Kinh tạng Tây Tạng (Kangyur Đại Học) — 063_མདོ་སྡེ།_ཛ

ེས་པ། འཇིགས་པ་དང་བཅས་པ། གནོད་པ་དང་བཅས་པ། མྱ་ངན་དང་། འཁྲུག་པ་མང་བ། འདྲུལ་བ། འབྲུལ་
བ། འཆད་པ། འབྱེ་བ། འཇོམས་པ། རྣམ་པར་འཇིག་པའི་ཆོས་ཅན་ཏེ། རྒྱལ་པོ་ཆེན་པོ་དེ་ལྟ་བས་ན་མི་རྟག་པར་ལྟ་ཞིང་ཟད་པ་དང་དེངས་པའི་སྒོ་ཡིན་པར་བལྟ་བར་བྱ་སྟེ་འཆི་བས་འཇིགས་སྐྲག་པར་བྱའོ། །རྒྱལ་པོ་ཆེན་པོ་ཁྱོད་ཆོས་ཁོ་ནས་རྒྱལ་སྲིད་གྱིས་ཤིག །ཆོས་
མ་ཡིན་པས་ནི་མི་བྱའོ། །ཁྱོད་ཆོས་དང་འཐུན་པར་གྱིས་ཤིག །ཆོས་མ་ཡིན་པ་དང་འཐུན་པར་ནི་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་འདི་ལྟ་སྟེ་དཔེར་ན་ཤིང་རྣམས་ལས་མེ་ཏོག་དག་བྱུང་ནས་འབྲས་བུ་རྣམས་འབྱུང་བར་འགྱུར་རོ། །འབྲས་བུ་དག་ཏུ་གྱུར་ནས་འབྲས་བུ་དག་ཀྱང་ཡལ་
བར་འགྱུར་རོ། །ལོ་མ་སྔོན་པོར་གྱུར་པ་ལས་སེར་པོར་འགྱུར་རོ། །སེར་པོར་གྱུར་ནས་ཡང་ཐམས་ཅད་དུ་མེད་པར་འགྱུར་རོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་ཏུ་རབ་ཏུ་མཆེད་ཅིང་འབར་བ་མེ་ལྕེ་གཅིག་ཏུ་གྱུར་པ་ཇི་ལྟར་ཡུན་རིང་ཡང་
འབར་ནས་ཞི་བར་འགྱུར་རོ། །ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་དབང་ཆེ་བར་གྲགས་པ། རང་གི་གཟི་བརྗིད་ཀྱིས་རྣམ་པར་མཛེས་པ་འདི་གཉིས་ཀྱང་འཇིག་རྟེན་འདི་སྣང་བར་བྱས་ནས་ནུབ་པར་འགྱུར་རོ། །ལྷའི་བུ་སྤྲིན་སྡུད་དམ། ཆར་འབེབས་
པ་དག་འབྲུག་བསྒྲགས། སྒྲ་ཕྱུང་སྟེ། ནམ་མཁའ་ཁེབས་པར་བྱས་ནས་ཆར་གྱི་རྒྱུན་ཕབ་ཀྱང་ཆར་པ་ཐ་མར་མི་སྣང་བར་འགྱུར་རོ། །རྒྱལ་པོ་ཆེན་པོ་དེ་བཞིན་དུ་རྒྱལ་སྲིད་ཀྱི་བདེ་བ་དང་། རྒྱལ་པོའི་དབང་ཕྱུག་གི་བདེ་བ་དང་། འདོད་པའི་བདེ་བ་དང་། འདོད་པའི་ལོངས་སྤྱོད་ཀྱི་བདེ་བ་

རྣམས་ཀྱང་རྨི་ལམ་དང་འདྲའོ། །འདི་ལྟ་སྟེ། གླང་པོ་ཆེ་དང་། རྟ་པ་དང་། ཤིང་རྟ་དང་། དཔུང་བུ་ཆུང་དང་། བུད་མེད་དང་། ཁང་ཁྱིམ་དང་། ཆུང་མ་དམ་པ་དང་། གཞོན་ནུ་དང་། བློན་པོ་དང་། རྩིས་པ་དང་། བློན་པོ་ཆེན་པོ་དང་། སྒོ་བ་དང་། འཁོར་དང་། ཕ་
དང་། མ་དང་། སྤུན་དང་། སྲིང་མོ་དང་། ཆུང་མ་དང་། བུ་ཕོ་དང་། བུ་མོ་དང་། ན་ཚོད་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། མཛའ་བཤེས་དང་། བློན་པོ་དང་། གཉེན་དང་། གྲོང་ཁྱེར་གྱི་སྐྱེ་བོ་དང་། འགྲོན་བུ་དང་། གསེར་
དང་། ནོར་བུ་དང་། རིན་པོ་ཆེ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། གོས་དང་། རྒྱན་དང་། ནོར་དང་། འབྲུ་དང་། མཛོད་དང་། བང་བ་ལ་སོགས་པ་དེ་དག་ཐམས་ཅད་བོར་ནས་འགྲོ་དགོས་སོ། །
དེ་དག་ཐམས་ཅད་ཀྱང་མི་རྟག་པ། མི་བརྟན་པ། ཡིད་བརྟན་དུ་མི་རུང་བ། འགྱུར་བའི་ཆོས་ཅན། ཡུན་ཐུང་བ། མི་གནས་པ། གཡོ་བ། འགུལ་བ། མཐར་འཇིག་པ། སྐད་ཅིག་པ། མཐར་སྡིག་པ། ཟད་པ་དང་དེངས་པའི་སྒོ། མཐར་འགྱེས་པའི་ཆོས་ཅན། འཇིག་པ་
དང་བཅས་པ། གནོད་པ་དང་བཅས་པ། མྱ་ངན་དང་། འཁྲུག་པ་མང་བ། འདྲུལ་བ། འབྲུལ་བ། འཆད་པ། འབྱེ་བ། འགྱེས་པ། འཇིག་པའི་ཆོས་ཅན་ཏེ། རྒྱལ་པོ་ཆེན་པོ་ཁྱོད་ཀྱིས་མི་རྟག་པར་བལྟ་ཞིང་ཟད་པ་དང་། དེངས་པའི་སྒོར་བལྟ་བར་བྱ་སྟེ། འཆི་
བས་འཇིགས་སྐྲག་པར་བྱའོ། །ཆོས་ཀྱི་རྒྱལ་སྲིད་གྱིས་ཤིག །ཆོས་མ་ཡིན་པས་ནི་མི་བྱའོ། །ཁྱོད་ཆོས་དང་འཐུན་པར་གྱིས་ཤིག །ཆོས་མ་ཡིན་པ་དང་འཐུན་པར་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་འདི་ལྟ་སྟེ་དཔེར་ན་ཕྱོགས་བཞི་ནས་རི་ཆེན་པོ་སྲ་བ། བརྟན་
པ། སྙིང་པོ་དང་ལྡན་པ། མ་ཞིག་པ། མ་གས་པ། འཕན་མེད་པ། ཤིན་ཏུ་མཁྲེགས་པ། གཅིག་ཏུ་སྟུག་པ་བཞི་གནམ་ལ་རེག་ཅིང་ས་ཟློག་སྟེ། རྩྭ་དང་། ཤིང་དང་། ཤིང་གེལ་པ་དང་། ཡལ་ག་དང་། ལོ་མ་ཐམས་ཅད་དང་། སེམས་ཅན་སྲོག་ཆགས་འབྱུང་

པོ་ཐམས་ཅད་ཕྱེ་མར་འཐག་ཅིང་འོང་བ་དེ་དག་ལས་ནི་མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བཟློག་པའམ། སྔགས་དང་། རྫས་དང་། སྨན་རྣམས་ཀྱིས་བཟློག་པར་བྱ་བར་སླ་བ་མ་ཡིན་ནོ། །རྒྱལ་པོ་ཆེན་པོ་དེ་བཞིན་དུ་འཇིགས་པ་ཆེན་པོ་བཞི་པོ་འདི་
དག་འོང་སྟེ། དེ་དག་ལས་མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བཟློག་པའམ། རྫས་དང་། སྔགས་དང་། སྨན་རྣམས་ཀྱིས་བཟློག་པར་བྱ་བར་སླ་བ་མ་ཡིན་ནོ། །བཞི་གང་ཞེ་ན། རྒ་བ་དང་། ན་བ་དང་། འཆི་བ་དང་། རྒུད་པའོ། །རྒྱལ་པོ་ཆེན་
པོ་རྒ་བ་ནི་དར་ལ་བབ་པ་འཇོམས་ཤིང་འོང་། ན་བ་ནི་ནད་མེད་པ་འཇོམས་ཤིང་འོང་། རྒུད་པ་ནི་ཕུན་སུམ་ཚོགས་པ་ཐམས་ཅད་འཇོམས་ཤིང་འོང་། འཆི་བ་ནི་སྲོག་འཇོམས་ཤིང་འོང་སྟེ། དེ་དག་ལས་མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བཟློག་
པའམ། རྫས་དང་། སྔགས་དང་། སྨན་རྣམས་ཀྱིས་ཞི་བར་བྱ་བར་སླ་བ་མ་ཡིན་ནོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་རི་དགས་ཀྱི་རྒྱལ་པོ་སེང་གེ་རི་དགས་ཀྱི་ཚོགས་ཀྱི་ནང་དུ་ཞུགས་ནས་རི་དགས་བཟུང་སྟེ། ཇི་ལྟར་འདོད་པ་བཞིན་དུ་བྱ་བ་བྱེད་དོ། །རི་དགས་དེ་ནི་སྟོབས་པོ་ཆེའི་ཁ་
མི་བཟད་པས་བཟུང་བས་དབང་མེད་པར་འགྱུར་རོ། །རྒྱལ་པོ་ཆེན་པོ་དེ་བཞིན་དུ་འཆི་བདག་གི་གསལ་ཤིང་གིས་ཟུག་སྟེ། རྒྱགས་པ་དང་ནི་བྲལ། མགོན་ནི་མེད། སྐྱབས་ནི་མེད། དཔུང་གཉེན་ནི་མེད། གཤིས་ནི་འཇིག །ཚིགས་ནི་འབྱེ་འབྲལ། ཤ་དང་ཁྲག་ནི་སྐམས། ལུས་
ནི་ནད་ཀྱིས་གདུངས། སྐོམ་ནི་སྐོམ། བཞིན་ནི་འགྱུར། རྐང་ལག་ནི་གཡོ་བ། ལས་ནི་མི་ནུས། མཐུ་ནི་མེད། ཁ་ཆུ་དང་། སྣབས་དང་། གཅིན་དང་། ངན་སྐྱུགས་ཀྱིས་ནི་ལུས་ལ་གོས། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དབང་
པོ་དག་ནི་འགགས། སྐྱིགས་བུ་ནི་འབྱུང་། སྒྲ་ངར་ངར་པོ་ནི་འཐོན། སྨན་པས་ནི་བོར། སྨན་དང་། ཁ་ཟས་དང་། བཟའ་བ་དང་། ཐུག་པ་ཐམས་ཅད་ཀྱིས་ནི་གླེས་ལ་བོར་ཏེ། འགྲོ་བ་གཞན་དག་ཏུ་འགྲོ་བར་མལ་གྱི་ཐ་མ་ལ་ནི་ཉལ། ཐོག་མ་མེད་པའི་སྐྱེ་བ་དང་། རྒ་བ་

དང་། ན་བ་དང་། འཆི་བའི་འཁོར་བའི་རྒྱུད་དུ་ནི་ནུབ། སྲོག་ནི་ཅུང་ཟད་ཅིག་ལས་གཤིན་རྗེའི་མིས་ནི་འཇིགས་སྐྲག །བྱུར་གྱི་དབང་དུ་ནི་སོང་། དབུགས་རྒྱུ་བ་ནི་ཆད། ཁ་དང་སྣ་ནི་གདངས། སོ་ནི་གཙིགས། སྦྱིན་པ་སྦྱིན་ནོ་ཞེས་དེ་སྐད་གསོལ་བ་ནི་འདེབས།
ལས་ཀྱི་སྲིད་པ་ནས་ཡང་སྲིད་པ་ལ་ནི་འཇུག །གཅིག་པུ་གཉིས་སུ་མེད་ཅིང་གྲོགས་ནི་མེད། འཇིག་རྟེན་འདི་ནི་འདོར། འཇིག་རྟེན་ཕ་རོལ་དུ་ནི་འགྲོ། །སྐྱས་ཆེན་པོ་ནི་འདེགས། མུན་པ་ཆེན་པོར་ནི་ཞུགས། གཡང་ས་ཆེན་པོར་ནི་ལྷུང་། ཁྲོད་སྟུག་པོར་ནི་འཇུག །དགོན་པ་ཆེན་པོར་ནི་འགྲོ།
རྒྱ་མཚོ་ཆེན་པོས་ནི་ཁྱེར། ལས་ཀྱི་རླུང་གིས་ནི་བདས། ས་ཚུགས་མེད་པའི་ཕྱོགས་སུ་ནི་འགྲོ། གཡུལ་ངོ་ཆེན་པོར་ནི་འཇུག །གདོན་ཆེན་པོས་ནི་ཟིན། ནམ་མཁའ་ལ་ནི་འཆེལ། ཕ་མ་དང་། ཕུ་ནུ་དང་། སྲིང་མོ་དང་། བུ་དང་བུ་མོས་ནི་བསྐོར། དབུགས་ནི་འཆད། ནོར་བགོ་
བཤའ་བྱ་ཞེས་ནི་ཟེར། ཀྱི་ཧུད་མ། ཀྱི་ཧུད་ཕ། ཀྱི་ཧུད་བུ་ཞེས་ནི་ཟེར། སྐྲ་ནི་ཞིག་སྟེ། སྦྱིན་པ་དང་། དཀའ་ཐུབ་དང་། ཆོས་འབའ་ཞིག་གྲོགས་སུ་གྱུར་པ་ན། ཆོས་མ་གཏོགས་པར་སྐྱབས་གཞན་མེད། མགོན་གཞན་མེད། གནས་གཞན་མེད། དཔུང་གཉེན་གཞན་མེད་དོ། །
རྒྱལ་པོ་ཆེན་པོ་དེའི་ཚེ་དེའི་དུས་ན་ཆོས་ནི་གླིང་དང་། གནས་དང་། མགོན་དང་། རྟོན་པར་འགྱུར་རོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་གྲང་བས་ཉེན་པ་ལ་མེ་དང་། མེས་རབ་ཏུ་གདུངས་པར་གྱུར་པ་ལ་མེ་གསོད་པ་དང་། ཚ་བས་ཉེན་པ་ལ་བསིལ་བ་དང་། འགྲོན་པོ་ངལ་བ་ལ་ནི་གྲིབ་
མ་དང་། རླུང་བསིལ་བ་དང་། སྐོམ་པ་ལ་ཆུ་བསིལ་བ་དང་། ལམ་དུ་ཞུགས་པ་ལ་བཞོན་པ་དང་། ཉལ་བ་ལ་མལ་འཇམ་པོ་དང་། སྐོམ་པ་ལ་ཆུ་གྲང་མོ་དང་། ཤིན་ཏུ་བཀྲེས་པ་ལ་ཟས་བཟང་པོ་དང་། མྱ་ངན་གྱིས་ནོན་པ་ལ་དབུགས་འབྱིན་པ་དང་། གདུངས་པ་ལ་སིམ་
པར་བྱེད་པ་དང་། དགོན་པར་ལམ་སྟོར་བ་ལ་ལམ་མཚོན་པ་དང་། ནད་ཀྱིས་བཏབ་པ་ལ་སྨན་པ་དང་། སྨན་དང་། ནད་གཡོག་བྱེད་པ་དང་། ཆུས་ཁྱེར་བ་ལ་གཟིངས་དང་། འདམ་དུ་བྱིང་བ་ལ་འཇུས་དང་། རྒལ་དཀའ་བ་ལ་ཟམ་པ་དང་། ཉམ་ང་བ་ལ་འབབ་

སྟེགས་དང་། མུན་ཁུང་ན་སྒྲོན་མ་དང་། རྒྱ་མཚོ་ཆེན་པོ་ལ་གྲུ་དང་། ལྷགས་པས་ཉེན་པ་ལ་རླུང་མེད་པའི་གནས་དང་། ཡུལ་གཞན་དུ་སོང་བ་ལ་ལམ་རྒྱགས་དང་། དབུལ་པོ་ལ་ནོར་དང་། བྱེད་པར་འདོད་པ་ལ་གྲོགས་དང་། གཅད་པར་འདོད་པ་ལ་ལག་ཆ་དང་། གཞིག་པར་འདོད་པ་
ལ་རྡོ་རྗེ་དང་། གཡུལ་ངོར་ཞུགས་པ་ལ་གོ་ཆ་དང་། འཇིགས་པ་ལ་སྟོབས་དང་ལྡན་པའི་གྲོགས་དང་། འཐབ་པ་ལ་དཔུང་གཉེན་དང་། དོག་པ་ལ་གོ་འབྱེད་པ་དང་། མུ་གེ་ལ་ནོར་དང་ལྡན་པ་དག་མགོན་དང་། སྐྱབས་དང་། གནས་དང་། རྟེན་དུ་གྱུར་པ་དེ་བཞིན་དུ་རྒྱལ་པོ་ཆེན་པོ་
འཆི་བདག་གི་གསལ་ཤིང་གིས་ཟུག་སྟེ། རྒྱགས་པ་དང་ནི་བྲལ། མགོན་ནི་མེད། སྐྱབས་ནི་མེད། དཔུང་གཉེན་ནི་མེད། གཤིས་ནི་འཇིག །ཚིགས་ནི་འབྱེ་འབྲལ། ཤ་དང་ཁྲག་ནི་སྐམས། ལུས་ནི་ནད་ཀྱིས་གདུངས། སྐོམ་ནི་སྐོམ། བཞིན་ནི་འགྱུར། རྐང་ལག་ནི་
གཡོ་བ། ལས་ནི་མི་ནུས། མཐུ་ནི་མེད། ཁ་ཆུ་དང་། གཅིན་དང་། ངན་སྐྱུགས་ཀྱིས་ནི་ལུས་ལ་གོས། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དབང་པོ་དག་ནི་འགགས། སྐྱིགས་བུ་ནི་འབྱུང་། སྒྲ་ངར་ངར་པོ་ནི་འཐོན། སྨན་པས་ནི་བོར།
སྨན་དང་། ཁ་ཟས་དང་། བཟའ་བ་དང་། ཟས་དང་། ཐུག་པ་ཐམས་ཅད་ཀྱིས་ནི་གླེས་ལ་བོར་ཏེ། འགྲོ་བ་གཞན་དུ་འགྲོ་བར་མལ་གྱི་ཐ་མ་ལ་ནི་ཉལ། ཐོག་མ་མེད་པའི་སྐྱེ་བ་དང་། རྒ་བ་དང་། ན་བ་དང་། འཆི་བའི་འཁོར་བའི་རྒྱུད་དུ་ནི་ནུབ། སྲོག་ནི་ཅུང་ཟད་
ཅིག་ལས། གཤིན་རྗེའི་མིས་ནི་འཇིགས་སྐྲག །བྱུར་གྱི་དབང་དུ་ནི་སོང་། དབུགས་རྒྱུ་བ་ནི་འཆད། ཁ་དང་སྣ་ནི་གདངས། སོ་ནི་གཙིགས། སྦྱིན་པ་སྦྱིན་ནོ་ཞེས་དེ་སྐད་གསོལ་བ་ནི་འདེབས། ལས་ཀྱིས་སྲིད་པ་ནས་ཡང་སྲིད་པ་ལ་ནི་འཇུག །གཅིག་པུ་
གཉིས་སུ་མེད་ཅིང་གྲོགས་ནི་མེད། འཇིག་རྟེན་འདི་ནི་འདོར། འཇིག་རྟེན་ཕ་རོལ་དུ་ནི་འགྲོ །སྐྱས་ཆེན་པོ་ནི་འདེགས། མུན་པ་ཆེན་པོར་ནི་ཞུགས། གཡང་ས་ཆེན་པོར་ནི་ལྷུང་། ཁྲོད་སྟུག་པོར་ནི་འཇུག །དགོན་པ་ཆེན་པོར་ནི་འགྲོ། རྒྱ་མཚོ་ཆེན་པོས་ནི་

ཁྱེར། ལས་ཀྱི་རླུང་གིས་ནི་བདས། ས་ཚུགས་མེད་པའི་ཕྱོགས་སུ་ནི་འགྲོ་བ་ན། ཆོས་མ་གཏོགས་པར་མགོན་གཞན་མེད། སྐྱབས་གཞན་མེད། དཔུང་གཉེན་གཞན་མེད་དོ། །རྒྱལ་པོ་ཆེན་པོ་ཆོས་ནི་དེའི་ཚེ་དེའི་དུས་ན་གླིང་ཆེན་པོ་དང་། གནས་དང་། མགོན་དང་།
སྐྱབས་དང་། དཔུང་གཉེན་དང་། རྟོན་པར་འགྱུར་རོ། །རྒྱལ་པོ་ཆེན་པོ་དེའི་ཚེ་འདི་སྙམ་དུ་སེམས་ཏེ། ཀྱི་ཧུད་གང་དུ་འགྲོ་བར་འགྱུར། ཕྱོགས་གང་དུ་འགྲོ་བར་འགྱུར། གང་དུ་ཡོངས་སུ་འཛིན་པར་བྱེད་པར་འགྱུར། བདག་གི་མར་ནི་སུ་ཞིག་འགྱུར་སྙམ་པ་ལས། དེས་
སེམས་ཅན་དམྱལ་བར་སྐྱེ་བར་མཐོང་བར་གྱུར་ན། འདི་ལྟ་སྟེ། མནར་མེད་པ་དང་། ཚ་བ་དང་། རབ་ཏུ་ཚ་བ་ལ་སོགས་པའི་སེམས་ཅན་དམྱལ་བ་རྣམས་སུ་ལོ་མང་པོ། ལོ་བརྒྱ་ཕྲག་མང་པོ། ལོ་སྟོང་ཕྲག་མང་པོར་སྡུག་བསྔལ་ཆེན་པོ། སྡུག་བསྔལ་མི་བཟད་པ། དྲག་པོ། རྩུབ་
པ། ཡིད་དུ་མི་འོང་བའི་ཚོར་བ་མྱོང་སྟེ། ཇི་སྲིད་དུ་སེམས་ཅན་དམྱལ་བ་མྱོང་བར་འགྱུར་བའི་སྡིག་པ་མི་དགེ་བའི་ལས་ཡོང་ཐམས་ཅད་དུ་ཟད་ཅིང་བྱང་བར་མ་གྱུར་པ། དེ་སྲིད་དུ་འཆི་བའི་དུས་བྱེད་པར་མི་འགྱུར་རོ། །དེ་དུད་འགྲོའི་སྐྱེ་གནས་སུ་སྐྱེ་བར་མཐོང་བར་གྱུར་ན་འདི་ལྟ་སྟེ། རྒྱ་མཚོ་
ཆེན་པོའི་ནང་དུ་ཉ་རློན་དང་། ཉ་རློན་མིད་ལ་སོགས་པ་སྲོག་ཆགས་གཅིག་གིས་གཅིག་གསོད་པ་དང་། འཚེ་བ་དང་། དབང་མེད་པར་སྐྱེའོ། །བདག་ཡི་དགས་ཀྱི་ནང་དུ་སྐྱེ་བར་མི་འགྱུར་རམ་སྙམ་ན་འདི་ལྟ་སྟེ། ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་
པོར་ཆུའི་སྒྲ་ཡང་མི་ཐོས་ན་མཐོང་བ་ལྟ་ཅི་སྨོས་པར་འགྱུར་རོ། །རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་མི་རྟག་པར་བལྟ་ཞིང་ཟད་པ་དང་དེངས་པར་བལྟ་བར་བྱ་སྟེ་འཆི་བས་འཇིགས་སྐྲག་པར་བྱའོ། །ཆོས་ཀྱིས་རྒྱལ་སྲིད་གྱིས་ཤིག །ཆོས་མ་ཡིན་པས་ནི་མི་བྱའོ། །ཁྱོད་ཆོས་དང་འཐུན་པར་
གྱིས་ཤིག །ཆོས་མ་ཡིན་པ་དང་འཐུན་པར་ནི་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཁྱོད་ཀྱི་ལུས་འདི་འདི་ལྟར་ལེགས་པར་ཡོངས་སུ་བསྲུངས་ལེགས་པར་ཡོངས་སུ་བཙས་པ་ཡང་འཆི་བའི་དུས་བྱེད་པར་འགྱུར་རོ། །ཡོན་ཏན་ཐམས་ཅད་དང་ལྡན་ཞིང་ཤིན་ཏུ་ཡུན་རིང་པོར་

བཟའ་བ་དང་། བཅའ་བ་དང་། མྱང་བ་དང་། ངོམས་པར་འགྱུར་བ། བསོད་པ་གཙང་མ་མང་པོས་ཚིམ་པར་བྱས་ཏེ་བསྐྱེད་བསྐྱེད་པ་ཡང་ཐ་མའི་མལ་ན་འདུག་པའི་ཚེ་སྨན་པས་བོར་ཞིང་། སྨན་དང་། ཁ་ཟས་དང་། བཟའ་བ་དང་། ཐུག་པས་ཀྱང་གླེས་ལ་བོར་ནས། བཀྲེས་པ་དང་།
སྐོམ་པས་ཉེན་ཅིང་ཡིད་མི་བདེ་བར་འཆི་བའི་དུས་བྱེད་པར་འགྱུར་རོ། །རྒྱལ་པོ་ཆེན་པོ་འདི་ལྟར་ཁྱོད་ཀྱིས་ལུས་བཀྲུས་ཤིང་བསྐུས་ཏེ། བདུག་པས་བསྒོས། མེ་ཏོག་གི་དྲི་ཞིམ་པོ་བསྒོས་ཀྱང་གདོན་མི་ཟ་བར་དུས་སུ་རང་བཞིན་གྱིས་ལྷན་ཅིག་སྐྱེས་པའི་དྲི་ང་བ་འབྱུང་བར་འགྱུར་རོ། །
རྒྱལ་པོ་ཆེན་པོ་འདི་ལྟར་ཡུལ་ཀ་ཤི་ཀའི་རས་དང་། མོན་དར་དང་། དུ་གུ་ལའི་རས་དང་། དར་དང་། འདབ་མ་དང་། བལ་གོས་དང་། ས་རས་ལ་སོགས་པའི་གོས་ཀྱི་བྱེ་བྲག་གིས་གཡོགས་ཀྱང་ཐ་མའི་མལ་ན་འདུག་པའི་ཚེ་སྣུམ་རྣམ་པ་མང་པོ་དང་། ཆུས་རེག་ཅིང་
གོས་དྲི་མ་ཅན་གྱོན་ཅིང་འཆི་བའི་དུས་བྱེད་པར་འགྱུར་རོ། །རྒྱལ་པོ་ཆེན་པོ་དེ་ལྟར་ཁྱོད་ཁྱིམ་ན་བུད་མེད་ཀྱི་ནང་ན་འདུག་བཙུན་མོའི་འཁོར་གྱི་ནང་ན་འདུག་སྟེ། བུད་མེད་ཀྱི་ཚོགས་ཀྱིས་བསྐོར་ཅིང་། གར་དང་། གླུ་དང་། རོལ་མོའི་སིལ་སྙན་བྱེད། ཕེག་རྡོབ་པ་དང་།
པི་བང་དང་། གླིང་བུ་ལེན། རྔ་བརྡུང་ཞིང་ཡིད་བདེ་བར་རྩེ་དགའ་སྟེ། དགའ་མགུར་སྤྱོད་པ་ཡང་འཆི་བས་འཇིགས་སྐྲག་ནས་ཤིན་ཏུ་ཡིད་མི་བདེ་ཞིང་འཆི་བའི་དུས་བྱེད་པར་འགྱུར་རོ། །རྒྱལ་པོ་ཆེན་པོ་དེ་ལྟར་ཁྱོད་ཁྱིམ་གྱི་ནང་ན་སྤོས་དྲི་ཞིམ་པོའི་བསྐུ་བས་ནི་བསྐུས།
གཏན་པ་ནི་བཅུག །སྐར་ཁུང་ནི་ལེགས་པར་བཅད། བྱུག་པ་མང་པོས་ནི་བྱུགས། འབྲུ་མར་དྲི་ཞིམ་པོ་དང་ལྡན་པའི་མར་མེ་ནི་འབར། དར་གྱི་ལྡ་ལྡི་མང་པོ་ནི་བྲེས། མེ་ཏོག་དྲི་ཞིམ་པོའི་སིལ་མ་མང་པོས་ནི་ཆལ་པར་བཀང་། པོག་པོར་ནས་ནི་བདུགས། ཁྲིའི་རྩ་བ་
གསེར་དང་། དངུལ་དང་། བཻ་དཱུརྱ་ལས་ནི་བྱས། པ་ཏི་ཀ་དང་། དྲིའུ་རྔོག་གི་སྟན་དང་། སྟན་ནང་ཚངས་ཅན་དང་། ཟ་འོག་གི་སྟན་དང་། ཡུལ་ཀ་ལིང་ཀ་པའི་སྟན་དང་། སྟེང་དུ་གདིང་བ་དང་། དེའི་སྟེང་དུ་གདིང་བས་ནི་བཀབ། གཡས་གཡོན་དུ་དར་དམར་པོའི་སྔས་

ནི་བཞག་པའི་ཁྲི་ལ་ཉལ་བ་ཡང་བྱ་རོག་དང་། བྱ་རྒོད་དང་། ཝ་དང་། རོ་དང་། ཤ་དང་། རུས་པ་དང་། སྐྲ་དང་། ཁྲག་དང་། ཞག་དང་། ཆུ་སེར་དང་། རྣག་གི་གནས་མཆོག་ཏུ་འཇིགས་སུ་རུང་བའི་དུར་ས་ཆེན་པོར་བོར་ནས། ལུས་གཡོ་བ་མེད་ཅིང་ས་ལ་ཉལ་དུ་
གདོན་མི་ཟའོ། །རྒྱལ་པོ་ཆེན་པོ་འདི་ལྟར་ཡང་ཁྱོད་གླང་པོ་ཆེའི་བྱ་ལ་ཁའམ། རྟའི་རྒྱབ་བམ། ཤིང་རྟ་ལ་ཞོན་ཏེ། དུང་དང་། རྔ་དང་། རྫ་རྔ་དང་། ཁར་རྔ་དང་། རོལ་མོ་སིལ་སྙན་གྱི་བྱེ་བྲག་ལེན་པ་དང་། གདུགས་དང་། རྒྱལ་མཚན་དང་། བ་དན་དང་། རྣམ་
པར་རྒྱལ་བའི་བ་དན་ནི་བསྒྲེང་། བསིལ་ཡབ་ནོར་བུའི་ཡུ་བ་ཅན་དང་། རྔ་ཡབ་དང་། ཤིང་ཏ་ལ་ལས་བྱས་པ་ནི་གཡོབ་ཅིང་། གླང་པོ་ཆེ་དང་། རྟ་པ་དང་། དཔུང་བུ་ཆུང་དུ་མ་ནི་ཕྱི་བཞིན་འབྲང་། རྒྱལ་བུ་དང་། བྲམ་ཟེས་བསླབ་པ་ཕོག་པའི་བློན་པོ་དང་། མདུན་ན་འདོན་དང་། སྐྱེ་
བོ་ཐལ་མོ་སྦྱར་བ་བརྒྱ་སྟོང་དུ་མས་ནི་ཕྱག་བྱ་ཞིང་རྒྱལ་བར་སྤྱོན་ཅིག །རྒྱལ་བར་སྤྱོན་ཅིག་ཅེས་སྙན་པར་རྗོད་དེ་ཕྱིར་འབྱུང་བ་ཡང་རིང་པོ་མི་ཐོགས་པར་གཡོ་བ་མེད་ཅིང་མལ་དུ་ཤི་ནས་མི་བཞིས་བཏེག་སྟེ། ཕ་དང་། མ་དང་། ཕུ་ནུ་དང་། སྲིང་མོ་དང་། ཆུང་མ་དང་། བུ་ཕོ་དང་། བུ་མོ་དང་། བྲན་ཕོ་དང་། བྲན་
མོ་དང་། ལས་བྱེད་པ་དང་། ཞོ་ཤས་འཚོ་བ་དང་། ཚལ་ཟ་དང་། བློན་པོ་དང་། གྲོང་ཁྱེར་བའི་སྐྱེ་བོ་དག་མྱ་ངན་གྱི་དབང་དུ་སོང་སྟེ། ལག་པ་བཏེགས་ནས་བྲང་རྡུང་ཞིང་མཆོག་ཏུ་སྙིང་རྗེ་བར་ཀྱི་ཧུད་བུ། ཀྱི་ཧུད་མགོན་པོ། ཀྱི་ཧུད་ཕོ་བོ། ཀྱི་ཧུད་ཇོ་བོ་ཞེས་ངུ་ཞིང་ཞབས་
འབྲིང་བ་དང་། གྲོང་ཁྱེར་བའི་སྐྱེ་བོ་དག་གིས་འཇིགས་པ་དང་བཅས་པར་མཐོང་སྟེ། གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཕྱུང་ནས་སའི་འོག་ཏུ་བཅུག་གམ། འབྲོག་དགོན་པར་སའི་འོག་ཏུ་བཅུག་ཀྱང་རུང་། བྱ་རོག་དང་། བྱ་རྒོད་དང་། ཝ་ལ་སོགས་པས་ཟོས་ཤིང་རུས་པ་དེ་དག་
མེས་བསྲེགས་སམ། ཆུར་སྐྱུར་རམ། སའི་འོག་ཏུ་བཅུག་ཀྱང་རླུང་དང་། ཉི་མ་དང་། ཆར་པས་ཕྱེ་མར་བྱས་ཏེ། ཕྱོགས་ཕྱོགས་སུ་འཐོར་ཞིང་། དེ་ཉིད་དུ་རུལ་བར་འགྱུར་རོ། །རྒྱལ་པོ་ཆེན་པོ་དེ་ལྟར་སེམས་ཅན་ཐམས་ཅད་ཀྱི་ལུས་ཀྱང་འདི་བཞིན་དུ་འགྱུར་རོ། །རྒྱལ་

པོ་ཆེན་པོ་འདུ་བྱེད་ཐམས་ཅད་ནི་དེ་ལྟར་མི་རྟག་པ། དེ་ལྟར་མི་བརྟན་པ། དེ་ལྟར་ཡིད་བརྟན་དུ་མི་རུང་བ། དེ་ལྟར་འགྱུར་བའི་ཆོས་ཅན་ཏེ། ཡུན་ཐུང་བ། མི་གནས་པ། གཡོ་བ། འགུལ་བ། སྐད་ཅིག་པ། མཐར་སྡིག་པ་ཟད་པ་དང་། དེངས་པའི་སྒོ། མཐར་འགྱེས་པ།
འཇིགས་པ་དང་བཅས་པ། གནོད་པ་དང་བཅས་པ། མྱ་ངན་དང་འཁྲུག་པ་མང་བ། འདྲུལ་བ། འབྲུལ་བ། འཆད་པ། འབྱེ་བ། འཐོར་བ། རྣམ་པར་འཇིག་པའི་ཆོས་ཅན་ནོ། །རྒྱལ་པོ་ཆེན་པོ་དེ་ལྟ་བས་ན་མི་རྟག་པར་བལྟ་ཞིང་ཟད་པ་དང་། དེངས་པའི་སྒོར་བལྟ་བར་བྱ་སྟེ།
འདོད་ཆགས་ཀྱིས་མ་ཆགས་པ་དང་། ཞེ་སྡང་གིས་མི་སྡང་བ་དང་། གཏི་མུག་གིས་མ་རྨོངས་པ་དང་། རྒྱལ་སྲིད་ཀྱི་དབང་ཕྱུག་གི་བདེ་བ་ལ་མ་ཆགས་པ་དང་། འདོད་པའི་བདེ་བ་དང་། འདོད་པའི་ལོངས་སྤྱོད་ཀྱི་བདེ་བ་ལ་མ་ཆགས་པ་དང་། མི་རྟག་པར་ལྟ་བ་དང་། བག་ཡོད་པ་དང་།
མ་ཆགས་པ་དང་། མི་བརྐམ་པ་དང་། མ་ཞེན་པ་དང་། མ་མོས་པ་དང་། སྲོག་སྙེམས་པ་མེད་པར་འཆི་བས་འཇིགས་སྐྲག་པར་བྱའོ། །ཆོས་ཁོ་ནས་རྒྱལ་སྲིད་གྱིས་ཤིག །ཆོས་མ་ཡིན་པས་ནི་མི་བྱའོ། །ཁྱོད་ཆོས་དང་འཐུན་པར་གྱིས་ཤིག །ཆོས་མ་ཡིན་པ་དང་འཐུན་པར་
ནི་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་འདོད་པའི་རྙེད་པ་དང་། རབ་ཏུ་རྙེད་པ་དང་། སོགས་པ་དང་། ཀུན་ཏུ་སོགས་པ་དང་། སྟེན་པས་འདོད་པ་དག་གིས་ངོམས་པར་ང་མི་སྨྲ་སྟེ། གང་དག་འཕགས་པའི་ཤེས་རབ་ཀྱིས་ངོམས་པར་འགྱུར་བ་དེ་དག་ནི་ངོམས་
སོ། །རྒྱལ་པོ་ཆེན་པོ་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་
གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་

འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འདི་ཡང་འབྱུང་བར་འགྱུར་རོ། །དེ་ལ་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་
དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་
འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འདི་ཡང་འགག་པར་འགྱུར་རོ། །རྒྱལ་པོ་ཆེན་པོ་
དེ་ལྟ་བས་ན། འདོད་ཆགས་ཀྱིས་མ་ཆགས་པ་དང་། ཞེ་སྡང་གིས་མི་སྡང་བ་དང་། གཏི་མུག་གིས་མ་རྨོངས་པ་དང་། རྒྱལ་སྲིད་ཀྱི་དབང་ཕྱུག་དང་། དབང་གི་དྲེགས་པ་མེད་པར་ཆོས་ཁོ་ནས་རྒྱལ་སྲིད་གྱིས་ཤིག །ཆོས་མ་ཡིན་པས་ནི་མི་བྱའོ། །ཁྱོད་ཆོས་དང་འཐུན་པར་གྱིས་
ཤིག །ཆོས་མ་ཡིན་པ་དང་འཐུན་པར་ནི་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་འདོད་པ་རྣམས་ཀྱི་རྙེད་པ་དང་། རབ་ཏུ་རྙེད་པ་དང་། ངོམས་པར་མི་འགྱུར་བའི་བར་དུང་སྨྲ་སྟེ། རབ་ཏུ་ངོམས་པར་མི་འགྱུར་རོ། །ཞེས་ང་སྨྲའོ། །གང་དག་འཕགས་པའི་ཤེས་རབ་ཀྱིས་ངོམས་
པར་གྱུར་པ་དེ་དག་ནི་ངོམས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མི་ཉིད་འདི་ནི་འགྲོ་བར་འགྱུར། །འཆི་བདག་རབ་ཏུ་མི་བཟད་འོང་། །ཁྱོད་ཀྱི་ཚེ་འདི་མི་བརྟན་གྱིས། །རྒྱལ་པོ་བག་མེད་མ་བྱེད་ཅིག །ནོར་ནི་གཏང་གི་ལུས་ནི་
བསྲུང་བར་བྱ། །ཡན་ལག་གཏང་གི་སྲོག་ནི་བསྲུང་བར་བྱ། །ནོར་དང་ཡན་ལག་རྣམས་དང་དེ་བཞིན་སྲོག །ཐམས་ཅད་གཏང་གི་འདིར་ནི་ཆོས་བསྲུང་ངོ་། །ཆོས་སྤྱོད་པ་ནི་ཆོས་ལ་སྲུང་བར་བྱེད། །དཔེར་ན་དབྱར་དུས་གདུགས་ཆེན་བསྲུང་བ་བཞིན། །ཆོས་སྤྱོད་པ་ཡི་ཕན་ཡོན་འདི་

ཡིན་ཏེ། །ཆོས་སྤྱོད་པ་ནི་ངན་འགྲོར་མི་འགྲོའོ། །ཆོས་མ་ཡིན་པ་སྤྱོད་ཅིང་བག་མེད་པ། །འདི་ནས་ཤི་འཕོས་ངན་འགྲོ་མི་བཟད་འགྲོ། །གང་དུ་གནས་ན་འཆི་བས་མི་ཚུགས་པ། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་མ་ཡིན་རྒྱ་མཚོའི་ནང་མ་ཡིན། །རི་ཡི་ཕུག་ཏུ་ཞུགས་
ཀྱང་མི་ཕན་ནོ། །འཆི་བས་འཇིགས་པ་ཆེན་པོ་དེ་དག་ནི། །ཕུང་པོ་འཇིག་ཅིང་སྲོག་འགག་ཤེས་གྱིས་ལ། །འཆི་མེད་ཐོབ་པར་ཁྱོད་ནི་མོས་པར་གྱིས། །མྱ་ངན་འདས་ཐོབ་ཕྱིན་ཆད་འཆི་མི་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཡུལ་ཀོ་ས་ལའི་
རྒྱལ་པོ་གསལ་རྒྱལ་དང་། སྲོག་ཆགས་བརྒྱད་ཁྲི་བཞི་སྟོང་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རྒྱལ་པོ་ལ་གདམས་
པ་ཞེས་བྱ་བ་ཐེག་པ་ཆེན་པོའི་མདོ། རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཤཱི་ལེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།
༄༅༅། །རྒྱ་གར་སྐད་དུ། ཨཱརྱ་མ་ཧཱ་བྷེ་རཱི་ཧཱ་ར་ཀ་པ་རི་བརྟ་ནཱ་མ་མ་ཧཱ་ཡ་ན་སཱུ་ཏྲ། བོད་སྐད་དུ། འཕགས་པ་རྔ་བོ་ཆེ་ཆེན་པོའི་ལེའུ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་
སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་སྟོང་ཉིས་བརྒྱ་ལྔ་བཅུ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའ་བརྒྱ་སྟོང་མང་པོ་དག་དང་ཐབས་ཅིག་གོ། །ལྷ་དང་། ཀླུ་
དང་། གནོད་སྦྱིན་དང་། དྲི་ཟ་མང་པོ་དང་ཡང་ཐབས་ཅིག་གོ། །དགེ་བསྙེན་དང་། དགེ་བསྙེན་མ་བརྒྱ་སྟོང་མང་པོ་དང་ཡང་ཐབས་ཅིག་གོ། །མི་མཇེད་ཀྱི་བདག་པོ་ཚངས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དག་དང་ཡང་ཐབས་ཅིག་གོ། །འདི་

ལྟ་སྟེ། ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་བྱང་ཆུབ་སེམས་དཔའ་དུ་མ་དང་ཡང་ཐབས་ཅིག་གོ། །དེ་ན་དེ་བཞིན་གཤེགས་པ་ཆོས་སྟོན་པ་ནི་འདི་ལྟ་སྟེ། འཁོར་བཞི་པོ་རྣམས་ཀྱི་
ནང་དུ་འདི་ལྟ་བུའི་ཆོས་ཀྱི་གཏམ། སྲིད་ཡོད་བདེ་དང་སྡུག་བསྔལ་ཏེ། །ཟད་དང་གཏན་ཡོད་མ་ཡིན་ནོ། །དེ་ལྟས་བདེ་སྡུག་སྤངས་པའི་ཕྱིར། །མྱ་ངན་འདས་པ་མཆོག་ཏུ་བདེ། །ཞེས་སྟོན་པར་མཛད་དོ། །འདིར་སྨྲས་པ། ཅིའི་ཕྱིར་བཅོམ་ལྡན་འདས་ལ་དེ་བཞིན་གཤེགས་
པ་དགེ་སློང་ལྔ་བརྒྱ་ཙམ་དང་ཐབས་ཅིག་ཏུ་བཞུགས་སོ་ཞེས་བྱ་བ་དེའི་གཏན་ཚིགས་བརྗོད་པར་བྱ་སྟེ། ཅིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་མང་པོ་དང་། འཁོར་མང་པོའི་གཙོ་བོ་དང་ལྡན་པ། འཁོར་རྟག་ཏུ་མི་ཕྱེད་
པ། རྨད་དུ་བྱུང་བའི་ཆོས་དང་ཆོ་འཕྲུལ་མང་པོ་མངའ་བའོ་ཞེས་སྒྲ་གྲགས། གལ་ཏེ་དེ་ལྟ་ན་ནི་འཁོར་ལྔ་བརྒྱར་མི་ཟད་ན། བཅོམ་ལྡན་འདས་འཁོར་བྱེ་བ་ཅན་དུ་འགྱུར་རོ། །ཡང་འདིར་སྨྲས་པ། འདུལ་བ་ཐམས་ཅད་ལ་མངའ་སྒྱུར་བའི་སྟོབས་མངའ་བས་མཉན་ཡོད་ན་དེ་བཞིན་
གཤེགས་པ་དགེ་སློང་ལྔ་བརྒྱ་དང་ཐབས་ཅིག་ཏུ་བཞུགས་སོ། །ཞེས་ཚིག་ཏུ་གསུངས་པ། ཅི་དཔེར་ན་མས་བུ་ཁུར་དུ་ཐོགས་ཏེ་རང་གི་ཡུལ་ནས་ཡུལ་གཞན་དུ་འགྲོ་བ་ན་རང་གི་བུ་སྤྲོ་བསྲིང་བའི་ཕྱིར་བུ་གྲོང་འདི་ཉེའོ་ཞེས་བྱ་བའི་ཚིག་སྨྲ་བ་དེ་བཞིན་དུ། སངས་རྒྱས་བཅོམ་ལྡན་འདས་འགྲོ་
བ་རྗེས་སུ་སྲུང་བ་རྣམས་དགེ་སློང་ལྔ་བརྒྱ་ཙམ་དང་ཐབས་ཅིག་གོ་ཞེས་བྱ་བ་ཡིན་ནམ་ཞེ་ན། དེ་དག་ལ་སྨྲས་པ། དགེ་སློང་དག་ཆོས་ཀྱི་གཏམ་འདི་ནི་ལན་གསུམ་དུ་བཟླས་པ་ཡིན་ཏེ། དེ་བས་ན་དགེ་སློང་ལྔ་བརྒྱ་ཙམ་ཞེས་བྱ་བ་དེ་དག་ནི་སྐྱེས་བུའི་གཙོ་བོ་རྣམས་ཡིན་པར་རིག་པར་བྱ་སྟེ། དོན་
གཞན་ནི་མ་ཡིན་ནོ། །དཔེར་ན་ཁྱུ་མཆོག་རེ་རེ་ལ་ཡང་བ་ལང་གི་ཚོགས་ཡོད་པ་བཞིན་དུ་སྐྱེས་བུའི་གཙོ་བོ་ལ་ཡང་སློབ་མ་ལྔ་བརྒྱ་ཡོད་དེ། རེ་རེ་ལ་ཡང་སློབ་མ་ལྔ་བརྒྱ་ལྔ་བརྒྱ་ཡོད་དོ། །དེ་ལྟ་བས་ན་ཉན་ཐོས་ཆེན་པོ་ལྔ་བརྒྱ་ཙམ་ཞེས་བྱ་སྟེ། འདི་ལྟ་སྟེ། འོད་སྲུང་ཆེན་པོ་དང་།

དེ་བཞིན་དུ་ཀུན་དགའ་བོ་ལ་སོགས་པ་ཉན་ཐོས་ཆེན་པོ་ལྔ་བརྒྱ་ཙམ་པོ་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དབང་དུ་གྱུར་པ། གླང་པོ་ཆེན་པོ། ཅང་ཤེས་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། བྱ་བ་བྱས་པ།
བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་ཕྱིན་པ་རྗེས་སུ་ཐོབ་པ། མི་སློབ་པ་རྣམས་དང་། སློབ་པ་རྒྱུན་དུ་
ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་ལ་གནས་པ་ལ་སོགས་པ་དཔག་ཏུ་མེད་པ་རྣམས་དང་ཟག་པ་ཟད་པའི་ཆོས་ཅན་གྱི་དགེ་སློང་གི་ཚོགས་དུ་མ་དག་དང་། ཡོན་ཏན་བརྒྱ་སྟོང་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་ཅིང་
དཔག་ཏུ་མེད་པ། ཕྱོགས་བཅུ་ནས་ལྷགས་པ་གང་ཡིན་པ་དེ་དག་གི་ཚད་ཀྱང་འཇམ་དཔལ་མ་གཏོགས་པ་རྩིས་མཁན་ནམ། རྩིས་མཁན་གྱི་སློབ་མས་ཀྱང་བགྲང་བར་མི་ནུས་ཤིང་ཉན་ཐོས་དང་། རང་སངས་རྒྱས་རྣམས་ཀྱིས་ཀྱང་མི་ནུས་པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་
མཐུ་ཆེན་ཐོབ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དང་། བྱང་ཆུབ་སེམས་དཔའི་ཚོགས་ཚད་མེད་གྲངས་མེད་པ་
དཔེར་ན་ཤིང་ཆེན་པོ་སྣད་པའི་ཤིང་ཤུན་རྣམས་འབྱུང་བ་དེ་བཞིན་དུ་ས་ཆེན་པོ་འདི་ཤུན་པ་བཞིན་དུ་བརྟུལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་ཅིང་གྲངས་མེད་པ་གང་ཡིན་པ་དེ་དག་གི་ཚད་ཀྱང་རྩིས་མཁན་ནམ། རྩིས་མཁན་གྱི་སྣ་ཆེན་པོ་ལ་གཏོགས་པ་རྣམས་ཀྱིས་ཀྱང་
བརྗོད་པར་མི་ནུས་པ་ལྷགས་པ་རྣམས་དང་། སྲིང་མོའི་ཚོགས་དགེ་སློང་མ་དེས་མ་ལ་སོགས་པ་དང་། རི་དགས་འཛིན་གྱི་མ་ས་ག་དང་། བཙུན་མོ་ཕྲེང་ལྡན་མ་ལ་སོགས་ཏེ། དགེ་བསྙེན་མ་དུ་མ་དང་། ཁྱིམ་བདག་བཟང་སྦྱིན་ལ་སོགས་པ་དགེ་བསྙེན་དུ་མ་དག་སྟེ། བཅོམ་

ལྡན་འདས་དེ་བཞིན་གཤེགས་པ་འཁོར་མང་པོ་དེ་དག་ཐམས་ཅད་ཀྱི་གུང་ལ་བཞུགས་ནས་བཅོམ་ལྡན་འདས་ཆོས་ཀྱི་སྒོ་སྟོན་ཏོ། །དེ་ནས་དེའི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་རང་གི་མལ་ནས་ལངས་ཏེ་བསམས་པ། བདག་བཅོམ་ལྡན་འདས་ཀྱི་སྤྱན་སྔར་འགྲོ་བར་
བྱའོ་སྙམ་ནས་དེ་ནས་དེ་རང་གི་མལ་ནས་ལངས་པ་དང་རྒྱལ་པོ་གཤེགས་སོ་ཞེས་རྔ་བོ་ཆེ་ཆེན་པོ་དག་ནི་རྡུང་། དུང་དག་ནི་འབུད། གདུགས་དང་། རྒྱལ་མཚན་དང་། བ་དན་མང་པོ་བསྒྲེང་བ་དག་ནི་ནམ་མཁའ་ལ་ཉི་མའི་འོད་བཞིན་དུ་ཀུན་དུ་སྣང་ངོ་། །བཅོམ་ལྡན་འདས་ནི་མཁྱེན་བཞིན་དུ་རྨེད་པ་
ཡིན་པས་དེ་ནས་དེ་ན་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་རྔ་བོ་ཆེ་ཆེན་པོ་དག་གི་སྒྲ་དང་། དུང་དག་གི་སྒྲ་གྲག་པ་འདི་ཅི་ཞིག །ཀུན་དགའ་བོས་གསོལ་པ། བཅོམ་ལྡན་འདས་ས་སྐྱོང་བའི་རྒྱལ་པོ་གསལ་རྒྱལ་དམ་པ་འདིར་མཆིས་ཏེ། དེའི་
རྔ་བོ་ཆེ་དག་བརྡུངས་པའི་སྒྲ་ཆེན་པོ་འབྱིན་པ་ལགས་སོ། །བཀའ་སྩལ་པ། ཀུན་དགའ་བོ་ཅིའི་ཕྱིར་རྔ་བོ་ཆེའི་སྒྲ་འབྱིན། གསོལ་པ། རྒྱལ་པོ་ཤཱཀྱའི་མགོན་པོ་བལྟ་ཞིང་མཆི་བ་དེས་རང་གི་དཔུང་ལ་བཅོམ་ལྡན་འདས་ཀྱི་སྤྱན་སྔར་འདེང་གིས་ཆོས་ཤིག་ཅེས་གོ་བར་བགྱིད་པ་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ཀྱང་ཆོས་ཀྱི་རྔ་བོ་ཆེ་བརྡུངས་ལ་ཆོས་ཀྱི་དུང་བུས་ཤིག་དང་། ངས་དེ་ནས་རྔ་བོ་ཆེ་ཆེན་པོ་ཞེས་བྱ་བའི་ཆོས་ཀྱི་མདོ་བཤད་དོ། །གསོལ་པ། བཅོམ་ལྡན་འདས་བདག་གི་རྔ་བོ་ཆེ་ཆེན་པོ་ཞེས་བགྱི་བའི་
མདོ་སྔོན་ནམ་ཡང་མ་ཐོས་ལགས་ན་རྔ་བོ་ཆེ་ཆེན་པོ་ཞེས་བགྱི་བའི་ཆོས་དེ་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཅི་ཁྱོད་ཀྱིས་ཤེས་པར་འགྱུར་སྙམའམ། རེ་ཞིག་ཕྱོགས་བཅུ་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་
ཐམས་ཅད་ཀྱིས་ཀྱང་འདི་ལྟར་རྔ་བོ་ཆེ་ཆེན་པོའི་མདོ་ཡིག་འབྲུ་བཞི་ཙམ་ཡང་མི་ཤེས་ན། ཁྱོད་ཀྱིས་ལྟ་སྔོན་མ་ཐོས་པ་ཇི་ལྟར་ཤེས། གསོལ་པ། བཅོམ་ལྡན་འདས་ཆོས་འདི་དེ་ལྟར་རྙེད་དཀའ་བ་ནི་ངོ་མཚར་ཆེ་ལགས་སོ། །དེ་བཞིན་གཤེགས་པས་བཀའ་སྩལ་པ། ཀུན་

དགའ་བོ་མདོ་འདི་ནི་ཤིན་ཏུ་རྙེད་པར་དཀའ་སྟེ། ཀུན་དགའ་བོ་རྔ་བོ་ཆེ་ཆེན་པོའི་མདོ་ཆེན་པོ་འདི་ནི་འདི་ལྟ་སྟེ་དཔེར་ན། འཇིག་རྟེན་ན་མེ་ཏོག་ཨུ་དུམ་བ་ར་རྙེད་པ་བཞིན་ནོ། །གསོལ་པ། བཅོམ་ལྡན་འདས་ཅི་ལགས། འདི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཉིད་མ་
ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འདི་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡང་ཆོས་ཉིད་ཡིན་ནོ། །གསོལ་པ། གལ་ཏེ་འདི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཉིད་ལགས་ན་
ཅིའི་སླད་དུ་སངས་རྒྱས་བཅོམ་ལྡན་འདས་དེ་དག་གིས་རང་རང་གི་སངས་རྒྱས་ཀྱི་ཞིང་དེ་དང་དེ་དག་ཏུ་མ་བཤད་ཅིང་རབ་ཏུ་མ་བསྟན་ལ། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་མཆོག་འདི་དག་འདིར་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ།
ཀུན་དགའ་བོ་དཔེར་ན་འདི་ན་དགེ་སློང་དགོན་པ་པ་འགའ་ཞིག །རི་བོའམ། འབབ་ཆུའི་འགྲམ་འམ། ཕུག་ཅིག་ན་འདུག་འདུག་པ་ལས་ནམ་ནངས་ནས་གྲོང་ངམ། གྲོང་ཁྱེར་ཞིག་ཏུ་བསོད་སྙོམས་ཀྱི་ཕྱིར་སོང་ན་དེས་སྦྲུལ་ལམ། ཁྱིའམ། མི་ཤི་བའི་རོའམ། ཤི་
བའི་རོ་གང་ཡང་རུང་བ་མཐོང་ངོ་། །དེས་དེ་མཐོང་ནས་ཨེ་མའོ་ཀྱི་ཧུད་ཨེ་མའོ་ཀྱི་ཧུད་བདག་ཀྱང་ཡུན་རིང་པོར་འཁོར་བར་འཁོར་བ་ན། འདི་ལྟ་བུའི་གནས་སྐབས་དག་ཉམས་སུ་མྱོང་བར་གྱུར་པས་ད་སྲིད་པ་ནི་ཐ་ཆད་ཡིན་ནོ་ཞེས་བྱ་བར་གྱུར་ཏོ། །དེ་ནས་དེ་དུས་གཞན་ཞིག་ན་སྙིང་
དགའ་བར་འགྱུར་བའི་ཆོས་འགའ་ཞིག་གིས་ཡིད་བདེ་བ་དང་། དེ་ནས་ཡང་མི་སེམས་པ་ལས་ཡང་དེས་རོ་མཐོང་སྟེ། དེ་མཐོང་བ་ན་དེ་ཡིད་བྱུང་བར་གྱུར་ནས་དེ་ཕྱིར་ཞིང་གྲོང་ཁྱེར་རམ། རི་འོར་རམ། ལུང་པའི་མདོར་རྒྱུ་ཞིང་། དེ་དེ་ལྟར་རྒྱུ་བ་ན་ཤི་ནས་ཞག་གཅིག་ལོན་
པའམ། ཤི་ནས་ཞག་གཉིས་ལོན་པའམ་ཞེས་བྱ་བ་ནས། མི་རོ་མཐོང་ན་ཞེས་བྱ་བའི་བར་གོང་མ་བཞིན་དུ་སྟེ། དེ་མཐོང་བ་ཁོ་ནས་འབྲས་བུའི་མཆོག་དགྲ་བཅོམ་པ་མངོན་སུམ་དུ་བྱེད་པ་དེ་བཞིན་དུ་འཇིག་རྟེན་གྱི་ཁམས་གཞན་དག་ན་སངས་རྒྱས་བཅོམ་ལྡན་འདས་རྣམས་སྡུག་

བསྔལ་གྱི་གཏམ་ཡང་མི་གསུང་། མི་རྟག་པའི་གཏམ་ཡང་མི་གསུང་། བདག་མེད་པ་དང་། མི་གཙང་བའི་གཏམ་ཡང་མི་གསུང་ངོ་། །དེ་ཅིའི་ཕྱིར་ཞེ་ན། འདི་ནི་དེ་དག་གི་ཆོས་ཉིད་ཡིན་ཏེ། དེ་ན་སངས་རྒྱས་བཅོམ་ལྡན་འདས་ཇི་སྙེད་བཞུགས་པ་དེ་དག་གིས་
དགོས་པའི་དོན་དུ་ནི་རང་རང་གི་སངས་རྒྱས་ཀྱི་ཞིང་དག་ན་འཁོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་སྐད་ཅེས་རིགས་ཀྱི་བུ་དག་རེ་ཞིག་སངས་རྒྱས་བཅོམ་ལྡན་འདས་རྣམས་སེམས་ཅན་རྣམས་ཀྱི་དོན་དུ་ཞིང་གི་སྙིགས་མ་སྙིགས་མ་ལྔ་ཅན་གྱི་སངས་རྒྱས་ཀྱི་ཞིང་
འདི་འདྲ་བར་འབྱུང་བ་ནི་དཀའ་བ་མཛད་པ་ཡིན་ཏེ། དེ་ལྟ་བས་ན་རིགས་ཀྱི་བུ་དག་ཁྱོད་ཀྱིས་ཀྱང་དེ་ལྟར་བསླབ་པར་བྱའོ་ཞེས་རབ་ཏུ་འཇོག་པར་མཛད། འདོམས་པར་མཛད་དོ། །དེ་ནས་དེ་དག་ལྟ་འདོད་ཅིང་ཕྱག་བྱེད་པར་འདོད་པར་འགྱུར་ཏེ། དེ་དག་ལྟ་འདོད་ཅིང་ཕྱག་བྱེད་པར་
འདོད་པ་ན་དེ་དག་གིས་དེ་རྣམས་ཉེ་བར་བསྟན་པས་དེའི་ཕྱིར་དེ་དག་མི་མཇེད་ཀྱི་འཇིག་རྟེན་གྱི་ཁམས་འདིར་འོང་བར་འགྱུར་ཞིང་འོངས་ནས་ཁ་ཅིག་ནི་ས་དང་པོ་ཐོབ་པར་འགྱུར། ཁ་ཅིག་གིས་ནི་ས་བདུན་པ་དང་། བརྒྱད་པ་དང་། དགུ་པ་དང་། བཅུ་པའི་བར་དག་ཀྱང་ཐོབ་པར་འགྱུར་
རོ། །ཀུན་དགའ་བོ་དེ་ལྟ་བས་ན་རྔ་བོ་ཆེ་ཆེན་པོ་ཞེས་བྱ་བའི་མདོ་འདི་ནི་ཤིན་ཏུ་རྙེད་པར་དཀའ་བ་ཡིན་ཏེ། ཕྱོགས་བཅུ་ནས་ལྷགས་པའི་འཁོར་འདི་དག་ཐམས་ཅད་ཉན་པར་འདོད་པ་ཡང་དེའི་ཕྱིར་རོ། །ཀུན་དགའ་བོས་གསོལ་པ། བཅོམ་ལྡན་འདས་ལེགས་སོ། །ཐམས་ཅད་ལྷགས་པ་
ལེགས་སོ་ལྷགས་པ་ལེགས་སོ། །འདི་དག་ཐམས་ཅད་ཀྱིས་ཤིན་ཏུ་རྙེད་པར་དཀའ་བའི་མདོ་འདི་འདྲ་བ་ཐོབ་པར་གྱུར་ཅིག །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཐམས་ཅད་ཀྱི་ཐུན་མོང་ལྟར་མདོ་འདི་ཐུན་མོང་མ་ཡིན་པས་ལྷགས་པ་ལེགས་སོ་ཞེས་ཚིག་ཏུ་མ་བརྗོད་
ཅིག །གསོལ་པ། བཅོམ་ལྡན་འདས་ཅིའི་སླད་དུ་ཐམས་ཅད་ལྷགས་པ་ལེགས་སོ། །ལྷགས་པ་ལེགས་ས་ཞེས་མི་བགྱི་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མདོ་འདི་ནི་ཟབ་ཅིང་རྟོགས་པར་དཀའ་བ། ཡིད་ཆེས་ཤིང་དད་པར་དཀའ་བ།

སངས་རྒྱས་ཀྱི་གསང་བ་ཡིན་ཏེ། ཀུན་དགའ་བོ་དེའི་ཕྱིར་འོངས་པ་དང་མ་འོངས་པ་ཐམས་ཅད་ལ་ལྷགས་པ་ལེགས་སོ་ལྷགས་པ་ལེགས་སོ་ཞེས་ཚིག་ཏུ་མ་བརྗོད་ཅིག །གསོལ་པ། བཅོམ་ལྡན་འདས་ཅི་ལགས། ཡུལ་ཀོ་ས་ལའི་རྒྱལ་པོ་གསལ་རྒྱལ་གཡུལ་འགྱེད་པའི་དུས་སུ་རྔ་བོ་
ཆེའི་སྒྲ་འབྱིན་པ་དང་། ཁར་དཀྲོལ་རྡེབས་པ་དེའི་ཚེ་དཔུང་གི་ཚོགས་ཐམས་ཅད་ཀྱི་མ་ལགས་སམ། ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རྔ་བོ་ཆེ་དེ་ཉིད་གང་གི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་ཕ་རོལ་གྱི་དཔུང་དང་ལྷན་ཅིག་གཡུལ་འགྱེད་པ་
དེའི་དུས་སུ་ཇི་ཙམ་ན་རྔ་བོ་ཆེའི་སྒྲ་བྱུང་བ་དེའི་ཚེ་སེམས་ཅན་མང་པོ་དག་ནི་ཐོས་ནས་དགའ་བར་མི་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་སྡར་མའི་རིགས་ཅན་གཞན་དག་ནི་སྒྲ་དེ་ཐོས་ན་དེ་ཉིད་ཀྱིས་དེ་དག་འཆི་བའམ། འཆི་བ་ལ་ཐུག་པའི་སྡུག་བསྔལ་སྐྱེ་བར་འགྱུར་རོ། །ཀུན་
དགའ་བོ་དེའི་ཕྱིར་རྔ་བོ་ཆེ་ཆེན་པོ་ཞེས་བྱ་བའི་མདོ་འདི་ནི་ཀུན་དགའ་བོ་ཁྱོད་ཀྱིས་ཀྱང་མི་ཤེས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་ཆོས་ཀྱི་སྒོའི་མདོ་འདི་ལ་ནི་ཉན་ཐོས་དང་། རང་སངས་རྒྱས་ཀྱི་ཐེག་པ་ཅན་རྣམས་ཡིད་ཆེས་པར་མི་འགྱུར་རོ། །ཀུན་དགའ་བོ་དེ་ལྟ་བས་ན་རྒྱུ་དེས་
ན་གང་གི་ཚེ་ཡུལ་ཀོ་ས་ལའི་རྒྱལ་པོ་གཡུལ་འགྱེད་པའི་དུས་སུ་རྒྱལ་པོ་རྔ་བོ་ཆེའི་སྒྲ་འབྱིན་པ་ཇི་ལྟ་བ་དེ་བཞིན་དུ་རྔ་བོ་ཆེ་ཆེན་པོའི་མདོ་འདི་ཡང་སངས་རྒྱས་ཀྱི་གསང་བ་ཡིན་ཏེ། སངས་རྒྱས་པའི་དུས་སུ་གསུང་བར་འགྱུར་རོ། །དེ་ནས་དེ་ན་བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་
ལ་བོས་ཏེ། བོས་ནས་འདི་སྐད་ཅེས་བཀའ་སྩལ་ཏོ། །འོད་སྲུང་ཅི་དགེ་སློང་འདི་དག་དད་པ་ཅན་ཚུལ་དང་འཐུན་པ། མཐུ་དང་ལྡན་པ་ཡིན་ནམ། གསོལ་པ། བཅོམ་ལྡན་འདས་དེའི་དོན་ཅི་ལགས། བཀའ་སྩལ་པ། འོད་སྲུང་སེམས་ཅན་སྦུན་པ་ལྟ་བུ་མ་ཡིན་པ་དེ་དག་རྔ་
བོ་ཆེ་ཆེན་པོ་ཞེས་བྱ་བའི་མདོ་འདི་ཉན་པར་འགྱུར་རོ། །གསོལ་པ། བཅོམ་ལྡན་འདས་དེའི་སླད་དུ་གནས་བརྟན་མཽད་གལ་གྱི་བུ་ཆེན་པོ་ཡང་རང་ལ་སྨོད་པར་བགྱིད་ཅིང་། བཅོམ་ལྡན་འདས་ཇི་ལྟར་བདག་ཀྱང་གལ་ཏེ་དེ་འདྲ་བའི་དགེ་སློང་དག་མཆིས་ན་དེ་དག་གི་ནང་དུ་མཆིས་པ་མ་

ལགས་ན་དེ་བཞིན་གཤེགས་པ་བཞུགས་པ་ལྟ་ཅི་སྨོས་ཏེ། དགེ་སློང་ཚུལ་ཁྲིམས་འཆལ་པ་དང་། ཚུལ་ཁྲིམས་དང་མི་ལྡན་པ་གང་ལགས་པ་དེ་དག་ནི་མ་མཆིས་ལགས་སོ། །བཅོམ་ལྡན་འདས་འཁོར་འདི་ཐམས་ཅད་ནི་ཚུལ་ཁྲིམས་བསྲུང་བ། ཚུལ་དང་འཐུན་པ་
ལགས་ཏེ། འཁོར་གྱི་དཀྱིལ་འཁོར་ན་དེ་དག་ནི་ཙན་དན་གྱི་སྙིང་པོ་འདྲ་བ་ཤ་སྟག་ལགས་སོ། །བཀའ་སྩལ་པ། འོད་སྲུང་འཁོར་འདི་ཐམས་ཅད་ཚུལ་ཁྲིམས་བསྲུངས་པ། ཚུལ་དང་འཐུན་པ་ཡིན་ཡང་ཅི་དགོངས་པའི་ཚིག་ལ་མཁས་པ་ཡིན་ནམ། གསོལ་པ།
བཅོམ་ལྡན་འདས་དགོངས་པའི་ཚིག་ཅེས་བགྱི་བ་ཅི་ལགས། བཀའ་སྩལ་པ། འོད་སྲུང་དགོངས་པའི་ཚིག་ཅེས་བྱ་བ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཞེས་བྱ་བ་ད་ལྟར་འདི་ལས་དེ་བཞིན་གཤེགས་པ་རྟག་པ། བརྟན་པ། ཞི་བ། ཐེར་ཟུག་པ།
ཡོངས་སུ་མྱ་ངན་ལས་འདས་ཀྱང་ཉམས་པར་མི་འགྱུར་བ་ཞེས་བྱ་བ་སྟེ། མདོ་འདི་ནི་དགོངས་པའི་ཚིག་ཅེས་བྱའོ། །འོད་སྲུང་མི་འཐུན་པའི་མདོ་དག་པ་འོད་གསལ་བ་འདི་ནི་སེམས་ཅན་དམན་པ་རྣམས་ཀྱིས་རྒྱུ་དང་གཏན་ཚིགས་བརྒྱ་སྟོང་གིས་རིག་པར་བྱ་དགོས་སོ། །འོད་
སྲུང་དེ་ལྟ་བས་ན་ཡང་ཁྱོད་ཀྱིས་རེ་ཞིག་འཁོར་འདི་རྟོགས་ཤིག །དེ་ནས་དེའི་ཚེ་གནས་བརྟན་འོད་སྲུང་ཆེན་པོས་སེམས་ཅན་ལྷགས་པ་འདི་དག་ཅི་འདྲ་བ་ཞིག་ཡིན་པར་བལྟས་སོ། །དེ་ནས་སྐད་ཅིག་དེ་ཉིད་ལ་རྒྱ་ཆེན་པོ་མ་ཡིན་པའི་སེམས་ཅན་རྣམས་དང་། ཉན་ཐོས་དང་།
རང་སངས་རྒྱས་ཀྱི་ཐེག་པ་ཅན་རྣམས་དང་། བྱང་ཆུབ་སེམས་དཔའ་ཐེག་པ་ལ་གསར་དུ་ཞུགས་པ་གང་ཡིན་པ་དེ་དག་ཐམས་ཅད་རང་རང་ལ་སྨོད་པར་བྱེད་དེ། དཔེར་ན་གྱད་ཀྱི་ཚོགས་ཆེན་པོར་རྒྱལ་པོའི་གྱད་སྟོང་ཐུབ་པ་ཞིག་སྟན་ལས་ལངས་ཏེ། འདི་ན་ཁོ་བོ་དང་ལྷན་ཅིག་འགྱེད་པར་
འོས་པའི་རྒོལ་ཕོད་པ་གང་ཡིན་པ་དེ་སུ་ཡོད་ཅེས་དྲིལ་བསྒྲགས་པ་དང་། དེ་ནས་དེ་ན་རྒོལ་བར་མ་འོས་པའི་སེམས་ཅན་གང་ཡིན་པ་དེ་དག་ཐམས་ཅད་ནི་བདག་ཅག་གསོད་པར་འགྱུར་གྱིས་འདི་དང་ལྷན་ཅིག་བདག་ཅག་འགྱེད་པར་མི་ནུས་སོ་ཞེས་རང་གིས་རང་ལ་སྨད་ནས་ཅང་མི་སྨྲ་བར་

འགྱུར་རོ། །དེ་ནས་གལ་ཏེ་དེས་དེར་གྱད་ཀྱི་ཟླ་འགའ་ཡང་མ་རྙེད་ན་དེ་དེ་ན་དཔའ་བོ་གྱད་ཟླ་མེད་དུ་གྱུར་ཅིང་རུ་མཚོན་འཛུགས་པ་དེ་བཞིན་དུ་དེ་ན་རྒྱལ་པོ་མ་ཡིན་པའི་སེམས་ཅན་ཉན་ཐོས་དང་། རང་སངས་རྒྱས་ཀྱི་ཐེག་པ་ཅན་རྣམས་དང་། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་
དཔའ་གང་ཡིན་པ་རྣམས་ཀྱང་བདག་ཅག་ནི་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདས་བཞིན་དུ་ཡང་ང་ནི་རྟག་པ་བརྟན་པ་ཞི་བ་ཐེར་ཟུག་པ་ཡིན་ནོ་ཞེས་སྟོན་པ་འདི་ནི་རྟོགས་པར་མི་ནུས་སོ་ཞེས་འདོར་བར་བྱེད་དོ། །དེ་ཅིའི་ཕྱིར་ཞེ་ན། དེ་དག་ནི་ཡུན་རིང་པོར་སྟོན་པ་ཉིད་
ཀྱི་ལྟ་བ་ཉམས་པར་བྱེད་པའི་ལྟ་བ་བསྒོམས་པའི་བདག་ཉིད་ཡིན་པའི་ཕྱིར་ཏེ། དམན་པའི་སེམས་ཅན་རྣམས་ཀྱིས་མདོ་དག་པ་འདི་ཐོས་ནས་དོང་ངོ་། །ཕྱོགས་བཅུ་དེ་དང་དེ་དག་ནས་ལྷགས་པའི་ཉན་ཐོས་དང་། རང་སངས་རྒྱས་ཀྱི་ཐེག་པ་ཅན་དང་། བྱང་ཆུབ་སེམས་དཔའི་ཐེག་པ་ལ་
གསར་དུ་ཞུགས་པ་གང་དང་གང་དག་ཡིན་པ་དེ་དང་དེ་དག་དང་ལྷན་ཅིག་ཏུ་གང་དང་གང་དག་ལྷགས་པ་དེ་དག་ལས་ཀྱང་བཅུའི་ཆའི་ཆ་དང་། བརྒྱའི་ཆའི་ཆ་དང་། སྟོང་གི་ཆའི་ཆ་དང་། བརྒྱ་སྟོང་གི་ཆའི་ཆ་དང་། བྱེ་བའི་ཆའི་ཆ་དང་། གྲངས་མེད་པའི་ཆའི་ཆ་གང་ཡིན་པ་དག་
འདུས་པར་གྱུར་ཏོ། །དེ་ལ་ཙན་དན་གྱི་སྙིང་པོ་འདྲ་བ་སྦུན་པ་ལྟ་བུ་མ་ཡིན་པའི་དགེ་བསྙེན་ཅི་འདྲ་བ་དག་འདུག་པར་གྱུར་ཅེ་ན། བསླབ་པའི་གཞི་ལྔ་དང་ལྡན་པ་དང་། བསླབ་པའི་གཞི་བརྒྱད་དང་ལྡན་པ་དང་། གསུམ་འདོན་པ་དང་། བཅུ་བཞིའི་དང་། བཅྭ་ལྔའི་ཞེས་བྱ་བ་
ནས་ཟླ་བ་ཕྱེད་ཀྱི་དང་། ཚེས་བརྒྱད་ཀྱི་དང་། ཆོ་འཕྲུལ་གྱི་ཟླ་བ་ཕྱེད་ཀྱི་བར་གྱི་ཡན་ལག་བརྒྱད་ལེགས་པར་བླངས་པ་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་འཐུན་པ་ཅན་གལ་ཏེ་མུ་གེ་ལོ་བཅུའམ། བཅུ་གཉིས་སམ། གཞན་ཡང་ལོ་མང་པོ་
བྱུང་ཡང་བདག་གིས་བཟའ་བའམ། བལྡག་པའམ། ཟས་སམ། བཏུང་བ་རང་གི་སྐལ་བ་དེ་ལས་བདག་གིས་ཕ་དང་མ་གཉིས་ལ་ཕྱེད་ཕྱེད། དགེ་སློང་རྣམས་ལ་ཕྱེད་འབུལ་ཞིང་བདག་གིས་དགེ་སློང་རྣམས་ལ་མཆོད་ཡོན་གྱི་སྦྱིན་པ་དོར་བར་མི་བྱའོ་སྙམ་པ་སྟེ། རིགས་

ཀྱི་བུ་དེའི་དུས་ངན་པ་ལ་རྟག་པར་སྐལ་བ་གང་ཡིན་པ་དེ་ཇི་ཙམ་ཞིག་ཡོད་པར་འགྱུར་ཞེ་ན། སྐྱེས་བུ་དཔའ་བོ་དེའི་ཟླ་བ་ཕྱེད་ཀྱིས་ཟ་མ་གཅིག་ཅིག་འབྱུང་སྟེ། དེས་ཟ་མ་གཅིག་པོ་ཡང་དགེ་སློང་རྣམས་ལ་བྱིན་ནས་བསོད་ནམས་མི་ཟད་པའི་སྐལ་བ་ཅན་དུ་འགྱུར་རོ། །སྐྱེས་
བུས་དེ་ལྟར་བྱིན་ནས་འཇིག་རྟེན་དུ། །སྐྱེས་བུ་དམ་པར་འགྱུར་བས་ལེགས་འདོད་མིས། །འདི་ན་བདག་ཉིད་བག་མེད་ཅི་བྱ་སྟེ། །དེ་བས་བསྟན་ལ་བག་བྱེད་མཆོག་ཡིན་ནོ། །ནོར་ནི་དགྲ་དང་ཆོམ་རྐུན་སོགས་མང་དང་། །རྒྱལ་པོ་ཆུ་དང་མེ་དང་མཛའ་བཤེས་དང་། །ཉེ་དུ་མི་མཛད་
བགོ་སྐལ་སྤྱོད་མང་གིས། །སྡིག་པ་སྤྱད་པ་ཡིས་ནི་ཟད་པར་འགྱུར། །རང་དང་རང་གི་ལོངས་སྤྱོད་དག་ལ་ཡང་། །སྤྱོད་པར་བྱེད་པ་སྐྱེས་བུ་རྣམས་ཀྱི་ནོར། །སྤྱད་པ་ཉིད་དང་གནོད་པ་གཞན་གྱིས་ཀྱང་། །ཟད་པར་མི་འགྱུར་ཤེས་བྱ་དམ་ཆོས་ཕྱིར། །འདི་ཟད་བྱས་མཆོག་ཕ་རོལ་ཟད་མི་
འགྱུར། །འཇིག་རྟེན་འདིར་འཕེལ་འཇིག་རྟེན་ཕ་རོལ་དུ། །ཟད་པར་མི་འགྱུར་ཁ་དོག་མཐུར་བཅས་བྱེད། །མཐོང་ན་ཐམས་ཅད་དགའ་ཞིང་རྙེད་པ་དང་། །མདོག་དང་གྲགས་པ་རབ་ཏུ་གསལ་བར་འགྱུར། །དེ་ཡི་ཕྱུགས་རྣམས་ཟད་པར་མི་འགྱུར་ཞིང་། །དེ་ཡི་བྲན་ཕོ་བྲན་མོ་ལས་བྱེད་དང་། །
ལས་ཀྱི་མཐའ་རྣམས་ཉམས་པར་མི་འགྱུར་ཏེ། །དེ་ལ་ཐབ་མོ་རྩོད་དང་འགྱེད་མེད་ཅིང་། །དེ་ནི་ནམ་ཡང་གནོད་སེམས་མེད་མཆོག་ཐོབ། །སྦྱིན་ལ་དགའ་བའི་སྐྱེ་བོ་འཇིག་རྟེན་དུ། །དེ་ལ་སོགས་པའི་ཡོན་ཏན་འཐོབ་འགྱུར་བས། །དེ་ལྟ་བས་ན་རྟག་ཏུ་ཆོས་འདོད་པ། །སངས་རྒྱས་རྣམས་
དང་ལྷན་ཅིག་ཕྲད་པར་འགྱུར། །ལུས་དང་སྲོག་ལ་མི་བལྟ་ལྷུག་པར་གཏོང་། །མི་ཡི་མི་མཆོག་དེ་ནི་ལག་རྐྱོང་ཡིན། །སེམས་ཅན་ཀུན་ལ་རྗེས་སུ་སྙིང་བརྩེ་བས། །བུ་བཞིན་མཐོང་ན་སྡུག་ཅིང་རིག་པར་ལྡན། །བསམ་གཏན་བག་ཡོད་ཐོས་པས་དཔག་ཏུ་མེད། །ཁྱིམ་ན་གནས་
པའི་ཤེས་རབ་ཅན་གྱིས་ནི། །རྟག་ཏུ་དེ་ལྟར་བྱ་དགོས་དེ་དག་གི །དཔེ་ནི་དེ་འདྲ་མང་དུ་ཡོད་པ་ཡིན། །ཡང་དེའི་ཚེ་ན་དགེ་བསྙེན་མ་ཅི་འདྲ་བ་དག་ཅིག་འདུག་ཅེ་ན། ཇི་ཙམ་ཁྭ་མ་ལངས་པ་དེ་ཙམ་ནས་རང་གིས་ཕྱགས་མ་བླངས་ཏེ། རང་གི་ཉེན་ཀོར་འཕྱག་ཅིང་བའི་ལྕི་བའི་བྱུག་པས་ས་

གཞི་བྱུགས་པས། ས་རྒྱན་གྱིས་མཛེས་པར་བྱེད་པའི་ལེགས་པར་བྱ་བ་བྱེད་པ་ཡིན། དེས་དེར་བསོད་སྙོམས་པ་རབ་ཏུ་མང་པོ་འོངས་པར་ཤེས་ན་རང་གི་ལག་གིས་བཟའ་བ་དང་། བཏུང་བ་གྱ་ནོམ་པ་ལེགས་པར་རྒྱུན་ཏུ་སྟོབས་པར་བྱེད་ཅིང་དེ་དག་དང་བདག་གྲོང་རྡལ་ལམ། གྲོང་ཁྱེར་རམ།
གྲོང་དག་ཏུ་ཡང་ཕྲད་ཅིང་འགྲོགས་པར་གྱུར་ཅིག །བདག་ནམ་ཡང་ཡུལ་མཐའ་འཁོབ་ཏུ་སྐྱེ་བ་དང་། དགེ་བའི་བཤེས་གཉེན་དང་སྐོལ་བར་དུས་སྟོན་བཞི་བྱེད་པར་མ་གྱུར་ཅིག །བདག་སྦྱིན་པ་དང་། ཚུལ་ཁྲིམས་སྤྱད་པ་དང་། ཉན་པ་དང་། བདག་ཆོས་ཀྱི་གཏམ་ལ་རྟག་ཏུ་
སྤྱོད་པར་གྱུར་ཅིག་ཅེས་དེ་ལྟ་བུའི་ཡོན་ཏན་ཕུན་སུམ་ཚོགས་པའི་སྲིང་མོ་དགེ་བསྙེན་མ་ཡིད་རྣམ་པར་དག་པ་སྟེ། དེ་ལྟ་བུ་ནི་དགེ་བསྙེན་མའི་ཡོན་ཏན་དག་ཡིན་ནོ། །དེ་ལ་དགེ་སློང་དང་དགེ་སློང་མ་ཅི་འདྲ་བ་དག་ཅིག་ཅེ་ན། དུལ་བ། ཞི་བ། བག་ཚ་བ་མེད་པ། ཟག་པ་ཟད་པ།
ཐ་མའི་ལུས་འཛིན་པ། ཙན་དན་གྱི་སྙིང་པོ་འདྲ་བའི་འཁོར་དག་གོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་འདྲ་བ་དག་ཅིག་ཅེ་ན། ཐམས་ཅད་ཀྱང་དེ་བཞིན་གཤེགས་པའི་ཆོས་འདོད་པ། ཐམས་ཅད་ཀྱང་དེ་བཞིན་གཤེགས་པའི་སྙིང་པོའི་མདོ་སྡེ་འཛིན་པ།
ཐམས་ཅད་ཀྱང་དེ་བཞིན་གཤེགས་པའི་སྙིང་པོ་ཕན་པ་སྟོན་པ། ཐམས་ཅད་ཀྱང་སངས་རྒྱས་རྟག་པ་ཉིད་འདོད་པ། ཐམས་ཅད་ཀྱང་དགོངས་པའི་ཚིག་ལ་བྱང་བ། ཐམས་ཅད་ཀྱང་ངེས་པའི་དོན་གྱི་མདོ་སྡེ་སྟོན་པ། སྲན་ཐུབ་པ། ཐམས་ཅད་ཀྱང་ཚུལ་ཁྲིམས་འཆལ་པ་རྣམས་
ཚར་གཅོད་ཅིང་ཕན་འདོགས་པར་ཞུགས་པ་དེས་པ་རྣམས་ལ་མཆོག་ཏུ་གུས་པ། ཐེག་པ་ཆེན་པོ་ལ་དད་པ་ཆེན་པོ་ཐོབ་པ། ཉན་ཐོས་དང་། རང་སངས་རྒྱས་ཀྱི་ཐེག་པ་ལ་ཡ་མཚན་དུ་མི་འཛིན་པ། འདི་ལྟ་བུའི་མདོ་སྡེ་རྒྱ་ཆེན་པོ་མཆོག་བོར་ནས་མདོ་སྡེ་གཞན་མི་སྒྲོགས་པའི་ཤེས་རབ་ཅན།
གང་དུ་སངས་རྒྱས་རྟག་པ་དེ་བཞིན་གཤེགས་པའི་སྙིང་པོ་ཡོད་དོ་ཞེས་བསྟན་པ་གཞན་ཡང་སྒྲོགས་ཤིང་མི་སྤོང་བ། བརྟན་པ། འཇིག་ཚོགས་ལ་ལྟ་བས་སྟོང་པ་སྟོང་པ་མ་ཡིན་གྱི། འདུས་བྱས་ཐམས་ཅད་རང་བཞིན་གྱིས་སྟོང་པ། ཐེར་ཟུག་མཆོག་གི་གཞི་དེ་འདོད་པ་དེ་ལྟ་བུ་ལ་སོགས་པའི་ཡོན་

ཏན་ལ་བརྟེན་པ་དག་སྟེ། ཡོན་ཏན་ལྷག་མ་ནི་བསམ་གྱིས་མི་ཁྱབ་བོ། །འོད་སྲུང་དེ་ལྟ་བས་ན་ཁྱོད་ཀྱིས་ལན་གཉིས་ལན་གསུམ་དུ་ཡང་འཁོར་སོལ་ཅིག །དེ་ནས་གནས་བརྟན་འོད་སྲུང་ཆེན་པོས་ལན་གཉིས་ལན་གསུམ་གྱི་བར་དུ་ཡང་བལྟས་ཤིང་བརྟགས་ཏེ་བསལ་
ན་སྦུན་པ་ལྟ་བུའི་སྐྱེས་བུ་ལྷག་མའི་འཁོར་དག་ཡོད་པར་འགྱུར་རོ། །ཡང་ལན་གསུམ་གྱི་བར་དུ་བསལ་བས་བསལ་བ་ན་སྐྱེས་བུ་སྦུན་པ་ལྟ་བུ་མ་ཡིན་པ་ཤ་སྟག་ཏུ་གྱུར་ཏོ། །དེ་ནས་བཅོམ་ལྡན་འདས་ཀྱིས་ཡང་གནས་བརྟན་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ད་འཁོར་འདི་དག་
དག་པ་སྙིང་པོར་གྱུར་པ་ཡིན་མོད། ཡང་བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འཁོར་འདི་ལེགས་པར་སྦྱངས་པ་ལེགས་སོ་ལེགས་སོ། །གསོལ་པ། བཅོམ་ལྡན་འདས་ཇི་ལྟར་འཁོར་ཡོངས་སུ་སྦྱངས་པ་ལགས། སྟོན་ཀའི་ཟླ་བ་ཉ་བ་ལ་རྣམ་པར་དག་པ་བཞིན་ནོ། །
འོད་སྲུང་འདི་ལྟ་སྟེ་དཔེར་ན། རྩིས་མཁན་ནམ། རྩིས་མཁན་གྱི་སློབ་མས། སྔོན་གྱི་སྡོམ་པས་བསྡམས་པ་ལ་འགོད་པའི་ཆས་ཕྲིན་ལྷག་མ་གང་ཡིན་པ་དེ་འདུག་པ་ཇི་ལྟ་བ་དེ་བཞིན་དུ་འཁོར་ལྷགས་པ་གང་ཡིན་པ་འདི་དག་ཐམས་ཅད་ཅེས་བྱ་བ་ནས་གྲངས་མེད་པ་དཔག་ཏུ་མེད་པ་ཞེས་
བྱ་བའི་བར་སྔ་མ་བཞིན་ནོ། །འོད་སྲུང་དེ་དག་ལས་བྱེ་བ་བརྒྱ་སྟོང་གི་ཆའི་ཆ་གང་དག་ཡིན་པ་ནི་མི་མཆོག་བག་ཚ་བ་མེད་པའི་འཁོར་འདུག་པ་འདི་དག་ཡིན་གྱིས་འོད་སྲུང་ད་ཡང་ཁྱོད་ཀྱིས་འཁོར་རྣམས་ལ་གྲོགས་པོ་དག་ཅི་ཁྱེད་ཅག་རྔ་བོ་ཆེ་ཆེན་པོ་ཞེས་བྱ་བའི་མདོ་ཆེན་པོ་ཡངས་པ་ཐེག་པ་
གཅིག་པ་འདི་ལྟ་སྟེ། ཐེག་པ་ཆེན་པོ་དད་པར་དཀའ་བ། ཡིད་ཆེས་པར་དཀའ་བ་འདི་མཉན་པར་ནུས་སམ་ཞེས་དྲིས་ཤིག །འོད་སྲུང་དེ་བཞིན་དུ་ཁྱོད་ཀྱིས་ལན་གཉིས་ལན་གསུམ་དུ་ཡང་འཁོར་རྣམས་ལ་དྲིས་ཤིག །བཅོམ་ལྡན་འདས་ལེགས་སོ་ཞེས་གསོལ་ནས།
དེ་ནས་གནས་བརྟན་འོད་སྲུང་ཆེན་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལངས་ཏེ་ལན་གསུམ་དུ་བསྐོར་བ་བྱས་ནས་འཁོར་མང་པོ་དེ་ལ་སྨྲས་པ། ཤེས་ལྡན་དག་

ཅི་རྔ་བོ་ཆེ་ཆེན་པོ་ཞེས་བྱ་བའི་མདོ་ཉན་པའི་འོས་ཡིན་ནམ། དེ་བཞིན་གཤེགས་པའི་ཐེག་པ་ཆེན་པོ་གཅིག་པ་འདི་ལྟ་སྟེ། ཐེག་པ་ཆེན་པོ་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡུལ་ལས་འདས་པ་དེ་ཁྱོད་ལ་སྟོན་པར་འགྱུར་རོ། །དེ་བཞིན་དུ་གནས་བརྟན་འོད་སྲུང་ཆེན་
པོས་ལན་གཉིས་ལན་གསུམ་དུ་ཡང་སྐུལ་བ་བསྐུལ་བ་དང་། དེ་རྣམས་ཀྱིས་སྨྲས་པ། བཙུན་པ་འོད་སྲུང་བདག་ཅག་དམ་པའི་ཆོས་མཉན་པའི་ཆེད་དུ་མཆིས་ལགས་པས་ཉན་པར་འཚལ་གྱིས། བཙུན་པ་འོད་སྲུང་དེ་བཞིན་གཤེགས་པས་བདག་ཅག་ལ་ཐུགས་བརྩེ་བས་ཉེ་
བར་བཟུང་སྟེ། མདོ་ཆེན་པོ་དེ་ལེགས་པར་བསྒྲགས་པ་མཛད་དུ་གསོལ། འོད་སྲུང་ཆེན་པོས་སྨྲས་པ། ཇི་ལྟར་ཡིད་ཆེས་པར་འགྱུར། དེ་དག་གིས་སྨྲས་པ། བཙུན་པ་འོད་སྲུང་དཔེར་ན་སྐྱེས་བུ་བཙས་ནས་ལོ་ཉི་ཤུ་ལོན་པ་ཞིག་ལ་བུ་ལོ་བརྒྱ་ལོན་པ་དག་ཡོད་དོ་ཞེས་
སྨྲས་པ་ལ་གལ་ཏེ་དེ་བཞིན་གཤེགས་པ་དེ་ཁོ་ན་བཞིན་དུ་གསུང་ན། བདག་ཅག་གིས་ཀྱང་དེ་བཞིན་དུ་ཡིད་ཆེས་པར་བགྱི་ལགས་ན་བཙུན་པ་འོད་སྲུང་དམ་པའི་ཆོས་མཉན་པ་ལྟ་སྨོས་ཀྱང་ཅི་འཚལ། དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་ཅི་གསུང་བ་དེ་བཞིན་དུ་མཛད་
པ། དེ་བཞིན་གཤེགས་པ་ནི་ཀུན་ནས་སྤྱན་མངའ་བ། དེ་བཞིན་གཤེགས་པ་ནི་སངས་རྒྱས་ཀྱི་སྤྱན་གྱིས་གཟིགས་པ་ཡིན་ནོ། །བཙུན་པ་འོད་སྲུང་གཞན་ཡང་བདག་ཅག་ནི་དེ་བཞིན་གཤེགས་པས་མཁྱེན་ཏོ། །སྨྲས་པ། ཤེས་ལྡན་དག་ཁྱེད་ཅག་ནི་རྔ་བོ་ཆེ་ཆེན་པོའི་མདོ་ཆེན་
པོ་མཉན་པ་དང་། བཀླག་པ་དང་། གཟུང་བ་དང་། བསྟན་པའི་འོས་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འདི་ནི་ཇི་ལྟར་སྐྱེས་བུ་བཙས་ནས་ལོ་ཉི་ཤུ་ལོན་པའི་བུ་ལོ་བརྒྱ་ལོན་པ་དག་ལྟར་རྔ་བོ་ཆེ་ཆེན་པོའི་མདོ་འདི་ཡང་དེ་དང་འདྲའོ། །དེ་ཅིའི་ཕྱིར་ཞེ་ན། དེ་
བཞིན་གཤེགས་པ་ཡོངས་སུ་མྱ་ངན་ལས་འདས་བཞིན་དུ་ད་དུང་དུ་གནས་སོ་ཞེས་བྱ་བ་དང་། བདག་ཡོད་པ་མ་ཡིན་ཞིང་བདག་གི་ཡོད་པ་མ་ཡིན་པ་དག་ལ་ཡང་བདག་ཅེས་བྱ་བས་སོ། །དེ་དག་གིས་གསོལ་པ། དེ་ནི་བཅོམ་ལྡན་འདས་ཁོ་ནས་མཁྱེན་པས་བཅོམ་ལྡན་འདས་ཀྱིས་ཇི་སྐད་

གསུངས་པ་དེ་བཞིན་དུ་གཟུང་བར་བགྱི་ལགས་སོ། །འོད་སྲུང་གིས་གསོལ་པ། བཅོམ་ལྡན་འདས་དེ་བཞིན་གཤེགས་པས་ད་ནི་རྔ་བོ་ཆེ་ཆེན་པོའི་མདོ་ཆེན་པོ་བཤད་དུ་གསོལ། བཅོམ་ལྡན་འདས་ཀྱིས་ཆོས་ཀྱི་རྔ་བོ་ཆེ་བརྡུང་དུ་གསོལ། བཅོམ་ལྡན་འདས་ཀྱིས་
ཆོས་ཀྱི་དུང་བུད་དུ་གསོལ། བཀའ་སྩལ་པ། འོད་སྲུང་ལེགས་སོ་ལེགས་སོ། །འོད་སྲུང་ད་ནི་ཁྱོད་རྔ་བོ་ཆེ་ཆེན་པོའི་མདོ་ཆེན་པོ་འདི་ཉོན་ཅིག །གསོལ་པ། བཅོམ་ལྡན་འདས་བདག་ཅག་གིས་མཉན་པར་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གལ་ཏེ་བདག་གི་སྤྱོད་
ཡུལ་དུ་མ་གྱུར་ཀྱང་དེ་བཞིན་གཤེགས་པས་བདག་རྔ་བོ་ཆེ་ཆེན་པོའི་སླད་དུ་བདག་ལ་གུས་པར་མཛད་ལགས་པས་སོ། །ཡང་གསོལ་པ། ཇི་ལྟར་ལགས་ཞེ་ན་བཅོམ་ལྡན་འདས་ཀྱིས་བདག་ལ་འདི་སྐད་ཅེས་འོད་སྲུང་ཁྱོད་ང་དང་ལྷན་ཅིག་འདུག་གིས་ཚུར་ཤོག་ཅེས་གསུངས་ཏེ།
བཅོམ་ལྡན་འདས་བདག་ནི་དོན་དེའི་སླད་དུ་བགྱིས་པ་གཟོ་བར་བགྱིས་པ་ཚོར་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ལེགས་སོ་ལེགས་སོ། །ངས་ཀྱང་དོན་འདིའི་ཕྱིར་གསུངས་སོ། །འོད་སྲུང་དཔེར་ན་རྒྱལ་པོ་གསལ་རྒྱལ་གྱིས་གླང་པོ་ཆེ་དང་།
རྟ་དང་། དམག་མི་རྣམས་ཁ་ཟས་དང་། བཟའ་བ་དང་། བཏུང་བ་དང་། བལྡག་པ་ལ་སོགས་པས་གསོར་འཇུག་གོ། །དེ་ཅིའི་ཕྱིར་ཞེ་ན། གང་གི་ཚེ་བདག་རྔ་བོ་ཆེ་དང་། རྫ་རྔ་དང་། དུང་གི་སྒྲ་ཤིན་ཏུ་ཆེན་པོ་འབྱིན་པ་དང་། གདུགས་དང་། རྒྱལ་མཚན་དང་། བ་
དན་དག་བསྒྲེང་བ་དང་། གང་གི་ཚེ་ཕ་རོལ་གྱི་དཔུང་གི་ཚོགས་ཆེན་པོ་ཉེ་བར་གནས་པར་གྱུར་པ་དེའི་ཚེ། བདག་གིས་གསོར་བཅུག་པའི་ཕན་ཡོན་རྗེས་སུ་དྲན་ནས་ཕ་རོལ་གྱི་དམག་ཚོགས་དང་ལྷན་ཅིག་གཡུལ་འགྱེད་པར་འགྱུར་ཞིང་དེའི་ཚེ་སེམས་ཅན་རྣམས་ལ་ཡང་ཕན་པ་
བྱེད་པར་འགྱུར། བདག་གི་བཀའ་ལ་ཡང་ཕན་པ་བྱེད་པར་འགྱུར་རོ་སྙམ་སྟེ། དེ་དག་ཀྱང་དེ་བཞིན་དུ་འགྱུར་རོ། །འོད་སྲུང་དེ་བཞིན་དུ་ང་ཡོངས་སུ་མྱ་ངན་ལས་འདས་ན་ཡང་ཁྱོད་ཀྱིས་རྔ་བོ་ཆེ་ཆེན་པོའི་མདོ་འདི་འབྱིན་པར་འགྱུར་རོ་ཞེས་ངས་ཁྱོད་ལ་སྟན་གྱི་ཕྱེད་

བསྟབས་པ་ཡིན་གྱིས་ངེས་པ་ཁོ་ནར་དེ་བཞིན་དུ་གྱིས་ཤིག །གསོལ་པ། བཅོམ་ལྡན་འདས་བདག་ནི་ཁྱོད་ཀྱི་ཐུགས་ལས་སྐྱེས་པའི་སྲས་ཀྱི་ཐུ་བོར་གཞག་པའི་རིགས་ལགས་སོ། །བཀའ་སྩལ་པ། འོད་སྲུང་དཔེར་ན་ཀོ་ས་ལའི་རྒྱལ་པོ་གསལ་རྒྱལ་རང་གི་བུ་རྣམས་ལ་
འདི་དག་ནི་མ་འོངས་པའི་དུས་ན་བདག་གི་རིགས་འཚོབ་པར་འགྱུར་རོ་ཞེས་བསྟན་བཅོས་སྣ་ཚོགས་དང་། བཟོའི་གནས་རྣམས་ལ་སྦྱོང་བར་བྱེད་པ་དེ་བཞིན་དུ་འོད་སྲུང་ཁྱོད་ཀྱང་ང་འདས་ནས་མདོ་འདི་འབྱིན་པར་འགྱུར་རོ། །འོད་སྲུང་དཔེར་ན་ཀོ་ས་ལའི་རྒྱལ་པོ་གསལ་རྒྱལ་རྒྱལ་པོ་མང་
པོས་བསྔོས་ནས་དེ་རྣམས་དང་ལྷན་ཅིག་གཡུལ་འགྱེད་པ་དེ་དང་དེའི་དུས་ཀྱི་དམག་མི་གླང་པོ་ཆེ་བ་དང་། རྟ་པ་དང་། དཔུང་བུ་ཆུང་གང་དག་ཡིན་པ་ལས་གོ་ཆ་བཟང་པོ་བགོས་ཤིང་རྔ་བོ་ཆེ་ཆེན་པོ་དང་། དུང་གི་སྒྲ་ཐོས་ན་མི་དངང་མི་སྐྲག་ཅིང་བྲེད་པར་མི་འགྱུར་བ་གང་ཡིན་པ་དེ་དག་ལ་ནི་
རྒྱལ་པོས་བཟའ་བ་དང་། བཅའ་བ་དང་། ཟས་དང་། སྐོམ་དང་། གོས་དང་། རྒྱན་དང་། ལྷབ་ལྷུབ་དང་། ཆས་དག་སྦྱིན་པར་བྱེད་དོ། །དེ་ལས་གཞན་པ་གཡུལ་ངོར་ཞུགས་ནས་གཡུལ་འགྱེད་པའི་དམག་མི་གང་ཡིན་པ་དེ་དག་ལ་ནི་གསེར་དང་། ནོར་བུ་དང་། མུ་ཏིག་
ལ་སོགས་པ་དང་། གྲོང་རྡལ་དང་། ཡུལ་རྣམས་སྦྱིན་པར་བྱེད་དོ། །དེ་ན་སྐྱེས་བུ་དཔའ་བོ་སྡེ་དང་བཅས་པར་ཕྱིར་མི་ལྡོག་པ། གླང་པོ་ཆེ་བ་དང་། རྟ་པ་དང་། ཤིང་རྟ་པ་དང་ལྡན་པས་དགྲའི་དཔུང་ཕམ་པར་བྱེད་པ་གང་ཡིན་པ་དེ་དག་ནི་རྒྱལ་པོ་རང་གིས་རིག་པར་བྱས་ནས་རྒྱལ་ཚབ་ཏུ་
དབང་བསྐུར་བའི་ཅོད་པན་བཅིང་བར་བྱེད་དོ། །འོད་སྲུང་དེ་བཞིན་དུ་ངའི་ཉན་ཐོས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་བསླབ་པ་ལེགས་པར་ཇི་ལྟར་བཅས་པ་ལ་ལེགས་པར་བསླབས་པ་གང་ཡིན་པ་དེ་དག་དང་། སོ་སོར་ཐར་པའི་སྡོམ་པས་བསྡམས་པ་
དང་། འདུལ་བའི་ཆོ་ག་དང་། སྤྱོད་ཡུལ་ལ་གནས་པ་དེ་དག་ལ་ནི་དེ་བཞིན་གཤེགས་པས་ལྷ་དང་མིའི་བདེ་བ་སྦྱིན་པར་མཛད་དོ། །དེ་ལས་གཞན་པས་ཕུང་པོའི་བདུད་དང་། ཉོན་མོངས་པའི་བདུད་དང་། འཆི་བདག་གི་བདུད་དང་། ལྷའི་བུའི་བདུད་ཕམ་པར་བྱེད་པ་གང་ཡིན་པ་དེ་

དག་ལ་ནི་དེ་བཞིན་གཤེགས་པས་འཕགས་པའི་བདེན་པ་བཞིའི་རྣམ་པར་གྲོལ་བའི་ཅོད་པན་འཆིང་བར་མཛད་དོ། །དེ་ལས་གཞན་པའི་རྒྱ་ཆེན་པོ་ལ་ལྷག་པར་མོས་པ་དེ་བཞིན་གཤེགས་པའི་སྙིང་པོའི་ཆེ་བའི་བདག་ཉིད་རྟག་པ་དང་། བརྟན་པ་དང་། ཞི་བ་དང་། ཐེར་ཟུག་པ་
འདོད་པའི་སེམས་ཅན་གང་ཡིན་པ་དེ་དག་ལ་ནི་དེ་བཞིན་གཤེགས་པས་རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཐེག་པ་ཆེན་པོ་དབང་བསྐུར་བའི་ཅོད་པན་འཆིང་བར་མཛད་དོ། །འོད་སྲུང་དེ་བཞིན་དུ་ཁྱོད་ཀྱང་དེ་རིང་ཐེག་པ་ཆེན་པོའི་དབང་བསྐུར་བའི་ཅོད་པན་བཅིངས་ཏེ།
སངས་རྒྱས་བརྒྱ་སྟོང་ཕྲག་མང་པོའི་སྤྱན་སྔ་ནས་རྔ་བོ་ཆེ་ཆེན་པོའི་མདོ་འདི་འབྱིན་པར་འགྱུར་རོ། །དེ་ལྟ་བས་ན་འོད་སྲུང་ཁྱོད་ཀྱིས་ཀྱང་ད་ནི་ང་འདས་ནས་མདོ་འདི་འབྱུང་བའི་རིགས་སོ། །གསོལ་པ། བཅོམ་ལྡན་འདས་རེ་ཞིག་བདག་གིས་རིག་པར་ལྟ་རྔོ་མི་ཐོགས་ཀྱང་བཅོམ་ལྡན་འདས་རེ་
ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སམ་བཞུགས་ཀྱང་བདག་གིས་ཕྱུང་ནས་བསྟན་པར་བགྱི་ལགས་སོ། །བཀའ་སྩལ་པ། འོད་སྲུང་ལེགས་སོ། །ད་ནི་དེ་བཞིན་གཤེགས་པས་རྔ་བོ་ཆེ་ཆེན་པོ་ཞེས་བྱ་བའི་མདོ་ཆེན་པོ་བཤད་པ་བརྩམ་མོ། །དེ་ནས་ནམ་མཁའ་
ལས་ལྷའི་ཚོགས་དང་། འབྲུག་གི་ཚོགས་ཀྱིས་ལེགས་སོ་ཞེས་བྱ་བ་བྱིན་ཏེ། འོད་སྲུང་ལེགས་སོ་ལེགས་སོ། །སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ད་ནི་ལྷ་རྣམས་དང་། འབྲུག་གི་ཚོགས་རྣམས་ཀྱང་མེ་ཏོག་གི་ཆར་འབེབས་ཤིང་བདུད་རྩིའི་ཆུས་གང་བའི་ཕྱེ་
མའི་ཆར་གྱི་རྒྱུན་ཆེན་པོ་ཡང་འབེབས་སོ། །འོད་སྲུང་ཁྱོད་བཅོམ་ལྡན་འདས་ཀྱི་ཞལ་དང་ཐུགས་ལས་སྐྱེས་པ་སྟེ་དེ་བཞིན་གཤེགས་པའི་སྲས་ཀྱི་ཐུ་བོར་འོས་སོ། །དེ་ནས་ལྷའི་ཚོགས་དང་། འབྲུག་གི་ཚོགས་ཀྱིས་སྐད་འཐུན་པར་ཚིགས་སུ་བཅད་པ་འདི་སྨྲས་སོ། །
མཉན་ཡོད་གྲོང་ཁྱེར་དག་ཏུ་རྔ་ཆེན་དང་། །ཤིན་ཏུ་རྔ་ཆེན་དུང་རྣམས་སྒྲོགས་པ་ན། །མགོན་པོ་ཆོས་ཀྱི་རྗེ་ཡིས་རྒྱལ་བྱེད་ཀྱི། །ཚལ་དུ་ཆོས་ཀྱི་རྔ་ཆེན་སྒྲོགས་པར་མཛད། །འོད་སྲུང་ཁྱོད་ཀྱིས་ཆོས་རྔ་བརྡུང་བར་གྱིས། །ཆོས་ཀྱི་རྒྱལ་པོ་དག་གིས་གསུངས་པའི་མདོ། །ཞུ་

བའི་དབྱིག་གུས་ཆོས་རྔ་ཆེ་བརྡུངས་ན། །ལྷའི་ལྷས་ཆོས་མང་ཐེ་ཙོམ་གཅོད་པར་མཛད། །རྔ་བོ་ཆེ་ཆེན་པོའི་མདོ་ཆེན་པོ་ལས་འོད་སྲུང་འོངས་པ་ཞེས་བྱ་བའི་ལེའུའོ།། །།དེ་ནས་བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་བཀའ་
སྩལ་ཏོ། །འོད་སྲུང་ངས་སྔར་མདོ་འདི་ལས་གོང་ནས་གོང་དུ་དགེ་སློང་ཡངས་པ་ལ་དད་པའི་ཡིད་ཅན་ཞེས་བྱ་བ་ཞིག་ཡོད་ཅེས་བཤད་པ་དགེ་སློང་དེའི་མིང་། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། སེམས་ཅན་གང་དག་གིས་ཐོས་པའི་སེམས་ཅན་
དེ་དག་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་དབྱུང་བར་འགྱུར་རོ། །དེ་ཅིའི་ཕྱིར་ཞེ་ན། འོད་སྲུང་འདི་ལྟ་སྟེ་དཔེར་ན། ཀོ་ས་ལའི་རྒྱལ་པོ་གསལ་རྒྱལ་ལ་འཚོ་བྱེད་ཀྱི་བུ་སྨན་མཆོག་ཅེས་བྱ་བ་ཡོད་དེ། དེ་གང་གི་ཚེ་རྒྱལ་པོ་གསལ་རྒྱལ་
ཕ་རོལ་གྱི་དམག་ཚོགས་དང་ལྷན་ཅིག་གཡུལ་འགྱེད་པར་འགྱུར་ལ་དེ་ནས་རྒྱལ་པོས་གཡུལ་ཤོམ་པ་ན་སྨན་པ་སྨན་མཆོག་བཀུག་སྟེ། བཀུག་ནས་འདི་སྐད་ཅེས། ཀྱེ་སྨན་པ་སྨན་གང་གིས་སེམས་ཅན་གང་དང་གང་དག་ཟུག་རྔུས་ཟུག་པར་གྱུར་པའི་སེམས་ཅན་དེ་དང་དེ་དག་ཇི་ལྟ་
ཇི་ལྟར་ཟུག་རྔུ་དབྱུང་བར་འགྱུར་བ་དེ་ལྟ་བུའི་སྨན་ད་སྦྱོར་ལ་མྱུར་དུ་ཁྱེར་ཏེ་ཤོག་ཤིག །དེ་ནས་སྨན་པ་སྨན་མཆོག་དེས་སྨན་གྱི་རྒྱལ་པོ་དུག་སྨན་རྟོལ་པ་ཞེས་བྱ་བ་ཁྱེར་ནས་རྒྱལ་པོ་ཆེན་པོ་གཡུལ་ངོར་འཇུག་པའི་རྔ་བོ་ཆེ་ལ་སྨན་དེས་བྱུགས་ཤིང་བདུགས་ཏེ་བརྡུངས་སོ། །བྱུགས་ཤིང་བདུགས་
ཏེ་བརྡུངས་མ་ཐག་ཏུ་སེམས་ཅན་ཟུག་རྔུས་ཟུག་པར་གྱུར་པ་གང་དག་ཡིན་པ་དེ་དག་གིས་སྒྲ་དེ་དཔག་ཚད་དམ། དཔག་ཚད་གཉིས་སུ་ཐོས་ནས་ཐོས་པ་ཙམ་གྱིས་སེམས་ཅན་དེ་དང་དེ་དག་ཐམས་ཅད་ཀྱི་ཟུག་རྔུ་རྣམས་དབྱུང་བར་འགྱུར། ཟུག་རྔུ་རྣམས་བསལ་བར་འགྱུར་རོ། །འོད་སྲུང་དེ་
བཞིན་དུ་དགེ་སློང་ཡངས་པ་ལ་དད་པའི་ཡིད་ཅན་དེའི་མིང་ཐོས་པའི་སེམས་ཅན་གང་དག་ཡིན་པ་དེ་དག་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་དབྱུང་བར་འགྱུར་རོ། །དེ་ཅིའི་ཕྱིར་ཞེ་ན། དེས་ངའི་བསྟན་པ་ལ་མདོ་འདི་ཕྱུང་ཞིང་རྒྱས་པར་བྱས་ཏེ། དེ་

བས་ན་ཆོས་དང་ལྡན་པ་མངོན་སུམ་དུ་བྱས་པ་དེའི་མཐུའོ། །འོད་སྲུང་ལྟོས། རེ་ཞིག་རྒྱལ་པོའི་རྔ་བོ་ཆེ་སེམས་མེད་པ་ཕལ་པ་དེ་ཡང་སེམས་དང་བཅས་པས་སྨན་གྱིས་བྱུགས་ཤིང་བདུགས་ཏེ་བརྡུངས་མ་ཐག་ཏུ་སེམས་ཅན་རྣམས་ལ་ཕན་པ་སྐྱེད་པར་བྱེད་ན། བྱང་ཆུབ་
སེམས་དཔའ་སེམས་དཔའ་ཆེན་པོ་ཡངས་པ་ལ་དད་པའི་ཡིད་ཅན་གྱི་མིང་ཐོས་པས་སེམས་ཅན་རྣམས་ཀྱི་ཉོན་མོངས་པ་རྣམ་པ་གསུམ་འབྲལ་བར་འགྱུར་བ་ལྟ་སྨོས་ཀྱང་ཅི་དགོས། གལ་ཏེ་དེ་ལྟར་རེ་ཞིག་བྱང་ཆུབ་སེམས་དཔའི་མིང་ཐོས་པས་སེམས་ཅན་རྣམས་ཀྱི་འདོད་ཆགས་
དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྲལ་བར་འགྱུར་ན། བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་སངས་རྒྱས་བཅོམ་ལྡན་འདས་རྣམས་ཀྱི་མཚན་བརྗོད་པའམ། ཡོན་ཏན་ཡོངས་སུ་བསྒྲགས་པ་ལྟ་སྨོས་ཀྱང་ཅི་དགོས། གལ་ཏེ་དེ་ལྟར་བཅོམ་
ལྡན་འདས་ཤཱཀྱ་ཐུབ་པའི་མཚན་ཙམ་གྱིས་སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྲལ་བར་འགྱུར་ན་སེམས་ཅན་ལ་ཕན་པ་སྟོན་པ་ཞིག་གིས་རྔ་བོ་ཆེ་ཆེན་པོའི་མདོ་འདི་ལས་འགྲེས་སམ། ཚིགས་སུ་བཅད་པའམ། ཚིག་འགའ་
ཙམའམ། མིང་ཙམ་བསྟན་པའམ། ལེའུ་སྟོན་ན་སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྲལ་བར་འགྱུར་བ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། ངས་དགེ་སློང་དག་ཚུལ་ཁྲིམས་དང་ལྡན་པའི་སེམས་ཀྱི་སྨོན་ལམ་འགྲུབ་
བོ་ཞེས་བཤད་དེ། སྔོན་སྨོན་ལམ་ལེགས་པར་སྦྱང་བ་བྱས་པའི་ཕྱིར་རོ། །འདི་ནི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཉིད་ཡིན་ཏེ། འདི་ལྟ་སྟེ། རྔ་བོ་ཆེ་ཆེན་པོའི་མདོ་ཆེན་པོས་མ་བྱས་པ། མ་བྱུང་བ། མ་འགགས་པའོ། །འོད་སྲུང་ཁྱོད་ཀྱང་དེ་ལྟ་བས་
ན་མ་འོངས་པའི་དུས་ན་ང་དང་འདྲ་བར་འགྱུར་རོ། །དེ་ཅིའི་ཕྱིར་ཞེ་ན། ཁྱོད་ཀྱི་ཡང་མིང་ཐོས་པའི་དགེ་སློང་ངམ། །དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ཡིན་པ་དེ་དག་དང་། སེམས་ཅན་དེ་དག་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་

གི་ཟུག་རྔུ་རྣམས་འབྲལ་བར་འགྱུར་རོ། །དེའི་ཕྱིར་འོད་སྲུང་ཁྱོད་ཀྱང་མདོ་འདི་ཞུས་ནས་ཡུན་རིང་པོར་འཇིག་རྟེན་དུ་འབྱིན་པར་འགྱུར་རོ། །གསོལ་པ། བཅོམ་ལྡན་འདས་གལ་ཏེ་དེ་ལྟ་ལགས་ན་རྔ་བོ་ཆེ་ཆེན་པོའི་མདོ་ཆེན་པོ་དེ་ལས་ཕྱོགས་འགའ་ཙམ་ཞིག་བདག་ལ་ལེགས་པར་བཤད་
དུ་གསོལ། །འོད་སྲུང་དུས་ལ་བབ་ཀྱིས་ཁྱོད་ང་ལ་ཕྱོགས་འགའ་ཞིག་ཞུས་ཤིག །འོད་སྲུང་གིས་ལེགས་སོ་ཞེས་གསོལ་ནས་ཞུ་བ་འདི་ཞུས་སོ། །བཅོམ་ལྡན་འདས། གང་ན་སྲིད་ཡོད་སྲིད་པ་དེར་སྡུག་བསྔལ། །གང་ན་སྲིད་མེད་སྡུག་བསྔལ་མེད་པ་ཡི། །མྱ་ངན་
འདས་པ་དེ་ནི་མཆོག་ཏུ་བདེ། །བདེ་སྡུག་སྤང་ཕྱིར་མྱ་ངན་འདས་མཆོག་འགྱུར། །སྲིད་པ་ཡོད་ན་བདེ་དང་སྡུག་བསྔལ་ཏེ། །སྲིད་པ་མེད་ན་བདེ་དང་སྡུག་བསྔལ་མེད། །དེའི་ཕྱིར་མྱ་ངན་འདས་ཐོབ་འདོད་པ་ཡིས། །རིགས་ཀྱི་བུ་ཡིས་སྲིད་འདོད་ཡོངས་སུ་གཅད། །ཅེས་བཀའ་
སྩལ་པ་འདིའི་དོན་ཅི་ལགས། འདིར་ཚིགས་སུ་བཅད་པས་ལེགས་པར་བཀའ་སྩལ་པ། སྲེད་པ་ཐམས་ཅད་མི་རྟག་མི་བརྟན་ལ། །ཐམས་ཅད་དུ་ཡང་སྙིང་པོ་མེད་པས་ན། །སྲིད་པ་གང་ཡིན་དེ་ནི་སྡུག་བསྔལ་ཏེ། །གང་ལ་སྲིད་མེད་དེ་ན་སྡུག་བསྔལ་མེད། །སྲིད་པ་
ཡོད་པ་མིན་ན་སྡུག་བསྔལ་མེད། །འདི་ན་སྲིད་ཡོད་སྡུག་བསྔལ་འགྱུར་བས་ན། །སྲིད་ལ་མངོན་པར་དགའ་བར་མི་བྱ་ཞིང་། །སྲིད་པ་རྣམས་ལ་ཡིད་བརྟན་འགྲོ་མི་བྱ། །བཅོམ་ལྡན་སྲིད་དང་སྲིད་པ་མེད་པ་དང་། །བདེ་དང་སྡུག་བསྔལ་འགྱུར་བ་ཡོད་པར་སྟོན། །དེ་སྐད་ཅེས་གསུངས་
ནས། བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་དེ་ལྟར་ཚིག་གི་དོན་འདི་ནི་བརྟན་པའི་ཚིག་གི་དོན་ཡིན་པས་རེ་ཞིག་འོད་སྲུང་ཁྱོད་ཀྱིས་མི་ཤེས་སོ། །སེམས་ཅན་ནི་ཕལ་ཆེར་སྲིད་པ་གཅོད་པར་མི་བྱེད་དེ། སེམས་ཅན་
རྣམས་ནི་འདུ་བྱེད་སྐུད་པས་བརྒྱུས། །སྲིད་མེད་མྱ་ངན་འདས་པ་མཆོག་ཏུ་བདེ། །འོད་སྲུང་གིས་གསོལ་པ། གང་གིས་མྱ་ངན་འདས་ཐོབ་པ། །མྱ་ངན་འདས་པ་དེ་མི་གནས། །དེ་ལ་བདེ་བ་མིང་ཙམ་སྟེ། །མིས་ནི་མྱོང་བར་འགྱུར་མ་མཆིས། །བཅོམ་ལྡན་འདས་ཀྱིས་བཀའ་

སྩལ་པ། ཐར་པ་བརྟན་པ་མིང་ཙམ་མིན། །ཡོད་དང་མེད་དང་ཐེར་ཟུག་ག་གཞི། །དེ་ལྟ་བས་ན་འདི་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡུལ་མ་ཡིན་ཞིང་སྤྱོད་ཡུལ་མ་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་གཟུགས་ཀྱང་ལགས་
ལ་ཐེར་ཟུག་ཀྱང་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དཔེར་ན་ལྷོ་ཕྱོགས་ཀྱི་ཡུལ་སྐྱེ་བོའི་བཅོམ་བརླག་ཅེས་བྱ་བ་ནས་སེམས་ཅན་གཞན་འགའ་ཞིག་འོངས་པར་གྱུར་ལ། མི་དེ་ལ་མི་འགའ་ཞིག་གིས་ཁྱོད་གང་ནས་འདིར་འོངས་ཞེས་དྲིས་པ་དང་། དེ་ནས་
དེས་སྨྲས་པ། ཁོ་བོ་ནི་ལྷོ་ཕྱོགས་ཀྱི་བཅོམ་བརླག་ནས་འོངས་སོ། །མིས་ཡང་སྨྲས་པ། དེ་ཡུལ་གྱི་ཕྱོགས་གང་ན་ཡོད། དེ་ནས་མི་དེས་མཛུབ་མོས་ལྷོ་ཕྱོགས་ཀྱི་ལམ་གྱི་ནམ་མཁའ་བསྟན་ན། འོད་སྲུང་མི་དེས་མི་དེ་ལ་ཇི་ག་ཡིད་ཆེས་པར་འགྱུར་རམ། དེ་ཅིའི་ཕྱིར་ཞེ་
ན། སོང་ན་དེ་མཐོང་བར་འགྱུར་རོ། །འོད་སྲུང་དེ་བཞིན་དུ་ཁྱོད་ཀྱིས་མ་མཐོང་བར་དད་པས་ཡིད་ཆེས་པར་གྱིས་ཤིག།། །།འཕགས་པ་རྔ་བོ་ཆེ་ཆེན་པོའི་ལེའུ་བམ་པོ་གཉིས་པ། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་བཀའ་སྩལ་ཏོ། །
ཇི་ལྟར་མཁའ་ལ་མཛུབ་མོས་སྟོན་པ་ལྟར། །དེ་བཞིན་ཐར་པ་མིང་ཙམ་གྱིས་བསྟན་ཏོ། །ཇི་ལྟར་ལྷོ་ཕྱོགས་བཅོམ་བརླག་མི་བཞིན་དུ། །དེ་བཞིན་ང་ཉིད་བརྟེན་པ་མེད་ནས་བྱོན། །འོད་སྲུང་འདི་ལའང་དོན་མཐོང་ན། །རྒྱུ་ནི་དགོས་པ་ཡོད་མེད་དེ། །མངོན་སུམ་མ་གྱུར་
དོན་ལ་ནི། །རྒྱུ་དང་རྐྱེན་ཀྱང་དེ་བཞིན་ནོ། །འོད་སྲུང་དེ་ལྟ་བས་ན་སངས་རྒྱས་བཅོམ་ལྡན་འདས་ཀྱིས་རྒྱུ་དུ་མས་ཐར་པའི་ཚིག་གི་དོན་ཉེ་བར་སྟོན་པར་མཛད་དོ། །བཀའ་སྩལ་པ། འོད་སྲུང་རྒྱུ་ཞེས་བྱ་བ་ཅི་ཡིན་པར་འདོད། གསོལ་པ། རྒྱུ་ནི་བྱེད་རྒྱུ་ཞེས་བགྱི་བ་ལགས་
སོ། །བཅོམ་ལྡན་འདས་ཀྱིས་བཀའ་སྩལ་པ། རྐྱེན་ཅེས་བྱ་བ་གང་གི་ཚིག་བླ་དགས་ཡིན། གསོལ་པ། བཅོམ་ལྡན་འདས་རྐྱེན་ཅེས་བགྱི་བ་དེ་ནི་རྟེན་ལགས་སོ། །བཀའ་སྩལ་པ། འོད་སྲུང་རིགས་པའི་དཔེ་དང་། རྒྱུ་དང་ཉེ་བར་སྦྱར་བ་དང་། བྱེད་རྒྱུ་རྣམས་ཀྱིས་

དེ་ཇི་ལྟ་བུ་ཡིན་པ་དེ་ཁོ་ན་དེ་བཞིན་དུ་གསལ་བར་སྟོན་ཅིག །གསོལ་པ། བཅོམ་ལྡན་འདས་དཔེར་ན་ཕ་དང་མ་གཉིས་འདུས་པ་ལས་བུ་འབྱུང་བར་འགྱུར་ཏེ། དེ་ལ་མ་ནི་རྒྱུ་ལགས་སོ། །ཕ་ནི་རྐྱེན་ལགས་ཏེ། དེ་ལྟ་བས་ན་ཕ་དང་མ་གཉིས་ནི་བུའི་རྒྱུ་དང་རྐྱེན་ལགས་སོ། །དེ་བཞིན་
དུ་རྒྱུ་དང་རྐྱེན་གྱིས་ཆོས་སྐྱེ་བར་འགྱུར་ཏེ། འདི་ནི་གྲུབ་པ་ཞེས་བགྱིའོ། །གྲུབ་པ་ཞེས་བྱ་བ་ཅི་ཡིན། གྲུབ་པ་ཞེས་བགྱི་བ་ནི་འཇིག་རྟེན་གྱི་གྲགས་པ་ལགས་སོ། །འཇིག་རྟེན་ཞེས་བྱ་བ་ཅི་ཡིན། འོད་སྲུང་གིས་གསོལ་པ། སེམས་ཅན་དང་ལྡན་པས་བཏགས་པ་གང་
ལགས་པའོ། །སེམས་ཅན་ཞེས་བྱ་བ་ཅི་ཡིན། སེམས་ཅན་ཞེས་བགྱི་བ་ནི་ཆོས་ཀྱི་བརྡར་བཏགས་པ་ལགས་སོ། །ཆོས་ཞེས་བྱ་བ་ཅི་ཡིན། གསོལ་པ། ཆོས་མ་ལགས་པའི་ཆོས་དང་། ཆོས་ཀྱི་ཆོས་སོ། །ཆོས་དེ་དག་ཀྱང་རྣམ་པ་གཉིས་སུ་བསྟན་ཏོ། །རྣམ་
པ་གཉིས་གང་ལགས་ཞེ་ན། འདུས་བྱས་དང་། འདུས་མ་བྱས་དང་། གཟུགས་ཅན་དང་། གཟུགས་ཅན་མ་ལགས་པ་སྟེ། དེ་ལས་མུ་གསུམ་པ་ནི་མ་མཆིས་པ་ལགས་སོ། །དེ་ལ་ཆོས་ཞེས་བྱ་བ་ཇི་ལྟ་བུ་ཡིན། གསོལ་པ། ཆོས་ཞེས་བགྱི་བ་ནི་གཟུགས་མ་
མཆིས་པ་ལགས་སོ། །བཀའ་སྩལ་པ། ཆོས་མ་ཡིན་པ་ཇི་ལྟ་བུ་ཡིན། ཆོས་མ་ལགས་པ་ཞེས་བགྱི་བ་དེ་ཡང་གཟུགས་མ་མཆིས་པ་ལགས་སོ། །བཀའ་སྩལ་པ། གལ་ཏེ་ཆོས་དང་ཆོས་མ་ཡིན་པ་གཟུགས་མེད་ཅིང་མཚན་མ་མེད་པ་ཡིན་ན་དེ་ལ་ཆོས་ནི་གང་། ཆོས་མ་
ཡིན་པ་ནི་གང་། གསོལ་པ། ཆོས་ཞེས་བགྱི་བ་ནི་མྱ་ངན་ལས་འདས་པ་ཞེས་བགྱི་བ་ལགས་སོ། །ཆོས་མ་ལགས་པ་ཞེས་བགྱི་བ་ནི་སྲེད་པ་ཞེས་བགྱི་བ་ལགས་སོ། །བཀའ་སྩལ་པ། གལ་ཏེ་དེ་ལྟར་ཆོས་དང་ཆོས་མ་ཡིན་པ་གཟུགས་མེད་ཅིང་མཚན་ཉིད་མེད་པ་
ཡིན་ན་སངས་རྒྱས་རྣམས་ཀྱིས་ཇི་ལྟར་ཅི་ཞིག་མཚན་མ་གང་གིས་འདི་ནི་ཆོས་ཡིན་ནོ་ཞེས་རྣམ་པར་མཁྱེན་པར་འགྱུར། གསོལ་པ། སེམས་ཅན་རྣམས་འཁོར་བར་སྐྱེས་ནས་དགེ་བའི་བསོད་ནམས་དང་། དགེ་བའི་རྩ་བ་རྣམ་པ་སྣ་ཚོགས་ལ་བསྟེན་པ་ན་དེའི་ཚུལ་འདི་དང་།

དེ་དེ་ལྟར་ཆོས་མངོན་དུ་ཡང་དག་པར་སྤྱད་པས་དགེ་བའི་མཚན་ཉིད་ཐམས་ཅད་ཀུན་དུ་སྐྱེ་བར་འགྱུར་བ་སྟེ། དེ་ལྟར་ཆོས་མངོན་དུ་ཡང་དག་པར་སྤྱོད་པ་གང་ལགས་པ་དེ་ལྟ་བུའི་སེམས་ཅན་དེ་དག་ནི་ཆོས་ལགས་སོ། །སེམས་ཅན་རྣམས་འཁོར་བར་སྐྱེས་ནས་བསོད་
ནམས་མ་ལགས་པ། སྡིག་པའི་ལས་རྣམ་པ་སྣ་ཚོགས་ཀུན་དུ་སྤྱོད་ཅིང་ཆོས་མ་ལགས་པ་ཀུན་སྤྱོད་པ། དེ་ཁོ་ན་ལ་སྡིག་པ་མི་དགེ་བའི་མཚན་ཉིད་དེ་དག་ཐམས་ཅད་སྐྱེ་བར་འགྱུར་ཏེ། དེ་ལྟར་ཆོས་མ་ལགས་པ་ཀུན་དུ་སྤྱོད་པ་གང་ལགས་པ་དེ་ལྟ་བུའི་སེམས་ཅན་དེ་ནི་ཆོས་མ་
ལགས་པ་ལགས་སོ། །དེ་ལ་སེམས་ཅན་ཞེས་བགྱི་བ་ནི་ནང་གི་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་ཏེ། ཁམས་བཞིས་ཡང་དག་པར་བསྡུས་ཤིང་བཏགས་པ་དང་། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་
ཀྱི་སྐྱེ་མཆེད་དྲུག་དང་། དབང་པོ་ལྔ་དང་། ཚོར་བ་དང་། འདུ་ཤེས་དང་། སེམས་པ་དང་། སེམས་དང་། ཡིད་ཀྱི་རྣམ་པར་ཤེས་པ་སྟེ། དེ་ལྟར་སྲིད་པའི་ཡན་ལག་བཅུ་གསུམ་གྱི་བར་ནི་ཆོས་ཐམས་ཅད་ཅེས་བགྱི་བ་ལགས་སོ། །བཀའ་སྩལ་པ། འོད་སྲུང་དེ་དག་
ཁོ་ན་ལ་སེམས་ཅན་གྱི་ཆོས་ཞེས་བྱ་ན། དེ་ལ་སེམས་ཅན་ཞེས་བྱ་བའི་ཆོས་གང་ཡིན་ཞེ་ན། གསོལ་པ། དེ་ལ་སེམས་ཅན་ཞེས་བགྱི་བར་བཏགས་པའི་ཆོས་འགའ་ཡང་མ་མཆིས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དཔེར་ན་ཀོ་ས་ལའི་རྒྱལ་པོ་གསལ་རྒྱལ་
གྱི་རྔ་བོ་ཆེ་ཞེས་བགྱི་བ་གང་ལགས་པ་དེའི་རྔ་བོ་ཆེ་ཞེས་བགྱི་བ་དེ་གང་ལགས། བཀའ་སྩལ་པ། འོད་སྲུང་རྔ་བོ་ཆེ་གང་ཡིན་པ་དེ་ཉིད་རྔ་བོ་ཆེ་ཡིན་པར་ཤེས་པར་བྱ་སྟེ། རྔ་བོ་ཆེ་ཞེས་བྱ་བ་ནི་པགས་པ་དང་། དབྱིག་གུ་དང་། ཤིང་ལེབ་དང་། ཆོས་འདི་གསུམ་ཚོགས་པ་གང་ཡིན་
པའི་ཆོས་དེ་དག་ལ་རྔ་བོ་ཆེ་ཞེས་བྱའོ། །གསོལ་པ། དེ་ལ་བརྡུང་བའི་མི་ལ་རྔ་བོ་ཆེ་ཞེས་བགྱི་བ་ལགས་སམ། བཀའ་སྩལ་པ། མི་མེད་པར་ཡང་རྔ་བོ་ཆེ་རླུང་གིས་བསྐྱོད་པ་ན་སྒྲ་འབྱུང་ངོ་། །གསོལ་པ། བཅོམ་ལྡན་འདས་ཅི་ལགས། རྔ་བོ་ཆེ་ཞེས་བགྱི་བ་ཆོས་སམ། འོན་

ཏེ་ཆོས་མ་ལགས་པ་ལགས། བཀའ་སྩལ་པ། རྔ་བོ་ཆེ་ཞེས་བྱ་བ་འདི་ནི་ཆོས་ཀྱང་མ་ཡིན། ཆོས་མ་ཡིན་པ་ཡང་མ་ཡིན་ནོ། །གསོལ་པ། དེ་ཅི་ཞེས་བགྱི། བཀའ་སྩལ་པ། ཆོས་གང་ཞིག་ཆོས་གང་དང་ཡང་ལྷན་ཅིག་ལྡན་པ་མ་ཡིན་ཞིང་། ཆོས་མ་ཡིན་པ་དང་ཡང་མ་ཡིན་
པ་འདི་ལུང་དུ་མ་བསྟན་པའི་ཆོས་ཞེས་བྱའོ། །གསོལ་པ། གལ་ཏེ་ལུང་དུ་མ་བསྟན་པའི་ཆོས་ཤིག་མཆིས་ན་དེས་ན་འཇིག་རྟེན་ན་ཆོས་གསུམ་མཆིས་པར་འགྱུར་རོ། །བཀའ་སྩལ་པ། ལུང་དུ་མ་བསྟན་པ་ཞེས་བྱ་བ་གང་ཡིན་པ་དེ་ནི་ཇི་ལྟར་སྐྱེས་པ་ཡང་མ་ཡིན། བུད་མེད་
ཀྱང་མ་ཡིན་པ་ལྟར་མ་ནིང་ཞེས་བྱའོ། །དཔེར་ན་ཇི་ལྟ་བུ་ལགས། བཀའ་སྩལ་པ། འོད་སྲུང་ཁྱོད་ཀྱིས་འདི་ནི་ཕ་དང་མ་འདུས་པའི་བུ་ཡིན་ནོ་ཞེས་སྨྲས་པ། གལ་ཏེ་ཕ་དང་མ་འབྲས་བུ་མེད་པར་གྱུར་ན་ཁ་ཅིག་འདི་སྐད་ཅེས། མ་དང་ཕ་ནི་རྒྱུ་དང་རྐྱེན་མ་ཡིན་ནོ་ཞེས་སྨྲ་བར་འགྱུར་
རོ། །ཡང་བཀའ་སྩལ་པ། སེམས་ཅན་ས་བོན་གྱི་