Kinh tạng Tây Tạng (Kangyur Đại Học) — 070_མདོ་སྡེ།_ལ

ས་ཀྱི་ཚོགས་ནས་གནས་ཀྱི་ཚོགས། རིན་པོ་
ཆེའི་ནགས་ནས་རིན་པོ་ཆེའི་ནགས་ལ་བྱའི་ཚོགས་མང་པོ་མངོན་པར་མཐོང་བའི་རྣམ་པ་དེས་མཐོང་བ་དང་ཐོས་པས་དགའ་བ་བྱའི་ཚོགས་གཞན་ལྟ་བར་འདོད་པ་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་ཏུ་དགའ་བར་བྱེད་ཅིང་ཡོངས་སུ་སྤྱོད་པར་ཡང་བྱེད་དོ། །དེ་རང་བཞིན་གྱིས་
མཐོང་བ་དང་། ཐོས་པ་དང་། སྣ་དང་། ལྕེ་དང་། ལུས་ཀྱི་ཡུལ་ལྔ་པོ་རྣམས་དགའ་སྟེ་དབང་པོ་དེ་དག་རྣམས་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་སོ་སོ་དང་གཅིག་ལ་ཡང་དགའ་བར་བྱེད་དོ། །ཡུལ་རྣམས་ལ་ཡང་དབང་པོ་རྣམས་དང་། ཡུལ་དེ་
ལ་དབང་པོ་ལྔ་རྣམ་པར་རོལ་པའི་ཡིད་དོ། །མཆོག་ཏུ་བདེ་བ་དཔེ་མེད་པ་ཉེ་བར་ལོངས་སྤྱོད་དོ། །རྣམ་པ་དུ་མ་དང་། རྣམ་པར་རྟོག་པ་དུ་མར་མཐོང་བ་དང་། སྒྲ་དང་། སྣ་དང་། རོ་དང་། ཆོས་ཀྱི་ཡུལ་ཡང་ཟློས་པ་མ་ཡིན་པའི་ལྷའི་བདེ་བ་ཉེ་བར་ལོངས་སྤྱོད་དོ། །ད་ལྟར་

བའི་བདེ་བ་དང་སྡུག་བསྔལ་གྱིས་ཉེ་བར་འཇོམས་པར་བྱེད་དོ། །དེ་ལྟར་དེ་ཡུལ་ལ་རྣམ་པར་ཆགས་པའི་ཡིད་ཀྱིས་དེ་འདྲ་བའི་བག་མེད་པར་འགྱུར་རོ། །ཇི་ལྟར་གང་ལས་ཀྱི་འབྲས་བུ་རྣམ་པར་བཀྲ་བ་སྔོན་ཕྱོགས་ན་མངོན་པར་བྲིས་པ་ཡོད་ཀྱང་དེ་ཐམས་ཅད་མི་དྲན་ནོ། །
དེ་རྣམས་ཀྱིས་གཞན་ཡང་དེས་སྔོན་ལེགས་པར་བྱས་པའི་ཕྱིར་ཀུན་ཏུ་སྤྱོད་པར་གྱུར་པ་དང་། རྩེ་བར་གྱུར་པས་ཀྱང་གལ་ཏེ་ཤེད་ན་རི་ཆེན་པོ་ལ་རིན་པོ་ཆེ་འོད་འབྱིན་པ་དེ་ཉིད་ཀྱི་རྩེ་མོ་དུ་མ་མཆོག་ཏུ་སྔོ་བ་དྲི་མ་མེད་པ་མེ་ལོང་གི་མཐིལ་དྲི་མ་མེད་པ་ཞེས་བྱ་བ་གང་ཡིན་པ་འདི་དྲི་མ་མེད་
པས་གང་ལ་ཤིང་རྟའི་རྡུལ་ཡང་མཐོང་སྟེ། ལྷ་དེ་རྣམས་ཀྱི་བརྩོན་པ་ལྷག་པས་གང་ཡང་སྦོམ་པོ་མཆོག་ཏུ་རྣམ་པར་བཀྲ་བ་དང་། མཐོང་ན་མཆོག་ཏུ་དགའ་བ་དང་། ལུས་ཀྱི་མདོག་རྣམ་པ་མི་འདྲ་བའི་ཕན་ཚུན་གྱི་རྣམ་པ་ལས་ཀྱིས་བྱས་པ་མངོན་པར་བྲིས་པ་ལ་ལྟ་སྨོས་ཅི་
དགོས། འགྲོ་བའི་རིས་གང་དང་གང་ལས་འཆི་འཕོ་བ་དང་རྣམ་པ་གང་གིས་བྱས་པར་གྱུར་པ་དེ་ཡང་བྲང་དང་མགྲིན་པའི་དབུས་སུ་བྲིས་པར་འགྱུར་རོ། །ལེགས་པར་བྱས་པའི་ལས་ཀྱིས་དེས་དེའི་ཉེས་དམིགས་རྟོགས་ནས་སྐྱོ་བ་སྐྱེ་བར་འགྱུར་རོ། །འདོད་པའི་རོ་ཐོབ་པའི་རྒྱུ་དེས་ཀྱང་
བྱིས་པ་རྣམས་སྐྱོ་བ་མི་སྐྱེའོ། །ཡང་གང་གི་ཚེ་དེ་རྣམས་ཉིད་ལ་འདོད་པ་རྣམས་ཀྱི་ཉེས་དམིགས་ལེགས་པར་བསྟན་པར་གྱུར་པའམ། རང་ཉིད་ཀྱིས་གོ་བར་གྱུར་པ་དེ་ལས་ཀྱང་འདོད་པའི་ཉེས་དམིགས་ཉེ་བར་དམིགས་པར་འགྱུར་རོ། །དེའི་ཚེ་བྱིས་པ་རྨོངས་པའི་བློ་ཅན་རྣམས་ཀྱིས་
རབ་ཏུ་རྟོགས་ཏེ་གང་ཐོབ་ནས་དེ་འདོད་པའི་རོ་ལ་ཆགས་པར་མི་བྱེད་པ་དང་། ཉེས་དམིགས་ཀྱང་ལེགས་པར་མཐོང་བ་ཡིན་ནོ། །དེ་འདོད་པ་རྣམས་ལ་ཕྱིས་འགྱོད་པའི་མེས་སྲེག་པར་བྱེད་དེ། གང་གི་ཕྱིར་ཐ་མི་དད་པའི་ལུས་ཡོངས་སུ་འདོར་བའི་ཕྱིར་རོ། །གང་ཡུལ་གྱི་མེ་མཚོན་
ཆ་དམྱལ་བའི་མཐར་གཏུགས་པའི་རྒྱུ་བདག་ཅག་རྣམས་སོ། །ཕྱི་ནས་འགྱོད་པའི་མེས་སྲེག་པར་བྱེད་དོ། །གང་ཡང་ལུས་བསྒོམས་པའི་ཡིད་བསྒོམས་པར་གྱུར་པ་དེ་འདོད་པའི་རོ་ལ་མི་དགའ་བ་དང་ཉེས་དམིགས་ཀྱང་མཐོང་བ་ཡིན་ནོ། །དེ་འདོད་པ་རྣམས་ཀྱི་རོ་ལ་ཡང་དགའ་བ་

མ་ཡིན་ནོ། །འདོད་པ་རྣམས་ཡོད་ཀྱང་ཞབས་འབྲིང་དང་མངོན་པར་རྟོག་པར་བྱེད་པར་མི་འགྱུར་རོ། །དེའི་ཚེ་འདོད་པ་རྣམས་ཀྱི་ཁ་འོག་ཏུ་འདུ་བར་མི་འགྱུར་རོ། །གཞན་ཡང་འདོད་པ་རྣམས་ཀྱི་གཉེན་པོ་འདི་ལྟ་སྟེ། གང་གིས་གཟུགས་དེ་མཐོང་བ་ན་དེ་རྣམ་པར་འཇིག་པའི་
ཆོས་ཅན་དེས་གཟུགས་ལ་གཟུགས་ཀྱི་རྗེས་སུ་ལྟ་བ་དང་། ཇི་ལྟ་བ་བཞིན་དུ་ཚུལ་བཞིན་ཉིད་ཡིད་ལ་བྱེད་པས་ལྟ་བ་དེས་འདུན་པའི་འདོད་ཆགས་རྣམ་པར་འཇོམས་སོ། །དེ་ལྟར་ཡུལ་ལྔ་ལ་ཇི་ལྟ་བ་བཞིན་དུ་ཉེས་དམིགས་སུ་མཐོང་བའི་རང་བཞིན་དུ་འགྱུར་ལ་དེ་དགའ་བའི་འདོད་
ཆགས་དང་ལྡན་པའི་སྲེད་པ་འཁོར་བའི་ས་བོན་དུ་གྱུར་པ་ལས་ཕྱི་རོལ་ཏུ་གྱུར་པའོ། །དེ་ལྟར་ཡང་འདོད་པ་རྣམས་ཀྱི་ཉེས་དམིགས་རྟོགས་ཤིང་དེ་དག་ཉེས་དམིགས་ཤེས་ནས་ཕྱིས་འགྱོད་པར་འགྱུར་རོ། །འདོད་པའི་ཡུལ་གྱི་འདོད་ཆགས་དང་ཕྲད་པས་མི་གནོད་དོ། །སྔོན་གྱི་
འབྱུང་བ་ལས་བྱུང་བས་ལྷ་རྣམས་ཡོངས་སུ་སྤྱོད་པས་གལ་ཏེ་ཤེད་ན་རི་དེའི་རྩེ་མོ་ལ་མངོན་པར་འཁོད་དོ། །མཆོག་ཏུ་དྲི་མ་མེད་པའི་མེ་ལོང་གི་མཐིལ་ཇི་ལྟ་བར་ལྷ་དེ་རྣམས་ཀྱི་ཡན་ལག་དེ་རྣམས་ཀྱང་མཐོང་ངོ་། །དེ་ནས་ལུས་བསྒོམས་པ་ཡིད་བསྒོམས་པའི་ལྷ་དེས་མཐོང་བར་
གྱུར་པ་ལས་ཐམས་ཅད་ཀྱི་འབྲས་བུ་དང་། འཆི་འཕོ་དང་། གླེང་གཞི་དང་། སྐྱེ་བ་ཡང་དཔྲལ་བ་ན་བྲིས་པ་དེ་རྣམས་བདག་ཉིད་ཀྱིས་རབ་ཏུ་མཐོང་བར་འགྱུར་རོ། །ཇི་ལྟར་ཆེ་གེ་མོ་ཞིག་གི་དུས་ན་གནས་ཆེ་གེ་མོ་ཞིག་ན་ཆེ་གེ་མོ་ཞིག་གི་ཡུལ་ན་རྣམ་པར་ཆེ་གེ་མོས་འཆི་འཕོ་
བའི་རྒྱུ་མཚན་ཆེ་གེ་མོས་ལྷ་ཆེ་གེ་མོ་འཆི་འཕོ་བར་འགྱུར་རོ། །གང་དཔྲལ་བར་མངོན་པར་བྲིས་པ་འདི་ཤེས་པར་གྱུར་པ་དེ་ལྷའི་རིགས་དེ་ལས་འཆི་འཕོས་ནས་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སམ། སྐྱེས་ནས་མྱོང་བར་འགྱུར་བས་སམ། ལུས་ཀྱི་ཉེས་
པར་སྤྱོད་པས་སམ། ངག་གི་ཉེས་པར་སྤྱོད་པས་སམ། ཡིད་ཀྱི་ཉེས་པར་སྤྱོད་པའི་རྒྱུས་འཆི་འཕོས་ནས་དམྱལ་བར་ཆེ་གེ་མོ་ཞིག་ཏུ་སྐྱེ་བ་དང་། ཆེ་གེ་མོ་ཞིག་ཡི་དགས་སུ་སྐྱེ་བ་དང་། འདིར་དུད་འགྲོའི་ལུས་སུ་སྐྱེ་བར་འགྱུར་བ་དང་། དེ་དུད་འགྲོའི་རིགས་དེ་ལས་ཡོངས་སུ་

གྲོལ་ནས་འདོད་པའི་བག་མེད་པས་བསླུས་ཤིང་ལས་ཀྱི་རླུང་གིས་བསྐོར་ནས་སླར་ཡང་ཆེ་གེ་མོ་ཞིག་ཏུ་འཁོར་བར་འགྱུར་རོ། །དེ་ལྟར་འདོད་པ་རྣམས་ཀྱི་ཉེས་དམིགས་དང་སྙིང་པོ་མེད་པ་ཡང་དཔྲལ་བ་དེ་ཉིད་ལ་མངོན་པར་བྲིས་པ་མཐོང་ངོ་། །ཇི་ལྟར་ཆེ་གེ་མོ་
ཞིག་གི་གཉེན་པོ་ཆེ་གེ་མོ་ཞིག་གིས་ཏེ། འདི་ལྟ་སྟེ། འདོད་པ་རྣམས་ནི་མི་རྟག་པ་སྙིང་པོ་མེད་པར། དཔྲལ་བར་མངོན་པར་བྲིས་པ་གང་ཡིན་པ་ཐམས་ཅད་མཐོང་ངོ་། །དེ་མཐོང་ནས་ཀྱང་གང་ཆེས་བསྒོམས་པའི་ལུས་དང་ཡིད་བསྒོམས་པར་གྱུར་པ་དེས་འདོད་པ་རྣམས་ཡོངས་སུ་
སྤོང་ངོ་། །ཉེས་དམིགས་དང་བཅས་པ་ཞེས་རིག་ནས་གང་གི་ཕྱིར་དུག་དང་འདྲ་བར་ཇི་ལྟར་ཕྲ་མོ་རྣམས་ཀྱང་དེ་བཞིན་དུ་ཡུལ་རྟེན་པ་རྣམས་ཀྱང་དུག་བཞིན་ཟོས་ནས་ལོག་པར་ལྟུང་བར་འགྱུར་རོ། །དེ་དག་རྣམས་དེ་ལྟར་མཐོང་བ་དང་། སྟེན་པ་དང་། ཡུལ་རྣམས་ཡོངས་སུ་སྤོང་བ་པོ་
རྣམས་གང་ཡིན་པ་དེ་དག་གི་ཡང་དཔྲལ་བར་བྲིས་པ་ཡིན་ནོ། །ངན་འགྲོར་སྐྱེ་བ་དམྱལ་བ་ཡི་དགས་དུད་འགྲོའི་སྐྱེ་བ་བླངས་ནས་དེ་ཟད་པ་ཡང་ལེགས་པར་བྱས་པའི་ལས་ཀྱིས་རྟག་ཏུ་ཡང་དག་པར་མངོན་པར་མཐོང་ནས། གཞན་ཡང་ལས་ཀྱི་དབང་དུ་བྱས་ནས་ཡིད་ཆེས་པ་སྐྱེ་བ་དེ་ནི་ལེགས་
པར་བྱས་པའི་ལས་ཀྱི་མཐའ་ལ་སྤྱད་པ་ཡིན་ཏེ། ཇི་སྲིད་དུ་མྱ་ངན་ལས་འདས་པའི་ས་བོན་དུ་གྱུར་པ་ལས་ཟད་པར་འགྱུར་བའོ། །དེ་ནས་ལྷ་གཞན་གང་དག་བློ་དམན་པར་གྱུར་པ་རྣམས་འདོད་པ་སྟེན་པ་ལ་ཆེད་ཆེར་བྱེད་ཅིང་དེ་སྔོན་གྱི་ལེགས་པར་བྱས་པའི་དབང་དུ་གྱུར་པའི་ངོ་བོས་ཀྱང་མངོན་པར་
བྲིས་པ་ལེགས་པར་མཐོང་སྟེ། ཇི་ལྟར་བདག་འདི་ལས་འཆི་འཕོས་ནས་མི་རྣམས་སུ་སྐྱེས་ལ་ཕྱིར་ཡང་ལྷ་རྣམས་སུ་སྐྱེ་བ་སྟེ་རྟག་ཏུའམ། མངོན་པར་མཐོང་ཡང་ཀུན་ནས་སྐྲག་པ་དང་ལྡན་པར་ཡང་མི་འགྱུར་རོ། །ཕྱིར་ཡང་ཡུལ་ལྔའི་རླབས་ཀྱི་སྲེད་པའི་ཆུ་ཀླུང་དུ་བག་མེད་པ་བག་མེད་
པས་སྤྱོད་པས་ལྷ་ཁྲུས་བྱེད་དོ། །དེའི་ཐོས་པའི་ཤེས་པ་དེ་ཡང་འགགས་ནས་སྐྱེ་བས་བྱས་པ་གཞན་ཡང་རབ་ཏུ་འབྱུང་བར་འགྱུར་ཏེ། འདོད་པས་བསླུས་ནས་ལས་ཟད་པར་བྱས་པས་དམྱལ་བ་དང་ཡི་དགས་དང་། དུད་འགྲོར་སྐྱེའོ། །ཕྱིས་ཡང་དམྱལ་བ་ཡི་དགས་དུད་འགྲོར་སྐྱེ་བ་རྣམ་

པར་འཇིག་གོ། །དེ་ནས་དེ་ལྟར་བག་མེད་པ་ལ་ལྟ་བའི་ལྷ་དེ་དག་རྣམས་རྟོགས་ནས་དབང་ཕྱུག་ལ་གནས་པ་ཞེས་བྱ་བའི་བྱས་དགེ་བའི་ལས་ཀྱི་དབང་གིས་ཚིག་བརྗོད་པ་ཇི་ལྟར། དགེ་བ་ཡིས་ནི་སེམས་ཁྲིད་ཅིང་། །དགེ་བ་ཁོ་ནས་རྗེས་སུ་ཁྲིད། །དེ་བཞིན་མི་དགེ་རྗེས་སྤྱད་པས། །མི་དགེ་
ཉིད་ལ་རྒྱུག་པ་ཡིན། །བདེ་ལེགས་རྒྱུ་བ་མི་ཡི་སེམས། །ཆུ་ཀླུང་ཉིད་དང་དེ་དག་མཚུངས། །ཇི་ལྟ་བར་ནི་རྐྱེན་ཐོབ་ནས། །དེ་བཞིན་དེ་ནི་ཡོངས་སུ་རྒྱུག །མྱུར་བར་རབ་ཏུ་རྒྱུག་བྱེད་སེམས། །མྱུར་བར་ཡང་ནི་ཡོངས་སུ་ལྡོག །མྱུར་བར་འབབ་པ་ལྷ་རྣམས་དང་། །མྱུར་བར་ཐབས་
མིན་སར་ཡང་ངོ་། །གང་ལ་སེམས་ནི་རྗེས་ཆགས་པ། །མྱུར་བ་མྱུར་བར་ཆེས་འགྱུར་རོ། །ཆོས་རྣམས་ཐམས་ཅད་བྱེད་པོ་དང་། །ལས་རྣམས་ཐམས་ཅད་གཅོད་བྱེད་ཡིན། །ཆོས་རྣམས་ཐམས་ཅད་ཁྲིད་བྱེད་ནི། །སེམས་འདི་ཡིན་ཞེས་བརྗོད་པ་ཡིན། །རྟག་ཏུ་གླགས་ནི་གཅོད་བྱེད་
པའི། །སེམས་ལ་ཡིད་ཆེས་མི་བྱ་ཡི། །གཟུང་བར་དཀའ་དང་ཤུགས་དྲག་དང་། །ལིམ་ལོག་གི་ནི་ཁྱད་པར་གྱིས། །དེས་ན་ཡུད་ཙམ་དགེར་འགྱུར་ཞིང་། །དེ་བཞིན་མི་དགེར་ཡུད་ཙམ་དེས། །དེ་བཞིན་ལུང་མ་བསྟན་པར་འགྱུར། །འདི་ལ་འགྲོ་གནས་ཡོད་མ་ཡིན། །འོང་བ་ཉིད་ཀྱང་
མཐོང་བ་མེད། །མེད་པར་གྱུར་ནས་འབྱུང་འགྱུར་དེ། །བྱུང་ནས་ཀྱང་ནི་འགྲོ་བར་འགྱུར། །དེ་ཡིས་མི་བྱེད་པ་མེད་ཅིང་། །བསགས་པ་ཡང་ནི་ཡོད་མ་ཡིན། །དེ་ལ་གཟུང་བ་ཉིད་ཡོད་མིན། །དེ་ནི་ཐམས་ཅད་དུ་ལུས་མེད། །རྒྱུ་དང་རྐྱེན་ནི་ཚོགས་པ་ལས། །སོ་སོར་ཀུན་ནས་སླར་སྐྱེའོ། །
ནོར་བུ་བ་ལྕིའི་རྐྱེན་དག་གིས། །མི་སྐྱེ་བ་ནི་ཇི་བཞིན་དུ། །དེ་བཞིན་ཁོ་ནར་དབང་གཟུགས་སོགས། །གསུམ་ལས་རྣམ་པར་ཤེས་པ་འབྱུང་། །འདོད་རྒྱལ་དུ་ནི་སྐྱེ་མིན་ཏེ། །སེམས་ནི་ཚོགས་པ་ལས་འབྱུང་ངོ་། །ཐམས་ཅད་དུ་ནི་སྤང་དཀའ་བ། །དེ་ཉིད་ཡུལ་དུ་རིག་ནས་ནི། །དམ་པའི་
ཆོས་ལ་བློ་ངེས་གཞག །འདོད་པ་རྣམས་ལ་ནམ་ཡང་མིན། །དེ་ལྟར་ལྷ་གང་དག་ལུས་བསྒོམས་པར་གྱུར་པ་དང་། ཡིད་བསྒོམས་པར་གྱུར་པ་གཉི་ག་ལ་ཡང་ངེས་པར་འབྱུང་བའི་ཡིད་ཅན་རྣམས་འདུལ་བར་ཡང་དཀའོ། །དེ་འདུལ་བ་ལ་གུས་པས་ལྷ་ཉིད་ལས་འཆི་འཕོས་ནས་ཀྱང་སླར་

ཡང་ལྷ་གཞན་ལས་ཆེས་ཁྱད་པར་དུ་འཕགས་པ་རྣམས་ཀྱི་ནང་དུ་སྐྱེའོ། །རྒྱལ་པོར་ཡང་འགྱུར་ལ་རྒྱལ་པོའི་བློན་པོའམ་གང་ཡང་ཐར་པའི་ཆ་དང་འཐུན་པའི་ལས་བྱེད་དོ། །གང་ཡང་སེམས་བརྩོན་པ་ནི་བྱང་ཆུབ་གསུམ་ལས་གཞན་གང་རུང་ཞིག་འཐོབ་པ་དེའི་
ཡང་ན་རྒྱལ་པོ་འཁོར་ལོས་སྒྱུར་བར་ཡང་དང་ཡང་དུ་འགྱུར་ཏེ། དགེ་བའི་ལས་བསགས་པ་དེའི་དགེ་བའི་ལས་ཀྱིས་སོ། །གལ་ཏེ་དེ་ཉིད་ཀྱིས་ཡང་གང་དག་སེར་སྣར་གྱུར་པའི་ལས་བྱས་པ་ཉེ་བར་མ་བརྟགས་པར་དང་། སེམས་བསྒྲུབས་པར་དཀའ་བས་དགེ་བ་རྗེས་སུ་མི་སྒྲུབ་
པས་དེ་སླར་ཡང་དམྱལ་བ་ཡི་དགས་དུད་འགྲོ་རྣམས་སུ་སྐྱེའོ། །གཞན་ཡང་དགེ་སློང་དེ་ཤིན་ཏུ་ངོ་མཚར་བར་གྱུར་པའི་ལས་རྨད་དུ་ཁྱེར་བའི་རྣམ་པར་སྨིན་པ་འདི་ལ་རྗེས་སུ་དཔྱོད་པར་བྱེད་པ་ན་དེས་མཐོང་བར་གྱུར་པ་ནི་གང་ཞིག་རབ་ཏུ་དད་པར་གྱུར་པས་བཅོམ་ལྡན་འདས་ཀྱི་སྐུ་བྲིས་པ་དང་།
དང་བ་དང་ལྡན་པས་རིག་ཅིང་རབ་ཏུ་དང་བའི་སེམས་ཀྱིས་དམ་པའི་ཆོས་ཀྱི་པུ་སྟི་བྲིས་པར་གྱུར་པས་ཀྱང་བྱང་ཆུབ་འཐོབ་པར་འགྱུར་རོ། །རབ་ཏུ་མ་དད་པའི་སེམས་ཀྱིས་ཀྱང་མགྲིན་པ་དང་། བྲང་གི་དབུས་སུ་ཐམས་ཅད་བྲིས་པ་དེ་མཐོང་ནས་དེ་དད་པ་དང་ལྡན་པར་འགྱུར་རོ། །དེ་ཡང་དཔྲལ་བའི་
ཡུལ་དུ་མཐོང་ནས་ཀྱང་དད་པ་དང་ལྡན་ནོ། །རབ་ཏུ་མ་དད་པའི་སེམས་ཀྱིས་སམ་རྒྱལ་པོའི་ཞབས་འབྲིང་བྱེད་པའི་འཇིགས་པས་དང་། དེ་ལས་གཞན་གྱིས་ཀྱང་བརྩོན་པ་མེད་པས་དང་། ཡང་དེ་འཚོ་བའི་དོན་དུ་ཡང་པུ་སྟི་འདྲི་བར་གྱུར་པ་དང་། སྐུ་གཟུགས་ཀྱང་སྟེ་མཐོ་རིས་སུ་སྐྱེས་པ་ན་
ཡང་དེའི་ལས་མངོན་པར་བྲིས་པ་མངོན་པར་མཐོང་ནས་དད་པར་འགྱུར་རོ། །སླར་ཡང་བག་མེད་པ་མང་བར་འགྱུར་ཞིང་དེའི་དགེ་ལེགས་ཀྱི་ས་བོན་དུ་གྱུར་པའི་ལས་རྣམས་ཟད་པར་འགྱུར་ཏེ། བག་མེད་པ་དང་བྲལ་བའི་སེམས་དང་བྲལ་བར་གྱུར་པས་ཀྱང་སྟེ། དེ་ལྟར་ན་ལས་ཀྱིས་བྱས་པ་
རྒྱུ་མེད་པར་འགྱུར་བ་ནི་ཅུང་ཟད་ཀྱང་ཡོད་པ་མ་ཡིན་ནོ། །དེ་ནས་གཞན་ཡང་ལྷ་དེ་དག་བག་མེད་པ་ལ་མངོན་པར་དགའ་བ་དང་། བག་མེད་པ་ལ་སྤྱོད་པས་ཀྱང་དེ་རྫས་ཀྱི་ཡུལ་གྱི་རྒྱགས་པས་རྟག་ཏུ་ངོམས་པ་མེད་དོ། །གཞན་ཡང་དེ་ལ་འདོད་པ་དུ་མ་འཕེལ་བས་ནི་རིན་པོ་ཆེ་འོད་འབྱུང་གི་རི་ལ་

དུས་ཡུན་རིང་པོར་འདོད་པའི་ཡོན་ཏན་ལྔ་ལ་སྤྱད་ནས། ལྷན་ཅིག་སྤྱོད་པའི་འཁོར་དང་བཅས་པ་འགྱིང་བར་བྱེད་པ་དང་། ཡོངས་སུ་སྤྱོད་པར་གྱུར་པས་འདོད་པའི་ཡོན་ཏན་ལྔ་དང་ལྡན་པའི་གང་ན་འོད་འབྱིན་ཞེས་བྱ་བའི་རི་གསུམ་པ་ཡོད་པ་དེར་ཉེ་བར་འགྲོ་སྟེ། རབ་ཏུ་རངས་པ་མཆོག་གི་ཡིད་ཀྱིས་
རྔ་སྐད་ཡན་ལག་ལྔ་དང་བཅས་པས་དེ་འགྱིང་བར་འགྱུར། ཡོངས་སུ་སྤྱོད་པར་འགྱུར་རོ། །ཉེ་འཁོར་ན་ཡང་མཆོག་ཏུ་གྱུར་པའི་དཔལ་དང་ཡང་དག་པར་ལྡན་པར་ལྷ་དེ་ཡང་དང་ཡང་དུ་རྣམ་པ་དུ་མའི་བདེ་བ་ཀུན་ཏུ་རྟོག་པ་དུ་མས་ཚུལ་བཟང་པོ་དང་། ཆ་བྱད་བཟང་པོ་མཆོག་ཏུ་ཡིད་འཕྲོག་པ་
ཡུལ་མཆོག་ཏུ་གྱུར་པ་གཞན་རྣམ་པ་དུ་མ་རྣམས་རི་དེ་དག་ལ་ཉེ་བར་ལོངས་སྤྱད་ནས་ཆུ་ཀླུང་གི་ངོས་དེར་ནོར་བུ་འབར་བ་ཉིད་ཀྱི་རི་ཆེན་པོ་གསུམ་པ་ནོར་བུ་འོད་འབྱིན་ཞེས་བྱ་བའི་ལམ་དུ་སོང་སྟེ། ཇི་ལྟ་ཇི་ལྟར་ལྷ་རྣམས་དགའ་བར་གྱུར་པའི་ཡུལ་རྣམས་སྟེན་པ་དེ་ལྟ་དེ་ལྟར་དགའ་བའི་འདོད་ཆགས་
དང་ལྡན་པའི་སྲེད་པ་མངོན་པར་འཕེལ་བར་འགྱུར་ཏེ། བསམ་པ་རྣམ་པར་མ་གྲོལ་བས་དེ་འདོད་ཆགས་ཀྱི་མེས་སྲེག་བཞིན་ངོམས་པ་མེད་པའི་སྒྲ་རེག་བྱ་རོ་གཟུགས་དྲིའི་ཡུལ་གྱི་ཆུ་བོས་མི་ངོམས་པས་ཉ་བཞིན་དུ་ནོར་བུ་འོད་འབྱིན་པ་ཞེས་བྱ་བ་དེའི་རི་གསུམ་པ་ཡིད་འཕྲོག་པ་དེ་ལའོ། །
ནོར་བུ་འོད་འབྱིན་པའི་རི་དེའི་ངོས་གཅིག་ནི་ཨིན་དྲ་ནཱི་ལའི་རང་བཞིན་ནོ། །གཞན་ནི་པད་མ་དམར་པོའི་རང་བཞིན་ནོ། །གཞན་ནི་མུ་སཱ་ར་གལ་བའི་རང་བཞིན་ནོ། །གཞན་ནི་པད་མ་དངུལ་གྱི་རང་བཞིན་ནོ། །དེ་དག་མཐོང་ནས་ཀྱང་ལྷ་དེ་དག་རྣམས་རབ་ཀྱི་མཆོག་ཏུ་རངས་པའི་ཡིད་ཀྱིས་རི་
རབ་མཆོག་དེ་ལེགས་པར་མཐོང་ནས་ཕན་ཚུན་དུ་བརྗོད་པ། ལྷ་རྣམས་རི་འདི་རྣམ་པ་དུ་མར་མཛེས་པ་ལ་ཇི་ལྟ་བ་བཞིན་དུ་ལྟོས་དང་། འདི་ནོར་བུ་ལས་བྱས་པ་དཔག་ཚད་སྟོང་ཕྲག་བཅུའི་ཉེ་འཁོར་ཁྱབ་ནས་ཤིན་ཏུ་གནས་སོ། །གང་གི་འོད་ཀྱི་དཀྱིལ་ན་ལྷ་རྣམས་ནུབ་པར་ངེས་པར་ཀུན་ཏུ་མཚོན་ཏེ།
སྔོན་པོ་དང་། སེར་པོ་དང་། དཀར་པོའི་འོད་འདི་ཡང་ཉེ་འཁོར་ན་རྣམ་པ་དུ་མར་ཀུན་ཏུ་གསལ་ལོ། །དེ་དེ་ལྟར་བརྗོད་པར་གྱུར་ནས་གང་ན་ཤིང་འགྱིང་བ་ཡོད་པ་ཞེས་བྱ་བའི་རི་དེར་ཉེ་བར་འགྲོ་སྟེ། རབ་ཏུ་དགའ་བའི་ལྷ་དང་ལྷ་མོས་གང་བ་རབ་ཏུ་དགའ་བའི་རོལ་མོའི་ཡབ་ཆ་དང་། གླུ་དང་། རབ་

ཏུ་དགའ་བ་དང་། འགྱིང་བ་དང་བཅས་པས་རྣམ་པ་དུ་མ་ལ་ལྟ་བ་ལ་ཆེད་ཆེར་བྱེད་པའི་ཉེ་འཁོར་རྔ་སྐད་ཡན་ལག་ལྔ་པ་སྙན་པར་གྱུར་པ་འདྲ་བའི་ཆགས་པ་དགའ་བར་གྱུར་པ་ལྷ་དེ་ཤིང་འགྱིང་བ་ཞེས་བྱ་བའི་ནགས་དེར་ལེགས་པར་བྱས་པ་ལ་སྤྱོད་པ་རྒྱན་དང་ཆ་བྱད་མཆོག་དང་ལྡན་
པ་རྣམས་ཉེ་བར་ལེགས་པར་འགྲོ་བར་བྱེད་དོ། །དེ་ནས་ལྷ་དེ་དག་དེ་ལྟར་སྤྱོད་པར་གྱུར་པ་རྣམས་བག་མེད་པ་ལ་སྤྱོད་པ་སྲེད་པའི་དབང་དུ་སོང་བ་རྣམས་དུས་ཡུན་རིང་པོར་འདའོ། །དེ་ནས་ལྷ་དེས་ཤིང་འགྱིང་བའི་ནགས་ཆེན་པོ་མཐོང་བ་ནི་རིན་པོ་ཆེ་བདུན་གྱི་རང་བཞིན་གྱི་ཤིང་དབུས་ན་ཆུ་ཀླུང་གཉིས་
རྒྱུན་མཆོག་གིས་འབབ་པའི་མདོག་དང་རོ་དང་། རེག་བྱ་ཅན་ཇི་ལྟར་འདོད་པར་རྣམ་པར་སྨིན་པར་འགྱུར་བའི་འོ་མས་ཡོངས་སུ་གང་བ། མུ་མེན་གྱི་རྡོ་ལ་ཀུན་ཏུ་བག་མེད་པས་རྣམ་པར་རྒྱུ་བ། སྲེད་པའི་ཡུལ་རྣམས་ཀྱིས་གང་བ། ངང་ངུར་གྱིས་ཀུན་ཏུ་གང་བ། ཤིན་ཏུ་མཆོག་ཏུ་བསིལ་བའི་
ཆུ་ཀླུང་དག་གོ། །དེ་ལ་ཆུ་ཀླུང་གཅིག་ནི་རྣམ་པ་སྣ་ཚོགས་པ་ཞེས་བྱ་བའོ། །གཞན་ནི་ཇི་ལྟར་འདོད་པའི་ཆུ་ཞེས་བྱའོ། །དེ་ལ་བཏུང་བ་ལ་སོགས་པ་རྣམ་པ་སྣ་ཚོགས་པའི་ཆུ་ཞེས་བྱ་བའི་དེ་རང་བཞིན་ཉིད་ཀྱིས་བཀྲ་བ་མཆོག་ཏུ་གཙང་བ་རབ་ཏུ་འབབ་སྟེ་ཆུ་དང་བཏུང་བ་ཡང་རུང་སྟེ། སྐྱོན་དང་
བྲལ་བ་ཁ་དོག་རྣམ་པ་སྣ་ཚོགས་པ་སྟེ། རྒྱུ་འདི་དག་གིས་ན་རྣམ་པ་སྣ་ཚོགས་པའི་ཆུ་ཞེས་བྱ་བའི་ཆུ་ཀླུང་གི་མིང་དེ་འཐོབ་པའོ། །གཞན་ཇི་ལྟར་འདོད་པའི་ཆུ་ནི་རྣམ་པ་དུ་མའི་འདོད་པ་འབྱུང་ངོ་། །ལྷ་དེ་དག་རྣམས་རྣམ་པ་དེ་སྲིད་ཉིད་དུ་ཆུ་དེ་ལས་ཕུན་སུམ་ཚོགས་པར་འགྱུར་ཏེ། གལ་ཏེ་
འདོད་པར་གྱུར་ཏེ། གལ་ཏེ་འདོད་པར་གྱུར་ན་ཇི་ལྟར་རྣམ་པ་སྟོང་ཕྲག་གི་ཆུ་ཀླུང་རབ་ཏུ་འབབ་པ་དེ་རྣམས་མཆོག་ཏུ་དཀར་བའི་མདོག་མཆོག་ཏུ་དྲི་ཞིམ་པར་དེ་དག་རབ་ཏུ་འབབ་པའོ། །གང་ཡང་ཇི་ལྟར་འདོད་པར་ཇི་ལྟ་བུའི་རྩི་རྣམས་འབབ་བོ། །དེ་དག་རྣམས་ནི་སྣ་ཚོགས་པའི་མདོག་
དང་། རོ་དང་། དྲི་དང་། རེག་བྱ་ཕུན་སུམ་ཚོགས་པའི་རྩི་དག་རབ་ཏུ་འབབ་བོ། །དེ་ནས་འདི་ལྟར་འགྱུར་ཏེ། ཇི་ལྟར་མེ་ཏོག་ཁྲ་བོར་སྣང་བ་རབ་ཏུ་འབབ་པ་ཡིན་ལ་དེ་དག་དང་། གཞན་ཡང་མེ་ཏོག་རྣམ་པ་སྣ་ཚོགས་པའི་མདོག་དང་དྲི་རྣམ་པ་སྣ་ཚོགས་པ་དེ་དག་ཐམས་ཅད་རབ་ཏུ་འབབ་

བོ། །བུང་བ་བརྒྱ་སྟོང་ལེགས་པར་འདུ་བ་གང་དག་གིས་མིང་གཟུང་བར་ཡང་སླ་བ་མ་ཡིན་ནོ། །དེ་བཞིན་དུ་ཆུ་ཀླུང་གི་ཆུ་ལས་གཞན་ཇི་ལྟར་འདོད་པ་རྣམས་རབ་ཏུ་འབབ་བོ། །ལྗོན་ཤིང་འགྱིང་བའི་ནགས་དེ་ན་རྣམ་པ་སྣ་ཚོགས་པའི་མེ་ཏོག་ཉེ་བར་འཕེལ་བས་མཆོག་ཏུ་དགའ་བའོ། །དེ་ནས་ལྷ་
རྣམས་ཆུ་ཀླུང་དེ་དག་གི་ནང་ན་རབ་ཏུ་འཇུག་པར་གྱུར་པས་འགྱིང་བར་བྱེད་དེ། སྒྲ་དང་། རེག་བྱ་དང་། རོ་དང་། གཟུགས་དང་། དྲི་འདོད་པ་རྣམ་པ་སྣ་ཚོགས་དང་བཅས་པ་ལ་སྤྱོད་དོ། །ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་ལེགས་པར་བྱས་པའི་ལས་ལ་ལོངས་སྤྱོད་དེ།
དེ་ནས་དགའ་བར་བྱེད་པའི་རྣམ་པ་དུ་མར་རྩི་ཡང་འཐུང་ངོ་། །རྣ་བའི་ཁུང་བུར་སིལ་སྙན་གྱིས་གཏད་པའི་ཀུན་དགའ་བ་རྣམ་པ་དུ་མས་སྙིང་ལེགས་པར་གང་བ་མྱ་ངན་དང་། ཟུག་རྔུ་དང་། ཕྱིར་རྒོལ་བའི་འཇིགས་པ་དང་རྟག་ཏུ་བྲལ་བའི་ཡུལ་རྣམས་ཀྱིས་རྟག་ཏུ་ཡང་ཡུལ་གྱིས་ངོམས་པ་མེད་པའོ། །ཡུལ་
རྣམས་ཀྱིས་ངོམས་པ་མེད་པ་ནི་ཚྭ་ཆུ་ཚན་མོ་བཞིན་དུ་རྣམ་པ་དུ་མ་དང་། རྣམ་པར་རྟོག་པ་དུ་མ་དང་། རྣམ་པ་སྣ་ཚོགས་པའི་མཐོ་རིས་ལ་ཉེ་བར་ལོངས་སྤྱོད་དོ། །དེ་ལྟར་གྱུར་པའི་བདེ་བས་རྣམ་པར་རྒྱུ་བའི་ལྷ་དེ་དག་རྣམས་ལ་ཆུ་ཀླུང་ལ་སྤྱོད་པའི་བྱས་ཚིགས་སུ་བཅད་པ་བརྗོད་པ། ཇི་ལྟར།
ཇི་ལྟར་འདི་ན་ཆུ་འགྲོ་བ། །དེ་བཞིན་བདེ་བ་ལུས་ལ་སྐྱེས། །གསོན་པ་ཐམས་ཅད་སྐད་ཅིག་ཀྱང་། །བྱིས་པ་རྣམས་ཀྱིས་མི་རྟོགས་སོ། །རྒ་དང་ན་དང་འཆི་བ་དང་། །རྒུད་པའི་ལས་སུ་བགྲང་བ་རྣམས། །འགྱུར་ཡིན་ལྷ་རྣམས་དེ་དག་ཀུན། །རྟག་ཏུ་འདོད་པའི་རྗེས་སྤྱོད་རྣམས། །གསོན་
པ་རྟག་པ་ཡོད་མ་ཡིན། །ཁམས་གསུམ་ཀུན་ཀྱང་བདེ་བ་མིན། །རྟག་ཏུ་འདོད་པ་ཡིས་མྱོས་པའི། །ལོག་པའི་དབང་གིས་ལྷས་མི་རྟོགས། །ཇི་ལྟར་ཆར་རྒྱུན་ནམ་མཁའ་ལས། །ཐམས་ཅད་དུ་ནི་མྱུར་འབབ་པ། །དེ་བཞིན་བདེ་བ་འདི་དག་ཀུན། །ཆར་གྱི་རྒྱུན་ནི་ཇི་བཞིན་ནོ། །རླུང་གིས་
རྡུལ་རྣམས་ཇི་བཞིན་དུ། །ཕན་ཚུན་དུ་ནི་ཡོངས་བསྐྱོད་པའི། །འཁོར་འགྱུར་ནམ་མཁའ་ཐམས་ཅད་དུ། །དེ་བཞིན་འདུས་པའི་ལུས་འདི་ཡིན། །ལྷ་རྫས་བདེ་བ་རྟག་ཡོད་མིན། །མི་བརྟན་པ་དང་རྣམ་པར་འཇིག །སྲེད་པའི་དུག་གིས་ལེགས་འདྲེས་པ། །དུག་དང་འདྲེས་པའི་ཟས་

བཞིན་ནོ། །དེ་བདེ་བ་དང་རྟག་པར་མཛེས། །གང་ལ་འཆི་བ་མི་དམིགས་པ། །སྡུག་པ་དང་ཡང་རྣམ་མི་འབྲལ། །ནམ་ཡང་ཚ་དང་གྲང་བ་མིན། །རྟག་པར་གོ་འཕང་དེ་མཐོང་ནས། །དེ་ལ་བརྟེན་ཞེས་མཁས་རྣམས་བརྗོད། །གང་ལ་སྐྱེ་དང་འཆི་བ་དང་། །སྡུག་
བསྔལ་འབྱུང་བ་མི་དམིགས་པ། །གང་དེ་བུད་མེད་གཡོས་སྡུག་བསྔལ། །དེ་དག་བདེ་ཞེས་རྟོགས་པར་བྱེད། །དེ་ནི་ས་བོན་རྒྱུར་མཐོང་སྟེ། །གང་ཕྱིར་དམྱལ་བ་སྐྱེད་བྱེད་ཕྱིར། །སྡུག་བསྔལ་སྐྱེད་བྱེད་བདེ་བ་གང་། །ཇི་ལྟར་དེ་ནི་བདེ་བར་འདོད། །དེ་ནི་ཡོངས་སྨིན་དབང་གིས་ན། །སྡུག་
བསྔལ་ཆེས་སྡུག་བསྔལ་ཞེས་བྱ། །གང་ལ་སེམས་ཅན་འདི་སྐྱེ་བ། །ལས་ཀྱིས་ཀུན་ནས་གཡོས་པ་ཡིན། །ཆགས་བྱེད་ལོག་པའི་དབང་དེ་ལ། །ལས་ཀྱི་དྲ་བས་རྨོངས་པ་ཡིན། །རབ་ཏུ་ཞི་བར་རྗེས་རྟོགས་ནི། །རྒྱབ་ཀྱིས་ཕྱོགས་པར་ལྷན་ཅིག་སྤྱོད། །དགེ་དང་མི་དགེའི་ལས་རྣམས་
ནི། །མེ་ཏོག་དྲི་བཞིན་རྗེས་སུ་འགྲོ། །གང་ལོངས་སྤྱོད་པ་དེ་དེ་ནི། །བདེ་བ་དེ་དག་དུས་ཀྱིས་འགག །ཉི་དང་ལྷན་ཅིག་སྤྱོད་པ་ཡི། །འོད་རྣམས་ཉིན་མོའི་མཐར་ཐུག་གོ། །དེ་ལྟར་ཆུ་ལ་སྤྱོད་པའི་བྱ་ལེགས་པར་བྱས་པའི་ལས་ཀྱིས་བསྐུལ་ནས་ལྷ་དེ་དག་རྣམས་ལ་སྨྲ་བར་བྱེད་དེ་ཐམས་ཅད་ཀྱང་
བག་མེད་པས་བག་མེད་པར་སྤྱོད་པ་ལའོ། །དེ་ནས་ལྷ་གང་བག་མེད་པར་གྱུར་པ་དེ་དག་རྣམས་ཀྱིས་ཆུ་ལ་སྤྱོད་པ་དེ་དག་ལས་ཚིགས་སུ་བཅད་པ་དེ་དག་ཐོས་ནས་ཀྱང་བརྗོད་པ། ཇི་ལྟར་བྱ་དེ་དག་གིས་ལེགས་པར་ངག་གིས་གོ་བར་བྱས་ཏེ། ཇི་ལྟ་བ་ཉིད་དུ་དེ་དག་བདེན་པར་འབྱུང་བར་འགྱུར་ན་
བདག་ཅག་རྣམས་བག་མེད་པས་བག་མེད་པ་ལ་སྤྱོད་པས་ངེས་པར་རྟོགས་པ་ཡང་མ་ཡིན་ནོ། །བདག་ཅག་ལས་མཆོག་མ་ཡིན་པའི་དུད་འགྲོ་དེ་དག་རྣམས་ཀྱིས་ཀྱང་སྟེ། བདག་ཅག་བག་མེད་པ་བག་མེད་པས་ངེས་པར་རྟོགས་པ་ཡང་མ་ཡིན་ནོ། །གང་ངེས་པ་ཁོ་ནར་འབྱུང་བར་
འགྱུར་བ་འདོད་པ་ཐམས་ཅད་རྣམ་པར་འཇོམས་པའི་སྡུག་བསྔལ་ཆེན་པོ་དེ་བདག་ཅག་རྣམས་ཀྱིས་བཟློག་པའི་དོན་དུ་ཨེ་མ་བརྩོན་པར་བྱ་ན། དུས་ཤིན་ཏུ་རིང་པོར་དགེ་བར་གྱུར་པའི་བློ་འདི་དག་གིས་ངེས་པར་གནས་ནས་འདོད་པ་རྣམས་རབ་ཏུ་འཇོམས་པའི་ཆེད་དུ་རབ་ཏུ་སྒྲུབ་བོ། །དེ་

དུས་ཤིན་ཏུ་རིང་བར་ཡང་བློ་དེ་གཅིག་ཏུ་བྱས་ནས་མཛེས་པར་གཅིག་ཏུ་སྤྱོད་པ་འདོད་པ་རྣམས་ཀྱི་རོ་མྱང་བའི་ཉེས་དམིགས་དང་ངེས་པར་འབྱུང་བ་བསམས་ནས་སླར་ཡང་སེམས་འགྱུར་ལྡོག་ཆེ་བས་རབ་ཏུ་གཡོ་བ་དང་། འདོད་པ་ལ་ཡང་དུས་ཤིན་ཏུ་རིང་བར་གོམས་པའི་ཕྱིར་ན། དེ་ནས་ལྷ་དེ་དག་
རྣམས་སླར་ཉིད་ཀྱང་འཁྲིད་པར་འགྱུར་ཏེ། ལྷ་དེ་དག་རྣམས་ཡུལ་གྱི་རྣམ་པ་དུ་མ་དང་། རྣམ་པར་རྟོག་པ་དུ་མ་དང་། དུ་མར་བསྐྱར་ནས་ཀྱང་འཕྲོག་པར་བྱེད་དོ། །དེ་ངེས་པར་ཕྲོགས་པས་དེ་སླར་ཡང་རྣམ་པ་དུ་མར་དགའ་བར་བྱེད་པ་དང་། རྩེ་བ་དང་། ཡོངས་སུ་སྤྱོད་པར་ཡང་བྱེད་དེ།
རྣམ་པ་སྣ་ཚོགས་པར་འདོད་པ་ཕུན་སུམ་ཚོགས་པ་ལ་བྱ་སྣ་ཚོགས་པ་སྒྲ་རྣམ་པར་སྒྲོགས་པས་དགའ་བ་ལ་དང་། ནགས་དང་། སྐྱེད་མོས་ཚལ་དང་། མཚེའུ་དགའ་བ་ལ་དང་། རིའི་རྩེ་མོ་རིན་པོ་ཆེ་བདུན་གྱི་རང་བཞིན་ལ་དང་། པད་མའི་རྫིང་བུ་བརྒྱ་སྟོང་དང་ལྡན་པ་ལ་བུང་བ་སྟོང་ཕྲག་བརྒྱ་
རྣམ་པར་སྒྲོགས་པས་དགའ་བ་ལ་དང་། བྱ་རྣམས་དང་། ཟས་དང་། སྐོམ་གྱི་ཀླུང་དང་། ཤིང་སྟོང་ཕྲག་བརྒྱ་རྣམ་པར་བཏགས་པའི་གེལ་བའི་དྲ་བས་ཁྱབ་པ་ལ་མེ་ཏོག་ཕུན་སུམ་ཚོགས་པ་ལ་ཡང་འཁྲི་ཤིང་སྤྲས་པའི་ཁང་བུའི་འཁྲི་ཤིང་གི་ཁྱིམ་ན་འོད་ཟེར་གྱི་ཕྲེང་བ་རང་གི་འོད་དང་།
གནོད་པ་མེད་པ་དག་གིས་རིམས་ནད་མེད་པ་མྱ་ངན་དང་རྣམ་པར་བྲལ་བ། རང་གིས་བྱས་པའི་ཡང་ལས་དམན་པ་དང་། བར་མ་དང་། ཁྱད་པར་དུ་འཕགས་པ་རྣམས་དང་ཡང་ཕྲག་དོག་དང་། འཐབ་རྩོད་ཀྱི་སྐྱོན་གྱིས་ནམ་ཡང་ཉམས་དམའ་བ་ནི་མ་ཡིན་གྱི། གཞན་དུ་ན་ཕན་ཚུན་དུ་
གནོད་པ་མེད་པ་དང་། གནོད་པ་མེད་པར་བྱས་ནས་བདག་ཉིད་རྒྱུའོ། །དེ་ནས་དེ་དག་དེ་ལྟར་དགའ་བ་རྣམ་པ་དུ་མར་དགའ་བ་ལས་རྣམ་པ་འདི་ལྟ་བུའི་བློས་ཞུགས་པར་གྱུར་ཏེ། ཇི་ལྟར་བདག་ཅག་གིས་ཐོས་པ་ལྷ་འདི་དག་རྣམས་ཐམས་ཅད་ཀྱི་ཡང་ཇི་ལྟ་བ་བཞིན་ལྷའི་མངའ་བདག་ཏུ་གྱུར་པ་
མུ་སུ་ལུན་དྷ་ཞེས་བྱ་བ་རབ་ཏུ་དགའ་བས་གང་ལེགས་པར་གནས་པ་འཕེལ་བར་གྱུར་ན། མ་ཐང་ཡང་བདག་ཅག་རྣམས་དགའ་བར་གྱུར་པས་འཐབ་བྲལ་བའི་མངའ་བདག་དེའི་སྲིད་པར་ལེགས་པར་འགྲོ་བར་བྱ་ན་ཇི་ལྟར་འདིའི་སྒྲ་དཔག་ཚད་སྟོང་ཕྲག་ལྔར་ལེགས་པར་ཐོས་པ་ཡིན་ཏེ། སྙན་པ་ཐོས་

པར་དགའ་བ་དང་རིང་བ་ནས་ཀྱང་ཟིན་ཏེ་སྒྲ་རྣམས་རྣ་བའི་རྗེས་སུ་འཐུན་པའི་གླུ་དང་། བྱ་རྣམས་ཀྱི་སྒྲས་ཀྱང་ལྷའི་འཇིག་རྟེན་འདི་ཐམས་ཅད་མ་ལུས་པར་སྒྲོགས་པར་བྱེད་དོ། །དེ་དག་གིས་རང་བཞིན་གྱི་རྩབ་ཧྲལ་ཅན་གྱི་བློ་ཡོན་ཏན་ཐམས་ཅད་དང་ལྡན་པ་དེས་འཕྲོག་
པར་བྱེད་དོ། །གླུའི་སྒྲ་དེ་དེས་ཉེ་བར་ཐོས་ནས་སླར་ཡང་རྣ་བ་སྒྲས་ངོམས་པ་མེད་པས་ཐམས་ཅད་དུ་དེར་འགྲོ་བའི་བློ་སྐྱེད་དོ། །རྐྱེན་ཇི་ལྟ་བས་བདག་ཅག་གང་ན་ཡོན་ཏན་ཐམས་ཅད་ཕུན་སུམ་ཚོགས་པ་ན་ལྷ་དེ་དག་རྣམས་ལྷའི་མངའ་བདག་མུ་སུ་ལུན་དྷ་དང་ལྷན་ཅིག་ཏུ་དགའ་བར་བྱེད་པར་འགྲོ་བར་
བྱའོ། །ལྷའི་ཚོགས་དེ་དག་ཐམས་ཅད་འཐུན་པར་ལྷན་ཅིག་སྤྱོད་པས་ཡོངས་སུ་བསྐོར་ནས་རྣམ་པ་སྣ་ཚོགས་པའི་རྒྱན་དང་ཆ་བྱད་ཅན་རྣམ་པ་སྣ་ཚོགས་པའི་འབབ་ཆུ་ཡོན་ཏན་ཐམས་ཅད་ཕུན་སུམ་ཚོགས་པ་མ་བཏགས་པའི་གོས་བགོས་པ་དེ་ནི་རྒྱ་ཆེ་བ་དམ་པ་ལ་སོང་བ་དང་ལེགས་པར་ལྡན་
པའི་ལག་པ་གླུ་ལ་རྗེས་སུ་ཆགས་པའི་ཡིད་ཅན་ཕན་ཚུན་དུ་གནོད་པ་མེད་པས་འདོད་པའི་སྙིང་གིས་ཁ་ཅིག་ནི་ནམ་མཁའ་ལ་འགྲོའོ། །ཁ་ཅིག་ནི་པད་མའི་བཞོན་པས་སོ། །ཁ་ཅིག་ནི་ཨུད་པ་ལའི་བཞོན་པས་མཆོག་ཏུ་དྲི་ཞིམ་པ་བུང་བ་ཁ་ནས་སྒྲ་འབྱིན་པའི་ཨུད་པལ་ཉིད་ལ་མངོན་པར་
ཞོན་ནས་སོ། །ཁ་ཅིག་ནི་ཀུ་མུ་དའི་འདབ་མ་ཀུ་མུ་དའི་ཚོགས་དཀར་བ་ཟླ་བའི་དཀྱིལ་འཁོར་དཀར་པོ་དང་འདྲ་བ་ལ་ཞོན་ནས་འགྲོའོ། །ལྷན་ཅིག་སྤྱོད་པས་ཡོངས་སུ་བསྐོར་ནས་གླུས་རྗེས་སུ་འབྲེལ་བའི་སྙིང་གིས་ཡུལ་ལྔ་ལ་ཉེ་བར་ལོངས་སྤྱོད་པར་གྱུར་པས་དེ་ཉིད་ལ་སྲེད་པའི་ཡིད་དེ་ལ་
སེམས་རྗེས་སུ་སྤྱོད་པ་རྣམ་པར་རྟོག་པས་སྤྲུལ་པའི་རང་གི་དགེ་བའི་བཞོན་པ་མཆོག་ཏུ་གསལ་བར་གྱུར་པ་རང་གི་ལས་ཀྱིས་སྤྲུལ་པ་དམན་པ་དང་། བར་མ་དང་། ཁྱད་པར་དུ་འཕགས་པ་རྣམས་དམན་པ་དང་། བར་མའི་གཟུགས་དམན་པ་དང་། བར་མ་དང་ཁྱད་པར་དུ་འཕགས་པའི་ལོངས་
སྤྱོད་པ་དང་། དམན་པ་དང་བར་མ་དང་མཆོག་གི་བློ་དམན་པ་དང་། བར་མ་དང་མཆོག་གི་ཚེ་ཐམས་ཅད་ཀྱང་ནམ་མཁའི་དཀྱིལ་གང་བར་བྱས་ནས་གང་ན་རྩེད་མོའི་ནགས་ཞེས་བྱ་བ་འདོད་པ་དུ་མ་ཕུན་སུམ་ཚོགས་པའི་མུ་སུ་ལུན་དྷའི་གནས་དེར་ཕན་ཚུན་ལྷན་ཅིག་ཏུ་ཉེ་བར་འགྲོའོ། །དེ་དག་

རྣམས་དེ་ལྟར་རྒྱུ་བས་ཕྱིན་པ་ན་དམན་པ་མ་ཡིན་པའི་གནས་རྩེད་མོའི་ནགས་ན་གཞན་ནི་མ་རྙེད་ཀྱི། ཇི་སྲིད་དུ་ནམ་མཁའི་ཕྱོགས་གཅིག་ནི་མར་མེ་བཞིན་དུ་མཐོང་ངོ་། །ཇི་སྲིད་དུ་ཕྱོགས་གཞན་ན་ཨིན་དྲ་ནཱི་ལ་དང་མཚུངས་པའི་མདོག་གོ། །ཇི་སྲིད་དུ་ཕྱོགས་གཞན་ན་སྔོན་པོ་དང་།
སེར་པོ་དང་། དཀར་པོའི་མདོག་གོ། །ཇི་སྲིད་དུ་ཕྱོགས་གཞན་ན་མེ་དང་མཚུངས་པའི་མདོག་གོ། །དེ་དག་གིས་དེའི་ཚེ་ན་རྣམ་པ་དེ་ལྟ་བུར་ནམ་མཁའ་ལས་མངོན་པར་མཐོང་ནས་མཆོག་ཏུ་ངོ་མཚར་བ་ཀུན་ཏུ་སྐྱེས་ཏེ། ཀྱེ་ལྷ་དག་དེ་ལྟར་ངོ་མཚར་བར་གྱུར་པའི་ནམ་མཁའ་མཐོང་སྟེ།
ཁ་དོག་སྣ་ཚོགས་པའི་གོས་རྣམས་བཀྲམ་པའི་ཁ་དོག་དུ་མ་དེ་དག་རྣམས་ནི་བདག་ཅག་རྣམས་ཀྱིས་སྔར་མ་མཐོང་ན་འདི་དག་ཅི་ཡིན། དེ་དག་ཐམས་ཅད་ཕན་ཚུན་དུ་དེ་སྐད་སྨྲས་ནས་ངོ་མཚར་བས་ཡིད་ངོམས་པ་མེད་པར་གནས་པ་ལས། ཇི་སྲིད་དུ་དུས་མི་རིང་བ་ཞིག་ན་ཐོས་པ་ཇི་ལྟར་མཆོག་ཏུ་
སྙན་པར་གྱུར་པའི་གླུའི་སྒྲ་དུ་མ་རྣ་བར་སྙན་པ་དེ་ཡང་དེས་ཐོས་ནས་སླར་ཡང་ངོ་མཚར་བར་གྱུར་པ་ཀུན་ཏུ་སྐྱེས་པའི་ཡིད་ཀྱིས་སླར་ཉིད་ཀྱང་ཐམས་ཅད་ན་ནམ་མཁའི་དཀྱིལ་བཀང་ནས་སའི་གཞི་ལ་ཡང་དགའ་བར་གྱུར་པའི་རྒྱན་དང་ཆ་བྱད་ཅན་གྱི་ལྷན་ཅིག་སྤྱོད་པ་དང་བཅས་པ་གནས་སོ། །ལྟ་བར་
འདོད་པ་དེ་སུ་ཞིག་འོང་བར་འགྱུར། དེས་རིང་བ་ནས་མཐོང་བ་ནི་ཚོགས་པ་རྒྱུ་བ་ན་རྒྱུ་བ། རིན་པོ་ཆེ་སྣ་ཚོགས་པའི་རྒྱན་དང་ཆ་བྱད་དང་། རིན་པོ་ཆེ་རྣམ་པ་སྣ་ཚོགས་པས་བརྒྱན་པའི་ལུས་ཅན་དེ་དག་གི་དབུས་ན་ལྷ་ཤིན་ཏུ་འཐབ་བྲལ་བ་རིན་པོ་ཆེ་བདུན་གྱི་རང་བཞིན་གྱི་སྟན་ཆེན་པོ་ལ་གནས་པ་རིན་པོ་ཆེ་
བདུན་གྱི་རང་བཞིན་གྱི་ཕུག་གི་ནང་དུ་ཆུད་པར་གནས་པ། སྔོན་པོ་ཆེན་པོའི་རང་བཞིན་གྱིས་རྣ་བའི་གདུ་བུ་ཅིག་གོ། །གཞན་ནི་པད་མ་རཱ་གའི་རང་བཞིན་གྱི་རིན་པོ་ཆེ་ཆེན་པོ་དང་ཡང་དག་པར་ལྡན་ནོ། །རིན་པོ་ཆེའི་རང་བཞིན་འོད་མཆོག་དང་ལྡན་པ་རྣམ་པ་དུ་མའི་བ་དན་ངེས་པར་བཅིངས་པས་ཉེ་
འཁོར་འོད་དང་ལྡན་པས་དཔག་ཚད་བརྒྱ་ཕྲག་བཅུར་འོད་ཀྱིས་འབར་ཞིང་འཐུལ་བར་བྱེད་པས་སྐྱ་བོ་བཞིན་དུ་ནམ་མཁའ་འོད་ཀྱིས་བྱེད་དེ། སྣ་ཚོགས་པའི་གོས་བཞིན་དུ་ནམ་མཁའ་ལ་འབྱུང་བར་བྱེད་དོ། །དེའི་འོད་འདི་དག་མངོན་པར་མཐོང་ནས་རྒྱ་ཆེན་པོའི་ཁོར་ཡུག་ན་རྒྱུ་བའི་ལྷ་དེ་རྣམས་མཆོག་

ཏུ་ངོ་མཚར་ནས་ལྷག་པར་གནས་པར་འགྱུར་རོ། །དེ་ནས་ཚོགས་པ་རྒྱུ་བ་ན་རྣམ་པར་རྒྱུ་བ་དེ་དག་རྣམས་གསལ་བར་དེས་མཐོང་ནས་ལྷ་འདི་དག་རྣམས་གང་ན་མུ་སུ་ལུན་དྷའི་རྩེད་མོའི་ནགས་གང་ཡོད་པ་དེར་ཉེ་བར་ལེགས་པར་འགྲོ་སྟེ། ཇི་ལྟར་བདག་ཅག་རྣམས་ཀྱང་ཉེ་བར་ལེགས་
པར་འགྲོ་བར་བྱའོ་ཞེས་བྱ་བའི་བློ་ལ་ལེགས་པར་བཞག་ནས་ཁྱད་པར་དུ་འཕགས་པའི་ལྷ་བདག་ཅག་ཐམས་ཅད་ཉིད་ཀྱང་ཇི་ལྟ་བ་བཞིན་དུ་འཐུན་པས་དང་། ཕན་ཚུན་ལྷན་ཅིག་ཏུ་མཛེས་པ་དང་ལྡན་པས་འགྲོ་བར་བྱ་ཞེས་དེ་དག་གིས་དེ་ལྟར་བློ་བྱས་ཏེ། ཇི་སྲིད་དུ་ཡང་ཚོགས་པ་རྒྱུ་བ་ན་རྣམ་པར་རྒྱུ་བའི་
ལྷ་དེ་དག་རྣམས་ཀྱིས་ལྷ་རྣམས་མངོན་སུམ་དུ་མཐོང་བར་གྱུར་ནས། དེ་བཞིན་དུ་དེ་དག་སུ་ཡིན་ཞེས་སྔར་ངོ་མཚར་བ་ཀུན་ཏུ་སྐྱེས་པའི་ཡིད་དང་ལྡན་པར་གྱུར་པ་དང་། དེ་ནས་སེམས་ཅན་ལེགས་པར་མཐོང་ནས་དེ་དག་ཀྱང་འདི་ལྟར་སེམས་པར་གྱུར་ཏེ། རྒྱ་ཆེན་པོའི་ཁོར་ཡུག་ཏུ་རྒྱུ་བའི་ལྷ་
འདི་དག་ཉིད་ནི་ཇི་ལྟ་བར་གང་ན་འཐབ་བྲལ་གྱི་མངའ་བདག་གི་ཕོ་བྲང་དུ་ཉེ་བར་ལེགས་པར་འགྲོ་བར་འགྱུར་གྱི་གང་ཆུང་ངུ་ན་བདག་ཅག་ཀྱང་དེ་དག་དང་ལྷན་ཅིག་ཏུ་གང་ན་རྩེད་མོའི་གནས་དེར་ཉེ་བར་འགྲོ་བར་བྱའོ། །ཐམས་ཅད་ཀྱང་ཕན་ཚུན་ལྷན་ཅིག་ཏུ་དང་ཕན་ཚུན་དུ་གནོད་པ་མེད་པས་གཏོད་པའི་
ཡིད་ཀྱིས། དེ་ནས་ཤིན་ཏུ་འཐབ་བྲལ་གྱིས་མགོ་བྱས་པའི་ཚོགས་པ་རྒྱུ་བ་ན་རྒྱུ་བ་དེ་ཐམས་ཅད་དང་། ཡངས་པ་ཟླུམ་པ་ན་སྤྱོད་པའི་རྒྱ་ཆེན་པོའི་ཁོར་ཡུག་ན་རྒྱུ་བ་མ་ལུས་པ་དེ་དག་རྣམས་ཀྱིས་དེ་ཁྱབ་པར་བྱས་ནས་ཀྱང་གནས་སོ། །བ་དན་དང་། རྒྱལ་མཚན་དང་། ཤིང་རྟ་དང་། བྱའི་ཚོགས་
ཀྱི་རྒྱབ་ཏུ་ལེགས་པར་ཞོན་ནས་རྔ་སྐད་ཡན་ལག་ལྔ་དང་ལྡན་པས་འདོད་པའི་ཡོན་ཏན་ལྔ་ཕུན་སུམ་ཚོགས་པ་གང་གིས་སྐྱེད་མོས་ཚལ་གྱི་ལྟད་མོའི་དབང་དུ་བྱས་པ་དེ་རྩེད་མོའི་ནགས་ཆེན་པོའི་འདོད་པ་དུ་མ་ཕུན་སུམ་ཚོགས་པ་དཔེ་མེད་པ་དེར་ཉེ་བར་འགྲོའོ། །མཆོག་ཏུ་ངོ་མཚར་བས་གདུངས་
པ་ཚིམ་པ་མེད་པའི་འདོད་པའི་ཡོན་ཏན་ལྔས་མི་ངོམས་པ་ངོ་མཚར་བས་ཚིམ་པ། ཡོན་ཏན་དང་ཉེ་བར་སྤྱོད་པ་ཐམས་ཅད་ཀྱིས་ངོམས་པ་མེད་པ། ཕན་ཚུན་དུ་འགྲོ་བས་ངོམས་པ་མེད་པ་ཚེ་རྣམས་དང་དེ་དག་གིས་དེ་ལྟར་འདོད་པ་ཐམས་ཅད་ཀྱིས་ངོམས་པ་མེད་པའི་ཡིད་དེ་དགེ་སློང་གིས་

ལེགས་པར་མཐོང་ནས་ལས་ཀྱི་འབྲས་བུའི་དེ་ཁོ་ན་དུ་མ་སྟོན་པའི་དེ་ལྟར་ཚིགས་སུ་བཅད་པ་བརྗོད་པ་ཇི་ལྟར། ཇི་ལྟར་ཆར་ནི་འབབ་པའི་ཆུ། །མཚོ་ནི་འཕེལ་བ་དེ་བཞིན་དུ། །དེ་བཞིན་ཤིན་ཏུ་འདོད་པའི་ཆར། །ལྷ་རྣམས་ཀྱི་ནི་མེ་འཕེལ་ལོ། །ཉ་འབྱུང་བ་ཡི་ཆུས་ཀྱང་ནི། །
སྲེད་པ་རྟག་ཏུ་མཚུངས་པ་མེད། །དེ་བཞིན་བདེ་བ་འཕེལ་བས་ཀྱང་། །ལྷ་རྣམས་ངོམས་པར་འགྱུར་མ་ཡིན། །ཇི་ལྟར་ནམ་མཁའི་མཐའ་མི་དམིགས། །གྲངས་ཀྱང་མ་ཡིན་པ་དེ་ལྟར། །འདོད་ལྡན་རྣམས་ཀྱི་འདོད་མཐའ་མེད། །གྲངས་ཀྱང་ཡོད་པ་མ་ཡིན་ནོ། །རྒྱ་མཚོ་
རླབས་ཀྱི་ཕྲེང་བ་ཅན། །ཆུ་ཡིས་ངོམས་པར་འགྱུར་མ་ཡིན། །སྲེད་ལྡན་འདོད་པ་རྣམས་ཀྱིས་ཀྱང་། །ཚིམ་པ་ནམ་ཡང་ཡོད་མ་ཡིན། །ཡུལ་མ་ཐོབ་པས་ལྷ་རྣམས་ནི། །བྱིས་རྣམས་སྲེད་དང་བྲལ་མི་འགྱུར། །ཐོབ་པས་ཀྱང་ནི་ངོམས་པ་མེད། །བདེ་ལ་སྲེད་པ་ཆེད་ཆེར་
བྱེད། །འཆི་འཕོའི་སྡུག་བསྔལ་མི་བཟད་པར། །གྱུར་པ་དུ་མ་དེས་ཐོབ་ནས། །ཡུལ་གཞན་གྱིས་ནི་གདུང་བྱེད་གང་། །དེ་ཕྱིར་འདོད་པ་ཞི་བ་མིན། །སྐྱེས་བུ་རྣམ་པར་འཇིག་ཕྱིར་ཏེ། །འདོད་པ་བློ་གཏད་འཇོམས་བྱེད་ཡིན། །སྡུག་བསྔལ་བྱུང་ནས་སྤོང་བས་ཀྱང་། །ལྷ་དེ་
རྒུད་པར་འགྱུར་བ་ཡིན། །ངོམས་པ་མེད་ལ་བདེ་བ་མེད། །ཡུལ་རྣམས་ཀྱིས་ཀྱང་རྣམ་མི་ངོམས། །གང་ཡང་ངོམས་མེད་བྱེད་མཐོང་ནས། །བློ་ལྡན་གྱིས་ནི་དེ་ཡོངས་སྤོངས། །གང་ཚེ་ཞི་བའི་གཞི་ལས་བདེ། །ཡུལ་ནི་བདེ་བ་མིན་པར་འདོད། །དེ་ཕྱིར་ཞི་བ་རྟག་ཏུ་སྟེན། །
ཡུལ་རྣམས་ལ་ནི་ཆགས་པ་སྤོངས། །རྟག་ཏུ་ཉོན་མོངས་སྤང་བར་གྱིས། །བླ་མེད་ཤེས་པ་རྟག་ཏུ་སྟེན། །མྱ་ངན་འདའ་བྱེད་ཡེ་ཤེས་ཡིན། །ཉོན་མོངས་འཆིང་བར་འདིར་བརྗོད་དོ། །གསོད་དང་འཆི་དང་ནད་ལ་སོགས། །ཡུལ་རྣམས་ལས་ནི་འཇིགས་པ་ཆེ། །འཁོར་བ་ན་ཡང་
ཀུན་ནས་འཁོར། །ཡུལ་ཉིད་ལས་ནི་སྐྱེ་བ་ཡིན། །འདུ་དང་འབྲལ་བ་བརྒྱ་ཕྲག་དང་། །ལས་དེ་སྟོང་ཕྲག་དུ་མ་ནི། །སྐྱེ་ཞིང་སྐྱེ་བ་ལེགས་མཐོང་བ། །བདེ་འགྲོ་དེ་ཁོ་ན་མཐོང་བས། །བདེ་བ་དུ་མ་ལེགས་ཐོབ་པ། །འཇིགས་པ་གང་འབྱུང་འཇིགས་པ་ནི། །དེ་ཀུན་ཡུལ་ཉིད་ཁོ་

ནས་སྐྱེད། །སྐྱེ་བ་སྐྱེ་བར་རབ་ཏུ་སྐྱེད། །སྡུག་བསྔལ་གང་ཉིད་ཡུལ་ཡིན་པ། །རྨོངས་པའི་སེམས་ཀྱིས་བཟོད་པར་བྱེད། །རྨོངས་པ་དེ་ཉིད་སླར་སྟེན་པ། །ལོང་བའི་བློ་ཡིས་བྱས་པ་ཡིན། །དགྲ་ཡི་ཚིག་གིས་དོགས་པ་ལས། །མི་ཡིས་རྟག་ཏུ་ཡོངས་
སྤངས་སོ། །དགྲར་གྱུར་པ་ཡི་ཡུལ་རྣམས་ཀྱང་། །མི་སྤོང་བ་ནི་སུ་ཞིག་ཡོད། །བྱིས་པ་རྣམས་ནི་རྟག་པར་ཡང་། །ཡུལ་གྱིས་ངེས་པར་སྲེག་པ་ཡིན། །ཀུན་ནས་རྨོངས་པས་མི་སྤོང་ལ། །རང་གི་ལས་ཀྱིས་རྨོངས་པ་ཡིན། །ཇི་ལྟར་ཁ་ཅིག་མེས་འཇིགས་པ། །མེ་ཉིད་ལ་ནི་
ཉེ་བར་སྟེན། །དེ་བཞིན་ཡུལ་གྱིས་རྨོངས་པ་ཡང་། །ཡུལ་ཉིད་ལ་ནི་སྟེན་པར་བྱེད། །ཡུལ་དུག་ལོངས་སྤྱོད་གང་ཚེ་མི། །བདག་ཉིད་བདེ་བར་བྱེད་མ་ཡིན། །སྲེད་པ་སྟེན་པ་དེ་བཞིན་བྱིས། །ཐམས་ཅད་དུ་ནི་ཡོངས་སུ་རྟོག །སྲེད་པས་ཉེན་པ་ཚྭ་ཡིས་ཆུ། །ཇི་བཞིན་ལྡག་བྱེད་
ངོམས་པ་མེད། །ཡུལ་གྱིས་ལྡོངས་པའི་དེ་བཞིན་མི། །སྲེད་པ་ཉིད་ཀྱིས་ཚིམ་པ་མེད། །ངོམས་མེད་ཡུལ་ལ་ལྷ་རྣམས་ནི། །འདོད་ཆགས་ཀྱིས་གདུངས་བག་མེད་པ། །ལས་ཀྱི་རླུང་གིས་བསྐྱོད་ནས་ནི། །ཐམས་ཅད་འཆི་བར་འགྲོ་བ་ཡིན། །དེ་ལྟར་དགེ་སློང་སྐྱེ་བ་དུ་མར་སྐྱེ་བའི་ལས་
ཀྱི་སྐྱེ་བ་གཅིག་ནས་གཅིག་ཏུ་བརྒྱུད་པའི་དེ་ཁོ་ན་ཤེས་པས་ལྷ་དེ་རྣམས་ལ་རྗེས་སུ་བརྩེའོ། །གཞན་ཡང་ལྟ་བར་བྱེད་པ་དང་། ལྷ་དེ་དག་ཕན་ཚུན་ཀུན་ཏུ་འདྲེ་བར་གྱུར་ནས་འགྲོ་བར་བྱེད་དེ། རབ་ཏུ་དགའ་བའི་ཡིད་ཀྱིས་གང་ན་རྩེད་མོའི་ནགས་མུ་སུ་ལུན་དྷའི་ཕོ་བྲང་དེར་རོ། །དེ་ནས་དེ་དག་
ཤུགས་ཀྱིས་འགྲོ་བ་ན་རྒྱན་དང་། ཆ་བྱད་དུ་མ་དང་། བདེ་བས་རྒྱུ་བ་དུ་མ་དང་། ལས་ཀྱིས་སྤྲུལ་པའི་བདེ་བ་ལ་གནས་པ་དུ་མ་དང་། སྐྱེད་མོས་ཚལ་དང་། ནགས་དང་། རྫིང་བུ་དུ་མ་ལེགས་པར་རབ་ཏུ་བསྟེན་པ་བུད་མེད་སྟོང་ཕྲག་བརྒྱས་ཡོངས་སུ་བསྐོར་བར་འགྲོའོ། །ཇི་སྲིད་དུ་ལྷ་
གཞན་རྣམས་ཀྱང་ཁང་བུ་བརྒྱ་སྟོང་དུ་མངོན་པར་ཞུགས་ནས་འགྲོ་སྟེ། ཐམས་ཅད་ནམ་མཁའི་ཁམས་ལ་འོད་ཀྱིས་རྣམ་པར་སྣང་བར་གྱུར་པས་གླུ་དང་། གར་གྱིས་རྒྱུ་བ་རྔ་སྐད་ཡན་ལག་ལྔ་པ་ཀུན་ཏུ་སྒྲོགས་པ་ལ་རྗེས་སུ་ཆགས་པའི་ཡིད་ཕྲེང་བ་དང་། ཕྱི་མ་དང་། བྱུག་པ་རྣམས་འཕྱང་བ་

ཆུན་པོའི་ཕྲེང་བ་དང་ཅོད་པན་དག་རྣམ་པར་འཕྱང་བ་མེ་ཏོག་གི་ཕྲེང་བ་གཞན་རྣམས་འཕྱང་བ། ཕྱོགས་གཅིག་ན་བ་དན་རླུང་གིས་རྣམ་པར་བསྐྱོད་པ། རྣ་གདུབ་ཀྱིས་མཁུར་ཚོས་ལ་ངེས་པར་འདྲུད་པ། རང་གི་འོད་ཀྱིས་རྣམ་པར་སྣང་བར་བྱེད་པའི་འོད་དང་ལྡན་པ། སྣལ་མའི་ཆུན་པོ་གཞན་རྣམ་
པར་འཕྱང་བ་རབ་ཏུ་དགའ་བའི་པུ་ཌིན་བཅིངས་པའི་ཕྲེང་བ་དང་། རླུང་གི་ཤུགས་ཀྱིས་ཐད་ཀར་གྱུར་པ་ལ་བྲིས་པའི་གཞོན་ནུ་མ་ལང་ཚོ་ལ་བབ་པ་རྣམས་ཀྱིས་ལག་པ་དང་། རྐང་པ་ལ་གཏད་པའི་ཡིད་ཅན་རྣམས་སོ། །ལྷ་གཞན་ནི་པི་བང་གི་སྒྲས་བསྐྱེད་པའི་ཀུན་ཏུ་ཆགས་པ་དེ་ལ་སོང་
བའི་ཡིད་ཀྱིས་གང་ན་རྩེད་མོའི་ནགས་ཡོད་པ་དེར་དགའ་བས་གནས་པར་བྱ་བའི་ཕྱིར་ཉེ་བར་ལེགས་པར་འགྲོ་བའོ། །དེ་ལྟར་ན་འཐབ་བྲལ་གྱི་ལྷའི་འཇིག་རྟེན་པའི་ས་ན་གནས་པ་དེའི་ལྷའི་འཇིག་རྟེན་པ་དེ་དག་རྣམས་གང་ན་འཐབ་བྲལ་གྱི་བདག་པོ་མུ་སུ་ལུན་དྷའི་ཕོ་བྲང་ཡོད་པ་དེར་ཉེ་
བར་ལེགས་པར་འགྲོའོ། །མདོར་བསྡུ་ན་ལས་ཇི་ལྟ་བ་དང་འདྲ་བའི་འགྱིང་བག་གིས་རྒྱུ་བ་དང་། རྒྱན་ནི་ཕྱོགས་བཅུ་ཐམས་ཅད་ཁྱབ་པར་སྒྲོགས་པ་བཞིན་དུ་གླུ་སྙན་པའི་སྒྲ་ཅན་གྱི་བུད་མེད་ཀྱི་ཚོགས་ཀྱིས་ཡོངས་སུ་བསྐོར་བས་ཕྱོགས་བཅུར་ཁྱབ་པར་གྱུར་ནས་ཐག་ཉེ་བར་བསྙེན་
ཏེ། ལྷ་དེ་དང་བདག་ཉེ་བར་གྱུར་པ་ཡིན་ནོ་སྙམ་ནས་གནས་སོ། །དེ་ནས་ལྷ་དེ་དག་རྣམས་ཐམས་ཅད་ཀྱིས་ཀྱང་འཐབ་བྲལ་གྱི་མངའ་བདག་གི་གནས་མ་ལུས་པ་ལྷག་པར་བཀང་བར་འགྱུར་ཏེ། མུ་སུ་ལུན་དྷ་ནི་ཇི་ལྟར་ལས་རྣམས་ཀྱིས་བླ་ལྷག་པ་ཡིན་ལ་དེ་བཞིན་དུ་འབྲས་བུས་ཀྱང་
སྟེ། རྒྱུ་དང་འབྲས་བུ་དག་གི་ཅི་འདྲ་བར་འགྱུར་བ་ནི་ས་བོན་དང་མྱུ་གུ་དག་གི་དཔེ་འདིས་རྗེས་སུ་རྟོགས་པ་ཡིན་ནོ། །གནས་དེར་སོང་བ་དེ་དག་མ་ལུས་པ་རྣམས་ཟིལ་གྱིས་ནོན་པར་འགྱུར་ཏེ། འདོད་པ་ཐམས་ཅད་ལྷག་པ་ཡིན་པའི་ཕྱིར་རོ། །དེ་ལ་དཔེ་མེད་པའི་དགའ་བ་རྣམས་
ཡོད་པ་ཡིན་ལ་ཕྱོགས་ཙམ་ཞིག་བརྗོད་པར་བྱ་སྟེ། ཇི་ལྟར་ཉེ་འཁོར་དེ་སྲིད་ཀྱི་ནམ་མཁའ་ལས་ནགས་དེ་ཡོངས་སུ་བསྐོར་ནས་ཕྱི་རོལ་གྱི་ཕྲེང་བ་སའི་ཡོངས་སུ་འཁོར་བ་ནི་རིན་པོ་ཆེ་བདུན་གྱི་རང་བཞིན་གྱི་རིན་པོ་ཆེ་བརྒྱུས་པའི་ཕྲེང་བ་བཟུང་བས་མཆུ་ལ་འཕྱང་བའོ། །དེའི་ཡུལ་

ཕྱོགས་གཞན་ན་དྲིལ་བུ་གཡེར་ཀའི་སྒྲ་དེ་ནི་རྣམ་པ་འདི་ལྟ་བུའི་སྒྲ་ཡིན་ཏེ། སྒྲ་སྙན་པ་གང་གིས་བོས་པས་ལྷ་འོང་བར་འགྱུར་ལ། དེ་མྱུར་བ་ཉིད་དུ་ཀུན་ཏུ་རྟོག་པས་རྣམ་པར་སྤྱོད་པ་དང་སྐོར་བར་བྱེད་པ་ཡང་བྱའི་ཁར་བཅུག་ནས་སོ། །བྱ་རྣམས་ཀྱང་རིན་པོ་ཆེ་
བདུན་གྱི་རང་བཞིན་གྱིས་རྣམ་པར་བཀྲ་བའི་སྒྲོ་ཅན་ནགས་དེའི་ཉེ་འཁོར་ན་དེ་དག་རྣམས་རྣམ་པ་དུ་མར་གཡས་སྐོར་བྱེད་དེ། དེ་ལྟར་ནགས་ཆེན་པོའི་དེའི་ཕྱི་རོལ་གྱི་ཕྲེང་བ་ལ་ཡོངས་སུ་འཁོར་རོ། །དེ་དག་ན་རྨ་བྱ་རྣམས་ཀྱང་ཁ་དོག་དུ་མ་རིན་པོ་ཆེ་བདུན་གྱི་ཕྲེང་བ་མཆུ་ན་འཕྱང་བ་རྣམས་
སོ། །གཞན་ཡང་ངོ་མཚར་བར་གྱུར་པ་ནི་ཐམས་ཅད་ཀྱི་ཕྱི་རོལ་གྱི་རྒྱབ་ན་པད་མའི་རྫིང་བུ་ཡོད་དེ། བྱ་རྣམ་པ་སྣ་ཚོགས་པ་སྒྲ་སྒྲོགས་པ་བུང་བ་བརྒྱ་སྟོང་བརྗོད་པ་དགའ་བར་གྱུར་པའི་སྒྲ་རབ་ཏུ་དང་བ་ཞེས་བྱ་བའི་ཆུ་ལ་བཻ་ཌཱུརྱའི་འདབ་མ་དང་། གཞན་མཚོ་སྐྱེས་རྣམས་ནི་རིན་པོ་ཆེ་
བདུན་གྱི་རང་བཞིན་གྱི་འདབ་མའོ། །དེ་བཞིན་དུ་མཚོ་སྐྱེས་གཞན་ཡང་མཆོག་ཏུ་དྲི་ཞིམ་པ་དང་ལྡན་པ་གང་དག་གི་དྲི་ནི་དཔག་ཚད་ལྔར་འགྲོའོ། །དེ་ལྟར་དེ་དག་གི་ཕྱི་རོལ་གྱི་རྒྱབ་རྣམས་ན་ནི་ཤིན་ཏུ་བར་ཡང་རྣམ་པར་མཛེས་ཤིང་གསལ་ལོ། །གཞན་ཡང་ངོ་མཚར་བར་གྱུར་པ་ཆེན་
པོ་གཞན་ན་དེ་དག་རྣམས་ཉིད་ཀྱི་གཙུག་ལ་ཡོད་དེ། ཟེ་བ་ལ་ལེགས་པར་གནས་ནས་པད་མ་དང་། པད་མ་ལ་ལྷ་རྣམས་རྩེ་བར་བྱེད་དོ། །ལྷ་མོ་བརྒྱས་ཡོངས་སུ་བསྐོར་ནས་མཆོག་ཏུ་སྙན་པ་ལེན་པར་གྱུར་པས་ལྷ་མོ་དང་ལྷན་ཅིག་ཏུ་འདོད་པས་བྱས་པའི་རྣམ་འགྱུར་གཅམ་གསག་
དང་ཡང་དག་པར་ལྡན་པས་གླིང་བུ་དང་། རྫ་རྔ་དང་། འཁར་རྔ་དང་། དུང་དང་། གླུ་ཀུན་ནས་ལེན་པས་ལྷན་ཅིག་ཏུ་རྩེ་བ་དང་། རང་ལས་འོད་འབྱུང་བ་རྒྱན་དང་ལྡན་པ་རྣམས་ཡོངས་སུ་སྤྱོད་པར་ཡང་བྱེད་དོ། །གཞན་ཡང་གཙུག་དེ་དག་ཉིད་ཀྱི་ཕྲེང་བ་རྣམས་ལ་ངོ་མཚར་བ་ཆེན་པོར་གྱུར་པ་
རང་གི་ལས་ཀྱིས་བྱས་པས་སྤྲུལ་པར་གྱུར་པ་རྣམས་ལ་འདི་ལྟ་སྟེ། རེ་རེའི་ཕྱི་རོལ་གྱི་མགོ་བོ་ལ་དཔག་བསམ་གྱི་ཤིང་ལེགས་པར་སྐྱེས་པར་གྱུར་པ། མེ་ཏོག་དུ་མས་ཀུན་ཏུ་གང་བ། མཆོག་ཏུ་རྣམ་པར་བཀྲ་བ་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པའི་སྒོ་དང་ཡང་དག་པར་

ལྡན་པའོ། །ལྗོན་ཤིང་དེ་ལ་ཡང་ལྷ་ལེགས་པར་གནས་ནས་བདུད་རྩི་དག་འཐུང་ཞིང་གླུ་ཡང་ལེན་ལ། གཞན་ཡང་ལྷ་རྫས་ཀྱི་བདེ་བ་རྣམས་ཉམས་སུ་མྱོང་ངོ་གཞན་ཡང་དེའི་མདོངས་ཀྱི་ཕྲེང་བ་ཉིད་ལ་ངོ་མཚར་བ་འདི་ལྟ་སྟེ། རེ་རེའི་ཕྱི་རོལ་ན་དཔག་བསམ་གྱི་ཤིང་རྣམ་པར་བཀྲ་བ་དགའ་
བར་གྱུར་པའི་བདེ་བར་ཉེ་བར་གནས་ནས་ལྷ་དགའ་བར་བྱེད་པ་རྣམས་དང་ཡང་དག་པར་ལྡན་ནོ། །ཕན་ཚུན་གནོན་པས་ངལ་བ་མེད་པར་གླུ་ལེན་པ་དང་ལིམ་ལོག་བྱེད་དོ། །ལྷ་རྫས་ཀྱི་བདེ་བ་ལ་ཡང་ཉེ་བར་ལོངས་སྤྱོད་པར་བྱེད་དེ། དང་པོ་ངོ་མཚར་བ་ཆེན་པོ་དེ་དག་མཐོང་ནས་རྒྱན་
དང་ཆ་བྱད་མཆོག་དང་ལྡན་པའི་ལྷ་དེ་རྣམས་དགའ་བར་འགྱུར་བས་ཀྱང་གཞན་ངོ་མཚར་ཆེ་བ་རྣམས་སུ་ཉེ་བར་འགྲོའོ། །དེ་ནས་ཕྲེང་བ་དེ་དག་རྣམས་ལ་ལྷ་རྣམས་ངོ་མཚར་བ་རྣམ་པ་དུ་མའི་བློ་སྐྱེ་བར་འགྱུར་རོ། །གཞན་ཡང་ངོ་མཚར་བ་གཉིས་པ་མཐོང་བ་ནི་འདི་ལྟ་སྟེ། པད་མའི་
རྫིང་བུའི་ཕྲེང་བ་ཞེས་བྱ་བ་པད་མའི་རྫིང་བུ་སྟོང་ཕྲག་ཉི་ཤུ་སྟེ། འདམ་མེད་པ་རྣམས་གསེར་དང་། དངུལ་གྱི་བྱེ་མ་རྣམས་ཀྱིས་འདམ་དུ་བྱས་པ་དང་། ཡན་ལག་བརྒྱད་དང་ལྡན་པའི་ཆུས་ལེགས་པར་གང་བ་དང་། ངང་པ་དང་། ཀཱ་རཎྜ་བ་དང་། ངང་ངུར་རྣམས་ཀྱིས་
ཡོངས་སུ་བསྐོར་བ། རྒྱགས་པའི་ངང་པ་དགེ་བའི་ལས་ཀྱིས་ཡོངས་སུ་བསྐུལ་ནས་ཚིགས་སུ་བཅད་པ་བརྗོད་པ་ཇི་ལྟར། ཤིན་ཏུ་ཡུན་རིང་ཀུན་དགའ་ཡང་། །ལུས་ཅན་རྣམས་ལ་རྟག་པ་མེད། །མི་རྟག་པ་ཡི་བདེ་དེ་ཡང་། །ལྷ་རྣམས་ཀྱིས་ཀྱང་རྟོགས་པ་མིན། །
བདེ་བ་ཡི་ནི་ལམ་འདི་ཡང་། །རྣམ་པར་འཇིག་པར་འགྱུར་བ་ཡིན། །འདོད་པ་ཡིས་ནི་སེམས་བསླུས་པས། །རྣམ་པར་འཇིག་པ་རྟོགས་མ་ཡིན། །སྡུག་བསྔལ་གྱིས་འདྲེས་བདེ་རིག་པ། །རབ་ཏུ་གཡོགས་པས་མཐོང་བ་མིན། །པད་མའི་ཕྲེང་བས་ཡོངས་བཀབ་པའི། །
དུག་གིས་གང་བཞིན་འདོད་ཆགས་ཡིན། །འབྲས་ཅན་དུག་གིས་ལེགས་བསྲེས་པ། །ཇི་བཞིན་དུ་ནི་འཆི་བའི་མཐའ། །དེ་བཞིན་བདེ་བ་འདི་དག་ཀུན། །མཐར་ནི་དམྱལ་བར་འགྱུར་བ་ཡིན། །རྒྱུས་པ་ཡིས་ནི་ཀུན་སྦྲེལ་ཕྱུགས། །བལྟ་བར་དགའ་བ་ཇི་ལྟ་བར། །དེ་བཞིན་

དགའ་བའི་ལུས་འདི་ཡང་། །ཕྱུགས་ཡིན་མཆོག་ཏུ་མི་བཟད་པ། །ཇི་ལྟར་ཀིམ་པ་ཀ་ཡི་བྲོ། །དངར་བའི་ཚོགས་ཆེན་བྱུང་བ་ནི། །ཕྱི་ནས་འཇིག་པར་འགྱུར་བ་ཡིན། །དེ་བཞིན་མི་རྣམས་ཀྱི་ཡང་བདེ། །མར་མེའི་རྩེ་མོ་ཇི་ལྟ་བར། །ཕྱེ་ལེབ་རྨོངས་པས་
བརྒྱལ་བར་འགྱུར། །འཚེད་པ་དང་ནི་སྲེག་པར་བྱེད། །དེ་བཞིན་བདེ་བ་འདི་བརྗོད་དོ། །བྱིས་རྣམས་མི་ཤེས་པས་ཇི་ལྟར། །དགའ་བ་དོགས་མེད་བདེ་འདོད་པ། །ཤི་ནས་འབར་རྣམས་དེ་བཞིན་དུ། །བདེ་བ་དེ་རྣམས་འབྱུང་བར་འགྱུར། །རི་དགས་སྲེད་ལ་ཇི་ལྟར་ནི། །སྲེད་གདུངས་
རི་དགས་ཉེར་རྒྱུག་པ། །སྲེད་པ་རྣམ་པར་ཆོམས་མིན་ཏེ། །དེ་བཞིན་འདི་ཡིས་བདེ་འདི་བརྗོད། །སྲེད་པས་ཀྱང་ནི་ངོམས་པ་མིན། །ངོམས་པ་འབྱུང་བར་འགྱུར་བའང་མེད། །ཡུལ་གྱི་ལྷ་རྣམས་ཐམས་ཅད་ཀྱང་། །དེའི་ཕྱིར་འདོད་པ་ཞི་ཉིད་མིན། །བདེ་བ་ཡི་ཡང་རྩ་བའི་མཆོག །
ཞི་བ་གཅིག་པུར་རབ་ཏུ་གྲགས། །གང་གི་སྙིང་ལ་དེ་མེད་པ། །དེ་ནི་སྡུག་བསྔལ་ཅན་རབ་བསྒྲགས། །གཅིག་ཏུ་བདེ་བ་ཚངས་པའི་མཆོག །གཅིག་པུ་བཟོད་པ་ཞི་བའི་མཆོག །རིག་པ་གཅིག་ནི་ཕ་རོལ་འགྲོ། །བྱམས་པ་གཅིག་པུ་ལས་བདེ་འབབ། །འཚེ་བ་མེད་པ་རྟག་ཏུ་
བཟང་། །ལྟ་བ་དམ་པ་མཆོག་ཏུ་དགེ། །སེམས་དྲང་བ་ནི་རྒྱུན་དུ་མཛེས། །སྡིག་རྣམས་རྟག་ཏུ་སྤོང་བ་ཡང་། །རྒན་པོ་སྟེན་དང་མང་བློ་འཐུན། །རྟག་ཏུ་ཆོས་ལ་གུས་པ་དང་། །སློབ་དཔོན་གུས་ཉན་བདེ་རྣམས་དང་། །ལས་ལའང་དད་པར་ལྡན་པའོ། །རྟག་ཏུ་དཀོན་མཆོག་
གསུམ་མཆོད་དང་། །གང་ཕྱིར་དགེ་བའི་བློ་དྲི་མེད། །མ་དང་ཕ་དག་མཆོད་པ་ཡང་། །མྱང་འདས་གྲོང་ཁྱེར་འགྲོ་བའོ། །ཆོས་རྣམས་ཐམས་ཅད་མ་ལུས་པ། །རབ་ཏུ་འབྱུང་བ་ཡིན་པར་བརྗོད། །བདེ་བ་ཀུན་གྱི་མཆོག་བྱེད་པའི། །ཚངས་པར་སྤྱོད་པ་སྤྱོད་པའི་མཆོག །
སྦྱིན་པ་རྣམས་ཀྱི་སྦྱིན་པའི་མཆོག །ཆོས་ཀྱི་སྦྱིན་པ་རབ་ཏུ་བརྗོད། །བརྩོན་རྣམས་ལས་ཀྱང་བསམ་གཏན་རྒྱུན། །གང་གིས་མྱ་ངན་འདས་འགྲོ་བའི། །སྦྱིན་དང་ཚུལ་ཁྲིམས་དཀའ་ཐུབ་ཤེས། །ཤེས་རབ་ཉིད་ནི་མཆོག་ཏུ་བརྗོད། །ཐར་པ་ཡང་ནི་ཡེ་ཤེས་ལས། །ཤེས་དང་

ཚུལ་ཁྲིམས་ལས་བདེ་འབྱུང་། །མིག་རྣམས་ཀྱིས་ཀྱང་ཡོངས་མཐོང་བ། །ཤིན་ཏུ་དྲི་མེད་ཡེ་ཤེས་མིག །ལམ་རྣམས་ལས་ཀྱང་ཡན་བརྒྱད་ལམ། །ཤིས་པར་དེ་བཞིན་གཤེགས་པས་གསུངས། །བཞི་པོ་ཡང་ནི་བདེན་རྣམས་ཀྱི། །མཆོག་ཏུ་ལེགས་པར་གསུངས་པ་
ཡིན། །སྟོབས་རྣམས་ཀྱི་ཡང་ལེགས་མཐོང་བ། །ཤེས་རབ་སྟོབས་ནི་མཆོག་ཡིན་ནོ། །སྟེང་འོག་བར་གྱི་འཇིག་རྟེན་འདིར། །དུ་མ་ཡི་ནི་ལས་རྣམས་ཀྱི། །ཆོས་རྣམས་དེ་ཉིད་གཟིགས་པ་པོ། །མཆོག་གྱུར་དེ་བཞིན་གཤེགས་པ་བརྗོད། །ཚོགས་རྣམས་ལས་ཀྱང་འཕགས་
པ་ཡི། །དགེ་འདུན་མཆོག་དང་ཞི་བར་བརྗོད། །ཞིང་རྣམས་ཀྱི་ཡང་རྣམ་གསུམ་སྐྱོན། །ཡོན་ཏན་སྡུག་བསྔལ་འཇིགས་པ་དེ། །ཕ་མ་ལེགས་པར་མཆོད་པ་དང་། །མཁན་པོ་ཡང་ནི་རྟག་པར་ཏེ། །དེ་ནི་མིག་བཙུམས་གྱུར་པ་ན། །ཆོས་ཀྱི་སྤྱོད་ཡུལ་དེ་དབང་གིས། །ཐུབ་པ་དེ་
ཉིད་གཟིགས་རྣམས་ཀྱིས། །མཆོག་ཏུ་དེ་དག་རྟག་ཏུ་གཟིགས། །བདེ་བའི་ཡུལ་ནི་དེ་དག་རྣམས། །ཡུལ་ནི་བདེ་བ་མིན་པར་དྲན། །གང་ཞིག་དེ་རྣམས་བྱེད་པ་ནི། །དྲི་མེད་ཆོས་ཀྱི་ལམ་མཐོང་ཡིན། །དེ་སྤོང་བདེ་བ་རྟག་ཏུ་མཐོང་། །ས་རྣམས་ཀུན་ནི་བདེ་བ་མིན། །དེ་
ལྟར་དེ་དགེ་བའི་ལས་ཀྱི་ཆོས་དོན་དུ་གཉེར་བར་དགེ་བས་ཉེ་བར་འཚོ་བ་དེར་སྐྱེས་པ་ན་སྔོན་གྱི་དགེ་བའི་ལས་ཀྱི་སྐྱེ་བ་གཞན་རྗེས་སུ་དྲན་པར་གྱུར་པས་ཚིགས་སུ་བཅད་པ་བརྗོད་དོ། །དེ་ལྟ་བས་ན་རབ་ཏུ་དང་བས་དམ་པའི་ཆོས་མ་ཡེངས་པར་བཀླག་པར་བྱའོ། །གང་གིས་རྒྱུས་དུད་
འགྲོའི་སྐྱེ་གནས་སུ་སྐྱེས་པ་རྣམས་ཀྱང་དམ་པའི་ཆོས་བཀླགས་པའི་འབྲས་བུ་མེད་པར་མི་འགྱུར་བའི་ཕྱིར་རོ། །སླར་ཡང་ལྷ་ཐམས་ཅད་ཉིད་གང་ན་འཐབ་བྲལ་གྱི་པད་མའི་རྫིང་བུ་དེར་འགྲོའོ། །པད་མའི་རྫིང་བུ་བརྒྱ་སྟོང་ཕྲག་ཉི་ཤུ་པ་དགའ་བའི་སྒོ་ནས་དེ་བརྩོན་པ་དང་ལྡན་པར་
གྱུར་ནས་རྒྱུ་བ་རྒྱན་དང་ཆ་བྱད་ཅན་ཐམས་ཅད་སོ་སོར་གཟུགས་དང་ཆ་བྱད་འཛིན་པའི་ལྷའི་བུ་མོས་ཡོངས་སུ་བསྐོར་བ་མཐོང་སྟེ། ལྷའི་ཚོགས་པད་མའི་རྫིང་བུའི་དབུས་སུ་སོང་ནས་རྒྱན་དང་ཆ་བྱད་མཆོག་དང་ལྡན་པ་ཁྲི་ཕྲག་བརྒྱ་དང་། བྱེ་བ་ཕྲག་དུ་མ་ཉིད་དང་ཡང་དགའ་བར་བྱེད་དོ། །

ཡོངས་སུ་རྒྱུ་བར་ཡང་བྱེད་དེ། རྔ་སྐད་ཡན་ལག་ལྔ་དང་ལྡན་པས་ཡུལ་ལྔ་ལ་ལྷའི་བུ་མོའི་ཚོགས་དང་ལྷན་ཅིག་ཏུ་ཁ་ཅིག་ནི་པད་མའི་གསེབ་ཏུ་འགྲོའོ། །ཁ་ཅིག་ནི་དྲིལ་བུ་གཡེར་ཀ་དཀྲོལ་བ་ལ་ཟིད་དོ། །ཁ་ཅིག་ནི་འདབ་མ་ལ་ཞོན་ནོ། །ཁ་ཅིག་ནི་སྙིང་
པོ་ལ་རྣམ་པར་གནས་ནས་ཇི་ལྟར་འདོད་པས་ཤིན་ཏུ་ཕྲ་བ་དང་། རྒྱ་ཆེ་བའི་ལུས་ཀྱིས་མིག་བཙུམས་ནས་ཕྱེ་བའི་བར་ལ་འགྲོ་བ་མགྱོགས་པས་དཔག་ཚད་སྟོང་ཕྲག་བརྒྱར་ཕྱིན་ནས་སླར་ཡང་ཕྱིར་འོང་ངོ་། །མཐོང་བ་འཇུག་པ་བཞིན་དུ་དེ་དག་ཀུན་ནས་གནོད་པ་མེད་པར་
འགྱུར་ཏེ། ཇི་ལྟར་སོར་མོ་གཅིག་གི་རྩེ་མོ་ལ་མིག་བརྒྱའི་བལྟ་བ་འཇུག་པ་ན་ཡང་མཐོང་བ་རྣམས་དོག་པ་ཡང་མ་ཡིན་པ་དེ་བཞིན་དུ་ལྷ་རྣམས་བརྒྱ་དང་སྟོང་ཡང་པད་མའི་སྙིང་པོ་གཅིག་ལ་སོ་སོར་ངེས་པར་གནས་སོ། །འོན་ཀྱང་དོག་པ་ཡང་མ་ཡིན་ནོ། །ལྷ་དེ་དག་རྣམས་ཀྱི་ལེགས་པར་
བྱས་པའི་ལས་ཀྱིས་ཤིན་ཏུ་ཕྲ་བའི་དངོས་པོ་དང་དུ་མའི་དངོས་པོའི་དངོས་པོ་མང་པོའི་ལས་བྱས་པ་དང་། ཡང་བར་འགྱུར་བ་དང་། ཕྲ་བར་གྱུར་པ་སྟེ་གནོད་པ་ཡང་མ་ཡིན་ནོ། །དེ་བཞིན་དུ་ལྷ་རྣམས་ཀྱང་གནོད་པ་མ་ཡིན་པ་ནི་ལེགས་པར་བྱས་པའི་ལས་ཀྱི་སྟེ། ལྷ་དེ་དག་རྣམས་རང་
ཉིད་ཀྱི་ལས་ཀྱིས་དེ་ལྟ་བུའི་གཟི་བརྗིད་དང་ལྡན་པའི་པད་མའི་རྫིང་བུ་དེར་རྩེད་མོ་ལ་ཆེད་ཆེར་བྱེད་ཅིང་ལྷ་རྣམས་ཇི་ལྟར་འདོད་པ་བཞིན་དུ་དགའ་བར་འགྱུར་བ་རོ་མཆོག་དང་ལྡན་པའི་རྩི་རྣམས་ཀྱང་འཐུང་བར་བྱེད་ཅིང་འགྱིང་བར་ཡང་ཤིན་ཏུ་མང་བའི་ཚོགས་ཀྱི་ས་དང་སྟོང་ཕྲག་རྣམས་ཀྱིས་ཀྱང་བྱེད་
དོ། །དེ་ནས་དེའི་ཚེ་ལྷ་ས་གཞན་དག་ན་གནས་པའི་ལྷ་དེ་དག་རྣམས་རྩེ་བ་ལ་ཆེད་ཆེར་མི་བྱེད་པར་ས་གཞན་ན་གནས་པའི་ལྷ་དེ་དག་རྣམས་ཀྱང་ཕན་ཚུན་ལྷན་ཅིག་གྲོགས་སུ་གྱུར་པས་དང་། གང་ཁ་ན་མ་ཐོ་བ་མེད་པའི་གཟུགས་རང་ཉིད་ཀྱི་འོད་ཉི་མ་བརྒྱ་སྟོང་གིས་འོད་བས་ཆེས་ལྷག་པའི་
ལུས་འདོད་པས་རྒྱགས་པའི་རང་བཞིན་གྱི་ཡུལ་གྱི་བདེ་བས་སྙིང་དགའ་བར་བྱེད་པ་དང་། རྩི་ཡང་འཐུང་བར་བྱེད་ལ་དུས་ཤིན་ཏུ་རིང་བས་དེ་ལ་གནས་ནས་སླར་ཡང་མུ་སུ་ལུན་དྷ་བལྟ་འདོད་པས་འཇུག་པར་བྱེད་དོ། །ནགས་དེ་ན་གཟུགས་དུ་མ་དགའ་བར་གྱུར་པ་ཇི་ལྟར་འདོད་པས་སྤྲུལ་

པ་དང་། ཇི་ལྟར་རང་ཉིད་འདོད་པར་གྱུར་པ་འཐབ་བྲལ་གྱི་མངའ་བདག་མུ་སུ་ལུན་དྷའི་ནགས་དེ་ལྟར་མཐོང་སྟེ། གཟུགས་དུ་མ་ཕན་ཚུན་དུ་དགའ་བ་རྣམས་ནི་འཐབ་བྲལ་གྱི་བདག་པོ་དེའི་མཛེས་པ་སྔ་ན་མེད་པ་ཡིན་ནོ། །དེ་ནས་ལྷ་དེ་སྔ་ན་མེད་པའི་གཟུགས་མཐོང་བ་བཞིན་དུ་ནགས་དེ་ལྟ་
ཞིང་འཇུག་པར་ཡང་བྱེད་དེ། ལྷ་དེ་དག་དགའ་བར་འགྱུར་བའི་རྒྱན་དང་ཆ་བྱད་དགའ་བར་གྱུར་པ། སྟེང་དུ་སྐྱེས་པའི་ལྷ་རྫས་ཀྱི་ཙན་དན་གྱིས་ཉེ་བར་བྱུགས་པའི་ལུས་ཅན་རྣམས་དེ་བཞིན་དུ་གོས་མཆོག་བགོས་པ་མཐོ་རིས་དང་རྗེས་སུ་འཐུན་པའི་རྒྱན་དང་ཆ་བྱད་ཅན་གྱིས་རྣམ་པར་བཀྲ་བའི་ནགས་
དེ་ཡང་དེས་ཡང་དག་པར་མངོན་པར་མཐོང་ནས་དེ་ངོ་མཚར་བ་ཀུན་ཏུ་སྐྱེའོ། །ལས་རྣམ་པ་སྣ་ཚོགས་པ་ཡང་རྗེས་སུ་མཐོང་བར་འགྱུར་ལ་རྣམ་པ་སྣ་ཚོགས་པ་མཐོང་ནས་ཀྱང་སྔ་ན་མེད་པར་དགའ་བའི་ཡང་ནགས་རྣམས་དལ་བུས་ཉེ་འཁོར་བལྟས་ནས་ཕྱི་ནས་དགའ་བར་བྱེད་པ་དང་། རྣམ་
པར་ལྟ་བར་བྱེད་པ་དང་། ཕན་ཚུན་དུ་བརྒྱན་པར་གྱུར་པ་དང་། ཕན་ཚུན་དུ་པད་མའི་རྫིང་བུ་དེར་འཇུག་པར་ཡང་བྱེད་དེ། ཤིན་ཏུ་འདས་པར་ཞུགས་ནས་མང་དུ་ལྟའོ། །ནེ་ཙོ་ཡང་ཚང་གི་སྒོ་ནས་མཉམ་པར་རྣམ་པ་སྣ་ཚོགས་པའི་རིན་པོ་ཆེའི་ཕྲེང་བ་ལ་སོགས་པ་འཛིན་པར་གྱུར་པས་
ཉེ་འཁོར་ན་ཕན་ཚུན་དུ་ཤིན་ཏུ་ཆགས་པར་གྱུར་པས་མཆུ་ལ་མུ་ཏིག་གི་ཕྲེང་བ་རྣམས་རྒྱགས་པས་གཡས་ཕྱོགས་ནས་སྐོར་བར་བྱེད་དོ། །ནགས་དེ་དག་ན་ཚིགས་སུ་བཅད་པ་ཡང་བརྗོད་པ་ཇི་ལྟར། རང་གི་ལས་ཀྱིས་བསྐུལ་བ་ཡིས། །འཁོར་ལོ་འདི་དག་ཐམས་ཅད་འཁོར། །འདི་ནི་རྒ་ཤི་འཕྱང་མོ་ཡང་། །སྐྱོ་བར་འགྱུར་བ་
མ་ཡིན་ནོ། །འགྲོ་བ་དང་ནི་འགྲོ་གཞན་འགྲོ། །ལྷ་དང་ལྷ་མིན་དེ་བཞིན་མི། །རང་སེམས་ཡོངས་སུ་ཟློག་པ་ཡི། །དེ་ཉིད་མཁྱེན་པ་ལྟོས་པ་མེད། །དེ་བཞིན་འཁོར་ལོ་འཁོར་བ་མིན། །གང་འདི་ཀུན་ཏུ་འཁོར་བྱེད་ནི། །ལས་ཀྱི་ལག་པས་ཡོངས་བསྐུལ་བ། །སེམས་ཅན་
འཁོར་ལོ་མྱུར་བའང་ཡིན། །འབྱུང་གནས་བཅུ་གཉིས་ཡན་ལག་ལྡན། །རྨོངས་པ་དང་ཡང་ཀུན་ནས་ལྡན། །རྟེན་འབྲེལ་འཁོར་ལོ་འཁོར་བ་ཡང་། །འཇིག་རྟེན་གྱིས་ནི་རྟོགས་པ་མིན། །དེ་ལྟར་ནེ་ཙོའི་ཁ་ནས་ངེས་པར་འབྱུང་བའི་ཚིགས་སུ་བཅད་པ་རྗོད་པ་ལྷ་དེ་དག་རྣམས་

ཀྱིས་ཐོས་ནས་ཤིན་ཏུ་མཉམ་པར་བཞག་པས་རང་གི་ལས་བདག་གིར་བྱ་བ་ལ་རབ་ཏུ་རྟོག་པར་བྱེད་པ་དང་གུས་པ་མང་བར་ཡང་འགྱུར་རོ། །ཇི་ལྟར་ནེ་ཙོའི་མཆོག་དེ་ནི་ལས་བདག་གིར་བྱ་བ་གང་ཡིན་པ་ལ་སྤྱོད་པར་བྱེད་པ་ལ། ཨེ་མ་བདག་ཅག་རྣམས་སྲེད་པ་དང་ལྷན་
ཅིག་ཏུ་དགའ་བར་བྱེད་པ་བདག་བདེ་བ་དང་ལྡན་པར་ཡང་གྱུར་ནས་ཡོངས་སུ་སྤྱོད་པར་ཡང་བདག་ཅག་རྣམས་བྱེད་པ། སླར་ཡང་མུ་སུ་ལུན་དྷ་བལྟ་བར་འདོད་པས་གང་ན་དེའི་འགྱིང་བའི་ནགས་ཡོད་པ་དེར་ཉེ་བར་ལེགས་པར་འགྲོའོ། །དེ་དག་རྣམས་ནགས་དེའི་ནང་དུ་ལེགས་པར་
སོང་ནས་མཐོང་བ་ནི་མན་དཱ་ར་བའི་ནགས་སྟོང་ཕྲག་བརྒྱ་ཁ་དོག་དང་མེ་ཏོག་གིས་རྒྱས་པར་གྱུར་པ་རྣམ་པ་སྣ་ཚོགས་པའི་བྱའི་ཚོགས་ཀྱིས་ལེགས་པར་གང་བ་ཉི་མ་སྟོང་དང་འདྲ་བར་ལྷམ་མེ་བར་འོད་འབར་བས་སྲེག་པའི་སྐྱོན་དང་རྣམ་པར་བྲལ་བ། སྣང་བ་འབའ་ཞིག་བྱེད་པ། ཤིང་
དེ་མཐོང་ནས་རབ་ཏུ་དགའ་བ་ཡང་སྐྱེ་བར་བྱེད་དོ། །རྟག་ཏུ་རྣམ་པར་དབེན་པའི་སྒྲ་སྙན་པ་རྣམས་ཀྱིས་རྣ་བར་རབ་ཏུ་དགའ་བ་སྐྱེད་པར་བྱེད་དོ། །སྣ་ཡང་རབ་ཏུ་དགའ་བ་རྣམས་སྐྱེད་པར་བྱེད་དོ། །དབང་པོ་ལྔ་ཀ་ཡང་མེ་ཏོག་ཤིན་ཏུ་དྲི་ཞིམ་པོས་ཏེ། ལྕེ་རབ་ཏུ་དགའ་བ་ཡང་སྐྱེད་
པར་བྱེད་པ་ནི་ལྷ་རྫས་ཀྱི་འབྲས་བུའི་རོ་རབ་ཏུ་དགའ་བ་རྣམས་ཀྱིས་སོ། །ལུས་ཀྱང་རབ་ཏུ་དགའ་བ་སྐྱེད་པར་བྱེད་དེ། མ་བཏགས་པའི་གོས་མཆོག་འབྱུང་བ་རྣམས་ཀྱིས་སོ། །ཡིད་ཀྱང་རབ་ཀྱི་མཆོག་ཏུ་དགའ་བ་སྐྱེད་པར་བྱེད་དོ། །དབང་པོ་ལྔ་མཆོག་ཏུ་ཚིམ་པར་གྱུར་པའི་ཕྱིར་
རོ། །དེ་དང་རབ་ཏུ་འབྲེལ་པས་ཀྱང་ཡིད་ཆོས་རྣམས་རབ་ཏུ་དཔྱོད་པར་བྱེད་དོ། །དེས་རྣམ་པར་ཤེས་པ་ཉམས་སུ་མྱོང་བའི་དོན་དུ་བྱས་པས་དེ་དག་རྣམས་ཀྱིས་མན་དཱ་ར་བ་དེ་དག་ཀྱང་མཐོང་ངོ་། །མན་དཱ་ར་བ་ཞེས་བྱ་བའི་ལྗོན་ཤིང་ཡོད་པ་ལ་ཤིན་ཏུ་རབ་ཏུ་དགའ་བར་གྱུར་པའི་ལྷ་
དང་ལྷ་མོའི་ཚོགས་ཀྱིས་ཀུན་ནས་གང་བ། སྔ་ན་མེད་པའི་རྒྱན་དང་ཆ་བྱད་ཅན་དུ་གྱུར་པས་གཞལ་དུ་མེད་པའི་འགྱིང་བག་རྣམས་དང་ཉེ་བར་སྤྱོད་པ་དང་ལྡན་པ་དང་། དེ་ལྟར་ས་དེ་ན་སྤྱོད་པའི་ལྷ་ཐམས་ཅད་མཐོང་བར་འགྱུར་རོ། །དེ་ནས་དཔེ་མེད་པ་བརྒྱ་སྟོང་ཕྲག་བྱེ་བ་དུ་མའི་ཡོན་

ཏན་གྱིས་ཡོངས་སུ་གང་བ་ནགས་དེའི་ཉེ་འཁོར་རྣམས་བཻ་ཌཱུརྱས་ཁྱབ་པ་ན་ལྷ་གང་དག་གིས་འཐབ་བྲལ་གྱི་མངའ་བདག་མུ་སུ་ལུན་དྷའི་རྗེས་སུ་མི་འབྲང་བའི་ལྷ་དེ་ནི་ཡོད་པ་མ་ཡིན་ཏེ། རང་གི་ངོས་ཆགས་པ་དང་། རྗེས་སུ་ཡང་ཆགས་ཤིང་མཆོག་ཏུ་ཆོས་བྱེད་དུ་ཡང་རིག་པའི་ཕྱིར་རོ། །དེ་ནས་
ལྷ་དེ་དག་རྟག་ཏུ་ཡང་ཇི་ལྟར་བཤད་པའི་བཞོན་པ་རྣམས་ཀྱིས་དང་། དེའི་ཚིག་བླ་དགས་ཀྱི་འབབ་ཆུ་ཆུ་ཀླུང་དང་། རྫིང་བུ་དང་། པད་མའི་ནགས་དང་། ཤིང་ཕུན་སུམ་ཚོགས་པས་སའི་ཆ་ཉེ་བར་མཛེས་པ་མནན་ན་ནེམ་ལ་བཏེག་ན་འཕར་བ་གསེར་གྱི་གོས་དང་འདྲ་བའི་ས་གཞི་
རྣམ་པར་བཀྲ་བ་མཐོང་བར་གྱུར་པ་ན་རྣམ་པ་སྣ་ཚོགས་པའི་འདོད་པའི་ལོངས་སྤྱོད་རྣམས་ཀྱིས་སོ། །གཞན་ཡང་རྩེ་གཅིག་ཏུ་ལྟ་བ་ལ་ཆེད་ཆེར་བྱེད་པར་གྱུར་པའི་ཡིད་ཅན་རྣམས་ཐམས་ཅད་ཀྱང་རྗེས་སུ་སྤྱོད་པ་རྣམས་དང་བཅས་ནས་གང་ན་འཐབ་བྲལ་གྱི་མངའ་བདག་ཡོད་པ་དེར་ཉེ་བར་
འགྲོའོ། །ཕྱིན་ནས་ཡང་ས་དེ་དག་ལས་ཤིན་ཏུ་འདས་ནས་འཇུག་པར་བྱེད་དེ། ལྷ་དེ་དག་རྣམས་ཇི་སྐད་དུ་བཤད་པ་བཞོན་པ་དེ་དག་རྣམས་ཀྱིས་སྔར་བཞིན་ཉིད་དུ་ལྷ་དེ་དག་རྣམས་འཇུག་གོ། །ས་གཞན་སྔ་མ་བས་ཆེས་ལྷག་པར་དགའ་བར་གྱུར་པའི་ས་དེ་དག་རྣམས་ཀྱང་
ལྔ་བརྒྱ་ཡོད་དེ། རྩེད་མོའི་རི་བཻ་ཌཱུརྱའི་རང་བཞིན་ཅན་རྣམས་ལ་པད་མ་རཱ་གའི་རང་བཞིན་གྱི་ལྗོན་ཤིང་ལ་གསེར་བཙོ་མའི་རང་བཞིན་འདབ་མ་རྣམས་དང་། དངུལ་གྱི་རང་བཞིན་རྣམས་ཀྱིས་ཀྱང་བརྒྱན་པའོ། །གཞན་དག་རྣམས་ཀྱང་གསེར་བཙོ་མའི་ལྗོན་ཤིང་ངོ་། །གཞན་དག་
རྣམས་ཀྱང་བྱི་རུའི་ཡིན་ཏེ་བྱ་རྣམས་ཀྱིས་ཡོངས་སུ་བསྐོར་བའོ། །ཡང་མཛེས་པ་གཞན་རྣམས་ལ་རིན་པོ་ཆེའི་ཁམས་དུ་མ་རྣམ་པར་འདྲེས་པས་རྒྱན་དུ་བྱས་པ་ལ་རྣམ་པ་སྣ་ཚོགས་པའི་རི་དགས་དང་། བྱ་རྣམས་ཀྱིས་ཉེ་བར་མཛེས་པར་གྱུར་པ་རྣམས་རྣམ་པ་སྣ་ཚོགས་པའི་
འབབ་ཆུ་དང་། རྫིང་བུ་དང་། ཆུ་ཀླུང་དང་། ཚང་ཚིང་གིས་ཉེ་བར་མཛེས་པ་རྣམས་འཁྲི་ཤིང་གི་རྩེ་མོ་ཡང་འཁྲི་ཤིང་རྣམ་པར་འཕྱང་བ་ཉེ་བར་མཛེས་པའི་འཁྲི་ཤིང་གི་ཁང་པ་རྣམས་དང་། གསེར་གྱི་མདོག་ཅན་གྱི་འབྲས་བུ་རྣམས་དང་། གསེར་གྱི་འཁྲི་ཤིང་རྣམ་པར་

འཕྱང་བ་རྣམས་དང་། གཞན་ཡང་བཻ་ཌཱུརྱའི་དང་འདྲ་བའི་ཁ་དོག་གི་འབྲས་བུ་རྣམས་དང་གསེར་གྱི་འདབ་མས་ཉེ་བར་མཛེས་པའི་འབྲས་བུ་རྣམས་ལ་བུང་བ་བརྒྱ་སྟོང་སྒྲ་འདོན་པ་རྣམས་ཀྱིས་རྣ་བ་ལ་གཏོད་པ་རྣམ་པ་སྣ་ཚོགས་པའི་རོ་དང་། དྲི་དང་། རེག་བྱས་ཀུན་ཏུ་གང་
བ་དང་། བཟའ་བ་དང་། བཏུང་བའི་ཆུ་ཀླུང་རབ་ཏུ་ཕལ་རྣམས་དང་། རིན་པོ་ཆེ་བདུན་གྱི་རང་བཞིན་གྱི་བྱའི་ཚོགས་ཀྱིས་ཉེ་བར་མཛེས་པ་རྣམས་དང་། མཆོག་ཏུ་རེག་ན་བདེ་བའི་སའི་ཆ་རྣམས་སོ། །གཞན་ཡང་ལྷ་རྣམས་ཀྱིས་རྩེད་མོའི་རི་དེ་ཉིད་ཀྱིས་མཛེས་པ་རྣམས་མཐོང་བ་
ནི་རི་ངོས་དང་། ཚང་ཚིང་དང་། རྩེ་མོ་རྣམས་དང་། ཕུག་གི་སྒོ་དང་། འཁྲི་ཤིང་གི་ཁང་པ་དང་། པད་མའི་རྫིང་བུ་དང་། ཐམས་ཅད་ལ་ཡང་རབ་ཏུ་དགའ་བའི་ལྷ་དང་། ལྷ་མོའི་ཚོགས་ཀྱིས་ལེགས་པར་གང་བ། ལྷ་དེ་དག་རྣམས་ལས་ཁ་ཅིག་ནི་ལྷན་ཅིག་སྤྱོད་པས་
ཡོངས་སུ་བསྐོར་ནས་གར་བྱེད་ཅིང་རོལ་ཆ་དང་བཅས་པས་གླུ་ལེན་པར་འགྱུར་རོ། །ཁ་ཅིག་ནི་པད་མའི་ནགས་སུ་ཞུགས་ནས་ཆུའི་རྩེད་མོ་ལྷན་ཅིག་སྤྱོད་པ་རྣམས་དང་ལྷན་ཅིག་ཏུ་རྩེའོ། །ཁ་ཅིག་ནི་རང་གི་ཡིད་མཆོག་ཏུ་དགའ་བས་བཏུང་བ་རྣམས་འཐུང་ངོ་། །ཁ་ཅིག་ནི་རི་ངོས་
གཞན་ལ་མེ་ཏོག་རྣམས་སྤུང་བར་བྱེད་དོ། །ཁ་ཅིག་ནི་པད་མའི་ཕྲེང་བ་མཆོག་གིས་དེ་ལ་ཆེད་དུ་བྱེད་པས་འཕྱང་བ་ནི་ཅོད་པན་གྱི་ཕྲེང་བ་རྣམས་འཕྱང་བར་བྱེད་དེ། ལྷན་ཅིག་སྤྱོད་པས་ཡོངས་སུ་བསྐོར་ནས་མཆོག་གི་རྒྱན་དང་ཆ་བྱད་ཅན་རྣམས་རང་ཉིད་ཀྱི་འོད་ཀྱིས་རྗེས་སུ་བྱུགས་པའི་ལུས་
ཅན་ནོ། །ཁ་ཅིག་ནི་ནམ་མཁའ་ལ་ལྷན་ཅིག་སྤྱོད་པས་ཡོངས་སུ་བསྐོར་ནས་སོ། །ལྷ་གཞན་དག་རྣམས་ནི་གླིང་བུ་དང་། འཁར་རྔ་དང་། རྣམ་པ་སྣ་ཚོགས་པའི་རོལ་ཆ་ལག་ན་ཐོགས་པས་གླུ་ལེན་པར་བྱེད་པས་ཀྱང་རི་ངོས་དང་ཚང་ཚིང་དུ་གནས་སོ། །བརྒྱ་ཕྲག་དུ་མ་དང་ཡང་ནི་
སྟོང་ཕྲག་དུ་མར་ཡང་ལྷ་དེ་དག་རྣམས་དེ་ལྟར་འོད་སྣ་ཚོགས་ཀྱིས་ལུས་བརྒྱན་ཅིང་སྔོན་པོ་དང་། སེར་པོ་དང་། དམར་པོ་དང་། འདྲེན་མའི་འོད་ལུས་ལས་འབྱུང་བ་རྣམས་ཡིན་ཏེ། དེ་ལྟར་ཅུང་ཟད་ཙམ་ཅིག་དཔེར་བྱས་པར་ཟད་ཀྱི་ཆུང་བ་རྣམས་ནི་དཔེར་ན་ཉི་མ་ལས་འོད་ཁ་དོག་དུ་མ་

འབྱུང་བའོ། །དེ་ནས་ལྷ་དེ་དག་རྣམས་ཀྱིས་རྩེད་མོའི་རི་དེ་རྣམས་མངོན་པར་མཐོང་སྟེ། བརྒྱ་སྟོང་ཕྲག་དུ་མས་མཛེས་པར་གྱུར་པས་ཆེས་ལྷག་པར་ཉེ་བར་མཛེས་པ་རྣམ་པར་བཀྲ་བའི་ལེགས་པར་བྱས་པའི་ལས་ཀྱིས་སྤྲུལ་པ་རྣམ་པ་དུ་མ་མཐོང་ནས་མཆོག་ཏུ་དགའ་བ་སྐྱེས་སོ། །དེ་
དག་རྣམས་ཀྱིས་ཕྱིར་ཞིང་རྩེད་མོའི་རི་རྣམས་ཀྱི་ས་མངོན་པར་མཐོང་ནས་ལྷ་རྣམས་ཀྱི་མངའ་བདག་བལྟ་བར་འདོད་པས་སླར་ཡང་ནང་གཞན་དུ་སོང་ཞིང་ཞུགས་ནས། དེ་དག་རྣམས་ཀྱིས་ཉེ་འཁོར་ན་ཁང་བཟངས་ཀྱི་ཕྲེང་བ་ཞེས་བྱ་བའི་ས་གཞན་ན་འཐབ་བྲལ་གྱི་བདག་པོ་དེ་མཐོང་ནས་ལྷ་
དེ་དག་རྣམས་འཇུག་པར་བྱེད་དེ། རྒྱན་དང་ཆ་བྱད་མཆོག་དང་ལྡན་པས་ཤིན་ཏུ་འཐབ་བྲལ་གྱིས་མགོ་བྱས་པ་ཚོགས་པ་རྒྱུ་བ་ན་གནས་པ་རྣམས་དང་། རྒྱ་ཆེན་པོའི་ཁོར་ཡུག་ན་རྒྱུ་བ་རྣམས་དང་། གང་ཡང་ས་དེ་ན་གནས་པ་རྣམས་ཀྱིས་ཀྱང་ཁང་བཟངས་ཀྱི་ཁོར་ཡུག་རྣམས་
ཀུན་ནས་ལེགས་པར་གང་བ་ཆ་ཤས་རྣམ་པར་བཀྲ་བར་གྱུར་པ་ནི་མུ་སུ་ལུན་དྷའི་ལེགས་པར་བྱས་པའི་ལས་རྣམ་པ་དུ་མར་བྱས་ཤིང་བསགས་ལ་སོ་སོར་མྱོང་བར་འགྱུར་བའི་རྣམ་པ་དུ་མ་རྣམས་ཡིན་ལ། ཁང་བཟངས་དེ་དག་རྣམས་ཀྱང་སྟོང་ཕྲག་བཅུར་རྣམ་པ་དུ་མར་ཁ་དོག་དུ་མ་སྣ་
ཚོགས་པར་བཀྲ་བ། གསེར་འབར་བ་རྣམས་ཀྱིས་དེ་དག་རྣམ་པ་སྣ་ཚོགས་པར་ལེགས་པར་བརྒྱན་པར་གྱུར་པ་དེ་རྣམས་ཀྱི་དགའ་བར་གྱུར་པ་འདི་དག་རྣམས་ཀྱང་འདི་ལྟ་སྟེ། རྩིག་པ་གང་ཡིན་པ་རྣམས་ནི་གསེར་གྱི་རང་བཞིན་ནོ། །དེ་དག་གི་སྟེགས་བུ་རྣམས་ནི་བཻ་ཌཱུརྱའི་རང་
བཞིན་ནོ། །གློ་སྐར་རྣམས་ནི་ཨིན་དྲ་ནཱི་ལའི་རང་བཞིན་ནོ། །ཀ་བ་རྣམས་ནི་ཆ་ཤས་རྣམ་པར་བཀྲ་བ་རྣམས་སོ། །གཞན་ཡང་ཁང་བཟངས་གཞན་རྣམས་ཀྱི་ནི་བཻ་ཌཱུརྱའི་རང་བཞིན་ནོ། །སྒོ་རྣམས་ནི་གསེར་འབར་བའི་རང་བཞིན་ནོ། །བཻ་ཌཱུརྱའི་རང་བཞིན་དང་། གསེར་
བཙོ་མའི་རང་བཞིན་གྱི་སྒོ་གླེགས་ཀུན་ནས་འདུད་པས་མཆོག་ཏུ་ཆ་ཤས་རྣམ་པར་བཀྲ་བའོ། །གཞན་ཡང་ཆེས་མཆོག་ཏུ་གྱུར་པའི་གནས་དགའ་བ་དེ་དག་རྣམས་ལ་འདི་ལྟ་སྟེ། རྩིག་པ་རྣམས་ནི་པད་མ་རཱ་གའི་རང་བཞིན་ནོ། །དངུལ་གྱི་རང་བཞིན་གྱི་ཀ་བ་རྣམས་སོ། །

སྒོ་རྣམས་ནི་གསེར་གྱིའོ། །གློ་སྐར་རྣམས་ནི་བྱི་རུའི་རང་བཞིན་ལས་སོ། །ས་རྣམས་ཀྱང་རྣམ་པར་བཀྲ་བས་རྣམ་པར་བཀྲ་བར་གྱུར་པའི་ལས་ཀྱིས་དགའ་བར་གྱུར་པའོ། །གཞན་ཡང་རྣམ་པར་བཀྲ་བར་བྱས་པའི་ཡུལ་ཕྱོགས་བླ་ན་མེད་པ་ཡོད་དེ། འདི་
ལྟ་སྟེ། ཨིན་དྲ་ནཱི་ལའི་རང་བཞིན་གྱི་རྩིག་པ་རྣམས་སོ། །སྒོ་རྣམས་ནི་གསེར་བཙོ་མའི་རང་བཞིན་རྣམས་སོ། །དངུལ་གྱི་རང་བཞིན་དུ་གྱུར་པའི་ཀ་བ་དང་རི་རྣམས་ཀྱང་འོད་འབར་བའི་ཕྲེང་བས་དཀྲིགས་པའོ། །གཞན་ཡང་མཛེས་པ་མཆོག་ཏུ་གྱུར་པ་ཡོད་དེ། མུ་སུ་ལུན་དྷའི་
ཕོ་བྲང་འདིའི་རྣམ་པ་སྣ་ཚོགས་པའི་ལས་ཀྱིས་སྤྲུལ་པ་རྣམས་ལ་ཇི་ལྟར་རྡོ་རྗེ་ཕ་ལམ་གྱི་ཕྱེ་མས་བརྟན་པར་གྱུར་པ། དངུལ་གྱི་རང་བཞིན་མཆོག་ཏུ་དྲི་མ་མེད་པ་རྣམས་དང་། གསེར་འབར་བ་རྣམས་ཀྱི་སྒོ་དང་། ཀ་བ་དང་། གློ་སྐར་རྣམས་ནི་པད་མ་རཱ་ག་རྣམས་ལས་སོ། །
གཞན་ཡང་གཞན་རྣམས་ཡོད་པ་ནི་རིན་པོ་ཆེ་སྣ་བདུན་གྱི་རང་བཞིན་ཕན་ཚུན་དུ་གསལ་བར་བྱེད་པ་འོད་མཆོག་དང་ལྡན་པའི་ཁང་བཟངས་རྣམས་ཀྱི་ཚོགས་རྣམ་པ་དེ་ལྟ་བུ་རྣམ་པར་བཀྲ་བར་གྱུར་པས་འཁྲིལ་པའི་ཁང་བཟངས་དེ་དག་རྣམས་ཀྱིས་མཛེས་པ་མཐོང་ངོ་། །ལྷ་དེ་
དག་རྣམས་ཕྲེང་བའི་གོས་རྣམས་འཆང་བར་གྱུར་པས་ཐམས་ཅད་དུ་ཡང་མིག་གི་རྒྱུ་བ་གཏོད་པར་བྱེད་དེ། མུ་སུ་ལུན་དྷ་ལྟ་བ་ལ་ཆེད་ཆེར་བྱེད་དོ། །ཤིན་ཏུ་འཐབ་བྲལ་གྱི་ས་རྣམ་པ་དུ་མ་སྣ་ཚོགས་པའི་རྒྱན་དང་ཆ་བྱད་ཅན་ཕན་ཚུན་དུ་སེམས་བསྟུན་པའི་བསམ་པ་ཅན་དེ་དག་
རྣམས་དེ་ལྟར་ལེགས་པར་མཐོང་བར་གྱུར་ནས་ཕྱིར་ཞིང་ཡང་འཇུག་པར་བྱེད་དེ། མུ་སུ་ལུན་དྷའི་ཕོ་བྲང་རྣམས་སུ་ལྷ་དེ་དག་ཇི་ལྟ་ཇི་ལྟར་རབ་ཏུ་འཇུག་པ་དེ་ལྟ་དེ་ལྟར་ཆེས་དགའ་བར་འགྱུར་བ་རྣམས་མཐོང་ངོ་། །རྣམ་པར་བཀྲ་བ་ཤིན་ཏུ་ལྷག་པ་རྣམས་ཀྱང་མཐོང་ངོ་། །མཆོག་ཏུ་
ངོ་མཚར་ཤིན་ཏུ་རྨད་དུ་གྱུར་པ་ཡོན་ཏན་དུ་མས་རྣམ་པར་བཀྲ་བར་བྱས་པའི་ཁང་བཟངས་དེ་དག་གི་ཉེ་འཁོར་རྣམས་དེ་དག་རྣམས་ཀྱིས་ཀུན་ཏུ་བལྟས་ནས་སླར་ཡང་འཐབ་བྲལ་གྱི་བདག་པོ་ལ་བལྟ་བར་འདོད་པས་གུས་པ་དང་བཅས་པས་ལྷ་རྣམས་འཇུག་པ་ན་དེ་དག་གིས་གཞན་ཡང་

གང་ལ་རྒྱལ་པོ་དེ་རྣམ་པར་སྤྱོད་པར་བྱེད་པའི་ལྷའི་བུ་མོ་གཞན་རྣམས་མཐོང་བ་ལ་ལྷ་དེ་ནི་ལུས་ལ་དཀྲིགས་མ་སྟོང་ཕྲག་བདུན་གྱིས་ཡོངས་སུ་བསྐོར་བའི་ལྷ་མོ་རྣམས་ནི་རྒྱན་དང་ཆ་བྱད་མཆོག་གིས་རབ་ཏུ་སྣང་བར་བྱས་པའི་ལུས་རྣམས་འོད་ཀྱི་ཕུང་པོ་གོས་ཀྱི་ཕྲེང་བ་འཕྱང་བ་དང་ཅོད་
པན་འཕྱང་བ། དཔུང་རྒྱན་དང་གདུབ་ཀོར་ལེགས་པར་བཅུག་པ་མེ་ཏོག་གི་ཕྲེང་བ་རྣམས་ལུས་ལ་བཏགས་པའི་ལྷའི་ལུས་ཀྱིས་རྣམ་པར་རྒྱུ་བ་དེ་དག་རྣམས་ཀྱིས་ཀུན་ནས་ཁྱབ་པར་འཐབ་བྲལ་བའི་མངའ་བདག་དེ་ཡོངས་སུ་བསྐོར་ནས་ལེགས་པར་གནས་པ་ནི་རི་རྣམས་ཀྱིས་རིའི་
རྒྱལ་པོ་རི་རབ་ལྷུན་པོ་བཞིན་དུ་དང་། མཚོ་རྣམས་ཀྱིས་རྒྱ་མཚོ་བཞིན་དུ་དང་། གཟའ་དང་། སྐར་མ་དང་། རྒྱུ་སྐར་རྣམས་ཀྱིས་ཟླ་བ་བཞིན་དུ་གྱུར་པས་དེ་ལྟར་ལྷ་དེ་རྣམས་ཀྱིས་འཐབ་བྲལ་གྱི་མངའ་བདག་ཡོངས་སུ་བསྐོར་ནས་ཤིན་ཏུ་གནས་སོ། །མཛེས་པར་གྱུར་པ་དེ་དག་
རྣམས་ཐམས་ཅད་ཀྱི་འོད་དེ་དག་ཀྱང་ཟླ་བ་བཞིན་དུ་དེ་ཡང་ལེགས་པར་གནས་སོ། །འོད་ཀྱི་ཕུང་པོ་ཨིན་དྲ་ནཱི་ལའི་རང་བཞིན་གྱི་མཆོག་ཏུ་གྱུར་པའི་སྟན་ཆེན་པོ་ལ་གནས་སོ། །སྟོང་ཕྲག་བརྒྱའི་ཀ་བ་རབ་ཏུ་གསལ་བའི་རིན་པོ་ཆེ་བདུན་གྱི་རང་བཞིན་ཀ་བ་རྣམ་པར་བཀྲ་བ་རིན་པོ་ཆེ་འབར་
བ་འདྲ་བས་མཛེས་པའི་ཁང་བཟངས་ལ་གནས་པར་བྱེད་པ་ན་ཁང་བཟངས་དེའི་གཟི་བརྗིད་ནི་ཇི་ལྟ་ཇི་ལྟར་ལྷ་གནས་པ་དེ་ལྟ་དེ་ལྟར་ཡངས་པར་འགྱུར་ཏེ། ཁང་བཟངས་འདི་རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པའི་ཁང་བཟངས་དེ་དག་གི་ཡང་ནང་ན་ཤིང་གང་དག་ཡོད་པ་དེ་དག་
རྣམས་ཀྱི་ཡལ་ག་དེ་དག་རྣམས་ལ་རྟག་ཏུ་མེ་ཏོག་རབ་ཏུ་རྒྱས་པས་དུས་དྲུག་ཏུ་ཆེས་མཆོག་ཏུ་འཛིན་པ་དང་། ཤིན་ཏུ་ལེགས་པར་འབྲེལ་པས་འབྲས་བུ་རྣམས་རྟག་པར་རྒྱུན་དུ་འཛིན་པའི་མཐོང་ན་མཛེས་པའི་རྩིག་ལོགས་རྣམས་ནི་རིན་པོ་ཆེ་བདུན་གྱི་ཚོན་གྱིས་རྣམ་པར་བཀྲ་བར་བྱས་
སོ། །དེ་ནས་ལྷ་ཤིན་ཏུ་འཐབ་བྲལ་ལ་སོགས་པ་ལྷ་དེ་དག་རྣམས་གང་ན་མུ་སུ་ལུན་དྷ་ཡོད་པ་དེ་དང་ཉེ་བར་འགྲོ་སྟེ། གར་དང་། གླུ་དང་། རོལ་མོའི་སྒྲ་རྣམས་ཀྱང་རྗེས་སུ་སྒྲོགས་པས་དགའ་བའི་ཡིད་བརྩོན་པས་གཅིག་ཏུ་རྒྱ་ཆེ་བའི་ལས་ཀྱི་འབྲས་བུ་ལ་ཤིན་ཏུ་ལོངས་སྤྱོད་པ། འོད་

དུ་མའི་ཕུང་པོ་འཐབ་བྲལ་གྱི་མངའ་བདག་མུ་སུ་ལུན་དྷ་དེ་དག་རྣམས་ཐམས་ཅད་ཀྱིས་མངོན་པར་མཆོད་ནས་གནས་ཇི་ལྟ་བའི་སྟན་ལ་གནས་པར་གྱུར་ཅིང་ཀུན་ནས་འདུན་པ་དེ་དག་རྣམས་ལ་ཀུན་དགའ་བ་དང་། ལེགས་པར་དགའ་བ་སྐྱེད་པའི་གཏམ་ཡང་བྱས་ནས་
ལྷའི་ཚོགས་འོངས་པ་ཐམས་ཅད་ལ་འདི་སྐད་དུ་སྨྲས་ཏེ། བདེ་བའི་ཕྱིར་ན་བག་མེད་པར་འགྱུར་བ་གསོན་པ་རྣམས་ཀྱང་ལེགས་པར་བསྲུང་བར་གྱིས་དང་། ཆོས་ཀྱང་ལེགས་པར་སྲུངས་དང་། ལྷ་རྣམས་རབ་ཏུ་ལྷུང་བར་གྱུར་ཏ་རེ། དེ་ལྟར་ན་ཡང་བདེ་བ་མཆོག་གི་མཐར་ཐུག་པའི་བདེ་
བ་རྣམས་འབྱུང་བར་འགྱུར་བ་ཡིན་ནོ། །བདེ་བས་རྣམ་པར་གནས་ནས་ཀྱང་མྱ་ངན་ལས་འདས་པའི་མཐར་ཡང་ཐུག་པ་ཡིན་ནོ། །ཀྱེ་ལུས་ཞིག་ནས་ཀྱང་ནམ་ཡང་སྡུག་བསྔལ་འབྱུང་བར་མི་འགྱུར་རོ། །ལྷ་རྣམས་བདེ་བར་གནས་པར་ཡང་འགྱུར་རོ། །དེ་ནས་ལྷ་དེ་དག་རྣམས་ཐམས་ཅད་
ལྷག་མ་མ་ལུས་པ་དང་ཡང་དག་པར་ལྡན་པ་རྣམས་ལ་མངའ་བདག་གིས་ཚིགས་སུ་བཅད་པ་བརྗོད་པ། ཇི་ལྟར། སྣ་ཚོགས་ཁམས་ཀྱི་འཇིག་རྟེན་འདི། །སྣ་ཚོགས་ལས་ཀྱི་དབང་རྗེས་འགྲོ། །སྣ་ཚོགས་འགྲོ་ལས་འཕོ་བའི་ལྷ། །གནས་འདིར་ཀུན་ནས་འོངས་པ་ཡིན། །
ཇི་ལྟར་འོངས་པ་དེ་ལྟར་སླར། །སྲིད་པ་གཞན་དུ་འགྲོ་བར་འགྱུར། །ཇི་སྲིད་སྐྱེ་བ་འདི་ཀུན་ཡོད། །ཇི་སྲིད་བློ་ནི་མ་ཉམས་པ། །དེ་སྲིད་བདེ་ལེགས་རབ་བརྩོན་པས། །བྱ་བ་རབ་ཏུ་བརྩོན་པ་ཡིས། །རིང་དུ་ལོངས་སྤྱོད་བདེ་བའི་མཆོག །ངེས་པ་ཁོ་ནར་ལྷུང་བའི་འཇིགས། །
ལྟུང་བ་ལས་ཀྱང་རྟག་པར་ནི། །སྡུག་བསྔལ་འབྱུང་བར་ཐེ་ཙོམ་མེད། །དེ་བཞིན་བདག་གིས་ཁྱེད་རྣམས་ལ། །འདིར་ནི་ཆོས་ལྡན་བཤད་པ་རྣམས། །དེ་དག་ཐམས་ཅད་འདིར་ཉོན་ལ། །ཇི་སྐད་དེ་བཞིན་གཤེགས་གསུངས་ཀྱིས། །དེ་ལྟར་འཐབ་བྲལ་གྱི་བདག་
པོས་ལྷ་དེ་དག་རྣམས་ཡོ་ལ་ཕན་པར་འདོད་པའི་ཕྱིར་འདི་དག་བརྗོད་དོ། །ཇི་ལྟར་བདེ་བ་རྣམས་ཀྱི་རྗེས་སུ་འགྲོ་བ་དང་། ཡུལ་གྱིས་ཀུན་ནས་རྨོངས་པའི་ཡང་ཕྱིར་ལྷ་རྣམས་རྣམ་པར་ངོམས་པ་མེད་པས་ཇི་ལྟ་བར་ཡོངས་སུ་ཉམས་ནས་ལྷ་རྣམས་འཇུག་པར་མི་འགྱུར་རོ། །

གལ་ཏེ་ཡུལ་འདི་དག་བདེ་བ་རྣམས་ཡིན་ན་ནི་འདི་དག་རྣམས་མི་རྟག་པ་དང་། མི་བརྟན་པ་དང་། ཤིས་པ་མ་ཡིན་པར་ཡང་མི་འགྱུར་བ་ཞིག་ན། ཇི་ལྟ་བ་བཞིན་དུ་རྗེས་སུ་ཉོན་དང་། གང་དག་ཡིན་པ་འདི་དག་རྣམས་མཐོང་བར་གྱུར་པ་རྣམས་ལ་ཡང་དག་པར་རྫོགས་པའི་སངས་
རྒྱས་དྲུག་པོ་རྣམས་ཀྱི་མཆོད་རྟེན་དྲུག་རིན་པོ་ཆེ་རྣམ་པ་སྣ་ཚོགས་པས་ཉེ་བར་མཛེས་པ་ལས་བྱས་པ་རྣམས་སོ། །དེ་དག་རྣམས་ནི་དེ་བཞིན་གཤེགས་པ་དྲུག་གིར་བྱས་པ་ཡིན་ལ་བྱས་པ་དེ་དག་རྣམས་ཀྱང་འདི་ལྟ་སྟེ། ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་དང་།
ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དང་། ཡང་དག་པར་རྫོགས་པའི་སངས་རྒྱས་གསེར་ཐུབ་དང་། ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་དང་། ཡང་དག་པར་རྫོགས་པའི་སངས་རྒྱས་འཁོར་བ་འཇིག་དང་། ཡང་དག་པར་རྫོགས་
པའི་སངས་རྒྱས་འོད་སྲུང་སྟེ། སྐུ་གདུང་དེ་དག་རྣམས་སྔོན་གྱི་ལྷ་རྣམས་ཀྱིས་བྱས་པར་གཞན་ལ་བདག་ཅག་གིས་རྣ་བས་ཐོས་ནས་ཀྱང་མཆོད་པར་བྱེད་དེ། བདག་ཅག་རྣམས་ཚེ་ཤིན་ཏུ་ཐུང་བའི་རྒྱུ་གང་གིས་དེ་བཞིན་གཤེགས་པ་རྣམས་དེ་དག་ཐམས་ཅད་ཀྱིས་མ་མཐོང་ངོ་། །འོན་ཀྱང་
བཅོམ་ལྡན་འདས་དེ་རྣམས་འཇིག་རྟེན་ལ་ཕན་པ་མཛད་པས་བརྩོན་པར་གྱུར་པ་དང་། དོན་བཞེད་པས་ལྷ་དེ་རྣམས་ལ་ཕན་པའི་དོན་དུ་ལྷའི་འཇིག་རྟེན་འདིར་བཞུགས་པར་གྱུར་ཏོ། །དེ་ལྟར་ཐོས་པ་བརྒྱུད་པས་ཡིན་གྱི་ཆོས་འདི་རྗེས་སུ་རྟོགས་པ་ནི་མ་ཡིན་ནོ། །དེ་ལ་བཅོམ་ལྡན་འདས་
འཁོར་བ་འཇིག་གཅིག་པུས་ཀྱང་འཐབ་བྲལ་བ་ལ་ཤིན་ཏུ་བར་ཡང་ཕན་པ་མཛད་པ་འདི་ལྟ་སྟེ། སྐུ་གདུང་གཅིག་ལས་ཀྱང་རྒྱུ་མཚན་ཤིན་ཏུ་ངོ་མཚར་ཆེ་བར་གྱུར་པའི་བློའི་ཡུལ་ལ་ངེས་པར་གནས་པ་རྣམས་ཇི་ལྟར་གང་གི་ཚེ་དགེ་སྦྱོང་རྣམས་ལ་མ་ཡིན་ཞིང་བྲམ་ཟེ་དང་སྐྱེ་དགུ་
རྣམས་ལ་ཡང་འབྱུང་བར་མི་འགྱུར་བ་སྟེ། དེའི་ཚེ་ལྷའི་ཕྱོགས་རྣམས་ཡོངས་སུ་ཉམས་ཏེ། ཡོངས་སུ་ཉམས་ནས་ཡང་སྐུ་གདུང་འདིར་སྤྲུལ་པ་རྣམས་མངོན་སུམ་དུ་མཐོང་བ་ནི་ལྷ་འཆི་འཕོ་བར་འགྱུར་བ་དང་། ཡོངས་སུ་ཉམས་པར་གྱུར་ནས་དེ་རྣམས་ཀྱིས་བདག་རང་ཉིད་

གཅིག་པུར་མཐོང་སྟེ། ཇི་ལྟར་འཇོམས་པ་ཡང་བག་མེད་པས་བག་མེད་པར་རྣམ་པར་གནས་པ་རྣམས་ལ་འགྱུར་ལ། འགྱུར་བ་ཡང་ཡུལ་རྣམ་པར་ཆགས་པའི་ཕྱིར་མཐོང་བ་མ་ཡིན་ལ། དེ་དག་བདག་ཉིད་ལ་གླུའི་སྒྲ་ཀུན་ནས་བསྒྲགས་པས་ཕན་པ་མ་
ཡིན་པ་རྣམས་ཕན་པར་འདོད་པའི་ཕྱིར་ན། ཇི་ལྟར་བག་མེད་པ་ཁྱེད་རྣམས་བག་མེད་པས་རྒྱུ་བས་ཀྱང་དུས་བྱེད་པར་གྱུར་ཏ་རེ། ལེགས་པར་བྱས་པ་འདི་ཟད་པར་འགྱུར་བས་དེ་དོན་མེད་པར་གྱུར་ཏ་རེ། ཇི་ལྟར་དེའི་རྒྱུ་མཚན་དུ་རྩོམ་པ་འདི་དག་བྱེད་པའི་དེ་བཞིན་གཤེགས་པ་དྲུག་གི་
མདོ་གང་དག་ཡིན་པ་ལུས་ཅན་རྣམས་ལ་ཕན་པའི་དོན་དུ་གསུངས་པ་དེ་དག་རྣམས་ཐམས་ཅད་ཀྱང་སྐུ་གདུང་དེ་དག་རྣམས་ཉིད་ལ་དེ་བཞིན་གཤེགས་པ་རྣམས་ཀྱིས་རྗེས་སུ་བྲིས་པ་ང་ལས་བློ་དང་ལྡན་པ་རྣམས་ཀྱིས་མཉན་པར་གྱིས་དང་། ལྷ་རྣམས་ཕྱིས་འཆི་བའི་དུས་ན་འགྱོད་
པར་གྱུར་ཏ་རེ། དེ་ནས་ལྷ་དེ་དག་རྣམས་ཀྱི་གཙོ་བོ་རྣམས་ཡིད་ཚིམ་པ་མེད་པ་དང་ལྡན་པའི་གུས་པས་ཐམས་ཅད་ཉིད་ཀྱང་ངེས་པར་གནས་པར་གྱུར་ལ། གང་གི་ཕྱིར་གུས་པ་ནི་ལྷའི་བདག་པོ་ལ་གུས་པ་དང་ཆོས་འདུལ་བ་ལ་ཡང་གུས་པས་བདེན་པ་མཐོང་བ་བཞིན་དུ་དེ་དག་
རྣམས་གནས་ཏེ་མི་གཡོ་བའི་ཡིད་ཀྱིས་སོ། །དེས་དེ་ལྟར་གདུལ་བྱ་རྣམས་ལེགས་པར་མངོན་པར་མཐོང་ནས་ཐམས་ཅད་ལ་འདི་སྐད་ཅེས་སྨྲས་སོ། །ཁྱེད་རྣམས་ཇི་ལྟ་བ་བཞིན་དུ་རབ་ཏུ་ཞུགས་པ་རྣམས་ཀུན་གྱི་དང་པོ་ཉིད་དུ་དེ་བཞིན་གཤེགས་པ་དང་པོའི་མཆོད་རྟེན་གཙུག་ཏོར་
ཅན་དེས་རྩིག་ངོས་ལ་མངོན་པར་བྲིས་པ་ནི་ཇི་ལྟར་དགེ་སློང་དག་ཆོས་བརྒྱད་པོ་འདི་དག་རྣམས་དགེ་བའོ་ཞེས་བྱ་བའི་མདོས་ལྷ་རྣམས་ལ་ཕན་པའི་དོན་དང་། བདེ་བ་དང་། དོན་བཞེད་པ་དང་། ཕ