Kinh tạng Tây Tạng (Kangyur Đại Học) — 070_མདོ་སྡེ།_ལ

མ་ཆེན་པོ་དེ་ཉིད་ཀྱི་སྟེང་དུ་འབྱུང་བར་བྱེད་པ་དང་། རང་གི་གཟི་བརྗིད་རྣམས་ཀྱིས་ལམ་མེར་གྱུར་པར་ལྷ་དེ་དག་རྣམས་ཀྱིས་ལུས་ཤིན་ཏུ་བལྟ་བར་དཀའ་བ་ཡིན་ནོ། །
གཞན་ཡང་མུ་སུ་ལུན་དྷ་དེ་ཉིད་ཀྱིས་རྫུ་འཕྲུལ་གཞན་ཡང་བྱེད་པར་གྱུར་པ་ནི། ལྷ་དེ་དག་རྣམས་ཉིད་ཀྱི་བག་མེད་པ་ཀུན་ནས་བསྙུངས་པར་བྱ་བའི་དོན་དུ་འདི་ལྟ་སྟེ། ཁ་ནས་ལྷ་བརྒྱ་སྟོང་ཀུན་དུ་འབྱུང་བར་བྱེད་དོ། །ཁ་ཅིག་ནི་ཁང་བུའི་སྟེང་དུ་ཞོན་ནས་རིན་པོ་ཆེ་སྣ་ཚོགས་པའི་འོད་རྣམས་
ཀྱིས་ལུས་ཤིན་ཏུ་གསལ་བར་གྱུར་པ་རྣམས་སོ། །ཁ་ཅིག་ནི་རྣམ་པ་སྣ་ཚོགས་པའི་ཆ་བྱད་འཛིན་པར་གྱུར་པས་གླུའི་རོལ་མོ་རྣམས་ཉེ་བར་ལེན་པར་བྱེད་པ་རྣམས་ལྷ་རྫས་ཀྱི་རྒྱན་དང་། ཆ་བྱད་དང་། མཆོག་ཏུ་ལང་ཚོ་ལ་བབ་པའི་ལྷ་མོ་རྣམས་ཀྱིས་ཡོངས་སུ་བསྐོར་ནས་གླུ་ཉེ་བར་ལེན་པས་མུ་
སུ་ལུན་དྷའི་ཁ་ནས་བྱུང་ནས་འགྲོའོ། །ཁ་ཅིག་ནི་རིན་པོ་ཆེ་བདུན་གྱི་རང་བཞིན་གྱི་པད་མ་གཞན་དག་རྣམས་ལ་ནང་དུ་ཞེན་ནས་སྙན་པའི་གླུ་རྣམས་ལེན་པར་བྱེད་པ་དང་། རྩི་ཡང་ལྷ་རྫས་ཀྱི་རོ་དང་དྲི་དང་ཡང་དག་པར་ལྡན་པ་དག་འཐུང་བར་བྱེད་དེ། ལྷན་ཅིག་སྤྱོད་པ་རྣམས་ཀྱིས་
ཡོངས་སུ་བསྐོར་ནས་ལན་བརྒྱ་ཕྲག་རྣམས་སུ་དང་། གལ་ཏེ་ན་ལན་སྟོང་ཕྲག་ཏུ་ཡང་མཛེས་པར་གྱུར་པ་དང་ལྡན་པའི་ལྷ་རྫས་ཀྱི་ཕྲེང་བའི་མཆོག་རྣམས་ཀྱིས་བརྒྱན་པ། རང་གི་འོད་ཀྱི་དཔལ་འབར་བ་དང་ལྡན་པ་རྣམས་ཡིན་ནོ། །གཞན་ཡང་ལྷ་གཞན་དག་རྣམས་རྣམ་པ་གཞན་
གྱིས་མུ་སུ་ལུན་དྷ་དེའི་ཁ་ནས་ཀུན་ཏུ་བྱུང་ནས་འགྲོ་ན། རྫུ་འཕྲུལ་གྱིས་སྤྲུལ་པ་རྣམས་ལ་འདི་ལྟ་སྟེ། བྱའི་རྒྱབ་ཏུ་ཞོན་པ་རྣམས་ནི་རིན་པོ་ཆེ་བདུན་གྱི་རང་བཞིན་གྱི་བྱ་རྣམས་ལ་མངོན་པར་ཞོན་ནས་དགའ་བར་བྱེད་པ་དང་། གླུ་ཡང་ལེན་པར་བྱེད་པ་དང་ལྷན་ཅིག་སྤྱོད་པ་རྣམས་ཀྱིས་
ཡོངས་སུ་བསྐོར་ནས། རབ་ཀྱི་མཆོག་ཏུ་རངས་པའི་ཡིད་ཀྱིས་རྔ་སྐད་ཡན་ལག་ལྔ་དང་ལྡན་པ་ཉན་པར་བྱེད་ཅིང་། བག་མེད་པས་ཉེ་བར་འཚོ་བ་རྣམས་མུ་སུ་ལུན་དྷའི་ཁ་ནས་ཀུན་ཏུ་འགྲོའོ། །ལྷ་ངོ་མཚར་བར་གྱུར་པ་མཚུངས་པ་མེད་པའི་གཟུགས་གསལ་ཞིང་སྡུག་པའི་ཡོན་ཏན་དང་ལྡན་པ་

གཞན་ཡང་རྣམ་པ་གཞན་གྱིས་ལྷ་རྣམས་སྤྲུལ་པར་བྱེད་པ་ན། ཇི་ལྟར་མུ་སུ་ལུན་དྷའི་ཁ་ནས་དེ་དག་ཉིད་འགྲོ་བ་ནི་ཨུད་པ་ལའི་ཟེ་བའི་ནང་དུ་ཞོན་ཞིང་རྒྱན་རྒྱུན་བར་འབྲེལ་པའི་དབུས་སུ་སོང་ནས། ལྷ་རྫས་ཀྱི་རྔ་སྐད་ཡན་ལག་ལྔ་པ་ཉན་པར་བྱེད་ཅིང་ལྷ་མོའི་ཚོགས་རྣམས་
ཀྱིས་ཡོངས་སུ་བསྐོར་ནས་ལྷ་རྫས་ཀྱི་བཏུང་བ་དག་འཐུང་བར་བྱེད་དོ། །གླུ་ཡང་ལེན་པར་བྱེད་ལ་ལྷན་ཅིག་སྤྱོད་པའི་འཁོར་རྣམས་ཀྱིས་ཡོངས་སུ་བསྐོར་ནས་ལན་བརྒྱ་ཕྲག་དང་། ཅི་སྟེ་ལན་སྟོང་ཕྲག་དང་ལན་བྱེ་བ་ཕྲག་རྣམས་སུ་ཡང་གཟུགས་དང་། ཁ་དོག་དང་། དབྱིབས་དཔེ་
མེད་པའི་ལྷའི་བུ་མོ་མཆོག་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་པ་ལྷ་རྫས་ཀྱི་ནགས་དང་ཉེ་བའི་ནགས་སུ་ཐབས་དུ་མས་རབ་ཏུ་སྒྲུབ་པར་བྱེད་དོ། །ནམ་མཁའི་དཀྱིལ་དུ་མངོན་པར་འཕགས་ནས་ས་གཞི་དག་བཞིན་དུ་འགྲོ་བར་བྱེད་ལ། རང་བཞིན་པའི་ལྷ་དེ་དག་
ཀྱང་གླུ་དེ་དག་རྣམས་ཉན་པར་བྱེད་དོ། །དེ་དག་གི་དྲུང་ན་ཡོན་ཏན་བརྒྱས་ལྷག་པར་སྙན་པར་གྱུར་པ། དེ་དག་གི་གླུ་དང་། དེ་དག་གི་གཟུགས་དང་། དེ་དག་གི་བདེ་བ་ཡང་རྣམ་པ་སྣ་ཚོགས་པའི་ཡོན་ཏན་དང་ལྡན་པ་ཡིན་ནོ། །དེ་ནས་རང་བཞིན་དུ་གནས་པའི་ལྷ་དེ་དག་སྔ་ན་མ་
མཐོང་བའི་ངོ་མཚར་ཆེ་བ་དེ་དག་རྣམས་ཀུན་ཏུ་མངོན་པར་མཐོང་ནས། ཁ་ཅིག་ནི་ངོ་མཚར་བའི་མཆོག་དང་ལྡན་པར་གྱུར་ཏོ། །ཁ་ཅིག་ནི་རབ་ཏུ་དགའ་བར་གྱུར་ལ། ཁ་ཅིག་ནི་རྨད་དུ་བྱུང་བར་གྱུར་ནས་ཅིའི་ཕྱིར་ལྷ་དེ་དག་རྣམས་ཇི་ལྟར་ན་འཐབ་བྲལ་གྱི་བདག་པོ་མུ་སུ་
ལུན་ངྷའི་ཁ་ནས་འགྲོ་བར་འགྱུར། འདི་དག་ནི་ཤིན་ཏུ་ཡང་ཡ་མཚན་ཆེའོ། །དེ་ལྟར་རང་བཞིན་གྱི་ལྷ་དེ་དག་རྣམས་སེམས་པར་བྱེད་པ་དང་ཕན་ཚུན་རྗོད་པར་ཡང་བྱེད་དེ། དེ་ལྟར་ཡང་རང་བཞིན་གྱི་ལྷ་དེ་དག་རྣམས་བྱེད་དོ། །གཞན་ཡང་མུ་སུ་ལུན་དྷས་མཆོག་ཏུ་
གྱུར་པའི་རྫུ་འཕྲུལ་གཞན་དག་བྱེད་པ་ནི་འདི་ལྟ་སྟེ། ཁ་ནས་བྱུང་བའི་ལྷ་དེ་དག་ལས་སྣ་ཚོགས་པའི་ཆ་བྱད་འཛིན་པ་རལ་པ་རིང་པོ་དང་ཅོད་པན་དང་ལྡན་པ་ཤིང་ཤུན་གྱི་གོས་ཅན་ལག་ན་རིལ་བ་སྤྱི་བླུགས་ཐོགས་པ། ལྷ་རྫས་ཀྱི་ཕྲེང་བའི་རྒྱན་ཅན། གཟི་བརྗིད་ཀྱི་དཔལ་

འབར་བའི་རི་དགས་ཀྱི་པགས་པ་འཛིན་པའི་རྣམ་པ་སྣ་ཚོགས་པའི་དྲང་སྲོང་དག་ཀུན་ཏུ་འབྱུང་སྟེ། བརྒྱ་ཕྲག་རྣམས་དང་དེ་ནས་ལན་སྟོང་ཕྲག་ཀྱང་ཀུན་ཏུ་བྱུང་ནས། ནམ་མཁའི་དཀྱིལ་དུ་འཁོད་ནས་ཚིགས་སུ་བཅད་པ་རྣམས་ཀྱང་བག་མེད་པ་རྣམས་དང་ཀུན་ནས་བྲལ་
བར་བྱ་བའི་དོན་དུ་རྗོད་པར་བྱེད་པ། ཇི་ལྟར། སྒྱུ་མ་ལྟ་བུའི་སྲིད་པ་ལས། །གཡོ་བའི་སེམས་ཅན་འདི་དག་ཀྱང་། །ཐམས་ཅད་འཆི་བའི་མཐའ་ཅན་གྱི། །དངོས་པོས་བག་མེད་པར་མ་བྱེད། །སྲེད་པ་ཀུན་ནས་འཕེལ་བ་ཡི། །དགའ་བར་འགྱུར་བ་ཐམས་ཅད་ལ། །ཐ་
མར་སྨད་པའི་གནས་ཀྱི་ནི། །དངོས་པོས་བག་མེད་པར་མ་བྱེད། །གང་ཞིག་སྐྱེས་པ་མི་འཇིག་པའི། །གནས་ནི་ཡོད་པ་མ་ཡིན་ནོ། །གང་ཕྱིར་བདེ་ཀུན་འཇིག་བཅས་ཀྱིས། །བག་མེད་མ་བྱེད་དངོས་རྣམས་ལ། །གལ་ཏེ་ཡོན་ཏན་ལྡན་པ་ཡི། །དགའ་བར་
མཐོང་བ་འདི་ཐམས་ཅད། །ཐམས་ཅད་རྨི་ལམ་འདྲ་བ་ཡི། །སྲིད་པས་བག་མེད་པར་མ་བྱེད། །བག་མེད་དགྲ་བོ་སྡིག་ཅན་འདི། །དགའ་བའི་འདོད་ཆགས་གདུལ་དཀའ་བ། །དམྱལ་བར་མྱུར་དུ་འབབ་འགྱུར་བའི། །དངོས་པོར་བག་མེད་པར་མ་བྱེད། །བདེ་
བ་འདི་ནི་ཡང་དང་ཡང་། །ཡོངས་སུ་ཉམས་པ་ཀུན་དུ་འབྱུང་། །ཡང་ནི་ཐམས་ཅད་འཇིག་འགྱུར་བའི། །སྲིད་པས་བག་མེད་པར་མ་བྱེད། །འོག་ཏུ་བར་གྱི་བསྐལ་པར་ནི། །སྐྱེ་དགུ་སྐྱོན་གྱིས་ཉེ་བར་བཅོམ། །ལས་ཀྱི་ལྕགས་སྒྲོག་གིས་བཅིངས་ནས། །ཇི་ལྟར་
མཆིལ་པས་ཉ་བཞིན་དུ། །ཐབས་ཀྱི་རྣམ་པ་ཐ་དད་ཀྱིས། །ལྕགས་སྒྲོག་གཅོད་པར་ནུས་མོད་ཀྱི། །ལྷ་དང་ལྷ་མིན་ཐམས་ཅད་ཀྱིས། །ལས་ཀྱི་སྒྲོག་ནི་གཅོད་མི་ནུས། །མཐོང་བ་མེད་དང་ཤིན་ཏུ་རིང་། །སྐྱེས་པ་རྒྱ་ཆེ་བ་ཡི་སྒྲོག །སྲེད་པའི་རྒྱུད་ནི་དམ་པོ་འདིས། །གང་
ཡང་འཆིང་བ་བྱིས་པ་རྣམས། །བདག་ཅག་ལྷ་རྣམས་ཐམས་ཅད་དང་། །མི་དང་དེ་བཞིན་ལྷ་མིན་མེད། །མི་རྟག་ཉིད་ལས་རྣམ་གྲོལ་མིན། །མིག་མེད་པས་ཀྱང་མཐོང་བ་མིན། །ལས་རྒྱ་ཆེན་པོའི་རྒྱུན་རྣམས་ནི། །ཤིན་ཏུ་རིང་བར་རབ་ཏུ་འཇུག །ཇི་སྲིད་ཤེས་

པས་རྣམ་མ་བཅོམ། །དེ་སྲིད་དུ་ནི་སྲེད་པ་ཡིན། །ལྔ་ཡི་གཙུབ་ཤིང་ལས་གྱུར་པའི། །སྲེད་པའི་བུད་ཤིང་ལས་བྱུང་བ། །རྣམ་རྟོག་རླུང་ནི་སྟོབས་པོ་ཆེས། །དུས་ཀྱི་མེས་ནི་ཤིན་ཏུ་སྲེག །བྱིས་པ་བློ་གྲོས་ཆུང་རྟག་ཏུ། །སྡུག་བསྔལ་དེས་ཀྱང་ཀུན་དུ་ལྡན། །
ཕྱིན་ཅི་ལོག་གིས་ཡོངས་འཁྲུལ་པས། །དེ་ནི་འགྲོ་བ་ལྔར་འཁོར་རོ། །ལོངས་སྤྱོད་རྣམ་པ་སྣ་ཚོགས་དང་། །ཆུང་མ་བུ་ལ་ཀུན་ཏུ་ཆགས། །མི་ལུས་ནད་ཀྱིས་རྣམ་བཅོམ་ནས། །འཆི་བདག་རྒྱལ་པོས་ཀུན་དུ་འདྲེན། །སྤྱང་ཁུས་ཇི་ལྟར་རི་དགས་ཀུན། །རབ་དང་མིན་
པས་མངོན་པར་འཇོམས། །དེ་བཞིན་འཆི་བདག་དཔུང་ཚོགས་ཀྱིས། །དང་བ་མིན་པས་མི་རྣམས་འཇོམས། །མཉམ་པ་མེད་དང་ཁྱད་འཕགས་པའི། །སྡུག་བསྔལ་སྲིད་དང་སྲིད་པར་མཐོང་། །གཏི་མུག་གིས་ནི་ཡོངས་བསླུས་པས། །འཇིག་རྟེན་འདི་ནི་སྐྱོ་བའང་
མེད། །ཤིན་ཏུ་བདག་ལ་བྱམས་པ་གང་། །དེ་ཀུན་སྡིག་ལ་རྟེན་པའི་མི། །གང་དག་བདག་ལ་བྱམས་མིན་པ། །དེ་ལ་འཇིག་རྟེན་སུ་མི་བྱམས། །དེ་ལྟར་ལྷ་དེ་དག་རྣམས་ཀྱི་བག་མེད་པ་ཀུན་ནས་ཞི་བར་བྱ་བའི་དོན་དུ་མུ་སུ་ལུན་དྷའི་ཁ་ནས་འབྱུང་བཞིན་པའི་དྲང་སྲོང་
རྣམས་རྫུ་འཕྲུལ་གྱིས་སྤྲུལ་ནས་རང་བཞིན་གྱི་ལྷ་རྣམས་ལ་སྟོན་པར་བྱེད་དེ། དེ་དག་ནི་མཐར་ཐུག་པར་ཕན་པ་རྣམས་ཡིན་ནོ། །གཞན་ཡང་འཐབ་བྲལ་བའི་མངའ་བདག་དེས་ཕན་པ་གཞན་གྱི་སྤྲུལ་པ་གཞན་རྣམས་བྱེད་པ་ནི་འདི་ལྟ་སྟེ། བྲང་དུ་ཆེས་མཆོག་ཏུ་དགའ་བར་
གྱུར་པའི་ངང་པ་དང་། ཀཱ་རཎྜ་བ་དང་། ངང་ངུར་དག་གིས་ཉེ་བར་མཛེས་པར་གྱུར་པ་ཡན་ལག་བརྒྱད་དང་ལྡན་པ་རབ་ཏུ་དང་བ་མཆོག་གི་ཆུ་དང་ཡང་དག་པར་ལྡན་པའི་པད་མའི་རྫིང་བུ་སྤྲུལ་པར་བྱེད་དོ། །དེའི་པད་མའི་རྫིང་བུ་དེ་ན་བརྒྱ་སྟོང་བྱེ་བའི་པད་མ་རྣམས་ལེགས་པར་སྐྱེས་
པ་འདི་དག་རྣམས་ནི་མཚོ་ཆེན་པོར་གྱུར་པ་རྣམས་ཡིན་ཏེ། རིན་པོ་ཆེ་བདུན་གྱི་རང་བཞིན་དུ་གྱུར་པ་དང་དཔག་ཚད་བརྒྱར་དྲི་ཞིམ་པོ་རྣམས་འབྱུང་བ་ཡིན་ནོ། །པད་མ་དེ་དག་རྣམས་ཀྱི་ནང་དུ་སོན་པའི་སྙིང་པོ་རྣམས་ལ། ཅོད་པན་དང་ལྡན་པའི་མགོ་བོ་རྣམས་རྣམ་པ་སྣ་ཚོགས་

པའི་འདབ་མ་རྣམས་ཀྱི་འོད་ཀྱིས་རབ་ཏུ་སྣང་བར་བྱས་པ། རིན་པོ་ཆེ་རབ་ཀྱི་མཆོག་གིས་རྒྱན་དུ་བྱས་པའི་དཔུང་རྒྱན་ཅན་རྣམས་འདུག་པ་ལ། རྣམ་པ་དུ་མར་སྣ་ཚོགས་པར་རབ་ཀྱི་མཆོག་ཏུ་ལང་ཚོ་ལ་བབ་པར་མང་པོ་རྣམས་ཀྱིས་ཉེ་བར་གླུ་ལེན་པར་བྱེད་ཅིང་། སེང་གེའི་
ཁྲི་ལ་ཉེ་བར་གནས་པ་ལ་རྔ་ཡབ་དཀར་པོ་ཉེ་བར་གཡོབ་པར་བྱེད་པ་དང་། མགོ་བོ་ལ་མེ་ཏོག་གི་མཆོག་རྣམས་དང་ལྡན་པའི་རྗེས་སུ་སྤྱོད་པ་གཞན་རྣམས་ཀྱིས་མངོན་པར་སྟོད་པར་བྱེད་པར་གྱུར་པས་རྒྱལ་བར་གྱུར་ཅིག་རྒྱལ་བར་གྱུར་ཅིག་ཅེས་ཀུན་ནས་དགའ་བ་འཕེལ་བར་བྱེད་པ་
རྣམས་ཀྱིས་མངོན་པར་བསྟོད་པར་གྱུར་པ་ན། བརྒྱ་བྱིན་ལ་རབ་ཏུ་འགྲན་པར་བྱེད་པའི་རྒྱལ་པོ་བརྒྱ་སྟོང་སྤྲུལ་པར་བྱེད་དོ། །གཞན་ལ་ཕན་པ་ལ་རབ་ཏུ་ཞུགས་པར་གྱུར་པའི་འཐབ་བྲལ་གྱི་མངའ་བདག་དེས་རང་བཞིན་པའི་ལྷ་རྣམས་ལ་གོ་བར་བྱ་བའི་དོན་དུ་འཁོར་ལོས་སྒྱུར་བ་བརྒྱ་ཕྲག་ལ་
འགྲན་པར་བྱེད་པའི་རྒྱལ་པོ་བརྒྱ་ཕྲག་སྟོང་ཡང་ཡོངས་སུ་སྤྲུལ་པར་བྱེད་དོ། །གཞན་ཡང་གཞན་ལ་ཕན་པ་རྣམས་ལ་ཞུགས་པས་རྫུ་འཕྲུལ་གཞན་བྱེད་པ་ནི། མུ་སུ་ལུན་དྷ་དེས་རང་གི་ལུས་རྣམས་ལ་སྤྲུལ་པར་བྱེད་པ་རྣམས་ལ་དཔག་ཚད་བརྒྱ་པའི་པད་མ་དེ་དག་
རྣམས་ནི་བརྒྱ་སྟོང་བྱེ་བའི་འདབ་མ་དང་ལྡན་པ། རིན་པོ་ཆེ་བདུན་གྱི་རང་བཞིན་གྱིས་རྣམ་པར་བཀྲ་བའི་འདབ་མ་རྣམས་ལ་ལྷའི་བུང་བ་རྣམས་གླུ་ཉེ་བར་ལེན་པར་གྱུར་པའི་སྒྲ་རྣམས་ཀུན་དུ་བརྗོད་པ། དགའ་བར་གྱུར་ཅིང་མཉན་པར་འོས་པ་མཐོང་ན་ཆེས་དགའ་བར་གྱུར་
པ་ལྷ་རྣམས་ཀྱི་པད་མ་ཆེན་པོ་དེའི་སྒྲ་དག་ནི་དཔག་ཚད་ལྔ་བརྒྱར་འགྲོ་བ་ཡིན་ནོ། །ཡུ་བ་རྣམས་སྤྲུལ་པར་བྱེད་པ་ནི་བཻ་ཌཱུརྱའི་རང་བཞིན་རྡོ་རྗེས་ལེགས་པར་གནས་པ། ཨིན་དྲ་ནཱི་ལའི་རིན་པོ་ཆེ་དང་ལྡན་པ་མཛེས་པས་འཇའ་ཚོན་རྣམས་པས་ཀྱང་ཆེས་ལྷག་པར་དགའ་
བ་ཡིན་ནོ། །པད་མ་ཆེན་པོ་དེའི་ནང་དུ་ཞུགས་པ་ན་མིའི་རྒྱན་དང་ཆ་བྱད་སྣ་ཚོགས་པས། རྣམ་པ་དུ་མར་བརྒྱན་པའི་ལུས་མཆོག་ཏུ་སྐྱིད་པ་རྣམས་ཐོང་གཤོལ་གྱིས་ཞིང་ལས་ཀྱང་བྱེད་ཅིང་། ཞིང་གི་རྣང་ལ་ཚིགས་སུ་བཅད་པའི་དབྱངས་བརྗོད་པ། ཇི་ལྟར། འབྲས་འདོད་

མི་རྣམས་ཐམས་ཅད་ཀྱིས། །ས་གཞི་འདི་ལ་ཞིང་ལས་བྱེད། །འདོད་ལ་ཆགས་པའི་མཁས་མིན་རྣམས། །འཆི་བ་ལེགས་པར་མཐོང་བ་མིན། །སྐད་ཅིག་སྐད་ཅིག་ལ་འགྲིབ་པ། །སྐྱེ་བོ་འདོད་པའི་བསམ་པས་རྨོངས། །སྐད་ཅིག་སྐད་ཅིག་ལ་
ཟད་པའི། །འདུ་བྱེད་གོ་བ་ཡང་མ་ཡིན། །མི་རྣམས་ལང་ཚོ་མཐར་བྱེད་པའི། །རྒས་པའི་དབྱུག་པ་འདི་འབྱུང་ངོ་། །ནད་མེད་ལོ་ཐོག་འཇོམས་པ་ཡི། །ནད་ཀྱི་དབྱུག་པ་འདི་འབྱུང་ངོ་། །འཇིགས་པའི་དབྱུག་པ་འདི་གསུམ་གྱིས། །ལྷར་བཅས་ལྷ་མིན་འཇོམས་བྱེད་པ། །
བྱིས་པའི་འཇིག་རྟེན་བླུན་པོ་འདིས། །འོང་བ་མཐོང་བ་ཡང་མ་ཡིན། །ལྷ་དང་ལྷ་མིན་དྲི་ཟ་དང་། །ཤ་ཟ་ཀླུ་དང་སྲིན་པོ་ལའང་། །གསོན་པ་མཐར་ནི་བྱེད་པའི་མཆོག །དུས་ཀྱི་དབྱུག་པ་འདི་འབྱུང་འགྱུར། །སྐྱེ་བོ་གཞན་ཡང་རབ་བཅོམ་ནས། །རང་གི་སྐྱེ་ལ་ཆགས་ཤིང་
འཆུམས། །སྲིད་གཞན་འགྲོ་བས་སྐྱེ་གཏོང་ཡང་། །རྨོངས་པས་བཅིངས་པའི་སྐྱེ་བོ་རྣམས། །བུ་དང་ཚ་བོ་ཡང་ཚ་དང་། །མི་གང་དེ་ཡི་རིགས་གནས་པ། །དེ་དག་ཐམས་ཅད་མེད་གྱུར་ཀྱང་། །ཁྱོད་ནི་ཆགས་པས་འཆིང་བར་བྱེད། །དེ་ལྟར་སྤྲུལ་པ་དེ་དག་གིས་གཞན་
ལ་ཕན་པ་བསྒྲུབ་པའི་ཕྱིར་དོན་དུ་ཚིགས་སུ་བཅད་པ་བརྗོད་པ་ཡིན་ནོ། །རང་བཞིན་གྱི་ལྷ་རྣམས་ཀྱིས་ཀྱང་ཐོས་ཤིང་ཐོས་པར་གྱུར་ནས་ཀྱང་ཡིད་ཀྱིས་འཐུན་པར་བྱེད་དོ། །ཡུལ་རྣམས་ལ་ཡང་ཤིན་ཏུ་བག་མེད་པར་ཡང་མི་འགྱུར་རོ། །དེ་ནས་གཞན་ཡང་རྫུ་འཕྲུལ་གཞན་
ཤིན་ཏུ་དཀའ་བ་རྣམས་གཞན་ལ་ཕན་པ་ལ་རབ་ཏུ་ཞུགས་པའི་འཐབ་བྲལ་གྱི་མངའ་བདག་དེས་སྤྲུལ་པར་བྱེད་པ་རྣམས་ནི་འདི་ལྟ་སྟེ། ཡན་ལག་དང་ཉིང་ལག་རྣམས་ཐམས་ཅད་ལས་རྒྱན་དང་ཆ་བྱད་སྣ་ཚོགས་པ་དང་། རྣམ་པ་སྣ་ཚོགས་པའི་དབུ་རྒྱན་གྱིས་བརྒྱན་པ་རྣམས་ནི་ཁ་
ཅིག་ཡིན་ནོ། །ཁ་ཅིག་ནི་ཁ་དོག་དུ་མ་རྣམས་དང་དབྱིབས་དུ་མ་རྣམས་དང་འགྲོ་བ་དུ་མ་རྣམས་དང་ལྡན་པའི་ལྷ་དང་དྲི་ཟ་དང་མི་དང་ཀླུ་དང་ལྷ་མ་ཡིན་དང་གཞན་དག་རྣམས་ཀྱང་སྟེ། རང་གི་སྐྱེ་བ་གཉུག་མར་གནས་པར་གྱུར་པའི་རྒྱན་དང་ཆ་བྱད་ཅན་རྣམས་ཀུན་དུ་འབྱུང་སྟེ། འཐབ་

བྲལ་གྱི་མངའ་བདག་དེའི་བ་སྤུའི་ཁུང་བུ་རྣམས་ཐམས་ཅད་ལས་དང་། ལུས་ཀྱི་མཐའ་རྣམས་མ་ལུས་པ་ནས་འབྱུང་བ་ནི་ཇི་ལྟར་རྗེས་སུ་འཐུན་པ་དང་གནས་སྐབས་ཇི་ལྟ་བ་དང་། དེ་དག་གི་རིགས་རྣམས་དང་རྗེས་སུ་སྤྱོད་པ་རྣམས་ཇི་ལྟ་བའི་འཁོར་གྱིས་གླུ་ལེན་པར་བྱེད་པ་དང་
གར་བྱེད་པ་དང་དགོད་པར་བྱེད་པ་ཡིན་ནོ། །མི་རྣམས་ནི་མི་རྣམས་དང་རྗེས་སུ་འཚམ་པར་གྱུར་པའི་ལོངས་སྤྱོད་མཆོག་ཏུ་ཡིད་འཕྲོག་པར་བྱེད་པ་རྣམས་དང་། ཡང་དག་པར་ལྡན་པས་གར་བྱེད་པ་དང་དགོད་པར་བྱེད་པས་ཀྱང་མི་རྣམས་ཀྱི་རྒྱལ་པོ་བདེ་བ་རྣམས་ལ་ཉེ་བར་ལོངས་སྤྱོད་
པར་བྱེད་པ་ཡིན་ནོ། །དེ་བཞིན་དུ་རྣམ་པ་སྣ་ཚོགས་པའི་རྒྱན་དང་ཆ་བྱད་ཅན་གྱི་ཀླུ་རྣམས་ཀྱང་ཁ་ཅིག་ནི་མགོ་གཅིག་པ། ཁ་ཅིག་ནི་མགོ་གཉིས་པ། ཁ་ཅིག་ནི་མགོ་གསུམ་པ། ཁ་ཅིག་ནི་མགོ་བཞི་པ། ཁ་ཅིག་ནི་མགོ་ལྔ་པ། ཁ་ཅིག་ནི་མགོ་དྲུག་པ། ཁ་ཅིག་ནི་མགོ་བདུན་
པ་རྣམས་ཡིན་ཏེ། མདོག་དང་དབྱིབས་སྣ་ཚོགས་པའི་ཅོད་པན་བཅིངས་པའི་མགོ་བོ་རྣམས་ཡིན་ནོ། །རིན་པོ་ཆེ་སྣ་ཚོགས་པའི་འོད་ཟེར་གྱིས་མཆོག་ཏུ་གསལ་བར་བྱས་པའི་མགོ་བོ་ཅན་རྣམས་སྣ་ཚོགས་པའི་རོལ་མོའི་སྒྲ་དང་། གླུ་དང་། དགོད་པ་དང་། འགྱིང་བ་དང་། རྩེ་དགའ་
བས་རྗེས་སུ་ཆགས་པའི་ཡིད་ཀྱིས་བདེ་བ་རྣམས་ལ་ཉེ་བར་ལོངས་སྤྱོད་པར་བྱེད་དོ། །དེ་བཞིན་དུ་ལྷ་མ་ཡིན་ཡང་བརྟན་པ་ལ་སོགས་པ་སྒྲ་གཅན་འཛིན་གྱི་མཐར་ཐུག་པས་གཞིར་གཏོགས་པ་རྣམས་སྤྲུལ་པར་བྱེད་དོ། །འཐབ་བྲལ་གྱི་བདག་པོ་དེས་བསྐལ་པ་གཞན་གྱི་བརྒྱ་བྱིན་
གྱི་རྩ་ལག་ལྷན་ཅིག་རྗེས་སུ་སྤྱོད་པ་རྣམས་ཀྱི་རྗེས་སུ་འབྲང་བར་གྱུར་པ། མཆོག་ཏུ་གཟུགས་དང་རྒྱན་དང་ཆ་བྱད་དང་རབ་ཏུ་དང་བའི་ལྷ་མ་ཡིན་གྱི་བུ་མོས་རྗེས་སུ་འབྲང་བར་གྱུར་པས། རྔ་སྐད་ཡན་ལག་ལྔ་པ་རྣམས་ཐོས་ནས་དགའ་བར་འགྱུར་བས་ཡིད་ཆེས་སུ་འབྲེལ་བས་
མཆོག་ཏུ་སྐྱིད་པ་རྣམས་དང་། ལྷ་མ་ཡིན་གྱི་མངའ་བདག་རྣམས་ཀྱང་ཁང་བུ་ན་ལེགས་པར་གནས་ནས་མུ་སུ་ལུན་དྷའི་ལུས་དང་ཁ་ནས་ཀུན་ཏུ་འབྱུང་སྟེ། སྤྲུལ་པ་རྣམས་ཐམས་ཅད་ཀྱང་རྩེ་བར་བྱེད་བཞིན་པས་མཆོག་ཏུ་ཡང་དཔེ་མེད་པའི་བདེ་བ་རྣམས་ལ་ཉེ་བར་ལོངས་

སྤྱོད་པར་བྱེད་དོ། །དེ་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱང་སྤྲུལ་པར་བྱེད་དེ། སྤྲིན་དང་འདྲེས་པ་ལ་སོགས་པའི་རི་ཆེན་པོ་བཅུ་ལ་སོ་སོར་གནས་པ་རྣམས། སུམ་ཅུ་རྩ་གསུམ་པའི་ལྷ་རྣམས་ལས་ཉེ་བར་ལོངས་སྤྱོད་པར་བྱ་བ་རྣམས་ཅུང་ཟད་
ཀྱིས་ཆུང་བར་གྱུར་པའི་ནགས་དང་ཉེ་བའི་ནགས་དང་། རྫིང་བུ་དང་། པད་མའི་ཚལ་རྣམས་དང་། རྣམ་པ་སྣ་ཚོགས་པའི་བཟའ་བའི་ཀླུང་དང་བཏུང་བ་རྣམས་དང་། རྣམ་པ་སྣ་ཚོགས་པའི་བདེ་བ་རྣམ་པ་དུ་མ་རྣམས་ཉམས་སུ་མྱོང་བར་གྱུར་པས་རྩེ་བར་བྱེད་པ་དང་། གར་བྱེད་པ་
རྣམས་ཀྱང་མུ་སུ་ལུན་དྷའི་ལུས་པོ་ཉིད་ལས་ཀུན་དུ་འབྱུང་ངོ་། །དེ་བཞིན་དུ་བ་ལང་སྤྱོད་པ་རྣམས་ཀྱི་མི་རྣམས་ཀྱང་རང་གི་བདེ་བ་དག་དང་ཡང་དག་པར་ལྡན་པར་གྱུར་པས་མཆོག་གི་རབ་ཏུ་དགའ་བའི་ཡིད་ཀྱིས་གར་བྱེད་པར་གྱུར་པ་དང་། གླུ་ལེན་པར་གྱུར་པ་དང་དགོད་པར་གྱུར་པས་
མུ་སུ་ལུན་དྷའི་ལུས་ཉིད་ལས་ཀུན་དུ་འབྱུང་ངོ་། །དེ་བཞིན་དུ་ཤར་ཕྱོགས་ལུས་འཕགས་པའི་མི་རྣམས་ཀྱི་རང་གི་བདེ་བ་དང་ཡང་དག་པར་ལྡན་པ་དང་། རབ་ཀྱི་མཆོག་ཏུ་རངས་པའི་ཡིད་ཀྱིས་རྩེ་བར་གྱུར་པ་རྣམས་ཀྱང་རང་བཞིན་གྱི་ལྷ་རྣམས་ཀྱིས་མཐོང་ངོ་། །ཆོ་འཕྲུལ་གྱི་མཆོག་
རྣམས་དང་ཡང་དག་པར་ལྡན་པར་གྱུར་པའི་འཐབ་བྲལ་བ་རྣམས་ཀྱི་བདག་པོ་དེས། དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མས་བག་མེད་པ་རྣམས་ཀུན་ནས་ཞི་བར་བྱ་བའི་དོན་དང་། གཞན་རྣམས་ལ་ཕན་པར་བྱ་བའི་དོན་དུ་ཡང་སྤྲུལ་པ་དེ་དག་རྣམས་བྱེད་དོ། །བག་མེད་
པས་རྣམ་པར་རྒྱུ་བར་བྱེད་པའི་ལྷ་དེ་དག་རྣམས་ཇི་ལྟར་ན་མི་རྟག་པ་མངོན་སུམ་དུ་གྱུར་པས་སེམས་ཀྱི་རྒྱུད་འཇམ་པོར་འགྱུར་བ་ཡིན་ཞེས། རྒྱུ་འདིའི་ཕྱིར་ན་ཕུན་སུམ་ཚོགས་པ་རྣམས་སྟོན་པར་བྱེད་དེ། འདོད་པ་རྣམས་ཀྱི་ཀུན་ནས་རོ་མྱང་བའི་དོན་དང་ཕྱི་ནས་ནི་ཉེས་དམིགས་
རྣམས་བསྟན་པར་བྱའོ། །རྣམ་པ་ཇི་སྲིད་ཀྱིས་འདོད་པ་རྣམས་ལས་ངེས་པར་འབྱུང་བ་ཡིན་པའི་རྒྱུ་འདི་དག་གིས་ལྷ་རྣམས་སྤྲུལ་པ་བྱས་སོ། །དེ་ལ་ཀུན་ནས་རོ་མྱང་བར་གྱུར་པ་རྣམས་ནི་ཇི་ལྟར་ཐོས་པར་གྱུར་པ་བཞིན་དུ་རྣམ་པ་སྣ་ཚོགས་པའི་འདོད་པའི་ལོངས་སྤྱོད་པ་

རྣམས་ཀྱི་གར་དང་། དགོད་པ་དང་། འགྱིང་བག་དང་། གླུ་དང་། གོས་རྣམས་དང་ཉེ་བར་ལོངས་སྤྱོད་པར་བྱ་བའི་བཟའ་བ་དང་། བཏུང་བ་རྣམས་མིད་པར་བྱེད་པ་དང་། བུད་མེད་རྣམས་ཀྱིས་ཡོངས་སུ་བསྙེན་བཀུར་བ་དང་འཁྱུད་འཕྱང་བྱེད་པ་རྣམས་ཏེ། དབང་པོ་ལྔ་ཀའི་ཉེ་བར་ལོངས་
སྤྱོད་པ་རྣམས་ཐམས་ཅད་ཇི་ལྟར་འདོད་པ་བཞིན་དུ་མངོན་པར་ཆགས་པ་ཕུན་སུམ་ཚོགས་པ་འདི་ནི་འདོད་པ་རྣམས་ཀྱི་རོ་མྱོང་བ་ཞེས་བརྗོད་དོ། །དེ་ལ་ཉེས་དམིགས་རྣམས་གང་དག་ཞེ་ན། ཐོབ་པར་གྱུར་པའི་འདོད་པ་གང་དག་ཡིན་པ་རྣམས་མངོན་པར་འཆུམས་པ་སྔོན་དུ་འགྲོ་
བས་དོན་དུ་གཉེར་བར་བྱེད་པ་ན་ཉམས་པར་འགྱུར་བ་དང་། ཐུན་མོང་བ་རྣམས་ཀྱིས་དབང་བྱས་ནས་རླག་པར་གྱུར་པའི་བྲལ་བས་བསྐྱེད་པའི་སྡུག་བསྔལ་རྣམ་པ་དུ་མ་རྣམས་དང་། གཞན་དག་གིས་ཕྲོགས་པར་གྱུར་པའམ། རྫས་དང་ལྡན་པ་ལས་འཇིག་པ་ལྔས་ངེས་
པར་འཇོམས་པ་རྣམས་ཀྱང་འདི་ལྟ་སྟེ། རྒྱལ་པོ་དང་ཆུ་དང་ཆོམ་རྐུན་པ་དང་མེ་ལ་སོགས་པ་རྣམས་སོ། །སྡུག་བསྔལ་གཞན་དག་རྣམས་ཀྱི་ཡང་གཞི་པོར་འགྱུར་བ་ཡིན་ཏེ། རྟག་ཏུ་ཡང་དགྲ་རྣམས་ཀྱིས་མངོན་པར་འཚེ་བར་འགྱུར་བ་དང་། རླག་གིས་དོགས་པ་བསྲུང་
བའི་འཇིགས་པ་རྒྱུན་མི་འཆད་པ་རྣམས་ཀྱིས་འཇིགས་པར་ཡང་འགྱུར་རོ། །མངོན་པར་ཞེན་པ་སྔོན་དུ་སོང་བས་གང་དག་གི་ཡིད་ཀྱང་མྱ་ངན་གྱིས་རྟག་ཏུ་གཟེར་ཟུག་དང་ལྡན་པར་འགྱུར་རོ། །དེ་ནི་ལུས་དང་ཡིད་ཀྱི་འདོད་པའི་ཉེས་དམིགས་རྣམས་ཡིན་ནོ། །འདོད་པ་རྣམས་ཀྱི་
ཉེས་དམིགས་དེས་ནི་འཆི་བའི་མཐར་ཐུག་པ་ན་ཡང་བྱིས་པ་བློ་དམན་པ་རྣམས་ལ་ཡི་མུག་པས་བསྐྱེད་པའི་སྡུག་བསྔལ་བ་རྣམ་པ་དུ་མ་རྣམས་སྐྱེ་བར་བྱེད་དེ། ཟུག་གཟེར་འདི་དག་རྣམས་ཀྱང་འདོད་པ་རྣམས་ཀྱི་ཉེས་དམིགས་ཡིན་ལ། གཞན་ཡང་འདོད་པ་རྣམས་ཀྱི་ཉེས་
དམིགས་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ་དེས་མ་དང་བུ་དག་ཀྱང་ལྷན་ཅིག་ཏུ་འཐབ་ཅིང་རྩོད་པར་བྱེད་དོ། །དཀའ་བླས་ཀྱིས་འཚོ་བར་འགྱུར་རོ། །འདོད་པ་དེའི་རྒྱུས་གང་དག་ལ་སྤུན་དང་སྤུན་རྣམས་ལྷན་ཅིག་ཏུ་འཐབ་རྩོད་བྱེད་དོ། །གསོད་པ་དང་

འཆིང་བ་རྣམས་ཀྱང་ཕུལ་དུ་ཕྱིན་པར་བྱེད་དོ། །དེ་དག་ཀྱང་འདོད་པའི་རྒྱུ་ལས་ཡིན་ལ། འདོད་པ་རྣམས་ཀྱི་དོན་གྱིས་དེ་བཞིན་དུ་རྒྱལ་པོ་དང་རྒྱལ་པོ་ཡང་ལྷན་ཅིག་ཏུ་འཐབ་ཅིང་རྩོད་པར་བྱེད་དོ། །གཡུལ་འགྱེད་པར་བྱེད་དོ། །ཡུལ་ལྗོངས་རྣམས་
འཇོམས་པར་བྱེད་དོ། །ཕན་ཚུན་དུ་གསོད་པ་དང་འཆིང་བའི་སྡུག་བསྔལ་རྣམ་པ་སྣ་ཚོགས་པ་རྣམས་ཀྱི་རྩེ་མོར་ཕྱིན་པར་བྱེད་དོ། །དེ་ལ་དེ་དག་ཉིད་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་པས་ན། འདོད་པ་རྣམས་ཀྱི་ཉེས་དམིགས་འདི་དག་རྣམས་ཀྱང་སོ་སོར་
ཤེས་པར་བྱའོ། །གང་གི་ཕྱིར་འཁོར་བ་རྣམས་ཐམས་ཅད་ཀྱི་འཆིང་བ་ཡིན་པའི་ཕྱིར་འདོད་པ་འདི་དག་རྣམས་བྱེ་བྲག་ཏུ་རྟོགས་པར་བྱ་བ་ཡིན་ནོ། །དེ་ལ་རྒྱུ་འདི་དག་གིས་ནི་འཐབ་བྲལ་བ་རྣམས་ཀྱི་བདག་པོ་དེས་ལྷ་དེ་དག་རྣམས་ལ་རྣམ་པ་དུ་མ་དང་། རྣམ་པར་རྟོག་པ་
དུ་མས་ཀྱང་རྫུ་འཕྲུལ་དེ་དག་རྣམས་བྱས་སོ། །དེ་ལྟ་བུ་དག་ནི་མི་རྣམས་ཀྱི་འདོད་པའི་ཉེས་དམིགས་རྣམས་ཡིན་ཏེ། གང་གཞན་དག་རྣམས་ལྟ་ཕར་ཞོག་གི་རྒྱལ་པོ་ཡང་རྣམ་པ་དུ་མ་དང་བཅས་པའི་ཐབས་རྣམས་བྱེད་དོ། །གང་ཡང་མི་གཞན་དག་འདོད་པའི་དོན་
དུ་རྒྱ་མཚོར་འཇུག་པར་བྱེད་པ་དང་། འཁྲུག་པ་ལ་ལྷན་ཅིག་ཏུ་འཇུག་པར་བྱེད་པ་དང་། འཆིང་བ་དང་མྱ་ངན་དང་། ངལ་དུབ་དང་སེམས་ཁྲལ་དང་། འཐབ་རྩོད་དང་འཇིག་པ་ལ་སོགས་པའི་དོན་མེད་པ་རྣམས་ཀུན་བཟོད་པར་བྱེད་དོ། །དེ་དག་རྣམས་ཐམས་ཅད་ཀྱང་འདོད་པའི་
དོན་དུ་ཡིན་ལ། དེ་ལྟར་མི་རྣམས་ཐམས་ཅད་འདོད་པ་རྣམས་ཀྱི་དོན་དུ་ཉེས་དམིགས་རྣམས་ཀུན་ནས་བཟོད་པར་བྱེད་དོ། །ཇི་ལྟར་ན་ཡང་ལྷ་རྣམས་འདོད་པའི་དོན་དུ་ཉེས་དམིགས་རྣམས་ཀུན་ཀྱང་བཟོད་པར་བྱེད་པ་ཡིན་ན་འདི་ལྟ་སྟེ། གང་དག་ལྷ་མ་ཡིན་རྣམས་དང་ལྷན་
ཅིག་ཏུ་གཡུལ་འགྱེད་པར་བྱེད་པ་དང་། རྩོད་པར་བྱེད་པ་དང་དེ་དག་གི་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །དེ་བཞིན་དུ་ལྷ་མ་ཡིན་རྣམས་ཀྱང་ལྷ་རྣམས་དང་ལྷན་ཅིག་ཏུ་རྩོད་པར་བྱེད་པ་དང་། གཡུལ་འགྱེད་པར་བྱེད་པ་གང་ཡིན་པ་འདི་དག་ཡང་འདོད་

པ་རྣམས་ཀྱི་ཉེས་དམིགས་ཡིན་ནོ། །དངོས་པོ་རྣམས་ཁོ་ནའི་རྒྱགས་པ་གང་ཡིན་པ་དེ་དག་རྣམས་ནི་འདོད་པ་རྣམས་ཀྱི་ཉེས་དམིགས་ཡིན་ནོ། །དེ་ལ་རྒྱུ་འདི་རྣམས་ཀྱིས་ཀྱང་སྤྲུལ་པ་རྣམས་བྱས་སོ། །གང་ཡང་ཀླུ་རྣམས་ཀླུ་རྣམས་དང་ལྷན་ཅིག་གཡུལ་འགྱེད་པར་བྱེད་ཅིང་ཡུལ་
གཞན་དག་རྣམས་ཀྱང་འཇིག་པར་བྱེད་པ་དང་། གློག་དང་ཐོག་ལ་སོགས་པ་ཡང་གཏོང་བར་བྱེད་པ་གང་ཡིན་པ་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །ཡང་གང་དག་དུད་འགྲོ་རྣམས་ཀྱང་ཕན་ཚུན་དུ་ཟ་བར་བྱེད་པ་དང་། གསོད་པ་དང་འཆིང་བ་ལ་སོགས་
པར་བྱེད་པ་རྣམས་དང་། འཐབ་པར་ཡང་བྱེད་པ་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ཏེ། འདི་ཡང་འདོད་པའི་ཉེས་དམིགས་ཡིན་ནོ། །དེ་བཞིན་དུ་ཡི་དགས་རྣམས་ཀྱང་ཟས་ཀྱི་རྒྱུ་མཚན་གྱིས་སམ། འཁྲིག་པའི་རྒྱུ་མཚན་གྱིས་ཀྱང་ཕན་ཚུན་དུ་རལ་
གྲིས་གཅོད་པར་བྱེད་པ་དང་། དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །གང་ཡང་འདོད་པ་རྣམས་ཀྱིས་ཉེས་དམིགས་དེ་དག་རྣམས་ཡིན་པའི་རྒྱུ་མཚན་འདི་དག་གིས་ནི་འཐབ་བྲལ་གྱི་མངའ་བདག་དེས་བག་མེད་པ་དང་བྲལ་བར་བྱ་བའི་དོན་དུ་ལྷ་རྣམས་ལ་
སྤྲུལ་པར་བྱེད་དོ། །དེ་བཞིན་དུ་དམྱལ་བ་རྣམས་ཀྱང་ཕན་ཚུན་དུ་མངོན་པར་འཇོམས་པར་བྱེད་དེ། ཉེས་པར་བྱེད་པའི་ལས་རྣམས་ཀྱིས་སྐྱེས་པ་གཞན་རྣམས་སུ་གང་དག་དང་ཞེ་འགྲས་པར་གྱུར་པ་དེ་དག་རྣམས་རྗེས་སུ་དྲན་པར་འགྱུར་ལ། རྗེས་སུ་དྲན་ནས་ཀྱང་འཁོན་དེ་
དག་རྣམས་ནི་རལ་གྲི་རྣམས་ཀྱིས་ཕན་ཚུན་དུ་ལས་བྱེད་པར་འགྱུར་བ་ཁོ་ན་ཉེ་བར་གནས་པས་བདག་ཉིད་དང་གཞན་དག་རྣམས་ཀྱང་གཤོག་པར་བྱེད་དོ། །དེ་ལྟར་ཡང་དམྱལ་བ་རྣམས་ཀྱི་འདོད་པ་རྣམས་ཀྱི་ཉེས་དམིགས་ཡིན་ནོ། །དེ་ལ་རྒྱུ་མཚན་འདི་དག་གིས་ཀྱང་འདོད་
པ་རྣམས་ཡོངས་སུ་སྤོང་བའི་རྒྱུར་འཐབ་བྲལ་བ་རྣམས་ཀྱི་མངའ་བདག་དེ་སྤྲུལ་པ་གཞན་རྣམས་བྱེད་པ་ཡིན་ནོ། །འགྲོ་བ་ལྔ་པོ་འདི་དག་རྣམས་ཐམས་ཅད་ན་ནི་འདོད་པ་རྣམས་ཀྱི་ཉེས་དམིགས་ཡོད་པ་ཡིན་ནོ། །གང་ཡང་འཁོར་བ་ལས་ཁ་ཕྱིར་ཕྱོགས་པར་གྱུར་པ་དེ་དག་རྣམས་

ཐམས་ཅད་ནི་གནས་སྐབས་ཐམས་ཅད་དུ་འདོད་པ་རྣམས་ལས་ངེས་པར་འབྱུང་བར་སྟོན་པར་བྱེད་པ་དང་འཆད་པར་ཡང་བྱེད་དོ། །དེ་ལ་འཐབ་བྲལ་གྱི་བདག་པོ་དེས་འདོད་པ་རྣམས་ཀྱི་རོ་མྱང་བ་རྣམས་བསྟན་པ་ཡིན་ཞིང་། ཉེས་དམིགས་རྣམས་ཀྱང་
པད་མའི་འདབ་མ་བརྒྱ་པོ་དང་ལྷ་རྣམས་རབ་ཏུ་ལྷུང་བར་གྱུར་པ་རང་བཞིན་པའི་ལྷ་རྣམས་ལ་ཅུང་ཟད་ཅིག་བསྟན་པ་ཡིན་ནོ། །རྒྱས་པར་ཡང་ལྷ་དང་མི་རྣམས་ཀྱི་ཉེས་དམིགས་གཞན་དག་ཀྱང་བདག་གིས་བསྟན་པར་བྱ་ཡིས། ཉེས་དམིགས་རྣམས་ལེགས་པར་བསྟན་
ནས་ངེས་པར་འབྱུང་བ་ཡང་བདག་གིས་བཤད་པར་བྱ་སྟེ། ཐར་པའི་ས་བོན་གྱི་རྒྱུར་གྱུར་པ་རང་བཞིན་གྱི་ལྷ་རྣམས་ལ་ཕན་པའི་དོན་དུ་དང་བདེ་བའི་དོན་དུའོ། །གཞན་ཡང་ལྷ་དེ་དག་རྣམས་ལ་ཕན་པའི་དོན་དུ་མུ་སུ་ལུན་དྷ་དེས་འདོད་པ་རྣམས་ཀྱི་ཉེས་དམིགས་རྣམས་མངོན་
སུམ་དུ་བྱེད་དེ། འདོད་པ་རྣམས་ཀྱི་ཉེས་དམིགས་རྣམས་གཞན་རྣམས་སུ་མཐོང་བར་གྱུར་པ་དང་། གཞན་དུ་ཡང་ཐོས་པར་གྱུར་པའི་རྒྱུ་མཚན་གྱིས་ཀྱང་འཁོར་བ་ལ་ཡིད་འབྱུང་བར་འགྱུར་བ་ཡིན་ནོ། །དེ་ལ་རྒྱུ་མཚན་འདིས་ལྷ་དེ་དག་རྣམས་ལ་འདོད་པ་རྣམས་ཀྱི་ཉེས་དམིགས་
རྣམས་སོ་སོར་སྤྲུལ་པར་བྱེད་དོ། །དེ་ནས་ལྷ་དེ་དག་དང་ལྷ་མ་ཡིན་དང་ཀླུ་རྣམས་ཀྱི་འདོད་པ་རྣམས་ལ་རོ་མྱོང་བར་བྱེད་པ་དེ་དག་རྣམས་བསྟན་ནས་ཉེས་དམིགས་ཀུན་དུ་སྟོན་པར་བྱེད་དེ། ལྷ་དང་། མི་དང་། ཀླུ་དང་། ལྷ་མ་ཡིན་དེ་དག་རྣམས་ཉིད་ཀྱང་དུས་རྣམས་མདོར་བསྡུ་བ་ཇི་ལྟ་བ་
བཞིན་དུ་ཡིན་པས་སོ། །དེ་ལ་ལྷ་རྣམས་ནི་རྣམ་པ་སྣ་ཚོགས་པའི་འདོད་པ་རྣམ་པ་དུ་མ་རྣམས་ལ་ལོངས་སྤྱོད་ནས། འཆི་འཕོ་བའི་དུས་བྱུང་བར་གྱུར་པ་ན་དེ་དག་རྣམས་ཇི་ལྟར་ཡིན་པ་དེ་བཞིན་དུ་སྟོན་པར་བྱེད་དེ། རྣམ་པ་དུ་མ་སྣ་ཚོགས་པའི་ཚུལ་གྱིས་འཆི་འཕོ་བར་འགྱུར་བ་རྣམས་
ལ་འདི་ལྟ་སྟེ། རིའི་དྲུང་དག་ནས་རྣམ་པ་དུ་མར་གྱུར་པ་བྱི་ལ་དང་། གུང་དང་། གཟིག་དང་། སེར་བ་ཅག་ཅག་དང་། ཅེ་སྤྱང་དང་། རི་བོང་དང་། སེང་གེ་དང་། ཕག་པ་དང་། ཀླུ་དང་། དོམ་དང་། སྟག་དང་། སྲིན་བྱ་དང་། རྟ་དང་། སྟོ་མ་ར་དང་། གླང་པོ་དང་། ཁྭ་ཏ་དང་། སུ་སུ་ཀ་དང་།

ཆུ་སྲིན་དང་། རུས་སྦལ་དང་། རྔ་མོ་རྣམས་ཀྱི་གདོང་གཅིག་པ་དང་། གདོང་གཉིས་པ་དང་། གདོང་གསུམ་པ་དང་། གདོང་མང་པོར་གྱུར་པ་དེ་དག་རྣམས། ཁ་ཅིག་གི་ལག་ན་ནི་ཐལ་བ་དང་སོལ་མེ་ཐོགས་པའོ། །ཁ་ཅིག་གི་ནི་ཐམས་ཅད་རབ་ཏུ་འབར་བར་གྱུར་པའོ། །ཁ་ཅིག་
གིས་ནི་མེའི་ཆར་འབེབས་པར་བྱེད་པ་དང་། རྡོ་རྗེ་དང་བཅས་པའི་རལ་གྲི་ཀུན་ནས་འཕེན་པར་བྱེད་དོ། །ཐོན་ཀོར་ཀུན་ནས་འཇིགས་སུ་རུང་བའི་སྒྲ་མང་པོ་རྣམས་མངོན་པར་འདོན་པར་གྱུར་པ་ནི་རི་དང་ཐོག་འབབ་པ་དང་མཚུངས་པའི་འཇིགས་པ་ཆེན་པོ་རྣམ་པ་དུ་མ་རྣམས་ཡིན་
ཏེ། ཆར་འབྱུང་བའི་སྤྲིན་མཐིང་ནག་དང་མདོག་འདྲ་བར་འཇིགས་པ་ཆེན་པོར་གྱུར་པའི་གཟུགས་དང་ལྡན་པ་དེའི་མགོ་བོ་ནི་རི་དང་མཉམ་པར་སྐྲ་རྣམས་དང་། ལུས་རབ་ཏུ་འབར་བར་གྱུར་པ་བརྒྱ་ཕྲག་མང་པོ་རྣམས་དང་། དེ་བཞིན་དུ་སྟོང་ཕྲག་མང་པོ་རྣམས་ཀྱིས་ཀུན་ནས་
བསྐོར་ནས་ལག་ན་ཞགས་པ་ཐོགས་པ་དང་། རལ་གྲི་དང་། མདུང་དང་། རྡོ་རྗེ་དང་། རྫོགས་ལག་ན་ཐོགས་པ། འཇིགས་བྱེད་ཆེན་པོའི་གཟུགས་སུ་སྟོན་པར་བྱེད་པ་རྣམས་རི་དེ་དག་གི་ཁྲོད་རྣམས་ནས་བྱུང་བ་ནས་ངེས་པར་འོང་བར་བྱེད་དོ། །གང་ན་སྤྲུལ་པའི་ལྷ་དེ་དག་རྣམས་
ཡོད་པ་དེར་ཉེ་བར་རྒྱུག་པར་བྱེད་དོ། །ཁྲོས་པས་བཞིན་དམར་པོ་རྣམ་པར་རོལ་བ་ཉེ་བར་སྒྱུར་བར་བྱེད་པས་སྔོན་པོ་དང་སེར་པོ་དང་དམར་པོ་རྣམས་ཀྱི་མདོག་གི་མེ་འབར་བ་རྣམ་པ་དུ་མར་ཆར་འབྱུང་བའི་སྤྲིན་མཐིང་ནག་གི་གསེབ་རྣམས་ལས་བཞིན་དུ་གློག་རྣམ་པར་འབྱིན་པས་
ངེས་པར་རྒྱུག་པར་བྱེད་དོ། །སྤྲུལ་པ་གཞན་རྣམས་ཁ་ཅིག་ནི་འཆི་བདག་ལྟ་བུར་གྱུར་པས་མཆོག་ཏུ་འཇིགས་སུ་རུང་བའི་གཟུགས་རྣམས་ཀྱིས་གང་ན་སྤྲུལ་པ་དེ་དག་རྣམས་ཡོད་པར་རྒྱུག་པར་བྱེད་པ་ནི་སྣ་ཚོགས་པའི་ཞགས་པ་དང་། ལག་ཆ་ཐོགས་པ་རྣམས་ལ་འདི་ལྟ་སྟེ།
ལྕགས་ཀྱི་རང་བཞིན་ལས་ལག་པ་གྱེན་དུ་རབ་ཏུ་འབར་བར་གྱུར་པ་འབྲུག་བཞིན་དུ་སྒྲ་ཀུན་ནས་སྒྲོག་པར་བྱེད་པ་ལུས་རབ་ཏུ་འབར་བར་གྱུར་པ་དཔག་ཚད་བཅུའི་ཚད་ཙམ་གྱི་གཟུགས་ཅན་རྣམས་སོ། །ཁ་ཅིག་ནི་མིག་བརྒྱ་པ་རྣམས་སོ། །ཁ་ཅིག་ནི་མིག་བཞི་བརྒྱ་པ་རྣམས་སོ། །

དེ་བཞིན་དུ་ལྔ་པ་དང་དྲུག་དང་བདུན་དང་བརྒྱད་དང་དགུ་དང་མིག་བརྒྱ་ཕྲག་བཅུ་པ་རྣམས་ཏེ། མིག་རབ་ཏུ་འབར་བར་གྱུར་པ་རྒྱང་གྲགས་ཀྱི་ཚད་ཙམ་པ་རྣམས་རབ་ཏུ་འོང་བར་བྱེད་དོ། །ཁ་དོག་སྔོན་པོ་དང་། སེར་པོ་དང་། དམར་པོ་དང་། སྔོ་སྐྱ་རྣམས་དང་དབྱིབས་
རྣམ་པ་སྣ་ཚོགས་པར་གྱུར་པ། འབྱུང་པོ་རྣམས་ཐམས་ཅད་འཇིགས་པར་བྱེད་པ། ཧཱ་ཧཱ་ཞེས་སྒྲོགས་པར་བྱེད་པས་ཀྱང་དེ་དག་ཐམས་ཅད་རིའི་རྩེ་མོ་འདུད་པའི་སྒྲ་དང་འདྲ་བར་སོ་སོར་གསུས་པ་འཕྱང་བ་དང་། གསུས་པ་གཞན་དག་རྣམས་ནི་རི་དང་མཚུངས་པར་གྱུར་པའི་
གསུས་པ་དང་། རི་དང་མཚུངས་པའི་མགོ་བོ་ཅན་རྣམས་ཡིན་ནོ། །མགོ་བོ་ཐུང་ངུ་དང་ལྡན་པ་དང་། གཞན་རྣམས་ནི་རིང་བར་རབ་ཏུ་འབར་བར་གྱུར་པའི་སྐྲ་དང་ལག་པ་རིང་པོར་གྱུར་པ་དང་། སེན་མོ་རྣམས་རབ་ཏུ་འབར་བ་དང་། དེ་བཞིན་དུ་ལུས་ལ་སྐྱེས་པའི་བ་སྤུ་རྣམས་ཀྱང་སྟེ།
ཉེ་འཁོར་ཀུན་ནས་རབ་ཏུ་འབར་བར་གྱུར་པའི་རི་དང་མཉམ་པ་རྣམས་དུས་ཀྱི་རི་ཆེན་པོ་དེ་ལས་སྤྲུལ་པ་བྱས་པ་རྣམས་ངེས་པར་འོང་བ་ཡིན་ཏེ། རྡོ་རྗེའི་ཐོག་འབབ་པར་བྱེད་པ་ཉེ་འཁོར་ཀུན་ནས་འབེབས་པར་བྱེད་པ་ཡིན་ནོ། །ཡང་རྣམ་པ་གཞན་དག་རྣམས་ཀྱིས་དེ་བཞིན་དུ་
འཆི་བདག་གི་ཕོ་ཉ་ཉེ་བར་རྒྱུག་པར་བྱེད་པ་རྣམས་ནི་ཉེ་འཁོར་རྣམས་ན་བྱ་རྒོད་དང་། ཁྭ་ཏ་དང་། ཀང་ཀ་དང་། ཅེ་སྤྱང་དང་། རྔ་མོའི་གདོང་ཅན་རྣམས་ལུས་པོ་ཁྲག་གིས་རྣམ་པར་བྱུགས་པ་དང་། གྲོག་མ་འཕུངས་པའི་ལུས་ཅན་གྱི་ལྷ་དེ་དག་རྣམས་མངོན་པར་མི་དགའ་བ་
རྣམས་ངེས་པར་ཡོད་པར་བྱེད་པ་ཡིན་ནོ། །དུས་ཀྱི་རི་ཆེན་པོ་དེ་དག་ལས་སྤྲུལ་པ་བྱས་པ་དེ་དག་རྣམས་ཐམས་ཅད་ཀྱང་གང་ན་ལྷ་སྤྲུལ་པའི་ལྷ་དེ་རྣམས་ཡོད་པར་དེར་རླུང་གི་ཤུགས་ཆེན་པོས་བཏབ་པ་བཞིན་དུ་སྤྲིན་ནག་པོ་གློག་དང་བཅས་པས་མྱུར་བར་རྒྱུག་པར་བྱེད་དོ། །དེ་
ནས་འཆི་བདག་ལྟ་བུར་བྱེད་པར་གྱུར་པ་དེ་དག་རྣམས་ཀྱིས་ལྷ་དེ་དག་རྣམས་དང་ཉེ་བར་འོངས་པར་གྱུར་ནས་སྤྲུལ་པའི་ལྷ་དེ་དག་རྣམས་མངོན་པར་འཛིན་པར་བྱེད་དོ། །དེའི་གཏིང་ལ་ཁ་ཅིག་ནི་རབ་ཏུ་འབར་བར་གྱུར་པའི་ལྕགས་ཀྱི་ཐག་པ་རྣམས་ཀྱིས་དཔུང་པ་བཅིངས་ནས་

འདྲེན་པར་བྱེད་དོ། །དེ་བཞིན་དུ་སྤྲུལ་པའི་ལྷ་གཞན་དེ་དག་རྣམས་ཀྱིས་དེ་དག་རྣམས་ཉིད་འཁྲིད་པར་གྱུར་པ་མངོན་པར་མཐོང་ནས། ཤིན་ཏུ་འཇིགས་པར་གྱུར་པས་ཕན་ཚུན་ཀུན་དུ་རྒྱུག་པར་བྱེད་དོ། །དེ་དག་རྣམས་ཀྱང་འཛིན་པར་བྱེད་དེ། འཆི་བདག་གི་ཕོ་ཉ་ནི་མགོ་
ལ་མངོན་པར་དམིགས་ནས། དེ་དག་ནམ་མཁའ་ལ་མངོན་པར་འཕགས་ཏེ་འཇིགས་པར་བྱེད་པའི་ང་རོ་དག་ཀུན་དུ་བཏོན་པས་མིག་གི་ཡུལ་ངེས་པར་འཕྱོང་བར་བྱེད་དོ། །ཁ་ཅིག་ནི་ལྷ་གཞན་མ་དེ་དག་རྣམས་ཉིད་བཟུང་ནས་ལྕགས་ཀྱི་རང་བཞིན་གྱི་རབ་ཏུ་འབར་བའི་ཐག་པ་
རྣམས་ཀྱིས་མགྲིན་པ་བཅིངས་ཤིང་ཁྱེར་ཏེ། ས་གཞིའི་གསེབ་ཏུ་རྗེས་སུ་ཐིམ་ནས་མི་མཐོང་བར་འགྲོ་བར་བྱེད་དོ། །འཆི་བདག་གི་ཕོ་ཉ་སྤྲུལ་པ་བྱས་པ་གཞན་དེ་དག་རྣམས་ཁ་ཅིག་གིས་ཀྱང་སྤྲུལ་པའི་ལྷ་རྣམས་ཁྱེར་ནས་ཆུར་སྤྱིང་བར་བྱེད་དེ། རབ་ཏུ་ཁྲོས་པར་གྱུར་པས་
ནང་དུ་ནུབ་པར་གྱུར་ཏོ། །དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མ་རྣམས་སུ་སྤྲུལ་པ་དེ་དག་རྣམས་ནི་འཇིགས་པ་ཆེན་པོར་གྱུར་པ་རྣམས་ཡིན་ནོ། །རང་བཞིན་གྱི་ལྷ་དེ་དག་རྣམས་ཀྱིས་ཀྱང་དེ་དག་རྣམས་ཐམས་ཅད་རྨི་ལམ་གྱི་སྣང་བ་བཞིན་དུ་མཐོང་བར་གྱུར་ཏེ། འདི་དང་འདི་
དག་རྣམས་ནི་ཅི་ཡིན་ཞེས་གོ་བར་འགྱུར་བ་ཡིན་ནོ། །དེ་ནས་དེ་དག་གང་གི་ཚེ་སྤྲུལ་པར་གྱུར་པའི་ལྷ་རྣམས་ལ་དམིགས་པ་ན་དེའི་ཚེ། སྤྲུལ་པའི་སྐྱེས་བུ་དེ་དག་རྣམས་ཀྱིས་རྗེས་སུ་གདམས་པར་བྱེད་པའི་ཚིགས་སུ་བཅད་པ་བརྗོད་པ་རྣམས་ནི། ཇི་ལྟར། ལོངས་སྤྱོད་རྒྱགས་
པས་རྒྱགས་པ་ཡི། །བག་མེད་དབང་གིས་འཇུག་པ་རྣམས། །རྨོངས་པ་རྣམས་ཀྱི་དུས་སོང་ནས། །འཆི་བདག་དུས་སུ་འོངས་པ་ཡིན། །ནགས་ཀྱི་དུས་འདི་མཐའ་ཡས་པ། །དུག་གིས་གང་བ་ཇི་བཞིན་ནགས། །སྲེད་པའི་མྱུ་གུ་རྣམ་སྤངས་པ། །དགེ་བ་དོན་གཉེར་
ཀུན་ནས་སྤངས། །མཛེས་པའི་ལས་ནི་མ་བྱས་པར། །བག་མེད་པས་ཀྱང་བག་མེད་འགྱུར། །འཆི་བདག་འཇིགས་པའི་དུས་བྱུང་ན། །བློ་གྲོས་ངན་པ་ཅི་བྱར་ཡོད། །སྲེད་པའི་ཆུར་ནི་ནུབ་པ་གང་། །སྡུག་བསྔལ་ཕ་རོལ་ཏུ་ཕྱིན་མིན། །རྒ་དང་འཆི་བར་བྱིང་བ་གང་། །

བདེ་བ་དེ་དག་རྣམས་ལ་མེད། །སྐྱེས་པ་ཙམ་གྱིས་ཐམས་ཅད་ཀྱི། །རྒྱབ་ན་འཆི་བདག་ངེས་པར་གནས། །ཅི་ཡི་དོན་དུ་འཇིག་རྟེན་འདི། །བག་མེད་པས་ནི་བག་མེད་བྱེད། །ཉམས་པ་མེད་དང་རྣམ་མི་ཤེས། །རྟག་ཏུ་གླགས་གཅོད་སྟོབས་པོ་ཆེ། །འཆི་
བདག་དམག་དཔུང་ཤུགས་པོ་ཆེ། །འཇིག་རྟེན་པས་ཀྱང་གོ་བ་མིན། །རྟག་ཏུ་རྣམ་པར་འགལ་འགྱུར་དང་། །བཟློག་ཐབས་མེད་པ་ཉིད་ཀྱང་ཡིན། །སེམས་ཅན་ཐམས་ཅད་འཆི་བ་ཡང་། །བག་མེད་པས་ནི་མ་གོ་འོ། །འཆི་བདག་གིར་གྱུར་འཇིག་རྟེན་གསུམ། །ཉེ་
འཁོར་ཀུན་དུ་རྣམ་པར་དཔྱོད། །རྒ་དང་ན་དང་རྒུད་པ་ཡང་། །བྱིས་པ་རྣམས་ཀྱིས་རིག་པ་མིན། །དེ་ལྟར་སྤྲུལ་པའི་འཆི་བདག་གི་ཕོ་ཉར་གྱུར་པ་དེ་དག་གིས་སྤྲུལ་པའི་ལྷ་དེ་དག་རྣམས་ལ་རྗེས་སུ་གདམས་པར་བྱེད་པའི་ཚིགས་སུ་བཅད་པ་རྣམས་བརྗོད་ནས། ལན་བརྒྱ་
ཕྲག་རྣམས་སུ་དང་ལན་སྟོང་ཕྲག་རྣམས་སུ་ཡང་སྲིད་པ་རྣམས་སུ་འཁྲིད་པར་བྱེད་ཅིང་དེ་བཞིན་དུ་འདྲེན་པར་བྱེད་དོ། །སྡུག་བསྔལ་ཆེན་པོ་དེ་དག་རྣམས་མཐོང་བར་གྱུར་པས་ཀྱང་རང་བཞིན་གྱི་ལྷ་དེ་དག་གིས་བག་མེད་པ་ལས་ཤིན་ཏུ་སྡུག་བསྔལ་བར་འགྱུར་བ་སྤངས་ནས།
ཡིད་འབྱུང་བར་འགྱུར་ཞིང་ཐམས་ཅད་ཀྱང་རབ་ཏུ་དང་བའི་ཡིད་ཀྱིས་དཀོན་མཆོག་གསུམ་ལ་སྐྱབས་སུ་སོང་བར་གྱུར་ཏོ། །དེ་དག་རྟོགས་ནས་གཞན་ཡང་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ཀྱི་ཡིད་གཞན་ཡང་ཇི་ལྟ་བ་བཞིན་དུ་ལས་སུ་རུང་བར་བྱ་བའི་ཕྱིར་སླར་ཉིད་ཀྱང་
སྤྲུལ་པ་གཞན་རྣམས་སྤྲུལ་པར་བྱེད་པ་ནི། ལྷ་དེ་དག་རྣམས་ཉིད་ཀྱི་ཕྱིར་ཞིང་ཉིད་ཀྱང་ཁྱད་པར་དུ་རྟོགས་ནས་དགའ་བར་འགྱུར་བ་རྣམས་ལ། འདི་ལྟ་སྟེ་དབུ་རྒྱན་གྱིས་བརྒྱན་པ་འདོད་པ་རྣམས་ཐམས་ཅད་ཕུན་སུམ་ཚོགས་པའི་རྒྱལ་པོ་གང་ཡིན་པ་དེ་དག་རྣམས་མུ་སུ་
ལུན་དྷའི་ལུས་ལས་ངེས་པར་འབྱུང་སྟེ། ལྷན་ཅིག་སྤྱོད་པར་བྱེད་པའི་མཆོག་ཏུ་ལང་ཚོ་ལ་བབ་པ་རྣམས་ཀྱིས་ཕྱི་བཞིན་འབྲང་བར་གྱུར་པ་རྣམས་ནི་སྔར་ཁོ་ན་བཞིན་ནོ། །དེ་དག་ཐམས་ཅད་ཀྱང་རྣམ་པ་དེ་སྲིད་ཀྱི་གཟུགས་དང་ཕུན་སུམ་ཚོགས་པ་རྣམས་ཀྱིས་ཀྱང་ཕུན་སུམ་

ཚོགས་པར་གྱུར་ནས་ཕྱི་ནས་ཡང་རྒྱལ་པོ་རྣམས་ལུས་གོག་པོར་སོང་བ། མགོ་བོ་ཀུན་སྐྲ་དཀར་རྣམས་ཀྱིས་གཡོགས་པར་གྱུར་པ། ལུས་པོ་རྣམས་ཀུན་ནས་འཁུམས་པ། ལུས་ལ་གཉེར་མ་དང་སྐྲ་དཀར་རྣམས་ཀྱིས་ཀུན་དུ་གང་བ་ལུས་དབྱུག་པ་ལ་ཀུན་ནས་
རྟེན་པ་མཆོག་ཏུ་རྗུད་པར་གྱུར་པའི་ལུས་པོ་ཅན་རྣམས་ལས་རྣམ་པ་ཐམས་ཅད་ལ་ནུས་པ་མེད་པར་གྱུར་པ། གཞན་ལ་ཀུན་ནས་རྟེན་ནས་འགྲོ་བར་བྱེད་པ། སྐྱེ་བོ་རྣམས་ཐམས་ཅད་བཞད་གད་དུ་གྱུར་པ་སྒྲ་ངར་ངར་པོར་གྱུར་པའི་དབུགས་ཕྱིར་འབྱུང་བ་ལུས་ཀུན་ལ་བསྙེ་བས་
ཉམས་པར་བྱས་པ། དབང་པོ་རྣམས་ཤིན་ཏུ་རྙིངས་པར་གྱུར་པ་ཐམས་ཅད་ལ་ཡང་སྤྲོ་བ་མེད་པ། སྐྱེ་བོ་རྣམས་ཐམས་ཅད་སྐྱུག་ཟློག་པར་བྱེད་པ། འཁྱོར་ཞིང་འགྲོ་བར་གྱུར་པ་དུས་ཤིན་ཏུ་ཉེ་བར་གྱུར་པ་དེ་དག་རྣམས་མཚོ་འདི་ཉིད་ན་རྒྱུ་བར་བྱེད་དེ། སྟོབས་ཤིན་ཏུ་ཡང་ཆུང་བར་
གྱུར་པ་གཞན་དག་གི་ལག་པ་ལ་འཕྱངས་ནས་གོམ་པ་རྣམས་འབོར་བར་བྱེད་པ་ཤིན་ཏུ་ཡང་འཇིགས་སུ་རུང་བའི་གཟུགས་དང་ལྡན་པ་རྣམས་ཡིན་ནོ། །དེ་དང་དེ་ལྟར་རྒྱུ་བར་བྱེད་པ་རྣམས་ཀྱི་ལུས་རྣམས་ལ་དུས་གཞན་འགའ་ཞིག་གི་ཚེ་ན། གཟུགས་མང་པོ་རྣམ་པ་སྣ་ཚོགས་
པའི་ནད་རྣམས་ཀུན་དུ་སྐྱེ་བ་ནི། རིམས་ཚ་བ་དང་། ཧ་ཅང་ཐལ་ཆེས་པར་འཁྲུ་བ་དང་། གློ་ལུ་བ་དང་། དབུགས་མི་བདེ་བ་དང་། སྐྱིགས་བུ་དང་། སྐྲང་གློ་དང་། མཛེ་སྔོན་དུ་འགྲོ་བར་གྱུར་པ་རྣམས་ཀྱིས་ཤིན་ཏུ་མི་བཟད་པར་གྱུར་པ། ཉེ་བར་འཚེ་བ་རྣམས་དང་བཅས་པ། འཆི་
བའི་མཐར་ཐུག་པར་བྱེད་པ། ཤིན་ཏུ་སྐྱུག་བྲོ་བར་གྱུར་པའི་ནད་ཁྱད་པར་དུ་དྲག་པོ་དེ་དག་རྣམས་ཀུན་དུ་འབྱུང་བར་གྱུར་པའི་སྟོབས་ཀྱིས། གསོ་དཔྱད་མེད་པ་དང་མི་འདོད་པ་རྣམས་མཐར་ཐུག་པར་བྱས་པས་རྒྱལ་པོ་དེ་དག་རྣམས་ཐམས་ཅད་ཉིད་ཁྲིད་པར་གྱུར་ནས་ཤིན་ཏུ་སྡུག་
བསྔལ་བ་ཁོ་ནར་འཆི་བར་བྱེད་དོ། །ཤི་བ་དེ་དག་རྣམས་ཀྱི་ལུས་དེ་དག་རྣམས་ཟགས་ཤིང་དྲི་མི་ཞིམ་པར་གྱུར་པ་ལ་སྲིན་བུ་བརྒྱ་སྟོང་གིས་ཁྱབ་པར་གྱུར་པས་ཟ་བར་བྱེད་བཞིན་པའི་ལུས་དེ་དག་རྣམས་རང་བཞིན་པའི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །དེ་ནས་གང་

དག་གིས་དེ་དག་གི་ལུས་རྣམས་འཛིན་པར་བྱེད་པའི་སྤྲུལ་པའི་བྱ་རྣམས་ཀྱང་ཀུན་དུ་འོངས་པར་གྱུར་ནས་ཁ་ཅིག་གིས་ནི་ཟ་བར་བྱེད་དོ། །ཁ་ཅིག་གིས་ནི་བཟུང་བར་གྱུར་པ་མཐོང་ནས་འབྲོས་པར་བྱེད་དེ། དེ་དག་རྣམས་ཀྱང་མཆོག་ཏུ་སྐྱོ་བ་སྐྱེ་བར་འགྱུར་
བའི་གནས་སུ་ལེགས་པར་མཐོང་བས་ལྷ་རང་བཞིན་པ་དེ་དག་རྣམས་ཤིན་ཏུ་ལེགས་པར་མཉམ་པར་བཞག་པའི་ཡིད་དུ་འགྱུར་རོ། །གཞན་ཡང་ལྷ་དེ་དག་རྣམས་ཉིད་ལ་ཕན་པར་བྱ་བའི་དོན་དུ་འཐབ་བྲལ་གྱི་བདག་པོ་བརྟན་པས་མགོ་དྲངས་པའི་ལྷ་མ་ཡིན་གྱི་རྒྱལ་པོ་གང་
ཡིན་པ་དེ་དག་རྣམས་སྒྲ་གཅན་འཛིན་གྱི་མཐར་ཐུག་པར་གྱུར་པའི་ས་འོག་ན་གནས་པ་དེ་དག་རྣམས་གང་གི་ཚེ་མུ་སུ་ལུན་དྷ་ལས་མི་རིང་བ་ན་ཀུན་ནས་གནས་པར་གྱུར་ལ། དེའི་ཚེ་རྣམ་པར་ཁྲོས་པར་གྱུར་པས་ཀྱང་ཐམས་ཅད་ཀྱི་སྐད་ཆེན་པོ་ཀུན་དུ་བཏོན་ཞིང་ཕན་ཚུན་དུ་ཡང་
བོས་པར་གྱུར་ནས་ས་གཞི་ལ་ཀུན་ནས་འགྱེལ་བ་ནི་སྟ་རེས་ཤིང་ཀར་ཎི་ཀཱ་ར་སྟ་རེས་རྩ་བ་ནས་བཅད་པ་བཞིན་དུ་ས་གཞི་ལ་འགྱེལ་བར་གྱུར་ཏོ། །འགྱེལ་ནས་ཀྱང་ཤི་བར་གྱུར་པས་ཐམས་ཅད་ཤིང་དང་རྡོ་བ་རྣམས་བཞིན་དུ་རྣམ་པར་འགྱུར་བ་དང་བྲལ་བར་འགྱུར་རོ། །དེ་
དག་རྣམས་མངོན་པར་མཐོང་ནས་ལྷ་མ་ཡིན་གྱི་བུ་མོ་དེ་དག་རྣམས་ཤིན་ཏུ་སྡུག་བསྔལ་གྱིས་གཟིར་ནས་ཀྱང་རྣམ་པར་ཁྲོ་བར་བྱེད་པ་དང་ངུ་བར་ཡང་བྱེད་དོ། །ཡོངས་སུ་བསྐོར་བར་གྱུར་ནས་དེ་དག་རྣམས་ཐམས་ཅད་ཀྱང་དེ་ལྟར་ངུ་བར་བྱེད་པ་རྣམས་ལ་བྱ་དག་ཀུན་དུ་འོང་
བར་གྱུར་ནས་དེ་དག་གིས་དེ་དག་རྣམས་ཀྱི་ལུས་ཤིང་སྐམ་དང་རྡོ་བ་དང་ཤིང་བུ་དང་མཚུངས་པར་བྱེད་པ་མེད་པ་རྣམས་ཀུན་ནས་འདྲེན་པར་བྱེད་དོ། །སྙིང་རྗེ་རྣམ་པར་འཁྲུགས་པར་གྱུར་པའི་ལྷ་མ་ཡིན་གྱི་བུ་མོ་དེ་དག་རྣམས་དེ་ནས་དེ་ལྟར་རྣམ་པར་འཁྲུགས་པའི་རྟིང་
ཐོགས་ཉིད་ལ་དེ་དག་རྣམས་ཐམས་ཅད་ཀྱང་ཤི་བར་གྱུར་ཏོ། །དེ་དག་རྣམས་ཀྱི་རོ་དེ་དག་རྣམས་ཀྱང་བྱ་རྣམས་ཉིད་ཀྱིས་འཛིན་པར་བྱེད་དོ། །བཟུང་བར་གྱུར་ནས་ཀྱང་ཁྭ་ཏ་དང་འུག་པ་དང་བྱ་རྒོད་རྣམས་ནམ་མཁའ་ལ་འཕུར་བར་འགྱུར་ཏེ། མཐོང་བའི་ཡུལ་

ལས་འདས་ནས་འགྲོ་བར་བྱེད་དོ། །དེ་ལྟར་ཡང་འཐབ་བྲལ་བ་རྣམས་ཀྱི་བདག་པོ་དེས་རང་བཞིན་གྱི་ལྷ་རྣམས་ལ་ཕན་པར་བྱ་བའི་དོན་དུ་སྤྲུལ་པ་གཞན་རྣམས་ཀྱང་ཕུལ་དུ་ཕྱིན་པར་བྱས་སོ། །དེའི་རྗེས་ཐོགས་ལ་སྤྲུལ་པ་གཞན་དག་བྱེད་པ་རྣམས་ལ་ཇི་ལྟར་གང་དེ་ཀླུའི་
རྒྱལ་པོ་རྣམས་གང་ཡིན་པ་དེ་དག་གི་སྤྲུལ་པ་རྣམས་ནི་སྔ་མ་བཞིན་ནོ། །ཡང་དེ་དག་རྣམས་ཀྱི་མི་རྟག་པ་འདི་དག་སྟོན་པར་བྱེད་པ་ལས་དེ་ལྟར་ཡང་ཀླུ་རྣམས་ཁ་ཅིག་ནི་བྱེ་ཚན་དག་གིས་སྲེག་པར་བྱེད་དོ། །སོལ་བའི་མེ་ཚ་བ་རྣམས་ཀུན་དུ་འབབ་པར་འགྱུར་ཞིང་དེ་དག་རྣམས་
བབ་པར་གྱུར་པས་ཀྱང་དེ་ལྟར་སྲེག་པར་བྱེད་དོ། །ཇི་ལྟར་སེང་ལྡེང་གི་མེ་ཤིན་ཏུ་ཆེན་པོ་རྣམས་སུ་རྩྭ་འཇག་སྐམ་པོ་ཅིག་ལྷུང་བ་སྲེག་པར་བྱེད་པ་དེ་བཞིན་དུ་ལྷུང་བར་གྱུར་པ་ཙམ་ཉིད་ན་ཀླུ་དེ་དག་རྣམས་བྱེ་ཚན་གྱིས་སྲེག་པར་བྱེད་དོ། །དེ་དག་རྣམས་ལས་གཞན་པའི་ཀླུ་རྣམས་ཀྱང་
འཆི་བདག་གིས་འཁྲིད་པར་འགྱུར་ཏེ། ལྷན་ཅིག་སྤྱོད་པར་བྱེད་པ་རྣམས་ཀྱི་ནང་ན་གནས་པ་ལས་རྣམ་པར་ཁྲོས་པར་གྱུར་བཞིན་དུ་དེ་དག་རྣམས་དུས་ཀྱི་འཁོར་ལོས་སྡུད་པར་བྱེད་དོ། །གཞན་རྣམས་ཁ་ཅིག་ནི་ཕན་ཚུན་དུ་འགྱེད་པར་གྱུར་པས་ཕན་ཚུན་དུ་བཅིངས་ནས་སྙིང་
ཕན་ཚུན་དུ་འཇོམས་པར་བྱེད་དོ། །དེ་ལྟར་འཆི་བདག་རྣམས་ཀྱིས་ཀུན་དུ་ཁྲིད་པར་གྱུར་པའི་སྤྲུལ་པ་པའི་ཀླུ་དེ་དག་རྣམས་ཀྱང་རང་བཞིན་གྱི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །མཐོང་ནས་ཀྱང་ཕྱིར་ཞིང་ཁོ་ན་ཤིན་ཏུ་ངེས་པར་ཡིད་འབྱུང་བར་འགྱུར་རོ། །གཞན་ཡང་
འཐབ་བྲལ་བ་རྣམས་ཀྱི་བདག་པོ་དེ་ཉིད་ཀྱིས་སྤྲུལ་པ་གཞན་དག་བྱེད་པ་ནི་ཇི་ལྟར་ཤར་གྱི་ལུས་འཕགས་པོ་རྣམས་དང་། བ་ལང་སྤྱོད་པ་རྣམས་ཀྱི་མི་རྣམས་ཀྱང་རྒས་པ་རྣམ་པ་སྣ་ཚོགས་པ་རྣམས་ཀྱིས་ཟིལ་གྱིས་གནོན་པར་བྱེད་དོ། །ལྷན་ཅིག་རྗེས་སུ་སྤྱོད་པའི་འཁོར་དང་
བཅས་པ་རྣམས་ལན་བརྒྱ་དང་སྟོང་དུ་ཡང་བྱེད་དོ། །ཤི་བ་དེ་དག་རྣམས་ཉིད་ཀྱི་ལུས་དེ་དག་རྣམས་ལས་སྲིན་བུ་རྣམས་ཀྱིས་གང་བར་གྱུར་པར་ཤིན་ཏུ་འཇིགས་སུ་རུང་བར་ས་གཞི་ལ་འགྱེལ་བར་གྱུར་པ་དག་རང་བཞིན་གྱི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །རྣམ་པ་

དུ་མ་དང་རྣམ་པར་རྟོག་པ་དུ་མར་ཡང་སྲིན་བུའི་སྐྱོན་ཕུལ་དུ་ཕྱིན་པའི་སྡུག་བསྔལ་གྱིས་འཆི་བ་མངོན་པར་མཐོང་ནས། རང་བཞིན་གྱི་ལྷ་དེ་དག་མཆོག་ཏུ་ཡིད་བྱུང་བ་དང་ལྡན་པར་གྱུར་ནས། འཆི་བའི་སྡུག་བསྔལ་འདི་ནི་ངེས་པར་བསླང་བ་ཡིན་ཏེ། དེ་ལྟར་ཡང་
སྲོག་ཆགས་སུ་གྱུར་པ་གང་ཡིན་པ་འདི་དག་རྣམས་ཐམས་ཅད་ཀྱང་རྒ་བ་དང་ནད་དང་འཆི་བ་རྣམས་ཀྱིས་མཐར་ཐུག་པར་བྱེད་པ་ཡིན་པ་རབ་ཏུ་མི་ཤེས་ན། དེ་དག་རྣམས་ཀྱང་གང་དུ་སོང་གང་གིས་ཁྲིད་པར་གྱུར་པ་ཡིན། ཕུན་སུམ་ཚོགས་པ་རྣམས་ཐམས་ཅད་ནི་མི་རྟག་པ་
ཡིན་པ་དང་། བདེ་བ་རྣམས་ཐམས་ཅད་ཀྱང་སྲིད་པའི་སྐྱོན་དང་ཀུན་དུ་འདྲེས་པའི་འདུས་བྱས་ཞེས་བྱ་བ་གཡོ་བ་མཐར་འཇིག་པར་འགྱུར་བ་འདི་ལ་བློ་དང་ལྡན་པའི་སྐྱེས་བུ་རྣམས་ཀྱིས་ཡིད་ཆེས་པར་མི་བྱའོ། །རབ་ཏུ་རྣམ་པར་འཇིག་པར་འགྱུར་བའི་ཆོས་ཅན་འདི་དག་
རྣམས་ཐམས་ཅད་ལ་འདི་དང་སྲིད་པ་གཞན་དུ་ཡང་བདེ་བ་ཡོད་པ་མ་ཡིན་ནོ། །མཆོག་ཏུ་སྐྱོ་བ་སྐྱེས་པའི་ཡིད་དང་ལྡན་པའི་ལེགས་པར་སྐྱོ་བ་སྐྱེས་པའི་བློ་དང་ལྡན་པའི་རང་བཞིན་གྱི་ལྷ་དེ་དག་རྣམས་དེ་ལྟར་ཕན་ཚུན་དུ་རྗོད་པར་བྱེད་དོ། །དེ་ནས་འཐབ་བྲལ་གྱི་བདག་པོ་
དེས་དེ་དག་རྣམས་ཀྱི་སེམས་དང་སེམས་ལས་བྱུང་བ་དེ་དག་རིག་པར་གྱུར་ནས་སྤྲུལ་པ་གཞན་ཡང་བྱེད་པར་གྱུར་པ་ལས། དེ་ནས་སྐྱེས་བུ་གང་དག་ང་མེད་པ་ངའི་བ་མེད་པར་གྱུར་པ། ངེས་པར་གོང་དུ་འགྲོ་བ་དེ་དག་རྣམས་ནི། འདི་ལྟ་སྟེ་གང་བྱང་ཕྱོགས་སྒྲ་མི་སྙན་པ་
གང་ཡིན་པ་རྣམས་ཏེ། དེ་དག་རྣམས་ནི་ལྷ་རྣམས་ཀྱི་དྲུང་ན་ཅུང་ཟད་པ་ཅིག་གིས་ཆུང་བའི་མཆོག་ཏུ་སྐྱིད་པར་གྱུར་པའོ། །དེ་དག་རྣམས་ཀྱང་རྒས་པ་དང་ནད་ཀྱིས་གཟིར་བར་གྱུར་ནས་འཆི་བདག་གི་ཞགས་པས་འདྲེན་པར་བྱེད་དོ། །ཤིན་ཏུ་འཇིགས་སུ་རུང་
བའི་ལུས་རྣམས་ལ་སྲིན་བུ་བརྒྱ་སྟོང་གིས་ཀུན་ནས་གཡོགས་པར་གྱུར་པ། ལུས་པོ་འདི་དག་ལ་སྐྱེ་བོ་རྣམས་ཐམས་ཅད་ཀྱིས་བལྟ་བར་རྗེས་སུ་མི་འཐུན་པ། བཤང་བའི་ཕུང་པོ་རྣམས་ཀྱིས་ཀུན་དུ་གང་བར་གྱུར་པའི་བྱང་ཕྱོགས་སྒྲ་མི་སྙན་པ་འདི་དག་རྣམས་སོ། །

དེ་ལྟར་བདེ་བ་རྒྱ་ཆེན་པོའི་ས་ན་གནས་པའི་འཐབ་བྲལ་བའི་ལྷ་རྣམས་ལ་ཕན་པར་བྱ་བའི་དོན་དུ་ལྷ་དང་མི་དང་ལྷ་མ་ཡིན་རྣམས་ཀྱི་མི་རྟག་པ་ཉིད་འཐབ་བྲལ་གྱི་བདག་པོ་འདིས་བསྟན་པ་ཡིན་ནོ། །དེའི་རྗེས་ཐོགས་ལ་གང་དག་རང་བཞིན་གྱི་ལྷ་དེ་དག་རྣམས་ཀྱིས་མཐོང་
བར་སྤྲུལ་པ་གཞན་དག་རྣམས་བྱེད་པ་ནི་འདི་ལྟ་སྟེ། སྲིད་པ་བར་མ་དོ་པའི་ཚོགས་རྣམ་པ་དུ་མ་རྣམས་སོ། །ཇི་ལྟར་ཤི་བར་གྱུར་ནས་སེམས་ཅན་རྣམས་ལས་སྣ་ཚོགས་པ་རྣམས་ཀྱི་དབང་གིས་དམྱལ་བ་དང་ཡི་དགས་དང་དུད་འགྲོ་དང་ལྷ་དང་མི་རྣམས་སུ་སྐྱེ་བ་དེ་
བཞིན་དུ་སྲིད་པ་བར་མ་དོ་པ་རྣམས་སྤྲུལ་པ་བྱེད་དེ། ཇི་ལྟར་འགྲོ་བ་ལྔ་པོ་རྣམས་ཀུན་དུ་རྒྱུ་བར་བྱེད་པ་རྣམས་ལྷ་རང་བཞིན་པས་མངོན་སུམ་ཉིད་དུ་མཐོང་བར་འགྱུར་རོ། །དེ་ལ་ལས་དུ་མ་རྣམས་ལས་སེམས་ཀྱི་ཐ་མའི་བསམ་པའི་དབང་གིས་སྐྱེ་བར་འགྱུར་རོ། །
དེ་ལས་རང་བཞིན་གྱི་ལྷ་དེ་དག་རྣམས་ཉིད་ངེས་པར་སྐྱོ་བར་བྱ་བའི་དོན་དུ་རྣམ་པ་དུ་མར་ལན་བརྒྱ་སྟོང་དུ་སྐྱེ་དགུ་རྣམས་འགྲོ་བ་ལྔར་སྐྱེ་བ་སྤྲུལ་པར་བྱེད་དོ། །མཚོ་དེ་ཉིད་དུ་བསམ་གྱིས་མི་ཁྱབ་པ་ཤིན་ཏུ་ངོ་མཚར་བ་གཞན་རྣམས་དང་མི་འདྲ་བ་དེ་དག་རྣམས་མངོན་པར་མཐོང་
ཞིང་རང་བཞིན་གྱིས་ལྷ་དེ་དག་གིས་མངོན་སུམ་ཁོ་ནར་མཐོང་བར་འགྱུར་རོ། །དེ་ལ་ཡང་འགྲོ་བ་ལྔར་ཀུན་དུ་རྒྱུ་བར་བྱེད་པའི་འབྱུང་པོ་རྣམས་ཐམས་ཅད་ལས་དང་ཉོན་མོངས་པ་རྣམས་ཀྱི་དབང་གིས་དྲངས་པར་གྱུར་པས་འགྲོ་བ་གཞན་ནས་འགྲོ་བ་གཞན་རྣམས་སུ་དམྱལ་
བ་དང་། ཡི་དགས་དང་། དུད་འགྲོ་དང་། ལྷ་དང་མིའི་འགྲོ་བ་རྣམས་ལ་ཡོངས་སུ་འཁྱམ་པར་གྱུར་པ་ལ་ནི་སྐྱབས་མེད་པ་དང་གྲོགས་མེད་པར་གྱུར་པས་སྲིད་པ་གཞན་རྣམས་བརྗེ་བསོར་བྱེད་པ། དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་མི་རྣམས་ཀྱི་ནང་དུ་བརྗེ་
བསོར་བྱེད་པ་རྣམས་མཐོང་ངོ་། །དེ་ལ་སྲིད་པ་བར་མ་དོ་པ་རྣམས་ཀྱི་ཡ་མཚན་ཆེ་བར་གྱུར་པ་ཤིན་ཏུ་འཇིགས་སུ་རུང་བ། ཀུན་ནས་ཤིན་ཏུ་འཇིགས་པར་བྱེད་པ་མཆོག་ཏུ་སྐྱོ་བ་སྐྱེ་བར་བྱེད་པ་ཐམས་ཅད་ལ་རབ་ཏུ་འཇིགས་པར་བྱེད་པར་གྱུར་པ་དེ་དག་རྣམས་རང་བཞིན་གྱི་

ལྷ་རྣམས་ཀྱིས་མཐོང་བར་འགྱུར་རོ། །དེ་ལ་ལྷ་རྣམས་ཉིད་ཀྱི་དེ་ལྟ་བུའི་སྲིད་པ་བར་མ་དོ་པ་མཐོང་བ་ལས། འཐབ་བྲལ་བའི་ལྷའི་རིགས་རྣམས་ལས་ལས་ཟད་པར་གྱུར་ནས་རབ་ཏུ་ལྷུང་བར་གྱུར་པ་ན། འགྱོད་པའི་མེས་སྲེག་པར་བྱེད་པ་བག་མེད་པ་
རྣམས་ཀྱིས་དེ་དེ་ལྟར་ཤིན་ཏུ་བསླུས་ནས་མགོ་བོ་ཐུར་ལ་དཔྱངས་པས་རབ་ཏུ་ལྷུང་བར་འགྱུར་རོ། །དེ་དག་འཆི་འཕོ་བར་གྱུར་པ་ན་ལྷ་གང་ཡིན་པའི་རྒྱུད་དེས་ཡོངས་སུ་བཟུང་བའི་ཕུང་པོ་དེ་དག་རྣམས་ནི་ཉེ་བར་ནུབ་པར་འགྱུར་རོ། །རྒྱའི་རྗེས་དང་ཆ་འདྲ་བར་སྲིད་པ་བར་
མ་དོ་པ་དེའི་འགྲོ་བ་རྣམས་ཀྱི་ཕུང་པོ་རབ་ཏུ་འབྱུང་བར་འགྱུར་རོ། །དམྱལ་བ་རྣམས་ཀྱི་ལས་བྱས་པར་གྱུར་པ་དེ་དང་འཁོར་བས་བྱས་པའི་ལས་ཀྱི་རྣམ་པར་སྨིན་པ་ཀུན་ནས་སློང་བའི་འཇིགས་པ་ཆེན་པོ་དང་གཟེར་ཟུག་ཆེན་པོར་ཡང་གྱུར་པ་རྣམས་མངོན་པར་མཐོང་ནས།
འཐབ་བྲལ་གྱི་རང་བཞིན་པ་དེ་དག་རྣམས་མཆོག་ཏུ་སྐྱོ་བ་དང་ལྡན་པར་འགྱུར་རོ། །དེ་ལྟར་དམྱལ་བ་པ་རྣམས་ཀྱི་སྲིད་པ་བར་མ་དོ་ནི་མཐོང་བར་འགྱུར་ལ། སྐྱེ་བའི་སྲིད་པ་རྣམས་ནི་མུ་སུ་ལུན་དྷ་འདིས་ལེགས་པར་སྟོན་པར་མི་བྱེད་དོ། །རྒྱུ་གང་གི་ཕྱིར་ན་ལྷ་དེ་དག་རྣམས་
ཀྱིས་བཟོད་པར་མི་ནུས་པའི་ཕྱིར་ཏེ། སེམས་ཤིན་ཏུ་འཇམ་པ་ཡིན་པས་སྐད་ཅིག་ཉིད་ལ་དུས་བྱེད་པར་འགྱུར་བའི་ཕྱིར་རོ། །ལྷ་དེ་དག་གིས་དཔེ་མེད་པའི་སྡུག་བསྔལ་འདི་རྣམས་མངོན་པར་མཐོང་བར་བྱེད་པ་ཡིན་ནོ། །རྒྱུ་འདི་དག་གིས་སྤྲུལ་པ་བྱས་པས་འཐབ་
བྲལ་གྱི་བདག་པོ་དེ་ལེགས་པར་སྟོན་པར་བྱེད་དོ། །དེ་ལྟར་ལྷ་དེ་དག་རྣམས་དམྱལ་བར་རབ་ཏུ་ལྷུང་བར་གྱུར་པ་ལྷ་གཞན་རང་བཞིན་པ་དེ་དག་རྣམས་ཀྱིས་རྣམ་པར་ལྟ་བར་བྱེད་དོ། །གཞན་ཡང་མུ་སུ་ལུན་དྷ་དེས་ངོ་མཚར་རྨད་དུ་བྱུང་བའི་སྤྲུལ་པ་འདི་དག་རྣམས་
བྱས་པས་སྲིད་པ་བར་མ་དོ་པ་རྣམས་སྟོན་པར་བྱེད་པ་ནི་ཇི་ལྟར་བག་མེད་པ་གང་ཁོ་ནའི་སྐྱོན་གྱིས། ཉེ་བར་བཅོམ་པའི་འཐབ་བྲལ་བ་རྣམས་ལས་ཟད་ནས་འཆི་འཕོ་བ་ནི་ཡི་དགས་རྣམས་སུ་སྐྱེའོ། །དེ་དག་གི་སྲིད་པ་བར་མ་དེ་དག་རྣམས་ནི་ལས་བྱས་པ་དེ་དག་དང་འདྲ་བའི་

གཟུགས་བརྙན་དུ་འགྱུར་ཏེ། ལས་ཀྱིས་ཐག་པ་རིང་པོ་རྣམས་ཀྱིས་དྲངས་པར་གྱུར་པས་མགོ་ཐུར་དུ་དཔྱངས་ནས་ལྟུང་བར་འགྱུར་བས་གང་ལ་དེས་བྱས་པའི་ལས་ཀྱིས་འཚེད་པར་བྱེད་པ་དེ་ལ་དེ་དག་ཀུན་ནས་འཁྲིད་དོ། །རང་བཞིན་གྱི་ལྷ་དེ་དག་རྣམས་ཀྱིས་
དེ་ལྟར་སྲིད་པ་བར་མ་དོ་པ་གཉིས་པ་རྣམས་མཐོང་ངོ་། །གཞན་ཡང་སྤྲུལ་པ་པའི་སྲིད་པ་བར་མ་དོ་པ་གསུམ་པ་རྣམས་མཐོང་བ་ནི་ཇི་ལྟ་བ་ཁོ་ནར་འཐབ་བྲལ་བ་རྣམས་གཞན་ཡང་ལས་ཟད་པ་ཉིད་བག་མེད་པས་ཉེ་བར་བཅོམ་ནས་མགོ་ཐུར་དུ་བལྟས་ཤིང་རབ་ཏུ་ལྷུང་བར་
གྱུར་པ་དང་། ཤིན་ཏུ་ཉམ་ཉེས་པ་དང་ཀུན་ནས་བཅིངས་པས་ཀྱང་དུད་འགྲོ་རྣམས་སུ་སྐྱེའོ། །དེ་དག་གི་སྲིད་པ་བར་མ་དོ་པ་རྣམས་ནི་དེ་དག་གི་འགྲོ་བའི་རྒྱའི་རྗེས་དང་ཆ་འདྲ་བ་ཉིད་དུ་སྐྱེ་བར་གྱུར་པ་ཡིན་ཏེ། དུད་འགྲོ་རྣམས་ཀྱི་རྣམ་པ་མཐའ་ཡས་པ་དང་
རྣམ་པ་དུ་མར་གྱུར་པ་དེ་དག་རྣམས་དང་འདྲ་བའི་སྲིད་པ་བར་མ་དོ་པ་རྣམས་སུ་འགྱུར་རོ། །རྒྱའི་རྗེས་དང་ཆ་འདྲ་བར་གྱུར་པ་དེ་ཡང་འགྲོ་བ་གསུམ་པ་རྣམས་ཀྱིས་ཀུན་ནས་བསྡུས་པའི་སྲིད་པ་བར་མ་དོ་པ་ཤིན་ཏུ་སྐྲག་པར་བྱེད་པ་དེ་དག་རྣམས་མངོན་པར་མཐོང་ནས། སླར་ཡང་ལྷ་དེ་
དག་རྣམས་ཆེས་ཕལ་ཆེ་བར་སྐྱོ་བར་གྱུར་ཅིང་མཆོག་ཏུ་ཀུན་ནས་སྐྲག་པར་གྱུར་པས་ཉེ་འཁོར་ཀུན་ན་འཇིགས་པ་དེས་ཁོང་དངངས་པར་གྱུར་པའི་བཞིན་གྱིས་ཕན་ཚུན་རྣམས་སུ་མངོན་པར་མཐོང་ནས་ཚིགས་སུ་བཅད་པ་བརྗོད་པ། ཇི་ལྟར། རྣམ་པར་ཤེས་དཀའ་
ཤིན་ཏུ་ཕྲ། །ཐམས་ཅད་དུ་ནི་རྒྱུག་པ་པོ། །སེམས་ཅན་ལས་ཀྱི་དབང་འགྲོ་བ། །ཐམས་ཅད་དུ་ནི་ཡོངས་སུ་རྒྱུག །གང་དག་འཕགས་པ་ལ་སྐུར་འདེབས། །གང་ཡང་ལས་འབྲས་ལ་སྡང་བ། །དེ་དག་ཤི་ནས་དམྱལ་བར་འགྲོ། །གང་ཡང་ལོག་པར་
འདུལ་བ་པོ། །གང་ཞིག་ནང་དུ་སྡིག་སྦས་ནས། །གང་ཡང་ཆོས་གཞན་གྱིས་སླུ་བ། །ཤིན་ཏུ་སྡིག་ཅན་འཇིག་རྟེན་དེ། །དམྱལ་བའི་རྩེ་མོའི་སྐལ་ལྡན་ཡིན། །བདེ་བ་ཀུན་ཆགས་གཞན་གང་དང་། །སྐྱེ་བོ་རྟག་ཏུ་སྡིག་དགའ་བ། །རང་གི་སེམས་ཀྱིས་བསླུས་

ནས་ནི། །དེ་ནི་བདེ་ནས་སྡུག་བསྔལ་འགྲོ། །གང་ཞིག་མཐར་ཐུག་བདེར་མཐོང་བ། །བདེ་དེ་མཚོན་ཆར་བརྗོད་པ་ཡིན། །གང་ཡང་སྡུག་བསྔལ་རྣམ་སྨིན་འགྱུར། །བདེ་དེ་སྡུག་བསྔལ་ཁོ་ན་ཉིད། །བག་མེད་པ་ཡི་ལྷ་རྣམས་ནི། །འཐབ་བྲལ་སྲིད་པ་ནས་འཆི་འཕོ། །དེ་
ཕྱིར་ཆོས་སྲོག་གང་གི་ཕྱིར། །མཁས་པས་རབ་ཏུ་བསྔགས་པར་བྱེད། །ཁང་བུ་སྐྱེད་མོས་ཚལ་དགའ་ཞིང་། །ཆེད་ཆེར་བུད་མེད་རྣམས་ལ་ལྟ། །འདོད་པའི་ཡུལ་གྱིས་ངོམས་མེད་པར། །ལྷ་ནི་ས་ལ་ལྟུང་བ་ཡིན། །ཇི་ལྟར་བདེ་བ་འཕེལ་བ་ནི། །སྐོམ་པ་འཕེལ་བ་དེ་བཞིན་ནོ། །སྐོམ་པ་ལས་
ནི་མཆོག་ཏུ་ནི། །མཁས་པ་ལས་ནི་རབ་ཏུ་བརྗོད། །འཇིག་རྟེན་སྐྱེ་དང་འཆི་མཐོང་ནས། །མཆོག་ཏུ་སྐྱོ་བ་མི་སྐྱེ་བ། །དེ་ལ་བདེ་ལེགས་སྐྱབས་གང་ཡོད། །གང་ཡང་སྐྱོབ་པར་མི་འགྱུར་རོ། །དེ་ལྟར་རང་བཞིན་གྱི་ལྷ་དེ་དག་རྣམས་ཀྱིས་རྣམ་པ་དུ་མའི་སྲིད་པ་བར་མ་དོ་པ་དེ་དག་རྣམས་མངོན་
པར་མཐོང་བར་གྱུར་པ་དང་རབ་ཏུ་སྐྱོ་བའི་ཡིད་ཀུན་དུ་སྐྱེས་སོ། །དེ་དག་རྣམས་ཀྱི་སེམས་དེ་དག་མངོན་པར་མཐོང་ནས་འཐབ་བྲལ་གྱི་མངའ་བདག་མུ་སུ་ལུན་དྷ་དེས་སྤྲུལ་པའི་ལྷ་དེ་དག་རྣམས་ཐམས་ཅད་ཀྱིས་སྣང་བར་བྱས་ནས། ལེགས་པར་ཕྲད་པར་བྱེད་དོ། །ཞི་བ་རྒྱས་པའི་ཆ་བྱད་དེ་མངོན་
པར་མཐོང་ནས་ལྷ་དེ་དག་རྣམས་དབུགས་ཕྱིན་ཅིང་ཡིད་ཕེབས་པར་གྱུར་ནས། འཐབ་བྲལ་བ་རྣམས་ཀྱི་མངའ་བདག་མགོན་པོ་དེ་གང་ན་ཡོད་པ་དེར་ཡོངས་སུ་བསྐོར་ནས་ཀུན་དུ་གནས་ཏེ། གུས་པ་ལེགས་པར་སྐྱེས་པས་ཁྱབ་པར་ཚིམ་པའི་ཡིད་ཀྱིས་ཐམས་ཅད་ཉིད་དེ་ན་གནས་སོ། །སྐྱོ་
བའི་ཡིད་ཀྱིས་བདག་ཉིད་མགོན་དང་བཅས་པ་དེ་བཞིན་དུ་དེ་དག་རྣམས་ཀྱིས་རྟོགས་སོ། །དེ་ལ་རྣམ་པ་དུ་མ་དང་རྣམ་པར་རྟོག་པ་དུ་མར་མཐོང་ན་ངོ་མཚར་བར་གྱུར་པ་རྣམས་རང་གིས་མཐོང་བས་ཚིམ་པ་མེད་པའི་ཡིད་ཀྱིས་ཀུན་དགའ་བ་མཐོང་བ་ལྟ་བུར་གྱུར་པ་དེ་ཡོངས་སུ་བསྐོར་ནས་རང་བཞིན་
གྱི་ལྷ་དེ་དག་རྣམས་གནས་སོ། །དེ་ནས་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ལ་འདི་སྐད་ཅེས་བརྗོད་དེ། ཁྱེད་ཅག་རྣམས་ནགས་དང་ཉེ་བའི་ནགས་དང་པད་མའི་རྫིང་བུ་དང་རིན་པོ་ཆེའི་ཁམས་རྣམས་དང་ལྡན་པས་རྣམ་པར་བརྒྱན་པའི་རིའི་རྩེ་མོ་རྣམས་ཉིད་ལ་ཡང་གར་གྱིས་ཤིག་ཅེས་

ཉམས་སུ་བླང་བར་བྱ་བའི་དོན་དུ་རྗོད་པར་བྱེད་ཀྱང་། ཅི་ཡང་ལྷ་དེ་དག་རྣམས་སྐྱོ་བར་གྱུར་པའི་ཡིད་ལེགས་པར་སྐྱེས་པའི་ཕྱིར་དང་བག་མེད་པ་རྣམས་བསྙུངས་པར་བྱ་བའི་ཡིད་ཅན་རྣམས་བྱེད་པ་ཡིན་ནམ། དེ་ནས་རང་བཞིན་གྱི་ལྷ་དེ་དག་རྣམས་ཀྱི་འཐབ་བྲལ་གྱི་བདག་པོའི་དྲུང་ནས་ཚིག་དེ་དག་ཐོས་ནས་རང་
བཞིན་གྱི་ལྷ་དེ་དག་སེམས་རབ་ཏུ་སྐྱོ་བར་གྱུར་པས་འདི་སྐད་ཅེས་བརྗོད་དེ། ལྷ་ལགས་ནགས་དང་ཉེ་བའི་ནགས་དང་རིན་པོ་ཆེའི་ཁམས་དང་ལྡན་པས་བརྒྱན་པ་རྣམས་ལ་བདག་ཅག་ཇི་ལྟར་ཅིའི་ཕྱིར་དགའ་བར་འགྱུར། ལྷ་རྣམས་མཚོར་བྱིང་བ་བཞིན་དུ་བདག་གིས་འཁོར་བའི་བྲེལ་ཏོག་རྣམས་རྣམ་
པར་རྟོག་པ་དུ་མས་ཀྱང་བསྲན་པར་མི་ཚུགས་པ་རྣམས་རང་གི་མིག་སྔར་མཐོང་སྟེ། འདོད་པ་རྣམས་ཐམས་ཅད་ནི་མི་རྟག་པ། སྡུག་བསྔལ་གྱི་མཐར་གཏུགས་པར་བྱེད་པ་བདག་ཅག་རྣམས་རྟག་པ་མ་ཡིན་བརྟན་པ་མ་ཡིན་ཐེར་ཟུག་མ་ཡིན་ཏེ། དེ་དག་རྣམས་ལ་སྙིང་པོ་ཅུང་ཟད་ཀྱང་མེད་དོ། །དེ་ནས་
འཐབ་བྲལ་གྱི་བདག་པོ་དེས་ལྷ་དེ་དག་རྣམས་ཀྱི་དྲུང་ནས་ཚིག་གི་ཆ་འདི་དག་རྣམས་ཐོས་ནས་འདི་སྐད་ཅེས་བརྗོད་དོ། །བཅོམ་ལྡན་འདས་ཀྱིས་ཇི་ལྟ་བར་འདི་དག་རྣམས་ཐམས་ཅད་སྡུག་བསྔལ་གྱི་མཐར་ཐུག་པ་ཡིན་པར་གསུངས་སོ། །དེ་ནས་ལྷ་དེ་དག་ཐམས་ཅད་ཀྱིས་ཀྱང་འདི་སྐད་ཅེས་བརྗོད་
དེ། བདག་ཅག་རྣམས་ཐམས་ཅད་ནི་ཇི་ལྟ་བ་བཞིན་དུ་དེ་ལ་ཡིད་སོང་བ་ལགས་ན། ཇི་ལྟར་ཤིན་ཏུ་སྡུག་བསྔལ་བ་རྣམས་ལྷའི་ཞལ་སྔ་ནས་ཤེས་པར་འཚལ་ལོ། །དེ་ནས་དེ་དག་གི་དྲུང་ནས་འཐབ་བྲལ་བ་རྣམས་ཀྱི་མངའ་བདག་དེས་ཚིག་དེ་དག་རྣམས་ཐོས་ནས་འདི་སྐད་ཅེས་བརྗོད་དེ།
ཇི་ལྟར་འཁོར་བའི་སྡུག་བསྔལ་མ་ལུས་པ་དེ་དག་རྣམས་ངས་བརྗོད་པར་ནུས་མོད་ཀྱིས་ཀྱང་རེ་ཞིག་ངས་ཁྱེད་རྣམས་ལ་ཕྱོགས་གཅིག་ཙམ་མངོན་པར་བརྗོད་པར་བྱ་སྟེ། འཁོར་བ་རྣམས་སུ་ཇི་ལྟ་བར་བག་མེད་པའི་དབང་གིས་འགྲོ་བར་མ་གྱུར་ན་ནི། བསྐལ་པ་བྱེ་བ་སྟོང་ཕྲག་དུ་མ་རྣམས་ན།
ཀྱེ་མ་དཀའ་བླས་ཀྱིས་བདེ་འགྲོའི་འགྲོ་བར་འབྱུང་བར་འགྱུར་བ་ཡིན་ཏེ། འགྲོ་བ་གཉིས་པོ་ལྷ་དང་མི་དང་རྙེད་པ་ནི་ཤིན་ཏུ་དཀའ་བ་ཡིན་ཞིང་། གང་དག་བག་མེད་པའི་དབང་དུ་འགྲོ་བར་མི་འགྱུར་བ་དེ་དག་རྣམས་ནི་མཁས་པ་ཡིན་ནོ། །རྐྱེན་གྱི་དབང་གིས་བྱུང་བ་རྣམས་ཀྱང་ཡོངས་སུ་སྤོང་

བར་བྱེད་དོ། །དེ་དག་གི་དབང་དུ་འགྲོ་བར་མི་འགྱུར་རོ། །དམྱལ་བ་དང་ཡི་དགས་དང་བྱོལ་སོང་རྣམས་སུ་དེ་དག་སྐྱེའོ། །དེ་ལ་ཀྱེ་ཧོ་ལྷ་རྣམས་འགྲོ་བ་གསུམ་པོ་རྣམས་ངན་སོང་ཞེས་མངོན་པར་བརྗོད་དོ། །ལྷ་དང་མིའི་འགྲོ་བ་གཉིས་པོ་ནི་བདེ་འགྲོ་
ཞེས་མངོན་པར་བརྗོད་དོ། །དེ་དག་རྣམས་ཉིད་རེ་ཞིག་ཇི་ལྟར་རབ་ཏུ་སྟོབས་ཆེ་བར་གྱུར་པའི་སྡུག་བསྔལ་དག་མངོན་པར་བརྗོད་པར་མི་ནུས་སོ། །རྒྱས་པར་ནི་སྟོན་པས་མངོན་པར་བརྗོད་པར་སྤྱོད་དོ། །མདོར་བསྡུ་བར་གྱུར་ན་ལྷ་དང་མི་རྣམས་ཀྱི་སྡུག་བསྔལ་རྣམས་ནི་
རྣམ་པ་བཅུ་དྲུག་གོ། །ཡང་ལྷ་དང་མི་རྣམས་ཀྱི་དེ་ཡང་གང་དག་ཡིན་ན། བདེ་འགྲོའི་འགྲོ་བས་བསྡུས་པའི་སྡུག་བསྔལ་དུ་གྱུར་པ་རྣམས་ལ། འདི་ལྟ་སྟེ་སྲིད་པ་བར་མ་དོའི་སྡུག་བསྔལ་དང་མངལ་ན་གནས་པའི་ཡ་ང་བའི་སྡུག་བསྔལ་དང་མངལ་ནས་ཀུན་དུ་
འབྱུང་བའི་སྡུག་བསྔལ་དང་ཟས་ཀྱི་སྡུག་བསྔལ་དང་འདོད་པའི་སྡུག་བསྔལ་དང་མི་འཐུན་པ་རྣམས་དང་ཀུན་དུ་ཕྲད་པའི་སྡུག་བསྔལ་དང་སྡུག་པ་རྣམས་དང་བྲལ་བའི་སྡུག་བསྔལ་དང་གྲང་བ་དང་ཚ་བ་ལ་སོགས་པས་བཅིངས་པའི་སྡུག་བསྔལ་དང་ནད་ཀྱི་སྡུག་བསྔལ་
དང་གཞན་གྱི་དབང་དུ་གྱུར་པའི་སྡུག་བསྔལ་དང་ཚོལ་ཁྲོའི་སྡུག་བསྔལ་དང་སྡིག་པའི་གྲོགས་པོ་དང་འདྲེ་བར་བྱེད་པའི་སྡུག་བསྔལ་དང་བུ་དང་བུ་མོ་དང་གཉེན་འདུན་རྣམས་ཀྱི་བྲེལ་དོག་གི་སྡུག་བསྔལ་དང་བཀྲེས་པ་དང་སྐོམ་པའི་སྡུག་བསྔལ་དང་དབང་ཆུང་བའི་སྡུག་
བསྔལ་དང་རྒ་བའི་སྡུག་བསྔལ་དང་ལྷག་པར་གྱུར་པའི་སྡུག་བསྔལ་ཤིན་ཏུ་སྡུག་བསྔལ་བས་ཤིན་ཏུ་སྡུག་བསྔལ་བ་ནི་འཆི་བའི་སྡུག་བསྔལ་ལོ། །ཇི་ལྟར་རབ་ཏུ་སྟོབས་ཆེ་བའི་སྡུག་བསྔལ་ཆེན་པོ་བཅུ་དྲུག་པོ་དེ་དག་རྣམས་ནི་མིའི་འཇིག་རྟེན་པ་རྣམས་ཀྱི་ཡིན་ཏེ་འཆི་བའི་
མཐར་ཐུག་པ་རྣམས་མིའི་འཇིག་རྟེན་དུ་སྐྱེས་པ་རྣམས་ཀྱི་ཡིན་ནོ། །གང་སེམས་ཅན་གཞན་དག་རྣམས་ལ་ནི་རྣམ་པ་སྣ་ཚོགས་པའི་སྡུག་བསྔལ་གཞན་དག་རྣམས་འབྱུང་བར་འགྱུར་བ་ཡིན་ཏེ། ཤིན་ཏུ་ཡང་བསྲན་པར་མི་བཟོད་པ་རྣམས་ཡིན་ནོ། །གང་ཡང་མཐར་

ཐུག་པ་ཁོ་ནར་ཟད་པར་མི་འགྱུར་བའི་ཆོས་ཅན་དང་རབ་ཏུ་འཇིག་པར་མི་འགྱུར་བའི་ཆོས་ཅན་གྱི་བདེ་བ་ནི་འདི་དང་སྲིད་པ་གཞན་རྣམས་ན་ཡང་མེད་དོ། །དེ་ལ་རེ་ཞིག་དང་པོ་ཁོ་ནར་སྲིད་པ་བར་མ་དོར་སྐྱེས་པའི་དྲི་ཟ་སྲིད་པ་བར་མ་དོ་པའི་ཐ་སྙད་ཅན་རྣམས་ཀྱི་རྣམ་པ་ཇི་ལྟ་བུའི་
སྡུག་བསྔལ་ཡིན་ན་འདི་ལྟ་སྟེ། ལས་ཀྱི་རླུང་གིས་བཏབ་པར་གྱུར་པ་རྣམས་ཤའི་མིག་གིས་མངོན་སུམ་དུ་བལྟ་བར་བྱར་མེད་པར་ལྷའི་མིག་གིས་མཐོང་བར་གྱུར་པ་དང་། ཐོགས་པ་མེད་པར་གྱུར་པའི་རང་བཞིན་ཅན་དེ་ཡང་གང་གི་ཚེ་མིར་སྐྱེ་བར་འགྱུར་བ་ཡིན་པ་དེའི་ཚེ། ཇི་
ལྟ་བུའི་རྣམ་པར་འདི་སྐྱེ་བར་འགྱུར་བ་རྣམས་དང་རྣམ་པ་ཇི་ལྟ་བུའི་ཁྱིམ་དུ་འདི་སྐྱེ་བར་འགྱུར་བ་རྣམས་ཀྱང་སྟེ། དམན་པ་དང་བར་མ་དང་ཁྱད་པར་དུ་འཕགས་པའི་ཁྱིམ་རྣམས་སུ་སྦྱིན་པ་དང་ཚུལ་ཁྲིམས་དང་ཤེས་རབ་ཀྱི་འབྲས་བུ་ཅན་རྣམས་ལ་སྐྱེ་བར་འགྱུར་བ་ན། དྲི་ཟ་དེ་ཡང་
རྣམ་པ་དེ་ལྟ་བུར་འགྱུར་བ་ཡིན་ནོ། །སྲིད་པ་བར་མ་དོ་པ་འདིའི་ཟས་ཀྱི་རིགས་སུ་གྱུར་པ་རྣམས་ནི། གལ་ཏེ་དབུལ་པོའི་ཁྱིམ་རྣམས་སུ་སྐྱེ་བར་འགྱུར་ན་དེའི་ཟས་རྣམས་ཧྲུད་ཧྲུད་པོ་དང་། མདོག་ངན་པ་དང་དྲི་དང་རོ་དང་རེག་དང་ཚད་རྣམས་ཀྱང་དམན་པར་འགྱུར་ཏེ། སྦྱིན་པའི་མཐུ་
ཆུང་བར་གྱུར་པའི་ཕྱིར་ན་སྐྱེ་བ་ན་ཡང་འཐོབ་པར་མི་འགྱུར་རོ། །དེ་ལ་འདི་ནི་མིར་སྐྱེ་བར་གྱུར་པ་རྣམས་ཀྱི་སྡུག་བསྔལ་གྱི་དང་པོ་ཡིན་ནོ། །དེ་ནས་སྐྱེས་པར་གྱུར་ནས་ལས་དང་ཉོན་མོངས་པའི་དབང་གིས་མངལ་ན་གནས་པར་གྱུར་ཏེ། དབུལ་པོའི་ཁྱིམ་དུ་སྐྱེ་བར་
འགྱུར་ན་མའི་ཟས་ངན་པ་དང་། གྱོང་པོ་དང་སྐྱུར་མོའི་ཟས་རྣམས་དང་ཟས་ཆུངས་པར་གྱུར་ན་ཡང་ཤ་མ་ལ་རབ་ཏུ་བརྟེན་པས་ལྟེ་བའི་སྦུབས་ནས་རབ་ཏུ་སྤེལ་བར་བྱེད་པའི་སྲོག་ཆགས་མངལ་ན་གནས་པ་ཁ་དོག་ངན་པ་དང་ལུས་རིད་པར་འགྱུར་བ་ཡིན་ནོ། །མའི་
ལུས་གཡོ་བར་གྱུར་པའི་སྐྱོན་གྱིས་ཤིན་ཏུ་སྡུག་བསྔལ་བར་གྱུར་པས་གསུས་པའི་གསེབ་ན་རྒྱུག་པར་བྱེད་དོ། །ཟས་སུ་གྱུར་པ་གྲང་བ་དང་དྲོ་བ་དག་གིས་བྱས་པས་ཀྱང་སྟེ། དེ་ལྟར་གཟིར་བར་བྱེད་པ་མནར་བའི་མཆོག་ཏུ་ཕྱིན་པ་ལ་ཡང་གོ་སྐབས་ཡེ་མེད་པ་སྐབས་

མེད་པ་རྣམ་པར་ཁྲོ་བར་བྱེད་པ་ན་ཡང་སྤུངས་མེད་པ། གཅིན་དང་རྟུག་པའི་ཕུང་པོ་ཆེན་པོའི་ནང་དུ་བྱིང་བར་གྱུར་པ་རྣམས་ཀྱི་སྡུག་བསྔལ་ཆེན་པོ་རྣམ་པ་དུ་མ་རྣམས་ཡོད་དོ། །དེ་ལ་འདི་ནི་གཞན་གཉིས་པ་ཡིན་ཏེ། བདེ་འགྲོ་བ་རྣམས་ཀྱང་དེ་འདྲ་ན་དམྱལ་
བ་དང་ཡི་དགས་དང་དུད་འགྲོ་རྣམས་ལྟ་སྨོས་ཀྱང་ཅི་དགོས། གཞན་ཡང་སྡུག་བསྔལ་གསུམ་པ་ཡོད་དེ། དེའི་རྗེས་ཐོགས་ལ་གལ་ཏེ་མངལ་ནས་འབྱུང་བར་འགྱུར་བ་ན་མའི་སྐྱེ་གནས་ཀྱི་བུག་པའི་ཟུར་མ་མིག་ནས་གཟིར་བར་གྱུར་པ་ནི། ཇི་ལྟར་བུ་རམ་གྱི་ཤིང་འཁྲུལ་མིག་
གི་བུ་གུ་ནས་འབྱུང་བ་ན་བཙིར་བར་གྱུར་པས་འབྱུང་བར་འགྱུར་བ་དེ་བཞིན་དུ་མངལ་གྱི་དེ་ཡང་མའི་སྐྱེ་གནས་ཀྱི་བུ་ག་ནས་ཀུན་དུ་འབྱུང་བ་ཡིན་ནོ། །དེ་ལ་འདི་ནི་མངལ་ནས་སྐྱེ་བ་སྟེ་སྡུག་བསྔལ་གཞན་ཡིན་ནོ། །དེ་དག་གི་རྗེས་ཐོགས་ལ་སྡུག་བསྔལ་བཞི་པ་ཡོད་དེ། མར་སར་
པ་དང་ཆུ་ཤིང་གི་ལོ་མ་ལྟར་ཤིན་ཏུ་འཇམ་པར་གྱུར་པའི་ལུས་རབ་ཏུ་སྨིན་པ་གཞོན་ཤ་ཅན་གྱི་དཔེར་གྱུར་པའི་ལུས་དང་ལྡན་པ་རྣམས་གང་གི་ཚེ་བཙས་པ་ན་མ་མས་རྩུབ་པ་དང་རོད་རོད་པོ་དང་རྡོལ་བ་དང་མདོག་ངན་པ་དང་ལས་སུ་མི་རུང་བ་དང་རིད་པ་དང་། བར་མིག་ཅན་
མཐུག་པ་དང་རྩེ་མོ་དང་སྒྲ་མི་སྙན་པ་དག་གི་ལག་པ་གཉིས་ཀྱིས་ལེན་པར་བྱེད་པ་དེའི་ཚེ་ཇི་ལྟར་མེས་སྲེག་པར་བྱེད་པའམ། རལ་གྲིས་གཏུབ་པར་བྱེད་པ་དེ་བཞིན་དུ་ཤིན་ཏུ་འཇམ་པའི་ཕྱིར་ན་འདི་ལ་ཡང་ཟུག་གཟེར་སྐྱེད་དོ། །དེའི་ལུས་ཤིན་ཏུ་འཇམ་པོར་གྱུར་པ་འདི་
གལ་ཏེ་དང་པོར་གོས་འཇམ་པོ་རྣམས་བསྐོན་པར་གྱུར་ཀྱང་དེ་དག་རྣམས་ནི་ཇི་ལྟར་བསླངས་པ་དང་མཐུག་པ་དང་རྩུབ་པ་དང་རྡོལ་བ་དང་རབ་ཏུ་རྙིངས་པ་དང་བཙེམས་པ་དང་བསྐུམས་པ་རྣམས་ཀྱི་ནང་དུ་ལུས་བཅུག་པ་བཞིན་དུ་འགྱུར་རོ། །གྲང་བའི་དུས་སུ་འདི་ཡང་ཤིན་ཏུ་གྲང་
བར་འགྱུར་ཏེ། བཙས་པ་ན་ཁྱིམ་གང་ཡིན་པར་ནི་གྲང་བས་ཤིན་ཏུ་ཡང་ཉེན་པར་འགྱུར་རོ། །དེ་བཞིན་དུ་ཚད་པའི་དུས་སུ་ཚད་པ་ཤིན་ཏུ་སྟོབས་ཆེ་བར་འགྱུར་ཏེ། གང་གིས་ཤིན་ཏུ་སྲེག་པར་བྱེད་པ་སྦྱིན་པ་དམན་པ་ཉིད་ཀྱི་ཕྱིར་ན་མནར་བར་འགྱུར་རོ། །ནང་དུ་ཡང་

བསྲེགས་པས་སྡུག་བསྔལ་གྱིས་མའི་སྐྱེ་གནས་ནས་འབྱུང་བར་འགྱུར་རོ། །འདིའི་སྦྱིན་པ་དམན་པ་ཡིན་པའི་ཕྱིར་ན་དེའི་རྗེས་ཐོགས་ལ་ཟས་ཀྱིས་སྡུག་བསྔལ་བར་འགྱུར་ཏེ། ནུ་མ་དག་གི་དང་ཟས་ཟ་བར་བྱེད་པ་ན་ཡང་སྡུག་བསྔལ་བར་འགྱུར་རོ། །རེ་ཞིག་ནུ་མ་དག་
ནི་མ་ཟས་ཉུང་བར་གྱུར་པས་དེའི་ནུ་ཞོ་རྣམས་ཀྱང་ཉུང་བར་འགྱུར་ཏེ། གང་གིས་ཤིན་ཏུ་རིད་པ་དང་མདོག་ཉམས་པ་དང་མདོག་ངན་པ་དང་རྗུད་པར་གྱུར་པ་དང་རྒྱུས་པ་དང་རུས་པ་དང་པགས་པ་རྣམས་ཀྱི་ལྷག་མ་ཙམ་དུ་གྱུར་པའི་ལུས་བཀྲེས་པར་གྱུར་པ་ནད་རྣམས་འདྲེན་
པར་བྱེད་པའི་ལུས་སུ་འགྱུར་རོ། །རྟག་ཏུ་རྟེན་དུ་མི་བཟོད་པའི་ལུས་སུ་འགྱུར་རོ། །དེ་ནས་དུས་གཞན་ན་ཟས་དང་སྐོམ་བག་ཙམ་ཡོད་པར་གྱུར་ན་ཡང་། དེ་དེ་ཁོ་ན་བཞིན་དུ་ཡོངས་སུ་འཛིན་པར་བྱེད་པའི་རྣམ་པར་རྟོག་པས་ཡོངས་སུ་བཅོམ་པའི་ཕྱིར་དྲི་དང་རོ་དང་
རེག་བྱ་རྣམས་ཆུང་ཞིང་དམན་པ་དང་གཞན་རྣམས་ཀྱི་ཟས་ཀྱིས་ཏེ། གལ་ཏེ་ཤེད་ན་སྲོག་ཀུན་ནས་གཏོང་བའམ་ཤིན་ཏུ་རིད་པས་འཛིན་པར་འགྱུར་རོ། །དེ་ལྟར་ཡིན་པས་ཡང་གལ་ཏེ་ན་ནུ་མ་ཟས་སུ་ཟ་བར་འགྱུར་ཏེ། ཇི་ལྟ་བར་མཛེས་པ་ནི་ལུས་ལྟད་མོར་ཆེ་བས་སྲོག་
འཛིན་པར་བྱེད་པ་ཡིན་ནོ། །དེ་ལྟར་འདིའི་སྦྱིན་པ་ངན་པ་ཡིན་པའི་ཕྱིར་ན་འདིའི་མ་ལུས་པ་ཀུན་ཡང་རབ་ཏུ་ཟད་པར་འགྱུར་བ་ཡིན་ནོ། །དེས་ན་ཡང་ཟས་བསོད་པར་འགྱུར་བ་རྣམས་ཀྱིས་འདིའི་གསུས་པ་ལེགས་པར་ཚིམ་པར་གྱུར་པ་ཡིན་ན་ཡང་། དེ་ལྟར་ན་ཡང་ཟས་
ཀྱིས་བྱས་པའི་སྡུག་བསྔལ་ཆེན་པོར་འབྱུང་བར་འགྱུར་རོ། །དེའི་རྗེས་ཐོགས་ལ་འདིའི་སྡུག་བསྔལ་ལྔ་པ་ཡོད་པ་རྣམས་ནི་འདི་ལྟ་སྟེ། འདོད་པས་བྱས་པ་རྣམས་སོ། །དེ་དེ་ལྟར་ཟས་ཀྱིས་བྱས་པའི་སྡུག་བསྔལ་རྣམས་ཀྱིས་གཟིར་བར་གྱུར་པ་ན་འདི་ལ་རྣམ་པ་སྣ་ཚོགས་
པ་རྣམས་སུ་རྒྱུ་བར་བྱ་བའི་འདོད་པ་འབྱུང་བར་འགྱུར་ཏེ། ལྟོ་བཀྲེས་པས་ཉེ་བར་བཅོམ་པ་ཡིན་པའི་ཕྱིར་རོ། །དེ་དེས་གཟིར་བར་གྱུར་པའི་ཕྱིར་གལ་ཏེ་ན་རྐུ་བར་བྱེད་དོ། །གལ་ཏེ་ན་ཕན་པ་མ་ཡིན་པའི་ལས་གཞན་ཅུང་ཟད་ཙམ་ཡང་བྱེད་པར་འགྱུར་ཏེ། ལྷན་ཅིག་ཏུ་

གནས་པ་དེ་གསོད་པར་བྱེད་པས་འཆི་བའམ་འཆི་བ་ལ་ཐུག་པའི་སྡུག་བསྔལ་ལྷག་པར་འབྱུང་བར་འགྱུར་རོ། །སྡུག་བསྔལ་འདི་དག་རྣམས་ཐམས་ཅད་ཀྱི་ཡང་རྩེ་མོར་ཕྱིན་པར་སྡུག་བསྔལ་ནི་འདི་ལྟ་སྟེ། བཀྲེས་པ་དང་སྐོམ་པས་བྱས་པའི་སྡུག་བསྔལ་ལོ། །
དེ་ལ་དུས་དེའི་ཚེ་ན་མུ་སུ་ལུན་དྷ་དེས་འཐབ་བྲལ་བ་དེ་དག་རྣམས་ལ་ཚིགས་སུ་བཅད་པ་བརྗོད་པ། ཇི་ལྟར། ཕལ་ཆེར་འཁོར་བའི་སྡུག་བསྔལ་ལ། །བཀྲེས་པའི་སྡུག་དང་མཚུངས་མེད་པ། །གང་གིས་སེམས་ཅན་འདི་དག་གཟིར། །མི་དགེའི་བདག་ཉིད་བྱས་པ་
ལས། །རང་གི་ལུས་ལས་ལངས་པའི་མེ། །བཀྲེས་པ་ཞེས་ནི་མངོན་པར་བརྗོད། །རྣམ་རྟོག་མེས་ནི་ལྗོན་ཤིང་བཞིན། །འཇིག་རྟེན་གསུམ་གྱི་ལྷག་མ་སྲེག །འཇིག་རྟེན་གཞན་དུ་མེ་འདི་ནི། །འགྲོ་ཞིང་རྗེས་སུ་འགྲོ་བར་འགྱུར། །བསྐལ་པ་བརྒྱ་ཡི་བར་དུ་
ཡང་། །འཆི་བར་གྱུར་པ་མཐོང་བ་མེད། །གང་ཡང་བྱིས་རྣམས་མི་དགེ་བྱེད། །གང་ཡང་འགྲོ་བ་ངན་སོང་དུ། །དེ་ནི་ཟས་རྣམས་དག་གི་ནི། །གཞི་ལས་ཡིན་པར་མཁས་རྣམས་བརྗོད། །ལྟོགས་པའི་འབྲས་བུ་ཇི་བཞིན་དུ། །མི་ནི་རང་དོན་ལ་བརྩོན་མིན། །
ཁམས་གསུམ་མ་ལུས་འདི་དག་རྣམས། །ཟས་ཀྱི་དབང་གིས་འཇུག་པ་ཡིན། །དེ་དག་གང་ཕྱིར་རྣམ་སྣ་ཚོགས། །འཇིག་རྟེན་འདི་དག་མི་ལས་བྱུང་། །སྲིད་གསུམ་ཆུ་བོ་དེ་ཐམས་ཅད། །ཟས་དོན་གཉེར་བ་བྱེད་ལས་ཡིན། །དེ་ལྟར་མུ་སུ་ལུན་དྷ་དེས་རང་བཞིན་གྱི་ལྷ་དེ་
དག་རྣམས་ལ་རྗོད་པར་བྱེད་དོ། །གཞན་ཡང་ལྷ་དག་མིའི་འཇིག་རྟེན་དུ་མི་རྣམས་ཀྱི་སྡུག་བསྔལ་གང་དག་ཅེ་ན། འདི་ལྟ་སྟེ་མི་སྡུག་པ་དང་ཕྲད་པ་ཞེས་བྱ་བའོ། །དེ་ལ་དྲུག་པོ་འདི་དག་རྣམས་ནི་མི་སྡུག་པ་དང་ཀུན་དུ་ཕྲད་པ་ཡིན་ནོ། །དེ་ལ་དེ་དག་རྣམས་ཀྱང་གང་ཞེ་ན། འདི་
ལྟ་སྟེ་མིག་གིས་གཟུགས་རྣམས་གང་དག་མཐོང་བ་ནས་མཛའ་བོ་མ་ཡིན་པ་ལ་སོགས་པ་དེ་དག་རྣམས་ནི་འདོད་པ་མ་ཡིན་པ་དང་སྡུག་པ་མ་ཡིན་པ་རྣམས་མཐོང་བ་ཡིན་ནོ། །གཟུགས་འདི་མཐོང་བར་གྱུར་པ་ལས་ཀྱང་ཡིད་ཀྱི་རྗེས་སུ་མི་འཐུན་ཞིང་དང་བ་མ་ཡིན་པར་འགྱུར་རོ། །

སེམས་དང་སེམས་ལས་བྱུང་བ་རྣམས་རྙོག་པ་ཅན་དུ་བྱས་པ་ལས་ཀྱང་འཇིགས་པ་དང་བཅས་པར་འགྱུར་བ་དང་། ཉེ་བར་འཚེ་བ་དང་བཅས་པའི་སྡུག་བསྔལ་རྣམས་སེམས་དང་སེམས་ལས་བྱུང་བ་རྣམས་ལ་སྐྱེད་པར་བྱེད་དོ། །དེ་ལ་གཟུགས་ཀྱི་ཚོགས་དེ་དག་རྣམས་ཀུན་ལ་དང་
པོར་འདི་འཇུག་པར་འགྱུར་བ་ནི། འདི་ལྟ་སྟེ་དགྲ་བོ་དང་ཕྲད་པའམ་སྡིག་པའི་གྲོགས་པོའི་སྐྱེས་བུ་དང་ཕྲད་པའོ། །དེ་བཞིན་དུ་རྣ་བས་ཀྱང་སྒྲ་རྣམས་ཐོས་པ་ན་མི་ཕན་པ་དང་མི་སྡུག་པ་དང་ཡིད་དུ་མི་འོང་ཞིང་རྗེས་སུ་མི་འཐུན་པ་རྣམས་འདི་ལ་སྐྱེད་པར་བྱེད་པ་དང་། ཡིད་ཀྱི་རྒྱུན་
ཀྱང་རྙོག་པ་ཅན་དུ་བྱེད་པ་འདི་ནི་མི་སྡུག་པ་དང་ཕྲད་པའི་སྡུག་བསྔལ་གཞན་ཡིན་ནོ། །དེ་ལ་མི་འཐུན་པའི་སྒྲ་རྣམས་ཀྱི་ཕུལ་དུ་ཕྱིན་པ་ནི་འདི་ཡིན་ཏེ། འདི་ལྟར་དམ་པ་མ་ཡིན་པའི་ཆོས་སྒྲོགས་པ་ན་ཡང་དེ་ཉན་པར་བྱེད་པའོ། །འདི་ཐོས་ནས་ལུས་ཞིག་པ་ན་ཡང་ངན་སོང་ལོག་
པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །གང་ཡང་གཞན་ཅུང་ཟད་སྒྲ་མི་སྙན་པ་དང་མི་སྡུག་པ་དང་མི་འཐུན་པ་དང་ཀུན་ནས་ཉོན་མོངས་པ་ཅན་རྣམས་གང་དག་ཐོས་ནས་འདི་དག་རྣམས་ཀྱི་ཡིད་མི་བདེ་བ་སྐྱེད་པར་བྱེད་པ་དང་། སེམས་ཀྱི་རྒྱུད་ཀྱང་རྙོག་པ་ཅན་
དུ་བྱེད་པར་འགྱུར་བ་དང་། མི་འདོད་པ་མི་སྡུག་པ་ཡིད་དུ་མི་འོང་བ་འདི་ནི་མིའི་འཇིག་རྟེན་པའི་མི་རྣམས་ཀྱི་མི་སྡུག་པ་དང་ཕྲད་པ་ལས་སྐྱེས་པའི་སྡུག་བསྔལ་ཞེས་བརྗོད་དོ། །ལྷ་དག་གང་མི་རྣམས་ཀྱི་མིའི་འཇིག་རྟེན་དུ་མི་འཐུན་པ་དང་ཕྲད་པ་ལས་སྐྱེས་པའི་སྡུག་བསྔལ་གསུམ་པ་
གཞན་གང་ཞེ་ན། འདི་ལྟ་སྟེ་སྣས་ཇི་སྲིད་དུ་དྲི་རྣམས་སྣོམ་པར་བྱེད་པ་ན་མི་འདོད་པ། མི་སྡུག་པ། ཡིད་དུ་མི་འོང་བ་རྣམས་དང་། གང་ཡང་འདིས་བསྣམས་པར་གྱུར་པས་སེམས་ཀྱི་རྒྱུད་རྙོག་པ་ཅན་དུ་སྐྱེད་པར་བྱེད་པ་དང་། ཡང་ཡིད་ཀྱི་རྗེས་སུ་མི་འཐུན་པར་གྱུར་པ་
གང་གིས་འདི་ཀུན་ནས་ཉོན་མོངས་པ་ཅན་གྱི་སྡུག་བསྔལ་རྣམས་སྐྱེད་པར་བྱེད་པའོ། །ཀྱེ་ཧོ་ལྷ་དག་དེ་ལ་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་པ་དང་ཕྲད་པ་རྣམས་ཀྱི་ཕུལ་དུ་ཕྱིན་པ་ཡིན་ཏེ། དགེ་ལེགས་སུ་གྱུར་པའི་སྐྱེས་བུ་གཞན་དག་གང་ཡང་རུང་བ་རྣམས་ཀྱིས་ཆོས་

ལ་མཆོད་པར་བྱ་བའི་རྒྱུ་མཚན་དུའམ་དགེ་འདུན་ལ་ཡང་རུང་སྟེ། བདུག་སྤོས་ཕུལ་བར་གྱུར་པ་ལས་བློ་གྲོས་དམན་པར་གྱུར་པ་དང་ཡིད་མོང་རྟུལ་བར་གྱུར་པ་གང་དག་གིས་ཇི་ལྟར་འགྲོ་བར་གྱུར་པ་ནའམ་འདུག་པར་གྱུར་པ་ན་ཡང་རུང་སྟེ། འདུན་པའི་འདོད་ཆགས་
སྔོན་དུ་འགྲོ་བས་དང་། མངོན་པར་གཙེ་བ་སྔོན་དུ་འགྲོ་བས་དང་། གུས་པ་མེད་པ་སྔོན་དུ་བཏང་བས་དང་། ཐུལ་འོག་ཏུ་འཇུག་པ་སྔོན་དུ་བཏང་བས་ཀྱང་རུང་སྟེ། ཀུན་ནས་ཆགས་པ་སྣ་ཕྱོགས་སུ་བཏང་བས་དེ་ཡང་སྣོམ་པར་བྱེད་དོ། །དེའི་རྒྱུ་ལས་ལུས་ཞིག་པར་གྱུར་ནས་
ངན་སོང་ལོག་པར་ལྟུང་བར་དམྱལ་བར་སྐྱེའོ། །སྐྱེས་བུ་ངན་པ་རྣམས་སྣའི་རྒྱུ་དང་སྣ་དང་ཀུན་དུ་འབྲེལ་པ་ལས་མི་དགེ་བའི་བློ་དང་ལྡན་པ་རྣམས་ནི་ལུས་ཞིག་པར་གྱུར་པ་དང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །ཀྱེ་ལྷ་དག་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་
པ་རྣམས་དང་ཕྲད་པ་ལས་ཀུན་དུ་སྐྱེས་པའི་སྡུག་བསྔལ་ཞེས་བརྗོད་དོ། །གཞན་ཡང་མི་སྡུག་པ་དང་ཕྲད་པ་ལས་སྐྱེས་པའི་ཤིན་ཏུ་སྡུག་བསྔལ་བ་རྣམས་ཡོད་དོ། །དེ་ཡང་གང་ཞེ་ན། འདི་ལྟ་སྟེ་མི་རྣམས་ཀྱི་མིའི་འཇིག་རྟེན་ན་བློ་གྲོས་ངན་པ་དང་ལྡན་པའི་སྐྱེས་བུ་
ངན་པ་རྣམས་རོའི་དོན་དུ་ཉེས་པ་བྱེད་པའི་ལས་རྣམས་བྱེད་པ་རྣམས་ཡིན་ལ། གང་དག་གི་རྒྱུས་ལུས་ཞིག་པ་ན་ངན་སོང་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །གང་ཡང་དགེ་སྦྱོང་མ་ཡིན་པར་དགེ་སྦྱོང་གི་ཆ་བྱད་འཛིན་པ་ནང་རུལ་
པར་གྱུར་པ་ཐོས་པ་དང་མི་ལྡན་པ་དུང་གི་སྒྲ་དང་མཚུངས་པར་སྤྱོད་པ་རྣམས། དགེ་འདུན་གྱི་ནང་དུ་ཞུགས་པར་གྱུར་པའམ་སྦྱིན་བདག་གི་ཁྱིམ་དུ་སོང་བར་གྱུར་པ་ན་ཡང་རུང་སྟེ། ལྕེ་དང་རབ་ཏུ་འབྲེལ་བ་དང་དེ་ལ་སོང་བའི་བློས་དགེ་སློང་གི་ཆ་བྱད་འཛིན་པས་རོ་དག་མྱོང་
བར་བྱེད་པ་ནི། རྒྱུ་དེ་དང་རྐྱེན་དེ་དག་གིས་ལུས་ཞིག་པ་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །གང་ཡང་ལེ་ལོ་ཅན་གྱི་དགེ་སློང་གཞན་རྣམས་ནི་བསམ་གཏན་གྱིས་བསམ་གཏན་དུ་བྱེད་པའི་བྱ་བ་ཡོངས་སུ་བཏང་ནས། ཡིད་དེ་ལ་སོང་བ་དང་རང་གི་འདུན་

པའི་འདོད་ཆགས་སྔོན་དུ་འགྲོ་བས་ཟས་ཀྱི་དོན་དུ་གནས་ན་གནས་རྣམས་སུ་ཉེ་བར་འགྲོ་བར་བྱེད་དོ། །རྒྱུ་དེ་ལས་ལེ་ལོ་ཅན་དེ་ལུས་ཞིག་པ་ན་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །ཀྱེ་ཡེའི་ལྷ་དག་དེ་ལ་འདི་ནི་མིའི་འཇིག་རྟེན་དུ་མི་རྣམས་ལ་ལྕེ་རོ་དང་ཀུན་
དུ་འབྲེལ་པའི་མི་སྡུག་པ་དང་ཕྲད་པ་ལས་བྱུང་བའི་སྡུག་བསྔལ་ཡིན་ནོ། །གཞན