Kinh tạng Tây Tạng (Kangyur Đại Học) — 057_མདོ་སྡེ།_པ

བརྗོད་དུ་མེད་པ་ཡང་མ་ཡིན་པ་དེ་ལྟར་དེ་བཞིན་གཤེགས་པ་བལྟའོ། །ཚིག་གི་ལམ་དང་དབྱངས་སུ་བརྗོད་པ་ཐམས་ཅད་ལས་ཡང་དག་པར་

འདས་པས། མཐོང་བ་མེད་པར་དེ་བཞིན་གཤེགས་པ་བལྟའོ། །བཙུན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ཀྱང་དེ་བཞིན་གཤེགས་པ་ལ་དེ་ལྟར་བལྟ་སྟེ། ཁོ་བོ་ཡང་དེ་བཞིན་དུ་བལྟའོ། །ཤ་ར་དྭ་ཏིའི་བུས་སྨྲས་པ་དེ་བཞིན་གཤེགས་པ་ལ་གལ་ཏེ་དེ་ལྟར་བལྟ་ན། དེའི་ཆོས་བསྟན་པ་ཡང་
ཇི་ལྟར་ཉན། སྨྲས་པ། བཙུན་པ་ཤ་ར་དྭ་ཏིའི་བུ་གལ་ཏེ་ཁོ་བོ་ལ་ཆོས་ཀྱི་འདུ་ཤེས་སྐྱེ་བ་ཞིག་ཡོད་དམ། ཆོས་མ་ཡིན་པའི་འདུ་ཤེས་སྐྱེ་བ་ཞིག་ཡོད་ན་ནི་ཁོ་བོ་ཡང་བཅོམ་ལྡན་འདས་ཀྱི་ཆོས་བསྟན་པ་ཉན་ཏོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་བརྗོད་པ་ཐམས་ཅད་ལས་བྱང་ཆུབ་སེམས་
དཔའི་ཆོས་ཀྱི་ཚིག་འབྱུང་བ་མེད་དེ། དེ་ལ་མངོན་པར་ཞེན་པ་ཡང་མེད་ལ་ཆོས་ཀྱི་འདུ་ཤེས་ཀྱང་མི་སྐྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། འདུ་ཤེས་ཐམས་ཅད་དང་བྲལ་བའི་ཕྱིར་རོ། །ཤ་ར་དྭ་ཏིའི་བུས་སྨྲས་པ། བདེན་སྨྲ་ཁྱོད་ཆོས་དོན་དུ་གཉེར་བའི་ཕྱིར་དེ་བཞིན་གཤེགས་པའི་ཐད་དུ་མ་འོངས་
སམ། སྨྲས་པ། བཙུན་པ་ཤ་ར་དྭ་ཏིའི་བུ་ཁོ་བོ་ནི་ཆོས་དོན་དུ་གཉེར་བ་ཡང་མ་ཡིན། ཆོས་མ་ཡིན་པ་དོན་དུ་གཉེར་བ་ཡང་མ་ཡིན་པར་དེ་བཞིན་གཤེགས་པའི་ཐད་དུ་འོངས་སོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་ཆོས་དོན་དུ་གཉེར་ཞེས་བྱ་བ་དེ་ནི་ཆོས་ཐམས་ཅད་ལ་དོན་དུ་
གཉེར་བ་མེད་པའི་ཚིག་བླ་དགས་ཏེ། བཙུན་པ་ཤ་ར་དྭ་ཏིའི་བུ་གང་ཆོས་དོན་དུ་གཉེར་བ་དེ་ནི་སངས་རྒྱས་ལ་མངོན་པར་ཞེན་པར་འདོད་པ་མ་ཡིན། ཆོས་ལ་སྒྲོ་གདགས་པར་འདོད་པ་མ་ཡིན། དགེ་འདུན་བསྐྱེད་པར་འདོད་པ་མ་ཡིན། སྡུག་བསྔལ་ཡོངས་སུ་ཤེས་པར་བྱ་བར་འདོད་པ་མ་ཡིན།
ཀུན་འབྱུང་བ་སྤང་བར་འདོད་པ་མ་ཡིན། ལམ་བསྒོམ་པར་འདོད་པ་མ་ཡིན། འགོག་པ་མངོན་དུ་བྱ་བར་འདོད་པ་མ་ཡིན། འདོད་པའི་ཁམས་ལས་ཡང་དག་པར་འདའ་བར་འདོད་པ་མ་ཡིན། གཟུགས་ཀྱི་ཁམས་དང་གཟུགས་མེད་པའི་ཁམས་ལས་ཡང་དག་པར་འདའ་བར་འདོད་པ་མ་ཡིན།
མྱ་ངན་ལས་འདའ་བར་འདོད་པ་མ་ཡིན་པའི་ཕྱིར་ཏེ། བཙུན་པ་ཤ་ར་དྭ་ཏིའི་བུ་རྣམ་གྲངས་དེས་ན་འདི་ལྟར་ཁོ་བོ་ནི་ཆོས་ཐམས་ཅད་ལ་དོན་དུ་གཉེར་བ་མེད་པར་དེ་བཞིན་གཤེགས་པའི་སྤྱན་སྔར་ཕྱིན་པར་རིག་པར་བགྱིའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤ་ར་དྭ་ཏིའི་བུས་གཅེར་བུ་པའི་བུ་བདེན་

སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་ཅི་ལས་བསམས་ཏེ་དེ་སྐད་ཅེས་སྨྲ། སྨྲས་པ། བཙུན་པ་ཤ་ར་དྭ་ཏིའི་བུ་ཁོ་བོ་ནི་བསམས་པ་མེད་པར་ཆོས་ཐམས་ཅད་དེ་ལྟར་སྟོན་ཏོ། །བཙུན་པ་ཤ་ར་དྭ་ཏིའི་བུ་ཆོས་ཀྱི་དབྱིངས་ལ་ནི་གཉིས་མི་དམིགས་པའི་ཕྱིར་བསམས་པ་ཡང་མི་
དམིགས་མ་བསམས་པ་ཡང་མི་དམིགས་སོ། །སྨྲས་པ། བདེན་སྨྲ་ཁྱོད་འགྲོ་བ་དག་དང་མི་སྦྱོར་རམ། སྨྲས་པ། བཙུན་པ་ཤ་ར་དྭ་ཏིའི་བུ་གལ་ཏེ་ཁོ་བོས་འགྲོ་བ་ཞིག་དམིགས་ན་ནི་སྦྱོར་བ་ཡང་ཡོད། གལ་ཏེ་ཁོ་བོ་ལ་སྐྱེ་བ་ཞིག་ཡོད་ན་ནི་སྐྱེ་བར་ཡང་འགྱུར། གལ་ཏེ་ཁོ་བོ་ལ་འཕོ་བ་ཞིག་
ཡོད་ན་ནི་འཕོ་བར་ཡང་འགྱུར་ན། བཙུན་པ་ཤ་ར་དྭ་ཏིའི་བུ་ཆོས་ཐམས་ཅད་ནི་འཕོ་བ་མེད་པ་སྟེ། འགྲོ་བ་མེད་ཅིང་ཤི་འཕོ་དང་སྐྱེ་བ་མེད་པའོ། །སྨྲས་པ། བདེན་སྨྲ་དེ་བཞིན་གཤེགས་པས་དགེ་སློང་ཁྱོད་ནི་སྐྱེའོ། །རྒའོ། འཆིའོ། འཕོའོ། འབྱུང་ངོ་ཞེས་འདི་མ་གསུངས་སམ། སྨྲས་པ། བཙུན་
པ་ཤ་ར་དྭ་ཏིའི་བུ་འགྲོ་བ་ལ་རྟེན་ཅིང་ལྷག་པའི་ང་རྒྱལ་ཡོད་པའི་སེམས་ཅན་རྣམས་ཀྱི་རྟེན་པ་བསལ་བའི་ཕྱིར་དེ་བཞིན་གཤེགས་པ་དེ་སྐད་ཅེས་སྟོན་ཏེ། བསྟན་པའི་ཆོས་ཉིད་ཇི་ལྟ་བ་བཞིན་དུ་བྱ་ན་འདི་ལ་འགྲོ་བ་མེད། ཤི་འཕོ་མེད། སྐྱེ་བ་མེད་དོ། །ཤ་ར་དྭ་ཏིའི་བུས་སྨྲས་པ། བདེན་སྨྲ་
ལེགས་སོ་ལེགས་སོ། །འདི་ལྟར་ཐེག་པ་ཆེན་པོ་འདི་བསྟན་པའི་དོན་རྣམ་པར་ངེས་པ་ལ་མཁས་པ་ལེགས་སོ་ལེགས་སོ། །བདེན་སྨྲས་སྨྲས་པ། བཙུན་པ་ཤ་ར་དྭ་ཏིའི་བུ་ཁྱོད་ཀྱིས་དོན་ནི་གང་། རྣམ་པར་ངེས་པ་ནི་གང་ཡིན་པ་མཁྱེན་ཏམ། ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁོ་བོ་ནི་
སྟོན་པར་འདོད་པ་མ་ཡིན་གྱི་ཉན་པར་འདོད་པ་ཡིན་གྱིས། རིགས་ཀྱི་བུ་དོན་ནི་གང་། རྣམ་པར་ངེས་པ་ནི་གང་ཁྱོད་ཀྱིས་སྟོན་ཅིག་དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས། ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་དོན་ཞེས་བྱ་བ་ནི་བརྗོད་
དུ་མེད་པའོ། །དེ་བརྗོད་པ་གང་ཡིན་པ་དེ་ནི་རྣམ་པར་ངེས་པ་ཞེས་བྱའོ། །དོན་ཞེས་བྱ་བ་ནི་སྨྲར་མེད་པའོ། །དེ་སྨྲ་བ་གང་ཡིན་པ་དེ་ནི་རྣམ་པར་ངེས་པ་ཞེས་བྱའོ། །དོན་ཞེས་བྱ་བ་ནི་སྨོས་སུ་མེད་པའོ། །དེ་སྨོས་པ་གང་ཡིན་པ་དེ་ནི་རྣམ་པར་ངེས་པ་ཞེས་བྱའོ། །དོན་ཞེས་བྱ་བ་ནི་གཡོ་བ་མེད་པ། བསམ་པ་མེད་པ།

སྤྲོས་པ་མེད་པ། བརྟགས་པ་མེད་པ། རྣམ་པར་བསྒྲུབས་པ་མེད་པ། དངོས་པོ་མེད་པ། རྫས་མེད་པ། ངར་འཛིན་པ་མེད་པ། དབའ་རླབས་མེད་པ། གཟུང་བ་མེད་པ། གནས་མེད་པ། གནས་ཀྱི་ཚིག་གི་ལམ་ཐམས་ཅད་ལས་ཡང་དག་པར་འདས་པའོ། །རྣམ་པར་ངེས་པ་ཞེས་བྱ་བ་ནི་
བསམ་པ་དང་། གཞལ་བ་དང་། བགྲང་བ་དང་། བརྟག་པ་དང་། གཞན་གྱི་སེམས་ཀྱི་རྒྱུད་ལ་གོ་བར་བྱེད་པའོ། །དོན་ཞེས་བྱ་བ་ནི་དོན་སོ་སོ་ཡང་དག་པར་རིག་པའོ། །རྣམ་པར་ངེས་པ་ཞེས་བྱ་བ་ནི་ཆོས་དང་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་སྟེ། བཙུན་པ་ཤ་ར་
དྭ་ཏིའི་བུ་འདི་ནི་མདོར་ན་དོན་ཏོ། །འདི་ནི་རྣམ་པར་ངེས་པའོ། །དེ་ནས་བཅོམ་ལྡན་འདས་ཀྱིས་རིགས་ཀྱི་བུ་བདེན་སྨྲ་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །ཇི་ལྟར་ཁྱོད་སྟོན་པ་དེ་ལྟར་གཞན་གྱིས་ཀྱང་བསྟན་པར་བྱའོ། །ཁྱོད་ཀྱིས་བསྟན་པ་འདི་བཤད་པས་
ལྷའི་བུ་སྟོང་ཕྲག་གསུམ་མི་སྐྱེ་བའི་ཆོས་ལ་བཟོད་པ་སྐྱེས་པར་གྱུར་ཏོ། །སྲོག་ཆགས་ཉི་ཁྲིས་ཁྱོད་ཀྱི་སྤོབས་པའི་ཆེ་བ་ཕུན་སུམ་ཚོགས་པ་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་
འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་བདེན་སྨྲས་མུ་སྟེགས་ཅན་གྱི་ཆ་བྱད་འདིས་སེམས་ཅན་ཇི་སྙེད་ཅིག་ཡོངས་སུ་སྨིན་པར་བགྱིས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་
བུ་ཆེན་པོ་གནས་འདི་ཐོས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་ལྷ་དང་བཅས་པའི་འཇིག་རྟེན་རྨོངས་པར་འགྱུར་རོ། །མཽད་གལ་གྱི་བུ་ཆེན་པོ་འོན་ཀྱང་མགོ་ཙམ་ཞིག་བསྟན་གྱིས་རིགས་ཀྱི་བུ་བདེན་སྨྲ་འདིས་ཁ་དོག་དང་། གཟུགས་དང་། སྤྱོད་ལམ་སྣ་ཚོགས་ཀྱིས་སེམས་ཅན་
ཇི་སྙེད་ཡོངས་སུ་སྨིན་པར་བྱས་པ་ཉོན་ཅིག །མཽད་གལ་གྱི་བུ་ཆེན་པོ་རིགས་ཀྱི་བུ་བདེན་སྨྲ་འདིས་མུ་སྟེགས་ཅན་གྱི་གཟུགས་སུ་གནས་ཏེ། སེམས་ཅན་རི་རབ་ཀྱི་རྡུལ་ཕྲ་རབ་ཀྱི་རྡུལ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སྤྱོད་པའི་གཟུགས་ཀྱིས་སེམས་ཅན་

གླིང་བཞི་པའི་རྡུལ་ཕྲ་རབ་ཀྱི་རྡུལ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཀུན་ཏུ་རྒྱུའི་གཟུགས་ཀྱིས་སེམས་ཅན་གང་གཱའི་ཀླུང་བརྒྱད་ཅུ་རྩ་བཞིའི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །
ཉན་ཐོས་ཀྱི་གཟུགས་ཀྱིས་སེམས་ཅན་གང་གཱའི་ཀླུང་བཅུའི་བྱེ་མ་སྙེད་ཉན་ཐོས་ཀྱི་བྱང་ཆུབ་ཏུ་ངེས་པར་འབྱུང་བར་བསྟན་ནས་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་བས་ཀྱང་ཆེས་མང་བའི་སེམས་ཅན་རྣམས་རང་སངས་རྒྱས་ཀྱི་གཟུགས་ཀྱིས་
ཡོངས་སུ་སྨིན་པར་བྱས་སོ། །བྱང་ཆུབ་སེམས་དཔའི་གཟུགས་ཀྱིས་སེམས་ཅན་བགྲང་བ་ལས་འདས་པ་ཡོངས་སུ་སྨིན་པར་བྱས་སོ། །གཞན་དག་བརྒྱ་བྱིན་གྱི་གཟུགས་ཀྱིས། གཞན་དག་ཚངས་པའི་གཟུགས་ཀྱིས། གཞན་དག་འཁོར་ལོས་སྒྱུར་བའི་གཟུགས་ཀྱིས། གཞན་དག་
འཇིག་རྟེན་སྐྱོང་བའི་གཟུགས་ཀྱིས། གཞན་དག་མིའམ་ཅིའི་གཟུགས་ཀྱིས། གཞན་དག་ལྷ་མ་ཡིན་གྱི་གཟུགས་ཀྱིས། གཞན་དག་ནམ་མཁའ་ལྡིང་གི་གཟུགས་ཀྱིས། གཞན་དག་ལྟོ་འཕྱེ་ཆེན་པོའི་གཟུགས་ཀྱིས། གཞན་དག་སྐྱེས་པའི་གཟུགས་ཀྱིས། གཞན་དག་བུད་མེད་ཀྱི་གཟུགས་
ཀྱིས། གཞན་དག་ཁྱེའུའི་གཟུགས་ཀྱིས། གཞན་དག་བུ་མོའི་གཟུགས་ཀྱིས། གཞན་དག་སའི་ལྷའི་གཟུགས་ཀྱིས། གཞན་དག་ལྷན་ཅིག་སྐྱེས་པའི་ལྷའི་གཟུགས་ཀྱིས། གཞན་དག་དྲང་སྲོང་གི་གཟུགས་ཀྱིས། གཞན་དག་བྲམ་ཟེའི་གཟུགས་ཀྱིས། གཞན་དག་དགེ་སློང་གི་གཟུགས་
ཀྱིས། གཞན་དག་དགེ་སློང་མའི་གཟུགས་ཀྱིས། གཞན་དག་དགེ་བསྙེན་གྱི་གཟུགས་ཀྱིས། གཞན་དག་དགེ་བསྙེན་མའི་གཟུགས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་ཏེ། མཽད་གལ་གྱི་བུ་རིགས་ཀྱི་བུ་བདེན་སྨྲ་འདིས་དེ་ལྟར་སེམས་ཅན་མང་པོ་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །གསོལ་པ། འདིས་དེ་བཞིན་གཤེགས་པ་ཇི་སྙེད་ཅིག་མཉེས་པར་བགྱིས་ལགས། བཀའ་སྩལ་པ། མཽད་གལ་གྱི་བུ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་།

ནམ་མཁའི་ཁམས་དང་། སེམས་ཅན་གྱི་ཁམས་ཀྱི་མཐའ་ནི་རྟོགས་པར་ནུས་སྲིད་ཀྱི། རིགས་ཀྱི་བུ་བདེན་སྨྲ་འདིས་དེ་བཞིན་གཤེགས་པ་ཇི་སྙེད་ཅིག་གཟུགས་སྣ་ཚོགས་ཀྱིས་མཉེས་པར་བྱས་པའི་སངས་རྒྱས་བྱུང་བ་དེ་དག་གི་མཐའ་ནི་རྟོགས་པར་མི་ནུས་སོ། །དེ་ནས་གནས་བརྟན་
འོད་སྲུང་ཆེན་པོས་རིགས་ཀྱི་བུ་བདེན་སྨྲ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་མང་པོ་མཉེས་པར་བྱས་ན་དེ་ལྟར་བསམ་པ་ཡོངས་སུ་རྫོགས་པ་ཅིའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ། བདེན་སྨྲས་
སྨྲས་པ། བཙུན་པ་འོད་སྲུང་གལ་ཏེ་ཁོ་བོའི་བྱང་ཆུབ་བམ། མངོན་པར་རྫོགས་པར་འཚང་རྒྱ་བར་བྱེད་པ་ཞིག་དམིགས་ན་ནི་ཁོ་བོ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །སྨྲས་པ། བདེན་སྨྲ་བྱང་ཆུབ་སེམས་དཔའ་གང་གཱའི་ཀླུང་གི་བྱེ་
མ་སྙེད་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་སམ། མངོན་པར་རྫོགས་པར་འཚང་མི་རྒྱ་འམ། མངོན་པར་རྫོགས་པར་འཚང་རྒྱ་བར་མི་འགྱུར་རམ། སྨྲས་པ། བཙུན་
པ་འོད་སྲུང་དེ་ནི་སེམས་ཅན་མངོན་པའི་ང་རྒྱལ་ཅན་རྣམས་ལ་གྲངས་སུ་བྱས་པ་ཡིན་ཏེ། འདི་ལ་དོན་དམ་པར་ན་བྱང་ཆུབ་དམིགས་སུ་མེད་དོ། །བྱང་ཆུབ་སེམས་དཔའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་འདི་ལྟར་བྱང་ཆུབ་ནི་འདུས་མ་བྱས་པ་སྟེ།
གྲངས་ཐམས་ཅད་དང་བྲལ་བ། གཟུགས་མེད་པ། བསྟན་དུ་མེད་པ་སྟེ། སྔོན་པོ་མ་ཡིན། སེར་པོ་མ་ཡིན། དཀར་པོ་མ་ཡིན། བཙོད་ཀ་མ་ཡིན། ཤེལ་གྱི་མདོག་མ་ཡིན། ཁ་དོག་མེད་པ། དབྱིབས་མེད་པ། རྟགས་མེད་པ། མཚན་མ་མེད་པ་མཚན་མ་ཐམས་ཅད་
ལས་ཡང་དག་པར་འདས་པ། གནས་མེད་པ། གནས་ཐམས་ཅད་ཡང་དག་པར་བཅོམ་པ། དངོས་པོ་མེད་པ། དངོས་པོ་ཐམས་ཅད་དང་བྲལ་བ། མཚན་ཉིད་མེད་པ། མཚན་ཉིད་ཐམས་ཅད་དང་བྲལ་བ། བརྗོད་དུ་མེད་པ། ཚིག་གི་ལམ་ཐམས་ཅད་ཀྱིས་

རྟོགས་པར་མི་ནུས་པ། བལྟར་མེད་པ། རིལ་པོ་མ་ཡིན་པ། རྫས་མེད་པ། མུན་པ་མེད་པ། སྣང་བ་མེད་པ། རྟགས་མེད་པ། དབྱིབས་མེད་པ། སྨྲར་མེད་པ། སྨོས་སུ་མེད་པ། རེག་པར་བྱར་མེད་པ། རྣམ་པར་ཤེས་པར་མི་རུང་བ།
ཐོས་པར་མི་རུང་བ། དབྱངས་མེད་པ། ཚིག་གི་ལམ་མེད་པ། ཐོགས་པ་མེད་པ། མ་བཅིངས་པ། མ་གྲོལ་བ། འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པ། རྒྱུ་ཐམས་ཅད་ཀྱིས་གདགས་སུ་མེད་པ། གདགས་པར་བྱ་བ་མ་ཡིན་པ་སྟེ། བཙུན་
པ་འོད་སྲུང་བྱང་ཆུབ་ནི་དེ་ལྟ་བུའི་རང་བཞིན་ཡིན་པས་དེ་ནི་ལུས་ཀྱིས་མངོན་པར་རྫོགས་པར་འཚང་རྒྱ་བར་མི་ནུས་སོ། སེམས་ཀྱིས་ཀྱང་མི་ནུས་སོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ལུས་ནི་སེམས་མེད་པ། གཡོ་བ་མེད་པ། རྩྭ་དང་། ཤིང་དང་། རྩིག་པ་དང་། བོང་བ་
སྣང་བ་ལྟ་བུ་སྟེ། དེས་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །སེམས་ཀྱང་དེ་ལྟ་བུའི་རང་བཞིན་ཡིན་ཞིང་བལྟར་མེད་པ། དེས་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བར་མི་ནུས་སོ། །གང་གིས་མངོན་པར་རྫོགས་པར་འཚང་རྒྱ་བར་བྱ་བའི་སེམས་ཅན་
དེ་དག་ཀྱང་མི་དམིགས་ཏེ། བཙུན་པ་འོད་སྲུང་ཆོས་ཐམས་ཅད་དེ་ལྟ་བུའི་རང་བཞིན་ཡིན་ན། དེ་ལ་ཅིའི་ཕྱིར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་ཞེས་ཇི་སྟེ་དེ་ལྟར་སེམས་པར་གྱུར། དེ་ནས་བྱང་ཆུབ་སེམས་དཔའ་དེ་དག་དང་། དགེ་
སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་སེམས་ཅན་བདག་ཅག་གི་བསམ་པ་དང་མོས་པ་བཞིན་དུ་ཐེ་ཙོམ་དང་ནེམ་ནུར་དང་ཡིད་གཉིས་
བསལ་བའི་ཕྱིར་རིགས་ཀྱི་བུ་བདེན་སྨྲ་འདི་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང་། འཇིག་རྟེན་གྱི་ཁམས་གང་དུ་མངོན་པར་རྫོགས་པར་འཚང་རྒྱ་བ་དང་། འདི་བྱང་ཆུབ་ཐོབ་ནས་མཚན་ཅི་ཞེས་བྱ་བར་འགྱུར་བ་དང་། ཚེའི་ཚད་

ཇི་ཙམ་དུ་འགྱུར་བ་དང་། བྱང་ཆུབ་ཐོབ་ནས་དེའི་འཁོར་འདུས་པ་ཇི་སྙེད་ཅིག་ཏུ་འགྱུར་བ་ལུང་བསྟན་ཀྱང་ཅི་མ་རུང་སྙམ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་
དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་ཐུགས་སུ་ཆུད་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་རིགས་ཀྱི་བུ་བདེན་སྨྲ་འདི་ནི་བསྐལ་པ་བཟང་པོ་འདི་འདས་པའི་འོག་ཏུ་བསྐལ་པ་
བགྲང་བ་ལས་ཡང་དག་པར་འདས་པ་སྙེད་ཅིག་ན་བསྐལ་པ་གནོད་པར་སྡོ་བའི་དགྲ་མེད་པ་ཞེས་བྱ་བ་ལ་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པའི་བློ་གྲོས་ཀྱི་ཏོག་གི་རྒྱལ་
པོ་ཞེས་བྱ་བར་འགྱུར་རོ། །འཇམ་དཔལ་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་ཞེས་བྱ་བ་དེ་ནི་བཟང་ཞིང་མཛེས་ལ་བལྟ་ན་སྡུག་པ། རིན་པོ་ཆེ་སྣ་བདུན་གྱིས་རབ་ཏུ་བརྒྱན་པ། རིན་པོ་ཆེའི་རབ་འབུམ་ཕྲག་བདུན་གྱིས་བསྐོར་བ། སྤོས་ཆུའི་འོབས་འབུམ་
ཕྲག་བདུན་གྱིས་རྗེས་སུ་བསྐོར་བ། ནོར་བུ་རིན་པོ་ཆེ་བཻ་དཱུརྱ་ཆེན་པོ་འབུམ་ཕྲག་བདུན་གྱི་ཤིང་ཐགས་བཙུགས་པ། འཛམ་བུ་ཆུ་བོའི་གསེར་གྱི་དྲ་བ་ས་ཡ་དག་གིས་སྟེང་ནས་ཡོངས་སུ་བཀབ་པ། ནོར་བུ་རིན་པོ་ཆེ་ས་ཡ་དག་གིས་བརྒྱན་པའི་རྟ་བབས་དང་ལྡན་པ། ནོར་བུ་རིན་པོ་
ཆེ་སེང་གེ་ཡིད་དུ་འོང་བ་ས་ཡ་དག་གིས་སྤྲས་པའི་པུ་ཤུ་དང་། སྐར་ཁུང་དག་གིས་མཛེས་པར་བྱས་པ། ནོར་བུ་རིན་པོ་ཆེ་སེང་གེའི་རྒྱལ་མཚན་ས་ཡ་དག་གིས་སྤྲས་པའི་མཁའ་རྟེན་རྣམས་ཀྱིས་མཛེས་པར་བྱས་པ། ནོར་བུ་རིན་པོ་ཆེ་སྣང་བའི་རྒྱལ་མཚན་ས་ཡ་དག་གིས་གཅིག་
ཏུ་འབར་བར་སྣང་བར་བྱས་པ། དྲིལ་བུ་གཡེར་ཀའི་དྲ་བ་ས་ཡ་དག་གིས་ཀུན་ནས་སྒྲ་ཕྱུང་བའི་སྒྲ་ཡིད་དུ་འོང་བ་དང་ལྡན་པ། གསེར་གྱི་ལྡ་ལྡི་ས་ཡ་དག་ཀུན་ནས་མངོན་པར་བྲེས་པ་དང་ལྡན་པ། ནོར་བུ་རིན་པོ་ཆེ་ཏོག་གི་རྒྱལ་མཚན་གྱི་ལྷའི་བ་དན་དང་། རྒྱལ་མཚན་ས་ཡ་བསྒྲེང་

བ་དང་ལྡན་པར་འགྱུར་ཏེ། འཇམ་དཔལ་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་དེ་ནི་ལག་མཐིལ་ལྟར་མཉམ་ཞིང་རིན་པོ་ཆེའི་ཤིང་ལྗོན་པ་དག་གིས་ཀུན་ཏུ་གང་བར་འགྱུར་ཏེ། དེ་ན་རྩྭ་སྐྱེ་བ་དག་འཇམ་ཞིང་གཡུང་དྲུང་འཁྱིལ་བ་
ལྟར་གཡས་སུ་འཁྱིལ་ལ། རྨ་བྱའི་མགྲིན་པ་འདྲ་ཞིང་ཀ་ཙ་ལིན་དི་ཀའི་གོས་ལྟར་འཇམ་པ་ཤ་སྟག་གིས་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་དེ་ཀུན་ནས་གཡོགས་པར་འགྱུར། སྐྱེད་མོས་ཚལ་ས་ཡ་དག་གིས་བརྒྱན་པར་འགྱུར། སྐྱེད་
མོས་ཚལ་རེ་རེ་ཡང་། རྫིང་བུ་ས་ཡ་དག་གིས་ལེགས་པར་བརྒྱན་ཅིང་ཀུན་ནས་མཛེས་པར་འགྱུར། རྫིང་བུ་རེ་རེ་ཡང་སྟེགས་བརྒྱད་དང་བཅས་པ་ནོར་བུ་རིན་པོ་ཆེ་ཡན་ལག་བརྒྱད་དང་ལྡན་པས་སྤྲས་པ། འཛམ་བུ་ཆུ་བོའི་གསེར་གྱི་བྱེ་མ་བདལ་བ། ཡན་ལག་བརྒྱད་དང་
ལྡན་པའི་ཆུས་ཡོངས་སུ་གང་བ། རིན་པོ་ཆེའི་པད་མས་ཀུན་ནས་ཡོག་པ། ངང་པ་དང་། ངུར་པ་དང་། ཁྲུང་ཁྲུང་སྒྲ་སྐེད་འབྱིན་པ་དང་ལྡན་པར་འགྱུར་ཏེ། འཇམ་དཔལ་དེ་ལྟར་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་དེ་ནི་གྲོང་དང་། གྲོང་ཁྱེར་
དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ས་ཡ་དག་གིས་ཀུན་ནས་བརྒྱན་པར་འགྱུར། གྲོང་ཁྱེར་ཆེན་པོ་རེ་རེ་ཡང་གྲོང་ཁྱེར་ས་ཡ་ས་ཡ་དག་གིས་ལེགས་པར་བརྒྱན་པར་འགྱུར་ཞིང་དེ་བཞིན་དུ་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་
འཁོར་དང་། རྒྱལ་པོའི་ཕོ་བྲང་འཁོར་ཐམས་ཅད་ཀྱང་དེ་སྙེད་དུ་འགྱུར་ཏེ། གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་ས་ཡ་ས་ཡ་ཐམས་ཅད་ཀྱང་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དུ་མ་དག་གིས་གང་བར་འགྱུར་རོ། །འཇམ་དཔལ་འཇིག་
རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་དེར་གླིང་བཞི་པའི་འཇིག་རྟེན་གྱི་ཁམས་བར་མ་བལྟ་ན་ཡིད་དུ་འོང་བ་ཞེས་བྱ་བ། ཤིན་ཏུ་བལྟ་ན་སྡུག་པ། ཤིན་ཏུ་མཛེས་པ། ཤིན་ཏུ་འབྱོར་པ། ཤིན་ཏུ་རྒྱས་པ། སྐྱེས་པ་དང་། བུད་མེད་ཤིན་ཏུ་མང་བས་གང་བ་འབྱུང་བར་

འགྱུར་ཏེ། དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེའི་སྐྱེ་བའི་གྲོང་ཁྱེར་དུ་འགྱུར་རོ། །འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་ནི་བྲམ་
ཟེའི་རིགས་ལས་མངོན་པར་འབྱུང་བར་འགྱུར་རོ། །དེའི་ཡུམ་ནི་ཤུགས་ལྡན་ཞེས་བྱ་བར་འགྱུར་ཏེ། ད་ལྟར་ངའི་ཡུམ་ལྷ་མོ་སྒྱུ་འཕྲུལ་ལྟ་བུར་འགྱུར་རོ། །དེའི་ཡབ་ནི་ཚངས་པའི་དབྱིག་ཅེས་བྱ་བར་འགྱུར་ཏེ། ད་ལྟར་ངའི་ཡབ་རྒྱལ་པོ་ཟས་གཙང་མ་ལྟ་བུར་འགྱུར་རོ། །
དེའི་སྲས་ནི་སྒྲ་རྣམ་པར་གྲགས་པ་ཞེས་བྱ་བར་འགྱུར་ཏེ། །ད་ལྟར་ངའི་གཞོན་ནུ་སྒྲ་གཅན་འཛིན་ལྟ་བུར་འགྱུར་རོ། །དེའི་བཙུན་མོ་དམ་པ་ནི་བློ་གྲོས་ཆེན་པོ་ཞེས་བྱ་བར་འགྱུར་ཏེ། ད་ལྟར་ངའི་ཤཱཀྱའི་བུ་མོ་ས་འཚོ་མ་ལྟ་བུར་འགྱུར་རོ། །དེའི་མ་མ་ནི་གྲགས་པ་ཆེན་པོ་ཞེས་
བྱ་བར་འགྱུར་ཏེ། ད་ལྟར་ངའི་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལྟ་བུར་འགྱུར་རོ། །བཅོམ་ལྡན་འདས་དེའི་རིམ་གྲོ་པ་ནི་རྟག་ཏུ་རྗེས་སུ་འབྲང་བ་ཞེས་བྱ་བར་འགྱུར་ཏེ། ད་ལྟར་ངའི་རིམ་གྲོ་པ་འདུན་པ་ལྟ་བུར་འགྱུར་རོ། །དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་
གི་རྒྱལ་པོ་དེ་གང་ལ་བཅིབས་ཏེ། མངོན་པར་འབྱུང་བར་འགྱུར་བའི་རྟའི་རྒྱལ་པོ་དེ་ནི་ཤུགས་ཅན་ལྡན་ཞེས་བྱ་བར་འགྱུར་ཏེ། ད་ལྟར་ངའི་རྟའི་རྒྱལ་པོ་བསྔགས་ལྡན་ལྟ་བུར་འགྱུར་རོ། །བཅོམ་ལྡན་འདས་དེའི་བྱང་ཆུབ་ཀྱི་སྙིང་པོ་ནི་ཆོས་ཀྱིས་འཕགས་པ་ཞེས་བྱ་བར་འགྱུར་
ཏེ། དེར་དེ་བཞིན་གཤེགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བྱང་ཆུབ་ཀྱི་སྙིང་པོ་དེ་ནི་བྱང་ཆུབ་ཀྱི་ཤིང་འབུམ་ཕྲག་བརྒྱད་ཅུས་ཡོངས་སུ་བསྐོར་བར་འགྱུར་རོ། །འཇམ་དཔལ་དེའི་ཚེ་དེའི་དུས་ན་བདུད་དམ་
བདུད་ཀྱི་རིས་ཀྱི་ལྷ་རྣམས་འབྱུང་བར་མི་འགྱུར་ཏེ། འཇམ་དཔལ་གང་གི་ཚེ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་འཇིག་རྟེན་གྱི་ཁམས་དེ་ན་སེམས་ཅན་གྱི་

རིས་གང་ཇི་སྙེད་ཅིག་ཡོད་པ་དེ་དག་ཐམས་ཅད་མེ་ཏོག་དང་ཕྲེང་བ་དང་། སྤོས་དང་། ཕྱེ་མ་དང་། བྱུག་པ་དང་། སིལ་སྙན་དང་། ཕེག་ཐོགས་ཤིང་བྱང་ཆུབ་ཀྱི་སྙིང་པོ་ཆོས་ཀྱིས་འཕགས་པ་ག་ལ་བ་དེར་དོང་སྟེ། གླུ་དང་རོལ་མོ་སྣ་ཚོགས་བྱེད་པར་འགྱུར་རོ། །
འོག་མིན་རིས་ཀྱི་མཐར་ཐུག་པའི་ལྷའི་ཚོགས་ཐམས་ཅད་ཀྱང་དེར་འདུ་བར་འགྱུར་རོ། །གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། མི་འམ་ཅི་དང་། ལྟོ་འཕྱེ་ཆེན་པོའི་ཚོགས་ཕལ་པོ་ཆེའང་དེར་འདུ་བར་འགྱུར་རོ། །ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་
དང་། བྱང་ཕྱོགས་དག་ནས་ཀྱང་བྱང་ཆུབ་སེམས་དཔའི་ཚོགས་ཤིན་ཏུ་མང་བ་འདུ་བར་འགྱུར་རོ། །འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་ཐོག་མ་མངོན་པར་རྫོགས་པར་སངས་རྒྱས་ནས་འདུས་པའི་འཁོར་དུ་བྱང་ཆུབ་སེམས་དཔའི་སྤྱོད་
ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་བ་བསྟན་པའི་ཆོས་ཀྱི་རྣམ་གྲངས་ཆེན་པོ་མདོ་སྡེ་བྱེ་བ་འབུམ་ཕྲག་དུ་མའི་འཁོར་དང་ལྡན་པ་སྟོན་པར་འགྱུར་ཏེ། འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེས་ཆོས་ཀྱི་རྣམ་གྲངས་དེ་བསྟན་པའི་ཚེ་
སེམས་ཅན་གང་གཱའི་ཀླུང་གི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། འཇམ་དཔལ་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེས་ཆོས་སྟོན་པ་ནི་ཐེག་པ་གསུམ་རྣམ་པར་དགོད་པས་མི་སྟོན་ཏེ། སངས་
རྒྱས་ཀྱི་ཞིང་དེར་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པ་དག་འབྱུང་བར་མི་འགྱུར་རོ། །སེམས་ཅན་ཐམས་ཅད་ཀྱང་ཐེག་པ་གཅིག་ལ་མོས་པ་རྒྱ་ཆེན་པོ་ལ་མོས་པ་ཤ་སྟག་སངས་རྒྱས་ཀྱི་ཞིང་དེར་སྐྱེ་བར་འགྱུར་ཏེ། འཇམ་དཔལ་དེ་ལྟར་དེ་བཞིན་གཤེགས་པ་
བདེན་པའི་བློ་གྲོས་ཀྱི་ཏོག་གི་རྒྱལ་པོ་དེའི་འདུས་པ་དང་པོ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་གང་གཱའི་ཀླུང་གི་བྱེ་མ་སྙེད་དུ་འགྱུར་རོ། །འདུས་པ་གཉིས་པ་ནི་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཁྲག་ཁྲིག་ཕྲག་བརྒྱད་ཅུར་

འགྱུར་རོ། །འདུས་པ་གསུམ་པ་ནི་བྱང་ཆུབ་སེམས་དཔའ་དཀྲིགས་ཕྲག་དྲུག་ཅུར་འགྱུར་ཏེ། དེ་ཕྱིན་ཅད་སེམས་ཅན་གྲངས་དང་བགྲང་བ་ལས་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་འགོད་པར་འགྱུར་རོ། །འཇམ་དཔལ་དེ་
བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེ་བྱང་ཆུབ་ཐོབ་པའི་ཚེའི་ཚད་ནི་བར་གྱི་བསྐལ་པ་དྲུག་ཅུར་འགྱུར་རོ། །དེ་ཡོངས་སུ་མྱ་ངན་ལས་འདས་ནས་ཀྱང་ལོ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུར་དམ་པའི་ཆོས་གནས་པར་འགྱུར་རོ། །དམ་པའི་ཆོས་རྒྱས་པས་
སེམས་ཅན་དེ་སྙེད་འདུལ་བར་འགྱུར་རོ། །འཇམ་དཔལ་དེ་བཞིན་གཤེགས་པ་དེ་གང་གི་ཚེ་ཡོངས་སུ་མྱ་ངན་ལས་འདའ་བར་འགྱུར་བ་དེའི་ཚེ་བྱང་ཆུབ་སེམས་དཔའ་ཏོག་ཆེན་པོ་ཞེས་བྱ་བ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་བཀོད་པ་ཆེན་པོ་ཞེས་བྱ་བར་འགྱུར་རོ་ཞེས་བྱང་ཆུབ་སེམས་དཔའ་ཏོག་ཆེན་པོ་ཞེས་བྱ་བ་ལུང་བསྟན་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་དེའི་ཚེ་ཐམས་ཅད་དང་
ལྡན་པའི་འཁོར་དེ་དེའི་ཚེ་དེའི་དུས་ན་བྱང་ཆུབ་སེམས་དཔའ་ཏོག་ཆེན་པོ་ཞེས་བྱ་བ་འབྱུང་ཞིང་། བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོ་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ།
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཀོད་པ་ཆེན་པོ་ཞེས་བྱ་བར་འགྱུར་བ་དེ་གང་ཞིག་ཡིན་སྙམ་དུ་ཡ་མཚན་དུ་འཛིན་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེའི་སེམས་ཀྱི་རྣམ་པར་རྟོག་པ་ཐུགས་
ཀྱིས་ཐུགས་སུ་ཆུད་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་རིགས་ཀྱི་བུ་བདེན་སྨྲ་འདིའི་མདུན་དུ་བྲམ་ཟེའི་ཁྱེའུ་བདེན་དགའ་ཞེས་བྱ་བ་འདུག་པ་བྲམ་ཟེའི་བྱིས་པ་ཐམས་ཅད་ཀྱི་ནང་ན་མཆོག་ཏུ་བྱ་བ་འདི་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་

པ་ཡང་དག་པར་རྫོགས་པའི་སངས་རྒྱས་བཀོད་པ་ཆེན་པོ་ཞེས་བྱ་བར་འགྱུར་ཏེ། དེའི་སངས་རྒྱས་ཀྱི་ཞིང་གི་བཀོད་པ་དེ་དག་ནི་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་རྒྱལ་པོའི་སངས་རྒྱས་ཀྱི་ཞིང་གི་བཀོད་པ་བཞིན་དུ་འགྱུར་རོ། །སངས་རྒྱས་ཀྱི་
ཞིང་གི་ཡོན་ཏན་བཀོད་པའི་ཆེ་བ་དེ་ཐོས་ནས་འཁོར་གྱི་དཀྱིལ་འཁོར་དེ་ལས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུས་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་བཏབ་སྟེ། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་
རྒྱལ་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་པ་དེའི་ཚེ་བདག་ཅག་ཀྱང་འཇིག་རྟེན་གྱི་ཁམས་དེར་སྐྱེ་བར་ཤོག་ཤིག་ཅེས་སྨོན་ལམ་བཏབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་དག་ཐམས་ཅད་ཀྱང་སངས་
རྒྱས་ཀྱི་ཞིང་དེར་སྐྱེ་བར་ལུང་བསྟན་ཏོ། །དེ་ནས་གཅེར་བུ་པ་འབུམ་ཕྲག་བརྒྱད་ཅུ་པོ་དེ་དག་གིས་ཀྱང་ཚིག་འཐུན་པར་སྨྲས་པ། བཅོམ་ལྡན་འདས་བདག་ཅག་ཀྱང་སངས་རྒྱས་ཀྱི་ཞིང་དེར་སྐྱེ་བར་གྱུར་ཅིག་ཅེས་སྨོན་ལམ་བཏབ་བོ། །དེ་ནས་བཅོམ་ལྡན་འདས་ཀྱིས་དེ་དག་
ཀྱང་སངས་རྒྱས་ཀྱི་ཞིང་དེར་སྐྱེ་བར་ལུང་བསྟན་ཏོ། །དེ་ནས་སྟེང་གི་བར་སྣང་ལས་ཀྱང་ལྷའི་བུ་བྱེ་བ་ཁྲག་ཁྲིག་འབུམ་ཕྲག་དགུ་བཅུས་འདི་སྐད་ཀྱི་ཚིག་བརྗོད་དེ། བཅོམ་ལྡན་འདས་བདག་ཅག་ཀྱང་བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཀྱི་ཏོག་གི་
རྒྱལ་པོ་དེ་བྱང་ཆུབ་བརྙེས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་དེར་སྐྱེ་བར་གྱུར་ཅིག །ཡོན་ཏན་བཀོད་པ་བསམ་གྱིས་མི་ཁྱབ་པ་དེ་ཡང་མཐོང་བར་ཤོག་ཤིག་ཅེས་སྨོན་ལམ་བཏབ་བོ། །བཅོམ་ལྡན་འདས་ཀྱིས་བཀའ་
སྩལ་པ། ལྷའི་བུ་དག་ཁྱེད་ཅག་ཀྱང་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་ཅན་དེར་སྐྱེ་བར་འགྱུར་ཏེ། དེ་བཞིན་གཤེགས་པ་དེ་ཡང་མཉེས་པར་བྱེད་པར་འགྱུར་རོ། །ལྷའི་བུ་ཁྱེད་ཀྱང་འཇིག་རྟེན་གྱི་ཁམས་ཤིན་ཏུ་རྣམ་པར་བལྟས་པའི་གྲགས་པ་

ཅན་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མིང་ཐ་དད་པའི་དེ་བཞིན་གཤེགས་པར་འགྱུར་ལ་ཚེའི་ཚད་ནི་འཐུན་པར་འགྱུར་རོ། །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་
པ་དྲུག་ཏུ་གཡོས་ཏེ། སའི་འོག་ནས་པད་མ་འཛམ་བུ་ཆུ་བོའི་གསེར་གྱི་འདབ་མ་ཅན་ནོར་བུ་རིན་པོ་ཆེ་ཆེན་པོ་ཨན་ད་རྙིལ་གྱི་ཟེ་བའི་ཚོགས་ཅན། སྤུག་གི་སྙིང་པོ་དང་ལྡན་པ། ནོར་བུ་རིན་པོ་ཆེ་བཻ་དཱུརྱའི་ཆུ་བ་ཅན། བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ས་གཞི་བརྟོལ་ནས་
མངོན་པར་འཕགས་ཏེ། པད་མ་དེ་དག་ཐམས་ཅད་ལ་བྱང་ཆུབ་སེམས་དཔའི་གཟུགས་སྐྱིལ་མོ་ཀྲུང་དུ་འཁོད་པ་མཚན་དང་དཔེ་བྱད་བཟང་པོས་ལེགས་པར་བརྒྱན་པའི་ལུས་ཀྱིས་བཅོམ་ལྡན་འདས་ལ་འདུད་ཅིང་ཕྱག་འཚལ་བར་སྣང་བར་གྱུར་ཏེ། དེ་དག་གིས་རིན་པོ་ཆེ་སྣ་ཚོགས་
ཀྱི་སྤྲིན་གྱི་དྲ་བ་དག་གིས་བཅོམ་ལྡན་འདས་ལ་མངོན་པར་བཀབ་ནས་འདི་སྐད་ཀྱི་ཚིག་བརྗོད་དོ། །བཅོམ་ལྡན་འདས་བདག་ཅག་ནི་འཇིག་རྟེན་གཞན་དང་གཞན་གྱི་ཁམས་ནས་དེ་བཞིན་གཤེགས་པས་བྱང་ཆུབ་སེམས་དཔའི་ཡོན་ཏན་བསམ་གྱིས་མི་ཁྱབ་པ་བཀའ་སྩལ་པ་
འདིའང་ཉན། བཅོམ་ལྡན་འདས་ལ་ཡང་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། རིགས་ཀྱི་བུ་བདེན་སྨྲ་འདི་དང་འཁོར་འདུས་པ་འདི་ཡང་བལྟ་བའི་སླད་དུ་འདིར་མཆིས་ཏེ། བཅོམ་ལྡན་འདས་ཆོས་ཀྱི་རྣམ་གྲངས་འདི་ཐོས་པས་སངས་རྒྱས་ཀྱི་ཞིང་བསམ་གྱིས་མི་
ཁྱབ་པ་དག་ཏུ་བྱང་ཆུབ་སེམས་དཔའ་བགྲང་བ་ལས་འདས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་དོན་འདི་ཉིད་ཤིན་ཏུ་གསལ་བར་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །རྩེ་གཅིག་
སེམས་སུ་དབང་པོ་མཉམ་ཞོག་སྟེ། །དེ་རིང་ངས་སྨྲས་འདི་དོན་མཉན་པར་གྱིས། །དེ་བཞིན་གཤེགས་ལ་བརྫུན་གྱི་ཚིག་མི་མངའ། །བདེ་གཤེགས་རང་བྱུང་ཚིག་ནི་གཞན་དུ་མིན། །སྐྱེ་བོ་དེ་དགའ་བདེན་སྨྲ་འདི་ཉིད་ནི། །དག་ཅིང་དྲི་མེད་གནོད་མེད་བསྐལ་པ་ལ། །བསྐལ་པ་གྲངས་མེད་

མང་པོས་འཇིག་རྟེན་དུ། །འཚང་རྒྱ་བདེན་པའི་བློ་གྲོས་ཏོག་གི་རྒྱལ། །ཉོན་མོངས་གནོད་པ་དེ་ལ་མི་འབྱུང་སྟེ། །དེ་ཕྱིར་བསྐལ་པ་དེ་ནི་གནོད་མེད་པ། །འཇིག་རྟེན་མིང་ཡང་རྣམ་པར་བལྟས་པ་སྟེ། །བསྐལ་པ་དེ་ནི་དཔལ་གྱི་ཕུང་པོར་འགྱུར། །རྣམ་པར་འདྲེན་
པ་དེ་ཡི་བསྐལ་པ་དེ། །ལྷ་མི་རྣམས་ཀྱིས་བལྟ་བའི་འོས་འགྱུར་ཏེ། །རིན་ཆེན་ཚོགས་ཀྱི་འོབས་དང་རྟ་བབས་རྣམས། །ཉམས་དགའ་ཀུན་ནས་ཤིན་ཏུ་མཛེས་པར་འགྱུར། །འཛམ་བུ་ཀླུང་གི་གསེར་གྱི་དྲ་བས་གཡོགས། །ཆོས་ཀྱི་སྒྲ་དབྱངས་ཡིད་དུ་འོང་བ་བསྒྲགས། །སེང་གེའི་
རྒྱལ་མཚན་རབ་རྣམས་རྟག་ཏུ་བསྒྲེང་། །རིན་ཆེན་ཚོགས་ཀྱི་ལྡ་ལྡི་བརྒྱ་དག་སྤྱངས། །རྩིག་པའི་རྒྱུད་ནི་རིན་ཆེན་དྲི་མེད་དེ། །དེ་ནི་ལྷ་ཡི་ཁྱིམ་དང་འདྲ་བར་འགྱུར། །མཚེའུ་དང་ལུ་མ་པད་མའི་མཚོ་དག་གིས། །དེ་ནི་རྟག་ཏུ་ལེགས་པར་བརྒྱན་པར་འགྱུར། །དེ་ཡི་ཆུ་དང་
པད་མ་ཨུད་པལ་དང་། །པད་མ་དཀར་པོ་དག་གིས་ཀུན་ཁེབས་འགྱུར། །གླིང་བཞི་པ་ཡི་འཇིག་རྟེན་བར་མ་དེ། །མིང་ནི་བལྟ་ན་སྡུག་ཅིང་ཡིད་འོང་སྟེ། །དེ་ནི་བདེ་གཤེགས་དེ་ཡི་སྐྱེ་བའི་ས། །རང་བྱུང་དེ་ནི་བྲམ་ཟེའི་རིགས་ལས་འབྱུང་། །ཐུབ་པའི་ཡུམ་ནི་ཤུགས་དང་
ལྡན་ཞེས་བྱ། །ཡབ་ནི་ཚངས་པའི་དབྱིག་ཅེས་བྱ་བར་འགྱུར། །དེ་ཡི་བུ་ནི་རྣམ་གྲགས་སྒྲ་ཞེས་བྱ། །དཔེར་ན་ངའི་བུ་སྒྲ་གཅན་ཟིན་འདི་འདྲ། །བདེ་གཤེགས་དེ་ཡི་བཙུན་མོ་དམ་པ་ནི། །བློ་གྲོས་ཆེན་མོ་ང་ཡི་ས་འཚོ་བཞིན། །དེ་ཡི་མ་མ་མིང་ནི་གྲགས་ཆེན་ཏེ། །ང་ཡི་སྐྱེ་
དགུའི་བདག་མོ་ཆེན་མོ་བཞིན། །ཐུབ་པའི་རིམ་གྲོ་བྱེད་པའི་སེམས་ཅན་འཕགས། །རྟག་ཏུ་རྗེས་སུ་འབྲང་ཞེས་བྱ་བ་སྟེ། །ང་ཡི་རིམ་གྲོ་འདུན་པ་གུས་ལྡན་བཞིན། །དེ་ནི་འདྲེན་པ་དེ་ལ་རིམ་གྲོ་བྱེད། །ཐུབ་པ་དེ་ཡི་རྟ་མཆོག་འགྱུར་བ་ཡི། །ཤུགས་ཅན་ཞེས་བྱའི་མིང་དང་ལྡན་
འགྱུར་ཏེ། །བདེ་གཤེགས་མངོན་པར་འབྱུང་ཚེ་བཅིབས་པར་འགྱུར། །ང་ཡི་རྟ་མཆོག་བསྔགས་ལྡན་གྱུར་པ་བཞིན། །བདེ་གཤེགས་དེ་ཡི་རྫོགས་པའི་བྱང་ཆུབ་ཤིང་། །ཆོས་ཀྱི་འཕགས་ཞེས་བྱ་བ་དེ་ཚེ་འབྱུང་། །ཤིང་མཆོག་བརྒྱ་ཕྲག་སྟོང་དུ་བསྒྱུར་བ་ཡིན། །ཕྲག་ནི་བརྒྱད་ཅུ་

དག་གིས་དེ་བསྐོར་འགྱུར། །ཤིང་མཆོག་དེ་དྲུང་ཀྱེ་མ་ཆོས་ཀྱི་རྒྱལ། །རང་བྱུང་ཟླ་མེད་བདེན་ཞེས་བྱ་བཞུགས་ནས། །བླ་ན་མེད་པའི་བྱང་ཆུབ་རབ་ཞི་བ། །མྱ་ངན་མེད་པ་མངོན་པར་འཚང་རྒྱར་འགྱུར། །དེ་ན་བདུད་མེད་བདུད་ཀྱི་ཕྱོགས་ཀྱང་མེད། །བདུད་ཀྱི་ལས་ཀྱང་དེར་
འབྱུང་མི་འགྱུར་རོ། །རྒྱལ་བ་ཐུབ་པ་གང་ཟག་ཟླ་མེད་པའི། །སངས་རྒྱས་ཞིང་ནི་གནོད་བདོ་མེད་པར་འགྱུར། །མི་དང་ལྷ་ཚོགས་མང་པོ་འདུ་འགྱུར་ཏེ། །རྣམ་དག་ཤིན་ཏུ་སྦྱངས་པ་དེ་ཚེ་འབྱུང་། །དེ་ཀུན་མེ་ཏོག་ཕྲེང་བ་གོས་དང་གླུ། །རོལ་མོ་སྒྲ་ཡིས་བདེ་གཤེགས་
དྲུང་འདོང་འགྱུར། །རྒྱལ་བས་དེ་དག་བསམ་མཁྱེན་མདོ་སྡེ་འདི། །མདོ་གཞན་ལྷན་ཅིག་དྲང་སྲོང་གསུང་བར་འགྱུར། །རྒྱལ་བ་དེས་ནི་རབ་ཏུ་གསུངས་པ་ཡི། །མདོ་སྡེ་ཁྱད་པར་འཕགས་པ་འདི་ཐོས་ནས། །སེམས་ཅན་དཔག་ཡས་གང་གཱའི་བྱེ་མ་སྙེད། །ཐུབ་དབང་
བྱང་ཆུབ་མཆོག་ཏུ་མི་ལྡོག་འགྱུར། །ཐེག་པ་དམན་པ་དེར་འབྱུང་མི་འགྱུར་ཏེ། །རང་རྒྱལ་ཐེག་པའང་ཞིང་དེར་འབྱུང་མི་འགྱུར། །རྒྱལ་བ་དེ་ཡི་སངས་རྒྱས་ཞིང་མཆོག་དེར། །བྱང་ཆུབ་སེམས་དཔའ་འབྱུང་ཀུན་དཔའ་ཞིང་མཛངས། །རྐང་གཉིས་མཆོག་དེའི་འདུས་པ་
དང་པོར་ནི། །རྒྱལ་སྲས་གྲགས་པའི་འོད་ལྡན་གང་འབྱུང་བ། །རྫོགས་པའི་བྱང་ཆུབ་སེམས་དཔའ་ཕྱིར་མི་ལྡོག །རྣམ་དག་གང་གཱའི་རྡུལ་བས་མང་བ་འབྱུང་། །བློ་བཟང་ལྡན་པའི་འདུས་པ་གཉིས་པ་ནི། །སྐྱེ་བ་གཅིག་གནས་ཁྲག་ཁྲིག་བརྒྱད་ཅུ་འབྱུང་། །འདུས་པ་གསུམ་
པ་བྱང་ཆུབ་སེམས་དཔའ་མཆོག །དཀྲིགས་ཕྲག་དྲུག་ཅུ་དག་ནི་འབྱུང་བར་འགྱུར། །བདེ་བར་གཤེགས་དེའི་ཚེ་ཡི་ཚད་འགྱུར་བ། །བསྐལ་པ་བར་མ་དྲུག་ཅུ་ཚང་བ་སྟེ། །རྒྱལ་བ་དེ་ནི་མྱ་ངན་འདས་གྱུར་ནས། །མི་ཡི་འདྲེན་པའི་ཆོས་ཀྱི་སྒྲོན་མ་ཡང་། །ལོ་གྲངས་བྱེ་བ་ཁྲག་ཁྲིག་
སྟོང་ཕྲག་ནི། །བརྒྱད་ཅུ་ཐམ་པར་གནས་པར་འགྱུར་བ་ཡིན། །རང་གི་སྐུ་གདུང་རིང་བསྲེལ་རྒྱས་མཛད་ཅིང་། །དེ་ནི་གདུལ་བ་རབ་མང་འདུལ་བར་འགྱུར། །དྲང་སྲོང་ཆེ་དེ་བྱང་ཆུབ་སེམས་དཔའ་ནི། །ཏོག་ཆེན་ལུང་བསྟན་མཛད་ནས་མྱ་ངན་འདའ། །འདི་ནི་བཀོད་ཆེན་ཞེས་བྱའི་ཐུབ་དབང་

འགྱུར། །རྒྱལ་བ་དགྲ་ལས་རྒྱལ་བར་འདི་འགྱུར་རོ། །རྒྱལ་བ་དེ་ཡི་ཞིང་བཀོད་འདི་འདྲ་སྟེ། །འཇིག་རྟེན་ཕན་པར་མཛད་པ་འདི་བཞིན་ནོ། །རྒྱལ་བའི་བྱང་ཆུབ་མཉམ་མེད་དྲི་མེད་པ། །རབ་ཞི་རྫོགས་པའི་སངས་རྒྱས་མགོན་པོར་འགྱུར། །ང་ཡི་མཁྱེན་
པ་དེ་འདྲ་ནམ་མཁའི་ཚད། །བསྐལ་པ་འབྱུང་བ་མང་པོ་རབ་ཏུ་ཤེས། །འདས་པའི་ལོས་ཤེས་ད་ལྟར་ཅི་ཞིག་སེམས། །ཡེ་ཤེས་ཀུན་དུ་ཐོགས་པ་མེད་པ་མངའ། །ང་ཡི་ཚིག་ནི་དག་ཅིང་བརྫུན་མེད་དེ། །བརྫུན་དུ་མི་སྨྲ་དོན་དམ་བདེན་པ་ལ། །ང་གནས་ནས་ནི་ནམ་ཡང་མི་
སྨྲའོ། །ཇི་སྐད་གསུངས་པ་འདི་ལ་ཡིད་ཆེས་གྱིས། །དྲང་སྲོང་ཆེན་པོའི་གསུང་འདི་ཐོས་གྱུར་ནས། །འཁོར་རྣམས་ཀུན་ཀྱང་དགའ་བའི་སེམས་གྱུར་ཏེ། །དེ་ཚེ་ཁམས་དེར་སྐྱེ་བར་ཤོག་ཤིག་ཅེས། །ཞིང་མཆོག་དེར་སྐྱེར་དད་པས་སྨོན་ལམ་བཏབ། །འཇིག་རྟེན་ཁམས་
མཆོག་དེར་ནི་སྐྱེ་འགྱུར་ཏེ། །འཇིག་རྟེན་འདྲེན་པས་དེ་དག་ལུང་བསྟན་ཏེ། །དེར་ནི་ཁྱེད་ཀྱིས་བདེ་གཤེགས་ཐོབ་གྱུར་ནས། །ཀུན་ཀྱང་སེམས་ཅན་དོན་མང་བྱེད་པར་འགྱུར། །མདོ་སྡེ་རྒྱལ་པོ་འདི་བསྟན་དེ་ཡི་ཚེ། །ས་ཆེན་འདི་ཡང་རྣམ་པ་དྲུག་ཏུ་གཡོས། །བྱང་ཆུབ་
སེམས་དཔའ་པད་མར་གནས་པ་དག །དེ་ཚེ་ཐལ་སྦྱར་ཐུབ་ལ་འདི་སྐད་གསོལ། །ཁྱོད་ཀྱིས་ཆོས་ཚུལ་དམ་པ་འདི་གསུངས་པ། །ཐུབ་པ་ཟླ་མེད་རང་བཞིན་ཤིན་ཏུ་ལེགས། །ཆོས་ཀྱི་ཚུལ་རབ་དམ་པ་མཉན་པ་དང་། །རྒྱལ་བའི་ཆོས་འཚལ་བདག་ཅག་འདིར་མཆིས་ལགས། །
དེ་ནས་ཐམས་ཅད་དང་ལྡན་པའི་འཁོར་དེ་ཚིམ་ཞིང་མགུ་སྟེ། ཡི་རངས་ལ་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་གོས་རེ་རེ་བཞག་སྟེ། །གོས་གཞན་དག་བཅོམ་ལྡན་འདས་ཀྱི་སྐུ་ལ་གསོལ་ནས་ཚིག་འདི་སྐད་ཀྱང་སྨྲས་ཏེ། ཀྱེ་མ་འཇིག་རྟེན་དུ་ཆོས་ཀྱི་འཁོར་ལོ་བསྐོར་
བ་གཉིས་པ་བྱུང་བར་གྱུར་ཏེ། དང་པོ་ནི་གྲོང་ཁྱེར་བཱ་རཱ་ཎ་སཱིར་བསྐོར་ཏོ། །ཆོས་ཀྱི་འཁོར་ལོ་གཉིས་པ་ནི་བཅོམ་ལྡན་འདས་ཀྱིས་དེ་རིང་འདིར་བསྐོར་ཏོ། །བཅོམ་ལྡན་འདས་བདག་ཅག་ཀྱང་རྟག་ཏུ་རྒྱུན་མི་ཆད་པར་ཆོས་རིན་པོ་ཆེ་འདི་ལྟ་བུ་འདི་དང་མི་འབྲལ་ཞིང་སྐྱེས་བུ་དམ་པ་འདི་དང་

མི་འབྲལ་བར་ཤོག་ཤིག་ཅེས་སྨོན་ལམ་བཏབ་བོ། །སྟེང་གི་བར་སྣང་ལས་ཀྱང་ལྷའི་རྔ་ཆེན་པོ་དག་སྒྲ་མངོན་པར་འབྱིན་པར་གྱུར་ཏོ། །ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོའི་ཆར་ཆེན་པོ་ཡང་བཅོམ་ལྡན་འདས་ཀྱི་ཞབས་ཀྱི་དྲུང་དུ་
མངོན་པར་བབ་པར་གྱུར་ཏོ། །སྟེང་གི་བར་སྣང་ལ་ཡང་ལྷ་རྣམས་ཀྱིས་ལྷའི་གོས་དག་གཡབ་མོའི་ཐབས་སུ་བསྐོར་ཏེ། །ཚིག་འདི་སྐད་ཀྱང་བརྗོད་པར་གྱུར་ཏོ། །སྐྱེས་བུ་དམ་པ་གང་དག་ཆོས་ཀྱི་རྣམ་གྲངས་འདི་འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དེ་
དག་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པ་དང་། ཀློག་
པ་དང་། ཀུན་ཆུབ་པར་བགྱིད་པ་དང་། གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དང་། གླེགས་བམ་དུ་བགྱིས་ཤིང་འཆང་བ་ན་བསོད་ནམས་ཀྱི་ཕུང་པོ་ཇི་སྙེད་ཅིག་འཕེལ་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་
གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་གལ་ཏེ་རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སེམས་ཅན་གཟུགས་ཅན་ནམ། གཟུགས་ཅན་མ་ཡིན་པའམ། འདུ་ཤེས་ཅན་ནམ། འདུ་ཤེས་ཅན་
མ་ཡིན་པ་ཇི་སྙེད་པ་དང་སེམས་ཅན་གྱི་ཁམས་ན་སེམས་ཅན་ཇི་སྙེད་ཅིག་ཡོད་པར་སངས་རྒྱས་ཀྱི་ཡེ་ཤེས་ཀྱིས་མཁྱེན་པ་དེ་དག་ཐམས་ཅད་སྔ་ཕྱི་མེད་པར་མིའི་ལུས་ཐོབ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ལ་དེ་དག་
ཐམས་ཅད་ལ་རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་གིས་བསྐལ་པར་གནས་པའི་ཚེ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས། བླ་མར་བྱས། བསྟི་སྟང་དུ་བྱས། མཆོད་པ་བྱས་ན། འཇམ་དཔལ་འདི་ཇི་སྙམ་དུ་སེམས། རིགས་ཀྱི་བུའམ། རིགས་ཀྱི་བུ་མོ་དེ་བསོད་ནམས་

མང་དུ་སྐྱེད་དམ། གསོལ་པ་བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་ཏེ། འདི་ལྟར་བགྲང་བའམ། བརྩི་བར་ཡང་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བས་ཀྱང་གང་གིས་ཆོས་ཀྱི་རྣམ་
གྲངས་འདི་འཛིན་ཏམ། ཀློག་གམ། གཞན་དག་ལ་ཡང་རྒྱ་ཆེར་ཡང་དག་པར་སྟོན་ཏམ། གླེགས་བམ་དུ་བྲིས་ཏེ་འཆང་ངམ། གཞན་དག་ལ་ཡང་རྒྱ་ཆེར་ཡང་དག་པར་བསྟན་ན། ཆོས་ཀྱི་རྣམ་གྲངས་འདི་ལུང་འབོགས་པ་དེ་བསོད་ནམས་མང་དུ་སྐྱེད་དོ། །དེ་སྐད་ཅེས་བཀའ་
སྩལ་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་འཇིག་རྟེན་ཐམས་ཅད་ལ་སྨན་པའི་སླད་དུ་ཆོས་ཀྱི་རྣམ་གྲངས་འདི་བསྟན་པ་ངོ་མཚར་ལགས་སོ། །བཅོམ་ལྡན་འདས་ཆོས་ཀྱི་རྣམ་
གྲངས་འདི་ཡུན་རིང་པོ་ཇི་སྲིད་ཅིག་ཏུ་འཛམ་བུའི་གླིང་ན་མཆིས་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ང་མྱ་ངན་ལས་འདས་ནས་གང་གི་ཚེ་རྒྱལ་པོ་བརྒྱད་ཀྱིས་ངའི་རིང་བསྲེལ་རྒྱ་ཆེར་བྱ་བའི་ཕྱིར་བརྒྱད་དུ་བགོས་ནས་ཟ་མ་ཏོག་བརྒྱད་དུ་བཅུག་སྟེ།
རང་རང་གི་ཡུལ་དུ་མཆོད་རྟེན་གྱི་ཁང་པ་ཡངས་པར་འཇོག་པར་འགྱུར་ཏེ། རྒྱལ་པོ་མ་སྐྱེས་དགྲས་ནི་ངའི་རིང་བསྲེལ་རྣམས་ལས་བརྒྱད་ཆ་བླངས་ནས་རིན་པོ་ཆེའི་ཟ་མ་ཏོག་ཏུ་བཅུག་སྟེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཕྱི་རོལ་ཏུ་ས་བརྐོས་ནས་རིང་བསྲེལ་ལ་པོག་སྣོད་ཁ་གབ་
བཅད་ནས་སྤོས་ཀྱིས་ནི་བདུགས། གདུགས་དང་རྒྱལ་མཚན་ནི་བཙུགས། རིན་པོ་ཆེའི་མེ་ཏོག་ནི་གཏོར། ལོ་བརྒྱར་བྱིན་གྱིས་བརླབས་པའི་མར་མེ་མེ་ལྕེ་གཅིག་ཏུ་འབར་བ་ནི་བུས་ཤིང་རིང་བསྲེལ་གྱི་ཟ་མ་ཏོག་འཇོག་པར་འགྱུར་ལ། རྒྱལ་པོ་མྱ་ངན་མེད་པ་འབྱུང་བར་འགྱུར་བ་བསྡད་
པའི་ཕྱིར་མདོའི་རྒྱལ་པོ་འདི་གསེར་གྱི་གླེགས་བམ་ལ་བྲིས་ནས་རིང་བསྲེལ་གྱི་ཟ་མ་ཏོག་དེ་ཉིད་དུ་འཇུག་པར་འགྱུར་རོ། །འཇམ་དཔལ་འདི་ལྟ་སྟེ། རྒྱལ་པོ་མྱ་ངན་མེད་པ་དེ་ནི་མྱ་ངན་ལས་འདས་ནས་ལོ་བརྒྱ་ལོན་པ་ན་འབྱུང་བར་འགྱུར་ཏེ། དེ་ནི་མོའུ་རྱའི་རིགས་སུ་སྐྱེས་པ། འཛམ་

བུའི་གླིང་ལ་དབང་བ། མཐུ་དང་བརྩོན་པ་ཐོབ་པ། སྟོབས་ཀྱི་འཁོར་ལོས་སྒྱུར་བར་འགྱུར་ཏེ། དེ་ངའི་རྣམ་པ་ལས་རྗེས་སུ་དྲན་པར་བྱེད་པར་འགྱུར་རོ། །ངའི་བསྟན་པ་ལ་ཡང་དད་པ་ཐོབ་པར་འགྱུར་རོ། །དེའི་ཚེ་དེའི་དུས་ན་དགེ་སློང་དབང་པོ་བདེ་བ་ཞེས་བྱ་བ་རྫུ་འཕྲུལ་
ཆེ་བ། མཐུ་ཆེ་བ། དམ་པའི་ཆོས་ཡོངས་སུ་འཛིན་པ། ཤིན་ཏུ་རྒྱས་པའི་མདོ་སྡེ་འཛིན་པ། རྒྱལ་པོའི་རིགས་ལས་རབ་ཏུ་བྱུང་བ། རྒྱལ་པོ་མྱ་ངན་མེད་པས་བཀུར་བ་གྲོང་དུ་འཇུག་པ་འབྱུང་བར་འགྱུར་རོ། །འཇམ་དཔལ་དེ་ལྟར་རྒྱལ་པོ་མྱ་ངན་མེད་པ་དེས་ངའི་རིང་
བསྲེལ་རྒྱ་ཆེར་བྱ་བའི་ཕྱིར་སྐྱེ་བོ་མང་པོས་ཡོངས་སུ་བསྐོར་ཅིང་བཀོད་པ་ཆེན་པོ་དང་རྒྱལ་པོའི་མཐུ་ཆེན་པོས་མེ་ཏོག་དང་། ཕྲེང་བ་དང་། སྤོས་དང་། ཕྱེ་མ་དང་། བྱུག་པ་དང་། སིལ་སྙན་དང་། ཕེག་ཐོགས་ཏེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་སོང་ནས་མཆོད་
པའི་ཆོ་ག་མངོན་པར་འདུ་བྱ་བ་ཆེན་པོ་བྱས་ཏེ་སའི་ཕྱོགས་དེ་ནས་རིང་བསྲེལ་གྱི་ཟ་མ་ཏོག་དེ་ཕྱུང་ནས། ཉི་མ་བདུན་གྱི་བར་དུ་སྤོས་ཐམས་ཅད་དང་། མེ་ཏོག་ཐམས་ཅད་དང་། མེ་ཏོག་ཕྲེང་ཐམས་ཅད་དང་། ཕྱེ་མ་ཐམས་ཅད་དང་། བྱུག་པ་ཐམས་ཅད་དང་། སིལ་སྙན་ཐམས་
ཅད་དང་། ཕེག་རྡོབ་པ་དང་། གླུ་དབྱངས་ཐམས་ཅད་ཀྱིས་མཆོད་པ་རྣམ་པ་དུ་མ་བྱས་ཏེ། སྐར་མ་དང་། སྦྱོར་བ་དང་ལྡན་པ་གཅིག་ལ་ཡུལ་སྣ་ཚོགས་སུ་ཆོས་ཀྱི་རྒྱལ་པོས་བྱས་པའི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་རོ། །དེའི་ཚེ་ཆོས་སྨྲ་བ་དབང་པོ་བདེ་བས་
ཆོས་ཀྱི་རྣམ་གྲངས་འདི་རིང་བསྲེལ་གྱི་ཟ་མ་ཏོག་ནས་ཕྱུང་ནས་བྱང་ཕྱོགས་ཀྱི་རྒྱུད་ཀྱི་ཡུལ་ཆེན་པོར་འཇོག་པར་འགྱུར་ཏེ། སྐྱེ་བོ་མང་པོས་ཤེས་པར་མི་འགྱུར། སྐྱེ་བོ་མང་པོས་རིག་པར་མི་འགྱུར། སྐྱེ་བོ་མང་པོས་ཡོངས་སུ་བཟུང་བར་མི་འགྱུར་ལ་ཆོས་ཀྱི་རྣམ་གྲངས་འཛིན་པ་ཉུང་
བ་དང་། ཀློག་པ་ཉུང་བར་འགྱུར་ཏེ། འཇམ་དཔལ་ཆོས་ཀྱི་རྣམ་གྲངས་འདི་ནི་རྟག་ཏུ་སྒྲོམ་དུ་བཅུག་པ་དང་སྣོད་དུ་བཅུག་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཚོལ་བ་མེད་ཅིང་སྣོད་མ་ཡིན་པའི་ཕྱིར་རོ། །འཇམ་དཔལ་ཆོས་ཀྱི་རྣམ་གྲངས་འདི་ནི་མོས་པར་དཀའ་

ཞིང་ཡིད་ཆེས་པར་དཀའ་ལ། རྟོགས་པར་དཀའ་བ་སྟེ། མུན་སྤྲུལ་དུ་མངོན་པར་ཡིད་ཆེས་པའམ། འཇུག་པར་མི་ནུས་སོ། །འཇམ་དཔལ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་བབ་པའི་ཚེ་ཆོས་ཀྱི་རྣམ་གྲངས་འདི་གང་ལ་ལ་དག་གིས་ཐོས་
ཏེ། ཡིད་ཆེས་པར་གྱུར་ཏམ། ཚོལ་ལམ་རྟོག་ན་དེ་དག་ནི་འཇམ་དཔལ་ཁྱོད་ཀྱིས་སངས་རྒྱས་མང་པོ་ལ་བསྙེན་བཀུར་བྱས་པ། ལེགས་པར་སྤྱོད་པ་སྤྱད་པ། ཐེག་པ་ཆེན་པོ་འདིའི་སྣོད་དུ་གྱུར་པར་ངེས་པར་རིག་པར་བྱ་སྟེ། རིགས་ཀྱི་བུའམ། རིགས་ཀྱི་བུ་མོ་གང་དག་
ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པ་དང་། གླེགས་བམ་དུ་བྱས་ཤིང་འཆང་བ་དེ་དག་ཐམས་ཅད་ཀྱིས་ཀྱང་བདག་ཅག་གིས་ནི་སྔོན་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་དག་མཐོང་བར་གྱུར་ཏོ། །མཉེས་པར་
བྱས་སོ། །བསྙེན་བཀུར་བྱས་སོ་ཞེས་བྱ་བ་དང་། དེ་དག་གིས་ནི་ང་ཡང་སྐྱེད་མོས་ཚལ་འདི་ན་ཆོས་ཀྱི་རྣམ་གྲངས་འདི་བསྟན་པ་དང་། འཁོར་འདུས་པ་འདི་ཡང་མཐོང་ངོ་ཞེས་དེ་ལྟར་ཤེས་པར་བྱའོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།
ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ལོང་ཤིག །ཟུང་ཤིག །ཀུན་ཆུབ་པར་གྱིས་ཤིག །དབང་པོ་རྣོན་པོ་རྣམས་མ་གཏོགས་པར་གར་བབ་བབ་ཀྱི་མདུན་དུ་མ་སྟོན་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་འདི་ནི་དེ་བཞིན་གཤེགས་པའི་གསང་བ་ཡིན་པ་དང་། འདི་ནི་
དེ་བཞིན་གཤེགས་པའི་གསང་ཆེན་ཡིན་པ་དང་། འདི་ནི་དེ་བཞིན་གཤེགས་པའི་བར་ཆད་མེད་པའི་ཆོས་བསྟན་པ་ཡིན་པ་དང་། འདི་ནི་དེ་བཞིན་གཤེགས་པའི་ཕྱག་རྒྱ་ཡིན་པ་དང་། འདི་ནི་དེ་བཞིན་གཤེགས་པའི་བསྲུང་བ་བསྒོམ་པ་ཡིན་པ་དང་། འདི་ནི་དེ་བཞིན་གཤེགས་
པའི་གཏེར་གྱི་མཆོག་ཡིན་པའི་ཕྱིར་ཏེ། ཀུན་དགའ་བོ་དེ་བས་ན་ངའི་བུ་ཐུ་བོ་ཆོས་ཀྱི་མཛོད་འཛིན་པ། ཆོས་ཀྱི་མཛོད་སྲུང་བ་དེ་དག་ལ་སྦྱིན་པར་བྱ་བ་མ་གཏོགས་པར་འདི་ནི་ཤིན་ཏུ་སྦ་བར་བྱ་ཞིང་སུ་ལའང་སྦྱིན་པར་མི་བྱའོ། །ཀུན་དགའ་བོས་གསོལ་པ་བཅོམ་ལྡན་འདས་བདག་གིས་ཆོས་ཀྱི་

རྣམ་གྲངས་འདི་བཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་
འཕྲུལ་པ་བསྟན་པ་ཞེས་བྱ་བར་ཟུང་ཤིག །དེ་བཞིན་གཤེགས་པའི་གསང་བའི་གནས་ཞེས་བྱ་བ་དང་། དེ་བཞིན་གཤེགས་པའི་བར་མེད་པའི་ཆོས་བསྟན་པ་ཞེས་བྱ་བ་དང་། དེ་བཞིན་གཤེགས་པའི་ཡུལ་ཞེས་བྱ་བ་དང་། ཐེག་པ་གཅིག་ཏུ་བསྟན་པ་ཞེས་བྱ་བ་དང་། འཇམ་དཔལ་གྱིས་
ཡོངས་སུ་དྲིས་པ་ཞེས་བྱ་བ་དང་། བདེན་སྨྲ་ལུང་བསྟན་པ་ཞེས་བྱ་བ་དང་། བདེན་སྨྲའི་ལེའུ་ཞེས་བྱ་བར་ཡང་ཟུང་ཤིག །ཆོས་ཀྱི་རྣམ་གྲངས་འདི་བསྟན་པའི་ཚེ་སྲོག་ཆགས་ཁྲག་ཁྲིག་ཕྲག་སུམ་ཅུ་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་སྐྱེས་པ་ལས་སེམས་སྐྱེས་པར་གྱུར་ཏོ། །བྱང་
ཆུབ་སེམས་དཔའ་དྲུག་ཁྲིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སེམས་ཅན་ཚད་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང་འཇམ་དཔལ་གཞོན་
ནུར་གྱུར་པ་དང་། བྱང་ཆུབ་སེམས་དཔའ་དེ་དག་ཐམས་ཅད་དང་། ཐམས་ཅད་དང་ལྡན་པའི་འཁོར་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་དང་། ལྷ་དང་། མི་དང་།
ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ལུང་བསྟན་པའི་ལེའུ་སྟེ་བཅུ་པའོ།། །།འཕགས་པ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་
བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་བར་མ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

རྒྱ་གར་སྐད་དུ། ཨཱརྱ་ཏ་ཐཱ་ག་ཏ་མ་ཧཱ་ཀ་རུ་ཎཱ་ནི་ར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་
དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི། སྔོན་རྒྱལ་བ་བཞུགས་བཞུགས་པའི་མཆོད་རྟེན་ཆེན་པོ་དེ་བཞིན་གཤེགས་པའི་བྱིན་གྱི་རླབས་ཀྱིས་བརླབས་པ་སའི་སྙིང་པོ།
བྱང་ཆུབ་སེམས་དཔས་མངོན་པར་བསྟོད་པ། ཆོས་ཀྱི་གདན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་གྱིས་ཕྱག་བྱས་པའི་ས་ཕྱོགས། དགེ་བའི་རྩ་བ་ཡང་དག་པར་སྐུལ་བ། དེ་བཞིན་གཤེགས་པ་འབྱུང་བ་ཆོས་ཀྱི་སྒོ་མངོན་པར་བརྗོད་པ། བྱང་ཆུབ་སེམས་
དཔའ་འབྱུང་བ། ཡོན་ཏན་ཚད་མེད་པ་ལས་ཡང་དག་པར་བྱུང་བ། དེ་བཞིན་གཤེགས་པའི་སྤྱོད་ཡུལ་ན། བཅོམ་ལྡན་འདས་ཆོས་ཐམས་ཅད་ཀྱི་མཉམ་པ་ཉིད་ནི་མངོན་པར་རྫོགས་པར་སངས་རྒྱས། ཆོས་ཀྱི་འཁོར་ལོ་ནི་ཤིན་ཏུ་བསྐོར། སློབ་མ་ཤིན་ཏུ་དུལ་བ་མཐའ་ཡས་པའི་
ཚོགས་ནི་མངའ། ཆོས་ཐམས་ཅད་ལ་མངའ་དབང་ནི་བརྙེས། སེམས་ཅན་ཐམས་ཅད་ཀྱི་བསམ་པ་སྒྲུབ་པ་ནི་ལེགས་པར་མཁྱེན། དབང་པོ་དམ་པའི་ཕ་རོལ་ཏུ་ཕྱིན་པ་ནི་བརྙེས། སེམས་ཅན་ཐམས་ཅད་ཀྱི་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ལ་ནི་མཁས།
སངས་རྒྱས་ཀྱི་མཛད་པ་ལྷུན་གྱིས་གྲུབ་པ་ནི་རྒྱུན་མི་འཆད་ཅིང་དགེ་སློང་སྟོང་ཕྲག་དྲུག་ཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་
ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཉོན་མོངས་པའི་བག་ཆགས་ཀྱི་མཚམས་སྦྱོར་བ་ཐམས་ཅད་ལེགས་པར་བཅོམ་པ། དེ་བཞིན་གཤེགས་པ་ཆོས་ཀྱི་རྒྱལ་

པོའི་སྲས། ཆོས་ཟབ་མོ་ལ་གནས་པར་མཁས་པ། དམིགས་པ་མེད་པའི་ཆོས་ཀྱིས་ངེས་པར་བྱུང་བ། སྤྱོད་ལམ་མཛེས་པ་ཕུན་སུམ་ཚོགས་པ། སྦྱིན་པའི་གནས་ཆེན་པོར་གྱུར་པ། དེ་བཞིན་གཤེགས་པའི་བཀའ་ལ་ཤིན་ཏུ་ཞུགས་པ་ཤ་སྟག་གོ། །བྱང་ཆུབ་སེམས་
དཔའི་དགེ་འདུན་དཔག་ཏུ་མེད་པ་དང་ཡང་ཐབས་ཅིག་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པ་ཆགས་པ་མེད་པའི་སྤྱོད་ཡུལ་གྱིས་ངེས་པར་བྱུང་བ། བྱམས་པ་ཆེན་པོ་དང་། སྙིང་རྗེ་ཆེན་པོའི་ཆོས་ཀྱི་སྤྲིན་ལས་ལྷག་མཐོང་དང་། རིག་པ་དང་། རྣམ་པར་
གྲོལ་བའི་གློག་ཕྱུང་ཞིང་བདུད་རྩིའི་ཆུའི་རྒྱུན་གྱི་ཆར་འབེབས་པས་འགྲོ་བ་ཐམས་ཅད་ཚིམ་པར་བྱེད་པ། སེམས་ཅན་ཐམས་ཅད་ལ་སེམས་ས་དང་མཉམ་པ་རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བ། བྱང་ཆུབ་ཀྱི་ཕྱོགས་ཀྱི་ཆོས་སྣ་ཚོགས་ཀྱི་ལོ་ཐོག་ཡང་དག་པར་འཕེལ་བར་བྱེད་
པ། ཉི་མའི་དཀྱིལ་འཁོར་བས་ལྷག་པའི་ཤེས་རབ་ཀྱི་འོད་ཟེར་རབ་ཏུ་གཏོང་བས་གཏི་མུག་གི་མུན་པ་སེལ་བའི་ལམ་གྱི་སྣང་བ་ཐོབ་པ་ཀུན་ཏུ་སྟོན་པ་དང་། སེམས་ཅན་གྱི་པད་མ་ཁ་འབྱེད་པ་དང་། དགེ་བའི་རྩ་བ་ཡོངས་སུ་སྨིན་པར་བྱེད་པ་དང་། སྲེད་པའི་ཆུ་སྐེམས་པ་དང་། ཤེས་
པའི་ལས་ཀྱི་མཐའ་ལ་རབ་ཏུ་འཇོག་པ་ལ་མངོན་པར་ཤེས་པ་ཆེན་པོ་དང་། ཞི་གནས་ཀྱིས་རྒྱུ་བ། ཟླ་བ་ལྟ་བུར་འགྲོ་བ་ཐམས་ཅད་ལ་སེམས་མཉམ་པས་མངོན་པར་ཞི་བར་བྱ་བའི་བསམ་པ་ཚིམ་པར་བྱ་བའི་ཐབས་ལ་མཁས་པས་འགྲིབ་པ་དང་འཕེལ་བ་ཀུན་ཏུ་སྟོན་པ། རི་རབ་ལྟ་
བུའི་ལྷག་པའི་བསམ་པས་ཚངས་པའི་གནས་པའི་རིན་པོ་ཆེ་ཤིན་ཏུ་བརྟན་ཏེ། ངོས་བཞི་ནས་ཡུལ་གྱི་རླུང་ཐམས་ཅད་ཀྱིས་མི་སྒུལ་ཅིང་འཇིག་རྟེན་གྱི་ཆོས་ལས་མངོན་པར་འཕགས་པའི་སངས་རྒྱས་ཀྱི་ཞིང་ཐམས་ཅད་ཀུན་ཏུ་བསྟན་པ་སྣང་བར་གྱུར་པ། རྒྱ་མཚོ་ཆེན་པོ་ལྟར་གཟུངས་དང་དྲན་པའི་སྣོད་
རྒྱ་ཆེན་པོ་ཆོས་ཀྱི་ཆུས་ཡོངས་སུ་གང་བ་དང་། བྱང་ཆུབ་སེམས་དཔའི་སྤྱོད་པ་རིན་པོ་ཆེས་འགྲོ་བ་ཐམས་ཅད་ཉེ་བར་འཚོ་བ། རི་དགས་ཀྱི་རྒྱལ་པོ་ལྟར་བདེན་པའི་རྐང་པ་དང་། བྱམས་པ་རབ་ཏུ་འཕེལ་བའི་མཇུག་མ་དང་། ཞི་གནས་དང་ལྷག་མཐོང་གི་མིག་དང་ལྡན་ཞིང་ཆོས་ཟབ་

མོ་ལ་སྐྲག་པ་མེད་པས་ཕ་རོལ་རྒོལ་བ་ཐམས་ཅད་འཇོམས་པ། བསྐལ་པ་བརྒྱ་སྟོང་ཕྲག་དཔག་ཏུ་མེད་ཅིང་མཐའ་ཡས་ཐུག་པ་མེད་པར་བྱང་ཆུབ་སེམས་དཔའི་སྤྱོད་པ་རྒྱུན་མ་བཅད་པས་ཡོན་ཏན་ཐམས་ཅད་དང་ལྡན་པ་ཤ་སྟག་དང་ཐབས་ཅིག་པ་ལ་འདི་ལྟ་སྟེ། བྱང་ཆུབ་སེམས་
དཔའ་སེམས་དཔའ་ཆེན་པོ་ཀུན་ནས་སྣང་ཞིང་སྒྲིབ་པ་མེད་པར་ལྟ་བ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཞིང་ཐམས་ཅད་ཀྱི་རྒྱུན་བཀོད་པ་ཀུན་ཏུ་སྟོན་པ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་ལས་བྱུང་
བའི་སྤྱོད་པའི་བློ་གྲོས་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་ལམ་ཐམས་ཅད་ཀྱིས་འདུལ་བ་མི་འཁྲུགས་པ་ཀུན་ཏུ་སྟོན་པ་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་མཐའ་ཡས་པའི་ཏོག་གི་རྒྱལ་མཚན་རྣམ་པར་སྤྲུལ་པའི་དབྱངས་
ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གསེར་བཟང་པོ་རྣམ་པར་བསགས་པའི་འོད་ཀྱི་གཟི་བརྗིད་ཀྱི་འོད་ཟེར་ཞེས་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱིས་རྣམ་པར་ངེས་པའི་ཚིག་ལ་སྤོབས་པ་ཞེས་བྱ་བ་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པས་བརྟན་པས་བསགས་པ་ཞེས་བྱ་བ་དང་། དེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་དག་དང་ཐབས་ཅིག་གོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའི་སྤྱོད་པ་ལ་འདུག་
པས་ངེས་པར་འབྱུང་བ་སྒྲིབ་པ་མེད་པའི་སྒོ་ཞེས་བྱ་བའི་ཆོས་ཀྱི་རྣམ་གྲངས་ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་ལོ་བཅུ་དྲུག་བཞེས་ཏེ། ཚངས་པར་སྤྱོད་པ་རྒྱས་པར་གྱུར་པར་མཁྱེན། བྱང་ཆུབ་སེམས་དཔའ་འདུས་པ་ཆེན་པོ་
དེ་ཡང་གཟིགས་ཤིང་མཁྱེན་ཏེ། ཀྱེ་མ་བྱང་ཆུབ་སེམས་དཔའ་འདུས་པ་འདི་དག་ནི་དེ་བཞིན་གཤེགས་པའི་ཆོས་ཀྱི་མཛོད་འཛིན་པར་མཁྱེན་ནས་འདི་སྙམ་དུ་གང་གི་ཕྱིར་ངས་བྱང་ཆུབ་སེམས་དཔའ་རྒྱ་ཆེར་རྗེས་སུ་ཡོངས་སུ་གཟུང་བ་དང་། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་

ཆེན་པོ་རྣམས་དེ་བཞིན་གཤེགས་པའི་ཡུལ་ལ་གཟུད་པའི་ཕྱིར་དེ་བཞིན་གཤེགས་པའི་རྣམ་པར་འཕྲུལ་པ་ཆེན་པོ་དང་། དེ་བཞིན་གཤེགས་པའི་ཆོ་འཕྲུལ་ཆེན་པོས་བྱང་ཆུབ་སེམས་དཔའི་སྤྱོད་པ་ལ་འཇུག་པས་ངེས་པར་འབྱུང་བ་སྒྲིབ་པ་མེད་པའི་སྒོ་ཞེས་བྱ་བའི་ཆོས་ཀྱི་རྣམ་གྲངས་ཡང་དག་
པར་བསྟན་པར་བྱའོ་སྙམ་དུ་དགོངས་སོ། །དེ་ནས་དེའི་ཚེ་བཅོམ་ལྡན་འདས་དེ་བཞིན་གཤེགས་པའི་ཏིང་ངེ་འཛིན་སངས་རྒྱས་ཀྱི་ཡུལ་རྣམ་པར་སྤྲུལ་པ་ཇི་ལྟ་བ་བཞིན་དུ་ཡང་དག་པར་སྟོན་པ་ཞེས་བྱ་བ་ལ་སྙོམས་པར་ཞུགས་སོ། །བཅོམ་ལྡན་འདས་དེ་བཞིན་གཤེགས་པའི་ཏིང་ངེ་འཛིན་
སངས་རྒྱས་ཀྱི་ཡུལ་རྣམ་པར་སྤྲུལ་པ་ཇི་ལྟ་བ་བཞིན་དུ་ཡང་དག་པར་སྟོན་པ་ཞེས་བྱ་བ་དེ་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་སངས་རྒྱས་ཀྱི་མཐུས་སྟེང་གི་བར་སྣང་ལ་འདོད་པའི་ཁམས་དང་། གཟུགས་ཀྱི་ཁམས་ཀྱི་བར་དུ་འཁོར་གྱི་ཁྱམས། སངས་རྒྱས་ཀྱི་གནས་དེ་བཞིན་
གཤེགས་པའི་དགེ་བའི་རྩ་བས་མངོན་པར་གྲུབ་པ། བྱང་ཆུབ་སེམས་དཔའི་བསམ་པ་ཡོངས་སུ་སྦྱོང་བ། ཕྱོགས་བཅུའི་འཇིག་རྟེན་གྱི་ཁམས་སྣང་བར་བྱེད་པ། སེམས་ཅན་ཚད་མེད་པའི་བསམ་པ་ཚིམ་པར་བྱེད་པ། ལྷའི་གཞལ་མེད་ཁང་ཐམས་ཅད་ཟིལ་གྱིས་གནོན་པ། ཕྱོགས་
བཅུའི་བྱང་ཆུབ་སེམས་དཔའ་ཡང་དག་པར་སྐུལ་བ། གཞི་བཻ་དཱུརྱ་དཀར་པོའི་དབྱིབས་དང་། འཛམ་བུའི་གླིང་གི་གསེར་གྱི་ཁང་པ་དག་དང་། དཔལ་གྱི་སྙིང་པོའི་རྟ་བབས་དག་དང་། རིན་པོ་ཆེ་རྡོའི་སྙིང་པོའི་སྒོ་ཁང་དག་དང་། ནོར་བུ་རིན་པོ་ཆེ་སྙིང་པོའི་ཁ་ཁྱེར་དག་དང་། རིན་
པོ་ཆེ་དྲི་མ་མེད་པའི་འོད་ཀྱི་སྟེགས་བུ་དག་དང་། རིན་པོ་ཆེ་ཀུན་ནས་འོད་ཀྱི་ཁང་པ་བརྩེགས་པ་དག་དང་། རིན་པོ་ཆེ་ཐམས་ཅད་ཀྱིས་དགབ་པ་དང་། མུ་ཏིག་གི་རྒྱན་ཕྲེང་རབ་ཏུ་སྤྱངས་པ་དང་། གདུགས་དང་། རྒྱལ་མཚན་དང་། བ་དན་སྒྲེང་བ་དང་། ལྷའི་དར་གྱི་ལྡ་ལྡི་མངོན་པར་
སྤྱངས་པས་བསྔགས་པ་བསྟན་པ་དཔག་ཏུ་མེད་ཅིང་ཐུག་པ་མེད་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་ཞིག་བྱུང་སྟེ། འཁོར་གྱི་ཁྱམས་དེ་ཡང་ཙན་དན་སྦྲུལ་གྱི་སྙིང་པོས་བསྐུས་པ། ཙན་དན་དུས་ཀྱི་རྗེས་སུ་འབྲང་བའི་དྲི་ཡིད་དུ་འོང་བ་དང་ལྡན་པ། དྲིའི་

མཆོག་ཨ་ག་རུ་དམ་པའི་སྙིང་པོས་བདུགས་པ། ཀླུའི་མུ་ཏིག་དང་རིན་པོ་ཆེའི་མེ་ཏོག་གིས་རྣམ་པར་སྤྲས་པ། མེ་ཏོག་སིལ་མ་བཀྲམ་པ། རིན་པོ་ཆེའི་ཤིང་དང་། རིན་པོ་ཆེའི་མཁའ་རྟེན་གྱིས་མཛེས་པར་བྱས་པ་སྟེ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་
ན་རྒྱན་མཛེས་པ་བཀོད་པ་ཇི་སྙེད་པ་དེ་དག་ཐམས་ཅད་འཁོར་གྱི་ཁྱམས་དེ་ཉིད་ན་ཀུན་ཏུ་སྣང་ངོ་། །དེར་གདན་སེང་གེའི་ཁྲི་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དཔག་ཏུ་མེད་པ། གྲངས་མེད་པ། སྣ་ཚོགས་པ། བལྟ་ན་སྡུག་པ། མཐོ་བ། རབ་ཏུ་བཟང་བ། ཡངས་པ། རྒྱ་ཆེ་བ།
ཡིད་དུ་འོང་བ། ཡིད་དགའ་བར་བྱེད་པ་དག་བྱུང་བར་གྱུར་ཏོ། །གླིང་བཞི་པའི་འཇིག་རྟེན་གྱི་ཁམས་འདིར་ཐེམ་སྐས་ཁ་ཁྱེར་མི་བདུན་གྱི་འཕང་ཙམ་གྱིས་བསྐོར་བ། རྒྱར་དཔག་ཚད་ཕྱེད་ཀྱིས་ཡོངས་སུ་བཟུང་བ། རིན་པོ་ཆེ་ཨན་ད་རྙིལ་དང་། མཐོན་ཁ་ཆེན་པོས་སྙིང་པོར་གྱུར་པ། བརྒྱ་
བྱིན་ཐོགས་པའི་ནོར་བུ་རིན་པོ་ཆེ་ཆེན་པོའི་གདུགས་ཅན། ཚངས་པའི་ནེ་ཙོ་འམ་ཅི་དང་། རིན་པོ་ཆེ་སེར་པོས་སྤྲས་པ། རིན་པོ་ཆེའི་དྲིལ་བུ་གཡེར་ཁའི་དྲ་བ་ཀུན་ཏུ་བསྐྱོད་པས་སྒྲ་འབྱུང་བ། སའི་སྟེང་ནས་འཁོར་གྱི་ཁྱམས་ལ་ཐུག་གི་བར་དུ་གྱེན་དུ་མངོན་པར་འཕགས་པ། དྲང་བ་མ་ཡོ་བ་
བཞི་སྟོང་བྱུང་བར་གྱུར་ཏོ། །གླིང་བཞི་པའི་འཇིག་རྟེན་གྱི་ཁམས་འདིར་ཇི་ལྟ་བ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པའི་འཇིག་རྟེན་གྱི་ཁམས་ཐམས་ཅད་དུ་ཡང་དེ་ལྟ་བུའི་ཐེམ་སྐས་ཆེན་པོ་དག་བྱུང་བར་གྱུར་ཏོ། །དེ་ནས་བཅོམ་ལྡན་འདས་དགོངས་
ཤིང་མཁྱེན་བཞིན་དུ་ཏིང་ངེ་འཛིན་དེ་ལས་བཞེངས་པར་གྱུར་ཏོ། །བཅོམ་ལྡན་འདས་ཏིང་ངེ་འཛིན་དེ་ལས་བཞེངས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ། སྣང་བ་ཆེན་པོ་ཡང་བྱུང་བར་གྱུར་ཏོ། །དེ་ནས་བཅོམ་ལྡན་འདས་བྱང་ཆུབ་སེམས་
དཔའི་ཚོགས་དང་ཐབས་ཅིག །ཉན་ཐོས་ཀྱི་ཚོགས་དང་ཐབས་ཅིག་ཏུ་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་ཉན་ཐོས་ཀྱི་ཚོགས་ཀྱིས་མདུན་དུ་བདར་ཏེ། ལྷ་དང་ཀླུས་མངོན་པར་བསྟོད་ཅིང་མེ་ཏོག་གི་ཆར་ཆེན་པོ་ནི་འབེབས། ན་བཟའི་ཆར་ཆེན་པོས་ནི་མངོན་པར་འགེབས།

ཕྱེ་མ་དང་། །སྤོས་དང་། བྱུག་པའི་ཆར་ཆེན་པོ་ནི་འཐོར། སིལ་སྙན་དང་། སྒྲ་དབྱངས་ཆེན་པོ་ནི་རབ་ཏུ་སྒྲོགས། འཇིག་རྟེན་གྱི་ཁམས་དཔག་ཏུ་མེད་པ་ནི་རབ་ཏུ་གཡོ་བར་མཛད། འཇིག་རྟེན་གྱི་ཁམས་གྲངས་མེད་པ་ནི་སྣང་བར་མཛད་ཅིང་སངས་རྒྱས་ཀྱི་མཐུ་ཆེན་པོ་དང་། སངས་
རྒྱས་ཀྱི་རྫུ་འཕྲུལ་ཆེན་པོ་དང་། སངས་རྒྱས་ཀྱི་ཆོ་འཕྲུལ་ཆེན་པོ་དང་། སངས་རྒྱས་ཀྱི་ཁྱུ་མཆོག་ཏུ་གྱུར་པ་ཆེན་པོ་དང་། སངས་རྒྱས་ཀྱི་བྱིན་གྱི་རླབས་ཆེན་པོ་དང་། སངས་རྒྱས་ཀྱི་གཟི་བརྗིད་ཆེན་པོ་དང་། སངས་རྒྱས་ཀྱི་བྱིན་ཆེན་པོ་དང་། སངས་རྒྱས་ཀྱི་རྣམ་པར་འཕྲུལ་པ་ཆེན་
པོས་བྱ་རྒོད་ཀྱི་ཕུང་པོའི་རི་ལས་མི་སྣང་བར་གྱུར་ཏེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་བྱེ་བ་ཕྲག་དུ་མ་ཞབས་འབྲིང་དུ་འབྲང་ཞིང་ནོར་བུ་རིན་པོ་ཆེ་སྣ་ཚོགས་ཀྱི་ཐེམ་སྐས་ཀྱི་དབུས་ནས་
འཁོར་གྱི་ཁྱམས་བཀོད་པ་ག་ལ་བ་དེར་གཤེགས་སོ། །དེ་ནས་རྒྱལ་པོ་ཆེན་པོ་བཞི་ལ་སོགས་པ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་བཅོམ་ལྡན་འདས་ཐེམ་སྐས་སུ་ཞུགས་པར་རིག་ནས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ལྷའི་མེ་ཏོག་གི་སྤྲིན་གྱི་ཆར་རབ་ཏུ་ཕབ་སྟེ་
ཐལ་མོ་སྦྱར་ནས་བཅོམ་ལྡན་འདས་ལ་མངོན་པར་བསྟོད་པ། ཉི་ཟླ་མེ་དང་ནོར་བུའི་འོད་དང་ལྷ་ཡུལ་པ་ཡི་ལྷ་འོད་ཤིན་ཏུ་དྲི་མེད་པ། །ཐུབ་པས་འོད་ཀྱིས་ཐམས་ཅད་ཟིལ་གྱིས་མནན་ནས་ངན་སོང་གསུམ་པོ་དག་ཀྱང་ཞི་བར་མཛད། །རི་བོ་ལྷུན་པོ་དང་ནི་ཁོ་ར་ཁོར་ཡུག་རྩེ་མོ་
བསྙིལ་ཏེ་ཞིང་རྣམས་གསལ་བར་གྱུར་པས་ན། །དགའ་ཞིང་ཡིད་རྣམས་མགུ་ནས་དོན་རྣམས་ཐམས་ཅད་གྲུབ་པའི་རྒྱལ་བ་ལ་ནི་སྐྱབས་སུ་མཆི། །དེ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདིས་མངོན་པར་བསྟོད་ནས་བཅོམ་ལྡན་འདས་
གཤེགས་པའི་ཞབས་འབྲིང་དུ་འབྲང་ངོ་། །དེ་ནས་ལྷའི་དབང་པོ་བརྒྱ་བྱིན་ལ་སོགས་པ་སུམ་ཅུ་རྩ་གསུམ་གྱི་ལྷ་རྣམས་ཀྱིས་བཅོམ་ལྡན་འདས་ཐེམ་སྐས་སུ་ཞུགས་པར་རིག་ནས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ལྷའི་སྤོས་ཀྱི་སྤྲིན་གྱི་ཆར་རབ་ཏུ་ཕབ་སྟེ། ཐལ་མོ་སྦྱར་ནས་བཅོམ་

ལྡན་འདས་ལ་མངོན་པར་བསྟོད་པ། རྫུ་འཕྲུལ་དམ་པ་བརྙེས་ཤིང་རབ་ཏུ་མཚུངས་པ་མེད་པ་རྣམ་པར་འཕྲུལ་པ་ཤིན་ཏུ་སྟོན། །རྒྱལ་བ་ཉི་མ་ཇི་བཞིན་འཕགས་ཏེ་ཞིང་རྣམས་བྱེ་བ་བརྒྱ་དག་ཏུ་ཡང་རབ་ཏུ་གདའ། །རྒྱལ་བས་རང་གི་ཡོན་ཏན་ཀུན་གྱིས་ཞིང་རྣམས་
ཐམས་ཅད་བརྒྱན་ཏེ་ཤིན་ཏུ་མཛེས་མཛད་པ། །གང་ཞིག་ཤིན་ཏུ་མཉམ་མེད་མཚུངས་པ་མེད་ཅིང་རྫུ་འཕྲུལ་དབང་དུ་གྱུར་ལ་ཕྱག་འཚལ་ལོ། །དེ་ནས་སུམ་ཅུ་རྩ་གསུམ་གྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདིས་མངོན་པར་བསྟོད་ནས་བཅོམ་ལྡན་འདས་ཀྱི་ཞབས་འབྲིང་
དུ་འབྲང་ངོ་། །དེ་ནས་ལྷའི་རྒྱལ་པོ་རབ་འཐབ་བྲལ་ལ་སོགས་པ་འཐབ་བྲལ་གྱི་ལྷ་རྣམས་ཀྱིས་བཅོམ་ལྡན་འདས་ཐེམ་སྐས་སུ་ཞུགས་པར་རིག་ནས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ལྷའི་ན་བཟའི་སྤྲིན་གྱི་ཆར་རབ་ཏུ་ཕབ་སྟེ་ཐལ་མོ་སྦྱར་ནས་བཅོམ་ལྡན་འདས་ལ་མངོན་པར་
བསྟོད་པ། བདེ་གཤེགས་ཁྱོད་ཀྱི་མཁྱེན་པ་མཐའ་ཡས་ཡངས་པས་སེམས་ཅན་བསམ་པ་མཁྱེན། །མཁའ་འདྲའི་ལམ་གྱི་ཆོས་གསུམ་དག་ལ་ཆགས་མེད་ཐམས་ཅད་མཁྱེན་པ་ཉིད། །སེམས་ཀྱི་འཇུག་པ་གཅིག་གིས་འགྲོ་བའི་སེམས་ཀྱི་སྤྱོད་པ་ཐམས་ཅད་མཁྱེན། །དེས་
ན་སྲིད་པ་གསུམ་པོ་དག་ན་ལུས་ཅན་རྣམས་ཀྱིས་མཆོད་པར་འོས། །དེ་ནས་འཐབ་བྲལ་གྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདིས་མངོན་པར་བསྟོད་ནས་བཅོམ་ལྡན་འདས་ཀྱི་ཞབས་འབྲིང་དུ་འབྲང་བར་གྱུར་ཏོ། །དེ་ནས་ལྷའི་རྒྱལ་པོ་རབ་དགའ་ལྡན་ལ་སོགས་
པ་དགའ་ལྡན་གྱི་ལྷ་རྣམས་ཀྱིས་བཅོམ་ལྡན་འདས་ཐེམ་སྐས་སུ་ཞུགས་པར་རིག་ནས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ལྷའི་རིན་པོ་ཆེའི་སྤྲིན་གྱི་ཆར་རབ་ཏུ་ཕབ་སྟེ་ཐལ་མོ་སྦྱར་ནས་བཅོམ་ལྡན་འདས་ལ་མངོན་པར་བསྟོད་པ། གང་གི་སླད་དུ་སྒྲ་དང་ཡི་གེ་མ་མཆིས་གང་དུའང་རྒྱུ་བ་
མ་མཆིས་པས། །ཁྱོད་ཀྱིས་ཆོས་རྣམས་མི་གཡོ་ཡ་མ་བརླ་དང་སྒྱུ་མ་སྨིག་རྒྱུ་འདྲར་མཁྱེན་ནས། །བཅོམ་ལྡན་འདས་ཀྱིས་ཐུགས་རྗེས་སེམས་ཅན་རྣམས་ལ་ཆེད་དུ་ཆོས་མཆོག་གསུངས་པས་ན། །ཆོས་ཀྱི་དངོས་པོའི་རང་བཞིན་མཁས་པ་བདག་མེད་གསུང་བའི་རྒྱལ་ལ་ཕྱག་འཚལ་ལོ། །

དེ་ནས་དགའ་ལྡན་གྱི་རིས་ཀྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདིས་མངོན་པར་བསྟོད་ནས་བཅོམ་ལྡན་འདས་ཀྱི་ཞབས་འབྲིང་དུ་འབྲང་ངོ་། །དེ་ནས་ལྷའི་རྒྱལ་པོ་རབ་འཕྲུལ་དགའ་ལ་སོགས་པ་འཕྲུལ་དགའི་ལྷ་རྣམས་ཀྱིས་བཅོམ་ལྡན་འདས་ཐེམ་སྐས་སུ་ཞུགས་པར་
རིག་ནས། བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ལྷའི་རྒྱན་གྱི་སྤྲིན་གྱི་ཆར་རབ་ཏུ་ཕབ་སྟེ། ཐལ་མོ་སྦྱར་ནས་བཅོམ་ལྡན་འདས་ལ་ཚིགས་སུ་བཅད་པ་འདིས་མངོན་པར་བསྟོད་དོ། །ཆོས་ཀྱི་ཟོང་གིས་རང་གི་སྟོབས་བཅུ་མཁའ་འདྲ་འོད་ཟེར་ལྡན་པ་དང་། །ཐུགས་རྗེ་བརྙེས་
ནས་བྱམས་པའི་དགོངས་པས་སེམས་ཅན་རྣམས་ལ་གཟུགས་སྟོན་པ། །གྲུ་ཚུལ་ཆོས་ལ་གཉིས་སུ་མེད་པར་ཞུགས་ཀྱང་རྒྱལ་བ་མཚུངས་པར་མཁྱེན། །ཆོས་ཀྱི་ཁྱད་པར་སེམས་ལྷག་དོན་ཀུན་གྲུབ་པའི་རྒྱལ་ལ་ཕྱག་འཚལ་ལོ། །དེ་ནས་འཕྲུལ་དགའི་ལྷ་རྣམས་ཀྱིས་བཅོམ་ལྡན་འདས་
ལ་ཚིགས་སུ་བཅད་པ་འདིས་མངོན་པར་བསྟོད་ནས་བཅོམ་ལྡན་འདས་ཀྱི་ཞབས་འབྲིང་དུ་འབྲང་བར་གྱུར་ཏོ། །དེ་ནས་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་བཅོམ་ལྡན་འདས་ཐེམ་སྐས་སུ་ཞུགས་པ་དང་། འཁོར་གྱི་ཁྱམས་སུ་མངོན་པར་ཕྱོགས་པར་
རིག་ནས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་མུ་ཏིག་གི་དོ་ཤལ་གྱི་སྤྲིན་གྱི་ཆར་རབ་ཏུ་ཕབ་སྟེ། ཐལ་མོ་སྦྱར་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཚུལ་ཁྲིམས་དྲི་མ་མི་མངའ་རྣམ་དག་རྣམ་པར་ངེས་པ་དམ་པ་ཏིང་ངེ་འཛིན་མཆོག་མི་
གཡོས་པ། །མཉམ་མེད་བློ་ལྡན་རྒྱ་མཚོ་འདྲ་བར་གནས་ཤིང་སྲིད་ལས་རྣམ་གྲོལ་དབང་སྒྱུར་ཞབས་ལ་ཕྱག་འཚལ་ལོ། །རིམ་གྱིས་བྱམས་དང་ལྡན་པའི་ཐུགས་རྗེ་ཡིས་ནི་བདེན་པའི་ལམ་གྱི་རྣམ་པ་རབ་ཏུ་གནས་མཛད་པ། །རྣམ་ཐར་གསུམ་གྱི་ལམ་གྱི་ཁྱམས་ན་གནས་པའི་བདེ་
གཤེགས་སེང་གེ་ཁྱོད་ལ་བདག་ཅག་ཕྱག་འཚལ་ལོ། །སྙིང་རྗེའི་ཆུ་བོ་ཏིང་ངེ་འཛིན་གྱིས་རྣམ་འཕེལ་བ། །ཞི་གནས་འདབ་མ་རྣམ་པར་གྲོལ་བའི་མེ་ཏོག་རྒྱས། །སློབ་མའི་ཚོགས་ཀྱི་བུང་བས་ངེས་པར་བསྙེན་གྱུར་པ། །བདེ་གཤེགས་པད་མ་ལ་ནི་སྤྱི་བོས་ཕྱག་འཚལ་ལོ། །མངའ་

བདག་གཡོ་བ་མ་མཆིས་ཚུལ་ཁྲིམས་སར་གནས་པས། །བརྩོན་འགྲུས་མཚུངས་པ་མ་མཆིས་སྟོབས་ཀྱིས་ཡང་དག་འཕགས། །ཡུལ་གྱི་རླུང་རྣམས་ལངས་པ་ཆེན་པོས་མི་གཡོས་པ། །སངས་རྒྱས་རི་བོ་དམ་པ་ཁྱོད་ལ་ཕྱག་འཚལ་ལོ། །མངའ་བདག་ཐུགས་རྗེས་
དབྱངས་ཀྱི་དཀྱིལ་འཁོར་རྣམ་དག་པ། །བློ་གཏེར་བློ་མཆོག་གིས་ནི་རབ་ཏུ་འཇོམས་མཛད་པ། །སེམས་ཅན་བརྒྱ་དག་གིས་ནི་མང་པོས་མཆོད་གྱུར་པ། །བདེ་གཤེགས་ཟླ་བ་ཁྱོད་ལ་བདག་ཅག་ཕྱག་འཚལ་ལོ། །མཁའ་ལྟར་ཞི་བའི་རྣམ་པར་ཐར་པའི་ལམ་གཤེགས་པ། །ཤེས་
རབ་འོད་ཀྱིས་ཕྱོགས་བཅུ་དག་ནི་རྒྱས་འགེངས་ཤིང་། །སྐྱེ་བོ་མང་པོ་མཚུངས་མེད་པད་མ་ཁ་འབྱེད་པ། །སངས་རྒྱས་ཉི་མ་དམ་པ་ཁྱོད་ལ་ཕྱག་འཚལ་ལོ། །མངའ་བདག་ཕྱོགས་བཅུའི་འཇིག་རྟེན་གསུམ་པོ་དག་ན་ཡང་། །འདྲེན་པ་ཁྱོད་དང་མཉམ་པ་དམིགས་པར་མ་གྱུར་ཏེ། །ཁྱོད་
ནི་ཡོན་ཏན་ཀུན་གྱིས་ཡང་དག་གྲུབ་པ་ལགས། །བདག་ཅག་ཁྱོད་ལ་བསྟོད་པས་ངོམས་པར་འགྱུར་མ་ལགས། །ལྷ་དབང་ཀླུ་དང་ལྷ་མ་ཡིན་གྱིས་ཕྱག་བགྱིས་པ། །ལྷ་མཆོག་བརྒྱ་དག་གིས་ཀྱང་ཡང་དག་མངོན་བསྟོད་པ། །བསྔགས་པ་བརྒྱ་ཕྲག་མང་པོས་ཡང་དག་མངོན་བསྟོད་པ། །
བདེ་བར་གཤེགས་པ་བསྟོད་འོས་ཁྱོད་ལ་ཕྱག་འཚལ་ལོ། །དེ་ནས་གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བཅོམ་ལྡན་འདས་ཀྱི་ཞབས་འབྲིང་དུ་འབྲང་ངོ་། །དེ་ནས་བཅོམ་ལྡན་འདས་དེ་ལྟར་སངས་རྒྱས་ཀྱི་
ཡུལ་རྣམ་པར་སྤྲུལ་པ་ཚད་མེད་པ་ལྷ་འབུམ་གྱིས་མངོན་པར་བསྟོད་ནས་འཁོར་གྱི་ཁྱམས་རིན་པོ་ཆེ་བཀོད་པར་གཤེགས་ཏེ། ཇི་ལྟར་བཅོམ་ལྡན་འདས་གླིང་བཞི་པའི་འཇིག་རྟེན་གྱི་ཁམས་མི་མཇེད་འདིར་ཐེམ་སྐས་ནས་འཁོར་གྱི་ཁྱམས་རིན་པོ་ཆེ་བཀོད་པར་གཤེགས་པ་ཤེས་པ་དེ་
བཞིན་དུ། སྟོང་གསུམ་གྱི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པའི་འཇིག་རྟེན་གྱི་ཁམས་ཐམས་ཅད་ན་ཡང་གཤེགས་པར་ཤེས་སོ། །དེ་ནས་བཅོམ་ལྡན་འདས་འཁོར་གྱི་ཁྱམས་སྟོང་གསུམ་གྱིས་ཡོངས་སུ་གཟུང་བ་རིན་པོ་ཆེ་བཀོད་པར་གདན་སེང་གེའི་ཁྲི་ཇི་ལྟར་བཤམས་པ་

ལ་བཞུགས་སོ། །བྱང་ཆུབ་སེམས་དཔའ་དང་ཉན་ཐོས་ཆེན་པོ་དག་ཀྱང་སྟན་ཅི་རིགས་པ་ལ་འཁོད་པར་གྱུར་ཏོ། །དེ་ནས་བཅོམ་ལྡན་འདས་དེའི་ཚེ་སངས་རྒྱས་ཀྱི་ཏིང་ངེ་འཛིན་རྣམ་པར་ཐར་པ་སྒྲིབ་པ་མེད་པ་ལ་སངས་རྒྱས་རྣམ་པར་རོལ་པ་ཞེས་བྱ་བ་ལ་སྙོམས་པར་ཞུགས་སོ། །བཅོམ་
ལྡན་འདས་སངས་རྒྱས་ཀྱི་ཏིང་ངེ་འཛིན་རྣམ་པར་ཐར་པ་སྒྲིབ་པ་མེད་པ་ལ་སངས་རྒྱས་རྣམ་པར་རོལ་པ་ཞེས་བྱ་བ་ལ་སྙོམས་པར་ཞུགས་མ་ཐག་ཏུ། དེ་ནས་བཅོམ་ལྡན་འདས་ཀྱི་སྐུའི་སྤུའི་ཁུང་བུ་ཐམས་ཅད་ཀྱི་སྤུའི་ཁུང་བུ་རེ་རེ་ནས་ཀྱང་འོད་ཟེར་གང་གཱའི་ཀླུང་གི་བྱེ་མ་སྙེད་བྱུང་སྟེ། བྱུང་
ནས་ཀྱང་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་སྣང་བར་བྱས་སོ། །དེ་བཞིན་དུ་ལྷོ་དང་། ནུབ་དང་། བྱང་གི་ཕྱོགས་རྣམས་དང་། འོག་དང་། སྟེང་དང་། ཕྱོགས་མཚམས་རྣམས་ཀྱི་འཇིག་རྟེན་གྱི་ཁམས་ཐམས་ཅད་སྣང་བར་བྱས་སོ། །འཇིག་རྟེན་གྱི་ཁམས་རྣམས་སྣང་
བར་བྱས་མ་ཐག་ཏུ། དེ་ནས་སེམས་ཅན་དམྱལ་བ་པའི་སེམས་ཅན་ཐམས་ཅད་ཀྱི་སེམས་ཅན་དམྱལ་བའི་སྡུག་བསྔལ་གྱི་ཚོར་བ་རྒྱུན་ཆད་དོ། །དུད་འགྲོའི་སྐྱེ་གནས་པའི་སེམས་ཅན་རྣམས་དང་གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་སྡུག་བསྔལ་གྱི་ཚོར་བ་ཡང་རྒྱུན་ཆད་
དོ། །སེམས་ཅན་ཐམས་ཅད་ཀྱང་སྐད་ཅིག་དེ་ལ་འདོད་ཆགས་ཀྱིས་གནོད་པར་མ་གྱུར་ཅིང་། ཞེ་སྡང་གིས་མ་ཡིན། གཏི་མུག་གིས་མ་ཡིན་ཏེ། ཉོན་མོངས་པ་གཞན་གྱིས་ཀྱང་གནོད་པར་མ་གྱུར་ཏོ། །དེའི་ཚེ་སེམས་ཅན་ཐམས་ཅད་ཀྱང་བྱམས་པའི་སེམས་དང་། ཕ་མ་ལྟ་བུའི་
འདུ་ཤེས་སུ་གྱུར་ཏོ། །བྱང་ཆུབ་སེམས་དཔའ་ཡང་དག་པར་བསྐུལ་བའི་ཕྱིར་སངས་རྒྱས་ཀྱི་མཐུས་དེ་བཞིན་གཤེགས་པའི་འོད་དེ་ལས་ཚིགས་སུ་བཅད་པ་འདི་བྱུང་ངོ་། །གང་གིས་བརྩོན་འགྲུས་སྟོབས་ནི་མཐའ་ཡས་ཡངས་པ་བརྟན་པ་བརྩམས་གྱུར་ཏེ། །གང་གིས་བརྩོན་
འགྲུས་ཆེན་པོའི་སྟོབས་ཀྱིས་བསྐལ་པ་དག་ལས་ཕྱིར་ཕྱོགས་སྤངས། །གང་གིས་ཡོན་ཏན་དག་ནི་ཕྱོགས་བཅུ་རྣམས་ན་མཐུ་ལྡན་རབ་བརྗོད་པ། །ཤཱཀྱ་ཐུབ་པའི་འོད་ཡངས་འགྲོ་བ་ཐམས་ཅད་སྣང་བར་བྱེད་པ་མཛེས། །གང་ཆོས་རྒྱ་ཆེན་བླ་མེད་མཉན་སླད་དེ་ཡི་ཞབས་ལ་ཕྱག་

འཚལ་ཏེ། །མཁས་པ་བློ་གྲོས་བརྟན་པ་དག་ནི་བསྐལ་པ་གྲངས་མེད་རྟག་ཏུ་ཉན། །བློ་རྒྱས་གང་ཞིག་རྫོགས་པའི་བྱང་ཆུབ་སེམས་དཔའི་བསམ་པ་ཚིམ་སྐྱེད་པ། །ཐུབ་པ་དེས་ནི་གང་ཕྱིར་སེམས་ཅན་བདེ་བར་བཞེད་པས་འོད་འདི་ཕྱུང་། །མངའ་
བདག་གང་ཞིག་བརྩོན་འགྲུས་ཀྱིས་ནི་བདུད་སྟོབས་མུ་སྟེགས་ཚོགས་བཅས་ཕམ་མཛད་ནས། །པདྨ་བྱུང་བ་བཞིན་དུ་འཕགས་ཤིང་ཕྱོགས་བཅུ་དག་ཏུ་ལྷུན་པོ་ཇི་བཞིན་མཛེས། །གང་ཞིག་ཉི་མ་བཞིན་དུ་སྐུ་ཡི་འོད་ཀྱིས་འགྲོ་བ་མ་ལུས་སྣང་མཛད་པ། །དེ་ཡི་ཆོས་ཀྱི་འཁོར་
ལོ་གཞག་པ་དོན་ཆེན་གསན་དུ་རྒྱལ་བ་གཤེགས་སུ་གསོལ། །རབ་ཏུ་བསྐོར་བར་མ་གྱུར་མཚུངས་པ་མེད་ཅིང་རྒྱལ་བ་ཀུན་གྱིས་བསྐོར་གྱུར་པ། །འཁོར་ལོ་དམ་པ་སྟོབས་བཅུ་སེམས་ཅན་ཐུགས་བརྩེ་ཕྱིར་ནི་དེ་རིང་སྐོར་བར་མཛད། །སྲོག་ཆགས་རྣམས་ཀྱིས་བསྟེན་པར་རྙེད་
དཀའ་ལེགས་པ་རྒྱ་ཆེན་དེ་རིང་འབྱུང་བར་འགྱུར། །གང་དག་དད་པ་དང་བ་ཆེ་ཡངས་དོན་དུ་གཉེར་བ་དེ་དག་དེ་རིང་ལྟོས། །དེ་ནས་འོད་ཟེར་དེ་དག་གིས་སངས་རྒྱས་ཀྱི་ཞིང་ཐམས་ཅད་ཚིགས་སུ་བཅད་པ་འདི་དག་གིས་གོ་བར་བྱས། བྱང་ཆུབ་སེམས་དཔའ་ཐམས་ཅད་ཡང་དག་པར་
བསྐུལ། འཇིག་རྟེན་གྱི་ཁམས་ཐམས་ཅད་རབ་ཏུ་གཡོ་བར་བྱས། སེམས་ཅན་ཐམས་ཅད་བདེ་བར་བྱས། ཉོན་མོངས་པའི་ཁམས་ཐམས་ཅད་རྣམ་པར་སྦྱངས། མུན་པ་མུན་ནག་ཐམས་ཅད་བསལ། བདུད་ཀྱི་ཁྱ