Kinh tạng Tây Tạng (Kangyur Đại Học) — 070_མདོ་སྡེ།_ལ

་ཆོས་སུམ་ཅུ་
རྩ་ལྔ་དང་ཡང་དག་པར་ལྡན་པའི་རྒྱལ་པོས་སྐྱེ་དགུ་རྣམས་སྐྱོང་བར་བྱེད་ལ། སྐྱོང་བར་བྱེད་པར་གྱུར་པས་ཀྱང་ནོར་ཆེན་པོར་འགྱུར་རོ། །སྟོབས་ཆེ་བ་དང་། ཕས་ཀྱི་རྒོལ་བའི་དཔུང་ཐམས་ཅད་ཀྱིས་མི་ཐུབ་པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོ་འཐབ་
བྲལ་བ་རྣམས་ཀྱི་མངའ་བདག་ཏུ་འགྱུར་རོ། །སུམ་ཅུ་རྩ་ལྔ་པོ་གང་དག་ཞེ་ན་འདི་ལྟ་སྟེ། འདིའི་རང་གི་སྐྱེ་བོ་གཙང་བར་གྱུར་པ་དང་དཔྱ་རྣམས་ངེས་པར་བྱས་ནས་ཟ་བར་བྱེད་པ་དང་བཟོད་པ་དང་ལྡན་པ་དང་ལུགས་ལས་ཕྱོགས་འཛིན་མེད་པ་དང་བླ་མ་མཆོད་པར་བྱེད་པ་དང་སྔར་
ཉིད་སྟེར་བར་བྱེད་པ་ཡིན་སྔར་བྱིན་པར་གྱུར་ནས་ཕྱིས་ཀྱང་སྟེར་བར་བྱེད་པ་ཡིན་ཆོས་མ་ཡིན་པ་འཛིན་པར་མི་བྱེད་པ་ཡིན། སྡིག་པའི་གྲོགས་པོ་དང་སྟེན་པར་བྱེད་པ་མ་ཡིན་བུད་མེད་ཀྱི་དབང་དུ་འགྲོ་བ་མ་ཡིན་ཐམས་ཅད་ཀྱི་ཚིག་ལ་དད་པར་བྱེད་པ་མ་ཡིན་སྙན་པར་གྲགས་པ་ལ་

འདོད་པ་སྐྱེད་པ་ཡིན་གྱི་ནོར་ལ་འདོད་པ་ཅན་མ་ཡིན་ནོ། །ལོག་པར་ལྟ་བ་དང་ལྡན་པ་མ་ཡིན་གཏོང་བ་ཅན་ཡིན་འཐུན་པར་བྱེད་པ་དང་ངག་སྙན་པར་འགྱུར་བ་ཡིན་བདེན་པར་སྨྲ་བ་ཡིན་ནོར་གཞིས་རྣམས་འཕེལ་བ་དང་འགྲིབ་པར་གློ་བུར་དུ་མི་བྱེད་པ་ཡིན་མིའི་ཁྱད་པར་ཤེས་པ་
ཡིན་དུས་ངེས་པར་ལེགས་པར་སྟོན་པར་བྱེད་པ་པོ་ཡིན། གཉིད་ཆེ་བ་མ་ཡིན་ལེ་ལོ་མེད་པ་ཡིན་གྲོགས་པོ་བརྟན་པ་ཡིན་མི་ཕན་པ་རྗེས་སུ་སྟེན་པར་བྱེད་པ་མ་ཡིན། ཁྲོ་བའི་ཤུགས་དང་དགའ་བ་ཡ་ཡ་བོ་སྡོམ་པར་བྱེད་པ་ཡིན་ཟས་དང་སྐོམ་ལ་ཤིན་ཏུ་ཀུན་ནས་ཆགས་
པའི་རང་བཞིན་ཅན་མ་ཡིན། ལེགས་པར་བསམ་པར་བྱ་བ་རྣམས་སེམས་པ་པོ་ཡིན་དོན་དུས་རིང་དུ་སྐོར་བར་བྱེད་པ་མ་ཡིན་ཆོས་ལ་སྐྱེ་དགུ་རབ་ཏུ་འགོད་པར་བྱེད་པ་ཡིན་དགེ་བ་བཅུའི་ལས་ཀྱི་ལམ་གྱི་དགེ་བ་རྣམས་བྱེད་པར་འགྱུར་བ་ཡིན། རྒྱུ་དང་རྐྱེན་ལེགས་པར་སྟོན་པར་
བྱེད་པ་ཡིན། ལྷ་དག་མཆོད་པར་བྱེད་པ་ཡིན། བུ་དང་བུ་མོ་ཡང་དག་པར་བདེ་བར་ཡོངས་སུ་སྐྱོང་བར་བྱེད་པ་ཡིན། རྟག་པར་ཡང་ཤེས་རབ་གོམས་པར་བྱེད་པའི་རང་བཞིན་ཅན་ཡིན་ཡུལ་གྱིས་བཀྲི་བར་འགྱུར་བ་མ་ཡིན་རིགས་པ་དང་ལྡན་པའི་རང་བཞིན་རྣམས་
ཀྱི་རིགས་ཀྱི་ས་གཞི་སྦྱིན་པར་གཏོང་ངོ་། །དེ་ལྟ་བུའི་ཆོས་སུམ་ཅུ་རྩ་ལྔ་དང་ཡང་དག་པར་ལྡན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་དེ་དེས་རབ་ཏུ་བསྔགས་པར་འགྱུར་རོ། །ཤིན་ཏུ་ནོར་ཆེ་བ་དང་རབ་ཏུ་ཕལ་ཆེ་བའི་དཀོར་དང་ཉེ་བར་མཁོ་བ་དང་ལྡན་
པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་ལྷའི་མངའ་བདག་ཏུ་འགྱུར་ཏེ་ལེགས་པར་བྱས་པར་གྱུར་པ་དེའི་རྒྱུ་ལས་སོ། །དེ་ལ་གཙང་བའི་རང་གི་སྐྱེ་བོ་དང་ཡང་དག་པར་ལྡན་པའི་རྒྱལ་པོ་ཉུང་ཟད་ཀྱི་རང་བཞིན་ཅན་མ་
ཡིན་པར་འགྱུར་བའི་རྣམ་པ་ཅི་ལྟ་བུས་སྐྱེ་བོ་དེ་གཙང་བ་ལ་སྦྱོར་བས་གཞན་ལ་ཕན་པ་ལ་རབ་ཏུ་ཞུགས་པ་ཡིན་ཞེ་ན། ཆོས་ལུགས་རྣམ་པར་གཞག་པ་ལ་ཤིན་ཏུ་བར་ཡང་ས་མཚམས་སྲུང་བར་འགྱུར་རོ། །དམ་ཚིག་སྲུང་བར་འགྱུར་བ་དང་རྩབ་ཧྲལ་ཅན་དུ་མ་གྱུར་པ་དང་།

རྗེ་དཔོན་ལ་ཕན་པ་མ་ཡིན་པ་རབ་ཏུ་འགོགས་པར་བྱེད་པར་འགྱུར་རོ། །འདིས་ཕན་པར་གྱུར་པ་དག་ལ་ཀུན་ཏུ་སྦྱོར་བར་བྱེད་པ་དང་། རྒྱལ་སྲིད་ཀྱང་ཆོས་ཀྱིས་ལེགས་པར་སྲུང་ངོ་། །ཕན་པ་དང་གྲོགས་སུ་འགྱུར་བ་རྣམས་སྨྲ་བར་བྱེད་པ་དང་།
དུས་སུ་ཉེ་བར་གནས་པ་དང་དྲང་པོའི་རང་བཞིན་ཅན་གཞན་ལ་བཞད་བགད་དུ་བྱེད་པ་མ་ཡིན་པ་དང་། ཞབས་འབྲིང་བྱེད་པའི་དབང་གིས་ཕན་པ་མ་ཡིན་པ་རྣམས་རྗེ་བོ་ལ་བྱེད་པར་མི་འགྱུར་བ་དང་། འདོད་པ་དང་ང་རྒྱལ་དག་གིས་ཀྱང་འཁྲིད་པར་འགྱུར་བ་མ་ཡིན་
པ་དང་། གནས་སྐབས་ཐམས་ཅད་དུ་ཆོས་རྣམས་ལས་ཉམས་པར་གྱུར་པ་ཡོད་པ་མ་ཡིན་པ་དང་། འཇིག་རྟེན་ཕ་རོལ་གྱི་དོན་ཀུན་ནས་གླེང་སློང་བར་བྱེད་པ་དང་ལྡན་པའོ། །འཁོར་བ་ལ་འཇིགས་པར་འགྱུར་བ་དང་། ལས་ཀྱི་འབྲས་བུ་རྣམ་པར་སྨིན་པ་ལ་སྐུར་
བ་མི་འདེབས་པ་དང་། ཉེས་པར་སྤྱོད་པ་རྣམ་པ་གསུམ་ཡང་ཡོངས་སུ་སྤོང་བར་བྱེད་དོ། །གོམས་པར་ཡང་མི་བྱེད་དོ། །ཆད་པ་ལ་དགའ་བ་མ་ཡིན་ནོ། །བློ་གཞན་དང་ལྡན་པ་མ་ཡིན་པ་དང་སྟེ། དེ་རྣམ་པ་དེ་ལྟ་བུ་དག་གིས་སྐྱེ་བོ་གཞན་དང་བདག་ཉིད་ཀྱང་
ལེགས་པར་འཇུག་པར་བྱེད་དེ་རྒྱས་པར་ཡང་བྱེད་དོ། །འཇིག་རྟེན་གཉིས་སུ་ཕན་པ་བྱེད་པར་གྱུར་པའི་སྐྱེ་བོ་རྣམ་པ་དེ་ལྟ་བུ་དེ་དག་གི་སྐྱེ་བོ་དང་ལྡན་པའི་རྒྱལ་པོས་རྒྱལ་ཁམས་ཀྱང་སྐྱོང་བར་བྱེད་ཅིང་རང་དང་གཞན་ཡང་འཛིན་པར་བྱེད་པ་རྣམས་ནི་ལུས་ཞིག་ནས་མཐོ་རིས་
བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཡང་ཆོས་གཞན་དང་ཡང་དག་པར་ལྡན་པར་གྱུར་པའི་རྒྱལ་པོས་རྒྱལ་ཁམས་ལེགས་པར་སྐྱོང་བར་བྱེད་པ་ནི། ལུས་ཞིག་ནས་ཀྱང་མཐོ་རིས་བདེ་འགྲོའི་འཐབ་བྲལ་གྱི་ལྷ་རྣམས་ཀྱི་མངའ་
བདག་ཏུ་འགྱུར་རོ། །གང་དག་ཞེ་ན། འདི་ལྟ་སྟེ། ངེས་པ་དང་ལྡན་པས་འབྲས་བུ་རྣམས་ཟ་བར་འགྱུར་བའོ། །ངེས་པ་མེད་པ་ཞེས་བྱ་བ་ནི་དེའི་ཡུལ་ལམ་གྲོང་ཁྱེར་རམ་གྲོང་ངམ་ཚོང་འདུས་རྣམས་ཀྱང་རུང་སྟེ། དུས་ཐམས་ཅད་དང་གནས་སྐབས་ཐམས་ཅད་དུ་ངེས་

པར་བྱས་པའི་དཔྱ་རྣམས་ཡོད་པར་གྱུར་པ་ལས་དེ་དག་རྣམས་དེ་ཁོ་ན་བཞིན་དུ་རྒྱལ་པོ་འདིས་ཉམས་པར་མ་གྱུར་པ་ཡང་དུས་ཀྱི་སྐྱོན་གྱིས་སམ། མནར་བར་གྱུར་ནས་རིམ་གྱིས་འཕེལ་བར་གྱུར་པའི་རང་གི་དངོས་པོ་རྣམས་རིགས་པ་མ་ཡིན་པས་འཕྲོག་པར་བྱེད་ན། འཇལ་བྱེད་
ལ་འཇལ་བར་མི་བྱེད་པ་དང་། གཡོས་བདེན་པར་འགྱུར་བ་ཡོད་དམ་ཅི། དེ་ལྟར་རྒྱལ་པོ་ངེས་པའི་འབྲས་བུ་ཟ་བར་བྱེད་པ་ཡིན་ནོ། །དེས་སྐྱེ་དགུ་རྣམས་འཚེ་བར་མི་བྱེད་དོ། །ཡུལ་འཁོར་ཡང་ཡོངས་སུ་སྲུང་བར་བྱེད་དོ། །སྐྱེ་བོ་ཐམས་ཅད་ལ་རྗེས་སུ་བརྩེ་བ་པོ་དེ་ལུས་
ཞིག་པར་གྱུར་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་བདག་པོར་འགྱུར་རོ། །ཡང་ཆོས་གཞན་དང་ཡང་དག་པར་ལྡན་པའི་རྒྱལ་པོས་ཡུལ་འཁོར་ཡོངས་སུ་སྐྱོང་བར་བྱེད་དོ། །སྐྱེ་དགུ་ཀུན་ཏུ་དགའ་བར་ཡང་བྱེད་དོ། །གང་དག་ཞེ་ན། འདི་ལྟ་སྟེ།
བཟོད་པ་དང་ལྡན་པར་གྱུར་པའོ། །འདི་ལ་རྐྱེན་གྱི་དབང་གིས་ཁྲོ་བ་འབྱུང་བར་གྱུར་ན་ཡང་ཡོངས་སུ་སྤོང་བར་བྱེད་དོ། །རྗེད་དཔོན་ཡིན་པར་གྱུར་ནས་ཀྱང་གནང་ལ་སྒོ་བར་མི་བྱེད་དོ། །གཞན་གྱི་འབྱོར་པས་མི་བཟོད་པར་མི་བྱེད་དོ། །གྲོང་ཁྱེར་ཉེས་པ་ཅན་རྣམས་ལ་ཡང་
གཙེ་བ་སྐྱེད་པར་ཡང་མི་བྱེད་དོ། །གྲོགས་པོའི་དྲུང་དུ་ཚིག་རྩུབ་མོ་རྣམས་སྨྲ་བར་ཡང་མི་བྱེད་དོ། །ཁྲོ་བ་སྐྱེས་པར་གྱུར་ན་ཡང་བཟོད་པས་རབ་ཏུ་ཞི་བར་བྱེད་དོ། །འདིས་སྙན་པ་རྗོད་པར་བྱེད་དོ། །བརྗོད་པར་གྱུར་པ་ན་ཡང་ཇི་ལྟར་འདིས་གྲོང་ཁྱེར་པ་འདི་རྣམས་མི་བདེ་བར་གྱུར་
ཅིང་འཁྲུག་པར་བྱེད་པ་མ་ཡིན་ནོ། །དེ་ལྟར་གནས་སྐབས་ཐམས་ཅད་དང་རྣམ་པ་ཐམས་ཅད་དང་དུས་ཐམས་ཅད་དུ་སྙིང་རྗེ་དང་ལྡན་པར་འགྱུར་ཏེ། རང་བཞིན་གྱིས་ཡིན་གྱི་དགོས་པ་རྣམས་ཀྱི་རྒྱུ་གང་ལས་ཀྱང་ནི་མ་ཡིན་ནོ། །རྒྱལ་པོ་དེ་བཟོད་པ་དང་ལྡན་པར་གྱུར་པའི་
རྒྱུ་དེ་དག་དང་རྐྱེན་དེ་དག་གིས་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བར་གྱུར་པ་འཇིག་རྟེན་འདི་དང་ཕ་རོལ་དུ་ཡང་ཕན་པར་འགྱུར་བའི་ཕྱོགས་འཛིན་

མེད་པར་ལུགས་ལེགས་པར་སྐྱོང་བར་བྱེད་པ་འདི་ཡང་གང་ཞེ་ན། བླ་ན་མེད་པའི་དགེ་བའི་བསམ་པ་མཚུངས་པས་རྒྱལ་པོ་ཡུལ་ལྗོངས་པ་རྣམས་ཐམས་ཅད་ཀྱི་མ་དང་ཕ་དང་འདྲ་བར་འགྱུར་རོ། །གཅིག་ཏུ་ནོར་གྱི་རྒྱུས་དང་ཕན་འདོགས་པའི་རྒྱུས་དང་རང་གི་
སྐྱེ་བོ་ཡིན་པའི་རྒྱུས་དང་སྔོན་ཕན་བཏགས་པའི་རྒྱུས་དང་། འབྲེལ་བར་གྱུར་པའི་རྒྱུས་དང་སྐྱེ་དགུའི་བདག་པོར་གྱུར་པ་དང་དམག་གི་དཔོན་པོ་ཡིན་པའི་རྒྱུས་ཀྱང་མ་ཡིན་ཏེ། གནས་སྐབས་ཐམས་ཅད་དུ་ཡང་ཕྱོགས་འཛིན་པར་མི་བྱེད་དོ། །དེ་ལུགས་རྣམ་པར་གཞག་པ་
བྱེད་པའི་དུས་ན་གྲོགས་པོ་དང་གྲོགས་པོ་མ་ཡིན་པ་ལ་བློ་མཉམ་པར་འགྱུར་རོ། །དེ་དག་རྣམས་བྱེད་པར་གྱུར་པ་ན་རྒྱལ་པོ་དེའི་ཡུལ་ལྗོངས་ཡོངས་སུ་ཉམས་པར་མི་འགྱུར་རོ། །སྙན་གྲགས་ཀྱང་ཡོངས་སུ་ཉམས་པར་མི་འགྱུར་རོ། །རྒྱལ་པོ་མེད་པའི་གྲོང་ཁྱེར་དུ་མི་འགྱུར་རོ། །
གཞན་གྱི་དཔུང་གིས་འཇིགས་པར་མི་འགྱུར་རོ། །རྒྱལ་པོ་གཞན་ཁ་དྲག་པར་མི་འགྱུར་རོ། །དེ་དུས་ཡུན་རིང་དུ་རྒྱལ་པོ་བྱེད་པར་འགྱུར་རོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་རྒྱལ་
རིགས་རྒྱལ་པོར་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་བའི་ཆོས་ཡོད་པ་ནི། འཇིག་རྟེན་གཉིས་ལ་ཕན་པ་དང་མྱ་ངན་ལས་འདས་པའི་མཐར་ཐུག་པར་ཡང་བྱེད་དོ། །འདི་ཡང་གང་ཞེ་ན། འདི་ལྟ་སྟེ། བླ་མ་མཆོད་པར་བྱེད་པའོ། །བླ་མ་ཞེས་བྱ་བའང་ཇི་ལྟ་བ་བཞིན་
དུ་དེ་ཁོ་ན་སྟོན་པར་བྱེད་པའོ། །དེ་ཡང་ཚུལ་ཁྲིམས་དང་ཤེས་རབ་དང་དཀའ་ཐུབ་དང་ལྡན་ཞིང་སེམས་ཅན་རྣམས་ལ་ཕན་པ་ལ་ལེགས་པར་ཞུགས་པར་གྱུར་པ་གཅིག་ཏུ་ངེས་པར་དགེ་བ་བྱེད་པ་པོ་ལུས་དང་ངག་གིས་ལས་ཀྱི་མཐའ་རབ་ཏུ་ཞི་བ་དྲི་མ་རྣམས་དང་བྲལ་བར་གྱུར་པ་དེ་
གཞན་རྗེས་སུ་འཛིན་པ་ལ་ཞུགས་པ་དེ་ལ་རྗེས་སུ་རྟེན་པར་བྱེད་དོ། །དེ་དག་གི་དྲུང་ནས་ངག་འཛིན་པར་བྱེད་དོ། །དེ་ཇི་ལྟར་སྤྱོད་པར་བྱེད་པ་དེ་ལྟར་དེ་ཡང་སྤྱོད་པར་བྱེད་དོ། །རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་དག་དེ་མཆོད་པར་བྱེད་པས་འདི་ལ་རྟག་ཏུ་ཕན་

པར་འགྱུར་བ་དང་། ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་མངའ་བདག་ཏུ་འགྱུར་ཏེ། དགེ་བའི་ལས་དེའི་རྐྱེན་རྣམས་དང་དགེ་བ་དེ་དག་གི་རྒྱུ་ལས་སོ། །གཞན་ཡང་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་
བའི་ཆོས་སུ་གྱུར་པ་དག་གིས་འཇིག་རྟེན་གཉིས་སུ་ཕན་པར་གྱུར་པ་ནི་འདི་ལྟ་སྟེ། སྔར་བྱིན་ནས་ཕྱིས་ཀྱང་སྟེར་བར་གྱུར་པའོ། །གང་ཡང་ཕས་སམ་མེས་པོས་སམ་ཡང་མེས་པོས་སམ་གཞན་གྱིས་སམ་དེ་དག་དང་དེ་ལས་གཞན་པ་རྣམས་ཀྱིས་ཀྱང་རུང་སྟེ་རྟག་ཏུ་གང་བྱིན་
པར་གྱུར་པ་ལས་གཞིའམ་དབྱིག་ལ་སོགས་པ་རྣམས་འདྲེན་མ་དང་རྙོག་མ་ཅན་དུ་གྱུར་པའི་སེམས་མ་ཡིན་པས་དང་ཕན་པ་དང་མཆོག་ཏུ་དང་བས་དེ་དག་ལ་རྗེས་སུ་ཡི་རང་བར་བྱེད་ཅིང་དེ་དག་ཉིད་ལ་དགའ་བ་དང་། སླར་ཉིད་ཡང་སྦྱིན་པ་བསྔགས་པར་བྱེད་དོ། །གཞན་ཡང་སྦྱིན་
པ་རྗེས་སུ་གཏོང་བ་ལ་རབ་ཏུ་འཇུག་པར་བྱེད་དོ། །དེ་ཉིད་ཀྱང་དེ་བཞིན་དུ་རབ་ཏུ་གནས་པ་དང་རབ་ཏུ་འཇུག་པར་བྱེད་པ་གང་ཡིན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་འདིའི་ལུས་ཞིག་ནས་ལས་དེ་དག་རྣམས་ཀྱི་རྒྱུ་དང་། རྐྱེན་དེ་དག་གིས་ཀྱང་མཐོ་རིས་བདེ་
འགྲོའི་འཇིག་རྟེན་འཐབ་བྲལ་བའི་མངའ་བདག་ཏུ་སྐྱེ་བར་འགྱུར་རོ། །ཆོས་གཞན་ཡང་རྒྱལ་རིགས་སྤྱི་བོ་ནས་དབང་བསྐུར་བའི་འཇིག་རྟེན་གཉིས་སུ་དོན་དང་། ཕན་པ་དང་། བདེ་བར་འགྱུར་བ་འདི་ཡང་གང་ཞེ་ན། འདི་ལྟ་སྟེ། སྦྱིན་པའོ། །སྦྱིན་པ་ཞེས་བྱ་བ་
ཡང་གནས་སྐབས་ཐམས་ཅད་དང་། ཐམས་ཅད་ཉིད་ལ་དང་། རྣམ་པ་ཐམས་ཅད་དུ་དང་། དུས་ཐམས་ཅད་དུ་དང་། བློ་གྲོས་ཐམས་ཅད་ལ་ཡང་ཕན་པར་འགྱུར་བ་དང་། བདེ་བར་འགྱུར་བ་དང་། ཐམས་ཅད་ནས་འགྲོ་བ་ཐམས་ཅད་དུ་ཡང་དམྱལ་བ་དང་། ཡི་
དགས་དང་། དུད་འགྲོར་སྐྱེས་པ་རྣམས་ལ་ཡང་བཀྲེས་པ་རྣམ་པར་འཇོམས་པ་དང་། སྐོམ་པ་རྣམ་པར་འཇོམས་པར་བྱེད་པ་ཡིན་ན་ལྷ་དང་མི་རྣམས་ལ་འབྱུང་བར་འགྱུར་བ་ལ་ལྟ་སྨོས་ཀྱང་ཅི་དགོས། གཏོང་བ་ཅན་གྱི་རྒྱལ་པོ་ནི་མཐོང་བའི་ཚེ་འབྲས་བུ་དང་ཡང་ལྡན་པ་ཡིན་

ནོ། །གང་དག་ཞེ་ན། འདི་ལྟ་སྟེ། གྲགས་པས་རྗེས་སུ་དགའ་བར་གྱུར་ནས་གྲོང་ཁྱེར་དང་ཡུལ་ལྗོངས་ཕུན་སུམ་ཚོགས་པར་འགྱུར་བ་དང་། དེ་དག་རྣམས་ཀྱིས་ཡོངས་སུ་སྤོང་བར་ཡང་མི་འགྱུར་རོ། །དེས་ཡུལ་ལྗོངས་གཞན་གྱི་མཆོད་པ་ཡང་
བླ་ན་མེད་པ་དུ་མ་འཐོབ་བོ། །དེ་ཉིད་མངོན་པར་ཀུན་དུ་མཐོང་ནས་ཀྱང་ཕས་ཀྱི་དཔུང་རྣམས་ཀྱིས་ཀྱང་ཟིལ་གྱིས་མི་ནོན་ནོ། །འདི་ལ་དགྲ་རྣམས་ཀྱིས་བར་དུ་གཅོད་པ་ཕྲ་མོ་ཙམ་ཡང་བྱ་བར་གླགས་མི་ཐོད་དོ། །དེ་ཡུལ་དང་གྲོང་ཁྱེར་གྱི་མཆོག་རྣམས་དང་ལྡན་པར་འགྱུར་བ་ནི་
གོམས་པར་མ་གྱུར་པ་རྣམས་ལ་ཡང་མཐོང་བའི་ཆོས་ཀྱི་སྦྱིན་པའི་འབྲས་བུ་ཡིན་ནོ། །གང་ཡང་ཞིང་དང་། དངོས་པོ་དང་། བསམ་པ་ཕུན་སུམ་ཚོགས་པས་སྦྱིན་པ་བྱིན་པར་གྱུར་པ་རྣམས་ལ་ལྟ་ཅི་སྨོས། དེས་ནི་གཅིག་ཏུ་དགའ་བར་གྱུར་པ་དང་། གཅིག་ཏུ་ངན་སོང་གི་
སྒོ་རྣམ་པར་སྡོམ་པ་དང་། གཅིག་ཏུ་རྣམ་པར་སྨིན་པ་བདེ་བར་འགྱུར་རོ། །དེ་ལ་སྦྱིན་པ་སྦྱིན་པར་བྱ་བ་རྣམས་ནི་རྣམ་པ་དུ་མ་ཡོད་དོ། །རྣམ་པ་དུ་མ་དེ་ཡང་གང་ཞེ་ན། འདི་ལྟ་སྟེ། ཟང་ཟིང་གི་སྦྱིན་པ་དང་། མི་འཇིགས་པའི་སྦྱིན་པ་དང་། ཆོས་ཀྱི་སྦྱིན་པའོ། །
རྣམ་པ་དེ་ལྟ་བུའི་སྦྱིན་པ་རྣམས་གང་གི་ཚེ་རྒྱལ་པོ་དེས་དགེ་སྦྱོང་དང་བྲམ་ཟེ་རྣམས་ལ་གཏོང་བར་བྱེད་པ་དེ་ཡང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་བདག་པོར་ལས་དེའི་རྒྱུ་དང་རྐྱེན་རྣམས་ཀྱིས་འགྱུར་རོ། །གཞན་ཡང་རྒྱལ་པོ་རྒྱལ་
རིགས་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་བའི་ཆོས་འཇིག་རྟེན་གཉིས་ལ་ཕན་པར་བྱེད་པ་ཡོད་དེ། འདི་ཡང་གང་ཞེ་ན། ཆོས་བྱེད་པ་མ་ཡིན་པ་རྣམས་མི་འཛིན་པའོ། །རྒྱལ་པོ་རྒྱལ་རིགས་རྣམས་ཀྱང་གང་གི་ཕྱིར་ཆོས་དང་ལྡན་པ་དང་། ཆོས་ཀྱི་རྗེས་
སུ་འཇུག་པ་ཡིན་ནོ། །ཆོས་བྱེད་པ་མ་ཡིན་པའི་སྐྱེ་བོ་རྣམས་ངེས་པར་འགེགས་པར་མི་བྱེད་པ་དང་། འཛིན་པར་བྱེད་པ་དང་། ཆོས་བྱེད་པ་མ་ཡིན་པ་རྣམས་ཀྱིས་མགྲིན་པ་མི་གཙང་བར་བྱེད་པ་པོ་ལོག་པར་ལྟ་བས་རི་དགས་ཀྱི་འཁོར་བ་འགྲོལ་བར་བྱེད་པ། མཆོད་

སྦྱིན་དང་ཕྱུགས་གསོད་པར་བྱེད་པ། སྐྱེས་བུ་ཐ་ཆད་དུ་གྱུར་པ། སྐྱེས་བུ་ཕྱིན་ཅི་ལོག་འཛིན་པ། ཕ་མ་ལ་གུས་པ་མེད་པ་དང་རྣམ་པ་དེ་ལྟ་བུར་གྱུར་པ་རྣམས་ཡུལ་དུ་འཛིན་པར་མི་བྱེད་དོ། །དེ་དང་བསྟེན་འགྲོགས་བྱས་པར་གྱུར་པའི་སྐྱོན་གྱིས་སྐྱེས་བུ་གཞན་དག་དགེ་བའི་
སེམས་དང་ལྡན་པ་རྣམས་ཀྱང་རབ་ཏུ་ཆུད་གཟོན་པར་བྱེད་དོ། །དེ་དག་རྣམས་ལ་བསྟེན་པའི་སྐྱོན་གྱིས་དེ་དག་ཆུད་གཟན་པས་འདིའི་མངའ་བྱེད་པ་རྣམས་ཡོངས་སུ་ཉམས་པར་འགྱུར་རོ། །དུས་མ་ཡིན་པར་ཆར་འབབ་པར་འགྱུར་རོ། །དུས་མ་ཡིན་པར་ལྷས་
ཤིན་ཏུ་ཚ་བར་བྱེད་དོ། །དུས་མ་ཡིན་པར་ལོ་ཏོག་རྫོགས་པར་བྱེད་དོ། །ཡུལ་ལྗོངས་བརླག་པར་ཡང་འགྱུར་ཏེ། སྡིག་པ་བྱེད་པ་པོ་དེ་རྣམས་ཀྱི་ཉེས་དམིགས་ཆེན་པོས་སོ། །རྒྱུ་དེས་ན་ཆོས་བྱེད་པ་རྣམས་འཛིན་པ་ཡིན་ནོ། །སྐྱེས་བུ་ཆོས་བྱེད་པ་ཀུན་དུ་བཟུང་
བས་ཀྱང་ལྷས་དུས་སུ་ཆར་འབེབས་སོ། །དུས་སུ་རླུང་རྒྱུའོ། །དུས་སུ་ལོ་ཏོག་རྫོགས་པར་བྱེད་དོ། །ཡུལ་ལྗོངས་བརླག་པར་ཡང་མི་འགྱུར་རོ། །འཇིགས་པ་དང་། མྱ་ངན་དང་། ཡ་ང་བ་དང་སྐྱེ་དགུ་རྣམས་བྲལ་བར་འགྱུར་རོ། །སྐྱེས་བུ་ཆོས་བྱེད་དེ་དག་མངའ་བྱེད་
པར་གྱུར་པས་འདུ་བྱེད་རྣམས་ཐམས་ཅད་ཀྱི་སྡུག་བསྔལ་རྣམ་པར་ཆད་པར་བྱེད་དོ། །སྐྱེས་བུ་ཆོས་བྱེད་ལེགས་པར་འཛིན་ཅིང་སྟེན་པར་བྱེད་པ་འདིའི་སྙིང་པོའི་མཆོག་ནི་ཚངས་པར་སྤྱོད་པའོ། །འདི་ལྟ་སྟེ། སྐྱེས་བུ་ཆོས་བྱེད་རྣམས་སྟེན་པའམ། ལེགས་པར་འཛིན་པར་
བྱེད་པའོ། །དེའི་ཕྱིར་ན་བློ་དང་ལྡན་པར་གྱུར་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བས་སྐྱེས་བུ་ཆོས་བྱེད་པ་ལ་ཀུན་དུ་བསྟེན་པར་བྱའོ། །དེ་ལས་ཀྱང་འཇིག་རྟེན་གཉིས་སུ་ཕན་པར་འགྱུར་རོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་
བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། ལས་དེའི་རྒྱུ་དང་རྐྱེན་གྱིས་སོ། །གང་གིས་སྡིག་པའི་གྲོགས་པོ་དང་སྟེན་པར་མི་འགྱུར་བ་ལ་སྡིག་པའི་གྲོགས་པོ་ཡང་རྣམ་པ་བརྒྱད་སྤང་བར་བྱ་སྟེ། འདི་ལྟ་སྟེ། མེད་པར་སྨྲ་བར་གྱུར་པ་གང་གིས་སྦྱིན་སྲེག་མེད་དོ། །

སྦྱིན་པ་མེད་དོ། །འཇིག་རྟེན་འདི་མེད་དོ། །ཕ་རོལ་མེད་དོ་ཞེས་ཟེར་བ་འདི་ནི་སྡིག་པའི་གྲོགས་པོ་གཅིག་ཡིན་ནོ། །སྡིག་པའི་གྲོགས་པོ་གཉིས་པ་ཡོད་དེ། འདི་ལྟར་བགྲོད་པར་བྱ་བ་མ་ཡིན་པ་ཡོད་པ་ནི་མ་ཡིན་ནོ། །ཚངས་པར་སྤྱོད་པ་མེད་དོ། །
ནམ་ཟླ་དང་དུས་ཀྱིས་བུད་མེད་དག་ལ་ཐམས་ཅད་ཀྱིས་བགྲོད་པར་བྱ་བའོ། །སྐྱེས་བུ་གསུམ་པ་སྡིག་པའི་གྲོགས་པོར་གྱུར་པ་ནི་འདི་ལྟ་སྟེ། ཇི་ལྟར་གང་དག་སེམས་ཅན་རྣམས་ལ་བྱིན་པ་དང་མེར་བཅུག་པ་དེ་དག་རྣམས་ཀྱི་བཅུག་པར་གྱུར་པ་ནི་མ་བཅུག་པ་ཡིན་ནོ། །སྡིག་
པའི་གྲོགས་པོ་བཞི་པ་ནི་འདི་ན་ཇི་སྲིད་འཚོ་བའི་བར་དེ་སྲིད་ཅིག་ཁོ་ནར་སྐྱེས་བུ་དག་འགྱུར་གྱི་དེ་ཤི་བར་གྱུར་ན། དེའི་ཕྱིར་དེའི་ལེགས་པར་བྱས་པ་དང་ཉེས་པར་བྱས་པ་དེ་དག་རྣམས་ཐམས་ཅད་ཀྱང་ཇི་ལྟར་སྤྲིན་དང་ཁུག་རྣ་རྣམས་རྣམ་པར་ཉམས་ནས་སླར་ཡང་མི་འཇུག་པ་དེ་བཞིན་
དུ། ལུས་ཅན་དེ་དག་རྣམས་ཀྱི་བསོད་ནམས་དང་སྡིག་པ་ཡང་ཡིན་ནོ། །སྡིག་པའི་གྲོགས་པོ་ལྔ་པར་གྱུར་པ་ནི་ཕ་དང་མའི་རྩ་ནས་འབྱེད་པར་བྱེད་དོ། །གུས་པ་དང་རྣམ་པར་འབྲེལ་བར་བྱེད་དོ། །སྡིག་པའི་གྲོགས་པོ་དྲུག་པ་ཡོད་དོ། །འདི་ལྟ་སྟེ། སྲོག་གཅོད་
པ་བྱ་བར་བྱས་ཏེ་རྒན་པོ་དང་། ལོང་བ་དང་། མགོན་མེད་པ་དང་། བཀྲེན་པ་རྣམས་སོ། །དེ་དག་ཀྱང་ཤི་ནས་འཇིག་རྟེན་གཞན་དུ་བདེ་བར་འགྱུར་རོ། །སྡིག་པའི་གྲོགས་པོ་བདུན་པ་ནི་འདི་ལྟ་སྟེ། གང་དག་རླུང་གིས་སམ་དེའི་ཚེ་མེས་སྲེག་པ་དང་། རླུང་ཟ་
བ་དང་། གདུང་བ་ལྔས་དུས་བྱེད་པ་ནི་དེ་དག་གི་འཇིག་རྟེན་ཟད་པར་འགྱུར་ཏེ། གཞན་དག་ཏུ་རྗེ་བར་འགྱུར་བས་སོ། །སྡིག་པའི་གྲོགས་པོ་བརྒྱད་པ་ནི་འདི་དག་ཐམས་ཅད་ནི་ལྷས་བྱས་ཀྱི་ལས་དང་འབྲས་བུའི་མཚན་ཉིད་ནི་མ་ཡིན་ནོ། །སྡིག་པའི་གྲོགས་པོ་བརྒྱད་པོ་དེ་
དག་རྣམས་ལེགས་པར་ཡོངས་སུ་སྤང་བར་བྱའོ། །ཀུན་ཏུ་སྤང་བར་བྱའོ། །ཡུལ་དུ་འཇོག་པར་མི་བྱེད་དོ། །ཕྲད་པར་ཡང་མི་བྱེད་དོ། །གང་དག་གིས་རྒྱུ་དང་འབྲས་བུ་ཡང་དག་པ་ཇི་ལྟ་བར་བརྗོད་པ་དེ་དག་རྗེས་སུ་འཛིན་པར་བྱེད་དོ། །དེ་དག་རྣམས་ཀྱི་དྲུང་ནས་

དམ་པའི་ཆོས་རྗེས་སུ་འཛིན་པར་བྱེད་དོ། །འཇིག་རྟེན་གཉིས་ལ་ཕན་པ་ལ་རབ་ཏུ་ཞུགས་པའི་རྒྱལ་པོ་འདི་ནི་ལུས་ཞིག་ནས་ཤི་བའི་འོག་ཏུ་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་རྒྱལ་པོས་ཆོས་རབ་ཏུ་གཞོལ་བར་བྱ་བ་འདི་ཡང་གང་ཞེ་ན།
འདི་ལྟ་སྟེ། བུད་མེད་ཀྱི་དབང་དུ་འགྲོ་བར་མི་འགྱུར་བའོ། །སྐྱེས་བུ་ཐ་མལ་པ་རྣམས་བུད་མེད་ཀྱི་དབང་དུ་འགྲོ་བ་ཐམས་ཅད་ལ་ཡང་འཇིག་རྟེན་པ་རྣམས་ཐམས་ཅད་ཀྱིས་གཤེ་བར་འགྱུར་རོ། །ཅི་ཡང་མཆོག་ཏུ་རྒྱ་ཆེ་བའི་རིགས་རྒྱུད་དུ་ལེགས་པར་སྐྱེས་པའི་རྒྱལ་
པོ་ལྟ་ཅི་སྨོས། བུད་མེད་ཐམས་ཅད་ནི་རྣམ་པར་འབྱེད་པའི་རང་བཞིན་ཅན་ཡིན་ནོ། །དེས་ཡུལ་འཁོར་དང་། ཡུལ་ལྗོངས་རྒྱ་ཆེན་པོ་རྣམས་ཐམས་ཅད་ལས་རྒྱལ་པོ་རྣམ་པར་འབྱེད་པར་བྱེད་དོ། །འདོད་པས་ཟིལ་གྱིས་མནན་པར་གྱུར་པས་ལྷན་ཅིག་ཏུ་འགྲོགས་པ་
རྣམས་སུན་འདོན་པར་བྱེད་པར་འགྱུར་རོ། །ནོར་གྱི་ཆོས་ཀྱི་རྗེས་སུ་འཇུག་པར་བྱེད་ལ་སྦྱིན་པ་འགོགས་པར་བྱེད་དོ། །འདོད་པས་ཟིལ་གྱིས་མནན་པར་གྱུར་པ་གང་གི་ཕྱིར་ལེ་ལོ་ཅན་རྣམས་ཐམས་ཅད་ཀྱང་བུད་མེད་འཛིན་པར་བྱེད་དོ། །འདོད་ཆགས་ཀྱི་བསམ་
པས་གློར་ཀུན་ནས་སྐོར་བར་བྱེད་དོ། །སྐྱེས་བུ་རང་གི་དོན་རྣམས་ལས་ཡོངས་སུ་ཉམས་པར་བྱེད་དོ། །སྐྱེས་པ་ཆོས་ཀྱི་བསམ་པ་ཡང་དག་པར་བྱུང་བ་ཡང་བུད་མེད་ཐམས་ཅད་ཀྱིས་རྣམ་པར་འབྱེད་པར་བྱེད་པ་དང་། ཕྲ་མའི་བསམ་པ་དང་། ང་རྒྱལ་དང་། ཕྲག་
དོག་གི་སྐྱེ་གནས་ཅན་དེ་དག་རྣམས་ཀྱིས་སྐྱེས་པ་རྣམས་རང་བཞིན་མཚུངས་པར་བྱེད་དོ། །བུད་མེད་ཀྱིས་འཚོ་བར་གྱུར་པ་དེ་དག་ནི་སྦྲུལ་ནག་པོ་མཐོང་བ་དུག་ཅན་དེ་དག་གིས་ཡོངས་སུ་ཉམས་པར་བྱེད་དོ། །དེའི་ཕྱིར་བུད་མེད་ཀྱིས་འཚོ་བར་གྱུར་པའི་རྒྱལ་པོ་ཞེ་ལྡོག་གོ།།
དེ་དག་གི་གཞི་ཡང་འདི་ལྟ་སྟེ། བུད་མེད་ཅེས་བྱ་བའོ། །གཞི་དེས་འཚོ་བར་གྱུར་པས་དེ་ཆེས་བཙོག་པར་འགྱུར་རོ། །ཀུན་གྱི་ལམ་དུ་གྱུར་པ་ཆོས་ཀྱི་དུས་ལས་ལྷུང་ནས་ཡོངས་སུ་ཉམས་པར་འགྱུར་རོ། །སྐྱེས་བུ་བུད་མེད་ལ་གཙོར་བྱེད་པ་རྣམས་ནི་སྡུག་བསྔལ་དང་

ལང་ཚོ་དག་ཀྱང་ཀུན་དུ་འཛིག་པར་འགྱུར་རོ། །འདོད་ཆགས་ལ་མཆོག་ཏུ་འཛིན་པའི་སྐྱོན་གྱིས་རྟག་ཏུ་ཡང་ཐམས་ཅད་ཀྱིས་དེ་ཡོངས་སུ་སྤོང་བར་འགྱུར་རོ། །དེ་ཡང་བུད་མེད་དེ་ཉིད་རང་གི་སླུ་བར་བྱེད་དེ། དཀྲིག་མ་འདི་དག་རྣམས་ཐམས་ཅད་ནི་རང་
བཞིན་ཁོ་ནས་འདི་ལྟ་སྟེ། གསར་པ་ལ་ཞོན་པར་བྱེད་པ་དང་། བྱས་པ་ཆུད་གཟོན་པ་དང་། སྡུག་བསྔལ་བར་གྱུར་ན་ཡོངས་སུ་སྤོང་བ་ལ་མཁས་པ་དང་། འདོད་པ་དང་ཕྲག་དོག་ཕལ་ཆེ་བར་གནས་པས་ཀྱང་དེ་དག་རྣམས་ནི་སྐྱེས་པ་ལ་ངལ་སོས་པར་འགྱུར་བ་མེད་
དོ། །གང་ཡང་བུད་མེད་ཀྱི་དབང་གིས་འགྲོ་བར་གྱུར་པ་ནི་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཚོང་འདུས་རྣམས་ཐམས་ཅད་དུ་ཡང་འདི་ལ་སྐྱེ་བོ་དག་གིས་ཤིན་ཏུ་བར་ཡང་གཤེ་བར་འགྱུར་རོ། །ཁྱད་པར་དུ་ཡང་རྒྱལ་པོ་ལའོ། །དེའི་ཕྱིར་
བུད་མེད་བསྒྲུབ་པར་མི་བྱའོ། །བུད་མེད་ཀྱིས་འཇིགས་ཤིང་སྐྱོན་དུ་ལྟ་བ་དེ་ནི་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཡང་ཆོས་གཞན་རྒྱལ་པོས་མི་བྱའོ། །འདི་ཡང་གང་ཞེ་ན། འདི་ལྟ་སྟེ། ཐམས་ཅད་ཀྱི་
ཚིག་ལ་དད་པར་མི་བྱའོ། །གསོན་པའི་འཇིག་རྟེན་པ་འདི་དག་ཐམས་ཅད་ནི་རྒྱུད་ཐ་དད་པར་གནས་པ་ཕལ་ཆེར་ཡང་ཕན་ཚུན་དུ་སེམས་ཀུན་ནས་ཐ་དད་པ་དང་། རང་བཞིན་རྣམ་པ་ཐ་དད་པ་དང་། དགོས་པ་རྣམས་རྣམ་པར་ཐ་དད་པ་དང་། རྒྱུ་རྣམ་པར་ཐ་དད་པ་དང་། རང་
བཞིན་གྱི་གཤིས་ཀྱིས་དྲི་མའི་དངོས་པོ་རྣམས་རྣམ་པར་ཐ་དད་པ། རྟག་ཏུ་འཐབ་པ་དང་། རྩོད་པ་དང་། རྒྱུ་འཐུན་པའི་སེམས་ཐ་དད་པ་དང་། བསྟེན་གྲོགས་རྣམ་པར་ཐ་དད་པ་དང་། རང་བཞིན་རྣམ་པར་ཐ་དད་པ་དང་། ཡུལ་ལྗོངས་ལ་སྐྱོན་བྱེད་པ་རྣམ་པར་ཐ་དད་
པ་རྐྱེན་དང་བཅས་པའི་སེམས་ཡང་མོར་གྱུར་པས་ཀྱང་ཕན་ཚུན་དུ་རྒྱབ་ཀྱི་ཤ་ཟ་བར་བྱེད་དོ། །ཕན་ཚུན་མངོན་སུམ་དུ་ཐུལ་འོག་ཏུ་འཇུག་གོ། །དེ་དག་རྣམས་ཐམས་ཅད་ཀྱི་ཚིག་ལ་རྒྱལ་པོས་ཐ་དད་པར་མི་བྱ་སྟེ། དེ་ལྟར་གང་དག་རིགས་པ་དང་། རྣམ་པར་ཐ་དད་

པར་གྱུར་པ་དང་། སྔ་ཕྱི་རྣམ་པར་འགལ་བ་དང་། བསམ་པ་ཕན་ཚུན་མ་རུངས་པར་སོང་བར་གྱུར་པ་དང་། ཕྱོགས་ཆ་འཛིན་པར་གྱུར་པས་ཀྱང་སྨྲས་པར་གྱུར་པ་དང་། ཉེ་བར་བསྐྱེད་འདོད་པའི་དངོས་པོས་སྨྲས་པར་གྱུར་པ་དང་། སྔོན་ཕན་པར་བྱས་པ་དང་།
གནོད་པར་བྱས་པར་གྱུར་པས་སྨྲ་བར་འགྱུར་བ་དང་། ཕན་ཚུན་དུ་ནོར་དང་དབྲལ་བར་འདོད་པས་རྒྱལ་པོ་ལ་རྗོད་པར་བྱེད་པ་དེ་དག་སྔར་བརྗོད་པར་གྱུར་པའི་རྒྱུས་ཕན་ཚུན་དུ་རབ་ཏུ་སྡང་བར་ཞུགས་པས་རྗོད་པར་བྱེད་དོ། །དེ་དག་ལ་རྒྱལ་པོས་དད་པར་མི་བྱའོ། །
དེ་ལྟར་ན་འདིའི་ཡུལ་ལྗོངས་རྣམས་འཇིག་པར་མི་འགྱུར་རོ། །རང་བཞིན་གྱིས་ཀྱང་མི་སྐྱེ་ལ་གནས་མ་ཡིན་པ་ལ་ཡང་ཁྲོ་བར་མི་བྱེད་དོ། །འབྱེད་པར་བྱེད་པ་རྣམས་ལ་དད་པར་བྱེད་པ་ཡང་མ་ཡིན་ནོ། །རྒྱལ་པོ་དེ་ནི་ཡོན་ཏན་དང་ལྡན་པར་གྱུར་པ་གཞན་གྱི་རྐྱེན་གྱིས་
མི་འགྲོ་བར་རང་གི་འདུན་པར་གྱུར་པ། འཇུག་པར་གྱུར་པ། ཁྲོ་བ་ཤས་ཆུང་བ་སྐྱེ་བོ་རྣམས་ཐམས་ཅད་དང་ལྷ་རྣམས་ཀྱང་བློ་འཐུན་པ་སྟེ། ལེགས་པར་དཔྱད་ནས་བྱེད་པ་པོ་ཆོས་བྱེད་དྲང་པོར་གྱུར་པ་གྲོང་ཁྱེར་ལ་གཅེས་ཤིང་འདོད་པ་ནི་ལུས་ཞིག་པ་ན་མཐོ་རིས་འཐབ་
བྲལ་བའི་ལྷ་རྣམས་ཀྱི་ན་ནང་དུ་སྐྱེའོ། །གཞན་ཡང་ཆོས་གཞན་དང་ཡང་དག་པར་ལྡན་པའི་རྒྱལ་རིགས་རྒྱལ་པོ་སྤྱི་བོ་ནས་དབང་བསྐུར་བ་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །འདི་ཡང་གང་ཞེ་ན། འདི་ལྟ་
སྟེ། སྙན་གྲགས་ལ་སྲེད་པ་སྐྱེད་པར་བྱེད་པའོ། །རྒྱལ་པོ་གང་རྫས་ཀྱིས་ནི་མ་ཡིན་ལ་བརྐམ་ཆགས་ཅན་དུ་གྱུར་པ་ཡང་མ་ཡིན་ཏེ། ལག་པ་རབ་ཏུ་འཁུམས་པ་ནི་མ་ཡིན་ལ་བཞིན་རྣམ་པར་བསྡུས་པར་འགྱུར་བ་ཡང་མ་ཡིན་ཞིང་མིག་ཆུང་བ་ཡང་མ་ཡིན་ནོ། །གདོང་
ཆུང་བ་མ་ཡིན་ནོ། །གློ་བུར་དུ་ཁྲོ་བ་མ་ཡིན་པ་དང་། གློ་བུར་དུ་དང་བར་འགྱུར་བ་ཡང་མ་ཡིན་པ་དང་། ཤིན་ཏུ་བརྟན་པའི་བློར་གྱུར་པ་དང་། དེ་ནི་སྙན་གྲགས་དང་ཡང་དག་པར་ལྡན་པར་འགྱུར་ལ། ནོར་རྫས་རྣམས་དང་ཡང་ལྡན་པར་འགྱུར་རོ། །འོན་ཀྱང་

དེ་བཞིན་དུ་ནོར་ལ་འདོད་པ་མི་སྐྱེད་དེ་ཇི་ལྟར་སྐྱེ་དགུ་རྣམས་ལ་སྙན་གྲགས་སུ་འགྱུར་བར་རྒྱལ་པོ་དེས་སྒྱུར་བར་བྱེད་དོ། །དགྲ་རྣམས་ཀྱིས་ཀྱང་མི་ཐུབ་པ་དང་འཇུ་བར་ཡང་འགྱུར་རོ། །རྒྱུ་བཅུས་སྙན་གྲགས་ཅན་འཐོབ་པར་འགྱུར་ཏེ། བཅུ་པོ་གང་ཞེ་ན།
འདི་ལྟ་སྟེ། ཚིག་སྙན་པར་གྱུར་པ་དང་། རྒྱལ་པོ་ཡང་ཀུན་འགྱེད་པའི་རང་བཞིན་ཅན་དང་། རྐོ་ཏྲོག་ཅན་མ་ཡིན་པ་དང་། ཤིན་ཏུ་རིང་དུ་རྟོགས་པར་གྱུར་པའི་བདེ་བར་སྟེན་པ་དང་། དུས་སུ་རབ་ཏུ་སྦྱིན་པ་གཏོང་བ་དང་། བྲན་དང་ནོར་བླ་མ་དང་། སྐྱེ་བོ་བཟང་
པོ་དང་མགོན་མེད་པ་རྣམས་ལ་ཆ་ཤས་འགོད་པར་བྱེད་པ་དང་། གཙང་མའི་རབ་ཏུ་སྤྱོད་པ་དང་ལྡན་པ་དང་། གནོད་པར་མི་བྱེད་པ་དང་། ལོག་ལྟ་ཅན་མ་ཡིན་པ་དང་། རྒྱུ་བཅུ་པོ་དེས་སྙན་པ་ཐོབ་པར་འགྱུར་རོ། །རྒྱུ་དེ་དག་ཐམས་ཅད་འདིས་རབ་ཏུ་བྱེད་པར་
འགྱུར་ཞིང་གཞན་ཡང་བྱེད་དུ་འཇུག་པ་དང་། དེས་རྒྱུ་དེ་དག་བྱེད་པར་གྱུར་པ་ན་སྙན་པ་ཡང་འཐོབ་བོ། །རྒྱལ་འབངས་ཀྱང་ཡང་དག་པར་སྐྱོང་བར་བྱེད་དོ། །ཆོས་བྱེད་དུ་ཡང་འགྱུར་རོ། །གཞན་གྱིས་ཀྱང་གདུལ་བར་མི་ནུས་སོ། །བདེ་བར་སྟེན་པར་ཡང་འགྱུར་
རོ། །མིའི་འཇིག་རྟེན་དུ་དུས་ཤིན་ཏུ་རིང་བར་རྒྱལ་པོ་བྱས་ནས་རྒྱུ་དེ་དང་རྐྱེན་དེས་ལུས་ཞིག་པར་གྱུར་པ་ན་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རབ་ཏུ་སྤངས་པར་གྱུར་པ་ན། རྒྱལ་པོ་རྒྱལ་རིགས་སྤྱི་
བོ་ནས་དབང་བསྐུར་བ་ཡང་དག་པར་སྐྱེ་དགུ་སྐྱོང་བར་འགྱུར་ལ། དེ་བཞིན་དུ་མཐོང་བའི་ཆོས་ལ་རྟག་པར་རབ་ཏུ་བསྔགས་པར་ཡང་འགྱུར་རོ། །ལུས་ཞིག་ནས་ཀྱང་ཤི་བའི་འོག་ཏུ་མཐོ་རིས་ཀྱི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་
འདི་ཡང་གང་ཞེ་ན། འདི་ལྟ་སྟེ། ལོག་པར་ལྟ་བའོ། །ལོག་པར་ལྟ་བ་ཞེས་བྱ་བ་ཉེས་པ་ཐམས་ཅད་ཀྱི་གཞིར་གྱུར་པ་ཡང་དག་པ་མ་ཡིན་པ་ཕྱིན་ཅི་ལོག་གི་ལྟ་བ་རྒྱུ་དང་རྐྱེན་ཐམས་ཅད་ལ་གཤེ་བར་བྱེད་པ། མི་དད་པར་བྱེད་པའོ། །དེ་གཞི་དེ་ལ་རབ་ཏུ་གནས་པར་

མི་བྱེད་པ་དང་། དེ་ལ་རབ་ཏུ་ཞེ་སྡང་བར་བྱེད་པ་དང་། དེ་ལ་རྣམ་པར་གཤེ་བར་བྱེད་པ་དང་། དེ་ཡོངས་སུ་སྤོང་བར་འགྱུར་རོ། །ལོག་པར་ལྟ་བ་དང་ལྡན་པར་གྱུར་པའི་རྒྱལ་པོ་ནི་སྐྱེ་བོ་ཐམས་ཅད་ཀྱི་རྗེས་སུ་མི་འཐུན་པར་འགྱུར་རོ། །མི་འཐུན་པས་དུས་ཐམས་
ཅད་དུ་ཡུལ་ལྗོངས་པ་རྣམས་ཐམས་ཅད་ཀྱིས་ཡོངས་སུ་སྤོང་བར་བྱེད་དེ་འདི་མི་བཟོད་དོ། །ཆོས་དང་ལྡན་པའི་ལྷ་དག་གིས་ཀྱང་ཡོངས་སུ་སྤོང་བར་འགྱུར་རོ། །ཡོངས་སུ་སྤངས་པར་གྱུར་པ་དེ་མོས་པ་མང་པོ་དང་མི་ལྡན་པར་འགྱུར་རོ། །དེའི་ཕྱིར་རྒྱལ་པོ་ལོག་པར་ལྟ་
བ་ཅན་མ་ཡིན་པ་ཡང་དག་པར་ལྟ་བ་ཅན་གྱི་རྒྱལ་པོ་ནི་ཡང་དག་པར་སྐྱེ་དགུ་ལ་ཕན་པར་གནས་པར་འགྱུར་རོ། །ཡུལ་བ་རྣམས་ཐམས་ཅད་ཀྱིས་མཆོད་པར་འགྱུར་རོ། །ལྷ་ཆོས་པ་དག་གིས་ཀྱང་ཡོངས་སུ་མི་གཏོང་ངོ་། །ཡུལ་ལྗོངས་ཐམས་ཅད་ཀྱི་རྗེས་སུ་མི་འཐུན་
པ་མ་ཡིན་པར་འགྱུར་རོ། །འདིས་ཀུན་དུ་བརྟགས་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །འདིའི་ཡིད་ལ་བསམས་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །རང་བཞིན་གྱིས་ཀྱང་ཕྱིས་འགྱོད་པ་ཅན་དུ་མི་འགྱུར་རོ། །དེ་དུས་རིང་
བར་ཉེས་པ་མེད་པའི་རྒྱལ་སྲིད་བྱས་པར་གྱུར་ནས་ལུས་ཞིག་སྟེ། མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་རྒྱུ་དེ་དག་དང་རྐྱེན་དེས་འགྱུར་རོ། །ཡང་གཞན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བྱ་བར་བྱ་སྟེ། འདི་
ཡང་གང་ཞེ་ན། འདི་ལྟ་སྟེ། གཏོང་བ་ཅན་དུ་གྱུར་པའོ། །རྒྱལ་པོ་འདིའི་མཆོག་ཏུ་ཁྲེལ་ཡོད་པའི་རྩ་བ་དེ་ནི་གང་སྦྱིན་པ་ཞེས་བྱ་བ་དེས་འཇིག་རྟེན་པའི་ཕན་པའི་ལམ་རབ་ཏུ་སྒྲུབ་བོ། །འཇིག་རྟེན་ལས་འདས་པ་དང་འཇིག་རྟེན་པ་ཡང་རེ་ཞིག་སྦྱིན་པ་ལས་ཡིན་ཏེ།
གཏོང་བར་བྱེད་པ་ན་རྒྱལ་པོའམ་རྒྱལ་པོའི་བློན་པོ་ལ་ཡང་རུང་སྟེ། སྟེར་བའི་སྐྱེ་བོ་དེ་ལ་ཡུལ་ལྗོངས་པ་ཐམས་ཅད་རང་བཞིན་གྱིས་མཆོག་ཏུ་དགའ་བར་འགྱུར་རོ། །ཡོངས་སུ་སྤོང་བར་མི་བྱེད་དོ། །གཤེ་བ་དང་། སྨོད་པར་ཡང་མི་བྱེད་དེ། ཡུལ་འཁོར་གཞན་

དུ་ཉེ་བར་འཕོས་ནས་མི་འགྲོའོ། །གང་ལུས་གཞན་ནས་སོང་བར་གྱུར་པ་དེ་དག་ཡང་གཏོང་བ་ཅན་གྱི་རྒྱལ་པོ་ཞེས་བྱས་ནས་འོང་བར་འགྱུར་རོ། །དེའི་ཡུལ་ལྗོངས་ཀྱི་ཚོགས་ཀུན་ཏུ་འཕེལ་བར་འགྱུར་རོ། །ཡུལ་ལྗོངས་ཀྱི་ཚོགས་དེས་ཀྱང་རྒྱལ་པོ་
བསྲུངས་པར་གྱུར་པས་གཞན་གྱིས་མི་ཐུབ་པར་འགྱུར་རོ། །གང་རང་བཞིན་གྱིས་ཀྱང་འདི་རྣམ་པར་འཕེལ་བ་དང་ལྡན་པར་འགྱུར་རོ། །དེ་རང་བཞིན་གྱིས་རྣམ་པར་འཕེལ་བར་གྱུར་པས་འཛིན་པ་དང་། སོ་སོར་སྐྱོབ་པ་ལ་ནུས་པ་མཆོག་དང་ལྡན་པར་འགྱུར་རོ། །
དེ་ལྟར་འཇིག་རྟེན་པའི་དོན་ལ་ཡང་སྦྱིན་པ་རབ་ཏུ་བསྔགས་སོ། །སྦྱིན་པ་ནི་འཇིག་རྟེན་ལས་འདས་པའི་དོན་ལ་ཡང་རབ་ཏུ་བསྔགས་ཏེ། དེ་ལྟར་སྦྱིན་པ་པོ་དང་སྦྱིན་བདག་གི་སྦྱིན་པ་གཏོང་བར་གྱུར་པ་ན་ལྷ་རྣམས་ཀྱིས་ཡོངས་སུ་འཛིན་ནོ། །གཟི་བརྗིད་ཆེ་བར་འགྱུར་
རོ། །བཙན་ཕྱུག་ཆེན་པོ་དང་ལྡན་པ་དང་། མཐུ་སྟོབས་ཆེ་བར་འགྱུར་རོ། །དགེ་སྦྱོང་དང་། བྲམ་ཟེ་དང་། ཉོན་མོངས་པར་གྱུར་པ་དང་། ལོང་བ་དག་རྣམས་ལ་སྦྱིན་པ་དག་གཏོང་བས་འཇིག་རྟེན་ཕ་རོལ་དུ་ཁྱད་པར་དུ་བྱེད་པར་འགྱུར་ལ་མཐོང་བའི་ཚེ་ལ་ཡང་ཁ་
དོག་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། གང་གི་ཕྱིར་སེམས་རབ་ཏུ་དད་པ་དང་ལྡན་པར་གྱུར་པས་འགྲོ་བ་ཡང་རབ་ཏུ་དང་བར་འགྱུར་རོ། །རྗེས་སུ་རབ་ཏུ་དང་བས་ཀྱང་བཞིན་གྱི་ཁ་དོག་རབ་ཏུ་དང་བར་འགྱུར་རོ། །དེ་རབ་ཏུ་དང་བར་གྱུར་པས་དེའི་
གཟུགས་ཤིན་ཏུ་བཟང་བ་ཉིད་དང་ལྡན་པར་འགྱུར་རོ། །སྦྱིན་བདག་རྣམས་ཀྱིས་སྦྱིན་པ་གཏོང་བར་བྱེད་པ་ན་འདི་ནི་གཟི་བརྗིད་གཅིག་ཡིན་ནོ། །ཡང་མཐོང་བའི་ཆོས་ལ་སྦྱིན་པ་ལས་བྱུང་བའི་ཆོས་གཞན་ཡོད་དོ། །འདི་ཡང་གང་ཞེ་ན། འདི་ལྟ་སྟེ། སྦྱིན་པ་གཏོང་
བ་ན་ང་རྒྱལ་རབ་ཏུ་འཇོམས་པར་བྱེད་དོ། །འདོད་སྲེད་རབ་ཏུ་འཇོམས་སོ། །ཕྲག་དོག་རབ་ཏུ་འཇོམས་སོ། །མ་རིག་པ་རབ་ཏུ་འཇོམས་པར་བྱེད་དོ། །རྒྱུ་དང་རྐྱེན་དག་ལ་དད་པ་དང་ལྡན་པར་འགྱུར་རོ། །རྣམ་པར་སྨིན་པ་ལ་ཡིད་ཆེས་པ་ཅན་དུ་འགྱུར་རོ། །

འཇིག་རྟེན་ཕ་རོལ་ལ་སྐུར་པ་མི་འདེབས་སོ། །བླ་མ་རྣམས་མཆོད་པར་བྱེད་དོ། །སེམས་འཇམ་པོར་འགྱུར་རོ། །བློ་གྲོས་མཉམ་པར་བཞག་པར་འགྱུར་རོ། །སེམས་ཀྱིས་ཀུན་དུ་སྒོམ་པར་བྱེད་དོ། །དངོས་པོ་རྣམས་ཡོངས་སུ་གཏོང་བར་བྱེད་དོ། །ལོངས་
སྤྱོད་ཆེན་པོར་འགྱུར་བའི་རྒྱུ་རྣམས་ཀུན་དུ་འཕེན་པར་བྱེད་དོ། །སེར་སྣ་རྣམས་རབ་ཏུ་འཇོམས་པར་བྱེད་དོ། །ཞིང་རྣམ་པ་གསུམ་པོ་ཡོན་ཏན་དང་། ཚུལ་ཁྲིམས་དང་། གཉི་ག་སྲིད་པ་རྣམས་ལ་སྦྱིན་པའི་ས་བོན་ཆང་བས་འདེབས་པར་བྱེད་དོ། །དེ་དེ་ལྟར་
ལེགས་པར་བསྒོམས་པར་གྱུར་པའི་ཡིད་ཅན་མཆོག་ཏུ་རྣམ་པར་དག་པའི་ཡིད་དང་ལྡན་པ་ནི་དུས་རིང་དུ་མངའ་བདག་བྱེད་པར་འགྱུར་རོ། །དུས་རིང་དུ་འཚེ་བ་མེད་པ་དང་སྐྱོན་མེད་པར་གྱུར་པའི་ལོངས་སྤྱོད་རྣམས་དང་ལྡན་ཞིང་འཇིགས་པ་དང་མྱ་ངན་དང་རྣམ་པར་
བྲལ་བ་དང་ལུས་ཞིག་པར་གྱུར་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་ཏེ། དེས་སྔོན་བྱས་པར་གྱུར་པའི་ལས་རྣམས་ཀྱི་རྒྱུ་དང་རྐྱེན་གྱིས་སོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པར་བྱའོ། །
འདི་ཡང་གང་ཞེ་ན། འདི་ལྟ་སྟེ། འཐུན་པར་བྱེད་པ་དང་སྙན་པའི་ངག་གོ། །རྒྱལ་པོ་འཐུན་པར་སྙན་པར་སྨྲ་བ་ནི། གང་གི་ཕྱིར་ཆོས་ལུགས་ལེགས་པ་དང་ལྡན་པར་འགྱུར་རོ། །རང་བཞིན་གྱིས་ཐམས་ཅད་ཀྱང་ཤིན་ཏུ་སྡུག་པར་འཛིན་པར་འགྱུར་རོ། །
གང་འཐུན་པར་འཛིན་པའི་སྙན་པའི་ངག་གིས་བྱེད་པ་ལྟར་ནི་ཡོ་བྱད་ཀྱིས་ཀྱང་བྱ་བར་ནུས་པ་མ་ཡིན་ནོ། །ཇི་ལྟར་སྙན་པའི་ཚིག་གིས་ཡུལ་ལྗོངས་པ་དེ་དག་རྣམས་ཐམས་ཅད་དགའ་བར་འགྱུར་བ་ལྟར་རྣམ་པ་དེ་ལྟ་བུར་རབ་ཏུ་དགའ་བར་བྱེད་པ་དང་། ཡུལ་ལྗོངས་
ཀྱི་སྐྱེ་བོ་རྣམས་ཐམས་ཅད་ཤིན་ཏུ་མྱུར་བར་ཡིད་རབ་ཏུ་ཚིམ་པར་བྱེད་པ་ནི་ཡོད་པ་མ་ཡིན་ནོ། །རྒྱུ་མཚན་འདི་དག་གི་ཕྱིར་ན་སྙན་པའི་ཚིག་དེ་བྱའོ། །ཡང་ན་འཐུན་པར་སྨྲ་བ་སྔོན་དུ་བཏང་བས་ནི་སེམས་རབ་ཏུ་དང་བར་གྱུར་ནས་སྐྱེ་བོ་རྣམས་ཀྱིས་གཞན་རྣམས་ལ་

གོ་བར་བྱེད་པར་འགྱུར་རོ། །སྙན་པར་སྨྲ་བའི་ཚིག་གི་རྒྱུ་དེས་དེ་ལ་དགའ་བར་འགྱུར་རོ། །སྙན་པར་སྨྲ་བའི་རྒྱུ་དེ་དང་ཡང་དག་པར་ལྡན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་གཞན་གྱི་མདུན་དུ་རྣམ་པར་རྒྱལ་བར་འགྱུར་རོ། །རང་
བཞིན་གྱིས་ཀྱང་དགའ་བར་འགྱུར་བ་ལ། བདེན་པ་དང་སྦྱིན་པ་དང་བསྲེས་པའི་སྙན་པའི་ཚིག་གིས་ཕྱིར་ཡང་དགའ་བར་བྱེད་དོ། །སྙན་པར་སྨྲ་བར་བྱེད་པའི་རང་བཞིན་ཅན་གྱི་རྒྱལ་པོ་ལ་ནི་དགྲ་རྣམས་ཀྱང་གྲོགས་པོར་འདུད་པར་བྱེད་ན་བར་མར་གནས་པ་དང་། གྲོགས་
པོ་རྣམས་ལྟ་སྨོས་ཀྱང་ཅི་དགོས། དེ་ལྟར་སྙན་པར་སྨྲ་བར་གྱུར་པའི་རང་བཞིན་ཅན་དེ་ལ་ཚོམས་གཅིག་ཏུ་འགྱུར་རོ། །འདི་ལྟ་སྟེ་གྲོགས་པོ་ཉིད་ཀྱི་ཚོམས་སུ་འགྱུར་གྱི། བར་མར་གནས་པ་ནི་མ་ཡིན་ཏེ། རང་བཞིན་གྱིས་སྐྱེ་བོ་ཐམས་ཅད་དགའ་བ་དང་མཆོག་ཏུ་མཆོད་པ་
དང་། དུས་རིང་དུ་ཡང་རྒྱལ་པོ་བྱེད་པར་འགྱུར་རོ། །སྙན་པར་སྨྲས་པའི་རྒྱུ་དང་རྐྱེན་གྱིས་ལུས་ཞིག་པར་གྱུར་ནས་ཤི་བའི་འོག་ཏུ་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པ་མང་པོས་ཆོས་རྣམས་ཤིན་ཏུ་བསྟེན་པར་
བྱའོ། །འདི་ཡང་གང་ཞེ་ན། འདི་ལྟ་སྟེ། བདེན་པར་སྨྲ་བ་ཞེས་བྱ་བ་འཁོར་བ་ན་ཀུན་ནས་བཅིངས་པའི་སྐྱེ་བོ་རྣམས་ཐམས་ཅད་ངེས་པར་འབྱིན་པའི་རྒྱུ་ངེས་པར་འབྱུང་བའི་རྒྱུར་གྱུར་པ་ཉོ་བའི་རིན་ཐང་བྱར་མེད་པའི་ཟད་པ་མེད་པའི་ནོར་གཏེར་དུ་བརྡུངས་ནས་བསྐྱེད་པ་
ཐུན་མོང་མ་ཡིན་པའི་ནོར་སྙིང་གི་རྒྱུར་གྱུར་པར་གནས་པ། མཆོག་ཏུ་ལྟ་བར་མཛེས་པའི་རིན་པོ་ཆེ་ཆེན་པོ་དམ་པའི་སྐྱེ་བོ་ཐམས་ཅད་ཀྱིས་བསྟེན་པའི་འཇིག་རྟེན་ཕ་རོལ་དང་འཇིག་རྟེན་འདིར་ཡང་སྐྱབས་སུ་གྱུར་པ་མྱ་ངན་ལས་འདས་པ་ལ་བརྩོན་པ་དང་ལྡན་པ་རྣམས་
ཀྱི་སྒོ་གཉེར་བར་གྱུར་པ་ཡོན་ཏན་དང་ཀུན་ཏུ་འབྲེལ་བ་རྣམས་ཟད་པར་མི་འགྲོ་བ་སྐྱོན་རྣམས་འཇིགས་པར་བྱེད་པ་པོ་ཡིད་ཆེས་པ་སྐྱེད་པར་བྱེད་པ་པོ་དབུལ་བ་འཇིག་པར་བྱེད་པ་པོ་བདེན་པར་སྨྲ་བ་ནི། གཟུགས་ཐམས་ཅད་དང་བྲལ་བ་ཡིན་ཡང་གཟུགས་དང་ལྡན་པ་ཐམས་

ཅད་ལས་ལྷག་པ་ཡིན་ཏེ། བདེན་པའི་འོད་ཟེར་གྱིས་ཀུན་ནས་སྣང་བར་བྱས་པའི་ཕྱིར་རོ། །རིགས་ཐམས་ཅད་ལས་དམན་པ་ཡིན་ན་ཡང་རིགས་རྒྱུད་ཐམས་ཅད་ཀྱི་གཙོ་བོར་གྱུར་པ་རྣམས་ཀྱི་དྲུང་ན་ལྷག་པར་འགྱུར་ཏེ། བདེན་པའི་དགེ་བ་དེས་ཀུན་ནས་གསལ་བར་
བྱས་པའི་རིགས་ཅན་རྣམས་ལ་ནི་ཡུལ་ལྗོངས་པ་ཐམས་ཅད་ཀྱི་རྗེས་སུ་འཇུག་པར་འགྱུར་བ་ཡིན་ནོ། །སྐྱེ་བོ་ཐམས་ཅད་ཀྱིས་གཉེན་བཞིན་དུ་མཐོང་བར་འགྱུར་རོ། །གང་དང་གང་དུ་འགྲོ་བ་དེ་དང་དེ་ཉིད་དུ་རྒྱལ་པོ་བཞིན་དང་མ་བཞིན་དུ་མཆོད་པ་བྱེད་དོ། །ངམ་གྲོག་
ཐམས་ཅད་དུ་རབ་ཏུ་ཞུགས་ན་མཆོག་ཏུ་སྐྱིད་པར་འགྱུར་རོ། །རྒྱལ་པོས་ཀྱང་ས་གཞིར་མཆོག་གིས་ཕན་པར་བྱེད་པ་བཞིན་དུ་མཆོད་པར་བྱེད་དོ། །གྲོང་དང་གྲོང་ཁྱེར་དང་གྲོང་རྡལ་དང་ཚོང་འདུས་དག་ཏུ་སོང་ན་ཡང་གྲོང་པ་དང་གྲོང་ཁྱེར་པ་དག་གིས་མཆོད་པ་བྱེད་དོ། །གྲོང་
ཆུང་བ་དག་གིས་མཆོག་ཏུ་ཡང་མཆོད་པར་བྱེད་དོ། །མ་མཐོང་བ་དག་ཏུ་ཡང་ལྷ་དག་གིས་སྙན་གྲགས་རབ་ཏུ་སྒྲོགས་པར་བྱེད་དོ། །ཇི་ལྟར་ཡུལ་འདིར་རྒྱལ་པོ་དང་རྒྱལ་པོའི་བློན་པོ་ཡང་རུང་སྟེ་བདེན་པར་སྨྲ་བ་དགེ་བ་བྱེད་པར་གྱུར་པ་དེའི་སྙན་པའི་བ་དན་ཡུལ་རྣམས་
སུ་དམ་པར་བྱས་ནས་འཛིན་པར་བྱེད་དོ། །དགེ་བ་བྱེད་པ་པོ་ལ་ནི་ལྷ་དག་གིས་ཀྱང་རྟག་ཏུ་ཕྱི་བཞིན་རྗེས་སུ་འབྲང་ཞིང་མཆོད་པར་བྱེད་དོ། །རྨི་ལམ་ངན་པ་ཡང་འཇིག་པར་བྱེད་དོ། །ལྷ་རྣམས་ཀྱི་གཙོ་བོར་གྱུར་པ་རྣམས་ཀྱིས་ཀྱང་ལྷ་བཞིན་དུ་མཆོད་པར་བྱེད་དོ། །
བདེན་པར་སྨྲ་བ་དེ་ཉིད་ཀྱི་གནས་སྐབས་དེར་ཡང་མཆོག་ཏུ་རྗེས་སུ་འཇུག་པ་དང་སླར་ཡང་ལེགས་པར་ལངས་ནས་འགྲོའོ། །འདིའི་ཡིད་ལ་བསམས་པ་ཐམས་ཅད་ཕུན་སུམ་ཚོགས་པར་འགྱུར་རོ། །དལ་བུས་ཀྱང་རིམས་ནད་དེ་དག་རྣམས་ལེགས་པར་ཞི་བ་སྐྱེད་པར་འགྱུར་ཏེ།
བདེན་པའི་བཅུད་ཀྱིས་ལེན་གྱིས་དབང་པོ་རྣམས་ཚིམ་པར་ཡང་བྱེད་པར་འགྱུར་རོ། །རྫུ་འཕྲུལ་ཆེ་བར་ཡང་འགྱུར་རོ། །མཐུ་སྟོབས་ཆེ་བ་དང་ཚེ་རིང་བ་ཀུན་ཏུ་འཕེལ་བར་བྱེད་པའི་ལས་རྣམས་ཀྱང་འཕེན་པར་བྱེད་དོ། །སྐྱེ་བོ་རྣམས་ཐམས་ཅད་ཀྱིས་ཀྱང་ཆོས་ལུགས་རྣམ་པར་

གཞག་པ་ལ་གཅིག་ཏུ་ཚད་མར་བྱེད་དོ། །རྣམ་པར་མ་གཙེས་པའི་སྐྱེས་བུ་རྣམས་ཀྱིས་ཀྱང་ནོར་ཆེན་པོའི་སྦས་དང་སྦས་པ་ཡང་རྒྱལ་པོ་ལ་སྟོན་པར་བྱེད་དོ། །བདེན་པར་སྨྲ་བ་ཞེས་ཟེར་ནས་ཐམས་ཅད་ལས་མི་གཡོ་བ་བཞིན་དུའོ། །ཐམས་ཅད་ལས་ཀྱང་གཡོ་བ་
མེད་པར་འགྱུར་རོ། །གྲོགས་པོས་འཁྲིད་པར་མི་བྱེད་དོ། །གྲོགས་པོ་མ་ཡིན་པས་འཁྲིད་པར་མི་བྱེད་དོ། །རྣམ་པར་གཡོ་བར་མི་བྱེད་དོ། །གང་བདེན་པར་སྨྲ་བའི་མགྲིན་པ་རབ་ཏུ་རྩེ་དགའ་བར་གྱུར་ཏེ་བདེན་པའི་ཚིག་གིས་བློ་དེ་ཚིམ་པར་བྱས་པ་ལྟ་བུར་གྱུར་ནས་
དགའ་བར་འགྱུར་རོ། །བདེན་པའི་ནོར་དེ་ལ་དགའ་བར་གྱུར་པའི་རྒྱུས་ཡང་དང་ཡང་དུ་བསམ་པར་བྱེད་པ་ན་ཡིད་ཁྲོ་བ་དང་དགའ་བ་ཡ་ཡ་པོས་མི་ཁྲིད་དོ། །དྲང་སྲོང་གི་མཆོག་འཇིག་རྟེན་གཉིས་སུ་ཕན་པར་བྱེད་པ་རྣམས་ཀྱི་བཅུད་དུ་གྱུར་པའི་བདེན་པའི་མཚམས་དེ་
ལས་ནམ་ཡང་འདའ་བར་མི་འགྱུར་རོ། །ཆུ་མེད་པར་ཡང་བདེན་པའི་རང་བཞིན་གྱིས་མཆོག་ཏུ་གཙང་བའི་བདེན་པའི་འཇུག་ངོས་སུ་འཁྲུ་བ་རྣམས་ནི་མཆོག་ཏུ་གཙང་བར་འགྱུར་རོ། །གོས་མེད་པར་གྱུར་ཡང་མཆོག་ཏུ་དཀར་བ་མ་བཏགས་པ་བདེན་པའི་གོས་
མཆོག་ཏུ་རྒྱ་ཆེ་བ་སྐད་ཅིག་མ་ཡིན་པར་རྟག་ཏུ་ལེགས་པར་གྱོན་པར་འགྱུར་རོ། །དྲི་མེད་པར་གྱུར་ན་ཡང་འདིའི་སྙན་པའི་ཚུལ་ཁྲིམས་ཀྱི་དྲིས་ཕྱོགས་དང་ཕྱོགས་མཚམས་རྣམས་སུ་རབ་ཏུ་འགྲོའོ། །འདི་མ་མཐོང་བར་གྱུར་པའི་སྐྱེ་བོ་ཐམས་ཅད་ཀྱང་གྲོགས་པོ་ཉིད་དུ་
འགྱུར་རོ། །མཐོང་བ་རྣམས་ནི་དང་པོར་ཡིན་ནོ། །རི་རབ་ལྷུན་པོའི་རྩེ་མོ་ཡང་འདིས་ངེས་པར་རྒལ་ནས་འགྲོ་བར་འགྱུར་ཏེ། ཇི་ལྟར་འོད་ཟེར་མཆོག་གིས་བརྟོལ་ཞིང་ཕུག་པར་འགྱུར་བ་བཞིན་དུ་རབ་ཏུ་འཕྲོ་བར་འགྱུར་རོ། །རྒན་པོ་རྣམས་ཀྱིས་ཕ་བཞིན་དུ་
མཆོད་པར་བྱེད་དེ་བདེན་པས་རྒན་པར་གྱུར་པ་ཞེས་བྱས་སོ། །ཚེ་རིང་བར་གྱུར་འཕེན་པར་བྱེད་པའི་ལས་རྣམས་ཀྱང་འཕེན་པར་བྱེད་དོ། །ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་ཀྱི་ལས་འཕེན་པར་བྱེད་ན་འཐབ་བྲལ་གྱི་མངའ་བདག་ལ་

ལྟ་སྨོས་ཀྱང་ཅི་དགོས། བདེན་པར་སྨྲ་བ་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བ་དེ་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོ་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་རོ། །ཡང་ཆོས་གཞན་དང་ལྡན་པ་རྒྱལ་རིགས་སྤྱི་བོ་ནས་དབང་བསྐུར་བ་དེ་
འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །གང་དག་ཞེ་ན། འདི་ལྟ་སྟེ། ནོར་གཞིས་རྣམས་གློ་བུར་དུ་འཕེལ་འགྲིབ་མི་བྱེད་པའོ། །རྒྱལ་པོ་འདི་ནི་བློ་བརྟན་པར་གྱུར་པ་སྟེ། དེས་དེ་ཤེས་པར་གྱུར་ནས་ངང་ཚུལ་དང་ཆོས་ལུགས་རྣམ་པར་གཞག་པ་ཡང་བློ་
གྲོས་ངལ་སོས་པ་དང་ལྡན་པར་འགྱུར་རོ། །ཤིན་ཏུ་རྣམ་པར་དཔྱད་ནས་བྱེད་པ་རྣམས་ནི་རྒྱལ་པོར་འགྱུར་རོ། །མ་བརྟགས་པར་བྱེད་པ་ནི་མ་ཡིན་ནོ། །གང་ཡང་རྒྱལ་པོས་རྣམ་པར་དཔྱད་ནས་ནོར་གཞིས་རྣམས་འཕེལ་བ་དང་འགྲིབ་པར་བྱེད་པའི་རྒྱལ་པོ་དེ་ནི་རྒྱལ་པོར་མི་
འགྱུར་རོ། །གལ་ཏེ་གྱུར་ན་ཡང་དེ་ཡང་ཡུན་རིང་པོར་མི་འགྱུར་རོ། །རྒྱལ་པོའི་མིང་ཙམ་དུ་འགྱུར་རོ། །ལེགས་པར་རབ་ཏུ་བརྟགས་ནས་བྱེད་པ་མ་ཡིན་ནོ། །བློ་ཆུང་ཞིང་རྩབ་ཧྲལ་ཅན་དུ་གྱུར་པ་དང་བློ་རྣམ་པར་གནས་པ་མེད་པའི་ཡང་མོར་འགྱུར་རོ། །གང་ཡང་
སྔ་རབས་དག་གིས་བརྗོད་པ་ན་དེ་ལ་ཡང་དད་པར་མི་བྱེད་དོ། །ཅི་དགའ་བའི་རྒྱལ་པོ་བརྫུན་དུ་སྨྲ་བ་དེ་ལ་འདོད་ཆགས་དང་བྲལ་བར་གྱུར་ནས་ཀྱང་རྒྱལ་པོ་གཞན་ཡང་ཉེ་བར་འཇོག་པར་བྱེད་དོ། །དེའི་ཕྱིར་སྐྱོན་དེ་དག་རྣམས་གོ་བར་བྱས་ལ་བརྫུན་དུ་སྨྲ་བར་མི་བྱའོ། །བརྫུན་
དུ་སྨྲ་བ་ནི་འཇིག་རྟེན་འདིར་ཕན་པ་མ་ཡིན་ལ་འཇིག་རྟེན་ཕ་རོལ་ཏུ་ཡང་མ་ཡིན་ནོ། །དེའི་ཕྱིར་ན་མཐོང་བའི་ཚེ་ལ་ཡང་སྐྱོན་གྱི་རྣམ་པ་མང་པོ་དེ་དག་རྣམས་གོ་བར་བྱས་ལ་བརྫུན་དུ་སྨྲ་བར་མི་བྱའོ། །ཐམས་ཅད་ལས་ཀྱང་དང་པོ་ཁོ་ནར་ཇི་ལྟ་ཇི་ལྟར་རྒྱལ་པོ་ཆོས་ལ་རབ་ཏུ་གཞོལ་
བར་གྱུར་པའི་རྒྱུ་གང་གིས་དེ་ལྟ་དེ་ལྟར་སྐྱེ་དགུ་འཕེལ་བར་འགྱུར་རོ། །སྐྱེ་དགུ་རྣམས་ལ་ནི་རྒྱལ་པོ་གཙོ་བོར་གྱུར་པའི་ཕྱིར་རོ། །གང་ཡང་རྒྱལ་པོ་གཅིག་ཏུ་རྟག་པ་ཁོ་ནར་བདེན་པ་སྨྲ་བར་གྱུར་པ་དེས་ནི་སྐྱེ་དགུ་བསྒོས་ནས་ངེས་པར་གྱུར་པའི་རྒྱལ་པོའི་བརྒྱུད་པ་དག་གིས་ཡང་

དག་པའི་བདེ་བས་ཡོངས་སུ་སྐྱོང་བར་བྱེད་དོ། །བདེན་པའི་རྩ་བ་ལས་ཆོས་ཡིན་ནོ། །དེ་ཡང་གང་གི་ཚེ་བདེན་པར་སྨྲ་བར་མི་བྱེད་པ་དེའི་ཚེ་དེས་གློ་བུར་དུ་ནོར་གཞིས་རྣམས་ལ་འཕེལ་བ་དང་འགྲིབ་པ་བྱེད་པར་འགྱུར་རོ། །གང་ཡང་བདེན་པར་སྨྲ་བར་བྱེད་པ་རྟག་ཏུ་དུལ་
བར་གྱུར་པ་དེ་ནི་ནམ་ཡང་ནོར་གཞིས་རྣམས་ལ་གློ་བུར་དུ་འཕེལ་བ་དང་འགྲིབ་པར་མི་བྱེད་དོ། །གནས་རྣམས་གཡོ་བར་མི་བྱེད་པ་དེའི་དྲུང་ནས་ནམ་ཡང་གཞན་དག་ཏུ་འགྲོ་བར་མི་འགྱུར་རོ། །མི་དགའ་བར་མི་འགྱུར་རོ། །དེ་འདི་མ་དང་འདྲ་བ་དང་ཕ་དང་འདྲ་བར་ཡང་
རྗེས་སུ་ཆགས་པར་འགྱུར་རོ། །རྟག་ཏུ་ཡང་ཡིད་བདེ་བ་དང་ལྡན་པ་དང་རྟག་ཏུ་ཡང་བདེ་སྐྱིད་ཅན་དུ་འགྱུར་རོ། །རྒྱལ་པོ་དེ་ཡང་བློ་བརྟན་པར་འགྱུར་བ་དང་འགྱུར་བ་མེད་པའི་བློ་དང་བློ་གཅིག་ཏུ་ངེས་པ་དང་བདེ་བ་སྟེར་བར་བྱེད་པས་ལུས་ཞིག་ནས། མཐོ་རིས་བདེ་འགྲོའི་
འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་རྒྱུ་འདི་དང་རྐྱེན་འདིས་འགྱུར་རོ། །ཆོས་གཞན་ཡང་གང་ལན་ཅིག་དང་ལན་ཅིག་མ་ཡིན་པར་རྣམ་པ་དུ་མར་རྒྱལ་པོས་རབ་ཏུ་བརྩོན་པ་ཤེས་པར་བྱ་ཞིང་བྱ་བར་ཡང་བྱའོ། །འདི་ཡང་གང་ཞེ་ན། འདི་ལྟ་སྟེ། མིའི་ཁྱད་པར་
ཤེས་པར་བྱ་བའོ། །མིའི་ཁྱད་པར་ཤེས་པར་བྱ་བར་གྱུར་པ་དེ་ཡང་ཤེས་པ་ཆེན་པོ་ཡིན་ཏེ། གང་ཡང་རྒྱལ་པོ་མིའི་ཁྱད་པར་རིག་པར་གྱུར་པ་དེ་ནི་ས་གཞི་ཐམས་ཅད་ཀྱི་སྣོད་དུ་འགྱུར་རོ། །གཞན་རྣམས་ཀྱིས་མི་ཐུབ་པར་ཡང་འགྱུར་རོ། །ལས་རྣམས་ཀྱང་ཇི་ལྟར་རིག་པ་ལ་འཇུག་པར་
བྱེད་དོ། །འདིའི་ལས་ཀྱི་མཐའ་དག་ཡང་ཡོངས་སུ་ཉམས་པར་མི་འགྱུར་རོ། །ནོར་ལས་ཀྱང་ཡོངས་སུ་མི་ཉམས་སོ། །རྟག་པར་ཡང་ཆོས་གོང་ནས་གོང་དུ་བྱེད་པར་འགྱུར་རོ། །མིའི་ཁྱད་པར་ཤེས་པར་གྱུར་པའི་རྒྱལ་པོ་ཡང་སྐྱེས་བུ་ཆོས་བྱེད་མ་ཡིན་པ་རྣམས་
མི་འཛིན་ཏོ། །ལས་ལ་དགའ་བའི་རང་བཞིན་ཅན་མ་ཡིན། སྟན་ལ་དད་ཆེ་བ་མ་ཡིན། བྱས་པ་ཆུད་གཟོན་པ་མ་ཡིན། འཇིག་རྟེན་པ་ལ་ཞེ་སྡང་བ་མ་ཡིན། ལོག་པར་ལྟ་བ་ཅན་མ་ཡིན། གཡོ་སྒྱུ་ཅན་དང་མ་ཡིན། གཞན་གྱི་ཡོན་ཏན་དང་ཀུན་དུ་སོ་སོར་འབྲེལ་བས་དོན་བྱེད་པ་དང་

མ་ཡིན་ཏེ། དེ་ནི་རྒྱལ་པོ་གཞན་གྱིས་ཉེ་བར་འཚོ་བར་འགྱུར་རོ། །འདྲ་བ་མ་ཡིན་པ་མ་ཡིན། ཡུལ་དུས་མི་ཤེས་པ་མ་ཡིན། བསྒྲུབ་པར་དཀའ་བ་མ་ཡིན། རྟག་ཏུ་སྡིག་པ་དྲག་པོ་བྱེད་པ་མ་ཡིན། ཡུལ་གྱིས་རབ་ཏུ་དཀྲུགས་པ་རྣམས་ཀྱང་མ་ཡིན། གཡོ་སྒྱུའི་རྒྱུ་སྨྲ་
བ་ཡང་མ་ཡིན། ངོ་བོ་ཉིད་ཀྱི་བཤེས་ཀྱིས་ཆོག་ཤེས་པ་མ་ཡིན། འཇིག་རྟེན་ལ་མི་ཕན་པ་མ་ཡིན། གཞན་དུ་སྡིག་པ་བྱས་པ་མ་ཡིན། མངོན་པའི་ང་རྒྱལ་ཅན་མ་ཡིན། དགྲ་བོ་མ་ཡིན། སྡུག་བསྔལ་ཅན་མ་ཡིན། ངག་རྩབ་ཧྲལ་ཅན་མ་ཡིན། ཡིད་རྩབ་ཧྲལ་ཅན་མ་
ཡིན་པ་སྟེ། རྣམ་པ་དེ་ལྟ་བུའི་སྐྱེས་བུ་ངན་པ་འཛིན་པར་མི་བྱེད་དོ། །རྒྱལ་པོས་རྣམ་པ་ཇི་ལྟ་བུ་རྣམས་འཛིན་པར་བྱེད་ན་འདི་ལྟ་སྟེ། ཆོས་པ་དང་ཚུལ་འཆོས་ཅན་མ་ཡིན་པ་དང་། ང་རྒྱལ་ཅན་མ་ཡིན་པ་དང་། བདེན་པར་སྨྲ་བ་དང་། ཤེས་རབ་ཅན་དང་། ཡིད་
གཞུངས་པ་དང་། བརྟན་པ་དང་གཞན་ལ་གདུང་བར་མི་བྱེད་པ་དང་། དྲང་པོ་དང་གཡོ་རྣམས་སྤངས་པ་དང་། ཆེས་མཆོག་ཏུ་དཀོན་མཆོག་གསུམ་མཆོད་པར་བྱེད་པ་དང་། སེམས་ཆོག་ཤེས་པ་ཐོབ་པ་དང་། དབང་དུ་གྱུར་པ་དང་། རྒྱུན་དུ་ལས་ཀྱི་རང་བཞིན་ཅན་
དང་། འཇིག་རྟེན་པ་རྣམས་བློ་འཐུན་པ་དང་། སྙིང་རྗེ་དང་ལྡན་པ་དང་། མི་རྣམས་ཀྱིས་བསྔགས་པ་ལ་རྗེས་སུ་ཆགས་པར་འགྱུར་བ་དང་། ཡང་དག་པའི་ལྟ་བ་ཅན་དང་ཤེས་ཉེན་ཅན་དང་། དུལ་བ་དང་སྐྱེས་པ་ནས་བཟུང་ནས། ལུས་དང་། ངག་དང་། ཡིད་དག་པར་
བྱེད་པ་པོ་མེད་པར་སྨྲ་བ་མ་ཡིན་པ་དང་། རྒྱུ་རྐྱེན་ལ་ཤིན་ཏུ་བར་ཡང་རྟེན་པ་དང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དང་། བག་མེད་པ་མ་ཡིན་པ་དང་། གཉིད་ཀྱི་དབང་དུ་སོང་བའི་རང་བཞིན་ཅན་མ་ཡིན་པ་དང་། དགེ་བའི་བཤེས་གཉེན་ལ་སྟེན་པར་བྱེད་པ་པོ་དང་།
གཏོང་བ་ཅན་དང་། ཚུལ་ཁྲིམས་དང་ལྡན་པ་དང་། ཤེས་རབ་དང་ལྡན་པ་དང་། རྣམ་པ་དེ་ལྟ་བུའི་སྐྱེས་བུ་རྣམས་རྟག་པ་ཁོ་ནར་རྒྱལ་པོ་གང་དག་གིས་འཛིན་པར་བྱེད་པ་དེ་དག་ནི་ཁྱད་པར་ཤེས་པ་ཡིན་ནོ། །གང་ལས་གང་ལ་ངེས་པར་སྦྱོར་བར་བྱེད་པའི་རྒྱལ་པོ་དེ་

ནི་གཞན་དག་གིས་རྒྱལ་སྲིད་ལས་ཉམས་པར་བྱ་བར་མི་ནུས་སོ། །གདུལ་བར་མི་ཐུབ་པར་ཡང་འགྱུར་རོ། །ནོར་དང་ལྡན་པར་ཡང་འགྱུར་རོ། །དེ་ནོར་དང་ལྡན་པར་འགྱུར་ཞིང་ཆོས་པ་ཆོས་ཀྱི་རྗེས་སུ་འཇུག་པར་གྱུར་ནས་སྦྱིན་པ་དག་གཏོང་བར་བྱེད་དོ། །
བསོད་ནམས་དག་བྱེད་དོ། །དཀོན་མཆོག་གསུམ་མཆོད་པར་བྱེད་དོ། །དེའི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། ལས་དེ་དག་གི་རྒྱུ་དང་རྐྱེན་གྱིས་སོ། །ཡང་ཆོས་གཞན་རྒྱལ་པོ་ཐམས་
ཅད་ཀྱིས་བྱ་བར་བྱ་བ་འདི་ཡང་གང་ཞེ་ན། འདི་ལྟ་སྟེ། དུས་ངེས་པར་ལེགས་པར་སྟོན་པར་གྱུར་པའོ། །རྒྱལ་པོ་གང་དག་དུས་ངེས་པར་སྟོན་པར་བྱེད་པ་དེ་ནི་དུས་ཡུན་རིང་དུ་རྒྱལ་སྲིད་བྱེད་པར་འགྱུར་རོ། །འདིའི་རང་བཞིན་ལ་སྐྱོ་བ་སྐྱེ་བར་མི་འགྱུར་རོ། །དེས་མིའི་
ཁྱད་པར་རིག་པར་འགྱུར་རོ། །འདི་ཆོས་མ་ཡིན་པ་རྣམས་ལ་མི་འཇུག་གོ། །ཡུལ་ཇི་སྲིད་དུ་སྟོབས་དང་ལྡན་པར་གྱུར་ནས་རྒུད་པ་ཟིལ་གྱིས་གནོན་པར་བྱེད་དོ། །དེ་དེའི་རྒྱུར་ལྟ་བ་ལ་ཆེད་ཆེར་བྱེད་པའི་རྒྱལ་པོ་རྫས་དང་ལྡན་པར་འགྱུར་རོ། །ནོར་གྱི་ཐབས་
ཀྱིས་ཕུན་སུམ་ཚོགས་པར་འགྱུར་རོ། །དེ་ཚུལ་དང་ནོར་དང་ལྡན་པར་གྱུར་ནས་གཞན་རྣམས་ཀྱི་དབང་དུ་འགྱུར་བ་མ་ཡིན་ནོ། །ཆོས་པར་ཡང་འགྱུར་རོ། །ཆོས་ཀྱི་རྗེས་སུ་འཇུག་པར་བྱེད་པ་དང་དགེ་སྦྱོང་དང་བྲམ་ཟེ་རྣམས་མཆོད་པར་བྱེད་དོ། །དེ་དག་རྣམས་ཀྱི་
དྲུང་ནས་ཆོས་ཉན་པར་བྱེད་པས་དེ་ལྟ་དེ་ལྟར་ཆེས་ལྷག་པར་ཆོས་བྱེད་དུ་འགྱུར་རོ། །ངེས་པར་ལེགས་པར་སྟོན་པར་བྱེད་པས་དེ་ཇི་ལྟ་ཇི་ལྟར་ཆོས་བྱེད་དུ་འགྱུར་བ་དེ་ལྟ་དེ་ལྟར་ལོངས་སྤྱོད་ཆེན་པོ་དང་ལྡན་པར་འགྱུར་རོ། །དེ་ལོངས་སྤྱོད་ཆེན་པོ་དང་ལྡན་པར་གྱུར་ནས་
ཕྱིར་ཞིང་ཉིད་དུ་སྦྱིན་པ་དག་གཏོང་བར་བྱེད་དོ། །བསོད་ནམས་དག་བྱེད་དོ། །ཚུལ་ཁྲིམས་དང་ལྡན་པར་འགྱུར་རོ། །གང་གིས་ཀྱང་གདུལ་བར་མི་ནུས་པར་འགྱུར་རོ། །དེ་ལ་ཡོན་ཏན་དེ་དག་རྣམས་སྲིད་པར་འགྱུར་རོ། །དེའི་ཕྱིར་རྒྱལ་པོས་རྟག་ཏུ་ངེས་པར་ལེགས་པར་

སྟོན་པར་འགྱུར་བར་བྱའོ། །ངེས་པར་ལེགས་པར་སྟོན་པར་བྱེད་པའི་རྒྱལ་པོ་ཆོས་པ་གང་གིས་ཕྱིར་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་ལས་དེའི་རྒྱུ་དང་རྐྱེན་གྱིས་འགྱུར་རོ། །ཡང་ཆོས་གཞན་རྒྱལ་པོས་
ཅིས་ཀྱང་བསྟེན་པར་བྱ་བ་ལ་འདི་ལྟ་སྟེ། གཉིད་ལ་དགའ་བར་མི་བྱ་བའོ། །གཉིད་ཀྱི་དབང་དུ་མི་འགྲོ་བའི་རྒྱལ་པོ་ནི་ལེགས་པར་བསམ་པར་བྱ་བ་རྣམས་སེམས་པར་འགྱུར་རོ། །བློ་ཤིན་ཏུ་རྣམ་པར་ཆགས་པ་དང་ལྡན་པར་མི་འགྱུར་རོ། །ཀུན་ཏུ་རྨོངས་པའི་བློར་ཡང་མི་
འགྱུར་རོ། །དགྲ་བོས་བརྒལ་བར་མི་ནུས་སོ། །བློ་རྩེ་གཅིག་པར་འགྱུར་རོ། །དོན་ངེས་པར་ལྡན་པ་དང་དོན་ངེས་པ་དང་ལྡན་པར་གྱུར་ནས་ལེགས་པར་རྣམ་པར་དཔྱད་པའི་དོན་དག་བྱེད་པར་འགྱུར་རོ། །དེ་ལ་ལེགས་པར་རྣམ་པར་དཔྱད་ནས་བྱེད་པ་པོ་འདིའི་ལེགས་པར་དོན་
རྣམས་སྨིན་པར་འགྱུར་རོ། །ལེགས་པར་འགྲུབ་པར་དུས་ཡུན་རིང་པོ་མ་ཡིན་པ་ན་འགྱུར་ཞིང་དུས་སྔ་བར་རྫོགས་པར་འགྱུར་བ་ཡིན་ནོ། །བག་དང་ལྡན་པར་འགྱུར་རོ། །བག་ཡོད་པས་རྒྱུ་བ་དང་དེའི་ཚེ་རིང་བར་འགྱུར་རོ། །ལེགས་པར་བསམ་པ་རྣམས་སེམས་
པར་གྱུར་པས་ལེགས་པར་སེམས་པ་པོ་དེའི་རང་བཞིན་གྱིས་ཡིད་བྱུང་བར་མི་འགྱུར་རོ། །དེ་སྐྱེ་བོ་རྣམས་དང་གྲོང་ཁྱེར་རྣམས་དང་བློན་པོ་དག་གིས་ཡོངས་སུ་བསྐོར་བར་འགྱུར་རོ། །ནོར་དང་ལྡན་པར་ཡང་འགྱུར་རོ། །སྐྱེ་བོ་མང་པོ་ལ་ཡང་རྒྱལ་པོའི་ནོར་གནས་པ་ཉིད་ཀྱིས་ནོར་
དང་ལྡན་པའི་དཔལ་ཀུན་ཏུ་གནས་པས་དཔལ་དང་ལྡན་པར་གྱུར་ནས་སྦྱིན་པ་གཏོང་བར་ཡང་བྱེད་དོ། །ཚུལ་ཁྲིམས་ཀྱང་སྲུང་བར་བྱེད་དོ། །དེ་ལུས་ཞིག་པར་གྱུར་ནས་ཤི་བའི་འོག་ཏུ་དེའི་རྒྱུ་དང་རྐྱེན་གྱིས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་
བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པས་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། ལེ་ལོ་མེད་པའོ། །ལེ་ལོ་མེད་པར་གྱུར་པའི་རྒྱལ་པོ་ནི་བརྩོན་འགྲུས་བརྟན་པར་གྱུར་པའི་རིགས་པས་བརྩམས་པའི་ཕྱིར་ན་ལས་ཐམས་ཅད་ཀྱང་རྒྱས་

པར་བྱེད་དོ། །ངེས་པར་རྫོགས་པར་བྱེད་ཅིང་སྒྲུབ་པར་བྱེད་དོ། །དབང་དུ་འགྱུར་བར་བྱེད་དོ། །ཐུབ་པར་མི་ནུས་པར་འགྱུར་བ་དང་ཐམས་ཅད་དུ་རང་བཞིན་གྱིས་དགའ་ཞིང་རྗེས་སུ་ཆགས་པ་དང་གཅེས་པའི་བློར་འགྱུར་རོ། །འདིའི་ཡུལ་འཁོར་དང་གྲོང་
ཁྱེར་དང་གྲོང་དང་གྲོང་རྡལ་དང་ཚོང་འདུས་རྣམས་ཀྱང་ཤིན་ཏུ་ཕུན་སུམ་ཚོགས་པར་འགྱུར་རོ། །ལེ་ལོ་མེད་པར་གྱུར་པའི་རྒྱལ་པོ་ཡང་བརྩོན་འགྲུས་བརྟན་པ་དང་ལྡན་ཞིང་ཕ་རོལ་གནོན་པར་གྱུར་པ་ནི་ལས་རྣམས་གང་ཁོ་ན་རྩོམ་པར་བྱེད་པ་དེ་དག་ཉིད་ཐམས་ཅད་སྒྲུབ་པར་
བྱེད་དོ། །དེ་ཅིའི་ཕྱིར་ཞེ་ན། ལེ་ལོ་མེད་པར་གྱུར་པ་དག་ནི་རིགས་པས་ཡུལ་དང་དུས་རྣམས་ལ་ལེགས་པར་འདྲེ་བར་གནས་པའི་ཕྱིར་ན་ལེ་ལོ་མེད་པ་དག་ནི་འཇིག་རྟེན་པ་དང་འཇིག་རྟེན་ལས་འདས་པའི་ཇི་སྲིད་དུ་མྱ་ངན་ལས་འདས་པའི་མཐར་ཐུག་པར་དགོས་པ་རྣམས་
ཐམས་ཅད་ཕུན་སུམ་ཚོགས་པར་འགྱུར་རོ། །གལ་ཏེ་ཡང་དེས་བརྩམས་པར་གྱུར་པའི་དོན་གཞན་ཡུལ་དང་དུས་གཉི་ག་ལ་ཆགས་པ་དང་བྲལ་བར་བྱེད་པར་གྱུར་པ་རྣམས་ལྟ་ཅི་སྨོས། དེས་ཐམས་ཅད་ཀྱང་གཞན་རྣམས་དང་ཐུན་མོང་མ་ཡིན་པར་འགྲུབ་པར་འགྱུར་རོ། །
དེ་ཇི་ལྟར་འཇིག་རྟེན་པའི་དོན་བྱེད་པར་འགྱུར་བའི་དོན་དེ་ཡང་ཕུན་སུམ་ཚོགས་པར་འགྱུར་བ་དང་། དེ་བཞིན་དུ་ཤེས་རབ་དང་ལྷན་ཅིག་ཏུ་གང་གིས་འཇིག་རྟེན་ལས་འདས་པ་ཡང་བྱེད་པ་ཡིན་ཏེ། སྦྱིན་པ་དང་ཚུལ་ཁྲིམས་དང་ཤེས་རབ་རྣམས་སོ། །འདི་དེ་དག་གི་དྲི་
ཙམ་གྱིས་ཀྱང་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། རྒྱུ་དེ་དང་རྐྱེན་དེས་སོ། །ཆོས་གཞན་ཡང་རྒྱལ་པོས་བྱའོ། །འདི་ཡང་གང་ཞེ་ན། འདི་ལྟ་སྟེ། གྲོགས་པོ་བརྟན་པའོ། །རྒྱལ་
པོ་གྲོགས་པོ་བརྟན་པོར་གྱུར་པ་ནི་ཤིན་ཏུ་ལེགས་པར་མཐོང་བར་བྱེད་པས་རྒྱལ་སྲིད་དུས་རིང་དུ་ལོངས་སྤྱོད་པར་བྱེད་དོ། །གོས་པ་མེད་པ་དང་གཞན་གྱིས་མི་རྫི་བ་ཡིན་ཏེ། ཤིང་བཞིན་དུ་གང་དག་ཆེས་མང་དུ་ལེགས་པར་རབ་ཏུ་གནས་པས་གཡོ་བར་མི་འགྱུར་ཞིང་ངན་པ་རྣམས་ཀྱིས་ཀྱང་མི་

གཡོ་བ། རླུང་གིས་ཀྱང་ནགས་ཀྱི་ཚལ་འདི་ལ་ཇི་ལྟ་བ་དེ་བཞིན་དུ་རྒྱལ་པོ་འདིའི་གྲོགས་པོ་ནི་ཤིན་ཏུ་བརྟན་པོ་ཡིན་ནོ། །རང་བཞིན་ཤིན་ཏུ་བཟང་བར་གྱུར་པས་སྐྱེ་བོ་ཐམས་ཅད་ཀྱིས་མངོན་པར་བགྲོད་པར་བྱ་བར་གྱུར་པ་མཆོག་ཏུ་དགའ་བར་གྱུར་པ་ཡིན་ནོ། །ཤིན་ཏུ་གྲོགས་པོ་བརྟན་པར་
གྱུར་པའི་ཡོན་ཏན་དང་ལྡན་པ་ལ་ཡང་འཇིག་རྟེན་པའི་ཡོན་ཏན་བཅུ་གསུམ་དང་ལྡན་པར་འགྱུར་བ་རྣམས་འདི་ལྟ་སྟེ། གང་དུ་འདི་ལ་བུག་རྡོལ་བྱུང་བར་གྱུར་པ་ན་དེའི་ཚེ་འདིས་རབ་ཏུ་འགེབས་པར་བྱེད་པ་ཡིན་ཏེ། དཀའ་བར་སྤྱད་པ་ཐམས་ཅད་དང་མཆོག་ཏུ་རྒུད་པའི་དོན་དག་ལའོ། །དེ་ཅིའི་
ཕྱིར་བྱེད་པ་ཡིན་ཞེ་ན། གྲོགས་པོ་གང་ཡིན་པའི་གྲོགས་པོ་གཞན་ཡང་དེའི་གྲོགས་པོར་འགྱུར་ཏེ་དེས་ཀྱང་ངའི་གྲོགས་པོ་འདིའི་གྲོགས་པོ་ཡིན་ཞེས་བྱས་ནས་དེ་དང་ལྷན་ཅིག་ཏུ་མཛའ་བར་འགྱུར་རོ། །ཁྱིམ་ན་ནོར་གྱི་རིགས་གང་དག་ཡོད་པ་འདི་ལ་ཤེས་པར་བྱེད་དོ། །གང་དང་
གང་ཡང་ཕན་པའི་ལྷག་མ་གཞན་དུ་གྱུར་པ་ཡང་། དེ་དག་རྣམས་འདིས་བདག་ཉིད་ཐམས་ཅད་ཀྱིས་བྱེད་དེ། རྣམ་པ་ཐམས་ཅད་དང་བདག་ཉིད་ཐམས་ཅད་ཀྱིས་ཀྱང་སྟེན་པར་བྱེད་དོ། །གལ་ཏེ་ཡང་འདི་གང་དག་གིས་དཀའ་བར་གྱུར་པ་ཐམས་ཅད་དུ་གྱུར་པ་དང་སྲོག་འཆད་པར་གྱུར་ཀྱང་དེས་བརྒྱ་
ལ་ཡང་ཡོངས་སུ་མི་གཏོང་ངོ་། །འདི་ཡང་ཇི་ལྟ་ཇི་ལྟར་དོན་གྱི་རིགས་རྣམས་ལ་བཟོད་པར་འགྱུར་བ་དེ་ལྟར་བྱེད་དོ། །གང་ཡང་འདིའི་ཁྱིམ་ན་ཅུང་ཟད་ཡོད་པ་དེ་རྣམས་ཐམས་ཅད་སྔོ་བར་བྱེད་དོ། །གང་གི་ཚེ་འདི་ཕུན་སུམ་ཚོགས་པར་གྱུར་པ་དེའི་ཚེ་ཤིན་ཏུ་དགའ་བར་འགྱུར་རོ། །
གང་གི་ཚེ་འདི་ལ་སྡུག་བསྔལ་དག་བྱུང་བར་གྱུར་པ་དེའི་ཚེ་མཉམ་པོར་སྡུག་བསྔལ་བར་འགྱུར་རོ། །ཐམས་ཅད་ནས་ཁྲོས་པ་སྐྱེས་པར་གྱུར་ཀྱང་རྣམ་པར་འགྱུར་བར་མི་འགྱུར་རོ། །དེ་དང་ཡང་གང་ལྷན་ཅིག་ཏུ་གྱུར་པ་དེ་དག་བཟའ་ཟ་བས་ཀྱང་དེ་དང་ལྷན་ཅིག་ཏུ་དགའ་བར་འགྱུར་རོ། །
གང་འདིའི་ཁྱིམ་ན་ཡོད་པར་གྱུར་པ་དེ་དག་ཀྱང་དབང་པོ་ལ་གནོད་པ་མེད་པར་དོན་དུ་གཉེར་བར་བྱེད་པ་དང་། གང་ཡང་བདག་རང་གི་ཁྱིམ་ན་ཡོད་པར་དེ་ཐམས་ཅད་སྐྱོ་བ་མེད་པར་ཡང་འདི་ལ་སྟེར་བར་བྱེད་དོ། །གང་ཡང་ཅུང་ཟད་ཁྱིམ་ན་ཡོད་པ་དེ་ཐམས་ཅད་གྲོགས་པོ་ལ་རྗོད་

པར་བྱེད་དོ། །རང་གི་གཏམ་རྣམས་དག་ཀྱང་རང་གིས་རྗོད་པར་བྱེད་དོ། །རྣམ་པ་བཅུ་གསུམ་པོ་དེ་དག་རྣམས་དང་ལྡན་པ་ནི་གྲོགས་པོ་ཡིན་ནོ། །འཇིག་རྟེན་པའི་གྲོགས་པོ་ཡོན་ཏན་རྣམ་པ་དེ་ལྟ་བུ་དང་ལྡན་པ་དང་རྒྱལ་པོ་ཡང་དག་པར་ལྡན་པས་ནི་གཅིག་གིས་
ཀྱང་སྟོབས་དང་ལྡན་པ་དང་ཡང་དག་པར་ལྡན་པའི་རྒྱལ་པོ་ནི་སྟོབས་ཆེན་པོ་དང་ལྡན་པར་འགྱུར་རོ། །ཅི་ཡང་མང་པོ་དང་ལྡན་པར་གྱུར་པ་མི་རྫི་བ་ལ་ལྟ་ཅི་སྨོས། དེའི་ཕྱིར་རབ་ཏུ་བརྩོན་པས་རྒྱལ་པོས་སྨྱུག་མའི་གྲོགས་པོ་བྱའོ། །འཇིག་རྟེན་ལས་འདས་པའི་ལམ་དགའ་བར་
གྱུར་པས་དོན་སྒྲུབ་པར་བྱེད་པའོ། །དེ་གྲོགས་པོའི་ཡོན་ཏན་མདོར་བསྡུ་ན་བཅུ་ཡིན་ནོ། །འདི་ལྟ་སྟེ་གང་གིས་ཆོས་མ་ཡིན་པ་བྱེད་པར་འགྱུར་བ་ན། དེ་འགོག་པར་བྱེད་པ་དང་། སྦྱིན་པ་གཏོང་དུ་འཇུག་པ་དང་། ཚུལ་ཁྲིམས་ལ་གོམས་པར་བྱེད་དུ་འཇུག་གོ། །གྲོགས་པོ་
ངན་པ་ལས་རབ་ཏུ་ཟློག་པར་བྱེད་དོ། །ལས་ཀྱི་འབྲས་བུ་རྣམ་པར་སྨིན་པ་ལེགས་པར་སྟོན་པར་བྱེད་དོ། །ལམ་ངན་པར་ཞུགས་པར་གྱུར་པ་ལམ་ལ་རབ་ཏུ་འགོད་པར་བྱེད་དོ། །གང་ཡང་འདི་ལས་ཚུལ་ཁྲིམས་འཆལ་པ་ཆུང་ཟད་ཡོད་པ་དེ་དང་བྲལ་བར་བྱེད་དོ། །ཕ་དང་མ་དག་གི་ངག་
ཉན་པར་བྱེད་དུ་འཇུག་གོ། །དུས་ཐམས་ཅད་བར་རབ་ཏུ་བརྩོན་པས་ངེས་པར་ལེགས་པ་ལ་ཀུན་ནས་སྦྱོར་བར་བྱེད་དོ། །བྱེད་དུ་འཇུག་པ་དང་རྣམ་པ་དེ་ལྟ་བུའི་གྲོགས་པོ་ནི་འཇིག་རྟེན་ལས་འདས་པའི་ཡིན་ནོ། །ཐབས་མ་ཡིན་པ་ཐམས་ཅད་ལས་ཀྱང་སྐྱོབ་པར་འགྱུར་རོ། །ཕ་དང་མ་
དང་འདྲ་བར་འགྱུར་རོ། །བརྟན་པོ་ཁོ་ནར་གྲོགས་པོ་འདི་དག་རྣམས་ནི་ཐམས་ཅད་ཁོ་ནར་ཡང་སྡིག་པ་ཟད་པར་བྱེད་པར་འགྱུར་རོ། །དེ་དང་ཉེ་བ་ལས་ཉེས་པ་འབྱུང་བར་ཡང་མི་འགྱུར་རོ། །ཕ་རོལ་གྱི་གྲོགས་པོའི་མཆོག་ཡིན་གྱི་འདིའི་ནི་མ་ཡིན་ནོ། །དེའི་ཕྱིར་རྒྱལ་པོས་གྲོགས་
པོ་བརྟན་པོ་བྱའོ། །གང་དག་དགེ་བའི་བཤེས་གཉེན་ལ་ཉེ་བར་སྟེན་པར་བྱེད་ཅིང་དགེ་བའི་རྣམས་ཀྱང་བྱེད་པ་དེ་ནི་ལུས་ཞིག་ནས་ཤི་བར་གྱུར་པའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་གྲོགས་པོ་མ་ཡིན་པ་བདེ་

ལེགས་སུ་འགྱུར་བར་མི་བྱེད་པ་ཀུན་ཏུ་བསྟེན་པར་མི་བྱའོ། །དཔེར་ན་སྐྱེ་བོ་ཐམས་ཅད་སླུ་བར་བྱེད་པ་འབའ་ཞིག་པ་ཤིན་ཏུ་ལམ་ལོག་པ་སྟོན་པར་བྱེད་པ་དང་བསམ་པ་ངན་པ་སེམས་པར་བྱེད་པ་ཉེ་བར་སྟེན་པར་བྱེད་པ་ཡང་དེས་ནི་དོན་མ་ཡིན་པ་ཆེན་པོ་དང་ཀུན་ཏུ་སྦྱོར་རོ། །རླག་པར་
བྱེད་པའི་རྩ་བ་དེ་ཡང་རྣམ་པ་གཉིས་ཡིན་ཏེ། རབ་ཏུ་འགེབས་པར་བྱེད་པ་དང་ངེས་པར་སྦེད་པར་བྱེད་པའོ། །དེ་ལ་རབ་ཏུ་འགེབས་པར་བྱེད་པ་ཞེས་བྱ་བ་ནི་འཇིག་རྟེན་པ་སླུ་བར་བྱེད་པ་རབ་ཏུ་དང་བ་མ་ཡིན་པར་གྱུར་པ་ཚུལ་འཆོས་པའི་རྟགས་འཛིན་པར་བྱེད་པ་ལས་ཅི་ཡང་མེད་པ་ཟོང་
བཅོས་མ་དང་འདྲ་བའི་མུ་སྟེགས་ཀྱི་ཚེར་མས་རང་དང་གཞན་སླུ་བར་བྱེད་པ་འཇིག་རྟེན་ཕ་རོལ་སྤངས་པ་བཟང་པོའི་ཆ་བྱད་ཆེས་འཛིན་པར་བྱེད་པ་དོན་མ་ཡིན་པ་རྣམས་བྱེད་པར་འགྱུར་བ་པོ་རྐུན་མ་དེ་དག་རྣམས་ལ་ལེགས་པར་ཕྲད་པར་བྱ་བ་དང་ཀུན་བརྗོད་པར་ཡང་སླ་བར་སྦྱིན་པར་མི་བྱ་ན།
ལྷན་ཅིག་ཏུ་འགྲོགས་པར་བྱ་བ་ལྟ་སྨོས་ཀྱང་ཅི་དགོས། དེ་དག་དང་ལྷན་ཅིག་པར་གྱུར་པ་ནི་དེས་ཤིན་ཏུ་བར་ཡང་སྤང་བར་བྱའོ། །དེ་དག་ལ་ནི་བདག་ཉིད་ལ་ཡང་ཡོད་པ་མ་ཡིན་ན་གཞན་དག་ལ་ཅི་ལ་འབྱུང་བར་འགྱུར། གང་སྡིག་པའི་གྲོགས་པོ་སྤོང་བར་གྱུར་པ་རྣམས་ཀྱིས་ནི།
སྒྱུ་ཅན་ལ་རྗེས་སུ་བསྟེན་པར་མི་བྱའོ། །ཚུལ་འཆོས་པར་བྱེད་པ་དང་ཡང་མ་ཡིན་ལ་དེ་དག་དང་གྲོགས་པོ་མི་བྱེད་པས་ཡང་དག་པའི་ལེགས་པར་གཞིགས་ནས་བྱེད་པར་འགྱུར་རོ། །དེས་གྲོགས་པོ་རྩབ་ཧྲལ་ཅན་ལ་བསྟེན་པར་མི་བྱའོ། །དེ་དེ་ཉིད་ཀྱིས་བག་ཆགས་ཀྱིས་བསྒོས་
པར་གྱུར་པ་ནི་ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་རྒྱུ་རྐྱེན་དེས་བྱེད་པར་འགྱུར་རོ། །གཞན་ཡང་ཆོས་གཉིས་རྒྱལ་པོས་ཅི་ནས་ཀྱང་སྤང་བར་བྱ་སྟེ། གཉིས་པོ་གང་ཞེ་ན། འདི་ལྟ་སྟེ། ཁྲོ་བ་དང་རྒོད་པ་ཆེས་སྡོམ་པར་བྱེད་
པའོ། །ཁྲོ་བ་དང་རྒོད་པའི་ཡང་གང་དག་ཤུགས་སྡོམ་པར་བྱེད་པའི་རྒྱལ་པོ་དེ་ནི་རྒྱལ་སྲིད་བརྟན་པར་འགྱུར་ཞིང་རང་བཞིན་བསྒོ་བར་བྱེད་པ་ཡིན་པས་ཕན་ཚུན་གྱིས་ཀྱང་མངོན་པར་གདུལ་བར་མི་ནུས་སོ། །འདི་ལ་འགའ་ཞིག་གིས་ཀྱང་གླགས་མི་རྙེད་དོ། །ཁྲོ་བ་སྡོམ་པར་བྱེད་པའི་རྒྱལ་པོ་དེ་དག་ནི་

མ་བསམས་པར་བྱ་བ་རྣམས་བྱེད་པར་མི་འགྱུར་རོ། །གློ་བུར་དུ་གནས་ནས་འཕོ་བར་མི་བྱེད་དོ། །བྲན་ལ་གློ་བུར་དུ་རྡེག་པར་མི་བྱེད་དོ། །གསང་བར་བྱ་བ་རྣམས་ནི་ཕྱི་རོལ་དུ་མི་བྱེད་དོ། །གློ་བུར་དུ་འཕེལ་བ་དང་འགྲིབ་པ་དག་སྐྱེད་པར་མི་བྱེད་དོ། །དགའ་བའི་གནས་སུ་
འཕར་བར་མི་འགྱུར་རོ། །འདིའི་སེམས་དམའ་བར་གྱུར་པས་ཀྱང་དོན་དག་བྱེད་པར་འགྱུར་བ་ནི་མ་ཡིན་ནོ། །སྐྱེས་བུ་དམ་པ་མ་ཡིན་པ་དག་རྗེས་སུ་འཛིན་པར་མི་བྱེད་དོ། །དེ་ནི་བློ་བརྟན་པར་འགྱུར་རོ། །དེ་ལྟར་རྒྱལ་པོ་དེ་ཁྲོ་བ་དང་རྒོད་པའི་ཚན་ཀ་སྡོམ་པར་བྱེད་པ་ཉིད་ནི་འཇིག་རྟེན་
པའི་དོན་ལ་ཡང་རབ་ཏུ་བསྔགས་པར་འགྱུར་རོ། །ཇི་ལྟར་འཇིག་རྟེན་ལས་འདས་པའི་ལམ་ལ་རྒོད་པའི་ཤུགས་སྡོམ་པ་དང་གང་ཁྲོ་བ་སྡོམ་པར་བྱེད་པ་དག་འདིར་བསྔགས་པ་ཡིན་ཞེ་ན། ཁྲོ་བ་སྡོམ་པར་བྱེད་པ་དེས་ནི། འཁོར་བའི་དྲི་མ་གཅིག་བསྡམས་པ་ཡིན་ནོ། །གང་གིས་ཡང་
རྒོད་པའི་ཤུགས་མཛེས་པས་རྣམ་པར་སྡོམ་པར་བྱེད་པར་གྱུར་པ་དེས་ནི་འདོད་ཆགས་ཀྱི་ཤུགས་རྣམ་པར་བསྡམས་པ་ཡིན་ནོ། །གང་གིས་ཤུགས་དང་ལྡན་པའི་དྲི་མ་གཉིས་པོ་དག་སྡོམ་པར་བྱེད་པ་ཉིད་དུ་འགྱུར་བ་དེས་གཏི་མུག་གི་ཤུགས་བསྡམས་པར་འགྱུར་རོ། །དྲི་མ་གསུམ་གྱི་ཤུགས་
རྣམས་སྡོམ་པར་བྱེད་པ་པོ་དེ་ནི་ཤེས་པ་དང་ལྡན་པ་དང་བཟོད་པ་དང་ལྡན་པ་དང་བློ་གྲོས་བརྟན་པ་དང་གཅིག་ཏུ་ངེས་པར་གྱུར་པའི་བློ་གྲོས་ཅན་དག་ནི་སྔོན་གྱི་རྒྱུ་རྐྱེན་དེ་དག་གིས་རྣམ་པར་སྨིན་པས་ལུས་ཞིག་པར་གྱུར་པ་ན་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་
འགྱུར་རོ། །གཞན་ཡང་ཆོས་གཉིས་ཤིན་ཏུ་ཡང་དགག་པར་བྱའོ། །གཉིས་པོ་གང་དག་ཞེ་ན། འདི་ལྟ་སྟེ་རྒྱལ་པོ་ཤིན་ཏུ་ཡང་ཟས་དང་སྐོམ་རྣམས་ལ་སྲེད་པའི་རང་བཞིན་ཅན་དུ་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཤིན་ཏུ་ཟས་སྐོམ་གྱི་རང་བཞིན་ཅན་ནི་འཆུམས་ནས་གཡེང་བར་
འགྱུར་རོ། །གསུས་པ་འགེངས་པར་བྱེད་པ་ལ་ཤིན་ཏུ་ཕྱོགས་པར་འགྱུར་རོ། །དེ་རང་བཞིན་གྱིས་ཉེ་བར་ཆགས་པར་གྱུར་ནས་ཕྱུགས་བཞིན་དུ་བློ་གཅིག་ཏུ་འགྱུར་རོ། །ཟས་དང་སྐོམ་གཉིས་ལས་མ་གཏོགས་པ་དོན་གཞན་རྣམས་ལ་དེའི་བློ་འཇུག་པར་མི་འགྱུར་རོ། །དེ་ལྟར་ཀུན་དུ་

ཆགས་པར་གྱུར་པའི་བློ་དང་སྤྱོད་པ་དང་ལྡན་པ་བློ་དེ་ལ་སོང་བར་གྱུར་པས་ཆོས་དང་ཆོས་མ་ཡིན་པ་དཔྱོད་པར་མི་བྱེད་དོ། །ཡུལ་འཁོར་རྗེས་སུ་སྒྲུབ་པར་མི་བྱེད་དོ། །ཡུལ་ལྗོངས་ཀྱི་དོན་དག་དཔྱོད་པར་མི་བྱེད་དོ། །རང་བཞིན་ལེགས་པར་བསྒོ་བར་མི་བྱེད་དོ། །བཀའ་བློན་པ་
རྣམས་ཁུར་ལ་སྦྱོར་བར་མི་བྱེད་དོ། །དོན་དག་ལྕི་མོ་དང་ཡང་མོ་རྣམས་རྟོགས་པ་མ་ཡིན་ནོ། །དེ་རྟག་པར་ཡང་དོན་རྣམས་ལས་ཉམས་པར་འགྱུར་རོ། །དེ་ཡོངས་སུ་ཉམས་པ་ལས་ཀྱང་འབྱོར་བ་དམན་པར་འགྱུར་ལ་དེས་ཀྱང་ཟས་དང་སྐོམ་མིང་མེད་པར་འགྱུར་རོ། །དེ་དེ་ལས་
ཡོངས་སུ་ཉམས་པར་གྱུར་པས་ཀྱང་འཇིག་རྟེན་པ་རྣམས་ཐམས་ཅད་ཀྱི་སྐྱུག་བྲོ་བའི་གནས་སུ་གྱུར་པ་མཆོག་ཏུ་དབུལ་བར་འགྱུར་རོ། །སྲེད་པའི་རྣམ་པར་གཡེང་བ་དེས་འཇིག་རྟེན་པའི་དོན་རྣམས་ཀྱི་ཡང་བར་དུ་གཅོད་པར་བྱེད་པར་འགྱུར་བ་ཡིན་པ་དང་། ཟས་དང་སྐོམ་ཉེ་བར་
སྟེན་པར་གྱུར་པས་ཇི་ལྟར་འཇིག་རྟེན་ལས་འདས་པ་རྣམས་ལ་ཡང་རྣམ་པར་གཤེ་བར་གྱུར་པ་ཡིན་ནོ། །འདི་ལྟ་སྟེ་ཤིན་ཏུ་ཁོ་ན་ཡང་ཟས་སྐོམ་ལ་སྲེད་པར་གྱུར་པའི་རང་བཞིན་དང་ལྡན་པ་དེ་ལ་ཡིད་སོང་བར་གྱུར་པ་དེའི་ངང་ཚུལ་ཅན་དག་ནི་རྟག་པར་ཡང་རོའི་སྲེད་པས་ཀུན་ཏུ་ཁྲིད་
པར་བྱེད་པས་ཡིད་མཉམ་པར་བཞག་པ་མ་ཡིན་པར་འགྱུར་རོ། །ལུས་སུ་གཏོགས་པའི་དྲན་པ་དག་མེད་པར་འགྱུར་རོ། །ཚོར་བར་གཏོགས་པ་ཡང་མེད་དོ། །སེམས་སུ་གཏོགས་པ་དག་ཀྱང་མེད་དོ། །ཆོས་སུ་གཏོགས་པ་དག་ཀྱང་མེད་དོ། །སྡུག་བསྔལ་དང་ཀུན་
འབྱུང་དང་འགོག་པ་དང་ལམ་གྱིས་བསྡུས་པ་རྣམས་ཀྱང་མེད་དོ། །ཟས་དང་སྐོམ་ལ་གུས་པར་འགྱུར་བ་ལས་མ་གཏོགས་པ་འདི་དག་དོན་གཞན་རྣམས་འགའ་ཞིག་ལ་ཡང་བློ་ལས་སུ་རུང་བར་མི་འགྱུར་རོ། །དེ་ནི་དུད་འགྲོ་དང་རང་བཞིན་མཚུངས་པར་འགྱུར་བ་ཡིན་ནོ། །དེ་ཟས་
དང་སྐོམ་གྱི་སྤྱོད་ཡུལ་རྣམས་ལས་ཟས་ལ་རྣམ་པར་སྤྱོད་པའི་བརྩོན་པ་དེ་དག་ལས་གྲོལ་བ་ནི་ལུས་ངག་གི་སྤྱོད་པས་བསྡུས་པ་དང་དབང་པོ་རྣམས་ཀྱང་ཡང་དག་པར་ཡོངས་སུ་སྨིན་པར་འགྱུར་རོ། །ཡང་དག་པའི་ལམ་རྣམས་སྤྱོད་པར་བྱེད་དོ། །དེའི་སེམས་ལས་སུ་རུང་བར་འགྱུར་

རོ། །ལུས་དང་སེམས་དང་ཚོར་བ་དང་ཆོས་རྣམས་དང་སྡུག་བསྔལ་དང་ཀུན་འབྱུང་དང་འགོག་པ་དང་ལམ་རྣམས་མ་ལུས་པ་ཤེས་པ་དང་ལྡན་པར་འགྱུར་རོ། །དེའི་ཡིད་ཤིན་ཏུ་མཉམ་པར་བཞག་པར་འགྱུར་བ་དང་སེམས་དང་དབང་པོ་རྣམས་ཀྱང་རབ་ཏུ་དང་བར་
འགྱུར་རོ། །ཟས་དང་སྐོམ་དང་ལྡན་པའི་ལུས་ནི་ཡང་དག་པར་འགྱུར་ཏེ། ལུས་རང་བཞིན་དུ་གནས་པ་དང་སེམས་རང་བཞིན་དུ་གནས་པ་དང་། སེམས་རང་བཞིན་དུ་གནས་པར་གྱུར་པ་ཡིན་པ་གང་གི་ཕྱིར་ཡང་དགེ་བའི་ཆོས་རྣམས་བསམ་པར་ནུས་པ་ཡིན་ནོ། །དེའི་ཕྱིར་ན་
རོ་ལ་སྲེད་པ་ལ་ཆེད་ཆེར་འགྱུར་བར་མི་བྱའོ། །གལ་ཏེ་ཟས་སམ་སྐོམ་མམ་ལུས་ལ་འཇུག་པར་བྱེད་པ་དེའི་ཚེ་འགྲངས་པ་ཙམ་དང་ཕན་པ་ཙམ་ཞིག་གོམས་པར་བྱས་པས་དེ་ལྟར་འདིའི་ཡིད་ལས་སུ་རུང་བ་དང་སེམས་མཉམ་པར་གཞག་པར་ཡང་འགྱུར་རོ། །སེམས་ཤིན་ཏུ་མཉམ་
པར་བཞག་པར་གྱུར་པ་རྣམས་ནི་དགེ་བའི་ལས་ལ་དཔྱོད་པར་བྱེད་དོ། །དགེ་བའི་ལས་རྣམས་ཀྱི་མཐའ་ལ་སྤྱོད་པ་ནི་ལུས་ཞིག་པར་གྱུར་ནས་ཤི་བའི་འོག་ཏུ་ལས་དེ་དང་དེ་དག་གི་དྲི་ཙམ་གྱིས་ཀྱང་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་ཏེ་ལས་དེའི་རྒྱུ་དང་རྐྱེན་གྱིས་སོ། །
ཆོས་གཞན་ཡང་རྒྱལ་པོས་བྱས་པར་བྱའོ། །འདི་ཡང་གང་ཞེ་ན། འདི་ལྟ་སྟེ་ལེགས་པར་སྤྱོད་པར་བྱ་བ་རྣམས་སེམས་པར་བྱེད་པའོ། །ལེགས་པར་བསམ་པར་བྱ་བ་རྣམས་སེམས་པར་བྱེད་པ་ཡང་གང་གི་ཕྱིར་འཇིག་རྟེན་འདི་དང་ཕྱི་མ་མ་ཡིན་ཡང་སེམས་ཅན་རྣམས་ཀྱི་དོན་
སྒྲུབ་པར་བྱེད་དོ། །དེ་ཅིའི་ཕྱིར་ཞེ་ན། སེམས་ཀྱི་ཡོན་ཏན་ཡིན་པའི་ཕྱིར་ཏེ། གང་དག་གི་ས་འདི་དང་ཕ་རོལ་དུ་ཡང་ལེགས་པར་བསམ་པར་བྱ་བ་རྣམས་སེམས་པ་པོ་ནི་མཆོག་ཏུ་བདེ་བར་འགྱུར་རོ། །འོན་ཀྱང་སྐྱོན་རྣམས་རབ་ཏུ་གཞོམ་པར་བྱ་ཞིང་དེས་ལེགས་པར་བསམ་
པར་བྱ་བ་རྣམས་བསམ་པར་བྱའོ། །ཡིད་ལ་ཡང་གཞག་པར་བྱའོ། །འདོད་ཆགས་ལ་སོགས་པའི་དྲི་མ་རྣམས་ཀྱང་རྟག་པར་ངན་སོང་དུ་རྣམ་པར་འཇུག་པར་བྱེད་པ་ཡིན་པར་བརྗོད་པར་བྱའོ། །འདོད་ཆགས་ལ་ནི་མི་སྡུག་པས་སོ། །ཞེ་སྡང་ལ་ནི་བྱམས་པས་སོ། །གཏི་

མུག་ལ་ནི་ཤེས་རབ་ཀྱིས་སོ། །དེ་ལ་དྲི་མ་རྣམ་པ་གསུམ་པོ་དེ་དག་རྣམས་ནི་ལེགས་པར་བསམ་པ་སེམས་པས་ཟད་པར་བྱ་བར་ནུས་སོ། །ངན་པར་བསམ་པ་སེམས་པར་བྱེད་པ་དེ་དག་རྣམས་ཀྱིས་ནི་མ་ཡིན་ནོ། །འཇིག་རྟེན་གྱི་ཆོས་རྣམས་ཀྱང་དེ་ཁོ་ན་བཞིན་དུ་ལེགས་པར་
བསམ་པར་སེམས་པར་བྱེད་པ་རྣམས་ཀྱིས་འགྲུབ་པར་འགྱུར་རོ། །ངན་པར་བསམ་པ་སེམས་པར་བྱེད་པས་ནི་མ་ཡིན་ནོ། །དེའི་ཕྱིར་ཐམས་ཅད་ཀྱིས་གནས་སྐབས་ཐམས་ཅད་དུ་དོན་ཐམས་ཅད་ལེགས་པར་བསམས་ལ་བྱའོ། །དེ་ལས་འདིའི་དོན་ཀུན་འགྲུབ་པར་འགྱུར་བ་
དང་། ཆོས་པའི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་བདག་པོར་འགྱུར་ཏེ། ལས་བཟང་པོ་བྱས་པ་དེའི་རྒྱུ་དང་རྐྱེན་རྣམས་ཀྱིས་སོ། །ཆོས་གཞན་ཡང་རྒྱལ་པོས་མི་བྱའོ། །འདི་ཡང་གང་ཞེ་ན། འདི་ལྟ་སྟེ།
དོན་ཐག་རིང་བར་གྱུར་པ་ཞེས་བྱ་བ་འཇིག་རྟེན་པའི་དོན་རྣམས་བསྒྲུབ་པ་དང་། འཇིག་རྟེན་ལས་འདས་པའི་ཡང་སྟེ་ཕན་པའི་དོན་གང་བྱེད་པར་གྱུར་པ་དང་། གཞན་དག་རྣམས་ཀྱང་བྱེད་པར་གྱུར་པ་ན་དུས་རིང་པོས་ཀྱང་བྱ་བར་མི་ནུས་པའོ། །དེ་དག་ལ་མི་བཟོད་པར་འགྱུར་རོ། །
འདི་ལྟ་སྟེ་ནད་ཀྱིས་ཀྱང་མྱུར་བར་ཀུན་ཏུ་བཅོམ་པར་གྱུར་པ་ན། དོན་ཐག་རིང་བར་གྱུར་པའི་སྐྱོན་གྱིས་བསྒྲུབ་བྱར་གྱུར་པ་རྣམས་ཡང་བསྒྲུབ་བྱ་མ་ཡིན་པར་བྱས་ནས་ཆུད་གཟོན་པར་བྱེད་དོ། །དེ་བཞིན་དུ་དོན་གཞན་དག་དུ་མ་རྣམས་ཀྱང་མྱུར་བར་མ་བྱས་པས་དུས་གཞན་དུ་ཤིན་ཏུ་
ཡང་བཟོད་པར་མི་ནུས་པར་འགྱུར་རོ། །དེ་ལྟར་ངེས་པར་ལེགས་པའི་ལམ་ཅུང་ཟད་ཙམ་ཡང་མེད་དེ། ནད་ལྟ་བུར་གྱུར་པའི་ཉོན་མོངས་པས་རྗེས་སུ་བཅོམ་པར་གྱུར་པས་ངན་སོང་དུ་འགྲོ་བར་འགྱུར་ཏེ། དོན་ཐག་རིང་བར་འགྱུར་བའི་སྐྱོན་གྱིས་ཡིན་ཏེ། དེའི་ཚེ་འཇིག་རྟེན་ལས་
འདས་པའི་ལམ་ཅུང་ཟད་ཙམ་ཡང་མེད་དོ། །ལམ་རྣམས་རྗེས་སུ་ཉེ་བར་འཇོམས་པར་འགྱུར་བས་དུག་གི་མྱུག་གུ་དང་ཆ་འདྲ་བར་གྱུར་པ་རྣམ་པར་འཕེལ་བར་གྱུར་ནས་དུས་གཞན་དུ་རབ་ཏུ་འཕེལ་བར་ཞུགས་ནས་རྒྱུད་མ་རུངས་པར་སྲེག་པར་བྱེད་དེ། གང་གིས་སྲོག་ཆགས་

རྣམས་དམྱལ་བ་དང་ཡི་དགས་དང་དུད་འགྲོའི་སྐྱེ་བར་འགྱུར་བར་བྱེད་དོ། །དེའི་ཕྱིར་དོན་ཐག་རིང་བ་ནི་རྒྱལ་པོའམ་དེ་མ་ཡིན་པ་དགེ་སློང་རྣམས་སམ། ནོར་ཅན་རྣམས་སམ་འགའ་ཞིག་ལ་ཡང་སྙན་པ་མ་ཡིན་ནོ། །ཐམས་ཅད་ལ་ཤིན་ཏུ་བར་ཡང་
བསྔགས་པ་མ་ཡིན་ནོ། །གང་ཡང་དོན་ཐག་རིང་བར་གྱུར་པ་མ་ཡིན་པ་དེ་དག་ནི་སྐྱོན་སྐྱེས་པར་གྱུར་པ་དག་སྐད་ཅིག་གི་དུས་དེར་སྒྱུར་བར་བྱེད་དོ། །གཏོང་བར་བྱེད་དོ། །ཀུན་ནས་འཇོམས་པར་བྱེད་དོ། །རབ་ཏུ་འཇོམས་པར་བྱེད་དོ། །རྩ་བ་ནས་རླག་པར་བྱེད་དོ། །
དེས་སྐྱོན་དེ་དག་རྣམས་ཀུན་ནས་བཅོམ་པར་གྱུར་པས་མཐར་ཐུག་པར་བདེ་བར་འགྱུར་རོ། །སྐྱེས་བུ་འཇིག་རྟེན་པའིའམ་འཇིག་རྟེན་ལས་འདས་པའི་ལམ་ལ་ཡང་གནས་ནས་ཀུན་ཏུ་སྐྱེས་པའི་སྐྱོན་རྣམས་འཇོམས་པར་བྱེད་དོ། །དུག་གི་མྱུག་གུ་དང་འདྲ་བའི་སྐྱོན་ཡང་
དུས་གཞན་དུ་འཕེལ་ནས་སྐྱོན་མང་པོར་འགྱུར་རོ། །དེའི་ཕྱིར་གང་དག་གིས་སྐད་ཅིག་དེ་ལ་སྐྱོན་རྣམས་གཞོམ་པར་བྱས་ལ་རིངས་པར་བྱས་ཏེ་ཡང་བདེ་ལེགས་ཀྱི་གནས་ལ་ལེགས་པར་སྦྱར་བར་བྱའོ། །མངོན་སུམ་དུ་འགྱུར་བའི་ལུས་ཞིག་ནས་ཤི་བའི་འོག་ཏུ་མཐོ་རིས་
བདེ་འགྲོའི་འཇིག་རྟེན་འཐབ་བྲལ་བ་རྣམས་ལ་དབང་བར་འགྱུར་བ་ཡིན་ཏེ། དེས་སྔོན་བྱས་པའི་ལེགས་པར་བྱས་པའི་ལས་དེ་ཉིད་ཀྱི་རྒྱུ་དང་རྐྱེན་རྣམས་ལས་ཡིན་ནོ། །ཆོས་གཞན་ཡང་རྒྱལ་པོས་བྱ་བར་བྱའོ། །འདི་ཡང་གང་དག་ཞེ་ན། འདི་ལྟ་སྟེ་ཆོས་ཀྱིས་
སྐྱེ་དགུ་རྣམས་བསྐྱང་བར་བྱའོ། །གང་གི་ཕྱིར་རྒྱལ་པོ་གང་དག་ཆོས་ཀྱིས་སྐྱེ་དགུ་རྣམས་བསྐྱང་བར་བྱའི་ཆོས་མ་ཡིན་པས་ནི་མ་ཡིན་ནོ། །ཆོས་ཀྱིས་ལྷག་པའི་རྒྱལ་པོའི་ཡང་བདག་དང་གཞན་ལ་ཕན་པར་བྱེད་པར་འགྱུར་རོ། །བདག་ལ་ཕན་པ་མ་ཡིན་པ་མི་བྱེད་དོ། །
ཇི་སྲིད་དུ་ཚུལ་ཁྲིམས་དང་ལྡན་པར་འགྱུར་རོ། །ཚུལ་ཁྲིམས་དང་ལྡན་པར་གྱུར་པ་རྣམས་ནི་ཆོས་མ་ཡིན་པས་ནམ་ཡང་སྐྱེ་དགུ་སྐྱོང་བར