Kinh tạng Tây Tạng (Kangyur Đại Học) — 057_མདོ་སྡེ།_པ

ཁའ་ཚད་མེད་པས་དེའི་རྩོམ་པ་ཐམས་ཅད་ཀྱང་ཚད་མེད་པར་ཀུན་དུ་གནས་
ཏེ། དེ་བས་ན་བསོད་ནམས་ནམ་མཁའ་དང་མཚུངས་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཡེ་ཤེས་ནམ་མཁའ་དང་མཚུངས་པ་ཡིན་ཞེ་ན། གང་སེམས་ཅན་ཐམས་ཅད་ཀྱི་སེམས་ལ་ཡེ་ཤེས་དེས་ཁྱབ་པར་བྱེད་ཅིང་། སེམས་ཅན་ཐམས་ཅད་ཀྱི་སེམས་
འདོད་ཆགས་དང་བཅས་པའི་སེམས་ཀྱང་འདོད་ཆགས་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེ་སྡང་དང་བཅས་པའི་སེམས་ཀྱང་ཞེ་སྡང་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཏི་མུག་དང་བཅས་པའི་
སེམས་ཀྱང་གཏི་མུག་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉེ་བའི་ཉོན་མོངས་པ་དང་བཅས་པའི་སེམས་ཀྱང་དེས་ཉེ་བའི་ཉོན་མོངས་པ་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེས་བདག་འདོད་ཆགས་
མེད་པའི་ཆོས་ཀྱི་རང་བཞིན་ལས་མ་གཡོས་པར་སེམས་ཅན་གཞན་རྣམས་དང་གང་ཟག་གཞན་དག་ལ་འདོད་ཆགས་འདུལ་བའི་ཕྱིར་ཆོས་འཆད་དོ། །དེས་བདག་ཉིད་ཞེ་སྡང་མེད་པའི་ཆོས་ཀྱི་རང་བཞིན་ལས་མ་གཡོས་པར་སེམས་ཅན་གཞན་རྣམས་དང་གང་ཟག་གཞན་དག་ལ་

ཞེ་སྡང་འདུལ་བའི་ཕྱིར་ཆོས་འཆད་དོ། །དེས་བདག་ཉིད་གཏི་མུག་མེད་པའི་ཆོས་ཀྱི་རང་བཞིན་ལས་མ་གཡོས་པར་སེམས་ཅན་གཞན་རྣམས་དང་གང་ཟག་གཞན་དག་ལ་གཏི་མུག་འདུལ་བའི་ཕྱིར་ཆོས་འཆད་དོ། །དེས་བདག་ཉིད་ཉེ་བའི་ཉོན་མོངས་པ་མེད་པའི་ཆོས་ཀྱི་རང་བཞིན་
ལས་མ་གཡོས་པར་སེམས་ཅན་གཞན་རྣམས་དང་། གང་ཟག་གཞན་དག་ལ་ཉོན་མོངས་པ་ཐམས་ཅད་འདུལ་བའི་ཕྱིར་ཆོས་འཆད་དོ། །དེས་འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་རྣམ་པར་དག་པར་བྱ་བའི་ཕྱིར་ཆོས་འཆད་དོ། །འདོད་ཆགས་དང་།
ཞེ་སྡང་དང་། གཏི་མུག་དང་ཉེ་བའི་ཉོན་མོངས་པའི་སེམས་ལ་དམན་པར་ཡང་ཡང་དག་པར་རྗེས་སུ་མི་མཐོང་། འདོད་ཆགས་དང་། ཞེ་སྡང་དང་། གཏི་མུག་དང་ཉེ་བའི་ཉོན་མོངས་པ་མེད་པའི་སེམས་ལ་མཆོག་ཏུ་ཡང་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། འདི་
ལྟར་བྱང་ཆུབ་སེམས་དཔའ་དེ་གཉིས་སུ་མེད་པའི་མཐའི་སྒོ་ནས་ཆོས་ཀྱི་དབྱིངས་ཡོངས་སུ་ཤེས་ཏེ། ཆོས་ཀྱི་དབྱིངས་གང་ཡིན་པ་དེ་འདོད་ཆགས་ཀྱི་དབྱིངས། ཆོས་ཀྱི་དབྱིངས་གང་ཡིན་པ་དེ་ཞེ་སྡང་གི་དབྱིངས། ཆོས་ཀྱི་དབྱིངས་གང་ཡིན་པ་དེ་གཏི་མུག་གི་དབྱིངས། ཆོས་ཀྱི་
དབྱིངས་གང་ཡིན་པ་དེ་ཉོན་མོངས་པའི་དབྱིངས་སོ། །དེ་བས་ན་ཆོས་ཐམས་ཅད་ཆོས་ཀྱི་དབྱིངས་སུ་ཡང་དག་པར་འདུའོ་ཞེས་བྱ་སྟེ། ཆོས་ཀྱི་དབྱིངས་ནི་གར་ཡང་འགྲོ་བའང་མེད། མི་འགྲོ་བའང་མེད་དོ། །ཆོས་ཐམས་ཅད་ནི་ཆོས་ཀྱི་དབྱིངས་ཀྱི་རྗེས་སུ་སོང་སྟེ། གང་བདག་
གི་དབྱིངས་ཤེས་པ་དེས་ཆོས་ཀྱི་དབྱིངས་ཀྱང་ཤེས་སོ། །དེ་ལྟར་ན་ཆོས་ཀྱི་དབྱིངས་དང་བདག་གི་དབྱིངས་དེ་དག་མི་གཉིས་སོ། །དེ་ཅིའི་ཕྱིར་ཞེ་ན། བདག་རྣམ་པར་དག་པས་ཆོས་ཀྱི་དབྱིངས་ཀྱང་རྣམ་པར་དག་གོ། །དེ་བཞིན་དུ་ཆོས་ཐམས་ཅད་ཀྱང་རྣམ་པར་དག་པ་སྟེ།
གང་རྣམ་པར་དག་པ་དེ་རབ་ཏུ་སྣང་བའོ། །གང་རབ་ཏུ་སྣང་བ་དེ་བླ་གབ་མེད་པའོ། །གང་བླ་གབ་མེད་པ་དེ་ལ་མཚན་མ་ཐམས་ཅད་ཀྱི་སྐབས་མེད་དོ། །གང་མཚན་མ་མེད་པ་དེ་ལ་གནས་པ་གང་ཡང་མེད་དེ། མི་གནས་པ་ནི་ནམ་མཁའོ། །གང་དེ་ལྟར་ཡེ་ཤེས་ཀྱི་རྗེས་སུ་

འགྲོ་ཞིང་ཡེ་ཤེས་དེས་ཆོས་ཐམས་ཅད་ཀྱི་རྗེས་སུ་འགྲོ་བ་དེ་ནི་བྱང་ཆུབ་སེམས་དཔའི་ཡེ་ཤེས་ནམ་མཁའ་དང་མཚུངས་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སངས་རྒྱས་ཀྱིས་གནང་བའི་སངས་རྒྱས་རྗེས་སུ་དྲན་པ་གང་ཞེ་ན། གང་ཚུལ་ཁྲིམས་
ལས་སངས་རྒྱས་རྗེས་སུ་དྲན་ཞིང་ཟག་པ་མེད་པའི་ཚུལ་ཁྲིམས་ལས་ཀྱང་མི་ཉམས་པའོ། །ཏིང་ངེ་འཛིན་ལས་སངས་རྒྱས་རྗེས་སུ་དྲན་ཞིང་ཆོས་ཀྱི་དབྱིངས་མཉམ་པ་ཐམས་ཅད་ལས་ཀྱང་མི་འགྱུར་བའོ། །ཤེས་རབ་ལས་ཀྱང་སངས་རྒྱས་རྗེས་སུ་དྲན་ཞིང་ཆོས་ཐམས་ཅད་རྒྱུ་བ་
མེད་པར་ཡང་རྣམ་པར་མི་རྟོག་པའོ། །རྣམ་པར་གྲོལ་བ་ལས་སངས་རྒྱས་རྗེས་སུ་དྲན་ཞིང་སེམས་གཉིས་པ་ལ་ཡང་མི་གནས་པའོ། །རྣམ་པར་གྲོལ་བའི་ཡེ་ཤེས་མཐོང་བ་ལས་སངས་རྒྱས་རྗེས་སུ་དྲན་ཞིང་ཤེས་པ་ཐམས་ཅད་ལ་ཡང་མི་ཆགས་པའོ། །སྟོབས་ལས་སངས་
རྒྱས་རྗེས་སུ་དྲན་ཞིང་དུས་གསུམ་མཚུངས་པའི་ཡེ་ཤེས་ལས་ཀྱང་མི་གཡོ་བའོ། །མི་འཇིགས་པ་ལས་སངས་རྒྱས་རྗེས་སུ་དྲན་ཞིང་ཟག་པ་ཐམས་ཅད་དང་ལྷན་ཅིག་ཏུ་ཡང་མི་གནས་པའོ། །སངས་རྒྱས་ཀྱི་ཆོས་ཐམས་ཅད་ལས་ཀྱང་སངས་རྒྱས་རྗེས་སུ་དྲན་ཞིང་ཆོས་ཀྱི་དབྱིངས་
མཉམ་པ་ཉིད་དུ་ཡང་རྣམ་པར་མི་རྟོག་པའོ། །གཞན་ཡང་སངས་རྒྱས་རྗེས་སུ་དྲན་པ་ནི་གང་གཟུགས་ལས་སངས་རྒྱས་ཡང་དག་པར་རྗེས་སུ་མི་མཐོང་ལ། གཟུགས་ཀྱི་ངོ་བོ་ཉིད་ཤེས་པས་དྲན་པའི་ཡེ་ཤེས་ཀྱི་རྗེས་སུ་ཡང་འགྲོ་བའོ། །དེ་བཞིན་དུ་ཚོར་བ་དང་། འདུ་ཤེས་
དང་། འདུ་བྱེད་དང་། རྣམ་པར་ཤེས་པ་ལས་སངས་རྒྱས་ཡང་དག་པར་རྗེས་སུ་མི་མཐོང་ལ། རྣམ་པར་ཤེས་པའི་ངོ་བོ་ཉིད་ཤེས་པས་དྲན་པའི་ཡེ་ཤེས་ཀྱི་རྗེས་སུ་ཡང་འགྲོ་བའོ། །ཕུང་པོ་དང་། ཁམས་དང་། སྐྱེ་མཆེད་རྣམས་ལས་སངས་རྒྱས་ཡང་དག་པར་རྗེས་སུ་མི་
མཐོང་ལ། ཕུང་པོ་དང་ཁམས་དང་སྐྱེ་མཆེད་ཀྱི་ངོ་བོ་ཉིད་ཤེས་པས་དྲན་པའི་ཡེ་ཤེས་ཀྱི་རྗེས་སུ་ཡང་འགྲོ་བའོ། །གང་ཡང་ཆོས་ཐམས་ཅད་ཀྱི་ངོ་བོ་ཉིད་ཤེས་པས་ཤེས་རབ་ཆེ་བའི་དྲན་པ་དེ་ནི་ཡིད་ལ་བྱེད་པ་ཐམས་ཅད་མེད་དེ། ལྟ་བ་ཐམས་ཅད་ཀུན་ནས་ལྡང་བ་མེད་པའོ། །

གང་དེ་ལྟ་བུ་རྙོག་པ་མེད་པའི་དྲན་པས་དྲན་པ་ཉེ་བར་གཞག་པ་ཤེས་པ་དེ་ནི་སངས་རྒྱས་ཀྱིས་གནང་བའི་སངས་རྒྱས་རྗེས་སུ་དྲན་པ་ཞེས་བྱའོ། །གཞན་ཡང་སངས་རྒྱས་རྗེས་སུ་དྲན་པ་ནི་གང་སྤྱོད་ལམ་ཐམས་ཅད་དུ་སངས་རྒྱས་ལ་མངོན་པར་ཆགས་པར་མི་བྱེད་དོ། །འགྲེང་བ་དང་།
འཆག་པ་དང་། འདུག་པ་དང་། ཉལ་བ་དང་། འགྲོ་བ་དང་། འོང་བ་དང་། སྨྲ་བ་དང་། མི་སྨྲ་བར་ཡང་སངས་རྒྱས་ལ་མངོན་པར་ཆགས་པར་མི་བྱེད་དོ། །དེ་མངོན་པར་མ་ཆགས་པས་དྲན་པའང་དྲན་པར་མི་བྱེད་མི་དྲན་པའང་དྲན་པར་མི་བྱེད་དོ། །དེ་དྲན་པ་ཡིད་ལ་མི་བྱེད་
པས་གཟུགས་དང་། མཚན་དང་ཆོས་ཉིད་དུའང་སངས་རྒྱས་རྗེས་སུ་མི་དྲན་ནོ། །རིགས་ཀྱི་བུ་འདི་ནི་སངས་རྒྱས་ཀྱིས་གནང་བའི་སངས་རྒྱས་རྗེས་སུ་དྲན་པ་སྟེ་གང་ལ་མཚན་མ་དང་དམིགས་པ་ཐམས་ཅད་ཀུན་དུ་སྤྱོད་པ་མེད་པའོ། །རིགས་ཀྱི་བུ་དེ་ལ་བྱང་ཆུབ་སེམས་
དཔའ་རྣམས་ཀྱི་སངས་རྒྱས་ཀྱིས་གནང་བའི་ཆོས་རྗེས་སུ་དྲན་པ་གང་ཞེ་ན། ཆོས་ཞེས་བྱ་བ་ནི་འདོད་ཆགས་མེད་པའོ། །དེ་ལ་གང་ཆོས་ཅི་ལ་ཆགས་ཀྱང་རུང་དེ་དག་ལ་ཆོས་རྗེས་སུ་དྲན་པ་གང་ཡང་མེད་དོ། །ཆོས་ཞེས་བྱ་བ་ནི་ཀུན་གཞི་མེད་པའོ། །དེ་ལ་གང་ཆོས་གང་ལ་
སྦྱོར་བ་དེ་དག་ལ་ཆོས་རྗེས་སུ་དྲན་པ་གང་ཡང་མེད་དོ། །ཆོས་ཞེས་བྱ་བ་ནི་ཉེ་བར་ཞི་བ་སྟེ། གང་སེམས་དང་ཡིད་འབར་བར་བྱེད་པ་དེ་དག་ལ་ཆོས་རྗེས་སུ་དྲན་པ་གང་ཡང་མེད་དོ། །ཆོས་ཞེས་བྱ་བ་ནི་མཚན་མ་མེད་པ་སྟེ། གང་མཚན་མའི་རྗེས་སུ་འབྲང་བའི་རྣམ་པར་
ཤེས་པ་དེ་དག་ལ་ཆོས་རྗེས་སུ་དྲན་པ་གང་ཡང་མེད་དོ། །ཆོས་ཞེས་བྱ་བ་ནི་འདུས་མ་བྱས་པ་སྟེ། གང་འདུས་བྱས་སུ་རབ་ཏུ་གཞག་པ་ལ་གནས་པ་དེ་དག་ལ་ཆོས་རྗེས་སུ་དྲན་པ་གང་ཡང་མེད་དོ། །ཡང་ཆོས་རྗེས་སུ་དྲན་པ་ནི་གང་གིས་འདུ་བྱེད་ཐམས་ཅད་སྐྱེ་བ་མེད་པར་
མཐོང་བ་སྟེ། ཡང་དག་པ་ཉིད་སྐྱོན་མེད་པ་ལ་འཇུག་པའོ། །བྱང་ཆུབ་སེམས་དཔས་ཆོས་ཐམས་ཅད་རང་བཞིན་གྱིས་མ་སྐྱེས་པར་རིག་ནས་མི་སྐྱེ་བའི་ཆོས་ལ་བཟོད་པ་རབ་ཏུ་འཐོབ་བོ། །གང་དེ་ལྟ་བུའི་གནས་ནི་ཡང་དག་པའི་ཆོས་ཀྱི་གནས་སོ། །གང་གིས་དེ་ལྟར་མངོན་

པར་རྟོགས་པ་དེ་ནི་ཆོས་ཐམས་ཅད་མངོན་པར་རྟོགས་པ་སྟེ། འདི་ནི་སློབ་པ་དང་། མི་སློབ་པ་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། ཡང་དག་པར་རྫོགས་པའི་སངས་རྒྱས་རྣམས་ཀྱིས་མངོན་པར་རྟོགས་པའོ། །དེ་ལྟར་མཉམ་པར་གཞག་པ་ནི་
འཕགས་པ་ཐམས་ཅད་ཀྱི་རྣམ་པར་གྲོལ་བ་སྟེ། དེ་ལ་ཆོས་གང་ཡང་ཀུན་དུ་སྤྱོད་པ་མེད་དོ། །ཆོས་གང་ཡང་ཀུན་དུ་སྤྱོད་པ་མེད་པ་དེ་ནི་སངས་རྒྱས་ཀྱིས་གནང་བའི་ཆོས་རྗེས་སུ་དྲན་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སངས་རྒྱས་ཀྱིས་གནང་བའི་དགེ་འདུན་རྗེས་སུ་དྲན་པ་གང་
ཞེ་ན། དགེ་འདུན་ཞེས་བྱ་བ་ནི་འདུས་མ་བྱས་པ་སྟེ། མངོན་པར་འདུ་བྱེད་པས་རྗེས་སུ་དྲན་པར་མི་ནུས་སོ། །གང་ན་ལུས་ཀྱི་ལས་དང་ངག་གི་ལས་དང་ཡིད་ཀྱི་ལས་ཀུན་དུ་སྤྱོད་པ་མེད་པ་དེ་ནི་མངོན་པར་འདུ་མི་བྱེད་པ་ཞེས་བྱའོ། །དེ་ལ་འདུས་བྱས་ཞེས་བྱ་བ་ནི་གདགས་པ་དང་ཐ་སྙད་དོ། །
འདུས་མ་བྱས་ནི་གདགས་པ་ཐམས་ཅད་ཡང་དག་པར་འཇོམས་པའོ། །ཐ་སྙད་ཐམས་ཅད་ལས་ཡང་དག་པར་འདས་པ་སྟེ། རིགས་ཀྱི་བུ་འདི་ནི་སངས་རྒྱས་ཀྱིས་གནང་བའི་དགེ་འདུན་རྗེས་སུ་དྲན་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སངས་རྒྱས་ཀྱིས་གནང་བའི་གཏོང་བ་
རྗེས་སུ་དྲན་པ་གང་ཞེ་ན། གཏོང་པ་ཞེས་བྱ་བ་ནི་ཕུང་པོ་ཐམས་ཅད་འདོར་ཞིང་རབ་ཏུ་གཏོང་བའོ། །དེ་ཅིའི་ཕྱིར་ཞེ་ན། དེས་ཆོས་གང་ཡང་བཏང་བ་མེད་དོ། །འདི་ལྟར་དེ་ལ་གང་གཏོང་བའི་ཆོས་གང་ཡང་སྣང་བར་མི་འགྱུར་ཏེ། འདི་ལ་གང་ཆོས་ཐམས་ཅད་མི་འཛིན་པ་དེ་ནི་གཏོང་
བའི་མཆོག་གོ། །གང་མི་འཛིན་པ་དེ་ནི་མི་གཏོང་ངོ་། །གང་མི་གཏོང་བ་དེ་ནི་མི་སྙེམས་སོ། །གང་མི་སྙེམས་པ་དེ་ནི་དམིགས་པར་མི་བྱེད་དོ། །དམིགས་པར་མི་བྱེད་པ་དེ་ལ་སེམས་རྒྱུ་བ་མེད་དོ། །རྒྱུ་བ་མེད་པ་ནི་སེམས་ཀྱིས་རྣམ་པར་རིག་པ་མེད་པའོ། །གང་ལ་སེམས་ཀྱིས་
རྣམ་པར་རིག་པ་མེད་པ་དེ་ནི་རྣམ་པར་ཤེས་པ་མི་གནས་པའོ། །རྣམ་པར་ཤེས་པ་མི་གནས་པ་དེ་ནི་སངས་རྒྱས་ཀྱིས་གནང་བའི་གཏོང་བ་རྗེས་སུ་དྲན་པའོ། །གང་ཡང་བྱང་ཆུབ་སེམས་དཔའི་གཏོང་བ་དེ་ནི་ཐམས་ཅད་མཁྱེན་པར་བསྔོས་པ་སྟེ། གང་ཐམས་ཅད་མཁྱེན་པ་ནི་ཆོས་

ཐམས་ཅད་ཀྱི་མཉམ་པ་ཉིད་དོ། །གང་མཉམ་པ་ཉིད་ལ་གནས་པ་ནི་རབ་ཏུ་གཏོང་ཞིང་བྱང་ཆུབ་ཏུ་འང་བསྔོ་སྟེ། དེ་རྗེས་སུ་དྲན་ཡང་ཆོས་གང་ཡང་རྗེས་སུ་དྲན་པ་མེད་དོ། །དེ་ཅིའི་ཕྱིར་ཞེ་ན། ཐམས་ཅད་མཁྱེན་པ་ནི་ཆོས་དང་ཆོས་མ་ཡིན་པ་གཉིས་དང་ལྡན་པ་མ་ཡིན་ཏེ། གང་འདི་གཉིས་
སུ་མེད་པ་དེ་ཡིད་ལ་བྱེད་པ་ཅི་ཡང་མེད་དོ། །རིགས་ཀྱི་བུ་དེ་ལྟར་ཆོས་ཤེས་པ་ལ་རབ་ཏུ་སྦྱོར་བའི་བྱང་ཆུབ་སེམས་དཔའ་ནི་སངས་རྒྱས་ཀྱིས་གནང་བའི་གཏོང་བ་རྗེས་སུ་དྲན་པ་ཡིན་ནོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སངས་རྒྱས་ཀྱིས་གནང་བའི་ཚུལ་ཁྲིམས་རྗེས་སུ་དྲན་
པ་གང་ཞེ་ན། ཚུལ་ཁྲིམས་ཞེས་བྱ་བ་ནི་འདུས་མ་བྱས་པ་སྟེ། ཟག་པ་མེད་པ། སྨོན་ལམ་མེད་པ། ལྷུན་གྱིས་གྲུབ་པ། བརྟུལ་ཞུགས་གྲུབ་པ། བརྟུལ་ཞུགས་ཐམས་ཅད་ཡོངས་སུ་རྫོགས་པ་སྟེ། རྣམ་པར་རིག་པའི་མཚན་ཉིད་མ་ཡིན་ནོ། །ཏིང་ངེ་འཛིན་གྱིས་གནས་ཏེ།
སེམས་ཀྱི་དམིགས་པའི་གནས་མ་ཡིན་ནོ། །ཤེས་རབ་ཀྱི་རྩ་བ་སྟེ། སྤྲོས་པའི་མཚན་ཉིད་མ་ཡིན་ནོ། །རྣམ་པར་གྲོལ་བའི་རྒྱུ་འཐུན་པ་སྟེ། གཉིས་ཀྱིས་རབ་ཏུ་ཕྱེ་བ་མ་ཡིན་ནོ། །མཁས་པས་རབ་ཏུ་བསྔགས་པ་སྟེ། གཟུགས་སྣང་བ་མ་ཡིན་ནོ། །ཉོན་མོངས་པ་ཞི་བ་
སྟེ། སོ་སོ་རྣམ་པར་རིག་པའི་མཚན་ཉིད་མ་ཡིན་ནོ། །བདེ་བ་ཐམས་ཅད་ཀྱི་རྗེས་སུ་འགྲོ་ཞིང་གཉེན་པོས་བསྐྱེད་པ་མ་ཡིན་ཏེ་གང་དེ་ལྟ་བུའི་ཚུལ་ཁྲིམས་རྗེས་སུ་དྲན་ཞིང་དྲན་པ་ལ་རྙོག་པ་མེད་པ་དེ་ནི་རིགས་ཀྱི་བུ་སངས་རྒྱས་ཀྱིས་གནང་བའི་ཚུལ་ཁྲིམས་རྗེས་སུ་དྲན་པ་ཞེས་
བྱའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སངས་རྒྱས་ཀྱིས་གནང་བའི་ལྷ་རྗེས་སུ་དྲན་པ་གང་ཞེ་ན། ལྷའི་རིས་གཉིས་རྗེས་སུ་དྲན་པར་བྱ་སྟེ། གཉིས་གང་ཞེ་ན། གནས་གཙང་མའི་རིས་ཀྱི་ལྷ་དང་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དགའ་ལྡན་གྱི་གནས་
ན་འཁོད་པ་རྣམས་སོ། །དེ་ལ་བྱང་ཆུབ་སེམས་དཔའ་གནས་གཙང་མའི་རིས་ཀྱི་ལྷ་རྣམས་རྗེས་སུ་དྲན་ནོ། །ཡང་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དགའ་ལྡན་གྱི་གནས་ན་གང་དག་འཁོད་པ་དེ་དག་ནི་སྤྱི་བོ་ལྟ་བུ་བཅུས་རྗེས་སུ་དྲན་ཏེ་བཅུ་གང་ཞེ་ན། ཕ་

རོལ་ཏུ་ཕྱིན་པ་ཐམས་ཅད་ཀྱི་ནང་ན་ཤེས་རབ་ཀྱི་ཕ་རོལ་ཏུ་ཕྱིན་པ་སྤྱི་བོར་གྱུར་པ་དང་། མངོན་པར་ཤེས་པ་ཐམས་ཅད་ཀྱི་ནང་ན་མི་ཉམས་པའི་མངོན་པར་ཤེས་པ་དང་། ས་ཐམས་ཅད་ཀྱི་ནང་ན་དབང་བསྐུར་བའི་ས་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་
ཅད་ཀྱི་ནང་ན་ཡང་དག་པའི་ལྟ་བ་དང་ཏིང་ངེ་འཛིན་མི་ཉམས་པ་དང་། སོ་སོ་ཡང་དག་པར་རིག་པའི་ནང་ན་དོན་དང་སྤོབས་པ་རྒྱུན་མི་འཆད་པ་དང་། ཤེས་པ་ཐམས་ཅད་ཀྱི་ནང་ན་ཆགས་པ་མེད་པའི་ཡེ་ཤེས་ལ་འཇུག་པ་དང་། དབང་པོ་ཐམས་ཅད་ཀྱི་ནང་ན་རབ་འབྲིང་ཐ་མ་ལ་
འཇུག་པ་ཤེས་པ་དང་། སྟོབས་དང་མི་འཇིགས་པ་ལ་སྣང་བའི་ཡེ་ཤེས་རྗེས་སུ་འགྲོ་བ་དང་། སྤྱན་ཐམས་ཅད་ཀྱི་ནང་ན་སངས་རྒྱས་ཀྱི་སྤྱན་ཀུན་དུ་གཟིགས་པ་དང་། སངས་རྒྱས་ཀྱི་ཆོས་ཐམས་ཅད་འདི་དག་གི་ལག་མཐིལ་དུ་སོང་བ་ལྟར་འདུག་པ་དང་། བྱང་ཆུབ་ཀྱི་སྙིང་
པོ་ལ་འདུག་ནས་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་མངོན་པར་རྫོགས་པར་བྱང་ཆུབ་པའོ་ཞེས་སྤྱི་བོ་ལྟ་བུའི་ཆོས་རྣམ་པ་བཅུ་པོ་དེ་དག་གིས་རྗེས་སུ་དྲན་ནོ། །དེའི་དྲན་པ་དེ་ནི་ལྟ་བས་མ་འཁྲུགས། བག་ལ་ཉལ་དང་ཀུན་ནས་ལྡང་བས་མ་འཁྲུགས། ཡིད་ལ་
བྱེད་པས་མ་འཁྲུགས། སྤྲོས་པས་མ་འཁྲུགས་པ་སྟེ། དེ་ལྟ་བུའི་དྲན་པ་རྙོག་པ་མེད་པས་ལྷ་རྗེས་སུ་དྲན་པ་འདི་ནི་རིགས་ཀྱི་བུ་སངས་རྒྱས་ཀྱིས་གནང་བ་ལྷ་རྗེས་སུ་དྲན་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་མྱ་ངན་ལས་འདས་པ་དང་མཉམ་པ་ཉིད་
ཐོབ་ཀྱང་བྱང་ཆུབ་སེམས་དཔའི་སྤྱད་པ་ཡང་སྤྱོད་པ་ཡིན་ཞེ་ན། མྱ་ངན་ལས་འདས་པ་ཞེས་བྱ་བ་ནི་ཉོན་མོངས་པ་ཐམས་ཅད་རབ་ཏུ་ཞི་བ་སྟེ། ཚོར་བ་ཐམས་ཅད་རྒྱུན་བཅད་པ། དམིགས་པ་ཐམས་ཅད་ཞི་བ། ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་ཉིང་མཚམས་
སྦྱོར་བ་མེད་པ་སྟེ། སྐྱེས་བུ་དམ་པ་དེ་མྱ་ངན་ལས་འདས་པ་དང་མཉམ་པ་ཉིད་ཐོབ་ཅིང་། སྔོན་གནས་བཅས་པའི་སྙིང་རྗེ་ཆེན་པོ་དང་། ཐབས་དང་། ཤེས་རབ་དང་། ཡེ་ཤེས་ཀྱིས་ནི་རྣམ་པར་རོལ། སངས་རྒྱས་ཀྱི་བྱིན་གྱི་རླབས་ཀྱིས་ནི་ཤིན་ཏུ་བྱིན་གྱིས་བརླབས། ཤེས་རབ་དང་།

ཡེ་ཤེས་ནི་ཤིན་ཏུ་བསྒོམས། མངོན་གྱི་བྱིན་གྱི་རླབས་ཀྱིས་ནི་བསྒོམ་པ་ཡོངས་སུ་དག །སྒྱུ་མས་རྣམ་པར་རོལ་པའི་ཏིང་ངེ་འཛིན་ལ་ནི་གནས་ཏེ། ཉོན་མོངས་པ་གང་གིས་འཁོར་བ་རབ་ཏུ་སྐྱེད་པའམ། འཁོར་བར་འཆིང་བ་དེ་དག་རབ་ཏུ་སྤངས་ཤིང་ཡེ་ཤེས་གང་གིས་མྱ་ངན་ལས་
འདས་པར་སྟོན་པ་དེ་ལ་དབང་ཐོབ་པས་མི་སྐྱེ་བ་ལས་སྐྱེ་ཞིང་མི་འབྱུང་བ་ལས་འབྱུང་བ་སྟེ། མྱ་ངན་ལས་འདས་པ་དང་མཉམ་པ་ཉིད་དུ་ཡང་དག་པར་ཞུགས་ཀྱང་སེམས་ཅན་ཡོངས་སུ་སྨིན་པར་བྱ་བ་ཡང་མི་འཆད་དོ། །དེ་ནི་རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཕྲུགས་སུ་
ཚད་ཞེས་བྱ་བའི་ཡེ་ཤེས་ཀྱི་སྒོ་སྟེ། ཡེ་ཤེས་ཀྱི་སྒོ་གང་ལ་གནས་པས་བྱང་ཆུབ་སེམས་དཔའ་མྱ་ངན་ལས་འདས་པ་དང་མཉམ་པ་ཉིད་ཐོབ་ཀྱང་བྱང་ཆུབ་སེམས་དཔའི་སྤྱད་པ་སྤྱོད་པའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྤྱོད་པའི་
མཚན་ཉིད་དང་ཆོ་ག་ཤེས་པ་གང་ཡིན་ཞེ་ན། རིགས་ཀྱི་བུ་སེམས་ཅན་རྣམས་ཀྱི་སྤྱོད་པ་ནི་བརྒྱད་ཁྲི་བཞི་སྟོང་སྟེ། འདི་ནི་སྔོན་གྱི་རྩ་བའི་ཚིག་གོ། །གང་ཡང་སེམས་ཅན་ཐམས་ཅད་ཀྱི་སྤྱོད་པ་ཚད་མེད་པ་བསམ་གྱིས་མི་ཁྱབ་པ་བརྗོད་དུ་མེད་པ་དེ་སངས་རྒྱས་ཀྱི་ཡེ་ཤེས་ཀྱིས་
མཁྱེན་ཏེ། ཉན་ཐོས་དང་རང་སངས་རྒྱས་ཀྱི་ཡེ་ཤེས་ཀྱིས་མི་རིག །བྱང་ཆུབ་སེམས་དཔའི་ཡེ་ཤེས་ཀྱིས་མི་རིག་པ་དེ་ལ་བྱང་ཆུབ་སེམས་དཔའ་སངས་རྒྱས་ཀྱི་བྱིན་གྱི་རླབས་དང་། རང་གི་ཤེས་པས་སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་ཀྱི་རྗེས་སུ་རབ་ཏུ་འཇུག་སྟེ།
སྤྱོད་པ་དེའི་གང་ངོ་བོ་ཉིད་དམ། གང་མཚན་ཉིད་ཀྱང་རུང་སྟེ། རྒྱུའི་མཚན་ཉིད་དམ། རྐྱེན་གྱི་མཚན་ཉིད་དམ། བྱེད་རྒྱུའི་མཚན་ཉིད་དམ། ཚོགས་པའི་མཚན་ཉིད་དམ། ཐ་དད་པའི་མཚན་ཉིད་དམ། མི་འདྲ་བའི་མཚན་ཉིད་དམ། འདོད་ཆགས་ཀྱི་མཚན་ཉིད་དམ། ཞེ་
སྡང་གི་མཚན་ཉིད་དམ། གཏི་མུག་གི་མཚན་ཉིད་དམ། སྐལ་བ་མཉམ་པའི་མཚན་ཉིད་དམ། སེམས་ཅན་དམྱལ་བའི་མཚན་ཉིད་དམ། དུད་འགྲོའི་སྐྱེ་གནས་ཀྱི་མཚན་ཉིད་དམ། གཤིན་རྗེའི་འཇིག་རྟེན་གྱི་མཚན་ཉིད་དམ། ལྷའི་མཚན་ཉིད་དམ། མིའི་མཚན་ཉིད་དམ།

ཉན་ཐོས་ཀྱི་ངེས་པར་གྱུར་པའི་མཚན་ཉིད་དམ། རང་སངས་རྒྱས་ཀྱི་ངེས་པར་གྱུར་པའི་མཚན་ཉིད་དམ། སངས་རྒྱས་ཀྱི་ངེས་པར་གྱུར་པའི་མཚན་ཉིད་དམ། རིང་པོའི་རྒྱུའི་མཚན་ཉིད་དམ། བར་མའི་རྒྱུའི་མཚན་ཉིད་དམ། ཉེ་བའི་རྒྱུའི་མཚན་ཉིད་ཀྱང་རུང་སྟེ།
སྤྱོད་པ་དེ་དག་ཐམས་ཅད་ཀྱི་མཚན་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ་ཡེ་ཤེས་ཐམས་ཅད་ལ་ཁ་ན་མ་ཐོ་བ་མེད་པ་ཡིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་དང་ཆོ་ག་ཤེས་པ་ཡིན་ནོ། །རིགས་ཀྱི་བུ་དེ་ལ་
ཇི་ལྟར་ན་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་དག་གི་ཆོས་དཀོན་མཆོག་གི་མཛོད་འཛིན་པ་ཡིན་ཞེ་ན། རིགས་ཀྱི་བུ་སངས་རྒྱས་བཅོམ་ལྡན་འདས་དག་གི་ཆོས་དཀོན་མཆོག་གི་མཛོད་ནི་མི་ཟད་པ་སྟེ། སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་ལ་རབ་ཏུ་འཇུག་
པ་ཇི་སྙེད་པ་སངས་རྒྱས་བཅོམ་ལྡན་འདས་རྣམས་ཀྱི་ཆོས་དཀོན་མཆོག་གི་མཛོད་ལ་གཟུད་པའི་ཡེ་ཤེས་ལ་འཇུག་པའང་དེ་སྙེད་དོ། །ཇི་ལྟར་སེམས་ཅན་གྱི་སྤྱོད་པ་མི་ཟད་ཅིང་མཐའ་མེད་པ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱི་ཆོས་དཀོན་མཆོག་གི་མཛོད་ཀྱང་མི་
ཟད་ཅིང་མཐའ་མེད་པའོ། །ཆོས་དཀོན་མཆོག་གི་མཛོད་ཅེས་བྱ་བ་ནི་གང་གི་ནུབ་མོ་དེ་བཞིན་གཤེགས་པས་བྱང་ཆུབ་བརྙེས་པ་ནས། གང་གི་ནུབ་མོ་ཡོངས་སུ་མྱ་ངན་ལས་འདས་པ་དེའི་བར་དུ་དེ་བཞིན་གཤེགས་པས་བཤད་པ་དང་འཆད་པ་དང་། འཆད་པར་འགྱུར་བ་དེ་ཐམས་
ཅད་ནི་དེ་བཞིན་ནོ། །མ་ནོར་བ་དེ་བཞིན་ནོ། །གཞན་མ་ཡིན་པའོ། །ཅིའི་ཕྱིར་དེ་བཞིན་ཞེས་བྱ་ཞེ་ན། དེ་བཞིན་ཉིད་ཞི་བ་ལ་ཡང་དག་པར་ཞུགས་པས་དེའི་ཕྱིར་དེ་བཞིན་ཞེས་བྱའོ། །ཅིའི་ཕྱིར་མ་ནོར་བ་དེ་བཞིན་ཉིད་ཅེས་བྱ་ཞེ་ན། དོན་དམ་པའི་བདེན་པ་ལ་ཡང་དག་པར་ཞུགས་པ་
དེའི་ཕྱིར་མ་ནོར་བ་དེ་བཞིན་ཉིད་ཅེས་བྱའོ། །ཅིའི་ཕྱིར་ན་གཞན་མ་ཡིན་པ་དེ་བཞིན་ཉིད་ཅེས་བྱ་ཞེ་ན། དེ་བདག་གི་ངོ་བོ་ཉིད་མ་ཡིན་པར་གཞན་དུ་མི་བཙལ་ཏེ། དེའི་ཕྱིར་གཞན་མ་ཡིན་པའོ། །ཡང་སངས་རྒྱས་བཅོམ་ལྡན་འདས་རྣམས་ཀྱི་ཆོས་དཀོན་མཆོག་གི་མཛོད་ནི་སྟོང་གསུམ་

གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་མང་དུ་ཐོས་པ་ཀུན་དགའ་བོ་ལྟ་བུར་གྱུར་ཀྱང་དེ་དག་ཐམས་ཅད་ཀྱིས་བསྐལ་པ་བྱེ་བ་ཕྲག་སྟོང་དུ་ཡང་ཡི་གེ་ཁོང་དུ་ཆུད་པར་མི་ནུས་སོ། །ཡང་དོན་གཅིག་ཏུ་བསྟན་ཏེ་ཇི་ལྟ་བ་བཞིན་དུ་བསྟན་པ་འདི་ལྟ་བུ་
ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་དཀོན་མཆོག་གི་མཛོད་དོ། །དེ་བྱང་ཆུབ་སེམས་དཔའ་རྣམས་འཛིན་ཏེ་ཇི་ལྟར་ཡི་གེ་ཐམས་ཅད་མི་བརྗེད་ཅིང་དོན་ཐམས་ཅད་མི་ཉམས་པར་སེམས་ཅན་ཐམས་ཅད་མགུ་བར་བྱེད། སངས་རྒྱས་ཐམས་ཅད་རབ་ཏུ་མཉེས་པར་བྱེད།
བདུད་ཐམས་ཅད་ཕམ་པར་བྱེད། མུ་སྟེགས་ཅན་གཞན་ཐམས་ཅད་ཚར་གཅོད། ཉོན་མོངས་པ་ཐམས་ཅད་ཞི་བར་བྱེད་ཅིང་དེ་དག་ལ་ཆོས་དཀོན་མཆོག་རབ་ཏུ་སྒྲོགས་པ་དེ་ལྟར་འཛིན་ཏོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་རྣམས་ཀྱི་ཆོས་
དཀོན་མཆོག་གི་མཛོད་འཛིན་པ་ཡིན་ནོ། །ཡང་རིགས་ཀྱི་བུ་ཆོས་གང་གི་ངོ་བོ་ཉིད་དུ་ངས་ཆོས་རྣམས་མངོན་པར་སངས་རྒྱས་པ་དེའི་ངོ་བོ་ཉིད་དུ་བྱང་ཆུབ་སེམས་དཔས་ཆོས་རྣམས་གཟུང་བར་བྱའོ། །ཡང་ཇི་ལྟ་བུར་དེ་བཞིན་གཤེགས་པས་ཆོས་རྣམས་མངོན་པར་རྫོགས་པར་སངས་
རྒྱས་ཤེ་ན། ཡོངས་སུ་མ་གྲུབ་པའི་ཚུལ་གྱིས་སྒྱུ་མའི་ངོ་བོ་ཉིད་དང་། ཡུལ་ལས་ཤིན་ཏུ་འདས་པའི་ཚུལ་གྱིས་རྨི་ལམ་གྱི་ངོ་བོ་ཉིད་དང་། ཤིན་ཏུ་སྐྱེ་བ་མེད་པའི་ཚུལ་གྱིས་སྨིག་རྒྱུའི་ངོ་བོ་ཉིད་དང་། མི་འཕོ་བའི་ཚུལ་གྱིས་མིག་ཡོར་གྱི་ངོ་བོ་ཉིད་དང་། རང་བཞིན་མེད་པའི་ཚུལ་གྱིས་
གཟུགས་བརྙན་གྱི་ངོ་བོ་ཉིད་དང་། རག་ལས་པའི་ཚུལ་གྱིས་སྟོང་པའི་ངོ་བོ་ཉིད་དང་། རྣམ་པར་མི་རྟོག་པའི་ཚུལ་གྱིས་མཚན་མ་མེད་པའི་ངོ་བོ་ཉིད་དང་། སེམས་ཆགས་པ་མེད་པའི་ཚུལ་གྱིས་སྨོན་པ་མེད་པའི་ངོ་བོ་ཉིད་དང་། འདོད་ཆགས་ཐམས་ཅད་དང་བྲལ་བའི་ཚུལ་
གྱིས་འདོད་ཆགས་མེད་པའི་ངོ་བོ་ཉིད་དང་། གྲངས་ཐམས་ཅད་ལས་འདས་པའི་ཚུལ་གྱིས་འདུས་མ་བྱས་པའི་ངོ་བོ་ཉིད་དེ། དེ་ལྟར་རིགས་ཀྱི་བུ་ཐ་སྙད་དུ་གཞན་གྱི་རྣམ་པར་རིག་པ་ལ་བརྟེན་ནས་དེ་འདྲ་བར་ཆོས་དེ་ངས་མངོན་པར་རྫོགས་པར་སངས་རྒྱས་ཏེ། གང་ཆོས་དེའི་

ངོ་བོ་ཉིད་ཀྱི་མཚན་ཉིད་དེ་ནི་ཚིག་གིས་བརྗོད་པར་མི་ནུས་སོ། །དེ་ལ་ཆོས་རྣམས་འཛིན་པར་འདོད་པའི་བྱང་ཆུབ་སེམས་དཔས་དེ་ལྟ་བུའི་ངོ་བོ་ཉིད་ཀྱི་ཆོས་རྣམས་མངོན་པར་རྫོགས་པར་སངས་རྒྱས་པར་བྱ་སྟེ། ཡི་གེ་དང་ངེས་པའི་ཚིག་གིས་ཀྱང་སེམས་ཅན་གཞན་རྣམས་
དང་། གང་ཟག་གཞན་དག་ལ་བསྟན་པར་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཐོག་མ་ནས་སེམས་ཅན་རྣམ་པར་དག་པས་སེམས་ཅན་རྣམས་ཡོངས་སུ་སྨིན་པར་བྱེད་ཅེ་ན། རིགས་ཀྱི་བུ་སེམས་ཅན་གྱི་ཁམས་ནི་ཐོག་མ་ནས་རྣམ་པར་དག་པ་སྟེ། དེ་ལ་སེམས་
ཅན་རྣམས་ཀྱི་རྩ་བའི་དངོས་པོ་མེད་དེ། བྱང་ཆུབ་སེམས་དཔའ་ཆོས་ཐམས་ཅད་ཀྱི་རྩ་བ་ཡོངས་སུ་ཆད་པར་རིག་ནས་སེམས་ཅན་གང་རྣམས་ཡོངས་སུ་སྨིན་པར་བྱེད་པ་དེ་ལ་བདག་ཏུ་ལྟ་བར་མི་འགྱུར། སེམས་ཅན་དུ་ལྟ་བར་མ་ཡིན། སྲོག་ཏུ་ལྟ་བར་མ་ཡིན། གང་ཟག་ཏུ་ལྟ་བར་
ཡང་མི་འགྱུར་རོ། །ཡང་དེ་འདི་སྙམ་དུ་སེམས་ཏེ་སེམས་ཅན་ཞེས་བྱ་བ་འདི་ནི་ཕྱིན་ཅི་ལོག་སྟེ། རྒྱུར་ལྟ་བའི་ཀུན་ནས་དཀྲིས་པ་དང་། མ་རིག་པ་དང་། སྲིད་པ་དང་། སྲེད་པ་དང་། ཡང་དག་པ་མ་ཡིན་པ་ཀུན་དུ་རྟོག་པ་ལས་སེམས་ཅན་ཞེས་བརྗོད་སྙམ་མོ། །དེ་ལ་བྱང་ཆུབ་
སེམས་དཔས་མེད་པ་ཕྱིན་ཅི་ལོག་ལས་བྱུང་བའི་ཉོན་མོངས་པ་རབ་ཏུ་སྤང་བའི་ཕྱིར་སེམས་ཅན་རྣམས་ལ་ཆོས་སྟོན་ཏེ། དངོས་པོ་གང་ཡང་ཆུད་མི་གཟོན་ཏོ། །སེམས་ཅན་མེད་ཅིང་སེམས་ཅན་དབེན་པས་སེམས་ཅན་རྣམས་ཡོངས་སུ་སྨིན་པར་བྱེད་དེ། དེ་ལྟར་བྱང་ཆུབ་སེམས་དཔའ་
ཐོག་མ་ནས་རྣམ་པར་དག་པས་སེམས་ཅན་རྣམས་ཡོངས་སུ་སྨིན་པར་བྱེད་དོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཚུལ་བཞིན་ལ་རབ་ཏུ་སྦྱོར་བས་སངས་རྒྱས་ཀྱི་ཆོས་ཐམས་ཅད་ཡང་དག་པར་སྡུད་ཅེ་ན། ཚུལ་བཞིན་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་ལ་འཇུག་
པའོ། །དེ་ཅིའི་ཕྱིར་ཞེ་ན། རྒྱུ་དང་རྐྱེན་ཅི་འདྲ་བ་དེ་འདྲ་བར་འབྲས་བུ་མངོན་པར་འགྲུབ་བོ། །སྦྱིན་པ་ནི་ལོངས་སྤྱོད་ཆེན་པོའི་རྒྱུ་སྟེ། དེ་ལ་བྱང་ཆུབ་སེམས་དཔའ་གང་གཏོང་བ་དེ་ཡང་ཐམས་ཅད་མཁྱེན་པར་བསྔོས་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ཚུལ་

ཁྲིམས་ནི་ལྷ་དང་མིར་སྐྱེ་བའི་རྒྱུ་སྟེ། ལྷ་དང་མིར་སྐྱེས་ནས་བྱང་ཆུབ་སེམས་དཔས་སེམས་ཅན་རྣམས་ཚུལ་ཁྲིམས་ལ་རབ་ཏུ་འཛུད་དེ། ཚུལ་ཁྲིམས་ཡང་དག་པར་བཟུང་བ་དེ་ཡང་ཐམས་ཅད་མཁྱེན་པར་བསྔོས་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་
དོ། །བཟོད་པ་དང་དེས་པ་ནི་ལུས་དང་ངག་དང་སེམས་ཀྱི་རྒྱན་གྱི་རྒྱུ་སྟེ། ལུས་དང་། ངག་དང་། སེམས་བརྒྱན་པས་བྱང་ཆུབ་སེམས་དཔའ་བདག་ལ་ཕན་པ་དང་གཞན་ལ་ཕན་པར་ཞུགས་པ་ཡིན་ཏེ། ཕན་པར་འདོད་པ་བཟོད་པའི་གནས་དེ་ཡང་ཐམས་ཅད་མཁྱེན་པར་བསྔོས་ནས་
བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །བརྩོན་འགྲུས་ནི་སངས་རྒྱས་ཀྱི་ཆོས་ཐམས་ཅད་སྡུད་པའི་རྒྱུ་སྟེ། བྱང་ཆུབ་སེམས་དཔས་བརྩོན་འགྲུས་བརྩམས་ནས་དགེ་བའི་རྩ་བ་ཐམས་ཅད་ཡང་དག་པར་སྒྲུབ་ཅིང་དགེ་བའི་རྩ་བ་ཐམས་ཅད་ཡང་དག་པར་གྲུབ་
པའི་བརྩོན་འགྲུས་དེ་ཡང་ཐམས་ཅད་མཁྱེན་པར་བསྔོས་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །བསམ་གཏན་ནི་སེམས་དགའ་བ་དང་ཅང་ཤེས་པའི་རྒྱུ་སྟེ། བྱང་ཆུབ་སེམས་དཔའ་དགའ་བ་དང་ཅང་ཤེས་པས་ཞི་གནས་ཀྱི་ཚོགས་ཀུན་སྐོང་སྟེ།
ཞི་གནས་ཀྱི་ཚོགས་དེ་ཡང་ཐམས་ཅད་མཁྱེན་པར་བསྔོས་ནས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ཐོས་པ་ནི་ཤེས་རབ་ཆེན་པོའི་རྒྱུ་སྟེ། བྱང་ཆུབ་སེམས་དཔའ་ཤེས་རབ་ཆེན་པོ་ནི་དམིགས་པར་ལྟ་བ་མི་འཛིན་ཅིང་དམིགས་པ་མེད་པའི་ཐོས་པ་དེ་ཡང་
ཐམས་ཅད་མཁྱེན་པར་བསྔོས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །དེ་བཞིན་དུ་དགེ་བའི་ཆོས་ཐམས་ཅད་དེ་དགེ་བའི་ཆོས་ཀྱི་རྒྱུ་གང་དང་གང་བསགས་པ་དེ་དང་དེའི་འབྲས་བུ་ལྷུན་གྱིས་གྲུབ་པས་མངོན་པར་སྐྱེ་བར་འགྱུར་ཏེ། རྒྱུ་དང་རྐྱེན་དེ་ནི་ཚུལ་བཞིན་
ཡིད་ལ་བྱེད་པ་ཞེས་བྱའོ། །གཞན་ཡང་ཚུལ་བཞིན་ཞེས་བྱ་བ་ལ་ཆོས་ཐམས་ཅད་ཀྱི་ཚུལ་བཞིན་ནི་བདག་ཡིན་ཏེ། ཇི་ལྟར་བདག་ལ་བདག་མེད་པ་དེ་བཞིན་དུ་སེམས་ཅན་ཐམས་ཅད་ལ་བདག་མེད་དོ། །ཇི་ལྟར་ན་བདག་སྟོང་པ་དེ་བཞིན་དུ་ཆོས་ཐམས་ཅད་སྟོང་ངོ་། །ཇི་ལྟར་བདག་མིང་

དུ་བཏགས་པ་ཙམ་དུ་ཟད་པ་དེ་བཞིན་དུ་ཆོས་ཐམས་ཅད་ཀྱང་མིང་དུ་བཏགས་པ་ཙམ་དུ་ཟད་དོ། །དེ་ལྟར་ཚུལ་བཞིན་ལ་རབ་ཏུ་སྦྱོར་བའི་བྱང་ཆུབ་སེམས་དཔའ་ནི་ཆོས་ཐམས་ཅད་མཉམ་པར་སྦྱོར་རོ། །གང་ཆོས་ཐམས་ཅད་མཉམ་པ་ཉིད་དེ་ནི་སངས་རྒྱས་ཀྱི་ཆོས་
ཐམས་ཅད་མཉམ་པ་ཉིད་དེ། དེ་ལྟར་ཚུལ་བཞིན་ལ་སྦྱོར་བའི་བྱང་ཆུབ་སེམས་དཔའ་ནི་སངས་རྒྱས་ཀྱི་ཆོས་རྣམས་ཡང་དག་པར་སྒྲུབ་བོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་མངོན་པར་ཤེས་པ་ལས་མ་ཉམས་ཤིང་ཆོས་ཐམས་ཅད་ལ་དབང་བྱེད་པ་ཡིན་ཞེ་ན། འདི་
ལ་རིགས་ཀྱི་བུའམ། དགེ་སྦྱོང་ངམ། བྲམ་ཟེ་འཇིག་ཚོགས་ལ་ལྟ་བ་མ་བཅོམ་པས་མངོན་པར་ཤེས་པ་བསྐྱེད་པ་དེ་དག་ནི་མངོན་པར་ཤེས་པ་རྣམས་ལས་ཉམས་པར་ཡང་འགྱུར་རོ། །ཡང་བྱང་ཆུབ་སེམས་དཔའ་ནི་འཇིག་ཚོགས་ལ་ལྟ་བའི་རྩ་བ་ལས་བྱུང་བའི་ལྟ་བར་གྱུར་པ་དྲུག་ཅུ་
རྩ་གཉིས་ཡང་དག་པར་བཅོམ་ནས་ལྟ་བ་དང་ལེན་པ་ཐམས་ཅད་མེད་པར་མངོན་པར་ཤེས་པ་བསྐྱེད་དེ། ཡེ་ཤེས་དང་ལྡན། ཤེས་རབ་དང་ལྡན། བློ་དང་ལྡན། བཟོད་པ་དང་ལྡན། ཚུལ་ཁྲིམས་དང་ལྡན་ཏེ། ཏིང་ངེ་འཛིན་ལ་སྙོམས་པར་ཞུགས་ཤིང་ལུས་དབེན་སེམས་དབེན་ཏེ། འདི་
འདྲ་བའི་ཡེ་ཤེས་ཀྱིས་ནང་ཉེ་བར་འགྲོ་ཞིང་ཕྱི་རོལ་དུ་མི་རྒྱུ་བ། ཡུལ་མེད་པའི་ཡུལ་ཅན། ཅང་ཤེས་པའི་སེམས་དང་ལྡན་པ་དགའ་བའི་སེམས་དང་ལྡན་པ། ཤིན་ཏུ་བརྟགས་པས་བརྟགས་པ། རབ་ཏུ་དཀར་བའི་བློ་ཉོན་མོངས་པས་མ་འཁྲུགས་པ་སྣང་བ་ཐོབ་པ། ཡེ་ཤེས་
རབ་རིབ་མེད་པ། བསོད་ནམས་ཀྱི་ཚོགས་བསགས་པ། ཡེ་ཤེས་ཀྱི་ཚོགས་བསགས་པ། ཞི་གནས་ཀྱི་ཚོགས་བསགས་པ། ལྷག་མཐོང་གི་ཚོགས་བསགས་པ། སྦྱིན་པས་བརྟན་པ། ཚུལ་ཁྲིམས་ཀྱིས་བརྒྱན་པ། བཟོད་པའི་གོ་གྱོན་པ། བརྩོན་འགྲུས་ཀྱི་ཡ་ལད་
བགོས་པ། བསམ་གཏན་ལ་གནས་པ། ཤེས་རབ་ཤིན་ཏུ་བསྒོམས་པའི་བློ་དང་ལྡན་པ། བྱམས་པས་རྗེས་སུ་འཐུན་པ། སྙིང་རྗེ་ལ་རབ་ཏུ་གནས་པ། ཐབས་ཀྱིས་མངོན་པར་བསྒྲུབས་པ་དེ་ལྟ་བུའི་ཆོས་དང་ལྡན་པས་མངོན་པར་ཤེས་པ་བསྐྱེད་དོ། །བྱང་ཆུབ་ཀྱི་སྙིང་པོའི་

བར་དུ་མངོན་པར་ཤེས་པ་དེ་དག་གིས་ཤིན་དུ་འཕགས་ཤིང་དེ་མངོན་པར་ཤེས་པ་དེ་དག་གིས་ཆོས་ཐམས་ཅད་ལ་དབང་བྱེད་པ་ཡིན་ཏེ། གཟུགས་ཐམས་ཅད་མཐོང་། སྒྲ་ཐམས་ཅད་ཐོས། སེམས་ཐམས་ཅད་ལ་འཇུག་ཅིང་བསྐལ་པ་གྲངས་མེད་པ་རྗེས་སུ་དྲན་ཏེ། རྫུ་འཕྲུལ་
ཐམས་ཅད་ཀྱིས་རྣམ་པར་འཕྲུལ་པ། ཟག་པ་ཟད་པའི་བདེ་བ་རྙེད་ཅིང་། ཡིད་ཀྱི་རྣམ་པར་རྟོག་པ་ཇི་སྙེད་པ་ལ་རྣམ་པར་རྟོག་པ་དང་། རྣམ་པར་དཔྱོད་པ་ཐམས་ཅད་ལ་དབང་བྱེད་པ་ཡིན་ཏེ། དེས་ཆོས་ཐམས་ཅད་ལ་དེ་བཞིན་དུ་ལྷུན་གྱིས་གྲུབ་པར་གནས་སོ། །རིགས་ཀྱི་བུ་དེ་ལྟར་ན་
བྱང་ཆུབ་སེམས་དཔའ་མངོན་པར་ཤེས་པ་ལས་མི་ཉམས་ཤིང་ཆོས་ཐམས་ཅད་ལ་དབང་བྱེད་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་ཚུལ་ཟབ་མོ་ལ་རབ་ཏུ་ཞུགས་ཤིང་ཉན་ཐོས་དང་། རང་སངས་རྒྱས་ཐམས་ཅད་ཀྱིས་རྟོགས་པར་དཀའ་བ་
ཡིན་ཞེ་ན། རིགས་ཀྱི་བུ་ཟབ་མོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའོ། །རྟེན་ཅིང་འབྲེལ་པར་འབྱུང་བའི་ཚུལ་ནི་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་
ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་
པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། །སེམས་ཅན་རྣམས་ཀུན་ནས་ཉོན་མོངས་པར་འགྱུར་བའི་རྒྱུ་གང་དང་། རྐྱེན་གང་ཡིན་པ་དེ་ལ་
བྱང་ཆུབ་སེམས་དཔའ་ཡེ་ཤེས་རབ་ཏུ་འཇུག་སྟེ། འདི་ནི་རྟེན་ཅིང་འབྲེལ་པར་འབྱུང་བ་ཀུན་འབྱུང་བའི་ཚུལ་ཞེས་བྱའོ། །དེ་ལ་རྟེན་ཅིང་འབྲེལ་པར་འབྱུང་བའི་འགོག་པའི་ཚུལ་གང་ཞེ་ན། འདི་ལྟ་སྟེ། མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་

རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་
འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་།
འཁྲུག་པ་རྣམས་འགག་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འགག་པར་འགྱུར་རོ། །དེ་ནི་རིགས་ཀྱི་བུ་རྟེན་ཅིང་འབྲེལ་པར་འབྱུང་བ་འགོག་པའི་ཚུལ་ཞེས་བྱའོ། །སེམས་ཅན་རྣམས་རྣམ་པར་དག་པར་འགྱུར་བའི་རྒྱུ་གང་དང་རྐྱེན་གང་ཡིན་པ་དེ་ལ་
བྱང་ཆུབ་སེམས་དཔའ་ཡེ་ཤེས་རབ་ཏུ་འཇུག་སྟེ། དེ་ནི་ཆོས་ཀྱི་ཚུལ་ཟབ་མོ་ལ་འཇུག་པ་ཞེས་བྱ་སྟེ། གང་ཉན་ཐོས་དང་། རང་སངས་རྒྱས་ཐམས་ཅད་ཀྱི་ས་མ་ཡིན་པའོ། །དེ་ཅིའི་ཕྱིར་ཞེ་ན། ཉན་ཐོས་དང་། རང་སངས་རྒྱས་ཐམས་ཅད་ཀྱི་ས་མ་ཡིན་ཞེ་ན། སེམས་
ཅན་ཐམས་ཅད་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་ཤེས་པ་ནི་སངས་རྒྱས་བཅོམ་ལྡན་འདས་ཀྱི་ཡུལ་ལོ། །རང་གི་ཡེ་ཤེས་དང་། སངས་རྒྱས་ཀྱི་བྱིན་གྱི་རླབས་ཀྱིས་བྱང་ཆུབ་སེམས་དཔས་ཀྱང་དེའི་མཚམས་སྦྱོར་བ་ཤེས་སོ། །གཞན་ཡང་ཟབ་མོ་ཞེས་
བྱ་བ་ནི་འཇིག་ཚོགས་དང་། བདག་རྣམ་པར་དག་པ་དང་། ཆོས་ཐམས་ཅད་རྣམ་པར་དག་པའོ། །དེ་ཅིའི་ཕྱིར་ཞེ་ན། འཇིག་ཚོགས་ནི་ཀུན་དུ་བཙལ་ཀྱང་མི་དམིགས་སོ། །གང་མི་དམིགས་པ་དེ་ནི་ཟབ་མོའོ། །བདག་ནི་སངས་རྒྱས་ཐམས་ཅད་ཀྱིས་ཀྱང་མ་བརྙེས་
སོ། །དེ་ཅིའི་ཕྱིར་ཞེ་ན། བདག་ཐོག་མ་ནས་ཀྱང་རྣམ་པར་དག་པ་སྟེ། ཇི་ལྟར་བདག་རྣམ་པར་དག་པ་དེ་བཞིན་དུ་ཆོས་ཐམས་ཅད་རྣམ་པར་དག་གོ། །དེ་ཅིའི་ཕྱིར་རྣམ་པར་དག་པ་ཞེས་བྱ་ཞེ་ན། དེ་ལ་ཆོས་གང་ཡང་མ་སྐྱེས། མ་སྐྱེད། མ་འགགས། མི་འགག་

པ་སྟེ། དེ་བས་ན་རྣམ་པར་དག་པ་ཞེས་བྱའོ། །མུན་པ་མེད་པ། སྣང་བ་མེད་པ། ཀུན་གཞི་མེད་པ། རབ་རིབ་མེད་པ། དོན་དམ་པ་ཟབ་མོ་གང་ལ་མིག་མེད་ཅིང་མིག་འགོག་པ་མེད་པ་ནས་ཡིད་ཀྱི་བར་དུ་མེད་ཅིང་ཡིད་འགོག་པ་མེད་པ་སྟེ། དེ་ནི་ཡུལ་དུ་བགྲང་བ་མ་ཡིན་ནོ། །གང་
ཡུལ་མ་ཡིན་ཞིང་ཡུལ་བྱེད་པ་དེ་ནི་དོན་དམ་པ་སྟེ། དེའི་ཕྱིར་ཟབ་མོ་ཞེས་བྱའོ། །དེ་ལ་སེམས་དང་ཡིད་འཛིན་པ་མེད་དེ་རྟོགས་པར་དཀའ་བ་མཐོང་བར་དཀའ་བ་ཁོང་དུ་ཆུད་པར་དཀའ་བ་དེ་ལྟ་བུའི་ཆོས་ཀྱི་ཚུལ་ཟབ་མོ་ལ་ཡེ་ཤེས་གཞན་གྱི་དྲིང་ལ་མི་འཇོག་ཅིང་སེམས་ཅན་གཞན་ལ་
ཡང་རབ་ཏུ་སྟོན་ཏེ། དེ་ལྟར་ན་བྱང་ཆུབ་སེམས་དཔའི་ཆོས་ཀྱི་ཚུལ་ཟབ་མོ་ལ་རབ་ཏུ་ཞུགས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་གཏིང་དཔག་དཀའ་བ་ཡིན་ནོ།། །།འཕགས་པ་ནམ་མཁའ་མཛོད་ཀྱིས་ཞུས་པ། བམ་པོ་གསུམ་པ། རིགས་
ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཤེས་པ་ལ་མཁས་ཏེ། མཐའ་གཉིས་སུ་ལྟ་བ་ཐམས་ཅད་དང་བྲལ་བ་ཡིན་ཞེ་ན་རིགས་ཀྱི་བུ་འདི་ལ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་རྟེན་པ་དེ་ནི་ཅི་ཡང་མ་ཡིན་པ། གང་
རྟེན་པ་དེ་ནི་དངོས་པོ་མེད་པ། གང་རྟེན་པ་དེ་ནི་ཡོངས་སུ་མ་གྲུབ་པ། གང་རྟེན་ཅིང་འབྲེལ་པར་འབྱུང་བ་དེ་ནི་མི་རྟག་པ། སྡུག་བསྔལ་བ་བདག་མེད་པ། ཞི་བ། གང་རྟེན་པ་དེ་ལ་ནི་བདག་མེད། སེམས་ཅན་མེད། སྲོག་མེད། གསོ་བ་མེད། སྐྱེས་བུ་མེད། གང་ཟག་མེད།
ཤེད་ལས་སྐྱེས་མེད། ཤེད་བུ་མེད། གང་རྟེན་པ་དེ་ལ་ནི་ཡང་དག་པར་འབྱུང་བ་གང་ཡང་མེད། གང་རྟེན་པ་དེ་ལ་ནི་ཅི་ཡང་མེད་པ། རྩོལ་བ་མེད་པ། སྟོང་པ། མཚན་མ་མེད་པ། དབེན་པ། རྒྱུ་བ་མེད་པ། མ་སྤྲོས་པ། སྤྲོས་པ་མེད་པ་སྟེ། དེའི་ཕྱིར་སྐྱེ་བ་ནི་ཆོས་ཁོ་ན་སྐྱེ། འགག་
པ་ནི་ཆོས་ཁོ་ན་འགག་སྟེ། འདི་ལ་བདག་གམ། སེམས་ཅན་ནམ། སྲོག་གམ། གསོ་བའམ། སྐྱེས་བུའམ། གང་ཟག་གམ། ཤེད་ལས་སྐྱེས་སམ། ཤེད་བུ་མེད་ཅེས་བྱའོ། །ཆོས་གང་དག་རྟེན་ཅིང་འབྲེལ་པར་འབྱུང་བ་དེ་དག་ལ་ནི་སྐྱེ་བ་ཅི་ཡང་མེད་ཅིང་བདག་པོ་མེད་དེ། དེའི་

ཕྱིར་ཆོས་ཐམས་ཅད་ནི་རྩྭ་དང་། ཤིང་དང་། རྩིག་པ་དང་། ལམ་དང་། མིག་ཡོར་ལྟ་བུ་ཞེས་བྱ་སྟེ། ཇི་ལྟར་ཕྱི་རོལ་གྱི་དངོས་པོ་རྣམས་སྐྱེ་བ་ན་སྐྱེད་པར་བྱེད་པ་མེད། འགག་པ་ན་ཡང་འགོག་པར་བྱེད་པ་མེད་པ་དེ་བཞིན་དུ་ནང་གི་ཆོས་རྣམས་སྐྱེ་བ་ན་ཡང་སྐྱེད་པར་བྱེད་པ་
མེད། འགག་པ་ན་ཡང་འགོག་པར་བྱེད་པ་མེད་དེ། གཞན་དུ་ན་རྐྱེན་རྣམས་ཡོད་ན་འབྱུང་གི་རྐྱེན་མ་ཚང་ན་འགོག་གོ་སྙམ་དུ་སེམས་ཏེ། དེ་ལྟར་ན་ཤེས་པ་ལ་སྦྱོར་བ་ནི་མཐར་ལྟ་བ་ཐམས་ཅད་རབ་ཏུ་སྤོང་ངོ་། །དེ་ལ་མཐར་ལྟ་བ་གང་ཞེ་ན། མཐའ་ཞེས་བྱ་བ་ནི་ཆད་པ་དང་རྟག་པ་སྟེ། གང་དེ་
མི་སྐྱེད་ཅིང་རྣམ་པར་མི་འཇིག་པ་ནི་ཆད་པ་དང་རྟག་པ་དང་བྲལ་བ་སྟེ། དེའི་ཕྱིར་དག་པས་ན་མཐར་ལྟ་བ་ཐམས་ཅད་རྣམ་པར་དག་པ་སྟེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཤེས་པ་ལ་མཁས་ཏེ། མཐར་ལྟ་བ་ཐམས་ཅད་དང་བྲལ་
བ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་ཕྱག་རྒྱས་བཏབ་པས། དེ་བཞིན་ཉིད་དབྱེར་མེད་པ་ཤེས་པ་ལ་མཁས་པ་ཡིན་ཞེ་ན། དེ་བཞིན་གཤེགས་པའི་ཕྱག་རྒྱས་བཏབ་པ་ཞེས་བྱ་བ་ལ་དེ་བཞིན་ཉིད་དབྱེར་མེད་པ་དེ་ནི་ཕྱག་རྒྱ་
སྟེ། ཕྱེ་བ་མེད་པ། འཇུག་པ་མེད་པ། མངོན་པར་ཞེན་པ་མེད་པ། མི་བསྐྱོད་པ། བསྐྱོད་པར་བྱ་བ་མ་ཡིན་པ་སྟེ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་བསྐྱོད་པར་མི་ནུས་སོ། །དེ་ཅིའི་ཕྱིར་ཞེ་ན། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་
ནི་ཕྱག་རྒྱ་དེས་བཏབ་པ་ཉིད་དོ། །དེ་བཞིན་གཤེགས་པའི་ཕྱག་རྒྱ་དེ་ནི་ཤིན་ཏུ་མི་སྐྱེ་བའི་ཕྱག་རྒྱ། ཤིན་ཏུ་སྟོང་པ་ཉིད་ཀྱི་ཕྱག་རྒྱ། ཤིན་ཏུ་མཚན་མ་མེད་པའི་ཕྱག་རྒྱ། ཤིན་ཏུ་སྨོན་པ་མེད་པའི་ཕྱག་རྒྱ། ཤིན་ཏུ་འདུས་མ་བྱས་པའི་ཕྱག་རྒྱ། ཤིན་ཏུ་འདོད་ཆགས་
དང་བྲལ་བའི་ཕྱག་རྒྱ། ཤིན་ཏུ་དེ་བཞིན་ཉིད་ཀྱི་ཕྱག་རྒྱ། ཤིན་ཏུ་ཡང་དག་པའི་མཐའི་ཕྱག་རྒྱ། ཤིན་ཏུ་ནམ་མཁའི་ཕྱག་རྒྱ་སྟེ། དཔེར་ན་ནམ་མཁའ་ཕྱག་རྒྱ་མི་སྣང་བ་དེ་བཞིན་དུ་དེ་བཞིན་གཤེགས་པའི་ཕྱག་རྒྱ་དེ་ཡང་སྤྱན་ལྔ་ལ་མི་སྣང་སྟེ་རང་གི་མཚན་ཉིད་ཀྱི་ཕྱག་

རྒྱས་བཏབ་པའོ། །དེ་བཞིན་གཤེགས་པས་ཆོས་ཀྱི་ཐ་སྙད་ཇི་སྙེད་དུ་འདོགས་པ་དེ་དག་ཐམས་ཅད་ནི་དེ་བཞིན་གཤེགས་པའི་ཕྱག་རྒྱས་བཏབ་པ་དེ་བཞིན་དུ་ཐ་སྙད་འདོགས་སོ། །དེ་ལ་གང་དག་རྣམ་པར་ཤེས་པའི་སྤྱོད་ཡུལ་བ་དེ་དག་ནི་ཆོས་རྣམ་པར་འཇོག་པར་བྱེད་དོ། །གང་དག་རྣམ་
པར་ཤེས་པ་ལ་མི་གནས་པ་དེ་དག་ནི་ཆོས་རྣམ་པར་འཇོག་པར་མི་བྱེད། ཆོས་ཐ་དད་དུ་མི་བྱེད་དོ། །དེ་དག་དེ་བཞིན་གཤེགས་པའི་ཕྱག་རྒྱས་བཏབ་པས་ན་དེ་དག་དེ་བཞིན་ཉིད་འབྱེད་པར་མི་བྱེད་དོ། །དེ་ལ་དེ་བཞིན་ཉིད་ཐ་དད་པ་གང་ཞེ་ན། གང་དག་ཐ་མ་དང་འབྲིང་དང་རབ་ཀྱི་ཆོས་
རྣམས་སུ་རྣམ་པར་རྟོག་པའོ། །གང་དག་ཆོས་ཐམས་ཅད་ལ་མི་རྟོག་ཅིང་རྣམ་པར་མི་རྟོག་པ་དེ་དག་ནི་དེ་བཞིན་ཉིད་ཐ་དད་མི་བྱེད་དོ། །གང་ཇི་སྙེད་མང་པོར་བརྟགས་ཤིང་རྣམ་པར་བརྟགས་ཀྱང་དེ་བཞིན་ཉིད་དབྱེ་བར་མི་ནུས་ཏེ། དཔེར་ན་སེམས་ཅན་ཐམས་ཅད་ནི་ནམ་མཁའ་ལ་
རྣམ་པར་རྒྱུ་ཡང་ནམ་མཁའི་ཁམས་ནི་འབྲེལ་པར་མི་བྱེད་དོ། །དེ་བཞིན་དུ་སེམས་ཅན་ཐམས་ཅད་དེ་བཞིན་ཉིད་ལ་རྣམ་པར་རྒྱུ་ཡང་དེ་བཞིན་ཉིད་ནི་འདྲེས་པར་མི་བྱེད་དོ། །གང་འདིར་དེ་ལྟ་བུའི་ཆོས་རྣམས་ཤེས་པའི་བྱང་ཆུབ་སེམས་དཔའ་དེ་ལྟ་བུ་ནི་དེ་བཞིན་གཤེགས་པའི་ཕྱག་
རྒྱས་བཏབ་པ་ཡིན་ཏེ། དེ་བཞིན་ཉིད་ཀྱང་འདྲེས་པར་མི་བྱེད་དོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་ཚུལ་ལ་ཞུགས་ཤིང་ཆོས་ཀྱི་དབྱིངས་ཐམས་ཅད་ལས་ཡང་དག་པར་གཞོལ་བ་ཡིན་ཞེ་ན། ཆོས་ཀྱི་དབྱིངས་ཞེས་བྱ་བ་ནི་རྡུལ་ཐམས་
ཅད་དང་བྲལ་བའི་ཕྱིར་འདོད་ཆགས་དང་བྲལ་བའི་དབྱིངས་སོ། །ཡང་དག་པར་བསྒྲུབས་པ་མེད་པའི་ཕྱིར་མ་སྐྱེས་པའི་དབྱིངས་སོ། །མ་བྱུང་བའི་ཕྱིར་མི་འགོག་པའི་དབྱིངས་སོ། །འགྲོ་བ་མེད་པའི་ཕྱིར་མི་འགྲོ་བའི་དབྱིངས་སོ། །རྒལ་བ་མེད་པའི་ཕྱིར་འོང་བ་མེད་པའི་
དབྱིངས་སོ། །འབྱུང་བ་མེད་པའི་ཕྱིར་གནས་མེད་པའི་དབྱིངས་སོ། །དུས་གསུམ་མཉམ་པའི་ཕྱིར་ཇི་ལྟ་བ་བཞིན་གྱི་དབྱིངས་སོ། །གཟོད་མ་ནས་རྣམ་པར་དག་པའི་ཕྱིར་བདག་གི་དབྱིངས་སོ། །དོན་དམ་པ་ཡིན་པའི་ཕྱིར་གང་ཟག་མེད་པའི་དབྱིངས་སོ། །གནས་མེད་

པའི་ཕྱིར་རྣམ་པར་རིག་པ་མེད་པའི་དབྱིངས་སོ། །འདྲེ་བ་མེད་པའི་ཕྱིར་ཀུན་གཞི་མེད་པའི་དབྱིངས་སོ། །ངེས་པར་གྱུར་པའི་ཕྱིར་སྐྱེ་བ་མེད་པའི་དབྱིངས་སོ། །རང་བཞིན་གྱིས་ཡོངས་སུ་དག་པའི་ཕྱིར་ནམ་མཁའི་དབྱིངས་སོ། །གཉེན་པོ་མེད་པའི་ཕྱིར་མྱ་
ངན་ལས་འདས་པའི་དབྱིངས་ཏེ། འདི་ནི་ཆོས་ཀྱི་དབྱིངས་ཀྱི་ཚུལ་ལ་འཇུག་པ་ཞེས་བྱའོ། །རིགས་ཀྱི་བུ་ཆོས་ཐམས་ཅད་དེ་ལྟར་ཞུགས་པས་དེ་ལ་བྱང་ཆུབ་སེམས་དཔའ་དེ་ལྟར་ཆོས་ཀྱི་ཚུལ་ལ་ཞུགས་པའི་གང་ཅི་སྨྲ་བ་དང་བརྗོད་པ་དང་། སྟོན་པ་དེ་ཐམས་ཅད་ནི་ཆོས་
ཀྱི་དབྱིངས་སུ་ཡང་དག་པར་གཞོལ་བ་ཉིད་དོ། །ཆོས་ཀྱི་དབྱིངས་ཀྱི་ཚུལ་ལ་ཞུགས་པ་དེ་འདོད་ཆགས་ཀྱི་ཁམས་དང་། ཆོས་ཀྱི་དབྱིངས་དེ་དག་གཉིས་སུ་མེད་པར་རབ་ཏུ་ཤེས་སོ། །དེ་ཅིའི་ཕྱིར་ཞེ་ན། འདོད་ཆགས་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །ཞེ་སྡང་གི་
ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ཞེ་སྡང་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །གཏི་མུག་གི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། གཏི་མུག་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །ཉོན་
མོངས་པའི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ཉོན་མོངས་པ་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །འདོད་པའི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། འདོད་པའི་ཁམས་ནི་ཆོས་ཀྱི་དབྱིངས་
ཀྱི་རང་བཞིན་ཅན་ནོ། །གཟུགས་ཀྱི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། གཟུགས་ཀྱི་ཁམས་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །གཟུགས་མེད་པའི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན།
གཟུགས་མེད་པའི་ཁམས་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །མིག་གི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། མིག་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །གཟུགས་ཀྱི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་

སུ་མེད་དེ། དེ་ཅིའི་ཕྱིར་ཞེ་ན། གཟུགས་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །མིག་གི་རྣམ་པར་ཤེས་པའི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། མིག་གི་རྣམ་པར་ཤེས་པ་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །ཡིད་ཀྱི་
བར་གྱི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ཡིད་ཀྱི་ཁམས་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །ཡིད་ཀྱི་རྣམ་པར་ཤེས་པའི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ཡིད་ཀྱི་རྣམ་
པར་ཤེས་པ་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །ཕུང་པོའི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ཕུང་པོའི་ཁམས་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །སའི་ཁམས་དང་། ཆུའི་ཁམས་དང་། མེའི་ཁམས་དང་།
རླུང་གི་ཁམས་དང་། ཆོས་ཀྱི་དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ས་དང་། ཆུ་དང་། མེ་དང་། རླུང་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དང་སྤྱོད་པ་བརྒྱད་ཁྲི་བཞི་སྟོང་དང་ཆོས་ཐམས་ཅད་ཀྱི་བར་དང་། ཆོས་ཀྱི་
དབྱིངས་དེ་དག་ནི་གཉིས་སུ་མེད་དེ། དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ཆོས་ཀྱི་དབྱིངས་ཀྱི་རང་བཞིན་ཅན་ནོ། །བྱང་ཆུབ་སེམས་དཔའ་གང་ཆོས་མཉམ་པ་ཉིད་འདི་ལ་ཞུགས་པ་དེ་ནི་ཆོས་ཀྱི་དབྱིངས་ཐམས་ཅད་ལ་ཡང་དག་པར་གཞོལ་བའི་ཕྱིར་ཆོས་ཐམས་ཅད་རབ་
ཏུ་ཤེས་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཆོས་ཀྱི་ཚུལ་ལ་ཞུགས་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་བསམ་པ་རྡོ་རྗེ་ལྟར་སྲ་ཞིང་མི་ཕྱེད་དེ་ཐེག་པ་ཆེན་པོ་འདི་ལ་ལེགས་པར་གནས་ཤིང་མི་གཡོ་བ་ཡིན་ཞེ་ན། རིགས་ཀྱི་
བུ་བྱང་ཆུབ་སེམས་དཔའ་ནི་རྡོ་རྗེ་ལྟར་སྲ་ཞིང་མི་ཕྱེད་པ་བཅུ་གཉིས་ཀྱིས་ན་ལྷ་དང་བཅས་པའི་འཇིག་རྟེན་གྱིས་མི་ཕྱེད་པ་ཡིན་ཏེ། བཅུ་གཉིས་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་ཕྱེད་པ་དང་། བསམ་པ་དང་། ལྷག་པའི་བསམ་པས་སྦྱོར་བ་མི་ཕྱེད་པ་

དང་། སྦྱིན་པ་མི་ཕྱེད་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་མི་ཕྱེད་པ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་མི་ཕྱེད་པ་དང་། བསྡུ་བའི་དངོས་པོ་མི་ཕྱེད་པ་དང་། སེམས་ཅན་ཡོངས་
སུ་སྨིན་པར་བྱེད་པ་མི་ཕྱེད་པ་དང་། སངས་རྒྱས་ཀྱི་ཞིང་ཡོངས་སུ་དག་པ་མི་ཕྱེད་པ་དང་། འཁོར་བས་ཡོངས་སུ་མི་སྐྱོ་བ་མི་ཕྱེད་པ་དང་། དགེ་བའི་རྩ་བས་མི་ངོམས་པ་མི་ཕྱེད་པ་དང་། མཚན་དང་དཔེ་བྱད་བཟང་པོའི་ཕྱིར་གཏན་པ་མེད་པའི་མཆོད་སྦྱིན་བྱེད་པ་མི་ཕྱེད་པ་
དང་། དམ་པའི་ཆོས་ཡོངས་སུ་གཟུང་བའི་ཕྱིར་ལུས་དང་སྲོག་འདོར་བར་མི་ཕྱེད་པ་དང་། སེམས་ཅན་གཞན་དང་གང་ཟག་གཞན་གྱི་ཕྱིར་དགེ་བའི་རྩ་བ་བསྔོ་བ་མི་ཕྱེད་པ་དང་། སངས་རྒྱས་ཀྱི་ཆོས་ཐམས་ཅད་ཡང་དག་པར་སྒྲུབ་པ་མི་ཕྱེད་པ་སྟེ། རིགས་ཀྱི་བུ་གང་གི་ཚེ་བྱང་
ཆུབ་སེམས་དཔའ་ཆོས་འདི་ལྟ་བུ་འདི་དག་ལས་མི་ཕྱེད་པ་དེའི་བསམ་པ་རྡོ་རྗེ་ལྟར་སྲ་ཞིང་མི་ཕྱེད་པ་ཡིན་ནོ། །འདི་ལྟ་སྟེ་དཔེར་ན་ནོར་བུ་རིན་པོ་ཆེ་རྡོ་རྗེ་ནི་ནོར་བུ་རིན་པོ་ཆེ་ཐམས་ཅད་འབིགས་ཀྱང་བདག་ཉིད་ནི་མི་ཕིགས་སོ། །དེ་བཞིན་དུ་བྱང་ཆུབ་སེམས་དཔའ་བསམ་པ་
རྡོ་རྗེ་ལྟར་སྲ་ཞིང་མི་ཕྱེད་པ་ཡང་སེམས་ཅན་ཐམས་ཅད་ཀྱི་བག་ལ་ཉལ་དང་། ཉོན་མོངས་པ་ཀུན་ནས་ལྡང་བ་དང་། ལྟ་བར་གྱུར་པ་རྣམས་སེལ་ཀྱང་བདག་ཉིད་ནི་ཐེག་པ་ཆེན་པོ་འདི་ལས་མི་ཕྱེད་དོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་བསམ་པ་རྡོ་རྗེ་ལྟར་
སྲ་ཞིང་མི་ཕྱེད་དེ། ཐེག་པ་ཆེན་པོ་འདི་ལ་ལེགས་པར་གནས་ཤིང་མི་གཡོ་བ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཡུལ་རྗེས་སུ་ཐོབ་ཅིང་རང་གི་ཡུལ་ཡོངས་སུ་དག་པ་ཡིན་ཞེ་ན། སངས་རྒྱས་ཀྱི་ཡུལ་ཞེས་བྱ་བ་ནི་ཡུལ་མ་
ཡིན་པ། ཡུལ་མེད་པ་ཡུལ་ཐམས་ཅད་ལས་ཡོངས་སུ་དག་པའོ། །དེ་ལ་བྱང་ཆུབ་སེམས་དཔའ་ནི་སངས་རྒྱས་ཀྱི་ཡུལ་ཡོངས་སུ་དག་པས་རང་གི་ཡུལ་ཡོངས་སུ་སྦྱོང་སྟེ། དེ་འདི་སྙམ་དུ་མིག་གི་ཡུལ་ནི་སངས་རྒྱས་ཀྱི་ཡུལ་ཡིན་ཡང་སངས་རྒྱས་ཀྱི་ཡུལ་ནི་

སུ་དང་ཡང་ཉེ་བའམ་རིང་བ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་དབེན་པའི་ཡུལ་ཡིན་པའི་ཕྱིར་ཏེ། དབེན་པའི་ཡུལ་ལ་ནི་མིག་གི་ཡུལ་གང་ཡང་མེད་དོ། །རྣ་བའི་ཡུལ་ནི་སངས་རྒྱས་ཀྱི་ཡུལ་ཡིན་ཡང་། སངས་རྒྱས་ཀྱི་ཡུལ་ནི་སུ་དང་ཡང་ཉེ་བའམ་རིང་
བ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་དབེན་པའི་ཡུལ་ཡིན་པའི་ཕྱིར་ཏེ། དབེན་པའི་ཡུལ་ལ་ནི་རྣ་བའི་ཡུལ་གང་ཡང་མེད་དོ། །སྣའི་ཡུལ་ནི་སངས་རྒྱས་ཀྱི་ཡུལ་ཡིན་ཡང་སངས་རྒྱས་ཀྱི་ཡུལ་ནི་སུ་དང་ཡང་ཉེ་བའམ་རིང་བ་མ་ཡིན་ནོ། །དེ་ཅིའི་ཕྱིར་ཞེ་ན།
སངས་རྒྱས་ཀྱི་ཡུལ་ནི་དབེན་པའི་ཡུལ་ཡིན་པའི་ཕྱིར་ཏེ། དབེན་པའི་ཡུལ་ལ་ནི་སྣའི་ཡུལ་གང་ཡང་མེད་དོ། །ལྕེའི་ཡུལ་ནི་སངས་རྒྱས་ཀྱི་ཡུལ་ཡིན་ཡང་སངས་རྒྱས་ཀྱི་ཡུལ་ནི་སུ་དང་ཡང་ཉེ་བའམ་རིང་བ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་
དབེན་པའི་ཡུལ་ཡིན་པའི་ཕྱིར་ཏེ། དབེན་པའི་ཡུལ་ལ་ནི་ལྕེའི་ཡུལ་གང་ཡང་མེད་དོ། །ལུས་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཡང་། སངས་རྒྱས་ཀྱི་ཡུལ་ནི་སུ་དང་ཡང་ཉེ་བའམ་རིང་བ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་དབེན་པའི་ཡུལ་
ཡིན་པའི་ཕྱིར་ཏེ། དབེན་པའི་ཡུལ་ལ་ནི་ལུས་ཀྱི་ཡུལ་གང་ཡང་མེད་དོ། །ཡིད་ཀྱི་ཡུལ་ནི་སངས་རྒྱས་ཀྱི་ཡུལ་ཡིན་ཡང་སངས་རྒྱས་ཀྱི་ཡུལ་ནི་སུ་དང་ཡང་ཉེ་བའམ་རིང་བ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་དབེན་པའི་ཡུལ་ཡིན་པའི་ཕྱིར་ཏེ་དབེན་
པའི་ཡུལ་ལ་ནི་ཡིད་ཀྱི་ཡུལ་གང་ཡང་མེད་དོ། །ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་དང་། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ལ་ཡང་དེ་བཞིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཡུལ་དབེན་པ་ཉིད་
ཀྱི་ཡུལ་ཐམས་ཅད་དབེན་པར་འཇུག་གོ། །རང་གི་ཞིང་ཡོངས་སུ་དག་པས་སངས་རྒྱས་ཀྱི་ཞིང་ལ་ཞུགས་པ་དེ་ནི་ཆོས་གང་དག་དེའི་དབང་པོ་དྲུག་ལ་སྣང་བར་གྱུར་པ་དེ་དག་ཐམས་ཅད་ལ་སངས་རྒྱས་ཀྱི་ཡུལ་དབེན་པར་འཇུག་གོ། །ཇི་ལྟར་དེ་བཞིན་གཤེགས་པའི་ཡུལ་

ཆགས་པ་མེད་ཅིང་ཐོགས་པ་མེད་པའི་དེ་བཞིན་དུ་དེ་ཡུལ་ཐམས་ཅད་ལ་ཡང་མི་ཆགས་མི་ཐོགས་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཡུལ་ལ་རྗེས་སུ་ཞུགས་ཤིང་རང་གི་ཡུལ་ཡོངས་སུ་དག་པ་ཡིན་ནོ། །རིགས་ཀྱི་བུ་དེ་ལ་ཇི་
ལྟར་ན་བྱང་ཆུབ་སེམས་དཔའ་གཟུངས་ཐོབ་པ་རྟག་ཏུ་མི་བརྗེད་པར་སྤྱོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གཟུངས་ཡོངས་སུ་སྦྱང་བ་བྱ་བས་གཟུངས་ཐོབ་པར་གྱུར་ཏེ། དེ་ལ་གཟུངས་ཡོངས་སུ་སྦྱོང་བ་བྱེད་པ་གང་ཞེ་ན། རིགས་ཀྱི་བུ་སུམ་ཅུ་རྩ་གཉིས་
པོ་འདི་དག་ནི་གཟུངས་ཡོངས་སུ་སྦྱོང་བ་བྱེད་པ་སྟེ། སུམ་ཅུ་རྩ་གཉིས་པོ་གང་ཞེ་ན། འདི་ལྟ་སྟེ། ཆོས་དོན་དུ་གཉེར་བ་དང་། ཆོས་འདོད་པ་དང་། ཆོས་ཀྱི་ཀུན་དགའ་ལ་དགའ་མོས་པ་དང་། ཆོས་ལ་གཞོལ་བ་དང་། ཆོས་ལ་བབ་པ་དང་། མང་དུ་ཐོས་པ་རྣམས་ལ་སྟེན་
ཅིང་བསྙེན་ལ་བསྙེན་བཀུར་བྱེད་པ་དང་། སློབ་དཔོན་དང་མཁན་པོ་རྣམས་ལ་ང་རྒྱལ་མེད་ཅིང་བཙུན་པར་གུས་པར་བྱེད་པ་དང་། ཆོས་ཡོངས་སུ་ཚོལ་བས་མི་ངོམས་པ་དང་། རྗེས་སུ་བསྟེན་པ་རྣམས་ལ་བཀའ་བློ་བདེ་ཞིང་འཐུན་པར་འཛིན་པ་དང་། ཆོས་སྨྲ་བའི་གང་ཟག་
རྣམས་ལ་སྟོན་པ་ཙམ་དུ་སེམས་ཤིང་འཁྲུལ་པ་མི་ཚོལ་བ་དང་། ཀུན་འཛིན་པ་དང་། ཀློག་པ་དང་། སྟོན་པ་ལ་ལེ་ལོ་མེད་པ་དང་། ཆོས་ལ་སློབ་དཔོན་གྱི་དཔེ་མཁྱུད་མེད་ཅིང་ཟང་ཟིང་མེད་པར་ཆོས་སྦྱིན་པ་དང་། ཤེས་རབ་ཀྱི་རྩ་བའི་གནས་ཐོས་པ་དང་ཚུལ་
བཞིན་གྱི་ཆོས་ལ་སྦྱོར་བ་དང་། ཇི་ལྟར་ཐོས་པའི་ཆོས་ལ་སོ་སོར་བརྟག་པའི་ཕྱིར་མང་དུ་ཐོས་པ་མུ་མེད་པར་བྱས་པ་དང་། ཚངས་པར་སྤྱོད་པ་ལ་གནས་པ་མུ་མེད་པར་བྱས་པ་དང་། རྟག་ཏུ་དབེན་པ་ལ་སེམས་གཞོལ་བ་དང་། རྗེས་སུ་དྲན་པ་དྲུག་རྗེས་སུ་དྲན་པ་དང་།
ཡང་དག་པར་ཆགས་པར་འགྱུར་བ་དྲུག་མི་འདོར་བ་དང་། གུས་པར་བྱ་བའི་གནས་དྲུག་ཡོངས་སུ་མི་གཏོང་བ་དང་། སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་ཀྱིས་ཆོས་ལ་སྦྱོར་བ་དང་། རྟེན་ཅིང་འབྲེལ་པར་འབྱུང་བ་དང་མི་འགལ་བའི་ལས་དང་། བྱ་བ་

ལ་འཇུག་པ་དང་། རྣམ་པར་ཐར་པའི་སྒོ་གསུམ་ལ་སེམས་ངེས་པར་རྟོག་པ་ལ་མི་སྐྲག་པ་དང་། འཕགས་པའི་རིགས་དང་སྦྱངས་པའི་ཡོན་ཏན་ཀུན་འཛིན་པས་ཡོང་མི་འཆད་པ་དང་། དམ་པའི་ཆོས་ཡོངས་སུ་གཟུང་བ་ལ་སེམས་ཞུམ་པ་མེད་པ་དང་། སེམས་ཅན་ལ་ལྟ་བས་
སྙིང་རྗེ་ཆེ་བ་དང་། ཆོས་ལ་ལྟ་བས་ལུས་དང་སྲོག་འདོར་བ་དང་། ཡེ་ཤེས་ལ་ལྟ་བས་རྟག་ཏུ་ང་རྒྱལ་མེད་པ་དང་། སེམས་ཅན་ཡོངས་སུ་སྨིན་པར་བྱ་བ་ལ་ཡོངས་སུ་མི་སྐྱོ་བ་སྟེ། འདི་ནི་གཟུངས་ཡོངས་སུ་སྦྱོང་བ་བྱེད་པ་ཞེས་བྱའོ། །རིགས་ཀྱི་བུ་དེ་ལ་གཟུངས་གང་
ཞེ་ན། གང་ཀུན་བཟུང་བའི་ཆོས་རྣམས་མི་བརྗེད་པ་དང་། ཇི་ལྟར་ཐོས་པའི་ཆོས་རྣམས་མི་བརྗེད་པ་དང་། དྲན་པ་རྗེས་སུ་དྲན་པ་དང་། རྟོགས་པར་ཁོང་དུ་ཆུད་པ་དང་། བློ་གྲོས་འདོད་པ་དང་། ཡི་གེ་མི་ཟད་པ་དང་། ངེས་པའི་ཚིག་དང་སྐད་ལ་འཇུག་པ་ཤེས་པ་དང་།
སྤོབས་པ་བསྟན་པ་ཐོགས་པ་མེད་ཅིང་རྒྱུན་མི་འཆད་པ་དང་། ངེས་པའི་དོན་གྱི་མདོ་སྡེ་རྟོགས་པ་ལ་འཇུག་པ་ཤེས་པ་དང་། དྲང་བའི་དོན་གྱི་མདོ་སྡེ་རྟོགས་པ་ལ་འཇུག་པ་ཤེས་པ་དང་། ཀུན་རྫོབ་མི་ཟད་པ་བསྟན་པ་ཤེས་པ་དང་། དོན་དམ་པ་དབྱེར་མེད་པའི་དེ་ཁོ་ན་བསྟན་
པ་ཤེས་པ་དང་། བདེན་པ་ལ་འཇུག་པ་ངེས་པ་ཤེས་པ་དང་། དྲན་པ་ཉེ་བར་གཞག་པའི་རྗེས་སུ་འཇུག་པ་ཤེས་པ་དང་། ཡང་དག་པར་སྤོང་བའི་བརྩོན་འགྲུས་མི་འགོད་པ་ཤེས་པ་དང་། རྫུ་འཕྲུལ་གྱི་རྐང་པས་རྣམ་པར་རོལ་པ་ཤེས་པ་དང་། དབང་པོའི་རིམ་པ་ཤེས་
པ་དང་། སྟོབས་ལ་གནས་པ་མི་བསྐྱོད་པར་ཤེས་པ་དང་། བྱང་ཆུབ་ཀྱི་ཡན་ལག་རྟོགས་པ་དང་། འཐུན་པ་ཤེས་པ་དང་། ལམ་ལ་འཇུག་པའི་གནས་ཤེས་པ་དང་། ཞི་གནས་ཀྱིས་སེམས་གནས་པར་ཤེས་པ་དང་། ལྷག་མཐོང་གིས་ཆོས་སྒྲོལ་བར་ཤེས་པ་
དང་། རིག་པ་དང་རྣམ་པར་གྲོལ་བའི་རྗེས་སུ་འཐུན་པ་ཤེས་པ་དང་། སོ་སོ་ཡང་དག་པར་རིག་པ་ལ་འཇུག་པ་ཤེས་པ་དང་། མངོན་པར་ཤེས་པའི་ཡེ་ཤེས་སྐྱེད་པ་ཤེས་པ་དང་། ཕ་རོལ་ཏུ་ཕྱིན་པ་དྲུག་ལ་འཇུག་པ་ཤེས་པ་དང་། བསྡུ་བའི་དངོས་པོ་བཞི་སོ་སོ་ཅི་རིགས་

པར་ཤེས་པ་དང་། སྒྲ་སྐད་དང་ངག་གི་ལམ་ལ་འཇུག་པ་ཤེས་པ་དང་། ཆོས་ཀྱི་བརྡ་སྟོན་པ་ཤེས་པ་དང་། དོན་དབྱེར་མེད་པར་ཤེས་པ་དང་། ཚིག་འབྲུ་མི་ཟད་པར་ཤེས་པ་དང་། སེམས་ཅན་ཐམས་ཅད་ཚིམ་པར་བྱ་བ་ཤེས་པ་དང་། སོ་སོ་ཅི་རིགས་
པར་ཆོས་སྟོན་པ་ཤེས་པ་དང་། སངས་རྒྱས་ཐམས་ཅད་ཀྱིས་གསུངས་པ་དྲན་པས་འཛིན་པ་ཤེས་པ་དང་། ཚིག་དང་ཡི་གེ་ཐམས་ཅད་མཚམས་སྦྱོར་བའི་ངེས་པའི་ཚིག་ལ་འཇུག་པ་ཤེས་པ་དང་། ཀུན་ནས་ཉོན་མོངས་པ་དང་རྣམ་པར་བྱང་བ་ཡང་དག་པ་ཇི་ལྟ་བ་བཞིན་དུ་རྟོགས་
པ་ཤེས་པ་དང་། རྒྱུ་དང་བྱ་བ་ལ་འཇུག་པ་ཤེས་པ་དང་། ཆོས་ཐམས་ཅད་ལ་སྣང་བ་རབ་རིབ་མེད་པར་ཤེས་པ་སྟེ། འདི་ནི་གཟུངས་ཞེས་བྱའོ། །ལུས་དང་ངག་དང་སེམས་ས་དང་འདྲ་བའི་ཆོས་ཀུན་དུ་འཛིན་པ་གང་ཡིན་པ་དེ་ནི་མི་ཟད་པ་སྟེ། ཆོས་ཀྱི་ཆར་འབེབས་པ་
དང་། ཉོན་མོངས་པའི་གདུང་བ་རབ་ཏུ་ཞི་བར་བྱེད་པ་དང་། སངས་རྒྱས་ཀྱི་ཆོས་ཐམས་ཅད་རྣམ་པར་སྐྱེད་པ་འདི་ནི་གཟུངས་ཀྱི་ཚུལ་ལ་འཇུག་པ་ཡིན་ཏེ། གཟུངས་ཐོབ་པ་སངས་རྒྱས་ཀྱི་ཆོས་ཐམས་ཅད་ལ་མི་བརྗེད་པར་སྤྱོད་པར་ཤེས་པར་བྱའོ། །རིགས་ཀྱི་བུ་དེ་ལྟར་ན་
བྱང་ཆུབ་སེམས་དཔའ་གཟུངས་ཐོབ་པ་རྟག་ཏུ་མི་བརྗེད་པར་སྤྱོད་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སྤོབས་པ་ཐོགས་པ་མེད་ཅིང་རྒྱུན་མི་འཆད་ལ་རྟག་ཏུ་སངས་རྒྱས་ཀྱི་བྱིན་གྱི་རླབས་ཀྱི་བྱིན་གྱིས་བརླབས་པ་ཡིན་ཞེ་ན། རིགས་ཀྱི་བུ་ཉི་ཤུ་རྩ་བཞི་པོ་
འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་ཡིན་ཏེ། ཉི་ཤུ་རྩ་བཞི་གང་ཞེ་ན། འདི་ལྟ་སྟེ། སྤོབས་པ་མྱུར་བ་དང་། སྤོབས་པ་མགྱོགས་པ་དང་། སྤོབས་པ་ཐོགས་པ་མེད་པ་དང་། སྤོབས་པ་རྒྱུན་མི་འཆད་པ་དང་། ཤིན་ཏུ་ངེས་པའི་ཚིག་ལ་སྤོབས་པ་དང་།
ཟབ་མོ་ལ་སྤོབས་པ་དང་། སྣ་ཚོགས་ལ་སྤོབས་པ་དང་། ལེགས་པར་བརྒྱན་པའི་སྤོབས་པ་དང་། ཞུམ་པ་མེད་པའི་སྤོབས་པ་དང་། འཇིགས་པ་མེད་པའི་སྤོབས་པ་དང་། ཚིགས་སུ་བཅད་པ་སྣ་ཚོགས་བསྟན་པའི་ངེས་པའི་ཚིག་ལ་སྤོབས་པ་དང་། མདོ་དང་རྟོགས་པ་

བརྗོད་པ་དང་། སྔོན་བྱུང་བ་ལ་སྤོབས་པ་དང་། མི་ཐུལ་བའི་སྤོབས་པ་དང་། ཚིག་རབ་ཏུ་དབྱེ་བ་བསྟན་པ་མི་ཟད་པ་ལ་སྤོབས་པ་དང་། སྤོབས་པ་ཤིན་ཏུ་གསལ་ཞིང་ཤིན་ཏུ་མཛེས་པ་དང་། ཚིག་བཙུན་ཞིང་གཟུང་བའི་སྤོབས་པ་དང་། ཆོས་སྟོན་པའི་འབྲས་བུ་ཡོད་པའི་
སྤོབས་པ་དང་། ལྷའི་འཁོར་གྱི་རྒྱན་གྱི་སྤོབས་པ་དང་། ཐེ་ཙོམ་ཐམས་ཅད་གཅོད་པའི་སྤོབས་པ་དང་། འཇིག་རྟེན་དང་འཇིག་རྟེན་ལས་འདས་པའི་ཆོས་ལ་སྤོབས་པ་དང་། འཁྲུལ་པ་མེད་པའི་སྤོབས་པ་དང་། འཁོར་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་
སྙོམས་ཀྱི་སྤོབས་པ་དང་། སྐྱེ་བ་དྲན་པའི་མངོན་པར་ཤེས་པའི་སྤོབས་པ་དང་། སངས་རྒྱས་ཀྱི་བྱིན་གྱི་རླབས་ཀྱི་བྱིན་གྱིས་བརླབས་པའི་སྤོབས་པ་ཡིན་ཏེ་རིགས་ཀྱི་བུ་ཉི་ཤུ་རྩ་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་ཡིན་ནོ། །དེ་དག་ཀྱང་ཡོངས་སུ་སྦྱང་བ་བྱ་བ་
ཉི་ཤུ་རྩ་བཞིས་འགྲུབ་སྟེ། ཉི་ཤུ་རྩ་བཞི་གང་ཞེ་ན། འདི་ལྟ་སྟེ། བླ་མའི་ངག་མི་གཅོག་པས་མྱུར་བའི་སྤོབས་པར་འགྱུར་རོ། །ཚུར་ཤོག་ཅེས་བྱ་བ་དང་སོང་ཞེས་བྱ་བ་ལ་གཡོ་མེད་པས་སྤོབས་པ་མགྱོགས་པར་འགྱུར་རོ། །ཉོན་མོངས་པ་ཐམས་ཅད་ལ་ཆགས་པ་མེད་
པས་སྤོབས་པ་ཐོགས་པ་མེད་པར་འགྱུར་རོ། །དེ་ལ་མ་ཆགས་པར་གནས་པས་སྤོབས་པ་རྒྱུན་མི་འཆད་པར་འགྱུར་རོ། །ཕྲ་མའི་ཚིག་མེད་པས་ཤིན་ཏུ་ངེས་པའི་ཚིག་ལ་སྤོབས་པར་འགྱུར་རོ། །རྟེན་ཅིང་འབྲེལ་པར་འབྱུང་བ་རྟོགས་པས་ཟབ་མོ་ལ་སྤོབས་པར་འགྱུར་རོ། །
སྦྱིན་པ་སྣ་ཚོགས་བསགས་པས་སྣ་ཚོགས་ལ་སྤོབས་པར་འགྱུར་རོ། །ཆུང་མ་ལེགས་པར་བརྒྱན་ཏེ་རབ་ཏུ་བྱིན་པས་ལེགས་པར་བརྒྱན་པའི་སྤོབས་པར་འགྱུར་རོ། །བྱང་ཆུབ་ཀྱི་སེམས་ལས་མི་ཉམས་པས་ཞུམ་པ་མེད་པའི་སྤོབས་པར་འགྱུར་རོ། །ཚུལ་ཁྲིམས་ཀྱི་
ཕུང་པོ་ལེགས་པར་ཀུན་དུ་བསྲུངས་པས་འཇིགས་པ་མེད་པའི་སྤོབས་པར་འགྱུར་རོ། །གདུགས་དང་། རྒྱལ་མཚན་དང་། བ་དན་དང་། དྲིལ་བུ་སྣ་ཚོགས་བྱིན་པས་ཚིགས་སུ་བཅད་པ་སྣ་ཚོགས་བསྟན་པ་ངེས་པའི་ཚིག་ལ་སྤོབས་པར་འགྱུར་རོ། །སྦྱིན་པ་དང་ལྡན་

པ་དང་། རིམ་གྲོ་བྱེད་པ་དང་། བསྙེན་བཀུར་བྱེད་པ་སྔོན་དུ་འགྲོ་བས་མདོ་དང་རྟོགས་པ་བརྗོད་པ་དང་སྔོན་བྱུང་བ་ལ་སྤོབས་པར་འགྱུར་རོ། །སྡུག་བསྔལ་བ་དང་དབུལ་བ་དང་མགོན་མེད་པ་ལ་མི་བརྙས་པས་མི་ཐུལ་བའི་སྤོབས་པར་འགྱུར་རོ། །གཏེར་
མི་ཟད་པ་སྦྱིན་པ་དང་། ཕ་རོལ་ཆོས་ལ་སྦྱོར་བས་ཚིག་རབ་ཏུ་དབྱེ་བ་བསྟན་པ་མི་ཟད་པ་ལ་སྤོབས་པར་འགྱུར་རོ། །ཚིག་བདེན་པ་དང་། ཐ་བ་མེད་པ་དང་། ངག་རྩུབ་པོ་མེད་པའི་ངག་གི་ལས་དང་ལྡན་པས་སྤོབས་པ་ཤིན་ཏུ་གསལ་ཞིང་མཛེས་པར་འགྱུར་རོ། །བླ་མའི་
ཚིག་ཁྱད་དུ་མི་གསོད་པ་དང་གཞན་གྱི་ཚིག་མི་གཅོག་པས་ཚིག་བཙུན་ཞིང་གཟུང་བའི་སྤོབས་པར་འགྱུར་རོ། །རང་གི་ཡོན་ཏན་གྱི་ཆོས་སྒྲུབ་པས་ཆོས་བསྟན་པ་འབྲས་བུ་ཡོད་པའི་སྤོབས་པར་འགྱུར་རོ། །བདག་ལ་མི་སྟོད་པ་དང་། གཞན་ལ་མི་སྨོད་པ་དང་། ཕངས་
པའི་དངོས་པོ་ཡོངས་སུ་གཏོང་བས་ལྷའི་འཁོར་གྱི་རྒྱན་གྱི་སྤོབས་པར་འགྱུར་རོ། །ཆོས་ལ་སློབ་དཔོན་གྱི་དཔེ་མཁྱུད་མེད་པ་དང་། ཆོས་ཇི་ལྟར་ཐོས་པ་བཞིན་དུ་སྟོན་པས་ཐེ་ཙོམ་ཐམས་ཅད་གཅོད་པའི་སྤོབས་པར་འགྱུར་རོ། །བསྟན་བཅོས་ཐམས་ཅད་ཤེས་པ་དང་། གཞན་ལ་
མི་གནོད་པ་དང་། ནད་པ་རྣམས་ཀྱི་ནད་གཡོག་བྱེད་པ་དང་། སྨན་རབ་ཏུ་སྦྱིན་པས་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་ཐམས་ཅད་ལ་སྤོབས་པར་འགྱུར་རོ། །ཕ་རོལ་ལ་འཁྲུལ་པའི་སྐབས་མི་ཚོལ་བ་དང་། གཞན་དག་གི་ལྟུང་བ་མི་གླེང་བ་དང་། འཁྲུལ་
པ་ལ་མི་རྟོག་པས་འཁྲུལ་པ་མེད་པའི་སྤོབས་པར་འགྱུར་རོ། །སེམས་ཅན་ཐམས་ཅད་ལ་སེམས་སྙོམས་པ་དང་། སེམས་ཅན་ཐམས་ཅད་ལ་མཚུངས་པར་སྤྱོད་པ་དང་། མྱ་ངན་ལས་འདས་པའི་ལམ་ལ་འགོད་པ་དང་། རྙེད་པ་དང་བཀུར་སྟི་དང་། ཚིགས་སུ་བཅད་པ་ཐམས་
ཅད་དོན་དུ་མི་གཉེར་བས་འཁོར་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་སྤོབས་པར་འགྱུར་རོ། །བཀའ་བློ་བདེ་བ་དང་། དེས་པ་དང་། ཇི་སྐད་སྨྲས་པ་དེ་བཞིན་བྱེད་པ་དང་། སེམས་དགའ་བ་དང་། གཞན་གྱི་རྒྱུད་འཁྲུག་པར་མི་བྱེད་པས་སྐྱེ་བ་

དྲན་པའི་མངོན་པར་ཤེས་པའི་སྤོབས་པར་འགྱུར་རོ། །ཐེག་པ་ཆེན་པོ་ལས་མི་ཉམས་པ་དང་། ཐེག་པ་དམན་པ་མི་འདོད་པ་དང་། སེམས་ཅན་ལ་སྙིང་རྗེ་ཆེ་བ་དང་། ཐམས་ཅད་ནན་ཏན་ལ་འགོད་པས་སངས་རྒྱས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པའི་སྤོབས་པར་
འགྱུར་རོ། །སེམས་ཅན་གཞན་ལ་གོ་བར་བྱེད་པས་དེའི་ཕྱིར་སྤོབས་པ་ཞེས་བྱའོ། །སེམས་ཅན་གཞན་ལ་ནན་ཏན་དུ་བྱ་བ་སྟོན་པས་དེའི་ཕྱིར་སྤོབས་པ་ཞེས་བྱའོ། །གཞན་གྱི་སེམས་ཀྱི་རྒྱུད་ཚིམ་པར་བྱེད་པས་དེའི་ཕྱིར་སྤོབས་པ་ཞེས་བྱའོ། །སེམས་ཅན་གཞན་གྱི་
སེམས་དང་འཐུན་པར་སྟོན་པས་དེའི་ཕྱིར་སྤོབས་པ་ཞེས་བྱའོ། །རིགས་ཀྱི་བུ་ཆོས་དང་ཡོན་ཏན་དང་ཡེ་ཤེས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་ནི་སྤོབས་པ་ཐོགས་པ་མེད་ཅིང་རྒྱུན་མི་འཆད་ལ། རྟག་ཏུ་སངས་རྒྱས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ་ཡིན་ནོ། །
རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སྐྱེ་བ་དང་འཆི་འཕོ་དང་འབྱུང་བ་རྣམས་ལ་དབང་ཐོབ་པ་ཡིན་ཞེ་ན། རིགས་ཀྱི་བུ་ཆོས་བཅུ་གཉིས་དང་ལྡན་ན་བྱང་ཆུབ་སེམས་དཔའ་སྐྱེ་བ་དང་འཆི་འཕོ་བ་དང་འབྱུང་བ་རྣམས་ལ་དབང་ཐོབ་པ་ཡིན་ཏེ། བཅུ་གཉིས་གང་ཞེ་ན།
འདི་ལྟ་སྟེ། སྡིག་པའི་གྲོགས་པོ་ཡོངས་སུ་སྤངས་ཤིང་རྟག་ཏུ་དགེ་བའི་བཤེས་གཉེན་ལ་བསྟེན་པ་དང་། ལྟ་བ་ཤིན་ཏུ་ཡོངས་སུ་དག་པ་དང་། སངས་རྒྱས་ཀྱིས་གནང་བའི་ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་ལྡན་པ་ཤེས་པ་དང་།
ཤེས་རབ་དང་ཐབས་ཟུང་དུ་འབྲེལ་བ་དང་། མངོན་པར་ཤེས་པ་མ་ཉམས་པ་ཐོབ་པ་དང་། མ་སྐྱེས་པ་དང་མ་བྱུང་བར་སོ་སོར་རྟོག་པ་དང་། བསམས་བཞིན་དུ་སྐྱེ་བ་དང་། སྨོན་ལམ་ཡོངས་སུ་རྫོགས་པ་དང་། སེམས་ཅན་ལྟ་བའི་བྱམས་པ་ལ་སྦྱོར་བ་དང་། སྙིང་རྗེ་ཆེན་པོ་ལ་ངེས་པར་
སེམས་པ་དང་། ཆོས་ལ་སྒྱུ་མ་ལྟ་བུར་རྟོག་པ་དང་། འཆི་འཕོ་མེད་པར་འཕོ་ཞིང་སྐྱེ་བ་དང་། ཆོས་ཀྱི་མཚན་ཉིད་རྨི་ལམ་གྱི་ངོ་བོ་ཉིད་ཀྱིས་ཆོས་ལ་འཇུག་པ་དང་། ཕྱིན་ཅི་ལོག་གི་ཆོས་ལ་ཡང་དག་པ་ཇི་ལྟ་བ་བཞིན་དུ་རྟོག་པ་དང་། སངས་རྒྱས་བཅོམ་ལྡན་འདས་རྣམས་ཀྱི་བྱིན་གྱིས་བརླབས་

པ་ནས་སྐྱེ་སྟེ། འཕོ་ཞིང་འབྱུང་ལ་སྐྱེ་བ་དང་། འཕོ་བ་དང་། འབྱུང་བར་ཡང་མི་སེམས་པའོ། །རིགས་ཀྱི་བུ་བྱང་ཆུབ་སེམས་དཔའ་གང་དང་གང་དུ་སྐྱེས་ནས་སེམས་ཅན་གྱི་དོན་བྱེད་པའི་སྐྱེས་པའི་རབས་བསྟན་པ་ཚད་མེད་གྲངས་མེད་པའི་སྐྱེས་པའི་རབས་དེ་དག་ཐམས་ཅད་ནི་
རྩ་བ་གཉིས་ལ་གནས་པ་སྟེ། འདི་ལྟ་སྟེ། མངོན་པར་ཤེས་པའི་ཡེ་ཤེས་ལ་གནས་པ་དང་། སྙིང་རྗེ་ཆེན་པོའི་རྩ་བ་ལ་གནས་པའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སྐྱེ་བ་དང་། འཆི་འཕོ་དང་འབྱུང་བ་རྣམས་ལ་དབང་ཐོབ་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་
བྱང་ཆུབ་སེམས་དཔའ་བདུད་བཞིའི་ལམ་ལས་ཡང་དག་པར་འདས་ཤིང་བདུད་དང་ཕྱིར་རྒོལ་བ་ཐམས་ཅད་ཡང་དག་པར་བཅོམ་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཆོས་ཐམས་ཅད་སྒྱུ་མ་ལྟ་བུར་ཤེས་ཤིང་རྟོགས་པས་ཕུང་པོའི་བདུད་ལས་ཡང་དག་པར་འདའོ། །
ཇི་ལྟར་ཐོས་པའི་ཆོས་ལ་ཚུལ་བཞིན་སོ་སོར་རྟོགས་པས་ཉོན་མོངས་པའི་བདུད་ལས་ཡང་དག་པར་འདའོ། །རྟེན་ཅིང་འབྲེལ་པར་འབྱུང་བ་རྟོགས་པས་འཆི་བདག་གི་བདུད་ལས་ཡང་དག་པར་འདའོ། །བྱང་ཆུབ་ཀྱི་སེམས་མི་ཉམས་པས་ལྷའི་བུའི་བདུད་ལས་ཡང་དག་པར་འདའོ། །ཡང་
དེས་བདུད་ཀྱི་ལས་རྣམས་བཅོམ་པ་ཡིན་ཏེ། དེས་བདུད་ཀྱི་ལས་རྣམས་བཅོམ་པ་གང་ཞེ་ན། གང་དག་གིས་བྱང་ཆུབ་སེམས་དཔའ་ལ་བདུད་ཀྱིས་གླགས་མི་རྙེད་པ་སྟེ། ཐེག་པ་དམན་པ་འདོད་པ་བདུད་ཀྱི་ལས་དང་། བྱང་ཆུབ་ཀྱི་སེམས་མི་སྲུང་བ་བདུད་ཀྱི་ལས་དང་། སེམས་ཅན་ཐ་
དད་པར་སྦྱིན་པ་བདུད་ཀྱི་ལས་དང་། སྐྱེ་བ་ལ་གནས་པའི་ཚུལ་ཁྲིམས་བདུད་ཀྱི་ལས་དང་། དེ་བཞིན་དུ་སྦྱར་ཏེ། གཟུགས་སུ་བསྔོས་པའི་བཟོད་པ་དང་། འཇིག་རྟེན་གྱི་བྱ་བ་ལ་བརྩོན་པའི་བརྩོན་འགྲུས་དང་། དེ་ལ་ཆགས་ཤིང་རོ་མྱོང་བའི་བསམ་གཏན་དང་། ཤེས་རབ་ཀྱི་ཆོས་ངན་པ་
ལ་སྨོད་པ་བདུད་ཀྱི་ལས་དང་། འཁོར་བས་ཡོངས་སུ་སྐྱོ་བ་བདུད་ཀྱི་ལས་དང་། དགེ་བའི་རྩ་བ་ཡོངས་སུ་མི་སྔོ་བ་བདུད་ཀྱི་ལས་དང་། ཉོན་མོངས་པ་ལ་མི་སྨོད་པ་བདུད་ཀྱི་ལས་དང་། ལྟུང་བ་འཆབ་པ་བདུད་ཀྱི་ལས་དང་། བྱང་ཆུབ་སེམས་དཔའ་ལ་སྡང་བ་བདུད་ཀྱི་ལས་དང་།

དམ་པའི་ཆོས་སྤོང་བ་བདུད་ཀྱི་ལས་དང་། བྱམས་པ་རྒྱུན་གཅོད་པ་བདུད་ཀྱི་ལས་དང་། ཕ་རོལ་ཏུ་ཕྱིན་པ་རྣམས་ཡོངས་སུ་མི་ཚོལ་བ་བདུད་ཀྱི་ལས་དང་། དམ་པའི་ཆོས་མཉན་པར་མི་འདོད་པ་བདུད་ཀྱི་ལས་དང་། ཆོས་ལ་སློབ་དཔོན་གྱི་དཔེ་མཁྱུད་བྱེད་པ་བདུད་ཀྱི་ལས་དང་།
ཟང་ཟིང་དང་འབྲེལ་པར་ཆོས་སྟོན་པ་བདུད་ཀྱི་ལས་དང་། ཐབས་དང་བྲལ་བས་སེམས་ཅན་ཡོངས་སུ་སྨིན་པར་བྱེད་པ་བདུད་ཀྱི་ལས་དང་། བསྡུ་བའི་དངོས་པོ་འདོར་བ་བདུད་ཀྱི་ལས་དང་། ཚུལ་ཁྲིམས་འཆལ་པ་རྣམས་ལ་ཁོང་ཁྲོ་བ་བདུད་ཀྱི་ལས་དང་། ཚུལ་ཁྲིམས་དང་ལྡན་
པ་རྣམས་ལ་མི་གུས་པ་བདུད་ཀྱི་ལས་དང་། ཉན་ཐོས་ཀྱི་བསླབ་པའི་རྗེས་སུ་འཐུན་པ་བདུད་ཀྱི་ལས་དང་། རང་སངས་རྒྱས་ཀྱི་ཐེག་པ་ཅན་གྱི་རྗེས་སུ་འཇུག་པ་བདུད་ཀྱི་ལས་དང་། དུས་མ་ཡིན་པར་བསྒྲུབ་པ་འདོད་པ་བདུད་ཀྱི་ལས་དང་། སྙིང་རྗེ་ཆེན་པོ་བོར་ནས་རིགས་ལ་རྟོག་པ་བདུད་
ཀྱི་ལས་དང་། འདུས་མ་བྱས་འདོད་པ་བདུད་ཀྱི་ལས་དང་། འདུས་བྱས་ལ་སྨོད་པ་བདུད་ཀྱི་ལས་དང་། སེམས་སེམས་ཅན་གྱི་ཅི་བྱའོ་ཅོག་ལ་གཡེལ་བ་བདུད་ཀྱི་ལས་དང་། ང་རྒྱལ་ལ་གནས་ཤིང་མི་འདུད་པ་དང་། ལྕེ་གཉིས་སྨྲ་བ་དང་། གཡོ་སྒྱུ་དང་ལྡན་པ་དང་། བཅོས་མ་ལ་དགའ་བ་
དང་། མི་དྲང་བ་དང་། རྩུབ་ཅིང་བརླང་བ་དང་། སྡིག་པ་ལ་མི་སྨོད་པ་དང་། ཆོས་ཀྱི་དྲུངས་འབྱིན་པ་དང་། ཐོས་པ་ཅུང་ཟད་ཙམ་གྱིས་ཆོག་པར་འཛིན་པ་དང་། ཆོས་མ་ཡིན་པ་དོན་དུ་གཉེར་བ་དང་། ཆོས་མ་ཡིན་པ་འདོད་པ་དང་། སྒྲིབ་པ་དང་། ཆོད་པ་དང་། ཀུན་ནས་ལྡང་བ་རྣམ་པར་མི་
གནོན་པ་བདུད་ཀྱི་ལས་དང་། སེམས་ཀྱི་དྲི་མ་མི་རྟོག་པ་བདུད་ཀྱི་ལས་དང་། དགེ་སྦྱོང་གི་དྲི་མ་ལ་མི་མཇེད་པ་བདུད་ཀྱི་ལས་ཏེ། རིགས་ཀྱི་བུ་ཇི་ཙམ་དུ་མི་དགེ་བའི་ཆོས་ལ་འཇུག་པ་དང་། དགེ་བའི་ཆོས་འདོར་བ་དེ་ཐམས་ཅད་ནི་བདུད་ཀྱི་ལས་སོ། །ཆོས་བཞིས་ནི་བདུད་ཀྱི་ལས་འདི་
དག་ལས་ཤིན་ཏུ་འདའ་སྟེ། བཞི་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མ་བརྗེད་པའི་ཕ་རོལ་ཏུ་ཕྱིན་པ་དྲུག་པོ་དག་དང་། དད་པ་དང་བརྩོན་འགྲུས་ལ་གནས་པའི་བག་ཡོད་པ་དང་ཐབས་ལ་མཁས་པ་ལ་གནས་ཏེ་སེམས་ཅན་ཡོངས་སུ་སྨིན་པར་བྱེད་པ་དང་། ཆོས་ཀྱི་ཚུལ་ཟབ་མོ་ལ་གནས་

ཏེ་དམ་པའི་ཆོས་ཡོངས་སུ་འཛིན་པས་སོ། །རིགས་ཀྱི་བུ་དེ་ལྟར་ཆོས་ལ་སྦྱོར་བའི་བྱང་ཆུབ་སེམས་དཔའ་ནི་བདུད་བཞིའི་ལམ་ལས་ཡང་དག་པར་འདས་ཤིང་བདུད་དང་ཕྱིར་རྒོལ་བ་ཐམས་ཅད་བཅོམ་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་
བསོད་ནམས་ཚད་མེད་པ་བསགས་ཤིང་སེམས་ཅན་ཐམས་ཅད་འཚོ་བར་གྱུར་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ནི་སེམས་ཅན་རྣམས་ལ་བྱམས་པས་གནས་པ་ཡིན། འབྱུང་པོ་རྣམས་ལ་སྙིང་རྗེ་བར་གནས་པ་ཡིན། བསམ་གཏན་རྣམས་ལ་དེ་ལ་མ་ཆགས་
པར་གནས་པ་ཡིན། སློང་བ་རྣམས་ལ་བདོག་པ་ཐམས་ཅད་ཡོངས་སུ་གཏོང་བ་ཡིན། བསོད་ནམས་དག་གིས་ལོངས་སྤྱོད་མི་ཟད་པ་ཡིན། བསམ་པ་དག་པས་ལག་ན་རིན་པོ་ཆེ་ཡིན། མཐོན་དམན་གྱི་ཡིད་མེད་པས་སེམས་ས་དང་མཚུངས་པ་ཡིན། ཚུལ་ཁྲིམས་ཡོངས་སུ་དག་
པས་བསམ་པ་འབྱོར་བ་ཡིན། མཆོད་སྦྱིན་ཐམས་ཅད་སྒྲུབ་པས་སེམས་གྲོལ་ཞིང་སྒོ་བསྒྲིབ་པ་མེད་པ་ཡིན། ཆོས་རྣམ་པར་འབྱེད་པས་གཟུངས་དང་སྤོབས་པ་ཕུན་སུམ་ཚོགས་པ་ཡིན། སངས་རྒྱས་ཀྱི་ཞིང་ཚད་མེད་པར་འགྲོ་བས་མངོན་པར་ཤེས་པའི་ཡེ་ཤེས་ལ་གནས་པ་
ཡིན་ནོ། །ཇི་ལྟར་ཕྱི་རོལ་གྱི་འབྱུང་བ་ཆེན་པོ་བཞི་པོ་འདི་དག་སེམས་ཅན་ཐམས་ཅད་ཀྱི་འཚོ་བར་གྱུར་པ་དེ་བཞིན་དུ་བདག་གི་ནང་གི་འབྱུང་བ་ཆེན་པོ་བཞི་པོ་འདི་དག་ཀྱང་སེམས་ཅན་ཐམས་ཅད་ཀྱི་འཚོ་བར་གྱུར་ཅིག །བདག་གི་དགེ་བའི་རྩ་བ་དང་། ཆོས་ཤེས་པ་ལ་མཁས་པ་
གང་ཡིན་པ་དེ་སེམས་ཅན་ཐམས་ཅད་ཀྱི་འཚོ་བ་མ་ཡིན་པར་མ་གྱུར་ཅིག་ཅེས་དེ་ལྟར་དགེ་བའི་རྩ་བ་རྣམས་ཀྱང་ཡོངས་སུ་བསྔོ་སྟེ། དེ་ལྟར་ན་བྱང་ཆུབ་སེམས་དཔའ་བསོད་ནམས་ཚད་མེད་པ་བསགས་ཤིང་སེམས་ཅན་ཐམས་ཅད་ཀྱི་འཚོ་བར་གྱུར་པ་ཡིན་ནོ། །རིགས་ཀྱི་བུ་
དེ་ལ་ཇི་ལྟར་ན་བྱང་ཆུབ་སེམས་དཔའ་སངས་རྒྱས་རྣམས་མ་བྱུང་ཡང་སངས་རྒྱས་ཀྱི་མཛད་པས་སེམས་ཅན་རྣམས་ལ་ཉེ་བར་གནས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ནི་གནས་དང་གནས་མ་ཡིན་པའི་བྱ་བ་ཤེས་པས་སྟོབས་བཅུ་ཡོངས་སུ་སྦྱང་བར་བྱ་བ་ཚར་

ཕྱིན་པ་ཡིན། །ཟག་པ་ཟད་པའི་བྱ་བ་ཤེས་པས་མི་འཇིགས་པ་བཞི་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན། དུས་གསུམ་ལ་ཆགས་པ་མེད་པའི་ཡེ་ཤེས་ཀྱི་བྱ་བ་ཤེས་པས་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན། སངས་རྒྱས་ཀྱི་སྤྱན་གྱི་སྣང་བ་ཐོབ་པས་
སྤྱན་ལྔ་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན། བྱང་ཆུབ་ཀྱི་སྙིང་པོར་འགྲོ་བ་ཐོབ་པས་མངོན་པར་ཤེས་པ་ཐམས་ཅད་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན། ཉོན་མོངས་པའི་བག་ཆགས་ཡང་དག་པར་བཅད་པས་དགེ་བའི་ཆོས་ཐམས་ཅད་ཡོངས་སུ་བསྐང་བ་ཚར་ཕྱིན་པ་ཡིན། བསོད་
ནམས་ཀྱི་ཚོགས་ཐམས་ཅད་བསགས་པས་ལུས་དང་། ངག་དང་། སེམས་དང་། མཚན་དང་། དཔེ་བྱད་བཟང་པོའི་རྒྱན་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན། དབང་བསྐུར་བ་ཐོབ་པས་ས་བཅུ་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན། ཡེ་ཤེས་ཀྱི་ཚོགས་བསགས་པས་སངས་རྒྱས་
ཀྱི་ཆོས་ཐམས་ཅད་ཡོངས་སུ་སྦྱང་བར་བྱ་བ་ཚར་ཕྱིན་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སངས་རྒྱས་རྣམས་མ་བྱུང་ཡང་སངས་རྒྱས་ཀྱི་མཛད་པས་སེམས་ཅན་རྣམས་ལ་ཉེ་བར་གནས་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་རྒྱ་
མཚོའི་ཕྱག་རྒྱའི་ཏིང་ངེ་འཛིན་ཐོབ་ཅིང་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་མི་ཆགས་པ་ཡིན་ཞེ་ན། རིགས་ཀྱི་བུ་འདི་ལྟ་སྟེ་དཔེར་ན་འཛམ་བུའི་གླིང་ན་སེམས་ཅན་རྣམས་ཀྱི་གཟུགས་སྣང་བ་ཇི་སྙེད་པར་དེ་དག་ཐམས་ཅད་དང་འདྲ་བའི་ཕྱག་རྒྱ་རྒྱ་མཚོ་ཆེན་པོ་ལ་ཡོད་དེ།
དེའི་ཕྱིར་རྒྱ་མཚོ་ཆེན་པོ་ཞེས་བྱའོ། །དེ་བཞིན་དུ་སེམས་ཅན་ཐམས་ཅད་ཀྱི་སེམས་སུ་སྣང་བའམ། གཟུགས་སུ་སྣང་བའམ། སྒྲར་སྣང་བ་ཇི་སྙེད་པ་དེ་དག་ཐམས་ཅད་རྒྱ་མཚོའི་ཕྱག་རྒྱའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་སྣང་བ་གཅིག་ལ་སྣང་བར་འགྱུར་ཏེ། དེའི་
ཕྱིར་རྒྱ་མཚོའི་ཕྱག་རྒྱའི་ཏིང་ངེ་འཛིན་ཅེས་བྱའོ། །འདི་ལྟ་སྟེ་དཔེར་ན་རྒྱ་མཚོ་ཆེན་པོ་ནི་རོ་གཅིག་པ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་ལ་རྣམ་པར་གྲོལ་བའི་རོར་ཤེས་པས་རོ་གཅིག་པ་ཡིན་ནོ། །འདི་ལྟ་སྟེ་དཔེར་ན་རྒྱ་མཚོ་ཆེན་པོ་ནི་དུས་ལས་མི་ཡོལ་བ་ཡིན་ནོ། །དེ་

བཞིན་དུ་བྱང་ཆུབ་སེམས་དཔའ་ཡང་དུས་དང་དུས་མ་ཡིན་པ་ལ་སོ་སོར་རྟོག་པས་བྱང་ཆུབ་ཀྱི་སྙིང་པོའི་དུས་ལས་མི་ཡོལ་ལོ། །འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་ཤི་བའི་རོ་དང་ལྷན་ཅིག་མི་གནས་སོ། །དེ་བཞིན་དུ་བྱང་ཆུབ་སེམས་དཔའ་ཡང་བག་ཆགས་ཀྱི་ཉོན་མོངས་པ་ཐམས་
ཅད་དང་། ཉན་ཐོས་དང་། རང་སངས་རྒྱས་ཀྱི་སེམས་ཐམས་ཅད་དང་ལྷན་ཅིག་མི་གནས་སོ། །འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་ཆུ་ཐམས་ཅད་ཟད་པས་བྲི་བའམ་གང་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཐམས་ཅད་ཟད་པས་ཆོས་ཀྱི་དབྱིངས་བྲི་བའམ་གང་
བར་མི་བྱེད་དོ། །འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་ཁ་ཚོན་ཚད་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཤེས་རབ་ཀྱིས་ཚད་མེད་དོ། །འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་ཟབ་ཅིང་གཏིང་དཔག་དཀའ་བ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་ཟབ་ཅིང་ཉན་
ཐོས་དང་། རང་སངས་རྒྱས་ཐམས་ཅད་ཀྱིས་གཏིང་དཔག་དཀའ་བ་ཡིན་ནོ། །འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་སེམས་ཅན་ཚད་མེད་པའི་གནས་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་སེམས་ཅན་ཡོངས་སུ་སྨིན་པར་བྱ་བ་ཚད་མེད་པའི་གནས་ཡིན་ནོ། །འདི་ནི་རྒྱ་མཚོའི་
ཕྱག་རྒྱའི་ཏིང་ངེ་འཛིན་ལ་འཇུག་པ་ཡིན་ཏེ། རིགས་ཀྱི་བུ་དེ་ལྟར་ཞུགས་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་མི་ཆགས་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་