Kinh tạng Tây Tạng (Kangyur Đại Học) — 057_མདོ་སྡེ།_པ

་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་གཉིས་པོ་འདི་དག་སྟེ། གཉིས་གང་ཞེ་ན། འདི་ལྟ་སྟེ། ཀུན་ཏུ་འཛིན་པ་དང་། འཛིན་པ་སྟེ། གཉིས་
པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་གསུམ་པོ་འདི་དག་སྟེ། གསུམ་གང་ཞེ་ན། འདི་ལྟ་སྟེ། དོན་ལ་མཁས་པ་དང་། ཚིག་འབྲུ་ལ་མཁས་པ་དང་། ངེས་པའི་ཚིག་ལ་མཁས་པ་སྟེ། གསུམ་པོ་འདི་དག་གོ། །
རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་བཞི་པོ་འདི་དག་སྟེ། བཞི་གང་ཞེ་ན། འདི་ལྟ་སྟེ། ཆགས་པ་མེད་པའི་ཚིག་དང་། རྩུབ་པ་མ་ཡིན་པའི་ཚིག་དང་། རབ་ཏུ་གྲོལ་བའི་ཚིག་དང་། བརྫུན་པ་མེད་པའི་ཚིག་སྟེ། བཞི་པོ་
འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་ལྔ་པོ་འདི་དག་སྟེ། ལྔ་གང་ཞེ་ན། འདི་ལྟ་སྟེ། ཐོས་པ་ཐམས་ཅད་ཀྱི་ནང་ནས་དོན་ལ་རྟོན་པ་དང་། ཡི་གེའི་ཚོགས་ཐམས་ཅད་ཀྱི་ནང་ནས་ཡེ་ཤེས་ལ་རྟོན་པ་དང་། མདོ་སྡེ་
ཐམས་ཅད་ཀྱི་ནང་ནས་ངེས་པའི་དོན་གྱི་མདོ་སྡེ་ལ་རྟོན་པ་དང་། གང་ཟག་གི་སྒྲ་ཐམས་ཅད་ལས་ཆོས་ཉིད་ལ་རྟོན་པ་དང་། འཇིག་རྟེན་ཐམས་ཅད་ལས་འཇིག་རྟེན་ལས་འདས་པ་ལ་རྟོན་པ་སྟེ། ལྔ་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་
གཟུངས་ཀྱི་རྒྱན་ནི་དྲུག་པོ་འདི་དག་སྟེ། དྲུག་གང་ཞེ་ན། འདི་ལྟ་སྟེ། ཇི་སྐད་སྨྲས་པ་དེ་བཞིན་དུ་བྱེད་པ་དང་། བདེན་པའི་རྗེས་སུ་འཐུན་པའི་ཚིག་རབ་ཏུ་ཐོབ་པ་དང་། ང་རྒྱལ་མེད་པས་གཟུང་བར་འོས་པའི་ཚིག་དང་། གཡོ་མེད་པས་བླང་བར་འོས་པའི་

ཚིག་དང་། སྙིང་རྗེ་ཆེན་པོ་ལ་སྦྱོར་བས་འབྲས་བུ་ཡོད་པའི་ཆོས་སྟོན་པ་དང་། སྣོད་ལ་མཁས་པས་ཕྱད་པར་ཆོས་སྟོན་པ་དང་། འཇིག་རྟེན་ཤེས་པས་དུས་སུ་ཆོས་སྟོན་པ་སྟེ་དྲུག་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་
རྒྱན་ནི་བདུན་པོ་འདི་དག་སྟེ། བདུན་གང་ཞེ་ན། འདི་ལྟ་སྟེ། མགྱོགས་པའི་སྤོབས་པ་དང་། ཤུགས་ཅན་གྱི་སྤོབས་པ་དང་། མྱུར་བའི་སྤོབས་པ་དང་། ཆགས་པ་མེད་པའི་སྤོབས་པ་དང་། རྒྱུན་ཆད་པ་མེད་པའི་སྤོབས་པ་དང་། འཁྲུལ་པ་མེད་
པའི་སྤོབས་པ་དང་། ཤིན་ཏུ་ངེས་པའི་ཚིག་གི་སྤོབས་པ་སྟེ། བདུན་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་བརྒྱད་པོ་འདི་དག་སྟེ། བརྒྱད་གང་ཞེ་ན། འདི་ལྟ་སྟེ། ལྷའི་སྐད་ཤེས་པ་དང་། ཀླུའི་སྐད་ཤེས་པ་
དང་། གནོད་སྦྱིན་གྱི་སྐད་ཤེས་པ་དང་། དྲི་ཟའི་སྐད་ཤེས་པ་དང་། ལྷ་མ་ཡིན་གྱི་སྐད་ཤེས་པ་དང་། ནམ་མཁའ་ལྡིང་གི་སྐད་ཤེས་པ་དང་། མི་འམ་ཅིའི་སྐད་ཤེས་པ་དང་། ལྟོ་འཕྱེ་ཆེན་པོའི་སྐད་ཤེས་པ་ནས་སེམས་ཅན་ཐམས་ཅད་ཀྱི་བར་གྱི་སྐད་
ཤེས་པ་སྟེ། བརྒྱད་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་དགུ་པོ་འདི་དག་སྟེ། དགུ་གང་ཞེ་ན། འདི་ལྟ་སྟེ། འཁོར་གྱི་ནང་དུ་སྤ་གོང་བ་མེད་པ་དང་། སྨྲ་བའི་ནང་དུ་ཞུམ་པ་མེད་པ་དང་། ཆོས་བཤད་པའི་
ནང་དུ་འཇིགས་པ་མེད་པ་དང་། འདྲི་བ་རྣམས་ལ་ངེས་པར་འབྱུང་བ་ཤེས་པ་དང་། མངོན་པའི་ང་རྒྱལ་ཅན་རྣམས་ལ་སྣྲེལ་ཞིར་བསྟན་པ་ཤེས་པ་དང་། ཡང་དག་པར་ཞུགས་པ་རྣམས་ལ་རྗེས་སུ་འཐུན་པ་བསྟན་པ་ཤེས་པ་དང་། ཁེངས་པ་དག་ལ་ལག་ན་
རྡོ་རྗེ་སྟོན་པ་དང་། མངོན་པར་ཆགས་པ་རྣམས་ལ་སྲེག་པའི་བསྐལ་པ་སྟོན་པ་དང་། ཡོངས་སུ་སྨིན་པ་རྣམས་ལ་ཐེག་པའི་རིམ་པ་ཇི་ལྟ་བ་བཞིན་དུ་སྟོན་པ་སྟེ། དགུ་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་བཅུ་པོ་འདི་

དག་སྟེ། བཅུ་གང་ཞེ་ན། འདི་ལྟ་སྟེ། དོགས་པ་ཐམས་ཅད་ལ་ཐེ་ཚོམ་མེད་པར་སྟོན་པ་ཤེས་པ་དང་། བློས་ཆོས་སྐྱེ་བའི་སྒོ་དང་། ཤེས་རབ་ཀྱི་སྣང་བ་གཞན་ལ་ལྷག་མ་མ་ལུས་པ་དང་། ཡི་གེ་བསྟན་པ་མི་ཟད་པ་དང་། དོན་བསྟན་པ་རྒྱུན་ཆད་པ་མེད་པ་
དང་། སངས་རྒྱས་ཀྱི་བསྔགས་པ་མཐའ་ཡས་པ་ཡང་དག་པར་རབ་ཏུ་བརྗོད་པ་དང་། ཀུན་ནས་ཉོན་མོངས་པའི་སྐྱོན་མུ་མེད་བར་བརྗོད་པ་དང་། རྣམ་པར་བྱང་བའི་བསྔགས་པ་ཚད་མེད་པ་སྟོན་པ་དང་། དབང་པོ་ཐམས་ཅད་ལ་གཞོལ་བར་འཇུག་པ་ཆགས་
པ་མེད་པ་དང་། སངས་རྒྱས་ཀྱིས་གནང་བའི་སོ་སོ་ཡང་དག་པར་རིག་པ་ལ་འཇུག་པ་ཤེས་པ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་རྒྱན་ནི་བཅུ་པོ་འདི་དག་གོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་ཚིགས་
སུ་བཅད་བ་འདི་དག་གསུངས་སོ། །གང་གིས་ཐེག་མཆོག་དམ་པ་འདི་མཛེས་པ། །བློ་གྲོས་ཆེན་པོ་རྣམས་ཀྱི་རྒྱན་བཞི་སྟེ། ཚུལ་ཁྲིམས་ཏིང་འཛིན་དེ་བཞིན་ཤེས་རབ་མཆོག །ཤིན་ཏུ་རྣམ་ངེས་དོན་དང་དེ་བཞིན་གཟུངས། །དེ་ནི་ལུས་ཅན་ཀུན་གྱི་ཡིད་
འོད་དགའ། །ལུས་དང་ངག་རྣམས་དང་ནི་ཡིད་དག་ཅིང་། དེ་ཡི་རྣམ་པར་ལྷུང་བ་ཀུན་ཆད་པ། །འདི་ནི་ཚུལ་ཁྲིམས་ལྡན་པའི་རྒྱན་ཡིན་ནོ། །ལྷ་མི་རྣམས་ཀྱི་ནང་དུ་མཁས་པ་སྐྱེ། །དེ་ཡི་སྨོན་ལམ་ཇི་ལྟར་འདོད་བཞིན་འགྲུབ། །ནན་ཏན་སྙིང་པོར་བྱེད་
དང་ཡང་དག་ལྡན། །འདི་ནི་ཚུལ་ཁྲིམས་དག་པའི་རྒྱན་ཡིན་ནོ། །དེ་ཡི་ཏིང་འཛིན་སྒྱུ་མ་མ་ཡིན་ཏེ། །ཤེས་རབ་རྣམ་གྲོལ་དེ་བཞིན་ཡེ་ཤེས་མཐོང་། དེ་ཡི་མྱ་ངན་ལས་འདས་པ་སྒྱུ་མ་མིན། །འདི་ནི་ཚུལ་ཁྲིམས་རྣམ་པར་དག་པའི་རྒྱན། །ཚུལ་ཁྲིམས་
སྐྱོན་མེད་ཚུལ་ཁྲིམས་རྣམ་པར་དག །ཚུལ་ཁྲིམས་སྲ་སྲེ་མ་ཡིན་འདྲེན་མ་མེད། །དེ་ཡི་རང་དགའ་དེ་བཞིན་རང་དབང་ཡིན། །འདི་ནི་གང་དག་ཚུལ་ཁྲིམས་དག་པའི་རྒྱན། །ཚུལ་ཁྲིམས་ཀྱིས་ནི་སྦྱིན་པ་དག་པར་འགྱུར། །བཟོད་པ་དག་ཅིང་དེ་བཞིན་

བརྩོན་འགྲུས་དག །བསམ་གཏན་དག་ཅིང་དེ་བཞིན་ཤེས་རབ་དག །ཐབས་དང་དེ་བཞིན་བག་ཡོད་དག་པ་ཡིན། །གཡོ་བ་མེད་ཅིང་བརྟན་ལ་ཤིན་ཏུ་གནས། །ས་མཆོག་ཐོབ་ཅིང་རྣལ་འབྱོར་རྣམ་འཕྲོ་མེད། །ལྷོད་པ་སྤངས་ཤིང་དགང་སླ་གསོ་ཡང་སླ། །
འདི་ནི་གང་དག་ཚུལ་ཁྲིམས་དག་པའི་རྒྱན། །བརྩོན་འགྲུས་འབར་ཞིང་ཚུལ་ཁྲིམས་བསྔགས་པ་སྟེ། །དེ་ཡི་སེམས་ནི་ནམ་ཡང་གདུང་མི་འགྱུར། །དེ་ལ་ཡིད་ལ་གཅགས་པར་འགྱུར་མེད་དེ། །འདི་ནི་གང་དག་ཚུལ་ཁྲིམས་དག་པའི་རྒྱན། །འཇིགས་པ་
མེད་ཅིང་མི་སྐྲག་མི་ཞུམ་སྟེ། །བསམ་པ་དེས་ཤིང་ཞི་ལ་ཡིད་རབ་ཞི། །འདིར་ནི་དེ་ཡི་བཅིངས་པ་ལྷོད་པར་གྱུར། །འདི་ནི་གང་དག་ཚུལ་ཁྲིམས་དག་པའི་རྒྱན། །གྲགས་ཆེན་སེམས་ནི་ལས་སུ་རུང་བ་ཡིན། །དེ་ནི་དུལ་ཞིང་དེ་བཞིན་ཅང་ཤེས་ཡིད། །འདིར་ནི་
རང་ལུས་མཚན་གྱིས་བརྒྱན་བྱེད་པ། །འདི་ནི་གང་དག་ཚུལ་ཁྲིམས་དག་པའི་རྒྱན། །དེ་ནི་ཇི་སྐད་སྨྲས་པ་དེ་བཞིན་བྱེད། །མཁས་པ་དེ་ནི་ངག་གི་རྒྱན་ཐོབ་སྟེ། །དེ་ནི་ཉོན་མོངས་མེད་པས་རྟག་སེམས་བརྒྱན། །འདི་ནི་གང་དག་ཚུལ་ཁྲིམས་དག་པའི་རྒྱན། །ཁྱད་
པར་འཕགས་པའི་ཞིང་ནི་ལེགས་པར་བརྒྱན། །ཐེག་པ་མཆོག་ལ་སེམས་ཅན་ཡོངས་སྨིན་བྱེད། །གང་ཕྱིར་སྡིག་པ་ཐམས་ཅད་མི་བྱེད་པས། །རང་གི་སྐྱེ་བ་ལེགས་པར་བརྒྱན་པར་བྱེད། །བྱང་ཆུབ་སྤྱོད་པ་རྟག་ཏུ་བརྒྱན་བྱེད་ཅིང་། །བྱང་ཆུབ་སྙིང་པོ་དམ་པ་བརྒྱན་
པར་བྱེད། །སྟོབས་དང་མི་འཇིགས་པ་དག་བརྒྱན་བྱེད་ཅིང་། །ང་རྒྱལ་མེད་པས་ཤེས་པ་ལེགས་པར་བརྒྱན། །དེ་ནི་བྱམས་པས་སེམས་ཅན་ཀུན་ཁྱབ་བྱེད། །མཁས་པ་རྟག་ཏུ་དྲང་དང་མཉེན་པ་ཡིན། །གཡོ་ནི་མེད་ཅིང་སྒྱུ་མེད་བཅོས་པ་མེད། །གཏི་མུག་
འདོད་སྡང་འཇིགས་པས་འགྲོ་མ་ཡིན། །དེ་ནི་སྒྲིབ་པ་ལྔ་པོ་རྣམ་པར་སེལ། །བག་ཡོད་གྱུར་ནས་རྗེས་སུ་དྲན་དྲུག་བསྒོམ། །བྱང་ཆུབ་ཡན་ལག་བདུན་དང་ལམ་སྒོམ་སྟེ། །མཐར་གྱིས་དགུ་དང་ཏིང་འཛིན་བསམ་གཏན་བྱེད། །རྣལ་འབྱོར་པ་ནི་ཞི་གནས་ངེས་

སེམས་སྦྱོར། །དེ་ནི་ཚུལ་བཞིན་དགེ་བ་ཆུད་མི་གསོན། །དབེན་དང་ཤིན་ཏུ་སྦྱངས་དང་སོ་སོར་རྟོག །འཕགས་པའི་རིགས་ལ་དབང་ནི་སྒྱུར་བ་ཡིན། །ཆོས་རྣམས་ལ་ནི་ཐེ་ཚོམ་མེད་པར་གྱུར། །དེ་ལ་ཀུན་ནས་ལྡང་དང་འགྱོད་པ་མེད། །དེ་
ལ་མ་རིག་གཏི་མུག་མུན་པ་མེད། །བདེན་པ་སྣང་བ་ཡོངས་སུ་ཤེས་པ་ཤེས། །ཚུལ་ཁྲིམས་དག་པ་དམིགས་པ་མེད་པ་སྟེ། །ཤེས་རབ་དམ་པ་བསམ་གཏན་ཏིང་འཛིན་དག །གཉིས་བསལ་ནས་ནི་རྣམ་པར་གྲོལ་བ་དག །ལྷག་པའི་ང་རྒྱལ་མེད་ཅིང་ཤེས་པ་
དག །དུས་གསུམ་དག་ལ་ཡེ་ཤེས་མཐོང་མི་ཆགས། །འདོད་ཆགས་བྲལ་བའི་ཤེས་པས་ཆོས་ཀྱང་དག །དག་ནས་འདིར་ནི་དེ་ལ་རློམ་སེམས་མེད། །འདི་ནི་གང་དག་ཤེས་རབ་ལྡན་པའི་རྒྱན། །ཤེས་རབ་ཀྱིས་ནི་སྦྱིན་པ་བརྒྱན་གྱུར་ཏེ། །རྨི་ལམ་སྒྱུ་མ་ཚོལ་
བ་མེད་པའི་ཕྱིར། །བདག་དང་བྱང་ཆུབ་དེ་བཞིན་སེམས་ཅན་རྣམས། །འཁོར་གསུམ་པོ་དག་དེ་དག་རྣམ་པར་སྦྱོང་། །ཤེས་རབ་ཀྱིས་ནི་ཚུལ་ཁྲིམས་བརྒྱན་གྱུར་ཏེ། །གཟུགས་བརྙན་སྒྱུ་མ་བྲག་ཅ་འདྲ་བའི་ཕྱིར། །ལུས་དང་ངག་རྣམས་དང་ནི་དེ་བཞིན་སེམས། །
འཁོར་གསུམ་པོ་དག་དེ་ནི་རྣམ་པར་སྦྱོང་། །ཤེས་རབ་ཀྱིས་ནི་བཟོད་པ་བརྒྱན་གྱུར་ཏེ། །མཁས་དང་མཐོ་མིན་དམའ་བར་འགྱུར་མིན་དང་། །དམ་པའི་ཆོས་སྐུ་རྟག་ཏུ་རབ་རྟོག་པ། །འཁོར་གསུམ་པོ་དག་དེ་ནི་རྣམ་པར་སྦྱོང་། །ཤེས་རབ་ཀྱིས་ནི་བརྩོན་འགྲུས་བརྒྱན་
གྱུར་ཏེ། །སྐྱོ་བ་མེད་ཅིང་བསམ་པ་བརྟན་པ་དང་། །དེ་ནི་བླང་བ་མེད་ཅིང་དོར་མེད་པ། །འཁོར་གསུམ་པོ་དག་དེ་ནི་རྣམ་པར་སྦྱོང་། །ཤེས་རབ་ཀྱིས་ནི་བསམ་གཏན་བརྒྱན་གྱུར་ཏེ། །དེ་ལ་མ་ཆགས་གྱུར་དང་ལྷག་མཐོང་དང་། །མཁས་དང་མངོན་པར་ཤེས་
པ་སྐྱེད་པ་དང་། །འཁོར་གསུམ་པོ་དག་དེ་ནི་རྣམ་པར་སྦྱོང་། །ཤེས་རབ་ཀྱིས་ནི་ཐབས་ཀྱང་བརྒྱན་བྱེད་དེ། །ཤིན་ཏུ་སྡུད་དང་གཟུངས་དང་ཡང་དག་སྨོན། །འཁོར་གསུམ་པོ་དག་དེ་ནི་རྣམ་སྦྱོང་ཞིང་། །སེམས་ཅན་ཆོས་དང་དེ་བཞིན་ཞིང་རྣམས་སྦྱོང་། །དྲན་

པ་ཉེ་བར་གཞག་ལ་དྲན་མི་འཇུག །ཡང་དག་སྤོང་བ་རྣམས་ལ་གཉིས་མེད་དེ། །རྫུ་འཕྲུལ་གྱིས་ནི་ལུས་དང་སེམས་ཀྱང་དབེན། །སེམས་ཅན་གྱིས་ནི་དབང་པོ་ཀུན་མི་ཤེས། །བདུད་དང་ཉོན་མོངས་རྣམས་ཀྱིས་ཟིལ་མི་ནོན། །ཆོས་ཀྱི་རང་བཞིན་ཚུལ་བཞིན་རྗེས་
སུ་རྟོགས། །དེ་བཞིན་ལམ་ལ་འོང་མེད་འགྲོ་བ་མེད། །འདི་ནི་གང་དག་ཤེས་རབ་ལྡན་པའི་རྒྱན། །དེ་ནི་ཤིན་ཏུ་ཞི་བས་ཞི་གནས་ཤེས། །དེ་ཡི་ལྷག་མཐོང་སྤྱོད་ཡུལ་མཐའ་ཡས་ཏེ། །ཆོས་ཀྱི་ཕུང་པོ་ཅི་བཞིན་ཕུང་པོ་ཤེས། །ཁམས་ནི་ནམ་མཁའ་མཚུངས་
ཤིང་འདྲ་བར་ཤེས། །དེས་ནི་སྟོང་པ་ལྟ་བུར་སྐྱེ་མཆེད་ཤེས། །རྟེན་པས་བསགས་པས་ཆོས་རྣམས་འབྱུང་མེད་དེ། །དོན་དམ་བདེན་པར་འཁྲུགས་པ་མེད་པར་ཤེས། །ཚུལ་བཞིན་གྱིས་ནི་ངེས་པར་རྟོགས་པར་ཤེས། །དུས་གསུམ་ལ་ནི་ཆགས་མེད་ཡེ་ཤེས་
འཇུག །རྣམ་པར་གཞག་ཕྱིར་ཕུང་པོ་གསུམ་ཡང་ཤེས། །དཀོན་མཆོག་གསུམ་ནི་མཚན་ཉིད་གཅིག་ཏུ་ཤེས། །འདི་ནི་གང་དག་ཤེས་རབ་ལྡན་པའི་རྒྱན། །རྣམ་བསྒྲུབས་མཚན་ཉིད་སྒྱུ་མ་ལྟ་བུར་ཤེས། །ཡོངས་བརྟགས་རྩ་བ་རྨི་ལམ་ཇི་བཞིན་ནོ། །
རྣམ་འཕྲུལ་མཚན་ཉིད་སྨིག་རྒྱུ་འདྲ་བ་སྟེ། །འཕོ་མེད་ཆོས་རྣམས་གཟུགས་བརྙན་མཚན་ཉིད་དོ། །འདུ་འཕྲོད་བྱུང་བ་མིག་ཡོར་ལྟ་བུ་སྟེ། །རྐྱེན་རྣམས་ཀྱིས་ནི་བྲག་ཅ་ཇི་བཞིན་ནོ། །ཆོས་ཀྱི་དབྱིངས་ནི་རྟག་ཏུ་མ་འདྲེས་ཤེས། །དེ་བཞིན་ཉིད་ནི་གནས་མེད་དེ་
རབ་ཤེས། །ཡང་དག་མཐའ་ནི་རྟག་ཏུ་མི་གཡོ་ཆོས། །འདུས་མ་བྱས་དང་འདུས་བྱས་གཉིས་སུ་མེད། །ཤེས་རབ་ཟབ་ཅིང་བློ་ནི་རབ་ཡངས་པར། །བརྒྱན་ནས་སངས་རྒྱས་ཆོས་རྣམས་ཚོལ་བར་བྱེད། །དེ་ནི་ནམ་ཡང་དྲན་པ་བརྗེད་པ་མེད། །ཆོས་རྣམས་
ཀུན་ཏུ་འཛིན་ཅིང་འཛིན་པར་བྱེད། །དོན་དང་ཚིག་འབྲུ་ལ་ནི་རྟག་ཏུ་མཁས། །ངེས་ཚིག་ཤེས་པ་རྟག་པར་རྟོགས་ཁོང་ཆུད། །ཆགས་མེད་ཚིག་དང་རྩུབ་པ་མ་ཡིན་དང་། །རབ་ཏུ་གྲོལ་བའི་ཚིག་དང་བརྫུན་མེད་ཚིག །ཐོས་པ་ཀུན་དོན་རྟག་ཏུ་རྟོག་པ་དང་། །

མཁས་པ་དེ་ནི་ཡེ་ཤེས་རྟོན་པར་བྱེད། །ངེས་དོན་མདོ་སྡེ་རྟོགས་པར་རབ་ཏུ་ཤེས། །གང་ཟག་མེད་པའི་ཆོས་ཉིད་རྟོན་བྱེད་ཅིང་། །འཇིག་རྟེན་འདས་པའི་ཆོས་ཉིད་ལ་ཡང་རྟོན། །དེ་ནི་གཟུངས་ཀྱིས་བརྒྱན་པར་གྱུར་པ་ཡིན། །དེ་ཡི་ཚིག་ནི་བདེན་
པའི་རྗེས་སུ་འཐུན། །གཟུང་བར་འོས་དང་དུས་སུ་འོས་པ་ཡིན། །དེ་ཡི་ཆོས་བསྟན་དེ་ནི་འབྲས་བུ་ཡོད། །ཕྱེད་པ་དང་ནི་དུས་སུ་རྒྱུན་ཆགས་འཇུག །དེ་ཡི་སྤོབས་པ་མགྱོགས་པ་སྐྱེ་བ་སྟེ། །ཤུགས་ཅན་དང་ནི་མྱུར་དང་རྟག་མི་ཆགས། །རྒྱུན་ཆད་མེད་དང་འཁྲུལ་
མེད་ངེས་པའི་ཚིག །ལེགས་པར་བརྒྱུས་པའི་ཕྲེང་བས་ལེགས་བརྒྱན་བཞིན། །ལྷ་དང་ཀླུ་ཡི་སྐད་ནི་རབ་ཏུ་ཤེས། །གནོད་སྦྱིན་དག་དང་དྲི་ཟ་ལྷ་མིན་དང་། །མཁའ་ལྡིང་མི་འམ་ཅི་དང་ལྟོ་འཕྱེ་ཆེ། །སེམས་ཅན་ཀུན་གྱི་སྐད་ཀྱང་རབ་ཏུ་ཤེས། །འཁོར་ལྷགས་
ཤེས་ནས་སྤ་གོང་མེད་པ་སྟེ། །སྨྲ་བ་མཐོང་ནས་ཞུམ་པར་གྱུར་པའང་མེད། །འཇིགས་པ་མེད་པར་ཆོས་ཀྱི་གཏམ་ཡང་རྗོད། །འདྲི་བ་རྣམས་ལ་ངེས་འབྱུང་རབ་ཏུ་ཤེས། །ལྷག་པའི་ང་རྒྱལ་ཅན་མཐོང་སྣྲེལ་ཞི་ཡི། །གཏམ་བརྗོད་རྣལ་འབྱོར་མཐོང་ནས་རྗེས་
སུ་འཐུན། །ང་རྒྱལ་ཅན་ལ་ལག་ན་རྡོ་རྗེ་སྟོན། །ཡུལ་མངོན་ཆགས་ལ་སྲེག་པའི་བསྐལ་པ་སྟེ། །ཐེག་པ་གསུམ་གྱི་རིམ་པའི་གཏམ་ཡང་རྗོད། །དོགས་པ་ཀུན་གྱི་ཐེ་ཚོམ་གཅོད་པ་སྟེ། །བློ་ཡི་ཆོས་རྣམས་མངོན་སུམ་འགྱུར་བ་ཡིན། །དེ་ཡི་ཤེས་རབ་
ནམ་ཡང་གཞན་མི་ལྟོས། །ཡི་གེ་ཐམས་ཅད་རྟག་ཏུ་ཟད་མི་ཤེས། །དོན་རྣམས་ངེས་པ་དག་ལ་རྒྱུན་ཆགས་ཏེ། །འདི་ནི་སངས་རྒྱས་ཆོས་རྣམས་མཐའ་ཡས་བརྗོད། །དེ་ནི་གཟུངས་ཀྱིས་བརྒྱན་པར་གྱུར་པ་ཡིན། །ཀུན་ནས་ཉོན་མོངས་སྐྱོན་ནི་མཐའ་ཡས་
ཤེས། །རྣམ་པར་བྱང་བའི་ཕན་ཡོན་ཐུག་པ་མེད། །དེ་བཞིན་སེམས་ཅན་དབང་པོ་ཐམས་ཅད་ཤེས། །སངས་རྒྱས་གནང་བའི་སོ་སོ་རིག་པ་ཐོབ། །དེ་ནི་གཟུངས་ཀྱིས་བརྒྱན་པར་གྱུར་པ་སྟེ། །དེ་ཡི་ཡོན་ཏན་འདི་དང་གཞན་དག་ཀྱང་། །བསྐལ་པར་རྒྱུན་

ཆད་མེད་པར་རབ་བརྗོད་ཀྱང་། །ཡོན་ཏན་མཐའ་ནི་རྟོགས་པར་མི་ནུས་སོ།། །།བམ་པོ་གསུམ་པ། བཅོམ་ལྡན་འདས་ཀྱིས་གཞན་ཡང་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ལ་བཀའ་སྩལ་པ། རིགས་ཀྱི་བུ་སྣང་བ་
གང་དག་གིས་སྣང་བར་གྱུར་ན་བྱང་ཆུབ་སེམས་དཔའ་མུན་པ་མུན་ནག་དང་བྲལ་ཞིང་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པ་སྤྱོད་པར་འགྱུར་བ་བྱང་ཆུབ་སེམས་དཔའ་རྣམས་ཀྱི་སྣང་བ་ནི་བརྒྱད་པོ་འདི་དག་གོ། །བརྒྱད་གང་ཞེ་ན། འདི་ལྟ་སྟེ། དྲན་པའི་
སྣང་བ་དང་། བློ་གྲོས་ཀྱི་སྣང་བ་དང་། རྟོགས་པའི་སྣང་བ་དང་། ཆོས་ཀྱི་སྣང་བ་དང་། ཤེས་པའི་སྣང་བ་དང་། བདེན་པའི་སྣང་བ་དང་། མངོན་པར་ཤེས་པའི་སྣང་བ་དང་། སྒྲུབ་པའི་སྣང་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྣང་
བ་ནི་བརྒྱད་པོ་འདི་དག་གོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་དྲན་པའི་སྣང་བ་གང་ཞེ་ན། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་དྲན་པའི་སྣང་བ་ནི་བརྒྱད་པོ་འདི་དག་སྟེ། བརྒྱད་གང་ཞེ་ན། འདི་ལྟ་སྟེ། སྔོན་བྱས་པའི་དགེ་བའི་རྩ་བ་
ཆུད་མི་གཟོན་པ་དང་། དགེ་བའི་རྩ་བ་མ་བྱས་པ་སོགས་པ་དང་། ཐོས་པའི་ཆོས་རྣམས་མི་བརྗེད་པ་དང་། དོན་རྣམ་པར་ངེས་པ་རྗེས་སུ་ཐོབ་པ་དང་། ཡུལ་དྲུག་གིས་མི་འཕྲོགས་པ་དང་། མི་དགེ་བའི་ཆོས་སྤང་ཞིང་དགེ་བའི་ཆོས་ཡོངས་སུ་རྫོགས་
པར་བྱ་བའི་ཕྱིར་དྲན་པ་རྒྱ་ཆེན་པོ་ཕུན་སུམ་ཚོགས་པར་གྱུར་པ་དང་། དེ་དྲན་པ་ཕུན་སུམ་ཚོགས་པར་རིག་ནས་སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཀྱི་གྲོང་ཁྱེར་སྲུང་བར་འཇོག་པ་དང་། དྲན་པ་སྔོན་དུ་འགྲོ་བས་ཆོས་ཐམས་ཅད་ལ་སྣང་བ་ཐོབ་པ་ཡིན་ཏེ།
རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་དྲན་པའི་སྣང་བ་ནི་བརྒྱད་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བློ་གྲོས་ཀྱི་སྣང་བ་ནི་བརྒྱད་པོ་འདི་དག་སྟེ། བརྒྱད་གང་ཞེ་ན། འདི་ལྟ་སྟེ། དོན་གྱི་བློ་གྲོས་ཡིན་གྱི་ཚིག་འབྲུའི་བློ་གྲོས་མ་ཡིན་

པ་དང་། ཡེ་ཤེས་ཀྱི་བློ་གྲོས་ཡིན་གྱི་རྣམ་པར་ཤེས་པའི་བློ་གྲོས་མ་ཡིན་པ་དང་། ཆོས་ཀྱི་བློ་གྲོས་ཡིན་གྱི་ཉོན་མོངས་པའི་བློ་གྲོས་མ་ཡིན་པ་དང་། རིག་པའི་བློ་གྲོས་ཡིན་གྱི་འགལ་བའི་བློ་གྲོས་མ་ཡིན་པ་དང་། བྱང་ཆུབ་ཀྱི་སེམས་ཀྱི་བློ་གྲོས་
ཡིན་གྱི་ཉན་ཐོས་དང་རང་སངས་རྒྱས་ཀྱི་བློ་གྲོས་མ་ཡིན་པ་དང་། རླབས་པོ་ཆེའི་བློ་གྲོས་ཡིན་གྱི་དམན་པའི་བློ་གྲོས་མ་ཡིན་པ་དང་། སངས་རྒྱས་ཀྱི་བློ་གྲོས་ཡིན་གྱི་བདུད་ཀྱི་བློ་གྲོས་མ་ཡིན་པ་དང་། སྙིང་རྗེ་ཆེན་པོའི་བློ་གྲོས་ཡིན་གྱི་སེམས་ཅན་ལ་རྣམ་པར་འཚེ་
བའི་བློ་གྲོས་མ་ཡིན་པ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བློ་གྲོས་ཀྱི་སྣང་བ་ནི་བརྒྱད་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་རྟོགས་པའི་སྣང་བ་ནི་བརྒྱད་པོ་འདི་དག་སྟེ། བརྒྱད་གང་ཞེ་ན། འདི་ལྟ་སྟེ། ཆོས་ཐམས་
ཅད་རྟོགས་པར་ཁོང་དུ་ཆུད་པར་འགྱུར་བ་དང་། དགོངས་ཏེ་བསྟན་པ་རྣམས་རྟོགས་པར་ཁོང་དུ་ཆུད་པར་འགྱུར་བ་དང་། སེམས་ཅན་གྱི་བསམ་པ་རྣམས་རྟོགས་པར་ཁོང་དུ་ཆུད་པར་འགྱུར་བ་དང་། སོ་སོ་ཡང་དག་པར་རིག་པའི་ཤེས་པ་རྣམས་རྟོགས་པར་ཁོང་
དུ་ཆུད་པར་འགྱུར་བ་དང་། རྟེན་ཅིང་འབྲེལ་བར་འབྱུང་བ་ཟབ་མོ་རྟོགས་པར་ཁོང་དུ་ཆུད་པར་འགྱུར་བ་དང་། སྣྲེལ་ཞིའི་རྒྱུད་བསྟན་པ་རྟོགས་པར་ཁོང་དུ་ཆུད་པར་འགྱུར་བ་དང་། སྤྱིའུ་ཚུགས་ཀྱི་རྒྱུད་བསྟན་པ་རྟོགས་པར་ཁོང་དུ་ཆུད་པར་འགྱུར་བ་དང་། སངས་
རྒྱས་ཀྱི་ཆོས་ཐམས་ཅད་རྟོགས་པར་ཁོང་དུ་ཆུད་པར་འགྱུར་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་རྟོགས་པའི་སྣང་བ་ནི་བརྒྱད་པོ་འདི་དག་གོ །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་སྣང་བ་ནི་བརྒྱད་པོ་འདི་དག་སྟེ། བརྒྱད་གང་ཞེ་ན།
འདི་ལྟ་སྟེ། སེམས་ཅན་རྣམས་ལ་ལས་ཀྱི་བྱ་བ་ལ་འཇུག་པ་སྟོན་པས་འཇིག་རྟེན་པའི་ཆོས་ཀྱི་སྣང་བ་དང་། ཐར་པ་འདོད་པ་རྣམས་ལ་ཤེས་རབ་ཀྱིས་སྟོན་པས་འཇིག་རྟེན་ལས་འདས་པའི་ཆོས་ཀྱི་སྣང་བ་དང་། ལམ་ཤིན་ཏུ་བསྒོམས་པའི་ཕྱིར་སྒྲིབ་པ་མེད་

པའི་ཆོས་ཀྱི་སྣང་བ་དང་། འདོད་པ་དང་། སྲིད་པ་དང་། མ་རིག་པ་དང་། ལྟ་བའི་ཟག་པ་མི་སློང་བའི་ཕྱིར་ཟག་པ་མེད་པའི་ཆོས་ཀྱི་སྣང་བ་དང་། འཕགས་པ་རྣམས་ཀྱི་ངེས་པར་གྱུར་པ་མངོན་སུམ་དུ་བྱེད་པའི་ཕྱིར་འདུས་མ་བྱས་པའི་ཆོས་ཀྱི་སྣང་བ་དང་། གློ་བུར་
གྱི་ཉོན་མོངས་པ་ལ་ཤིན་ཏུ་རྟོགས་པའི་ཕྱིར་ཀུན་ནས་ཉོན་མོངས་པའི་ཆོས་ཀྱི་སྣང་བ་དང་། སེམས་རང་བཞིན་གྱིས་འོད་གསལ་བའི་ཕྱིར་རྣམ་པར་བྱང་བའི་ཆོས་ཀྱི་སྣང་བ་དང་། ཆོས་རྣམས་ཤིན་ཏུ་ཉེ་བར་ཞི་བའི་ཕྱིར་མྱ་ངན་ལས་འདས་པའི་ཆོས་ཀྱི་སྣང་བ་སྟེ།
རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་སྣང་བ་ནི་བརྒྱད་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཤེས་པའི་སྣང་བ་ནི་བརྒྱད་པོ་འདི་དག་སྟེ། བརྒྱད་གང་ཞེ་ན། འདི་ལྟ་སྟེ། བརྒྱད་པའི་ཤེས་པའི་སྣང་བ་དང་། རྒྱུན་
དུ་ཞུགས་པའི་ཤེས་པའི་སྣང་བ་དང་། ལན་ཅིག་ཕྱིར་འོང་བའི་ཤེས་པའི་སྣང་བ་དང་། ཕྱིར་མི་འོང་བའི་ཤེས་པའི་སྣང་བ་དང་། དགྲ་བཅོམ་པའི་ཤེས་པའི་སྣང་བ་དང་། རང་སངས་རྒྱས་ཀྱི་ཤེས་པའི་སྣང་བ་དང་། བྱང་ཆུབ་སེམས་དཔའི་ཤེས་
པའི་སྣང་བ་དང་། ཡང་དག་པར་རྫོགས་པའི་སངས་རྒྱས་ཀྱི་མཁྱེན་པའི་སྣང་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཤེས་པའི་སྣང་བ་ནི་བརྒྱད་པོ་འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བདེན་པའི་སྣང་བ་ནི་བརྒྱད་པོ་འདི་
དག་སྟེ། བརྒྱད་གང་ཞེ་ན། འདི་ལྟ་སྟེ། བདེན་པ་བསྒོམ་པ་གང་གིས་ངེས་པར་གྱུར་པ་ལ་འཇུག་པ་དེ་ལ་དེའི་སྣང་བ་དང་། བདེན་པ་བསྒོམ་པ་གང་གིས་འབྲས་བུ་དང་པོ་འཐོབ་པར་འགྱུར་བ་དེ་ལ་དེའི་སྣང་བ་དང་། བདེན་པ་བསྒོམ་པ་གང་གིས་འབྲས་བུ་
གཉིས་པ་འཐོབ་པར་འགྱུར་བ་དེ་ལ་དེའི་སྣང་བ་དང་། བདེན་པ་བསྒོམ་པ་གང་གིས་འབྲས་བུ་གསུམ་པ་འཐོབ་པར་འགྱུར་བ་དེ་ལ་དེའི་སྣང་བ་དང་། བདེན་པ་བསྒོམ་པ་གང་གིས་འབྲས་བུ་བཞི་པ་འཐོབ་པར་འགྱུར་བ་དེ་ལ་དེའི་སྣང་བ་དང་། བདེན་པ་བསྒོམ་པ་གང་

གིས་རང་སངས་རྒྱས་ཉིད་འཐོབ་པར་འགྱུར་བ་དེ་ལ་དེའི་སྣང་བ་དང་། བདེན་པ་བསྒོམ་པ་གང་གིས་བྱང་ཆུབ་སེམས་དཔའི་བཟོད་པ་རབ་ཏུ་འཐོབ་པར་འགྱུར་བ་དེ་ལ་དེའི་སྣང་བ་དང་། བདེན་པ་བསྒོམ་པ་གང་གིས་སངས་རྒྱས་ཀྱི་བྱང་ཆུབ་མངོན་པར་རྫོགས་པར་
འཚང་རྒྱ་བར་འགྱུར་བ་དེ་ལ་དེའི་སྣང་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བདེན་པའི་སྣང་བ་ནི་བརྒྱད་པོ་འདི་དག་གོ །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པའི་སྣང་བ་ནི་བརྒྱད་པོ་འདི་དག་སྟེ། བརྒྱད་གང་ཞེ་ན། འདི་ལྟ་སྟེ།
ལྷའི་མིག་གིས་གཟུགས་ཐམས་ཅད་ཡང་དག་པར་མཐོང་བའི་ཕྱིར་གསལ་བའི་སྣང་བ་དང་། ལྷའི་རྣ་བས་སྒྲ་ཐམས་ཅད་ཐོས་པའི་ཕྱིར་ངེས་པར་རྟོགས་པའི་སྣང་བ་དང་། སྔོན་གྱི་གནས་བསྐལ་པ་གྲངས་མེད་པ་རྗེས་སུ་དྲན་པའི་ཕྱིར་རྗེས་སུ་དྲན་པའི་སྣང་བ་དང་། སེམས་ཅན་
ཐམས་ཅད་ཀྱི་སེམས་ལ་ལྟ་བའི་ཕྱིར་རང་བཞིན་གྱིས་འོད་གསལ་བའི་སྣང་བ་དང་། སངས་རྒྱས་ཀྱི་ཞིང་མཐའ་ཡས་པར་རྫུ་འཕྲུལ་གྱིས་འགྲོ་བའི་ཕྱིར་ནམ་མཁའ་སྒྲིབ་པ་མེད་པའི་སྣང་བ་དང་། ཟག་པ་མེད་པའི་ཤེས་པ་ཡོངས་སུ་རྫོགས་པར་བྱེད་པའི་ཕྱིར་ཤེས་པའི་སྣང་
བ་དང་། སེམས་ཅན་ཐམས་ཅད་ཉེ་བར་འཚོ་བའི་ཕྱིར་བསོད་ནམས་ཀྱི་ཚོགས་ཀྱི་སྣང་བ་དང་། སེམས་ཅན་ཐམས་ཅད་ཀྱི་དོགས་པ་གཅོད་པའི་ཕྱིར་ཡེ་ཤེས་ཀྱི་ཚོགས་ཀྱི་སྣང་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པའི་སྣང་བ་ནི་བརྒྱད་པོ་
འདི་དག་གོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྒྲུབ་པའི་སྣང་བ་ནི་དགུ་པོ་འདི་དག་སྟེ། དགུ་གང་ཞེ་ན། འདི་ལྟ་སྟེ། སྒྲུབ་པས་ཡེ་ཤེས་ཀྱི་སྣང་བ་དང་། སྒྲུབ་པས་ཤེས་རབ་ཀྱི་སྣང་བ་དང་། སྒྲུབ་པས་བློའི་སྣང་བ་དང་། སྒྲུབ་པས་ཡང་དག་པའི་ལྟ་བའི་
སྣང་བ་དང་། སྒྲུབ་པས་ཞི་གནས་ཀྱི་སྣང་བ་དང་། སྒྲུབ་པས་ལྷག་མཐོང་གི་སྣང་བ་དང་། སྒྲུབ་པས་སེམས་ཅན་གྱི་བསམ་པའི་སྣང་བ་དང་། སྒྲུབ་པས་འཁྲུགས་པ་མེད་པར་སེམས་རྣམ་པར་གྲོལ་བའི་སྣང་བ་དང་། སྒྲུབ་པས་ཤིན་ཏུ་མཐར་ཐུག་པའི་སྣང་བ་སྣང་བ་

སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྒྲུབ་པའི་སྣང་བ་ནི་དགུ་པོ་འདི་དག་གོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །དྲན་པ་དེ་དང་ཡང་དག་འདྲེས་པ་ནི། །སྔོན་ཆད་ལས་དགེ་བསགས་པ་ཆུད་མི་གཟོན། །
ཕྲ་བར་སྔོ་བ་ཕུན་སུམ་ཚོགས་པ་དེ། །ཕྱི་ཕྱིར་ཞིང་ནི་ཡང་དག་སྒྲུབ་པར་བྱེད། །ཐོས་པའི་ཆོས་རྣམས་ལ་ནི་བརྗེད་པ་མེད། །རྣམ་པར་ངེས་པ་མྱུར་དུ་འཐོབ་པར་འགྱུར། །ཉེ་བར་ཞི་བས་ཡུལ་རྣམས་ལས་ནི་སྦས། །དྲན་དང་ལྡན་པ་མི་དགེ་རྣམས་དང་བྲལ། །དྲན་
པ་རྒྱ་བོ་ཆེ་ནི་ཤིན་ཏུ་བསགས། །བྱ་བ་བྱ་བ་དག་ནི་རྣམ་པར་འབྱེད། །དྲན་པ་དག་དང་ལྡན་པར་རིག་ནས་ནི། །རྒྱལ་བ་རང་བྱུང་དག་གི་བྱིན་གྱིས་རློབ། །དམ་པའི་ཆོས་ཀྱི་གྲོང་ཁྱེར་སྐྱོང་བྱེད་པ། །དེ་ནི་འགྲོ་བ་རྣམས་ལ་ཆོས་སྟོན་ནུས། །ཤེས་རབ་ལྡན་པ་མུན་
པ་རྣམ་བྲལ་ཏེ། །ལྷ་དང་མི་རྣམས་ཀྱི་ནི་དོན་ཀྱང་བྱེད། །བློ་གྲོས་བཟང་ལྡན་སྣང་བ་ཐོབ་གྱུར་ནས། །དོགས་པ་དང་ནི་ཐེ་ཙོམ་རྣམས་ཀྱང་གཅོད། །དྲན་དང་ལྡན་པ་རང་འབྱུང་ཡེ་ཤེས་ཀྱིས། །བྱང་ཆུབ་མྱུར་དུ་རྗེས་སུ་རྟོགས་པར་བྱེད། །དེ་ནི་དོན་གྱི་བློ་གྲོས་
ཅན་ཡིན་གྱི། །ཚིག་འབྲུའི་རྗེས་སུ་མི་རྒྱུག་སྒྲ་ལའང་མིན། །སེམས་ཅན་དག་པ་ཡེ་ཤེས་བློ་གྲོས་ཅན། །རྣམ་པར་ཤེས་པའི་བློ་གྲོས་འདོད་མ་ཡིན། །ཆོས་ཀྱི་བློ་གྲོས་ལྡན་པར་གྱུར་པ་དེ། །ཉོན་མོངས་བློ་གྲོས་སེལ་ཅིང་གཏི་མུག་བྲལ། །ཤེས་རབ་དང་
ནི་ཐབས་ཀྱི་ཚུལ་ཤེས་པ། །དེ་ནི་རྒྱལ་བའི་བྱང་ཆུབ་འགལ་མི་བྱེད། །དེ་ནི་སངས་རྒྱས་འགྱུར་བའི་བློ་གྲོས་ལྡན། །ཉན་ཐོས་འགྱུར་མིན་རང་རྒྱལ་འགྱུར་མ་ཡིན། །རྟག་ཏུ་རླབས་ཆེན་བློ་གྲོས་ཅན་ཡིན་གྱི། །དེ་ནི་བློ་གྲོས་ཆུང་ངུ་འདོད་མ་ཡིན། །སངས་
རྒྱས་བློ་གྲོས་རྟག་ཏུ་ལྡན་ཡིན་གྱི། །བདུད་ཀྱི་བློ་གྲོས་སུ་ནི་འགྱུར་མ་ཡིན། །བློ་གྲོས་ལྡན་པ་སྙིང་རྗེ་ཆེར་གཞོལ་གྱི། །སེམས་ཅན་གང་ལའང་རྣམ་པར་འཚེ་བ་མིན། །ཆོས་འགའ་བསྟན་པ་གང་ཡིན་དེ་ལ་ནི། །ཐེ་ཚོམ་མེད་ཅིང་རྟོགས་པར་ཁོང་དུ་ཆུད། །

དེ་ནི་དགོངས་ཏེ་གསུང་ལ་མཁས་འགྱུར་ཞིང་། །སེམས་ཅན་སྤྱོད་པ་རྣམས་ལ་རྟོགས་དང་ལྡན། །སོ་སོ་ཡང་དག་རིག་ལ་རྟོགས་ལྡན་ཞིང་། །དེ་ཡི་ཤེས་པ་འཇུག་པ་ཆགས་པ་མེད། །རྐྱེན་བྱུང་བྱེད་པ་པོ་དང་རྣམ་བྲལ་བར། །རྟེན་པའི་ཆོས་རྣམས་
དག་ནི་རབ་ཏུ་ཤེས། །དེ་ནི་སྣྲེལ་ཞིའི་རྒྱུ་ལ་མཁས་གྱུར་ཅིང་། །སྤྱིའུ་ཚུགས་ཚུལ་ནི་རྟོགས་པར་ཁོང་དུ་ཆུད། །སངས་རྒྱས་ཀྱི་ནི་ཆོས་རྣམས་ཇི་སྙེད་པ། །ཐམས་ཅད་ཀྱང་ནི་རྟོགས་པར་ཁོང་དུ་ཆུད། །འཇིག་རྟེན་པ་ཡི་ཆོས་ཀྱི་སྣང་བ་ཡིས། །ལྷ་མི་རྣམས་
ཀྱི་ལས་ཀྱི་བྱ་བ་ཤེས། །འཇིག་རྟེན་ལས་ནི་འདས་པའི་ཡེ་ཤེས་ཀྱིས། །ཤེས་རབ་སྣང་བ་དང་ནི་ལྡན་པ་ཡིན། །ཁ་ན་མ་ཐོར་བཅས་དང་མ་ཐོ་མེད། །ཡེ་ཤེས་རབ་ཏུ་གསལ་བ་ཆེན་པོ་འཇུག །ལམ་ནི་ཤིན་ཏུ་བསྒོམས་པར་གྱུར་པའི་ཕྱིར། །རྟག་ཏུ་འབྲས་
བུ་ཡོད་པར་ཆོས་སྟོན་ཏོ། །ཟག་པར་བཅས་དང་ཟག་པ་མེད་པ་ཡི། །ཆོས་ལ་དེ་ཡི་སྣང་བ་རབ་ཏུ་འཇུག །དེ་ནི་ཟག་པ་ཐམས་ཅད་སྤོང་བྱེད་ཅིང་། །ལྷ་དང་མི་རྣམས་ཀྱི་ནི་དོན་ཀྱང་བྱེད། །འདུས་མ་བྱས་དང་འདུས་བྱས་ཆོས་རྣམས་ལ། །དེ་ཡི་ཤེས་པ་རྟག་
ཏུ་རབ་ཏུ་འཇུག །དེ་ནི་དེ་ཡིས་དྲི་བྲལ་རབ་རིབ་མེད། །སྐྱོན་མེད་ཐོབ་ནས་སྤྱད་པ་རྣམས་ཀྱང་སྤྱོད། །རྣམ་པར་བྱང་དང་ཀུན་ནས་ཉོན་མོངས་ལ། །དེ་ཡི་ཤེས་པ་སྒྲིབ་པ་མེད་པ་འཇུག །རང་བཞིན་གྱིས་ནི་སེམས་འོད་གསལ་བ་དང་། །ཀུན་ནས་ཉོན་མོངས་
པ་ཡི་ཚུལ་ཡང་ཤེས། །ཇི་ལྟར་མྱ་ངན་འདས་པར་གྱུར་པ་ནི། །སྐྱེ་བ་མེད་ཅིང་འབྱུང་བ་མེད་པར་ཤེས། །འདི་འདྲ་འདི་ནི་ཐེག་པ་ཆེན་པོ་ལ། །ཆོས་ཀྱི་སྣང་བ་མཐའ་ཡས་གྱུར་པ་ཡིན། །དེ་ནི་བརྒྱད་པ་ཡི་ནི་ཤེས་པ་དང་། །རྒྱུན་དུ་ཞུགས་ལ་ཤེས་པ་
འཇུག་པ་དང་། །ལན་ཅིག་ཕྱིར་འོང་བ་ཡི་ཤེས་པ་དང་། །ཕྱིར་མི་འོང་ལ་ཤེས་པ་འཇུག་པ་དང་། །དེ་ནི་དགྲ་བཅོམ་པ་དང་རང་རྒྱལ་དང་། །འཇིག་རྟེན་མགོན་པོ་བྱང་ཆུབ་སེམས་དཔའ་དག །ཀུན་ལ་དེ་ཡི་ཤེས་དང་སྒྲུབ་པ་རྣམས། །ལྷག་མ་ལུས་པ་

མེད་པར་རབ་ཏུ་འཇུག །གང་གིས་འབྲས་བུ་འཐོབ་པར་འགྱུར་བ་དང་། །འཁྲུགས་མེད་དོན་དམ་ངེས་པར་འབྱུང་འགྱུར་བ། །དེ་ལ་རབ་བསྒོམས་སྨྲ་བ་དཔའ་བོ་རྣམས། །བདེན་པའི་སྣང་བ་དག་དང་ལྡན་པ་ཡིན། །བདེན་པ་དག་ནི་བསྒོམ་པ་བྱས་པས་ན། །སྐྱོན་
མེད་འཇུག་དང་འབྲས་བུ་དང་པོ་འཐོབ། །གཉིས་དང་གསུམ་དང་དེ་བཞིན་བཞི་པ་དང་། །རང་རྒྱལ་རྣམས་ཀྱི་འབྲས་བུ་ཐོབ་པར་འགྱུར། །བསྒོམ་པ་གང་གིས་སུ་ནི་སྨྲ་བའི་སྟག །དེ་དག་བཟོད་པ་དག་ནི་འཐོབ་འགྱུར་དང་། །གང་གིས་རྒྱལ་བ་བྱང་ཆུབ་འཚང་
རྒྱ་བ། །བདེན་པ་དེ་དག་ལ་ནི་སྣང་བར་འགྱུར། །ལྷ་ཡི་མིག་གིས་སུ་ནི་དེ་ཡིས་ཀྱང་། །གཟུགས་ཀྱི་རྣམ་པ་དག་ནི་ཐམས་ཅད་མཐོང་། །ལྷ་ཡི་རྣ་བ་ངེས་པར་རྟོགས་པ་ཡིས། །ཕྱོགས་བཅུ་དག་གི་སྒྲ་རྣམས་རྟོགས་པར་འགྱུར། །སྔོན་གྱི་གནས་ཤེས་པ་ཡི་
སྣང་བ་ཡིས། །བསྐལ་པ་ཁྲག་ཁྲིག་དག་ནི་རྗེས་སུ་དྲན། །འོད་གསལ་བ་ཡི་ཤེས་པའི་སྣང་བ་ཡིས། །གཞན་གྱི་སེམས་ཀྱི་སྤྱོད་པ་རྣམས་ལ་མཁས། །རྫུ་འཕྲུལ་གྱི་ནི་ཤེས་པའི་སྣང་བ་ཡིས། །ཕྱོགས་བཅུའི་ཞིང་ནི་ཁྲག་ཁྲིག་རྣམས་སུ་འགྲོ། །ཟག་
པ་མེད་པའི་ཤེས་པའི་སྣང་བ་ནི། །ནམ་མཁའ་དང་ནི་མཚུངས་ཤིང་འདྲ་བ་ཡིན། །བསོད་ནམས་ཀྱི་ནི་སྣང་བ་མཐའ་ཡས་པའི། །མངོན་ཤེས་ཐོག་མ་འགྲོ་བ་ཉེ་བར་འགྲོ། །དེ་ཡི་ཤེས་པ་ཆགས་པ་མེད་པ་ཡིས། །འགྲོ་བའི་དོགས་པ་དག་ནི་གཅོད་པར་བྱེད། །
ནན་ཏན་སྙིང་པོར་བྱེད་པའི་རྣལ་འབྱོར་པ། །དྲན་དང་བློ་གྲོས་རྟོགས་དང་ཆོས་ཤེས་སྣང་། །བདེན་པ་ཡི་ནི་སྣང་བ་མཐའ་ཡས་ཏེ། །མངོན་པར་ཤེས་པའི་སྣང་བར་གྱུར་པ་ཡིན། །སྒྲུབ་པས་ཡེ་ཤེས་དང་ནི་ཤེས་རབ་དང་། །རྒྱ་ཆེན་བློ་དང་སྤོབས་པ་མཐའ་ཡས་
དང་། །ཡང་དག་ལྟ་བ་དང་ནི་ལྷག་མཐོང་དང་། །ཤིན་ཏུ་འཁྲུགས་པ་མེད་པ་མཐར་ཐུག་གྱུར། །སྣང་བ་ཤིན་ཏུ་རྣམ་པར་དག་པ་བརྒྱད། །འདི་དག་མཐུ་ཆེན་གང་ལ་ཡོད་པ་ནི། །རེ་ཞིག་བྱང་ཆུབ་ཐོབ་པར་མ་གྱུར་ཀྱང་། །དེ་ནི་སངས་རྒྱས་མཛད་པ་བྱེད་པར་

འགྱུར། །བཅོམ་ལྡན་འདས་ཀྱིས་གཞན་ཡང་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ལ་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་རྣམ་པ་བཅུ་དྲུག་གིས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེའོ། །
བཅུ་དྲུག་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་འདི་སྙམ་དུ། ཀྱེ་མ་སེམས་ཅན་འདི་དག་ནི་འཇིག་ཚོགས་ལ་ལྟ་བས་བཅིངས་པ། ལྟ་བ་སྣ་ཚོགས་དང་འདྲེས་པ་དག་སྟེ། ལྟ་བ་ཐམས་ཅད་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་
ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ཡོད་པ་མ་ཡིན་པའི་ཕྱིན་ཅི་ལོག་ཏུ་གྱུར་ནས་མི་རྟག་པ་ལ་རྟག་པར་འདུ་ཤེས། སྡུག་བསྔལ་བ་ལ་བདེ་བར་འདུ་ཤེས། བདག་མེད་པ་ལ་བདག་ཏུ་འདུ་ཤེས། མི་སྡུག་པ་ལ་
སྡུག་པར་འདུ་ཤེས་པ་དག་སྟེ། ཕྱིན་ཅི་ལོག་ཐམས་ཅད་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ངར་འཛིན་པ་དང་། ང་ཡིར་འཛིན་པ་ལ་གནས་པ། དངོས་
པོ་མེད་པ་ལ་དངོས་པོར་འདུ་ཤེས་པ་དག་སྟེ། ངར་འཛིན་པ་དང་ང་ཡིར་འཛིན་པ་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་སྒྲིབ་པ་ལྔས་བསྒྲིབས་ཏེ་འདོད་པའི་
ཟུག་རྔུས་ཟུག་པ། ཁོང་ཁྲོ་བ་མང་བ། རྨུགས་པ་དང་གཉིད་ལ་ཆགས་པ། དམ་པ་མ་ཡིན་པ་ལ་འགྱོད་པ་ཀུན་ནས་ལངས་པ། ཟབ་མོའི་ཆོས་ལ་ངེས་པ་མ་ཐོབ་པ་དག་སྟེ། སྒྲིབ་པ་ཐམས་ཅད་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་
རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་ནི་སྐྱེ་མཆེད་དྲུག་གིས་ཆགས་པས་ཆགས་ཏེ། མིག་གིས་གཟུགས་རྣམས་མཐོང་ནས་མཚན་མར་འཛིན་ཅིང་མངོན་རྟགས་སུ་འཛིན་པ་ཡིན། རྣ་བས་སྒྲ་ཐོས། སྣས་དྲི་སྣམས།

ལྕེས་རོ་མྱངས། ལུས་ཀྱིས་རེག་བྱ་རྣམས་ལ་རེག །ཡིད་ཀྱིས་ཆོས་རྣམས་རྣམ་པར་ཤེས་ནས་མཚན་མར་འཛིན་ཅིང་མངོན་རྟགས་སུ་འཛིན་པ་དག་ཡིན་ཏེ། སྐྱེ་མཆེད་དྲུག་གིས་ཆགས་པ་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་
ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ང་རྒྱལ་དང་། ལྷག་པའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། མངོན་པའི་ང་རྒྱལ་དང་། ཆུང་ཟད་སྙམ་པའི་ང་རྒྱལ་
དང་། ལོག་པའི་ང་རྒྱལ་གྱིས་བཅོམ་པས། ཆུང་ངུ་དག་པས་བདག་ཅག་ཆེའོ་སྙམ་དུ་བདག་ལ་རློམ་སེམས་སུ་བྱེད་པ། མཚུངས་པ་དག་པས་ནི་བདག་ཅག་ཆེའོ་སྙམ་དུ་བདག་ལ་རློམ་སེམས་སུ་བྱེད་པ་དང་། ཆེས་ཆེ་བ་དག་པས་ཀྱང་བདག་ཅག་ཆེས་
ཆེའོ་སྙམ་དུ་བདག་ལ་རློམ་སེམས་སུ་བྱེད་པ། གཟུགས་ལ་བདག་ཏུ་ཁས་ལེན་པ་ནས་རྣམ་པར་ཤེས་པའི་བར་ལ་བདག་ཏུ་ཁས་ལེན་པ། མ་ཐོབ་པར་བདག་ལ་ཐོབ་པ་སྙམ་དུ་ཤེས་པ། བདག་ཅག་ནི་འཕགས་པའོ་སྙམ་དུ་བདག་ལ་སེམས་པ། ལོག་པའི་ལྟ་བ་
ལ་ཡང་དག་པའི་ལྟ་བར་མོས་པ་དག་སྟེ། ང་རྒྱལ་གྱི་རྣམ་པ་ཐམས་ཅད་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ལམ་ངན་པར་ཞུགས་པ། འཕགས་
པའི་ལམ་དང་བྲལ་བ་དག་སྟེ། ལམ་ངན་པ་སྤང་ཞིང་འཕགས་པའི་ལམ་ཐོབ་པར་བྱ་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་སྲེད་པའི་ཁོལ་པོ་ཆུང་མ་དང་།
བུ་ཕོ་དང་། བུ་མོ་ལ་ཡོངས་སུ་ཞེན་པས་སྦགས་པ། རང་དབང་མེད་པས་བདག་ལ་མི་དཔོགས་པ་དག་སྟེ། རང་དབང་ཡོད་ཅིང་བདག་ལ་དཔོགས་པར་བྱ་བ་དང་། གར་དགའ་བར་འགྲོ་བར་བྱ་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་

ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ཕན་ཚུན་མི་འཕྲོད་པ། ཁྲོ་བ་དང་། ཞེ་སྡང་དང་། གནོད་སེམས་མང་བ་དག་སྟེ། ཁྲོ་བ་དང་། ཞེ་སྡང་དང་། གནོད་སེམས་སྤང་བར་བྱ་བའི་ཕྱིར་དེ་དག་
ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་སྡིག་པའི་གྲོགས་པོས་ཡོངས་སུ་ཟིན་པ། དགེ་བའི་བཤེས་གཉེན་དང་བྲལ་བ། སྡིག་པའི་ལས་བྱེད་པ་དག་སྟེ། དགེ་བའི་
བཤེས་གཉེན་གྱིས་ཡོངས་སུ་ཟིན་པ་དང་། སྡིག་པའི་གྲོགས་པོ་ཡོངས་སུ་སྤང་བར་བྱ་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་བརྐམ་པ། ཆགས་པས་
ཟིལ་གྱིས་ནོན་པ། ཆོག་མི་ཤེས་ཤིང་འཕགས་པའི་ཤེས་རབ་ཀྱི་གནས་པ་དང་བྲལ་བ་དག་སྟེ། ཆགས་པ་སྤངས་པ་དང་། འཕགས་པའི་ཤེས་རབ་བསྐྱེད་པའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་
ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ལས་ཀྱི་རྣམ་པར་སྨིན་པ་མེད་པར་ལྟ་ཞིང་རྟག་པ་དང་ཆད་པ་ལ་གནས་པ་དག་སྟེ། རྟེན་ཅིང་འབྲེལ་བར་འབྱུང་བ་ཟབ་མོ་དང་། ལས་དང་། བྱ་བ་ལ་གཟུད་པའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་
སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་མ་རིག་པ་དང་གཏི་མུག་གིས་ལྡོངས་པ། བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་ལ་མངོན་པར་ཞེན་པ་དག་སྟེ།
འཕགས་པའི་ཤེས་རབ་ཀྱི་མིག་རྣམ་པར་དག་པར་བྱ་བ་དང་། ལྟ་བར་གྱུར་པ་ཐམས་ཅད་སྤང་བར་བྱ་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་འཁོར་བ་ལ་

མངོན་པར་དགའ་བ། ཕུང་པོ་ལྔའི་གཤེད་མས་ཡོངས་སུ་ཟིན་པ་དག་སྟེ། ཁམས་གསུམ་ཐམས་ཅད་ལས་དབྱུང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་
བདུད་ཀྱི་ཞགས་པའི་བཅིང་བས་བཅིངས་པ། གཡོ་བ་དང་། རློམ་སེམས་ལ་གནས་པ་དག་སྟེ། བདུད་ཀྱི་ཞགས་པས་བཅིངས་པ་ཐམས་ཅད་ལས་རྣམ་པར་དགྲོལ་བ་དང་། གཡོ་དང་རློམ་སེམས་སྤང་བའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ་སེམས་
ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་མྱ་ངན་ལས་འདའ་བའི་སྒོ་བཅད་ཅིང་། ངན་འགྲོའི་སྒོ་ཕྱེ་བ་དག་སྟེ། མྱ་ངན་ལས་འདའ་བའི་སྒོ་དབྱེ་བ་དང་། ངན་འགྲོའི་སྒོ་བཅད་པའི་ཕྱིར་དེ་དག་ལ་ཆོས་བསྟན་པར་
བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་སྟེ། རིགས་ཀྱི་བུ་རྣམ་པ་བཅུ་དྲུག་པོ་དེ་དག་གིས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེའོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལས་མ་
འདྲེས་པ་སུམ་ཅུ་རྩ་གཉིས་ཏེ། དེ་དག་ལ་བརྩོན་ན་བྱང་ཆུབ་སེམས་དཔའ་རྣམས་ལེགས་པར་བྱེད་པའི་ལས་བྱེད་པ་རྣམས་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། སེམས་ཅན་དག་གཏི་མུག་གི་གཉིད་ཀྱིས་ལོག་པ་དང་། བདག་ཤེས་རབ་ཀྱིས་
སད་པ་མཐོང་ནས་ཤེས་རབ་ཀྱིས་སེམས་ཅན་རྣམས་སད་པར་བྱེད་པ་འདི་ནི་བྱང་ཆུབ་སེམས་དཔའི་ལས་མ་འདྲེས་པ་དང་པོའོ། །སེམས་ཅན་དག་ཆུང་ངུ་ལ་མོས་པ་དང་། བདག་རྒྱ་ཆེན་པོ་ལ་མོས་པར་མཐོང་ནས་ཐེག་པ་ཆེན་པོ་ལ་སེམས་ཅན་རྣམས་ཡང་དག་པར་
འཛིན་དུ་འཇུག་པ་དང་། སེམས་ཅན་དག་ཆོས་མ་ཡིན་པ་འདོད་པ་དང་། བདག་ཆོས་ལ་གནས་པར་མཐོང་ནས་སེམས་ཅན་རྣམས་ཆོས་འདོད་པ་ལ་རབ་ཏུ་འགོད་པ་དང་། སེམས་ཅན་དག་འཚོ་བ་ཡོངས་སུ་མ་དག་པ་དང་། བདག་འཚོ་བ་ཡོངས་སུ་དག་པར་མཐོང་

ནས་སེམས་ཅན་རྣམས་འཚོ་བ་ཡོངས་སུ་དག་པར་སྦྱོར་བ་དང་། སེམས་ཅན་དག་ལྟ་བར་གྱུར་པར་བྱིང་བ་དང་། བདག་ཡང་དག་པའི་ལྟ་བར་ཞུགས་པར་མཐོང་ནས་སེམས་ཅན་རྣམས་འཕགས་པའི་ཡང་དག་པའི་ལྟ་བ་ལ་རབ་ཏུ་འགོད་པ་དང་། སེམས་
ཅན་དག་མ་རིག་པར་གྱུར་ཅིང་ཚུལ་བཞིན་མ་ཡིན་པ་ཡིད་ལ་བྱེད་པ་བསགས་པར་མཐོང་ཞིང་བདག་རིག་པའི་རྗེས་སུ་འཐུན་པའི་ཚུལ་བཞིན་ཡིད་ལ་བྱེད་པ་ལ་གནས་པར་རིག་ནས་སེམས་ཅན་རྣམས་རིག་པའི་རྗེས་སུ་འཐུན་པའི་ཚུལ་བཞིན་ཡིད་ལ་བྱེད་པ་ལ་རབ་ཏུ་
འགོད་པ་དང་། སེམས་ཅན་དག་ལོག་པའི་ཆོས་ལ་གནས་པ་དང་། བདག་ཡང་དག་པའི་ཆོས་ལ་ཞུགས་པར་མཐོང་ནས་ཡང་དག་པའི་ཆོས་བསྒྲུབ་པར་བྱ་བའི་ཕྱིར་སེམས་ཅན་རྣམས་ལ་ཆོས་སྟོན་པ་དང་། སེམས་ཅན་དག་སེར་སྣ་ཅན་དུ་གྱུར་ཏེ་ཀུན་ཏུ་འཛིན་པའི་
སེམས་དང་ལྡན་པ་དང་། བདག་བདོག་པ་ཐམས་ཅད་ཡོངས་སུ་གཏོང་བར་མཐོང་ནས་སེམས་ཅན་རྣམས་བདོག་པ་ཐམས་ཅད་ཡོངས་སུ་གཏོང་བ་ལ་སྦྱོར་བ་དང་། སེམས་ཅན་དག་ངང་ཚུལ་ངན་པ་ཅན་དུ་གྱུར་ཏེ། སྡོམ་པ་ལ་མི་གནས་པ་དང་། བདག་ཚུལ་
ཁྲིམས་ཡོངས་སུ་དག་པར་གནས་ནས། སེམས་ཅན་རྣམས་ཚུལ་ཁྲིམས་ཀྱི་སྡོམ་པ་ལ་རབ་ཏུ་འགོད་པ་དང་། སེམས་ཅན་དག་གནོད་སེམས་མང་ཞིང་ཁྲོ་བ་ཤས་ཆེ་བ་དང་། བདག་བཟོད་པའི་སྟོབས་དང་། བྱམས་པ་ལ་གནས་པར་མཐོང་ནས་སེམས་ཅན་རྣམས་
བཟོད་པའི་སྟོབས་དང་། བྱམས་པ་ལ་གནས་པ་ཡང་དག་པར་འཛིན་དུ་འཇུག་པ་དང་། སེམས་ཅན་དག་ལེ་ལོ་ཅན་དུ་གྱུར་ཏེ། བརྩོན་འགྲུས་ཆུང་བ་དང་། བདག་ལེ་ལོ་མེད་ཅིང་བརྩོན་འགྲུས་བརྩམས་པར་མཐོང་ནས་སེམས་ཅན་རྣམས་བརྩོན་འགྲུས་རྩོམ་པ་ལ་སྦྱོར་
བ་དང་། སེམས་ཅན་དག་སེམས་གཡེངས་ཤིང་དྲན་པ་ཉམས་པ་དང་། བདག་མཉམ་པར་བཞག་སྟེ། བསམ་གཏན་ལ་བསམ་གཏན་བྱེད་པར་མཐོང་ནས་སེམས་ཅན་རྣམས་སེམས་མི་གཡེང་བ་དང་། དྲན་པ་དང་། ཤེས་བཞིན་ལ་རབ་ཏུ་འགོད་པ་དང་།

སེམས་ཅན་དག་ཤེས་རབ་འཆལ་པར་གྱུར་ཏེ། དམན་ཞིང་གཏི་མུག་དང་ལྡན་པ་དང་། བདག་ཤེས་རབ་དང་ལྡན་ཞིང་གཏི་མུག་དང་བྲལ་བར་མཐོང་ནས་སེམས་ཅན་རྣམས་ཤེས་རབ་ཆེན་པོ་དང་། གཏི་མུག་དང་བྲལ་བ་ཡང་དག་པར་འཛིན་དུ་འཇུག་པ་དང་།
སེམས་ཅན་དག་རིགས་པ་མ་ཡིན་པར་ལྷུང་ཞིང་ཡ་ང་བའི་བྱེད་པ་བརྩམས་པ་དང་། བདག་ཐབས་མཁས་པ་དང་ལྡན་ཞིང་ཡང་དག་པའི་ལས་བརྩམས་པར་མཐོང་ནས་སེམས་ཅན་རྣམས་ཐབས་མཁས་པ་དང་། ཡང་དག་པའི་ལས་རྩོམ་པ་ཡང་དག་པར་འཛིན་དུ་
འཇུག་པ་དང་། སེམས་ཅན་དག་ཉོན་མོངས་པས་བཅོམ་ཞིང་ཀུན་ཏུ་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པའི་སྤྱོད་ཡུལ་པར་གྱུར་པ་དང་། བདག་ཉོན་མོངས་པ་ཐམས་ཅད་ལས་ལོག་པར་མཐོང་ནས་སེམས་ཅན་རྣམས་ཉོན་མོངས་པ་ཐམས་ཅད་
སྤོང་བ་ལ་རབ་ཏུ་འགོད་པ་དང་། སེམས་ཅན་དག་འཇིག་ཚོགས་ལ་ལྟ་བའི་བཅིང་བས་བཅིངས་ཤིང་དམིགས་པ་ལ་རབ་ཏུ་གནས་པ་དང་། བདག་འཇིག་ཚོགས་ལ་ལྟ་བ་ཡོངས་སུ་ཤེས་པ་དང་ལྡན་ཞིང་དམིགས་པས་བཅིངས་པ་ལས་ཡོངས་སུ་གྲོལ་བར་
མཐོང་ནས་སེམས་ཅན་རྣམས་འཇིག་ཚོགས་ལ་ལྟ་བ་ཡོངས་སུ་ཤེས་པ་དང་དམིགས་པ་དང་བྲལ་བ་ལ་སྦྱོར་བ་དང་། སེམས་ཅན་དག་མ་དུལ་ཞིང་མ་སྦས་ཏེ་བྱང་བ་མ་ཡིན་པ་དང་། བདག་དུལ་ཞིང་སྦས་ཏེ་བྱང་བར་མཐོང་ནས་སེམས་ཅན་རྣམས་དུལ་བ་དང་། སྦས་
པ་དང་། བྱང་བ་ལ་རབ་ཏུ་འགོད་པ་དང་། སེམས་ཅན་དག་བྱས་པ་མི་གཟོ་ཞིང་བྱས་པ་མི་ཤེས་ཏེ། དགེ་བའི་རྩ་བ་འཇོམས་པ་དང་། བདག་བྱས་པ་གཟོ་ཞིང་བྱས་པ་ཤེས་ཏེ་དགེ་བའི་རྩ་བ་བསྲུང་བར་གནས་པར་མཐོང་ནས་སེམས་ཅན་རྣམས་བྱས་པ་གཟོ་བ་
དང་། བྱས་པ་ཤེས་པ་དང་། དགེ་བའི་རྩ་བ་ཆུད་མི་གཟོན་པ་ལ་རབ་ཏུ་འགོད་པ་དང་། སེམས་ཅན་དག་ཆུ་བོར་ལྷུང་ཞིང་སྡིག་པ་འདོད་པའི་དབང་དུ་སོང་བ་དང་། བདག་ཆུ་བོ་ཐམས་ཅད་ལས་ཡང་དག་པར་འདས་པར་མཐོང་ནས་སེམས་ཅན་རྣམས་ཆུ་བོ་

ཐམས་ཅད་ལས་ཡང་དག་པར་འདའ་བ་ལ་སྦྱོར་བ་དང་། སེམས་ཅན་དག་བཀའ་བློ་མི་བདེ་ཞིང་འཐུན་པར་འཛིན་པ་མ་ཡིན་པ་དང་། བདག་བཀའ་བློ་བདེ་ཞིང་འཐུན་པར་འཛིན་པར་མཐོང་ནས་སེམས་ཅན་རྣམས་བཀའ་བློ་བདེ་ཞིང་འཐུན་པར་འཛིན་
པ་ཡང་དག་པར་འཛིན་དུ་འཇུག་པ་དང་། སེམས་ཅན་དག་ཕོངས་པ་མང་ཞིང་དམ་པ་མ་ཡིན་པ་ལ་ཡོངས་སུ་ཞེན་པ་དང་། བདག་མ་ཕོངས་པ་མང་ཞིང་དགེ་བ་བདུད་རྩི་ལ་གནས་པར་མཐོང་ནས་སེམས་ཅན་རྣམས་ཡོངས་སུ་ཞེན་པ་དང་བྲལ་ཞིང་དགེ་བའི་རྩ་བ་ལ་
གནས་པར་སྦྱོར་བ་དང་། སེམས་ཅན་དག་དབུལ་ཞིང་འཕགས་པའི་ནོར་དང་བྲལ་བ་དང་། བདག་འཕགས་པའི་ནོར་དང་མ་བྲལ་ཞིང་ནོར་བདུན་དང་ལྡན་པར་མཐོང་ནས་སེམས་ཅན་རྣམས་འཕགས་པའི་ནོར་ཐོབ་པར་བྱ་བ་ལ་རབ་ཏུ་འགོད་པ་དང་། སེམས་ཅན་དག་རྟག་
ཏུ་ན་ཞིང་ཁམས་རྣམ་པ་བཞི་པོའི་སྦྲུལ་གདུག་པས་ཟིན་པ་དང་། བདག་ནད་མེད་ཅིང་བདེ་ལ་འགྱུར་བ་མེད་པར་མཐོང་ནས་སེམས་ཅན་རྣམས་ནད་ཐམས་ཅད་སྤོང་བ་ཡང་དག་པར་འཛིན་དུ་འཇུག་པ་དང་། སེམས་ཅན་དག་མི་ཤེས་པའི་མུན་པས་ཀུན་ཏུ་གཏིབས་
ཤིང་ཡེ་ཤེས་ཀྱི་སྣང་བ་དང་བྲལ་བ་དང་། བདག་ཡེ་ཤེས་ཀྱི་སྣང་བ་ཐོབ་པར་མཐོང་ནས་སེམས་ཅན་རྣམས་ཡེ་ཤེས་ཀྱི་སྣང་བ་ཆེན་པོ་ལ་རབ་ཏུ་འགོད་པ་དང་། སེམས་ཅན་དག་ཁམས་གསུམ་ལ་ཆགས་པས་ཆགས་ཤིང་རྒྱུད་ལྔའི་འགྲོ་བའི་འཁོར་བའི་འཁོར་
ལོའི་རྗེས་སུ་འཇུག་པ་མཐོང་ཞིང་བདག་ཁམས་གསུམ་ཡོངས་སུ་ཤེས་པ་ལ་མཁས་པར་ཤེས་ནས་སེམས་ཅན་རྣམས་ཁམས་གསུམ་ཡོངས་སུ་ཤེས་པ་ལ་མཁས་པ་ཡང་དག་པར་འཛིན་དུ་འཇུག་པ་དང་། སེམས་ཅན་དག་གཡོན་ཕྱོགས་ཀྱི་ལམ་དུ་ཞུགས་ཤིང་
གཡས་ཕྱོགས་ཀྱི་ལམ་དང་བྲལ་བ་དང་། བདག་གཡས་ཕྱོགས་ཀྱི་ལམ་ལ་གནས་པར་མཐོང་ནས་སེམས་ཅན་རྣམས་གཡས་ཕྱོགས་ཀྱི་ལམ་ལ་རབ་ཏུ་འགོད་པ་དང་། སེམས་ཅན་དག་ལུས་དང་སྲོག་ལ་ཆགས་ཤིང་ཉེས་པ་མ་མཐོང་བ་དང་། བདག་ལུས་དང་

སྲོག་ལ་མི་ལྟ་ཞིང་ཉེས་པ་མཐོང་བ་ཡིན་པར་མཐོང་ནས་སེམས་ཅན་རྣམས་ལུས་དང་སྲོག་ལ་མི་ལྟ་བ་དང་། ཉེས་པ་མཐོང་བ་ལ་རབ་ཏུ་འགོད་པ་དང་། སེམས་ཅན་དག་སངས་རྒྱས་དང་། ཆོས་དང་། དགེ་འདུན་དང་བྲལ་བ་དང་། བདག་དཀོན་མཆོག་གསུམ་གྱི་རིགས་
རྒྱུན་མི་གཅོད་པར་གནས་པར་མཐོང་ནས་སེམས་ཅན་རྣམས་དཀོན་མཆོག་གསུམ་གྱི་རིགས་རྒྱུན་མི་གཅོད་པ་ལ་འཛུད་པ་དང་། སེམས་ཅན་རྣམས་དམ་པའི་ཆོས་ལས་ཉམས་པ་དང་། བདག་དམ་པའི་ཆོས་ཡོངས་སུ་འཛིན་པར་གནས་པར་མཐོང་ནས་སེམས་ཅན་རྣམས་
དམ་པའི་ཆོས་ཡོངས་སུ་འཛིན་པ་ལ་རབ་ཏུ་འགོད་པ་དང་། སེམས་ཅན་དག་སྟོན་པ་རིན་པོ་ཆེ་དང་རིང་དུ་གནས་ཤིང་། རྗེས་སུ་དྲན་པ་དྲུག་དང་བྲལ་བ་དང་། བདག་རྗེས་སུ་དྲན་པ་དྲུག་མ་བཏང་བ་མཐོང་ནས་སེམས་ཅན་རྣམས་རྗེས་སུ་དྲན་པ་དྲུག་བསྒོམ་པ་ལ་རབ་ཏུ་འགོད་
པ་དང་། སེམས་ཅན་དག་ལས་དང་ཉོན་མོངས་པའི་སྒྲིབ་པས་བསྒྲིབས་པ་དང་། བདག་ལས་དང་ཉོན་མོངས་པ་དང་བྲལ་བར་མཐོང་ནས་སེམས་ཅན་རྣམས་ལས་དང་ཉོན་མོངས་པ་དང་བྲལ་བ་ལ་རབ་ཏུ་འགོད་པ་དང་། སེམས་ཅན་དག་མི་དགེ་བའི་ཆོས་ཐམས་ཅད་དང་
ལྡན་ཞིང་དགེ་བའི་ཆོས་ཐམས་ཅད་སྤངས་པ་དང་། བདག་མི་དགེ་བའི་ཆོས་ཐམས་ཅད་སྤངས་ཤིང་། དགེ་བའི་ཆོས་ཐམས་ཅད་དང་ལྡན་པར་མཐོང་ནས་སེམས་ཅན་རྣམས་མི་དགེ་བའི་ཆོས་ཐམས་ཅད་སྤོང་བ་དང་། དགེ་བའི་ཆོས་ཐམས་ཅད་ཡོངས་སུ་རྫོགས་པར་བྱེད་
པ་ལ་རབ་ཏུ་འགོད་པ་སྟེ། རིགས་ཀྱི་བུ་བྱང་ཆུབ་སེམས་དཔའི་ལས་སུམ་ཅུ་རྩ་གཉིས་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡང་དག་ཕུལ་ཡིན་ཏེ། དེ་དག་ལ་གནས་ནས་བྱང་ཆུབ་སེམས་དཔའ་རྣམས་ལེགས་པར་བྱེད་པའི་ལས་བྱེད་པ་རྣམས་ཡིན་ནོ། །རིགས་ཀྱི་
བུ་ཡང་བྱང་ཆུབ་སེམས་དཔའི་ལས་ནི་ཚད་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་སེམས་ཅན་རྣམས་ཀྱི་ཀུན་ནས་ཉོན་མོངས་པའི་སྒོ་ཇི་སྙེད་པར་བྱང་ཆུབ་སེམས་དཔས་རྣམ་པར་བྱང་བའི་སྒོ་ཡང་དག་པར་བསྒྲུབ་པར་བྱ་བ་ཡང་དེ་སྙེད་དོ། །རིགས་ཀྱི་བུ་གལ་ཏེ་གང་དག་གང་

གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་དེ་དག་ཐམས་ཅད་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་ལ་རབ་ཏུ་གནས་པར་གྱུར་ཀྱང་སེམས་ཅན་དེ་དག་ཐམས་ཅད་ཀྱི་ལས་གང་ཡིན་པ་དེ་སེམས་དང་པོ་བསྐྱེད་པའི་བྱང་ཆུབ་
སེམས་དཔའི་ལས་ཀྱི་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བའི་ཆ་དང་། བྱེ་བ་བརྒྱ་ཕྲག་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། ཉན་ཐོས་དང་། རང་
སངས་རྒྱས་དག་ནི་རང་གི་རྒྱུད་ཀྱི་ཉོན་མོངས་པ་སྤོང་བར་ཉེ་བར་གནས་པ་ཡིན་གྱི། བྱང་ཆུབ་སེམས་དཔའ་དག་ནི་སེམས་ཅན་ཐམས་ཅད་ཀྱི་ཉོན་མོངས་པ་སྤོང་བར་ཉེ་བར་གནས་པ་ཡིན་ནོ། །རིགས་ཀྱི་བུ་དེ་ལྟར་ན་སེམས་ཅན་ཐམས་ཅད་ཀྱི་ལས་གང་ཡིན་པ་དང་། ཉན་
ཐོས་དང་། རང་སངས་རྒྱས་ཐམས་ཅད་ཀྱི་ལས་གང་ཡིན་པ་བས་འདིར་བྱང་ཆུབ་སེམས་དཔའི་ལས་ཉིད་མཆོག་ཅེས་བརྗོད་དོ། །དེ་ཅིའི་ཕྱིར་ཞེ་ན། བྱིས་པ་སོ་སོའི་སྐྱེ་བོ་རྣམས་ཀྱི་ལས་ནི་ཕྱིན་ཅི་ལོག་དང་ལྡན་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་ལས་
ནི་ཉི་ཚེ་བ་དང་ལྡན་པ་ཡིན་གྱི། བྱང་ཆུབ་སེམས་དཔའི་ལས་ནི་ཕྱིན་ཅི་ལོག་མེད་ཅིང་ཚད་མེད་པའི་རྣམ་པའི་ཡོན་ཏན་རྩོམ་པ་སྟེ། བྱང་ཆུབ་སེམས་དཔའ་རྒྱུ་འདིས་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་ཟིལ་གྱིས་ནོན་ཏོ། །
དེ་ནས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། ཡང་བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་བཞིན་གཤེགས་པས་བྱང་ཆུབ་སེམས་དཔའི་རྒྱན་དང་། བྱང་ཆུབ་སེམས་དཔའི་སྣང་བ་དང་། བྱང་ཆུབ་སེམས་དཔའི་སྙིང་རྗེ་ཆེན་པོ་དང་། བྱང་ཆུབ་སེམས་དཔའི་ལས་ལེགས་པར་གསུངས་པ་དེ་དག་ནི་ངོ་

མཚར་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཡང་བཤད་དུ་གསོལ། བཅོམ་ལྡན་འདས་ཇི་ལྟར་སེམས་ཅན་དག་ལ་སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེ་ཆེན་པོ་འཇུག །དེ་བཞིན་གཤེགས་
པའི་ཐུགས་རྗེ་ཆེན་པོ་ནི་ཅི་ཙམ། རྣམ་པ་ནི་གང་ལགས། རྟགས་ནི་གང་ལགས། མཚན་མ་ནི་གང་ལགས། གནས་ནི་གང་ལགས། སངས་རྒྱས་བཅོམ་ལྡན་འདས་རྣམས་འཕྲིན་ལས་ནི་ཇི་ལྟར་མཛད། དེ་བཞིན་གཤེགས་པའི་འཕྲིན་ལས་ནི་ཅི་ཙམ།
རྣམ་པ་ནི་གང་ལགས། རྟགས་ནི་གང་ལགས། མཚན་མ་ནི་གང་ལགས། གནས་ནི་གང་ལགས་པ་དེ་བཅོམ་ལྡན་འདས་ཐམས་ཅད་མཁྱེན་པ། ཐམས་ཅད་གཟིགས་པ། དེ་བཞིན་གཤེགས་པའི་འཕྲིན་ལས་རྣམས་མངོན་སུམ་དུ་གྱུར་པས་མངོན་སུམ་དུ་བདག་
ཅག་ལ་ལེགས་པར་ཡང་དག་པར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་
དང་དེ་བཞིན་གཤེགས་པའི་སྙིང་རྗེ་ཆེན་པོ་དང་། དེ་བཞིན་གཤེགས་པའི་འཕྲིན་ལས་ལ་འཇུག་པ་ཙམ་ཅུང་ཟད་ཅིག་ཁྱོད་ལ་བཤད་པར་བྱའོ། །རིགས་ཀྱི་བུ་སེམས་ཅན་རྣམས་ལ་སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེ་ཆེན་པོ་ནི་སྐྱེ་བ་ཡང་མེད། འཇུག་པ་
ཡང་མེད་དོ་ཞེས་བརྗོད་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེ་ཆེན་པོ་ནི་རྟག་ཏུ་འཇུག་པའི་ཕྱིར་རོ། །དེ་ནི་བསྐལ་པ་གྲངས་མེད་པར་ཡོངས་སུ་སྦྱང་བ་བྱས་པས་ཡང་དག་པར་བསྐྱེད་པ་སྟེ། འཇུག་པ་ཡང་མེད། ལྡོག་པ་ཡང་
མེད་དོ། །སངས་རྒྱས་བཅོམ་ལྡན་འདས་རྣམས་ཀྱི་ཐུགས་རྗེ་ཆེན་པོ་ནི་མ་བཏང་བ། སེམས་ཅན་ཐམས་ཅད་ལ་གནས་པའོ། །དེ་བཞིན་གཤེགས་པའི་ཐུགས་རྗེ་ཆེན་པོ་དེ་ནི་ཅི་ཙམ་དུ་ལས་ཡོངས་སུ་ཐོབ་པར་བྱ་བར་སླ་བ་མ་ཡིན་པ་དེ་ཙམ་དུ་ཚད་མེད། དེ་ཙམ་དུ་

བསམ་གྱིས་མི་ཁྱབ་སྟེ། དེ་ཙམ་དུ་མི་ཟད་ཅིང་། དེ་ཙམ་དུ་རིང་དུ་སོང་བའོ། །དེ་ཅིའི་ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པས་ཇི་ལྟར་བྱང་ཆུབ་ཐོབ་པ་དེ་ལྟར་སེམས་ཅན་རྣམས་ལ་ཐུགས་རྗེ་ཆེན་པོ་འཇུག་གོ། །བྱང་ཆུབ་ཅི་འདྲ་བ་ཐུགས་རྗེ་ཆེན་
པོ་ཡང་དེ་འདྲའོ། །དེ་བཞིན་གཤེགས་པས་བྱང་ཆུབ་ཇི་ལྟར་ཐོབ་ཅེ་ན། དེ་བཞིན་གཤེགས་པས་རྩ་བ་མེད་པ་དང་། གནས་མེད་པར་བྱང་ཆུབ་ཐོབ་བོ། །དེ་ལ་རྩ་བ་ནི་གང་། གནས་ནི་གང་ཞེ་ན། འཇིག་ཚོགས་ནི་རྩ་བའོ། །ཡང་དག་པ་མ་ཡིན་པ་ཀུན་རྟོག་པ་ནི་
གནས་སོ། །དེ་གཉིས་ནི་དེ་བཞིན་གཤེགས་པས་བྱང་ཆུབ་དང་མཉམ་པ་ཉིད་ཀྱིས་མཉམ་པར་ཡོངས་སུ་ཤེས་ཏེ། དེའི་ཕྱིར་དེ་བཞིན་གཤེགས་པས་རྩ་བ་མེད་པ་དང་གནས་མེད་པར་བྱང་ཆུབ་མངོན་པར་རྫོགས་པར་སངས་རྒྱས་ཞེས་བྱའོ། །སེམས་ཅན་འདི་དག་
གིས་ནི་རྩ་བ་མེད་པ་དང་། གནས་མེད་པའི་ཆོས་འདི་དག་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་ཞི་བ་དང་ཉེ་བར་ཞི་བའོ། །དེ་ལ་ཞི་བ་ནི་གང་། ཉེ་
བར་ཞི་བ་ནི་གང་ཞེ་ན། ནང་ནི་ཞི་བའོ། །ཕྱི་ནི་ཉེ་བར་ཞི་བའོ། །དེ་ཅིའི་ཕྱིར་ཞེ་ན། མིག་ནི་བདག་དང་བདག་གིས་སྟོང་སྟེ། དེ་ནི་དེའི་རང་བཞིན་ནོ། །རྣ་བ་དང་། སྣ་དང་། ལྕེ་དང་། ལུས་དང་ཡིད་ནི་བདག་དང་བདག་གིས་སྟོང་སྟེ། དེ་ནི་དེའི་རང་བཞིན་ནོ། །མིག་སྟོང་པར་
ཡོངས་སུ་ཤེས་ནས་གཟུགས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །རྣ་བ་སྟོང་པར་ཡོངས་སུ་ཤེས་ནས་སྒྲ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །སྣ་སྟོང་པར་ཡོངས་སུ་ཤེས་ནས་དྲི་རྣམས་ལ་མི་རྒྱུག་སྟེ། དེའི་ཕྱིར་
ཉེ་བར་ཞི་བ་ཞེས་བྱའོ། །ལྕེ་སྟོང་པར་ཡོངས་སུ་ཤེས་ནས་རོ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ལུས་སྟོང་པར་ཡོངས་སུ་ཤེས་ནས་རེག་བྱ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ཡིད་སྟོང་པར་ཡོངས་སུ་ཤེས་ནས་ཆོས་

རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །སེམས་ཅན་འདི་དག་གིས་ནི་ཞི་བ་དང་། ཉེ་བར་ཞི་བ་ཁོང་དུ་མ་ཆུད་པས་དེ་དག་གི་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་སེམས་རང་
བཞིན་གྱིས་འོད་གསལ་བའི་ཕྱིར་བྱང་ཆུབ་རང་བཞིན་འོད་གསལ་བའོ། །ཅིའི་ཕྱིར་རང་བཞིན་འོད་གསལ་བ་ཞེས་བྱ་ཞེ་ན། རང་བཞིན་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ། ནམ་མཁའ་དང་མཚུངས་པ། ནམ་མཁའི་རང་བཞིན། ནམ་མཁའ་དང་མཉམ་པར་
གཞོལ་བ། ནམ་མཁའ་དང་མཉམ་པས་མཉམ་པ་སྟེ། རང་བཞིན་དེ་ནི་ཤིན་ཏུ་འོད་གསལ་བ་ཉིད་དོ། །བྱིས་པ་སོ་སོའི་སྐྱེ་བོ་རྣམས་ཀྱིས་ནི་རང་བཞིན་འོད་གསལ་བ་འདི་ཁོང་དུ་མ་ཆུད་པས་གློ་བུར་གྱི་ཉོན་མོངས་པ་རྣམས་ཀྱིས་ཀུན་ནས་ཉོན་མོངས་ཏེ། རང་བཞིན་འོད་གསལ་
བ་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་བླང་བ་མེད་པ་དང་། དོར་བ་མེད་པའོ། །དེ་ལ་བླང་བ་མེད་པ་ནི་གང་། དོར་བ་མེད་པ་ནི་གང་ཞེ་ན། བླང་བ་མེད་པ་ཞེས་བྱ་བ་ནི་
ཆོས་ཐམས་ཅད་མི་འཛིན་པའོ། །དོར་བ་མེད་པ་ཞེས་བྱ་བ་ནི་ཆོས་ཐམས་ཅད་མི་འདོར་བའོ། །དེ་ལ་དེ་བཞིན་གཤེགས་པ་བླང་བ་མེད་པ་དང་། དོར་བ་མེད་པར་ཆུ་བོར་འཇུག་པ་ན། ཇི་ལྟར་དེ་བཞིན་ཉིད་ལ་ཕ་རོལ་མེད་པ་དང་། ཕ་རོལ་མེད་པ་མ་ཡིན་པར་ཡང་དག་
པར་རྗེས་སུ་མཐོང་བ་དེ་ལྟར་རྒལ་ཏོ། །དེ་ལྟར་དེ་བཞིན་གཤེགས་པས་ཆོས་ཐམས་ཅད་ཕ་རོལ་མེད་པ་དང་། ཕ་རོལ་དང་བྲལ་བར་མངོན་པར་རྫོགས་པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཞེས་བྱའོ། །བྱིས་པ་སོ་སོའི་སྐྱེ་བོ་དག་གིས་ནི་བླང་བ་
མེད་པ་དང་། དོར་བ་མེད་པ་འདི་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་མཚན་མ་མེད་པ་དང་། དམིགས་པ་མེད་པའོ། །དེ་ལ་མཚན་མ་མེད་

པ་ནི་གང་། དམིགས་པ་མེད་པ་ནི་གང་ཞེ་ན། མིག་གི་རྣམ་པར་ཤེས་པ་དམིགས་སུ་མེད་པ་ནི་མཚན་མ་མེད་པའོ། །གཟུགས་ཡང་དག་པར་རྗེས་སུ་མི་མཐོང་བ་ནི་དམིགས་པ་མེད་པའོ། །རྣ་བའི་རྣམ་པར་ཤེས་པ་དམིགས་སུ་མེད་པ་ནི་མཚན་མ་མེད་
པའོ། །སྒྲ་མཉན་དུ་མེད་པ་ནི་དམིགས་པ་མེད་པའོ། །སྣའི་རྣམ་པར་ཤེས་པ་དམིགས་སུ་མེད་པ་ནི་མཚན་མ་མེད་པའོ། །དྲི་བསྣམ་དུ་མེད་པ་ནི་དམིགས་པ་མེད་པའོ། །ལྕེའི་རྣམ་པར་ཤེས་པ་དམིགས་སུ་མེད་པ་ནི་མཚན་མ་མེད་པའོ། །རོ་མྱང་དུ་མེད་པ་ནི་
དམིགས་པ་མེད་པའོ། །ལུས་ཀྱི་རྣམ་པར་ཤེས་པ་དམིགས་སུ་མེད་པ་ནི་མཚན་མ་མེད་པའོ། །རེག་བྱ་རེག་པར་བྱར་མེད་པ་ནི་དམིགས་པ་མེད་པའོ། །ཡིད་ཀྱི་རྣམ་པར་ཤེས་པ་དམིགས་སུ་མེད་པ་ནི་མཚན་མ་མེད་པའོ། །ཆོས་ཡང་དག་པར་རྗེས་སུ་མི་མཐོང་བ་ནི་
དམིགས་པ་མེད་པའོ། །དེ་ལྟར་ན་མཚན་མ་མེད་པ་དང་། དམིགས་པ་མེད་པ་ནི་འཕགས་པ་རྣམས་ཀྱི་སྤྱོད་ཡུལ་ལོ། །འཕགས་པ་རྣམས་ཀྱི་སྤྱོད་ཡུལ་གང་ཞེ་ན། གང་ཁམས་གསུམ་པའི་སྤྱོད་ཡུལ་མ་ཡིན་པ་དེ་ནི་འཕགས་པ་རྣམས་ཀྱི་སྤྱོད་ཡུལ་ལོ། །དེ་
ལྟར་ན་གང་སྤྱོད་ཡུལ་མ་ཡིན་པ་དེ་ནི་འཕགས་པ་རྣམས་ཀྱི་སྤྱོད་ཡུལ་ཏེ། འཕགས་པའི་སྤྱོད་ཡུལ་འདི་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །
རིགས་ཀྱི་བུ་བྱང་ཆུབ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ཏེ། དུས་གསུམ་མཉམ་པ་འཁོར་གསུམ་ཡོངས་སུ་ཆད་པའོ། །དེ་ལ་འཁོར་གསུམ་ཡོངས་སུ་ཆད་པ་གང་ཞེ་ན། གང་འདས་པ་ལ་སེམས་མི་འཇུག་པ་དང་། མ་འོངས་པ་
ལ་རྣམ་པར་ཤེས་པ་མི་རྒྱུག་པ་དང་། ད་ལྟར་བྱུང་བ་ལ་ཡིད་ལ་བྱེད་པ་མི་འཇུག་པའོ། །དེ་སེམས་དང་། ཡིད་དང་། རྣམ་པར་ཤེས་པ་མི་གནས་པས་འདས་པ་ལ་རྟོག་པར་མི་བྱེད། མ་འོངས་པ་ལ་མི་སེམས། ད་ལྟར་བྱུང་བ་སྤྲོས་པར་མི་བྱེད་དོ། །དེ་ལྟར་

དུས་གསུམ་མཉམ་པ་ཉིད་དང་། འཁོར་གསུམ་ཡོངས་སུ་དག་པ་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་ལུས་མེད་ཅིང་
འདུས་མ་བྱས་པའོ། །དེ་ལ་ལུས་མེད་པ་ནི་གང་མིག་གི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པའོ། །འདུས་མ་བྱས་ཞེས་བྱ་བ་ནི་གང་ལ་སྐྱེ་བ་
མེད་པ་དང་། འཇིག་པ་མེད་པ་དང་། གནས་མེད་པ་སྟེ། དེ་ནི་མཚན་ཉིད་གསུམ་དང་བྲལ་བའི་འདུས་མ་བྱས་ཞེས་བྱའོ། །འདུས་མ་བྱས་ཇི་ལྟ་བར་འདུས་བྱས་ཀྱང་དེ་བཞིན་དུ་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་བཞིན་གང་ཡིན་
པ་དེ་ནི་མེད་པའོ། །མེད་པ་གང་ཡིན་པ་དེ་ལ་ནི་གཉིས་མེད་དོ། །ལུས་མེད་པ་དང་འདུས་མ་བྱས་འདི་བྱིས་པ་སོ་སོའི་སྐྱེ་བོ་དག་གིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །
རིགས་ཀྱི་བུ་བྱང་ཆུབ་ཅེས་བྱ་བ་དེ་ནི་དབྱེར་མེད་པ་དང་གནས་སོ། །དེ་ལ་གནས་ནི་གང་། དབྱེར་མེད་པ་ནི་གང་ཞེ་ན། དེ་བཞིན་ཉིད་ནི་གནས་སོ། །གནས་མེད་པ་ནི་དབྱེར་མེད་པའོ། །ཆོས་ཀྱི་དབྱིངས་ནི་གནས་སོ། །ཐ་དད་པ་མ་ཡིན་པ་ནི་དབྱེར་མེད་པའོ། །ཡང་
དག་པའི་མཐའ་ནི་གནས་སོ། །གཡོ་བ་མེད་པ་ནི་དབྱེར་མེད་པའོ། །སྟོང་པ་ཉིད་ནི་གནས་སོ། །དམིགས་སུ་མེད་པ་ནི་དབྱེར་མེད་པའོ། །མཚན་མ་མེད་པ་ནི་གནས་སོ། །རྣམ་པར་རྟོག་པ་མེད་པ་ནི་དབྱེར་མེད་པའོ། །སྨོན་པ་མེད་པ་ནི་གནས་སོ། །སྨོན་ལམ་
འདེབས་པ་མེད་པ་ནི་དབྱེར་མེད་པའོ། །སེམས་ཅན་མེད་པ་ཉིད་ནི་གནས་སོ། །སེམས་ཅན་ངོ་བོ་ཉིད་མེད་པ་ནི་དབྱེར་མེད་པའོ། །ནམ་མཁའ་ནི་གནས་སོ། །དམིགས་སུ་མེད་པ་ནི་དབྱེར་མེད་པའོ། །སྐྱེ་བ་མེད་པ་ནི་གནས་སོ། །འགོག་པ་མེད་པ་ནི་དབྱེར་

མེད་པའོ། །འདུས་མ་བྱས་ནི་གནས་སོ། །རྒྱུ་བ་མེད་པ་ནི་དབྱེར་མེད་པའོ། །བྱང་ཆུབ་ནི་གནས་སོ། །ཉེ་བར་ཞི་བ་ནི་དབྱེར་མེད་པའོ། །མྱ་ངན་ལས་འདས་པ་ནི་གནས་སོ། །མངོན་པར་གྲུབ་པ་མེད་པ་ནི་དབྱེར་མེད་པའོ། །དེ་ལྟར་དབྱེར་མེད་པ་
དང་། གནས་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་ལུས་ཀྱིས་ཀྱང་མངོན་པར་རྫོགས་པར་འཚང་མི་རྒྱ། སེམས་ཀྱིས་ཀྱང་
མ་ཡིན་ནོ། །དེ་ཅིའི་ཕྱིར་ཞེ་ན། ལུས་ནི་བེམས་པོའོ། །སེམས་ནི་སྒྱུ་མ་ལྟ་བུའོ། །གང་ལུས་དང་སེམས་འདི་ལྟ་བུར་ཁོང་དུ་ཆུད་པ་དེ་ནི་ཐ་སྙད་བཏགས་ནས་བྱང་ཆུབ་ཅེས་བྱའི། བྱང་ཆུབ་ནི་ལུས་སམ། སེམས་སམ། ཆོས་སམ། ཆོས་མ་ཡིན་པའམ། ཡང་
དག་པའམ། ཡང་དག་པ་མ་ཡིན་པའམ། བདེན་པའམ། བརྫུན་པ་གང་གིས་ཀྱང་བརྗོད་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་ནོ། །བྱང་ཆུབ་ནི་གང་གིས་ཚིག་ཏུ་ཐ་སྙད་གདགས་པར་འགྱུར་བའི་དབྱིབས་
ཅི་ཡང་མེད་དེ། ཇི་ལྟར་ནམ་མཁའ་དབྱིབས་མེད་ཅིང་བརྗོད་པར་བྱ་བ་མ་ཡིན་པ་དེ་བཞིན་དུ་བྱང་ཆུབ་ཀྱང་དབྱིབས་མེད་ཅིང་བརྗོད་པར་བྱ་བ་མ་ཡིན་ནོ། །དེ་ལྟར་ཡང་དག་པ་ཇི་ལྟ་བ་བཞིན་དུ་ཡོངས་སུ་བཙལ་ན་ཆོས་ཐམས་ཅད་ནི་བརྗོད་པར་བྱ་བ་མ་ཡིན་པ་སྟེ། ཆོས་ལ་
ཚིག་མེད་དོ། །ཚིག་ལ་ཡང་ཆོས་མེད་དོ། །ཆོས་ཀྱི་ཚུལ་གྱི་རྣམ་པ་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་
གཟུང་དུ་མེད་པ་དང་། གཞི་མེད་པའོ། །དེ་ལ་གཟུང་དུ་མེད་པ་ནི་གང་། གཞི་མེད་པ་ནི་གང་ཞེ་ན། མིག་ཡོངས་སུ་ཤེས་པ་ནི་གཟུང་དུ་མེད་པའོ། །གཟུགས་དམིགས་སུ་མེད་པ་ནི་གཞི་མེད་པའོ། །རྣ་བ་ཡོངས་སུ་ཤེས་པ་ནི་གཟུང་དུ་མེད་པའོ། །སྒྲ་

དམིགས་སུ་མེད་པ་ནི་གཞི་མེད་པའོ། །སྣ་ཡོངས་སུ་ཤེས་པ་ནི་གཟུང་དུ་མེད་པའོ། །དྲི་དམིགས་སུ་མེད་པ་ནི་གཞི་མེད་པའོ། །ལྕེ་ཡོངས་སུ་ཤེས་པ་ནི་གཟུང་དུ་མེད་པའོ། །རོ་དམིགས་སུ་མེད་པ་ནི་གཞི་མེད་པའོ། །ལུས་ཡོངས་སུ་ཤེས་པ་ནི་གཟུང་དུ་མེད་
པའོ། །རེག་བྱ་དམིགས་སུ་མེད་པ་ནི་གཞི་མེད་པའོ། །ཡིད་ཡོངས་སུ་ཤེས་པ་ནི་གཟུང་དུ་མེད་པའོ། །ཆོས་དམིགས་སུ་མེད་པ་ནི་གཞི་མེད་པའོ། །དེ་ལྟར་དེ་བཞིན་གཤེགས་པས་བྱང་ཆུབ་གཟུང་དུ་མེད་པ་དང་། གཞི་མེད་པར་མངོན་པར་རྫོགས་པར་སངས་
རྒྱས་སོ། །མངོན་པར་རྫོགས་པར་སངས་རྒྱས་ནས་ཀྱང་མིག་གཟུང་དུ་མེད། གཟུགས་གཞི་མ་ཡིན། རྣམ་པར་ཤེས་པ་གནས་པ་མེད་དོ། །རྣ་བ་གཟུང་དུ་མེད། སྒྲ་གཞི་མ་ཡིན། རྣམ་པར་ཤེས་པ་གནས་པ་མེད་དོ། །སྣ་གཟུང་དུ་མེད། དྲི་གཞི་མ་ཡིན།
རྣམ་པར་ཤེས་པ་གནས་པ་མེད་དོ། །ལྕེ་གཟུང་དུ་མེད། རོ་གཞི་མ་ཡིན། རྣམ་པར་ཤེས་པ་གནས་པ་མེད་དོ། །ལུས་གཟུང་དུ་མེད། རེག་བྱ་གཞི་མ་ཡིན། རྣམ་པར་ཤེས་པ་གནས་པ་མེད་དོ། །ཡིད་གཟུང་དུ་མེད། ཆོས་གཞི་མ་ཡིན། རྣམ་པར་ཤེས་པ་
གནས་པ་མེད་དོ། །དེ་རྣམ་པར་ཤེས་པ་གནས་པ་མེད་པས་སེམས་ཅན་ཐམས་ཅད་ཀྱི་སེམས་ཀྱི་གནས་རྣམས་རབ་ཏུ་ཤེས་སོ། །སེམས་ཅན་དག་གི་སེམས་ཀྱི་གནས་རྣམས་གང་ཞེ་ན། སེམས་ཅན་རྣམས་ཀྱི་སེམས་ཀྱི་གནས་ནི་བཞི་པོ་འདི་དག་གོ། །བཞི་གང་ཞེ་ན། འདི་ལྟ་
སྟེ། གཟུགས་སེམས་ཅན་རྣམས་ཀྱི་སེམས་ཀྱི་གནས་དང་། ཚོར་བ་དང་། འདུ་ཤེས་དང་། འདུ་བྱེད་དག་སེམས་ཅན་རྣམས་ཀྱི་སེམས་ཀྱི་གནས་ཏེ། སེམས་ཀྱི་གནས་དེ་དག་ཀྱང་དེ་བཞིན་གཤེགས་པས་གནས་མེད་པར་མཁྱེན་ཏོ། །གནས་མེད་པའི་མཐའ་འདི་སེམས་
ཅན་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ཅེས་བྱ་བ་འདི་ནི་སྟོང་པ་ཉིད་ཀྱི་ཚིག་བླ་དགས་སོ། །སྟོང་པ་ཉིད་གང་གིས་བྱང་ཆུབ་སྟོང་པའི་སྟོང་

པ་ཉིད་དེས་ཆོས་ཐམས་ཅད་སྟོང་ངོ་། །སྟོང་པ་ཉིད་ཇི་ལྟ་བ་བཞིན་དུ་ཆོས་དེ་དག་ཐམས་ཅད་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ཏེ། སྟོང་པ་ཉིད་ཀྱིས་སྟོང་པ་ཉིད་མངོན་པར་རྫོགས་པར་སངས་རྒྱས་པ་མ་ཡིན་ནོ། །དེ་ནི་འདི་ལྟ་སྟེ།
སྟོང་པ་ཉིད་དང་བྱང་ཆུབ་ཅེས་བྱ་བ་ཚུལ་གཅིག་པར་ཤེས་པ་སྟེ། དེ་ལ་གཉིས་གང་གིས་སྟོང་པ་ཉིད་དང་། བྱང་ཆུབ་གཉིས་སུ་དབྱེ་བའི་གཉིས་ཆུང་ཟད་ཀྱང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་གཉིས་སུ་མེད་པ། གཉིས་སུ་དབྱེར་མེད་པ། མཚན་ཉིད་
མེད་པ། མིང་མེད་པ། མཚན་མ་མེད་པ། རྒྱུ་བ་མེད་པ། རབ་ཏུ་རྒྱུ་བ་མེད་པ། ཀུན་ཏུ་འབྱུང་བ་མེད་པའོ། །གང་སྟོང་པ་ཞེས་བྱ་བ་དེ་ནི་མངོན་པར་ཞེན་པ་མེད་ཅིང་འཛིན་པ་མེད་པའི་ཚིག་བླ་དགས་སོ། །འདི་ལ་དོན་དམ་པར་གང་སྟོང་པ་ཞེས་བྱ་བའི་ཆོས་གང་
ཡང་དམིགས་སུ་མེད་ཀྱང་སྟོང་པ་ཞེས་ཀྱང་བརྗོད་དོ། །ཇི་ལྟར་ནམ་མཁའ་ལ་ནམ་མཁའ་ཞེས་རྗོད་ཀྱང་ནམ་མཁའ་ནི་བརྗོད་པར་བྱ་བ་མ་ཡིན་པ་དེ་བཞིན་དུ་སྟོང་པ་ལ་སྟོང་པ་ཞེས་རྗོད་ཀྱང་སྟོང་པ་ནི་བརྗོད་པར་བྱ་བ་མ་ཡིན་ནོ། །འདི་ལྟ་སྟེ། མིང་མེད་པ་ལ་མིང་དུ་ཐ་
སྙད་འདོགས་པ་དེ་ནི་ཆོས་ཐམས་ཅད་ལ་འཇུག་པའོ། །མིང་དེ་ཡང་ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན་ནོ། །ཇི་ལྟར་མིང་ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན་པ་དེ་བཞིན་དུ་མིང་གང་གིས་ཆོས་གང་བརྗོད་པའི་ཆོས་དེ་ཡང་
ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན་ནོ། །དེ་ལྟར་དེ་བཞིན་གཤེགས་པས་ཆོས་དེ་དག་ཐམས་ཅད་མཁྱེན་ཏེ། གཟོད་མ་ནས་མ་སྐྱེས་པ་དང་། མ་འགགས་པ་དང་། མཚན་ཉིད་མེད་པ་དང་། སེམས་དང་། ཡིད་དང་། རྣམ་པར་ཤེས་པ་དང་བྲལ་
བ་དང་། ཡི་གེ་མེད་པ་དང་། སྒྲ་མེད་པར་ཤེས་སོ། །ཇི་ལྟར་ཤེས་པ་དེ་བཞིན་དུ་རྣམ་པར་གྲོལ་ཏེ། བཅིངས་པ་ཡང་མེད། གྲོལ་བ་ཡང་མེད་དོ། །མཉམ་པ་ཉིད་འདི་ཡང་བྱིས་པ་སོ་སོའི་སྐྱེ་བོ་དག་གིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་

དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་ནམ་མཁའ་དང་མཉམ་སྟེ། ནམ་མཁའ་ནི་མཉམ་པའང་མ་ཡིན། མི་མཉམ་པའང་མ་ཡིན་ནོ། །བྱང་ཆུབ་ཀྱང་མཉམ་པའང་མ་ཡིན། མི་མཉམ་པའང་མ་ཡིན་ནོ། །
ཆོས་གང་ལ་ཡང་དག་པར་ཡོངས་སུ་གྲུབ་པ་མེད་པ་དེ་མཉམ་པའམ་མི་མཉམ་པར་བརྗོད་པ་མ་ཡིན་ནོ། །དེ་ལྟར་དེ་བཞིན་གཤེགས་པས་ཆོས་ཐམས་ཅད་མཉམ་པའང་མ་ཡིན། མི་མཉམ་པའང་མ་ཡིན་པར་མངོན་པར་རྫོགས་པར་སངས་རྒྱས་ཏེ། ཇི་ལྟར་ཆོས་ཆུང་ཟད་ཙམ་
ཡང་མཉམ་པར་ཡང་མི་བྱེད། མི་མཉམ་པར་ཡང་མི་བྱེད་པ་དེ་ལྟར་མངོན་པར་རྫོགས་པར་སངས་རྒྱས་སོ། །ཆོས་འདི་དག་ཅི་འདྲ་བ་དེ་འདྲ་བར་ཡང་དག་པའི་ཡེ་ཤེས་ཀྱིས་མཁྱེན་ཏོ། །ཡང་དག་པའི་ཡེ་ཤེས་ཀྱང་གང་ཞེ་ན། འདི་ལྟ་སྟེ། ཆོས་ཐམས་ཅད་ནི་རྩ་བ་
མེད་པ། མ་སྐྱེས་པ། མ་འགགས་པ་སྟེ། དེ་དག་ནི་མ་བྱུང་བ་ལས་འབྱུང་བ། བྱུང་ནས་ཀྱང་འབྲལ་བའོ། །དེ་དག་ནི་བདག་པོ་མེད་པར་འབྱུང་བ། བདག་པོ་མེད་པར་འབྲལ་བའོ། །དེ་ལྟར་འབྱུང་བ་དང་འཇིག་པ་ལ་བརྟེན་ནས་འཇུག་ཀྱང་འདི་ལ་འཇུག་པ་གང་ཡང་
མེད་དེ། ལམ་བཅད་པའི་ཕྱིར་དེ་བཞིན་གཤེགས་པ་ཆོས་སྟོན་ཏོ་ཞེས་ཀྱང་བརྗོད་དོ། །ལམ་ཆད་པ་དེ་ཡང་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །
རིགས་ཀྱི་བུ་བྱང་ཆུབ་ཅེས་བྱ་བ་དེ་ནི་ཇི་ལྟ་བ་བཞིན་གྱི་གནས་སོ། །དེ་ལ་ཇི་ལྟ་བ་བཞིན་གྱི་གནས་གང་ཞེ་ན། བྱང་ཆུབ་ཇི་ལྟ་བར་གཟུགས་ཀྱང་དེ་བཞིན་ཏེ། དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བར་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་
པར་ཤེས་པ་ཡང་དེ་བཞིན་ཏེ། དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བར། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་ཀྱང་དེ་བཞིན་ཏེ། དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བར་མིག་གི་ཁམས་

དང་། གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་ཀྱང་དེ་བཞིན་ཏེ། དེ་བཞིན་ཉིད་ལས་མི་འདའོ། །བྱང་ཆུབ་ཇི་ལྟ་བར་རྣ་བའི་ཁམས་དང་། སྒྲའི་ཁམས་དང་། རྣ་བའི་རྣམ་པར་ཤེས་པའི་ཁམས་དང་། སྣའི་ཁམས་དང་།
དྲིའི་ཁམས་དང་། སྣའི་རྣམ་པར་ཤེས་པའི་ཁམས་དང་། ལྕེའི་ཁམས་དང་། རོའི་ཁམས་དང་། ལྕེའི་རྣམ་པར་ཤེས་པའི་ཁམས་དང་། ལུས་ཀྱི་ཁམས་དང་། རེག་བྱའི་ཁམས་དང་། ལུས་ཀྱི་རྣམ་པར་ཤེས་པའི་ཁམས་དང་། ཡིད་ཀྱི་ཁམས་དང་། ཆོས་
ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་ཀྱང་དེ་བཞིན་ཏེ། དེ་བཞིན་ཉིད་ལས་མི་འདའོ། །ཆོས་སུ་བཏགས་པ་ནི་འདི་དག་ཏུ་ཟད་དེ། འདི་ལྟར་ཕུང་པོ་དང་། ཁམས་དང་། སྐྱེ་མཆེད་དུ་བཏགས་པའོ། །དེ་དག་ནི་དེ་བཞིན་གཤེགས་པས་ཇི་ལྟ་བ་བཞིན་དུ་མངོན་
པར་རྫོགས་པར་སངས་རྒྱས་སོ། །ཕྱིན་ཅི་མ་ལོག་པར་མངོན་པར་རྫོགས་པར་སངས་རྒྱས་སོ། །དེ་དག་ནི་སྔོན་གྱི་ཇི་ལྟ་བར་ཕྱིས་ཀྱང་དེ་བཞིན་བར་དུ་ཡང་དེ་བཞིན་ཏེ། སྔོན་གྱི་མཐར་ཡང་མ་སྐྱེས། ཕྱི་མའི་མཐར་ཡང་མི་འཕོ། བར་དུ་ཡང་དབེན་པ་དག་གོ། །དེ་ལྟར་ན་
འདི་ནི་ཇི་ལྟ་བ་བཞིན་གྱི་གནས་ཡིན་ནོ། །གཅིག་ཇི་ལྟ་བར་ཐམས་ཅད་ཀྱང་དེ་བཞིན། ཐམས་ཅད་ཇི་ལྟ་བར་གཅིག་ཀྱང་དེ་བཞིན་ཏེ། ཇི་ལྟ་བ་བཞིན་ལ་ནི་གཅིག་པའམ་མང་བར་མི་དམིགས་སོ། །ཇི་ལྟ་བ་བཞིན་གྱི་གནས་འདི་འང་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་
དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་རྣམ་པ་ལ་འཇུག་པས་རྣམ་པ་མེད་པ་ལ་ཞུགས་པའོ། །དེ་ལ་རྣམ་པ་ནི་གང་། རྣམ་པ་མེད་པ་ནི་གང་ཞེ་ན། རྣམ་
པ་ཞེས་བྱ་བ་ནི་དགེ་བའི་ཆོས་ཐམས་ཅད་རྩོམ་པའོ། །རྣམ་པ་མེད་པ་ཞེས་བྱ་བ་ནི་ཆོས་ཐམས་ཅད་མི་དམིགས་པའོ། །རྣམ་པ་ཞེས་བྱ་བ་ནི་གནས་པ་མེད་པའི་སེམས་ཀྱི་གནས་སོ། །རྣམ་པ་མེད་པ་ཞེས་བྱ་བ་ནི་མཚན་མ་མེད་པའི་ཏིང་ངེ་འཛིན་གྱི་རྣམ་པར་ཐར་པའི་སྒོའོ། །

རྣམ་པ་ཞེས་བྱ་བ་ནི་ཆོས་རྣམས་ལ་སེམས་པ་དང་། འཇལ་བ་དང་། བགྲང་བ་དང་། སོ་སོར་རྟོག་པའོ། །རྣམ་པ་མེད་པ་ཞེས་བྱ་བ་ནི་འཇལ་བ་ལས་ཤིན་ཏུ་འདས་པའོ། །འཇལ་བ་ལས་ཤིན་ཏུ་འདས་པ་གང་ཞེ་ན། གང་ལ་རྣམ་པར་ཤེས་པའི་ལས་མེད་པའོ། །
རྣམ་པ་ཞེས་བྱ་བ་ནི་འདུས་བྱས་ལ་སོ་སོར་རྟོག་པའོ། །རྣམ་པ་མེད་པ་ཞེས་བྱ་བ་ནི་འདུས་མ་བྱས་ལ་མངོན་སུམ་དུ་བྱེད་པའོ། །རྣམ་པ་དང་རྣམ་པ་མེད་པ་ལ་འཇུག་པ་འདི་ཡང་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མ་ཆུད་པས་དེ་དག་གིས་ཁོང་དུ་ཆུད་པར་བྱའོ་སྙམ་དུ་
སེམས་ཅན་རྣམས་ལ་དེ་བཞིན་གཤེགས་པའི་ཐུགས་རྗེ་ཆེན་པོ་འཇུག་གོ། །རིགས་ཀྱི་བུ་བྱང་ཆུབ་ནི་ཟག་པ་མེད་པ་དང་། ཉེ་བར་ལེན་པ་མེད་པའོ། །དེ་ལ་ཟག་པ་མེད་པ་ནི་གང་། ཉེ་བར་ལེན་པ་མེད་པ་ནི་གང་ཞེ་ན། ཟག་པ་མེད་པ་ཞེས་བྱ་བ་ནི་ཟག་པ་བཞི་དང་
བྲལ་བའི་ཕྱིར་ཏེ། འདི་ལྟ་སྟེ། འདོད་པའི་ཟག་པ་དང་བྲལ་བ་དང་། སྲིད་པའི་ཟག་པ་དང་བྲལ་བ་དང་། མ་རིག་པའི་ཟག་པ་དང་བྲལ་བ་དང་། ལྟ་བའི་ཟག་པ་དང་བྲལ་བའི་ཕྱིར་རོ། །ཉེ་བར་ལེན་པ་མེད་པ་ཞེས་བྱ་བ་ནི་ཉེ་བར་ལེན་པ་བཞི་དང་བྲལ་བའི་ཕྱིར་ཏེ།
འདི་ལྟར་འདོད་པའི་ཉེ་བར་ལེན་པ་དང་བྲལ་བ་དང་། ལྟ་བའི་ཉེ་བར་ལེན་པ་དང་བྲལ་བ་དང་། བདག་ཏུ་སྨྲ་བའི་ཉེ་བར་ལེན་པ་དང་བྲལ་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཉེ་བར་ལེན་པ་དང་བྲལ་བའི་ཕྱིར་རོ། །དེ་ལ་ཉེ་བར་ལེན་པ་བཞི་པོ་འདི་
དག་ཐམས་ཅད་ཀྱང་མ་རིག་པས་མུན་པར་བྱས་ཤིང་སྲེད་པས་བསྙེན་ཏེ། བདག་གོ་སྙམ་དུ་མངོན་པར་ཞེན་པས་ཉེ་བར་ལེན་པ་དག་གོ། །དེ་ལ་དེ་བཞིན་གཤེགས་པས་བདག་ཉེ་བར་ལེན་པའི་རྩ་བ་ཡོངས་སུ་ཤེས་ནས། བདག་རྣམ་པར་དག་པས་སེམས་ཅན་རྣམ་པར་
དག་པར་རྟོགས་སོ། །བདག་རྣམ་པར་དག་པ་གང་ཡིན་པ་དང་། སེམས་ཅན་ཐམས་ཅད་རྣམ་པར་དག་པ་གང་ཡིན་པ་དེ་གཉིས་སུ་མེད་ཅིང་གཉིས་སུ་དབྱེར་མེད་དོ། །གཉིས་སུ་མེད་པའི་དོན་གང་ཡིན་པ་དེ་སྐྱེ་བ་མེད་དོ། །སྐྱེ་བ་དང་འགག་པ་མེད་པས་སེམས་དང་།

ཡིད་དང་། རྣམ་པར་ཤེས་པ་རྣམས་མི་འཇུག་གོ། །གང་ལ་སེམས་དང་། ཡིད་དང་། རྣམ་པར་ཤེས་པ་མི་འཇུག་པ་དེ་ལ་ཡོངས་སུ་རྟོག་པ་གང་གིས་ཚུལ་བཞིན་མ་ཡིན་པ་ཡིད་ལ་བྱེད་པར་འགྱུར་བའི་ཡོངས་སུ་རྟོག་པ་གང་ཡང་མེད་དོ། །དེར་ཚུལ་བཞིན་
ཡིད་ལ་བྱེད་པ་དང་ལྡན་པས་མ་རིག་པ་ཀུན་ནས་མི་སློང་ངོ་། །གང་མ་རིག་པ་ཀུན་ནས་མི་ལྡང་བ་དེ་སྲིད་པའི་ཡན་ལག་བཅུ་གཉིས་ཀུན་ནས་མི་ལྡང་ངོ་། །གང་སྲིད་པའི་ཡན་ལག་བཅུ་གཉིས་ཀུན་ནས་མི་ལྡང་བ་དེ་མི་སྐྱེ་བའོ། །གང་མི་སྐྱེ་བ་དེ་ངེས་པར་གྱུར་པའོ། །གང་
ངེས་པར་གྱུར་པ་དེ་ངེས་པའི་དོན་ཏོ། །ངེས་པའི་དོན་གང་ཡིན་པ་དེ་དོན་དམ་པའོ། །དོན་དམ་པ་གང་ཡིན་པ་དེ་གང་ཟག་མེད་པའི་དོན་ཏོ། །གང་ཟག་མེད་པའི་དོན་གང་ཡིན་པ་དེ་བརྗོད་དུ་མེད་པའི་དོན་ཏོ། །བརྗོད་དུ་མེད་པའི་དོན་གང་ཡིན་པ་དེ་རྟེན་ཅིང་འབྲེལ་པར་འབྱུང་
བའི་དོན་ཏོ། །རྟེན་ཅིང་འབྲེལ་པར་འབྱུང་བའི་དོན་གང་ཡིན་པ་དེ་ཆོས་ཀྱི་དོན་ཏོ། །ཆོས་ཀྱི་དོན་གང་ཡིན་པ་དེ་དེ་བཞིན་ཉིད་ཀྱི་དོན་ཏོ། །དེ་བཞིན་ཉིད་ཀྱི་དོན་ག