Kinh tạng Tây Tạng (Kangyur Đại Học) — 070_མདོ་སྡེ།_ལ

ལ་བུ་གཡེར་ཀ་རྣམས་དང་། འབབ་ཆུ་དང་། ཆུ་ཀླུང་དང་། རྫིང་བུ་དང་། ཚལ་དང་། འཇུག་ངོགས་དང་། མེ་ཏོག་དང་། བྱའི་སྒྲ་སྐད་ཕུན་སུམ་ཚོགས་པ་དང་། ལྷ་རྫས་མཆོག་གི་དྲི་དང་། རབ་ཏུ་དང་བ་
དང་། ཉེ་འཁོར་ཡང་ཀུན་ཏུ་མཉམ་པ་དང་། འོད་དང་ལྡན་པའི་རི་དེའི་རྒྱབ་ཏུ་ཕྱིན་ནས་སླར་ཉིད་ཀྱང་ནམ་མཁའ་ལ་འཁོད་དོ། །མཆོག་ཏུ་སྐྱིད་པའི་ལྷན་ཅིག་སྤྱོད་པའི་གྲོགས་རྣམས་དང་བཅས་པ་ལ་ལྷ་ཁ་ཅིག་གི་ནི་བརྒྱ་ཁོ་ནའོ། །གཞན་གྱི་ནི་ཉིས་བརྒྱའོ། །དེ་མིན་རྣམས་ཀྱི་ནི་
སུམ་བརྒྱའོ། །དེ་བཞིན་དུ་རང་གི་ལས་ཀྱི་ཁྱད་པར་གྱིས་ཁྱད་པར་དུ་གྱུར་པ་ཡིན་ནོ། །ལྷན་ཅིག་སྤྱོད་པའི་འཁོར་འཕེལ་བ་དང་འགྲིབ་པ་ནི་གཞན་ཁ་ཅིག་གི་ནི་སྟོང་ངོ་། །གཞན་གྱི་ནི་སྟོང་ཕྲག་གཉིས་སོ། །གཞན་རྣམས་ཀྱི་ནི་སྟོང་ཕྲག་གསུམ་སྟེ། དེ་ལྟར་ཇི་སྲིད་དུ་སྟོང་ཕྲག་ཉི་ཤུར་
འགྱུར་རོ། །རྣམ་པ་སྣ་ཚོགས་པའི་གར་དང་རྔ་སྐད་ཀྱི་སྒྲས་བསྒྲགས་པར་གྱུར་པ་ན་དགའ་ཞིང་གླུ་ཡང་ལེན་པས་ནགས་ནས་ནགས་གཞན་ཉེ་བར་སྟེན་ཏོ། །དེ་བཞིན་དུ་པད་མའི་ནགས་ནས་རྩི་བྱེད་པད་མའི་ནགས་རྣམས་སུ་འགྲོ་ལ་རྩི་འབྱུང་བ་དང་ཡང་དག་པར་ལྡན་པ་རྣམས་ནས་
རྩིའི་ནགས་སུ་འགྲོ་བར་འགྱུར་ཏེ། ལྷ་དེ་དག་རྣམས་རྔ་སྐད་ཡན་ལག་ལྔ་ཉེ་བར་སྒྲོགས་པར་གྱུར་པའི་རི་དེའི་རྒྱབ་དེ་ན་གཞན་དགའ་བ་ལྷག་པར་གྱུར་པའི་ཁམས་མཆོག་དང་རབ་ཏུ་ལྡན་པར་གྱུར་པ་རྣམས་ལ་འདི་ལྟ་སྟེ། གང་དག་རྡོ་ཡིན་པ་དེ་དག་རྣམས་ནི་ཐམས་ཅད་ཀྱང་རིན་པོ་ཆེའི་རང་

བཞིན་མཆོག་ཏུ་རྣམ་པར་བཀྲ་བའི་ཆ་ཤས་ཀྱི་སའི་ཆ་རྣམས་ཡིན་ནོ། །ཉི་མ་བས་ཆེས་ལྷག་པའི་འོད་རྣམས་དང་ལྡན་པ། མནན་ན་ནེམ་ལ་བཏེག་ན་འཕར་བ་ནི་ཇི་ལྟར་འཛམ་བུའི་གླིང་པ་རྣམས་ཀྱི་གོ་ན་ཀཱི་མཆོག་ཏུ་འཇམ་པའི་རས་བལ་གྱིས་བཀང་བའམ། གང་ནང་ཚངས་ཅན་
དུ་གྱུར་པ་མནན་ན་ནེམ་ལ་བཏེག་ན་འཕར་བ་རྣམས་སམ། འཇམ་པོར་གྱུར་པ་གཞན་ཡང་རུང་སྟེ་རྐང་པ་བཞག་གམ་མ་བཞག་པ་ན་ཡང་ནེམ་པར་བྱེད་པ་རྣམས་ཡིན་ནོ། །དེ་བཞིན་དུ་རྒྱུན་གྱི་རི་གང་ཡིན་པ་དེའི་རྒྱབ་ན་གང་ཆུང་ཟད་རིན་པོ་ཆེར་གྱུར་པའམ། སའི་ཆའམ། ལྗོན་
ཤིང་གི་ཡལ་གའམ། རིའི་རྩེ་མོའམ། ཨུད་པ་ལའམ། ནོར་བུའི་རང་བཞིན་རྣམས་ཀྱང་རུང་སྟེ། དེ་ཐམས་ཅད་མཆོག་ཏུ་འཇམ་པ་དང་མཆོག་ཏུ་རེག་ན་བདེ་བ་དང་། མཆོག་ཏུ་མཐོང་ན་ཡིད་འཕྲོག་པས་དགའ་བ་ནི་ཇི་ལྟར་རྣམ་པར་བཀྲ་བ་རྣམས་དང་འདྲ་བ་ཡིན་ནོ། །རྣམ་པར་བཀྲ་
བར་གྱུར་པའི་རི་དེའི་རྒྱབ་ཏུ་ཕྱིན་ནས་ལྷ་དེ་རྣམས་དགའ་བར་བྱེད་ཅིང་ཡོངས་སུ་སྤྱོད་དོ། །རྣམ་པ་སྣ་ཚོགས་པའི་བདེ་བའི་སྐལ་བ་ཅན་རྣམས་ལྷན་ཅིག་སྤྱོད་པའི་འཁོར་དང་བཅས་པ་ཕན་ཚུན་དུ་དེ་ལ་རྗེས་སུ་སོང་བས་ཆགས་པའི་ཡིད་ཅན་འདོད་པའི་ཡོན་ཏན་ཐམས་ཅད་ཕུན་སུམ་ཚོགས་པའི་
རེག་བྱའི་བདེ་བ་ཉམས་སུ་མྱོང་བར་བྱེད་དོ། །རྒྱུན་གྱི་རིའི་རྒྱབ་ཏུ་ཕྱིན་ནས་མཆོག་ཏུ་དགའ་བར་གྱུར་པའི་ལྷ་བརྒྱ་སྟོང་ཕྲག་དུ་མའི་ཚོགས་ཀྱིས་གང་བ་ཐམས་ཅད་ནས་ཀྱང་གླུ་དང་། གར་མཆོག་དང་ལྡན་པའི་ལྷའི་བུ་མོས་ཡོངས་སུ་བསྐོར་བས་ལྷ་དེ་དག་ལྷའི་ཡུལ་གྱི་བདེ་བ་རྣམས་ཉམས་
སུ་མྱོང་བར་བྱེད་དོ། །དེ་དག་རྣམས་དེ་ལྟར་དགའ་བས་དུས་ཡུན་རིང་པོར་ཡན་ལག་ལྔ་དང་ལྡན་པའི་རྔ་སྐད་དང་། ཡུལ་ལྔའི་བདེ་བ་རྣམས་ཀྱང་ཉམས་སུ་མྱོང་བས་དུས་རིང་པོ་འདས་པར་བྱས་ནས་ཚོགས་པ་རྣམས་དང་། འདུས་པ་རྣམས་དགའ་བར་བྱེད་ཅིང་གླུ་མཆོག་གི་སྒྲ་རྣམས་ལ་
ཡང་རབ་ཏུ་ཆགས་པར་གྱུར་པ་ལས་ནམ་ཞིག་གི་ཚེ་ན་འཐབ་བྲལ་བའི་འཇིག་རྟེན་པ་རྣམས་ཀྱིས་མཐོང་མ་མྱོང་བ་མཆོག་ཏུ་མིང་དུ་བྱ་བའི་འོད་ཆེན་པོ་མཆོག་ཏུ་ཕལ་ཆེ་བ་གཞན་ཞིག་དེ་དག་རྣམས་ཀྱིས་མཐོང་ནས། ལྷ་གང་དག་སེམས་སྟོབས་ཆུང་བ་དེ་དག་རྣམས་ལས་ཁ་ཅིག་ནི་མ་བཟོད་

པར་གྱུར་པས་མིག་གཉིས་ལག་པས་བཀབ་ནས་ས་ལ་འགྱེལ་བར་གྱུར་ཏོ། །ལྷ་གཞན་ཁ་ཅིག་ནི་འོད་མ་བཟོད་ནས་ཤིང་གི་གོ་སྐབས་རྣམས་སུ་བཞའ་བར་གྱུར་ཏོ། །རིན་པོ་ཆེའི་རང་བཞིན་གྱི་ཕུག་གི་ནང་དུ་ཡང་ལྷན་ཅིག་སྤྱོད་པའི་འཁོར་དང་བཅས་ཏེ་གབ་པར་གྱུར་
ཏོ། །ལྷ་གཞན་གང་དག་སེམས་སྟོབས་ལྷག་པར་གྱུར་པ་དེ་དག་ནི་སེམས་སྟོབས་དང་ལྡན་པས་ཚོགས་པ་རྣམས་དེ་ཁོ་ན་བཞིན་དུ་བྱས་ནས་ཤིན་ཏུ་ངོ་མཚར་བས་ཡིད་ཚིམ་པར་ཕྱིར་ཉིད་ཀྱང་དེས་འགལ་བར་བྱེད་པར་ཡང་མི་རྩི་བར་ལྟ་བར་བྱེད་པར་རྩོམ་སྟེ། འདི་ཅི་ཞིག་ཡིན་པར་
གྱུར་ན། དེ་ལྟ་བུ་འདི་གང་གི་ཡིན་རྣམ་པ་དེ་ལྟ་བུ་གང་ཡིན་པའི་འོད་གང་གིས་རི་འདིའི་རྒྱབ་ཏུ་དེ་ལྟ་བུའི་འོད་ཀྱིས་དགའ་བ་དེ་ལྟ་བུའི་རིན་པོ་ཆེ་དང་ལྡན་པ། དེ་ལྟར་ཀུན་ནས་འབར་བ་དང་ལྡན་པར་གྱུར་པ། དེ་སྐད་དུ་ཡང་བརྗོད་ནས་ཇི་ལྟར་བདག་ཅག་རྣམས་ཀྱིས་སྔར་ནམ་ཡང་
མ་མཐོང་ངོ་ཞེས་དེ་ལྟར་ཡིད་ལ་བྱས་ཏེ། ནམ་མཁའ་ལ་བལྟ་བར་བརྩམས་པ་ན་ཇི་སྲིད་དུ་འོད་ཆེན་པོར་གྱུར་པ་ལྷུང་བ་མཐོང་སྟེ། མཆོག་ཏུ་གྱུར་པའི་འོད་འབར་བ་དང་ལྡན་པ་དང་། གཡོ་བར་གྱུར་པ་ལྟར་ནམ་མཁའ་ལས་ལྷུང་ངོ་། །ལྷུང་བར་གྱུར་པའི་འོད་དེ་ལ་ཀུན་ཏུ་ལྟ་
བར་བྱེད་ཅིང་འོད་ལྷུང་བ་འདིའི་འོད་ཀྱི་ཚད་ནི་ཅི་ཙམ་ཞིག་ཡིན་པར་གྱུར་ན་ཞེས་དེའི་ཚད་ཙམ་འབའ་ཞིག་རྣམ་པར་བརྟགས་པ་ཙམ་གྱིས་བལྟས་ནས་གླེང་རྗོད་ཀྱང་བྱེད་དེ། ཇི་ལྟར་དཔག་ཚད་ལྔ་སྟོང་རྣམས་སུ་འཐབ་བྲལ་གྱི་ནམ་མཁའ་ལ་རབ་ཏུ་འབར་བ་བཞིན་དུ་འོད་འབབ་ཅིང་རབ་ཏུ་
ལྷུང་སྟེ། རྣམ་པ་དེ་ལྟ་བུའི་འོད་བྱེད་པ་འདི་གཞལ་བར་ཡང་མི་ནུས་སོ། །དེ་ནས་ཇི་ལྟར་འོད་དེ་དང་ཉེ་བར་གྱུར་པ་དེ་ལྟར་མཆོག་ཏུ་སེམས་སྟོབས་དང་ལྡན་པར་གྱུར་པའི་ལྷ་དེས་ཀྱང་ལྟ་བར་མི་ནུས་པས་མིག་དག་འཛུམས་པར་བྱེད་དོ། །དེ་ཅིའི་ཕྱིར་ཞེ་ན། གཟི་བརྗིད་གང་
མ་བཟོད་པས་མིག་རྣམས་ཀྱིས་རྟོགས་པའི་ཡུལ་མ་ཡིན་པའི་ཕྱིར་ཏེ། སླར་ཡང་མིག་འགེབས་པར་བྱེད་དོ། །ལག་པས་ཡུད་ཙམ་ཅིག་བཀབ་ནས་སླར་ཡང་ཅ་ཅོ་ལེགས་པར་སྐྱེད་པའི་ཡིད་ཅན་རྣམས་ཕྱིར་མིག་རྣམ་པར་ཕྱེ་ནས་སླར་ཡང་ནམ་མཁའ་དེ་ཉིད་ལ་ཡང་དག་པར་ལྟ་

བར་བྱེད་དོ། །དེ་ནས་སླར་ཡང་ནམ་མཁའ་དེ་ཉིད་ལ་ལྟའོ། །དེ་ནས་ཕྱིས་ཡང་ཉེ་བར་སོང་ནས་ལྟ་བར་བྱེད་དོ། །དེའི་ཚེ་དེ་ལྟར་གྱུར་པའི་འོད་དེ་ལ་ཐེ་ཙོམ་དུ་གྱུར་པའི་ཡིད་ཀྱིས་ཕན་ཚུན་དུ་གཏམ་བྱེད་པ་ནི་དེ་ལྟར་ངོ་མཚར་སྐྱེས་པས་ནམ་མཁའ་ལས་རབ་ཏུ་ལྷུང་བར་གྱུར་པ་འདི་དག་ཅི་
ཡིན། མཚན་པ་རྣམས་ཀྱིས་ཀྱང་བཟླ་བར་ནུས་པ་མ་ཡིན་པ་གང་གིས་ལྷའི་འཇིག་རྟེན་འདི་ཐམས་ཅད་རབ་ཏུ་འབར་བར་གྱུར་པ་ཉིད་ཀྱི་རྣམ་པ་དེ་ལྟ་བུ་ངོ་མཚར་བ་འདི་ཅི་ཡིན། དེ་ནས་འོད་བབ་པར་གྱུར་ཅིང་རབ་ཏུ་ལྷུང་བར་གྱུར་པའི་འོད་དེ་ཉིད་དུས་ཤིན་ཏུ་རིང་བ་ན་ནམ་མཁར་རབ་
ཏུ་ཞི་ཞིང་ནུབ་ལ་ངེས་པར་འགགས་པར་གྱུར་ཏོ། །ནམ་མཁའ་ལ་གནས་ནས་རབ་ཏུ་བབ་པར་གྱུར་པ་དེ་ལེགས་པར་འགགས་པ་དང་། དེ་ནས་ལྷ་གང་དག་ཤིན་ཏུ་སེམས་སྟོབས་དམན་པར་གྱུར་པ་དེ་དག་རྣམས་དེ་འགགས་པར་གྱུར་པའི་ཚེ་ན་ཕྱིར་ཡང་ཕུག་གི་སྒོ་རྣམས་ནས་
བྱུང་ནས་རྗེས་སུ་སྤྱོད་པའི་འཁོར་དང་བཅས་པ་རྣམས་འཇིགས་པ་དང་བྲལ་ནས་དེ་དག་ཕན་ཚུན་དུ་གཏམ་བྱེད་པ། རྨད་དུ་བྱུང་བར་གྱུར་པ་དང་། ངོ་མཚར་བ་སྐྱེད་པ་དང་། བདག་ཅག་རྣམས་འཇིགས་པར་བྱེད་པ་པོ་བྱུང་བ་འདི་དག་ཅི་ཡིན་ཞེས་སོ། །དེ་ནས་དེ་སྐད་སྨྲས་ནས་
ཀྱང་དེ་ནས་དེ་ཁོ་ན་སྐད་ཕན་ཚུན་དུ་བརྗོད་ཀྱང་ལེགས་པར་ཤེས་པ་ཡང་མ་ཡིན་ནོ། །དེ་ནས་ངོ་མཚར་བ་ཅིག་བྱུང་བ་དེ་དག་ཅི་ཡིན་ཞེས་དེ་ལྟར་དུས་རིང་དུ་སོ་སོར་རྟོག་པར་བྱེད་དོ། །ཅུང་ཟད་ཅིག་ནི་ངོ་མཚར་བས་ཡིན་ལ། རྨད་དུ་བྱུང་བ་དེ་དག་ཅི་བྱུང་བ་ཡིན་ཞེས་དེ་ནས་དེ་ལྟར་དུས་
ཡུན་རིང་དུ་རྟོག་པ་ཅུང་ཟད་ཅིག་ནི་འཇིགས་པས་ཡིན་ནོ། །དེ་ནས་དེ་ལྟར་རྒྱུན་གྱི་རྒྱབ་ན་གནས་པའི་ལྷ་རྣམས་དགའ་བ་དང་། ཀུན་ཏུ་སྤྱོད་པར་ཡང་བྱེད་པ་ལས་གཞན་ཡང་གཡོ་བའི་སེམས་ཡིན་པས་དང་། ཡུལ་གྱིས་ཀུན་ནས་འཕྲོག་པའི་ཕྱིར་རྣམ་པ་དུ་མ་སྤྱོད་ཅིང་ཀུན་ཏུ་སྤྱོད་
པར་ཡང་བྱེད་དེ། རྣམ་པ་མང་པོ་དང་རྣམ་པར་རྟོག་པ་དུ་མར་རྔ་སྐད་ཡན་ལག་ལྔ་པས་ནགས་དང་ཚལ་རྣམས་སུ་དུས་ཡུན་རིང་པོར་འདའ་བར་ལྷ་དང་ལྷ་མོ་བརྒྱ་སྟོང་ཕྲག་ཁྲག་ཁྲིག་དུ་མས་ཡོངས་སུ་བསྐོར་ནས་ལྷ་ཤིན་ཏུ་འཐབ་བྲལ་དང་། ཤིན་ཏུ་འཐབ་བྲལ་གྱི་མངའ་བདག་མུ་སུ་ལུན་

དྷ་རྒྱུན་གྱི་རྒྱབ་དེ་ཉིད་ན་གནས་ཏེ། རྔ་སྐད་ཡན་ལག་ལྔ་པས་ཉེ་བར་སྒྲོགས་པར་བྱེད་དོ། །དུས་རིང་དུ་འདའ་བར་ཡང་ལྷ་དང་ལྷ་མོ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཏེ། ལྷ་ཤིན་ཏུ་འཐབ་བྲལ་ཡང་ཤིན་ཏུ་འཐབ་བྲལ་གྱི་མངའ་བདག་མུ་སུ་ལུན་
དྷ་དང་དེ་ཁོ་ན་བཞིན་དུ་རྒྱུན་གྱི་རྒྱབ་ཏུ་གནས་ནས་རྔ་སྐད་ཡན་ལག་ལྔ་པ་བསྒྲགས་པར་གྱུར་པ་དང་། ཡིད་ཀྱང་རབ་ཀྱི་མཆོག་ཏུ་དགའ་བས་པད་མའི་སྟན་རྣམས་ལ་ཡང་ལེགས་པར་གནས་པ་རྣམས་ལ། ལྷ་བརྒྱ་སྟོང་དུ་མས་རྒྱན་དང་ཆ་བྱད་སྣ་ཚོགས་པ་དང་ལྡན་པ་འོད་ཟེར་
ཡང་དུ་མ་དང་ལྡན་པ་རྣམས་ཀྱིས་གླུ་དང་རོལ་མོ་བརྒྱ་སྟོང་ཉེ་བར་བསྒྲགས་པར་གྱུར་པ་མཆོག་ཏུ་སྙན་པར་རྗེས་སུ་ཞུགས་པ་ཡིད་ཤིན་ཏུ་རབ་ཏུ་དགའ་བས་རི་དེ་ལ་རྟག་ཏུ་ནམ་མཁའ་གང་བ་བཞིན་དུ་སྟེ། དེ་ན་གནས་པའི་ཚོགས་པ་ཐམས་ཅད་ཀྱིས་རྣམ་པ་དུ་མ་དང་། རྒྱན་དང་ཆ་བྱད་
དུ་མ་དང་། གཟུགས་དུ་མ་དང་། ཡོན་ཏན་བརྒྱ་སྟོང་དུ་མ་རྣམས་དང་ལྡན་པའི་ལྷའི་བུ་མོ་རྣམས་ཀྱིས་ཡོངས་སུ་བསྐོར་ཏེ་རི་དེའི་རྒྱབ་ན་ལྷའི་ཚོགས་རྣམས་གནས་ནས་འདོད་པའི་ཡོན་ཏན་ལྔས་དགའ་བར་བྱེད་པ་རྣམས་མཐོང་ངོ་། །དེ་དག་རྣམས་འཐབ་བྲལ་གྱི་མངའ་བདག་གིས་
མངོན་པར་མཐོང་ནས་ཤིན་ཏུ་མཆོག་ཏུ་རངས་པས་ལྷན་ཅིག་རྗེས་སུ་སྤྱོད་པ་དང་བཅས་པ་རྣམས་རིངས་པ་དང་བཅས་པ་ཉིད་ཀྱིས་ཚོགས་པའི་རྒྱུན་གང་ལ་སོ་སོར་གནས་པར་ཉེ་བར་རྒྱུག་པར་བྱེད་ལ། དེ་དག་རྣམས་ཀྱིས་ཀྱང་མུ་སུ་ལུན་དྷ་དེ་མངོན་པར་མཐོང་ནས་རིངས་པ་དང་བཅས་
པས་གང་ན་ལྷའི་བདག་པོ་ཡོད་པ་དེར་ཕྱི་བཞིན་འབྲང་བའི་འཁོར་དང་བཅས་པ་རྣམས་ཉེ་བར་རྒྱུག་པར་བྱེད་དེ། རོལ་མོ་དང་གླུ་དང་བཅས་པ་ལ་གླུ་ལ་རབ་ཏུ་རྗེས་སུ་དགའ་བའི་ཡིད་ཅན་དེ་དག་རྣམས་ཕན་ཚུན་འདྲེ་བར་གྱུར་པས་གནས་བཞིན་དུ་རྟག་ཏུ་ནམ་མཁའ་ལ་དང་། རི་
དེའི་རྒྱབ་ལ་ཡང་གར་བྱེད་པར་འགྱུར་བ་དང་། གླུ་ལེན་པར་འགྱུར་བས་ཀྱང་མུ་སུ་ལུན་དྷ་མངོན་པར་སྟོད་པར་བྱེད་ཅིང་། རྔ་སྐད་ཡན་ལག་ལྔ་དང་ལེགས་པར་ལྡན་ཞིང་ཡང་དག་པར་ལྡན་པས་དུས་ཡུན་རིང་པོར་རྩེད་མོ་དུ་མ་བྱེད་དོ། །དེ་དག་རྣམས་དེ་ལྟར་རྩེ་བར་བྱེད་

པ་དང་དགའ་བར་ཡང་བྱེད་པ་ལས། གཞན་ཡང་དུས་རིང་དུ་འདའ་བར་གྱུར་པ་ན་རྣམ་པ་དེ་སྲིད་ཁོ་ནའི་འོད་ཀུན་ཏུ་བྱུང་བར་གྱུར་པ་ནི་སྔ་མ་ཁོ་ན་བཞིན་ཏེ། དེ་ནས་གཞན་ཡང་ལྷ་རྣམས་སྐྱེས་པ་ནི་མཆོག་ཏུ་ངོ་མཚར་བ་ཡང་དག་པར་སྐྱེས་པ་སྟེ། གཞན་འགའ་ཞིག་ནི་
ཤིན་ཏུ་འཇིགས་པའི་ཡིད་ཀྱིས་གང་ན་ལྷའི་བདག་པོ་ཡོད་པ་དེར་ཡང་དག་པར་འཁྱུད་པར་བྱེད་དེ། ཤིན་ཏུ་སྐྲག་པ་སྙིང་ལ་རྗེས་སུ་ཞུགས་པའི་ཕྱིར་རོ། །གཞན་ནི་ནམ་མཁའི་དཀྱིལ་དུ་ལྟ་བར་གྱུར་པས་དཀྱིལ་དེ་ལ་ཆེད་ཆེ་བ་སྐྱེའོ། །གཞན་འོད་དེ་ལྷུང་བའི་དོན་གང་
ཡིན་པ་ཐོས་པ་རྣམས་ནི་ལྷུང་བ་དེ་ངེས་པར་ཤེས་པ་པོ་ལྷ་མུ་སུ་ལུན་དྷ་ལ་སོགས་པ་བག་མེད་པ་དང་བྲལ་བ་རྣམས་དེའི་ཚེ་གུས་པ་དང་མ་བྲལ་བས་སངས་རྒྱས་ལ་རབ་ཏུ་ཕྱག་འཚལ་བར་བྱེད་དོ། །གཞན་དག་ནི་སེམས་སྟོབས་ཉམས་པ་དང་བརྟན་པར་གནས་པ་བཅོམ་པས་ཕུག་
གི་སྒོ་དང་ཤིང་གསེབ་རྣམས་སུ་གབ་པར་འགྱུར་རོ། །གཞན་ནི་སླར་ཡང་གང་ན་འཐབ་བྲལ་གྱི་བདག་པོ་ཡོད་པ་དེར་སྐྱབས་པའི་དོན་དུ་རྒྱུག་པར་བྱེད་དེ། སྐྱབས་བཙལ་བའི་དོན་དུའོ། །དེ་དག་དེ་ལྟར་མཆོག་ཏུ་ངོ་མཚར་རྨད་དུ་བྱུང་བའི་ཤེས་པ་པོ་མངོན་པར་མཐོང་ནས་
ཐམས་ཅད་ཀྱི་མུ་སུ་ལུན་དྷ་ལ་གསོལ་པ། འོད་ནམ་མཁའ་ལ་གནས་ནས་ལྷུང་བ་གང་ཡིན་པ་དེ་དག་ཇི་ལྟ་བ་བཞིན་དུ་ལྷས་ཤེས་པར་མཛད་དུ་གསོལ། ལྷ་ལེགས་པར་ཤེས་པར་མཛོད་དང་རྣམ་པ་དེ་ལྟ་བུ་ལྷུང་བ་དེ་ཅི་ལགས། དེ་ནས་ལྷ་དེ་དག་རྣམས་གང་ཡིན་པས་མི་
ཤེས་པའི་དོན་དེ་དག་རྣམས་ཀྱིས་ལྷའི་བདག་པོ་དེ་ལ་འདི་སྐད་ཅེས་སྨྲས་སོ། །ཇི་ལྟ་བར་བདག་ཅག་རྣམས་ཀྱིས་མི་འཚལ་ན་ལྷ་རྣམས་ཀྱི་བདག་པོ་ངོ་མཚར་བ་དེ་དག་ཅི་ལགས། འདི་དག་བདག་ཅག་གིས་མཐོང་ལགས་ཀྱང་རྟོགས་པ་ནི་མ་ལགས་རྣམ་པ་དེ་ལྟ་བུ་འདི་ཅི་
ལགས། དེ་ནས་ལྷའི་ཚོགས་ཐམས་ཅད་འདུས་པ་ལ་འཐབ་བྲལ་བ་རྣམས་ཀྱི་བདག་པོས་འདི་སྐད་ཅེས་བརྗོད་དོ། །རུང་གིས་གང་ཞིག་བདག་ཉིད་ཐམས་ཅད་ཁོ་ནས་ནམ་མཁའ་ལས་ལྷུང་བ་དེ་དག་ནི། མཆོག་ཏུ་ངེས་པར་འབར་བ་གང་ཡིན་པ་དེ་ནི་མིག་ལས་འདས་ནས་ལྷག་

པར་གནས་པ། ཁྱེད་རྣམས་ཀུན་ནས་སྐྲག་པར་བྱེད་པ་དང་ངོ་མཚར་བ་སྐྱེད་པར་བྱེད་པ་རྣམས་ཉོན་ཅིག །དེ་ནས་ངོ་མཚར་བས་ཡིད་ཚིམ་པ་མེད་པའི་ཀུན་ནས་འདུས་པ་དེ་དག་རྣམས་ཉིད་ཐམས་ཅད་ལ་འཐབ་བྲལ་གྱི་བདག་པོ་དེས་འདི་སྐད་བརྗོད་དེ། ཉོན་ཅིག་དང་
གང་ཡང་ལྷུང་བ་དེ་དག་ནི་རྣམ་པ་ཐམས་ཅད་དུ་ཚད་དང་། མདོག་དང་། དབྱིབས་དང་། ཚེའི་ཚད་རིང་བ་དང་། སོ་སོའི་ལས་རྣམས་ཀྱང་རེ་རེ་ཞིང་བརྒྱ་འགྱུར་གྱིས་ལྷག་པར་གྱུར་པའི་ལྷའི་རིགས་བདག་ཅག་གི་སྟེང་ན་གནས་པ་ནི། བྱང་ཆུབ་སེམས་དཔའ་རྣམས་ཀྱི་གཞལ་ཡས་
ཁང་སྟེ། མཆོག་ཏུ་རྣམ་པར་དག་པའི་ཚུལ་ཁྲིམས་རྣམ་པ་ལྔ་མ་ཉམས་པ། མ་བརྟོལ་བ། མ་ཟགས་པ། བརྟན་པ། སྙིང་པོ་དང་ལྡན་པ་དང་རྣམ་པ་དུ་མར་ཡང་སྟེ། མིར་གྱུར་པ་གང་དག་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་དགའ་ལྡན་གྱི་ལྷ་ཞེས་བྱ་བ་དེ་དག་རྣམས་
ཀྱི་ནང་དུ་སྐྱེ་བར་འགྱུར་རོ། །དེ་དག་གི་ཡང་རྩེད་མོ་གང་ཡིན་པ་དང་། དགའ་བ་གང་ཡིན་པ་དང་། ནགས་ཚལ་གང་ཡིན་པ་དང་། ལྷའི་བུ་མོ་གང་ཡིན་པ་དང་། འོད་ཟེར་གྱི་རྣམ་པ་ཇི་ལྟ་བུ་གང་ཡིན་པ་དང་། གང་ཡང་གཟུགས་དང་། གཟི་བརྗིད་གང་ཡིན་པ་དང་། གང་ཡང་
ཤེས་རབ་དང་། གང་ཡང་ཚེ་རིང་བ་དང་། ཇི་སྲིད་དུ་རྣམ་པ་དུ་མ་རྣམས་དང་གང་ཡང་བདེ་བ་རྣམས་དང་ལུས་དང་། ཡིད་དང་། གང་ཡང་ལོངས་སྤྱོད་དང་། རྣམ་པ་ཇི་ལྟ་བུའི་གཟུགས་ཀྱི་ལྷའི་བུ་མོ་རྣམས་ཀྱི་ཡང་ཁྱད་པར་ལ་འཐབ་བྲལ་གྱི་ལྷས་བཅུ་དྲུག་ཆར་ཡང་མི་ཕོད་དོ། །
དེ་དག་རྣམས་ཀྱི་གཟི་བརྗིད་གང་ཡིན་པ་འདི་བདག་ཅག་རྣམས་ཀྱིས་བརྗོད་པར་མི་ནུས་སོ། །དེ་དག་རྣམས་ཀྱི་ཁྱད་པར་གྱིས་བདག་ཅག་རྣམས་སྲིན་བུ་མེ་ཁྱེར་ཙམ་དུ་ཡང་གཟི་བརྗིད་ཀྱིས་མི་ཕོད་ལ་ལོངས་སྤྱོད་ཀྱིས་ཀྱང་མི་ཆོག་གི་ཅུང་ཟད་ཙམ་ཆ་འདྲ་བར་ཟད་དོ། །དེ་དུས་རིང་པོར་རྣམ་པ་
དུ་མར་བདེ་བ་རྣམས་ལ་ལོངས་སྤྱོད་ནས་ལྷའི་མཆོག་ཏུ་དགའ་བར་གྱུར་པའི་བདེ་བ་མཆོག་འདོད་པའི་ཡོན་ཏན་ལྔ་དང་ལྡན་པར་གྱུར་པ་རྣམ་པ་སྣ་ཚོགས་པའི་ཡུལ་ལ་ལོངས་སྤྱོད་པ་དགའ་བར་གྱུར་པ་ནི་འཐབ་བྲལ་གྱི་ལྷ་རྣམས་ལས་རིམ་པ་ཐམས་ཅད་ཀྱིས་ཤིན་ཏུ་འདས་པ་

ཡིན་ཞིང་། དུས་ཡུན་རིང་དུ་འདས་པའི་ཕྱིར་དང་། དེའི་ལས་རྣམས་ཀྱང་ཟད་པས་དང་། མི་རྟག་པའི་ཐོག་ངེས་པར་བབ་པས་དང་། ངེས་པར་མྱོང་བར་འགྱུར་བ་ཡིན་པས་ཏེ། སེམས་ཅན་ཐམས་ཅད་ཀྱིས་ངེས་པར་མྱོང་བར་འགྱུར་བར་ངེས་པ་ནི་གང་ལོངས་སྤྱོད་དང་
ན་ཚོད་དང་ཤེས་པ་རྣམས་སེམས་ཅན་ཐམས་ཅད་ཀྱིས་ངེས་པར་མྱོང་བར་འགྱུར་བ་ནི་མི་རྟག་པའི་དབང་གིས་ན། ཚེ་ཡོངས་སུ་ཟད་པས་དང་། ལེགས་པར་བྱས་པའི་ལས་རྣམས་ཀྱང་ཡོངས་སུ་ཟད་པར་གྱུར་ནས་འཆི་འཕོས་ནས་དགའ་ལྡན་གྱི་ལྷའི་རིགས་དེ་ལས་ལྟུང་བ་ཡིན་ནོ། །
འབྱུང་བར་འགྱུར་བའི་འདུས་བྱས་དེ་ནི་སྣ་ཚོགས་པའི་བུད་ཤིང་དང་ཆུ་དང་ཡང་དག་པར་ལྡན་པས་འདི་ལྟ་སྟེ། སྐྱེ་བ་དང་ལྡན་པའི་ཡན་ལག་རྣམས་ཀྱང་གར་སྐྱེས་པའི་འདུས་བྱས་རྣམས་ནི་སྟོབས་ཀྱིས་མི་འཇིགས་པ་དེ་ནི་ཁམས་གསུམ་ན་ཡོད་པ་མ་ཡིན་ཏེ། མི་ཟད་པ་དང་མཐར་
ཐུག་པར་མི་འགྱུར་ན་ནི་དེ་དག་རྟག་པར་འགྱུར་བ་ཞིག་ན། སེམས་ཅན་དང་བཅས་པ་རྣམས་ལ་གནས་སྐབས་འདི་ནི་དམིགས་པ་ཡང་མ་ཡིན་ཏེ། འདུས་བྱས་རྣམས་ནི་འཇིག་པར་འགྱུར་བའི་ངོ་བོ་ཡིན་པའི་ཕྱིར་རོ། །སེམས་ཅན་ངེས་པར་ལྟུང་བའི་མཐའ་པ་ཡིན་པས་བདག་
ཅག་གི་ལྷའི་རིས་སུ་དེ་དགའ་ལྡན་ནས་ལྷུང་ངོ་། །དེའི་ཡང་ལེགས་པར་བྱས་པའི་ལས་ཟད་ནས་དེའི་རྗེས་ཉིད་ལ་འཆི་འཕོ་བར་འགྱུར་རོ། །སྣུམ་དང་སྡོང་བུ་ཟད་པ་ན་སྒྲོན་མ་སྒྲོན་མའི་ཡུལ་ཕྱོགས་སུ་དུས་ཀྱི་རླུང་གིས་ཡིད་རྣམས་རབ་ཏུ་ཉམས་པར་འགྱུར་རོ། །ཇི་ལྟར་ས་བོན་གྱི་རྣམ་
པ་ཉམས་པའི་དུས་ཀྱི་རྗེས་ཐོགས་ལ་མྱུ་གུ་སྐྱེ་བར་འགྱུར་བ་དེ་བཞིན་དུ་ལས་དང་བཅས་པར་ལྐོག་ཏུ་གྱུར་པའི་ཚེ་ཡོངས་སུ་ཟད་པར་གྱུར་པ་དེ་དག་དེའི་རྗེས་ལ་དེ་ལྟར་འཆི་འཕོའོ། །དེའི་འོད་དེ་དག་ཁྱེད་ཀྱིས་མཐོང་བར་ཟད་དོ། །ལས་ཡོངས་སུ་ཟད་ནས་ཤི་བའི་རོ་དེའི་ལུས་རྣམ་པར་ཉམས་
པ་དེའི་འོད་ཀྱང་འདི་ཡིན་ན། གང་ཡང་གཞན་ལས་གཅིག་གིས་ཡོངས་སུ་སྤྲུལ་པའི་མཆོག་ཏུ་རྒྱ་ཆེ་བས་མཆོག་ཏུ་རྒྱ་ཆེ་བར་གྱུར་པ་ངེས་པར་འབྱུང་བའི་ལས་ཀྱི་འབྲས་བུ་དགེ་བས་སྤྲུལ་པ་མཆོག་ཏུ་འོད་ཀྱི་རང་བཞིན་ཡིན་པ་དེའི་དཔེ་བརྗོད་པ་འདིས་ནི། ཀྱེ་འཐབ་བྲལ་

བ་རྣམས་དཔེ་བརྗོད་པ་གོ་བར་གྱིས་ཤིག་དང་། གང་ལ་རྣམ་པ་འདི་ལྟ་བུའི་འོད་ཡོད་ན་འོད་དང་རྒྱན་དུ་མས་མངོན་པར་བརྒྱན་པ་མཆོག་ཏུ་ཡིད་དུ་འོང་བ་གང་ཡིན་པའི་དཔེ་བརྗོད་པར་བྱ་བར་མི་ནུས་ཏེ། དེ་རྣམ་པ་འདི་ལྟ་བུའི་དགེ་བའི་ལས་ཀྱིས་བཞི་
འགྱུར་དུ་སྤྲུལ་པ་དེ་ཡང་ཡོངས་སུ་ཉམས་པར་གྱུར་ན། སུམ་འགྱུར་གྱི་ཤིན་ཏུ་ཆུང་བའི་ལས་ཀྱིས་སྤྲུལ་པ་འཐབ་བྲལ་བ་རྣམས་སུ་སྐྱེས་པ་ཁྱེད་ཅག་རྣམས་ཀྱི་བདག་གི་དངོས་པོ་རྙོག་མ་དང་བཅས་པ་དམན་པའི་ལུས་རྣམས་ལ་ལྟ་ཅི་སྨོས། དེ་ནས་དེའི་ཚེ་མུ་སུ་ལུན་དྷས་
ཚིགས་སུ་བཅད་པ་བརྗོད་པ་ཇི་ལྟར། མི་རྟག་མིག་བཟློག་འོད་ཀྱིས་ནི། །རབ་ཏུ་བསྲེགས་པ་དགའ་ལྡན་ལྷ། །དེ་དབང་ལྟོས་ནས་ངེས་པར་འགག །མར་མེ་སྣུམ་ནི་ཟད་པ་བཞིན། །ལས་ཀྱིས་འཕེན་པས་འཕངས་པ་ཡི། །བཅུ་གཉིས་རྩིབས་ནི་སྟོབས་པོ་ཆེ། །ལས་ཀྱི་
འཁོར་ལོ་འཁོར་བ་འདི། །ལྟུང་ཞིང་སྐྱེ་བས་གཡོ་བ་ཡིན། །རྣམ་པ་སྣ་ཚོགས་ཡུལ་རྩོམ་པ། །དུ་མའི་ཁ་དོག་དང་ལྡན་པའི། །དགའ་ལྡན་ལྟུང་འགྱུར་རང་དབང་མེད། །དུས་ཀྱི་དབང་གིས་འོང་བ་ཡིན། །དུས་ཀྱི་དབང་གིས་ཞུགས་པ་ནི། །ཇི་ལྟར་ཤིང་རྣམས་སྐྱེ་བ་
ཡིན། །དེ་ཡང་དུས་དང་ཕྲད་ནས་ནི། །འོད་ནི་འདིར་ནི་འོངས་པ་ཡིན། །ཇི་ལྟར་དུས་སུ་ལེགས་ཕྱིན་ནས། །ལྷ་ནི་བདེ་བར་འགྱུར་བ་ཡིན། །ཕྱི་ནས་དེ་ཉིད་ཀུན་བཏང་ནས། །དབང་དང་བྲལ་བས་དེ་ལྟུང་ངོ་། །ལས་ཀྱི་དུས་ནི་ཡོངས་ཐོབ་ནས། །འཇིག་རྟེན་འདི་ནི་ཡོངས་སུ་
འཕེལ། །བདེ་ལྡན་སྡུག་བསྔལ་ལ་ལྡན་འགྱུར་བ། །དུས་ཀྱི་དབང་གིས་འོང་བ་ཡིན། །གལ་ཏེ་བདེ་འམ་སྡུག་ཀྱང་རུང་། །འཇིག་རྟེན་རྟག་པར་ཡིད་བརྟན་མིན། །རྒྱུ་དང་རྐྱེན་གྱིས་བསྐྱེད་པ་ཡི། །བདེ་སྡུག་རྣམ་པ་ཐ་དད་དེ། །ཡོད་མིན་བདེ་བ་འགའ་ཞིག་ནི། །དེ་དག་ལས་
དབང་རྗེས་སུ་འགྲོ། །དེ་ལྟར་སྡུག་བསྔལ་མི་འདོད་ཀྱང་། །སྐྱེས་བུ་ལས་ཀྱི་རྒྱུ་ཅན་ཡིན། །ཕན་ཚུན་འབྲས་བུ་ཀུན་བྱུང་ནས། །འདུས་བྱས་ཀུན་ནི་རབ་ཏུ་འཇུག །དེ་ཉིད་རྒྱུར་ནི་ཤེས་བྱས་པས། །འཕགས་པའི་བདེན་པ་བཞི་ཡིན་ཏེ། །འཕགས་པའི་བདེན་པ་རྟོགས་པ་

ཡི། །སྐྱེས་བུ་རྟག་ཏུ་གྲོལ་བ་ཡིན། །ཡུལ་ལ་ཤིན་ཏུ་རྨོངས་པ་ཡི། །སྐྱེ་དགུ་འཁོར་བ་འཁོར་ལོ་བཞིན། །དོན་རིག་དེ་ཉིད་ལ་མཁས་པའི། །སྐྱེ་བོ་ཡང་ནི་གྲོལ་བ་ཡིན། །དེ་དེ་ལྟར་རྟོགས་སེམས་ཅན་ནི། །སྐྱེ་དགུ་ཐམས་ཅད་རྟག་པ་མིན། །བློ་ལྡན་ལེགས་པར་བྱ་བ་གྱིས། །
སྐྱོན་རྣམས་ཀྱང་ནི་སྤང་བར་གྱིས། །དེ་ལྟར་འཇིགས་པ་དང་བཅས་པའི་འཐབ་བྲལ་གྱི་ལྷ་ཤིན་ཏུ་འཐབ་བྲལ་ལ་སོགས་པ་དེ་དག་རྣམས་ལ་རྣམ་པར་རྟོག་པ་དུ་མས་ཀྱང་ལམ་དེ་སྟོན་པ་པོ་ཆོས་ཉིད་དང་ཉེ་བར་འབྲེལ་བའི་འཐབ་བྲལ་གྱི་མངའ་བདག་དེས་ཆོས་བསྟན་ཏོ། །དེ་ནས་ལྷ་དེ་
རྣམས་བསམ་པ་ཐ་དད་པ་སྐྱེས་པའི་ཡིད་ཅན་རྣམས་ལ་འགའ་ཞིག་ནི་སྐྱོ་བར་གྱུར་པའི་ཡིད་ཅན་དུ་གྱུར་ཏོ། །ཁ་ཅིག་ནི་འཁོར་བ་ལ་མངོན་པར་ཕྱོགས་པར་གྱུར་པའི་ཡིད་ཅན་དུ་གྱུར་ཏོ། །གཞན་ནི་རབ་ཏུ་འཇིགས་པའི་ཡིད་སྐྱེས་སོ། །གཞན་ནི་མི་སླུ་བའི་ཚིག་ཐོས་ནས་སླར་ཡང་
འཇུག་པར་བྱེད་པའི་ཡིད་ཀྱིས་ཡུལ་དེ་རྣམས་ལ་ཆེད་དུ་བྱེད་པས་ནགས་དང་ཉེ་བའི་ནགས་དང་ཡང་དག་པར་ལྡན་པའི་རྣམ་པ་སྣ་ཚོགས་པའི་སྐྱེད་མོས་ཚལ་དང་། འབབ་ཆུ་དང་། རྫིང་བུ་དང་ལྡན་པ། འཁྲི་ཤིང་དང་ལྗོན་པས་གང་བ་དང་། རིན་པོ་ཆེའི་ཁྲོད་དགའ་བ་རྣམས་ན་བྱའི་
སྐད་རྣམ་པ་སྣ་ཚོགས་པ་ཐོས་ན་ཡིད་འཕྲོག་པ། པད་མའི་རྫིང་བུ་བརྒྱས་བརྒྱན་པས་དགའ་བར་གྱུར་པ་ན་རིན་པོ་ཆེ་སྣ་བདུན་དང་ལྡན་པ་དེ་ལ་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱི་ཡུལ་དང་། གླུ་མཁན་དུ་མ་ཡིད་དུ་འོང་བས་བསྟེན་པས་རྒྱུན་གྱི་རིའི་
རྒྱབ་དགའ་བ་ན་རྗེས་བཞིན་འབྲང་བའི་འཁོར་དང་བཅས་པ་ཡུལ་ལ་འཆུམས་པའི་སྐྱེ་བོ་དེ་མཆོག་ཏུ་མ་བགྲངས་པར་ཕྱིར་ཡང་དགའ་བའི་ཡུལ་གྱི་དབང་དུ་གྱུར་ནས་ལྷན་ཅིག་སྤྱོད་པའི་འཁོར་གྱིས་བསྐོར་ནས་དགའ་ཞིང་ཀུན་ཏུ་སྤྱོད་དོ། །རྣམ་པ་སྣ་ཚོགས་པའི་ཡུལ་གྱི་བདེ་བ་རྣམ་པ་དུ་
མ་ལ་བརྟེན་ནས་བསྒྲུབ་པར་དཀའ་བའི་རི་ལས་གྱུར་པའི་སེམས་སྤྲེའུ་དེ་རྣམ་པ་དེ་ལྟ་བུའི་བདེ་བ་དང་ཡང་དག་པར་ལྡན་པའི་ལྷ་རྫས་ཀྱི་བདེ་བ་ཉམས་སུ་མྱོང་བར་གྱུར་པ་ལས། གཞན་ཡང་གང་ན་རྩེད་མོའི་ནགས་ལེགས་པར་གནས་པར་དེ་དག་ཉིད་དང་མུ་སུ་ལུན་དྷ་དང་བཅས་

པ་རྣམས་ཁ་ཅིག་ནི་ནམ་མཁའ་ལས་སོ། །ཁ་ཅིག་ནི་བཞོན་པ་ཆེན་པོ་རྣམས་ཀྱིས་སོ། །ཁ་ཅིག་ནི་རྣམ་པར་རྟོག་པ་དུ་མ་དང་ལྡན་པའི་ཤིང་རྟའི་བཞོན་པ་ལ་ཞོན་པ་ལ་འདི་ལྟ་སྟེ། རྨ་བྱའི་རྒྱབ་ཏུ་དང་། ཁ་ཅིག་ནི་གླང་པོ་ཆེའི་བཞོན་པས་སོ། །ཁ་ཅིག་ནི་
ངང་པའི་བཞོན་པས་སོ། །ཁ་ཅིག་ནི་ཀཱ་རཎྜ་པའི་རང་བཞིན་གྱི་བཞོན་པས་སོ། །ཁ་ཅིག་ནི་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ནས་གླུ་ལེན་པར་བྱེད་དེ། གླུ་དང་། རྔ་སྒྲ་དང་། རོལ་མོའི་སྒྲ་ཀུན་ཏུ་སྒྲོགས་པས་མཐོ་རིས་ཀྱི་ཉེ་བའི་ནགས་སུ་བྱེད་པས་མུ་སུ་ལུན་དྷ་སྡུན་དུ་
བྱས་ནས་གང་ན་རྩེད་མོའི་ནགས་ཞེས་བྱ་བའི་ནགས་མུ་སུ་ལུན་དྷའི་གནས་ཡོད་པ་དེར་ཉེ་བར་འགྲོའོ། །རྣམ་པ་སྣ་ཚོགས་པས་བསྐྱེད་པའི་བློས་གནས་དེ་ལྷ་འགའ་ཞིག་ནི་ཡིད་འབྱུང་བར་འགྱུར་རོ། །ཁ་ཅིག་ནི་བག་མེད་པ་ལ་གནས་པས་དེ་བཞིན་དུ་དགའ་བར་བྱེད་དེ། རྣམ་པར་
རྟོག་པ་དུ་མས་ཡུལ་གྱི་བདེ་བ་རྣམས་ལའོ། །དེ་ལྟར་གང་རྩེད་མོའི་ནགས་ན་རྒྱུན་དུ་གནས་པའི་འཐབ་བྲལ་གྱི་ལྷ་རྣམས་དང་། གཞན་ཡང་ཚོགས་པ་རྒྱུ་བ་ན་གནས་པ་དེ་དག་རྣམས་ཡང་རྒྱུན་གྱི་རིའི་རྒྱབ་ཏུ་རྣམ་པ་སྣ་ཚོགས་པའི་བསམ་པ་ཅན་རྣམ་པ་དུ་མའི་བློ་དང་ལྡན་པ་རྣམས་
དགའ་བར་བྱེད། ཀུན་ཏུ་དགའ་བར་ཡང་བྱེད་དོ། །ཁ་ཅིག་ནི་སྐྱོ་བའི་ཡིད་ཅན་དུ་འགྱུར་རོ། །དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མ་དང་ཡུལ་དུ་མ་ལ་དགའ་བར་བྱེད་དེ། རྒྱུན་ན་གནས་པའི་ལྷ་དེ་རྣམས་དུས་དེ་སྲིད་དུ་དགའ་བར་བྱེད་ཀུན་ཏུ་སྤྱོད་པར་ཡང་བྱེད་དེ། ཇི་
སྲིད་དུ་འདོད་པའི་སྡུག་པ་ཡིད་དུ་འོང་བའི་རྒྱུར་གྱུར་པའི་ཡིད་དུ་འོང་བའི་ལས་རྣམས་ཟད་པ་དང་། རུལ་བ་དང་། རྣག་པར་མ་གྱུར་གྱི་བར་དུའོ། །དེ་དག་དེ་ལྟར་ཡང་ཡུལ་དུ་མའི་བདེ་བས་རྣམ་པར་མི་ངོམས་པའི་ལྷའི་རིས་དེ་ལས་འཆི་འཕོའོ། །འཆི་འཕོས་ནས་ཀྱང་བསྒྲུབས་
པ་བཞིན་དུ་ལས་ཀྱི་ཞགས་པས་ཉེ་བར་བཅིངས་ནས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །དེ་དག་རྣམས་གལ་ཏེ་གནས་གཞན་དུ་མི་རྣམས་དང་སྐལ་བ་འཐུན་པར་མིར་སྐྱེས་ན་དེ་རྟག་ཏུ་གཞོན་ཤ་ཅན་གྱི་མཆོག་ཏུ་འགྱུར་རོ། །དབང་པོ་མ་ཉམས་པ་

དང་། བློ་དང་ལྡན་པ་དང་། མཆོག་ཏུ་བློ་རྒྱ་ཆེ་བ་དང་། མཆོག་ཏུ་ཕུན་སུམ་ཚོགས་པ་དང་། ཡུལ་ལྗོངས་ཐམས་ཅད་ཀྱིས་མཆོད་པར་འགྱུར་བ་དང་། གཟུགས་དང་ལྡན་པ་དང་། འཇིགས་པ་དང་བྲལ་བ་དང་། རྒྱལ་པོའམ་རྒྱལ་པོའི་བཀའ་བློན་བར་ཡང་ལས་དེ་དག་གི་རྒྱུ་འཐུན་
པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་རྣམས་ཤེས་པ་དེ། འཐབ་བྲལ་གྱི་ལྷ་རྣམས་ཀྱི་ས་ལ་རྣམ་པར་ལྟ་བར་བྱེད་པ་ན། འཐབ་བྲལ་བའི་ལྷ་རྣམས་ཀྱི་ས་རྒྱ་ཆེན་པོའི་ཁོར་ཡུག་ན་རྒྱུ་བ་ཞེས་བྱ་བ་ཇི་ལྟ་བ་བཞིན་དུ་ཡོད་པ་དེས་ཐོས་པ་ལས་བྱུང་བའི་
ཤེས་རབ་ཀྱིས་མཐོང་ལ། དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ་ནི་སྐྱེས་བུ་དམ་པ་གང་གིས་སྐྱེས་བུ་དམ་པའི་རྗེས་སུ་བསྟེན་པ་ལས་དང་། འབྲས་བུ་ལ་དད་པ་དང་ལྡན་པ། དྲང་པོ་དྲང་པོའི་རང་བཞིན་ཅན་ཆོས་ཀྱི་རྗེས་
སུ་འཇུག་པས་ཚུལ་ཁྲིམས་དང་ལྡན་པར་གྱུར་ནས་དད་པའི་སྟོབས་ཀྱིས་རྟག་ཏུ་ཡང་ལས་རྣམས་ལ་སེམས་པར་གྱུར་པ། ཡང་དག་པའི་ལྟ་བ་ཅན། ཡང་དག་པའི་ལྟ་བ་སྔོན་དུ་འགྲོ་བས་སེམས་ལས་སུ་རུང་བ་དང་། རྟག་ཏུ་ཡང་རྒན་པོ་རྣམས་ཀྱིས་རྗེས་སུ་གདམས་པར་བྱེད་པ་དགེ་བའི་
བཤེས་གཉེན་ལ་སྟེན་པ་སངས་རྒྱས་དང་། ཆོས་དང་། དགེ་འདུན་ལ་རྟག་ཏུ་དང་བར་གྱུར་པའི་རང་བཞིན་ཅན། འཆི་འཕོ་དང་སྐྱེ་བའི་རྒྱུན་ལ་དད་པ་དང་ལྡན་པ། རྟག་པར་ཡང་ལེགས་པར་རབ་ཏུ་བཟུང་བའི་དབང་པོ་ཅན་ཡུལ་རྣམས་ཀྱིས་བསྡུས་པའི་འཁོར་བའི་འཇིགས་པས་
འཇིགས་པ་དང་ལྡན་པ། རྣམ་པར་འབྲལ་བའི་སྡུག་བསྔལ་ལ་བསལ་བར་ཤེས་པ་སྐྱེ་བ་དང་། རྒས་པ་དང་། འཆི་བ་དང་། མི་འཐུན་པ་དང་ཕྲད་པ་དང་། འཐུན་པ་དང་བྲལ་བའི་སྡུག་བསྔལ་མངོན་པར་ཤེས་པ་ཉེ་བར་ལེན་པའི་ཕུང་པོ་ལྔའི་ཉེས་དམིགས་རྣམས་ཤེས་པ། རྟག་ཏུ་
ཡང་དག་པར་བརྩོན་པས་དགེ་བའི་ལས་རྣམས་ལ་སྤྱོད་པ། སྡིག་པའི་གྲོགས་པོ་ཡོངས་སུ་སྤངས་པ། རྟག་ཏུ་ཡང་དམ་པའི་ཆོས་ཉན་པ་ལ་བྲོད་པར་གྱུར་པ། དེར་གཏོགས་པ་རྣམས་ལ་དཔྱོད་པར་བྱེད་པ་ཐོས་པའི་དོན་དེ་ཁོ་ན་ཉིད་ལ་བློ་གཞོལ་བ་དེའི་སྒོ་ནས་དེ་ལ་ཆེད་ཆེར་བྱེད་པ།

འདོད་པའི་རོ་མྱང་བ་རྣམས་སྙིང་པོ་མེད་པར་ཤེས་པས་རྟག་ཏུ་ཡང་དབང་པོ་ལྔ་ལེགས་པར་སྡོམ་པར་གྱུར་ནས། སྲོག་གཅོད་པ་དང་། མ་བྱིན་པར་ལེན་པ་སྤངས་པར་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་གཡེམ་པ་ཡང་ཡོངས་སུ་སྤངས་པར་གྱུར་པ་
ནི་བུད་མེད་རྣམས་དང་ལྷན་ཅིག་ཏུ་མིག་ཀྱང་ལེགས་པར་ལྟ་བར་མི་བྱེད་དོ། །དེ་དག་གི་གར་རམ་གླུའམ། རྒྱན་གྱི་སྒྲ་ཐོས་ན་ཡང་རོ་མྱོང་བར་མི་བྱེད་དོ། །ཅུང་ཟད་ཙམ་ཞིག་མཐོང་བའམ་ཐོས་པས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པས་ལྷན་ཅིག་དགའ་བར་བྱས་ནས་རངས་
པར་བྱེད་པ་དང་། དེ་ལ་སོང་བར་འགྱུར་བའི་ཡིད་ཅན་ཡང་མ་ཡིན་ནོ། །རྨི་ལམ་ན་ཡང་བུད་མེད་དང་སྟེན་པར་བྱེད་པ་དང་། ཉིན་མོ་ཡང་རྣམ་པར་ཞེན་པར་བྱེད་པ་དང་། དེ་ལ་སོང་བའི་བློས་ཚུལ་བཞིན་མ་ཡིན་པ་ཡིད་ལ་བྱེད་པ་ཡང་མ་ཡིན་ནོ། །རྟག་པར་ལྡན་པར་རབ་ཏུ་འཇུག་པར་
མི་བྱེད་དོ། །རྟག་པར་ཡང་ཚུལ་བཞིན་དུ་ཡིད་ལ་བྱེད་པ་རྒྱུ་བར་བྱེད་དོ། །དུག་བཞིན་དུ་ཡང་འདོད་པ་ལ་ལོག་པར་གཡེམ་པ་ཡོངས་སུ་སྤོང་བར་བྱེད་དོ། །དེ་དེ་ལྟ་བུའི་ཡོན་ཏན་རྣམས་དང་ལྡན་པ་དེ་དགེ་བར་སྤྱོད་པ་རྟག་པར་ཡང་དགེ་བ་ལ་འཇུག་པས་བློ་རྣམ་པ་དུ་མར་དྲི་མའི་རྙོག་པ་ལེགས་
པར་སྦྱངས་པ། དྲང་པོ་དྲང་པོའི་རིགས་ཅན་ཀུན་ནས་ཡོངས་སུ་དག་པའི་ཚུལ་ཁྲིམས་སྤྱོད་པར་གྱུར་པས་ལུས་ཞིག་པ་ན་མཐོ་རིས་བདེ་འགྲོའི་འཇིག་རྟེན་ལས་འཐབ་བྲལ་གྱི་ལྷ་རྣམས་ཀྱིས་རྒྱ་ཆེ་བའི་ཁོར་ཡུག་ན་སྤྱོད་པར་སྐྱེའོ། །ཡོན་ཏན་གསུམ་དང་ལྡན་པ་དེས་བསྟེན་
ཅིང་བསྒོམས་ལ་ལན་མང་དུ་བྱས་པའི་འདོད་པ་སྡུག་པ་ཡིད་དུ་འོང་བའི་ཚུལ་ཁྲིམས་ལ་སྤྱད་པའི་འབྲས་བུས་དེར་སྐྱེས་པ་ན་ལྷའི་བྱ་མཐོང་ཞིང་སྒྲ་ལེགས་པར་འདོན་པ་ཡང་ཐོས་ཏེ་མཆོག་ཏུ་ཐོས་ན་ཡིད་འཕྲོག་པ་དང་། མདོག་བལྟ་བར་སྡུག་པ་དང་། བྱ་དེ་རྣམས་ཀྱིས་ཀྱང་
སྣོམ་པར་བྱ་བ་དེ་དག་རྗེས་སུ་ལོངས་སྤྱོད་པར་བྱེད་དེ། དང་པོ་ཁོ་ན་རེག་པར་བྱེད་པ་ཡང་མཆོག་ཏུ་བདེ་བའི་རེག་བྱ་ཅན་བདེ་བ་བྱེད་པའི་རེག་བྱ་གང་ཡིན་པ་སྔོན་ནམ་ཡང་མ་རེག་པ་རྣམས་སོ། །ཡིད་ཀྱང་ཤིན་ཏུ་རབ་ཏུ་དང་བ་རྙོག་པ་མེད་པ་རབ་ཀྱི་མཆོག་ཏུ་རངས་པ་མཆོག་

ཏུ་ཡིད་དུ་འོང་བར་སྤྱོད་པའི་ཡིད་དང་ཡང་དག་པར་ལྡན་པས་ཡིད་རབ་ཏུ་རངས་པ་ཡིན་ནོ། །རོ་རྣམས་ཀྱང་རྣམ་པ་སྣ་ཚོགས་མྱོང་བར་བྱེད་དོ། །གང་ཡང་སྔོན་ནམ་ཡང་མ་མྱངས་པ་དེ་ལྟར་རྣམ་པར་ཤེས་པ་དྲུག་གི་ཚོགས་རྣམ་པར་ཆགས་ཤིང་དགའ་བ་དེ་ལྟར་སྔ་ན་མེད་པ་ཉེ་
བར་ལོངས་སྤྱོད་པར་གྱུར་པ་ན་འདི་སྙམ་དུ་སེམས་ཏེ། འཇིག་རྟེན་འདི་ནི་གང་ཡིན། གང་ཞིག་ཏུ་བདག་བྱུང་བར་གྱུར་ན་དེ་ལ་བདག་གིས་ཐམས་ཅད་ཤིན་ཏུ་དགའ་བར་གྱུར་པ་དང་། འཇིག་རྟེན་འདི་ཐམས་ཅད་ཀྱང་འདོད་པ་སྡུག་པ་ཡིད་དུ་འོང་བའི་གཟུགས་གཅིག་ཏུ་བདག་གིས་མཐོང་
ངོ་། །གཞན་ཡང་རང་གི་ལུས་ཀྱི་བཀོད་པ་མཐོང་བ་ན་རང་གི་འོད་ཉི་མ་བས་ཆེས་ལྷག་པས་རྣམ་པར་རྒྱལ་བར་གྱུར་པ། ཤ་དང་རུས་པ་དང་ཆུ་སེར་དང་བྲལ་བ། མི་གཙང་བ་རྣམས་དང་བྲལ་བ། མིག་འཛུམས་པ་དང་འབྱེད་པ་དང་བྲལ་བ། རྩ་དང་རྒྱུས་པ་དང་རུས་པ་རྣམས་དང་
བྲལ་བ། ཚིགས་དང་གནད་རྣམས་དང་དེ་ཀུན་ནས་འཛིན་པ་དང་བྲལ་བ། ས་གཞི་དང་གྲིབ་མ་དང་བྲལ་བ་རྩུབ་མོ་བྲལ་བས་ལུས་དང་ཡུལ་དང་ཡུལ་ཕྱོགས་སོ་སོ་ཤིན་ཏུ་འཇམ་པ་རྡུལ་དང་འགྲོ་བ་ལས་ཀྱིས་དུབ་པ་དང་བྲལ་བ། གློན་པ་དང་འདོད་པའི་ཐོག་རྡུངས་དང་འགྲོ་འོང་དོན་དུ་གཉེར་བའི་
ཐོག་རྡུངས་དང་བྲལ་བ། ཆུ་སེར་རྡོ་རྗེའི་ཀྱི་གྱོག་དང་ཕན་ཚུན་དུ་འགལ་བའི་འཁོར་ལོ་སྤུའི་ཀྱི་གྱོག་གཅིག་ཏུ་སྐྱེས་པའི་སྤུ་དང་སྐྲ་རྣམས་དང་བྲལ་བ། པགས་པ་དང་མིག་གིས་མཐོང་བ་ཐོགས་པ་དང་བྲལ་བ། སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱི་
ཡུལ་རྣམས་ལ་དོག་པ་དང་བྲལ་བ། ལུས་ཀྱི་རིང་བ་དང་ཐུང་བ་དང་བྲལ་བ། གསར་པ་དང་གསར་པ་མ་ཡིན་པ་ལས་འདས་པ་ཉིད་ཀྱི་ལུས་དེའི་དུས་ན་བུད་མེད་ལ་ལྟ་བའི་སེར་སྣ་དང་ཕྲག་དོག་དང་འཇིགས་པ་དང་ཞེན་པ་དང་བྲལ་བ། འདུས་པ་ལ་དགའ་བ་དང་བྲལ་བ། སློང་བ་དོན་
དུ་གཉེར་བའི་འཇིགས་པ་དང་བྲལ་བ། ངར་འཛིན་པ་འཁོར་ལོའི་རྫས་དང་། འགྲོ་བ་དང་འོང་བ་ན་ཕྱིར་རྒོལ་བའི་འཇིགས་པ་དང་། སྤྲུལ་པའི་གནས་ལ་འཇིགས་པ་དང་། རང་གིས་བུད་མེད་ཡོངས་སུ་འཛིན་པའི་སྐྱོན་རྣམས་དང་བྲལ་བ། ཁ་ཅིག་ནི་ནགས་ན་ཀུན་ཏུ་རྒྱུ་བའི་འཇིགས་

པ་དང་། དགྲའི་འཇིགས་པ་དང་བྲལ་བ། དོག་པའི་འཇིགས་པ་དང་བྲལ་བ་ཡོངས་སུ་མགུ་བར་བྱེད་པ་དང་། རང་གི་ལྟ་བ་དང་འདོད་པ་ཉམས་པ་དང་བྲལ་བའོ། །རྣམ་པ་དུ་མའི་ལྷ་རྫས་ཀྱི་ཡུལ་སྟེན་པ་ས་རབ་ཏུ་འཕེལ་བས་ཆེད་ཆེར་བྱེད་པ་མངོན་པར་ཞེན་པས་
བདེ་བ་ལ་མངོན་པར་འཆུམས་པ་བློ་དམན་པར་གྱུར་པས་འདི་ལྟར་སེམས་ཀྱིས་བསམས་ནས་རབ་ཏུ་རྟོག་པར་བྱེད་དེ་ང་ནི་གང་ཡིན། གང་ནས་འདིར་འོངས། གནས་འདིའི་མིང་ནི་ཅི་ཡིན་ཞེས་དེ་ལྟར་དེའི་བློས་རབ་ཏུ་རྟོག་པར་འགྱུར་བ་ནི་དཔེར་ན་ར་རོ་བར་གྱུར་པའི་སྐྱེས་བུ་ཉལ་བའམ་གཉིད་
འགགས་ནས་ཐུན་གསུམ་ལ་རབ་ཏུ་སད་པ་ན་ཡིད་ཀྱིས་རབ་ཏུ་རྟོག་པར་བྱེད་དེ། བདག་ནི་གང་ཡིན། གང་ན་གནས་པ་ཡིན། ར་རོ་བ་དེས་བསམ་པས་བསམས་ནས་སོ་སོར་ཤེས་པར་འགྱུར་བ་དེ་བཞིན་དུ་འདིར་ལྷ་གསར་དུ་སྐྱེས་པ་དེས་ཀྱང་དུས་ཤིན་ཏུ་རིང་བར་བསམས་ནས་སོ་སོར་
ཤེས་པར་གྱུར་ཏེ། ཇི་ལྟར་བདག་མི་ནས་འཆི་འཕོས་ནས་འདིར་སྐྱེས་སོ། །དེའི་སེམས་ཅི་འདྲ་བ་ནི་བདག་མིར་གྱུར་པ་ན་མ་ཡིན་ལ། རྣམ་པ་དེ་འདྲ་བའི་ཡིད་ཀྱིས་བསྒོས་པའི་རྒྱུད་ཅན་ཡང་ལྷའི་འཇིག་རྟེན་དེ་ན་ཡོད་པ་རྣམས་ཡིན་ནོ། །ཡུལ་ལྔ་པོ་རྣམས་ལ་འདི་ན་ཞེན་
པར་བྱེད་དེ། དེ་དེ་ལྟར་བསྒོས་པའི་རྒྱུད་ཅན་ཡིན་པས་ལྷའི་འཇིག་རྟེན་དེ་ལ་སོ་སོར་དེ་ཁོ་ན་བཞིན་དུ་མངོན་པར་ཞེན་པར་འགྱུར་རོ། །སྔོན་དེའི་རྒྱུད་ལ་བསྒོས་པར་གྱུར་པས་དུས་ཤིན་ཏུ་རིང་བ་ནི་ལེགས་པར་ཤེས་ཏེ། བདག་ནི་ལྷའི་ནང་འདིར་སྐྱེས་ཏེ་ལེགས་པར་བྱས་པའི་ལས་ཀྱིས་
ལྷའི་འཇིག་རྟེན་དུ་སྐྱེས་སོ། །དེ་ལྟ་བུ་གང་ཡིན་པ་ནི་འཐབ་བྲལ་ནས་འཆི་འཕོས་ནས་ལྷར་སྐྱེས་པ་མ་ཡིན་པར་བལྟ་སྟེ། དེ་ནི་རྣམ་པ་དེ་ལྟ་བུའི་རོལ་མོའི་རང་བཞིན་ཅན་ཡིན་པའི་ཕྱིར་རོ། །ཇི་ལྟར་ལྷ་ཉིད་ནས་འཆི་འཕོས་ནས་མིར་སྐྱེ་བ་ནི་སྔོན་དེས་བསྒོས་པའི་རྒྱུད་ཡིན་པས་དེ་འདྲ་
བའི་རང་བཞིན་དུ་འགྱུར་རོ། །དེ་བཞིན་དུ་མི་རྣམས་ནས་འཆི་འཕོས་ནས་ཡང་དེས་བསྒོས་པའི་རྒྱུད་ཡིན་པས་དེ་ཁོ་ན་འདྲ་བའི་རང་བཞིན་དུ་འགྱུར་རོ། །ལྷར་ཡང་རང་བཞིན་དེས་སྤྱོད་པར་འགྱུར་ཏེ། རང་བཞིན་སེམས་ཀྱི་རྒྱུ་འཐུན་པ་ཡིན་པའི་ཕྱིར་རོ། །གལ་ཏེ་དམྱལ་བ་ནས་འཆི་

འཕོས་ནས་ལྷར་སྐྱེས་པར་གྱུར་ན། དེ་དམྱལ་བར་ནི་སྐྱེས་ནས་མྱོང་བར་འགྱུར་བའི་ལས་ཀྱིས་གལ་ཏེ་ཤེད་ནའོ། །ཅུང་ཟད་ཅིག་གང་ཞིག་ཏུ་སྤྱད་པ་དེ་ལན་གྲངས་གཞན་ཉིད་ལ་ཡིན་པ་གང་གི་ཕྱིར་དམྱལ་བ་རྣམས་དམྱལ་བར་གནས་ནས་དམ་པའི་ལས་ཅུང་ཟད་ཀྱིས་དེ་ལན་གྲངས་གཞན་ལ་
དེར་སྐྱེ་བར་འགྱུར་ཏེ། དེ་དེར་སྐྱེས་པ་དེས་རྣམ་པ་དེ་སྲིད་ཀྱི་དེ་དང་ཆོས་འཐུན་པའི་སྡུག་བསྔལ་དེ་སོ་སོར་མྱོང་བར་གྱུར་ནས་རྣམ་པ་དེ་སྲིད་ཉིད་ཀྱི་བདེ་བ་རྣམས་ཉེ་བར་དམིགས་པས་ཕྱིར་ཡང་ཡིད་མཆོག་ཏུ་རངས་པར་འགྱུར་རོ། །ཁྲོ་བ་ཆེས་ལྷག་པར་འགྱུར་རོ། །ཆེས་ལྷག་པར་བསིལ་བའི་
ནགས་དང་། ཉེ་བའི་ནགས་དང་། འབབ་ཆུ་དང་། རྫིང་བུ་ལ་སྟེན་པའི་རང་བཞིན་ཅན་དུ་འགྱུར་རོ། །ཤིན་ཏུ་ལྷག་པར་རྣམ་པར་རྒྱུ་བའི་རང་བཞིན་ཅན་དུ་འགྱུར་རོ། །ཤིན་ཏུ་ལྷག་པར་ཟས་ལ་སྤྱོད་པར་བྱེད་པར་འགྱུར་བའི་རང་བཞིན་ཅན་དུ་འགྱུར་ཏེ་དེས་བསྒོས་པའི་རྒྱུད་ཡིན་པའི་ཕྱིར་རོ། །
གལ་ཏེ་ཡི་དགས་ལས་འཆི་འཕོས་པ་ཡིན་ན་དེའི་སྤྱོད་པ་ཆེས་མང་བ་ཡིན་ཏེ། དེས་རྟག་ཏུ་བསྒོས་པའི་ཕྱིར་ཆེས་ལྷག་པར་ཟས་དང་སྐོམ་ལ་སྤྱོད་པར་འགྱུར་རོ། །རྟག་ཏུ་ཡང་ཤིན་ཏུ་བསིལ་བ་ལ་དགའ་བར་འགྱུར་རོ། །བུད་མེད་ལ་སྟེན་པ་ཆེད་ཆེར་བྱེད་པར་འགྱུར་རོ། །དེས་ལྷག་
པར་བསྒོས་པའི་སེམས་དང་ལྡན་པར་འགྱུར་རོ། །གལ་ཏེ་མ་ཡིན་ན་དུད་འགྲོ་རྣམ་པ་དུ་མ་རྣམས་ལས་འཆི་འཕོས་ནས་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་ལྷ་རྣམས་སུ་སྐྱེས་ན་དེ་སྐོམ་དང་ཟས་ལ་སྤྱོད་པའི་རང་བཞིན་ཅན་དུ་འགྱུར་རོ། །དེ་ལྷ་རྣམས་ཀྱི་ནང་དེར་
སྐྱེས་པ་ན་དུད་འགྲོའི་རིགས་དུ་མ་ཡིན་པའི་ཕྱིར། རྣམ་པ་དེ་སྲིད་ཉིད་དུ་འགྱུར་ཏེ། མདོར་བསྡུ་ན་ཟས་ཀྱིས་དམན་པ་དང་མཆོག་ཏུ་འགྱུར་རོ། །ཤིན་ཏུ་ལྷག་པར་ཡང་འདོད་པ་རྣམས་ལ་རྨོངས་པ་ཚབས་ཆེ་བར་འགྱུར་ཏེ། རྒྱུད་དེས་བསྒོས་པ་ཡིན་པའི་ཕྱིར་རོ། །གལ་ཏེ་ལྷ་
རྣམས་ནས་ལྷ་འཆི་འཕོས་ནས་སླར་ཡང་ལྷ་རྣམས་ཉིད་དུ་སྐྱེ་བ་རྣམས་ལས་དེ་གལ་ཏེ་གཟུགས་མེད་པ་བཞི་པོ་རྣམས་ཀྱི་སྙོམས་པར་འཇུག་པ་ཐོབ་ནས་འཆི་འཕོ་ལ་དེ་འཆི་འཕོས་ནས་ཀྱང་དེ་ཁོ་ན་བཞིན་དུ་དེས་བསྒོས་པའི་རྒྱུད་ཡིན་པས་དེ་ཁོ་ན་བཞིན་དུ་འདོད་པའི་སྒྲ་དང་། རེག་བྱ་དང་།

རོ་དང་། གཟུགས་དང་། དྲི་རྣམས་ལ་ཡང་རབ་ཏུ་འཇུག་པར་གྱུར་པ་ན་ཤིན་ཏུ་བར་སེམས་རྣམ་པར་གཡེང་བར་མི་འགྱུར་ཏེ། དེས་བསྒོས་པའི་ཕྱིར་རོ། །གལ་ཏེ་གཟུགས་ལ་སྤྱོད་པ་བསམ་གཏན་དང་པོ་ལ་ཀུན་ནས་རྟེན་པ་ནས་ཇི་སྲིད་དུ་བསམ་གཏན་བཞི་པ་
ལ་རྟེན་པ་རྣམས་དང་། ཇི་སྲིད་དུ་བཞི་པ་ལ་རྟེན་པའི་དབང་དུ་བྱས་ཏེ། དེ་བཞིན་དུ་འདོད་པའི་ཁམས་པ་འདི་སྐྱེས་པའི་ཡང་སེམས་རྒྱུད་དེ་བཞིན་དུ་དམན་པ་དང་། བར་མ་དང་། མཆོག་ཏུ་གྱུར་པ་བསམ་གཏན་ལ་མོས་པར་འགྱུར་རོ། །ཡུལ་རྣམས་ལ་དགའ་བ་དམན་
པར་འགྱུར་རོ། །གལ་ཏེ་འདོད་པ་ན་སྤྱོད་པའི་ལྷ་ཉིད་ལས་འཆི་འཕོས་ཏེ་འདོད་པ་ན་སྤྱོད་པ་ཉིད་དུ་སྐྱེས་ན་བརྒྱ་ལ་ན་སྐྱེས་ནས་མྱོང་བར་འགྱུར་བ་གང་གིས་གང་གི་ཕྱིར་ལྷ་དང་མི་རྣམས་ཀྱི་འགྲོ་བའི་རིས་གཉིས་པོ་དག་ཏུ་དཀར་པོ་བྱས་པར་གྱུར་པའོ། །དེས་ན་ལས་རྣམ་པ་གཉིས་
བྱས་པའི་ཉེ་བར་ལོངས་སྤྱོད་པ་དང་། ཡང་དག་པའི་སྦྱོར་བས་ལྷ་རྣམས་ཐམས་ཅད་ལྷ་རྣམས་ཉིད་དུ་སྐྱེ་བར་འགྱུར་ཏེ། གནས་གཙང་མ་པ་རྣམས་ནི་མ་གཏོགས་པའོ། །དེ་དག་རྣམས་ན་ནི་སྐྱེས་ནས་མྱོང་བར་འགྱུར་བའི་ལས་ཀྱང་མེད་ལ་ལན་གྲངས་གཞན་ལ་མྱོང་བར་འགྱུར་
བའི་ལས་ཀྱང་མི་བྱེད་དོ། །དེ་ལྟར་ལས་ཀྱི་རླུང་གིས་ཡོངས་སུ་འཁྱམ་པའི་འཇིག་རྟེན་མ་ལུས་པ་འདི་དག་ཡོངས་སུ་འཁྱམ་སྟེ། སྣ་ཚོགས་སྐུད་པའི་འཁྲུལ་འཁོར་དེ་རྣམ་པ་སྣ་ཚོགས་པའི་ཞགས་པས་བཅིངས་ནས་སེམས་ཀྱི་མོས་པ་བརྒྱ་སྟོང་ཕྲག་དུ་མ་དང་ལྡན་པ། རྣམ་པར་རྟོག་
པ་དུ་མ་དང་། རྒྱུད་དུ་མ་འགྲོ་བ་ལྔར་ཡོངས་སུ་འཁྱམ་མོ། །རྒྱུ་འདིས་ལྷ་གསར་དུ་སྐྱེས་པ་གོ་བར་བྱ་སྟེ། དེ་ལྟར་སོ་སོར་ཡིད་ལ་བྱེད་པ་རྣམས་སྐྱེའོ། །དེ་ནས་དེ་ལྟར་རིག་ནས་ལྷ་དེས་ཇི་ལྟ་བ་བཞིན་དུ་སོ་སོར་ཤེས་པར་འགྱུར་ཏེ། སྐྱེ་བ་གཞན་ཆེ་གེ་མོ་ཞིག་ནས་འཆི་འཕོས་ནས་འདིར་
སྐྱེས་སོ། །དེ་གལ་ཏེ་མི་ཉིད་ལས་འཆི་འཕོས་ནས་སམ། སླར་ཡང་ལྷར་སྐྱེས་པར་གྱུར་ན་ཡང་། སྐྱེས་ནས་མྱོང་བར་འགྱུར་བའི་ལས་ཡིན་ན་དེས་ལས་དེ་རྣམ་པར་ཤེས་སོ། །གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཡིན་ན་དེ་དག་ནི་འདིས་ཤེས་པ་ཁོ་ན་མ་ཡིན་ཏེ། རྒྱུ་

དེ་དག་ལྷ་དེའི་རྟོགས་པའི་ཡུལ་མ་ཡིན་པའི་ཕྱིར་རོ། །ལན་གྲངས་གཞན་ལ་མྱོང་བར་འགྱུར་བ་རྣམས་ནི་གལ་ཏེ་ཤེད་ན་བསྐལ་པ་བརྒྱ་རྐྱེན་དང་ཕྲད་ནས་འབྲས་བུ་འབྱིན་པར་བྱེད་དོ། །གལ་ཏེ་ན་བསྐལ་པ་བརྒྱ་སྟོང་ནའོ། །གལ་ཏེ་བསྐལ་པ་བརྒྱ་སྟོང་ཕྲག་གཞལ་དུ་མེད་པ་རྣམས་ན་སྟེ་རང་
ཉིད་སྐྱེ་བའི་རྒྱུ་ལྷའི་མིག་གིས་མི་མཐོང་ངོ་། །དེ་དེ་ལྟར་སྐྱེ་བའི་རྒྱུ་མངོན་པར་མ་མཐོང་བར་གྱུར་ནས་གནས་པར་འགྱུར་ཏེ། ཇི་སྲིད་དུ་དེ་རྗེས་ཐོགས་ཉིད་ལ་དེ་དགེ་བ་གོམས་པའི་ཡུལ་རྣམ་པ་དུ་མ་རབ་ཏུ་འབྱུང་བར་འགྱུར་བ་རྣམས་ཀྱང་དེ་བཞིན་དུ་འགྱུར་རོ། །ཇི་ལྟར་བདག་འཐབ་བྲལ་གྱི་ལྷ་
རྣམས་ཀྱི་ནང་ལས་རྒྱ་ཆེན་པོའི་ཁོར་ཡུག་ན་སྤྱོད་པའི་ས་ལས་སྐྱེས་སོ། །འདིའི་སེམས་བསྐྱེད་པ་ཙམ་ཉིད་ན་དགེ་བའི་ལས་ཀྱི་མཐུས་ཤིན་ཏུ་ལྷའི་བུ་མོའི་ཚོགས་ཤིན་ཏུ་མང་བ་རྣམས་རབ་ཏུ་འབྱུང་བར་འགྱུར་ཞིང་ཉེ་བར་བརྒྱུགས་ནས་འོང་ངོ་། །ལྷ་དེའི་དགེ་བའི་རྐྱེན་གང་ཡིན་པ་དེས་
འབྱུང་བར་འགྱུར་བ་ཡིན་ཏེ། དུས་ཉེ་བ་ན་སྐྱེས་པ་ཡིན་ནོ་ཞེས་བྱས་ནས་མྱུར་དུ་རྒྱུག་པ་ཡིན་ལ་གང་ཡང་སྐྱེས་ནས་རིང་དུ་ལོན་པ་དེ་དག་ནི་རྣམ་པར་འགྲིབ་པའི་ཕྱིར་རོ། །དེ་ནས་ལྷ་དེ་དེ་དག་གིས་བསྐོར་ནས་མཆོག་ཏུ་ཡིད་དགའ་བའི་ནགས་དང་ཉེ་བའི་ནགས་རྣམས་སུ་བདེ་བ་ཉམས་སུ་
མྱོང་བར་འགྱུར་རོ། །ལས་རྣམས་ཀྱི་རིན་གྱིས་ཉོས་པའི་ཡོན་ཏན་མཆོག་དང་ལྡན་པས་མཆོག་ཏུ་དགའ་བར་གྱུར་པ་རྣམས་ལ་རྗེས་སུ་ལོངས་སྤྱོད་པར་བྱེད་དོ། །ས་དེ་ལ་ཡང་རི་དང་། ནགས་དང་། ཉེ་བའི་ནགས་དང་། རྫིང་བུ་དང་། ཚང་ཚིང་དང་། འབབ་ཆུ་དང་། པད་མའི་
མཚེའུ་དང་། རི་ངོས་དང་། ནགས་ལྷམ་མེ་བ་དང་། ཕུག་དང་། འཁྲི་ཤིང་གིས་ལེགས་པར་གཡོགས་པའི་ཁང་བུ་དང་། བྱའི་ཚོགས་བརྒྱ་སྟོང་རྣམ་པར་ཆགས་པར་འགྱུར་བའི་སྐད་འདོན་པས་ཡིད་དགའ་བ་དང་། རིང་དུ་སྐྱོང་བས་དགའ་བར་འགྱུར་བའི་ལྷའི་བུ་མོ་བརྒྱ་སྟོང་གི་
གླུས་རྣམ་པར་གསལ་བར་བྱེད་པ་དགའ་བ་སྐྱེད་པའི་གར་གྱིས་དགའ་བར་གྱུར་པ་དང་། ཉེ་བའི་ནགས་རྣམས་ན་རིན་པོ་ཆེ་སྣ་བདུན་གྱི་རང་བཞིན་གྱིས་རྣམ་པར་གསལ་ཞིང་འབར་བ་མཐོང་ན་མཆོག་ཏུ་ཡིད་འཕྲོག་པའི་རི་དགས་རྣམས་དང་། རིན་པོ་ཆེ་སྣ་བདུན་གྱི་རང་བཞིན་གྱི་རྡོ་བརྒྱ་ཕྲག་འོད་

འབྱིན་པའི་རྩེ་མོ་རྒྱ་ཆེན་པོ་ཞེས་བྱ་བ་དེ་གང་ཡིན་པའི་རི་དེ་ལ་ཁམས་དུ་མ་དང་ལྡན་པའི་རྩེ་མོ་རིན་པོ་ཆེས་ཉེ་བར་གསལ་བར་བྱེད་པའི་རྩེ་མོ་ལ་འཁྲི་ཤིང་གི་ཁང་བུ་ཡོད་པ་དང་། རྒྱ་ཆེ་བའི་རྡོས་དགའ་བ་བཏིང་བ་དང་། ཚང་ཚིང་དང་། པད་མའི་ནགས་དང་།
སྐྱེད་མོས་ཚལ་དང་། མཚེའུ་དང་། འབབ་ཆུ་དང་། ཆུ་ཀླུང་གི་འགྲམ་དང་། ལྗོངས་དང་། རིའི་རྩེ་མོས་ཀྱང་དབྱིབས་དང་ཡོན་ཏན་དུ་མ་དང་ལྡན་པ་རྣམས་ལ་དང་། བསིལ་བའི་ཆུ་རྡུལ་གྱི་འབབ་ཆུ་སྟོང་ཕྲག་བརྒྱར་བསིལ་བ་རྣམས་ལ་ལྷ་དེ་དགེ་བའི་ལས་རྣམ་པ་སྣ་ཚོགས་པ་དང་
ལྡན་པའི་གཟུགས་ཀྱིས་དགའ་བར་བྱེད། ཀུན་ཏུ་སྤྱོད་པར་ཡང་བྱེད་པས་རྣམ་པ་སྣ་ཚོགས་པའི་བདེ་བ་རྣམས་ཉམས་སུ་མྱོང་བར་བྱེད་དོ། །ལྷའི་ཚོགས་དེ་དག་རྣམས་དེ་ལྟར་དགའ་བར་གྱུར་ཅིང་རྩེ་བར་གྱུར་པ་ནི་རྣམ་པར་རྟོག་པ་དུ་མ་རྣམས་ཀྱིས་ཡིན་ལ་མདོར་བསྡུ་ན་གང་དག་ཆུ་ལ་རྩེ་བ་ལ་དགའ་
བ་དེ་དག་རྣམས་ནི་ཆུ་ལ་རྩེ་བས་དགའ་བར་བྱེད་པ་སྟེ། ཕལ་ཆེར་དམྱལ་བ་དང་། ཡི་དགས་དང་། དུད་འགྲོ་རྣམས་ནས་ཡིན་པས་ཤིན་ཏུ་ཆགས་པའི་ཡིད་ཀྱིས་ལྷན་ཅིག་ཏུ་དགའ་བར་བྱེད་ཀྱི་ལས་ལེགས་པར་བྱས་པ་རྣམས་ཀྱང་ནི་ཡོངས་སུ་སྤྱོད་པར་བྱེད་པ་ཡང་མ་ཡིན་ལ་ལྷ་དེ་དག་རྣམས་
ཀྱི་རང་གི་ལུས་རྣམས་དང་ལྷན་ཅིག་ཏུ་རིགས་ཐམས་ཅད་ལ་འདི་དག་གི་ལས་ངོ་ཤེས་པར་བྱེད་པའི་མིང་རྣམས་ལེགས་པར་སྐྱེ་བར་འགྱུར་རོ། །ལྷ་གང་དག་གིས་དང་། ལེགས་པར་བྱས་པའི་ལས་གང་གིས་དང་། རྣམ་པ་ཇི་སྲིད་ཅིག་གིས་དང་། ཚུལ་གང་གིས་བྱས་པ་དང་། དུས་
ནམ་གྱི་ཚེ་ན་བྱས་པ་དང་། རྐྱེན་གང་གིས་དང་། སྐྱེ་བ་གཞན་དུ་སྐྱེས་པ་གང་གི་ཚེ་ན་བྱས་པ་དང་། དམན་པ་དང་། བར་མ་དང་། ཁྱད་དུ་འཕགས་པའི་ཞིང་དང་། དངོས་པོ་རྣམས་རྣམ་པ་ཇི་སྙེད་ཅིག་གི་ཡོན་ཏན་ཕུན་སུམ་ཚོགས་པས་དགེ་བ་བྱས་པར་གྱུར་པ་རྣམས་དེ་དག་ཐམས་ཅད་
དུས་དང་བཅས་པ་མངོན་སུམ་དུ་ཤེས་པ་དང་བཅས་པར་སྟེང་དུ་མིང་དང་། ཁ་བྱང་རྣམས་ཡི་གེར་བྲིས་པ་ལྷན་ཅིག་ཏུ་སྐྱེས་པ་སྐྱེ་བར་འགྱུར་རོ། །དཔེར་ན་སྒྲིན་པ་དང་མིག་ཆེས་རྣོ་བའི་ཡི་གེ་མཁན་གྱིས་ཆ་ཤས་རབ་ཏུ་རྣམ་པར་ཕྱེ་བའི་ཡི་གེ་མངོན་པར་བྲིས་པར་གྱུར་པ་དེ་བཞིན་དུ་ལྷ་

དེའི་ཡིག་མཁན་སྤྱང་པོས་ལེགས་པར་བྱས་པའི་ལས་ཀྱི་རྩིག་པའི་ལོགས་དེ་ལ་ལེགས་པར་བྱས་པའི་ལས་དེ་དག་ཐམས་ཅད་མངོན་པར་བྲིས་པར་འགྱུར་རོ། །མཆོག་དང་ཁ་དོག་གང་གིས་མཆོག་ཏུ་མཛེས་པར་བྱེད་པ་དང་། མཆོག་ཏུ་ཡིད་འཕྲོག་པར་འགྱུར་བའི་ཁ་དོག་དེ་ལེགས་པར་
བྱས་པའི་ལས་དེས་ལྷ་དེ་རྫོགས་པར་བྱེད་དོ། །དེ་རྣམ་པ་སྣ་ཚོགས་པ་དང་ཁྱད་པར་དུ་འཕགས་པའི་མཚན་ཉིད་ཀྱི་ཁ་དོག་གིས་མངོན་པར་བྲིས་པ་དེས་བརྒྱ་འགྱུར་དུ་རྣམ་པར་མཛེས་སོ། །དཔེར་ན་མཆོག་ཏུ་དགའ་བ་ལན་བརྒྱར་བཏུལ་བའི་གསེར་གསལ་བ་ལ་པད་མ་རཱ་ག་ཉེ་བར་བཅུག་
པའམ་ཨིན་དྲ་ནཱི་ལའམ་མཆོག་ཏུ་མཛེས་པར་གྱུར་པའི་རྣམ་པ་དེ་ལྟ་བུའི་རིན་པོ་ཆེའི་རིགས་སུ་གྱུར་པ་གཞན་ཡང་རུང་སྟེ། དེ་བཞིན་དུ་ལྷ་དེ་ལས་ཀྱིས་བྱས་པ་མངོན་སུམ་དུ་ཤེས་པར་བྲིས་པ་དེས་རྣམ་པར་མཛེས་ཤིང་གསལ་ལོ། །བྲིས་པ་དེ་ཡང་རང་ཉིད་ཀྱི་མིག་གིས་མི་མཐོང་ལ་
རྒྱུ་གང་གིས་མགྲིན་པ་དང་མིག་ཕོར་དག་ལས་དེ་ཉེ་བར་སྐྱེའོ། །བྲང་ལ་ཡང་སྟེ། རྒྱུ་དེས་ན་རང་ཉིད་ཀྱིས་མངོན་པར་བྲིས་པ་དེ་མི་མཐོང་ངོ་། །ཕན་ཚུན་དུ་ནི་མཐོང་བར་འགྱུར་ཏེ། གང་གི་ཚེ་ལྷ་དེ་ཤིན་ཏུ་ཡང་བག་མེད་པའི་ཡིད་ཅན་དུ་མི་འགྱུར་རོ། །དེའི་ཚེ་ཐམས་ཅད་ཇི་ལྟ་བ་བཞིན་དུ་མཐོང་
ངོ་། །འདི་ཉིད་ནི་རྒྱ་ཆེན་པོའི་ཁོར་ཡུག་ན་སྤྱོད་པའི་ལྷ་རྣམས་ཀྱི་སའི་མཆོག་ཏུ་རྨད་དུ་བྱུང་བ་ཅིག་ཡིན་ནོ། །གཞན་ཡང་ངོ་མཚར་བར་གྱུར་པ་ནི་ཇི་ལྟར་ལེགས་པར་བྱས་པའི་ལས་ཀྱིས་བྱས་པ་བྲང་ན་ཡོད་པ་དེ་ལྟར་དཔྲལ་བར་ཡང་བྲིས་པ་ཡིན་ནོ། །གང་གི་ཚེ་རྣམ་པ་གང་གིས་དུས་
གང་དུ་འཆི་འཕོ་བར་འགྱུར་བ་དང་། འཆི་འཕོས་ནས་ཀྱང་གང་དུ་ཅིར་སྐྱེ་བར་འགྱུར་བ་དང་། དེར་ཡང་དུས་རིང་དུ་འགྲོ་བ་དང་བཅས་པ་དང་། ཁ་དོག་དུ་མར་འགྱུར་བ་ཡང་མངོན་པར་བྲིས་པ་ནི་ལྷ་དེ་དག་གི་ངོ་མཚར་བ་གཞན་ཡིན་ཏེ། དེ་དག་ནི་ལས་ཀྱིས་བསྐྱེད་པ་ཡིན་ནོ། །ཡི་གེའི་ཕྲེང་
དེ་དག་རྣམས་དེ་ལྟར་རྣམ་པར་བཀྲ་བས་རྣམ་པར་མཛེས་པ་ཆེས་ལྷག་པ་ནི་ཇི་ལྟར་རྣམ་པ་དུ་མ་སྣ་ཚོགས་པའི་མེ་ཏོག་ལེགས་པར་སྤེལ་བའི་ཕྲེང་བ་རྣམས་ཀྱིས་ས་གཞན་རྣམས་ན་གནས་པའི་ལྷ་རྣམས་མཛེས་པ་ཡིན་ལ། གཞན་རྣམས་ལ་རྣམ་པར་གསལ་བར་བྱེད་དོ། །དེ་བཞིན་དུ་

རྣམ་པར་མཛེས་པ་ཡིན་ཏེ། དེ་དེ་དག་གིས་ལེགས་པར་བྱས་པའི་ལས་གཞན་བྱས་པ་ལྷ་རྣམས་ཡིན་པའི་ཕྱིར་རོ། །དེ་ནས་ལྷ་དེ་དག་རྣམས་དེ་ལྟར་རང་གི་ལས་ཀྱི་ལུས་ཁ་བྱང་དུ་བཏབ་པ་རྣམས་ནི་རྟོགས་པ་ཡང་མ་ཡིན་པར་མཐོ་རིས་ཀྱི་ཉེ་བའི་ནགས་རྣམས་ལ་སྣ་
ཚོགས་པའི་ཆ་བྱད་དང་། རྒྱན་འཆང་བ་རྣམས་དང་ལྷན་ཅིག་ཏུ་རྣམ་པ་དུ་མར་དགའ་བར་བྱེད་དེ། རྒྱ་ཆེན་པོའི་ཁོར་ཡུག་ན་སྤྱོད་པའི་ས་རྣམས་སུ་དེ་དེ་ལྟར་དགའ་བར་འགྱུར་ཞིང་རྩེ་བར་གྱུར་ནས་གང་ན་དུས་ཤིན་ཏུ་རིང་བར་རྣམ་པར་བཀྲ་བའི་ཆུ་ཞེས་བྱ་བའི་ཆུ་ཀླུང་ངོས་རྣམ་པ་སྣ་ཚོགས་པར་
དགའ་བ་རྩེ་མོ་ནས་རྩེ་མོར་འབབ་པ། རིན་པོ་ཆེའི་ཁམས་རྣམ་པ་སྣ་ཚོགས་པ་དང་ལྡན་པ་བྱའི་ཚོགས་དུ་མས་བརྗོད་པའི་སྒྲ་ཀུན་ཏུ་སྒྲོགས་པ། ཤིང་གི་ཚལ་འཐུག་པོ་དུ་མ་དང་ལྡན་པ། མེ་ཏོག་རྣམ་པ་མང་པོ་སྟོང་ཕྲག་བརྒྱས་ཆ་ཤས་རྣམ་པར་བཀྲ་བར་བྱས་པས་རྣམ་པར་
བཀྲ་བའི་ངོས་ན་ལྷའི་བུ་མོའི་ཚོགས་ཀྱིས་བསྟེན་པའོ། །གཞན་ཡང་རྣམ་པར་བཀྲ་བའི་རྩེ་མོའི་ངོས་ཀྱི་ངོ་མཚར་ཆེ་བར་གྱུར་པ་ནི་རྒྱར་ཇི་ལྟ་བར་རྩེ་མོའི་ངོས་ནས་རབ་ཏུ་འབབ་པའི་ཆུ་ཀླུང་དུས་ཤིན་ཏུ་རིང་བར་རྣམ་པར་བཀྲ་བ་ཆུ་ཞེས་བྱ་བའི་དེའི་ངོས་གང་གི་ཚེ་རབ་ཏུ་དང་བར་
གྱུར་པ་ན་ལྷ་གང་དག་ཆུ་ཀླུང་དེར་དམྱལ་བ་ནས་འཆི་འཕོས་པར་གྱུར་པ་ཆུ་ཀླུང་དེའི་ངོས་སུ་ཕྱིན་ནས་དེའི་ལས་ཀྱིས་བསྐྱེད་པའི་ཁྱད་པར་གྱིས་སྐྱེ་བ་གཞན་རྗེས་སུ་དྲན་ནོ། །དེས་དེ་རྗེས་སུ་དྲན་ནས་ཀྱང་མཆོག་ཏུ་དགའ་བའི་འདོད་པའི་ཡོན་ཏན་ལྔ་ཕུན་སུམ་ཚོགས་པ་ལ་སྤྱོད་པ་རྟག་
ཏུ་རབ་ཏུ་རངས་པའི་ལྷ་དང་ལྷ་མོའི་ཚོགས་ཀྱིས་གང་བས་དེ་ཆེད་ཆེར་རྣམ་པ་དུ་མར་རྣམ་པར་ཆགས་པར་བྱས་ནས་གྲངས་མེད་པའི་དུས་ཀྱི་བར་དུ་ལོངས་སྤྱོད་པར་བྱེད་པ་ན་སྡུག་བསྔལ་རྣམས་དྲན་པར་གྱུར་ནས་བདེ་བ་དེ་དག་ཐམས་ཅད་བརྗེད་པར་འགྱུར་རོ། །སླར་ཡང་སྐྱོ་བ་དང་
བཅས་པའི་ཡིད་ཀྱིས་ཚིགས་སུ་བཅད་པ་བརྗོད་པ། ཇི་ལྟར། རྒྱུ་ཆེན་སྡུག་བསྔལ་ཆེན་པོ་ཡི། །དམྱལ་བའི་མེ་དང་ཡང་དག་ལྡན། །བདག་གི་སྡིག་པ་ཀུན་བྱང་ནས། །སླར་ཡང་འཇིག་རྟེན་འདིར་འོངས་སོ། ལེགས་པར་བྱས་པའི་འབྲས་བུ་བཟང་། །ཡོན་ཏན་དུ་མ་དང་

ལྡན་པ། །ཉེས་པར་བྱས་འབྲས་སྡུག་བསྔལ་ནི། །སླུ་བ་མེད་ལྡན་ཆེན་པོ་ཡིན། །བདེ་དང་སྡུག་བསྔལ་དེ་དག་གིས། །སྲིད་པའི་གཡང་སར་འཁོར་འགྱུར་བ། །རྒྱ་མཚོའི་རླབས་ནི་ཇི་ལྟ་བར། །ལས་ཀྱི་རླུང་གིས་ཀུན་ནས་བསྐོར། །བྱས་པའི་སྡིག་ཅན་ཡིད་ཀྱིས་ཏེ། །སྡིག་
ལ་དགའ་བའི་མི་དག་ནི། །མི་དགེ་བ་ལ་སྤྱད་པ་ཡིས། །དེ་རྒྱུས་དེ་ནི་དམྱལ་བར་འགྲོ། །དེ་ཕྱིར་ཡང་ནི་མ་འགྲོ་ལ། །ལྷ་ཡུལ་དུ་ནི་འགྲོ་འགྱུར་བ། །དེས་ནི་སྡུག་བསྔལ་དེ་བསྲིངས་ན། །སླར་ཡང་འདོད་པའི་དབང་རྗེས་འགྲོ། །རྩུབ་པར་འགྱུར་བའི་སེམས་འདིས་ནི། །ཕྱང་
མོ་འཕྱང་མིན་བདེ་མིན་བདེ། །ཡུལ་འདི་རྣམས་ལ་ཡོངས་འཁྱམས་ཀྱང་། །སྡུག་བསྔལ་གྱིས་ནི་སྐྱོ་བ་མེད། །ཚུ་རོལ་ཕ་རོལ་ལེགས་ལྡན་པའི། །དབང་པོ་ཡོངས་སུ་བསླུས་པ་ཡིས། །སྐྱེ་དགུ་འཁོར་བར་འཁོར་བ་སྟེ། །སྲེད་པའི་ཞགས་པའི་དབང་རྗེས་འགྲོ། །དམྱལ་གནས་
ཡི་དགས་སྲིད་པར་ཏེ། །ཡི་དགས་ལས་ནི་དུད་འགྲོའི་སྐྱེ། །ཀླུ་ཡི་སྲིད་པར་དུད་འགྲོ་ལས། །དམྱལ་ལས་ཕལ་ཆེར་བུད་མེད་སྐྱེ། །དེ་ལྟར་ལས་ཀྱིས་ཡོངས་འཁོར་བའི། །འཇིག་རྟེན་འཁོར་བ་འཁོར་ལོ་བཞིན། །སྐྱོ་དབང་དུ་ནི་མི་འགྲོ་ཡང་། །གོམས་པའི་དབང་དུ་འགྲོ་ཕྱིར་
རོ། །ཀླུ་ཡི་སྲིད་པར་དགའ་འགྱུར་བ། །བདེ་བ་ཇི་ལྟར་རྣམ་སྤྲས་པ། །སྲིད་པ་ན་ནི་སྤྱོད་པ་རྣམས། །བདེ་ལས་བདེ་བ་ཡོངས་ཉམས་འགྱུར། །སྡུག་བསྔལ་པད་མ་སྟོང་དང་ནི། །པད་མ་བྱེ་བ་བརྒྱར་ཡང་ནི། །སྡུག་བསྔལ་ཡོངས་སུ་ལོངས་སྤྱོད་ཀྱང་། །བྱིས་རྣམས་སྐྱོ་བར་ཡང་
མི་འགྱུར། །བདེ་བ་མི་དམིགས་སྲིད་གསུམ་ན། །ཐམས་ཅད་སྡུག་བསྔལ་གྱིས་ཡོངས་བསླད། །སྐྱོ་བ་སྐྱེ་བར་མི་འགྱུར་ལ། །སྲོག་ཆགས་སྡུག་བསྔལ་གྱིས་གཟིར་ར་རྣམས། །བྱིས་པ་སྡུག་བསྔལ་གྱིས་དུབ་ཀྱང་། །སྡུག་བསྔལ་རྒྱུ་ལ་འཇུག་པར་བྱེད། །རྒྱུ་རིང་འབྲས་བུ་འབྲལ་
མིན་ཏེ། །ས་བོན་བརྟན་དབང་འབྲས་ཅི་བཞིན། །ཡུལ་རྣམས་ཀྱིས་ནི་ཡོངས་འཁྲུལ་ཡིད། །ཡིད་ཀྱི་ཤུགས་ནི་སྟོབས་པོ་ཆེ། །སེམས་ནི་རྗེས་འབྲངས་བཅས་འདུལ་བ། །ལུས་ཅན་རྣམས་ནི་ཤིས་པར་འགྱུར། །དེ་འདུལ་བྱེད་པར་མྱུར་བར་ནི། །ཁམས་རྣམས་ཐམས་ཅད་སྤྱོད་

པ་སྟེ། །སྲིད་གསུམ་ཐམས་ཅད་བསྐོར་བྱས་ཀྱང་། །དེ་ཉིད་རབ་ཏུ་མཐོང་བའང་མིན། །ཀུན་ཏུ་གཡོ་བྱེད་དབང་གིས་གཡོ། །ཇི་ལྟར་འཁོར་བ་རྒྱ་མཚོ་བཞིན། །སེམས་ཀྱི་དབང་ཕྱུག་ཡང་དག་ལྡན། །འཇིག་རྟེན་འདི་ནི་རྟག་ཏུ་འཁོར། །བདེ་སྡུག་དུས་ཀྱི་རྗེས་
འབྲེལ་བ། །སྲོག་ཆགས་སྲིད་གསུམ་རྗེས་སུ་འགྲོ། །སྡུག་བསྔལ་ཐམས་ཅད་སྤངས་པ་ཡི། །ལེགས་པའི་མཆོག་ཏུ་འབབ་པར་བྱེད། །འཁོར་བྱེད་རྟག་ཏུ་སྡུག་བསྔལ་གྱིས། །དེ་ཚེ་ལུས་ཅན་རྣམས་དུབ་འགྱུར། །བརྗེད་པར་གྱུར་ནས་ཕྱི་ནས་ཀྱང་། །རྣམ་པར་གདུང་བྱེད་
སྡུག་བསྔལ་སྤྱོད། །དམྱལ་བའི་གང་ཚེ་ལུས་ཅན་གྱིས། །སྡུག་བསྔལ་དྲན་པར་གྱུར་ན་ནི། །དེ་ཚེ་མ་ལུས་བདེ་འདི་རྣམས། །རྡུལ་ཕྲན་ཙམ་དུ་ངེས་པར་གནས། །དེ་དུས་ཇི་སྲིད་དུ་རྣམ་པར་བཀྲ་བའི་རྩེ་མོའི་ངོས་དེ་ན་ཉེ་བར་གནས་པར་གྱུར་གྱི་བར་དེ་སྲིད་དུ་སྐྱེ་བ་གཞན་རྗེས་སུ་དྲན་པར་
བྱེད་དོ། །གང་གི་ཚེ་བཏང་བར་གྱུར་པ་དེའི་ཚེ་སྐྱེ་བ་གཞན་རྗེས་སུ་དྲན་པ་ཐམས་ཅད་བརྗེད་པར་འགྱུར་རོ། །དེ་སྐྱེ་བ་གཞན་ལ་ཉམས་སུ་མྱོང་བའི་སྡུག་བསྔལ་གཞན་བརྗེད་ནས་བརྗེད་པས་ཀྱང་ཕྱི་རོལ་ཡུལ་ལ་འཆུམས་པས་རྣམ་པ་དུ་མར་གཞན་དང་མི་འདྲ་བ་དང་། སྡུག་པའི་སྒྲ་དང་། རེག་
བྱ་དང་། རོ་དང་། གཟུགས་དང་། དྲི་འདོད་པར་གྱུར་པའི་ལྷའི་རྫས་ཀྱི་ཡུལ་རྣམས་ལ་ལྷན་ཅིག་ཏུ་དགའ་བར་བྱེད་དོ། །དེ་གཞན་ཡང་གང་ན་ཆུ་ཀླུང་འོད་འབྱིན་ཞེས་བྱ་བའི་རི་ཡོད་པ་དེར་ཉེ་བར་འགྲོའོ། །རི་དེ་ཡང་ཉེ་འཁོར་ཀུན་ཏུ་དགའ་བའི་ཤིང་མཆོག་གིས་ཤིན་ཏུ་གང་བ་རབ་ཏུ་
དང་བའི་ཆུ་ལ་ངང་པ་དང་། ཀཱ་རཎྜ་བ་དང་། ངང་ངུར་གྱིས་ཡོངས་སུ་གང་བ་རྣམ་པ་སྣ་ཚོགས་པའི་གསེར་འབར་བ་སྒྲའི་མཆོག་གིས་ཡིད་དགའ་བའི་ཅ་ཅོས་གང་བའི་ཆུ་ཀླུང་འབབ་པར་འགྱུར་ལ། ཆུ་ཀླུང་དེ་ལ་ཡང་ཤིན་ཏུ་མང་བ་འབྱུང་བར་འགྱུར་བ་ནི་སྟོང་ཕྲག་བཅུས་ལེགས་
པར་གང་བ་སྟེ། ཚད་དང་ཤུགས་དང་དབྱིབས་རྣམས་མཚུངས་པ། ཤིང་དང་བྱའི་ཚོགས་ཀྱིས་དགའ་བར་གྱུར་པའོ། །རབ་ཏུ་མང་བ་བྱུང་བ་དེ་དག་རྣམས་ལས་ཀྱང་ཐམས་ཅད་ལས་ཆེས་ཆེར་ལྷག་པའི་ཆུ་ཀླུང་ནི་བཞི་ཡོད་པ་ལ་འདི་ལྟ་སྟེ། མཛེས་པར་འབབ་པ་དང་།

གསེར་གྱི་ཕྲེང་བ་དང་། བཻ་ཌཱུརྱའི་ཆུ་དང་། བདེ་བར་འབབ་པ་དང་བཞིའོ། །དེ་ནས་ལྷ་དེ་རང་གི་ལས་ཀྱི་འབྲས་བུ་ལ་སྤྱོད་པས་ཐམས་ཅད་ཀྱང་རབ་ཏུ་དགའ་བའི་ཡིད་ཅན་མཆོག་ཏུ་རྒྱ་ཆེ་བའི་རྒྱན་དང་ཆ་བྱད་ཕྲེང་བར་འཛིན་པ་རྣམས་རྩེ་བར་གྱུར་པས་གང་ན་མཛེས་པར་འབབ་པའི་ཆུ་ཀླུང་
ཡོད་པ་དེར་ཉེ་བར་ལེགས་པར་འགྲོ་བར་བྱེད་དོ། །ཆུ་ཀླུང་དེའི་ངོས་ན་ཡང་དཀར་ལ་རིང་བའི་མེ་ཏོག་གི་ནགས་ཆེན་པོ་ན་དགའ་བ་དུ་མ་ཞེས་བྱ་བའི་མཚོ་དེ་ན་མེ་ཏོག་གི་འཁྲི་ཤིང་ཐེན་པ་མཆོག་གིས་རབ་ཏུ་གཡེངས་པ། མེ་ཏོག་གི་བྱེ་བྲག་སྟོང་ཕྲག་རྣམས་ཀྱིས་རྣམ་པར་དགའ་བ། ཚད་དང་
དབྱིབས་དུ་མ་དང་ལྡན་པའི་བྱ་རྣམ་པ་དུ་མས་རྣམ་པ་སྣ་ཚོགས་པའི་རྒྱན་དང་ཆ་བྱད་ཅན་གྱི་བྱས་སྒྲའི་རྣམ་པ་རྒྱ་ཆེ་བས་ལེགས་པར་གནེམས་པས་མཆོག་ཏུ་དགའ་བར་གྱུར་པའོ། །ཆུ་ཀླུང་མཛེས་པར་འབབ་པ་དེའི་ངོས་གཉིས་པ་ན་ཡང་བུང་བ་རྐང་དྲུག་རྗེས་སུ་རྒྱུ་བ་ཞེས་བྱ་བའི་པད་མའི་རྫིང་བུ་
ནང་པར་གྱི་ཉི་མ་དང་མཉམ་པའི་འོད་མཆོག་ཏུ་དྲི་ཞིམ་པའི་པད་མས་རྟག་ཏུ་ལེགས་པར་གང་བའི་པད་མའི་རྫིང་བུའི་ནགས་དེ་ནི་རྣམ་པ་དུ་མར་དགའ་བ་རིང་དུ་ནི་དཔག་ཚད་ལྔ་བརྒྱའི་རྒྱར་གྱུར་པའི་ངོ་བོ་ནི་དཔག་ཚད་ལྔའོ། །ཉེ་འཁོར་ན་ཡང་མཆོག་ཏུ་དྲི་མ་མེད་པའི་ཆུ་ནི་ཆུ་སྐྱེས་དང་། མེ་ཏོག་
གཞན་གྱིས་ཀྱང་ཡང་དག་པར་གང་བ་ཁ་དོག་རྣམ་པ་སྣ་ཚོགས་པའི་འདབ་མ་རྣམས་དྲི་གང་དག་ཉེ་འཁོར་དཔག་ཚད་ལྔར་འགྲོ་བས་མཆོག་ཏུ་དྲི་ཞིམ་པའོ། །དེ་ནས་དེ་ཇི་ལྟར་འདོད་པས་ཁ་ཅིག་ནི་ནགས་རྣམས་སུ། ཁ་ཅིག་ནི་པད་མའི་རྫིང་བུར་ཇི་ལྟར་འདོད་པ་རྒྱུ་བས་རབ་ཏུ་དགའ་
བ་ལྷ་དང་ལྷ་མོའི་ཚོགས་ཀྱིས་གང་བ་རང་གི་གཟི་བརྗིད་དང་ལྡན་པ་ལས་ཀྱིས་བྱས་ཤིང་བསགས་པས་དེར་སྐྱེའོ། །དེ་དག་རྣམས་དྲི་མཆོག་ཏུ་མཛེས་པའི་དྲིའི་མེ་ཏོག་གིས་མཛེས་པར་འབབ་པ་དེ་མཐོང་ན་ཆེས་ཡིད་སྤྲོ་བའི་ངོས་ལ་རྒྱ་ཆེན་པོའི་ཁོར་ཡུག་ན་རྒྱུ་བའི་ལྷ་རྣམས་
དགའ་བར་བྱེད་ལ་ཡོངས་སུ་སྤྱོད་པར་ཡང་བྱེད་དོ། །རྣམ་པ་དུ་མ་དེ་དག་གཅིག་ཏུ་ཆུ་ཀླུང་འོད་འབྱིན་གྱི་རིའི་རྩེ་མོ་ལ་རབ་ཏུ་འབབ་བོ། །གཞན་ཡང་འོད་འབྱུང་གི་རི་ཡོད་པ་ལ་ཆུ་ཀླུང་གཞན་ལེགས་པར་འབབ་སྟེ། གསེར་གྱི་ཕྲེང་བ་ཞེས་བྱ་བའི་ཆུ་ཀླུང་འོད་འབྱུང་ཡིན་ནོ། །

ཆུ་ཀླུང་དེ་ལ་བརྟེན་ནས་ཆུ་ཀླུང་དེ་འབབ་པའོ། །དེ་ཉིད་ཀྱི་མིང་གིས་ཆུ་ཀླུང་དེ་གསེར་གྱི་ཕྲེང་བ་ཞེས་བརྗོད་དོ། །དེ་ན་དགའ་བ་འདི་དག་ཡོད་དེ་འདི་ལྟ་སྟེ། ཆུ་དེའི་སྐྱོན་རྣམས་འགགས་པས་བཏུང་བ་བཞིན་དུ་འགྱུར་རོ། །ཤིན་ཏུ་དྲི་ཞིམ་པའི་དྲིས་ཅི་ལྟར་
འདོད་པའི་རོ་དང་། ཁ་དོག་དང་། དྲི་དང་། རེག་བྱ་དྲན་པར་གྱུར་པས་རྒྱགས་པ་སྐྱེ་བ་ཐམས་ཅད་དང་བྲལ་བའོ། །དེ་ནས་ལྷ་དེ་དག་གིས་བཏུང་བའི་ཁྱད་པར་དེ་འཐུངས་ནས་ཀྱང་ཆེས་ལྷག་པར་བག་མེད་པས་གནས་པས་གང་དག་དགའ་བར་བྱེད་དོ། །ལྷན་ཅིག་རྒྱུ་བ་ཆེན་པོ་དང་
བཅས་པའི་ཐམས་ཅད་ཚོགས་པ་ཆེན་པོས་བསྐོར་བ་ཡུལ་ལྔ་ལ་རྣམ་པར་ཆགས་པའི་ཡིད་ཅན་རྔ་སྐད་ཡན་ལག་ལྔ་དང་ལྡན་པར་གྱུར་པ་མཉམ་པ་དང་། སྙན་པ་དང་། ཆགས་པའི་སྒྲས་མཆོག་ཏུ་རྗེས་སུ་འཐུན་པའི་ཡང་རྒྱན་དང་། ཆ་བྱད་དང་། མཆོག་ཏུ་བལྟ་ན་སྡུག་པ་
རྣམས་ཞབས་འབྲིང་དུ་གྱུར་པས་ཅི་དགའ་བར་འདོད་པར་བྱས་པའི་རང་དབང་དུ་འཇུག་པ་ལྷ་དེ་དག་རྣམས་གསེར་གྱི་ཕྲེང་བའི་ངོས་ན་སྣ་ཚོགས་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་ཡིས་རྒྱགས་པས་རྒྱགས་པ་རྣམས་རྣམ་པ་དུ་མར་རྒྱུ་བ་དེས་ཆུ་ཀླུང་མཆོག་
ཏུ་དགའ་བ་མཐོང་ན་གཟུགས་ཀྱི་ཡུལ་གྱིས་ངོམས་པ་མེད་པ་དེ་ཡང་ཉེ་བར་ལོངས་སྤྱད་ནས། གཞན་ཡང་གར་དང་ལྡན་པའི་གླུའི་སྒྲས་རྣ་བའི་ཁུང་བུ་འཕྲོག་པའི་ཡུལ་ལྔ་ལ་མངོན་པར་ཆགས་པའི་ཡིད་ཀྱིས་དགའ་བར་གྱུར་པས་རི་དང་། ལྗོངས་ནས་ལྗོངས་དང་། རིའི་རྩེ་མོ་ནས་
རིའི་རྩེ་མོ་དང་། ཆུ་ཀླུང་གི་ངོས་ནས་ཆུ་ཀླུང་གི་ངོས་དང་། པད་མའི་རྫིང་བུ་ནས་པད་མའི་རྫིང་བུ་དང་། ནགས་ནས་ནགས་སུ་དང་། བང་རིམ་ནས་བང་རིམ་དང་། ཤིང་དྲུང་ནས་ཤིང་དྲུང་དུ་དགའ་བར་གྱུར་པས་རྣམ་པ་སྣ་ཚོགས་པའི་བདེ་བའི་རྒྱགས་པས་མྱོས་པ་རྣམས་རྒྱུ་བར་གྱུར་པ་ན་
དུས་གཞན་ཞིག་གི་ཚེ་བཻ་ཌཱུརྱའི་ཆུ་ཞེས་བྱ་བའི་ཆུ་ཀླུང་དེ་དང་ཉེ་བར་རབ་ཏུ་དགའ་བའི་རྒྱགས་པས་རྣམ་པར་རྒྱུ་ཞིང་འགྲོའོ། །ཆུ་ཀླུང་དེ་ལ་ཡང་མཛེས་པ་འདི་དག་རྣམས་ཡིན་ལ་འདི་ལྟ་སྟེ། བཻ་ཌཱུརྱའི་རང་བཞིན་དུ་གྱུར་པའི་ཆུ་ཀླུང་དྲི་མ་མེད་པའི་ཆུའོ། །རྡོ་བ་རྣམས་བཻ་ཌཱུརྱའི་རང་བཞིན་ནོ། །

བཻ་ཌཱུརྱའི་རང་བཞིན་གྱི་ལྗོན་ཤིང་གིས་ལེགས་པར་གང་བ། བཻ་ཌཱུརྱའི་རང་བཞིན་དང་མདོག་མཚུངས་པའི་ལྗོན་ཤིང་ལ་བྱའི་སྒྲས་ནང་ན་གང་བ། འབྲས་བུ་རྣམས་ལྟ་བས་ཆེས་རྒོད་པ་ལྟར་གྱུར་པ། གཙང་ཞིང་དྲི་མ་མེད་པའི་ཆུ་བདེ་བར་འབབ་པ། ཟབ་ཅིང་སྙན་པའི་སྒྲ་ལེགས་པར་
བྱས་པའི་ལས་ཀྱིས་དབང་པོར་གྱུར་པའི་བཻ་ཌཱུརྱའི་ཆུ་ཞེས་བྱ་བའི་ཆུ་ཀླུང་རབ་ཏུ་འབབ་པའོ། །དེ་ལྟར་ལྷ་དེ་དག་རྣམས་དགའ་བས་རྒྱུ་བའི་དོན་དུ་འགྲོ་བར་བྱེད་དོ། །ཡུལ་ལ་སྲེད་པའི་སྲེད་པས་རྣམ་པ་དུ་མར་རབ་ཏུ་རྣམ་པར་ཞེན་པས་ལྷ་དེ་རྣམས་རྣམ་པར་རྒྱུའོ། །ཁ་ཅིག་ནི་ཆུ་ཀླུང་གི་ངོས་
དག་ན་དགའོ། །ཁ་ཅིག་ནི་ཆུའི་ནང་ན་ལྷན་ཅིག་སྤྱོད་པ་དང་བཅས་ནས་སོ། །ཁ་ཅིག་ནི་མཆོག་ཏུ་འགྱིང་བས་བྱ་གཞན་རྣམས་ཀྱི་རྒྱབ་ཏུ་དེ་དག་མངོན་པར་ཞོན་ནས་རླབས་ནས་རླབས་ལ་འགྲོའོ། །ཆུ་ལ་དཀྱི་ལི་ཀུད་འཁོར་བ་ནས་འཁོར་བ། ཕྱི་འཁོར་ནས་ཕྱི་འཁོར་དུ། ཆུ་མི་མཉམ་
པ་ནས་ཆུ་མི་མཉམ་པར། པད་མའི་སྟན་ནས་པད་མའི་སྟན་ལ། ཨུད་པ་ལའི་ནགས་ནས་ཨུད་པ་ལའི་ནགས་སུ་ཡོངས་སུ་སྤྱོད་དོ། །བརྒྱ་ཕྲག་དང་བརྒྱ་སྟོང་ཕྲག་ཏུ་དཔེ་མེད་པའི་བདེ་བ་དང་ཡང་དག་པར་ལྡན་པའི་ལྷ་དེ་དག་རྣམས་ལ་གལ་ཏེ་ཤེད་ན་ལེགས་པར་བྱས་པའི་
ལས་རྣམས་ཀྱིས་དང་། ཡུལ་རྣམས་ཀྱང་ཞི་བ་དང་། དེའི་ཚེ་བཻ་ཌཱུརྱ་ཡང་དྲི་མ་མེད་པ་ལ་མཐོང་བ་ནི་གང་དག་ཚུལ་ཁྲིམས་དང་ཤེས་རབ་ཀྱིས་ལྷག་པར་གྱུར་པ་དེ་དག་རྣམས་ཀྱིས་དེ་ལ་ལས་ཀྱི་འབྲས་བུའི་རྟགས་ཀྱི་གཟུགས་བརྙན་མཐོང་བར་འགྱུར་ཏེ། དེའི་རྒྱུ་གང་ཡིན་པ་དང་། དེའི་
གླེང་གཞི་དང་། དེ་དང་མ་བྲལ་བས་དང་། རྐྱེན་དེས་ལྷའི་རིས་དེར་སྐྱེ་བར་འགྱུར་བ་དང་། འདི་དག་ཐམས་ཅད་མངོན་སུམ་དུ་ཤེས་པ་དང་བཅས་པ། དམིགས་པ་དང་བཅས་པ་དང་། སེམས་བསྐྱེད་པའི་གླེང་གཞི་དང་བཅས་པ། ཞིང་ལ་རབ་ཏུ་དང་བར་གྱུར་པ་རྣམས་མངོན་
པར་མཐོང་ནས་དེ་རྣམས་དམིགས་པར་བྱས་ནས་སྐྱེ་བ་གཞན་དྲན་པའི་དབང་དུ་བྱས་པའི་བློ་སྐྱེའོ། །ཀྱེ་མ་བདག་ཡུལ་གྱི་ཤུགས་ཀྱི་ལིམ་ལོག་ཅན་གྱི་ཆུའི་རླབས་སྐྱོ་བ་སྐྱེ་བར་འགྱུར་བའི་ཤུགས་དང་ལྡན་པའི་སྲེད་པའི་ཆུ་ཀླུང་གིས་བདག་ཇི་ལྟ་བར་རབ་ཏུ་ཁྱེར་བར་གྱུར་པ། གང་གི་དབང་

གིས་འབྱུང་བར་གྱུར་པ་ལོག་པར་ལྟུང་བར་འགྱུར་བ་ཡང་བདག་གིས་མ་རྟོགས་ཏེ། གང་གི་རྒྱུས་འདི་ཇི་ལྟ་བ་བཞིན་དུ་མངོན་སུམ་དུ་རྟོགས་པར་འགྱུར་བ་མངོན་གྱི་དུས་དང་ལྡན་པའི་ལོ་རྒྱུས་དེ་དག་རྣམ་པ་དུ་མར་མངོན་པར་བྲིས་པའི་རྒྱུ་དེས་རྙེད་པས་སྐྱེ་བ་གཞན་གྱི་
ལོ་རབས་རྣམས་བདག་གིས་རྙེད་པར་འགྱུར་རོ། །ལེགས་པར་བྱས་པ་འདི་རྣམས་ལ་ལོངས་སྤྱོད་པར་ཡང་བྱེད་དེ། ཡང་གང་གི་ཚེ་ཟད་པར་བྱེད་པ་དེའི་ཚེ་ཕྱིར་ཡང་རྣམ་པ་དུ་མར་ལོག་པར་ལྟུང་བ་ལྷའི་རིགས་དེ་ལས་འབྱུང་བར་འགྱུར་རོ། །དེ་ལྟར་ཕན་ཚུན་དུ་བརྗོད་པར་འགྱུར་
བ་དང་། འགྲོ་བ་ལྔའི་འཇིགས་པ་ཡང་མཐོང་བར་གྱུར་པས་ཐམས་ཅད་སོ་སོ་ལ་བརྟེན་ནས་སྐྱེས་པའི་ཡིད་འབྱུང་བས་བཻ་ཌཱུརྱའི་ཆུ་ཀླུང་གི་ཆུ་འགྲམ་དེ་ཉིད་ན་ཚིགས་སུ་བཅད་པ་བརྗོད་པ་ཇི་ལྟར། སྔོན་དགེའི་ལས་ཀྱིས་བྱུང་བ་གང་། །ལེགས་པ་དང་ལྡན་ཆེ་འབྱུང་བ། །མཐོ་
རིས་འདི་དེ་སྤྱོད་བྱེད་དང་། །ཡང་དང་ཡང་དུ་ཟད་པ་དང་། །མཐོ་རིས་ལེགས་བྱས་ལས་བྱུང་བ། །དེ་ཟད་པས་ནི་ལྟུང་བར་མཐོང་། །མཐོ་རིས་རྒྱུ་དང་བཅས་པ་ནི། །སྐད་ཅིག་པ་ཡི་ཁྱད་པར་གྱིས། །མི་རྟག་འབྱུང་གནས་གཙུག་ལག་ལས། །ཐམས་ཅད་འཇིག་པར་
འགྱུར་བ་ཡིན། །དངོས་གང་འདུས་བྱས་མི་རྟག་པ། །དེ་ཀུན་རྣམ་པར་འཇིག་པ་ཡིན། །སྐྱེ་ཀུན་རབ་ཏུ་རྣམ་འཇིག་པ། །ཆོས་ཉིད་ཀྱིས་འདི་རྣམ་པར་གནས། །འདོད་པའི་རོ་ལ་ཆགས་བྱེད་པ། །བྱིས་པ་བློ་དམན་རྣམས་ཡིན་ནོ། །ཀིམ་པ་ཀ་ཡི་འབྲས་མཚུངས་པའི། །
ཉེས་དམིགས་གོ་བ་མ་ཡིན་ནོ། །གཟུགས་ལ་སོགས་པའི་དགྲ་འདིས་ཀྱང་། །སྲེད་པའི་རང་བཞིན་ཕྱིར་ལོག་སྐྱེ། །ལས་ངན་འབྲས་ལ་རྨོངས་པ་ཡི། །སྲོག་ཆགས་ལོག་པའི་དབང་འགྲོ་ཉམས། །འདོད་པ་དུག་གི་འབྲས་འདྲ་རྣམས། །སྐྱེས་བུས་ཇི་སྲིད་མྱངས་པ་ཡིས། །
དེ་དག་ཉིད་ལ་ངོམས་མེད་ཡིན། །ཕྱིར་ཡང་དམྱལ་བར་ལྟུང་བ་ཡིན། །སྦྱིན་དང་ཚུལ་ཁྲིམས་དགའ་སྤྱོད་སྤེལ། །རྟག་ཏུ་དེ་ལ་ཞུགས་པའི་ཡིད། །རྟག་ཏུ་གང་ལ་དེ་ཡོད་པ། །སྐྱེ་བོ་དེ་ནི་མཐོ་རིས་འགྲོ། །རྟག་ཏུ་ཚུལ་ཁྲིམས་བསྒོམས་པ་དང་། །མི་དགེ་བ་ཡང་སྤངས་པ་ནི། །

སྤྱང་པོ་འོད་ལྡན་བརྟན་པོ་སྟེ། །སྐྱེ་བོ་དེ་ནི་མཐོ་རིས་འགྲོ། །དགྲ་བོ་རྣམས་ལའང་རྟག་ཏུ་གང་། །འཁོན་དང་བྲལ་བ་བྱམས་པའི་སེམས། །རྟག་ཏུ་རབ་ཏུ་ཞི་བའི་ཡིད། །སྐྱེ་བོ་དེ་ནི་མཐོ་རིས་འགྲོ། །ཡིད་ཀྱི་སྒོམ་པ་དྲག་པོ་ཡིས། །སྡོམ་པར་བྱེད་པའི་ལེགས་པ་གང་། །རྟག་ཏུ་
སྡོམ་བརྩོན་གཅིག་ལ་དགའ། །ཤིན་ཏུ་མང་བ་མི་སྨྲ་བ། །སྙིང་པོ་སྙིང་མེད་རྣམ་པར་ཤེས། །གང་དེ་སྐྱེ་བོ་མཐོ་རིས་འགྲོ། །འཁོར་བར་ཆགས་པར་གྱུར་པ་གང་། །རྒ་ཤི་དག་གིས་བསླུས་པ་ཡིན། །རྟག་ཏུ་མྱ་ངན་འདས་མངོན་དགའ། །འགྲོ་འགྱུར་སྐྱེ་དེ་མཐོ་རིས་སུ། །ཤིང་
དྲུང་འམ་ནི་དུར་ཁྲོད་དུ། །དེ་བཞིན་ཉིད་དུ་རི་ཁྲོད་དུ། །སྒོམ་པའི་ཡིད་ལྡན་སེམས་དཔའ་དེ། །མཐོ་རིས་འགྲོ་བའི་སྐྱེ་བོ་ཡིན། །ཚོད་ཤེས་ཡུལ་ཤེས་དུས་ཤེས་དང་། །སྡིག་པའི་གྲོགས་པོ་རྣམ་སྤངས་པ། །གང་ལ་བྱམས་པའི་སེམས་ཡོད་དེ། །སྐྱེ་བོ་མཐོ་རིས་འགྲོ་བ་ཡིན། །གྲོང་
ལྟ་བ་ལ་མི་དགའ་ཞིང་། །ཚལ་དང་སྲང་དུ་མི་རྒྱུ་བ། །གཅིག་པུ་གནས་དང་ཞི་བ་ཡི། །སྐྱེ་བོ་དེ་ནི་མཐོ་རིས་འགྲོ། །གང་ཞིག་ཞི་བས་རྟག་ཏུ་ལུས། །མི་གཙང་ལས་བྱུང་ལྟ་བྱེད་པ། །ལུས་དང་ལུས་ཀྱི་ཆོ་ག་ཤེས། །གང་དེ་སྐྱེ་བོ་མཐོ་རིས་འགྲོ། །ཆོས་རྣམས་ལས་ཀྱི་དྲ་བར་
ནི། །གང་གིས་རྣམ་མང་སྐྱེ་བོ་མཐོང་། །འཁོར་བ་ལ་ཡང་དགའ་བ་མེད། །མཐོ་རིས་འགྲོ་བའི་སྐྱེ་བོ་དེ། །དེ་ཉིད་ཀྱང་ནི་ཇི་བཞིན་རིག །རྣམ་པ་དུ་མ་ལས་བྱུང་བའི། །མཐོང་ཡང་དགའ་བ་མ་ཡིན་ནོ། །མཐོ་རིས་འགྲོ་བའི་སྐྱེ་བོ་དེ། །སྐད་ཅིག་པ་དང་སྒྱུ་མ་བཞིན། །དྲི་ཟ་སྒྱུ་མ་
ལྟ་བུར་ཡང་། །གང་ཞིག་རྟག་ཏུ་སེམས་འདུལ་བ། །སྐྱེ་བོ་དེ་ནི་མཐོ་རིས་འགྲོ། །དེ་ཉིད་སྐད་ཅིག་ལ་ཤེས་དང་། །མཚན་ཉིད་བྲལ་བ་ཤེས་གང་དང་། །བདེ་ཆགས་ཀྱིས་ནི་སྐྱོ་བའི་ཡིད། །སྐྱེ་བོ་དེ་ནི་མཐོ་རིས་འགྲོ། །བུད་མེད་གཞན་ལ་མ་བཞིན་དང་། །ཕ་བཞིན་དུ་ཡང་
ལུས་ཅན་ཀུན། །འཇིག་རྟེན་མཚུངས་པར་ལྟ་བྱེད་གང་། །མཐོ་རིས་འགྲོ་བའི་སྐྱེ་བོ་དེ། །རྟག་ཏུ་ཕྲ་མ་སྤོང་བྱེད་ཅིང་། །སེམས་ཅན་རྣམས་ལའང་རྟག་ཏུ་དགའ། །ཁྲོ་མེད་དྲང་པོར་གྱུར་པའི་ཡིད། །སྐྱེ་བོ་དེ་ནི་མཐོ་རིས་འགྲོ། །ཐམས་ཅད་ཤིང་བཞིན་རྡོ་བཞིན་དུ། །གཞན་

གྱི་སེམས་ལ་སྤྱོད་པ་པོ། །རང་གི་སེམས་ཀྱི་ཆོག་ཤེས་པ། །སྐྱེ་བོ་དེ་ནི་མཐོ་རིས་འགྲོ། །ཉིན་དང་མཚན་དུ་གང་དག་གི། །སྙིང་ལ་ལེ་ལོ་མི་འཇུག་པ། །རྟག་ཏུ་བརྩོན་པས་རྣམ་པར་རྒྱུ། །གང་དེ་སྐྱེ་བོ་མཐོ་རིས་འགྲོ། །རྒོད་དང་རྨུགས་དང་གཉིད་དང་ནི། །
ལེ་ལོ་ཡང་ནི་ཁྱད་པར་དུ། །སྤོང་བར་བྱེད་པ་རྟག་ཏུ་བཟང་། །སྐྱེ་བོ་དེ་ནི་མཐོ་རིས་འགྲོ། །སྒོ་ལྔ་ལས་ནི་ཚུལ་ཁྲིམས་འཆལ། །གཅིག་ཏུ་ཡོངས་སུ་མཐོལ་བ་དང་། །རྟག་ཏུ་སྤོང་བྱེད་བློ་ལྡན་པ། །སྐྱེ་བོ་དེ་ནི་མཐོ་རིས་འགྲོ། །ཉེ་བར་ལེན་པ་རྣམ་བཞི་ཤེས། །བདེན་པ་ཡང་ནི་དེ་བཞིན་
དེ། །ཆོ་ག་ཤེས་པས་ལྟ་བའི་ཡང་། །སྐྱེ་བོ་དེ་ནི་མཐོ་རིས་འགྲོ། །སྡུག་བསྔལ་སྡུག་བསྔལ་རྣམ་སྨིན་དང་། །གང་ཡང་སྡུག་བསྔལ་འགོག་པ་དང་། །རྟག་ཏུ་དེ་ཉིད་ལ་ལྟ་གང་། །སྐྱེ་བོ་དེ་ནི་མཐོ་རིས་འགྲོ། །རྟག་ཏུ་སྡུག་བསྔལ་ལ་ཞུགས་པ། །ཆོས་ནི་རྣམ་པར་མི་འདོར་གང་། །
ཆོས་ཀྱི་བློ་ནི་ཞི་བ་དང་། །སྐྱེ་བོ་དེ་ནི་མཐོ་རིས་འགྲོ། །རས་ཀྱང་དཀར་དང་ཤིན་ཏུ་ཕྲ། །དེ་བཞིན་དུ་ཡང་ཕྱག་དར་ཁྲོད། །གཏུམ་མིན་ཡིད་ནི་ཞི་བ་དང་། །རྟག་ཏུ་བསམ་གཏན་གྱིས་གནས་པ། །རྟག་ཏུ་ངེས་འབྱུང་ལ་དགའ་བའི། །སྐྱེ་བོ་དེ་ནི་མཐོ་རིས་འགྲོ། །ཞིམ་
མམ་གལ་ཏེ་མི་ཞིམ་པ། །ཇི་ལྟར་འདོད་པའི་ཚུལ་གྱིས་འོངས། །ཆོག་ཤེས་དང་ནི་ཁྲོ་མིན་པའི། །སྐྱེ་བོ་དེ་ནི་མཐོ་རིས་འགྲོ། །གོས་གང་འཇམ་ཞིང་དཀར་བ་དང་། །ཕྱག་དར་ཁྲོད་ཀྱང་དེ་བཞིན་ཏེ། །ལེགས་སྡོམ་བྱེད་པ་ཆོག་ཤེས་མཆོག །སྐྱེ་བོ་དེ་ནི་མཐོ་རིས་
འགྲོ། །མལ་སྟན་གཞི་དང་དེ་བཞིན་ས། །ཁང་བཟངས་རྩེ་འམ་དེ་བཞིན་གཞན། །དགའ་བའམ་ཁྲོ་བ་མེད་པ་ཡི། །སྐྱེ་བོ་དེ་ནི་མཐོ་རིས་འགྲོ། །གཟུགས་གང་མིག་གི་ཡུལ་དུ་ནི། །གཏོགས་དང་གཞན་དུ་གྱུར་པ་ཡང་། །དེ་ཁོ་ནར་ནི་རབ་ལྟ་གང་། །སྐྱེ་བོ་དེ་ནི་
མཐོ་རིས་འགྲོ། །སྙན་པའམ་ནི་མི་སྙན་པ། །གང་གིས་ཐོས་ནས་འཁྲུལ་བྲལ་བ། །མིག་དང་བློ་དག་ལྡན་པ་ཡི། །སྐྱེ་བོ་དེ་ནི་མཐོ་རིས་འགྲོ། །དབང་པོ་དྲུག་པོ་ཐམས་ཅད་དང་། །ཡུལ་རྣམས་ཀྱང་ནི་དེ་བཞིན་དུ། །སྤོང་བར་བྱེད་ཅིང་མི་དགའ་བ། །སྐྱེ་བོ་དེ་ནི་མཐོ་རིས་

འགྲོ། །བྱ་བ་འདི་རྣམས་དོན་ཆེན་དང་། །རྟག་ཏུ་བདེ་བ་བྱེད་པ་ཡང་། །དེ་དག་ཐམས་ཅད་ཆོ་ག་བཞིན། །བྱེད་པའི་སྐྱེ་དེ་མཐོ་རིས་འགྲོ། །ཇི་ལྟར་ལས་རྣམས་བྱས་པ་ཀུན། །དེ་ཉིད་དུ་ནི་བྱེད་མེད་པར། །ལྟ་བྱེད་དྲི་བྲལ་བཟང་པོ་ཡི། །སྐྱེ་བོ་དེ་ནི་མཐོ་རིས་འགྲོ། །ལས་རྣམས་
ཀྱི་ཡང་རྣམ་སྨིན་དེས། །ལས་རྣམས་སྨིན་གྱིས་བྱས་པའི་ཡང་། །སྡུག་བསྔལ་རྟག་ཏུ་རྣམ་པར་འབྱེད། །སྐྱེ་དེ་མཐོ་རིས་འགྲོ་བའོ། །དེ་ལྟར་ལྷ་དེ་དེའི་མགྲིན་པར་བྱས་པ་དེ་ཡང་དག་པར་མཐོང་ནས་མཆོག་ཏུ་སྐྲག་པའི་ཡིད་ཀྱིས་ཚིགས་སུ་བཅད་པ་སྨྲས་ཏེ། ཤིན་ཏུ་བརྗོད་ནས་
ཀྱང་ཆུ་ཀླུང་གི་འགྲམ་དུ་ལྷ་དེ་དག་ཉིད་དང་ལྷན་ཅིག་ཏུ་རང་བཞིན་ཡིན་པས་སླར་ཡང་བག་མེད་པས་རྒྱུ་བར་བྱེད་དོ། །གལ་ཏེ་གང་དག་དེའི་མགྲིན་པ་ན་བྱས་པ་ཡོད་པར་གྱུར་དུ་ཟིན་ཡང་རྐྱེན་མེད་པར་མི་མཐོང་སྟེ། གང་གིས་རྟེན་ཅིང་འབྲེལ་པར་འབྱུང་བའི་དངོས་པོའི་རྐྱེན་མེད་པར་མི་
འགྱུར་ལ། ལྷ་གང་གི་ཡང་རང་བཞིན་ཡིན་པས་སླར་ཡང་བག་མེད་པར་སྤྱོད་པས་གང་ན་ཆུ་ཀླུང་འོད་འབྱུང་གི་རི་ལ་རིན་པོ་ཆེ་འོད་འབྱིན་ཞེས་བྱ་བའི་རི་དེ་ཡོད་པ་དེར་འགྲོ་སྟེ། རྒྱན་དང་ཆ་བྱད་དུ་མས་རབ་ཏུ་དགའ་བའི་ཡིད་ཅན་ཡུལ་ད་ལྟར་བ་ལ་ཆགས་པས་ཀུན་ནས་ཁྲིད་པར་གྱུར་པས་དུས་
ཆོད་པར་གྱུར་པའི་འཇིགས་པ་ཡང་མ་རྩིས་པ་དང་། དབང་པོ་འགྱུར་ལྡོག་ཅན་རྣམས་ཀྱིས་ཀྱང་དྲངས་པ་དང་མཐོ་རིས་པ་དེ་རྣམས་མཆོག་ཏུ་ཡང་བདེ་བའི་ཕྱིར་ན་ཕྱིར་ཞིང་ཡང་གར་བྱེད་པར་གྱུར། རབ་ཏུ་རྒོད་པར་གྱུར་པས་རྣམ་པར་རྒྱུ་བར་བྱེད་པས་ཆུ་ཀླུང་གི་འགྲམ་ན་རྣམ་པ་དུ་མར་དགའ་བའི་
མེ་ཏོག་གི་ཚོགས་རྣམ་པ་དུ་མ་ཕུན་སུམ་ཚོགས་པ་འཁྲི་ཤིང་ཤིན་ཏུ་འགྱུས་པས་ཁེབས་པའི་ངོས་ན་རྟག་ཏུ་ཡང་རབ་ཏུ་དགའ་བའི་བྱའི་ཚོགས་ཀྱིས་འཁྲིགས་པར་རོ། །གཞན་ཡང་ཁྱད་པར་ལྟ་བར་འདོད་པས་རིན་པོ་ཆེ་འོད་འབྱིན་གྱི་རི་ལ་རིན་པོ་ཆེའི་རྣམ་པ་བརྒྱ་སྟོང་དུ་མ་ཆ་ཤས་རྣམ་པར་བཀྲ་
བ་ཡོད་པར་འགྲོའོ། །ལྟ་བ་ལ་མཚོར་རྔམས་པས་དེས་དེ་རིང་བ་ཉིད་ནས་མཐོང་སྟེ། འོད་འབར་བ་ནམ་མཁའ་བརྟོལ་བ་བཞིན་དུ་གནས་པ་ལྔར་མ་མཐོང་བ་དེ་ཡིད་ལ་སྨོན་པས་བྱས་པ་བཞིན་དུ་སྐྱོན་གཞན་མེད་པ་དེའི་འོད་དཔག་ཚད་སྟོང་ཕྲག་བཅུར་འགྱུར་ཏེ། སྔོན་པོ་དང་སེར་པོ་དང་དམར་

པོ་དང་ལྗང་ཁུའི་ཁ་དོག་གོ། །གཞན་ཡང་རྣམ་པར་འདྲེས་པའི་འོད་རྣམས་སོ། །གཞན་ཡང་ངོས་དེ་ན་རིན་པོ་ཆེའི་འོད་ཀྱི་ཕྲེང་བ་ཅན་གྱི་རི་གཞན་གང་དག་ཡོད་པ་དེ་དག་རྣམས་ཀྱང་བརྟོལ་ཞིང་རིན་པོ་ཆེ་འོད་འབྱིན་གྱི་རི་དེའི་འོད་དེ་དག་གིས་རི་དེ་དག་རྣམས་ཐམས་ཅད་ཀྱི་འོད་
ངེས་པར་བཅོམ་ནས་གནས་སོ། །དཔེར་ན་རིའི་རྒྱལ་པོ་རི་རབ་ལྷུན་པོའི་འོད་ཀྱིས་ནི་རི་རྣམས་ཐམས་ཅད་ཀྱི་འོད་ཟིལ་གྱིས་གནོན་ནོ། །དེ་བཞིན་དུ་རིན་པོ་ཆེ་འོད་འབྱིན་དེའི་འོད་མཆོག་ཏུ་རྒྱ་ཆེ་བ་དགའ་བར་གྱུར་པ་མཆོག་ཏུ་རངས་པ་ཡིད་འཕྲོག་པ་ཡིན་ནོ། །དེ་བཞིན་དུ་རྣ་བའི་དབང་པོ་གཅིག་
ཚིམ་པར་བྱེད་ལ་རིན་པོ་ཆེ་དེས་རྣ་བའི་དབང་པོ་གཉིས་པ་ཡང་སྒྲ་རྣམ་པ་དུ་མས་ལེགས་པ་བསྒོ་བར་བྱེད་ལ། རིན་པོ་ཆེ་འོད་འབྱིན་གྱི་རི་དེ་ཉིད་ན་འདི་ལྟ་སྟེ། ཐོས་ན་ཡིད་འཕྲོག་པའི་སྒྲ་དང་ལྡན་པའི་ཆུ་ཀླུང་འབབ་པས་ཀྱང་ཀུན་ཏུ་སྒྲ་སྒྲོགས་པས་མཆོག་ཏུ་ཐོས་ན་ཡིད་འཕྲོག་པ་དང་། དེ་དག་
ན་རྣམ་པ་དུ་མའི་བྱ་རྣམས་ནི་རིན་པོ་ཆེ་སྣ་བདུན་གྱིས་རྣམ་པར་བཀྲ་བའི་སྒྲོ་དང་ལྡན་པ་ཁྱད་པར་མེད་པའི་རླུང་གིས་རབ་ཏུ་བསྐྱོད་པའི་དྲིལ་བུ་གཡེར་ཀའི་རང་བཞིན་གྱི་ལྗོན་ཤིང་རྣམས་ཀྱི་སྒྲ་གང་ཡིན་པས་སོ། །དེ་དག་གི་དཔེ་བྱ་བར་མི་ནུས་ཏེ་ཡིད་རྣམས་དང་འདྲ་བ་ཡིན་པའི་ཕྱིར་རོ། །རིན་པོ་ཆེ་
འོད་འབྱིན་གྱི་རི་ཆེན་པོ་འདི་ལས་དེ་བཞིན་དུ་ལྷ་དེ་དག་རྣམས་ཀྱི་རྣ་བའི་དབང་པོ་ལ་ཡང་ཚིམ་པར་བྱེད་དེ་གཞན་ཡང་ལྷ་དེ་དག་གི་དབང་པོ་གསུམ་པ་རིང་བ་ཉིད་ནས་རི་ཆེན་པོས་ཚིམ་པར་བྱེད་པ་ཡང་འདི་ལྟ་སྟེ། སྣ་ལ་དྲི་དུ་མ་རྣམས་ཀྱིས་མེ་ཏོག་གི་ཚོགས་མང་པོ་ལས་འབྱུང་བར་འགྱུར་བ་ལ་ཆུ་ཀླུང་
དུ་མ་ལས་ཉེ་བར་སྐྱེས་པའི་མེ་ཏོག་གིས་ལེགས་པར་བསྐྱེད་པའི་དྲི་དེ་དག་གིས་ལྷ་རྣམས་ཚིམ་པར་བྱེད་དོ། །གཞན་ཡང་རི་ཆེན་པོ་དེས་ལྷ་དེ་དག་རྣམས་ཀྱི་དབང་པོ་བཞི་པ་ཀུན་ནས་ཚིམ་པར་བྱེད་དེ་ལྕེ་ཡང་རོ་དང་། མདོག་དང་གཟུགས་དང་། དྲི་རྣམས་མཆོག་ཏུ་གྱུར་པའི་རྣམ་པ་དུ་མའི་
འབྲས་བུ་རྣམས་ཀྱིས་ཀྱང་ཀུན་ཏུ་ཚིམ་པར་བྱེད་དོ། །ལུས་ལ་ཡང་རེག་ན་དགའ་བར་འགྱུར་བའི་གོས་རྒྱུ་སྤུན་མེད་པ་དུ་མ་རྣམས་དང་། རེག་ན་བདེ་བའི་རླུང་རྣམས་ཀྱིས་ཀྱང་ཚིམ་པར་བྱེད་དོ། །རི་ཆེན་པོ་དེ་གང་ལ་ལྷ་དེ་དག་རྣམས་ཀྱི་དབང་པོ་ལྔ་པོ་རྣམས་རང་གི་ཡུལ་བདེ་བ་ཉམས་སུ་མྱོང་

བར་བྱེད་དོ། །དེས་ཚིམ་པར་བྱེད་པ་པོའི་ངོ་བོས་ཡིད་ཀྱང་མཆོག་ཏུ་ཚིམ་པར་འགྱུར་རོ། །དེ་ལྟར་རིན་པོ་ཆེ་འོད་འབྱིན་གྱི་རི་འདིས་དབང་པོ་ལྔའི་བདེ་བ་རབ་ཏུ་སྦྱིན་པས་ལྷ་དེ་རྣམས་ཤིན་ཏུ་བདེ་བ་ལ་གནས་སོ། །དེ་ནས་ལྷ་དེ་རྣམས་ཀྱིས་རིན་པོ་ཆེ་འོད་འབྱིན་གྱི་རི་དེར་སླེབ་ནས་རིན་པོ་ཆེ་དུ་མ་
འབར་བའི་ཕྲེང་བ་རྣམ་པ་དུ་མར་ཡང་འོད་འབར་བ་ཉེ་བར་འབྱིན་ནོ། །དེ་ནས་ལྷ་དེ་རིན་པོ་ཆེ་དེ་ལ་ཆུ་ཀླུང་སྟོང་ཕྲག་རྣམ་པ་དུ་མ་དང་འབབ་ཆུ་དང་རྫིང་བུ་དང་པད་མའི་རྫིང་བརྒྱ་སྟོང་གིས་ཉེ་བར་མཛེས་པ་གསེར་དང་བཻ་ཌཱུརྱ་དང་། ཨིན་དྲ་ནཱི་ལ་དང་དངུལ་དང་འདབ་མ་རྣམ་པར་བཀྲ་
བ་འདྲེན་མ་སྟོང་ཕྲག་བརྒྱས་མཛེས་པར་མངོན་པར་མཐོང་ནས་ལྷ་དེ་རང་བཞིན་ཉིད་ཀྱིས་བདེ་བར་རྒྱུ་བ་བརྒྱ་འགྱུར་ཐོབ་ནས་རི་དེ་ལ་ཉེ་བར་ལོངས་སྤྱོད་དེ། རབ་ཏུ་དགའ་བའི་འཁོར་དང་བཅས་ནས་ཕན་ཚུན་དུ་གནོད་པ་མེད་པར་གཏད་པས་ཚིམ་པར་བྱེད་པའི་ཡིད་ཅན་རྣམས་དེ་དག་དེ་
བཞིན་དུ་ཆེས་རབ་ཏུ་དགའ་བའི་ཡིད་ཀྱིས་རིན་པོ་ཆེ་འོད་འབྱིན་གྱི་རི་དེའི་ཁྱད་པར་ལྟ་བར་འདོད་པས་ཕུག་དང་རི་ཁྲོད་ལ་དཔྱོད་དེ་པད་མའི་རྫིང་བུ་ནས་པད་མའི་རྫིང་བུ། རྩེ་མོ་ནས་རྩེ་མོ། ཆུ་ཀླུང་གི་ངོས་ནས་ཆུ་ཀླུང་གི་ངོས། གན