Kinh tạng Tây Tạng (Kangyur Đại Học) — 057_མདོ་སྡེ།_པ

ཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་
དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་འཕགས་རྒྱལ་ན་རྒྱལ་པོ་གཏུམ་པོ་རབ་སྣང་གི་སྐྱེད་མོས་ཚལ་ཤིང་སཱ་ལ་དང་། ཏ་ལ་དང་། ཏ་མ་ལ་དང་། དོང་ཀའི་ཤིང་དང་། ནྱ་གྲོ་དྷ་དང་།
པླག་ཤ་དང་། ཨུ་དུམ་བཱ་ར་དང་། བར་ཤི་ཤི་ཀ་དང་། དྷ་ནུ་ཀ་རི་དང་། ཨ་ཏི་མུག་ཏ་ཀ་དང་། ཙམ་པ་ཀ་དང་། མྱ་ངན་འཚང་དང་། སྐྱ་སྣར་གྱིས་ལེགས་པར་བརྒྱན་པ། འབབ་ཆུའི་དངོ་དང་། མཚོ་དང་། མཚོ་བྲན་དང་། མཚེའུ་དང་། རྫིང་དང་། ལུ་མ་
མང་པོས་མཛེས་པར་བྱས་པ། མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་མངོན་པར་གང་བ། ངང་པ་དང་། ཁྲུང་ཁྲུང་དང་། རྨ་བྱ་དང་། ཁུ་བྱུག་དང་། ཀུ་ན་ལ་དང་། འདབ་སྐྱོབ་དང་། ནེ་ཙོ་དང་། རི་སྐེགས་དང་། ཤང་

ཤང་ཏེའུ་དག་སྒྲ་མངོན་པར་སྒྲོགས་པ་དང་ལྡན་པ། བུང་བ་མང་པོས་གང་བ། ས་གཞི་ནེའུ་གསིང་སྔོ་བ་དང་ལྡན་པའི་ནགས་ཚལ་ཆེན་པོ་མཆོག་ན། དགེ་སློང་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། འདི་ལྟ་སྟེ། ཚེ་དང་ལྡན་པ་
ཤཱ་རིའི་བུ་དང་། མཽད་གལ་གྱི་བུ་ཆེན་པོ་དང་། འོད་སྲུང་ཆེན་པོ་དང་། མ་འགགས་པ་དང་། རབ་འབྱོར་དང་། ཀཱཏྱཱའི་བུ་ཆེན་པོ་དང་། ཀ་པི་ན་ཆེན་པོ་དང་། ནག་པོ་དང་། དགའ་བོ་དང་། ལྟེང་རྒྱས་འོད་སྲུང་དང་། ཆུ་ཀླུང་འོད་སྲུང་དང་། ག་ཡཱ་འོད་སྲུང་དང་།
བྱམས་མའི་བུ་གང་པོ་དང་། བ་ལང་བདག་དང་། བཀ་ཀུ་ལ་དང་། ལམ་བསྟན་དང་། ལམ་ཕྲན་བསྟན་དང་། གྱད་བུ་ནོར་དང་། སེང་ལྡེང་ནགས་དང་། སྐུལ་བྱེད་དང་། གསུས་པོ་ཆེ་དང་། སྒྲ་གཅན་ཟིན་དང་། ཚེ་དང་ལྡན་པ་ཀུན་དགའ་བོ་དང་། དེ་དག་
ལ་སོགས་པ་དགེ་སློང་ཁྲི་ཉིས་སྟོང་དང་ཐབས་ཅིག་སྟེ། ཐམས་ཅད་ཀྱང་ཆོས་ཀྱི་དབྱིངས་ཚུལ་གཅིག་པའི་སྤྱོད་ཡུལ་ལ་གནས་པ། ངོ་བོ་ཉིད་ཀྱི་ཆོས་ཀྱི་ཚུལ་ལ་ཞུགས་པ་ནམ་མཁའ་གནས་མེད་པའི་སྤྱོད་ཡུལ་བ། མི་རྟེན་པར་གནས་པ། ཉོན་མོངས་པ་དང་།
སྒྲིབ་པ་དང་། ཆོད་པ་དང་། ཀུན་ནས་དཀྲིས་པ་ཐམས་ཅད་དང་བྲལ་བ། དེ་བཞིན་གཤེགས་པའི་ཆོས་ཀྱི་དབྱིངས་སྣང་བའི་ཚུལ་ལ་ཞུགས་པ། ཆོས་ཐམས་ཅད་ཚུལ་གཅིག་པ་ལ་ཡང་དག་པར་གཞོལ་བ། ཐམས་ཅད་མཁྱེན་པ་ཉིད་ལ་མངོན་པར་ཕྱོགས་པ། ལམ་
གྱི་རྒྱུན་མ་ཆད་པ། ཐམས་ཅད་མཁྱེན་པ་ཉིད་ལ་མོས་པ་མི་ཟློགས་པའི་ཡིད་དང་ལྡན་པ། ཤེས་རབ་དང་ཡེ་ཤེས་རྣམ་པར་མཐོང་བའི་དམ་པའི་ཕ་རོལ་ཏུ་ཕྱིན་པ། ཐབས་ཀྱི་ཡུལ་དང་སྤྱོད་ཡུལ་ལ་ངེས་པར་བྱང་བ་ཤ་སྟག་གོ། །དགེ་སློང་མ་སྐྱེ་དགུའི་བདག་མོ་ཆེན་མོ་
དང་གྲགས་འཛིན་ལ་སོགས་པ་དགེ་སློང་མ་བརྒྱད་འབུམ་དང་ཡང་ཐབས་ཅིག་སྟེ་ཆོས་དཀར་པོ་ཤིན་ཏུ་ཡོངས་སུ་བསྡུས་པ་ཐམས་ཅད་མཁྱེན་པ་ཉིད་ཀྱི་ལམ་རབ་ཏུ་རྟོགས་པ། ཐམས་ཅད་མཁྱེན་པའི་ཡེ་ཤེས་དང་ཉེ་བར་གྱུར་པ། དངོས་པོ་མེད་པའི་ཆོས་ཀྱི་ཚུལ་ཤིན་ཏུ་རྟོགས་པ།

མཚན་ཉིད་མེད་པའི་ཆོས་ཀྱི་ཚུལ་ལ་རྟོགས་པ། ཆོས་ཐམས་ཅད་ཡང་དག་པའི་མཐས་མཐའ་མེད་པར་ཤིན་ཏུ་མོས་པ། སྒྲིབ་པ་མེད་པའི་རྣམ་པར་ཐར་པ་ཐོབ་པ། གདུལ་བའི་འགྲོ་བ་ཇི་ལྟ་བ་དེ་བཞིན་དུ་གཟུགས་ཀུན་ཏུ་སྟོན་པ་ལ་མཁས་པ་ཤ་སྟག་གོ། །བྱང་
ཆུབ་སེམས་དཔའ་ས་ཡ་ཕྲག་བདུན་དང་ཉིས་འབུམ་གྱི་བྱང་ཆུབ་སེམས་དཔའི་དགེ་འདུན་ཆེན་པོ་དང་ཡང་ཐབས་ཅིག་སྟེ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་ཆེན་དང་། ཤུགས་ཆེན་འཛིན་དང་། རྣམ་པར་འཕྲུལ་པ་ཆེན་པོ་དང་། རྣམ་པར་འཕྲུལ་པ་ཆེན་
པོའི་རྒྱལ་པོ་དང་། བརྩོན་འགྲུས་ཆེན་པོས་རྣམ་པར་གནོན་པ་དང་། རྩལ་ཆེན་དཔའ་བོ་དང་། ཆེར་བསྒྱིངས་དང་། ཆེར་བསྒྱིངས་སྟོབས་ལྡན་དང་། ཚོགས་ཆེན་དབང་པོ་དང་། གླང་པོ་ཆེན་པོ་སྤོས་ཀྱི་གླང་པོ་དང་། ཟླ་བ་ཆེན་པོ་དང་། ཟླ་བ་བཟང་པོ་དང་། ཡོན་ཏན་ཟླ་
བ་དང་། རིན་ཆེན་ཟླ་བ་དང་། ཀུན་ཏུ་སྣང་བའི་ཟླ་བ་དང་། ཆོས་དྲི་མ་མེད་པའི་ཟླ་བ་དང་། རྣམ་པར་སྣང་བྱེད་ཟླ་བ་དང་། རྣམ་པར་གྲགས་པའི་ཟླ་བ་དང་། འོད་ཟེར་རབ་ཏུ་འགྱེད་པའི་ཟླ་བ་དང་། རྒྱས་པའི་ཟླ་བ་དང་། ཚངས་པའི་དབྱངས་དང་། ཚངས་པའི་དབང་པོ་ལྟར་
སྒྲོགས་པའི་དབྱངས་དང་། ས་ལ་ངེས་པར་སྒྲོགས་པའི་དབྱངས་དང་། ཆོས་ཀྱི་དབྱིངས་ངེས་པར་སྒྲོགས་པའི་དབྱངས་དང་། བདུད་ཀྱི་དཀྱིལ་འཁོར་ཐམས་ཅད་སྨ་འབེབས་པའི་དབྱངས་དང་། ཆོས་ཀྱི་སྒྲ་ངེས་པར་སྒྲོགས་པའི་དབྱངས་དང་། ཐམས་ཅད་དུ་གོ་བར་བྱེད་པའི་
དབྱངས་དང་། རྣམ་པར་མི་རྟོགས་པས་རྣམ་པར་མ་བརྟགས་པའི་དབྱངས་དང་། ས་སྟེང་ངེས་པར་སྒྲོགས་པའི་དབྱངས་དང་། དབྱངས་ཀྱི་ཡན་ལག་ཐམས་ཅད་ཟིལ་གྱིས་མནོན་པའི་དབྱངས་དང་། ཀུན་ནས་སྙིང་པོ་དང་། ཡོན་ཏན་སྙིང་པོ་དང་། ཆོས་དྲི་མ་མེད་
པའི་སྙིང་པོ་དང་། རྣམ་པར་སྣང་བྱེད་སྙིང་པོ་དང་། རིན་ཆེན་སྙིང་པོ་དང་། ཟླ་བའི་སྙིང་པོ་དང་། ཉི་མའི་སྙིང་པོ་དང་། སྣང་བའི་སྙིང་པོ་དང་། པད་མའི་སྙིང་པོ་དང་། པད་མའི་དཔལ་གྱི་སྙིང་པོ་དང་། བསོད་ནམས་དཔལ་གྱི་སྙིང་པོ་དང་། ཡེ་ཤེས་དཔལ་གྱི་

སྙིང་པོ་དང་། བློ་གྲོས་ཆེན་པོ་དང་། ཁྱད་པར་བློ་གྲོས་དང་། རྣམ་གྲགས་བློ་གྲོས་དང་། རླབས་ཆེན་བློ་གྲོས་དང་། བླ་མའི་བློ་གྲོས་དང་། རིན་ཆེན་བློ་གྲོས་དང་། འཕེལ་བའི་བློ་གྲོས་དང་། མཐའ་ཡས་བློ་གྲོས་དང་། རྒྱ་ཆེན་བློ་གྲོས་དང་། སངས་རྒྱས་བློ་གྲོས་
དང་། བློ་གྲོས་མི་ཟད་པ་དང་། བློ་གྲོས་རྒྱ་མཚོ་དང་། ལྷུན་པོའི་སྒྲོན་མ་དང་། སྒྲོན་མ་ཆེན་པོ་དང་། ཆོས་ཏ་ལ་ལའི་སྒྲོན་མ་དང་། ཕྱོགས་ཐམས་ཅད་རྒྱས་པར་འགེངས་པའི་སྒྲོན་མ་དང་། ཀུན་ཏུ་སྒྲོན་མ་དང་། མུན་པ་ཐམས་ཅད་སེལ་བའི་སྒྲོན་མ་དང་།
འགྲོ་བ་ཐམས་ཅད་སྣང་བར་བྱེད་པའི་སྒྲོན་མ་དང་། ཤིན་ཏུ་སྣང་བའི་སྒྲོན་མ་དང་། ཟླ་བའི་སྒྲོན་མ་དང་། ཉི་མའི་སྒྲོན་མ་དང་། ངན་སོང་སེལ་བ་དང་། བདུད་ཕམ་བྱེད་དང་། བདུད་ཆེན་ཕམ་བྱེད་དང་། མངོན་པར་འབྱུང་དཀའ་དང་། ཐུབ་དཀའ་དང་། གཏིང་
དཔག་དཀའ་བ་དང་། བློ་རྟོགས་དཀའ་བ་དང་། ངན་འགྲོ་སྐེམས་དང་། མཐུ་ཆེན་ཐོབ་དང་། སྤྱན་རས་གཟིགས་དབང་ཕྱུག་དང་། བྱམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་། དེ་དག་ལ་སོགས་པ་བྱང་ཆུབ་སེམས་
དཔའ་ས་ཡ་ཕྲག་བདུན་དང་འབུམ་ཕྲག་གཉིས་དང་ཐབས་ཅིག་སྟེ། ཐམས་ཅད་ཀྱང་སྐྱེ་བ་གཅིག་གིས་ཐོགས་པ། གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་མཐའ་ཡས་པ་ཐོབ་པ། ཐོགས་པ་མེད་པའི་མི་འཇིགས་པ་ཐོབ་པ། རྫུ་འཕྲུལ་ལ་དབང་བ་དམ་
པའི་ཕ་རོལ་ཏུ་ཕྱིན་པ། སངས་རྒྱས་ཀྱི་ཞིང་མཐའ་ཡས་པར་འགྲོ་བའི་མངོན་པར་ཤེས་པས་རྣམ་པར་རྩེ་བ། ལུས་དང་སེམས་ཅན་རྣམ་པར་གྲོལ་བ། ཆགས་པ་མེད་ཅིང་སྒྲིབ་པ་མེད་པའི་ཡེ་ཤེས་མཐོང་བ་དང་ལྡན་པ། སངས་རྒྱས་མི་བཞུགས་པའི་འཇིག་རྟེན་གྱི་ཁམས་
སུ་སངས་རྒྱས་འབྱུང་བ་ཀུན་ཏུ་སྟོན་པ། ཆོས་ཀྱི་འཁོར་ལོ་ཁྱད་པར་ཐོབ་པར་བྱེད་པ་ལ་མཁས་པ། སེམས་ཅན་ཐམས་ཅད་ལ་སོ་སོ་ཅི་རིགས་པར་ཆོས་ཡང་དག་པར་སྟོན་པ། ཕྱིར་མི་ཟློགས་པའི་ཆོས་སྟོན་པ། བླང་བ་མེད་པ་དང་། དོར་བ་མེད་པའི་ཆོས་ཀྱི་ངོ་བོ་ཉིད་ཀྱི་

ཚུལ་ལ་ཞུགས་པ། སྟོང་པ་ཉིད་རྗོད་པ། སེང་གེའི་སྒྲ་ཆེན་པོ་སྒྲོགས་པ། ཕས་ཀྱི་རྒོལ་བ་ཐམས་ཅད་སྨ་འབེབས་པ། བདུད་ཕྱིར་རྒོལ་བ་ཐམས་ཅད་བཅོམ་པ། བྱང་ཆུབ་སེམས་དཔའི་སྤྱོད་པ་དང་། རྫུ་འཕྲུལ་ཐམས་ཅད་ཐོབ་པ། རྗེས་སུ་ཆགས་
པ་དང་། ཁོང་ཁྲོ་བ་མེད་པ། ཆུ་དང་། མེ་དང་། རླུང་དང་། ས་ལྟ་བུའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་གསང་བའི་གནས་སུ་ཆུད་པ། སེམས་ཅན་ཐམས་ཅད་ལ། སངས་རྒྱས་ཀྱི་མཛད་པས་ཉེ་བར་གནས་པ། དེ་བཞིན་གཤེགས་པ་
ཐམས་ཅད་ཀྱིས་བསྟོད་བསྔགས་སྙན་པར་བརྗོད་བརྗོད་ཅིང་བཀུར་བ། ཕྱི་མའི་མཐའི་བསྐལ་པར་བྱིན་གྱི་རླབས་ཀྱིས་བྱིན་གྱིས་བརླབས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡང་དག་པར་འཛིན་པ། ཆོས་རིན་པོ་ཆེའི་འོད་ཟེར་དང་ལྡན་པ། ཡོན་ཏན་གྱི་
བསྔགས་པ་ཐམས་ཅད་མཐར་ཕྱིན་པ་དང་ལྡན་པ། འཇིག་རྟེན་གྱི་དབང་པོར་གྱུར་པ། སྔོན་གྱི་སྨོན་ལམ་ཕུན་སུམ་ཚོགས་པ། དེ་བཞིན་གཤེགས་པ་ལ་མོས་པའི་སྤྱོད་ཡུལ་ལ་ངེས་པར་བྱུང་བ། སྔོན་ཐེག་པ་ཆེན་པོ་ལ་སྤྱད་པ་ལེགས་པར་སྤྱད་པ། སངས་རྒྱས་ཀྱི་ཡེ་
ཤེས་ཀྱི་ཚུལ་གྱིས་དྲི་མ་མེད་ཅིང་ཡོངས་སུ་དག་པ་རྟག་ཏུ་རྒྱུན་མི་འཆད་པར་དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པ་ལ་བརྩོན་པ། ཕྱིར་མི་ཟློགས་པའི་གོ་ཆ་བགོས་པ། སྙིང་རྗེ་ཆེན་པོ་མངོན་དུ་གྱུར་པ། རང་བཞིན་གྱིས་རྒྱ་ཆེན་པོ་ལ་མོས་པའི་སེམས་དང་ལྡན་
པ། ནེམ་ནུར་དང་ཐེ་ཙོམ་དང་ཡིད་གཉིས་ཐམས་ཅད་ལས་ཡང་དག་པར་འདས་པ། དེ་བཞིན་གཤེགས་པའི་བྱིན་གྱི་རླབས་ཀྱི་བྱིན་གྱིས་བརླབས་པ་ཤ་སྟག་གོ། །དགེ་བསྙེན་དང་། དགེ་བསྙེན་མ་དུ་མ་དང་ཡང་ཐབས་ཅིག་གོ། །སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་འདི་ན་ལྷའམ། ལྷའི་དབང་པོའམ། ཀླུའམ། ཀླུའི་དབང་པོའམ། གནོད་སྦྱིན་ནམ། གནོད་སྦྱིན་གྱི་དབང་པོའམ། དྲི་ཟའམ། དྲི་ཟའི་དབང་པོའམ། ལྷ་མ་ཡིན་ནམ། ལྷ་མ་ཡིན་གྱི་དབང་པོའམ། ནམ་མཁའ་ལྡིང་ངམ། ནམ་མཁའ་

ལྡིང་གི་དབང་པོའམ། མིའམ་ཅིའམ། མིའམ་ཅིའི་དབང་པོའམ། ལྟོ་འཕྱེ་ཆེན་པོའམ། ལྟོ་འཕྱེ་ཆེན་པོའི་དབང་པོའམ། མིའམ་མིའི་དབང་པོ་གཟི་བརྗིད་ཆེ་བ་གཟི་བརྗིད་ཆེ་བ་རྒྱ་ཆེ་བ་རྒྱ་ཆེ་བ། གཡོག་འཁོར་འབུམ་ཕྲག་དུ་མ་དང་ལྡན་པ་གང་དག་གནས་པ་དེ་དག་ཐམས་
ཅད་ཀྱང་འཁོར་དེ་ཉིད་དུ་འདུས་ཏེ་འཁོད་པར་གྱུར་ཏོ། །དེའི་ཚེ་བཅོམ་ལྡན་འདས་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་དཔལ་གྱི་སྙིང་པོའི་སེང་གེའི་ཁྲི་ལ་བཞུགས་ཏེ། སྐུ་མདོག་དང་། གཟི་བརྗིད་དང་། སྐུའི་འོད་ཀྱིས་འཁོར་ཐམས་ཅད་ཟིལ་
གྱིས་མནན་ནས་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན་རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་འཕགས་ཤིང་། རི་ནག་པོ་གཞན་ཟིལ་གྱིས་མནན་ནས་ལམ་མེ་ལྷན་ནེ་ལྷང་ངེ་བ་དེ་བཞིན་དུ། བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལྷ་དང་མིར་
བཅས་པའི་འཇིག་རྟེན་ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། ཟླ་བ་ཡར་གྱི་ངོའི་ཟླ་བ་ཉ་ལ་བབ་སྟེ། ཟླ་བའི་དཀྱིལ་འཁོར་རྒྱས་པ་ནི་རྒྱུ་སྐར་དང་སྐར་མའི་ཚོགས་ཐམས་ཅད་ཟིལ་གྱིས་མནན་ཏེ་མོག་མོག་པོར་བྱས་ནས་ལམ་མེ་ལྷན་ནེ་ལྷང་ངེའོ། །དེ་བཞིན་
དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལྷ་དང་བཅས་པའི་འཇིག་རྟེན་ཟིལ་གྱིས་མནན་ཏེ། མོག་མོག་པོར་མཛད་ནས་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། དག་ཅིང་དྲི་མ་མེད་པའི་ནམ་མཁའ་སྤྲིན་མེད་པ་ལ་ཉི་མའི་དཀྱིལ་འཁོར་འོད་ཟེར་གྱི་དྲ་བ་རབ་
ཏུ་འཕྲོ་བར་འདུག་པ་ནི་སྲིན་བུ་མེ་ཁྱེར་ཐམས་ཅད་ཟིལ་གྱིས་མནན་ཏེ། མོག་མོག་པོར་བྱས་ནས་ཤིན་ཏུ་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱི་འོད་ཟིལ་
གྱིས་མནན་ཏེ། མོག་མོག་པོར་མཛད་ནས་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། མཚན་མོ་རི་ཆེན་པོའི་སྤོ་ལ་མེ་ཆེན་པོ་འབར་བ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ལ་ཡང་ལམ་མེ་ལྷན་ནེ་ལྷང་ངེའོ། །

འདི་ལྟ་སྟེ་དཔེར་ན། ནོར་བུ་རིན་པོ་ཆེ་བཻ་དཱུརྱ་ཡན་ལག་བརྒྱད་དང་ལྡན་ཞིང་དྲི་མ་མེད་པ་འོད་ཟེར་རབ་ཏུ་འཕྲོ་བ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་ཤིང་ཕྱོགས་བཅུ་ཐམས་ཅད་སྣང་བར་མཛད་པ་ཡང་ལམ་མེ་
ལྷན་ནེ་ལྷང་ངེའོ། །འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་ནི་གླིང་བཞིའི་སེམས་ཅན་ཐམས་ཅད་ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ་
དཔེར་ན། ལྷའི་དབང་པོ་བརྒྱ་བྱིན་བརྒྱ་བྱིན་ཐོགས་པའི་ནོར་བུ་རིན་པོ་ཆེ་ཐོགས་ཤིང་ལྷའི་འདུན་ས་ཆོས་བཟངས་ན་གནས་པ་ནི་ལྷ་ཐམས་ཅད་ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་གདན་སེང་གེའི་ཁྲི་ལ་བཞུགས་པ་ཡང་ལྷ་དང་བཅས་
པའི་འཇིག་རྟེན་ཟིལ་གྱིས་མནན་ཅིང་ལམ་མེ་ལྷན་ནེ་ལྷང་ངེའོ། །དེ་ནས་འཇམ་དཔལ་གཞོན་ནུར་གྱུར་པས་དེ་ལྟ་བུའི་འཁོར་ཆེན་པོ་འདུས་པར་ཡང་རིག་ཅིང་དེ་བཞིན་གཤེགས་པའི་སྐུ་བསྙེན་པར་དཀའ་བ་དེ་ཡང་མཐོང་ནས་འདི་སྙམ་དུ་སེམས་ཏེ། འདི་ལྟར་བཅོམ་ལྡན་
འདས་གདན་སེང་གེའི་ཁྲི་ལ་བཞུགས་པ་ཡང་ཤིན་ཏུ་ལམ་མེ་ལྷན་ནེ་ལྷང་ངེའོ། །འཁོར་ཆེན་པོ་འདི་ཡང་འདུས་པར་གྱུར་ན་འདི་གོ་ཅིའི་སྔ་ལྟས་ཞིག་ཏུ་འགྱུར། བདག་གིས་དེའི་དོན་དེ་བཞིན་གཤེགས་པ་ལ་ཞུ་བར་བྱའོ་སྙམ་ནས་དེའི་ཚེ་འཇམ་དཔལ་གཞོན་ནུར་གྱུར་པ་སྟན་
ལས་ལངས་ནས་བླ་གོས་ཕྲག་པ་གཅིག་ལ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྟོབས་བཅུ་མངའ་བས་ལྷར་
བཅས་འཇིག་རྟེན་འདི། །ཟིལ་གྱིས་མནན་ནས་ཁྱོད་ནི་ལྷན་ནེར་བཞུགས། །སྲིད་པ་གསུམ་ན་ཁྱོད་འདྲ་མ་མཆིས་ན། །ལྷག་པའི་སེམས་ཅན་མཆིས་པར་ག་ལ་འགྱུར། །དཔེར་ན་ལྷ་གནས་གྱུར་པ་ལྷུན་པོ་ནི། །རི་བོ་ཀུན་གྱི་ནང་ནས་མངོན་འཕགས་ཏེ། །རི་བོ་གཞན་

དག་ཟིལ་གྱིས་མནན་ནས་སུ། །ཕྱོགས་རྣམས་ཀུན་ནས་ལྷན་ནེར་རྣམ་པར་མཛེས། །དེ་བཞིན་ཐུབ་པ་ཡོན་ཏན་མངའ་བ་པོ། །ཡེ་ཤེས་རི་བོའི་དབང་པོ་འཇིག་རྟེན་ལས། །མངོན་པར་འཕགས་ཤིང་འཁོར་ཀུན་ཟིལ་མནན་ཏེ། །རྟག་ཏུ་ལྷན་ནེར་བཞུགས་ཤིང་རྣམ་པར་མཛེས། །
དཔེར་ན་མཁའ་ལ་གནས་པའི་དགུང་ཟླ་ནི། །མར་གྱི་ངོ་ལ་མཛེས་པ་མ་ལགས་ཀྱི། །དཔལ་ལྡན་དགུང་ཟླ་ཉ་བ་རྒྱས་པ་ནི། །སྐར་མའི་ཚོགས་རྣམས་ཐམས་ཅད་ཟིལ་གྱིས་གནོན། །དེ་བཞིན་སྟོབས་བཅུ་མངའ་བ་ཐུབ་པ་ཁྱོད། །རང་གི་སློབ་མ་སྐར་ཚོགས་ཞབས་འབྲིང་
མངའ། །འཇིག་རྟེན་ཐམས་ཅད་ཟིལ་གྱིས་མནན་མཛད་ཅིང་། །ཡེ་ཤེས་འོད་རྣམས་ཀྱིས་ཀྱང་སིམ་པར་མཛད། །དྲང་སྲོང་དཔེར་ན་གདུགས་ཀྱི་དཀྱིལ་འཁོར་ནི། །འཇིག་རྟེན་ཐམས་ཅད་ཟིལ་མནན་རབ་ཏུ་ལྷན། །མི་ཡི་ཉི་མ་ཁྱོད་ཀྱང་དེ་བཞིན་ཏེ། །བློ་གྲོས་
འོད་ཀྱིས་འཇིག་རྟེན་ཀུན་ཟིལ་གནོན། །དཔེར་ན་རི་མཆོག་མཆིས་པའི་ཞུགས་ཀྱི་ཚོགས། །གཟི་བརྗིད་ཀྱིས་ནི་ཕྱོགས་བཅུ་རྣམ་པར་མཛེས། །དེ་བཞིན་ཡེ་ཤེས་རི་བཞུགས་ཐུབ་པ་ཡང་། །ཕྱོགས་བཅུ་དག་ཏུ་རྣམ་པར་མཛེས་པ་ལགས། །དཔེར་ན་རི་དགས་རྒྱལ་
པོས་རི་དགས་ཕྲན། །ཟིལ་གྱིས་མནན་ཅིང་དེར་གནས་མངོན་པར་མཛེས། །མུ་སྟེགས་ཅན་གཞན་ཀུན་གྱི་ནང་གནས་ཤིང་། །ཐུབ་པ་ཁྱོད་ཀྱང་དེ་བཞིན་རྣམ་པར་མཛེས། །དཔེར་ན་འདི་ན་མི་བདག་འཁོར་ལོས་སྒྱུར། །འགྲོ་བ་ཟིལ་གྱིས་མནན་ཅིང་རྣམ་པར་མཛེས། །
མགོན་པོ་ཆོས་མཆོག་འཁོར་ལོས་སྒྱུར་བ་ཡང་། །འགྲོ་བའི་ནང་ན་དེ་བཞིན་རྣམ་པར་མཛེས། །དཔེར་ན་སུམ་ཅུ་གསུམ་དབང་བརྒྱ་བྱིན་ནི། །ལྷ་རྣམས་ཟིལ་གྱིས་མནན་ནས་མངོན་པར་མཛེས། །མཚུངས་པ་མ་མཆིས་དེ་བཞིན་ཚོགས་པ་རྣམས། །ཐམས་ཅད་
ཟིལ་གྱིས་མནན་ནས་རྣམ་པར་མཛེས། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཐོས་པས་རྒྱ་ཆེན་པོ་ལ་མོས་

པའི་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དང་། དམན་པ་ལ་མོས་པའི་སེམས་ཅན་རྣམས་ཀྱང་རྒྱ་ཆེན་པོ་ལ་འཇུག་པ་ལ་གནས་པར་འགྱུར་བ་དང་། བྱང་ཆུབ་ཏུ་སེམས་བསྐྱེད་པའི་སེམས་ཅན་རྣམས་ཀྱང་བྱང་ཆུབ་ལ་
དམིགས་པ་རྣམ་པར་འཕེལ་བར་འགྱུར་བ་དང་། དམན་པ་ལ་སྦྱོར་བའི་སེམས་ཅན་རྣམས་ཀྱང་བརྩམ་པ་ཆེན་པོ་རྩོམ་པར་འགྱུར་བ་དང་། ལམ་ལས་ཉམས་པའི་སེམས་ཅན་རྣམས་ཀྱང་བྱང་ཆུབ་ཀྱི་ལམ་དུ་འཇུག་པར་འགྱུར་བ་དང་། བྱང་ཆུབ་ཀྱི་ལམ་དུ་ཞུགས་པའི་སེམས་ཅན་
རྣམས་ཀྱང་དེ་བཞིན་གཤེགས་པའི་ཡེ་ཤེས་ཀྱིས་རྣམ་པར་བསྒྲུབས་པའི་དགོངས་པའི་ཚུལ་ལ་འཇུག་པར་འགྱུར་བ། བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བགྱི་བའི་ཆོས་ཀྱི་རྣམ་གྲངས་དེ་འཁོར་འདིར་བསྟན་དུ་གསོལ། དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ལྡེམ་པོ་དག་དགོངས་ཏེ་བསྟན་པ་ནི་ལྷ་དང་བཅས་པའི་འཇིག་རྟེན་གྱིས་མོས་
པར་དཀའ་བ། ཤེས་པར་དཀའ་བ། རྟོགས་པར་དཀའ་བ། རྣམ་པར་ཤེས་པར་དཀའ་བ། འཇུག་པར་དཀའ་བ། ཡོངས་སུ་རྟོགས་པར་དཀའ་བ་ཡིན་པས་ཆོ་ག་ཉམས་པའམ། ལྟ་བ་ཉམས་པའམ། ཚུལ་ཁྲིམས་ཉམས་པས། ཡོངས་སུ་ཤེས་པའམ། རྣམ་པར་
ཤེས་པར་མི་ནུས་སོ། །དམན་པ་ལ་མོས་པ་རྣམས་ཀྱིས་མོས་པར་མི་ནུས་སོ། །བསམ་པ་ཉམས་པ་རྣམས་ཀྱིས་ཡིད་ཆེས་པར་མི་ནུས་སོ། །སྡིག་པའི་གྲོགས་པོས་ཡོངས་སུ་ཟིན་པ་རྣམས་ཀྱིས་འཇུག་པར་མི་ནུས་སོ། །དགེ་བའི་བཤེས་གཉེན་གྱིས་ཡོངས་སུ་མ་ཟིན་པ་རྣམས་
ཀྱིས་རྟོགས་པར་མི་ནུས་སོ། །ཆོས་དེ་ལྟ་བུ་ནི་ཡང་དག་པར་རྫོགས་པའི་སངས་རྒྱས་ཀྱིས་བྱིན་གྱིས་མ་བརླབས་པར་མཉན་པར་ཡང་མི་ནུས་ན། མོས་པར་ལྟ་ག་ལ་ནུས་ཏེ། དེ་བཞིན་གཤེགས་པའི་བྱིན་གྱི་རླབས་མ་གཏོགས་པར་དེ་ནི་གནས་མེད་དོ། །དེ་ནས་བཅོམ་ལྡན་

འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཡིད་འོང་སྙན་པའི་དབྱངས་དང་ལྡན་ཁྱོད་ཀྱིས། །ང་ལ་གང་དྲིས་དོན་དེ་ངས་བསྟན་ཉོན། །སེམས་ཅན་དམན་པ་མུན་པ་བསྒྲིབས་པ་ཡིས། །ཆོས་ཚུལ་དམ་པ་ཁོང་དུ་ཆུད་མི་ནུས། །གང་དག་སྔོན་སངས་
རྒྱས་ལ་སྤྱོད་སྤྱད་ཅིང་། །འཇིག་རྟེན་མགོན་པོ་རྣམས་ཀྱིས་བྱིན་བརླབས་པ། །དེ་དག་ཆོས་ཚུལ་དམ་པ་འདི་ཐོས་ན། །མི་རྟོག་ཤིན་ཏུ་གྱ་ནོམ་འབྱུང་བར་འགྱུར། །གང་དག་སྡིག་གྲོགས་སྦྲུལ་གྱིས་སེམས་ཟིན་ཅིང་། །དགེ་བའི་བཤེས་ཀྱི་དུག་སྨན་རྣམ་སྤངས་པ། །དེ་དག་
དམ་ཆོས་དཀོན་མཆོག་འདི་ཐོས་ན། །ཀྱེ་མ་བག་མེད་གཡང་ས་ཆེ་ལས་ལྟུང་། །གང་དག་སེམས་ཆུང་དམན་ཞིང་ཞུམ་གྱུར་དང་། །གང་དག་ལྷག་པའི་བསམ་པ་ཆེ་མེད་པ། །ཡིད་ཆེས་མེད་པ་མོས་པ་ཉམས་པས་ན། །ཐོས་ཀྱང་དེ་དག་དགའ་བར་མི་འགྱུར་རོ། །ཆོས་
མཆོག་འདི་ལ་དད་པར་མ་གྱུར་པ། །དེ་དག་ཡུན་རིང་སྡུག་བསྔལ་ལྟུང་འགྱུར་ཏེ། །ཀྱེ་མ་སྡུག་བསྔལ་རྣམས་ལ་གནོད་འགྱུར་ཞེས། །དེ་ལ་སྙིང་རྗེ་མངོན་བྱས་དེ་མ་བསྟན། །དེ་སྐད་ཅེས་བཀའ་སྩལ་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་འཁོར་འདུས་པ་འདི་ནི་དག་པ་ལགས་ཏེ། སྤྱད་པ་རྣམས་ལེགས་པར་སྤྱད་པ་སངས་རྒྱས་འབྱུང་བ་རྣམས་ལེགས་པར་བསྙེན་བཀུར་བགྱིས་པ་དགེ་བའི་བཤེས་གཉེན་རྣམས་ཀྱིས་ལེགས་པར་ཡོངས་སུ་བཟུང་བ། དད་པའི་མིག་ལེགས་
པར་ཡོངས་སུ་དག་པ། མོས་པའི་སྤྱོད་ཡུལ་ལ་ངེས་པར་བྱུང་བ་བསམ་པ་དང་ལྷག་པའི་བསམ་པ་ལེགས་པར་ཡོངས་སུ་དག་པ་རྣམ་པ་བཟང་པོ་རྟོགས་པར་འགྱུར་བ་ཤ་སྟག་སྟེ། འཁོར་འདུས་པ་འདི་ནི་དེ་ལྟ་བུ་ལགས་པས་དེ་དག་གིས་ཆོས་ཀྱི་ཚུལ་འདི་འཚལ་བར་འགྱུར་ཞིང་།
རྣམ་པར་འཚལ་བར་འགྱུར་ན་སེམས་ཅན་རྣམས་ལ་ཐུགས་བརྩེ་བའི་སླད་དུ། བཅོམ་ལྡན་འདས་ཀྱིས་ལེགས་པར་ཡང་དག་པར་བཤད་དུ་གསོལ། དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ། །དྲང་སྲོང་ཆེན་པོ་གང་དག་ཆོས་འདི་འཚལ་འགྱུར་བའི། །སེམས་ཅན་

དཔལ་ཡོན་ལྡན་པ་འདི་ན་མང་དུ་མཆིས། །གང་དག་སྔོན་སངས་རྒྱས་ལ་སྤྱད་པ་ལེགས་སྤྱད་པ། །དེ་དག་རྣམས་ལ་ཐུབ་དབང་དེ་རིང་ཆོས་བསྟན་གསོལ། །དེ་དག་གུས་དང་བཅས་ཤིང་ཐལ་མོ་སྦྱར་མཆིས་ནས། །མི་ཡི་ལྷ་ཡི་ཞལ་དུ་ལྟ་ཞིང་མཆིས་ལགས་ན། །དྲང་
སྲོང་ཆེན་པོ་དེ་སླད་ཐུགས་རྗེ་བསྐྱེད་མཛད་ཅིང་། །དམ་ཆོས་ཆར་པ་དགྱེས་པ་བཞིན་དུ་དབབ་ཏུ་གསོལ། །ཆོས་རྒྱལ་ཁྱོད་ལ་བདག་ནི་གསོལ་བ་འདེབས་ལགས་ན། །ཆོས་ཀྱི་དམ་པ་གྱ་ནོམ་རབ་ཏུ་བསྟན་དུ་གསོལ། །རྫོགས་པའི་བྱང་ཆུབ་སེམས་དཔའ་ཁྱུ་མཆོག་བསྡུ་སླད་དུ། །
མགོན་པོ་དམ་ཆོས་ཕྱག་མཛོད་དབྱེ་བ་མཛད་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །འཇམ་དཔལ་ཁྱོད་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ལ་དོན་འདི་འདྲི་བར་སེམས་པ་ལེགས་སོ་ལེགས་སོ། །འདི་ལྟར་འཇམ་དཔལ་ཁྱོད་ནི་ཆོས་འདི་དག་ལ་མངོན་སུམ་དུ་གནས་པ། ཆོས་ཐམས་ཅད་ལ་ཐེ་ཙོམ་མེད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་ལ་མཁས་པས་ངེས་པར་འབྱུང་
བ་སྟེ། འཇམ་དཔལ་ཁྱོད་ནི་སྐྱེ་བོ་མང་པོ་ལ་ཕན་པའི་ཕྱིར་ཞུགས་པའོ། །འཇམ་དཔལ་ཁྱོད་ནི་མ་འོངས་པའི་བྱང་ཆུབ་སེམས་དཔའ་རྣམས་ལ་སྣང་བ་བྱ་བར་འདོད་པའོ། །འཇམ་དཔལ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག །བྱང་ཆུབ་སེམས་དཔའི་སྤྱོད་ཡུལ་གྱི་
ཐབས་ཀྱི་ཡུལ་ལ་རྣམ་པར་འཕྲུལ་པ་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་ངས་ཁྱོད་ལ་བཤད་དོ། །བཅོམ་ལྡན་འདས་དེ་བཞིན་འཚལ་ལོ་ཞེས་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་དེ་དག་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་
དེ་དག་ལ་འདི་སྐད་ཅེས་བཀའ་སྩལ་པ། རིགས་ཀྱི་བུ་ཆོས་བཅུ་གཉིས་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བར་འགྱུར་རོ། །བཅུ་གཉིས་གང་ཞེ་ན། འདི་ལྟ་སྟེ། རང་བཞིན་གྱིས་རྒྱ་ཆེན་པོ་ལ་མོས་ཤིང་དམན་པ་ལ་

མོས་པ་མེད་པ་ཡིན། རང་བཞིན་གྱིས་སྙིང་རྗེའི་སྤྱོད་ཡུལ་དང་ལྡན་ཞིང་དཀར་པོའི་རང་བཞིན་ཅན་ཡིན། བཅོས་མ་མ་ཡིན་པའི་ལྷག་པའི་བསམ་པའི་སྤྱོད་ཡུལ་དང་ལྡན་ཞིང་ཡི་དམ་ལ་བརྟན་པ་ཡིན། ཚོགས་ཤིན་ཏུ་བསགས་ཤིང་སྤྱད་པ་ལེགས་པར་སྤྱད་པ་ཡིན། སངས་རྒྱས་འབྱུང་བ་
ལེགས་པར་བསྙེན་བཀུར་ཞིང་དཀར་པོའི་ཆོས་ལེགས་པར་ཡོངས་སུ་བསྡུས་པ་ཡིན། ལུས་དང་ངག་དང་ཡིད་ཀྱི་ལས་ཀྱི་མཐའ་ཁ་ན་མ་ཐོ་བ་མེད་པ་དང་ལྡན་ཞིང་སྡིག་པའི་ལས་ཐམས་ཅད་བོར་བ་ཡིན། སྡིག་པའི་གྲོགས་པོ་ཐམས་ཅད་ཡོངས་སུ་སྤངས་ཤིང་དགེ་བའི་བཤེས་གཉེན་ལ་
བརྟེན་པ་ཡིན། ཇི་ལྟར་སྨྲས་པ་དེ་བཞིན་དུ་བྱེད་ཅིང་སླུ་བ་མེད་པ་ཡིན། བགེད་པའི་ངང་ཚུལ་ཅན་ཡིན་ཞིང་རོ་བྲོ་བ་རྣམས་ལ་མ་ཞེན་མ་ཆགས་པ་མང་བ་ཡིན། དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་ཤིང་བདུད་ཀྱི་བྱིན་གྱི་རླབས་དང་བྲལ་བ་ཡིན། སེམས་
ཅན་ཐམས་ཅད་ལ་ཡང་དང་ཡང་སྙིང་རྗེ་ཆེན་པོ་ཡང་དག་པར་འཇུག་པ་ཡིན། བདོག་པ་ཐམས་ཅད་ཡོངས་སུ་གཏོང་ཞིང་མ་ཆགས་པའི་སེམས་དང་ལྡན་པ་ཡིན་ཏེ། རིགས་ཀྱི་བུ་ཡོན་ཏན་གྱི་ཆོས་བཅུ་གཉིས་པོ་དེ་དག་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་སྟེ། འདི་ལྟ་སྟེ། སེམས་ཅན་ཐམས་ཅད་བདེ་བར་བྱ་བའི་ཕྱིར་ཕན་པའི་སེམས་སོ། །སྡིག་པ་ཐམས་ཅད་མི་བྱེད་པའི་ཕྱིར་སྙིང་རྗེའི་སེམས་སོ། །སེམས་ཅན་ཐམས་ཅད་ཀྱི་ཁུར་བཀུར་བའི་ཕྱིར་སྙིང་རྗེ་ཆེན་པོའི་སེམས་སོ། །
ངན་འགྲོ་ཐམས་ཅད་རབ་ཏུ་སིམ་པར་བྱེད་པའི་ཕྱིར་བྱམས་པ་ཆེན་པོའི་སེམས་སོ། །ཐེག་པ་གཞན་མི་འདོད་པའི་ཕྱིར་དག་པའི་སེམས་སོ། །ཉོན་མོངས་པའི་རྙོག་པ་སེལ་བའི་ཕྱིར་ཉོན་མོངས་པ་མེད་པའི་སེམས་སོ། །རང་བཞིན་གྱིས་འོད་གསལ་བའི་ཕྱིར་འོད་གསལ་བའི་སེམས་
སོ། །རྫས་མེད་པའི་ཕྱིར་སྒྱུ་མ་ལྟ་བུའི་སེམས་སོ། །དངོས་པོ་དང་བྲལ་བའི་ཕྱིར་དངོས་པོ་མེད་པའི་སེམས་སོ། །མི་སྒུལ་བའི་ཕྱིར་བརྟན་པའི་སེམས་སོ། །ཆོས་ཐམས་ཅད་ངེས་པར་རྟོག་པའི་ཕྱིར་མི་ཟློག་པའི་སེམས་སོ། །ཇི་སྐད་སྨྲས་པ་དེ་བཞིན་དུ་བྱེད་པའི་ཕྱིར་སེམས་

ཅན་ཐམས་ཅད་སྒྲོལ་བའི་སེམས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྒྱལ་སྲས་གང་དག་སྤྱོད་པ་ལེགས་སྤྱོད་ཅིང་། །དཀར་པོའི་ཆོས་ཀྱིས་བསམ་པ་ཡོངས་དག་ལ། །དགྲ་ལའང་བྱམས་ཤིང་སྙིང་རྗེས་
སེམས་བརླན་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་སྡིག་གྲོགས་དགྲ་བོ་རྣམ་སྤངས་ཤིང་། །བྱང་ཆུབ་སྟོན་པའི་དགེ་བཤེས་བསྟེན་གྱུར་ཏེ། །བྱང་ཆུབ་ཐེག་པར་སྨོན་ལམ་སྦྱོང་བྱེད་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་སྔོན་མཐར་སྤྱད་
པ་སྤྱོད་པ་ན། །ནམས་ཀྱང་སྐྱོ་བའི་སེམས་ནི་མི་སྐྱེ་ལ། །རྡོ་རྗེ་ལྟ་བུར་མི་ཟློགས་སེམས་ལྡན་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་སྐྱེ་བོ་ཀུན་ལ་བྱམས་སེམས་ལྡན། །སེམས་ཅན་ཐམས་ཅད་བདེ་ལ་སྦྱོར་འདོད་ཅིང་། །སྡིག་པ་ཐམས་ཅད་སྤང་བའི་
བསམ་པ་ཅན། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །ཐེག་པ་གཞན་གྱི་ཡོན་ཏན་མི་འདོད་ཅིང་། །བྱང་ཆུབ་རྒྱ་ཆེན་ཡོན་ཏན་མཆོག་སེམས་ཤིང་། །རྣམ་དག་ཉོན་མོངས་མེད་པའི་སེམས་ལྡན་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །སྲིད་པ་ཞི་བ་གང་
ལ་ཡང་དག་ཏུ། །སྐད་ཅིག་ཙམ་ཡང་ཡོད་མེད་རྟོག་མེད་ཅིང་། །མེ་ལོང་གདོང་ལྟར་འགྲོ་བ་ཀུན་ལྟ་བ། །འདི་ནི་ཡང་དག་ཏུ་ན་བྱང་ཆུབ་སེམས། །ཉོན་མོངས་སྐྱོན་གྱི་རྡུལ་རྣམས་རྣམ་སྤངས་ཤིང་། །དྲི་མེད་ནམ་མཁའ་ལྟ་བུར་རྣམ་མཛེས་ལ། །ཚིག་ལམ་ངེས་ཚིག་ཐམས་
ཅད་མཐོང་དགའ་བ། །འདི་ནི་བཟང་པོའི་བྱང་ཆུབ་སེམས་ཞེས་བྱ། །གཟུངས་དང་སོ་སོ་རིག་དང་སྤྱོད་མཆོག་གི། །རྩ་བ་འདི་ཡིན་མཚན་གྱི་འབྱུང་གནས་ཏེ། །དཔེ་བྱད་བཟང་པོ་འབར་བ་ལུས་ཀྱི་རྒྱུ། །སངས་རྒྱས་ཡོན་ཏན་ཀུན་གྱི་རིགས་སུ་གནས། །གླེང་གཞིའི་ལེའུ་སྟེ་
དང་པོའོ།། །།འཇམ་དཔལ་ཡོན་ཏན་གྱི་ཆོས་དེ་ལྟ་བུ་ལ་གནས་པའི་བྱང་ཆུབ་སེམས་དཔའ་ཡོན་ཏན་གྱི་ཕན་ཡོན་བཅུ་གཉིས་ཡང་དག་པར་མཐོང་བ་དེས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་

ཀྱི་ལམ་སྟོན་པར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། ལོངས་སྤྱོད་ཆེན་པོ་ཡོངས་སུ་སྒྲུབ་པའི་ལམ་ཡིན་པར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། འདོད་པའི་རིགས་སུ་སྐྱེ་བར་འགྱུར་བར་ཡང་དག་པར་
མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། སེར་སྣ་ཚར་གཅོད་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། གཏོང་བའི་རྒྱུན་འཕེལ་བར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་
དང་། ཡི་དགས་ཀྱི་གྲོང་ཁྱེར་གྱི་སྒོ་གཅོད་པར་བྱེད་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། སྐྱེ་བོ་མང་པོ་དང་ཐུན་མོང་གི་ལོངས་སྤྱོད་རྣམས་ལས་སྙིང་པོ་ལེན་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་
ལ་སྦྱར་བར་བྱ་བ་དང་། ཡོ་བྱད་ཡོངས་སུ་རྫོགས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། བདོག་པ་ཐམས་ཅད་ཡོངས་སུ་གཏོང་བ་ལ་གོམས་པར་བྱས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་
སྦྱར་བར་བྱ་བ་དང་། དངོས་པོ་ཐམས་ཅད་ལ་འཛིན་པའི་སེམས་བདག་ལ་མེད་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། བདག་གི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་བར་ཡང་དག་པར་མཐོང་བས་སྦྱིན་པའི་
ཕ་རོལ་ཏུ་ཕྱིན་པ་ལ་སྦྱར་བར་བྱ་བ་དང་། དེ་བཞིན་གཤེགས་པའི་རྗེས་སུ་བསྟན་པ་ལ་འཐུན་པར་ཞུགས་པར་འགྱུར་བར་ཡང་དག་པར་མཐོང་བས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་བ་སྟེ། རིགས་ཀྱི་བུ་ཡོན་ཏན་གྱི་ཕན་ཡོན་བཅུ་གཉིས་པོ་དེ་དག་ཡང་དག་པར་མཐོང་
བའི་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་བར་བྱ་སྟེ། སྦྱིན་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་

ཏོ། །སྦྱིན་པ་རྒྱ་ཆེན་མཚུངས་མེད་བྱིན་པས་དེ་དག་བྱང་ཆུབ་འགྲུབ་འགྱུར་ཞེས། །རྐང་ལག་མགོ་དང་དྲི་མེད་མིག་དང་རྐང་དང་དེ་བཞིན་རུས་པ་དང་། །ཕྱི་དང་ནང་གི་དངོས་པོ་ཐམས་ཅད་སེར་སྣ་མེད་པའི་བློས་ཀྱང་གཏོང་། །ཕྱིར་ཞིང་ཕན་ཡོན་མཐོང་བ་རྒྱ་ཆེན་སེམས་
ལྡན་གང་དུའང་ལྟ་བ་མེད། །བདག་ནི་ལོངས་སྤྱོད་བཟང་པོ་རྫོགས་འགྱུར་རིགས་ཀྱི་མཆོག་ཏུ་སྐྱེ་བར་འགྱུར། །སངས་རྒྱས་དྲི་མེད་ལམ་འཕེལ་ཡོན་ཏན་སེར་སྣ་ཡོངས་སུ་སྤངས་པར་འགྱུར། །དབང་དང་ཕ་རོལ་ཕྱིན་ལ་སོགས་པ་རྫོགས་འགྱུར་སྦྱིན་འདི་རྒྱལ་བས་བསྔགས། །
མཁས་པ་དེ་ལྟར་དུ་མར་རྟོག་ཅིང་དོན་ཀུན་གཏོང་ལ་དགའ་བར་བྱེད། །རིགས་ཀྱི་བུ་ཡོན་ཏན་གྱི་ཆོས་བཅུ་གཉིས་པོ་འདི་དག་མཐོང་བའི་བྱང་ཆུབ་སེམས་དཔས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། བདག་གིས་
བྱིན་གྱི་རླབས་ཕུན་སུམ་ཚོགས་པ་ཡོངས་སུ་ཟིན་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བྱང་ཆུབ་སེམས་དཔའི་ལམ་དུ་ཞུགས་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་གིས་
ཉོན་མོངས་པའི་འཆིང་བ་རྣམས་ལྷོད་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་ངན་འགྲོ་ཐམས་ཅད་ལས་ཡང་དག་པར་འདའ་བར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་
གིས་ངན་འགྲོའི་ལམ་ཐམས་ཅད་རྣམ་པར་སྦྱངས་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་གིས་ལུས་དང་ངག་དང་། ཡིད་ཀྱི་ལས་ཁ་ན་མ་ཐོ་བ་མེད་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་
བྱ་བ་དང་། མཁས་པའི་སྐྱེ་བོ་རྣམས་ཀྱིས་སྨད་པ་མེད་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་བག་ཡོད་པའི་ཆོས་ལ་བརྟེན་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་

གིས་སེམས་ཅན་ཐམས་ཅད་ལ་མི་འཇིགས་པའི་སྦྱིན་པ་བྱིན་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། ལུས་དང་ངག་དང་ཡིད་ཀྱི་ལས་སྡོམ་པ་ཐོབ་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་།
བདག་གིས་སངས་རྒྱས་ཀྱི་ཆོས་ཐམས་ཅད་བསྒྲུབ་པར་འགྱུར་བར་མཐོང་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་དང་། བདག་གིས་དེ་བཞིན་གཤེགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བླ་ན་མེད་པ་ཡོངས་སུ་སྦྱངས་པར་འགྱུར་བར་མཐོང་བས་ཚུལ་ཁྲིམས་
ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་བ་སྟེ། རིགས་ཀྱི་བུ་ཡོན་ཏན་གྱི་ཕན་ཡོན་བཅུ་གཉིས་པོ་དེ་དག་ཡང་དག་པར་མཐོང་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱ་སྟེ། ཚུལ་ཁྲིམས་དེ་ཡང་ཐམས་ཅད་མཁྱེན་
པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བདག་གི་ཉོན་མོངས་འཆིང་བ་ལྷོད་འགྱུར་ཞིང་། །བདག་ནི་ངན་འགྲོའི་སྒོ་བཅད་འགྱུར་རོ་ཞེས། །མཁས་པས་ཕན་ཡོན་ཡོངས་སུ་བསམ་བྱས་
ལ། །ཚུལ་ཁྲིམས་གཡག་རྔ་བཞིན་དུ་བསྲུང་བར་བྱ། །སངས་རྒྱས་རྗེས་བསྟན་རྗེས་སུ་བདག་འབྲང་ཞིང་། །བདེ་བར་གཤེགས་པས་རྟག་ཏུ་བསྔགས་འགྱུར་ལ། །བདག་གིས་བྱིན་བརླབས་དོན་མེད་མི་འགྱུར་བ། །ཚུལ་ཁྲིམས་གནས་ལས་འགྱུར་ཞེས་ཚུལ་ཁྲིམས་
བསྲུང་། །ལུས་དང་ངག་ལ་ཁ་ན་མ་ཐོ་མེད། །སེམས་ལ་སྐྱོན་མེད་ཆོས་ལ་སྤྱོད་པར་འགྱུར། །ལུས་ཀྱིས་བསྲུངས་ལ་ངག་གིས་བསྲུངས་གྱུར་ཅིང་། །སེམས་ཀྱིས་སྡིག་པ་རྣམ་པར་སེམས་མི་འགྱུར། །བག་ཡོད་བདེ་བར་གཤེགས་པས་བསྔགས་པ་སྟེ། །དགེ་བའི་
ལས་ཀྱི་རྩ་བར་གང་གྱུར་པ། །དེ་ལ་རྟག་ཏུ་བག་ཡོད་བདག་གནས་བྱ། །བག་མེད་ཐམས་ཅད་རྟག་པར་ཡོངས་སུ་སྤང་། །ཚུལ་ཁྲིམས་ཕ་རོལ་ཕྱིན་པའི་མཆོག་གནས་ན། །སངས་རྒྱས་ཆོས་རྣམས་བདག་གིས་ཐོབ་པར་འགྱུར། །སངས་རྒྱས་ཚུལ་ཁྲིམས་རབ་ཏུ་

སྦྱང་བར་བྱ། །དེ་ནི་ཚུལ་ཁྲིམས་མཆོག་ཅེས་འཕགས་པས་གསུངས། །ཡོན་ཏན་དེ་དག་ཐོབ་པར་གང་འདོད་ཅིང་། །བྱང་ཆུབ་སེམས་དཔའ་བྱང་ཆུབ་མཆོག་འདོད་པ། །དེས་ན་ཚུལ་ཁྲིམས་གཡག་རྔ་བཞིན་བསྲུངས་ན། །ཡོན་ཏན་ཐམས་ཅད་མཁས་
པས་མྱུར་དུ་འཐོབ། །རིགས་ཀྱི་བུ་གཞན་ཡང་ཆོས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་བཅུ་གཉིས་ཀྱིས་བཟོད་པ་བསྒོམ་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་སྐད་ཅིག་པའོ་ཞེས་བཟོད་པ་
བསྒོམ་པར་བྱ་བ་དང་། བདག་མི་དམིགས་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང་། བདག་དང་གཞན་ཡོངས་སུ་བསྲུང་བའི་ཕྱིར་བཟོད་པ་བསྒོམ་པར་བྱ་བ་དང་། འཁྲུག་པ་གཏན་མེད་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང་། བག་ལ་ཉལ་དང་ཀུན་ནས་
དཀྲིས་པ་རྣམ་པར་བསལ་བའི་ཕྱིར་བཟོད་པ་བསྒོམ་པར་བྱ་བ་དང་། རྗེས་སུ་ཆགས་པ་དང་ཁོང་ཁྲོ་བ་སྤང་བའི་ཕྱིར་བཟོད་པ་བསྒོམ་པར་བྱ་བ་དང་། མཚན་དང་དཔེ་བྱད་བཟང་པོ་ཡོངས་སུ་བསྒྲུབ་པའི་ཕྱིར་བཟོད་པ་བསྒོམ་པར་བྱ་བ་དང་། ཚངས་པའི་འཇིག་རྟེན་དུ་སྐྱེ་བ་ཐོབ་པར་
བྱ་བའི་ཕྱིར་བཟོད་པ་བསྒོམ་པར་བྱ་བ་དང་། གཞན་གྱི་གནོད་པ་ཐམས་ཅད་ལས་ཡང་དག་པར་འདའ་བར་བྱ་བའི་ཕྱིར་བཟོད་པ་བསྒོམ་པར་བྱ་བ་དང་། ཟད་པ་ཤེས་པ་དང་མི་སྐྱེ་བ་ཤེས་པ་ཐོབ་པར་བྱ་བའི་ཕྱིར་བཟོད་པ་བསྒོམ་པར་བྱ་བ་དང་། བདུད་ཀྱི་ཡུལ་ཐམས་ཅད་ལས་
ཡང་དག་པར་འདའ་བར་བྱ་བའི་ཕྱིར་བཟོད་པ་བསྒོམ་པར་བྱ་བ་དང་། དེ་བཞིན་གཤེགས་པའི་སྐུ་ཚད་མེད་པ་ཡང་དག་པར་མཐོང་བས་བཟོད་པ་བསྒོམ་པར་བྱ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་བཅུ་གཉིས་པོ་དེ་དག་གིས་བཟོད་པ་
བསྒོམ་པར་བྱ་སྟེ། བཟོད་པ་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཀྱེ་མ་ཆོས་རྣམས་སྐད་ཅིག་ཡ་མ་བརླ། །དེ་ལ་ནམས་ཀྱང་སེམས་ཅན་རྙེད་མི་འགྱུར། །

ཡོན་ཏན་ཆོས་རྣམས་རབ་ཏུ་རྟོགས་གྱུར་ན། །འཕགས་པ་སངས་རྒྱས་ཡོན་ཏན་གནས་པར་འགྱུར། །མཐའ་གཉིས་རྣམ་པར་སྤང་བ་བྱས་པས་ན། །བདག་དང་གཞན་ལ་རྟག་ཏུ་གནོད་མེད་པར། །བཟོད་པ་ཕུན་སུམ་ཚོགས་པ་མྱུར་བསྒོམ་ཞེས། །ཐུགས་རྗེ་ཆེན་པོའི་
དབང་པོ་དེ་སྐད་གསུང་། །རྟག་ཏུ་རྣམ་རྟོག་མེད་པར་བྱ་བ་ལ། །དེ་ནི་བརྟན་པའི་ཡིད་ཀྱིས་བཟོད་པ་སྟེན། །ཟད་པ་ཤེས་པ་བདག་གིས་ཐོབ་བྱ་ཞེས། །ཉོན་མོངས་ཞི་བར་བྱ་ཕྱིར་བཟོད་པ་སྟེན། །མཚན་གཟུགས་དཔེ་བྱད་བཟང་པོ་དག་བྱ་དང་། །ཚངས་པའི་གནས་སུ་
འགྲོ་བར་སུ་འདོད་པ། །བརྩོན་འགྲུས་བརྟན་པ་དེ་ཡིས་བཟོད་སྟོབས་སྟེན། །བཟོད་ལ་མོས་ན་ཐམས་ཅད་འབྱོར་པར་འགྱུར། །བདུད་ཀྱི་སྟོབས་ནི་སྟོབས་མེད་བྱ་བ་ལ། །བཟོད་པ་འདྲ་བ་སྟོབས་ཟླ་གང་ཡང་མེད། །དེ་ནི་ཡོན་ཏན་ཀུན་གྱི་འབྱུང་གནས་ཏེ། །དེ་ཕྱིར་བཟོད་
པའི་ཡོན་ཏན་དེ་བསྟེན་བྱ། །རིགས་ཀྱི་བུ་གཞན་ཡང་བྱང་ཆུབ་སེམས་དཔས་རྟུལ་བ་བཅུ་གཉིས་ཀྱིས་བརྩོན་འགྲུས་བརྩམ་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། ཆོས་ཐམས་ཅད་མངོན་པར་རྫོགས་པར་བྱང་ཆུབ་པར་བྱ་བའི་རྟུལ་བས་བརྩོན་འགྲུས་བརྩམ་
པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང་། དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང་། དེ་བཞིན་གཤེགས་པ་ཐམས་ཅད་མཉེས་
པར་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང་། སེམས་ཅན་ཐམས་ཅད་སངས་རྒྱས་ཀྱི་ཆོས་ལ་དགོད་པའི་རྟུལ་བས་བརྩོན་འགྲུས་བརྩམ་པར་བྱ་བ་དང་། སེམས་
ཅན་ཐམས་ཅད་ཀྱི་མི་ཤེས་པ་བསལ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང་། སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཉེ་བར་བསྒྲུབ་པའི་རྟུལ་བས་བརྩོན་འགྲུས་བརྩམ་པར་བྱ་བ་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱོང་བའི་རྟུལ་བས་བརྩོན་

འགྲུས་བརྩམ་པར་བྱ་བ་དང་། ཕྱི་མའི་མཐའི་མུར་ཐུག་པའི་བསྐལ་པར་སེམས་ཅན་གྱི་དོན་དུ་སྤྱོད་པ་སྤྱད་པས་ཡོངས་སུ་མི་སྐྱོ་བའི་རྟུལ་བས་བརྩོན་འགྲུས་བརྩམ་པར་བྱ་བ་དང་། སྐད་ཅིག་གཅིག་གིས་འཇིག་རྟེན་གྱི་ཁམས་ཐམས་ཅད་དུ་འགྲོ་བའི་རྟུལ་
བས་བརྩོན་འགྲུས་བརྩམ་པར་བྱ་བ་དང་། སངས་རྒྱས་ཀྱི་ཞིང་ཐམས་ཅད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་ཆོས་ཀྱི་འཁོར་ལོ་བསྐོར་བའི་རྟུལ་བས་བརྩོན་འགྲུས་བརྩམ་པར་བྱ་བ་སྟེ། རིགས་ཀྱི་བུ་རྟུལ་བ་བཅུ་གཉིས་
པོ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོས་བརྩོན་འགྲུས་བརྩམ་པར་བྱ་སྟེ། བརྩོན་འགྲུས་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དྲང་སྲོང་
སྲས་པོ་གང་དག་བྱང་ཆུབ་མཆོག་འདོད་པ། །ཁྱུ་མཆོག་དེ་དག་རྣམས་ཀྱི་བརྩོན་འགྲུས་མ་ཞུམ་མཆོག །དེ་དག་སངས་རྒྱས་ཞིང་ནི་བརྒྱར་ཡང་འགྲོ་བར་བྱེད། །དེ་དག་ཡུན་རིང་སྤྱད་པ་སྤྱོད་ཀྱང་སྐྱོ་བ་མེད། །སེམས་ཅན་ཡོངས་སུ་སྨིན་པར་བྱ་ཕྱིར་བརྩོན་འགྲུས་ཅན། །
དེ་དག་བསྐལ་པ་བརྒྱ་ཕྲག་མང་པོར་སྡུག་བསྔལ་བཟོད། །སྐྱེ་བོ་སྡུག་བསྔལ་དཔག་མེད་ཞི་བདེ་སྦྱིན་འདོད་པ། །ལེ་ལོ་མེད་པ་དེ་དག་བརྩོན་འགྲུས་མི་ཉམས་འདོད། །ཞིང་ཀུན་རྣམ་པར་སྦྱོང་བར་བདག་ནི་སྨོན་ལམ་འདེབས། །ཆོས་རྣམས་འདི་དག་ཐམས་ཅད་རྣམ་པ་ཀུན་
རྟོགས་བྱ། །ཞིང་བརྒྱ་ཀུན་ཏུ་ཆོས་ཀྱི་འཁོར་ལོ་བསྐོར་བར་བྱ། །ཐེག་པ་མཆོག་ལ་བདག་གིས་སེམས་ཅན་བྱེ་བ་གདུལ། །ཤིན་ཏུ་རྒྱ་ཆེན་ཞིང་རྣམས་སྤྲུལ་པ་བྱས་ནས་སུ། །སེམས་ཀྱི་སྐད་ཅིག་གཅིག་ལ་བྱང་ཆུབ་མཆོག་འཚང་རྒྱ། །རྒྱལ་བའི་སྲས་པོ་བརྩོན་འགྲུས་ཕ་
རོལ་དོང་བ་དག །སེམས་ཅན་དོན་དུ་རྣམ་པར་འཕྲུལ་པ་འདི་ན་སྟོན། །རིགས་ཀྱི་བུ་བྱང་ཆུབ་སེམས་དཔས་རྣམ་པ་བཅུ་གཉིས་ཀྱིས་བསམ་གཏན་རྣམས་བསྒོམ་པར་བྱའོ། །བཅུ་གཉིས་པོ་དེ་དག་གང་ཞེ་ན། འདི་ལྟ་སྟེ། ཤིན་ཏུ་མི་འཁྲུགས་པའི་ཕྱིར་ཉོན་མོངས་

པ་ཞི་བར་བྱ་བའི་རྣམ་པ་དང་། ཡུལ་རྣམས་ལ་མི་རྒྱུག་པའི་ཕྱིར་སེམས་གནས་པའི་རྣམ་པ་དང་། འདོད་པ་དང་གཟུགས་དང་གཟུགས་མེད་པའི་ཁམས་ལས་ཡང་དག་པར་འདའ་བའི་ཕྱིར་མི་གནས་པའི་རྣམ་པ་དང་། འཇིག་རྟེན་པའི་སྙོམས་པར་འཇུག་པ་ཟིལ་གྱིས་
གནོན་པའི་ཕྱིར་འཇིག་རྟེན་ལས་འདས་པའི་རྣམ་པ་དང་། དེ་ལ་མ་ཆགས་པའི་ཕྱིར་ཁྱད་པར་གྱི་རྣམ་པ་དང་། བསམ་གཏན་ཟློག་པའི་ཕྱིར་འདོད་རྒྱལ་གྱི་རྣམ་པ་དང་། དངོས་པོའི་འདུ་ཤེས་དང་བྲལ་བའི་ཕྱིར་ངོ་བོ་ཉིད་ཀྱི་རྣམ་པ་དང་། ཚད་ཡོད་པའི་ཏིང་ངེ་འཛིན་ལ་
སྨོད་པའི་ཕྱིར་ཚད་མེད་པའི་རྣམ་པ་དང་། ཤིན་ཏུ་ཞི་བའི་ཕྱིར་ཞི་གནས་ཀྱི་རྣམ་པ་དང་། ཅང་ཤེས་པའི་ཕྱིར་སེམས་དུལ་བའི་རྣམ་པ་དང་། དབང་པོ་ངེས་པར་བསྡམས་པའི་ཕྱིར་ངེས་པར་སེམས་པའི་རྣམ་པ་དང་། བྱང་ཆུབ་ཀྱི་བསམ་པ་མ་བོར་བའི་ཕྱིར་ཐབས་མཁས་
པའི་རྣམ་པས་བྱང་ཆུབ་སེམས་དཔའ་རྣམས་བསམ་གཏན་སྒོམ་གྱི། ང་རྒྱལ་དང་ལྟ་བ་དང་སྲེད་པ་ཤས་ཆེ་བའི་བསམ་གཏན་པ་ནི་མ་ཡིན་ཏེ། དེའི་ཕྱིར་བྱང་ཆུབ་སེམས་དཔའ་རྣམས་སྙོམས་པར་འཇུག་པ་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ་རྣམ་
པ་བཅུ་གཉིས་པོ་དེ་དག་གིས་བྱང་ཆུབ་སེམས་དཔས་བསམ་གཏན་རྣམས་བསྒོམ་པར་བྱ་སྟེ། བསམ་གཏན་དེ་ཡང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་
ཆུབ་སེམས་དཔའ་གཟི་ལྡན་པ། །དེ་ཉིད་དེ་དག་བསམ་གཏན་ནི། །ཉོན་མོངས་ཐམས་ཅད་ཞི་ཕྱིར་དང་། །ཤིན་ཏུ་འཁྲུག་མེད་དོན་ཕྱིར་ཡིན། །ཞི་བའི་ཞི་གནས་ངེས་པར་སེམས། །ཡུལ་ལ་རྟག་པར་དགའ་བ་མེད། །སེམས་འཁྲུལ་གྱུར་པ་གནས་རྣམས་
སུ། །རྟག་པར་ཡང་དག་རབ་ཏུ་སྦྱོར། །མི་གནས་དེ་དག་བསམ་གཏན་བྱེད། །འདོད་དང་གཟུགས་དང་གཟུགས་མེད་པ། །གང་ལའང་དེ་དག་མི་གནས་ཏེ། །དེ་དག་མི་གནས་བསམ་གཏན་བྱེད། །བྱང་ཆུབ་སེམས་དཔའ་ཡེ་ཤེས་ཅན། །བསམ་གཏན་འཇིག་

རྟེན་འདས་པར་བརྗོད། །དེ་བས་ཏིང་ངེ་འཛིན་རྣམས་ཀྱིས། །ཉན་ཐོས་རྣམས་དང་འཇིག་རྟེན་འཕགས། །དེ་དག་བསམ་གཏན་ལས་སུ་རུང་། །ཇི་ལྟར་འདོད་བཞིན་དབང་ཡང་སྒྱུར། །འདོད་པའི་ཁམས་སུ་སྐྱེ་མི་འདོད། །དེ་དག་བསམ་གཏན་ཟློག་པར་
བྱེད། །བདག་ཉིད་ཆེན་པོ་དེ་དག་གི། །བསམ་གཏན་རྣམས་ནི་རྣམ་པས་འཕགས། །དེ་དག་དེར་ཆགས་མེད་པ་ཞེས། །དེ་ཕྱིར་རྒྱལ་བས་བཀའ་སྩལ་ཏོ། །སེམས་ཅན་མེད་ཆོས་དྲི་མེད་དེ། །དེ་དག་བསམ་གཏན་ཚད་མེད་དོ། །ཕྱོགས་གཅིག་བསམ་གཏན་
བྱེད་པ་དག །ཟིལ་གྱིས་མནན་ཅིང་བསམ་གཏན་བྱེད། །ཤེས་རབ་ཐབས་དང་ལྡན་པ་པོ། །མ་སྨད་བསམ་གཏན་བསམ་གཏན་བྱེད། །དེ་དག་ལྟ་བའི་རྣམ་པ་སྤངས། །ཤིན་ཏུ་དགེ་བའི་སྤྱོད་ཡུལ་ཅན། །དངོས་ལ་མི་གནས་ཤེས་རབ་ལྡན། །དངོས་པོ་མེད་ལའང་མི་
གནས་ཏེ། །དངོས་དང་དངོས་མེད་འདུ་ཤེས་སྤངས། །དེ་དག་བསམ་གཏན་བསམ་གཏན་བྱེད། །གཟི་ལྡན་དེ་དག་འདྲ་བ་ཡི། །རྣམ་པས་མཉམ་མེད་བསམ་གཏན་བྱེད། །དེ་ལ་དགྲ་བཅོམ་རང་སངས་རྒྱས། །བློ་ནི་ཤིན་ཏུ་རྨོངས་པར་འགྱུར། །རིགས་ཀྱི་བུ་རྣམ་པ་བཅུ་
གཉིས་ཀྱིས་བྱང་ཆུབ་སེམས་དཔས་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་བྱའོ། །བཅུ་གཉིས་པོ་དག་གང་ཞེ་ན། འདི་ལྟ་སྟེ། གཏི་མུག་གི་མུན་པ་མུན་ནག་མེད་པའི་ཕྱིར་སྣང་བའི་རྣམ་པ་དང་། ཉོན་མོངས་པའི་ཐིབས་པོ་སྣང་བར་བྱེད་པའི་ཕྱིར་སྒྲོན་མའི་རྣམ་པ་དང་།
མི་ཤེས་པ་དང་བྲལ་བའི་ཕྱིར་ཡེ་ཤེས་ཀྱི་འོད་ཟེར་རབ་ཏུ་འགྱེད་པའི་རྣམ་པ་དང་། མ་རིག་པ་དྲུངས་ནས་འབྱིན་པའི་ཕྱིར་ཐང་གཤོལ་གྱི་རྣམ་པ་དང་། སྲེད་པའི་རྒྱ་མོ་རྣམ་པར་འཇིག་པར་བྱེད་པའི་ཕྱིར་ལྕགས་ཀྱུའི་རྣམ་པ་དང་། ཉོན་མོངས་པའི་རི་རྡུལ་དུ་རློག་པའི་ཕྱིར་རྡོ་རྗེའི་
རྣམ་པ་དང་། ཉོན་མོངས་པའི་འདམ་རྫབ་སྐེམས་པའི་ཕྱིར་ཉི་མའི་དཀྱིལ་འཁོར་གྱི་རྣམ་པ་དང་། སྐྱེ་བའི་ཤིང་སྲེག་པའི་ཕྱིར་མེའི་རྣམ་པ་དང་། རྨོངས་པ་མེད་པར་བྱེད་པའི་ཕྱིར་ནོར་བུ་ལྟ་བུའི་རྣམ་པ་དང་། རྫས་མེད་པའི་ཕྱིར་སྟོང་པ་ཉིད་ཀྱི་རྣམ་པ་དང་། མཚན་ཉིད་མེད་པའི་

ཕྱིར་མཚན་མ་མེད་པའི་རྣམ་པ་དང་། ཁམས་གསུམ་ལས་ཡང་དག་པར་འདའ་བའི་ཕྱིར་སྨོན་པ་མེད་པའི་རྣམ་པ་སྟེ། རིགས་ཀྱི་བུ་རྣམ་པ་བཅུ་གཉིས་པོ་དེ་དག་གིས་བྱང་ཆུབ་སེམས་དཔས་ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་བྱའོ། །དེ་ནས་བཅོམ་ལྡན་འདས་
ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཤེས་རབ་འཕགས་པ་འདི་ནི་སྣང་ལྟ་བུར། །རྟག་ཏུ་སྐྱེ་དགུ་རྣམས་ཀྱི་མུན་པ་སེལ། །དེ་ནི་སྒྲོན་མ་ལྟ་བུར་སྣང་ཕྱིར་བྱུང་། །ཉོན་མོངས་ཚོགས་ལ་འདི་ནི་སྣང་བར་བྱེད། །སྲེད་དང་རྨོངས་པའི་རྩ་རྣམས་བསལ་
བའི་ཕྱིར། །དགེ་བའི་ཡིད་ནི་ཐོང་གཤོལ་འདྲ་བ་ཡིན། །ཉོན་མོངས་རི་རྣམས་རྡུལ་དུ་རློག་པ་སྟེ། །ལྷ་མིན་ལྡང་ལ་དབང་པོའི་རྡོ་རྗེ་བཞིན། །རང་གི་སྣང་བས་ཤེས་རབ་མུན་བྲལ་བས། །དམ་པ་རྣམས་ཀྱིས་མར་མེ་འདྲ་ཞེས་བསྟན། །དེ་ནི་ཉོན་མོངས་འདམ་རྫབ་ངན་
སྐེམས་ཕྱིར། །དཔྱིད་ཉི་འདྲ་ཞེས་དམ་པ་རྣམས་ཀྱིས་བརྗོད། །དེ་ནི་ཉོན་མོངས་ཆུ་བོར་ནུབ་པ་ལ། །གྲུ་བཞིན་འཇིག་རྟེན་ཡང་དག་སྒྲོལ་བ་བྱེད། །དེ་ནི་གཏི་མུག་ཤིང་ཆེན་གཅོད་པས་ན། །དག་ཅིང་མི་རྟོག་རལ་གྲི་རྣོ་དང་མཚུངས། །རྨོངས་པ་མེད་འགྱུར་ནོར་བུ་རིན་
ཆེན་འདྲ། །དངོས་མེད་ཆོས་ཀྱི་མཚན་ཉིད་རྟོགས་པར་བྱེད། །སྟོང་པ་རང་དབང་བྱེད་ཅིང་རྟོག་མེད་པས། །དེ་ནི་སྲིད་དང་ཞི་ལ་མི་གནས་སོ། །ནེམ་ནུར་ཐེ་ཙོམ་ལ་སོགས་འཇིག་བྱེད་དེ། །དྲིས་པ་ལན་གདབ་པ་ལའང་དེ་མཁས་སོ། །འཁོར་བའི་ཉེས་པའང་དེ་ཉིད་སེལ་བྱེད་དེ། །
མྱ་ངན་འདས་ལམ་མཚོན་ལ་དེས་སྒྲོན་ཡིན། །དེ་ལ་མིག་ཅེས་ཐུབ་པ་ཟླ་བ་གསུང་། །མངོན་སུམ་བྱེད་ཅིང་རྟོགས་པའི་མཚན་ཉིད་དེ། །དེ་གྲོགས་བྱང་ཆུབ་སེམས་དཔའ་དྲི་མེད་རྣམས། །སྒྲོལ་མའི་ཡིད་ལྟར་བྱང་ཆུབ་སྤྱད་པ་སྤྱོད། །ཕ་རོལ་ཏུ་ཕྱིན་པ་བསྟན་པའི་ལེའུ་
སྟེ་གཉིས་པའོ།། །།རིགས་ཀྱི་བུ་བྱང་ཆུབ་སེམས་དཔའི་ཐབས་ནི་ཡུལ་བཅུ་གཉིས་ལ་བལྟ་བར་བྱ་སྟེ། བཅུ་གཉིས་པོ་དག་གང་ཞེ་ན། རིགས་ཀྱི་བུ་འདི་ལ་ནི་བྱང་ཆུབ་སེམས་དཔའ་ནི་མྱ་ངན་ལས་འདས་པའི་ཡུལ་ལ་གནས་པའང་ཡིན་ལ། ཐབས་ཀྱིས་

འཁོར་བའི་ཡུལ་ལ་ཡང་གནས་པར་སྣང་བ་དང་། དབེན་པའི་ཡུལ་ལ་གནས་པའང་ཡིན་ལ། ཐབས་ཀྱིས་འདུ་འཛིའི་ཡུལ་ལ་གནས་པར་ཡང་སྣང་བ་དང་། བསམ་གཏན་གྱི་ཡུལ་ལ་གནས་པའང་ཡིན་ལ། ཐབས་ཀྱིས་བཙུན་མོའི་འཁོར་གྱི་
ནང་ན་གནས་པར་ཡང་སྣང་བ་དང་། མངོན་པར་འདུ་མི་བྱེད་པའི་ཡུལ་ལ་གནས་པའང་ཡིན་ལ། ཐབས་ཀྱིས་མངོན་པར་འདུ་བྱེད་པ་ཐམས་ཅད་ཀྱི་ཡུལ་ལ་གནས་པར་ཡང་སྣང་བ་དང་། སྐྱེ་བ་མེད་པའི་ཡུལ་ལ་གནས་པའང་ཡིན་ལ། ཐབས་ཀྱིས་སྐྱེ་བ་དང་། ཤི་
འཕོའི་ཡུལ་ལ་གནས་པར་ཡང་སྣང་བ་དང་། བདུད་བཞིའི་ཡུལ་ལ་ཡང་དག་པར་འདས་པའང་ཡིན་ལ། ཐབས་ཀྱིས་བདུད་འདུལ་བ་ཡང་སྟོན་པ་དང་། འཕགས་པའི་སྐྱེ་བོའི་ཡུལ་ལ་གནས་པའང་ཡིན་ལ། ཐབས་ཀྱིས་འཕགས་པ་མ་ཡིན་པའི་ཡུལ་ལ་གནས་པར་ཡང་
སྣང་བ་དང་། འཇིག་རྟེན་གྱི་ཡུལ་ལས་ཡང་དག་པར་འདས་པའང་ཡིན་ལ། ཐབས་ཀྱིས་འཇིག་རྟེན་གྱི་ཡུལ་ལ་གནས་པར་ཡང་སྣང་བ་དང་། ཡེ་ཤེས་ཀྱི་ཡུལ་རྙེད་པའང་ཡིན་ལ་ཐབས་ཀྱིས་མི་ཤེས་པའི་མཐའི་ཡུལ་ལ་གནས་པར་ཡང་སྣང་བ་དང་། ཡང་དག་པའི་མཐའི་
ཡུལ་མངོན་སུམ་དུ་གྱུར་པའང་ཡིན་ལ། ཐབས་ཀྱིས་ཉན་ཐོས་དང་རང་སངས་རྒྱས་ཀྱི་ཡུལ་དུ་ཡང་མི་ལྟུང་བ་དང་། མཚན་ཉིད་མེད་པའི་ཆོས་ཁོང་དུ་ཆུད་པའང་ཡིན་ལ། ཐབས་ཀྱིས་མཚན་དང་དཔེ་བྱད་བཟང་པོས་ལེགས་པར་བརྒྱན་ཅིང་སྤུད་པའི་ལུས་ཀྱིས་སེམས་ཅན་
ཐམས་ཅད་ཡོངས་སུ་སྨིན་པར་བྱེད་པའི་ཡུལ་ལ་གནས་པར་ཡང་སྣང་བ་དང་། སངས་རྒྱས་ཀྱི་ཡུལ་ལ་ཡང་དག་པར་ཞུགས་པའང་ཡིན་ལ། ཐབས་ཀྱིས་བདུད་ཀྱི་ཡུལ་ཐམས་ཅད་ལ་གནས་པར་ཡང་སྣང་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐབས་ནི་
ཡུལ་བཅུ་གཉིས་པོ་དེ་དག་ལ་བལྟ་བར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་དག་རྣམས་ཀྱི། །ཐབས་ཀྱི་ཡུལ་ནི་འདི་ཡིན་ཏེ། །ཡུལ་རྣམས་གང་ལ་གནས་གྱུར་ཀྱང་། །ཡུལ་རྣམས་ཀུན་

ལའང་སྣང་བ་ཡིན། །མྱ་ངན་འདས་པའི་མཚོར་བཀྲུས་ཀྱང་། །ཐབས་ཀྱིས་འཁོར་བའི་ཆུན་སྣང་། །ཐབས་ཀྱི་བསམ་པ་ཐོབ་པས་ན། །གཉི་གའི་སྐྱོན་གྱིས་གོས་པ་མེད། །འགྲོ་ཕན་ཐམས་ཅད་ལུས་ཡིད་ཀྱིས། །དབེན་པ་དམ་པ་ཐོབ་གྱུར་ནས། །མེ་ཏོག་ནགས་ཀྱི་བུང་བ་
བཞིན། །འདུ་འཛི་དག་དང་འདྲེས་པ་མེད། །གདུ་བུ་འཁྲོལ་བའི་སྒྲ་ཆེན་འབྱུང་བ་ཡི། །བཙུན་མོའི་འཁོར་ན་དེ་དག་སྒེག་པར་སྣང་། །སེམས་ཅན་དམྱལ་ལ་སོགས་པའི་གནོད་པ་ཡིས། །སེམས་ཅན་སྡུག་བསྔལ་སེམས་ཤིང་རྟག་མི་གཡོ། །དེ་དག་རྟག་ཏུ་ཞི་ཞིང་མཉམ་
གཞག་ཀྱང་། །རྣམ་པར་གཡེངས་པའི་ཡུལ་དུའང་སྣང་བ་ཡིན། །རྣམ་པར་གཡེངས་པའི་གཞི་ནི་བསལ་བ་སྟེ། །དེ་དག་ཐབས་མཁས་ཚུལ་ནི་དེ་ཡིན་ནོ། །དེ་དག་མི་རྟོག་མངོན་པར་འདུ་བྱེད་མེད། །རྣམ་པར་རྟོག་པའི་མེ་ཡང་ཡོད་མིན་ཀྱང་། །ཐབས་ཀྱིས་སྤྲོས་པ་དང་
ནི་འདུ་བྱེད་དང་། །རྟོག་དང་ལྡན་པ་དེ་དག་སྣང་བ་ཡིན། །ཆོས་རྣམས་འཆི་འཕོ་སྐྱེ་བ་མེད་ལྡན་ཞིང་། །ཡང་དག་ཉིད་དུ་སྐྱེ་མེད་ལྡན་མཐོང་ཡང་། །མཁས་པ་རྣམས་ནི་ཐབས་ཀྱི་ཡེ་ཤེས་ཀྱིས། །སྐྱེ་བ་དང་ནི་འཆི་འཕོ་སྟོན་པར་བྱེད། །བདུད་ཀྱི་ཡུལ་ལས་ཡོངས་འདས་
ཤིང་། །བརྟན་རྣམས་སངས་རྒྱས་ཡུལ་གནས་ཀྱང་། །བརྟན་པ་རྣམས་ཀྱི་ཐབས་ཀྱིས་སུ། །བདུད་ཀྱི་ཡུལ་ལ་རྒྱུ་བར་སྣང་། །འཕགས་པའི་ཚོགས་ཀྱི་སྤྱིར་གནས་ཀྱང་། །ཐབས་ཀྱིས་བྱིས་པ་ཉིད་དུ་སྟོན། །ཡེ་ཤེས་སྟོབས་ཅན་རྣམ་འཕྲུལ་ཀྱང་། །སེམས་ཅན་དག་
པ་སྙིང་རྗེས་ཟིན། །ཆོས་རྣམས་སྟོང་པ་ཉིད་ཀྱི་མཆོག །ཆོས་ཉིད་དེ་དག་རྟོགས་ཡིན་ཞིང་། །ཤིན་ཏུ་མྱ་ངན་ལས་འདས་པའི། །ཐབས་ལའང་དེ་དག་སྤྱོད་པར་བྱེད། །ཆོས་ཀུན་རང་བཞིན་མེད་པ་དང་། །སྟོང་ཞི་མཚན་ཉིད་མེད་རྟོགས་ཀྱང་། །ཐབས་ཀྱིས་མཚན་གྱིས་
བརྒྱན་པ་ཡི། །ལུས་ཀྱིས་སེམས་ཅན་དོན་ཀྱང་སྤྱོད། །ཤེས་རབ་ཉམས་ཤིང་བརྩེ་མེད་པ། །སྙིང་རྗེ་མེད་བློ་འཚོ་བ་མིན། །ཤེས་རབ་འཕགས་དང་སྙིང་རྗེ་ནི། །དག་པས་དེ་ཕྱིར་ཐབས་སུ་འདོད། །བྱང་ཆུབ་སེམས་དཔའ་ཆེ་རྣམས་ཀྱི། །མཐུ་ལྡན་ཐབས་ནི་

འདི་ཡིན་ཏེ། །འཕགས་པ་དེ་དག་དེར་གནས་ཤིང་། །རྣམ་པར་འཕྲུལ་པ་བརྒྱ་དག་སྟོན། །རིགས་ཀྱི་བུ་འདི་ལྟར་ཡང་དེ་བཞིན་གཤེགས་པ་རྣམས་ཀྱི་ཐབས་སུ་བལྟ་བར་བྱ་སྟེ། གང་འདི་ལྟར་ཡོན་ཏན་གྱི་སྙིང་པོ་རྣམ་པ་བཅུ་གཉིས་ཀྱིས་མངོན་པར་
འཕགས་པའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱང་བསྐལ་པའི་སྙིགས་མ་སྟོན་པ་དང་། དུས་ཀྱི་སྙིགས་མ་སྟོན་པ་དང་། སེམས་ཅན་གྱི་སྙིགས་མ་སྟོན་པ་དང་། ཉོན་མོངས་པའི་སྙིགས་མ་སྟོན་པ་
དང་། ཚེའི་སྙིགས་མ་སྟོན་པ་དང་། ཐེག་པ་ཐ་དད་པ་སྟོན་པ་དང་། ཀུན་ནས་ཉོན་མོངས་པ་ཅན་གྱི་སངས་རྒྱས་ཀྱི་ཞིང་སྟོན་པ་དང་། སེམས་ཅན་དམུ་རྒོད་སྟོན་པ་དང་། ཆོས་བསྟན་པ་ལ་བྱེ་བྲག་སྟོན་པ་དང་། གཞན་མུ་སྟེགས་ཅན་གྱི་འཁྲུག་པ་ཡོད་པར་སྟོན་པ་དང་། བདུད་
རྣམས་དང་། བདུད་ཀྱི་ལས་རྣམས་ཀྱང་སྟོན་ལ། ཉེས་པ་དེ་དག་ཀྱང་ཡོད་པ་མ་ཡིན་པ་ཐམས་ཅད་ནི་དེ་བཞིན་གཤེགས་པའི་ཐབས་སུ་བལྟ་བར་བྱའོ། །དེ་སྐད་ཅེས་བཀའ་སྩལ་པ་དང་། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
ཡོན་ཏན་གྱི་སྙིང་པོ་གང་དང་ལྡན་ན་གང་དུ་སངས་རྒྱས་བཅོམ་ལྡན་འདས་རྣམས་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་ལྟ་བུར་འགྱུར་བའི་ཡོན་ཏན་གྱི་སྙིང་པོ་བཅུ་གཉིས་པོ་དེ་དག་བཅོམ་ལྡན་འདས་ཀྱིས་བསྟན་དུ་གསོལ། །བཅོམ་ལྡན་འདས་ཀྱིས་
བཀའ་སྩལ་པ། འཇམ་དཔལ་འདི་ལ་གང་དུ་སངས་རྒྱས་བཅོམ་ལྡན་འདས་རྣམས་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་ནི་ཡོན་ཏན་གྱི་སྙིང་པོས་བསྒྲུབས་པའི་ཕྱིར་བསྐལ་པའི་སྙིང་པོ་དང་ལྡན་པ་ཡིན། །སངས་རྒྱས་ཀྱི་ཞིང་དེ་ནི་ཆོས་སྤྱད་པའི་དུས་
ལས་མི་འདའ་བའི་ཕྱིར་དུས་ཀྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་ཆོས་ཤེས་པར་འགྱུར་བ་དང་ལྡན་པའི་ཕྱིར་སེམས་ཅན་གྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་ལེགས་པར་ཡོངས་སུ་དག་པའི་ཕྱིར་ཉོན་མོངས་པ་ཅན་མ་ཡིན་པའི་ཞིང་གི་སྙིང་

པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་སེམས་ཅན་དམུ་རྒོད་མེད་པའི་ཕྱིར་སེམས་ཅན་ཅང་ཤེས་ཀྱི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་ཐེག་པ་གཅིག་གིས་ངེས་པར་འབྱུང་བའི་ཕྱིར་ཐེག་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་རྫས་ཀྱི་
ལྷག་མ་ཡོད་པའི་ཕྱིར་སའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་གཞན་མུ་སྟེགས་ཅན་ཐམས་ཅད་ཀྱི་བསྟན་པ་མི་སྤྱོད་པའི་ཕྱིར་བསྟན་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་གཡོ་མེད་པའི་ཕྱིར་ཡོན་ཏན་གྱི་སྙིང་པོ་དང་ལྡན་པ་ཡིན། སངས་རྒྱས་
ཀྱི་ཞིང་དེ་ནི་སེམས་ཅན་རང་བཞིན་གྱིས་དཀར་བའི་གནས་སུ་གྱུར་པའི་ཕྱིར་བསམ་པ་དང་ལྷག་པའི་བསམ་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་སྦྱིན་པའི་གནས་དང་མི་འབྲལ་བའི་ཕྱིར་འཕགས་པའི་སྙིང་པོ་དང་ལྡན་པ་ཡིན། སངས་རྒྱས་ཀྱི་ཞིང་དེ་ནི་སྔོན་གྱི་དེ་
བཞིན་གཤེགས་པ་རྣམས་བཞུད་ཅིང་རྗེས་སུ་བཞུད་པའི་ཕྱིར་བྱང་ཆུབ་ཀྱི་སྙིང་པོ་དང་ལྡན་པ་ཡིན་ཏེ། འཇམ་དཔལ་གང་དུ་སངས་རྒྱས་བཅོམ་ལྡན་འདས་བྱང་ཆུབ་མངོན་པར་རྫོགས་པར་འཚང་རྒྱ་བའི་སངས་རྒྱས་ཀྱི་ཞིང་དེ་ནི་ཡོན་ཏན་གྱི་སྙིང་པོ་དེ་དག་དང་ལྡན་པ་ཡིན་ནོ། །
ཐབས་ལ་མཁས་པའི་ལེའུ་སྟེ་གསུམ་པའོ།། །།འཇམ་དཔལ་དེ་ལྟར་རྣམ་གྲངས་དེས་ཀྱང་འདི་ལྟར་ང་ལ་ཉན་ཐོས་དང་རང་སངས་རྒྱས་ཀྱི་ཐེག་པ་རྣམ་པར་བཀོད་པ་མེད་པར་ཁྱོད་ཀྱིས་རིག་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་འདུ་ཤེས་ཐ་
དད་པ་མེད་པའི་ཕྱིར་རོ། །འཇམ་དཔལ་གལ་ཏེ་དེ་བཞིན་གཤེགས་པ་སེམས་ཅན་ཁ་ཅིག་ལ་ནི་ཐེག་པ་ཆེན་པོ་སྟོན། ཁ་ཅིག་ལ་ནི་རང་སངས་རྒྱས་ཀྱི་ཐེག་པ་སྟོན། ཁ་ཅིག་ལ་ནི་ཉན་ཐོས་ཀྱི་ཐེག་པ་སྟོན་ན། དེ་ནི་དེ་བཞིན་གཤེགས་པའི་སེམས་ཡོངས་སུ་མ་དག་པར་
འགྱུར་རོ། །སེམས་མ་སྙོམས་པ་ཉིད་དུ་ཡང་འགྱུར་རོ། །མངོན་པར་ཞེན་པའི་སྐྱོན་དུ་ཡང་འགྱུར་རོ། །སྙིང་རྗེ་ཆེན་པོ་ཕྱོགས་གཅིག་པར་ཡང་འགྱུར་རོ། །འདུ་ཤེས་ཐ་དད་པའི་སྐྱོན་དུ་ཡང་འགྱུར་རོ། །ངས་ཆོས་ལ་སློབ་དཔོན་གྱི་དཔེ་མཁྱུད་བྱས་པར་ཡང་འགྱུར་རོ། །

འཇམ་དཔལ་ངས་སེམས་ཅན་རྣམས་ལ་ཆོས་གང་དང་གང་བསྟན་པ་དེ་དག་ཐམས་ཅད་ནི་འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར་བྱང་ཆུབ་ལ་གཞོལ་བ་ཐེག་པ་ཆེན་པོ་ལ་འབབ་པ། ཐམས་ཅད་མཁྱེན་པ་ཉིད་བསྒྲུབ་པ། ཡུལ་གཅིག་ཏུ་ཡང་
དག་པར་ཕྱིན་པར་བྱེད་པ་སྟེ། དེ་བས་ན་ང་ལ་ཐེག་པ་ཐ་དད་པར་རྣམ་པར་དགོད་པ་མེད་དོ། །འཇམ་དཔལ་གྱིས་གསོལ་པ་བཅོམ་ལྡན་འདས་གལ་ཏེ་ཐེག་པ་རྣམ་པར་དགོད་པ་མ་མཆིས་ན་ཅིའི་སླད་དུ་དེ་བཞིན་གཤེགས་པས་འདི་ནི་ཉན་ཐོས་ཀྱི་ཐེག་པའོ། །འདི་ནི་རང་སངས་རྒྱས་
ཀྱི་ཐེག་པའོ། །འདི་ནི་ཐེག་པ་ཆེན་པོའོ་ཞེས་ཐེག་པ་གསུམ་ལས་བརྩམས་ཏེ། སེམས་ཅན་རྣམས་ལ་ཆོས་བསྟན་པ་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཐེག་པ་རྣམ་པར་དགོད་པ་ཞེས་བྱ་བ་དེ་ནི་དེ་བཞིན་གཤེགས་པས་ས་རྣམ་པར་དགོད་པ་
མཛད་པ་ཡིན་གྱི། ཐེག་པ་རྣམ་པར་བཀོད་པ་མ་ཡིན་ནོ། །དེ་ནི་དེ་བཞིན་གཤེགས་པས་ཆོས་ཀྱི་མཚན་ཉིད་རྣམ་པར་དགོད་པ་མཛད་པ་ཡིན། དེ་ནི་དེ་བཞིན་གཤེགས་པས་གང་ཟག་རྣམ་པར་དགོད་པ་མཛད་པ་ཡིན། དེ་ནི་དེ་བཞིན་གཤེགས་པས་ཚོགས་ཆུང་བ་དང་།
ཚོགས་ཚད་མེད་པ་རྣམ་པར་དགོད་པ་མཛད་པ་ཡིན་ཏེ། ཆོས་ཀྱི་དབྱིངས་ལ་ཐ་དད་པ་མེད་པའི་ཕྱིར་འདི་ལ་ཐེག་པ་ཐ་དད་པར་འགྱུར་བ་གང་ཡང་མེད་དོ། །འཇམ་དཔལ་དེ་ནི་དེ་བཞིན་གཤེགས་པས་འཇུག་པའི་སྒོ་བསྟན་པ་སྟེ། བཟོ་སློབ་པ་ནི་རིམ་གྱིས་སློབ་པ་ལ་འཇུག་པ་ལྟར་
བལྟ་བར་བྱའོ། །འཇམ་དཔལ་འདི་ལྟ་སྟེ་དཔེར་ན་འཕོང་གི་སློབ་དཔོན་འཕོང་དཔྱད་ཀྱི་ཕ་རོལ་ཏུ་ཕྱིན་པའི་མཆོག་ཐོབ་པ་ནི་སློབ་མ་རྣམས་ལ་ཐབས་སྣ་ཚོགས་དང་། རྩོལ་བ་སྣ་ཚོགས་ཀྱིས་འཕོང་དཔྱད་སྟོན་ཏེ། འཕོང་ཤེས་པར་བྱ་བ་ནི་གཅིག་ཏུ་ཟད་དོ། །འཇམ་དཔལ་དེ་
བཞིན་དུ་དེ་བཞིན་གཤེགས་པ་ཆོས་ཀྱི་འཕོང་གི་སློབ་དཔོན་མཁས་པ་ཡང་ཐམས་ཅད་མཁྱེན་པའི་ཡེ་ཤེས་གཅིག་པོ་དེ་ཉིད་རྣམ་པ་གསུམ་དུ་སྟོན་པ་མཛད་དོ། །འཇམ་དཔལ་འདི་ལྟ་སྟེ། དཔེར་ན་མེ་ལྕེ་ཆུང་ངུ་དེ་ཉིད་མཆེད་ན་སྲེག་པའི་བསྐལ་པའི་བར་དུ་འཚིག་པའི་མཐུ་

ཡོད་པར་འགྱུར་རོ། །འཇམ་དཔལ་དེ་བཞིན་དུ་ཡེ་ཤེས་སྣང་བ་གཅིག་པོ་དེ་ཡང་རིམ་གྱིས་རྣམ་པར་འཕེལ་ན། ཉོན་མོངས་པ་ཐམས་ཅད་སྲེག་པའི་ཕྱིར་དེ་བཞིན་གཤེགས་པའི་ཡེ་ཤེས་ཀྱི་སྣང་བ་ཆེན་པོའི་བར་དུ་སྦྱིན་པར་བྱེད་དོ། །འཇམ་དཔལ་འདི་ལྟ་སྟེ། དཔེར་ན་རིའི་རྒྱལ་
པོ་རི་རབ་ནི་རྣམ་པར་རྟོག་པ་མེད་དེ། དེའི་དྲུང་དུ་སེམས་ཅན་གང་དག་ཁ་ཅིག་ཕྱིན་པ་དེ་དག་ཐམས་ཅད་འདི་ལྟ་སྟེ། གསེར་གྱི་མདོག་ཏུ་ཁ་དོག་གཅིག་པར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་རི་རབ་ཆེན་པོ་བླ་ན་མེད་པ་ཡང་རྣམ་པར་
མི་རྟོག་སྟེ། དེར་སེམས་ཅན་གང་དག་ཁ་ཅིག་དེ་བཞིན་གཤེགས་པའི་ཆོས་ཉིད་ལ་རྣམ་པར་ལྟ་བ་དེ་དག་ཐམས་ཅད་འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་མདོག་ཏུ་ཁ་དོག་གཅིག་པར་འགྱུར་རོ། འཇམ་དཔལ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཆེན་པོ་ཨན་
ད་རྙིལ་ནི་ཕྱོགས་གང་ན་འདུག་པ་དེར་རིན་པོ་ཆེ་ཆེན་པོ་དེའི་ཡུལ་དུ་ཇི་ཙམ་དུ་གྱུར་པ་ཚུན་ཆད་ན་ཁ་དོག་ཐ་དད་པ་གཟུགས་ཁ་དོག་སྣ་ཚོགས་སྣང་བ་གང་དག་ཇི་སྙེད་ཅིག་ཡོད་པ་དེ་དག་ནོར་བུ་རིན་པོ་ཆེ་དེའི་གཟི་བརྗིད་ཀྱིས་འདི་ལྟ་སྟེ། སྔོ་བའི་མདོག་ཏུ་ཁ་དོག་གཅིག་
པར་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་བླ་ན་མེད་པའི་ནོར་བུ་རིན་པོ་ཆེ་ཨན་ད་རྙིལ་ཆེན་པོའི་ཆོས་སྣང་བ་དང་འོད་ཀྱིས་སེམས་ཅན་གང་ལ་བབ་པ་དེ་ཐམས་ཅད་འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་མདོག་ཏུ་ཁ་དོག་གཅིག་པར་འགྱུར་རོ། །
འཇམ་དཔལ་འདི་ལྟ་སྟེ། དཔེར་ན་རྒྱ་མཚོ་ཆེན་པོར་ནི་སྒོ་ཐ་དད་པ་ནས་ཆུ་མང་པོ་འབབ་སྟེ། དེར་བབས་ནས་ཐམས་ཅད་ཀྱང་འདི་ལྟ་སྟེ། ལན་ཚྭའི་རོར་རོ་གཅིག་པར་རྟག་ཏུ་གནས་པར་འགྱུར་རོ། །འཇམ་དཔལ་དེ་ལ་རྒྱ་མཚོ་ཆེན་པོ་ཞེས་བྱ་བ་དེ་ནི་དེ་བཞིན་
གཤེགས་པའི་ཚིག་བླ་དགས་སོ། །སྒོ་ཐ་དད་པ་ནས་ཆུ་མང་པོ་འབབ་ཅེས་བྱ་བ་དེ་ནི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་ཚིག་བླ་དགས་སོ། །དེར་བབས་ནས་དེ་ཐམས་ཅད་རོ་གཅིག་ཏུ་འགྱུར་ཞེས་བྱ་བ་དེ་ནི་རྣམ་པར་མི་རྟོག་

པའི་ཕྱིར་ཐེག་པ་གཅིག་གི་ཚིག་བླ་དགས་ཏེ། འཇམ་དཔལ་རྣམ་གྲངས་དེས་ཀྱང་འདི་ལྟར་དེ་བཞིན་གཤེགས་པས་དེ་ནི་ཡོངས་སུ་སྦྱང་བ་བྱ་བའི་སར་རྣམ་པར་བཀོད་པ་དེ་ནི་དེ་བཞིན་གཤེགས་པས་འཇུག་པའི་ཚུལ་དུ་གསུངས་པ། དེ་ནི་དེ་བཞིན་གཤེགས་པས་
ཆོས་རྣམ་པར་དགོད་པ་མཛད་པ། དེ་ནི་དེ་བཞིན་གཤེགས་པས་བསྟན་པ་ལ་རིམ་གྱིས་འཇུག་པར་བསྟན་པ་སྟེ། ཚོགས་ཆུང་ངུ་དང་ཚོགས་ཆེན་པོའི་གང་ཟག་རྣམས་རྣམ་པར་དགོད་པ་ཐབས་མཁས་པའི་རྣམ་པར་འཕྲུལ་པ་སྟེ། དེ་བཞིན་གཤེགས་པའི་སོ་སོ་ཡང་དག་
པར་རིག་པ་སྣ་ཚོགས་དང་ཀུན་རྫོབ་ལ་འཇུག་པ་བསྟན་པ་ཡིན་པར་དེ་ལྟར་རིག་པར་བྱ་སྟེ། དོན་དམ་པར་ནི་ཐེག་པ་གཅིག་སྟེ་གཉིས་སུ་མེད་དོ། །འཇམ་དཔལ་སངས་རྒྱས་ཀྱི་ཞིང་འདི་ན་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་བ་དག་སྣང་བ་འདི་ཡང་དེ་བཞིན་གཤེགས་
པའི་ཐབས་ཡིན་པར་བལྟ་བར་བྱ་སྟེ། དེ་བཞིན་གཤེགས་པའི་བྱིན་གྱི་རླབས་ཀྱི་མངའ་དབང་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པས་ནི་གཉེན་པོ་ཐམས་ཅད་ཤིན་ཏུ་བསལ་བའི་ཕྱིར་ཕྱིར་རྒོལ་བ་ཐམས་ཅད་ཀྱི་ཐམས་ཅད་མེད་དེ།
འཇམ་དཔལ་འཁོར་ལོས་སྒྱུར་བའི་རྒྱལ་པོ་དགེ་བའི་རྩ་བ་འཇིག་པའི་ཚུལ་ཅན་དང་ལྡན་པ། འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ། ཉེ་བར་ལེན་པ་དང་བཅས་པ། བག་ལ་ཉལ་དང་བཅས་པ། ཉོན་མོངས་པ་དང་བཅས་པ་ལ་ཡང་ཕྱིར་རྒོལ་བ་ཐམས་
ཅད་ཀྱིས་ཐམས་ཅད་མེད་ཅིང་བསྡོ་བའི་དམག་ཚོགས་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་འཁོར་ལོས་སྒྱུར་བའི་རྒྱལ་པོ་ལ་འཚེ་བ་མེད་པའི་ཕྱིར་ཏེ། འཇམ་དཔལ་འཁོར་ལོས་སྒྱུར་བའི་རྒྱལ་པོ་ཡང་དེ་ལྟ་ན་དེ་བཞིན་གཤེགས་པ་ཆོས་ཀྱི་འཁོར་ལོས་སྒྱུར་བའི་རྒྱལ་པོ་ཆེན་
པོ་བསོད་ནམས་དང་ཡེ་ཤེས་ཀྱི་ཚོགས་ཚད་མེད་པ་བསགས་པ། སྙིང་རྗེ་ཆེན་པོ་རྒྱུན་མི་འཆད་པ་བརྙེས་པ། ཟག་པ་མེད་པའི་ཆོས་ཀྱི་ནམ་མཁའ་ལ་རྒྱུ་བ། བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ། བསྙེལ་བ་མི་མངའ་བའི་ཆོས་ཅན། ཆོས་ཀྱི་འཁོར་

ལོས་སྒྱུར་བའི་རྒྱལ་པོ་ཆེན་པོའི་ཆོས་ཀྱི་རྒྱལ་སྲིད་ལ་འཚེ་བ་ཡོད་པའམ། བསྡོ་བའི་དམག་ཚོགས་ཀྱི་འཇིགས་པར་འགྱུར་བ་ལྟ་ག་ལ་ཡོད་དེ་དེ་ནི་གནས་མེད་དོ། །འཇམ་དཔལ་ཡང་སངས་རྒྱས་ཀྱི་ཞིང་འདི་ན་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་བ་གང་དག་
སྣང་བ་འདི་ཡང་དེ་བཞིན་གཤེགས་པའི་བྱིན་གྱི་རླབས་ཡིན་པར་བལྟ་བར་བྱ་སྟེ། རིགས་ཀྱི་བུ་དེ་དག་ཀུན་ཀྱང་མུ་སྟེགས་གཅིག་ལ་གནས་པ་ཡིན་པར་རིག་པར་བྱའོ། །འཇམ་དཔལ་འདི་ལྟ་སྟེ། དཔེར་ན་རི་དགས་ཀྱི་རྒྱལ་པོ་སེང་གེའི་མདུན་དུ་ནི་རི་དགས་
ཕྲ་མོ་ཐམས་ཅད་གནས་པར་མི་ནུས་སོ། །འཇམ་དཔལ་དེ་བཞིན་དུ་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་ཐམས་ཅད་ཀྱིས་དེ་བཞིན་གཤེགས་པའི་ཡུལ་མནན་པར་བྱ་བའམ། དེ་བཞིན་གཤེགས་པ་སྐྱེས་བུ་སེང་གེ་ཆེན་པོ་སྟོབས་བཅུ་མངའ་བ་མི་འཇིགས་པ་
བཞི་བརྙེས་པའི་མདུན་དུ་གནས་པར་བྱ་བའམ། བརྩད་པར་བྱ་བར་དེ་བཞིན་གཤེགས་པའི་བྱིན་གྱི་རླབས་མ་གཏོགས་པར་མི་ནུས་ཏེ་དེ་ནི་གནས་མེད་དོ། །འཇམ་དཔལ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ཤར་ཅིང་འོད་ཟེར་མང་པོ་བཀྱེ་བའི་ཚེ་སྲིན་བུ་མེ་ཁྱེར་
ཐམས་ཅད་ཀྱང་འོད་མེད་པར་འགྱུར་ཞིང་། མེ་དང་ནོར་བུ་དང་སྐར་མ་ཐམས་ཅད་ཀྱི་འོད་ཟེར་རྣམས་ཀྱང་མི་སྣང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་ཉི་མའི་དཀྱིལ་འཁོར་ཆེན་པོ་ཤར་ཅིང་ཡེ་ཤེས་ཀྱི་འོད་ཟེར་མང་པོ་བཀྱེ་བའི་ཚེ་གཞན་མུ་སྟེགས་ཅན་
སྤྱོད་པ་པ་དང་། ཀུན་ཏུ་རྒྱུ་ཐམས་ཅད་ཟིལ་གྱིས་ནོན་ཅིང་མི་སྣང་ངོ་། །འཇམ་དཔལ་འདི་ལྟ་སྟེ། དཔེར་ན་ལྕགས་ཀྱི་རྒྱལ་པོ་ཁབ་ལོང་སའི་ཕྱོགས་གང་དུ་བྱུང་བ་དེར་ཁབ་ལོང་གི་མི་འདྲེ་བའི་མཚན་ཉིད་ཀྱི་ཕྱིར་ལྕགས་ཐམས་ཅད་མི་གནས་སོ། །འཇམ་དཔལ་དེ་བཞིན་
དུ་སངས་རྒྱས་ཀྱི་ཞིང་གང་དུ་སངས་རྒྱས་བྱུང་བར་གྱུར་པ་དེ་ནི་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་ཐམས་ཅད་རྒྱུ་བ་མེད་པར་རིག་པར་བྱའོ། །དེ་ཅིའི་ཕྱིར་ཞེ་ན། དེ་ནི་སངས་རྒྱས་བྱུང་བའི་མི་འདྲེ་བའི་ཆོས་ཀྱི་མཚན་ཉིད་ཀྱི་ཕྱིར་རོ། །འཇམ་དཔལ་འདི་ལྟ་སྟེ།

དཔེར་ན་རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་གང་དུ་བྱུང་བ་དེར་ནི་མཆིང་བུ་རྣམས་མི་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་ཡེ་ཤེས་རིན་པོ་ཆེ་ཆེན་པོ་གང་དུ་བྱུང་བ་དེར་ནི་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་ཐམས་ཅད་
མི་འབྱུང་བར་རིག་པར་བྱའོ། །འཇམ་དཔལ་འདི་ལྟ་སྟེ། དཔེར་ན་རིན་པོ་ཆེའི་འབྱུང་ཁུང་གང་ནས་འཛམ་བུའི་ཆུ་བོའི་གསེར་བྱུང་བ་དེ་ནས་ལྕགས་འགྱེས་ཀྱི་ཕུང་པོ་མི་འབྱུང་ངོ་། །འཇམ་དཔལ་དེ་བཞིན་དུ་འཇིག་རྟེན་གྱི་ཁམས་གང་དུ་དེ་བཞིན་གཤེགས་པ་བྱུང་བ་དེར་
གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་ཐམས་ཅད་མི་འབྱུང་ངོ་། །འཇམ་དཔལ་རྣམ་གྲངས་དེས་ཀྱང་འདི་ལྟར་དེ་བཞིན་གཤེགས་པ་གང་དུ་བྱུང་བ་དེར་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་ཐམས་ཅད་མི་འབྱུང་བར་རིག་པར་བྱའོ། །འཇམ་དཔལ་ཡང་སངས་
རྒྱས་ཀྱི་ཞིང་འདི་ན་གཞན་མུ་སྟེགས་ཅན་སྤྱོད་པ་པ་དང་། ཀུན་ཏུ་རྒྱུ་གང་དག་སྣང་བ་འདི་ཡང་དེ་བཞིན་གཤེགས་པའི་བྱིན་གྱི་རླབས་དང་ཐབས་ལ་མཁས་པའི་ཡུལ་བསམ་གྱིས་མི་ཁྱབ་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་མུ་སྟེགས་ཅན་གཞན་གྱི་
སྒོ་འདི་དག་ཐམས་ཅད་ནི་རྣམ་པར་ཐར་པ་བསམ་གྱིས་མི་ཁྱབ་པའི་སྒོ་ལ་གནས་པ་དག་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་ངེས་པར་བྱུང་བ་དག་གོ། །ཐབས་ལ་མཁས་པས་རྣམ་པར་རྩེ་བ་དག་གོ། །སངས་རྒྱས་དང་ཆོས་དང་དགེ་འདུན་ཡིད་ལ་བྱ་བ་མ་བཏང་བ་དག་གོ། །
སེམས་ཅན་ཡོངས་སུ་སྨིན་པར་བྱ་བ་རྣམས་ལ་དམ་པའི་ཕ་རོལ་ཏུ་སོན་པ་དག་གོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་པ་དག་གོ། །བསྟན་པ་འདི་བཤད་པ་ན་ལྷའི་བུ་ཉན་ཐོས་ཀྱི་ཐེག་པ་ལ་གནས་པ་བརྒྱད་
སྟོང་གིས་ཐེག་པ་གཅིག་ཅེས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དགེ་སློང་ལྔ་བརྒྱས་ཐེག་པ་གཅིག་ཏུ་ཡང་དག་པར་འདུ་བའི་སྒྲོན་མའི་ཏིང་ངེ་འཛིན་ཐོབ་པར་གྱུར་ཏོ། །བྱང་ཆུབ་སེམས་དཔའ་སྟོང་ཉིས་བརྒྱས་མི་སྐྱེ་བའི་

ཆོས་ལ་བཟོད་པ་ཐོབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏོ། །སྟེང་གི་བར་སྣང་ལས་ཀྱང་ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོའི་ཆར་མངོན་པར་བབ་བོ། །
ལྷའི་ཙན་དན་གྱི་ཕྱེ་མའི་ཆར་དག་ཀྱང་དེ་བཞིན་གཤེགས་པའི་ཞབས་ཀྱི་དྲུང་དུ་བབ་པར་གྱུར་ཏོ། །ལྷའི་བུ་འབུམ་དག་ཀྱང་སྟེང་གི་བར་སྣང་ལ་འདུག་ནས་ཅ་ཅོ་དང་ག་ཞའི་སྒྲ་བརྒྱ་སྟོང་དུ་མ་བྱུང་བར་གྱུར་ཏེ། ལྷའི་གོས་དག་ཀྱང་གཡབ་མོའི་ཐབས་སུ་གཡོབ་བོ། །ལྷའི་རྔ་དག་
ཀྱང་བརྡུངས་པར་གྱུར་ཏོ། །ཆེད་དུ་བརྗོད་པ་འདི་སྐད་ཀྱང་ཆེད་དུ་བརྗོད་དེ། ཀྱེ་མ་སྔོན་མ་ཐོས་པའི་ཆོས་ཀྱི་རྣམ་གྲངས་འཇིག་རྟེན་དུ་བྱུང་ངོ་། །བཅོམ་ལྡན་འདས་ཆོས་ཀྱི་རྣམ་གྲངས་འདི་ཡུན་རིང་པོར་འཛམ་བུའི་གླིང་ན་གནས་པར་གྱུར་ཅིག་ཅེས་བརྗོད་དོ། །དགེ་སློང་མ་བརྒྱད་
བརྒྱས་ཀྱང་རང་རང་གི་བླ་གོས་དེ་བཞིན་གཤེགས་པའི་སྐུ་ལ་གསོལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་དོན་འདི་ཉིད་རྒྱ་ཆེར་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡི་ཐབས་ཡུལ་བསམ་གྱིས་མི་ཁྱབ་འདི། །འཇམ་དཔལ་ཁྱོད་
ཀྱིས་དེ་ལྟར་ཤེས་པར་གྱིས། །བཅུད་ཀྱི་དུས་ལ་བྱང་ཆུབ་སངས་རྒྱས་ཀྱང་། །འདི་འདྲའི་དུས་ནི་ང་ནི་སྟོན་པ་མཛད། །ང་ལ་དུས་ཀྱི་ཉེས་པ་མི་མངའ་སྟེ། །ཆོས་ཀྱི་དུས་ནི་རྟག་ཏུ་ཉེ་བར་གནས། །ང་ལས་སེམས་ཅན་ཆོས་ཐོས་འཇུག་པར་བྱེད། །སེམས་ཅན་སྐྱོན་ནི་ནམ་
ཡང་ཡོད་མ་ཡིན། །ཡོན་ཏན་རྫས་ཀྱི་ཁྱད་ཀྱིས་བསྐལ་པའི་བཅུད། །དྲི་མེད་ཡོངས་སུ་དག་པ་ཞིང་གི་བཅུད། །དུས་ཀྱི་བཅུད་ལ་བྱང་ཆུབ་ངས་བརྙེས་ཏེ། །དེ་བས་ང་ལ་རྙོག་པ་ཡོང་མེད་དོ། །ངས་ནི་བསྐལ་པ་བྱེ་བ་ཇི་སྙེད་ཀྱིས། །སངས་རྒྱས་ཡེ་ཤེས་མཚུངས་མེད་བསྒྲུབ་
བྱས་པ། །བྱང་ཆུབ་བརྙེས་ནས་དེ་སྲིད་ང་ཡི་ཚེ། །བར་མ་དོར་ནི་མྱ་ངན་འདའ་བ་མེད། །འོན་ཀྱང་མྱ་ངན་འདའ་བ་ངས་བསྟན་ཏེ། །རྟག་པའི་འདུ་ཤེས་ཅན་རྣམས་མི་རྟག་བསྟན། །ལྷག་མ་ལུས་པ་ལྟར་ཡང་ངས་བསྟན་ཏེ། །ང་ཡི་ཚེ་ནི་ཕྱི་མའི་མཐར་བརྟགས་སོ། །

ང་ཡི་མྱ་ངན་འདའ་གཅིག་ཐེག་པ་གཅིག །ང་ཡི་ཐེག་པ་ཐ་དད་མེད་པ་སྟེ། །ཡང་དག་ཏུ་ན་ཐེག་པ་གཅིག་ཏུ་བསྟན། །དེ་ནི་ཐབས་ཀྱི་ཡུལ་དུ་ཤེས་པར་གྱིས། །རྒྱུད་ཞན་བསམ་པ་ཆུང་བའི་སྐྱེ་བོ་དག །འཕྲལ་དུ་ཐོས་པས་འཇིགས་པར་འགྱུར་སྲིད་ཅེས། །དེ་དག་
རྣམས་ལ་ཐེག་པ་གསུམ་བསྟན་གྱི། །ཐེག་པ་གཅིག་སྟེ་ཐེག་པ་གཉིས་སུ་མེད། །ངས་བསྟན་འདིས་ནི་ཆོས་ལ་མོས་པ་དང་། །བསྟན་པའི་ལམ་ལ་དེ་བཞིན་འཇུག་འགྱུར་ཞེས། །ཐེག་པ་གཅིག་པོ་རྣམ་པ་གསུམ་དུ་བསྟན། །ཐེག་པ་ཐ་དད་ནམ་ཡང་ཡོད་པ་མིན། །དཔེར་
ན་འཕོང་ཤེས་ཕ་རོལ་ཕྱིན་གྱུར་པ། །ཤེས་པ་དེ་ཉིད་རྣམ་པ་གསུམ་དུ་སྟོན། །དེ་བཞིན་སྟོན་པ་ཆོས་ལ་མཁས་པའི་མཆོག །ཐེག་པ་གཅིག་པོ་རྣམ་པ་གསུམ་དུ་སྟོན། །འདྲེན་པ་སེམས་ཅན་ཀུན་ལ་མཉམ་པའི་སེམས། །ང་ལ་ཐ་དད་འདུ་ཤེས་ནམ་ཡང་མེད། །ཐེག་པ་དམན་
པ་གཞན་ལ་ངས་བསྟན་ན། །དེ་ནི་ང་ལ་སེར་སྣའི་སྐྱོན་དུ་འགྱུར། །དཔེར་ན་རིན་ཆེན་དམ་པ་ཨན་ད་རྙིལ། །གང་དང་གང་གི་གནས་སུ་གཞག་གྱུར་པ། །ཕྱོགས་དེ་ཐམས་ཅད་མདོག་གཅིག་སྒྱུར་བྱེད་དེ། །ཁ་དོག་སྔོན་པོར་གྱུར་ཡང་རྟོག་པ་མེད། །འཇིག་རྟེན་འདྲེན་པ་ཡེ་ཤེས་རིན་
ཆེན་ཡང་། །དེ་བཞིན་འོད་འགྱེད་ཞིང་ཀུན་རྒྱས་མཛད་ཅིང་། །སྲོག་ཆགས་ཐམས་ཅད་ཁ་དོག་གཅིག་བསྒྱུར་ཏེ། །བྱང་ཆུབ་མཆོག་བསྒྱུར་རྣམ་རྟོག་སེམས་མི་མངའ། །དཔེར་ན་མེ་སྟག་ཆུང་ངུ་འཕེལ་གྱུར་ན། །མེ་ལྕེ་ཆེན་པོ་འབར་ཞིང་མཆེད་པ་ལྟར། །ཉན་ཐོས་ཡེ་ཤེས་མེ་ཡི་མེ་
སྟག་ཀྱང་། །དེ་ཉིད་སངས་རྒྱས་ཡོན་ཏན་མེ་ལྕེ་སྐྱེད། །དཔེར་ན་གང་དག་རི་རྒྱལ་ལྷུན་པོའི་དྲུང་། །ཕྱིན་པ་དེ་དག་དེ་མཐུས་མདོག་གཅིག་འགྱུར། །དེ་བཞིན་སྟོབས་བཅུ་དག་ན་གང་འོངས་པ། །མཁས་པ་དེ་དག་བྱང་ཆུབ་མཆོག་ཏུ་འགྱུར། །དཔེར་ན་སྦྲང་མ་དག་གི་མཆུ་ཡིས་
ནི། །བཟང་དང་མི་བཟང་སྣ་ཚོགས་གང་བླངས་པ། །དེ་དག་ཐམས་ཅད་གཅིག་ཏུ་བསོགས་བྱས་ཤིང་། །སྦྲང་རྩི་ཉིད་དུ་སྒྱུར་བར་བྱེད་པ་ལྟར། །དེ་བཞིན་མཁས་པ་འཇིག་རྟེན་གྲགས་པ་ཡང་། །ཐེག་པ་གསུམ་པོ་ཉེ་བར་བསྟན་མཛད་ཅིང་། །དཀར་པོ་ཐམས་ཅད་ཡོངས་སུ་

བསྡུད་མཛད་དེ། །མཚན་ཉིད་མེད་པའི་བྱང་ཆུབ་མཚན་དུ་སྒྱུར། །རྒྱལ་པོ་འཁོར་ལོས་སྒྱུར་ལ་འཚེ་མེད་དེ། །དེ་ལ་བསྡོ་བའི་དམག་ཚོགས་ཡོད་མ་ཡིན། །ཆོས་ཀྱི་རྒྱལ་སྲིད་ཆེན་པོ་ངས་བཟུང་ན། །དེ་ལ་མུ་སྟེགས་ཅན་གྱི་ཡུལ་མེད་དོ། །དཔེར་ན་ཉི་མའི་དཀྱིལ་འཁོར་ཤར་
གྱུར་ན། །སྲིན་བུ་མེ་ཁྱེར་ཀུན་འོད་ཟིལ་གྱིས་གནོན། །དེ་བཞིན་ཡེ་ཤེས་དཀྱིལ་འཁོར་ཤར་གྱུར་ན། །མུ་སྟེགས་ཅན་རྣམས་ཐམས་ཅད་འོད་མེད་འགྱུར། །ཡུལ་ནི་གང་ན་ཁབ་ལོང་གནས་གྱུར་པ། །དེ་ན་ལྕགས་ཀྱི་རྣམ་པ་གཞན་མེད་དེ། །ཞིང་མཆོག་གང་ན་དེ་བཞིན་
གཤེགས་བཞུགས་པ། །དེར་ནི་མུ་སྟེགས་ཅན་རྣམས་འབྱུང་བ་མེད། །གསེར་གྱི་རྒྱལ་པོ་ཡུལ་གང་བྱུང་གྱུར་པ། །དེ་ནས་འགྱེས་པའི་ཕུང་པོའི་ལྕགས་མི་འབྱུང་། །གང་དུ་འདྲེན་པས་བྱང་ཆུབ་བརྙེས་གྱུར་པ། །ཞིང་དེར་མུ་སྟེགས་ཅན་གྱི་ཚོགས་མི་འབྱུང་། །ཡིད་བཞིན་ནོར་བུ་མཆིང་
བུ་ཕྲད་འགྱུར་བ། །བདེན་པའི་ཚུལ་དུ་ནམ་ཡང་འབྱུང་བ་མེད། །དེ་བཞིན་སངས་རྒྱས་རིན་ཆེན་མུ་སྟེགས་ཅན། །ཞིང་གཅིག་ཏུ་ནི་ནམ་ཡང་འབྱུང་མི་འགྱུར། །མུ་སྟེགས་ཅན་སྒོ་འདི་ཀུན་བསམ་གཏན་དང་། །མངོན་ཤེས་དབང་སྒྱུར་མཁས་ཡིན་ཤེས་པར་གྱིས། །ཤེས་རབ་
ཐབས་ཀྱི་སྤྱོ