Kinh tạng Tây Tạng (Kangyur Đại Học) — 063_མདོ་སྡེ།_ཛ

ཕངས་ཀྱི། བདག་
འཕངས་ན། ཅིའི་ཕྱིར་ཞིག་ཏུ་དེ་ལྟར་མོ་ནི་མ་འཕངས་ལ་བདག་འཕངས་པ་ལས་ན་སྲིང་མོ་དེ་ནི་དགེ་བའི་རྩ་བ་ཤིན་ཏུ་འབར་བ་ཟབ་མོ་ལ་ཤིན་ཏུ་བཟོད་པར་གྱུར་པ་ཞིག་གི། །བདག་ནི་དེ་ལྟ་བུ་མ་ཡིན་པ་ཞིག་གམ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་
གྱུར་ཏེ། གང་བདག་གིས་རྫུ་འཕྲུལ་གྱི་མཐུ་བསྐྱེད་དེ། སླར་ཡང་འཁོར་དེར་འགྲོའོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་སེམས་བསྐྱེད་པ་གཅིག་གིས་ཤར་ཕྱོགས་ནས་སངས་རྒྱས་ཀྱི་
ཞིང་གང་གཱའི་ཀླུང་གི་བྱེ་མ་སྙེད་འདས་པར་གྱུར་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་ཀྱང་སངས་རྒྱས་ཀྱི་ཞིང་དེར་ཆུང་ངུ་ན་སྐྲའི་རྩེ་མོའི་ཆ་ཤས་ཙམ་དུ་ཡང་འགྲོ་མི་ནུས་ན་འཁོར་དེར་འགྲོ་བ་ལྟ་ཅི་སྨོས་ཏེ། དེ་ལྟ་བུའི་གནས་མེད་དོ། །དེ་ནས་འཇམ་དཔལ་གཞོན་ནུར་

གྱུར་པ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ཀུན་དུ་སོང་ཡང་འདི་ལྟ་སྟེ། སངས་རྒྱས་ཀྱི་མཐུ་དང་། བྱིན་གྱི་རླབས་ཀྱིས་འཁོར་དེར་འགྲོ་མ་ནུས་སོ། །དེ་ནས་འཇམ་དཔལ་གཞོན་ནུར་གྱུར་པ་ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཀུན་ཏུ་
སོང་ནས་སླར་ཡང་རི་ཁོར་ཡུག་གི་རྩེ་མོ་ལ་འདུག་ནས་འདི་སྙམ་དུ་གྱུར་ཏེ། སངས་རྒྱས་བཅོམ་ལྡན་འདས་རྣམས་ཀྱི་བྱིན་གྱི་རླབས་ནི་མཐུ་ཆེས། དེ་ལ་བདག་གི་རྫུ་འཕྲུལ་གྱི་རྣམ་པས་གནོན་ཡང་མི་ནུས། དེ་ལ་སངས་རྒྱས་བཅོམ་ལྡན་འདས་རྣམས་ཀྱིས་ཉེས་པ་ཡང་མེད་དོ། །དེ་
ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་ནི་ཆོས་ལ་སློབ་དཔོན་གྱིས་འཆབ་པ་མེད་དེ། བདག་ཉིད་ཆུང་ཟད་ཅིག་ཁོ་རུ་ཆུང་བས་དེའི་ཕྱིར་བདག་ཞི་བའི་ཆོས་སྟོན་པ་དེར་འགྲོ་མ་ནུས་པར་གྱུར་དུ་ཟད་དེ། དེ་བཞིན་གཤེགས་པ་དག་ནི་ཆོས་ལ་སློབ་དཔོན་གྱིས་འཆབ་པ་མེད་ཀྱི། དེ་
བཞིན་གཤེགས་པ་དག་ནི་སེམས་ཅན་ཐམས་ཅད་ལ་སྙོམས་པས་ན་གང་བདག་ནི་དྲན་པ་ཉེ་བར་གཞག་པ་ལ་གནས་པས་རི་ཁོར་ཡུག་གི་རྩེ་མོ་འདི་ཉིད་ལ་གནས་ས་སྙམ་མོ། །དེ་ལ་འཇམ་དཔལ་གཞོན་ནུར་གྱུར་པའི་དྲན་པ་ཉེ་བར་གཞག་པ་ནི་འདི་ཡིན་ཏེ། འདི་ལྟ་སྟེ། ཆོས་
ཐམས་ཅད་དྲན་པ་མེད་པ། ཡིད་ལ་བྱེད་པ་མེད་པ། ཆོས་ཐམས་ཅད་མི་གནས་པ། ཆོས་ཐམས་ཅད་གནས་པ་མེད་པ་སྟེ། ཅིའི་ཕྱིར་མི་གནས་ཞེ་ན་འགྲོ་བ་མེད་པའི་ཕྱིར་ཏེ། ཆོས་གང་ཡང་ཤིན་ཏུ་ཡོད་པ་མེད་དེ། དེའི་ཕྱིར་དེ་དག་མི་འགྲོའོ། །གང་མི་འགྲོ་བ་དེ་ནི་མི་
གནས་སོ། །འདི་ལྟ་སྟེ། གནས་དང་གནས་མ་ཡིན་པ་སྟོན་པ་དང་། དྲན་པ་མེད་ཅིང་ཡིད་ལ་བྱེད་པ་མེད་པ་ནི་འཇམ་དཔལ་གྱི་དྲན་པ་ཉེ་བར་འཇོག་པ་ཡིན་ནོ། །དེ་ནས་འཇམ་དཔལ་གཞོན་ནུར་གྱུར་པས་དྲན་པ་ཉེ་བར་འཇོག་པ་ལ་གནས་པ་འདི་ལ་གནས་པ་ལས། ལྷའི་བུ་
བཞི་ཁྲི་ཉིས་སྟོང་འཇམ་དཔལ་གཞོན་ནུར་གྱུར་པ་དེ་ག་ལ་བ་དེར་སོང་སྟེ་ཕྱིན་ནས་འཇམ་དཔལ་གཞོན་ནུར་གྱུར་པའི་རྐང་པ་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་འཁོར་དེར་འོད་ཟེར་གྱི་རྒྱལ་མཚན་ཞེས་བྱ་བའི་ལྷའི་བུ་འོངས་ཏེ་འདུག་ནས་འཇམ་དཔལ་གཞོན་ནུར་གྱུར་

པ་ལ་འདི་སྐད་ཅེས་གསོལ་ཏོ། །འཇམ་དཔལ་ཁྱོད་གནས་པ་གང་ལ་གནས་ཏེ། ད་ལྟར་ལངས་པ་ལགས། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་བདག་ལ་གནས་པ་ཡོད་ན་ནི་བདག་གནས་པས་གནས་པར་བྱེད་ན། ལྷའི་བུ་ཆོས་ཐམས་ཅད་དབེན་པའི་
ཕྱིར་བདག་ལ་གནས་པ་མེད་མོད་ཀྱི། ལྷའི་བུ་ཁྱོད་གནས་པ་གང་ལ་གནས་ཏེ་ད་ལྟར་ལངས་པ་ཡིན་ཞེས་ཟེར་བ། བདག་ནི་དྲན་པ་ཉེ་བར་གཞག་པ་ལ་གནས་པས་གནས་ཏེ་ད་ལྟར་ལངས་པ་ཡིན་ནོ། །གསོལ་པ། འཇམ་དཔལ་དྲན་པ་ཉེ་བར་གཞག་པ་ལ་གནས་པ་ཇི་ལྟ་བུ་ཞིག་
ལགས། སྨྲས་པ། ཆོས་ཐམས་ཅད་དྲན་པ་མེད་ཡིད་ལ་བྱེད་པ་མེད་པའོ། །གསོལ་པ། འཇམ་དཔལ་གང་ན་དྲན་པ་མེད། ཡིད་ལ་བྱེད་པ་མེད་པ་དེར་གནས་ཏེ་ད་ལྟར་ལངས་པ་ལགས་སམ། འཇམ་དཔལ་གྱིས་སྨྲས་པ། གནས་པ་གང་ལ་གནས་ན་བྱིས་པ་ལྟ་བུ་སོ་སོའི་སྐྱེ་བོ་
ཐམས་ཅད་འདོད་ཆགས་དང་། ཞེ་སྡང་དང་། གཏི་མུག་རྒྱུ་བར་འགྱུར་བའི་གནས་པ་དེ་ལ་གནས་ཏེ་བདག་ད་ལྟར་ལངས་པ་ཡིན་ནོ། །ལྷའི་བུ་འོད་ཟེར་གྱི་རྒྱལ་མཚན་གྱིས་གསོལ་པ། འཇམ་དཔལ་གང་སངས་རྒྱས་ཀྱིས་མ་དམིགས་པའི་གནས་པ་དེ་ཇི་ལྟ་བུ་ལགས། སྨྲས་
པ། ལྷའི་བུ་སྟོང་པ་ཉིད་ལ་གནས་པ་ནི་སངས་རྒྱས་ཀྱིས་མ་དམིགས་པའོ། །མཚན་མ་མེད་པ་ལ་གནས་པ་དང་། སྨོན་པ་མེད་པ་ལ་གནས་པ་ནི་སངས་རྒྱས་ཀྱིས་མ་དམིགས་པའོ། །དེ་བས་ན་གནས་པ་དེ་ལ་གནས་ཏེ་ད་ལྟར་ལངས་པ་ཡིན་ནོ། །གསོལ་པ། དྲན་པ་
ཉེ་བར་གཞག་པ་ལ་གནས་པ་ཇི་ལྟ་བུ་ལགས། སྨྲས་པ། ལྷའི་བུ་གང་ན་དྲན་པ་མེད་ཡིད་ལ་བྱེད་པ་མེད་པ་དེ་ནི་གནས་པའི་དམ་པ་ཡིན་ཏེ། གང་གནས་པ་དེ་ལ་གནས་པ་དེ་དག་ནི་འདོད་པའི་ཁམས་སུ་མི་གནས། གཟུགས་ཀྱི་ཁམས་སུ་མི་གནས། གཟུགས་མེད་
པའི་ཁམས་སུ་མི་གནས་སོ། །གང་ཁམས་གསུམ་ལ་མི་གནས་པ་དེ་དག་ནི་མཉམ་པའི་གནས་པས་གནས་པའོ། །གང་མཉམ་པའི་གནས་པས་གནས་པ་དེ་དག་ལ་ནི་མི་མཉམ་པ་མེད་དོ། །གང་ལ་མི་མཉམ་པ་མེད་པ་དེ་དག་ནི་འགྲོ་བ་མེད་དོ། །གང་ལ་འགྲོ་བ་མེད་པ་

དེ་དག་ལ་ནི་མ་རིག་པ་མི་མཐོང་ངོ་། །གང་མ་རིག་པ་མི་མཐོང་བ་དེ་དག་ལ་ནི་རིག་པ་མ་སྐྱེས་སོ། །གང་རིག་པ་མ་སྐྱེས་པ་དེ་དག་ནི་མི་འབྱུང་ངོ་། །གང་མི་འབྱུང་བ་དེ་དག་ནི་འབྱུང་བར་མི་འགྱུར་རོ། །གང་འབྱུང་བར་མི་འགྱུར་བ་དེ་དག་ནི་འཇིག་པ་མེད་དོ། །གང་འཇིག་པ་མེད་པ་དེ་དག་
ནི་མི་འབྱུང་ངོ་། །གང་མ་བྱུང་བ་དེ་དག་ནི་དབྱེ་བར་མི་ནུས་སོ། །གང་དབྱེ་བར་མི་ནུས་པ་དེ་དག་ནི་ལྷའི་བུ་ཤིན་ཏུ་དག་པ་ཡིན་ཏེ། ལྷའི་བུ་དེ་ནི་འཕགས་པ་གནས་པ་རྡུལ་དང་བྲལ་བའོ། །གསོལ་པ། འཇམ་དཔལ་རྡུལ་ཅེས་བགྱི་བ་ལགས། སྨྲས་པ། ལྷའི་བུ་ཆུང་ངུ་ན་སངས་
རྒྱས་སུ་དམིགས་པའི་རྣམ་པར་ཤེས་པ་འབྱུང་བ་དེ་ནི་རྡུལ་ཏོ། །ལྷའི་བུ་མཚན་མ་ནི་རྡུལ་ཏོ། །འདུ་ཤེས་དང་། འཛིན་པ་དང་། ཆགས་པ་དང་། རློམ་སེམས་དང་། འདུད་པ་དང་། ཁེངས་པ་དང་། ཕྱག་འཚལ་བ་དང་། ཆགས་སེམས་དང་། ཁོང་ཁྲོ་བ་དང་། དམིགས་པ་དང་།
འགྲོ་བ་དང་། སྨོན་ལམ་དང་། རྟོག་པ་དང་། རྟོག་པའི་མཚན་མ་དང་། ཡོངས་སུ་རྟོག་པ་དང་། རྣམ་པར་རྟོག་པ་དང་། ཀུན་ཏུ་རྟོག་པ་དང་། ཡུལ་ཡིད་ལ་བྱེད་པ་དང་། ང་སློང་བར་བྱེད་པ་དང་། ཆད་པར་འཛིན་པ་དང་། རྟག་པར་འཛིན་པ་དང་། མེད་པར་འཛིན་པ་དང་། ལོག་
པར་འཛིན་པ་དང་། ཡོད་པར་འཛིན་པ་དང་། མེད་པར་འཛིན་པ་དང་། ལྷའི་བུ་ཇི་ཙམ་དུ་རྣམ་པར་རྟོག་ཅིང་སྤྲོས་པ་དང་། ཡིད་ལ་བྱེད་པ་དང་། སེམས་པ་དང་། སྒྲུན་པ་དེ་ཐམས་ཅད་ནི་འཕགས་པའི་ཆོས་འདུལ་བ་ལ་རྡུལ་དུ་བཤད་དོ། །དེ་ནས་འཇམ་དཔལ་གཞོན་ནུར་གྱུར་པ་
ལ་ལྷའི་བུ་འོད་ཟེར་གྱི་རྒྱལ་མཚན་གྱིས་ལེགས་སོ་ཞེས་བྱ་བ་བྱིན་ཏེ། འཇམ་དཔལ་ལེགས་ས་ལེགས་སོ། །ཡང་འཇམ་དཔལ་ཁྱོད་ཀྱིས་དྲན་པ་ཉེ་བར་གཞག་པ་ལ་གནས་པ་བཤད་པ་འདི་ལེགས་ས་ཞེས་སྨྲས་སོ། །འཇམ་དཔལ་གྱིས་སྨྲས་པ། ལྷའི་བུ་ཆོག་གིས་མ་རྟོག་
ཤིག །ཁྱོད་ནི་མ་སྐྱེས་པ་མ་བྱུང་བ་མ་བསྟན་པའི་ཆོས་ཀྱིས་ལེགས་པ་སྦྱིན་པར་བྱེད་དེ། ལྷའི་བུ་གང་དྲན་པ་ཉེ་བར་གཞག་པ་བརྟན་པ་འདི་ནི་བཤད་པའམ། བརྗོད་པར་མི་ནུས་སོ། །དེ་ཅིའི་ཕྱིར་ཞེ་ན། ཆོས་ཐམས་ཅད་བརྗོད་དུ་མེད་པའི་ཕྱིར་ཏེ། ཆོས་ཐམས་ཅད་ནི་བརྗོད་དུ་མེད་

པའོ། །དེ་ཅིའི་ཕྱིར་ཞེ་ན། དེ་ནི་བརྗོད་པ་གང་ཡང་མེད་པས་དེའི་ཕྱིར་དེ་དག་ནི་མི་བརྗོད་པའོ། །ལྷའི་བུ་འོད་ཟེར་གྱི་རྒྱལ་མཚན་གྱིས་གསོལ་པ། འཇམ་དཔལ་གནས་པ་གང་ལ་གནས་པ་བྱིས་པ་ལྟ་བུ་སོ་སོའི་སྐྱེ་བོ་ཐམས་ཅད་ཀྱི་འདོད་ཆགས་དང་། ཞེ་སྡང་དང་།
གཏི་མུག་རྣམས་རྒྱུ་བར་འགྱུར་བའི་གནས་པ་དེ་ལ་གནས་ཏེ་ལངས་སོ་ཞེས་དེ་སྐད་བཤད་པ་གང་ལ་གནས་ན་བྱིས་པ་ལྟ་བུ་སོ་སོའི་སྐྱེ་བོ་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་རྣམས་རྒྱུ་བར་འགྱུར་རོ། །འཇམ་དཔལ་གྱིས་སྨྲས་པ། ལྷའི་བུ་བྱིས་པ་ལྟ་བུ་སོ་སོའི་སྐྱེ་བོ་
ཐམས་ཅད་དངོས་པོ་མེད་པ་ལ་གནས་ན། འདོད་ཆགས་དང་། ཞེ་སྡང་དང་། གཏི་མུག་རྣམས་རྒྱུ་བར་འགྱུར་རོ། །ཆོས་ཀྱི་དབྱིངས་ལ་གནས་པ། ཡང་དག་པའི་མཐའ་ལ་གནས་པ། དེ་བཞིན་ཉིད་ལ་གནས་པའི་བྱིས་པ་ལྟ་བུ་སོ་སོའི་སྐྱེ་བོ་ཐམས་ཅད་ཀྱི་འདོད་ཆགས་དང་། ཞེ་སྡང་དང་།
གཏི་མུག་རྣམས་རྒྱུ་བར་འགྱུར་རོ། །དེ་ཅིའི་ཕྱིར་ཞེ་ན། ཆོས་གང་ཡང་ཆོས་ཀྱི་དབྱིངས་དང་། དེ་བཞིན་ཉིད་དང་། ཡང་དག་པའི་མཐའ་ལས་བྲལ་ཏེ་བཤད་མི་ནུས་སོ། །གསོལ་པ། འཇམ་དཔལ་ཡང་དག་པའི་མཐའ་ཞེས་བགྱི་བ་གང་གི་ཚིག་བླ་དགས་ལགས། སྨྲས་པ།
ལྷའི་བུ་ཡང་དག་པའི་མཐའ་ཞེས་བྱ་བ་ནི་སེམས་ཅན་གྱི་མཐའི་ཚིག་བླ་དགས་སོ། །གསོལ་པ། འཇམ་དཔལ་སེམས་ཅན་གྱི་མཐའ་ཞེས་བགྱི་བ་གང་གི་ཚིག་བླ་དགས་ལགས། བདག་གི་མཐའི་ཚིག་བླ་དགས་སོ། །གསོལ་པ། འཇམ་དཔལ་བདག་གི་མཐའ་ཞེས་
བགྱི་བ་གང་གི་ཚིག་བླ་དགས་ལགས། སྨྲས་པ། འཁོར་བའི་མཐའི་ཚིག་བླ་དགས་སོ། །གསོལ་པ། འཇམ་དཔལ་འཁོར་བའི་མཐའ་ཞེས་བགྱི་བ་གང་གི་ཚིག་བླ་དགས་ལགས། སྨྲས་པ། ནམ་མཁའི་ཚིག་བླ་དགས་ཡིན་ནོ། །ལྷའི་བུ་འདི་ལྟ་སྟེ། དཔེར་ན་ནམ་མཁའི་
དབྱིངས་ལ་ནི་མཐའ་མ་མེད། ཆད་པ་མེད། རིང་བ་མེད། ཐུང་བ་མེད། ཟླུམ་པ་མེད། གྲུ་བཞི་མེད། ཕྲ་བ་མེད། སྦོམ་པ་མེད། ལེབ་ལེབ་པོ་མེད། དཀར་པོ་མེད། ནག་པོ་མེད། དམར་པོ་མེད་དེ། གཞན་དུ་ན་ནམ་མཁའ་ནམ་མཁའ་ཞེས་མིང་ཙམ་དུ་གྲངས་སུ་འགྲོ་སྟེ་མིང་

དེ་ཡང་གསོབ་ཡིན་ནོ། །ལྷའི་བུ་དེ་བཞིན་དུ་ཆོས་ཐམས་ཅད་ནི་ནམ་མཁའི་མཐའ་ནམ་མཁའི་འགྲོས། ནམ་མཁའི་མིང་གི་རང་བཞིན་ནོ། །ལྷའི་བུ་འདི་ལྟ་སྟེ། དཔེར་ན་ནམ་མཁའ་ནི་མི་སྐྱེ། མི་རྒ། མི་འཆི། མི་འབྱུང་། ཉོན་མི་མོངས། རྣམ་པར་མི་དཀར། ཆགས་པ་མེད། ཞེ་
སྡང་བ་མེད། བཀུར་བ་མེད། མི་བཀུར་བའང་མེད་དེ། དེའི་མཐས་ནི་མི་བགྲང་བའི་ཚུལ་གྱིས་ཆོས་ཐམས་ཅད་བགྲང་བར་བྱའོ། །ལྷའི་བུ་གདགས་སུ་མེད་པའི་ཕྱིར་ཆོས་ཐམས་ཅད་ནི་འདུ་བ་དང་འབྲལ་བར་བསྟན་ཅིང་གཞག་མི་ནུས་སོ། །ལྷའི་བུ་ཆོས་ཐམས་ཅད་ནི་མ་བརྟགས་པ་
མ་བཏུལ་བ། དམ་པ་མ་ཡིན་པ་སྟེ། ལྷའི་བུ་འདི་ནི་ཆོས་ཐམས་ཅད་ཀྱི་མཉམ་པ་ཉིད། མི་མཉམ་པ་མ་ཡིན་པ། དེ་བཞིན་ཉིད་ཕྱིན་ཅི་མ་ལོག་པ་དེ་བཞིན་ཉིད་དོ། །སྟོན་པ་འདི་བསྟན་པའི་ཚེ་ལྷའི་བུ་དེ་དག་ཐམས་ཅད་མི་སྐྱེ་བའི་ཆོས་ལ་བཟོད་པ་སྐྱེས་སོ། །དེ་དག་མི་སྐྱེ་བའི་
ཆོས་ལ་བཟོད་པ་ཐོབ་ནས་ཆོས་ལ་གུས་པས་འཇམ་དཔལ་གཞོན་ནུར་གྱུར་པ་ལ་ལྷའི་མེ་ཏོག་མན་ད་རས་གཏོར་ཏོ། །མེ་ཏོག་དེ་དག་གཏོར་མ་ཐག་ཏུ་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་སྟེང་གི་བར་སྣང་ལ་གནས་མེད་ཅིང་ཡོངས་སུ་མ་བཙུད་བཞིན་དུ་འདུག་པར་གྱུར་
ཏོ། །དེ་ནས་འཇམ་དཔལ་གཞོན་ནུར་གྱུར་པས་ལྷའི་བུ་འོད་ཟེར་གྱི་རྒྱལ་མཚན་ལ་འདི་སྐད་ཅེས་སྨྲས་སོ། །ལྷའི་བུ་དེ་ཇི་སྙམ་དུ་སེམས། མེ་ཏོག་འདི་དག་གང་ལ་གནས། གསོལ་པ། འཇམ་དཔལ་མེ་ཏོག་འདི་དག་ནི་གནས་པ་མ་ལགས་སོ། །སྨྲས་པ། ལྷའི་བུ་དེ་བཞིན་དུ་
ཆོས་ཐམས་ཅད་ཀྱང་མི་གནས་པ་སྟེ། མི་གནས་པར་ནམ་མཁའ་ལ་གནས་ཤིང་ནམ་མཁའ་ལས་ཀྱང་མི་འཕག །མི་ལྟུང་། མི་གཡོ། རབ་ཏུ་མི་གཡོ། མི་འབུགས་རབ་ཏུ་མི་འབུགས་སོ། །དེ་ཅིའི་ཕྱིར་ཞེ་ན། ཆོས་དེ་དག་ཐམས་ཅད་ནི་ནམ་མཁའ་དང་མཚུངས་པས་དེའི་ཕྱིར་དེ་དག་
མི་གཡོ་རབ་ཏུ་མི་གཡོ། མི་འབུགས་རབ་ཏུ་མི་འབུགས་སོ། །དེ་ནས་འཇམ་དཔལ་གཞོན་ནུར་གྱུར་པ་ལ་ལྷའི་བུ་འོད་ཟེར་གྱི་རྒྱལ་མཚན་གྱིས་འདི་སྐད་ཅེས་གསོལ་ཏོ། །འཇམ་དཔལ་ཁྱོད་ཀྱིས་རྫུ་འཕྲུལ་གྱི་མཐུ་ཆོ་འཕྲུལ་ཐོབ་སྟེ། ཁྱོད་སེམས་སྐྱེད་པ་གཅིག་གིས་

ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་འགྲོ་ཞིང་འོང་བ་ངོ་མཚར་ཏོ། །འཇམ་དཔལ་གྱིས་སྨྲས་པ། ལྷའི་བུ་བདག་ནི་རྫུ་འཕྲུལ་གྱི་མཐུ་ཆོ་འཕྲུལ་ཐོབ་པ་ཡང་མ་ཡིན། །སངས་རྒྱས་བཅོམ་ལྡན་འདས་རྣམས་ཀྱི་ཉན་ཐོས་
ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་མ་གཏོགས་ཤིང་ཟད་པ་མེད་པའི་ཕྱིར་རོ། །ལྷའི་བུ་བྱིས་པ་ལྟ་བུ་སོ་སོའི་སྐྱེ་བོ་ཐམས་ཅད་ནི་རྫུ་འཕྲུལ་གྱི་མཐུའི་ཆོ་འཕྲུལ་ཐོབ་པའོ། །དེ་ཅིའི་ཕྱིར་ཞེ་ན། དེ་ལྟར་ལྷའི་བུ་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་
ཐམས་ཅད་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་ཀྱིས་བསྐལ་པ་གྲངས་མེད་པར་བཙལ་ཀྱང་ཆོས་གང་ཡང་ཐོབ་པར་མ་གྱུར། མ་ཐོབ་མི་འཐོབ་བོ། །བྱིས་པ་ལྟ་བུ་སོ་སོའི་སྐྱེ་བོ་ཐམས་ཅད་ཀྱིས་ནི་ཐོབ་བོ། །ཅི་ཐོབ་ཅེ་ན། བདག་ཐོབ་བོ། །སེམས་ཅན་
དང་། སྲོག་དང་། སྐྱེ་བ་པོ་དང་། གསོ་བ་པོ་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་དང་། ཆད་པ་དང་། རྟག་པ་དང་། འདོད་ཆགས་དང་། ཞེ་སྡང་དང་། གཏི་མུག་ཐོབ་བོ། །གང་སངས་རྒྱས་རྣམས་ཀྱིས་ཆོས་མ་ཐོབ་པ་མ་བསྐྱེད་པ་དེ་སྐྱེད་པར་བྱེད་པས་
ན། ལྷའི་བུ་དེའི་ཕྱིར་བྱིས་པ་ལྟ་བུ་སོ་སོའི་སྐྱེ་བོ་རྣམས་ནི་རྫུ་འཕྲུལ་གྱི་མཐུ་ཐོབ་པ་ཡིན་གྱི་སངས་རྒྱས་རྣམས་མ་ཡིན། བྱང་ཆུབ་སེམས་དཔའ་རྣམས་མ་ཡིན། རང་སངས་རྒྱས་རྣམས་མ་ཡིན། ཉན་ཐོས་རྣམས་མ་ཡིན་ནོ། །དེ་ནས་སངས་རྒྱས་བཅོམ་ལྡན་འདས་དེ་དག་
སངས་རྒྱས་བགྲོ་བའི་ཆོས་ཀྱི་རྣམ་གྲངས་རྒྱ་ཆེར་བཤད་ནས་བདག་བདག་གི་སངས་རྒྱས་ཀྱི་ཞིང་དུ་གཤེགས་སོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་འདི་སྙམ་དུ་དགོངས་ཏེ། གང་བདག་གིས་འཇམ་དཔལ་གཞོན་ནུར་གྱུར་པ་སངས་རྒྱས་ཀྱི་ཞིང་འདིར་འོང་
བར་ལྟས་ཤིག་བྱའོ་སྙམ་མོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་བྱིན་གྱི་རླབས་སྔ་མ་དེ་བཏང་སྟེ། ཕྱག་གཡས་པའི་མཐིལ་ནས་འོད་ཟེར་གསེར་གྱི་ཁ་དོག་ལྟ་བུ་ཕྱུང་སྟེ། འོད་དེ་ཅི་ནས་ཀྱང་འཇམ་དཔལ་གཞོན་ནུར་གྱུར་པའི་ལུས་ལ་ཕོག་ནས་

ལན་བདུན་བསྐོར་ཏེ། འཇམ་དཔལ་གྱི་སྤྱི་བོར་ནུབ་པར་འགྱུར་བ་དེ་ལྟར་བྱིན་གྱིས་བརླབས་སོ། །དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་གྱུར་ཏེ། ཅིའི་རྒྱུ་ཅིའི་རྐྱེན་གྱིས་ན་འདི་ལྟ་བུའི་སྣང་བ་བསམ་གྱིས་མི་ཁྱབ་པ་བདག་གི་ལུས་ལ་ཕོག་ནས་སྤྱི་བོར་མི་སྣང་བར་གྱུར་སྙམ་པ་ལས།
ཡང་དེ་འདི་སྙམ་དུ་གྱུར་ཏེ། དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་བདག་གཟིགས་པར་བཞེད་དོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་ལྷའི་བུ་འོད་ཟེར་གྱི་རྒྱལ་མཚན་ལ་འདི་སྐད་ཅེས་སྨྲས་སོ། །ལྷའི་བུ་དག་ཚུར་ཤེག །བཅོམ་ལྡན་འདས་དེ་བཞིན་
གཤེགས་པ་འཇུག་སྲེད་ཀྱི་རྒྱལ་པོའི་སངས་རྒྱས་ཀྱི་ཞིང་དུ་དེ་བཞིན་གཤེགས་པ་དེ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཀུན་དུ་ཞུ་བའི་ཕྱིར་འདོང་ངོ་། །ཟབ་མོ་ཟབ་པའི་ཕྱིར་ཆོས་ཀྱི་སྒོ་སྒྲུབ་པ་དག་ཀྱང་དེ་ནས་འཆད་ཀྱིས་དེ་དག་ཀྱང་མཉན་པར་
བྱའོ། །དེ་ནས་འཇམ་དཔལ་གཞོན་ནུར་གྱུར་པ་ལ་ལྷའི་བུ་འོད་ཟེར་གྱི་རྒྱལ་མཚན་གྱིས་འདི་སྐད་ཅེས་གསོལ་ཏོ། །འཇམ་དཔལ་དེའི་དུས་ལ་བབ་པར་མཁྱེན་ན་བཞུད་དོ། །དེ་ནས་འཇམ་དཔལ་གཞོན་ནུར་གྱུར་པས་སེམས་བསྐྱེད་པ་གཅིག་གིས་རི་ཁོར་ཡུག་གི་རྩེ་མོ་
དེ་ནས་ལྷའི་བུ་དེ་དག་དང་བཅས་ཏེ་མི་སྣང་བར་གྱུར་ནས། བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་སྤྱན་སྔར་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་ཞབས་ལ་འཇམ་དཔལ་གཞོན་ནུར་གྱུར་པས་
མགོ་བོས་ཕྱག་འཚལ་ཏེ་ལན་གསུམ་བསྐོར་ནས་ཕྱོགས་གཅིག་ཏུ་འཁོད་དོ། །ལྷའི་བུ་དེ་དག་གིས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇུག་སྲེད་ཀྱི་རྒྱལ་པོའི་ཞབས་ལ་མགོ་བོས་ཕྱག་འཚལ་ནས་
ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་དང་། རིགས་ཀྱི་བུ་མོས་ལེགས་པར་དགེ་བའི་རྩ་བ་བསྐྱེད་

པར་བགྱིའོ། །ཟབ་མོ་ལ་བཟོད་པ་ལ་ཡང་ཐེ་ཚོམ་མ་མཆིས་པར་བགྱིའོ། །དེས་བདག་ཀྱང་སྣོད་དུ་གྱུར་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ལྟར་གླང་པོ་ཆེན་པོ་དག་གི་ནང་ནས་བདག་སླད་རོལ་དུ་བྱུང་བར་གྱུར་ཏོ། །ཆོས་བཤད་
པ་དེ་འདྲ་བ་ལས་ཀྱང་སླད་རོལ་དུ་བྱུང་བར་གྱུར་ཏོ། །བཅོམ་ལྡན་འདས་སྲིང་མོ་ཐེ་ཚོམ་སེལ་བ་འདི་ནི་སའི་ཕྱོགས་འདི་ལས་གང་དུ་ཡང་མ་གཡོས། གང་དུ་ཡང་མ་འཕངས་པར་གྱུར་ཏོ། །བདག་གིས་མངོན་པར་འཚལ་བ་སྔ་དྲོ་གཅིག་གིས་ཤར་ཕྱོགས་སུ་སངས་རྒྱས་ཀྱི་ཞིང་
གང་གཱའི་ཀླུང་གི་བྱེ་མ་སྙེད་གྲངས་མེད་པར་མཆི་ཞིང་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་བ་དང་། གང་དེ་དག་གི་ཆོས་བཤད་པ་དེ་ཡང་འཛིན་ཅིང་སངས་རྒྱས་བཅོམ་ལྡན་འདས་དེ་དག་ལ་ཡོངས་སུ་ཞུ། ཡོངས་སུ་གསོལ་བར་བགྱིད་ཅིང་། དེ་བཞིན་
གཤེགས་པ་དེ་དག་ཀྱང་བདག་ལ་ཞུས་པའི་ལུང་སྟོན་པར་མཛད་དེ། བཅོམ་ལྡན་འདས་བདག་ནི་ཆོས་བཤད་པ་གང་དུ་ཡང་བསྐྲད་པའམ། འཇིག་རྟེན་གྱི་ཁམས་གཞན་དུ་འཕངས་པར་མ་འཚལ་ཏེ། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་བདག་གི་
བསམ་པ་མཁྱེན་ནས་བདག་ཉིད་ལ་ཆོས་འཆད་པར་བསྒོའོ། །བཅོམ་ལྡན་འདས་བདག་རི་ཁོར་ཡུག་གི་རྩེ་མོ་དེ་ལ་མཆིས་པའི་ཚེ་ན་ཆོས་ལ་འཚལ་བ་དང་། ཆོས་ལ་སྐོམ་པ་དང་། ཆོས་ལ་བཀུར་སྟི་བགྱིད་པ་དང་། དེ་བཞིན་གཤེགས་པ་ཡང་ཆེར་འཚལ་བར་
གྱུར་ཏོ། །ཡང་བདག་འདི་སྙམ་དུ་གྱུར་ཏེ། ཅིའི་རྒྱུ་ཅིའི་རྐྱེན་གྱིས་ན། བདག་འཁོར་དེ་ནས་རི་ཁོར་ཡུག་གི་རྩེ་མོ་འདིར་འཕངས་ཤིང་སྲིང་མོ་ཐེ་ཚོམ་སེལ་བ་འདི་ནི་མ་འཕངས་པར་གྱུར་སྙམ་པ་ལས་བཅོམ་ལྡན་འདས་ཡང་བདག་འདི་སྙམ་དུ་གྱུར་ཏེ། དེ་བཞིན་
གཤེགས་པ་ནི་ཆོས་རྣམས་ལ་སློབ་དཔོན་གྱིས་འཆབ་པ་ཡང་མི་མཛད། ཆགས་པའི་སེམས་ཀྱང་མ་མཆིས་ན་དེ་ལ་བདག་ཉིད་ཁོ་རུ་ཆུང་ངུ་བས་སམ། ཡང་ན་ཆོས་བཤད་པ་འདི་ལ་བདག་སྣོད་དུ་མ་གྱུར་པ་ལྟ་སྟེ། དེའི་སླད་དུ་བདག་དེར་འཕངས་སོ་སྙམ་བགྱིད་

དོ། །དེ་ནི་བདག་དེ་བཞིན་གཤེགས་པ་ལ་ཞུ་ན་ཅིའི་སླད་དུ་བདག་འཁོར་འདི་ནས་རི་ཁོར་ཡུག་གི་རྩེ་མོར་འཕངས་ལ། སྲིང་མོ་འདི་མ་འཕངས་པར་གྱུར་ཅེས་དེ་སྐད་གསོལ་པ་དང་། དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་
བཀའ་སྩལ་ཏོ། །འཇམ་དཔལ་སངས་རྒྱས་བཅོམ་ལྡན་འདས་རྣམས་ཀྱི་ཆོས་བཤད་པ་གང་དུ་ཡང་ཁྱོད་སྣོད་དུ་མ་གྱུར་པ་དེ་ནི་འགའ་ཡང་མེད་མོད་ཀྱི། འཇམ་དཔལ་སངས་རྒྱས་བཅོམ་ལྡན་འདས་རྣམས་ནི་མཉེས་པར་དཀའ་སྟེ། དུས་ཐམས་ཅད་དུ་ཕ་རོལ་གྱིས་ཆོས་སྤྱོད་པ་
ལ་ལན་གདབ་པར་མི་ནུས་ཏེ། འཇམ་དཔལ་ཁྱོད་ཐོག་མ་ཁོ་ནར་འཇིག་རྟེན་གྱི་ཁམས་མི་མཇེད་པ་ནས་འབྱུང་བའི་ཚེ་འདི་སྙམ་དུ་གྱུར་ཏེ། དེ་རིང་ཀུན་དུ་འོད་ཀྱི་འཇིག་རྟེན་གྱི་ཁམས་སུ་སངས་རྒྱས་བཅོམ་ལྡན་འདས་རྣམས་སངས་རྒྱས་བགྲོ་བ་ཞེས་བྱ་བའི་ཆོས་ཀྱི་རྣམ་གྲངས་འཆད་
ཀྱིས། བདག་ནི་དེར་སངས་རྒྱས་བཅོམ་ལྡན་འདས་རྣམས་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་བསྟན་པ་དེ་དག་མཉན་པའི་ཕྱིར་འགྲོའོ་སྙམ་དུ་གྱུར་ཏོ། །འཇམ་དཔལ་ཁྱོད་ནི་སྤོབས་པ་ཆེན་པོ་དང་། དམིགས་པ་ཆེན་པོ་དང་། རྟོག་པ་
ཆེན་པོ་དང་། ཡོངས་སུ་རྟོག་པ་ཆེན་པོས་སངས་རྒྱས་ཀྱི་ཞིང་དེ་ནས་སོང་སྟེ་སངས་རྒྱས་རྣམས་བལྟའོ། །ཆོས་ཀྱང་མཉན་དུ་འགྲོའོ་སྙམ་དུ་སེམས་ཏེ། འཇམ་དཔལ་ཁྱོད་ནི་ཆགས་པ་གསུམ་གྱིས་ཆགས་ཤིང་སངས་རྒྱས་ཀྱི་ཞིང་དེ་ནས་སངས་རྒྱས་ཀྱི་ཞིང་
འདིར་འོངས་སོ། །གསུམ་གང་ཞེ་ན། བདག་ཏུ་དམིགས་པ་དང་། སངས་རྒྱས་སུ་དམིགས་པ་དང་། ཆོས་སུ་དམིགས་པའོ། །འཇམ་དཔལ་བྱང་ཆུབ་སེམས་དཔའ་དམིགས་པ་ལ་སྤྱོད་ན་མ་ཆགས་པ་ཐོབ་པར་འགྱུར་བ་མེད་དོ། །འཇམ་དཔལ་དེ་ཇི་སྙམ་དུ་སེམས།
དེ་བཞིན་གཤེགས་པ་ལ་སུས་ཀྱང་ཤེས་པ་འམ། མཐོང་བའམ། དེ་བཞིན་གཤེགས་པ་ལས་གཞན་པའི་ཆོས་གང་ཡང་མཐོང་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་རྣམས་ཀྱི་ཆོས་ཉིད་དེ་ལ་ནི་དེ་བཞིན་གཤེགས་པ་ལ་ཡང་

བལྟ་བར་མི་བགྱི། ཆོས་ལ་མ་ལགས། སེམས་ཅན་ལ་མ་ལགས་སོ། །བཅོམ་ལྡན་འདས་གལ་ཏེ་སེམས་ཅན་ཡོངས་སུ་གྲུབ་པར་གྱུར་ཏམ། དེ་བཞིན་གཤེགས་པ་འབྱུང་བར་གྱུར་ཏམ། དེ་བཞིན་གཤེགས་པ་གཟུགས་ཀྱི་སྐུ་ལ་བལྟ་བར་བགྱི་ན་ནི་དེ་བཞིན་
གཤེགས་པ་ཡང་བལྟ་བར་ནུས། དེ་བཞིན་གཤེགས་པས་གཞན་ཡང་གཟིགས་པར་འགྱུར་ན་བཅོམ་ལྡན་འདས་གང་གི་སླད་དུ། ཆོས་ཐམས་ཅད་མ་སྐྱེས་པས་དེའི་སླད་དུ། གང་དེ་བཞིན་གཤེགས་པར་བལྟ་བ་དེ་ལ་མ་མཆིས་སོ། །དེ་བཞིན་གཤེགས་པས་ཀྱང་ཆུང་ཟད་
ཀྱང་གཟིགས་པ་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་མཐོང་བར་བགྱིད་པ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་མིག་དང་རྣ་བ་གང་དང་ལྡན་ན་དེ་བཞིན་གཤེགས་པའི་སྐུ་མཐོང་བ་དང་། དེ་བཞིན་
གཤེགས་པས་བསྟན་པའི་ཆོས་འདུལ་བ་ཐོས་པར་འདོད་པའི་མིག་དང་རྣ་བ་ཆུང་ཟད་ཀྱང་ཡོད་དམ། དེ་ནས་འཇམ་དཔལ་གཞོན་ནུར་གྱུར་པ་ཅང་མི་སྨྲ་བར་གྱུར་ཏོ། །དེ་ནས་བྱང་ཆུབ་སེམས་དཔའི་འཁོར་དེ་ན་བྱང་ཆུབ་སེམས་དཔའ་ཁ་ཅིག་འདི་སྙམ་དུ་གྱུར་ཏེ། འཇམ་དཔལ་
གཞོན་ནུར་གྱུར་པ་འདི་ནི་དེ་བཞིན་གཤེགས་པས་རྨ་བ་རྨས་ན་ཅང་མི་ཟེར་བར་གྱུར་པས་དེ་བཞིན་གཤེགས་པས་རྨས་པའི་ལན་འདེབས་མ་ནུས་སོ་སྙམ་མོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་སེམས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་
རྟོག་པ་ཡོངས་སུ་མཁྱེན་ནས་བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་དེ་ལྟར་མ་སེམས་ཤིག །ཁྱོད་འཇམ་དཔལ་གཞོན་ནུར་གྱུར་པ་ལ་བརྙས་པའི་འདུ་ཤེས་མ་སྐྱེད་ཅིག །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་ནི་ཟབ་
མོ་བཟོད་པ་དང་ལྡན་པ་ཡིན་ཏེ། གང་དེ་བཞིན་གཤེགས་པས་རྨ་བ་རྨས་པ་དེའང་འཇམ་དཔལ་གཞོན་ནུར་གྱུར་པས་ལན་ཐེབས་པ་ཡིན་ནོ། །བྱང་ཆུབ་སེམས་དཔའ་དེ་དག་གིས་གསོལ་པ། བཅོམ་ལྡན་འདས་རིགས་པ་གང་དང་ཚུལ་གང་གིས་ན་རྨས་པའི་ལན་ཐེབས་པ་

ལགས། བཀའ་སྩལ་པ། འདི་ལ་རིགས་ཀྱི་བུ་དག་འཇམ་དཔལ་ནི་འདི་སྙམ་དུ་སེམས་ཏེ། གལ་ཏེ་བདག་གིས་བདག་ལ་མིག་མཆིས་སོ། །བདག་ལ་རྣ་བ་མཆིས་སོ་ཞེས་བཤད་ན་ནི་རྟག་པར་ལྟ་བར་འགྱུར། གལ་ཏེ་བདག་ལ་མིག་མ་མཆིས་སོ། །རྣ་བ་མ་མཆིས་
ས་ཞེས་བཤད་ན་ནི་ཆད་པར་ལྟ་བར་འགྱུར་ཏེ། རྟག་པ་དང་ཆད་པར་སྤྱོད་པས་ཆོས་ཉིད་ཤེས་པར་མི་འགྱུར་ཏེ། ཆོས་ཉིད་གང་ཡིན་པ་དེ་ལ་ནི་ཆད་པ་ཡང་མེད་རྟག་པ་ཡང་མེད་དོ། །གང་ན་ཆད་པ་ཡང་མེད་རྟག་པ་ཡང་མེད་པ་དེ་ནི་མི་སྐྱེ་བའོ། །གང་མི་སྐྱེ་བ་དེ་ནི་བརྗོད་
དུ་མེད་པའོ་ཞེས་དེ་ལྟར་སེམས་ཤིང་འཇམ་དཔལ་གཞོན་ནུར་གྱུར་པས་རྨས་པའི་ལན་བཏབ་པ་འདི་ཡིན་ནོ། །སྟོན་པ་འདི་བསྟན་པའི་ཚེ་བྱང་ཆུབ་སེམས་དཔའ་དྲུག་བརྒྱ་མི་སྐྱེ་བའི་ཆོས་ལ་བཟོད་པ་སྐྱེས་སོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་རྒྱུ་འདི་དང་རྐྱེན་འདི་ཡིན་ཏེ་དེའི་ཕྱིར་ཁྱོད་རི་ཁོར་ཡུག་གི་རྩེ་མོར་འཕངས་སོ། །འཇམ་དཔལ་གང་ཡང་ཅིའི་སླད་དུ་ཞེ་ན། སྲིང་མོ་ཐེ་ཚོམ་སེལ་བ་འདི་མ་འཕངས་པར་གྱུར་ཅེས་ཁྱོད་དེ་
སྐད་ཟེར་བ་ནི་འཇམ་དཔལ་སྲིང་མོ་འདི་ཟླ་བའི་འོད་ཀུན་དུ་དྲི་མ་མེད་པར་སྣང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་སྟེ། དེ་ནི་སངས་རྒྱས་དག་འདིར་གཤེགས་སམ་མ་གཤེགས་ཞེའམ། ཆོས་འཆད་དམ་མི་འཆད་ཅིག་སྙམ་དུ་མི་སེམས་ཏེ་འདི་ལ་ནི་སངས་
རྒྱས་སུ་འདུ་ཤེས་མེད། ཆོས་སུ་འདུ་ཤེས་མེད། དགེ་འདུན་དུ་འདུ་ཤེས་མེད། བདག་ཏུ་འདུ་ཤེས་མེད། གཞན་དུ་འདུ་ཤེས་མེད་དེ། འཇམ་དཔལ་སྲིང་མོ་དེ་ནི་འདུ་ཤེས་དང་ཡིད་ལ་བྱེད་པ་ཐམས་ཅད་དང་བྲལ་བའོ། །དེ་ནི་ཏིང་ངེ་འཛིན་དེ་ལ་གནས་ནས་ཕྱོགས་
བཅུའི་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་རྣམས་ཀྱི་ཆོས་ཉན་ཏོ། །འཛིན་ཏོ། །ཐོས་ནས་ཀྱང་གཞན་ལ་སྟོན་པར་བྱེད་མོད་ཀྱི། འཇམ་དཔལ་སྲིང་མོ་འདི་ནི་ཞིང་ལ་ཞིང་དུ་འདུ་ཤེས་པ་མེད་དོ། །སངས་རྒྱས་ལ་སངས་རྒྱས་སུ་འདུ་ཤེས་པ་མེད།

ཆོས་ལ་ཆོས་སུ་འདུ་ཤེས་པ་མེད། དགེ་འདུན་ལ་དགེ་འདུན་དུ་འདུ་ཤེས་པ་མེད། བདག་ལ་བདག་ཏུ་འདུ་ཤེས་པ་མེད། གཞན་ལ་གཞན་དུ་འདུ་ཤེས་པ་མེད་དེ། འཇམ་དཔལ་འདི་ལྟ་སྟེ། དཔེར་ན་ཟླ་བའི་དཀྱིལ་འཁོར་ནི་གཞལ་མེད་ཁང་ལས་ཀྱང་མི་
གཡོ་ལ་ཀུན་དུ་ཡང་སྣང་བར་བྱེད་དེ། ཐམས་ཅད་དུ་ཡང་བསྟན་མོད་ཀྱི། ཟླ་བའི་དཀྱིལ་འཁོར་ནི་གང་ལ་ཡང་ཉེ་བར་མི་བྱེད། འདི་ལ་འོད་སྣང་བར་བྱའོ། །འདི་ལ་འོད་མི་སྣང་བར་བྱའོ་ཞེས་རྟོག་པ་ཡང་མེད་དོ། །འཇམ་དཔལ་དེ་བཞིན་དུ་སྲིང་མོ་དེ་ཏིང་ངེ་འཛིན་འདི་ལ་གནས་ན་
འཇིག་རྟེན་གྱི་ཁམས་མཐའ་ཡས་མུ་མེད་པར་སེམས་ཅན་དཔག་ཏུ་མེད་པ་རྣམས་ལ་སྣང་བར་བྱེད། སངས་རྒྱས་ཀྱི་ཞིང་དཔག་ཏུ་མེད་པར་སྟོན་པར་བྱེད། རྣམ་པར་རྟོག་པ་མེད། སེམས་ཅན་ཐམས་ཅད་ལ་སེམས་མཉམ་པར་བྱེད་ཅིང་སེམས་ཅན་ཐམས་ཅད་ལ་ཆོས་སྟོན་ཏོ། །
འཇམ་དཔལ་ངས་ནི་བསྐལ་པའམ། བསྐལ་པའི་ལྷག་མ་ལུས་ཀྱི་བར་དུ་སྲིང་མོ་འདིའི་ཡོན་ཏན་བརྗོད་ཀྱང་ཡོན་ཏན་ཟད་པར་མི་འགྱུར་ཏེ། འཇམ་དཔལ་དེ་ལྟར་སྲིང་མོ་འདི་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །འཇམ་དཔལ་གྱིས་གསོལ་པ། བཅོམ་ལྡན་
འདས་སངས་རྒྱས་ཀྱི་ཞིང་འདི་ན་གང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དག་མཆིས་ན་ཅི་ལགས། སངས་རྒྱས་བཅོམ་ལྡན་འདས་དེ་དག་ཚོགས་པའི་ཚེ་བྱང་ཆུབ་སེམས་དཔའ་དེ་དག་ཀྱང་བདག་བཞིན་དུ་འཇིག་རྟེན་གྱི་ཁམས་གཞན་དུ་འཕངས་པར་གྱུར་ཏམ།
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་སྐད་མ་ཟེར་ཅིག །དེ་བཞིན་གཤེགས་པའི་ཡེ་ཤེས་ལ་མ་རྟོག་ཤིག །དེ་བཞིན་གཤེགས་པས་རྣམ་པར་སྤྲུལ་པ་ལ་མ་རྟོག་ཤིག །དེ་བཞིན་གཤེགས་པའི་བྱིན་གྱི་རླབས་ལ་མ་རྟོག་ཤིག །དེ་ཅིའི་ཕྱིར་ཞེ་ན། འཇམ་
དཔལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ནི་སངས་རྒྱས་བཅོམ་ལྡན་འདས་རྣམས་ཚོགས་པས་འདི་ལྟ་སྟེ། དཔེར་ན་བུ་རམ་ཤིང་གི་ཚལ་ལམ། འདམ་བུའི་ཚལ་ལམ། སྨྱིག་མའི་ཚལ་བཞིན་དུ་དེ་འདྲ་བར་མང་བའི་དེ་བཞིན་གཤེགས་པ་རྣམས་ཀྱིས་

ཡོངས་སུ་ཁྱབ་པར་གྱུར་ཀྱང་། གང་སངས་རྒྱས་ཀྱི་ཞིང་འདི་ན་བྱང་ཆུབ་སེམས་དཔའ་དག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། མི་དང་མི་མ་ཡིན་པ་གནས་པ་དེ་དག་ཐམས་ཅད་ཀྱིས་ཀྱང་ཐམས་ཅད་དུ་ཐམས་ཅད་དེ་བཞིན་གཤེགས་པ་གཞན་ཅིག་ཀྱང་
མ་མཐོང་སྟེ་ང་གཅིག་པུ་གཉིས་སུ་མེད་པར་མཐོང་ངོ་། །དེ་དག་གི་ཆོས་བཤད་པ་ཡང་མ་ཐོས་ཏེ་ང་གཅིག་པུའི་ཐོས་སོ། །འཇམ་དཔལ་དེ་བཞིན་གཤེགས་པའི་བྱིན་གྱི་རླབས་དང་། དེ་བཞིན་གཤེགས་པའི་ཆོ་འཕྲུལ་དང་། དེ་བཞིན་གཤེགས་པའི་རྣམ་པར་འཕྲུལ་པ་དང་།
དེ་བཞིན་གཤེགས་པའི་སྐུ་ཕྲ་བ་ལ་ལྟོས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་བཞིན་གཤེགས་པའི་སྐུས་ཡོངས་སུ་གང་ཡང་། བྱང་ཆུབ་སེམས་དཔའ་དེ་དག་གི་ལྷའི་མིག་གིས་ཀྱང་དེ་བཞིན་གཤེགས་པ་གཅིག་ཀྱང་མ་མཐོང་ན་སེམས་ཅན་གཞན་གྱིས་མཐོང་
བར་འགྱུར་བ་ལྟ་ཅི་སྨོས་ཏེ་དེ་ནི་གནས་མེད་དོ། །འཇམ་དཔལ་བྱང་ཆུབ་སེམས་དཔའ་དེ་དག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། མི་དང་མི་མ་ཡིན་པ་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གནས་ཤིང་རྒྱུ་བ་དང་། འཆག་པ་དང་།
འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དག་ཇི་ལྟར་སེམས་པ་བཞིན་དུ་སྤྱོད་པ་དེ་དག་ལ་དེ་བཞིན་གཤེགས་པའི་སྐུ་དེ་ལྟར་མང་བ་སྒྲིབ་པར་མི་བྱེད། ཐོགས་པར་མི་བྱེད་པ་ལ་ལྟོས། འཇམ་དཔལ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། དེ་བཞིན་
གཤེགས་པ་ནི་ཆོས་ཀྱི་སྐུ་ཡིན་གྱི་གཟུགས་ཡོངས་སུ་གྲུབ་པའི་སྐུ་མ་ཡིན་ནོ། །འཇམ་དཔལ་དེ་བཞིན་གཤེགས་པའི་སྐུ་ནི་ཟག་པ་མེད་པ་སྟེ། ནམ་མཁའ་དང་འདྲ་བ། མ་སྐྱེས་པ། མ་བྱུང་བ། མ་མཐོང་བ། མ་ཐོས་པ། རྣམ་པར་མ་ཤེས་པའོ། །འཇམ་དཔལ་འདི་ལྟ་སྟེ།
དཔེར་ན་ནམ་མཁའ་ནི་ཟག་པ་མེད་པ། གཏོགས་པ་མེད་པ། གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྣམ་པར་མི་དམིགས་པ་སྟེ། ནམ་མཁའ་ནི་སུས་ཀྱང་བལྟ་མི་ནུས་སོ། །ཡང་ནམ་མཁའ་ནི་སྤྱན་ལྔས་མཐོང་བར་མི་འགྱུར་རོ། །སྤྱན་ལྔ་གང་ཞེ་ན། འདི་

ལྟ་སྟེ། ཤའི་སྤྱན་དང་། ལྷའི་སྤྱན་དང་། ཤེས་རབ་ཀྱི་སྤྱན་དང་། ཆོས་ཀྱི་སྤྱན་དང་། སངས་རྒྱས་ཀྱི་སྤྱན་ཏེ། གཞན་དུ་ན་ནམ་མཁའ་ནམ་མཁའ་ཞེས་གྲངས་སུ་འགྲོ་བར་ཟད་དོ། །འཇམ་དཔལ་དེ་བཞིན་དུ་དེ་བཞིན་གཤེགས་པའི་སྐུ་ཡང་ཟག་པ་མེད་པ། གཏོགས་
པ་མེད་པ། གཟུགས་མེད་པ། བསྟན་དུ་མེད་པ། ཐོགས་པ་མེད་པ། དམིགས་སུ་མེད་པ་སྟེ། དེ་བཞིན་གཤེགས་པའི་སྐུ་ནི་སུས་ཀྱང་མཐོང་བར་མི་ནུས་སོ། །ཡང་དེ་བཞིན་གཤེགས་པའི་སྐུ་ནི་སུས་ཀྱང་མ་མཐོང་ངོ་། །དེ་བཞིན་གཤེགས་པའི་སྐུ་ནི་ཤའི་སྤྱན་ནས་སངས་རྒྱས་
ཀྱི་སྤྱན་གྱི་བར་དུ་སྤྱན་ལྔ་ལ་སྣང་བར་མི་འགྱུར་གྱི། གཞན་དུ་ན་དེ་བཞིན་གཤེགས་པ་དེ་བཞིན་གཤེགས་པ་ཞེས་མིང་ཙམ་གྱི་གྲངས་སུ་འགྲོ་སྟེ་མིང་དེ་ཡང་གསོབ་བོ། །འཇམ་དཔལ་དེ་བཞིན་གཤེགས་པའི་ཆོ་འཕྲུལ་ལ་ལ་ལྟོས། དེ་བཞིན་གཤེགས་པ་དག་ནི་ནམ་མཁའ་
དང་འདྲ་སྟེ། དེ་དག་གཟུགས་ཀྱི་སྐུའི་ཁ་དོག་ཡོངས་སུ་རྫོགས་པ་ཡང་སྟོན་ཏོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ཡང་ལྡན་ནོ། །འཇམ་དཔལ་གང་ཡང་དེ་བཞིན་གཤེགས་པ་དེ་དག་ཁྱོད་ཀྱི་མིག་གིས་མཐོང་བར་མ་གྱུར་པ་དེ་དག་ཐམས་ཅད་ནི། དེ་བཞིན་
གཤེགས་པ་དེ་དག་གི་བྱིན་གྱི་རླབས་དང་མཐུས་དེ་ལྟར་གྱུར་ཏོ། །དེ་ཅིའི་ཕྱིར་ཞེ་ན། དེ་ལྟར་འཇམ་དཔལ་གཞོན་ནུ་ཁྱོད་ཡིན་ཏེ་ཁྱོད་ལས་བརྩམས་ནས་ཆོས་ཟབ་མོ་བསྟན་པར་འགྱུར་རོ། །དེ་ནས་སངས་རྒྱས་ཀྱི་ཞིང་དེ་ན་གནས་པའི་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་
མགྲིན་གཅིག་ཏུ་ངོ་མཚར་ཆེ་བའི་སྒྲ་ཕྱུང་ནས་ངོ་མཚར་ཏོ། །ངོ་མཚར་ཏོ། །དེ་བཞིན་གཤེགས་པ་དག་ནི་དེ་ལྟར་རྫུ་འཕྲུལ་ཆེ། མཐུ་ཆེ་སྟེ། དེ་ལྟར་དེ་བཞིན་གཤེགས་པ་དག་མང་ཡང་བདག་ཅག་གིས་དེ་བཞིན་གཤེགས་པ་གཅིག་ཀྱང་མ་མཐོང་སྟེ། འདིར་སུ་ཞིག་གཤེགས། སུ་
ཞིག་བཞུད། སུ་ཞིག་འཆང་། སུ་ཞིག་འཆད་ཅེས་མཚན་མ་ཙམ་ཡང་མ་འཚལ་ཏེ། འདི་ན་དེ་བཞིན་གཤེགས་པ་གཅིག་པུ་འཆད་པར་མཐོང་ངོ་། །བཅོམ་ལྡན་འདས་གལ་ཏེ་ཡེ་ཤེས་ཆེན་པོ་འདི་འདྲ་བའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་

རེ་རེའི་ཕྱིར་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སེམས་ཅན་དམྱལ་བ་ཆེན་པོར་བསྒྲལ་ཀྱང་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་བཟོད་པར་བགྱིའོ། །ཡེ་ཤེས་ཆེན་པོ་དེ་འདྲ་བ་ཡོངས་སུ་དོར་བར་ནི་མི་བགྱིའོ། །དེ་ནས་དེ་བཞིན་གཤེགས་པ་འཇུག་སྲེད་
ཀྱི་རྒྱལ་པོ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སྲིང་མོ་འདིས་ཇི་སྲིད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་སྲིང་མོ་དེ་འདི་འདྲ་བར་ཞི་བ་དང་དམ་པའི་ཏིང་ངེ་འཛིན་ལ་མཉམ་པར་བཞག་པ་ཐོབ་པར་གྱུར།
བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་བསྐལ་པ་དཔག་ཏུ་མེད་པས་བསྐྱེད་པ་སྟེ། རྟག་པར་སྐྱེས་པ། ཚད་མེད་པར་སྐྱེས་པ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་
དང་། བསམ་གཏན་དང་། ཤེས་རབ་ལས་སྐྱེས་པ་ནི་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིན་ཏེ། འཇམ་དཔལ་སྲིང་མོ་འདི་ནི་ཡུན་རིང་པོ་ནས་སྤྱད་པ། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ་སྟེ་སྲིང་མོ་འདི་ནི་
སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་ལ་བསྙེན་བཀུར་བྱས་པ་ཡིན་མོད་ཀྱི། འཇམ་དཔལ་ཁྱོད་ཀྱིས་འདི་ཏིང་ངེ་འཛིན་ལས་སློང་ལ་ཡུན་ཇི་སྲིད་ནས་སྤྱོད་ཅེས་དྲིས་ཤིག་དང་། སྲིང་མོ་འདི་ཉིད་ཁྱོད་ལ་སྟོན་པར་འགྱུར་རོ།། །།བམ་པོ་གསུམ་པ་སྟེ་ཐ་མ། དེ་
ནས་འཇམ་དཔལ་གཞོན་ནུར་གྱུར་པས་སྲིང་མོ་དེ་སློང་བར་འདོད་ནས་སེ་གོལ་གྱི་སྒྲ་ཐ་མལ་པ་བྱས་ཀྱང་སྲིང་མོ་དེ་ཏིང་ངེ་འཛིན་དེ་ལས་མ་ལངས་སོ། །དེ་ནས་འཇམ་དཔལ་གཞོན་ནུར་གྱུར་པས་སེ་གོལ་ཇི་ལྟ་བུས་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པའི་སྒྲ་ཐོས་
པར་འགྱུར་བ་དེ་འདྲ་བའི་སེ་གོལ་གྱི་སྒྲ་བྱས་ཀྱང་སྲིང་མོ་དེ་ཏིང་ངེ་འཛིན་དེ་ལས་མ་ལངས་སོ། །དེ་ནས་འཇམ་དཔལ་གཞོན་ནུར་གྱུར་པས་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པ་ཇི་ལྟ་བུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྷ་དང་མིའི་སིལ་སྙན་ཐམས་

ཅད་མ་དཀྲོལ་བར་སྒྲ་འབྱུང་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱས་ཏེ། བདག་ཉིད་ཀྱང་སིལ་སྙན་བྱེ་བ་ཁྲག་ཁྲིག་བརྒྱ་སྟོང་སྤྲུལ་ནས་ཡིད་དུ་འོང་བ་ཆགས་པར་བྱེད་པ་རྣར་འོང་བའི་སྒྲ་འབྱིན་ཏོ། །ཡང་དེའི་ཚེ་ན་སིལ་སྙན་གྱི་སྒྲ་གང་གིས་ཕྱོགས་
བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ཀུན་ཏུ་གྲགས་པར་འགྱུར་བའི་སྒྲ་ཤིན་ཏུ་ཆེན་པོ་བྱུང་བར་གྱུར་ཀྱང་སྲིང་མོ་དེ་ཏིང་ངེ་འཛིན་དེ་ལས་མ་ལངས་ཏེ། ཡང་དེའི་ཚེ་གང་ཕྱོགས་བཅུ་ན་སངས་རྒྱས་བཅོམ་ལྡན་འདས་བཞུགས་པ་འཚོ་བ་གཞེས་པ་དེ་དག་ལ་བདག་གི་གཡོག་
གིས་ཞུས་པ། བཅོམ་ལྡན་འདས་ཅིའི་རྒྱུ་ཅིའི་རྐྱེན་གྱིས་ན་སིལ་སྙན་གྱི་སྒྲ་དབྱངས་བཅོམ་ལྡན་འདས་སྔོན་མ་ཐོས་པའི་སྒྲ་གདའ་བ་འདི་འཇིག་རྟེན་དུ་བྱུང་བར་གྱུར། དེ་སྐད་ཅེས་གསོལ་པ་དང་། དེ་བཞིན་གཤེགས་པ་དེ་དག་གིས་བདག་གི་གཡོག་ལ་འདི་སྐད་ཅེས་བཀའ་སྩལ་
ཏོ། །འཇིག་རྟེན་གྱི་ཁམས་ཀུན་ཏུ་འོད་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ཞེས་བྱ་བ་བཞུགས་འཚོ་གཞེས་ཏེ། དེའི་སངས་རྒྱས་ཀྱི་ཞིང་ན་སྲིང་མོ་ཐེ་ཚོམ་སེལ་བ་ཞེས་བྱ་བ་དེ་བཞིན་གཤེགས་པ་དེའི་གཡས་ཕྱོགས་ན་ཟླ་བའི་འོད་
ཀུན་ཏུ་དྲི་མ་མེད་པར་སྣང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་སྟེ། དེ་ན་འཇམ་དཔལ་གཞོན་ནུར་གྱུར་པ་ཞེས་བྱ་བ་གོ་ཆ་བསམ་གྱིས་མི་ཁྱབ་པ་བགོས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་ཞིག་ཡོད་དེ། སྲིང་མོ་དེ་ཏིང་ངེ་འཛིན་དེ་ལས་སློང་བར་འདོད་
ནས་རིགས་ཀྱི་བུ་འཇམ་དཔལ་གཞོན་ནུར་གྱུར་པ་དེས་ལྷ་དང་མིའི་སིལ་སྙན་གྱི་སྒྲ་ཕྱུང་སྟེ། དེའི་བྱིན་གྱི་རླབས་ཀྱིས་སིལ་སྙན་འདི་དག་མ་དཀྲོལ་བར་སྒྲ་འབྱིན་ཅིང་འདི་ལྟ་སྟེ། སྲིང་མོ་འདི་ཏིང་ངེ་འཛིན་དེ་ལས་བསླང་བའི་ཕྱིར་དེས་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དག་
སྤྲུལ་ཏེ། རིགས་ཀྱི་བུ་དེ་དག་ཀྱང་མ་དཀྲོལ་བར་སྒྲ་འབྱུང་མོད་ཀྱི། སྲིང་མོ་དེ་ཏིང་ངེ་འཛིན་དེ་ལས་བསླང་བར་མ་ནུས་སོ། །རིགས་ཀྱི་བུ་རྒྱུ་དེ་དང་རྐྱེན་དེའི་ཕྱིར་སིལ་སྙན་གྱི་སྒྲ་ཆེན་པོ་འཇིག་རྟེན་དུ་བྱུང་ངོ་། །དེ་སྐད་ཅེས་བཀའ་སྩལ་པ་དང་། སངས་རྒྱས་བཅོམ་ལྡན་འདས་

དེ་དག་ལ་གཡོག་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་སྲིང་མོ་དེ་འདི་འདྲ་བའི་ཏིང་ངེ་འཛིན་ཞི་བ་ཐོབ་ཅིང་འདི་འདྲ་བའི་སིལ་སྙན་གྱི་སྒྲས་ཀྱང་མི་ལྡང་བ་ངོ་མཚར་ཏོ། །བཀའ་སྩལ་པ། རིགས་ཀྱི་བུ་དེ་བཞིན་ཏེ། སྲིང་མོ་འདི་ནི་ཏིང་ངེ་འཛིན་བསམ་གྱིས་
མི་ཁྱབ་པ་ཐོབ་པའོ། །དེ་ནས་གཏམ་འདི་བརྗོད་པའི་ཚེ་ཕྱོགས་བཅུ་ནས་སེམས་ཅན་གྲངས་མེད་ཚད་མེད་པ་དག་བླ་ན་མེད་པའི་བྱང་ཆུབ་ཏུ་ཞུགས་པར་གྱུར་ཏེ། སྲིང་མོ་དེ་ཇི་ལྟ་བ་བཞིན་དུ་བདག་ཅག་ཀྱང་དེ་དང་འདྲ་བའི་ཏིང་ངེ་འཛིན་ཞི་བ་ཐོབ་པར་གྱུར་ཅིག །འཇམ་དཔལ་
གཞོན་ནུར་གྱུར་པ་ཇི་ལྟ་བ་བཞིན་དུ་བདག་ཅག་ཀྱང་དེ་འདྲ་བའི་རྣམ་པར་སྤྲུལ་པ་ཐོབ་པར་གྱུར་ཅིག་ཅེས་དེ་སྐད་ཀྱི་ཚིག་སྨྲས་སོ། །དེ་ནས་ཡང་འཇམ་དཔལ་གཞོན་ནུར་གྱུར་པས་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱེད་པ་ཇི་ལྟ་བུས་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ན་རི་རབ་ལྷུན་པོའི་རིའི་རྒྱལ་པོ་དང་། གངས་ཀྱི་རི་དང་། རི་བཏང་བཟུང་དང་། རི་བཏང་བཟུང་ཆེན་པོ་དང་། རི་ཁོར་ཡུག་དང་། ཁོར་ཡུག་ཆེན་པོ་དང་། གཞན་ཡང་རི་རབ་འབྲིང་ཐ་མ་དེ་དག་ཐམས་ཅད་གཅིག་ལ་གཅིག་འདུས་ཤིང་གཅིག་ལ་གཅིག་ཐུག་པ་དང་།
གཅིག་ལ་གཅིག་འཐབ་པ་འདི་ལྟ་སྟེ། སྐྱེས་བུ་སྟོབས་པོ་ཆེ་སྟོབས་པོ་ཆེའི་ཟླ་བོ་ལ་མཐུའི་ཤུགས་ཐམས་ཅད་ཀྱིས་ཐལ་མོ་རྡོབ་པར་བྱེད་པ་དེ་བཞིན་དུ་རི་ཆེན་པོ་དང་། རི་ཁོར་ཡུག་ཆེན་པོ་དེ་དག་གཅིག་ལ་གཅིག་འདུས་ནས་རིའི་རྒྱལ་པོ་དེ་དག་འཇིགས་པའི་སྒྲའི་དབྱངས་
ཀྱིས་བ་སྤུ་ཟིང་ཞེས་བྱེད་པར་གྱུར་པ་དེ་འདྲ་བའི་སྒྲས་འཇིག་རྟེན་གྱི་ཁམས་མཐའ་ཡས་མུ་མེད་པར་གྲགས་པར་འགྱུར་བ་དེ་འདྲ་བའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་ཀྱང་སྲིང་མོ་དེ་ཏིང་ངེ་འཛིན་དེ་ལས་བསླང་མ་ནུས་སོ། །དེ་ནས་འཇམ་དཔལ་གཞོན་ནུར་གྱུར་པས་
སྲིང་མོ་དེ་ལག་པ་གཉིས་ཀྱིས་མ་རེག་ལ། བྱིན་གྱི་རླབས་ཀྱིས་ལག་པ་གཉིས་བཟུང་སྟེ་བསླང་བར་འདོད་ནས་དེ་དེ་ལྟར་བསྐྱོད་པ་དང་། འོག་གི་ཕྱོགས་ཀྱིས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་ཀྱང་སྲིང་མོ་དེ་

བསླང་བར་མ་ནུས་ཏེ། ཆུང་ངུ་ན་སྐྲའི་རྩེ་མོའི་ཆ་ཤས་ཙམ་ཡང་གཡོ་བར་མ་ནུས། འགུལ་བར་མ་ནུས་སོ། །ཏིང་ངེ་འཛིན་དེ་ལས་བསླང་བར་ཡང་མ་ནུས་ནས། དེ་ཡང་ཤིན་ཏུ་ཤུགས་ཐམས་ཅད་ཀྱིས་གདེག་གོ་སྙམ་ནས་ཤུགས་ཕྱུང་སྟེ་བཏེག་པ་དང་། སངས་
རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པ་རྣམས་གྱེན་དུ་འཕངས་ཀྱང་ཏིང་ངེ་འཛིན་དེ་ལས་མ་ལངས་སོ། །དེ་ནས་འཇམ་དཔལ་གཞོན་ནུར་གྱུར་པས་ས་གང་གི་ཕྱོགས་ན་སྲིང་མོ་དེ་མཉམ་པར་གཞོག་པས་དེའི་ཕྱོགས་ཁོ་ར་ཁོར་ཡུག་ཏུ་དྲངས་ཏེ་ལག་པ་གཡས་པ་ལ་
གཞོག་གོ། །ལག་པ་གཡས་པར་བཞག་ནས་ཚངས་པའི་འཇིག་རྟེན་གྱི་བར་དུ་འཕངས་ཀྱང་སྲིང་མོ་དེ་ཏིང་ངེ་འཛིན་དེ་ལས་མ་ལངས་སོ། །ཚངས་པའི་འཇིག་རྟེན་ནས་སླར་ཡང་ས་ལ་བཞག་ཀྱང་མ་ལངས་སོ། །དེ་ནས་འཇམ་དཔལ་གཞོན་ནུར་གྱུར་པས་སྲིང་མོ་དེ་ལག་པ་གཡས་
པར་བཞག་ནས་ཤར་ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དུ་སོང་ཞིང་སིལ་སྙན་གྱི་སྒྲ་དེ་དག་དང་རིའི་སྒྲ་དབྱངས་དེ་དག་འབྱིན་ཅིང་མེ་ཏོག་གི་ཆར་འབེབས་བཞིན་དུ་སོང་ཡང་སྲིང་མོ་དེ་ཏིང་ངེ་འཛིན་དེ་ལས་མ་ལངས་སོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་
དང་། བྱང་ཕྱོགས་དང་། ཕྱོགས་བཅུའི་འཇིག་རྟེན་ཀུན་ཏུ་སྲིང་མོ་དེ་ཁྱེར་ཏེ་སོང་ནས་ས་ཕྱོགས་དེ་ཉིད་དུ་བཞག་སྟེ་ཐལ་མོ་སྦྱར་ནས། བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་
རྣམས་ཀྱི་སྤྱོད་པ་ནི་ངོ་མཚར་ཏེ་སེམས་ཅན་ཐམས་ཅད་ཀྱིས་ཀྱང་འཚལ་བའམ། སེམས་པར་སླ་བ་མ་ལགས་སོ། །བཅོམ་ལྡན་འདས་གལ་ཏེ་བདག་གིས་སེམས་མ་མཆིས་པའི་དངོས་པོ་དག་སྨྲར་སྩལ་ནའང་སྨྲ་བར་འགྱུར་ན་སྲིང་མོ་འདི་ལ་འདི་འདྲ་བའི་སྒྲ་རྫུ་འཕྲུལ་དང་།
རྣམ་པར་འཕྲུལ་པ་དང་། ཆོ་འཕྲུལ་གྱི་སྒྲས་བསླང་བར་མ་ནུས་ཏེ། བཅོམ་ལྡན་འདས་སྲིང་མོ་འདི་དང་གང་སུའང་དེ་ལས་གཞན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་པ་དང་། གང་འཇུག་པ་དང་། གང་དེ་འདྲ་བའི་ཡེ་ཤེས་ཆེན་པོ་བསྒྲུབ་པར་བགྱིད་

པ་དེ་ལ་ཕྱག་འཚལ་ལོ། །དེ་ཅིའི་སླད་དུ་ཞེ་ན། གང་བཅོམ་ལྡན་འདས་བྱང་ཆུབ་སེམས་དཔའི་སྤྱོད་པ་འདི་ནི་འདུལ་བ་ཆེན་པོའི་སྤྱོད་པ་ལགས་སོ། །སྲིང་མོ་དེ་ཏིང་ངེ་འཛིན་དེ་ལས་བསླང་བའི་ཕྱིར་འཇམ་དཔལ་གཞོན་ནུར་གྱུར་པས་ཕྱོགས་བཅུ་ཐམས་ཅད་དུ་སློང་བར་བགྱིད་པའི་ཚེ་སེམས་
ཅན་དཔག་ཏུ་མེད་པ་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་དཔག་ཏུ་མེད་པ་དག་གི་དགེ་བའི་རྩ་བ་ཡོངས་སུ་གྲུབ་པར་གྱུར་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་འཇམ་དཔལ་གཞོན་ནུར་གྱུར་པ་ལ་འདི་
སྐད་ཅེས་བཀའ་སྩལ་ཏོ། །དེ་བཞིན་ནོ། །འཇམ་དཔལ་ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་རྣམས་ཀྱི་གོ་ཆ་ནི་བསམ་གྱིས་མི་ཁྱབ་སྟེ། ཉན་ཐོས་དང་། རང་སངས་རྒྱས་རྣམས་ཀྱིས་ཀྱང་བདེ་བར་ཤེས་པར་མི་ནུས་ན་སེམས་ཅན་གཞན་གྱིས་ལྟ་ཅི་སྨོས་ཏེ། འཇམ་
དཔལ་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྔའི་ཁ་ཡ་གཅིག་ཏུ་གྱུར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཀྱང་རྔའི་ཁ་ཡ་གཅིག་ཏུ་གྱུར་ཏེ་ཡོངས་སུ་བརྟག་པ་བཟུང་ན། འཇམ་དཔལ་དེ་འདྲ་བའི་རྔ་ཆེན་
པོར་གྱུར་ན་དེ་ནི་སྐྱེས་བུ་དེ་འདྲ་བར་སྟོབས་ཆེ་ཞིང་། དེ་འདྲ་བར་མཐུ་ཆེ་བ་དེ་ལྟ་བུའི་ལུས་དང་ལྡན་པས་སྟོང་གཅིག་གི་འཇིག་རྟེན་གྱི་ཁམས་དང་མཉམ་པའི་དབྱུག་གུ་ཐོགས་ཏེ། སྲིང་མོ་དེའི་མདུན་དུ་བསྐལ་པའམ། བསྐལ་པའི་ལྷག་མ་ལུས་ཀྱི་བར་དུ་རྔ་ཆེན་པོ་དེ་
བརྡུངས་སུ་ཟིན་ཀྱང་སྒྲ་དེ་སྲིང་མོ་དེའི་རྣར་གྲག་པར་མི་འགྱུར་ན་ཏིང་ངེ་འཛིན་ལས་བསླང་བར་ལྟ་ཅི་སྨོས་ཏེ། དེ་ནི་གནས་མེད་དེ་སྲིང་མོ་དེ་ནི་དེ་འདྲ་བའི་ཏིང་ངེ་འཛིན་ཞི་བ་ཐོབ་བོ། །འཇམ་དཔལ་གྱིས་གསོལ་པ། བཅོམ་ལྡན་འདས་སྲིང་མོ་འདི་ཏིང་ངེ་འཛིན་འདི་ལས་སློང་བར་སུ་
ཞིག་གིས་ནུས། བཀའ་སྩལ་པ། འཇམ་དཔལ་དེ་བཞིན་གཤེགས་པའམ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་མ་གཏོགས་པར་གཞན་སྲིང་མོ་འདི་ཏིང་ངེ་འཛིན་འདི་ལས་སློང་བར་ནུས་པ་མེད་དོ། །དེ་ནས་རིགས་ཀྱི་བུ་དེའི་མིང་བརྗོད་མ་ཐག་ཏུ་

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་རྣམ་པ་དྲུག་ཏུ་གཡོས་སོ། །དེ་ནས་བཅོམ་ལྡན་འདས་འཇུག་སྲེད་ཀྱི་རྒྱལ་པོའི་གཡོག་བྱང་ཆུབ་སེམས་དཔའ་རབ་ཏུ་དགའ་བའི་རྒྱལ་པོ་ཞེས་བྱ་བ་དེས་དེ་བཞིན་གཤེགས་པ་དེ་ལ་ཞུས་པ། བཅོམ་ལྡན་
འདས་ཅིའི་རྒྱུ་ཅིའི་རྐྱེན་གྱིས་ན་འཇིག་རྟེན་ན་ས་ཆེན་པོ་འདི་གཡོ་བར་གྱུར། བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བའི་མིང་བརྗོད་མ་ཐག་ཏུ་ངེས་པར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཡོ་བར་འགྱུར་ཏེ། འཇིག་
རྟེན་གྱི་ཁམས་གཞན་ན་ཡང་གང་ན་དེ་བཞིན་གཤེགས་པ་དག་རིགས་ཀྱི་བུ་དེའི་མིང་བརྗོད་པར་གྱུར་པ་དེའི་ཚེ་བརྗོད་མ་ཐག་ཏུ་ས་ཆེན་པོ་རྣམ་པ་དྲུག་ཏུ་གཡོའོ། །དེ་ནས་འཁོར་དེ་ན་བྱང་ཆུབ་སེམས་དཔའ་དེ་དག་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་མཐོང་བར་
སྐོམ། འཇམ་དཔལ་གཞོན་ནུར་གྱུར་པ་ཡང་བྱང་ཆུབ་སེམས་དཔའ་དེ་མཐོང་བར་འདོད་དོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ཡོངས་སུ་སྐོམ་པར་ཡང་ཤེས། བདག་ཀྱང་མཐོང་བ་དང་། སྲིང་མོ་དེ་ཏིང་ངེ་འཛིན་དེ་ལས་བསླང་བའི་
ཕྱིར་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ནས་ཀྱང་བདག་གིས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་མཐོང་བར་འགྱུར་བ་དེ་འདྲ་བའི་རྫུ་འཕྲུལ་གྱི་མཐུ་ལེགས་པར་བསྟན་པར་གསོལ། བཅོམ་ལྡན་
འདས་འཁོར་འདི་དག་ཀྱང་རིགས་ཀྱི་བུ་དེ་མཐོང་བར་འཚལ་ན། བཅོམ་ལྡན་འདས་བདག་ཀྱང་སྐྱེས་བུ་དམ་པ་དེ་མཐོང་བར་འཚལ་ན་ཅི་ནས་ཀྱང་སྐྱེས་བུ་དེ་སངས་རྒྱས་ཀྱི་ཞིང་འདིར་མཆི་ཞིང་རིགས་ཀྱི་བུ་དེ་ལས་བརྩམས་ནས་ཆོས་ཟབ་མོ་བཤད་པར་འགྱུར་བ་དང་། བྱང་ཆུབ་
སེམས་དཔའ་འདི་དག་ཀྱང་བྱང་ཆུབ་སེམས་དཔའ་དེ་མཐོང་བར་འགྱུར་ཞིང་མཐོང་ནས་ཀྱང་དེའི་རྗེས་སུ་སློབ་པ་དང་། སྲིང་མོ་དེ་ཡང་ཏིང་ངེ་འཛིན་དེ་ལས་ལྡང་བར་འགྱུར་བ་དེ་འདྲ་བའི་རྫུ་འཕྲུལ་རྣམ་པར་འཕྲུལ་པ་བསྟན་ན་ལེགས་སོ། །དེ་ནས་བཅོམ་ལྡན་འདས་འཇུག་སྲེད་ཀྱི་

རྒྱལ་པོ་དེ་ལ་བྱང་ཆུབ་སེམས་དཔའ་རབ་ཏུ་དགའ་བའི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱོགས་གང་དང་། སངས་རྒྱས་ཀྱི་ཞིང་གང་ན་རིགས་ཀྱི་བུ་དེ་ལྟར་གནས་པ་ལགས། དེའི་སངས་རྒྱས་ཀྱི་ཞིང་ན་དེ་བཞིན་གཤེགས་པ་དེའི་མཚན་ཅི་ལགས། བཀའ་
སྩལ་པ། རིགས་ཀྱི་བུ་འོག་གི་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་སྣ་ཚོགས་ཀྱི་རྒྱལ་མཚན་ཞེས་བྱ་བ་ཞིག་ཡོད་དོ། །དེ་ན་དེ་བཞིན་གཤེགས་པ་སེང་གེ་དང་། ངང་པ་དང་། བལ་གླང་གི་ཕུང་
པོའི་སྒྲ་བསྒྲགས་པ་ཞེས་བྱ་བ་བཞུགས་འཚོ་གཞེས་ཤིང་ཆོས་ཀྱང་སྟོན་ཏེ། དེ་ན་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ཞེས་བྱ་བ་དེ་ད་ལྟར་གནས་སོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་དེའི་ཚེ་དེ་ལྟར་གདན་ལ་བཞུགས་བཞིན་དུ་ཞབས་
གཡས་པའི་མཐེ་བོ་ལས་བྱང་ཆུབ་སེམས་དཔའ་སྐུལ་བར་བྱེད་པ་ཞེས་བྱ་བའི་འོད་ཟེར་གྱི་ཁ་དོག་ལྟ་བུ་གཏོང་ངོ་། །འོད་དེ་བཏང་མ་ཐག་ཏུ་འོག་གི་ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པ་བརྟོལ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་
སེལ་བའི་ལུས་ལ་ཕོག་སྟེ། རིགས་ཀྱི་བུ་དེ་ལ་ལན་གསུམ་བསྐོར་ནས་སྤྱི་བོར་མི་སྣང་བར་སོང་ངོ་། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ཅིའི་རྒྱུ་ཅིའི་རྐྱེན་གྱིས་ན། གང་གི་ཕྱིར་དེ་ལྟར་འོད་དང་བ་བདག་ལ་ལན་བདུན་བསྐོར་ནས་སྤྱི་བོར་མི་སྣང་
བར་སོང་སྙམ་དུ་བསམས་པ་ལས། དེ་འདི་སྙམ་དུ་སེམས་ཏེ། དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་བདག་གཟིགས་པར་བཞེད་དོ་སྙམ་མོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སེང་གེ་དང་། ངང་པ་དང་། བལ་གླང་གི་ཕུང་པོའི་སྒྲ་
བསྒྲགས་པ་དེ་བཞིན་གཤེགས་པ་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་སྟེང་གི་ཕྱོགས་སུ་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་

བལྟ་བར་འཚལ་ལོ། །བཀའ་སྩལ་པ། དེའི་དུས་ལ་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་དེ་བཞིན་གཤེགས་པ་སེང་གེ་དང་། ངང་པ་དང་། བལ་གླང་གི་ཕུང་པོའི་སྒྲ་བསྒྲགས་པ་དེའི་གཡོག་དོན་ཐམས་ཅད་གྲུབ་པ་ཞེས་བྱ་བ་དེས། དེ་བཞིན་གཤེགས་
པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་མཐོང་བར་འཚལ་ལོ། །དེ་ནས་དེ་བཞིན་གཤེགས་པ་སེང་གེ་དང་། ངང་པ་དང་། བལ་གླང་གི་ཕུང་པོའི་སྒྲ་བསྒྲགས་པས་དེའི་ཚེ་སྨིན་མཚམས་ཀྱི་མཛོད་སྤུ་ནས་འོད་བྱུང་ངོ་། །འོད་བྱུང་བ་
དེས་སྟེང་གི་ཕྱོགས་ཀྱི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པ་བརྟོལ་ནས། འཇིག་རྟེན་གྱི་ཁམས་ཀུན་ཏུ་འོད་ཅེས་བྱ་བར་སྣང་བར་གྱུར་ཏེ་དེ་ཉིད་དུ་བྱུང་བ་བཞིན་དུ་སྣང་སྟེ། དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་བྱང་ཆུབ་སེམས་དཔའ་མང་པོས་བསྐོར་ཅིང་འཛམ་
བུའི་ཆུ་བོའི་གསེར་གྱི་རི་བཞིན་དུ་ཆོས་འཆད་དེ། འདི་ལྟ་སྟེ། དཔེར་ན་འདོམ་གང་ཙམ་ན་སྐྱེས་བུ་མིག་དང་ལྡན་པ་གཅིག་གིས་སྐྱེས་བུ་གཅིག་གི་རང་བཞིན་ལ་རྟོག་པ་དེ་བཞིན་དུ་འཁོར་དེ་དག་ཐམས་ཅད་ཀྱིས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་བྱང་ཆུབ་སེམས་དཔའི་དགེ་འདུན་དང་བཅས་
པ་མཐོང་ངོ་། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་ལྔ་འབུམ་དང་སེམས་གཅིག་བསྐྱེད་པས་སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ནས་འཇིག་རྟེན་གྱི་ཁམས་ཀུན་ཏུ་འོད་ཅེས་བྱ་བར་གནས་ཏེ། དེ་བཞིན་གཤེགས་པ་འཇུག་སྲེད་
ཀྱི་རྒྱལ་པོའི་ཞབས་ལ་མགོ་བོས་ཕྱག་འཚལ་ཏེ་སྤྱན་སྔར་འདུག་གོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་དེ་དག་དང་བཅས་ཏེ་ལུས་མི་སྣང་བར་སོང་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་
ལྡན་འདས་ལ་ལན་གསུམ་བསྐོར་ནས་སྟེང་གི་བར་སྣང་ལ་གནས་ཤིང་ལུས་ཐམས་ཅད་སུན་འབྱིན་ཅེས་བྱ་བའི་ཏིང་ངེ་འཛིན་ལ་མཉམ་པར་བཞག་གོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་ཇི་ལྟ་བུའི་ལྟས་ཀྱིས་སྟེང་གི་བར་སྣང་ལས་ལྷའི་མེ་ཏོག་གི་ཆར་

འབབ་པ་དང་། མེ་ཏོག་དེ་དག་ཀྱང་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་ཞབས་ལ་འབབ་ཅིང་། མེ་ཏོག་དེ་དག་ལས་སེང་གེ་དང་། ངང་པ་དང་། བལ་གླང་གི་ཕུང་པོའི་སྒྲ་བསྒྲགས་པ་དེ་བཞིན་གཤེགས་པ་ནི་བཅོམ་ལྡན་འདས་ལ་བསྙུང་བ་མ་མཆིས་
སམ། འོ་མ་བརྒྱལ་ཏམ། བཞེངས་པ་ཡང་ངམ། སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་ཟེར་བ་དེ་འདྲ་བའི་སྒྲ་འབྱུང་བར་འགྱུར་བ་དེ་ལྟ་བུའི་ལྟས་མཛད་དོ། །དེ་ནས་འཁོར་དེ་ཐམས་ཅད་ངོ་མཚར་ཐོབ་པར་གྱུར་ནས། བཅོམ་ལྡན་
འདས་གང་མེ་ཏོག་འདི་འདྲ་བ་དག་དང་། སྒྲ་འདི་འདྲ་བར་ཡིད་དུ་མཆི་བ་སྒྲོགས་པར་བགྱིད་པ་སུའི་མཐུ་ལགས་ཞེས་དེ་སྐད་ཀྱི་ཚིག་སྨྲས་སོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་
འདས་གང་མེ་ཏོག་འདི་དག་ཆར་འབབ་པ་དང་། མེ་ཏོག་དེ་དག་ལས་འདི་འདྲ་བའི་སྒྲ་ཡིད་དུ་མཆི་བ་འབྱུང་བ་སུའི་མཐུ་ལགས། བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དེའི་མཐུ་ཡིན་ནོ། །གསོལ་པ། བཅོམ་ལྡན་འདས་བྱང་
ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དེ་གང་ན་མཆིས། བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་དེ་ནི་སྟེང་གི་བར་སྣང་ལ་འདུག་སྟེ། བྱང་ཆུབ་སེམས་དཔའ་ལྔ་འབུམ་དང་འགྲོགས་ནས་ངའི་རྐང་པ་ལ་
ཕྱག་འཚལ་ཏེ། སྟེང་གི་བར་སྣང་ལ་ལུས་ཐམས་ཅད་སུན་འབྱིན་པ་ཞེས་བྱ་བའི་ཏིང་ངེ་འཛིན་ལ་མཉམ་པར་གཞོག་གོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་དེ་དག་མི་གདའོ། །བཀའ་སྩལ་པ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་
པར་སེལ་བའི་མཐུས་མི་སྣང་ངོ་། །དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་གྱུར་ཏེ། བདག་ཀྱང་ལུས་ཐམས་ཅད་སུན་འབྱིན་པའི་ཏིང་ངེ་འཛིན་ལ་མཉམ་པར་བཞག་གོ། །བདག་གིས་ཀྱང་ཏིང་ངེ་འཛིན་དེ་ལ་མཉམ་པར་བཞག་སྟེ་སྐྱེས་བུ་དམ་པ་སྒྲིབ་པ་ཐམས་ཅད་

རྣམ་པར་སེལ་བ་དེ་དང་། བྱང་ཆུབ་སེམས་དཔའ་དེ་དག་ཡོངས་སུ་བཙལ་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འཇམ་དཔལ་གཞོན་ནུར་གྱུར་པའི་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས་བར་སྣང་ལ་ལུས་མི་
སྣང་བར་བྱས་ཏེ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་ཇི་སྙམ་དུ་སེམས། ལུས་ཐམས་ཅད་སུན་འབྱིན་པའི་ཏིང་ངེ་འཛིན་ཅེས་བྱ་བ་གཅིག་པུའོ་སྙམ་དུ་ཁྱོད་དེ་ལྟར་མ་ལྟ་ཤིག །དེ་ཅིའི་ཕྱིར་ཞེ་ན། འཇམ་དཔལ་རྒྱ་མཚོ་མཆིང་རྣམ་ཆེན་པོ་ན་ཆུའི་
ཕུང་པོ་ཇི་ཙམ་ཡོད་པ་དེའི་ཆུའི་ཐིགས་པ་ཇི་སྙེད་ཡོད་པ་དེ་སྙེད་ཀྱི་ལུས་ཐམས་ཅད་སུན་འབྱིན་པའི་ཏིང་ངེ་འཛིན་ལ་ང་མཉམ་པར་གཞོག་པར་ཡང་བྱེད་ལྡང་བར་ཡང་བྱེད་དེ། ཁྱོད་ནི་དེ་དག་གི་མིང་ཙམ་ཡང་མི་ཤེས་སོ། །དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་གྱུར་ཏེ།
གལ་ཏེ་བདག་གིས་ཏིང་ངེ་འཛིན་དེ་མ་བསྒྲུབས་ན་བདག་གིས་སྔར་སྦྱངས་པ་དག་དོན་མེད་དོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་ཇི་ལྟ་བུའི་བརྩོན་འགྲུས་ཀྱིས་སེ་གོལ་གཅིག་གིས་འགྲུབ་པར་འགྱུར་བ་དེ་འདྲ་བའི་བརྩོན་འགྲུས་བརྩམས་སོ། །དེ་ནས་དེ་བཞིན་
གཤེགས་པ་འཇུག་སྲེད་ཀྱི་རྒྱལ་པོས་བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་ཏིང་ངེ་འཛིན་གང་བྱང་ཆུབ་སེམས་དཔའ་གཞན་གྱིས་བསྐལ་པ་བྱེ་བ་ཁྲག་ཁྲིག་ཏུའང་གྲུབ་པར་མི་འགྱུར་བ་དེ་འཇམ་དཔལ་གཞོན་ནུར་གྱུར་པས་སེ་གོལ་གཅིག་གིས་
བསྒྲུབས་སོ། །ལྷག་པའི་བསམ་པའི་སྦྱངས་པའི་ཁྱད་པར་ལ་ལྟོས། དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་དག་སྐྱེས་བུ་དམ་པ་དེ་རྣམས་དང་། བྱང་ཆུབ་
སེམས་དཔའ་དེ་མཐོང་བར་འཚལ་ན་བསྟན་པར་གསོལ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་བཀའ་སྩལ་པ། འཁོར་འདི་དག་ཁྱོད་མཐོང་བར་འདོད་ཀྱིས། རིགས་ཀྱི་བུ་ཁྱོད་ཀྱིས་བདག་གི་ལུས་སྟོན་ཅིག །དེ་ནས་བྱང་ཆུབ་སེམས་

དཔའ་སྒྲིབ་པ་ཐམས་ཅད་རྣམ་པར་སེལ་བས་བར་སྣང་དེ་ལས་བབས་ཏེ། སླར་ཡང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བྱང་ཆུབ་སེམས་དཔའ་དེ་དང་འགྲོགས་ཏེ། ལུས་མི་སྣང་བར་བྱས་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །ང་མཐོང་
ངམ། འཇམ་དཔལ་གྱིས་སྨྲས་པ། ངས་མ་མཐོང་ངོ་། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་བཀའ་སྩལ་པ། རིགས་ཀྱི་བུ་འདི་དག་དང་། འཁོར་འདི་ཁྱོད་ཀྱི་ལུས་མཐོང་བར་འདོད་ཀྱིས་རིགས་ཀྱི་བུ་ཁྱོད་
ཀྱིས་བདག་གི་ལུས་སྟོན་ཅིག །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་ལྔ་འབུམ་དེ་དག་དང་འགྲོགས་ཏེ་གཟུགས་ཀྱི་ལུས་ཡོངས་སུ་རྫོགས་པས་བདག་གིས་ལུས་སྟོན་ཏོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་
སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་སྨྲས་པ། རིགས་ཀྱི་བུ་ཁྱོད་ཀྱིས་སྲིང་མོ་འདི་ཏིང་ངེ་འཛིན་འདི་ལས་སློངས་ཤིག །སྨྲས་པ། འཇམ་དཔལ་སྲིང་མོ་འདི་ཏིང་ངེ་འཛིན་འདི་ལས་སློངས་ཤིག་ཅེས་དེ་སྐད་སྨྲས་པ་དང་། ཅི་འདི་མིང་བསླང་བར་བྱའམ། འོན་ཏེ་
གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བསླང་བར་བྱ། འཇམ་དཔལ་གཟུགས་ཀྱི་རང་བཞིན་ནི་མཉམ་པར་མི་གཞོག་གོ། །ཚོར་བའི་རང་བཞིན་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རང་བཞིན་ནི་མཉམ་པར་ཡང་མི་
གཞོག་ལྡང་བར་ཡང་མི་བྱེད་དོ། །འཇམ་དཔལ་ཆོས་ཐམས་ཅད་ཀྱི་རང་བཞིན་གང་ཡིན་པ་དེ་ནི་མཉམ་པར་ཡང་མི་གཞོག །ལྡང་བར་ཡང་མི་བྱེད་ན་ཆོས་དེ་གང་ཞིག་བསླང་བར་བྱ། འཇམ་དཔལ་གལ་ཏེ་སྲིང་མོ་འདི་མཉམ་པར་གཞོག་པར་འགྱུར་ན་ནི་དེའི་ཕྱིར་བསླང་བར་
བྱ་ན། འཇམ་དཔལ་སྲིང་མོ་འདིས་ནི་ཅུང་ཟད་ཀྱང་མཉམ་པར་བཞག་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་གཡོ་ཞིང་བྱེད་པ་མེད་པའི་ཕྱིར་རོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་

བ་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་སྲིང་མོ་འདི་ཏིང་ངེ་འཛིན་འདི་ལས་སློང་ཤིག །གསོལ་པ། བཅོམ་ལྡན་འདས་བདག་ནི་སྤྱི་བརྟོལ་བགྱིད་པའི་རྔོ་མི་ཐོགས་ཏེ། དེ་བཞིན་གཤེགས་པས་ཁྱོད་ཀྱིས་དགེ་བ་ནི་བཅབ་པར་གྱིས་ཤིག་ཅེས་བཀའ་སྩལ་པས་དེ་
བཞིན་གཤེགས་པ་ཉིད་ཀྱིས་སྲིང་མོ་འདི་བསླང་བར་གསོལ། བཅོམ་ལྡན་འདས་བདག་གིས་ནི་སྲིང་མོ་འདི་ཏིང་ངེ་འཛིན་འདི་ལས་བསླང་བའི་རྔོ་ཡང་ཐོགས་མོད་ཀྱི་དེ་བཞིན་གཤེགས་པ་དག་ཆོས་ཐམས་ཅད་ཤེས་པ་དང་སྟོན་པ་ལ་མཁས་པ་ལགས་ཀྱིས་དེ་བཞིན་གཤེགས་པ་ཉིད་ཀྱིས་
སྲིང་མོ་འདི་བསླང་བར་གསོལ། དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་ཏིང་ངེ་འཛིན་གྱི་སེམས་ལས་ལྡང་བྱེད་ཅེས་བྱ་བའི་ཏིང་ངེ་འཛིན་ལ་མཉམ་པར་བཞག་ནས་དེ་བཞིན་གཤེགས་པས་མཉམ་པར་བཞག་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་
ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། བྱང་ཆུབ་སེམས་དཔའ་མཉམ་པར་གཞོག་པ་ཇི་སྙེད་ཡོད་པ་དེ་དག་ཐམས་ཅད་ལངས་པར་གྱུར་ཏོ། །སྲིང་མོ་དེ་ཡང་ཏིང་ངེ་འཛིན་དེ་ལས་ལངས་པར་གྱུར་ཏེ་ལངས་ནས་ས་ཆེན་པོ་རྣམ་པ་དྲུག་ཏུ་གཡོ་བར་བྱས་ཏེ་སྟེང་གི་བར་སྣང་ལ་འདུག་གོ།
ཡང་དེའི་ཚེ་ལྷའི་བུ་བརྒྱ་སྟོང་ཕྲག་དུ་མ་དག་འདུས་པར་གྱུར་ཏོ། །དེ་ནས་སྲིང་མོ་དེ་སྟེང་གི་བར་སྣང་ལ་འདུག་པ་དེས་མེ་ཏོག་ཨུད་པ་ལ་དང་། ཀུ་མུ་ད་དང་། པུན་ད་རི་ཀས་དེ་བཞིན་གཤེགས་པའི་སྐུ་ལ་གཏོར་ཏོ། །དེ་ནས་འཇམ་དཔལ་གཞོན་ནུར་གྱུར་པས་སྲིང་མོ་ཐེ་ཚོམ་སེལ་བ་ལ་འདི་
སྐད་ཅེས་སྨྲས་སོ། །སྲིང་མོ་ཁྱོད་དེ་འདྲ་བའི་ཏིང་ངེ་འཛིན་ཞི་བ་ཐོབ་པ་ངོ་མཚར་ཏོ། །སྨྲས་པ། འཇམ་དཔལ་དེ་སྐད་མ་གསུང་རྣམ་པར་རྟོག་པ་ལ་མ་སྤྱོད་ཅིག །བདག་ནི་ཞི་བའི་ཏིང་ངེ་འཛིན་ཐོབ་པ་མ་ལགས་སོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ཀྱི་བྱང་ཆུབ་ནི་མ་ཐོབ་པས་
བསྐྱེད་པའོ། །འཇམ་དཔལ་གང་ན་ཐོབ་པ་ཡོད་པ་དེ་ན་ནི་དམིགས་པ་ཡང་ཡོད་དོ། །འཇམ་དཔལ་ཆོས་ཐམས་ཅད་ནི་ཞི་བ་རབ་ཏུ་ཞི་བ་ཉེ་བར་ཞི་བ་སྟེ་ཞི་བ་ནི་ཞི་བར་མི་བྱའོ། །ཞི་བ་ནི་མཉམ་པར་ཡང་མི་གཞོག་ལྡང་བར་ཡང་མི་བྱེད་དོ། །སྨྲས་པ། སྲིང་མོ་དེ་བཞིན་ཏེ། ཇི་སྐད་སྨྲས་པ་བཞིན་མོད་ཀྱི་

འོན་ཀྱང་ཁྱོད་ནི་ཏིང་ངེ་འཛིན་རྒྱ་ཆེན་པོ་ཐོབ་པ་སྟེ། ཁྱོད་ནི་སིལ་སྙན་གྱི་སྒྲ་ཆེན་པོ་ཕྱུང་བས་ཀྱང་ལངས་པར་མ་གྱུར་ཏོ། །སྨྲས་པ། འཇམ་དཔལ་ཅི་ཆོས་ཀྱི་དབྱིངས་ལ་མཉམ་པར་གཞོག་པའམ། ལྡང་བ་མཆིས་སམ། སྨྲས་པ། སྲིང་མོ་དེ་མ་ལགས་སོ། །སྨྲས་པ། འཇམ་
དཔལ་ཅི་གང་མཉམ་པར་མ་བཞག་པ་དེ་བསླང་བར་ནུས་སམ། སྨྲས་པ། དེ་མ་ལགས་སོ། །སྨྲས་པ། འཇམ་དཔལ་གང་དག་ལ་ཁ་དོག་དང་། མཚན་དང་། དབྱིབས་དང་། མཚན་མ་མ་མཆིས་པ་དེ་དག་མཉམ་པར་གཞོག་གི །གང་ལ་ཁ་དོག་མ་མཆིས།
མཚན་མ་མཆིས། དབྱིབས་མ་མཆིས། མཚན་མ་མ་མཆིས་པ་དེ་དག་གང་དུ་མཉམ་པར་གཞོག་སྟེ། འཇམ་དཔལ་དེ་དག་ནི་རང་བཞིན་གྱིས་དུས་ཐམས་ཅད་དུ་མཉམ་པར་བཞག་གི། །དེ་དག་ནི་སླར་མཉམ་པར་མི་གཞོག །ལྡང་བར་མི་བྱེད་དོ། །དེ་བས་
ན་འཇམ་དཔལ་གསོན་ཅིག །འཇམ་དཔལ་འདི་ལྟ་སྟེ། དཔེར་ན་ལྷ་དང་མིའི་སིལ་སྙན་ཐམས་ཅད་དཀྲོལ་ན་ཅི་ཡིད་དུ་འོང་བའི་སྒྲ་འབྱུང་ངམ། སྨྲས་པ། སྲིང་མོ་དེ་བཞིན་ནོ། །འཇམ་དཔལ་ཅི་ནམ་མཁའི་ཁམས་ནི་སིལ་སྙན་འདི་དག་ལས་ཡིད་དུ་འོང་བའི་སྒྲ་འབྱུང་
ངོ་སྙམ་དུ་འགྱུར་རམ། སྨྲས་པ། སྲིང་མོ་དེ་མ་ལགས་སོ། །འཇམ་དཔལ་དེ་བས་ན་འདི་ལ་ཆོས་ཐམས་ཅད་ནམ་མཁའ་དང་མཚུངས་ན་འདི་ལ་སུ་ཞིག་སྒྲ་ཐོས་པར་འགྱུར། གང་ལ་རྣམ་པར་ཤེས་པ་ཡོད་པ་དེས་ཐོས་སུ་ཟད་དོ། །སྨྲས་པ། སྲིང་མོ་གང་
གིས་སྒྲ་ཐོས་པར་གྱུར་པའི་རྣ་བ་ཁྱོད་ལ་མེད་དམ། དེ་ནས་སྲིང་མོ་དེ་ཅང་མི་སྨྲ་བར་གྱུར་ནས། སྨྲས་པ། སྲིང་མོ་ཅིའི་ཕྱིར་ཅང་མི་སྨྲ་བར་གྱུར། སྨྲས་པ། མི་ཐོས་སོ། །སྨྲས་པ། ཅིའི་ཕྱིར། སྨྲས་པ། རྣ་བ་མི་དམིགས་པའི་ཕྱིར་རོ། །གཞན་ཡང་
སྲིང་མོ་ཐེ་ཚོམ་སེལ་བ་དེས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་འདི་ལྟ་སྟེ། དཔེར་ན་རླུང་གི་དཀྱིལ་འཁོར་ཆེན་པོ་ཞིག་ལངས་ཏེ་ཤིང་ཆེན་པོ་དག་གཡོ་བར་གྱུར་ཀྱང་རླུང་ནི་སུས་ཀྱང་བལྟར་མི་ནུས་ལ། དེ་ཡང་རྣམ་པར་

མི་རྟོག་པ་དེ་དག་ཀྱང་རྣམ་པར་མི་རྟོག་སྟེ། རླུང་ཡང་བདག་གིས་ཤིང་དག་བསྒུལ་བར་བྱའོ་སྙམ་དུ་དེ་ལྟར་མི་སེམས་སོ། །ཤིང་དག་ཀྱང་བདག་ཅག་ནི་རླུང་དག་གིས་བསྒུལ་ཏོ་སྙམ་དུ་མི་སེམས་སོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཤེས་
རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་རྣམ་པར་རྟོག་པ་ཐམས་ཅད་སྤངས་པ་ཡང་བདག་ནི་མཉམ་པར་གཞོག་པ་དང་ལྡང་བར་བྱའོ་སྙམ་དུ་མི་སེམས་སོ། །དེ་ཅིའི་ཕྱིར་ཞེ་ན། ཆོས་ཐམས་ཅད་རང་བཞིན་གྱིས་དབེན་པའི་ཕྱིར་རོ། །འཇམ་དཔལ་གྱིས་སྨྲས་པ། སྲིང་མོ་བར་
སྣང་ལས་བོབས་ལ་དེ་བཞིན་གཤེགས་པའི་སྤྱན་སྔར་འདུག་ལ་ཤོད་ཅིག །སྲིང་མོ་དེས་སྨྲས་པ། འཇམ་དཔལ་བདག་གི་སྤྱོད་ཡུལ་དུ་མཆིས་ཀྱི། བདག་ལ་གཞན་གྱི་སྤྱོད་ཡུལ་ནི་མི་འཚལ་ལོ། །སྨྲས་པ། སྲིང་མོ་ཁྱོད་ཀྱི་བདག་གི་སྤྱོད་ཡུལ་གང་ཡིན་སྨྲས་
པ། འཇམ་དཔལ་ནམ་མཁའི་དབྱིངས་ནི་སེམས་ཅན་ཐམས་ཅད་ཀྱི་སྤྱོད་ཡུལ་ལོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི་ནམ་མཁའ་ལས་འགྲོ་ཞིང་འོང་སྟེ། སེམས་ཅན་གྱི་སྤྱོད་པ་དེ་ཇི་ཙམ་པ་དེ་ཐམས་ཅད་ནི་ནམ་མཁའ་ལ་སྤྱོད་དོ། །དེ་བས་ན་ནམ་
མཁའ་ནི་སེམས་ཅན་ཐམས་ཅད་ཀྱི་སྤྱོད་ཡུལ་ཏེ། འདི་ལྟ་སྟེ། ནམ་མཁའི་ཕྱག་རྒྱ་འདི་ནི་ཆོས་ཐམས་ཅད་ཀྱི་ཕྱག་རྒྱའོ། །དེ་ནས་སྲིང་མོ་དེ་སྟེང་གི་བར་སྣང་ལས་བབས་ནས་ཕྱོགས་གཅིག་ཏུ་པད་མོ་ལ་འདུག་གི། །དེ་བཞིན་གཤེགས་པའི་ཞབས་ལ་མགོ་
བོས་ཕྱག་ཀྱང་མི་འཚལ། ཚིག་ཀྱང་མི་སྨྲའོ། །དེ་ནས་འཇམ་དཔལ་གཞོན་ནུར་གྱུར་པས་སྲིང་མོ་དེ་ལ་འདི་སྐད་ཅེས་སྨྲས་སོ། །སྲིང་མོ་གང་ཁྱོད་ནི་དེ་བཞིན་གཤེགས་པ་ལ་ཕྱག་མི་འཚལ་བར་འདུག་སྟེ་གུས་པ་མ་ཡིན་ནོ། །སྨྲས་པ། འཇམ་དཔལ་དེ་བཞིན་
ཏེ། འཇམ་དཔལ་བདག་ནི་གུས་པ་མ་ལགས་སོ། །དེ་ཅིའི་ཕྱིར་ཞེ་ན། དེ་ལྟར་ཅི་ནས་ཀྱང་བྱེད་པ་ཡང་མེད། མི་བྱེད་པ་ཡང་མེད་པ་དེ་ལྟར་བདག་མ་གུས་མོད་ཀྱི། འཇམ་དཔལ་དེ་བཞིན་ཉིད་ལ་ཕྱག་བགྱི་བར་ནུས་སམ། སྨྲས་པ། དེ་མ་ལགས་སོ། །

སྨྲས་པ། དེ་བཞིན་གཤེགས་པ་ལའང་ཕྱག་འཚལ་བར་མི་ནུས་སོ། །དེ་ཅིའི་ཕྱིར་ཞེ་ན། དེ་ལྟར་དེ་བཞིན་གཤེགས་པ་དང་དེ་བཞིན་ཉིད་དེ་ནི་གཉིས་སུ་མེད་དེ། གཉིས་ལྟ་བུར་དབྱེར་མེད་པའི་ཕྱིར་རོ། །ཡང་སྨྲས་པ། འཇམ་དཔལ་ཁྱོད་ཀྱིས་དེ་བཞིན་གཤེགས་པ་མཐོང་
ངམ། སྨྲས་པ། མཐོང་ངོ་། །སྨྲས་པ། ཇི་ལྟར་མཐོང་། སྨྲས་པ། ཇི་ལྟར་རྡུལ་ཙམ་ཡང་མ་མཐོང་བ་དེ་ལྟར་མཐོང་སྟེ་དེ་འདྲ་བར་མཐོང་ངོ་། །སྨྲས་པ། དེ་ལྟར་མཐོང་ན་ཅི་ཞིག་མཐོང་། སྨྲས་པ། དེ་ལྟར་མཐོང་ན་ཅུང་ཟད་ཀྱང་མ་མཐོང་ངོ་། །སྨྲས་པ། འཇམ་
དཔལ་གང་ཁྱོད་ཅུང་ཟད་ཀྱང་མ་མཐོང་ན་ཅི་ཁྱོད་མིག་རྟུལ་ལམ། སྨྲས་པ། བདག་ནི་མིག་རྟུལ་བ་ཡང་མ་ཡིན། མིག་ལྔ་དང་ལྡན་པའང་མ་ཡིན། མིག་མེད་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། སྲིང་མོ་མིག་ནི་མ་སྐྱེས་པ། ཡང་དག་པར་མ་སྐྱེས་པ། སྒྱུ་མ་
ལྟ་བུ་སྟེ། ཆོས་ཐམས་ཅད་དངོས་པོ་མེད་པའི་ཕྱིར་དེ་ནི་དངོས་པོའམ། དངོས་པོ་མེད་པ་གང་གིས་ཀྱང་བཤད་པར་མི་བྱའོ། །སྨྲས་པ། འཇམ་དཔལ་ཅི་ཆོས་ཐམས་ཅད་དངོས་པོ་མེད་པའམ། སྨྲས་པ། དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ་
ཡིན་ནོ། །སྨྲས་པ། འཇམ་དཔལ་དེ་བཞིན་དུ་ཇི་སྐད་སྨྲས་པ་བཞིན་ནོ། །དེ་ནས་འཇམ་དཔལ་གཞོན་ནུར་གྱུར་པས་སྲིང་མོ་དེ་ལ་འདི་སྐད་ཅེས་སྨྲས་སོ། །ཅིའི་ཕྱིར་ན་སྲིང་མོ་ཁྱོད་བུད་མེད་ཀྱི་ལུས་ལས་སྒྱུར་བར་མི་བྱེད། སྨྲས་པ། འཇམ་དཔལ་དེ་སྐད་མ་སྨྲ།
རྣམ་པར་མ་རྟོག་ཤིག །ཁྱོད་ཀྱིས་ཆོས་གང་ཡང་སྐྱེས་པའམ། བུད་མེད་དུ་གྱུར་པ་དེ་མཐོང་ངམ། སྨྲས་པ། དེ་མ་ཡིན་ནོ། །སྨྲས་པ། འཇམ་དཔལ་ཇི་སྙམ་དུ་སེམས། གཟུགས་སྐྱེས་པའམ། བུད་མེད་ཡིན་ནམ། སྨྲས་པ། མ་ཡིན་ནོ། །ཚོར་
བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་སྐྱེས་པའམ། བུད་མེད་ཡིན་ནམ། སྨྲས་པ། མ་ཡིན་ནོ། །འཇམ་དཔལ་དེ་ཇི་སྙམ་དུ་སེམས། མིག་སྐྱེས་པའམ། བུད་མེད་ཡིན་ནམ། རྣ་བ་དང་། སྣ་དང་། ལྕེ་དང་། ལུས་དང་། ཡིད་སྐྱེས་པའམ། བུད་

མེད་ཡིན་ནམ། སྨྲས་པ། མ་ཡིན་ནོ། །འཇམ་དཔལ་དེ་ཇི་སྙམ་དུ་སེམས། སའི་ཁམས་སྐྱེས་པའམ། བུད་མེད་ཡིན་ནམ། སྨྲས་པ། མ་ཡིན་ནོ། །ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་
ཤེས་པའི་ཁམས་སྐྱེས་པའམ། བུད་མེད་ཡིན་ནམ། སྨྲས་པ། མ་ཡིན་ནོ། །འཇམ་དཔལ་དེ་ཇི་སྙམ་དུ་སེམས། ཡི་གེ་གང་དག་གིས་བཤད་པའི་ཡི་གེ་དག་ཏུ་སྐྱེས་པའམ། བུད་མེད་དུ་དམིགས་སམ། སྨྲས་པ། དེ་ནི་མ་ཡིན་ནོ། །འཇམ་དཔལ་འོ་ན་ད་འཇམ་
དཔལ་ཇི་ལྟར་ན་སྲིང་མོ་ཁྱོད་ཅིའི་ཕྱིར་བུད་མེད་ཀྱི་ལུས་ལས་བསྒྱུར་བ་མེད་ཅེས་དེ་སྐད་སྨྲ། འཇམ་དཔལ་གལ་ཏེ་བདག་བུད་མེད་དུ་དམིགས་སམ། སྐྱེས་པར་མཐོང་ན་ནི་བུད་མེད་ཀྱི་ལུས་དེ་བོར་ཏེ་སྐྱེས་པའི་ལུས་བླང་ན། འཇམ་དཔལ་བདག་ནི་བུད་མེད་དུའང་མི་
དམིགས། སྐྱེས་པར་ཡང་མི་མཐོང་ན་དེ་ཇི་ལྟར་ན་བུད་མེད་ཀྱི་ལུས་ལས་བསྒྱུར་བར་བགྱི། འཇམ་དཔལ་ཆོས་ཀྱི་དབྱིངས་ནི་འབྱུང་བར་ཡང་མི་འགྱུར། འཇིག་པར་ཡང་མི་འགྱུར་རོ། །དེ་བཞིན་ཉིད་དང་། ཡང་དག་པའི་མཐའ་དང་། སྟོང་པ་ཉིད་དང་། ནམ་
མཁའི་དབྱིངས་ཀྱང་འབྱུང་བར་མི་འགྱུར། འཇིག་པར་ཡང་མི་འགྱུར་ན། དེ་ཇི་ལྟར་ན་ཆོས་ཐམས་ཅད་ནམ་མཁའ་དང་མཚུངས་པ་ལ་བུད་མེད་ཀྱི་ལུས་དོར་ཞིང་སྐྱེས་པའི་ལུས་བླང་བར་ནུས་པར་འགྱུར། དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་བླང་བའམ།
མི་བླང་བའི་ཕྱིར་ཆོས་འཆད་པར་མི་འགྱུར་ཏེ། ཡང་འཇམ་དཔལ་མིག་ནི་སྐྱེས་པ་མ་ཡིན། བུད་མེད་མ་ཡིན། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་སྐྱེས་པ་མ་ཡིན། བུད་མེད་མ་ཡིན་ནོ་ཞེས་དེ་བཞིན་གཤེགས་པས་གསུངས་ཏེ།
ཆོས་གང་སྐྱེས་པ་མ་ཡིན། བུད་མེད་མ་ཡིན་པ་དེ་ནི་འབྱུང་བ་ཡང་མེད། འཇིག་པ་ཡང་མེད་དོ། །སྨྲས་པ། སྲིང་མོ་ཁྱོད་ཀྱིས་ཇི་སྲིད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད། སྨྲས་པ། སྒྱུ་མའི་སྐྱེས་བུས་ཇི་སྲིད་ནས་རྣམ་

པར་ཤེས་པའོ། །སྨྲས་པ། སྒྱུ་མའི་སྐྱེས་བུ་ཡོད་དམ། སྨྲས་པ། དེ་མ་ཡིན་ནོ། །སྨྲས་པ། འོ་ན་ཅིའི་ཕྱིར་ན་དེ་སྐད་སྨྲ། ཁྱོད་ཅི་བཟོད་པ་སྐྱེས་སམ། སྨྲས་པ། དེ་མ་ཡིན་ནོ། །སྨྲས་པ། འོ་ན་ཅིའི་ཕྱིར་ན་འཆད་པར་བྱེད། སྨྲས་པ། སྒྱུ་མའི་སྐྱེས་བུས་ཇི་
སྲིད་ནས་བྱང་ཆུབ་ཏུ་སེམས་བསྐྱེད་པ་དེ་སྲིད་ནས་བདག་གིས་བྱང་ཆུབ་ཏུ་སེམས་བསྐྱེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་སྒྱུ་མ་ལྟ་བུ་ཡིན་པའི་ཕྱིར་རོ། །ཡང་ཇི་སྲིད་ནས་ཁྱོད་ཀྱིས་བྱང་ཆུབ་ཏུ་སེམས་བསྐྱེད་ཅེས་དེ་སྐད་སྨྲས་པའི་འདྲི་བ་འདི་ནི་ཚུལ་བཞིན་མ་ཡིན་ནོ། །དེ་ཅིའི་ཕྱིར་
ཞེ་ན། མི་སྐྱེ་བ་ནི་བསྐྱེད་པར་མི་ནུས། དགག་པར་མི་ནུས། གདགས་པར་མི་ནུས། གང་དགག་ཏུ་མེད་པའི་ཆོས་དེ་ནི་སྐྱེད་པའམ། དགག་པར་མི་ནུས་སོ། །སྨྲས་པ། ཚུལ་བཞིན་དུ་འདྲི་བ་ནི་གང་། ཚུལ་དེ་ནི་གང་། སྨྲས་པ། མི་སྐྱེ་བ་ནི་ཚུལ་ཏེ། དེ་འདྲ་
བར་འདི་འདྲ་བ་ནི་ཚུལ་བཞིན་དུ་འདྲི་བའོ། །ཡང་སྲིང་མོ་ཁྱོད་བཟོད་པ་སྐྱེས་སམ། ཞེས་དེ་སྐད་སྨྲ་བ། བདག་ནི་བཟོད་པ་སྐྱེས་པ་ཡང་མ་ལགས། བཟོད་པ་མ་སྐྱེས་པ་ཡང་མ་ལགས་སོ། །དེ་ཅིའི་ཕྱིར་ཞེ་ན། བཟོད་པ་ནི་མི་དམིགས་པའི་ཕྱིར་བསྐྱེད་པར་ཡང་མ་
ལགས། འབྲི་བ་ཡང་མ་ལགས་སོ། །དེ་བས་ན་བདག་བཟོད་པ་སྐྱེས་པ་ཡང་མ་ལགས། བཟོད་པ་མ་སྐྱེས་པ་ཡང་མ་ལགས་སོ། །སྲིང་མོ་བྱང་ཆུབ་སེམས་དཔའ་དོན་གང་གི་དབང་མཐོང་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇུག །སྨྲས་པ།
འཇམ་དཔལ་སེམས་ཅན་ཡོངས་སུ་མྱ་ངན་ལས་བཟླ་བའི་ཕྱིར་བྱང་ཆུབ་སེམས་དཔའ་བྱང་ཆུབ་ཀྱི་ཕྱིར་གོ་ཆ་བགོ་བར་བྱེད་དོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཐམས་ཅད་ཐོག་མ་ནས་མྱ་ངན་ལས་འདས་པའི་ཕྱིར་རོ། །འདས་པའི་ཡང་དག་པར་རྫོགས་པའི་སངས་
རྒྱས་རྣམས་ཀྱིས་ཀྱང་སེམས་ཅན་གང་ཡང་ཡོངས་སུ་མྱ་ངན་ལས་མ་བཟླས་མ་བྱོན་པ་རྣམས་ཀྱང་ཡོངས་སུ་མྱ་ངན་ལས་ཟློ་བར་མི་འགྱུར། ད་ལྟར་བཞུགས་པ་རྣམས་ཀྱང་ཡོངས་སུ་མྱ་ངན་ལས་ཟློ་བར་མི་མཛད་དོ། །དེ་ཅིའི་ཕྱིར་ཞེ་ན། སེམས་ཅན་མེད་པའི་ཕྱིར་རོ། །

སྨྲས་པ། སྲིང་མོ་ཅིའི་ཕྱིར་སངས་རྒྱས་འབྱུང་བར་འགྱུར། འཇམ་དཔལ་མི་བྱ་མི་བྱེད་པའི་ཕྱིར་སངས་རྒྱས་འབྱུང་བར་འགྱུར་རོ། །སྨྲས་པ། ཅིའི་ཕྱིར། སྨྲས་པ། འདི་ལ་ཅུང་ཟད་ཀྱང་བྱར་མེད་དོ། །སྨྲས་པ། སྲིང་མོ་ཅིའི་ཕྱིར་ན་རབ་ཏུ་འབྱུང་
བ་དང་བསྙེན་པར་རྫོགས་ཤིང་དགེ་སློང་གི་དངོས་པོར་འགྱུར། སྨྲས་པ། མཚམས་མེད་པ་ལྔ་ཡོངས་སུ་རྫོགས་པར་བྱ་བའི་ཕྱིར་རོ། །སྨྲས་པ། སྲིང་མོ་དེ་སུ་ཞིག་ཡིད་ཆེས་པར་འགྱུར། སྨྲས་པ། གང་དག་ཡེ་ཤེས་མ་སྐྱེས་པ་མི་འཇིག་པའོ། །སྨྲས་པ།
དེ་ལ་སུ་ཞིག་མོས་པར་འགྱུར། སྨྲས་པ། གང་མོས་པའོ། །སྲིང་མོ་མོས་པ་ལ་ཡོན་ཏན་ཅི་ཞིག་ཡོད། སྨྲས་པ། འཇམ་དཔལ་མོས་པ་ལ་ནི་རྣམ་པར་གྲོལ་བའི་ཡོན་ཏན་མཆིས་སོ། །སྨྲས་པ། སྲིང་མོ་ཁྱོད་ཐོགས་པ་མེད་པའི་ཡོན་ཏན་དང་ལྡན་པ་ངོ་མཚར་ཏོ། །
སྨྲས་པ། འཇམ་དཔལ་དམིགས་པ་ལ་མ་སྤྱོད་ཅིག །འཇམ་དཔལ་གང་དུའང་ཆགས་པ་ཡོད་དམ་ཅི་ན། དེའི་ཕྱིར་བདག་ལ་ཁྱོད་ནི་མ་ཐོགས་པའི་སྤོབས་པ་དང་ལྡན་ནོ་ཞེས་སྨྲ། སྨྲས་པ། དེ་མ་ཡིན་ནོ། །དེ་བས་ན་བདག་ནི་ཐོགས་པ་མེད་པའི་སྤོབས་པ་དང་ལྡན་
པ་མ་ཡིན་ནོ། །སྨྲས་པ། སྲིང་མོ་གང་སྤོབས་པ་ཞེས་བྱ་བ་དེ་ཅི་ལ་སྤོབས་པ་ཞེས་བྱ། སྨྲས་པ། གང་དག་གིས་རྟོགས་པ་དེ་དག་ལ་ནི་སྤོབས་པ་ཡོད་དོ། །སྨྲས་པ། གང་དུ་རྟོགས། སྨྲས་པ། གང་དུ་ཡང་མ་རྟོགས་པས་དེའི་ཕྱིར་རྟོགས་པའོ། །ཆོས་ཀྱི་དབྱིངས་
དང་། དེ་བཞིན་ཉིད་དང་། ཡང་དག་པའི་མཐའ་མ་རྟོགས་པས་དེའི་ཕྱིར་རྟོགས་པ་ཞེས་བྱའོ། །འཇམ་དཔལ་ཡང་གང་དག་གིས་མ་རྟོགས་པ་བདག་གིས་རྟོགས་པའོ། །སྨྲས་པ། གང་དུ་མ་རྟོགས། སྨྲས་པ། ཁམས་གསུམ་དུ་མ་རྟོགས་པ་སྟེ། གང་དག་གིས་
ཁམས་གསུམ་དུ་མ་རྟོགས་པ་དེ་ནི་ཁོང་དུ་མ་ཆུད་པས་རྟོགས་སོ། །སྨྲས་པ། སྲིང་མོ་ཁྱོད་ཀྱིས་ཇི་སྲིད་ནས་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། སྨྲས་པ། གང་གི་ཚེ་ན་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་བྱང་ཆུབ་མངོན་པར་རྫོགས་པར་འཚང་

རྒྱ་བར་འགྱུར་བ་དེའི་ཚེ་ན་བདག་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་མོད་ཀྱི། འཇམ་དཔལ་བྱང་ཆུབ་ལ་མངོན་པར་འཚང་རྒྱ་བའམ། ཐོབ་པར་ནུས་སམ། དེ་ནས་འཇམ་དཔལ་གཞོན་ནུར་གྱུར་པ་ཅང་མི་སྨྲ་བར་གྱུར་པ་དང་། སྲིང་མོ་དེས་འདི་སྐད་ཅེས་སྨྲས་སོ། །འཇམ་
དཔལ་ཅང་མི་སྨྲ་བར་བྱ་བ་དུས་ལ་མ་བབ་ཀྱིས་ཤོད་ཅིག །འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ནི་བཤད་དུ་མེད་ན་དེའི་ཕྱིར་ཅི་བཤད་མ་འཚལ་ཏོ། །དེ་ནས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་
ལྡན་འདས་སྲིང་མོ་འདི་ཡེ་ཤེས་བསམ་གྱིས་མི་ཁྱབ་པ་དང་ལྡན་ཞིང་འདི་འདྲ་བའི་བསྟན་པ་སྟོན་པར་བགྱིད། བགྱིད་པ་ངོ་མཚར་ན། བཅོམ་ལྡན་འདས་སྲིང་མོ་འདིས་ཡུན་ཇི་སྲིད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་