Kinh tạng Tây Tạng (Kangyur Đại Học) — 057_མདོ་སྡེ།_པ

་དང་། དུད་འགྲོའི་སྐྱེ་གནས་དང་། གཤིན་རྗེའི་
འཇིག་རྟེན་དུ་མཆི་བར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། སྲོག་གཅོད་བགྱིད་པའི་གང་ཟག་ནི། །ཚེ་ཐུང་ནད་ཀྱང་རབ་ཏུ་མང་། །གང་ན་མི་བདེ་ཆེ་བ་ཡི། །སེམས་ཅན་དམྱལ་བར་སྐྱེ་བར་འགྱུར། །དེ་བས་སྡུག་བསྔལ་མི་འཚལ་ཞིང་། །ཚེ་འདིར་བདེ་འཚལ་
མཁས་པ་ཡིས། །གཞན་གྱི་སྲོག་གཅད་མི་བགྱི་སྟེ། །སྲོག་ཆགས་རྣམས་ནི་བདག་བཞིན་བསྲུང་། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་
བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་འཇིགས་མེད་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ལགས་ན། དེ་ཡང་སྐྱོན་དང་བཅས་པ་
ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་འཇིགས་མེད་ཀྱི་སྐྱོན་གང་། སྨྲས་པ། རྒྱལ་པོ་ཆེན་པོ་རྒྱལ་བུ་འཇིགས་མེད་ནི་ཧ་ཅང་སྙིང་རྗེ་ཅན་ལགས་ཏེ། རྒྱལ་པོ་ཆེན་པོ་མཁས་པས་ནི་ཧ་ཅང་སྙིང་རྗེ་ཅན་དུ་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་གང་རྒྱལ་པོ་

དབང་ཕྱུག་ཆེན་པོ་དང་ལྡན་ལ། ཧ་ཅང་སྙིང་རྗེ་ཆེས་ན་དེའི་རྒྱལ་སྲིད་ལ་ཆད་པ་མ་མཆིས་པས་མ་རུངས་པ་མང་པོས་འཁྲུག་པར་འགྱུར་ཞིང་ཆོམ་རྐུན་གྱི་གནོད་པ་མང་པོ་ཡང་མི་ཟློགས་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། རྒྱལ་པོ་ཧ་ཅང་སྙིང་རྗེ་ན། །མ་རུངས་
པ་དང་བཀྲབས་པ་དང་། །རྐུན་པོས་རྒྱལ་སྲིད་འཁྲུག་ཅིང་སྐྱོ། །རྒྱལ་པོས་རྟག་ཏུ་ཤེས་གུས་བརྩོན། །དེ་བས་ས་ཡི་བདག་པོ་ཡིས། །སྐྱོན་དེ་མཐོང་ནས་སྤང་བགྱི་སྟེ། །ཧ་ཅང་སྙིང་རྗེར་མི་བགྱིའོ། །ཉམ་ཐག་སྲོག་ཆགས་སྙིང་རྗེའང་བགྱིད། །སྨྲས་པ། བྲམ་ཟེ་སེམས་
ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ལ་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་
པ། རྒྱལ་པོ་ཆེན་པོ་རྒྱལ་བུ་གཞོན་ནུ་སྟོབས་ལྷ་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ལགས་ན། དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་སྟོབས་ལྷའི་སྐྱོན་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་
ནུ་སྟོབས་ལྷ་ནི་ཤིན་ཏུ་ཆང་ལ་ཆགས་པ་སྟེ། རྒྱལ་པོ་ཆེན་པོ་མཁས་པས་ནི་ཤིན་ཏུ་ཆང་ལ་ཆགས་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཆང་གི་བཏུང་བ་ནི་དྲན་པ་ཡོངས་སུ་ཉམས་པར་འགྱུར་བའི་རྒྱུ་སྟེ། ཡན་ལག་དམ་པའི་བགེགས་སུ་འགྱུར་ཞིང་འཇིག་
རྟེན་པ་དང་། འཇིག་རྟེན་ལས་འདས་པའི་དོན་ཆེན་པོ་རྣམས་འགྲིབ་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། ཆང་དགའ་དགོས་པ་ཐམས་ཅད་ལ། །རྟག་ཏུ་བག་མེད་སྤྱོད་པར་འགྱུར། །མཁས་པ་རྣམས་ཀྱིས་སྨད་འགྱུར་ཞིང་། འདི་དག་གཞན་དུ་རྣམས་
པར་རྨོངས། །དེ་བས་སྐྱེས་བུ་མཁས་པ་ཡིས། །ཆང་ལ་དགའ་བ་སྤང་བར་བགྱི། །དེ་ནི་ཡོན་ཏན་འགྲིབ་པར་བགྱིད། །གཞན་དུའང་སྨྱོན་པར་བགྱིད་པ་ལགས། སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་

ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ནོར་ལྷ་འདི་ནི་མཛངས་ཤིང་མཁས་ལ་
བརྟགས་ཤིང་ཡིད་གཞུངས་པ་སྟེ། མོས་པ་ཆེ་ཞིང་འཇིགས་པ་མ་མཆིས་ལ། གཏོང་བ་དང་ལྡན་ཞིང་སྙིང་སྟོབས་ཕུན་སུམ་ཚོགས་པ་ལགས་ན་དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་ནོར་ལྷའི་སྐྱོན་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་
ནོར་ལྷ་ནི་ཤིན་ཏུ་མཐའ་རིང་བ་སྟེ། རྒྱལ་པོ་ཆེན་པོ་མཁས་པས་ནི་ཤིན་ཏུ་མཐའ་རིང་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཧ་ཅང་མཐའ་རིངས་ཏེ་ལུས་ན་དོན་ཉམས་པར་འགྱུར་ཏེ། སྐྱོན་རྣམས་ཀྱང་བརྟན་པར་གྱུར་པས་ཞི་བར་མི་འགྱུར་བའི་སླད་དུའོ། །རྒྱལ་པོ་ཆེན་
པོ་དེ་ལྟ་ལགས་པས་མཁས་པས་ཤིན་ཏུ་མཐའ་རིང་བར་མི་བགྱིའོ། །དེ་ལ་འདི་སྐད་ཅེས་བགྱི་སྟེ། ཤིན་ཏུ་མཐའ་རིང་ཤེད་བུ་ཡི། །དོན་རྣམས་ཐམས་ཅད་འཇིག་པར་འགྱུར། །མ་ཐོབ་པ་ནི་འཐོབ་མི་འགྱུར། །ཐོབ་པ་རྣམས་ཀྱང་ཉམས་པར་འགྱུར། །དེ་བས་མཐའ་རིང་སྤང་
བགྱིས་ལ། །མཁས་པས་ཤིན་ཏུ་བསྒྲིམ་པར་བགྱི། །དུས་ཀྱི་འབྲས་བུ་བཀོང་བར་འགྱུར། །དེས་ན་དེ་ནི་འགྲིབ་པ་འཐོབ། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་
སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་སྡེ་ཆེན་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པ་མོས་པ་ཆེ་བ་ལགས་ན། དེ་ཡང་སྐྱོན་དང་
བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་གཞོན་ནུ་སྡེ་ཆེན་གྱི་སྐྱོན་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་སྡེ་ཆེན་ནི་ཧ་ཅང་བརྐམ་ཆགས་ཅན་ཏེ། མི་རིགས་པའི་འདོད་ཆེན་གྱི་ཟིལ་གྱིས་ནོན་ཅིང་གཞན་གྱི་ནོར་འཕྲོག་པ་སྟེ། རྒྱལ་པོ་ཆེན་པོ་མཁས་པས་ནི་ཧ་

ཅང་འདོད་ཆེན་ཆེ་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་འདོད་ཆེན་ཆེ་བ་ནི་ཚེ་འདི་ཉིད་ལ་ཡང་སེམས་ཅན་རྣམས་ཀྱིས་ཡིད་བརྟན་དུ་མི་རུང་བ་ལགས་ལ། ལུས་ཞིག་ནས་ཀྱང་ངན་སོང་རྣམས་སུ་སྐྱེ་བར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། གང་
ཞིག་སོགས་ལ་བརྩོན་གྱུར་ཅིང་། །ལོངས་སྤྱོད་ཐོབ་ཀྱང་དགར་མི་ཚོར། །གཞན་གྱི་ལོངས་སྤྱོད་འཕྲོག་བགྱིད་ཅིང་། །མི་རིགས་འདོད་ལྡན་སེམས་ཅན་གང་། །དེ་ནི་གུམ་ནས་ངན་སོང་མཆི། །ཚེ་འདིར་སྲོག་ཆགས་ཡིད་མི་མཆི། །དེ་བས་སྐྱེས་བུ་མཁས་པ་ཡིས།
མི་རིགས་འདོད་ཆེན་ཡོངས་སུ་སྤང་། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། །དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ།
རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ལྷ་ཆེན་པོ་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པ་ལགས་ན། །དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་རྒྱལ་བུ་
གཞོན་ནུ་ལྷ་ཆེན་པོའི་སྐྱོན་གང་། སྨྲས་པ། རྒྱལ་པོ་ཆེན་པོ་རྒྱལ་བུ་གཞོན་ནུ་ལྷ་ཆེན་པོ་ནི་རྒོད་ཅིང་ཅ་ཅོ་ཅན་མ་ཞི་བ་སྟེ། རྒྱལ་པོ་ཆེན་པོ་མཁས་པས་ནི་རྒོད་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་རྒོད་པ་ནི་ཞི་གནས་དང་། ལྷག་མཐོང་གི་བགེགས་
སུ་འགྱུར་བའི་ཆོས་ལགས་པ་དང་། ངན་སོང་དུ་མཆི་བའི་རྒྱུར་གྱུར་པའི་སླད་དུའོ། །དེ་བས་ན་མཁས་པས་རྒོད་པར་མི་བགྱིའོ། །དེ་ལ་འདི་སྐད་ཅེས་བགྱི་སྟེ། རྒོད་པའི་དྲི་མར་བཅས་པའི་སེམས། །མཁས་པས་བསྔགས་པ་མ་ལགས་ཏེ། །སྡུག་བསྔལ་མཐར་ཕྱིན་
ཏིང་ངེ་འཛིན། །བསྒྲིམས་ཀྱང་མི་འཐོབ་ག་ལ་ཐར། །ཡོན་ཏན་གྲགས་པ་འཇིག་བགྱིད་པའི། །རྒོད་པ་དེ་སླད་སྤང་བར་བགྱི། །སྐྱེས་བུ་དོན་ཆེན་འཚལ་བ་ལ། །འདི་དང་གཞན་དུའང་དེ་གནོད་འགྱུར། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་

ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་
པོ་ཡུལ་ཀོ་ས་ལའི་རྒྱལ་པོ་གསལ་རྒྱལ་འདི་ནི་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ལགས་ན་དེ་ཡང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་སྐྱོན་གང་། སྨྲས་པ། རྒྱལ་པོ་ཆེན་པོ་
ཡུལ་ཀོ་ས་ལའི་རྒྱལ་པོ་གསལ་རྒྱལ་ནི་ཤིན་ཏུ་མང་དུ་ཟ་བ་སྟེ། རྒྱལ་པོ་ཆེན་པོ་མཁས་པས་ནི་ཤིན་ཏུ་མང་དུ་ཟ་བར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཤིན་ཏུ་མང་དུ་ཟ་བ་ནི་ལེ་ལོ་ཅན་དུ་འགྱུར། ལུས་ལྕི་བར་འགྱུར་དེའི་ཁ་ཟས་བདེ་བར་འཇུ་བར་མི་འགྱུར།
ཚེ་འདི་དང་ཕ་རོལ་གྱི་དོན་རྣམས་ཀྱང་ཡོངས་སུ་འགྲིབ་པར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། སྐྱེས་བུ་གང་ཞིག་མང་ཟ་བ། །དེ་ནི་ལུས་ལྕི་ལེ་ལོ་ཅན། །འདི་དང་ཕ་རོལ་ཚེ་ཡི་དོན། །ངེས་པར་རབ་ཏུ་འགྲིབ་པར་འགྱུར། །དེ་ནི་སད་ནའང་སྡུག་བསྔལ་ཏེ།
ཉལ་ནའང་སྡུག་བསྔལ་གཞན་གནོད་བགྱིད། །དེ་བས་ཕན་དང་རན་པར་བཟའ། །ཟས་ཀྱི་དུས་ནི་ངེས་པར་བགྱི། །སྨྲས་པ། བྲམ་ཟེ་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཛངས་ཤིང་མཁས་ལ་བརྟགས་ཤིང་ཡིད་གཞུངས་པར་གྱུར་པ་ཡིན་ལ། དེ་
ཡང་སྐྱོན་དང་བཅས་པར་གྱུར་པ་གཞན་ཡང་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་ཁྱོད་ཀྱང་མཛངས་ཤིང་མཁས་ལ་བརྟགས་ཤིང་ཡིད་གཞུངས་ལ་མོས་པ་ཆེ་ཞིང་འཇིགས་པ་མ་མཆིས་ལ་གཏོང་
བ་དང་ལྡན་ཞིང་ཐུགས་སྟོབས་ཕུན་སུམ་ཚོགས་པ་ལགས་ན། ཁྱོད་ཀྱང་སྐྱོན་དང་བཅས་པ་ལགས་སོ། །སྨྲས་པ། བྲམ་ཟེ་ངའི་སྐྱོན་གང་ཡིན། སྨྲས་པ། རྒྱལ་པོ་ཆེན་པོ་ཁྱོད་ནི་ཤིན་ཏུ་གཏུམ་མོ། །རྒྱལ་པོ་ཆེན་པོ་ཁྱོད་ནི་ཤིན་ཏུ་ཁྲོའོ། །རྒྱལ་པོ་ཆེན་པོ་ཁྱོད་ནི་ཤིན་

ཏུ་བརླང་ངོ་། །རྒྱལ་པོ་ཆེན་པོ་ཁྱོད་ནི་ཤིན་ཏུ་རྩུབ་བོ། །རྒྱལ་པོ་ཆེན་པོ་ཁྱོད་ནི་ཤིན་ཏུ་གཟུ་ལུམས་ཆེའོ། །རྒྱལ་པོ་ཆེན་པོ་མཁས་པས་ནི་ཤིན་ཏུ་གཏུམ་པར་མི་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་རྒྱལ་པོའམ། རྒྱལ་པོའི་བློན་པོ་ཤིན་ཏུ་གཏུམ་པ་གང་ལགས་
པ་དེ་ལ་ནི་སྐྱེ་བོ་མང་པོ་མི་དགའ་བར་འགྱུར་བ་ལགས་ཏེ། བདག་གི་ཕ་མ་ལ་ཡང་མི་སྡུག་པ་ལགས་ན་གྲོང་རྡལ་གྱི་མི་དང་ཡུལ་གྱི་མི་གཞན་ལ་ལྟ་ཅི་སྨོས་པའི་སླད་དུ་སྟེ། །རྒྱལ་པོ་ཆེན་པོ་དེ་ལྟ་ལགས་པས་མཁས་པས་ཤིན་ཏུ་གཏུམ་པར་མི་བགྱིའོ། །རྒྱལ་པོ་ཆེན་པོ་མཁས་
པས་ནི་ཕྱི་རྗེས་རིང་དུ་བལྟ་བར་བགྱིའོ། །དེ་ལ་འདི་སྐད་ཅེས་བགྱི་སྟེ། རྒྱལ་པོ་གང་ཞིག་གཏུམ་གྱུར་ལ། །ཁྲོ་དབང་དགོས་པ་ཁྱད་གསོད་པ། །དེ་ནི་རང་གི་ཕ་མ་ཡང་། །ཤིན་ཏུ་སྐྱོ་བར་བགྱིད་པ་ལགས། །སྐྱེ་བོ་གཞན་ལྟ་ཅི་སྨོས་ཏེ། །སྐད་ཅིག་ཙམ་ཡང་ག་
ལ་དགའ། །དེ་བས་མཁས་པས་ནན་ཏན་དུ། །ཁྲོ་བ་ཡོངས་སུ་སྤང་བར་བགྱི། །དེ་ནས་རྒྱལ་པོ་གཏུམ་པོ་རབ་སྣང་གིས་མངོན་སུམ་དུ་བདག་ལ་མི་སྙན་པར་རྗོད་པ་དེ་ལྟ་བུ་ཐོས་ནས་ཁྲོས་འཁྲུགས་ཏེ། ཡི་མ་རངས་ཤིང་ཚིག་པ་ཟ་བར་གྱུར་ནས། གཅེར་བུ་པའི་
བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་ཁྱོད་ཀྱིས་འཁོར་འདི་ལྟ་བུའི་མདུན་དུ་ང་ལ་དེ་སྐད་ཀྱི་མི་སྙན་པ་བྱའམ། དེ་བས་ན་ཁྱོད་ནི་གསད་པར་འོས་པའོ་ཞེས་བྱས་ནས། དེས་ཁྲོས་པའི་སེམས་ཀྱིས་དགེ་སྦྱོང་འདི་ནི་རྒྱལ་པོ་ལ་ངན་དུ་སྨྲ་བ་ཡིན་གྱིས་སོད་ཅིག་ཅེས་ཚིག་
ཕྱུང་བར་གྱུར་ཏོ། །དེ་ནས་གཅེར་བུ་པའི་བུ་བདེན་སྨྲ་འཇིགས་ཤིང་སྐྲག་སྟེ། རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེ་ལྟར་གཟུ་ལུམས་མ་མཛད་པར་རྒྱལ་པོ་ཆེན་པོ་བདག་ལ་མི་འཇིགས་པ་སྩལ་དུ་གསོལ། གསོལ་བ་འདི་ཡང་
གསན་དུ་གསོལ། སྨྲས་པ། བདེན་སྨྲ་མི་འཇིགས་པ་སྦྱིན་གྱིས་ཅི་གསོལ་སྨྲོས་ཤིག །སྨྲས་པ། རྒྱལ་པོ་ཆེན་པོ་བདག་ཀྱང་སྐྱོན་དང་བཅས་པ་ལགས་སོ། །སྨྲས་པ། ཁྱོད་ཀྱི་སྐྱོན་གང་། སྨྲས་པ། རྒྱལ་པོ་ཆེན་པོ་ཁྱོད་དེ་ལྟར་གཏུམ་པ། དེ་ལྟར་ཁྲོ་བ། དེ་

ལྟར་ཞེ་སྡང་བ། དེ་ལྟར་གཟུ་ལུམས་ཅན་གྱི་སྤྱན་སྔར་བདག་འདི་ལྟར་ཡང་དག་པ་ཇི་ལྟ་བ་བཞིན་དུ་སྨྲ་བ་ནི་བདག་ཀྱང་ཧ་ཅང་ངོར་རོ་བར་སྨྲ་བ་ལགས་ཏེ། བདག་ནི་དེ་ཁོ་ན་སྨྲ་བར་གྱུར་ཏོ། །རྒྱལ་པོ་ཆེན་པོ་མཁས་པས་ནི་དུས་ཐམས་ཅད་དུ་ཡང་དག་པ་ཇི་
ལྟ་བ་བཞིན་དུ་སྨྲ་བར་མི་བགྱིའོ། །རྒྱལ་པོ་ཆེན་པོ་མཁས་པས་ནི་དུས་དང་དུས་མ་ལགས་པ་དང་། ཡུལ་དང་ཡུལ་མ་ལགས་པ་འཚལ་བར་བགྱིའོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་ཡང་དག་པར་སྨྲ་བ་ནི་འཇིག་རྟེན་ཡིད་མི་བདེ་ཞིང་མི་དགའ་བར་འགྱུར་ཏེ། དེས་
པ་རྣམས་ཀྱིས་མི་བསྔགས་ཤིང་གླེན་པའི་སྐྱེ་བོ་རྣམས་ཞེ་སྡང་བར་འགྱུར་བའི་སླད་དུའོ། །དེ་ལ་འདི་སྐད་ཅེས་བགྱི་སྟེ། གང་ཞིག་ཡང་དག་སྨྲ་བགྱིད་ཅིང་། །སྨྲ་དུས་དུས་མིན་མ་འཚལ་བ། །དེ་ནི་མཁས་པས་སྨད་འགྱུར་ན། །འཇིག་རྟེན་གཞན་ལྟ་ཅི་ཞིག་སྨོས། །
དེ་བས་བདེན་པའི་ཚིག་ལགས་ཀྱང་། །བློ་ལྡན་ཀུན་ཏུ་སྨྲ་མི་བགྱི། །བདག་ཀྱང་འདིར་ནི་འདི་ལྟ་བུར། །བདེན་སྨྲས་རང་ལ་གནོད་པར་གྱུར། །ཡོན་ཏན་དང་སྐྱོན་བསྟན་པའི་ལེའུ་སྟེ་བརྒྱད་པའོ།། །།དེ་ནས་རྒྱལ་པོ་གཏུམ་པོ་རབ་སྣང་གཅེར་བུ་པའི་བུ་
བདེན་སྨྲའི་ལེགས་པར་བཤད་པས་མགུ་སྟེ། རྗེས་སུ་ཡི་རངས་ནས་ཡང་དྲི་བ་གཞན་དག་དྲིས་སོ། །བྲམ་ཟེ་ཡང་སེམས་ཅན་གྱི་རིས་ཀྱི་འཇིག་རྟེན་འདི་ན་སེམས་ཅན་གང་ལ་ལ་མཁས་ཤིང་མཛངས་ལ་བརྟགས་ཤིང་ཡིད་གཞུངས་ལ། ཚུལ་དང་འདུལ་བའི་ཆོ་ག་ལ་
མཁས་པ་ཡང་ཡིན་ལ། དེ་ལ་སྐྱོན་ཡང་མེད་པ་དེ་ལྟ་བུ་ཡོད་དམ། སྨྲས་པ། རྒྱལ་པོ་ཆེན་པོ་མཆིས་སོ། །སྨྲས་པ། བྲམ་ཟེ་དེ་གང་། སྨྲས་པ། རྒྱལ་པོ་ཆེན་པོ་དགེ་སྦྱོང་གཽ་ཏ་མ་ནི་ཤཱཀྱའི་རྒྱལ་པོ་ཆེན་པོ་ཤཱཀྱའི་རིགས་ལས་རབ་ཏུ་བྱུང་བ་དེ་ནི། བདག་ཅག་གི་རིག་བྱེད་ལས་འབྱུང་བ་
བཞིན་དུ་སྐྱོན་མ་མཆིས་པ་སྟེ། དེ་ནི་རིགས་ཀྱི་ཆེ་བ་ཉིད་ཀྱིས་སྐྱོན་གདགས་པར་མི་ནུས་ཏེ། འདི་ལྟར་འཁོར་ལོས་སྒྱུར་བའི་རིགས་སུ་བྱུང་བའོ། །དེ་ནི་རྒྱུད་ལས་སྨོས་ནས་སྐྱོན་གདགས་སུ་མི་ནུས་ཏེ། འདི་ལྟར་བུ་རམ་ཤིང་པའི་རིགས་ཀྱི་རྒྱུད་དུ་བྱུང་བའོ། །དེ་ནི་ལུས་ཀྱི་

ཆེ་བ་ཉིད་ཀྱིས་ཀྱང་སྐྱོན་གདགས་སུ་མི་ནུས་ཏེ། འདི་ལྟར་མཚན་དང་དཔེ་བྱད་བཟང་པོས་ལེགས་པར་བརྒྱན་པའི་ལུས་དང་ལྡན་པའོ། །དེ་ནི་ཆོས་དང་བཅས་པར་སྐྱོན་གདགས་སུ་མི་ནུས་ཏེ། འདི་ལྟར་ཚུལ་ཁྲིམས་དང་། སྟོབས་དང་། མི་འཇིགས་པ་དང་། སངས་
རྒྱས་ཀྱི་ཆོས་མ་འདྲེས་པ་དང་ལྡན་པས་དེའི་སླད་དུ་དེ་ནི་སྐྱོན་མ་མཆིས་པ་ལགས་སོ། །རྒྱལ་པོ་ཆེན་པོ་གལ་ཏེ་དགེ་སྦྱོང་གཽ་ཏ་མ་དེ་ཁྱིམ་ནས་ཁྱིམ་མ་མཆིས་པར་རབ་ཏུ་མ་བྱུང་ན་ནི་དེ་རྒྱལ་པོ་འཁོར་ལོས་སྒྱུར་བ། མཐའ་བཞིར་རྣམ་པར་རྒྱལ་བ། ཆོས་དང་ལྡན་པ་ཆོས་ཀྱི་
རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་དུ་གདོན་མི་འཚལ་ཏེ། །དེའི་རིན་པོ་ཆེ་སྣ་བདུན་ནི་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་
པ་བློན་པོ་རིན་པོ་ཆེ་ལགས་སོ། །དེ་ལ་སྲས་ཀྱང་སྟོང་ཐམ་པ་མངའ་བར་འགྱུར་དུ་གདོན་མ་འཚལ་ཏེ། དཔའ་བ་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ། འཁོར་ལོས་སྒྱུར་བའི་མཚན་དང་ལྡན་པ་ཤ་སྟག་འབྱུང་བར་
འགྱུར་དུ་གོར་མ་བཀུམ་མོ། །དེ་ནི་གླིང་བཞི་པའི་འཇིག་རྟེན་གྱི་ཁམས་འདིར་གཅིག་པུ་སྤྱོད་པའི་དབང་སྒྱུར་བར་འགྱུར་ཞིང་གཞན་གྱི་དྲིང་མི་འཇོག་པར་འགྱུར་དུ་གདོན་མ་འཚལ་ཏེ། དེས་ས་ཆེན་པོ་མ་ལུས་པ་གནོད་པར་སྡོ་བ་མ་མཆིས་ཤིང་འཚེ་བ་མ་མཆིས་པ་འདི་ཉིད་
ཆད་པ་མ་མཆིས་ཤིང་མཚོན་གྱིས་བདའ་བ་མ་མཆིས་ལ། ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་དུ་གདོན་མ་འཚལ་བ་ཞིག་ན། དེ་ཁྱིམ་ནས་ཁྱིམ་མ་མཆིས་པར་རབ་ཏུ་བྱུང་ནས་བརྟུལ་ཞུགས་དང་དཀའ་ཐུབ་ཆེན་པོ་བརྩམས་ཏེ། རྒྱ་ཤུག་
གི་འབྲས་བུའམ། ཏིལ་གྱི་འབྲུམ་བུའམ། འབྲས་ཀྱི་འབྲུ་འགས་ལོ་དྲུག་འདས་པར་བགྱིས་ཏེ། བྱང་ཆུབ་ཀྱི་ཤིང་དྲུང་དུ་བཞུགས་ནས། བདུད་ཀྱི་སྡེ་དཔུང་དང་བཅས་པ་རབ་ཏུ་ཕམ་པར་བགྱིས་ཏེ། སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཤེས་པར་བགྱི་

བ་དང་། ཐོབ་པར་བགྱི་བ་དང་། མཐོང་བར་བགྱི་བ་དང་། ཁོང་དུ་ཆུད་པར་བགྱི་བ་དང་། མངོན་དུ་བགྱི་བ་གང་ཅི་ཡང་རུང་བ་དེ་ཐམས་ཅད་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ། དེ་དང་མཉམ་པའི་སེམས་ཅན་ཡང་འཇིག་
རྟེན་ན་མ་མཆིས་ན། དེའི་གོང་དུ་ཕྱིན་པ་ལྟ་ག་ལ་མཆིས་ཏེ། དགེ་སྦྱོང་གཽ་ཏ་མ་དེ་ནི་མི་མཉམ་པ་དང་མཉམ་ཞིང་ཟླ་གང་ཡང་མ་མཆིས་པ་སྟེ། དེའི་སླད་དུ་དེ་ནི་སྐྱོན་མ་མཆིས་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དགེ་སྦྱོང་གཽ་ཏ་མ་དེ་ནི་རིགས་དང་། རྒྱུད་ཀྱིས་
འདྲ་བ་མ་མཆིས་པ་དང་། གཟུགས་ཀྱི་ཆེ་བ་ཉིད་ཀྱིས་འདྲ་བ་མ་མཆིས་པ་དང་། ཡེ་ཤེས་ཀྱི་ཆེ་བ་ཉིད་ཀྱིས་མཚུངས་པ་མ་མཆིས་པའི་སླད་དུ་སྟེ། དེའི་སླད་དུ་དེ་སྐྱོན་མ་མཆིས་པ་ལགས་སོ། །དེ་ལ་འདི་སྐད་ཅེས་བགྱི་སྟེ། རིགས་དང་རྒྱུད་དང་གཟུགས་དང་ལྡན། །
མཚན་རྣམས་ཀྱིས་ནི་འབར་བའི་སྐུ། །དཔེ་བྱད་བཟང་པོ་བརྒྱད་ཅུས་ཀྱང་། །ཐུབ་པའི་ཟླ་བ་མངོན་པར་བརྒྱན། །མུ་སྟེགས་ཚོགས་རྣམས་ཟིལ་མནན་ཏེ། །ལོ་དྲུག་ཡུན་རིང་དཀའ་ཐུབ་སྤྱད། །བདུད་ཀྱང་བཏུལ་བ་མཛད་ནས་སུ། །བདེ་གཤེགས་ཐམས་ཅད་
མཁྱེན་ཉིད་བརྙེས། །སེམས་ཅན་མེད་ཅིང་སྲོག་མེད་ཆོས། །འཕགས་པའི་བདེན་བཞི་ཕུན་ཚོགས་པ། །དྲང་སྲོང་ལྷུང་བར་དེས་བཤད་པས། །དེ་སླད་དེ་ལ་སྐྱོན་མ་མཆིས། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །
ཀྱེ་བྲམ་ཟེ་ཆེན་པོ་དགེ་སྦྱོང་གཽ་ཏ་མ་དེ་མཚན་གང་དག་དང་ལྡན་ན་མཚན་གྱིས་ལེགས་པར་བརྒྱན་པའི་སྐུ་དང་ལྡན་པ་ཞེས་བྱ་བ་དེ་བཞིན་གཤེགས་པ་སྐྱེས་བུ་ཆེན་པོ་སེང་གེ་དེའི་མཚན་སུམ་ཅུ་རྩ་གཉིས་པོ་དེ་དག་གང་ཡིན། དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས་
རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེའི་སླད་དུ་གསན་དུ་གསོལ། །བརྗོད་པར་བགྱིའོ། །རྒྱལ་པོ་ཆེན་པོ་འདི་ལྟ་སྟེ། དགེ་སྦྱོང་གཽ་ཏ་མ་དེ་ནི་ཞབས་ཤིན་ཏུ་གནས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཕྱག་དང་ཞབས་ཀྱི་མཐིལ་

འཁོར་ལོ་རྩིབས་སྟོང་དང་ལྡན་པ་མངའ་བའོ། །དགེ་སྦྱོང་གཽ་ཏ་མ་དེ་ནི་ཕྱག་དང་ཞབས་དྲ་བར་འབྲེལ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཕྱག་དང་ཞབས་འཇམ་ཞིང་གཞོན་ཤ་ཆགས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སོར་མོ་རིང་བ་དང་ལྡན་པའོ། །དགེ་
སྦྱོང་གཽ་ཏ་མ་དེ་ནི་བདུན་མཐོ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཞབས་ཀྱི་རྟིང་པ་ཡངས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཞབས་ལོང་མོའི་ཚིགས་མི་མངོན་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་བྱིན་པ་རི་དགས་ཨེ་ན་ཡའི་ལྟ་བུ་དང་ལྡན་པའོ། །དགེ་སྦྱོང་
གཽ་ཏ་མ་དེ་ནི་བརླ་ཟླུམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་བཞེངས་བཞིན་དུ་མ་བཏུད་པར་ཕྱག་པུས་མོར་སླེབས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་མདོམས་ཀྱི་སྦ་བ་སྦུབས་སུ་ནུབ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྤུ་རེ་རེ་ནས་སྐྱེ་བ་དང་ལྡན་པའོ། །དགེ་
སྦྱོང་གཽ་ཏ་མ་དེ་ནི་དབུ་སྐྲ་མཐོན་མཐིང་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་དབུ་སྐྲ་གཡས་ཕྱོགས་སུ་འཁྱིལ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྐུའི་སྤུ་གྱེན་དུ་འཁྱིལ་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་པགས་པ་འཇམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་
པགས་པ་གསེར་གྱི་ཁ་དོག་ལྟ་བུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་དཔུང་མགོ་ཤིན་ཏུ་ཟླུམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཐལ་གོང་རྒྱས་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྐུ་ཆེ་ཞིང་དྲང་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་འགྲམ་པ་སེང་གེའི་འདྲ་བ་
དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་བཞི་བཅུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་ཐགས་བཟང་བ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་མཉམ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚེམས་ཤིན་ཏུ་དཀར་བ་དང་ལྡན་པའོ། །དགེ་སྦྱོང་གཽ་
ཏ་མ་དེ་ནི་རོ་བྲོ་བ་མཆོག་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ལྗགས་ཤིན་ཏུ་རིང་ཞིང་སྲབ་པ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚངས་པའི་དབྱངས་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྤྱན་གྱི་རྫི་མ་བའི་ལྟ་བུ་དང་ལྡན་པའོ། །དགེ་སྦྱོང་གཽ་ཏ་མ་དེ་ནི་སྤྱན་མཐོན་མཐིང་

དང་ལྡན་པའོ། །དགེ་སྦྱོང་གཽ་ཏ་མ་དེ་ནི་ཚོགས་ཡོངས་སུ་རྫོགས་པའི་མཛོད་སྤུ་དང་ལྡན་པའོ། །རྒྱལ་པོ་ཆེན་པོ་འདི་དག་ནི་དགེ་སྦྱོང་གཽ་ཏ་མའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དག་སྟེ། དེ་དག་དང་ལྡན་པས་དགེ་སྦྱོང་གཽ་ཏ་མ་དེ་མཚན་གྱིས་ལེགས་
པར་བརྒྱན་པའི་སྐུ་དང་ལྡན་པ་ཞེས་བགྱི་སྟེ། དེའི་སླད་དུ་དེ་སྐྱོན་མ་མཆིས་པ་ལགས་སོ། །དེ་ལ་འདི་སྐད་ཅེས་བགྱི་སྟེ། སྤྱི་བོ་གཙུག་ཏོར་མཛེས་པས་རྣམ་པར་བརྒྱན། །དབུ་སྐྲ་མཐོན་མཐིང་གཡས་སུ་འཁྱིལ་བ་མངའ། །རྫི་མ་བའི་འདྲ་ཨུད་པལ་མཆོག་གི་སྤྱན། །
དེ་བས་འདི་ན་རྒྱལ་བ་སྐྱོན་མ་མཆིས། །ཚངས་པ་ཀ་ལ་པིང་ཀ་མཆོག་གི་དབྱངས། །པད་མའི་འདབ་ལྟར་དྲི་མེད་ཡངས་པའི་ལྗགས། །དེ་ཡི་ལྗགས་ཀྱང་ཞལ་ཀུན་ཁེབས་པ་སྟེ། །དེ་བས་དེ་འདྲའི་སེམས་ཅན་འགའ་མ་མཆིས། །རོ་མཆོག་གཅིག་ཀྱང་ཐམས་ཅད་
རོ་ལྡན་པར། །མཚན་རབ་དེ་ཡིས་རབ་ཏུ་མྱུར་འགྱུར་ཏེ། །རྒྱལ་བའི་ལྗགས་ནི་དེ་དང་ལྡན་པས་ན། །དེ་བས་འདི་ན་རྒྱལ་བ་སྐྱོན་མ་མཆིས། །ཚེམས་ཀྱི་ཡོན་ཏན་མཉམ་མེད་མཉམ་པ་ཡིན། །དེ་ཡི་ཚེམས་ནི་བཞི་བཅུ་ཐམ་པ་ཚང་། །དེས་ནི་འཇིག་རྟེན་ལྷར་བཅས་
ཐམས་ཅད་ཀྱང་། །བདེ་གཤེགས་དེ་ལ་དགའ་འགྱུར་ངོ་མཚར་འཐོབ། །སེང་གེའི་ཟ་འགྲམ་སྒྲོས་ནི་བིམ་པའི་མཆོག །མཚུངས་མེད་ཐལ་གོང་ཤིན་ཏུ་རྒྱས་དང་ལྡན། །དཔུང་མགོ་ཤིན་ཏུ་ཟླུམ་ཞིང་མཛེས་པར་ལྡན། །དཔལ་ལྡན་ཤིང་ལྟར་ཆུ་ཞེང་གབ་པའི་སྐུ། །
དཔེ་ལེགས་སྐུ་ནི་ཡངས་ཤིང་རྐྱེན་དུ་འབབ། །ཡིད་ཅན་ཀུན་ལ་སྡུག་པའི་སྐུ་ཡང་མངའ། །ཐུབ་པ་དཔའ་བོ་མཐོ་བ་བདུན་དང་ལྡན། །པགས་པའི་མདོག་ནི་གསེར་མཆོག་བཙོ་མ་འདྲ། །ཤིན་ཏུ་འཇམ་སྐུ་སྤུ་ནི་གྱེན་དུ་འཁྱིལ། །སྡུག་ཅིང་མི་སྲབ་མཐོན་མཐིང་དྲི་
མེད་དབུ། །དབུ་འཇམ་གཡས་སུ་འཁྱིལ་དང་ལྡན་པ་སྟེ། །དེ་བས་བདེ་གཤེགས་མཉམ་པ་འགའ་མ་མཆིས། །བདེ་བར་གཤེགས་ནི་མ་བཏུད་བཞུགས་དང་ལྡན། །མདོམས་སྦ་མི་གདའ་གླང་པོའི་རྒྱལ་པོ་བཞིན། །བརླ་ཟླུམ་བྱིན་པ་ཨེ་ན་ཡ་ཡི་འདྲ། །བདེ་

གཤེགས་དེ་ལ་ཡིད་ཅན་སུ་མི་སྟེན། །ཕྱག་དང་ཞབས་ཀྱི་སོར་མོ་དྲ་བས་འབྲེལ། །སེན་མོ་ཟངས་མདོག་སོར་མོ་ལེགས་པར་ཟླུམ། །དུང་ལྟར་མཐོ་བའི་ཞབས་ལྡན་མཉམ་པའི་ཞབས། །རྟིང་པ་ཡངས་ཤིང་མཉམ་པ་དྲང་སྲོང་མཆོག །ཕྱག་དང་ཞབས་ལ་འཁོར་ལོ་
འཇམ་པ་མངའ། །དྲང་སྲོང་ཆེན་པོ་སོར་མོ་རིང་དང་ལྡན། །ཐུབ་པའི་དབང་པོ་ཞབས་མཐིལ་ཤིན་ཏུ་གནས། །དེས་ནི་ས་ལ་མི་གཡོའི་སྐུར་བཞུད་དེ། །འདི་ནི་དྲང་སྲོང་ཆེན་པོའི་མཚན་གྱི་ཚོགས། །དེ་ཡིས་བརྒྱན་སྐུ་ཤིན་ཏུ་མཛེས་པར་གདའ། །མཉམ་མེད་འཁོར་
གྱི་ནང་ན་བཞུགས་པའི་ཚེ། །སྐར་ཚོགས་མང་དབུས་ཟླ་བ་གནས་པ་བཞིན། །སྐྱེས་བུ་ཆེན་པོའི་སྐུ་མཆོག་གཟུགས་དེ་ཡང་། །འགྲོ་བ་ཀུན་ཏུ་དེ་བཞིན་ཤིན་ཏུ་གདའ། །བདེ་བར་གཤེགས་པའི་ཡོན་ཏན་དྲི་མེད་ཆོས། །གང་ལགས་དེ་ཀུན་ཐུབ་པ་ཉིད་གསུང་
གྲང་། །སྨྲས་པ། བྲམ་ཟེ་ཅིའི་ཕྱིར་ན་དགེ་སྦྱོང་གཽ་ཏ་མ་དེ་བསོད་ནམས་བརྒྱ་པའི་མཚན་དང་ལྡན་ཞེས་བྱ། སྨྲས་པ། རྒྱལ་པོ་ཆེན་པོ་དེའི་སླད་དུ། དོན་འདི་ཉིད་རབ་ཏུ་བསྒྲུབ་པའི་སླད་དུ་དཔེ་གསོལ་བར་འཚལ་ལོ། །རྒྱལ་པོ་ཆེན་པོ་གལ་ཏེ་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་ན་སེམས་ཅན་སྐྱེ་གནས་བཞིས་ཡོངས་སུ་ཟིན་པ་གང་ཇི་སྙེད་ཅིག་མཆིས་པ་དེ་དག་ཐམས་ཅད་ཡོངས་སུ་བརྟག་པ་ཉེ་བར་བཟུང་སྟེ། མིའི་ལུས་ཐོབ་པར་གྱུར་ལ། མིའི་ལུས་ཐོབ་པ་དེ་དག་རེ་རེ་ཞིང་འཁོར་ལོས་སྒྱུར་བའི་བསོད་ནམས་དང་ལྡན་པར་གྱུར་ལ།
འཁོར་ལོས་སྒྱུར་བའི་བསོད་ནམས་དང་ལྡན་པའི་སེམས་ཅན་དེ་དག་ཐམས་ཅད་ཀྱི་བསོད་ནམས་ཀྱི་ཕུང་པོ་གང་ལགས་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་སྤུའི་ཁུང་བུ་གཅིག་མངོན་པར་འགྲུབ་སྟེ། དེ་བཞིན་དུ་སྤུའི་ཁུང་བུ་རེ་རེ་ཡོངས་སུ་གྲུབ་
བོ། །སྤུའི་ཁུང་བུ་ཐམས་ཅད་དུ་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་དཔེ་བྱད་བཟང་པོ་གཅིག་མངོན་པར་འགྲུབ་སྟེ། དེ་བཞིན་དུ་དཔེ་བྱད་བཟང་པོ་རེ་རེ་ཡོངས་སུ་འགྲུབ་བོ། །དཔེ་བྱད་བཟང་

པོ་ཐམས་ཅད་དུ་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་སྐྱེས་བུ་ཆེན་པོའི་མཚན་གཅིག་མངོན་པར་འགྲུབ་སྟེ། དེ་བཞིན་དུ་མཚན་སུམ་ཅུ་རེ་རེ་ནས་ཡོངས་སུ་འགྲུབ་བོ། །
མཚན་སུམ་ཅུར་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་བརྒྱ་གྱུར་དུ་བསྒྱུར་བའི་བསོད་ནམས་ཀྱི་ཕུང་པོ་དེས་དགེ་སྦྱོང་གཽ་ཏ་མའི་སྐུ་ལ་སྐྱེས་བུ་ཆེན་པོའི་མཚན་དབུ་གཙུག་ཏོར་དང་ལྡན་པ་མངོན་པར་འགྲུབ་བོ། །དབུ་གཙུག་ཏོར་དུ་གཏོགས་པའི་བསོད་ནམས་ཀྱི་ཕུང་པོ་དེ་ལས་བྱེ་
བ་ཕྲག་འབུམ་དུ་བསྒྱུར་བའི་བསོད་ནམས་ཀྱི་ཕུང་པོས་དགེ་སྦྱོང་གཽ་ཏ་མའི་ཆོས་ཀྱི་དུང་མངོན་པར་འགྲུབ་སྟེ། ཆོས་ཀྱི་དུང་དེ་དང་ལྡན་པས་དགེ་སྦྱོང་གཽ་ཏ་མ་དེ་བཞེད་ན། འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་སེམས་ཅན་དུ་བསྡུ་བས་བསྡུས་པའི་སེམས་ཅན་གང་དག་
གནས་པ་དེ་དག་ཐམས་ཅད་ཀྱིས་གལ་ཏེ་རྣམ་པ་སྣ་ཚོགས་སུ་སྨྲས་པ། དགེ་སྦྱོང་གཽ་ཏ་མ་ལ་དུས་གཅིག་ཏུ་དྲི་བ་དྲིས་ཏེ། གཅིག་གིས་གང་དྲིས་པ་དེ་གཉིས་པ་མི་འདྲི་བར་སོ་སོ་ནས་དྲིས་ཀྱང་དེ་དག་ཐམས་ཅད་དགེ་སྦྱོང་གཽ་ཏ་མ་དེ་སེམས་ཀྱི་སྐད་ཅིག་གཅིག་དང་ལྡན་པའི་
ཤེས་རབ་ཀྱིས་བཟུང་ཞིང་གསུང་གཅིག་གིས་སེམས་ཅན་དེ་དག་གིས་ཇི་སྐད་དུ་དྲིས་པའི་དྲི་བ་དེ་དག་གི་ལན་གློན་ཞིང་སེམས་ཅན་དེ་དག་གིས་ཀྱང་རང་རང་གི་སྐད་དུ་འཚལ་བར་འགྱུར་ཏེ། རྒྱལ་པོ་ཆེན་པོ་དེའི་སླད་དུ་དགེ་སྦྱོང་གཽ་ཏ་མ་དེ་ནི་བསོད་ནམས་བརྒྱ་པའི་མཚན་དང་ལྡན་
པ་དང་། ཚངས་པའི་སྒྲ་དབྱངས་ཀྱི་གསུང་དང་ལྡན་པ་ཞེས་བགྱིའོ། །དེ་ལ་འདི་སྐད་ཅེས་བགྱི་སྟེ། བསོད་ནམས་བརྒྱ་པའི་མཚན་དང་ལྡན་པས་ན། །ལྷར་བཅས་འཇིག་རྟེན་ནང་ན་བསོད་ནམས་གཏེར། །མཐོང་དང་ཐོས་དང་བཞད་པ་མཛད་པས་ཀྱང་། །སེམས་ཅན་
ཀུན་ལ་ཕན་པ་མཛད་པ་ལགས། །འདི་ལྟར་སེམས་ཅན་ཀུན་གྱིས་ངེས་པའི་ཚིག །མང་པོ་དག་གིས་དུས་གཅིག་ཞུ་ཞུས་ན། །སེམས་ཀྱི་སྐད་ཅིག་གཅིག་ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཡང་འདེབས། །དེ་ལྟ་བས་ན་འདྲེན་པ་འཇིག་

རྟེན་ན། །ཚངས་པའི་སྒྲ་དབྱངས་གསུང་སྒྲོག་མཁྱེན་པར་མཛོད། །དེ་ནི་ལྷ་མི་སྡུག་བསྔལ་མཐར་འབྱིན་པའི། །ཆོས་ཀྱི་འཁོར་ལོ་རབ་ཏུ་བསྐོར་བར་མཛད། །དེ་ནས་རྒྱལ་པོ་གཏུམ་པོ་རབ་སྣང་གིས་གཅེར་བུ་པའི་བུ་བདེན་སྨྲ་ལ་ཚིགས་སུ་བཅད་དེ་དྲིས་པ། གང་
རྣམས་ཁྱོད་ཀྱིས་སྔར་བཤད་དེ། །དཔེ་བྱད་བཟང་པོ་ཡོད་སྨྲས་པ། །ཐུབ་པའི་དཔེ་བྱད་བཟང་པོ་གང་། །བྲམ་ཟེ་ཆེན་པོས་བརྗོད་པར་གྱིས། །དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས། རྒྱལ་པོ་གཏུམ་པོ་རབ་སྣང་ལ་ཚིགས་སུ་བཅད་དེ་སླར་སྨྲས་པ།
གང་དག་གིས་ན་ཐུབ་པ་དེ་ཡི་སྐུ། །དཔེ་བྱད་བཟང་པོ་བརྒྱད་ཅུ་ལྡན་བརྗོད་པ། །བདེ་གཤེགས་དཔེ་བྱད་བཟང་པོ་བརྒྱད་ཅུ་རྣམས། །བཤད་པར་འཚལ་གྱིས་རྒྱལ་པོ་གསན་དུ་གསོལ། །སེན་མོ་མཐོ་ཞིང་སེན་མོ་ཟངས་མདོག་འདྲ། །སེན་མོ་སྣུམ་ཞིང་ཕྱག་གི་སོར་
མོ་མཉམ། །སོར་མོ་ཟླུམ་ཞིང་སོར་མོ་རྒྱས་པ་སྟེ། །སོར་མོ་རྣམས་ནི་བྱིན་གྱིས་ཕྲ་བ་ལགས། །རྩ་རྣམས་མི་མངོན་སྒྲོས་ནི་བིམ་པ་འདྲ། །ཞབས་གཉིས་མཉམ་ཞིང་ལོང་བུ་མི་མངོན་ལགས། །ཕྱག་གི་རི་མོ་བྱིན་གྱིས་ཕྲ་བ་སྟེ། །རི་མོ་རྣམས་ནི་ཟབ་ཅིང་ཤིན་ཏུ་
གསལ། །ལྗགས་ནི་ཟངས་མདོག་ཤིན་ཏུ་མཉེན་ཞིང་འཇམ། །ཚིགས་རྣམས་མི་མངོན་ཕྱག་ནི་ཤིན་ཏུ་རིང་། །གླང་པོས་སྒྲ་བསྒྲགས་ལྟ་བུའི་གསུང་དང་ལྡན། །འབྲུག་སྒྲ་འདྲ་བར་སྙན་པའི་འཇམ་དབྱངས་ཅན། །སྐུ་ནི་སྙོམས་ཤིང་གསལ་ལ་ཤིན་ཏུ་མཁྲེགས། །ཤིན་
ཏུ་ལེགས་སྐུ་ཕྱག་གི་རི་མོ་སྣུམ། །སྐུ་ཡི་དངོས་པོ་ཤིན་ཏུ་གཙང་དང་ལྡན། །རྒྱལ་བའི་ཟླ་བ་སྐུ་ཡིས་ཤིན་ཏུ་བཙུན། །སྐུ་ནི་ཤིན་ཏུ་མཉམ་པར་བཞག་པ་སྟེ། །ཡན་ལག་རབ་འབྱེས་ནག་ནོག་མ་མཆིས་སྐུ། །སྐུ་ཡི་རོ་སྟོད་རྒྱས་ཡངས་ཤིན་ཏུ་མཁྲེགས། །དཔེ་བྱད་
བཟང་པོ་རྣམས་ནི་ཡོངས་སུ་རྫོགས། །སྐུ་ནི་རིམ་གྱིས་རྒྱས་ཤིང་ཤིན་ཏུ་མཛེས། །སྤྱོད་པ་གཙང་ལྡན་ཤིན་ཏུ་འཇམ་པའི་སྐུ། །ལྟེ་བའི་ཁུང་བུ་ནག་ནོག་མ་མཆིས་ལ། །ཡོངས་སུ་རྫོགས་ཤིང་ཤིན་ཏུ་ཟབ་དང་ལྡན། །འོད་ནི་ནག་ནོག་མ་མཆིས་ཡོངས་སུ་དག །སྐུ་ནི་

ཀུན་ནས་བཟང་ཞིང་ཤིན་ཏུ་མཁྲེགས། །དེ་ནི་ཀུན་ནས་བཟང་དང་ཤིན་ཏུ་ལྡན། །མགོན་པོའི་སྐུ་ནི་བལྟ་བས་ཆོག་མི་མྱོང་། །བལ་གླང་འདྲ་བར་བརྗིད་པའི་འགྲོས་སུ་གཤེགས། །ཁྱུ་མཆོག་འགྲོས་དང་སེང་གེ་ངང་པའི་འགྲོས། །གསུང་ནི་ཧ་ཅང་
མཐོ་བ་མ་ལགས་ལ། །བཟང་བའི་སྐུ་མངའ་འཇམ་ཞིང་སྣུམ་པའི་སྐུ། །ཕྱག་ནི་ཤིན་ཏུ་ཟླུམ་ཞིང་འཇམ་ལ་མཛེས། །གཡས་ནས་གཤེགས་ཤིང་གཤེགས་ཐབས་མཛེས་ལ་བཟང་། །ཤིན་ཏུ་ཕྱང་ངེར་གནས་པའི་ཕྱལ་དང་ལྡན། །འདོད་དང་འཇིགས་མེད་
ནག་ནོག་མེད་པའི་སྐུ། །སྨིན་མ་གནག་ཅིང་ཤིན་ཏུ་གཟངས་རིང་མཛེས། །ཕྱལ་ནི་མ་ཞོམ་སྤྱན་གྱི་དཀྱུས་ཀྱང་རིང་། །ཞལ་ནི་རབ་ལེགས་གཙང་མའི་སྤྱན་དང་ལྡན། །དྲི་མེད་སྤྱན་མངའ་སྤྱན་ནི་ཤིན་ཏུ་ཡངས། །ཚེམས་ཀྱི་མཆེ་བ་བྱིན་གྱིས་གྱེན་དུ་འཕགས། །སྨིན་
ཚུགས་འཇའ་ཁུགས་འདྲ་ཞིང་ཤངས་དབྱིབས་མཐོ། །ཨུད་པལ་སྔོན་པོའི་འདབ་འདྲའི་སྤྱན་དང་ལྡན། །སྨིན་མ་སྟུག་ཅིང་ཚེམས་ཀྱི་མཆེ་བ་ཟླུམ། །སྨིན་མ་མཉམ་ཞིང་འདབ་ཆགས་འབྲེལ་དང་ལྡན། །སྙན་གཉིས་མཉམ་ཞིང་ཚེམས་ཀྱི་མཆེ་བ་རྣོ། །ཞལ་གྱི་མཁུར་ཙོས་
སྐྱོན་དང་བྲལ་བ་མངའ། །རྒྱལ་བའི་སྤྱོད་པ་སྐྱོན་བག་ཡོད་མ་མཆིས། །དཔྲལ་བའི་དབྱེས་ལ་གཉེར་མ་མི་མངའ་ཞིང་། །མགུར་ནི་དུང་འདྲ་མཁྲེགས་པའི་སྐུ་མངའ་ལ། །ཚིགས་རྣམས་སྲེད་མེད་བུ་ཡི་སྟོབས་དང་ལྡན། །ཡན་ལག་དམ་པ་དབུ་ནི་གདུགས་དབྱིབས་
འདྲ། །དབུ་ཡི་སྟོད་རྣམས་ལྕང་ལོ་འཁྱིལ་དང་ལྡན། །དབུ་གནག་སྟུག་ཅིང་སྤོས་ཞིམ་དྲི་དང་ལྡན། །རྒྱལ་བའི་དབུ་སྐྲ་བཤོར་བ་མ་ལགས་ཏེ། །དབུ་སྐྲ་མི་འཛིངས་ཤིན་ཏུ་མཛེས་པའི་སྐུ། །དབུ་སྐྲ་སྟུག་ཅིང་ལེགས་པར་རིམ་གྱིས་གནས། །དབུ་དང་བ་སྤུ་འཇམ་
ཞིང་ཕྲ་ལ་གནག །དབུ་སྐྲ་བུང་བའི་ལྟོ་ལྟར་གནག་དང་ལྡན། །མཉམ་ཞིང་ཁོད་སྙོམས་དབུ་མཆོག་ཆུ་རླབས་འདྲ། །སེང་གེ་ཁྲི་དང་ཉ་དང་རྒྱལ་མཚན་དང་། །རྡོ་རྗེ་ལྕགས་ཀྱུ་བུམ་པ་གཡུང་དྲུང་འཁྱིལ། །དཔལ་གྱི་བེའུ་དང་དུང་དང་པད་མ་དང་། །བཀྲ་ཤིས་ལྡན་

རྣམས་ཕྱག་ཞབས་མཐིལ་ལ་མངའ། །རྒྱལ་པོ་ཆེན་པོ་བཟང་མཛེས་འདི་དག་ནི། །བདེ་བར་གཤེགས་པའི་དཔེ་བྱད་བཟང་པོའི་མཆོག །དཔེ་ལེགས་སྨོས་པ་འདི་དག་ཐམས་ཅད་ནི། །མུ་སྟེགས་ཅན་མི་གཞན་ལ་ཡོང་མ་མཆིས། །རྒྱལ་པོ་ཆེན་པོ་འདི་ནི་རེ་
ཞིག་དགེ་སྦྱོང་གཽ་ཏ་མ་དེའི་གཟུགས་ཀྱི་ཆེ་བ་ཉིད་དེ། དེ་ནི་སེམས་ཅན་ཐམས་ཅད་ལ་མ་མཆིས་པས་དེའི་སླད་དུ་དེ་ལ་སྐྱོན་མ་མཆིས་ལགས་སོ། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་བྱམས་པ་ཆེན་པོའི་སྟོབས་དང་ལྡན་པ་སྟེ། སེམས་ཅན་ཐམས་ཅད་ལ་ཁོང་ཁྲོ་བ་
མ་མཆིས་པའི་ཐུགས་དང་ལྡན་པའོ། །དེའི་བྱམས་པ་དེ་ཡང་མ་ཆགས་ལ་སྒྲིབ་པ་མ་མཆིས་ཤིང་རྟག་ཏུ་འབྱུང་བ་སྟེ། ལྷུན་གྱིས་གྲུབ་པར་རྒྱས་པར་འགེང་བ། འཇིག་རྟེན་གྱི་ཁམས་ཐམས་ཅད་དུ་ཁྱབ་པ། སེམས་ཅན་ཐམས་ཅད་ཀྱི་བསམ་པའི་རྗེས་སུ་ཞུགས་པ་སྟེ།
རྒྱལ་པོ་ཆེན་པོ་འདི་ལྟ་སྟེ་དཔེར་བགྱི་ན། ནོར་བུ་རིན་པོ་ཆེ་ཆུ་འདང་ནི་རང་བཞིན་གྱིས་དག་ཅིང་ཆབ་ཀྱི་རྙོག་མ་ཐམས་ཅད་དང་བར་བགྱིད་དོ། །རྒྱལ་པོ་ཆེན་པོ་དེ་བཞིན་དུ་དགེ་སྦྱོང་གཽ་ཏ་མ་དེ་ཡང་ནང་ཡོངས་སུ་དག་ཅིང་སེམས་ཅན་ཐམས་ཅད་ཀྱི་ཉོན་མོངས་པའི་རྙོག་པ་དང་བར་
མཛད་པ་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། །དུས་རྣམས་ཀུན་དང་ཞིང་ཀུན་དང་། །འཇིག་རྟེན་བྱམས་པས་ཁྱབ་པར་མཛད། །འགྲོ་བ་ཀུན་གྱི་བསམ་པ་ཡང་། །ཁྱབ་མཛད་ཀུན་མཁྱེན་བྱམས་དང་ལྡན། །ཟླ་མེད་
ཐུབ་པའི་བྱམས་པ་ཡིས། །མ་ཁྱབ་ཕྱོགས་འགའ་མ་མཆིས་ཏེ། །ཁམས་དང་བསམ་པ་རྣམས་ཀྱང་ཁྱབ། །དེ་བས་ཀུན་མཁྱེན་སྐྱོན་མ་མཆིས། །དཔེར་ན་ནོར་བུ་ཆུ་འདང་བ། །ཤིན་ཏུ་རྣམ་དག་ཆབ་འདང་བགྱིད། །དེ་བཞིན་དྲང་སྲོང་ཐུགས་དག་པ། །སྐྱེ་བོའི་
རྙོག་པ་དང་བར་མཛད། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་རྣམ་པ་སུམ་ཅུ་རྩ་གཉིས་དང་ལྡན་པའི་ཐུགས་རྗེ་ཆེན་པོ་དང་ལྡན་པ་ལགས་ཏེ། རྣམ་པ་སུམ་ཅུ་རྩ་གཉིས་པོ་དེ་དག་གང་ཞེ་ན། འདི་ལྟ་སྟེ། གཏི་མུག་གི་མུན་པར་ཞུགས་པའི་འཇིག་རྟེན་གནས་པ་གཟིགས་

ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། མ་རིག་པ་ཆེན་པོའི་སྒོ་ངའི་སྦུབས་སུ་ཆུད་པའི་འཇིག་རྟེན་གནས་པ་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། འཁོར་བ་ཆེན་པོར་
ལྷུང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རྟག་ཏུ་གཡེན་སྤྱོ་ཞིང་མ་ཞི་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། ཉོན་མོངས་པའི་ཆུ་བོ་
ཆེན་པོས་ཁྱེར་བའི་སེམས་ཅན་རྒྱུན་གྱི་རྗེས་སུ་འགྲོ་བ་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། གཡང་ས་ཆེན་པོ་ནས་ལྷུང་ཞིང་སྡུག་བསྔལ་ཆེན་པོ་མྱོང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་
གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། ལམ་ངན་པར་ཞུགས་པའི་སེམས་ཅན་འཕགས་པའི་ལམ་དང་བྲལ་བ་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། ཉོན་མོངས་པ་ཆེན་པོའི་བཅིང་བས་བཅིངས་པ་རྟག་ཏུ་དཀྲི་བས་
དཀྲིས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། ཡུན་རིང་པོར་ཡུལ་གྱིས་དགང་དཀའ་ཞིང་ངོམས་མི་ཤེས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་།
སྲེད་པས་འཁོལ་ཅིང་རྟག་ཏུ་གཞན་གྱི་དབང་དུ་གྱུར་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རྒ་ཤིས་ཡོངས་སུ་མནར་ཅིང་ཤིན་ཏུ་ཉོན་མོངས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་
མའི་ཐུགས་རྗེ་ཆེན་པོ་འཇུག་པ་དང་། ནད་སྣ་ཚོགས་མང་པོས་ཡོངས་སུ་མནར་ཅིང་རྟག་ཏུ་ནད་པར་གྱུར་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། མེ་གསུམ་རབ་ཏུ་འབར་ཞིང་རྟག་ཏུ་སྲེག་པའི་སེམས་ཅན་དག་

གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། དམན་ཞིང་ཡོངས་སུ་མ་དག་ལ་འཁོར་བ་རྣམ་པར་འཕེལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རྟག་ཏུ་སྐྲག་ཅིང་
རྟག་ཏུ་ཡིད་སྐྲག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རོ་བྲོ་བ་ཆུང་བ་ལ་ཆགས་ཤིང་ཉེས་དམིགས་མ་མཐོང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་
འཇུག་པ་དང་། དྲེགས་པ་སྣ་ཚོགས་མང་པོས་མྱོས་ཤིང་ཡུན་རིང་པོར་གཉིད་ཀྱིས་ལོག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། དགོན་པ་ཆེན་པོའི་ལམ་དུ་ཞུགས་ཤིང་གསོད་པ་རྟག་ཏུ་ཕྱི་བཞིན་
འབྲང་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རྟག་ཏུ་གནོད་པར་གྱུར་ཅིང་དུས་ཐམས་ཅད་དུ་འཇུག་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་།
མ་རིག་པས་ལོང་བར་གྱུར་ཅིང་རྟག་ཏུ་རབ་རིབ་ཀྱིས་བསྒྲིབས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། ཐགས་འཁྲུགས་པ་ལྟ་བུར་གྱུར་ཅིང་དྲུ་བུ་འཛིངས་པ་ལྟ་བུར་གྱུར་ལ་རྩ་མུན་ཛ་དང་བལ་བ་ཛ་ལྟ་བུར་གྱུར་པའི་
སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། གནོད་པ་དང་ལྡན་ཞིང་གནོད་པ་མ་མཆིས་པ་དང་བྲལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། མི་ཁོམ་
པ་དང་ལྡན་པར་གྱུར་ཅིང་དལ་བ་དང་བྲལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། ཐེ་ཙོམ་ཅན་དུ་གྱུར་ཅིང་ལོག་པར་ལྟ་བར་ཞུགས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་

ཐུགས་རྗེ་ཆེན་པོ་འཇུག་པ་དང་། ཤིང་བལ་གྱི་འདའ་བ་ལྟར་གྱུར་ཅིང་ལྟ་བ་སྣ་ཚོགས་ལ་རྟེན་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། འདུ་ཤེས་དང་སེམས་ཕྱིན་ཅི་ལོག་ཏུ་གྱུར་ཅིང་མི་
རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་ལ་བདེ་བར་འདུ་ཤེས་པ་དང་། མི་སྡུག་པ་ལ་སྡུག་པར་འདུ་ཤེས་པ་དང་། དངོས་པོ་མ་མཆིས་པ་ལ་དངོས་པོ་མཆིས་པར་འདུ་ཤེས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་
རྗེ་ཆེན་པོ་འཇུག་པ་དང་། ཁུར་གྱིས་གཟིར་ཅིང་ཡུན་རིང་པོ་ནས་དུབ་སྟེ། སྡུག་བསྔལ་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། མཐུ་ཆུང་བ་ལ་རྟེན་ཅིང་སྙིང་པོ་མ་མཆིས་པ་སྙིང་པོར་འདུ་ཤེས་
པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རྟག་ཏུ་ཉེ་བར་ཉོན་མོངས་པ་དང་ལྡན་པར་གྱུར་ཅིང་དྲི་མས་གོས་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་།
སྲིད་པའི་འདོད་ཆགས་ཀྱིས་བརླགས་ཤིང་ཡིད་ཞུམ་པའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། རྙེད་པ་དང་བཀུར་སྟིའི་ཟིལ་གྱིས་ནོན་ཅིང་རྟག་ཏུ་རྙེད་པ་ཚོལ་བའི་སེམས་ཅན་དག་གཟིགས་ན་སེམས་ཅན་རྣམས་
ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་པོ་འཇུག་པ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམ་པ་མང་པོས་གཟིར་བའི་སེམས་ཅན་དག་གཟིགས་ན་སེམས་ཅན་རྣམས་ལ་དགེ་སྦྱོང་གཽ་ཏ་མའི་ཐུགས་རྗེ་ཆེན་
པོ་སྐྱེ་བ་སྟེ། དགེ་སྦྱོང་གཽ་ཏ་མ་དེ་ནི་རྣམ་པ་སུམ་ཅུ་རྩ་གཉིས་པོ་དེ་དང་ལྡན་པའི་ཐུགས་རྗེ་ཆེན་པོ་དང་ལྡན་པ་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། གཏི་མུག་མུན་པ་མུན་ནག་གིས་རྟག་ཏུ། །སེམས་ནི་བསྒྲིབས་པར་གྱུར་པའི་

སྐྱེ་དགུ་དང་། །འཁོར་བའི་བཙོན་རར་ཆུད་པ་རྣམས་གཟིགས་ན། །དྲང་སྲོང་དམ་པ་དེ་ནི་ཐུགས་རྗེ་སྐྱེད། །རྟག་ཏུ་གཡེན་སྤྱོར་གྱུར་དང་རྟག་ཏུ་ཡང་། །ཆུ་བོ་བཞི་པོ་དག་གིས་ཁྱེར་གྱུར་ཅིང་། །འཁོར་བའི་རྒྱུན་ལ་གནས་པའི་སེམས་ཅན་རྣམས། །གཟིགས་ན་
སྟོབས་བཅུ་མངའ་བ་ཐུགས་རྗེ་སྐྱེ། །གཡང་ས་ཆེན་པོར་ལྷུང་བར་གྱུར་པའམ། །ལམ་ངན་ཞུགས་པའི་སེམས་ཅན་རྣམས་གཟིགས་ན། །ཐུབ་པ་ཐུགས་རྗེས་ཞི་བའི་གནས་དང་ནི། །འཕགས་པའི་རྒྱལ་པོའི་ལམ་ལ་འགོད་པ་མཛད། །བཅིངས་པར་གྱུར་དང་སྲེད་
པས་འཁོལ་བ་དང་། །རྟག་ཏུ་ཡུལ་ལ་ཆགས་དང་རྒ་བ་དང་། །འཆི་བའི་གཏིང་ལྷུང་སེམས་ཅན་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །སྡུག་བསྔལ་རྣམ་པ་མང་པོས་མནར་བ་དང་། །མེ་གསུམ་འབར་བའི་སྐྱེ་དགུ་འདི་དག་དང་། །ངན་སོང་སས་
འཇིགས་པ་རྣམས་གཟིགས་གྱུར་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །རོ་ལ་བརྐམ་པའི་སེམས་དང་ལྡན་པ་དང་། །བག་མེད་རྟག་ཏུ་ཡུལ་ལ་ཆགས་པ་དང་། །སྲིད་པའི་དགོན་པར་ཉོན་མོངས་སེམས་ཅན་རྣམས། །གཟིགས་པར་གྱུར་ན་རྣམ་པར་གྲོལ་བར་
མཛད། །མ་རིག་ལྡོངས་ཤིང་རབ་རིབ་ཁེབས་པ་དང་། །བལ་བ་ཛ་དང་མུན་ཛ་འདྲར་གྱུར་དང་། །ཞེ་འགྲས་གྱུར་པའི་སེམས་ཅན་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །འཁོར་བར་བཅིངས་པའི་སེམས་དང་ལྡན་པ་དང་། །མི་ཁོམ་སྐྱེས་པའི་སྐྱེ་དགུ་
འདི་དག་དང་། །ལོག་པར་ལྟ་བར་ལྷུང་བ་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །སྡུག་བསྔལ་བདེ་དང་མི་སྡུག་སྡུག་ཤེས་དང་། །མི་རྟག་རྟག་དང་བདག་མ་མཆིས་པ་ལ། །བདག་ཏུ་འདུ་ཤེས་འཁྲུལ་བ་རྣམས་གཟིགས་ན། །སྟོབས་བཅུ་མངའ་བའི་ཐུགས་
རྗེ་རབ་ཏུ་སྐྱེ། །ཁུར་གྱིས་ནོན་ཅིང་གཟིར་བར་གྱུར་རྣམས་དང་། །དེ་བཞིན་མཐུ་ཆུང་རྟེན་པའི་བྱིས་པ་དང་། །རྟག་ཏུ་ཉོན་མོངས་ཉོན་མོངས་རྣམས་གཟིགས་ན། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །འདོད་པའི་ཟིལ་གྱིས་ནོན་པའི་ཡིད་ལྡན་དང་། །སྲེད་པ་ཆེ་ཞིང་རྟག་ཏུ་ཡུལ་

བརྐམ་དང་། །སྲིད་པའི་འདོད་ཆགས་རྒྱ་མཚོར་ལྷུང་བ་རྣམས། །གཟིགས་ནས་རྒྱལ་བའི་ཐུགས་རྗེ་ཆེན་པོ་སྐྱེ། །ནད་དང་མྱ་ངན་རྣམ་པ་མང་དག་གིས། །ཤིན་ཏུ་གཙེས་པའི་སྐྱེ་དགུ་ཉོན་མོངས་རྣམས། །གཟིགས་ནས་སྡུག་བསྔལ་མ་ལུས་བསལ་སླད་
དུ། །སྟོབས་བཅུ་མངའ་བའི་ཐུགས་རྗེ་རབ་ཏུ་སྐྱེ། །ཐུབ་པའི་ཐུགས་རྗེ་ཆེན་པོ་རྟག་བྱུང་སྟེ། །དེ་མི་འབྱུང་བ་ནམ་ཡང་སྲིད་མི་འགྱུར། །འགྲོ་བ་ཀུན་གྱི་བསམ་པ་གནས་པ་སྟེ། །དེ་བས་སངས་རྒྱས་དེ་ལ་སྐྱོན་མི་མངའ། །རྒྱལ་པོ་ཆེན་པོ་མདོར་ན་དགེ་སྦྱོང་གཽ་ཏ་མ་དེ་ནི་དྲན་
པ་ཉེ་བར་གཞག་པ་བཞི་དང་ལྡན་པའོ། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་ཡང་དག་པའི་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་ལྡན་པ་སྟེ།
དེའི་སླད་དུ་དེ་ལ་སྐྱོན་མ་མཆིས་པ་ལགས་སོ། །དེ་ལ་འདི་སྐད་ཅེས་བགྱི་སྟེ། དྲན་པ་ཉེ་བར་གཞག་པ་བཞི་པོ་མཁྱེན། །ཡང་དག་སྤོང་བཞི་མཁྱེན་ཏེ་ཟླ་མ་མཆིས། །ཏིང་འཛིན་བསམ་གཏན་སྦྱོར་ལ་དེ་མངའ་ཆེ། །དེ་ལྟར་སེམས་ཅན་རླབས་ཆེན་སྐྱོན་མ་མཆིས། །འཇིག་རྟེན་
མགོན་གཅིག་རྫུ་འཕྲུལ་རྐང་མཉམ་པས། །སོ་སོ་ཡང་དག་རིག་པའི་ཕ་རོལ་བྱོན། །དྲང་སྲོང་ཆེན་པོ་རིག་དང་རྣམ་གྲོལ་མཁས། །ཐུབ་པ་རྣམ་དག་སེམས་ཅན་ཐབས་མཁྱེན་ལྡན། །བྱམས་དང་སྙིང་རྗེ་དགའ་དང་བཏང་སྙོམས་དང་། །ཚངས་པའི་གནས་པ་བཞི་ལ་དེ་དབང་
སྒྱུར། །ལྷག་མཐོང་ཞི་གནས་གཉིས་ལ་རྣལ་འབྱོར་པ། །དེ་བས་དེ་ལ་ནམ་ཡང་སྐྱོན་མ་མཆིས། །བྱང་ཆུབ་ཡན་ལག་རིན་ཆེན་རྒྱན་མཆོག་ལྡན། །ཡན་ལག་བརྒྱད་ལྡན་ལམ་ཆུ་དྲི་མེད་བཀྲུས། །བདེ་ཞིང་མི་གཡོ་འཇིགས་དང་གང་བྲལ་བའི། །ལམ་དེ་ཉིད་ལ་འགྲོ་
བ་སྦྱོར་བར་མཛད། །ཐུབ་པ་ཁྱུ་མཆོག་དེ་དང་གང་འདྲ་བའི། །སེམས་ཅན་འཇིག་རྟེན་འདི་ན་འགའ་མ་མཆིས། །ཐམས་ཅད་ཟིལ་གནོན་ཡོན་ཏན་ཀུན་དང་ལྡན། ཡོན་ཏན་དབང་ཕྱུག་དེ་ལ་སྨད་མ་མཆིས། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་སྟོབས་བཅུ་དང་ལྡན་པའོ། །

སྨྲས་པ། བྲམ་ཟེ་ཆེན་པོ་དེ་བཞིན་གཤེགས་པའི་སྟོབས་བཅུ་པོ་དེ་དག་གང་། སྨྲས་པ། རྒྱལ་པོ་ཆེན་པོ་འདི་ལྟ་སྟེ། འདི་ན་དེ་བཞིན་གཤེགས་པ་ནི་གནས་ལ་ཡང་གནས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། གནས་མ་ལགས་པ་ལ་ཡང་གནས་མ་ལགས་
པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། རྒྱལ་པོ་ཆེན་པོ་འདི་ནི་དགེ་སྦྱོང་གཽ་ཏ་མ་དེའི་དེ་བཞིན་གཤེགས་པའི་སྟོབས་དང་པོའོ། །དེ་བཞིན་གཤེགས་པ་དེ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་ཡང་དག་པར་བླངས་པ་རྣམས་གནས་དང་།
རིགས་དང་། རྣམ་པར་སྨིན་པ་ལས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འཇིག་རྟེན་གྱི་ཁམས་དུ་མ་པ་དང་། ཁམས་སྣ་ཚོགས་པ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་གཞན་དག་དང་གང་ཟག་གཞན་རྣམས་ཀྱི་མོས་པ་དུ་མ་དང་
མོས་པ་སྣ་ཚོགས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སེམས་ཅན་གཞན་དག་དང་གང་ཟག་གཞན་རྣམས་ཀྱི་དབང་པོ་མཆོག་དང་མཆོག་མ་ཡིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཐམས་ཅད་དུ་འགྲོ་བའི་ལམ་ཡང་དག་པ་ཇི་ལྟ་བ་
བཞིན་དུ་རབ་ཏུ་མཁྱེན་ཏོ། །སེམས་ཅན་གཞན་དག་དང་གང་ཟག་གཞན་རྣམས་ཀྱི་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱི་ཀུན་ནས་ཉོན་མོངས་པ་དང་
རྣམ་པར་བྱང་བ་དང་ལྡན་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། ཚེ་རབས་གཅིག་ཀྱང་རྗེས་སུ་དྲན་ཞིང་། ཚེ་རབས་བྱེ་བ་ཁྲག་ཁྲིག་འབུམ་ཕྲག་དུ་མའི་བར་དག་ཀྱང་རྣམ་པ་དང་བཅས་པ་དང་། ས་
ཕྱོགས་དང་བཅས་པ་དང་། རྒྱུ་མཚན་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །དེ་ལྷའི་སྤྱན་རྣམ་པར་དག་པ་མིའི་ལས་འདས་པས་སེམས་ཅན་འཆི་འཕོ་བ་དང་། སྐྱེ་བ་ལས་བདེ་འགྲོ་དང་ངན་འགྲོར་སྐྱེ་བ་རྣམས་གཟིགས་སོ། །ཟག་པ་ཟད་པས་ཟག་པ་

མེད་པ་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། འདི་ནི་དགེ་སྦྱོང་གཽ་ཏ་མའི་དེ་བཞིན་གཤེགས་པའི་སྟོབས་བཅུ་པའོ། །རྒྱལ་པོ་ཆེན་པོ་དེ་དག་ནི་དེ་བཞིན་གཤེགས་པའི་སྟོབས་བཅུ་པོ་དེ་དག་སྟེ།
སྟོབས་དེ་དག་དང་ལྡན་པས་དེ་བཞིན་གཤེགས་པ་དེ་སྟོབས་བཅུ་མངའ་ཞེས་བགྱི་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། གནས་དང་དེ་བཞིན་གནས་མ་ལགས། །ཡང་དག་ཇི་བཞིན་དེ་མཁྱེན་ཏེ། །དཔའ་བོ་ཆེན་པོ་ཡང་དག་
གསུང་། །དེ་ལ་སྐྱོན་ནི་མ་མཆིས་སོ། །དེ་ནི་འདས་པའི་དུས་ལ་ཡང་། །མ་ཆགས་པ་ཡི་ཡེ་ཤེས་འཇུག །ད་ལྟར་བྱུང་དང་མ་འོངས་ལ། །དེ་ཡི་ཡེ་ཤེས་རྨོངས་མ་མཆིས། །ལས་དང་ལས་ཀྱི་རྣམ་སྨིན་དང་། །རྒྱུ་ཡི་ཤེས་པ་གང་ལགས་པ། །དེ་དག་ཐམས་ཅད་
མ་ལུས་པར། །འཇིག་རྟེན་རྣམ་པར་འདྲེན་པས་མཁྱེན། །དུ་མའི་ཁམས་ཅན་འཇིག་རྟེན་དང་། །སྣ་ཚོགས་ཁམས་ཅན་དེས་མཁྱེན་ཏོ། །ཁམས་མཁྱེན་ཚུལ་ལ་མཁས་པ་སྟེ། །འཇིག་རྟེན་གང་ཟག་ཟླ་མ་མཆིས། །མོས་པ་སྣ་ཚོགས་ལྡན་པ་དང་། །དེ་བཞིན་
མོས་པ་དུ་མ་ཅན། །འཇིག་རྟེན་སྒྲོན་མ་དེས་མཁྱེན་ཏེ། །ཡང་དག་ཇི་བཞིན་གཞན་དུ་མིན། །དབང་པོ་རྟུལ་བའང་རབ་ཏུ་མཁྱེན། །དེ་བཞིན་དབང་པོ་འབྲིང་ཡང་མཁྱེན། །ཡོངས་སྨིན་དབང་པོ་དེས་མཁྱེན་ཏེ། །དབང་པོ་ཚོགས་ལ་དབང་ཕྱུག་གོ། །ཐམས་ཅད་དུ་ནི་འགྲོ་
བའི་ལམ། །ཡང་དག་ཇི་བཞིན་དེས་མཁྱེན་ཏེ། །མངོན་ཤེས་དབང་པོ་བསམ་གཏན་སྟོབས། །བྱང་ཆུབ་ཡན་ལག་རྣམ་ཐར་མཁྱེན། །ཀུན་ནས་ཉོན་མོངས་རྣམ་བྱང་དག །རྣམ་པར་དགོད་པའང་དེས་མཁྱེན་ཏོ། །ཐོགས་མེད་ཡེ་ཤེས་གཟིགས་མངའ་བས། །
དེ་ལ་ཐོགས་པ་ཡོང་མ་མཆིས། །སྔོན་ཚེ་དཔག་ཏུ་མེད་པ་དག །རྣམ་པ་དུ་མར་དེས་གཟིགས་ཏེ། །བདག་དང་གཞན་གྱི་མ་ལུས་པར། །ཡང་དག་ཇི་བཞིན་གཞན་དུ་མིན། །དེའི་སྤྱན་དྲི་མ་མ་མཆིས་ཤིང་། །མིའི་ལས་ཤིན་ཏུ་འདས་པ་སྟེ། །སེམས་ཅན་

ཤི་འཕོ་སྐྱེ་བ་ཡང་། །དེས་ནི་འདྲེན་པས་རབ་ཏུ་གཟིགས། །ཟག་པ་ཟད་པ་མཁྱེན་པ་སྟེ། །རྣམ་པར་གྲོལ་བའང་རབ་ཏུ་མཁྱེན། །ཟག་མེད་ཁམས་ནི་གང་ལགས་པ། །དེ་ནི་འདྲེན་པས་རབ་ཏུ་མཁྱེན། །སངས་རྒྱས་མངའ་ཆེན་སྒྱུར་བ་ཡིས། །སྟོབས་བཅུ་འདི་
དག་མཚུངས་མ་མཆིས། །སེམས་གཅིག་ལ་ནི་ཀུན་གནས་ཀྱང་། །སེམས་ལ་རྟོག་པ་མི་མངའ་སྟེ། །བླང་མེད་དོར་བ་མེད་ཚུལ་དུ། །ལྷུན་གྱིས་གྲུབ་པར་དེ་དག་འབྱུང་། །སྔར་བསྐོར་འཁོར་ལོའི་ཤུགས་བཞིན་དུ། །རྟོག་པ་མི་མངར་འབྱུང་བ་སྟེ། །སེམས་
ཅན་ཀུན་གྱིས་རྣམ་བསམས་པ། །སེམས་གཅིག་གིས་ནི་རབ་ཏུ་མཁྱེན། །འོན་ཀྱང་སེམས་དང་སེམས་ཅན་ལ། །གཉིས་ཀྱི་བློ་ནི་མི་འབྱུང་ངོ་། །དེ་བས་སངས་རྒྱས་དབང་སྒྱུར་ལ། །སྐྱོན་ནི་གང་ཡང་མི་མངའ་སྟེ། །ཆོས་རྣམས་ཀུན་ལ་མཁས་པ་དེ། །ཡོན་
ཏན་དཔལ་ནི་ཀུན་ལས་འཕགས། །རྒྱལ་པོ་ཆེན་པོ་དགེ་སྦྱོང་གཽ་ཏ་མ་དེ་ནི་མི་འཇིགས་པ་བཞི་དང་ལྡན་པའོ། །སྨྲས་པ། བྲམ་ཟེ་ཆེན་པོ་དགེ་སྦྱོང་གཽ་ཏ་མ་དེ་མི་འཇིགས་པ་གང་དག་དང་ལྡན་པས་མི་འཇིགས་པ་བཞི་དང་ལྡན་པ་ཞེས་བྱ་བའི་དེ་བཞིན་གཤེགས་པའི་མི་འཇིགས་པ་
བཞི་པོ་དེ་དག་གང་ཡིན། སྨྲས་པ། རྒྱལ་པོ་ཆེན་པོ་འདི་ལ་དགེ་སྦྱོང་གཽ་ཏ་མ་དེ་ནི་ང་ཡང་དག་པར་རྫོགས་པའི་སངས་རྒྱས་སོ་ཞེས་བདག་ཉིད་དམ་བཅས་ན་ཆོས་འདི་རྣམས་ཁྱོད་ཀྱིས་མངོན་པར་རྫོགས་པར་སངས་མ་རྒྱས་སོ་ཞེས་ལྷ་དང་བཅས་པ། བདུད་དང་བཅས་པ།
ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང་མི་འཇིགས་པ་བརྙེས་ནས་
གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ། ཚངས་པའི་འཁོར་ལོ་དགེ་སྦྱོང་ངམ། བྲམ་ཟེའམ། གཞན་སུའང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་དང་། ནམ་དེ་ཟག་

པ་ཟད་པ་སྟེ། ང་ནི་ཟག་པ་ཟད་དོ་ཞེས་བདག་ཉིད་དམ་བཅས་ན། དེ་ལ་ཁྱོད་ཀྱིས་ཟག་པ་དེ་དག་མ་ཟད་དོ་ཞེས་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ཆོས་
དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང་། མི་འཇིགས་པ་བརྙེས་ནས་གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང་། འཁོར་གྱི་ནང་དུ་སེང་གེའི་སྒྲ་
ཡང་དག་པར་སྒྲོག་ལ་ཚངས་པའི་འཁོར་ལོ་དགེ་སྦྱོང་ངམ། བྲམ་ཟེའམ། གཞན་སུ་ཡང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་དང་། དེ་བཞིན་གཤེགས་པས་གང་དག་བར་དུ་གཅོད་པའི་ཆོས་སུ་གསུངས་པ་དེ་དག་བསྟེན་ཀྱང་བར་དུ་
གཅོད་པར་མི་འགྱུར་རོ་ཞེས་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན་ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་
རྗེས་སུ་མ་གཟིགས་པས་བདེ་བ་བརྙེས་ཤིང་མི་འཇིགས་པ་བརྙེས་ནས་གནས་ཏེ། ཁྱུ་མཆོག་གི་གནས་སུ་དམ་འཆའ་ཞིང་། འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ། ཚངས་པའི་འཁོར་ལོ་དགེ་སྦྱོང་ངམ། བྲམ་ཟེའམ། གཞན་སུ་ཡང་རུང་བས་ཆོས་དང་
འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་དང་། དེ་བཞིན་གཤེགས་པས་འཕགས་པ་ངེས་པར་འབྱིན་པའི་ལམ་གང་གསུངས་པ་དེ་བསྟེན་ཀྱང་། ཡང་དག་པར་སྡུག་བསྔལ་ཟད་པའི་རྒྱུར་མི་འགྱུར་རོ་ཞེས་ལྷ་དང་བཅས་པ། བདུད་དང་བཅས་པ། ཚངས་པ་དང་
བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་འཇིག་རྟེན་ན། ཆོས་དང་འཐུན་པར་འགའ་ཞིག་བདག་ལ་རྒོལ་བའི་རྒྱུ་དེ་ཡང་དག་པར་རྗེས་སུ་མི་གཟིགས་ཏེ། རྒྱུ་དེ་ཡང་དག་པར་རྗེས་སུ་མ་གཟིགས་པས་བདེ་བ་བརྙེས་ཤིང་། མི་འཇིགས་པ་བརྙེས་ནས་གནས་ཏེ།

ཁྱུ་མཆོག་གི་གནས་སུ་དམ་འཆའ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་ལ། ཚངས་པའི་འཁོར་ལོ་དགེ་སྦྱོང་ངམ། བྲམ་ཟེ་འམ། གཞན་སུ་ཡང་རུང་བས་ཆོས་དང་འཐུན་པར་འཇིག་རྟེན་དུ་མ་བསྐོར་བ་བསྐོར་བར་མཛད་པ་སྟེ། རྒྱལ་པོ་ཆེན་པོ་འདི་དག་ནི་དེ་
བཞིན་གཤེགས་པའི་མི་འཇིགས་པ་བཞི་སྟེ། དེ་དག་དང་ལྡན་པའི་དེ་བཞིན་གཤེགས་པ་ནི་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་སྟེ། དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། ང་དང་མཚུངས་པའི་སེམས་ཅན་ནི། །འགའ་མེད་
ལྷག་པ་ག་ལ་ཞེས། །མི་ཡི་འདྲེན་པ་འཁོར་ནང་དུ། །སེང་གེའི་སྒྲ་ནི་སྒྲོག་པར་མཛད། །ང་ཡི་ཆོས་རྣམས་སངས་རྒྱས་པ། །དེ་དག་ཡང་དག་གཞན་དུ་མིན། །དེ་གཟིགས་རྫོགས་པའི་སངས་རྒྱས་དེ། །བསྙེངས་པ་མི་མངའ་སེང་གེ་བཞིན། །ལ་ལ་དེ་ལ་རྒོལ་འགྱུར་བའི། །
རྒྱུ་ནི་ཡང་དག་མི་གཟིགས་ཏེ། །རྒྱུ་ཡང་གཟིགས་པར་མ་གྱུར་པས། །འདྲེན་པ་བསྙེངས་པ་མི་མངའ་སྒྲོག །ཟག་པ་ཐམས་ཅད་ཟད་གྱུར་ཏེ། །ང་ཡི་སྐུ་ལ་ཟག་པ་མེད། །དེ་ཕྱིར་ལྷར་བཅས་འཇིག་རྟེན་ན། །ང་དང་མཚུངས་པ་གང་ཡང་མེད། །བར་དུ་གཅོད་པའི་ཆོས་
གང་དག །སྐྱེ་བོ་རྣམས་ལ་ངས་བསྟན་པ། །དེ་ཀུན་ཡང་དག་ཉིད་དུ་སྨྲས། །གཞན་དུ་འགྱུར་བ་ཡོད་མ་ཡིན། །ངེས་པར་འབྱིན་པའི་ཆོས་གང་དག །ངས་སངས་རྒྱས་ནས་རབ་བསྟན་པ། །ཆོས་རྣམས་དེ་དག་བསྟེན་བྱས་ནས། །བར་དུ་གཅོད་པར་འགྱུར་བ་མེད། །དེ་
འདྲ་དཔའ་བོ་ཆེན་པོས་མཁྱེན། །དེ་བཞིན་གཤེགས་པས་བདེ་བརྙེས་པས། །འཇིགས་མེད་བདེ་བ་བརྙེས་གྱུར་ཏེ། །ཐུབ་པ་བསྙེངས་པ་མི་མངར་བཞུགས། །སུས་ཀྱང་བསྐོར་བར་མ་གྱུར་པའི། །ཚངས་པའི་འཁོར་ལོ་རབ་ཏུ་སྐོར། །རྐང་གཉིས་དམ་པ་མ་གཏོགས་པར། །
འཇིག་རྟེན་དག་ན་སྐོར་མི་ནུས། །རྒྱལ་པོ་ཆེན་པོ་ཡང་དགེ་སྦྱོང་གཽ་ཏ་མ་དེ་ནི་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་པོ་འདི་དག་དང་ལྡན་པའོ། །སྨྲས་པ། བྲམ་ཟེ་ཆེན་པོ་དགེ་སྦྱོང་གཽ་ཏ་མའི་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་པོ་དེ་དག་གང་ཡིན། སྨྲས་པ། རྒྱལ་པོ་ཆེན་པོ་དེ་ལ་

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ནི་དེ་བཞིན་གཤེགས་པ་ལ་འཁྲུལ་པ་མི་མངའ་བ་དང་། ཅ་ཅོ་མི་མངའ་བ་དང་། བསྙེལ་བ་མི་མངའ་བ་དང་། སེམས་མཉམ་པར་མ་བཞག་པ་མི་མངའ་བ་དང་། ཐ་དད་པའི་འདུ་ཤེས་མི་མངའ་བ་དང་། སོ་སོར་མ་
བརྟགས་པའི་བཏང་སྙོམས་མི་མངའ་བ་དང་། འདུན་པ་ཉམས་པ་མི་མངའ་བ་དང་། བརྩོན་འགྲུས་ཉམས་པ་མི་མངའ་བ་དང་། དྲན་པ་ཉམས་པ་མི་མངའ་བ་དང་། ཏིང་ངེ་འཛིན་ཉམས་པ་མི་མངའ་བ་དང་། ཤེས་རབ་ཉམས་པ་མི་མངའ་བ་དང་། རྣམ་པར་གྲོལ་བ་ཉམས་
པ་མི་མངའ་བ་དང་། ལུས་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང་། ངག་གི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང་། ཡིད་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང་།
འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང་། མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང་། ད་ལྟར་གྱི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་སྟེ། བཅྭ་བརྒྱད་པོ་དེ་དག་ནི་དགེ་སྦྱོང་གཽ་ཏ་མ་དེའི་སངས་
རྒྱས་ཀྱི་ཆོས་མ་འདྲེས་པ་རྣམས་ཏེ། རྒྱལ་པོ་ཆེན་པོ་དེ་བཞིན་གཤེགས་པ་ནི་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་པོ་དེ་དག་དང་ལྡན་པས་དེའི་སླད་དུ་དེ་ལ་སྐྱོན་མ་མཆིས་ལགས་སོ། །དེ་ལ་འདི་སྐད་ཅེས་བགྱི་སྟེ། སངས་རྒྱས་ལ་ནི་འཁྲུལ་མི་མངའ། །ཅ་ཅོ་དེ་བཞིན་མི་མངའ་སྟེ། །
དེ་ཡི་དགོངས་པ་ཉམས་མི་མངའ། །དེ་ཕྱིར་ཀུན་མཁྱེན་སྐྱོན་མི་མངའ། །ཐ་དད་འདུ་ཤེས་མི་མངའ་སྟེ། །རྣམ་པར་གཡེང་བའི་ཐུགས་མི་མངའ། །སོ་སོར་བརྟགས་པའི་བཏང་སྙོམས་ཏེ། །འདུན་པ་ཉམས་པ་མི་མངའོ། །དེ་ཡི་བརྩོན་འགྲུས་རྟག་ཏུ་འབར། །བསྙེལ་བ་མངའ་བ་མ་ལགས་ཏེ། །
ཤེས་རབ་དང་ནི་རྣམ་གྲོལ་དང་། །དབང་པོ་གཟིགས་པ་ཉམས་མི་མངའ། །ཡེ་ཤེས་ཀྱིས་ཀྱང་དེ་མི་འཁྲུགས། །དེ་ཡི་ལུས་དང་ངག་ཡིད་ལས། །ཡེ་ཤེས་སྔོན་དུ་འགྲོ་བ་སྟེ། །ཡེ་ཤེས་ཀྱི་ནི་རྗེས་སུ་འབྲང་། །ཡེ་ཤེས་འབྲལ་བ་མ་མཆིས་ཏེ། །འདས་པའི་དུས་ལ་ཐོགས་མ་མཆིས། །མ་འོངས་དུས་

དང་ད་ལྟར་ལའང་། །དེ་ཡི་ཡེ་ཤེས་ཐོགས་མ་མཆིས། །དགེ་སྦྱོང་བདག་ཉིད་ཆེ་བ་ཡིས། །དེ་ཡི་ཡོན་ཏན་འདི་འདྲ་བས། །འདི་ལས་གཞན་ཡང་ཚད་མེད་པ། །བདག་གིས་བགྲང་བར་རྔོ་མི་ཐོགས། །དེ་ནས་རྒྱལ་པོ་གཏུམ་པོ་རབ་སྣང་དེ་བཞིན་གཤེགས་པའི་ཡོན་ཏན་དང་ཆེ་བ་
བསམ་གྱིས་མི་ཁྱབ་པ་རྣམ་པ་དེ་ལྟ་བུ་དག་ཐོས་ནས། །ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། གཅེར་བུ་པའི་བུ་བདེན་སྨྲ་ལ་དད་པ་ཚད་མེད་ཅིང་བསམ་གྱིས་མི་ཁྱབ་པ་སྐྱེས་པར་གྱུར་ཏེ། སྟོན་པའི་འདུ་ཤེས་རྙེད་ནས། དགེ་བའི་བཤེས་
གཉེན་གྱི་འདུ་ཤེས་དང་། བྱང་ཆུབ་སྟོན་པའི་འདུ་ཤེས་དང་། ཐམས་ཅད་མཁྱེན་པར་སྒྲོལ་བའི་འདུ་ཤེས་དང་། ཡང་དག་པར་སྐུལ་བའི་འདུ་ཤེས་དང་། རྗེས་སུ་དྲན་པར་བྱེད་པའི་འདུ་ཤེས་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་ལ་གནས་པའི་འདུ་ཤེས་
ཀྱང་ཐོབ་པར་གྱུར་ཏོ། །དེས་འདུ་ཤེས་ཡིད་ལ་བྱ་བ་དེ་ལྟ་བུ་དང་ལྡན་པའི་སེམས་ཀྱིས་མུ་ཏིག་གི་ཕྲེང་བ་འབུམ་རི་བ་དང་རིན་ཐང་མེད་པའི་རས་བཅོས་བུ་ཕྲུགས་སུ་སྦྱར་བས་གཅེར་བུ་པའི་བུ་བདེན་སྨྲ་ལ་ཆོས་ཀྱི་དགབ་པའི་ཕྱིར་བསྐོན་ནོ། །འདི་སྐད་ཀྱི་ཚིག་ཏུ་བརྗོད་པ་ཡང་ཆེད་དུ་བརྗོད་དེ། བདེན་
སྨྲ་ཁྱོད་ཀྱིས་ཆོས་ཀྱི་ཚུལ་ལ་མཁས་པ་རྣམ་པ་འདི་ལྟ་བུ་འདི་ལེགས་པར་སྨྲས་པ་ལེགས་སོ་ལེགས་སོ། །བདེན་སྨྲ་ཁྱོད་ཀྱིས་ཆོས་བསྟན་པ་འདི་ནི་ཐམས་ཅད་མཁྱེན་པའི་ཡེ་ཤེས་དང་འཐུན་པའི་ཕྱིར་རྗེས་སུ་འཐུན་པའོ། །ཁྱོད་ཀྱིས་ཆོས་བསྟན་པ་འདི་ནི་ཐམས་ཅད་མཁྱེན་པ་ཉིད་ཐོབ་
པར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་འཁོར་བ་ནས་འབྱུང་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་ཉོན་མོངས་པའི་དྲི་མ་རྣམས་དག་པར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་སེར་སྣའི་སྒོ་གླེགས་རྣམས་འཇོམས་པའོ། །ཁྱོད་ཀྱིས་ཆོས་བསྟན་པ་འདི་ནི་གཏོང་
བའི་རྔ་རྣམས་རྡུང་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་ང་རྒྱལ་གྱི་རི་རྣམས་རྙིལ་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་སྲེད་པའི་རྒྱ་མཚོ་སྐེམ་པར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་མི་ཤེས་པའི་ཐིབས་པོ་སྣང་བར་བྱེད་པའོ། །ཁྱོད་ཀྱིས་ཆོས་བསྟན་པ་འདི་ནི་སེམས་

ཅན་ཡོངས་སུ་སྨིན་པར་བྱེད་པའི་དུས་དང་ཚོད་ལས་མི་འདའ་བའོ། །དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས། རྒྱལ་པོ་གཏུམ་པོ་རབ་སྣང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དེ་དེ་བཞིན་ཏེ། བྱང་ཆུབ་སེམས་དཔའ་རྣམས་ཀྱི་སྤྱོད་ལམ་ནི་གང་
ཡང་རུང་སེམས་ཅན་འདུལ་བར་མི་འགྱུར་བ་དེ་གང་ཡང་མ་མཆིས་སོ། །ཆོས་བསྟན་པ་གང་ཡང་རུང་ཐེག་པ་ཆེན་པོ་དང་མི་འཐུན་པ་དེ་གང་ཡང་མ་མཆིས་སོ། །ཐམས་ཅད་མཁྱེན་པའི་ཡེ་ཤེས་ཡང་དག་པར་མི་སྒྲུབ་པ་དེ་ལྟ་བུ་མ་མཆིས་སོ། །ཉོན་མོངས་པ་ཐམས་ཅད་ཟད་པར་
མི་བགྱིད་པ་དེ་ལྟ་བུ་མ་མཆིས་སོ། །འཁོར་བའི་ཉེས་པ་མི་སྟོན་པ་དེ་ལྟ་བུ་མ་མཆིས་སོ། །མྱ་ངན་ལས་འདས་པ་མི་སྒྲུབ་པ་དེ་ལྟ་བུ་མ་མཆིས་སོ། །བྱང་ཆུབ་སེམས་དཔའི་སྤྱོད་པ་དང་མི་འཐུན་པ་དེ་ལྟ་བུ་མ་མཆིས་སོ། །རྒྱལ་པོ་ཆེན་པོ་བྱང་ཆུབ་སེམས་དཔའི་རྩོམ་པ་ཐམས་ཅད་ནི་
བདག་གི་དོན་དང་གཞན་གྱི་དོན་དང་གཉིས་ཀའི་དོན་ཡོངས་སུ་གྲུབ་པར་བགྱིད་པའོ། །གཅེར་བུ་པའི་བུ་བདེན་སྨྲས་བསྟན་པ་འདི་བཤད་པའི་ཚེ། རྒྱལ་པོ་གཏུམ་པོ་རབ་སྣང་གིས་ཕྱིར་མི་ཟློག་པའི་དད་པ་ཐོབ་པར་གྱུར་ཏོ། །རྒྱལ་བུ་གཞོན་ནུ་བཅུ་དྲུག་གིས་དགའ་བའི་ཤུགས་ཀྱི་
ཡུལ་ཞེས་བྱ་བའི་དད་པ་ཐོབ་པར་གྱུར་ཏོ། །ལྷའི་བུ་ཁྲི་བརྒྱད་སྟོང་གིས་སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ། །རྒྱལ་པོའི་ཕོ་བྲང་དེའི་མི་དང་། གཅེར་བུ་པའི་བུ་འཁོར་དེའི་ནང་ནས་མི་ཁྲི་སུམ་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
སྐྱེས་པར་གྱུར་ཏེ། དེ་དག་ཐམས་ཅད་ཀྱིས་རང་རང་གི་གོས་གཅེར་བུ་པའི་བུ་བདེན་སྨྲ་ལ་ཆོས་ཀྱིས་དགབ་པའི་ཕྱིར་བསྐོན་ཏེ་འདི་སྐད་ཀྱི་ཚིག་ཀྱང་བརྗོད་པར་གྱུར་ཏེ། བདག་ཅག་གིས་འདི་ལྟར་རིགས་ཀྱི་བུ་བདེན་སྨྲ་མཐོང་ཞིང་རྗེས་སུ་འཐུན་པའི་ཆོས་བསྟན་པ་འདི་ཐོས་པ་ནི་བདག་ཅག་
གི་རྙེད་པ་ལེགས་པར་རྙེད་དོ་ཞེས་བརྗོད་ནས་འདི་སྐད་ཀྱི་ཚིག་ཀྱང་སྨྲས་ཏེ། བདེན་སྨྲ་ཚུར་སྤྱོན་ད་བཅོམ་ལྡན་འདས་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བའི་ཕྱིར་བཞུད་དོ། །དེ་བཞིན་གཤེགས་པ་དེ་ནི་བདག་ཅག་ཉིད་ཀྱི་སྐྱེད་མོས་ཚལ་ན་བཞུགས་སོ། །བདེན་སྨྲས་སྨྲས་པ་

ཀུན་ཀྱང་ཚུར་ཤེག །རྒྱལ་པོ་དང་བཅས། དཔུང་དང་བཅས། གྲོང་རྡལ་གྱི་མི་དང་བཅས། ཡུལ་གྱི་མི་དང་བཅས། འཁོར་གྱི་མི་དང་བཅས་པར་ལྷན་ཅིག་འཐུན་པར་བགྱིས་ཏེ་བཀོད་པ་ཆེན་པོས་འདོང་ངོ་། །དེ་ནས་རྒྱལ་པོ་གཏུམ་པོ་རབ་སྣང་གིས་གྲོང་
ཁྱེར་ཐམས་ཅད་དུ་དྲིལ་གྱི་སྒྲ་བསྒྲགས་ཏེ། དེ་བཞིན་གཤེགས་པའི་གན་དུ་སུ་མི་འགྲོ་བ་དེའི་ཆད་པ་ནི་བསད་པའོ་ཞེས་བསྒོའོ། །དེ་ནས་གྲོང་གི་མི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ཀྱིས་རྒྱལ་པོ་གཏུམ་པོ་རབ་སྣང་གི་བཀའ་དེ་ཐོས་ནས། མེ་ཏོག་དང་།
སྤོས་དང་། མེ་ཏོག་ཕྲེང་དང་། བྱུག་པ་དང་། སིལ་སྙན་དང་། ཕེག་རྣམས་ཐོགས་ཏེ། གྲོང་ཁྱེར་ཆེན་པོ་འཕགས་རྒྱལ་ནས་ཕྱི་རོལ་ཏུ་འཐོན་ཏེ། སྐྱེད་མོས་ཚལ་དུ་འདོང་བར་ཆས་ནས་རྒྱལ་པོ་གཏུམ་པོ་རབ་སྣང་ལ་སྡོད་ཅིང་འཁོད་པར་གྱུར་ཏོ། །དེ་ནས་རྒྱལ་པོ་གཏུམ་པོ་རབ་སྣང་གཅེར་
བུ་པའི་བུ་བདེན་སྨྲ་དང་ལྷན་ཅིག །བློན་པོའི་ཚོགས་དང་ལྷན་ཅིག །རྒྱལ་བུ་གཞོན་ནུ་དང་། དཔུང་གི་ཚོགས་དང་ལྷན་ཅིག །བཙུན་མོའི་འཁོར་དང་ལྷན་ཅིག །གྲོང་རྡལ་པའི་མི་དང་ཡུལ་གྱི་མི་རྣམས་དང་ལྷན་ཅིག །འཁོར་གྱི་མི་དང་ཆབ་སྒོ་པ་རྣམས་དང་ལྷན་ཅིག་ཏུ་ཐམས་ཅད་
ཀྱིས་ཡོངས་སུ་བསྐོར་ཅིང་དཔུང་གི་བཀོད་པ་ཆེན་པོས་མདུན་དུ་བདར་ནས། གདུགས་དང་། རྒྱལ་མཚན་དང་། བ་དན་དག་ནི་བསྒྲེང་། སིལ་སྙན་བྱེ་བ་འབུམ་དག་ནི་བུན་ལོང་དུ་བྱས། གར་དང་། གླུ་དང་། རོལ་མོའི་སྒྲ་དབྱངས་ནི་བསྒྲགས། རོལ་མོའི་སྤྱད་ཀི་མ་པ་ལ་དང་། ན་ཀུ་
ལ་དང་། ཁར་དཀྲོལ་དང་། ཕེག་གི་སྒྲ་ནི་བསྒྲགས། རྟ་དང་གླང་པོ་ཆེ་རྣམས་སྒྲ་ནི་འབྱིན། བཀྲ་ཤིས་ཀྱི་བུམ་པ་གསེར་ཐག་གིས་བཏགས་པ་འབུམ་དག་ཐོགས་པ་རྣམས་ནི་མདུན་དུ་བཀྱེ་སྟེ། གླང་པོ་ཆེའི་ཤིང་རྟ་པ་རྣམས་དང་། རྟའི་ཤིང་རྟ་པ་རྣམས་དང་། སྲོག་ཆགས་འབུམ་ཕྲག་དགུ་
བཅུ་རྩ་བརྒྱད་དང་ལྷན་ཅིག་ཏུ་རྒྱལ་པོའི་མཐུ་ཆེན་པོ་དང་། རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་རྣམ་པར་འཕྲུལ་པ་ཆེན་པོ་དང་། རྒྱལ་པོའི་རྣམ་པར་རྩེ་བ་ཆེན་པོས་རང་གི་སྐྱེད་མོས་ཚལ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་

ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །གཅེར་བུ་པའི་བུ་བདེན་སྨྲ་ཡང་འཁོར་དང་བཅས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ལན་འབུམ་ཕྲག་དུ་མར་བསྐོར་བ་བྱས་ཏེ། ཐལ་མོ་སྦྱར་ནས་
མིག་མི་འཛུམས་པར་བཅོམ་ལྡན་འདས་ལ་བལྟ་ཞིང་འདུག་གོ། །དེ་ནས་ཚེ་དང་ལྡན་པ་ཤཱ་རིའི་བུས་གཅེར་བུ་པའི་བུ་བདེན་སྨྲ་བཅོམ་ལྡན་འདས་ཀྱི་སྤྱན་སྔ་ན་མིག་མི་འཛུམས་པར་བཅོམ་ལྡན་འདས་ལ་བལྟ་ཞིང་འདུག་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ཀྱེ་མ་
གཅེར་བུ་པའི་བུ་བདེན་སྨྲ་འདི་ཅི་ཞིག་འདོད་དེ། འདིར་འོངས་སྙམ་ནས། དེ་ལྟར་རྣམ་པར་བརྟགས་ཏེ། གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་ཁྱོད་ཅི་ཞིག་འདོད་དེ་དེ་བཞིན་གཤེགས་པའི་ཐད་དུ་འོངས། ཅི་བཅོམ་ལྡན་འདས་བལྟ་བར་འདོད་དམ། ཆོས་
ཉན་པར་འདོད། དེ་སྐད་ཅེས་སྨྲས་པ་དང་། གཅེར་བུ་པའི་བུ་བདེན་སྨྲས། ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་ཁོ་བོ་ནི་བཅོམ་ལྡན་འདས་བལྟ་བར་འདོད་པ་མ་ཡིན། ཆོས་ཉན་པར་འདོད་པ་ཡང་མ་ཡིན་ཏེ། བཙུན་པ་ཤ་ར་དྭ་ཏིའི་
བུ་ཁོ་བོ་ནི་ཆོས་ཐམས་ཅད་མི་འདོད་པའི་ཕྱིར་བཅོམ་ལྡན་འདས་ཀྱི་ཐད་དུ་འོངས་སོ། །དེ་ཅིའི་ཕྱིར་ཞེ་ན། བཙུན་པ་ཤ་ར་དྭ་ཏིའི་བུ་གཟུགས་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མཐོང་བ་ནི་དེ་བཞིན་
གཤེགས་པ་མཐོང་བ་མ་ཡིན། སའི་ཁམས་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ཆུའི་ཁམས་དང་། མེའི་ཁམས་དང་། རླུང་གི་ཁམས་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། བདག་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། སེམས་ཅན་
དང་། སྲོག་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། གང་ཟག་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ངར་འཛིན་པ་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། ང་ཡིར་འཛིན་པ་མཐོང་བ་ནི་དེ་བཞིན་གཤེགས་པ་མཐོང་བ་མ་ཡིན། མཚན་མ་མཐོང་བ་ནི་དེ་

བཞིན་གཤེགས་པ་མཐོང་བ་མ་ཡིན་པའི་ཕྱིར་ཏེ། བཙུན་པ་ཤ་ར་དྭ་ཏིའི་བུ་མཚན་མ་ཐམས་ཅད་མ་མཐོང་བ་དེ་ནི་དེ་བཞིན་གཤེགས་པ་མཐོང་བའོ། །མངོན་པར་ཞེན་པ་མེད་པ་མཐོང་བ་ནི་དེ་བཞིན་གཤེགས་པ་མཐོང་བའོ། །དངོས་པོ་མེད་པ་མཐོང་བ་ནི་དེ་བཞིན་གཤེགས་པ་མཐོང་བའོ། །
ངོ་བོ་ཉིད་མེད་པ་མཐོང་བ་ནི་དེ་བཞིན་གཤེགས་པ་མཐོང་བའོ། །ཡང་དག་པའི་མཐའ་མེད་པར་མཐོང་བ་ནི་དེ་བཞིན་གཤེགས་པ་མཐོང་བའོ། །མིག་གཟུགས་ལ་འདོད་ཆགས་དང་བྲལ་བར་མཐོང་བ་ནི་དེ་བཞིན་གཤེགས་པ་མཐོང་བའོ། །རྣ་བ་སྒྲ་ལ་རྣམ་པར་རིག་པ་མེད་པར་མཐོང་བ་ནི་
དེ་བཞིན་གཤེགས་པ་མཐོང་བའོ། །སྣ་དྲི་ལ་འཕོ་བ་མེད་པར་མཐོང་བ་ནི་དེ་བཞིན་གཤེགས་པ་མཐོང་བའོ། །ལྕེ་རོ་ལ་རྣམ་པར་ཤེས་པར་མི་མཐོང་བ་ནི་དེ་བཞིན་གཤེགས་པ་མཐོང་བའོ། །ལུས་རེག་བྱ་ལ་རེག་པར་མི་མཐོང་བ་ནི་དེ་བཞིན་གཤེགས་པ་མཐོང་བའོ། །ཡིད་ཆོས་ལ་
རྣམ་པར་མ་བརྟགས་པར་འཛིན་པ་མཐོང་བ་ནི་དེ་བཞིན་གཤེགས་པ་མཐོང་བའོ། །ཤ་ར་དྭ་ཏིའི་བུས་སྨྲས་པ་བདེན་སྨྲ་དེ་ལྟར་མཐོང་བས་གལ་ཏེ་དེ་བཞིན་གཤེགས་པ་མཐོང་བ་ཡིན་ན། འོ་ན་དེ་བཞིན་གཤེགས་པ་ཇི་ལྟར་བལྟ་བར་བྱ། བདེན་སྨྲས་སྨྲས་པ། བཙུན་པ་ཤ་ར་དྭ་ཏིའི་བུ་དེ་
བཞིན་གཤེགས་པ་ནི་རིགས་སུ་མི་བལྟའོ། །རུས་སུ་མི་བལྟའོ། །མཚན་ཉིད་དུ་མི་བལྟའོ། །མཚན་ཉིད་མེད་པར་མི་བལྟའོ། །ཆོས་སུ་མི་བལྟའོ། །ཆོས་མ་ཡིན་པར་མི་བལྟའོ། །ཡང་དག་པར་མི་བལྟའོ། །ཡང་དག་པ་མ་ཡིན་པར་མི་བལྟའོ། །དམིགས་པར་མི་
བལྟའོ། །དམིགས་པ་མེད་པར་མི་བལྟའོ། །ཡིད་ལ་བྱ་བར་མི་བལྟའོ། །ཡིད་ལ་བྱ་བ་མེད་པར་མི་བལྟའོ། །རྟོག་པར་མི་བལྟའོ། །མི་རྟོག་པར་མི་བལྟའོ། །འདུས་བྱས་སུ་མི་བལྟའོ། །འདུས་མ་བྱས་སུ་མི་བལྟའོ། །དངོས་པོ་ཡོད་པར་མི་བལྟའོ། །དངོས་པོ་མེད་པར་མི་བལྟའོ། །
གོང་བུར་མི་བལྟའོ། །རྫས་སུ་མི་བལྟའོ། །གཟུགས་སུ་མི་བལྟའོ། །ཚོར་བར་མི་བལྟའོ། །འདུ་ཤེས་སུ་མི་བལྟའོ། །འདུ་བྱེད་རྣམས་སུ་མི་བལྟའོ། །རྣམ་པར་ཤེས་པར་མི་བལྟའོ། །ཉེ་བར་ལེན་པར་མི་བལྟའོ། །ཉེ་བར་ལེན་པ་མེད་པར་མི་བལྟའོ། །དེ་བཞིན་གཤེགས་པ་ནི་སྐྱེ་བར་

མི་བལྟའོ། །སྐྱེ་བ་མེད་པར་མི་བལྟའོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་ཤ་ར་དྭ་ཏིའི་བུས་གཅེར་བུ་པའི་བུ་བདེན་སྨྲ་ལ་འདི་སྐད་ཅེས་སྨྲས་སོ། །བདེན་སྨྲ་གལ་ཏེ་དེ་བཞིན་གཤེགས་པ་དེ་ལྟར་མི་ལྟ་ན་སྐྱེས་བུ་དམ་པ་ཁྱོད་དེ་བཞིན་གཤེགས་པ་ལ་ཇི་ལྟར་བལྟ།
སྨྲས་པ། བཙུན་པ་ཤ་ར་དྭ་ཏིའི་བུ་ཁོ་བོ་ནི་དེ་བཞིན་གཤེགས་པ་གཟུགས་སུ་མི་བལྟའོ། །དེ་བཞིན་གཤེགས་པ་གཟུགས་ལས་གཞན་དུ་ཡང་མི་བལྟའོ། །དེ་བཞིན་གཤེགས་པ་གཟུགས་གཞིག་པའི་ཕྱིར་མི་བལྟའོ། །བཙུན་པ་ཤ་ར་དྭ་ཏིའི་བུ་ཁོ་བོ་ནི་དེ་བཞིན་གཤེགས་
པ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་རྣམ་པར་ཤེས་པར་མི་བལྟའོ། །དེ་བཞིན་གཤེགས་པ་རྣམ་པར་ཤེས་པ་ལས་གཞན་དུ་ཡང་མི་བལྟའོ། །དེ་བཞིན་གཤེགས་པ་རྣམ་པར་ཤེས་པ་གཞིག་པའི་ཕྱིར་ཡང་མི་བལྟའོ། །དེ་བཞིན་གཤེགས་པ་འཇིག་རྟེན་དུ་
གཏོགས་པར་མི་བལྟའོ། །དེ་བཞིན་གཤེགས་པ་འཇིག་རྟེན་ལས་རྒལ་བར་མི་བལྟའོ། །དེ་བཞིན་གཤེགས་པ་ཕུང་པོས་རབ་ཏུ་ཕྱེ་བར་མི་བལྟའོ། །དེ་བཞིན་གཤེགས་པ་ཁམས་ཀྱིས་རབ་ཏུ་ཕྱེ་བར་མི་བལྟའོ། །དེ་བཞིན་གཤེགས་པ་སྐྱེ་མཆེད་ཀྱིས་རབ་ཏུ་ཕྱེ་བར་མི་བལྟ་སྟེ། དེ་
བཞིན་གཤེགས་པ་ནི་ཚིག་གི་ལམ་ཐམས་ཅད་ཀྱིས་བརྗོད་དུ་མེད་པར་བལྟ་ཞིང་ཅི་ནས་ཀྱང་མི་མཐོང་བ་དང་རྣམ་པར་མི་མཐོང་བ་དང་། མི་དམིགས་པ་དང་། མི་རྟོག་པ་དང་། རྣམ་པར་མི་རྟོག་པ་དང་། ཡོངས་སུ་མི་རྟོག་པ་དང་། རྣམ་པར་མཐོ་བཙམ་པ་མེད་པ་དང་། ཀུན་ནས་སློང་བ་མེད་པ་
དང་། ལེན་པ་མེད་པ་དང་། འདོར་བ་མེད་པ་དང་། སྤྲོས་པ་མེད་པ་དང་། མཚན་མར་བྱ་བ་མེད་པ་དང་། མཚན་མར་བྱ་བ་མེད་པ་མ་ཡིན་པ་དང་། བྱ་བ་མེད་པ་དང་། རྣམ་པར་བྱ་བ་མེད་པ་དང་། ཡོད་པར་བྱ་བ་མེད་པ་དང་། མེད་པར་བྱ་བ་མེད་པ་དང་། བླང་བ་མེད་པ་དང་། དོར་བ་མེད་པ་དང་།
བསམ་པ་མེད་པ་དང་། ལྷུན་གྱིས་གྲུབ་པ་མེད་པ་དང་། དམིགས་སུ་མེད་པ་ཡང་མ་ཡིན་པ་དེ་ལྟར་དེ་བཞིན་གཤེགས་པ་བལྟ་སྟེ། བརྗོད་དུ་མེད་པ་དང་།