Kinh tạng Tây Tạng (Kangyur Đại Học) — 063_མདོ་སྡེ།_ཛ

ུའི་འདུ་ཤེས་སྐྱེ་ན་དེ་ནི་ལོག་པར་ལྟ་བ་ཞེས་བྱའོ། །དགའ་བོ་གཞན་ཡང་དེ་བཞིན་གཤེགས་པ་ནང་དུ་ཡང་དག་འཇོག་ལ་འཇུག་ན་འདི་ལྟར་ཆོས་ཤོད་ཅིག །ཁྱེད་ཀྱིས་ཆོས་དགོས་པར་གྱིས་ཤིག །ཆོས་ལ་
དགའ་བ་དང་། མགུ་བ་དང་། རངས་པ་དང་། འཚོ་བ་ཡོངས་སུ་དག་པ་དང་། བསླབ་པ་ལ་འདོད་པ་དང་། དད་པ་དང་། དང་བ་མང་བ་དང་། ཁྲེལ་བ་དང་བཅས་པ་དང་། གུས་པ་དང་། བསྟི་སྟང་དང་བཅས་པ་དང་། ཡིད་ལ་སྐྲག་པ་དང་། ཁམས་གསུམ་ཐམས་ཅད་ལས་འབྱུང་
བར་སེམས་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ལ་བསྒོམ་པའི་བརྩོན་འགྲུས་དང་ལྡན་པ་དང་། བཟོད་པ་དང་། ཚིག་བཟང་པོ་དང་། དོན་ལ་རྟོན་ཅིང་ཚིག་ལ་མི་རྟོན་པ་དང་། ཡེ་ཤེས་ལ་རྟོན་ཅིང་རྣམ་པར་ཤེས་པ་ལ་མི་རྟོན་པ་དང་། ངེས་པའི་
མདོ་ལ་རྟོན་གྱི་དྲང་བའི་མདོ་ལ་མི་རྟོན་པ་དང་། ཆོས་ཉིད་ལ་རྟོན་གྱི་གང་ཟག་ལ་མི་རྟོན་པ་དང་། རྣམ་པར་ཐར་པའི་སྒོ་གསུམ་ལ་ཚུལ་བཞིན་ཡིད་ལ་བྱ་བས་རྟོགས་པ་དང་། ཁྱེད་སྟོང་པ་ཉིད་ལ་སྤྱོད་ཡུལ་བར་གྱིས་ཤིག །བདག་ཏུ་འཛིན་པ་ཡོངས་སུ་སྤངས་པ་དང་། མཚན་མའི་
སྤྱོད་ཡུལ་མེད་པ་དང་། མཚན་མ་ཡོངས་སུ་སྤངས་པ་དང་། སྨོན་པ་མེད་པའི་རྣམ་པར་ཐར་པའི་སྒོ་ལ་སྤྱོད་ཡུལ་བ་དང་། སྨོན་ལམ་ལས་འདས་པར་གྱིས་ཤིག །དགའ་བོ་ཁྱོད་ཀྱིས་སེམས་ཅན་རྣམས་ལ་རྟེན་ཅིང་འབྲེལ་པར་འབྱུང་བ་ལས་བརྩམས་ཏེ་ཆོས་ཤོད་ཅིག །རྟེན་

ཅིང་འབྲེལ་པར་འབྱུང་བའི་ཆོས་ཞེས་བྱ་བ་ནི་རྐྱེན་མེད་ན་ཆོས་གང་ཡང་མི་འབྱུང་བ་སྟེ། དེ་ལྟར་ཁྱེད་ཀྱིས་རྟེན་ཅིང་འབྲེལ་པར་འབྱུང་བ་ཁོང་དུ་ཆུད་པར་བྱའོ། །དགའ་བོ་དེ་ལ་རྟེན་ཅིང་འབྲེལ་པར་འབྱུང་བ་ཇི་ལྟ་བ་ཡང་དག་པར་རྟོགས་པ་གང་ཞེ་ན། རྟེན་ཅིང་འབྲེལ་པར་འབྱུང་བ་ནི་མི་
སྐྱེ་བ་ཡིན་ཏེ། དེ་ལ་ཇི་ལྟར་རྟོགས་པར་འགྱུར་ཞེ་ན། མི་སྐྱེ་བ་ལ་བཟོད་པ་ཡིན་ཏེ། དེ་ལ་ཡང་རློམ་སེམས་མི་བྱེད་པ་དེ་ནི་རྟེན་ཅིང་འབྲེལ་པར་འབྱུང་བ་ལ་ཇི་ལྟ་བ་ཡང་དག་པར་རྟོགས་པའོ། །དགའ་བོ་ཁྱོད་ཀྱིས་འཕགས་པའི་བདེན་པའི་རབ་ཏུ་ཐ་དད་པ་ལས་བརྩམས་ཏེ་
སེམས་ཅན་རྣམས་ལ་ཆོས་བཤད་པར་བྱའོ། །དགའ་བོ་འཕགས་པའི་བདེན་པའི་རབ་ཏུ་ཐ་དད་པ་གང་ཞེ་ན། དགའ་བོ་གང་འཕགས་པའི་བདེན་པ་དེ་ཉོན་ཅིག །དགའ་བོ་འཕགས་པའི་བདེན་པ་ནི་བདེན་པ་ཡང་མ་ཡིན་བརྫུན་པ་ཡང་མ་ཡིན་ཏེ། གང་བདེན་པ་ཡང་མ་ཡིན་བརྫུན་པ་
ཡང་མ་ཡིན་པ་དེ་ནི་འཕགས་པའི་བདེན་པ་ཞེས་བྱའོ། །བདེན་པ་དེའི་རབ་ཏུ་ཐ་དད་པ་ཇི་སྙེད་ཅིག་ཡོད་ཅེ་ན། མི་སྐྱེ་བའི་བདེན་པ་དང་། ཇི་ལྟ་བཞིན་གྱི་བདེན་པ་དང་། འདོད་ཆགས་དང་བྲལ་བའི་བདེན་པ་དང་། འགོག་པའི་བདེན་པ་དང་། མྱ་ངན་ལས་འདའ་བའི་བདེན་
པ་དང་། རྣམ་པར་གྲོལ་བའི་བདེན་པ་དང་། དངོས་པོ་མེད་པའི་བདེན་པ་དང་། མ་སྤྲོས་པའི་བདེན་པ་དང་། མི་རྒྱུ་བའི་བདེན་པ་དང་། ལྷུན་གྱིས་གྲུབ་པའི་བདེན་པ་དང་། མི་ལེན་པའི་བདེན་པ་དང་། མི་གཏོང་བའི་བདེན་པ་དང་། མ་བྱས་པའི་བདེན་པ་དང་། མི་བྱེད་པའི་བདེན་པ་
དང་། མི་ལྟུང་བའི་བདེན་པ་དང་། གནས་མེད་པའི་བདེན་པ་དང་། དགའ་བོ་ཆོས་གང་མི་སྐྱེ་བ་དང་། མི་འབྲི་བ་དང་། མི་གནས་པ་དང་། གཞན་དུ་མི་འགྱུར་བ་དེ་ནི་བདེན་པ་ཞེས་བྱ་སྟེ། དགའ་བོ་དེ་ལས་དགོངས་ཏེ་དེ་བཞིན་གཤེགས་པ་དག་འཕགས་པའི་གང་ཟག་ནི་
འདུས་མ་བྱས་པས་བསྐྱེད་པའོ་ཞེས་ཆོས་འཆད་དོ། །གང་སྡུག་བསྔལ་ལ་མི་སྐྱེ་བར་ཤེས་པ་འདི་ནི་འཕགས་པའི་སྡུག་བསྔལ་བདེན་པ་སྟེ་དེ་ནི་སྡུག་བསྔལ་རྟོགས་པའོ། །གང་ཀུན་འབྱུང་བ་མི་རྒྱུ་བར་རྒྱུ་ཡོངས་སུ་ཤེས་པ་འདི་ནི་སྡུག་བསྔལ་གྱི་ཀུན་འབྱུང་བ་རྟོགས་པའོ། །

གང་ཤིན་ཏུ་འགོག་པའི་ཆོས་ཐམས་ཅད་ཟད་པ་ཤིན་ཏུ་མི་སྐྱེ་བ་འདི་ནི་སྡུག་བསྔལ་འགོག་པའོ། །དེ་ལ་ལམ་གང་ཞེ་ན། ལམ་གང་གིས་གཉིས་སུ་མི་བྱེད་ཅིང་དགེ་བ་དང་མི་དགེ་བའི་ཚུལ་གཅིག་ལ་འཇུག་པ་དང་། ཆོས་ཐམས་ཅད་ཀྱི་ཚུལ་གཅིག་རྟོགས་པ་འདི་ནི་ལམ་
ཞེས་བྱའོ། །དགའ་བོ་རྣམ་པར་ཐར་པའི་སྒོ་གསུམ་ལ་ཡང་ལམ་ཞེས་བྱ་སྟེ། ལམ་དེས་སྔོན་གྱི་ཡང་དག་པར་རྫོགས་པའི་སངས་རྒྱས་ཀྱི་ཉན་ཐོས་ཀྱི་དགེ་འདུན་དང་བཅས་པ་དག་འདི་ལྟ་སྟེ། མྱ་ངན་ལས་འདའ་བའི་འགྲོ་བ་བཟང་པོར་གཤེགས་སོ། །དགའ་བོ་འདི་ནི་འཕགས་
པའི་ལམ་ཡན་ལག་བརྒྱད་པ་ཞེས་བྱ་སྟེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་འབད་པ་དང་། ཡང་དག་པའི་དྲན་པ་དང་། ཡང་དག་པའི་
ཏིང་ངེ་འཛིན་ཏོ། །དེ་ནི་མཉམ་པར་བཤད་པ་ཡིན་ཏེ། མཉམ་པ་དེའི་ཕྱིར་ཆོས་གང་ལ་ཡང་རྣམ་པར་རྟོག་པར་མི་བྱེད་པས་ན་དེའི་ཕྱིར་ལམ་ལ་ཞུགས་པ་ཞེས་བྱའོ། །དགའ་བོ་གཞན་ཡང་འདི་སྐད་དུ་ཆོས་ཤོད་ཅིག །ཁྱེད་ཀྱིས་དྲན་པ་ཉེ་བར་གཞག་པའི་རྣལ་འབྱོར་ལ་བརྩོན་པར་
གྱིས་ཤིག །ཁྱེད་ཀྱིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཚུལ་ཇི་ལྟ་བ་བཞིན་དུ་རྟོགས་ཤིང་འགྲོ་བ་ལ་མཁས་པར་གྱིས་ཤིག་ཅེས་དེ་སྐད་དུ་ཆོས་ཤོད་ཅིག །དགའ་བོ་དེ་ལ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཚུལ་ཇི་ལྟ་བ་བཞིན་དུ་རྟོགས་པ་དང་འགྲོ་བ་
ལ་མཁས་པ་གང་ཞེ་ན་འདི་ལྟ་སྟེ། ཡི་གེའི་རང་བཞིན་དང་སྐད་མཉམ་པ་ཉིད་ཡིན་ཏེ། དགའ་བོ་དེ་བཞིན་གཤེགས་པ་ནི་ཡི་གེས་ཆོས་རྣམ་པར་འཇོག་ལ་ཡི་གེ་དེ་དག་ཀྱང་རང་བཞིན་གྱིས་སྟོང་ཞིང་མི་སྐྱེ་མི་འཇིག་པས་བཤད་ཀྱང་དེ་ཙམ་དུ་ཟད། མ་བཤད་ཀྱང་དེ་ཙམ་དུ་ཟད་དེ་
མི་འཕེལ་མི་འབྲི་བས་དེའི་ཕྱིར་ཡི་གེ་དེ་དག་ཡི་གེ་མ་ཡིན་ནོ། །དགའ་བོ་དགེ་སློང་གང་ཡི་གེ་མཉམ་པ་དང་། སྐད་མཉམ་པ་ཤེས་པའི་དགེ་སློང་དེ་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ཚུལ་ཇི་བཞིན་པ་རྟོགས་ཤིང་འགྲོ་བ་ལ་མཁས་པར་རིག་པར་བྱའོ། །དགའ་བོ་གཞན་

ཡང་དེ་བཞིན་གཤེགས་པ་ནང་དུ་ཡང་དག་འཇོག་ལ་ཞུགས་པའི་ཚེ་འཁོར་བཞི་གང་འོང་བ་དེ་དག་ལ་དགའ་བོ་ཁྱོད་ཀྱིས་དུས་གསུམ་མཉམ་པ་ཉིད་ལས་བརྩམས་ཏེ་ཆོས་ཤོད་ཅིག །དགའ་བོ་དུས་གསུམ་མཉམ་པ་ཉིད་གང་ཞེ་ན། དགའ་བོ་འདས་པའི་དུས་ནི་མ་སྐྱེས་པའོ། །མ་
འོངས་པའི་དུས་ནི་མ་མཐོང་བའོ། །ད་ལྟར་ནི་མི་གནས་པ་སྟེ། ཆོས་ཐམས་ཅད་ནི་ཕྱིན་ཅི་ལོག་ལ་གནས་པ་དང་། རང་བཞིན་གྱིས་ཞི་བའོ། །སྟོང་པ་ཉིད་ལ་ཡང་དུས་གང་ཡང་མི་གནས་ཏེ། འདས་པ་ཡང་སྟོང་པ། མ་འོངས་པ་ཡང་སྟོང་པ། ད་ལྟར་ཡང་སྟོང་པའོ། །
ཇི་ལྟར་དུས་སྟོང་པ་ཡིན་པ་དེ་བཞིན་ཉིད་ཀྱང་དེ་དང་འདྲའོ། །ཇི་ལྟར་དུས་སྟོང་པ་དེ་བཞིན་དུ་སེམས་ཅན་ཡང་སྟོང་སྟེ། དགའ་བོ་འདི་ལྟ་སྟེ། སྣ་ཚོགས་སུ་མེད་པ་དང་། ཚུལ་གཅིག་ལ་འཇུག་པ་དེ་ནི་དུས་གསུམ་མཉམ་པ་ཉིད་དོ། །དགའ་བོ་གཞན་ཡང་ཁམས་གསུམ་ཡོངས་
སུ་ཤེས་པའི་ཕྱིར་ཆོས་ཤོད་ཅིག །ཇི་ལྟར་ན་ཁམས་གསུམ་ཡོངས་སུ་ཤེས་པ་ཡིན་ཞེ་ན། དགའ་བོ་འདི་ལ་རྣལ་འབྱོར་པ་རྣལ་འབྱོར་སྤྱོད་པ་འདི་ལྟར་རྟོག་སྟེ། འདོད་པའི་ཁམས་ནི་ཡོངས་སུ་རྟོག་པ་ལས་བྱུང་ངོ་། །གཟུགས་ཀྱི་ཁམས་དང་། གཟུགས་མེད་པའི་
ཁམས་ཀྱང་ཡོངས་སུ་རྟོག་པ་ལས་བྱུང་སྟེ། གང་ཡོངས་སུ་རྟོག་པ་དེ་ནི་དངོས་པོ་མེད་པས་ཁམས་གསུམ་ཐམས་ཅད་རང་བཞིན་མེད་པར་རྟོགས་ནས་རྟོག་པར་མི་བྱེད་རྣམ་པར་རྟོག་པར་མི་བྱེད། ལེན་པར་མི་བྱེད། དོར་བར་མི་བྱེད། འདོད་པར་མི་བྱེད། སྨོན་པར་མི་
བྱེད། སྙེམས་པར་མི་བྱེད། སེམས་པར་མི་བྱེད་དེ། དེས་སེམས་པ་ཐམས་ཅད་དང་བྲལ་བས་འདི་ལྟ་སྟེ། རྣམ་པར་ཐར་པའི་སྒོ་གསུམ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཚེགས་ཆུང་ངུས་མངོན་དུ་བྱེད་དོ། །དགའ་བོ་རྣམ་པར་ཐར་པའི་སྒོ་གསུམ་
མངོན་དུ་བྱ་བ་གང་ཞེ་ན། གང་མཉམ་པ་ཉིད་མ་འཁྲུགས་པ་དང་། ཆོས་གང་ཡང་མི་བྱ་བ་དང་། རྣམ་པར་མི་བྱ་བ་སྟེ། ཆོས་ཐམས་ཅད་ཐོག་མ་ནས་ཟད་པར་ཤེས་ནས་ཡེ་ཤེས་དང་བཅས་པའི་ཡིད་ལ་བྱེད་པ་ཡང་མི་སྐྱེད་དེ། གཅིག་པར་ཡང་མི་བྱེད་སྣ་ཚོགས་སུ་མི་བྱེད་པ་

འདི་ནི་དགའ་བོ་རྣམ་པར་ཐར་པའི་སྒོ་གསུམ་མངོན་དུ་བྱེད་པའི་མཉམ་པ་ཉིད་དོ། །དགའ་བོ་ཁྱོད་ཀྱི་ཕུང་པོ་ལྔ་ཡོངས་སུ་ཤེས་པར་བྱ་བའི་ཕྱིར་ཡང་ཆོས་ཤོད་ཅིག །དགའ་བོ་ཕུང་པོ་ལྔ་ཡོངས་སུ་ཤེས་པར་བྱ་བ་གང་ཞེ་ན། དགའ་བོ་འདི་ལ་རྣལ་འབྱོར་པ་རྣལ་
འབྱོར་སྤྱོད་པ། དགོན་པ་དང་དབྱེ་ལ་གནས་པ་དག་འདི་ལྟར་སློབ་བོ། །དེ་བཞིན་གཤེགས་པས་ཀྱང་འདི་སྐད་གསུངས་ཏེ། གཟུགས་ནི་དབུ་བ་རྡོས་པ་ལྟ་བུ། ཚོར་བ་ནི་ཆུའི་ཆུ་བུར་ལྟ་བུ། འདུ་ཤེས་ནི་སྨིག་རྒྱུ་ལྟ་བུ། འདུ་བྱེད་ནི་ཤིང་ཆུ་སྐྱེས་ལྟ་བུ། རྣམ་པར་
ཤེས་པ་ནི་སྒྱུ་མ་ལྟ་བུའོ་ཞེས་ཉི་མའི་གཉེན་གྱིས་གསུངས་སོ། །དེ་ལ་རྣལ་འབྱོར་པ་རྣལ་འབྱོར་སྤྱོད་པ་དག་འདི་ལྟར་སློབ་སྟེ། གང་དེ་བཞིན་གཤེགས་པས་གསུངས་པའི་དཔེ་དེ་དག་ནི་ཡང་དག་པའོ། །དེ་དག་ནི་དེ་བཞིན་ནོ། །དེ་དག་ནི་གཞན་མ་ཡིན་ཏེ། དབུ་བ་ནི་
སྟོང་པ། འདོད་པའི་ཁམས་སུ་མ་གཏོགས་པ། གཟུགས་ཀྱི་ཁམས་སུ་མ་གཏོགས་པ། གཟུགས་མེད་པའི་ཁམས་སུ་མ་གཏོགས་པའོ། །གང་ཁམས་གསུམ་དུ་མ་གཏོགས་པ་དེ་ནི་གདགས་སུ་མེད་པ་མི་གདགས་པའོ། །དབུ་བ་ལ་ཡང་བདག་གམ་
སེམས་ཅན་དུ་གདགས་སུ་ཡང་མི་ནུས། དེ་ལ་བདག་གམ་སེམས་ཅན་དུ་མི་དམིགས་ཤིང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བདག་མེད་པའི་ཕྱིར་རོ། །ཚོར་བ་དང་། འདུ་ཤེས་དང་། འདུ་བྱེད་ཀྱང་དེ་བཞིན་ནོ། །གང་རྣམ་པར་ཤེས་པ་ནི་སྒྱུ་མ་ལྟ་བུའོ་ཞེས་
གསུངས་པ། སྒྱུ་མ་ནི་སྟོང་པ་སྟེ། འདོད་པའི་ཁམས་སུ་མ་གཏོགས། གཟུགས་ཀྱི་ཁམས་སུ་མ་གཏོགས། གཟུགས་མེད་པའི་ཁམས་སུ་མ་གཏོགས་སོ། །གང་ཁམས་གསུམ་དུ་མ་གཏོགས་པ་དེ་ནི་གདགས་སུ་མེད་པ་མི་གདགས་པའོ། །སྒྱུ་མ་ལ་ཡང་
བདག་གམ་སེམས་ཅན་དུ་གདགས་སུ་མི་ནུས་ཏེ། དེ་ལ་ནི་བདག་གམ་སེམས་ཅན་མེད་ཅིང་མི་དམིགས་པའོ། །དགའ་བོ་ཆོས་ཐམས་ཅད་ནི་བདག་མེད་པའོ་ཞེས་དེ་ལྟར་ཕུང་པོ་ལ་རྟོགས་པ་དེ་ནི་ཕུང་པོ་ཡོངས་སུ་ཤེས་པའོ། །དགའ་བོ་གཞན་ཡང་ཕྱི་དང་ནང་གི་

སྐྱེ་མཆེད་དྲུག་ཡོངས་སུ་ཤེས་པར་བྱ་བ་དང་། སྤང་བར་བྱ་བའི་ཕྱིར་ཁྱོད་ཀྱིས་ཆོས་ཤོད་ཅིག །དེ་ལ་ཕྱི་དང་ནང་གི་སྐྱེ་མཆེད་དྲུག་ཡོངས་སུ་ཤེས་པར་བྱ་བ་གང་ཞེ་ན། དགའ་བོ་མིག་ནི་བདག་དང་བདག་གིས་སྟོང་སྟེ། དེ་རང་བཞིན་གྱིས་དེ་བཞིན་ནོ། །དེ་བཞིན་དུ་རྣ་བ་དང་།
སྣ་དང་། ལྕེ་དང་། ལུས་དང་། ཡིད་བདག་དང་བདག་གིས་སྟོང་སྟེ། རང་བཞིན་གྱིས་དེ་བཞིན་ནོ། །གཟུགས་བདག་དང་བདག་གིས་སྟོང་སྟེ། དེ་ནི་རང་བཞིན་གྱིས་དེ་བཞིན་ནོ། །དེ་བཞིན་དུ་སྒྲ་དང་། དྲི་དང་། རོ་དང་། རེག་དང་། ཆོས་རྣམས་ཀྱང་བདག་དང་བདག་གིས་སྟོང་
སྟེ། དེའང་རང་བཞིན་གྱིས་དེ་བཞིན་ནོ་ཞེས་དེ་བཞིན་གཤེགས་པས་གསུངས་ཏེ། དགའ་བོ་གང་རང་བཞིན་གྱིས་སྟོང་པ་དེ་ལ་ནི་ཆོས་གང་ཡང་གདགས་སུ་མེད་དོ། །དེ་ལ་ནི་མིག་མེད། རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད། གཟུགས་མེད། སྒྲ་མེད།
དྲི་མེད། རོ་མེད། རེག་མེད། ཆོས་མེད་དོ། །དགའ་བོ་གང་ཆོས་དེ་དག་ལ་གཞན་གྱི་དྲིང་མི་འཇོག་པའི་ཡེ་ཤེས་དེ་ནི་ཕྱི་དང་ནང་གི་སྐྱེ་མཆེད་དྲུག་ཡོངས་སུ་ཤེས་པའོ། །དེ་ལ་ཕྱི་དང་ནང་གི་སྐྱེ་མཆེད་དྲུག་སྤང་བ་གང་ཞེ་ན་འདི་ལྟ་སྟེ། ཆོས་ཐམས་ཅད་མི་འཛིན་པ། མི་སྙེམས་
པ། མཚན་མ་མི་རྒྱུ་བ་དེ་ནི་ཕྱི་དང་ནང་གི་སྐྱེ་མཆེད་དྲུག་སྤོང་བའོ། །དེ་ལྟ་བས་ན་དགའ་བོ་ཁྱོད་ཀྱིས་གལ་ཏེ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མའི་འཁོར་བཞི་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་
དང་། མི་དང་། མི་མ་ཡིན་པ་དག་འོང་ན་དེ་དག་ལ་དགའ་བོ་ཁྱོད་ཀྱིས་དེ་སྐད་དུ་ཆོས་ཤོད་ཅིག །ཡང་དེའི་ཚེ་ན་བཅོམ་ལྡན་འདས་ཀྱིས་འདི་འདྲ་བའི་བྱིན་གྱིས་བརླབ་པས་བྱིན་གྱིས་བརླབས་པར་གྱུར་ཏེ། གང་དང་གང་དག་ཆོས་བཤད་པ་འདིའི་སྣོད་དུ་གྱུར་པ་དེ་དག་ནི་ཐོས་སོ། །
ལྷག་མ་དག་ལ་ནི་རྣར་ཡང་མི་གྲག་སྟེ། དེ་བཞིན་གཤེགས་པ་ཅང་མི་གསུང་བར་མཐོང་ངོ་། །སྟོན་པ་འདི་བསྟན་པའི་ཚེ་དགེ་སློང་ལྔ་བརྒྱ་ནི་ཟག་པ་ལས་མ་ལུས་པར་སེམས་རྣམ་པར་གྲོལ་ལོ། །ལྷའི་བུ་བཞི་ཁྲི་ཉིས་སྟོང་ནི་ཆོས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་

པར་དག་གོ། །དགེ་སློང་མ་སུམ་སྟོང་ནི་ཟག་པ་ལས་མ་ལུས་པར་སེམས་རྣམ་པར་གྲོལ་ལོ། །སྲོག་ཆགས་ཁྲག་ཁྲིག་ཕྲག་བདུན་གྱིས་ནི་འདོད་ཆགས་དང་བྲལ་བ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་ལ་དེ་འདྲ་བར་བསྟན་ནས་
ཚེ་དང་ལྡན་པ་དགའ་བོ་ལ་བཀའ་སྩལ་པ། དགའ་བོ་ཁྱོད་ལངས་ཏེ། དབང་པོའི་བྲག་གི་ཕུག་ཏུ་སོང་ལ་དེ་བཞིན་གཤེགས་པའི་རྩྭའི་གདིང་བ་ཐིང་ཤིག །དེ་བཞིན་གཤེགས་པ་ནི་རྩྭའི་གདིང་བ་ལ་བཞུགས་ཏེ། ཟླ་བ་གསུམ་དུ་ནང་དུ་ཡང་དག་འཇོག་ལ་བཞུགས་པར་འགྱུར་རོ། །དེ་སྐད་
ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་གདིང་བར་བགྱིའོ། །གདན་གདིང་བ་ལྟ་ཞིག་ཅིར་འཚལ། བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ཆོག་གིས་དེ་སྐད་མ་ཟེར་ཅིག །
སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་རྩྭའི་གདིང་བ་ལ་དགྱེས་པར་གྱུར་ཏོ། །དགའ་བོ་དེ་བཞིན་གཤེགས་པ་ནི་ཡོ་བྱད་བདེ་བས་བདེ་བ་མ་ཡིན་གྱི། དགའ་བོ་དེ་བཞིན་གཤེགས་པ་ནི་ཆོས་ལ་གནས་པའི་བདེ་བས་བདེ་བ་ཡིན་ནོ། །དེ་
ནས་ཚེ་དང་ལྡན་པ་དགའ་བོས་བཅོམ་ལྡན་འདས་ཀྱི་ལྟར་མཉན་ཏེ། སྟན་ལས་ལངས་ནས་རྩྭའི་ཕྱིར་དེ་བཞིན་གཤེགས་པའི་འཁོར་ནས་བྱུང་ངོ་། །དེ་ནས་དེའི་ཚེ་ལྷའི་བུ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མས་ལྷའི་རྩྭ་འཇམ་པ་རེག་ན་བདེ་བ། གོས་ཀ་ཙ་ལིན་དི་ཀ་དང་འདྲ་བ་དག་ཚེ་དང་
ལྡན་པ་དགའ་བོའི་ལག་ཏུ་བཞག་པར་གྱུར་ཏོ། །དེ་ནས་ཚེ་དང་ལྡན་པ་དགའ་བོས་རྩྭ་དེ་དག་བླངས་ཏེ། དབང་པོའི་བྲག་གི་ཕུག་གང་ན་བ་དེར་སོང་ནས་དབང་པོའི་བྲག་གི་ཕུག་གི་ནང་དུ་ཕྱིན་པ་དང་། བཅོམ་ལྡན་འདས་ཀྱི་རྩྭའི་གདིང་བ་བཏིང་ངོ་། །ཚེ་དང་ལྡན་པ་དགའ་བོས་བཅོམ་ལྡན་འདས་ཀྱི་
རྩྭའི་གདིང་བ་བཏིང་མ་ཐག་ཏུ་དེ་ནས་དེའི་ཚེ་ལྷའི་བུ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མས་རྩྭའི་གདིང་བའི་སྟེང་དུ་ལྷའི་གོས་བཏིང་བར་གྱུར་ཏེ། གོས་མང་པོ་དེ་དག་གིས་འཛམ་བུའི་གླིང་ཡོངས་སུ་གང་ཞིང་བྱུར་བུར་གྱུར་ནས་བཅོམ་ལྡན་འདས་ཀྱི་རྫུ་འཕྲུལ་གྱི་བྱིན་གྱིས་བརླབས་ཀྱིས་གོས་མང་པོ་དེ་

སྙེད་དག་ཀྱང་འཕང་དུ་སོར་བཞི་ཙམ་དུ་གྱུར་ཏོ། །དེ་ནས་བཅོམ་ལྡན་འདས་གདན་ལས་བཞེངས་ཏེ། དབང་པོའི་བྲག་གི་ཕུག་ཏུ་གཤེགས་སོ། །བཅོམ་ལྡན་འདས་གཤེགས་ནས་སིལ་སྙན་ཐམས་ཅད་ཀྱང་མ་དཀྲོལ་བར་སྒྲ་བྱུང་ངོ་། །མེ་ཏོག་གི་ཆར་དག་ཀྱང་བབ་སྟེ། མེ་ཏོག་གི་ཆར་དེ་དག་
གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་དབང་པོའི་བྲག་གི་ཕུག་ཏུ་གཤེགས་ནས་སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲངས་ནས་དྲན་པ་མངོན་པར་བཞག་སྟེ་བཞུགས་སོ། །ཡང་དེའི་ཚེ་ན་བཅོམ་ལྡན་འདས་ཀྱིས་དབང་པོའི་བྲག་གི་
ཕུག་བཻ་དཱུརྱ་ལས་བྱས་པ་ལྟ་བུར་གྱུར་པ་དེ་འདྲ་བའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱས་སོ། །ཡང་དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་སངས་རྒྱས་ཀྱིས་འདུལ་བ། དགེ་བའི་རྩ་བ་ཡོངས་སུ་སྨིན་པ་དེ་དག་གིས་དབང་པོའི་བྲག་གི་ཕུག་ན་དེ་བཞིན་
གཤེགས་པ་བཞུགས་པ་མཐོང་བ་ནི་འདི་ལྟ་སྟེ། མེ་ལོང་ཡོངས་སུ་དག་པའི་ནང་དུ་བཞིན་སྣང་བ་དེ་བཞིན་དུ་སེམས་ཅན་དེ་དག་གིས་དེ་བཞིན་གཤེགས་པ་མཐོང་ངོ་། །ཡང་དེའི་ཚེ་ན་བཅོམ་ལྡན་འདས་ཀྱི་ཕྱག་གཡས་པའི་མཐིལ་ནས་འོད་ཟེར་བརྒྱ་སྟོང་དག་བཏང་སྟེ། འོད་ཟེར་དེ་དག་
གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བར་གྱུར་ནས་ཉི་མ་དང་ཟླ་བ་སེམས་ཅན་དག་གིས་མིག་གིས་མཐོང་བར་གྱུར་ཏོ། །ཡང་དེའི་ཚེ་ན་སེམས་ཅན་ཐམས་ཅད་འདོད་ཆགས་ཀྱི་གནོད་པ་མེད། ཞེ་སྡང་མེད། གཏི་མུག་མེད། ང་རྒྱལ་མེད། གནོང་འཆབ་
པ་མེད། ཕྲག་དོག་མེད། སེར་སྣ་མེད། ཁྲོ་བ་མེད། ཐ་བ་མེད། གནོད་སེམས་མེད་དེ། དེའི་ཚེ་སེམས་ཅན་ཐམས་ཅད་ཀྱང་བྱམས་པའི་སེམས་དང་ལྡན་ཞིང་ཕ་དང་མར་འདུ་ཤེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་གནས་མེད་པ་ལྷུན་གྱིས་གྲུབ་པ། ནམ་
མཁའི་རང་བཞིན་མཚན་མ་མེད་པ་སྤྱོད་པ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་གོ། །བཅོམ་ལྡན་འདས་ཀྱིས་ཏིང་ངེ་འཛིན་དེ་ལས་མཉམ་པར་བཞག་མ་ཐག་ཏུ། དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །དེ་ནས་སྟོང་གསུམ་

གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གནས་པའི་སེམས་ཅན་དེ་དག་ཐམས་ཅད་ཀྱིས་དེ་བཞིན་གཤེགས་པའི་སྤྱོད་ལམ་དང་། རྫུ་འཕྲུལ་གྱི་ཆོ་འཕྲུལ་དང་། ཏིང་ངེ་འཛིན་རྣམ་པར་འཕྲུལ་པ་མཐོང་ངོ་། །མཐོང་ནས་ལྷའི་བུ་བཞི་ཁྲི་ཉིས་སྟོང་དག་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེའི་ཚེ་དེ་དག་ཐམས་ཅད་ཀྱིས་ཀྱང་ལྷའི་མེ་ཏོག་མན་དཱ་ར་བ་དག་ཐོགས་ཏེ་དབང་པོའི་བྲག་གི་ཕུག་ག་ལ་བ་དང་། བཅོམ་ལྡན་འདས་ག་ལ་བ་དེར་གཏོར་ཏོ། །དེ་དག་གཏོར་མ་ཐག་ཏུ་དབང་པོའི་བྲག་གི་ཕུག་ལན་བདུན་བསྐོར་ནས་དེ་ཉིད་དུ་མི་
སྣང་བར་གྱུར་ཏོ། །ཡང་དེའི་ཚེ་བཅོམ་ལྡན་འདས་ཀྱིས་དབང་པོའི་བྲག་གི་ཕུག་ཏུ་སྤྲུལ་པ་སྤྲུལ་ཏེ་དེར་བཞག་ནས། བཅོམ་ལྡན་འདས་འཇུག་སྲེད་ཀྱི་རྒྱལ་པོ་དེ་བཞིན་གཤེགས་པའི་སངས་རྒྱས་ཀྱི་ཞིང་ཀུན་དུ་འོད་ཅེས་བྱ་བའི་འཇིག་རྟེན་གྱི་ཁམས་ག་ལ་བ་དེར་གཤེགས་སོ། །ཡང་
དེའི་ཚེ་ན་ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀུན་དུ་དེ་བཞིན་གཤེགས་པ་གང་གཱའི་ཀླུང་གི་བྱེ་མ་དང་མཉམ་པ་རྙོག་པ་ལྔའི་ཚེ་འཇིག་རྟེན་དུ་བྱུང་བར་གྱུར་ཏེ། དེ་དག་གི་སངས་རྒྱས་ཀྱི་ཞིང་ཡང་ཤིན་ཏུ་སྨད་པ་སྟེ། དཔེར་ན་ད་ལྟར་གྱི་བཅོམ་ལྡན་འདས་
ཤཱཀྱ་ཐུབ་པའི་མི་མཇེད་ཀྱི་འཇིག་རྟེན་གྱི་ཁམས་འདི་ཇི་ལྟ་བ་དེ་བཞིན་དུ་སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་ཤིན་ཏུ་ངན་ཏེ། དེ་བཞིན་དུ་སེམས་ཅན་འདོད་ཆགས་ཀྱི་ཤས་ཆེ་བ་དང་། ཞེ་སྡང་གི་ཤས་ཆེ་བ་དང་། གཏི་མུག་གི་ཤས་ཆེ་བ་དང་། མ་གུས་པ་དང་།
བྱས་པ་མི་གཟོ་བ་དང་། གཡོན་ཅན་དང་། སྒྱུ་ཅན་དང་། དམན་པ་ལ་མོས་པ་ཡིན་ནོ། །སངས་རྒྱས་བཅོམ་ལྡན་འདས་དེ་དག་གི་འཇིག་རྟེན་གྱི་ཁམས་དེ་ན་གནས་པའི་སེམས་ཅན་དེ་དག་ཀྱང་ཤིན་ཏུ་མཐོང་བར་འདོད་པ་མ་ཡིན་ན། ཆོས་ལ་ཡང་འདུན་པར་མི་བྱེད། ཆོས་བཤད་པ་
དགོས་པར་མི་བྱེད། རྣ་བ་ཡང་བླགས་ཏེ་མི་ཉན་ནས་དེ་བཞིན་གཤེགས་པ་དེ་དག་ཀྱང་ཐབས་མཁས་པས་ནང་དུ་ཡང་དག་འཇོག་ལ་ཞུགས་ཏེ། སྤྲུལ་པ་གཞན་དག་སྤྲུལ་ནས་བཅོམ་ལྡན་འདས་འཇུག་སྲེད་ཀྱི་རྒྱལ་པོ་དེ་བཞིན་གཤེགས་པའི་སངས་རྒྱས་ཀྱི་ཞིང་ཀུན་དུ་འོད་ཅེས་བྱ་

བའི་འཇིག་རྟེན་གྱི་ཁམས་སུ་འདི་ལྟ་སྟེ། སངས་རྒྱས་བགྲོ་བ་ཞེས་བྱ་བའི་ཆོས་ཀྱི་རྣམ་གྲངས་བཤད་ཅིང་བསྟན་པའི་ཕྱིར་གཤེགས་པར་གྱུར་ཏོ། །དེའི་ཕྱིར་སངས་རྒྱས་བགྲོ་བ་ཞེས་བྱའོ། །སངས་རྒྱས་བཅོམ་ལྡན་འདས་རྣམས་ནི་སྐྱེ་བོ་ཕྱི་མ་དག་གི་ཕྱིར་སངས་རྒྱས་བགྲོ་བ་མཛད་
པ་མ་གཏོགས་པར་གཞན་ཅུང་ཟད་ཀྱང་མཛད་པ་མེད་དེ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཅི་ནས་ཀྱང་སེམས་ཅན་ཆོས་འདོད་པ་དག་འབྱུང་ཞིང་སངས་རྒྱས་བཅོམ་ལྡན་འདས་ཆོས་ཀྱི་རྗེ་དེ་དག་ཀྱང་ཆོས་བགྲོ་བར་མཛད་ན་བདག་ཅག་གིས་ལྟ་ཅིའི་ཕྱིར་ཆོས་མི་བགྲོ་
སྙམ་དུ་སེམས་པར་འགྱུར་བའི་དོན་དེ་གཟིགས་ནས་སངས་རྒྱས་བཅོམ་ལྡན་འདས་སངས་རྒྱས་ཀྱི་བགྲོ་བ་མཛད་དོ། །ཡང་དེའི་ཚེ་ན་ཀུན་དུ་འོད་ཅེས་བྱ་བའི་འཇིག་རྟེན་གྱི་ཁམས་དེར་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་དག་ཚོགས་པར་གྱུར་ཏོ། །ཅིའི་ཕྱིར་ན།
འཇིག་རྟེན་གྱི་ཁམས་ཀུན་དུ་འོད་ཅེས་བྱ་ཞེ་ན་སངས་རྒྱས་ཀྱི་ཞིང་དེ་ན་ཉན་ཐོས་དང་རང་སངས་རྒྱས་དག་གིས་མིང་ཡང་མི་གྲག་སྟེ། སངས་རྒྱས་ཀྱི་ཞིང་དེ་བྱང་ཆུབ་སེམས་དཔའ་འབའ་ཞིག་གིས་ཡོངས་སུ་གང་ལ། བྱང་ཆུབ་སེམས་དཔའ་དེ་དག་ཀྱང་འོད་རང་ལས་འབྱུང་ཞིང་ལུས་
གསེར་གྱི་ཁ་དོག་ལྟ་བུ་དང་། མཚན་ཡོངས་སུ་རྫོགས་པ་སྣ་ཚོགས་ཀྱི་རིགས་དང་ལྡན་ཞིང་ཀུན་དུའང་བྱང་ཆུབ་སེམས་དཔའ་དེའི་འོད་འབྱུང་བས་ན་དེའི་ཕྱིར་འཇིག་རྟེན་གྱི་ཁམས་ཀུན་དུ་འོད་ཅེས་བྱའོ། །དེ་ལ་སངས་རྒྱས་བགྲོ་བ་གང་ཡིན་ཞེ་ན། འདི་ལྟ་སྟེ། ཆོས་ཐམས་ཅད་ཀྱི་
ཚུལ་ཡང་དག་པ་ཇི་ལྟ་བ་བཞིན་དུ་རྟོགས་པའོ། །དེ་ལ་ཆོས་ཐམས་ཅད་ནི་གང་། ཚུལ་ནི་གང་། རྟོགས་པ་ནི་གང་ཞེ་ན། ཆོས་ཐམས་ཅད་ནི་ཆོས་གཅིག་པ་སྟེ། ཆོས་དེ་ཡང་ཆོས་དང་ཆོས་མ་ཡིན་པར་ཡང་སུས་ཀྱང་བཤད་མི་ནུས་སོ། །དེ་ཅིའི་ཕྱིར་ཞེ་ན། དེ་དག་ཀྱང་མ་
སྐྱེས་པ་མ་བྱུང་བ་སྟེ། དེ་དག་ནི་ཆོས་ཀྱི་སྒྲས་བཤད་མོད་ཀྱི། གང་ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་དང་། ཕུང་པོ་དང་། ཁམས་ཞེས་བྱ་བ་དེ་དག་ནི་ཆོས་ཐམས་ཅད་ཅེས་བྱ་སྟེ། དེ་དག་ཐམས་ཅད་ཀྱང་བརྗོད་པ་ཙམ་དུ་ཟད་དོ། །གང་ཆོས་ཐམས་ཅད་ཀྱི་བྱེད་པ་མེད་

པ། ཡང་དག་པ་ཇི་ལྟ་བ་བཞིན་དུ་རྟོག་པ་དེ་ལ་ནི་ཕུང་པོ་ཡང་མེད། ཁམས་ཀྱང་མེད། སྐྱེ་མཆེད་ཀྱང་མེད། རྟག་པ་ཡང་མེད། ཆད་པ་ཡང་མེད་དེ། དེ་ལྟ་བས་ན་དབུས་ཀྱི་གནས་ཀྱང་མེད་པ་དེ་ནི་ཆོས་ཐམས་ཅད་ཀྱི་མཉམ་པ་ཉིད་བཤད་པ་ཡིན་ནོ། །འདི་ལྟ་སྟེ། ཆོས་
ཐམས་ཅད་རང་བཞིན་སྟོང་པ་ཉིད་དོ་ཞེས་མིང་གིས་བརྗོད་དོ། །མིང་དེ་ཡང་བྱེད་པ་མེད་དེ་མིང་གིས་བརྗོད་དོ། །མིང་དེ་ཡང་རང་བཞིན་གྱིས་མེད་དེ་དེ་ནི་སངས་རྒྱས་བགྲོ་བ་ཞེས་བྱའོ། །ཚུལ་གང་ཞེ་ན། ཚུལ་ཞེས་བྱ་བ་ནི་འདི་ལྟ་སྟེ། འདོད་ཆགས་མེད་པའི་ཚུལ་དང་། མི་སྐྱེ་བའི་ཚུལ་
དང་། དབེན་པའི་ཚུལ་དང་། ཇི་ལྟ་བ་བཞིན་གྱི་ཚུལ་དང་། དེ་བཞིན་ཉིད་ཀྱི་ཚུལ་དང་། ཆོས་ཀྱི་དབྱིངས་ཀྱི་ཚུལ་དང་། ཡང་དག་པའི་མཐའི་ཚུལ་ཏེ། ཆོས་ཐམས་ཅད་སྟོང་ངོ་ཞེས་བྱ་བ་འདི་ནི་ཡང་དག་པའི་ཚུལ་ལོ། །ཆོས་ཐམས་ཅད་ནི་མི་ལྡང་བ། མི་སྐྱོད་པ། སྤྱོད་པ་
མེད་པ། མ་འོངས་པ། མི་འགྲོ་བ། བདག་གི་བ་མེད་པ། བདག་པོ་མེད་པ། ལེན་པ་མེད་པ། ལྟོས་པ་མེད་པ་སྟེ། ཤིན་ཏུ་ཟད་པའི་ཕྱིར་ཟད་པའོ། །མི་སྐྱེ་བའི་ཕྱིར་མི་ཟད་པའོ། །ཇི་ལྟ་བ་བཞིན་དུ་དབེན་པའི་ཕྱིར་ཞི་བའི་རང་བཞིན་ཅན་ནོ། །གནས་དང་བྲལ་བའི་ཕྱིར་
གནས་མེད་པའོ། །ཚུལ་དང་བྲལ་བའི་ཕྱིར་ཚུལ་མེད་པའོ། །འབྱུང་བ་མེད་པ་ལྟུང་བ་མེད་པའོ། །བྲལ་བར་གྱུར་པའོ། །མ་བཏུད་པ་བཏུད་པ་མེད་པའོ། །མ་སྐྱེས་པར་བཤད་པའི་ཕྱིར་མི་སྐྱེ་བ་དང་མཚུངས་པའོ། །མི་འདྲ་བའི་ཕྱིར་མི་མཉམ་པའོ། །གང་ཡི་གེ་ན་
འཇུག་པ་དེ་ནི་ཚུལ་ལོ། །ཆོས་ཐམས་ཅད་ནི་མིང་དང་བྲལ་བ་སྟེ། མ་སོང་བ། མ་འོངས་པ། མ་ཐོབ་པ། མ་སྟོར་བ། མ་ཁྱེར་བ། མ་བླངས་པ། མཉམ་པ་དང་མི་མཉམ་པར་མི་བཤད་པའོ། །མ་མཐོང་བ། མ་ཐོས་པ། མི་དྲན་པ། རྣམ་པར་མི་ཤེས་པ། གཟུང་བ་མ་
ཡིན། རབ་ཏུ་གཟུང་བ་མ་ཡིན། དགའ་བ་མ་ཡིན། ཞེ་སྡང་བ་མ་ཡིན། ཞི་བ་མ་ཡིན། ཞི་བར་བྱེད་པ་མ་ཡིན། གཏོར་བ་མ་ཡིན། མ་གཏོར་བ་མ་ཡིན། རགས་པ་མ་ཡིན། ཕྲ་བ་མ་ཡིན། རིང་བ་མ་ཡིན། ཐུང་བ་མ་ཡིན། དབུང་མེད་པ། མཐའ་མ་མེད་པ། ཐོག་

མ་མེད་པ། འཇིག་པ་མེད་པ། མུ་མེད་པ། བདེ་བ་མེད་པ། མི་བདེ་བ་མེད་པ། ཤེས་པ་མེད་པ། རྒྱུ་བ་མེད་པ། སྤོང་བ་མེད་པ། ལེན་པར་བྱེད་པ་མེད་པ། རེག་པར་བྱེད་པ་མེད་པ། སྟོན་པར་བྱེད་པ་མེད་པ། སེམས་པར་བྱེད་པ་མེད་པ། རྣམ་པར་ཤེས་པར་བྱེད་པ་མེད་པ། རློམ་སེམས་
མེད་པ། ཡིད་ལ་བྱེད་པ་མེད་པ། རྣམ་པར་འཕྲུལ་པ་མེད་པ། སྤང་བ་མེད་པ། མི་སྤང་བ་ཡང་མེད་པར་བརྗོད་པར་བྱའོ། །བསྲུངས་པ་མེད་པ། མ་བསྲུངས་པ་ཡང་མེད་དོ། །མ་སྦས་པ་སྦས་པ་མེད་དོ། །དེ་ལ་ནི་འཐོབ་པ་མེད། འཐོབ་པར་འགྱུར་བའང་མེད་དེ། དེ་ན་དངོས་པོ་ཡང་
མེད། དངོས་པོ་མེད་པ་ཡང་མེད་དོ། །སྒོམ་པ་ཡང་མེད། མི་སྒོམ་པ་ཡང་མེད་དོ། །ཆད་པ་ཡང་མེད། རྟག་པ་ཡང་མེད་དོ། །དེ་ན་ཐོབ་པ་ཡང་མེད། སྟོར་བ་ཡང་མེད་དོ། །འདས་པ་མ་ཡིན། མ་འོངས་པ་མ་ཡིན། ད་ལྟར་མ་ཡིན། ཤེས་པ་མ་ཡིན། མི་ཤེས་པ་ཡང་མ་ཡིན།
རྣམ་པར་ཤེས་པ་མ་ཡིན། རྣམ་པར་མི་ཤེས་པ་ཡང་མ་ཡིན། སྒྲ་མེད། ངག་གི་ལམ་མེད། བརྗོད་པ་མེད། སྐད་མེད། སྨྲ་བ་མེད། ཡི་གེ་མེད། ཡི་གེ་འཇུག་པ་མེད། ཞུགས་པ་མེད། སྟོར་བ་མེད། རིང་བ་མ་ཡིན། ཉེ་བ་མ་ཡིན། ཐོབ་པ་མེད། མ་ཐོབ་པ་ཡང་མེད་པའོ། །དེ་ལ་ནི་
ཡིད་འཇུག་པ་ཡང་མེད། བདག་མེད། སེམས་ཅན་མེད། སྲོག་མེད། གང་ཟག་མེད། ཚུལ་ཁྲིམས་དང་ལྡན་པ་མེད། ངང་ཚུལ་ངན་པ་མེད། བཟོད་པ་དང་ལྡན་པ་མེད། མི་བཟོད་པ་སྤྱོད་པ་མེད། བརྩོན་འགྲུས་མེད། ལེ་ལོ་མེད་དེ་སུས་ཀྱང་མ་ཡིན། སུ་ལའང་མ་
ཡིན། ཅུང་ཟད་ཀྱང་མ་ཡིན། ཅུང་ཟད་མེད་པ་ཡང་མ་ཡིན། ཐར་པ་ཡང་མ་ཡིན། བཅིངས་པ་མ་ཡིན། ནམ་མཁའ་འང་མ་ཡིན། ནམ་མཁའ་མེད་པ་ཡང་མ་ཡིན། མིང་ཙམ་དང་འདྲ་བ། མི་བླང་བ། མ་བླངས་པ། མི་སྐྱེ་བ། མི་འཆི་བ། བཏུལ་བ་མེད་པ། མ་
བཏུལ་བ་ཡང་མེད་པ། བྱ་བ་མེད་པ། མི་བྱ་བའང་མེད་པ། སྡོམ་པ་མེད་པ། ལྟུང་བ་མེད་པ། ལྟུང་བ་གནོད་པ་མེད་པ། གཡོ་བ་མེད་པ། མི་གཡོ་བ་མེད་པ། རྟོག་པ་མེད་པ། རྣམ་པར་རྟོག་པ་མེད་པ། རབ་ཏུ་རྟོག་པ་མེད་པ། ལེན་པ་མེད། དོར་བ་མེད། སྐྱེ་བ་མེད།

ཤི་འཕོ་བ་མེད། སྦྱིན་པ་མེད། ལེན་པ་མེད། གཡེང་བ་མེད། ཞི་བ་མེད། ཞི་བར་བྱས་པ་མེད། ཆོས་ཉིད་མེད། ཆོས་ཉིད་དང་འགལ་བ་མེད། རྡུལ་མེད། རྡུལ་དང་བྲལ་བ་མེད། སྒྲ་འབྱིན་པ་མེད། སྒྲ་འབྱིན་པར་བྱེད་པ་མེད། སྒྲ་འབྱིན་པར་འགྱུར་བ་མེད། འདོད་
ཆགས་པ་མེད། ཞེ་སྡང་བ་མེད། གཏི་མུག་པ་མེད། ཆགས་པ་མེད། ཁོང་ཁྲོ་བ་མེད། ཚུ་རོལ་མེད། ཕ་རོལ་མེད། དབུང་མེད། ཐང་མེད། མཐའ་མེད། སྒྲོལ་བ་མེད། སྒྲོལ་བར་བྱེད་པ་མེད། འགྲོ་བ་མེད། འདུག་པ་མེད། སྨོན་པ་མེད། ཟློག་པ་མེད། འབྱུང་བ་མེད། འཇིག་
པ་མེད། གཅད་པ་མེད། གཞིག་པ་མེད། སྦྱོར་བ་མེད། སྒྲེལ་པ་མེད། བཅིང་བ་མེད། དགྲོལ་བ་མེད། གཟུང་བ་མེད། མི་གཟུང་བ་མེད། འོད་མེད། འོད་མ་ཡིན་པ་མེད། སྲོག་མེད། གསོ་བ་མེད། གང་ཟག་མེད། སེམས་ཅན་མེད། བཏགས་པ་མེད། བཏགས་པ་
དང་བྲལ་བའང་མེད། བརྗོད་པར་བྱ་བའང་མེད། མི་བརྗོད་པར་བྱ་བའང་མེད། དེ་ནི་ཡི་གེ་ལ་འཇུག་པ་ཞེས་བྱ་སྟེ། འཇུག་པ་དེ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་མིང་ལ་མི་ཆགས་སོ། །མ་ཆགས་ན་མ་ཆགས་པའི་ཆོས་ལ་འཇུག་གོ། །ཚུལ་གྱི་གནས་པ་ལ་
ཡང་འཇུག་པར་འགྱུར་རོ། །དེ་ནི་ཚུལ་ཞེས་བྱ་སྟེ། དེ་ཡང་སངས་རྒྱས་བགྲོ་བ་ཡིན་ནོ། །དེ་ལ་ནན་གཏན་གང་ཞེ་ན། ཆོས་ཐམས་ཅད་ནི་ཆོས་ཀྱི་དབྱིངས་གནས་པའི་ཕྱིར་གནས་པ་སྟེ། དེ་ལ་ཆོས་ཉིད་ལ་འཇུག་པ་དེ་ནི་ནན་གཏན་ཞེས་བྱའོ། །དེ་ལ་ཆོས་ཉིད་གང་ཞེ་ན། ཆོས་ཉིད་
ཅེས་བྱ་བ་ནི་འདི་ལྟ་སྟེ། ཆོས་རྣམས་ལ་རློམ་སེམས་མེད་པའོ། །གང་གི་ཚེ་ན་རློམ་སེམས་མེད་པ་དེའི་ཚེ་ན་མངོན་པར་རློམ་སེམས་མེད། གང་གི་ཚེ་མངོན་པར་རློམ་སེམས་མེད་པ་དེའི་ཚེ་རྣམ་པར་རྟོག་པ་མེད། ཡོངས་སུ་རྟོག་པ་མེད་དོ། །གང་གི་ཚེ་ན་ཡོངས་སུ་རྟོག་པ་མེད་པ་
དེའི་ཚེ་རྟོག་པ་ཐམས་ཅད་ཅེས་བྱ་སྟེ། དེ་ནི་མང་དུའང་མི་བྱེད། ཉུང་ངུའང་མི་བྱེད། ལེན་པར་མི་བྱེད། སྤོང་བར་མི་བྱེད་དོ། །དེ་ནི་འདས་པ་ལ་མི་སེམས་མི་རྟོག་གོ། །མ་འོངས་པ་ལ་མ་ཡིན། ད་ལྟར་ལ་མ་ཡིན། གང་ད་ལྟར་མི་གནས་པ་དེ་ཡང་ཡང་དག་པར་རྗེས་སུ་མི་མཐོང་

སྟེ་དེ་ནི་དུས་གསུམ་མཉམ་པ་ཉིད་དོ། །དེ་ལ་གང་སྐྱེ་བ་མེད། གོད་པ་མེད། གནས་པ་མེད། གཞན་དུ་འགྱུར་བ་མེད་པ་དེ་ནི་ཆོས་ཀྱི་དབྱིངས་ཞེས་བྱ་སྟེ། དེ་བཞིན་གཤེགས་པ་དེ་ལ་དགོངས་ནས་དེ་བཞིན་གཤེགས་པ་བྱུང་ཡང་རུང་། མ་བྱུང་ཡང་རུང་སྟེ། ཆོས་ཉིད་ཆོས་ཀྱི་དབྱིངས་
ཆོས་གནས་པ་ཉིད། ཆོས་སྐྱོན་མེད་པ་ནི་གནས་པ་ཉིད་དོ་ཞེས་གསུང་ངོ་། །ཅིའི་ཕྱིར་ན། ཆོས་སྐྱོན་མེད་པ་ཞེས་བྱ་ཞེ་ན། གང་ལ་སྐྱོན་མེད་པ་དེ་ནི་སྐྱོན་མེད་པ་སྟེ། དེའི་ཕྱིར་ན་ཆོས་སྐྱོན་མེད་པ་ཞེས་བྱའོ། །དེ་ལ་སྐྱོན་གང་ཞེ་ན། བདག་ཏུ་བྱེད་པ་ནི་སྐྱོན་ནོ། །བདག་གིར་བྱེད་པ་
ནི་སྐྱོན་ནོ། །རྒྱུར་ལྟ་བ་དང་། མིང་དང་གཟུགས་སུ་འདུ་ཤེས་པ་དང་། ཆོས་ཐམས་ཅད་དུ་འདུ་ཤེས་པ་དང་། འགོག་པ་དང་། སྤྱོད་པ་དང་། མངོན་པར་ཆགས་པའི་རློམ་སེམས་ནི་སྐྱོན་ནོ། །སྙེམས་པ་དང་། སྐྲུན་པ་དང་། སེམས་པ་དང་། རྟོག་པ་དང་། ང་ལྷག་པ་དང་། ཕུང་པོར་
འཛིན་པ་དང་། རྒྱུར་འཛིན་པ་དང་། སྐྱེ་མཆེད་དུ་འཛིན་པ་དང་། བདག་ནི་ཁམས་གསུམ་སྤོང་ངོ་། །བདག་ནི་འདོད་ཆགས་དང་། ཞེ་སྡང་དང་། གཏི་མུག་ཟད་པར་བྱེད་དོ། །བདག་ནི་ལམ་སྒོམ་མོ། །བདག་ནི་རྣམ་པར་ཐར་པའི་སྒོ་རྣམས་མངོན་དུ་བྱེད་དོ། །བདག་ནི་རྒྱུན་དུ་ཞུགས་པའི་འབྲས་བུ་
མངོན་དུ་བྱེད་དོ། །བདག་ནི་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་མངོན་དུ་བྱེད་དོ། །བདག་ནི་དགྲ་བཅོམ་པ་ཉིད་མངོན་དུ་བྱེད་དོ་ཞེས་རྟོག་པ་ནི་སྐྱོན་ནོ། །བདག་ནི་དྲན་པ་ཉེ་བར་གཞག་པ་བཞི་སྒོམ་མོ། །བདག་ནི་ཡང་དག་པར་སྤོང་བ་བཞི་དང་། རྫུ་འཕྲུལ་གྱི་
རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་བསྒོམ་མོ་སྙམ་པ་ནི་སྐྱོན་ནོ། །འཕགས་པའི་བདེན་པ་བཞི་རྟོགས་པར་བྱའོ། །ཉོན་མོངས་པ་འདི་དག་ཟད་པར་བྱའོ་སྙམ་པ་ནི་སྐྱོན་ནོ། །ཆོས་འདི་དག་
བསྒོམ་མོ་སྙམ་པ་ནི་སྐྱོན་ཏེ། དེ་དག་ནི་ཉན་ཐོས་ཀྱི་ཐེག་པ་ལ་གནས་པའི་སྐྱོན་ནོ། །དེ་ལ་བྱང་ཆུབ་སེམས་དཔའི་ཐེག་པ་ལ་གནས་པའི་སྐྱོན་གང་ཞེ་ན། བདག་སངས་རྒྱས་སུ་འགྱུར་བར་བྱའོ་སྙམ་པ་ནི་སྐྱོན་ནོ། །བདག་གིས་བྱང་ཆུབ་ཐོབ་པར་བྱའོ་སྙམ་པ་ནི་སྐྱོན་ནོ། །བདག་གིས་སྦྱིན་པ་

སྦྱིན་ནོ་སྙམ་པ་ནི་སྐྱོན་ནོ། །བདག་གིས་སེར་སྣ་ཚར་གཅད་དོ་སྙམ་པ་ནི་སྐྱོན་ནོ། །བདག་གིས་ཚུལ་ཁྲིམས་ཡོངས་སུ་དག་པར་བྱའོ། །ངང་ཚུལ་ངན་པ་སྤང་བར་བྱའོ་སྙམ་པ་ནི་སྐྱོན་ནོ། །བདག་ཚུལ་ཁྲིམས་དང་ལྡན་པར་བྱའོ་སྙམ་པ་ནི་སྐྱོན་ནོ། །བདག་བཟོད་པ་ལ་གནས་
སོ་སྙམ་པ་ནི་སྐྱོན་ནོ། །བདག་གིས་གནོད་སེམས་དང་ཐ་བའི་ཉེས་པ་རྣམས་སྤང་ངོ་སྙམ་པ་ནི་སྐྱོན་ནོ། །བཟོད་པ་བསྒོམ་མོ་སྙམ་པ་ནི་སྐྱོན་ནོ། །བདག་ནི་བརྩོན་འགྲུས་རྩོམ་པ་ལ་གནས་ཏེ་ལེ་ལོའི་དྲི་མ་སྤང་ཞིང་བརྩོན་འགྲུས་བརྩམ་མོ་སྙམ་པ་ནི་སྐྱོན་ནོ། །བདག་ནི་བསམ་གཏན་ལ་གནས་པས་གནས་
སོ། །ཏིང་ངེ་འཛིན་བསྒོམ་མོ། །བདག་གིས་མཉམ་པར་བཞག་གོ་སྙམ་པ་ནི་སྐྱོན་ནོ། །ལྡང་བར་བྱའོ་སྙམ་པ་ནི་སྐྱོན་ནོ། །བདག་གིས་བསམ་གཏན་ཐོབ་པར་བྱའོ་སྙམ་པ་ནི་སྐྱོན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་མོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབས་ནས་སངས་རྒྱས་
སུ་འགྱུར་བར་བྱའོ་སྙམ་པ་ནི་སྐྱོན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པས་ཕྱུང་ནས་སངས་རྒྱས་ཀྱི་མྱ་ངན་ལས་འདའ་བས་ཡོངས་སུ་མྱ་ངན་ལས་འདའོ་སྙམ་པ་ནི་སྐྱོན་ནོ། །སངས་རྒྱས་ཀྱི་ཡེ་ཤེས་ཡོངས་སུ་བསྒྲུབ་བོ་སྙམ་པ་ནི་སྐྱོན་ནོ། །སངས་རྒྱས་ཀྱི་བསླབ་པ་བསླབ་པོ་སྙམ་པ་ནི་སྐྱོན་ནོ། །དེ་བཞིན་
གཤེགས་པའི་སྟོབས་བཅུ་ཡོངས་སུ་རྫོགས་པར་བྱའོ་སྙམ་པ་ནི་སྐྱོན་ནོ། །སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་རྫོགས་པར་བྱའོ་སྙམ་པ་ནི་སྐྱོན་ནོ། །སྟོབས་རྣམས་དང་། དབང་པོ་རྣམས་དང་། མི་འཇིགས་པ་རྣམས་དང་། སོ་སོ་ཡང་དག་པར་རིག་པ་རྣམས་ཐོབ་
པར་བྱའོ་སྙམ་པ་ནི་སྐྱོན་ནོ། །སྤོབས་པ་བསྒྲུབ་པོ་སྙམ་པ་ནི་སྐྱོན་ཏེ། བྱང་ཆུབ་སེམས་དཔའ་ནི་ཇི་ཙམ་དུ་སྒོམ་པ་དང་། རྟོག་པ་དང་། སྨོན་པ་དང་། ལེན་པ་དང་། འདོར་བ་དེ་ཙམ་དུ་སྐྱོན་ནོ། །མཚན་མ་ཐམས་ཅད་ནི་སྐྱོན་ནོ། །རྟོག་པ་ཐམས་ཅད་ནི་སྐྱོན་ནོ། །འཇུག་པ་ཐམས་ཅད་ནི་
སྐྱོན་ནོ། །དེ་ལ་ཆོས་དེ་དག་མེད་པས་ན་དེའི་ཕྱིར་སྐྱོན་མེད་པ་ཞེས་བྱའོ། །གང་སྐྱོན་མེད་པ་དེ་ནི་ཆོས་ཉིད་ཡིན་པས་དེའི་ཕྱིར་ཆོས་སྐྱོན་མེད་པ་ཞེས་བྱ་སྟེ། དེ་ཡང་སངས་རྒྱས་བགྲོ་བ་ཞེས་བྱའོ། །གཞན་ཡང་སངས་རྒྱས་བགྲོ་བ་ནི་འདི་ལྟ་སྟེ། བྱང་ཆུབ་སེམས་དཔའི་སེམས་དང་པོ་

བསྐྱེད་པ་བསྒྲུབ་པའོ། །དེ་ལ་བྱང་ཆུབ་སེམས་དཔའི་སེམས་དང་པོ་བསྐྱེད་པ་བསྒྲུབ་པ་གང་ཞེ་ན། འདི་ལྟ་སྟེ། མི་སྐྱེ་བ་བསྒྲུབ་པའོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི་སེམས་མེད་པའོ། །གང་སེམས་མེད་པ་དེ་ནི་མི་སྐྱེ་བ་སྟེ། འདི་ལྟ་སྟེ། མ་སྐྱེས་པའི་ཆོས་རྣམས་ལ་
བཟོད་པ་དེ་ནི་སེམས་དང་པོ་བསྐྱེད་པའོ། །གཞན་ཡང་བྱང་ཆུབ་སེམས་དཔའི་སེམས་དང་པོ་བསྐྱེད་པ་ནི་གང་གོ་ཆ་བརྟན་པ་འདི་ཡིན་ཏེ། དེ་ལ་གོ་ཆ་བརྟན་པ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔས་རྡོ་རྗེ་ལྟ་བུའི་སེམས་བསྐྱེད་པར་བྱའོ། །དེ་ལ་རྡོ་རྗེ་ལྟ་བུའི་སེམས་བསྐྱེད་པ་གང་ཞེ་ན།
བཅུ་པོ་འདི་དག་ནི་བྱང་ཆུབ་སེམས་དཔའི་རྡོ་རྗེ་ལྟ་བུའི་སེམས་བསྐྱེད་པའོ། །བཅུ་པོ་གང་ཞེ་ན། འདི་ལྟ་སྟེ། འཁོར་བ་དཔག་ཏུ་མེད་པ་ཡོངས་སུ་ལེན་པའི་གོ་ཆ་དང་། བདོག་པ་ཐམས་ཅད་ཡོངས་སུ་གཏོང་བ་དང་། སེམས་ཅན་ཐམས་ཅད་ལ་སེམས་སྙོམས་པ་དང་། བདག་གིས་
སེམས་ཅན་ཐམས་ཅད་སངས་རྒྱས་ཀྱི་མྱ་ངན་ལས་འདའ་བས་ཡོངས་སུ་མྱ་ངན་ལས་བཟླ་བར་བྱ་སྟེ། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླས་ཀྱང་། སེམས་ཅན་གང་ཡང་ཡོངས་སུ་མྱ་ངན་ལས་འདས་པར་མ་གྱུར་པ་དང་། ཆོས་ཐམས་ཅད་མ་སྐྱེས་པར་ཤེས་ཤིང་བརྩོན་
འགྲུས་མི་གཏོང་བ་དང་། སེམས་ཅན་ཐམས་ཅད་ལ་བྱ་བའི་ཡེ་ཤེས་ཀྱི་སྨོན་ལམ་དང་ལྡན་པ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་སྒྲུབ་པ་དང་། ཚུལ་གཅིག་པར་རྟོགས་པ་དང་། དགའ་བ་དང་མི་དགའ་བ་ལ་མི་ལྟ་བ་དང་། ཆགས་པ་དང་ཁོང་ཁྲོ་བ་སྤངས་པ་སྟེ། དེ་
དག་ནི་བྱང་ཆུབ་སེམས་དཔའི་རྡོ་རྗེ་ལྟ་བུའི་སེམས་བསྐྱེད་པ་ཞེས་བྱའོ། །གཞན་ཡང་བྱང་ཆུབ་སེམས་དཔའ་སེམས་དང་པོ་བསྐྱེད་པ་བསྒྲུབ་པ་ནི་འདི་ལྟ་སྟེ། ཁམས་གསུམ་གྱི་འདུ་ཤེས་བསྐྱེད་པ་ཐམས་ཅད་ཀྱང་མི་བྱེད་ལ་འདུ་ཤེས་མི་སྐྱེད་པར་ཡང་མི་ལྟུང་བའོ། །གཞན་ཡང་
སངས་རྒྱས་བགྲོ་བ་ནི་འདི་ལྟ་སྟེ། ཕ་རོལ་ཏུ་ཕྱིན་པ་དྲུག་གི་རབ་ཏུ་ཐ་དད་པའོ། །ཕ་རོལ་ཏུ་ཕྱིན་པ་དྲུག་གི་རབ་ཏུ་ཐ་དད་པ་གང་ཞེ་ན། སྦྱིན་པའི་ཕ་རོལ་ཏུ་ཕྱིན་པ་ལ་འཇིག་རྟེན་པའི་ཡང་ཡོད། འཇིག་རྟེན་ལས་འདས་པའི་ཡང་ཡོད་དོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་

པའི་བར་དུ་འཇིག་རྟེན་པའི་ཡང་ཡོད། འཇིག་རྟེན་ལས་འདས་པའི་ཡང་ཡོད་དོ། །དེ་ལ་སྦྱིན་པའི་ཕ་རོལ་ཏུ་ཕྱིན་པ་འཇིག་རྟེན་པའི་ཡིན་གྱི་འཇིག་རྟེན་ལས་འདས་པའི་མ་ཡིན་པ་གང་ཞེ་ན། འདི་ལྟར་བྱང་ཆུབ་སེམས་དཔའ་སྦྱིན་པར་བྱེད་པ་སྦྱིན་པའི་བདག་པོ་ནི་དགེ་སྦྱོང་དང་།
བྲམ་ཟེ་བཀྲེན་པ་ཕོངས་པ་སློང་བ་དག་ལ་སྦྱིན་པ་སྦྱིན་པར་བྱེད་དེ་ཟས་འདོད་པ་ལ་ནི་ཟས། སྐོམ་འདོད་པ་ལ་ནི་སྐོམ། ཐེག་པ་འདོད་པ་ལ་ནི་ཐེག་པ། གོས་འདོད་པ་ལ་ནི་གོས་དང་། དེ་བཞིན་དུ་གསེར་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་།
དངུལ་དང་། ས་ལེ་སྦྲམ་དང་། ཆུང་མ་དང་། བུ་ཕོ་དང་། བུ་མོ་དང་། རྒྱལ་སྲིད་ཐམས་ཅད་ཀྱི་བར་དུ་འདོད་པ་ལ་ཡོངས་སུ་གཏོང་ཞིང་དེ་ནི་བདག་གི་ལུས་མ་གཏོགས་པར་ཕྱི་རོལ་གྱི་དངོས་པོ་དུ་མ་ལ་ཡང་མི་ལྟ་སྟེ། ཐམས་ཅད་ཡོངས་སུ་གཏོང་ཞིང་གནས་ནས་ཡོངས་སུ་གཏོང་བར་བྱེད་
དེ་བདག་ནི་སྦྱིན་པར་བྱེད་དོ། །འདི་ནི་ལེན་པར་བྱེད་དོ། །བདག་ནི་སྦྱིན་པ་སྦྱིན་པར་བྱེད་དེ་སེར་སྣ་མེད་དོ། །བདག་ནི་སྦྱིན་པའི་བདག་པོའོ། །བདག་ནི་བདོག་པ་ཐམས་ཅད་གཏོང་བར་བྱེད་དོ། །བདག་ནི་སངས་རྒྱས་རྣམས་ཀྱི་བཀའ་བཞིན་དུ་བྱེད་དོ། །བདག་ནི་སྦྱིན་པའི་ཕ་རོལ་ཏུ་ཕྱིན་པ་ལ་
སྤྱོད་དོ་ཞེས་སེམས་ཅན་ཐམས་ཅད་ལ་དམིགས་པས་སྦྱིན་པ་དེ་བྱིན་ནས་བདག་གི་སྦྱིན་པ་དེས་སེམས་ཅན་ཐམས་ཅད་བདེ་བར་གྱུར་ཅིག་ཅེས་སྦྱིན་པ་དེ་སེམས་ཅན་ཐམས་ཅད་ལ་སྔོ་བར་བྱེད་དོ། །དེ་ནི་ཆགས་པ་རྣམ་པ་གསུམ་གྱིས་ཆགས་པ་ཡིན་ཏེ། གསུམ་གང་ཞེ་ན། བདག་ཏུ་འདུ་
ཤེས་པ་དང་། གཞན་དུ་འདུ་ཤེས་པ་དང་། སྦྱིན་པར་འདུ་ཤེས་པའོ། །དེ་ནི་འཇིག་རྟེན་གྱི་སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་སྟེ། འཇིག་རྟེན་ལས་འདས་པ་ནི་མ་ཡིན་ནོ། །ཅིའི་ཕྱིར་ན། འཇིག་རྟེན་གྱི་ཞེས་བྱ་ཞེ་ན། དེ་ལྟར་འཇིག་རྟེན་གྱི་ལས་འདའ་བར་མི་བྱེད་པས་ན་དེའི་ཕྱིར་
འཇིག་རྟེན་གྱི་ཞེས་བྱའོ། །དེ་ལ་འཇིག་རྟེན་ལས་འདས་པའི་སྦྱིན་པའི་ཕ་རོལ་ཏུ་ཕྱིན་པ་ཡིན་གྱི་འཇིག་རྟེན་པའི་མ་ཡིན་པ་གང་ཞེ་ན། འདི་ལྟ་སྟེ། འཁོར་གསུམ་ཡོངས་སུ་དག་པའོ། །དེ་ལ་འཁོར་གསུམ་ཡོངས་སུ་དག་པ་གང་ཞེ་ན། འདི་ལ་བྱང་ཆུབ་སེམས་དཔའ་སྦྱིན་པ་སྦྱིན་པ་ན།

བདག་ཏུ་མི་དམིགས་ལེན་པར་མི་མཐོང་། དེའི་རྣམ་པར་སྨིན་པ་ལ་དགའ་ཞིང་སྨོན་པར་མི་བྱེད། སྦྱིན་པ་ལ་ཡང་གསོབ་ཏུ་མཐོང་བ་འདི་ནི་འཁོར་གསུམ་ཡོངས་སུ་དག་པའོ། །གཞན་ཡང་བྱང་ཆུབ་སེམས་དཔའ་སྦྱིན་པ་སྦྱིན་པར་བྱེད་པ་ན་སེམས་ཅན་ཐམས་ཅད་ལ་ཡོངས་སུ་བསྔོ་ཞིང་
སེམས་ཅན་ཐམས་ཅད་ཀྱང་སེམས་ཅན་དུ་མི་དམིགས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་ཅིང་དེ་ལ་ཡང་ཆོས་རྡུལ་ཙམ་ཡང་མི་མཐོང་བ་འདི་ནི་འཇིག་རྟེན་ལས་འདས་པའི་སྦྱིན་པའི་ཕ་རོལ་ཏུ་ཕྱིན་པ་ཞེས་བྱའོ། །དེ་ཅིའི་ཕྱིར་ཞེ་ན། དེ་ལྟར་
འཇིག་རྟེན་ལས་འདའ་བར་བྱེད་པའི་ཕྱིར་རོ། །དེ་ལ་འཇིག་རྟེན་གང་ཞེ་ན། འདི་ལྟ་སྟེ། ལེན་པའི་ཕུང་པོ་ལྔའོ། །དེ་དག་འདའ་བར་བྱེད་པ་གང་ཞེ་ན། གང་དེ་ལ་མཉམ་པ་ཉིད་དང་། རློམ་སེམས་མེད་པ་དང་། ཆགས་པ་མེད་པ་དང་། གནས་པ་མེད་པ་སྟེ་འདི་ནི་དེ་དག་འདའ་
བར་བྱེད་པའོ། །དེ་བཞིན་དུ་གནས་པའི་ཚུལ་ཁྲིམས་ཀྱི་བར་དུ་ནི་འཇིག་རྟེན་གྱིའོ། །མི་གནས་པ་ནི་འཇིག་རྟེན་ལས་འདས་པའོ། །དེ་བཞིན་དུ་བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱང་གནས་པ་ནི་འཇིག་རྟེན་གྱིའོ། །མི་གནས་པ་ནི་འཇིག་
རྟེན་ལས་འདས་པའིའོ། །ཡང་འཇིག་རྟེན་གྱི་བྱ་བ་ཐམས་ཅད་ལ་ཡི་གེའི་འབྲུ་དང་། ལག་བརྡ་དང་། གྲངས་དང་། བགྲང་བ་དང་། སྔགས་དང་། གཙུག་ལག་ལ་ཤེས་པ་འདི་ནི་འཇིག་རྟེན་པའི་ཤེས་རབ་ཅེས་བྱའོ། །ཡང་གང་འཇིག་རྟེན་ལས་འདས་པའི་ཤེས་རབ་དེ་ནི་
གདགས་སུ་མེད་པ། བཤད་དུ་མེད་པའོ། །དེ་ལྟར་ཕ་རོལ་ཏུ་ཕྱིན་པ་དྲུག་གི་རབ་ཏུ་ཐ་དད་པ་ཡིན་ཏེ་དེ་ཡང་སངས་རྒྱས་བགྲོ་བ་ཡིན་ནོ། །བཅོམ་ལྡན་འདས་འཇུག་སྲེད་ཀྱི་རྒྱལ་པོ་དེ་བཞིན་གཤེགས་པ་སངས་རྒྱས་ཀྱི་ཞིང་དུ་བསྟན་པ་འདི་བསྟན་པའི་ཚེ། བྱང་ཆུབ་སེམས་དཔའ་
ཁྲག་ཁྲིག་ཕྲག་བདུན་མི་སྐྱེ་བའི་ཆོས་ལ་བཟོད་པ་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཡང་རྣམ་པ་དྲུག་ཏུ་གཡོས་སོ། །གཞན་ཡང་སངས་རྒྱས་བགྲོ་བ་འདི་ནི་འདི་ལྟ་སྟེ། བྱང་ཆུབ་སེམས་དཔའ་རྣམས་ཀྱི་ས་ནས་སར་འཕར་བའོ། །ས་ནས་སར་འཕར་

བ་གང་ཞེ་ན། འདི་ལྟ་སྟེ། ཆོས་ཐམས་ཅད་མི་འཕོ་བ་སྟེ། ཆོས་ཐམས་ཅད་མི་འཕོ་ཞིང་མི་འཇིག་པའོ། །དེ་ས་ལ་ཡང་རློམ་སེམས་མེད། སེམས་པ་མེད་ལ་སའི་སྦྱོང་བ་ཡང་མེད་མོད་ཀྱི། ས་ལ་ཡང་དག་པར་རྗེས་སུ་མཐོང་བ་ཡང་མེད་དོ། །ས་སྦྱོང་བ་གང་
ཞེ་ན། འདི་ལྟ་སྟེ། ས་དང་པོ་ལ་གནས་པའི་བྱང་ཆུབ་སེམས་དཔས་སྦྱོང་བ་བཅུ་བྱའོ། །བཅུ་གང་ཞེ་ན། བསམ་པ་ལྷག་པའི་སྦྱོང་བ་དང་། ཕན་པའི་དངོས་པོ་སྦྱོང་བ་དང་། སེམས་ཅན་ཐམས་ཅད་ལ་སེམས་མཉམ་པའི་སྦྱོང་བ་དང་། དགེ་བའི་བཤེས་གཉེན་ལ་སྟེན་པའི་
སྦྱོང་བ་དང་། ཆོས་ཡོངས་སུ་ཚོལ་བའི་སྦྱོང་བ་དང་། ཕྱི་ཕྱིར་ཞིང་འབྱུང་བ་སྦྱོང་བ་དང་། སངས་རྒྱས་ཀྱི་སྐུ་འདོད་པའི་སྦྱོང་བ་དང་། ཟང་ཟིང་མེད་པའི་ཆོས་ཀྱི་སྦྱིན་པ་འཆད་པའི་སྦྱོང་བ་དང་། ང་རྒྱལ་གྱིས་ཁེངས་པ་འཇོམས་པའི་སྦྱོང་བ་དང་བདེན་པའི་ཚིག་སྦྱོང་བ་སྟེ། སྦྱོང་བ་བཅུ་པོ་འདི་
དག་ནི་བྱང་ཆུབ་སེམས་དཔའི་ས་དང་པོ་ལ་གནས་པའི་བྱང་ཆུབ་སེམས་དཔས་བྱ་བའོ། །བྱང་ཆུབ་སེམས་དཔའི་ས་གཉིས་ལ་གནས་པའི་བྱང་ཆུབ་སེམས་དཔས་ནི་ཕྱི་ཕྱིར་ཞིང་ཆོས་བརྒྱད་ཡིད་ལ་བྱས་ཏེ་དེ་ལ་ཡང་དེས་ནན་ཏན་དུ་བྱའོ། །བརྒྱད་པོ་གང་ཞེ་ན་འདི་ལྟ་སྟེ། ཚུལ་ཁྲིམས་ཡོངས་
སུ་དག་པ་དང་། བྱས་པ་གཟོ་ཞིང་བྱས་པ་ཤེས་པ་དང་། བཟོད་པའི་མཐུ་ལ་གནས་པ་དང་། དགའ་བ་དང་མགུ་བ་མྱོང་བར་བྱེད་པ་དང་། སེམས་ཅན་ཐམས་ཅད་ཡོངས་སུ་མི་གཏོང་བ་དང་། སྙིང་རྗེ་ཆེན་པོ་ལ་མ་རྨོངས་པ་དང་། བླ་མ་ལ་གུས་ཤིང་སྟོན་པར་འདུ་ཤེས་
པ་དང་། ཕ་རོལ་ཏུ་ཕྱིན་པ་ལ་བརྩོན་པས་ཚོལ་བ་སྟེ། ཆོས་བརྒྱད་པོ་དེ་དག་ནི་བྱང་ཆུབ་སེམས་དཔའི་ས་གཉིས་ལ་གནས་པའི་བྱང་ཆུབ་སེམས་དཔས་ཕྱི་ཕྱིར་ཡིད་ལ་བྱ་ཞིང་དེ་དག་ལ་བསླབ་པར་བྱའོ། །གཞན་ཡང་བྱང་ཆུབ་སེམས་དཔའི་ས་གསུམ་ལ་གནས་པའི་བྱང་
ཆུབ་སེམས་དཔས་ཆོས་ལྔ་ལ་གནས་པར་བྱའོ། །ལྔ་གང་ཞེ་ན། འདི་ལྟ་སྟེ། མང་དུ་ཐོས་པས་ཆོག་མི་ཤེས་པ་དང་། ཟང་ཟིང་མེད་པས་ཆོས་ཀྱི་སྦྱིན་པ་འཆད་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བའི་དགེ་བའི་རྩ་བ་ཡོངས་སུ་བསྔོ་བར་བྱེད་པ་དང་། འཁོར་བ་དཔག་ཏུ་

མེད་པས་མི་སྐྱོ་བ་དང་། ངོ་ཚ་བ་དང་འཛེམ་པ་ལ་གནས་པར་བྱ་བ་སྟེ། ཆོས་ལྔ་པོ་དེ་དག་ནི་བྱང་ཆུབ་སེམས་དཔའི་ས་གསུམ་ལ་གནས་པའི་བྱང་ཆུབ་སེམས་དཔས་ཡོངས་སུ་སྦྱང་བར་བྱའོ། །ཡོངས་སུ་རྫོགས་པར་བྱའོ། །བྱང་ཆུབ་སེམས་དཔའི་ས་བཞི་ལ་གནས་པའི་བྱང་ཆུབ་སེམས་
དཔས་ཆོས་བཅུ་ཡོངས་སུ་མི་གཏང་བར་བྱའོ། །བཅུ་གང་ཞེ་ན། དགོན་པར་གནས་པ་དང་། འདོད་པ་ཆུང་བ་དང་། ཆོག་ཤེས་པ་དང་། སྦྱངས་པའི་ཡོན་ཏན་བླངས་པ་མི་གཏོང་བ་དང་། བསླབ་པ་མི་གཏོང་བ་དང་། དུལ་བའི་ས་ལ་གནས་པ་དང་། འདོད་པའི་ཡོན་ཏན་ལ་སྨོད་
པ་དང་། སེམས་བསྐྱེད་པ་སྐྱོ་བ་དང་བཅས་པ་དང་། བདོག་པ་ཐམས་ཅད་གཏོང་ཡང་སེམས་མི་ཞུམ་པ་དང་། དངོས་པོ་ཐམས་ཅད་ལ་མི་ལྟ་བ་སྟེ། ཆོས་བཅུ་པོ་དེ་དག་ནི་བྱང་ཆུབ་སེམས་དཔའི་ས་བཞི་ལ་གནས་པའི་བྱང་ཆུབ་སེམས་དཔས་ཡོངས་སུ་མི་གཏང་བར་བྱའོ། །
བྱང་ཆུབ་སེམས་དཔའི་ས་ལྔ་པ་ལ་གནས་པའི་བྱང་ཆུབ་སེམས་དཔས་ཆོས་བཅུ་གཉིས་ཡོངས་སུ་གཏང་བར་བྱའོ། །བཅུ་གཉིས་གང་ཞེ་ན། འདི་ལྟ་སྟེ། ཁྱིམ་པ་དང་སྟེན་པ་དང་། དགེ་སློང་མ་དང་སྟེ་ན་པ་དང་། རིགས་ལ་ཆགས་པ་དང་། སེར་སྣའི་སེམས་དང་། འདུ་
འཛིའི་གནས་དང་། གནོད་སེམས་དང་། འཐབ་པ་དང་། འཕྱ་བ་དང་། འགྱེད་པ་དང་། རྩོད་པ་དང་། བདག་སྟོད་པ་དང་། གཞན་སྨད་པ་སྤང་བ་དང་། མི་དགེ་བའི་ལས་ཀྱི་ལམ་བཅུ་སྤང་བར་བྱ་བ་དང་། ཆེ་བའི་ང་རྒྱལ་དང་ཁེངས་པ་སྤང་བར་བྱ་བ་དང་། ཕྱིན་ཅི་ལོག་སྤང་བར་བྱ་བ་དང་། ཐེ་ཚོམ་སྤང་བར་བྱ་བ་དང་།
འདོད་ཆགས་དང་། ཞེ་སྡང་དང་། གཏི་མུག་ལ་བཟོད་པར་བྱེད་པ་སྟེ། ཆོས་བཅུ་གཉིས་པོ་དེ་དག་ནི་བྱང་ཆུབ་སེམས་དཔའི་ས་ལྔ་པ་ལ་གནས་པའི་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །གཞན་ཡང་ས་དྲུག་པ་ལ་གནས་པའི་བྱང་ཆུབ་སེམས་དཔས་ཆོས་དྲུག་
ཡོངས་སུ་རྫོགས་པར་བྱའོ། །དྲུག་གང་ཞེ་ན་འདི་ལྟ་སྟེ། ཕ་རོལ་ཏུ་ཕྱིན་པ་དྲུག་གོ། །གཞན་ཡང་ཆོས་དྲུག་རྣམས་མི་བྱའོ། །དྲུག་གང་ཞེ་ན་འདི་ལྟ་སྟེ། ཉན་ཐོས་ཀྱི་སེམས་སུ་མི་བྱའོ། །རང་སངས་རྒྱས་ཀྱི་སེམས་སུ་མི་བྱའོ། །སྐྱོ་བའི་སེམས་སུ་མི་བྱའོ། །སློང་བ་

མཐོང་ནས་ཞུམ་པའི་སེམས་བསྐྱེད་པར་མི་བྱའོ། །ཡོངས་སུ་བཏང་ནས་ཡིད་མི་བདེ་བར་མི་བྱའོ། །སེམས་ཅན་ལ་གནོད་སེམས་མི་བྱ་སྟེ་ཆོས་དྲུག་པོ་དེ་དག་མི་བྱའོ། །གཞན་ཡང་ས་བདུན་ལ་གནས་པའི་བྱང་ཆུབ་སེམས་དཔས་ཆོས་ཉི་ཤུ་མི་བྱའོ། །ཉི་ཤུ་གང་
ཞེ་ན། འདི་ལྟ་སྟེ། བདག་ཏུ་འཛིན་པ་དང་། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། ཆད་པར་འཛིན་པ་དང་། རྟག་པར་འཛིན་པ་དང་། མཚན་མའི་འདུ་ཤེས་དང་། རྒྱུར་ལྟ་བ་དང་། མིང་དང་གཟུགས་ལ་ཆགས་པ་དང་། ཕུང་པོ་ལ་ཆགས་
པ་དང་། ཁམས་ལ་ཆགས་པ་དང་། སྐྱེ་མཆེད་ལ་ཆགས་པ་དང་། ཁམས་གསུམ་ལ་ཆགས་པ་དང་། ཁམས་གསུམ་ལ་ཞེན་པ་དང་། ཁམས་གསུམ་ལ་གནས་པ་དང་། སངས་རྒྱས་ལ་གནས་པའི་ལྟ་བ་ལ་ཆགས་པ་དང་། ཆོས་ལ་གནས་པའི་ལྟ་བ་ལ་ཆགས་
པ་དང་། དགེ་འདུན་ལ་གནས་པའི་ལྟ་བ་ལ་ཆགས་པ་དང་། ཚུལ་ཁྲིམས་ལ་གནས་པའི་ལྟ་བ་ལ་ཆགས་པ་དང་། ཆོས་ནི་སྟོང་པའོ་ཞེས་འཇིགས་པ་སྟེ་ཆོས་ཉི་ཤུ་པོ་དེ་དག་ནི་བྱང་ཆུབ་སེམས་དཔས་མི་བྱའོ། །གཞན་ཡང་བྱང་ཆུབ་སེམས་དཔའ་དེས་ཆོས་ཉི་ཤུ་ཡོངས་སུ་
རྫོགས་པར་བྱའོ། །ཉི་ཤུ་གང་ཞེ་ན། འདི་ལྟ་སྟེ། སྟོང་པ་ཉིད་རྟོགས་པ་དང་། མཚན་མ་མེད་པ་མངོན་དུ་བྱེད་པ་དང་། སྨོན་པ་མེད་པའི་ཤེས་པ་དང་། འཁོར་གསུམ་ཡོངས་སུ་དག་པ་དང་། སེམས་ཅན་ཐམས་ཅད་ལ་སྙིང་བརྩེ་ཞིང་སྙིང་རྗེ་བ་དང་། སེམས་ཅན་དེ་དག་ལ་
མི་བརྙས་པ་དང་། ཆོས་ཐམས་ཅད་ལ་མཉམ་པ་ཉིད་དུ་མཐོང་བ་དང་། ཡང་དག་པའི་ཚུལ་རྟོགས་པ་དང་། མི་སྐྱེ་བའི་ཆོས་ལ་བཟོད་པ་ཐོབ་པ་དང་། ཚུལ་གཅིག་སྟོན་པ་དང་། རྟོག་པ་འཇོམས་པ་དང་། འདུ་ཤེས་ལྡོག་པ་དང་། ཉོན་མོངས་པ་ལྡོག་པ་དང་། ཞི་
གནས་དང་། ལྷག་མཐོང་གི་ས་དང་། སེམས་དུལ་བ་དང་། སེམས་ཞི་བ་དང་། སྨོན་པ་མེད་པ་ཤེས་པ་དང་། མཛའ་བ་ལ་མ་ཆགས་པ་དང་། སེམས་ཅན་ཐམས་ཅད་ལ་སེམས་སྙོམས་པ་སྟེ་ཉི་ཤུ་པོ་དེ་དག་ཡོངས་སུ་རྫོགས་པར་བྱའོ། །གཞན་ཡང་བྱང་ཆུབ་སེམས་དཔའི་

ས་བརྒྱད་པ་ལ་གནས་པའི་བྱང་ཆུབ་སེམས་དཔས་ཆོས་བཞི་བྱའོ། །བཞི་གང་ཞེ་ན་སེམས་ཅན་ཐམས་ཅད་ལ་སེམས་སྙོམས་པར་འཇུག་པ་དང་། མངོན་པར་ཤེས་པས་རྣམ་པར་འཕྲུལ་པ་དང་། སངས་རྒྱས་ཀྱི་ཞིང་སྟོན་ཅིང་དེ་ནི་དེའི་ལྟ་བ་ཡོངས་སུ་རྫོགས་པ་དང་། སངས་རྒྱས་
ལ་བསྙེན་བཀུར་བྱེད་ཅིང་སངས་རྒྱས་ཀྱི་སྐུ་དེ་ལ་རྟོག་པ་སྟེ། བྱང་ཆུབ་སེམས་དཔས་ཆོས་དེ་བཞི་བྱའོ། །གཞན་ཡང་བྱང་ཆུབ་སེམས་དཔས་ཆོས་བཞི་བྱའོ། །བཞི་གང་ཞེ་ན་དབང་པོ་དམ་པ་དང་། དམ་པ་མ་ཡིན་པ་ཤེས་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་།
སྒྱུ་མ་ལྟ་བུའི་ཏིང་ངེ་འཛིན་ལ་ཕྱི་ཕྱིར་ཞིང་མཉམ་པར་འཇོག་པ་དང་། ཇི་ལྟ་ཇི་ལྟར་སེམས་ཅན་རྣམས་མོས་པར་འགྱུར་བ་དེ་ལྟ་དེ་ལྟར་བདག་གིས་ལུས་སྤྲུལ་ནས་ཆེད་དུ་སྲིད་པར་སྐྱེ་བ་ལེན་པ་སྟེ། བྱང་ཆུབ་སེམས་དཔའི་ས་བརྒྱད་ལ་གནས་པའི་བྱང་ཆུབ་སེམས་དཔས་ཆོས་བཞི་
པོ་དེ་དག་ཡོངས་སུ་རྫོགས་པར་བྱའོ། །གཞན་ཡང་བྱང་ཆུབ་སེམས་དཔའི་ས་དགུ་པ་ལ་གནས་པའི་བྱང་ཆུབ་སེམས་དཔས་སྨོན་ལམ་ལ་མཁས་པར་བྱ་སྟེ། ཇི་ལྟར་སྨོན་པར་བྱ་བ་དེ་བཞིན་དུ་སྨོན་ལམ་བསྒྲུབ་པར་བྱའོ། །ལྷ་དང་ཀླུ་དང་གནོད་སྦྱིན་དང་དྲི་ཟ་དང་མི་དང་མི་མ་ཡིན་པའི་
སྐད་ལ་ཤེས་ཤིང་སྤོབས་པ་སྟོན་པ་དང་། མངལ་ནས་འབྱུང་བ་ཕུན་སུམ་ཚོགས་པ་དང་། རིགས་ཕུན་སུམ་ཚོགས་པ་དང་། སྐྱེད་པར་བྱེད་པ་ཕུན་སུམ་ཚོགས་པ་དང་། རུས་ཕུན་སུམ་ཚོགས་པ་དང་། གཡོག་ཕུན་སུམ་ཚོགས་པ་དང་། ཚེ་ཕུན་སུམ་ཚོགས་པ་དང་།
འབྱུང་བ་ཕུན་སུམ་ཚོགས་པ་དང་། བྱང་ཆུབ་ཀྱི་ཤིང་བཀོད་པ་ཕུན་སུམ་ཚོགས་པ་དང་། ཡོན་ཏན་གྱི་ཚོགས་ཐམས་ཅད་ཡོངས་སུ་རྫོགས་པར་བྱའོ། །གཞན་ཡང་བྱང་ཆུབ་སེམས་དཔའ་ས་བཅུ་པ་ལ་གནས་པ་ནི་དེ་བཞིན་གཤེགས་པ་ཉིད་དུ་བཤད་པར་བྱ་སྟེ། བྱང་ཆུབ་སེམས་
དཔའ་རྣམས་ཀྱི་ས་ནས་སར་འཕར་བ་དེ་ནི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་བགྲོ་བའོ།། །།བམ་པོ་གཉིས་པ། གཞན་ཡང་སངས་རྒྱས་བགྲོ་བ་ནི་འདི་ལྟ་སྟེ། ཡི་གེ་མཉམ་པ་ཉིད་དང་། སྐད་མཉམ་པ་ཉིད་དང་།

ཡི་གེའི་རྣམ་པའི་སྒོར་འཇུག་པའོ། །ཡི་གེའི་རྣམ་པའི་སྒོར་འཇུག་པ་གང་ཞེ་ན། ཨའི་སྒོ་ནི་ཆོས་ཐམས་ཅད་མི་སྐྱེ་བ་དང་སྐྱེ་མཆེད་མི་དམིགས་པའི་ཕྱིར་རོ། །རའི་སྒོ་ནི་ཆོས་ཐམས་ཅད་རྡུལ་དང་བྲལ་བའི་ཕྱིར་རོ། །པའི་སྒོ་ནི་ཆོས་ཐམས་ཅད་དོན་དམ་པར་
བསྟན་པའི་ཕྱིར་རོ། །ཙའི་སྒོ་ནི་ཆོས་ཐམས་ཅད་འཆི་འཕོ་དང་སྐྱེ་བ་དང་བྲལ་བའོ། །ནའི་སྒོ་ནི་ཆོས་ཐམས་ཅད་མིང་དང་བྲལ་བའོ། །མིང་གི་རང་བཞིན་ཅན་མ་ཐོབ་པ་མ་སྟོར་བའོ། །ལའི་སྒོ་ནི་ཆོས་ཐམས་ཅད་འཇིག་རྟེན་ལས་འདས་ཤིང་སྲེད་པའི་ལྕུག་མའི་རྒྱུ་དང་རྐྱེན་བཅོམ་པའི་
ཕྱིར་རོ། །དའི་སྒོ་ནི་ཆོས་ཐམས་ཅད་དུལ་བ་དང་དུལ་ནས་ཡོངས་སུ་ཆད་པའི་ཕྱིར་རོ། །བའི་སྒོ་ནི་ཤིན་ཏུ་དབེན་པའི་ཕྱིར་ཆོས་ཐམས་ཅད་བཅིངས་པ་དང་བྲལ་བའོ། །རའི་སྒོ་ནི་ཆོས་ཐམས་ཅད་གཟུགས་ལ་སོགས་པ་སྟོང་པ་ཉིད་ཀྱི་ཕྱིར་རོ། །སའི་སྒོ་ནི་ཆོས་ཐམས་ཅད་ཆགས་
པ་མི་དམིགས་པའི་ཕྱིར་ཆགས་པ་མེད་དགྲོལ་བ་མེད་པའོ། །བའི་སྒོ་ནི་ཆོས་ཐམས་ཅད་ངག་གི་ལམ་གྱི་སྒོ་ཡོངས་སུ་ཆད་པའོ། །ཏའི་སྒོ་ནི་ཆོས་ཐམས་ཅད་དེ་བཞིན་ཉིད་ལས་མི་གཡོ་བའོ། །ཡའི་སྒོ་ནི་ཆོས་ཐམས་ཅད་ཇི་ལྟ་བཞིན་གྱི་ཕྱིར་རོ། །སྟའི་སྒོ་ནི་ཆོས་ཐམས་ཅད་
ལ་ཁེངས་པ་མེད་དེ་ཆགས་པ་མེད། ཞེ་སྡང་བ་མེད་པའོ། །ཀའི་སྒོ་ནི་ཆོས་ཐམས་ཅད་དག་ལ་བྱེད་པོ་བ་མེད་པའོ། །སའི་སྒོ་ནི་ཆོས་ཐམས་ཅད་མཉམ་པ་ཉིད་ལས་མི་ལྡོག་པའོ། །མའི་སྒོ་ནི་ཆོས་ཐམས་ཅད་དྲི་མ་དང་བྲལ་བ་ཤིན་ཏུ་དྲི་མ་མེད་པ། སྐྱོན་མེད་པ། རྙོག་
པ་མེད་པའོ། །གའི་སྒོ་ནི་ཆོས་ཐམས་ཅད་གཟུང་བ་དང་། གཟུང་བ་མེད་པའི་མི་དམིགས་པའི་ཕྱིར་ཟབ་པ། ནམ་མཁའི་ངོས་དང་འདྲ་བ་ཤིན་ཏུ་དབེན་པའོ། །སྠའི་སྒོ་ནི་ཆོས་ཐམས་ཅད་ཐང་དང་བྲལ་བ། རླན་པ་དང་བྲལ་བ་སྟེ། ཚུ་རོལ་དང་ཕ་རོལ་མེད་པའོ། །ཛའི་
སྒོ་ནི་ཆོས་ཐམས་ཅད་སྐྱེ་བ་དང་། རྒ་བ་དང་། འཆི་བ་མི་དམིགས་པའི་ཕྱིར་རོ། །ཤྭའི་སྒོ་ནི་ཆོས་ཐམས་ཅད་དབུགས་དང་དབུགས་ནང་དུ་རྔུབ་པ་དང་། དབུགས་ཕྱིར་འབྱིན་པ་དང་། དབུགས་ནང་དུ་འགྲོ་བ་དང་། དབུགས་ཕྱིར་འགྲོ་བ་དང་བྲལ་བའོ། །དྷཱའི་སྒོ་ནི་ཆོས་

ཐམས་ཅད་ཆོས་ཀྱི་དབྱིངས་ལ་གནས་པའི་ཕྱིར་རོ། །ཤའི་སྒོ་ནི་ཆོས་ཐམས་ཅད་ཞི་གནས་ཡིན་པ་དང་། དུལ་བ་དང་། ཞི་བའི་སར་གྱུར་པའི་ཕྱིར་རོ། །ཁའི་སྒོ་ནི་ཆོས་ཐམས་ཅད་རྩ་བ་དང་གནས་མེད་པའི་ཕྱིར་ནམ་མཁའ་དང་འདྲའོ། །ཀྵའི་སྒོ་ནི་ཆོས་ཐམས་ཅད་ཤིན་ཏུ་
ཟད་པའི་ཕྱིར་ཟད་པ་ལས་མི་ལྡོག་པ་དང་། མི་གཡོ་བའི་ཕྱིར་གནས་པ་དང་མི་འགུལ་བའོ། །ཛའི་སྒོ་ནི་ཆོས་ཐམས་ཅད་ཡེ་ཤེས་མི་རྒྱུ་བའི་ཕྱིར་མི་ཤེས་པ། རྣམ་པར་མི་ཤེས་པ། མི་སེམས་པ། མི་མཐོང་བའོ། །ཨའི་སྒོ་ནི་ཆོས་ཐམས་ཅད་དེ་བཞིན་མ་ཡིན་པའི་ཚིག་བླ་
དགས་ཀྱི་ཕྱིར་ལྡན་པ་མ་ཡིན། བྲལ་བ་མ་ཡིན། ཀུན་ལྡན་པ་མ་ཡིན། ཀུན་བྲལ་བ་མ་ཡིན་པའོ། །བྷའི་སྒོ་ནི་ཆོས་ཐམས་ཅད་ཁུར་དང་བྲལ་བའོ། །ཚའི་སྒོ་ནི་ཆོས་ཐམས་ཅད་མདོག་ཀྱང་མེད་དེ། འདི་ལྟ་སྟེ་སྟོང་པའོ། །སྨའི་སྒོ་ནི་ཆོས་ཐམས་ཅད་གླེན་པའི་ཕྱིར་དྲན་པ་ཞེས་
མི་བྱ། རྨོངས་པ་ཞེས་མི་བྱའོ། །སྭའི་སྒོ་ནི་ཆོས་ཐམས་ཅད་རང་བཞིན་སྟོང་པ་ཉིད་དང་སྐད་སྟོང་པ་ཉིད་ཀྱི་ཕྱིར་རོ། །བྷའི་སྒོ་ནི་ཆོས་ཐམས་ཅད་སྐད་སྟོང་པ་ཉིད་ཀྱི་ཕྱིར་རོ། །སའི་སྒོ་ནི་ཆོས་ཐམས་ཅད་རྟག་ཏུ་ཟད་པ་ཆད་པ་དང་རྟག་པ་ཡོངས་སུ་ཆད་པའོ། །གྷའི་སྒོ་ནི་ཆོས་ཐམས་ཅད་
སྟུག་པོའི་མི་དམིགས་པའི་ཕྱིར་གདེག་པ་མེད། གཏོར་བ་མེད་པའོ། །ཨེའི་སྒོ་ནི་ཆོས་ཐམས་ཅད་དབེན་པའི་ཕྱིར་མི་གནས་པའི་ཚུལ་གྱིས་ཤིན་ཏུ་གནས་པའོ། །ནའི་སྒོ་ནི་ཆོས་ཐམས་ཅད་རྡུལ་ཕྲ་རབ་མི་དམིགས་པའི་ཕྱིར་ཆོས་ཐམས་ཅད་མ་གཏོགས་པ། མི་འགྲོ་བ། མི་
འོང་བ། མི་འགྲེང་བ། མི་འདུག་པ། མི་ཉལ་བ། རྣམ་པར་མི་རྟོག་པའོ། །སྥའི་སྒོ་ནི་ཆོས་ཐམས་ཅད་ཁྱབ་པ་དང་བྲལ་བ་སྟེ། གང་ཁྱབ་པར་བྱེད་པའམ། གང་གིས་ཁྱབ་པར་བྱེད་པའམ། གང་ལ་ཁྱབ་པར་བྱེད་པ་མེད་དེ། མ་ཁྱབ་པ་ནམ་མཁའ་དང་འདྲ་བའོ། །སྐའི་སྒོ་
ནི་ཆོས་ཐམས་ཅད་ཕུང་པོ་མ་དམིགས་པའི་ཕྱིར་རོ། །ཛྭའི་སྒོ་ནི་ཆོས་ཐམས་ཅད་རིམས་ནད་དང་བྲལ་བ། རིམས་མེད་པ། ནད་མེད་པའོ། །སྟྱའི་སྒོ་ནི་ཆོས་ཐམས་ཅད་ཤིན་ཏུ་བཏང་བས་བཏང་བའོ། །བའི་སྒོ་ནི་ཆོས་ཐམས་ཅད་ལམ་ཆད་པའི་ཕྱིར་ཤིན་ཏུ་མྱ་ངན་ལས་འདས་པ། མྱ་

ངན་ལས་འདའ་བ་དང་འདྲ་བའོ། །ཧའི་སྒོ་ནི་ཆོས་ཐམས་ཅད་མཐའ་ལ་གནས་པས་འཆི་འཕོ་བ་མེད་པ། སྐྱེ་བ་མེད་པའོ། །འདི་ལྟ་སྟེ། ཧའི་ཕ་རོལ་ན་ཡི་གེ་མེད་དེ། འདི་ལ་མིང་ངམ། རང་བཞིན་འགའ་ཡང་མེད་པ། སྨྲར་མེད་པ། བརྗོད་དུ་མེད་པ། བསྟན་དུ་མེད་
པ། བྲིར་མེད་པ། བཀླག་ཏུ་མེད་པའོ། །ཇི་ལྟར་དེ་མ་བྱས་པ་དེ་བཞིན་དུ་ཆོས་ཐམས་ཅད་ལ་རྟོགས་པར་བྱའོ། །གཟུངས་ལ་འཇུག་པ་འདི་ནི་ཡི་གེ་ཨ་ལ་སོགས་པ་བཤད་པ་ལ་འཇུག་པ་སྟེ། འཇུག་པ་དེ་ལ་གནས་ན་བྱང་ཆུབ་སེམས་དཔའ་ཡི་གེ་ཐམས་ཅད་ལ་མཁས་པ་ཤེས་
པར་འགྱུར་རོ། །ཆོས་ཐམས་ཅད་ཀྱང་ཆོས་མཉམ་པ་ཉིད་དང་སྦྱོར་བར་འགྱུར་རོ། །སྐད་ལ་ཤེས་པ་ཡང་ཐོབ་པར་འགྱུར་རོ། །བྱང་ཆུབ་སེམས་དཔའ་གང་ཡང་བློ་ཚུལ་དང་ལྡན་པས་ཡི་གེ་ལ་འཇུག་པའི་ཕྱག་རྒྱ་ཨའི་སྒོའི་ཚིག་འདི་ཉན་ཏམ། ལེན་ཏམ། འཛིན་ཏམ། ཀློག་གམ།
གཞན་དག་ལ་འཆད་ན། དེ་ལ་ཡོན་ཏན་ཉི་ཤུ་པོ་འདི་དག་ཡོད་པར་བལྟའོ། །ཉི་ཤུ་གང་ཞེ་ན། དྲན་པ་དང་ལྡན་པ་ཡིན། རྟོགས་པ་དང་ལྡན་པ་ཡིན། བློ་གྲོས་དང་ལྡན་པ་ཡིན། བློ་དང་ལྡན་པ་དང་། སྤོབས་པ་དང་ལྡན་པ་དང་། གཟུངས་ཀྱང་ཚེགས་ཆུང་ངུས་ཐོབ་པར་འགྱུར་བ་
དང་། ཐེ་ཚོམ་མེད་པར་འགྱུར་ཞིང་ནེམ་ནུར་མེད་པར་འགྱུར་བ་དང་། གཞན་ལས་ཚིག་འཇམ་པོ་ཐོས་ནས་ཆགས་པའི་སེམས་མི་སྐྱེད་ཅིང་གཞན་ལས་ཚིག་རྩུབ་པོ་ཐོས་ནས་ཞེ་སྡང་བའི་སེམས་མི་སྐྱེད་ལ། ཁེངས་པ་དང་འདུད་པར་མི་འགྱུར་བ་དང་། དགྲ་ལས་རྒྱལ་བར་འགྱུར་བ་དང་།
སྐད་ལ་མཁས་པ་དང་། ཕུང་པོ་ལ་མཁས་པ། ཁམས་ལ་མཁས་པ། སྐྱེ་མཆེད་ལ་མཁས་པ་དང་། རྒྱུ་ལ་མཁས་པ་དང་། རྐྱེན་ལ་མཁས་པ་དང་། ཆོས་ཀྱི་དབྱིངས་ལ་མཁས་པ་དང་། དབང་པོ་དམ་པ་དང་། དམ་པ་མ་ཡིན་པ་ལ་མཁས་པ་དང་། ཕ་རོལ་གྱི་
སེམས་ཤེས་པ་ལ་མཁས་པ་དང་། ཆོས་འཆད་པ་ལ་མཁས་པ་དང་། གནས་དང་གནས་མ་ཡིན་པའི་ཡེ་ཤེས་ལ་མཁས་པ་དང་། ཐབས་མཁས་པ་དང་། འོང་བ་དང་། འགྲོ་བ་ལ་མཁས་ཤིང་སྤྱོད་ལམ་ལ་མཁས་པ་དང་། ངོ་ཚ་བ་དང་འཛེམ་པ་ལ་མཁས་པ་ཡང་

ཐོབ་པར་འགྱུར་རོ། །བུད་མེད་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་ཡི་གེའི་ཚུལ་གྱི་སྒོའི་ཕྱག་རྒྱ་ཨ་བཤད་པ་ལ་འཇུག་པ་འདི་ཉན་པར་འགྱུར། ལེན་པར་འགྱུར། འཛིན་པར་འགྱུར། ཀློག་པར་འགྱུར། གཞན་ལ་རྒྱ་ཆེར་སྟོན་པར་འགྱུར་
ན་ཐོས་མ་ཐག་ཏུ་ཡོན་ཏན་བཅུ་ཐོབ་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། བུད་མེད་ཀྱི་ལུས་ཐ་མར་འགྱུར། མི་ཁོམ་པ་ཡོངས་སུ་སྤངས་པར་འགྱུར། དལ་འབྱོར་ཐོབ་པར་འགྱུར། སངས་རྒྱས་འབྱུང་བ་མཐོང་ནས་དད་པར་འགྱུར། དད་ནས་བཀུར་སྟི་བྱེད་པར་འགྱུར།
དེ་བཞིན་གཤེགས་པས་དེའི་བསམ་པ་མཁྱེན་ནས་ཆོས་སྟོན་པར་འགྱུར། ཆོས་དེ་ཐོས་ནས་བཟོད་པ་ཐོབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། དེ་ཡང་སངས་རྒྱས་བགྲོ་བའོ། །གཞན་ཡང་སངས་རྒྱས་བགྲོ་བ་ནི་འདི་
ལྟ་སྟེ། སངས་རྒྱས་ཀྱི་མཉམ་པ་ཉིད་འཁོར་གསུམ་ཡོངས་སུ་དག་པ་མི་སྐྱེ་བའི་ཚུལ་རྟོགས་པ། ཇི་ལྟ་བ་བཞིན་དུ་ཆོས་འཆད་པ། ཁམས་གསུམ་པ་ཡོངས་སུ་ཤེས་པ། འདོད་ཆགས་དང་། ཞེ་སྡང་དང་། གཏི་མུག་གི་རང་བཞིན་ཡོངས་སུ་ཤེས་པ། ཆད་པ་མ་ཡིན་པ།
རྟག་པ་མ་ཡིན་པ། མི་གནས་པ། མི་འགྲོ་བ། ཐེག་པ་གསུམ་གྱི་ཚུལ་གཅིག་པ་ལ་འཇུག་པ། ཚུལ་གཅིག་པ་རྟོགས་པ། ཆོས་ཐམས་ཅད་བགྲོ་བར་མི་བྱ་བ། བརྩད་པར་མི་བྱ་བ། མི་མཉམ་པ། མི་མཉམ་པ་དང་མཉམ་པ། མ་འོངས་པ། མི་འགྲོ་བ། མི་
རྒྱུ་བ། མཚན་ཉིད་མེད་པ། སངས་རྒྱས་རྣམས་ཀྱི་ཆོས་གང་ཡང་མངོན་པར་རྫོགས་པར་སངས་མ་རྒྱས་པ། མ་མཁྱེན་པ། སངས་རྒྱས་རྣམས་ཀྱིས་ཡེ་ཤེས་དང་ཡེ་ཤེས་མ་ཡིན་པར་མ་དམིགས་པ། ཉོན་མོངས་པ་སྤངས་པ་མ་ཡིན་པ། རྣམ་པར་དག་པ་མངོན་དུ་བྱས་པ་མ་
ཡིན་པ། མ་ཐོབ་པ། མངོན་པར་མི་བྱ་བ། བསྒོམ་པ་མ་ཡིན་པ། རྟོགས་པ་མ་ཡིན་པ། སངས་རྒྱས་རྣམས་ཀྱིས་མ་དམིགས་པ། མ་བཤིག་པ། སངས་རྒྱས་རྣམས་ཀྱིས་སངས་རྒྱས་འབྱུང་བར་མ་དམིགས་པ། ཆོས་མ་ཡིན་པ། དགེ་འདུན་མ་ཡིན་པ། སངས་

རྒྱས་རྣམས་ཀྱིས་སེམས་ཅན་དག་མ་བཀྲོལ་མ་བཅིངས་པའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཐོག་མ་ནས་རྣམ་པར་དག་པའི་ཕྱིར་ཏེ། སངས་རྒྱས་རྣམས་ཀྱིས་ཆོས་གང་ཡང་མ་གཟིགས་མ་གསན། མ་དགོངས་མ་མཁྱེན་ཏེ། སངས་རྒྱས་རྣམས་ཀྱིས་
མ་བཤད་མ་གསུངས་སོ། །སངས་རྒྱས་བཅོམ་ལྡན་འདས་དག་མི་འཆད་མི་གསུང་འཆད་པར་མི་འགྱུར་རོ། །སངས་རྒྱས་དག་ནི་ཡེ་ཤེས་དང་ལྡན་པ་མ་ཡིན། མི་ལྡན་པའང་མ་ཡིན། སྦྱིན་གནས་མ་ཡིན། སྦྱིན་གནས་མ་ཡིན་པ་ཡང་མ་ཡིན་ཏེ། སྦྱིན་པ་སྦྱོང་བར་ཡང་མི་
མཛད་དོ། །སངས་རྒྱས་དག་ནི་སྤྱོད་པར་མི་མཛད་ཡོངས་སུ་སྤྱོད་པར་མི་མཛད་དོ། །སངས་རྒྱས་དག་ལ་ནི་སྐུ་གང་ཡང་མེད་དོ། །སངས་རྒྱས་དག་ལ་ནི་གཟུགས་སུ་མི་བལྟ། ཆོས་སུ་མ་ཡིན། མཚན་དུ་མ་ཡིན། ཆོས་ཀྱི་དབྱིངས་སུ་མ་ཡིན་ནོ། །སངས་རྒྱས་དག་ནི་བྱུང་
བ་མ་ཡིན་ནོ། །འགགས་པ་མ་ཡིན། མྱ་ངན་ལས་འདས་པ་མ་ཡིན། མྱ་ངན་ལས་མ་འདས་པ་ཡང་མ་ཡིན། ཡོངས་སུ་མྱ་ངན་ལས་འདའ་བར་འགྱུར་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཐོག་མ་ནས་ཡོངས་སུ་མྱ་ངན་ལས་འདས་པའི་ཕྱིར་ཏེ། སངས་
རྒྱས་དག་ནི་གཅིག་པུ་ཡང་མ་ཡིན། སྐྱེ་བོ་མང་པོའི་ནང་དུ་གཤེགས་པ་ཡང་མ་ཡིན་ནོ། །སངས་རྒྱས་དག་ནི་སུས་ཀྱང་མ་མཐོང་མ་ཐོས། མ་མཆོད་མཆོད་པར་མི་འགྱུར་རོ། །སངས་རྒྱས་དག་ནི་ཆོས་གང་ལ་ཡང་གཅིག་པའམ། ཐ་དད་པར་མི་མཛད་དོ། །སངས་རྒྱས་
དག་གིས་ནི་བྱང་ཆུབ་མ་འཐོབ་བོ། །སངས་རྒྱས་དག་ནི་རྙེད་པ་འདོགས་པར་ཡང་མི་མཛད་དོ། །སངས་རྒྱས་དག་ནི་ཆོས་ཀྱི་འཁོར་ལོ་ཡང་མི་སྐོར་ཏེ། མིང་ཇི་ལྟ་བ་སངས་རྒྱས་དག་ཀྱང་དེ་བཞིན། སྒྲའི་ཐོག་མའི་མཐའ་དང་ཐ་མའི་མཐའ་ཡང་དེ་བཞིན་ནོ། །འདི་ནི་མཉམ་པ་
ཉིད་དེ་གང་མཉམ་པ་ཉིད་པ་དེ་ལ་ནི་མི་མཉམ་པ་གང་ཡང་མེད་དོ། །མི་མཉམ་པ་མེད་པ་དེ་ལ་ནི་བདུད་རྩི་གང་ཡང་མེད་དོ། །གང་ན་བདུད་རྩི་གང་ཡང་མེད་པ་དེ་ན་ནི་སྨན་ཀྱང་མི་སྐྱེ་སྟེ། འདི་ནི་སངས་རྒྱས་བགྲོ་བའོ། །སེམས་ཅན་རྣམས་ནི་དྲང་བར་བྱ་བའི་ཕྱིར་དཔེས་བཤད་པ་ཡིན་ཏེ།

སངས་རྒྱས་རྣམས་ནི་བགྲོ་བར་ཡང་མི་མཛད། རྩོད་པར་ཡང་མི་མཛད། བགྲོ་བས་འཇོག་པར་ཡང་མི་མཛད་དོ། །བཅོམ་ལྡན་འདས་འཇུག་སྲེད་ཀྱི་རྒྱལ་པོ་དེ་བཞིན་གཤེགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཀུན་དུ་འོད་ཅེས་བྱ་བར་སངས་རྒྱས་བགྲོ་བའི་ཆོས་ཀྱི་རྣམ་གྲངས་
འདི་བསྟན་པའི་ཚེ། བྱང་ཆུབ་སེམས་དཔའ་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་དག་གིས་ནི་སངས་རྒྱས་བྱེ་བ་དེ་སྙེད་བཞུགས་པ་ལས་དེ་བཞིན་གཤེགས་པ་གཞན་གང་ཡང་མ་མཐོང་སྟེ། དེ་བཞིན་གཤེགས་པ་འཇུག་སྲེད་
ཀྱི་རྒྱལ་པོ་ཉག་གཅིག་མཐོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་མི་མཇེད་ཀྱི་འཇིག་རྟེན་གྱི་ཁམས་འདི་ན་གནས་པ་ལས་འདི་སྙམ་དུ་གྱུར་ཏེ། དེ་རིང་ཤར་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་
ཀུན་དུ་འོད་ཅེས་བྱ་བར་ཕྱོགས་བཅུ་ཀུན་ནས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་འདུས་སོ། །འདུས་ནས་སངས་རྒྱས་བགྲོ་བའི་ཆོས་ཀྱི་རྣམ་གྲངས་བགྲོ་བར་མཛད། འཆད་པར་མཛད་ཀྱིས། གང་བདག་ནི་སངས་རྒྱས་བཅོམ་ལྡན་འདས་དེ་དག་ལ་ཕྱག་
བྱ་བ་དང་། ཆོས་བསྟན་པ་དེ་དག་མཉན་པའི་ཕྱིར་འགྲོའོ། །གང་བདག་ནི་སངས་རྒྱས་བཅོམ་ལྡན་འདས་དེ་དག་ལ་བལྟ་བ་དང་། ཆོས་མཉན་པའི་ཕྱིར་ཕྱོགས་བཅུར་ཡང་འགྲོ་ཞིང་རྒྱུ་བར་བྱ་ན། དེ་ལྟར་ཚེགས་ཆུང་ཞིང་སངས་རྒྱས་ཀྱི་ཞིང་གཅིག་ཏུ་འདུས་ཀྱིས་གང་བདག་ནི་ངེས་
པར་འགྲོའོ། །སྐྱེས་བུ་དམ་པ་དེ་འདྲ་བ་དག་འཇིག་རྟེན་དུ་བྱུང་བར་ཐོས་པའམ་མཐོང་བ་དཀོན་ནོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་བྱམས་པ་ལ་སྨྲས་པ། བྱམས་པ་ད་ནི་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་སངས་
རྒྱས་ཀྱི་ཞིང་དུ་འདོང་ངོ་། །དེ་ནས་སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་མང་པོ་ད་ལྟར་འདུས་ཏེ་སངས་རྒྱས་བགྲོ་བའི་ཆོས་ཀྱི་རྣམ་གྲངས་འཆད་ཀྱིས། དེ་དག་ལ་བདག་ཅག་གིས་ཆོས་མཉན་ཏོ། །དེ་བཞིན་གཤེགས་པ་དེ་དག་ལ་བདག་ཅག་གིས་བལྟའོ། །དེ་ཅིའི་ཕྱིར་ཞེ་

ན། སྐྱེས་བུ་གླང་པོ་ཆེན་པོ་དེ་དག་གནས་གཅིག་ཏུ་འདུས་པ་མཐོང་བ་ནི་དཀོན་ནོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་བྱམས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་བཞུད་ཅིག་བདག་ནི་མི་མཆིའོ། །
དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་དག་ནི་མཉེས་དཀའ་སྟེ། འདུས་པ་དེ་དག་གིས་བདག་ཅག་ལྟ་བུ་ལ་སྐབས་མ་ཕྱེ་བར་བལྟ་བའམ། མཉན་པར་ཡང་མི་ནུས་ལ། འཇམ་དཔལ་དེ་བཞིན་གཤེགས་པ་རྣམས་ནི་གཟུགས་ཀྱི་སྐུར་མི་བལྟའོ། །དེ་བཞིན་
གཤེགས་པ་རྣམས་ནི་ཆོས་ཀྱི་སྐུ་སྟེ། གང་ཆོས་ཉིད་དེ་ཡང་སུས་ཀྱང་མ་མཐོང་མ་ཐོས་མ་མཆོད་དོ། །འཇམ་དཔལ་གྱིས་སྨྲས་པ། བྱམས་པ་ཁྱོད་ཀྱིས་དེ་བཞིན་གཤེགས་པ་ལ་མ་མཆོད་དམ། བྱམས་པས་སྨྲས་པ། འཇམ་དཔལ་བདག་ནི་དེ་བཞིན་གཤེགས་
པ་ལ་མི་མཆོད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་ནི་སུས་ཀྱང་མཆོད་མི་ནུས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དང་དེ་བཞིན་ཉིད་དེ་གཉིས་སུ་མེད་དོ། །འཇམ་དཔལ་གྱིས་སྨྲས་པ། བྱམས་པ་གཉིས་སུ་མེད་ཅེས་བྱ་བ་དེ་གང་ལ་བྱ། བྱམས་པས་
སྨྲས་པ། འཇམ་དཔལ་གཉིས་སུ་མེད་ཅེས་བྱ་བ་ནི་ཉོན་མོངས་པ་རྣམས་གཅིག་པ་ཡང་མ་ཡིན་ཐ་དད་པ་ཡང་མ་ཡིན་པའོ། །འཇམ་དཔལ་གཉིས་སུ་མེད་ཅེས་བྱ་བ་ནི་གང་རྣམ་པ་གཉིས་སུ་མེད་པའོ། །རྣམ་པ་གཉིས་སུ་མེད་པ་ཡང་གང་ཞེ་ན། འདི་ནི་ཀུན་ནས་ཉོན་མོངས་པའོ། །
འདི་ནི་རྣམ་པར་དག་པའོ་ཞེས་དེ་ལྟར་ཤེས་ན་དེ་ནི་རྣམ་པ་གཉིས་སུ་མེད་དོ། །འདི་ནི་ཚུལ་ཁྲིམས་དང་ལྡན་པའོ། །འདི་ནི་ངང་ཚུལ་ངན་པ་ཅན་ནོ་ཞེས་རྟོག་ན་རྣམ་པ་གཉིས་སུ་བྱེད་དོ། །འདི་ནི་ཉན་ཐོས་སོ། །འདི་ནི་རང་སངས་རྒྱས་སོ། །འདི་ནི་ཡང་དག་པར་རྫོགས་པའི་སངས་རྒྱས་སོ་
ཞེས་རྣམ་པར་རྟོག་ན་གཉིས་སུ་བྱེད་དོ། །འདི་དག་ནི་བསྒོམ་པར་བྱའོ། །འདི་དག་ནི་སྤང་བར་བྱའོ། །འདི་དག་ནི་མངོན་དུ་བྱའོ་ཞེས་རྣམ་པར་རྟོག་ན་རྣམ་པ་གཉིས་སུ་བྱེད་དོ། །འདི་ནི་ཡེ་ཤེས་ཀྱིས་ཤེས་པར་བྱའོ། །འདི་ནི་རྣམ་པར་ཤེས་པས་ཤེས་པར་བྱའོ་ཞེས་ཡིད་ལ་

བྱེད་ན་རྣམ་པ་གཉིས་སུ་བྱེད་དོ། །འཇམ་དཔལ་གང་དུ་གཉིས་སུ་འཇུག་པའི་རྣམ་པར་ཤེས་པ་རྟོག་པ་ནི་ཆུང་ངུ་ན་སངས་རྒྱས་སོ་ཞེས་རྟོག་པ་དེ་ཐམས་ཅད་རྣམ་པ་གཉིས་སུ་བྱེད་དོ། །འཇམ་དཔལ་བདག་གིས་ནི་བསྐལ་པའམ། བསྐལ་པའི་ལྷག་མ་ལུས་ཀྱི་བར་དུ་རྣམ་པ་གཉིས་
སུ་མེད་པ་ལས་བརྩམས་ཏེ། བཤད་དུ་ཟིན་ཀྱང་སྤོབས་པའི་མཐར་ཕྱིན་པ་ལས་ཟད་པར་འགྱུར་བ་མེད་དོ། །དེ་ཅིའི་ཕྱིར་ཞེ་ན། བདག་གིས་མཐའ་དང་དབུས་མ་མཐོང་བའི་ཕྱིར་རོ། །འཇམ་དཔལ་གཉིས་སུ་མེད་ཅེས་བྱ་བ་ནི་འདི་ལྟ་སྟེ། ཆོས་ཐམས་ཅད་ཀྱི་ཚུལ་གཅིག་པ་
དང་ཐ་དད་པ་མེད་པའོ། །སྨྲས་པ། བྱམས་པ་ཁྱོད་ནི་ཆོས་ཐམས་ཅད་མ་སྐྱེས་པ་ལ་འཇམ་དཔལ་ངས་ནི་བསྐལ་པའམ། བསྐལ་པའི་ལྷག་མ་ལུས་ཀྱི་བར་དུ་གཉིས་སུ་མེད་པ་ལས་བརྩམས་ཏེ་བཤད་ན་ངའི་སྤོབས་པ་ཟད་པར་མི་འགྱུར་རོ་ཞེས་ཁྱོད་དེ་སྐད་སྨྲ་བ་ཉིད་
དམིགས་པ་ཆེན་པོ་ཡིན་ནོ། །བྱམས་པས་སྨྲས་པ། འཇམ་དཔལ་ཡི་གེ་ལ་ཆགས་པར་མ་བྱེད་ཅིག །ཡི་གེ་ཐམས་ཅད་ནི་མི་སྐྱེ་བའི་མཚན་ཉིད་ལས་མི་གཡོའོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ཐམས་ཅད་ལ་སྨྲས་པ། རིགས་ཀྱི་བུ་ཁྱེད་ཅག་
ཚུར་ཤེག །བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་སངས་རྒྱས་ཀྱི་ཞིང་དུ་དེ་བཞིན་གཤེགས་པ་དེ་དག་ལ་བལྟ་བ་དང་། ཆོས་བསྟན་པ་དེ་དག་ཉན་དུ་འདོང་ངོ་། །དེ་ནས་བྱང་ཆུབ་སེམས་དཔའ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་
ཅེས་སྨྲས་སོ། །འཇམ་དཔལ་དེ་བཞིན་གཤེགས་པ་རྣམས་ནི་སུས་ཀྱང་བལྟ་མི་ནུས་ན་ཅིའི་ཕྱིར་ན་ཁྱོད་ཚུར་ཤེག །དེ་བཞིན་གཤེགས་པ་ལ་བལྟར་འདོང་ཞེས་ས་སྨྲ། གང་བལྟ་བར་བྱ་བའི་དེ་བཞིན་གཤེགས་པ་དེ་དག་གང་ཡིན། འཇམ་དཔལ་དེ་བཞིན་གཤེགས་
པས་ནི་དེ་བཞིན་གཤེགས་པ་དག་འདས་པ་མ་ཡིན། མ་བྱོན་པ་མ་ཡིན། ད་ལྟར་མ་ཡིན་ཏེ། ཆོས་གང་དུས་གསུམ་དུ་སྟོང་པ་དེ་ནི་བལྟ་མི་ནུས་སོ་ཞེས་དེ་སྐད་ཅེས་གསུངས་སོ། །ཡང་འཇམ་དཔལ་དེ་བཞིན་གཤེགས་པ་བལྟའོ་ཞེས་སྨྲས་པ་མིག་གི་རྣམ་པར་ཤེས་པ་གང་གིས་དེ་

བཞིན་གཤེགས་པ་བལྟ་བར་བྱ། ཅི་ཤའི་མིག་གིས་བལྟ་བར་བྱའམ། འོན་ཏམ་ལྷའི་མིག་གིས་བལྟ་བར་བྱ། གལ་ཏེ་ཤའི་མིག་གིས་བལྟ་ན་ནི་ཤའི་མིག་ནི་སྟོང་པ་སྟེ་སྟོང་པས་ནི་མཐོང་བར་མི་ནུས་སོ། །དེ་སྟེ་ལྷའི་མིག་གིས་བལྟ་ན་ནི་དེ་ལ་ལྷའི་མིག་ཏུ་
བརྟགས་ན་ལྷའི་མིག་གོ་སྙམ་དུ་འདུ་ཤེས་པར་འགྱུར་ཏེ། བརྟགས་པའི་མིག་གིས་ནི་དེ་བཞིན་གཤེགས་པ་མི་མཐོང་ངོ་། །སྨྲས་པ། རིགས་ཀྱི་བུ་ཁྱོད་ནི་གང་སྟོང་པ་ཉིད་ཀྱིས་སྟོན་པར་བྱེད་ན། དེ་ལ་སུས་ཀྱང་དེ་བཞིན་གཤེགས་པ་བལྟ་བར་མི་འགྱུར། མཆོད་པར་མི་འགྱུར་ཏེ།
རིགས་ཀྱི་བུ་དེ་བཞིན་གཤེགས་པ་ཞེའམ། སངས་རྒྱས་ཞེའམ། སེམས་ཅན་ཞེའམ། བགྲོ་བ་ཞེའམ། མཆོད་པ་ཞེའམ། ལྟ་བ་ཞེས་གང་ཆུང་ཟད་སྨྲ་བ་སྨོས་པ་བརྗོད་པའི་ཡི་གེ་དེ་ཐམས་ཅད་ནི་ཡི་གེའི་རང་བཞིན་གྱིས་སྟོང་ངོ་། །དེ་བས་ན་མཉམ་པ་ཉིད་ཅེས་བྱ་བའི་ཚིག་དེ་ནི་
དེ་བཞིན་ཉིད་ལ་འཁྲུགས་པར་མི་བྱེད་དེ། དེ་བཞིན་ཉིད་ལྡོག་པར་མི་བྱེད་ཀྱིས་ཁྱེད་ལས་གང་བཟོད་པ་དག་ནི་འདོང་ངོ་། །གང་མི་བཟོད་པ་དག་ནི་ཁྱེད་ཅིག་བདག་ནི་འགྲོའོ། །དེ་ནས་འཇམ་དཔལ་གཞོན་ནུར་གྱུར་པ་འདི་ལྟ་སྟེ། ཆོས་ཀྱིས་ཆོག་མི་ཤེས་པའི་ཕྱིར་གཉིས་སུ་མེད་
དེ་གཅིག་ཏུ་སོང་སྟེ། སངས་རྒྱས་ཀྱི་མཐུས་འཁོར་དེ་ནས་སུའང་མ་སོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་འདི་ལྟ་སྟེ། སྐྱེས་བུ་སྟོབས་པོ་ཆེའི་དཔུང་པ་བརྐྱང་བ་ལས་བསྐུམ་པའམ། བསྐུམ་པ་ལས་བརྐྱང་བ་ཙམ་དུ་དེའི་ཐང་ཅིག་སྐད་ཅིག་ཡུད་ཙམ་གྱིས་འཇམ་
དཔལ་གཞོན་ནུར་གྱུར་པ་མི་མཇེད་ཀྱི་འཇིག་རྟེན་གྱི་ཁམས་སུ་མི་སྣང་བར་གྱུར་ནས་ཀུན་དུ་འོད་ཀྱི་འཇིག་རྟེན་གྱི་ཁམས་སུ་འདུག་གོ། །དེ་ནས་འཇམ་དཔལ་གཞོན་ནུར་གྱུར་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་ལན་བདུན་བསྐོར་ནས། སངས་རྒྱས་བཅོམ་ལྡན་
འདས་དེ་དག་གི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཡང་དེའི་ཚེ་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་གཡས་ཕྱོགས་ན་སྲིང་མོ་ཐེ་ཚོམ་སེལ་བ་ཞེས་བྱ་བ་སྐྱིལ་མོ་ཀྲུང་དུ་བཅས་ཤིང་འདུག་སྟེ། དེ་ཀུན་དུ་ཟླ་བའི་འོད་དྲི་མ་

མེད་པར་སྣང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་འདི་སྙམ་དུ་དགོངས་ཏེ་འཇམ་དཔལ་གཞོན་ནུར་གྱུར་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱིས་བདག་ལ་བསྟོད་དོ། །
བཀུར་རོ། །ཟབ་མོ་ལ་བཟོད་པའོ། །སྟོང་པ་ལ་གནས་པའོ་ཞེས་བཤད་དོ་སྙམ་དུ་སེམས་ཏེ། འདི་ནི་མི་མཇེད་ཀྱི་འཇིག་རྟེན་གྱི་ཁམས་ནས་དམིགས་པ་ཆེན་པོས་བསྐྱོད་ཅིང་བདག་ཏུ་འཛིན་པ་ཆེ་བ་དང་ལྡན་ཞིང་འོངས་ཀྱིས། གང་ངས་ནི་འདི་རི་ཁོར་ཡུག་གི་རྩེ་མོ་ལ་འཕངས་
པ་དང་འདི་ལས་བརྩམས་ཏེ་ཆོས་ཟབ་མོ་སྟོན་པར་འགྱུར་བས་སྐྱེ་བོ་ཕྱི་མ་དག་དང་། མ་འོངས་པའི་བྱང་ཆུབ་སེམས་དཔའ་དག་ལ་ཡང་སྣང་བར་བྱས་པར་འགྱུར་ཏེ། དེ་ཅིའི་ཕྱིར་ཞེ་ན། དེ་ལྟར་སངས་རྒྱས་ཀྱི་ཆོས་ནི་བསམ་གྱིས་མི་ཁྱབ་དེ་ལྟར་ཟབ་པས་འཇམ་དཔལ་གཞོན་ནུར་གྱུར་པ་
ལྟ་བུ་སྟོང་པ་ལ་གནས་པའི་མཆོག་ཀྱང་རི་ཁོར་ཡུག་གི་རྩེ་མོར་འཕངས་པར་འགྱུར་རོ་སྙམ་མོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཀྱིས་དོན་གང་
གི་དབང་མ་མཐོང་ནས་འདིར་འོངས། འཇམ་དཔལ་གྱིས་གསོལ་པ། བཅོམ་ལྡན་འདས་བདག་ནི་མི་མཇེད་ཀྱི་འཇིག་རྟེན་གྱི་ཁམས་དེ་ན་མཆིས་པ་ལས་འདི་སྙམ་དུ་གྱུར་ཏེ། སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་བ་ནི་དཀོན་ནོ། །ཆོས་ཐོས་པ་ཡང་
དཀོན་ཏེ། ཀུན་ཏུ་འོད་ཅེས་བགྱི་བའི་འཇིག་རྟེན་གྱི་ཁམས་སུ་ཡང་ཕྱོགས་བཅུ་ནས་སངས་རྒྱས་བཅོམ་ལྡན་འདས་དཔག་ཏུ་མ་མཆིས། གྲངས་མ་མཆིས་པ་དག་ཚོགས་སོ། །ཚོགས་ནས་སངས་རྒྱས་བགྲོ་བ་ཞེས་བགྱི་བའི་ཆོས་ཀྱི་རྣམ་གྲངས་འཆད་ཀྱིས། བདག་ནི་དེ་
བཞིན་གཤེགས་པ་དེ་དག་ལ་བལྟ་བ་དང་། ཆོས་བཤད་པ་དེ་དག་མཉན་དུ་མཆིའོ་སྙམ་ནས་བཅོམ་ལྡན་འདས་བདག་ནི་ཆོས་ཉན་པའི་སླད་དུ་སངས་རྒྱས་ཀྱི་ཞིང་འདིར་མཆིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོས་དེའི་ཚེ་ཅི་ནས་ཀྱང་

རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་འཇམ་དཔལ་གཞོན་ནུར་གྱུར་པ་རི་ཁོར་ཡུག་གི་རྩེ་མོར་འཕངས་པར་གྱུར་ལ། བདག་གང་དུ་བླངས་ཤིང་ཁྱེར་སྙམ་དུ་ཡང་མི་ཤེས་པ་དེ་འདྲ་བར་མྱུར་དུ་བཏེག་སྟེ་འཕང་བའི་རྫུ་འཕྲུལ་མངོན་པར་འདུ་བྱ་བ་མངོན་
པར་འདུས་བྱས་སོ། །དེ་ནས་འཇམ་དཔལ་གཞོན་ནུར་གྱུར་པ་རི་ཁོར་ཡུག་གི་རྩེ་མོར་འཕངས་པ་ལས་སེམས་ཤིང་འདི་སྙམ་དུ་གྱུར་ཏོ། །རྒྱུ་གང་དང་རྐྱེན་གང་གིས་ན་བདག་སངས་རྒྱས་ཀྱི་འཁོར་ཆེན་པོ་དེ་ལྟ་བུར་བལྟ་ན་བཟང་བ། མཛེས་པ། གླང་པོ་ཆེ་ཆེན་པོ་དེ་འདྲ་བ་དག་གི་ནང་
ནས་རི་ཁོར་ཡུག་གི་རྩེ་མོ་འདིར་འཕངས་པར་གྱུར། བདག་རི་ཁོར་ཡུག་གི་རྩེ་མོར་སུས་འཕངས་སྙམ་དུ་དེ་ལྟར་སེམས་པ་ལས་འདི་སྙམ་དུ་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོ་དེས་བདག་རི་ཁོར་ཡུག་གི་རྩེ་མོར་འཕངས་སོ་སྙམ་མོ། །
དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་གྱུར་ཏེ་བདག་ནི་འཁོར་དེ་ནས་འཕངས་ལ། སྲིང་མོ་ཐེ་ཚོམ་སེལ་བ་དེ་ནི་བཅོམ་ལྡན་འདས་དེ་བཞིན་གཤེགས་པ་འཇུག་སྲེད་ཀྱི་རྒྱལ་པོའི་དྲུང་ན་སྐྱིལ་མོ་ཀྲུང་བཅས་ཤིང་འདུག་པ་ལས་སྲིང་མོ་དེ་ནི་མ་འ