Kinh tạng Tây Tạng (Kangyur Đại Học) — 070_མདོ་སྡེ།_ལ

ན་པར་གནང་བའོ། །དེ་ནས་དང་པོ་ཁོ་ནར་ལྷ་གང་ཉེ་བར་འགྲོ་བ་དེ་གཙོ་བོར་གྱུར་
པའི་མུ་སུ་ལུན་དྷ་དེ་དང་ལྷན་ཅིག་ཏུ་ལེགས་པར་ཞུགས་ནས་དེས་མཐོང་བ། བཅོམ་ལྡན་འདས་གཙུག་ཏོར་ཅན་གྱི་སྐུ་གཟུགས་བཻ་ཌཱུརྱའི་རང་བཞིན་དང་ཨིན་དྲ་ནཱི་ལའི་ཡང་རང་བཞིན་གྱི་གདན་ཆེན་པོ་ལ་ཉེ་བར་ཞུགས་པ་སྐྱིལ་མོ་ཀྲུང་ལེགས་པར་བཅས་པ་དེའི་རྩིག་ངོས་ལ་ཡང་

མདོ་མངོན་པར་བྲིས་པ་ཇི་ལྟར་བརྒྱད་པོ་འདི་ནི་དགེ་སློང་དག་ལྷ་དང་མི་རྣམས་ཀྱི་ཡང་དགེ་བའི་ཆོས་རྣམས་ཀྱི་བར་དུ་གཅོད་པ་ཡིན་ཏེ། དེ་ལ་བརྒྱད་པོ་གང་ཞེ་ན་འདི་ལྟ་སྟེ། དགེ་སློང་དག་དང་པོ་ཉིད་དུ་བག་མེད་པ་བག་མེད་པས་ཉེ་བར་བཅོམ་པའི་ལྷའམ། མི་རྣམས་
ཀྱང་རུང་སྟེ། གང་དགེ་བ་རྗེས་སུ་སྒྲུབ་པ་ན་འཇིག་རྟེན་གྱི་ཡང་མ་ཡིན་ལ་འཇིག་རྟེན་ལས་འདས་པའི་ཡང་མ་ཡིན་ཏེ། འཇིག་རྟེན་པའི་ནི་ལེ་ལོས་བག་མེད་པ་བག་མེད་པར་གནས་པས་ལས་ཀྱི་མཐའ་རྣམས་འགྲིབ་པར་འགྱུར་ཏེ། གང་མཛའ་བོ་ཡིན་པ་དེ་དག་རྣམས་ལ་མ་
བལྟས་པས་དེ་དག་ནི་བར་མར་གནས་པར་འགྱུར་རོ། །གང་ཡང་དགྲ་བོ་ཡིན་པ་དེ་དག་རྣམས་ནི་ཆེས་མི་བཟད་པར་གྱུར་ནས་གོ་སྐབས་དག་ཚོལ་ཞིང་གླགས་རྣམས་གཅོད་པར་འགྱུར་བས་བག་མེད་པ་དང་བག་མེད་པར་རྒྱུ་བ་དེ་དག་རྣམས་ཀྱི་ཡང་འཇིག་རྟེན་པའི་ཆོས་ཀྱི་ལས་ཀྱི་མཐའ་
རྣམས་དེ་བཞིན་དུ་འགྱུར་རོ། །དེ་ལས་ཀྱི་མཐའ་ཉམས་པ་དང་། དགྲ་བོ་རྣམས་ཕལ་ཆེ་བ་དང་། གཉེན་འབྲེལ་རྣམས་ཡོངས་སུ་ཉམས་པ་དང་། དབུལ་པོ་དང་གཞན་ཁ་དྲག་པར་ཡང་འགྱུར་རོ། །ཁ་ཉེན་པ་རྣམས་མཐར་ཐུག་པ་ནི་འདི་ཡིན་ཏེ། འདི་ལྟར་དབུལ་པོ་ཞེས་བྱ་བའོ། །
དབུལ་བས་དངངས་པའི་སྐྱེས་བུ་ནི་གྲོགས་བཤེས་དང་། གཉེན་བཤེས་དང་རྩ་ལག་རྣམས་དབང་ཆེ་བར་འགྱུར་རོ། །བརྣབ་སེམས་དང་། གནོད་སེམས་དང་། ལོག་པར་ལྟ་བ་རྣམས་རབ་ཏུ་ཕལ་ཆེ་བར་འགྱུར་རོ། །དེ་མི་དགེ་བ་སྤྱོད་པ་པོ་ཞེས་ཟེར་ནས་བློ་གྲོས་ངན་པ་དེ་ལ་ལྷ་
རྣམས་སྡང་བར་འགྱུར་ཏེ། ལྷ་རྣམས་ཐམས་ཅད་ཀྱིས་མི་དགེ་བ་སྤྱོད་པ་དེ་ཡོངས་སུ་སྤོང་བར་འགྱུར་ལ་སེམས་ཅན་འཚེ་བ་པོ་རྣམས་ཀྱིས་དེ་གཙེས་པས་དུས་བྱེད་པར་འགྱུར་རོ། །ཚོང་པ་ཡིན་པར་གྱུར་ན་ཡང་བག་མེད་པས་བག་མེད་པའི་སྤྱོད་པས་བར་སྐབས་སུ་ནོར་ཉམས་པར་འགྱུར་
རོ། །འདི་ན་བག་མེད་པས་དགེ་སློང་ངམ་གཞན་ཡང་རུང་སྟེ། དགེ་བསྙེན་རྣམས་ཀྱང་བསམ་གཏན་བྱེད་པ་ན་བརྩོན་པ་དང་ལྡན་པར་མི་འགྱུར་རོ། །ལུང་དུ་བསྟན་པའི་བསམ་གཏན་གྱིས་ཟག་པ་རྣམས་ཟད་པར་བྱེད་པ་ནི་མ་ཡིན་གྱི་ཟས་ཀྱི་རོ་རྣམས་འབའ་ཞིག་ལ་ཆགས་པས་ཟས་ཀྱི་

དུས་ལ་ཤིན་ཏུ་ཡང་ལྟའོ། །ཡིད་བདེ་བར་འགྱུར་བ་མ་ཡིན་གྱི། བག་མེད་པ་བག་མེད་པར་རྒྱུ་བ་དེ་དག་རྣམས་བརྒྱ་ཞིག་ལ་ཡང་སེམས་རབ་ཏུ་དང་བ་ཡོད་པ་མ་ཡིན་ནོ། །རོ་ལ་ཤིན་ཏུ་བརྐམ་པ་དང་ལྡན་པ་ཁྭ་ཏ་དང་སེམས་མཚུངས་པ་དང་ངང་ཚུལ་མཚུངས་པར་གྱུར་
པ་གང་གི་ཚེ་དེ་དག་བག་མེད་པ་རྣམས་སེམས་པ་ལ་རབ་ཏུ་བརྩོན་པ་དང་ལྡན་པར་འགྱུར་རོ། །དེ་འཁོར་རྣམས་འདུས་པའི་ནང་དུ་སོང་ངམ་མང་དུ་ཐོས་པ་རྣམས་ཀྱི་ནང་དུ་སོང་ན་ཤེས་རབ་ཆུང་བས་ཁ་ཉེན་པར་འགྱུར་རོ། །སྦྱིན་པ་པོ་དང་སྦྱིན་བདག་རྣམས་ལ་གཟི་བརྗིད་ཆུང་བར་ཡང་
འགྱུར་རོ། །མི་འཇིགས་པ་ཡོངས་སུ་ཉམས་པ་སྟེ། མི་འཇིགས་པ་རྣམས་ཀྱི་མཆོག་ནི་འདི་ལྟར་ཆོས་རྣམས་རྣམ་པར་འབྱེད་པའོ། །དབང་ཆུང་བ་རྣམས་ཀྱི་ཐ་མ་ནི་འདི་ལྟ་སྟེ། ཐོས་པ་ཉུང་བའོ། །ཁ་ཉེན་པ་དེ་བདག་ཉིད་ཀྱི་ཉེས་པ་རྣམས་ཀྱང་ངེས་པར་མི་ཤེས་སོ། །གཞན་
ལ་ཡང་བརྣབ་སེམས་དང་གནོད་སེམས་མང་བར་འགྱུར་ཏེ། དེ་ཡང་མང་དུ་ཐོས་པ་རྣམས་ལའམ། བླ་མ་རྣམས་ལའམ། དེ་ཡང་ན་སྦྱིན་པ་པོ་དང་སྦྱིན་བདག་སེམས་རབ་ཏུ་དང་བ་དང་དབང་པོ་རབ་ཏུ་རྒྱས་པ་རྣམས་ལ་སྟེ། བློ་དམན་པ་དེ་བག་མེད་པའི་ལས་མང་པོ་རྣམས་བྱས་པས་
ལུས་ཞིག་པ་ན་ཐབས་མ་ཡིན་པར་རྣམ་པར་ལྟུང་ནས་དམྱལ་བ་རྣམས་སུ་སྐྱེའོ། །བག་མེད་པ་བག་མེད་པས་གནས་པ་རྣམས་དེ་ལྟར་མི་རྣམས་བག་མེད་པས་འཇིག་རྟེན་དང་འཇིག་རྟེན་ལས་འདས་པའི་དོན་རྣམས་ཀྱི་བར་ཆད་བྱེད་པར་འགྱུར་རོ། །ཡང་དགེ་སློང་དག་ཇི་ལྟར་ན་
ལྷ་རྣམས་ཀྱི་བག་མེད་པས་བར་ཆད་བྱེད་པར་འགྱུར་ན། འདིའི་རང་བཞིན་ཉིད་ཀྱིས་ལྷ་འདི་དག་རྣམས་བག་མེད་པས་བག་མེད་པར་རྒྱུ་བའི་ལྷ་སྒྲ་དང་། རེག་བྱ་དང་། རོ་དང་། གཟུགས་དང་། དྲི་འདོད་པ། སྡུག་པ་ཡིད་དུ་འོང་བ་དེ་དག་གིས་བག་མེད་པས་བག་མེད་པར་
འགྱུར་བ་རྒས་པ་འོང་བར་འགྱུར་བ་མི་མཐོང་ངོ་། །རྒུད་པ་ཡང་མི་མཐོང་ངོ་། །ལེགས་པར་བྱས་པའི་ལས་རྣམས་ཟད་པ་རྣམ་པར་མི་དྲན་ནོ། །ཆོས་ལ་གོམས་པར་མི་བྱེད་དོ། །སངས་རྒྱས་དང་། ཆོས་དང་། དགེ་འདུན་རྣམས་ལ་གུས་པ་དང་བཅས་པ་མ་ཡིན་ནོ། །

དེ་དང་བྲལ་བའི་ཡིད་ཀྱིས་བག་མེད་པ་བག་མེད་པར་རྒྱུ་བ་སངས་རྒྱས་འབྱུང་བ་དང་བྲལ་བར་གྱུར་པ་མཐོང་བ་བག་མེད་པ་གོམས་པར་གྱུར་པ་སྲིད་པའི་གདུང་བའི་སྡུག་བསྔལ་ཆེན་པོ་ཉེ་བར་གནས་པ་རྣམས་ལ་འཆི་བའི་ལྟས་བྱུང་བའི་འབྲལ་བར་འགྱུར་བའི་སྡུག་བསྔལ་རབ་ཏུ་འབྱུང་
བས་བུད་མེད་རྣམས་ཀྱི་ཚོགས་ཀྱིས་ཡོངས་སུ་སྤངས་པར་གྱུར་པའི་འཇིགས་པ་ཆེན་པོ་ཉེ་བར་གནས་པ། འོབས་བཞིན་དུ་རབ་ཏུ་ལྷུང་བར་གྱུར་པ་ན་གང་དག་བཤད་པའི་ཡུལ་ལ་ཉེ་བར་སྤྱོད་པ་དེ་དག་གི་ཚོགས་པ་དེ་རྣམས་ཀྱང་ལན་བརྒྱར་ཡང་མི་མཐོང་བར་དེ་འཇིག་རྟེན་གཞན་
དུ་འགྲོ་བར་འགྱུར་ལ། དེ་དག་རྣམས་རྗེས་སུ་འགྲོ་བ་མ་ཡིན་པ་དང་འཆི་བའི་དུས་ན་བདེ་བ་རྣམས་ཤེས་པ་ཡང་མ་ཡིན་ནོ། །དབུགས་འབྱིན་པར་ཡང་མི་འགྱུར་རོ། །ཡུལ་དེ་དག་རྣམས་ནི་ཉམས་པ་ཡིན་ཞིང་ཡུལ་རྣམས་ནི་སྐྱུགས་པ་དང་རྣག་ཏུ་གྱུར་པའོ། །ཡང་སྲིད་
པར་ཀུན་ཏུ་སྐྱེད་པ་དང་། དེ་ལས་འབྱུང་བར་འགྱུར་བ་གང་ཡིན་པ་དེ་ནི་བག་མེད་པས་བག་མེད་པར་གནས་པས་བྱས་པའི་ལས་དེས་ཀུན་ནས་གནས་པས་སྲིད་པ་གཞན་དུ་འགྲོ་ཞིང་རྗེས་སུ་འགྲོ་སྟེ། དེ་ཡུལ་གྱི་སྲེད་པའི་ཟུག་ཟེར་གྱིས་བག་མེད་པས་དུས་བྱེད་པར་འགྱུར་རོ། །
ཡོངས་སུ་བཏང་ཞིང་ལྷ་ཐམས་ཅད་ཀྱིས་ཡོངས་སུ་བཏང་བ་དང་། ཀུན་ནས་སྐྲག་པ་དང་། ཡུལ་གྱིས་ཀུན་ནས་རྨོངས་པས་ཀྱང་དུས་བྱེད་དེ། དེ་དུས་ཀྱི་ཆོས་དང་ལྡན་པས་དམྱལ་བ་དང་ཡི་དགས་དང་། དུད་འགྲོ་རྣམས་སུ་སྐྱེའོ། །དེ་ལྟ་བས་ན་མིའམ་ལྷ་ཡང་རུང་སྟེ།
བག་མེད་པ་མི་བྱའོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་ཚིགས་སུ་བཅད་པ་བརྗོད་པ། ཇི་ལྟར། ལྷ་རྣམས་ཡུལ་གང་བདེ་བ་ཡིས། །རྟག་པ་ཉིད་དུའང་སྟེན་བྱེད་པ། །དེ་ནི་ཉམས་དང་དེ་ནས་ཀྱང་། །ལས་རྣམས་འགྲོ་ཞིང་རྗེས་སུ་འགྲོ། །བདེ་བ་རྣམས་
ལ་བསགས་པ་མེད། །ལས་རྣམས་ལ་ནི་བསགས་པ་ཡོད། །བདེ་བ་ཡིས་ནི་རྨོངས་པའི་ལྷ། །ལས་རྣམས་ཀྱི་ནི་དབང་གིས་འགྲོ། །ད་ལྟར་བ་ཡི་ཡུལ་གྱི་བདེ། །དེ་ནི་དགེ་བ་བྱེད་མིན་པས། །ཡུལ་རྣམས་ཀྱིས་ནི་ལེགས་སྐོམ་ལྷ། །དེ་བཞིན་རྣམ་པར་གཡེང་ཡིད་ཅན། །

འཁོར་བའི་ནད་ཀྱི་སྨན་གྱུར་པ། །བདེ་བའི་ལས་ནི་རྟོགས་མ་ཡིན། །གླིང་ཉིད་དང་ནི་སྐྱོབ་བཞིན་དང་། །དེ་བཞིན་དུ་ནི་སྐྱབས་ཉིད་བཞིན། །ལེགས་པར་བྱས་པ་སྐྱེ་གཞན་དུ། །ལུས་ཅན་རྣམས་ཀྱི་རྒྱབ་ན་གནས། །དེ་ཕྱིར་རྟག་པར་རབ་འབད་པས། །ལྷ་རྣམས་
ཀྱིས་ནི་རྟག་བསྟན་བྱ། །ཡུལ་རྣམས་སྤོང་བར་བྱེད་པ་དང་། །བསོད་ནམས་རྟེན་པ་བཟང་པོ་ཡིན། །གང་ཡང་མ་འོངས་པ་ཡི་སྲིད། །བློ་ཡིས་མིག་གིས་མཐོང་བ་ནི། །དེ་ནི་མཁས་ཡིན་རྟག་ཏུ་མཛེས། །ལྟུང་བ་འཇིགས་པའི་རྩ་བ་པོ། །རྣམ་པར་འཕྲུལ་སྐྱེས་འཇིགས་རྟག་
འདི། །ལེགས་པར་བློ་ལྡན་གྱིས་ནི་མཐོང་། །དེས་ནི་བྲལ་བའི་དམན་ཐོབ་ནས། །མི་བཟད་པས་ནི་འཆིང་བ་ཡིན། །འོན་ཀྱང་རྟག་ཏུ་བློ་རྨོངས་པས། །ཡུལ་ཉིད་ཁོ་ན་སྟེན་པར་བྱེད། །ཡུལ་རྣམས་ཀྱིས་ནི་རྣམས་རྨོངས་པ། །ཕྱི་ནས་གདུང་བས་སྲེག་པར་བྱེད། །ཇི་སྲིད་སྐྱེ་བ་
འདི་ཀུན་དང་། །ཇི་སྲིད་ཤེས་པ་མ་ཉམས་པ། །དེ་སྲིད་དུ་ནི་བསོད་ནམས་ཀྱིས། །བསོད་ནམས་མ་བྱས་སྡུག་བསྔལ་ཡིན། །དེ་ལྟར་མུ་སུ་ལུན་དྷ་དེ་ལྷ་དེ་རྣམས་ལ་བཅོམ་ལྡན་འདས་གཙུག་ཏོར་ཅན་གྱིས་གསུངས་པའི་རྩིག་ལོགས་ལ་བྲིས་པའི་ཚིགས་སུ་བཅད་པ་བཤད་དོ། །གཞན་ཡང་
རབ་ཏུ་སྟོན་པར་བྱེད་དོ། །གང་རྩིག་ལོགས་ལ་ཆོས་བརྒྱད་པོ་འདི་རྣམས་ཏེ། དེ་དག་གིས་བག་མེད་པ་རབ་ཏུ་བརྗོད་ནས་ཆོས་བདུན་བདག་གིས་བཤད་པར་བྱ་སྟེ། བདུན་པོ་རྣམས་གང་ཞེ་ན། བག་མེད་པར་གྱུར་པ་དེ་ནི་རྒྱུན་མི་འཆད་པར་རྒྱགས་པར་འགྱུར་རོ། །བག་མེད་པ་ལ་
སྤྱོད་པའི་སྐྱེས་བུ་རྣམས་ནི་སྨྱོན་པར་འགྱུར་ཏེ། བག་མེད་པའི་ལྷ་དང་མི་རྣམས་ནི་རྟག་ཏུ་ཡང་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་ཀྱི་བར་ཆད་བྱེད་པར་འགྱུར་རོ། །དེ་ལ་ཇི་ལྟར་ན་འཇིག་རྟེན་པའི་དོན་རྣམས་ཀྱི་བར་ཆད་བྱེད་པར་འགྱུར་བ་དང་། འཇིག་རྟེན་ལས་
འདས་པ་རྣམས་ལ་ཡང་སྟེ། འདི་ནི་བག་མེད་པའི་སྐྱེས་བུ་རྣམས་ནི་རྣམ་པར་གཡེང་བའི་བློ་ཅན་དུ་འགྱུར་རོ། །བློ་སྔོན་དུ་བཏང་བས་ཀྱང་དོན་ཐམས་ཅད་ལ་ལོག་པར་འཇུག་པ་ཡིན་ནོ། །དེ་ལྟར་རྒྱགས་པའི་སྐྱོན་རྣམས་ཀྱིས་རྣམ་པ་ཐམས་ཅད་དུ་རབ་ཏུ་མཛེས་པ་མ་ཡིན་ནོ། །ཆེས་

མང་བར་ཕན་པ་མ་ཡིན་པ་རྣམས་དང་། བདེ་བ་མ་ཡིན་པ་རྣམས་དང་། དོན་འགའ་ཞིག་དང་ཡང་ལྡན་པར་འགྱུར་བ་མ་ཡིན་ནོ། །ཇི་ལྟར་འཇིག་རྟེན་ལས་འདས་པའི་ཆོས་འདུལ་བ་ལ་རྒྱགས་པ་ཉེས་དམིགས་ཆེན་པོ་དང་ལྡན་པར་འགྱུར་བ་ཡིན་ཞིང་ཇི་ལྟར་གཞན་ཡང་རྒྱགས་པས་འདི་
ན་མི་རྣམས་ཀྱི་བར་ཆད་བྱེད་པར་འགྱུར་ན། དེ་ལ་མི་རྣམས་དང་རབ་ཏུ་བྱུང་བ་རྣམས་ལ་ཡང་ཤིན་ཏུ་བར་ཡང་བག་མེད་པ་རྣམ་པ་ཐམས་ཅད་དུ་ཡང་རྣམ་པར་སྨད་པར་བྱ་བར་འགྱུར་བ་ཡིན་པ་ནི་འདི་ལྟ་སྟེ། འདིར་ཆོས་འདུལ་བ་འདི་ལ་རྒྱགས་པ་དང་བྲལ་བ་རྣམ་པ་ཐམས་ཅད་དུ་རྣམ་
པར་མཛེས་ལ་བག་མེད་པ་དང་ཀུན་ནས་ལྡན་པ་ནི་མ་ཡིན་ནོ། །རྒྱགས་པའི་སྐྱོན་དང་ཀུན་ཏུ་ལྡན་པ་དེ་བསམ་གཏན་མི་བྱེད་དོ། །བྱ་གཞག་གི་བྱ་བར་གྱུར་པ་འགྲོ་བ་དང་འོང་བའི་གནས་ལ་ལེགས་པར་སྤྱོད་པ་མ་ཡིན་ནོ། །སྤྱོད་ཡུལ་ལ་མི་སྟེན་སྦྱིན་བདག་དང་སྦྱིན་པ་པོ་རྣམས་རྗེས་
སུ་སྒྲུབ་པ་ལ་བརྩོན་པ་མ་ཡིན་གྱིས། སྟན་དང་མལ་སྟན་རྣམས་འབའ་ཞིག་ལ་གནས་པའི་རང་བཞིན་ཅན་དུ་འགྱུར་རོ། །དེ་ཚུལ་བཞིན་མ་ཡིན་པ་ཡིད་ལ་བྱེད་པ་འབའ་ཞིག་གིས་ཁྱེར་བར་བྱེད་དོ། །དེ་ལུས་ཞིག་པ་ན་ཤི་བའི་འོག་ཏུ་དམྱལ་བ་རྣམས་སུ་སྐྱེའོ། །དེ་ལྟར་མི་
རྣམས་ཀྱི་འཇིག་རྟེན་པའི་ལམ་མམ། འཇིག་རྟེན་ལས་འདས་པའི་ལམ་ལ་ཡང་རབ་ཏུ་མཛེས་པ་མ་ཡིན་པའི་རྒྱགས་པ་བདུན་པོ་འདི་དག་རྣམས་ཡིན་པ་ལ་འདི་ལྟ་སྟེ། གཟུགས་ཀྱིས་རྒྱགས་པ་དང་། ནོར་གྱིས་རྒྱགས་པ་དང་། རིགས་ཀྱིས་རྒྱགས་པ་དང་། རྒྱན་དང་ཆ་
བྱད་ཀྱིས་རྒྱགས་པ་དང་། རྒྱལ་པོས་མཆོད་པས་རྒྱགས་པ་དང་། བུད་མེད་དང་འཁྱུད་འཕྱང་གིས་རྒྱགས་པ་དང་། གཞན་གྱི་བུ་མོའི་དབང་དུ་བྱས་ནས་སེམས་རྣམ་པར་གཡེང་བས་རྒྱགས་པ་རྣམས་སོ། །རྒྱགས་པ་དེ་དག་ནི་རྒྱགས་པ་རྣམས་མདོར་བསྡུས་པ་ཡིན་
ནོ། །རྒྱགས་པ་རྣམས་ནི་དགྲ་ཡིན་ནོ། །རྒྱགས་པ་ནི་ལྷག་མ་ཡིན་ནོ། །རྒྱགས་པ་ནི་ཆོས་རྣམས་ཐམས་ཅད་ཀྱི་ཡང་བར་དུ་གཅོད་པར་འགྱུར་བ་ཡིན་ནོ། །འདི་ན་མི་རྣམས་རྒྱགས་པ་ནི་ཚད་དང་ལྡན་པའི་ལོངས་སྤྱོད་དང་གསོན་པ་རྣམས་ཉུང་ཟད་ཀྱི་རང་བཞིན་ལ་རྣམ་

པར་སྤྱོད་ཀྱང་རྒྱགས་པ་ཡིན་ནོ། །ཡང་ལྷ་རྣམས་ཀྱི་རྒྱགས་པ་འདི་དག་ཅི་འདྲ་བར་འགྱུར། དེ་རྣམས་འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་ལ་སྤྱོད་པ་ཉིན་མཚན་དུ་རབ་ཏུ་འཕེལ་བ་ནི་རྒྱགས་པ་བག་མེད་པའི་རང་བཞིན་ཅན་དེ་དག་
རྣམས་ཚེའི་འདུ་བྱེད་རྣམས་ཡོངས་སུ་ཉམས་པར་འགྱུར་བའི་བློ་ནི་མེད་ཀྱི་རྒྱགས་པ་འབའ་ཞིག་དང་། རྒྱགས་པའི་ལྷག་མ་ཅན་དང་། རྒྱགས་པས་ཆོས་རྣམས་ཐམས་ཅད་ཀྱི་བར་དུ་གཅོད་པར་འགྱུར་རོ། །ལུས་འཇིག་པ་ལ་ཤེས་པ་རབ་ཏུ་མི་འཇུག་པ་དང་། ཚེའི་འདུ་བྱེད་
རྣམས་ཟད་པ་ལ་ཡང་སྟེ། དེ་དག་དགེ་བ་དང་མི་དགེ་བའི་ལས་རྣམས་ཀྱིས་དུས་དེ་སྲིད་དུ་རྒྱགས་པར་འགྱུར་རོ། །སྒྲུབ་པར་བྱེད་པ་ཡང་མ་ཡིན་ནོ། །དེ་དེ་དག་རྣམས་ཟད་པར་འགྱུར་བར་ཕྱིས་ངེས་པར་ལྟུང་བར་འགྱུར་བ་ན་ངེས་པར་རྟོགས་པར་འགྱུར་ཏེ། ཀྱེ་མ་ཡུལ་རྣམས་ཀྱིས་
བདག་བསླུས་སོ། །ཀུན་ནས་ཉོན་མོངས་པ་རྣམས་ཀྱིས་རྟག་ཏུ་བསླུས་པ་རྣམས་ནི་ལུས་ཞིག་ནས་ཐབས་མ་ཡིན་པས་ལོག་པར་ལྟུང་བ་དམྱལ་བའམ། ཡི་དགས་ཀྱི་ལུས་དང་། དུད་འགྲོའི་སྐྱེ་གནས་རྣམས་སུ་སྐྱེ་བར་འགྱུར་ཏེ། དེ་ལྟར་འཇིག་རྟེན་པའི་ལས་ལ་བག་མེད་པ་
རྣམས་སྨད་པར་བྱ་བར་འགྱུར་རོ། །ཇི་ལྟར་ཡང་ལྷ་དག་འཇིག་རྟེན་ལས་འདས་པའི་ལམ་ལ་རྒྱགས་པ་རྣམ་པར་སྨད་པ་ཡིན་ཞེ་ན། ལྷ་གང་དག་ཡིན་པའི་ལྷ་རྣམས་ཐམས་ཅད་ཀྱང་འདོད་པ་དང་། སྡུག་པ་དང་། ཡིད་དུ་འོང་བས་ལེགས་པར་བྱས་པའི་ལས་ཀྱི་རྒྱུ་རྣམས་ཀྱིས་
འཐབ་བྲལ་གྱི་ལྷ་འདི་རྣམས་ཀྱི་ནང་དུ་སྐྱེས་ལ་དམ་པའི་ཆོས་འདུལ་བ་ལ་དེ་བག་མེད་པར་གྱུར་ནས་དེས་རང་གིས་བྱས་པའི་ལས་རྣམས་མི་རྟོགས་སོ། །གང་དག་ཆེས་ལྷག་པར་རྒྱགས་པས་གནས་པར་མ་གྱུར་པ་རྣམས་དེ་ཡང་མི་སྟེན་པ་དང་། གང་དག་རྣམ་པ་ཐམས་ཅད་དུ་བག་
མེད་པས་རྣམ་པར་རྒྱུ་བ་མ་ཡིན་པ་དེ་དག་རྣམས་ལ་ཡང་སྟེན་པར་མི་བྱེད་ལ་སངས་རྒྱས་དང་། ཆོས་དང་། དགེ་འདུན་རྣམས་ལ་ཡང་ལྟ་བར་བྱེད་པའི་རང་བཞིན་ཅན་དུ་མི་འགྱུར་ཞིང་དམ་པའི་ཆོས་འདུལ་བ་རྣམས་ལ་སྒྲུབ་པར་མི་བྱེད་པ་དང་། ཇི་ལྟ་བ་བཞིན་དུ་འཇུག་པར་ཡང་མི་བྱེད་

དོ། །དེ་ལྟར་དེ་ལམ་རྣམས་ལ་སློབ་པའི་རང་བཞིན་ཅན་དུ་མི་འགྱུར་རོ། །རྟེན་ཅིང་འབྲེལ་པར་འབྱུང་བ་རྣམས་ལ་རྣམ་པར་ལྟ་བ་ལ་གཙོ་བོར་བྱེད་པར་མི་འགྱུར་རོ། །བླ་མ་ལ་ཉེ་བར་བསྟེན་པར་མི་བྱེད་དོ། །ལྷ་ཡེ་ཤེས་ལ་གོམས་པར་བྱེད་པའི་རང་བཞིན་ཅན་དང་ཉེ་བར་བསྟེན་པར་ཡང་
མ་ཡིན་ནོ། །དེ་ནི་འདོད་པ་རྣམས་ཀྱིས་བསླུས་ནས་ཡུལ་གྱིས་རྣམ་པར་ཉམས་པར་བྱས་ཏེ། བདག་ཅག་གི་ལྷའི་རིས་ནས་འཆི་འཕོ་བར་འགྱུར་ལ་འཆི་འཕོ་བའི་དུས་ན་ཡང་ཤིན་ཏུ་རབ་ཏུ་འགྱོད་པར་འགྱུར་རོ། །དེའི་ཕྱིར་ན་མེ་བཞིན་དང་སྦྲུལ་བཞིན་དུ་ལྷ་དང་མི་རྣམས་ཀྱི་རྒྱགས་
པ་རྣམས་ཡོངས་སུ་སྤང་བར་བྱའོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་ཚིགས་སུ་བཅད་པ་གསུངས་པ་ཇི་ལྟར། དང་པོ་བག་མེད་པས་ཉེར་བཅོམ། །རྒྱགས་པ་ཡིས་ཀྱང་རྣམ་པར་རྨོངས། །ལྷ་རྣམས་སམ་ནི་སྐྱེས་བུ་ཡང་། །དེ་ནི་ཞི་བའི་ཐབས་མ་ཡིན། །
གང་ཞིག་རྒྱགས་པ་མི་སྒྲུབ་པ། །སྐྱེས་བུ་འཆི་བ་མེད་པ་ཡིན། །རྒྱགས་པའི་སྐྱོན་གྱིས་ངེས་ཟིན་པའི། །མི་རྣམས་ཐམས་ཅད་དམྱལ་བར་ལྟུང་། །དམ་པ་མིན་པའི་ལམ་སྤྱོད་སྐྱོན། །རྒྱགས་པ་ཞེས་བྱར་འདིར་བརྗོད་དོ། །རྒྱགས་པ་ཡིས་ནི་རྨོངས་པའི་བློ། །ལྷ་ནི་དམྱལ་བར་འགྲོ་
བ་ཡིན། །ཡང་དག་མིན་ལ་དགའ་བར་བྱེད། །ཡང་དག་འགྱུར་བ་ནམ་ཡང་མིན། །རྒྱགས་པའི་མུན་པས་བསྐོར་བ་ཡིན། །ལྷ་རྣམས་འདོད་པས་རྨོངས་པ་ཡིན། །འདོད་པ་ཡིས་ནི་ལྷ་རྣམས་རྨོངས། །རྒྱགས་པ་ཡིས་ཀྱང་དེ་བཞིན་ཏེ། །དམུས་ལོང་བཞིན་དུ་དམ་པའི་ལས། །དེ་
ཉིད་རྗེས་སུ་མཐོང་བ་མིན། །དེ་ལྟར་བཅོམ་ལྡན་འདས་གཙུག་ཏོར་ཅན་གྱིས་བག་མེད་པ་དང་། རྒྱགས་པ་ཡང་འཇིག་རྟེན་པ་དང་འཇིག་རྟེན་ལས་འདས་པའི་ཚིག་རྣམས་ཀྱིས་བསྟན་ནས་གཞན་འདིའི་གསུམ་པ་སྡོམ་པ་མ་ཡིན་པའི་སྐྱོན་ཡང་དག་པར་སྟོན་པ་སྐུ་གདུང་ལ་གནས་པ་རྣམས་
ལ། དེ་ནས་འཐབ་བྲལ་གྱི་བདག་པོ་མུ་སུ་ལུན་དྷས་ལྷ་དེ་རྣམས་ལ་གང་དག་ལུས་ཀྱིས་བྱས་པ་མཆོད་རྟེན་ལས་སྟོན་ནོ། །འདི་ལྟ་སྟེ་སྡོམ་པ་མ་ཡིན་པ་རྣམས་སོ། །སྡོམ་པ་མ་ཡིན་པ་ཡང་སྐྱོན་ཆེན་པོ་གསུམ་གྱིས་ལྷ་རྣམས་དང་མི་རྣམས་ལ་ཡང་ཕན་པར་འགྱུར་བ་མ་ཡིན་ནོ། །

འཇིག་རྟེན་པའི་ལས་དང་འཇིག་རྟེན་ལས་འདས་པའི་ལས་ལ་ཡང་རྣམ་པ་ཐམས་ཅད་དུ་མ་ཡིན་ནོ། །དེ་ལ་སྡོམ་པ་མ་ཡིན་པས་མི་རྣམས་ཀྱི་བར་དུ་གཅོད་པར་འགྱུར་བ་གང་ཡིན་ན་འདིར་འཇིག་རྟེན་པའི་སྡོམ་པ་རྣམས་བླངས་ནས་རང་བཞིན་གྱིས་མཆོག་ཏུ་རྨོངས་
པས་དོན་དང་དོན་མ་ཡིན་པ་མི་ཤེས་ལ། གནས་དང་གནས་མ་ཡིན་པ་རྣམས་ཀྱང་མི་ཤེས་སོ། །ལེགས་པར་གནས་པར་བྱས་ནས་ཀྱང་རང་གི་སྐྱེ་བོ་དང་། གཉེན་འདུན་དང་ལྷན་ཅིག་ཏུ་དགའ་བར་བྱེད་དོ། །རྩི་བགྲང་མེད་པར་རང་གི་སྐྱེ་བོ་དང་། གཉེན་འབྲེལ་རྣམས་དང་ལྷན་
ཅིག་ཏུ་བརྟན་པར་གནས་པར་བྱེད་དོ། །བྱས་ནས་ཀྱང་སྡོམ་པ་ཡོངས་སུ་འཛིན་པར་མི་འགྱུར་རོ། །དེ་ལེགས་པར་གནས་པ་ལས་ཉམས་པས་ཁ་ཉེན་པར་འགྱུར་རོ། །རང་གི་སྐྱེ་བོ་དང་གཉེན་འབྲེལ་ཐམས་ཅད་ཀྱིས་སྐྱུག་བྲོར་ལྟ་བར་བྱེད་དོ། །གང་གི་མིང་གིས་ལེགས་པར་
གནས་པ་སྡོམ་པ་བརྟན་པོ་རྣམས་ཇི་ལྟ་བ་བཞིན་དུ་ཡོད་དེ་ཞེས་རྗོད་པར་ཡང་བྱེད་དོ། །སྔགས་ཀྱི་སྡོམ་པ་རྣམས་སམ། ལེགས་པར་གནས་པར་བྱ་བ་རྣམས་ལ་ཡང་རུང་སྟེ། དེ་ཉིད་ཀྱི་བློས་རང་གི་སྐྱེ་བ་རྣམས་མི་འཇུག་གོ། །རང་གི་ཕ་དང་རང་གི་ཁྱིམ་དུ་བྱ་བ་དག་གིས་
ལེགས་པར་འདྲེས་པར་བྱས་པ་གང་ཡིན་པས་ངལ་སོས་པར་གྱུར་པ་ཞེས་ནས་སོ། །སེམས་སྟོབས་ཡང་བ་དེ་རྒྱུ་དེ་དང་། གཞི་དེ་ལས་དང་། དེ་ཡོངས་སུ་འཛིན་པས་གང་ཡང་འདིའི་གྲོགས་པོར་གྱུར་པ་དེ་དག་རྣམས་ཐམས་ཅད་ཀྱང་ཁ་ཕྱིར་ཕྱོགས་པར་འགྱུར་རོ། །གཞན་པ་རྣམས་
ལས་གང་དག་གྲོགས་པོ་མ་ཡིན་པ་དེ་དག་རྣམས་ནི་བཟང་པོར་གྱུར་པ་རྗེས་སུ་རྟོགས་སོ། །གང་དག་བར་མའི་ཚོགས་སུ་གནས་པར་གྱུར་པའི་སྐྱེས་བུ་དེ་དག་རྣམས་ནི་རྟག་ཏུ་ཡང་ཕྱོགས་མ་ཡིན་པར་འགྱུར་རོ། །རླུང་གིས་ཉེ་བར་བཅོམ་པའི་ལྗོན་པ་རྩ་བ་གཏན་ནས་བཅད་པ་བཞིན་དུ་
ལྟུང་ལ། དེ་ལྟུང་བས་ཀྱང་རྫས་རྣམས་དང་། ཕུན་སུམ་ཚོགས་པ་དང་། རང་གི་སྐྱེ་བོ་རྣམས་དང་། གཉེན་འབྲེལ་རྣམས་གཏོང་ངོ་། །རང་བཞིན་གྱིས་ཀྱང་འགྱུར་ལྡོག་ཅན། རྩབ་ཧྲབ་ལ་གནས་པའི་སེམས་མི་བགྲུངས་པར་འགྱུར་རོ། །དེ་སྐྱེ་བོ་ཐམས་ཅད་ལ་བརྣབ་

སེམས་དང་གནོད་སེམས་མང་བར་འགྱུར་རོ། །ཕྱིན་ཅི་ལོག་ཏུ་དོགས་པ་འཆལ་བ་དང་། ཡོངས་སུ་རྟོག་པ་དང་། བློ་གདུག་རྩུབ་ཅན་དུ་འགྱུར་རོ། །དེ་སེམས་ཅན་ཐམས་ཅད་ལ་ཞེ་འགྲས་པ་དང་། གནོད་སེམས་དང་། ང་རྒྱལ་དང་། བཞིན་རྣམ་པར་འགྱུར་ཞིང་གདུག་པ་དང་།
རང་གི་ཡིད་རྣམ་པར་གཡེང་བ་དང་། དབུལ་བར་འགྱུར་རོ། །དེ་སྡོམ་པ་མ་ཡིན་པའི་རྒྱུས་དེ་དག་རྣམས་ཀྱིས་ལུས་ཞིག་ནས་ཤི་བའི་འོག་ཏུ་ཐབས་མ་ཡིན་པར་ལྷུང་ནས་དམྱལ་བར་སྐྱེ་བར་འགྱུར་རོ། །དེའི་ཕྱིར་ན་རྟག་ཏུ་ཕན་པར་འདོད་པའི་སྐྱེས་བུས་སྡོམ་པ་འཇིག་རྟེན་པ་རྣམས་ཀྱང་བསྲུང་
བར་བྱའོ། །སྡོམ་པ་ལ་གནས་པའི་རྒྱུ་དེས་ཡིད་ཤིན་ཏུ་བརྟན་པར་འགྱུར་རོ། །སེམས་ཀྱི་རྒྱུད་ཤིན་ཏུ་བཟང་བར་ཤེས་ནས་ཀྱང་གྲོགས་པོ་རྣམས་ཀྱིས་ཀྱང་ཡིད་ཆེས་པར་འགྱུར་རོ། །མཆོག་ཏུ་གསང་བར་གྱུར་པའི་རྒྱལ་པོའི་དོན་མཆོག་ཏུ་རྒྱ་ཆེ་བའི་རིན་པོ་ཆེ་རྣམས་སམ། གསེར་དང་རྫས་
ཀྱི་རིགས་གཞན་རྣམས་ལ་ཡང་རུང་སྟེ། སྡོམ་པའི་སེམས་དང་ལྡན་པ་ལ་ཀུན་གཏོད་པར་བྱེད་དོ། །བྱས་ནས་ཀྱང་ཞེ་སྡང་བ་རྣམས་ཀྱིས་དེ་དག་ཇི་ལྟ་བ་བཞིན་དུ་སྡོམ་པར་བྱེད་པ་རྣམས་ལ་གནོད་པ་བྱ་བར་ཡང་མི་ནུས་སོ། །གྲོས་བློ་རྣམས་ཀྱིས་ཀྱང་སྡོམ་པ་འཇིག་པར་མི་བྱེད་ལ། རང་
གི་སྐྱེ་བོ་དང་། གྲོགས་པོ་དང་། ཡིད་འཐུན་པ་རྣམས་ཀྱིས་ཀྱང་འཇིག་པར་མི་བྱེད་ཀྱི་ལེགས་པར་གནས་པ་དང་ལྡན་པ་དེ་ལ་གཉེན་བཤེས་ཀྱི་སྐྱེ་བོ་རྣམས་ཀྱིས་མཆོད་པར་བྱེད་དོ། །ཡིད་ཆེས་པའི་གནས་སུ་འགྱུར་རོ། །སློབ་དཔོན་བཞིན་དུ་ཡང་སློབ་དཔོན་རྣམས་ཀྱིས་ཀྱང་ལེགས་
པར་སྒྲུབ་པར་བྱེད་དོ། །སྡོམ་པ་བདུན་འཛིན་པ་རྣམས་ནི་རྒྱལ་པོས་ཀྱང་མཆོད་པར་བྱེད་དོ། །གྲོགས་པོ་དང་། སྐྱེ་བོ་དང་། གཉེན་བཤེས་རྣམས་ཀྱིས་ཀྱང་དེ་བཞིན་ཏེ། དེ་ལ་སྐྱེ་བོ་ཐམས་ཅད་ཀྱིས་ཕུན་སུམ་ཚོགས་པར་རྫས་སྒྲུབ་པར་བྱེད་དོ། །འདི་ལ་ཡང་དོན་མ་ཡིན་པ་
ཅུང་ཟད་ཙམ་ཡང་བྱ་བར་མི་ནུས་སོ། །དེ་མཆོག་ཏུ་ནོར་དང་ལྡན་པར་འགྱུར་རོ། །དེ་རྫས་རྣམས་ཕུན་སུམ་ཚོགས་པས་སྦྱིན་པ་ནི་གཏོང་བར་བྱེད་དོ། །བསོད་ནམས་དག་ནི་བྱེད་དོ། །གཅིག་ཏུ་ལེགས་པར་གནས་པའི་བློ་ཉམས་པ་མེད་པའི་རྒྱུ་དེ་དག་དང་གླེང་གཞི་དེ་ལས་ལུས་ཞིག་

ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་ལྷ་རྣམས་སུ་སྐྱེའོ། །དེ་དེ་ལྟར་རང་བཞིན་གྱིས་ཀྱང་མ་བསྡམས་པར་གྱུར་ཅིང་གཞན་རྣམས་ཀྱིས་ཀྱང་རྣམ་པར་སྨད་པ་རྣམས་ནི་ཕལ་ཆེ་བར་ཡང་འཇིག་རྟེན་ལས་འདས་པའི་ལས་བློ་གཡོ་བ་དང་བཅས་པའི་བློ་
གར་ཡང་གནས་པུ་མེད་པ་ལས་དང་འབྲས་བུའི་རྣམ་པར་སྨིན་པ་རྣམས་ལ་ལྡོངས་པ་རྣམས་ནི་སྡོམ་པ་མེད་པའི་ཁྱིམ་རྣམས་སུ་སྐྱེ་བར་འགྱུར་བའམ་དེ་ཡང་ན་རྐྱེན་དེས་སྡོམ་པ་གཅིག་ཀྱང་མེད་པར་གྱུར་ལ། ཇི་ལྟར་དགེ་སློང་གི་ཆ་བྱད་འབའ་ཞིག་ཙམ་འཛིན་པ་དུང་གི་སྒྲ་དང་མཚུངས་
པར་ཀུན་ན་སྤྱོད་པ། སྡོམ་པ་ལ་བསྙད་ནས་སྦྱིན་པ་པོ་དང་སྦྱིན་བདག་རྣམས་སླུ་བར་བྱེད་དོ། །སངས་རྒྱས་བཅོམ་ལྡན་འདས་ཀྱི་སྡོམ་པ་ཇི་ལྟ་བར་བདག་འཛིན་པ་ཡིན་ཟེར་ལ། དེ་སྡོམ་པ་འཛིན་པ་ཡང་མ་ཡིན་ནོ། །དེའི་ལུས་ཚུལ་ཁྲིམས་དང་ཡང་དག་པར་ལྡན་པ་ཡང་
མ་ཡིན་ནོ། །དེ་ནི་སླུ་བ་པོ་དང་། རྐུན་མ་ལྷ་དང་བཅས་པའི་འཇིག་རྟེན་དང་། བདུད་དང་བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེར་བཅས་པའི་རིགས་ཀྱི་སྐྱེ་དགུ་དང་། ལྷ་དང་མི་དང་། ལྷ་མ་ཡིན་དང་བཅས་པའི་འཇིག་རྟེན་པ་རྣམས་སླུ་བར་བྱེད་པ་པོ་ཡིན་ཏེ་གཞན་
རྣམས་སླུ་བ་པོ་ཇི་ལྟར་ཤེས་པར་གྱུར་པ་དེ་ལྟར་སྒྲུབ་པར་མི་བྱེད་པ་དེ་ནི་དེ་ལྟར་སྟོང་པ། ནང་ན་ཅི་ཡང་མེད་པ། སྙིང་པོ་མེད་པ། དབུ་བའི་ཕུང་པོ་དང་འདྲ་བར་ཇི་སྐད་དུ་སྨྲ་བ་དེ་ལྟར་མི་བྱེད་པའི་སྐྱེ་བོ་ཐམས་ཅད་སླུ་བ་པོ། གཡོ་ཆེ་བའི་མཆོག་ཏུ་གྱུར་པ། ཚུལ་འཆོས་འབའ་ཞིག་
པ་དེ་རབ་ཏུ་ཕལ་ཆེ་བའི་གནས་མལ་དང་། ནད་ཀྱི་རྐྱེན་སྨན་རྣམས་གཞན་གྱིས་བྱིན་པས་འཁོར་བར་རྟག་ཏུ་བྱིང་ཞིང་ནུབ་པར་འགྱུར་རོ། །དམྱལ་བ་རྣམས་ནས་དམྱལ་བ་རྣམས་སུ་སྟེ། གཞན་རྣམས་སུ་ཡང་སྡིག་པས་བགྲོད་པ་ཡིན་ནོ། །ཚུལ་ཁྲིམས་འཆལ་པ་སྡིག་
པ་ཅན་མི་ཤིས་པའི་སྐལ་བ་ཅན་དེ་ལ་འོས་མ་ཡིན་པར་གྱུར་པས་གང་དག་དགེ་འདུན་དབང་བར་གྱུར་པའི་ས་གཞི་རྣམས་ཀྱིས་ཀྱང་བར་ཆད་འགྱུར་བ་ནི། ཚུལ་ཁྲིམས་དང་ལྡན་པའི་དགེ་སློང་རྣམས་ཀྱིར་ས་དེ་དག་སྦྱིན་པ་པོ་སྦྱིན་བདག་རྣམས་ཀྱིས་ཉེ་བར་སྤེལ་བའི་རྒྱུ་གང་དག་གི་ཕྱིར་ཏེ།

སྡོམ་པ་དང་མི་ལྡན་པ་རྣམས་ཀྱིས་ཀྱང་མ་ཡིན་ན་ཚུལ་ཁྲིམས་འཆལ་པའི་སྡིག་པ་ཅན་དེ་དག་རྣམས་ཀྱིས་ནི་གོམ་པ་འབོར་བ་དང་ཀུན་འདྲེ་བར་བྱེད་པ་ཙམ་གྱིས་ཀྱང་བརྒྱ་ཕྲག་ཏུ་ཡང་བར་ཆད་དུ་འགྱུར་ཞིང་ཡང་ལུས་ཀྱིས་གནས་མལ་དང་། ནད་ཀྱི་རྐྱེན་སྨན་དང་། ལོངས་སྤྱོད་གཞན་
རྣམས་ལྟ་སྨོས་ཀྱང་ཅི་དགོས། དེ་ནས་དེའི་དུས་ན་བཅོམ་ལྡན་འདས་ཀྱིས་ཚིགས་སུ་བཅད་པ་གསུངས་པ། ཇི་ལྟར། གང་འདི་དགེ་སློང་མ་བསྡམས་པ། །རྐུན་མ་རྣམས་ལས་འདི་རྐུན་མཆོག །ནང་ནས་རྣག་གི་ཁུ་བ་འབབ། །ཆོས་གོས་ཀྱིས་ནི་ཕྱི་རོལ་བསྡམས། །
སྙིང་པོ་ཐམས་ཅད་དང་བྲལ་བ། །དབུ་བའི་ཕུང་པོའི་རང་བཞིན་ལྟར། །དེ་བཞིན་འཁོར་བ་ཆང་སྟོང་འདི། །དེ་བཞིན་ལོག་པར་དགེ་སློང་སྨྲ། །དགེ་འདུན་དཀོན་མཆོག་ཕྱིར་བྱས་ནས། །ཚུལ་འཆལ་དེ་ནི་དམྱལ་བར་སྐྱེ། །ལུས་ཞིག་ནས་ནི་དམྱལ་རྣམས་སུ། །འཁྲིད་པ་སེམས་
ཀྱིས་བསླུས་པ་ཡིན། །ཆོས་འདུལ་བ་ནི་བསླུ་བྱས་ནས། །ལྟུང་བར་རང་གི་ལས་ཀྱིས་ཡིན། །དྲི་མའི་མུན་པ་རྣམ་དཀྲིགས་ནས། །སྡུག་བསྔལ་སྐལ་བ་ཅན་དུ་འགྱུར། །དགེ་བའི་ལས་ཀྱིས་གོས་མེད་པའི། །གཅེར་བུ་ལ་ནི་བཟང་སྐྱུག་བྲོ། །ཇི་ལྟར་ཆོས་ནི་ཕྱིར་བྱས་ནས། །
དམྱལ་བ་འཇིགས་པར་འཁྲིད་པར་བྱེད། །མཛེས་པ་མིན་པའི་དམྱལ་རྣམས་ཀྱིས། །སྡུག་བསྔལ་སྒོ་ནི་མ་བསྡམས་པ། །འཁོར་བའི་འཆིང་བ་མི་བཟད་པ། །ཚུལ་འཆལ་ཞེས་བྱ་འདི་ལ་རྗོད། །གང་གིས་མ་བསྡམས་པ་བསྲེགས་ན། །དེ་ནི་མེ་ཡིས་ཤིན་ཏུ་བསྲེགས། །སྤྱོད་པ་
ཉམས་པ་དེ་ཡི་ནི། །ལོག་པར་ལྟུང་བ་རྟག་པར་གནས། །ཡིད་རྣམས་བསྡམས་པ་མེད་གནས་པས། །དེ་སྲིད་དུ་ནི་སྤྱོད་སྡོམ་པ། །དེ་ནི་རྨོངས་པ་སྤྱོད་ཚུལ་འཆོས། །དམྱལ་བ་རྣམས་སུ་ཉེ་བར་འོངས། །དེ་ནི་ཉིན་མཚན་ཐམས་ཅད་དུ། །མི་དགེ་བ་རྣམས་འཕེལ་བར་བྱེད། །
གང་ཡང་ཚུལ་ཁྲིམས་རིན་ཆེན་འདི། །ཚུལ་ཁྲིམས་འཆལ་པས་ངེས་པར་ལྷུང་། །སྟོང་པའི་ཆོས་ལ་ཆགས་པ་དང་། །མུན་པས་ཀྱང་ནི་ཀུན་བསྒྲིབས་པ། །སྣ་ཚོགས་བསམ་པས་ནང་རྟོག་པའི། །དེ་ལ་སྐབས་ནི་དམིགས་མ་ཡིན། །བསྡམས་མིན་རང་བཞིན་ཞགས་པ་

ཡིས། །དྲི་མ་མཁས་པས་ནམ་སྤངས་པ། །ཚུལ་ཁྲིམས་འཆལ་པ་སྡིག་པ་ཅན། །ཚུལ་ཁྲིམས་སྤངས་པས་འདྲེན་པར་བྱེད། །བསྡམས་པ་མེད་པར་ཚུལ་འཆལ་བ། །སྡིག་པ་དང་ནི་ལྷན་ཅིག་འགྲོགས། །འདོད་པ་རྣམས་ནི་སྟེན་པ་ཡང་། །འདི་
དག་དམྱལ་བའི་ཕོ་ཉ་ཡིན། །མ་བསྡམས་པ་དང་རྨོངས་པ་དང་། །རྩབ་ཧྲལ་གྱི་ནི་ཁྱད་པར་གྱིས། །སྡིག་པའི་ལས་དང་མངོན་ལྡན་པ། །དམྱལ་བ་ཤིན་ཏུ་རིང་བ་མིན། །ལས་རྣམས་ཅི་འདྲའི་འབྲས་ཡིན་ན། །ཅི་ཡི་ཕྱིར་ན་དེར་མི་འགྲོ། །བདག་ཉིད་འཇོམས་བྱེད་ཀུན་
རྨོངས་པ། །གང་ལ་དགའ་བས་རྣམ་པར་རྨོངས། །སྡིག་པའི་ཆུ་བོ་བཟོད་དཀའ་བ། །ཉིན་དང་མཚན་དུ་འཕེལ་བ་ཡིན། །སྡུག་བསྔལ་རླབས་ཕྲེང་རྦ་རླབས་ཅན། །དེས་ཀྱང་རང་གི་སྐྱེ་བོ་འཕྲོག །གང་དག་གིས་ནི་ཆོས་བསླུས་པའི། །དེ་རྣམས་ཡིད་ནི་བདེ་མ་ཡིན། །སྡོམ་
པ་མེད་གནས་སྐྱེས་བུ་ནི། །དགེ་བའི་ཆོས་རྣམས་རྣམ་པར་སྤངས། །དགེ་བའི་ལམ་འདི་བདེ་ལེགས་ཡིན། །ཆོས་གང་གོ་འཕང་བདག་ཉིད་ཅན། །གོ་འཕང་དེ་ཐོབ་རྗེས་སྐྱེས་པ། །འགྱུར་མེད་གོ་འཕང་རབ་ཏུ་འགྲོ། །རང་འབྱུང་བསྙེན་གནས་བསམ་གཏན་དང་། །གང་ཞིག་དམ་
པའི་སྤྱོད་མངོན་དགའ། །སྡོམ་པ་ལ་གནས་རྟག་ཏུ་དུལ། །དེ་རྣམས་ལ་ནི་སྡུག་བསྔལ་མེད། །སྡོམ་མིན་དྲི་མ་འདི་དག་གིས། །དྲི་མ་བྱེད་པའི་མི་གང་ནི། །བསླབ་པའི་གཞི་ལས་ཡོངས་ཉམས་པ། །དེ་ནི་དམྱལ་བའི་སྐལ་ལྡན་ཡིན། །དེ་ལྟར་རྟོགས་ནས་མི་རྣམས་ཀྱིས། །
སྡོམ་པ་ཐམས་ཅད་རབ་ཏུ་སྒྲུབས། །སྲིད་པའི་རྒྱ་མཚོ་ཐམས་ཅད་དུ། །གང་ཕྱིར་སྡོམ་དེ་ཉམས་མྱོང་འགྱུར། །དེ་ལྟར་མི་རྣམས་ཐམས་ཅད་ལ་མ་བསྡམས་པས་འཇིག་རྟེན་ལས་འདས་པའི་ལམ་ལ་བར་ཆད་བྱེད་པར་འགྱུར་རོ། །ཇི་ལྟར་སྡོམ་པ་མ་ཡིན་པས་ལྷ་རྣམས་ཀྱི་བར་
ཆད་བྱེད་པར་འགྱུར་ན། འདི་ན་ལས་དང་འབྲས་བུའི་ས་པའི་འཇིག་རྟེན་འདིར་ཚུལ་ཁྲིམས་རྣམ་པ་བདུན་པོ་རྣམས་ཀྱིས་ཉེ་བར་བསྐྱེད་པའི་བདེ་བ་གང་ཡིན་པ་དེ་མཐོ་རིས་འདིར་བག་མེད་པར་གནས་པས་ཟད་པར་བྱེད་དོ། །དེ་དག་རྣམས་ཀྱི་དེ་ཟད་པ་དང་སླར་ཡང་མི་འབྱུང་སྟེ། ཇི་

ལྟར་མར་མེའི་སྣུམ་དང་སྡོང་བུ་ཟད་པས་འོད་ཟེར་ཟད་པར་འགྱུར་རོ། །དེ་བཞིན་དུ་ཇི་ལྟར་སྡོམ་པ་མེད་པ་འཇིག་རྟེན་ལས་འདས་པའི་ལམ་གྱི་བར་ཆད་བྱེད་པར་འགྱུར་ན་འདི་ལྟ་སྟེ། ཚུལ་ཁྲིམས་ལ་སྤྱད་པའི་སྐྱེས་བུ་རྣམས་ནི་མཐོ་རིས་སུ་སྐྱེ་བར་འགྱུར་རོ། །དེར་སྐྱེས་པ་ན་
འདི་ལྟར་སེམས་པར་བྱེད་དེ། ཇི་ལྟར་བདག་མི་རྣམས་སུ་སྡོམ་པ་རྣམ་པ་བདུན་གྱིས་འདིར་སྐྱེས་པ་ལྷ་རྣམས་དང་མཉམ་པའི་ནང་དུ་སྐྱེས་པར་གྱུར་ཏོ། །དེ་ལ་ལྷ་དེ་ནི་སྡོམ་པ་གང་ལ་རྩེ་གཅིག་ཏུ་སྤྱོད་པར་བྱེད་དེ། ལས་དང་འབྲས་བུ་རྣམས་མཐོང་བ་དང་སྟོན་པར་ཡང་བྱེད་དོ། །
ཇི་ལྟར་འདིར་སྐྱེས་པ་ཐམས་ཅད་ནི་སྡོམ་པ་ལས་རབ་ཏུ་བྱུང་ངོ་ཞེས་བྱ་བ་སྟེ། དེ་རྩབ་ཧྲལ་ཅན་དུ་གྱུར་པའི་ཡིད་དང་ཡུལ་རྣམས་དགའ་བར་གྱུར་པས་ཀྱང་ཕྲོགས་པའི་བློས་ཐོས་པར་མི་འགྱུར་རོ། །རབ་ཏུ་སྒྲུབ་པར་མི་བྱེད་དོ། །སྡོམ་པ་ལ་དད་པ་སྐྱེ་བ་མ་ཡིན། ལས་དང་འབྲས་
བུའི་རྣམ་པར་སྨིན་པ་རྣམས་ལའང་སྟེ། ཡུལ་རྣམས་ལ་རྒོད་པ་དང་ལྡན་པའི་བློར་གྱུར་པས་དེས་སྡོམ་པ་དེ་དག་རྣམས་ཉེ་བར་འཇོམས་པ་དང་། ཆོས་རྣམས་ལ་ཡང་སྤྱོད་པར་མི་འགྱུར་རོ། །དེ་དགེ་བ་ལས་ཉམས་པས་ངེས་པར་ལྟུང་སྟེ། རྣམ་པ་དེ་ལྟ་བུའི་ངང་ཚུལ་གྱིས་མཐོ་
རིས་སུ་སྐྱེ་བར་མི་འགྱུར་རོ། །འཇིག་རྟེན་པ་དང་འཇིག་རྟེན་ལས་འདས་པ་ཡང་མ་ཡིན་ནོ། །དེ་ལྟར་ཆོས་གསུམ་པ་སྡོམ་པ་མེད་པ་ཞེས་བྱ་བ་བར་ཆད་བྱེད་པར་འགྱུར་བ་ཡིན་ནོ། །དེ་ལ་ལྷ་རྣམས་ཀྱི་ཆོས་བཞི་པ་གང་དག་གིས་ལྷ་དང་མི་རྣམས་ཀྱི་བར་ཆད་བྱེད་པར་འགྱུར་ན་འདི་
ལྟ་སྟེ། ལེ་ལོའོ། །ལེ་ལོ་ལ་མངོན་པར་དགའ་བ་རྣམས་ཀྱང་དེ་ཁོ་ན་བཞིན་དུ་མི་རྣམས་ལ་ཐམས་ཅད་དང་། རྣམ་པ་ཐམས་ཅད་འཇིག་རྟེན་པའི་ཆོས་ཐམས་ཅད་མི་འབྱུང་ངོ་། །ལེ་ལོ་ལ་དགའ་བ་དེ་ཆོས་བདུན་དང་ཡོངས་སུ་འབྲལ་ཏེ། བདུན་གང་ཞེ་ན། ཇི་ལྟར་ཀུན་ནས་ང་
རྒྱལ་བས་ལེ་ལོས་བརྩོན་འགྲུས་མི་རྩོམ་མོ། །གང་དབང་བྱེད་པ་དང་མི་ལྡན་པས་ཡོངས་སུ་ཉམས་སོ། །ཀུན་ནས་ང་རྒྱལ་བ་ལས་ཀྱང་ཡོངས་སུ་ཉམས་པར་འགྱུར་རོ། །ལོངས་སྤྱོད་རྣམས་ལས་ཡོངས་སུ་ཉམས་པར་འགྱུར་རོ། །ཡུལ་ཤེས་པ་ལས་ཡོངས་སུ་ཉམས་པར་

འགྱུར་རོ། །འཇིག་རྟེན་པའི་ཐམས་ཅད་ལས་དེ་ཉམས་པར་འགྱུར་རོ། །སྐྱེས་བུ་དམ་པ་ལ་བསྟེན་པ་དང་འཇིག་རྟེན་པའི་གཏམ་དང་འབྲེལ་བ་ལས་ཀྱང་ཡོངས་སུ་ཉམས་སོ། །དེ་འཇིག་རྟེན་པའི་དོན་ཐམས་ཅད་ལས་ཡོངས་སུ་ཉམས་པས་ཀུན་ཏུ་རྨོངས་
པར་འགྱུར་རོ། །དོན་ལྷག་མ་དུ་མ་ཆུད་ཟོས་པར་འགྱུར་རོ། །དེ་ལྟར་མི་རྣམས་ཀྱི་འཇིག་རྟེན་པའི་དོན་ཐམས་ཅད་ཀྱི་བར་དུ་གཅོད་པར་འགྱུར་རོ། །ལེ་ལོ་ཇི་ལྟར་མི་རྣམས་ཀྱི་འཇིག་རྟེན་ལས་འདས་པའི་ཆོས་རྣམས་ཀྱི་བར་ཆད་བྱེད་པར་འགྱུར་ན། འདི་ན་ལེ་ལོས་ལེ་ལོར་གྱུར་
པའི་སྐྱེས་བུ་རྣམས་ནི་ཤ་ཤིས་ཁྱིམ་གྱི་ལས་ཀྱིས་འཇིགས་པས་རབ་ཏུ་འབྱུང་སྟེ། ཇི་ལྟར་བདག་རབ་ཏུ་བྱུང་ལ་རབ་ཏུ་མང་བའི་གནས་མལ་དང་། ནད་ཀྱི་རྐྱེན་གྱི་ཡོ་བྱད་རྣམས་ལ་ལོངས་སྤྱོད་པར་བྱའོ། །བདག་ནུབ་མོ་ཡང་ལས་བྱ་མི་དགོས་ལ་ཉིན་མོ་ཡང་མ་ཡིན་ཏེ། སྒྱུ་སྙོམ་
དེས་རབ་ཏུ་འབྱུང་ངོ་། །རབ་ཏུ་བྱུང་བ་དེ་དམ་པར་བྱས་ཏེ་གསོལ་བ་འདེབས་པར་མི་བྱེད། དོན་དང་བྱ་བ་མི་བྱེད། བསམ་གཏན་ལ་མངོན་པར་བརྩོན་པའི་རང་བཞིན་ཅན་མ་ཡིན་ནོ། །མཐར་ཐུག་པ་ཉིད་ནི་མ་ཡིན་གྱི་ལེ་ལོའི་སྐྱོན་གྱིས་ཉམས་སྨད་པ་ཡིན་ནོ། །གང་གི་ཚེ་བརྒྱ་ལ་
རབ་ཏུ་མང་བའི་རྙེད་པ་དང་བཀུར་སྟི་ལ་ཉེ་བར་ལོངས་སྤྱོད་དོ། །ཚུལ་ཁྲིམས་དང་ཤེས་རབ་ལ་མངོན་པར་དགའ་བར་མི་འགྱུར་རོ། །བློ་དམན་པ་དེ་སྐྱོན་དེས་ལུས་ཞིག་པ་ན་ཐབས་མ་ཡིན་པ་ལོག་པར་ལྟུང་བ་དམྱལ་བར་སྐྱེའོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་
ཚིགས་སུ་བཅད་པ་གསུངས་པ། ཇི་ལྟར། ལེ་ལོ་ལས་ནི་སྐལ་བ་ཆུང་། །གཏི་མུག་གིས་ནི་བཅོམ་པའི་སེམས། །སྐྱེ་བོ་སྙོམ་ལས་ཅན་ཐམས་ཅད། །ཤིས་པའི་སྐྱེ་བ་ཡོད་མ་ཡིན། །སྒྱུ་སྙོམ་སྡིག་པ་ཅན་གྱི་ཆོས། །རྨུགས་དང་གཉིད་ཀྱང་དེ་བཞིན་ཏེ། །ཐར་པའི་སྒོ་ནི་རྣམ་
འཇོམས་པར། །འགྱུར་བ་འདི་ནི་འབྲས་བུ་ཆེ། །ཁྲེལ་མེད་ངོ་ཚ་མེད་པ་དང་། །སྡིག་པའི་གྲོགས་དང་རྒོད་པ་ནི། །སྡུག་བསྔལ་གྱི་ནི་རྒྱུ་དེ་དག །དེ་ལ་ཆགས་མེད་མཁས་པ་ཡིན། །ལོག་པའི་ང་རྒྱལ་མངོན་ང་རྒྱལ། །ང་སྙམ་ང་རྒྱལ་ང་ཐམས་ཅད། །སྡུག་བསྔལ་གྱི་ནི་ལྗོན་

ཤིང་རྒྱུ། །དེ་དག་རྟག་ཏུ་ཡོངས་སུ་སྤོངས། །ལེ་ལོ་ཡི་ནི་དབང་གྱུར་ནས། །ལྷ་ཡི་འགྲོ་གང་དམྱལ་བར་རྩོམ། །དབུགས་རྒྱུ་ཡང་ནི་ཤི་བ་ཡིན། །དེ་དག་གསོན་དོན་ཡང་འབྲས་མེད། །ལེ་ལོས་ཉེ་བར་བཅོམ་པའི་མི། །གསོན་པ་ན་ཡང་གསོན་པ་མིན། །རོ་ལས་ཀྱང་ནི་ལྷག་དེ་
དག །འདི་ནི་སྒྱུ་སྙོམ་ཡིན་པར་ཤེས། །ལེ་ལོའི་འདམ་དུ་བྱིང་བ་གང་། །དེ་ནི་སྡུག་བསྔལ་རྒྱ་མཚོར་བྱིང་། །གང་ལ་བརྩོན་འགྲུས་བརྩམས་ཡོད་པ། །སྲིད་པའི་རྒྱ་མཚོ་ལས་དེ་རྒལ། །ལེ་ལོ་བརྩོན་འགྲུས་དམན་པ་གང་། །ཟས་ལ་རྟག་ཏུ་དགའ་བ་ཕྱུགས། །དེ་ནི་གསོན་
ཡང་ཤི་བ་ཡིན། །ཤི་ནས་ཀྱང་ནི་དམྱལ་བར་འགྲོ། །མི་གང་སྡུག་བསྔལ་སྐལ་ལྡན་པའི། །མི་དེ་ཕྱུགས་དང་མཚུངས་པ་ཡིན། །གཞན་གྱི་གོང་བུ་ཟ་བའི་ལྷ། །དེ་ཡི་རྒྱུ་ནི་ལེ་ལོ་ཡིན། །ཕལ་ཆེར་ལེ་ལོ་ཅན་རྣམས་ནི། །གཞན་གྱི་བུ་མོས་ཉེ་བར་འཚོ། །རོ་ལ་ལྷག་པར་
ཆགས་པ་དང་། །འཁྲིག་པ་ལ་ཡང་རྟག་ཏུ་དགའ། །དེ་ནི་དེ་ཉིད་དཔྱོད་བྲལ་ནས། །ཟས་འབའ་ཞིག་ལ་ཆེད་དུ་བྱེད། །འཆི་བའི་དུས་ནི་བྱུང་བ་ན། །རང་གི་སེམས་ནི་སྲེག་པར་བྱེད། །ཇི་སྲིད་ཚ་གྲང་ལྷན་ཅིག་དང་། །དེ་བཞིན་བཀྲེས་སྐོམ་ལྷན་ཅིག་ཏུ། །དེ་སྲིད་ལུས་
ཀྱིས་བྱ་བ་གྱིས། །གང་ཕྱིར་རྟག་ཏུ་མཚུངས་གྱུར་པ། །ལེ་ལོའི་བློ་ནི་བྱ་མིན་ཏེ། །ལེ་ལོ་སྙོམ་པའི་བདག་ཉིད་ཅན། །རྟག་ཏུ་འཁོར་བར་དེ་ལུས་གནས། །སྡུག་བསྔལ་ལས་ཀྱང་ལེགས་གྲོལ་མིན། །བརྒྱ་ཡི་ནང་ན་ཁ་ཉེན་ཞིང་། །ལེ་ལོ་ཅན་དེ་འཇིག་རྟེན་འབྲེང་། །ཐ་
མར་ཡང་ནི་ཅོ་འབྲུར་འགྱུར། །ལེགས་པའི་བློ་ཡང་ཡོད་མ་ཡིན། །སྐྱོན་ནི་དེ་དག་རྣམས་དང་ཡང་། །གཞན་རྣམས་དང་ཡང་ཡང་དག་ལྡན། །འཇིག་རྟེན་འདས་པའི་ལམ་ལས་ནི། །ཕྱི་རོལ་ཉིད་དང་བྲལ་བ་ཡིན། །ལེ་ལོ་ཅན་གྱི་སྐྱེས་བུ་ནི། །འཇིག་རྟེན་
འདས་ལས་ཡོངས་ཉམས་འགྱུར། །ལྷ་རྣམས་ཇི་ལྟར་ན་འཇིག་རྟེན་པ་དང་འཇིག་རྟེན་ལས་འདས་པའི་ཆོས་འདུལ་བ་ལས་ཉམས་པར་འགྱུར་ཞིང་། ཇི་ལྟར་ལྷ་རྣམས་ཀྱི་བར་ཆད་དུ་འགྱུར་ན་འདི་ན་ལེ་ལོ་ཅན་འཇིག་རྟེན་པའི་ལམ་གྱིས་གལ་ཏེ་ན་ལན་གྲངས་གཞན་ལ་མྱོང་

བར་འགྱུར་བའི་ལས་ཀྱིས་སམ། གལ་ཏེ་ལེགས་པར་བྱས་པ་རྣམས་ལ་དམིགས་པར་གྱུར་པས་སམ། གལ་ཏེ་དེ་ལྟར་སྐྱེས་པར་གྱུར་ལ་དེ་ལེ་ལོ་དེ་ཉིད་ཀྱིས་ཉེ་བར་བཅོམ་པས་ཐམས་ཅད་དུ་འདོད་པའི་སྒྲ་དང་། རོ་དང་། རེག་བྱ་དང་། གཟུགས་དང་། དྲི་
རྣམས་ལ་ཡང་ཀུན་དགའ་བར་མི་འགྱུར་རོ། །སྐྱེད་མོས་ཚལ་དགའ་བར་གྱུར་པ་རྣམས་དང་། རྒྱུག་པ་དང་སྙོང་བའི་རང་བཞིན་ཅན་དུ་མི་འགྱུར་རོ། །གླུའི་སྒྲའི་རང་བཞིན་ལ་མི་དགའོ། །གླུ་ལེན་པར་མི་བྱེད་དོ། །ནམ་མཁའི་དཀྱིལ་དུ་འཕགས་པར་མི་བྱེད་དོ། །རིའི་རྩེ་མོ་
ནས་རིའི་རྩེ་མོར་མི་འགྲོའོ། །རླབས་ཀྱི་ཕྲེང་བ་ནས་རླབས་ཀྱི་ཕྲེང་བ་རྣམས་ལ་བྱའི་རྒྱབ་ཏུ་ཞོན་ནས་རྩེ་བར་མི་བྱེད་དོ། །བདེ་བ་དེ་ཉིད་ཀྱིས་ཉེ་བར་བཅོམ་པ་དེའི་དྲུང་དུ་ཡང་འཐབ་བྲལ་གྱི་བདག་པོ་འགྲོ་བར་འགྱུར་ལ། དེས་ཡུལ་ཐམས་ཅད་ལས་ཀྱང་ལེགས་པར་སྦྱོར་བར་
མི་བྱེད་དོ། །དེ་ལ་ཡུལ་དེ་དག་ཐམས་ཅད་དགྲའི་ཚོགས་སུ་གྱུར་པའི་ལེ་ལོ་འཇིག་རྟེན་པ་རྣམས་ཡིན་ནོ། །ཇི་ལྟར་འཇིག་རྟེན་ལས་འདས་པའི་ལམ་གྱི་བར་ཆད་ཡིན་ན། ལེ་ལོ་ཅན་རྣམས་འདི་ན་ལྷ་གཞན་གང་དག་དམ་པའི་ཆོས་ཉན་པའི་རང་བཞིན་ཅན་དུ་གྱུར་པ་རྣམས་
དང་། དེ་དམ་པའི་ཆོས་ལ་དགའ་བར་གྱུར་པ་རྣམས་ལ་ཡང་དེ་དག་ལེགས་པར་སྟེན་པར་མི་བྱེད་དོ། །དེ་དམ་པའི་ཆོས་ལ་ཁ་ཕྱིར་ཕྱོགས་པར་འགྱུར་རོ། །དེས་མ་ཐོས་པའི་ཆོས་རྣམས་མི་ཉན་ནོ། །ཐོས་པ་རྣམས་ཀྱང་འཛིན་པར་མི་བྱེད་དོ། །གོམས་པར་ཡང་མི་བྱེད་
དོ། །བླ་མ་ལ་ཉེ་བར་སྟེན་པར་མི་བྱེད་དོ། །ཤེས་པ་དང་རྣམ་པར་ཤེས་པ་དང་ལྡན་པའི་རང་བཞིན་ཅན་མ་ཡིན་ནོ། །དེ་དམ་པའི་ཆོས་ལས་ཕྱི་རོལ་ཏུ་གྱུར་པ་དགེ་བ་ཐམས་ཅད་དང་རྣམ་པར་བྲལ་བ། འཁོར་བ་ན་རྟག་ཏུ་ཡང་འཁོར་བར་གྱུར་པ་སྟེ། རྟག་ཏུ་ཡང་སྡུག་བསྔལ་གྱི་སྐལ་
བ་ཅན་དུ་འགྱུར་རོ། །དེ་ཅིའི་ཕྱིར་ཞེ་ན། ཡང་དག་པའི་ལམ་དང་བྲལ་བའི་ཕྱིར་ན་མི་རྟོགས་ཤིང་ཡོངས་སུ་མི་འགྲོལ་ལོ། །དེ་ལེ་ལོས་ཉེ་བར་ཉམས་པས་དམྱལ་བ་དང་། ཡི་དགས་དང་། དུད་འགྲོ་དང་། མི་རྣམས་སུ་སྐྱེ་བར་འགྱུར་རོ། །དེ་རྒ་བ་དང་འཆི་བའི་ཁོག་ཙེས་

བཅིངས་པས་ཤིན་ཏུ་སྡུག་བསྔལ་བས་ཡོངས་སུ་འཁྱམ་མོ། །དེ་ལ་ལེ་ལོ་གཅིག་པོ་དེ་ཉིད་ཀྱིས་དོན་མ་ཡིན་པར་བྱེད་པ་ངན་འགྲོ་ཐམས་ཅད་ཀྱི་རྩ་བ་འཁོར་བ་ཐམས་ཅད་ཀྱི་ས་བོན་དུ་གྱུར་པ་རབ་ཏུ་འབྱུང་བ་ཡིན་ནོ། །དེའི་ཕྱིར་ན་གང་དག་འཁོར་བ་ལས་ལྡོག་པར་འདོད་པ་དེས་རབ་ཏུ་
བརྩོན་པས་ལེ་ལོ་ཡོངས་སུ་སྤང་བར་གྱིས་དང་། དེའི་རྩ་བ་ལས་གྱུར་པ་མ་ཡིན་པའི་རི་རྒལ་བར་མི་ནུས་སོ། །སྐྱོན་གཅིག་གིས་གོས་པས་སྡུག་བསྔལ་གྱི་རྒྱ་མཚོ་ལས་རྒལ་བར་ཡང་མི་ནུས་སོ། །གཞན་ཡང་སྐྱོན་བཞི་པ་ལས་ཤིན་ཏུ་འདས་ནས་གཞན་ཆོས་ལྔ་པ་ལྷ་དང་མི་
རྣམས་ཀྱི་བར་དུ་གཅོད་པར་འགྱུར་བ་རྣམས་གང་ཞེ་ན། འཇིག་རྟེན་པ་དང་འཇིག་རྟེན་ལས་འདས་པའི་ལམ་ནི་འདི་ལྟ་སྟེ། མི་བཟད་པའི་འདོད་པ་ནི་ལྷ་དང་མི་རྣམས་ཀྱི་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་ཀྱི་བར་དུ་གཅོད་པར་བྱེད་པར་འགྱུར་རོ། །ཇི་ལྟར་
ལྷ་དང་མི་རྣམས་ཀྱི་འཇིག་རྟེན་པའི་ལམ་ལ་རྣམ་པར་སྨད་པར་བྱ་བ་མི་བཟད་པའི་འདོད་པ་ཡིན་ན་འདི་ལྟ་སྟེ། ཁྱིམ་ལ་གནས་ནས་སྐྱེས་བུ་འདོད་པས་ཟིལ་གྱིས་གནོན་པར་འགྱུར་ཏེ། དེ་ནི་ཆོས་ལ་ངེས་པར་མི་དགའ་བ། རྟག་ཏུ་ཡང་ནོར་ལ་ཆེད་ཆེར་བྱེད་པ་ཡིན་ཏེ། གཞི་དེས་
ཉིན་མཚན་མེད་པར་ཡང་ནོར་རྣམས་ཀྱི་སྲེད་པ་སྙིང་ལ་འཇུག་པར་བྱེད་དོ། །དེ་ཇི་ལྟ་ཇི་ལྟར་རྫས་རྣམས་འབྱུང་བ་དེ་ལྟ་དེ་ལྟར་ཕྱིར་ཞིང་ཡུལ་གཞན་རྣམས་འདོད་པ་སྙིང་ལ་འཇུག་གོ། །དེ་ནི་འདི་ལྟར་འགྱུར་ཏེ། བདག་གིས་སྒྱུས་ཉེ་བར་འཚོ་བའི་རྣམ་གྲངས་གང་གིས་གཞན་བསླུ་
བར་བྱ་ཞེས་ཏེ། རྟག་ཏུ་ཡང་གྱ་གྱུའི་དཔྱད་ར་བར་འགྱུར་རོ། །དེས་གཞན་རྣམས་ལ་ཡང་དེ་བཞིན་དུ་ཡུལ་དེ་དག་ལ་འདོད་པ་སྐྱེད་པར་བྱེད་དོ། །གཡོ་སྒྱུ་རྣམས་ཉེ་བར་སྟེན་ཏོ། །ཆོས་མ་ཡིན་པ་ཕལ་པོ་ཆེས་གནས་པར་འགྱུར་བའི་ལས་ཀྱི་བྱ་བ་རྣམས་ལ་འཇུག་པར་བྱེད་དོ། །
དེ་དག་དེ་བཞིན་དུ་བརྣབ་སེམས་མང་བར་འགྱུར་རོ། །ཇི་ལྟར་གང་དག་གཞན་གྱི་རྫས་ཡིན་པ་དེ་རྣམས་ངའི་ཡིན་པར་གྱུར་ན་ཞེས་དེས་དེ་ལྟར་ཡིད་ཀྱིས་བསམས་ནས་ཀྱང་གཞན་རྣམས་ལ་ཡང་དེ་བཞིན་དུ་དགའ་བར་བྱས་ནས་དེས་གཞན་རྣམས་དང་ཡང་ལྷན་ཅིག་ཏུ་གཡོ་སྒྱུ་

བྱས་པས་གཞན་རྣམས་སླུ་བར་བྱེད་དོ། །བསླུས་ནས་ཀྱང་རབ་ཏུ་དགའ་བར་འགྱུར་རོ། །ཇི་ལྟ་བུའི་ལེགས་པ་ཅིག་བདག་གིས་བྱ་སྟེ། ཡུལ་དེའི་ཉོ་ཚོང་གིས་གཡོ་ཟོལ་དང་ལྡན་པས་གཞན་རྣམས་ཀྱང་བསླུས་ནས་ནོར་ཕྲོགས་པས་བདག་ལ་འདི་
སྙེད་ཅིག་འཕེལ་བ་ཞེས་དེ་ལྟར་དེ་རོ་མྱོང་བར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །གཞན་རྣམས་ཀྱང་དེས་སྡུག་བསྔལ་བར་བྱེད་པར་འགྱུར་རོ། །འདོད་པ་མི་བཟད་པས་ཟིལ་གྱིས་མནན་ནས་དེ་ཡུལ་ལྗོངས་རྣམས་འཇོམས་པར་བྱེད་པར་འགྱུར་རོ། །གྲོང་ཁྱེར་
རྣམས་དང་ཡུལ་ལྗོངས་རྣམས་ཕུང་བར་བྱེད་པ་པོར་འགྱུར་རོ། །སྐྱེ་བོ་ཐམས་ཅད་ཀྱིས་ཡོངས་སུ་སྤངས་པ་པོར་འགྱུར་རོ། །དེ་བཟང་པོ་རྣམས་ཐམས་ཅད་ཀྱིས་རྣམ་པར་གཤེས་པ་དང་ཡོངས་སུ་སྤངས་པར་ཡང་འགྱུར་ཏེ། ཡུལ་གྱི་ཚེར་མ། གྲོང་གི་ཚེར་མ། གྲོང་ཁྱེར་གྱི་
ཚེར་མ། ཡུལ་འཇོམས་པ་པོ་དང་། གྲོང་འཇོམས་པ་པོ་དང་། ཁྱིམ་འཇོམས་པ་པོ་དང་། རིགས་འཇོམས་པ་པོ་དང་ཡང་རྟག་ཏུ་ཡང་དག་པར་ལྡན་པ་གཞན་རྣམས་ལ་གནོད་པར་བྱེད་པ་པོ་ལུས་ཞིག་པ་དང་། ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་
ལྟར་འཇིག་རྟེན་པའི་ཡུལ་རྣམས་ལ་འདོད་པ་དང་ལྡན་པས་ནི་མི་རྣམས་ཀྱི་བར་དུ་གཅོད་པར་གྱུར་ཏོ། །འདོད་པ་མི་བཟད་པ་གོམས་པར་བྱས་པ་ནི་སླར་ཡང་རབ་ཏུ་འཕེལ་བར་འགྱུར་ཏེ། ཇི་ལྟར་མེ་རྣམས་ལ་ཤིང་བསྣན་པ་དེ་ལྟ་དེ་ལྟར་རྣམ་པར་འཕེལ་ལོ། །དེ་ཁོ་ན་བཞིན་མི་བཟད་
པའི་འདོད་པ་ཇི་ལྟ་ཇི་ལྟར་རྫས་རྣམས་རྙེད་པ་དེ་ལྟ་དེ་ལྟར་ཕྱིར་ཞིང་རབ་ཏུ་འཕེལ་ཏེ། བརྣབ་སེམས་པར་གྱུར་པ་དང་ལྷན་ཅིག་ཏུ་སྤྱོད་པའི་ཕྱིར་རོ། །དེའི་ཕྱིར་ན་སྐྱེས་བུ་ཆོས་བྱེད་པ་རྣམས་ཀྱིས་རབ་ཏུ་བརྩོན་པས་ཀྱང་འདོད་པ་མི་བཟད་པ་རྣམས་རབ་ཏུ་གཞོམ་པར་བྱའོ། །རྒྱུ་གང་
གིས་འདོད་པ་འདི་དྲི་མ་རྣམས་ཀྱི་མཆོག་ཡིན་པ་ནི་འདི་ལྟ་སྟེ། ནོར་སྐྱེད་པའི་དྲི་མ་རྣམས་སོ། །དྲི་མ་དེ་དག་གིས་ཉེ་བར་བཅོམ་པའི་སྐྱེས་བུ་རྣམས་ཀྱང་དམྱལ་བར་ཉེ་བར་རྒྱུག་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་ཚིགས་སུ་བཅད་པ་གསུངས་པ།

ཇི་ལྟར། གཡོ་སྐྱེད་པ་ཡི་ཉོ་ཚོང་གིས། །གང་ཞིག་གཞན་གྱི་ནོར་འཕྲོག་པ། །དེ་ནི་བརྣབ་སེམས་མང་འགྱུར་ནས། །རྟག་ཏུ་གནོད་པ་བྱ་བར་སེམས། །ཉིན་མཚན་མེད་པར་དེ་དག་གིས། །སྙིང་ནི་བདེ་བར་གནས་མ་ཡིན། །ཡིད་ནི་འདོད་པའི་དབང་གྱུར་ནས། །གཞན་གྱི་ནོར་
ལ་འདོད་བྱེད་པ། །མི་བཟད་རྣམས་ཀྱི་རང་བཞིན་ནི། །དེ་དག་མེ་དང་འགྲོགས་པར་རུང་། །མི་རྣམས་ཐམས་ཅད་རྣམ་འཇིགས་པ། །མི་བཟད་དུག་ཅན་སྦྲུལ་བཞིན་ནོ། །འདོད་གང་མི་བཟད་པ་འདི་ཡིས། །དབང་དུ་བསྡུས་པའི་མི་རྣམས་ནི། །དེ་ཤི་ནས་ནི་དམྱལ་བར་
འགྲོ། །ཡི་དགས་སྐྱེ་གནས་དེ་བཞིན་ཏེ། །དེ་ལས་ཀྱང་ནི་རྣམ་གྲོལ་ནས། །དམྱལ་བའི་མེས་ནི་ཀུན་གང་བར། །སྐྱེ་བ་ལྔ་བརྒྱ་རྣམས་སུ་ནི། །གཞན་གྱི་འདོད་པ་དེར་འགྲོའོ། །ཉི་མ་རྒྱ་ཆེའི་བཞིན་རྣམས་ནི། །རྟག་ཏུ་སྡུག་བསྔལ་སྐལ་ལྡན་ཡིན། །སེམས་ནི་འདོད་པས་
ཉེར་བཅོམ་པར། །མི་རྣམས་ཐམས་ཅད་གྱུར་པ་ཡིན། །རྒྱུད་གང་འདོད་པ་རབ་སྤངས་པ། །རྟག་ཏུ་ཡེ་ཤེས་ལ་དགའ་བ། །རྫུ་འཕྲུལ་དང་ལྡན་རྟག་ཏུ་ཞི། །དེ་ནི་འགྲོ་བའི་མཆོག་ཏུ་འགྲོ། །མི་བཟད་སྦྲུལ་གྱི་བཞིན་འདྲ་བ། །ངེས་པར་སྙིང་ལ་འདོད་པས་གང་། །འདོད་
པ་མཐོང་བ་དུག་ཅན་སྦྲུལ། །ལོག་པར་ལྟུང་ལ་རྟག་ཏུ་གནས། །འདོད་པ་རྟག་ཏུ་བྱས་གྱུར་ན། །དེ་དག་ཡང་དང་ཡང་དུ་འཕེལ། །ཤིང་སྐམ་དང་ནི་ལེགས་ཕྲད་ནས། །མེ་ནི་རབ་ཏུ་འཕེལ་བ་ལྟར། །སྐྱེས་བུ་ནོར་གྱིས་སྲེད་གདུངས་པ། །ནོར་སྐྱེད་པ་ལ་ཆེད་ཆེར་བྱེད། །ངེས་
པར་འཆི་བའི་དུས་བྱུང་ན། །དབང་བྱར་མེད་པར་ནོར་རྣམས་གཏོང་། །གང་ཕྱིར་དེ་འབྱུང་གཞོམ་པ་ནི། །འཕེལ་བར་འགྱུར་བས་རྣམ་པར་འཇིག །གང་ཕྱིར་འདོད་དེས་བདག་བཅིངས་པས། །མི་ནི་དམྱལ་བར་ཁྲིད་པ་ཡིན། །ནོར་དེ་གཞན་གྱི་ཟ་བ་ཡིན། །དེ་ནི་སྡིག་གིས་
གོས་པ་ཡིན། །དོན་མིན་དོན་གྱི་གཟུགས་ཀྱིས་དང་། །བདེ་བའི་གཟུགས་ཀྱིས་བདེ་མིན་ཡང་། །དགྲ་བོ་གྲོགས་པོའི་གཟུགས་ཀྱིས་ཀྱང་། །འདོད་པ་སྙིང་ལ་འཇུག་པ་ཡིན། །འདོད་གོམས་མ་བྱེད་ཤེས་རབ་ཅན། །འདོད་པའི་མེ་ཡིས་རྟག་ཏུ་སྲེག །དེ་ཡིས་སྐྱེས་བུ་རབ་

བསྲེགས་པས། །ཕྱི་ནས་དམྱལ་བར་འགྲོ་བ་ཡིན། །འདོད་པ་མཚུངས་པ་གང་ཕྱིར་འདི། །མི་རྟག་རི་ཡི་འཇིག་པ་ཡིན། །བློ་གྲོས་ངན་པས་སྡིག་བྱས་པ། །དེ་དག་དོན་ནི་ག་ལ་ཡོད། །དེ་ལྟར་འདོད་པ་མི་བཟད་པ་རྣམ་པ་ཐམས་ཅད་དུ་དོན་མ་ཡིན་ཞིང་དགོས་
པ་རྣམས་མི་སྒྲུབ་པའོ། །དེ་ལྟར་འཇིག་རྟེན་པའི་མི་བཟད་པའི་འདོད་པ་རྣམས་ཀྱིས་མི་རྣམས་ལ་བར་དུ་གཅོད་པར་འགྱུར་ཏེ། མི་བཟད་པའི་འདོད་པ་གོམས་པར་བྱས་པའི་ཕྱིར་རོ། །གཞན་ཡང་རབ་ཏུ་འཕེལ་བ་ཉིད་དེ། ཇི་ལྟར་མེ་ཤིང་དང་ཕྲད་པ་དེ་ལྟ་དེ་ལྟར་རྣམ་པར་
འཕེལ་བ་ཡིན་ལ་དེ་ཁོ་ན་བཞིན་དུ་འདོད་པ་མི་བཟད་པ་ཇི་ལྟ་ཇི་ལྟར་ནོར་རྣམས་རྙེད་པ་དེ་ལྟ་དེ་ལྟར་ཕྱིར་ཞིང་རབ་ཏུ་འཕེལ་ཏེ། བརྣབ་སེམས་དང་ཡང་ལྷན་ཅིག་ཏུ་སྤྱོད་པར་འགྱུར་བས་ན་དེའི་ཕྱིར་ན་སྐྱེས་བུ་ཆོས་བྱེད་པ་རྣམས་ཀྱི་རབ་ཏུ་བརྩོན་པ་དུ་མས་ཀྱང་མི་བཟད་པའི་
འདོད་པ་རྣམས་རབ་ཏུ་གཞོམ་པར་བྱའོ། །ལྷ་དག་འདི་ན་སྐྱེས་བུ་གང་ཞིག་སྦྱིན་པ་ལ་མངོན་པར་དགའ་བས་ཚོང་པར་གྱུར་ཏེ། དེ་དག་དགེ་སྦྱོང་དང་བྲམ་ཟེ་རྣམས་ལ་རིན་ཆུང་དུན་གྱིས་ཟས་དང་སྐོམ་དག་བླངས་ནས། སྦྱིན་པའི་སྙད་ཀྱི་ཚོང་གིས་ཡིད་རབ་ཏུ་དྲང་བས་
ཚོང་བྱེད་དོ། །ཡོན་ཏན་གྱི་ཁྱད་པར་གྱི་གང་གིས་རིན་ཐང་མེད་པ་འཚོང་ངོ་། །དེ་ཡང་བཞི་ལོག་གམ་བརྒྱད་ལོག་ཏུ་བྱེད་དོ། །སྔར་ལས་ལྷག་པར་བཅུ་ལོག་ཏུ་ཡང་བྱེད་དེ། འདི་ནི་འདོད་པ་མི་བཟད་པ་སྨད་པར་བྱ་བ་རྣམས་ལས་གཅིག་ཡིན་ནོ། །གཞན་
ཡང་མི་བཟད་པའི་འདོད་པ་ནི་འདི་ལྟ་སྟེ། ཆོས་སྨྲ་བ་པོ་རྣམས་ཀྱིས་ཆོས་བསྟན་ནས་རྫས་ལེན་ནོ། །ནོར་དེ་ཡང་དཀོན་མཆོག་གསུམ་ལ་སྔོ་བར་མི་བྱེད་དོ། །གཞན་ཡང་རྣམ་པར་སྨད་པར་བྱ་བའི་འདོད་པ་ནི་གང་དག་ཡེ་ཤེས་ལ་གོམས་པ་བསྐྱེད་པར་གྱུར་ནས་ཀྱང་
རིག་པ་ལྷག་པ་གསུམ་པོ་རྣམས་འཛིན་པར་བྱེད་པ་སྟེ། རབ་ཏུ་བྱུང་བར་གྱུར་ཅིང་རེ་བ་མེད་པ་དང་། ཀུན་ནས་དགའ་བ་མེད་པར་གྱུར་པ་དེ་དག་རྣམས་ཉིད་ཀྱི་འདོད་པ་འདི་ནི་རྣམ་པར་སྨད་པར་བྱ་བ་ཡིན་ནོ། །ཡང་རྣམ་པར་སྨད་པར་བྱ་བའི་འདོད་པ་གཞན་ནི་འདི་ལྟ་སྟེ། གང་ཞིག་

རབ་ཏུ་བྱུང་བར་གྱུར་ནས་ཀྱང་། ས་ལས་བྱས་པའམ། བ་སོ་ལས་བྱས་པའམ། ཤིང་ལས་བྱས་པའམ། དངུལ་ལས་བྱས་པའི་བཅོམ་ལྡན་འདས་ཀྱི་སྐུ་གཟུགས་འཚོང་བར་བྱེད་པའོ། །དེ་དག་རྣམས་ཀྱི་འདོད་པ་འདི་ནི་རྣམ་པར་སྨད་པར་བྱ་བའོ། །ནོར་དེ་ཡང་
ཆོས་ལ་སྔོ་བར་མི་བྱེད་དོ། །དེ་ལྟར་མི་རྣམས་ཀྱི་ཡང་འཇིག་རྟེན་ལས་འདས་པའི་ཆོས་རྣམས་ཐོབ་པ་ལ་འདོད་པ་མི་བཟད་པ་རྣམ་པར་སྨད་པར་བྱ་བ་སྐྱུག་བྲོ་བར་གྱུར་པ་རྟག་པར་རྒྱུན་དུ་མཛེས་པར་གྱུར་པ་མ་ཡིན་ནོ། །ཇི་ལྟར་ལྷ་རྣམས་ཀྱི་འདོད་པ་ཡིན་ན་དེ་དག་གི་རྣམ་པ་སྣ་
ཚོགས་པའི་བདེ་བ་རྣམས་ཀྱིས་རྣམ་པར་རྒྱུ་བ་རྣམས་ཡིན་ཏེ། དེ་ཡང་དེ་ལྟར་ཁྱེད་རྣམས་འདོད་པ་མི་བཟད་པ་མངོན་སུམ་ཉིད་དུ་གྱུར་པ་ནི་ཇི་ལྟར་གསེར་དང་། དངུལ་དང་། བཻ་ཌཱུརྱ་དང་། ཨིན་དྲ་ནཱི་ལ་དང་། མ་ཧཱ་ནཱི་ལ་དང་། ཤེལ་གྱི་རང་བཞིན་རྣམས་ཀྱི་རི་གང་དག་ཡིན་པ་དེ་དག་ལ་
རྩེད་མོ་ཉམས་སུ་མྱོང་བར་བྱེད་དོ། །དེ་ལ་རི་གཅིག་ལས་རི་གཞན་རྣམས་ལ་རྩེད་མོ་ལ་འགྲོ་བ་རྣམས་ཕོས་མོས་ཀྱི་ཚོགས་ཀྱིས་ཡོངས་སུ་བསྐོར་བ་དེ་དག་ཐམས་ཅད་ནི་འདོད་པས་བྱས་ཀྱི་གཞན་གྱིས་ནི་མ་བྱས་ལ། ལྷ་ཁྱེད་རྣམས་ཡུལ་གྱི་སྲེད་པ་དང་ལྷན་ཅིག་ཏུ་འདོད་པ་གང་ཡིན་
པ་དེ་དག་གིས་བཅིངས་ནས་རྣམ་པར་ལྷུང་བ་ཡང་རྟོགས་པར་མི་བྱེད་ཅིང་ངན་འགྲོའི་འཇིགས་པ་རྣམས་མ་ཡིན་ལ། མི་འདོད་པ་ཡིད་དུ་མི་འོང་བ་ཡུལ་ལྗོངས་དང་བྲལ་བའི་འཇིགས་པ་ཡང་མེད་པ་དང་། ནད་ཀྱིས་བྱས་པའི་འཆི་བའི་དུས་ཀྱི་སྡུག་བསྔལ་གྱི་འཇིགས་པ་
རྣམས་ཀྱང་རྟོགས་པར་གྱུར་ཏ་རེ། ལྷ་ཁྱེད་རྣམས་ཀྱང་འདོད་པས་ཟིལ་གྱིས་མནན་པའི་ཡིད་དེ་དང་། སྤྱོད་པ་དེ་དག་ཉིད་ཀྱིས་རབ་ཏུ་བཟོད་དཀའ་བའི་རིས་རྣམ་པར་འཇོམས་པར་འགྱུར་རོ། །དེ་ལྟར་ལྷ་དེ་དག་རྣམས་རྣམ་པར་འབྲལ་བ་དང་། ནད་ཀྱི་འཇིགས་པ་ཡང་མེད་པར་
འཆི་འཕོ་བར་གྱུར་པ་ན་ཡང་འདོད་པ་རྣམས་ཀྱིས་ཡིད་མི་ཚིམ་མོ། །དེ་ལྟར་ལྷ་རྣམས་ཀྱིས་འཇིག་རྟེན་པའི་ལམ་ལ་ཡང་མི་བཟོད་པའི་འདོད་པ་རྣམས་ཀྱིས་བར་དུ་གཅོད་པར་བྱེད་པར་འགྱུར་རོ། །ཇི་ལྟར་འཇིག་རྟེན་ལས་འདས་པའི་ལམ་གྱིས་ལྷའི་འཇིག་རྟེན་པ་རྣམས་ཀྱི་བར་ཆད་

བྱེད་པར་འགྱུར་ན། འདི་ན་འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་ལ་རབ་ཏུ་འཇུག་པར་བྱེད་པ་སྤྱོད་པ་དམ་པ་མ་ཡིན་པ་ལ་མངོན་པར་དགའ་བར་འགྱུར་རོ། །འདོད་པ་ཅན་གྱི་ལྷ་རྣམས་ནི་ལྷ་གཞན་འདོད་པ་ཆུང་བར་གྱུར་པ་ཆོས་འདུལ་བ་
ལ་ཕྱིང་བ་པར་རྗེས་སུ་སློབ་པ་རྣམས་ལ་ཐོས་པས་དགའ་བར་བྱས་པའི་ཡིད་ཅན་མ་ཡིན་ནོ། །རྩ་བ་ལ་ཆུ་ལྡུགས་པ་བཞིན་དུ་དགེ་བའི་ཆོས་རྣམས་ཐམས་ཅད་ལ་ཡང་འདི་ལྟ་སྟེ། ཆོས་ཀྱི་རྟོགས་པའོ། །ཆོས་ཀྱི་རྟོགས་པ་དེ་ཡང་ཐོས་པ་མེད་པར་མི་འགྱུར་རོ། །དེ་ཁོ་ན་ཉིད་
ཐོས་པ་ཡང་ཇི་ལྟར་རྟོགས་པར་མི་འགྱུར་བ་དང་། བག་མེད་པས་བག་མེད་པ་དེ་ཡང་ཅིའི་རྩ་བ་ལས་ཡིན། གང་གི་ཕྱིར་འདོད་པའི་རྩ་བ་ལས་ཡིན། གང་གི་ཕྱིར་འདོད་པའི་རྩ་བའོ། །དེའི་ཕྱིར་ན་འདོད་པ་སྤོང་བ་པོ་གང་ཡིན་པ་དེ་ཐམས་ཅད་མྱ་ངན་ལས་འདས་པའི་གྲོང་ཁྱེར་
དུ་འཇུག་པ་ཡིན་ནོ། །གང་ཡང་འདོད་པས་བཙིར་བའི་ཡིད་ཅན་དེ་དག་རྣམས་ཐམས་ཅད་འཁོར་བའི་ལམ་ལ་རྒྱུ་བ་ཡིན་ནོ། །དེ་ལྟར་ན་ལྷ་རྣམས་འཇིག་རྟེན་ལས་འདས་པའི་ལམ་ལ་ཡང་ལྷ་དང་མི་རྣམས་ཀྱིས་བར་ཆད་བྱེད་པར་འགྱུར་རོ། །དེའི་ཕྱིར་བློ་དང་ལྡན་པར་གྱུར་པས་རབ་ཏུ་
བརྩོན་པས་འདོད་པ་མི་བཟད་པ་རྣམས་སྤང་བར་བྱའོ། །འདི་ནས་ཐམས་ཅད་ཟང་ཟིང་གི་སྦྱིན་པ་ལ་རབ་ཏུ་བརྩོན་པ་དེའི་རྒྱུ་འཐུན་པའི་འབྲས་བུའོ། །སྦྱིན་པའི་ལམ་དེ་དག་རྣམས་ཉིད་ནི་ལྷ་རྣམས་ཀྱིས་བྱ་བར་མི་ནུས་པར་འདོད་དེ། མི་གཟི་བརྗིད་ཆེ་བ་རྣམས་ཀྱིས་བྱས་ཀྱི་
ལྷས་ནི་མ་ཡིན་ནོ། །ལྷ་དེ་མིར་གྱུར་པ་ན་རབ་ཏུ་རྙེད་དཀའ་བའི་སྦྱིན་པ་གང་ཡིན་པ་ལ་མངོན་པར་དགའ་བ་དེ་གཞན་གྱིས་བསླུས་པར་གྱུར་པ་སྟེ། རིན་པོ་ཆེའི་གླིང་ལས་ཉམས་པའི་ཚོང་པ་ངན་པ་བཞིན་ཏེ། འདི་ལྟར་ཡང་ཟང་ཟིང་གི་སྦྱིན་པ་རྣམ་པ་དུ་མ་ཡོད་དོ། །དེ་ལ་མི་
འཇིགས་པའི་སྦྱིན་པ་གང་ཞེ་ན། རྣམ་པ་ཡང་དུ་ཞིག་མི་འཇིགས་པའི་སྦྱིན་པ་ཡིན་ཞེ་ན། མི་འཇིགས་པའི་སྦྱིན་པ་རྣམ་པ་གསུམ་ཡིན་ཏེ། སྲོག་ཡོངས་སུ་སྐྱོབ་པ་དང་། ནོར་འཕྲོག་པ་རྣམས་ཡོངས་སུ་སྐྱོབ་པ་དང་། དེ་བཞིན་དུ་གཞན་གྱི་བུ་དང་བུ་མོ་འཕྲོག་པ་ཡོངས་

སུ་སྐྱོབ་པར་བྱེད་པའོ། །དེ་ལ་སྲོག་བྱིན་པས་ནི་ལྷ་དང་མི་རྣམས་སུ་ཚེ་རིང་བར་འགྱུར་རོ། །ནོར་འཕྲོག་པ་རྣམས་ཡོངས་སུ་བསྐྱབས་པ་ལས་རྐུན་མ་ལས་ལེགས་པར་བསྲུངས་པར་འགྱུར་རོ། །ནོར་རྣམས་དང་ཡང་ལྡན་པར་ཡང་འགྱུར་རོ། །རྒྱལ་པོ་དང་། རྐུན་མ་
དང་། ཆུ་ལ་སོགས་པས་འདིའི་ནམ་ཡང་རྫས་རྣམས་འཕྲོག་པར་མི་འགྱུར་རོ། །རྒྱལ་པོར་འགྱུར་བ་དང་། རྒྱལ་པོའི་བློན་པོ་རྣམས་སུ་འགྱུར་བ་དང་། ལས་དེའི་འབྲས་བུས་རྫུ་འཕྲུལ་ཆེ་བར་འགྱུར་བ་དང་། དབང་ཆེ་བ་དང་། སྐྱེ་བ་གཞན་ཐམས་ཅད་དུ་ཡང་ནོར་དང་
ལྡན་པར་འགྱུར་རོ། །བུ་དང་བུ་མོ་རྣམས་ཀྱི་མི་འཇིགས་པ་བྱིན་པས་ནི་བུ་དང་བུ་མོ་རྣམས་ལེགས་པར་བཟུང་བར་འགྱུར་རོ། །ལྷ་དང་མི་རྣམས་སུ་འཆི་འཕོ་བའི་དུས་ཀྱི་ཚེ་ན་ཡང་དེ་ལྟར་རྣམ་པར་མི་སྤོང་ངོ་། །ལྷ་དག་དེ་ལ་ཆོས་ཀྱི་སྦྱིན་པ་གང་ཞེ་ན། དེ་ལ་རྣམ་
པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་འཇིག་རྟེན་པ་ནི་བསམ་གཏན་བཞིར་ཉེ་བར་འགྲོ་བའི་འཇིག་རྟེན་པའི་ཤེས་པ་དང་ཡང་དག་པར་ལྡན་པ་བྱིན་པས་ལྷ་དང་མི་རྣམས་སུ་བདེ་བར་འགྱུར་ཏེ། ལྷ་དང་མི་རྣམས་ཀྱི་ནང་དུ་སྟེ། གལ་
ཏེ་ལོག་པར་ལྟ་བར་མ་གྱུར་ནའོ། །འཇིག་རྟེན་ལས་འདས་པའི་ཆོས་ཀྱི་སྦྱིན་པ་རྣམས་བཏང་བས་རྣམ་པར་བྱང་བའི་ལྷར་འདོད་པ་ན་སྤྱོད་པ་རྣམས་སམ། གཟུགས་ན་སྤྱོད་པ་རྣམས་སུའོ། །དེ་གལ་ཏེ་འདོད་པ་ན་སྤྱོད་པར་སྐྱེས་ན་དེ་དགུ་བཅུ་རྩ་བརྒྱད་ཀྱི་ས་ལ་སྤྱོད་པའི་
འདོད་པ་ན་སྤྱོད་པའི་ལྷའི་རིས་དྲུག་ཇི་ལྟ་བའི་གཙོ་བོ་རྣམས་སུ་སྐྱེའོ། །གཟུགས་ན་སྤྱོད་པ་རྣམས་སུ་ཡང་སྐྱེ་སྟེ། མྱ་ངན་ལས་འདས་པ་རྟོགས་པར་ཡང་འགྱུར་རོ། །འབྲས་བུའི་ཁྱད་པར་ཆེ་བ་རྣམས་ནི་བློའི་ཁྱད་པར་རྣམས་ཀྱིས་མྱ་ངན་ལས་འདས་པ་ལྷག་པར་རྟོགས་པར་
འགྱུར་རོ། །གནས་གཙང་མའི་རྣམས་སུ་ཡང་སྐྱེའོ། །ཡོངས་སུ་བསྔོ་བའི་ཁྱད་པར་གྱིས་རྒྱལ་པོར་ཡང་འགྱུར་ཏེ། འཁོར་ལོས་གླིང་བཞི་ལ་སྒྱུར་བ་གསེར་གྱི་འཁོར་ལོ་ཅན་རིན་པོ་ཆེ་དང་ཉེ་བ་བཅུ་བཞི་དང་ཡང་ཡང་དག་པར་ལྡན་པའོ། །ཡོངས་སུ་བསྔོ་བའི་ཁྱད་

པར་གྱིས་ཁ་དོག་དང་ལྡན་པར་འགྱུར་རོ། །ཡོངས་སུ་བསྔོ་བའི་ཁྱད་པར་གྱིས་ཟག་པ་རྣམས་ཟད་པ་དང་། རང་སངས་རྒྱས་དང་། བརྩོན་འགྲུས་དང་ལྡན་པར་ཡང་སེམས་ཀྱི་བསྔོ་བའི་ཁྱད་པར་གྱིས་འགྱུར་རོ། །སངས་རྒྱས་བཅོམ་ལྡན་འདས་དགྲ་བཅོམ་
པ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་ཡང་ཆོས་ཀྱི་སྦྱིན་པ་དེའི་ཁྱད་པར་གྱིས་འགྱུར་རོ། །དེ་ལ་ལྷ་དེ་རྣམས་ནི་སྦྱིན་
པ་རྣམ་པ་གསུམ་པོ་འདི་དག་རྣམས་དང་བྲལ་བ་ཡིན་ནོ། །དེ་ལྟར་བྱས་པས་ལྷ་རྣམས་ཀྱི་དྲུང་ན་མི་རྣམས་ལྷག་པ་ཡིན་ནོ། །ལྷ་རྣམས་ནི་རྣམ་པར་སྨིན་པའི་ས་པ་ཡིན་ནོ། །ལས་ཀྱི་ས་པ་ནི་མི་རྣམས་ཡིན་ཏེ། ལས་རྒྱ་ཆེ་བ་ལས་འབྲས་བུ་རྒྱ་ཆེ་བ་ཡིན་པའི་ཕྱིར་ན་ལྷ་དང་མི་དེ་
རྣམས་ཡིན་ནོ། །ལས་དང་འབྲས་བུའི་ཁྱད་པར་འདིས་མི་རྣམས་ཀྱི་དྲུང་ན་ལྷ་རྣམས་ཆུང་བར་གྱུར་པ་ཡིན་ནོ། །གཞན་ཡང་ལས་ཀྱི་རྣམ་པར་དབྱེ་བས་སྐྱེ་བར་གྱུར་པ་རྣམས་ནི་གང་དག་སྦྱིན་པ་དང་བྲལ་བ་འབའ་ཞིག་གི་ཚུལ་ཁྲིམས་འབའ་ཞིག་ལ་སྒྲུབ་པར་བྱེད་པ་དེ་དག་ནི་ཡོན་ཏན་
གཅིག་པུ་ཞིག་དང་ལྡན་པས་ནི་འདོད་པའི་ཡོན་ཏན་ལྔ་ཤིན་ཏུ་ཆུང་བར་འགྱུར་རོ། །དེ་ལ་ལས་ཀྱི་རྐྱེན་བསྟན་པ་འདིས་ནི་མི་མཆོག་རྣམས་སུ་འགྱུར་གྱི་ལྷ་རྣམས་སུ་ནི་མ་ཡིན་ནོ། །དེ་ནས་དེའི་ཚེ་ན་བཅོམ་ལྡན་འདས་རྣམ་པར་གཟིགས་དེས་ཚིགས་སུ་བཅད་པ་གསུངས་པ། ཇི་ལྟར།
མི་ཡི་ས་ལ་སྐྱེས་བྱིན་འདིས། །དགེ་བའི་འགྲོ་བར་འགྲོ་བ་ཡིན། །ལྷ་རྣམས་དགའ་བ་མིན་པར་འདོད། །གང་ཕྱིར་འབྲས་བུའི་ས་འདིར་འདོད། །ལས་ཀྱི་སར་ནི་མི་རྣམས་ཡིན། །འབྲས་བུའི་ས་ནི་ལྷ་ཡི་གནས། །འབྲས་ཀུན་ལས་ཀྱི་ལམ་ལས་ཡིན། །འབྲས་བུ་ཟད་
པས་རྒྱུ་མེད་ཡིན། །སྐད་ཅིག་དབང་གིས་མྱུར་བར་ཡང་། །སྲོག་ནི་བཟློག་པར་ནུས་མ་ཡིན། །ལས་རྣམས་ཀྱང་ནི་ཟད་པར་གྱུར། །དེ་ཕྱིར་ཡིད་ནི་ལེགས་པར་གྱིས། །སེམས་ཀྱི་ཤུགས་ནི་མཚུངས་པར་ཀུན། །གསོན་པ་རྣམས་ནི་འགོད་པ་ཡིན། །དེ་ཕྱིར་གསོན་པའི་

དོན་དུ་ནི། །མཁས་པས་སྡིག་པ་མ་བྱེད་ཅིག །མ་འོངས་པ་ཡི་སྡུག་བསྔལ་ནི། །སྐྱེ་བོའི་ཚོགས་ཀྱིས་མི་རྟོགས་སོ། །འདི་ན་འཇིག་རྟེན་འཚེད་པ་རྣམས། །གཏི་མུག་ཕྱུགས་ཀྱི་ཚོགས་རྣམས་ཡིན། །སྦྱིན་དང་ཚུལ་ཁྲིམས་དཀའ་ཐུབ་ནི། །རིན་ཆེན་གང་དག་སྙིང་
ལ་སྟེན། །ལྷ་འམ་ཡང་ན་མི་ཡང་རུང་། །དེ་ནི་འགྲོ་བའི་མཆོག་ཏུ་འགྲོ། །སྐྱེ་དང་གནས་དང་འཇིག་པ་ནི། །འདུས་བྱས་ཐམས་ཅད་ཡིན་པར་བརྗོད། །འདུས་བྱས་ཐམས་ཅད་བདེ་བ་མིན། །དེ་དག་འཇིག་པ་ཁོ་ན་ཡིན། །འཇིག་པར་འགྱུར་དང་རྣམ་ཉམས་དང་། །
འབྲལ་དང་སྐད་ཅིག་དེ་ལྟ་བུ། །གསོན་པ་ཀུན་གྱི་བདེ་བ་ཡིན། །དེ་ཕྱིར་དེ་ནི་སྤང་བར་གྱིས། །དེ་ལྟར་འདུས་བྱས་དེ་དག་ཐམས་ཅད་མི་རྟག་པ། སྡུག་བསྔལ་བ། སྟོང་པ། བདག་མེད་པ་སྟེ། སྐྱེ་བོ་དག་སྡུག་བསྔལ་རྣམ་པ་དུ་མའི་ཁུར་གྱིས་ནོན་པ། འཆིང་བ་ལྔས་
བཅིངས་ཀྱང་སྐྱོ་བར་མི་འགྱུར་བར་ལྷ་དང་མི་རྣམས་གཏི་མུག་གིས་ཟུམ་པའི་མིག་དང་། འདོད་ཆགས་སྙིང་ལ་སེམས་པའི་ཡང་དག་པ་མ་ཡིན་པའི་འཆིང་བས་བཅིངས་པ། གཅིག་ཏུ་ན་དོན་དམ་པའི་དོན་དུ་ཀུན་ནས་མངོན་པར་ཞེན་པའི་ཡིད་ཅན་ནི་བྱིས་པ་སོ་སོའི་སྐྱེ་བོ་
ཐམས་ཅད་ཡིན་ཏེ། ཕན་ཚུན་དུ་སྲེད་པ་བརྒྱུད་པས་བཅིངས་པའི་བྱ་བཞིན་དུ་འཁོར་བར་འཁོར་བ་དེ་རྣམས་ལ་ལྷའམ་མི་རྣམས་ཀྱིས་ཀྱང་བདེ་བ་རྟག་པའི་བློ་ནི་མི་བྱའི་འཇིག་རྟེན་འདི་ཐམས་ཅད་ནི་རྣམ་པ་མང་པོ་དང་། རྣམ་པར་རྟོག་པ་དུ་མས་མི་རྟག་པར་ཐམས་
ཅད་དུ་འགྱུར་རོ། །གང་ཡང་སྦྱིན་པ་ཡོན་ཏན་བཅུ་གཉིས་དང་ལྡན་པའི་སྦྱིན་པ་གང་ཡིན་པ་ནི་ལྷ་རྣམས་ལ་མི་དམིགས་ཏེ། འབྲས་བུ་འབའ་ཞིག་གིས་འཚོ་བ་རྣམས་གང་གི་ཚེ་འབྲས་བུ་ཟད་པར་འགྱུར་བ་དང་། རུལ་པར་འགྱུར་བ་དང་། རྣགས་པར་གྱུར་པ་དེའི་ཚེ་
ལྷའི་རིས་དེ་རྣམས་ལས་ལྟུང་བར་འགྱུར་ཏེ། དེ་དག་གང་གི་ཚེ་བསོད་ནམས་ཟད་པར་གྱུར་པ་ན་ངེས་པར་ལྟུང་བར་ཡང་འགྱུར་རོ། །དེ་ལ་ཡོན་ཏན་བཅུ་གཉིས་དང་ལྡན་པའི་སྦྱིན་པ་རྣམས་གང་ཞེ་ན། འདི་ལྟ་སྟེ། ཡུལ་ཕུན་སུམ་ཚོགས་པ་དང་། དུས་ཕུན་སུམ་

ཚོགས་པ་དང་། ཡོན་ཏན་ཕུན་སུམ་ཚོགས་པ་དང་། དགའ་བ་ཕུན་སུམ་ཚོགས་པ་གང་ལ་དགའ་བར་འགྱུར་བར་དེ་རབ་ཏུ་སྟེར་བ་དང་། ཞིང་ཕུན་སུམ་ཚོགས་པར་གྱུར་པ་དང་། བཀྲེས་པ་དང་། སྐོམ་པས་འོངས་པ་རྣམས་ལ་གང་དག་སྟེར་བ་དང་། དད་པ་དང་གུས་པས་རབ་ཏུ་སྟེར་བ་
དང་། ཉོན་མོངས་པ་མེད་པ་ཡོན་ཏན་ཕུན་སུམ་ཚོགས་པ་ལ་རབ་ཏུ་སྟེར་བ་དང་། རྒྱ་ཆེན་པོས་རབ་ཏུ་བསྒྲགས་པས་སྟེར་བ་དང་། གུས་པས་དང་གང་ཟག་མ་ཡིན་པའི་ཚོགས་ལ་རབ་ཏུ་སྟེར་བ་དང་། ཕྲག་དོག་དང་བྲལ་བས་
རབ་ཏུ་སྟེར་བ་དང་། ཉམས་པ་མེད་པར་གུས་པའི་བཀུར་སྟིས་སྟེར་བ་སྟེ་དེ་ལ་ཡོན་ཏན་བཅུ་གཉིས་པོ་དེ་དག་དང་ལྡན་པའི་སྦྱིན་པ་བྱིན་ལ་ཚུལ་ཁྲིམས་ཕུན་སུམ་ཚོགས་ན་ལྷ་རྣམས་སུ་སྐྱེའོ། །ལྷ་ནི་དེ་དག་ཟད་ནས་ངེས་པར་ལྟུང་བར་འགྱུར་རོ། །དེའི་ཕྱིར་ན་ལྷ་དག་གིས་བག་
མེད་པར་གནས་པར་མི་བྱའོ། །ཕྱི་མ་ཡང་དྲི་མ་བཅུ་གཉིས་དང་རྣམ་པར་བྲལ་བར་བྱས་ནས་སྦྱིན་པ་བྱིན་པར་གྱུར་ན་ནི་ཆེན་པོ་ལ་འོས་པར་འགྱུར་ཏེ། འཁོར་ལོས་སྒྱུར་བའི་རྒྱལ་པོའམ། ལྷ་རྣམས་སམ། ལྷ་གཞན་རྣམས་ལས་ལྷག་པར་ཡང་འགྱུར་རོ། །དྲི་མ་བཅུ་གཉིས་
པོ་རྣམས་ནི་འདི་ལྟ་སྟེ། གཅིག་གི་ནང་དུ་གཏོགས་པ་རྣམས་དགེ་འདུན་གྱི་གཏོགས་པ་རྣམས་དང་། བསླབ་པ་མཚུངས་པ་རྣམས་དང་། ཤེས་རབ་དང་། ཡོན་ཏན་ཕུན་སུམ་ཚོགས་པ་རྣམས་ལ་མཉམ་པོར་སྦྱིན་པ་བྱིན་པ་ནི་དྲི་མ་མི་བཟད་པའི་སྦྱིན་པ་དེ་དག་རྣམས་
ཀྱི་འབྲས་བུ་ནི་ཆུང་བར་འགྱུར་རོ། །འདོད་ཆགས་ཀྱིས་སྟེར་བར་གྱུར་པ་གང་ལ་འདོད་ཆགས་པར་གྱུར་པ་བུད་མེད་དམ་སྐྱེས་པར་གྱུར་པ་ལ་ཡང་རུང་སྟེ་དེ་ལ་སྟེར་བའོ། །དེ་ལ་དེ་དག་ནི་དྲི་མ་ཡིན་ནོ། །དགེ་སྦྱོང་ངམ་བྲམ་ཟེ་གང་དག་རྒྱལ་པོས་མཆོད་པར་བྱེད་པ་དེ་ལ་
དང་སྦྱིན་པ་པོ་རབ་ཏུ་མང་པོ་ཅན་རྣམས་ལ་སྦྱིན་པ་དང་། ཇི་ལྟར་སྡུག་བསྔལ་འདི་དག་ལས་འདིས་ཡོངས་སུ་སྐྱོང་སྙམ་པ་དང་། སེམས་ཀྱིས་བསྒོམས་པ་ཡང་མ་ཡིན་པ་དང་། དེ་ལ་དགོས་པ་དེ་དག་རྣམས་ཀྱི་རྒྱུ་མཚན་གྱིས་སྦྱིན་པ་དྲི་མ་ཅན་དུ་འགྱུར་རོ། །གང་དག་

གིས་དེ་ལས་བཟློག་པར་སྦྱིན་པར་བྱའོ། །གཞན་ཡང་སྦྱིན་པ་དྲི་མ་ཅན་རྣམས་ཡོད་དོ། །དེ་དག་གང་ཞེ་ན། འདི་ལྟ་སྟེ། གཏི་མུག་གིས་སྦྱིན་པ་དང་། གྱ་གྱུ་ལ་སོགས་པས་སོ། །གཞན་ཡང་སྦྱིན་པ་དྲི་མ་ཅན་རྣམས་ཡོད་དོ། །མཆོད་པས་ཀྱང་མཆོད་པ་པོ་ཞེས་བྱ་
བ་གང་གིས་ཚུལ་ཁྲིམས་དང་ཤེས་རབ་དང་རབ་ཏུ་ཞི་བའི་བསམ་གཏན་རྣམས་ནི་མི་སྒོམ་གྱི་གཞན་མཆོད་པ་འབའ་ཞིག་བྱེད་དེ། དེ་ནི་གཞན་གྱི་རྐྱེན་གྱིས་འདིར་ཀུན་མཆོད་པར་བྱེད་དེ། དེ་སེམས་པ་དང་ཡང་བྲལ་བ་ཡིན་ནོ། །དེའི་ཚེ་འདི་དག་ཡང་དྲི་མ་ཅན་ཡིན་ནོ། །གཞན་
ཡང་སྦྱིན་པ་དྲི་མ་ཅན་རྣམས་ཡོད་དེ། འདི་ལྟར་ངོར་བྱས་ནས་སྟེར་བར་བྱེད་པའོ། །དེ་ལ་འདི་དག་ཀྱང་དྲི་མ་ཅན་ཡིན་ནོ། །གཞན་ཡང་སྦྱིན་པ་དྲི་མ་ཅན་རྣམས་ཡོད་དེ། ནོར་གྱི་ཐབས་ཀྱི་དབང་དུ་བྱས་ནས་སྟེར་བའོ། །ཇི་ལྟར་སྦྱིན་པ་དེས་བདག་གི་ནོར་གྱི་ཐབས་ཀྱིས་
ནོར་ཉེ་བར་འཛིན་ཏེ། འདི་ཡིད་ཆེས་པ་བསྐྱེད་ལ་བདག་གིས་གཞོམ་པར་བྱའོ། །དེ་ལ་འདི་ཡང་སྦྱིན་པའི་དྲི་མ་ཡིན་ནོ། །གཞན་ཡང་སྦྱིན་པ་དྲི་མ་ཅན་ཡོད་དེ། འདི་ལྟ་སྟེ། དབྱེ་བའི་དོན་དུ་སྟེར་བའོ། །ཇི་ལྟར་འདི་ན་བདག་གི་བུད་མེད་དུ་བྱས་པས་དེ་དང་དེའི་རྩ་ལག་
ཏུ་སྔོན་གྱུར་པ་ཞེས་བྱས་ལ་དེ་གཞོམ་པར་བྱའོ་སྙམ་པའོ། །དེ་ལ་འབྱེད་པར་བྱེད་པ་དེ་དག་རྣམས་ནི་དྲི་མའི་དབང་དུ་གྱུར་པར་མཐོང་བ་ཡིན་ནོ། །གཞན་ཡང་དྲི་མས་ཉེ་བར་བཅོམ་པར་གྱུར་པའི་སྦྱིན་པ་ཡོད་དེ། འདི་ལྟ་སྟེ། འབྲེལ་པའི་དོན་གྱི་སྦྱིན་པ་བུད་མེད་གང་དག་
སྐྱེས་པའི་དོན་དུ་འབྲེལ་བར་བྱེད་པས་སྐྱེས་པས་སྐྱེས་པ་རྣམས་ལ་སྦྱིན་པར་བྱེད་དོ། །དེ་ལ་དེ་དག་ནི་དྲི་མས་ཉེ་བར་བཅོམ་པའི་སྦྱིན་པ་ཡིན་ནོ། །གཞན་ཡང་དྲི་མས་ཉེ་བར་བཅོམ་པར་གྱུར་པའི་སྦྱིན་པ་རྣམས་ནི་དཔེར་ན་གང་དག་ཚོང་གི་རྒྱུ་མཚན་གྱིས་གཞན་དུ་ཡང་ཟས་འཛིན་
ནམ། རྒྱུ་མཚན་གཞན་དུ་ཡང་ཟས་འཛིན་ནམ། རྒྱུ་མཚན་གཞན་ལོ་ལྔ་པར་ཡང་རུང་སྟེ། ཟས་དེ་དག་རྣམས་ཉིད་ཀྱང་གོང་ཆེན་པོས་སྟེར་བར་བྱེད་དེ། བསྡུ་བའི་དོན་དུའོ། །དེ་དག་རྣམས་ལ་ཉེ་བར་བྱིན་ནས་ཀྱང་རྫས་ཀྱིས་ཁྱིམ་བྱེད་དོ། །དེ་ལས་དེ་དག་རྣམས་སོག་པའི་

ཚོང་གི་སྦྱིན་པ་དྲི་མས་ཉེ་བར་བསླད་པ་ཡིན་ནོ། །གཞན་ཡང་དྲི་མས་ཉེ་བར་བསླད་པའི་སྦྱིན་པ་ཡོད་དེ། དཔེར་ན་གྲགས་པའི་སྦྱིན་པ་རྣམས་སོ། །བུ་དང་། རང་གི་སྐྱེ་བོ་དང་། གཉེན་འབྲེལ་རྣམས་སྡུག་ཕོངས་སུ་གྱུར་པ་རྣམས་ལ་སྟེ། དེ་ཡང་འདི་
དག་རྣམས་ལ་སེམས་པ་དང་བྲལ་བ། དྲེགས་པ་ཁོ་ནས་སྦྱིན་པ་གཏོང་བས་ན་གྲགས་པའི་སྦྱིན་པ་དེ་ནི་དྲི་མས་ཉེ་བར་བཅོམ་པ་ཡིན་ནོ། །དེ་དག་རྣམས་ཐམས་ཅད་ཀྱང་གལ་ཏེ་སེམས་དང་བྲལ་བར་གྱུར་ན་དེ་དང་འདྲ་བར་འགྱུར་རོ། །གལ་ཏེ་སེམས་ཁྱད་དུ་འཕགས་པ་ལས་
ཀྱང་དྲི་མ་དང་བྲལ་བར་འགྱུར་རོ། །དཔེར་ན་གོས་དྲི་མ་ཅན་རྣམས་ཐལ་བས་དྲི་མ་མེད་པར་བྱེད་པ་དེ་བཞིན་དུ་སེམས་ཀྱིས་བསྒོམས་པར་འགྱུར་བས་སོ། །ཡང་དེའི་ཚེ་བཅོམ་ལྡན་འདས་རྣམ་པར་གཟིགས་ཀྱིས་ཚིགས་སུ་བཅད་པ་གསུངས་པ། ཇི་ལྟར། ཡོན་ཏན་བཅུ་གཉིས་
ཡང་དག་ལྡན། །དྲི་མ་བཅུ་གཉིས་དང་བྲལ་བ། །སྦྱིན་པ་ཡོངས་སུ་དག་པར་འགྱུར། །དེ་ལས་བཟློག་པའི་ཀུན་རྟོག་པ། །ལྷ་རྣམས་གང་དག་སྐྱེས་བུ་ཡིན། །སྦྱིན་པའི་འབྲས་བུ་བླ་མེད་མིན། །སྦྱིན་པ་དང་ནི་བྲལ་སྡིག་གིས། །སྐྱེས་བུ་ཐ་ཆད་ལྟུང་བ་ཡིན། །འདོད་
པ་སེར་སྣའི་དྲི་མ་དང་། །བུ་དང་བུ་མོའི་དབང་གིས་འགྲོ། །ཟས་འབའ་ཞིག་ལ་འདོད་པ་ཡི། །མི་ནི་འཆི་བར་འགྲོ་བ་ཡིན། །འདོད་པའི་མདུད་པས་གྲོལ་མིན་དང་། །ཡིད་ཀྱི་ལྗོན་ཤིང་ཟད་པ་ཡིན། །མུན་པའི་ཚོགས་ནི་འཇོམས་བྱེད་པ། །རབ་སྦྱིན་འདིར་ནི་སྦྱིན་བྱེད་པ། །མཆོག་
ལ་སྤྱོད་པ་སྦྱིན་པ་དང་། །སྦྱིན་པ་པོ་ཡང་དེ་རྗེས་ལ། །སྦྱིན་པ་ལེགས་པའི་ལམ་སྟོན་པོ། །འཇིག་རྟེན་ཕ་རོལ་དུ་འགྲོའོ། །སྦྱིན་པའི་ཆུ་ཡིས་བཀྲུས་པའི་མི། །ཚུལ་ཁྲིམས་རླབས་ཀྱིས་ཡོངས་བསྒོས་པ། །ཤེས་རབ་རྒྱ་ཆེན་དྲི་མེད་པ། །སྦྱིན་པས་སྡུག་བསྔལ་ཟད་པར་
བྱེད། །སྐྱེས་བུ་ཕན་པར་འདོད་པ་ཡིས། །མར་མེ་གསུམ་ནི་སྤང་བར་བྱ། །སྦྱིན་དང་ཚུལ་ཁྲིམས་དེ་བཞིན་ཤེས། །དེ་དག་སྐྱོན་རྣམས་འཇོམས་བྱེད་ཡིན། །སྲེད་པ་རྒྱ་ཆེའི་ངན་སོང་ནི། །རྣམ་རྟོག་རླབས་ཀྱིས་ཀུན་ཏུ་གང་། །སྡུག་བསྔལ་རྒྱ་མཚོའི་གཞིར་གྱུར་ཏེ། །ཤེས་

དང་ཚུལ་ཁྲིམས་ཀྱིས་བསྲུངས་ཡིན། །སྨྱོ་བ་དང་ནི་ཉུང་བའི་ཡང་། །གང་དང་དེ་ལ་ངེས་པར་ལྟུང་། །སེམས་ཀྱི་འཆིང་བ་དེ་དག་རྣམས། །སྦྱིན་ཚུལ་གཉིས་ཀྱིས་ལེགས་པར་བསྲུངས། །ཉོན་མོངས་ནད་ནི་ངེས་འཇོམས་པོ། །གསུམ་པོ་འདི་ནི་སྨད་དུ་གནས། །སྦྱིན་དང་ཚུལ་
ཁྲིམས་དེ་བཞིན་ཤེས། །དེ་དག་རྟག་ཏུ་བདེ་བར་འགྲོ། །བག་མེད་མི་བཟད་པ་ཡི་སེམས། །ཀུན་རྟོག་གྱ་གྱུ་མྱུར་འཇུག་པ། །ཤེས་རབ་ལ་སོགས་གསུམ་པོ་འདིས། །མི་ཡི་འཆིང་བ་འཇིགས་པར་བྱེད། །སྐྱོན་གང་མེར་ཡང་མ་མཐོང་བས། །གང་གིས་འཇིག་རྟེན་
འདི་བསྲེག་གོ། །མེ་དེ་ཡེ་ཤེས་ཆུ་ཡིས་ནི། །བཅོམ་ནས་མྱ་ངན་འདས་པར་འགྲོ། །དེ་ལྟར་བཅོམ་ལྡན་འདས་རྣམ་པར་གཟིགས་དེས་མཆོད་རྟེན་དེ་ལ་ཚིགས་སུ་བཅད་པའི་མདོ་མངོན་པར་བྲིས་སོ། །དེ་ལ་སྦྱིན་པ་དེ་དག་ནི་ལྷ་རྣམས་ཀྱི་མ་ཡིན་གྱི་མི་རྣམས་ཀྱིའོ། །རྒྱུ་མཚན་
འདིས་ནི་ཆེས་མཆོག་ཏུ་གྱུར་པ་ནི་མིའི་ཡིན་གྱི་ལྷ་རྣམས་ཀྱིས་ནི་མ་ཡིན་ནོ། །དེ་ལ་སྦྱིན་པ་དེ་དག་ཉེ་བར་གོ་བར་གྱིས་ལ་ཐམས་ཅད་ཀྱིས་ཡུལ་ཐམས་ཅད་བཀྱིགས་ཏེ་རྟག་ཏུ་ཐབས་མེད་པའི་སེམས་ལེགས་པར་གཟུང་བར་བྱའོ། །གང་གི་ཕྱིར་དེ་བཟུང་བས་ཀྱང་ཤིང་ཆེན་པོ་
འདི་འགག་པར་འགྱུར་རོ། །ཡེ་ཤེས་ཀྱི་མེ་རྣམས་ཀྱིས་སྲེག་པར་བྱེད་དོ། །དེ་བསྲེགས་པས་མཆོག་ཏུ་དགའ་བའི་བག་མེད་པའི་འཆིང་བ་མེད་པ་འཛད་པ་མེད་པའི་གོ་འཕང་ཐོབ་པར་འགྱུར་གྱིས། དེའི་ཕྱིར་ན་བག་མེད་པ་རབ་ཏུ་བརྩོན་པས་ཀྱང་དགྲ་བོ་བཞིན་དུ་རབ་
ཏུ་སྤང་བར་གྱིས་ཤིག །གཞན་ཡང་ཆོས་བརྒྱད་པོ་ལྷ་རྣམས་ལ་སྤང་བར་བྱ་བ་མཆོག་ཏུ་ངོ་ཚ་བར་བྱེད་པའོ། །འདི་ཡང་གང་ཞེ་ན། འདི་ལྟ་སྟེ། ལས་རྣམས་རབ་ཏུ་བསྟན་པས་རབ་ཏུ་སྟོན་ན་ཡང་ཟས་ཀྱི་དུས་ན་ཡང་ངོ་ཚ་བར་འགྱུར་བ་སྟེ། ལས་རྣམས་རྣམ་
པ་གསུམ་པོ་ཆུང་ངུ་དང་བར་མ་དང་ཆེན་པོ་རྣམས་ཀྱི་ཆུང་ངུ་དང་བར་མ་དང་ཆེན་པོར་འགྱུར་རོ། །དེ་ལ་གཞན་ཡང་ཆུང་ཟད་ཀྱང་སྦྱིན་པར་ལྷ་རྣམས་ཀྱིས་མི་ནུས་སོ། །ལས་རྣམས་ལ་འཕོ་བ་ཡང་ཡོད་པ་མ་ཡིན་ནོ། །དེ་ལ་གང་གི་ཚེ་ལྷ་རྣམས་ཟས་ཀྱི་བྱ་བའི་ལས་

བྱེད་པ་དེའི་ཚེ་གང་གིས་རྣམ་པ་ཇི་ལྟ་བུའི་སྦྱིན་པ་དག་བྱིན་པར་གྱུར་པ་དང་། ཚུལ་ཁྲིམས་བསྲུངས་པར་གྱུར་པ་དེའི་རྣམ་པ་དེ་ལྟ་བུ་ཉིད་ཁོ་ནའི་ཟས་རབ་ཏུ་འབྱུང་ངོ་། །དེས་གཞན་གྱི་ཟས་ཆེས་ལྷག་པ་དྲི་དང་། རོ་དང་། རེག་བྱ་ཕུན་སུམ་ཚོགས་པ་དེ་མཐོང་
ནས་མཆོག་ཏུ་ངོ་ཚ་བ་སྙིང་ལ་འོང་ངོ་། །གང་གི་ཚེ་ནགས་དང་། ཉེ་བའི་ནགས་དང་། རྫིང་བུ་དང་། པད་མའི་ཚང་ཚིང་དུ་རྩེ་བར་བྱེད་པ་དེའི་ཚེ་བདེ་བ་དེ་དག་ཐམས་ཅད་ལས་ཅི་འདྲ་བར་སོ་སོར་ཉེ་བར་གནས་སོ། །དེ་ལ་ལྷ་གཞན་རྣམས་ལྷ་གཞན་རྣམས་ཀྱི་ཆེས་ལྷག་པའི་བདེ་བ་
མངོན་པར་མཐོང་ནས་མཆོག་ཏུ་ངོ་ཚ་བ་དང་ལྡན་པར་གྱུར་ཏེ། རང་གི་ལུས་ལ་ཞུམ་པར་འགྱུར་རོ། །ལྷ་རྣམས་ཀྱི་ལྔ་པོ་འདི་རྣམས་ནི་ངོ་ཚ་བའི་རྒྱུ་ཡིན་ཏེ། ལྔ་གང་དག་ཅེ་ན། འདི་ན་ཟས་ཀྱི་དུས་ན་ལྷ་གཞན་དག་གི་བདུད་རྩི་དྲི་མ་མེད་པ་རྣམས་མངོན་པར་མཐོང་ལ་རང་གི་ཡང་དྲི་
མ་ཅན་དང་དམན་པར་ཡང་གྱུར་པ་ཀུན་ནས་ཉེ་བ་ན་གནས་ནས་ཟ་བར་བྱེད་པ་ན་མཆོག་ཏུ་ངོ་ཚ་བ་ལྟ་བུ་སྐྱེའོ། །འདི་ནི་ལྷ་རྣམས་ཀྱི་ངོ་ཚ་བའི་རྒྱུ་དང་པོ་ཡིན་ནོ། །གཟུགས་ཤིན་ཏུ་བཟང་བ་རྒྱན་དང་ཆ་བྱད་མཆོག་ཏུ་བཟང་བ་མང་བ་ལྷ་གཟུགས་བཟང་བའི་ལྷ་གཞན་ཉེ་བར་
གནས་པ་དེ་དག་མངོན་པར་མཐོང་ནས། ལྷ་གཞན་རྣམས་ངོ་ཚ་བར་འགྱུར་རོ། །འདི་ནི་ངོ་ཚ་བའི་རྒྱུ་གཉིས་པའོ། །གཞན་ཡང་ངོ་ཚ་བའི་རྒྱུ་གསུམ་པ་ནི་གང་གི་ཚེ། ནམ་མཁའ་ལ་པད་མའི་ནགས་དང་། ཉེ་བའི་ནགས་དང་། རིའི་རྩེ་མོ་གསེར་དང་། བཻ་
ཌཱུརྱའི་རང་བཞིན་རྣམས་ལ་རྩེད་མོ་རྩེ་བའི་དོན་དུ་ལྷ་རྣམས་གང་དག་འགྲོ་བར་བྱེད་པ་དེའི་ཚེ་ལས་ཀྱི་ཁྱད་པར་གྱིས་ཤིན་ཏུ་མྱུར་བར་འགྲོ་བར་འགྱུར་རོ། །ལྷ་གང་དག་ལས་ཤིན་ཏུ་ཆུང་བ་དེ་འགྲོ་བ་བུལ་བར་འགྱུར་རོ། །དེ་ཤུགས་དང་ལྡན་པར་འགྲོས་ཀྱིས་རྗེས་སུ་
འགྲོ་བ་ཡང་མ་ཡིན་ནོ། །དེ་རང་གི་གནས་ཀྱི་ལྷ་མོའི་ཚོགས་དེ་རྣམས་ཀྱི་མདུན་དུ་ངོ་ཚ་བར་འགྱུར་རོ། །གཞན་ཡང་ངོ་ཚ་བའི་རྒྱུ་བཞི་པ་དཔེར་ན་གང་གི་ཚེ་ལྷ་པད་མའི་རྫིང་བུ་ལ་སྟེན་པ་དེའི་ཚེ་ལྷ་གང་གིས་རྣམ་པ་ཇི་སྲིད་ཀྱི་ལས་བྱས་པར་གྱུར་པ་དེའི་རྣམ་པ་དེ་སྲིད་ཀྱི་པད་མ་འབྱུང་བར་

འགྱུར་རོ། །ཁ་དོག་དང་། དྲི་དང་། རེག་བྱ་ཤིན་ཏུ་ཆེ་བ་དེ་དག་རྣམས་མངོན་དུ་ལེགས་པར་མཐོང་ནས་ཀྱང་ཇི་ལྟར་འཁོར་གྱི་ནང་དུ་འཇུག་པ་ན་གཙོ་བོར་གྱུར་པའི་ལྷ་རྣམས་ཤིན་ཏུ་ངོ་ཚ་བར་འགྱུར་རོ། །གཞན་ཡང་ངོ་ཚ་བའི་རྒྱུ་ལྔ་པ་ནི་ལྷ་རྣམས་སོ་སོ་ལ་ངོ་ཚ་བར་འགྱུར་
བའོ། །གང་དག་ཞེ་ན། འདི་ལྟ་སྟེ། སྟན་རྣམས་ནི་གང་དག་གིས་རྣམ་པ་ཇི་ལྟ་བུ་དག་གི་ལས་བྱས་པར་གྱུར་པའི་ལྷ་དེ་དང་དེ་དག་གི་རྣམ་པ་དེ་ལྟ་བུ་རྣམས་སུ་སྟེ། རྣམ་པ་དེ་ལྟ་བུ་ཁོ་ནའི་སྟན་རྣམས་འབྱུང་བར་འགྱུར་རོ། །དེ་ལ་གང་གིས་ཤིན་ཏུ་ལེགས་པར་བྱས་པའི་ལས་བྱས་པར་གྱུར་
པ་དེ་དག་རྣམས་ལ་ནི་བཻ་ཌཱུརྱའི་རང་བཞིན་དང་། ཨིན་དྲ་ནཱི་ལའི་རང་བཞིན་ནམ། པད་མ་རཱ་གའི་རང་བཞིན་གྱི་སྟན་རྣམས་རབ་ཏུ་འབྱུང་བར་འགྱུར་རོ། །སྟན་དེ་དག་ལ་ལྷ་གཞན་གང་དག་འདུག་པར་བྱེད་པ་ན་ལས་རྣམས་ཉུང་བའི་ཕྱིར་ན་དེའི་ཚེ་ན་སྟན་དེ་ཡང་གསེར་དུ་འགྱུར་བའམ།
དེ་ཡང་ན་དངུལ་གྱི་རང་བཞིན་དུ་འགྱུར་བའམ། དེ་ཡང་ན་ཤེལ་གྱི་རང་བཞིན་དུ་འགྱུར་རོ། །དེའི་ཚེ་སྟན་རྣམ་པར་གྱུར་པ་དེ་མངོན་པར་མཐོང་ནས་ལས་ལྕི་མོ་དང་ཡང་མོ་རྣམ་པ་སྣ་ཚོགས་པ་ཡིན་པ་ཁོ་ནས་ལྷ་དེ་དག་ཀུན་ནས་ཤིན་ཏུ་ངོ་ཚ་བར་འགྱུར་རོ། །དེ་རྣམས་ངོ་ཚ་བས་གཟི་བརྗིད་
རྣམས་ཡོངས་སུ་ཉམས་པར་འགྱུར་རོ། །དེ་དག་དེ་ལྟར་ཀུན་ནས་ཉམས་པས་བཞིན་གྱི་མདངས་ཡོངས་སུ་ཉམས་པར་འགྱུར་བ་དང་། གཞན་ཡང་ཤིན་ཏུ་རབ་ཀྱི་སྟོབས་དང་ལྡན་པ་དང་། ཆེས་ལྷག་པའི་ལྷ་རྣམས་མངོན་པར་མཐོང་ནས་ལྷ་ལས་རྣམས་ཤིན་ཏུ་དམན་
པའི་ལྷ་དེ་དག་ལྷ་མོ་རྣམས་ཀྱིས་ཡོངས་སུ་སྤོང་ངོ་། །ལྷ་མོ་དེས་ལྷ་དེ་དག་ཡོངས་སུ་སྤངས་ནས་ལྷ་གཞན་རྣམས་ལ་རྟེན་ནོ། །ལུགས་གཅིག་ཏུ་ངེས་པའི་ལྷ་མོ་དེ་དག་རྣམས་ཐམས་ཅད་ཀྱང་ལྷ་གཞན་དག་རྣམས་ལ་ཀུན་ནས་འཕོས་ནས་ཁྱད་པར་དུ་འཕགས་པའི་ལྷ་མོ་དག་
དགའ་བར་བྱེད་དོ། །ལས་དམན་པའི་ལྷ་དེ་རྣམས་མཆོག་ཏུ་ངོ་ཚ་བ་ཐོབ་པར་འགྱུར་རོ། །འདི་ནི་ལྷ་རྣམས་ཀྱི་རྒྱུ་ལྔ་པ་ཡིན་ནོ། །འཁོར་གྱི་ནང་དུ་འགྲོ་བ་ན་ངོ་ཚ་བར་བྱེད་པ་ཡིན་པ་དེའི་ཕྱིར་ན་རྣམ་པར་འཇིག་པར་འགྱུར་བའི་ཆོས་ཅན་གྱི་འདུས་བྱས་ཀྱི་ཆོས་རྣམས་ཐམས་ཅད་

ལ་ཤིན་ཏུ་མྱུར་བ་མྱུར་བར་ཏེ། གང་ལ་རྣམ་པ་དེ་ལྟ་བུ་ཁོ་ནའི་མངར་བ་དང་འདྲེས་ཤིང་བཅས་པའི་ལོ་མ་མེད་པའི་རོས་ཀྱང་སྡུག་བསྔལ་སྐྱེད་དེ། བདེ་བར་མངོན་པར་ང་རྒྱལ་བ་སྡུག་བསྔལ་དང་འདྲེས་པ་ཡིན་ན། སྐྱེ་བ་གཞན་རྣམས་སུ་དེ་སྐྱེས་
པའི་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་བ་རྣམས་སུ་སོ་སོར་ངེས་པར་སྡུག་བསྔལ་ཆེན་པོ་རྣམ་པ་དུ་མ་རབ་ཏུ་ཕལ་ཆེ་བ་སྐྱེ་བ་རྣམས་ལ་སྨོས་ཀྱང་ཅི་དགོས། དཔེར་ན་རྒྱ་མཚོར་རྣམ་པ་སྣ་ཚོགས་པ་རྣམ་པ་དུ་མའི་ཆུ་ཀླུང་རྣམས་འབབ་པའོ། །དེ་བཞིན་
དུ་སེམས་ཅན་རྣམས་ཀྱི་སེམས་ཀྱི་རྒྱུད་ཀྱི་འཇུག་ངོགས་རྣམས་ལ་ཡང་རྣམ་པ་སྣ་ཚོགས་པའི་རྒྱུད་རྣམས་ཀྱིས་ཉེ་བར་བཞག་པའི་སྡུག་བསྔལ་དུ་མ་རབ་ཏུ་དྲག་པ་རྣམས་སྐྱེ་བའོ། །ལྷ་རྣམས་དེ་དག་ལ་རྗེས་སུ་དཔགས་པ་འདིས་ནི་སྡུག་བསྔལ་གཞན་རྣམས་ཀྱང་བསྟན་ནོ། །
འདི་དག་ཐམས་ཅད་ཉིད་དང་། ཐམས་ཅད་དུ་རྣམ་པ་ཐམས་ཅད་ཀྱིས་ཀྱང་དུས་གསུམ་དང་ལྡན་པར་སྡུག་བསྔལ་རྣམ་པ་གསུམ་གྱིས་གང་བར་གྱུར་པ་ཡིན་ནོ། །སྡུག་བསྔལ་རྣམས་འཇོམས་པར་བྱེད་པ་རྣམ་པར་འཇིག་པར་བྱེད་པ་པོ་རྣམས་ནི་ཤེས་རབ་དང་།
ཚུལ་ཁྲིམས་དང་། སྦྱིན་པ་དང་གསུམ་ཡིན་ནོ། །དེ་ནས་དེའི་དུས་ན་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། སྦྱིན་དང་ཤེས་རབ་ཚུལ་ཁྲིམས་ལ། །གང་དག་བློ་ནི་ལེགས་མི་རྟེན། །སེམས་ཅན་དེ་ནི་རྟག་སྡུག་བསྔལ། །བདེ་བ་དེ་དག་
རྣམས་ལ་མེད། །རྣམ་པ་སྣ་ཚོགས་རྒྱུ་རྣམས་ཀྱིས། །གང་ཚེའང་གང་གང་ཇི་ཇི་ལྟར། །ལས་རྣམས་བྱེད་པའི་སྐྱེ་དེ་དག །འབྲས་བུའང་རྣམ་པ་དེ་འདྲ་ཡིན། །འདི་དག་ཐམས་ཅད་རྒྱུ་ལྡན་ཡིན། །འདི་ལ་རྒྱུ་ནི་ཡོད་མིན་པའི། །གང་ཕྱིར་འདུས་བྱས་མི་
འཇིག་པའི། །རྒྱུ་ནི་མཐོང་བ་མ་ཡིན་ནོ། །ཐོག་མེད་དུས་ནས་ངོ་ཚའི་བཞིན། །སེམས་ཀྱི་སྐྱོན་གྱིས་བསླུས་པ་ཡིན། །མཐོ་རིས་བློ་གྲོས་དམན་གྱུར་པས། །དེ་ཕྱིར་སྦྱིན་པ་མཛེས་པ་ཡིན། །སྦྱིན་པ་ཁྱད་པར་འགྲོ་རིམ་ལྡན། །སེར་སྣའི་དྲི་མ་སྤངས་པ་རྣམས། །

རྩེད་མོའི་ཆེད་དུ་བྱེད་པའི་ལྷ། །ཆུད་ཟོས་ཡིད་ཀྱིས་ཟད་བྱས་ནས། །མི་གང་བཀྲེས་སྐོམ་རང་བཞིན་གྱི། །ཡི་དགས་རྣམས་སུ་རྒྱུག་པ་ཡིན། །སེར་སྣའི་འབྲས་བུ་དེ་དག་ཀུན། །དེ་ཉིད་གཟིགས་པས་གསུངས་པ་ཡིན།