Kinh tạng Tây Tạng (Kangyur Đại Học) — 070_མདོ་སྡེ།_ལ

་མི་བྱེད་དོ། །དེ་ལྟར་བདག་ལ་ཕན་པ་བྱེད་དོ། །ཇི་ལྟར་ཡང་གཞན་ལ་ཕན་པ་བྱེད་པ་ཡིན་ན། སྲོག་ཆགས་སུ་གྱུར་པ་གང་

དག་ཡང་ཆོས་པ་མ་ཡིན་ཞིང་ཆོས་ཀྱི་རྗེས་སུ་ཡོངས་སུ་འཇུག་པ་ཡང་མ་ཡིན་པ། དེ་དག་རྣམས་འདིས་བདེ་ལེགས་ལ་རབ་ཏུ་སྦྱོར་བར་བྱེད་དོ། །དེ་ལྟར་ཡང་དག་པར་སྐྱེ་དགུ་སྐྱོང་བར་བྱེད་པ་ཉིད་དུ་འགྱུར་རོ། །བསྐྱངས་པར་གྱུར་པ་ལས་ཀྱང་ཆོས་དང་དོན་དང་སྙན་པ་རྣམས་
དང་ཡང་དག་པར་ལྡན་པར་འགྱུར་རོ། །རེ་ཞིག་དང་པོར་ཆོས་ཀྱིས་ནི་མཆོག་ཏུ་ངེས་པར་ལེགས་པ་ལ་ཡང་དག་པར་སྦྱོར་བར་གྱུར་པ་ཡིན་ན་ཇི་ལྟར་ན་ཆོས་མ་ཡིན་པ་དང་ཀུན་ནས་ལྡན་པར་གྱུར། རྒྱལ་པོ་དོན་དང་ཡང་དག་པར་ལྡན་པར་འགྱུར་ཏེ། ཇི་ལྟ་བུའི་དོན་གྱིས་ཞེ་ན།
འདི་ལྟ་སྟེ། གང་གི་ཚེ་འབྲས་བུ་ངེས་པར་བྱས་ནས་ཟ་བའི་རྒྱལ་པོར་གྱུར་པ་ན་དྲུག་ཆ་ལེན་པར་བྱེད་པ་ཡིན་ལ་དེའི་ཚེ་སྐྱེ་དགུ་རྣམས་ཕུན་སུམ་ཚོགས་པར་བྱེད་པར་འགྱུར་རོ། །ལེགས་པར་ཡོངས་སུ་བསྐྱངས་པས་ཏེ་སྐྱེ་དགུ་ཕུན་སུམ་ཚོགས་པ་དེ་ཡང་རྒྱལ་པོའི་སེམས་དགའ་བའི་
དབང་གིས་རྗེས་སུ་ཆགས་པར་གྱུར་ནས་སྒྲོལ་བར་བྱེད་པ་ཡིན་ནོ། །དེ་ལས་ཡོན་ཏན་གཉིས་པ་དང་ཡང་དག་པར་ལྡན་པ་ཕུན་སུམ་ཚོགས་པར་འགྱུར་བ་ནི་རྒྱལ་པོ་སྙན་གྲགས་དང་ཡང་དག་པར་ལྡན་པར་འགྱུར་རོ། །རྒྱལ་པོས་ཡང་དག་པར་སྐྱེ་དགུ་བསྐྱངས་པར་གྱུར་པ་
ན་གྲོང་ཁྱེར་པ་གང་དག་རྗེས་སུ་ཆགས་པར་གྱུར་པ་དེས་ཕྱོགས་ཐམས་ཅད་དུ་སྙན་པ་སྒྲོགས་པར་བྱེད་པར་འགྱུར་རོ། །དེ་ལྟར་ཆོས་དང་དོན་དང་སྙན་པ་རྣམས་དང་ཡང་ལེགས་པར་ལྡན་པར་འགྱུར་རོ། །རྒྱལ་པོ་ལེགས་པར་སྐྱེ་དགུ་རྣམས་བསྐྱངས་པར་གྱུར་པ་ལས་
ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་བདག་པོར་འགྱུར་རོ། །དེས་སྔོན་བྱས་པའི་རྒྱུ་ལས་ཀྱི་རྣམ་པར་སྨིན་པ་ལས་ཡིན་ནོ། །ཡང་ཆོས་གཞན་རྒྱལ་པོའམ་གཞན་གྱིས་ཀྱང་རབ་ཏུ་བརྩོན་པ་མང་པོ་རྣམས་ཀྱིས་བྱ་བར་བྱ་
སྟེ། འདི་ཡང་གང་ཞེ་ན། འདི་ལྟ་སྟེ་དགེ་བ་བཅུའི་ལས་ཀྱི་ལམ་རྣམས་བྱ་བའོ། །དེ་མ་ལུས་པ་རྣམས་ཀྱིས་ཀྱང་མཆོག་ཏུ་བདེ་བའི་རྣམ་པར་སྨིན་པ་དང་ལྡན་པར་འགྱུར་རོ། །དེ་ལ་དགེ་བའི་ལས་ཀྱི་ལམ་དེ་ཉིད་ཀྱང་རྣམ་པ་གསུམ་སྟེ། ལུས་ཀྱི་དང་ངག་གི་དང་ཡིད་ཀྱིའོ། །ལུས་

ཀྱི་རྣམས་ནི་སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་གཡེམ་པ་སྤོང་བའོ། །ངག་གི་རྣམས་ནི་རྫུན་དང་ཕྲ་མ་དང་ཚིག་རྩུབ་པོ་དང་འབྲེལ་བ་མེད་པར་བརྗོད་པ་སྤོང་བའོ། །ཡིད་ཀྱི་རྣམས་ནི་བརྣབ་སེམས་དང་གནོད་སེམས་དང་ལོག་པར་ལྟ་བ་རྣམས་
སོ། །དེ་ལ་དེ་དག་ནི་ཇི་ལྟར་ལས་ཀྱི་ལམ་སྣ་ཚོགས་པ་རྣམས་སུ་གྱུར་པའི་མི་དགེ་བ་བཅུ་པོ་དེ་དག་རྣམས་ནི་མི་དགེ་བའི་ལས་ཀྱི་ལམ་ཞེས་བྱའོ། །ཤེས་རབ་ཇི་ལྟར་ཕྱིན་ཅི་མ་ལོག་པར་གྱུར་པའི་ཡང་དག་པའི་དགེ་བའི་ལམ་ཞེས་བྱ་བའི་མིང་ནི་ཤེས་རབ་དེ་ལ་བརྗོད་པ་ཡིན་ནོ། །ཤེས་
རབ་དེ་དག་གང་ཡིན་པ་དེ་དག་གིས་ཀྱང་ཇི་ལྟ་བ་བཞིན་དུ་མྱ་ངན་ལས་འདས་པའི་མཐར་ཐུག་པར་འགྱུར་བ་ཡིན་ནོ། །མི་དང་ལྷ་རྣམས་འབྱུང་བར་འགྱུར་བ་གང་དག་ཇི་ལྟར་འདོད་པ་བཞིན་འགྱུར་ཏེ། དེ་དག་རྒྱལ་པོ་འདི་རང་ཉིད་ཀྱིས་འཛིན་པར་ནུས་པ་དང་། གྲོང་ཁྱེར་བ་
རྣམས་ལ་ཡང་རྒྱལ་པོ་དེས་ཕ་དང་མ་དང་འདྲ་བར་འགྱུར་ཞིང་མྱ་ངན་ལས་འདས་པ་རབ་ཏུ་འཐོབ་པར་བྱེད་པ་དང་མཐོ་རིས་རབ་ཏུ་འཐོབ་པར་བྱེད་པ་ཡིན་ནོ། །དེའི་བསམ་པ་རྣམས་ཐམས་ཅད་མངོན་པར་འགྲུབ་པར་འགྱུར་རོ། །ལྷ་རྣམས་ཀྱིས་ཀྱང་འདི་དག་ལ་སྲུང་བར་
འགྱུར་རོ། །འདི་ལ་མཚོན་ཆ་དང་མུ་གེས་བྱས་པའི་འཇིགས་པ་རྣམས་དང་ཡུལ་འཇིག་པར་འགྱུར་བ་ནམ་ཡང་འབྱུང་བར་མི་འགྱུར་རོ། །འདིའི་ཡུལ་དུ་དུས་སུ་ལོ་ཏོག་རྣམས་ཕུན་སུམ་ཚོགས་པར་འགྱུར་རོ། །འདིའི་ཡུལ་དུ་ཡང་དུས་སུ་ཟླ་བ་དང་ཉི་མ་དག་རབ་ཏུ་འོད་འབྱིན་
པར་བྱེད་པ་དང་། དགོས་པ་ཐམས་ཅད་ཕུན་སུམ་ཚོགས་པར་འགྱུར་བ་དང་ཡུལ་ལྗོངས་རྣམས་ཕུན་སུམ་ཚོགས་པར་ཡང་འགྱུར་རོ། །རྒྱལ་པོ་དེ་ལེགས་པར་སྐྱེ་དགུ་རྣམས་བསྐྱངས་པར་གྱུར་ནས་དུས་རྣམས་ཡོངས་སུ་སྨིན་པར་གྱུར་ཏེ། མི་རྟག་པའི་རང་བཞིན་ཡིན་
པས་གལ་ཏེ་རྣམ་པར་བྲལ་བར་གྱུར་ན་གང་གི་ཚེ་ལྷ་རྣམས་ཀྱི་ནང་དུ་སྐྱེ་བར་འགྱུར་བ་དེའི་ཚེ་དགེ་བའི་ལས་ཀྱི་རྣམ་པར་སྨིན་པ་གང་གིས་བདེ་བ་གང་དག་ལ་ཉེ་བར་ལོངས་སྤྱོད་པར་འགྱུར་བ་ཡིན་ན། དེ་ལ་མདོར་བསྡུ་ན་འཐབ་བྲལ་གྱི་ལྷར་སྐྱེ་བར་འགྱུར་བ་རྣམས་ལས། སྲོག་

གཅོད་པ་རྣམ་པར་སྤངས་པས་ནི་དམན་པ་དང་བར་མ་དང་ཁྱད་པར་དུ་འཕགས་པའི་ལྷ་རྣམས་ཚེ་རིང་བར་འགྱུར་རོ། །གཞན་ཡང་དེ་ཁོ་ན་བཞིན་དུ་ལྷའི་རིས་དྲུག་ཏུ་མ་བྱིན་པར་ལེན་པ་རྣམ་པར་སྤངས་པས་ནི་ནོར་བརྟན་པར་འགྱུར་ཏེ། རིན་པོ་ཆེ་བདུན་གྱི་རང་བཞིན་ཕུན་སུམ་
ཚོགས་པར་འགྱུར་བའི་ནགས་དང་ཉེ་བའི་ནགས་དང་རིའི་རྩེ་མོ་སྣ་ཚོགས་པར་དགའ་བར་གྱུར་པ་རྣམས་ལའོ། །འདོད་པས་ལོག་པར་གཡེམ་པ་རྣམ་པར་སྤངས་པས་ནི་ཇི་སྲིད་དུ་འདི་ཤི་འཕོས་པར་མ་གྱུར་གྱི་བར་གྱི་དུས་དེ་སྲིད་དུ་ལྷ་མོ་རྣམས་ལྷའི་བུ་གཞན་དག་རྣམས་ལ་འཕོ་བར་
མི་འགྱུར་རོ། །གསོན་བཞིན་དུ་ཡང་ལྷའི་བུ་གཞན་དག་རྣམས་ལ་ནམ་ཡང་ཀུན་ཏུ་འཕོ་བར་མི་འགྱུར་ཞིང་ཁྱུད་འཕྱང་ཡང་མི་བྱེད་ཀྱི་དེ་ཉིད་ཁོ་ན་ལ་གཟུགས་བཟང་བ་ཐམས་ཅད་ཀྱིས་གཟི་བརྗིད་ཐམས་ཅད་ཀྱིས་ཀྱང་ལྟ་བར་བྱེད་དོ། །གང་ཡང་འདོད་པ་ལོག་པར་གཡེམ་
པ་ལེགས་པར་བསྲུངས་པ་མ་ཡིན་པ་དེ་དག་རྣམས་ཀྱི་ལྷ་མོ་རྣམས་ནི་གཞན་དག་ལ་འཕོ་བར་འགྱུར་ཏེ། སོ་སོ་དང་སོ་སོར་ལས་ཀྱི་རྣམ་པར་སྨིན་པ་རྣམས་རབ་ཏུ་སྟེར་བར་བྱེད་པ་ཡིན་ནོ། །དེ་ལྟར་ལུས་ཀྱིས་ལེགས་པར་སྤྱོད་པ་རྣམས་བསྲུངས་ཤིང་བསྟེན་ལ་
བསྒོམས་ལ་ལན་མང་དུ་བྱས་པས་ནི་ལྷ་རྣམས་ཀྱི་ནང་དུ་སྐྱེ་བར་འགྱུར་བ་ཡིན་ནོ། །རྣམ་པར་སྨིན་པ་བདེ་བ་དང་ལྡན་པ་གཉིས་པར་གྱུར་པ་ངག་གི་རྣམ་པ་བཞིས་བསྟེན་ཅིང་བསྒོམས་ལ་ལན་མང་དུ་བྱས་པས་ལྷ་རྣམས་ཀྱི་ནང་དུ་སྐྱེའོ། །ལས་གང་གི་རྣམ་པར་སྨིན་
པས་ལྷ་རྣམས་ཀྱི་ནང་དུ་སྐྱེས་ནས་བདེ་བ་གང་ལ་ལོངས་སྤྱོད་པ་ཡིན་ན། ངག་ལེགས་པར་བསྡམས་པ་རྣམས་ཀྱང་བཞིའོ། །དེ་ལ་རྫུན་རྣམ་པར་སྤངས་པས་ནི་གསལ་ཞིང་སྙན་ལ་ཟུར་ཐོན་པའི་ངག་ཏུ་འགྱུར་རོ། །རྟག་ཏུ་ཡང་ལེགས་པར་སྦྱར་བའི་མཆོག་གི་སྨྲ་བ་པོར་
འགྱུར་ཏེ། གང་དང་གང་ཉིད་སྨྲ་བར་བྱེད་པ་ན་བདེ་བས་དེ་དང་དེ་ཁོ་ན་འདིས་ལྷན་ཅིག་ཏུ་རྗོད་པར་བྱེད་པ་ནི་ལྷ་འདི་དག་ལ་ཉེ་བར་གནས་པ་ཡིན་ཏེ། དེ་དག་གིས་རྫུན་ལེགས་པར་སྤངས་པ་ཡིན་པའི་ཕྱིར་རོ། །ཕྲ་མ་རྣམ་པར་སྤངས་པས་ནི་ཡུལ་ལྗོངས་རྣམས་འཇིག་པར་མི་འགྱུར་

རོ། །རྟག་ཏུ་ཡང་ཚིག་རྩུབ་པོ་དེ་དང་དེ་ཉིད་རྣམ་པར་སྤངས་པས་ནི་རྟག་ཏུ་སྙན་པའི་གླུ་དང་གར་དང་དགོད་པ་དང་འགྱིང་བག་དག་གི་སྒྲ་མཆོག་ཏུ་རྣ་བ་དང་ཡིད་འཕྲོག་པར་བྱེད་པ་རྣམས་ཐོས་སོ། །འབྲེལ་བ་མེད་པར་བརྗོད་པ་རྣམ་པར་སྤངས་པས་ནི་རྟག་ཏུ་ལྕེ་གཞལ་ཞིང་
ལྗགས་ཕྱིན་པར་འགྱུར་རོ། །ལྷ་རྣམས་ཐམས་ཅད་ཀྱི་ཡིད་དུ་འོང་བར་འགྱུར་རོ། །དེ་ལྟར་ངག་གི་ལེགས་པར་སྤྱད་པའི་འབྲས་བུ་རྣམས་ལ་ལོངས་སྤྱོད་པར་བྱེད་དོ། །ལྷ་རྣམས་སུ་ལྷ་རྣམས་ཀྱི་ཡིད་ཀྱི་རྣམས་ཀྱང་གང་དག་གིས་འབྲས་བུ་རྣམས་གང་དག་ལ་ལོངས་སྤྱོད་པར་བྱེད་ན།
བརྣབ་སེམས་རྣམ་པར་སྤངས་པས་ནི་འདིའི་འདོད་པ་རྣམས་ཐམས་ཅད་སེམས་བསྐྱེད་པ་ཙམ་ཉིད་ན་ཉེ་བར་འདུ་བར་འགྱུར་རོ། །དེས་ཐོབ་པ་རྣམས་ཀྱང་ངེས་པར་ཉམས་པར་མི་འགྱུར་རོ། །ལྷ་གཞན་འགའ་ཞིག་གིས་ཀྱང་དང་དུ་ལེན་པར་བྱེད་པར་འདོད་པ་ཡང་མ་ཡིན་ཏེ། དེས་
ན་བརྣབ་སེམས་རྣམ་པར་སྤངས་པ་དེ་དག་རྣམས་ཀྱི་དེ་ལྟར་འགྱུར་བ་ཡིན་གྱི་རྣམ་པར་སྨིན་པ་འདི་གཞན་རྣམས་ཀྱི་ནི་མ་ཡིན་ནོ། །གནོད་སེམས་རྣམ་པར་སྤངས་པ་རྣམས་ཀྱི་ཡང་གནོད་སེམས་སྤངས་པས་ནི་ལྷའི་སྐྱེ་བོ་རྣམས་ཐམས་ཅད་དང་འཐུན་པར་འགྱུར་རོ། །གཟུགས་མཆོག་
དང་ཡང་ལྡན་པར་འགྱུར་རོ། །ལོག་པར་ལྟ་བ་རྣམ་པར་སྤངས་པས་ནི་འདི་ལ་ཅུང་ཟད་ཅིག་ཀྱང་གཞན་མུ་སྟེགས་པ་རྣམས་ཀྱིས་རྩོད་པ་དོན་དུ་གཉེར་བར་མི་བྱེད་དོ། །ཇི་ལྟ་བ་ཉིད་དུ་རབ་ཏུ་སེམས་པ་དེ་ཁོ་ན་བཞིན་དུ་ཕུན་སུམ་ཚོགས་པར་འགྱུར་རོ། །གཞན་དུ་འགྱུར་བ་ནི་མེད་
དོ། །འདོད་བཞིན་དུ་ཡང་འདོད་པ་རྣམས་ཀྱིས་སྟོང་པར་ནི་ནམ་ཡང་ཅུང་ཟད་ཅིག་ཀྱང་མི་འགྱུར་རོ། །དེ་ལ་མདོར་བསྡུས་ནས་དེ་ལྟར་དགེ་བ་བཅུའི་ལས་ཀྱི་ལམ་རྣམས་ཀྱིས་རྣམ་པར་སྨིན་པ་རྣམས་སོ་སོར་བཤད་པ་ཡིན་ནོ། །སྦྱིན་པའི་ཁྱད་པར་གྱིས་ནི་ལོངས་སྤྱོད་ཀྱི་ཁྱད་
པར་རྣམས་འབྱུང་བར་འགྱུར་རོ། །ཤེས་རབ་ཀྱི་ཁྱད་པར་གྱིས་ནི་ཐམས་ཅད་ཀྱང་ཆེས་ཁྱད་པར་དུ་འཕགས་པར་འགྱུར་ཏེ། གང་གི་ཕྱིར་བདེ་བ་རྣམས་ཐམས་ཅད་ནི་ཤེས་རབ་ཀྱི་རྩ་བ་ལས་ཡིན་ནོ། །བདེ་བ་མ་ཡིན་པ་རྣམས་ནི་སྲིད་པའི་རྨོངས་པ་སྔོན་དུ་འགྲོ་བ་ཅན་ཡིན་

ནོ། །སེམས་ཀྱི་དབང་གིས་དང་དུས་ཀྱི་དབང་གིས་དང་དངོས་པོའི་དབང་གིས་དང་ལྷག་པར་མོས་པའི་དབང་གིས་ཀྱང་རུང་སྟེ། དགེ་བའི་ལས་ཀྱི་ལམ་རྣམས་ལས་གལ་ཏེ་ཤེད་ན་གཅིག་གིས་ཀྱང་ལྷར་སྐྱེ་བར་འགྱུར་རོ། །མྱ་ངན་ལས་འདས་པ་ཡང་འཕེན་པར་བྱེད་ན་སེམས་ཅན་
རྣམས་ལྷ་རྣམས་སུ་སྐྱེ་བར་འགྱུར་བ་ལ་ལྟ་ཅི་སྨོས། དེ་ལ་དེ་ལྟར་ལས་ཀྱི་རྣམ་པར་སྨིན་པ་འདི་ནི་མཆོག་ཏུ་ཕྲ་བར་གྱུར་པ་ཡིན་ཏེ། དེ་གང་གིས་མི་ཤེས་པ་དེ་དག་རྣམས་ནི་ལས་རྣམ་པར་སྨིན་པ་རྣམས་ལ་ཡང་ཀུན་ཏུ་རྨོངས་པར་འགྱུར་ལ། དེ་ཀུན་ཏུ་རྨོངས་པས་ཀྱང་དམྱལ་བར་
ཉེ་བར་རྒྱུག་པར་འགྱུར་རོ། །དེ་ལ་ཇི་སྐད་དུ་བཤད་པའི་དགེ་བ་བཅུའི་ལས་ཀྱི་ལམ་དེ་དག་རྣམས་ལ། རྒྱལ་པོ་གང་ཞིག་གིས་ཇི་སྐད་བཤད་པ་བཞིན་དུ་སྤྱོད་པར་བྱེད་པ་ནི། འདིའི་ཡུལ་འཁོར་རྣམས་དང་གྲོང་ཁྱེར་རྣམས་དེས་དབང་དུ་བྱེད་པར་འགྱུར་བ་ཡིན་ནོ། །རྒྱལ་པོ་དེ་
ལུས་ཞིག་ནས་ཤི་བའི་འོག་ཏུ་ཡང་ལས་དེ་དག་རྣམས་ཀྱི་རྣམ་པར་སྨིན་པས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རྗེས་སུ་བསྒྲུབ་པར་བྱའོ། །འདི་ཡང་གང་ཞེ་ན། འདི་ལྟ་སྟེ། རྒྱུ་དང་འབྲས་
བུ་ལ་ལེགས་པར་བལྟའོ། །རྒྱུ་དང་འབྲས་བུ་རྣམས་ལ་ལེགས་པར་ལྟ་བར་བྱེད་པའི་རྒྱལ་པོའམ་བློན་པོ་རྣམས་ཀྱང་རུང་སྟེ། ཀུན་ཏུ་རྨོངས་པར་མི་འགྱུར་རོ། །ལས་རྣམས་དང་ལས་ཀྱི་རྣམ་པར་སྨིན་པ་རྣམས་ལ་ཡང་རྟག་ཏུ་མཉམ་པར་བཞག་པའི་བློར་འགྱུར་ཞིང་།
ཡུལ་རྣམས་ལ་བག་མེད་པས་འཇུག་པར་ཡང་མི་འགྱུར་རོ། །དེ་ལ་རྒྱུ་བྱ་བའི་མིང་ནི་འབྲས་བུའི་ས་བོན་ནོ། །རྐྱེན་ནི་ནམ་ཟླའི་དུས་ཚོད་དང་ས་གཞི་ཚོགས་པའོ། །དེ་གལ་ཏེ་དེ་རྒྱུ་རྣམས་ལ་སྐུར་པ་མི་འདེབས་པ་དང་རྐྱེན་རྣམས་ལ་སྐུར་པ་མི་འདེབས་པ་དེ་ནི་རྒྱུ་དང་འབྲས་
བུ་དག་གི་དེ་ཁོ་ན་ཉིད་མཐོང་བ། སྡིག་པའི་ལས་རྣམས་ལ་སྤྱོད་པར་མི་བྱེད་དོ། །ཇི་ལྟ་བ་དེ་ཁོ་ནས་ས་བོན་དང་། མྱུག་གུ་དག་རྒྱུ་རྐྱེན་དུ་གཏོགས་པ་གང་ཡིན་པ་དེ་ཁོ་ན་བཞིན་དུ་ལས་དང་ལས་ཀྱི་འབྲས་བུ་རྣམ་པར་སྨིན་པ་རྣམས་ལ་ཡང་ཀུན་དུ་རྨོངས་པར་མི་འགྱུར་རོ། །དེ་ལ་

སྐྱེ་བའི་ལམ་དུ་གྱུར་པའི་དགེ་བ་དང་མི་དགེ་བའི་ལས་རྣམས་ཀྱིས་ནི་རྣམ་པ་སྣ་ཚོགས་པའི་བདེ་བ་དང་སྡུག་བསྔལ་རྣམས་འཁོར་བ་ནས་འཁོར་བར་རབ་ཏུ་འབབ་པར་འགྱུར་བ་ཡིན་ཏེ། སྲོག་ཆགས་རྣམས་ཀྱི་རྒྱུད་དེས་བསྡུས་པ་ནས་བཟུང་ནས་དམྱལ་བ་དང་ཡི་དགས་དང་དུད་
འགྲོའི་འགྲོ་བ་རྣམས་དང་ལྷ་དང་མི་རྣམས་སུ་ཁམས་གསུམ་དུ་གཏོགས་པ་རྣམས་ཀྱི་འདུ་བྱེད་དུ་འགྱུར་བ་རྣམ་པ་གསུམ་པོ་དགེ་བ་རྣམས་དང་མི་དགེ་བ་རྣམས་དང་མི་གཡོ་བ་རྣམས་ཀྱིས་སོ། །དེ་ཡང་དགེ་བའི་ལས་ཀྱི་འདུ་བྱེད་ཀྱི་རྒྱུ་རྣམས་ཀྱིས་ནི་ལྷ་རྣམས་དང་མི་རྣམས་སུའོ། །
མི་དགེ་བ་ལས་ནི་དམྱལ་བ་རྣམས་སུའོ། །མི་གཡོ་བ་རྣམས་ཀྱིས་ནི་གཟུགས་དང་གཟུགས་མེད་པའི་ཁམས་དག་ཏུའོ། །ཁམས་རྣམ་པ་གསུམ་དུ་གཏོགས་པ་དེ་དག་རྣམས་ལ་ཡང་རྒྱལ་པོ་གང་ཞིག་རྒྱུ་ཙམ་དེ་ཁོ་ན་ཉིད་དུ་མཐོང་བ་དེ་ནི་འཁོར་བའི་འབྲོག་དགོན་པ་རྣམས་སུ་
རྨོངས་པར་མི་འགྱུར་རོ། །དེ་ལྟར་རེ་ཞིག་འདུས་བྱས་འདི་དག་རྣམས་ཐམས་ཅད་མདོར་བསྡུས་པ་ནི་འདི་ལྟ་སྟེ་རྒྱུ་དང་འབྲས་བུའོ། །རྒྱུ་དང་འབྲས་བུ་ཀུན་ནས་མཐོང་བའི་རྒྱལ་པོ་ནི་སྐྱོན་རྣམས་ཀྱིས་མི་འཇོམས་སོ། །ཉེས་པའི་འཇིགས་པ་རྣམས་ཀྱིས་འཇིགས་པས་མི་
དགེ་བའི་ལས་དག་མི་བྱེད་དོ། །དགེ་བ་ཡང་རྟག་ཏུ་བྱེད་པར་འགྱུར་རོ། །དེ་ནི་ལུས་ཞིག་པར་གྱུར་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ཀྱི་ལྷར་སྐྱེ་བར་འགྱུར་རོ། །དེ་ལ་ཡིད་ལ་འཇུག་པར་བྱེད་པ་རྣམས་ཐམས་ཅད་ཀྱི་མཆོག་ནི་འདི་ལྟ་སྟེ། རྐྱེན་ལེགས་
པར་མཐོང་བ་ཞེས་བྱ་བའོ། །དེའི་ཕྱིར་ན་ཆོས་འདི་དག་རབ་ཏུ་བརྩོན་པས་རྒྱལ་པོས་གཟུང་བར་བྱ་བ་ཡིན་ནོ། །འདི་ལྟ་སྟེ་རྒྱུ་དང་རྐྱེན་རྣམས་ལ་ལེགས་པར་བལྟ་བའོ། །ཆོས་གཞན་ཡང་རབ་ཏུ་བརྩོན་པ་དུ་མས་རྒྱལ་པོས་བྱའོ། །འདི་ཡང་གང་ཞེ་ན། འདི་ལྟ་སྟེ་ལྷ་
དག་མཆོད་པར་བྱའོ། །འདིར་ལེགས་པར་བྱས་པའི་ལས་ཀྱི་མཐའ་ལ་སྤྱད་པའི་ལྷ་རྣམས་ནི་ལེགས་པར་བྱ་བའི་ལས་རྣམས་ལ་གྲོགས་སུ་རང་དབང་དུ་འགྲོ་བར་འགྱུར་རོ། །དགེ་བའི་ཆོས་རྣམས་ལ་ཡང་བར་ཆད་བྱེད་པར་མི་འགྱུར་རོ། །ཉིན་མོ་དང་མཚན་མོར་ཡང་འདི་

དག་མཆོད་པས་མཆོད་པར་བྱེད་པ་རྣམས་ལ་ནི། ལས་རྣམས་ཐམས་ཅད་ལ་ཡང་ལྷན་ཅིག་རང་དབང་དུ་འགྱུར་རོ། །རྨི་ལམ་ཡང་བཟང་པོ་དང་ངན་པ་མྱོང་བར་འགྱུར་བ་རྣམས་ངེས་པར་ལེགས་པར་སྟོན་པར་འགྱུར་རོ། །ཡུལ་ལྗོངས་འཇིག་པར་འགྱུར་བ་ཡང་འདི་དག་
གིས་སྲུང་བར་བྱེད་དོ། །དགེ་བའི་ལས་རྣམས་རྟག་ཏུ་སྐུལ་བར་བྱེད་དོ། །འདི་ལྟ་སྟེ། དགེ་བ་དག་ལ་སོ་སོར་ངེས་པར་འཇུག་པར་བྱེད་པ་ན་འདི་དག་གིས་ཉིན་མོ་དང་མཚན་མོར་ཡང་སྲུང་བར་བྱེད་དོ། །ཕ་དང་མ་བཞིན་དུ་ཐབས་དུ་མས་དགེ་བར་བྱེད་པའི་ལྷ་མཆོད་པར་བྱ་
བར་འོས་པ་ཡང་ཡིན་ནོ། །དེའི་ཕྱིར་ན་རྒྱལ་པོས་རྟག་ཏུ་ལྷ་དག་མཆོད་པར་བྱ་བ་ཡིན་ཏེ། ཆོས་དང་ལྡན་པའི་ཆོ་ག་དག་གིས་དང་མངོན་པར་འདོད་པ་རྣམས་དང་དམ་ཚིག་གིས་དང་སྡིག་པའི་ལས་རྣམས་དང་རྣམ་པར་བྲལ་བས་དེང་འཚེ་བ་མེད་པ་དང་ལོག་པར་ལྟ་བ་ཅན་གྱི་ཡི་
དམ་གྱིས་མ་ཡིན་པ་དང་། འགྲོ་བ་ཐམས་ཅད་ཀྱི་ལས་དང་སྡུག་བསྔལ་བྱེད་པ་པོར་གྱུར་པའི་རྒྱུ་དེ་དང་བློ་དེ་དག་དང་ཇི་ལྟ་བར་བྲལ་བར་གྱུར་པ་དེ་ལྟར་ལྷ་དག་མཆོད་པར་བྱའོ། །གྲོགས་བྱེད་པའི་ཡོན་ཏན་རྣམས་ཀྱིས་དེ་ལྟར་མཆོད་པར་བྱེད་པའི་རྒྱལ་པོ་ནི་དོན་དག་ལས་ཡོངས་སུ་
ཉམས་པར་མི་འགྱུར་རོ། །རྒྱུ་དང་འབྲས་བུ་ལ་སྐུར་པ་མི་འདེབས་སོ། །ལོག་པར་ལྟ་བ་དང་ལྡན་པར་མི་འགྱུར་རོ། །རྟག་ཏུ་ཡང་མཆོད་པར་བྱ་བར་འགྱུར་རོ། །ལུས་ཞིག་ནས་ཀྱང་ལས་དེའི་རྒྱུ་དང་རྐྱེན་དག་གིས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་ལས་
འཐབ་བྲལ་གྱི་ནང་དུ་སྐྱེས་ནས་འཐབ་བྲལ་གྱི་ལྷ་རྣམས་ཀྱི་རྒྱལ་པོར་འགྱུར་རོ། །ཆོས་གཞན་ཡང་རྒྱལ་པོས་བྱ་བར་བྱའོ། །འདི་ཡང་གང་ཞེ་ན་འདི་ལྟ་སྟེ། ལེགས་པར་སྐྱེ་དགུ་རྣམས་བསྐྱང་བར་བྱའོ། །རྒྱལ་པོས་ཡང་དག་པར་སྐྱེ་དགུ་སྐྱོང་བར་བྱེད་པ་ནི་ཆོས་བྱེད་
ཆོས་ཀྱི་རྗེས་སུ་འཇུག་པར་གྱུར་པ་མ་དང་ཕ་དང་མཚུངས་པར་མི་འཇིགས་པ་སྦྱིན་པར་བྱེད་པ་ཡིན་ནོ། །འཇིགས་པ་རྣམས་ཐམས་ཅད་ལས་དེས་མི་འཇིགས་པ་སྦྱིན་པར་བྱེད་པས་ཉིན་དང་མཚན་དུ་ཡང་དགེ་བའི་ཆོས་རྣམས་ཀྱི་ཆུ་ཀླུང་རབ་ཏུ་འཇུག་པར་འགྱུར་བའི་ཕྱིར་

རབ་ཏུ་རྒྱས་པར་འགྱུར་རོ། །འདི་ལ་གྲོང་ཁྱེར་པ་རྣམས་ཐམས་ཅད་རྗེས་སུ་ཆགས་པར་འགྱུར་བ་དང་རྗེས་སུ་ཆགས་པའི་ཡིད་ཅན་དེ་དག་རྣམས་ལས་དེར་ནོར་རྣམས་རྙེད་པར་འགྱུར་བ་དང་སྙན་པ་ལ་ཡང་སྦྱོར་བར་བྱེད་དོ། །ཉིན་དང་མཚན་དུ་ཡང་འདིའི་བདེ་བ་སེམས་
པར་བྱེད་དོ། །དེ་དེ་ལྟར་ཞུགས་པར་གྱུར་པའི་རྒྱལ་པོ་ནི་སེམས་ཅན་རྣམས་ཐམས་ཅད་ལ་ཕན་པར་རབ་ཏུ་ཞུགས་པས་ན་དབང་སྒྱུར་བ་ཡང་རབ་ཏུ་འཕེལ་བར་འགྱུར་ཏེ། མངའ་ཐང་འཕེལ་བར་གྱུར་པ་གང་ཡིན་པ་དེ་དག་གིས་ཡང་དག་པ་ཇི་ལྟ་བ་བཞིན་དུ་ལོ་ཏོག་རྣམས་སྐྱེ་བར་འགྱུར་
རོ། །ལེགས་པ་ཉིད་དུ་སྐྱེ་དགུ་རྣམས་ཀྱང་འཕེལ་བར་འགྱུར་རོ། །གྲོང་ཁྱེར་དེ་འཕེལ་བར་གྱུར་པས་ཀྱང་ཕྱིར་ཞིང་ཡང་རྒྱལ་པོ་དེ་ཉིད་མངོན་པར་འཕེལ་བར་བྱེད་དོ། །དེ་ལྟར་རྒྱལ་པོ་དེས་སྐྱེ་དགུ་རྣམས་བསྐྱངས་པར་གྱུར་པ་ན་ཆོས་དང་ནོར་དང་སྙན་གྲགས་དང་ཡང་རྟག་ཏུ་ཡང་
དག་པར་ལྡན་པར་འགྱུར་རོ། །ལེགས་པར་ལྡན་པས་ཕྱིར་ཞིང་ཡང་རྒྱལ་འབངས་རྣམས་སྐྱོང་བར་བྱེད་དོ། །དེ་རྟག་ཏུ་སྐྱེ་དགུ་རྣམས་ལ་ཕན་པར་འདོད་པ་དང་། གནོད་སེམས་མེད་པ་དང་། བརྣབ་སེམས་མེད་པར་འགྱུར་བས་ཀྱང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་པ་
རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་བ་ཡིན་ཏེ། དེས་སྔོན་བྱས་པའི་རྒྱུ་དང་རྐྱེན་རྣམས་ཀྱིས་སོ། །རྒྱལ་པོ་ཆོས་བྱེད་ཆོས་ཀྱི་རྗེས་སུ་ཀུན་ནས་འཇུག་པས་ཆོས་གཞན་ཡང་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། བུ་དང་བུ་མོ་ཡང་དག་པ་ཇི་
ལྟ་བའི་བདེ་བས་འཛིན་པའོ། །བུ་དང་བུ་མོ་ཡང་ཡང་དག་པའི་བདེ་བས་འཛིན་པར་བྱེད་པར་འགྱུར་བའི་རྒྱལ་པོའམ་རྒྱལ་པོའི་བློན་པོ་ལ་ཡང་རུང་སྟེ། རྣམ་པ་དུ་མའི་བསོད་ནམས་ཆེན་པོ་རྒྱུན་མི་འཆད་པར་རབ་ཏུ་འཕེལ་བར་འགྱུར་རོ། །གང་འདི་ལ་གྱུར་པ་རྣམས་དེ་དག་ལ་འགྱུར་
བར་བྱེད་པ་དང་། རྣམ་པ་གང་དག་གིས་ཡིན་པ་དང་། ཡོད་པ་རྣམས་ཀྱང་ཇི་སྲིད་ཀྱི་བར་དུ་དང་། དུས་གང་གི་ཚེ་ན་ཡོད་པ་དེ་དག་རྣམས་ཀྱང་དེ་བཞིན་དུ་དེས་དེ་ལ་ཐམས་ཅད་ནས་སྟེར་བར་བྱེད་པ་སྟེ། རྫས་དང་ཟས་དང་སྐོམ་དང་གོས་དང་ཡོངས་སུ་འཁྱུད་པ་དང་སྙན་པར་སྨྲ་བ་

དང་ཡིད་ཆེས་པར་བྱ་བ་དང་དགའ་བར་བྱ་བ་དང་མི་འཇིགས་པ་སྦྱིན་པ་རྣམས་ཀྱང་ཤུགས་བཏོན་ནས་རབ་ཏུ་སྦྱིན་པར་བྱེད་དོ། །བུ་རྣམས་དང་བུ་མོ་རྣམས་ལས་གང་དག་བསོད་ནམས་ཆེན་པོ་འབྱུང་བར་འགྱུར་ཏེ། རྣམ་པ་དུ་མར་བསོད་ནམས་ཆེན་པོར་ཁྱིམ་ནས་ཀུན་ཏུ་འབྱུང་བར་
འགྱུར་བ་འདི་ནི་བུ་དང་བུ་མོ་ལེགས་པར་འཛིན་པ་ཞེས་བྱ་བ་གང་ཡིན་པ། བཀྲེན་པས་ཟིལ་གྱིས་མནན་པར་མ་གྱུར་པ་དང་། འདོད་པས་གཟིར་བར་མ་ཡིན་པས་ཀྱང་བུ་དང་བུ་མོ་རྣམས་ལ་སྙིང་རྗེ་དང་ལྡན་པར་གྱུར་པའོ། །དེའི་རྫས་བྱིན་པར་གྱུར་ནས་གསོད་པ་ལས་བསྲུངས་
པ་རྣམས་ཀྱི་དྲུང་ན་ཡང་ཆེས་ལྷག་པར་འགྱུར་རོ། །དེའི་ཕྱིར་ན་གང་དག་དད་པས་རབ་ཏུ་འབྱུང་བར་མི་ནུས་པ་དེ་དག་རྣམས་ཀྱིས་བུ་དང་བུ་མོ་རྣམས་ཡང་དག་པར་བདེན་པས་གཟུང་བར་བྱའོ། །གང་ཡང་ནུས་པ་དང་ལྡན་པར་གྱུར་ཀྱང་བཀྲེན་པར་གྱུར་པས་ནུས་པ་ཇི་ལྟ་བ་
བཞིན་དུ་བུ་དང་བུ་མོ་རྣམས་འཛིན་པར་མི་བྱེད་པ་དེ་ནི་ཁྱིམ་པ་ཡང་མ་ཡིན་ལ་དགེ་སློང་ཡང་མ་ཡིན་ནོ། །དེའི་ཕྱིར་ན་ཟང་ཟིང་གི་སྦྱིན་པས་སྦྱིན་པ་ལ་ལེགས་པར་སྦྱར་བར་བྱ་བ་དང་། ཚུལ་ཁྲིམས་ལ་ཀུན་ནས་གོམས་པར་བྱ་བས་ཀྱང་རྒྱལ་པོའམ་རྒྱལ་པོའི་བློན་པོ་རྣམས་ཀྱིས་ཀྱང་
རུང་སྟེ། བུ་དང་བུ་མོ་ཚུལ་ཁྲིམས་ལ་རབ་ཏུ་དགོད་པར་བྱའོ། །སྦྱིན་པ་དག་གཏོང་དུ་གཞུག་པར་བྱའོ། །ཤེས་རབ་ལ་གོམས་པར་བྱེད་དུ་གཞུག་གོ། །ཡང་དག་པའི་བདེ་བས་ཡོངས་སུ་བསྐྱང་བར་བྱ་བ་དང་། རྗེས་སུ་བསྐྱངས་པའི་དབང་དུ་བྱས་ནས་ལྷག་མ་རྣམས་ཀྱིས་
རིམ་གྱིས་ནུས་པ་ཇི་ལྟ་བ་བཞིན་དུ་སྟེ། དེ་ལྟར་བྱེད་པར་གྱུར་པའི་རྒྱལ་པོའམ་རྒྱལ་པོའི་བློན་པོ་དེ་དག་རྣམས་ཀྱང་རུང་སྟེ། ཤིན་ཏུ་རིང་དུ་བདེ་བར་འཚོའོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་
བདག་ཏུ་འགྱུར་ཏེ། དགེ་བའི་ལས་དེ་དག་གི་རྒྱུ་དང་རྐྱེན་རྣམས་ཀྱིས་སོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པ་དུ་མར་བྱ་བ་རྣམས་ལ་འདི་ལྟ་སྟེ། ཤེས་རབ་ལ་ཅི་ནས་ཀྱང་གོམས་པར་བྱ་བའི་རང་བཞིན་ཅན་ཉིད་དོ། །ཤེས་རབ་ལ་གོམས་པར་བྱ་བ་ཞེས་བྱ་བ་ནི་སྡུག་བསྔལ་

ཐམས་ཅད་ཀུན་ནས་འཇོམས་པར་བྱེད་པ་འཁོར་བ་ཐམས་ཅད་ལས་ངེས་པར་འབྱུང་བའི་རྒྱུར་གྱུར་པའི་ཕྱིར་ན། དེ་ལ་ཅི་ནས་ཀྱང་རྒྱལ་པོས་གོམས་པར་བྱ་བ་ཡིན། ཤེས་རབ་ཞེས་བྱ་བ་ཡང་། གང་གི་ཕྱིར་མུན་པ་ཆེན་པོར་ཀུན་ནས་ལྟུང་བའི་སྡུག་བསྔལ་དུ་མའི་
མུན་པར་འཐོམས་པར་གྱུར་པ་རྣམས་ལ་རབ་ཏུ་གསལ་བར་བྱེད་པའི་མར་མེ། འཁོར་བའི་དབུལ་པོ་རྣམས་ཀྱི་ནོར། མིག་མེད་པར་གྱུར་པ་རྣམས་ཀྱི་མིག །སྟོབས་མེད་པ་རྣམས་ཀྱི་སྟོབས་དང་། གྲོགས་མེད་པ་རྣམས་ཀྱི་གྲོགས་དང་། སྐྱོབ་པ་དང་མི་ལྡན་པ་རྣམས་ཀྱི་
སྐྱོབ་པར་བྱེད་པ་དང་། ནད་ཀྱིས་ཤིན་ཏུ་གཟིར་བའི་སྲོག་ཆགས་འདི་དག་རྣམས་ཀྱི་ནི་སྨན་ནོ། །ལམ་མེད་པ་ལ་རབ་ཏུ་གནས་པ་རྣམས་ཀྱི་ནི་ལམ་སྟོན་པར་བྱེད་པའོ། །འཁོར་བའི་དགོན་པར་རབ་ཏུ་ཞུགས་པར་གྱུར་པས་སྲེད་པས་ཀུན་ནས་གདུངས་པ་རྣམས་ཀྱི་ནི་ཤིན་ཏུ་
བར་ཡང་བསིལ་བར་གྱུར་པའི་ཆུ་རྣམ་པ་དུ་མ་རྣམས་སོ། །འཁོར་བའི་བཙོན་རར་ཀུན་ནས་བསྡམས་པ་རྣམས་ཀྱི་ངེས་པར་འབྱིན་པའི་རྒྱུར་གྱུར་པའོ། །གཉེན་བཤེས་མེད་པ་རྣམས་ཀྱི་ཕན་པར་བྱེད་པའི་གཉེན་ནོ། །མིག་ལྡོངས་པ་རྣམས་ཀྱི་རབ་རིབ་དང་རྣམ་པར་བྲལ་བར་བྱེད་པའི་མིག་
གོ། །གསོད་པར་བྱེད་པའི་ཡུལ་དང་དུས་རྣམས་སུ་སྟོབས་དང་ལྡན་པའི་གྲོགས་པོའོ། །གཤིན་རྗེའི་ཕོ་ཉ་རྣམས་ཉེ་བར་གནས་པའི་འཆི་བའི་དུས་ན་སྟོབས་དང་ལྡན་པའི་གྲོགས་པོ་རྣམས་གང་གིས་ངན་འགྲོའི་འཇིགས་པ་རྣམས་ཐམས་ཅད་ལས་ཀུན་ཏུ་འདྲེན་པར་བྱེད་པའོ། །བགྲོད་དཀའ་
བ་རྣམས་དང་ངམ་གྲོག་རྣམས་དང་གཡང་ས་རྣམས་ལས་ལག་པས་འདོན་པར་བྱེད་པའི་སྟོབས་དང་ལྡན་པའི་གྲོགས་པོ་རྣམས་གང་གིས་བདེ་བ་རྣམས་ཐམས་ཅད་འཐོབ་པར་བྱེད་པའོ། །ཀུན་ནས་ཚིག་པར་གྱུར་པའི་སྐྱེས་བུ་རྣམས་ཀྱི་རིན་ཐང་མེད་པའི་གོས་རྣམས་སོ། །ཚུལ་ཁྲིམས་འཆལ་
པའི་མེའི་འཇིགས་པའི་ཚ་བས་གདུངས་པ་རྣམས་ཀྱི་ཤིན་ཏུ་ཆེ་བའི་ཡལ་ག་དུ་མ་རྣམས་ཀྱིས་ཀུན་ནས་ཁྱབ་པར་གྱུར་པའི་བསིལ་བའི་གྲིབ་མ་འཇིགས་པ་མེད་པ་དང་ལྡན་པ་ལ་ཡལ་ག་དུ་མ་སྟུག་པོར་གྱུར་པ་ཡལ་ག་ཕྲེའུ་དང་། ཆིའུ་གཞོན་ནུ་དང་འདབ་མ་དང་ཟེ་བ་དང་ལྡན་པའི་ལྗོན་ཤིང་སྐྱེ་

བོ་རྣམས་ཐམས་ཅད་ཀྱི་མིག་དང་རེག་པ་ན་ཤིན་ཏུ་དགའ་བར་འགྱུར་བ་ཡིན་ནོ། །དེའི་ཕྱིར་ན་ཡང་ཤེས་རབ་ནི་ཆེས་ཤིན་ཏུ་ལྷག་པར་གྱུར་པ་ཡིན་ནོ། །ཀྱེ་ཧོ་འཇིག་རྟེན་ཕ་རོལ་དང་འདི་དང་གཞན་ལ་ཡང་རུང་སྟེ། སྐྱེ་དགུ་རྣམས་ལ་ཐོག་མ་མེད་པའི་དུས་ནས་རབ་ཏུ་འཇུག་པར་གྱུར་པའི་
རྒྱུར་གྱུར་པ་རྣམ་པ་དེ་ལྟ་བུ་གཞན་ནི་ཡོད་པ་མ་ཡིན་ནོ། །ཤེས་རབ་ཀྱིས་ནི་ཇི་ལྟ་བ་བཞིན་དུ་གཅིག་ཏུ་ཡོན་ཏན་དང་ལྡན་པ་དང་དེ་ཡོངས་སུ་ཤེས་པར་བྱ་བའི་ཚུལ་ཇི་ལྟ་བར་གོམས་པར་བྱ་བ་ལས་ལམ་དམ་པ་རྟོགས་པར་འགྱུར་ཞིང་། ལེགས་པར་རྣམ་པར་སྤྱད་ནས་སེམས་ལ་རབ་ཏུ་བཞག་སྟེ།
མཐའ་མར་ལྷན་ཅིག་ཀུན་དུ་བསྐྱོད་པ་དང་། གཅིག་ཏུ་ངེས་པ་དང་དེ་རྣམ་པ་དུ་མར་རྣམ་པར་ཤེས་པར་བྱ་བ་ཡིན་པ་དང་། དང་པོ་དང་བར་དང་ཐ་མར་ཆེས་མཛེས་པར་གྱུར་པ་བྲིས་པ། ངོ་བོ་ཉིད་ཀྱི་ལམ་ལེགས་པར་སྟོན་པར་བྱེད་པའོ། །དེ་དག་ཉིད་ནི་མངོན་པར་འདོད་པའི་དོན་
ཐམས་ཅད་ལ་གཅིག་ཏུ་ཆགས་པ་མེད་པར་མྱ་ངན་ལས་འདས་པའི་གྲོང་ཁྱེར་ལེགས་པར་སྟོན་པ་པོ་དེ་ནི་རྟག་ཏུ་གོམས་པར་བྱའོ། །དེ་ནི་ཡུན་རིང་དུ་རྒྱལ་སྲིད་ལ་ལོངས་སྤྱོད་པར་གྱུར་པ་དང་གྲོང་ཁྱེར་པ་རྣམས་ཀྱང་འདི་ལ་རྗེས་སུ་དགའ་བར་འགྱུར་རོ། །ཡུལ་གཞན་རྣམས་ཀྱི་
རྒྱལ་པོས་ཀྱང་གཞོམ་པར་མི་ནུས་སོ། །དུས་ཡུན་རིང་དུ་འཚོ་བར་འགྱུར་བ་དང་སྡུག་བསྔལ་ཡང་འབྱུང་བར་མི་འགྱུར་རོ། །བདེ་བ་རྣམས་ལ་ཡང་དུས་རིང་དུ་ཉེ་བར་ལོངས་སྤྱོད་པར་བྱེད་པ་དེས་བདེ་བ་ནས་བདེ་བ་འཐོབ་པར་འགྱུར་རོ། །ལུས་ཀྱང་ཞིག་པར་གྱུར་ནས་ཤི་བའི་འོག་
ཏུ་ཡང་མཐོ་རིས་བདེ་འགྲོའི་འཇིག་རྟེན་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། དེས་སྔོན་བྱས་པའི་ལས་རྣམས་ཀྱི་རྒྱུའི་རྣམ་པར་སྨིན་པའི་རྐྱེན་གྱིས་སོ། །ཡང་ཆོས་གཞན་དག་རྒྱལ་པོས་རབ་ཏུ་བརྩོན་པ་ཐམས་ཅད་ཀྱིས་བྱ་བར་བྱའོ། །འདི་ཡང་གང་
ཞེ་ན། འདི་ལྟ་སྟེ། ཡུལ་གྱིས་འཁྲིད་པར་འགྱུར་བ་དེ་ལྟར་མི་བྱའོ། །རྒྱལ་པོ་གང་ཞིག་ཡུལ་རྣམས་མཆོག་ཏུ་བྱེད་པར་གྱུར་པ་རྣམ་པ་ཐམས་ཅད་དུ་དགེ་ལེགས་སུ་འོས་པའི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་ཀུན་ཏུ་ཕྲོགས་པའི་རྒྱལ་པོ་ནི་ཐབས་རྣམས་

ཐམས་ཅད་ཀྱིས་ཀྱང་དགེ་བར་བྱ་མི་ནུས་སོ། །རྣམ་པ་དེ་ལྟ་བུ་དག་གིས་ཡུལ་རྣམས་ཀྱང་དག་པའི་བདེ་བས་ཡོངས་སུ་སྐྱོང་བར་མི་འགྱུར་རོ། །བདག་ཉིད་ཀྱང་ཡུལ་དེ་དག་རྣམས་ལ་མཆོག་ཏུ་བྱེད་པར་ཡང་མི་འགྱུར་ཞིང་བློ་དེ་ལ་སོང་བར་གྱུར་པས་ཀྱང་ཆོས་དང་
ནོར་དང་སྙན་པ་རྣམས་ལས་ཀྱང་ཡོངས་སུ་ཉམས་པར་འགྱུར་རོ། །ཡོངས་སུ་ཉམས་པ་ལས་ནི་མི་འཐུན་པའི་རྒྱལ་པོ་གཞན་གྱིས་མངོན་པར་འཚེ་བར་བྱེད་དོ། །དེ་དེས་མངོན་པར་གཙེས་པ་ལས་ནི་དེའི་གྲོང་ཁྱེར་བ་རྣམས་དགའ་བ་དང་རྣམ་པར་བྲལ་བར་གྱུར་ནས་རྒྱལ་སྲིད་
འཆོར་བར་འགྱུར་རོ། །སྡུག་བསྔལ་ཆེན་པོ་རྣམས་སུ་ཡང་ལྷུང་ནས་སྲོག་ཀྱང་ངམ་བརྒྱ་ལ་ན་སྟེ་མེད་པར་འགྱུར་རོ། །དེའི་ཕྱིར་ན་ཡུལ་རྣམས་ལ་ཆེད་ཆེར་འགྱུར་བར་མི་བྱའོ། །གང་ཡང་རྒྱལ་པོ་ཡུལ་རྣམས་ལ་ཆེད་ཆེར་བྱེད་པ་མ་ཡིན་པ་དང་རང་གི་ཆོས་ཡོངས་སུ་སྐྱོང་བར་
བྱེད་པ་དང་། སེམས་ཀྱང་ཤིན་ཏུ་མཉམ་པར་བཞག་པ་དག་ནི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་ཀུན་ནས་འཁྲིད་པར་མི་འགྱུར་རོ། །དེ་ལྟར་རྒྱལ་པོ་དེས་སྐྱེ་དགུ་རྣམས་བསྐྱངས་པར་གྱུར་པ་ན་ཆོས་དང་ནོར་དང་སྙན་གྲགས་དང་ཡང་རྟག་ཏུ་ཡང་དག་པར་ལྡན་པར་
འགྱུར་རོ། །ལེགས་པར་ལྡན་པས་ཕྱིར་ཞིང་ཡང་རྒྱལ་འབངས་རྣམས་སྐྱོང་བར་བྱེད་དོ། །དེ་རྟག་ཏུ་སྐྱེ་དགུ་རྣམས་ལ་ཕན་པར་འདོད་པ་དང་། གནོད་སེམས་མེད་པ་དང་བརྣབ་སེམས་མེད་པར་གྱུར་པས་ཀྱང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་
བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་བ་ཡིན་ཏེ་དེས་སྔོན་བྱས་པའི་རྒྱུ་དང་རྐྱེན་རྣམས་ཀྱིས་སོ། །ཡང་ཆོས་གཞན་ཡང་རྒྱལ་པོས་མི་བྱ་བར་གྱུར་པ་འདི་ཡང་གང་ཞེ་ན། འདི་ལྟ་སྟེ་གདུལ་དཀའ་བ་རྣམས་ཡུལ་དུ་འཛིན་པར་མི་བྱེད་དོ། །གང་ཡང་རྒྱལ་པོར་གྱུར་ནས་གདུལ་
དཀའ་བའི་སྡིག་པའི་ལས་ཅན་ཚུལ་ཁྲིམས་འཆལ་པ་རྣམས་ཡུལ་དུ་འཛིན་པར་བྱེད་པ་ན་དེ་ནི་དུས་མི་རིང་བ་ཉིད་ན་དེས་བྱས་པར་གྱུར་པའི་སྐྱོན་ཆེན་པོ་ཀུན་ཏུ་ལྟུང་བར་འགྱུར་རོ། །སྐྱོན་ཆེན་པོ་དེ་དག་རྣམས་ཀྱིས་ཀྱང་ཡུལ་ལྗོངས་འཇིགས་པར་འགྱུར་བ་དང་། མངའ་བྱེད་རྣམས་ལས་ཡང་

ཡོངས་སུ་ཉམས་པར་འགྱུར་རོ། །ལོ་ཏོག་རྣམས་ཀྱང་སྨིན་པར་མི་འགྱུར་རོ། །ལས་ཀྱི་མཐའ་དག་མེད་པར་འགྱུར་རོ། །ལེགས་པར་སྐྱེ་དགུ་རྣམས་སྐྱོང་བར་ཡང་མི་བྱེད་དོ། །དེ་ལ་སྐྱེ་དགུ་འདོད་ཆགས་དང་བྲལ་བར་འགྱུར་རོ། །གདུལ་དཀའ་བ་རྣམས་ཡུལ་དུ་འཛིན་པར་
བྱེད་པ་ཡིན་པའི་ཕྱིར་ན་ཡུལ་ན་གནས་པའི་ལྷ་དག་ཀྱང་རྗེས་སུ་བརྩེ་བར་མི་འགྱུར་རོ། །གདུལ་དཀའ་བ་རྣམས་ཀྱིས་ནི་གང་གི་ཕྱིར་སྐྱེ་བོ་མཆོག་ཏུ་དུལ་བ་རྣམས་ཀྱང་གདུལ་དཀའ་བར་བྱེད་པ་ཡིན་ཏེ། ཐམས་ཅད་ཀྱང་བསྟེན་གྲོགས་ཀྱི་དབང་གིས་ཡིན་པའི་ཕྱིར་ན་ཡོན་ཏན་དང་ལྡན་པར་
གྱུར་པ་རྣམས་ཐམས་ཅད་དང་གཞན་དང་སྟེན་གྲོགས་བྱས་པར་གྱུར་པ་ལས་ཆུད་འཛའ་བར་འགྱུར་རོ། །དེའི་ཕྱིར་ན་རྒྱལ་པོས་གདུལ་དཀའ་བ་རྣམས་ཀུན་ཏུ་གཟུང་བར་མི་བྱའོ། །གང་ཡང་སྐྱེས་བུ་ངན་པ་གདུལ་བར་དཀའ་བ་སྡིག་པ་ཀུན་ཏུ་སྤྱོད་པ་འཛིན་པར་མི་བྱེད་པ་
དེ་དག་ལ་ནི་སྐྱོན་ཇི་ལྟར་བཤད་པ་དེ་དག་རྣམས་མི་འབྱུང་ངོ་། །ཡང་དག་པར་སྐྱེ་དགུ་རྣམས་སྐྱོང་བར་བྱེད་དོ། །སྐྱེས་བུ་ཆོས་བྱེད་མ་ཡིན་པ་རྣམས་ནི་འདིའི་ཡུལ་ན་གནས་པར་ཡང་མི་བྱེད་དོ། །དེ་སྐྱེས་བུ་ཆོས་པ་རྣམས་དང་ལྡན་པས་ཆོས་མ་ཡིན་པ་རྣམས་ལ་དགའ་བར་
ཡང་མི་བྱེད་དོ། །ཆོས་པ་ཆོས་ཀྱི་རྗེས་སུ་འཇུག་པར་དེའི་ཡིད་ལ་བསམས་པ་འདི་དག་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འདིའི་ཡུལ་ཡང་འཇིག་པར་མི་འགྱུར་རོ། །དོན་མ་ཡིན་པ་གཞན་ཡང་འབྱུང་བར་མི་འགྱུར་རོ། །རྒྱལ་པོ་དེ་ཆོས་ཁོ་ནའི་
སྐྱབས་དང་ཆོས་ཁོ་ནའི་གྲོགས་དང་གཞི་དེ་ཉིད་ཀྱིས་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་ལས་དེའི་རྒྱུ་དང་རྐྱེན་རྣམས་ཀྱིས་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པར་གྱུར་པས་བྱེད་པ་ན་ཆོས་
དང་ལེགས་པར་ལྡན་པས་ཡིན་གྱི་འདི་ལ་ཡང་རང་བཞིན་ཆགས་པ་དང་ལྡན་པས་ནི་མ་ཡིན་ནོ། །འདི་ཡང་གང་ཞེ་ན་འདི་ལྟ་སྟེ། བྲན་རྣམས་ལ་རང་གི་ཁྱིམ་དུ་ལོངས་སྤྱོད་པར་བྱེད་པ་ད་ལྟར་གྱུར་པའི་ས་གཞི་དང་ནོར་སྦྱིན་པར་སྦྱིན་པ་རྣམས་རྒྱལ་པོ་གང་གིས་བྲན་གང་ལ་

འདིའི་ཁྱིམ་དུ་རིགས་པ་ཡིན་པ་རྣམས་དེས་དེ་རང་ལ་སྟེར་བར་བྱེད་དོ། །དེ་ལ་རང་བཞིན་གྱིས་མི་དགའ་བར་མི་བྱེད་དོ། །བྲན་རྣམས་དང་ཕན་ཚུན་དུ་དགའ་རངས་པར་བྱེད་པ་ཡང་མ་ཡིན་ནོ། །འདི་དག་རྣམས་ལ་ཡིད་འབྱུང་བར་མི་བྱེད་དོ། །བགོ་བཤའ་བྱེད་
པའི་དབང་དུ་བྱས་ནས་གནས་ནས་གཡོ་བར་ཡང་མི་འགྱུར་རོ། །རྟོག་པར་ཡང་མི་བྱེད་པའི་རྒྱལ་པོ་ནི་ཤིན་ཏུ་ལེགས་པར་གནས་པ་རྣམས་ཀྱིས་ཀྱང་གནས་པ་ཡིན་ནོ། །འདི་ནི་ཉོ་ཚོང་གི་བྱ་བའི་ཡུལ་རྣམས་ལ་ཡང་འཇུག་པར་མི་བྱེད་དོ། །སྟོབས་དང་ལྡན་པར་གྱུར་ན་ཡང་
སྟོབས་ཆུང་བ་རྣམས་ཅི་ནས་ཀྱང་འཚེ་བར་མི་བྱེད་དོ། །ཆོས་རྣམས་ལ་འདོད་པ་ཅན་ཡང་མ་ཡིན་ནོ། །ཆོག་ཤེས་ཅན་ཡིན་པ་ཡང་ཇི་ལྟར་རང་གི་ལས་ཀྱིས་བྱས་པ་རྣམས་ཀྱིས་ཆོག་ཤེས་སོ། །ཡུལ་ལྗོངས་རྣམས་སུ་ཡང་དུས་མ་ཡིན་པར་ལྷས་ཆར་མི་འབེབས་སོ། །དུས་
མ་ཡིན་པར་ཉི་མ་རབ་ཏུ་ཚ་བར་མི་འགྱུར་རོ། །མུ་གེ་འབྱུང་བར་མི་འགྱུར་རོ། །མཚོན་ཆ་འཁྲུག་པར་མི་འགྱུར་རོ། །ཀླུ་རྣམས་ཀུན་ནས་འཁྲུག་པར་མི་འགྱུར་རོ། །ལྷ་དག་གིས་ཡུལ་དེ་ཡོངས་སུ་སྤངས་པར་གྱུར་ནས་ཡུལ་གཞན་རྣམས་སུ་ཉེ་བར་འགྲོ་བར་མི་འགྱུར་
རོ། །ཡུལ་དེ་ཡང་ལྷ་གཞན་དག་གིས་སྟོངས་པར་བྱས་ནས་རླག་པར་མི་བྱེད་དོ། །མི་རྣམས་དང་ལྷ་རྣམས་ཀྱང་མི་རྣམས་ཀྱི་སྟོབས་ཀྱིས་འཕེལ་བར་བྱེད་པ་ཡིན་ནོ། །དེ་ལ་དེ་ལྟར་སྐྱོན་དག་རྗེས་སུ་རྟོགས་པར་བྱས་ལ་རྒྱལ་པོས་མི་སྡིག་ཅན་རྣམས་གཟུང་བར་མི་བྱའོ། །གང་
ཡང་དགེ་བ་སྤྱོད་པར་བྱེད་པ་སྤྱོད་པ་རྣམས་ཀྱི་མཆོག་ཆོས་བྱེད་ཀྱི་མཆོག་ཏུ་གྱུར་པ་རྣམས་ཡུལ་དུ་འཛིན་པར་བྱེད་པའི་ཡུལ་དེ་དག་རྣམས་ཐམས་ཅད་ནི་ལྷས་ཡོངས་སུ་སྐྱོང་བར་བྱེད་དོ། །འཛིན་པར་བྱེད་དོ། །འཛིན་པར་བྱེད་པའི་རྒྱུ་མཚན་གྱིས་ཀྱང་ལྷའི་ཚོགས་དང་ཉེ་བའི་
ཡུལ་ལ་ལྷ་གཞན་རྣམས་ཀྱིས་དེར་བར་ཆད་བྱ་བར་མི་ནུས་སོ། །ཡུལ་དེ་ལ་ཡང་སྲུང་བར་འགྱུར་རོ། །རྒྱལ་པོ་དེ་ཡང་རྒྱས་པར་འགྱུར་བ་དེའི་ཕྱིར་ཡུལ་དུ་སྦྱིན་པ་དག་ནི་གཏོང་བར་བྱེད་ལ། བསོད་ནམས་དག་ཀྱང་བྱེད་དོ། །ཚུལ་ཁྲིམས་སྲུང་བར་བྱེད་དོ། །ཤེས་པ་དང་

ལྡན་པར་འགྱུར་རོ། །དེ་དེ་ལྟར་ཤིན་ཏུ་ལེགས་པ་དང་ཡང་དག་པར་ལྡན་པར་གྱུར་པའི་རྒྱལ་པོ་ཆོས་བྱེད་ཀྱི་མཆོག་ནི་འཇིག་རྟེན་འདིར་ཡང་མཆོག་ཏུ་མཛེས་པར་འགྱུར་ལ་ལུས་ཞིག་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་ལས་འཐབ་བྲལ་བའི་ལྷ་རྣམས་ཀྱི་མངའ་
བདག་ཏུ་འགྱུར་རོ། །རྒྱལ་པོ་གང་དག་ཆོས་སུམ་ཅུ་རྩ་ལྔ་པོ་དེ་དག་རྣམས་འཛིན་པར་བྱེད་པ་ནི། དེ་དག་གིས་ཀྱང་ལེགས་པར་གཟུང་བར་འགྱུར་རོ། །དེ་ནི་ཡོན་ཏན་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །དེ་ལ་འདི་ནི་བདེ་བ་ནས་ཀྱང་ཆེས་བདེ་བའི་གནས་སུ་འགྱུར་
རོ། །དེ་ནས་དེའི་ཚེ་ནམ་མཁའ་ལྡིང་གི་རྒྱལ་པོ་དུས་བཟངས་དེ་གཙུག་ཏོར་ཅན་གྱིས་གསུངས་པའི་ཚིགས་སུ་བཅད་པ་རྣམས་བརྗོད་པ་ཇི་ལྟར། གང་གི་སྐྱེ་བོ་གཙང་མའི་འཁོར། །ཆོས་ལ་སྤྱོད་པ་དབང་པོ་ཐུལ། །རྒྱལ་པོ་ཆོས་བྱེད་བློ་ལྡན་དེ། །མཐོ་རིས་འཇིག་རྟེན་སྐྱེ་བ་
ཡིན། །དུས་ནི་ངེས་པར་བྱེད་པ་གང་། །ཆོས་ཀྱིས་ཡོངས་སུ་ལོངས་སྤྱོད་ཅིང་། །འདོད་པ་ལས་གྲོལ་རྒྱལ་པོ་དེ། །འཐབ་བྲལ་རྣམས་ལས་ལྷག་པར་འགྱུར། །བཟོད་ལྡན་སྙན་པའི་ངག་ཅན་གང་། །ཁྲོ་དང་རྒོད་པའང་རྣམ་སྡོམ་པ། །དེས་ནི་ས་ཆེན་བསྐྱང་བྱས་ནས། །
ལྷ་འདི་རྣམས་ཀྱི་གཙོ་བོར་འགྱུར། །དག་པ་ཕྱོགས་སུ་ལྷུང་མིན་པ། །གྲོགས་དང་གྲོགས་མིན་གྱིས་མི་འཇོམས། །རྒྱལ་པོ་ཤིན་ཏུ་མཉམ་རྒྱལ་ཕྱིར། །ལྷ་ཡི་འཇིག་རྟེན་དག་ཏུ་རུང་། །རྒན་པོ་ལྷ་ལ་སྤྲོ་བ་ཆེ། །བླ་མ་མཆོད་པ་པོ་ཉིད་དང་། །བརྐམ་ཆགས་མེད་དང་
བརྟན་པོའི་བློ། །ལྷ་རྣམས་ནང་ན་ལྷང་ངེའོ། །ཕ་ཡིས་སྔོན་ནི་བྱིན་པ་དང་། །དེ་ཉིད་སླར་ཡང་སྟེར་བ་གང་། །འབྱུང་པོ་རྣམས་ཀྱང་མི་འཚེ་བ། །དེ་ནི་ལྷར་ནི་སྐྱེ་བར་འགྱུར། །སྦྱིན་དང་ཚུལ་ཁྲིམས་རྟག་ཏུ་བསྒྲིན། །ཆོས་སྨྲ་བ་དང་དབང་པོ་ཐུལ། །རྒྱལ་དེས་ས་འདི་
ལེགས་བཟུང་ནས། །ལྷ་ཡི་འཇིག་རྟེན་ས་བདག་འགྱུར། །ཆོས་པ་མིན་པ་འཛིན་མི་བྱེད། །ཆོས་པ་ལ་ཡང་དགའ་བར་བྱེད། །དེ་ནི་ཆོས་ཚུལ་ཀུན་དག་པས། །ལྷ་རྣམས་ཀྱི་ནི་མངའ་བདག་འགྱུར། །རྒྱལ་པོ་བུད་མེད་དབང་མི་འགྲོ། །རྟག་ཏུའང་བཟང་པོ་

རྣམས་ཀྱི་དབང་། །དྲི་མེད་བློ་གྲོས་སྦྱངས་པ་སྟེ། །ལྷ་ཡི་འཇིག་རྟེན་དག་ཏུ་སྐྱེ། །ཐམས་ཅད་ཚིག་ནི་འཛིན་མི་བྱེད། །འཛིན་བྱེད་བཟང་པོ་རྣམས་ཀྱི་ཚིག །བདུད་རྩི་དེ་ཉིད་ལེགས་འཐུང་བ། །ལྷ་ཡི་རྒྱབ་ཏུ་གནས་པ་པོ། །སྙན་གྲགས་ལ་ནི་འདོད་བྱེད་ཅིང་། །
རྫས་ཉིད་ལ་ནི་འདོད་ལྡན་མིན། །འདོད་པའི་དྲི་མ་ལས་གྲོལ་ཏེ། །འཐབ་བྲལ་རྣམས་ཀྱི་མངའ་བདག་འགྱུར། །ལོག་པར་ལྟ་བའི་བློ་མིན་ཞིང་། །དེ་ཉིད་ཀུན་དུ་ལྟ་ལ་དགའ། །ཤིན་ཏུ་ལྟ་དག་མི་གཡོ་བ། །འཐབ་བྲལ་རྣམས་ལས་ལྷག་པར་འགྱུར། །སྦྱིན་
དང་ཚུལ་ཁྲིམས་རྟག་ཏུ་ལྡན། །ཤེས་རབ་ཀྱིས་ཀྱང་རྟག་དེ་འགྲོ། །མ་ལུས་ས་ཆེན་རྣམ་རྒྱལ་དེ། །ཕྱི་མར་ལྷ་ཡི་མངའ་བདག་འགྱུར། །རྣ་བ་སྤྲོ་བ་བྱེད་པའི་མཆོག །ངག་ནི་སྙན་པར་གྱུར་པ་ཡིས། །རབ་ཏུ་ཚིམ་བྱེད་ས་བདག་ནི། །ཐ་མར་ལྷ་རྣམས་དག་
ཏུ་སྐྱེ། །ངག་གི་སླུ་བ་མེད་པ་གང་། །ལྷུན་པོ་བཞིན་དུ་མི་གཡོ་བ། །བདེན་པའི་ཐེམ་སྐས་ལ་འཛེགས་ནས། །ཐ་མར་དེ་ནི་ལྷ་རྣམས་ནང་། །གཞིས་རྣམས་ལ་ནི་འཕེལ་འགྲིབ་ཏུ། །གློ་བུར་དུ་ནི་མི་བྱེད་གང་། །མཆོག་ཏུ་སྒོ་བྱེད་རྒྱལ་པོ་དེ། །ངེས་
པར་ལྷ་ཡི་འཇིག་རྟེན་གནས། །མི་ཡི་ཁྱད་པར་དེ་ཉིད་ཤེས། །སྟོབས་དང་སྟོབས་མིན་ཤེས་པ་གང་། །དེ་ནི་བློ་སྟོབས་ལེགས་ལྡན་པས། །འཐབ་བྲལ་རྣམས་ཀྱི་བདག་པོར་འགྱུར། །གང་ཡང་ཁམས་གསུམ་ཕ་རོལ་གྱུར། །འདིར་ནི་དཀོན་མཆོག་
གསུམ་ཞེས་བརྗོད། །མི་བདག་གང་གིས་དེ་མཆོད་པ། །དེ་ནི་ལྷ་ཡི་ནང་དུ་སྐྱེ། །དུས་ངེས་པ་ནི་ལེགས་པར་སྟོན། །སྐྱེ་དགུ་རྣམས་ལ་ཕན་པར་དགའ། །རྒྱགས་དང་ཉམ་ང་བྲལ་བ་ཡི། །དེ་ནི་ལྷ་རྣམས་བདག་པོར་དྲན། །གཉིད་ཀྱི་དྲི་མ་ལས་རྣམས་གྲོལ། །
འདུ་འཛིའི་སྐྱོན་ནི་ཡོངས་སུ་སྤངས། །ཤེས་རབ་སྤྱོད་ཡུལ་ཡང་དག་ལྡན། །ངེས་པ་ཁོ་ནར་ལྷ་ཉིད་ཡིན། །ལེ་ལོའི་སྐྱོན་དང་བྲལ་བ་དང་། །རྟག་ཏུ་བརྟན་པ་ཕ་རོལ་གནོན། །དེས་ནི་ཉེས་པའི་ཚོགས་བཅོམ་ནས། །ཕ་རོལ་ཏུ་དེ་མཐོ་རིས་འགྲོ། །གང་ཞིག་གྲོགས་

པོ་བརྟན་པ་དང་། །རྟག་ཏུ་ལས་ནི་བྱེད་རྣམས་ཀྱི། །དམ་པའི་གྲོགས་ཀྱིས་ལེགས་ཡོངས་བསྐོར། །རྒྱལ་པོ་ལྷ་ཡི་བདག་པོར་འགྱུར། །གང་གིས་གཡོ་སྒྱུ་ཅན་མི་སྟེན། །གཡོ་སྒྱུ་ཅན་ནི་སྤངས་པས་ཀྱང་། །དེ་ནི་བསྒྲུབ་བྱའི་ཡུལ་ལས་གྲོལ། །ལྷ་རྣམས་ལས་ནི་
ལྷག་པར་འགྱུར། །ཁྲོ་དང་རྒོད་བག་རྣམ་པར་སྤངས། །གང་ཡང་སྡིག་ལ་དགའ་མི་འགྱུར། །དེས་ནི་སྡིག་རྫབ་ལེགས་བཀྲུས་ནས། །རྟག་ཏུ་ལྷ་ཡི་བདག་པོར་འགྱུར། །ཟས་དང་སྐོམ་ལ་ཆགས་པ་མིན། །དགེ་བ་རྣམས་ལ་རྟག་ཏུ་ཆགས། །དམ་པ་ཆོས་ལེགས་
མཐོང་བ་དེ། །བློ་རབ་རྒྱལ་ནས་ལྷག་པར་མཛེས། །ལེགས་པར་བསམས་པ་སེམས་པར་བྱེད། །དམ་པའི་ཆོས་ལ་འཇུག་པར་བྱེད། །དམ་པའི་ཆོས་ཀྱི་གདམས་ངག་གིས། །ཇི་བཞིན་ལྷ་ཡི་ནང་དུ་འགྲོ། །དོན་སྐོར་མིན་དང་མྱུར་བར་ཡང་། །གང་ཞིག་ཆོས་ཀྱི་རྗེས་སུ་འཇུག །
སྡུག་བསྔལ་དེ་ནི་མྱུར་གྲོལ་ནས། །ལྷ་ཡི་འཇིག་རྟེན་དུ་ཉེར་འགྲོ། །མི་བདག་གང་ཡང་ཆོས་ཀྱིས་ནི། །རྟག་ཏུ་སྐྱེ་དགུ་ཡོངས་སྐྱོང་བ། །རབ་ཏུ་བསྔགས་པའི་ཆོས་བྱེད་བདག །ལྷ་ཡི་འཇིག་རྟེན་ས་བདག་འགྱུར། །དགེ་བའི་ཆོས་བཅུ་བདག་གིས་ནི། །གང་བཤད་
དེ་ཉིད་མཐོང་བ་ཡིས། །གང་དེ་བྱེད་པའི་བློ་ལྡན་ནི། །ལྷ་ལས་ལྷག་པར་མཛེས་པ་ཡིན། །རྒྱུ་དང་རྐྱེན་ནི་ལེགས་པར་མཐོང་། །ལམ་དང་ལམ་མིན་དེ་བཞིན་ཏེ། །དེ་ནི་ལྟ་བའི་དྲི་བྲལ་ནས། །དེ་བློ་ལྷག་པར་ཁྱད་པར་འགྲོ། །ཇི་ལྟར་འོས་པར་ས་བདག་གི། །ལྷ་གང་
དག་ནི་མཆོད་བྱེད་པ། །ལྷ་རྣམས་མཆོད་པས་དེ་ལྟར་ཡང་། །ལྷ་རྣམས་ལས་ནི་ལྷག་པར་འགྱུར། །རྙོག་པ་མེད་པའི་ཡིད་ཀྱིས་ནི། །བུ་དང་བུ་མོ་འཛིན་བྱེད་པ། །རང་གི་ཆུང་མས་ཆོག་ཤེས་དེ། །ལྷ་རྣམས་ཀྱི་ནི་བདག་པོར་འགྱུར། །བྱིས་པ་ཐམས་ཅད་འཕྲོག་བྱེད་པའི། །ཡུལ་རྣམས་
གྱིས་ནི་འཕྲོག་མི་འགྱུར། །རྟག་ཏུ་ཚུལ་ཁྲིམས་ཀྱིས་བསྲུངས་པའི། །ཚུལ་ཁྲིམས་ལྡན་དེ་ལྷ་ཡུལ་འགྲོ། །གདུལ་བར་མི་ནུས་རྟག་ཏུ་སྤངས། །སྟེན་པ་གང་ཡང་ཆོས་བྱེད་ལ། །དམ་པའི་ཆོས་སེམས་གཙང་མ་ནི། །ལྷར་འོས་པ་ཡི་ཕུན་ཚོགས་ལྡན། །རིགས་པས་བརྩམས་

པའི་ཆོས་ཀྱིས་འདི། །ས་སྐྱོང་བ་ཡི་བདག་པོ་འདི། །ས་གཞི་མ་ལུས་ཀུན་བསྔགས་ནས། །འཐབ་བྲལ་གྱི་ཡང་བདག་པོར་འགྱུར། །དེ་ལྟར་འཐབ་བྲལ་གྱི་མངའ་བདག་དེ་མངོན་པར་མཐོང་ནས་ངང་པའི་རྒྱལ་པོས་དུས་བཟངས་ཀྱིས་སྐྱེ་བ་གཞན་དྲན་པར་གྱུར་པས་དང་སྨོན་ལམ་
གྱིས་ཀྱང་དེར་སྐྱེས་པས་ན། གཙུག་ཏོར་ཅན་གྱིས་གསུངས་པ་རྣམས་མུ་སུ་ལུན་དྷ་དེ་ཀུན་ཏུ་དགའ་བར་བྱ་བའི་དོན་དུ་བསྟན་པ་ཡིན་ནོ། །གནས་འདི་ནི་དེ་ལྟར་རྙེད་པ་མ་ཡིན་གྱི་ཆོས་ཆེན་པོའི་ཁྱད་པར་གྱིས་གནས་འདི་འཐོབ་པར་འགྱུར་བ་ཡིན་ནོ། །དེ་ཐོབ་ནས་ཀྱང་གང་དག་བག་མེད་
པས་མི་ཕྲོགས་པ་དེ་ནི་ཕྱིས་འགྱོད་པས་གདུང་བར་མི་འགྱུར་རོ། །འཆི་བའི་དུས་ན་ཡང་དམྱལ་བའི་ཕོ་ཉ་བཞིན་རྣམ་པར་སྒྱུར་བར་བྱེད་པ་རྣམས་འདིའི་སྔུན་ན་ངེས་པར་གནས་པར་མི་འགྱུར་རོ། །དེ་འཐབ་བྲལ་གྱི་བདག་པོ་ཁྱོད་ནི་བག་མེད་པ་མ་ཡིན་ཞིང་བག་མེད་པས་རྒྱུ་བ་མ་ཡིན་
པས་ཁྱོད་ངའི་སྒྲ་གང་ཐོས་པར་གྱུར་ནས་ཡུལ་རྣམས་ཐམས་ཅད་ཡོངས་སུ་སྤངས་ཏེ། ཆོས་ཉན་འདོད་པས་གདུངས་ནས་འདིར་འོངས་སོ། །གང་དག་སྡུག་བསྔལ་བས་ཆོས་ལ་སྤྱོད་པ་དེ་དག་ནི་བདེ་བར་སྒྲུབ་པ་ཡིན་ལ། གང་དག་བག་མེད་པས་ཡོངས་སུ་ཕྲོགས་པས་ན།
ལྷའི་ཡུལ་རྣམས་ལ་ལོངས་སྤྱོད་པར་བྱེད་པ་དེ་དག་ནི་སྡུག་བསྔལ་བ་ཡིན་ནོ། །དེ་ལ་མུ་སུ་ལུན་དྷ་ཁྱོད་འདོད་པའི་དབང་གིས་མི་འགྲོ་བ་གང་ཡིན་པ་དེ་ནི་འདིར་བདེ་བ་ཡིན་ལ། ལྷ་གཞན་ཡང་གང་དག་ཁྱོད་ལ་འཐུན་པས་རྗེས་སུ་འབྲེལ་བ་རྣམས་ནི་མུ་སུ་ལུན་དྷ་དེ་དག་རྣམས་ཀྱང་སྐྱེ་བ་འདི་ལ་
དགེ་བའི་བཤེས་གཉེན་བསྟེན་པ་ལས་ན་རྟག་ཏུ་བདེ་བར་འགྱུར་བ་ཡིན་ནོ། །སྡིག་པའི་གྲོགས་པོ་རྣམས་སྟེན་པར་མི་བྱེད་པ་ཡང་སྟེ། དེ་ལ་མུ་སུ་ལུན་དྷ་ཁྱོད་ནི་དེ་དག་ཉིད་བྱེད་པ་ཡིན་པས་ལྷ་འདི་དག་རྣམས་ལ་གཅེས་པར་བྱ་བ་ཡིན་ནོ། །དེས་དེ་དག་རྣམས་གཉི་ག་ཡང་ཇི་ལྟ་བ་བཞིན་དུ་མྱ་ངན་
ལས་འདས་པའི་མཐར་ཐུག་པའི་བདེ་བ་རྣམས་འབྱུང་བར་འགྱུར་རོ། །གང་གི་ཕྱིར་ཁྱེད་རྣམས་ཐམས་ཅད་ཀྱང་རང་གི་ས་ལ་འགྲོ་བར་གྱིས་ཤིག །ཁོ་བོ་ཡང་ལྷ་གཞན་གང་དག་བག་མེད་པར་འགྱུར་བ་དེ་དག་རྣམས་ཀྱི་བག་མེད་པ་གདུལ་བའི་དོན་དུ་བདག་གིས་བརྩོན་པ་གང་དག་བྱའོ། །དེ་སྐད་

ཅེས་བརྗོད་ནས་རིའི་ཕྲེང་བ་དེའི་ནམ་མཁའ་ལ་འཕགས་པར་གྱུར་ཏོ། །མུ་སུ་ལུན་དྷ་ཡང་དེས་བཤད་པ་ལ་མངོན་པར་དགའ་བར་གྱུར་ནས། ལྷ་རྫས་ཀྱི་ཁང་བཟངས་དེ་ཉིད་ལ་མངོན་པར་ཞོན་ཞིང་། ལྷ་དེ་དག་རྣམས་ཀྱིས་དེ་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་སོ། །
ལྷ་གཞན་དེ་དག་རྣམས་ཀྱང་ལྷན་ཅིག་རྗེས་སུ་སྤྱོད་པའི་ལྷ་དེ་དག་རྣམས་ཉིད་ཀྱིས་ཡོངས་སུ་བསྐོར་ནས་རྩེ་མོ་སྟོང་པའི་རིའི་ཕྲེང་བའི་རི་གང་ཡིན་པའི་རི་ལ་རྩེ་བར་བྱེད་དེ། དེ་དག་ཁོ་ན་བཞིན་དུ་བག་མེད་པའི་དུག་གིས་ཀུན་དུ་རྨོངས་པར་གྱུར་ཅིང་། ཡུལ་སྲེད་པས་ཉེ་བར་བཅོམ་པས་ནགས་དང་
ཉེ་བའི་ནགས་དང་རྫིང་བུ་དང་པད་མའི་ནགས་དང་། མཚོ་ཆེན་པོ་རྣམས་དང་དེ་ཡང་དཔག་བསམ་གྱི་ཤིང་གི་ནགས་རྣམས་ལ་ཡང་དེ་ཁོ་ན་བཞིན་དུ་ཕན་ཚུན་དུ་གྲོགས་ཀྱི་བྱ་བ་དང་ལྡན་པས་དགའ་བར་བྱེད་དོ། །རྩེ་བར་ཡང་བྱེད་པ་ནི་ལྷ་རྫས་རྔ་སྐད་ཡན་ལག་ལྔ་དང་ལྡན་པ་དཔེ་མེད་པས་
ཟས་སྐོམ་གྱི་ཆུ་ཀླུང་རྣམས་ལ་དགའ་བར་བྱེད་དོ། །ལྷ་རྣམས་རྩེ་བ་ཡང་དུས་ཐམས་ཅད་ཀྱི་མེ་ཏོག་དང་། འབྲས་བུ་དང་བྱ་དག་སྒྲ་ཀུན་ནས་སྒྲོགས་པ་ཕུན་སུམ་ཚོགས་པ་རྣམས་ལ་རང་གི་ལས་ཀྱིས་སྤྲུལ་པའི་བདེ་བ་མཆོག་ལ་ཉེ་བར་ལོངས་སྤྱོད་པར་བྱེད་དེ། ཡིད་དུ་འོང་བར་འགྱུར་བ་
བྱས་ཤིང་བསགས་པའི་ལས་རྣམས་ཇི་སྲིད་དུ་ཟད་པར་མ་གྱུར་གྱི་བར་གྱི་དུས་དེ་སྲིད་དུའོ། །གང་གི་ཚེ་ཟད་པར་གྱུར་པ་དེའི་ཚེ་ཇི་ལྟར་བྱས་པའི་རང་གི་ལས་རྣམས་ཀྱིས་དམྱལ་བ་དང་ཡི་དགས་དང་དུད་འགྲོར་སྐྱེ་བར་འགྱུར་རོ། །གང་ཡང་མི་རྣམས་དང་སྐལ་བ་འཐུན་པར་གྱུར་པ་མི་
རྣམས་ཀྱི་ནང་དུ་སྐྱེས་ན། དེ་མཆོག་ཏུ་སྐྱིད་དེ་བར་འགྱུར་རོ། །རྒྱ་མཚོའི་ངོས་རྣམས་སུའམ་འབབ་ཆུ་རྣམས་ཀྱིའམ་ཚོང་པའམ་སེམས་སྟོབས་དང་ལྡན་པ་དང་རྒྱལ་པོ་རྣམས་ཐམས་ཅད་ཀྱིས་ཀྱང་རྒྱ་མཚོའི་ངོས་དེ་ཉིད་ལ་རབ་ཏུ་རྒྱུ་བར་མི་བྱེད་པ་དང་ལོངས་སྤྱོད་ཆེ་བའི་མཆོག་དང་ལྡན་པ་དང་སྐྱེ་བོ་ཐམས་
ཅད་ཕུན་སུམ་ཚོགས་པར་འགྱུར་ཞིང་འཐུན་པ་དང་ཡིད་དུ་འོང་བ་དང་ལྡན་པར་ལས་དེའི་རྒྱུ་འཐུན་པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་པ་ན། འཐབ་བྲལ་གྱི་ལྷ་རྣམས་ཀྱི་ས་རྟག་ཏུ་

བདེ་བ་ཞེས་བྱ་བ་ཇི་ལྟ་བ་བཞིན་དུ་ཡོད་པ་དེས་ཐོས་པ་ལས་བྱུང་བའི་ཤེས་རབ་ཀྱིས་ཤེས་སོ། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བ་ནི། གང་གིས་སྲོག་གཅོད་པ་དང་མ་བྱིན་པར་ལེན་པ་དག་བྱེད་པར་མ་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་
གཡེམ་པ་ཡང་ཐམས་ཅད་དུ་སྤངས་པར་གྱུར་པས་ཅུང་ཟད་ཅིག་ཀྱང་བུད་མེད་ཀྱི་གཟུགས་ལ་མངོན་དུ་ལྟ་བ་དང་སེམས་པར་མི་བྱེད་དོ། །ཡིད་ཀྱིས་ཀུན་དུ་རྟོག་པར་མི་བྱེད་དོ། །ཀྱེ་གཟུགས་འདི་ནི་ཇི་ལྟར་འདོད་ཆགས་དང་བཅས་པ་རྣམས་ལ་མཆོག་ཏུ་སྡུག་པ་ཡིན་ཞིང་། བུད་མེད་ཆེ་གེ་
མོ་ནི་མཆོག་ཏུ་བསྟེན་པར་མཛེས་པར་གྱུར་པ་སྟེ། གཟུགས་འདི་ནི་མཆོག་ཏུ་དགའ་བ་ཡིན་ཞེས་པ་འདི་ནི་ཚུལ་བཞིན་མ་ཡིན་པ་ཡིད་ལ་བྱེད་པས་རབ་ཏུ་རྣམ་པར་རྟོག་པར་བྱེད་པ་ཡིན་པ་དང་ཡིད་འདོད་ཆགས་དང་ལྷན་ཅིག་ཏུ་འགྲོགས་པར་གྱུར་པས་དང་། སེམས་ཀུན་དུ་བཅོམ་པས་དང་ལམ་དེར་
ཞུགས་པ་ཡིན་པའི་ཡིད་ལ་བྱེད་པ་དེ་ལྟ་བུ་རྣམས་ཀྱི་འདོད་ཆགས་དང་ལྷན་ཅིག་འགྲོགས་པའི་སྡུག་བསྔལ་ཡོང་ཡོངས་སུ་སྤོང་བར་བྱེད་དོ། །བདག་ཉིད་ཀྱི་རྣམས་ཀྱང་ཡོངས་སུ་སྤོང་བར་བྱེད་དེ་སྐྱུག་བྲོ་བ་ཡིན་པར་ལྟ་བར་བྱེད་དོ། །དགའ་བ་སྐྱེད་པར་མི་བྱེད་དོ། །ས་རྣམས་སྐྱེད་པར་མི་བྱེད་
པའི་བློ་སྲེད་པར་བྱེད་དོ། །གཞན་དག་རྣམས་ལ་ཡང་དེ་ལྟར་འདོད་པ་ལོག་པར་གཡེམ་པ་ཉེ་བར་སྟོན་པར་བྱེད་དོ། །ལམ་ལ་རབ་ཏུ་འགོད་པར་བྱེད་དོ། །འདོད་པ་རྣམས་ཀྱི་ཉེས་དམིགས་རབ་ཏུ་སྟོན་པར་བྱེད་དོ། །སྲེད་པ་རྣམས་ལ་ཡང་ཀུན་དུ་འདོད་ཆགས་པར་མི་བྱེད་དོ། །དེ་ལྟར་
འདོད་པ་ལ་ལོག་པར་གཡེམ་པ་རྣམ་པར་སྤོང་བར་བྱེད་པ་དེ་ནི་ལུས་ཀྱི་ལས་ཀྱི་མཐའ་རྣམས་མཆོག་ཏུ་དག་པ་ཡང་དག་པའི་ལྟ་བ་ཅན་བརྐམ་ཆགས་མེད་པར་འགྱུར་བ་དེའི་ལུས་ཞིག་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་པ་འཐབ་བྲལ་གྱི་ལྷ་རྣམས་ཀྱི་ས་རྟག་ཏུ་བདེ་
བར་སྐྱེའོ། །དེ་ལ་སྐྱེས་པར་གྱུར་པ་དེ་ཡང་སྲིད་པ་བར་མ་དོ་ནས་བཟུང་ནས་དབང་པོ་ལྔ་པོ་རྣམས་སྒྲ་དང་རེག་བྱ་དང་རོ་དང་གཟུགས་དང་དྲི་ཕུན་སུམ་ཚོགས་པས་ཚིམ་པར་བྱེད་དེ། དགེ་བའི་ལས་རྒྱ་ཆེན་པོ་དང་ལས་རྒྱུན་མི་འཆད་པར་བྱས་པས་ལེགས་པར་སྐྱེ་བ་ཡིན་ཏེ། དེའི་རྗེས་

ཐོགས་ལ་འདི་སྐྱེ་བའི་གནས་རྣམས་ཀྱང་གསུམ་དུ་སྐྱེ་བར་འགྱུར་བ་ཡིན་ཏེ་རྫུས་ཏེ་སྐྱེ་བ་ལ་འདི་ལྟ་སྟེ། པད་མའི་སྙིང་པོ་ལ་ཡང་སྐྱེ་བར་འགྱུར་བ་དང་ཨུད་པ་ལའི་ཟེ་བའི་དབུས་སུ་དང་མན་དཱ་རའི་མེ་ཏོག་དག་གི་ཡང་དབུས་སུའོ། །དེ་ལ་གང་ཡང་ཨུད་པ་ལའི་ཟེ་བའི་དབུས་སུའམ། མན་
དཱ་ར་བའི་མེ་ཏོག་གི་དབུས་སུ་ཡང་སྐྱེས་པར་གྱུར་པ་རྣམས་ནི་དེ་དག་གི་གཟི་བརྗིད་ཀྱིས་དེ་དག་གི་ཁ་དོག་རྣམས་དེ་དག་དང་ཞད་འདྲ་བར་འགྱུར་བ་ཡིན་པ་ལ་གལ་ཏེ་ན་ལེ་བརྒན་ནོ། །གལ་ཏེ་ན་སྔོན་པོའི་འོད་དང་ལྡན་པར་འགྱུར་བ་ཡིན་ནོ། །དེ་བཞིན་དུ་ཁ་དོག་སྣ་ཚོགས་པ་རྣམས་སུ་
འགྱུར་རོ། །ཨུད་པ་ལ་དེ་ཇི་ལྟ་བ་ཁོ་ན་བཞིན་དུ་རིན་པོ་ཆེ་བདུན་གྱིས་རྣམ་པར་བཀྲ་བར་གྱུར་པའི་ལུས་སུའོ། །དེ་ལ་ཇི་ལྟར་ན་རིན་པོ་ཆེ་བདུན་གྱིས་རྣམ་པར་བཀྲ་བར་གྱུར་པ་ཡིན་ན། གང་དག་ནི་བཻ་ཌཱུརྱའི་མདོག་གི་སྤུ་དང་དེ་བཞིན་དུ་མིག་འབྲས་དག་ཀྱང་ངོ་། །དངུལ་གྱི་མདོག་གི་སེན་
མོ་དང་དམར་པོ་དང་ལྡན་པའི་མདོག་ཅན་མུ་ཏིག་གི་སོ་དང་འཛམ་བུ་ཆུ་བོ་དག་པའི་གསེར་གྱི་མདོག་གི་ལུས་དང་། ཨིན་དྲ་ནཱི་ལའི་མདོག་དང་མཚུངས་པར་གྱུར་པའི་སྤུའི་ཕྲེང་བ་དང་ས་ར་ཀ་འདྲ་བའི་བྱུག་པ་དང་ལྡན་པར་རྣམ་པ་དུ་མར་འདི་ལུས་རྣམ་པར་བཀྲ་བར་བྱས་པ་ནི་ལས་གང་ཡིན་པ་དེས་
པད་མའི་སྙིང་པོ་ལས་སྐྱེའོ། །དེ་ལ་དེ་དག་རྣམས་ཕལ་ཆེར་ནི་དེ་དག་དང་མཚུངས་པའི་ཁ་དོག་འཛམ་བུའི་ཆུ་བོའི་གསེར་སྦྱངས་པ་ཡིན་ནོ། །སྐྲ་རྣམས་ནི་ཨིན་དྲ་ནཱི་ལ་དང་མཚུངས་པའི་མདོག་དང་པད་མ་རཱ་ག་དང་ཆ་འདྲ་བའི་མཆུ་དང་མུ་ས་ར་དང་འདྲ་བའི་མིག་འབྲས་དང་། པད་མ་རཱ་ག་དང་
ཞད་འདྲ་བའི་སེན་མོ་དང་མཆོག་ཏུ་གནག་པའི་སྤུའི་ཕྲེང་བར་གྱུར་པ་མུ་ས་ར་དང་འདྲ་བ་རྣམས་སོ། །དེ་ལ་ཅུང་ཟད་ཀྱང་མ་མཐོང་བ་རྣམས་དཔེས་གཞལ་བ་ཡིན་ནོ། །གཞན་གང་དག་མན་དཱ་ར་བའི་མེ་ཏོག་གི་ནང་དུ་སྐྱེ་བར་འགྱུར་བ་དེ་དག་རྣམས་ནི་སྣ་ཚོགས་པའི་གཟུགས་དང་ཆ་བྱད་དག་གིས་
རྣམ་པར་བཀྲ་བར་བྱས་པར་གྱུར་པ་ཡང་དེ་དག་ལ་བསྟེན་པའི་དབང་གིས་སོ། །དཔེར་ན་ཅུང་ཟད་ཙམ་ཞིག་འདྲ་བར་གྱུར་པ་ནི་གང་ཞིག་མངོན་དུ་ཇི་ལྟ་བ་བཞིན་གྱི་རྣམ་པས་སྲིན་བུ་དག་ཇི་ལྟར་སྙིང་པོར་བརྗོད་པ་ལས་སྐྱེ་བར་འགྱུར་བ་ན་དེ་རྣམ་པ་དེ་ལྟ་བུ་ཉིད་ཀྱི་ཁ་དོག་ཏུ་འགྱུར་རོ། །འདིའི་

ཡོན་ཏན་ཡང་བསྟེན་གྲོགས་ཀྱིས་བྱས་པ་ཁོ་ན་ཡིན་ལ། བསྟེན་གྲོགས་ཀྱང་དགེ་བ་དང་མི་དགེ་བར་ཡིན་ནོ། །དེའི་ཕྱིར་ཐམས་ཅད་དུ་བསྟེན་གྲོགས་བྱས་པ་ལས་ཐམས་ཅད་འགྱུར་རོ། །དེ་ལས་སྐྱེས་པའི་ལྷ་དེ་དག་རྣམས་ནི་བདེ་བ་རྒྱ་ཆེན་པོ་རྣམས་ཀྱིས་ཡོངས་སུ་གང་
བའི་མཐོ་རིས་ཀྱི་བདེ་བས་འཕེལ་བར་འགྱུར་བ་ན། རབ་ཏུ་རྒྱ་ཆེ་བར་གྱུར་པའི་ལྷ་རྫས་ཕལ་ཆེ་བ་རྣམས་ཀྱིས་ཡུད་ཙམ་ཡུད་ཙམ་ལ་ཡང་དུ་མར་ཤིན་ཏུ་མང་བའི་ལྷ་རྫས་ཀྱི་བྱེ་བྲག་རྣམས་ཀྱི་དེ་དག་རྣམས་ཀྱི་བདེ་བ་རྣམས་ནི་རྣམ་པ་ཐམས་ཅད་ཀྱི་ཐམས་ཅད་དུ་ཕྱོགས་གཅིག་ཀྱང་རྟོགས་པར་
བྱེད་པའི་དཔེས་གཞལ་བར་བྱ་བ་དང་བྲལ་བ་ཡིན་ནོ། །དེ་དག་རྣམས་ལས་ཅུང་ཟད་ཅིག་མངོན་པར་བརྗོད་པ་ཡིན་ནོ། །དེ་ཡང་དཔེར་ན་རྒྱ་མཚོའི་ཆུ་རྣམས་ལས་ཐིགས་པ་གཅིག་ཉིད་ཡིན་པ་དེ་བཞིན་དུ་འདི་ཡང་ཡིན་ནོ། །གང་དག་གིས་ལེགས་པར་བྱས་པའི་ལས་རྣམས་བྱས་
པར་གྱུར་པ་རྣམས་དགེ་བའི་ལས་རྣམས་ལ་དེ་རྟག་པ་ཁོ་ནར་རབ་ཏུ་སྤྲོ་བར་འགྱུར་བའི་རྒྱུ་གང་གིས་ལེགས་པར་བྱས་པའི་ལས་དང་འབྲས་བུ་དག་རྟོགས་པར་འགྱུར་བ་ཡིན་ནོ། །ཉེ་བར་ལོངས་སྤྱད་པར་བྱ་བ་རྣམས་ལ་མངོན་པར་ཞེན་པས་ཀྱང་ལེགས་པར་བྱས་པའི་ལས་རྣམས་བྱེད་པ་
ཡིན་ནོ། །དེ་བཞིན་དུ་ཐར་པ་ལ་ཡང་བརྩོན་པའི་བློ་ཡང་ཡིན་ཏེ། སྲིད་པ་རྣམས་ན་སྡུག་བསྔལ་དུ་མས་མངོན་པར་བཅོམ་པ་རྣམས་དང་སྲེད་པའི་ཡུལ་དག་གིས་ཉེ་བར་བཅོམ་པ་རྣམས་ལ་སྲིད་པ་ན་བདེ་བ་ཅུང་ཟད་ཅིག་ཙམ་ཡང་ཡོད་པ་ཡིན་ནམ། དེ་ལ་རྒྱུ་འདི་དག་གིས་ལེགས་པར་
བྱས་པའི་ལས་རྣམས་ཀྱི་འབྲས་བུ་བསྟན་པ་ཡིན་གྱི། འདིར་སྲིད་པ་ལ་མངོན་པར་ཞེན་པར་གྱུར་པ་འདི་ལས་ནི་ལྷ་རྣམས་ཀྱི་བདེ་བ་མངོན་པར་བསྔགས་པ་མ་ཡིན་ནོ། །དེ་ནས་ལྷའི་ས་དེ་དག་ཏུ་སྐྱེས་པའི་ལྷ་རྣམས་ནི་རྟག་པ་ཉིད་དུ་ལྷ་རྫས་ཀྱི་འདོད་པའི་ཡོན་ཏན་ལྔས་རྩེ་བར་གྱུར་པ་དང་།
ལྷ་མོའི་འགྲོ་བ་པ་བརྒྱ་སྟོང་རྣམས་ཀྱིས་གླུ་ཉེ་བར་བླངས་པར་གྱུར་པ་རྣམས་ནི་ལྷ་རྫས་ཀྱི་ནགས་དང་ཉེ་བའི་ནགས་དང་མཚོ་དང་མཚོ་བྲན་དག་ཏུ་ཡང་ཉེ་བར་ལེན་པར་བྱེད་དོ། །ཕན་ཚུན་དུ་གྲོགས་སུ་གྱུར་པ་རྣམས་རང་གི་ལས་ལ་ལོངས་སྤྱོད་པ་དང་ལྡན་པས་རི་ངོས་རྣམས་དང་རི་བོ་དང་། མཚོ་

བྲན་དང་པད་མའི་རྫིང་བུ་དང་ནགས་དེ་དག་རྣམས་ཀྱི་བདེ་བ་རྒྱ་ཆེན་པོ་རྣམས་ལ་ལོངས་སྤྱོད་པར་བྱེད་པས་ལྷ་དང་ལྷ་མོའི་ཚོགས་ཀྱི་བདེ་བ་དང་ཉེ་བར་ལྡན་པ། རང་གི་འོད་དང་ལྡན་པའི་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་དག་རྣམས་དང་དགའ་བར་བྱེད་དོ། །ཡུལ་
ནས་ཡུལ་དང་ཉེ་བའི་ནགས་ནས་ཉེ་བའི་ནགས་དང་ཆེས་དགའ་བར་གྱུར་པ་ནས་ཆེས་དགའ་བར་གྱུར་པ་དག་དང་རིན་པོ་ཆེ་བདུན་གྱི་རང་བཞིན་གྱི་རྩེ་མོ་རྣམས་ནས་རིན་པོ་ཆེ་བདུན་གྱི་རང་བཞིན་གྱི་རྩེ་མོ་རྣམས་སུ་འདོད་པའི་སྲེད་པ་རྣམ་པར་ངོམས་པ་མེད་པ་རྣམས་ཀྱིས་རྣམ་པར་རྒྱུ་
བར་བྱེད་དོ། །དེ་དག་གིས་སྔ་ན་མེད་པའི་པད་མའི་རྫིང་བུ་མཛེས་པ་རྣམས་རྟག་ཏུ་ལེགས་པར་མཐོང་བ་དང་གླུའི་སྒྲ་རྣམས་ལ་ཡང་ཤིན་ཏུ་ཆགས་པ་དང་། ལྷ་རྫས་ཀྱི་རོ་ལ་མྱོང་བར་བྱེད་པ་དང་ལྷ་རྫས་ཀྱི་གོས་དང་སྨད་གཡོགས་དག་གིས་ཁྱབ་པར་བྱས་པ་དང་། ལྷ་རྫས་ཀྱི་དྲི་ཡིད་ཀྱི་རྗེས་
སུ་འཐུན་པ་རྣམས་སྣོམ་པར་བྱེད་པས་ཀྱང་དུས་ཡུན་རིང་བ་ལས་ཀྱང་རིང་བར་འགྲོ་བར་བྱེད་དོ། །འདོད་པ་ཀུན་ནས་སད་པ་དེ་དག་རྣམས་ནི་ཕན་ཚུན་དུ་སྙིང་ཀུན་ནས་ཆགས་པ་རྣམས་ཡིན་ནོ། །ཕན་ཚུན་དུ་སྙིང་ཀུན་ནས་ཆགས་པ་དེ་དག་རྣམས་ལ་འདོད་པ་ལས་ལེགས་པར་སད་པར་
བྱེད་པ་ཞེས་བྱ་བའི་བྱ་དག་གིས་ཚིགས་སུ་བཅད་པ་བརྗོད་པ་ཇི་ལྟར། ཐམས་ཅད་ཐམས་ཅད་འབྱུང་ཐམས་ཅད། །ཕུང་པོ་གསུམ་དུ་ངེས་པར་འགྱུར། །བྱིས་པ་རྣམས་ཀྱང་འཁོར་བ་ལ། །ཀུན་ནས་སྐྱོ་བ་སྐྱེ་བའང་མིན། །ཐམས་ཅད་ཐམས་ཅད་དུ་ཐམས་ཅད། །དུ་མའི་ཐབས་
ཀྱིས་རབ་བརྩོན་པས། །འཆི་བདག་དུས་ནི་མི་བཟད་པ། །བྱུང་བ་ལ་ནི་སྐྱབས་ཡོད་མིན། །རྒྱུན་ཆད་བདེ་བ་ཐམས་ཅད་རྣམས། །སྡུག་བསྔལ་འབྱུང་གནས་ཆེན་པོ་རྣམས། །འབྲེལ་བ་ཐམས་ཅད་འབྲལ་བྱེད་པ། །འཆི་བདག་ཞེས་ནི་མངོན་པར་བརྗོད། །འབྱུང་གནས་
འཇིགས་པར་ཉེར་ཁྲིད་པའི། །སྡུག་བསྔལ་རྣམས་ནི་རྒྱ་མཚོ་མཚུངས། །བློ་རྣམས་རྣམ་པར་རྨོངས་བྱེད་པ། །འཆི་བདག་ཅེས་ནི་འདི་ལ་བརྗོད། །སྲོག་དང་རེ་ཐག་ཀུན་ནས་གཅོད། །དབང་པོ་རྣམས་ཀྱང་འཇིགས་བྱེད་པ། །སེམས་ཅན་ཀུན་གྱིས་བཟློག་མི་ནུས། །

འཆི་བདག་ཅེས་ནི་མངོན་པར་བརྗོད། །འབྱུང་པོ་ཀུན་གྱིས་ཐུབ་མིན་དང་། །ལས་རྣམས་ཀུན་གྱིས་རྒྱལ་མིན་པས། །སེམས་ཅན་ཐམས་ཅད་རྣམ་འཇོམས་པ། །འཆི་བདག་ཅེས་ནི་འདི་ལ་བརྗོད། །ངེས་པ་ཁོ་ནར་མྱོང་འགྱུར་དང་། །ལུས་ཅན་ཐམས་ཅད་
ལྟུང་བའི་མཐའ། །རིགས་འཐུན་འཇིག་པར་བྱེད་པ་འདི། །འཆི་བདག་ཅེས་ནི་མངོན་པར་བརྗོད། །ལྷར་བཅས་གནོད་སྦྱིན་དྲི་ཟ་དང་། །ཤ་ཟ་ཀླུ་དང་སྲིན་པོ་ཡང་། །དུས་ཀྱི་འཁོར་ལོས་རྣམ་འཇོམས་པ། །འཆི་བདག་ཅེས་ནི་བརྗོད་པ་ཡིན། །མ་བསྡམས་པ་དང་བག་
མེད་པ། །ལུས་ཅན་ཀུན་ལ་མེ་དང་འདྲ། །ཁྲོ་བ་ཡང་ནི་ཕྱིར་མི་ཟློག །འཆི་བདག་ཅེས་ནི་འདི་ལ་བརྗོད། །ཕུང་པོ་སྐྱེ་མཆེད་འཇིག་པ་དང་། །ཚེ་དང་དྲོད་དང་ཅི་སྟེ་སེམས། །དུས་ཀྱི་ཆོས་ནི་ཤུགས་པོ་ཆེ། །འཆི་བདག་ཅེས་ནི་བརྗོད་པ་ཡིན། །དེ་ལ་འདི་དག་མྱུར་
རྒྱུག་པས། །ལུས་ཅན་རྣམས་ནི་ལོག་པར་འཁྲིད། །དགེ་ལེགས་དག་ནི་འབད་པར་གྱིས། །ཡིད་ནི་བག་མེད་པར་མ་བྱེད། །དེ་ལྟར་དུས་སུ་ལེགས་པར་འབོད་པ་ཞེས་བྱ་བའི་བྱས་བག་མེད་པ་བག་མེད་པར་སྤྱོད་པར་བྱེད་པའི་ལྷ་དེ་དག་རྣམས་ལ་འཆི་བདག་གི་འཇིགས་
པ་བདེན་པ་གྱུར་པ་ངེས་པར་མྱོང་བར་བྱ་བ་རྣམས་སྟོན་པར་བྱེད་དོ། །དེ་དག་རྣམས་དེ་ལྟར་ཐོས་པར་གྱུར་ཡང་ལྷ་བག་མེད་པར་སྤྱོད་པ་དེ་དག་རྣམས་ཇི་ལྟར་མ་ཐོས་པ་ཁོ་ན་བཞིན་དུ་སྐྱོ་བར་ཡང་མི་འགྱུར་ཏེ་རང་བཞིན་གྱིས་ཀྱང་དབང་པོ་རྣམས་ནི་གཡོ་བ་ཡིན་ལ། ཁྱད་པར་
དུ་ཡང་གང་དག་བདེ་སྐྱིད་ཅན་དེ་དག་རྣམས་ནི་ཆེས་ཀྱང་གཡོ་འགྱུར་ཅན་ཡིན་པའི་ཕྱིར་དང་། ཁྱད་པར་དུ་ཡང་ལྷ་རྣམས་ནི་རྟག་ཏུ་བདེ་བས་རྒྱུ་བ་ཡིན་པའི་ཕྱིར་རོ། །དེ་ལ་རྒྱུ་འདི་དག་གིས་ན་ལྷ་དེ་རྣམས་ལ་ཡང་དག་པ་དང་། དེ་ཁོ་ན་དང་ཕན་པ་དང་སྙིང་པོ་དང་ཇི་ལྟ་བའི་དོན་རྣམས་བརྗོད་
པར་གྱུར་པ་ན་ཡང་ཀུན་དུ་རྟོགས་པ་མ་ཡིན་ནོ། །དེ་དག་རྣམས་ལས་ངེས་པར་རྟོགས་པ་དེ་དག་རྣམས་ཀྱང་མི་འཛིན་ཏེ། ཡུལ་གྱི་སྲེད་པའི་དུག་གིས་རྣམ་པར་འཁྲུལ་བར་བྱས་པའི་ཕྱིར་རོ། །དེ་ལ་རྒྱུ་འདིས་ཀྱང་ལྷ་དག་ཡང་དག་པར་གྱུར་པ་རྣམས་མི་འཛིན་ཏོ། །དེ་ལྟར་རྩིས་བཏབ་

མ་བྱས་པར་སླར་ཡང་དེ་ཁོ་ན་བཞིན་དུ་རྒྱ་ཆེན་པོ་མངར་མོའི་ཡུལ་གྱི་བདེ་བ་རྣམས་ལ་དགའ་བར་བྱེད་དེ། རྣམ་པ་སྣ་ཚོགས་པའི་བདེ་བའི་ཆུ་བོ་རྣམས་ལ་རྒྱུ་བས་དེ་དེ་བཞིན་དུ་སླར་ཡང་རྔ་སྐད་ཡན་ལག་ལྔ་དང་ལྡན་པའི་འགྱིང་བས་དགོད་ལ་གླུ་དང་རོལ་མོའི་སྒྲ་རྣམས་ཀྱིས་རབ་ཏུ་དགའ་བས་
ནགས་དང་ཉེ་བའི་ནགས་ཀྱི་ས་གཞི་རྣམས་ལ་དང་རྫིང་བུ་དང་ཚང་ཚིང་གི་ནགས་རྣམས་ལ་ལྷ་དང་བཅས་ནས་དགའ་བར་བྱེད་དོ། །ལེགས་པར་བྱས་པའི་ལས་རྣམས་ཀྱིས་ཀྱང་འདིར་དགའ་བར་བྱེད་དོ། །དེ་དག་རྣམས་རིན་པོ་ཆེ་རྣམས་ཀྱི་ཡུལ་དུ་མ་རྣམས་ལ་དང་། རིའི་རྒྱབ་རིན་
པོ་ཆེ་བདུན་གྱིས་རྣམ་པར་བརྒྱན་པ་རྣམས་ལ་དང་། རྟག་ཏུ་ཁྱད་པར་དུ་དགའ་བའི་བདེ་བས་རྣམ་པར་རྒྱུ་བ་རྣམས་ལ་དང་། འདོད་པ་ཐམས་ཅད་ཕུན་སུམ་ཚོགས་པས་བསྐྱེད་པ་རྣམས་ལ་དང་། མཆོག་ཏུ་སྐྱིད་པ་རྣམས་ལ་ཡང་རྣམ་པ་སྣ་ཚོགས་པར་རྣམ་པར་བཀྲ་བར་བྱས་པའི་ས་
གཞིའི་ཆ་དགའ་བར་གྱུར་པ་རྣམས་ལ་དང་། ས་གཞིའི་ཆ་རྣམས་ལ་ཡང་རྟག་ཏུ་སྐྱེད་མོས་ཚལ་དུ་རབ་ཏུ་དགའ་བའི་ཡིད་དང་ལྡན་པ་ཡིན་ནོ། །ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་ལྷ་དེ་དག་རྣམས་ཀྱང་ཟས་དང་སྐོམ་གྱིས་རྣམས་སུ་དགའ་བར་བྱེད་པར་འགྱུར་རོ། །འདོད་པ་
ཐམས་ཅད་ཕུན་སུམ་ཚོགས་པ་དེ་དེ་ཁོ་ན་བཞིན་དུ་རྣམ་པར་རོལ་བར་གྱུར་པ་ན། སྐྱེད་མོས་ཚལ་གྱི་ལྟད་མོའི་དབང་དུ་བྱས་ནས་ཕན་ཚུན་ལྷན་ཅིག་ཏུ་གྱུར་ནས། གནོད་པ་མེད་པར་དོན་གཅིག་པ་རྣམས་རྟག་ཏུ་ཡང་ཕན་ཚུན་གྱི་རྗེས་སུ་འཐུན་པར་བྱེད་པ་དེ་ལ་སོང་བའི་ཡིད་ཅན་རྣམས་རྔ་སྐད་
ཡན་ལག་ལྔ་དང་ལེགས་པར་ལྡན་པར་གྱུར་ནས། ཀུན་དགའ་བར་བྱེད་དོ། །དེ་དག་དགའ་བར་གྱུར་པ་ལས་ནམ་ཞིག་ན་རྣམ་པར་རྒྱས་པ་ཞེས་བྱ་བའི་འཇུག་ངོས་སུ་ཉེ་བར་འགྲོ་བར་བྱེད་དེ། འཇུག་ངོས་དེའི་ཡང་ཉེ་འཁོར་ནི་དཔག་ཚད་བརྒྱ་པའོ། །དེ་དག་ཐམས་ཅད་ཀྱང་རིན་པོ་ཆེ་
བདུན་གྱི་རང་བཞིན་གྱི་རྣམ་པར་བཀྲ་བའི་ཆ་ཤས་ཀྱིས་རྣམ་པར་བཀྲ་བས་རེག་པར་བཟོད་པའི་བཻ་ཌཱུརྱའི་ཡུ་བ་ཞེས་རྡོ་རྗེ་ཤིན་ཏུ་ཕྲ་བ་རྣམས་ཀྱི་ཟེ་འབྲུ་ཅན་གྱི་རབ་ཏུ་ཁ་བྱེ་བའི་པད་མ་ཆེན་པོ་རྣམས་ཀྱིས་ཀུན་ཏུ་ཁྱབ་པར་གྱུར་པ་སྟེ། དེ་ཡང་སྔ་ན་མ་མཐོང་བ་དེས་མངོན་པར་མཐོང་ནས་ལྷས་

མཆོག་ཏུ་ངོ་མཚར་བར་གྱུར་པའི་ཆེས་དགའ་བའི་མཐོ་རིས་དེ་དག་ལ་ལྷ་དེ་དག་གིས་སྔ་ན་མ་མཐོང་བར་མངོན་པར་མཐོང་ཞིང་དེ་ལས་གཞན་པའི་ངོ་མཚར་བ་རྣམས་དང་མཐོང་ན་མཆོག་ཏུ་དགའ་བ་རྣམས་ཀྱང་མངོན་པར་མཐོང་ནས་ལྷ་དེ་ཕྱིར་ཞིང་ཉིད་དུ་བརྒྱ་འགྱུར་གྱིས་
ཀྱང་ཆེས་རབ་ཏུ་དགའ་བའི་ཡིད་ཀྱིས་ཕན་ཚུན་དུ་མངོན་པར་ལྟ་བར་བྱེད་ཅིང་གཡོག་ཡང་བྱེད་པ་ན། ཡུལ་ཅིག་ན་དགའ་བར་གྱུར་པ་དང་། རྣམ་པར་དགའ་བར་གྱུར་པ་ཤིན་ཏུ་ཁ་བྱེ་བར་གྱུར་པའི་པད་མ་ཆེན་པོ་དེ་དག་རྣམས་ཀྱིས་མཐོང་བར་གྱུར་ནས་ཕན་ཚུན་དུ་བརྗོད་པར་
ཡང་བྱེད་དེ། ལྷ་དག་ཇི་ལྟ་བ་བཞིན་དུ་འདི་ལ་ལྟ་བར་གྱིས་དང་མཐོ་རིས་མ་ལུས་པ་རྣམས་ལ་འདི་ངོ་མཚར་བར་གྱུར་པ་དང་མཆོག་ཏུ་དགའ་བར་གྱུར་པ་ཡང་ཡིན་ལ། གང་དག་སྔར་ནམ་ཡང་མཐོང་མ་མྱོང་བ་རྣམས་ཀྱི་རྣམ་པ་དེ་སྲིད་དུ་མཐོང་ན་ངོ་མཚར་བར་གྱུར་པ་འོད་ཀྱི་མཆོག་
དང་ལྡན་པ་དེ་ན། བུང་བ་རྣམ་པ་དུ་མའི་རིན་པོ་ཆེ་བདུན་གྱིས་རྣམ་པར་བཀྲ་བའི་ལུས་ཅན་རྣམས་ཀྱིས་ཉེ་བར་མཛེས་པར་བྱས་པའོ། །ཁ་བྱེ་བར་གྱུར་པའི་པད་མ་ཆེན་པོ་དེ་ལ་ཡང་ཕན་ཚུན་དུ་བལྟ་བར་སྡུག་པས་ན་པད་མ་ཆེན་པོ་ལ་རྩེད་མོ་རྩེ་བར་བྱེད་དོ། །མཚོ་དེའི་ཉེ་འཁོར་
རྣམས་ན་རབ་ཏུ་ཁྱབ་པ་ནི་ཇི་ལྟར་ཅུང་ཟད་ཙམ་པ་རྣམས་ཀྱང་དགེ་ལེགས་སུ་གྱུར་པ་རྣམས་ཡིན་ཏེ། རྣམ་པར་རྒྱས་པའི་མཚོ་ཆེན་པོ་དེའི་ཆུར་ནི་ཅུང་ཟད་ཅིག་མཐོང་ངོ་། །འགྲམ་གྱི་ཉེ་འཁོར་རྣམས་ན་ཡང་མུ་ཏིག་གི་རང་བཞིན་གྱིས་ཁའི་མཚམས་རྣམས་བསྒྲོན་
པ་དང་། ཨིན་དྲ་ནཱི་ལ་དང་པད་མ་རཱ་ག་དང་དངུལ་གྱི་རང་བཞིན་གྱི་ཁ་ཁྱེར་དང་ཁ་ཁྱེར་རྣམས་ཀྱི་ཆ་ཤས་རབ་ཏུ་རྣམ་པར་ཕྱེ་བ་ཤིན་ཏུ་བལྟ་བར་སྡུག་པ་དང་ལྡན་པ་ཡིན་ནོ། །འདི་དག་གི་དབུས་ན་ཡང་པད་མ་ཆེན་པོ་གང་ཡིན་པའི་སྙིང་པོ་དང་བཅས་པའི་འཕང་དུ་ནི་དཔག་ཚད་
ལྔའོ། །རྒྱར་ནི་དཔག་ཚད་བཅུ་ཡིན་ལ་ལེགས་པར་བྱས་པའི་ལས་བྱས་པའི་ལྷ་རྣམས་ཀྱི་ཇི་ལྟ་བ་འདོད་པ་བཞིན་དུ་རྒྱ་ཆེ་བར་འགྱུར་བ་ནི་མ་གཏོགས་ཏེ། རྒྱ་ཆེ་བའི་དབང་དུ་བྱས་ནས་ནི་ཇི་ལྟར་འདོད་པར་ལྷ་དེ་དག་རྩེ་བར་འགྱུར་བ་དེ་བཞིན་དུ་ཡང་པད་མ་ཆེན་པོ་དེ་ཁ་དབྱེ་

བ་དང་འཁུམ་པར་ཡང་འགྱུར་རོ། །ལྷ་རྣམས་ཀྱིས་ཀྱང་ཇི་ལྟར་ཀུན་ཏུ་རྟོག་པར་བྱེད་པ་དང་། གང་ཡང་ཀུན་ཏུ་རྟོག་པར་བྱེད་པ་དང་རྣམ་པ་གང་དག་གིས་ཀྱང་ཀུན་ཏུ་རྟོག་པར་བྱེད་པ་ན་དེ་དག་རྣམས་ཐམས་ཅད་ཀྱང་མཚོ་ཆེན་པོ་དེ་དང་པད་མ་ཆེན་པོ་དག་ལས་རྙེད་པར་འགྱུར་རོ། །
དེ་ལྟར་ན་ཡང་མཚོ་ཆེན་པོ་དེ་ནི་ཀུན་བརྟགས་པར་དགའ་བ་ཞེས་བྱ་བ་ཡིན་པ་དང་པད་མ་དེ་ཡང་ཀུན་བརྟགས་པའི་པད་མ་ཞེས་བྱ་བ་ཡིན་ཏེ། དེ་དག་གཉིས་ཀྱི་མིང་ཡིན་ནོ། །དེས་ན་ལྷ་དེ་དག་རྣམས་གང་དང་པོ་ཉིད་ཁོ་ནར་མཚོ་དེ་དང་པད་མ་འདི་ཞེས་དེ་དག་གཉིས་ཀའི་མིང་དུ་བྱེད་
པ་ཡིན་ནོ། །དེ་ནས་ལྷ་དེ་དག་རྣམས་ཐོག་མ་ཉིད་ཁོ་ནར་མཚོ་དེ་གང་ཡིན་པ་དེ་མཐོང་བར་གྱུར་ནས། དེ་བརྒྱ་འགྱུར་གྱིས་ལྷག་པར་ཆེས་རབ་ཏུ་དགའ་བར་འགྱུར་བའི་ཡིད་ཀྱིས་མཚོ་དེའི་འགྲམ་དུ་གར་བྱེད་པ་དང་འགྱིང་བག་ཀྱང་བྱེད་དོ། །གླུ་ཡང་ལེན་པར་བྱེད་དོ། །ཕན་ཚུན་
གཡོག་བྱེད་པར་གྱུར་ཅིང་རྔ་སྐད་ཡན་ལག་ལྔ་དང་ལྡན་པས་དེ་ལྟར་ལྷ་རྫས་ཀྱི་འདོད་པ་རྣམས་ལ་ཉེ་བར་ལོངས་སྤྱོད་པར་བྱེད་དོ། །རང་གི་ལེགས་པར་བྱས་པའི་ལས་བྱས་པ་དེ་དག་རྣམས་མཚོ་ལ་དུས་དེ་སྙེད་དུ་རྩེད་མོ་བྱས་ནས་ཕྱིས་ཉིད་ཀྱང་མྱོས་པའི་སྐྱོན་རྣམས་དང་བྲལ་བ་དང་
མྱོས་པའི་ཡོན་ཏན་རྣམས་དང་ལྡན་པའི་བཏུང་བ་དག་འཐུང་བར་བྱེད་པ་རྣམས་ལ་ཇི་ལྟར་འདོད་པ་བཞིན་དུ་བསིལ་བ་དང་ཇི་ལྟར་འདོད་པའི་དྲི་རྣམས་དང་། ཇི་ལྟར་འདོད་པའི་ཁ་དོག་རྣམས་དང་ཇི་ལྟར་འདོད་པ་བཞིན་གྱི་སྣོད་ཀྱི་དབྱིབས་དང་རིན་པོ་ཆེའི་རང་བཞིན་གྱི་ཡོན་ཏན་རབ་
ཀྱི་མཆོག་གིས་ཀུན་ནས་གང་བའི་བཏུང་བའི་མཚོ་ཆེན་པོ་དེ་ཉིད་ཀྱི་དྲུང་ནས་བྱུང་ནས། མ་ལུས་པ་རྣམས་ལ་འགྲོ་བར་བྱེད་པ་དང་གང་དག་ཡིན་པའི་ལྷ་དེ་དག་རྣམས་འཐུང་བར་བྱེད་དོ། །གཞན་ཡང་ཐག་ཉེ་བ་ན་གནས་པའི་ལྷ་གཞན་དག་རྣམས་ཀྱང་མཚོ་ཆེན་པོ་དེ་ཉིད་དུ་སོང་
ནས་གར་བྱེད་པར་གྱུར་པ་ན། བདུད་རྩིའི་ཁུ་བ་དག་ལྷ་རྫས་ཀྱི་དྲི་དང་རོ་དང་རེག་བྱ་དང་ཁ་དོག་མཆོག་དང་ལྡན་པ་རྣམས་དེ་དག་གིས་མཐོང་བར་གྱུར་ནས། དེ་དེ་དག་རྣམས་ལ་དགའ་བའི་ཡིད་ཀྱིས་རྩེ་བར་བྱེད་དེ། ཟས་བཟའ་བར་འདོད་པས་དེ་དེ་དག་རྣམས་ཀྱི་དྲུང་དུ་ཉེ་

བར་ཕྱིན་ནས་བདུད་རྩི་དེ་དག་མིད་པར་བྱེད་དོ། །དེ་ཡང་ལག་ཏུ་བླངས་ནས་སམ་སྣོད་དུ་བཅུག་ནས་ཀྱང་རུང་སྟེ། ཇི་ལྟར་ལས་ཀྱི་རྗེས་སུ་འཐུན་པའི་ཆ་འདྲ་བ་རྣམས་ཡིན་ནོ། །དེ་དག་མིད་པར་གྱུར་ནས་སླར་ཡང་གང་ཁོ་ན་མཚོ་དེ་ཉིད་ཡིན་པ་དེར་ཉེ་བར་ལེགས་
པར་ཕྱིན་པ་ན། དེས་མཐོང་བ་ནི་པད་མ་ཆེན་པོ་དེའི་འོད་ཟེར་རྣམས་དང་ལྡན་པ་ཡང་ཉི་མ་བརྒྱ་སྟོང་རྣམས་པས་ཆེས་ལྷག་པར་འབར་བར་གྱུར་པ་གང་ལ་མཐོ་རིས་ཀྱི་རིན་པོ་ཆེའི་འོད་རྣམས་ཐམས་ཅད་ཀྱིས་བཅུ་དྲུག་ཆར་ཡང་མི་ཕོད་པ་ཡིན་ནོ། །དེ་ནས་ལྷ་དེ་དག་གིས་པད་
མ་ཆེན་པོ་དེ་ཀུན་ནས་མངོན་པར་མཐོང་བས། མཆོག་གི་རབ་ཏུ་དགའ་བའི་ཡིད་ཀྱིས་ལྷའི་ཚོགས་རྣམས་ཀྱིས་ཡོངས་སུ་བསྐོར་ནས་རྔ་སྐད་ཡན་ལག་ལྔ་དང་ལྡན་པས་གར་བྱེད་པར་གྱུར་ཅིང་མཚོ་ཆེན་པོ་རྣམ་པར་རྒྱས་པ་དེའི་ཉེ་འཁོར་རྣམས་ཀུན་དུ་ཡོངས་སུ་འཆག་གོ། །
དེ་དག་རྣམས་ཇི་ལྟ་ཇི་ལྟར་ཡོངས་སུ་འཆག་པར་བྱེད་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་མཆོག་ཏུ་བལྟ་ན་སྡུག་པ་རྨད་དུ་བྱུང་བའི་ཁྱད་པར་གཞན་རྣམ་པ་སྣ་ཚོགས་པ་རྣམས་མཚོ་དེ་དག་ཏུ་ལེགས་པར་མཐོང་ངོ་། །པད་མ་ཆེན་པོ་དེའི་རྣམ་པ་དེ་ལྟ་བུ་རྣམས་གང་ཞེ་ན། འདི་
ལྟ་སྟེ་དགའ་བར་གྱུར་པ་དང་། ངོ་མཚར་བར་གྱུར་པ་རྣམས་ལ། ཁ་ཅིག་ནི་པད་མ་ཆེན་པོ་འདིའི་སྟེང་ན་མདོག་དང་དབྱིབས་སྣ་ཚོགས་པའི་བུང་བ་རྣམས་ཏེ། རིན་པོ་ཆེ་བདུན་གྱི་རང་བཞིན་གྱི་གཤོག་པ་ཅན་གྱི་བུང་བ་དང་བུང་བ་མོ་དག་ལྷན་ཅིག་ཏུ་དགའ་བར་སྤྱོད་དོ། །
དེ་ཁོ་ན་བཞིན་དུ་རིན་པོ་ཆེ་བདུན་གྱི་རང་བཞིན་གྱི་བུང་བ་མོ་དེ་དག་དང་བུང་བ་དེ་དག་རྣམས་ལྷན་ཅིག་ཏུ་མེ་ཏོག་གི་རྩི་དཔེ་མེད་པའི་རང་བཞིན་གྱི་པད་མའི་རྩི་རྣམས་འཐུངས་པར་གྱུར་པ་ན་དེ་ཚིགས་སུ་བཅད་པ་བརྗོད་པ། ཇི་ལྟར། རྣམ་པ་སྣ་ཚོགས་ལས་བསྐྱེད་པའི། །སྣ་ཚོགས་
འབྲས་དང་ཡང་དག་ལྡན། །གང་འདི་བཀྲ་བར་འགྲོ་བ་ཡི། །སེམས་ཀྱིས་ཇི་ལྟར་ལེགས་འདོད་བཞིན། །ཐམས་ཅད་སེམས་ཀྱིས་བཀྲ་བར་བྱས། །རྣམ་པར་བཀྲ་བར་རྟེན་པར་བྱེད། །ལས་ཞིག་ནས་ནི་རྣམ་འཇིགས་པ། །རིང་པོ་མིན་པར་འབྱུང་བར་འགྱུར། །

དཔེ་མེད་པ་ཡི་བདེ་བ་འདི། །གལ་ཏེ་ལྷ་རྣམས་ཀྱིས་མཐོང་བ། །མི་རྟག་ཐབས་འོག་ཉིད་དུ་ནི། །རིང་པོ་མིན་པར་ཚུད་པར་འགྱུར། །དབུ་བ་དང་ནི་ཆུའི་ཆུ་བུར། །འདི་ནི་སྨིག་རྒྱུའི་མདོག་མཚུངས་པའོ། །རབ་ཏུ་རྣམ་འཇིག་བདེ་བ་ཀུན། །ལོག་ལྟུང་
མཐར་ནི་འགྲོ་བར་འདོད། །བཟློག་ཐབས་མེད་དང་མི་བཟད་པའི། །འབྱུང་པོ་ཐམས་ཅད་འཇིག་བྱེད་པ། །བཟློག་པར་མི་ནུས་ཤུགས་ཅན་འདིར། །འཆི་བདག་རྒྱལ་པོ་རྒྱུག་པར་བྱེད། །བདེ་བ་ཐམས་ཅད་འཇོམས་པ་དང་། །གསོན་པ་ཡང་ནི་
བཅོམ་ནས་ནི། །ཀུན་རྟོག་ལས་ཀྱིས་བཅིངས་པ་ཡི། །འཇིག་རྟེན་གཞན་དུ་འཁྲིད་པར་འགྱུར། །མི་རྣམས་ཀྱི་ནི་འདས་དེ་གང་། །དེ་ནི་བདེ་བར་རྟོག་པ་མེད། །གང་ཡང་བདེ་བ་འདོད་གྱུར་པ། །དེ་ཡང་ཅུང་ཟད་བགྲང་མི་བྱེད། །སྲེད་པའི་དུག་དང་འདྲེས་པ་
ཡི། །དེ་ལྟ་བ་ཡི་བདེ་བ་གང་། །དེ་ཀུན་ལོག་པར་ལྟུང་བའི་མཐས། །འདུས་བྱས་མི་རྟག་གཡོ་བ་ཡིན། །འཇིག་རྟེན་གསུམ་གྱི་བདེ་བ་གང་། །དེ་ཉིད་གཟིགས་པས་བསྔགས་མི་མཛད། །དེ་ཡིས་ཇི་ལྟར་ལྷ་རྒྱགས་འགྱུར། །དོན་མེད་པ་དང་བྲལ་བར་གྱིས། །ལུས་
འདི་རིང་མིན་ན་ཉམས་པར། །འདི་ནི་མྱུར་བར་རྒྱུག་པར་འགྱུར། །ཤིང་སྐོམ་ལ་ནི་མེ་བཞིན་དུ། །ལྷ་གང་གིས་ནི་ཆོས་སྲེག་པ། །བདེ་བ་ཐམས་ཅད་ཤིན་ཏུ་ལྟུང་། །དགེ་ལེགས་ཡིད་ནི་བྱ་བར་གྱིས། །འཆི་བདག་དུས་ནི་བྱུང་གྱུར་ན། །ཕྱི་ནས་འགྱོད་པར་མ་བྱེད་
ཅིག །སྐྱེ་བ་གཞན་ཡང་སྟོང་ཕྲག་ལ། །ལས་ཀྱིས་བདེ་བ་གང་བྱུང་བ། །དེ་དག་གར་སོང་རྨི་ལམ་བཞིན། །བདག་ཅག་འཇིག་པའི་མཐའ་མིན་ནམ། །ཤིང་སྐོམ་མེ་ནི་ཇི་ལྟ་བར། །བྱིས་རྣམས་བདེ་བས་ཚིམ་པ་མིན། །དེ་ཕྱིར་བདེ་ལ་ཆགས་པ་ཡིས། །བདེ་
བ་མཐར་ཐུག་འགྱུར་མ་ཡིན། །སྐོམ་པའི་སྐྱོན་ལ་ཆགས་པ་ནི། །འདོད་པའི་སྐྱོན་རྣམས་རྗེས་སུ་འདྲེན། །བསམ་གཏན་པ་ཡང་བག་ཡོད་པའི། །དེ་ཡི་བདེ་གང་རྙོག་པ་མེད། །དེ་ཐོབ་ཤིན་ཏུ་བདེར་འགྱུར་གྱི། །སྲིད་པ་ལས་སྐྱེས་བདེར་མི་འདོད། །སྦྲང་རྩི་དང་བསྲེས་

སྲེད་ཇི་ལྟར། །དེ་ལྟར་བདེ་བ་སྲིད་བདེ་ཡིན། །དེ་ཕྱིར་བདེ་ལ་ཆགས་པ་དང་། །རྟག་ཏུ་འདོད་པ་བཙལ་མི་བྱ། །བདེ་བ་ཤིན་ཏུ་མཐར་ཐུག་ཡིན། །དེ་ཕྱིར་འདོད་པ་ཞི་བ་མིན་ཞེས་བྱའོ། །དེ་ལྟར་བུང་བ་དེ་དག་རྣམས་ཀྱིས་མངོན་དུ་ཕྱོགས་ནས་ལེགས་
པར་གནས་པའི་ལྷ་དེ་དག་རྣམས་ལ་ལེགས་པར་བྱས་པའི་ལས་ཀྱིས་ཀུན་ནས་བསྐུལ་བ་བརྗོད་པ་ཡིན་ནོ། །ལྷ་དེ་དག་རྣམས་ཀྱིས་དེ་དག་གིས་བཤད་པ་དེ་ལ་རྩིས་བགྲང་མ་བྱས་པར་སླར་ཡང་མཚོ་དེ་ལྟ་བར་བྱེད་པ་ལ་ཤིན་ཏུ་སྤྲོ་བ་དང་། དེ་ལ་སོང་བའི་ཡིད་ཀྱིས་ལྷན་ཅིག་སྤྱོད་
པའི་འཁོར་རྣམས་དང་བཅས་ནས་དགའ་བར་གྱུར་པ་དང་རྩེ་དགའ་བར་གྱུར་པ་དང་དགོད་པར་གྱུར་པ་དང་གླུ་ལེན་པར་གྱུར་པས་ཀྱང་ཡོངས་སུ་སྤྱོད་པར་བྱེད་དོ། །དེ་དག་རྣམས་ཀྱིས་དེའི་ཚེ་དུས་རིང་དུ་རྩེད་མོ་རྩེས་ནས། གཞན་ཡང་མཚོ་དེ་ལྟ་བར་བྱེད་པ་ལ་ཀུན་ནས་མངོན་དུ་
ཕྱོགས་པས་ཕན་ཚུན་གྲོགས་སུ་གྱུར་པས། མཚོ་དེ་རྒལ་བར་བྱེད་དོ། །པད་མ་ཆེན་པོ་དེ་གཙང་མར་གྱུར་པ་དང་། འབྱུང་བ་ཆེན་པོ་ཡང་བའི་དབང་གིས་དང་ལས་རྣམས་ཀྱི་མཐུས་ཀྱང་ཡོངས་སུ་རྣམ་པར་རྒྱུ་བ་ཡིན་ནོ། །རང་གི་ལས་ཀྱིས་འགྲོ་བར་བྱེད་པ་དེ་དག་
རྣམས་པད་མའི་འདབ་མ་གཞན་ལ་འཆེལ་ཞིང་ཆགས་པར་གྱུར་པའི་ཁ་དོག་དུ་མ་རྣམ་པར་བཀྲ་བའི་ཆ་ཤས་དུ་མས་རྣམ་པར་བཀྲ་བར་བྱས་པ་རྣམས་ལ་ཞེན་པར་གྱུར་ཅིང་ལྷ་རྣམས་དགའ་བར་བྱེད་དེ། ལྷན་ཅིག་སྤྱོད་པ་རྣམས་དང་བཅས་པས་པད་མའི་འདབ་མ་གཞན་
དག་གི་ནགས་རྣམས་སུ་ཡང་ལྷན་ཅིག་རྩེ་བར་བྱེད་དོ། །ཀུན་དུ་འཆེལ་བའི་ལྷ་དེ་དག་རྣམས་ཉིད་དང་འདབ་མ་རྣམས་ལ་ཀུན་ཏུ་འཛེག་པར་བྱེད་པའི་ལྷ་དེ་དག་རྣམས་དང་ལྷ་དེ་དག་རྣམས་ཇི་ལྟ་བ་བཞིན་དུ་དེ་ལྟར་ཡང་པད་མའི་འདབ་མ་དེ་དག་ཁ་འབྱེ་བར་འགྱུར་རོ། །དགེ་
བའི་ལས་རྣམས་ཀྱི་རྐྱེན་གྱིས་པད་མ་ཆེན་པོ་དེ་ཡང་དེ་ཁོ་ན་བཞིན་དུ་ཁ་འབྱེའོ། །སྙིང་པོ་ཡང་དེ་བཞིན་དུ་ཇི་སྲིད་དཔག་ཚད་ཉིས་བརྒྱར་འགྱུར་བ་དང་། དེ་བཞིན་དུ་གསུམ་དང་དེ་བཞིན་དུ་བཞི་དང་དེ་བཞིན་དུ་ལྔ་དང་དེ་བཞིན་དུ་དྲུག་ཏུ་ཡང་འགྱུར་ཏེ། དེ་བཞིན་དུ་དགུ་དང་དེ་

ལྟར་ཇི་སྲིད་དུ་དཔག་ཚད་སྟོང་གི་བར་དུ་ཡང་ལྷ་དེ་དག་རྣམས་ཀྱི་ལེགས་པར་བྱས་པའི་ལས་ཀྱིས་འགྱུར་རོ། །སྙིང་པོ་དེ་ཡང་དེ་ཁོ་ན་བཞིན་དུ་ཁ་འབྱེ་སྟེ། ཇི་སྲིད་དུ་དཔག་ཚད་བརྒྱའི་བར་དུ་ཁ་འབྱེའོ། །མཐུ་སྟོབས་འདི་དག་ནི་པད་མ་ཆེན་པོ་དེའི་ཡིན་ནོ། །འདི་ལ་ལྷན་
ཅིག་སྤྱོད་པ་དང་བཅས་པའི་ལྷ་དེ་དག་རྣམས་ཐམས་ཅད་སོ་སོ་སོ་སོར་འདབ་མ་གཞན་ལ་སོང་ནས་དགའ་བར་བྱེད་པ་དང་རྩེ་བར་ཡང་བྱེད་པ་ན་དེ་དག་རྣམས་ཀྱང་ཁ་འབྱེའོ། །དེ་ནས་རྩེ་བར་བྱེད་པའི་ལྷ་དེ་དག་རྣམས་ཉིད་འདི་སྙམ་དུ་སེམས་ཏེ། བདག་ཅག་རྣམས་རྩེ་བར་བྱེད་
པས་འདི་ལྟར་རྣམ་པར་རྒྱུ་བ་ཉིད་ལ་གཞན་ཡང་གནས་འདི་ཉིད་ན་བཟའ་བའི་ཀླུང་དང་བཏུང་བའི་ཀླུང་རོ་བཟང་པོ་དང་ལྡན་པ་རྣམས་འབྱུང་བར་འགྱུར་མོད། དེ་ནས་སེམས་བསྐྱེད་པ་ཙམ་ཉིད་ན་དེ་དག་རྣམས་ཉིད་གནས་པའི་སར་བཟའ་བའི་ཀླུང་དང་བཏུང་བའི་ཀླུང་དེ་དག་ཀྱང་པད་མའི་ནང་གི་འདབ་མ་
དེ་ཉིད་ལ་རབ་ཏུ་འབྱུང་བར་འགྱུར་རོ། །དེ་དག་ཉིད་འདི་སྙམ་དུ་སེམས་པར་གྱུར་ཏེ། བདག་ཅག་གི་བཏུང་བ་དང་ཁ་ཟས་འདི་དག་ལ་ལྟོས་དང་ཟེར་ནས་དེ་དག་ལྷ་དག་དང་ལྷན་ཅིག་ཏུ་བདུད་རྩི་ཟ་བར་བྱེད་དོ། །དེ་ནས་ལྷ་དེ་དག་རྣམས་དུས་རིང་དུ་འདའ་བར་བྱེད་དོ། །
འདས་ནས་ནི་འདི་ཉིད་དུ་རྣམ་པར་གནས་པའི་བདག་ཅག་རྣམས་ལ་ཡང་འདབ་མའི་བར་རྣམས་ཉིད་ལས་རྩེད་མོའི་ནགས་འདི་དག་རྣམས་ཀྱང་ལེགས་པར་འབྱུང་བར་གྱུར་ཅིག །དེ་ནས་སེམས་བསྐྱེད་པ་ཙམ་ཉིད་ན་ལེགས་པར་བྱས་པའི་ལས་རྣམས་ཀྱི་ནགས་དེ་དག་རབ་ཏུ་
འབྱུང་བར་གྱུར་པ་ནི། རིན་པོ་ཆེ་བདུན་གྱིས་རྣམ་པར་སྤྲས་པའི་ལྗོན་ཤིང་རྣམས་ལ་སྣ་ཚོགས་པའི་བྱ་རྣམས་ཀྱིས་སྒྲའི་ཁྱད་པར་བརྗོད་པས་དགའ་བར་གྱུར་པ་འཁྲི་ཤིང་ཀུན་ནས་དུད་པའི་ཁང་པ་རྣམ་པར་རྒྱས་པ་དང་། མེ་ཏོག་དང་འབྲས་བུ་དང་ལོ་ཏོག་རྣམས་ཕུན་
སུམ་ཚོགས་པས་དུས་དང་ནམ་ཟླ་ཐམས་ཅད་དུ་དགའ་བར་གྱུར་པ་དང་། ཁྱད་པར་དུ་རྣམ་པ་སྣ་ཚོགས་པ་དགའ་བར་གྱུར་པའི་ཆུ་ཀླུང་དང་འབབ་ཆུ་དང་། ཤིན་ཏུ་བལྟ་བར་མཛེས་པའི་ཆུ་ཚག་ཚིག་དང་རྣམ་པ་སྣ་ཚོགས་པའི་འབབ་ཆུ་དང་ཆུ་བཤལ་དག་གི་སྒྲ་འུར་འུར་

ཟེར་བ་རྣམས་ཆེས་དགའ་བར་གྱུར་པ་རྣམས་དང་། ཤིན་ཏུ་རྣམ་པར་ཕྱེ་བའི་ས་གཞིའི་ཆ་ཤས་རྣམས་ལ་རྣམ་པ་དུ་མ་སྣ་ཚོགས་པའི་དྲི་དང་ཚད་དང་དབྱིབས་དང་ལྡན་པའི་མེ་ཏོག་རྣམས་ཉེ་བར་སྐྱེས་པར་གྱུར་པ་ལ། འདི་ལྟ་སྟེ་ཆུ་ལས་གྱུར་པའི་མེ་ཏོག་དེར་སྐྱེས་པ་
ན། འདི་ལྟ་སྟེ། ཨུད་པ་ལ་སྔོན་པོ་དང་ཀུ་མུ་ད་དང་། ཨ་མ་ལཱ་ནཱ་དང་ནཱི་ཏཱ་ན་དང་ལེགས་པར་སྤྲས་པ་དང་འདབ་མ་བརྒྱ་པ་དང་གཡོ་བ་མེད་པ་དང་ཕུན་སུམ་ཚོགས་པ་དང་། ལ་བ་ལ་དང་ཁོར་ཡུག་དང་འདྲ་བ་དང་འོད་སྣང་བ་དང་བུང་བའི་མིག་དང་མཚུངས་པ་རྟག་པར་རྣམ་པར་
བཀྲ་བ་དང་། ཨིན་དྲ་ནཱི་ལའི་མདོག་དང་མེ་ཏོག་རྣམས་ཐམས་ཅད་ཐམས་ཅད་དུ་སྐྱེས་པ་དེ་ལྟ་བུ་རྣམས་ལ་སོགས་པའི་ཆུ་ལས་སྐྱེས་པར་གྱུར་པའི་ལྷ་རྫས་ཀྱི་མེ་ཏོག་རྣམས་ཀྱིས་ཉེ་བར་མཛེས་པར་བྱས་པའི་ནགས་རྣམས་རབ་ཏུ་འབྱུང་ངོ་། །དེ་བཞིན་དུ་ཐང་ལས་སྐྱེས་པར་གྱུར་
པའི་མེ་ཏོག་རྣམས་མདོག་དང་དབྱིབས་སྣ་ཚོགས་པར་དགའ་བར་གྱུར་པའི་མེ་ཏོག་གིས་ཉེ་བར་མཛེས་པར་བྱས་པ་རྣམས་པད་མ་ཆེན་པོའི་འདབ་མའི་གསེབ་ཏུ་ཞུགས་པའི་ལྷ་རྣམས་ལ། པད་མ་ཆེན་པོ་ཉིད་ཀྱི་ནགས་ལས་ལེགས་པར་སྐྱེས་པའི་མེ་ཏོག་རྣམས་ཁ་ཅིག་ནི་འདི་ལྟ་སྟེ།
བདེ་བའི་འོད་ཟེར་འཐབ་བྲལ་བ་རྣམས་ཀྱིས། བོས་པར་གྱུར་པ་ན་འོང་བ་གང་གི་ཚེ་བོས་པ་ཉིད་ན་ལྷ་མོ་རྣམས་ཀྱི་དྲུང་དུའམ། ལྷ་རྣམས་ལ་ཡང་རྟག་པར་རབ་ཏུ་དྲངས་པས་ཁ་བྱེ་བར་གྱུར་པའི་མདོག་གིས་འོང་བར་གྱུར་ཏེ། དཔག་ཚད་བརྒྱར་དྲི་འབྱུང་བར་བལྟ་ན་སྡུག་ཅིང་དགའ་བར་གྱུར་
པ། ཁ་དོག་སྣ་ཚོགས་པ་རྣམས་ལེགས་པར་ཁ་བྱེ་བ་དུས་ཐམས་ཅད་དུ་