Kinh tạng Tây Tạng (Kangyur Đại Học) — 057_མདོ་སྡེ།_པ

ནས་གྱུར་ཤིན་ཏུ་དུལ། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་བདེ་གཤེགས་
སྤྱན་སྔར་པད་མའི་སྟེང་ན་འདུག །དེ་ཡི་ལུས་ནི་ཆོས་ཀྱི་རྒྱུས་བྱུང་རྡུལ་དང་བྲལ། །དེ་ཡི་ལུས་ལ་མངལ་གྱི་དྲི་མས་གོས་མི་འགྱུར། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་རྒྱལ་བ་ཀུན་གྱིས་བྱིན་བརླབས་ཆོས་སྨྲ་སྟེ། །དེ་ནི་ལུས་དང་ངག་ཡིད་ལས་
རྣམས་གང་བྱེད་པ། །ཐམས་ཅད་ཤེས་པས་བྱས་ཏེ་སྐྱེ་བོ་ཕན་པར་བྱེད། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་སྨྲ་ཚེ་བསྔགས་པ་ཟད་པར་མི་འགྱུར་ཏེ། །སེམས་ཅན་ཐམས་ཅད་འདྲེན་པ་ཤེས་རབ་ཆེར་གྱུར་ཀྱང་། །དེ་ཡི་བསྔགས་པ་བསྐལ་པ་

མང་པོར་བསམ་མི་ཁྱབ།། །།བམ་པོ་བདུན་པ་སྟེ་ཐ་མ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་གི་རྒྱལ་པོ་ལ་ལེགས་སོ་བྱ་བ་གནང་སྟེ། གཟུངས་ཀྱི་དབང་ཕྱུག་གི་རྒྱལ་པོ་ཁྱོད་
ཀྱིས་གཟུངས་རྣམ་པར་ངེས་པར་བསྟན་པ་འདི་ལེགས་པར་བཤད་པ་དང་། ཇི་ལྟར་ཡང་ཁྱོད་ཆོས་འདི་དག་ལ་གཞན་གྱི་དྲིང་མི་འཇོག་པ་དང་། ཇི་ལྟར་ཡང་ཁྱོད་སྔོན་གྱི་དེ་བཞིན་གཤེགས་པ་རྣམས་ལ་གཟུངས་ཀྱི་སྒོའི་ཚིག་ཟབ་མོ་རྣམས་ཡོངས་སུ་འདྲི་བའི་རང་བཞིན་ཅན་
དུ་གྱུར་པ་ལེགས་སོ་ལེགས་སོ། །དེའི་ཕྱིར་གཟུངས་ཀྱི་དབང་ཕྱུག་གི་རྒྱལ་པོ་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་རིག་པར་བྱའོ། །གཟུངས་ཀྱི་དབང་ཕྱུག་གི་རྒྱལ་པོ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་རྒྱས་པ་ཚད་མེད་པ།
བསམ་གྱིས་མི་ཁྱབ་པར་གྱུར་པ། དེའི་ཚེ་དེའི་དུས་ན་རྣམ་པར་སྣང་བྱེད་ཀྱི་བསྐལ་པ་ལ་འཇིག་རྟེན་གྱི་ཁམས་དྲི་མ་མེད་པར་དེ་བཞིན་གཤེགས་པ་དྲི་མ་མེད་པར་སྣང་བ་ཞེས་བྱ་བ་སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་གྱུར་པ་འཇིག་རྟེན་དུ་བྱུང་ངོ་། །འཇིག་རྟེན་གྱི་ཁམས་དྲི་མ་
མེད་པ་དེ་ཡང་བཻ་དཱུརྱ་ལྟར་དག་པར་གྱུར་ཏེ། མེ་ལོང་ལྟ་བུར་ཤིན་ཏུ་བྱི་དོར་བྱས་པ། ལག་མཐིལ་ལྟར་མཉམ་པའོ། །འཇིག་རྟེན་གྱི་ཁམས་དེར་རིན་པོ་ཆེ་སྣ་བདུན་གྱི་ཤིང་ལྗོན་པ་རིན་པོ་ཆེའི་ཡལ་ག་དང་། ལོ་མ་དང་། མེ་ཏོག་དང་། འབྲས་བུར་ལྡན་པ་དག་བྱུང་བར་གྱུར་
ཏོ། །འཛམ་བུའི་ཆུ་བོའི་གསེར་གྱི་པད་མ་ཚད་ཤིང་རྟའི་ཕང་ལོ་ཙམ་དུ་གྱུར་པ་སྣ་ཚོགས་པ། བལྟ་ན་སྡུག་པ་དག་ཀྱང་བྱུང་བར་གྱུར་ཏོ། །ལྷ་དང་མི་དེ་དག་ཀྱང་རིན་པོ་ཆེའི་ཁང་པ་བརྩེགས་པ་ལ་ཡོངས་སུ་ལོངས་སྤྱོད་པར་གྱུར་ཏོ། །ཟས་དང་སྐོམ་ཡང་བསམས་པ་ཙམ་གྱིས་
འབྱོར་ཏེ། འདི་ལྟ་སྟེ། དཔེར་ན་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ལོངས་སྤྱོད་དག་ཡོངས་སུ་སྤྱོད་པ་ལྟར་ལྷ་དང་མི་དེ་དག་གི་ལོངས་སྤྱོད་དང་། ཡོངས་སུ་སྤྱོད་པ་ཡང་དེ་འདྲ་བར་གྱུར་ཏོ། །ལྷ་དང་མི་དེ་དག་ཀྱང་འདོད་ཆགས་ཆུང་བ། ཞེ་སྡང་ཆུང་བ། གཏི་མུག་ཆུང་བ། རྣམ་

པ་བཟང་བ། ཤིན་ཏུ་རྣམ་པར་རིག་པར་བྱེད་པར་གྱུར་ཏོ། །འཇིག་རྟེན་གྱི་ཁམས་དེ་ནི་ཉི་མ་དང་ཟླ་བར་བཏགས་པ་རྣམས་མེད་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དེ་ནི་ལུས་ཀྱི་འོད་ཀྱིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་
གསལ་བར་གྱུར་ཏོ། །འཇིག་རྟེན་གྱི་ཁམས་དེ་ན་པད་མ་ཁ་ཟུམ་པས་མཚན་མོ་ཞེས་བྱ་བ་དང་པད་མ་ཁ་བྱེ་བས་ཉིན་མོར་བགྲང་བ་མ་གཏོགས་པར་ཉིན་མཚན་དུ་གདགས་པ་མེད་དོ། །བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དེའི་བྱང་ཆུབ་སེམས་དཔའི་དགེ་
འདུན་ནི་བྱང་ཆུབ་སེམས་དཔའ་རབ་ཏུ་བྱུང་བ་སྙོམས་པར་ཞུགས་པའི་བྱང་ཆུབ་སེམས་དཔའ་བྱེ་བ་བརྒྱ་ཕྲག་དྲུག་ཅུར་གྱུར་ཏོ། །ཁྱིམ་པ་ཚད་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་ཏོ། །དེ་ནི་ཐེག་པ་ཆེན་པོ་མ་གཏོགས་པར་
ཐེག་པ་རྣམ་པར་དགོད་པ་གཞན་མེད་པར་གྱུར་ཏོ། །བཅོམ་ལྡན་འདས་དེ་ནི་ཕྱིར་མི་ལྡོག་པ་དག་པའི་གཏམ་ཡང་དག་པར་སྟོན་ཏོ། །བཅོམ་ལྡན་འདས་དེའི་སྐུ་ཚེའི་ཚད་ནི་བསྐལ་པ་ཕྱེད་དུ་གྱུར་ཏོ། །མི་རྣམས་ཀྱང་བར་མ་དོར་འཆི་བའི་དུས་བྱེད་པ་མེད་པར་གྱུར་ཏོ། །སངས་རྒྱས་ཀྱི་
ཞིང་དེ་ན་གང་དག་ས་ལ་གནས་པའི་ཁང་པ་བརྩེགས་པ་རྣམས་ན་གནས་པ་དེ་དག་ནི་མི་ཞེས་བྱ་བའི་གྲངས་སུ་འགྲོ། གང་དག་ནམ་མཁའ་ལ་གནས་པའི་ཁང་པ་བརྩེགས་པ་རྣམས་ན་གནས་པ་དེ་དག་ནི་ལྷ་ཞེས་བྱ་བའི་གྲངས་སུ་འགྲོ་བ་མ་གཏོགས་པར་ལྷ་དང་མི་རྣམས་ཀྱི་ཁ་དོག་དང་།
ཡོངས་སུ་སྤྱོད་པ་ཐ་དད་དུ་བྱ་བ་མེད་པར་གྱུར་ཏོ། །འཇིག་རྟེན་གྱི་ཁམས་དེ་ན་བཅོམ་ལྡན་འདས་ཆོས་ཀྱི་རྒྱལ་པོ་བླ་ན་མེད་པ་དེ་མ་གཏོགས་པར་རྒྱལ་པོ་གཞན་གང་ཡང་མེད་དོ། །ལྷ་དང་མི་དེ་དག་ཐམས་ཅད་ཀྱང་དེ་བཞིན་གཤེགས་པ་ལ་མཆོད་པའི་ལས་བྱེད་པ་དང་། ཆོས་ཉན་
པ་ལ་འདུན་པར་གྱུར་པ་མ་གཏོགས་པར་ལྷ་གཞན་མེད། སྟོན་པ་གཞན་མེད། གཞན་ལ་ཕྱག་མི་འཚལ། ལས་གཞན་མི་བྱེད། གཞན་ཡིད་ལ་མི་བྱེད་པར་གྱུར་ཏོ། །འཇིག་རྟེན་གྱི་ཁམས་དེ་ན་བུད་མེད་དུ་གདགས་པ་མེད་དོ། །སེམས་ཅན་དེ་དག་བསླབ་པ་གསུམ་པོ་དག་

ལ་སློབ་པ་མ་གཏོགས་པར་ལྟུང་བར་གདགས་པ་མེད་དོ། །བསླབ་པ་ལས་འདའ་བར་གདགས་པ་མེད་དོ། །བསླབ་པ་གསུམ་གང་ཞེ་ན། འདི་ལྟ་སྟེ། ལྷག་པའི་ཚུལ་ཁྲིམས་ཀྱི་བསླབ་པ་དང་། ལྷག་པའི་སེམས་ཀྱི་བསླབ་པ་དང་། ལྷག་པའི་ཤེས་རབ་
ཀྱི་བསླབ་པའོ། །དེ་ལ་ལྷག་པའི་ཚུལ་ཁྲིམས་ཀྱི་བསླབ་པ་གང་ཞེ་ན། གང་ཐམས་ཅད་མཁྱེན་པའི་སེམས་མི་གཏོང་བ་དང་། མངོན་པར་འདུ་བྱེད་པ་ཐམས་ཅད་རྣམ་པར་སྤོང་བའོ། །དེ་ལ་ལྷག་པའི་སེམས་ཀྱི་བསླབ་པ་གང་ཞེ་ན། གང་ཏིང་ངེ་འཛིན་ལ་རབ་ཏུ་གནས་
ནས་ལྷག་པའི་ཤེས་རབ་ཐོབ་པའོ། །དེ་ལ་ལྷག་པའི་ཤེས་རབ་ཀྱི་བསླབ་པ་གང་ཞེ་ན། གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རབ་ཏུ་གནས་ནས། སོ་སོ་ཡང་དག་པར་རིག་པ་ཐོབ་པའོ། །བྱང་ཆུབ་སེམས་དཔའ་དེ་དག་ནི་ལུང་ཕོག་པ་མེད་པར་བསླབ་པ་འདི་ལྟ་བུ་དག་ལ་
སློབ་པ་དག་གོ། །འཇིག་རྟེན་གྱི་ཁམས་དེ་ནི་དེ་ལྟ་བུར་ཡོངས་སུ་དག་པར་གྱུར་ཏོ། །བཅོམ་ལྡན་འདས་དེའི་ཆོས་བསྟན་པ་ཡང་དེ་ལྟ་བུར་ཡོངས་སུ་དག་པར་གྱུར་ཏོ། །དེའི་ཚེ་བྱང་ཆུབ་སེམས་དཔའ་འོད་དཔལ་ཞེས་བྱ་བ་འཁོར་དེ་ཉིད་དུ་འདུས་ཏེ། འདུག་པར་གྱུར་པ་དེ་སྟན་
ལས་ལངས་ཏེ། བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་གཟུངས་ཞེས་བགྱི་ན། བཅོམ་ལྡན་འདས་བྱང་ཆུབ་སེམས་དཔའ་དག །གཟུངས་གང་ལ་རབ་ཏུ་གནས་ནས། སངས་
རྒྱས་བཅོམ་ལྡན་འདས་ཐམས་ཅད་ཀྱིས་གསུངས་པ་ཀུན་དུ་འཛིན་པ་དང་། ཆོས་བསྟན་པ་ན་ཟད་པར་མི་འགྱུར་བ་དང་། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བགྱིད་པའི་གཟུངས་དེ་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་
དེ་བཞིན་གཤེགས་པ་དྲི་མ་མེད་པར་སྣང་བ་དེས། བྱང་ཆུབ་སེམས་དཔའ་འོད་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་གང་གི་ཕྱིར། དེ་བཞིན་གཤེགས་པ་ལ་དོན་འདི་ཡོངས་སུ་དྲི་བར་སེམས་པ་ལེགས་སོ་ལེགས་སོ། །རིགས་ཀྱི་བུ་རིན་

ཆེན་སྒྲོན་མ་ཞེས་བྱ་བའི་གཟུངས་ཡོད་དེ། བྱང་ཆུབ་སེམས་དཔའ་དག་གཟུངས་དེ་ལ་རབ་ཏུ་གནས་ནས། སངས་རྒྱས་ཐམས་ཅད་ཀྱིས་གསུངས་པ་ཀུན་དུ་འཛིན་ཏོ། །ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་དོ། །དེ་སྐད་ཅེས་བཀའ་སྩལ་པ་དང་། དེ་
བཞིན་གཤེགས་པ་དྲི་མ་མེད་པར་སྣང་བ་ལ། བྱང་ཆུབ་སེམས་དཔའ་འོད་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཐོས་པས་བདག་ཅག་དེ་བཞིན་དུ་སྒྲུབ་ཅིང་། གཟུངས་འདི་འཐོབ་པར་འགྱུར་བར་དེ་བཞིན་གཤེགས་པས་རིན་ཆེན་སྒྲོན་མའི་གཟུངས་
ལ་གང་ཆུང་ཟད་འཇུག་པ་ཙམ་ཞིག་ལེགས་པར་བཤད་དུ་གསོལ། དེ་ནས་དེ་བཞིན་གཤེགས་པ་དྲི་མ་མེད་པར་སྣང་བས། བྱང་ཆུབ་སེམས་དཔའ་འོད་དཔལ་ལ་ཚིགས་སུ་བཅད་དེ་བཀའ་སྩལ་པ། ཉོན་མོངས་རྣམས་ཀྱི་རྡུལ་དང་བྲལ་གྱུར་ཏེ། དྲི་མ་མེད་ཅིང་དྲི་མ་
ཀུན་དུ་སྤངས། །སེམས་ནི་རྟག་ཏུ་དག་ཅིང་དྲི་མེད་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །ལུས་ཀྱིས་ངག་རྣམས་དག་ཅིང་ཡིད་ཀྱིས་ནི། །ཟླ་བ་ལྟ་བུར་དྲི་བྲལ་དྲི་མེད་འོད། །བྱམས་པའི་སེམས་དང་ཡིད་ཀྱང་སྙོམས་གྱུར་པ། །འདི་ནི་རིན་ཆེན་སྒྲོན་མའི་
གཟུངས་ཡིན་ནོ། །གཉིས་སུ་ལྟ་བ་དག་ལས་རྣམ་གྲོལ་ཞིང་། །རྟོག་དང་རྣམ་པར་རྟོག་དང་ཀུན་དུ་བྲལ། །འདུ་ཤེས་རྣམས་ནི་ཡོངས་སུ་ཤེས་གྱུར་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །དྲན་དང་བློ་གྲོས་རྟོག་ལ་འཇུག་པ་འགྲུབ། །ཤེས་རབ་ཆེ་
ལྡན་ཡོན་ཏན་རྣམས་དང་ལྡན། །ནམ་མཁའི་དཀྱིལ་ལྟར་དྲི་མ་མེད་ཅིང་དག །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །དཀོན་མཆོག་གསུམ་པོ་རྒྱུན་མི་འཆད་པ་དང་། །དྲི་གསུམ་རྣམ་སྤངས་སྲིད་པ་གསུམ་ལས་གྲོལ། །གཉིས་ལ་ཡིད་གཉིས་ཟ་བ་མཐར་
འབྱིན་པ། །རིན་ཆེན་སྒྲོན་མའི་གཟུངས་ནི་དག་པ་ཡིན། །འདོད་ཆགས་དང་ནི་ཞེ་སྡང་གཏི་མུག་བཅོམ། །དུས་ངན་རྙོག་སྤངས་ཡོན་ཏན་ཀུན་དང་ལྡན། །ཉོན་མོངས་མུན་པ་རབ་རིབ་སེལ་བྱེད་པ། །རིན་ཆེན་སྒྲོན་མ་གཟུངས་ཀྱི་མཆོག་ཡིན་ནོ། །འཇིག་རྟེན་

དག་ན་སྒྲ་སྐད་ཐ་མ་དང་། །འབྲིང་དང་མཆོག་ནི་ཇི་སྙེད་ཡོད་པ་དག །སྒྲ་རྣམས་ཀུན་ལ་ཤིན་ཏུ་ཞུགས་གྱུར་པ། །རིན་ཆེན་སྒྲོན་མའི་གཟུངས་ནི་རྡུལ་དང་བྲལ། །ཟབ་མོའི་ཆོས་རྣམས་དང་ནི་ལྡན་གྱུར་ཅིང་། །ཚིག་དང་ཡིག་འབྲུ་སྣ་ཚོགས་མཐའ་
ཡས་མང་། །བདག་དང་སེམས་ཅན་དག་ཏུ་ལྷུང་བ་མེད། །གཉིས་མེད་ལྡན་པ་འདི་ནི་གཟུངས་ཡིན་ནོ། །སོ་སོ་ཡང་དག་རིག་པ་ཐོབ་གྱུར་ཅིང་། །རྐང་པ་སྙིང་པོ་བཞི་ལ་རབ་གནས་ཏེ། །བསམ་གཏན་བཞི་དང་ཡང་དག་རབ་ལྡན་པ། །འདི་ནི་རིན་ཆེན་སྒྲོན་མའི་
གཟུངས་ཡིན་ནོ། །དམ་པའི་དོན་གྱི་ཆོས་ཀྱི་ཚུལ་གྱུར་ཅིང་། །ཚངས་པའི་གནས་པ་བཞི་དང་བསྡུ་དང་ལྡན། །མངོན་པར་ཤེས་པ་ལྔ་ལ་འགྲོ་བྱེད་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །དྲན་པ་ཉེ་བར་གཞག་པ་རྣམས་ལ་གནས། །ཡང་དག་སྤོང་བ་
རྣམས་དང་རྟག་ཏུ་འཐུན། །རྫུ་འཕྲུལ་རྐང་པ་བཞི་ལ་སྤྱོད་བྱེད་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །དབང་པོ་ལྔ་པོ་དག་དང་ལྡན་གྱུར་ཅིང་། །སྟོབས་ལྔ་དག་ལ་གནས་པ་མི་གཡོའི་ཤུགས། །བྱང་ཆུབ་ཡན་ལག་རྣམས་དང་རབ་ལྡན་པ། །འདི་ནི་རིན་
ཆེན་སྒྲོན་མའི་གཟུངས་ཡིན་ནོ། །ཡན་ལག་བརྒྱད་པའི་ལམ་གྱིས་འགྲོ་བྱེད་ཅིང་། །ཞི་གནས་མཆོག་དང་ལྷག་མཐོང་ཟུང་དུ་འབྲེལ། །རིག་དང་རྣམ་པར་གྲོལ་བས་འགྲོ་བྱེད་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །ས་རྣམས་གནོན་པ་དག་ནི་རབ་ལྡན་
ཞིང་། །མཚམས་སྦྱོར་གྲོལ་བའི་ལམ་དང་རྗེས་སུ་འཐུན། །ཉེས་པ་རྣམས་ནི་ཀུན་དུ་སྤངས་གྱུར་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །འཇིག་རྟེན་ཐམས་ཅད་ན་ནི་སྣང་བྱེད་ཅིང་། །ཉི་དང་ཟླ་ཡི་འོད་ཀྱི་དཀྱིལ་འཁོར་ལྟར། །རྣམ་པར་དག་ཅིང་
མིག་ནི་འབྱེད་བྱེད་པ། །འདི་ནི་རིན་ཆེན་སྒྲོན་མའི་གཟུངས་ཡིན་ནོ། །འདིར་ནི་ལྷ་མིག་དག་སྟེ་རབ་རིབ་མེད། །ཤེས་རབ་མཆོག་གི་མིག་ཀྱང་རྣམ་དག་པ། །འདིར་ནི་ཆོས་ཀྱི་མིག་ཀྱང་དག་གྱུར་ཏེ། །རྒྱལ་བ་དམ་པའི་སྤྱན་ནི་རྣམ་པར་དག །འདིར་ནི་ཉོན་མོངས་

བདུད་ཀྱང་དག་པར་གྱུར། །ཕུང་པོ་ལྔ་ཡི་ཉེས་པ་འདིར་ཡོངས་དག །འདིར་ནི་འཆི་བདག་བདུད་ཀྱང་དག་གྱུར་ཅིང་། །འདིར་ནི་སྡེ་དང་བཅས་པའི་བདུད་ཀྱང་བཅོམ། །འདིར་ནི་གཟུངས་ལ་རབ་ཏུ་གནས་ནས་སུ། །བྱེ་བ་ཁྲག་ཁྲིག་དག་གི་ཞིང་དུ་འགྲོ། །སངས་རྒྱས་
ཁྲག་ཁྲིག་དག་ཀྱང་མཐོང་འགྱུར་ཞིང་། །བླ་ན་མེད་པའི་ཆོས་ཀྱང་ཉན་པར་བྱེད། །རྒྱ་ཆེན་ཆོས་ནི་ཐོས་པར་གྱུར་ནས་ཀྱང་། །གཟུངས་ཀྱི་དྲན་པའི་སྟོབས་ཀྱིས་འཛིན་པར་བྱེད། །དོན་དང་ཚིག་འབྲུ་དག་ཀྱང་གཟུངས་ལྡན་པར། །སེམས་ཅན་ཐམས་ཅད་ལ་ནི་སྟོན་པར་བྱེད། །
རྒྱུ་དང་རྐྱེན་གྱིས་རྣམ་པར་ཕྱེ་བས་ན། །སེམས་ནི་སྐད་ཅིག་འཇིག་པར་ཤེས་གྱུར་ཏེ། །ཆོས་རྣམས་རབ་ཏུ་དབྱེ་བ་ཤེས་ཐོབ་པ། །གཟུངས་འདི་ལ་ནི་གནས་པར་གྱུར་པ་ཡིན། །སྤོབས་པ་ཐོབ་ཅིང་གསུམ་རིག་ཆགས་པ་མེད། །མིག་གསུམ་རྣམ་པར་དག་པའང་རབ་ཏུ་
ཐོབ། །རྣམ་པར་ཐར་པ་གསུམ་གྱི་དོན་ཀྱང་ཐོབ། །འདིར་ནི་གཟུངས་རྣམས་ཐོབ་པར་གྱུར་དང་ལྡན། །གང་དག་གཟུངས་རྣམས་མང་པོ་གཞལ་ཡས་ཤིང་། །ཚད་མེད་པ་དག་ངེས་པར་བསྟན་པ་ཡང་། །གཟུངས་ཀྱི་དམ་པ་འདི་ནི་ཐོབ་གྱུར་ན། །དེ་དག་ཐམས་
ཅད་རབ་ཏུ་ཐོབ་པར་འགྱུར། །བསམ་གཏན་གང་དང་རྣམ་ཐར་གང་དག་དང་། །སྙོམས་འཇུག་ཏིང་འཛིན་གང་དག་མཐའ་ཡས་དང་། །མངོན་པར་ཤེས་པས་རྣམ་པར་རོལ་དང་གཟུངས། །མཐའ་ཡས་དེ་དག་ལ་ནི་རབ་ཏུ་འཇུག །ཇི་ལྟར་རྒྱ་མཚོ་དཔག་ཏུ་མེད་པ་ལ། །
མཐའ་ཡས་སྒོ་ནས་ཀླུང་མཚོ་མཚེའུ་འཇུག་པ། །དེ་ལྟར་གཟུངས་འདི་འཛིན་པར་བྱེད་པ་ཡང་། །མཐའ་ཡས་ཆོས་རྣམས་ཀྱི་ནི་སྒོ་མོར་འཇུག །ཟད་པ་མེད་པའི་སྒྲ་ལ་འཇུག་པ་ཡང་། །ཟད་པ་མེད་པའི་ཤེས་པས་ཁོང་དུ་ཆུད། །གཟུངས་འདི་སྨྲ་བར་བྱེད་པ་དེ་
ཡི་ནི། །བསོད་ནམས་ཐམས་ཅད་ཟད་པར་མི་འགྱུར་རོ། །གཟུངས་འདི་རབ་ཏུ་ཐོབ་པར་གྱུར་པ་ནི། །རིན་ཆེན་དམ་པ་དྲི་མེད་ལག་ཏུ་འགྱུར། །གཟུགས་དང་མཚན་རྣམས་དང་ནི་རིགས་དང་ཡང་། །རུས་དང་སྐྱེ་བ་དག་ནི་རྣམ་པར་དག །ཟབ་མོའི་ཚུལ་

དག་ལ་ནི་འཇུག་པ་དང་། །མི་སྐྱེ་བ་ལ་བཟོད་དང་མ་སྐྱེས་དང་། །ཕྱིར་མི་ལྡོག་པའི་ཤེས་པའི་ས་དག་ཀྱང་། །གཟུངས་འདི་ཡིན་པར་ངེས་པར་བསྟན་པ་ཡིན། །བྱང་ཆུབ་བླ་མེད་མཆོག་འདི་ཚོལ་བྱེད་པའི། །བྱང་ཆུབ་སེམས་དཔའ་མང་པོ་གང་
དག་གིས། །གཟུངས་འདི་རབ་ཏུ་ཐོབ་པར་གྱུར་ན་ནི། །བྱང་ཆུབ་བླ་ན་མེད་པ་རྙེད་མི་དཀའ། །གང་དག་ཕྱོགས་བཅུ་རྣམས་ན་བདེ་བར་གཤེགས། །འགྲོ་ལ་ཕན་དང་བདེ་ཕྱིར་ཆོས་སྟོན་པ། །གཟུངས་ཀྱི་དམ་པ་འདི་ནི་ཐོབ་གྱུར་ན། །དེ་དག་སྤོབས་པ་རྒྱུན་ཆད་མི་འགྱུར་
རོ། །གཟུངས་འདི་རབ་ཏུ་ཐོབ་པར་གྱུར་པ་དག །དགའ་དང་མོས་དང་བསམ་པ་ཤེས་ནས་ནི། །དེ་དག་འབྲས་བུ་ཡོད་པ་སྟོན་པས་ན། །སེམས་ཅན་ཁྲག་ཁྲིག་དག་ནི་ཚིམ་པར་བྱེད། །གཟུངས་འདི་ལ་ནི་གནས་པའི་དཔའ་བོ་དག །འཁོར་ལོ་དམ་པ་རབ་ཏུ་སྐོར་བྱེད་
ཅིང་། །སེམས་ཅན་སྡུག་བསྔལ་སྣ་ཚོགས་རྣམས་ལས་འགྲོལ། །ཐེག་པ་དམ་པ་ལ་ཡང་འཇོག་པར་བྱེད། །བསྐལ་པ་བྱེ་བ་ཁྲག་ཁྲིག་མང་པོར་ནི། །བསྔགས་དང་ཡོན་ཏན་ལེགས་པ་བརྗོད་བྱས་ཀྱང་། །དྲང་སྲོང་ཆེན་པོས་དེ་ཡི་ཡོན་ཏན་གྱི། །མཐའ་མ་བརྗོད་དུ་
ནུས་པར་མི་འགྱུར་རོ། །རིགས་ཀྱི་བུ་དེ་ལྟར་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་སྣང་བ་དེས་གཟུངས་བསྟན་པ་འདི་བཤད་པ་ན། བྱང་ཆུབ་སེམས་དཔའི་འཁོར་ཆེན་པོ་དེ་ལས་བྱང་ཆུབ་སེམས་དཔའ་སྟོང་ཕྲག་སུམ་ཅུ་རྩ་གཉིས་ཀྱིས་གཟུངས་ཐོབ་པར་གྱུར་ཏོ། །
བྱང་ཆུབ་སེམས་དཔའ་སེམས་དཔའ་ཆེན་པོ་འོད་དཔལ་གྱིས་ནི་རིན་ཆེན་སྒྲོན་མའི་གཟུངས་འདི་ཐོབ་པར་གྱུར་ཏོ། །གཟུངས་ཀྱི་དབང་ཕྱུག་གི་རྒྱལ་པོ་ཁྱོད་དེའི་ཚེ་དེའི་དུས་ན། བྱང་ཆུབ་སེམས་དཔའ་འོད་དཔལ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་དོགས་ཤིང་ཡིད་
གཉིས་སུ་གྱུར་ཏམ། ཐེ་ཚོམ་ཟ་བ་ལྟ་ན། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁྱོད་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་དཔལ་ཞེས་བྱ་བར་གྱུར་ཏེ། གཟུངས་ཀྱི་དབང་ཕྱུག་གི་རྒྱལ་པོ་ཁྱོད་ཀྱིས་དེ་ཚུན་ཆད་བགྲང་བ་ལས་འདས་པའི་

དེ་བཞིན་གཤེགས་པ་དག་ལ་གཟུངས་རྣམ་པར་ངེས་པ་འདི་ཡོངས་སུ་དྲིས་སོ། །ཡོངས་སུ་དྲི་བ་བྱས་སོ། །དེས་ན་ཁྱོད་ད་ལྟར་ཡང་དེ་བཞིན་གཤེགས་པ་ལ་ཡོངས་སུ་འདྲི་བ་དེ་ལྟར་འཇིགས་པ་མེད་ཅིང་གཟུངས་ཀྱི་རྣམ་པར་ངེས་པ་འདིའང་སྟོན་ཏོ། །ཁྱོད་ཀུན་དུ་ལྟ་བའི་
བློས་ཆོས་འདི་མངོན་སུམ་དུ་གྱུར་པས་རྣམ་གྲངས་འདིས་ན་ངས་ཁྱོད་བྱང་ཆུབ་སེམས་དཔའ་གཟུངས་ཐོབ་པ་དང་། བྱང་ཆུབ་སེམས་དཔའ་དྲན་པ་དང་ལྡན་པ་རྣམས་ཀྱི་མཆོག་ཏུ་བསྟན་ཏོ། །དེ་ནས་བྱང་ཆུབ་སེམས་དཔའ་ཤེས་རབ་བརྩེགས་ཞེས་བྱ་བ་འཁོར་དེ་ཉིད་དུ་འདུག་པར་
གྱུར་པ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་རིན་ཆེན་སྒྲོན་མའི་གཟུངས་འདི་རབ་ཏུ་ཐོབ་ཅིང་། ཐོབ་ནས་ཀྱང་ཆབ་འཚལ་བར་མི་བགྱིད་པ་དང་། འདི་ལྟ་སྟེ། གཟུངས་ཀྱི་སྟོབས་བསྐྱེད་པས་སེམས་
ཅན་ཐམས་ཅད་ཉེ་བར་འཚོ་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཤེས་རབ་བརྩེགས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གང་གི་ཚེ་བྱང་ཆུབ་སེམས་དཔའ་ཤེས་རབ་ཀྱི་རྩ་བ་ལ་གནས་པར་གྱུར་པ་དང་། ཤེས་
རབ་ཀྱི་ལས་བྱེད་པར་གྱུར་པ་དེའི་ཚེ་གཟུངས་འདི་རབ་ཏུ་འཐོབ་བོ། །ཆུད་ཟ་བར་མི་བྱེད་དོ། །སེམས་ཅན་ཐམས་ཅད་ཀྱི་ཉེ་བར་འཚོ་བར་ཡང་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་ཤེས་རབ་བརྩེགས་ཀྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས་ཤེས་རབ་ཀྱི་རྩ་བ་ནི་གང་ལགས། ཤེས་རབ་ཀྱི་ལས་ནི་གང་ལགས། དེ་བཞིན་གཤེགས་པས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རིགས་ཀྱི་བུ་ཁྱོད་ཤིན་ཏུ་ལེགས་པར་ཉོན་
ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་མ་ཐོས་པའི་ཆོས་ཉན་པ་གང་ཡིན་པ་འདི་ནི་ཤེས་རབ་ཀྱི་རྩ་བའོ། །ཇི་ལྟར་ཐོས་པའི་ཆོས་གཞན་དག་ལ་རྒྱ་ཆེར་ཡང་དག་པར་སྟོན་པ་གང་ཡིན་པ་འདི་ནི་ཤེས་རབ་ཀྱི་ལས་

སོ། །དཔྱོད་པ་ནི་ཤེས་རབ་ཀྱི་རྩ་བའོ། །གང་དཔྱད་པ་གཞན་དག་ལ་ཉེ་བར་སྟོན་པ་འདི་ནི་ཤེས་རབ་ཀྱི་ལས་སོ། །ཚུལ་བཞིན་སོ་སོར་རྟོག་པ་ནི་ཤེས་རབ་ཀྱི་རྩ་བའོ། །སེམས་ཅན་རྣམས་ཚུལ་བཞིན་ལ་རབ་ཏུ་དགོད་པ་འདི་ནི་ཤེས་རབ་ཀྱི་ལས་སོ། །
ཡང་དག་པར་སྦྱོར་བ་ནི་ཤེས་རབ་ཀྱི་རྩ་བའོ། །ཡང་དག་པར་སྒྲུབ་པ་ནི་ཤེས་རབ་ཀྱི་ལས་སོ། །སེམས་ལ་ངེས་པར་སེམས་པ་ནི་ཤེས་རབ་ཀྱི་རྩ་བའོ། །སེམས་ལ་ངེས་པར་སེམས་པ་ཡང་དག་པར་སྟོན་པ་ནི་ཤེས་རབ་ཀྱི་ལས་སོ། །རབ་ཏུ་དབེན་པར་གནས་པ་ནི་ཤེས་
རབ་ཀྱི་རྩ་བའོ། །ལུས་དང་སེམས་དབེན་པར་ཤེས་པ་ནི་ཤེས་རབ་ཀྱི་ལས་སོ། །གཅིག་པུར་དགའ་བ་ནི་ཤེས་རབ་ཀྱི་རྩ་བའོ། །གཅིག་པུར་བགྲོད་པའི་ལམ་སྒྲུབ་པ་ནི་ཤེས་རབ་ཀྱི་ལས་སོ། །ཞི་གནས་དང་ལྷག་མཐོང་སྒོམ་པ་ནི་ཤེས་རབ་ཀྱི་རྩ་བའོ། །རིག་
པ་དང་རྣམ་པར་གྲོལ་བ་འཐོབ་པ་ནི་ཤེས་རབ་ཀྱི་ལས་སོ། །རྣམ་པར་ཐར་པ་གསུམ་སྒོམ་པ་ནི་ཤེས་རབ་ཀྱི་རྩ་བའོ། །རིག་པ་གསུམ་མངོན་སུམ་དུ་བྱེད་པ་ནི་ཤེས་རབ་ཀྱི་ལས་སོ། །དྲན་པ་ཉེ་བར་གཞག་པ་སྒོམ་པ་ནི་ཤེས་རབ་ཀྱི་རྩ་བའོ། །དྲན་པ་མེད་ཅིང་ཡིད་ལ་
བྱེད་པ་མེད་པ་ནི་ཤེས་རབ་ཀྱི་ལས་སོ། །ཡང་དག་པར་སྤོང་བ་སྒོམ་པ་ནི་ཤེས་རབ་ཀྱི་རྩ་བའོ། །ཆོས་ཐམས་ཅད་རང་བཞིན་གྱིས་སྤངས་པར་རབ་ཏུ་ཤེས་པ་ནི་ཤེས་རབ་ཀྱི་ལས་སོ། །རྫུ་འཕྲུལ་གྱི་རྐང་པ་སྒོམ་པ་ནི་ཤེས་རབ་ཀྱི་རྩ་བའོ། །མངོན་པར་འདུ་བྱ་བ་མེད་པ་
རྫུ་འཕྲུལ་ཐོབ་པ་ནི་ཤེས་རབ་ཀྱི་ལས་སོ། །དད་པས་མོས་ཏེ་ཡིད་ཆེས་པ་ནི་ཤེས་རབ་ཀྱི་རྩ་བའོ། །ཆགས་པ་ཐམས་ཅད་ལས་ཡང་དག་པར་འདའ་བ་ནི་ཤེས་རབ་ཀྱི་ལས་སོ། །སེམས་མི་འཇུམ་པ་ནི་ཤེས་རབ་ཀྱི་རྩ་བའོ། །ལུས་དང་སེམས་ཤིན་ཏུ་སྦྱངས་པ་ནི་ཤེས་རབ་
ཀྱི་ལས་སོ། །དྲན་པ་དང་ཤེས་བཞིན་ནི་ཤེས་རབ་ཀྱི་རྩ་བའོ། །དྲན་པར་བྱ་བ་རྗེས་སུ་དྲན་པ་ནི་ཤེས་རབ་ཀྱི་ལས་སོ། །ཏིང་ངེ་འཛིན་རིམ་གྱིས་རྗེས་སུ་རྟོགས་པར་བྱེད་པ་ནི་ཤེས་རབ་ཀྱི་རྩ་བའོ། །རྟག་ཏུ་མཉམ་པར་བཞག་པར་གནས་པ་འཐོབ་པ་ནི་ཤེས་རབ་ཀྱི་

ལས་སོ། །ཤེས་རབ་ཀྱི་དབང་པོ་ལ་སྟེན་པ་ནི་ཤེས་རབ་ཀྱི་རྩ་བའོ། །དབང་པོ་མཆོག་དང་མཆོག་མ་ཡིན་པ་ཤེས་པ་ནི་ཤེས་རབ་ཀྱི་ལས་སོ། །སྟོབས་ལྔའི་གནས་ཤེས་པ་ནི་ཤེས་རབ་ཀྱི་རྩ་བའོ། །བདུད་དང་ཉོན་མོངས་པས་མི་རྫི་བ་ནི་ཤེས་རབ་ཀྱི་ལས་སོ། །
བྱང་ཆུབ་ཀྱི་ཡན་ལག་རྗེས་སུ་འཐུན་པའི་བཟོད་པ་ནི་ཤེས་རབ་ཀྱི་རྩ་བའོ། །ཆོས་ཐམས་ཅད་ཀྱི་རང་བཞིན་རྗེས་སུ་རྟོགས་པ་ནི་ཤེས་རབ་ཀྱི་ལས་སོ། །ལམ་གྱི་ཡན་ལག་ཡང་དག་པར་སྒྲུབ་པ་ནི་ཤེས་རབ་ཀྱི་རྩ་བའོ། །ཆོས་ཐམས་ཅད་གཟིངས་ལྟ་བུར་ཤེས་ནས་ཆོས་
དང་ཆོས་མ་ཡིན་པ་ལ་མི་གནས་པ་ནི་ཤེས་རབ་ཀྱི་ལས་སོ། །སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་སྒོམ་པ་ནི་ཤེས་རབ་ཀྱི་རྩ་བའོ། །འགོག་པ་མངོན་སུམ་དུ་བྱེད་པ་ནི་ཤེས་རབ་ཀྱི་ལས་སོ། །དྲང་བའི་དོན་གྱི་མདོ་སྡེ་ཀུན་ཆུབ་པར་
བྱེད་པ་ནི་ཤེས་རབ་ཀྱི་རྩ་བའོ། །ངེས་པའི་དོན་གྱི་མདོ་སྡེ་ལ་རྟོན་པ་ནི་ཤེས་རབ་ཀྱི་ལས་སོ། །ཐོས་པ་ཐམས་ཅད་འཛིན་པ་ནི་ཤེས་རབ་ཀྱི་རྩ་བའོ། །དོན་ལ་རྟོན་པ་ནི་ཤེས་རབ་ཀྱི་ལས་སོ། །རྣམ་པར་ཤེས་པ་ལ་སོ་སོར་རྟོག་པ་ནི་ཤེས་རབ་ཀྱི་རྩ་བའོ། །ཡེ་ཤེས་
ལ་རྟོན་པ་ནི་ཤེས་རབ་ཀྱི་ལས་སོ། །གང་ཟག་གི་སྒྲ་ལ་མངོན་པར་ཞེན་པ་མེད་པ་ནི་ཤེས་རབ་ཀྱི་རྩ་བའོ། །ཆོས་ཉིད་ལ་རྟོན་པ་ནི་ཤེས་རབ་ཀྱི་ལས་སོ། །འདུ་བྱེད་ཐམས་ཅད་མི་རྟག་པར་སོ་སོར་རྟོག་པ་ནི་ཤེས་རབ་ཀྱི་རྩ་བའོ། །གདོད་མ་ནས་མ་སྐྱེས་པར་རབ་ཏུ་
ཤེས་པ་ནི་ཤེས་རབ་ཀྱི་ལས་སོ། །འདུ་བྱེད་ཐམས་ཅད་སྡུག་བསྔལ་བར་སོ་སོར་རྟོག་པ་ནི་ཤེས་རབ་ཀྱི་རྩ་བའོ། །ཆོས་ཐམས་ཅད་མངོན་པར་འདུ་བྱ་བ་མེད་པར་ཤེས་པ་ནི་ཤེས་རབ་ཀྱི་ལས་སོ། །ཆོས་ཐམས་ཅད་ལ་བདག་མེད་པར་སོ་སོར་རྟོག་པ་ནི་ཤེས་རབ་ཀྱི་རྩ་བའོ། །
སེམས་ཅན་གཟོད་མ་ནས་རྣམ་པར་དག་པར་ཤེས་པ་ནི་ཤེས་རབ་ཀྱི་ལས་སོ། །མྱ་ངན་ལས་འདས་པ་ལ་ཞི་བར་སོ་སོར་རྟོག་པ་ནི་ཤེས་རབ་ཀྱི་རྩ་བའོ། །ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ཤེས་པ་ནི་ཤེས་རབ་ཀྱི་ལས་སོ། །དོན་

ཐོས་ནས་སྐྲག་པ་མེད་པ་ནི་ཤེས་རབ་ཀྱི་རྩ་བའོ། །དོན་སོ་སོ་ཡང་དག་པར་རིག་པ་ནི་ཤེས་རབ་ཀྱི་ལས་སོ། །ཡང་དག་པའི་ཆོས་ཉིད་ཐོས་ནས་སྐྲག་པ་མེད་པ་ནི་ཤེས་རབ་ཀྱི་རྩ་བའོ། །ཆོས་ཐམས་ཅད་ཡང་དག་པར་རིག་པ་ནི་ཤེས་རབ་ཀྱི་ལས་སོ། །
ངེས་པའི་ཚིག་ཐམས་ཅད་ལ་སྐྲག་པ་མེད་པ་ནི་ཤེས་རབ་ཀྱི་རྩ་བའོ། །ངེས་པའི་ཚིག་སོ་སོ་ཡང་དག་པར་རིག་པ་ནི་ཤེས་རབ་ཀྱི་ལས་སོ། །སངས་རྒྱས་ཀྱི་སྤོབས་པ་ཐོས་ནས་སྐྲག་པ་མེད་པ་ནི་ཤེས་རབ་ཀྱི་རྩ་བའོ། །སྤོབས་པ་སོ་སོ་ཡང་དག་པར་རིག་པ་ནི་ཤེས་རབ་
ཀྱི་ལས་སོ། །སེམས་ཅན་ལ་དམིགས་པ་དང་། ཆོས་ལ་དམིགས་པའི་བྱམས་པ་ནི་ཤེས་རབ་ཀྱི་རྩ་བའོ། །དམིགས་པ་མེད་པའི་བྱམས་པ་ནི་ཤེས་རབ་ཀྱི་ལས་སོ། །བདག་ལ་བྱེད་པ་དང་། གཞན་ལ་བྱེད་པ་ལ་སྙིང་རྗེ་བ་ནི་ཤེས་རབ་ཀྱི་རྩ་བའོ། །མཐའ་གཉི་
ག་བསལ་བའི་སྙིང་རྗེ་ཆེན་པོ་ནི་ཤེས་རབ་ཀྱི་ལས་སོ། །ཆོས་ལ་སེམས་པ་ལ་མཆོག་ཏུ་དགའ་བར་བྱེད་པའི་དགའ་བ་ནི་ཤེས་རབ་ཀྱི་རྩ་བའོ། །བླང་བ་མེད་པ་དང་དོར་བ་མེད་པ་ནི་ཤེས་རབ་ཀྱི་ལས་སོ། །རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བའི་བཏང་སྙོམས་
ནི་ཤེས་རབ་ཀྱི་རྩ་བའོ། །གཉིས་དང་བྲལ་བ་ནི་ཤེས་རབ་ཀྱི་ལས་སོ། །སངས་རྒྱས་རྗེས་སུ་དྲན་པ་ནི་ཤེས་རབ་ཀྱི་རྩ་བའོ། །ཆོས་ཀྱི་སྐུ་རབ་ཏུ་ཤེས་པ་ནི་ཤེས་རབ་ཀྱི་ལས་སོ། །ཆོས་རྗེས་སུ་དྲན་པ་ནི་ཤེས་རབ་ཀྱི་རྩ་བའོ། །འདོད་ཆགས་དང་བྲལ་བའི་ཆོས་
ཉིད་ཤེས་པ་ནི་ཤེས་རབ་ཀྱི་ལས་སོ། །དགེ་འདུན་རྗེས་སུ་དྲན་པ་ནི་ཤེས་རབ་ཀྱི་རྩ་བའོ། །འདུས་མ་བྱས་སུ་སོ་སོར་རྟོག་པ་ནི་ཤེས་རབ་ཀྱི་ལས་སོ། །གཏོང་བ་རྗེས་སུ་དྲན་པ་ནི་ཤེས་རབ་ཀྱི་རྩ་བའོ། །ཉོན་མོངས་པ་ཐམས་ཅད་ཡོངས་སུ་གཏོང་བ་ནི་ཤེས་རབ་ཀྱི་
ལས་སོ། །ཚུལ་ཁྲིམས་རྗེས་སུ་དྲན་པ་ནི་ཤེས་རབ་ཀྱི་རྩ་བའོ། །ཚུལ་ཁྲིམས་མངོན་པར་འདུ་བྱ་བ་མེད་པར་ཤེས་པ་ནི་ཤེས་རབ་ཀྱི་ལས་སོ། །ལྷ་རྗེས་སུ་དྲན་པ་ནི་ཤེས་རབ་ཀྱི་རྩ་བའོ། །རྣམ་པར་དག་པའི་ཆོས་ཉིད་ནི་ཤེས་རབ་ཀྱི་ལས་སོ། །ཐོས་པ་ལ་རྟོག་

པ་ནི་ཤེས་རབ་ཀྱི་རྩ་བའོ། །འཇིག་རྟེན་ཐམས་ཅད་ལ་རྟོག་པ་ནི་ཤེས་རབ་ཀྱི་ལས་སོ། །མ་བྱས་པའི་ལས་བྱེད་པ་ནི་ཤེས་རབ་ཀྱི་རྩ་བའོ། །ལས་ཀྱི་རྣམ་པར་སྨིན་པ་མེད་པར་ཤེས་པ་ནི་ཤེས་རབ་ཀྱི་ལས་སོ། །ང་རྒྱལ་མེད་པ་ནི་ཤེས་རབ་ཀྱི་རྩ་བའོ། །ཡེ་ཤེས་ཆེན་
པོ་ཐོབ་པ་ནི་ཤེས་རབ་ཀྱི་ལས་སོ། །བདག་གི་དོན་ནི་ཤེས་རབ་ཀྱི་རྩ་བའོ། །གཉི་གའི་དོན་ནི་ཤེས་རབ་ཀྱི་ལས་སོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཀུན་དུ་འཛིན་པ་ནི་ཤེས་རབ་ཀྱི་རྩ་བའོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡོངས་སུ་ཤེས་པ་ནི་ཤེས་རབ་ཀྱི་ལས་སོ། །
ཆོས་བསྟན་པ་ཤེས་པ་ནི་ཤེས་རབ་ཀྱི་རྩ་བའོ། །འབྲས་བུ་ཡོད་པའི་ཆོས་སྟོན་པ་ནི་ཤེས་རབ་ཀྱི་ལས་སོ། །སེམས་ཅན་རྣམས་བྱང་ཆུབ་ཡང་དག་པར་འཛིན་དུ་འཇུག་པ་ནི་ཤེས་རབ་ཀྱི་རྩ་བའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པས་སེམས་ཅན་རྣམས་ཕྱིར་
མི་ལྡོག་པའི་ས་ལ་རབ་ཏུ་དགོད་པ་འདི་ནི་ཤེས་རབ་ཀྱི་ལས་སོ། །སྲིད་པར་འགྲོ་བར་སྐྱེ་བ་ཐམས་ཅད་ཀྱིས་སྐྲག་པ་ནི་ཤེས་རབ་ཀྱི་རྩ་བའོ། །བསམས་བཞིན་དུ་སྐྱེ་བ་ནི་ཤེས་རབ་ཀྱི་ལས་སོ། །སྒྲའི་རྗེས་སུ་འགྲོ་བའི་བཟོད་པ་ནི་ཤེས་རབ་ཀྱི་རྩ་བའོ། །བསྒོམ་
པ་ལས་བྱུང་བའི་བཟོད་པ་ནི་ཤེས་རབ་ཀྱི་ལས་སོ། །ཟད་པ་ཤེས་པ་ནི་ཤེས་རབ་ཀྱི་རྩ་བའོ། །མི་སྐྱེ་བར་ཤེས་པ་ནི་ཤེས་རབ་ཀྱི་ལས་སོ། །རྗེས་སུ་འཐུན་པའི་བཟོད་པ་ནི་ཤེས་རབ་ཀྱི་རྩ་བའོ། །མི་སྐྱེ་བའི་ཆོས་ལ་བཟོད་པ་ནི་ཤེས་རབ་ཀྱི་ལས་སོ། །ཕྱིར་མི་ལྡོག་
པའི་ས་ནི་ཤེས་རབ་ཀྱི་རྩ་བའོ། །དབང་བསྐུར་བའི་ས་ནི་ཤེས་རབ་ཀྱི་ལས་སོ། །བྱང་ཆུབ་ཀྱི་སྙིང་པོ་ལ་འདུག་པ་ནི་ཤེས་རབ་ཀྱི་རྩ་བའོ། །གང་ཅི་ཤེས་པར་བྱ་བ་དང་། ཐོས་པར་བྱ་བ་དང་། རྟོགས་པར་བྱ་བ་དང་། མངོན་པར་རྫོགས་པར་
འཚང་རྒྱ་བར་བྱ་བ། དེ་ཐམས་ཅད་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་འདི་ནི་ཤེས་རབ་ཀྱི་ལས་སོ། །ཤེས་རབ་ཀྱི་རྩ་བ་དང་ལས་བསྟན་པ་འདི་

བཤད་པ་ན། ཕྱོགས་བཅུའི་སངས་རྒྱས་ཀྱི་ཞིང་གྲངས་མེད། དཔག་ཏུ་མེད་པ་དག་རྣམ་པ་དྲུག་ཏུ་གཡོས་པར་གྱུར་ཏོ། །འཁོར་གྱི་ཁྱམས་རིན་པོ་ཆེ་བཀོད་པ་ཡང་རྣམ་པ་དྲུག་ཏུ་གཡོས་སོ། །དེ་ནས་བཅོམ་ལྡན་འདས་ལ། བྱང་
ཆུབ་སེམས་དཔའ་ཤེས་རབ་བརྩེགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས། ཕྱོགས་བཅུའི་སངས་རྒྱས་ཀྱི་ཞིང་གྲངས་མ་མཆིས། དཔག་ཏུ་མ་མཆིས་པ་འདི་དག་རབ་ཏུ་གཡོས་པར་གྱུར་པ་དང་། ནམ་མཁའ་ལ་གནས་པའི་
འཁོར་གྱི་ཁྱམས་འདི་ཡང་རྣམ་པ་དྲུག་ཏུ་གཡོས་པར་གྱུར་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤེས་རབ་ཀྱི་རྩ་བ་དང་། ལས་བསྟན་པའི་ཆོས་ཀྱི་རྣམ་གྲངས་འདི། འདས་པའི་དེ་བཞིན་
གཤེགས་པ་རྣམས་ཀྱིས་སྔོན་བཤད་པ་ན། རིགས་ཀྱི་བུ་ཁྱོད་ཉིད་ཀྱིས་ནམ་མཁའ་ཡོངས་སུ་འཛིན་པ་འདི་ཉིད་དུ། དེ་བཞིན་གཤེགས་པ་དེ་དག་ལ་ཡོངས་སུ་དྲིས་ཤིང་ཡོངས་སུ་དྲི་བ་བྱས་ཏེ། ས་ཆེན་པོ་གཡོས་པ་འཇིག་རྟེན་དུ་བྱུང་བའི་རྒྱུ་ནི་འདི་ཡིན་ནོ། །རྐྱེན་
ནི་འདི་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སོ་སོ་ཡང་དག་པར་རིག་པ་ལ་སྤོབས་པ་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་ཤེས་རབ་བརྩེགས་ལ་ཤེས་རབ་བརྩེགས་ཞེས་བགྱི། བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྔོན་བྱུང་བ་འདས་པའི་དུས་ན། དྲི་མ་མེད་པའི་བསྐལ་པ་ལ་འཇིག་རྟེན་གྱི་ཁམས་འབྱུང་བ་བཟང་པོ་ན། དེ་བཞིན་གཤེགས་པ་དཔལ་སྦས་ཞེས་བྱ་བའི་སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་གྱུར་པ་
འཇིག་རྟེན་དུ་བྱུང་ངོ་། །འཇིག་རྟེན་གྱི་ཁམས་འབྱུང་བ་བཟང་པོ་དེའི་སེམས་ཅན་རྣམས་ནི་བདེ་བས་ཚིམ་པས་གནས་པར་གྱུར་ཏོ། །དེ་བཞིན་གཤེགས་པ་དཔལ་སྦས་དེའི་བྱང་ཆུབ་སེམས་དཔའི་དགེ་འདུན་ནི། བྱང་ཆུབ་སེམས་དཔའ་སྟོང་ཕྲག་བཞི་བཅུ་

རྩ་གཉིས་སུ་གྱུར་ཏོ། །དེའི་ཉན་ཐོས་ཀྱི་དགེ་འདུན་ནི་ཉན་ཐོས་སྟོང་ཕྲག་བརྒྱད་ཅུ་རྩ་བཞིར་གྱུར་ཏོ། །རིགས་ཀྱི་བུ་དེ་ལྟར་བཅོམ་ལྡན་འདས་དེ་བཞིན་གཤེགས་པ་དཔལ་སྦས་དེས། བྱང་ཆུབ་སེམས་དཔའ་དེ་དག་གི་སྤོབས་པ་རྒྱ་ཆེན་པོ་ཉེ་བར་བཟུང་སྟེ། དྲི་
བ་བྱེ་བ་ཕྲག་བརྒྱ་ཆེད་དུ་མཛད་ནས། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། སྐྱེས་བུ་དམ་པ་ཁྱོད་ཀྱི་ནང་ནས་སུ་དུས་ཇི་སྲིད་ཅིག་ན། དྲི་བ་བྱེ་བ་ཕྲག་བརྒྱ་པོ་འདི་དྲི་བ་རེ་རེ་ལ་བསྟན་པ་བྱེ་བ་ཕྲག་བརྒྱ་བརྒྱས་ལན་འདེབས་པར་སྤྲོ། དེའི་ནང་ནས་
བྱང་ཆུབ་སེམས་དཔའ་ཁ་ཅིག་གིས་གསོལ་པ། མཚན་མོ་འདི་བས་ཏེ་ལན་གདབ་པར་བགྱིའོ། །ཁ་ཅིག་གིས་གསོལ་པ། དགུང་བདུན་ནའོ། །ཁ་ཅིག་གིས་གསོལ་པ། དགུང་ཟླ་ཕྱེད་ནའོ། །ཁ་ཅིག་གིས་གསོལ་པ། བཅོམ་ལྡན་འདས་དྲིས་པ་
འདི་དག་བདག་ཅག་གིས་དགུང་ཟླ་གཅིག་ན་ལན་གདབ་པར་བགྱིའོ། །དེའི་ཚེ་བྱང་ཆུབ་སེམས་དཔའ་དྲན་པའི་བློ་ཞེས་བྱ་བ་འཁོར་དེ་ཉིད་དུ་འདུས་ཏེ་འདུག་པར་གྱུར་པ་དེས། བཅོམ་ལྡན་འདས་དེ་བཞིན་གཤེགས་པ་དཔལ་སྦས་དེ་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་བདག་སྟན་ལས་མི་ལྡང་ཞིང་། སྤྱོད་ལམ་འཁྲུག་པ་མ་མཆིས་པར་དེ་བཞིན་གཤེགས་པ་དབང་དུ་བགྱིས་ཏེ་དྲི་བ་འདི་བས་པར་ལན་གདབ་པར་བགྱིའོ། །སྐྱེས་བུ་དམ་པ་དེས་སེང་གེའི་སྒྲ་བསྒྲགས་མ་ཐག་ཏུ། དེ་ནས་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །སྣང་བ་ཆེན་པོ་ཡང་འཇིག་རྟེན་དུ་བྱུང་བར་གྱུར་ཏོ། །སྣང་བ་དེས་བསྐུལ་ནས་ས་བླ་བའི་ལྷ་ནས་བཟུང་སྟེ། གནས་གཙང་མའི་རིས་ཀྱི་བར་གྱི་ལྷ་རྣམས་འདུས་སོ། །དགེ་སློང་དང་། དགེ་སློང་མ་དང་།
དགེ་བསྙེན་དང་། དགེ་བསྙེན་མ་སྟོང་ཕྲག་མང་པོ་ཡང་འདིར་འདུས་པར་གྱུར་ཏོ། །དེ་ལྟར་སྐད་ཅིག་ཐང་ཅིག་ཡུད་ཙམ་དེ་ལ་དཔག་ཚད་སྟོང་ཕྲག་བཅུར་འཁོར་གྱི་དཀྱིལ་འཁོར་གཅིག་ཏུ་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་དྲན་པའི་བློས་འཁོར་

འདུས་པ་ཆེན་པོ་དེ་མཐོང་ནས། རང་གི་བསོད་ནམས་ཀྱི་སྟོབས་དང་། ཡེ་ཤེས་ཀྱི་སྟོབས་དང་། དྲན་པའི་སྟོབས་དང་། གཟུངས་ཀྱི་སྟོབས་དང་། སྤོབས་པའི་སྟོབས་དང་། མི་འཇིགས་པའི་སྟོབས་དང་། སངས་རྒྱས་ཀྱི་བྱིན་གྱི་རླབས་
དང་སྟོབས་ཀྱིས་དྲི་བ་ཆེད་དུ་མཛད་པ་བྱེ་བ་ཕྲག་བརྒྱ་པོ་དེ་ཀུན་དུ་བཟུང་ནས། བཅོམ་ལྡན་འདས་དེའི་སྤྱན་སྔར་ཐམས་ཅད་དང་ལྡན་པའི་འཁོར་དེའི་མདུན་དུ་དྲི་བ་བྱེ་བ་ཕྲག་བརྒྱ་པོ་རེ་རེ་ལ་བསྟན་པ་བྱེ་བ་ཕྲག་བརྒྱས་ལན་བཏབ་སྟེ། ཕྱད་པ་དང་། རྒྱུན་ཆད་པ་མེད་པ་དང་།
རྗེས་སུ་ལྡན་པ་དང་། རྗེས་སུ་འབྲེལ་བ་དང་། ཚིག་དང་ཡིག་འབྲུར་ལྡན་པ་དང་། ཤིན་ཏུ་ངེས་པའི་ཚིག་རྣམས་ཀྱིས་དེའི་ལན་བཏབ་པ་དང་། འཁོར་དེ་ལས་སྲོག་ཆགས་སྟོང་ཕྲག་དྲུག་ཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་
སེམས་དཔའ་སྟོང་ཕྲག་བཞི་བཅུ་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དཔལ་སྦས་དེས་དེ་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་ཞེས་བྱ་བའི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
དབྱངས་ཀྱིས་གོ་བར་གྱུར་ཏོ། །ས་བླ་པའི་ལྷ་ནས་བཟུང་སྟེ། གནས་གཙང་མའི་རིས་ཀྱི་བར་གྱི་ལྷ་རྣམས་ཀྱིས། ཀྱེ་མ་གང་ཤེས་རབ་དང་། སྤོབས་པ་དང་། བསྟན་པ་འདི་འདྲ་བ་འདི་ནི་བྱང་ཆུབ་སེམས་དཔའ་ཤེས་རབ་བརྩེགས་སུ་འགྱུར་རོ་ཞེས་སྒྲ་ཕྱུང་སྟེ་སྒྲ་
བསྒྲགས་སོ། །དེ་ལྟར་ན་དེ་ཤེས་རབ་བརྩེགས་ཤེས་རབ་བརྩེགས་ཞེས་མིང་དུ་བཏགས་སོ། །རིགས་ཀྱི་བུ་དེའི་ཚེ་དེའི་དུས་ན་བྱང་ཆུབ་སེམས་དཔའ་དྲན་པའི་བློ་ཞེས་བྱ་བར་གྱུར་པ་དེ་གཞན་ཡིན་པ་སྙམ་དུ་དོགས་ཤིང་ཡིད་གཉིས་སུ་གྱུར་ཏམ། ཐེ་ཚོམ་ཟ་བ་ལྟ་ན་
ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཤེས་རབ་བརྩེགས་འདི་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་དྲན་པའི་བློ་ཞེས་བྱ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དོན་འདི་རྒྱ་ཆེར་བརྗོད་པའི་ཕྱིར་དེའི་ཚེ་ཚིགས་སུ་བཅད་

པ་འདི་དག་གསུངས་སོ། །མ་མོས་གྱུར་ནས་མ་ཐོས་ཆོས་རྣམས་རྟག་ཉན་པ། །ཤེས་རབ་རྩ་བ་སེམས་ཅན་དག་པས་ཐོབ་ནས་ནི། །འཛིན་ཅིང་བྱམས་པས་འགྲོ་བ་དག་ལ་སྟོན་བྱེད་པ། །ཤེས་རབ་ལས་ཏེ་བྱང་ཆུབ་སེམས་དཔའ་རྟག་ཏུ་བྱེད། །དཔྱོད་པའི་དྲན་
པ་ཆེན་པོ་འདི་ནི་ཤེས་རབ་རྩ། །དཔྱད་ནས་འགྲོ་ལ་རྟག་ཏུ་སྟོན་པ་ཤེས་རབ་ལས། །གལ་ཏེ་ཚུལ་བཞིན་རབ་སྲེག་འདི་ནི་ཤེས་རབ་རྩ། །དེ་ལ་སྦྱར་ནས་སྟོན་པ་ཤེས་རབ་ལས་ཞེས་བྱ། །ཡང་དག་སྦྱོར་ལ་གལ་ཏེ་སྦྱོར་བ་ཤེས་རབ་རྩ། །སྒྲུབ་ཅིང་སྟོན་པར་བྱེད་པ་དེ་
ནི་ཤེས་རབ་ལས། །སེམས་ལ་ངེས་པར་སེམས་རྙེད་འདི་ནི་ཤེས་རབ་རྩ། །ངེས་པར་སེམས་པ་སྤྱོད་པ་འདི་ནི་ཤེས་རབ་ལས། །གཅིག་པུ་དབེན་པར་སྤྱོད་པ་འདི་ནི་ཤེས་རབ་རྩ། །ལུས་དང་སེམས་ལ་ངའི་མེད་འདི་ནི་ཤེས་རབ་ལས། །གང་ཚེ་འདུ་འཛིའི་འཇིགས་
གྱུར་དེ་ནི་ཤེས་རབ་རྩ། །གཅིག་པུ་བགྲོད་པའི་ལམ་ལ་རིག་བྱེད་ཤེས་རབ་ལས། །ཞི་གནས་ལྷག་མཐོང་དགའ་བ་འདི་ནི་ཤེས་རབ་རྩ། །རིག་དང་རྣམ་པར་གྲོལ་ལ་རེག་འདི་ཤེས་རབ་ལས། །རྣམ་ཐར་གསུམ་ལ་མངོན་པར་བརྩོན་པ་ཤེས་རབ་རྩ། །རིག་གསུམ་མངོན་
དུ་བྱེད་པ་ཤེས་རབ་ལས་ཞེས་བྱ། །གལ་ཏེ་དྲན་པ་ཉེར་གཞག་སྒོམ་པ་ཤེས་རབ་རྩ། །དྲན་མེད་ཡིད་ལ་བྱེད་མེད་དེ་ནི་ཤེས་རབ་ལས། །སྡིག་པ་སྤངས་ཏེ་དགེ་བ་སྤྱོད་པ་ཤེས་རབ་རྩ། །ཆོས་འདི་རང་བཞིན་སྤངས་པ་དེ་ནི་ཤེས་རབ་ལས། །གལ་ཏེ་རྫུ་འཕྲུལ་རྐང་པ་བཞི་
སྒོམ་ཤེས་རབ་རྩ། །ལྷུན་གྲུབ་རྫུ་འཕྲུལ་ཐོབ་པ་འདི་ནི་ཤེས་རབ་ལས། །དད་པས་མོས་ནས་ཡིད་ཆེས་པ་ནི་ཤེས་རབ་རྩ། །ཆགས་པ་ཐམས་ཅད་གང་བྲལ་དེ་ནི་ཤེས་རབ་ལས། །ཞུམ་མེད་རྟག་ཏུ་བརྩོན་པ་དེ་ནི་ཤེས་རབ་རྩ། །ལུས་དང་ཡིད་སེམས་རབ་སྦྱངས་དེ་ནི་ཤེས་རབ་ལས། །
དྲན་དང་ཤེས་བཞིན་མཁས་པ་འདི་ནི་ཤེས་རབ་རྩ། །གནས་རྣམས་ཀུན་ལ་མི་གནས་འདི་ནི་ཤེས་རབ་ལས། །རང་གིས་ཏིང་འཛིན་རྟོགས་པ་དེ་ནི་ཤེས་རབ་རྩ། །རང་བཞིན་མཉམ་པར་བཞག་ལ་སྤྱོད་འདི་ཤེས་རབ་ལས། །གལ་ཏེ་ཤེས་རབ་དབང་པོར་རབ་གནས་ཤེས་རབ་རྩ། །

འགྲོ་བའི་དབང་པོ་ཐམས་ཅད་ཤེས་པ་ཤེས་རབ་ལས། །སྟོབས་ལྔ་པོ་དག་རྗེས་སུ་སྒོམ་པ་ཤེས་རབ་རྩ། །བཅོམ་ནས་ཡེ་ཤེས་ཐོབ་པ་དེ་ནི་ཤེས་རབ་ལས། །བྱང་ཆུབ་ཡན་ལག་རྗེས་འཐུན་བཟོད་པ་ཤེས་རབ་རྩ། །ཆོས་ཀུན་རྗེས་སུ་གང་རྟོགས་དེ་ནི་ཤེས་རབ་ལས། །
ལམ་གྱི་ཡན་ལག་སྐྱེ་གནས་སྒྲུབ་པ་ཤེས་རབ་རྩ། །ཆོས་དང་ཆོས་མིན་སྤོང་བ་འདི་ནི་ཤེས་རབ་ལས། །སྡུག་བསྔལ་རང་བཞིན་མཁས་པ་འདི་ནི་ཤེས་རབ་རྩ། །གལ་ཏེ་འགོག་པ་མངོན་སུམ་བྱེད་འདི་ཤེས་རབ་ལས། །དྲང་བའི་དོན་གྱི་མདོ་སྡེ་ཚིག་འཛིན་ཤེས་རབ་རྩ། །ངེས་པའི་
དོན་ལ་རྟོན་པ་འདི་ནི་ཤེས་རབ་ལས། །ཐམས་ཅད་ཐོས་པས་མི་ངོམས་འདི་ནི་ཤེས་རབ་རྩ། །དོན་ལ་རབ་ཏུ་རྟོན་པ་འདི་ནི་ཤེས་རབ་ལས། །རྣམ་པར་ཤེས་ལ་ཚུལ་བཞིན་ཚོལ་བ་ཤེས་རབ་རྩ། །ཡེ་ཤེས་ལ་ནི་རབ་ཏུ་རྟོན་འདི་ཤེས་རབ་ལས། །གང་ཟག་གང་ལའང་མ་
ཞེན་འདི་ནི་ཤེས་རབ་རྩ། །གལ་ཏེ་ཆོས་ཉིད་རྟོན་པ་འདི་ནི་ཤེས་རབ་ལས། །འདུ་བྱེད་མི་རྟག་ཡོངས་སུ་ཚོལ་བ་ཤེས་རབ་རྩ། །གལ་ཏེ་གཟོད་ནས་མ་སྐྱེས་ཤེས་པ་ཤེས་རབ་ལས། །འདུ་བྱེད་སྡུག་བསྔལ་མོས་པར་བྱེད་པ་ཤེས་རབ་རྩ། །ཆོས་རྣམས་འདུས་མ་བྱས་སུ་མོས་པ་ཤེས་
རབ་ལས། །ཆོས་རྣམས་བདག་མེད་ཐེ་ཚོམ་མེད་པ་ཤེས་རབ་རྩ། །སེམས་ཅན་འདི་དག་གདོད་ནས་དག་དེ་ཤེས་རབ་ལས། །མྱ་ངན་འདས་ལ་ཞི་བར་མོས་པ་ཤེས་རབ་རྩ། །འགྲོ་བ་ཤིན་ཏུ་མྱ་ངན་འདས་འདི་ཤེས་རབ་ལས། །དོན་གྱི་རྗེས་སུ་རྟོགས་པ་འདི་ནི་ཤེས་རབ་རྩ། །དོན་རྟོགས་སོ་སོ་
ཡང་དག་རིག་པ་ཤེས་རབ་ལས། །གལ་ཏེ་ཆོས་ཉིད་མོས་པར་བྱེད་པ་ཤེས་རབ་རྩ། །ཆོས་ལ་སོ་སོ་ཡང་དག་རིག་པ་ཤེས་རབ་ལས། །སྒྲ་རྣམས་ཀུན་ལ་སྐྲག་པ་མེད་འདི་ཤེས་རབ་རྩ། །ངེས་ཚིག་སོ་སོ་ཡང་དག་རིག་འདི་ཤེས་རབ་ལས། །སྐྲག་མེད་བློ་ཡིས་སྤོབས་པ་དེ་ནི་ཤེས་རབ་རྩ། །
སྤོབས་པ་སོ་སོ་ཡང་དག་རིག་པ་ཤེས་རབ་ལས། །གལ་ཏེ་སེམས་ཅན་གནས་པའི་བྱམས་དེ་ཤེས་རབ་རྩ། །དམིགས་པ་མེད་པའི་བྱམས་ཐོབ་དེ་ནི་ཤེས་རབ་ལས། །བདག་དང་གཞན་ལ་སྙིང་རྗེ་འདི་ནི་ཤེས་རབ་རྩ། །གང་གིས་གཉི་གར་མི་རྟོག་དེ་ནི་ཤེས་རབ་ལས། །མཆོག་ཏུ་

དགའ་ལ་དགའ་བ་ཐོབ་འདི་ཤེས་རབ་རྩ། །དགའ་མེད་གདུང་བ་མེད་པ་འདི་ནི་ཤེས་རབ་ལས། །བྱམས་དང་གནོད་པར་མི་བྱེད་དེ་ནི་ཤེས་རབ་རྩ། །གཉིས་ལས་སེམས་གྲོལ་ཐོབ་པ་དེ་ནི་ཤེས་རབ་ལས། །བློ་གྲོས་ལྡན་པ་སངས་རྒྱས་དྲན་འདི་ཤེས་རབ་རྩ། །གང་ཚེ་ཆོས་སྐུ་རྗེས་སུ་
རྟོགས་པ་ཤེས་རབ་ལས། །ཆོས་ཀྱང་རྟག་ཏུ་དྲན་པ་འདི་ནི་ཤེས་རབ་རྩ། །ཆོས་རྣམས་འདོད་ཆགས་བྲལ་བར་རྟོགས་པ་ཤེས་རབ་ལས། །ཡོན་ཏན་ལས་ནི་དགེ་འདུན་དྲན་དེ་ཤེས་རབ་རྩ། །དེ་ཡང་འདུས་མ་བྱས་སུ་རྟོགས་པ་ཤེས་རབ་ལས། །བློ་ལྡན་གཏོང་བ་དྲན་པ་དེ་ནི་ཤེས་རབ་རྩ། །
གང་ཕྱིར་ཉོན་མོངས་ཀུན་འདོར་འདི་ནི་ཤེས་རབ་ལས། །ཚུལ་ཁྲིམས་ཤིན་ཏུ་དག་པ་དྲན་འདི་ཤེས་རབ་རྩ། །ཚུལ་ཁྲིམས་ཟག་པ་མེད་ལ་གནས་ནི་ཤེས་རབ་ལས། །ཆེ་བའི་བདག་ཉིད་ལྷ་དྲན་འདི་ནི་ཤེས་རབ་རྩ། །དག་ནས་དག་པ་དྲན་པ་འདི་ནི་ཤེས་རབ་ལས། །གང་ཕྱིར་བསྒྲིམས་
ཏེ་ཐོས་པ་ཚོལ་བ་ཤེས་རབ་རྩ། །གཞན་དག་ལས་ནི་ཕྱིས་མི་ཚོལ་བ་ཤེས་རབ་ལས། །ལེགས་པར་བྱེད་པའི་ལས་བྱེད་འདི་ནི་ཤེས་རབ་རྩ། །ལས་ཕྱིས་མངོན་པར་འདུ་མི་བྱེད་པ་ཤེས་རབ་ལས། །ང་རྒྱལ་མེད་ཅིང་འདུད་པར་བྱེད་པ་ཤེས་རབ་རྩ། །ཡེ་ཤེས་ཆེ་བའི་བདག་ཉིད་ཐོབ་
འདི་ཤེས་རབ་ལས། །བདག་གི་དོན་ལ་བརྩོན་འགྱུར་འདི་ནི་ཤེས་རབ་རྩ། །སེམས་ཅན་རྣམས་ཀྱི་དོན་བྱེད་འདི་ནི་ཤེས་རབ་ལས། །གལ་ཏེ་ཆོས་ཀྱི་ཕུང་པོ་འཛིན་བྱེད་ཤེས་རབ་རྩ། །སེམས་ཅན་སྤྱོད་པ་རྗེས་སུ་རྟོགས་བྱེད་ཤེས་རབ་ལས། །གཞན་གྱི་བློ་ལ་ཡང་དག་ཐོབ་བྱེད་ཤེས་
རབ་རྩ། །སེམས་ཅན་ཐེག་གསུམ་ངེས་འབྱུང་བྱེད་པ་ཤེས་རབ་ལས། །བློ་གྲོས་ལྡན་པ་སྦྱིན་དང་སྙན་པར་སྨྲ་བ་དང་། །དོན་བྱེད་སེམས་ཅན་ཡོངས་སུ་སྨིན་བྱེད་ཤེས་རབ་རྩ། །གལ་ཏེ་དོན་འཐུན་པ་ཡིས་སངས་རྒྱས་ཡོན་ཏན་འགོད། །འདི་ནི་སྐྱེས་བུ་དམ་པ་རྣམས་ཀྱི་ཤེས་
རབ་ལས། །སྲིད་པ་ཀུན་དུ་འབར་ཤེས་སྐྲག་པ་ཤེས་རབ་རྩ། །མི་སྐྱེ་བཟོད་པ་ཐོབ་པ་དེ་ནི་ཤེས་རབ་ལས། །ཕྱིར་མི་ལྡོག་པའི་ས་འདི་ཤེས་རབ་རྩ་བ་སྟེ། །དབང་བསྐུར་དེ་ཡི་ས་ཐོབ་དེ་ནི་ཤེས་རབ་ལས། །གལ་ཏེ་བྱང་ཆུབ་ཤིང་དྲུང་འདུག་པ་ཤེས་རབ་རྩ། །ཀུན་

མཁྱེན་ཡེ་ཤེས་རེག་པ་འདི་ནི་ཤེས་རབ་ལས། །བྱང་ཆུབ་སེམས་འདི་ཤེས་རབ་རྩ་བ་ཞེས་ཀྱང་བྱ། །སེམས་ནི་གནས་སུ་གང་བྱེད་དེ་ནི་ཤེས་རབ་ལས། །གང་དག་བྱང་ཆུབ་སེམས་ལ་རྟག་གནས་མི་གཡོ་བ། །དེ་དག་ཤེས་རབ་ཀྱིས་ནི་རྟག་ཏུ་ལས་བྱ་བྱེད། །རྩ་
བ་འདི་འདྲ་བྱང་ཆུབ་སྤྱོད་པ་མཆོག་གི་སེམས། །སངས་རྒྱས་སྟོབས་དང་དེ་བཞིན་སོ་སོ་ཡང་དག་རིག །དེ་ཡི་བསྔགས་པ་བསྐལ་པ་བྱེ་བ་མང་བརྗོད་ཀྱང་། །སངས་རྒྱས་ཡོན་ཏན་མཐའ་མར་ཐུག་པར་འགྱུར་བ་མེད། །གང་དག་འདས་པའི་བདེ་གཤེགས་དེ་བཞིན་ད་ལྟར་
བྱུང་། །གང་དག་མ་འོངས་པ་དང་ཕྱོགས་བཅུའི་ཐུབ་དབང་པོ། །ཚད་མེད་པ་ལ་བསྙེན་བཀུར་ཚད་མེད་བྱེད་འདོད་གང་། །དེ་ནི་མ་མྱོས་བྱང་ཆུབ་སེམས་ལ་དགའ་བ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོས་འདི་སྐད་ཅེས་གསོལ་
ཏོ། །བཅོམ་ལྡན་འདས། ཀྱེ་མ་ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཤིན་ཏུ་རྣམ་པར་ངེས་ཤིང་། ཡི་གེ་རྣམས་ཀྱིས་བསྟན་པ་མཐའ་ཡས་པ། དོན་གྱིས་འཇུག་པ་མཐའ་ཡས་པ། མི་བརྩོན་པ་རྣམས་ཀྱིས་
འཇུག་པར་དཀའ་བ། རྟེན་ཅིང་འབྲེལ་བར་འབྱུང་བ་རྗེས་སུ་རྟོགས་པས་ཟབ་པ། གཉིས་ལ་སྤྱོད་པ་རྣམས་ཀྱིས་འཚལ་བར་དཀའ་བ། སྐྱེ་མཆེད་དྲུག་ལ་བརྟེན་པ་རྣམས་ཀྱིས་མཐོང་བར་དཀའ་བ། ཐེག་པ་དམན་པ་ལ་མོས་པ་རྣམས་ཀྱིས་ཡིད་ཆེས་པར་དཀའ་བ། ཉན་
ཐོས་དང་རང་སངས་རྒྱས་རྣམས་ཀྱིས་མ་ལགས་པ། བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ། ཆོས་ཐམས་ཅད་ཀྱི་ཕྱག་རྒྱ། ཆོས་ཀྱི་དབྱིངས་མཉམ་པ་ཉིད་པས་ཕྱེ་བ་མ་མཆིས་པ། ནམ་མཁའི་མཚན་ཉིད་ཀྱི་སླད་དུ་འགྱུར་བ་མ་མཆིས་པ། ཤིན་ཏུ་འདས་པས་ཀུན་
གཞི་མ་མཆིས་པ། སེམས་ཅན་ཐམས་ཅད་ཀྱི་སྤྱོད་པ་རབ་ཏུ་ཤེས་པ། རྒྱུ་ཐམས་ཅད་ཡོངས་སུ་ཤེས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་སྣང་བ། ངེས་པར་འབྱུང་བ་རྣམས་ཀྱི་འབྱུང་བ། དགེ་བའི་རྩ་བ་རྣམས་ཀྱི་ཐབས། སོ་སོ་ཡང་དག་པར་རིག་པ་ཐོབ་པ་

རྣམས་ཀྱིས་རྣམ་པར་དབྱེ་བར་བགྱི་བ། མངོན་པར་ཤེས་པ་ཐོབ་པ་རྣམས་ཀྱིས་རྣམ་པར་དགྲོལ་བར་བགྱི་བ། ཚུལ་གཅིག་ལ་གནས་པ་རྣམས་ཀྱིས་མཉམ་པ་ཉིད་དུ་རྟོགས་པར་བགྱི་བ། སྣ་ཚོགས་མ་མཆིས་པར་སྤྱོད་པ་རྣམས་ལ་ཁྱད་པར་མ་མཆིས་པ། ནམ་མཁའ་
དང་མཉམ་པ་ཉིད་པས་མཉམ་པ། གཉེན་པོ་མ་མཆིས་པས་མཉམ་པ་མ་མཆིས་པ། སངས་རྒྱས་ཐམས་ཅད་དང་མཉམ་པ་ཉིད་པས་མི་མཉམ་པ་དང་མཉམ་པ། འགོག་པས་རབ་ཏུ་ཕྱེ་བས་གཉིས་དང་བྲལ་བ། ཡི་གེ་རྣམས་ཀྱིས་དཔྱད་དུ་མ་མཆིས་པ། དོན་
གྱི་ཡང་དག་པར་བཞག་པ། སྒྲས་རྣམ་པར་རིག་པར་བགྱི་བ། དོན་དམ་པར་བརྗོད་དུ་མ་མཆིས་པ། ཀུན་རྫོབ་ཏུ་མཆིས་པ། དཀོན་མཆོག་གསུམ་གྱི་མཐུ་དང་ལྡན་པ། ཐེག་པ་གསུམ་ལ་རྣམ་པར་རྟོག་པ། རྣམ་པར་ཐར་པའི་སྒོ་གསུམ་པོ་དག་རབ་ཏུ་སྟོན་པ།
ཁམས་གསུམ་པ་ལས་ཤིན་ཏུ་འདས་པ། རིག་པ་གསུམ་པོ་དག་ཁོང་དུ་ཆུད་པར་བགྱིད་པ། རྡོ་རྗེ་ལྟ་བུའི་ཏིང་ངེ་འཛིན་བསྐྱེད་པ། ཆོས་ཐམས་ཅད་ཀྱི་གནས། སངས་རྒྱས་ཀྱི་ཡེ་ཤེས་ལས་བྱུང་བ། སེམས་ཅན་ཐམས་ཅད་ཀྱི་ཉེ་བར་འཚོ་བ། སངས་རྒྱས་
ཐམས་ཅད་ཀྱིས་གསལ་བར་མཛད་པ་ནི་ངོ་མཚར་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་དག་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་བསྟན་པ་ཚད་མ་མཆིས་པ་འདི་ལ་མོས་པར་བགྱིད་པ་དང་། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ཡང་སེམས་སྐྱེད་པར་བགྱིད་པ་དང་། དམ་པའི་ཆོས་ཡོངས་སུ་གཟུང་བའི་སླད་དུ་མདོ་སྡེ་འདི་ལྟ་བུ་འདི་མཉན་པར་བགྱིད་པ་དང་། མོས་པར་བགྱིད་པ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བགྱིད་པ་དང་། གཞན་དག་
ལ་ཡང་རྒྱས་པར་ཡང་དག་པར་སྟོན་པར་བགྱིད་པ་དེ་དག་ནི་བཅོམ་ལྡན་འདས་བསོད་ནམས་མང་དུ་སྐྱེད་པ་ལགས་སོ། །དེ་བཞིན་གཤེགས་པ་རྣམས་ལ་ཡང་བྱས་པ་གཟོ་བ་དང་། བྱས་པ་འཚལ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་

ཀྱི་བུ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། དེ་དག་བསོད་ནམས་མང་དུ་སྐྱེད་པར་འགྱུར་རོ། །རིགས་ཀྱི་བུ་གང་གིས་དེ་བཞིན་གཤེགས་པའི་སྤྱན་གྱིས་གཟིགས་པའི་སངས་རྒྱས་ཀྱི་ཞིང་ཐམས་ཅད་རིན་པོ་ཆེ་ཐམས་ཅད་ཀྱིས་རབ་ཏུ་བཀང་སྟེ། དེ་
བཞིན་གཤེགས་པ་རྣམས་ལ་སྦྱིན་པ་བྱིན་པ་བས་གང་གིས་དམ་པའི་ཆོས་ཡོངས་སུ་བཟུང་བ་དང་། དཀོན་མཆོག་གསུམ་རྒྱུན་མི་འཆད་པར་བྱ་བའི་ཕྱིར་མདོ་སྡེ་འདི་ལྟ་བུ་འདི་ཉན་ཏམ། མོས་སམ། འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། སྟོན་ཏམ།
གཞན་དག་ལ་ཡང་རྒྱས་པར་ཡང་དག་པར་སྟོན་ཏམ། བསྒོམ་པའི་རྣལ་འབྱོར་ལ་བརྩོན་པར་གནས་ན་འདི་ནི་དེ་བས་བསོད་ནམས་ཆེས་མང་དུ་སྐྱེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་སྤྱན་གྱིས་ཞིང་གང་ངས་མཐོང་
བ། །རིན་ཆེན་བཀང་སྟེ་དེ་བཞིན་གཤེགས་བྱིན་ཡང་། །འདི་ལྟ་བུ་ཡི་ཆོས་འདི་མ་ཐོས་ན། །དེ་ནི་བསོད་ནམས་ཆུང་ཞེས་ང་སྨྲའོ། །གང་གིས་དམ་པའི་དོན་ལྡན་ཕྲ་ཟབ་པ། །མདོ་སྡེ་བཟང་པོ་འདི་ནི་ཐོས་གྱུར་ན། །ཀུན་དུ་འཛིན་ཅིང་བཟུང་ནས་ཀློག་བྱེད་པ། །འདི་ནི་
དེ་བས་བསོད་ནམས་མཆོག་ཏུ་འཕགས། །འདི་ལྟར་རྒྱལ་བའི་ཆོས་ཀྱིས་ཉེར་གནས་ཤིང་། །ཆོས་ཀྱིས་ངེས་པར་འབྱུང་གི་ཟང་ཟིང་མིན། །དེ་བས་གང་ཞིག་བདེ་གཤེགས་ཆོས་འཛིན་པ། །དེ་ནི་སངས་རྒྱས་ཀུན་ལ་བྱས་པ་གཟོ། །དེ་ནས་བཅོམ་ལྡན་འདས་ཀྱིས་བྱང་
ཆུབ་སེམས་དཔའི་ཚོགས་ཆེན་པོ་དེ་ལ་བཀའ་སྩལ་པ། སྐྱེས་བུ་དམ་པ་དག་ཁྱེད་ཀྱི་ནང་ནས་ང་ཡོངས་སུ་མྱ་ངན་ལས་འདས་པའི་ཕྱིན་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར་ཆོས་ཀྱི་རྣམ་གྲངས་འདི་རྒྱས་པར་བྱ་བ་དང་། སངས་རྒྱས་བཅོམ་ལྡན་འདས་རྣམས་ཀྱི་བྱང་
ཆུབ་འདི་ཡོངས་སུ་བསྲུང་བར་སུ་སྤྲོ། དེ་ནས་བྱང་ཆུབ་སེམས་དཔའི་འཁོར་དེའི་ནང་ནས་བྱང་ཆུབ་སེམས་དཔའ་བྱེ་བ་ཕྲག་དྲུག་ཅུས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་བདག་ཅག་རྣམས་དེ་བཞིན་གཤེགས་པའི་བྱང་ཆུབ་བསྐལ་པ་གྲངས་མ་མཆིས་པར་བསྒྲུབས་

པ་འདི་འཛིན་པ་དང་། སླད་མའི་ཚེ་སླད་མའི་དུས་དེ་ན་ཡང་རྒྱས་པར་བགྱིད་པར་སྤྲོའོ། །བཅོམ་ལྡན་འདས་འོན་གྱིས་ཀྱང་ཅི་ནས་དེའི་དུས་ན་སྐྱེ་བོ་མང་པོ་གནས་པར་འགྱུར་བ། དགེ་བའི་རྩ་བ་བསྐྲུན་པའི་སེམས་ཅན་དེ་དག་གི་རྣ་བར་གྲགས་པར་འགྱུར་བར་དེ་བཞིན་གཤེགས་
པས་ཆོས་ཀྱི་རྣམ་གྲངས་འདི་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྫོགས་པའི་སངས་རྒྱས་བདེན་པ་གསུང་། །བདེན་པའི་ཆོས་ལ་རབ་ཏུ་གནས། །བྱིན་གྱི་རླབས་ཀྱིས་དེ་དག་ལ། །མདོ་སྡེ་འདི་
ནི་བྱིན་གྱིས་བརླབས། །སྙིང་རྗེ་ཆེན་པོའི་གོ་ཆ་བགོས། །བྱམས་པ་ཆེན་པོར་རབ་ཏུ་གནས། །ཀུན་ལ་བྱམས་པ་ཉིད་ཀྱི་ཕྱིར། །མདོ་སྡེ་འདི་ནི་བྱིན་གྱིས་བརླབས། །བསོད་ནམས་ཚོགས་ནི་ཕུན་སུམ་ཚོགས། །ཡེ་ཤེས་ཚོགས་ཀྱིས་བྱུང་གྱུར་པ། །ཚོགས་རྣམས་ཀུན་
དང་ལྡན་པ་ཡིས། །མདོ་སྡེ་འདི་ནི་བྱིན་གྱིས་བརླབས། །བདུད་རྣམས་ཐམས་ཅད་ངེས་འཇོམས་ལ། སྨྲ་བ་ཐམས་ཅད་རབ་འདུལ་ཞིང་། །ལྟ་བ་ཐམས་ཅད་རྒྱུན་གཅོད་པ། །མདོ་སྡེ་འདི་ནི་བྱིན་གྱིས་བརླབས། །འཇིག་རྟེན་སྐྱོང་དང་བརྒྱ་བྱིན་དང་། །དེ་བཞིན་ལྷ་མ་ཡིན་
རྣམས་དང་། །ལྷ་དང་དྲི་ཟ་ཀླུ་དག་ཀྱང་། །ངས་ནི་བྱིན་གྱིས་བརླབ་པ་བྱས། །ས་དང་དེ་བཞིན་བར་སྣང་ལ། །ལྷ་རྣམས་མང་པོ་གང་འཁོར་བ། །སངས་རྒྱས་རྣམས་ཀྱི་བྱིན་རླབས་ཀྱིས། །ཚུལ་འདི་རབ་ཏུ་འཛིན་པར་འགྱུར། །འཁོར་འདི་བསྲུང་བར་བྱ་བའི་ཕྱིར། །ཚངས་
པའི་གནས་པ་རྣམས་ལྡན་ཞིང་། །བདེན་པ་བཞི་ཡིས་བརྒྱན་གྱུར་པ། །མདོ་སྡེ་འདི་ནི་བྱིན་གྱིས་བརླབས། །ནམ་མཁའ་གཟུགས་ཅན་བྱེད་ཀྱང་སྲིད། །གཟུགས་ནི་གཟུགས་མེད་བྱེད་སྲིད་ཀྱི། །སངས་རྒྱས་རྣམས་ཀྱི་བྱིན་རླབས་ནི། །རྣམ་པར་དཀྲུགས་པར་མི་ནུས་
སོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དག་གིས་མགྲིན་གཅིག་ཏུ་ཚིགས་སུ་བཅད་པ་འདི་གཉིས་གསོལ་ཏོ། །དེ་བཞིན་གཤེགས་པ་བདག་ཅག་རྣམས། །མདོ་འདི་ཀུན་དུ་བསྲུང་སླད་དུ། །རྩ་ལག་དང་ནི་བཅས་རྣམས་ཀྱིས། །བསྲུང་བ་བཟང་པོ་

བགྱི་བར་འཚལ། །མཁས་པ་བྱང་ཆུབ་བློ་གྲོས་ཀྱིས། །གང་དག་འཛིན་པར་བགྱིད་པ་དག །དེ་དག་ལ་ནི་ཕྱོགས་བཞི་ནས། །རྟག་པར་ཀུན་དུ་བསྲུང་བ་བགྱི། །དེ་ནས་བཅོམ་ལྡན་འདས་ལ། ལྷའི་དབང་པོ་བརྒྱ་བྱིན་གྱིས་ཚིགས་སུ་བཅད་པ་འདི་
གཉིས་གསོལ་ཏོ། །བདག་ནི་བཅོམ་ལྡན་མཛད་པ་གཟོ། །འདྲེན་པ་ཆོས་ཀྱི་དབང་བདག་ལགས། །མགོན་པོ་མདོ་སྡེ་མཆོག་འདི་ལས། །སངས་རྒྱས་འབྱུང་བ་རབ་ཏུ་བསྟན། །སངས་རྒྱས་རྣམས་ནི་ཐམས་ཅད་ཀྱི། །མཛད་པ་གཟོ་བ་བསྲུང་བགྱིད་ཅིང་། །འདི་འདྲའི་
མདོ་དང་དེ་བཞིན་དུ། །མདོ་སྡེ་འཛིན་པ་བསྲུང་བར་འཚལ། །དེ་ནས་བཅོམ་ལྡན་འདས་ལ་མི་མཇེད་ཀྱི་བདག་པོ་ཚངས་པས་ཚིགས་སུ་བཅད་པ་འདི་གཉིས་གསོལ་ཏོ། །བསམ་གཏན་གང་དང་ཚད་མེད་དང་། །ཐེག་པ་ཀུན་གྱིས་འབྱུང་བ་གང་། །དེ་དག་དོན་ལྡན་ཟབ་མོ་
ཡི། །མདོ་སྡེ་འདི་ལས་ངེས་པར་འབྱུང་། །བདག་ནི་ཚངས་པའི་བདེ་བོར་ཏེ། །གང་ན་ཚུལ་འདི་འཆད་པར་ནི། །མཉན་པའི་སླད་དང་དེ་བཞིན་དུ། །བསྲུང་བའི་སླད་དུ་མཆི་བར་བགྱི། །དེ་ནས་བཅོམ་ལྡན་འདས་ལ་ལྷའི་བུ་རབ་དགའ་ལྡན་གྱིས་ཚིགས་སུ་བཅད་པ་འདི་
གཉིས་གསོལ་ཏོ། །གང་ཞིག་སངས་རྒྱས་གསུངས་པ་ཡི། །མདོ་སྡེ་འདི་ནི་འཛིན་འགྱུར་བ། །སྐྱེ་བ་གཅིག་གིས་རབ་གནས་ནས། །དགའ་ལྡན་རྣམས་སུ་གནས་པར་འགྱུར། །མགོན་པོ་བདག་ནི་ལྷ་ཡུལ་བའི། །ཕུན་སུམ་ཚོགས་པ་བོར་ནས་སུ། །ཚུལ་འདི་རབ་ཏུ་
སྟོན་བགྱིད་ཅིང་། །འཛམ་བུ་གླིང་དུ་གནས་པར་སྤྲོ། །དེ་ནས་བཅོམ་ལྡན་འདས་ལ་བདུད་ཀྱི་བུ་དེད་དཔོན་གྱིས་ཚིགས་སུ་བཅད་པ་འདི་གཉིས་གསོལ་ཏོ། །གང་ཞིག་གདོན་དང་ལྡན་པ་ཡི། །མདོ་སྡེ་འདི་ནི་འཛིན་འགྱུར་བ། །དེ་དག་བདུད་ལས་འདི་སྤངས་པས། །བདུད་
ཀྱི་དབང་དུ་མི་མཆིའོ། །དེ་བཞིན་གཤེགས་པ་བདག་ཀྱང་ནི། །མདོ་འདི་ཀུན་དུ་བསྲུང་སླད་དུ། །ཅི་ནས་ཀྱང་ནི་རྒྱས་འགྱུར་བར། །བརྩོན་བགྱིད་ཅིང་འདུན་བར་བགྱིད། །དེ་ནས་བཅོམ་ལྡན་འདས་ལ་བདུད་སྡིག་ཅན་གྱིས་ཚིགས་སུ་བཅད་པ་འདི་གཉིས་གསོལ་ཏོ། །

རྣམ་པར་འདྲེན་པ་གང་ཞིག་ནི། །ཉོན་མོངས་ཐམས་ཅད་ཚར་གཅོད་པ། །འདི་འཛིན་བགྱིད་པ་དེ་དག་ལ། །བདག་ནི་སྒྲིབ་པར་མི་བགྱིད་དོ། །མདོ་སྡེ་མཆོག་ནི་འབྱུང་བ་དེར། །བདུད་ཀྱི་གོ་སྐབས་མ་མཆིས་སོ། །མགོན་པོས་གསུངས་པ་དྲན་བགྱིད་པ། །དེ་ལ་བསྲུང་བ་བགྱིད་པར་འཚལ། །
དེ་ནས་བཅོམ་ལྡན་འདས་ལ་ལྷའི་བུ་མཚམས་རབ་ཀྱིས་ཚིགས་སུ་བཅད་པ་འདི་གཉིས་གསོལ་ཏོ། །སངས་རྒྱས་ཀུན་གྱི་བྱང་ཆུབ་ནི། །མདོ་སྡེ་འདི་ལས་རབ་བཤད་པས། །གང་ཞིག་མདོ་སྡེ་འདི་འཛིན་པ། །དེས་ནི་སངས་རྒྱས་ཀུན་ལ་མཆོད། །མགོན་པོ་བདག་ནི་མདོ་སྡེ་འདི། །
ལྷ་ནི་བྱེ་བ་རྣམས་ལ་བཤད། །གང་དག་གུས་པར་ཉན་པ་དག །བྱང་ཆུབ་ཡང་དག་འཛིན་དུ་སྩལ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་ཚིགས་སུ་བཅད་པ་འདི་གཉིས་གསོལ་ཏོ། །མི་གང་བྱང་ཆུབ་རབ་ཞུགས་ཏེ། །དམ་ཆོས་ཡོངས་སུ་བསྲུང་སླད་
དུ། །བདག་ཀྱང་སྟོང་བགྱིད་དེ་དག་ནི། །གསོལ་བ་མ་བཏབ་བཤེས་གཉེན་ལགས། །བདག་ནི་དགའ་ལྡན་མཆིས་ནས་སུ། །སངས་རྒྱས་ཀྱི་ནི་བྱིན་རླབས་ཀྱིས། །འདི་ལྟ་བུ་ཡི་མདོ་སྡེ་འདི། །ཤིན་ཏུ་རྒྱས་པར་བགྱིད་པར་འཚལ། །དེ་ནས་བཅོམ་ལྡན་འདས་ལ་ཚེ་དང་ལྡན་
པ་འོད་སྲུང་ཆེན་པོས་ཚིགས་སུ་བཅད་པ་འདི་གཉིས་གསོལ་ཏོ། །སྟོན་པ་ལས་ནི་བདག་གིས་སུ། །མདོ་སྡེ་སྟོང་ཕྲག་མང་ཐོས་ཀྱང་། །བདག་གིས་མདོ་སྡེ་འདི་ལྟ་བུ། །སྔོན་ཆད་ནམ་ཡང་མ་ཐོས་སོ། །མངོན་སུམ་དུ་ནི་མདོ་སྡེ་འདི། །བླངས་ཤིང་ཀུན་དུ་བཟུང་ལགས་ཏེ། །བྱང་
ཆུབ་སེམས་དཔའི་ཆེད་དུ་ནི། །ཤིན་ཏུ་རྒྱས་པར་བགྱི་བར་འཚལ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་དང་། ལྷའི་བུ་དེ་དག་དང་། བྱང་ཆུབ་སེམས་དཔའ་དེ་དག་དང་། ཉན་ཐོས་ཆེན་པོ་དེ་དག་ལ་ལེགས་སོ་ཞེས་བྱ་བ་གནང་
སྟེ། སྐྱེས་བུ་དམ་པ་དག་ཁྱེད་ཀྱིས་དམ་པའི་ཆོས་ཡོངས་སུ་བཟུང་བའི་ཕྱིར་འདི་ལྟ་བུའི་སེང་གེའི་སྒྲ་བསྒྲགས་པ་ལེགས་སོ་ལེགས་སོ། །སྐྱེས་བུ་དམ་པ་དག་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་བྱའོ། །སེམས་ཅན་གང་དག་ཐེག་པ་ཆེན་པོ་ལ་ཞུགས་པ་བཟོད་པ་མ་ཐོབ་པ་དེ་དག་

སངས་རྒྱས་བཅོམ་ལྡན་འདས་རྣམས་ཀྱི་བྱིན་གྱི་རླབས་ཀྱིས་ཆོས་ཀྱི་རྣམ་གྲངས་འདི་ཀུན་དུ་བཟུང་སྟེ། བཟུང་ནས་ཀྱང་ཀུན་ཆུབ་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་མ་ཐོབ་ཀྱི་བར་དུ་དེ་བཞིན་གཤེགས་པ་བདུན་པ་ལས་འདའ་
བར་མི་འགྱུར་རོ། །གང་དག་ཉན་ཐོས་ཀྱི་ཐེག་པ་པར་འགྱུར་བ་དེ་དག་ནི་དེ་བཞིན་གཤེགས་པ་བྱམས་པའི་ཉན་ཐོས་འདུས་པ་དང་པོའི་གྲངས་སུ་ཆུད་པར་འགྱུར་རོ། །རང་སངས་རྒྱས་ཀྱི་ཐེག་པ་པ་གང་དག་ཆོས་ཀྱི་རྣམ་གྲངས་འདི་འཛིན་པར་འགྱུར་བ་དེ་དག་ནི་ང་ཡོངས་སུ་མྱ་ངན་ལས་
འདས་པའི་འོག་ཏུ་གཞན་ལས་མ་ཐོས་པར་རང་བྱང་ཆུབ་འཐོབ་པར་འགྱུར་རོ། །གཟུངས་ཀྱི་དབང་ཕྱུག་གི་རྒྱལ་པོས་ཡོངས་སུ་ཞུས་པ་བསྟན་པའི་ཆོས་ཀྱི་རྣམ་གྲངས་འདི་བཅོམ་ལྡན་འདས་ཀྱིས་བསྟན་པ་ན་སེམས་ཅན་དཔག་ཏུ་མེད་པ་དག་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་
དཔའ་གྲངས་མེད་པ་དག་ནི་ཕྱིར་མི་ལྡོག་པ་ལ་རབ་ཏུ་གནས་སོ། །འཇིག་རྟེན་གྱི་ཁམས་གྲངས་མེད་པ་དག་ནི་རྣམ་པ་དྲུག་ཏུ་གཡོས་སོ། །སྣང་བ་ཆེན་པོས་ཀྱང་གསལ་བར་གྱུར་ཏོ། །མེ་ཏོག་སིལ་མས་ཀྱང་གཏོར་བར་གྱུར་ཏོ། །ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་
ཆུབ་སེམས་དཔའ་དེ་དག་གིས་བཅོམ་ལྡན་འདས་དང་། ཆོས་ཀྱི་རྣམ་གྲངས་འདི་ལ་མཆོད་པའི་ལས་ཀྱི་ཕྱིར་ཐམས་ཅད་དང་ལྡན་པའི་འཁོར་གྱི་ཁྱམས་རིན་པོ་ཆེ་བཀོད་པ་རིན་པོ་ཆེ་སྣ་བདུན་གྱི་མེ་ཏོག་གིས་རྣམ་པར་བཀྲ་བར་བྱས་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ། །བཅོམ་ལྡན་འདས་
བདག་ཅག་གིས་རྙེད་པར་བགྱི་བ་ལེགས་པར་རྙེད་དོ། །གང་གི་སླད་དུ་བདག་ཅག་གིས་རྣམ་པར་ངེས་པའི་ཆོས་ཀྱི་རྣམ་གྲངས་འདི་ལྟ་བུ་ཐོས་པས་བདག་ཅག་འདིར་མཆིས་པ་དོན་མ་མཆིས་པ་མ་ལགས་སོ། །ཀྱེ་མ་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེ་ཡོངས་སུ་བསྐྱང་དུ་གསོལ།
འཛམ་བུའི་གླིང་གི་མི་རྣམས་ལ་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་གྱུར་ཅིག །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་གང་དག་མདོ་སྡེ་འདི་ལྟ་བུ་འཛིན་པ་དེ་དག་ཀྱང་དུས་རིང་པོར་ཡུན་དུ་ཚེ་ཡོངས་སུ་སྐྱོང་བར་གྱུར་ཅིག །སེམས་ཅན་

ཐམས་ཅད་ལ་ཡང་ཕན་པ་བྱེད་པར་གྱུར་ཅིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོས་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་ཇི་ཙམ་དུ་རྣམ་པར་ངེས་པའི་ཆོས་ཀྱི་རྣམ་གྲངས་འདི་དོན་བཟང་བ་དང་། ཚིག་འབྲུ་བཟང་བ་དང་།
ལེགས་པར་བརྒྱན་པ་དང་། བྱང་ཆུབ་སེམས་དཔའ་ཐམས་ཅད་མཆོག་ཏུ་དགའ་བ་སྐྱེད་པ་དང་། བདུད་དང་ཕ་རོལ་རྒོལ་བ་ཐམས་ཅད་འཇོམས་པ་དང་། ཆོས་ཐམས་ཅད་ལ་མཁས་པར་འཛིན་པ་དང་། སེམས་ཅན་ཐམས་ཅད་ཀྱི་བསམ་པ་ཚིམ་པར་བགྱིད་པ་དང་། ཐེག་པ་ཐམས་
ཅད་ཀྱི་ངེས་པར་འབྱུང་བའི་ཕྱིར་འབྱུང་བ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ལ་འཇུག་པའི་རྗེས་སུ་སོང་བ་དང་། ཐམས་ཅད་ཀྱིས་བརྩོན་པར་བགྱི་བ་ལས་གཏི་མུག་མ་མཆིས་པར་སྟོན་པ་ངོ་མཚར་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས།
འདི་ཇི་ལྟར་གཟུང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་གཟུངས་ཀྱི་དབང་ཕྱུག་གི་རྒྱལ་པོ་ཁྱོད་ཀྱིས་ཆོས་ཀྱི་རྣམ་གྲངས་འདི་དེ་བཞིན་གཤེགས་པའི་
སྙིང་རྗེ་ཆེན་པོ་བསྟན་པ་ཞེས་བྱ་བར་ཟུང་ཤིག །དེ་བཞིན་གཤེགས་པའི་ལས་དོན་ཡོད་པ་ཉན་པ་ལུང་བསྟན་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་དང་། བྱང་ཆུབ་
སེམས་དཔའི་ཚོགས་དང་། ཉན་ཐོས་ཀྱི་ཚོགས་དེ་དག་ཐམས་ཅད་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དེ་བཞིན་གཤེགས་པའི་སྙིང་
རྗེ་ཆེན་པོ་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།

༄༅༅། རྒྱ་གར་སྐད་དུ། ཨཱརྱ་ག་ག་ན་གཉྫ་པ་རི་པྲྀཙྪ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ནམ་མཁའ་མཛོད་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་
ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པའི་སྤྱོད་ཡུལ་རིན་པོ་ཆེ་བཀོད་པའི་འཁོར་གྱི་ཁྱམས་དེ་བཞིན་གཤེགས་པའི་གནས། བསོད་ནམས་ཆེན་པོའི་རྒྱན་གྱིས་ཚོགས་བསགས་པ། སྤྱོད་པ་ཆེན་པོའི་རྒྱུ་འཐུན་
པ། སངས་རྒྱས་ཀྱི་ཆོས་ཐམས་ཅད་རྣམ་པར་སྨིན་པས་མངོན་པར་གྲུབ་པ། བྱང་ཆུབ་སེམས་དཔའ་སེམས་དཔའ་ཆེན་པོའི་གནས་མཐའ་ཡས་པ་ངེས་པར་བསྟན་པ། དེ་བཞིན་གཤེགས་པའི་རྣམ་པར་སྤྲུལ་པའི་བྱིན་གྱི་རླབས། མི་ཆགས་པའི་སྤྱོད་ཡུལ་གྱི་ཡེ་ཤེས་
ལ་འཇུག་པ། དགའ་བ་རྒྱ་ཆེན་པོ་རབ་ཏུ་སྐྱེད་པ། དྲན་པ་དང་། བློ་གྲོས་དང་། རྟོགས་པ་ལ་འཇུག་པ། ཀུན་ནས་མ་སྨད་པ། ཡེ་ཤེས་ཀྱིས་རྣམ་པར་དཔྱོད་པ། དེའི་རང་བཞིན་མ་ཡིན་པ་ལ་འཇུག་པ། ཕྱི་མའི་མཐའི་བསྐལ་པར་མངོན་དུ་བསྟོད་པ། ཡོན་ཏན་གྱི་ཚོགས་
ཐམས་ཅད་དཔག་ཏུ་མེད་པ་ན་བཞུགས་ཏེ། བཅོམ་ལྡན་འདས་ཆོས་ཐམས་ཅད་ཀྱི་མཉམ་པ་ཉིད་ནི་མངོན་པར་རྫོགས་པར་སངས་རྒྱས། ཆོས་ཀྱི་འཁོར་ལོ་ནི་རབ་ཏུ་བསྐོར། སློབ་མ་ཤིན་ཏུ་དུལ་བ་མཐའ་ཡས་པའི་ཚོགས་ནི་མངའ། ཆོས་ཐམས་ཅད་ལ་ནི་མངའ་བརྙེས། སེམས་
ཅན་ཐམས་ཅད་ཀྱི་བསམ་པའི་བྱ་བ་ནི་ཤིན་ཏུ་མཁྱེན། དབང་པོ་དམ་པའི་ཕ་རོལ་དུ་ནི་བྱོན། སེམས་ཅན་ཐམས་ཅད་ཀྱི་ཉོན་མོངས་པའི་བག་ཆགས་ཀྱིས་མཚམས་སྦྱོར་བ་ཡང་དག་པར་འཇོམས་པ་ལ་ནི་མཁས་ཤིང་། སངས་རྒྱས་ཀྱི་མཛད་པ་ལྷུན་གྱིས་གྲུབ་པ་ནི་རྒྱུན་མ་བཅད་དོ། །
དགེ་སློང་ས་ཡ་ཕྲག་དྲུག་གི་དགེ་སློང་གི་དགེ་འདུན་ཆེན་པོ་དང་ཐབས་ཅིག་སྟེ། ཐམས་ཅད་ཀྱང་ཅང་ཤེས་ཀྱི་སེམས་དང་ལྡན་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། ཉོན་མོངས་པ་ཐམས་ཅད་ཀྱི་བག་ཆགས་ཀྱིས་མཚམས་སྦྱོར་བ་ཡང་དག་པར་འཇོམས་

པ་ལ་བརྩོན་པ། དེ་བཞིན་གཤེགས་པ་ཆོས་ཀྱི་རྒྱལ་པོའི་སྲས་ཆོས་ཟབ་མོ་ལ་གནས་པར་མཁས་པ། དམིགས་སུ་མེད་པའི་ཆོས་ལས་ངེས་པར་བྱུང་བ། སྤྱོད་ལམ་མཛེས་པ་ཕུན་སུམ་ཚོགས་པ། སྦྱིན་པའི་གནས་ཆེན་པོར་གྱུར་པ། དེ་བཞིན་གཤེགས་པའི་བཀའ་ལ་ཤིན་
ཏུ་ཞུགས་པ་ཤ་སྟག་གོ། །སངས་རྒྱས་ཀྱི་ཞིང་སྣ་ཚོགས་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་གྲངས་མེད་བསམ་གྱིས་མི་ཁྱབ་མཚུངས་པ་མེད་པ་གཞལ་དུ་མེད་པ་ཚད་མེད་པ་བརྗོད་དུ་མེད་པའི་ཡང་བརྗོད་དུ་མེད་པའི་བྱང་ཆུབ་སེམས་དཔའི་ཚོགས་ཆེན་
པོ་དང་ཡང་ཐབས་ཅིག་སྟེ། ཐམས་ཅད་ཀྱང་སེམས་ཀྱི་སྐད་ཅིག་གིས་སངས་རྒྱས་ཀྱི་ཞིང་མཐའ་ཡས་པར་འགྲོ་བ་ལ་མཁས་པ། དེ་བཞིན་གཤེགས་པ་ཐམས་ཅད་ལ་མཆོད་པ་དང་། རིམ་གྲོ་བྱ་བ་ལ་མཁས་པ། ཆོས་ཉན་པ་ལ་མི་ངོམས་པར་ཡང་དག་པར་ཚོལ་བ། རྟག་ཏུ་
རྒྱུན་མི་ཆད་པར་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་ལ་བརྩོན་པ། ཐབས་དང་ཤེས་རབ་དམ་པའི་ཕ་རོལ་ཏུ་ཕྱིན་པ། སྒྲིབ་པ་མེད་པའི་རྣམ་པར་ཐར་པ་ལ་རབ་ཏུ་གནས་པ། རྟོག་པ་དང་། རྣམ་པར་རྟོག་པ་དང་། སྤྲོས་པ་ཐམས་ཅད་ལས་ཡང་དག་པར་འདས་པ།
ཐམས་ཅད་མཁྱེན་པའི་ཡེ་ཤེས་ལ་ཉེ་བར་གྱུར་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་གློག་གི་ལྷ་ཞེས་བྱ་བ་དང་། བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་ཞེས་བྱ་བ་དང་། བྱང་ཆུབ་སེམས་དཔའ་རྣམ་པར་སྣང་མཛད་སྙིང་པོ་ཞེས་བྱ་བ་དང་། བྱང་
ཆུབ་སེམས་དཔའ་རྣམ་པར་གནོན་པ་དཔའ་བོ་ཞེས་བྱ་བ་དང་། བྱང་ཆུབ་སེམས་དཔའ་ཡིད་གཉིས་ཡང་དག་པར་འཇོམས་པ་ཞེས་བྱ་བ་དང་། བྱང་ཆུབ་སེམས་དཔའ་རྣམ་པར་བསྒྲགས་ལྡན་ཞེས་བྱ་བ་དང་། བྱང་ཆུབ་སེམས་དཔའ་རྣམ་པར་ལྟ་བའི་མིག་ཅེས་བྱ་བ་དང་། བྱང་ཆུབ་
སེམས་དཔའ་མུན་པ་དང་བྲལ་བ་ཞེས་བྱ་བ་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་ཚད་མེད་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད། དཔག་གིས་མི་ལང་བརྗོད་དུ་མེད་པའི་ཡང་བརྗོད་དུ་མེད་པ་དག་དང་

ཡང་ཐབས་ཅིག་གོ། །དེ་ནས་བཅོམ་ལྡན་འདས་འདུས་པ་ཆེན་པོའི་ལེའུ་ཞེས་བྱ་བའི་ཆོས་ཀྱི་རྣམ་གྲངས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་རབ་ཏུ་སྟོན་ཏེ་འདུས་པ་ཆེན་པོའི་ལེའུའི་ཆོས་ཀྱི་རྣམ་གྲངས་འདི་བཤད་པ་ན། ཐམས་ཅད་དང་ལྡན་
པའི་འཁོར་དེ་ནམ་མཁའི་དཀྱིལ་ན་འཁོད་ཅིང་བཀོད་པ་ཆེན་པོའི་ཁང་པ་བརྩེགས་པའི་ནང་ན་བདག་འདུག་པ་སྙམ་དུ་སེམས་སོ། །ཁང་པ་བརྩེགས་པ་དེ་དག་གི་བཀོད་པ་ཉིད་སེམས་ཅན་རྣམས་ཀྱི་མིག་སྔར་སྣང་བར་གྱུར་ཏེ། ཁང་པ་བརྩེགས་པ་ན་འཁོད་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་དང་། གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟའི་འཁོར་དེ་དག་ཐམས་ཅད་མ་གཏོགས་པར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གཟུགས་སུ་སྣང་བ་ལྷག་མ་གཞན་ཐམས་
ཅད་མེད་པར་གྱུར་ཏེ། ཐམས་ཅད་ཀྱང་ནམ་མཁའ་ལྟ་བུར་གྱུར་པ་སྙམ་དུ་ཤེས་སོ། །འདི་ལྟ་སྟེ་དཔེར་ན། བསྐལ་པས་ཤིན་ཏུ་བསྲེགས་ཏེ་ནམ་མཁའ་བཞིན་དུ་གྱུར་པ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གཟུགས་སུ་སྣང་བ་གང་ཡང་མིག་སྔར་སྣང་
བར་མི་འགྱུར་བ་དེ་བཞིན་དུ། དེའི་ཚེ་ན་གང་གཟུགས་སུ་སྣང་བ་རྣམས་སེམས་ཅན་དག་གི་མིག་སྔར་མི་སྣང་བར་གྱུར་ཏོ། །འདི་ལྟ་སྟེ་དཔེར་ན། དེ་བཞིན་གཤེགས་པ་རིན་པོ་ཆེ་བཀོད་པ་གཅིག་པའི་འཇིག་རྟེན་གྱི་ཁམས་བཀོད་པ་ཆེན་པོ་ཞེས་བྱ་བ་ན་བྱང་ཆུབ་སེམས་དཔའ་དེ་
དག་གི་ཁང་པ་བརྩེགས་པ་ཡོངས་སུ་ལོངས་སྤྱོད་པ་དེ་འདྲ་བའི་ཁང་པ་བརྩེགས་པ་དེ་ན་སྣང་ངོ་། །ནམ་མཁའ་ལ་ཁང་པ་བརྩེགས་པ་འདུག་པ་དེ་དག་མ་གཏོགས་པར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སའི་སྟེང་དང་། གཞིའི་བར་དུ་ཐམས་ཅད་ཀྱང་
མི་སྣང་བ་སྙམ་དུ་རབ་ཏུ་ཤེས་ཏེ། རིའི་རྒྱལ་པོ་རི་རབ་དང་། ཁོར་ཡུག་གི་རི་དང་། ཁོར་ཡུག་གི་རི་ཆེན་པོ་དག་སེམས་ཅན་གང་གི་མིག་སྔར་ཡང་མི་སྣང་བར་གྱུར་ཏོ། །གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་

འཁོར་རྣམས་ཀྱང་མི་སྣང་སྟེ། གཞན་དུ་ན་ནམ་མཁའི་དཀྱིལ་ན་གནས་པའི་ཁང་པ་བརྩེགས་པ་དེ་དག་ཉིད་དུ་ཤེས་ཤིང་། བཅོམ་ལྡན་འདས་ཀྱི་སེང་གེའི་ཁྲི་ནི་འཕང་དུ་དཔག་ཚད་ཁྲིར་འཕགས་པར་རབ་ཏུ་སྣང་ངོ་། །གང་ལ་བཅོམ་ལྡན་འདས་བཞུགས་པའི་སེང་གེའི་
ཁྲི་དེའི་འོད་ཀྱིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་ཁྱབ་པར་གྱུར་ཏེ། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་ཉི་མ་དང་། ཟླ་བ་དང་། སྐར་མ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བའི་འོད་དེ་དག་ཐམས་
ཅད་ཀྱང་མོག་མོག་པོར་བྱས་པར་གྱུར་ཏོ། །དེ་ནས་བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས་འདི་ལྟ་བུའི་ཆོ་འཕྲུལ་ངོ་མཚར་དང་རྨད་དུ་བྱུང་བ་མཐོང་ནས་ཕན་ཚུན་དུ་སྨྲ་བ་ཁང་པ་བརྩེགས་པ་འདིའི་བཀོད་པ་ཅི་འདྲ་བ་དེ་ནི་བདག་ཅག་གི་ཚེའི་ཚད་བསྐལ་པར་འདུག་པར་
གྱུར་ཀྱང་བདག་ཅག་གིས་རྒྱ་ཆེར་རྣམ་པར་དབྱེ་བ་བསྟན་པར་སླ་བ་མ་ཡིན་ཏེ། དེ་ཙམ་དུ་ཁང་པ་བརྩེགས་པ་འདི་དག་གི་ཡོན་ཏན་བཀོད་པ་ནི་ཚད་མེད་དོ་ཞེས་འཛེར་ཏོ། །དེ་ནས་བཅོམ་ལྡན་འདས་ཀྱི་མཐུས་གནས་བརྟན་ཤཱ་རིའི་བུ་ཁང་པ་བརྩེགས་པ་དེ་ནས་ལངས་ནས་ནམ་
མཁའ་ལ་འདུག་སྟེ། པུས་མོ་གཡས་པའི་ལྷ་ང་ས་ལ་བཏུད་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནམ་མཁའ་ལ་མཆིས་པའི་ཁང་པ་བརྩེགས་པ་འདི་མ་ལགས་པ་
གཞན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ནམ་མཁར་གྱུར་ཅིང་ནམ་མཁའི་རང་བཞིན་ཅན་དུ་གདའ་བ་འདི་སུའི་སྔ་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཁྱོད་ཀྱིས་ཁང་པ་བརྩེགས་པ་འདི་མཐོང་ངམ། གསོལ་པ།
བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཁྱོད་ཀྱིས་ཁང་པ་བརྩེགས་པ་འདི་དག་གི་བསྔགས་པ་ཡོངས་སུ་བརྗོད་པའི་མཐའ་ཤེས་པར་ནུས་སམ། གསོལ་པ། བཅོམ་ལྡན་འདས་བདག་གི་ཚེའི་ཚད་བས་པར་གྱུར་ཀྱང་ཁང་

པ་བརྩེགས་པ་འདི་དག་གིས་བསྔགས་པའི་མཐའ་རྟོགས་པར་མི་ནུས་སོ། །བཀའ་སྩལ་པ། ཤཱ་རིའི་བུ་ཇི་ལྟར་འཁོར་འདི་དག་ཐམས་ཅད་ནམ་མཁའ་ལ་སོང་ཞིང་ཁང་པ་བརྩེགས་པ་བཀོད་པ་ཆེན་པོར་ཞུགས་པར་སྣང་བ་བཞིན་དུ་བཀོད་པ་ཆེན་པོའི་འཇིག་རྟེན་གྱི་
ཁམས་ཀྱི་ཁང་པ་བརྩེགས་པ་དེ་ཡང་འདི་འདྲའོ། །གསོལ་པ། བཅོམ་ལྡན་འདས་བཀོད་པ་ཆེན་པོའི་འཇིག་རྟེན་གྱི་ཁམས་དེ་གང་གི་ཕྱོགས་ན་མཆིས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་ནི་འདི་ནས་ཤར་ཕྱོགས་སུ་སངས་རྒྱས་ཀྱི་ཞིང་བརྒྱད་ཀྱི་རྡུལ་ཕྲ་རབ་
ཀྱི་རྡུལ་གྱིས་ཡོངས་སུ་གང་བ་སྙེད་ཀྱི་སངས་རྒྱས་ཀྱི་ཞིང་རྣམས་འདས་པ་ན་བཀོད་པ་ཆེན་པོ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་རིན་པོ་ཆེ་བཀོད་པ་གཅིག་པ་ཞེས་བྱ་བ་ད་ལྟ་ན་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །ཤཱ་རིའི་བུ་བཀོད་པ་
ཆེན་པོའི་འཇིག་རྟེན་གྱི་ཁམས་དེ་ན། བྱང་ཆུབ་ཀྱི་སེམས་རིན་པོ་ཆེ་ལས་རིན་པོ་ཆེ་གཞན་མི་འབྱུང་ངོ་། །དེ་བས་ན་དེ་བཞིན་གཤེགས་པ་དེ་རིན་པོ་ཆེ་བཀོད་པ་གཅིག་པ་ཞེས་བྱའོ། །དེ་བཞིན་གཤེགས་པ་དེ་ཡང་། ནམ་བྱང་ཆུབ་སེམས་དཔའ་དེ་དག་ལ་ཆོས་འཆད་པ་དེ་ན། སེང་
གེའི་ཁྲི་དང་བཅས་ཏེ། ཏ་ལ་བྱེ་བ་ཕྲག་བརྒྱད་ཅུ་སྲིད་ཀྱི་ནམ་མཁའི་དཀྱིལ་དུ་མངོན་པར་འཕག་གོ། །བྱང་ཆུབ་སེམས་དཔའ་དེ་དག་ཀྱང་ཁང་པ་བརྩེགས་པ་བཀོད་པ་ཆེན་པོ་དེར། ནམ་མཁའི་དཀྱིལ་དུ་མངོན་པར་འཕགས་ནས། དེ་བཞིན་གཤེགས་པ་དེ་ལ་ཆོས་ཉན་ཏེ། དེ་
བཞིན་གཤེགས་པ་དེ་ཡང་ནམ་མཁའི་དཀྱིལ་ཡོངས་སུ་དག་པ་ཞེས་བྱ་བའི་ཆོས་ཀྱི་ཕྱག་རྒྱ་ཡང་དག་པར་རབ་ཏུ་སྟོན་ཏོ། །ཤཱ་རིའི་བུ་བཀོད་པ་ཆེན་པོའི་འཇིག་རྟེན་གྱི་ཁམས་དེ་ན། གང་བྱང་ཆུབ་སེམས་དཔའ་དེ་དག་གི་ཁང་པ་བརྩེགས་པའི་ཡོངས་སུ་ལོངས་སྤྱོད་པ་དེ་ནི་བསྐལ་
པར་ཡང་བརྗོད་མི་ནུས་སོ། །ཤཱ་རིའི་བུ་ཁྱོད་ཀྱིས་ངའི་སེང་གེའི་ཁྲི་འདི་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེ་བཀོད་པ་གཅིག་པ་དེའི་སེང་གེའི་

ཁྲི་ཡང་འདི་འདྲ་སྟེ། དེ་ལ་བཅོམ་ལྡན་འདས་དེ་བཞུགས་ནས། བྱང་ཆུབ་སེམས་དཔའ་དེ་དག་ལ་རྣམ་པ་སུམ་ཅུ་རྩ་གཉིས་ལ་འཇུག་པ། ནམ་མཁའི་དཀྱིལ་ཡོངས་སུ་དག་པའི་ཆོས་ཀྱི་ཕྱག་རྒྱ་ཡང་དག་པར་རབ་ཏུ་སྟོན་ཏོ། །རྣམ་པ་སུམ་ཅུ་རྩ་གཉིས་ལ་འཇུག་པ་ནམ་
མཁའི་དཀྱིལ་ཡོངས་སུ་དག་པའི་ཆོས་ཀྱི་ཕྱག་རྒྱ་དེ་གང་ཞེ་ན། འདི་ལྟ་སྟེ། དངོས་པོ་མེད་པས་ཆོས་ཐམས་ཅད་ཡོད་པ་དང་མེད་པ་དང་བྲལ་བ་དང་། རྣམ་པར་རིག་པའི་མཚན་ཉིད་པས་ཆོས་ཐམས་ཅད་དངོས་པོ་མེད་པ་དང་། སྣང་བར་གྱུར་པ་མེད་པས་ཆོས་ཐམས་ཅད་
རྣམ་པར་རིག་པ་མེད་པ་དང་། རྒྱུ་དང་དམིགས་པ་མེད་པས་ཆོས་ཐམས་ཅད་སྣང་བར་གྱུར་པ་མེད་པ་དང་། ཉེ་བར་ཞི་བའི་མཚན་ཉིད་པས་ཆོས་ཐམས་ཅད་དམིགས་པ་མེད་པ་དང་། གཉིས་སུ་མེད་པས་ཆོས་ཐམས་ཅད་ཉེ་བར་ཞི་བ་དང་། སོ་སོ་ཐ་དད་པ་མེད་པས་ཆོས་
ཐམས་ཅད་གཉིས་སུ་མེད་པ་དང་། ཚུལ་གཅིག་ལ་ཞུགས་པས་ཆོས་ཐམས་ཅད་ཐ་དད་པ་མེད་པ་དང་། ངོ་བོ་ཉིད་ཀྱི་མཚན་ཉིད་དང་བྲལ་བས་ཆོས་ཐམས་ཅད་ཚུལ་གཅིག་པ་དང་། དུས་གསུམ་ལས་ཡང་དག་པར་འདས་པས་ཆོས་ཐམས་ཅད་ངོ་བོ་ཉིད་མེད་པ་དང་། ཐམས་
ཅད་ལ་མི་གནས་པས་ཆོས་ཐམས་ཅད་ནམ་མཁའི་དཀྱིལ་དང་། ཐམས་ཅད་དུ་མི་སྣང་བས་ཆོས་ཐམས་ཅད་མི་གནས་པའི་སྒོ་དང་། ཡུལ་གྱི་ལམ་ལས་ཡང་དག་པར་འདས་པས་ཆོས་ཐམས་ཅད་སྣང་བ་མེད་པ་དང་། ནང་དང་ཕྱིའི་རྣམ་པར་དག་པས་ཆོས་ཐམས་ཅད་
ཡུལ་མེད་པ་དང་། རང་བཞིན་གྱིས་ཀུན་ནས་ཉོན་མོངས་པ་ཅན་མ་ཡིན་པས་ཆོས་ཐམས་ཅད་རྣམ་པར་དག་པ་དང་། ངོ་བོ་ཉིད་ཀྱིས་ཉེ་བར་ཞི་བས་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་དང་། སེམས་དང་ཡིད་དང་རྣམ་པར་ཤེས་པ་མེད་པས་ཆོས་ཐམས་
ཅད་ཉེ་བར་ཞི་བ་དང་། གཟོད་མ་ནས་མ་བྱུང་བས་ཆོས་ཐམས་ཅད་མཚན་ཉིད་མེད་པ་དང་། ངའི་བ་མེད་ཅིང་ཡོངས་སུ་འཛིན་པ་མེད་པས་ཆོས་ཐམས་ཅད་གཟོད་མ་ནས་མ་བྱུང་བ་དང་། བདག་པོ་མེད་པས་ཆོས་ཐམས་ཅད་ངའི་བ་མེད་ཅིང་ཡོངས་སུ་འཛིན་པ་མེད་པ་དང་རང་

བཞིན་གྱིས་བདག་མེད་པས་ཆོས་ཐམས་ཅད་བདག་པོ་མེད་པ་དང་། གཟོད་མ་ནས་རྣམ་པར་དག་པས་ཆོས་ཐམས་ཅད་རང་བཞིན་གྱིས་བདག་མེད་པ་དང་། ལྡོག་པ་མེད་པས་ཆོས་ཐམས་ཅད་གཟོད་མ་ནས་རྣམ་པར་དག་པ་དང་། སྒྱུ་མའི་མཚན་ཉིད་ཀྱིས་
རང་བཞིན་པས་ཆོས་ཐམས་ཅད་ལྡོག་པ་མེད་པ་དང་། དངོས་པོ་མེད་པས་ཆོས་ཐམས་ཅད་སྒྱུ་མ་ལྟ་བུ་དང་། མངོན་པར་འདུ་མི་བྱེད་པའི་མཚན་ཉིད་པས་ཆོས་ཐམས་ཅད་དངོས་པོ་མེད་པ་དང་། སེམས་དང་ལུས་དབེན་པས་ཆོས་ཐམས་ཅད་མངོན་པར་འདུས་མ་བྱས་པ་དང་།
མཚན་ཉིད་མེད་ཅིང་མཚན་ཉིད་ཀྱི་གཞིའི་མཚན་ཉིད་མེད་པས། ཆོས་ཐམས་ཅད་དབེན་པའི་མཚན་ཉིད་དང་། རང་གི་མཚན་ཉིད་ལས་མ་གཡོས་པས་ཆོས་ཐམས་ཅད་མཚན་ཉིད་མེད་པ་དང་། གནས་དམིགས་སུ་མེད་པས་ཆོས་ཐམས་ཅད་མ་གཡོས་པ་དང་། དམིགས་པ་
མེད་པའི་མཐའ་ལ་རབ་ཏུ་གནས་པས་ཆོས་ཐམས་ཅད་གནས་མེད་པ་དང་། ཀུན་གཞི་མེད་པས་ཆོས་ཐམས་ཅད་དམིགས་པ་མེད་པ་དང་། ཀུན་གཞི་དང་བྲལ་བས་ཆོས་ཐམས་ཅད་ཀུན་གཞི་མེད་པ་སྟེ། ཤཱ་རིའི་བུ་དེ་ལྟར་དེ་བཞིན་གཤེགས་པ་རིན་པོ་ཆེ་བཀོད་པ་གཅིག་པ་དེ་
བྱང་ཆུབ་སེམས་དཔའ་དེ་དག་ལ་རྣམ་པ་སུམ་ཅུ་རྩ་གཉིས་ལ་འཇུག་པ་ནམ་མཁའི་དཀྱིལ་ཡོངས་སུ་དག་པའི་ཆོས་ཀྱི་ཕྱག་རྒྱ་ཡང་དག་པར་རབ་ཏུ་སྟོན་ཏེ། དེ་ཐོས་པས་ཀྱང་བྱང་ཆུབ་སེམས་དཔའ་ཚད་མེད་པ་དག་མངོན་པར་ཤེས་པ་རྣམ་པར་དག་པས་རྣམ་པར་ཤེས་པ་ལ་བཟོད་
པ་ཆོས་ཐམས་ཅད་ལ་དབང་བྱེད་པ་རྗེས་སུ་འཐོབ་བོ། །ཡང་ཤཱ་རིའི་བུ་བཀོད་པ་ཆེན་པོའི་འཇིག་རྟེན་གྱི་ཁམས་དེའི་བྱང་ཆུབ་སེམས་དཔའ་རྣམས་ནི་སྦྱིན་པས་བརྒྱན་ཅིང་། བསྐལ་པ་གྲངས་མེད་པར་གཏོང་བའི་རྗེས་སུ་སོང་བ། ཚུལ་ཁྲིམས་ཀྱིས་བརྒྱན་ཅིང་བློ་ཤིན་ཏུ་བྱང་བ།
བཟོད་པས་བརྒྱན་ཅིང་སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་དང་ལྡན་པ། བརྩོན་འགྲུས་ཀྱིས་བརྒྱན་ཅིང་སངས་རྒྱས་ཀྱི་ཆོས་ཐམས་ཅད་ཀྱི་ཚོགས་བསགས་པ། བསམ་གཏན་གྱིས་བརྒྱན་ཅིང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་།

སྙོམས་པར་འཇུག་པ་དང་། མངོན་པར་ཤེས་པ་ཐམས་ཅད་ཀྱིས་རྣམ་པར་རྩེན་པ། ཤེས་རབ་ཀྱིས་བརྒྱན་ཅིང་བག་ཆགས་ཀྱིས་མཚམས་སྦྱོར་བའི་ཉོན་མོངས་པ་ཐམས་ཅད་དང་བྲལ་བ། བྱམས་པ་ཆེན་པོས་བརྒྱན་ཅིང་སེམས་ཅན་ཐམས་ཅད་ཡོངས་སུ་སྐྱོབ་པར་གནས་པ།
སྙིང་རྗེ་ཆེན་པོས་བརྒྱན་ཅིང་སེམས་ཅན་