Kinh tạng Tây Tạng (Kangyur Đại Học) — 063_མདོ་སྡེ།_ཛ

་ལས་
འདས་པ་དམིགས་པར་གྱུར་ན། དེ་དག་གི་རྗེས་སུ་ང་རབ་ཏུ་མི་འབྱུང་བ་ཞིག་ན། སྟོན་པ་གང་ཡིན་པ་དེ་དག་གི་རྗེས་སུ་རབ་ཏུ་བྱུང་སྟེ། སྟོན་པ་གང་ཡིན་པ་དེ་དག་གི་སྟོན་པའི་ཆོས་ནི་སྐྱོབ་པ་ཡིན་པར་ཤཱ་རིའི་བུ་ཆོས་འདུལ་བ་འདི་ལ་རིག་པར་བྱའོ། །དེ་དག་ནི་ཆོས་འདུལ་བ་འདི་
ལ་སུན་འབྱིན་པ་ཡིན་པར་རིག་པར་བྱའོ། །དེ་དག་ནི་ཆོས་འདུལ་བ་འདི་ལ་རྩོད་པ་ཅན་ཡིན་པར་རིག་པར་བྱ་སྟེ། ཤཱ་རིའི་བུ་དཔེར་ན་གྲོང་རྡལ་དང་། ཚོང་རྡལ་དང་། གྲོང་ཁྱེར་དག་གི་ཆོམ་རྐུན་པ་ཆེན་པོ་བཞིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་སྐྱེས་བུ་བླུན་པོ་དེ་དག་ནི་མྱ་ངན་
ལས་འདས་པ་ལ་དམིགས་པ་ན་དམིགས་པར་བྱེད་ན། གང་ཟག་ཏུ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་དག་གི་སྟོན་པ་ཡང་ང་མ་ཡིན་ལ་ངའི་ཉན་ཐོས་ཀྱང་དེ་དག་མ་ཡིན་ཞིང་འདི་ལྟར་ངའི་ཉན་ཐོས་ཀྱི་དགེ་འདུན་འདུ་བའི་ནང་དུ་ཡང་མི་གཏོགས་པས་ང་ནི་སྐྱེས་བུ་བླུན་པོ་དེ་དག་ལག་བརྡས་སྐྲོད་པར་

མཛད་དོ། །ཤཱ་རིའི་བུ་གང་ཞིག་ཆོས་ཐམས་ཅད་ནི་རྒྱུ་ཅན་མ་ཡིན་པ། ཡིད་ལ་བྱེད་པ་མེད་པ། མཚན་མ་མེད་པ། བཟོད་པ་དང་ལྡན་པ་མ་ཡིན་པ། མངོན་པར་རྫོགས་པར་བྱང་ཆུབ་པ་མ་ཡིན་པ་སྟེ། དེ་དག་ནི་མྱ་ངན་ལས་འདས་པ་ཡང་དམིགས་པར་མི་བྱེད་ན། གང་གི་མྱ་ངན་ལས་
འདས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་འདི་ནི་གང་མཐོང་ན་དེ་བཞིན་གཤེགས་པ་མཐོང་བ་ཡིན་ནོ་ཞེས་དེ་བཞིན་གཤེགས་པས་ཆོས་མཐོང་བ་གསུངས་པ་ཡིན་ནོ། །ཤཱ་རིའི་བུ་ཡང་དེ་བཞིན་གཤེགས་པ་གང་ཞེ་ན། དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ཡིན་
པ་དེ་བཞིན་ཉིད་དེ། ཤཱ་རིའི་བུ་འདི་ནི་དེ་བཞིན་གཤེགས་པ་ཞེས་བྱའོ། །ཡང་ཆོས་ལ་ནེམ་ནུར་མེད་ཅིང་ཐེ་ཙོམ་མི་ཟ་བ་གང་ཡིན་པ་དེ་དག་ནི་འཕགས་པའི་ཉན་ཐོས་ཞེས་བྱའོ། །རྟོག་པ་མེད་པ་དང་། རྟོག་པ་དང་བྲལ་བ་དང་། སྤྲོས་པ་མེད་པ་དང་། མཚན་མ་མེད་པ་ལ་
གནས་པ་དེ་དག་ནི་སྐྱེས་བུ་དམ་པ་ཡིན་ཏེ། དེ་དག་ནི་འཕགས་པའི་དགེ་འདུན་ཞེས་བྱའོ། །ཤཱ་རིའི་བུ་སྔོན་བྱུང་བ་སྐྱེས་བུ་བྱིས་པའི་རང་བཞིན་ཅན་སྔོན་ཆད་ལན་འགའ་ཡང་སྤྲེའུ་མ་མཐོང་བ་ཞིག་དགོས་པ་འགའ་ཞིག་གི་ཕྱིར་ནགས་ཚང་ཚིང་ཞིག་ཏུ་སོན་པ་དང་། དེས་དེར་སྤྲེའུའི་
ཚོགས་ཆེན་པོ་མཐའ་གཅིག་ཏུ་འདུས་པ་དག་མཐོང་ངོ་། །དེས་སྤྲེའུའི་ཚོགས་ཆེན་པོ་དེ་མཐོང་བ་དང་། དེ་འདི་སྙམ་དུ་སུམ་ཅུ་རྩ་གསུམ་པའི་ལྷ་ཞེས་བྱ་བ་ཞིག་ཡོད་དོ། །ཞེས་ཐོས་པའི་སུམ་ཅུ་རྩ་གསུམ་པའི་ལྷ་དེ་རྣམས་ནི་འདི་དག་ཡིན་པ་ལྟ་ཞིག་སྙམ་ནས། དེ་
རིངས་ཤིང་བརྟབས་པའི་གཟུགས་ཀྱིས་མྱུར་བར་རང་གི་གྲོང་རྡལ་དུ་སོང་སྟེ། སོན་པ་དང་། དེའི་ཚེ་གྲོང་རྡལ་དེ་ན་སྐྱེ་བོའི་ཚོགས་ཆེན་པོ་འདུས་པར་གྱུར་ཏོ། །དེས་སྐྱེ་བོའི་ཚོགས་ཆེན་པོ་དེ་ལ་འདི་སྐད་ཅེས་སྨྲས་སོ། །ཁྱོད་ཀྱིས་སུམ་ཅུ་རྩ་གསུམ་པའི་ལྷ་རྣམས་སྔོན་ཆད་
མཐོང་ངམ། དེ་དག་གིས་སྨྲས་པ། གྲོགས་པོ་བདག་ཅག་གིས་སྔོན་ཆད་སུམ་ཅུ་རྩ་གསུམ་པའི་ལྷ་རྣམས་མ་མཐོང་ངོ་། །དེས་སྨྲས་པ། ཤེས་ལྡན་དག་བདག་གིས་ནི་སུམ་ཅུ་རྩ་གསུམ་པའི་ལྷ་རྣམས་མཐོང་ན་ཁྱེད་ཅག་ཀྱང་སུམ་ཅུ་རྩ་གསུམ་པའི་ལྷ་རྣམས་ལ་བལྟ་བར་འདོད་

དམ། དེ་དག་གིས་སྨྲས་པ། གྲོགས་པོ་བདག་ཅག་ཀྱང་སུམ་ཅུ་རྩ་གསུམ་པའི་ལྷ་རྣམས་ལ་བལྟ་བར་འཚལ་ལོ། །དེས་གྲོང་རྡལ་གྱི་སྐྱེ་བོའི་ཚོགས་དེ་དེད་ནས་ནགས་ཚང་ཚིང་ཆེན་པོ་གང་ན་བ་དེར་སོང་སྟེ། ཤེས་ལྡན་དག་སུམ་ཅུ་རྩ་གསུམ་པའི་ལྷ་
རྣམས་ལ་ལྟོས་ཤིག་ཅེས་སྤྲེའུའི་ཚོགས་ཆེན་པོ་དེ་བསྟན་པ་དང་དེ་དག་གིས་ཀྱེ་སྐྱེས་བུ་འདི་དག་ནི་སུམ་ཅུ་རྩ་གསུམ་པའི་ལྷ་རྣམས་མ་ཡིན་ནོ། །ཀྱེ་སྐྱེས་བུ་འདི་དག་ནི་ནགས་ན་རྒྱུ་བའི་སྤྲེའུ་ཞེས་བྱ་བ་ཡིན་ཏེ། ཀྱེ་སྐྱེས་བུ་ཁྱོད་ནི་ནོར་བ། ཕྱིན་ཅི་ལོག་པ། འདི་ལྟར་སྤྲེའུ་ཡང་མི་ཤེས།
སུམ་ཅུ་རྩ་གསུམ་པའི་ལྷ་ཡང་མི་ཤེས་སོ་ཞེས་སྨྲས་སོ། །ཤཱ་རིའི་བུ་སྐྱེས་བུ་རྨོངས་པ་དེས་སྐྱེ་བོའི་ཚོགས་དེ་དོན་མེད་པར་བསླུས་པ་དེ་བཞིན་དུ། ཤཱ་རིའི་བུ་མ་འོངས་པའི་དུས་ན་དགེ་སློང་འདི་ལྟ་བུ་དག་འབྱུང་བར་འགྱུར་ཏེ། དེ་དག་ཁྱིམ་པ་དག་གི་དྲུང་དུ་དོང་ནས། འདི་སྐད་ཅེས་
ཁྱེད་ཅག་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལ་བལྟ་བ་དང་། སངས་རྒྱས་ཀྱི་གསུང་ཉན་པར་འདོད་དམ་ཞེས་སྨྲས་པ་དང་། ཤཱ་རིའི་བུ་དེ་ལ་ཁྱིམ་པ་དག་མངོན་པར་དགའ་བར་གྱུར་ནས། འདི་སྐད་ཅེས་བདག་ཅག་ཀྱང་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ལ་
བལྟ་བ་དང་། སངས་རྒྱས་ཀྱི་གསུང་ཉན་པར་འཚལ་ལོ་ཞེས་སྨྲའོ། །ཤཱ་རིའི་བུ་དེ་ལ་དགེ་སློང་སྨྲ་བ་ལྷུར་ལེན་པ་གང་ཡིན་པ་དག་འབྱུང་བར་འགྱུར་ཏེ། དེ་དག་ཁྱིམ་པ་དེ་དག་དང་དགེ་འདུན་གྱི་ཀུན་དགའ་ར་བར་ཞུགས་ནས་སྟོན་པར་བྱེད་དོ། །རྣམ་པར་རིག་བྱེད་ལ་མཁས་པ། ཡི་གེ་
ལྷུར་བྱེད་པ། ཡི་གེ་ལ་མཁས་པ། ཡི་གེའི་རྗེས་སུ་འབྲང་བ། ཡི་གེ་ལ་རྟོན་པ། ཡི་གེ་ལ་མོས་པར་འགྱུར་བའི་དགེ་སློང་དག་འབྱུང་བར་འགྱུར་ཏེ། དེ་དག་ནི་བྱ་བ་དེ་དང་དེའི་རྗེས་སུ་འཐུན་པ། དེའི་རྗེས་སུ་འབྲང་བ། ཡི་གེ་ཙམ་ཆེད་ཆེར་བྱེད་པ། ཡི་གེ་ལྷུར་ལེན་པའི་དགེ་
སྦྱོང་ཚོགས་ཀྱི་གཟུགས་བརྙན་ཕྱུགས་རྫི་ལྟ་བུ་གྲངས་མ། སྨྲ་བ་ལ་དགའ་བ། སྨྲ་བ་ལ་སྲེད་པ། སྨྲ་བ་ལ་དགའ་བའི་སྦྱོར་བའི་རྗེས་སུ་བརྩོན་པ། ཡང་དག་པ་མ་ཡིན་པའི་མཐའ་ལ་ཞུགས་པ། གཞན་ལ་སྨྲ་བ་མང་བ། གསང་ཚིག་ངན་པས་འཚོ་བ། འཇིག་རྟེན་རྒྱང་ཕན་པ་

སྣ་ཚོགས་ལ་མཁས་པ། ཡོངས་སུ་མ་དག་པའི་ཆོས་བྱེད་པ། ཡོངས་སུ་མ་དག་པའི་ཆོས་སྟོན་པ། གཏམ་ལ་སེམས་པ། འཇིག་རྟེན་པའི་ལམ་དུ་བྱིང་བ། མདངས་ངན་པ། མདོག་ངན་པ། དཔེ་ཆད་པ། མི་སྨྲ་བའི་རང་བཞིན་བོར་བ། ཏིང་ངེ་འཛིན་མ་ཡིན་པ་ལྷུར་བྱེད་པ་དེ་
དག་ནི་ཉིན་པར་རམ། མཚན་མོའམ། ཉིན་མཚན་དུ་རྩོད་པའི་གཏམ་ལ་མངོན་པར་དགའ་ཞིང་ཤིན་ཏུ་གཟབས་པའི་མལ་སྔས་ནང་ཚངས་ཅན་བཅུག་པ། གདིང་བ་དང་གཡོག་པ་འཇམ་པོ་ལ་ཉལ་བར་བྱེད་ཀྱི། དེ་དག་བསམ་གཏན་ལ་གཞོལ་བའི་སེམས་གཅིག་ཀྱང་སྐྱེད་པར་མི་
བྱེད་ན། འབྲས་བུ་ཐོབ་པར་བྱེད་པ་ལྟ་སྨོས་ཀྱང་ཅི་དགོས་ཏེ། དེ་ནི་གནས་མེད་དོ། །དེ་དག་འཇིག་རྟེན་རྒྱང་པ་ན་པ་ཡིད་ལ་བྱེད་པའི་སྦྱོར་བས་ཉལ་ཞིང་དེ་ལྟ་བུའི་སེམས་ཀྱིས་གཉིད་ལོག་པར་འགྱུར་རོ། །དེ་དག་ནམ་གྱི་ཆ་སྟོད་དང་། གུང་ཐུན་དང་། ནམ་གྱི་ཆ་སྨད་ཀྱི་ཐུན་ལ་ཡང་
རྗེས་སུ་འཐུན་པའི་བཟོད་པ་སྐྱེད་པར་བྱེད་པ་མ་ཡིན་ནོ། །དེ་དག་དེ་ན་དམན་པ་མ་དག་པའི་གཏམ་ལ་མངོན་པར་བརྩོན་ཞིང་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་དང་། ཡོ་བྱད་ཀྱི་རྙེད་པ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་
སྐྱེས་བུ་དམ་པ་མ་ཡིན་པ་རྣམས་བསྡུ་བའི་ཕྱིར་བདུད་སྡིག་ཅན་མངོན་པར་བརྩོན་པར་བྱེད་དེ། དེ་དག་བདུད་སྡིག་ཅན་ལ་སྤྲོ་བར་འགྱུར་ཞིང་མངོན་པར་བརྩོན་པར་བྱེད་དོ། །དེ་དག་ཕལ་བའི་གཏམ་དེ་ལ་མངོན་པར་བརྩོན། མངོན་པར་དགའ་བ་སྟེ། དོན་དམ་པ་ལ་བརྩོན་པར་མི་བྱེད་
དོ། །དེ་དག་རིགས་པ་མ་ཡིན་པ་དང་། འཐུན་པས་འདི་ལྟ་བུའི་ངེས་པའི་གཏམ་འཛིན་པར་མི་འགྱུར་གྱི། སྐྲག་པར་འགྱུར། དངང་བར་འགྱུར། ཀུན་དུ་དངང་བར་འགྱུར། གཏམ་གྱི་སྙིང་པོ་འདོར་ཞིང་ལྕགས་ཀྱི་ཚ་ཚ་ལྟ་བུ་དག་འཛིན་པར་འགྱུར་རོ། །དེ་དག་གི་བཀུར་
སྟི་དེ་སྐྱེས་བུ་དམ་པ་མ་ཡིན་པ་བྱིས་པ་གཞན་དག་གིས་ཀྱང་མཐོང་ནས་དགའ་བར་འགྱུར་རོ། །དེ་དག་འདི་སྙམ་དུ་བདག་ཅག་ཀྱང་རེ་ཞིག་འདི་ལྟ་བུའི་གཏམ་བཙལ་ཞིང་མཐར་ཕྱིན་པར་བྱའོ། །སྙམ་ནས་དེ་དག་བླ་ན་མེད་པའི་ཆོས་འདུལ་བ་འདི་སྤོང་བར་འགྱུར་རོ། །ཤཱ་རིའི་

བུ་དེ་ལ་དེ་ལྟ་བུའི་དགེ་སློང་འབྱུང་བར་འགྱུར་བ་གང་ཡིན་པ་དེ་དག་ནི་ལམ་མ་རྙེད་པ། དེ་དག་ནི་ལམ་གོལ་བ་བཟུང་བ། དགེ་སྦྱོང་གི་དྲི་མ་ཅན། དགེ་སྦྱོང་གདོལ་པ་ཡིན་ནོ། །དེ་དག་གི་ཁྱིམ་པ་གང་ཡིན་པ་དག་ཤེས་ནས་དྲུང་དུ་འདོང་བར་སེམས་སོ། །སྐྱེས་བུ་དམ་པ་མ་
ཡིན་པ་དེ་དག་གི་དྲུང་དུ་དོང་ནས་ཇི་སྲིད་འཚོ་བའི་ལམ་གྱི་དོན་དུ་སངས་རྒྱས་ཀྱི་བསྔགས་པ་བརྗོད་པར་འགྱུར་རོ། །ཆོས་ཀྱི་བསྔགས་པ་བརྗོད་པར་འགྱུར་རོ། །དགེ་འདུན་གྱི་བསྔགས་པ་བརྗོད་པར་འགྱུར་རོ། །དེ་དག་ནི་འཚོ་བ་དོན་དུ་གཉེར་བ། ཟང་ཟིང་གིས་བཀོལ་བ། ཟས་དང་བགོ་བ་
ལྷུར་ལེན་པ་ཡིན་པས། གང་དག་དེ་དག་ལ་རྟག་པར་སྦྱིན་པར་བྱེད་དོ། །དེ་དག་དེ་བས་ཀྱང་ལྷག་པར་དེ་བཞིན་གཤེགས་པས་ཚངས་པར་སྤྱོད་པ་གསུངས་པ་ནི་འདི་ཡིན་ཏེ། འདི་ལྟ་བུའི་སྦྱིན་པ་ཆེན་པོ་བྱིན་པས་ནི་མཐོ་རིས་ལེན་པར་འགྱུར་རོ་ཞེས་བསྔགས་པ་བརྗོད་པར་འགྱུར་རོ། །དེ་དག་ནི་
དོན་ཤེས་པ་མ་ཡིན། ཆོས་ཤེས་པ་མ་ཡིན། སྦྱིན་པ་ལྷུར་ལེན་པ། གང་ཟག་ཏུ་འཛིན་པ་ཡིན་ཏེ། འདི་ལྟར་དོན་དམ་པའི་གཏམ་གྱི་སྙིང་པོ་འཛིན་པར་མི་འགྱུར་རོ། །ཤཱ་རིའི་བུ་དེ་ལ་ཁ་ཅིག་དད་པ་རྙེད་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །དེ་དག་དེ་ལ་རབ་ཏུ་བྱུང་
ནས་ཀྱང་སྐྱེས་བུ་དམ་པ་མ་ཡིན་པ་དེ་ལྟ་བུ་དག་དང་། རིགས་པ་མ་ཡིན་པའི་སྦྱོར་བས་ལྷན་ཅིག་ཏུ་གནས་པར་འགྱུར་རོ། །དེ་དག་ནི་དམིགས་པ་ཅན་བདག་ཏུ་སྨྲ་བ། སེམས་ཅན་དུ་སྨྲ་བ། སྲོག་ཏུ་སྨྲ་བ། གང་ཟག་ཏུ་སྨྲ་བ་ཡིན་ཏེ། དེ་དག་ནི་དངོས་པོ་ཡོད་པ་མ་ཡིན་པ་ལ་ཡོད་པར་བརྟགས་
ནས་འཇིག་པར་འདོགས་པར་འགྱུར། ཆད་པར་སྨྲ་བ་དང་། མ་བྱས་པར་སྨྲ་བར་འགྱུར་ཏེ། ཤཱ་རིའི་བུ་དེའི་ཚེ་གསུང་རབ་རྒྱ་ཆེན་པོ་འདི་ལ་མུ་སྟེགས་ཅན་མང་དུ་འབྱུང་བར་འགྱུར་རོ། །དེ་དག་སྐྱེ་བོའི་ཚོགས་ཆེན་པོ་འབྱེད་པར་འགྱུར་རོ། །ཤཱ་རིའི་བུ་དེ་ལྟར་དེ་བཞིན་གཤེགས་པའི་བསྟན་པ་དོན་
དམ་པ་དམིགས་སུ་མེད་པ་བླ་ན་མེད་པའི་ཆོས་དཀོན་མཆོག་འདི་ཡང་ནུབ་པར་འགྱུར་རོ། །ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་ལྟ་བུ་དེ་དག་གིས་ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྤོང་བར་འགྱུར་རོ། །ཤཱ་རིའི་བུ་ངས་དེ་དག་ནི་རབ་ཏུ་འབྱུང་བའི་ཕྱིར་རམ། བསྙེན་པར་རྫོགས་པའི་ཕྱིར་རམ།

དད་པས་བྱིན་པ་ཐ་ན་ཆུ་ཕོར་བུ་གང་ཙམ་ལ་ཡང་ཡོངས་སུ་ལོངས་སྤྱད་པའི་ཕྱིར་སྐབས་མ་ཕྱེའོ། །དེ་ཅིའི་ཕྱིར་ཞེ་ན། ཤཱ་རིའི་བུ་གང་སུ་ཡང་རུང་འདི་ལྟར་དམིགས་པར་ལྟ་བ་དང་། བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་སྟེ། ལྟ་བ་འདི་དག་
སོ་སོར་མ་སྤངས་པའི་ཕྱིར་རོ། །ཤཱ་རིའི་བུ་དེ་དག་གིས་ནི་ཆོས་འདུལ་བ་འདི་ལ་འབྲས་བུ་ཐོབ་པར་མི་ནུས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ་ང་ནི་ལྟ་བ་དེ་ལྟ་བུ་དང་ལྡན་པ་རྣམས་ནི་གཞན་མུ་སྟེགས་ཅན་ཡིན་ནོ་ཞེས་གསུང་ངོ་། །ཤཱ་རིའི་བུ་དེ་བཞིན་གཤེགས་པས་དོན་འདི་མ་འོངས་པ་ན་
འབྱུང་བར་ཡང་དག་པར་གཟིགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་ཀྱང་སྦེད་པར་མཛད་ཀྱི་ཆོས་ལ་སེར་སྣ་བྱ་བའི་ཕྱིར་ནི་མ་ཡིན་ནོ། །ཤཱ་རིའི་བུ་དེ་ལ་གང་ཞིག་ཡང་དག་པ་དོན་དམ་པ་དེ་བཞིན་གཤེགས་པས་དགོངས་ཏེ་གསུངས་པ་མ་ཤེས་པ་རྣམས་ནི་གང་ཟག་ཏུ་སྨྲ་
བར་འགྱུར་ཞིང་གང་ཟག་ཏུ་ཁས་ལེན་པར་འགྱུར་རོ། །གལ་ཏེ་ཡང་དམིགས་སུ་མེད་པ་བླ་ན་མེད་པའི་ཆོས་དཀོན་མཆོག་འདི་ཐོས་ནས་དད་པར་གྱུར་ན་རང་གི་གནས་སུ་ཁྲིད་ནས་སླར་ཡང་རབ་ཏུ་དབྱུང་བར་བྱའོ། །སླར་ཡང་བསྙེན་པར་རྫོགས་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་
གང་དག་འདི་ལྟ་སྟེ། དམིགས་པར་ལྟ་བ་དང་། བདག་ཏུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་སྟེ། འདི་ལྟར་ལྟ་བ་དེ་དག་སོ་སོར་མ་སྤངས་པའི་ཕྱིར་གཞན་མུ་སྟེགས་ཅན་ཡིན་ནོ་ཞེས་གསུངས་པའི་ཕྱིར་རོ། །དེ་ཅིའི་ཕྱིར་ཞེ་ན། ཤཱ་རིའི་
བུ་དེ་བཞིན་གཤེགས་པས་འཇིག་རྟེན་གྱི་ཐ་སྙད་ལ་བརྟེན་ནས་གང་ཟག་གསུང་བར་མཛད་ཀྱི་དོན་དམ་པར་ནི་མ་ཡིན་ནོ། །ཤཱ་རིའི་བུ་དེ་ལ་གལ་ཏེ་གང་དག་འདི་སྐད་ཅེས་བདག་ཅག་ཀྱང་འཇིག་རྟེན་གྱི་ཐ་སྙད་ཀྱིས་གང་ཟག་ཅེས་ཐ་སྙད་དུ་བྱེད་ཀྱི་དོན་དམ་པར་ནི་མ་ཡིན་ནོ། །ཞེས་སྨྲ་ན།
དེ་དག་གི་བཟོད་པ་འདི་ནི་འདི་ལྟ་སྟེ། འབྱུང་བ་མེད་པ། འགག་པ་མེད་པ། སྐྱེ་བ་མེད་པ། མཚན་ཉིད་མེད་པ། སོ་སོར་རིག་པ་མེད་པ། སྨད་དུ་མེད་པ་ཡིན་ཏེ། ངས་གསུངས་པ་དང་མི་འཐུན་པ་མེད་པས་དེ་དག་ནི་ངའི་ཉན་ཐོས་ཡིན་ནོ། །ཤཱ་རིའི་བུ་གང་ཞིག་འདི་སྐད་ཅེས་

དེ་བཞིན་གཤེགས་པས་གང་ཟག་མེད་པ་ལ་གང་ཟག་ཅེས་གསུངས་པ་ནི་ཅི་ནས་ཀྱང་འཇིག་རྟེན་གྱི་ཐ་སྙད་ཀྱི་དོན་དུ་ཡིན་ནོ་ཞེ་ན། རེ་ཞིག་དེ་བཞིན་གཤེགས་པ་འཇིག་རྟེན་གྱི་ཐ་སྙད་ཀྱི་དོན་དུ་བརྫུན་མི་གསུང་ཞིང་། དེ་བཞིན་གཤེགས་པས་མདོ་སྡེ་མང་པོ་དེ་དག་ལས་གང་ཟག་གི་སྒྲ་
གསུངས་པ་ཡང་། རེ་ཞིག་དེ་བཞིན་གཤེགས་པའི་ཡང་དག་པ་ལ་ཡང་དག་པ་མ་ཡིན་པར་མི་འགྱུར་རོ་ཞེས་སྨྲ་ན། ཤཱ་རིའི་བུ་དེ་ལ་ཡང་ཚིག་འདི་སྐད་ཅེས། དེ་བཞིན་གཤེགས་པས་ཆོས་ཐམས་ཅད་ནི་བདག་པོ་མེད་པ་དངོས་པོ་མེད་པར་གསུངས་ཏེ། དེ་བཞིན་གཤེགས་པས་འཇིག་རྟེན་གྱི་ཐ་
སྙད་ཀྱིས་བརྗོད་པ་མཛད་ཀྱི། ཇི་ལྟར་འཕགས་པ་རྣམས་ཀྱི་ཐ་སྙད་དོན་དམ་པར་ནི་མ་ཡིན་ནོ། །དེ་བཞིན་གཤེགས་པ་དང་འདྲ་བ་འགའ་ཡང་མེད་ན། དེ་བས་ལྷག་པའི་ལྷའམ། ཀླུའམ། གནོད་སྦྱིན་ལྟ་ག་ལ་ཡོད། གང་ཞིག་དེ་བཞིན་གཤེགས་པ་བས་ལྷག་པར་མཁས་པའམ།
ལྷག་པར་བྱང་བའམ། ལྷག་པར་ཡིད་གཞུངས་པའམ། ལྷག་པར་ཤེས་རབ་དང་ལྡན་པར་གྱུར་པ་དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་སངས་རྒྱས་ཀྱི་གསུང་བསམ་གྱིས་མི་ཁྱབ་པ་གང་ཡིན་པ་ནི་སེམས་ཅན་ཐམས་ཅད་ཀྱིས་མི་ཤེས་ན། ཤཱ་རིའི་བུ་ཅི་འདིར་དེ་བཞིན་གཤེགས་
པ་བདག་དང་འཇིག་རྟེན་ལྷན་ཅིག་ཏུ་མཚུངས་པར་བྱ་བ་ཡིན་ནམ། གླང་པོ་ཆེན་པོས་ཅིའི་ཕྱིར་གང་ཟག་གསུངས་ཞེན། ཤཱ་རིའི་བུ་འཇིག་རྟེན་ནི་ང་དང་ལྷན་ཅིག་རྩོད་པར་བྱེད་ཀྱི། ང་ནི་འཇིག་རྟེན་དང་ལྷན་ཅིག་རྩོད་པར་མི་མཛད་དེ། ཤཱ་རིའི་བུ་ང་ནི་གང་ཟག་ཏུ་ལྟ་བའི་སེམས་
ཅན་སྐྲོད་པར་མཛད་དོ། །ཤཱ་རིའི་བུ་དེ་བཞིན་གཤེགས་པས་གང་དུ་གང་ཟག་མེད་པ་དང་། དངོས་པོ་མེད་པ་དེ་ལས་དགོངས་ཏེ་གསུངས་པ་སེམས་ཅན་མང་པོས་མ་ཤེས་ནས་ཆོས་འདུལ་བ་འདི་ལ་མི་འཇུག་ཅིང་ངན་སོང་དུ་འདོང་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་
བུ་ངས་གཞན་མུ་སྟེགས་ཅན་གྱི་ཚིག་གསུངས་ཀྱང་དེ་བཞིན་གཤེགས་པ་ནི་གཞན་མུ་སྟེགས་ཅན་མ་ཡིན་ནོ། །ཤཱ་རིའི་བུ་ང་ནི་ཆད་པར་སྨྲ་བ་དམ་འཆའ་ཡང་དེ་བཞིན་གཤེགས་པ་ནི་ལམ་གོལ་བ་ལ་གཞོལ་བ་མ་ཡིན་ནོ། །ཤཱ་རིའི་བུ་ང་ནི་ཐམས་ཅད་རྒྱུ་མེད་པར་དམ་འཆའ་ཡང་དེ་བཞིན་

གཤེགས་པ་ནི་རྒྱུ་མེད་པར་གསུང་བ་མ་ཡིན་ནོ། །ཤཱ་རིའི་བུ་ང་ནི་བྱེད་པ་མེད་པའི་ཚིག་དམ་འཆའ་ཡང་དེ་བཞིན་གཤེགས་པ་ནི་བྱེད་པ་མེད་པ་གསུང་བ་མ་ཡིན་ནོ། །ཤཱ་རིའི་བུ་ང་ནི་ལོག་པར་ལྟ་བ་དམ་འཆའ་ཡང་དེ་བཞིན་གཤེགས་པ་ནི་ལོག་པར་ལྟ་བ་མ་ཡིན་ནོ། །ཤཱ་རིའི་བུ་ལོག་
པར་ལྟ་བ་ལ་ལོག་པར་ལྟ་བ་ཡིན་པར་རབ་ཏུ་ཤེས་པ་དེ་ནི་དེའི་ཡང་དག་པར་ལྟ་བ་ཡིན་ནོ། །ཤཱ་རིའི་བུ་ལོག་པར་ལྟ་བ་ནི་ནམ་ཡང་ཡང་དག་པའི་ལྟ་བར་མི་འགྱུར་ཏེ། ལྟ་བས་ལྟ་བ་ནི་ནམ་ཡང་ཤེས་པའམ་མཐོང་བ་མ་ཡིན་ནོ། །ཤཱ་རིའི་བུ་འཇིག་རྟེན་ཐམས་ཅད་ཀྱིས་ཡིད་ཆེས་པར་
དཀའ་བའི་གནས་ནི་འདི་ཡིན་ཏེ། འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་ཡིན་ནོ། །ཤཱ་རིའི་བུ་ང་ནི་ཡིད་མི་ཆེས་པར་བྱ་བ་མ་ཡིན་ནོ། །ཤཱ་རིའི་བུ་ང་ནི་མཐུ་དང་ལྡན་པས་ལྷ་དང་བཅས་པའི་འཇིག་རྟེན་གྱིས་ཡིད་མི་
ཆེས་པར་བྱ་བ་མ་ཡིན་ཏེ། ཤཱ་རིའི་བུ་དེ་བཞིན་གཤེགས་པས་ཕ་རོལ་ཏུ་འགྲོ་བའི་ཆོས་བསྟན་པ་དེ་ལ་ཡང་ཆོས་བསྟན་པ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་མི་ཟད་པའི་ཆོས་བསྟན་པ་དེ་ལ་ཡང་འཇུག་པ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་
པས་ཉེ་བར་ཞི་བའི་ཆོས་བསྟན་པ་དེ་ལ་ཡང་ཉེ་བར་ཞི་བ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་ཡོངས་སུ་མྱ་ངན་ལས་འདའ་བར་བྱ་བའི་ཕྱིར་ཆོས་བསྟན་པ་དེ་ལ་ཡང་ཡོངས་སུ་མྱ་ངན་ལས་འདའ་བ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་གྲོལ་བར་
བྱ་བའི་ཕྱིར་ཆོས་བསྟན་པ་དེ་ལ་ཡང་གྲོལ་བ་མེད་ཅིང་རྣམ་པར་གྲོལ་བ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་ངེས་པར་འབྱུང་བར་བྱ་བའི་ཕྱིར་ཆོས་བསྟན་པ་དེ་ལ་ཡང་ལེན་པ་མེད་ཅིང་དུལ་བ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་མཁས་པས་
ཤེས་པ་དང་རིག་པར་བྱ་བའི་ཕྱིར་ཆོས་བསྟན་པ་དེ་ལ་ཡང་རིག་པ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་སེམས་རྣམ་པར་བྱང་བར་བྱ་བའི་ཕྱིར་ཆོས་བསྟན་པ་དེ་ལ་ཡང་ཀུན་ནས་ཉོན་མོངས་པ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་ལྷ་རྣམས་

ཀྱི་ཕྱིར་ཆོས་བསྟན་པ་དེ་ལ་ཡང་ལྷ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་མི་རྣམས་ཀྱི་ཕྱིར་ཆོས་བསྟན་པ་དེ་ལ་ཡང་མི་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་སེམས་ཅན་གྱི་ཕྱིར་ཆོས་བསྟན་པ་དེ་ལ་ཡང་སེམས་ཅན་འགའ་
ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་རིག་པ་དང་རྣམ་པར་གྲོལ་བར་བྱ་བའི་ཕྱིར་ཆོས་བསྟན་པ་དེ་ལ་ཡང་རིག་པ་དང་རྣམ་པར་གྲོལ་བ་འགའ་ཡང་མེད་དོ། །ཤཱ་རིའི་བུ་དེ་བཞིན་གཤེགས་པས་སངས་རྒྱས་རྗེས་སུ་དྲན་པའི་ཆོས་བསྟན་པ་ལ་ཡང་སངས་རྒྱས་བཅོམ་ལྡན་
འདས་རྣམས་ཀྱིས་ཀྱང་རྗེས་སུ་དྲན་པར་མི་སྤྱོད་དོ། །ཤཱ་རིའི་བུ་དེ་བཞིན་གཤེགས་པས་སྟོང་པ་ཉིད་ཀྱིས་གནས་པ་གསུངས་པ་ལ་ཡང་སྟོང་པ་ཉིད་ཀྱི་ཕྱིར་ཡང་གནས་པར་མི་ནུས་ཤིང་སྟོང་པ་ཉིད་ཡིད་ལ་བྱ་བར་ཡང་མི་ནུས་སོ། །ཤཱ་རིའི་བུ་དེ་བཞིན་གཤེགས་པས་མདོ་སྡེ་དེ་དང་དེ་དག་
བསྟན་པ་དེ་ལ་ཡང་སྟོན་པ་པོའམ། འཆད་པ་པོ་འགའ་ཡང་མེད་ན། སྐྱེས་བུ་བླུན་པོ་གང་ཡིན་པ་དེ་ནི་དམིགས་ནས་གཞན་ལ་ཆོས་སྟོན་པར་འགྱུར། ང་ལ་ཡང་སྟོན་པ་ཡིན་ནོ་ཞེས་སྨྲ་བར་འགྱུར། དགེ་འདུན་གྱི་མིང་གིས་ཀྱང་བགྲང་ཞིང་ཀུན་ཏུ་འབྲེལ་བར་བྱེད་པར་འགྱུར་ཏེ་ཆོས་
གང་དག་དང་ལྡན་ན་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དུ་འགྱུར་བའི་ཆོས་དེ་དག་དང་ལྡན་པར་མི་འགྱུར་རོ། །ཤཱ་རིའི་བུ་དཔེར་ན་སྤྲེའུ་དག་དང་སུམ་ཅུ་རྩ་གསུམ་པའི་ལྷ་རྣམས་ནི་འདྲ་བ་མ་ཡིན་ནོ། །དེ་བཞིན་དུ་སྐྱེས་བུ་བླུན་པོ་དེ་དག་དང་ངའི་ཉན་ཐོས་ཀྱི་དགེ་འདུན་ཡང་འདྲ་བ་མ་
ཡིན་ནོ། །ཤཱ་རིའི་བུ་བྱིས་པའི་རང་བཞིན་གྱིས་ལྷ་ཐོས་པ་ཙམ་གྱིས་སྤྲེའུ་སྟོན་པར་བྱེད་པ་དེ་བཞིན་དུ་སྐྱེས་བུ་བླུན་པོ་དེ་དག་ཀྱང་ཚིག་ཙམ་ལྷུར་བྱེད་པ་དགེ་སྦྱོང་གི་འདུ་ཤེས་ཅན་དུ་འགྱུར་རོ། །ཤཱ་རིའི་བུ་དེ་ལ་འདྲི་བ་པོའི་རང་བཞིན་དུ་འགྱུར་བ་གང་ཡིན་པ་དེ་དག་ནི་དགེ་སློང་རྣམས་ལ་འདི་ལྟ་བུས་
མགུ་བར་བྱེད་པར་འགྱུར་ཏེ། གང་དག་མིང་དང་གཟུགས་ཀྱི་བརྗོད་པ་མེད་པ་དང་། ཐ་སྙད་མེད་པ་དང་། དམིགས་པ་མེད་པ་དང་། འབྱུང་བ་མེད་པ་དང་། འཇིག་པ་མེད་པ་དང་། འགལ་བ་མེད་པ་དང་། རྣམ་པར་མི་རྟོག་པར་བྱ་བའི་ཕྱིར་མཚན་ཉིད་མེད་པར་ས་སོར་ཁོང་དུ་ཆུད་པར་

བྱེད་དོ། །གང་དག་གིས་མཚན་ཉིད་མེད་པ་དང་། འབྱུང་བ་མེད་པ་དེ་ལྟ་བུ་དེ་དག་ཐོས་ནས་མི་སྐྲག་མི་དངང་། དངང་བར་མི་འགྱུར་ན། ཤཱ་རིའི་བུ་དེ་དག་ནི་ངས་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་ཡིན་ནོ་ཞེས་གསུང་ངོ་། །དེ་དག་ནི་ཆོས་འདུལ་བ་འདི་ལ་ཀུན་ཤེས་པ་ཡིན་ནོ། །
དེ་དག་ནི་འཕགས་པའི་དགེ་འདུན་ཞེས་བྱའོ། །འཕགས་པའི་དགེ་འདུན་གྱི་ལེའུ་སྟེ་བཞི་པའོ།། །།སངས་རྒྱས་ཀྱི་སྡེ་སྣོད་ཚུལ་ཁྲིམས་འཆལ་པ་ཚར་གཅོད་པ། བམ་པོ་གསུམ་པ། ཤཱ་རིའི་བུ་ཡང་ཚུལ་ཁྲིམས་འཆལ་པའི་དགེ་སློང་རྣམས་ཀྱི་གདུང་བ་ནི་
བཅུ་པོ་འདི་དག་ཡིན་ཏེ། ཚུལ་ཁྲིམས་འཆལ་པའི་དགེ་སློང་མྱ་ངན་གྱི་ཟུག་རྔུ་བཅུ་དང་ལྡན་པ་རྣམས་ནི་སངས་རྒྱས་ཀྱི་གསུང་གི་རོ་མི་མྱང་ངོ་། །ཆོས་ཟབ་མོ་བཤད་པ་རྣམས་ལ་མི་འཇུག་ཅིང་མོས་པར་མི་འགྱུར་རོ། །དམིགས་སུ་མེད་པའི་སྟོང་པ་ཉིད་དང་། མཚན་མ་མེད་པ་དང་། སྨོན་
པ་མེད་པའི་ཆོས་ཐོས་ན་སྐྲག་པར་འགྱུར། དངང་བར་འགྱུར་ཀུན་དུ་དངང་བར་འགྱུར་རོ། །དེ་བཞིན་གཤེགས་པས་དགོངས་ཏེ་གསུངས་པའི་དོན་མི་ཤེས་སོ། །ཆོས་སྨྲ་བའི་དགེ་སློང་ལ་ཡང་སྡང་བར་བྱེད་དོ། །ཆོས་སྨྲ་བའི་དགེ་སློང་ལ་ཡང་ལྟ་མི་འདོད་པར་འགྱུར་རོ། །བཅུ་གང་ཞེ་ན།
ཤཱ་རིའི་བུ་འདི་ལ་ཚུལ་ཁྲིམས་འཆལ་པའི་དགེ་སློང་ནི་དགེ་འདུན་འཐུན་པ་ལ་མི་དགའ་ཞིང་ཡིད་མི་བདེ་བ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། དགེ་སློང་གི་དགེ་འདུན་འཐུན་པའི་གསོ་སྦྱོང་གི་ལས་ཀྱི་མཐས་བདག་ཉམས་པར་མི་འགྱུར་གྲང་སྙམ་སྟེ། དེ་རང་གི་སྐྱོན་ལ་བལྟས་
ནས་རྟག་ཏུ་ཡིད་གཉིས་ཀྱི་སྡུག་བསྔལ་གྱིས་གནས་ཤིང་ཚུལ་ཁྲིམས་དང་ལྡན་པའི་དགེ་སློང་རྣམས་ལ་ཡང་གནོད་པར་སེམས་པར་འགྱུར་རོ། །ཤཱ་རིའི་བུ་འདི་ནི་ཚུལ་ཁྲིམས་འཆལ་པའི་དགེ་སློང་རྣམས་ཀྱི་འཆལ་པའི་ཚུལ་ཁྲིམས་ཀྱི་སྐྱོན་དང་པོ་ཡིན་ཏེ། ངན་སོང་ཡོངས་སུ་
རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་ནི་སྐྱེ་བོ་མང་པོས་སྨད་པའི་འོས་སུ་འགྱུར་རོ། །གླང་རྭ་རྣོན་བཞིན་དུ་བསྐྲད་པའི་འོས་ཡིན་ཏེ། དེ་རང་གི་སྐྱོན་ལ་ཀུན་ཏུ་བལྟས་ནས་སྡུག་བསྔལ་གྱིས་གནས་པར་འགྱུར་རོ། །

ཤཱ་རིའི་བུ་འདི་ནི་ཚུལ་ཁྲིམས་འཆལ་པའི་དགེ་སློང་གི་འཆལ་པའི་ཚུལ་ཁྲིམས་ཀྱི་སྐྱོན་གཉིས་པ་ཡིན་ཏེ། ངན་སོང་ཡོངས་སུ་རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་གིས་དགེ་སློང་གི་འཁོར་མཐོང་
ན་ཐག་མི་རིང་བར་འདུག་ནས་གཡས་གཡོན་དུ་ལྟ་བར་བྱེད་དེ་དེ་ན་བདག་དང་མཚུངས་པར་མ་མཐོང་ནས་ཡི་ཆད་པ་ཉིད་ཀྱི་སླར་ལྡོག་པར་འགྱུར། དགེ་སློང་གི་འཁོར་གྱི་ནང་དུ་ཉེ་བར་འགྲོ་བར་མི་སྤྲོ་ཞིང་ཉེ་བར་སོང་ན་ཡང་ཞུམ་ཞུམ་པོར་བྱས་ནས་འདུག་པར་འགྱུར་རོ། །ཤཱ་རིའི་བུ་འདི་
ནི་ཚུལ་ཁྲིམས་འཆལ་པའི་དགེ་སློང་གི་འཆལ་པའི་ཚུལ་ཁྲིམས་ཀྱི་སྐྱོན་གསུམ་པ་ཡིན་ཏེ། ངན་སོང་ཡོངས་སུ་རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་ནི་གཏུམ་པ། སྙིང་རྗེ་མེད་པ། གསོ་དཔྱད་མེད་པ།
མུ་སྟེགས་ཀྱི་ཚུལ་ཁྲིམས་ལ་རབ་ཏུ་གནས་པ་ཡིན་ནོ། །དེ་ཚུལ་ཁྲིམས་རལ་ཞིང་ཚུལ་ཁྲིམས་མཚུངས་པ་དང་ལྡན་པའི་དགེ་སློང་རྣམས་ལས་ལེགས་པར་བགོ་བཤའ་མ་བྱས་པ་ཡིན་ཏེ། དེ་ཚུལ་ཁྲིམས་ཉམས་པས་ངོ་ཚ་མེད་པ་ཡིན་ནོ། །ཤཱ་རིའི་བུ་འདི་ནི་ཚུལ་ཁྲིམས་འཆལ་པའི་
དགེ་སློང་གི་འཆལ་པའི་ཚུལ་ཁྲིམས་ཀྱི་སྐྱོན་བཞི་པ་ཡིན་ཏེ། ངན་སོང་ཡོངས་སུ་རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་ནི་གཞན་གྱིས་བསགས་པའི་ལོངས་སྤྱོད་ཀྱིས་ལུས་གསོ་བར་བྱེད་དོ། །ཤཱ་རིའི་བུ་ང་ནི་དེ་ལྟ་
བུའི་དགེ་སློང་ལ་ཁུར་ཁྱེར་བ་ཡིན་ནོ། །ཞེས་གསུང་ངོ་། །དེ་ཅིའི་ཕྱིར་ཞེ་ན། ཤཱ་རིའི་བུ་ངས་རིགས་པ་ཅན་དང་། གྲོལ་བ་ཅན་རྣམས་ལ་ནི་དད་པས་བྱིན་པ་རྗེས་སུ་གནང་ངོ་། །ཤཱ་རིའི་བུ་ཡང་ཚུལ་ཁྲིམས་འཆལ་པའི་དགེ་སློང་ནི་རིགས་པ་མེད་པ་ཉིད་ཀྱིས་གྲོལ་བ་མ་ཡིན་
ནོ། །ཤཱ་རིའི་བུ་དེ་ལྟ་བས་ན་ཚུལ་ཁྲིམས་འཆལ་པའི་དགེ་སློང་གིས་བསྐལ་པ་བྱེ་བ་ཕྲག་བརྒྱ་སྟོང་དུ་ཡན་ལག་དང་། ཉིང་ལག་གི་ཤ་གཏུབས་ཀྱང་སླར་སོར་ཆུད་པར་འགྱུར་བའི་གནས་དེ་ནི་ཡོད་པ་མ་ཡིན་ནོ། །དུད་འགྲོའི་སྐྱེ་གནས་སུ་གཏོགས་པ་གླང་དང་། བོང་བུའི་

ཁུར་ལེན་པར་འགྱུར་བས་དེ་སླར་སོར་ཆུད་པར་འགྱུར་བའི་གནས་དེ་ནི་ཡོད་པ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་ཚུལ་ཁྲིམས་འཆལ་པའི་དགེ་སློང་རྣམས་ཀྱིས་དད་པས་བྱིན་པ་ལ་བྱེ་བ་བརྒྱ་སྟོང་དུ་གཤེགས་པའི་ཆ་ཤས་ཀྱང་ཡོངས་སུ་སྦྱང་བར་མི་ནུས་ན། ཆོས་
གོས་སམ། བསོད་སྙོམས་ལྟ་སྨོས་ཀྱང་ཅི་དགོས་ཏེ། དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་ངས་དྲང་སྲོང་གི་རྒྱལ་མཚན་གྱིས་གཡོགས་པ་ཚུལ་ཁྲིམས་འཆལ་པའི་དགེ་སློང་ནི་གཙུག་ལག་ཁང་གི་གཞི་ལ་གོམ་པ་གཅིག་ཀྱང་འདོར་བར་རྗེས་སུ་མ་གནང་ན་ཆུའི་སྣོད་ལྟ་ཅི་
སྨོས། ཁྲིའམ་ཁྲིའུ་ལྟ་ཅི་སྨོས། དེ་ཅིའི་ཕྱིར་ཞེ་ན། ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་དག་ནི་ལྷ་དང་བཅས་པའི་འཇིག་རྟེན་གྱི་ཆོམ་རྐུན་པ་ཡིན་པའི་ཕྱིར་རོ། །ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་དག་ནི་ལྷ་དང་བཅས་པའི་འཇིག་རྟེན་གྱིས་བསྐྲད་པར་བྱ་བའི་འོས་ཡིན་
ནོ། །ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་དག་ནི་ལྷ་དང་བཅས་པའི་འཇིག་རྟེན་གྱི་དགྲ་བོ་ཡིན་ཏེ། དེ་དག་ནི་སྡིག་པའི་གྲོགས་པོ་ཞེས་བྱའོ། །ཤཱ་རིའི་བུ་ངས་ལྷ་དང་བཅས་པའི་འཇིག་རྟེན་ལ་ཆོས་བསྟན་པའི་ཕྱིར་སྐབས་དབྱེ་བར་བྱའོ། །ཤཱ་རིའི་བུ་ང་ནི་ཚུལ་ཁྲིམས་
འཆལ་པའི་དགེ་སློང་ཚུལ་ཁྲིམས་ཉམས་པ། སྤྱོད་པ་ཉམས་པ། འཚོ་བ་ཉམས་པ། ལྟ་བ་ཉམས་པ་རྣམས་ནི་ལག་བརྡས་སྐྲོད་པར་མཛད་དོ། །དེ་དག་ནི་ངས་བལྟ་བའི་ཕྱིར་ཡང་སྐབས་མ་ཕྱེ་ན། བསྟན་པ་འདི་ལ་མཚན་གཅིག་གམ། ཉིན་གཅིག་གམ། སྐད་ཅིག་
ཙམ་ཉེ་བར་འགྲོ་བའི་ཕྱིར་ལྟ་ཅི་སྨོས། ཤཱ་རིའི་བུ་དཔེར་ན་སྦྲུལ་གྱི་རོའམ། ཁྱི་རོའམ། མི་རོ་མི་གཙང་བ། རུལ་བ། དྲི་མི་ཞིམ་པ་དག་ནི་ལྷའི་འཁོར་དང་འཐུན་པ་མ་ཡིན་ཞིང་འདོད་པའི་རྩེད་མོ་རྣམས་དང་ཡང་འཐུན་པ་མ་ཡིན་ཏེ། གལ་ཏེ་དེ་དག་མཐོང་ན་རྒྱང་རིང་པོ་ཁོ་ན་
ནས་ཡོངས་སུ་སྤོང་བར་བྱེད་དོ། །ཤཱ་རིའི་བུ་དེ་བཞིན་དུ་མཁས་པ་རྣམས་ཀྱིས་ཚུལ་ཁྲིམས་འཆལ་པའི་དགེ་སློང་ཡང་སྦྲུལ་གྱི་རོ་དང་འདྲ་བར་རིག་པར་བྱ་སྟེ། འདི་ལྟར་དེ་ནི་རྒྱང་རིང་པོར་ཡོངས་སུ་སྤང་བར་བྱའོ། །དེ་དག་དང་བཀྲ་ཤིས་ཀྱི་ལས་སམ། གས་སྦྱོང་ངམ། དགག་

དབྱེ་ཡང་ལྷན་ཅིག་ཏུ་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་བླུན་པོ་དེ་དག་ནི་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། བདེ་བ་མ་ཡིན་པ་དང་། སྡུག་བསྔལ་བ་དང་། ཉམས་པ་དང་། གཞན་གྱིས་ཟིལ་གྱིས་མནན་པ་དང་། ལོག་
པར་ལྷུང་བ་ཀུན་ཏུ་རྫོགས་པར་འགྱུར་བ་ཡིན་པའི་ཕྱིར་རོ། །ཚུལ་ཁྲིམས་དང་ལྡན་པའི་དགེ་སློང་གང་ཡིན་པ་དག་ལ་གུས་པར་མི་བྱེད། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་ཞིང་བྱ་བ་དང་ལས་དང་། གསོ་སྦྱོང་བ་
དང་། དགག་དབྱེ་རྣམས་འདྲལ་བར་བྱེད་དོ། །ཤཱ་རིའི་བུ་ངའི་བསྟན་པ་འདི་ལ་ཚུལ་ཁྲིམས་དང་ལྡན་པར་བཀུར་བའི་དགེ་སློང་གང་ཡིན་པ་དེ་དག་གིས་ཚུལ་ཁྲིམས་འཆལ་པའི་དགེ་སློང་རྣམས་མཐོང་ན་རྒྱང་རིང་པོ་ཁོ་ནར་ཡོངས་སུ་སྤོང་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་
འདི་ལྟར་ཚུལ་ཁྲིམས་འཆལ་པའི་དགེ་སློང་རྣམས་ཀྱི་ལྷུང་བཟེད་དམ་ཆོས་གོས་གང་ཡིན་པ་དེ་དག་དང་། ཚུལ་ཁྲིམས་དང་ལྡན་པའི་དགེ་སློང་རྣམས་ཀྱིར་འདྲེས་ན་དུག་དང་འདྲེས་པ་ལྟ་བུར་རིག་པར་བྱའོ། །ཤཱ་རིའི་བུ་ང་ནི་སྦྲུལ་གྱི་རོས་གང་བའམ། ཁྱི་རོས་གང་བའམ། མི་
རོས་གང་བའི་ས་ལ་སྤྱོད་ལམ་བཞི་པོ་རྣམས་ལས་སྤྱོད་ལམ་གང་ཡང་རུང་བས་གནས་པར་ནི་སྤྲོ་ཡི། ཤཱ་རིའི་བུ་ང་ནི་ཚུལ་ཁྲིམས་འཆལ་པའི་དགེ་སློང་སྤྱོད་པ་ཉམས་པ། འཚོ་བ་ཉམས་པ། ལྟ་བ་ཉམས་པ་རྣམས་དང་། མཚན་གཅིག་གམ། ཉིན་གཅིག་གམ། སྐད་ཅིག་
གམ། ཐ་ན་སེ་གོལ་གཏོགས་པ་ཙམ་ཡང་ལྷན་ཅིག་ཏུ་གནས་པར་ཡང་མི་སྤྲོའོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་དེ་ལྟ་བུའི་དགེ་སློང་རྣམས་ནི་དགེ་སྦྱོང་ཐ་ཤལ་ཞེས་བྱའོ། །དགེ་སྦྱོང་བཀྲེན་པ་ཞེས་བྱའོ། །དགེ་སྦྱོང་ཕལ་པ་ཞེས་བྱའོ། །དགེ་སྦྱོང་སྤུན་པ་ཞེས་
བྱའོ། །དགེ་སྦྱོང་རུལ་པ་ཞེས་བྱའོ། །དགེ་སྦྱོང་དྲི་མ་ཅན་ཞེས་བྱའོ། །དགེ་སྦྱོང་གི་སྙིགས་མ་ཞེས་བྱའོ། །དགེ་སྦྱོང་གི་དྲི་མ་ཞེས་བྱའོ། །དགེ་སྦྱོང་གདོལ་པ་ཞེས་བྱའོ། །དགེ་སྦྱོང་ཉམས་པ་ཞེས་བྱའོ། །དགེ་སྦྱོང་སྡིག་ཅན་ཞེས་བྱའོ། །དགེ་སྦྱོང་སྲེད་ཞེས་བྱའོ། །

འཕགས་པའི་ལམ་ལས་ཕྱི་རོལ་པ་ཞེས་བྱའོ། །དགེ་སྦྱོང་ཆུ་སྐྱར་ཞེས་བྱའོ། །དགེ་སྦྱོང་སུན་འབྱིན་པ་ཞེས་བྱ་སྟེ། དེ་དག་ངའི་བསྟན་པ་འདི་ལ་རབ་ཏུ་བྱུང་ནས་བསོད་ནམས་མ་ཡིན་པའི་ཕུང་པོ་མང་དུ་འཐོབ་པར་འགྱུར་རོ། །ཤཱ་རིའི་བུ་དེ་དག་ནི་དེ་བཞིན་གཤེགས་པའི་
བསྟན་པ་ལ་ཐབ་ཁྲོལ་བ་ཡིན་ནོ། །ཤཱ་རིའི་བུ་དེ་དག་ནི་དེ་བཞིན་གཤེགས་པའི་བསྟན་པ་ལ་ཆོམ་རྐུན་ཆོས་སུན་འབྱིན་པ་ཡིན་ནོ། །ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་དག་ནི་ཚུལ་འཆོས་པ། འཚོ་བ་ལྷུར་ལེན་པ། འཇིག་རྟེན་གྱི་ཟང་ཟིང་གིས་བཀོལ་བ། ཟས་དང་བགོ་བ་
ལྷུར་ལེན་པ་ཡིན་ནོ། །ཤཱ་རིའི་བུ་དཔེར་ན་མ་ནིང་ནི་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་ནོ་ཞེས་བརྗོད་པར་བྱའོ། །ཤཱ་རིའི་བུ་དེ་བཞིན་དུ་ཚུལ་ཁྲིམས་འཆལ་པའི་དགེ་སློང་ཡང་ཁྱིམ་པ་ཡང་མ་ཡིན་དགེ་སྦྱོང་ཡང་མ་ཡིན་ནོ་ཞེས་བརྗོད་པར་བྱ་སྟེ། དེའི་ཐ་སྙད་ཀྱི་བདེན་པའི་ཚིག་གི་དོན་
གྱི་བླ་དགས་ནི་སེམས་ཅན་དམྱལ་བ་ཞེས་བྱ་བ་ཁོ་ན་ཡིན་ནོ། །ཤཱ་རིའི་བུ་དཔེར་ན་བྱ་མ་བྱི་ནི་འདབ་ཆགས་ཀྱི་བྲེལ་བ་བྱུང་ན་ནི་ཕུག་ཏུ་ཞུགས་ནས་བྱི་བའི་འདུ་ཤེས་འབྱིན་ནོ། །བྱི་བའི་བྲེལ་བ་བྱུང་ན་ནི་འདབ་ཆགས་རྣམས་ཀྱི་གྲངས་ཀྱི་ཁ་སྐོང་བར་བྱེད་དོ། །དེ་ལ་ནི་བྱ་བ་དང་བསྐྱོད་པའི་
མཐུ་ཡོད་པ་མ་ཡིན། སྐད་དང་གདངས་ཆེན་པོ་འབྱིན་པ་མ་ཡིན། ཁ་དོག་བཟང་པོ་དང་ངན་པའི་གནས་རྣམས་བསྟན་དུ་མེད་དེ། འདི་ལྟར་མུན་ཁུང་ཉིད་ལ་སྟེན་པ་དང་། དེ་བདག་ཉིད་ཀྱི་རང་བཞིན་ཡང་དྲི་མི་ཞིམ་པ་ཡིན་ནོ། །ཤཱ་རིའི་བུ་དེ་བཞིན་དུ་ཚུལ་ཁྲིམས་འཆལ་པའི་
དགེ་སློང་ཡང་བྱ་བ་དང་བསྐྱོད་པ་ལ་མཐུ་མེད་པར་འགྱུར་ཏེ། རྒྱལ་པོའི་ལས་ལ་ནི་དགེ་སྦྱོང་དང་ཐུན་མོང་བཟང་པོའི་ལས་ལ་ནི་ཁྱིམ་པ་དང་ཐུན་མོང་དུ་བྱེད་དེ། དེ་ལྟ་བས་ན་དེ་ནི་ཁྱིམ་པ་ཡང་མ་ཡིན་དགེ་སྦྱོང་ཡང་མ་ཡིན་པར་བརྗོད་པར་བྱའོ། །རོའམ་མགལ་མེའི་འཁོར་ལོ་བཞིན་དུ་
བྱ་བ་དང་གཡོ་བ་ཡོངས་སུ་ཉམས་པར་དེ་ཉིད་ཀྱིས་ཚུལ་ཁྲིམས་ཀྱི་དྲི་ཡོད་པ་མ་ཡིན། ཏིང་ངེ་འཛིན་གྱི་དྲི་ཡོད་པ་མ་ཡིན། ཤེས་རབ་ཀྱི་དྲི་ཡོད་པ་མ་ཡིན། རྣམ་པར་གྲོལ་བའི་དྲི་ཡོད་པ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བའི་དྲི་ཡོད་པ་མ་ཡིན་གྱི། གཞན་དུ་ན་དེ་ལ་

ཚུལ་ཁྲིམས་འཆལ་པའི་དྲི་ཁོ་ན་ཡོད་དོ། །དགེ་སྦྱོང་དང་འདྲ་བའི་སྐད་དང་གཏམ་འདི་ལྟ་སྟེ། ཚུལ་ཁྲིམས་ཀྱི་གཏམ་འམ། ཏིང་ངེ་འཛིན་གྱི་གཏམ་འམ། ཤེས་རབ་ཀྱི་གཏམ་འམ། རྣམ་པར་གྲོལ་བའི་གཏམ་འམ། རྣམ་པར་གྲོལ་བའི་ཡེ་ཤེས་
མཐོང་བའི་གཏམ་འམ། འབྲས་བུ་ཐོབ་པའི་གཏམ་མངོན་པར་མི་བརྗོད་ཀྱི། གཞན་དུ་ན་ཚུལ་ཁྲིམས་འཆལ་པའི་དགེ་སློང་ནི་འདུ་འཛི་ལ་དགའ་ཞིང་མངོན་པར་མགུ་བར་བྱེད་པ་ཁོ་ན་ཡིན་ནོ། །དེ་ནི་རིགས་པ་མ་ཡིན་པ་ལ་སྦྱོར་བ་དེ་འདྲ་བ་དག་དང་ལྷན་ཅིག་མ་དག་པའི་གཏམ་མང་
པོ་འདི་ལྟ་སྟེ། ཆོས་གོས་བགོས་པའི་གཏམ་དང་། བདག་གིས་ཁ་ཟས་རྙེད་ནས་ཟོས་པའི་གཏམ་དང་། སྦྱིན་པ་བྱིན་ན་བྱིན་ལེན་བྱ་བའི་གཏམ་དང་། ཕོ་ཉ་དང་སྤྲིང་ཡིག་སྐྱེལ་བའི་གཏམ་དང་། ལོ་མ་དང་། མེ་ཏོག་དང་། འབྲས་བུ་སྦྱིན་པའི་གཏམ་དང་། བཞད་
གད་དང་རྩེད་མོ་དང་ཀུན་ཏུ་འབྲེལ་བ་དང་། གདུལ་དཀའ་བ་དང་། དགང་དཀའ་བ་དང་། གསོ་དཀའ་བ་སྨྲ་སྟེ། གཏམ་འདི་འདྲ་བ་མ་དག་པ་དག་གིས་ཉིན་མཚན་ལྷག་པར་འདའ་བར་བྱེད་དོ། །དེ་ལྟར་དེ་དག་ཡོངས་སུ་མ་དག་པའི་ལུས་ཀྱི་ལས་ཀྱི་མཐའ་དང་། ཡོངས་སུ་མ་
དག་པའི་ངག་གི་ལས་ཀྱི་མཐའ་དང་། ཡོངས་སུ་མ་དག་པའི་ཡིད་ཀྱི་ལས་ཀྱི་མཐའ་དང་། ཡོངས་སུ་མ་དག་པའི་འཚོ་བ་བས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་ལྟུང་བར་འགྱུར་རོ། །ཤཱ་རིའི་བུ་དཔེར་ན་བྱ་མ་བྱི་ནི་
མུན་ཁྲོད་ན་སྟེན་པ་ཡིན་ནོ་ཞེས་གསུང་ངོ་། །སྐྱེས་བུ་བླུན་པོ་དེ་དག་ཀྱང་དེ་བཞིན་གཤེགས་པས་གསུངས་པའི་མདོ་སྡེ་ཡང་དག་པ་ཇི་ལྟ་བ་བཞིན་སྐུལ་བར་བྱེད་པ་འདི་ལྟ་བུ་ཐོས་ནས་སྡུག་བསྔལ་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་འཇིག་རྟེན་ནི་བདེན་པ་ལ་
ཁྲོ་བ་ཡིན་པས་དེ་དག་ཆོས་སྨྲ་བ་ལ་སེམས་མ་དད་པར་འགྱུར་རོ། །དེ་དག་ལྷག་པར་ཡང་ངན་སོང་གི་གནས་ཀུན་ཏུ་འཕེལ་བ་དང་། ཡོངས་སུ་རྫོགས་པར་བྱེད་པར་འགྱུར་རོ། །ཤཱ་རིའི་བུ་འདི་ནི་ཚུལ་ཁྲིམས་འཆལ་པའི་དགེ་སློང་གི་འཆལ་པའི་ཚུལ་ཁྲིམས་ཀྱི་སྐྱོན་ལྔ་པ་ཡིན་ཏེ། ངན་

སོང་ཡོངས་སུ་རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་ནི་སྤྱི་བརྟོལ་ཅན་ཡིན། མུ་ཅོར་སྨྲ་བ་ཡིན། ཐུགས་ཐུབ་ཅན་ཡིན། ཕལ་པའི་དབང་པོ་ཅན་ཡིན་ནོ། །ལུས་ཀྱི་ལས་མི་གཙང་བ་རྣམས་དང་ལྡན་པ་ཡིན་ནོ། །ངག་གི་ལས་མི་
གཙང་བ་རྣམས་དང་། ཡིད་ཀྱི་ལས་མི་གཙང་བ་རྣམས་དང་ལྡན་པ་ཡིན་ནོ། །སྤྱོད་ལམ་མི་གཙང་བ་རྣམས་དང་ལྡན་པ་ཡིན་ནོ། །ཆོས་གོས་མི་གཙང་བའི་དགོན་པ་དང་ལྡན་པ་ཡིན་ནོ། །བརྫུན་དུ་སྨྲ་བ་ཡིན། ངག་མ་བསྡམས་པ་ཡིན། སེམས་ཀུན་ནས་ཉོན་མོངས་པ་ཅན་ཡིན་ནོ། །
ཤཱ་རིའི་བུ་དཔེར་ན་ས་ལས་བྱས་པའི་སྣོད་སར་པ་ཞིག་ཡོད་ལ། དེར་སྐྱེས་པ་འགའ་ཞིག་གིས་ངན་སྐྱུགས་བླུགས་ནས་དེ་ཕོ་སྟེ། ཙན་དན་དམར་པོས་སླར་བཀང་ནས་ཙན་དན་དམར་པོ་དེ་ཡང་ཕོ་ན། ཤཱ་རིའི་བུ་འདི་ཇི་སྙམས་དུ་སེམས། ས་ལས་བྱས་པའི་སྣོད་སར་པ་དེ་ལ་འདི་ལྟར་
ཙན་དན་གྱི་དྲིའམ། འོན་ཏེ་ངན་སྐྱུགས་ཀྱི་དྲི་དྲིའི་རང་བཞིན་གང་ཞིག་གི་མཐུ་ཡོད་པར་འགྱུར། བཅོམ་ལྡན་འདས་དོག་སའི་སྣོད་དེ་ངན་སྐྱུགས་ཀྱི་དྲི་གང་ལགས་པ་ཁོ་ནས་ཐོག་མར་བསྒོས་པས་དྲི་དེའི་རང་བཞིན་ཁོ་ནར་འགྱུར་ལགས་ཏེ། འདི་ལྟ་སྟེ་ངན་སྐྱུགས་ཀྱི་དྲི་ལགས་སོ། །
ཙན་དན་གྱི་དྲི་ནི་མ་ལགས་ཏེ། དེས་ནི་ཙན་དན་དམར་པོའི་བགྱི་བ་དང་བསྒྲུབ་པ་རྔོ་མི་ཐོགས་ལགས་སོ། །ཤཱ་རིའི་བུ་དེ་བཞིན་དུ་འདི་ན་སེམས་ཅན་ཁ་ཅིག་དབང་པོ་ཡོངས་སུ་རྫོགས་ཤིང་ཡོངས་སུ་དག་སྟེ། དགེ་བའི་ཆོས་རྣམས་དང་ལྡན་ཞིང་། དེ་དད་པས་ཁྱིམ་ནས་ཁྱིམ་མེད་པར་
རབ་ཏུ་འབྱུང་སྟེ། དེ་དག་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་སྡིག་པའི་གྲོགས་པོའི་ལག་ཏུ་འདོང་བ་དང་། དབང་དུ་འདོང་བ་དང་། ཉེ་བར་འདོང་བར་འགྱུར་རོ། །ཤཱ་རིའི་བུ་སྡིག་པའི་གྲོགས་པོ་ཞེས་བྱ་བ་དེ་དག་གང་ཞེ་ན། ཤཱ་རིའི་བུ་སྡིག་པའི་གྲོགས་པོ་ནི་འདི་ལྟ་
སྟེ། རྒོད་པ་དང་། ཕོ་ཐེག་ཆེ་བ་དང་། མི་བརྟན་པ་དང་། མུ་ཅོར་སྨྲ་བ་དང་། ཐུགས་ཐུབ་ཅན་དང་། ཚིག་ཟློས་བུ་ཅན་དང་། ལེ་ལོ་ཅན་དང་། བརྩོན་འགྲུས་ཞན་པ་དང་། བརྗེད་ངས་པ་དང་། སེམས་མཉམ་པར་མ་བཞག་པ་དང་། སེམས་འཁྲུག་པ་དང་། མཛེས་

པ་མ་ཡིན་པ་དང་། ཤེས་བཞིན་མ་ཡིན་པ་དང་། ཤེས་རབ་འཆལ་པ་དང་། ལུག་ལྟར་ལྐུགས་པ་དང་། ཕལ་པའི་དབང་པོ་ཅན་གྱི་དགེ་སློང་རྣམས་ཡིན་ནོ། །དེ་དག་དགེ་སློང་དེ་ལྟ་བུ་དག་ལ་ཉེ་བར་སྟེན་ཅིང་བཀུར་སྟི་དང་བསྙེན་བཀུར་བྱེད་པ་ན། རྒྱུན་དུ་
ཞུགས་པའི་འབྲས་བུ་ལས་ཡོངས་སུ་ཉམས་པར་འགྱུར་རོ། །ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་ལས་ཡོངས་སུ་ཉམས་པར་འགྱུར་རོ། །ཐ་ན་མཐོ་རིས་སུ་སྐྱེ་བ་ལས་ཀྱང་ཡོངས་སུ་ཉམས་པར་འགྱུར་རོ། །ཆོས་ཀྱིས་
ཕོངས་པར་འགྱུར་བའི་ལས་ཡོངས་སུ་མངོན་པར་འདུ་བྱེད་པར་འགྱུར་རོ། །ཆོས་ཀྱིས་ཕོངས་པར་འགྱུར་བ་དང་ལྡན་པ་དག་དང་ལྷན་ཅིག་གནས་པ་དང་། ཀུན་ཏུ་གཞོལ་བར་འགྱུར་རོ། །ཡོངས་སུ་མ་དག་པའི་ལུས་ཀྱི་ལས་དང་ལྡན་པར་འགྱུར་རོ། །ཡོངས་སུ་མ་དག་པའི་ངག་གི་ལས་དང་།
ཡིད་ཀྱི་ལས་དང་ལྡན་པར་འགྱུར་རོ། །དགེ་སློང་འཚོ་བ་ཡོངས་སུ་མ་དག་པ་དེ་ལྟ་བུ་དག་ལ་བསྟེན་ཅིང་བཀུར་སྟི་དང་བསྙེན་བཀུར་བྱས་ནས་ལུས་ཞིག་ནས་ཤི་བའི་འོག་ཏུ་ངན་འགྲོར་འགྲོ་བར་འགྱུར་རོ། །ཤཱ་རིའི་བུ་ངན་འགྲོ་ཞེས་བྱ་བ་གང་ཞེ་ན། ཤཱ་རིའི་བུ་ངན་འགྲོ་ཞེས་བྱ་བ་ནི་འདི་ལྟ་སྟེ། སེམས་
ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དང་། ལྷ་མ་ཡིན་གྱི་རིས་སོ། །ཤཱ་རིའི་བུ་སྲོག་ཆགས་ཀྱི་རིགས་རྙེད་དགུ་ཟ་ཞེས་བྱ་བ་ཞིག་ཡོད་པ་དང་། ཤཱ་རིའི་བུ་སྲོག་ཆགས་ཀྱི་རིགས་མཆུས་རྐོ་ཞེས་བྱ་བ་ཞིག་ཡོད་པ་དང་། ཤཱ་རིའི་བུ་སྲོག་ཆགས་ཀྱི་རིགས་ཁབ་
ཀྱི་ཁ་ཞེས་བྱ་བ་ཞིག་ཡོད་པ་དང་། ཤཱ་རིའི་བུ་སྲོག་ཆགས་ཀྱི་རིགས་ས་བརྩོག་ཅེས་བྱ་བ་ཞིག་ཡོད་དེ། དེར་སྡིག་པའི་གྲོགས་པོ་སྐྱེས་བུ་བླུན་པོ་དེ་དག་སྐྱེ་བར་འགྱུར་རོ། །ཤཱ་རིའི་བུ་སྡིག་པའི་གྲོགས་པོ་དེ་དག་གི་ལག་ཏུ་སོང་བ་དང་། དབང་དུ་སོང་བ་དང་། ཉེ་བར་སོང་བ་གང་ཡིན་པ་དེ་དག་
ཀྱང་ལུས་ཞིག་ནས་ཤི་བའི་འོག་ཏུ་ངན་འགྲོར་འགྲོ་བར་འགྱུར་རོ། །ཤཱ་རིའི་བུ་ངན་འགྲོ་ཞེས་བྱ་བ་གང་ཞེ་ན། ཤཱ་རིའི་བུ་ངན་འགྲོ་ཞེས་བྱ་བ་ནི་འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དང་། ལྷ་མ་ཡིན་གྱི་རིས་སོ། །གལ་ཏེ་སེམས་ཅན་

དམྱལ་བ་ནས་ཤི་འཕོས་ཏེ་མི་རྣམས་སུ་སླར་སྐྱེ་བར་འགྱུར་ཏེ། དེ་དག་མི་རྣམས་སུ་སླར་སྐྱེས་ན་མ་དང་ཡང་འབྲལ་བར་འགྱུར་ཞིང་། ཕ་དང་ཡང་འབྲལ་བ་དང་། སྤུན་དང་ཡང་འབྲལ་བ་དང་། སྲིང་མོ་དང་ཡང་འབྲལ་བ་དང་། བུ་དང་ཡང་འབྲལ་བ་དང་། བུ་མོ་དང་ཡང་འབྲལ་བ་དང་།
བྲན་གཡོག་དང་ཡང་འབྲལ་བ་དང་། གྲོགས་པོ་དང་ཡང་འབྲལ་བ་དང་། ཉེ་དུ་དང་ཡང་འབྲལ་བ་དང་། ནད་ཀྱིས་ཀྱང་ཉམ་ཐག་པ་དང་། ལོངས་སྤྱོད་དང་ཡང་འབྲལ་བ་དང་། ཡུལ་དང་ཡང་འབྲལ་བ་དང་། ཡུལ་ཕྱོགས་དང་ཡང་འབྲལ་བར་འགྱུར་རོ། །མི་ཁོམ་པ་བརྒྱད་
དང་ཡང་ལྡན་པར་འགྱུར་རོ། །དལ་བ་ཕུན་སུམ་ཚོགས་པ་དང་ཡང་འབྲལ་བར་འགྱུར་རོ། །འདོད་ཆགས་བདོ་བ་དང་། ཞེ་སྡང་བདོ་བ་དང་། གཏི་མུག་བདོ་བར་ཡང་འགྱུར་རོ། །རྒོད་པ་དང་། ཕོ་ཐེག་ཆེ་བ་དང་། མི་བརྟན་པ་དང་། མུ་ཅོར་སྨྲ་བ་དང་། ཐུགས་ཐུབ་ཅན་དང་། ཚིག་ཟློས་བུ་
ཅན་དང་། ལེ་ལོ་ཅན་དང་། བརྩོན་འགྲུས་ཞན་པ་དང་། མ་བསྡམས་པ་དང་། ཤེས་བཞིན་མ་ཡིན་པ་དང་། མཉམ་པར་མ་བཞག་པ་དང་། བརྗེད་ངས་པ་དང་། ཤེས་རབ་འཆལ་པ་དང་། ལུག་ལྟར་ལྐུགས་པ་དང་། སེམས་འཁྲུག་པ་དང་། ཕལ་པའི་དབང་པོ་ཅན་རྣམས་སུ་
འགྱུར་རོ། །འདོད་ཆགས་ཀྱིས་ཀྱང་བཅོམ་པར་འགྱུར་ཏེ། ཞེ་སྡང་གིས་བཅོམ་པ་དང་། གཏི་མུག་གིས་བཅོམ་པ་དང་། ང་རྒྱལ་གྱིས་བཅོམ་པར་ཡང་འགྱུར་རོ། །ལོང་བ་དང་། ཞར་བ་དང་། སྒུར་པོ་དང་། འགྲམ་པ་ཞོམ་པ་དང་། འོན་པ་དང་། རྣ་བ་ཡ་ཅིག་འོན་པ་དང་། ལྷག་
པར་འོན་པ་དང་། རྐྱེན་གྱིས་འོན་པ་དང་། གླེན་པ་དང་། དིག་པ་དང་། ལུག་ལྟར་ལྐུགས་པ་རྣམས་སུ་འགྱུར་རོ། །དེ་ལ་སྐྱེས་བུ་བླུན་པོ་དེ་དག་ནི་གང་དུ་སངས་རྒྱས་བཅོམ་ལྡན་འདས་རྣམས་མངོན་སུམ་དུ་མི་འགྱུར་བ་དང་། ཡང་དག་པར་མངོན་སུམ་དུ་མི་འགྱུར་བ་དེར་སྐྱེ་བར་འགྱུར་རོ། །
འདི་ལྟར་ཁ་ཕྱིར་བལྟས་པར་ཡང་འགྱུར་རོ། །གང་ན་ཆོས་མི་ཐོས་པ་དང་། སངས་རྒྱས་ཀྱི་ཉན་ཐོས་དགྲ་བཅོམ་པ་ཟག་པ་ཟད་པ་རྣམས་དང་ཀུན་ཏུ་ཕྲད་པར་མི་འགྱུར་རོ། །དེ་དག་ལས་ངན་པ་རྣམས་མངོན་པར་འདུ་བྱེད་པར་འགྱུར་རོ། །དེ་དག་ལས་ངན་པ་མངོན་པར་འདུས་བྱས་ནས་ངན་པ་

ཁོ་ན་རྣམས་དང་ལྷན་ཅིག་སྐྱེ་བར་འགྱུར་རོ། །ངན་པ་རྣམས་ལ་དགའ་བར་འགྱུར་རོ། །དེ་དག་ཡང་དག་པའི་ལྟ་བ་ལ་ལོག་པའི་ལྟ་བ་ཡིན་པར་འདུ་ཤེས་ཤིང་། ལོག་པའི་ལྟ་བ་ལ་ཡང་དག་པའི་ལྟ་བ་ཡིན་པར་འདུ་ཤེས་པར་འགྱུར་རོ། །དེ་དག་ངན་པ་འདོད་པ་དང་།
ངན་པ་ལ་སེམས་པ་དང་། ངན་པ་དོན་དུ་གཉེར་བ་དང་། ངན་པ་ལ་སྨོན་པ་དང་། ངན་པ་མངོན་པར་འདུ་བྱེད་པ་དང་། ངན་པའི་ལྟ་བ་དང་། ངན་པའི་བཟོད་པ་དང་། ངན་པའི་ཤེས་རབ་དང་། ངན་པའི་ཤེས་པ་ཅན་དུ་འགྱུར་རོ། །ཤཱ་རིའི་བུ་ཤེས་པ་ངན་པ་ཅན་གྱི་སེམས་ཅན་
རྣམས་ནི་ནམ་ཡང་ཡིད་འབྱུང་བའམ། འདོད་ཆགས་དང་བྲལ་བའི་ཕྱིར་རམ། འགོག་པའི་ཕྱིར་རམ། ཉེ་བར་ཞི་བའི་ཕྱིར་རམ། མངོན་པར་ཤེས་པའི་ཕྱིར་རམ། མངོན་པར་བྱང་ཆུབ་པའི་ཕྱིར་རམ། དགེ་སྦྱོང་གི་ཕྱིར་རམ། མྱ་ངན་ལས་འདའ་བར་བྱ་བའི་ཕྱིར་སེམས་གཞོལ་བར་
མི་བྱེད་དེ། ཤཱ་རིའི་བུ་འདི་ལྟ་བུ་དག་གིས་ཕོངས་པར་འགྱུར་རོ། །སྡིག་པའི་གྲོགས་པོའི་དབང་དུ་སོང་བའི་སེམས་ཅན་རྣམས་ཀྱི་ཚུལ་ནི་འདི་དག་ཡིན། རྟགས་ནི་འདི་དག་ཡིན། མཚན་མ་ནི་འདི་དག་ཡིན་ནོ། །ཤཱ་རིའི་བུ་སྐྱེས་བུ་བླུན་པོ་དེ་དག་དེ་བཞིན་གཤེགས་པས་གསུངས་པའི་མདོ་
སྡེ་འདི་ལྟ་བུ་དག་ཐོས་ནས་སྐྲག་པར་འགྱུར། དངང་བར་འགྱུར། ཀུན་ཏུ་དངང་བར་འགྱུར་ཏེ། གཡང་སའི་འདུ་ཤེས་སུ་འགྱུར་ཞིང་། གཡང་ས་ཆེན་པོར་ཡང་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་དེ་བཞིན་གཤེགས་པས་ཡང་དག་ཕུལ་གྱི་མདོ་སྡེ་འདི་ལས་ཚུལ་
ཁྲིམས་འཆལ་པའི་སྐྱོན་རྣམས་གསུངས་པའི་ཕྱིར་རོ། །ཤཱ་རིའི་བུ་རྒྱུ་གང་དང་། རྐྱེན་ཅི་ཞིག་གིས་གང་གི་ཕྱིར་འཆལ་པའི་ཚུལ་ཁྲིམས་རྣམས་ཞེས་བྱ་ཞེ་ན། ཤཱ་རིའི་བུ་ཚུལ་ཁྲིམས་ཀྱི་སྤྱོད་པ་འཆལ་པས་ཚུལ་ཁྲིམས་འཆལ་པ་རྣམས་ཞེས་བྱ་སྟེ། ངན་པའི་ཚིག་སྤྱོད་པ་དང་། མཁས་
པ་མ་ཡིན་པའི་ཚིག་སྤྱོད་པ་དང་། ཀུན་ནས་ཉོན་མོངས་པའི་ཚིག་སྤྱོད་པ་དང་། མི་འཐུན་པར་སྤྱོད་པ་དང་། ཆགས་པར་སྤྱོད་པ་དང་། ཀུན་ཏུ་ཆགས་པར་སྤྱོད་པ་དང་། འདོད་ཆགས་ལ་སྤྱོད་པ་དང་། ཀུན་ནས་འདོད་ཆགས་ལ་སྤྱོད་པ་དང་། ཞེ་སྡང་ལ་སྤྱོད་པ་དང་། རབ་ཏུ་

ཞེ་སྡང་ལ་སྤྱོད་པ་དང་། གཏི་མུག་ལ་སྤྱོད་པ་དང་། ཀུན་ནས་གཏི་མུག་ལ་སྤྱོད་པ་དང་། ལས་ཀྱི་མཐའ་མང་བ་དང་། སྨྲ་བ་ལ་དགའ་བ་དང་། གཉིད་ལ་དགའ་བ་དང་། འདུ་བ་ལ་དགའ་བ་དང་། འདུ་འཛི་ལ་དགའ་བ་དང་། སྤྲོས་པ་ལ་དགའ་བ་དང་། རིགས་པ་མེད་པའི་གཏམ་
དང་། མ་དག་པའི་གཏམ་དང་། བདག་ཏུ་འཛིན་པ་དང་། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། མར་མི་འཛིན་པ་དང་། ཕར་མི་འཛིན་པ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པ་དང་། སྨད་པའི་ཐ་སྙད་ཀྱིས་ཁྱིམ་
སུན་འབྱིན་པ་ལ་དགའ་བ་དང་། ཕོ་ཉར་འགྲོ་བ་དང་། ཁྱིམ་པའི་ལས་ཀྱི་མཐའ་བྱེད་དུ་འཇུག་པ་དང་། ཁྱིམ་པའི་འདུ་འཛི་བྱེད་པ་དང་། ཁྱིམ་པའི་གོ་རེ་ལོང་བྱེད་པ་དང་། ལོ་མ་དང་། མེ་ཏོག་དང་། འབྲས་བུ་འཇིག་པ་དང་། གཅེར་བུ་པའི་སྡོམ་པ་བདག་གིར་བྱེད་པ་དང་།
གཅེར་བུ་པ་སྲེལ་བ་དང་། འཇིག་རྟེན་ལས་འདས་པའི་ཡེ་ཤེས་སྤོང་བ་དང་། ལོ་ཉི་ཤུ་མ་ཚང་བར་བསྙེན་པར་རྫོགས་པ་དང་། ཡན་ལག་མ་ཚང་བར་བསྙེན་པར་རྫོགས་པ་དང་། འབྲུ་མ་བཅོས་པ་བྱིན་ལེན་བྱེད་པ་དང་། ཤ་མ་བཙོས་པ་བྱིན་ལེན་བྱེད་པ་དང་། གསེར་དང་དངུལ་
བྱིན་ལེན་བྱེད་པ་དང་། བདག་ཏུ་སྨྲ་བ་ལ་མི་སྨོད་པ་དང་། བདག་ཤེས་པ་མ་ཡིན་པ་དང་། གང་ཟག་གཞན་དང་གཞན་ཤེས་པར་བྱེད་པ་དང་། བརྫུན་དུ་སྨྲ་བ་དང་། སྡོམ་པ་ལ་ལྷོད་པ་དང་། གྱ་གྱུ་བྱེད་པ་དང་། དད་པ་མེད་པ་དང་། སྲན་ཆུང་བ་དང་། བྱས་པ་མི་ཤེས་
པ་དང་། མ་རིག་པ་དང་། ལེ་ལོ་དང་། གཉིད་དང་། རྒོད་པ་དང་། འགྱོད་པ་དང་། ཁྲོ་བ་དང་། འཁོན་དུ་འཛིན་པ་དང་། འཆབ་པ་དང་། ཆགས་པ་དང་། སྒྱུ་དང་། གཡོ་དང་། ཕྲག་དོག་དང་། སེར་སྣ་དང་། ཁྲེལ་མེད་པ་དང་། ངོ་ཚ་མེད་པ་དང་། རྒྱགས་པ་
དང་། བག་མེད་པ་དང་། ཁེངས་པ་དང་། ཀུན་ལ་རྩོམ་པ་དང་། དགའ་བ་མེད་པ་དང་། སྒྱིད་ལུག་པ་དང་། གླལ་བ་དང་། ཟས་ཀྱིས་དྲེགས་པ་དང་། སེམས་ཞུམ་པ་དང་། ང་རྒྱལ་དང་། མངོན་པའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་

པའི་ང་རྒྱལ་དང་། ཅུང་ཟད་སྙམ་པའི་ང་རྒྱལ་དང་། ལོག་པའི་ང་རྒྱལ་དང་། ཚུལ་འཆོས་པ་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་དང་། ཆོས་དང་མི་འཐུན་པ་དང་། རྙེད་པས་རྙེད་པ་སྒྲུབ་པ་དང་། ཚུལ་ཁྲིམས་ཀྱི་ཕུང་པོ་ཉམས་པ་
དང་། ཤེས་རབ་ཀྱི་ཕུང་པོ་ཉམས་པ་དང་། རྣམ་པར་གྲོལ་བའི་ཕུང་པོ་ཉམས་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཉམས་པ་དང་། སངས་རྒྱས་ལ་མ་དད་པ་དང་། ཆོས་ལ་མ་དད་པ་དང་། དགེ་འདུན་ལ་མ་དད་པ་དང་། ལས་ཀྱི་རྣམ་པར་སྨིན་པ་ལ་ཡིད་མི་ཆེས་པ་
དང་། ཚེ་འདི་གཙོ་བོར་བྱེད་པ་དང་། ཚེ་ཕྱི་མའི་ཆོས་ལ་གཅེས་པར་མི་བྱེད་པ་དང་། སོམ་ཉི་དང་། ཡིད་གཉིས་དང་། ཐེ་ཙོམ་དང་། ཕོ་ཐེག་ཆེ་བ་དང་། འཇིགས་སུ་རུང་བའི་རང་བཞིན་ཅན་ཡིན་ཏེ། ཤཱ་རིའི་བུ་གང་ཟག་དེ་དག་ནི་ཆོས་འདུལ་བ་འདི་ལ་ངན་སྐྱུགས་དང་འདྲ་བར་རིག་པར་
བྱའོ། །མི་གཙང་བའི་ལུས་ཀྱི་ལས་དང་ལྡན་པ་དང་། མི་གཙང་བའི་ངག་གི་ལས་དང་ལྡན་པ་དང་། མི་གཙང་བའི་ཡིད་ཀྱི་ལས་དང་ལྡན་པ་དང་། འཚོ་བ་མ་དག་པ་གང་ཡིན་པ་དེ་དག་ནི་ལུས་ཞིག་ནས་ཤི་བའི་འོག་ཏུ་སེམས་ཅན་དམྱལ་བར་ལྟུང་བར་འགྱུར་རོ། །དེ་དག་ནི་སངས་རྒྱས་
རྣམས་དང་། སངས་རྒྱས་ཀྱི་ཉན་ཐོས་རྣམས་དང་། དེ་བཞིན་དུ་གཞན་ཡང་དགེ་བ་དོན་དུ་གཉེར་བ་རྣམས་དང་། ཡོངས་སུ་མྱ་ངན་ལས་འདའ་བར་འདོད་པ་རྣམས་ཀྱིས་ཡོངས་སུ་སྤང་བའི་འོས་ཡིན་ནོ། །ཤཱ་རིའི་བུ་དཔེར་ན་ཙན་དན་དམར་པོ་དེ་ངན་སྐྱུགས་བླུགས་པའི་སྣོད་དེར་བཅུག་
ན། དེ་ཡང་མི་གཙང་བར་འགྱུར་ཞིང་སྨད་པར་འགྱུར་རོ། །ཤཱ་རིའི་བུ་དེ་བཞིན་དུ་ཁྱིམ་པའམ། རབ་ཏུ་བྱུང་བ་ཚུལ་ཁྲིམས་ཀྱི་ཕུང་པོ་མ་རལ་བ་དང་ལྡན་པ་གང་དག་འབྱུང་བར་འགྱུར་བ་དེ་དག་ཀྱང་སྐྱེས་བུ་དམ་པ་མ་ཡིན་པ། སྡིག་པའི་གྲོགས་པོ་དེ་ལྟ་བུ་དེ་དག་བསྟེན་ལ་བསྙེན་
བཀུར་དང་། བཀུར་སྟི་བྱས་ཏེ། ཚུལ་ཁྲིམས་ཀྱི་ཕུང་པོ་ཉམས་པ་དེ་དག་གི་རྗེས་སུ་བསླབས་ན། དེ་དག་ཀྱང་དེ་ཁོ་ནའི་རང་བཞིན་དུ་འགྱུར་རོ། །ཚུལ་ཁྲིམས་རལ་བ་དང་། སྡོམ་པ་རལ་བ་དང་། སྤྱོད་ལམ་རལ་བ་དང་། སྤྱོད་པ་རལ་བ་དེ་དག་ལུས་ཞིག་ནས་ཤི་བའི་འོག་ཏུ་

སེམས་ཅན་དམྱལ་བར་རབ་ཏུ་ལྟུང་བར་འགྱུར་རོ། །དེ་དག་སངས་རྒྱས་རྣམས་དང་། སངས་རྒྱས་ཀྱི་ཉན་ཐོས་རྣམས་དང་། དེ་བཞིན་དུ་གཞན་ཡང་དགེ་བ་དོན་དུ་གཉེར་བ་རྣམས་དང་། ཡོངས་སུ་མྱ་ངན་ལས་འདའ་བར་འདོད་པ་རྣམས་ཀྱིས་ཡོངས་སུ་སྤང་བར་བྱ་བའི་འོས་ཡིན་ནོ། །
ཤཱ་རིའི་བུ་དཔེར་ན་ཙན་དན་དམར་པོ་དེ་ངན་སྐྱུགས་ཀྱིས་སྦགས་པའི་སྣོད་དེར་བཅུག་ན་དེ་ཡང་བྱ་བ་དང་བསྒྲུབ་པ་ལ་མཐུ་ཡོད་པ་མ་ཡིན་ནོ། །ཤཱ་རིའི་བུ་ཅི་ནས་ཀྱང་ཙན་དན་དམར་པོ་དེ་སྐྱེས་བུ་མི་ཤེས་པ་ཞིག་གིས་ལག་པས་ཀུན་ཏུ་རེག་གམ་ལུས་ལ་བྱུགས་ན་འདི་ལྟར་ངན་སྐྱུགས་ཀྱི་རང་བཞིན་
ཁོ་ན་ཡིན་པར་བལྟ་བར་བྱ་སྟེ། འདི་ལྟ་སྟེ་དྲི་མི་ཞིམ་པ་ཡིན་པའི་ཕྱིར་རོ། །ཤཱ་རིའི་བུ་དེ་བཞིན་དུ་ཅི་ནས་ཀྱང་དགེ་སློང་སྡིག་ཅན་དྲང་སྲོང་གི་རྒྱལ་མཚན་གྱིས་གཡོགས་པ་དགེ་འདུན་གྱི་དབུས་ན་འདུག་ན། འདི་ལྟར་དགེ་སློང་སྡིག་ཅན་གྱི་གནས་སྐབས་ཀྱི་རྣམ་པ་དང་། ཚུལ་ཁྲིམས་
འཆལ་པའི་དགེ་སློང་གི་རང་བཞིན་དེ་ཡང་དེ་དང་འདྲ་བར་བལྟ་བར་བྱའོ། །དེ་ཚངས་པ་མཚུངས་པར་སྤྱོད་པ་རྣམས་ཀྱིས་མི་གཙང་བ་ཡིན་པར་རིག་ནས་སྤོང་བར་བྱེད་དོ། །དེ་དགེ་སློང་དེས་པ་རྣམས་ཀྱིས་སྤངས་པ་ན་ཐབ་ཁྲོལ་ཆེན་པོ་བྱེད་དེ། དེ་ནི་ངས་སེམས་ཅན་དམྱལ་བ་ཆེན་པོར་འགྲོ་བར་འགྱུར་
རོ་ཞེས་གསུང་ངོ་། །ཤཱ་རིའི་བུ་འདི་ནི་ཚུལ་ཁྲིམས་འཆལ་པའི་དགེ་སློང་གི་འཆལ་པའི་ཚུལ་ཁྲིམས་ཀྱི་སྐྱོན་དྲུག་པ་ཡིན་ཏེ། ངན་སོང་ཡོངས་སུ་རྫོགས་པར་བྱ་བའི་ཕྱིར་ཞུགས་པ་ཡིན་ནོ། །ཤཱ་རིའི་བུ་གཞན་ཡང་ཚུལ་ཁྲིམས་འཆལ་པའི་དགེ་སློང་གིས་དེ་བཞིན་གཤེགས་པས་གསུངས་
པའི་ཡང་དག་པའི་མདོ་སྡེ་འདི་ལྟ་བུ་འདི་དག་ཤེས་ནས་དགའ་བའམ་མགུ་བ་མི་འཐོབ་ཅིང་བདག་ཉིད་ལ་ལྷག་པར་ཡང་གནོད་པ་བྱེད་དེ། རང་གི་སྤྱོད་ལམ་ངན་པ་ལ་ཀུན་ཏུ་བལྟས་ནས་རང་ཉིད་ཡིད་གཉིས་ཟ་བར་འགྱུར་ཞིང་མདོ་སྡེ་འདི་ལྟ་བུ་འདི་དག་ནི་བདག་ཁོ་ནའི་ཆེད་དུ་གསུངས་ཀྱི་གཞན་ལ་
ནི་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་བདག་ཁོ་ནའི་སྐྱོན་ཀུན་ཏུ་སྣང་ངོ་སྙམ་མོ། །ཤཱ་རིའི་བུ་འདི་ནི་དགེ་སློང་ཚུལ་ཁྲིམས་རལ་བ་རྣམས་ཀྱི་མ་འདྲེས་པའི་ཆོས་ཡིན་ཏེ། དེས་དེ་ཐོས་ནས་ཐོག་མ་ཁོ་ནར་ཁྲོ་བ་སྐྱེད་པར་འགྱུར་རོ། །དེ་ཁྲོ་བའི་ཟིལ་གྱིས་ནོན་ནས་དགེ་སློང་ཆོས་སྨྲ་བ་ལ་

མ་དད་པ་སྐྱེད་པར་བྱེད་དེ། དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ལ་འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་སྨོད་ཅིང་སྐྱེ་བོ་མང་པོ་ལ་འདུ་ཤེས་སུ་བྱེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་ཚུལ་ཁྲིམས་འཆལ་པའི་དགེ་སློང་ནི་
ཚུལ་བཞིན་མ་ཡིན་པ་དང་ལྡན་པའི་ཕྱིར་རོ། །ཤཱ་རིའི་བུ་ཡང་ཚུལ་བཞིན་ལ་སྦྱོར་བའི་དགེ་སློང་རྣམས་ནི་སྟོན་པའི་གསུང་ལ་སྨོད་པར་མི་བྱེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་ཚུལ་ཁྲིམས་འཆལ་པའི་ལས་འདི་ནི་བྱིས་པའི་ལས་ཡིན་པའི་ཕྱིར་རོ། །རིགས་པ་མེད་པའི་ལས་འདི་ནི་འདི་ལྟ་སྟེ།
དམ་པའི་ཆོས་ལ་སྨོད་པ་ཡིན་པའི་ཕྱིར་རོ། །དེ་བདག་ཉིད་རྨ་དང་བཅས་པ་དང་། ཟུག་རྔུ་དང་བཅས་པར་ཤེས་ནས་ཟུག་རྔུ་རྣམས་གླེངས། གནད་རྣམས་ལེགས་པར་བསྟན། ལྟ་བར་གྱུར་པ་རྣམས་བསྐུལ་བ་ན་མངོན་དུ་ཁྲོ་བར་བྱེད། འཁྲུག་པར་བྱེད། གནོད་སེམས་སྐྱེད། སླར་
གནོད་པར་བྱེད། ཡོངས་སུ་ཡི་ཆད་པར་བྱེད། ཞུམ་ཞུམ་པོར་གྱུར་ཅིང་ཁྲོ་བ་དང་། སྐྱོན་རབ་ཏུ་སྟོན་པར་བྱེད་དོ། །དེ་སངས་རྒྱས་ལ་མི་སྙན་པ་རྗོད། ཆོས་ལ་སྨོད། དགེ་འདུན་ལ་སྐུར་པ་འདེབས་པར་བྱེད་དོ། །ཤཱ་རིའི་བུ་ཟབ་མོ་དམིགས་སུ་མེད་པ་དོན་དམ་པ་སྟོང་པ་སངས་རྒྱས་ཀྱི་བྱང་
ཆུབ་ལ་མ་མོས་པའི་དགེ་སློང་ཇི་སྙེད་པ་དག་གིས་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ཐོས་ན། འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་སྨོད་པར་བྱེད་ཅིང་། དེ་ལྟར་སྐྱེ་བོ་ལ་འདུ་ཤེས་སུ་བྱེད་པར་འགྱུར་རོ། །ཤཱ་རིའི་བུ་འདི་ནི་དེ་བཞིན་གཤེགས་པས་ཆོས་
ལ་སྨོད་པ་ཡིན་ནོ་ཞེས་གསུངས་ཏེ། སྨོད་པ་གང་ཡིན་པ་ནི་དགེ་སྦྱོང་མ་ཡིན། ཤཱཀྱའི་སྲས་མ་ཡིན་ནོ། །སྐྱེས་བུ་གཏི་མུག་ཅན་དེ་ནི་སྲིད་པ་བྱེ་བ་ཕྲག་བརྒྱ་སྟོང་རྣམས་སུ་ཆད་པ་ཆེན་པོ་འཐོབ་ཅིང་། གནོད་པ་བྱེད་པར་འགྱུར་བས་ཉམས་པའི་འོས་ཡིན་ནོ། །ཤཱ་རིའི་བུ་ཡང་དེ་ལྟ་བུའི་དགེ་
སློང་རྣམས་ལ་ནི་གལ་ཏེ་སངས་རྒྱས་སྟོང་ངམ། སངས་རྒྱས་བྱེ་བ་བརྒྱ་ཕྲག་སྟོང་གིས་ཆོ་འཕྲུལ་རྣམ་པ་གསུམ་གྱི་ཆོས་བསྟན་ཀྱང་། དེ་དག་ཁོ་ན་ཆོས་ཀུན་ཤེས་པར་མི་འགྱུར་ཞིང་འབྲས་བུ་ཐོབ་པར་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ་མ་ཡིན་པ་དེ་དག་གིས་

འཕགས་པའི་ལམ་རྣམས་བགགས་པའི་ཕྱིར་ཏེ། དད་པ་དང་བྲལ་བ། ཟས་དང་བགོ་བ་ལྷུར་ལེན་པ། འཇིག་རྟེན་གྱི་ཟང་ཟིང་ལ་ཆུམས་པ་རྣམས་ནི་སེམས་ཅན་དམྱལ་བ་ཆེན་པོར་འདོང་བར་འགྱུར་རོ་ཞེས་གསུང་ངོ་། །ཤཱ་རིའི་བུ་ཡང་ཁྱོད་ལ་གོ་བར་བྱའོ། །ཁོང་དུ་ཆུད་པར་བྱའོ། །འདི་
ལྟ་བུའི་ཆོས་དཀོན་མཆོག་ལ་སྨོད་པ་ནི་བདེ་འགྲོ་ལ་དགའ་བ་མ་ཡིན་གྱི། འདི་ལྟར་ངན་འགྲོ་ལ་རབ་ཏུ་དགའ་བ་དང་། དམུས་ལོང་ལ་རབ་ཏུ་དགའ་བ་ཡིན་ནོ། །ཤཱ་རིའི་བུ་མངོན་པའི་ང་རྒྱལ་ཅན་དང་། ཚུལ་ཁྲིམས་འཆལ་པ་དང་། མ་ངེས་པའི་ཆོས་སྟོན་པའི་དགེ་སློང་རྣམས་ལས།
དགེ་སློང་ཕལ་ཆེར་གྱིས་ངའི་བསྟན་པ་འདི་ནུབ་པར་འགྱུར་ཏེ། དེ་དག་ནི་འཚོ་བས་འཇིགས་པས་འཇིག་རྟེན་གྱི་ཟང་ཟིང་ལ་ཆུམས་པ་ཡིན་ནོ། །ཤཱ་རིའི་བུ་འདི་ལྟ་བུའི་ཆོས་དཀོན་མཆོག་ལ་དེ་ལྟར་སྨོད་པ་ཆེན་པོ་བྱེད་པ་ནི་འོས་པ་མ་ཡིན་ནོ། །གང་ལ་སངས་རྒྱས་བཅོམ་ལྡན་འདས་ཐམས་ཅད་ཀྱིས་
འདི་ལྟར་གུས་པ་དང་བཅས་པ། འདི་ལྟར་ཞེ་ས་དང་བཅས་པ། རང་སངས་རྒྱས་ཐམས་ཅད་དང་། དགྲ་བཅོམ་པ་ཐམས་ཅད་ཀྱིས་འདི་ལྟར་གུས་པ་དང་བཅས་པ། འདི་ལྟར་ཞེ་ས་དང་བཅས་པ་མངོན་པའི་ང་རྒྱལ་ཅན་གྱི་དགེ་སློང་རྣམས་དང་། ཚུལ་ཁྲིམས་འཆལ་པ་དང་། མ་ངེས་
པའི་ཆོས་སྟོན་པའི་དགེ་སློང་རྣམས་ཀྱིས་ཤིན་ཏུ་ཟིལ་གྱིས་གནོན་པ་དང་ཤིན་ཏུ་སྤོང་བར་འགྱུར་རོ། །དེ་དག་ནི་བརྐམ་ཆགས་དང་སྲེད་པས་ཟིལ་གྱིས་གནོན་པ་དང་། འཚོ་བའི་ལམ་དུ་བྱིང་བ་དང་། ཟང་ཟིང་ལྷུར་ལེན་པ་དང་། ཕྲག་དོག་དང་སེར་སྣའི་ཀུན་ཏུ་སྦྱོར་བ་དང་ལྡན་པས་ཕན་ཚུན་དུ་
རྩོད་པ་འབྱུང་བར་འགྱུར་རོ། །བྱེ་ནས་མི་འཐུན་པས་ཕན་ཚུན་དུ་གུས་པ་མེད་པ་དང་། འཁུ་བ་དང་ཕྲག་དོག་གི་ལམ་གྱིས་འཁུ་བ་དང་། སློབ་དཔོན་ལ་ཁྱད་དུ་གསོད་པ་དང་། སྤྲེའུ་དང་འདྲ་བར་སྤྱོད་པ་དང་། གདོལ་པ་དང་། ལུས་མ་བསྒོམས་པ་དང་། སྡིག་པའི་ལས་ཀྱི་མཐའ་འཆབ་
པ་དག་དགེ་སྦྱོང་གི་ཆོས་རྣམས་ལས་ཤིན་ཏུ་ཉམས་པ་ཡིན་ནོ། །ཤཱ་རིའི་བུ་དེ་ལ་བདུད་སྡིག་ཅན་གྱིས་སྐྱེས་བུ་དམ་པ་མ་ཡིན་པ་སྡིག་པ་འདོད་པ། འདོད་ཆེན་ཆེ་བ། ཟང་ཟིང་ལྷུར་ལེན་པ། འཚོ་བའི་ལམ་དུ་བྱིང་བ་དེ་ལྟ་བུ་དེ་དག་གི་བསམ་པ་རིག་ནས། ཇི་ལྟར་ངའི་ཆོས་འདུལ་བ་འདི་

རྣམ་པ་ལྔར་འགྱུར་བ་དེ་ལྟ་བུའི་གནས་སྐབས་དག་བྱེད་པར་འགྱུར་རོ། །དེ་དག་གིས་རྣམ་པ་ལྔར་ཕྱེ་ནས་རྩོད་པར་འགྱུར་ཞིང་དེ་དག་ཕན་ཚུན་དུ་ཁྱིམ་པ་དང་རབ་ཏུ་བྱུང་བ་རྣམས་ལ་མི་སྙན་པ་སྒྲོགས་པར་འགྱུར་རོ། །འདི་ལྟ་སྟེ་དེ་ལྟར་གཅིག་ལ་གཅིག་ཁ་ཟེར་བ་དང་།
གཅིག་ལ་གཅིག་གུས་པ་མེད་པ་དང་། ཞེ་ས་མེད་པ་དང་། སྟོན་པའི་བཀའ་བཞིན་མི་བྱེད་པ་དེའི་ཚེ། དེ་དག་གཅིག་ལ་གཅིག་འདོམས་པར་མི་འགྱུར་རྗེས་སུ་སྟོན་པར་མི་འགྱུར་ཞིང་། གང་དག་བྱ་བ་མ་ཡིན་པའི་གནས་བྱེད་པ་དག་མཐོང་ན་དེ་ལ་ཅུང་ཟད་ཀྱང་སྒོ་བར་མི་བྱེད་དེ། དེ་དག་སྐྲག་
ནས་གནས་གཏོང་བའམ་ཡུལ་གཏོང་བར་བྱེད་ཀྱི། ཆོས་དང་འཐུན་པས་གདམས་ངག་དབོག་པའམ་རྗེས་སུ་བསྟན་པར་མི་ནུས་སོ། །དེ་དག་ཕྱོགས་སུ་ལྟུང་ནས་གཅིག་ལ་གཅིག་བྱིས་པའི་ངའོ་སྙམ་པའི་ང་རྒྱལ་འབྱིན་པར་འགྱུར་ཞིང་ཕན་ཚུན་ནས་རང་གི་སྡེ་བའི་ཕྱོགས་སྤོང་བར་འགྱུར་རོ། །
ཤཱ་རིའི་བུ་དེ་དག་ནི་མཐོང་ན་ཡང་ཕན་ཚུན་ཏུ་དགའ་བར་མི་འགྱུར་ན་གདམས་ངག་དང་རྗེས་སུ་བསྟན་པ་ལེན་པ་ལྟ་ཅི་སྨོས་ཏེ་དེ་ནི་གནས་ཡོད་པ་མ་ཡིན་ནོ། །ཤཱ་རིའི་བུ་དེ་བཞིན་གཤེགས་པ་བཞུགས་ན་སངས་རྒྱས་དཀོན་མཆོག་གཅིག །ཆོས་དཀོན་མཆོག་གཅིག །དགེ་འདུན་
དཀོན་མཆོག་གཅིག་ཡིན་ན། ཡོངས་སུ་མྱ་ངན་ལས་འདས་ནས་ནི་བསྟན་པ་ཡང་རྣམ་པ་ལྔར་འགྱུར་རོ། །ཤཱ་རིའི་བུ་བདུད་སྡིག་ཅན་གྱིས་འདུན་པ་བྱིན་པའི་སྐྱེས་བུ་གཏི་མུག་ལྷས་བྱིན་དགེ་འདུན་འབྱེད་པ་ལ་མངོན་པར་བརྩོན་པར་འགྱུར་ཏེ། དེ་ལ་དེ་བཞིན་གཤེགས་པ་ཐམས་ཅད་
མཁྱེན་པ། །ཐམས་ཅད་གཟིགས་པ་མངོན་སུམ་དུ་གྱུར་པ་ན་ནི་བདུད་སྡིག་ཅན་གྱིས་རྨོངས་པར་བྱ་མི་ནུས་སོ། །ཤཱ་རིའི་བུ་གང་ཡང་བསྟན་པ་འདི་ལ་བདུད་སྡིག་ཅན་དགེ་སྦྱོང་གི་གཟུགས་སུ་མངོན་པར་སྤྲུལ་ནས་ལོག་པར་འཛིན་པ་རྣམ་པ་དུ་མ་རབ་ཏུ་སྟོན་ཅིང་། དེ་ལ་སྐྱེ་བོ་མང་པོ་རབ་ཏུ་འགོད་
པར་འགྱུར་བའི་དུས་དེ་དང་དེ་དག་འབྱུང་བར་འགྱུར་རོ། །དེ་ལོག་པར་འཛིན་པ་འདི་ལྟ་བུ་འདི་དག་རབ་ཏུ་སྟོན་པར་འགྱུར་ཏེ། ཡིད་ཀྱི་ཁམས་ཀྱི་གཞི་ལྔ་པོ་འདི་ལྟ་སྟེ། ཆ་དང་འཐུན་པའི་གཞི་དང་། ཟད་པའི་ཆ་དང་འཐུན་པའི་གཞི་དང་། ཐམས་ཅད་ཡོད་པར་སྨྲ་བའི་གཞི་དང་། གང་ཟག་

གི་གཞི་དང་། དམིགས་པའི་གཞིའོ། །ཤཱ་རིའི་བུ་ལོག་པར་འཛིན་པ་འདི་ལྟ་བུ་འདི་དག་རབ་ཏུ་སྟོན་པར་འགྱུར་ཏེ། དེ་ནི་སངས་རྒྱས་རྣམས་དང་། ཉན་ཐོས་རྣམས་ཀྱིས་ཀྱང་མ་བཤད་དོ། །དེའི་ཚེ་བདུད་སྡིག་ཅན་གྱིས་དེ་དག་མངོན་པར་ཟིལ་གྱིས་མནན། རྨོངས་པར་བྱས། རྨུགས་
པར་བྱས། ལྷག་པར་ཟིལ་གྱིས་མནན། མཐུ་ཅན་དུ་བྱས། མངོན་པར་ཞེན་པར་བྱས་ནས། རང་རང་གི་ལྟ་བ་མཆོག་ཏུ་འཛིན་ཏེ། འདི་ཁོ་ན་བདེན་གྱི་གཞན་གྱི་འདི་ཁོ་ན་ནི་རྨོངས་པ་ཡིན་ནོ་ཞེས་གླེང་བར་བྱེད་དོ། །ཤཱ་རིའི་བུ་འདི་ལྟར་དེ་བཞིན་གཤེགས་པས་མ་འོངས་པའི་ཆོས་ཀྱི་
བར་ཆད་ལ་ཀུན་ཏུ་གཟིགས་ནས། སྔ་ནས་བདུད་སྡིག་ཅན་གྱི་ཕྱོགས་བཅད་པ་དང་། གཞོམ་པའི་ཕྱིར་འདི་ལྟ་བུའི་མདོ་སྡེ་འདི་ཡང་དག་པར་སྟོན་ཏོ། །ཤཱ་རིའི་བུ་དེའི་ཚེ་མངོན་པའི་ང་རྒྱལ་ཅན་གྱིས་འཛམ་བུའི་གླིང་འདི་རབ་ཏུ་གང་བར་འགྱུར་རོ། །དེ་དག་གནས་སྐབས་ཙམ་གྱིས་མ་ཐོབ་པ་
ཐོབ་བོ་སྙམ་པའི་འདུ་ཤེས་ཅན་དུ་འགྱུར་ཏེ། དེ་དག་འཆི་བའི་དུས་ཀྱི་ཚེ་ཕལ་ཆེར་ངན་འགྲོ་རྣམས་སུ་རབ་ཏུ་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་སྐྱེས་བུ་བླུན་པོ་དེ་དག་གིས་བདག་ནི་ཡུན་རིང་མོ་ཞིག་ནས་འདོད་ཆགས་དང་བྲལ་བ་ཡིན་ནོ་ཞེས་གཞན་ལ་ཡང་དེ་ལྟ་བུའི་
འདུ་ཤེས་སུ་བྱེད་ཅིང་དེ་དག་དགྲ་བཅོམ་པའི་བསོད་སྙོམས་ལ་ལོངས་སྤྱོད་པས་ལྷ་དང་བཅས་པའི་འཇིག་རྟེན་གྱི་ཆོམ་རྐུན་པ་ཡིན་པའི་ཕྱིར་རོ། །ཤཱ་རིའི་བུ་སྐྱེས་བུ་དམ་པ་མ་ཡིན་པ་དེ་དག་གིས་དེ་བཞིན་གཤེགས་པས་གསུངས་པའི་མདོ་སྡེ་དོན་དམ་པའི་གཏམ་གསུངས་པ་ཐོས་ནས་གཡང་
སའི་འདུ་ཤེས་སུ་འགྱུར་ཞིང་སྐྲག་པ་ཆེན་པོ་སྐྱེ་བར་འགྱུར་རོ། །ཤཱ་རིའི་བུ་བཟོད་པ་མཆོག་ལ་མོས་པར་མི་འགྱུར་བ་གང་ཡིན་པ་དེ་དག་ཕན་ཚུན་ནས་གཅིག་ཏུ་འདུས་ཏེ། སངས་རྒྱས་ཀྱི་བྱང་ཆུབ་ལ་སྨོད་པར་འགྱུར་ཞིང་། ཤཱ་རིའི་བུ་དེའི་ཚེ་མངོན་པའི་ང་རྒྱལ་ཅན་གྱི་ཕྱོགས་མང་བར་
འགྱུར་རོ། །དེའི་ཚེ་བདུད་སྡིག་ཅན་གྱིས་ཁྱིམ་པ་དང་རབ་ཏུ་བྱུང་བ་རྣམས་ཀུན་ནས་སྐུལ་བར་འགྱུར་ཞིང་། གང་ཡང་ཆོས་མ་ཡིན་པའི་ཕྱོགས་ཡོངས་སུ་འཛིན་པར་འགྱུར་རོ། །དེའི་ཚེ་ཆོས་སྨྲ་བའི་ཕྱོགས་ནི་ཉུང་ཞིང་ཚར་གཅད་པར་འགྱུར་རོ། །ཤཱ་རིའི་བུ་དེའི་ཚེ་དགེ་སློང་གསར་བུ་རྣམས་ལ་

ཤེས་རབ་རྣོན་པོ་ཕལ་ཆེར་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་གང་དག་བསྟན་པ་འདི་ལ་རབ་ཏུ་བྱུང་ནས་ཀུན་ནས་ཉོན་མོངས་པའི་སྤྱོད་པ་ལ་སྤྱད་པ་ཡིན་མོད་ཀྱི། དེ་དག་ལས་མང་དུ་མི་རྣམས་སུ་སླར་སྐྱེ་བ་བླངས་ཤིང་རབ་ཏུ་འབྱུང་བའི་ཕྱིར།
དེ་དག་མྱུར་བ་ཁོ་ནར་མངོན་པར་བྱུང་བ་དག་ཡིན་པའི་ཕྱིར་རོ། །ཤཱ་རིའི་བུ་དགེ་སློང་དེ་དག་ནི་སངས་རྒྱས་ཀྱི་གསུང་དོན་དམ་པར་གང་ཡིན་ཞེས་ཡོངས་སུ་འདྲི་བའི་རང་བཞིན་ཅན་དུ་འགྱུར་རོ། །ཤཱ་རིའི་བུ་དེ་ལ་མངོན་པའི་ང་རྒྱལ་ཅན་བདུད་ཀྱི་ཕྱོགས་ལ་ཞེན་པ། འཚོ་བའི་ཡོ་བྱད་ལྷུར་ལེན་པ། སོ་
སོའི་སྐྱེ་བོ་བྱིས་པ་རྣམས་ཀྱིས་དགྲ་བཅོམ་པར་བཀུར་བ་དག་འབྱུང་བར་འགྱུར་ཏེ། དེ་དག་དེ་རྣམས་ཀྱི་དྲུང་དུ་དོང་ནས་འདི་སྐད་ཅེས་བཙུན་པ་དག་ཆོས་འདུལ་བ་འདི་ལ་རབ་ཏུ་བྱུང་ནས་ཅི་ཞིག་བསྒོམ་པར་བྱ། སངས་རྒྱས་ཀྱི་གསུང་ནི་དོན་དམ་པར་གང་ཡིན་ཞེས་འདྲི་བར་བྱེད་དོ། །ཤཱ་རིའི་
བུ་དེ་ནས་མངོན་པའི་ང་རྒྱལ་ཅན་གྱི་དགེ་སློང་གནས་བརྟན་རྒན་པོ་རྨོངས་པ་འཁོགས་པ་ལམ་གོལ་བར་གཞོལ་བདག་ལ་དགེ་སློང་གསར་བུ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་དེ་དག་གིས་དྲིས་པ་ན། འདི་སྐད་ཅེས་ལུས་ཀྱིས་ལེགས་པར་སྤྱད་པ་དང་། ངག་གིས་ལེགས་པར་སྤྱད་
པ་དང་། ཡིད་ཀྱིས་ལེགས་པར་སྤྱད་པ་དང་། ཚུལ་ཁྲིམས་ཀྱི་སྡོམ་པ་ལ་གནས་པ་དང་། ཀློག་པ་དང་། འདོན་པ་དང་། མང་དུ་ཐོས་པ་ལ་མངོན་པར་བརྩོན་པ་དང་། སངས་རྒྱས་ལ་ཡིད་དང་བ་སྟེ། འདི་ནི་རྗེས་སུ་འཐུན་པའི་བཟོད་པ་ཡིན་ནོ། །དེ་ལྟ་མོད་ཀྱི་སེམས་ལ་དམིགས་པ་ཉེ་བར་
སྦྱར་ཏེ། ནམ་ཞིག་ན་སྡུག་བསྔལ་གྱི་ཕུང་པོ་ཆེན་པོ་འདི་སྤངས་པར་འགྱུར་ཞིང་མྱ་ངན་ལས་འདས་པ་ལ་དམིགས་པར་འགྱུར་ཞེས་ཡིད་ལ་བྱེད་པ་བསྐྱེད་པར་བྱའོ། །ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་ལ་ཡིད་འབྱུང་བར་བྱེད་པའམ། དབེན་པར་སོང་སྟེ། ཡང་
ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་ལ་མི་རྟག་པ་ལ་སོགས་པར་ཡིད་ལ་བྱེད་པ་དང་། ཡང་ལུས་ལ་མི་གཙང་བ་རྣམ་པ་དུ་མའི་འདུ་ཤེས་ཉེ་བར་སྒྲུབ་པར་བྱེད་དེ། དེ་དེ་ལྟར་ཡིད་ལ་བྱེད་པ་ན་རྒྱུན་དུ་ཞུགས་པའི་འབྲས་བུ་འཐོབ་པར་འགྱུར་རོ། །ཕུང་པོ་དེ་ཉིད་

སྡུག་བསྔལ་བ་ཉིད་དང་། ཕུང་པོ་སྟོང་པ་ཉིད་དང་། ཕུང་པོ་ཉམ་ཆུང་བ་ཉིད་དུ་ཡིད་ལ་བྱེད་པ་ན་ལན་ཅིག་ཕྱིར་འོང་བའི་འབྲས་བུ་འཐོབ་པར་འགྱུར་རོ། །དེ་བཞིན་དུ་ཕྱིར་མི་འོང་བའི་འབྲས་བུ་དང་། དེ་བཞིན་དུ་དགྲ་བཅོམ་པ་ཉིད་འཐོབ་པར་འགྱུར་རོ། །འདི་ནི་སངས་རྒྱས་ཀྱི་གསུང་དོན་
དམ་པ་ཡིན་ཏེ། འདི་ལྟ་སྟེ་དགྲ་བཅོམ་པ་ཉིད་ཐོབ་པ་ཡིན་ནོ་ཞེས་སྨྲ་བར་བྱེད་དོ། །ཤཱ་རིའི་བུ་དེ་ལ་དགེ་སློང་ཤེས་རབ་རྣོན་པོ་འབྱུང་བར་འགྱུར་བ་གང་ཡིན་པ་དེ་དག་གིས་འདི་སྐད་ཅེས། བདག་ཅག་ཀྱང་སངས་རྒྱས་ཀྱི་གསུང་དོན་དམ་པ་ནི་འདི་ཡིན་ཏེ། འདི་ལྟ་སྟེ་དགྲ་བཅོམ་པ་ཉིད་ཐོབ་པ་
ཡིན་པར་དེ་ལྟར་ནི་ཤེས་ན། ཇི་ག་ཕུང་པོ་ལྔ་རྣམས་ཡིད་ལ་བྱེད་པས་འཐོབ་པར་འགྱུར་རམ། འོན་ཏེ་ཡིད་ལ་བྱེད་པ་མེད་པས་འགྱུར་ཞེས་དྲིས་པ་དང་། དེ་དག་འདི་སྐད་ཅེས་འདི་ལྟར་ཕུང་པོ་ལྔ་རྣམས་ཡིད་ལ་བྱེད་པས་འཐོབ་པར་འགྱུར་གྱི། ཡིད་ལ་བྱེད་པ་མེད་པས་ནི་མ་ཡིན་
ནོ་ཞེས་སྨྲས་སོ། །དེ་དག་གིས་ཡང་འདི་སྐད་ཅེས་ཇི་ག་ཕུང་པོ་ཡང་གཞན་ཡིན་ལ། ཡིད་ལ་བྱེད་པ་ཡང་གཞན་ཡིན་ནམ་ཞེས་དྲིས་པ་དང་། དེ་དག་གིས་འདི་སྐད་ཅེས་ཕུང་པོ་ཡང་གཞན་ཡིན་ལ་ཡིད་ལ་བྱེད་པ་ཡང་གཞན་ཡིན་ནོ་ཞེས་སྨྲས་སོ། །དེ་དག་གིས་འདི་སྐད་ཅེས་གལ་ཏེ་ཕུང་
པོ་ཡང་གཞན་ཡིན་ལ། ཡིད་ལ་བྱེད་པ་ཡང་གཞན་ཡིན་ཞིང་དེས་ལམ་བསྒོམས་ན་མྱ་ངན་ལས་འདའ་བར་འགྱུར་བའི་ཕུང་པོ་གང་ཡིན་པ་དེ་དག་དང་། ཡིད་ལ་བྱེད་པ་གཞན་གང་ཡིན་པ་དེ་འགའ་ཞིག་ཀྱང་ཡོད་པར་འགྱུར་རམ་ཞེས་དྲིས་པ་དང་། དེ་དག་གིས་འདི་སྐད་ཅེས་ཕུང་པོ་
གང་ཡིན་པ་དེ་དག་དང་། ཡིད་ལ་བྱེད་པ་གང་ཡིན་པ་དེ་ཡང་དེ་ལྟར་མ་གྱུར་ན། ཡོངས་སུ་མྱ་ངན་ལས་འདའ་བར་མི་འགྱུར་བ་ཞིག་ན། གང་གི་ཕྱིར་ཕུང་པོ་གང་ཡིན་པ་དེ་དག་དང་། ཡིད་ལ་བྱེད་པ་གང་ཡིན་པ་དེ་ཡང་ཡོད་པས། དེས་ལམ་བསྒོམས་ནས་ཡོངས་སུ་མྱ་ངན་ལས་
འདའ་བར་འགྱུར་རོ་ཞེས་སྨྲའོ། །ཤཱ་རིའི་བུ་འདི་ལྟར་དེའི་ཚེ་དགེ་སློང་དེ་དག་ཕལ་ཆེར་དེ་ལྟ་བུའི་བཟོད་པ་ཅན་དུ་འགྱུར་རོ། །ཤཱ་རིའི་བུ་དེ་ན་ཡང་སངས་རྒྱས་ཀྱི་གསུང་དོན་དམ་པར་ཉན་པར་འདུས་པའི་ལྷ་གང་ཡིན་པ་དེ་དག་གིས་དེ་ལྟ་བུའི་བཤད་པ་ཐོས་ནས། གཡང་ས་ཆེན་

པོར་རབ་ཏུ་ལྟུང་བར་འགྱུར་རོ་ཞེས་སྐྲག་པ་ཆེན་པོ་སྐྱེ་བར་འགྱུར་ཞིང་འདི་སྐད་ཅེས། ཀྱེ་མའོ་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ནི་མྱུར་དུ་ཞི་བ་དང་། མྱུར་དུ་ནུབ་པའི་བར་དུ་འགྱུར་རོ་ཞེས་སྨྲའོ། །ཤཱ་རིའི་བུ་དེ་ལ་དགེ་སློང་སྔོན་གྱི་རྒྱལ་བ་ལ་ལྷག་པར་བྱ་བ་
བྱས་པ། དགེ་བའི་རྩ་བ་ཉེ་བར་བརྟན་པ། དགེ་བའི་རྩ་བ་འབར་བར་བྱས་པ་གང་ཡིན་པ་དེ་དག་ནི་སྐྱེས་བུ་གཏི་མུག་ཕུང་པོའི་འདུ་ཤེས་དང་། གང་ཟག་གི་འདུ་ཤེས་ཅན་གྱི་གནས་བརྟན་རྒན་པོ་རྨོངས་པ་འཁོགས་པ། ལམ་གོལ་བ་ལ་ཞུགས་པ། མངོན་པའི་ང་རྒྱལ་དང་།
ལོག་པའི་ལྟ་བ་ཅན་དེ་དག་གིས་སྨྲས་པ་དེ་ལ་མངོན་པར་བསྟོད་པར་མི་བྱེད་ཅིང་སྟན་ལས་ལངས་ནས་འདོང་བར་འགྱུར་རོ། །ཤཱ་རིའི་བུ་དེ་ལ་ལྷའི་ཚོགས་མང་པོ་དག་ཡིད་ལྷག་པར་དགའ་ནས་ཕྱོགས་བཞིར་ད་དུང་བཅོམ་ལྡན་འདས་ཤཱཀྱ་ཐུབ་པའི་ཉན་ཐོས་རྣམས་གནས་པ་ལྟ་ཅི་ཞིག་
ཅེས་དབྱངས་སུ་སྒྲོགས་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་རིགས་ཀྱི་བུ་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་པའི་ཕྱིར་རོ། །དེ་དག་འདི་ལྟ་བུའི་ཡོངས་སུ་མ་དག་པའི་བཟོད་པ་ལ་དགའ་བར་མི་བྱེད་དེ། འདི་ལྟ་སྟེ་གང་ཟག་ཏུ་ལྟ་བ་མ་ཡིན་ནོ། །འདི་ལྟར་
ལྷ་མང་པོ་འདུས་པ་དེས་དེ་དག་གི་བསམ་པ་རིག་ནས་དགའ་བ་དང་ཡིད་བདེ་བ་སྐྱེས་ཏེ། ལྷག་པར་ཡིད་དགའ་ནས་ཆེད་དུ་བརྗོད་པ་ཆེན་པོ་ཆེད་དུ་བརྗོད་པར་འགྱུར་རོ། །ཤཱ་རིའི་བུ་དགེ་སློང་ཡོངས་སུ་འདྲི་བའི་རང་བཞིན་ཅན་སངས་རྒྱས་ཀྱི་སྲས་དེ་དག་ནི་དམིགས་སུ་མེད་པའི་བཟོད་པ་ལ་དགའ་
བར་འགྱུར་ཏེ། དེ་དག་དེ་ན་ལྷན་ཅིག་དེ་ལྟ་བུ་སྟོན་པར་འགྱུར་རོ། །ཤཱ་རིའི་བུ་དེའི་ཚེ་འདི་ལྟར་སངས་རྒྱས་ཀྱི་ཉན་ཐོས་རྣམས་ཚོགས་ཤིང་སྤྱོད་པ་ལྷག་པར་ཆགས་པ་རྣམས་ཀྱིས་ཚར་གཅད་པར་འགྱུར་རོ། །དེ་ཅིའི་ཕྱིར་ཞེ་ན། ཅི་ནས་ཀྱང་ཤིན་ཏུ་ཟིལ་གྱིས་མནན་པར་བྱ་བའི་ཕྱིར་རོ། །
ཤཱ་རིའི་བུ་འདི་ལྟར་དེའི་ཚེ་ངའི་སྲས་ངའི་ཉན་ཐོས་རྣམས་ཀྱི་ཡབ་ཀྱི་གནས། ཡབ་ཀྱི་སྤྱོད་ཡུལ། ཡབ་ཀྱི་རིགས་རྒྱུད་ལ་དགའ་བའི་ཚིག་ཙམ་ཡང་སྨྲ་བར་མི་འགྱུར་ན། གཙུག་ལག་ཁང་དུ་གནས་པ་ལྟ་ཅི་སྨོས། བཀུར་སྟི་བྱ་བ་ལྟ་ཅི་སྨོས་ཏེ། དེ་ནི་གནས་ཡོད་པ་མ་ཡིན་ནོ། །

ཤཱ་རིའི་བུ་ལྟོས་ཤིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་སྲས་ཤིན་ཏུ་དུལ་བ་ཤིན་ཏུ་བྱང་བ་དམིགས་སུ་མེད་པའི་བཟོད་པ་ཅན་གང་ཡིན་པ་དེ་དག་དེའི་ཚེ་ཤིན་ཏུ་ཟིལ་གྱིས་གནོན་པ་དང་། ཤིན་ཏུ་སྤངས་པར་གྱུར་པ་དེའི་ཚེ་དེ་བཞིན་གཤེགས་པ་ཇི་སྙེད་ཅིག་ཐིབས་
ཀྱིས་མནན་པར་འགྱུར། གང་ཡང་དེས་ངའི་སྲས་རྣམས་ཡབ་ཀྱི་སྤྱོད་ཡུལ་གང་ཡིན་པས་བདེ་བ་ལ་རེག་པར་གནས་པར་འགྱུར་བར་བྱ་བའི་ཕྱིར་དེ་དག་གི་དོན་དུ་བསྐལ་པ་གྲངས་མེད་པ་ནས་བཟུང་སྟེ། གཡུལ་ཆེན་པོ་བཅོམ་ནས་ཆོས་ཀྱི་རྒྱལ་སྲིད་ཀྱིས་བསྐྱངས་ན། ཤཱ་རིའི་བུ་འདི་ལྟར་
གསལ་ཞིང་རྒྱ་ཆེ་བའི་ཆོས་འདུལ་བ་འདི་ལ་ཆོམ་རྐུན་པ་ཆེན་པོའི་དགེ་འདུན་དེ་དག་གིས་གཡག་ཆེན་པོ་ལྟ་བུའི་དགེ་འདུན་ཕྱེ་བར་འགྱུར་རོ། །ཤཱ་རིའི་བུ་འདི་ལྟར་ངས་ཆོས་དང་འཐུན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། དགེ་སྦྱོང་
ངམ། བྲམ་ཟེའམ། ལྷའམ་བདུད་དམ། ཚངས་པ་སུས་ཀྱང་འཇིག་རྟེན་དུ་ཆོས་དང་འཐུན་པས་མ་བསྐོར་བའི་བླ་ན་མེད་པའི་ཆོས་ཀྱི་འཁོར་ལོ་ཆོས་དང་འཐུན་པས་བསྐོར་གྱི། ཆོས་དང་མི་འཐུན་པས་མ་ཡིན་པའི་གནས་འདི་ལ་ལྷ་དང་བཅས་པའི་འཇིག་རྟེན་མངོན་སུམ་དང་
དབང་དུ་གྱུར་པ་ཡིན་ནོ། །ཤཱ་རིའི་བུ་དེ་ལ་འདི་ལྟ་བུའི་གཏན་ཚིགས་འདི་མངོན་སུམ་དུ་ཡོད་བཞིན་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡིད་ལ་བྱེད་པ་ན། ཆོས་དང་འཐུན་པས་དབང་པོ་དྲིས་ན་ཡང་
ལན་ལྡོན་པར་མི་ནུས་ཤིང་དེའི་ཚེ་ངའི་སྲས་རྣམས་ལ་ཡང་མི་འཇིགས་པ་སྦྱིན་པར་མི་བྱེད་དོ། །ཤཱ་རིའི་བུ་དཔེར་ན་མི་འགའ་ཞིག་གིས་ལམ་པོ་ཆེའི་བཞི་མདོར་སྦྲང་རྩིའི་བུམ་པ་ཞིག་བཞག་ནས་འདི་སྐད་ཅེས། གང་གི་སྦྲང་རྩིའི་བུམ་པ་འདི་ལས་ཐ་ན་སྐྲའི་རྩེ་མོའི་ཆ་ཤས་ཙམ་
ཞིག་ཟོས་ན་ཡང་དེ་ནི་རྒ་བ་དང་འཆི་བ་མེད་པར་འགྱུར་རོ་ཞེས་སྨྲས་ལ། སྦྲང་རྩིའི་བུམ་པ་དེ་ལ་ལྷ་དང་བཅས་པའི་འཇིག་རྟེན་ཕལ་ཆེར་གྱིས་ལག་པར་མཚོན་ཆ་བླངས་ནས་གང་གིས་སྦྲང་རྩིའི་བུམ་པ་འདི་ལས་ཐ་ན་སྐྲའི་རྩེ་མོའི་ཆ་ཤས་ཙམ་ཞིག་ཟོས་ན་དེའི་སྲོག་ཀྱང་མེད་པར་

འགྱུར་རོ་ཞེས་སྲུང་ཞིང་སྦེད་པར་བྱེད་དོ། །ཤཱ་རིའི་བུ་དེ་ལ་འགའ་ཞིག་འདི་སྙམ་དུ་སུ་ཡང་རུང་སྦྲང་རྩིའི་བུམ་པ་འདི་ལས་ཐ་ན་སྐྲའི་རྩེ་མོའི་ཆ་ཤས་ཙམ་ཞིག་ཟོས་ན་ཡང་དེ་ཁོ་ནས་ན་བ་དང་འཆི་བར་མི་འགྱུར་བས་མ་ལ་བདག་གིས་སྲོག་དང་ཡང་བསྡོས་ཏེ། སྦྲང་རྩིའི་
བུམ་པ་འདི་ལས་ཟོས་ན། གལ་ཏེ་མཚོན་ཆ་རྣམས་མངོན་དུ་འབབ་མོད་ཀྱི། སྦྲང་རྩིའི་བུམ་པ་འདི་ལས་ཅུང་ཟད་ཅིག་མྱང་བར་ནུས་ན་བདག་ལ་མཚོན་གྱིས་གསོད་པའི་འཇིགས་པ་ཡང་མི་འབྱུང་ཞིང་རྒ་བ་དང་འཆི་བ་མེད་པ་ཡང་འཐོབ་པར་འགྱུར་གོར་མ་ཆག་གོ་སྙམ་དུ་བསམས་ནས་
དེས་སྲོག་དང་བསྡོས་ཤིང་སྲོག་ལ་མི་བལྟ་བར་བྱས་ཏེ། སྦྲང་རྩིའི་བུམ་པ་དེ་ལ་རེག་པ་ན་སྲོག་ཆགས་བརྒྱ་སྟོང་ཕྲག་དུ་མའི་ལག་པ་ནས་མཚོན་ཆ་མངོན་དུ་འཕེན་ནོ། །དེ་ལྟར་མཚོན་ཆ་མངོན་དུ་འཕེན་པས་འཇིགས་བཞིན་དུ་སྦྲང་རྩིའི་བུམ་པ་ལས་སྐྲའི་རྩེ་མོའི་ཆ་ཤས་ཙམ་
ཞིག་ཟོས་ནས་དེ་དེ་ནས་ལངས་པ་དང་། རྒ་བ་དང་། འཆི་བ་ལས་ཡོངས་སུ་ཐར་བར་གྱུར་ཏོ། །ཤཱ་རིའི་བུ་དེ་བཞིན་དུ་ཆོས་དཀར་པོ་རྣམས་ཀྱི་བར་ཆད་བྱ་བའི་ཕྱིར་བདུད་དམ་བདུད་ཀྱི་རིས་ཀྱི་ལྷ་རྣམས་སམ། བདུད་ཀྱིས་མངགས་པའི་དགེ་སློང་ངམ། དགེ་སློང་མའམ། དགེ་བསྙེན་ནམ།
དགེ་བསྙེན་མ་མང་པོ་གང་ཡིན་པ་དག་རབ་ཏུ་ཞུགས་པ་ཡིན་ནོ། །ཤཱ་རིའི་བུ་གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ན་སྟོང་པ་ཉིད་དམིགས་སུ་མེད་པའི་ཆོས་དེ་ལ་སོམ་ཉི་མེད་ཅིང་ཡིད་གཉིས་མི་ཟ་སྟེ་འཇུག་པ་དང་། གང་ཡང་ཆོས་དེ་དག་ལ་མོས་པར་བྱེད་པའི་སངས་
རྒྱས་ཀྱི་སྲས་དམིགས་སུ་མེད་པའི་སྤྱོད་པ་བཟོད་པ་མཆོག་དང་ལྡན་པ་དེ་དག་དང་། གང་དག་ཡང་ཆོས་དེ་དག་ལ་མངོན་པར་བརྩོན་པར་འགྱུར་བ་སྟེ། དེ་རྣམས་ནི་དེའི་ཚེ་ཅི་ནས་ཀྱང་ཤིན་ཏུ་ཟིལ་གྱིས་གནོན་པར་འགྱུར་རོ། །སྲོག་ལ་ཡང་མི་ལྟོས་པར་ཞེས་བྱ་བ་ནི་དེ་བཞིན་དུ་དེ་དག་
མངོན་པར་འདུ་བྱེད་པ་མེད་པར་སོ་སོར་རྟོགས་པར་འགྱུར་ཞིང་སྡུག་བསྔལ་ཐམས་ཅད་ལས་ཡོངས་སུ་གྲོལ་བར་འགྱུར་རོ། །ཤཱ་རིའི་བུ་སྦྲང་རྩིའི་བུམ་པ་ཞེས་བྱ་བ་ནི་དེ་བཞིན་གཤེགས་པས་ཆོས་འདུལ་བ་འདི་སོ་སོར་བསྟན་པའི་ཚིག་བླ་དགས་ཡིན་ཏེ། འདི་ལྟ་སྟེ་སྟོང་པ་ཉིད་དང་།

མཚན་མ་མེད་པ་དང་། སྨོན་པ་མེད་པའི་ཆོས་རྣམས་སོ། །ཤཱ་རིའི་བུ་ལྷ་དང་བཅས་པའི་འཇིག་རྟེན་གྱིས་སྲུང་ཞིང་སྦེད་པ་ཞེས་བྱ་བ་ནི་ལྷ་དང་བཅས་པའི་འཇིག་རྟེན་མི་དགེ་བའི་ཕྱོགས་ལ་རབ་ཏུ་ཞེན་པ་དང་། བདུད་ཀྱི་ཕྱོགས་སུ་ཞུགས་པ་དང་། བདུད་ཀྱི་ཕྱོགས་ལ་ཆགས་པ་
ཕལ་མོ་ཆེ་གང་ཡིན་པ་སྟེ། དེ་དག་བདག་ཉིད་ཀྱང་ཤིན་ཏུ་ཉམས་ཤིང་གང་དག་ཆོས་དེ་དག་ལ་མངོན་པར་བརྩོན་པར་བྱེད་པ་དེ་དག་གི་བར་ཆད་བྱ་བའི་ཕྱིར་ཡང་ཞུགས་པ་ཡིན་ནོ། །ཤཱ་རིའི་བུ་མངོན་པའི་ང་རྒྱལ་ཅན་གྱི་དགེ་སློང་གང་ཡིན་པ་དེ་རྣམས་ཀྱང་ཞེས་བྱ་བ་ལ་དེ་དག་ནི་བདུད་ཀྱི་དབང་
དུ་སོང་བ། བདུད་ཀྱི་ཕྱོགས་སྐྱོང་བར་བྱེད་པ། བདུད་ཀྱི་ཕྱོགས་ལ་ཆགས་པ་རྣམས་ཡིན་ཏེ། དེ་དག་ཀྱང་སྟོང་པ་ཉིད་དམིགས་སུ་མེད་པའི་ཆོས་ཡིད་ལ་བྱེད་པ་འདི་ལ་སྨོད་པར་འགྱུར་རོ། །ཤཱ་རིའི་བུ་མ་འོངས་པའི་དུས་ན་ཡོངས་སུ་མ་དག་པའི་ཆོས་སྟོན་པའི་དགེ་སློང་གང་ཡིན་པ་དེ་དག་
ཀྱང་བདག་ཏུ་དམིགས་པ་དང་། སེམས་ཅན་དུ་དམིགས་པ་དང་། སྲོག་ཏུ་དམིགས་པ་དང་། གང་ཟག་ཏུ་དམིགས་པ་དང་། ཕུང་པོར་དམིགས་པ་དང་། ཁམས་སུ་དམིགས་པ་དང་། སྐྱེ་མཆེད་དུ་དམིགས་པ་དང་། སྲིད་པར་དམིགས་པ་དང་། ལམ་དུ་དམིགས་པ་དང་།
མྱ་ངན་ལས་འདས་པར་དམིགས་པ་དང་། འབྲས་བུར་དམིགས་པ་དང་། ཐོབ་པར་དམིགས་པ་དང་། མ་ཐོབ་པར་ཐོབ་པའི་འདུ་ཤེས་ཅན་དུ་འགྱུར་རོ།། །།སངས་རྒྱས་ཀྱི་སྡེ་སྣོད་ཚུལ་ཁྲིམས་འཆལ་པ་ཚར་གཅོད་པ། བ