Kinh tạng Tây Tạng (Kangyur Đại Học) — 063_མདོ་སྡེ།_ཛ

ཤི་གོས་ཀྱི་སྟེང་བཞག་ན། །ཀུན་གྱིས་མི་གོས་ལྟ་བུར་དགྲ་བཅོམ་རྣམས། །མེ་ལོང་བཞིན་དུ་སེམས་དག་དྲི་མ་མེད། །ཁྱོད་ཀྱི་ཉན་ཐོས་དེ་དག་ནི། །
བྱམས་པ་ཤིན་ཏུ་བསྒོམས་ནས་གནས། །ཉན་ཐོས་བརྟན་རྣམས་ཡེ་ཤེས་དགའ། །ཉོན་མོངས་མ་མཆིས་གདམས་ངག་སྟོན། །རྒྱལ་པོ་འདིར་ནི་མཆིས་པ་ཡང་། །དེ་དག་རྣམས་ཀྱིས་མ་ཚོར་ལགས། །གང་གི་ཉན་ཐོས་དེ་དག་ནི། །ཞི་ཞིང་ཆོས་ཀུན་མི་གནས་པ། །ཅང་མཁྱེན་ཁྱོད་ལ་
ཕྱག་འཚལ་ལོ། །སྐྱེས་མཆོག་ཁྱོད་ལ་ཕྱག་འཚལ་ལོ། །ཡེ་ཤེས་ཀྱིས་ནི་སྐུ་བསྒོམས་ཤིང་། །ཡེ་ཤེས་སྐུ་ཡིས་ཞུགས་པ་ལགས། །ཡེ་ཤེས་སྐུ་ཡིས་རྫོགས་སངས་རྒྱས། །སྐུ་ཡིས་ཟླ་བ་གསུམ་དུ་བཞུགས། །རྫོགས་སངས་རྒྱས་པ་སྨྲ་རྣམས་མཆོག །ཡེ་ཤེས་ལྡན་པ་

རྟག་ཏུ་མཛེས། །ཕྱི་མའི་དུས་ན་ཡེ་ཤེས་ལས། །ཉམས་འགྱུར་དགེ་སློང་རྣམས་ཀྱང་འབྱུང་། །རྒོད་ཅིང་དབང་པོ་ཕལ་པ་དང་། །རྒོད་པའི་དགེ་སློང་མཁྱེན་ནས་ནི། །བསོད་སྙོམས་གཅིག་གིས་ཟླ་གསུམ་དུ། །རྒྱལ་བ་ཏིང་ངེ་འཛིན་ལ་བཞུགས། །ཕྱི་མའི་དུས་ན་ཟང་ཟིང་ལ། །བརྐམ་
ཆགས་དགེ་སློང་རྣམས་འབྱུང་བས། །བསོད་སྙོམས་གཅིག་གིས་ཟླ་གསུམ་དུ། །རྒྱལ་བ་ཏིང་ངེ་འཛིན་ལ་བཞུགས། །ཕྱི་མའི་དུས་ཀྱི་དགེ་སློང་ཕྱིར། །ཁྱོད་ཀྱིས་དེ་སྐད་བཀའ་སྩལ་ཏེ། །དེ་ཚེ་གང་དག་དད་པ་རྣམས། །བསྟན་པ་འདི་ལ་བསླབས་པ་འབྱུང་། །སེམས་ཅན་གང་དག་མ་དད་པ། །ཆོས་འདི་དག་
ནི་ཐོས་ནས་ཀྱང་། །དེ་དག་དགའ་བར་མི་འགྱུར་བས། །དེ་དག་བསྐུལ་ཕྱིར་འདི་མཛད་དོ།། །།བམ་པོ་གཉིས་པ། དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་དང་བའི་སེམས་
ཀྱིས་ཡང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། དང་བའི་སེམས་ཀྱིས་བཅོམ་ལྡན་འདས་མཐོང་ནས། ཡང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཡུལ་ཀོ་ས་
ལའི་རྒྱལ་པོ་ལགས་སོ། །བཅོམ་ལྡན་འདས་བདག་ནི་ཡུལ་ཀོ་ས་ལའི་རྒྱལ་པོ་ལགས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་ཡུལ་ཀོ་ས་ལའི་རྒྱལ་པོ་གསལ་རྒྱལ་ལ་བཀའ་སྩལ་པ། རྒྱལ་པོ་ཆེན་པོས་བཀུར་སྟི་བྱས་
པ་དང་། རི་མོ་བྱས་པ་དང་། མཆོད་པ་བྱས་པས་ཆོག་གིས་ལོངས་ཤིག །ལོངས་ལ་རྒྱལ་པོ་ཆེན་པོ་རང་གི་སྟན་ལ་འདུག་ཤིག །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་སྤྱན་སྔ་ན་འདུག་ཅིང་། བཅོམ་ལྡན་འདས་ལ་མིག་མི་འཛུམས་པས་བལྟས་སོ། །བལྟས་ནས་ཀྱང་རིན་པོ་ཆེའི་
གོས་རིན་ཏང་མེད་པ་ལག་ན་ཐོགས་ཐོགས་པ་དང་། རང་གི་ལུས་ལ་གོས་གྱོན་གྱོན་པ་གང་ཡིན་པ་དེ་ལུས་ལས་ཕུད་དེ་བཅོམ་ལྡན་འདས་ལ་ཕུལ་ལོ། །ཕུལ་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་གོས་རིན་པོ་ཆེ་འདི་ནི་སྔོན་གྱི་ལས་ཀྱི་རྣམ་པར་

སྨིན་པ་ལས་གྲུབ་པ། མ་སྨད་པ། བཟང་བ། ཁ་ན་མ་ཐོ་བ་མ་མཆིས་པ། རང་གི་ལུས་ལ་འཚལ་འཚལ་བ་ལགས་ཏེ། འདི་བདག་གི་དབང་ཕྱུག་གིས་སུ་ལས་ཕྲོགས་པ་ཡང་མ་མཆིས་ཀྱི། སྔོན་ལེགས་པར་སྤྱད་པ་ལས་མངོན་པར་གྲུབ་པ་ལགས་ན། བཅོམ་ལྡན་འདས་ཀྱིས་བཞེས་སུ་གསོལ།
དེ་ནས་ཁྱིམ་བདག་མགོན་མེད་ཟས་སྦྱིན་འདི་སྙམ་དུ་སེམས་པར་གྱུར་ཏེ། འདི་ལྟར་ཡུལ་ཀོ་ས་ལའི་རྒྱལ་པོ་འདིས་གོས་རིན་པོ་ཆེ་ཡོངས་སུ་སྤྱད་སྤྱད་པ་འདི་བཅོམ་ལྡན་འདས་ལ་ཕུལ་ལོ་སྙམ་མོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱི་མཐུས་ཁྱིམ་བདག་མགོན་མེད་
ཟས་སྦྱིན་གྱི་སེམས་ཀྱི་རྟོག་པ་སེམས་ཀྱིས་ཤེས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་གོས་རིན་པོ་ཆེ་འདི་སྔ་ནས་བཅོམ་ལྡན་འདས་ལ་དབུལ་ལོ་སྙམ་པའི་སེམས་དེ་ལྟ་བུ་ནི་མ་སྐྱེས་ལགས་ཀྱི། བཅོམ་ལྡན་འདས་མཐོང་ནས་ནི་སེམས་སྐྱེས་
ལགས་ན་ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་གོས་རིན་པོ་ཆེ་འདི་བཞེས་སུ་གསོལ། བཅོམ་ལྡན་འདས་སེམས་འདི་ནི་མྱུར་དུ་འགྱུར་བ་ལགས་ལ། བཅོམ་ལྡན་འདས་དེ་བཞིན་གཤེགས་པ་དེ་དག་ནི་རྙེད་པར་དཀའ་སྟེ། ཨུ་དུམ་བ་རའི་མེ་ཏོག་བཞིན་དུ་མཆོག་ཏུ་རྙེད་པར་
དཀའ་བས་དབུལ་ལོ་སྙམ་པ་དེ་སྐྱེས་ལགས་སོ། །བདག་གིས་བཅོམ་ལྡན་འདས་མཉེས་པར་བགྱིས་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ཁྱོད་ནི་རྐང་གཉིས་གཙོ་བོ་སྟེ། །བསོད་ནམས་གཟི་བརྗིད་ཀུན་ཏུ་འཕགས། །ཉོན་མོངས་ཅན་སེམས་མ་གཏོགས་པར། །མཐོང་
ན་དགའ་བ་སུ་མི་སྐྱེད། །སེམས་ཅན་མ་རུངས་གང་དག་གིས། །ཐུབ་དབང་མ་མཆོད་དེ་དག་བརླག །ཨུ་དུམ་བ་རའི་མེ་ཏོག་ལྟར། །གསལ་མཛད་འཇིག་རྟེན་དག་ན་དཀོན། །ཤཱཀྱ་སེང་གེ་མི་ཡི་མཆོག །མགོན་པོ་བདག་གིས་དེང་མཉེས་ཀྱིས། །ཡེ་ཤེས་ལ་ནི་བདག་སྨོན་པས། །
ཁྱོད་ལ་དེང་ནི་མཆོད་པ་བགྱིད། །བྱང་ཆུབ་ཡེ་ཤེས་གང་འདོད་པ། །སངས་རྒྱས་རྣམས་ལ་མཆོད་འདི་ལགས། །སངས་རྒྱས་ཡེ་ཤེས་ཆེད་ཀྱི་ཕྱིར། །མི་མཆོག་ལ་ནི་མཆོད་བགྱིད་ན། །མགོན་པོ་བདག་གིས་བཞེས་སུ་གསོལ། །རྒྱལ་བ་བདག་གིས་བཞེས་སུ་གསོལ། །སེམས་

ཅན་ཀུན་གྱི་དོན་སླད་དུ། །ཁྱོད་ལ་བདག་ནི་ན་བཟའ་འབུལ། །བདག་གིས་སེམས་ནི་ཚར་བཅད་ཅིང་། །བདག་གིས་སེར་སྣ་བཅོམ་པས་ན། །ཆོས་རྣམས་བསྐྱེད་པའི་ཆེད་ཀྱི་ཕྱིར། །བདག་གིས་སེམས་ལ་གཏོང་བ་སྐྱེས། །དེ་ནས་བཅོམ་ལྡན་འདས་ཀྱིས་ཡུལ་ཀོ་ས་ལའི་རྒྱལ་པོ་གསལ་
རྒྱལ་གྱིས་ན་བཟའ་ཕུལ་བ་བཞེས་ནས་རྒྱལ་པོ་གསལ་རྒྱལ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་སེམས་བསྐྱེད་པ་རྒྱ་ཆེན་པོ་སྐྱེས་པ་ལེགས་སོ་ལེགས་སོ། །རྒྱལ་པོ་ཆེན་པོ་དེའི་ཕྱིར་ཆོས་བཞི་པོ་དག་ལ་བརྩོན་པར་བྱ་སྟེ། བཞི་གང་ཞེ་ན། རྒྱལ་པོ་ཆེན་པོ་འདི་ལྟ་སྟེ། རྒྱལ་པོ་རྒྱལ་
རིགས་སྤྱི་བོ་ནས་དབང་བསྐུར་བ་ཡུལ་ན་མཐུ་དང་བརྩོན་འགྲུས་ཐོབ་པས་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པའི་ཐད་དུ་འགྲོ་བར་བྱ་ཞིང་ཡོངས་སུ་དྲི་བར་བྱ་བ་དང་། དེ་བཞིན་གཤེགས་པའི་བསྟན་པ་བསྲུང་བ་དང་བསྐྱབ་པའི་ཕྱིར་བསྒྲུབ་པར་བྱ་བ་དང་། ཟབ་མོ་ལ་མོས་པས་ཆོས་བཙལ་བར་བྱ་
བའི་ཕྱིར་སྤྲོ་བར་བྱ་བ་དང་། ལོག་པར་ལྟ་བ་དང་བྲལ་བས་ཡང་དག་པ་ཉིད་དུ་ངེས་པར་བྱ་བའི་ཕྱིར་སྤྲོ་བར་བྱ་བ་སྟེ། རྒྱལ་པོ་ཆེན་པོ་ཆོས་བཞི་པོ་དེ་དག་ལ་བརྩོན་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བདེ་བར་གཤེགས་པས་དེ་སྐད་གསུངས་ཏེ། སྟོན་པས་
གཞན་ཡང་འདི་སྐད་ཅེས་བཀའ་སྩལ་ཏོ། །དགེ་སློང་ཚུལ་ཁྲིམས་ལྡན་རྣམས་ལ། །གུས་པ་དག་ནི་རྟག་བྱེད་ཅིང་། །དངོས་པོ་ཀུན་གྱིས་འདྲི་བྱེད་པ། །དེས་ནི་ཤེས་རབ་རྣམ་པར་འཕེལ། །དགེ་སློང་རྣམས་ལ་གུས་པ་དག །བྱས་པའི་ལས་ནི་དགེ་བ་ཡི། །ཇི་ལྟར་དག་པ་དེ་བཞིན་དུ། །
དེ་ཡི་སེམས་ནི་དག་པར་འགྱུར། །བསྟན་པ་བསྲུང་བ་བྱས་པ་ནི། །རྟག་ཏུ་ཀུན་ནས་བསྲུང་བ་ཡིན། །ཡན་ལག་དང་པོ་འདི་ཡིས་ནི། །ལུས་ནི་ངེས་པར་དག་པར་འགྱུར། །རྒྱལ་རིགས་དག་གིས་ཟབ་མོའི་ཆོས། །རྟག་ཏུ་ཉན་ཅིང་འདུག་བྱེད་ན། །ཕྱིར་ཞིང་ཐོས་པར་འདོད་འགྱུར་ཞིང་། །ཡང་
དང་ཡང་དུ་ཚོལ་བར་འགྱུར། །ཟབ་མོའི་ཆོས་ནི་ཐོས་ནས་ཀྱང་། །ལོག་པ་དག་ནི་སྤྱོད་མི་བྱེད། །རྒྱལ་པོ་ལོག་པར་ལྟ་བྲལ་ཞིང་། །ཡང་དག་ཆོས་ནི་ཤེས་པར་འགྱུར། །ཟབ་མོའི་ཆོས་ནི་ཤེས་ནས་ཀྱང་། །དེ་ནི་ལོག་པར་མི་སྤྱོད་ཅིང་། །སྡིག་པ་ཀུན་དང་བྲལ་བས་ན། །དེས་ན་རྒྱལ་པོ་ཁྱད་

པར་འཕགས། །ཆོས་ཀྱི་དམ་པ་བཞི་པོ་ལ། །རྒྱལ་རིགས་བཞི་པོ་རྟག་པར་ནི། །འགྲོ་བ་ངན་པར་དེ་མི་འགྲོ། །དེ་ལ་བདེ་འགྲོ་རྙེད་མི་དཀའ། །སངས་རྒྱས་མྱུར་དུ་མཐོང་འགྱུར་ཞིང་། །དེ་ལས་ཆོས་ཀྱང་ཉན་བྱེད་ལ། །རྫོགས་སངས་རྒྱས་ཀྱིས་བཤད་པ་ཡི། །ཟབ་མོའི་ཆོས་ནི་ཤེས་པར་
འགྱུར། །ཆོས་བཞི་དག་ལ་རྟེན་བྱེད་ཅིང་། །སེམས་ཀྱིས་བྱང་ཆུབ་སྔོ་བྱེད་ན། །ཡར་གྱི་ངོ་ཡི་ཟླ་བ་ལྟར། །དེ་ཡི་ཡེ་ཤེས་འཕེལ་བར་འགྱུར། །སེམས་ཀྱིས་བྱང་ཆུབ་སྔོ་བྱེད་ཅིང་། །ཆོས་མཆོག་དག་ནི་ཚོལ་བྱེད་ན། །རྐང་གཉིས་དམ་པ་རྫོགས་སངས་རྒྱས། །འཇིག་རྟེན་དམ་པར་དེ་འོས་སོ། །
ཆོས་ནམས་ཀུན་གྱི་དམ་པ་སྟེ། །ཆོས་མཆོག་དག་ནི་སྟོན་པ་པོ། །དེ་ལ་མཆོད་པ་བྱས་ནས་ནི། །ཐེག་པ་མཆོག་ཏུ་ངེས་པར་འགྱུར། །རྒྱལ་པོ་རྒྱལ་རིགས་གང་ཞིག་ནི། །ཆོས་ཀྱི་དམ་པ་ཚོལ་འདོད་པ། །ཡང་དང་ཡང་དུ་ཆོས་ཀྱི་མཆོག །ཆོས་བཞི་པོ་ལ་སྟེན་པར་བྱོས། །རྒྱལ་པོ་ཆེན་
པོ་གཞན་ཡང་མཆོག་འོས་ནི་སེམས་ཅན་རྣམས་ཀྱི་ཕྱིར་ཆོས་ཀྱི་མཆོག་རྣམ་པར་འབྱེད་དོ། །རྒྱལ་པོ་ཆེན་པོ་ཆོས་ཀྱི་མཆོག་གང་ཞེ་ན། རྒྱལ་པོ་ཆེན་པོ་ཆོས་ཀྱི་མཆོག་ནི་ཆོས་ཐམས་ཅད་གཟུང་བར་བྱ་བ་མ་ཡིན་པའོ། །སུས་གཟུང་བར་བྱ་བ་མ་ཡིན་ཞེ་ན། །རྒྱལ་པོ་ཆེན་པོ་སུས་ཀྱང་མི་
འཛིན་པ་དེའི་ཕྱིར་ཆོས་ཐམས་ཅད་གཟུང་བར་བྱ་བ་མ་ཡིན་ནོ་ཞེས་བྱའོ། །རྒྱལ་པོ་ཆེན་པོ་ཆོས་ཐམས་ཅད་ཆོས་ཐམས་ཅད་ཅེས་བྱ་བ་ཇི་ལྟ་བུ་ཞེ་ན། རྒྱལ་པོ་ཆེན་པོ་ཆོས་དེ་དག་ཐམས་ཅད་ནི་ཆོས་མ་ཡིན་ཏེ། དེས་ན་ཆོས་ཐམས་ཅད་ཆོས་ཐམས་ཅད་ཅེས་བྱའོ། །དེ་དག་ཆོས་མ་ཡིན་
པ་ཇི་ལྟ་བུ་ཞེ་ན། རྒྱལ་པོ་ཆེན་པོ་གང་ཇི་ཙམ་དུ་སྤྱོད་པ་དེ་ཙམ་དུ་ཆོས་ཀྱི་འདུ་ཤེས་མ་ཡིན་ནོ། །རྒྱལ་པོ་ཆེན་པོ་ཆོས་ཀྱི་འདུ་ཤེས་མ་ཡིན་པ་ཞེས་བྱ་བ་ནི་མི་ཤེས་པ་འབྱུང་བའོ། །གལ་ཏེ་འདུ་ཤེས་སུ་དམིགས་ན་འདུ་ཤེས་མ་ཡིན་པར་འགྱུར་རོ། །རྒྱལ་པོ་ཆེན་པོ་འདུ་ཤེས་གཞན་དུ་གྱུར་
ན་འདུ་ཤེས་མ་ཡིན་པར་འགྱུར་ཏེ། རྒྱལ་པོ་ཆེན་པོ་འདུ་ཤེས་ཞེས་བྱ་བ་འདི་ནི་བརྡའོ། །རྒྱལ་པོ་ཆེན་པོ་འདུ་ཤེས་ཞེས་བྱ་བ་འདི་ནི་ཆགས་པའོ། །རྒྱལ་པོ་ཆེན་པོ་འདུ་ཤེས་ཡོད་ན་བྱིས་པ་ཞེས་བྱའོ། །རྒྱལ་པོ་ཆེན་པོ་བྱིས་པ་ཞེས་བྱ་བ་ནི་བྱིས་པ་གནས་པར་བྱེད་པའོ། །ཅིའི་ཕྱིར་

བྱིས་པ་གནས་པར་བྱེད་པ་ཞེས་བྱ་ཞེ་ན། བྱིས་པ་གནས་པར་བྱེད་པའི་ཕྱིར་རོ། །ཅི་ནས་གནས་པར་བྱེད་ཅེ་ན། འདུ་ཤེས་གནས་པར་བྱེད་དོ། །འདུ་ཤེས་དེ་གང་ཞེ་ན། འདི་ལྟ་སྟེ། བདག་ཏུ་འདུ་ཤེས་པ་དང་། སྲིད་པར་འདུ་ཤེས་པ་དང་། སེམས་ཅན་དུ་འདུ་ཤེས་པ་
དང་། གཟུགས་སུ་འདུ་ཤེས་པ་ནས་རྣམ་པར་ཤེས་པར་འདུ་ཤེས་པའི་བར་དང་། མིག་ཏུ་འདུ་ཤེས་པ་དང་། རྣ་བར་འདུ་ཤེས་པ་དང་། སྣར་འདུ་ཤེས་པ་དང་། ལྕེར་འདུ་ཤེས་པ་དང་། ལུས་སུ་འདུ་ཤེས་པ་དང་། ཡིད་དུ་འདུ་ཤེས་པ་ནས་འདུ་ཤེས་ཐམས་ཅད་ཀྱི་བར་དུ་གནས་པར་
བྱེད་ཅིང་། ཐ་ན་མྱ་ངན་ལས་འདས་པར་འདུ་ཤེས་པར་ཡང་གནས་པར་བྱེད་དོ། །རྒྱལ་པོ་ཆེན་པོ་མྱ་ངན་ལས་འདས་པ་ཞེས་བྱ་བ་ཅིའི་ཕྱིར་མྱ་ངན་ལས་འདས་པ་ཞེས་བྱ་ཞེ་ན། མྱ་ངན་ལས་འདས་པར་འདུ་ཤེས་པ་སྟེ། རྒྱལ་པོ་ཆེན་པོ་མྱ་ངན་ལས་འདས་པར་འདུ་ཤེས་པ་ནི་མེད་པའོ། །རྒྱལ་
པོ་ཆེན་པོ་བྱིས་པ་མྱ་ངན་ལས་འདས་པ་ཞེས་བྱ་བ་ནི་འཁོར་ལོའི་ཚུལ་དང་། ཆུ་ཀླུང་འཁྱིལ་པའི་ཚུལ་གྱིས་སོ། །རྒྱལ་པོ་ཆེན་པོ་ཚུལ་ཞེས་བྱ་བ་ཅིའི་ཕྱིར་ཚུལ་ཞེ་ན། སྤྱོད་ཡུལ་མ་ཡིན་པ་སྟེ། གང་ན་སུའི་སྤྱོད་ཡུལ་ཡང་མ་ཡིན་པའོ། །སུའི་སྤྱོད་ཡུལ་ཡང་མ་ཡིན་པ་ནི་འདུ་ཤེས་ཀྱི་
སྤྱོད་ཡུལ་མ་ཡིན་པའོ། །རྒྱལ་པོ་ཆེན་པོ་སྤྱོད་ཡུལ་ཞེས་བྱ་བ་ཅིའི་ཕྱིར་སྤྱོད་ཡུལ་ཞེས་བྱ་ཞེ་ན། སེམས་དེ་དང་། སྤྱོད་པ་ཆེན་པོ་དེ་དང་། ཡང་དག་པ་མ་ཡིན་པའི་སྤྱོད་པ་སྦེད་པར་བྱེད་པའོ། །ཡང་དག་པ་མ་ཡིན་པ་གང་ཞེ་ན། གང་དེ་ཁོ་ན་མ་ཡིན་པ་ནི་ཡང་དག་པ་མ་ཡིན་པའོ། །དེ་ལ་ཡོད་
པ་མ་ཡིན་པ་ཞེས་བརྗོད་པ་ནི་ཐམས་ཅད་ཡང་དག་པ་མ་ཡིན་པ་སྟེ། དེས་ན་ཡོད་པ་མ་ཡིན་པ་ཞེས་བྱའོ། །རྒྱལ་པོ་ཆེན་པོ་ཡོད་པ་མ་ཡིན་པ་ཞེས་བྱ་བ་ཅིའི་ཕྱིར་ཡོད་པ་མ་ཡིན་པ་ཞེས་བྱ་ཞེ་ན། རྒྱལ་པོ་ཆེན་པོ་དངོས་པོ་མེད་དོ། །ཡང་དག་པ་མ་ཡིན་པ་ཅིའི་ཕྱིར་དངོས་པོ་མེད་ཅེ་ན། ཡང་དག་པ་
མ་ཡིན་པ་ནི་མི་རྟག་པའོ། །ཡང་དག་པ་མ་ཡིན་པ་ནི་མི་སྡུག་པའོ། །ཡང་དག་པ་མ་ཡིན་པ་ནི་བདག་མེད་པའོ། །ཡང་དག་པ་མ་ཡིན་པ་ནི་སྲིད་པ་མི་གཙང་བའོ། །གང་མི་དབེན་པ་དེ་ནི་ཡང་དག་པ་མ་ཡིན་པའོ། །རྒྱལ་པོ་ཆེན་པོ་དེ་བཞིན་དུ་དེ་ནི་ཕྱིན་ཅི་ལོག་ཡིན་ནོ། །ཅིའི་ཕྱིར་ཕྱིན་ཅི་ལོག་ཅེས་

བྱ་ཞེ་ན། རྒྱལ་པོ་ཆེན་པོ་ཕྱིན་ཅི་ལོག་ནི་ཚུ་རོལ་ན་ཡང་མེད། ཕ་རོལ་ན་ཡང་མེད། གཉི་གའི་བར་ན་ཡང་མེད་ན། རྒྱལ་པོ་ཆེན་པོ་དེ་ནི་འདུ་ཤེས་ལྟ་ག་ལ་ཡོད། འདུ་ཤེས་དེ་གང་ཞེ་ན། མི་རྟག་པར་འདུ་ཤེས་པ་དང་། སྡུག་བསྔལ་བར་འདུ་ཤེས་པ་དང་། བདག་མེད་པར་འདུ་ཤེས་པ་དང་། མི་
སྡུག་པར་འདུ་ཤེས་པའོ། །རྒྱལ་པོ་ཆེན་པོ་ཅིའི་ཕྱིར་འདུ་ཤེས་ཚུ་རོལ་ན་ཡང་མེད། ཕ་རོལ་ན་ཡང་མེད། གཉི་གའི་བར་ན་ཡང་མེད་ཅེ་ན། མི་རྟག་པར་འདུ་ཤེས་པ་ནི་རྟག་པ་ཁོ་ནར་འདུ་ཤེས་པར་ལྟོས་ཤིག །རྒྱལ་པོ་ཆེན་པོ་ཇི་སྐད་དུ་བསྟན་པར་འགྱུར་ཞེ་ན། གཉི་གའི་བར་ཞེས་བྱ་བ་ཅིའི་ཕྱིར་གཉི་གའི་བར་
ཞེས་བྱ་ཞེ་ན། རྒྱལ་པོ་ཆེན་པོ་གང་ན་བར་མེད་པ་དེ་ན་དབུས་ཀྱང་མི་དམིགས་ན་དེ་ལ་མཐར་ལྟ་ག་ལ་འགྱུར། རྒྱལ་པོ་ཆེན་པོ་གང་ན་དབུས་མི་དམིགས་པ་དེ་ན་མཐའ་ཡང་མི་དམིགས་སོ། །གང་ན་མཐའ་མི་དམིགས་པ་དེ་ན་འགྲོ་བ་ཡང་རྣམ་པར་ཆད་དོ། །གང་ན་འགྲོ་བར་རྣམ་པར་ཆད་
པ་དེ་ན་སུ་ཡང་སོང་བ་མེད་དོ། །གང་ན་སུ་ཡང་སོང་བ་མེད་པ་དེ་ན་འགྲོ་བ་ཡང་མེད་དོ། །གང་ན་འགྲོ་བ་མེད་པ་དེ་ན་ཉིང་མཚམས་སྦྱོར་བ་མེད་དོ། །གང་ཉིང་མཚམས་སྦྱོར་བ་མེད་པ་དེ་ནི་མཚམས་སྦྱོར་བ་སྟེ། བྱང་ཆུབ་དེ་ནི་གནས་པ་ཁོ་ནའོ། །བྱང་ཆུབ་གནས་པ་གང་ཡིན་པ་དེ་ནི་འཛིན་
པ་མེད་པའོ། །འཛིན་པ་མེད་པ་གང་ཡིན་པ་དེ་ནི་སེམས་ཅན་ཞེས་བྱ་སྟེ། དེའི་ཕྱིར་བྱང་ཆུབ་སེམས་དཔའ་ནི་སེམས་ཅན་གྱི་མཆོག་ཅེས་བརྗོད་དོ། །དེས་ན་བྱང་ཆུབ་སེམས་དཔའ་ནི་འཛིན་པ་མེད་པའོ། །ཅིའི་ཕྱིར་འཛིན་པ་མེད་ཅེ་ན། དམིགས་པ་མི་འཛིན་པ་དེའི་ཕྱིར་འཛིན་པ་མེད་པ་ཞེས་བརྗོད་
དེ། རྒྱལ་པོ་ཆེན་པོ་དེ་དག་ནི་ཆོས་ཀྱི་མཆོག་གོ། །དེ་ལྟར་ན་ཆོས་ཟབ་མོ་བསྟན་ཅིང་དེ་བཞིན་དུ་དེ་དག་བཤད་དེ། འདི་ལྟར་མ་བྱས་པ། མ་བསྒྱུར་བ། མ་བཤིག་པ་སྟེ། ངོ་བོ་ཉིད་ཀྱིས་སྟོང་ངོ་། །རྒྱལ་པོ་ཆེན་པོ་ངོ་བོ་ཉིད་ཅེས་བྱ་བ་ཅིའི་ཕྱིར་ངོ་བོ་ཉིད་ཀྱིས་སྟོང་ཞེ་ན། གང་བདག་གི་དངོས་པོ་
མེད་པ་དེའི་ཕྱིར་ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་ཞེས་བྱའོ། །རྒྱལ་པོ་ཆེན་པོ་ཟབ་མོ་ཞེས་བྱ་བ་ཅིའི་ཕྱིར་ཟབ་མོ་ཞེས་བྱ་ཞེ་ན། རྒྱལ་པོ་ཆེན་པོ་བརྟན་པ་རྣམས་འཇུག་པའོ། །རྒྱལ་པོ་ཆེན་པོ་བརྟན་པ་དག་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཏེ་དེ་དག་འཇུག་

གོ། །ཅིའི་ཕྱིར་འཇུག་ཅེ་ན། ཆོས་ཐམས་ཅད་སྟོང་པ་ལ་འཇུག་སྟེ། གང་དག་སྟོང་པ་ཉིད་ལ་འཇུག་པ་དེ་དག་འཇུག་སྟེ། དེའི་ཕྱིར་ཆོས་ཐམས་ཅད་ནི་སྟོང་པ་ཉིད་ཅེས་བརྗོད་དོ། །གཟུང་བར་བྱ་བ་མ་ཡིན་པ་ཞེས་བྱ་བ་ནི་ཆོས་ཐམས་ཅད་མཚན་མ་མེད་པའོ། །རྒྱལ་པོ་ཆེན་པོ་ཅིའི་
ཕྱིར་མཚན་མ་མེད་ཅེ་ན། རྒྱལ་པོ་ཆེན་པོ་ཆོས་ཐམས་ཅད་ནི་བདག་མེད་པ་སྟེ། གང་དག་བདག་མེད་པ་དེ་དག་ནི་བསྟན་དུ་མེད་པའོ། །གང་དག་བསྟན་དུ་མེད་པ་དེ་དག་ནི་མི་འཁྲུགས་པའོ། །གང་དག་མི་འཁྲུགས་པ་དེ་དག་ནི་གནས་པའོ། །གང་དག་གནས་པ་དེ་དག་ནི་མ་བསྒྲུབས་པའོ། །
གང་དག་མ་བསྒྲུབས་པ་དེ་དག་ནི་ཆུད་ཟོས་པ་མེད་པའོ། །གང་དག་ཆུད་ཟོས་པ་མེད་པ་དེ་ནི་ཆོས་རྣམས་ཀྱི་ཆོས་ཀྱི་དབྱིངས་གནས་པ་ཞེས་བྱའོ། །རྒྱལ་པོ་ཆེན་པོ་ཆོས་ཀྱི་དབྱིངས་གནས་པ་ཞེས་བྱ་བ་ཅིའི་ཕྱིར་ཆོས་གནས་པ་ཞེས་བྱ་ཞེ་ན། རྒྱལ་པོ་ཆེན་པོ་ཆོས་ནི་གནས་མེད་པའོ། །གནས་
མེད་པ་ཞེས་བྱ་བ་དེ་ནི་དང་པོ་ཉིད་ནས་མི་དམིགས་ལ་དང་པོ་ཉིད་ཀྱང་མི་དམིགས་སོ། །གང་དག་གི་གནས་མི་དམིགས་པ་དེ་དག་གི་འགྲོ་བ་ཡང་མེད་དོ། །འོང་བ་ཡང་མེད་དོ། །གང་གི་འོང་བ་མི་དམིགས་པ་དེ་ཐམས་ཅད་ནི་སྟོང་པའི་དབྱིངས་ཞེས་བྱའོ། །རྒྱལ་པོ་ཆེན་པོ་ཅིའི་ཕྱིར་དབྱིངས་མི་
དམིགས་ཞེ་ན། གལ་ཏེ་དབྱིངས་ལས་དབྱིངས་ཤིག་དམིགས་ན་དབྱིངས་དེ་ཉིད་དབྱིངས་སུ་འགྱུར་རོ། །རྒྱལ་པོ་ཆེན་པོ་དེ་ལྟར་ན་བྱིས་པ་རྣམས་ནི་རྣམ་པར་ཐར་པ་ལ་རྒྱུག་གོ། །རྒྱལ་པོ་ཆེན་པོ་རྣམ་པར་ཐར་པ་ཞེས་བྱ་བ་ཅིའི་ཕྱིར་རྣམ་པར་ཐར་པ་ཞེས་བྱ་ཞེ་ན། རྣམ་པར་ཐར་པ་ནི་ཟད་པ་མེད་
པའོ། །གང་དག་ཟད་པ་མེད་པ་ལ་རྒྱུག་པ་དེ་དག་ནི་ཟད་པར་འགྱུར་རོ། །གང་དག་ཟད་པར་འགྱུར་བ་དེ་དག་ནི་ཡོངས་སུ་ཟད་པར་འགྱུར་རོ། །གང་དག་ཡོངས་སུ་ཟད་པར་འགྱུར་བ་དེ་དག་ནི་ཡོངས་སུ་ཉམས་པར་འགྱུར་རོ། །ཇི་ལྟར་ཡོངས་སུ་ཉམས་པར་འགྱུར་ཞེ་ན། རང་བཞིན་ལས་
ཡོངས་སུ་ཉམས་པར་འགྱུར་ཏེ། གང་དག་ཡོངས་སུ་ཉམས་པར་འགྱུར་བ་དེ་དག་གི་རྣམ་པར་ཐར་པའི་སྒོ་ནི་ཐག་རིང་ངོ་། །རྒྱལ་པོ་ཆེན་པོ་སྒོ་ཞེས་བྱ་བ་ཅིའི་ཕྱིར་སྒོ་ཞེས་བརྗོད་ཅེ་ན། གཉིས་ལ་ཀུན་ནས་དགའ་བ་དེའི་ཕྱིར་སྒོའོ། །རྒྱལ་པོ་ཆེན་པོ་རྣམ་པར་ཐར་པའི་སྒོ་ཞེས་བྱ་བ་

འདི་ནི་ལྡེམ་པོ་ངག་གོ། །རྒྱལ་པོ་ཆེན་པོ་ལྡེམ་པོ་ངག་ཅེས་བྱ་བ་ཅིའི་ཕྱིར་ལྡེམ་པོ་ངག་ཅེས་བྱ་ཞེ་ན། འདི་ལ་ངག་ཆུང་ཟད་ཀྱང་མད་ལ་དེ་ལ་ཤེས་པར་བྱ་བ་ཡང་མེད་དོ། །གང་ལ་ཤེས་པར་བྱ་བ་མེད་པ་དེ་ནི་རྣམ་པར་ཤེས་པར་བྱ་བ་མ་ཡིན་ནོ། །རྒྱལ་པོ་ཆེན་པོ་རིགས་པ་མ་ཡིན་པ་མི་རིགས་པ་ཞེས་
བྱ་བ་ཅིའི་ཕྱིར་རིགས་པ་མ་ཡིན་པ་ཞེ་ན། ལེན་ཅིང་འདོར་བར་བྱེད་པའི་ཕྱིར་རོ། །ཅི་ཞིག་ལེན་ཅིང་འདོར་བར་བྱེད་ཅེ་ན། གང་ན་ལེན་པ་མེད་ཅིང་འདོར་བ་མེད་པའོ། །གང་དག་འདོར་བ་དེ་དག་ནི་རྣམ་པར་རྒྱུག་པའོ། །གང་དུ་རྣམ་པར་རྒྱུག་ཅེ་ན། བྱང་ཆུབ་ལ་རྣམ་པར་རྒྱུག་གོ། །སྟོང་པ་ཉིད་
ལ་རྣམ་པར་རྒྱུག་གོ། །རྣམ་པར་རྒྱུག་པ་དེ་དག་ནི་བསྟན་པ་འདི་དང་བྱང་ཆུབ་དང་ཉེ་བ་ལས་དེ་དག་ཐག་རིང་ངོ་། །རྒྱལ་པོ་ཆེན་པོ་ཉེ་བ་ཞེས་བྱ་བ་ཅིའི་ཕྱིར་ཉེ་བ་ཞེས་བྱ་ཞེ་ན། བྱང་ཆུབ་དང་ཉེ་བ་ཡང་མ་ཡིན། མི་ཉེ་བ་ཡང་མ་ཡིན་པའོ། །གང་བྱང་ཆུབ་གང་ལ་བཀོད་པ་ཡོད་པ་མ་ཡིན་པ་དེའི་ཕྱིར་ཉེ་བར་ཞི་
བ་དང་། ཉེ་བར་ཞི་བ་མ་ཡིན་པ་ཞེས་བརྗོད་པར་མི་བྱའོ། །རྒྱལ་པོ་ཆེན་པོ་ཉེ་བར་ཞི་བ་ཞེས་བྱ་བ་དང་། བྱང་ཆུབ་ཅེས་བྱ་བ་ཅིའི་ཕྱིར་བྱང་ཆུབ་ཅེས་བྱ་ཞེ་ན། སེང་གེའི་ཕྱིར་རོ། །སེང་གེ་གང་ཞེ་ན། བག་ཚ་བ་མེད་པའོ། །ཅིའི་ཕྱིར་བག་ཚ་བ་མེད་པ་ཞེས་བརྗོད་ཅེ་ན། རྒྱལ་པོ་ཆེན་པོ་བག་ཚ་
བ་ནི་འདས་པ་ཞེས་བརྗོད་དོ། །གང་བག་ཚ་བ་མེད་པ་དེ་དག་ལ་ཅིའི་ཕྱིར་དེ་བཞིན་གཤེགས་པ་དེ་བཞིན་གཤེགས་པ་ཞེས་བརྗོད་ཅེ་ན། འགྲོ་བ་དང་འོང་བ་སྟེ། དེའི་ཕྱིར་དེ་བཞིན་གཤེགས་པ་དེ་བཞིན་གཤེགས་པ་ཞེས་བརྗོད་དོ། །རྒྱལ་པོ་ཆེན་པོ་གཞན་ཡང་ཅིའི་ཕྱིར་དེ་བཞིན་གཤེགས་
པ་ཞེས་བྱ་ཞེ་ན། འདི་ལྟར་སོང་བ་ཡང་མེད། མ་སོང་བ་ཡང་མེད་པ་དེའི་ཕྱིར་དེ་བཞིན་གཤེགས་པ་ཞེས་བརྗོད་དོ། །རྒྱལ་པོ་ཆེན་པོ་སངས་རྒྱས་ཀྱི་བགྲོ་བ་ཞེས་བརྗོད་པ་དེ་ཅིའི་ཕྱིར་སངས་རྒྱས་ཀྱི་བགྲོ་བ་དང་། དེ་བཞིན་གཤེགས་པའི་བགྲོ་བ་ཞེས་བརྗོད་ཅེ་ན། ཆོས་ཐམས་ཅད་འགྲོ་བ་མེད་
པར་དེས་རྟོགས་པའི་ཕྱིར་རོ། །ཇི་ལྟར་རྟོགས་ཞེ་ན། འགྲོ་བ་དང་འོང་བ་མེད་པ་ཇི་ལྟར་རྟོགས་པ་དེ་ལྟར་རྟོགས་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་

གྲངས་ཟབ་མོ་འདི་ནི་ངོ་མཚར་ལགས་སོ། །བཅོམ་ལྡན་འདས་ཆོས་འདི་བསྟན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་བའི་སེམས་ཅན་ནི་ཇི་སྙེད་ཅིག་མཆིས་ལགས། ཉན་ཐོས་ཀྱི་གནས་ལ་གནས་པ་ནི་ཇི་སྙེད་ཅིག་མཆིས་ལགས། རང་སངས་
རྒྱས་ཀྱི་གནས་ལ་གནས་པ་ནི་ཇི་སྙེད་ཅིག་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འདི་ལྟར་ང་འཆད་པ་གང་ཡིན་པ་དང་། འཆད་པར་འགྱུར་བ་གང་ཡིན་པ་དང་། ངས་ཆོས་བཤད་པ་གང་ཡིན་པ་དང་། ཆོས་མངོན་པར་རྫོགས་པར་སངས་རྒྱས་པ་གང་ཡིན་
པའི་ཆོས་བསྟན་པ་འདི་ལ་ནི་སེམས་ཅན་ངེས་པར་འབྱུང་བ་གང་ཡང་མེད་དོ། །ཉན་ཐོས་ཀྱི་ཕྱིར་གནས་པ་མ་ཡིན་ནོ། །རང་སངས་རྒྱས་ཀྱི་ཕྱིར་གནས་པ་མ་ཡིན་ནོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་སྒྱུ་མ་མཁན་ནམ། སྒྱུ་མ་མཁན་གྱི་སློབ་མ་མཁས་པ་ཞིག་གིས་སྐྱེ་བོ་ཕལ་པོ་ཆེའི་
མདུན་དུ་དཔུང་གི་ཚོགས་ཡན་ལག་བཞི་པ་མངོན་པར་སྤྲུལ་ཏེ། ཤོམ་ཞིང་གོ་ཆ་བསྐོན་ལ། རྒྱལ་པོ་གཉིས་གཡུལ་འགྱེད་པར་སྡུད་པ་ལས། རྒྱལ་པོ་ཆེན་པོ་དེ་ལ་སྒྱུ་མ་མཁན་གྱིས་སྤྲུལ་པའི་རྒྱལ་པོ་གཉིས་ལས། དེ་ལ་རྒྱལ་པོ་གཅིག་ནི་ཕམ་པར་གྱུར། དེ་ལ་རྒྱལ་པོ་ཅིག་ཤོས་གང་ཡིན་པ་དེ་ནི་
སྤྲུལ་པའི་གཡུལ་དེར་གཡུལ་བཀྱེ་བ་ལས་སྤྲུལ་པའི་རྒྱལ་པོ་དེ་རྒྱལ་ནས། དེ་དཔུང་གི་ཚོགས་ཡན་ལག་བཞི་པོ་དེའི་མདུན་དུ་ཚིག་འདི་སྐད་ཅེས་ངས་རྒྱལ་པོ་ཆེན་པོ་ཕམ་པར་བྱས་སོ། །ངས་ཚེར་མ་ཕྱུང་ངོ་ཞེས་སྨྲ་ན་རྒྱལ་པོ་ཆེན་པོ་འདི་ཇི་སྙམ་དུ་སེམས། རྒྱལ་པོ་ཕམ་པ་དེ་ཅི་འདྲ་བ་ཞིག་ཡིན།
གསོལ་པ། བཅོམ་ལྡན་འདས་སྒྱུ་མ་མཁན་གྱིས་སྤྲུལ་པའི་རྒྱལ་པོས་སྒྱུ་མ་མཁན་གྱིས་སྤྲུལ་པ་ཕམ་པར་བགྱིས་སོ། །བཀའ་སྩལ་པ། རྒྱལ་པོ་ཆེན་པོ་སྤྲུལ་པས་སྤྲུལ་པ་འགའ་ཞིག་ཕམ་པར་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། སྤྲུལ་
པའི་མཐུ་གང་ལགས་པ་དེ་ནི་དངོས་པོ་མ་མཆིས་པ་ལགས་ཏེ། དངོས་པོ་མ་མཆིས་པས་དངོས་པོ་མ་མཆིས་པ་ཕམ་པར་བགྱིད་པ་མ་མཆིས་པའི་སླད་དུའོ། །བཅོམ་ལྡན་འདས་རྒྱལ་པོ་ཕམ་པ་འདི་དང་། རྒྱལ་པོ་འདི་ཞེས་བགྱི་བ་དེ་ནི་བྱིས་པ་རྣམས་ཀྱི་རྨོངས་པ་ལགས་སོ། །བཀའ་སྩལ་པ།

རྒྱལ་པོ་ཆེན་པོ་དེ་བཞིན་དུ་གང་ཆོས་རྣམས་ཀྱི་རང་བཞིན་དེ་ལ་ཡང་ཕམ་པ་དང་། མ་ཕམ་པ་མེད་དེ། ཆོས་འདི་ནི་གནས་པ་ཁོ་ན་སྟེ། ཆོས་ཀྱི་དབྱིངས་ནི་གནས་པ་ཉིད་དོ། །ཆོས་སྐྱོན་མེད་པ་ཉིད་དོ། །དེ་ལ་དེ་བཞིན་གཤེགས་པ་ནི་ཡང་དག་པར་སྨྲ་བ། དེ་བཞིན་དུ་སྨྲ་བ། ཕྱིན་ཅི་མ་ལོག་པར་སྨྲ་
བ། གཞན་མ་ཡིན་པ་སྨྲ་བ་སྟེ། ཆོས་ཐམས་ཅད་སྐྱེ་བ་མེད་པར་རྗེས་སུ་ཐ་སྙད་འདོགས་སོ། །རྒྱལ་པོ་ཆེན་པོ་བྱིས་པ་རྣམས་ཇི་ལྟར་འཛིན་པ་དེ་ལྟར་དེ་བཞིན་གཤེགས་པ་ནི་བསྟན་དུ་མེད་པ་ཞེས་བྱ་བར་སྟོན་ཏོ། །རྒྱལ་པོ་ཆེན་པོ་དེ་བཞིན་གཤེགས་པ་ནི་ཐ་སྙད་ཐམས་ཅད་ཡང་དག་པར་ཆད་པའོ། །
ཅིའི་ཕྱིར་དེ་བཞིན་གཤེགས་པ་ཐ་སྙད་ཐམས་ཅད་ཡང་དག་པར་ཆད་པ་ཞེས་བརྗོད་ཅེ་ན། ཐ་སྙད་ཐམས་ཅད་མཚུངས་པའི་ཕྱིར་རོ། །གང་མཚུངས་པ་དེ་ནི་ཆད་པ་སྟེ། གང་ཆད་པ་དེ་ལ་མཚུངས་པ་ཞེས་བརྗོད་དེ། ཐ་སྙད་དེ་ཐམས་ཅད་ཡང་དག་པར་ཆད་པ་དེ་ནི་ཆོས་རྣམས་སྐྱེ་བ་མེད་པའོ། །
རྒྱལ་པོ་ཆེན་པོ་འདི་ལྟར་རྩིས་ཀྱི་དྲུང་ཇི་ལྟར་བཞག་པ་དེ་ལྟར་བསྟན་པར་བྱ་སྟེ། རྒྱལ་པོ་ཆེན་པོ་འདི་ལྟ་སྟེ། དཔེར་ན་འབུམ་ཕྲག་གཅིག་ལས་བྱེ་བ་མང་པོར་སྟོན་པ་ནི་འབུམ་ཕྲག་དེ་ལས་བྱེ་བ་དག་བྱུང་བའོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་གཅིག་གི་ནང་ན་གཟུགས་
བརྙན་མང་པོ་སྣང་ཡང་མེ་ལོང་གི་དཀྱིལ་འཁོར་དེ་ལ་གཟུགས་བརྙན་དེ་དག་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་ཡིག་འབྲུ་གཅིག་གི་ནང་དུ་ཡིག་འབྲུ་མང་པོ་དག་མངོན་པར་སྒྲུབ་ཀྱང་ཡིག་འབྲུ་དེ་ལ་ཡིག་འབྲུ་དེ་དག་མི་སྣང་ངོ་། །རྒྱལ་པོ་ཆེན་པོ་འདི་ལྟ་སྟེ། དཔེར་ན་དགེ་སློང་རྫུ་འཕྲུལ་
ཆེན་པོ་དང་ལྡན་པ་ཞིག་གཅིག་ཏུ་གྱུར་ནས་མང་པོར་འགྱུར་ཞིང་། མང་པོར་གྱུར་ནས་གཅིག་ཏུ་ཡང་འགྱུར་བ་དེ་བཞིན་དུ། རྒྱལ་པོ་ཆེན་པོ་དེ་བཞིན་གཤེགས་པས་སྟོབས་དང་། མི་འཇིགས་པ་དང་། ཕ་རོལ་ཏུ་ཕྱིན་པ་ཐམས་ཅད་ཐོབ་ནས་སེམས་ཅན་རྣམས་ལ་གདམས་པའི་ཕྱིར་ཆོས་བསྟན་
པས་སེམས་ཅན་འདི་སྙེད་ཅིག་དུལ་ལོ་ཞེས་འཇིག་རྟེན་གྱི་ཐ་སྙད་དང་། བགྲང་བའི་ཚུལ་གྱིས་དེ་ལྟར་སྟོན་ཏོ། །རྒྱལ་པོ་ཆེན་པོ་ཇི་ལྟར་དུལ་བ་དང་། གང་དག་དུལ་བ་དང་། གང་གིས་དུལ་བ་དེ་དག་ནི་རྒྱལ་པོ་ཆེན་པོ་དེ་བཞིན་གཤེགས་པའི་གཉིས་སུ་མེད་པ་ལ་གནས་པ་སྟེ། ཆོས་འདི་བསྟན་པས་

སེམས་ཅན་འདི་སྙེད་ཅིག་དུལ་ལོ་ཞེས་བྱ་བ་དེ་ནི་མ་བྱས་པ། འགྱུར་བ་མེད་པར་སེང་གེའི་སྒྲ་སྒྲོགས་པའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བསྟན་པ་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་
འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །གཡོས་རབ་ཏུ་གཡོས། ཀུན་ཏུ་རབ་ཏུ་གཡོས་སོ། །ལྡེག །རབ་ཏུ་ལྡེག །ཀུན་ཏུ་རབ་ཏུ་ལྡེག་གོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་
དུ་དོག་ས་ཆེར་གཡོས་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པས་བསྟན་པ་འདི་བཤད་པ་ན་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་ཐེར་འབུམ་ཕྲག་འབུམ་ཕྲག་བརྒྱད་ཅུ་པོ་དེ་དག་ནི་ཆོས་རྣམས་ལ་ཆོས་
ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །ལྷ་ཐེར་འབུམ་ཕྲག་དགུ་བཅུ་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །བྲམ་ཟེ་སྟོང་ཕྲག་དྲུག་ཅུ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །སྲོག་ཆགས་ལྷ་དང་མིར་བཅས་པ་བརྒྱད་ཁྲི་ནི་ཆོས་རྣམས་ལ་
ཆོས་ཀྱི་མིག་རྣམ་པར་དག་གོ། །སྲོག་ཆགས་མིའི་སྐྱེ་དགུ་སྟོང་ཕྲག་དྲུག་ཁྲི་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །སྲོག་ཆགས་སྟོང་ཕྲག་བརྒྱད་སྟོང་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱེད་དོ། །རྒྱལ་པོ་ཆེན་པོ་འཇིག་རྟེན་དུ་ས་ཆེར་གཡོས་པར་གྱུར་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །
རྒྱལ་པོ་ཆེན་པོ་དེ་བཞིན་གཤེགས་པ་བགྲོ་བའི་ཆོས་ཀྱི་རྣམ་གྲངས་འདི་ནམ་མཁའ་དང་ལྡན་པའི་ས་ཕྱོགས་འདི་ཉིད་དུ་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བཤད་དོ། །ང་ཡང་འཆད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་
པ་ཡང་ས་ཕྱོགས་འདི་ཉིད་དུ་འཆད་པར་འགྱུར་རོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་ཆོས་ཀྱི་རྣམ་གྲངས་འདི་ཉིད་ལ་མཆོད་པ་བྱ་བའི་ཕྱིར་དེ་བཞིན་གཤེགས་པ་ལ་མེ་ཏོག་དང་། སྤོས་དང་། ཕྲེང་བ་སྣ་ཚོགས་དེ་དག་གིས་མངོན་པར་གཏོར་ཏོ། །རབ་ཏུ་གཏོར་ཏོ། །རབ་ཏུ་མངོན་

པར་གཏོར་ནས་ཚིག་འདི་སྐད་དུ། འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ལ་མཆོད་པར་འདོད་པས་ནི་དེ་བཞིན་གཤེགས་པ་བགྲོ་བའི་ཆོས་ཀྱི་རྣམ་གྲངས་འདི་ལ་མཆོད་པར་བྱའོ་ཞེས་སྨྲས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་
ལྷ་རྣམས་ལ་སྨྲས་པ། ལྷའི་བུ་དག་ཚུར་ཤེག །ཆོས་ཀྱི་རྣམ་གྲངས་འདི་ཉིད་ལ་མཆོད་པ་བྱ་བའི་ཕྱིར་བཅོམ་ལྡན་འདས་ལ་ལྷའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། ཙན་དན་གྱི་ཕྱེ་མ་དག་གིས་གཏོར་བར་བྱའོ། །མངོན་པར་གཏོར་བར་བྱའོ། །མངོན་པར་རབ་ཏུ་གཏོར་བར་བྱའོ། །དེ་
ཅིའི་ཕྱིར་ཞེ་ན། གྲོགས་པོ་དག་ཆོས་ཀྱི་རྣམ་གྲངས་འདི་ལ་མཆོད་པ་བྱས་པས་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱས་པར་འགྱུར་བའི་ཕྱིར་རོ། །དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་ཏུ་བཅོམ་ལྡན་
འདས་ལ། མེ་ཏོག་མན་དཱ་ར་བས་གཏོར་ཏོ། །རབ་ཏུ་གཏོར་ཏོ། །སྟེང་གི་བར་སྣང་ལས་ཀྱང་ལྷའི་རོལ་མོའི་སྒྲ་བསྒྲགས་སོ། །དེ་བཞིན་གཤེགས་པ་ཉིད་ལ་མཆོད་པ་བྱ་བའི་ཕྱིར་ཐམས་ཅད་དང་ལྡན་པའི་རྒྱལ་བུ་རྒྱལ་བྱེད་ཀྱི་ཚལ་ཡང་རིན་པོ་ཆེ་སྣ་བདུན་ལས་གྲུབ་པའི་དར་གྱི་ལྡ་ལྡི་དག་གིས་རྒྱས་པར་གྱུར་ལ།
ཚིག་འདི་སྐད་དུ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱས་པར་འགྱུར་རོ། །དེ་ནས་ཁྱིམ་བདག་དེ་དག་གིས་མེ་ཏོག་དང་། སྤོས་
དང་། ཕྲེང་བ་སྣ་ཚོགས་ཇི་ལྟར་ཐོགས་ཐོགས་པ་དེ་དག་བཅོམ་ལྡན་འདས་ལ་མངོན་པར་གཏོར་ཏེ། ཚིག་འདི་སྐད་དུ། གང་དག་ཆོས་ཀྱི་རྣམ་གྲངས་འདི་ལ་མཆོད་པ་བྱེད་པ་དེ་དག་གིས་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱས་
པར་འགྱུར་རོ། །དེ་ནས་བཅོམ་ལྡན་འདས་ཀྱིས་རྒྱལ་པོ་གསལ་རྒྱལ་དང་། ལྷའི་དབང་པོ་བརྒྱ་བྱིན་དང་། ཁྱིམ་བདག་དེ་དག་ལ་བཀའ་སྩལ་པ། ལྷའི་བུ་དག་ཇི་སྐད་སྨྲས་པ་དེ་དེ་བཞིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་རིགས་

ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀུན་ཆུབ་པར་བྱེད་པ་དང་། ཀློག་པ་དང་། གཞན་དག་ལ་ཡང་རྒྱ་ཆེར་སྟོན་པར་བྱེད་པ་དང་། དེ་བཞིན་
ཉིད་དུ་སྒྲུབ་པར་བྱེད་པ་དང་། ཐ་ན་གླེགས་བམ་དུ་བྱས་ཏེ་འཆང་བ་དེ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པར་བྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་བཅོམ་ལྡན་འདས་གང་དག་བྱུང་བའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་ཀྱང་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཉིད་བསྟན་ཏོ། །ཀུན་དགའ་བོ་མ་འོངས་པའི་དུས་ན་སངས་རྒྱས་བཅོམ་ལྡན་འདས་གང་དག་འབྱུང་བར་
འགྱུར་བ་དེ་དག་ཀྱང་དེ་བཞིན་གཤེགས་པ་བགྲོ་བ་དང་ཆོས་བགྲོ་བ་ཆོས་ཀྱི་རྣམ་གྲངས་འདི་ཉིད་སྟོན་པར་འགྱུར་རོ། །ཀུན་དགའ་བོ་ད་ལྟར་ཕྱོགས་བཅུ་ན་སངས་རྒྱས་བཅོམ་ལྡན་འདས་གང་དག་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཀྱང་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་
ཆོས་ཀྱི་རྣམ་གྲངས་འདི་ཉིད་སྟོན་ཏོ། །བསྟན་ཏོ། །སྟོན་པར་འགྱུར་རོ། །ཀུན་དགའ་བོ་སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་ནི་ཡང་དག་ཕུལ་ལོ་ཞེས་ཡང་དག་པར་སྨྲ་བས་སྨྲ་ན། ཀུན་དགའ་བོ་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ལ་ཡང་
དག་པར་སྨྲ་བས་སྨྲའོ། །ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་སངས་རྒྱས་ཀྱི་ཡེ་ཤེས་དང་། སངས་རྒྱས་ཀྱི་སྟོབས་རྣམས་དང་། སངས་རྒྱས་ཀྱི་མི་འཇིགས་པ་རྣམས་ཚོལ་བར་འདོད་པ་དང་། སངས་རྒྱས་ཀྱི་གནས་ལ་གནས་པར་འདོད་པ་དང་། སངས་རྒྱས་ཀྱི་ཡེ་ཤེས་
སྒྲུབ་པར་འདོད་པ་དང་། སངས་རྒྱས་ཀྱི་ཡེ་ཤེས་ཐོབ་པར་འདོད་པ་དེས་ནི་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཟུང་ཤིག །ཀུན་ཆུབ་པར་གྱིས་ཤིག །འཇུག་པར་གྱིས་ཤིག །ཆོངས་ཤིག །ལྷོགས་ཤིག །དེ་ཅིའི་ཕྱིར་ཞེ་ན། ཀུན་དགའ་བོ་རིགས་ཀྱི་བུའམ།

རིགས་ཀྱི་བུ་མོ་གང་ལ་ལ་ཞིག་གིས་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཐ་ན་གླེགས་བམ་དུ་བྱས་ཏེ། འཆང་བ་དང་། ཀློག་པ་དང་། ཟླ་བ་ཕྱེད་ཀྱི་བར་དུ་བརྗོད་ཅིང་འདོན་པ་དེས་རྨི་ལམ་ན་ང་ཆོས་སྟོན་པ་མཐོང་ན་དེའི་ཡོན་ཏན་གྱི་ཕན་ཡོན་དུ་འགྱུར་བ་ནི། ཀུན་དགའ་
བོ་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཐ་ན་རིགས་ཀྱི་བུའམ། རིགས་ཀྱི་བུ་མོ་གང་ལ་ལའི་རྣ་ལམ་དུ་གྲག་པ་དང་། ཐ་ན་ཐོས་པ་ཙམ་དུ་ཡང་འགྱུར་བ་དང་། ཐོས་ནས་ཀྱང་ཡི་རངས་པར་འགྱུར་ན། ཀུན་དགའ་བོ་དེས་ན་དེའི་མཐའ་ནི་ཀུན་དགའ་བོ་རིགས་ཀྱི་
བུའམ། རིགས་ཀྱི་བུ་མོ་དེ་དག་གིས་སངས་རྒྱས་མང་པོ་ལ་བསྙེན་བཀུར་བྱས་པ་ཡིན་པར་རྟོགས་པར་བྱ་སྟེ། ཀུན་དགའ་བོ་ཆོས་ཟབ་མོ་འདི་བསྟན་པས་རིགས་ཀྱི་བུའམ། རིགས་ཀྱི་བུ་མོ་དག་མི་སྐྲག་ཅིང་མི་དངང་ལ་དངང་བར་མི་འགྱུར་བའི་རྣམ་པ་ནི་དེ་ཡིན་ནོ། །མཚན་མ་ནི་དེ་ཡིན་ནོ། །རྟགས་
ནི་དེ་ཡིན་ནོ། །དབྱིབས་ནི་དེ་ཡིན་ནོ། །ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་དག་ཁ་ཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས། ཡང་དག་པར་འཇུག །ཡང་དག་པར་འཇུག་པར་འགྱུར་བ་དེ་དག་གིས་ཀྱང་དེ་བཞིན་གཤེགས་པ་བགྲོ་བ་དང་།
ཆོས་བགྲོ་བ་ཆོས་ཀྱི་རྣམ་གྲངས་འདི་ཐ་ན་ཚིག་བཞི་པའི་ཚིགས་སུ་བཅད་པ་ཙམ་ཡང་གཟུང་བར་བྱ། ཀུན་ཆུབ་པར་བྱ། གདོན་པར་བྱ། བཅང་བར་བྱ། གཞན་དག་ལ་ཡང་བཤད་པར་བྱ། བསྟན་པར་བྱ་སྟེ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་དེ་དག་གི་བསོད་ནམས་མང་
དུ་འཕེལ་བར་འགྱུར་རོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་གི་གདུགས་ལ་དགེ་སློང་གི་དགེ་འདུན་དང་ཐབས་ཅིག་ཏུ་བདག་གི་གདུགས་ཚོད་གསོལ་བར་གནང་བར་མཛད་དུ་གསོལ། རྒྱལ་པོ་
གསལ་རྒྱལ་ལ་ཐུགས་བརྩེ་བར་མཛད་པའི་སླད་དུ། བཅོམ་ལྡན་འདས་ཀྱིས་ཅང་མི་གསུང་བས་གནང་ངོ་། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་བགྱི་བ་མང་ཞིང་བགྱིད་པ་མང་བས་

མཆི་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དེའི་དུས་ལ་དབབ་པར་ཤེས་ན་སོང་ཤིག །དེ་ནས་རྒྱལ་པོ་གསལ་རྒྱལ་གྱིས་བུད་མེད་གཙོ་མོ་ལ་སྨྲས་པ། བུད་མེད་ཁྱོད་བཅོམ་ལྡན་
འདས་ཀྱི་སྤྱན་སྔར་འདུག་ལ། བཅོམ་ལྡན་འདས་ཀྱིས་ཆོས་གང་བཤད་པ་དེ་ཐམས་ཅད་ང་ལ་ཡང་ཟློས་ཤིག །དེ་ནས་རྒྱལ་པོ་གསལ་རྒྱལ་གུས་པ་དང་བཅས། ཞེ་ས་དང་བཅས་པས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་ཐད་ནས་སོང་ངོ་། །དེ་
ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་འདི་ནས་ཤར་ཕྱོགས་ལོགས་ན་འཇིག་རྟེན་གྱི་ཁམས་ཀུན་ནས་ཡོན་ཏན་ལྡན་ཞེས་བྱ་བ་དེ་ན་དེ་བཞིན་གཤེགས་པ་བཀོད་པ་མཆོག་སྒྲུབ་མེ་ཏོག་མངོན་འཕགས་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་
ཞིང་གཞེས་པ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་བཀོད་པ་མཆོག་སྒྲུབ་མེ་ཏོག་མངོན་འཕགས་རྒྱལ་པོས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །མེ་
ཏོག་འདི་གང་ལ་གནས་པ་དེ་ལ་ཆོས་ཐམས་ཅད་གནས་ཏེ། ཁོ་བོ་དེ་ལྟ་བུ་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་མེ་ཏོག་དེ་དག་ཅི་ལ་གནས་ལགས། བཅོམ་ལྡན་འདས་ཀྱིས་
བཀའ་སྩལ་པ། འཇམ་དཔལ་མེ་ཏོག་དེ་དག་ནི་གནས་མེད་དོ། །འཇམ་དཔལ་མེ་ཏོག་དེ་དག་ནི་རང་བཞིན་གྱི་གནས་ལ་གནས་པ་སྟེ། ཆོས་ཐམས་ཅད་ཀྱང་དེ་ལྟ་བུ་ལ་གནས་པས་བྱང་ཆུབ་དེ་ཡང་དེ་དང་འདྲ་སྟེ། དེ་ལ་བྱེ་བྲག་ཅུང་ཟད་ཀྱང་མེད་དོ། །འཇམ་དཔལ་གཞན་ཡང་དེ་བཞིན་
གཤེགས་པ་དེས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་གཙོ་བོ་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་དེ་ལ་

འདི་སྐད་ཅེས་སྨྲས་སོ། །ཁོ་བོ་ཡང་དག་པའི་མཐའ་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་ཡང་དག་པའི་མཐའ་ཅི་ལ་གནས་ལགས། བཀའ་སྩལ་པ། དེའི་ཕྱིར་ཁྱོད་ཉིད་ལ་དྲིས། ཁྱོད་ཇི་ལྟར་བཟོད་པ་དེ་ལྟར་ལན་ཐོབ་ཤིག །འཇམ་དཔལ་འདི་ལྟ་སྟེ། དཔེར་ན་སོས་ཀའི་ཟླ་བ་ཐ་མ་དྲོ་ཞིང་ཚ་བའི་དུས་ལ་བབ་པའི་ཚེ། མི་ཉམ་ཆུང་བ་ཞིག་གིས་སྨིག་རྒྱུ་གཡོ་བ་
མཐོང་བ་ལས་དེ་སྐོམ་པར་གྱུར་ལ། དེའི་གྲོགས་གང་དག་ཡིན་པ་དེ་དག་ཀྱང་སྨིག་རྒྱུ་དེ་ལ་ཆུར་འདུ་ཤེས་པར་གྱུར་ཏེ། དེ་དག་ཤས་ཆེར་འགྲོ་ཞིང་། འདི་ལྟར་སྨིག་རྒྱུ་དེ་ལ་ཆུར་འདུ་ཤེས་པ་རྣམས་ཇི་ལྟ་ཇི་ལྟར་འགྲོ་ཞིང་གང་དུ་འགྲོ་བ་དེ་ལྟ་དེ་ལྟར་དེ་དག་གི་སྐོམ་པ་འཕེལ་བར་འགྱུར་ན། འཇམ་
དཔལ་འདི་ཇི་སྙམ་དུ་སེམས། མི་དེ་དག་གི་འདུ་ཤེས་ཡང་དག་པ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། ཅི་སྨིག་རྒྱུ་ལ་ཆུ་གནས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །
སྨིག་རྒྱུ་ལ་ཆབ་ཀྱང་མ་མཆིས་ལགས་ན་གནས་པ་ལྟ་ག་ལ་མཆིས་ཏེ། གནས་པ་མ་མཆིས་པས་བཅོམ་ལྡན་འདས་དེ་ནི་བརྗོད་པར་བགྱི་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་ཆོས་ཐམས་ཅད་ཀྱང་ཡང་དག་པའི་མཐའ་ལ་གནས་ཏེ་བྱང་
ཆུབ་དེ་ཡང་དེ་དང་འདྲའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་སྒྲུབ་བཀོད་དུ་མ་མངོན་འཕགས་རྒྱལ་པོ་ཁྱུ་མཆོག་རྣམ་པར་རོལ་པ་ཞེས་བྱ་བ་དེས་ང་ལ་འདི་སྐད་ཅེས་སྨྲས་སོ། །དེ་བཞིན་
གཤེགས་པ་ཤཱཀྱའི་རྒྱལ་པོའི་གཙོ་བོ་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། ངས་དེ་ལ་འདི་སྐད་ཅེས་སྨྲས་སོ། །ཆོས་ཐམས་ཅད་ལ་གནས་ནས། ཁོ་བོ་བླ་ན་མེད་པ་ཡང་

དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ཅི་ལ་གནས་ལགས། བཀའ་སྩལ་པ། འཇམ་དཔལ་
ཆོས་ཐམས་ཅད་ནི་རང་བཞིན་ལ་ཡང་གནས་ལ། དེ་དག་རང་བཞིན་ལ་གནས་པ་ཡང་མ་ཡིན་ཏེ་བྱང་ཆུབ་དེ་ཡང་དེ་དང་འདྲ་འོ། །འཇམ་དཔལ་གཞན་ཡང་ངས་དེ་བཞིན་གཤེགས་པ་མེ་ཏོག་སྒྲུབ་བཀོད་དུ་མ་མངོན་འཕགས་རྒྱལ་པོ་ཁྱུ་མཆོག་རྣམ་པར་རོལ་པ་དེ་ལ་འདི་སྐད་ཅེས་སྨྲས་སོ། །དེ་
བཞིན་གཤེགས་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །ཡང་དག་པའི་མཐའ་གང་ལ་གནས་པ་དེ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པའི་མཐའ་ཅི་ལ་གནས་ལགས། བཀའ་སྩལ་པ། མ་འོངས་པའི་
མཐའ་དང་། ད་ལྟར་བྱུང་བའི་མཐའ་གང་ལ་གནས་པ་ལྟར་འདས་པའི་མཐའ་ཡང་དེ་ལྟར་གནས་སོ། །གསོལ་པ། བཅོམ་ལྡན་འདས་ད་ལྟར་བྱུང་བའི་མཐའ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། འཇམ་དཔལ་ཆོས་ཐམས་ཅད་ནི་རང་བཞིན་གྱིས་འཆི་འཕོ་མེད་
ཅིང་མ་སྐྱེས་པ་སྟེ། དེ་ནི་ད་ལྟར་བྱུང་བའི་མཐའ་ཞེས་བྱའོ། །གསོལ་པ། བཅོམ་ལྡན་འདས་འདས་པའི་མཐའ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། འཇམ་དཔལ་ཆོས་ཐམས་ཅད་ནི་བསམ་གྱིས་མི་ཁྱབ་པའི་མཐའ་སྟེ། དེའི་ཕྱིར་འདས་པའི་མཐའ་ཞེས་བྱའོ། །
གསོལ་པ། བཅོམ་ལྡན་འདས་མ་འོངས་པའི་མཐའ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། འཇམ་དཔལ་མ་འོངས་པའི་མཐའ་ནི་མ་སྐྱེས་པ་སྟེ། དེའི་ཕྱིར་མ་འོངས་པའི་མཐའ་ཞེས་བྱའོ། །འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་

བཅོམ་ལྡན་འདས་རྣམས་ཇི་ཙམ་དུ་དོན་ཤིན་ཏུ་རྣམ་པར་ངེས་པ་ངོ་མཚར་ལགས་སོ། །བཀའ་སྩལ་པ། འཇམ་དཔལ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་དོན་དང་ཚིག་ཤིན་ཏུ་རྣམ་པར་ངེས་པ་ཡིན་ནོ། །གསོལ་པ། བཅོམ་ལྡན་འདས་ཚིག་རྣམ་པར་ངེས་པ་ཞེས་བགྱི་བའི་ཚིག་གི་
དོན་གང་ལགས། བཀའ་སྩལ་པ། འཇམ་དཔལ་བྱས་པར་ངེས་པའོ། །ཅིའི་ཕྱིར་ངེས་ཞེ་ན། ཚིག་ལན་མེད་པར་ངེས་པའོ། །ཅིའི་ཕྱིར་ཚིག་ལན་མེད་པར་ངེས་ཞེ་ན། ཅིར་ཡང་བརྗོད་པར་བྱ་བ་མ་ཡིན་པའི་ཕྱིར་རོ། །བཅོམ་ལྡན་འདས་བརྗོད་པར་བགྱི་བ་མ་ལགས་པའི་ཚིག་གི་དོན་གང་
ལགས། བཀའ་སྩལ་པ། སྨྲ་བ་ནི་བརྗོད་པར་བྱ་བ་སྟེ། སྨྲ་བ་ཐམས་ཅད་ནི་བརྗོད་པར་བྱ་བ་མ་ཡིན་པའོ། །སྨྲ་བ་གང་ཞེ་ན། འཇམ་དཔལ་སྨྲ་བ་ནི་གནས་ཐ་དད་པ་ཞེས་བྱའོ། །གསོལ་པ། བཅོམ་ལྡན་འདས་གནས་ཐ་དད་པ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། འཇམ་
དཔལ་གནས་ཐ་དད་པ་ཞེས་བྱ་བ་ནི་སྨྲ་བ་འཛིན་པའི་འཛིན་པ་སྟེ། མཚན་མར་འཛིན་པའོ། །སྲོག་ཏུ་འཛིན་པའོ། །ཐམས་ཅད་འཛིན་པའོ། །གསོལ་པ། བཅོམ་ལྡན་འདས་ཅིའི་སླད་དུ་ཐམས་ཅད་འཛིན་པ་ལགས། བཀའ་སྩལ་པ། གཉི་ག་འཛིན་པ་ཡིན་པའི་ཕྱིར་རོ། །གསོལ་པ།
ཅིའི་སླད་དུ་གཉི་ག་འཛིན་པ་ལགས། བཀའ་སྩལ་པ། བདག་ཏུ་འཛིན་པ་དང་། གཞན་དུ་འཛིན་པ་སྟེ། ཚིག་དེ་ནི་བདག་ཏུ་འཛིན་པ་དང་ལྡན་པ་ཡང་མ་ཡིན། གཞན་དུ་འཛིན་པ་དང་ལྡན་པ་ཡང་མ་ཡིན་ཏེ། དེའི་ཕྱིར་ངེས་པ་ཞེས་བྱའོ། །དེ་ནས་བྱམས་མའི་བུ་གང་པོ་འདི་སྙམ་དུ་སེམས་པར་གྱུར་ཏེ་
སངས་རྒྱས་བཅོམ་ལྡན་འདས་རྣམས་ནི་ལེགས་པར་གསུངས་པའི་ཚིག་རབ་ཏུ་འབྱེད་པའོ། །སངས་རྒྱས་བཅོམ་ལྡན་འདས་རྣམས་ནི་ངེས་པའི་དོན་གཅིག་ཏུ་སྒྲུབ་ཅིང་རྣམ་པར་དབྱེ་བ་ལ་མཁས་པའོ། །སངས་རྒྱས་བཅོམ་ལྡན་འདས་རྣམས་ནི་ཡེ་ཤེས་ཡོངས་སུ་གཏུགས་པ་མེད་པ་ཐུགས་སུ་
ཆུད་པའོ། །སངས་རྒྱས་བཅོམ་ལྡན་འདས་རྣམས་ནི་ཚིག་འབྲུ་གསལ་བའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་འཁོར་ལོ་ལ་ལྡེམ་པོར་དགོངས་པའི་བཀོད་པ་ལ་མངོན་པར་དགྱེས་པ་སྟེ། མ་ལ་བདག་གིས་བཅོམ་ལྡན་འདས་ལ་ཆོས་ཐམས་ཅད་ལ་ཡི་གེ་བསྒྲུབ་པའི་

རྣམ་པར་དབྱེ་བ་ངེས་པར་རྣམ་པར་འབྱེད་པ་ཞུ་བར་བྱ་གོར་མ་ཆག་སྙམ་མོ། །དེ་ནས་བཅོམ་ལྡན་འདས་ཀྱིས་བྱམས་མའི་བུ་གང་པོའི་སེམས་ཀྱི་རྣམ་པར་རྟོག་པ་ཐུགས་ཀྱིས་མཁྱེན་ནས། བྱམས་མའི་བུ་གང་པོ་ལ་བཀའ་སྩལ་པ། གང་པོ་ཡི་གེ་བསྒྲུབ་པའི་རྣམ་པར་དབྱེ་བ་ངེས་པར་
རྣམ་པར་འབྱེད་པ་ལ་ངེས་པ་ཞེས་བྱ་བ་ལ་གཅིག་ནི་གང་ཡིན། བསྒྲུབ་པ་ནི་གང་ཡིན་ཞེ་ན། གཅིག་ནི་མངོན་པར་ཤེས་པ་སྟེ། དེ་ནི་བསྒྲུབ་པའོ། །སྒྲུབ་པ་སྒྲུབ་པ་ཞེས་བྱ་བ་ནི་གང་གི་ཡིན། ཐོབ་པར་བྱེད་པ་ཐོབ་པར་བྱེད་པ་ནི་གང་གི་ཡིན་ཞེ་ན། ཐོབ་པར་བྱེད་པ་རྟོགས་པ་ནི་དེ་བཞིན་
གཤེགས་པ་ཡིན་ཏེ། དེ་བཞིན་གཤེགས་པའི་འཇིག་པ་དང་། དེ་བཞིན་གཤེགས་པའི་འབྱུང་བའོ། །གང་པོ་དེ་བཞིན་གཤེགས་པ་དེ་བཞིན་གཤེགས་པ་ཞེས་ཅིའི་ཕྱིར་བརྗོད་པར་བྱ་ཞིང་སུས་བརྗོད་པར་བྱ་བ་ཡིན་ཞེ་ན། དངོས་པོས་ཀྱང་བརྗོད་པར་བྱ་བ་མ་ཡིན་ལ། དངོས་པོ་མེད་པས་
ཀྱང་བརྗོད་པར་བྱ་བ་མ་ཡིན་ནོ། །དངོས་པོ་ཡོད་པས་བརྗོད་པར་བྱ་བ་མ་ཡིན་ལ། དངོས་པོ་ཡོད་པ་མ་ཡིན་པས་བརྗོད་པར་བྱ་བ་ཡང་མ་ཡིན་ནོ། །དེ་བཞིན་གཤེགས་པ་ནི་ཚིག་ཐམས་ཅད་ལོག་པ་མ་ཡིན་ནོ། །དེ་བཞིན་གཤེགས་པ་ནི་གནས་ལས་ལོག་པ་མ་ཡིན་ཏེ། ཚིག་ཐམས་ཅད་ཀྱིས་
བརྗོད་པར་བྱ་བ་མ་ཡིན་ནོ། །གང་པོ་དེ་བཞིན་གཤེགས་པ་ཞེས་བྱ་བ་ནི་འདིའོ་ཞེས་བརྗོད་པར་བྱ་བ་མ་ཡིན་ནོ། །གང་པོ་དེ་བཞིན་གཤེགས་པ་ཞེས་བྱ་བ་ནི་བརྗོད་པར་བྱ་བ་མ་ཡིན་ཏེ། དཔེར་ན་ནམ་མཁའ་ནི་ལུས་སུ་གྱུར་པ་ཡང་མེད་དོ། །འགྱུར་བ་ཡང་མེད་དེ། དེ་ནི་དངོས་པོ་དང་དངོས་པོ་
མེད་པས་བརྗོད་པར་བྱ་བ་མ་ཡིན་ནོ། །གང་པོ་དེ་བཞིན་གཤེགས་པ་མཐོང་ངོ་ཞེས་གང་གིས་བརྗོད་པ་དང་། གང་ལ་བརྗོད་པ་ཡང་བརྗོད་པར་བྱ་བ་མ་ཡིན་ནོ། །དེ་སྐད་ཅེས་བཀའ་སྩལ་པ་དང་། བྱམས་མའི་བུ་གང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
ཆོས་བསྟན་པ་འདིའི་མིང་ཅི་ལགས། བཀའ་སྩལ་པ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་བགྲོ་བའོ། །གང་པོ་དེ་ནི་འདི་ཡིན་ཞེས་བྱ་བ་ཅིའི་ཕྱིར་དེ་ནི་འདི་ཡིན་ཞེ་ན། གྲངས་མེད་པ་འདི་དག་གིས་བགྲོ་བར་བྱ་བ་དག་ནི་བགྲོ་བའོ། །གང་པོ་ཅིའི་ཕྱིར་བགྲོ་བ་ཞེས་བྱ་ཞེ་ན། དེ་ནི་

བགྲོ་བ་མེད་པ་དང་། རྣམ་པར་བགྲོ་བ་མེད་པ་འདི་ཡིན་ནོ། །གང་པོ་ཆོས་ཀྱི་རྣམ་གྲངས་ཆོས་ཀྱི་རྣམ་གྲངས་ཞེས་བྱ་བ་ཅིའི་ཕྱིར་ཆོས་ཀྱི་རྣམ་གྲངས་ཞེས་བྱ་ཞེ་ན། ཤེས་པར་བྱ་བ་མ་ཡིན་པའོ། །ཡོངས་སུ་ཤེས་པར་བྱ་བ་མ་ཡིན་པའོ། །མ་བརྗོད་པའོ། །མ་སྨྲས་པའོ། །སྒྲ་མེད་པའོ། །བརྗོད་དུ་
མེད་ཅིང་བརྗོད་པ་ལས་འདས་པའོ། །རྣམ་པར་རིག་པ་མེད་པའོ། །གདགས་པར་བྱ་བ་མ་ཡིན་པའོ། །མི་གནས་པའོ། །བླང་དུ་མེད་ཅིང་དོར་དུ་མེད་པ་སྟེ། ཆོས་དེ་དག་ནི་ཆོས་ཀྱི་རྣམ་གྲངས་སུ་བསྟན་ཏོ། །གང་པོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཚུལ་གྱི་གནས་འདི་ཁོང་དུ་
ཆུད་པར་བྱེད་པ་དེ་དག་གི་ནི་དོན་དང་ཚིག་འབྲུས་ཡོངས་སུ་གཏུགས་པར་མི་འགྱུར་ཏེ། གང་པོ་རིགས་ཀྱི་བུའམ། རིགས་ཀྱི་བུ་མོ་དེ་དག་ལ་ངས་ཚུལ་གྱི་གནས་འདི་གཞག་པར་བྱའོ། །གང་པོ་ཚུལ་གྱི་གནས་ཞེས་བྱ་བ་ཅིའི་ཕྱིར་ཚུལ་གྱི་གནས་ཞེས་བྱ་ཞེ་ན། གང་པོ་འདི་ནི་ཚུལ་གྱི་གནས་ཞེས་
བྱ་བའམ། ཚུལ་མ་ཡིན་པའི་གནས་ཞེས་བྱ་བ་མེད་པ་དེའི་ཕྱིར་ཚུལ་གྱི་གནས་ཞེས་བརྗོད་དེ། གང་པོ་ཚིག་གཙོ་བོ་དེ་ནི་འདི་ཡིན་ནོ། །གང་པོ་ཚིག་གཙོ་བོ་ཚིག་གཙོ་བོ་ཞེས་བྱ་བ་ཅིའི་ཕྱིར་ཚིག་གཙོ་བོ་ཞེས་བྱ། དེ་དག་ཅིའི་ཕྱིར་ཚིག་གཙོ་བོ་ཞེས་བྱ་ཞེ་ན། གང་པོ་དཔེར་ན་རྣམ་པར་ཐར་པ་རྣམས་ཀྱི་
ཚིག་གི་དོན་བཞིན་ནོ། །གང་པོ་གཞན་ཡང་ཚིག་རབ་ཏུ་དབྱེ་བ་ཞེས་བྱ་བ་གང་གི་ཚིག་རབ་ཏུ་དབྱེ་བའི་རང་བཞིན་སྣང་བ་ཡིན་ཞེ་ན། རང་བཞིན་གྱིས་དངོས་པོ་མེད་པ་དེ་ལྟར་སྣང་ངོ་། །སྣང་བ་དེ་ནི་འདི་ལྟར་སྣང་སྟེ། ཆོས་ཐམས་ཅད་སྣོད་མ་ཡིན་པ་དེ་ལྟར་སྣང་ངོ་། །གང་པོ་སྣང་བ་དང་བྲལ་བ་
དེ་ལྟར་སྣང་ངོ་། །གང་པོ་ལས་དང་རྣམ་པར་སྨིན་པ་སྣང་བ་ལ། ལས་ནི་གང་། རྣམ་པར་སྨིན་པ་ནི་གང་ཞེ་ན། གང་པོ་ལས་ནི་གང་དཀར་པོ་དང་ནག་པོ་དང་། དཀར་པོ་ཡང་མ་ཡིན་ནག་པོ་ཡང་མ་ཡིན་པའོ། །རྣམ་པར་སྨིན་པ་ནི་ངེས་པར་སྤངས་པ་སྟེ། དེ་ལྟར་སྣང་བ་ཡིན་ནོ། །ཆོས་
ཐམས་ཅད་དབྱེར་མེད་པ་དེའི་ཕྱིར་སོ་སོ་ཡང་དག་པར་རིག་པ་ཞེས་བྱའོ། །ཅིའི་ཕྱིར་སོ་སོ་ཡང་དག་པར་རིག་པ་ཞེས་བྱ་ཞེ་ན། དོན་ས་སོ་ཡང་དག་པར་རིག་པའོ། །དོན་སོ་སོ་ཡང་དག་པར་རིག་པ་གང་ཞེ་ན། དོན་ཅེས་བྱ་བ་ནི་རང་བཞིན་གྱིས་སྟོང་པ་སྟེ། གང་རང་བཞིན་གྱིས་དབྱེར་མེད་པའོ། །

རྣམ་པ་ཐམས་ཅད་དུ་རང་བཞིན་གྱིས་སྟོང་ཞིང་དབྱེར་མེད་དེ། དེའི་ཕྱིར་དོན་སོ་སོ་ཡང་དག་པར་རིག་པ་ཞེས་བྱའོ། །ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་ཅིའི་ཕྱིར་ཆོས་ས་སོ་ཡང་དག་པར་རིག་པ་ཞེས་བྱ་
ཞེ་ན། ཆོས་རྣམས་ཀྱི་རང་བཞིན་ནི་ཆོས་ཉིད་དེ་དེ་ནི་མ་བྱས་པའོ། །གང་མ་བྱས་པ་དེ་ནི་རང་བཞིན་ཏེ། དེ་ནི་དབྱེར་མེད་པས་ཆོས་རྣམས་ཀྱི་དོན་སོ་སོ་ཡང་དག་པར་རིག་པ་ཞེས་བྱའོ། །སྤོབས་པའི་རང་བཞིན་ཅིའི་ཕྱིར་རང་བཞིན་ཞེས་བྱ་ཞེ་ན། ཆོས་ཐམས་ཅད་དབྱེར་མེད་པ་དེ་ལྟར་སྣང་བའོ། །ཆོས་ཐམས་ཅད་
རང་བཞིན་གྱིས་དངོས་པོ་མེད་པ་དེ་ལྟར་སྣང་བའོ། །ཆོས་ཐམས་ཅད་རང་བཞིན་གྱིས་འགགས་པ་དེ་ལྟར་སྣང་བའོ། །ཆོས་ཐམས་ཅད་མིག་ཡོར་དང་མཚུངས་པ་དེ་ལྟར་སྣང་བའོ། །གང་པོ་གཞན་ཡང་ལས་ནི་སྣ་ཚོགས་སུ་སྣང་སྟེ། ལས་དེ་ཡང་རྣམ་པར་སྨིན་པས་སྣ་ཚོགས་པ་ཉིད་དོ། །གང་
པོ་རྣམ་པར་སྨིན་པ་དེ་ཡང་དབང་པོས་སམ། དབང་པོ་བྱེ་བ་ཕྲག་དགུ་བཅུའམ། བྱེ་བ་ཕྲག་བརྒྱའི་སྒ་ནས་ལས་ཀྱི་རྣམ་པར་ཕྱེ་བས་ཐ་དད་པ་སྟེ། དེ་ལྟར་སྣང་ངོ་། །རྣམ་པར་སྨིན་པའི་ཆེད་དུ་ལས་སྐྱེད་པར་སྣང་སྟེ། འདིར་སྐྱེད་པ་ནི་སྐྲུན་པ་སྟེ། ཀུན་ཏུ་སྐྱེད་པའོ། །ཅིའི་ཕྱིར་ཀུན་ཏུ་སྐྱེད་པ་ཞེས་བྱ་
ཞེ་ན། སྡུག་བསྔལ་ཀུན་ཏུ་སྐྱེད་པའི་ཕྱིར་རོ། །སྡུག་བསྔལ་གང་ཞེ་ན་སྲེད་པ་དང་ལྟ་བའོ། །དེ་ལ་ལྟ་བ་ལ་ཆགས་པ་གང་ཞེ་ན། གང་དུ་འགྲོ་བ་ཡང་མེད་ཅིང་གནས་པ་ཡང་མེད་པ་ཡིན་ན་བྱིས་པ་རྣམས་ནི་ལྟ་བ་མེད་བཞིན་དུ་ལྟ་བ་ལ་ཆགས་ནས་ཀུན་ཏུ་རྒྱུག་གོ། །གང་དག་ཀུན་ཏུ་རྒྱུག་པ་དེ་དག་ནི་རྣམ་པར་
རྒྱུག་གོ། །གང་དག་རྣམ་པར་རྒྱུག་པ་དེ་དག་ནི་རྣམ་པར་ཉམས་སོ། །གང་དག་རྣམ་པར་ཉམས་པ་དེ་དག་ནི་རྣམ་པར་རྒྱུག་གོ། །གང་དག་རྣམ་པར་རྒྱུག་པ་དེ་དག་ནི་རྩོད་པར་བྱེད་དོ། །ཅིའི་ཕྱིར་རྩོད་པར་བྱེད་ཅེ་ན། ཡོད་པ་མ་ཡིན་པ་དང་། གསོག་དང་། བལྟར་མེད་པ་ལ་རྩོད་པར་བྱེད་དོ། །གཞན་
ཡང་བྱིས་པ་སོ་སོའི་སྐྱེ་བོ་ཡང་དག་པར་སྡོམ་པ་མ་ཡིན་པ་རྣམས་ནི་གང་སྐྱེད་ཅེས་བྱ་བ་དེ་ལྟར་སྣང་སྟེ། སྣང་བ་ནི་དེའི་ངེས་པའི་ཚིག་ཏུ་སྣང་བ་ཞེས་བྱའོ། །གང་པོ་བསྒྲུབ་པ་ཞེས་བྱ་བ་གང་གི་བསྒྲུབ་པ་ཞེ་ན། ཡི་གེའི་བསྒྲུབ་པའོ། །གང་པོ་ཅིའི་ཕྱིར་ཡི་གེ་ཞེས་བྱ་ཞེ་ན། གང་ཟག་པ་མེད་པའི་ཕྱིར་རོ། །གང་

པོ་ཡི་གེ་ཞེས་བྱ་བ་ནི་གཟོད་མ་ནས་ཟད་པའོ། །གང་པོ་གཟོད་མ་ནས་ཟད་ཅེས་བྱ་བ་ནི་ཟད་པ་མེད་པའོ། །གང་པོ་གཞན་ཡང་ཟད་པ་མེད་པ་དང་། ཟད་པ་མེད་པའི་སྒོ་ཞེས་བྱ་བ་ནི་ཆོས་ཐམས་ཅད་དོ། །ཟད་པ་མེད་པ་དང་། ཟད་པ་མེད་པའི་སྒོ་ཆོས་ཐམས་ཅད་ནི་ཆོས་ཀྱི་སྒོ་སྟེ། གང་པོ་ཆོས་ཀྱི་སྒོ་འདི་ནི་ནམ་མཁའི་
སྒོ་ཡིན་ཏེ། རིགས་ཀྱི་བུའམ། རིགས་ཀྱི་བུ་མོ་གང་དག་ཞུགས་པ་དེ་ནི་ངེས་པའི་ཚིག་བསྟན་པ་ལ་ཟད་པ་མེད་པར་འགྱུར་རོ། །གང་པོ་ངས་ཆོས་ཀྱི་སྒོ་ཟད་པ་མེད་པ་འདི་ཀུན་དགའ་བོ་ལ་གཏད་པར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་
བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །དེ་ཅིའི་ཕྱིར་ཞེ་ན། ཀུན་དགའ་བོ་གང་ལ་ལ་ཞིག་ཆོས་ཀྱི་རྣམ་གྲངས་འདི་འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། ཐ་ན་ཚིག་བཞི་པའི་ཚིགས་སུ་བཅད་པ་ཙམ་
བཟུང་ནས་གཞན་དག་ལ་སྟོན་པར་བྱེད་པ་དེ་ནི་ཀུན་དགའ་བོ་སངས་རྒྱས་ཀྱི་མཛད་པ་བྱེད་པ་ཡིན་ཏེ། འདི་གཞན་ལ་སྟོན་པར་བྱེད་པའི་རིགས་ཀྱི་བུའམ། རིགས་ཀྱི་བུ་མོ་གང་ཡིན་པ་དེའི་དགེ་བའི་རྩ་བ་མང་དུ་སྐྱེད་པར་འགྱུར་རོ། །ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ཁྱོད་ལ་ལན་གཉིས་
སུ་ཡོངས་སུ་གཏད་པས་ཡོངས་སུ་གཏད་དོ། །དེ་ནས་བཅོམ་ལྡན་འདས་ཀྱིས་ཕྱག་གཡས་པས་ཚེ་དང་ལྡན་པ་ཀུན་དགའ་བོ་ལ་བཟུང་ནས་བཀའ་སྩལ་པ། ཀུན་དགའ་བོ་ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྐལ་པ་གྲངས་མེད་པ་བྱེ་བ་ཕྲག་འབུམ་དུ་ཡང་དག་པར་བསྒྲུབས་པ་འདི་ཁྱོད་ཀྱི་
ལག་ཏུ་ཡོངས་སུ་གཏད་ཀྱིས། ཅི་ནས་ཀྱང་ཟུང་ལ་གཞན་དག་ལ་ཡང་ཀུན་ཆུབ་པར་གྱིས་ཤིག །ཞུགས་ནས་ཀྱང་གཞན་དག་ལ་རྒྱ་ཆེར་ཡང་དག་པར་སྒྲོགས་ཤིག །ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་དེ་བཞིན་གཤེགས་པ་བགྲོ་བའི་ཆོས་ཀྱི་རྣམ་གྲངས་འདི་འཛིན་
ཏམ། ཀུན་ཆུབ་པར་བྱེད་དམ། འཇུག་པར་བྱེད་པ་དེ་ལ་ནི་ཚེ་འདི་ལ་ཡོན་ཏན་ལྔ་བརྒྱ་འབྱུང་བར་འགྱུར་རོ། །ལྔ་བརྒྱ་གང་ཞེ་ན། ལུས་ལ་ཡོན་ཏན་བརྒྱ་དང་། ངག་གི་ལས་ཀྱི་ཡོན་ཏན་བརྒྱ་དང་། ཡིད་ཀྱི་ལས་ཀྱི་ཡོན་ཏན་བརྒྱ་དང་། ཀུན་ཏུ་བསྲུངས་པའི་ཡོན་ཏན་བརྒྱ་དང་། ཆོས་ཀྱི་ཡོན་ཏན་བརྒྱ་

པོ་དག་གོ། །ཀུན་དགའ་བོ་དེ་ལ་ལུས་ལ་གནས་པའི་སྲིན་བུའི་རིགས་གང་དག་ཡིན་པ་དེ་དག་དེའི་ལུས་ལ་འབྱུང་བར་མི་འགྱུར་རོ། །ཀུན་དགའ་བོ་དེ་ལྟར་ན་དེ་དག་ལ་མིག་ནད་མི་འབྱུང་ཞིང་རྣ་བའི་ནད་མེད། སྣའི་ནད་མེད། ལྕེའི་ནད་མེད་ཅིང་ལུས་ཀྱི་ནད་ཀྱང་མི་འབྱུང་ངོ་། །མིག་ལ་སྡུག་
བསྔལ་མི་འབྱུང་ཞིང་རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་སྡུག་བསྔལ་མི་འབྱུང་ངོ་། །མིག་ལ་ཀུན་ནས་གནོད་པ་མི་འབྱུང་ངོ་། །མིག་མི་གསལ་བར་མི་འགྱུར་རོ། །མིག་ཟུམས་པར་མི་འགྱུར་རོ། །མིག་འཁྲུལ་པར་མི་འགྱུར་རོ། །མིག་འཇིགས་འཇིགས་ལྟ་བུར་མི་འགྱུར་རོ། །
མིག་ལོང་བར་མི་འགྱུར་རོ། །མིག་ཡོན་པོར་མི་འགྱུར་རོ། །མིག་ཡ་གཅིག་པར་མི་འགྱུར་རོ། །མིག་ཟུར་གྱིས་ལྟ་བར་མི་འགྱུར་རོ། །མིག་གསལ་བར་འགྱུར་རོ། །མིག་ཀུན་ཏུ་བལྟ་བར་འགྱུར་རོ། །མིག་མ་ཉམས་ཤིང་གཞོན་བག་ཅན་དུ་འགྱུར་རོ། །མིག་རྨ་བྱའི་མགྲིན་པ་ལྟ་བུ་དང་། མིག་གླང་
པོའི་རྒྱལ་པོ་འགྱིང་ཞིང་འགྲོ་བ་ལྟ་བུར་འགྱུར་རོ། །གསང་བ་སྦ་བར་འགྱུར་རོ། །ཡན་ལག་བཅུ་རྣམ་པར་དག་པར་འགྱུར་རོ། །ཉིང་ལག་བཅུ་རྣམ་པར་དག་པར་འགྱུར་རོ། །ཉིང་ལག་མེད་པ་བཅུ་རྣམ་པར་དག་པར་འགྱུར་རོ། །རྣ་བ་བཅུ་རྣམ་པར་དག་པར་འགྱུར་རོ། །སྣ་བཅུ་རྣམ་པར་དག་པར་འགྱུར་རོ། །
ལྕེ་བཅུ་རྣམ་པར་དག་པར་འགྱུར་རོ། །བ་སྤུའི་ཁུང་བུ་འཁོར་ལྔ་པ་རྣམ་པར་དག་པར་འགྱུར་རོ། །འབྲས་ཆན་ལ་ཡོད་པའི་རོ་བྲོ་བ་ཉི་ཤུ་རྩ་གཅིག་མྱང་བ་རྣམ་པར་དག་པར་འགྱུར་ཏེ། ལུས་ཀྱི་ཡོན་ཏན་འདི་དག་ཐོབ་པར་འགྱུར་རོ། །དེ་ལ་ངག་གི་ལས་ཀྱི་ཡོན་ཏན་བརྒྱ་ཐོབ་པར་འགྱུར་བ་གང་ཞེ་ན།
དབྱངས་ཀྱིས་བསྒྱུར་བའི་ངག་གི་ལས་ཀྱི་ཡོན་ཏན་བཅུ་དང་། གཞན་བསྲུངས་པའི་ངག་གི་ལས་ཀྱི་ཡོན་ཏན་བཅུ་དང་། མ་འོངས་པའི་སྐྱོན་བསྲུངས་པའི་ངག་གི་ལས་ཀྱི་ཡོན་ཏན་བཅུ་དང་། ད་ལྟར་བྱུང་བའི་སྐྱོན་བསྲུངས་པའི་ངག་གི་ལས་ཀྱི་ཡོན་ཏན་བཅུ་དང་། སངས་རྒྱས་ཀྱིས་གནང་
བའི་ངག་གི་ལས་བཀྲ་ཤིས་པ་བཅུ་དང་། ལས་ཀྱི་རྗེས་སུ་འབྲེལ་བའི་ངག་གི་ལས་བཅུ་དང་། ལྷས་གནང་བའི་ངག་གི་ལས་དང་ཞིང་ཕན་པ་བཅུ་དང་། བསླབ་པ་ཡོངས་སུ་བཟུང་བའི་ངག་གི་ལས་བཅུ་དང་། ངོ་བོ་ཉིད་ཀྱིས་ཡོན་ཏན་དང་ལྡན་པའི་ངག་གི་ལས་བཅུ་སྟེ། ངག་གི་ལས་ཀྱི་

ཡོན་ཏན་བརྒྱ་པོ་འདི་དག་ཐོབ་པར་འགྱུར་རོ། །དེ་ལ་ཡིད་ཀྱི་ལས་ཀྱི་ཡོན་ཏན་བརྒྱ་ཐོབ་པར་འགྱུར་བ་གང་ཞེ་ན། ཡིད་ཀྱི་ལས་གཅིག་པོ་མི་འཐུན་པ་དེ་དང་བྲལ་བར་འགྱུར་བ་སྟེ། གང་ཞེ་ན། དེས་སྨྲ་བ་སྔོན་དུ་བཏང་སྟེ། ཚིག་བརྗོད་པ་ན་གང་ཡིད་ཀྱི་ལས་མི་འཐུན་པའི་རྗེས་སུ་འཇུག་པ་དང་བྲལ་བར་
འགྱུར་བ་ཡིན་ནོ། །སེམས་གཡེངས་པར་མི་འགྱུར་རོ། །སེམས་ལ་གནོད་པར་མི་འགྱུར་རོ། །སེམས་འདུ་ཤེས་ཅན་དུ་མི་འགྱུར་རོ། །དེའི་སེམས་ལ་མི་འཐུན་པ་མེད་པར་འགྱུར་རོ། །བློ་དང་ལྡན་པར་འགྱུར་རོ། །རྟོགས་པ་དང་ལྡན་པར་འགྱུར་རོ། །ངེས་པར་འགྱུར་རོ། །སྤྱོད་པ་དང་ལྡན་
པར་འགྱུར་རོ། །ཆོ་ག་ལ་མཁས་པར་འགྱུར་རོ། །བརྟག་པ་ཕུན་སུམ་ཚོགས་པར་འགྱུར་རོ། །གཡོག་ཕུན་སུམ་ཚོགས་པར་འགྱུར་རོ། །སྤྱོད་ལམ་ཕུན་སུམ་ཚོགས་པར་འགྱུར་རོ། །དྲན་པ་དང་ལྡན་ཞིང་མི་གཡོ་བར་འགྱུར་རོ། །སེམས་མི་སྒུལ་ཞིང་བརྟན་པར་འགྱུར་རོ། །ཡོན་ཏན་
སྒྲུབ་པར་འགྱུར་རོ། །སེམས་འཇམ་པར་འགྱུར་རོ། །ཕྱིར་མི་ལྡོག་པར་འགྱུར་རོ། །སེམས་མི་གཡོ་བར་འགྱུར་རོ། །སེམས་དང་འཐུན་པར་འགྱུར་ཏེ། སེམས་བརྟན་པ་དེ་དང་། ཕྱིར་མི་ལྡོག་པ་དེ་ལ་ནི་སངས་རྒྱས་བཅོམ་ལྡན་འདས་རྣམས་གཟིགས་བཞེད་པར་འགྱུར་ལ། ལྷ་རྣམས་ཀྱང་
ལྟ་འདོད་པར་འགྱུར་ཞིང་ཀླུ་རྣམས་དང་། གནོད་སྦྱིན་རྣམས་དང་། དྲི་ཟ་རྣམས་དང་། མི་འམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། མི་རྣམས་དང་། མི་མ་ཡིན་པ་རྣམས་ཀྱང་ལྟ་འདོད་པར་འགྱུར་རོ། །དེ་ལ་ལྷ་རྣམས་ཀྱང་སྙན་པར་སྨྲ་ཞིང་ཀླུ་རྣམས་དང་། དྲི་ཟ་རྣམས་དང་། གནོད་སྦྱིན་
རྣམས་དང་། མི་འམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། མི་རྣམས་དང་། མི་མ་ཡིན་པ་རྣམས་ཀྱང་སྙན་པར་སྨྲ་ལ། དེ་ལ་སངས་རྒྱས་བཅོམ་ལྡན་འདས་རྣམས་ཀྱང་སྙན་པ་གསུང་བར་འགྱུར་རོ། །ལྷ་རྣམས་དང་། ཀླུ་རྣམས་དང་། གནོད་སྦྱིན་རྣམས་དང་། དྲི་ཟ་རྣམས་དང་། མི་འམ་ཅི་
རྣམས་དང་། ལྟོ་འཕྱེ་ཆེན་པོ་རྣམས་དང་། མི་རྣམས་དང་། མི་མ་ཡིན་པ་རྣམས་ཀྱིས་བསྔགས་པར་བྱ་ཞིང་། སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བསྔགས་པར་བྱ་བ་སྟེ། དེ་ཉིད་འོང་བ་ལ་ཡང་སངས་རྒྱས་བཅོམ་ལྡན་འདས་རྣམས་ཆོས་ཉེ་བར་སྒྲུབ་པར་མཛད་དོ། །ཀུན་དགའ་བོ་

གང་ལ་ལ་དག་མདོ་སྡེ་འདི་འཆང་ངམ། སྟོན་པ་དེ་དག་གིས་ནི་ཡོན་ཏན་བརྒྱ་པོ་མང་པོ་ལ་རེ་བར་བྱའོ། །ཀུན་དགའ་བོ་ཆོས་ཀྱི་རྣམ་གྲངས་འདིར་ནི་སངས་རྒྱས་ཐམས་ཅད་ཀྱི་བྱང་ཆུབ་བསྡུས་སོ། །ཀུན་དགའ་བོ་དེ་ཅིའི་ཕྱིར་ཞེ་ན། འདིར་ནི་ཆོས་ཐམས་ཅད་བསྡུས་པའི་ཕྱིར་ཏེ།
དེ་ནི་སངས་རྒྱས་བགྲོ་བ་འདི་ཡིན་ནོ། །ཀུན་དགའ་བོ་སངས་རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་འདི་ནི་སྐྱེས་བུ་དམན་པ་རྣམས་ཀྱི་ལག་ཏུ་འོང་བར་མི་འགྱུར་ཞིང་། ལེ་ལོ་ཅན་རྣམས་ཀྱི་ལག་ཏུ་འོང་བར་མི་འགྱུར་ཏེ། སེམས་ཅན་དེ་དག་ནི་དམན་པར་མི་
འགྱུར་རོ། །ཀུན་དགའ་བོ་གཞན་ཡང་སངས་རྒྱས་བགྲོ་བ་འདི་གང་དག་གི་ལག་ཏུ་འོང་བར་འགྱུར་བའི་སེམས་ཅན་དེ་དག་ནི་བརྩོན་འགྲུས་བརྩམས་པར་འགྱུར་ལ། སེམས་ཞུམ་པ་མེད་པ་རྣམས་དང་། སེམས་ཚར་བཅད་པ་རྣམས་ཀྱི་ལག་ཏུ་འོང་བར་འགྱུར་རོ། །ཀུན་དགའ་བོ་སངས་རྒྱས་བགྲོ་བ་
འདི་སེམས་ཅན་སེམས་ཚར་མ་བཅད་པ་རྣམས་ཀྱི་ལག་ཏུ་འགྲོ་བར་མི་འགྱུར་རོ། །ཀུན་དགའ་བོ་གཞན་ཡང་འདི་ནི་བདུད་རྣམ་པར་འཇོམས་པར་རིག་པར་བྱའོ། །ཀུན་དགའ་བོ་བདུད་སྡིག་ཅན་ནི་མདོ་སྡེ་འདི་ནུབ་པར་བྱ་བའི་ཕྱིར་བརྩོན་པར་བྱེད་དེ། ཀུན་དགའ་བོ་དེ་ལ་བདུད་ཀྱི་ལས་ཕྲ་བ་རྣམས་
དང་། བདུད་ཀྱི་ལས་ཤིག་ཤིག་པོ་རྣམས་དང་། བདུད་ཀྱི་ལས་ཐག་རིང་བ་རྣམས་སུ་བལྟ་ཞིང་བདུད་ཀྱི་ལས་རྣམས་ཕམ་པར་ཡང་བལྟ་བར་བྱའོ། །ཀུན་དགའ་བོ་གཞན་ཡང་མདོ་འདི་ལས་བདུད་ཀྱི་ལས་མང་པོ་དག་འབྱུང་བར་འགྱུར་ཏེ། དེ་ལ་བདུད་ཀྱི་ལས་ཐག་རིང་བ་རྣམས་ཇི་ལྟ་བུར་བལྟ་
ཞེ་ན། མདོ་འདི་ནི་ཧ་ཅང་ཐག་རིང་བའོ། །མདོ་འདི་ནི་ཧ་ཅང་རྒྱ་ཆེ་བའོ། །མདོ་འདི་ནི་ཧ་ཅང་བར་ཆད་མང་བའོ། །མདོ་འདི་ནི་ཧ་ཅང་གཡེང་བ་མང་བའོ། །མདོ་འདི་ནི་ཧ་ཅང་ཉོན་མོངས་པ་མང་བའོ་ཞེས་ཏེ། རིགས་ཀྱི་བུའམ། རིགས་ཀྱི་བུ་མོ་དེ་དག་གིས་མདོ་འདིའི་ཡོན་ཏན་དེ་ལྟར་མ་ཤེས་ནས།
དེ་དག་གིས་མ་ཤེས་པ་ན་བདུད་ཀྱི་ལྕགས་ཀྱུས་ཟིན་ཅིང་བདུད་ཀྱི་ཞགས་པས་བཅིངས་ནས་མདོ་འདི་ལ་བརྩོན་པར་མི་བྱེད། འཛིན་པར་མི་བྱེད། འཆང་བར་མི་བྱེད། ཀུན་ཆུབ་པར་མི་བྱེད། སྟོན་པར་མི་བྱེད་དོ། །ཀུན་དགའ་བོ་སེམས་ཅན་རྣམས་ཇི་ཙམ་གྱིས་ཉམས་པར་འགྱུར་བ་

ལྟོས་ཤིག །ལ་ལ་ཞིག་གིས་དེ་བཞིན་གཤེགས་པ་བགྲོ་བ་ཆོས་ཀྱི་རྣམ་གྲངས་འདི་འཛིན་པར་མི་བྱེད་ཅིང་འཆང་བར་མི་བྱེད་ལ། གཞན་དག་ལ་ཡང་རྒྱ་ཆེར་ཡང་དག་པར་མི་སྟོན་པ་ནི་ཀུན་དགའ་བོ་འདི་ལྟར་སངས་རྒྱས་ཀྱི་བྱང་ཆུབ་ཡང་དག་པའི་ཕུལ་ལ་བརྙས་པ་ཡིན་ཏེ། ལེགས་པ་མ་ཡིན་
ནོ། །ཤིན་ཏུ་ལེགས་པ་མ་ཡིན་ནོ། །ཀུན་དགའ་བོ་གང་དག་གིས་མདོ་སྡེ་འདི་ལ་བརྙས་པ་དེ་དག་གིས་ནི་ཆོས་ལ་ཡང་བརྙས་པ་ཡིན་ནོ། །ཀུན་དགའ་བོ་གཞན་ཡང་གང་དག་གིས་མདོ་སྡེ་འདི་ལ་བརྙས་པར་བྱེད་པ་དེ་དག་ལ་སྐུལ་བ་འདིས་ཇིར་ཡང་མི་འགྱུར་རོ། །དེ་ཅིའི་ཕྱིར་ཞེ་ན།
འདི་ལྟར་སྐྱེས་བུ་རྨོངས་པ་དེ་དག་ནི་མངོན་པར་བརྩོན་པ་མ་ཡིན་ཏེ། དེ་དག་ལ་བསྐུལ་བ་ན་རང་གི་སེམས་ཀྱང་མི་ཤེས་ཤིང་རང་གི་གནས་ཀྱང་མི་ཤེས་ལ། དེ་དག་མི་ཤེས་པས་བསྐུལ་བ་ཡང་འཛིན་པར་མི་བྱེད་དོ། །ཀུན་དགའ་བོ་གཞན་ཡང་འདིར་དེ་བཞིན་གཤེགས་པ་ལ་བརྙས་པ་
བྱས་པར་འགྱུར་བ་དང་། ཆོས་ལ་བརྙས་པར་བྱེད་པ་ཅི་ཞིག་ཡོད་དེ། སངས་རྒྱས་བཅོམ་ལྡན་འདས་དེ་དག་ནི་ཆོས་ཉིད་ཀྱིས་མ་བརྙས་པའོ། །ཀུན་དགའ་བོ་སྐྱེས་བུ་རྨོངས་པ་དེ་དག་ནི་ཡང་དག་པ་མ་ཡིན་པའི་ཆོས་རྣམས་ལས་ཡོངས་སུ་ཉམས་པས་བདག་ཉིད་ལ་བརྙས་པར་འགྱུར་
གྱི། གང་དག་དེ་བཞིན་གཤེགས་པ་ལ་བརྙས་པར་འགྱུར་བའམ། ཆོས་ལ་བརྙས་པར་འགྱུར་བ་ནི་མེད་དོ། །ཀུན་དགའ་བོ་དེ་བཞིན་གཤེགས་པས་ནི་བརྙས་པ་མེད་པའི་ཆོས་ཐུགས་སུ་ཆུད་ལ། སངས་རྒྱས་བཅོམ་ལྡན་འདས་རྣམས་ནི་བརྙས་པ་མེད་པའོ། །ཀུན་དགའ་བོ་
དེ་ལྟ་བས་ན་སངས་རྒྱས་ཀྱི་ཆོས་རྣམས་ལ་བརྙས་པར་མི་འགྱུར་བ་དང་། ཕྱས་སུ་མི་འགྱུར་བར་ཆོས་འདི་དག་ཁོང་དུ་ཆུད་པར་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་འདི་ནས་འཇིག་རྟེན་གྱི་ཁམས་འབུམ་ཕྲག་ཚད་
མེད་ཅིང་དཔག་ཏུ་མེད་པ་དག་འདས་པའི་ཕ་རོལ་ན། འཇིག་རྟེན་གྱི་ཁམས་ཟླ་འཕགས་འོད་ཟེར་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་མངོན་འཕགས་འོད་ཟེར་རོལ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་སོ། །འཇམ་དཔལ་

དེ་བཞིན་གཤེགས་པ་དེའི་འཇིག་རྟེན་གྱི་ཁམས་དེ་རིན་པོ་ཆེ་སྣ་བདུན་ལས་གྲུབ་པའི་པད་མ་དག་གིས་རྒྱས་པར་གྱུར་ཏེ། པད་མ་དེ་དག་གི་དབུས་ནས་བྱང་ཆུབ་སེམས་དཔའ་དེ་དག་སྐྱིལ་མོ་ཀྲུང་བཅས་བཞིན་དུ་བྱུང་ལ། པད་མ་དེ་དག་ལས་ཀྱང་འོད་ཟེར་བྱུང་ངོ་། །བྱང་ཆུབ་སེམས་
དཔའ་དེ་དག་གིས་འོད་ཟེར་དེ་དག་ལས་སྤྲུལ་པ་སྤྲུལ་པར་བྱེད་དེ། སྤྲུལ་པ་དཔག་ཏུ་མེད་པ་དག་སྤྲུལ་པར་བྱེད་ཅིང་སྤྲུལ་པས་ཆོས་ཀྱང་སྟོན་ཏོ། །འཇམ་དཔལ་འོད་ཟེར་དེ་དག་གིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དྲུག་ཅུ་སྙེད་དག་སྣང་བས་གསལ་བར་བྱས་སོ། །འཇམ་དཔལ་
དཔེར་ན་སྟོན་ཀའི་དུས་སུ་ནམ་མཁའ་དག་ཅིང་དྲི་མ་མེད་ལ་ཆར་སྤྲིན་མེད་པ། ཟླ་བ་ཡར་གྱི་ཚེས་བཅྭ་ལྔའི་ནམ་གྱི་གུང་ཐུན་ལ་ཟླ་བའི་དཀྱིལ་འཁོར་སྤྲིན་མེད་ཟླ་བའི་འོད་ཟེར་གྱིས་ཀུན་དུ་གསལ་བར་སྣང་བ་དེའི་ཚེ་འཛམ་བུའི་གླིང་ཁོར་ཡུག་ཏུ་སྣང་བས་ཤིན་ཏུ་ཁྱབ་པར་འགྱུར་རོ། །འཇམ་དཔལ་དེ་
བཞིན་དུ་འཇིག་རྟེན་གྱི་ཁམས་ཟླ་འཕགས་འོད་ཟེར་དེ་ཁོར་ཡུག་ཏུ་ཡང་སྣང་བས་ཤིན་ཏུ་ཁྱབ་པར་འགྱུར་རོ། །དེ་བཞིན་དུ་ཤར་དང་། ལྷོ་དང་། ནུབ་དང་། བྱང་དང་། དེ་བཞིན་དུ་སྟེང་དང་། དེ་བཞིན་དུ་འོག་དང་། དེ་བཞིན་དུ་ཕྱོགས་མཚམས་དང་། དེ་བཞིན་དུ་ཕྱོགས་བཅུའི་འཇིག་རྟེན་དག་
ཏུ་ཡང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དྲུག་ཅུ་སྙེད་དག་སྣང་བས་གསལ་བར་བྱས་སོ། །འཇམ་དཔལ་རྒྱུ་དེས་ན་འཇིག་རྟེན་གྱི་ཁམས་མི་མཇེད་ཀྱི་མིང་ཟླ་འཕགས་འོད་ཟེར་ཅེས་བྱའོ། །འཇམ་དཔལ་དེ་བཞིན་གཤེགས་པ་དེ་ཆོས་སྟོན་པའི་སྤྱི་བོ་ནས་པད་མ་བྱུང་སྟེ། པད་མ་དེ་དག་ལས་
འོད་ཟེར་བྱུང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བར་བྱས་སོ། །འོད་ཟེར་དེ་དག་ལས་ཀྱང་སངས་རྒྱས་ཀྱི་སྐུ་བྱུང་སྟེ། སངས་རྒྱས་ཀྱི་སྐུ་དེ་དག་གིས་ཀྱང་དེ་བཞིན་གཤེགས་པ་དེ་ལ་པད་མ་དག་གིས་གཏོར་ཏོ། །མངོན་པར་གཏོར་ཏོ། །འཇམ་དཔལ་པད་མ་གཏོར་བ་
དེ་དག་ཉིད་ཀྱང་དེ་བཞིན་གཤེགས་པའི་སྐུར་གནས་སོ། །འཇམ་དཔལ་འདི་ལྟར་བཅོམ་ལྡན་འདས་དེའི་སྔོན་གྱི་སྨོན་ལམ་གྱི་རྒྱུས་ན། བཅོམ་ལྡན་འདས་དེ་པད་མ་མངོན་འཕགས་ཞེས་བྱའོ། །འཇམ་དཔལ་དེ་ནས་ངས་དེ་བཞིན་གཤེགས་པ་པད་མ་མངོན་འཕགས་འོད་ཟེར་རོལ་པ་དེ་ལ་འདི་སྐད་ཅེས་

སྨྲས་སོ། །དེ་བཞིན་གཤེགས་པ་པད་མ་མངོན་འཕགས་འོད་ཟེར་རོལ་པས་ཅི་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །འདས་པ་དང་མ་འོངས་པའི་སེམས་གང་ལ་གནས་ནས་དེ་
ལྟར་བྱང་ཆུབ་པ་དེ་ལྟ་བུ་ལ་གནས་ཏེ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་འདས་པ་དང་མ་འོངས་པའི་སེམས་ཅི་ལ་གནས་ལགས། བཀའ་སྩལ་པ། འཇམ་དཔལ་གང་འདས་པའི་
སེམས་དེ་ནི་མ་སྐྱེས་པའོ། །འཇམ་དཔལ་གང་མ་འོངས་པའི་སེམས་དེ་ཡང་མ་སྐྱེས་པའོ། །གང་ད་ལྟར་བྱུང་བའི་སེམས་དེ་ཡང་མ་སྐྱེས་པའོ། །གང་མི་སྐྱེ་བ་དེ་ནི་དེ་བཞིན་ཉིད་བྱང་ཆུབ་པར་བྱ་བའི་ཕྱིར་ཏེ་དེ་ནི་བྱང་ཆུབ་བོ། །འཇམ་དཔལ་དཔེར་ན་འདས་པའི་སྒྱུ་མ་ཡང་ཡོད་པ་མ་ཡིན་ནོ། །མ་
འོངས་པའི་ཡང་ཡོད་པ་མ་ཡིན་ལ། ད་ལྟར་བྱུང་བའི་ཡང་ཡོད་པ་མ་ཡིན་ཏེ། རང་གི་ངོ་བོས་དབེན་ཞིང་རང་གི་ངོ་བོ་དང་བྲལ་བ་ཡིན་ནོ། །འཇམ་དཔལ་དེ་བཞིན་དུ་གང་འདས་པའི་སེམས་དེ་ནི་མ་སྐྱེས་པའོ། །གང་མ་འོངས་པའི་སེམས་དེ་ཡང་མ་སྐྱེས་པའོ། །གང་ད་ལྟར་བྱུང་བའི་
སེམས་དེ་ཡང་མ་སྐྱེས་པ་སྟེ། བྱང་ཆུབ་དེ་ནི་དེ་ལྟ་བུ་ཡིན་ནོ། །འཇམ་དཔལ་བྱང་ཆུབ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ཏེ། འཇམ་དཔལ་བྱང་ཆུབ་དེ་ནི་དེ་ལྟ་བུ་ཡིན་ནོ། །འཇམ་དཔལ་འདི་ལྟར་བྱང་ཆུབ་ནི་ཡོད་པ་ཡང་མ་ཡིན། འཇམ་
དཔལ་བྱང་ཆུབ་དེ་ནི་མེད་པ་ཡང་མ་ཡིན་ནོ། །འཇམ་དཔལ་དེ་བཞིན་དུ་ཆོས་ཐམས་ཅད་ནི་བྱང་ཆུབ་ཀྱང་ཡིན་ལ། ཆོས་ཐམས་ཅད་བྱང་ཆུབ་མ་ཡིན་པ་ཡང་མ་ཡིན་ནོ།། །།བམ་པོ་གསུམ་པ་སྟེ་ཐ་མ། དེ་ནས་ཁྱིམ་བདག་དེད་དཔོན་བཟང་པོ་དང་། ཁྱིམ་བདག་རྣམ་པར་
དག་སྤྱོད་དང་། ཁྱིམ་བདག་ཀླུ་དགའ་དང་། ཁྱིམ་བདག་འཛིན་མེད་དང་། ཁྱིམ་བདག་རྣ་གཙུག་དང་། ཁྱིམ་བདག་གཙུག་ན་ནོར་བུ་དང་། ཁྱིམ་བདག་རྣ་བ་གང་པོ་དང་། ཁྱིམ་བདག་དོན་གྲུབ་དང་། ཁྱིམ་བདག་རིན་ཆེན་གོམ་པས་འགྲོ་དང་། ཁྱིམ་བདག་དེ་དག་ཐམས་ཅད་ཀྱིས་

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་ལུས་ཐོགས་པ་མ་མཆིས་པ་ལགས་ཤིང་། སངས་རྒྱས་བཅོམ་ལྡན་འདས་རྣམས་ནི་བྱམས་པའི་སྤྱན་དང་ལྡན་ཏེ་ངོ་མཚར་བ་ལགས་ན། དགུང་ཟླ་གསུམ་པོ་འདི་ལ་བཅོམ་
ལྡན་འདས་དེ་བཞིན་གཤེགས་པ་དུ་ཙམ་ཞིག་དང་ཐབས་ཅིག་ཏུ་དེ་བཞིན་གཤེགས་པ་བགྲོ་བ་འདི་ལ་བགྲོ་བ་མཛད་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དེ་དག་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་རྣམས་སངས་རྒྱས་ཀྱི་མཚན་ཉིད་ནི་གཞལ་བར་བྱ་
བ་མ་ཡིན་གྱིས་ཐོང་ཤིག །དེ་ནས་ཁྱིམ་བདག་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་བགྲོ་བའི་ཆོས་ཀྱི་རྣམ་གྲངས་འདི་ལ་བཅོམ་ལྡན་འདས་དེ་བཞིན་གཤེགས་པ་དུ་ཙམ་ཞིག་དང་ཐབས་ཅིག་ཏུ་བགྲོ་བ་མཛད་པ་དཔེས་བསྟན་པར་
སྤྱོད་ལགས་སམ། བཀའ་སྩལ་པ། ཁྱིམ་བདག་རྣམས་སངས་རྒྱས་ཀྱི་ཡེ་ཤེས་ལ་བརྟག་པ་དང་། མངོན་པར་ཡིད་ཆེས་པར་བྱ་བ་དག་དཔེའི་སྒོ་ནས་ནི་མཁས་པ་རྣམས་དང་། མོས་པ་མང་བ་རྣམས་དང་། ང་རྒྱལ་བཅོམ་པ་རྣམས་དང་། བློ་རྒྱ་ཆེ་བ་རྣམས་དང་། སངས་རྒྱས་ཀྱི་ཡེ་ཤེས་
བསམ་གྱིས་མི་ཁྱབ་པ་མཆོག་ལ་གནས་པ་དག་གིས་ཤེས་པར་ནུས་ཀྱི། བྱིས་པ་རྣམས་དང་། བདག་ཏུ་འདུ་ཤེས་པ་རྣམས་དང་། ང་རྒྱལ་གྱིས་ཉམས་པ་རྣམས་དང་། བློ་ཆུང་བ་རྣམས་ཀྱིས་ནི་མི་ནུས་པས་དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །ཁྱིམ་བདག་
རྣམས་དཔེ་ཡོངས་སུ་བརྟག་པ་ཉེ་བར་བཟུང་སྟེ། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ནི་ཁོར་ཡུག་ཐེར་འབུམ་ཡོད་པར་ཉི་མ་ཐེར་འབུམ་འཁོར་ཞིང་གནས་སོ། །ཟླ་བ་ཐེར་འབུམ་འཁོར་ཞིང་གནས་སོ། །ཁྱིམ་བདག་རྣམས་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་དེ་རིའི་རྒྱལ་པོ་ཁོར་ཡུག་ཆེན་པོ་དག་གིས་ཡོངས་སུ་བསྐོར་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་ཁོངས་ན་གང་དག་སེམས་ཅན་དུ་གདགས་པས་བཏགས་པ་སེམས་ཅན་ཐམས་ཅད་སྔ་ཕྱི་མེད་པར་མིའི་ལུས་ཐོབ་པར་གྱུར་ལ། གང་དག་འཇིག་རྟེན་གྱི་ཁམས་

དེ་ན་སའི་ཁམས་ཡོད་པ་དང་། རིན་པོ་ཆེ་དང་འདྲ་བའི་རྩྭ་དང་། ཤིང་དང་། ཡལ་ག་དང་། ལོ་མ་དང་། འདབ་མ་དག་ཉེ་བར་བཟུང་བ་དང་། རི་ཐམས་ཅད་དང་། དེ་དག་ལ་གང་དག་སའི་ཁམས་ཡོད་པ་དང་། ཇི་ཙམ་དུ་འབྱུང་བ་ཆེན་པོ་བཞི་གནས་པ་ལས་སའི་ཁམས་སུ་གདགས་པས་བཏགས་
པ་དེ་རྡུལ་ཕྲ་རབ་ཀྱི་རྡུལ་དུ་རླགས་ན་ཁྱིམ་བདག་རྣམས་དེ་ཇི་སྙམ་དུ་སེམས། རྡུལ་ཕྲ་རབ་དེ་དག་མང་བ་ཡིན་ནམ་དེ་སྐད་ཅེས་བཀའ་སྩལ་པ་དང་། ཁྱིམ་བདག་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྡུལ་ཕྲ་རབ་དེ་དག་མང་བ་ལགས་སོ། །རྡུལ་ཕྲ་རབ་ཀྱི་
རྡུལ་དེ་དག་ཤིན་ཏུ་མང་བ་ལགས་སོ། །བཅོམ་ལྡན་འདས་རྡུལ་ཕྲ་རབ་ཀྱི་རྡུལ་དེ་དག་ཚད་མ་མཆིས་པ་ལགས་སོ། །ཁྱིམ་བདག་རྣམས་གཞན་ཡང་ཡོངས་སུ་བརྟག་པ་ཉེ་བར་བཟུང་སྟེ། སེམས་ཅན་རྣམས་རྡུལ་ཕྲ་རབ་ཀྱི་རྡུལ་དེ་དག་སྙེད་དུ་གྱུར་ཅིང་སེམས་ཅན་དེ་དག་ཀྱང་སྔ་ཕྱི་མེད་པར་མིའི་ལུས་
ཐོབ་པར་གྱུར་ལ། དེ་དག་ཐམས་ཅད་ཀྱིས་མིའི་ལུས་ཐོབ་ནས་ཀྱང་རབ་ཏུ་བྱུང་ངོ་། །དེ་དག་ཐམས་ཅད་རབ་ཏུ་བྱུང་ནས་ཀྱང་དགྲ་བཅོམ་པ་ཉིད་ཐོབ་སྟེ། དེ་དག་མངོན་པར་ཤེས་པ་དག་མངོན་སུམ་དུ་བྱེད་ཅིང་། དེ་དག་མངོན་པར་ཤེས་པ་དྲུག་པོའི་རྫུ་འཕྲུལ་གྱི་སྟོབས་ཀྱིས་ཉན་ཐོས་ཆེན་པོ་དེ་དག་
ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་ཁོ་ན་དག་ཉན་ཐོས་གཅིག་གིས་སེ་གོལ་འགའ་གཏོགས་པ་ཙམ་གྱིས་འདའ་བར་བྱེད་དོ། །ཁྱིམ་བདག་རྣམས་རྣམ་གྲངས་འདིས་ན་ཉན་ཐོས་ཆེན་པོ་རེ་རེས་ཀྱང་འདའ་བར་བྱེད་ལ། གལ་ཏེ་གཅིག་གིས་འདའ་བར་བྱེད་པས་ཀྱང་འཇིག་རྟེན་གྱི་ཁམས་གཞན་
དང་གཞན་དུ་འགྲོ་བར་བྱེད་དེ། ཁྱིམ་བདག་རྣམས་རྣམ་གྲངས་འདིས་ན་ཉན་ཐོས་ཆེན་པོ་དེ་དག་ལོ་བརྒྱ་སྙེད་དུ་འདའ་བར་བྱེད་ན། ཁྱིམ་བདག་རྣམས་དེ་ཇི་སྙམ་དུ་སེམས། ཉན་ཐོས་ཆེན་པོ་དེ་དག་གིས་ལོ་བརྒྱ་སྙེད་ཐལ་བར་འདའ་བའི་འཇིག་རྟེན་གྱི་ཁམས་ཇི་སྙེད་ཅིག་ཡོད། གསོལ་པ།
བཅོམ་ལྡན་འདས་ཉན་ཐོས་ཆེན་པོ་དེ་དག་གིས་འདའ་བའི་འཇིག་རྟེན་གྱི་ཁམས་ཇི་སྙེད་པ་དེ་དག་ནི་ཚད་མ་མཆིས་པ་ལགས་སོ། །བཅོམ་ལྡན་འདས་འཇིག་རྟེན་གྱི་ཁམས་དེ་དག་གྲངས་མ་མཆིས་པ་ལགས་སོ། །བཀའ་སྩལ་པ། ཡོངས་སུ་བརྟག་པ་ཉེ་བར་བཟུང་སྟེ། ཉན་ཐོས་ཆེན་

པོ་དེ་དག་གིས་ལོ་བརྒྱ་སྙེད་ཐལ་བར་འདའ་བའི་འཇིག་རྟེན་གྱི་ཁམས་ཇི་སྙེད་པའི་འཇིག་རྟེན་གྱི་ཁམས་དེ་དག་ཐམས་ཅད་གྲོང་ཁྱེར་ཆེན་པོ་གཅིག་ཏུ་གྱུར་ལ། གྲོང་ཁྱེར་ཆེན་པོ་དེ་ཡང་སྲིད་ཇི་ཙམ་པ་དེ་ཙམ་ཁོ་ནར་རྒྱར་ཡང་ཡོད་ལ་དེའི་འཕང་དུ་ཡང་དེ་ཙམ་ཡོད་ན། ཁྱིམ་
བདག་རྣམས་དེ་ཇི་སྙམ་དུ་སེམས། གྲོང་ཁྱེར་གྱི་ར་བ་དེའི་ངོས་རྒྱ་ཆེ་བ་ཡིན་ནམ། གསོལ་པ། བཅོམ་ལྡན་འདས་གྲོང་ཁྱེར་དེ་ནི་རྒྱ་ཆེ་བ་ལགས་སོ། །བདེ་བར་གཤེགས་པ་གྲོང་ཁྱེར་དེ་ནི་མཐའ་མ་མཆིས་པ་ལགས་སོ། །བཅོམ་ལྡན་འདས་ཇི་