Kinh tạng Tây Tạng (Kangyur Đại Học) — 070_མདོ་སྡེ།_ལ

་གྱུར་པ་ན་རབ་ཏུ་གཡོ་བར་གྱུར་པ་དེ་དག་རྣམས་རིམ་པ་སོ་སོར་རྟོག་པར་
བྱེད་དེ། པུས་མོ་དང་། བརླ་དང་། བྱིན་པར་གཏོགས་པའི་ཆུ་རྒྱུས་དང་། ཁྲག་དང་། ཤ་དང་། ཚིལ་དང་། རུས་པ་ལ་ཡང་སོ་སོར་རྟོག་པར་བྱེད་དོ། །སེམས་དང་སེམས་ལས་བྱུང་བ་རྣམས་ལས་ཀྱི་རླུང་གིས་བསྐྱོད་ནས་འགྲོ་བར་བྱེད་པ་ཡིན་ནོ། །གཞན་ཡང་ལུས་

དེ་ཉིད་ཀྱི་འདུ་ཤེས་ཅན་གྱིས་ཇི་སྲིད་དུ་སྟེང་ནས་དམྱལ་བའི་བར་དུ་སོ་སོར་རྟོག་པར་བྱེད་དེ། ཤ་དང་ཆུ་རྒྱུས་ཕན་ཚུན་དུ་སྦྲེལ་བར་གྱུར་པ་ཤའི་བྱུག་པས་ཀུན་ཏུ་བྱུགས་པས་ཆེས་སྦོམ་པར་གྱུར་པ་ཆུ་སེར་ཀུན་ནས་འཛག་པ། ཁྲག་དང་། ཚིལ་རྣམས་
ཀྱིས་གང་བ། མདངས་འབའ་ཞིག་ཙམ་གྱིས་ཡིད་འཕྲོག་པ་རྣམས་དེས་རྣམ་པར་དཔྱོད་པར་གྱུར་པས་རྩ་སྦུབས་གཅིག་ལ་ཡང་དག་པ་ཇི་ལྟ་བར་སོ་སོར་རྟོག་པར་བྱེད་དོ། །བཏེག་པར་གྱུར་པ་ན་གཞན་ཡང་དེ་ཁོ་ན་ལྟར་སོ་སོར་རབ་ཏུ་རིག་པར་བྱེད་དོ། །བསྐུམ་པ་དང་བརྐྱང་
བར་གྱུར་པ་ན་ཡང་ཇི་ལྟ་བུའི་རང་བཞིན་གྱི་རྩ་ཕྲ་བར་གྱུར་པ་རྣམ་པ་དུ་མ་ལ་ཀུན་ཏུ་ལྟ་བར་བྱེད་དོ། །རབ་ཏུ་གཡོ་བར་བྱེད་པ་དང་། འགྲོ་བར་གྱུར་པ་ཡང་རྣམ་པ་དུ་མར་གྱུར་པའི་རླུང་གིས་ཀུན་ནས་གཡོ་བ་དང་དེའི་འབྲེལ་པ་སྟེང་དུ་གཞིར་གྱུར་པ་ཕོ་བའི་ཐ་སྙད་དུ་བྱ་བ་
བཤང་བ་དང་གཅི་བའི་གནས་དེ་རྣམ་པ་ཐམས་ཅད་དུ་མི་གཙང་བའི་སྔར་གྱི་གཞི་ལ་རྒྱུ་བས་རྒྱུ་བའི་ཆ་ཤས་རྣམས་རབ་ཏུ་འབྱུང་བར་གྱུར་པ་ན་ཡང་དག་པ་ཁོ་ནར་ལུས་ཀྱི་རྗེས་སུ་སོང་བའི་དྲན་པ་དགེ་སློང་གིས་ཆེས་སྟེང་ཉིད་དུ་རབ་ཏུ་གཡོ་བར་གྱུར་པའི་རང་གི་ལུས་འགྲོ་བ་
ཉེ་བར་རྟོགས་པར་བྱེད་དོ། །ཇི་ལྟར་ཞེ་ན། བདག་ལམ་དུ་འགྲོ་བར་གྱུར་པ་ན་བདག་གི་རྒྱུ་མ་དང་གཉེ་མ་དག་རབ་ཏུ་གཡོ་བར་གྱུར་པ་རྣམས་ལ་དེས་ལྟ་བ་ནི་རྐང་པ་བཏེག་པ་ན་དབུགས་རྔུབ་པ་དང་ལྷན་ཅིག་ཏུ་འགྲོགས་པ་རབ་ཏུ་གཡོ་བའོ། །བདག་གིས་རྒྱུ་མ་རབ་ཏུ་གཡོ་བ་
དེ་དག་ཐམས་ཅད་གཡོན་ལོགས་ནས་གཡས་ལོགས་སུ་རབ་ཏུ་གཡོ་བར་འགྱུར་ལ་གཡས་ནས་ཀྱང་གཡོན་དུའོ། །རྒྱུ་མ་དེ་དག་རྣམས་རླུང་དང་། མཁྲིས་པ་དང་། བད་ཀན་དང་། བཤང་བ་དང་། གཅི་བ་དང་སྲིན་བུས་རབ་ཏུ་གང་བ་རྣམས་གཡོ་བར་མངོན་པར་མཐོང་ནས་ཇི་ལྟ་
བ་བཞིན་དུ་རྗེས་སུ་ལྟ་བར་བྱེད་དོ། །ལུས་དེའི་རྒྱུ་མ་དང་གཉེ་མ་དང་བཅས་པ་རྣམས་དགེ་སློང་གིས་ཡང་དག་པར་མངོན་པར་མཐོང་ནས་གཞན་ཡང་ཤིན་ཏུ་མཐོང་བར་གྱུར་པའི་ལུས་དག་ལ་རྣམ་པར་ལྟ་བར་བྱེད་དེ། ལོང་ཀར་གྱུར་པ་ལ་རྒྱུས་པའི་འཁྲུལ་འཁོར་གྱིས་ཀུན་ནས་

སྦྲེལ་བ་ཇི་ལྟར་མཐོང་བའི་ལོགས་ལ་རྒྱུས་པའི་དྲ་བས་ཀུན་ནས་སྦྲེལ་བ་ནང་ན་ཟས་ཀྱི་རོ་རྣམས་རུལ་བ་ནི་དེ་མ་ཐག་ཏུ་སྐྱུག་པ་ལྟ་བུའི་བད་ཀན་རྣམས་དང་ལྡན་པས་ནད་རྣམས་གང་བར་གྱུར་པ་ཤིན་ཏུ་འཇིགས་སུ་རུང་བའི་ཤིན་ཏུ་དྲི་མི་ཞིམ་པ་རྣམས་ཀྱིས་མགྲིན་པ་དང་། མིག་
མཆུ་རྒྱུས་པ་དང་། གནད་དང་། རུས་པ་ཀུན་ཏུ་བཀང་ཞིང་ཀུན་ནས་འཛིན་པ་ནི་ལས་ཀྱིས་བསྐྱེད་པའི་རླུང་འབའ་ཞིག་གིས་སེམས་དང་སེམས་ལས་བྱུང་བ་རྣམས་ལྷན་ཅིག་ཏུ་འཛིན་པར་གྱུར་པ་དང་། འགྲོ་བར་གྱུར་པ་ན་ཡང་ལུས་ལ་སོ་སོར་རྟོག་པར་བྱེད་དོ། །གཞན་ཡང་
ལུས་དེ་ཉིད་རབ་ཏུ་གཡོ་བར་གྱུར་པ་ན་ཡང་སོ་སོར་རྟོག་པར་བྱེད་དོ། །དགེ་སློང་དེས་ཇི་ལྟ་བར་ཁ་དང་། འགྲམ་རུས་དང་། ཀླད་ཕོར་གྱི་ཚོགས་འདུས་པ་དང་། མིག་ཕོར་གཉིས་དང་གཅིག་ལྷག་པ་འཛུམས་པ་དང་། འབྱེད་པ་དང་། འབྲས་བུ་གཉིས་དང་། བདག་གི་
དེ་དག་རྣམས་ཤིང་གི་འཁྲུལ་འཁོར་གྱི་བུད་མེད་བཞིན་དུ་རྒྱུས་པའི་འཁྲུལ་འཁོར་གྱིས་ཀུན་ཏུ་སྦྲེལ་བ། སྐད་ཅིག་དང་སྐད་ཅིག་ལ་སྐྱེ་བར་འགྱུར་ཞིང་འཆི་བར་འགྱུར་ལ་འཕོ་བར་འགྱུར་བས་གྲོང་དང་། གྲོང་ཁྱེར་དང་། གྲོང་ཆུང་རྣམས་སུ་བདག་འགྲོ་བར་བྱེད་པ། ལུས་
ཀྱི་གོང་བུའི་ཁོག་ཙེ་སྦྲུལ་དུག་ཅན་གྱི་ཁོག་པ་ཉིད་གཅེས་པར་འཛིན་པ་ཡིན་པས་རྒྱགས་པས་རྒྱུ་བར་མ་བྱེད། ཟས་ཀྱི་དོན་དུ་ཀུན་ཏུ་འཆུམས་པར་མི་བྱ་བ་དང་། བདག་གིས་རབ་ཏུ་བགད་པར་ཡང་མི་བྱའོ། །འགྲོ་བའི་དབང་དུ་བྱས་ནས་དེས་དེ་ལྟར་བགྲོད་པར་བྱེད་པའི་དགེ་
སློང་ནི་རྣམ་པ་གཉིས་པ་རྒལ་བར་མི་འགྱུར་རོ། །གྲོང་དང་། གྲོང་ཁྱེར་དང་། གྲོང་ཆུང་རྣམས་སུ་བསོད་སྙོམས་ལ་ཞུགས་པར་གྱུར་པ་ལ་ཇི་ལྟ་བ་བཞིན་དུ་བདག་ཉིད་ཀྱི་ལུས་ལས་སོ་སོར་དཔྱོད་པར་བྱེད་དེ། དེ་ལྟར་དེ་ལུས་ལེགས་པར་བསྒོམས་པ་དང་། བརྩོན་འགྲུས་
བརྩམས་པར་གྱུར་པས་བུད་མེད་རྣམས་ཉིད་དང་། སྐྱེས་པ་རྣམས་ཐམས་ཅད་ལ་ཡང་དེ་དེ་ལྟར་འདོད་ཆགས་ལ་སོགས་པའི་དྲི་མ་རྣམས་སྙིང་ལ་མི་འཇུག་གོ། །རྣམ་པ་དེ་ལྟ་བུ་རྣམས་ལས་ནི་དེས་སྲོག་གི་དབང་པོའི་ཕྱིར་ཡང་རྒལ་བར་མི་བྱ་སྟེ། རྣམ་པ་འདི་རྣམས་

ནི་དགེ་སློང་ངེས་པར་ལེགས་པར་འདོད་པ་རྣམས་ཀྱིས་རྒལ་བར་མི་བྱའོ། །གཞན་ཡང་རྣམ་པ་གསུམ་པ་དགེ་སློང་གིས་རྒལ་བར་མི་བྱའོ། །འདི་ལྟ་སྟེ། དགེ་སློང་རྣམས་ཀྱི་ནི་རྟག་པ་ཉིད་དུ་དྲན་པ་ཉེ་བར་གནས་པར་བྱའོ། །དྲན་པ་ཉེ་བར་གནས་པ་ལས་
ཀྱང་དགེ་སློང་ཤེས་བཞིན་དང་ལྡན་པར་འགྱུར་རོ། །དགེ་བའི་བཤེས་གཉེན་གྱིས་དགེ་བའི་ཡིད་ཅན་བློ་རྣམ་པར་མི་གཡེང་བ་དེ་ལྟ་བུར་གྱུར་པའི་དགེ་སློང་དེ་ལ་ནི་རྟག་པར་ཡང་ལྷ་རྣམས་ཕྱི་བཞིན་ཉེ་བར་གནས་པར་འགྱུར་རོ། །དེ་ལ་བདུད་ཀྱི་རིས་ཀྱི་ལྷ་དག་གིས་ཀྱང་ཐོ་བཙམ་
པར་མི་ནུས་སོ། །ཇི་ལྟར་ན་དྲན་པ་ཉེ་བར་གནས་པ་ཡིན་ཞེ་ན། འདུན་པ་སྔོན་དུ་འགྲོ་བས་སེམས་དང་སེམས་ལས་བྱུང་བའི་ཆོས་རྣམས་འཇུག་པ་ཡིན་ཏེ། སྐྱེས་པ་དང་མ་སྐྱེས་པར་གྱུར་པ་དང་། མ་སྐྱེས་པ་རྣམས་བག་དང་ལྡན་པའི་བློ་ཤེས་བཞིན་དང་ལྡན་པར་གྱུར་པས་ཡང་དམིགས་
པ་ལས་སེམས་དང་སེམས་ལས་བྱུང་བའི་ཆོས་འདི་དག་རྣམས་ཉིད་སྐྱེ་བར་འགྱུར་ཏེ། དགེ་བ་དང་། མི་དགེ་བ་དང་། ལུང་དུ་མ་བསྟན་པ་རྣམས་སོ། །རྐྱེན་གྱི་ཁྱད་པར་གྱིས་བདག་ལ་དགེ་བའི་ཆོས་ཕན་པ་དང་། བདེ་བ་དང་། མྱ་ངན་ལས་འདས་པའི་མཐར་ཐུག་པར་
འགྱུར་བ་རྣམས་སྐྱེས་པ་དང་། དེ་ཉམས་པ་ན་ཆོས་གཞན་སེམས་དང་སེམས་ལས་བྱུང་བའི་རྐྱེན་གྱི་ཁྱད་པར་ལས་སྐྱེས་པ་མི་དགེ་བ་དང་། མཉམ་པར་མ་བཞག་པ་དང་། བདེ་བ་མ་ཡིན་པ་འབྱུང་བར་འགྱུར་བ་རྣམས་ཏེ། དེས་དགེ་བ་འདི་དག་རྣམས་ཀྱང་ཡང་དག་པ་ཇི་ལྟ་བ་
བཞིན་དུ་རབ་ཏུ་ཤེས་སོ། །སོ་སོར་ལེགས་པར་རིག་པར་བྱེད་དོ། །སེམས་ཀྱིས་རྣམ་པར་དྲན་པར་བྱེད་དོ། །དེ་བཞིན་དུ་ཡིད་དུ་མི་འོང་བའི་ཆོས་རྣམས་ལ་ཆ་ཤས་སོ་སོར་བྱེད་དོ། །དྲན་པ་ལྔའི་རོ་རྣམས་ཀྱང་མྱོང་བར་མི་བྱེད་དོ། །སེམས་ཀྱིས་ཀུན་ཏུ་རྟོག་པར་མི་བྱེད་དོ། །
ད་ལྟར་བ་རྣམས་སྤོང་བར་བྱེད་དོ། །དྲན་པ་ལྔ་གང་ཞེ་ན། འདི་ལྟ་སྟེ། གཟུགས་གང་ཡིད་དུ་འོང་བ་མིག་གི་ཡུལ་ཉམས་སུ་མྱོང་བར་གྱུར་པ་ལ་འདུ་ཤེས་སྔོན་དུ་སོང་བས་ཐག་ཉེ་བ་དང་། ཐག་རིང་བ་དང་། མདོག་བཟང་པོའམ། མདོག་ངན་པའམ། རིད་པར་གནས་པའམ།

དུས་ཆེས་སྔ་མ་ན་ཉམས་སུ་མྱོང་བའམ། རང་ཉིད་ལ་གྱུར་པ་རྣམས་སམ། གཞན་གྱིས་ཉེ་བར་ལོངས་སྤྱོད་པའི་གཟུགས་རྣམ་པ་སྣ་ཚོགས་པ་དེ་དག་རྣམས་ལ་ཡང་དགེ་སློང་འདིས་རོ་མྱོང་བར་མི་བྱེད་དོ། །དཔྱོད་པར་མི་བྱེད་དོ། །རྐྱེན་གྱི་དབང་གིས་འོངས་པ་རྣམས་ཀྱང་ཡོངས་
སུ་སྤོང་བར་བྱེད་དོ། །ཇི་ལྟར་འགའ་ཞིག་སྲེག་པར་བྱེད་པའི་སྐྱོན་གྱི་འཇིགས་པས་འཇིགས་ནས་མེ་སྤོང་བར་བྱེད་པ། དེ་བཞིན་དུ་དགེ་སློང་འདི་ཡང་འདོད་ཆགས་ཀྱིས་སྲེད་པའི་འཇིགས་པས་འཇིགས་ནས་འདས་པའི་ཉོན་མོངས་པའི་མེ་དགའ་བའི་འདོད་ཆགས་སྡུག་བསྔལ་མང་པོའི་
མཐར་ཐུག་པ་འབྱུང་བར་འགྱུར་བའི་གཟུགས་ཉམས་སུ་མྱོང་བ་དེ་དག་དྲན་པར་མི་བྱེད་དོ། །ཀུན་ཏུ་རྟོག་པར་མི་བྱེད་དོ། །སེམས་གནས་པར་མི་བྱེད་དོ། །དེ་ལྟར་གང་དག་འདས་པ་ཉམས་སུ་མྱོང་བ་རང་དང་གཞན་རྣམས་ཀྱིས་ཉེ་བར་སྤྱད་པར་གྱུར་པ་སྣ་ཚོགས་པ་རྣམས་ལ་
དེ་ལྟ་དེ་ལྟར་ཀུན་ཏུ་རྟོག་པར་མི་བྱེད་དོ། །དོན་དུ་གཉེར་བར་མི་བྱེད་དོ། །གཞན་ཡང་ལྷན་ཅིག་འགྲོགས་པ་རྣམས་དང་ཉེ་གནས་རྣམས་ཀྱང་མྱོང་བར་བྱེད་པ་ན་འགོག་པར་བྱེད་དོ། །རྗེས་སུ་ཡི་རང་བར་མི་བྱེད་དོ། །ལམ་ལ་རབ་ཏུ་འགོད་པར་བྱེད་དོ། །འགྱུར་བ་མེད་པའི་དགེ་
སློང་མི་བརྐམ་པར་འདོད་པ་ལ་འཆུམས་པ་མ་ཡིན་པ་དྲན་པ་ཉེ་བར་གནས་པ་ཀུན་ནས་ཉོན་མོངས་པའི་ཆོས་རྣམས་དང་མི་ལྡན་པ་ལེགས་པར་སྡོམ་པར་བྱེད་པའི་མིག་གི་རྣམ་པར་ཤེས་པ་གཟུགས་རྣམས་ཀྱིས་ཁྲིད་པར་མི་བྱེད་དོ། །གཞན་ཡང་དྲན་པ་གཉིས་པས་ལེགས་པར་བཟུང་
བར་གྱུར་པ་ནི་རྣ་བ་གང་དག་གིས་སྒྲ་རྣམས་ཐོས་པས་ཡིད་འཕྲོག་པར་བྱེད་པ་གང་གླུ་དང་། རོལ་མོའི་སྒྲ་དང་། གད་མོ་རྣམས་དང་། རྩེད་མོ་དང་། སྔོན་ཉེ་བར་ལོངས་སྤྱོད་པ་དེ་དག་རྣམས་འདིས་དྲན་པར་མི་བྱེད། སེམས་ཀྱིས་སེམས་པར་མི་བྱེད། ཀུན་ཏུ་རྟོག་པར་མི་བྱེད་དོ། །རྐྱེན་
ལས་བྱུང་བ་གཞལ་དུ་མེད་པ་རྣམས་ཀྱང་རྐྱེན་ལས་སྤོང་བར་བྱེད་དོ། །ཇི་ལྟར་འགའ་ཞིག་སྲེག་པའི་རྐྱེན་གྱིས་འཇིགས་པས་འཇིགས་ནས་མེ་ཡོངས་སུ་སྤོང་བར་བྱེད་པ་དེ་བཞིན་དུ་དགེ་སློང་འདི་ཡང་རྐྱེན་རྣམས་ཀྱིས་ཡོངས་སུ་སྤོང་བར་བྱེད་དོ། །གཞན་རྣམས་ཀྱང་རྣ་བའི་རྣམ་པར་

ཤེས་པས་སྒྲ་ཉན་པར་བྱེད་པར་གྱུར་པས་ཉེ་གནས་སམ། ལྷན་ཅིག་འགྲོགས་པ་རྣམས་ལམ་ལ་རབ་ཏུ་འགོད་པར་བྱེད་དོ། །རྗེས་སུ་ཡི་རང་བར་མི་བྱེད་དོ། །མཆོག་ཏུ་དགེ་བའི་ལས་ཀྱི་མཐའ་ལ་སྤྱོད་པའི་དགེ་སློང་དེའི་འདོད་པ་རྣམས་ལ་དད་ཆེ་བ་མ་ཡིན་ཞིང་
སྒྲ་ལ་བརྐམ་པས་མི་འཁྲིད་དོ། །དེའི་དྲན་པ་ནི་བརྟན་པར་འགྱུར་རོ། །སྒྲ་རྣམས་ཀྱིས་འཕྲོགས་པ་མ་ཡིན་ནོ། །དྲན་པ་གཉིས་པ་དང་ལྡན་པའི་དགེ་སློང་རྣམས་ནི་བརྩོན་འགྲུས་ཡང་དག་པར་བརྩམས་པར་འགྱུར་རོ། །ཤེས་བཞིན་དང་ལྡན་པ་ཚངས་པར་སྤྱོད་པ་ལ་གོམས་པའི་ཚུལ་
ཁྲིམས་ལ་རབ་ཏུ་གནས་པ་ཡིན་ནོ། །གཞན་ཡང་དགེ་སློང་དྲན་པ་དང་ལྡན་པས་སྒོམ་པར་མི་བྱེད། རོ་མྱོང་བར་མི་བྱེད། སེམས་ཀྱིས་རབ་ཏུ་རྟོགས་པར་མི་བྱེད་པ་རྣམས་ནི་གང་དག་འདིས་སྔོན་བསྣམས་པར་གྱུར་པ་དྲི་རྣམས་དྲི་ཞིམ་པ་དང་། དྲི་ང་བ་དང་། དམན་པ་དང་། མཆོག་
དང་། ཡུལ་ཐག་ཉེ་བ་ན་གནས་པ་དེ་དག་རྣམས་ཀྱང་འདིས་ཀུན་ཏུ་དྲན་པར་མི་བྱེད་དོ། །སེམས་ལ་རབ་ཏུ་འཇོག་པར་མི་བྱེད་དོ། །རྐྱེན་གྱིས་ནང་གི་བདག་ཉིད་དུ་སོན་པ་རྣམས་ཀྱང་ཡོངས་སུ་སྤོང་བར་བྱེད་དོ། །གཞན་ཡང་ཉེ་བར་གནས་སམ། ལྷན་ཅིག་རྒྱུ་བ་རྣམས་ལ་ཡང་
སྣའི་རྣམ་པར་ཤེས་པ་དྲི་སྣོམ་དུ་མི་འཇུག་སེམས་ཀྱིས་རབ་ཏུ་དཔྱོད་པར་མི་བྱེད། གང་དང་པོ་ཉིད་ནས་འདིས་ཡིད་རབ་ཏུ་ཟློག་པར་བྱེད་དོ། །རྗེས་སུ་ཡི་རང་བར་མི་བྱེད་དོ། །དགེ་སློང་དེ་བདག་དང་གཞན་དགེ་བ་ལ་སྤྱོད་པར་བྱེད་པ། དགེ་བའི་ཆོས་དང་ལྡན་པ། དྲན་པ་ཉེ་བར་གནས་པ།
ཞེན་པ་མེད་པར་ཤེས་བཞིན་དང་ལྡན་པ་ཡིན་ནོ། །འཆུམས་པར་གྱུར་པས་སྣ་འཕྲོགས་པར་མི་འགྱུར་རོ། །དགེ་སློང་དེ་ནི་སྡིག་པ་རྣམས་སྦྱངས་པར་གྱུར་པ་ཡིན་ཞིང་ལེགས་པའི་ཚུལ་ཁྲིམས་དང་ལྡན་པ་དྲན་པ་ཉེ་བར་གཞག་པའོ། །གཞན་ཡང་དྲན་པས་དྲན་པར་མི་བྱེད་པ་ནི་གང་འདིས་སྔོན་
མྱངས་པར་གྱུར་པ་དེ་དག་རྣམས་ཏེ། ཡིད་དུ་འོང་བ་རྣམས་དུས་བར་དུ་ཆོད་པ་ན་མྱངས་པའམ། དུས་ཉེ་བ་ན་མྱངས་པར་གྱུར་པ་ཡང་རུང་སྟེ། དེ་དག་རྣམས་འདིས་མྱོང་བར་མི་བྱེད་དོ། །ཀུན་ཏུ་རྟོག་པར་མི་བྱེད་དོ། །རྐྱེན་གྱིས་འོངས་པ་རྣམས་ཀྱང་མེ་བཞིན་དུ་ཡོངས་སུ་སྤོང་ངོ་། །

གཞན་ཡང་རོས་ཁྲིད་པར་གྱུར་པའི་ཉེ་གནས་དང་ལྷན་ཅིག་འགྲོགས་པ་རྣམས་རོ་ལ་འཆུམས་པས་ཀུན་ཏུ་དྲངས་པར་གྱུར་པ་རྣམས་ཀྱང་རབ་ཏུ་འགོག་པར་བྱེད་དོ། །རྗེས་སུ་ཡི་རང་བར་མི་བྱེད་དོ། །འདི་ནི་དགེ་སློང་ཞེན་པ་མེད་པ། དྲན་པ་ཉེ་བར་གནས་པ། ཤེས་བཞིན་དང་
ལྡན་པ། སྡིག་པ་བཅོམ་པ། དགེ་བའི་ཚུལ་ཁྲིམས་ཅན། བདག་དང་གཞན་ལ་ཕན་པ་ལ་ཞུགས་པ་ཞེས་བརྗོད་དོ། །གཞན་ཡང་དགེ་སློང་གིས་དྲན་པ་ངན་པ་རྣམས་སྒོམ་པར་མི་བྱེད་ཅིང་སེམས་རབ་ཏུ་གནས་པར་མི་བྱེད་པ་ནི་གང་རེག་པར་བྱ་བ་དེ་ལ་རེག་པར་མི་བྱེད་དོ། །
ཀུན་ནས་ཉོན་མོངས་པ་ཅན་གྱི་བདེ་བ་ཡིན་པའི་ཕྱིར་འཐུག་པ་དང་། སྲབ་པ་དང་། འཇམ་པར་གྱུར་པའི་དངོས་པོ་འདིའི་ཆོས་དེ་རྣམས་ཡང་འདིས་རོ་མྱོང་བར་ཡང་མི་བྱེད་དོ། །ཀུན་ཏུ་རྟོག་པར་ཡང་མི་བྱེད་དོ། །རྐྱེན་གྱིས་བྱུང་བ་རྣམས་ཀྱང་མེ་བཞིན་དུ་སྤོང་བར་བྱེད་དོ། །གཞན་
རྣམས་ལ་ཡང་དེ་བཞིན་དུ་སྤོང་དུ་འཇུག་གོ། །ལུས་སུ་གཏོགས་པའི་རེག་བྱར་གྱུར་པ་ལ་བརྐམ་པས་དྲང་བར་གྱུར་པ་རྣམས་ལ་རྗེས་སུ་ཡི་རང་བར་མི་བྱེད་དོ། །གང་འདི་ལ་དགེ་སློང་རོ་དང་རེག་བྱ་རྣམས་སྤངས་པ་ཤེས་བཞིན་དང་ལྡན་པ་ཚུལ་ཁྲིམས་དག་པ་དང་། གཙང་མ་ལ་སྤྱོད་
པ་དགེ་བའི་ཆོས་ལ་ལེགས་པར་ཀུན་ནས་གནས་པ་མྱ་ངན་ལས་འདས་པའི་མཐར་ཐུག་པ་ཞེས་བརྗོད་དོ། །ཡང་དྲན་པ་ལྔ་པོ་འདི་དག་རྣམས་དགེ་སློང་གིས་རྟག་ཏུ་བསྒོམ་པར་བྱ་ཞིང་ཡིད་ལ་བྱའོ། །ལྔ་གང་ཞེ་ན། འདི་ལྟ་སྟེ། དུས་དྲན་པ་དང་། ན་ཚོད་རྣམས་དྲན་པ་དང་།
མྱ་ངན་ལས་འདས་པ་དང་། འགྲོ་བ་དང་གནས་པའོ། །དེ་ལ་ཇི་ལྟར་དགེ་སློང་གིས་དུས་དྲན་པ་བསྒོམ་པར་བྱ་ན། འདི་ན་དགེ་སློང་རྟག་པ་ཁོ་ནར་ལུས་དྲན་པ་ཉེ་བར་གཞག་པ་སྒོམ་པར་གྱུར་པས་མི་རྨོངས་ཤིང་ཡུལ་གྱིས་མི་འཇོམས་སོ། །རྣམ་པར་ཉམས་པར་མི་བྱེད་དེ། དགེ་
སློང་དག་གིས་ཤེས་པར་བྱ་སྟེ། འདི་ན་ཉིན་དང་མཚན་དུ་ཡང་དེ་བཞིན་དུ་དགེ་བ་རྣམས་སོ་སོར་རིག་པར་བྱ་སྟེ། མི་ཉལ་བར་དབུགས་འཇུག་པ་དང་འབྱུང་བ་ལ་མངོན་པར་བརྩོན་པ་དང་ལྡན་པ་ཞེས་བྱ་བ་གང་གི་ཕྱིར་དབུགས་འབྱུང་བ་དང་འཇུག་པ་སྐད་ཅིག་པ་རྐྱེན་གྱིས་ངེས་པར་མྱོང་

བར་འགྱུར་བ་དམའ་བ་དང་མཐོ་བར་བྱེད་པ་པོ་འདིས་དེ་ལྟར་བདག་གིས་གསུས་པ་རྒྱས་པར་བྱེད་པ་ཁམས་དང་། སྐྱེ་མཆེད་རྣམས་འཐོབ་པ་སྐད་ཅིག་ལ་སྟེང་དུ་འགོར་བ་མེད་པར་བྱེད་པར་འགྱུར་བའི་འདུས་བྱས་ཀྱི་ཆོས་འདི་དག་རྣམས་ཐམས་ཅད་ནི་
ཁམས་དང་། ཕུང་པོ་དང་། སྐྱེ་མཆེད་རྣམས་ཀྱིས་ངེས་པར་བསྡུས་པ་མིག་བཙུམས་པ་དང་། འབྱེད་པར་བྱེད་པ་དང་། དབུགས་འབྱུང་བ་ཞེས་བྱ་བའི་ཐ་སྙད་དུ་བྱ་བའི་རླུང་རྣམས་གང་དག་ཡིན་པ་འདུས་བྱས་སུ་གྱུར་པ་དེ་དག་རྣམས་ནི་འགག་པ་འཇིག་པ་རུལ་བར་གྱུར་པ་ཡིན་
ནོ། །གཞན་ཡང་དེའི་རྗེས་ཐོགས་ལ་རྐྱེན་གཞན་ལས་རབ་ཏུ་འབྱུང་བར་འགྱུར་ལ་སྐད་ཅིག་ཏུ་ཡང་མི་འགོར་བར་ལྷན་ཅིག་ཏུ་དབུགས་རྔུབ་པར་བྱེད་པའི་དེ་ལྟར་དགེ་སློང་འདི་དུས་ཀྱི་རྗེས་སུ་ཞུགས་པའི་དྲན་པ་དང་ལྡན་པ་དེས་རབ་ཏུ་བསྒྲལ་བར་གྱུར་པའི་ཡིད་ལ་བྱེད་པའི་བྱ་བ་དང་
ལྡན་པར་གྱུར་པས་བདག་ཉིད་ཀྱིས་སོ་སོར་རིག་པར་བྱེད་དོ། །ཁམས་དང་སྐྱེ་མཆེད་ཀྱི་ཚོམ་བུར་གྱུར་པའི་ལུས་འདི་ནི་སྐད་ཅིག་གི་ཁོག་ཙེ་ལས་ཉེ་བར་འཚེ་བ་དང་བཅས་པ་ལུས་འདི་ཐམས་ཅད་ཀྱིས་སྟོང་པ་ལྟ་བུར་གྱུར་པ་ལ་ནི་བྱེད་པ་པོ་དང་། ཚོར་བ་པོ་རྣམས་ནི་ཡོད་པ་མ་
ཡིན་གྱི། རྒྱུ་དང་རྐྱེན་ཕན་ཚུན་གྱི་དབང་གིས་ཐ་སྙད་ཀྱི་ལུས་འདི་ཀུན་ནས་བསྐྱེད་པས་རབ་ཏུ་འཇུག་པར་འགྱུར་བ་ཡིན་ནོ། །སྐད་ཅིག་དང་སྐད་ཅིག་ལ་སྐྱེ་ཞིང་འཆི་ལ། རྒས་པར་གྱུར་ཅིང་འཆི་འཕོ་དང་སྐྱེ་བའི་ཕུང་པོ་འབའ་ཞིག་ཏུ་གྱུར་པ་ནི་འཁོར་བའི་ཕུང་པོ་ཐམས་ཅད་ཡིན་ནོ། །
དེ་ལྟར་སྒོམ་པའི་དགེ་སློང་དུས་རྣམས་འབྲས་བུ་མེད་པ་མ་ཡིན་པར་བྱེད་པ་དེ་ནི་རབ་ཏུ་དང་བ་བཞི་དང་ལེགས་པར་ལྡན་པར་སེམས་ཀྱིས་སེམས་རབ་ཏུ་དང་བས་འདིའི་བཞིན་གྱི་ཁ་དོག་རབ་ཏུ་དང་བར་འགྱུར་རོ། །འདིའི་དགེ་བ་དང་མི་དགེ་བའི་ལས་རྣམས་ཀྱང་རབ་ཏུ་དང་བར་འགྱུར་རོ། །
འཇིག་རྟེན་ཕ་རོལ་ཏུ་ཕན་པར་བྱེད་པ་པོ་ཉིད་དང་། མྱ་ངན་ལས་འདས་པའི་ཡང་མཐར་ཐུག་པའི་དགེ་སློང་འདིའི་ཚུལ་ཁྲིམས་ལ་རྣམ་པར་དཔྱད་ནས་སྦྱིན་པ་པོ་དང་སྦྱིན་བདག་གང་ཡིན་པ་རྣམས་ཀྱང་མཆོག་གི་རབ་ཏུ་རངས་པས་ཡིད་རབ་ཏུ་དང་བར་འགྱུར་རོ། །ཚུལ་ཁྲིམས་

དང་ལྡན་པ་མཆོག་ཏུ་དགེ་བ་ཡང་དག་པའི་དོན་ལ་སྤྱོད་པ་པོའི་དགེ་སློང་རྣམས་ནི་བཞི་པོ་དེ་དག་རྣམས་རབ་ཏུ་དང་བར་འགྱུར་རོ། །ཐམས་ཅད་དུ་ཤིན་ཏུ་རབ་ཏུ་དང་བས་བདེ་བར་ཉལ་ལོ། །དེ་ཉལ་བ་ན་ཆོས་དང་ལྡན་ཞིང་ཆོས་དང་རབ་ཏུ་འབྲེལ་པའི་རྨི་ལམ་བཟང་པོ་མཐོང་བར་
འགྱུར་རོ། །དེ་བཞིན་དུ་དེ་རྒྱགས་པ་མ་ཡིན་པ་བག་དང་ལྡན་པར་རྒྱུ་བས་ཆོས་བདུན་འཕེལ་བར་འགྱུར་ཏེ། བདུན་གང་ཞེ་ན། འདི་ལྟ་སྟེ། དགེ་བའི་ཆོས་རྣམས་དཔྱོད་པའི་དབང་དུ་བྱས་པའི་ཆོས་ཀྱི་སྤོབས་པ་དང་། དེ་དགེ་བའི་ལས་ཀྱི་མཐའ་རྣམས་ལ་སྤྱོད་པའི་དགའ་བ་
དང་ལྡན་པར་འགྱུར་རོ། །དེའི་དགའ་བ་ཡང་མངོན་པར་འཕེལ་བར་འགྱུར་རོ། །དགའ་བ་རྒྱ་ཆེ་བར་གྱུར་པ་གང་གི་ཕྱིར་མིང་དང་གཟུགས་དག་ཕན་ཚུན་གྱི་དབང་གིས་འཕེལ་བར་འགྱུར་རོ། །འཕེལ་ཞིང་རྒྱས་པའི་རྒྱུ་འདིས་ལུས་ཀྱི་ནད་མེད་པའི་ལུས་དང་སེམས་དག་ཀྱང་ཕན་
ཚུན་གྱི་དབང་གིས་བདེ་ལེགས་སུ་གྱུར་པས་ཡིད་གཞུངས་པར་གྱུར་ཏེ། ཡིད་གཞུངས་པའི་མིང་ནི་སྔོན་བྱས་པའི་དགེ་བའི་ཆོས་རྣམས་རྗེས་སུ་དྲན་པ་ཡིན་ཏེ། འདིའི་ཡིད་གཞུངས་པ་དེ་ཡང་འཕེལ་ལོ། །དགེ་བའི་ཆོས་རྣམས་ལ་རྟག་ཏུ་ཡང་དྲན་པ་འཕེལ་ལོ། །དགེ་བའི་
ཆོས་རྗེས་སུ་དྲན་པ་རྣམས་འཕེལ་བ་བསམས་ནས་ཀྱང་འདིའི་བདེ་བ་རྣམས་ཀྱང་འཕེལ་ལོ། །བདེ་བར་གྱུར་པ་རྣམས་ཀྱི་ཡང་སྟོབས་འཕེལ་བར་འགྱུར་རོ། །ཆོས་བདུན་འཕེལ་བ་རྣམས་ནི་བདེ་བས་མཚན་མོ་འདའ་བར་བྱེད་ལ་ཉལ་བ་ན་ཡང་མཚན་མོ་ལུས་སྒོམ་པ་དང་། སེམས་ཀྱང་
སྒོམ་པར་འགྱུར་རོ། །དེ་ལྟར་དུས་རྣམས་དྲན་པ་ཡིན་ནོ། །ཇི་ལྟར་ན་དགེ་སློང་ཉིན་མོ་དང་མཚན་མོ་དུས་དྲན་པ་དང་ཡང་དག་པར་ལྡན་པ་ཡིན་ཞེ་ན། དགེ་སློང་དག་འདི་ན་དགེ་སློང་གིས་མིག་བཙུམས་པ་དང་ཕྱེ་བ་རྟོགས་པར་བྱེད་དེ་སྐད་ཅིག་པའི་མིག་བཙུམས་པ་དང་།
ལྷན་ཅིག་ཏུ་བདག་གིས་དུས་སུ་གྱུར་པ་གང་ཞིག་ལེགས་པར་རབ་ཏུ་ཐོབ་པ་དང་དེ་དང་ལྷན་ཅིག་འགྲོགས་པའི་སེམས་དང་སེམས་ལས་བྱུང་བའི་ངོ་བོ་དེ་རྣམས་ནི་དུས་མི་རིང་བ་ན་ཞིག་ཅིང་རུལ་བར་འགྱུར་བའོ། །དེ་ལ་དུས་འདི་གང་དག་རིམ་གྱིས་འགག་པ་དང་སྐྱེ་བ་ཡང་ཡིན་

ཞེ་ན། རབ་ཏུ་སྐྱེ་བ་རྣམས་ལ་ཡང་ཚེ་ཟད་པ་སྒྲུབ་པ་ཡིན་པ་གང་གི་ཕྱིར་བདག་གི་ལང་ཚོ་རྣམས་ནི་རྒས་པས་ཟད་པར་འགྱུར་རོ། །གང་སྐྱེ་བོ་ཐམས་ཅད་ཀྱིས་ཀྱང་བཟློག་པར་བྱ་བའི་ཐབས་མེད་པའི་འཆི་བདག་གསོན་པ་ཐམས་ཅད་རབ་ཏུ་འཇོམས་པར་
བྱེད་པས་ཤིན་ཏུ་མྱུར་ཞིང་མགྱོགས་པར་འབབ་པས་སྲིད་པ་གཞན་དུ་བདག་འགག་པར་འགྱུར་རོ། །བདག་བག་ཆགས་སུ་གྱུར་པ་ཐམས་ཅད་ཀྱི་གསོན་པ་འདི་ནི་ཤིན་ཏུ་མྱུར་བར་འཇུག་པའི་ཕྱིར་ན་རྒྱུ་མེད་པར་མཆི་མ་འབྱུང་ངོ་། །དཔེར་ན་མར་མེ་གནས་པར་གྱུར་པའི་མེས་
སྣུམ་རྣམས་འཐུང་བར་བྱེད་དོ། །དེ་ཁོ་ན་བཞིན་དུ་ཞེན་པའི་རང་བཞིན་དུ་གྱུར་པའི་བདག་རྣམས་ཀྱིས་ཀྱང་སྣུམ་འདྲ་བའི་ཚེ་འཐུང་བར་བྱེད་པ་འདི་དགེ་སློང་དག་གིས་བསམ་པར་བྱའོ། །ངེས་པར་ལེགས་པ་ལ་རབ་ཏུ་བརྩོན་པར་བྱའོ། །དེ་ལྟར་ཡང་ནང་གི་བདག་ཉིད་ཀྱི་དངོས་
པོ་འདི་རྣམས་ནི་རབ་ཏུ་ཉམས་པར་བྱེད་པའི་ཆོས་བཞིས་ཟད་པར་བྱེད་པ་ཡིན་པ་དེ་བཞིན་དུ་ཕྱི་རོལ་གྱི་འདུས་བྱས་ཀྱི་དངོས་པོ་རྣམས་ཐམས་ཅད་ཀྱང་བཞིས་འཇོམས་པར་བྱེད་དེ། རི་དང་། ནགས་དང་། ཆུ་ཀླུང་དང་། གྲོང་ཁྱེར་དང་། གྲོང་དང་། གྲོང་རྡལ་དང་། སྨན་གྱི་ལྗོངས་དང་། སྐྱེད་
མོས་ཚལ་རྣམས་མིའི་འགྲོ་བས་བསྡུས་པ་རྣམས་དང་། ལྷའི་འཇིག་རྟེན་གྱི་ཡང་སྟེ། འཇོམས་ཤིང་ཟད་པར་འགྱུར་རོ། །ནགས་དང་། ཉེ་བའི་ནགས་དང་། རྫིང་བུ་དང་། ལྗོན་ཤིང་གི་ནགས་རྣམས་ཀྱང་ལྷ་རྣམས་ཐམས་ཅད་བག་མེད་པར་སྤྱོད་པས་ཉམས་ཤིང་ཉམས་པར་
ཡང་འགྱུར་རོ། །དེ་དག་རྣམས་ཐམས་ཅད་མེད་པས་ཡང་དང་ཡང་དུ་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེའོ། །འཇིག་རྟེན་འདི་དག་ཐམས་ཅད་རང་གི་ལས་ལ་ལོངས་སྤྱོད་པ་རྣམ་པ་དུ་མར་ཀུན་ཏུ་གནས་པ་མེད་པ་རྣམས་ལ་གཡེང་བ་མེད་པའི་བློས་ལྟ་བར་བྱེད་
དོ། །གཅིག་ཏུ་ངེས་པའི་བློས་དྲན་པ་བརྟན་པ་རྣམ་པར་མ་གཡེངས་པའི་དྲན་པ་དང་ལྡན་པ་གཅིག་ཏུ་དེ་ཁོ་ན་ཉིད་ལ་བལྟ་བར་གྱུར་པས་རྟོགས་ནས་གཞན་ཡང་དུས་དེ་ཉིད་ལ་སོ་སོར་དྲན་པ་དང་ཤེས་བཞིན་དང་ལྡན་པ་ཡིན་ཏེ། དགེ་སློང་དེ་ནི་ཅི་ལྟ་བུའི་སྤྱོད་ལམ་གྱིས་གནས་པའི་

རབ་ཏུ་བྱས་པ་དང་། སྡོམ་པ་ལ་གནས་པའི་དབང་དུ་བྱས་པ་དང་། ཇི་ལྟ་བ་བཞིན་དུ་དྲི་མ་ལས་ལྡང་བའི་དུས་ནི་འདི་ཡིན་ནོ། །བསམ་གཏན་གྱི་གནས་པས་ཉེ་བར་འཕེལ་བར་བྱ་བའི་དུས་ནི་འདི་ཡིན་ནོ། །ཉེ་བར་བཅག་པའི་དབང་དུ་བྱས་པའི་དུས་ནི་འདི་ཡིན་ནོ། །བླ་མའི་
དུས་ནི་འདི་ཡིན་ནོ། །བདག་གི་ཟས་ཀྱི་དུས་ནི་འདི་ཡིན་ནོ། །བདག་གི་ཆོས་གོས་བསྡུ་ཞིང་བྱི་དོར་བྱ་བའི་དུས་ནི་འདི་ཡིན་ནོ། །བདག་སྦྱིན་པ་པོ་དང་སྦྱིན་བདག་རྣམས་ཀྱི་དྲུང་དུ་སོང་ལ་ཆོས་བསྟན་པའི་དབང་དུ་བྱ་བའི་དུས་ནི་འདི་ཡིན་ནོ། །དེ་ལས་བདག་ཕྱིར་འགྲོ་བར་བྱ་བའི་དུས་ནི་
འདི་ཡིན་ནོ། །དགེ་སློང་དེས་དུས་ཐམས་ཅད་ཉིད་དུ་དུས་ཀྱི་རྗེས་སུ་རྟོགས་པའི་དྲན་པ་ཡིན་ནོ། །དེ་ལྟར་ན་དགེ་སློང་དུས་ཀྱི་རྗེས་སུ་ཞུགས་པའི་དྲན་པ་ཅན་ཡིན་ནོ། །གཞན་ཡང་ཇི་ལྟར་ན་ཚོད་དྲན་པ་ཡིན་ན་ནི་འདི་ན་དགེ་སློང་དག་དགེ་སློང་བདག་ཉིད་ཀྱི་ཇི་སྲིད་མངལ་ནས་བཟུང་
ནས་ན་ཚོད་ཀྱི་རྗེས་སུ་འབྲེལ་བ་རྣམས་དྲན་པར་བྱེད་དོ། །ལུས་ཀྱི་ན་ཚོད་རྣམས་ཀྱང་གང་གི་ཕྱིར་སྐད་ཅིག་པ་ཉིད་ཡིན་ཏེ། ནུར་ནུར་པོ་དང་། ལྟར་ལྟར་པོ་དང་། མཁྲང་འགྱུར་དང་། གོར་གོར་པོ་དང་། གོང་པོ་དང་། ཡན་ལག་དང་ཉིང་ལག་འགྱུས་པ་རྣམས་དང་། བྱིས་པ་
དང་། གཞོན་ནུ་དང་། བར་མ་དང་། རྒས་པར་གྱུར་པ་ལ་སོགས་པ་ལུས་ཀྱི་ན་ཚོད་སྔ་ཕྱིའི་རིམ་པ་རྣམས་ཤིན་ཏུ་མྱུར་ཞིང་གར་ཡང་གནས་པ་མེད་པའི་ལུས་སྐད་ཅིག་པ་འདི་ལ་ལྟ་བར་བྱེད་དོ། །བྱིས་པའི་སྐྱེ་བོ་བག་མེད་པས་ཉེ་བར་བཅོམ་པ་རྣམ་པར་རྟོག་པའི་རྒྱས་བཅུས་པ་
སྲིད་པའི་ཆུ་བོས་ཁྱེར་བ་འདི་དག་རྣམས་ཀྱིས་ནི་སོ་སོར་རིག་པ་ཡང་མ་ཡིན་ལ་སྐལ་བ་འཐུན་པའི་རིགས་གཞན་རྣམས་ནས་འཆི་འཕོས་ནས་ལས་ཀྱི་ལྕགས་སྒྲོག་གིས་རྒྱུད་ཀུན་ཏུ་བཅིངས་ཤིང་སླར་ཡང་སྐྱེ་བ་གཞན་གང་ཡང་རུང་བ་ཅིག་ཏུ་སྐྱེ་བར་འགྱུར་རོ། །གཞན་ཡང་དེ་རང་གི་
ལས་ཀྱིས་ཉེ་བར་འགྲོ་བར་གྱུར་པས་ལུས་དང་སེམས་ཀྱི་རྒྱུད་ཀྱི་རྗེས་སུ་འབྲེལ་བའི་ནུར་ནུར་པོ་དང་། ལྟར་ལྟར་པོ་དང་། མཁྲང་འགྱུར་དང་། གོར་གོར་པོ་དང་། ཤའི་གོང་བུ་དང་ཡན་ལག་དང་ཉིང་ལག་དང་ལྡན་པར་མིའི་འགྲོ་བར་སྐྱེ་བར་འགྱུར་བས་བྱིས་པ་དང་། གཞོན་

ནུ་བདོ་བ་དང་། བར་མ་ན་གནས་པའི་གནས་སྐབས་དེ་དག་ཉིད་རིམ་གྱིས་འཆི་བའི་མཐར་ཐུག་པར་འགྱུར་རོ། །གཅིག་ཇི་ལྟ་བ་དེ་བཞིན་དུ་འདོད་པའི་ཁམས་པ་རྣམས་ཐམས་ཅད་ཀྱང་སོ་སོ་སོ་སོར་སྔོན་གྱི་ལས་ཀྱིས་ཀུན་ནས་སྦྲེལ་བས་ཇི་ལྟར་རྗེས་སུ་
འཐུན་པའི་ལུས་ཀྱིས་བསྡུས་པ་དང་། ལུས་དང་ལྷན་ཅིག་འགྲོགས་པའི་ལས་རྣམས་ཀྱིས་ན་ཚོད་དང་རྗེས་སུ་འཐུན་པའི་ལུགས་རྣམས་ནི་ཅི་ནས་ཀྱང་སེམས་ཅན་རྣམས་ཐམས་ཅད་ལ་འགྱུར་བ་ཡིན་ནོ། །དེ་ལྟ་བུ་ལ་ནི་ན་ཚོད་རྣམས་དྲན་པའི་དགེ་སློང་ཞེས་བརྗོད་དོ། །གཞན་
ཡང་དྲན་པ་གསུམ་པ་དགེ་སློང་གིས་བསྟེན་པར་བྱ་ཞིང་བསྒོམ་པར་བྱ་ལ་མཐར་ཐུག་པར་ཡང་བྱའོ། །གང་དག་ཅེ་ན། འདི་ལྟ་སྟེ། འཆི་འཕོ་དང་སྐྱེ་བའོ། །མཚན་མོ་ཡང་བསྒོམ་པར་བྱ་སྟེ། སེམས་ཅན་འདི་དག་ཐམས་ཅད་ནི་མཐར་འཆི་བར་གྱུར་པ་སྟེ། གསོན་པ་རྣམས་
ཀྱི་མཐའ་ནི་འཆི་བས་མཐར་ཐུག་པར་བྱེད་དོ། །ཁམས་གསུམ་དུ་སྐྱེས་པའི་སེམས་ཅན་རྣམས་ཐམས་ཅད་ཀྱང་མི་རྟག་པ་དང་། སྐྱེ་བ་དང་། འགག་པའི་ཆོས་ཅན་ཀུན་ནས་འདུས་བྱས་པ། ཉེ་བར་འཚེ་བ་དང་བཅས་པ་འདུས་པ་མཐར་འབྲལ་བར་འགྱུར་བས་ན་ལྷ་རྣམས་ནས་
འཆི་འཕོས་ནས་དམྱལ་བ་རྣམས་སུ་སྐྱེ་བར་འགྱུར་རོ། །དམྱལ་བ་རྣམས་ནས་འཆི་འཕོས་ནས་ཀྱང་དམྱལ་བ་རྣམས་སུ་སྐྱེ་བར་འགྱུར་བ་དང་། དམྱལ་བ་རྣམས་ནས་འཆི་འཕོས་ནས་ཀྱང་ལྷར་སྐྱེ་བ་དང་། མི་རྣམས་ནས་ཤི་ནས་དམྱལ་བ་དང་། ཡི་དགས་དང་། དུད་འགྲོ་དང་། ལྷ་
དང་། མི་རྣམས་སུ་ཡང་སྐྱེའོ། །ཡི་དགས་རྣམས་ནས་ཤི་ནས་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་སུ་སྐྱེའོ། །དེ་ལྟར་ན་འོག་དང་། ཐད་ཀ་དང་། སྟེང་གི་འཁོར་བ་འདི་དག་རྣམས་སུ་ལས་ཀྱི་རླུང་གིས་ཡོངས་སུ་འཁོར་རོ། །རང་གི་ལས་རྣམས་
ལ་ལོངས་སྤྱོད་པས་ཡོངས་སུ་འཁྱམ་མོ། །འཁོར་བའི་རྒྱ་མཚོ་ཆེན་པོ་ན་ཡོངས་སུ་འཁོར་རོ། །དེ་བཞིན་དུ་དེས་ནམ་ནངས་པ་དང་། ནུབ་པ་དང་། ཉིན་མོ་དང་། མཚན་མོ་ཡང་གཅིག་ཏུ་འཆི་འཕོ་དང་སྐྱེ་བ་དྲན་པ་གང་ཡིན་པ་སྒོམ་པར་བྱེད་དོ། །དེའི་དགེ་སློང་འདིའི་གང་

དག་གསོན་པའི་རྒྱགས་པར་གྱུར་པ་གཅིག་ཏུ་ཆགས་པར་བྱེད་པའི་ལོག་པར་ཡོངས་སུ་ཞེན་པས་བྱས་པ་དེ་བསྙུངས་པར་གྱུར་པའམ། རྣམ་པ་ཐམས་ཅད་དུ་ཡང་མེད་པར་འགྱུར་རོ། །དྲན་པ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟར་འཆི་འཕོ་དང་སྐྱེ་བ་དྲན་
པའོ། །དེའི་ཕྱིར་མྱ་ངན་ལས་འདས་པའི་གྲོང་ཁྱེར་དུ་འཇུག་པར་འདོད་པ་རྣམས་ཀྱིས་འདི་བསྟེན་པར་བྱའོ། །ཡིད་ལ་བྱའོ། །རྒྱུ་གང་གིས་སེམས་ཅན་འདི་དག་རྣམས་དྲིན་མེད་པར་འགྱུར་བ་ནི་རྟག་པའི་གོ་འཕང་ཚོལ་བར་བྱེད་པ་དོན་མེད་དོ། །གང་གི་ཕྱིར་སྲེད་པའི་ཞགས་
པས་ཀུན་ཏུ་བཅིངས་ནས་འཁོར་བ་ན་ཡོངས་སུ་འཁྱམ་པ་རྣམས་ཀྱིས་རྟག་པའི་གོ་འཕང་འཐོབ་པར་འགྱུར་རམ། དེ་ནས་དེའི་ཚེ་ཚིགས་སུ་བཅད་པ་གསུངས་པ། ཇི་ལྟར། སྲིད་པའི་འཇིགས་ལས་རྣམ་གྲོལ་ཞིང་། །ཐམས་ཅད་ལ་ཡང་ཆགས་མེད་པས། །འདོད་དང་བྲལ་
བའི་བརྟན་པ་ནི། །གོ་འཕང་མྱ་ངན་འདས་ལ་གནས། །སྲིད་པའི་སྐྱོན་དུ་བྱིང་བ་ལ། །དཀའ་ཐུབ་སྤྱོད་པས་དགའ་བ་ཡི། །དེ་ཡི་ཡིད་རྣམས་ངལ་སོས་ཀྱང་། །ཞི་བར་འགྱུར་བ་ཡིན་ནམ་ཅི། །གང་གི་ཡིད་ཀྱང་རྣམ་འཁྲུལ་བས། །ལུས་རྣམས་ལ་ནི་རབ་ཏུ་རྒྱུགས། །དེ་
ནི་ཆོས་ཀྱི་ལམ་ནོར་བས། །དམྱལ་བར་སྐྱེ་བར་འགྱུར་བ་ཡིན། །བག་མེད་པས་ནི་སེམས་དཀྲུགས་པས། །དེ་ཉིད་རྗེས་སུ་མཐོང་བ་མིན། །བག་མེད་པ་ཡང་མེ་དང་འདྲ། །དེ་ཕྱིར་འབད་པས་ཡོངས་སུ་སྤོངས། །བག་མེད་པས་ནི་རྣམ་འཇོམས་པའི། །སྐྱེས་བུ་ལས་ཀྱི་སྐྱེ་
གནས་སྐྱེས། །ལམ་ཡང་རྣམ་བརྒྱད་དེས་ལེགས་པ། །ཐམས་ཅད་ཉིད་དུ་མི་མཐོང་ངོ་། །བག་མེད་ཡུལ་ན་བསྟེན་པ་ཡིས། །ཆོས་བཅུ་རྣམ་པར་ཉམས་པ་ཡིན། །དེ་ནི་རྟག་ཏུ་བག་མེད་པས། །བསམ་གཏན་ཡང་ནི་རབ་ཏུ་ཉམས། །བག་མེད་སེམས་ཅན་ཐམས་ཅད་
ཀྱི། །འཆིང་བ་རྣམས་ཀྱི་མཆོག་ཡིན་ནོ། །བདེ་བའི་གོ་འཕང་རྟག་པར་ཡང་། །བག་ཡོད་པར་ནི་རབ་བརྗོད་དོ། །འཁོར་བའི་འཇིགས་པ་སྟོན་པ་ལས། །གང་གི་བློ་ནི་རྨོངས་མེད་པ། །དེ་ནི་ངན་སོང་འཇིགས་གྲོལ་ནས། །རབ་ཞི་ལེགས་པར་གནས་ཞེས་བརྗོད། །

དེ་ལྟར་འཆི་འཕོ་དང་སྐྱེ་བ་དྲན་པ་ཅེས་ཀྱང་བསྒོམ་པར་བྱའོ། །དེ་བསྒོམས་པའི་ཕྱིར་རྟག་ཏུ་དགའ་བར་འགྱུར་རོ། །དེ་འདུས་བྱས་ཀྱི་དངོས་པོ་རྣམས་ཐམས་ཅད་ལ་འཆི་འཕོ་དང་སྐྱེ་བ་ལེགས་པར་མངོན་པར་མཐོང་ནས་འཁོར་བའི་སྡུག་བསྔལ་མང་པོ་
རྣམས་ལ་སོ་སོར་རྟོག་པར་བྱེད་དོ། །གང་ཞིག་འཇིག་རྟེན་འདིར་རྣམ་པ་དུ་མར་སྒྲུབ་པར་བྱེད་པའི་བག་མེད་པ་དེ་དག་རྣམས་ཀྱང་ཇི་ལྟ་བ་བཞིན་དུ་སྤོང་བར་བྱེད་པའི་དགེ་སློང་དེ་རྟག་ཏུ་ཡང་མི་རྟག་པ་ལ་རྗེས་སུ་ལྟ་ཞིང་གནས་སོ། །ཟད་ཅིང་འགོད་པ་རྗེས་སུ་ལྟ་བ་བློ་དང་ལྡན་པ་དྲན་པ་ཉེ་
བར་གཞག་ཅིང་ཡིད་ལ་བྱེད་པ་དང་ལྡན་པ་དེས་ནི་སྡུག་བསྔལ་རྣམས་མཐར་བྱེད་པར་ནུས་སོ། །གཞན་ཡང་དགེ་སློང་གིས་དྲན་པ་བཞི་པ་ཡིད་ལ་བྱ་བ་ནི་འདི་ལྟ་སྟེ། ཕུན་སུམ་ཚོགས་པ་དང་རྒུད་པ་རྣམས་དྲན་པ་ཡིད་ལ་བྱེད་པའོ། །འདི་ལྟར་ཕུན་སུམ་ཚོགས་པ་དང་རྒུད་པ་དྲན་པས་
ཕུན་སུམ་ཚོགས་པ་དང་རྒུད་པ་ཡིད་ལ་བྱེད་པའི་དགེ་སློང་རྣམས་ནི་རྙེད་པ་དང་བཀུར་སྟི་ལ་མངོན་པར་དགའ་བར་མི་འགྱུར་རོ། །འདོད་པའི་དབང་དུ་གྱུར་པས་སྦྱིན་པ་པོ་དང་སྦྱིན་བདག་རྣམས་ལ་བརྟེན་པར་མི་བྱེད་དོ། །དེས་རྒྱལ་པོའམ་རྒྱལ་པོའི་བློན་པོ་གང་ཡིན་པ་རྣམས་མཐོང་ཞིང་དེའི་བདེ་
བ་དེ་དག་རྣམས་ཀྱང་ཡང་དག་པར་མངོན་པར་མཐོང་བར་གྱུར་པ་དེའི་ཚེ་ཡང་བདེ་བར་སེམས་ཀྱིས་ཀུན་ཏུ་འཛིན་པར་མི་བྱེད་དོ། །སྲེད་པས་མི་འཆིང་ངོ་། །ཉིན་མོར་ཀུན་ཏུ་རྟོག་པར་མི་བྱེད་ཅིང་མཚན་མོར་ཡང་མ་ཡིན་ནོ། །ཤིན་ཏུ་ལེགས་པར་བརྟག་པར་བྱ་བའི་ལོངས་སྤྱོད་གཞན་རྣམས་
ཀྱང་བདག་གིར་མི་བྱེད་དོ། །གཞན་རྣམས་ལ་ཡང་འཐུན་པའི་སེམས་ཀྱིས་ཀུན་ཏུ་ལྟ་བར་བྱེད་དོ། །འདི་ལྟར་ཡང་ཡིད་ཀྱིས་སྒོམ་པར་བྱེད་དེ། ཇི་ལྟར་སེམས་ཅན་འདི་དག་རྣམས་ནི་རྒུད་པ་མཐར་ཐུག་པ་འབྱུང་བར་འགྱུར་ཏེ། གང་གི་ཕྱིར་ཕུན་སུམ་ཚོགས་པ་ཐམས་ཅད་
ཀྱང་རྒུད་པའི་མཐར་ཐུག་པ་ཡིན་པའི་ཕྱིར་རོ། །ཇི་ལྟ་ཇི་ལྟར་ཕུན་སུམ་ཚོགས་པ་ཤིན་ཏུ་ཆེས་ལྷག་པར་གྱུར་པ་དེ་ལྟ་དེ་ལྟར་སྲེད་པ་རྣམས་སྟོབས་ཆེས་ཤིན་ཏུ་ལྷག་པར་འགྱུར་བ་ཡིན་ནོ། །དེ་རྣམས་རབ་ཏུ་ཉམས་པར་གྱུར་པ་ལས་ཀྱང་དེ་ལ་མངོན་པར་ཞེན་པས་ཕྱིས་ཡང་རྣམ་པར་

འབྲལ་བར་བྱས་པའི་རྣམ་པ་དུ་མ་དང་རྣམ་པར་རྟོག་པ་དུ་མ་ཇི་སྙེད་ཀྱི་ཡིད་ཀྱི་སྡུག་བསྔལ་རྣམས་སྐྱེ་བར་འགྱུར་ཏེ། དེའི་དཔེ་རྣམས་ཀྱང་བྱ་བར་སླ་བ་མ་ཡིན་ནོ། །དེ་དེ་ལྟར་གང་གི་ཚེ་ཕུན་སུམ་ཚོགས་པ་དང་རྒུད་པ་རྣམས་ལ་ལེགས་པར་མངོན་པར་ལྟ་བར་བྱེད་པ་དེའི་ཚེ་
ལྷའི་རྒྱལ་པོ་རྣམས་ཀྱང་འདོད་པར་མི་བྱེད་ན་ཅི་ཡང་མིའི་རྒྱལ་པོ་རྣམས་སམ། འཁོར་ལོས་སྒྱུར་བའི་རྒྱལ་པོ་རྣམས་འདོད་པར་འགྱུར་རམ། དེ་ཅིའི་ཕྱིར་ཞེ་ན། དེ་དག་རྣམས་ལ་རྒུད་པའི་སྡུག་བསྔལ་རྣམ་པ་དུ་མ་ཀུན་ནས་མངོན་པར་མཐོང་བའི་ཕྱིར་ཏེ། གཞན་ཡང་རྒྱལ་
པོའམ། རྒྱལ་པོའི་བློན་པོ་རྣམས་སམ། ཁྱིམ་བདག་རྣམས་སམ། རྒྱལ་རིགས་རྣམས་དང་ཤིན་ཏུ་སྟོབས་དང་ལྡན་པ་གཞན་རྣམས་ཀྱི་མཆོག་ཏུ་ཕུན་སུམ་ཚོགས་པ་རྣམས་ཀྱང་རུང་སྟེ། སྐྱེས་ནས་ལན་ཅིག་དང་ལན་ཅིག་མ་ཡིན་པར་རྒུད་པར་བྱེད་པར་འགྱུར་བ་ཡིན་ནོ། །བུ་དང་།
བྲན་པོ་དང་། བྲན་མོ་རྣམས་དང་། ལས་བྱེད་པ་རྣམས་དང་། ཞོ་ཤས་འཚོ་བ་རྣམས་དང་འབྲལ་བར་འགྱུར་རོ། །རྒུད་པའི་བྲེལ་དོག་ཏུ་ལྟུང་བ་རྣམས་ལ་ནི་གཞན་རྣམས་སྔང་བར་འགྱུར་རོ། །གཞན་རྣམས་ཀྱིས་བསྔངས་པར་གྱུར་པ་ནི་ལམ་སྲང་རྣམས་དང་བཞི་མདོ་
རྣམས་ཀྱི་སྒོ་རྣམས་ན་ལག་པ་དང་རྐང་པ་ཟད་ནས་ཁྲག་འཐིག་པར་གྱུར་པ་གོས་རལ་བར་གྱུར་པ་བཀྲེས་པ་དང་། སྐོམ་པས་གདུངས་པས་སྐམས་པ་སྐད་ཆད་པར་གྱུར་པས་གྲོང་ཁྱེར་ནས་གྲོང་ཁྱེར་དང་། གྲོང་ནས་གྲོང་དང་། རི་ནས་རི་དང་། ཡུལ་ཆུང་ནས་ཡུལ་ཆུང་
རྣམས་གང་དག་ཡིན་པར་རྣམ་པ་དུ་མར་མཆོག་ཏུ་མི་བཟད་པའི་སྡུག་བསྔལ་གང་ཡིན་པ་རྣམས་ལ་ཉེ་བར་ལོངས་སྤྱོད་པར་བྱེད་དོ། །དེའི་ཚེ་དགེ་སློང་འདིས་ལེགས་པར་མངོན་པར་མཐོང་ནས་ཡིད་ལ་བྱེད་པར་གྱུར་པ་ན་ཤིན་ཏུ་ཡང་ཡུལ་གྱི་ངམ་གྲོག་རྣམ་པ་དུ་མར་ལྷུང་བའི་
འཁོར་བ་ལ་སྐྱོ་བ་སྐྱེའོ། །གཞན་ཡང་དགེ་སློང་འདིས་མི་རྣམས་ཀྱི་ཕུན་སུམ་ཚོགས་པ་རྣམས་རྒུད་པ་ལ་ལྟ་བར་བྱེད་ལ། དེའི་ཚེ་ལྷ་རྣམས་ལ་ཡང་རྗེས་སུ་དཔག་པ་དེ་ཉིད་ཀྱིས་རྗེས་སུ་དཔོག་པར་བྱེད་དོ། །དེ་ལ་རེ་ཞིག་མི་རྣམས་གང་ཡིན་པ་རྣམས་གཞན་གྱི་དབང་དུ་

གྱུར་པ་དང་། མེ་དང་ཆུ་དང་། ཆོམ་རྐུན་དང་། རྒྱལ་པོའི་སྒོ་དག་ནས་ཀྱང་ཉེ་བར་འཚེ་བར་བྱེད་པས་རྒུད་པའི་གནས་སྐབས་རྣམས་ན་སྡུག་བསྔལ་བའི་འཇིགས་པ་དུ་མར་འགྱུར་བ་རྣམས་ལ་ལྟ་བརྗོད་དུ་ཡང་ཅི་ཡོད་ནས་ལྷ་རྣམས་ཤ་དང་། རུས་པ་
དང་། ཆུ་སེར་དང་བྲལ་བ་ལྷའི་བདེ་བ་ཕུན་སུམ་ཚོགས་པ་ལྷ་རྫས་ཀྱི་པད་མའི་ཕྲེང་བས་ཀུན་ཏུ་དཀྲིས་པ་ལྷ་བརྒྱ་སྟོང་དུ་མས་ཡོངས་སུ་བསྐོར་བ་དཔེ་མེད་པའི་ཡོན་ཏན་རྣམས་ཕུན་སུམ་ཚོགས་པའི་བུད་མེད་ཀྱི་འགྲོ་བ་རྣམས་ཀྱིས་ཡོངས་སུ་བསྐོར་ནས་རྒོད་པ་དང་། འགྱིང་བ་
རྩེ་བའི་བདེ་བ་རྣམས་དང་ལྡན་པ་རྣམས་ལ་ལྷ་རྫས་ཀྱི་སྐྱེད་མོས་ཚལ་དང་། རྫིང་བུ་དང་། རིའི་རྩེ་མོ་རིན་པོ་ཆེ་སྣ་བདུན་གྱིས་ཤིན་ཏུ་འབར་བས་ཉེ་བར་གསལ་བ་རྣམས་ལ་རྔ་སྐད་ཡན་ལག་ལྔ་དང་ལྡན་པ་རྟག་ཏུ་ཉེ་བར་བསྒྲགས་པ་དང་ལྡན་པས་བདེ་བར་རྒྱུ་བ་རྣམས་རིན་པོ་ཆེ་བདུན་དང་
ལྡན་པའི་ཁང་བུ་ན་འོད་ཀྱིས་གསལ་བའི་ལུས་ཅན་རྣམས་ཤིན་ཏུ་རྣམ་པ་དུ་མར་དཔེ་མེད་པའི་ཡུལ་གྱི་བདེ་བ་རྣམས་ལ་རྟག་པར་སྟེན་པར་གྱུར་པ་རྣམས་ཕན་ཚུན་དུ་གནོད་པ་མེད་ཅིང་འཐབ་པ་དང་རྩོད་པ་རྣམ་པར་སྤངས་པ་རྣམས་ལ་ནི་གང་དག་ཁོ་ན་ཡིད་ཀྱིས་བསམས་པ་དེ་དག་
ཁོ་ན་འཐོབ་པར་འགྱུར་བ་རྣམས་རྔ་སྐད་ཡན་ལག་ལྔ་པས་རྟག་ཏུ་བསྒྲགས་པར་གྱུར་པའི་ཡིད་བདེ་བའི་ལྷ་རྣམས་ལ་ཡང་གང་གི་ཚེ་རྒུད་པས་བྱས་པའི་རྒུད་པའི་སྡུག་བསྔལ་རྣམས་འབྱུང་བར་འགྱུར་ཏེ། ལས་ཟད་པ་ན་སླར་ཡང་དམྱལ་བ་དང་། ཡི་དགས་དང་། དུད་འགྲོའི་སྐྱེ་བ་
རྣམས་སུ་སྐྱེ་བར་འགྱུར་བ་ལ་མངོན་དུ་ཕྱོགས་པ་རྣམས་ཀྱིས་ཕྱིར་ཉིད་སྐྱེ་བ་གཞན་དུ་སྐྱེ་བར་འགྱུར་བས་བྱས་པའི་རྣམ་པ་དུ་མ་སྐྱེ་བ་གཞན་སོ་སོ་ཐ་དད་པ་རྣམ་པ་སྣ་ཚོགས་པར་འཕོ་བར་འགྱུར་བ་རྣམས་གང་གི་ཚེ་འཆི་འཕོ་བ་ན་མཐོང་ངོ་། །དེ་ལ་གང་གི་ཕྱིར་དམྱལ་བ་རྣམས་སུ་སྐྱེ་བར་
འགྱུར་ན་ནི་དེའི་ཚེ་དམྱལ་བ་རྣམས་ན་རབ་ཀྱི་ཤུགས་ཀྱིས་འབར་བས་འཁྲིགས་པ་དང་། བཀྲེས་པ་དང་སྐོམ་པས་བྱས་པའི་སྡུག་བསྔལ་རྣམས་ལ་དཔེ་མེད་པའི་གཟེར་ཟུག་དང་ལྡན་པའི་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་

ཆེན་པོ་དང་། ཚ་བ་དང་། རབ་ཏུ་ཚ་བ་དང་སྟེ། མནར་མེད་པ་སྤངས་པའི་དམྱལ་བ་ཆེན་པོ་བདུན་པོ་རྣམས་སུ་ཇི་ལྟར་ལས་བྱས་པ་བཞིན་བདག་ཉིད་རབ་ཏུ་ལྟུང་བར་འགྱུར་བ་མཐོང་ངོ་། །དེའི་ཚེ་རྣམ་པར་འབྲལ་བས་བྱས་པ་གང་ཡིན་པའི་སྡུག་བསྔལ་ཆེན་པོ་དེ་དག་རྣམས་
མངོན་པར་མཐོང་ནས། ལུས་དང་ཡིད་གང་ཡིན་པའི་སྡུག་བསྔལ་སྐྱེ་བར་འགྱུར་རོ། །འདི་བཤད་པར་སླ་བ་ཡང་མ་ཡིན་ནོ། །དྲན་པ་འདི་དག་རྣམས་ནི་འདིར་དགེ་སློང་གིས་ལན་ཅིག་མ་ཡིན་ཞིང་ལན་ཅིག་མ་ཡིན་པར་དང་ཉིན་དང་མཚན་དུ་ཡང་བསྒོམ་པར་བྱའོ། །གཞན་
ཡང་དགེ་སློང་དེ་ལྷ་དང་མི་རྣམས་ཀྱི་ཕུན་སུམ་ཚོགས་པ་དེ་ཉིད་ཀྱིས་བྱས་པའི་དྲན་པ་རྗེས་སུ་སྒོམ་པར་བྱེད་དེ། འགྲོ་བ་གསུམ་པོ་རྣམས་ལ་ནི་རྒུད་པ་ཁོ་ན་ཡིན་གྱི། དམྱལ་བ་རྣམས་དང་། ཡི་དགས་རྣམས་དང་། དུད་འགྲོའི་འགྲོ་བ་རྣམས་ལ་གང་ལ་ཕུན་སུམ་ཚོགས་པ་
འབྱུང་བར་འགྱུར། ལྷ་དང་མི་རྣམས་ལ་ནི་བདེ་བའི་རྗེས་སུ་འཐུན་པའི་ཐ་སྙད་དུ་བྱ་བ་ཅུང་ཟད་ཙམ་ཡོད་ཀྱང་འཐག་པའི་སྣལ་མ་འཆུགས་དང་འདྲ་བར་རང་དབང་མེད་པ་ཕུན་སུམ་ཚོགས་པ་རྒུད་པར་བྱེད་པ་ཡིན་ནོ། །མི་རྣམས་ཀྱི་ལྔ་གང་ཞེ་ན། འདི་ལྟ་སྟེ། གང་གི་ཚེ་མིག་
གིས་གཟུགས་ཡིད་དུ་འོང་བ་འཐུན་པ་སྡུག་པ་མངོན་པར་མཐོང་ནས་ཞེན་པར་ལྟའོ། །དེའི་ཚེ་རོ་མྱོང་བར་བྱེད་དོ། །འདོད་པར་བྱེད་དོ། །བདེ་བའི་སྐལ་བ་ཅན་དུ་འགྱུར་རོ། །ཡང་གང་གི་ཚེ་དེ་ལས་བཟློག་པ་གཞན་མི་ཕན་པ་མི་འཐུན་པ་ཡིད་དུ་མི་འོང་བ་རྣམས་མཐོང་ན་དེའི་ཚེ་
དེ་ཉིད་ལ་འདོད་ཆགས་དང་བྲལ་ལོ། །སྡུག་བསྔལ་བར་འགྱུར་ཏེ། དེ་དག་རྣམས་དབང་པོ་གཅིག་གི་དབང་དུ་བྱས་པའི་ཕུན་སུམ་ཚོགས་པ་དང་རྒུད་པ་ཡིན་ནོ། །གཞན་ཡང་དགེ་སློང་དེ་ཉིད་རྒུད་པ་དང་ཕུན་སུམ་ཚོགས་པ་གཞན་དྲན་པ་ལ་རྗེས་སུ་འབྲེལ་བར་བྱེད་དེ། གང་
ཞེ་ན། འདི་ལྟ་སྟེ། རྣ་བས་དགའ་བ་འཐུན་པ་ཡིད་དུ་འོང་བ་རྗེས་སུ་འཐུན་པ་རབ་ཏུ་དགའ་བར་བྱེད་པའི་སྒྲ་རྣམས་རྣ་བས་ཐོས་ན་ཡིད་རབ་ཏུ་རངས་པ་སྐྱེད་པར་བྱེད་པ་དེ་ནི་འདིའི་ཕུན་སུམ་ཚོགས་པ་ཡིན་ནོ། །ཡང་གང་གི་ཚེ་ཐ་དད་པར་གྱུར་པའི་རྐྱེན་གཞན་གྱིས་སྒྲ་དེ་ཉིད་ཉན་པར་

བྱེད་པ་ན་མི་འདོད་པ་མི་སྡུག་པ་ཡིད་དུ་མི་འོང་བར་གྱུར་པ་དེའི་ཚེ་འདིའི་ཡིད་མི་བདེ་བ་སྐྱེད་པར་འགྱུར་ཏེ། རྗེས་སུ་མི་འཐུན་པ་སེམས་ལ་མི་ཕན་པ་དེ་ནི་འདིའི་རྒུད་པ་ཡིན་ནོ། །གཞན་ཡང་དགེ་སློང་དེ་གང་གི་ཚེ་མེ་ཏོག་གི་ཚོགས་རྣམས་དང་ཕྱེ་མའི་སྦྱོར་
བར་བྱས་པའི་དྲི་རྣམས་དང་གཞན་ཡང་རྣམ་པ་སྣ་ཚོགས་པའི་དྲི་ཡིད་ཀྱི་རྗེས་སུ་འཐུན་པའི་དྲི་རྣམས་སྣོམ་པར་བྱེད་དོ། །དེའི་ཚེ་རྒྱུ་དེ་དག་རྣམས་ཀྱིས་འདི་ལ་དགའ་བ་དང་ལྷན་ཅིག་འགྲོགས་པའི་ཡིད་བདེ་བ་སྐྱེ་བར་འགྱུར་རོ། །གཞན་ཡང་གང་གི་ཚེ་དགེ་སློང་དེ་ཉིད་གང་ཤིན་ཏུ་
བརྟན་པའི་དྲན་པ་དེ་དག་ཁོ་ནས་རྗེས་སུ་འབྲེལ་པར་བྱེད་དེ། གཞན་ཡང་ཇི་ལྟར་གང་གི་ཚེ་མི་དེ་དག་རྣམས་ཉིད་སྣ་དེ་ཉིད་ཀྱིས་དྲི་རྣམ་པ་དུ་མ་སྣོམ་པར་བྱེད་དེ། བརྣགས་པ་རྣམས་དང་། ཡིད་ཀྱི་རྗེས་སུ་མི་འཐུན་པ་མི་གཙང་བའི་རིགས་མང་པོར་གྱུར་པའི་དྲི་མི་ཞིམ་པ་རྣམས་
སྣོམ་པར་བྱེད་པ་ན། དེའི་ཚེ་འདི་ཡིད་མི་བདེ་བ་སྐྱེ་བར་འགྱུར་རོ། །དེ་ནི་འདིའི་རྒུད་པ་ཡིན་ནོ། །གཞན་ཡང་དགེ་སློང་དེ་ཉིད་རྣམ་པ་གཞན་གྱིས་ཀྱང་མིའི་འཇིག་རྟེན་དེ་ཉིད་ཀྱི་ཕུན་སུམ་ཚོགས་པ་དང་རྒུད་པ་ལ་དྲན་པ་རྗེས་སུ་འབྲེལ་པར་བྱེད་དེ། གང་གི་ཚེ་མིའི་འཇིག་རྟེན་པ་
རྣམས་ལྕེས་རོ་རྣམས་ཇི་ལྟར་མྱོང་བར་བྱེད་པ་ཡིན་ནོ། །འཐུན་པའི་ཡིད་དུ་འོང་བ་བསམས་པའི་རྗེས་སུ་འཐུན་པའི་ཚིམ་པར་བྱས་པས་ཡོངས་སུ་སྨིན་པ་ན་བདེ་བར་བྱེད་པ་ཚེ་དང་། སྟོབས་དང་། མདོག་དང་། བདེ་བ་རྣམས་སྣ་ཚོགས་པར་རབ་ཏུ་རྒྱས་པས་བྱེད་པ་དེའི་ཚེ་ཡིད་བདེ་བ་
འབྱུང་བར་འགྱུར་རོ། །དེ་ནི་འདིའི་ཕུན་སུམ་ཚོགས་པ་ཡིན་ནོ། །དེ་བཞིན་དུ་གང་གི་ཚེ་ལུས་ཀྱིས་ཀྱང་རེག་བྱ་རྣམས་ལ་རེག་པར་བྱེད་པ་ནི་འཐུན་པ་ཡིད་དུ་འོང་བ་གྲང་བའི་དུས་སུ་དྲོ་བ་རྣམས་ལ་ཡང་རྒུད་པ་དྲན་པ་རྗེས་སུ་འབྲེལ་བར་བྱེད་ལ་དྲོ་བའི་དུས་རྣམས་སུ་ནི་བསིལ་བ་
སྟེ། ཇི་ལྟར་ཡིད་ཀྱི་རྗེས་སུ་འཐུན་པར་བྱེད་པ་དེ་ནི་མི་རྣམས་སུ་གྱུར་པའི་མིའི་འཇིག་རྟེན་པ་རྣམས་ཀྱི་ཕུན་སུམ་ཚོགས་པ་ཡིན་ནོ། །ཡང་གཞན་གང་དག་གི་ཚེ་ན་རྒྱུ་གཞན་དག་དང་རྐྱེན་གཞན་རྣམས་ཀྱིས་ལུས་དེ་ཉིད་ལ་ཡང་རེག་བྱ་དེ་ཉིད་ཀྱང་མི་འདོད་པར་འགྱུར་ཏེ།

ཡུལ་གཞན་རྣམས་ཀྱི་དབང་གིས་ཀྱང་མི་འདོད་པར་འགྱུར་རོ། །གཞན་ཡང་ཡུལ་རྣམས་དང་དབང་པོ་དང་ཕྲད་པ་ལས་སྐྱེས་པ་དེའི་རྣམ་པར་རྟོག་པ་བརྟན་པོས་བྱས་པ་ལན་ཅིག་མ་ཡིན་ཞིང་ཕྱོགས་གཅིག་མ་ཡིན་པར་རབ་ཏུ་འཕེལ་བར་གྱུར་པས་སྲེད་པའི་མེས་བསྲེགས་པར་གྱུར་
པ་རྣམས་གང་ཡིན་པ་ནི་རང་བཞིན་གྱིས་འཇིག་རྟེན་པ་རྣམས་ཐམས་ཅད་ཆགས་པ་ཡིན་ནོ། །ཇི་ལྟ་བུའི་བདེ་བ་རྣམས་དང་ལྡན་པའི་ལྷའི་འཇིག་རྟེན་པ་ཡུལ་རྣམས་ལ་སྲེད་པས་ཆགས་པའི་བློ་ཅན་དེ་དག་རྣམས་ཀྱི་རྒུད་པ་དང་རྗེས་སུ་འབྲེལ་པའི་དྲན་པས་རྣམ་པར་དཔྱོད་པ་བྱེད་དོ། །
མཆོག་ཏུ་དགེ་བར་གྱུར་པའི་དགེ་སློང་དེས་འདོད་པ་ན་སྤྱོད་པའི་ལྷ་དྲུག་པོ་རྣམས་ཀྱི་རྒུད་པ་རྣམས་མཐོང་སྟེ། དེ་ལ་རྒྱལ་ཆེན་བཞིའི་རིགས་ཀྱི་ལྷ་རྣམས་ལ་ནི་རྒུད་པ་རྣམ་པ་བཅུ་གཉིས་ཡིན་ནོ། །འདི་ལྟ་སྟེ། ལྷ་དང་ལྷ་མ་ཡིན་རྣམས་ཀྱིས་འཐབ་མོའི་དུས་ན་བང་ཉམས་པ་དང་ལྷ་
མ་ཡིན་གྱིས་བརྒྱབ་པས་ལྷན་ཅིག་ཁོ་ནར་འགྱེལ་བ་དང་། རྒྱ་མཚོར་ལྷུང་བ་དང་། གོ་ཆ་རྣམས་ལྷུང་བ་དང་། ཆགས་པ་རྣམས་དང་ལྷན་ཅིག་ཁོ་ནར་འབྱེད་པ་དང་ཆགས་ཤིང་ངོ་ཚ་བ་རྣམས་དང་ལྷན་ཅིག་ཏུ་མགོ་རྒྱན་ལྷུང་བ་དང་། སྒྲ་གཅན་མཐོང་བས་བརྒྱལ་བ་དང་འཆི་
འཕོ་བའི་དུས་ན་ཚད་དང་དབྱིབས་དང་རྒྱན་རྣམས་དང་ལྡན་པའི་ལྷའི་བུ་མོ་དེ་དག་རྣམས་ཕྱིར་གསར་དུ་སྐྱེས་པའི་དྲུང་དུ་སོང་ནས་རྩེད་མོ་ཆེན་པོ་རྩེད་མོ་ཚད་མེད་པ་བྱེད་པར་གྱུར་ནས་ཡོངས་སུ་སྤངས་པ་དང་། རྩེད་མོའི་དུས་ན་དེ་རང་གི་ལས་དང་འཐུན་པའི་དམན་པར་འགྱུར་
བ་དང་། རྩེད་མོའི་དུས་ན་དུད་འགྲོར་སྐྱེས་པའི་བྱས་ཀྱང་སྨོད་པར་བྱེད་པ་དང་། པད་མ་རྣམས་ལ་བསྡད་པ་དང་རེག་པ་ཁོ་ནས་ཉམས་ཏེ་རང་གི་ལས་དང་འཐུན་པར་འགྱུར་བ་དང་། རྒྱན་རྣམས་དང་གཞན་ཆེས་གཙོ་བོར་གྱུར་པ་དག་གི་རྒྱན་རྣམས་མངོན་པར་མཐོང་ནས་ངོ་ཚ་བ་དང་སྟེ།
རྒུད་པ་རྣམ་པ་བཅུ་གཉིས་པོ་དེ་དག་ནི་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ཡིན་ནོ། །དགེ་ལེགས་སུ་རྗེས་སུ་སྤྱོད་པའི་དགེ་སློང་འདིས་མཐོ་རིས་ཀྱི་བདེ་བ་ལ་མ་འཆུམས་པ་དྲི་མ་མེད་པའི་བློས་དེ་དག་རྣམས་ལ་ཀུན་ནས་ལྟ་བར་བྱེད་དོ། །དེས་མཐོང་ནས་ཀྱང་གཤེ་ཞིང་མཐོ་རིས་

ཀྱི་བདེ་བ་རྣམས་ལ་སྨོད་པར་ཡང་བྱེད་དེ། གང་དག་མཐོ་རིས་འདོད་པས་ཚངས་པར་སྤྱོད་པ་དེ་དག་རྣམས་ཀྱི་ཚངས་པར་སྤྱོད་པ་ནི་མི་ཚངས་པར་སྤྱོད་པའི་དོན་དུ་སྤྱོད་པ་ཡིན་ནོ། །དེ་རྣམས་ལ་ཡང་འཕྱ་བར་བྱེད་ཅིང་སྐྱུག་བྲོ་བར་ལྟའོ། །དེ་ཅིའི་ཕྱིར་ཞེ་
ན། རང་དབང་མེད་པ་ཡིན་པའི་ཕྱིར་རོ། །གཞན་ཡང་དགེ་སློང་དེ་ཉིད་སུམ་ཅུ་རྩ་གསུམ་པའི་ལྷ་རྣམས་ཀྱི་རྒུད་པ་ལ་ཀུན་ཏུ་ལྟ་བར་བྱེད་དོ། །དེས་སུམ་ཅུ་རྩ་གསུམ་པའི་ལྷ་རྣམས་ཀྱི་རྒུད་པ་བརྒྱད་པོ་མཐོང་བ་ལ་འདི་ལྟ་སྟེ། ལྷ་དང་ལྷ་མ་ཡིན་རྣམས་ཀྱི་རྩོད་པས་གོ་ཆ་
རྣམས་མེད་པར་འགྱུར་བ་དང་། གང་གི་ཚེ་རབས་གཏན་གྱི་གཤུལ་ནས་ལྟུང་བ་དང་། མི་གཙང་བས་རྗེས་སུ་འབྲེལ་བའི་དུས་སུ་འཇུག་ངོས་རྣམས་མི་མཐོང་བ་དང་། མཐོང་བས་སེམས་སྟོབས་འཆོར་བ་དང་། ཟས་དང་རྩེད་མོ་དག་ལ་འཇུག་པའི་དུས་སུ་ཁ་དོག་དང་གཟུགས་
དང་སྟོབས་ཀྱི་ངོ་བོ་རྣམས་ཞན་པ་དང་། སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ལ་ཡང་མི་མཉམ་པར་བརྒྱ་བྱིན་གྱིས་ཡོངས་སུ་ཤེས་པ་དང་། འཆི་འཕོ་བའི་དུས་ན་བུད་མེད་རྣམས་འཕོས་པར་འགྱུར་བ་དང་། རྩེད་མོའི་ལྟད་མོ་ཁང་བུ་རྣམས་ཀྱི་བང་བུལ་བར་གྱུར་
པ་རྣམས་སོ། །རྒུད་པ་བརྒྱད་པོ་འདི་དག་རྣམས་ནི་སུམ་ཅུ་རྩ་གསུམ་པ་རྣམས་ཀྱི་ཡིན་ནོ། །འཐབ་བྲལ་བ་རྣམས་ཀྱི་རྒུད་པ་རྣམས་ནི་འདི་ལྟ་སྟེ། བུད་མེད་རྣམས་ཀྱིས་ཤེས་པར་འགྱུར་བས་ཟས་ཀྱི་དུས་ན་ངོ་ཚ་བར་འགྱུར་རོ། །དེའི་ལས་རྣམས་ཉུང་བ་ཡིན་པའི་ཕྱིར་ན་ལྷ་འདི་
ལ་ལྷ་གཞན་རྣམས་ཀྱིས་གཡོག་གི་བྱ་བ་མི་བྱེད་དེ། དཔེར་ན་ལྷ་གཞན་ལ་ལྷ་གཞན་དག་རྣམས་ཀྱིས་སྤྱོད་པར་བྱེད་ཅིང་རྒྱལ་པོར་ཡང་བྱེད་པར་འགྱུར་རོ། །མུ་སུ་ལུན་དྷའི་ཆོས་སྟོན་པའི་དུས་ན་ཤིན་ཏུ་འཇིགས་པར་འགྱུར་བ་ནི་མཐར་ཐུག་པའི་རྒུད་པ་ཡིན་ནོ། །ལས་རྣམས་
དམན་པ་ཡིན་པའི་ཕྱིར་ན་འོད་རྣམས་འཇོམས་པར་འགྱུར་ཏེ། ལྷ་གཞན་དགེ་བའི་ལས་ཀྱི་མཐའ་ལ་སྤྱོད་པ་རྣམས་ཀྱི་འོད་ཀྱིས་འདི་ཟིལ་གྱིས་གནོན་པར་འགྱུར་ཏེ། དེ་འཇོམས་པ་ཡང་མིའི་འཇིག་རྟེན་ན་ཉི་མས་གཟའ་དང་སྐར་མ་དང་རྒྱུ་སྐར་རྣམས་བཞིན་ནོ། །ལས་དམན་

པ་ཡིན་པའི་ཕྱིར་ན་སྟན་ལ་ཉེ་བར་འདུག་པའི་རིན་པོ་ཆེ་རྣམས་གཞན་ཉིད་དུ་ཉེ་བར་འགྱུར་ཏེ། གང་གི་ཚེ་དགེ་བའི་ལས་ཀྱི་མཐའ་ལ་སྤྱད་པའི་ལྷ་རྣམས་འདུག་པར་འགྱུར་བ་ན། དེའི་ཚེ་ལྷ་དེའི་སྟན་རྣམས་དངུལ་གྱི་རང་བཞིན་དུ་གྲུབ་པར་གྱུར་པ་ནི་ལས་རྣམས་སྣ་ཚོགས་
པའི་ཕྱིར་རོ། །དེ་དག་རྣམས་ནི་འདིའི་རྒུད་པ་ཡིན་ཏེ་འདིའི་ཚད་ཀྱང་ཆུང་བར་འགྱུར་རོ། །རྒུད་པ་དྲུག་པོ་དེ་དག་རྣམས་ནི་འཐབ་བྲལ་བའི་ཡིན་ནོ། །དགའ་ལྡན་པ་རྣམས་ལ་ནི་རྒུད་པ་བཞི་ཡོད་དེ། འདི་ལྟར་ངང་པའི་སྒྲ་ཀུན་ནས་སྒྲོགས་པ་མཉན་པར་འོས་པའི་དམ་པའི་
ཆོས་སྒྲོགས་པ་ཉན་པར་བྱེད་པའི་རྒྱུད་དགའ་ལྡན་པ་རྣམས་ཀྱིས་ཐོས་ན་མི་དགའ་བ་མེད་པ་ནམ་མཁའ་ལ་འགྲོ་བའི་རྒྱལ་པོ་ངང་པས་རང་གི་གཟུགས་འདོད་པ་བཞིན་དུ་བསྒྱུར་བས་རིན་པོ་ཆེ་བདུན་གྱིས་ཤིན་ཏུ་འབར་བའི་ཆ་བྱད་ཀྱིས་གཟུགས་དཔེ་མེད་པ་འཛིན་པའི་གཟུགས་
ཀྱིས་དཔག་ཚད་ལྔ་སྟོང་དུ་རང་གི་ལུས་རྣམ་པར་བསྲིངས་པའི་འོད་ཁ་དོག་སྣ་ཚོགས་པ་རྣམས་ཀྱིས་དགའ་ལྡན་ཀུན་ཏུ་སྣང་བར་བྱས་པར་གྱུར་ཞིང་མཆོག་ཏུ་ངོ་མཚར་བར་གྱུར་པའི་སྐད་ཀྱིས་ལྷ་དེ་དག་རྣམས་ལ་ཉི་མ་རེ་རེ་བཞིན་དུ་འགྲོ་བར་བྱེད་པས་ནམ་མཁའ་ལ་བགྲོད་པའི་
རྒྱལ་པོ་ངང་པ་བྱང་ཆུབ་སེམས་དཔའ་དེས་ཚིགས་སུ་བཅད་པ་བརྗོད་པ། ཇི་ལྟར། གང་ཕྱིར་བསོད་ནམས་རྣམས་ནི་ཟད། །ཚེ་ཡང་མྱུར་བར་འགྲོ་བ་ཡིན། །དགའ་ལྡན་གྱི་ནི་དབང་ཕྱུག་གིས། །ཆོས་ལེགས་བསྡུ་ལ་འབད་པར་གྱིས། །གང་ཡང་ཆོས་ནི་ཡོངས་བཏང་
ནས། །རྒྱགས་པས་མཆོག་ཏུ་ཉེར་བཅོམ་པ། །བསོད་ནམས་སྩོགས་པ་མ་ཡིན་ཏེ། །དེ་ནི་ཕྱི་ནས་གདུང་བར་འགྱུར། །ཇི་སྲིད་དུ་ནི་རྒས་དང་ནད། །འཆི་བདག་བཅས་ཏེ་མ་འོངས་པ། །དེ་སྲིད་དུ་ནི་བསོད་ནམས་ཀྱིས། །ཕྱི་ནས་འགྱོད་པར་གྱུར་ཏ་རེ། །བསོད་ནམས་ཀུན་
ནས་མ་བསྡུས་དང་། །བག་མེད་པས་ཀྱང་ཉེར་བཅོམ་པ། །དམྱལ་བའི་རྒྱུ་ཡི་སྡུག་བསྔལ་ལ། །བག་མེད་པ་ནི་བཞད་གད་བྱེད། །གསོན་པའི་དོན་དེས་ཅི་ཞིག་བྱ། །ལོངས་སྤྱོད་ཀྱིས་ཅི་གཉེན་གྱིས་ཅི། །དབང་པོ་ཚང་བ་དེ་རྙེད་ནས། །གང་ཞིག་ཆོས་ལ་རྟག་མི་དགའ། །ཆོས་

ནི་ལེགས་པར་བསྡུ་བའི་ཡིད། །ཉི་མ་རེ་རེ་བཞིན་དུ་བྱ། །སྡིག་པ་རྣམས་ནི་རྣམ་སྤངས་དང་། །བཟང་པོ་རྣམས་དང་ཕྲད་པར་བྱ། །ཡེ་ཤེས་མཚོན་ཆ་རྣོན་པོ་ཡིས། །རྒྱགས་རྒྱུན་གདུལ་དཀའ་གཅད་པར་གྱིས། །སྐྱོན་གྱི་ཕུང་པོ་གཞོམ་བྱ་ཞིང་། །
སྐྱོན་གྱི་ལམ་ནི་གཅད་པར་གྱིས། །ཤེས་དང་ཚུལ་ཁྲིམས་དཀའ་ཐུབ་སྤེལ། །འདོད་པ་དང་བྲལ་སྤྲོ་བ་སྤངས། །དེ་ཉིད་ལམ་ནི་རྣམ་སྟོན་པོ། །ཞི་བ་རྟག་ཏུ་བསྟེན་པར་བྱ། །ཚུལ་ཁྲིམས་གང་གིས་ལྷ་སྐྱེ་བ། །འཐོབ་པའི་འབྲས་ལ་རྨོངས་པ་ཡིས། །བསོད་ནམས་སོག་པར་
མི་བྱེད་ཅིང་། །སྲིད་པའི་མཐའ་ནི་ཟློག་མི་བྱེད། །ཡེ་ཤེས་རྩོལ་ལ་མངོན་དགའ་གང་། །ཚུལ་ཁྲིམས་རིན་པོ་ཆེ་ཡིས་བརྒྱན། །འདོད་འདོད་ཆགས་ཀྱིས་གང་འཇིགས་པ། །ལྷ་རྣམས་ལྷར་ནི་འདོད་པ་ཡིན། །གང་ཞིག་རྟག་ཏུ་ཆོས་ལ་དགའ། །ལྷ་རྣམས་རྟག་ཏུ་དེ་ཕྱག་
འཚལ། །གང་ཡང་དེ་ལས་ཕྱིན་ཅི་ལོག །དེ་དག་ཐམས་ཅད་ཉམས་པར་འགྱུར། །ཆོས་ཀྱི་ཟབ་པ་འདི་རྙེད་ནས། །ཕ་རོལ་མཆོག་ཏུ་སྒྲོལ་བ་ཆེ། །གང་ཞིག་ལེགས་པར་ཟམ་མི་རྒལ། །དེ་ནི་སྲིད་པ་ལས་མི་གྲོལ། །ཉོན་མོངས་ཤིང་ནི་མ་ལུས་པ། །ཡེ་ཤེས་མེ་ཡིས་
མི་སྲེག་པ། །ཅིའི་དོན་ཉོན་མོངས་ཡུལ་གྱི་ནི། །དྲ་བས་མི་རྣམས་བསྡམས་ཕྱིར་རོ། །འཐུག་པོའི་རང་བཞིན་མིག་སྤྲིན་ཚོགས། །རབ་ཏུ་ཡེ་ཤེས་མིག་སྦྱོང་ཞིང་། །དེ་ལས་སྒྲོལ་བ་རྫོགས་སངས་རྒྱས། །གསུང་གི་རང་བཞིན་སྨན་གྱི་ཟས། །དམ་ཆོས་དམག་གི་དཔོན་གྱིས་
ནི། །འདོད་ཆགས་དམག་ནི་ངེས་པར་འཇོམས། །དགེ་མངའ་ཤིན་ཏུ་བསྒྲགས་པས་ཏེ། །དེ་ནི་རབ་ཏུ་འབད་པས་མཉན། །ཕྱིན་ཅི་ལོག་ནི་རྣམ་པ་བཞི། །དེས་ཀྱང་དེ་སྲིད་ཉིད་དུ་སླུ། །དེ་བཞིན་འཇིག་རྟེན་ཆོས་བརྒྱད་ཀྱང་། །སྐྱེ་དགུ་མ་ལུས་འཇོམས་པར་བྱེད། །སྲེད་དྲ་མི་བཟད་ཆུ་བོ་
ནི། །རྣམ་རྟོག་བརྒྱ་ཕྲག་རྒལ་བར་དཀའ། །ཤེས་པའི་ཟམ་པ་ལེགས་ཞོན་ནས། །ཐུབ་རྣམས་ཞི་བར་རྒལ་བ་ཡིན། །འདོད་པས་ཀུན་ཏུ་རྨོངས་པའི་ཡིད། །ལྷ་གང་འདོད་པ་སྟེན་པ་རྣམས། །རྟག་པར་ཡང་ནི་གནས་ལྔ་རུ། །དེ་དག་རྣམས་ལ་གྲོལ་བ་མེད། །ལན་ཅིག་མིན་པར་

ཐོབ་ཉམས་པའི། །ཀིམ་པ་ཀ་དང་དུག་དང་མཚོན། །མེ་དང་མཚུངས་པའི་སྡུག་བསྔལ་རྒྱུ། །འདོད་པ་གློག་འདྲ་ཅི་ཞིག་བྱ། །ཇི་ལྟ་ཇི་ལྟར་བསྟེན་བྱས་པ། །དེ་ལྟ་དེ་ལྟར་རབ་ཏུ་འཕེལ། །ངོམས་མེད་བྱེད་ཕྱིར་དེ་དག་ནི། །སྲེག་པའི་རྒྱུ་ཡི་མེ་བཞིན་ནོ། །སྲེག་སྐྱོན་འཇིགས་
པས་ངེས་བརྒྱལ་བའི། །ལྷ་གང་བདེ་བ་འདོད་པ་རྣམས། །འདི་ལས་བདེ་བ་ཀུན་འབྱུང་གིས། །འདོད་པ་མི་དགེ་རྣམ་སྤང་གྱིས། །སྐྱེ་བོ་རྨོངས་པ་ཆགས་གྱུར་ཞིང་། །འཆིང་བའང་དམ་པོར་བསྡམས་ནས་ནི། །རྩབ་ཧྲལ་ཅན་ནི་གཞན་དུ་འགྲོ། །འདོད་པ་གློག་གི་
ཡོན་ཏན་བཞིན། །གང་ཞིག་འདོད་ཆགས་སྲེད་པ་ཡིས། །གོང་ནས་གོང་དུ་འདོད་པ་སྟེན། །དེ་ནི་འདོད་ཆགས་མེས་བསྲེགས་ནས། །བསྲེགས་བཞིན་བསྲེགས་པ་འཐོབ་པར་འགྱུར། །ལྷ་གང་འདོད་པ་སྟེན་བྱེད་རྣམས། །དེ་དག་གང་ཕྱིར་ཤིན་ཏུ་རྨོངས། །མེད་པར་
བྱ་ཕྱིར་འཇུག་བྱེད་པ། །གང་དེ་བདེ་ནས་བདེ་བ་ཡིན། །མྱང་འདས་འདོད་ལྡན་རྣམས་ལ་མེད། །གྲོལ་མེད་བདེ་བ་ཅི་ལ་ཡོད། །དེ་ཕྱིར་འདོད་པ་བསྟེན་མི་བྱ། །འདོད་དང་སྡུག་བསྔལ་མཉམ་དུ་བྱུང་། །ཡུལ་གྱི་ཆགས་པ་སྟེན་པ་རྣམས། །དབང་པོ་རྣམས་ཀྱང་ངོམས་པ་
མེད། །ཐམས་ཅད་དུ་ནི་ལེགས་འཕེལ་བའི། །ངོམས་མེད་བདེ་བའང་ག་ལ་ཡོད། །དེ་ཕྱིར་ཡིད་བྱུང་འཇིགས་བཅས་པའི། །འཁོར་བའི་སྡུག་བསྔལ་རྒྱ་མཚོ་ལས། །འདོད་པའི་སྲེད་པ་མི་བཟད་པ། །ཡོངས་སུ་སྤོངས་ཤིག་སྡིག་ཅན་དེ། །རི་ཡི་ཚོགས་ནི་དེ་དག་གི། །
དགའ་བའི་ལྗོན་ཤིང་རྣམ་སྣ་ཚོགས། །དེ་དག་ལ་ཡང་ཡོངས་བརྟེན་ནས། །འདོད་རྣམས་སྐྱེ་འཇིག་སྒོམ་པར་བྱེད། །ཤེས་པའི་བདེན་པ་བཞི་པོ་ནི། །དེ་དག་མཁས་པས་རབ་ལེགས་མཐོང་། །བསམ་པ་མེད་ལྡན་སྐྱེ་དང་རྒ་བའི་འཇིགས་པ་ལས། །རབ་ཏུ་གྲོལ་བ་མཆོག་ཏུ་
ཞི་བ་དང་ལྡན་པ། །བསམ་པ་མེད་ལྡན་གང་ཡང་རྣམ་པར་རྨོངས་པའི་བློ། །འདོད་པ་ལ་ཆགས་སྲིད་པའི་ལོངས་སྤྱོད་དག་གིས་བཅིངས། །དེ་ནི་འདོད་པའི་རང་བཞིན་འཆིང་རྣམས་ལས་མ་གྲོལ། །སྐྱེ་དང་རྒ་བའི་འཇིགས་པ་རྣམས་ལས་འགྲོལ་བ་མིན། །གང་གི་སྡུག་བསྔལ་

རྒྱ་ཆེ་འདི་ནི་རྣམ་བསམས་ནས། །སྲིད་པའི་རྒྱ་མཚོ་ལས་ནི་སྐྱོ་བར་མི་འགྱུར་བ། །དེ་ནི་འདོད་པའི་དུག་གི་མདའ་ཡི་ཤུགས་ཀྱིས་རྨོངས། །སྡུག་བསྔལ་གྱི་ནི་གནས་སྐབས་དམྱལ་བ་འཐོབ་པར་འགྱུར། །ཐོག་མ་ཐ་མའི་འདོད་པའི་བདེ་བ་རྣམས་ཀྱང་
སྤོངས། །བྱིས་རྣམས་ཅི་ཕྱིར་འདོད་པའི་ལོངས་སྤྱོད་རྣམས་ལ་དགའ། །ཤིན་ཏུ་མི་བཟད་འཇིགས་པ་དེ་དག་རྣམས་ཀྱང་ནི། །འཆི་བདག་འབར་བས་གསལ་བར་མ་འོངས་མི་ཤེས་པ། །གསོན་པ་འདི་དག་འདིས་ནི་འཇོམས་པར་བྱེད་པ་ཡི། །ཇི་སྲིད་འཆི་བདག་འཇིག་
རྟེན་ཐམས་ཅད་མི་འཇོམས་པ། །དེ་སྲིད་དུ་ནི་ཕན་དང་སྐྱིད་དང་བདེ་བ་དང་། །མྱ་ངན་མེད་ཀྱིས་དེ་དག་སྐྱེས་བུ་རྣམས་ཀྱིས་བྱོས། །ཆུད་གཟོན་ཀུན་གདུང་བྱེད་པ་པོ། །འདོད་པའི་སྐྱེ་གནས་ཀུན་ཐོབ་པ། །རྣམ་དུར་རྨོངས་པས་དེ་ལྟ་ན་འང་། །འདོད་པའི་སྤྱོད་པ་ཚིམ་པར་
བྱེད། །དེ་ལྟར་ནམ་མཁའ་ལྡིང་གི་རྒྱལ་པོ་ངང་པས་འགྲོ་བར་ཡང་བྱེད་པ་དང་། རྗེས་སུ་སྟོན་པར་ཡང་བྱེད་དོ། །ལྷ་གང་དག་བག་མེད་པར་གྱུར་པས་ཆོས་སྒྲོགས་པ་རྣམས་ལ་ཆེད་ཆེར་བྱས་ནས་ཉན་པར་མི་བྱེད་པ་དང་། གང་ཡང་དམ་པའི་ཆོས་ཉན་པ་ལས་ཆེད་ཆེར་བྱེད་པ་དེ་
དག་རྣམས་ཉིད་ལ་ལྷན་ཅིག་ཏུ་ངང་པ་དེས་རྗེས་སུ་བསྟན་པའི་ཚིགས་སུ་བཅད་པ་དེ་དག་རྣམས་སྒྲོགས་པ་ཡིན་ཏེ། དེ་རྣམས་དམ་པའི་ཆོས་ཉན་པ་ལ་གུས་པ་ལེགས་པར་སྐྱེས་ནས་རིངས་པར་གྱུར་པས་གང་ན་ཐོས་ན་མི་དགའ་བ་མེད་པ་ཞེས་བྱ་བའི་ས་ཡོད་པ་དེར་ཉེ་བར་ལེགས་
པར་འགྲོ་བར་བྱེད་ལ། དམ་པའི་ཆོས་ཉན་པ་ལ་གུས་པ་སྐྱེད་པའི་ཡིད་ཅན་གྱི་ལྷ་དེ་དག་རྣམས་རྒྱུག་པར་བྱེད་པ་ན། ཁང་བུའི་ཕྱི་བཞིན་གྱིས་ལམ་རྣམས་སུ་ཡོན་ཏན་སྟོང་ཕྲག་བརྒྱས་ཡང་དེ་དག་རྣམས་ཀྱི་འོད་ཟེར་རྣམས་རབ་ཏུ་དང་བར་འགྱུར་རོ། །རྒྱུག་པ་དེ་དག་རྣམས་ལས་
གཞན་པའི་ལྷ་བག་མེད་པས་རྣམ་པར་རྒྱུ་བ་དེ་དག་རྣམས་ཀྱི་གཟི་བརྗིད་རྣམས་ནི་དམན་པར་འགྱུར་རོ། །འདི་རྣམས་ནི་ཉེ་བར་བཅོམ་པར་འགྱུར་རོ། །དེའི་མཐུ་སྟོབས་རྣམས་ཀྱང་ཉེ་བར་བཅོམ་པར་འགྱུར་རོ། །དེ་ལ་འདི་དག་རྣམས་ནི་ལྷ་གང་དག་གི་མཐོང་བའི་ཆོས་ཀྱི་འབྲས་

བུ་ཡིན་ནོ། །འདོད་པ་ལ་མངོན་པར་དགའ་བའི་ལྷ་གང་དག་ཡིན་པ་དེ་དག་རྣམས་ཡང་མདོག་དང་། གཟུགས་དང་། ཆ་བྱད་དང་། རྒྱན་དམན་པར་འགྱུར་རོ། །དེ་དག་ནི་དགའ་ལྡན་པ་འདི་རྣམས་ཀྱི་རྒུད་པ་དང་པོ་ཡིན་ནོ། །གཞན་ཡང་དགའ་ལྡན་གྱི་ལྷ་རྣམས་ཀྱི་རྒུད་པ་གཉིས་
པ་ཡོད་དེ། ཉེ་བར་ལོངས་སྤྱོད་པས་བསྡུས་པ་རྣམས་དང་། དམ་པའི་ཆོས་ཉན་པའི་དབང་དུ་བྱས་ནས་བརྒྱ་སྟོང་བྱེ་བ་ཕྲག་དུ་མའི་འཁོར་རྣམས་བྱང་ཆུབ་སེམས་དཔའ་ལྔ་བརྒྱས་རྣམ་པར་བརྒྱན་པ་ལ་གང་ཡང་དགའ་ལྡན་གྱི་མངའ་བདག་ཉེ་བར་ཞི་བས་དམ་པའི་ཆོས་སྟོན་
པར་བྱེད་དོ། །འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་རྒྱས་པར་རོ། །དམ་པའི་ཆོས་དེ་དག་ཐོས་ནས་ཀྱང་ལྷ་གང་དག་ཡིད་ལེགས་པར་གཏོད་པ་དང་རབ་ཏུ་དང་བའི་ཡིད་ཀྱིས་ཉན་པར་བྱེད་པ་དེ་དག་རྣམས་ཀྱི་གཟི་བརྗིད་དང་། ཆ་བྱད་དང་། རྒྱན་དང་།
གཟུགས་དེ་དག་རྣམས་བརྒྱ་སྟོང་འགྱུར་དུ་ཤིན་ཏུ་ལྷག་པར་འཕེལ་བར་འགྱུར་རོ། །གང་ཡང་སེམས་ཀྱིས་རྐོ་ཏྲོག་ཏུ་གྱུར་པ་གློག་དང་ཟོ་ཆུན་ལྟར་ཀུན་ཏུ་འཁོར་བ་དེ་དག་རྣམས་ནི་སྲེད་པའི་ཡུལ་གྱི་དབང་གིས་ཀུན་ཏུ་ཁྲིད་པར་གྱུར་པ་དེ་དག་རྣམས་ཀྱི་གཟི་བརྗིད་དེ་
དག་དང་། ཆ་བྱད་དང་། རྒྱན་དང་། གཟུགས་ཀྱང་ཟིལ་གྱིས་གནོན་པར་འགྱུར་ཏེ། འདི་ནི་རྒུད་པ་གཉིས་པ་ཡིན་ནོ། །རྩེད་མོ་བྱེད་པའི་ལྷ་རྣམས་ཀྱི་གཞན་ཡང་ལྟུང་བ་གསུམ་པ་ཡོད་དེ། ལྷ་དེ་དག་རྣམས་ཉིད་ལས་ལྷ་གང་དག་ཉན་པ་ལ་གུས་པའི་ཡིད་ཅན་རྣམས་ཀྱིས་
ཆོས་ཀྱི་མཚན་ཉིད་རྣམས་ཇི་ལྟ་བ་བཞིན་དུ་རྟོགས་པར་འགྱུར་བ་དེའི་དུས་ན་ཡིད་དེ་ལ་སོང་བར་གྱུར་པ་དེ་དག་རྣམས་ཀྱི་འོད་ཀུན་ཏུ་གང་བ་དང་ཕྱིར་ཞིང་ཆེས་ལྷག་པར་གྱུར་པས་མངོན་པར་ཟིལ་གྱིས་གནོན་པར་བྱེད་དོ། །ལྷག་མ་རྣམས་ཀྱིས་ནི་དེ་བཞིན་དུ་མངོན་པར་རྒྱས་པར་མི་འགྱུར་
རོ། །ཅི་ལྟར་ལྷ་དེ་དག་རྣམས་ཆོས་ཀྱི་མཚན་ཉིད་རྟོགས་པར་བྱེད་པའི་དུས་དེ་དག་ཏུ་ཆ་བྱད་དང་། རྒྱན་རྣམས་དང་། གཟུགས་ཀྱང་མངོན་པར་རྒྱས་པར་མི་འགྱུར་རོ། །འདི་ནི་ལྷ་དེ་དག་རྣམས་ཀྱི་རྒུད་པ་གསུམ་པའོ། །གཞན་ཡང་ལྷ་རྣམས་ཀྱི་རྒུད་པ་བཞི་

པ་ནི་དེའི་ཚེ་ཉིད་ལ་ལྷ་གང་དག་དམ་པའི་ཆོས་ཉན་པ་ལ་གུས་པ་ལེགས་པར་སྐྱེས་པར་གྱུར་ཅིང་རྣ་བའི་ཁུང་བུ་ཤིན་ཏུ་ཕྱོགས་པ་ཡིད་རྩེ་གཅིག་ཏུ་གྱུར་པས་ཆོས་ཀྱི་མཚན་ཉིད་ཀུན་ཤེས་པར་བྱེད་པ་ལ་ཆེད་ཆེར་བྱེད་པ་ཆོས་དེ་དག་རྣམས་འཛིན་པར་བྱེད་དོ། །
ཡིད་ལ་རབ་ཏུ་འཇོག་པར་བྱེད་དོ། །དེ་ཁོ་ན་བཞིན་དུ་རྗེས་སུ་འཇོག་གོ། །དུས་ཡུན་རིང་དུ་ཡིད་ལ་ཀུན་ཏུ་བཟུང་ནས་རབ་ཏུ་སྒྲུབ་པར་བྱེད་དོ། །ཆོས་ལ་ཇི་ལྟ་བ་བཞིན་དུ་གུས་པ་སྐྱེས་པ་དེ་དག་རྣམས་ཆོས་ཉན་པའི་མཐུ་སྟོབས་ཀྱིས་ཕྱིར་ཞིང་ཤིན་ཏུ་ལྷག་པ་ཉིད་དུ་གཟི་བརྗིད་
དང་། ཆ་བྱད་དང་། རྒྱན་འགྱུར་ཏེ། ཐམས་ཅད་ཀྱང་བརྒྱ་ལོག་ཏུ་འགྱུར་རོ། །དེ་དག་རྣམས་ཀྱི་གཟི་བརྗིད་དེ་དག་མངོན་པར་འཕེལ་བར་གྱུར་པ་རྣམས་ཡང་དག་པར་མངོན་པར་མཐོང་ནས་ལྷ་གང་དག་ཤིན་ཏུ་ཡང་ལྷག་པར་མོས་པ་དམན་པའི་ཡིད་ཅན་དེ་དག་
རྣམས་ངོ་ཚ་བར་འགྱུར་རོ། །དེ་ནི་དགའ་ལྡན་གྱི་ལྷ་དེ་དག་རྣམས་ཀྱི་རྒུད་པ་བཞི་པ་ཡིན་ནོ། །དེ་ལྟར་དགེ་སློང་དེས་དགའ་ལྡན་པའི་ལྷ་རྣམས་ཀྱི་རྒུད་པ་རྣམ་པ་བཞི་སོ་སོར་རབ་ཏུ་རིག་པར་བྱས་ནས་འཕྲུལ་དགའི་ལྷ་རྣམས་ཀྱི་རྒུད་པ་རྣམས་ཀྱང་སོ་སོར་རབ་ཏུ་རིག་པར་བྱེད་དོ། །
དེ་སྲིད་དུ་བདེ་བར་གྱུར་པ་འདི་དག་འཕྲུལ་དགའི་ལྷ་རྣམས་ལ་ཡང་རྒུད་པ་རྣམ་པ་བཞི་ཡོད་པ་རྣམས་དེས་མཐོང་བ་ནི་ཇི་ལྟར་ལེགས་པར་བྱས་པའི་ལས་རྣམས་ཟད་པ་ན་ངེས་པར་རྐང་པ་དག་ལ་གྲིབ་མ་འབབ་པའོ། །ལུས་ཐམས་ཅད་ལས་ནི་འོད་ངེས་པར་འབྱུང་བར་འགྱུར་ལ་
རྐང་པ་དག་གི་ནི་ཡོངས་སུ་ཉམས་པར་འགྱུར་བའི་རྒྱུ་འདིས་ན་རྐང་པ་ལ་གྲིབ་མ་འོང་ངོ་། །ཐམས་ཅད་ནས་འོད་ཀྱི་ཕྲེང་བ་དང་ལྡན་པའི་ལྷ་གཞན་གང་དག་གིས་གྲིབ་མ་དེ་དག་རྣམས་མཐོང་བར་འགྱུར་རོ། །དེ་དག་གིས་གྲིབ་མས་མངོན་པར་ཉམས་པའི་ལྷ་དམན་པ་དེ་དག་མངོན་པར་
མཐོང་ནས་ཀྱང་ཡོངས་སུ་སྤོང་བར་བྱེད་ཅིང་བཞད་གད་དུ་ཡང་བྱེད་དེ། ལྷ་འདི་དག་ལ་ཡོངས་སུ་ཅོ་དྲིས་པར་གྱུར་ཏོ། །ལེགས་པར་བྱས་པའི་ལམ་རྣམས་ཡོངས་སུ་ཟད་པ་ངེས་པ་འབྱུང་ངོ་། །ཇི་ལྟར་ལེགས་པར་བྱས་པའི་ལས་ཡོངས་སུ་ཟད་པ་ཀུན་ནས་འབྱུང་བའི་དབང་དུ་

འདི་གྱུར་པ་རྐང་པ་ལ་ཚ་ཡས་མནར་བའི་ལྷ་དེ་དག་རྣམས་ཀྱིས་དེ་ལྟར་དེ་སྐད་ཐོས་ནས་ཤིན་ཏུ་ངོ་ཚ་བའི་རྙེད་པ་དང་ལྡན་པར་འགྱུར་རོ། །ལེགས་པར་བྱས་པའི་ལས་རྣམས་ཡོངས་སུ་ཟད་པར་བདག་ལ་ཇི་ལྟ་བ་བཞིན་དུ་སྐྱེས་པར་གྱུར་ཏོ། །ཕུན་སུམ་ཚོགས་པ་ཐམས་
ཅད་ཀྱི་མཐའ་ནི་མཐར་རྒུད་པར་འགྱུར་རོ། །དཔེར་ན་གང་གི་ཕྱིར་མི་རྣམས་ཀྱི་མིའི་འཇིག་རྟེན་ན་གང་ལ་ཉིན་མོ་ཡོད་པ་དེ་ལ་ཅིས་ཀྱང་མཚན་མོ་ངེས་པ་ཁོ་ནར་འབྱུང་ངོ་། །དེ་བཞིན་དུ་ཕུན་སུམ་ཚོགས་པ་ཐམས་ཅད་ཀྱི་མཐའ་ལ་ནི་རྒུད་པ་ཡིན་ཏེ། ཡང་ཇི་ལྟར་གང་འགའ་ཞིག་
གསོན་པ་ཡིན་པ་དེ་དག་རྣམས་ལ་ངེས་པ་ཁོ་ནར་འཆི་བར་འགྱུར་རོ། །དེ་བཞིན་དུ་ཕུན་སུམ་ཚོགས་པ་ཐམས་ཅད་ཀྱང་རྒུད་པའི་མཐར་ཐུག་པར་འགྱུར་བ་ཡིན་ཏེ། ཕུན་སུམ་ཚོགས་པ་རྣམས་ནི་འགའ་ཞིག་ཀྱང་རྒུད་པར་མི་འགྱུར་བ་གང་ཡིན་པ་ནི་ཡོད་པ་མ་ཡིན་ནོ། །དེ་ལྟ་བུ་
རྣམས་ནི་རྒུད་པར་གྱུར་པ་དང་པོ་ཡིན་ནོ། །འཕྲུལ་དགའ་བའི་ལྷ་དེ་དག་རྣམས་ཀྱི་གཞན་ཡང་རྒུད་པ་གཉིས་པ་ཡོད་དེ། ཇི་ལྟ་ཇི་ལྟར་ལྷ་དེ་དག་རྣམས་ཉིད་ཀྱི་མིའི་འཇིག་རྟེན་ན་རས་བལ་གྱི་དང་གློང་སྟན་ནང་ཚངས་ཅན་གང་རྣམས་མནན་ན་ནེམ་ལ་བཏེག་ན་འཕར་བར་ཡིན་པ་དེ་
བཞིན་དུ་ལྷའི་འཇིག་རྟེན་པ་འཕྲུལ་དགའ་བ་རྣམས་ཀྱི་མནན་ན་ནེམ་ལ། བཏེག་ན་འཕར་བར་འགྱུར་རོ། །དེ་ལ་ལྷ་གང་དག་ལེགས་པར་བྱས་པའི་ལས་རྣམས་ཤིན་ཏུ་ཟད་པར་གྱུར་པ་དེའི་ས་གཞི་འདི་དག་གི་རྣམས་མནན་ན་ནེམ་ལ་བཏེག་ན་འཕར་བ་ཟད་པར་འགྱུར་རོ། །དེ་རྐང་པ་
བཞག་པ་ན་དམའ་བར་འགྱུར་ལ་འཕར་བར་ནི་མི་འགྱུར་རོ། །དེ་བཞིན་དུ་བཏེག་པ་ན་སྟེ་དེ་དག་དེ་ལྟར་མངོན་པར་མཐོང་ནས་ལྷ་གཞན་རྣམས་ཀྱིས་རྣམ་པར་ཤེས་པ་ཡིན་ཏེ། ཇི་ལྟར་ལྷ་དེ་དག་གི་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་ནི་གདོན་མི་ཟ་བ་ཁོ་ནར་ཟད་པར་བྱུང་
ངོ་ཞེས་ཀྱང་ཁ་ཅིག་ཟེར་རོ། །འདིའི་ལེགས་པར་བྱས་པའི་ལས་རྣམས་ནི་ཡོངས་སུ་ཟད་པར་གྱུར་ལ་ཡོངས་སུ་ལྟུང་བར་འགྱུར་བ་ནི་འོངས་པ་ཡིན་ནོ་ཞེས་ནི་གཞན་དག་རྣམས་རྗོད་པར་བྱེད་དོ། །དེ་ལ་དེ་དག་རྣམས་ནི་འཕྲུལ་དགའི་ལྷ་རྣམས་ཀྱི་རྒུད་པའི་གནས་སུ་གྱུར་པ་གཞན་

གཉིས་པ་ཡིན་ནོ། །གཞན་ཡང་ལྷ་དེ་དག་གི་རྒུད་པའི་གནས་འདི་ལྟ་བུ་དག་ཡིན་ཏེ་ལྷ་དེ་དག་ཡང་ཤིང་གང་དག་ཉིད་ཁོ་ནའི་དྲུང་དུ་ཉེ་བར་འགྲོ་བར་བྱེད་པ་ན་དང་། ལྷ་དེ་དག་རྣམས་ཡོངས་སུ་རྩེ་བར་གྱུར་པ་ན་དང་། ནགས་དང་ཉེ་བའི་ནགས་རྣམས་སུ་རྩེ་
བར་གྱུར་པའི་ལྷ་དེ་དག་རྣམས་ཉིད་ལ་ཤིང་དེ་དག་རྣམས་ཉིད་ཀྱིས་མེ་ཏོག་གི་ཆར་མངོན་པར་འབེབས་པར་འགྱུར་རོ། །ལྷ་གང་དག་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་ཟད་པར་གྱུར་པ་དེ་དག་རྣམས་ལ་དེ་བཞིན་དུ་ཤིང་རྣམས་ཀྱིས་མེ་ཏོག་གི་ཆར་གྱིས་མངོན་པར་
འགེངས་པར་མི་བྱེད་དོ། །ཉིད་རྩེ་བར་གྱུར་པ་ན། ལྷ་གང་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་ཟད་པར་གྱུར་པའི་ལྷ་དེ་ལ་ཤིང་མེ་ཏོག་གིས་མངོན་པར་གང་བར་མི་བྱེད་དོ། །ལྷ་དེ་དག་རྣམས་ལ་ལྷ་གཞན་དག་རྣམས་ཀྱིས་དེ་ལྟར་མེ་ཏོག་གི་ཆར་གྱིས་སྟོང་པར་མངོན་
པར་མཐོང་བར་གྱུར་ནས། ཀྱེ་མ་ལྷ་འདི་དག་རྣམས་ནི་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་ནི་ཅི་ལྟ་བ་བཞིན་དུ་ཟད་ལ་ལྟུང་བར་འགྱུར་བ་ནི་འོངས་སོ། །དེའི་དེ་དག་རྣམས་ཐོས་པར་གྱུར་པ་དང་ལྷ་དེ་ཤིན་ཏུ་ངོ་ཚ་བ་དང་ལྡན་པར་འགྱུར་རོ། །མཐོང་བས་བྱས་པ་འདི་
དག་རྣམས་ནི་འཕྲུལ་དགའ་བའི་ལྷ་རྣམས་ཀྱི་རྒུད་པ་གསུམ་པ་ཡིན་ནོ། །གནས་དེ་དག་རྣམས་ནི་སླུ་བ་མེད་པ་ཡིན་ཏེ། ཕུན་སུམ་ཚོགས་པའི་མཐའ་ཐམས་ཅད་ནི་རྒུད་པར་འགྱུར་བ་ཡིན་ནོ། །གཞན་ཡང་འཕྲུལ་དགའི་ལྷ་དེ་དག་རྣམས་ཉིད་ཀྱི་རྒུད་པར་འགྱུར་བ་རྣམས་གང་ཞེ་
ན། འདི་ལྟ་སྟེ། རེ་རེ་ཞིང་རིན་པོ་ཆེའི་ས་གཞི་ལ་ཉེ་བར་འགྲོ་བར་བྱེད་པ་ན་རིན་པོ་ཆེའི་རང་བཞིན་དེ་དག་རྣམས་ཀྱི་ས་གཞི་དྲི་མ་མེད་པ་རྣམས་དང་། རྩིག་པ་ལ་མེ་ལོང་བཞིན་དུ་གཟུགས་ཀྱི་གཟུགས་བརྙན་རྣམ་པ་སྣ་ཚོགས་པའི་གྲིབ་མ་རྣམས་ཀྱི་གཟུགས་དང་། ཆ་བྱད་དང་རྒྱན་སྣ་ཚོགས་
པ་རྣམས་མཐོང་བར་འགྱུར་ཏེ། ཇི་ལྟར་མི་རྣམས་ཀྱི་མིའི་འཇིག་རྟེན་ན་ཉི་མའི་དཀྱིལ་འཁོར་གཅིག་ཉིད་མཚོ་དང་། རྫིང་བུ་དང་། པད་མའི་རྫིང་བུ་དུ་མར་ཡང་བརྒྱ་སྟོང་དུ་མར་མཐོང་ངོ་། །དེ་བཞིན་དུ་ལྷ་རྣམས་ལས་གཅིག་གི་གཟུགས་བརྙན་ཡང་བརྒྱ་སྟོང་དུ་མ་རྣམས་སུ་རིན་པོ་

ཆེའི་རང་བཞིན་གྱི་ས་གཞི་དེ་དག་རྣམས་ལ་ཤིན་ཏུ་ཡོངས་སུ་གསལ་བར་མཐོང་ངོ་། །དེ་ལ་ལྷ་གང་དག་ལེགས་པར་བྱས་པའི་ལས་རྣམས་ཟད་པར་གྱུར་པ་རྣམས་ཀྱི་ནི་དེའི་གཟུགས་བརྙན་གཅིག་ཁོ་ན་རིན་པོ་ཆེའི་ས་གཞི་གཅིག་ཁོ་ན་ལ་མཐོང་གི་གཞན་དུ་ནི་མ་ཡིན་ནོ། །ལྷ་
གང་དག་ཡིད་ཆེས་རབ་ཏུ་གསལ་བར་གྱུར་པ་རྣམས་ཀྱིས་རྣམ་པ་དེ་ལྟ་བུའི་རྒུད་པ་རྣམས་ཇི་ལྟ་བ་བཞིན་དུ་མངོན་པར་མཐོང་ནས་ལེགས་པར་བྱས་པའི་ལས་རྣམས་ཡོངས་སུ་ཟད་པ་ནི་ལྷ་འདི་དག་ལ་ངེས་པར་འབྱུང་ངོ་། །འདི་དག་གི་རྒུད་པ་རྣམས་ནི་འོངས་པར་གྱུར་ཏོ། །ཞེས་
རྗོད་པར་བྱེད་དོ། །དེ་ལ་འདི་དག་ནི་འཕྲུལ་དགའ་བའི་ལྷ་རྣམས་ཀྱི་རྒུད་པ་བཞི་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། འཇིག་རྟེན་ཕུན་སུམ་ཚོགས་རྒྱུ་བ། །རྒུད་པ་རྟོགས་པ་མ་ཡིན་ནོ། །ཇི་ལྟར་ཉིན་མོ་མཐར་ནི་འཛད། །
ཕུན་ཚོགས་མཐའ་ནི་རྒུད་པ་ཡིན། །ཇི་ལྟ་ཇི་ལྟར་ཕུན་ཚོགས་པ། །དེ་ལྟར་རྒུད་པའང་སྡིག་པ་ཅན། །འདོད་པའི་ལས་ནི་ངོམས་པ་མེད། །ངོམས་པ་མེད་པས་ཡོངས་སུ་སྲེག །གང་ཞིག་རྟག་ཏུ་ཕུན་ཚོགས་འདོད། །བདེ་བ་རྟག་པར་འདོད་བྱེད་པ། །དེ་ནི་སྲེད་པས་བཅོམ་ནས་
ཀྱང་། །གང་ཕྱིར་དེ་ལ་བདེ་བླག་འབབ། །འདོད་པ་སྤྱད་པས་ཚིམ་མེད་པའི། །ལྷ་གང་དམྱལ་བར་ལྟུང་བ་ནི། །ཐམས་ཅད་མེ་ཡིས་བསྐོར་ཡིན་པར། །དེ་ནི་དེ་བཞིན་གཤེགས་པས་གསུངས། །མི་གང་དམྱལ་བར་རབ་ཏུ་འགྲོ། །དེ་བཞིན་བརྒྱ་ཕྲག་དུ་ཡང་སྟེ། །དེ་ནི་རྣམ་
ཡངས་སྡིག་ཅན་གྱི། །བྱ་བར་མཁས་པས་ཤེས་པར་གྱིས། །དེ་ལྟར་འཕྲུལ་དགའ་བའི་ལྷ་རྣམས་ཀྱི་རྒུད་པ་བཞི་པ་ཡིན་ནོ། །གཞན་ཡང་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པ་ཡང་བཞི་ཁོ་ན་ཡོད་དེ། ཇི་ལྟར་གང་གི་ཚེ་ལྷ་རྣམས་ཀྱི་ལེགས་པར་བྱས་པ་ཟད་པར་གྱུར་
པ་ན་དེ་དེ་ལ་གོམས་པར་གྱུར་པས་འཆི་འཕོ་བའི་དུས་དེའི་ཚེ་ན་ཡང་དེ་རྣམས་ལ་ཕྲེང་བ་རྣམས་ཀྱིས་ཁྱབ་པ་རབ་ཏུ་འབྱུང་བར་འགྱུར་རོ། །འདི་ལྟ་སྟེ། རྣམ་པ་སྣ་ཚོགས་པའི་མེ་ཏོག་གི་ཕྲེང་བ་དང་ལྡན་པར་འགྱུར་ཏེ། ལྷ་རྣམས་ལྷ་རྫས་ཀྱི་མ་རྙིངས་པའི་མེ་ཏོག་རྣམས་ཀྱིས་

ཉེ་བར་བརྒྱན་པར་གྱུར་ཏོ། །མཆོག་ཏུ་དྲི་ཞིམ་པ་རྣམས་གང་དག་གི་དཔེར་བྱ་བར་སླ་བ་ཡང་མ་ཡིན་པའི་མེ་ཏོག་གི་ཕྲེང་བས་ཁ་དོག་སྣ་ཚོགས་པའི་འོད་ཀྱིས་ཤིན་ཏུ་གསལ་བར་བྱས་པར་གྱུར་པ་རྣམས་གང་གི་ཁྱད་པར་གྱིས་ཉི་མའི་དཀྱིལ་འཁོར་གྱིས་
ཀྱང་བཅུ་དྲུག་ཆར་ཡང་མི་ཕོད་དོ། །ཕྲེང་བ་དེ་དག་རྣམས་ལ་ཡང་རིན་པོ་ཆེ་བདུན་གྱིས་སྤྲས་པར་གྱུར་པའི་བྱ་རྣམས་དང་བུང་བས་རྟག་ཏུ་སྒྲ་འབྱིན་པ་རྣམས་ཀྱིས་ཁྱབ་པར་གྱུར་པའོ། །དེ་ལ་གང་གི་ཚེ་གཞན་འཕྲུལ་དབང་བྱེད་ཀྱི་ལྷ་རྣམས་ལ་རྒུད་པ་འབྱུང་བའི་དུས་སུ་གྱུར་
པ་ན་དེའི་ཚེ་རྣམ་པ་སྣ་ཚོགས་པའི་མེ་ཏོག་གི་ཕྲེང་བ་མཆོག་ཏུ་དྲི་ཞིམ་པོ་དེ་དག་རྣམས་བུང་བ་དེ་དག་གིས་ཡོངས་སུ་བཏང་ནས་གཞན་དག་ཏུ་འགྲོ་བར་བྱེད་དོ། །ཡིད་འབྱུང་བའི་སྒྲ་རྣམས་ཀྱང་འདོན་ཏོ། །དེའི་རྒུད་པ་དེ་དག་རྣམས་ཡིད་རབ་ཏུ་གསལ་བར་གྱུར་པའི་ལྷ་གཞན་དག་རྣམས་
ཀྱིས་ལེགས་པར་མངོན་པར་མཐོང་ནས་དེ་དག་ལ་བགྲོ་བར་བྱེད་དེ་བསོད་ནམས་ཟད་པར་གྱུར་པའི་ལྷའི་བར་དུ་གཅོད་པར་བྱེད་པ་རྣམས་ཅི་ལྟ་བ་བཞིན་དུ་འདིར་འོངས་སོ། །དེ་ནི་བག་མེད་པ་རྣམས་བག་མེད་པར་སྤྱོད་པའི་རྒུད་པ་དང་པོ་སྟེ། དེ་བུང་བ་རྣམས་ཀྱིས་ཡོངས་སུ་སྤངས་ནས་གཞན་དུ་
སོང་བར་གྱུར་པ་དེ་ཡང་ཐོས་ནས་བསོད་ནམས་ཟད་པར་གྱུར་པའི་ལྷ་དེ་དག་རང་ཉིད་སོ་སོར་རབ་ཏུ་རིག་པར་བྱེད་དོ། །དཔེ་མེད་པའི་ཡུལ་གྱི་བདེ་བ་རྣམས་མཐོང་ནས་བདག་ཉིད་ལ་ཡོངས་སུ་གདུང་བ་ཆེན་པོ་དང་ལྡན་པར་འགྱུར་ཏེ། ཡིད་གདུང་བར་བྱེད་པ་གང་དག་གི་ཁྱད་པར་རྣམས་ཀྱིས་
དམྱལ་བ་རྣམས་ཀྱི་མེ་དང་ཡང་འདྲ་བར་འགྱུར་རོ། །འདི་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པའི་གནས་དང་པོའོ། །གཞན་ཡང་ཐག་ཉེ་བར་གྱུར་པ་གཞན་གཉིས་པ་འབྱུང་བར་འགྱུར་བ་དེ་དག་ནི་ལྷ་རྣམས་འཆི་འཕོ་བར་འགྱུར་བའི་དུས་ན་འདི་ལྟ་སྟེ། མཆོག་ཏུ་འཇམ་ཞིང་
དཀར་པོར་གྱུར་པའི་འོད་ཀྱི་ཕྲེང་བར་གྱུར་པའི་ལྷ་གང་དག་གི་ཁྱད་པར་གྱིས་ཉི་མ་ནི་སྲིན་བུ་མེ་ཁྱེར་ཙམ་དུ་སྣང་བར་གྱུར་ལ། ལྷ་དེ་དག་རྣམས་ཀྱི་ལུས་ལ་ནི་ཆེན་པོར་གྱུར་པ་ཉིད་ཀྱི་བློ་འབྱུང་བ་ཡིན་ཏེ། རབ་ཏུ་གསལ་བའི་རིའི་རྩེ་མོ་རྣམས་དང་རྩིག་པའི་ལོགས་རྣམས་ལ་དེ་དག་མེ་

ལོང་བཞིན་དུ་མཐོང་བར་འགྱུར་རོ། །འདི་ལྟ་སྟེ། འཆི་འཕོ་བའི་དུས་སུ་རྒུད་པ་རྣམས་དང་ཐག་ཉེ་བར་གྱུར་པ་དེའི་ཚེ་ལྷ་རྣམས་ཀྱི་ལུས་དེ་དང་དེ་དག་རྣམས་དོ་ཤལ་རྣམས་དང་གཟུགས་བརྙན་ཡང་མཐོང་བར་མི་འགྱུར་རོ། །ལྷ་གཞན་གང་དག་ཆོས་ཤིན་ཏུ་ཤེས་རབ་རྣོ་བར་གྱུར་
པ་རྣམས་ཀྱིས་དེ་དག་རྣམས་མངོན་པར་མཐོང་ནས་དེས་ལྷ་དེ་དག་ལ་སྦྲོན་པར་བྱེད་དེ། བག་མེད་པས་བག་མེད་པར་སྤྱོད་པ་རྣམས་ལ་ཀྱེ་མ་བར་ཆད་འདི་དག་རྣམས་ཇི་ལྟ་བ་བཞིན་དུ་འོང་བར་འགྱུར་ཏེ། དོ་ཤལ་རྣམས་དང་གཟུགས་དེ་སྲིད་པ་རྣམས་ལུས་ལ་མ་མཐོང་སྟེ། ཇི་ལྟར་སྔོན་
གྱི་ལྷ་གཞན་རྣམས་འཆི་འཕོ་བའི་རྒུད་པའི་རྒྱུ་རྣམས་སྔར་མཐོང་བ་དེ་དག་རྣམས་ཁོ་ན་བཞིན་ནོ། །འདི་དག་རྣམས་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པའི་རྒྱུ་གཉིས་པ་ཡིན་ནོ། །གཞན་ཡང་གཞན་འཕྲུལ་དབང་བྱེད་པའི་ལྷ་རྣམས་ལ་རྒྱུ་གསུམ་པ་རྣམས་འཆི་འཕོ་བ་དང་ཉེ་བ་ན་འབྱུང་
བར་འགྱུར་བ་ལ་འདི་ལྟ་སྟེ། ལྷ་སྐལ་བ་ཡོངས་སུ་མ་ཟད་པ་རྣམས་ནི་རྣམ་པ་སྣ་ཚོགས་པའི་རིན་པོ་ཆེ་ཀུན་ཏུ་འབར་བའི་ཁང་བུ་རྣམས་ཀྱིས་གནས་གསུམ་དུ་མཚུངས་པར་འགྲོ་བར་བྱེད་པ་ལ་འདི་ལྟ་སྟེ། ནམ་མཁའ་ལ་འགྲོ་བར་བྱེད་པ་ན་ཐང་ལ་ཇི་ལྟ་བར་རོ། །དེ་བཞིན་དུ་ལྷའི་བུ་མོ་རྣམས་
ཀྱང་ཉམས་པ་མེད་པའི་ཤུགས་ཀྱིས་འགྲོའོ། །འོན་ཀྱང་ཉམས་པར་འགྱུར་བ་ཡང་མ་ཡིན་ཏེ། འདི་ལྟར་ལྷ་གཞན་དག་བསོད་ནམས་ཟད་པ་རྣམས་ཡིན་པར་གྱུར་ན་དེའི་ཚེ་དེ་དག་རྣམས་ཤིང་རྟ་ལས་ཉམས་པར་འགྱུར་བ་དང་ཆུར་ཡང་འབྱིང་ངོ་། །རྣམ་པ་ཐམས་ཅད་དུ་འགྲོ་བར་འགྱུར་བ་
ཡང་མ་ཡིན་ནོ། །དེ་ནས་ལྷ་དེ་དག་གི་ཁང་བུ་ནུབ་པ་དེ་དག་རྣམས་མངོན་པར་མཐོང་བ་དང་། ཇི་ལྟ་བུའི་བར་ཆད་བདག་ཅག་ལ་ཉེ་བར་འོངས་པར་གྱུར་ཏེ། འཆི་བའི་དུས་སུ་གྱུར་པ་ལས་གཞན་རྣམས་ཀྱང་རྒུད་པའི་རྒྱུ་འདི་ཉིད་ཀྱིས་འཆི་འཕོས་སོ་ཞེས་རྗོད་པར་བྱེད་པ་དེ་ཡང་
ཐོས་ནས་བསོད་ནམས་ཟད་པའི་ལྷ་དེ་ལྷ་རྫས་ཀྱི་ཡུལ་གཞན་དག་རྣམས་བཏང་བས་བྱས་པའི་སེམས་ཀྱི་གདུང་བས་ཀུན་ནས་སྲེག་པར་གྱུར་པ་ན་ཇི་ལྟར་དམྱལ་བ་རྣམས་ཀྱི་མེ་ཡིན་པ་དེ་བཞིན་དུ་ལུས་སྲེག་པར་བྱེད་དེ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པའི་རྒྱུ་གསུམ་

པ་ཡིན་ནོ། །གཞན་ཡང་ལྷ་དེ་དག་རྣམས་ཀྱི་རྒུད་པའི་རྒྱུ་ཡོད་དོ། །འདི་ལྟ་སྟེ། ལྷ་གང་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་ཟད་པར་གྱུར་པ་དེ་དག་རྣམས་ཀྱི་རྒྱན་རྣམས་གང་དག་ཡིན་པ་དེ་དག་རྣམས་ནི་ཡན་ལག་ལྔ་པོ་རྣམས་དང་མཚུངས་
པར་འགྱུར་ཞིང་འོང་སྟེ། སྙན་པའི་རང་བཞིན་དང་དགའ་བར་འགྱུར་བའི་སྒྲ་དང་ཡིད་རབ་ཏུ་རངས་པར་བྱེད་པ་དེ་དག་རྣམས་གཞི་དང་བཅས་པ་སྒྲུབ་པར་བྱེད་དོ། །སྒྲ་འགའ་ཞིག་ནི་རྣམ་པར་གྱུར་པ་དང་ལྡན་པ་ཡིན་ནོ། །སྒྲ་རྣམས་ནི་ལས་ཀྱིས་བྱས་པ་ཡིན་ནོ། །སྒྲ་རྣམས་ཀྱང་
དེའི་ལེགས་པར་བྱས་པའི་ལས་རྣམས་ཇི་ལྟ་བ་བཞིན་དུ་ཟད་པས་རབ་ཏུ་འཇུག་པ་རྣམས་ཀྱིས་ཚིམ་པ་མེད་པར་གང་གི་ཕྱིར་ལས་རྣམས་ཀྱིས་བཅིངས་པའི་ལུས་ཅན་རྣམས་འཇིག་རྟེན་ཕྱི་མར་འགྲོ་བར་བྱ་དགོས་སོ། །དེ་ལྟར་ལས་ཀྱིས་བྱས་པའི་རྒྱན་རྣམས་ཀྱི་སྒྲ་དེ་དག་ཐོས་ནས་
ཤིན་ཏུ་ཡིད་མི་བདེ་བར་འགྱུར་རོ། །ཡུལ་རྣམས་ཀྱིས་ཉེ་བར་བཅོམ་པ་དང་། བདག་གི་བསོད་ནམས་རྣམས་ཀྱང་ཟད་པས་འདིའི་རིན་པོ་ཆེ་རྣམ་པ་སྣ་ཚོགས་པས་བརྒྱན་པའི་ཅོད་པན་ལྟུང་བར་འགྱུར་རོ། །དེ་མངོན་པར་མཐོང་ནས་ཀྱང་ལྷ་དེ་དག་གི་ཡིད་ཤིན་ཏུ་སྐྱོ་བ་དང་ལྡན་པར་
འགྱུར་རོ། །དེ་ལྟ་བུ་རྣམས་ཉིད་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པའི་གནས་བཞི་པ་ཡིན་ནོ། །གང་དག་འདུས་བྱས་སུ་གྱུར་པ་རྣམས་གང་ཞིག་འཇིག་པར་མི་འགྱུར་བ་དང་། གང་ཞིག་ཟད་པར་མི་འགྱུར་བའི་གནས་དེ་ནི་ཁམས་གསུམ་ན་ཡོད་པ་མ་ཡིན་ནོ། །དེ་ལྟར་
ལྷ་དྲུག་པོ་རྣམས་ཀྱི་རྒུད་པའི་གནས་རྣམས་ལེགས་པར་བྱས་པའི་ལས་ཟད་པ་ན་ཡང་ངེས་པར་ལྟུང་བར་འགྱུར་བ་ཡིན་ནོ། །རྒུད་པར་གྱུར་པའི་ལྷ་རྣམས་ལྷའི་འཇིག་རྟེན་གྱིས་གདུངས་ནས་ཚུལ་ཁྲིམས་ལ་སྤྱོད་པའི་ལྷ་དེ་རྣམས་ངེས་པ་ཁོ་ནར་དེ་དག་རྣམས་ཟད་པ་ན་ལྟུང་བར་འགྱུར་
བས་ཅོ་དྲིས་པར་མཐོང་ངོ་། །དེ་ལྟར་ཚོགས་པ་རྒྱུ་བ་ན་སྤྱོད་པའི་ལྷ་རྣམས་འཐབ་བྲལ་གྱི་སར་སྐྱེས་པ་རྣམས་ལ་འཐབ་བྲལ་བའི་བདག་པོ་མུ་སུ་ལུན་དྷ་དེས་བཅོམ་ལྡན་འདས་འཁོར་བ་འཇིག་དེའི་གདུང་རྟེན་ལ་བརྒྱན་པའི་བྱང་བུ་རྣམ་པར་བཀྲ་བའི་ཚིག་དེ་དག་གིས་འདོད་པ་རྣམས་

ཐམས་ཅད་ནི་དམྱལ་བའི་མེ་རྣམ་པར་སྨིན་པ་མྱང་བར་རྩུབ་པ་ཡིན་གྱིས་ཤིན་ཏུ་རིངས་པ་རིངས་པར་བག་མེད་པ་རྣམས་ཡོངས་སུ་སྤོང་བར་གྱིས་ཞེས་ལྷ་དེ་དག་རྣམས་ལ་ལེགས་པར་སྟོན་པར་བྱེད་དོ། །དེ་ལ་དེ་བཞིན་གཤེགས་པའི་མདོ་གསུམ་པ་དེ་དག་རྣམས་ཐོས་པར་གྱུར་པ་
དང་། ལྷ་གང་དག་བག་མེད་པས་གདུངས་པ་དེ་དག་རྣམས་ཀྱི་བག་མེད་པ་རྣམས་འདིར་མཆོག་ཏུ་ཞི་བར་འགྱུར་རོ། །སྟོང་ཕྲག་སུམ་ཅུ་རྩ་དྲུག་པའི་མདོ་ལས་འཁོར་བ་འཇིག་གི་མདོ་སྡེ་གསུམ་པ་རྫོགས་སོ།། །དེ་ནས་འཐབ་བྲལ་གྱི་བདག་པོ་དེས་ལྷ་དེ་དག་རྣམས་
སྐྱོ་བ་དང་བཅས་པའི་ཡིད་མངོན་པར་མཐོང་བར་གྱུར་ནས་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དེས་འདི་སྐད་ཅེས་བརྗོད་དེ། ཇི་ལྟར་ཐོས་པའི་ཆོས་འདི་དག་རྣམས་ནི་དྲང་སྲོང་ཆེན་པོ་མཆོག་གིས་བསྟན་པ་ཡིན་ཏེ། སྡུག་བསྔལ་ཐམས་ཅད་ཟད་པར་བྱེད་པ། བག་མེད་པ་རྣམས་
འཇོམས་པར་བྱེད་པ་པོ། ལྷ་དང་མི་རྣམས་ལ་ཕན་པར་མཛད་པ། བཀྲ་ཤིས་པ་མཐར་ཐུག་པར་གྱུར་པ་རྣམས་ནི་བསྟན་པ་ཡིན་ནོ། །དེ་ལ་ཁྱེད་ཀྱིས་དེ་དག་རྣམས་ནི་ཐོས་པར་གྱུར་ན་དེ་ལ་དེ་བཞིན་གཤེགས་པ་གསུམ་པའི་དམ་པའི་ཆོས་འདུལ་བ་དེ་དག་ཉིད་ཉན་པར་འདོད་པ་རྣམས་གང་
ཡིན་པ་དེ་དག་རྣམས་ལ་མཐའ་ཡས་པར་ཤིས་པར་འགྱུར་བ་དེ་དག་རྣམས་ནི་ཁྱེད་ཀྱིས་ཉན་ནས། གཞན་ཡང་དེ་བཞིན་གཤེགས་པ་གཞན་གྱི་ཆོས་ཉོན་དང་དེས་ཕྱིར་ཞིང་ཁོ་ན་ཆོས་རྣམས་འཕེལ་བ་དང་བདེ་ལེགས་སུ་བྱེད་པར་ཡང་འགྱུར་རོ། །དེ་བཞིན་དུ་དམྱལ་བ་དང་། ཡི་དགས་ད