངས་སུ་བཏང་བས་བྱས་པའི་ཡིད་མི་བདེ་བ་རྣམས་ཀྱང་ཆེས་ལྷག་པར་འགྱུར་རོ། །ཡིད་དང་ལྷན་ཅིག་ཏུ་སྡུག་བསྔལ་བར་འགྱུར་རོ། །དེ་ལ་གཉིས་པོ་འདི་དག་ལ་ནི་དཔེ་མེད་པ་ཡིན་ཏེ། བདེ་བ་དང་། སྡུག་བསྔལ་དག་གོ། །ལྷ་རྣམས་ཀྱི་བདེ་བ་དང་།
དམྱལ་བ་པ་རྣམས་ཀྱི་སྡུག་བསྔལ་ལོ། །དེ་དེ་ལྟར་ལས་ཀྱི་ཞགས་པས་མནར་བས་མནར་བར་གྱུར་ནས་རབ་ཏུ་ལྟུང་བར་གྱུར་པས་རབ་ཏུ་ལྟུང་བ་རྣམས་རྣམ་པ་དུ་མར་ཤིན་ཏུ་མི་བཟད་པའི་ལྷང་ཀྱོག་གི་སྡུག་བསྔལ་རྣམས་ཁྱེར་བར་བྱེད་པ་མཆོད་རྟེན་གྱི་རྩིག་ལོགས་ལ་མཐོང་ངོ་། །

དེ་ནས་ལྷ་དེ་དག་རྣམས་ཀྱིས་སུམ་ཅུ་རྩ་གསུམ་པ་དེ་དག་རྣམས་རབ་ཏུ་ལྷུང་བར་གྱུར་ཅིང་རྣམ་པར་བཅོམ་པ་རྣམས་མཐོང་བས་མཆོག་ཏུ་ཡིད་ཟུག་གཟེར་དང་ལྡན་པར་འགྱུར་རོ། །གཞན་ཡང་སུམ་ཅུ་རྩ་གསུམ་པ་དེ་དག་ཉིད་ཡུལ་ཕྱོགས་གཞན་ཞིག་ན་ཡི་
དགས་ཀྱི་སྐྱེ་གནས་སུ་སྐྱེ་བར་འགྱུར་བ་རྣམས་མཐོང་བར་འགྱུར་ཏེ། དགའ་ཚལ་དང་། རྩུབ་འགྱུར་དང་། ཤིང་རྟ་སྣ་ཚོགས་དང་། ཡོངས་འདུ་སྟེ། དེ་དག་རྣམས་སུ་ཁྱོགས་གང་དག་སྟེན་པར་བྱེད་པ་ལྷ་རྫས་ཀྱི་བདུད་རྩིས་ཚིམ་པར་བྱེད་པ། མཆོག་ཏུ་སྐྱིད་པར་གྱུར་ནས་ཕྱིས་ཡང་
དེ་ལྟར་བཤང་བ་དང་། མི་རོ་མི་གཙང་བ་རྣམས་དང་། སྲིན་བུའི་རིགས་རྣམས་ཀྱིས་ཉམས་པར་གྱུར་པ་ཡིད་ཀྱིས་བསམ་དུ་མེད་པའི་སྡུག་བསྔལ་གྱི་མཆོག་རྣམས་དང་ལྡན་པས་ལུས་ལ་ཁྱབ་པར་གྱུར་པ་དེ་ལྟ་བུ་རྣམས་མཐོང་ངོ་། །ཚོགས་པ་རྒྱུ་བའི་ས་དག་ན་རྣམ་པར་རྒྱུ་བའི་ལྷ་རྣམས་
ཀྱིས་སུམ་ཅུ་རྩ་གསུམ་པ་རྣམས་ཀྱི་ལོག་པར་ལྟུང་བའི་གནས་སྐབས་སུ་གྱུར་པའི་ཡི་དགས་ཀྱི་སྐྱེ་གནས་དེ་དག་རྣམས་ལ་ཀུན་ཏུ་བལྟས་ནས་དུད་འགྲོའི་འགྲོ་བ་རྣམས་ལ་ཀུན་ཏུ་ལྟ་བར་བྱེད་དོ། །སུམ་ཅུ་རྩ་གསུམ་པའི་ལྷ་རྣམས་ལྷུང་བར་གྱུར་ནས་རྒྱ་མཚོ་ཆེན་པོར་ཉ་རྣམས་དང་། ཆུ་སྲིན་
དང་། མུ་ཏིག་དང་། སི་སུ་མཱ་ར་དང་། ཆུ་སྲིན་ན་ཀྲ་ལ་སོགས་པར་ཉེ་བར་སྐྱེ་བར་འགྱུར་བ་ན་ཕན་ཚུན་དུ་གསོད་པས་བྱས་པའི་ཀུན་ཏུ་བྲེད་པར་འགྱུར་བ། བཀྲེས་པ་དང་སྐོམ་པས་ལུས་ཤིན་ཏུ་བསྲེགས་པ། ཟུག་རྔུའི་མཆོག་རྣམ་པ་དུ་མ་ཀུན་ནས་འབབ་པར་འགྱུར་རོ། །དེ་བཞིན་དུ་
ནམ་མཁའ་ལ་དུད་འགྲོའི་འགྲོ་བ་གྲངས་མེད་པ་བྱ་ལ་སོགས་པ་ཕན་ཚུན་དུ་གནོད་པར་བྱེད་པས་བརྒྱལ་བར་གྱུར་པ། གསོད་པའི་མཐར་ཐུག་པའི་འཇིགས་པའི་གནས་སྐབས་རྣམས་སུ་གྱུར་པ་རྣམས་ཉམས་སུ་མྱོང་བར་བྱེད་དོ། །དེ་བཞིན་དུ་གང་འགའ་ཞིག་ཤིན་ཏུ་ལེགས་
པར་བྱས་པའི་ལས་དེས་ཀྱང་གྲོལ་བར་འགྱུར་བ་སྔར་བཞིན་ཏེ། རྒྱལ་ཆེན་རིས་བཞིའི་ལྷ་རྣམས་ཇི་ལྟ་བ་དེ་ཁོ་ན་བཞིན་དུའོ། །གལ་ཏེ་མི་རྣམས་སུ་སྐྱེ་བར་གྱུར་ན་ཡང་དེ་དག་རྣམས་ཀྱི་གཞན་ལ་མྱོང་བར་གྱུར་པའི་ལས་རྣལ་མ་རྣམས་ཡིན་གྱི་སྔ་ན་མེད་པ་ནི་མ་ཡིན་ནོ། །རིགས་

འཐུན་པར་སྐྱེ་བར་འགྱུར་བས་བྱས་པ་དང་། སྐྱེ་བ་དང་། རབ་ཏུ་འབྲེལ་བའི་འཆི་བས་བྱས་པ་རྣམས་དང་། ལྷ་རྣམས་འཆི་འཕོ་བའི་དུས་ཀྱི་འབྲལ་བའི་སྡུག་བསྔལ་རྣམ་པ་དུ་མར་གྱུར་པ་གང་དག་ཡིན་པ་དེ་སྲིད་པ་དེ་དག་རྣམས་ཉིད་ཀྱང་བརྗོད་པར་སླ་བ་ཡང་མ་ཡིན་ན་གང་
ཡང་མངལ་གྱི་སྡུག་བསྔལ་ཉེ་བར་སྤྱོད་པ་རྣམས་ལྟ་ཅི་སྨོས། མིའི་འཇིག་རྟེན་དུ་སྐྱེས་པ་རྣམས་ལ་ཡང་གང་དག་བྱིས་པར་གྱུར་པ་ནས་རྟག་ཏུ་སྡུག་བསྔལ་བར་འགྱུར་ཏེ། གོག་པར་བྱེད་པ་དང་། སྨིན་པ་དང་། ཀུན་ཏུ་འགྲོ་བ་དང་། མ་རིག་པར་གྱུར་པ། རྩོད་པ་བྱེད་པ། དོན་དང་དོན་
མ་ཡིན་པ་ལ་རྣམ་པར་ཞེན་པ་དང་། ངུ་བ་ལ་སོགས་པའི་སྡུག་བསྔལ་རྣམས་ཡིན་ནོ། །དེ་དག་གི་ཡན་ལག་སོ་སོར་གྱེས་པ་རྣམས་ནི་བརྗོད་པར་སླ་བ་ཡང་མ་ཡིན་ནོ། །དེ་ལྟར་གཟུགས་བརྙན་ལྟ་བུར་གྱུར་པ་དེ་དག་རྣམས་ཐམས་ཅད་ཉིད་ཀྱང་ཚོགས་པ་རྒྱུ་བའི་སར་སྐྱེས་པའི་འཐབ་བྲལ་
གྱི་ལྷ་དེ་རྣམས་ཀྱི་མཆོད་རྟེན་གྱི་ལོགས་ལ་རབ་ཏུ་མཐོང་ངོ་། །རྣམ་པ་དུ་མ་རྣམས་སུ་ཤིན་ཏུ་སྡུག་བསྔལ་ཞིང་ཤིན་ཏུ་རྣམ་པ་སྣ་ཚོགས་པར་གྱུར་པའི་འཁོར་བའི་གར་མཁན་རྣམས་དེས་མཐོང་བར་གྱུར་ཅིང་རྣམ་པ་སྣ་ཚོགས་པ་ཆེས་ངོ་མཚར་བར་གྱུར་པ་རྣམས་མངོན་པར་མཐོང་ནས་
ལྷ་དེ་དག་རྣམས་ཤིན་ཏུ་ཡིད་བྱུང་བར་འགྱུར་ཏེ། མི་རྣམས་ནི་འགྲོ་བ་གཞན་དག་ཏུ་འགྱུར་བ་ལ་འདི་ལྟ་སྟེ། ལྷའི་འགྲོ་བར་རོ། །ལྷ་རྣམས་ཀྱང་མིའི་འགྲོ་བ་རྣམས་སུའོ། །དེ་ལ་གང་དག་བདེ་འགྲོར་སྐྱེས་པ་རྣམས་ཀྱི་གནས་སྐབས་ཀྱང་འདི་འདྲ་བར་འགྱུར་ན། ཅི་ཡང་ལས་ཀྱིས་མནར་ནས་
ངན་སོང་དུ་སོང་བར་གྱུར་པ་རྣམས་ཀྱི་གནས་སྐབས་ཅི་འདྲ་བར་འགྱུར། གཞན་ཡང་ཚོགས་པ་རྒྱུ་བའི་སར་སྐྱེས་པའི་འཐབ་བྲལ་བའི་ལྷ་དེ་དག་རྣམས་ཀྱིས་རྩིག་པའི་ལོགས་དེ་དག་ཉིད་ལ་ལས་རྣམས་མཐོང་བར་གྱུར་པ་ནི་ཆོས་བཟངས་ན་གནས་པའི་ལྷ་རྣམས་འཆི་འཕོ་བར་འགྱུར་
བ་སྟེ། ཇི་ལྟ་བར་ལས་ཀྱི་དབང་གིས་འགྲོ་བ་རྣམས། འགྲོ་བ་ལྔར་སྐྱེ་བར་འགྱུར་བའོ། །འཆི་འཕོ་བར་འགྱུར་བའི་ལྷ་དེ་དག་རྣམས་ཀྱིས་གལ་ཏེ་ཤེད་ན་གང་དག་ཏུ་གང་ཞིག་བྱས་པའི་ལས་རྣམས་ཀྱི་རྐྱེན་གྱིས་འགྱུར་བ་རྣམས་སྔར་བཤད་པ་བཞིན་ནོ། །གལ་ཏེ་ལྷ་རྣམས་ཉིད་

ལས་ཤི་འཕོས་ནས་ལྷ་རྣམས་ཉིད་དུ་སྐྱེས་ན། དེ་ན་གནས་པ་ཉིད་ན་སྡུག་བསྔལ་ཡིན་ནོ། །འདི་ལྟ་སྟེ། འཆི་འཕོ་བ་དང་སྐྱེ་བས་བྱས་པ་རྣམས་དང་། རྣམ་པར་བྲལ་བར་བྱས་པས་རྣམས་དང་། འཆི་འཕོ་བའི་འཇིགས་པས་རྣམས་ཀྱང་སྟེ། འཆི་བས་བྱས་པའི་
སྡུག་བསྔལ་རྣམས་ནི་ཆེ་བ་དང་། རྣམ་པ་ཡང་མང་བ་ཡིན་ནོ། །དེ་དག་རྣམས་བཞིན་དུ་འཆི་འཕོ་བའི་འཇིགས་པ་རྣམ་པ་དུ་མ་རྣམས་དང་། འཆི་འཕོ་བ་རྣམས་ཀྱང་ཡང་དག་པར་མངོན་པར་མཐོང་ནས་གཞན་ཡང་ཡུལ་ཕྱོགས་གཞན་རྣམས་སུ་ཀུན་ཏུ་ལྟ་བར་བྱེད་དོ། །ཇི་སྲིད་དུ་རྩིག་
པ་དེ་ཉིད་ཀྱི་ལོགས་ལ་བརྒྱ་བྱིན་འཆི་འཕོ་བར་གྱུར་པ་ལྷ་རྫས་ཀྱི་ཕྲེང་བ་མཆོག་དང་ལྡན་པ་འོད་འབར་བར་གྱུར་པའི་རྣ་རྒྱན་བཅུག་པ། འདོད་པ་ལྔའི་ཕུན་སུམ་ཚོགས་པ་དཔེ་མེད་པར་གྱུར་པའི་བདེ་བ་རྣམས་དང་རྣམ་པར་བྲལ་བར་གྱུར་པ། རང་གི་ལས་ཀྱིས་དབང་གིས་ཡང་འགྲོ་
བར་འགྱུར་བ་བག་མེད་པ་ལ་ཞུགས་པར་གྱུར་པའི་དབང་གིས་ངན་སོང་གི་ས་རྣམས་ཁྱབ་པར་གྱུར་པར་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་རྣམས་སུ་ལྟུང་བར་གྱུར་པ་རྣམས་མཐོང་ངོ་། །རང་གིས་བྱས་པའི་ལས་ཀྱིས་ཏེ། དེ་ལ་དབང་པོའི་མིང་ནི་འདི་དག་
རྣམས་ཡིན་ཏེ། དེ་ལ་སུམ་ཅུ་རྩ་གསུམ་ན་གནས་པའི་དབང་པོ་རྣམས་འཆི་འཕོ་བའི་མིང་ནི་འདི་དག་རྣམས་ཡིན་ཏེ། འདི་ལྟར་འོད་དང་ལྡན་པ་ཞེས་བྱ་བའི་བརྒྱ་བྱིན་གྱིས་ལྷ་ཡུལ་གྱི་རྒྱལ་པོ་བྱས་ནས་རང་གི་ལས་ཀྱི་བསོད་ནམས་ཟད་པར་གྱུར་ནས་རྒྱ་མཚོར་ཆུ་སྲིན་གྱི་སྐྱེ་གནས་སུ་
སྐྱེས་སོ། །དེས་ཀྱང་མིར་གྱུར་པ་ན་བྱ་བར་གྱུར་ཏེ། སྲོག་ཆགས་མང་པོ་རྣམས་བསད་པར་གྱུར་པའི་ཕྱིར་དང་། སངས་རྒྱས་ལ་ཕྱག་ཀྱང་བྱས་པར་འགྱུར་རོ། །དེ་ཕྱག་བྱས་པར་གྱུར་པ་དེའི་རྒྱུས་དེ་དབང་པོར་གྱུར་ཏོ། །དེ་ཟད་པའི་ཕྱི་ནས་ཡང་སྲོག་གཅོད་པའི་སྡིག་པའི་ལྷག་
མ་རྣམས་ཀྱིས་སླར་ཡང་དུད་འགྲོར་སྐྱེས་སོ། །དབང་པོར་གྱུར་པ་ན་དེས་ལེགས་པའི་ལས་བྱས་པ་ནད་པ་རྣམས་དང་། མགོན་མེད་པ་རྣམས་དང་། དགེ་སློང་དག་ལ་ཡང་བསོད་སྙོམས་རབ་ཏུ་དང་བའི་ཡིད་ཀྱིས་བྱིན་པ་དེའི་རྒྱུས་སུམ་ཅུ་རྩ་གསུམ་གྱི་དབང་པོར་གྱུར་ཏོ། །སླར་ཡང་

དེ་ཟད་ནས་ལན་གྲངས་གཞན་ལ་མྱོང་བར་འགྱུར་བའི་ལས་ཉེས་པར་བྱས་པས་ཀྲི་ཀ་ལཱ་ཤར་སྐྱེས་སོ། །དེས་སྐྱེ་བ་གཞན་གང་ཡང་རུང་བ་ཞིག་ཏུ་ལོག་པར་ལྟ་བས་ཉམས་པར་གྱུར་པས་ཀྲི་ཀ་ལཱ་ཤ་མཆོད་སྦྱིན་དུ་བསྲེགས་སོ། །དེ་རྒྱུ་དེ་དང་རྐྱེན་དེས་དམྱལ་བར་སྐྱེས་སོ། །དེའི་
ལྷག་མ་རྣམས་ཀྱིས་སླར་ཡང་ཀྲི་ཀ་ལཱ་ཤའི་སྐྱེ་གནས་སུ་སྐྱེས་པར་གྱུར་ཏོ། །དེའི་རྗེས་ལ་ལྷ་རྫས་ཀྱི་ཡུལ་རྣམས་ལ་ཉེ་བར་ལོངས་སྤྱད་ནས། རབ་ཏུ་གསལ་བ་ཞེས་བྱ་བའི་དབང་པོ་གཞན་འཆི་འཕོ་བར་གྱུར་ནས་རབ་ཏུ་ལྟུང་བར་འགྱུར་བ་མཐོང་བ་ལ་དེས་མ་དང་ཕ་དག་ནད་པར་
གྱུར་པའི་གཡོག་བྱས་སོ། །རྒྱུ་དེས་དེ་སུམ་ཅུ་རྩ་གསུམ་གྱི་དབང་ཕྱུག་དང་ལྡན་པའི་དབང་པོར་ལེགས་པར་སྐྱེས་སོ། །ཡང་ལས་དེ་ཟད་ནས་ཡི་དགས་སུ་སྐྱེས་སོ། །དེས་སྐྱེ་བ་གཞན་གང་ཡང་རུང་བ་དག་ཏུ་དགོན་པར་ཤིན་ཏུ་མི་རིགས་པ་ཆེན་པོས་འབྲུ་བཙོངས་ནས་བསླུས་པར་
གྱུར་པ་གང་ཡིན་པ་དང་། ཡིད་ཀྱིས་ཀྱང་སླར་ཡང་དེ་བཞིན་དུ་མུ་གེ་དྲག་པོ་བསམས་པར་གྱུར་ཏོ། །དེ་རྒྱུ་དེ་དག་རྣམས་ཀྱིས་དམྱལ་བ་ཐིག་ནག་ཏུ་སྐྱེས་སོ། །དེའི་ལྷག་མ་རྣམས་ཀྱིས་ཀྱང་ཡི་དགས་ཁབ་ཀྱི་མགྲིན་པ་ལྟ་བུར་སྐྱེས་སོ། །གཞན་ཡང་འཐབ་བྲལ་གྱི་ལྷ་དེ་
རྣམས་ཉིད་ཀྱིས་མཐོང་བར་གྱུར་པ་རྣམས་ལས་གཞན་པ་རྣམ་པ་དུ་མར་གྱུར་པའི་འཁོར་བའི་སྡུག་བསྔལ་རྣམ་པ་མང་པོ་རྣམས་ཤིན་ཏུ་ལེགས་པར་སྐྱེས་པའི་ཡིད་ཀྱིས་མཐོང་བར་གྱུར་པ་ལས་ཇི་སྲིད་དུ་འཐུན་པར་བྱེད་པ་ཞེས་བྱ་བའི་བརྒྱ་བྱིན་མཐོ་རིས་ནས་རབ་ཏུ་འཆི་འཕོས་ནས་ཕག་
མོའི་སྐྱེ་གནས་སུ་སྐྱེས་པར་གྱུར་པ་མཐོང་ངོ་། །དེའི་ལེགས་པར་བྱས་པའི་ལས་རྣམས་ཀྱང་མཐོང་སྟེ། གང་བརྒྱ་བྱིན་དུ་སྐྱེས་པར་གྱུར་པ་དེས་སྐྱེ་བ་གཞན་གང་དག་ཏུ་ཤིན་ཏུ་ང་རྒྱལ་ཅན་གྱི་བྲམ་ཟེ་ལོག་པར་ལྟ་བའི་མཆོག་གིས་ཉེ་བར་སྨྲས་པར་གྱུར་པ་ལ་འཐུན་པར་སྨྲས་ནས་
ཟས་དང་སྨན་དག་བྱིན་ནོ། །སྲོག་གཅོད་པ་ལས་ཀྱང་བསླབ་པའི་གཞི་བླངས་པར་གྱུར་ཏོ། །རྒྱུ་དེ་དག་དང་། རྐྱེན་དེ་དག་དང་། གཞི་དེ་དག་ལས་དེ་ལུས་ཞིག་པ་ན་མཐོ་རིས་བདེ་འགྲོ་སུམ་ཅུ་རྩ་གསུམ་པའི་འཇིག་རྟེན་དུ་སྐྱེས་སོ། །དེ་ལས་དེ་དག་རྣམས་ཡོངས་སུ་

ཟད་ཅིང་ཉམས་པར་གྱུར་ནས་ཕག་གི་མངལ་དུ་སྐྱེས་སོ། །དེའི་ལེགས་པར་བྱས་པའི་ལས་རྣམས་ནི་གང་དག་ཡིན་ཞིང་ལེགས་པར་བྱས་པའི་ལས་ཀྱིས་ཀྱང་དེར་སྐྱེས་པ་དང་། མིང་ཡང་ཅིར་བཏགས་ཞེ་ན། སུ་མ་ནྱུམ་ཞེས་བྱ་བའི་དབང་པོ་དེས་སྐྱེ་བ་
གཞན་གང་ཡང་རུང་བ་ཞིག་ལ་གཞན་གང་ཡང་རུང་བ་ཞིག་སེང་གེའི་ལག་ཏུ་སོང་ཞིང་སྲོག་ཐེ་ཙོམ་དུ་གྱུར་པ་ལ་སྙིང་རྗེའི་སྣོད་དུ་གྱུར་པའི་ཡིད་ཀྱིས་རབ་ཏུ་གྲོལ་བར་བྱས་ནས་དུས་ཕལ་པོ་ཆེར་ཟས་དང་སྐོམ་རྣམས་ཀྱིས་ལེགས་པར་གསོས་པར་གྱུར་པ་དེ་རྒྱུ་དང་རྐྱེན་དེས་སུ་མ་ནྱུམ་ཞེས་
བྱ་བའི་དབང་པོར་གྱུར་ཏོ། །དེ་ལས་ཀྱང་འཕོས་ནས་རབ་ཏུ་ཚ་བའི་དམྱལ་བར་སྐྱེས་སོ། །དེས་སྐྱེ་བ་གཞན་ཞིག་ལ་རྒྱལ་པོའི་ནང་དུ་སོང་བར་གྱུར་པ་ན་བརྫུན་དུ་སྨྲས་པའི་རྒྱུ་དེ་དང་རྐྱེན་དེ་དག་རྣམས་ཀྱིས་དམྱལ་བར་སྐྱེས་སོ། །དེ་འཆི་འཕོས་པར་གྱུར་ནས་སྤྲུལ་པའི་བརྒྱ་བྱིན་ཞེས་
བྱ་བ་དབང་པོ་གཞན་མཐོང་བར་གྱུར་ཏོ། །དེའི་ཡང་ལེགས་པར་བྱས་པའི་ལས་རྣམས་ལ་ཀུན་ཏུ་ལྟ་བར་བྱེད་པ་ལ་ཤེས་རབ་ཅན་དེས་མཉམ་པར་བྱས་ནས་མཆོད་སྦྱིན་གྱི་གནས་སུ་བླ་མ་རྣམས་ལ་སྦྱིན་པ་བྱིན་ནོ། །དེ་རྒྱུ་དེས་ཀཽ་ཤི་ཀ་ཞེས་བྱ་བའི་དབང་པོར་གྱུར་ཏོ། །གཞན་དུ་
ཡང་འདིས་ལེགས་པར་བྱས་པའི་ལས་རྣམས་མང་དུ་བྱས་ཏེ། དེ་ལས་དེ་དག་རྣམས་ཀྱི་རྐྱེན་གྱིས་དབང་པོར་འབྱུང་བར་འགྱུར་ཏེ་རིགས་གཉིས་པའི་དབང་པོའོ། །སླར་ཡང་སྟན་དེ་ཉིད་ལ་དབང་པོར་འབྱུང་བར་འགྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་བསྟན་པའི་མཐུས་དེ་ངན་
འགྲོ་རྣམས་སུ་འགྲོ་བར་འགྱུར་བར་མ་མཐོང་ངོ་། །ལྷ་ལས་འཆི་འཕོས་ནས་མིར་སྐྱེ་བར་འགྱུར་རོ། །འདི་ནི་ལན་བདུན་བསྐོར་བ་ཡིན་གྱི་དེའི་འགྲོ་བ་འདི་དག་ལས་མེད་པ་ཡིན་པར་མཆོད་རྟེན་གྱི་ལོགས་དེ་ལ་འཐབ་བྲལ་གྱི་ལྷ་རྣམས་ཀྱིས་མཐོང་ངོ་། །དེ་ནས་དེ་དག་རྣམས་
མཆོག་ཏུ་ངོ་མཚར་བ་སྐྱེས་པར་གྱུར་པ་ཡིན་ནོ། །བརྒྱ་བྱིན་དེ་དག་རྣམས་ཐམས་ཅད་ལྷག་མ་མ་ལུས་པའི་འགྲོ་བ་མཆོད་རྟེན་འདིའི་རྩིག་པ་ལ་མཐོང་བ་ལ་ཀཽ་ཤི་ཀ་གཅིག་པུའི་ངན་འགྲོ་མ་དམིགས་སོ། །འདིའི་རྒྱུ་ཅི་ཞིག་ཡིན་ན། དེ་ནས་འཐབ་བྲལ་གྱི་ལྷ་དེ་དག་རྣམས་ཐམས་ཅད་

འཐབ་བྲལ་གྱི་བདག་པོ་མུ་སུ་ལུན་དྷ་དེ་ལ་ལྟའོ། །ཇི་ལྟར་དབང་པོ་དེ་དག་རྣམས་ཐམས་ཅད་ལྷག་མ་མ་ལུས་པ་རྣམས་ཀྱི་ཡང་ངན་སོང་དུ་འགྲོ་བའི་འགྲོ་བ་གཞན་རྣམས་མཐོང་བ་ལ་ཀཽ་ཤི་ཀ་ལ་ནི་སྐྱེ་བ་བདུན་གྱི་མཐར་ཐུག་པར་མཐོང་ངོ་། །བརྒྱད་པ་ནི་ཡོངས་སུ་ཤེས་པ་མ་ཡིན་
ནོ། །དེ་ལ་འདིའི་རྒྱུ་ནི་ཅི་ཡིན། རྐྱེན་ནི་ཅི་ཞིག་ཡིན། གླེང་གཞི་ནི་གང་ཡིན། དེ་ནས་ལྷ་དེ་རྣམས་ཀྱི་དྲུང་ནས་ཉེ་བར་ཐོས་པར་གྱུར་པ་དང་། འཐབ་བྲལ་གྱི་མངའ་བདག་དེས་འདི་སྐད་ཅེས་སྨྲས་སོ། །ཀཽ་ཤི་ཀ་འདིའི་འགྲོ་བ་གང་འབྱུང་བར་འགྱུར་བ་དང་། རྒྱུ་འདི་དག་རྣམས་
ཀྱིས་ཡིན་པ་དེ་དག་རྣམས་ཉོན་ཅིག་དང་། བདག་གིས་ཁྱེད་ཅག་རྣམས་ཐམས་ཅད་ལ་དེ་བཞིན་གཤེགས་པའི་མཆོད་རྟེན་རབ་ཏུ་བསྟན་པར་བྱ་ཞིང་དམ་པའི་ཆོས་ཀྱང་བཤད་པར་བྱའོ། །རྒྱུ་གང་གིས་དེ་དག་ཐམས་ཅད་འབྱུང་བ་བག་མེད་པས་བག་མེད་པར་གནས་པས་ལྷ་རྫས་ཀྱི་
འདོད་པས་ཀུན་ཏུ་རྨོངས་པས་དམ་པའི་ཆོས་ངོ་མཚར་བ་རྣམས་ཇི་ལྟ་བ་བཞིན་དུ་མི་ཉ