Kinh tạng Tây Tạng (Kangyur Đại Học) — 063_མདོ་སྡེ།_ཛ

ཏུ་སེམས་བསྐྱེད། ཇི་སྲིད་ནས་བྱང་ཆུབ་མངོན་
པར་རྫོགས་པར་འཚང་རྒྱ་བར་འགྱུར། འདི་སངས་རྒྱས་ཀྱི་ཞིང་ཇི་ལྟ་བུར་འགྱུར། འདིའི་མིང་ཅིར་འགྱུར། བཅོམ་ལྡན་འདས་ཀྱིས་བཀའ་སྩལ་པ། སྲིང་མོ་འདིས་བྱང་ཆུབ་ཀྱི་ཕྱིར་སྤྱད་ནས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཕྲག་དགུ་བཅུ་རྩ་དགུ་འདས་
པ་དང་། དེའི་འོག་ཏུ་ཁྱོད་ཀྱིས་བྱང་ཆུབ་ཏུ་སེམས་བསྐྱེད་དོ། །འཇམ་དཔལ་གྱིས་གསོལ་པ། སྲིང་མོ་འདིས་གང་གི་དྲུང་དུ་བྱང་ཆུབ་ཏུ་སེམས་བསྐྱེད་པའི་དེ་བཞིན་གཤེགས་པ་དེའི་མཚན་ཅི་ལགས། བཀའ་སྩལ་པ། འཇམ་དཔལ་དེ་བཞིན་གཤེགས་པ་དཀོན་མཆོག་
འབྱུང་བ་ཞེས་བྱ་བ་ཞིག་བྱུང་སྟེ། འདིས་དེ་བཞིན་གཤེགས་པ་དཀོན་མཆོག་འབྱུང་བའི་དྲུང་དུ་བྱང་ཆུབ་ཏུ་སེམས་བསྐྱེད་དོ། །དེའི་སངས་རྒྱས་ཀྱི་ཞིང་གི་ཡོན་ཏན་བཀོད་པར་གྱུར་པ་དེ་དག་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བཤད་ཀྱང་ཆ་ཙམ་ཡང་བཤད་པར་མི་འགྱུར་ཏེ། སྲིང་
མོ་འདིས་ནི་དེར་བྱང་ཆུབ་ཏུ་སེམས་བསྐྱེད་དོ། །གསོལ་པ། ཅི་བུད་མེད་དུ་གྱུར་པ་ལགས་སམ། བཀའ་སྩལ་པ། དེ་ནི་མ་ཡིན་ཏེ། འདི་ནི་དེའི་ཚེ་དེའི་དུས་ན། འཁོར་ལོས་སྒྱུར་བའི་རྒྱལ་པོ་སྒྲ་དང་བྲལ་བ་ཞེས་བྱ་བར་གྱུར་ཏེ། འཇམ་དཔལ་སྲིང་མོ་འདི་ལ་ནི་བུད་མེད་

ཅེས་ཀྱང་མི་བྱ། སྐྱེས་པ་ཞེས་ཀྱང་མི་བྱའོ། །སྲིང་མོ་འདི་ནི་སྒྱུ་མ་ལྟ་བུའི་ཏིང་ངེ་འཛིན་ཐོབ་པ་སྟེ། དེ་ཇི་ལྟར་འདོད་པ་ལྟར་བདག་གི་ལུས་སྤྲུལ་པར་བྱེད་དོ། །འཇམ་དཔལ་སྲིང་མོ་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྡུལ་དང་། ཡལ་ག་
དང་། འདབ་མ་ཇི་སྙེད་ཡོད་པ་དེ་སྙེད་ཀྱི་བསྐལ་པ་གྲངས་མེད་པ་བརྒྱ་ཕྲག་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ། ཀུན་ཏུ་སྣང་བ་སྦྱིན་པ་ཞེས་བྱ་བའི་དེ་བཞིན་གཤེགས་པ་སངས་རྒྱས་བཅོམ་ལྡན་འདས་ཡོན་ཏན་གྱི་ཚོགས་
ཆེན་པོས་བརྒྱན་པའི་སངས་རྒྱས་ཀྱི་ཞིང་དུ་འབྱུང་བར་འགྱུར་ཏེ། བཅོམ་ལྡན་འདས་དེ་བཞིན་གཤེགས་པ་དཀོན་མཆོག་འབྱུང་བའི་སངས་རྒྱས་ཀྱི་ཞིང་ཅི་འདྲ་བར་གྱུར་པ་འདི་ཡང་དེ་བཞིན་ཏེ། ལྷག་པ་མེད། ཆད་པ་མེད་དོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་
རྒྱལ་པོ་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་ནི་བགྱིད་པ་དང་། བགྱི་བ་མང་སྟེ། འདས་པ་དང་། མ་འོངས་པའི་ཆོས་རྣམས་ལ་ཡང་རྣམ་པར་རྟོགས་པར་བགྱིད་དོ། །
འཇམ་དཔལ་གྱིས་སྨྲས་པ། རིགས་ཀྱི་བུ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །དེ་ལྟར་བདག་ནི་བྱེད་པ་མང་བ་སྟེ། དེ་དག་ནི་ཆོས་ཀྱི་དབྱིངས་མི་ཟད་པའི་ཕྱིར་བྱེད་པ་ཟད་པར་མི་འགྱུར་རོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་འཇམ་དཔལ་གཞོན་
ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དང་མ་རྩོད་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ནི་སྤོབས་པ་དང་། འདྲི་བ་བསམ་གྱིས་མི་ཁྱབ་པ་དང་ལྡན་པ་ཡིན་ཏེ། བྱང་ཆུབ་སེམས་
དཔའ་སྒྲིབ་པ་ཐམས་ཅད་རྣམ་པར་སེལ་བ་མཉམ་པར་བཞག་པ་གང་ལ་མཉམ་པར་གཞོག་པ་དང་ལྡན་པར་བྱེད་པའི་ཏིང་ངེ་འཛིན་དང་། མཉམ་པར་གཞོག་པ་དེ་དག་གི་མིང་ཙམ་ཡང་ཁྱོད་ཀྱིས་མི་ཤེས་སོ། །དེ་ནས་འཁོར་དེ་ན་བྱང་ཆུབ་སེམས་དཔའ་ལས་ཐོག་མ་

བདག་འདི་སྙམ་དུ་གྱུར་ཏེ། ཀྱེ་མའོ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དེ་ནི་དེ་བཞིན་གཤེགས་པ་རྣམས་ཀྱིས་བསྔགས་པར་འགྱུར་རོ་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་སེམས་ཀྱིས་མཁྱེན་ནས། བྱང་ཆུབ་སེམས་
དཔའ་སེམས་ཤིན་ཏུ་དུལ་བ་ཞེས་བྱ་བ་ལ་བཀའ་སྩལ་པ། རིགས་ཀྱི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་པ་དེ་དག་ཐམས་ཅད་འཇམ་དཔལ་འདྲ་བར་གྱུར་དུ་ཟིན་ཀྱང་སྲིང་མོ་འདིའི་ཏིང་ངེ་འཛིན་གྱི་མཐུ་དང་། རྣམ་པར་འཕྲུལ་པ་དང་། ཆོ་འཕྲུལ་
དང་། ཡེ་ཤེས་ཀྱི་བརྒྱ་ཕྲག་སྟོང་གི་ཆར་ཡང་མི་ཕོད་དོ། །ཏིང་ངེ་འཛིན་གང་དག་ལ་སྲིང་མོ་འདི་མཉམ་པར་གཞོག་པ་དང་ལྡང་བར་བྱེད་པའི་མིང་ཡང་འཇམ་དཔལ་གྱིས་མི་ཤེས་སོ། །རིགས་ཀྱི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་
ཇི་སྙེད་ཡོད་པ་དེ་དག་ཐམས་ཅད་ཏིང་ངེ་འཛིན་གྱི་མཐུ་དང་ཡེ་ཤེས་དང་མཉམ་པར་གཞོག་པས་ཐེ་ཚོམ་སེལ་བ་དང་འདྲ་བར་གྱུར་དུ་ཟིན་ཀྱང་། དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བའི་ཏིང་ངེ་འཛིན་དང་། ཡེ་ཤེས་དང་། སྟོབས་དང་། རྣམ་
པར་འཕྲུལ་པའི་བརྒྱ་ཕྲག་སྟོང་གི་ཆར་ཡང་མི་ཕོད་དེ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་གང་ལ་མཉམ་པར་གཞོག་ཅིང་ལྡང་བར་བྱེད་པའི་ཏིང་ངེ་འཛིན་དེ་དག་གི་མིང་ཙམ་ཡང་སྲིང་མོ་འདིས་མི་ཤེས་སོ། །རིགས་ཀྱི་བུ་གལ་ཏེ་སེམས་ཅན་ཐམས་ཅད་ཏིང་ངེ་
འཛིན་དང་། ཡེ་ཤེས་དང་མཉམ་པར་གཞོག་པས་སྒྲིབ་པ་ཐམས་ཅད་རྣམ་པར་སེལ་བ་དང་འདྲ་བར་གྱུར་ཏེ་ཡེ་ཤེས་དེ་དང་ལྡན་དུ་ཟིན་ཀྱང་དེ་བཞིན་གཤེགས་པའི་གོམ་པ་འདོར་བ་ཡང་མི་ཤེས་ཏེ་རྨོངས་པར་འགྱུར་ཞིང་། དེ་བཞིན་གཤེགས་པའི་ཞབས་གོམ་པ་ཇི་ལྟར་འདོར། ཇི་
ལྟར་འཇོག་མི་ཤེས་པར་འགྱུར་ཏེ། རིགས་ཀྱི་བུ་དེ་ལྟར་སངས་རྒྱས་ཀྱི་ཡེ་ཤེས་ནི་བསམ་གྱིས་མི་ཁྱབ་བོ། །སངས་རྒྱས་ཀྱི་ཡེ་ཤེས་བསམ་གྱིས་མི་ཁྱབ་པ་བསྟན་པ་འདི་སྟོན་པའི་ཚེ། སྲོག་ཆགས་བརྒྱ་སྟོང་ཕྲག་བདུན་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་

ཏུ་སེམས་བསྐྱེད་ནས། བདག་ཅག་ཀྱང་ཡེ་ཤེས་དེ་དང་ལྡན་པར་གྱུར་ཅིག་ཅེས་དེ་སྐད་ཀྱི་ཚིག་ཀྱང་སྨྲས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་ཤིན་ཏུ་དུལ་བ་ལ་བཀའ་སྩལ་པ། རིགས་ཀྱི་བུ་སྲིང་མོ་འདིས་ནི་འཇམ་དཔལ་གཞོན་ནུར་གྱུར་པ་
བྱང་ཆུབ་ཏུ་སེམས་བསྐྱེད་དུ་བཅུག་སྟེ། འཇམ་དཔལ་གཞོན་ནུར་གྱུར་པ་ཇི་ལྟ་བ་དེ་དང་འདྲ་བའི་བྱང་ཆུབ་སེམས་དཔའ་ཤར་ཕྱོགས་ན་གང་གཱའི་ཀླུང་གི་བྱེ་མ་སྙེད་ཡོད་པ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། ཕྱོགས་བཅུ་ན་ཡོད་དོ། །རིགས་ཀྱི་བུ་བྱང་
ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་འདིས་སྲིང་མོ་འདི་བྱང་ཆུབ་ཏུ་སེམས་བསྐྱེད་དུ་བཅུག་སྟེ། སྲིང་མོ་འདི་ཇི་ལྟ་བ་དེ་དང་འདྲ་བའི་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་རིགས་ཀྱི་བུ་འདིས་ནི་ཤར་ཕྱོགས་སུ་བྱང་ཆུབ་ཏུ་སེམས་བསྐྱེད་དུ་བཅུག་གོ། །ཕྱོགས་
བཅུ་ཀུན་གྱི་བར་དུའང་དེ་བཞིན་ནོ། །རིགས་ཀྱི་བུ་ང་ཉིད་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཤིང་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བ་མཐོང་ངམ། རིགས་ཀྱི་བུ་ང་ཡང་འདས་པའི་དུས་ན་དེ་བཞིན་གཤེགས་པ་
རི་རབ་རྒྱལ་མཚན་གྱི་གསུང་རབ་ལས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་བྱང་ཆུབ་ཏུ་སེམས་བསྐྱེད་དུ་བཅུག་སྟེ། ང་ཇི་ལྟ་བ་དེ་འདྲ་བའི་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཕྱོགས་བཅུར་བྱང་ཆུབ་ཏུ་སེམས་བསྐྱེད་དུ་བཅུག་སྟེ། དེ་དག་
ད་ལྟར་བཞུགས་སོ། །འཚོ་གཞེས་སོ། །དཔག་ཏུ་མེད་པ་དེ་དག་ཀྱང་ཡོངས་སུ་མྱ་ངན་ལས་འདས་སོ། །ཚིག་དེ་གསུངས་མ་ཐག་ཏུ་དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་སོ། །ཆོས་ཀྱི་རྣམ་གྲངས་འདི་བཤད་པའི་ཚེ་ཀུན་ཏུ་
འོད་ཀྱི་འཇིག་རྟེན་གྱི་ཁམས་དེར་བྱང་ཆུབ་སེམས་དཔའ་ཁྲག་ཁྲིག་ཕྲག་དགུ་བཅུ་རྩ་གཉིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །འཇིག་རྟེན་གྱི་ཁམས་འདིར་ཡང་སེམས་ཅན་བསམ་པ་ཡོངས་སུ་དག་པ་རྣམས་ཀྱི་རྣ་བའི་དབང་པོ་ལ་ཆོས་ཀྱི་རྣམ་གྲངས་

གྲགས་པར་གྱུར་ཏོ། །བྱང་ཆུབ་སེམས་དཔའ་བྱམས་པས་ཀྱང་མ་ལྷག་མ་ཆད་པར་ཀུན་བཟུང་ངོ་། །འཇིག་རྟེན་གྱི་ཁམས་འདིར་ཡང་ཆོས་ཀྱི་རྣམ་གྲངས་འདི་ཐོས་ནས་སྲོག་ཆགས་བྱེ་བ་དྲུག་ཅུ་རྩ་བཞི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་
སེམས་དཔའ་སྟོང་ཕྲག་བདུན་ཅུས་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །དགེ་སློང་སྟོང་ཕྲག་བཅུ་བཞིས་ནི་ཟག་པ་ལས་མ་ལུས་པར་སེམས་རྣམ་པར་གྲོལ་ལོ། །དགེ་སློང་མ་ལྔ་སྟོང་དང་། ལྷ་དང་མིའི་སྐྱེ་དགུ་སེམས་ཅན་ཁྲག་ཁྲིག་ཕྲག་དྲུག་ཅུ་རྩ་དྲུག་ནི་ཆོས་ལ་ཆོས་
ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པས་བྱང་ཆུབ་སེམས་དཔའ་བྱམས་པ་ལ་བཀའ་སྩལ་པ། མ་ཕམ་པ་ཁྱོད་ཀྱིས་ཆོས་ཀྱི་རྣམ་གྲངས་འདི་ལོང་ཤིག །གཞན་ལ་ཡང་རྒྱ་ཆེར་ཤོད་ཅིག །
གསོལ་པ། བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་བླངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མ་ཕམ་པ་ཅི་ནས་ཀྱང་ཆོས་ཀྱི་རྣམ་གྲངས་འདི་ཕྱི་མའི་དུས་ཕྱི་མའི་ཚེ་སྤྱོད་པར་འགྱུར་བར་ཁྱོད་ལ་གཏད་དོ། །མ་ཕམ་པ་གལ་ཏེ་བྱང་
ཆུབ་སེམས་དཔའ་ད་ལྟར་ཕྱོགས་བཅུའི་འཇིག་རྟེན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་པ་འཚོ་བ། གཞེས་པ་ཇི་སྙེད་པ་དང་། གང་མ་འོངས་པའི་དུས་ན་སྤྱད་པ་སྤྱོད་པ་དང་། སྤྱོད་པར་འགྱུར་བ་དང་། ཡོངས་སུ་བརྟག་
པ་བཟུང་ན་སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཤིང་སྟོབས་བཅུ་དང་ལྡན་པར་འགྱུར། གང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་དེ་དག་ཀྱང་ཡོངས་སུ་བརྟག་པ་བཟུང་ན། ཉན་ཐོས་དང་
རང་སངས་རྒྱས་དང་བཅས་ཏེ་སླར་ཞུགས་པར་གྱུར་ལ། དེ་སྙེད་ཀྱི་དེ་བཞིན་གཤེགས་པ་མང་པོ་ལ་ཕྱི་མའི་མཐར་ཐུག་གི་བར་དུ་བདེ་བའི་ཡོ་བྱད་ཐམས་ཅད་ཀྱིས་བཀུར་སྟི་བྱས། རིམ་གྲོ་བྱས། བསྟི་སྟང་བྱས། མཆོད་པ་བྱས་ཤིང་ཡོངས་སུ་མྱ་ངན་ལས་འདས་

ནས་ཀྱང་ཡུན་དེ་སྲིད་དུ་མཆོད་པ་བྱས་ན་བྱང་ཆུབ་སེམས་དཔའ་བསོད་ནམས་མང་དུ་འཕེལ་བར་འགྱུར་རམ། མ་ཕམ་པས་གསོལ་པ། བཅོམ་ལྡན་འདས་བདག་གིས་དཔེ་འདི་ཐོས་ནས་སེམས་ཀྱང་རྨོངས་པར་འགྱུར་ཏེ། དེ་ལྟར་བསོད་ནམས་ཀྱི་ཕུང་པོ་དཔག་
ཏུ་མ་མཆིས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། མ་ཕམ་པ་གང་ཆོས་ཀྱི་རྣམ་གྲངས་འདི་ལེན་པར་བྱེད། འཛིན་པར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལ་ཡང་རྒྱ་ཆེར་སྟོན་པར་བྱེད་ཅིང་ཆུང་ངུ་ན་ཐོས་ནས་མོས་པར་བྱེད་པའི་བྱང་ཆུབ་སེམས་
དཔའ་དེ་ནི་དེ་བས་ཀྱང་ཤིན་ཏུ་བསོད་ནམས་མང་དུ་འཕེལ་བར་འགྱུར་རོ། །མ་ཕམ་པ་ང་ད་མྱ་ངན་ལས་འདས་ནས་གང་བུད་མེད་ལ་ལ་ཞིག་གིས་སྲིང་མོ་ཐེ་ཚོམ་སེལ་བ་དེའམ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དེའམ། དེ་བཞིན་གཤེགས་པ་འཇུག་
སྲེད་ཀྱི་རྒྱལ་པོ་དེའི་མཚན་ཐོས་སམ། ཆུང་ངུ་ན་ཆོས་ཀྱི་རྣམ་གྲངས་འདི་ཐོས་ན། དེ་ཉིད་དེའི་ལུས་ཐ་མར་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཚེ་འདས་ནས་ཀྱང་སངས་རྒྱས་འབྱུང་བ་མཉེས་པར་
བྱེད་པར་འགྱུར་རོ། །མི་ཁོམ་པ་བརྒྱད་ཀྱང་ཡོངས་སུ་སྤོང་བར་འགྱུར་རོ། །ཚེ་རབས་ཀྱང་དྲན་པར་འགྱུར་རོ། །གཟུངས་ཀྱང་ཐོབ་པར་འགྱུར་རོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱང་ཐོབ་པར་འགྱུར་རོ། །གཞན་ཡང་མངལ་དུ་མི་གནས་པར་འགྱུར་རོ། །དེ་ཅིའི་
ཕྱིར་ཞེ་ན། སྐྱེས་བུ་དམ་པ་དེ་དག་ནི་བུད་མེད་གང་དག་བདག་ཅག་གི་མིང་ཐོས་པ་དེ་ཡོན་ཏན་འདི་དག་དང་ལྡན་པར་གྱུར་ཅིག་ཅེས་སྨོན་ལམ་འདེབས་པའི་ཕྱིར་རོ། །བཅོམ་ལྡན་འདས་དགྱེས་ཤིང་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་དང་། ལྷ་
དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའོ། །སངས་རྒྱས་བགྲོ་བ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།ལོ་ཙྪ་བ་བན་དེ་དཔལ་དབྱངས་དང་དཔལ་བརྩེགས་ཀྱིས་བསྒྱུར་ཅིང་ཞུས།། །།

༄༅༅། །རྒྱ་གར་སྐད་དུ། ཏ་ཐ་ག་ཏ་སཾ་གཱི་ཏི་ན་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། དེ་བཞིན་གཤེགས་པ་བགྲོ་བ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །དེའི་ཚེ་དེ་བཞིན་གཤེགས་པ་བསོད་སྙོམས་གཅིག་གིས་ཟླ་བ་
གསུམ་ནང་དུ་ཡང་དག་འཇོག་ལ་ཞུགས་ནས་བཞུགས་སོ། །དེ་ནས་འཇམ་དཔལ་གཞོན་ནུར་གྱུར་པ་ཟླ་བ་གསུམ་པོ་དེ་ཉིད་འདས་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །
ཚེ་དང་ལྡན་པ་ཤཱ་རིའི་བུ་ཡང་ཟླ་བ་གསུམ་པོ་འདས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་།
ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་། ཚེ་དང་ལྡན་པ་གསུས་པོ་ཆེ་ཆེན་པོ་དང་། ཚེ་དང་ལྡན་པ་ཀ་པི་ན་དང་། ཚེ་དང་ལྡན་པ་དོན་ཡོད་རྒྱལ་པོ་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་ཉེ་བར་འཁོར་དང་། ཚེ་དང་ལྡན་པ་ནམ་གྲུ་
དང་། ཚེ་དང་ལྡན་པ་འཆར་ཀ་ནག་པོ་དང་། ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་གྲགས་འབྱིན་དང་། ཚེ་དང་ལྡན་པ་ཡུལ་འཁོར་སྐྱོང་དང་། ཚེ་དང་ལྡན་པ་གྲོ་ཞིན་སྐྱེས་བྱེ་བ་ཉི་ཤུ་པ་དང་། ཚེ་དང་ལྡན་པ་སྒྲ་གཅན་ཟིན་དང་། གནས་བརྟན་དེ་ལྟ་བུ་དག་དང་། དེ་དག་ལ་
སོགས་པ་ཉན་ཐོས་སྟོང་ཉིས་བརྒྱ་ལྔ་བཅུའི་བར་དག་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །རིགས་ཀྱི་བུ་བཟང་སྐྱོང་དང་། རིགས་ཀྱི་བུ་རིན་ཆེན་འབྱུང་གནས་དང་། ཡོན་ཏན་སྦེད་

དང་། རལ་གྲིའི་ཚོགས་ཅན་དང་། མིས་བྱིན་དང་། ཆུ་ལྷ་དང་། དབང་པོས་བྱིན་དང་། གུས་བྱིན་དང་། མིས་བྱིན་དང་། དེ་དག་དང་གཞན་ཡང་དེ་དག་ལ་སོགས་པ་བྱང་ཆུབ་སེམས་དཔའ་ལྔ་སྟོང་ཐམ་པ་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་
དོ། །ལྷའི་བུ་ཡོངས་སུ་དགའ་ལྡན་དང་། ལྷའི་བུ་དཔལ་བཟང་དང་། ལྷའི་བུ་སྤྲུལ་པ་དག་ཀྱང་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །མི་མཇེད་ཀྱི་བདག་པོ་ཚངས་པ་ཡང་ལྷའི་བུ་སྟོང་
ཕྲག་དུ་མ་དག་དང་ལྷན་ཅིག་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་དབང་ཕྱུག་དང་། ལྷའི་བུ་དབང་ཕྱུག་ཆེན་པོ་དང་། ལྷའི་བུ་རབ་ཞི་དུལ་བའི་དབང་ཕྱུག་རྣམས་
གནས་གཙང་མའི་རིས་ཀྱི་ལྷའི་བུ་སྟོང་ཕྲག་དུ་མ་དག་དང་ལྷན་ཅིག་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་ཉི་མ་དང་། ལྷའི་བུ་ཟླ་བ་ཡང་བཅོམ་ལྡན་འདས་ག་
ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་
ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གནས་པ་གང་གིས་དགུང་ཟླ་གསུམ་བཞུགས་ཤིང་། བཅོམ་ལྡན་འདས་ཀྱི་དབང་པོ་རྣམས་ནི་ཡོངས་སུ་དང་། ཞལ་

མདོག་ནི་ཡོངས་སུ་དག །སྐུ་མདོག་ནི་ཡོངས་སུ་དཀར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ང་ནི་སངས་རྒྱས་བགྲོ་བས་ཟླ་བ་གསུམ་གནས་ཤིང་། འཇམ་དཔལ་ང་ནི་
དེ་བཞིན་གཤེགས་པ་བགྲོ་བ་དང་། ཆོས་བགྲོ་བས་ཟླ་བ་གསུམ་གནས་གནས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་སངས་རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་དེ་གང་ལགས། བཅོམ་ལྡན་འདས་སངས་
རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་ཀྱི་བགྲོ་བ་དེའི་ངོ་བོ་ཇི་ལྟ་བུ་ལགས། བཅོམ་ལྡན་འདས་དེ་བཞིན་གཤེགས་པ་རྣམས་དང་། དེ་བཞིན་གཤེགས་པ་ཐབས་ཅིག་ཏུ་མོལ་པ་མཛད་པ་ཇི་ལྟ་བུ་ལགས་པའི་བཀའ་མཆིད་དེའི་སྣོད་དུ་བདག་ཀྱང་གྱུར་
ན་ལེགས་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་དེ་བཞིན་གཤེགས་པ་ལ་དེ་བཞིན་གཤེགས་པ་དེ་བཞིན་གཤེགས་པ་དེ་དག་དང་ཐབས་ཅིག་
ཏུ་བགྲོ་བའི་ངོ་བོ་གང་ཡིན་པའི་དོན་འདི་ཉིད་འདྲི་བར་སེམས་པ་ནི་འཇམ་དཔལ་ཁྱོད་ཡང་ལེགས་སོ། །འཇམ་དཔལ་ཁྱོད་སྔོན་གྱི་རྒྱལ་བ་ལ་ལྷག་པར་བྱ་བ་བྱས་ཤིང་སངས་རྒྱས་འབུམ་ཕྲག་མང་པོ་ལ་དགེ་བའི་རྩ་བ་བསྐྱེད་པ། སངས་རྒྱས་འབུམ་ཕྲག་མང་པོ་ལ་བསྙེན་བཀུར་བྱས་སུ་
ཟིན་ཀྱང་། འཇམ་དཔལ་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་མཐུས་ན་ཆོས་བགྲོ་བ་ལ་ཁྱོད་སྤོབས་སོ། །འཇམ་དཔལ་སངས་རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་ཀྱི་བགྲོ་བའི་ཆོས་ཀྱི་རྣམ་གྲངས་འདི་གང་དག་གི་ལག་ཏུ་འགྲོ་བ་དེ་དག་
ནི་བདུད་སྡིག་ཅན་གྱི་ལག་ཏུ་འགྲོ་བར་མི་འགྱུར་རོ། །འཇམ་དཔལ་སངས་རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་བགྲོ་བའི་ཆོས་ཀྱི་རྣམ་གྲངས་འདི་གང་དག་གི་ལག་ཏུ་འགྲོ་བའི་རིགས་ཀྱི་བུའམ། རིགས་ཀྱི་བུ་མོ་དེ་དག་གི་མདུན་དུ་ཡང་དེ་བཞིན་

གཤེགས་པ་མངོན་སུམ་དུ་གྱུར་ལ། དེ་དག་ཀྱང་ངས་མཐོང་བར་རིག་པར་བྱའོ། །འཇམ་དཔལ་སངས་རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་འདི་རིགས་ཀྱི་བུ་འམ། རིགས་ཀྱི་བུ་མོ་གང་དག་གི་ལག་ཏུ་འགྲོ་བ་དང་། གང་དག་སྤོང་
བར་བྱེད་པ་དེ་དག་ཀྱང་ངས་མཐོང་ངོ་། །འཇམ་དཔལ་རིགས་ཀྱི་བུ་དང་། རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་སྤོང་བར་མི་བྱེད་པའི་རིགས་ཀྱི་བུ་དང་། རིགས་ཀྱི་བུ་མོ་དེ་དག་ནི་དད་པ་དང་ལྡན་པར་འགྱུར། དང་བར་འགྱུར། དྲང་བ་དང་། གཡོ་མེད་པ་དང་། སྤྱོད་ལམ་
ཕུན་སུམ་ཚོགས་པ་དང་། ལྷག་པའི་བསམ་པ་ཕུན་སུམ་ཚོགས་པར་འགྱུར་རོ། །འཇམ་དཔལ་ཡང་རིགས་ཀྱི་བུ་དང་། རིགས་ཀྱི་བུ་མོ་དེ་དག་ཚུལ་ཁྲིམས་དང་ལྡན་པར་འགྱུར་རོ། །ལེ་ལོ་ཅན་དང་། བརྣབ་སེམས་ཅན་དང་། གནོད་སེམས་ཅན་གྱི་སེམས་སུ་མི་འགྱུར་རོ། །
དྲན་པ་ཉམས་པ་དང་། སེར་སྣ་ཅན་དུ་མི་འགྱུར་རོ། །འཇམ་དཔལ་རིགས་ཀྱི་བུ་དང་། རིགས་ཀྱི་བུ་མོ་དེ་དག་ཚུལ་ཁྲིམས་དང་ལྡན་པར་འགྱུར་རོ། །དེ་དག་ནི་ལེ་ལོ་མེད་པ་དང་། བརྣབ་སེམས་མེད་པ་དང་། གནོད་སེམས་ཀྱི་སེམས་མེད་པ་དང་། སེར་སྣ་མེད་པ་དང་། དྲན་
པ་དང་ལྡན་པ་དང་། བློ་གྲོས་དང་ལྡན་པ་དང་། རྟོགས་པ་དང་ལྡན་པ་དང་། ཁྲེལ་ཡོད་པ་ཕུན་སུམ་ཚོགས་པ་དང་། བརྩོན་འགྲུས་བརྩམས་པ་དང་། མོས་པ་མང་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་
གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་བཅོམ་ལྡན་འདས་ཀྱིས་ལྷ་དང་། མི་དང་། ལྷ་མ་ཡིན་དུ་བཅས་པ་དང་། ལྷ་དང་བཅས་པའི་འཇིག་རྟེན་གྱི་མདུན་དུ་སངས་རྒྱས་བགྲོ་བ་དང་། དེ་བཞིན་གཤེགས་པ་བགྲོ་བ་དང་། ཆོས་བགྲོ་བའི་ཆོས་
ཀྱི་རྣམ་གྲངས་ཀྱི་ཏིང་ངེ་འཛིན་འདི་བཀའ་སྩལ་ཅིང་བཤད་པ་དེའི་དུས་ལ་བབ་ལགས་སོ། །བདེ་བར་གཤེགས་པ་དེའི་དུས་ལ་བབ་ལགས་ཏེ། འདི་ལྟར་བཅོམ་ལྡན་འདས་ལས་ཐོས་ནས་དེ་བཞིན་ཉིད་དུ་འཛིན་པར་འགྱུར་ལགས་སོ། །དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ཏེ། འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱི་ལྟར་
ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཤར་ཕྱོགས་ལོགས་ན། སངས་རྒྱས་ཀྱི་ཞིང་སྟོང་འདས་པ་ན་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཇམ་དཔལ་དེ་ནས་ངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་མི་འཁྲུགས་པས་གང་ལ་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། འཇམ་དཔལ་དེ་བཞིན་གཤེགས་པ་མི་འཁྲུགས་པ་དེས་ང་ལ་འདི་སྐད་ཅེས་སྨྲས་སོ། །
བྱིས་པ་སོ་སོའི་སྐྱེ་བོའི་བདག་ཏུ་འདུ་ཤེས་པ་གང་ལ་གནས་པ་དེ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་མི་འཁྲུགས་པ་དེ་ལ་འདི་སྐད་ཅེས་སྨྲས་
སོ། །བྱིས་པ་སོ་སོའི་སྐྱེ་བོའི་བདག་ཏུ་འདུ་ཤེས་པ་གང་ལ་གནས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །མི་ཤེས་པ་ལ་གནས་ནས་བྱིས་པ་སོ་སོའི་སྐྱེ་བོའི་བདག་ཏུ་འདུ་ཤེས་པ་བྱུང་བ་ནི་མི་གནས་པ་སྟེ། དེ་ལྟ་བུ་ལ་གནས་ནས་ཁོ་བོ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་མི་འཁྲུགས་པས་ང་ལ་འདི་སྐད་ཅེས་སྨྲས་སོ། །ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་ཅི་ལ་གནས་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་མི་འཁྲུགས་པ་ལ་འདི་སྐད་ཅེས་སྨྲས་སོ། །བྱིས་པ་སོ་སོའི་སྐྱེ་བོ་གང་ལ་གནས་པའི་ལྟ་བར་གྱུར་པ་དྲུག་ཅུ་རྩ་གཉིས་ཀུན་ཏུ་འབྱུང་བ་དེ་ལ་གནས་ནས་ཁོ་བོ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་སྐད་ཅེས་སྨྲས་པ་དང་། འཇམ་དཔལ་དེ་བཞིན་གཤེགས་པ་མི་འཁྲུགས་པས་ང་ལ་འདི་སྐད་ཅེས་སྨྲས་སོ། །བྱིས་པ་སོ་སོའི་སྐྱེ་བོའི་ལྟ་བར་གྱུར་པ་དྲུག་ཅུ་རྩ་གཉིས་གང་ལ་གནས་ཏེ་ཀུན་ཏུ་འབྱུང་བར་
འགྱུར། དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་མི་འཁྲུགས་པ་ལ་འདི་སྐད་ཅེས་སྨྲས་སོ། །སྒྱུ་མའི་སྐྱེས་བུ་གང་ལ་གནས་པའི་སེམས་དང་སེམས་ལས་བྱུང་བའི་ཆོས་རྣམས་རབ་ཏུ་འཇུག་པ་དེ་ལ་གནས་ནས་བྱིས་པ་སོ་སོའི་སྐྱེ་བོའི་ལྟ་བར་གྱུར་པ་དྲུག་ཅུ་
རྩ་གཉིས་ཀུན་ཏུ་འབྱུང་བ་དེ་ལྟ་བུ་ལ་གནས་ཏེ། ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱིས་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ཀུན་ཏུ་སྲུང་ཞེས་བྱ་བ་དེས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་
སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་དེ་ལ་འདི་སྐད་ཅེས་སྨྲས་སོ། །བྱིས་པ་སོ་སོའི་སྐྱེ་བོ་གང་ལ་གནས་པའི་འདོད་ཆགས་དང་། ཞེ་སྡང་དང་། གཏི་མུག་ཀུན་ཏུ་འབྱུང་བ་དེ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་རྒྱས་སོ། །དེ་སྐད་ཅེས་སྨྲས་པ་དང་། འཇམ་དཔལ་དེ་བཞིན་གཤེགས་པ་དེས་ང་ལ་འདི་སྐད་ཅེས་སྨྲས་སོ། །བྱིས་པ་སོ་སོའི་སྐྱེ་བོའི་འདོད་ཆགས་དང་། ཞེ་སྡང་དང་། གཏི་མུག་གང་ལ་གནས་ཏེ་ཀུན་ཏུ་འབྱུང་བར་འགྱུར། དེ་སྐད་ཅེས་སྨྲས་པ་དང་། འཇམ་དཔལ་ངས་

དེ་བཞིན་གཤེགས་པ་དེ་ལ་འདི་སྐད་ཅེས་སྨྲས་སོ། །བསམ་གྱིས་མི་ཁྱབ་པའི་དབྱིངས་ལ་གནས་ནས་བྱིས་པ་སོ་སོའི་སྐྱེ་བོའི་འདོད་ཆགས་དང་། ཞེ་སྡང་དང་། གཏི་མུག་ཀུན་ཏུ་འབྱུང་བར་འགྱུར་རོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་བསམ་གྱིས་མི་ཁྱབ་པའི་དབྱིངས་དེ་བསམ་གྱིས་མི་ཁྱབ་པ་ལགས། བཀའ་སྩལ་པ། འཇམ་དཔལ་གནས་མེད་པ་ཞེས་བྱ་བའི་གནས་མེད་པ་ལ་གནས་ཏེ། བྱིས་པ་སོ་སོའི་སྐྱེ་བོ་རྣམས་ཀྱི་འདོད་ཆགས་དང་། ཞེ་སྡང་དང་། གཏི་
མུག་ཀུན་ཏུ་འབྱུང་ངོ་། །འཇམ་དཔལ་གཞན་ཡང་ངས་དེ་བཞིན་གཤེགས་པ་ཀུན་ཏུ་སྲུང་དེ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་སྲུང་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེ་བཞིན་གཤེགས་པ་དེས་ང་ལ་འདི་སྐད་ཅེས་སྨྲས་སོ། །བྱིས་པ་སོ་སོའི་སྐྱེ་བོ་རྣམས་ཀྱི་མཚམས་མེད་པའི་ལས་རྣམས་གང་ལ་གནས་ཏེ་ཀུན་ཏུ་འབྱུང་བ་དེ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་སོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱིས་པ་སོ་སོའི་སྐྱེ་བོ་རྣམས་ཀྱི་མཚམས་མ་མཆིས་པའི་ལས་རྣམས་གང་ལ་གནས་ཏེ་ཀུན་ཏུ་འབྱུང་ལགས། བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ་བྱིས་པ་སོ་སོའི་སྐྱེ་བོ་རྣམས་ཀྱི་མཚམས་མེད་པའི་ལས་རྣམས་ནི་ཡོད་པ་མ་ཡིན་པ་དེ་ལ་གནས་ཏེ་ཀུན་ཏུ་འབྱུང་ངོ་། །འཇམ་དཔལ་འདི་ལྟ་སྟེ། དཔེར་ན་མི་ཞིག་གཉིད་ཀྱིས་ལོག་པའི་རྨི་ལམ་ན་སྦྲུལ་གདུག་པ་ཞིག་ལག་གིས་བཟུང་བ་
ལས། དེས་དེ་ཟིན་ནས་གཞི་དེ་ལས་དེ་འཆི་བར་འགྱུར་བའམ། འཆི་བ་ལ་ཐུག་པ་ཙམ་དུ་སྡུག་བསྔལ་ཞིང་དེ་འཆི་བར་ཉེ་བའི་ཚོར་བས་རེག་པ་ལས་སད་པར་གྱུར་ན། སད་མ་ཐག་ཏུ་དེའི་སྡུག་བསྔལ་གྱི་ཚོར་བ་ཉམས་སུ་མྱོང་བ་དེ་དང་དེ་དག་མེད་པ་ཉིད་དུ་ཤེས་པ་ན་འཇམ་

དཔལ་དེ་ཇི་སྙམ་དུ་སེམས། ཅི་མི་དེ་སྦྲུལ་གདུག་པ་དེས་ཟིན་ཏམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །འཇམ་དཔལ་འདི་ཇི་སྙམ་དུ་སེམས། མི་དེ་མ་ཟིན་བཞིན་དུ་སྡུག་བསྔལ་བར་གྱུར་ཏམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །
དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ན་སྦྲུལ་གདུག་པ་ཡང་མ་མཆིས་ལ། བཅོམ་ལྡན་འདས་གང་ཟིན་པ་དེ་ཡང་མ་མཆིས་པ་ལགས་ན། དེ་ན་ཚོར་བར་འགྱུར་ཞིང་མངོན་པ་ལྟ་ག་ལ་ཞིག་མཆིས། བཀའ་སྩལ་པ། འཇམ་དཔལ་དེ་བཞིན་དུ་ཆོས་ཐམས་ཅད་ནི་མི་གནས་པ་
སྟེ། ཆོས་ཐམས་ཅད་མི་གནས་པ་ཅི་འདྲ་བར་ཟིན་པ་ཡང་དེ་དང་འདྲ་སྟེ། ཚོར་བ་ཡང་དེ་དང་འདྲའོ། །ཚོར་བ་ཅི་འདྲ་བར་སྦྲུལ་གདུག་པ་ཡང་དེ་དང་འདྲའོ། །སྦྲུལ་གདུག་པ་ཅི་འདྲ་བར་ཆོས་ཐམས་ཅད་ཀྱང་དེ་དང་འདྲའོ། །ཆོས་ཐམས་ཅད་ཅི་འདྲ་བར་མཚམས་མེད་པ་ཡང་དེ་དང་འདྲའོ། །
མཚམས་མེད་པ་ཅི་འདྲ་བར་བྱང་ཆུབ་ཀྱང་དེ་དང་འདྲའོ། །བྱང་ཆུབ་ཅི་འདྲ་བར་གནས་ཀྱང་དེ་དང་འདྲ་སྟེ། དེ་ལྟ་བུ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་
གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་ཞེས་བྱ་བ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུས་ཅི་ལ་གནས་ཏེ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། འཇམ་དཔལ་དེ་བཞིན་གཤེགས་པ་རི་རབ་ལྟ་བུས་ང་ལ་འདི་སྐད་ཅེས་སྨྲས་སོ། །སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་
ཁམས་གང་ལ་གནས་པའི་མཐའ་དེ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་རི་རབ་ལྟ་བུས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་

ཡང་དག་པར་རྫོགས་པའི་སངས་རྒྱས་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། ངས་དེ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་རི་རབ་ལྟ་བུས་གང་ལ་གནས་
ཏེ་འགྲོ་བ་དྲུག་སྟོན་པ་དེ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཀུན་ཏུ་མེ་ཏོག་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་མེ་ཏོག་གིས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་ལ། སངས་རྒྱས་ཀྱི་ཞིང་འདི་ཡང་ཇི་ལྟར་མངོན་པར་བསྒྲུབས། དེ་སྐད་ཅེས་སྨྲས་པ་དང་། འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་མེ་ཏོག་གིས་ང་ལ་འདི་སྐད་ཅེས་སྨྲས་སོ། །ཁོ་བོ་དང་པོ་
སེམས་བསྐྱེད་པ་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ལ། སྒྱུ་མའི་སྐྱེས་བུས་རྣམ་པར་ཐར་པ་བརྒྱད་ཇི་ལྟར་མངོན་པར་བསྒྲུབས་པ་དེ་ལྟར་སངས་རྒྱས་ཀྱི་ཞིང་འདི་ཡང་མངོན་པར་བསྒྲུབས་སོ། །དེ་སྐད་ཅེས་བཀའ་སྩལ་པ་དང་། འཇམ་
དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་དེ་བཞིན་གཤེགས་པ་ཀུན་ཏུ་མེ་ཏོག་དེས་དང་པོ་སེམས་བསྐྱེད་པ་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ལགས། དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དང་པོའི་སེམས་གང་ཡིན་པ་དེ་ཡང་མ་སྐྱེས་པ་ཡིན་ལ། ད་ལྟར་གྱི་དེ་ཡང་མ་སྐྱེས་པ་ཡིན་ཏེ། དང་པོའི་སེམས་བསྐྱེད་པ་དེ་ལྟ་བུ་ལ་གནས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

སངས་རྒྱས་ཀུན་ཏུ་མེ་ཏོག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་ཀུན་ཏུ་མེ་ཏོག་གིས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་
ཤཱཀྱ་ཐུབ་པས་ཅི་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་དེ་ལ་འདི་སྐད་ཅེས་སྨྲས་སོ། །གང་ལ་གནས་ནས་ཆགས་པ་ཐམས་ཅད་ཤེས་པ་དེ་ལ་གནས་ནས་ཁོ་བོ་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་ཐམས་ཅད་ལས་
ཡང་དག་པར་འདས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་མྱ་ངན་ཐམས་ཅད་ལས་ཡང་དག་པར་འདས་པ་ཅི་ལ་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས། དེ་སྐད་ཅེས་སྨྲས་པ་དང་། འཇམ་དཔལ་དེ་བཞིན་གཤེགས་པ་དེས་ང་ལ་འདི་སྐད་ཅེས་སྨྲས་སོ། །བྱིས་པ་སོ་སོའི་སྐྱེ་བོའི་སྲིད་པ་མངོན་པར་འགྲུབ་པ་གང་ལ་གནས་པ་དེ་ལ་གནས་ཏེ། ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །
འཇམ་དཔལ་གཞན་ཡང་དེ་བཞིན་གཤེགས་པ་མྱ་ངན་ཐམས་ཅད་ལས་ཡང་དག་པར་འདས་པས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་ལ་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
སངས་རྒྱས། དེ་སྐད་ཅེས་སྨྲས་པ་དང་། ངས་དེ་ལ་འདི་སྐད་ཅེས་སྨྲས་སོ། །འཁོར་བ་ན་འཁོར་བའི་ཚེ་སེམས་ཅན་ཐམས་ཅད་ཀྱི་སྔོན་གྱི་མཐའ་མི་མངོན་པ་གང་ལ་གནས་པ་དེ་ལ་གནས་ཏེ། ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་སྐད་

ཅེས་བཀའ་སྩལ་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འཁོར་བ་ན་འཁོར་བའི་ཚེ་གང་ལ་གནས་ཏེ་སེམས་ཅན་ཐམས་ཅད་ཀྱི་སྔོན་གྱི་མཐའ་མི་མངོན་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ།
འཇམ་དཔལ་མ་རིག་པ་ལ་གནས་ནས་བྱིས་པ་སོ་སོའི་སྐྱེ་བོ་ཐམས་ཅད་ཀྱི་སྔོན་གྱི་མཐའ་མི་མངོན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཅིའི་སླད་དུ་སྔོན་གྱི་མཐའ་མི་མངོན་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟར་ཆོས་ཐམས་ཅད་ནི་དངོས་
པོ་མེད་པ་སྟེ། དངོས་པོ་མེད་པ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། དེ་བཞིན་གཤེགས་པ་ཏིང་ངེ་འཛིན་ཇི་ལྟ་བུ་ཞིག་ལ་གནས་ནས་ཆོས་འདི་དག་ལ་ཡང་དག་པར་བགྲོ་བ་མཛད།
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་བསམ་གྱིས་མི་ཁྱབ་ཅིང་དྲི་མ་མེད་པ་ཤིན་ཏུ་ཡོངས་སུ་དཀར་བའི་ཕྱག་རྒྱའི་ཏིང་ངེ་འཛིན་ལ་གནས་ནས་དེ་བཞིན་གཤེགས་པ་རྣམས་ཆོས་འདི་དག་ལ་བགྲོ་བ་མཛད་དོ། །འཇམ་དཔལ་སངས་རྒྱས་ཀྱི་སྐུ་གཅིག་ཀྱང་མེད་མོད་ཀྱི། ཏིང་ངེ་
འཛིན་དེ་ལ་གནས་ན་སངས་རྒྱས་ཀྱི་སྐུ་ཐ་དད་པ་ཡང་སྣང་ངོ་། །འཇམ་དཔལ་སངས་རྒྱས་ཀྱི་ཞིང་གཅིག་ཀྱང་མེད་མོད་ཀྱི། ཏིང་ངེ་འཛིན་དེ་ལ་གནས་ན་སངས་རྒྱས་ཀྱི་ཞིང་ཐ་དད་པ་ཡང་སྣང་ངོ་། །འཇམ་དཔལ་ཉན་ཐོས་གཅིག་ཀྱང་མེད་མོད་ཀྱི། ཏིང་ངེ་འཛིན་དེ་ལ་གནས་ན་ཉན་ཐོས་
ཐ་དད་པ་ཡང་སྣང་ངོ་། །འཇམ་དཔལ་སངས་རྒྱས་ཀྱི་གསུང་གཅིག་ཀྱང་མེད་མོད་ཀྱི། ཏིང་ངེ་འཛིན་དེ་ལ་གནས་ན་སངས་རྒྱས་ཀྱི་གསུང་ཐ་དད་པ་ཡང་གྲག་གོ། །འཇམ་དཔལ་རྣམ་པར་རིག་པ་གཅིག་ཀྱང་མེད་མོད་ཀྱི། ཏིང་ངེ་འཛིན་དེ་ལ་གནས་ན་རྣམ་པར་རིག་པ་ཐ་
དད་པ་ཡང་བྱེད་དོ། །འཇམ་དཔལ་སེམས་ཅན་གཅིག་ཀྱང་མེད་མོད་ཀྱི། ཏིང་ངེ་འཛིན་དེ་ལ་གནས་ན་སེམས་ཅན་མང་པོ་དེ་དག་ཀྱང་རྣམ་པར་གྲོལ་བར་འགྱུར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཨ་ལ་ལ་ཏིང་ངེ་འཛིན་འདི་ནི་རྒྱ་ཆེ་བ་ལགས་སོ། །བཅོམ་ལྡན་

འདས་ཨ་ལ་ལ་ཏིང་ངེ་འཛིན་འདི་ནི་བསམ་གྱིས་མི་ཁྱབ་པ་ལགས་སོ། །བཅོམ་ལྡན་འདས་ཨ་ལ་ལ་ཏིང་ངེ་འཛིན་འདི་ནི་ཆགས་པ་མ་མཆིས་པ་ལགས་སོ། །བཅོམ་ལྡན་འདས་ཨ་ལ་ལ་ཏིང་ངེ་འཛིན་འདི་ནི་རྟོགས་པར་དཀའ་བ་ལགས་སོ། །བཅོམ་ལྡན་འདས་ཨ་ལ་ལ་ཏིང་
ངེ་འཛིན་འདི་ནི་ཟབ་པ་ལགས་སོ། །བཅོམ་ལྡན་འདས་ཨ་ལ་ལ་ཏིང་ངེ་འཛིན་འདི་ནི་ཤིན་ཏུ་འདས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། འཇམ་དཔལ་ཏིང་ངེ་འཛིན་འདི་ནི་རྒྱ་ཆེ་བའོ། །འཇམ་དཔལ་
ཏིང་ངེ་འཛིན་འདི་ནི་བསམ་གྱིས་མི་ཁྱབ་པའོ། །འཇམ་དཔལ་ཏིང་ངེ་འཛིན་འདི་ནི་ཆགས་པ་མེད་པའོ། །འཇམ་དཔལ་ཏིང་ངེ་འཛིན་འདི་ནི་རྟོགས་པར་དཀའ་བའོ། །འཇམ་དཔལ་ཏིང་ངེ་འཛིན་འདི་ནི་ཟབ་པའོ། །འཇམ་དཔལ་ཏིང་ངེ་འཛིན་འདི་ནི་ཤིན་ཏུ་འདས་པའོ། །འཇམ་དཔལ་ཏིང་ངེ་
འཛིན་འདི་ལ་གནས་ནས་སངས་རྒྱས་བཅོམ་ལྡན་འདས་དེ་དག་ལ་དྲི་བའི་ཕྱིར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གཞན་དུ་ཡང་མི་འགྲོའོ། །སངས་རྒྱས་བཅོམ་ལྡན་འདས་དེ་དག་ཀྱང་ངའི་ཐད་དུ་མི་འོང་སྟེ། ང་ཡང་དེ་དག་ལ་འདྲིའོ། །དེ་དག་ཀྱང་ང་ལ་འདྲི་བར་བྱེད་དོ། །འོན་
ཀྱང་འཇིག་རྟེན་གྱི་ཁམས་འདི་ཉིད་ན་གནས་ཏེ། འཇིག་རྟེན་གྱི་ཁམས་དེ་དང་དེ་དག་ན་གནས་པའི་སངས་རྒྱས་བཅོམ་ལྡན་འདས་དེ་དག་ལ་འདྲིའོ། །འཇིག་རྟེན་གྱི་ཁམས་དེ་དང་དེ་དག་ན་གནས་པའི་སངས་རྒྱས་བཅོམ་ལྡན་འདས་དེ་དག་ཀྱང་ང་འདི་ན་གནས་པ་ལ་འདྲི་བར་བྱེད་དོ། །
འཇམ་དཔལ་ང་ཏིང་ངེ་འཛིན་འདི་ལ་གནས་ཏེ་སངས་རྒྱས་ཀྱི་ཞིང་ཐམས་ཅད་དུ་དབྱངས་ཀྱིས་གོ་བར་བྱེད་དེ། སངས་རྒྱས་བཅོམ་ལྡན་འདས་དེ་དག་གི་ཐད་དུ་སྒྲ་དེ་སྒྲིབ་པའི་བྱ་བ་མི་བྱེད་དོ། །འཇམ་དཔལ་སངས་རྒྱས་བཅོམ་ལྡན་འདས་དེ་དག་ཀྱང་ཏིང་ངེ་འཛིན་འདི་ལ་གནས་ཏེ་སངས་རྒྱས་
ཀྱི་ཞིང་ཐམས་ཅད་དུ་དབྱངས་ཀྱིས་གོ་བར་བྱེད་དེ། ང་ལ་ཡང་སྒྲིབ་པར་མི་བྱེད་དོ། །འཇམ་དཔལ་ང་ཏིང་ངེ་འཛིན་འདི་ལ་གནས་ཏེ། སངས་རྒྱས་བཅོམ་ལྡན་འདས་དེ་དག་ལ་ལན་ཡང་འདེབས་ལ། སངས་རྒྱས་བཅོམ་ལྡན་འདས་དེ་དག་ཀྱང་ཏིང་ངེ་འཛིན་འདི་ལ་གནས་ན་ང་ལ་ཡང་ལན་

འདེབས་སོ། །འཇམ་དཔལ་འདི་ལྟ་སྟེ། དཔེར་ན་མི་ཞིག་འདི་ནས་སོང་སྟེ་གྲོང་ཁྱེར་ཆེན་པོ་རྒྱ་ཆེ་བ་ཞིག་ཏུ་ཕྱིན་ལ། དེ་དག་གཅིག་ལ་གཅིག་སྨྲ་སྟེ། དེ་དག་ཕན་ཚུན་སྨྲ་བའི་ཚེ་བྲག་ཅའི་སྒྲ་ཞིག་གྲག་པར་གྱུར་ན། འཇམ་དཔལ་འདི་ཇི་སྙམ་དུ་སེམས། དེ་ནི་བྲག་ཅ་ཅིག་ཤོས་ཀྱིས་བྲག་ཅ་
གཞན་ལ་གོ་བར་བྱེད་དམ། ཅི་བྲག་ཅ་སྔ་མ་ཤོས་ཀྱི་སྒྲ་བྲག་ཅ་ཕྱི་མ་ཤོས་གཞན་གྱིས་ཤེས་སམ། འོན་ཏེ་ཕན་ཚུན་དུ་ཐོས་སམ་ཀུན་ཏུ་ཤེས། འཇམ་དཔལ་གྱིས་གསོལ་པ། བཅོམ་ལྡན་འདས་བྲག་ཅ་སྔ་མ་ཤོས་དེའི་སྒྲ་དེ་དག་བྲག་ཅ་ཕྱི་མ་ཤོས་ཀྱིས་ཐོས་པའམ་འཚལ་བ་མ་མཆིས་
ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བྲག་ཅ་ནི་རྣམ་པར་རིག་པ་མ་མཆིས་པའི་སླད་དུ་སྟེ། རྣམ་པར་རིག་པ་མ་མཆིས་པ་དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀུན་ཏུ་འོད་ཅེས་བྱ་བ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་ཀྱིས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་
སྨྲས་པ་དང་། དེ་བཞིན་གཤེགས་པ་ཀུན་ཏུ་འོད་ཀྱིས་ང་ལ་འདི་སྐད་ཅེས་སྨྲས་སོ། །འདུ་ཤེས་ལ་བརྟེན་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་ལ་ངས་འདི་སྐད་ཅེས་སྨྲས་སོ། །ཇི་ལྟར་འདུ་ཤེས་ལ་བརྟེན་ཏེ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེས་ང་ལ་འདི་སྐད་ཅེས་སྨྲས་སོ། །འདུ་ཤེས་ལ་གནས་པ་དེ་ཇི་ལྟ་བུ། དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་དེ་ལ་འདི་སྐད་ཅེས་སྨྲས་སོ། །འདུ་ཤེས་ལ་གནས་པ་མེད་དོ། །དེས་སྨྲས་པ།
དེ་ལྟར་ན་གནས་པ་མེད་པས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་ཀུན་ཏུ་འོད་ཀྱིས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་

ལ་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། འཇམ་དཔལ་ངས་དེ་བཞིན་གཤེགས་པ་དེ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པས་བྱང་ཆུབ་སེམས་དཔའ་རྣམས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་གང་ལ་གནས་པ་དེ་ལ་གནས་ཏེ། ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་སྲུང་གི་བདག་པོ་སྤྲིན་གྱི་དབང་ཕྱུག་སྒྲོན་མ་ཞེས་བྱ་བ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཀུན་ཏུ་སྲུང་གི་བདག་པོ་སྤྲིན་གྱི་དབང་ཕྱུག་སྒྲོན་མས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས། དེས་ང་ལ་འདི་སྐད་ཅེས་སྨྲས་སོ། །བསམ་གྱིས་མི་ཁྱབ་པའི་དབྱིངས་གང་ལ་གནས་པ་དེ་ལ་གནས་ཏེ། ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་དེས་
ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་ལ་ངས་འདི་སྐད་ཅེས་སྨྲས་སོ། །སེམས་ཅན་གྱི་ཁམས་གང་ལ་གནས་པ་དེ་ལ་གནས་ཏེ།
ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གྱི་ཁམས་ཞེས་བགྱི་བ་གང་ལ་གནས་པ་ལགས། དེ་སྐད་ཅེས་གསོལ་
པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེའི་ཕྱིར་ཁྱོད་ཀྱིས་དོན་དེ་ཉིད་ཤེས་པར་བྱ་བའི་ཕྱིར་དཔེ་བསྟན་པར་བྱའོ། །དཔེས་བཀའ་སྩལ་བའི་དོན་འདིར་མི་ཁ་ཅིག་གིས་ཤེས་པར་ཡང་འགྱུར་རོ། །འཇམ་དཔལ་

འདི་ལྟ་སྟེ། དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པ་ཞིག་གིས་སྟེང་གི་བར་སྣང་ལ་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་དང་། མིའི་ལུས་དག་སྤྲུལ་ཏེ་འོང་ཞིང་འགྲོ་བའམ། ཡན་ལག་བཞི་པའི་དཔུང་གི་ཚོགས་
དག་ཀུན་ཏུ་སྟོན་པར་བྱེད་ན། འཇམ་དཔལ་དེ་ཇི་སྙམ་དུ་སེམས། ཡན་ལག་བཞི་པའི་དཔུང་གི་ཚོགས་དེ་གང་ན་གནས། དཔུང་གི་ཚོགས་བསྟན་པ་གང་ཡིན་པ་གང་ཡང་དེ་ན་སྣང་ངམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ན་དཔུང་གི་ཚོགས་
ཤིན་ཏུ་མ་མཆིས་ན་སྣང་བར་འགྱུར་བའམ། གང་ན་གནས་པར་འགྱུར་བའམ། མངོན་པ་ལྟ་ག་ལ་ཞིག་མཆིས། འཇམ་དཔལ་དེ་བཞིན་དུ་སེམས་ཅན་ནམ། སེམས་ཅན་དུ་བཏགས་པ་ཡང་ཤིན་ཏུ་ཡོད་པ་མ་ཡིན་ན་དེ་ན་གནས་པར་འགྱུར་བ་དང་། མངོན་པ་ལྟ་ག་ལ་ཡོད། འཇམ་
དཔལ་གནས་དེ་ལྟ་བུ་ལ་གནས་ཏེ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །བསྟན་པ་འདི་བཤད་པ་ན་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་སྟོང་ཕྲག་དྲུག་ཁྲི་ཆོས་རྣམས་ལ་ཆོས་ཀྱི་མིག་
རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །བྲམ་ཟེ་ལྷག་པའི་ང་རྒྱལ་ཅན་འབུམ་ཕྲག་སུམ་ཅུ་རྩ་གཉིས་ནི་ལྷག་པའི་ང་རྒྱལ་མེད་པའི་ཤེས་པ་སྐྱེས་སོ། །ལྷའི་བུ་འབུམ་ཕྲག་བཞི་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །དེ་ནས་བཅོམ་ལྡན་འདས་དེའི་ཚེ་འཛུམ་པ་མཛད་དེ། འདི་ནི་
སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་
ལྟ་བུ་དག་བྱུང་ནས་དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་སོང་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། །

བཅོམ་ལྡན་འདས་ཀྱིས་འཛུམ་པ་མཛད་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དག་འོད་ཀྱིས་སྣང་བར་བྱས་ཤིང་རབ་ཏུ་བརྒྱན་ཏོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་
རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། བསྟན་པ་འདི་བཤད་པ་ན་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་སྟོང་ཕྲག་དྲུག་
ཁྲི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །བྲམ་ཟེ་ལྷག་པའི་ང་རྒྱལ་ཅན་འབུམ་ཕྲག་སུམ་ཅུ་རྩ་གཉིས་ནི་ལྷག་པའི་ང་རྒྱལ་མེད་པའི་ཤེས་པ་སྐྱེས་སོ། །ལྷའི་བུ་འབུམ་ཕྲག་བཞི་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །ལྷའི་བུ་སུམ་ཁྲི་ཉིས་སྟོང་
པོ་འདི་དག་ལྷའི་རིས་འདི་ནས་ཤི་འཕོས་ཏེ། དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་དུ་སྐྱེ་བར་འགྱུར་ལ། དེ་དག་སངས་རྒྱས་ཀྱི་ཞིང་དེ་ནས་སངས་རྒྱས་ཀྱི་ཞིང་དག་ཏུ་ཡང་འགྲོ་བར་འགྱུར་རོ། །དེ་དག་གིས་བསྐལ་པ་དཔག་ཏུ་མེད་གྲངས་མེད་པར་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་བསྒྲུབས་ནས་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་འོད་ཅེས་བྱ་བར་འགྱུར་རོ། །བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་གི་སངས་རྒྱས་
ཀྱི་ཞིང་ཡང་ཀུན་ནས་སྣང་བ་དང་ལྡན་པར་འགྱུར་རོ། །དཔེར་ན་སུམ་ཅུ་རྩ་གསུམ་པའི་ལྷ་རྣམས་ཀྱི་བལྟ་ན་སྡུག་པ་རྟག་ཏུ་བརྒྱན་པ་དེ་བཞིན་དུ། དེ་དག་བྱང་ཆུབ་ཐོབ་པའི་འཇིག་རྟེན་གྱི་ཁམས་ཀྱང་རྟག་ཏུ་བརྒྱན་པར་འགྱུར་ཏེ། འཇམ་དཔལ་འཛུམ་པ་མཛད་པའི་རྒྱུ་ནི་དེ་ཡིན་ནོ། །རྐྱེན་ནི་དེ་
ཡིན་ནོ། །འཇམ་དཔལ་འདི་ལྟ་སྟེ། དཔེར་ན་ཤར་ཕྱོགས་ལོགས་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་གྲངས་མེད་དཔག་ཏུ་མེད་པ་དག་ཀྱང་སངས་རྒྱས་ཀྱི་བགྲོ་བ་དང་། དེ་བཞིན་གཤེགས་པའི་བགྲོ་བ་དང་། ཆོས་ཀྱི་བགྲོ་བ་འདི་ཉིད་སྟོན་པར་མཛད་དོ། །དེ་བཞིན་དུ་ལྷོ་

ཕྱོགས་དང་། དེ་བཞིན་དུ་ནུབ་ཕྱོགས་དང་། དེ་བཞིན་དུ་བྱང་ཕྱོགས་དང་། དེ་བཞིན་དུ་འོག་གི་ཕྱོགས་དང་། དེ་བཞིན་དུ་སྟེང་གི་ཕྱོགས་དང་། དེ་བཞིན་དུ་ཕྱོགས་བཅུ་དག་ན་དེ་བཞིན་གཤེགས་པ་གྲངས་མེད་དཔག་ཏུ་མེད་པ་དག་ཀྱང་སངས་རྒྱས་ཀྱི་བགྲོ་བ་དང་། ཆོས་ཀྱི་བགྲོ་བ་དང་། དེ་བཞིན་
གཤེགས་པའི་བགྲོ་བ་འདི་ཉིད་སྟོན་པར་མཛད་དེ། ངས་ཡི་གེ་གང་གིས་བསྟན་པ་ཡི་གེ་དེ་ཉིད་ཀྱིས་དེ་བཞིན་གཤེགས་པ་དེ་དག་ཀྱང་སྟོན་པ་མཛད་དོ། །འཇམ་དཔལ་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་སངས་རྒྱས་ཀྱི་བགྲོ་བ་དང་། དེ་བཞིན་གཤེགས་པའི་བགྲོ་བ་དང་། ཆོས་
ཀྱི་བགྲོ་བ་ཆོས་ཀྱི་རྣམ་གྲངས་འདི་ནམ་མཁས་ཡོངས་སུ་ཟིན་པའི་ས་ཕྱོགས་འདི་ཉིད་དུ་ཡང་དག་པར་བསྒྲགས་སོ། །འཇམ་དཔལ་མ་འོངས་པའི་དུས་ན་སངས་རྒྱས་བཅོམ་ལྡན་འདས་གང་དག་འབྱུང་བར་འགྱུར་བ་དེ་དག་ཀྱང་དེ་བཞིན་གཤེགས་པའི་བགྲོ་བ་དང་། སངས་རྒྱས་ཀྱི་བགྲོ་བ་དང་།
ཆོས་ཀྱི་བགྲོ་བ་ཆོས་ཀྱི་རྣམ་གྲངས་འདི་ནམ་མཁས་ཡོངས་སུ་ཟིན་པའི་ས་ཕྱོགས་འདི་ཉིད་དུ་འཆད་པར་འགྱུར་རོ། །འཇམ་དཔལ་དེ་བཞིན་གཤེགས་པ་བྱམས་པས་ཀྱང་སངས་རྒྱས་ཀྱི་བགྲོ་བ་དང་། དེ་བཞིན་གཤེགས་པའི་བགྲོ་བ་དང་། ཆོས་ཀྱི་བགྲོ་བ་ཆོས་ཀྱི་རྣམ་གྲངས་འདི་ནམ་མཁས་
ཡོངས་སུ་ཟིན་པའི་ས་ཕྱོགས་འདི་ཉིད་དུ་ཡང་དག་པར་སྒྲོགས་པར་འགྱུར་རོ། །འཇམ་དཔལ་སངས་རྒྱས་ཀྱིས་གསུངས་པའོ་ཞེས་སྨྲ་བ་གང་ཡིན་པ་དེ་ནི་ཡང་དག་པར་སྨྲ་བ་སྟེ། འཇམ་དཔལ་སངས་རྒྱས་ཀྱི་བགྲོ་བ་དང་། དེ་བཞིན་གཤེགས་པའི་བགྲོ་བ་དང་། ཆོས་ཀྱི་བགྲོ་བའི་
ཆོས་ཀྱི་རྣམ་གྲངས་འདི་ནི་དེ་བཞིན་གཤེགས་པས་གསུངས་པའོ་ཞེས་སྨྲ་བ་གང་ཡིན་པ་དེ་ནི་ཡང་དག་པར་སྨྲ་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡན་ལག་མཆོག་ཅེས་བྱ་བ་དེས་ང་ལ་འདི་
སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེ་ལ་ངས་འདི་སྐད་ཅེས་སྨྲས་སོ། །སྒྱུ་མའི་སྐྱེས་བུ་རྣམ་པར་

ཐར་པ་བརྒྱད་མངོན་པར་བསྒྲུབ་པ་གང་ལ་གནས་པ་དེ་ལ་གནས་ཏེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡན་ལག་མཆོག་
ཅེས་བྱ་བ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཡན་ལག་མཆོག་གིས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱ་ཐུབ་
པས་གང་ལ་གནས་ཏེ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར། དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་གནས་ཏེ་ཕུང་པོ་ལྷག་མ་མ་མཆིས་
པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སངས་རྒྱས་བཅོམ་ལྡན་འདས་རྣམས་ནི་བསམ་གྱིས་མི་ཁྱབ་པའི་མཐའི་ཡུལ་ལ་གནས་ཏེ་ཡོངས་སུ་མྱ་ངན་ལས་འདའོ། །འཇམ་
དཔལ་ཆོས་ཐམས་ཅད་ནི་དེ་ལྟ་བུ་ལ་གནས་པ་སྟེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་གཟིགས་ཞེས་བྱ་བ་དེས་ང་ལ་འདི་སྐད་ཅེས་སྨྲས་
སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་མཆོག་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེ་ལ་ངས་འདི་སྐད་ཅེས་སྨྲས་སོ། །དེ་སངས་རྒྱས་ཀྱི་སྤྲུལ་པ་གང་ལ་གནས་
པ་དེ་ལ་གནས་ཏེ། ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གཞན་ཡང་དེ་བཞིན་གཤེགས་པ་ཀུན་ཏུ་གཟིགས་ཞེས་བྱ་བ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཀུན་ཏུ་གཟིགས་ཀྱིས་གང་ལ་གནས་

ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །མཐའ་གང་ཁོ་ན་ལ་གནས་ནས་ཁོ་བོ་ལ་འདྲི་བ་དེ་ལ་གནས་ཏེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་
ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་རྣམ་དག་མངོན་འཕགས་དཔལ་གྱི་རྒྱལ་པོ་ཞེས་བྱ་བ་དེས་ང་ལ་འདི་སྐད་ཅེས་སྨྲས་སོ། །དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱའི་རྒྱལ་པོའི་གཙོ་བོ་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། ངས་དེ་བཞིན་གཤེགས་པ་དེ་ལ་འདི་སྐད་ཅེས་སྨྲས་
སོ། །བྱིས་པ་སོ་སོའི་སྐྱེ་བོའི་ཆོས་རྣམས་གང་ལ་གནས་པ་དེ་ལ་གནས་ཏེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་བྱིས་པ་སོ་སོའི་སྐྱེ་བོའི་ཆོས་རྣམས་གང་ལ་གནས་
ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་བྱིས་པ་སོ་སོའི་སྐྱེ་བོའི་ཆོས་རྣམས་ཡང་དག་པར་རྗེས་སུ་མཐོང་ངམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བྱིས་པ་
སོ་སོའི་སྐྱེ་བོའི་ཆོས་རྣམས་ནི་ཕྱི་དང་ནང་ན་མི་དམིགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟར་ཕྱི་དང་ནང་ལ་མི་གནས་པར་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་
གཞན་ཡང་དེ་བཞིན་གཤེགས་པ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་རྣམ་དག་མངོན་འཕགས་དཔལ་གྱི་རྒྱལ་པོས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་

རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །སྒྱུ་མའི་སྐྱེས་བུ་རྣམ་པར་ཐར་པ་བརྒྱད་མངོན་པར་སྒྲུབ་པ་གང་ལ་གནས་པ་དེ་ལ་གནས་ཏེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །
དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་སྒྱུ་མའི་སྐྱེས་བུ་ཉིད་མ་མཆིས་ཤིང་མི་དམིགས་པ་ལགས་ན། དེའི་རྣམ་པར་ཐར་པ་བརྒྱད་ཀྱི་སྒོ་མངོན་པར་སྒྲུབ་པ་ལྟ་ག་ལ་མཆིས། བཅོམ་ལྡན་
འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། ཆོས་གང་མེད་ཅིང་མི་དམིགས་པ་དེ་སྒྱུ་མའི་སྐྱེས་བུ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས་ཅི་སྒྱུ་མའི་སྐྱེས་
བུ་ཡོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་རྣམ་པར་ཐར་པ་བརྒྱད་པོ་དེ་ལྟ་བུ་ལ་གནས་ཏེ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ཏེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །འཇམ་དཔལ་གཞན་ཡང་ཤར་ཕྱོགས་ལོགས་ན་དེ་བཞིན་གཤེགས་པ་འོད་ཀྱི་དཀྱིལ་འཁོར་མངོན་པར་འཕགས་པའི་མེ་ཏོག་དཔལ་གྱི་གཟི་བརྗིད་རྒྱལ་པོ་ཞེས་བྱ་བ་དེ་ལ་ངས་འདི་སྐད་ཅེས་སྨྲས་སོ། །དེ་བཞིན་གཤེགས་པ་
འོད་ཀྱི་དཀྱིལ་འཁོར་མངོན་པར་འཕགས་པའི་མེ་ཏོག་དཔལ་གྱི་གཟི་བརྗིད་རྒྱལ་པོས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། དེ་སྐད་ཅེས་སྨྲས་པ་དང་། དེས་ང་ལ་འདི་སྐད་ཅེས་སྨྲས་སོ། །གཟུགས་དང་། ཚོར་བ་
དང་། འདུ་ཤེས་དང་། འདུ་བྱེད་རྣམས་གང་ལ་གནས་པ་དང་། རྣམ་པར་ཤེས་པ་གང་ལ་གནས་པ་དེ་ལ་གནས་ཏེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས་

གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དག་གང་ན་གནས་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། ཕུང་པོ་ལྔ་མ་གཏོགས་པར་ཕུང་པོ་ལྔ་གང་ལ་གནས་པའི་ཆོས་འགའ་ཞིག་འདི་ན་ཡོད་དམ།
འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། གཟུགས་ཀྱི་ངོ་བོ་ཉིད་གང་ཡིན་པ་དེ་གཟུགས་ལ་གནས་པ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་
དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། ཚོར་བ་དང་། འདུ་ཤེས་དང་། འདུ་བྱེད་རྣམས་གང་དག་ཡིན་པ་དང་། རྣམ་པར་ཤེས་པའི་ངོ་བོ་ཉིད་གང་ཡིན་པ་དེ་རྣམ་པར་ཤེས་པ་ལ་གནས་པ་ཡིན་ནམ། གསོལ་པ།
དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་གནས་པ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ལྟ་
ལགས་ཏེ། བཅོམ་ལྡན་འདས་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་མི་གནས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་རྣམ་པར་རིག་པའི་ངོ་བོ་ཉིད་གང་ཡིན་པ་དེ་ནི་རྣམ་
པར་རིག་པ་མེད་པ་ཡིན་ལ། རྣམ་པར་རིག་པ་མེད་པ་གང་ཡིན་པ་དེ་ནི་བྱང་ཆུབ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་དེ་ལྟ་བུ་ལ་གནས་པའོ། །འཇམ་དཔལ་གཞན་ཡང་དེ་བཞིན་གཤེགས་པ་འོད་ཀྱི་དཀྱིལ་འཁོར་
མངོན་པར་འཕགས་པའི་མེ་ཏོག་དཔལ་གྱི་གཟི་བརྗིད་རྒྱལ་པོ་དེས་ང་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཤཱཀྱའི་རྒྱལ་པོའི་གཙོ་བོ་ཤཱཀྱ་ཐུབ་པས་གང་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས། དེ་སྐད་ཅེས་

སྨྲས་པ་དང་། དེ་ལ་ངས་འདི་སྐད་ཅེས་སྨྲས་སོ། །ཆོས་ཐམས་ཅད་ཟད་པ་མེད་པ། ནམ་མཁའི་མཐའ་དང་མཉམ་པ་དེ་ནི་བྱང་ཆུབ་སྟེ། དེ་ལྟ་བུ་ལ་གནས་ནས་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཆོས་ཐམས་ཅད་ནི་
དེ་ལྟ་བུ་ལ་གནས་པ་སྟེ། དེ་ནི་ཡིད་ཀྱི་ཡང་དག་པར་བགྲོ་བའི་དྲི་བའོ། །བསྟན་པ་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་སོ། །འགུལ་ཏོ། །ལྡེག་གོ། །འཁྲུགས་སོ། །འུར་འུར་རོ། །ཆེམ་ཆེམ་མོ། །ཐམས་ཅད་དང་ལྡན་པའི་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་ཁྱབ་པར་གྱུར་ཏོ། །འཇིག་རྟེན་གྱི་བར་མུན་པ་མུན་ནག་གང་ན་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་གཟ་བརྗིད་ཆེ་བའི་འོད་ཀྱིས་སྣང་བར་མ་ནུས་པ་དང་། གཟི་བརྗིད་ཀྱིས་གཟི་
བྱིན་ཅན་དུ་མ་ནུས་པ་དང་། སྣང་བས་སྣང་བར་མ་ནུས་པ་དང་། གསལ་བས་གསལ་ཞིང་སྣང་བར་མ་ནུས་པ་གང་དག་ཡིན་པ་འཇིག་རྟེན་གྱི་བར་དེ་དག་ཐམས་ཅད་སྐད་ཅིག་དེ་ཉིད་དང་། ཐང་ཅིག་དེ་ཉིད་དང་། ཡུད་ཙམ་དེ་ཉིད་ལ་སྣང་བས་ཁྱབ་པར་གྱུར་ཏོ། །དེ་ནས་དེའི་ཚེ་བཅོམ་
ལྡན་འདས་འཛུམ་པ་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་།
བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་སོང་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་
ནས། བཅོམ་ལྡན་འདས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་གཡས་ཕྱོགས་ལོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་ནས། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འཁོར་འདི་ནི་དག་པ་སྟེ། གཙང་བ་

སྙིང་པོ་ལ་གནས་པའོ། །ཀུན་དགའ་བོ་བསྟན་པ་འདི་བཤད་པ་ན་དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཀུན་དགའ་བོ་རྒྱལ་བུ་རྒྱལ་བྱེད་ཀྱི་ཚལ་འདི་ན་དགེ་སློང་ཇི་སྙེད་ཅིག་གནས་པ་ཀུན་དགའ་བོ་དེ་དག་གི་ནང་ནས་ཆོས་འདི་དག་ལ་གང་ཐེ་ཙོམ་ཟ་བ་
འམ། ཡིད་གཉིས་ཟ་བའམ། སོམ་ཉི་ཟ་བའི་དགེ་སློང་འགའ་ཡང་མ་བྱུང་ངོ་། །བྱང་ཆུབ་སེམས་དཔའ་ལྔ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་དུ་མས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཐམས་ཅད་
ཀྱང་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་བརྗོད་ཅེས་བྱ་བར་མིང་འཐུན་པ་ཉིད་དུ་འགྱུར་རོ་ཞེས་བཅོམ་ལྡན་འདས་ཀྱིས་ལུང་བསྟན་ཏོ། །དེ་དག་གི་ཚེའི་ཚད་ནི་བསྐལ་པ་གཅིག་ཐུབ་པར་འགྱུར་རོ། །དེ་དག་གི་དམ་པའི་
ཆོས་ནི་བསྐལ་པ་ཕྱེད་ཀྱི་བར་དུ་གནས་པར་འགྱུར་རོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་འདི་སྙམ་དུ་སེམས་པར་གྱུར་ཏོ། །བདག་གིས་ནི་བཅོམ་ལྡན་འདས་ཡུན་རིང་ཞིག་ཏུ་མ་མཐོང་བས། བདག་གིས་བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་
བྱ་བའི་ཕྱིར། བཅོམ་ལྡན་འདས་ག་ལ་བ་དེར་འགྲོ་བར་བྱའོ་སྙམ་མོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་དེའི་ཚེ་སྣ་ཆེན་པོ་ལ་གཏོགས་པ་དབྱིབས་རིང་ལ་སྨྲས་པ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་ཀྱིས་ངའི་
ཤིང་རྟ་བཞོན་པ་བཟང་པོ་དང་ལྡན་པ་ཐོག་མར་སྦྱོར་ཅིག །ཡང་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་དེའི་ཚེ་སྣ་ཆེན་པོ་ལ་གཏོགས་པ་དཔལ་མཆོག་ལ་སྨྲས་པ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་ཀྱིས། དཔལ་
མཆོག་ཁྱོད་སོང་ལ་ཡན་ལག་བཞི་པའི་དཔུང་གི་ཚོགས་དག་ཤོམས་ཤིག་ཅེས་བསྒོ་ཤིག །ཡང་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཙུན་མོ་དམ་པ་ལ་སྨྲས་པ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་ཁྱོད་ཀྱང་འདོང་ངོ་ཞེས་སྨྲས་

སོ། །ཡང་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་གཞོན་ནུ་ས་གསོ་བྱིན་ལ་སྨྲས་པ། གཞོན་ནུ་ས་གསོ་བྱིན་ཁྱོད་སོང་ལ་རི་དགས་འཛིན་གྱི་མ་ལ་རྒྱལ་པོ་གསལ་རྒྱལ་ན་རེ་བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་སོ་ཞེས་
སྦྲོན་ཅིག །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་སྣ་ཆེན་པོ་ལ་གཏོགས་པ་རྩིས་པ་ས་ག་བཟང་པོ་ལ་སྨྲས་པ། ས་ག་བཟང་པོ་ཁྱོད་སོང་ལ་གྲོང་ཁྱེར་ཆེན་པོ་མཉན་ཡོད་ཀྱི་མི་དེ་དག་ཐམས་ཅད་ཀྱང་ཆར་གཞུག་ཅིང་། ལྗོངས་ཀྱི་མི་དང་། གྲོང་རྡལ་བའི་མི་ཐམས་ཅད་ལ་ཡང་
རྐང་ཏང་པས་ཀྱང་རྐང་ཏང་པ་དང་། བཞི་མདོ་བས་ཀྱང་བཞི་མདོ་བ་དང་། སུམ་མདོ་བས་ཀྱང་སུམ་མདོ་བ་དང་། ཤིང་རྟ་པས་ཀྱང་ཤིང་རྟ་པ་ལ་ཡུལ་ཀོ་ས་ལའི་རྒྱལ་པོ་གསལ་རྒྱལ་ན་རེ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་ཀྱི་ཆ་
རྫས་གྱིས་ཤིག་ཅེས་སྦྲོན་ཅིག །སྣ་ཆེན་པོ་ལ་གཏོགས་པ་ཐམས་ཅད་ལ་ཡང་སྦྲོན་ཅིག །ཁྱིམ་བདག་མགོན་མེད་ཟས་སྦྱིན་ལ་ཡང་སྦྲོན་ཅིག །ཁྱིམ་བདག་དེད་དཔོན་བཟང་པོ་ལ་ཡང་སྦྲོན་ཅིག །ཁྱིམ་བདག་ས་ག་ལ་ཡང་སྦྲོན་ཅིག །ཁྱིམ་བདག་ཀླུ་དགའ་ལ་ཡང་སྦྲོན་ཅིག །ཚོང་པ་དང་།
ཁྱིམ་བདག་ཐམས་ཅད་ལ་ཡང་སྦྲོན་ཅིག །ཁྱིམ་བདག་བསོད་ནམས་དཔལ་བྱུང་ལ་ཡང་སྦྲོན་ཅིག །ཁྱིམ་བདག་བསོད་ནམས་དཔལ་ལ་ཡང་སྦྲོན་ཅིག །ཁྱིམ་བདག་བསོད་ནམས་དཔལ་གྱི་སྙིང་པོ་དང་། གཅེས་མིན་གྱིས་བྱིན་དང་། རི་དགས་འཛིན་དང་། འཕེལ་བྱེད་དང་། ས་གསོ་
བྱིན་རྣམས་ལ་ཡང་སྦྲོན་ཅིག །ཁྱིམ་བདག་དཔའ་བོ་དཔལ་དང་། དཔའ་བོའི་འགྲོས་ཀྱིས་འགྲོ་བ་དང་། དགའ་བྱེད་དང་། དག་པའི་སེམས་དང་། དོན་གྲུབ་དང་། ཀུན་འཛིན་རྣམས་ལ་ཡང་སྦྲོན་ཅིག །ཁྱིམ་བདག་བཀོད་པའི་མཆོག་ལ་ཡང་སྦྲོན་ཅིག །ཁྱིམ་བདག་རྣ་གཙུག་
ལ་ཡང་སྦྲོན་ཅིག །ཁྱིམ་བདག་རྣ་ཆ་ཅན་ལ་ཡང་སྦྲོན་ཅིག །ཁྱིམ་བདག་མེ་ཏོག་རྣ་ཅན་ལ་ཡང་སྦྲོན་ཅིག །བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་ཀྱིས། ཡུལ་ཀོ་ས་ལའི་རྒྱལ་པོས་བཀའ་སྩལ་པ་བཞིན་དེ་ལྟར་གོ་མ་

ཐག་ཏུ་གྲོགས་པོ་དག་དེང་ཤིག །གྲོགས་པོ་དག་དེང་ཤིག །དེ་ལྟར་སྣ་ཆེན་པོ་ལ་གཏོགས་པ་རྩིས་པ་ས་ག་བཟང་པོས་ཀྱང་རྒྱལ་པོ་ཆེན་པོའི་ལྟར་མཉན་ནས་རྒྱལ་པོ་གསལ་རྒྱལ་གྱིས་ཇི་སྐད་བསྒོ་བ་བཞིན་བསྒྲགས་སོ། །དེ་ནས་བཙུན་མོ་ཕྲེང་ཐོགས་ཀྱིས་བྲན་མོ་དཔལ་བཟང་མོ་དང་།
བྲན་མོ་མེ་ཏོག་དཔལ་དང་། བྲན་མོ་དཔལ་དགའ་མོ་རྣམས་ལ་སྨྲས་པ། ཁྱོད་དེང་ལ་ང་ན་རེ་ཁྱིམ་བདག་གི་ཆུང་མ་རབ་ཏུ་རྟོག་བྱེད་ལ། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་འདོང་དགོས་སོ་ཞེས་སྦྲོན་ཅིག །ངའི་ཚིག་གིས་ཁྱིམ་བདག་གི་ཆུང་མ་ཟླ་བ་
དང་། དྲི་མེད་དང་། བདེ་དཔལ་དང་། འཕགས་མ་དང་། ཀུན་ཤེས་དང་། དཔེ་མེད་དཔལ་དང་། བཀོད་མཆོག་མ་དང་། ཟླ་བཟངས་མ་དང་། དྲི་མེད་ལྡན་རྣམས་ལ་ཡང་སྦྲོན་ཅིག །གནང་ཆེན་མོ་དེ་དག་གིས་ཇོ་མོ་ལེགས་སོ་ཞེས་ཇོ་མོའི་ལྟར་མཉན་ནས་ཇི་སྐད་བསྒོ་བ་བཞིན་སྦྲན་ཏོ། །
དེ་ནས་སྣ་ཆེན་པོ་ལ་གཏོགས་པ་དབྱིབས་རིང་གིས་རྒྱལ་པོ་གསལ་རྒྱལ་གྱི་བཞོན་པ་བཟང་པོ་བཤམས་སོ། །བཤམས་ནས་ཀྱང་ཡུལ་ཀོ་ས་ལའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ལྷའི་བཅིབས་པ་བཟང་པོ་ནི་བཤམས་ལགས་སོ། །དེ་ནས་ཡུལ་
ཀོ་ས་ལའི་རྒྱལ་པོ་གསལ་རྒྱལ་གྱིས། བཅོམ་ལྡན་འདས་ལ་ཕྱག་བྱ་བ་དང་། བལྟ་བ་དང་། བསྙེན་བཀུར་བྱ་བའི་ཕྱིར་བཞོན་པ་བཟང་པོ་ལ་ཞོན་ཏེ། རྒྱལ་པོ་ཆེན་པོའི་མཐུ་དང་། རྒྱལ་པོ་ཆེན་པོའི་རྫུ་འཕྲུལ་གྱིས་བཙུན་མོའི་འཁོར་གྱི་ནང་ན་གནས་ཤིང་། བཙུན་མོའི་འཁོར་
གྱིས་མདུན་གྱིས་ནི་བལྟས། ལྗོངས་ཀྱི་མི་དང་། གྲོང་རྡལ་བས་ནི་བསྐོར། ཡན་ལག་བཞི་པའི་དཔུང་གི་ཚོགས་ཀྱིས་ནི་མདུན་གྱིས་བལྟས། མེ་ཏོག་དང་། མེ་ཏོག་ཕྲེང་དང་། བདུག་པ་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། གདུགས་དང་། རྒྱལ་མཚན་དང་།
བ་དན་དང་། གོས་དག་ནི་ཐོགས། རིན་པོ་ཆེའི་གོས་རིན་ཏང་མེད་པ་དག་ནི་ཁྱེར། རིན་པོ་ཆེའི་གོས་རྒྱ་ཆེ་ཞིང་ཡངས་པ་དག་ནི་བགོས། ཤིང་རྟ་སྟོང་ཕྲག་དྲུག་ཁྲི་དང་། ཁྱོགས་པ་སྟོང་ཕྲག་དྲུག་ཁྲི་དང་། རྐང་ཏང་པ་སྟོང་ཕྲག་དྲུག་ཁྲིས་ནི་བསྐོར། བ་དན་སྟོང་ཕྲག་དྲུག་ཁྲི་

ནི་བསྒྲེང་། རོལ་མོའི་སྒྲ་སྟོང་ཕྲག་དྲུག་ཁྲི་དང་། རྔ་བོ་ཆེ་དང་། སིལ་སྙན་གྱི་སྒྲ་དུ་མ་དག་ནི་སྒྲོགས་ཤིང་། རྒྱལ་པོ་ཆེན་པོ་དེའི་མཐུས་གྲོང་ཁྱེར་ཆེན་པོ་མཉན་ཡོད་དུ་དོང་ངོ་། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་བཞོན་པ་ལ་ཇི་སྲིད་བཞོན་དུ་རུང་བ་དེ་སྲིད་དུ་བཞོན་པས་
སོང་སྟེ། བཞོན་པ་ལས་བབས་ནས་ཡུལ་ན་མཐུ་དང་། བརྩོན་འགྲུས་ཐོབ་པ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་རྒྱལ་པོའི་རྟགས་ལྔ་པོ་གང་དག་ཡིན་པ་འདི་ལྟ་སྟེ། རལ་གྲི་རིན་པོ་ཆེ་དང་། གདུགས་རིན་པོ་ཆེ་དང་། ཅོད་པན་རིན་པོ་ཆེ་དང་། བསིལ་ཡབ་རིན་པོ་ཆེ་དང་མཆིལ་
ལྷམ་ནོར་བུ་རིན་པོ་ཆེ་ལས་བྱས་པ་སྟེ། དེ་དག་ཐམས་ཅད་ཕུད་ཅིང་བཞག་ནས་རྐང་པས་རྒྱལ་བུ་རྒྱལ་བྱེད་ཀྱི་ཚལ་དུ་སོང་ངོ་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་རྒྱལ་བུ་རྒྱལ་བྱེད་ཀྱི་ཚལ་ན་སྒྲ་ཆུང་བར་རིག་ནས་སྣ་ཆེན་པོ་ལ་གཏོགས་པ་དབྱིབས་རིང་ལ་སྨྲས་པ། དབྱིབས་རིང་
འདི་ལྟར་འདི་ནི་བསམ་གཏན་པ་གནས་མེད་པ་རྣམས་ཀྱི་གནས་སོ། །རྣལ་འབྱོར་པ་དབེན་པ་ལ་དགའ་བ་རྣམས་དང་། སྟོང་པ་ཉིད་ལ་གནས་པ་རྣམས་དང་། མཚན་མ་མེད་པ་ལ་གནས་པ་རྣམས་དང་། སྨོན་པ་མེད་པ་ལ་གནས་པ་རྣམས་ཀྱི་གནས་སོ། །བསམ་གཏན་པ་མི་གནས་
པ་རྣམས་ཀྱི་གནས་ཏེ། ཕས་ཀྱི་རྒོལ་བ་རྣམས་ཀྱིས་ཀྱང་སྟོང་ལ་གནས་པ་རྣམ་པ་དེ་ལྟ་བུ་དེ་དག་དང་། སྒྲ་ཆུང་བ་དང་། དབེན་པ་འདིས་གནས་སོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་ས་ག་གཞོན་ནུ་དཔལ་ལ་སྨྲས་པ། ས་ག་གཞོན་ནུ་དཔལ་ངའི་འཁོར་རྣམས་
གཅོམ་བསྐྱུངས་ཤིག །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས། བཅོམ་ལྡན་འདས་ཐམས་ཅད་མཁྱེན་པ། ཐམས་ཅད་གཟིགས་པ། རྒྱལ་བུ་རྒྱལ་བྱེད་ཀྱི་ཚལ་ན་དགེ་སློང་གི་དགེ་འདུན་གྱིས་བསྐོར་ཏེ། དགེ་སློང་གི་དགེ་འདུན་གྱིས་མདུན་གྱིས་བལྟས་ཤིང་། ལྷའི་
འཁོར་མང་པོས་བསྐོར་ནས་མདུན་གྱིས་བལྟས་པ་ལ་ཆོས་སྟོན་ཅིང་བཞུགས་པ་མཐོང་ངོ་། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་དགའ་བ་དང་། མཆོག་ཏུ་དགའ་བ་སྐྱེས་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །སྣང་ཞིང་གསལ་བར་མཛད་པ་འོད་མཛད་པ། །

ཕས་ཀྱི་རྒོལ་བ་ཀུན་གྱིས་མི་གཡོས་ཤིང་། །འཁོར་གྱི་ནང་ན་ཟླ་བ་ཉ་བ་ལྟར། །གང་ཟག་དམ་པ་རྣམ་པར་ལམ་མེར་བཞུགས། །ཆོས་ཀྱི་དམ་པ་སྟོན་པར་མཛད་པ་ན། །ཕྱོགས་བཅུ་ཀུན་ཏུ་ཁྱོད་ནི་ཐ་ལེ་ཞིང་། །བདུད་ཀྱི་སྡེ་དཔོན་མ་ལུས་རབ་བཅོམ་ནས། །གསེར་གྱི་རི་བོ་འཕགས་བཞིན་ལམ་མེར་གདའ། །
ཀླུ་ཡི་བདག་པོ་མི་གཡོས་གནས་པ་ལྟར། །གཽ་ཏ་མའི་ཉན་ཐོས་མི་ཕམ་ལགས། །ཞི་གནས་དགྱེས་ཀྱི་སྲས་རྣམས་ཞི་གནས་དགའ། །དེ་དག་ནང་ན་རྒྱལ་བ་གསུང་ཚེ་མཛེས། །ཡོན་ཏན་ཡང་དག་སྟོན་པ་འཇིག་རྟེན་གྲགས། །དེ་ལྟར་རྒྱལ་བ་ཤཱཀ་ཐུབ་ལམ་མེར་བཞུགས། །ཇི་ལྟར་རི་རབ་རྒྱ་མཚོའི་ནང་
འཕགས་ཤིང་། །རིན་ཆེན་སྣ་ཚོགས་རྣམས་ཀྱིས་མཛེས་པ་ལྟར། །དེ་བཞིན་ཤཱཀྱ་ཁྱུ་མཆོག་འཇིག་རྟེན་འཕགས། །སེམས་ཅན་ཀུན་ལས་ཁྱོད་འཕགས་ལམ་མེར་བཞུགས། །ཇི་ལྟར་པད་མ་ཆུས་ནི་མི་གོས་ལྟར། །དེ་བཞིན་འཇིག་རྟེན་དག་ན་མ་གོས་བཞུགས། །ཇི་ལྟར་རི་རབ་རྟག་ཏུ་
བརྒྱན་པ་ལྟར། །ཁྱོད་ནི་ཡང་དག་འཕགས་པས་ཀུན་ཏུ་མཛེས། །དེ་ལྟར་རྒྱལ་བ་མཁས་པ་རྣམས་ཀྱིས་བསྐོར། །ལྷ་དང་བཅས་པའི་འཁོར་ནང་མངོན་པར་འཕགས། །སུམ་ཅུ་རྩ་གསུམ་གནས་ན་ཡོངས་འདུ་ཤིང་། །མེ་ཏོག་ལེགས་ཆས་འཕགས་མཛེས་ལྷག་གེ་ལྟར། །དེ་བཞིན་ལྷ་
དང་བཅས་པའི་འཁོར་ནང་ན། །ཤཱཀྱ་ཁྱུ་མཆོག་མཚན་གྱིས་རྣམ་པར་མཛེས། །འོད་གསལ་ཟུར་བརྒྱད་ནོར་བུ་བཻ་དཱུརྱ། །དུ་གུལ་ཀ་