Kinh tạng Tây Tạng (Kangyur Đại Học) — 063_མདོ་སྡེ།_ཛ

་བུ་འདི་ད་ནི་བཟང་པོའི་སྐལ་པ་ཡོད་དོ་སྙམ་ནས་དེ་ནས་དེའི་ཕས་བུ་དེ་ལ་འདི་སྐད་ཅེས་
སྨྲས་སོ། །ཀྭའི་མི་ཁྱོད་དེ་རིང་གཞན་དུ་སེམས་སམ། ཅིའི་ཕྱིར་ལས་ལེགས་པ་མི་བྱེད། དེས་སྨྲས་པ་དེ་བཞིན་ཏེ། བདག་དེ་རིང་ཉིད་དུ་ཁྱོད་ཀྱི་བུ་ཉིད་དུ་ཁས་ལེན་པར་འདོད་དེ་དེས་ན་དེ་རིང་བདག་གི་སེམས་དེ་ལྟར་དད་པར་གྱུར་ཏོ། །དེས་སྨྲས་པ་ལེགས་སོ་ང་ནི་ཁྱོད་ཀྱི་ཕ་ཡིན་ལ། ཁྱོད་ནི་
ངའི་བུ་ཡིན་ན་ཁྱོད་ཀྱིས་ང་འདི་ལྟར་ཕན་པར་འདོད་ཅིང་རྗེས་སུ་བརྩེ་བ་ཡིན་པར་མ་ཤེས་ས་ཞེས་བྱས་ནས། དེ་ནས་དེས་དེ་ལ་རང་དབང་བའི་ནོར་གྱི་མཛོད་མང་པོ་ཐམས་ཅད་བྱིན་ནས་སྐྱེ་བོའི་ཚོགས་ཆེན་པོའི་དབུས་སུ་དེ་མངོན་སུམ་དུ་བྱས་ཏེ། འདི་སྐད་ཅེས་འདི་ནི་བདག་གི་བུ་གཅིག་པ་ཡིན་ཏེ།

སྟོར་ནས་རིང་ཞིག་ལོན་པ་ལས་འདི་སླར་འཁོར་ཏེ། རང་གི་ཁྱིམ་དུ་ཞུགས་ནས་འདིས་འདི་ནི་བདག་གི་ཕའི་ཁྱིམ་ཡིན་ནོ་ཞེས་བྱ་བར་མ་ཤེས་མ་རྟོགས་ནས་དེའི་ཚེ་འདིས་ཁྱོད་ནི་བདག་གི་ཕའོ། །བདག་ནི་བུའོ་ཞེས་བྱ་བའི་མིང་ཡང་མི་འདོད་པ་ཉིད་ལས་ད་ལྟར་འདི་མོད་ལ་བུ་
ཡིན་ནོ་ཞེས་ཚིག་ཏུ་སྨྲས་སོ་ཞེས་སྨྲས་པ་དེའི་ཚེ་དེ་ནས་སྐྱེ་བོ་མང་པོས་ཀྱེ་མའོ་སེམས་ཅན་རྣམས་ནི་ལས་རྣམ་པ་མང་པོ་དག་གིས་ཉོན་མོངས་པར་གྱུར་ཏོ་ཞེས་ངོ་མཚར་དུ་གྱུར་ཏོ། །འོད་སྲུང་དེ་བཞིན་དུ་ངའི་བུ་ཉན་ཐོས་ཐམས་ཅད་ཀྱང་ཕྱག་དར་གྱི་ཕུང་པོ་འཕྱག་པའི་བུ་བཞིན་དུ་གདོད་ཤེས་ནས་
ཨེ་མ་ཀྱི་ཧུད་བཅོམ་ལྡན་འདས་ད་དུང་བདག་ཅག་གིས་རང་གི་ཕ་དང་འདྲ་བར་མ་འཚལ་བས་ན། ཉན་ཐོས་ཀྱི་ཐེག་པ་ནི་ང་ཐ་ཆད་ལགས་སོ་ཞེས་ཟེར་རོ། །དེ་བས་ན་འོད་སྲུང་ཁྱོད་ཀྱིས་འདི་ལྟར་བསླབ་པར་བྱ་སྟེ། གལ་ཏེ་རེ་ཞིག་ཡོངས་སུ་སྤང་བར་ནུས་ན་གཤེ་ཡང་རུང་སྤྱོས་ཀྱང་རུང་ཁྱོད་
ཀྱིས་དེ་དག་གི་ཡོངས་སུ་སྨིན་པའི་དུས་ལ་བབ་པར་ཤེས་པར་བྱའོ། །འོད་སྲུང་གཞན་ཡང་འདི་ན་ཐེག་པ་ཆེན་པོ་པ་རྣམས་དང་། ཉན་ཐོས་ཀྱི་ཐེག་པ་ཅན་རྣམས་ནི་རྟག་པར་མི་འཐུན་པ་ཡིན་ཏེ། ཇི་ལྟར་འཇིག་རྟེན་པ་དང་། འཇིག་རྟེན་ལས་འདས་པ་ལྟ་བུ་དང་། མཁས་པ་དང་།
ངན་པ་ལྟར་མི་འཐུན་པ་ཡིན་ནོ།། །།འཕགས་པ་རྔ་བོ་ཆེ་ཆེན་པོའི་ལེའུ་བམ་པོ་བཞི་པ། འོད་སྲུང་ཁྱོད་ཀྱིས་ཡང་མདོ་སྡེ་སྤོང་བ་དེ་དག་ཀུན་ཏུ་གཟུང་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་སྤོང་བ་དེ་དག་སེམས་དེ་དང་བཅས་ཏེ་དུས་བྱེད་པར་གྱུར་ན་དེ་ཉིད་དེ་དག་གི་
ཤིན་ཏུ་བརྣག་པ་ཉིད་ཀྱི་མཐར་ཕྱིན་པ་ཡིན་ནོ། །དེ་ལྟ་བས་ན་དེ་དག་ལ་སྙིང་བརྩེ་བའི་ཕྱིར་འདི་ལྟ་སྟེ། ཐེག་པ་ཆེན་པོ་ལ་སྦྱར་བའི་ཆེད་དུ་ཐབས་ཐམས་ཅད་ལ་མཁས་པར་བྱའོ། །དེ་ལ་གང་དག་མ་དད་པ་དེ་དག་ནི་དད་པར་འགྱུར་ཞིང་གང་དག་དད་པ་དེ་དག་ནི་ཡིད་ཆེས་པར་འགྱུར་ཏེ། དེ་དག་ཐམས་
ཅད་བསྡུ་བའི་དངོས་པོ་རྣམས་ཀྱིས་ཀུན་ཏུ་བསྡུ་བར་བྱ་ཞིང་གཟུང་བར་བྱའོ། །འོད་སྲུང་གཞན་ཡང་འདི་ན་མི་འགའ་ཞིག་རིམས་སམ། རིམས་ནད་དྲག་པོས་ཐེབས་པ་ཁོ་ནར་གྱུར་ན། འདི་ལྟར་མི་དེ་ལ་སྨན་ཡང་མི་སྦྱིན་ཞིང་དཔྱད་ཀྱང་མི་བྱའོ། །དེ་ཅིའི་ཕྱིར་ཞེ་ན། བྱ་བའི་དུས་ལ་མ་བབ་པ་དང་།

བྱ་བའི་དུས་ལ་བབ་ན་མི་བྱ་བ་དང་། བྱ་བའི་གནས་འདི་གཉིས་མི་ཤེས་པའི་སྨན་པ་གང་ཡིན་པ་ནི་འཇིག་རྟེན་ན་སྨད་པ་ཡིན་ཏེ། དེ་ལྟ་བས་ན་ནད་སྨིན་ན་དཔྱད་བྱ་ལ་མ་སྨིན་ན་དུས་སུ་བསྡད་དོ། །དེ་བཞིན་དུ་སེམས་ཅན་གང་དང་གང་དག་ཚུལ་འདི་སྤོང་བར་བྱེད་པ་དེ་དང་དེ་དག་ནི་ཚར་གཅད་པར་
བྱའོ། །དེ་དག་གང་གི་ཚེ་ནད་སྨིན་པར་གྱུར་པ་དང་། དེའི་འོག་ཏུ་དེ་དག་རྗེས་སུ་དྲན་ནས། ཨེ་མའོ་བདག་ཅག་གིས་མཚར་བྱས་སོ་ཞེས་ཤེས་པར་གྱུར་པ་དེའི་ཚེ་དེ་དག་ཉན་ཐོས་སམ། རང་སངས་རྒྱས་ཀྱི་ཐེག་པ་ལ་བསྡུས་ནས་དཔྱད་བྱའོ། །འོན་ཏེ་གཞན་དུ་མ་ནུས་ན་དེ་དག་ལ་གོས་དཀར་པོ་
དག་བྱིན་ཏེ་བསྐྲད་པ་འམ། རིམ་པ་གཞན་དང་གཞན་གྱིས་གདུལ་བར་བྱའོ། །དེ་ཅིའི་ཕྱིར་ཞེ་ན། དེ་དག་ཁོ་ན་ལ་སྙིང་བརྩེ་བས་ཅི་ཡང་རུང་བས་ཐེག་པ་ཆེན་པོ་ལ་སྦྱར་བའི་ཕྱིར་རོ། །རྒྱུ་གཉིས་ཀྱིས་སེམས་ཅན་རྣམས་ཐེག་པ་ཆེན་པོ་ལ་སྦྱར་བར་བྱ་སྟེ། གཉིས་གང་ཞེ་ན། རིགས་པ་དང་།
བསྡིགས་པས་སོ། །དེ་ལྟ་བས་ན་དེ་དག་རིགས་པས་སམ། བསྡིགས་པས་སྦྱར་བར་བྱའོ། །དེ་ལྟར་སྦྱར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་དང་པོ་གནོན་པར་འགྱུར་ཞིང་དེ་ས་དང་པོ་ལ་གནས་པར་འགྱུར་རོ། །ཡང་དེ་དེ་ལྟར་སྦྱོར་ཞིང་དེ་བཞིན་དུ་སྨྲ་ན་ས་གཉིས་པ་ཐོབ་པས་འདི་
ལྟ་སྟེ། བྱང་ཆུབ་ཏུ་མགོ་གཅིག་ཏུ་ལུང་བསྟན་པ་ཡིན་ནོ། །འདི་ལྟ་སྟེ་དཔེར་ན། མི་ཞིག་བཙོན་ར་ནས་ཕྱུང་ན་དེ་ཅི་སླར་བཙོན་རར་འཇུག་པར་འགྱུར་རམ། དེ་བཞིན་དུ་ཉན་ཐོས་ཀྱི་ཐེག་པ་ལས་བྱུང་སྟེ། ཐེག་པ་ཆེན་པོའི་ལམ་དུ་ཞུགས་པ་དེ་ཅི་ཉན་ཐོས་ཀྱི་ཐེག་པ་ལ་རེག་པར་འགྱུར་ལགས་
སམ། འོད་སྲུང་འདི་ནི་མི་འགྱུར་ཏེ། དེ་ཁྲོས་འཁྲུགས་ནས་ས་ལ་རྡེབས་པར་འགྱུར་རོ། །ཡང་བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཁྱོད་ཀྱིས་དེ་བཞིན་གཤེགས་པའི་སྙིང་པོ་ཤེས་ཀྱིས་འོད་སྲུང་ཁྱོད་དེ་ལྟར་མ་ངུ་ཤིག །འོད་སྲུང་དཔེར་ན་དོན་མཐོང་ན་གཏན་ཚིགས་
དགོས་པ་མེད་དེ། དཔེར་ན་སྔོན་སྐྱུ་རུ་ར་མཐོང་བ་ལ་སྐྱུ་རུ་ར་ནི་འདི་ཡིན་ནོ་ཞེས་བྱ་བ་དགོས་པ་མེད་མོད་ཀྱི་སྔོན་སྐྱུ་རུ་ར་མ་མཐོང་བ་ལ་སྐྱུ་རུ་ར་གཏན་ཚིགས་དང་བཅས་པ་དགོས་པ་ལྟ་བུ་དང་། དཔེར་ན་ལྷོ་ཕྱོགས་ཀྱི་མི་རྣམས་ལ་མི་འམ་ཅི་རི་མོར་བྲིས་ནས་བསྟན་དགོས་ཀྱི་བྱང་ཕྱོགས་ཀྱི་མི་རྣམས་

ལ་ནི་བསྟན་མི་དགོས་པ་ལྟ་བུའོ། །དེ་ཅིའི་ཕྱིར་ཞེ་ན། དེ་དག་གིས་སྔོན་མཐོང་བའི་ཕྱིར་རོ། །དེ་བཞིན་དུ་ཁྱོད་ཀྱིས་ཀྱང་སྐྱུ་རུ་ར་བཞིན་དུ་དེ་བཞིན་གཤེགས་པའི་སྙིང་པོ་མཐོང་ངོ་། །འོད་སྲུང་གཞན་ཡང་ང་བཞུགས་པའི་ཚེ་དང་། ཁྱོད་འདུག་པའི་ཚེ་མདོ་འདི་སྤོང་བ་གང་དག་
ཡིན་པ་དང་། སྤང་བར་འགྱུར་བ་གང་དག་ཡིན་པ་དེ་དག་གལ་ཏེ་ནུས་ན་ཁྱོད་ཀྱིས་ཚར་གཅད་ཅིང་གཟུང་བར་བྱའོ། །དེའི་ཚེ་ཚར་བཅད་ཅིང་བཟུང་ནས་རིགས་པའམ། བསྡིགས་པས་རང་གི་བུ་ལ་བྱ་བའམ། སྡུག་པ་ལ་བྱ་བའམ། རང་དང་འདྲ་བར་སྡུག་པར་བྱ་བས་ཐེག་པ་ཆེན་པོ་ལ་སྦྱར་བར་
བྱའོ། །འོད་སྲུང་དེ་ལྟར་ཉན་ཐོས་ཀྱི་ཐེག་པ་པ་དེ་དག་ཐམས་ཅད་ཀྱང་ངའི་བུ་ཡིན་ནོ། །དེ་དག་ཐམས་ཅད་སྔོན་ང་སྤྱད་པ་སྤྱོད་པ་ན་ཡོངས་སུ་སྨིན་པར་བྱས་པ་ཡིན་ཏེ། བསྐལ་པ་མང་པོ་གྲངས་མེད་པ་དཔག་ཏུ་མེད་པ་ཕ་རོལ་པས་ཆེས་ཕ་རོལ་ཏུ་དེ་བཞིན་གཤེགས་པ་འཇིག་རྟེན་གྱི་གཉེན་ཞེས་བྱ་བ་
བྱུང་བ་དེའི་ཚེ་དེའི་དུས་དེ་ན་མདོ་ཆེན་པོ་འདི་ལས་ཐེག་པ་གཅིག་པ་བཤད་པ་དང་། དེའི་ཚེ་འདི་དག་དང་གཞན་དེ་དག་ཐམས་ཅད་སྤོང་བར་བྱེད་དེ་དག་ཐམས་ཅད་གཅིག་ཏུ་བསྡོམས་ནས་ཁྲོ་བ་དང་། སྨོད་པ་དང་། མཚང་འདྲུ་བས་རྒྱུ་བར་བྱེད་དོ། །དེ་ནས་དེ་དག་ལ་འདི་དག་ནི་བདག་གི་བུ་ཡིན་བདག་གི་སློབ་མ་ཡིན་པས་
དུས་ལས་ཐལ་ན་མི་རུང་གིས་ཇི་ལྟར་འདི་དག་ཉེ་བར་ཞི་བར་འགྱུར་བ་དེ་ལྟ་དེ་ལྟར་གདུལ་བར་བྱ་བའི་ཐབས་མཁས་པ་ཞིག་ངས་བསམས་སོ། །དེ་ནས་ངས་དེ་དག་གི་སྟོབས་དང་སྟོབས་མེད་པར་ཤེས་པར་བྱས་ནས་དེ་ལྟ་བུའི་གཏམ་སྟོན་ཏོ། །དེ་ལ་གང་དག་ཐེག་པ་ཆེན་པོ་ལ་མ་དད་པར་གྱུར་པ་དེ་དག་ལ་ནི་ངས་ཉན་
ཐོས་ཀྱི་ཐེག་པའི་གཏམ་སྨྲས་ཏེ། རིགས་ཀྱི་བུ་མཐར་ཕྱིན་པ་འདི་ལྟ་སྟེ་ཐེག་པ་ཆེན་པོ་འདི་ཡིན་གྱི། ལྷག་མ་ནི་སྤང་བའི་ཐེག་པ་ཡིན་པར་བཟུང་ངོ་། །བུད་མེད་ཀྱིས་ནི་ལེགས་པར་སྤྱོད་པ་སྤྱད་ཀྱང་ཐར་པ་མི་འཐོབ་སྟེ་གྲོང་ཁྱེར་པས་ཀྱང་དེ་བཞིན་ནོ། །རྟ་ཅང་ཤེས་ལ་ཞོན་ཏེ་བརྒྱུགས་པས་ནི་
གྲོང་རྡལ་ལམ། གྲོང་ཁྱེར་དུ་མྱུར་དུ་ཕྱིན་པར་འགྱུར་གྱི། བྱིས་པའི་གོམ་པས་ཀྱང་རིམ་གྱིས་སོང་ན་ཅི་དེས་ཀྱང་སོན་པར་མི་འགྱུར་རམ། ཇི་ལྟར་བྱིས་པ་གཞོན་ནུ་ནི་མཛུབ་མོས་མར་དང་ཁ་ཟས་ཟ་ལ་སྟོབས་དང་ལྡན་པས་སྣོད་བཀང་སྟེ་ཟ་བ་དེ་བཞིན་དུ་འོད་སྲུང་ངས་ཀྱང་གང་དག་ཐེག་པ་ཆེན་པོ་

མི་འདོད་པ་དེ་དག་བསྡུས་ནས་ངས་དེའི་ཚེ་དེ་དག་ལ་ཕྱག་དར་གྱི་ཕུང་པོ་འཕྱག་པའི་བུ་བཞིན་དུ་ཉན་ཐོས་ཀྱི་ཐེག་པས་ཐེག་པ་ཆེན་པོ་ཉེ་བར་བསྟན་ཏོ། །དེ་དག་གི་མོད་ལ་སྐུར་པ་བཏབ་པའི་ལས་གང་ཡིན་པ་དེ་ཡང་ངའི་སྔོན་གྱི་བྱམས་པའི་རིམ་པས་ཐེག་པ་ཆེན་པོ་ལ་ཞུགས་པར་གྱུར་ན་ལུས་གཅིག་པོ་དེ་ལ་ཁ་ཅིག་
ནི་གླད་ནད་དམ། མྱ་ངན་ནམ། སེམས་མི་བདེ་བ་ཙམ་གྱིས་ཡོངས་སུ་ཟད་པར་འགྱུར་རོ། །དེའི་ཚེ་གང་དག་ངའི་ཚིག་མ་མཉན་ཅིང་མ་བླངས་པ་དེ་དག་ནི་ཚུལ་མ་ཡིན་པས་གནོད་པར་གྱུར་ཏོ། །འོད་སྲུང་དེ་ལྟར་ན་ཕྱག་དར་གྱི་ཕུང་པོ་འཕྱག་པའི་བུ་བཞིན་དུ་ཉན་ཐོས་དེ་དག་ཐམས་ཅད་ཀྱང་ངའི་བུ་ཡིན་ཏེ། ད་གདོད་ཤེས་
པར་འགྱུར་རོ། །ཨེ་མའོ་ཀྱི་ཧུད་བཅོམ་ལྡན་འདས་བདག་ཅག་གིས་ད་དུང་རང་གི་ཕ་མ་འཚལ་བས་ཉན་ཐོས་ཀྱི་ཐེག་པ་ནི་ད་གདོད་ཐ་ཆད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་ཉིད་ཀྱི་ཕྱིར་ངས་ཁྱོད་ཀྱིས་ཕྱིས་ཤེས་པར་འགྱུར་གྱིས་ཁྱེད་གང་འདོད་པ་དེ་བྱེད་ལ་རག་མ་སྤོང་ཤིག་
ཅེས་གསུངས་པ་ཡིན་གྱིས་གལ་ཏེ་ཁྱོད་ཀྱིས་མི་ནུས་ན་དེ་ཞོག་ཤིག །འོད་སྲུང་ཁྱོད་ཀྱིས་དེ་ལྟར་བསླབ་པར་བྱ་སྟེ། དེ་དག་ཁྲོས་སམ། སྨོད་ན་ཡང་ཁྱོད་ཀྱིས་མནགས་པར་བྱའོ། །འདི་ལྟ་སྟེ་དཔེར་ན། འབབ་ཆུའམ། ལྟེང་ཀའམ། མཚེའུ་འམ། མཚོ་བྲན་ནམ། རྫིང་བུའམ། ཁྲོན་པ་ཞིག་
ཡོད་ལ། དེ་ལ་སྐྱེས་པའམ། བུད་མེད་དམ། ཁྱེའུ་འམ། བུ་མོའམ། སེམས་ཅན་གང་དང་གང་དག་གིས་སྣོད་ཅི་དང་ཅི་འདྲ་བ་དག་ཐོགས་ཏེ་ལྷགས་ནས་དེ་ཙམ་དེ་ཙམ་གྱིས་ཆུ་བླངས་ནས་དོང་སྟེ། བུམ་པ་ནི་བུམ་པ་གང་། རྫ་མ་ནི་རྫ་མ་གང་། ཁྱོར་བ་ནི་ཁྱོར་བ་གང་གི་སྣོད་ཆག་པ་ཁོ་ན་ལ་
ཅི་ཡང་མེད་ན། རིགས་ཀྱི་བུ་དེ་ལ་ཁྱོར་བས་སྐྱེད་པས་བུམ་པས་སྐྱེད་པ་ལ་ཁྲོ་བའམ། འོན་ཏེ་སྟོང་པས་ཁྲོར་ཅི་ཡོད། དེ་བཞིན་དུ་རིགས་ཀྱི་བུ་ཁྱོད་ཀྱིས་རང་གི་ནུས་པའི་སྟོབས་བསྐྱེད་པས་ཉན་ཐོས་ཀྱི་ཐེག་པ་ལ་ཞུགས་ཏེ། ངེད་ལ་ཐེག་པ་ཆེན་པོས་ཅི་བྱ་ཞེས་མི་འདོད་ཅིང་སྤོང་བར་གྱུར་ཏོ། །གཞན་
ཡང་དཔེར་ན། རྒྱལ་པོ་ནི་འབྲས་ས་ལུའི་ཁ་ཟས་ཟ། ཡི་དགས་དང་། བཀྲེན་པ་ནི་འབྲས་བུ་དང་རྩ་བ་ཟ། ཁྱིམ་བདག་ནི་རང་གི་འབྱོར་པ་ཟ་ན། ཅི་དེས་རྒྱལ་པོ་ལ་ཁ་བྱའམ། གང་དང་གང་གིས་ཅི་དང་ཅི་བྱས་པའི་བདེ་བའམ། སྡུག་བསྔལ་དེ་དག་གསལ་བ་ཐོབ་པར་འགྱུར་བས་དེས་གནས་

པར་བྱའོ། །དེ་བཞིན་དུ་གལ་ཏེ་ཁྱེད་ཐེག་པ་ཆེན་པོ་ལ་འཇུག་པའི་མཐུ་མེད་ན་ཡང་ཅི་སྟེ་དེ་འགོག །གཞན་ཡང་རྒྱལ་པོ་ནི་དབྱིག་དང་། གསེར་དང་། མུ་ཏིག་དང་། ནོར་བུ་དང་། བཻ་དཱུརྱ་དང་། མན་ཤེལ་དང་། བྱི་རུ་ལ་སོགས་པ་སྦྱིན་པར་གཏོང་ལ། བཀྲེན་པ་རྣམས་ནི་གཟར་
བུ་གང་གི་ཁ་ཟས་སྦྱིན་པར་གཏོང་ངོ་། །གང་དག་མང་དུ་ཐོས་པ་ནི་ལུང་འཛིན་པར་བྱེད་ལ། བློ་ཞན་པ་ནི་རང་གི་སྤྱོད་ཡུལ་ཙམ་མོ། །གཞན་དག་ནི་གྲོང་ཁྱེར་ཆེན་པོའམ། དཔག་ཚད་མང་པོར་རྒྱུག་ལ་དེ་ལ་བྱིས་པ་དག་ནི་འདོམ་ཕྱེད་དུ་ཡང་རྒྱུག་མི་ནུས་ན། ཅི་དེ་ལ་བྱིས་པ་གཞོན་ནུས་འདི་ལྟར་ང་རྒྱུག་
མ་ནུས་སོ་ཞེས་ཅི་དེ་ལས་བརྡེག་པར་བྱ་བའམ། དེ་ལ་སུས་ཉེས། འོད་སྲུང་གཞན་ཡང་གྲོང་གི་བུད་མེད་ནི་གྲོང་དུ་དགའ་ལ་གྲོང་ཁྱེར་མོ་ནི་གྲོང་ཁྱེར་ལ་དགའོ། །འོད་སྲུང་དེ་བཞིན་དུ་དེ་བཞིན་གཤེགས་པ་ཡང་སེམས་ཅན་རྣམས་ལ་སྣོད་ཇི་ལྟ་བ་བཞིན་ཆོས་སྟོན་ཏོ། །གཞན་ཡང་བཅོམ་ལྡན་འདས་ལ་
འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་ཆོས་ཞིག་ཞུ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་ཞིག་གསོལ་པ། སེམས་ཅན་གྱི་ལྟ་བ་ལས་བརྩམས་ལགས་ན་སེམས་ཅན་གྱི་ལྟ་བ་ཅི་ལགས་ན། ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་
སྩལ་པ། འོད་སྲུང་དཔེར་ན་ཡུལ་ཙམ་པ་ཞེས་བྱ་བའི་གྲོང་ཁྱེར་ཆེན་པོ་ནས་མི་འགའ་ཞིག་མཉན་ཡོད་ཀྱི་གྲོང་ཁྱེར་དུ་ཆས་ཏེ། དེ་ཡང་མཉན་ཡོད་ཀྱི་གྲོང་ཁྱེར་ཆེན་པོ་དང་ཧ་ཅང་ཡང་མི་རིང་བའི་གྲོང་རྡལ་ཞིག་ཏུ་གནས་བཏབ་བོ།། །།དེ་ནས་དེས་འགྲོན་པོ་གཞན་ཞིག་ལ་དྲིས་པ། ཀྱེ་མི་མཉན་ཡོད་ན་
ཡུལ་ལོག་མ་པ་རྣམས་ཇི་ལྟར་གནས། དེ་ན་ཁྱིམའམ། བཀད་སའམ། འགྲོན་གནས་པ་གནས་པའི་བུད་མེད་རྙེད་པར་འགྱུར་རམ། དེ་ནས་མི་དེ་ཐབས་མཁས་ཤིང་ཕ་རོལ་གྱི་སེམས་ཤེས་པས་ལྷའི་མིག་གིས་དེ་འོང་བ་ལ་བརྟགས་ན་དེ་ནས་དེས་རིག་སྟེ། ངན་པ་འདི་ནི་རང་གི་མ་དཀའ་བར་བྱེད་
པ་བླ་མ་དམ་པ་ཡོངས་སུ་སྤངས་ཏེ། བརྫུན་ཅན་གྱི་བུ་ཞིག་གི་ཚིག་མཉན་ནས་བདག་མཉན་ཡོད་དུ་སོང་སྟེ། སྨད་འཚོང་མ་དང་ལྷན་ཅིག་རྩེ་བར་བྱའོ་སྙམ་ནས་འདིར་འོངས་སོ་སྙམ་པ་སེམས་ནས་དེ་ནས་དེས་མི་དེ་ལ་འདི་སྐད་ཅེས་སྨྲས་སོ། །ཀྱེ་མི་ལམ་ནས་སླར་མྱུར་དུ་ལོག་ན་ལེགས་ཏེ། ཡུལ་ལོག་མ་པ་

ཁྱོད་འདྲ་བ་རྣམས་ནི་རྒྱལ་པོ་གསལ་རྒྱལ་གྱིས་སྲིན་པོའི་རིགས་ཀྱི་ལག་ཏུ་ཟས་སུ་སྦྱིན་པར་བྱེད་ཀྱིས། ཀྱེ་མི་མྱུར་དུ་སླར་སོང་ཤིག །དེ་ནས་མི་དེས་མི་དེའི་ཚིག་མཉན་ནས་མྱུར་དུ་བརྒྱུགས་ཏེ་རང་གི་ཁྱིམ་གང་ན་བ་དེར་སོང་ནས་རང་གི་མའི་རྐང་པ་ལ་གཏུགས་ཏེ་བཟོད་པར་གསོལ་ཏོ། །དེ་ནས་དུས་གཞན་
ཞིག་ན་མི་དེའི་མ་ཤི་ནས་རང་དབང་བའི་ནོར་ཐམས་ཅད་ཐོགས་ཏེ། ཡང་མཉན་ཡོད་གང་ན་བར་ཆས་པ་དང་དེ་མི་དེ་ཉིད་ཀྱིས་མཐོང་ངོ་། །དེ་མཐོང་ནས་ཡང་དེ་འོང་བ་ལ་བསམས་ནས་འདི་ལྟར་བདག་དེར་སོང་ནས་ནོར་བདོག་པ་ཐམས་ཅད་ཤི་བ་དང་། བཀྲེན་པ་དང་། ཕོངས་པ་དང་། སློང་བ་པ་ལ་
སོགས་པ་ལ་བགོ་བ་དང་། དེ་བཞིན་གཤེགས་པ་ལ་མཆོད་པ་དང་བཀུར་སྟི་དང་རི་མོ་བྱས་ལ་ང་རྒྱལ་བཅག་སྟེ། བདག་གི་མེད་ཅིང་ང་རྒྱལ་མེད་པར་རིམ་གྱིས་བྱས་ལ་སྨད་འཚོང་མ་དང་ལྷན་ཅིག་ཇི་སྲིད་འདོད་པར་རྩེད་མོ་དང་། དགའ་བ་དང་། དགའ་མགུར་སྤྱད་ནས་དེའི་འོག་ཏུ་དེ་བཞིན་གཤེགས་
པའི་བསྟན་པ་ལ་རབ་ཏུ་འབྱུང་བར་བྱའོ་སྙམ་པར་ཤེས་སོ། །མི་དེས་མི་དེ་ལ་དྲིས་པ། ཀྱེ་མི་དེང་སང་མཉན་ཡོད་ཀྱི་གྲོང་ཁྱེར་ཆེན་པོ་ཅི་འདྲ། དེས་སྨྲས་པ། ཀྱེ་མི་ང་ནི་མཉན་ཡོད་ཀྱི་གྲོང་ཁྱེར་ནི་སྡུག་ཅིང་ཡིད་དུ་འོང་བ། དགའ་བ། མཐོང་ན་ཡིད་དགའ་བ། ཡུལ་གྱི་བཟང་མོའི་སྨད་འཚོང་གི་
ཚོགས་ཡོད་པ། འབྱོར་པ། རྒྱས་པ། བདེ་བ། ཉམས་དགའ་བ་ཡིན་ནོ། །འོད་སྲུང་དེ་སྐད་དུ་སྨྲ་ན་ཅི་དེ་བརྫུན་སྨྲ་བ་ཡིན་ནམ། གསོལ་པ། བཅོམ་ལྡན་འདས་ལགས་ཆེས་སོ། །བཀའ་སྩལ་པ། དེ་ནི་མ་ཡིན་ནོ། །གསོལ་པ། ཅི་ལགས། བཀའ་སྩལ་པ། དེ་ནི་ཐབས་ཡིན་ནོ། །ཡང་
བཀའ་སྩལ་པ། དེ་བཞིན་གཤེགས་པས་ནི་རྣམ་གྲངས་ཀྱིས་བརྫུན་ཅུང་ཟད་བྱ་བར་གསུངས་སོ། །གསོལ་པ། ཅིའི་སླད་དུ་ལགས། འོད་སྲུང་ཁྱོད་དང་བུ་མོ་སེར་སྐྱ་བཟང་མོ་ལྷན་ཅིག་ཁྱིམ་པར་གྱུར་ཏེ་འཁོར་བ་ན། བཟང་མོའི་ཕ་དང་མ་གཉིས་སྨྲ་ཞིང་ཕ་དང་མ་གཉིས་ཀྱིས་བསམས་ན།
བདག་ཅག་གི་བུ་གཉིས་ཡུལ་ཉམས་སུ་མྱོང་བར་བྱེད་དམ། འོན་ཏེ་བདག་ཅག་གི་བུ་མི་བྱེད་ཅེས་ནང་མི་ལ་དྲིས་པ་དང་། ནང་མི་ཉེ་བར་སོང་ནས་ནང་མིས་དྲིས་པ་ན་འཇིག་རྟེན་ན་སུ་ཞིག་གཟུགས་དང་། སྒྲ་དང་། དྲི་དང་། རོ་དང་། རེག་བྱའི་འདོད་པ་ལ་རྩེ་བ་དང་། དགའ་བའི་ཡུལ་ཉམས་

སུ་མྱོང་བར་མི་བྱེད་ཅེས་ཁྱོད་ཀྱིས་སྨྲས་པ་ཐོས་པ་ཡིན་ནམ། གསོལ་པ། བཅོམ་ལྡན་འདས་དེ་ནི་བདག་གི་བརྫུན་དུ་སྨྲས་པ་མ་ལགས་སོ། །དེ་བཞིན་དུ་འདི་ལ་ཡང་དེ་ནི་ཐབས་མཁས་པ་ཡིན་པར་རྣམ་གྲངས་འདིས་ཐ་སྙད་གདགས་པར་ནུས་ཏེ། རྒྱུད་གཉིས་ཀ་རྣམ་གྲངས་འདིས་མགུ་
བར་བྱའོ། །གསོལ་པ། བཅོམ་ལྡན་འདས་བདག་ཅག་ཚེ་རབས་ལྔ་བརྒྱར་སྤ་ཤུག་ཏུ་མཆིས་ན་ཡང་ཆུང་ངུ་ན་གཡར་ལམ་དུ་ཡང་ཉལ་པོ་མ་མྱོང་ངོ་། །བཀའ་སྩལ་པ། དེ་ནི་དེ་ཁོ་ན་ལྟར་ཡིན་གྱི་གཞན་དུ་མ་ཡིན་ཏེ། དེ་ཡང་སྐྱེས་བུའི་ཐབས་མཁས་པ་ཡིན་ནོ། །གསོལ་པ། བཅོམ་ལྡན་འདས་
ཐབས་མཁས་པ་ཞེས་བགྱི་བ་ཅི་ལགས། བཀའ་སྩལ་པ། ཐབས་མཁས་པ་ཞེས་བྱ་བ་ནི་སྔ་མ་དང་ཕྱི་མར་འགལ་བ་དང་། ཕྱི་མ་དང་སྔ་མར་འགལ་བ་སྨྲ་བའི་དོན་ཏེ། དོན་གྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་རྣམས་ནི་ཐབས་གང་དང་གང་གིས་དོན་འགྲུབ་པར་འགྱུར་བའི་
ཐབས་དེ་དང་དེས་ངེས་པའི་དོན་གྱིས་སམ། དྲང་བའི་དོན་གྱིས་གསུང་བ་ཡིན་ནོ། །གསོལ་པ། དོན་གྲུབ་པ་ཞེས་བགྱི་བ་གསུང་བ་ཅི་ལགས། བཀའ་སྩལ་པ། དོན་གྲུབ་པ་ཞེས་བྱ་བ་ནི་ཆོས་གྲུབ་པ་ཞེས་བྱའོ། །གསོལ་པ། དེ་བཞིན་གཤེགས་པས་དགེ་སློང་དག་ཚད་མས་རུང་བ་མ་ཡིན་པ་དེ་
ཡང་བླང་བར་བྱའོ་ཞེས་རྣམ་གྲངས་ཅུང་ཟད་ཅིག་གསུངས་པ། གལ་ཏེ་དེ་ལྟར་ལགས་ན་དེ་ཡང་བླང་བར་འགྱུར་རམ། བཀའ་སྩལ་པ། འོད་སྲུང་དེ་ནི་རྒྱུ་མ་ཡིན་ནོ། །གསོལ་པ། ཅིའི་སླད་དུ་ལགས། ཅི་ཕའི་ཆེད་དུ་མ་སྲོག་དང་དབྲལ་བར་བྱའམ། ཅི་གཞན་གྱི་ཆེད་དུ་རང་སྲོག་དང་དབྲལ་བར་བྱའམ།
ཅི་མའི་ཆེད་དུ་ཕ་སྲོག་དང་དབྲལ་བར་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་བཞིན་དུ་ཕ་དང་མས་མི་བྱེད་པ་གང་ཡིན་པ་དེ་ནི་དེ་བཞིན་གཤེགས་པའི་སྙིང་པོར་བྱེད་དོ། །འོད་སྲུང་ཇི་ལྟར་གོང་དུ་ཡུལ་ཙམ་པ་ན་གནས་པའི་མི་
བཞིན་ནོ་ཞེས་གསུངས་པ་ལྟར་བདག་བདེན་ཡང་ངས་བདག་ཏུ་འཛིན་པ་དགག་པ་མཛད་དོ། །དེ་ཅིའི་ཕྱིར་ཞེ་ན། ཇི་འདི་ལྟར་མི་དེས་རང་གི་མ་བོར་ནས་དེའི་མ་ཡང་སྡུག་བསྔལ་བར་གྱུར། དེ་ཡང་རང་གི་མ་དང་བྲལ་བར་གྱུར་པ་ལས་དེ་ནས་མི་དེས་དེ་སྐད་ཚིག་བསྒོ་ནས་སླར་བཟློག་པ་དང་མ་དང་བུ་

དེ་གཉིས་ཕྲད་པར་གྱུར་ཏོ། །དེ་ནས་དེའི་འོག་ཏུ་མ་ཤི་ནས་རང་དབང་བ་རྣམས་ཇི་སྐད་བཤད་པ་དེ་བཞིན་དུ་འདོད་པའི་བདེ་བ་བསྟན་ནས་དེའི་འོག་ཏུ་རབ་ཏུ་བྱུང་བ་བཞིན་ནོ། །དགེ་སློང་དག་དེ་བཞིན་དུ་ངས་ཀྱང་གལ་ཏེ་ཐོག་མ་ཁོ་ནར་བདག་ཡོད་དོ་ཞེས་བསྟན་ན་སུ་ཞིག་དད་པར་འགྱུར། གལ་ཏེ་དད་པར་གྱུར་
ནས། འཇིག་ཚོགས་ལ་ལྟ་བའི་བདག་ཏུ་འཛིན་པ་ནི་འཇིག་རྟེན་གྱི་སྤྱི་ཐུན་ཡིན་པས་ངའི་ཡང་ངར་འགྱུར་རོ། །ངས་ཀྱང་ཡུལ་ཙམ་པ་ན་གནས་པའི་མི་བཞིན་དུ་ཐོག་མར་བདག་མེད་པ་བསྟན་ནས་དེའི་འོག་ཏུ་བདག་ཡོད་པ་ཉིད་སྟོན་པར་འགྱུར་ཏེ། དེ་ཉིད་དང་བདག་གི་དེ་ཁོ་ན་ཉིད་ཀྱང་བཤད་དོ། །འོད་སྲུང་
དེ་ལྟ་བས་ན་ཐབས་ལ་མཁས་པར་བྱའོ། །འོད་སྲུང་གཞན་ཡང་དཔེར་ན་མི་ཞིག་ལམ་པོ་ཆེ་ཞིག་ནས་འབྲོག་དགོན་པར་སོང་བ་ལས་བྱ་རབ་གནོན་ཅེས་བྱ་བས་སྒྲ་ཕྱུང་བ་དང་། དེ་ནས་མི་དེ་ལམ་དུ་ཞུགས་ཏེ་འགྲོ་བས་བྱའི་སྐད་དེ་ཐོས་ནས་བསམས་པ། ཅི་ཆོམ་རྐུན་པ་བྱུང་ངམ་ཞེས་དེ་ཆོམ་རྐུན་པས་
འཇིགས་སྐྲག་སྟེ། བྱོལ་བ་ལས་དགོན་པ་གང་ན་སྟག་ཡོད་པ་དེར་ཆུད་ནས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །འོད་སྲུང་དེ་བཞིན་དུ་མ་འོངས་པའི་དུས་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས། བདག་དང་བདག་གི་ཞེས་བྱ་བའི་སྒྲ་ཙམ་གྱིས་
འཇིག་རྟེན་པའི་འཇིག་ཚོགས་ལ་ལྟ་བ་ནི་བདག་མེད་པ་སེམས་ཤིང་སྟོང་པ་ཉིད་ཆེན་པོ་ཆད་པའི་ལྟ་བ་སྨྲ་བའི་བདག་ཉིད་དུ་འགྱུར་བས་དེ་བཞིན་གཤེགས་པ་རྟག་པ་སངས་རྒྱས་རྟག་པའི་བདག་ཉིད་དང་ལྡན་པའི་མདོ་སྡེ་འདི་ལྟ་བུ་འདི་དག་ལ་དད་པར་མི་འགྱུར་རོ། །འོད་སྲུང་གཞན་ཡང་ཞིང་པ་བླུན་པོ་
མཉན་ཡོད་ཀྱི་གྲོང་ཁྱེར་ཆེན་པོ་སྔོན་མ་མཐོང་བ་ཞིག་ཡོད་པ་དེ་དེར་ཞུགས་པ་ན་སྐྱེས་པ་དང་། བུད་མེད་གཟུགས་བཟང་བ་མཛེས་པ་བལྟ་ན་སྡུག་པ་དག་མཐོང་ངོ་། །མཐོང་ནས་ཀྱང་མིག་མི་འཛུམས་པར་རིགས་ཀྱི་བུ་དང་། རིགས་ཀྱི་བུ་མོ་དག་ལ་བལྟས་སོ། །བལྟས་ཏེ་ཕྱིར་བྱུང་ནས་དེ་ནས་དེ་རང་
ཁྱིམ་གང་ན་བ་དེར་སོང་སྟེ། ཞིང་པ་བླུན་པོ་རྣམས་ལ་སྨྲས་པ། རྒྱལ་པོ་ནི་འདི་འདྲ། དེ་ན་བུད་མེད་ཀྱི་གཟུགས་ནི་ལྷའི་བུ་མོ་འདྲ། མིའི་དབང་པོའི་གཟུགས་ནི་ལྷའི་བུ་ཕོ་འདྲ་འོ་ཞེས་སྨྲས་པ་ན། མི་ཕལ་པ་གཞན་རྣམས་ཀྱང་རྒྱལ་པོ་མཐོང་ནས་འདི་སྙམ་དུ་བདག་ཅག་གིས་ཀྱང་

ལྷའི་བུ་དང་བུ་མོ་དང་བཅས་པ་མཐོང་ངོ་སྙམ་པ་དང་། དེ་ནས་རྒྱལ་པོའི་ཕོ་ཉ་བཀྲབས་པ་དག་གིས་ཐོས་ནས་ཅལ་ཅོལ་ཤ་དག་སྨྲའོ་ཞེས་བྱས་ཏེ་གསོད་པར་འགྱུར་རོ། །འོད་སྲུང་དེ་བཞིན་དུ་དེ་བཞིན་གཤེགས་པ་སངས་རྒྱས་པའི་དུས་མྱ་ངན་ལས་འདས་པ་ཉིད་ན་
རྟག་པ། བརྟན་པ། ཞི་བ། ཐེར་ཟུག་པ། བདག་ཅེས་བྱ་བའི་ཚིག་གི་གཞི་བསྟན་པ་ཡང་འཇིག་རྟེན་ལས་འདས་པའི་དུས་ན་བདག་ཅི་འདྲ་བ་དེ་འདྲ་བར་འགྱུར་ཞིང་འཇིག་རྟེན་པའི་འཇིག་ཚོགས་ལ་ལྟ་བ་གོམས་པར་བྱས་པའི་བདག་ཉིད་ཀྱང་ཟད་པར་གྱུར། ཟད་པར་འགྱུར། ཟད་པར་
འགྱུར་ཏེ། ལྟ་བ་དེ་ལྟ་བུ་གང་ཡིན་པ་དེ་ངའི་མ་ཡིན་པས་དེའི་ཕྱིར་རྟག་པ་དང་ཆད་པ་སྤངས་པ་ཞེས་གསུངས་པ་ནི་ངས་ལེགས་པར་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ང་བདག་ཉིད་སྐྱེས་སོ་ཞེས་གསུང་ན་ཅི་དེ་བཞིན་གཤེགས་པ་སྐྱེས་སམ། ང་ཚེམས་ཤིང་སྟེན་ཏོ་ཞེས་གསུང་
ན། ཅི་ང་ཚེམས་ཤིང་སྟེན་སྙམའམ། འོད་སྲུང་སྔ་མ་དང་ཕྱི་མའི་ཚིག་གི་དོན་འགལ་གྱི་དོན་ལ་ནི་མ་ཡིན་ནོ། །གསོལ་པ། ཇི་ལྟར་མ་ལགས། བཀའ་སྩལ་པ། འོད་སྲུང་ཁྱོད་ལ་དཔེ་བསྟན་ཏེ། དཔེར་ན་བཙོ་བླག་མཁན་མཁས་པས་གོས་ཕལ་པ་ཞིག་ཉོས་ནས་དམར་པོར་བྱས་
ཏེ་བཙོངས་ན་རིན་ཆེན་པོར་འདོང་ངོ་། །དེ་ནས་དེས་ཕྱིས་རིན་ལྷག་པས་ཉོས་ནས་གོས་དེ་ཉིད་སྔོན་པོས་ཚིག་གུར་བྱས་ཏེ་གཞན་གྱི་ལག་ཏུ་བཙོངས་ནས་དེ་ཉིས་གྱུར་གྱི་རིན་དུ་ལྡོམ་ན་འོད་སྲུང་ཅི་དེ་གོས་དེ་ཉིད་ཡིན་ནམ། འོན་ཏེ་གཞན་ཡིན་ཞེ་ན། དེ་ནི་གཞན་མ་ཡིན་ཏེ་ཁ་བསྒྱུར་བར་ཟད་དོ། །
འོད་སྲུང་དེ་བཞིན་དུ་གོས་ཀྱི་རྣམ་པ་བཞིན་དུ་བསོད་ནམས་གསར་གྱི་རྒྱུན་ཆགས་པས་དེ་ཕྱིས་ཚོན་རྩིའི་ཐབས་ཀྱི་ཐབས་མཁས་པས་ཁ་དོག་སྒྱུར་བ་ལྟ་བུར་བྱེད་དོ། །འོད་སྲུང་གཞན་ཡང་དཔེར་ན་གྲོང་ཁྱེར་ཆེན་པོ་ཞིག་ན་དགེ་སློང་ཚུལ་ཁྲིམས་དང་ལྡན་པ་ཞིག་ཡོད་པ་འཆི་ཀའི་ཚེ་གྲོང་རྡལ་ལམ། གྲོང་
ཁྱེར་དུ་བསོད་སྙོམས་སུ་རྒྱུ་བ་ན་སྨད་འཚོང་མ་ཞིག་མཐོང་ནས་དེ་སེམས་ཆགས་པར་གྱུར་ཏེ་དེ་ནས་དེས་བསམས་པ། གྱོན་པའི་གོས་འདི་བྱིན་ལ་འདི་ལྟ་བུ་ཞིག་བྱའོ་ཞེས་ངེས་པར་བྱས་ནས་དེས་གྱོན་པའི་གོས་དེས་སྨད་འཚོང་མ་དེ་བྲོངས་པ་དང་། སྨད་འཚོང་མ་དེ་ཡང་ཆགས་པའི་རང་བཞིན་

པས་དེ་བཞིན་དུ་བྱའོ་ཞེས་དེ་ལ་ཁས་བླངས་སོ། །དེ་ནས་དགེ་བསྙེན་ཐབས་ལ་མཁས་པ་ཞིག་གིས་དེ་མཐོང་ནས་བསམས་པ། ཨེ་མའོ་ཀྱི་ཧུད་དགེ་སློང་ཚུལ་ཁྲིམས་དང་ལྡན་པ་འདི་ནི་ད་ནི་ཚུལ་ཁྲིམས་འཆལ་པར་གྱུར་ལ། ཉེས་ན་དགེ་སློང་འདི་ལུས་འདིས་ཤི་བ་བླའི། ཚུལ་ཁྲིམས་
འཆལ་པ་ནི་མ་ཡིན་པས་དེའི་སྡིག་པ་གང་ཡིན་པ་དེ་བདག་ལ་བབ་པར་གྱུར་ཅིག་ཅེས་དེ་ནས་དེས་གཏམ་ཅི་ཞིག་བྱས་ནས་རྨོངས་པར་བྱས་ཏེ་མོད་ལ་བསད་ན། འོད་སྲུང་ཅི་མི་དེ་དམྱལ་བར་འགྱུར་རམ། འོད་སྲུང་གིས་གསོལ་པ། དེ་ནི་བཅོམ་ལྡན་འདས་ཉིད་མཁྱེན་ལགས་སོ། །
བཀའ་སྩལ་པ། འོད་སྲུང་མི་དེའི་དགེ་སྦྱོང་སྲོག་དང་ཕྲལ་བའི་སྡིག་པ་གང་ཡིན་པ་དེ། དེ་ཟླ་བ་བཞིར་རིམས་ཀྱིས་ཐེབས་ནས་ལུས་དེ་ཉིད་ལ་རྣམ་པར་སྨིན་པ་དང་དེངས་པར་འགྱུར་ན། འོད་སྲུང་ཐབས་མཁས་པ་སེམས་ཅན་གྱི་དོན་དུ་ཚིག་ཙམ་དུ་སྨྲ་བས་ཉེས་པ་མེད་དེ། བདག་བདེན་
པར་ཡོད་པ་ལ་བདག་མེད་དོ་ཞེས་འགོག་པའི་ཚིག་ཙམ་དུ་སྨྲ་བས་ཅིར་ཡང་མི་འགྱུར་བ་ལྟ་ཅི་སྨོས། འོད་སྲུང་གཞན་ཡང་ཁྱོད་ཀྱིས་ཀུན་དགའ་བོ་ཟིལ་གྱིས་མནན་ནས་ང་ལ་ཞུས་པ། སྲིད་པ་ཡོད་ན་བདེ་དང་སྡུག་བསྔལ་ཏེ། མེད་ན་བདེ་དང་སྡུག་བསྔལ་ག་ལ་ཡོད་ཅེས་བྱ་བ་དེའི་དོན་འོད་སྲུང་
ཁྱོད་ད་ཉོན་ཅིག །འོད་སྲུང་དེ་བཞིན་གཤེགས་པ་ནི་དངོས་པོ་མེད་པ། སེམས་ཅན་མེད་པ། འཇིག་པར་འགྱུར་བ་མ་ཡིན་པའོ། །གསོལ་པ། ཇི་ལྟ་བུ་ལགས། བཀའ་སྩལ་པ། འོད་སྲུང་དཔེར་ན་རིའི་རྒྱལ་པོ་གངས་ཅན་གྱི་དྲུང་ན་ནོར་བུ་རིན་པོ་ཆེ་འོད་མཐའ་ཡས་སྣང་བ་
ཞེས་བྱ་བའི་ཁམས་ཡོད་དོ། །དེ་ནས་ནོར་བུ་རིན་པོ་ཆེའི་ཁམས་དེ་ལ་ནོར་བུ་རིན་པོ་ཆེའི་ཁམས་བྱི་དོར་བྱེད་པས་བལྟས་ནས་དེས་དེ་མཐོང་སྟེ་ཤེས་ནས་དེས་དེ་བླངས་ཏེ། གསེར་གྱི་ཁ་དོག་བཞིན་དུ་ཐབས་ཀྱིས་དྲི་མ་སྦྱངས་ཏེ་བླངས་ནས་དེ་ནས་དེས་གང་གི་ཚེ་དྲི་མ་དག་པར་གྱུར་པ་དེ་ཕན་
ཆད་སའམ། འདམ་རྫབ་བམ། བྱེ་མའམ། སྣོད་གང་དང་གང་དུ་མི་དེས་བཅུག་ཀྱང་དེས་དེར་ནོར་བུ་རིན་པོ་ཆེ་དེ་དེ་ལྟ་དེ་ལྟར་ཕྱི་བདར་བྱས་པས་ཇི་ལྟར་ཐོག་མའི་དྲི་མའི་སྐྱོན་དེ་ཁོ་ནས་འདྲེས་པར་མི་འགྱུར་རོ། །དེ་ཅིའི་ཕྱིར་ཞེ་ན། དཔེར་ན་གང་དང་གང་དུ་མི་སྒྲོན་མ་ཐོགས་ཏེ་

སོང་བ་དེ་དང་དེ་ཉིད་དུ་མུན་པ་མེད་པར་འགྱུར་ཞིང་སྒྲོན་མ་ཡང་གསལ་བ་ཁོ་ནར་འགྱུར་རོ། །འོད་སྲུང་དེ་བཞིན་དུ་ནོར་བུ་རིན་པོ་ཆེ་དེ་གསེར་བཞིན་དུ་དྲི་མས་གོས་པ་མེད་པར་གྱུར་ཅིང་ནོར་བུ་རིན་པོ་ཆེ་དེ་ཡང་མཚན་མོ་ནི་རྒྱུ་སྐར་དང་། ཟླ་བའི་འོད་ཀྱི་རྐྱེན་གྱིས་
ཆུ་འཛག་པར་འགྱུར་ལ་ཉིན་མོ་ནི་ཉི་མའི་འོད་ཀྱིས་མེའི་ཁ་དོག་ལྟར་འབར་ཡང་ཅུང་ཟད་ཀྱང་སྲེག་པར་མི་བྱེད་དོ། །འོད་སྲུང་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ནས་བྱང་ཆུབ་སངས་རྒྱས་པ་ཉིད་ཀྱིས་སྐྱེ་བ་དང་།
རྒ་བ་དང་། ན་བ་དང་། འཆི་བའི་དྲི་མ་བསལ་ཅིང་ཉོན་མོངས་པ་བྱེ་བ་ལས་རྣམ་པར་གྲོལ་ཏེ། བག་ཆགས་ཀྱི་དྲི་མ་ཐམས་ཅད་དང་བྲལ་བ་ན་ནོར་བུ་དག་པ་བཞིན་དུ་རབ་ཏུ་གསལ་ཞིང་པད་མ་བཞིན་དུ་ཐམས་ཅད་དུ་གོས་པ་མེད་པར་འགྱུར་རོ། །འོད་སྲུང་གཞན་ཡང་དེ་བཞིན་གཤེགས་
པ་གང་གི་གཟུགས་ཀྱིས་འཇིག་རྟེན་གང་དང་གང་དུ་འབྱུང་ཞིང་བྱུང་ནས་ཀྱང་ཕལ་པ་བཞིན་དུ་སྟོན་པར་མཛད་དེ། ཕལ་པར་བྱུང་ཡང་ངན་འགྲོའི་ཉེས་པ་དེ་དག་གིས་གོས་པར་མི་འགྱུར་ཞིང་ལྷ་དང་མིའི་བདེ་བ་དང་སྡུག་བསྔལ་ཡང་ཉམས་སུ་མྱོང་བར་མི་འགྱུར་རོ། །ལྷ་དང་། མིའི་
བདེ་བ་དང་། སྡུག་བསྔལ་ཞེས་བྱ་བ་ནི་འདོད་པའི་ཡོན་ཏན་ལྔ་ཡིན་ཏེ། སྡུག་བསྔལ་ནི་བཀག་ལ་ཐར་པ་གཅིག་ཏུ་མཐར་ཕྱིན་པ་ནི་ཤིན་ཏུ་བདེ་བ་ཡིན་ནོ། །དེ་ནས་གནས་བརྟན་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །བདག་ནི་
ད་གདོད་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་དང་དགྲ་བཅོམ་པ་ཉིད་དུ་གྱུར་ལགས་ཏེ། ད་ནི་བདག་གིས་དེ་བཞིན་གཤེགས་པ་ལ་བགྱིས་པ་གཟོ་བ། བགྱིས་པ་ཚོར་བར་བགྱི་ལགས་སོ། །གང་དེ་བཞིན་གཤེགས་པས་བདག་ལ་འདི་སྐད་ཅེས་འོད་
སྲུང་ཚུར་ཤོག་སྟན་གྱི་ཕྱེད་སྦྱིན་གྱིས་བདག་ཅག་གཉིས་སྟན་གཅིག་ལ་ལྷན་ཅིག་འདུག་གོ། །ཞེས་གསུངས་པ་དེའི་དོན་ནི་དེ་རིང་བཅོམ་ལྡན་འདས་ཀྱིས་འཁོར་བཞིའི་དབུས་སུ་བདག་ཐེག་པ་ཆེན་པོ་ལ་དབང་བསྐུར་བ་ལགས་སོ། །དེ་ནས་འཁོར་དེའི་ནང་ན་སྐྲ་དང་ཁ་སྤུ་བྲེགས་པ་དགེ་སློང་གི་ཁ་

དོག་དང་གཟུགས་འཆང་བ་དག་ཀྱང་འདུག །དགེ་བསྙེན་མ་ཡིན་པ་དགེ་བསྙེན་གྱི་གཟུགས་འཆང་བ་དག་དང་ཁ་དོག་སྣ་ཚོགས་པའི་གཟུགས་འཆང་བ་དག་དང་། ཁ་ལོགས་ཤིག་ཏུ་ཕྱོགས་པ་དང་། སྙན་དངགས་མཁན་དང་། མགྲིན་པ་སྟ་རི་ལྟ་བུ་དང་། དུད་འགྲོ་དང་། ཁ་
གྱེན་དུ་ལྟ་བ་དང་། ཁ་ཐུར་དུ་ལྟ་བ་དག་འཁོད་དེ། དེ་དག་ཐམས་ཅད་ནི་བདུད་ཀྱིས་བྱིན་གྱིས་བརླབས་པ་ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་ནི་ཤིན་ཏེ་མ་མ་ལགས་པ་སྦུན་པ་དང་བྲལ་
བ། ཕུབ་མ་མཆིས་པ། ཙན་དན་གྱི་སྙིང་པོ་ལྟ་བུ་སྲ་བ་བརྟན་པར་གནས་པ་ལགས་ན་འཁོར་འདི་ལྟ་བུའི་ནང་དུ་འདི་དག་ཅིའི་སླད་དུ་ཞུགས་ལགས་བཀའ་སྩལ་པ། ཀུན་དགའ་བོ་ཁྱོད་གནས་བརྟན་འོད་སྲུང་ལ་དྲིས་ཤིག །ཀུན་དགའ་བོས་ལེགས་སོ་བཀའ་བཞིན་
འཚལ་ཞེས་མཉན་ནས་གནས་བརྟན་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་འདི་དག་འཁོར་གྱི་ནང་དུ་ཇི་ལྟར་ཞུགས། འོད་སྲུང་གིས་སྨྲས་པ། ཀུན་དགའ་བོ་འདི་དག་ནི་སྐྱེས་བུ་བླུན་པོ་བདུད་ཀྱི་འཁོར་ཏེ་བདུད་དང་ལྷན་ཅིག་ལྷགས་པ་ཡིན་ནོ། །ཀུན་དགའ་
བོ་བདག་ནི་རྒྱུ་འདིས་འདི་སྐད་ཅེས་བཅོམ་ལྡན་འདས་བདག་ནི་ཞིང་སྲུང་བ་ཐབས་མཁས་པ་བཞིན་དུ་དེ་བཞིན་གཤེགས་པ་འདས་ནས་དམ་པའི་ཆོས་བསྲུང་བའི་རྔོ་མི་ཐོགས་ལགས་སོ་ཞེས་གསོལ་ནས་དོན་དེའི་ཕྱིར་བདག་གིས་དེའི་ཚེ་ས་ཆེན་པོ་འདི་ཁུར་དུ་ཐོགས་པ་ནི་མི་མངོ་ལགས་སོ་ཞེས་
ཀྱང་གསོལ་ཏོ། །དེའི་ཚེ་བཅོམ་ལྡན་འདས་ཀྱིས་བདག་ལ་བཀའ་སྩལ་པ། འོད་སྲུང་ཁྱོད་ཀྱིས་ང་འདས་ནས་ཇི་སྲིད་བསྟན་པ་ཉམས་པར་མ་གྱུར་པ་དེ་སྲིད་དུ་འཇིག་རྟེན་དུ་དམ་པའི་ཆོས་འབྱིན་པར་ནུས་སོ་ཞེས་བདག་ལ་བཅོམ་ལྡན་འདས་ཀྱིས་སྤྲོ་བ་བསྐྱེད་དོ། །དེའི་ཚེ་
བདག་གིས་བཅོམ་ལྡན་འདས་རེ་ཞིག་བདག་གིས་དགུང་ལོ་བཞི་བཅུ་ཞིག་དམ་པའི་ཆོས་དབྱུང་བར་བགྱིའོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བདག་ལ་བཀའ་སྩལ་པ། རེ་ཞིག་དེའི་བར་དུ་ཡང་ཁྱོད་སྙོམ་ལས་སྐྱེད་དམ་ཅི། ཇི་སྲིད་བསྟན་པ་མ་ཉམས་

པའི་བར་དུ་བརྩོན་པར་མི་ནུས་སམ། དེའི་ཚེ་བཅོམ་ལྡན་འདས་ཀྱིས་ཡང་བདག་ལ་བཀའ་སྩལ་པ། འོད་སྲུང་རེ་ཞིག་བདུད་ཚོལ་ཅིག །གལ་ཏེ་རྙེད་ན་དེའི་ཚེ་དམ་པའི་ཆོས་འབྱིན་ནུས་པར་འགྱུར་ཞིང་ངའི་དོན་ཡང་ཤེས་པར་འགྱུར་རོ། །ཀུན་
དགའ་བོ་བདག་གིས་ནི་དེའི་ཚེ་ལྷའི་མིག་གིས་བདུད་སྡིག་ཅན་བལྟས་ན་མ་མཐོང་མ་ཤེས་སོ། །དཔེར་ན་མཉན་ཡོད་ཀྱི་གྲོང་ཁྱེར་དུ་སྐྱེ་བོ་མང་པོའི་དབུས་སུ་ཞིང་པ་བུ་སྟོར་བ་ཞིག་གིས་རང་གི་བུ་བཙལ་ཏེ་མ་རྙེད་ན་དུབ་ཅིང་སླར་ལྡོག་པར་འགྱུར་རོ། །ཀུན་དགའ་བོ་དེ་བཞིན་དུ་
བདག་གིས་བཙལ་བ་ན་མ་རྙེད་དོ། །མ་རྙེད་ནས་འདི་སྐད་ཅེས་བཅོམ་ལྡན་འདས་བདག་ནི་བདུད་སྡིག་ཅན་ཚོལ་བར་སྤྲོ་བ་མ་མཆིས་ལགས་སོ་ཞེས་གསོལ་ནས་དེའི་ཚེ་བདག་ཕྱོགས་གཅིག་ཏུ་འདུག་གོ། །དེ་ནས་དེ་བཞིན་དུ་འོད་སྲུང་ཆེན་པོའི་འོག་མའི་གནས་བརྟན་ནས་
ཉན་ཐོས་ཆེན་པོ་བརྒྱད་ཅུའི་བར་གྱི་ཉན་ཐོས་ཆེན་པོ་རེ་རེ་ཞིང་འདི་ལྟ་སྟེ། ཞིང་པ་བཞིན་དུ་དཔེ་སྦྱར་བ་ལ་ཚིགས་སུ་བཅད་པའི་གྲངས་ཀྱིས་བགྲངས་ན་སྟོང་ཕྲག་འབྱུང་བར་འགྱུར་རོ། །དེ་ནས་བྱང་ཆུབ་སེམས་དཔའ་བཟང་སྐྱོང་དང་། ཕུག་སྦས་ལ་སོགས་པ་ལྔ་
བརྒྱ་དང་། འཇིག་རྟེན་ཐམས་ཅད་ཀྱིས་མཐོང་ན་དགའ་བ་མ་གཏོགས་པ་ལ་སོགས་པ་དེ་དག་གིས་ཀྱང་དེ་བཞིན་དུ་བཙལ་ན་མ་རྙེད་དེ། དེ་དག་ལ་ཡང་ཚིགས་སུ་བཅད་པ་དེ་བཞིན་དུ་བགྲང་བར་བྱའོ། །དེ་ནས་བཅོམ་ལྡན་འདས་ཀྱིས་གནས་བརྟན་འོད་སྲུང་ཆེན་པོ་ལ་
བཀའ་སྩལ་པ། འོད་སྲུང་གང་མ་འོངས་པའི་དུས་ན་དམ་པའི་ཆོས་ཀུན་ཏུ་འབྱིན་པར་མི་ནུས་པའི་རྒྱུ་ནི་དམ་པའི་ཆོས་ནུབ་ནས་ལོ་བརྒྱད་ཅུ་ལོན་པ་དང་། ལོ་བརྒྱད་ཅུ་པ་ཉིད་ལ་ལྷོ་ཕྱོགས་ཀྱི་བྱང་ཆུབ་སེམས་དཔའ་བཟང་སྐྱོང་དང་། ཕུག་སྦས་ལ་སོགས་ཏེ། བྱང་ཆུབ་
སེམས་དཔའ་ལྔ་བརྒྱ་པོ་གང་ཡིན་པ་དེ་དག་ཐམས་ཅད་ཀྱི་ཐ་མ་ཤོས་དེས་འབྱིན་པར་འགྱུར་བ་ཡིན་པས་རེ་ཞིག་དེ་ཚོལ་ཅིག །གསོལ་པ། ལེགས་སོ། །བཙལ་ལགས་ཏེ་ལིད་ཙ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་ཉིད་ལགས་སོ། །

བཅོམ་ལྡན་འདས་ཀྱིས་བཀའ་སྩལ་པ། དེའི་དྲུང་དུ་འོད་སྲུང་སོང་ལ་གསོལ་བ་ཐོབ་ཤིག་དང་དེས་བདུད་བཙལ་བར་ནུས་སོ། །དེ་ནས་འོད་སྲུང་ཆེན་པོ་ལ་སོགས་ཏེ། ཉན་ཐོས་ཆེན་པོ་བརྒྱད་ཅུ་དང་། བཟང་སྐྱོང་དང་། ཕུག་སྦས་ལ་སོགས་པའི་གཞོན་ནུའི་དྲུང་དུ་
དོང་ནས་གོ་བར་བྱས་པ། གཞོན་ནུ་ཁྱོད་ཀྱིས་ནི་བདུད་སྡིག་ཅན་བཙལ་བར་ནུས་སོ་ཞེས་བཅོམ་ལྡན་འདས་ཀྱིས་བསྟན་ཏོ་ཞེས་གྲག་གོ། །དེ་ནས་གཞོན་ནུས་འཁོར་གྱི་གཙོ་བོ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་བདག་གིས་བདུད་སྡིག་ཅན་
བཙལ་བར་ནི་བགྱི་ན། འོན་ཀྱང་བཙུན་པ་འོད་སྲུང་བཟང་སྐྱོང་ལ་སོགས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནས་འཇམ་དཔལ་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། ངན་སོང་སྦྱོང་དང་། བྱམས་པ་ལ་སོགས་པའི་བར་དག་
ཡོད་ན། ཅི་བདག་ལ་ཐོ་བཙམ་འམ། བཙུན་པ་འོད་སྲུང་བདག་བདུད་ཀྱི་རྫི་བོ་མ་ལགས་ཀྱིས་རེ་ཞིག་བསོད་ནམས་དང་ལྡན་པ་རྣམས་ཀྱིས་ཚོལ་ཅིག །འོད་སྲུང་གིས་སྨྲས་པ། གཞོན་ནུ་ཅི་བདུད་སྡིག་ཅན་ཚར་བཅད་པས་བསོད་ནམས་སུ་མི་འགྱུར་རམ།
གཞོན་ནུས་སྨྲས་པ། བཙུན་པ་གལ་ཏེ་དེ་ལྟར་བདག་གིས་ཀྱང་ཅི་སྟེ་མི་ནུས་ན་ཁྱོད་ཉིད་ཤིན་ཏུ་ཤེས་པས་ཁྱོད་ཀྱིས་ཚོལ་ཅིག །དེ་ནས་བཅོམ་ལྡན་འདས་ལ་འོད་སྲུང་གིས་དོན་དེ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་སྐད་བྱས་
ན་གཞོན་ནུ་ཅི་ཟེར། གསོལ་པ། བཅོམ་ལྡན་འདས་གཞོན་ནུ་འདི་སྐད་ཅེས་རེ་ཞིག་བསོད་ནམས་དང་ལྡན་པ་རྣམས་ཀྱིས་ལེགས་པར་ཚོལ་ཅིག །དེའི་འོག་ཏུ་བདག་གིས་བདུད་སྡིག་ཅན་བཙལ་བར་བགྱིའོ། །རེ་ཞིག་ཉན་ཐོས་ཆེན་པོ་བརྒྱད་ཅུས་ཚོལ་ཅིག །བདག་
ནི་ཁྱིམ་ན་གནས་པ་རིགས་ལྷག་པར་དམའ་བ་ལགས་པས་དེའི་འོག་ཏུ་བཙལ་བར་བགྱིའོ་ཞེས་མཆི་ལགས་སོ། །དེ་ནས་ཉན་ཐོས་མཆོག་དེ་དག་དང་། བཟང་སྐྱོང་དང་། ཕུག་སྦས་ལ་སོགས་པས་ཡང་བཙལ་ན། དཔེར་ན་ཞིང་པའི་ཆུང་མ་གྲོང་ཁྱེར་དུ་བུ་སྟོར་བ་བཞིན་དུ་དེ་དག་བདག་ནི་

སྤྲོ་བ་མེད་དོ། །བདག་ནི་སྤྲོ་བ་མེད་དོ་ཞེས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་གཞོན་ནུ་བོས་ཏེ་བཀའ་སྩལ་པ། གཞོན་ནུ་ཁྱོད་ཀྱིས་བདུད་ཚོལ་ཅིག །གཞོན་ནུས་གསོལ་པ། བཅོམ་ལྡན་འདས་ས་འཛིན་གྱི་རྒྱལ་པོའི་བུ་མོ་རྒྱལ་པོའི་
གཞོན་ནུ་མ་ལྔ་དཀར་ཞེས་བགྱི་བ་བསོད་ནམས་དང་ལྡན་པ་དེ་འདིར་མཆིས་ཏེ། དེའི་སླད་དུ་རྔ་བོ་ཆེ་དང་། དུང་དང་། རོལ་མོའི་སྒྲ་སྒྲོགས་ཤིང་མཆི་ལགས་སོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ།
ས་འཛིན་གྱི་རྒྱལ་པོའི་བུ་མོ་གཞོན་ནུ་མ་ལྔ་དཀར་ཞེས་བྱ་བས་དྲི་བ་གཅིག་གི་ལན་མ་ཐོབ་ནས་མུ་སྟེགས་ཅན་ཐམས་ཅད་ཕམ་པར་བྱས་ཏེ། དེ་རིང་དུ་ཞག་བདུན་ལོན་ནས་འདི་སྐད་ཅེས་རྒྱལ་པོ་ཟས་གཙང་གི་བཙུན་མོ་སྒྱུ་འཕྲུལ་ཆེན་མོ་ཞེས་བྱ་བ་ཞིག་ཡོད་དེ། དེའི་སྲས་དེ་གཽ་
ཏ་མའི་རྒྱུད་གཟུགས་བཟང་པོ་སངས་རྒྱས་ཞེས་བྱ་བ་ཞིག་ཡོད་དོ་ཞེས་གྲག་གིས་དེའི་སྤྱན་སྔར་འགྲོའོ་ཞེས་སྨྲ་ཞིང་འོང་ངོ་། །དེ་ནས་དེ་འོང་བ་ན་དེའི་ཚེ་མཉན་ཡོད་ནས་རྒྱལ་བུ་རྒྱལ་བྱེད་ཀྱི་ཚལ་དེའི་བར་འཁོར་གྱིས་རྒྱས་པར་གྱུར་ཅིང་། རྔ་བོ་ཆེ་དང་དུང་དང་རོལ་མོའི་སྒྲས་
མཉན་ཡོད་ནས་རྒྱལ་བུ་རྒྱལ་བྱེད་ཀྱི་ཚལ་དེའི་བར་གྲགས་པར་གྱུར་ཏོ། །དེ་ནས་གཞོན་ནུས་གསོལ་པ། བཅོམ་ལྡན་འདས་བདག་ཀྱང་བདུད་སྡིག་ཅན་ཚོལ་ལ། བསོད་ནམས་དང་ལྡན་པ་རྣམས་ཀྱང་དེ་སྐད་མཆི་ན། དེའི་དྲི་བ་སུ་ལན་ལྡོན་པར་འགྱུར་ལགས། དེ་ནས་
བཅོམ་ལྡན་འདས་ཀྱིས་ཚིགས་སུ་བཅད་པ་འདི་བཀའ་སྩལ་ཏོ། །སྐྱེས་བུ་བརྟན་པོས་རྟག་ཏུ་ནི། །གནོད་སེམས་མེད་པར་བུ་བཞིན་སྦྱིན། །ཉམས་ལ་ནམ་ཡང་མིན་ཞེས་གྲགས། །དྲི་བ་འདི་ཡི་ལན་ཐོབ་ཤིག །དེ་ནས་ཉན་ཐོས་ཆེན་པོ་བརྒྱད་ཅུ་དང་། ཕུག་སྦས་ལ་སོགས་པ་བྱང་
ཆུབ་སེམས་དཔའི་ཚོགས་ཀྱིས་ཚིག་འཐུན་པར་ཚིགས་སུ་བཅད་པ་འདི་སྨྲས་སོ། །གནོད་སེམས་མེད་པའི་སེམས་ཀྱིས་སུ། །གཡེལ་ལམ་ཚུལ་ཁྲིམས་ལྡན་ཡང་རུང་། །མཛའ་བོ་དགྲ་ལ་བུ་བཞིན་དུ། །ཐམས་ཅད་དུ་ནི་སྦྱིན་པ་བསྔགས། །བཅོམ་ལྡན་འཇིག་རྟེན་མགོན་པོ་ཡིས། །

དྲི་བ་འདི་འདྲ་གསུངས་པ་གང་། །འདི་འདྲ་བདག་ཅག་མ་ཐོས་ན། །རེ་ཞིག་འཇམ་དཔལ་གྱིས་རྟོགས་ཤིག །དེ་ནས་འཇམ་དཔལ་ལ་སོགས་པའི་བྱང་ཆུབ་སེམས་དཔའི་ཚོགས་དེ་དག་གིས་ཀྱང་དེ་བཞིན་དུ་ཚིགས་སུ་བཅད་པ་དེ་ཉིད་ཀྱིས་ལན་བླན་ཏོ། །དེ་ནས་བཅོམ་ལྡན་འདས་ཀྱིས་ལིད་ཙ་
བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ལ་བཀའ་སྩལ་པ། །གཞོན་ནུ་ཁྱོད་ཀྱིས་དྲིས་པ་འདིའི་ལན་ཐོབ་ཤིག །གཞོན་ནུས་གསོལ་པ། བཅོམ་ལྡན་འདས་རེ་ཞིག་གླང་པོ་ཆེ་ཆེན་པོ་འདི་དག་ཐམས་ཅད་ཀྱིས་རྒན་རིམས་བཞིན་ཇི་ལན་འདེབས་སུ་སྩལ་དུ་གསོལ། དེ་
ནས་རྒྱལ་པོའི་གཞོན་ནུ་མ་ལྔ་དཀར་རྒྱལ་པོའི་གཞོན་ནུ་མ་ལྔ་བརྒྱ་དང་ལྷན་ཅིག་བཅོམ་ལྡན་འདས་ལ་ཕྱག་འཚལ་ཏེ། བཅོམ་ལྡན་འདས་ལ་མཆོད་པ་དཔེ་མེད་པ་དག་བྱས་ནས་རྔ་བོ་ཆེ་དག་བརྡུངས་སོ། །བརྡུངས་ནས་འདི་སྐད་ཅེས་སྨྲས་སོ། །བརྟན་པོ་གང་དང་གང་དག་རྔ་བོ་ཆེ་ཆེན་
པོའི་མདོ་ཉན་པར་འདོད་ནས་ལྷགས་པ་དེ་དག་བདག་གི་རྔ་བོ་ཆེ་བསྒྲགས་པ་གསན་ནས་དྲི་བ་དེའི་ལན་ལོན་ཅིག །གཞོན་ནུས་གསོལ་པ། བཅོམ་ལྡན་འདས་ལན་ལྡོན་དུ་སྩལ་དུ་གསོལ། དེ་དག་གིས་གསོལ་པ། བཅོམ་ལྡན་འདས་རེ་ཞིག་བུད་མེད་ནི་རང་བཞིན་གྱིས་མི་
བརྟན་པ་ལགས་པས་དེའི་སླད་དུ་བདག་ཅག་ལན་ལྡོན་རྔོ་མི་ཐོགས་ལགས་སོ། །གཞོན་ནུས་ཀྱང་གསོལ་པ། བཅོམ་ལྡན་འདས་བུད་མེད་འདི་རང་བཞིན་གྱིས་གཞོན་ནུ་མ་ལགས་ན་བདག་སྐྱེས་པར་གྱུར་པས་བུད་མེད་ཀྱིས་སྨྲས་པའི་དྲི་བ་ལན་གློན་ལགས་སམ། ལྔ་དཀར་
གྱིས་སྨྲས་པ། གཞོན་ནུ་ཁྱོད་མགོན་པོའི་བསྟན་པ་ལ་ཞུགས་ནས་ཁྱོད་ཀྱིས་ཆོས་ཉིད་ཀྱང་ཐོས་ན་ཅི་ད་དུང་སྐྱེས་པའོ། །བུད་མེད་དོ་སྙམ་པའི་ཕྱིན་ཅི་ལོག་གི་འདུ་ཤེས་མ་སྤངས་སམ། སྨྲས་པ། སྲིང་མོ་ཇི་ལྟར་དེ་ཡིན། དེ་ནས་ལྔ་དཀར་གྱིས་སྨྲས་པ། རེ་ཞིག་བཅོམ་ལྡན་
འདས་ཀྱང་གང་གི་ཕྱིར་དེ་སྐད་དུ་གསུང་ན་དེའི་ཕྱིར་ཕྱིན་ཅི་ལོག་གི་མཚན་ཉིད་ཅན་ཡིན་ནོ། །གཞོན་ནུས་ལྔ་དཀར་ལ་སྨྲས་པ། རེ་ཞིག་ཇ་ཐོག་མར་དེ་བཅོམ་ལྡན་འདས་ལ་གསོལ་ཅིག །དེའི་འོག་ཏུ་འདི་བདག་དང་ལྷན་ཅིག་སྨྲ་བར་བྱའོ། །འོད་སྲུང་གིས་གསོལ་པ། བཅོམ་ལྡན་

འདས་གཞོན་ནུ་དེ་སྐད་ཅེས་མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རེ་ཞིག་གཞོན་ནུ་ཁོ་ན་ལན་འདེབས་པར་འགྱུར་རོ། །གཞོན་ནུས་ཀྱང་སྨྲས་པ། བུ་མོ་ཁྱོད་སུ་ཡིན་སྨྲས་པ། བདག་ནི་ལྔ་དཀར་ཞེས་བྱ་བ་ཡིན་ནོ། །སྨྲས་པ། སྲིང་མོ་ཅི་ཁྱོད་ཀྱིས་དཀར་པོ་ལྔ་ཐོབ་
བམ། ལྔ་དཀར་གྱིས་སྨྲས་པ། ཆོས་རྣམས་ནི་མིང་མེད་པ་ཡིན་ཏེ། མིང་ནི་རྟོག་པས་ཀུན་རྫོབ་ཏུ་བསྟན་པའོ། །གཞོན་ནུའི་མཆོག་འདི་ལྟར་དོན་དམ་པར་ནི་དེ་སྟོང་པ་ཉིད་ཡིན་གྱིས་དེ་ལྟར་ཤེས་པར་གྱིས་ཤིག །གཞོན་ནུས་སྨྲས་པ། ལྷ་མོ་ད་དུང་ཡང་ཕྱིན་ཅི་ལོག་མ་སྤངས་སམ། འདི་ལ་གལ་ཏེ་
གཞོན་ནུའམ། གཞོན་ནུ་མ་ཞེས་བྱ་བ་རྙེད་ན་དེ་མྱུར་དུ་སྨྲོས་ཤིག །ལྔ་དཀར་གྱིས་སྨྲས་པ། གཞོན་ནུ་ལེགས་སོ་ལེགས་སོ། །ད་ནི་དྲི་བའི་ལས་བཅད་དེ། དེ་ལྟ་བས་ན་ཁྱོད་རྗེས་སུ་དཔགས་ན་འཇིག་རྟེན་དུ་སངས་རྒྱས་སུ་འགྱུར་བར་ཤེས་སོ། །དེས་སྨྲས་པ། ལྷ་མོ་ཅི་ཁྱོད་ཀྱིས་ད་དུང་དྲི་བ་བཅད་
པ་ཤེས་སམ། ཇི་ལྟར་གཞོན་ནུ་དང་གཞོན་ནུ་མ་ཟད་པར་འགྱུར་ཞིང་མི་སྐྱེ་བ་དེ་ལྟར་ཁྱོད་མི་ཤེས་ཏེ། ཁྱོད་ནི་ཉན་ཐོས་དག་ཇི་སྐད་བརྗོད་པ་དེ་བཞིན་དུ་རྗོད་པར་བྱེད་ཀྱི། དྲི་བ་འདི་ནི་འཇམ་དཔལ་གྱིས་ཇི་སྐད་སྨྲས་པ་བཞིན་ཡིན་ནོ། །ལྔ་དཀར་གྱིས་སྨྲས་པ། དཔེར་ན་ཇི་ལྟ་བུ་ཡིན། གཞོན་ནུས་
སྨྲས་པ། ཀྱེ་མའོ་ཇི་ལྟར་སྐྱེས་པ་འགའ་ཞིག་ཡི་གེ་རྣམས་ཀྱི་མཐར་ཕྱིན་ནས་བདག་ཉིད་ཀྱི་མིང་བྲིས་ན་ཀློག་མི་ཤེས་པ་དེ་བཞིན་དུ་ལྷ་མོ་ལྔ་དཀར་གྱིས་ཀྱང་ལྔ་དཀར་མི་ཤེས་སོ།། །།འཕགས་པ་རྔ་བོ་ཆེ་ཆེན་པོའི་ལེའུ་བམ་པོ་ལྔ་པ་སྟེ་ཐ་མ། དེ་ནས་ཐམས་ཅད་དང་ལྡན་པའི་
བྱང་ཆུབ་སེམས་དཔའི་ཚོགས་དང་། ནམ་མཁའི་ལྷའི་ཚོགས་དང་། འབྲུག་གི་ཚོགས་ཀྱིས་ཕྱོགས་བཅུ་ནས་གཡོས། རབ་ཏུ་གཡོས། ལྡེག་རབ་ཏུ་ལྡེག །ཆེམ་ཆེམ་རབ་ཏུ་ཆེམ་ཆེམ་སྟེ། དེ་དག་ཐམས་ཅད་ཀྱིས་དེ་ལྟ་བུའི་མཆོད་པའི་ལས་ཆེན་པོ་བྱས་ན་ལེགས་ས་ཞེས་བྱ་བ་བྱིན་ཏེ།
གཞོན་ནུ་གང་གིས་ཡ་མཚན་ཅན་ཐམས་ཅད་དྲི་བ་གཅིག་གིས་ཚར་བཅད་ཅིང་། སྲོག་ཆགས་བྱེ་བ་བརྒྱ་སྟོང་ཕྲག་དུ་མ་དག་དེ་བཞིན་གཤེགས་པའི་བསྟན་པ་ལ་བཙུད་པའི་ལྷ་མོ་དེ་ལྟ་བུ་དེང་ཐུབ་པ་དང་དེས་བཞག་པའི་དྲི་བ་ཀུན་ཤེས་པ་ལེགས་ས་ལེགས་སོ། །དེ་ནས་དེའི་ཚེ་མུ་སྟེགས་

བྱེད་པ་ཡ་མཚན་ཅན་ཐམས་ཅད་རང་རང་གི་རབ་ཏུ་བྱུང་བ་སྤངས་ནས། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་སྟེ། དེ་ན་གང་དག་རབ་ཏུ་འབྱུང་བ་ལ་མི་སྟེན་པ་དེ་དག་ནི་དགེ་བསྙེན་དུ་གྱུར་ཏོ། །དེ་ནས་ཐམས་ཅད་དང་ལྡན་པའི་འཁོར་དེས་གཞོན་ནུ་ལ་ལེགས་ས་ཞེས་བྱ་བ་
བྱིན་ཏེ། གཞོན་ནུ་ཁྱོད་ཀྱིས་གང་གི་ཕྱིར་དྲི་བ་འདིའི་ལན་གླན་པ་ལེགས་ས་ལེགས་སོ། །གཞོན་ནུས་སྨྲས་པ། འདི་ནི་བཅོམ་ལྡན་འདས་ཁོ་ནའི་མཐུ་ཡིན་གྱི་བདག་གི་ནི་མ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། འཇིག་རྟེན་ཐམས་ཅད་ཀྱིས་མཐོང་ན་དགའ་བ་ངས་ཀྱང་ཚིགས་
སུ་བཅད་པ་དེ་ཁོ་ན་བཞིན་དུ་ཤེས་སོ། །ཚིགས་སུ་བཅད་པ་དེའི་དོན་གྱི་ཚུལ་ནི་འདི་ཡིན་ནོ། །བྱང་ཆུབ་སེམས་དཔའ་སྐྱེས་མཆོག་གིས། །རྟག་ཏུ་གནོད་པའི་སེམས་སུ་བྱ། །རྟག་ཏུ་སྦྱིན་པ་བསྔགས་པ་ནི། །ཚུལ་ཁྲིམས་བཀུར་བ་གཡེལ་ལ་མིན། །བྱམས་དང་དགྲ་ལ་བུ་བཞིན་མིན། །ཚིག་
འདིའི་རྣམ་དབྱེ་སྣ་ཚོགས་ཉོན། །སྐྱེས་བུ་མཆོག་གིས་ཚུལ་ཁྲིམས་འཆལ་པ་མཐོང་ན་རྟག་ཏུ་གནོད་སེམས་སུ་བྱ་ཞིང་དེ་དག་ལ་ཅུང་ཟད་ཀྱང་སྦྱིན་པ་སྦྱིན་པར་མི་བྱ་སྟེ། དེ་དག་བསྟན་པ་ལ་དགྲ་དང་མཚུངས་པ་ཡིན་པས་འདི་ལ་སྦྱིན་པར་བྱའོ། །འདི་ལ་སྦྱིན་པར་མི་བྱའོ་ཞེས་འབྱུང་པོ་རྣམས་ཀྱི་ཆེད་
དུ་བསམ་པར་བྱའོ། །སྦྱིན་པ་རྣམ་པ་གཉིས་སུ་གསུངས་པ་སོ་སོའི་སྐྱེ་བོའི་ཚུལ་ཁྲིམས་དང་ལྡན་པ་དང་། སེམས་ཅན་སྡུག་བསྔལ་བ་ལ་སྙིང་རྗེས་སྦྱིན་པའོ། །གལ་ཏེ་ཚུལ་ཁྲིམས་འཆལ་པ་ལ་སྙིང་རྗེས་བྱིན་ན་གོས་པར་མི་འགྱུར་རམ། ཇི་ལྟར་མདའ་དུག་གིས་བྱུགས་པ་དེས་མ་བྱུགས་
པ་ཡང་གོས་པར་འགྱུར་བ་དེ་བཞིན་དུ་དགེ་སློང་ཚུལ་ཁྲིམས་འཆལ་པས་ཀྱང་ཚུལ་ཁྲིམས་དང་ལྡན་པ་གང་ཡིན་པ་དེ་ཡང་ཉམས་པར་བྱེད་དོ། །དེ་ལྟ་བས་ན་འདི་ལ་ཚར་གཅད་པ་ཁོ་ན་ལེགས་ཀྱི་སྦྱིན་པས་ལྟ་ག་ལ་གཟུང་། མཐོང་ན་རྟག་ཏུ་དགྲ་བོ་དང་འདྲ་བར་བྱ་སྟེ། དེས་ན་གནོད་སེམས་
སུ་མི་བྱའོ་ཞེས་གསུངས་སོ། །ཚུལ་ཁྲིམས་འདྲེན་མ་མི་བསྟེན་ཏེ། །རྒྱུ་དེའི་ཕྱིར་ན་གནོད་པ་ཡི། །སེམས་ནི་བསྐྱེད་པར་བྱའོ་ཞེས། །སྔོན་གྱི་སངས་རྒྱས་རྣམས་ཀྱིས་གསུངས། །མཛའ་དང་དགྲ་ལ་མཉམ་པ་གང་ཡིན་དང་། །གཡེལ་དང་ཚུལ་ཁྲིམས་ལྡན་ལ་མཉམ་པ་གང་། །གནོད་

སེམས་མེད་པར་སྤྱོད་པ་དེ་ཀུན་ནི། །བསྟན་པ་འདི་ལ་རྩྭ་དང་འདྲ་བར་གཟུང་། །བསྟན་པ་ལ་ནི་ངེས་པའི་དོན། །དེ་ལྟར་རབ་ཏུ་བསྔགས་པ་ཡི། །སྤྱོད་པ་སྤུ་གྲིའི་སོ་ལྟ་བུར། །རྣོ་བའི་མཆོག་ནི་སྤྱད་པར་གྱིས། །དེའི་ཕྱིར་རྔ་བོ་ཆེ་ཆེན་པོའི་མདོས་བསྒྲགས་སོ། །རྔ་བོ་ཆེ་ཆེན་པོའི་མདོས་
ཅི་ཞིག་བསྒྲགས་ཞེ་ན། ཚིགས་སུ་བཅད་པ་དེའི་དོན་གང་ཡིན་པ་དེ་འདིར་རྔ་བོ་ཆེ་ཆེན་པོའི་མདོ་ལས་སྨོས་པས་དེས་ན་མདོ་ཆེན་པོ་འདི་ནི་རྔ་བོ་ཆེ་ཆེན་པོ་ཞེས་བྱའོ། །དེ་ནས་ཇི་ལྟར་ལྷགས་པའི་འཁོར་དེ་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ཏེ། ཀྱེ་མ་གཞོན་ནུ་འཇིག་རྟེན་ཐམས་ཅད་ཀྱིས་མཐོང་
ན་དགའ་བ་མཁས་པ་ཇི་ལྟར་རྒྱལ་པོ་གསལ་རྒྱལ་འགྲོ་བ་ལ་ཕན་པའི་དོན་དུ་གཡུལ་ངོར་རྔ་བོ་ཆེ་སྒྲ་འབྱིན་པ་དེ་བཞིན་དུ་རྔ་བོ་ཆེ་ཆེན་པོའི་མདོ་འདི་བསྒྲགས་པ་ན་འགྲོ་བ་ལ་དཀོན་མཆོག་གསུམ་གྱི་བསྔགས་པའི་སྒྲ་བརྗོད་པའི་ཚུལ་གྱིས་སངས་རྒྱས་ཀྱི་གསུང་བ་འདི་ལྟ་སྟེ། དེ་བཞིན་གཤེགས་པ་རྟག་པ།
བརྟན་པ། ཞི་བ། ཐེར་ཟུག་པའོ་ཞེས་སངས་རྒྱས་ཀྱི་གསང་བ་འདི་སྒྲོགས་སོ། །དེ་ནས་བཅོམ་ལྡན་འདས་ཀྱིས་ཡང་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ཁྱོད་ཀྱིས་གང་གི་ཚེ་བདུད་བསྟན་པར་མི་ནུས་པ་དེའི་ཚེ་འོད་སྲུང་ཁྱོད་ཀྱིས་རྔ་བོ་ཆེ་ཆེན་པོའི་མདོ་འདི་ཉོན་ལ་ང་འདས་ནས་ལོ་བཞི་བཅུའི་བར་དུ་ཇི་ལྟར་ད་ལྟར་
གནས་པ་བཞིན་དུ་དམ་པའི་ཆོས་ཟུང་ཤིག །ཆོས་ཆེན་པོའི་རྔ་བོ་ཆེ་རྡུངས་ཤིག །ཆོས་ཆེན་པོའི་རྔ་བོ་ཆེ་དང་། དུང་སྒྲོགས་ཤིག །དེའི་འོག་ཏུ་ལོ་བརྒྱད་ཅུ་ན་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་དེའི་ཚེ་དེའི་དུས་སུ་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བས་དེའི་ཚེ་ཐོག་མར་བདུད་
ཀྱིས་བསྒྱུར་བའི་སེམས་ཅན་སྐྲ་དང་ཁ་སྤུ་བྲེགས་པ་དག་གནས་པ་དང་། དེའི་ཚེ་གཞོན་ནུས་སྡིག་ཅན་འཁོར་དང་བཅས་པ། གཟུགས་དང་བཅས་པ་བཅིང་བ་ལྔས་བཅིངས་ནས་རི་བོ་བཞིན་དུ་སྟོན་པར་འགྱུར་ཞིང་རྔ་བོ་ཆེ་ཆེན་པོའི་མདོ་ལས་གསུངས་པའི་ཆོས་ཆེན་པོ་སྒྲོགས་པར་འགྱུར། ཆོས་ཆེན་པོའི་རྔ་བོ་ཆེ་
རྡུང་བར་འགྱུར། ཆོས་ཆེན་པོའི་དུང་འབུད་པར་འགྱུར། ཆོས་ཀྱི་མཆོད་སྦྱིན་བྱེད་པར་འགྱུར། ཆོས་ཀྱི་རྒྱལ་མཚན་འཛུགས་པར་འགྱུར་རོ། །གསོལ་པ། ནམ་ཞིག་ན་ལགས། བཀའ་སྩལ་པ། གང་གི་ཚེ་ལོ་བརྒྱད་ཅུ་ན་བསྟན་པ་ཉམས་པར་འགྱུར་བ་དེའི་ཚེ་ནའོ། །གསོལ་པ། བཅོམ་ལྡན་འདས་བདག་

ཅག་གིས་ལྟ་ལགས་ན་ད་ལྟར་མངོན་སུམ་དུ་མཛད་དུ་གསོལ། དེ་ནས་བཅོམ་ལྡན་འདས་ཀྱིས་གཞོན་ནུ་ལ་བཀའ་སྩལ་པ། མྱུར་དུ་བདུད་སྟོན་ཅིག །དེ་ནས་གཞོན་ནུས་བཅོམ་ལྡན་འདས་གང་ན་བ་དེ་ལོགས་སུ་གདོང་ཕྱོགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདུད་སྡིག་ཅན་མཆིས་
པའོ་ནི་ལགས་ཏེ། འོ་ནི་འཇིག་རྟེན་གྱི་ཁམས་གཞན་ནས་མཆིས་ནས་བྱང་ཆུབ་སེམས་དཔའི་བཞིན་དུ་དགེ་སློང་གི་གཟུགས་སུ་མཆིས་པ་ལ་གཟིགས་ཞེས་མཛུབ་མོས་བསྟན་ཏོ། །ཐམས་ཅད་དང་ལྡན་པའི་འཁོར་གྱིས་ཀྱང་བདུད་དེ་བཅིང་བ་ལྔས་བཅིངས་པར་མཐོང་ངོ་། །དེ་ནས་བདུད་ཀྱིས་སྨྲས་པ། །
གཞོན་ནུ་བདག་མདོ་སྡེ་འདི་ལ་ལན་གཉིས་སུ་བར་ཆད་མི་བྱེད་དོ་ཞེས་ཚིག་དེ་ལན་གསུམ་དུ་སྨྲས་པ་དང་། གཞོན་ནུས་སྨྲས་པ། ཇི་ལྟར་ཡིད་ཆེས་པར་འགྱུར། བདུད་ཀྱིས་སྨྲས་པ། འདི་ལྟར་ཡིད་ཆེས་པར་གྱིས་ཤིག །སྦྱོར་བ་ཇི་སྙེད་ཀྱིས་བདུད་ཀྱི་ཆ་བྱད་དུ་བྱས་ནས་སེམས་ཅན་རྣམས་དད་པ་བསྒྱུར་བའི་
སྦྱོར་བ་དེ་ཐམས་ཅད་བསྟན་པར་བྱའོ། །གཞོན་ནུ་བདག་གིས་རྒྱུན་དུ་ཞུགས་པ་ལ་སོགས་པ་འབྲས་བུ་བཞིའི་བར་གྱིས་ཡོངས་སུ་མྱ་ངན་ལས་འདས་པ་དང་། སངས་རྒྱས་ཀྱི་ཡོངས་སུ་མྱ་ངན་ལས་འདས་པ་ཡང་སྟོན། སྟོང་པ་ཆེན་པོ་ཉིད་སྒོམས་ཤིག་པ་ཡང་སྨྲ། སེམས་ཅན་དུ་ལྟ་བ་ཡང་སྨྲ། སེམས་
ཅན་དུ་ལྟ་བ་ཡང་འདོད་པར་བྱེད་དེ། འདི་ལྟར་སེམས་ཅན་ཡོད་དོ་ཞེས་ཀྱང་སྨྲའོ། །བདག་ནི་བདག་གི་ལུས་ནམ་མཁའ་ལ་འབར་བ་ཡང་སྟོན། དུ་བར་འཐུལ་བ་དང་། མེ་ཏོག་གི་ཆར་ཆེན་པོ་འབེབས་པ་ཡང་སྟོན་ཅིང་གང་ངས་སྟོང་པ་ཆེན་པོ་ཞེས་བཤད་པ་དེ་ཐམས་ཅད་ནི་ཞི་བ་ཡིན་ལ། གང་ངས་སེམས་ཅན་
ཡོད་དོ་ཞེས་བཤད་པ་དེ་དག་ཐམས་ཅད་ནི་སྟོང་པ་ཡིན་གྱིས་སྟོང་པ་ཆེན་པོ་ནི་དེ་ལྟར་གྱིས་ཤིག །སེམས་ཅན་ཡོད་དོ་ཞེས་བྱ་བ་ནི་དེ་ལྟར་ཤེས་པར་གྱིས་ཤིག་ཅེས་ཀྱང་སྨྲའོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བདུད་སྡིག་ཅན་དེ་ལྟ་བུ་བྱེད་ནུས་པ་ལ་
ལྟོས། སངས་རྒྱས་ཡོངས་སུ་མྱ་ངན་ལས་འདའ་བའི་བར་འདི་ཡང་སྟེན་པར་བྱེད་ན། དགེ་སློང་དག་བདུད་ཀྱིས་དེ་ལྟར་བྱས་ན་སེམས་ཅན་རྣམས་ཇི་ལྟར་ཡིད་ཆེས་པར་མི་འགྱུར། དགེ་སློང་དག་དེ་ལྟ་བས་ན་སུ་ཡང་ཡོངས་སུ་མྱ་ངན་ལས་འདའ་བ་ནི་འདི་ལྟ་བུའི་ཚིག་གཉིས་སྨྲ་བ་ན། དེ་ནི་བདུད་ཡིན་པར་བལྟའོ།

གང་དག་དེ་སྐད་དུ་སྔ་ཕྱིར་ཚིག་གཉིས་སྨྲས་ནས་ཡོངས་སུ་མྱ་ངན་ལས་འདའ་ན། དེ་ནི་ངའི་ཉན་ཐོས་མ་ཡིན་པར་བལྟའོ། །དགེ་སློང་དག་དེ་ལྟ་བས་ན་ཆོས་རྣམ་པར་འཕྲུལ་པས་ཀྱང་མ་ཡིན། འབྲས་བུ་བཞིས་ཀྱང་མ་ཡིན། བསམ་གཏན་གྱིས་ཀྱང་མ་ཡིན། མངོན་པར་ཤེས་པའི་རྩེ་བས་ཀྱང་
མ་ཡིན་ཏེ། དེ་དག་ནི་དེའི་ཕྱོགས་ཡིན་པར་དེ་དག་ལ་ཡིད་ཆེས་པར་མི་བྱའོ། །གང་དག་ཇི་ལྟར་ཡང་རུང་བ་དེ་སྐད་དུ་སྔ་ཕྱིར་ཚིག་གཉིས་སྨྲས་ནས་དེའི་འོག་ཏུ་ཡོངས་སུ་མྱ་ངན་ལས་འདའ་བ་དེ་དག་ནི་བདུད་ཀྱིས་སྤྲུལ་པ་ཡིན་པར་བལྟའོ། །འོད་སྲུང་ང་ཡོངས་སུ་མྱ་ངན་ལས་འདས་ནས་ལོ་བདུན་བརྒྱའི་བར་
དུ་ངའི་ཉན་ཐོས་རྣམས་ཡོངས་སུ་མྱ་ངན་ལས་འདའ་བར་འགྱུར་ཏེ་དེ་དག་ནི་འདི་ལྟ་བུའི་ཚིག་གཉིས་པོ་ཉོན་མོངས་པ་གང་ཡིན་པ་དེ་ནི་སྟོང་པའོ། །ཞི་བ་གང་ཡིན་པ་དེ་ནི་མྱ་ངན་ལས་འདས་པའོ་ཞེས་སྨྲ་ཞིང་མྱ་ངན་ལས་འདའ་བར་འགྱུར་རོ། །དེ་ཕྱིན་ཅད་ནི་ཉན་ཐོས་སམ། བྱང་ཆུབ་སེམས་དཔའ་
ཡོངས་སུ་མྱ་ངན་ལས་འདའ་བར་མི་འགྱུར་ཏེ། དེ་ཅིའི་ཕྱིར་ཞེ་ན། འདི་ལྟར་སངས་རྒྱས་ཀྱིས་བྱིན་གྱིས་བརླབས་པའི་ཕྱིར་རོ། །ཡང་དེ་ཅིའི་ཕྱིར་ཞེ་ན། དེའི་ཚེ་མི་རྣམས་སྟོང་པ་ཉིད་ལ་ཆད་པ་དང་རྟག་པར་ལྟ་ཞིང་སྤྱོད་དེ། རུང་བ་མ་ཡིན་པ་དང་འདྲེན་མར་འགྱུར་རོ། །དེ་ལྟ་བས་ན་དེ་དག་སྟོང་པ་ཆེན་པོ་ཉིད་ལ་རུང་
བ་མ་ཡིན་པ་ཆད་པ་དང་། རྟག་པས་འགྲིབ་པ་ཉིད་དང་། འཕེལ་བ་ཉིད་དུ་སྨྲ་ཞིང་དེ་བཞིན་གཤེགས་པའི་སྙིང་པོའི་གཏམ་བསྟན་པ་ན་སྨོད་པས་སངས་རྒྱས་རྟག་པ་ཉིད་ཀྱི་གཏམ་སྤོང་བར་འགྱུར་ཏེ། དེ་ཉིད་ཀྱིས་ཡོངས་སུ་མྱ་ངན་ལས་འདའ་བར་མི་འགྱུར་རོ། །གང་དག་འདི་ལྟར་བདུད་ཀྱི་མྱ་ངན་ལས་འདས་པའི་
འབྲས་བུས་ཡོངས་སུ་མྱ་ངན་ལས་འདའ་བར་འགྱུར་བ་དེ་དག་ཐམས་ཅད་ནི་བདུད་ཀྱིས་སྤྲུལ་པ་ཡིན་པར་རིག་པར་བྱའོ། །མྱ་ངན་ལས་འདའ་བར་འགྱུར་བ་གང་དག་ཡིན་པ་དེ་དག་ཀྱང་ཕལ་ཆེར་བདུད་ཀྱིས་སྤྲུལ་པ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་འཇིག་རྟེན་
ཐམས་ཅད་ཀྱིས་མཐོང་ན་དགའ་བ་ལ་སོགས་པ་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག་ང་ཡོངས་སུ་མྱ་ངན་ལས་འདས་ནས་ཁྱེད་ཀྱིས་ཕྱི་མའི་ཚེ་ཕྱི་མའི་དུས་ན་དམ་པའི་ཆོས་འབྱིན་པར་སུ་འགྱུར། འོད་སྲུང་ཆེན་པོ་ལེགས་སོ། །ང་འདས་ནས་དམ་པའི་ཆོས་འབྱིན་པར་འགྱུར་

རམ་ཞེས་ལན་གསུམ་གྱི་བར་དུ་སྤྲོ་བ་བསྐྱེད་ཀྱང་སྤྲོ་བར་མི་བྱེད་དོ། །དེའི་ཚེ་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པ་ལ་ཁྱད་དུ་གསོད་པར་མ་སེམས་ཤིག །ང་ལ་གང་དག་ཕྱི་མའི་ཚེ་ཕྱི་མའི་དུས་ན་དམ་པའི་ཆོས་འཛིན་པར་འགྱུར་བའི་སློབ་མ་མང་དུ་ཡོད་དེ་གོང་
དུ་མདོ་འདི་ལས་གསུངས་པ་བཟང་སྐྱོང་དང་། ཕུག་སྦས་ལ་སོགས་པ་ལྔ་བརྒྱ་པོ་དེ་དག་གི་ཕྱི་མ་ཤོས་གང་ཡིན་པ་དེ་ཡིན་པར་འགྱུར་རོ། །འོད་སྲུང་དེ་ཡང་གང་ཞེ་ན་ལིད་ཙ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་འདི་ཉིད་ཡིན་ཏེ། ཕྱི་མའི་དུས་ན་ལྷོ་ཕྱོགས་ཀྱི་མཁས་པར་གྱུར་ནས་ཆོས་ཀྱི་
རྔ་བོ་ཆེ་ཆེན་པོ་རྡུང་བར་འགྱུར། ཆོས་ཀྱི་དུང་འབུད་པར་འགྱུར་རོ། །དེ་ནས་གཞོན་ནུས་བདུད་བཀྲོལ་ཏེ། བསྟན་ནས་ཆོས་ཇི་ལྟ་བ་དེ་བཞིན་དུ་མནའ་བསྒགས་ཏེ། དེའི་འོག་ཏུ་གཏད་དོ། །དེ་ནས་ཐམས་ཅད་དང་ལྡན་པའི་འཁོར་དེས་གཞོན་ནུ་ལ་སྨྲས་པ། གཞོན་ནུ་ཁྱོད་བཅོམ་ལྡན་འདས་ཀྱིས་ལུང་བསྟན་པ་ཡིན་
གྱིས་ཕན་པ་སྟོན་པ་ཆོས་ཀྱི་རྔ་བོ་ཆེ་རྡུངས་ཤིག །རྔ་བོ་ཆེ་ཆེན་པོའི་མདོ་སྨྲོས་ཤིག །ཆོས་ཀྱི་དུང་བུས་ཤིག་ཅེས་ཚིག་ཏུ་སྨྲས་སོ། །དེ་ནས་བཅོམ་ལྡན་འདས་ཀྱིས་ཡང་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ཁྱོད་ནི་ཞིང་སྲུང་བ་ལྟ་བུར་མ་ནུས་ཏེ། ཞིང་སྲུང་བཞིན་དུ་ཐབས་ལ་མཁས་པའི་
གཞོན་ནུས་མདོ་འདི་ཐམས་ཅད་མཉན་ནས་ལུས་ལ་ཐོགས་ཏེ། འཇིག་རྟེན་དུ་མངོན་སུམ་དུ་འབྱིན་པར་འགྱུར་རོ། །དེ་ནི་ངས་ས་བདུན་པ་ལ་བཞག་སྟེ་མི་ཕལ་པ་ཞིག་ཏུ་བྱིན་གྱིས་བརླབས་ནས་གང་གི་ཚེ་ལོ་བརྒྱད་ཅུ་པ་ལ་བསྟན་པ་ཉམས་པར་འགྱུར་བ་དེའི་ཚེ་ལྷོ་ཕྱོགས་སུ་ཡུལ་མུ་རུན་དུ་ཞེས་བྱ་བ་ན་ཆུ་བོའི་
འགྲམ་ལ་རྟེན་པའི་གྲོང་ཁྱེར་དམག་གིས་མི་ཚུགས་པ་ཞེས་བྱ་བ་དང་། ཉེ་བའི་གྲོང་ཕྲེང་བ་ཆེན་པོ་ཞེས་བྱ་བར་ཀ་ཡོ་རི་ཞེས་བྱ་བའི་རིགས་རྒྱུད་དེར་སྐྱེས་ནས་ངའི་མིང་འཆང་བའི་དགེ་སློང་ཞིག་ཏུ་གྱུར་ཏེ། ཞིང་སྲུང་བའི་ཐབས་མཁས་པས་ངའི་དགེ་སྦྱོང་གཡེལ་བ་རྣམས་ཀྱི་ནང་དུ་རབ་ཏུ་བྱུང་ནས་དེ་དག་
བསྡུ་བའི་དངོས་པོས་བསྡུས་ཏེ། མདོ་འདི་རྙེད་ནས་ལུས་ལ་བཅངས་ཏེ། དགེ་འདུན་དག་པར་བྱས་ནས་དང་པོ་རུང་བ་མ་ཡིན་པའི་གཞི་ཆེན་པོ་ཡོངས་སུ་སྤངས་ཏེ་ཆོས་ཆེན་པོ་སྒྲོགས་པར་འགྱུར། རྔ་བོ་ཆེ་ཆེན་པོའི་མདོ་ལས་གསུངས་པའི་ཆོས་ཀྱི་དུང་དང་། ཆོས་ཀྱི་རྒྱལ་མཚན་སྒྲོགས་པར་འགྱུར་རོ། །

གཉིས་པ་ཐེག་པ་ཆེན་པོའི་མདོ་སྟོང་པ་ཉིད་ཀྱི་གཏམ་སྨྲ་བར་འགྱུར་རོ། །གསུམ་པ་སེམས་ཅན་གྱི་ཁམས་རྟག་པའི་གཏམ་དང་། རྔ་བོ་ཆེ་ཆེན་པོའི་མདོའི་གཏམ་སྨྲ་བར་འགྱུར་རོ། །ཆོས་ཆེན་པོའི་རྔ་བོ་ཆེ་རྡུང་བར་འགྱུར། ཆོས་ཆེན་པོའི་དུང་འབུད་པར་འགྱུར། ཆོས་ཀྱི་རྒྱལ་མཚན་
འཛུགས་པར་འགྱུར། ངའི་མངོན་སུམ་དུ་གོ་གྱོན་པར་འགྱུར་རོ། །ཕྱིས་མདོ་འདི་ཐོས་ནས་ན་ཚོད་ཆེན་པོར་འགྱུར་ཏེ། ལོ་བརྒྱར་མདོ་འདིའི་གཏམ་སྨྲ་ཞིང་ཆོས་ཀྱི་ཆར་འབེབས་པར་འགྱུར་རོ། །ལོ་བརྒྱ་འདས་པའི་འོག་ཏུ་དེ་ལྷོ་ཕྱོགས་དེར་ལྷོ་ཕྱོགས་ཀྱི་མི་རྣམས་ཀྱི་ནང་དུ་རྣམ་པར་འཕྲུལ་པ་ཆེན་པོས་རྣམ་པར་
འཕྲུལ་ཞིང་ཡོངས་སུ་མྱ་ངན་ལས་འདས་པ་སྟོན་པར་འགྱུར་རོ། །རྒྱུ་དེས་ན་ཞིང་སྲུང་བའི་ཐབས་མཁས་པ་བཞིན་ནོ། །འོད་སྲུང་ད་ལྟར་བཟང་སྐྱོང་དང་། ཕུག་སྦས་ལ་སོགས་པའི་ཚིག་གི་སྐྱེས་བུས་ཕལ་པའི་བཞིན་ཏེ་འཛིན་མི་ནུས་པའི་སྙོམ་ལས་ཅན་དུ་གྱུར་ཏོ། །དེ་ནི་སྐྱེས་བུ་ཕལ་པ་ཁྲོ་བ་སྨོད་པར་བྱེད་པ་དེ་འདྲ་བ་
རྣམས་ཀྱི་ནང་དུ་རྣམ་པར་འཕྲུལ་བ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་རོ། །གསོལ་པ། ཇི་ལྟར་ལགས། བཀའ་སྩལ་པ། བྱང་ཆུབ་སེམས་དཔའ་རྣམས་ཇི་ལྟ་བ་དེ་ལྟར་རོ། །གསོལ་པ། བྱང་ཆུབ་སེམས་དཔའ་རྣམས་ཇི་ལྟ་བུ་ལགས། བཀའ་སྩལ་པ། ཆོས་ཀྱི་རྣམ་པར་འཕྲུལ་པས་མ་ཡིན།
འབྲས་བུ་བཞི་ཐོབ་པས་མ་ཡིན་ཏེ། དེ་དག་ནི་ས་འཕོ་བ་དང་། སངས་རྒྱས་དང་བཅས་པའི་སངས་རྒྱས་ཀྱི་ཞིང་དུ་འགྲོ་བས་སོ། །དེར་ཡང་གདུལ་བའི་སེམས་ཅན་དག་ཡོད་ན་སེམས་ཅན་དེ་འདྲ་བ་དེ་དག་གི་ནང་དུ་བཅོམ་ལྡན་འདས་ཤཱཀྱ་ཐུབ་པ་འདི་བྱོན་པ་ལ་ལྟོས་ཞེས་སྨྲ་ཞིང་དེ་བཞིན་གཤེགས་པ་ནི་རྟག་པ།
བརྟན་པ། ཞི་བ། ཐེར་ཟུག་པ་ཡིན་པ་དེ་ལྟ་བུ་དེ་ལ་ལྟོས་ཤིག །ངས་བརྟན་པ་དང་བདེ་བ་བསྟན་པ་བཤད་པ་ནི་དེ་ལྟ་བུ་ཡིན་པར་ཤེས་པར་གྱིས་ཤིག་ཅེས་ལུང་བསྟན་པར་འགྱུར་རོ། །དེ་ནས་ཕྱོགས་བཅུ་ནས་ནམ་མཁའ་ལས་སངས་རྒྱས་བཅོམ་ལྡན་འདས་རྣམས་ཀྱིས་སོ་སོའི་ཞལ་དེ་ལ་སྟོན་ཅིང་འདི་སྐད་ཅེས་དེ་ནི་
དེ་ལྟ་ཡིན་ནོ་ཞེས་གསུང་བར་འགྱུར། འཇིག་རྟེན་ཐམས་ཅད་ཀྱང་དེའི་ཆོས་བསྟན་པ་ལ་ལེགས་པར་བསྟན་ཏོ་ཞེས་ཡིད་ཆེས་པར་འགྱུར་རོ། །དེ་ནས་བར་སྐབས་དེར་ངའི་མིང་འཆང་བའི་དགེ་སློང་དེ་འདི་སྐད་ཅེས་ཀྱེ་མ་གལ་ཏེ་བདག་ལ་རྫུ་འཕྲུལ་གྱི་མཐུ་ཞིག་ཡོད་ན་ཡ་མཚན་ཅན་ཐམས་ཅད་བདག་གིས་

གདུལ་བ་ཞིག་ན་ཞེས་སྨྲ་བར་འགྱུར་ཞིང་བདག་ཉིད་ཤིན་ཏུ་ཕལ་པ་ཡིན་ནོ་སྙམ་དུ་སེམས་པར་འགྱུར་རོ། །དེ་གང་གི་ཚེ་ང་ལ་སློབ་པ་དེའི་ཚེ་བདག་ཉིད་ཀྱིས་ཤེས་པར་འགྱུར་ཏེ། དེ་བཞིན་གཤེགས་པའི་བྱིན་གྱི་རླབས་ནི་དེ་འདྲའོ། །འོད་སྲུང་དཔེར་ན་རེ་ཞིག་དགའ་བོ་རང་ཉིད་ཀྱིས་འབྲས་བུ་ཐོབ་པར་མི་
ཤེས་ཏེ། འདི་ས་བཅུ་ཐོབ་པ་ཡིན་ཡང་བདག་གིས་ནི་འབྲས་བུ་མ་ཐོབ་བོ་སྙམ་དུ་བདག་ཉིད་ཀྱིས་ཤེས་སོ། །དེ་ཅིའི་ཕྱིར་ཞེ་ན། ངའི་བྱིན་གྱི་རླབས་ཀྱིས་གྱུར་ན་ས་བདུན་པ་དང་། ས་བརྒྱད་པ་ལ་གནས་པ་ཅི་སྨོས། རབ་འབྱོར་གཞན་ཡང་དཔེར་ན་དེ་བཞིན་གཤེགས་པས་ཡུངས་ཀར་གྱི་འབྲུའི་ནང་དུ་ཕྱོགས་
བཅུའི་འཇིག་རྟེན་གྱི་ཁམས་ཀྱི་སེམས་ཅན་རབ་ཏུ་མང་པོ་གང་དག་ཡིན་པ་དེ་དག་བཅུག་ན་སེམས་ཅན་གཅིག་ལ་ཡང་དོག་པའམ། ཉམ་ང་བའམ། གནོད་པར་འགྱུར་བ་མེད་ཅིང་ཕན་ཚུན་ཡང་བདག་ཅག་གང་དུ་ཁྲིད་པ་དང་། ཁྱེར་བ་དང་། བཅུག་པ་ཡང་མི་ཤེས་ལ་བྱ་བ་དེ་ཡང་རབ་ཏུ་སྤྱོད་དོ། །དེ་བཞིན་དུ་ཇི་
ལྟར་ངས་མཁྱེན་པ་དེ་ལྟར་ཁྱོད་ཀྱིས་ཀྱང་ཤེས་ལ་གཞན་གྱིས་ཀྱང་ཤེས་སོ། །ཁ་ཅིག་གིས་ནི་མི་ཤེས་ཏེ་དེ་ཡང་རང་ཁོ་ནས་མི་ཤེས་སོ། །ཡང་གལ་ཏེ་དེ་ལྟར་སངས་རྒྱས་མཐུ་དང་ལྡན་པ་ལགས་ན་ཉིད་ཇི་ལྟ་བ་བཞིན་དུ་ཅིའི་སླད་དུ་སེམས་ཅན་ཐམས་ཅད་བྱིན་གྱིས་མི་བརླབ་ལགས། རབ་འབྱོར་རེ་ཞིག་
སྦྱོར་བ་མཁན་གྱིས་ཆུའི་བུམ་པ་ཁ་མ་བཅད་པ་ཡང་མི་འབོ་བར་བྱེད་ན། ཅིའི་ཕྱིར་སངས་རྒྱས་བཅོམ་ལྡན་འདས་སེམས་ཅན་རྣམས་བྱིན་གྱིས་རློབ་པར་མི་མཛད། འོད་སྲུང་གཞན་ཡང་རེ་ཞིག་འབྱུང་པོའི་སྦྱོར་བ་མཁན་གྱིས་ཆུའི་བུམ་པ་ཡང་འགུལ་བར་བྱེད་ན། ཅིའི་ཕྱིར་སངས་རྒྱས་བཅོམ་ལྡན་
འདས་བྱང་ཆུབ་སེམས་དཔའ་རྣམས་ལ་ཇི་ལྟར་རང་གིས་མི་ཤེས་པ་དེ་ལྟར་བྱིན་གྱིས་རློབ་པར་མི་མཛད། ཅི་དེ་ལྟར་མཛད་དམ་མི་མཛད། གསོལ་པ། བཅོམ་ལྡན་འདས་མཛད་ལགས་ཏེ་ས་བཅུ་ཐོབ་པ་རྣམས་ལའང་མཛད་ལགས་སོ། །གསོལ་པ། བྱང་ཆུབ་སེམས་དཔའ་ཡོན་ཏན་དུ་དང་ལྡན་ན་དེ་བཞིན་
གཤེགས་པ་རྟག་པ་མི་ཕྱེད་པའི་སྐུ་མངོན་སུམ་དུ་མཐོང་བར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་ཞིང་དུས་བགྱིད་པར་འགྱུར། བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་བརྒྱད་དང་ལྡན་ན་དེ་བཞིན་གཤེགས་པ་རྟག་པ་མི་ཕྱེད་པའི་སྐུ་མངོན་དུ་མཐོང་

བར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་ཞིང་དུས་བྱེད་པར་འགྱུར་ཏེ། བརྒྱད་གང་ཞེ་ན། མདོ་འདི་བཤད་པ་ན་མི་སྐྱོ་བ་དང་། ཐེག་པ་གསུམ་གྱིས་མི་སྐྱེ་ཞིང་གཏམ་རྣམ་པ་གསུམ་ལ་སྐྲག་པ་མེད་པ་དང་། གདུལ་བའི་སེམས་ཅན་རྣམས་མི་སྤོང་བ་དང་། དགེ་
འདུན་བྱེ་བ་འཐུན་ཞིང་གཅིག་ཏུ་གྱུར་པར་ཡང་དག་པར་སྤྲོ་བ་དང་། བུད་མེད་དང་། མ་ནིང་དང་། དགེ་སློང་དང་། དགེ་སློང་མ་དང་ཀུན་ཏུ་འདྲིས་པར་མི་བྱེད་པ་དང་། རྒྱལ་པོ་དང་། དབང་ཕྱུག་དང་ལྷན་ཅིག་ཀུན་ཏུ་འདྲིས་པ་སྤོང་བ་དང་། བསམ་གཏན་དང་། སྤོང་བ་ལ་མངོན་པར་དགའ་བ་དང་། མི་
གཙང་བ་དང་། བདག་མེད་པའི་འདུ་ཤེས་ཏེ་བརྒྱད་པོ་དེ་དག་གོ། །གཞན་ཡང་རྒྱུ་བཞིས་འགྱུར་ཏེ། བཞི་གང་ཞེ་ན། བདག་གིས་ཆོས་ངེས་པར་བཟུང་བ་ནི་ཤིན་ཏུ་ལེགས་པར་བྱས་སོ་སྙམ་པ་དང་། བདག་ཉིད་བདག་གི་སྐྱབས་ཡིན་ནོ་ཞེས་དེ་ལྟར་སེམས་པ་དང་། དེ་བཞིན་གཤེགས་པ་རྟག་པ། བརྟན་
པ། ཞི་བ། ཐེར་ཟུག་པའོ་ཞེས་བྱ་བར་ཐེ་ཚོམ་མེད་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་པ་དང་། ཉིན་མཚན་རྟག་ཏུ་དེ་བཞིན་གཤེགས་པའི་ཡོན་ཏན་འདི་ལྟ་བུ་རྗེས་སུ་དྲན་པར་བྱེད་ན་དེ་བཞིན་གཤེགས་པ་རྟག་པ་མི་ཕྱེད་པའི་སྐུ་མངོན་སུམ་དུ་མཐོང་བར་འགྱུར། རྣམ་པར་འཕྲུལ་པ་ཆེན་
པོས་རྣམ་པར་འཕྲུལ་ཞིང་དུས་བྱེད་པར་འགྱུར་རོ། །འོད་སྲུང་ངས་དེ་ལྟ་བུའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ལ་ཆོས་ཀྱི་སྐུ་བསྟན་པར་བྱའོ། །དེ་གྲོང་རྡལ་ལམ། གྲོང་ཁྱེར་རམ། ཚོང་རྡལ་གང་ན་འདུག་ཀྱང་རུང་སྟེ། དེར་ངས་དེ་དག་ལ་བསྟན་ནས་འདི་སྐད་ཅེས་རིགས་ཀྱི་བུ་དག་དེ་བཞིན་
གཤེགས་པ་ང་ནི་རྟག་པ་ཡིན་ནོ་ཞེས་གསུངས་སོ། །དེང་ཕྱིན་ཆད་སུ་ཞིག་མདོ་སྡེ་འདི་འཆང་བ་དང་། ཀློག་པ་དང་། འདོན་པ་དང་། གཞན་ལ་ཡང་སྒྲོགས་པར་བྱེད་ཅིང་འདི་སྐད་ཅེས་དེ་བཞིན་གཤེགས་པ་ནི་རྟག་པ། བརྟན་པ། ཞི་བ་ཐེར་ཟུག་པའོ། །ཞེས་སྨྲ་ཞིང་ཤེས་པར་བྱེད་པ་དང་། བཅོམ་ལྡན་འདས་
ནི་རྟག་ཏུ་བཞུགས་སོ་ཞེས་བདག་ཉིད་ཀྱི་བསམ་པ་ཐག་པ་དང་། ངན་གཡོ་མེད་པ་དང་། བཅོས་མ་མ་ཡིན་པ་དང་། སྒྱུ་མེད་པས་དེ་ལྟར་ཤེས་པར་བྱེད་པ་བསམ་པ་ཐག་པ་ཕུན་སུམ་ཚོགས་པ་དེ་ལ་ནི་ངས་བདག་ཉིད་མངོན་སུམ་དུ་བསྟན་པར་བྱའོ། །འོད་སྲུང་ཁྱོད་དད་པར་གྱིས་ཤིག །ཡིད་ཆེས་

པར་གྱིས་ཤིག །འོད་སྲུང་གལ་ཏེ་དེ་ལྟར་ཆོས་རྣམས་ལ་མི་སྤྱོད་ན་དེས་ང་མཐོང་བར་ཇི་ལྟར་འགྱུར། རྣམ་པར་འཕྲུལ་པ་ཆེན་པོས་རྣམ་པར་འཕྲུལ་པར་ཇི་ལྟར་འགྱུར་ངས་ཡང་ཉན་ཐོས་ཀྱི་ཐེག་པ་འདིར་དགེ་སློང་དག་ཆོས་གཅིག་རབ་ཏུ་སྤོངས་ཤིག་དང་། ལན་ཅིག་ཕྱིར་མི་འོང་བར་འགྱུར་བར་
ང་གཉའ་ཕོད་དོ་ཞེས་གསུངས་སོ། །དགེ་སློང་དག་དེ་བཞིན་དུ་འདིར་ཡང་སྤྱོད་པའི་ཡོན་ཏན་དང་ལྡན་པ་ན་ཁྱེད་ལ་ལྷ་ཆེན་པོ་རྣམས་བཀུར་སྟི་བྱེད་པར་འགྱུར་རོ་ཞེས་གསུངས་པས་ཁྱེད་ལུས་ལ་སོང་བའི་དྲན་པས་ཟང་ཟིང་ཚོལ་ཞིང་མ་འདུག་ཤིག །འོད་སྲུང་ངའི་མིང་འཆང་བའི་དགེ་སློང་དེ་ནི་རྟག་
ཏུ་དགེ་འདུན་ཡོངས་སུ་དག་པར་བྱེད་པར་འགྱུར་རོ། །འོད་སྲུང་གིས་གསོལ་པ། ཇི་ལྟར་བགྱིད་ལགས། བཀའ་སྩལ་པ། ཞིང་སྲུང་བ་བཞིན་དུ་ཐབས་མཁས་པས་དེ་དག་ཁྭའི་ཚོགས་ཇི་ལྟར་ཇི་སྲིད་དུ་ཀུན་ཏུ་བསྡུ་བའི་དུས་ཡིན་པ་དེ་སྲིད་དུ་གསོ་བར་འགྱུར་རོ། །དེའི་ཚེ་བཟང་སྐྱོང་དང་ཕུག་
སྦས་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་ཡང་དེའི་ཚེ་ང་ནི་སྔོན་གྱི་ཞིང་སྲུང་བཞིན་དུ་ཕྱི་མའི་དུས་ན་ངའི་དམ་པའི་ཆོས་འབྱིན་པར་ངེས་པར་གྱུར་ཏོ། །ངའི་མིང་འཛིན་པའི་དགེ་སློང་དེས་ཀྱང་ཇི་སྲིད་དུ་ཀུན་ཏུ་བསྡུ་བའི་དུས་ཡིན་པ་དེ་སྲིད་དུ་གཡེལ་བའི་ཚོགས་ཉེ་བར་བསྡུས་ཏེ། བཀུར་སྟི་དང་། རི་
མོ་དང་། གླེགས་བམ་དང་། ཟང་ཟིང་གི་སྦྱིན་པ་དང་། བ་ལང་གི་ཚོགས་དང་། ཟས་ཀྱི་སྦྱིན་པས་ཡིད་དགའ་བར་གྱུར་པ་དང་། དེའི་འོག་ཏུ་ཚར་གཅད་པའི་དུས་ཤེས་ནས་ཚར་གཅོད་པར་འགྱུར་རོ། །གལ་ཏེ་ཚར་གཅད་པའི་ཕན་བཏགས་པའི་མི་འདུག་ན་སྤྱོད་པ་མ་ཡིན་པ་ལ་གནས་པ་གང་དང་གང་ཡིན་
པ་དེ་དང་དེ་དག་ནི་ཇི་ལྟར་མདའ་དུག་གིས་རེག་པས་མ་རེག་པ་ཡང་འབགས་པ་བཞིན་དུ་འགྱུར་བས་ཚར་བཅད་ནས་སྤང་བར་སེམས་སོ། །དེ་ནས་དེས་འདི་སྙམ་དུ་བསམས་ནས་དགེ་སློང་ཚུལ་ཁྲིམས་དང་ལྡན་པ་གཞན་དག་ཚུལ་ཁྲིམས་ཉམས་པར་གྱུར་ན་མི་རུང་ངོ་ཞེས་འདི་དག་ནི་ཆོས་མ་ཡིན་པ་སྟོན་པ་
དང་། སྤྱོད་པ་མ་ཡིན་པ་ལ་ཞུགས་པ་ཡིན་པས་དེ་དག་དང་ལྷན་ཅིག་ཐལ་མོ་སྦྱོར་བའི་ལས་ཀྱང་མི་བྱེད། དེ་དག་དང་ལྷན་ཅིག་གསོ་སྦྱོང་གི་ལས་དང་། སྨྲ་བ་དང་། ཀུན་ཏུ་སྨྲ་བར་ཡང་མི་བྱེད་དེ། ཇི་ལྟར་རྒྱལ་པོ་ལ་སྙིང་རིངས་པས་གཞན་དག་མ་རུངས་པར་བྱེད་པ་ལྟར་དེ་ཡང་དེ་དང་འདྲའོ། །དེས་

དེ་ལྟར་བྱས་ནས་ལོ་བརྒྱར་ཆོས་ཀྱི་ཆར་ཕབ། ཆོས་ཆེན་པོའི་རྔ་བོ་ཆེ་བརྡུངས། ཆོས་ཀྱི་དུང་བུས། ཆོས་ཀྱི་མཆོད་སྦྱིན་བྱས། ཆོས་ཀྱི་རྒྱལ་མཚན་བཙུགས་ནས་རྣམ་པར་འཕྲུལ་པ་ཆེན་པོས་དུས་བྱེད་པར་འགྱུར་རོ། །དེ་ནས་ཕྱིས་སངས་རྒྱས་སུ་འགྱུར་ཏེ། སངས་རྒྱས་སྟོང་
ཡོངས་སུ་མྱ་ངན་ལས་འདས་ནས་བསྐལ་པ་དྲུག་ཅུ་རྩ་གཉིས་འདས་ནས་རང་སངས་རྒྱས་འབུམ་ཡོངས་སུ་མྱ་ངན་ལས་འདས་ཤིང་གཞན་ཡང་མགོན་པོ་བརྒྱད་ཡོངས་སུ་མྱ་ངན་ལས་འདས་ནས་དེའི་འོག་ཏུ་ངའི་མིང་འཆང་བའི་དགེ་སློང་འཇིག་རྟེན་ཐམས་ཅད་ཀྱིས་མཐོང་ན་དགའ་བ་
འདི་སངས་རྒྱས་ཀྱི་ཞིང་འཇིག་རྟེན་འདི་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ། །དེའི་ཚེ་གང་གིས་རྒྱལ་པོའི་བུ་མོ་ལྔ་དཀར་གྱིས་དྲི་བ་ལན་བཏབ་པ་དེ་ནི་ཕྱིས་རེ་ཞིག་འཇིག་རྟེན་དུ་སངས་རྒྱས་
སུ་འགྱུར་ལ། རྒྱལ་པོའི་གཞོན་ནུ་མ་ལྔ་དཀར་ནི་སྔར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་གསུམ་གྱི་མགོན་པོར་འགྱུར་ཏེ། གཞོན་ནུ་རྒྱས་པར་ལུང་བསྟན་པ་ནི་ཕྱིས་བྱའོ། །འོད་སྲུང་ལྟོས། འོད་སྲུང་སྐྱེ་བོ་ཕལ་པས་སངས་རྒྱས་འདི་
ལྟ་བུ་ཉིད་ལེགས་པར་རྙེད་པར་ཇི་ག་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བདེ་བར་གཤེགས་པ་དེ་ནི་མ་ལགས་སོ། །རེ་ཞིག་དེ་བཞིན་གཤེགས་པ་ནི་སངས་རྒྱས་ཀྱི་ཞིང་གཅིག་ཏུ་གཅིག་ཁོ་ན་སངས་རྒྱས་ཀྱི་མཛད་པ་མཛད་དེ། གཉིས་པ་གང་ཡིན་
པ་དང་། གསུམ་པ་གང་ཡིན་པ་དེ་དག་ཀྱང་དེ་བཞིན་ནོ། །དཔེར་ན་ཡུངས་འབྲུའི་ནང་དུ་འཇིག་རྟེན་གྱི་ཁམས་མང་པོ་བཅུག་ལ་དེ་དག་དེ་ཉིད་ན་རྒྱུ་ཡང་བདག་ཅག་གང་དུ་ཁྱེར་བའམ། བཅུག་པ་ཡང་མི་ཤེས་ལ་གཞན་དག་ནི་ཇི་ལྟར་ཤེས་པ་དེ་ལྟར་བྱེད་པ་དེ་བཞིན་དུ་ང་ཡང་སེམས་
ཅན་གཞན་དག་གིས་ནི་ཤེས་ལ། གཞན་དག་གིས་ནི་མི་ཤེས་སོ། །འཇིག་རྟེན་གྱི་ཁམས་གཅིག་པོ་འདི་ཉིད་ན་ཤཱཀྱ་ཐུབ་པ་དང་། འདི་ཉིད་ན་མི་འཕམ་པ་དང་། འཇིག་རྟེན་གྱི་ཁམས་འདི་ཉིད་སྲེག་པའི་བསྐལ་པ་བྱུང་ན་མི་ཚིག་པ་དང་། འདི་ཉིད་ན་བྱ་རྒོད་ཀྱི་ཕུང་པོའི་རི་འདི་ལ་

དམན་པའི་བསྟན་པ་སྟོན་པ་འདི་ལྟ་བུའི་ངོ་མཚར་ཡོད་ན། འཇིག་རྟེན་ཐམས་ཅད་ཀྱིས་མཐོང་ན་དགའ་བ་དགེ་སློང་ཕལ་པའི་ངོ་བོ་ལྟ་བུར་བྱིན་གྱིས་བརླབས་པ་གང་ཡིན་པ་ལྟ་ངོ་མཚར་ཅི་ཆེ། འོད་སྲུང་ཁྱོད་ཀྱིས་རིགས་གང་དུ་དེ་སྐྱེ་བ་ལེན་པ་དེ་དག་ཀྱང་བྱང་ཆུབ་སེམས་དཔའ་
ཡིན་པར་དེ་ལྟར་ཤེས་པར་གྱིས་ཤིག །འོད་སྲུང་བདག་ཅག་གི་རིགས་སུ་འདི་ལྟ་བུ་སྐྱེས་སོ་ཞེས་རིགས་ལ་དགའ་བ་དང་། ཡིད་དུ་འོང་བའི་རང་བཞིན་གྱིས་དེ་ལ་རིམ་གྲོ་བྱེད་པ་གང་ཡིན་པ་དེ་དག་ཐམས་ཅད་ངས་མངགས་པ་ཡིན་པར་ཁྱོད་ཀྱིས་དེ་ལྟར་ཤེས་པར་བྱ་སྟེ། དེ་དག་ཀྱང་བྱང་ཆུབ་
སེམས་དཔའ་སེམས་དཔའ་ཆེན་པོ་ཡིན་ནོ། །རྔ་བོ་ཆེ་ཆེན་པོའི་མདོ་འདི་བསྒྲགས་པ་སྒྲོགས་པ་ན་བདག་ཉིད་ཆེན་པོ་དེའི་ཕྱོགས་འཛིན་པའི་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་གཞན་གང་དག་ཡིན་པ་དེ་དག་ཐམས་ཅད་ཀྱང་སྔར་གོང་དུ་མདོ་འདི་
ལས་འཇིག་རྟེན་ཐམས་ཅད་ཀྱིས་མཐོང་ན་དགའ་བས་ཞུས་པའི་ཚོགས་ཀྱི་ལེའུར་ལུང་བསྟན་ཏོ། །མདོ་འདི་ལ་མཆོད་པ་བྱེད་པའི་སྐྱེས་པ་དང་། བུད་མེད་གང་ཡིན་པ་དེ་དག་ཐམས་ཅད་ཀྱང་གདོན་མི་ཟ་བར་རང་རང་གི་མཆོད་པ་དང་མིང་འཐུན་པའི་སངས་རྒྱས་སུ་འགྱུར་རོ། །འོད་སྲུང་རྔ་བོ་ཆེ་
ཆེན་པོའི་མདོ་འདི་ནི་ངའི་མིང་འཆང་བའི་དགེ་སློང་འདི་དང་གཉིས་ཀྱིས་ཆོས་ཆེན་པོའི་རྔ་བོ་ཆེ་རྡུང་བར་འགྱུར་གྱི་གསུམ་པ་ནི་མེད་དོ། །ཡང་བཀའ་སྩལ་པ། འོད་སྲུང་འདས་པའི་དུས་ན་ང་གྲོང་ཁྱེར་ཆེན་པོ་ཡངས་པ་ཅན་དུ་རྒྱལ་པོ་དགའ་སྡེ་ཞེས་བྱ་བར་གྱུར་པ་དེའི་ཚེ། ཡངས་པ་ཅན་གྱི་གྲོང་ཁྱེར་ཆེན་
པོ་ནི་དེ་ན་གླིང་བཞི་པའི་ཚད་ཙམ་དུ་གྱུར་ཏོ། །འཛམ་བུའི་གླིང་ནི་མི་མཇེད་ཀྱི་འཇིག་རྟེན་གྱི་ཁམས་ཀྱི་ཚད་ཙམ་ལ་དེ་བཞིན་དུ་གླིང་བཞི་དང་། དེ་བཞིན་དུ་སྟོང་གསུམ་གྱི་སྟོང་ཆེན་པོ་ཡང་དེ་ལྟར་བསྒྲེ་བར་བྱའོ། །དེ་ན་ངའི་ཚེ་ནི་བསམ་གྱིས་མི་ཁྱབ་སྟེ། དེ་ལྟར་ང་འཁོར་ལོས་སྒྱུར་བ་ཉིད་བྱེད་པ་ན་དེའི་
ཚེ་གྲངས་མེད་པའི་སྦྱིན་པ་བྱིན། བསོད་ནམས་བསགས། ཚུལ་ཁྲིམས་བསྲུངས། འཕགས་པ་དག་བསྟེན་ཏོ། །སྐྱེས་པའམ། བུད་མེད་གང་ཞིག་རྔ་བོ་ཆེ་ཆེན་པོའི་མདོ་བསྒྲགས་པ་ཐོས་ནས་ལན་འགའ་མཆོད་པ་བྱེད་པའམ། དཔྱས་གདགས་པའམ། བསྟིང་བའམ། ཇི་ལྟ་བུས་འགྲོ་ཡང་

རུང་བའི་སེམས་གཅིག་ཙམ་སྐྱེད་པར་སེམས་པ་དེས་བསགས་པའི་བསོད་ནམས་གང་ཡིན་པའི་བསོད་ནམས་དེ་ལ་ནི་ངས་བྱས་པའི་བསོད་ནམས་གོང་མ་དེ་ཐམས་ཅད་ཀྱིས་དཔེའི་དཔེར་ཡང་མི་ཕོད་དོ། །དཔེར་ན་རིག་པའི་རྒྱལ་པོ་བྲམ་ཟེ་གཟི་ལྡན་ཞེས་བྱ་བ་ཞིག་ཡོད་
དེ། རིག་པ་དེ་ལན་གཅིག་བཀླགས་ན་ཟླ་བ་བཞིར་སྡང་བ་ཐམས་ཅད་ལས་བསྲུང་བ་བྱས་པར་འགྱུར་རོ། །འོད་སྲུང་ལྟོས། རེ་ཞིག་རིག་པ་ཕལ་པ་དེའི་མཐུ་ཡང་འདི་ཡིན་ན། མདོ་འདི་ལན་ཅིག་བཀླགས་ཏེ་ཚེ་མཐར་ཐུག་གི་བར་དུ་བགེགས་མེད་པར་བསྲུང་བ་ཐམས་ཅད་བྱས་པར་
ཅིའི་ཕྱིར་མི་འགྱུར། དེ་ལྟ་བས་ན་གང་སུ་ཡང་རུང་བ་དག་གིས་མདོ་འདི་ལ་མཆོད་པ་བྱས་པར་གྱུར་ན། དེ་ནི་སེམས་ཅན་དེ་དག་ཐམས་ཅད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་འགྱུར་ཞིང་འདི་ནས་བཟུང་སྟེ་བྱང་ཆུབ་ལ་ཐུག་པའི་བར་དུ་མདོ་འདི་རྙེད་པར་འགྱུར་རོ། །དེ་ནས་
འཁོར་ཐམས་ཅད་ཀྱིས་ལེགས་སོ་ཞེས་བྱ་བ་གསོལ་ཏེ། དབྱངས་ཀྱིས་མགྲིན་འཐུན་པར་ཚིག་གསོལ་པ། ཀྱེ་མའོ་བཅོམ་ལྡན་འདས་གཞོན་ནུ་འདི་ཁྱོད་ཀྱི་མཚན་འཆང་བའི་དགེ་སློང་དུ་གྱུར་ནས་གང་གི་ཚེ་དུས་ལས་འདས་པར་གྱུར་པ་དེའི་ཚེ། གཡང་གཞི་ཅན་གྱི་ཕུག་ན་གནས་པའི་ལྷ་
མགོན་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་འདི་ནི་ཁྱོད་འདས་ནས་ལྷོ་ཕྱོགས་སུ་མཆིས་ཏེ་དུས་བགྱིད་པར་འགྱུར་ལགས་སོ། །བཀའ་སྩལ་པ། དེ་མི་འོང་ན་ང་ཉིད་དེར་སོང་སྟེ་བདག་ཉིད་བསྟན་པར་བྱ་ཞིང་ཡུལ་དེར་ཐོག་མ་ཁོ་ནར་མདོ་འདི་བསྐུལ་བར་བྱའོ། །དེ་ཅིའི་ཕྱིར་ཞེ་ན།
ཇི་སྲིད་དུ་མདོ་འདི་དེའི་ལག་ཏུ་སོན་པར་མ་གྱུར་པ་དེ་སྲིད་དུ་དེ་ལྡོག་པའི་སེམས་སྐྱེད་པར་འགྱུར་རོ། །ཡང་ན་དེ་ཉིད་དུ་གདུལ་བའི་དབང་ལ་བརྟེན་ཏེ། ང་ཚོགས་ཆེན་པོས་མདུན་གྱིས་བྱས་ནས་དེའི་མདུན་ན་འདུག་པར་བྱ་སྟེ། དེས་ང་མ་མཐོང་ན་དེ་ཉིད་དུ་ལྡོག་པར་འགྱུར་ཞིང་དེར་དེའི་དུས་བྱེད་
པར་ཡང་སྟོན་པར་འགྱུར་རོ། །ཡང་ན་ཅི་འདོད་པ་བཞིན་དུ་བྱེད་ཅིང་དེ་གདུལ་བ་གང་ན་ཡོད་པ་དེར་དུས་བྱེད་པར་འགྱུར་རོ། །དེ་བཞིན་གཤེགས་པ་ངའི་སློབ་མ་ས་བཅུ་ཐོབ་པ་ཀུན་དགའ་བོ་ཡང་རྣམ་པར་འཕྲུལ་པ་ཆེན་པོས་དེར་འགྲོ་བར་འགྱུར་རོ། །བརྒྱ་བྱིན་གྱི་བུ་མངོན་མཆོད་ཅེས་བྱ་བ་ལོ་

ཉུང་ཟད་ཅིག་གིས་ཐེག་པ་ཆེན་པོ་ལ་ལྷག་པའི་བསམ་པ་ཕུན་སུམ་ཚོགས་ཏེ་གཅིག་པུ་ཟླ་མེད་པར་ལྷ་དང་མི་དང་། ལྷ་མ་ཡིན་རྣམས་ཀྱི་ནང་དུ་ཐེག་པ་ཆེན་པོའི་མདོ་འདི་འཛིན་པར་འགྱུར་རོ། །དེ་ལྟ་བས་ན་ཐར་པའི་རྒྱུ་བསྟན་པ་དེ་ཉིད་དེའི་སངས་རྒྱས་ཉིད་དུ་ལུང་བསྟན་པ་དང་། ཐེག་པ་ཆེན་པོ་
རྣམ་པར་གཏན་ལ་འབེབས་པའི་དགེ་སློང་དུ་ལུང་བསྟན་པ་ཡིན་ནོ། །དེ་ནི་དེ་ཉིད་ཀྱི་སློབ་མར་གྱུར་ནས་དེ་ཉིད་ཀྱི་མིང་འཛིན་པར་འགྱུར་རོ། །དེ་ནས་དེ་ལྟ་བུ་དག་བྱུང་ནས་ལོ་ལྔ་ལོན་པ་དང་། དེའི་འོག་ཏུ་ཕན་པ་སྟོན་པའི་དགེ་བའི་མིག་ཉམ་ཆུང་བར་འགྱུར་རོ། །དེ་རྣམས་དུས་བདུན་གྱི་བར་དུ་
གྱུར་ནས་བར་སྐབས་དེར་བྱང་ཆུབ་སེམས་དཔའ་དམ་པ་དེ་དག་མ་གཏོགས་པར་སྐྱེས་པའམ། བུད་མེད་ཀྱང་རུང་སེམས་ཅན་ཕལ་པ་འགའ་ཡང་མེད་དོ། །དེ་ནས་འཁོར་དེ་ཐམས་ཅད་ཀྱིས་མགྲིན་གཅིག་ཏུ་ཡང་ཚིགས་སུ་བཅད་པ་འདི་དག་སྨྲས་སོ། །ཀྱེ་མ་འཇིག་རྟེན་ཀུན་མཐོང་དགའ། །བརྟན་པོ་དགེ་
སློང་གཟུགས་གྱུར་ནས། །རིང་ཞིག་བསྟན་པ་འབྱིན་བྱེད་ཅིང་། །ཆོས་ཀྱི་རྔ་ཆེན་རྡུང་བར་འགྱུར། །དེ་ནི་མྱ་ངན་ཡོངས་འདས་ནས། །དེ་འོག་འཇིག་རྟེན་སྟོངས་པར་འགྱུར། །ཆོས་སྨྲ་དེ་ནི་འདས་གྱུར་ནས། །དེ་འདྲ་གཞན་ནི་འགའ་མི་འབྱུང་། །དེ་འདྲའི་དགེ་སློང་རྙེད་དཀའ་སྟེ། །རིམ་གྱིས་སྣང་བ་ཉམས་པར་འགྱུར། །
འདི་ལྟར་དེ་ནི་ལྷོ་ཕྱོགས་སུ། །འབྱུང་བའི་ཐ་མ་གཅིག་ཡིན་ནོ། །དམ་པའི་ཆོས་དེ་ནུབ་པའི་དུས་སུ་ཆོས་སྨྲ་བ་དེ་འབྱུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། འོད་སྲུང་དང་དགའ་བོ་དང་། བཟང་སྐྱོང་ལ་སོགས་པ་འཁོར་མང་པོ་དེ་དག་ཐམས་ཅད་དང་། ཕྱོགས་
བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་དེ་དག་ཐམས་ཅད་ཡི་རངས་ཏེ། དེ་དག་བྱང་ཆུབ་ཐོབ་པར་བྱ་བའི་ཕྱིར། དེ་བཞིན་གཤེགས་པ་རྟག་པ་ཉིད་ཀྱི་ཆོས་འདོམ་པར་གྱུར་ཏོ། །འཕགས་པ་ཐེག་པ་ཆེན་པོའི་མདོ་རྔ་བོ་ཆེ་ཆེན་པོ་ཞེས་བྱ་བའི་ལེའུ་
རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་བ