Kinh tạng Tây Tạng (Kangyur Đại Học) — 057_མདོ་སྡེ།_པ

ད་པས་བློ་ལྡན་རྣམས། །རྣམ་པར་འཕྲུལ་པ་སྣ་ཚོགས་སྟོན་པར་བྱེད། །ཐབས་ཀྱི་ཡུལ་དེ་ཐོས་པར་གྱུར་པའི་ཚེ། །རྒྱལ་བའི་སྲས་རྣམས་ཐམས་ཅད་དཀར་གྱུར་ཏེ། །དགའ་སྐྱེས་ཉམས་བདེ་མཚུངས་པ་མེད་ཐོབ་ནས། །རྣམ་པར་འདྲེན་ལ་མེ་ཏོག་མང་པོས་གཏོར། །
ས་ཆེན་འདི་ཡང་རྣམ་པ་དྲུག་ཏུ་གཡོས། །ལྷ་ཡི་རྔ་ཡང་བར་སྣང་མཁའ་ལས་རྡུང་། །ལྷ་མང་བྱེ་བ་མཁའ་ལས་ཐལ་སྦྱོར་ཅིང་། །འདྲེན་པ་དེ་ལ་ལེགས་སོ་ལེགས་ཞེས་གསོལ། །ཐེག་པ་གཅིག་ཏུ་བསྟན་པའི་ལེའུ་སྟེ་བཞི་པའོ།། །།དེའི་ཚེ་ལྷོ་ཕྱོགས་ཀྱི་
རྒྱུད་ཆེན་པོ་ནས་གཅེར་བུ་པའི་བུ་བདེན་སྨྲ་ཞེས་བྱ་བ་གཅེར་བུ་པ་འབུམ་ཕྲག་བརྒྱད་ཅུ་དང་ལྷན་ཅིག་ཏུ་ཡུལ་རྒྱུ་བ་སྤྱོད་ཅིང་རིམ་གྱིས་གྲོང་ཁྱེར་ཆེན་པོ་འཕགས་རྒྱལ་དུ་ཕྱིན་ཏོ། །དེ་དེ་ལྟར་སྐྱེ་བོའི་ཚོགས་མང་པོ་དང་འགྲོགས་ཤིང་ཅ་ཅོ་དང་ག་ཞ་འབུམ་དག་བྱེད་པ་ཕྱི་བཞིན་འབྲང་

ཞིང་གཅེར་བུ་པའི་བུ་བདེན་སྨྲ་ལྷོ་ཕྱོགས་ཀྱི་རྒྱུད་ནས་གཅེར་བུ་པ་འབུམ་ཕྲག་བརྒྱད་ཅུ་དང་ལྷན་ཅིག་ཏུ་གྲོང་ཁྱེར་འཕགས་རྒྱལ་དུ་ཕྱིན་ནས་སྐྱེ་བོའི་ཚོགས་ཆེན་པོ་དུ་མས་ཡོངས་སུ་བསྐོར་ཅིང་མདུན་དུ་བདར་བ་ཞིག་ཡོད་དོ་ཞེས་རྒྱལ་པོ་གཏུམ་པོ་རབ་སྣང་
གིས་ཐོས་ཏེ། ཐོས་ནས་ཀྱང་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་བདེན་སྨྲ་ལ་སེམས་དང་བར་གྱུར་ཏོ། །དེ་སེམས་དང་བར་གྱུར་ནས་བློན་པོ་ཆེན་པོ་དང་། ཞབས་འབྲིང་བ་དང་། ཆབ་སྒོ་བ་དང་། འཁོར་བ་དང་། གྲོང་ཁྱེར་བ་དང་། ཡུལ་གྱི་མི་དང་། ཡུལ་འཁོར་
བ་དང་། །མདུན་ན་འདོན་དང་། རྒྱལ་བུ་རྣམས་དང་ལྷན་ཅིག་ཏུ་ཡན་ལག་བཞི་པའི་དཔུང་གི་ཚོགས་དང་བཅས་ཏེ། གླང་པོ་ཆེ་པ་དང་། རྟ་པ་དང་། ཤིང་རྟ་དང་། དཔུང་བུ་ཆུང་དག་རྗེས་སུ་འབྲང་ཞིང་རྒྱལ་པོའི་མཐུ་ཆེན་པོ་དང་། རྒྱལ་པོའི་ཕུན་སུམ་ཚོགས་པ་ཆེན་པོ་དང་
ཆས་ཏེ། བུམ་པ་གང་བ་འབུམ་དག་གིས་ནི་མདུན་དུ་དྲངས། རོལ་མོ་སིལ་སྙན་འབུམ་དག་ནི་བརྡུངས་ཤིང་དཀྲོལ། དུང་འབུམ་དག་ནི་བུས། གདུགས་དང་། རྒྱལ་མཚན་དང་། བ་དན་དང་། འཕན་རིངས་འབུམ་དག་ནི་བསྒྲེང་། མེ་ཏོག་ཨུད་པ་ལ་དང་། པད་མ་དང་། ཀུ་མུ་
ད་དང་། པད་མ་དཀར་པོ་དང་། མྱ་ངན་འཚང་དང་། བ་ཀུ་ལ་དང་། ཏི་ལ་ཀ་དང་། ཨ་ཏི་མུག་ཏ་ཀ་དག་གིས་ནི་ལམ་ཆལ་པར་བཀང་སྟེ། གཅེར་བུ་པའི་བུ་བདེན་སྨྲ་བསུ་བའི་ཕྱིར་དོང་ངོ་། །དེ་ནས་གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་མངོན་དུ་འོང་བ་མཐོང་ནས། །
ལམ་ནས་བཟུར་ཏེ་ཤིང་དྲུང་ཞིག་ཏུ་སྟན་བཏིང་ནས་འདུག་གོ། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ཤིང་དྲུང་དུ་འདུག་པར་ཤེས་ནས་གླང་པོ་ཆེ་ལས་བབས་ཏེ་རྐང་པས་སོང་ནས་ལེགས་པར་བརྗོད་དེ། བདག་གི་ཁྲི་རིན་པོ་ཆེའི་རྩ་བ་ཅན་ལ་འདུག་གོ། །དེ་ནས་
གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་ཡང་དག་པར་དགའ་བའི་གཏམ་བྱས་པ། རྒྱལ་པོ་ཆེན་པོ་བྱོན་པ་ལེགས་སོ། །འདི་ལྟར་ཁྱོད་ཕུན་སུམ་ཚོགས་པ་རྒྱ་ཆེན་པོས་ངང་དེས་པ་མ་ཉམས་པར་དགེ་སྦྱོང་དང་བྲམ་ཟེའི་གན་དུ་བྱོན་པ་ལེགས་སོ། །རྒྱལ་པོ་

ཆེན་པོ་ཁྱོད་ཀྱི་རྒྱལ་སྲིད་ལ་འཚེ་བ་མ་མཆིས་སམ། གནོད་པར་བགྱིད་པ་མ་མཆིས་སམ། མ་ཉམས་མ་དམས་སམ། ཁྱོད་ཀྱི་ཁམས་ན་མ་རུང་བ་དང་། བཀྲབས་པ་དང་། རོལ་མོ་མཁན་དང་། རྐུན་པོ་དང་། ཡང་རྒོད་དང་། ལ་གཅན་པ་དང་། ར་མ་པ་དང་། བྱི་བ་པ་དག་གིས་
རྒྱལ་སྲིད་ལ་གནོད་པར་མ་གྱུར་ཏམ། རྒྱལ་པོ་ཆེན་པོ་ཁྱོད་ཀྱི་ཁམས་ན་དགེ་སློང་དང་བྲམ་ཟེ་དག་གནས་དང་། ཁ་ཟས་དང་། གོས་དང་། ཆོས་སྒྲུབ་པའི་ཡོ་བྱད་ཀྱིས་ཉོན་མི་མོངས་ཤིང་བདེ་བར་གནས་སམ། རྒྱལ་པོ་ཆེན་པོ་ཁྱོད་ཀྱི་ཁམས་ན་རྔོན་པ་དང་། ཉ་པ་དང་། ཁྱི་ར་བ་
དང་། ཕག་འཚོང་དང་། ཤན་པ་དང་། སྦྲུལ་འཛིན་པ་དང་། བྱ་པ་དག་གིས་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་རྣམས་གཙེས་པར་མ་གྱུར་ཏམ། རྒྱལ་པོ་ཆེན་པོ་ཁྱོད་ཀྱང་ད་ཙམ་མི་རིགས་པར་རྒྱལ་སྲིད་ལ་མངའ་མི་མཛད་དམ། རྐང་གཉིས་པ་དང་།
རྐང་བཞི་པ་དང་། རྐང་མེད་པ་དང་། རྐང་མངས་ཀྱི་སྲོག་ཆགས་རྣམས་ལ་གཙེ་བའི་བློ་མ་སྐྱེས་ལགས་གྲང་། དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སེམས་ཅན་ཐམས་ཅད་ལ་ནི་སྲོག་ཕངས་ཀྱིས། རྒྱལ་པོ་ཆེན་པོ་དེའི་སླད་དུ་ཁྱོད་ཀྱིས་སྲོག་གཅོད་པ་སྤང་ཞིང་ཆད་པ་
སྤང་བ་དང་། ཐོ་བཙམ་པ་མ་མཆིས་པར་མཛད་ཅིང་། མ་བྱིན་པར་ལེན་པ་སྤང་ཞིང་བདག་གི་ལོངས་སྤྱོད་ཀྱིས་ཆོག་མཁྱེན་པ་དང་། གཞན་གྱི་ལོངས་སྤྱོད་ལ་གནོད་པ་མ་མཆིས་པར་མཛོད་ཅིག །འདོད་པ་ལ་ལོག་པར་གཡེམ་པ་སྤང་ཞིང་བདག་གི་བཙུན་མོ་ལ་དགྱེས་
པ་དང་། གཞན་གྱི་མཆིས་བྲང་ལ་བཞེད་པ་མ་མཆིས་པར་མཛོད་ཅིག །བརྫུན་དུ་སྨྲ་བ་སྤང་ཞིང་མང་བར་གསུང་བ་དང་ཆོས་དང་ལྡན་པར་བརྗོད་པར་མཛོད་ཅིག །ཕྲ་མའི་ཚིག་སྤང་ཞིང་དབྱེན་གྱི་ཚིག་མ་མཆིས་པ་དང་འདུམ་པར་བགྱི་བར་མཛོད་ཅིག །ངག་རྩུབ་པོ་
སྤང་ཞིང་སྙན་པ་དང་། འཇམ་པའི་ཚིག་ཏུ་བརྗོད་པར་མཛོད་ཅིག །ཚིག་ཀྱལ་པ་སྤང་ཞིང་ཇི་ལྟར་གསུངས་པ་བཞིན་དུ་བགྱི་བ་དང་དེས་པར་བརྗོད་པར་མཛོད་ཅིག །རྒྱལ་པོ་ཆེན་པོ་ཁྱོད་ཀྱིས་གཞན་གྱི་ལོངས་སྤྱོད་རྣམས་དང་གཞན་གྱི་ནོར་རྣམས་ལ་བརྣབ་སེམས་སུ་མི་བགྱི་

སྟེ། དེའི་གོང་དུ་རྗེས་སུ་དགྱེས་པའི་ཐུགས་བསྐྱེད་པར་མཛོད་ཅིག །རྒྱལ་པོ་ཆེན་པོ་ཁྱོད་ཀྱིས་གནོད་སེམས་མ་མཆིས་ཤིང་བྱམས་པ་དང་ལྡན་པ་དང་། ཡིད་ཀྱི་ལས་ཀྱི་མཐའ་ཡོངས་སུ་དག་པར་མཛོད་ཅིག །ལོག་པར་ལྟ་བ་སྤང་ཞིང་རང་གི་ལས་ཀྱི་འབྲས་བུ་
གཟིགས་པ་དང་། འཕགས་པ་རྣམས་ཀྱི་ཡང་དག་པར་ལྟ་བའི་རྗེས་སྙེགས་པར་མཛོད་ཅིག །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སྲོག་གཅོད་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་
པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཚེ་ཐུང་བ་དང་ནད་མང་བའོ། །མ་བྱིན་པར་ལེན་པས་ནི་སེམས་ཅན་དམྱལ་པར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་
རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ལོངས་སྤྱོད་ཆུང་བ་ཉིད་དང་། ལོངས་སྤྱོད་ཐུན་མོང་ཅན་ཉིད་དོ། །འདོད་པ་ལ་ལོག་པར་གཡེམ་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་
སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། གཡོག་འཁོར་མི་སྲུན་པ་དང་། འགྲན་ཟླ་དང་བཅས་པའི་ཆུང་མ་ཅན་དུ་འགྱུར་རོ། །བརྫུན་དུ་སྨྲ་
བས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། སྐུར་པ་མང་བ་ཉིད་དང་གཞན་གྱིས་
སླུ་བ་ཉིད་དོ། །ཕྲ་མའི་ཚིག་གིས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། གཡོག་

འཁོར་མི་འདུམ་པ་ཉིད་དང་། གཡོག་འཁོར་ངན་པ་ཉིད་དོ། །ངག་རྩུབ་པོས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་
གཉིས་མངོན་པར་འགྲུབ་སྟེ། ཡིད་དུ་མི་འོང་བའི་ཚིག་ཐོས་པ་ཉིད་དང་། ཐབ་མོའི་ཚིག་ཉིད་དོ། །ཚིག་འཁྱལ་པས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེས་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་
གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཚིག་མི་བཙུན་པ་ཉིད་དང་། མ་ངེས་པའི་སྤོབས་པ་ཉིད་དོ། །བརྣབ་སེམས་ཀྱིས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་
འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ཆོག་མི་ཤེས་པ་ཉིད་དང་། འདོད་པ་ཆེ་བ་ཉིད་དོ། །གནོད་སེམས་ཀྱིས་ནི་སེམས་ཅན་དམྱལ་བར་ཁྲིད་པར་འགྱུར་རོ། །དུད་འགྲོའི་སྐྱེ་གནས་སུ་ཁྲིད་པར་
འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། མི་ཕན་པ་ཚོལ་བ་ཉིད་དང་། གཞན་ལ་གནོད་པ་བྱེད་པ་ཉིད་དོ། །ལོག་པར་ལྟ་བས་ནི་སེམས་ཅན་དམྱལ་བར་ཁྲིད་པར་འགྱུར་
རོ། །དུད་འགྲོའི་སྐྱེ་གནས་སུ་ཁྲིད་པར་འགྱུར་རོ། །གཤིན་རྗེའི་འཇིག་རྟེན་དུ་ཁྲིད་པར་འགྱུར་རོ། །དེ་ནས་གལ་ཏེ་མིའི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་སྟེ། ལྟ་བ་ངན་པར་ལྟུང་བར་འགྱུར་བ་དང་། གཡོ་སྒྱུ་ཅན་དུ་འགྱུར་བའོ། །རྒྱལ་པོ་ཆེན་
པོ་དེ་ལྟར་ན་མི་དགེ་བ་བཅུའི་ལས་ཀྱི་ལམ་འདི་དག་གིས་ནི་སྡུག་བསྔལ་གྱི་ཕུང་པོ་ཆེ་ཞིང་ཚད་མ་མཆིས་པར་ཡང་དག་པར་འདུ་བར་འགྱུར་རོ། །རྒྱལ་པོ་ཆེན་པོ་དེའི་སླད་དུ་བག་མཆིས་པ་དང་། མི་རྟག་པར་སོ་སོར་བརྟག་པ་མང་བར་མཛོད་ཅིག །རྒྱལ་པོ་ཆེན་པོ་འཚོ་བའི་

ཡུན་ནི་ཐུང་ངོ་། །ཚེའི་ཚད་ནི་རིང་པོར་མི་ཐུབ་བོ། །ཕ་རོལ་ཏུ་ནི་བཞུད་འཚལ་ལོ། །ཚེའི་འདུ་བྱེད་ནི་རིའི་འབབ་ཆུ་ལྟར་མི་བརྟན་ཞིང་གཡོ་སྟེ། སྐད་ཅིག་ཀྱང་མི་གནས་ཀྱིས་དེའི་སླད་དུ་རྒྱལ་པོ་ཆེན་པོ་ལས་ཀྱི་རྣམ་པར་སྨིན་པའི་དྲུངས་མི་འབྱུང་ཞིང་འཇིག་རྟེན་
ཕ་རོལ་གྱིས་འཇིགས་པ་གཟིགས་པར་མཛོད་ཅིག །དེ་ནས་གཅེར་བུ་པའི་བུ་བདེན་སྨྲས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ས་ཡི་བདག་པོ་རྟག་ཏུ་བག་ཡོད་མཛོད། །བག་མེད་སེམས་ཅན་དམྱལ་བའི་གཡང་སར་འོར། །བག་མེད་
སྤྱོད་པ་སེམས་ཅན་དམྱལ་བར་མཆི། །བག་མཆིས་གང་ལགས་དེ་ནི་མཐོ་རིས་མཆི། །རྒྱལ་པོ་ཁྱོད་ནི་སྲོག་གཅོད་མ་མཛད་ཅིག །སྐྱེ་བོ་ཀུན་ལ་སྲོག་ནི་རབ་ཏུ་ཕངས། །དེ་བས་ཡུན་རིང་ཚེ་སྲུང་སུ་འདོད་པས། །ཡིད་ཀྱི་དགུ་ལའང་སྲོག་གཅོད་མི་བསམ་མོ། །འཇིག་རྟེན་
སྐྱོང་བ་རྐུ་བ་རྟག་ཏུ་སྤོངས། །དེས་ནི་ལོངས་སྤྱོད་འབྱོར་པ་བརྟན་པ་འཐོབ། །སྲོག་ཆེད་ཉོན་མོངས་ཐུན་ཁོལ་བསགས་བསགས་པ། །གཞན་ནོར་བླངས་པས་དབུལ་པོ་ཉིད་དུ་འགྱུར། །གཞན་གྱི་ཆུང་མ་རྟག་ཏུ་སྤོང་མཛད་ཅིང་། །ས་ཡི་བདག་པོ་བཙུན་མོས་འཚལ་བར་མཛོད། །
དེས་ན་རང་གི་བཙུན་མོ་སྡུག་པར་འགྱུར། །བཙུན་མོ་དགྲ་ཟླ་མ་མཆིས་འཐོབ་པར་མཆི། །བརྫུན་གྱི་ཚིག་ནི་ནམ་ཡང་བརྗོད་མ་མཛད། །རྒྱལ་པོ་དབང་པོ་དམ་བཅས་མང་བར་མཛོད། །བདེན་པར་སྨྲ་བ་དབང་པོའི་གནས་སུ་མཆི། །བརྫུན་དུ་གང་སྨྲ་གཤིན་རྗེའི་འཇིག་རྟེན་
མཆི། །ཕྲ་མའི་སྐྱོན་ལྡན་ཚིག་ནི་ཡོངས་སྤངས་ནས། །སྐྱེ་བོ་བྱེ་བ་འདུམ་པར་སྡུམས་བགྱིད་ན། །མི་ཕྱེད་གཡོག་འཁོར་འཕགས་པ་འཐོབ་པར་འགྱུར། །འདི་ནས་ཤི་འཕོས་མཐོ་རིས་རབ་ཏུ་མཆི། །ས་ཡི་བདག་པོ་ངག་རྩུབ་སྤང་བར་མཛོད། །གཞན་གྱི་རྣར་སྙན་བདེ་
བ་བཀའ་སྩོལ་ཅིག །དེ་རྒྱུས་འཇིག་རྟེན་ཕ་རོལ་ལྷ་དག་གི། །སྣ་ཚོགས་ཡིད་འོང་མཐོ་རིས་ཚིག་གསན་འགྱུར། །ཀྱལ་པའི་ཚིག་རྣམས་རྣམ་པར་སྤང་མཛད་དེ། །ཤིན་ཏུ་དེས་ཤིང་བརྟན་པའི་ཚིག་ཀྱང་གསུངས། །ཕ་རོལ་ལྷ་ཡི་དབང་ཕྱུག་འཇིག་རྟེན་དུ། །སེམས་

ཅན་རྣམས་ལ་བཙུན་པའི་ཚིག་ལྡན་འགྱུར། །གཞན་གྱི་ཕུན་སུམ་ཚོགས་པ་མཐོང་གྱུར་ན། །སྐྱེ་དགུའི་བདག་པོ་ཕན་འཚལ་ཆགས་མི་བགྱི། །གཞན་གྱི་ལོངས་སྤྱོད་དག་ལ་ཆགས་བགྱིས་ན། །ལོངས་སྤྱོད་ཐུན་མོང་ཅན་དུ་དེས་འགྱུར་རོ། །ས་ཡི་བདག་པོ་གནོད་སེམས་མ་མཛད་
ཅིག །སེམས་ཅན་རྣམས་ལ་བྱམས་པ་རྟག་ཏུ་མཛོད། །གནོད་སེམས་ལྡན་པའི་མི་རྣམས་ཤི་འཕོས་ནས། །དགེ་བ་བགྱིས་ཀྱང་མནར་མེད་དམྱལ་བར་མཆི། །མི་ཡི་བདག་པོ་ལོག་པར་ལྟ་སྤོང་མཛོད། །ཡང་དག་གཟིགས་པས་བདག་ཉིད་བརྟན་པར་མཛོད། །དགེ་
ཆོས་འདི་དག་ཡང་དག་བླང་བགྱིས་ན། །ལྷ་ཡི་གཞལ་མེད་ཁང་དུ་དགྱེས་པར་འགྱུར། །དགེ་སློང་བྲམ་ཟེ་ཚུལ་ཁྲིམས་ལྡན་པ་དང་། །ཡབ་དང་ཡུམ་ལ་མཆོད་པ་གུས་བགྱིས་ན། །ངན་སོང་ས་ཆེན་ཁྱོད་ཀྱིས་སྤངས་འགྱུར་ཞིང་། །མཐོ་རིས་དགྱེས་པ་བརྙེས་པས་དགྱེས་
པར་འགྱུར། །དེ་ནས་གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་བག་ཡོད་པ་དང་ལྡན་པའི་གཏམ་དེ་ལྟ་བུ་དག་བྱས་ནས་ཅང་མི་སྨྲ་བར་འདུག་གོ། །རྒྱལ་པོའི་དྲུང་དུ་ཕྱིན་པའི་ལེའུ་སྟེ་ལྔ་པའོ།། །།དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་
བུ་བདེན་སྨྲའི་ཚིག་དེ་ལ་མངོན་པར་དགའ་སྟེ། ཡང་དག་པར་དགའ་བར་འགྱུར་བ་དང་། ཡང་དག་པར་ཆགས་པར་འགྱུར་བའི་གཏམ་སྣ་ཚོགས་བྱས་ནས་གནོད་པ་ཆུང་བ་དང་། ཉམ་ང་བ་ཉུང་བའི་གཏམ་དྲིས་ཏེ་འདི་སྐད་ཅེས་སྨྲས་སོ། །བྲམ་ཟེ་གལ་ཏེ་བདག་གིས་དྲིས་ལ་
དྲིས་པ་ལན་གདབ་པར་ཁྱོད་ཀྱིས་སྐབས་དབྱེ་ན་ཕྱོགས་འགའ་ཞིག་དྲིའོ། །དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཅི་དང་ཅི་བཞེད་པ་སྨྲར་གསོལ། སྨྲས་པ་དེ་དང་དེ་ཉིད་ཀྱི་ལན་གསོལ་
པས། བདག་གིས་ཁྱོད་ཀྱི་ཐུགས་རངས་པར་བགྱིའོ། །སྐབས་ཕྱེ་བས་དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བྲམ་ཟེ་སྐྱེ་དགུ་སྐྱེ་དགུ་ཞེས་བྱ་ན། དེ་ལྟར་སྐྱེ་དགུ་ཞེས་བྱ་བ་དེ་ཆོས་གང་གི་ཚིག་བླ་དགས་ཡིན། སྨྲས་

པ། རྒྱལ་པོ་ཆེན་པོ་འདི་ལྟར་སྐྱེ་དགུ་ཞེས་བགྱི་བ་ནི་ཉེ་བར་ལེན་པའི་ཕུང་པོ་ལྔའི་ཚིག་བླ་དགས་ཏེ། ལྔ་པོ་དག་གང་ཞེ་ན། གཟུགས་ཉེ་བར་ལེན་པའི་ཕུང་པོ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཉེ་བར་ལེན་པའི་
ཕུང་པོའོ། །རྒྱལ་པོ་ཆེན་པོ་ཡང་ཉེ་བར་ལེན་པའི་ཕུང་པོ་ལྔ་པོ་དེ་དག་ཉིད་ཉེ་བར་བཟུང་སྟེ། སེམས་ཅན་གྱི་འཇིག་རྟེན་དང་སྣོད་ཀྱི་འཇིག་རྟེན་གདགས་པ་ལགས་སོ། །དེ་ལ་སེམས་ཅན་གྱི་འཇིག་རྟེན་གདགས་པ་ནི་སྐྱེ་གནས་བཞིས་ཟིན་པ་སྟེ། མངལ་ནས་སྐྱེ་བ་དང་། སྒོ་ང་ལས་སྐྱེ་བ་དང་།
དྲོད་གཤེར་ལས་སྐྱེ་བ་དང་། བརྫུས་ཏེ་སྐྱེ་བའོ། །སྣོད་ཀྱི་འཇིག་རྟེན་གདགས་པ་ནི་ས་དང་། ཆུ་དང་། མེ་དང་། རླུང་དང་། ནམ་མཁའི་ཁམས་ཀྱིས་ཟིན་པའོ། །སྨྲས་པ། བྲམ་ཟེ་སྐྱེ་དགུ་སྐྱོང་བ་གང་ཡིན། སྨྲས་པ། རྒྱལ་པོ་ཆེན་པོ་རང་གི་ལས་ཀྱི་དབང་དང་བདག་པོའོ། །སྨྲས་
པ། བྲམ་ཟེ་རྣམ་པ་གང་གིས་ཇི་ལྟར་རང་གི་ལས་ཀྱི་དབང་སྐྱེ་དགུ་སྐྱོང་བར་བྱེད། སྨྲས་པ། རྒྱལ་པོ་ཆེན་པོ་སེམས་ཅན་གང་དག་རང་གི་ལས་ཀྱི་དབང་གིས་རྣམ་པ་དེ་ལྟ་བུའི་གནས་སུ་སྐྱེས་ཤིང་བདག་གིར་བགྱི་བ་མ་མཆིས་པ་དང་། ཡོངས་སུ་བཟུང་བ་མ་མཆིས་པ་
དང་མ་རྨོས་མ་བཏབ་པའི་ཡོ་བྱད་རྣམས་ལ་སྤྱོད་ཅིང་ནད་དང་དགྲ་དང་། སྡུག་བསྔལ་ཆེན་པོ་རྣམ་པར་སྤངས་པས་གཅིག་ལ་གཅིག་མི་འཁུ་ཞིང་ཇི་སྲིད་འཚོའི་བར་དུ་འབྱོར་པ་དང་། མོད་པའི་ཡུལ་དུ་བདེ་བ་ལ་རེག་པར་གནས་ཤིང་དུས་ལ་བབ་སྟེ། ལུས་ཞིག་ནས་བདེ་
འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་བ་དག་མཆིས་ཏེ། འདི་ལྟ་སྟེ་དཔེར་ན། བྱང་གི་སྒྲ་མི་སྙན་གྱི་སེམས་ཅན་ལྟ་བུ་དག་ལགས་སོ། །སེམས་ཅན་གང་དག་རང་གི་ལས་ཀྱི་དབང་གིས་རྣམ་པ་དེ་ལྟ་བུའི་དུས་སུ་སྐྱེ་ཞིང་འོད་རང་ལས་འབྱུང་བ། ནམ་མཁའ་
ལ་མཆི་བ། དགའ་བའི་ཁ་ཟས་དང་ལྡན་པ། མངལ་ནས་མ་སྐྱེས་པ། ཚེ་རིང་བ་ཡུན་རིང་པོར་འཚོ་བ་དག་མཆིས་ཏེ། འདི་ལྟ་སྟེ་དཔེར་ན། བསྐལ་པ་དང་པོ་པའི་སེམས་ཅན་ལྟ་བུ་དག་ལགས་སོ། །སེམས་ཅན་གང་དག་རང་གི་ལས་ཀྱི་དབང་གིས་སྔོན་གྱི་བསོད་

ནམས་ཀྱི་རྒྱུའི་སྟོབས་བསྐྱེད་པ་དང་ལྡན་ཞིང་ཚེ་འདི་ལ་ཕར་ཤེས་པ། མར་ཤེས་པ། དགེ་སྦྱོང་དུ་འཛིན་པ། བྲམ་ཟེར་འཛིན་པ། དོན་བགྱིད་པ་དགོས་པ་བགྱིད་པ། རིགས་ཀྱི་གཙོ་བོ་ལ་རིམ་གྲོ་བྱེད་པ། ཁ་ན་མ་ཐོ་བས་འཇིགས་པར་ལྟ་བ། སྦྱིན་པ་དག་སྦྱིན་པ།
བསོད་ནམས་དག་བགྱིད་པ། ཉེ་བར་གནས་པས་ཉེ་བར་གནས་པ། ཚུལ་ཁྲིམས་ཡང་དག་པར་བཟུང་ཞིང་གནས་པ་དག་མཆིས་ཏེ། འདི་ལྟ་སྟེ། དཔེར་ན་དུས་བཟང་པོའི་སེམས་ཅན་ལྟ་བུ་དག་ལགས་ཏེ། དེ་དག་ལ་རྒྱལ་པོར་གདགས་པ་མ་མཆིས་སོ། །རྒྱལ་པོ་
ཆེན་པོ་དེ་ལྟར་ན་བདག་གི་ལས་ཀྱི་དབང་ནི་སྐྱེ་དགུ་སྐྱོང་ཞེས་བགྱིའོ། །སྨྲས་པ། བྲམ་ཟེ་ཇི་ལྟར་ན་སྐྱེ་དགུའི་བདག་པོས་སྐྱོང་ཞེས་བྱ། སྨྲས་པ། རྒྱལ་པོ་ཆེན་པོ་རྒྱལ་པོ་རྣམས་ནི་སྐྱེ་དགུ་རྣམས་ཀྱི་དབང་པོ་ཞེས་བགྱི་སྟེ། དེ་དག་ཀྱང་ཆོས་དང་ལྡན་ཞིང་ཚུལ་
ཁྲིམས་དང་། ཚུལ་དང་། ཡང་དག་པར་སྤྱོད་པ་སྐྱེ་དགུ་རྣམས་དགའ་བར་སྦྱོར་བས་མཛེས་པས་ན་དེའི་སླད་དུ་རྒྱལ་པོ་ཞེས་བགྱིའོ། །དེ་དག་ཀྱང་རྣམ་པ་བཞི་སྟེ། འདི་ལྟ་སྟེ། འཁོར་ལོས་སྒྱུར་བ་རྣམས་དང་། རྒྱལ་པོ་ཆེན་པོ་རྣམས་དང་། ཁམས་ཀྱི་རྒྱལ་པོ་
རྣམས་དང་། རྒྱལ་ཕྲན་རྣམས་ལགས་སོ། །དེ་ལ་འཁོར་ལོས་སྒྱུར་བ་ཞེས་བགྱི་བ་ནི་འདི་ན་ལ་ལ་རྒྱལ་པོ་འཁོར་ལོས་སྒྱུར་བ་རྒྱལ་རིགས་སྤྱི་བོ་ནས་དབང་བསྐུར་བ། མཐའ་བཞིར་རྒྱལ་བ། ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ལགས་
སོ། །དེའི་རིན་པོ་ཆེ་སྣ་བདུན་ནི་འདི་དག་ལགས་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། བུད་མེད་རིན་པོ་ཆེ་དང་། ནོར་བུ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་ལགས་སོ། །དེས་
ས་ཆེན་པོ་མ་ལུས་པ་གནོད་པར་སྡོ་བ་མ་མཆིས་ཤིང་འཚེ་བ་མ་མཆིས་ལ། ཆད་པ་མ་མཆིས་ཤིང་མཚོན་གྱིས་བདའ་བ་མ་མཆིས་པ་འདི་ཉིད་ཆོས་དང་འཐུན་པར་སྙོམས་པས་ལེགས་པར་ཕབ་སྟེ། གནས་ལགས་སོ་སྨྲས་པ། རྣམ་པ་གང་གིས་ཇི་ལྟར་མཐའ་

བཞིར་རྒྱལ་བར་འགྱུར། སྨྲས་པ། གླིང་བཞི་ལ་དབང་གིས་དབང་སྒྱུར་བའི་སླད་དུའོ། །སྨྲས་པ། ཇི་ལྟར་ན་རྣམ་པར་རྒྱལ་བ་ཡིན། སྨྲས་པ། བཀའ་ལས་འགལ་བར་བགྱིད་པ་མ་མཆིས་པའི་སླད་དུའོ། །སྨྲས་པ། ཇི་ལྟར་ན་ཆོས་དང་ལྡན་པ་ཡིན། སྨྲས་པ།
བདག་ཉིད་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཤིང་གནས་པའི་སླད་དུའོ། །སྨྲས་པ། ཇི་ལྟར་ན་ཆོས་ཀྱི་རྒྱལ་པོ་ཡིན། སྨྲས་པ། གཞན་དག་དགེ་བ་བཅུའི་ལས་ཀྱི་ལམ་ཡང་དག་པར་བླངས་ཤིང་གནས་སུ་སྩལ་བའི་སླད་དུའོ། །སྨྲས་པ། ཅིའི་ཕྱིར་འཁོར་ལོ་རིན་
པོ་ཆེ་དང་ལྡན་པར་འགྱུར། སྨྲས་པ། ཚེགས་ཆུང་ངུས་རྣམ་པར་རྒྱལ་ཞིང་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་གླང་པོ་རིན་པོ་ཆེ་དང་རྟ་རིན་པོ་ཆེ་དང་ལྡན་པར་འགྱུར། སྨྲས་པ། བཞོན་པའི་མཆོག་ངོ་མཚར་གྱི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་
བུད་མེད་རིན་པོ་ཆེ་དང་ལྡན་པར་འགྱུར། སྨྲས་པ། དགའ་བའི་མཆོག་གིས་རྩེ་བ་དང་དགའ་བའི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་ནོར་བུ་རིན་པོ་ཆེ་དང་ལྡན་པར་འགྱུར། སྨྲས་པ། སྣང་བ་དམ་པའི་ཡོ་བྱད་ཀྱི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་ཁྱིམ་
བདག་རིན་པོ་ཆེ་དང་ལྡན་པར་འགྱུར། སྨྲས་པ། ལོངས་སྤྱོད་ཀྱི་དབང་ཕྱུག་མཆོག་གི་བདེ་བ་འཐོབ་པའི་སླད་དུའོ། །སྨྲས་པ། ཅིའི་ཕྱིར་བློན་པོ་རིན་པོ་ཆེ་དང་ལྡན་པར་འགྱུར། སྨྲས་པ། ཤུལ་དུ་ཞུགས་ན་ཉོན་མི་མོངས་ཤིང་སྐྱོ་བར་མི་འགྱུར་བའི་བདེ་བ་འཐོབ་པའི་སླད་དུའོ། །
སྨྲས་པ། ཇི་ལྟར་ན་ས་འདི་མ་ལུས་པ་དག་ལ་གནས་པར་འགྱུར། སྨྲས་པ། མཐའ་དག་ལ་གནས་པའི་སླད་དུའོ། །སྨྲས་པ། ཇི་ལྟར་ན་གནོད་པར་སྡོ་བ་མེད་པ་ཡིན། སྨྲས་པ། ཕྱིར་རྒོལ་བ་མ་མཆིས་པའི་སླད་དུའོ། །སྨྲས་པ། ཇི་ལྟར་ན་འཚེ་བ་མེད་
པ་ཡིན། སྨྲས་པ། ནན་གྱིས་བགྱི་བ་མ་མཆིས་པའི་སླད་དུའོ། །སྨྲས་པ། ཇི་ལྟར་ན་ཆད་པ་མེད་པ་ཡིན། སྨྲས་པ། ཆད་པ་དང་མཚོན་ཆས་གནོད་པར་བགྱི་བ་མ་མཆིས་པའི་སླད་དུའོ། །སྨྲས་པ། ཇི་ལྟར་ན་ཆོས་དང་འཐུན་པ་

ཡིན། སྨྲས་པ། མི་རིགས་པའི་ཆགས་པ་དང་ཞེ་སྡང་དང་གཏི་མུག་རྣམ་པར་སྤངས་པའི་སླད་དུའོ། །སྨྲས་པ། ཇི་ལྟར་ན་སྙོམས་པ་ཡིན། སྨྲས་པ། ཕྱོགས་སུ་མ་ལྷུང་བར་ཡོངས་སུ་སྐྱོང་བའི་སླད་དུའོ། །སྨྲས་པ། ཇི་ལྟར་ན་ལེགས་པར་ཕབ་སྟེ་གནས་པར་འགྱུར།
སྨྲས་པ། གཞན་དག་རང་རང་གི་རིས་ནས་མ་སྐྱེས་པའི་སླད་དུའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་འདི་ལྟར་འཁོར་ལོས་སྒྱུར་བའི་རྒྱལ་པོ་གང་གི་ཚེ་གླིང་ལས་རྣམ་པར་རྒྱལ་བར་བགྱིད་པ་དེའི་ཚེ་དེ་ན་རྒྱལ་ཕྲན་ཇི་སྙེད་ཅིག་གནས་པ་དེ་དག་ལྷགས་ནས་འཁོར་
ལོས་སྒྱུར་བའི་རྒྱལ་པོ་ལ་འདི་སྐད་ཅེས་མཆིའོ། །ལྷའི་རྣམ་པར་རྒྱལ་བ་འདི་དག་ནི་འབྱོར་པ་རྒྱས་པ། བདེ་བ། ལོ་ལེགས་པ། སྐྱེ་བོ་མང་པོ་དང་མིས་གཏམས་པ་ལགས་ཏེ། དེ་དག་ལྷས་བསྐྱང་བ་མཛད་དུ་གསོལ། བདག་ཅག་ཀྱང་ལྷའི་ཞབས་འབྲིང་འཚལ་
ལོ་ཞེས་མཆིའོ། །དེ་དག་ལ་འཁོར་ལོས་སྒྱུར་བའི་རྒྱལ་པོ་འདི་སྐད་བསྒོ་སྟེ། དེའི་ཕྱིར་ཡུལ་གྱི་བདག་པོ་དག་རང་རང་གི་རྣམ་པར་རྒྱལ་བ་ལེགས་པར་སྐྱོང་ཤིག །དེ་ཡང་ཆོས་དང་འཐུན་པས་བསྐྱང་གི་ཆོས་དང་མི་འཐུན་པས་མ་ཡིན་ནོ། །སྙོམས་པས་བསྐྱང་
གི་མི་སྙོམས་པས་མ་ཡིན་ནོ། །ཁྱེད་ཀྱིས་ཆོས་དང་མི་འཐུན་པར་སྤྱད་པའམ་མི་རིགས་པར་སྤྱད་པས་ཡུལ་འཁོར་ན་འཁོད་པར་དགའ་བར་མ་བྱེད་ཅིག །དེ་ལྟར་ན་ཁྱོད་ཀྱང་ངའི་རྗེས་སུ་འབྲང་བ་ཡིན་ནོ། །ཞེས་རྣམ་པ་དེ་ལྟ་བུའི་འཁོར་ལོས་སྒྱུར་བའི་རྒྱལ་པོ་ནི་སྐྱེ་དགུ་དེ་ལྟར་
སྐྱོང་སྟེ། རྒྱལ་པོ་ཆེན་པོ་དང་ཁམས་ཀྱི་རྒྱལ་པོ་དང་རྒྱལ་ཕྲན་དེ་དག་ནི་དེའི་རྗེས་སུ་འབྲང་བ་ལགས་ཏེ། རྒྱལ་པོ་ཆེན་པོ་དེ་ལྟར་ན་བདག་པོས་སྐྱེ་དགུ་སྐྱོང་བ་ལགས་པའི་སླད་དུའོ། །སྨྲས་པ། བྲམ་ཟེ་ཆོས་དང་ལྡན་པའི་རྒྱལ་པོ་ཅི་ལ་གནས་ཤིང་སྐྱེ་དགུ་སྐྱོང་བར་བྱེད།
སྨྲས་པ། རྒྱལ་པོ་ཆེན་པོ་འཁོར་ལོས་སྒྱུར་བའི་རྒྱལ་པོ་མ་གཏོགས་པར་གཞན་ནི་བསྟན་བཅོས་ལ་གནས་ཤིང་སྐྱེ་དགུ་སྐྱོང་ལགས་སོ། །དེ་ཅིའི་སླད་དུ་ཞེ་ན། འཁོར་ལོས་སྒྱུར་བའི་རྒྱལ་པོས་སྐྱེ་དགུ་སྐྱོང་བ་དེའི་ཚེ་ན་ཆོས་མ་ལགས་པའི་འདོད་པ་ལ་དགའ་བ་ལ་ཆགས་པ་

འམ། མི་རིགས་པའི་འདོད་ཆེན་གྱིས་ཟིལ་གྱིས་ནོན་པའམ། ལོག་པའི་ཆོས་ཀྱིས་འཁོར་བ་དེ་ལྟ་བུའི་སེམས་ཅན་མ་མཆིས་ཏེ། དེའི་ཚེ་འཁོར་ལོས་སྒྱུར་བའི་རྒྱལ་པོ་དེ་རང་གི་ཆོས་ཀྱི་དབང་གིས་རྒྱལ་པོའི་བགྱི་བ་དེ་དང་དེ་དག་ལ་མི་ཟློགས་པའི་རྟོགས་པ་
དང་ལྡན་པས་དེའི་དོན་ཐམས་ཅད་ཚེགས་ཆུང་ངུས་འགྲུབ་ཅིང་ཀུན་ཀྱང་འཐུན་པར་གནས་པས་དེའི་སླད་དུ་དེ་ལ་བསྟན་བཅོས་མི་འཚལ་ལོ། །གང་གི་ཚེ་སེམས་ཅན་རྣམས་ཆོས་མ་ལགས་པའི་འདོད་པ་ལ་ཆགས་ཤིང་མི་རིགས་པའི་འདོད་ཆེན་གྱིས་ཟིལ་གྱིས་ནོན་པ་དང་ལོག་
པའི་ཆོས་ཀྱིས་འཁོར་བར་གྱུར་པ་དེའི་ཚེ་རྒྱལ་པོ་རྣམས་ཀྱི་རང་རང་གི་སྤོབས་པ་ལ་འབྲི་བར་འགྱུར་ཏེ། དེ་ལ་ཆོས་ཀྱིས་སྐྱེ་དགུ་ཡོངས་སུ་བསྐྱང་བའི་སླད་དུ་དྲང་སྲོང་ཆེན་པོ་རྣམས་བསྟན་བཅོས་དག་བགྱིད་དོ། །སྨྲས་པ། བྲམ་ཟེ་ཆོས་མ་ཡིན་པའི་འདོད་པ་ལ་ཆགས་པ་གང་
ཡིན། སྨྲས་པ། རྒྱལ་པོ་ཆེན་པོ་གང་མི་དགེ་བ་བཅུའི་ལས་ཀྱི་ལམ་ལ་མངོན་པར་དགའ་བ་ལགས་སོ། །སྨྲས་པ། མི་རིགས་པའི་འདོད་ཆེན་གང་ཡིན། སྨྲས་པ། གང་རང་གི་ལག་མཐུས་བསྒྲུབས་པ་དུས་ལ་གཏོགས་པ། ཆོས་དང་ལྡན་པར་ཆོས་ཀྱིས་ཐོབ་པའི་ལོངས་སྤྱོད་
རྣམས་ཀྱིས་ཆོག་མ་འཚལ་བ་ལགས་སོ། །སྨྲས་པ། ལོག་པའི་ཆོས་ཀྱིས་འཁོར་ཞེས་བྱ་བ་གང་ཡིན། སྨྲས་པ། དོན་གྱི་བསྟན་བཅོས་སུ་མིང་བཏགས་པ། གནོད་པར་འགྱུར་བ་དང་ལྡན་པ། དམ་པའི་ཆོས་ལྟར་བཅོས་པ། རྩོད་པའི་དུས་ན་སྐྱེས་བུ་དམ་པ་
མ་ལགས་པས་བགྱིས་པ་ལ་མོས་པས་ཡོངས་སུ་བསྒོས་པའི་ལྟ་བས་ཡོན་ཏན་དུ་ལྟ་བ་ལགས་སོ། །སྨྲས་པ། བྲམ་ཟེ་བསྟན་བཅོས་གང་ལ་ཆོས་དང་ལྡན་པའི་རྒྱལ་པོས་བརྟེན་ཅིང་སྐྱེ་དགུ་སྐྱོང་བར་བྱེད་པའི་བསྟན་བཅོས་གང་ཡིན། སྨྲས་པ། རྒྱལ་པོ་ཆེན་པོ་དེ་ནི་བསྟན་
བཅོས་གང་ལས་མི་རིགས་པའི་ཆགས་པ་དང་། མི་རིགས་པའི་ཞེ་སྡང་དང་། མི་རིགས་པའི་གཏི་མུག་གི་གཉེན་པོ་རང་བཞིན་ནམ། རབ་ཏུ་དབྱེ་བའམ། ཕན་ཡོན་གྱི་སྒོ་ནས་བསྟན་པ་སྟེ། དེ་ལ་གཉེན་པོའི་རང་བཞིན་ནི་འདི་ལགས་ཏེ། འདི་ལྟ་སྟེ། དེའི་གཉེན་པོར་

འགྱུར་བ་མ་ཆགས་པ་དགེ་བའི་རྩ་བ་དང་། ཞེ་སྡང་མ་མཆིས་པའི་དགེ་བའི་རྩ་བ་དང་། གཏི་མུག་མ་མཆིས་པའི་དགེ་བའི་རྩ་བ་ལགས་སོ། །དེ་ལ་གཉེན་པོ་ཀུན་ནས་སློང་བ་ནི་འདི་ལགས་ཏེ། འདི་ལྟ་སྟེ། བག་མཆིས་པ་དང་སྙིང་རྗེ་ལགས་སོ། །རྒྱལ་པོ་ཆེན་པོ་དེ་
ལ་ཆོས་དང་ལྡན་པའི་རྒྱལ་པོའི་ལོངས་སྤྱོད་རྣམས་དང་བདག་ཉིད་ཀྱང་མི་རྟག་པར་རྟོགས་ཤིང་དྲན་པ་ཉེ་བར་གཞག་སྟེ། ཉེས་དམིགས་སུ་ལྟ་ཞིང་ངེས་པར་འབྱུང་བ་འཚལ་བས་ལོངས་སྤྱོད་རྣམས་ལ་སྤྱོད་ཅིང་རྒྱལ་པོའི་དབང་ཕྱུག་གི་དབང་བགྱིད་པ་འདི་ནི་དེའི་བག་མཆིས་པ་ལགས་
སོ། །གང་ལ་གནས་ཏེ་མ་ཐོབ་པའི་ལོངས་སྤྱོད་ཀྱི་འབྲས་བུ་ལ་ཉེ་བར་མི་འཚོ་བ་དང་ཐོབ་པ་ལའང་དུས་མ་ཡིན་པར་ཉེ་བར་མི་འཚོ་བ་དང་། དུས་ལ་བབ་ཀྱང་དབུལ་པོ་རྣམས་ལ་གནོད་པ་བགྱིས་ཤིང་ཉེ་བར་མི་འཚོ་བ་དང་། མུ་གེའི་གནོད་པ་ཞིག་བྱུང་ན་སྐྱེ་དགུ་རྣམས་ཀྱི་
སྐྱབས་བགྱིད་པ་དང་། ཆོམ་རྐུན་གྱི་གནོད་པ་དང་། ཕ་རོལ་གྱི་དམག་ཚོགས་ཀྱི་གནོད་པ་དང་། གཅིག་ལ་གཅིག་གནོད་པར་གྱུར་པ་ཞིག་བྱུང་ན་ཡང་དག་པར་ཕན་འདོགས་པར་བགྱིད་པ་དང་། དབུལ་པོ་རྣམས་ལ་ནོར་སྦྱིན་པ་དང་། མི་སྲུན་པ་རྣམས་ལ་ཡང་དག་
པར་ཆད་པས་བཅད་པ་འདི་ནི་དེའི་སྙིང་རྗེ་ཞེས་བགྱི་སྟེ། རྒྱལ་པོ་ཆེན་པོ་ཆོས་གཉིས་པོ་དེ་དག་དང་ལྡན་ན་ཆོས་དང་ལྡན་པའི་རྒྱལ་པོ་སྐྱེ་དགུ་ཡང་དག་པར་སྐྱོང་བར་བགྱིད་ཅེས་བགྱི་བ་ལགས་ཏེ། བག་མཆིས་པ་དང་སྙིང་རྗེ་གཉིས་ལགས་སོ། །སྨྲས་པ། བྲམ་ཟེ་རྣམ་པ་
གང་གིས་ན་ཇི་ལྟར་ཆོས་དང་ལྡན་པའི་རྒྱལ་པོ་སྙིང་རྗེ་ཅན་མི་སྲུན་པ་ཆད་པས་གཅོད་པ་ཡིན། སྨྲས་པ། རྒྱལ་པོ་ཆེན་པོ་ཆོས་ཀྱི་རྒྱལ་པོ་ཆོས་དང་ལྡན་པ་སྙིང་རྗེ་ཅན་ནི་གནས་ལྔ་ལ་དྲན་པ་ཉེ་བར་གཞག་ཅིང་མི་སྲུན་པ་ཆད་པས་གཅོད་པ་ལགས་སོ། །དེ་ཡང་ཡང་དག་པས་ལགས་
ཀྱི་ལོག་པས་མ་ལགས་སོ། །དུས་སུ་ལགས་ཀྱི་དུས་མ་ལགས་པས་མ་ལགས་སོ། །དོན་དང་ལྡན་པར་ལགས་ཀྱི་དོན་དང་མི་ལྡན་པར་མ་ལགས་སོ། །འཇམ་པར་ལགས་ཀྱི་བརླང་བར་མ་ལགས་སོ། །བྱམས་པས་ལགས་ཀྱི་ཞེ་སྡང་གིས་མ་ལགས་སོ། །སྨྲས་པ།

རྣམ་པ་གང་གིས་ཇི་ལྟར་ན་ཡང་དག་པས་ཡིན་གྱི་ལོག་པས་མ་ཡིན་ཞེས་བྱ། སྨྲས་པ། གལ་ཏེ་གཡོན་ལ་མི་གནས་པ་མ་ལགས་ཀྱི་ཡང་དག་པར་གཡོན་ལ་གནས་པར་གྱུར་པའོ། །སྨྲས་པ། ཇི་ལྟར་ན་དུས་སུ་ཡིན་གྱི་དུས་མ་ཡིན་པར་མ་ཡིན་ཞེས་བྱ། སྨྲས་པ།
གལ་ཏེ་རྒྱལ་པོས་མི་སྲུན་པ་ཆད་པས་བཅད་པའི་མཐུ་མཆིས་ན་ལགས་ཀྱི་མཐུ་མ་མཆིས་ན་མ་ལགས་པའོ། །སྨྲས་པ། ཇི་ལྟར་ན་དོན་དང་ལྡན་པར་ཡིན་གྱི་དོན་དང་མི་ལྡན་པར་མ་ཡིན་ཞེས་བྱ། སྨྲས་པ། གལ་ཏེ་ཁས་བླངས་པ་ལ་གནས་པར་བགྱིས་པ་ལགས་ཀྱི་གནས་པར་
མ་བགྱིས་པ་མ་ལགས་སོ། །སྨྲས་པ། ཇི་ལྟར་ན་འཇམ་པར་ཡིན་གྱི་བརླང་བར་མ་ཡིན་ཞེས་བྱ། སྨྲས་པ། གལ་ཏེ་སྐྱོན་བརྗོད་པ་ཙམ་གྱིས་འགྲུབ་པར་རྟོགས་པ་ཞིག་ན་ཡང་བཅིང་བ་དང་གསད་པ་ལ་སོགས་པས་གནོད་པར་མི་བགྱི་བར་ཡང་དག་པར་སྐྱོན་བརྗོད་པ་ལགས་ཀྱི་
སྐྱོན་མ་བརྗོད་པར་མ་ལགས་སོ། །སྨྲས་པ། ཇི་ལྟར་ན་བྱམས་པས་ཡིན་གྱི་ཞེ་སྡང་གིས་མ་ཡིན་ཞེས་བྱ། སྨྲས་པ། གལ་ཏེ་སྐྱོན་བརྗོད་པ་ཙམ་གྱིས་མི་འགྲུབ་པར་རྟོགས་པ་ཞིག་ན་འགུམ་པ་དང་དབང་པོ་ཉམས་པར་བགྱིད་པ་དང་། ཡན་ལག་གཏུབ་པ་མ་གཏོགས་པར་
བྱམས་པའི་སེམས་དང་སྙིང་རྗེའི་སེམས་ཉེ་བར་གཞག་སྟེ་བཅིང་བ་དང་གོ་རར་སྩལ་བ་དང་། བརྡེག་པ་དང་། བསྡིགས་པ་དང་། གནོད་པར་བགྱི་བ་དང་། སྤྱོ་བ་དང་། བརྒྱད་བཀག་པ་དང་། གནས་ནས་བཀར་བ་དང་། ལོངས་སྤྱོད་འཕྲོག་པ་ལ་སོགས་པ་བརླང་བའི་རྣམ་པ་
རྣམས་ཀྱིས་བརླང་བར་བགྱི་བ་སྟེ། དེ་ལས་འདས་པར་བརླང་བར་བགྱི་བ་མ་ལགས་སོ། །སྨྲས་པ། བྲམ་ཟེ་ཇི་ལྟར་ན་ཆོས་དང་ལྡན་པའི་རྒྱལ་པོ་བརླང་བའི་རྣམ་པ་དེ་དག་གིས་སེམས་ཅན་མི་སྲུན་པ་དག་ལ་བྱམས་པའི་སེམས་དང་སྙིང་རྗེའི་སེམས་ཉེ་བར་གཞག་ཅིང་བརླང་བར་
སྤྱོད་པ་ཡིན། དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེའི་སླད་དུ་དོན་འདི་རབ་ཏུ་བསྒྲུབ་པའི་སླད་དུ་དཔེ་གསན་དུ་གསོལ། རྒྱལ་པོ་ཆེན་པོ་འདི་ལྟ་སྟེ། དཔེར་བགྱི་ན་ཕས་བུ་མི་སྲུན་པ་ཞིག་བཅོས་

པར་འཚལ་ན་བྱམས་པའི་སེམས་དང་སྙིང་རྗེའི་སེམས་ཉེ་བར་གཞག་སྟེ། དགུམ་པ་དང་དབང་པོ་ཉམས་པར་བགྱི་བ་དང་། ཡན་ལག་གཏུབ་པ་མ་གཏོགས་པར་གནོད་པའི་རྣམ་པ་གཞན་གྱིས་བརླང་བར་བགྱིད་དེ། འོན་ཀྱང་དེ་ལ་གཏང་བའི་སེམས་སམ། གནོད་པར་བགྱི་བའི་
སེམས་མི་འབྱུང་སྟེ། གཞན་དུ་ན་ཉེས་པ་བཟློག་པ་ཉིད་ཀྱི་ཆེད་དུ་བགྱིས་ཏེ། ཉེས་པ་མ་བྱུང་བ་རྣམས་མི་འབྱུང་བར་བྱའོ་སྙམ་སྟེ་བརླང་བར་བགྱིད་དོ། །དེ་བཞིན་དུ་རྒྱལ་པོ་ཆོས་དང་ལྡན་པ་ཡང་སྐྱེ་དགུ་རྣམས་ལ་བུའི་འདུ་ཤེས་ཉེ་བར་གཞག་སྟེ། སེམས་ཅན་མི་སྲུན་པ་
རྣམས་འཆོས་ན་སྲོག་བཅད་པ་དང་། དབང་པོ་ཉམས་པར་བགྱི་བ་དང་། ཡན་ལག་གཏུབ་པ་མ་གཏོགས་པར་བྱམས་པའི་སེམས་དང་སྙིང་རྗེའི་སེམས་སུ་བགྱིས་ཏེ་བཅིང་བ་དང་། གོ་རར་སྩལ་བ་དང་། བརྡེག་པ་དང་། བསྡིགས་པ་དང་། སྤྱོ་བ་དང་། བརྒྱད་བཀག་པ་དང་།
གནས་ནས་བཀར་བ་དང་། ལོངས་སྤྱོད་འཕྲོག་པ་ལ་སོགས་པ་བརླང་བའི་རྣམ་པ་རྣམས་ཀྱིས་བརླང་བར་བགྱིད་ཀྱང་། དེ་སེམས་ཅན་དེ་དག་ལ་གཏང་བའི་སེམས་སམ་གནོད་པར་བགྱི་བའི་སེམས་མི་འབྱུང་སྟེ། གཞན་དུ་ན་ཉེས་པ་བཟློག་པ་ཉིད་ཀྱི་ཆེད་དུ་བགྱིས་ཏེ། དེ་མ་
ལགས་པ་གཞན་རྗེས་སུ་བསླབ་པ་དང་། ཉེས་པ་མ་བྱུང་བ་རྣམས་མི་འབྱུང་བར་བྱའོ་སྙམ་སྟེ། བརླང་བར་བགྱིད་དོ། །སྨྲས་པ། བྲམ་ཟེ་མི་སྲུན་པ་དེ་དག་ཇི་ལྟ་བུ་ཡིན་པར་ཤེས་པར་བྱ། སྨྲས་པ། རྒྱལ་པོ་ཆེན་པོ་མདོར་ན་མི་སྲུན་པ་ནི་རྣམ་པ་ལྔར་མཁྱེན་པར་བགྱི་སྟེ། རྒྱལ་པོ་
ལ་གནོད་པ་བགྱིད་པ་དང་། གཅིག་ལ་གཅིག་གནོད་པར་བགྱིད་པ་དང་། བཀའ་མི་ཉན་པ་དང་། ལོག་པས་འཚོ་བ་དང་། ལོག་པར་ཞུགས་པ་ལགས་སོ། །དེ་ལ་རྒྱལ་པོ་ལ་གནོད་པ་བགྱིད་པ་ནི་འགུམས་པ་དང་། འགུམས་སུ་སྩོལ་བ་དང་། དུག་སྩོལ་བ་དང་། ཕྱག་མཛོད་
རྐུ་བ་དང་། དོན་མ་རུང་བར་བགྱིད་པ་དང་། བཙུན་མོ་འདྲིད་པ་དང་། བཀའ་ལྟར་མི་བགྱིད་པ་དང་། གསང་མི་ཐུབ་པ་དང་། ཁམས་ཀྱི་དཀྲུགས་མ་བགྱིད་པ་དང་། ཁ་རྒོད་མཆི་བ་དང་། ཁ་ཕྱར་གཏོང་བ་དང་། དེ་ལྟ་བུ་ལ་སོགས་པ་དག་ནི་རྒྱལ་པོ་ཆེན་པོ་རྒྱལ་པོ་ལ་གནོད་

པ་བགྱིད་པ་ལགས་པར་མཁྱེན་པར་བགྱིའོ། །དེ་ལ་གཅིག་ལ་གཅིག་གནོད་པར་བགྱིད་པ་ནི་སེམས་ཅན་འདི་དག་གཅིག་ལ་གཅིག་སྲོག་ལ་རྒལ་བའམ། ལོངས་སྤྱོད་འཕྲོག་པའམ། མཆིས་བྲང་ལ་བྱི་བ་བགྱིད་པའམ། སྒྱུའི་དབང་གིས་ཕ་རོལ་སླུ་བའམ། མཛའ་
བ་འབྱེད་པའམ། ངག་མི་སྙན་པས་འཐབ་པའམ། ལས་དང་། སྲང་དང་ཚད་སྒྱུ་མས་གཞན་འདྲིད་པའམ། གཅིག་ལ་གཅིག་མི་སྙན་པར་བརྗོད་པའམ། རྒྱལ་པོ་ཆེན་པོ་དེ་ལྟ་བུ་ལ་སོགས་པ་དག་ནི་གཅིག་ལ་གཅིག་གནོད་པ་བགྱིད་པ་ལགས་པར་མཁྱེན་པར་བགྱིའོ། །དེ་ལ་བཀའ་
མི་ཉན་པ་ནི་རྒྱལ་པོ་ཆེན་པོ་ལ་རྟེན་པའི་ཁམས་ཀྱི་རྒྱལ་ཕྲན་དང་། རྒྱལ་པོའི་བཀའ་ལྟར་མི་བགྱིད་པ་སྟེ། རྒྱལ་པོ་ཆེན་པོ་དེ་ལྟ་བུ་ལ་སོགས་པ་དག་ནི་བཀའ་མི་ཉན་པ་ལགས་པར་མཁྱེན་པར་བགྱིའོ། །དེ་ལ་ལོག་པས་འཚོ་བ་ནི་སེམས་ཅན་གང་དག་སྡོམ་པ་མ་མཆིས་པ་སྟེ་དེ་དག་ཀྱང་
ཤན་པ་དང་བྱ་པ་དང་ཕག་འཚོང་དང་། དེ་ལྟ་བུ་ལ་སོགས་པ་དག་ལགས་པར་མཁྱེན་པར་བགྱིའོ། །དེ་ལ་ལོག་པར་ཞུགས་པ་ནི་སེམས་ཅན་གང་དག་ལོངས་སྤྱོད་ལས་ཕྱིར་ལོག་སྟེ་མཚན་མ་ཅན་དུ་གྱུར་པ་རྣམས་ཚུལ་ཁྲིམས་ཉམས་པ་དང་ལྟ་བ་ཉམས་པ་དང་ཆོ་ག་ཉམས་པ་དང་འཚོ་བ་
ཉམས་པར་གྱུར་ཅིང་རང་རང་གི་ཆོས་ཡོངས་སུ་བཟུང་བ་རྣམས་ལ་མི་གནས་པ་ལགས་ཏེ་དེ་དག་ནི་རྒྱལ་པོ་ཆེན་པོ་ལོག་པར་ཞུགས་པ་ལགས་པར་མཁྱེན་པར་བགྱིའོ། །སྨྲས་པ། བྲམ་ཟེ་རྣམ་པ་གང་གིས་ཇི་ལྟར་ན་ཆོས་དང་ལྡན་པའི་རྒྱལ་པོས་རྒྱལ་པོ་ལ་གནོད་པ་བྱེད་པའི་མི་སྲུན་པ་རྣམས་
ཆད་པས་བཅད་པར་བྱ། སྨྲས་པ། རྒྱལ་པོ་ཆེན་པོ་དེ་ནི་སྐྱོན་བརྗོད་པས་དགག་པའམ། ལོངས་སྤྱོད་དབྲོག་པས་དགག་པའམ། བཅིང་བ་དང་བསྐྲད་པ་དང་སྨད་པས་དགག་པར་བགྱིའོ། །སྨྲས་པ། གཅིག་ལ་གཅིག་གནོད་པར་བྱེད་པ་ལ་ཇི་ལྟར་ནན་ཏན་དུ་བྱ། སྨྲས་པ། རྒྱལ་པོ་
ཆེན་པོ་བསྡིགས་པ་དང་གནོད་པར་བགྱི་བ་དང་། བརྡེག་པ་དང་། གོ་རར་སྩལ་བ་དང་། སྤྱོ་བ་དང་། ཆད་པས་བཅད་པས་བཟློག་པར་བགྱིའོ། །སྨྲས་པ། བཀའ་མི་ཉན་པ་རྣམས་ལ་ཇི་ལྟར་ནན་ཏན་དུ་བྱ། སྨྲས་པ། ཟིལ་གྱིས་མནན་ཏེ་དབང་དུ་བསྒྱུར་བ་ལ་རང་རང་གི་རིས་

ནས་བསྐྱོད་པར་མི་བགྱི་བས་བཟློག་པར་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་འདི་ལྟར་དེ་དག་རང་རང་གི་རིས་ནས་བསྐྱོད་པར་མ་བགྱིས་ན་རྒྱལ་པོའི་བཀའ་དྲིན་གཟོ་ཞིང་འཇིགས་པས་བཀའ་ཉན་པར་འགྱུར་ཏེ། གཞན་བཀའ་མི་ཉན་པའི་སྐབས་ཀྱང་ཡོངས་སུ་ཆད་པར་
འགྱུར་ཞིང་ཕྱག་མི་འཚལ་བ་རྣམས་ཀྱང་ཕྱག་འཚལ་བར་འགྱུར་ཕྱོགས་དང་ཕྱོགས་མཚམས་རྣམས་སུ་ཡང་སྙན་པར་གྲགས་པའི་སྒྲ་དང་ཚིགས་སུ་བཅད་པ་འབྱུང་བར་འགྱུར་ཞིང་གཞི་དེ་ལས་བསོད་ནམས་ཀྱང་མང་དུ་འཕེལ་བའི་སླད་དུའོ། །སྨྲས་པ། ལོག་པར་འཚོ་བ་རྣམས་ལ་ཇི་
ལྟར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་བསྡིགས་ཤིང་ད་ཕན་ཆད་གལ་ཏེ་དེ་ལྟར་བྱེད་ན་ཆད་པ་འདི་དང་འདིས་བཅད་དོ་ཞེས་འཇིགས་པ་བསྟན་པས་དགག་པར་བགྱིའོ། །སྨྲས་པ། ལོག་པར་ཞུགས་པ་རྣམས་ལ་ཇི་ལྟར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་ཡང་དག་
པའི་གཉེན་པོའི་ཕྱོགས་ལ་གཟུད་པས་བཟློག་པར་བགྱིའོ། །རྒྱལ་པོ་ཆེན་པོ་གལ་ཏེ་གང་ཟག་ཚུལ་ཁྲིམས་ཉམས་པའམ། ལྟ་བ་ཉམས་པའམ། ཆོ་ག་ཉམས་པའམ། འཚོ་བ་ཉམས་པ་ཞིག་དགེ་འདུན་འཐུན་པས་སྦྱངས་ཏེ་བརྟགས་ནས་བསྐྲད་པར་བགྱིས་པའམ། རང་
གིས་ཁས་བླངས་པ་ལས་དགེ་འདུན་གྱིས་བསྐྲད་པར་མི་ནུས་ན། དེ་ལ་ཆོས་དང་ལྡན་པའི་རྒྱལ་པོས་ཡང་དག་པ་ལ་ཡང་དག་པར་རྟོགས་པར་བགྱིས་ཏེ། བཙུན་པའི་ཕྱོགས་ཀྱི་གྲོགས་བགྱིའོ། །གལ་ཏེ་དགེ་འདུན་གཉིས་མི་འཐུན་པའི་རྩོད་པར་གྱུར་ཏེ། ཚུལ་ཁྲིམས་ཉམས་
པའམ། ཆོ་ག་ཉམས་པའམ། ལྟ་བ་ཉམས་པའམ། འཚོ་བ་ཉམས་པ་ལས་བརྩམས་ནས་ཡུས་རྟོད་ཅིང་རྩད་པ་ཞིག་ཏུ་གྱུར་ན། དེ་ལ་ཆོས་དང་ལྡན་པའི་རྒྱལ་པོས་བདག་ཉིད་ཆོས་ཀྱི་དོན་ལ་མཁས་སམ། མི་མཁས་ཀྱང་རུང་སྟེ། རིས་དེ་ན་ཡ་རབས་སུ་བཏུ་བའི་དགེ་སྦྱོང་
ངམ། བྲམ་ཟེ་ཆོས་ཀྱི་དོན་ལ་མཁས་པ་མཆིས་པ་དེ་དག་བསྡུས་ཏེ་རྩོད་པ་དེ་སྦྱང་བར་བགྱིའོ། །དེ་ལྟར་སྦྱངས་ནས་དེ་ལ་གང་རིགས་པར་སྨྲ་བ་དེའི་ཕྱོགས་ཀྱི་གྲོགས་བགྱི་ཞིང་བསྐྲད་པའམ་ལོག་པ་ལ་བརྩོན་པ་བཟློག་པའི་སླད་དུ་བསྟང་བར་བགྱིའོ། །སྨྲས་པ། བྲམ་ཟེ་

རྒྱལ་པོ་ཉིད་མི་སྲུན་པ་ཞིག་ཏུ་གྱུར་ན་དེ་ལ་སུས་ཆད་པས་བཅད་པར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་རྒྱལ་པོ་དེ་ཉིད་ཀྱིས་སོ། །གལ་ཏེ་རྒྱལ་པོ་བག་མ་མཆིས་པར་གྱུར་ཏམ། སྙིང་རྗེ་མ་མཆིས་པར་གྱུར་ན་དེའི་སླད་དུ་དེས་ཤེས་རབ་ཀྱི་སྟོབས་ལ་བརྟེན་
ཏེ་མི་སྙན་པར་འགྱུར་བའི་འཇིགས་པ་དང་། ངན་སོང་གི་འཇིགས་པ་དང་། ཆོས་གཉིས་པོ་འདི་དག་གིས་བག་མ་མཆིས་པ་དང་སྙིང་རྗེ་མ་མཆིས་པ་ལས་བདག་ཉིད་བཟློག་པར་བགྱིའོ། །རྒྱལ་པོ་ཆེན་པོ་ཆོས་དང་ལྡན་པའི་རྒྱལ་པོས་ནི་རང་གི་རིས་ན་ཡ་རབས་སུ་བཏུ་བའི་དགེ་
སྦྱོང་དང་བྲམ་ཟེ་མཁས་པ། གསལ་བ་རིག་པ་དང་ལྡན་པ་དེ་དག་གི་དྲུང་དུ་མཆི་ཞིང་དུས་དུས་སུ་དགེ་བ་ནི་གང་མི་དགེ་བ་ནི་གང་ཅི་བྱས་ན་ལེགས་པར་འགྱུར། ཅི་བྱས་ན་སྡིག་པར་མི་འགྱུར་ཞེས་དྲི་བར་བགྱི་ཞིང་དེ་དག་ཆོས་སྟོན་པར་འགྱུར་བའི་སྐབས་དབྱེ་བར་བགྱིའོ། །དེ་དག་གིས་
ཀྱང་དེ་ལ་རྒྱལ་པོའི་ཚུལ་རྙིང་དག་བསྟན་པར་བགྱི་སྟེ། སྐབས་ཕྱེ་ན་ཚིག་གི་ཚུལ་འཇམ་པོས་སྐྱོན་བརྗོད་པར་བགྱི་སྟེ། དེ་ལྟར་ན་དེས་འདི་ལྟ་སྟེ་ནང་གི་སྟོབས་སམ། ཕྱི་རོལ་གྱི་སྟོབས་ལ་བརྟེན་ཅིང་བདག་ཉིད་མི་སྲུན་པ་ལས་ལེགས་པར་ཆད་པས་བཅད་པར་འགྱུར་རོ། །སྨྲས་པ།
བྲམ་ཟེ་སྣོད་ཀྱི་འཇིག་རྟེན་གྱིས་ཡོངས་སུ་ཟིན་པའི་སྐྱེ་དགུ་ཆོས་དང་ལྡན་པའི་རྒྱལ་པོས་ཇི་ལྟར་བསྲུང་བར་བྱ། སྨྲས་པ། རྒྱལ་པོ་ཆེན་པོ་མི་སྲེག །མི་གཞིག་པ་ལ་སོགས་པས་བགྱིས་ཏེ། འདི་ལྟར་རྒྱལ་པོ་ཁྲོ་བའི་གནས་ལ་ཁྲོས་ཀྱང་གྲོང་བསྲེག་པའམ། གྲོང་ཁྱེར་བསྲེག་པའམ།
རྫིང་དྲལ་བའམ། གནས་གཞིག་པའམ། བཟའ་ཤིང་བཅད་པའམ། ལོ་གཞོམ་པའམ། གང་ཅི་ཡང་རུང་སྟེ་ལེགས་པར་བཤམས་པ། ལེགས་པར་བསྒྲུབས་པ། ལེགས་པར་བྲེས་པའི་སའི་ཕྱོགས་ཉམས་དགའ་བ་དེ་དང་དེ་དག་གཞིག་པར་བགྱི་བར་མི་རིགས་སོ། །དེ་ཅིའི་སླད་
དུ་ཞེ་ན་འདི་ལྟར་དངོས་པོ་དེ་དག་ནི་དེ་མ་ལགས་པའི་སེམས་ཅན་གཞན་དག་དང་ཐུན་མོང་གི་ཉེ་བར་འཚོ་བ་ལགས་ཏེ། དེ་དག་གིས་ནོངས་པར་མ་བགྱིས་པའི་སླད་དུའོ། །རྒྱལ་པོ་ཆེན་པོ་འདི་ལྟར་དངོས་པོ་དེ་དག་ལ་ཁྱིམ་དང་གཙུག་ལག་ཁང་དང་། མཆོད་རྟེན་དང་བཟའ་ཤིང་ར་བ་ལ་

སོགས་པ་སོ་སོའི་ལྷ་གནས་པ་དེ་དག་ཀྱང་དེ་ལྟར་བཤིག་ན་མི་དགའ་བར་འགྱུར་ལགས་སོ། །རྒྱལ་པོ་ཆེན་པོ་འདི་ལྟར་དངོས་པོ་དེ་དག་ལ་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་སྣ་ཚོགས་དག་ཀྱང་གནས་ཏེ། དེ་དག་གིས་ཀྱང་ནོངས་པ་མ་བགྱིས་ན་གནོད་པ་མི་བགྱིད་པ་ཀུན་ཀྱང་
ཆུད་གཟན་པར་འགྱུར་རོ། །དེ་ལྟ་ལགས་པས་ན་ཆོས་དང་ལྡན་པའི་རྒྱལ་པོས་སྣོད་ཀྱི་འཇིག་རྟེན་གྱིས་ཡོངས་སུ་ཟིན་པའི་སྐྱེ་དགུ་རྣམས་ཕུང་པར་མི་བགྱིའོ། །དེ་ལྟར་ཕུང་པར་མ་བགྱིས་ན་ཡོངས་སུ་བསྐྱངས་པ་ལགས་ཏེ། དེ་ཡོངས་སུ་བསྐྱངས་པས་སེམས་ཅན་རྣམས་ལ་ཡང་
སྨན་པར་བགྱིས་པར་འགྱུར་རོ། །སྨྲས་པ། བྲམ་ཟེ་རྒྱལ་པོའི་ཁམས་ན་ལྷ་གང་དག་གནས་པ་དེ་དག་ཆོས་དང་ལྡན་པའི་རྒྱལ་པོས་ཇི་ལྟར་བསྐྱང་བར་བྱ། སྨྲས་པ། རྒྱལ་པོ་ཆེན་པོ་ཡང་དག་པའི་གཏོར་མ་བཤམས་ཏེ་བསྩལ་བར་བགྱིའོ། །དེ་ལྟར་ན་ཆོས་དང་ལྡན་པའི་རྒྱལ་པོས་སྐྱེ་
དགུ་ཐམས་ཅད་བསྐྱངས་པར་འགྱུར་རོ། །མི་སྲུན་པ་ཐམས་ཅད་ཀྱང་ཆད་པས་གཅད་པར་འགྱུར་རོ། །ཁ་ན་མ་ཐོ་བ་ཡང་མ་མཆིས་པར་འགྱུར་རོ། །གཞི་དེ་ལས་ཚེ་སླད་མ་པའི་བསོད་ནམས་ཀྱང་མང་དུ་འཕེལ་ལགས་སོ། །སྨྲས་པ། བྲམ་ཟེ་རྒྱལ་པོ་ཆོས་དང་ལྡན་པའི་ཁམས་
ན་ཕ་དང་མ་རྒས་པ་ལ་མ་གུས་ཤིང་ཕར་མི་ཤེས་པ་དང་། མར་མི་ཤེས་པ་དང་། བུ་དང་། ཆུང་མ་དང་། བྲན་དང་། བྲན་མོ་དང་། ལས་བྱེད་པའམ་ཞོ་ཤས་འཚོ་བ་དག་ལ་ལེགས་པར་བགོ་བཤའ་མི་བྱེད་ཅིང་། ལས་ཆེན་པོ་དང་ལས་ངན་པས་ཤིན་ཏུ་སྙོན་སྨོངས་པར་བྱེད་པ་དེ་དག་མི་སྲུན་
པའི་ཕྱོགས་གང་གི་ནང་དུ་བགྲང་བར་བྱ། སྨྲས་པ། རྒྱལ་པོ་ཆེན་པོ་ལོག་པར་འཚོ་བའི་ཕྱོགས་མི་སྲུན་པའི་ནང་དུའོ། །དེ་ཅིའི་སླད་དུ་ཞེ་ན། འདི་ལྟ་སྟེ། ཕན་འདོགས་པའི་སེམས་ཅན་རྣམས་ལ་སྦྱིན་པར་བགྱི་བའི་ཆོས་བགོ་བཤའ་བགྱི་བར་འོས་པ་དག་ལ། བགོ་བཤའ་མི་
བགྱིད་ཅིང་གཅིག་ཏུ་སྤྱོད་པ་འདི་ནི་ལོག་པས་འཚོ་བ་ཆེན་པོ་ལགས་པའི་སླད་དུའོ། །སྨྲས་པ། བྲམ་ཟེ་སློང་བའི་དགེ་སློང་དང་བྲམ་ཟེ་འོང་ཞིང་འདུ་བ་དག་གི་མདུན་ནས་མི་རིགས་ཤིང་བརླང་བའི་ཚིག་གིས་མི་སྙན་པར་བརྗོད་པ་དང་། གཤེ་བ་དང་བརྒྱད་བཀག་པ་དང་ཆེད་དུ་བོས་ཤིང་

ཟན་གཅོད་པའམ། ཆོས་དང་འགལ་བའི་ཁ་ཟས་སྟོབས་པའམ། དབྱུག་པའམ་རྡོས་འཚོག་པའམ། ལག་པས་བརྡེག་པའམ། མཚོན་གྱིས་འདེབས་པ་དེ་དག་མི་སྲུན་པའི་ཕྱོགས་གང་གི་ནང་དུ་བགྲང་བར་བྱ། སྨྲས་པ། རྒྱལ་པོ་ཆེན་པོ་ལོག་པར་ཞུགས་པའི་མི་སྲུན་པའི་
ཕྱོགས་སུའོ། །དེ་ཅིའི་སླད་དུ་ཞེ་ན། རིམ་གྲོ་བགྱི་བའི་འོས་རྣམས་ལ་རིམ་གྲོ་མི་བགྱིད་པ་ནི་ལོག་པར་ཞུགས་པ་ཆེན་པོ་ལགས་པའི་སླད་དུ་སྟེ། རྒྱལ་པོ་ཆེན་པོ་ལོག་པར་ཞུགས་པ་དེ་ལྟ་བུས་ནི་ལྷ་རྣམས་ཀྱང་དུས་སུ་ཆར་གྱི་རྒྱུན་ལེགས་པར་མི་འབེབས་ཏེ། དེས་མུ་གེའི་དགོན་པ་ཉམ་ང་བར་
འགྱུར་ཞིང་མི་མ་ལགས་པ་རྣམས་ཀྱང་ཡམས་ཀྱི་ནད་དང་། གནོད་པ་དང་། འགོ་བའི་ནད་གཏོང་བར་འགྱུར་ཏེ། དེས་སེམས་ཅན་རྣམས་ཡམས་ཀྱི་ནད་ཅན། གནོད་པ་ཅན། ནད་འགོ་བ་ཅན་དུ་འགྱུར་ཞིང་ཚེ་ཡང་ཡོངས་སུ་འབྲི། ལོངས་སྤྱོད་ཀྱང་ཡོངས་སུ་འབྲི། ནད་མེད་པ་ཡང་ཡོངས་སུ་
འབྲི་བར་འགྱུར་རོ། །སྨྲས་པ། བྲམ་ཟེ་རྒྱལ་པོ་ཉོན་མོངས་པ་ཅན་གྱི་སེམས་དང་ལྡན་པས་ཅིའི་ཕྱིར་དབང་པོ་དང་ཡན་ལག་གཏུབ་ཅིང་ཉམས་པར་བྱ་བ་དང་། སེམས་ཅན་བསད་པར་མི་བྱ་བ་ཡིན། སྨྲས་པ། རྒྱལ་པོ་ཆེན་པོ་རྒྱལ་པོ་ཉོན་མོངས་པ་ཅན་གྱི་སེམས་དང་ལྡན་པ་ཡང་གཡོན་ལ་
གནས་པ་སྲོག་གཅད་པའམ། དབང་པོ་དང་ཡན་ལག་དང་ཉིང་ལག་དང་དབྲལ་བར་མི་སེམས་ཏེ། དེ་ཅིའི་སླད་དུ་ཞེ་ན། འདི་ལྟར་དེས་རང་གི་ལས་ཀྱི་དབང་གིས་འཆི་ན་ཡང་ཁོང་ཁྲོ་བའི་སེམས་བསྐྱེད་དེ་དུས་བགྱིས་ན་ངན་སོང་རྣམས་སུ་སྐྱེ་བར་འགྱུར་བ་དང་། ཡུན་རིང་པོར་རྗེས་སུ་འབྲང་བའི་
ཤ་ཁོན་དུ་འགྱུར་བ་མཐོང་བས་དེའི་སླད་དུ་སེམས་ཅན་དགུམ་པར་མ་བརྗོད་དེ། དབང་པོ་དང་། ཡན་ལག་དང་ཉིང་ལག་རྣམས་ཀྱང་ཕྱིར་གླན་དུ་མི་རུང་བས་དེའི་སླད་དུ་དེ་དག་གཏུབ་ཅིང་ཉམས་པར་བགྱི་བ་རུང་བར་མ་བརྗོད་ལགས་སོ། །རྒྱལ་པོ་ཆེན་པོ་བཅིང་བ་དང་། གོ་རར་སྩལ་བ་ལ་
སོགས་པ་ནི་བཅོས་སུ་རུང་བས་ན་དེའི་སླད་དུ་རུང་བར་བརྗོད་དོ། །རྒྱལ་པོ་ནི་སྐྱེ་དགུ་ཐམས་ཅད་ཡོངས་སུ་སྐྱོང་བ་ལགས་ན། དེ་ལྟར་བགྱིས་ན་དེ་ཉིད་མ་བསྐྱངས་པར་འགྱུར་བས། དེའི་སླད་དུ། རྒྱལ་པོས་སྐྱེ་དགུ་ཡོངས་སུ་བསྐྱང་བ་ཡང་རྫོགས་པར་མ་བགྱིས་པར་འགྱུར་ཏེ། རྒྱལ་པོ་ཆེན་

པོ་འདི་ལྟ་སྟེ། དགུམ་པ་དང་། དབང་པོ་དང་། ཡན་ལག་དང་། ཉིང་ལག་གཏུབ་ཅིང་ཉམས་པར་བགྱི་བ་ནི་སྐྱེ་དགུ་མ་འོས་པར་སྐྱོ་བར་འགྱུར་བའི་གནས་ལགས་ཏེ། དེ་ནི་ཆོས་དང་ལྡན་པའི་རྒྱལ་པོས་བགྱི་བ་མ་ལགས་སོ། །སྨྲས་པ། བྲམ་ཟེ་རྒྱལ་པོའི་ཁམས་ན་ལོངས་སྤྱོད་ཀྱི་འབྲས་བུ་
འདུ་བ་ཡོད་པ་དེ་དག་རྒྱལ་པོ་རང་གི་ཡིན་ཞེས་བྱའམ། གཞན་གྱི་ཡིན་ཞེས་བྱ། སྨྲས་པ། རྒྱལ་པོ་ཆེན་པོ་དེ་ནི་རང་གི་ཡང་མ་ལགས། གཞན་གྱི་ཡང་མ་ལགས་སོ། །དེ་ཅིའི་སླད་དུ་ཞེ་ན། གཞན་དག་ནི་རང་གི་ལག་མཐུས་བསྒྲུབས་པས་ན་རང་གི་མ་ལགས་སོ། །རྒྱལ་པོས་
ཡོངས་སུ་བསྲུངས་ཤིང་དེ་དག་གིས་ཀྱང་དེ་མངའ་བར་བཏགས་པས་གཞན་གྱི་མ་ལགས་སོ། །སྨྲས་པ། བྲམ་ཟེ་གལ་ཏེ་སྐྱེ་དགུ་ལ་ལོངས་སྤྱོད་ཡོད་བཞིན་དུ་ལོངས་སྤྱོད་ཀྱི་རྒྱུ་དཔྱ་དབུལ་བའི་རིགས་པ་རྒྱལ་པོ་ལ་དབུལ་དུ་མི་བཏུབ་ན། དེས་དེ་དག་གི་མ་བྱིན་པར་ལེན་པར་འགྱུར་ཞེས་བྱའམ་
མི་བྱ། སྨྲས་པ། རྒྱལ་པོ་ཆེན་པོ་དེ་ནི་མི་འགྱུར་ཏེ། གལ་ཏེ་ལོངས་སྤྱོད་མཆིས་བཞིན་མ་སྟེར་ན་སེར་སྣ་ལས་བྱུང་བའི་ཁ་ན་མ་ཐོ་བ་དང་བསོད་ནམས་མ་ལགས་པ་ནི་ཆེར་འཕེལ་ལོ། །སྨྲས་པ། བྲམ་ཟེ་གལ་ཏེ་ལོངས་སྤྱོད་ཡོད་བཞིན་དུ་ལོངས་སྤྱོད་ཀྱི་རྒྱུ་དཔྱ་དབུལ་བའི་རིགས་པ་འབུལ་
དུ་མི་བཏུབ་པ་ལ་རྒྱལ་པོས་ནན་གྱིས་མནན་ཏེ་དབུལ་དུ་བཅུག་ན་དེས་དེའི་མ་བྱིན་པར་ལེན་པ་ཞེས་བྱའམ་མི་བྱ། སྨྲས་པ། རྒྱལ་པོ་ཆེན་པོ་དེ་ནི་གླ་རྔན་བསྒྲུབ་པའི་དཔེའི་ཚུལ་གྱིས་མ་བྱིན་པར་ལེན་པ་ཞེས་མི་བགྱིའོ། །སྨྲས་པ། བྲམ་ཟེ་གལ་ཏེ་རྒྱལ་པོས་དབུལ་པོ་ཞིག་ནན་གྱིས་མནན་
ཏེ། ལོངས་སྤྱོད་ཀྱི་རྒྱུ་དཔྱ་དབུལ་བའི་རིགས་པ་དབུལ་དུ་བཅུག་ན་དེ་ཁ་ན་མ་ཐོ་བ་ཞེས་བྱའམ་མི་བྱ། སྨྲས་པ། རྒྱལ་པོ་ཆེན་པོ་དེ་ལ་ལར་ནི་ཁ་ན་མ་ཐོ་བར་འགྱུར། དེ་ལ་ལར་ནི་ཁ་ན་མ་ཐོ་བར་མི་འགྱུར་ལགས་སོ། །རྒྱལ་པོ་ཆེན་པོ་དེ་ལ་གལ་ཏེ་མི་དེས་ལོངས་སྤྱོད་དེ་དག་སྨད་འཚོང་
ལ་ཞུགས་པའམ། བརྒྱན་པོ་ལ་ཞུགས་པའམ། ཆུད་གསན་པའམ། ལོག་པར་སྤྱད་པ་སྤྱོད་པ་ཞིག་ཏུ་གྱུར་ལ། དེ་ལ་རྒྱལ་པོས་དེ་ལྟ་བུའི་སེམས་ཀྱིས་སླད་ཀྱིས་ཤས་སླར་སྩལ་བའི་ཤགས་མཆིས་པར་བགྱིས་ལ་ནན་གྱིས་འབུལ་དུ་སྩལ་བས། གལ་ཏེ་ཕྱིན་ཆད་ཚུལ་

མ་ལགས་པས་ལོངས་སྤྱོད་ཆུད་མི་གསོན་ན་རྒྱལ་པོས་གཉིས་ཀའི་དོན་བགྱིས་པར་འགྱུར་ཏེ། བདག་གི་དཀོར་འཕེལ་བའི་དོན་དང་། གཞན་རྒུད་པར་འགྱུར་བ་ལས་གཟུང་བའི་དོན་བགྱིས་པར་འགྱུར་རོ། །གལ་ཏེ་མི་དེའི་ལོངས་སྤྱོད་དེ་དག་ཞུགས་ཀྱིས་དྲལ་ཏམ། ཆབ་ཀྱིས་
འཚལ་ཏམ། བགོ་སྐལ་ལ་སྤྱོད་པ་མི་མཛའ་བ་དག་གིས་ཕྲོགས་སམ། རྐུན་པོས་བརྐུས་སམ། སྦས་པ་ལས་རུལ་ཏམ། ལོ་ཏོག་སེར་བས་ཁྱེར་རམ། བྱེ་བ་དང་། ནེ་ཙོ་དང་། བྱི་བས་འཚལ་ཏམ། ཆར་མ་བབ་སྟེ་མ་འཁྲུངས་སམ། དེ་དག་ལ་སོགས་པའི་རྣམ་པས་དེའི་ལོངས་སྤྱོད་དག་ཆབ་
འཚལ་བར་གྱུར་ན་ཆོས་དང་ལྡན་པའི་རྒྱལ་པོས་ལོངས་སྤྱོད་ཀྱི་རྒྱུ་དཔྱ་འབུལ་བའི་རིགས་པ་ཡངས་པར་གཞག་པའི་རིགས་ཏེ། དེ་ལྟར་མ་བགྱིས་ན། དེ་མ་བསྐྱངས་པའི་སླད་དུ་ཁ་ན་མ་ཐོ་བར་འགྱུར་ལགས་སོ། །རྒྱལ་པོ་ཆེན་པོ་འདི་ལྟ་སྟེ། དཔེར་བགྱི་ན་སྐྱེས་བུ་ལ་ལ་ཞིག་གིས་
སློང་བའི་དགེ་སྦྱོང་དང་བྲམ་ཟེ་དག་གཅིག་ཟས་ལ་བོས་པ་ལས། དེ་ནས་དེའི་དུས་ལ་བབ་པ་དང་། ཟས་སྦྱར་སྦྱར་བ་དེ་ཆབ་འཚལ་བར་གྱུར་ཏེ། མི་གཙང་བའི་ནང་དུ་ལྷུང་ངམ། ཞུགས་ཀྱིས་དྲལ་ཏམ། གསེག་མ་དང་། རྡུལ་དང་། ཆར་པས་ཆབ་འཚལ་བར་གྱུར་ཏམ། རྐུན་པོས་
འཚལ་བ་ཞིག་ཏུ་གྱུར་ཏེ། དེས་དེའི་སླད་དུ་དེའི་དུས་སུ་མཆིས་པའི་དགེ་སྦྱོང་དང་བྲམ་ཟེ་དག་ཟས་མ་སྩལ་ན། དེ་ནི་དེ་ལྟར་བཟར་མི་རུང་བའམ། བཟར་མ་མཆིས་པར་གྱུར་ཏེ། དགེ་སྦྱོང་དང་། བྲམ་ཟེ་ལ་དབུལ་བར་དགའ་ཡང་ཆ་མ་ལགས་པར་འགྱུར་བས། དེ་ལྟར་མ་སྩལ་བའི་
སླད་དུ་ཁ་ན་མ་ཐོ་བ་དང་བཅས་པར་མི་འགྱུར་ཏེ། རྒྱལ་པོ་ཆེན་པོ་དེ་ཡང་། ཚུལ་འདི་འདྲ་བར་གཟིགས་པར་བགྱིའོ། །སྨྲས་པ། བྲམ་ཟེ་དེ་ལྟར་བག་ཡོད་ཅིང་སྙིང་རྗེ་དང་ལྡན་པའི་ཆོས་ཀྱི་རྒྱལ་པོ་དེ་ལྟ་བུ་ཡན་ལག་དུ་ཞིག་གིས་རྣམ་པ་ཐམས་ཅད་ཡོངས་སུ་རྫོགས་པའི་རྒྱལ་པོའི་
ཆོས་དང་ལྡན་པར་འགྱུར། སྨྲས་པ། རྒྱལ་པོ་ཆེན་པོ་རྣམ་པ་བཅུས་ཏེ། གནམ་གྱིས་བསྐོས་པ་ཕུན་སུམ་ཚོགས་པ་དང་། འཁོར་སྲུན་པ་དང་། ཤེས་རབ་ཕུན་སུམ་ཚོགས་པ་དང་། བརྩོན་པ་དང་། ཆོས་ལ་གུས་པ་དང་མཁས་པ་དང་། དེས་པ་དང་། འཇིག་རྟེན་གྱི་ཀུན་སྤྱོད་

རབ་ཏུ་རིག་པར་སྤྱོད་པ་དང་། མི་བདེ་བ་བཟོད་པ་དང་། ཆོས་ལ་ཕྱིན་ཅི་མ་ལོག་པར་འཛིན་པའོ། །དེ་ལ་གནམ་གྱིས་བསྐོས་པ་ཕུན་སུམ་ཚོགས་པའི་རྒྱལ་པོ་ནི་བློན་པོ་དང་། བཀྲབས་པ་དང་། མདའ་ར་བའི་མཆོག་དང་། གྲོང་རྡལ་གྱི་མི་དང་། ཡུལ་གྱི་མི་རྣམས་ལ་དབེན་ཅིང་གནོད་པ་ཆུང་
བ་དང་། ནད་མ་མཆིས་པའི་རང་བཞིན་ཅན་ནོ། །འཁོར་སྲུན་པ་དང་ལྡན་པའི་རྒྱལ་པོ་ནི་རྒྱལ་པོའི་བགྱི་བ་ལ་ཚེགས་ཆུང་ངུར་རྟག་ཏུ་བདེ་བར་གནས་ལ། རྒྱལ་པོའི་ཚུལ་ལས་མི་ཉམས་པའོ། །ཤེས་རབ་ཕུན་སུམ་ཚོགས་པའི་རྒྱལ་པོ་ནི་ཆོས་ཀྱིས་སྐྱེ་དགུ་བསྐྱངས་པ་ལ་ཐབས་
མཁས་ཤིང་བགྱི་བ་རྣམས་ལ་གཞན་གྱི་དྲིང་མི་འཇོག་པའོ། །བརྩོན་པའི་རྒྱལ་པོ་ནི་དགྲ་མ་མཆིས་པས་དགའ་བར་གནས་ཤིང་མཛོད་འཕེལ་བར་བགྱིད་པའོ། །ཆོས་ལ་གུས་པའི་རྒྱལ་པོ་ནི་བསོད་ནམས་ཀྱི་བགྱི་བ་ཡང་མི་གཏོད་ལ་མི་སྲུན་པ་རྣམས་ཚར་གཅོད་པའོ། །
མཁས་པའི་རྒྱལ་པོ་ནི་བསམ་པ་མྱུར་དུ་རྫོགས་ཤིང་མཐའ་མི་རིང་བས་བགྱི་བ་དག་ལས་མི་ཉམས་པའོ། །དེས་པའི་རྒྱལ་པོ་ནི་སྐྱེ་བོ་ཐམས་ཅད་འཁོར་ཞིང་གྲོང་རྡལ་གྱི་མི་དང་། ཡུལ་གྱི་མི་ཐམས་ཅད་ཀྱིས་ཡིད་བརྟན་དུ་རུང་བའོ། །འཇིག་རྟེན་གྱི་ཀུན་སྤྱོད་རབ་ཏུ་རིག་པར་
སྤྱོད་པའི་རྒྱལ་པོ་ནི་སྲུན་པ་དང་མི་སྲུན་པའི་བྱེ་བྲག་ཀྱང་ཡང་དག་པ་ཇི་ལྟ་བ་བཞིན་དུ་རྟོགས་ལ་ལོངས་སྤྱོད་འདུ་བའི་སྒོ་ཡང་ཆད་པར་མི་བགྱིད་པའོ། །མི་བདེ་བ་བཟོད་པའི་རྒྱལ་པོ་ནི་རྒྱལ་པོའི་བགྱི་བ་ཡང་རྫོགས་པར་སྒྲུབ་ལ་སྡུག་བསྔལ་གྱིས་ཀྱང་མི་འཇིགས་པའོ། །ཆོས་ལ་
ཕྱིན་ཅི་མ་ལོག་པར་འཛིན་པ་ནི་ཁྱད་པར་དུ་འགྲོ་བའི་ལམ་ཡང་སྒྲུབ་ལ་དགེ་བའི་བཤེས་གཉེན་དག་དང་ཡང་མ་བྲལ་བའོ། །རྒྱལ་པོ་ཆེན་པོ་ཡན་ལག་བཅུ་པོ་དེ་དག་དང་ལྡན་པའི་ཆོས་ཀྱི་རྒྱལ་པོ་ནི་རྣམ་པ་ཐམས་ཅད་ཡོངས་སུ་རྫོགས་པའི་རྒྱལ་པོ་ཆོས་དང་ལྡན་པ་ལགས་སོ། །སྨྲས་པ།
བྲམ་ཟེ་རྒྱལ་པོའི་ཆོས་དེ་ལྟར་ཡོངས་སུ་རྫོགས་པ་དང་ལྡན་པའི་ཆོས་ཀྱི་རྒྱལ་པོས་ཐབ་མོའི་གཡུལ་ཞིག་ཉེ་བར་གནས་ན་ཇི་ལྟར་ནན་ཏན་དུ་བྱ། སྨྲས་པ། རྒྱལ་པོ་ཆེན་པོ་དུས་གསུམ་དུ་ཐབས་ལ་མཁས་པའི་རྣམ་པ་གསུམ་གྱིས་ནན་ཏན་དུ་བགྱིའོ། །དེ་ལ་དུས་གསུམ་ནི་ཐོག་མའི་

དུས་དང་། བར་གྱི་དུས་དང་། ཐ་མའི་དུས་སོ། །དེ་ལ་ཐོག་མའི་དུས་ཀྱི་ཐབས་མཁས་པ་ནི་གལ་ཏེ་རྒྱལ་པོའམ། བློན་པོ་མཛའ་བར་བགྱི་བས་འགྲུབ་པར་གདའ་ན་ཡང་མཛའ་བར་བགྱི་བས་ཉེ་བར་བཟུང་སྟེ་ཐབ་མོ་དེ་ཞི་བར་བགྱིའོ། །གལ་ཏེ་
ཕན་གདགས་པ་ཞིག་གིས་འགྲུབ་པར་གདའ་ན་ཡང་ཕན་གདགས་པས་ཉེ་བར་བཟུང་སྟེ་ཐབ་མོ་དེ་ཞི་བར་བགྱིའོ། །གལ་ཏེ་ཕྱོགས་མང་པོ་ཡོངས་སུ་བཟུང་བ་དང་དེ་བས་ལྷག་པའི་དགྲར་འགྱུར་བའི་འཇིགས་པ་ལ་སོགས་པ་བསྟན་པས་འགྲུབ་པར་གདའ་ན་ཡང་། དེ་གཉིས་
བསྟན་པས་ཉེ་བར་བཟུང་སྟེ། ཐབ་མོ་དེ་ཞི་བར་བགྱི་སྟེ། དེ་ལྟར་དུས་དང་པོ་ལ་ཐབས་མཁས་པ་སྦྱར་བར་བགྱིའོ། །གལ་ཏེ་དེ་དག་མཛའ་བར་བགྱི་བ་དང་། ཕན་གདགས་པ་དང་། འཇིགས་པ་བསྟན་པ་གང་གིས་ཀྱང་བསྒོ་སྟེ་མ་བཏུབ་ན་ཆོས་དང་ལྡན་པའི་རྒྱལ་
པོས་སེམས་གསུམ་ཉེ་བར་གཞག་སྟེ་ཐབ་མོ་བགྱིའོ། །གསུམ་གང་ཞེ་ན། བདག་ཆོས་དང་ལྡན་པའི་རྒྱལ་པོ་ཡིན་ན། བདག་གིས་སྐྱེ་དགུ་རྣམས་ཕུང་བར་བྱས་པར་མི་འགྱུར་གྲང་། ཕུང་བར་འགྱུར་བ་ལས་མ་བཟློག་པ་ལྟ་འང་མེད་དམ་ཞེས་དང་པོར་སྐྱེ་དགུ་
ཡོངས་སུ་བསྐྱང་བ་ལ་སེམས་ཉེ་བར་གཞག་པར་བགྱིའོ། །གཉིས་པ་ནི་ཕས་ཀྱི་དགྲ་ལས་རྒྱལ་བར་བགྱི་བའི་སེམས་སོ། །གསུམ་པ་ནི་སྲོག་གཟུང་བའི་སེམས་ཏེ། སེམས་གསུམ་པོ་འདི་དག་ཉེ་བར་གཞག་ལ་དཔུང་གི་ཚོགས་ཡན་ལག་བཞི་པ་ལ་བཀའ་
སྩལ་བར་བགྱི་སྟེ། དེ་ལྟར་དུས་བར་མ་ལ་ཐབས་མཁས་པ་སྦྱར་བར་བགྱིའོ། །དུས་ཐ་མ་ལ་ནི་དཔུང་གི་ཚོགས་ཡན་ལག་བཞི་པ་དེ་དག་དཔའ་བ་ཐ་མ་དང་། དཔའ་བ་འབྲིང་དང་། དཔའ་བ་རབ་ཀྱི་ཚུལ་དུ་གཡུལ་བཤམ་པར་བགྱིའོ། །དེ་ལ་དཔའ་བ་
ཐ་མ་རྣམས་ནི་ཐོག་མར་བཤམ་མོ། །དཔའ་བ་འབྲིང་རྣམས་ནི་དེའི་རྒྱབ་ཏུ་བཤམ་མོ། །རྟ་པའི་ཚོགས་ནི་དེ་གཉིས་ཀའི་རྒྱབ་རྒྱབ་ནས་དགྱེའོ། །རྒྱལ་པོ་བདག་ནི་དེ་དག་བག་དྲོ་ཞིང་བདེ་བར་རྒལ་བ་དང་། རྐང་ཐང་པ་རྣམས་ཡོངས་སུ་བསྲུང་བའི་ཕྱིར་དཔའ་

བའི་རབ་རྣམས་དང་། དེའི་ཕྱི་བཞིན་བསྡད་པར་བགྱིའོ། །དེ་ལྟར་བགྱིས་ན་དེ་དག་ཆུ་གང་དང་། འཇིགས་པ་དང་། སྤྱན་མཉེས་པར་བགྱི་བ་དང་། རྒྱབ་རྣམས་རྣམ་པར་དག་པ་དང་། བྱས་པ་གཟོ་བར་བགྱི་བའི་སླད་དུ་རྔོ་ཅི་ཐོགས་ཀྱིས་རྒོལ་ཞིང་སླར་མི་ལྡོག་
སྟེ། ད་ལྟར་ཐ་མའི་དུས་ལ་ཐབས་མཁས་པ་སྦྱར་བར་བྱའོ། །དེ་ལྟར་ཐབས་མཁས་ཤིང་གཡུལ་ལེགས་པར་ཤོམ་པའི་རྒྱལ་པོས་ནི་ཕ་རོལ་གྱི་དཔུང་བཀུམ་མམ། རྨ་ཕྱུང་ཡང་དེས་རྒྱལ་པོ་ལ་ཁ་ན་མ་ཐོ་བ་ཆུང་ཞིང་བསོད་ནམས་མ་ལགས་པ་ཆུང་
བ་དང་། འབྲས་བུ་མྱོང་བ་ཡང་ངེས་པ་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་དེས་སྙིང་རྗེ་བ་དང་། ཡོངས་སུ་མི་གཏང་བའི་སེམས་ཀྱིས་ལས་དེ་མངོན་པར་འདུ་བགྱིས་པའི་སླད་དུའོ། །གང་དེས་སྐྱེ་དགུ་ཡོངས་སུ་བསྐྱང་བ་དང་། བུ་
དང་ཆུང་མ་དང་། རིགས་ཀྱི་དོན་དུ་བདག་དང་ལོངས་སྤྱོད་ཡོངས་སུ་བཏང་སྟེ་ལས་དེ་བགྱིས་པས། གཞི་དེ་ལས་བསོད་ནམས་ཚད་མ་མཆིས་པ་ཡང་རབ་ཏུ་འཕེལ་ལོ། །རྒྱལ་པོ་ཆེན་པོ་ཐབ་མོའི་གཡུལ་ཞིག་ཉེ་བར་གནས་ན་ཆོས་དང་ལྡན་པའི་རྒྱལ་པོས་
དེ་ལྟར་ནན་ཏན་དུ་བགྱིའོ། །བྲམ་ཟེ་དེ་ལྟར་སྐྱེ་དགུ་ཡོངས་སུ་བསྐྱང་བ་ལ་བརྩོན་པའི་ཆོས་ཀྱི་རྒྱལ་པོས་འདུ་ཤེས་ཀྱིས་གནས་པ་རྣམ་པ་དུ་ཞིག་གིས་གནས་པར་བྱ། སྨྲས་པ། རྒྱལ་པོ་ཆེན་པོ་བརྒྱད་ཀྱིས་ཏེ། སྐྱེ་དགུའི་རིས་སུ་གཏོགས་པའི་སེམས་ཅན་
རྣམས་ལ་བུའི་འདུ་ཤེས་དང་། མི་སྲུན་པའི་རྣམས་ལ་ནད་པའི་འདུ་ཤེས་དང་། སྡུག་བསྔལ་བ་རྣམས་ལ་སྙིང་རྗེའི་འདུ་ཤེས་དང་། བདེ་བ་རྣམས་ལ་དགའ་བའི་འདུ་ཤེས་དང་། དགྲ་རྣམས་ལ་དེའི་རྒྱུས་ཉེས་པའི་འདུ་ཤེས་དང་། མཛའ་བཤེས་
རྣམས་ལ་རྗེས་སུ་བསྲུང་བའི་འདུ་ཤེས་དང་། ལོངས་སྤྱོད་རྣམས་ལ་སྨན་གྱི་འདུ་ཤེས་དང་། བདག་ལ་བདག་མེད་པའི་འདུ་ཤེས་སོ། །དེ་ལ་སྐྱེ་དགུའི་རིས་སུ་གཏོགས་པའི་སེམས་ཅན་རྣམས་ལ་བུའི་འདུ་ཤེས་ཀྱིས་གནས་པ་ནི་རྒྱལ་པོ་དེ་ཕས་བུ་བཅོས་པ་

ལྟར་མི་སྲུན་པ་ཚར་གཅད་པ་ལ་འཇུག་ཀྱང་སྙིང་རྗེའི་བསམ་པ་མི་གཏོང་བའོ། །མི་སྲུན་པ་རྣམས་ལ་ནད་པའི་འདུ་ཤེས་ཀྱིས་གནས་པ་ནི་སྨན་པ་ལྟར་གནོད་པ་ལ་མི་ཁྲོ་ཞིང་སྐྱོན་རབ་ཏུ་བསལ་བའི་སླད་དུ་སྦྱོར་བའོ། །སྡུག་བསྔལ་བ་རྣམས་ལ་སྙིང་རྗེའི་
འདུ་ཤེས་ཀྱིས་གནས་པ་ནི་གནོད་པ་ཐམས་ཅད་ཀྱང་ཡོངས་སུ་སྤོང་བར་བགྱིད་པ་དང་། ཕན་པ་བསྒྲུབ་པའི་སླད་དུ་འཇུག་པའོ། །བདེ་བ་རྣམས་ལ་དགའ་བའི་འདུ་ཤེས་ཀྱིས་གནས་པ་དེ་ནི་གཞན་གྱི་ནོར་དང་། གཞན་གྱི་ཡོ་བྱད་ལ་བརྣབ་སེམས་དང་ཕྲག་དོག་གི་
སེམས་མི་སྐྱེད་པའོ། །དགྲ་རྣམས་ལ་དེའི་རྒྱུས་ཉེས་པའི་འདུ་ཤེས་ཀྱིས་གནས་པ་ནི་དེའི་རྒྱུ་ཡོངས་སུ་སྤོང་ཞིང་སྐྱེ་བོ་གཞན་ལྟ་ཅི་སྨོས་ཀྱི། དགྲ་རྣམས་དང་ཡང་མཛའ་བར་བགྱིད་པའོ། །མཛའ་བཤེས་རྣམས་ལ་རྗེས་སུ་བསྲུང་བའི་འདུ་ཤེས་ཀྱིས་གནས་པ་ནི་མཛའ་
བ་བརྟན་པ་དང་། ཐམས་ཅད་དང་མཛའ་བའོ། །ལོངས་སྤྱོད་རྣམས་ལ་སྨན་གྱི་འདུ་ཤེས་ཀྱིས་གནས་པ་ནི་འདོད་པ་ལ་ལོག་པར་གཡེམ་པས་ཡོངས་སུ་མི་སྤྱོད་ཅིང་ལོངས་སྤྱོད་རྣམས་ལ་མ་ཆགས་པར་ཡོངས་སུ་སྤྱོད་པའོ། །བདག་ལ་བདག་མེད་པའི་འདུ་ཤེས་ཀྱིས་གནས་པ་ནི་
ཆོས་དོན་དུ་གཉེར་ཞིང་དགེ་སྦྱོང་དང་བྲམ་ཟེ་རྣམས་ཀྱི་དྲུང་དུ་མཆིས་ཏེ་རྗེས་སུ་འཐུན་པའི་ཆོས་ལ་ནན་ཏན་དུ་བགྱི་བ་ལ་འཇུག་པ་སྟེ། རྒྱལ་པོ་ཆེན་པོ་འདུ་ཤེས་ཀྱིས་གནས་པ་བརྒྱད་པོ་དེ་དག་གིས་གནས་པ་ཆོས་དང་ལྡན་པའི་རྒྱལ་པོ་ནི་སྐྱེས་ཕུལ་བ་ཙམ་གྱིས་ཀྱང་ཕྱག་མཛོད་མངོན་
པར་འཕེལ་བར་འགྱུར་གྱི། ཆོས་དང་མི་ལྡན་པས་ནི་སྒྱུའི་སྦྱོར་བ་དང་། གཡོའི་རྣམ་པ་ཐམས་ཅད་ཀྱིས་བསྒྲུབས་ཀྱང་དེ་ལྟར་འཕེལ་བར་མི་འགྱུར་ལགས་སོ། །འདུ་ཤེས་ཀྱིས་གནས་པ་བརྒྱད་པོ་དེ་དག་གིས་གནས་ན་ཚེས་གྲངས་དང་། སྐར་མ་དང་། བཀྲ་ཤིས་ཀྱི་ལས་
བརྩམས་པ་ཐམས་ཅད་འཐུན་པར་འགྱུར་ཏེ། དེས་ན་དེ་ལ་མིའམ། མི་མ་ལགས་པ་གླགས་ཚོལ་བ་རྣམས་ཀྱིས་ཀྱང་གླགས་མི་རྙེད་པར་འགྱུར་ལགས་སོ། །འདུ་ཤེས་ཀྱིས་གནས་པ་བརྒྱད་པོ་དེ་དག་གིས་གནས་ན་ཆར་ཡང་དུས་དུས་སུ་འབབ་པར་འགྱུར་ཏེ། དེས་དེའི་

ཁམས་སུ་ལོ་ལེགས་པར་འགྱུར་ཏེ། མུ་གེའི་དགོན་པ་འབྱུང་བར་མི་འགྱུར་ལགས་སོ། །ལོ་ཏོག་ཆབ་འཚལ་བར་འགྱུར་བའི་རྐྱེན་སེར་བ་དང་། བྱེ་བ་དང་། ནེ་ཙོ་དང་། བྱི་བ་ལ་སོགས་པའི་འཇིགས་པ་མི་འབྱུང་བ་ལགས་སོ། །གཅན་གཟན་མི་སྲུན་པ་རྣམས་
ཀྱང་ཉུང་དུ་འགྱུར། ཚེགས་ཆུང་ངུས་ཀྱང་དེ་ལ་གནོད་པར་སེམས་པའི་དགྲ་རྣམས་རང་རང་གི་ལས་ཀྱི་རྣམ་པར་སྨིན་པའི་ཉེས་པས་ཕུང་ཞིང་བས་པ་དང་། མ་མཆིས་པར་འགྱུར་ལགས་སོ། །རྒྱལ་པོ་ཆེན་པོ་ཆོས་དང་ལྡན་པའི་ཆོས་ཀྱི་རྒྱལ་པོ་དེ་ལྟར་སྐྱེ་
དགུ་སྐྱོང་བ་ནི་འཇིག་རྟེན་ན་དེས་པ་རྣམས་ལ་ནོངས་པ་མ་མཆིས་པར་འགྱུར་ལགས་ཏེ། ལུས་ཞིག་ནས་གུམ་པའི་འོག་ཏུ་ཡང་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་ལགས་སོ། །དེ་ལ་འདི་སྐད་ཅེས་བྱ་སྟེ། ཆོས་ལ་གུས་ཤིང་བག་
མཆིས་དང་། །སྐྱེ་དགུ་ཕན་སྤྱོད་ཡུལ་འཁོར་ལྡན། །གཞན་གྱི་སྤྱོད་པ་རབ་རྟོགས་ཤིང་། །གཙང་ལ་མ་ཆགས་རྒྱལ་པོ་རྒྱལ། །དཔའ་བརྟན་བརྩོན་འགྲུས་ལྡན་གྱུར་ཅིང་། །འཇིག་རྟེན་བསྟན་བཅོས་བཟོ་རྩལ་མཁས། །བརྩོན་ཞིང་མཐར་ཕྱིན་སྒྲུབ་
པ་ཡི། །རྒྱལ་པོ་བདེ་བར་སྐྱེ་དགུ་སྐྱོང་། །ཕན་ཞིང་བརྩོན་ལ་ངེས་སྨྲ་སྟེ། །སྙིང་རྗེ་ལྡན་ཞིང་གཞན་ཕན་བརྩོན། །སྐྱོན་ནམ་ཡོན་ཏན་ལྡན་རྟོགས་ན། །སྐྱེ་དགུ་ཕན་པའི་རྒྱལ་པོ་དགའ། །འབངས་ཀྱི་ཚོགས་རྣམས་ཀུན་དགའ་ཞིང་། །སྦྱིན་བགྱིད་དོན་
སྤྱོད་གཞན་ལ་སྙོམས། །དཔུང་དང་བཞོན་པ་ལེགས་སྐྱོང་བའི། །རྒྱལ་པོ་རྒྱལ་སྲིད་ཡུན་རིང་སྐྱོང་། །སྲོག་གཅོད་སྤངས་དང་མ་བྱིན་ལེན། །གཞན་གྱི་མཆིས་བྲང་ལོག་སྨྲ་དང་། །ཕྲ་མ་དང་ནི་ངག་རྩུབ་དང་། །ཀྱལ་པའི་སྐྱོན་དང་ཆང་སྤངས་
ཏེ། །འཚོ་དག་མི་ཡི་རྒྱལ་སྲིད་རྣམས། །སྤངས་ནས་ལྷ་ཡི་རྒྱལ་སྲིད་ལ། །རྒྱལ་པོ་གནས་འགྱུར་དེ་སླད་དུ། །རྒྱལ་པོ་ཚུལ་ཁྲིམས་བཟང་པོར་མཛོད། །རྒྱལ་པོའི་ཚུལ་གྱི་ལེའུ་སྟེ་དྲུག་པའོ།། །།

དེ་ནས་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་བདེན་སྨྲས་དྲིས་པའི་ལན་བཏབ་པས་མགུ་ནས། གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བྲམ་ཟེ་ཚུར་ཤོག །ངའི་ཕོ་བྲང་དུ་འདོང་། དེ་ཅིའི་ཕྱིར་ཞེ་ན། བྲམ་ཟེ་འཁོར་དང་
བཅས་པར་ངས་ཟན་ལ་འབོད་དོ། །དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ལེགས་སོ། །ལེགས་སོ། །དུས་ལ་བབ་པར་གསུངས་སོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་
བདག་ཅག་ནི་ཤུལ་ན་དུབ་ཅིང་བཀྲེས་པ་ལགས་སོ། །རྒྱལ་པོ་ཆེན་པོ་ཁྱོད་ཀྱིས་ཇི་སྐད་བཀའ་སྩལ་པ་དེ་བཞིན་དུ་བགྱིའོ། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་འཁོར་དང་བཅས་ཏེ། མདུན་དུ་བཀྱེ་ནས་ཕོ་བྲང་བཀོད་པ་ཆེན་པོར་ཕྱིན་ཏོ། །
དེར་ཕྱིན་པ་དང་། གཅེར་བུ་པའི་བུ་བདེན་སྨྲ་རྒྱལ་པོའི་སྟན་ལ་བཞག་གོ། །གཅེར་བུ་པའི་ལྷག་མ་གཞན་ཡང་རྐྱེན་རྐྱེན་གྱི་སྟན་ལ་བཀོད་དེ་རིམ་གྲོ་བྱས། བླ་མར་བྱས་ནས་གུས་པ་དང་བཅས་ཤིང་ཞེས་དང་བཅས་པར་རང་གིས་ལག་དར་ཏེ། གཅེར་བུ་པའི་བུ་བདེན་
སྨྲ་འཁོར་དང་བཅས་པ་ལ་ཁ་ཟས་རོ་བརྒྱ་དང་ལྡན་པས་བདར་ཏེ་ཚིམ་པར་བྱས་སོ། །དེ་ལྟར་བདར་བས་ཚིམ་པར་བྱས་ཏེ། ཟན་ཟོས་པར་ཤེས་ནས་བརྒྱ་ཕྲག་སྟོང་རི་བའི་གོས་ཕྲུགས་སུ་བཤམས་ཏེ་བསྐོན་ནོ། །གོས་བསྐོན་ནས་ཕྱོགས་གཅིག་ཏུ་འདུག་གོ། །དེ་ནས་
གཅེར་བུ་པའི་བུ་བདེན་སྨྲ་ཟས་ཀྱི་བྱ་བ་བྱས་ནས་སླེའུ་གྱུ་སྟེ། ལག་པ་བསྙལ་ཏེ་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་སྦྱིན་པ་འདི་མཛད་པས་ཁྱོད་ཀྱིས་ཐོག་མ་ཉིད་དུ་སེར་སྣ་བཅོམ་སྟེ་གཏོང་བའི་ཕྱག་མངོན་པར་བརྐྱང་བས་མེད་པར་ལྟ་བ་
ནི་བསལ། ཡང་དག་པར་ལྟ་བ་ནི་མངོན་པར་ཕྱུང་། སྐྱེས་བུ་དམ་པ་རྣམས་ཀྱི་རྗེས་ནི་བསྙགས། སྐྱེས་བུ་ངན་པ་རྣམས་ནི་ཡོངས་སུ་སྤངས། མཐོ་རིས་དང་ཐར་པའི་སྒོ་རྣམས་ནི་ཕྱེ། ངན་སོང་གི་སྒོ་རྣམས་ནི་བཅད། དགེ་བའི་རྩ་བ་ནི་བསྐྱེད། མི་དགེ་བའི་རྩ་བ་ནི་ཕྱུང་།

ཉོན་མོངས་པ་ནི་བསྲབས། དགེ་བའི་ཕྱོགས་ནི་སྤེལ། ཚུལ་ཁྲིམས་དང་ལྡན་པ་རྣམས་ནི་ཚིམ་པར་བགྱིས། བདག་ལ་སྨན་པ་དང་། གཞན་ལ་སྨན་པ་ནི་མཛད་པར་གྱུར་ཏོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སྦྱིན་པས་ནི་ལོངས་སྤྱོད་ཆེན་པོར་འགྱུར། ཁ་དོག་
ཕུན་སུམ་ཚོགས་པས་ནི་ཁ་དོག་དང་ལྡན་པར་འགྱུར། དྲི་ཕུན་སུམ་ཚོགས་པས་ནི་གྲགས་པ་དང་ལྡན་པར་འགྱུར། རོ་ཕུན་སུམ་ཚོགས་པས་ནི་ཡོ་བྱད་དམ་པ་འཐོབ་པར་འགྱུར། རེག་ཕུན་སུམ་ཚོགས་པས་ནི་རྐང་ལག་འཇམ་ཞིང་གཞོན་ཤ་ཆགས་པར་འགྱུར། རིམ་
གྲོར་བགྱིས་ཏེ་སྩལ་བས་ནི་གཉེན་ལ་སོགས་པས་རིམ་གྲོར་བགྱི་བར་འགྱུར། ལག་དར་ཏེ་སྩལ་བས་ནི་རིམ་གྲོ་པ་འཐོབ་པར་འགྱུར། དུས་སུ་སྩལ་བས་ནི་དོན་རྣམས་དུས་སུ་འགྲུབ་པར་འགྱུར། འཐུན་པ་ཡིད་དུ་འོང་བ་སྩལ་བས་ནི་ཡིད་དུ་འོང་བའི་ལོངས་སྤྱོད་རྣམས་ལ་
སེམས་འཇུག་པར་འགྱུར། གཞན་ལ་མི་གནོད་པར་སྩལ་བས་ནི་ལོངས་སྤྱོད་བརྟན་པ་དག་འཐོབ་པར་འགྱུར། མི་བདེ་བ་བཟོད་པས་སྩལ་བས་ནི་འཁོར་སྙིང་ཉེ་བར་འགྱུར། ཁ་ཟས་སྩལ་བས་ནི་ཉམ་སྟོབས་དང་ལྡན་པར་འགྱུར། གོས་སྩལ་བས་ནི་མདོག་
དང་ལྡན་པར་འགྱུར། མར་མེ་སྩལ་བས་ནི་མིག་དང་ལྡན་པར་འགྱུར། སིལ་སྙན་སྩལ་བས་ནི་མ་ཉམས་པའི་རྣ་བ་དང་ལྡན་པར་འགྱུར། བཞོན་པ་སྩལ་བས་ནི་བདེ་བར་འགྱུར། སྨན་སྩལ་བས་ནི་ནད་ཉུང་བར་འགྱུར། གནས་སྩལ་བས་ནི་ཐམས་ཅད་སྩལ་
བར་འགྱུར། ཆོས་སྩལ་བས་ནི་བདུད་རྩི་སྩལ་བར་འགྱུར། སྲོག་གཅོད་པ་སྤངས་པས་ནི་ཚེ་རིང་བར་འགྱུར། མ་བྱིན་པར་ལེན་པ་སྤངས་པས་ནི་ལོངས་སྤྱོད་ཆེན་པོར་འགྱུར། འདོད་པ་ལ་ལོག་པར་གཡེམ་པ་སྤངས་པས་ནི་འགྲན་ཟླ་མ་མཆིས་པའི་ཆུང་མ་དང་
ལྡན་པར་འགྱུར། བརྫུན་དུ་སྨྲ་བ་སྤངས་པས་ནི་སྐུར་པ་ཉུང་བར་འགྱུར། ཕྲ་མ་སྤངས་པས་ནི་འཁོར་མི་ཕྱེད་པ་དང་ལྡན་པར་འགྱུར། ངག་རྩུབ་པོ་སྤངས་པས་ནི་ཡིད་དུ་འོང་བའི་སྒྲ་ཐོས་པར་འགྱུར། ཚིག་ཀྱལ་པ་སྤངས་པས་ནི་ཚིག་བཙུན་པར་འགྱུར།

བརྣབ་སེམས་སྤངས་པས་ནི་མི་བཟད་པའི་འདོད་ཆགས་མ་མཆིས་པར་འགྱུར། གནོད་སེམས་སྤངས་པས་ནི་མི་བཟད་པའི་ཞེ་སྡང་མ་མཆིས་པར་འགྱུར། ལོག་པར་ལྟ་བ་སྤངས་པས་ནི་མི་བཟད་པའི་གཏི་མུག་མ་མཆིས་པར་འགྱུར། ང་
རྒྱལ་སྤངས་པས་ནི་རིགས་མཐོན་པོར་སྐྱེ་བར་འགྱུར། ཁོང་ཁྲོ་བ་སྤངས་པས་ནི་མཛེས་པར་འགྱུར། ཕྲག་དོག་སྤངས་པས་ནི་གཟི་བྱིན་ཆེ་བར་འགྱུར། སེར་སྣ་སྤངས་པས་ནི་ཕྱུག་པར་འགྱུར། ཡན་ལག་མ་ཚང་བ་མེད་པར་སྩལ་བས་ནི་ཡན་ལག་
ཐམས་ཅད་དང་ལྡན་པའི་སྐྱེས་བུར་འགྱུར་བའི་སླད་དུ་སྟེ། དེ་ལྟར་ཟས་སྩལ་བས་ནི་སྲོག་སྩལ་བར་འགྱུར། ཁ་དོག་དང་། སྟོབས་དང་། བདེ་བ་དང་། སྤོབས་པ་སྩལ་བར་འགྱུར་ཏེ། དེ་ལྟར་ན་སྦྱིན་པ་བགྱིད་པ་ནི་སྐྱེ་བོ་མང་པོ་ལ་བསྙེན་པ་ལགས་སོ། །དམ་
པ་རྣམས་ཀྱིས་བསྙེན་པ་ལགས་སོ། །དེའི་གྲགས་པ་ཡང་ཐམས་ཅད་དུ་གྲགས་པར་འགྱུར། འཁོར་དུ་མཆི་ནའང་འཇིགས་པ་མ་མཆིས་པར་འགྱུར། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར། ཐ་མར་ཡང་ཕྱིར་སྐྱེ་བ་མ་མཆིས་
པ་འཐོབ་པར་འགྱུར་ལགས་སོ། །དེ་ལ་འདི་སྐད་ཅེས་བྱ་སྟེ། གང་ཞིག་ཡང་དག་སྡོམ་རྣམས་ལ། །གུས་པར་དུས་སུ་ཟས་སྩོལ་བ། །སེམས་དད་དེ་ནི་ཕྱི་ཚེ་ལ། །གནས་བདུན་ཡང་དག་འཐོབ་པར་འགྱུར། །སྟོབས་དང་ཚེ་དང་ཁ་དོག་དང་། །བདེ་བ་དང་ནི་
སྤོབས་པ་དང་། །རྟག་ཏུ་བདེ་འགྲོར་སྐྱེ་བར་འགྱུར། །ཐ་མར་ཡང་སྲིད་མ་མཆིས་འཐོབ། །གང་གི་སླད་དུ་སྦྱིན་སྩལ་བ། །དེ་ཡི་དོན་དུ་དེ་འགྱུར་ཏེ། །བདེ་བའི་སླད་དུ་སྦྱིན་སྩལ་ན། །དེ་ནི་བདེ་བ་ཉིད་དུ་འགྱུར། །བསོད་ནམས་རྣམ་སྨིན་བདེ་བ་ལ། །ཇི་ལྟར་
བསམས་པ་དེ་བཞིན་འགྲུབ། །མི་དང་ལྷར་ནི་སྐྱེ་བ་འམ། །གཟུགས་དང་གཟུགས་མེད་རྣམས་སུ་སྐྱེ། །གལ་ཏེ་སྦྱིན་དང་གང་ལྡན་ཞིག །ཤེས་རབ་ཀྱིས་ནི་རྩོལ་བགྱིད་པ། །སྡུག་བསྔལ་ཐ་མར་དབྱུང་བ་ལ། །དེ་ཡི་ཡེ་ཤེས་ཆེན་པོ་སྐྱེ། །བདུད་ཀྱི་རིས་ཀྱི་ལྷ་

རྣམས་དང་། །སྡིག་པ་སྤྱོད་པ་ཅན་རྣམས་ཀྱིས། །བསོད་ནམས་ལེགས་པར་བགྱིས་པ་ལ། །བར་ཆད་བགྱི་བར་ཡོང་མི་ནུས། །བདེ་འགྲོ་དང་ནི་ནོར་རྙེད་དང་། །ཡང་སྲིད་མ་མཆིས་གསུམ་པ་སྟེ། །གསུམ་པོ་དེ་དག་དོན་གཉེར་ཞིང་། །དེ་སླད་སྦྱིན་
པ་སྩལ་བར་བགྱི། །བདེན་སྨྲ་འགྲོན་དུ་བོས་པའི་ལེའུ་སྟེ་བདུན་པའོ།། །།དེ་ནས་རྒྱལ་པོ་གཏུམ་པོ་རབ་སྣང་གིས་འདི་སྙམ་བསམས་ཏེ་འདི་ལྟར་གཅེར་བུ་པའི་བུ་བདེན་སྨྲའི་ཆོས་བསྟན་པ་དེ་ཀུན་ཀྱང་དེ་བཞིན་གཤེགས་པའི་བཀའ་དང་འཐུན་པ་ཤ་སྟག་ན་
བདག་གིས་གཅེར་བུ་པའི་བུ་བདེན་སྨྲ་འདི་དེ་བཞིན་གཤེགས་པ་ལ་དད་པ་ཡོད་དམ་མེད་བརྟག་པར་བྱའོ་སྙམ་མོ། །དེ་ནས་རྒྱལ་པོ་གཏུམ་པོ་རབ་སྣང་གིས་དེ་སྙམ་བསམས་ཏེ་སྟན་ཤིན་ཏུ་དམའ་བ་ཞིག་བཏིང་ནས་གཅེར་བུ་པའི་བུ་བདེན་སྨྲའི་མདུན་དུ་འདུག་སྟེ། འདི་སྐད་
ཅེས་སྨྲས་སོ། །བྲམ་ཟེ་གལ་ཏེ་དྲིས་ནས་དྲིས་པ་ལན་གདབ་པའི་ཕྱིར་སྐབས་ཕྱེ་ན་ངས་དྲི་བ་གཅིག་ཅིག་ཁྱོད་ལ་དྲིའོ། །དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས་རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཅི་
དང་ཅི་བཞེད་པ་དེང་སྨྲར་གསོལ། སྨྲས་པ་དེ་དང་དེའི་ལན་གསོལ་བས་བདག་གིས་ཁྱོད་ཀྱི་ཐུགས་རངས་པར་བགྱིའོ། །སྐབས་ཕྱེ་བས་དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ་སེམས་ཅན་གྱི་རིས་ཀྱི་
འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་དེ་ལྟ་བུ་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་
པོ་བྲམ་ཟེ་དབྱར་བྱེད་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ལགས་ཏེ། སྐར་མའི་རིགས་ལ་མཁས་པ། མཆོད་སྦྱིན་གྱི་རྒྱུད་ལ་མཁས་པ། སྦྱིན་སྲེག་དང་། བཟླས་བརྗོད་དང་། བསྲེག་པའི་ཆོ་ག་ལ་ཤིན་ཏུ་བསླབས་པ། ཟླ་བ་དང་ཉི་མ་སྤྱང་ཀིས་འཛིན་

པ་དང་། སྐར་མ་ལྟུང་བ་དང་། ལྕེ་འབབ་པ་དང་། ས་གཡོ་བའི་རྒྱུས་ཚར་ཕྱིན་པ། ལོ་ལེགས་པ་དང་། མུ་གེ་དང་། འཇིག་རྟེན་འཇིག་པ་དང་། ལོ་ཁྱུད་ཁོར་གྱི་རྒྱུས་རྣམས་རྟོགས་པར་ཁོང་དུ་ཆུད་པ་ལགས་ན། དེ་ནི་སྐྱོན་དང་བཅས་པ་ལགས་སོ། །
སྨྲས་པ། བྲམ་ཟེ་བྲམ་ཟེ་དབྱར་བྱེད་ཀྱི་སྐྱོན་གང་། སྨྲས་པ། རྒྱལ་པོ་ཆེན་པོ་བྲམ་ཟེ་དབྱར་བྱེད་ནི་བྱི་བ་ལ་དགའ་བ་སྟེ། རྒྱལ་པོ་ཆེན་པོ་མཁས་པས་ནི་གཞན་གྱི་མཆིས་བྲང་དང་བསྟེན་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་གཞན་གྱི་མཆིས་བྲང་
བསྟེན་པས་ནི་ཚེ་འདི་དང་ཚེ་ཕྱི་མ་ལ་སྡུག་བསྔལ་ཆེས་མང་པོ་འཐོབ་པར་འགྱུར་ཏེ། ལྷ་དང་མིར་བཅས་པའི་འཇིག་རྟེན་གྱིས་ཀྱང་སྨད་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། བྱི་བ་བགྱིད་པའི་ངང་ཚུལ་ཅན། །མ་བསྡམས་མི་སྲུན་ཡུལ་ལ་བརྐམ། །
བདག་གི་ཆུང་མས་མི་ཆོག་སྟེ། །འཇིག་རྟེན་དག་ན་སྨད་འོས་ལགས། །འདི་དང་ཕ་རོལ་སྡུག་བསྔལ་འགྱུར། །བསད་བཅིང་ཆད་པ་དྲག་པོ་མྱོང་། །སེམས་ཅན་དམྱལ་བ་རྣམས་སུ་སྐྱེ། །བདེ་བ་ཆུང་ཞིང་སེམས་ལ་གནོད། །སྨྲས་པ། བྲམ་ཟེ་སེམས་ཅན་གྱི་
རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ་དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་
པོ་ཆེན་པོ་བྲམ་ཟེ་བྷ་ར་དྭ་ཛ་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པ་སྟེ། ཚུལ་དང་འདུལ་བ་ལ་མཁས་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་བྲམ་ཟེ་བྷ་ར་དྭ་ཛའི་སྐྱོན་གང་། སྨྲས་པ། རྒྱལ་པོ་ཆེན་པོ་བྲམ་ཟེ་བྷ་ར་དྭ་ཛ་
འདི་ནི་རྨུགས་པ་དང་ཡུར་བ་མང་བ་དང་། ཧ་ཅང་གཉིད་ཆེ་བ་ལགས་ཏེ། རྒྱལ་པོ་ཆེན་པོ་མཁས་པས་ནི་རྨུགས་པ་དང་ཡུར་བ་དང་གཉིད་ཆེ་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་རྨུགས་པ་དང་གཉིད་འདི་ནི་འཇིག་རྟེན་པ་དང་འཇིག་རྟེན་ལས་འདས་པའི་ཆོས་

རྣམས་འགྲིབ་པར་བགྱིད་པའི་ཆོས་ཏེ། ཡེ་ཤེས་དང་སྤོང་བའི་བར་ཆད་དུ་ཡང་འགྱུར་བའི་སླད་དུའོ། །དེ་ལ་འདི་སྐད་ཅེས་བྱ་སྟེ། གང་ཞིག་རྨུགས་ཡུར་གཉིད་ཆེ་བ། །སྐྱེ་བོ་དེ་ནི་ལེ་ལོས་ནོན། །མ་ཐོབ་པ་དག་དེས་མི་འཐོབ། །ཐོབ་པར་གྱུར་པའང་འགྲིབ་པར་
འགྱུར། །དེ་ལྟར་ཁྱད་པར་ཐོབ་འཚལ་བས། །སྙོམ་ལས་དང་ནི་ལེ་ལོ་དང་། །རྨུགས་པ་དང་ནི་ཡུར་དང་གཉིད། །བག་མེད་ལྷན་ཅིག་སྤང་བར་བགྱི། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་
བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནག་པོ་འདི་ནི་མཛངས་ཤིང་མཁས་ལ་
བརྟགས་ཤིང་ཡིད་གཞུངས་པ་སྟེ། མོས་པ་ཆེན་པོ་དང་ལྡན་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་ནག་པོའི་སྐྱོན་ནི་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནག་པོའི་སྐྱོན་ནི་ཤིན་ཏུ་སེར་སྣ་ཅན་ལགས་ཏེ། རྒྱལ་
པོ་ཆེན་པོ་མཁས་པས་ནི་སེར་སྣ་ཅན་དུ་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ལོངས་སྤྱོད་ཕུན་སུམ་ཚོགས་པ་ཐོབ་ལ་སེར་སྣ་ལ་གནས་པ་ནི་དེས་ལོངས་སྤྱོད་རྣམས་ལས་སྙིང་པོ་མ་བླངས་ཏེ། དེ་ལག་པ་སྟོང་པར་འགུམ་པའི་དུས་བགྱིས་ནས་གཤིན་རྗེའི་ཡུལ་དུ་
མཆིས་ཏེ། དེར་བཀྲེས་པ་དང་སྐོམ་པ་ལ་སོགས་པའི་སྡུག་བསྔལ་མྱོང་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། གང་ཞིག་ལོངས་སྤྱོད་ཕུན་ལྡན་ལ། །སེར་སྣས་ཟིལ་ནོན་མི་དེ་ནི། །ལག་སྟོང་གཤིན་རྗེའི་ཡུལ་དུ་མཆི། །བཀྲེས་པས་ཉེན་པ་མྱོང་བར་འགྱུར། །
དེར་ནི་བཀྲེས་སྐོམ་གདུངས་པ་དང་། །མྱ་ངན་གྲང་སོགས་སྡུག་བསྔལ་མྱོང་། །དེ་བས་མཁས་པས་རང་གི་བློས། །འཇུངས་པའི་དྲི་མས་གོས་མི་བགྱི། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་

ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་རྒྱལ་སྡེ་འདི་ནི་མཛངས་ཤིང་མཁས་
ལ་བརྟགས་ཤིང་ཡིད་གཞུངས་པ་སྟེ། མོས་པ་ཆེ་ཞིང་འཇིགས་པ་མ་མཆིས་ལ། གཏོང་བ་དང་ལྡན་ཞིང་སྙིང་སྟོབས་ཕུན་སུམ་ཚོགས་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་རྒྱལ་སྡེའི་སྐྱོན་ནི་གང་། སྨྲས་པ། རྒྱལ་པོ་ཆེན་
པོ་རྒྱལ་བུ་གཞོན་ནུ་རྒྱལ་སྡེ་ནི་སྲོག་གཅོད་པ་སྟེ། རྒྱལ་པོ་ཆེན་པོ་མཁས་པས་ནི་སྲོག་གཅོད་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་སྐྱེས་བུ་གང་ཟག་སྲོག་གཅོད་པ་ནི་ཚེ་ཐུང་བར་འགྱུར་བ་དང་། སེམས་ཅན་དམྱལ་བ