Kinh tạng Tây Tạng (Kangyur Đại Học) — 054_མདོ་སྡེ།_ཐ

བསྒོམ། །སེམས་ཅན་གང་དག་ཤིན་ཏུ་ལོག་གྱུར་པ། །ཡེ་ཤེས་ལྡན་པས་མི་ཤེས་ཤེས་པར་མཛད། །འདས་པའི་དྲང་སྲོང་ཆེན་པོ་གང་བྱུང་སྟེ། །རྒྱལ་བ་དེ་དག་གི་ཡང་ཤུལ་མཆོག་འདི། །དྲང་སྲོང་མཆོག་ཀྱང་དེ་ཡི་ཤུལ་ནས་གཤེགས། །མ་བྱོན་གང་དེ་རྣམས་ཀྱང་གཤེགས་པར་འགྱུར། །དེ་བཞིན་ཆོས་འདི་རབ་ཏུ་
སུས་རྟོགས་པ། །དེ་ལ་གལ་ཏེ་སངས་རྒྱས་བྱེ་སྟོང་གིས། །འདི་ནི་ཚུལ་མ་ཡིན་ཞེས་གསུངས་ན་ཡང་། །ཁྱེད་ནི་རྒྱལ་བ་མ་ཡིན་དེ་ཞེས་སྨྲ། །གཞན་གྱི་བློ་ཕྱིར་གང་དག་མི་མཆི་བ། །དེ་ཡི་སེམས་ནི་དེ་ལས་ཡོངས་མི་འགྱུར། །རྒྱལ་བའི་ཚུལ་ལ་བདག་ནི་མངོན་སུམ་གྱུར། །མི་ཡི་རྒྱལ་པོ་ཁྱོད་ནི་མི་གསུང་

བཞུགས། །བདེ་བར་གཤེགས་པས་ཆོས་གང་རབ་བཤད་པ། །དེ་ལ་བདག་ནི་གང་ལའང་དོགས་མ་མཆིས། །བདག་གི་ཆོས་ཉིད་འདི་འཚལ་འཕྲོག་མི་ནུས། །གང་གིས་བཟོད་པ་གསུམ་པོ་དེ་འཚལ་བ། །དེ་ནི་ཇི་ལྟར་རྒྱལ་བའི་སྤྱོད་བཞིན་ཏེ། །མཆི་བ་དང་ནི་སླར་མཆི་ཉལ་བ་དང་། །སྨྲ་ཞིང་འཆག་པ་དག་ཀྱང་
སྟོན་པ་བཞིན། །དེ་ཡི་སྤྱོད་ལམ་རྣམས་ཀྱང་དེ་དང་འདྲ། །ལུང་སྟོན་པ་ཡང་རྒྱལ་བའི་རང་བཞིན་ཏེ། །རྒྱལ་བའི་བློ་གྲོས་ལ་ནི་དེ་ཡང་གནས། །འགྲོ་བ་ཐམས་ཅད་ཀྱིས་ནི་བསྐྱོད་མི་ནུས། །ཟླ་བ་སྐར་བཅས་ས་ལ་ལྷུང་ཡང་གདའ། །དེ་ལ་རྣམ་པར་འགྱུར་བ་ཡོང་མི་འབྱུང་། །ནམ་མཁར་འབྲས་ཆགས་ལྷུན་པོ་རྡིབ་ཀྱང་
གདའ། །དེ་ཡི་ཆོས་ཉིད་གཞན་དུ་ཡོད་མི་འགྱུར། །སྐྱེས་བུ་དེས་ནི་བཟོད་པ་འདི་རྙེད་ནས། །སེམས་ཅན་རིག་པར་མཛད་པའི་སངས་རྒྱས་འགྱུར། །གང་གིས་སངས་རྒྱས་རང་འབྱུང་འགྱུར་བ་ཡི། །དེ་འདྲ་བ་ཡི་ཆོས་ཉིད་དེས་རྟོགས་སོ། །རྒྱལ་ལས་མངོན་སུམ་བདག་གིས་འདི་ཐོས་ཏེ། །བཟོད་པ་འདི་རྙེད་ནས་ནི་
ཕྱིར་མི་ལྡོག །སངས་རྒྱས་གྱུར་ནས་རྣམ་པར་རྟོགས་བགྱིད་འགྱུར། །འགྲོ་བ་རྣམས་ལའང་ཆོས་འདི་གོ་བར་མཛད། །ཇི་ལྟར་བདག་གི་ཆོས་ཉིད་མཐོང་བའི་རྣམས། །དེ་ནི་གཞན་ལ་རབ་ཏུ་བཤད་པར་བགྱི། །རྒྱལ་བ་རྣམས་ཀྱི་བློ་གྲོས་བསྟན་བགྱི་སྟེ། །སེམས་ཅན་མི་རྟོགས་རྣམས་ཀྱང་རྟོགས་པར་བགྱི། །རྒྱལ་བ་
རྣམས་ཀྱིས་ཇི་ལྟར་ཆོས་གཟིགས་པ། །དེ་འདྲའི་ཆོས་ཉིད་རྣམས་ནི་རབ་ཏུ་བསྟན། །གང་ལ་གནས་པས་རང་འབྱུང་འགྱུར་བ་ཡི། །དེ་རིང་བླ་མེད་བཟོད་པ་བདག་གིས་ཐོབ། །རང་བྱུང་ཐུབ་དབང་དེ་ལ་སྐྱབས་སུ་མཆི། །འཇིག་རྟེན་སྨན་སླད་སྤྱོད་པ་བདག་གིས་སྤྱད། །རང་བྱུང་རྒྱལ་བའི་ཞིང་རྣམས་ཡོངས་སུ་
སྤྱད། །འགྲོ་བ་སྡུག་བསྔལ་དུབ་པ་རབ་ཏུ་དགྲོལ། །དེ་བཞིན་རྒྱལ་བའི་རྗེས་སུ་སློབ་བགྱིད་ཅིང་། །སེམས་ཅན་འགྲོ་བ་ཐོབ་པར་རྣམ་པར་གྲོལ། །སངས་རྒྱས་ཚུལ་ལ་བདག་གིས་ཚུལ་ཡང་འཚལ། །སེམས་ཅན་སྤྱོད་པ་འདི་འདྲ་བདག་གིས་སྤྱད། །ཞི་བའི་བློ་གྲོས་ཆོས་ཉིད་འདི་རིག་ནས། །ཞིང་
བརྒྱ་དག་ཏུ་སྤྲུལ་པ་སྤྲུལ་པ་བགྱིས། །སེམས་ཅན་ཀུན་གྱི་ཚུལ་ལ་རབ་ཞུགས་ནས། །སོ་སོར་འཐུན་པར་སྤྲུལ་པ་ཤིན་ཏུ་སྤྲུལ། །དེས་ནི་བསམ་མི་ཁྱབ་པའི་ཞིང་རྣམས་སྦྱངས། །སེམས་ཅན་བསམ་མི་ཁྱབ་ལ་གདམས་ངག་སྩལ། །ཆོས་ཚུལ་ཤིན་ཏུ་བཟང་བ་འཛིན་

དུ་སྩལ། སྟོན་པའི་བློ་གྲོས་ལ་ནི་ཐམས་ཅད་བཙུད། །དེ་ནས་དགེ་སློང་ཞི་བའི་བློ་གྲོས་དེས་ཆེར་རྗེས་སུ་འཐུན་པའི་བཟོད་པ་རབ་ཏུ་ཐོབ་ནས་བརྗོད་དུ་མེད་པའི་ཞིང་རྣམས་སྤྲུལ་པས་ཀུན་དུ་གང་བར་བྱས་སོ། །འཇམ་དཔལ་དེའི་ཚེ་དེའི་དུས་ན་དགེ་སློང་ཞི་བའི་
བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཡིད་གཉིས་དང་ཐེ་ཚོམ་ཟ་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་ཚེ་དེའི་དུས་ན་དགེ་སློང་ཞི་བའི་བློ་གྲོས་ཞེས་བྱ་བར་གྱུར་ཏོ། །འཇམ་
དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་མི་སྐྱེ་བའི་ཆོས་ལ་བཟོད་པ་ཐོབ་པར་འདོད་པས་བརྩོན་འགྲུས་བརྩམ་མོ། །ཇི་ལྟར་ན་བདག་གི་སེམས་སྤྱོད་ཡུལ་མ་ཡིན་པ་ལ་མི་སྤྱོད་ཅིང་། ཇི་ལྟར་ན་བདག་གི་སེམས་ཆོས་ཉིད་ཀྱིས་ལམ་གོལ་བ་ལ་གནས་པར་
མི་འགྱུར་སྙམ་དུ་དེ་གལ་ཏེ་སེམས་མི་གཡེང་བར་བྱ་བའི་ཕྱིར་བརྩོན་འགྲུས་རྩོམ་ཞིང་བརྩོན་འགྲུས་བརྩམས་ཏེ་གནས་པའི་བྱང་ཆུབ་སེམས་དཔའ་ལ་མྱུར་དུ་མི་སྐྱེ་བའི་ཆོས་ལ་བཟོད་པ་སྐྱེ་བར་འགྱུར་རོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་གྲངས་
མེད་པ་ནས་བརྗོད་དུ་མེད་པའི་བར་དེའི་ཕ་རོལ་གྱི་ཡང་ཆེས་ཕ་རོལ་ན་དེའི་ཚེ་དེའི་དུས་ན་བསྐལ་པ་རྟག་གི་འོད་ཅེས་བྱ་བ་བྱུང་སྟེ། བསྐལ་པ་རྟག་གི་འོད་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་དེའི་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་ཞེས་བྱ་བ་བྱུང་སྟེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དེས་བརྩོན་འགྲུས་རྩོམ་པ་བདག་དང་འདྲ་བ་མ་མཐོང་སྟེ། དེའི་

ཚེ་ན་བཅོམ་ལྡན་འདས་དེའི་སངས་རྒྱས་ཀྱི་ཞིང་ན་བྱང་ཆུབ་སེམས་དཔའ་ཚངས་པར་སྤྱོད་པ་ཇི་སྙེད་པ་དེ་དག་གི་ནང་ན་བྱང་ཆུབ་སེམས་དཔའ་བརྩོན་འགྲུས་བརྩམས་པ་དེ་མཆོག་ཏུ་བརྗོད་དོ། །དེ་ནས་དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་འཁོར་བརྒྱ་སྟོང་དུ་མས་བསྐོར་
ཅིང་མདུན་གྱིས་བལྟས་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་སྟན་ལས་ལངས་ཏེ། གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་
ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་
གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོས་བྱང་ཆུབ་སེམས་དཔའ་བརྩོན་འགྲུས་བརྩམས་པ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་འདོད་པ་དྲིས་ཤིག་དང་། དྲིས་པ་དེ་
དང་དེའི་ལུང་བསྟན་པས་སེམས་རངས་པར་བྱའོ། །དེ་ནས་བྱང་ཆུབ་སེམས་དཔའ་བརྩོན་འགྲུས་བརྩམས་པས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བརྩོན་འགྲུས་བརྩམས་པ་བརྩོན་འགྲུས་
བརྩམས་པ་ཞེས་བགྱི་བ་བཅོམ་ལྡན་འདས་ཇི་ཙམ་གྱིས་ན་བྱང་ཆུབ་སེམས་དཔའ་བརྩོན་འགྲུས་བརྩམས་པ་ལགས་དེ་སྐད་ཅེས་གསོལ་པ་དང་། དེ་བཞིན་གཤེགས་པ་དྲི་མ་མེད་པའི་ཟླ་འོད་གཟི་བརྗིད་རྒྱལ་པོས་བྱང་ཆུབ་སེམས་དཔའ་བརྩོན་འགྲུས་བརྩམས་པ་ལ་འདི་སྐད་ཅེས་བཀའ་
སྩལ་ཏོ། །ལེགས་སོ་ལེགས་སོ། །རིགས་ཀྱི་བུ་ཁྱོད་དེ་བཞིན་གཤེགས་པ་ལ་དེ་ལྟ་བུའི་དོན་འདྲི་བ་ནི་རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་བདེ་བའི་ཕྱིར་ཞུགས་

པ་སྟེ། རིགས་ཀྱི་བུ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས་བྱང་ཆུབ་སེམས་དཔའ་བརྩོན་འགྲུས་བརྩམས་པས་བཅོམ་ལྡན་འདས་དེའི་ལྟར་ཉན་པ་དང་། བཅོམ་ལྡན་འདས་ཀྱིས་
དེ་ལ་འདི་སྐད་ཅེས་བཀའ་སྩལ་ཏོ། །ནམ་བྱང་ཆུབ་སེམས་དཔའ་མཉམ་པ་ཉིད་རབ་ཏུ་རྟོགས་པར་བྱ་བའི་ཕྱིར་བརྩོན་པ་མི་འདོར་བར་གྱུར་ཏེ། སྐད་ཅིག་ཀྱང་མི་འདུག་ཅིང་། འདི་ལྟར་ཆོས་ཐམས་ཅད་ལ་རབ་ཏུ་རྟོགས་པར་བྱ་བའི་ཕྱིར་བློ་གྲོས་གཞན་དུ་མི་འགྱུར་ཏེ་ཡིད་གཞན་
དུ་མི་འཇུག་ན། དེ་ཙམ་གྱིས་རིགས་ཀྱི་བུ་བྱང་ཆུབ་ཀུན་བསྒྲུབ་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་ཡིན་ནོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ཀྱི་བརྩོན་འགྲུས་རྗེས་སུ་དྲན་ཏེ། དེ་ལྟར་སྔོན་གྱི་དེ་བཞིན་གཤེགས་པ་དེ་དག་བྱང་ཆུབ་སེམས་དཔའི་སྤྱད་པ་སྤྱོད་པ་ན་ལུས་དང་སེམས་གཉིས་ཡང་དག་པར་རབ་ཏུ་བཟུང་ནས་སྦྱིན་པ་སྦྱིན་པ་དེ་བཞིན་དུ་བདག་གིས་ཀྱང་སྦྱིན་པ་སྦྱིན་ནོ། །དེ་ལྟར་སྦྱིན་པ་ན་དེ་བཞིན་དུ་
རབ་ཏུ་རྟོགས་ན་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པར་འགྱུར་རོ། །ཇི་ལྟར་ན་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ཞེ་ན། འདི་ལྟ་སྟེ། དེ་ནི་སྦྱིན་པ་དང་། སྦྱིན་པ་པོ་དང་། ལེན་པ་དང་། ལེན་པ་པོ་མི་དམིགས་པ་སྟེ། དེ་ནི་དེའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །
སངས་རྒྱས་ཀྱི་ཞིང་བརྗོད་དུ་མེད་པ་བདག་གིས་ཡོངས་སུ་སྦྱང་ངོ་སྙམ་པ་ནི་ལུས་དང་སེམས་ཡང་དག་པར་བཟུང་བ་ཡིན་ཏེ། འདི་ལྟར་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་དག་པར་བྱའོ་སྙམ་པ་ནི་ལུས་དང་སེམས་ཡང་དག་པར་བཟུང་བ་ཡིན་ནོ། །འདི་ལྟར་བདག་གིས་བརྗོད་དུ་མེད་
པའི་སེམས་ཅན་རྣམས་ཡོངས་སུ་སྨིན་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་བདག་གིས་དེ་བཞིན་གཤེགས་པའི་སྟོབས་རྣམས་ཡོངས་སུ་རྫོགས་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་བདག་

གིས་དེ་བཞིན་གཤེགས་པའི་མི་འཇིགས་པ་རྣམས་ཡོངས་སུ་གཟུང་བར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་དེ་བཞིན་གཤེགས་པའི་དབང་པོ་རྣམས་ཡོངས་སུ་གཟུང་ངོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་
ལྟར་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་གཟུང་བར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ཐམས་ཅད་མཁྱེན་པ་ཡོངས་སུ་གཟུང་བར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ཐབས་
མཁས་པ་ལ་བསླབ་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་སེམས་ཅན་རྣམས་ཀྱི་བསམ་པ་ལ་འཇུག་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་དུས་ཤེས་པ་ལ་བསླབ་པོ་སྙམ་པ་ནི་ལུས་དང་
སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ཚོད་ཤེས་པ་དང་། དོན་ཤེས་པ་དང་། ཆོས་ཤེས་པ་དང་། བདག་ཤེས་པ་དང་། ཕ་རོལ་ཤེས་པ་དང་། གང་ཟག་མཆོག་དང་། མཆོག་མ་ཡིན་པ་ཤེས་པ་ལ་བསླབ་པར་བྱའོ་སྙམ་པ་ནི་ལུས་དང་སེམས་ཡང་དག་པར་
རབ་ཏུ་བཟུང་བ་ཡིན་ནོ། །དེ་ལྟར་ཡོངས་སུ་སྤང་བའི་རིགས་པ་ནི་ཡོངས་སུ་སྤང་བར་བྱ། འདི་ལྟར་བསྙེན་པའི་རིགས་པ་ནི་བསྙེན་པར་བྱའོ་སྙམ་པ་ནི་ལུས་དང་སེམས་ཡང་དག་པར་རབ་ཏུ་བཟུང་བ་ཡིན་ནོ། །འདི་ལྟར་ལུས་བརྟག་པར་མཁས་པ་ལ་བསླབ་པོ་སྙམ་པ་ནི་དེ་ལུས་དང་སེམས་
ཡང་དག་པར་རབ་ཏུ་བཟུང་བ་ཡིན་ཏེ། དེ་ལ་ལུས་ཡང་དག་པར་རབ་ཏུ་འཛིན་པ་དང་། སེམས་ཡང་དག་པར་རབ་ཏུ་འཛིན་པ་འདི་ནི་བརྩོན་འགྲུས་ཞེས་བྱའོ། །གང་མི་གཡོ་བ་དང་མི་ལྷོད་པར་འཇུག་པ་དང་། རྒྱུན་མི་འཆད་པ་དང་། རྒྱུན་ཆགས་པ་དང་། རྗེས་སུ་འཛིན་པ་དེ་ནི་བརྩོན་
པ་ཞེས་བྱའོ། །གང་བརྩོན་འགྲུས་འདི་དང་། གང་རྩོམ་པ་འདི་ལ་མངོན་པར་བརྩོན་པ་དེ་ནི་བརྩོན་འགྲུས་བརྩམས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དེས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་འདི་ཐོས་ནས་ཆོས་ཐམས་ཅད་ལ་

དབང་བྱེད་པའི་ཏིང་ངེ་འཛིན་ལ་གནས་པར་གྱུར་ཏོ། །བརྩོན་འགྲུས་རྩོམ་པ་འདི་ལ་ཡང་གནས་པར་གྱུར་ཏོ། །འཇིག་རྟེན་གྱི་ཁམས་དཔག་ཏུ་མེད་པ་ན་སེམས་ཅན་རྣམས་དད་པ་ཇི་ལྟ་བ་བཞིན་ཡོངས་སུ་སྨིན་པར་བྱ་བའི་ཕྱིར་སྤྲུལ་པ་རྣམ་པ་དུ་མ་མངོན་པར་སྤྲུལ་ཏེ།
ཐབས་མཁས་པ་དཔག་ཏུ་མེད་པ་དང་ལྡན་པས་སེམས་ཅན་དཔག་ཏུ་མེད་པ་དག་ཡོངས་སུ་སྨིན་པར་བྱས་སོ། །སངས་རྒྱས་ཀྱི་ཞིང་དེ་དང་དེ་དག་ཏུ་སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་མཉེས་པར་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་
བརྩམས་པ་དེས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པ་ཟླ་འོད་གཟི་བརྗིད་རྒྱལ་པོ་དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །སྟོབས་བཅུ་ལྡན་པ་ཁྱོད་ནི་བརྩོན་འགྲུས་ཀྱིས། །མཚུངས་འདྲའི་སེམས་ཅན་
གང་ཡང་མི་རྙེད་དེ། །ཐུབ་པ་དམ་པ་ཁྱོད་ནི་བརྩོན་འགྲུས་ཀྱིས། །ཆོས་ཉིད་མཆོག་ལ་ཡང་དག་རེག་པར་གྱུར། །སྟོབས་བཅུ་ལྡན་པ་ཁྱོད་ནི་བརྩོན་འགྲུས་ཀྱིས། །སངས་རྒྱས་ཞིང་ནི་དཔག་ཡས་ཡོངས་སུ་དག །སེམས་ཅན་རྣམས་ནི་ཡོངས་སུ་སྨིན་པར་མཛད། །ཤེས་རབ་
ཚད་ནི་དཔེ་ཟླ་མ་མཆིས་ལགས། །སྟོབས་བཅུ་ལྡན་པ་མི་ཡི་སེང་གེ་ཁྱོད། །བརྩོན་འགྲུས་ཀྱིས་ནི་སེམས་ཅན་འདུ་ཤེས་བཤིག །ཁྱོད་ཀྱིས་སྟོང་པ་ཉིད་ནི་རབ་ཏུ་མཁྱེན། །སེམས་ཅན་འདུ་ཤེས་དེ་ཡང་ཁྱོད་ཀྱིས་སྤངས། །ཁྱོད་ཀྱིས་སྟོང་པ་ཉིད་ནི་མི་དམིགས་པར། །བརྩོན་
འགྲུས་ཀྱིས་ནི་ཆོས་ཀུན་རབ་ཏུ་མཁྱེན། །བརྩོན་འགྲུས་སྟོབས་ཀྱིས་ཕ་རོལ་ཕྱིན་པས་ན། །ཞི་བའི་ས་རྣམས་ལ་ཡང་རབ་ཏུ་བཞུགས། །བདེ་གཤེགས་ཁྱོད་ཀྱི་སྲས་རྣམས་རྗེས་སློབ་པས། །བླ་ན་མེད་པའི་བྱང་ཆུབ་རབ་ཏུ་མཆིས། །སྟོབས་བཅུ་ལྡན་པ་ཁྱོད་ཀྱི་བརྩོན་འགྲུས་ཀྱིས། །
ཡང་དག་ཆེ་བའི་བདག་ཉིད་རབ་ཏུ་བསྟན། །བརྩོན་འགྲུས་སྟོབས་ཀྱིས་ཕ་རོལ་ཕྱིན་པ་ལ། །བདེ་བར་གཤེགས་པ་ཁྱོད་ཀྱི་སྲས་རྣམས་སློབ། །སྤྲུལ་པ་རྣམ་པ་སྣ་ཚོགས་བརྒྱ་དག་གིས། །སེམས་ཅན་རྣམས་ནི་ཡོངས་སུ་སྨིན་པར་བགྱིད། །འགྲོ་བ་རྣམས་ནི་རབ་ཏུ་དགྲོལ་སླད་དུ། །

ཁྱོད་ཀྱི་སྲས་རྣམས་བྱང་ཆུབ་གང་ཞུགས་པ། །དེ་དག་བཅོམ་ལྡན་ཁྱོད་ཀྱི་གོ་འཕང་འདིར། །བདེ་བར་གཤེགས་པའི་སྲས་རྣམས་རྗེས་སུ་མཆི། །འགྲོ་བ་རྣམས་ནི་ཡོངས་སྨིན་བགྱི་སླད་དུ། །ཁྱོད་ཀྱི་སྲས་རྣམས་གོ་བགོས་སྤྱོད་པ་ནི། །ཁྱོད་ཀྱི་རྗེས་སུ་ཐམས་ཅད་རབ་སློབ་
ཅིང་། །སེམས་ཅན་མང་པོ་བྱང་ཆུབ་ལ་ཡང་འགོད། །མི་ཡི་དབང་པོ་སེང་གེ་ཁྱོད་ཀྱི་སྲས། །ཁྲག་ཁྲིག་བརྩོན་འགྲུས་དག་ལ་གནས་ནས་སུ། །དེ་དག་འགྲོ་བ་ཡོངས་སུ་དགྲོལ་སླད་དུ། །རྒྱལ་བའི་ཞིང་ནི་ཁྲག་ཁྲིག་རྣམས་སུ་མཆི། །རྒྱལ་བའི་ཞལ་ནི་དྲི་མེད་ཟླ་བ་
ལྟར། །ཤིན་ཏུ་ཟིལ་གྱིས་མི་གནོན་མཐའ་ཡས་འོད། །ཐུབ་པ་ཁྱོད་སྲས་མཚུངས་པ་མ་མཆིས་པ། །སྤྱད་པས་དག་པར་གྱུར་པའི་སྤྱད་པ་སྤྱོད། །ཁྱོད་ཀྱི་སྲས་པོ་མི་བློ་རྣམ་དག་རྣམས། །སངས་རྒྱས་ཞིང་རྣམས་ཡོངས་སུ་དག་བགྱིད་ཅིང་། །མི་མཆོག་དབང་པོས་
སེམས་ཅན་ཁྲག་ཁྲིག་རྣམས། །བདག་མ་མཆིས་པར་རབ་ཏུ་འཚལ་བར་བགྱིས། །བརྩོན་འགྲུས་ཀྱིས་ནི་བརྩོན་འགྲུས་མཚུངས་མ་མཆིས། །ཏིང་འཛིན་མི་གཡོ་བརྟན་པའི་ཏིང་ངེ་འཛིན། །བརྩོན་འགྲུས་སྟོབས་ཀྱིས་ཕ་རོལ་ཕྱིན་ནས་སུ། །ལྷ་དང་མི་རྣམས་བརྩོན་འགྲུས་
སྐྱེད་དུ་བཅུག །ལྷ་མི་དྲི་ཟར་བཅས་པའི་འཇིག་རྟེན་དག །བརྩོན་འགྲུས་ཀྱིས་ནི་ཤིན་ཏུ་ཟིལ་གྱིས་གནོན། །བྱང་ཆུབ་འཚལ་བས་བརྩོན་འགྲུས་རབ་ཏུ་བརྟན། །སྲིད་པ་དག་ལས་སྐྱེ་བོ་སྒྲོལ་བར་འཚལ། །གང་གིས་འདུས་བྱས་མཚན་མ་རྣམས་བཤིག་ཅིང་། །དེ་དག་
གིས་ནི་བྱང་ཆུབ་ཐོབ་མ་མཆིས། །བརྩོན་འགྲུས་དག་ཀྱང་ནམ་དུའང་མི་ཉམས་པ། །དེ་དག་ལ་ནི་རབ་ཏུ་ཕྱག་འཚལ་ལོ། །གང་རྣམས་བསམ་པ་རྟག་ཏུ་བྱང་ཆུབ་ཕྱིར། །གང་དེ་རྒྱལ་བའི་རིགས་རྣམས་འཛིན་པ་དག །བདེ་གཤེགས་གོ་འཕང་གཞོལ་ཞིང་བརྟན་པ་རྣམས། །
དེ་དག་ལ་ཡང་རབ་ཏུ་ཕྱག་འཚལ་ལོ། །སྐྱེ་བོ་དག་གི་དོན་དང་སྨན་སླད་དུ། །གང་དག་རབ་ཏུ་ཞུམ་པར་མི་འགྱུར་ཞིང་། །རྟག་ཏུ་བདེ་བར་གཤེགས་པའི་གོ་འཕང་ནི། །རྒ་ཤི་མ་མཆིས་པ་ལ་དད་པ་རྣམས། །དེ་དག་ལ་ཡང་རབ་ཏུ་ཕྱག་འཚལ་ལོ། །ནད་དང་རྒ་ཤི་དག་ལས་

རབ་ཐར་བ། །དྲི་མ་གསུམ་བཅོམ་ཁྱོད་ཀྱི་སྐྱབས་མཆིས་པས། །དགེ་བ་དེ་ཡིས་བདེ་བར་གཤེགས་གྱུར་ཏེ། །མི་རྒ་མི་འཆི་བྱང་ཆུབ་རེག་པར་ཤོག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པས་བཅོམ་ལྡན་འདས་དེ་
བཞིན་གཤེགས་པ་དྲི་མ་མེད་པ་ཟླ་འོད་གཟི་བརྗིད་རྒྱལ་པོ་དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་ནས་དེ་བརྩོན་འགྲུས་རྩོམ་པ་དེ་དང་ལྡན་པར་གྱུར་ཏོ། །དེ་བསྐལ་པ་བྱེ་བ་དགུ་བཅུའི་འཁོར་བ་ཕྱིར་བསྙིལ་བར་གྱུར་
ཏོ། །འདི་ལྟར་ཡང་འཇམ་དཔལ་དེའི་ཚེ་དེའི་དུས་ན་བྱང་ཆུབ་སེམས་དཔའ་བརྩོན་འགྲུས་བརྩམས་པར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྱང་ཆུབ་
སེམས་དཔའ་བརྩོན་འགྲུས་བརྩམས་པར་གྱུར་ཏོ། །འཇམ་དཔལ་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་ཡང་དག་པར་ཞུགས་པ། སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་སྦྱང་བར་འདོད་པ་དང་སེམས་ཅན་དཔག་ཏུ་མེད་པ་རྣམས་ཡོངས་སུ་སྨིན་པར་བྱ་བར་འདོད་
པས་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་དགེ་བའི་རྩ་བ་དག་ཡོངས་སུ་བསྔོ་བར་བྱའོ། །སྒྲིབ་པ་མེད་པའི་རྣམ་པར་ཐར་པ་རྟོགས་པར་བྱ་བའི་ཕྱིར་བརྩོན་འགྲུས་ཀྱང་མི་གཏོང་བར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་སྒྲིབ་པ་
མེད་པའི་རྣམ་པར་ཐར་པ་ལ་གནས་པ་ནི་སེམས་ཅན་གྱི་བསམ་པ་རིག་པར་བྱ་བའི་ཕྱིར་སེམས་གནས་ཏེ། དེ་བཞིན་གཤེགས་པའི་སྟོབས་ཡོངས་སུ་གྲུབ་ནས་སེམས་ཅན་ཐམས་ཅད་ཀྱི་བསམ་པའི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དེ་འཐོབ་བོ། །དེས་ཏིང་ངེ་འཛིན་དེ་ཐོབ་ནས་སེམས་ཅན་
ཕུང་པོ་གསུམ་དུ་འབྱེད་དེ། གསུམ་གང་ཞེ་ན། ཡང་དག་པ་ཉིད་དུ་ངེས་པའི་ཕུང་པོ་དང་། ལོག་པ་ཉིད་དུ་ངེས་པའི་ཕུང་པོ་དང་། མ་ངེས་པའི་ཕུང་པོའོ། །དེ་སེམས་ཅན་གང་དག་ལོག་པ་ཉིད་དུ་ངེས་པའི་ཕུང་པོ་ལ་གནས་པ་དེ་དག་ཡོངས་སུ་སྨིན་པར་བྱ་བའི་ཕྱིར་ཐབས་མཁས་པ་ལ་

སློབ་ཅིང་སེམས་ཅན་གང་དག་ལོག་པ་ཉིད་དུ་ངེས་པའི་ཕུང་པོ་ལ་གནས་པ་དེ་དག་ཅི་ནས་དྲང་བའི་ཕྱིར་ཐབས་མཁས་པ་ལ་སློབ་སྟེ། དེ་ཐབས་མཁས་པ་དེ་དང་ལྡན་པས་ལོག་པ་ཉིད་དུ་ངེས་པའི་སེམས་ཅན་རྣམས་རབ་ཏུ་དྲང་བའི་ཕྱིར་བསྐལ་པ་བརྗོད་དུ་མེད་པར་འཁོར་བ་ན་འདུག་
གོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་བསམ་གྱིས་མི་ཁྱབ་མཚུངས་པ་མེད་བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་བདུད་རྩིའི་སྙིང་པོ་ཞེས་བྱ་བའི་བསྐལ་པ་བྱུང་སྟེ། བདུད་རྩིའི་སྙིང་པོའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་ཏོག་རྒྱུན་མི་འཆད་པའི་རྒྱལ་པོ་ཞེས་
བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེའི་སངས་རྒྱས་ཀྱི་ཞིང་དེར་ཡང་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་ཞེས་བྱ་བ་སངས་རྒྱས་ཁྲག་ཁྲིག་ཚད་མེད་པ་ལ་བསྙེན་བཀུར་བྱས་པ་དགེ་བའི་རྩ་བ་
ཚད་མེད་པ་དང་ལྡན་པ་ཞིག་བྱུང་ངོ་། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་དེ། བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེ་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་དེའི་ཞབས་ལ་མགོ་བོས་ཕྱག་འཚལ་
ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །ཇི་ཙམ་གྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་སེམས་ཅན་ཡོངས་སུ་སྨིན་པར་བགྱི་བ་དང་། སངས་རྒྱས་ཀྱི་ཞིང་ཡོངས་སུ་སྦྱང་བའི་ཐབས་མཁས་པ་དང་ལྡན་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོས་བྲམ་ཟེའི་

རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་ལ་འདི་སྐད་ཅེས་བཀའ་སྩལ་ཏོ། །དབང་པོས་བྱིན་བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ཀྱི་བསམ་པའི་རྗེས་སུ་སོང་བ་ཞེས་བྱ་བ་ཐོབ་པ་དེ་ན་
བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཐབས་མཁས་པ་དང་ལྡན་པར་འགྱུར་རོ། །དེ་བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ཀྱི་བསམ་པའི་རྗེས་སུ་
སོང་བ་དེ་དང་ལྡན་པས་སྨོན་ལམ་གང་དང་གང་བཏབ་པ་དེ་དང་དེས་ངེས་པར་འབྱུང་བར་འགྱུར་ཏེ། དེས་ཡིད་བཞིན་དུ་རབ་ཏུ་རྙེད་ཅིང་སྒྲུབ་བོ། །དེ་འདོད་ན་དེ་བཞིན་གཤེགས་པ་གཅིག་གི་སྨོན་ལམ་ཡོངས་སུ་རྫོགས་པར་བྱེད། དེ་འདོད་ན་དེ་བཞིན་གཤེགས་པ་གཉིས་ཀྱི་སྨོན་ལམ་ཡོངས་
སུ་རྫོགས་པར་བྱེད། དེ་འདོད་ན་དེ་བཞིན་གཤེགས་པ་གསུམ་གྱི་སྨོན་ལམ་ཡོངས་སུ་རྫོགས་པར་བྱེད་དེ། དེ་བཞིན་གཤེགས་པ་གྲངས་མེད་པའི་བར་གྱི་སྨོན་ལམ་ཡོངས་སུ་རྫོགས་པར་བྱེད་དོ། །དེ་བཞིན་གཤེགས་པ་བསམ་གྱིས་མི་ཁྱབ་པའི་སྨོན་ལམ་ཀུན་རྫོགས་པར་བྱེད་པས་
སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ཡོངས་སུ་དག་པར་འགྱུར་རོ། །དབང་པོས་བྱིན་ཤར་གྱི་ཕྱོགས་ཆ་ན་གང་གཱའི་ཀླུང་གི་བྱེ་མ་སྙེད་དང་མཉམ་པའི་སངས་རྒྱས་ཀྱི་ཞིང་འདས་པ་ན་རིན་ཆེན་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་དགེ་བའི་ཟླ་བ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ། །དབང་པོས་བྱིན་དེ་བཞིན་གཤེགས་པ་དགེ་བའི་ཟླ་བ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་གང་བཏབ་པ་དེ་ཐམས་ཅད་ཡོངས་སུ་རྫོགས་པར་གྱུར་ཏེ། དེས་སྨོན་
ལམ་འདི་སྐད་ཅེས་བཏབ་བོ། །བདག་གི་སངས་རྒྱས་ཀྱི་ཞིང་གི་མཐའ་རྟོགས་པར་སླ་བ་མ་ཡིན་པར་ཤོག་ཤིག་ཅེས་བྱས་ནས་དེའི་སྨོན་ལམ་དེ་ཡོངས་སུ་རྫོགས་ཏེ། ད་ལྟར་དེའི་སངས་རྒྱས་ཀྱི་ཞིང་གི་ཚད་གཟུང་སླ་བ་མ་ཡིན་ནོ། །གཞན་ཡང་བདག་གི་སངས་རྒྱས་ཀྱི་ཞིང་གི་བཀོད་

པ་ཚད་གཟུང་སླ་བར་མ་གྱུར་ཅིག །བདག་གི་སངས་རྒྱས་ཀྱི་ཞིང་ན་རིན་པོ་ཆེ་འདི་སྙེད་ཡོད་དོ་ཞེས་རིན་པོ་ཆེའི་མཐའ་བདེ་བར་རྟོགས་སླ་བར་མ་གྱུར་ཅིག །བདག་གི་སངས་རྒྱས་ཀྱི་ཞིང་ན་བྱང་ཆུབ་སེམས་དཔའ་རྣམས་ཚད་གཟུང་སླ་བར་མ་གྱུར་ཅིག །བདག་གི་སངས་རྒྱས་ཀྱི་
ཞིང་ན་རིན་པོ་ཆེ་མིག་མངས་རིས་སུ་བྲིས་པ་འདི་ཉིད་དོ་ཞེས་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་ན་འདི་སྙེད་ཀྱི་གཟུགས་དང་། སྒྲ་དང་དྲི་དང་། རོ་དང་རེག་བྱའི་ལོངས་སྤྱོད་དང་ལྡན་ནོ་ཞེས་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་
དེ་ན་དགེ་བར་སྤྱོད་པ་དང་ལྡན་པའི་སེམས་ཅན་རྣམས་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་དེ་ན་སེམས་ཅན་རྣམས་ཀྱི་དགེ་བ་ལ་མོས་པའི་སྤྱོད་པ་དང་ལྡན་པ་ཚད་གཟུང་ནུས་པར་མ་གྱུར་ཅིག །བདག་གི་སངས་རྒྱས་ཀྱི་ཞིང་དེ་ན་སེམས་ཅན་རྣམས་ཀྱི་
དགེ་བ་ཀུན་དུ་སྤྱོད་པ་དང་ལྡན་པ་ཚད་གཟུང་སླ་བར་མ་གྱུར་ཅིག་ཅེས་བྱས་ནས། དེ་སྨོན་ལམ་རྣམས་ཡོངས་སུ་རྫོགས་ཏེ། དེ་ལྟར་དེའི་སངས་རྒྱས་ཀྱི་ཞིང་དེ་ན་སངས་རྒྱས་ཀྱི་ཞིང་བཀོད་པ་རྣམས་ཀྱི་ཚད་གཟུང་སླ་བ་མ་ཡིན། རིན་པོ་ཆེའི་མཐའ་རྟོགས་པར་སླ་བ་མ་ཡིན། བྱང་
ཆུབ་སེམས་དཔའ་རྣམས་ཀྱི་ཚད་གཟུང་སླ་བ་མ་ཡིན། རིན་པོ་ཆེ་མིག་མངས་རིས་སུ་བྲིས་པ་རྣམས་ཀྱི་ཚད་གཟུང་སླ་བ་མ་ཡིན། གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ལོངས་སྤྱོད་དང་ལྡན་པའི་ཚད་གཟུང་སླ་བ་མ་ཡིན། སེམས་ཅན་རྣམས་ཀྱི་དགེ་
བར་སྤྱོད་པ་དང་ལྡན་པའི་ཚད་གཟུང་སླ་བ་མ་ཡིན་ནོ། །དེ་ལྟར་དེའི་སངས་རྒྱས་ཀྱི་ཞིང་དེ་ན་སེམས་ཅན་རྣམས་ཀྱི་དགེ་བ་ལ་མོས་པ་དང་ལྡན་པའི་ཚད་གཟུང་སླ་བ་མ་ཡིན་ནོ། །དེ་ལྟར་དེ་བཞིན་གཤེགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་འདི་དག་དང་།
གཞན་ཡང་ཚད་མེད་པ་དག་བཏབ་པར་གྱུར་ཏེ། དེ་དག་ཐམས་ཅད་བྱང་ཆུབ་སེམས་དཔའི་ཏིང་ངེ་འཛིན་བསམ་པའི་རྗེས་སུ་སོང་བ་ལ་བརྟེན་ནས་ཡོངས་སུ་རྫོགས་སོ། །དབང་པོས་བྱིན་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ཀྱི་

བསམ་པའི་རྗེས་སུ་སོང་བའི་ཏིང་ངེ་འཛིན་རབ་ཏུ་རྙེད་པར་བྱ་བའི་ཕྱིར་བརྩོན་པར་བྱའོ། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་དེས་དེ་བཞིན་གཤེགས་པ་རིན་ཆེན་ཏོག་རྒྱུན་མི་འཆད་པའི་རྒྱལ་པོ་དེས་སྨོན་ལམ་དེ་དག་བསྒྲགས་མ་ཐག་ཏུ་
དེས་སྨོན་ལམ་དེ་དག་ཐམས་ཅད་བཏབ་བོ། །དེ་ནས་བཅོམ་ལྡན་འདས་དེས་དེའི་སངས་རྒྱས་ཀྱི་ཞིང་ཡོན་ཏན་བསམ་གྱིས་མི་ཁྱབ་པ་དང་ལྡན་པར་འགྱུར་རོ་ཞེས་ལུང་བསྟན་ཏོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་
ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དབང་པོས་བྱིན་ཞེས་བྱ་བར་གྱུར་ཏེ། དེ་བཞིན་གཤེགས་པ་
དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཡོན་ཏན་དེ་སྙེད་དང་ལྡན་ནོ། །དེ་ལྟ་བས་ན་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་སྨོན་པའི་སྨོན་ལམ་དེ་དག་ལ་བསླབ་པར་བྱའོ། །ཇི་ལྟར་སྨོན་པའི་སྨོན་ལམ་ལ་སློབ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་
མཁས་པ་དང་ལྡན་པས་སེམས་ཅན་ཁྲག་ཁྲིག་དཔག་ཏུ་མེད་པ་ཡོངས་སུ་སྨིན་པར་བྱེད་དོ། །དེའི་ཚེའི་ཚད་དཔག་ཏུ་མེད་པར་འཛིན་ཏེ། སེམས་ཅན་ཁྲག་ཁྲིག་དཔག་ཏུ་མེད་པ་ཡང་ཚེའི་ཚད་དཔག་ཏུ་མེད་པ་འཛིན་དུ་འཇུག་གོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་
དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དགེ་བ་འབྱུང་བ་ཞེས་བྱ་བའི་བསྐལ་པ་བྱུང་སྟེ། དགེ་བ་འབྱུང་བའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྤོས་མཆོག་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ།

འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་མཆོག་རྒྱལ་པོ་དེའི་སངས་རྒྱས་ཀྱི་ཞིང་དེར་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་དན་གྱི་སྙིང་པོ་ཞེས་བྱ་བ་ཞིག་བྱུང་ངོ་། །བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེ་དེ་
བཞིན་གཤེགས་པ་སྤོས་མཆོག་རྒྱལ་པོ་དེ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དེ་བཞིན་གཤེགས་པ་སྤོས་མཆོག་རྒྱལ་པོའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་
དན་གྱི་སྙིང་པོ་དེས་དེ་བཞིན་གཤེགས་པ་སྤོས་མཆོག་རྒྱལ་པོ་དེ་ལ་འདི་སྐད་ཅེས་གསོལ་ཏོ། །ཐབས་མཁས་པ་དང་ལྡན་པ་ཐབས་མཁས་པ་དང་ལྡན་པ་ཞེས་བགྱི་བ་བཅོམ་ལྡན་འདས་ཇི་ཙམ་གྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་མཁས་པ་དང་ལྡན་པ་ལགས།
དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་སྤོས་མཆོག་རྒྱལ་པོས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །ཙན་དན་གྱི་སྙིང་པོ་ནམ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་
ཀྱི་བསམ་པ་ལ་ཞུགས་ཏེ། བསམ་པ་ལ་ཞུགས་ནས་སོ་སོ་ཅི་རིགས་པར་ཆོས་སྟོན་པ་དེ་ཙམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་དང་ལྡན་པ་ཡིན་ནོ། །དེ་ཐབས་ལ་མཁས་པ་དེ་དང་ལྡན་པས་མོས་པ་ཇི་ལྟ་བ་བཞིན་དུ་སེམས་ཅན་རྣམས་ལ་འཐུན་
པར་ཆོས་སྟོན་པར་བྱེད་དོ། །དེ་ཐབས་ལ་མཁས་པ་དེ་ལྟ་བུ་དང་ལྡན་པས་ན་སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་བསྐལ་པ་བརྗོད་དུ་མེད་པར་ཡང་བརྩོན་པ་མི་འདོར་རོ། །དེ་ཐབས་མཁས་པས་ཡོངས་སུ་ཟིན་པའི་ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སྤྱོད་པ་ན་ནམ་ཡང་ཐབས་མཁས་པ་དང་བྲལ་བའི་སེམས་མི་སྐྱེད་དོ། །མྱུར་དུ་སངས་རྒྱས་ཀྱི་ཞིང་བརྗོད་དུ་མེད་པ་ཡང་ཡོངས་སུ་སྦྱོང་ངོ་། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་དན་གྱི་སྙིང་པོ་དེ་བཅོམ་ལྡན་འདས་དེ་བཞིན་གཤེགས་པ་སྤོས་མཆོག་རྒྱལ་པོ་དེས་

ཐབས་ལ་མཁས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་མ་ཐག་ཏུ་ཇི་ལྟར་བསྟན་པ་བཞིན་རབ་ཏུ་བསྒྲུབས་སོ། །ཇི་ལྟར་བསྟན་པ་བཞིན་རབ་ཏུ་བསྒྲུབས་པས་ན་སེམས་ཅན་རྣམས་ཀྱི་བསམ་པ་ལ་འཇུག་པ་ཤེས་པ་རབ་ཏུ་ཐོབ་པར་གྱུར་ཏོ། །དེ་ཐབས་ལ་
མཁས་པ་དེ་དང་ལྡན་པས་སངས་རྒྱས་ཀྱི་ཞིང་ཡོངས་སུ་སྦྱང་བ་དང་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསྐལ་པ་བརྗོད་དུ་མེད་པར་ཡང་བརྩོན་པ་མ་བོར་རོ། །དེས་ཐབས་ལ་མཁས་པས་ཡོངས་སུ་ཟིན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་བསྐལ་པ་བརྗོད་དུ་མེད་པར་ནམ་
ཡང་ཐབས་ལ་མཁས་པ་དང་བྲལ་བའི་སེམས་མ་སྐྱེས་སོ། །སེམས་བསྐྱེད་པ་དེས་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཀྱི་ཞིང་ཁྲག་ཁྲིག་བརྗོད་དུ་མེད་པ་རྣམས་ཡོངས་སུ་སྦྱངས་སོ། །སངས་རྒྱས་ཀྱི་ཞིང་རེ་རེར་ཡང་སེམས་ཅན་དཀྲིགས་ཕྲག་ཁྲག་ཁྲིག་བརྗོད་དུ་མེད་པ་
ཡོངས་སུ་སྨིན་པར་བྱས་སོ། །སངས་རྒྱས་ཀྱི་ཞིང་རེ་རེར་ཡང་སེམས་ཅན་ཁྲག་ཁྲིག་ཚད་མེད་པ་རྣམས་ཟབ་མོའི་ཆོས་ཀྱི་བཟོད་པ་ལ་རབ་ཏུ་བཀོད་དོ། །འཇམ་དཔལ་དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་དན་གྱི་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་
འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཙན་དན་གྱི་སྙིང་པོ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་
ཆེན་པོས་སེམས་ཀྱི་མཚན་མ་ལ་ངེས་པར་རྟོག་པའི་བཟོད་པ་ལ་བརྩོན་པར་བྱའོ།། །།བམ་པོ་དྲུག་པ། འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་ཚད་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་
པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་

རྒྱས་བཅོམ་ལྡན་འདས་ཡེ་ཤེས་འབྱུང་གནས་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཡེ་ཤེས་འབྱུང་གནས་དེའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བླ་མ་ཞེས་བྱ་བ་བྱུང་སྟེ། དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་ཤེས་རབ་བླ་མས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་དེ་ལ་ཞུས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡུལ་རྒྱུ་ཞིང་སོང་ངོ་། །དེ་ཡུལ་རྒྱུ་ཞིང་སོང་ནས་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་སྦྱངས་ཏེ་སངས་རྒྱས་ཀྱི་ཞིང་
རེ་རེར་ཡང་སེམས་ཅན་བྱེ་བ་ཁྲག་ཁྲིག་བརྗོད་དུ་མེད་པ་རྣམས་བླ་ན་མེད་པའི་ཆོས་ལ་ངེས་པར་སེམས་པའི་བརྗོད་པར་ཡོངས་སུ་སྨིན་པར་བྱས་ནས་དེས་སྨོན་ལམ་འདི་སྐད་བཏབ་བོ། །བདག་སངས་རྒྱས་ཀྱི་ཞིང་གང་དུ་སྐྱེས་པ་དེར་སེམས་ཅན་རྣམས་ཀྱིས་སངས་རྒྱས་བྱུང་བ་སྙམ་དུ་
ཤེས་པར་ཤོག་ཤིག །བདག་སངས་རྒྱས་ཀྱི་ཞིང་གང་དུ་སྐྱེས་པར་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་རིས་དང་། མི་ཁོམ་པ་ཐམས་ཅད་ཆད་པར་ཤོག་ཤིག་ཅེས་དེས་སྨོན་ལམ་བཏབ་པ་ཡོངས་སུ་རྫོགས་
པར་གྱུར་ཏེ། འཇམ་དཔལ་བྱང་ཆུབ་སེམས་དཔའ་ཤེས་རབ་བླ་མ་དེ་བྱང་ཆུབ་སེམས་དཔའི་སྤྱད་པ་སྤྱོད་ཅིང་སངས་རྒྱས་ཀྱི་ཞིང་གང་དུ་སྐྱེས་པ་དེར་སེམས་ཅན་རྣམས་ཀྱིས་སངས་རྒྱས་བྱུང་བར་ཤེས་ཤིང་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་
འཇིག་རྟེན་དང་། ལྷ་མ་ཡིན་གྱི་རིས་དང་། མི་ཁོམ་པ་ཐམས་ཅད་ཡོངས་སུ་ཆད་པར་གྱུར་ཏོ། །ཆད་པར་གྱུར་ནས་ཀྱང་སངས་རྒྱས་ཀྱི་ཞིང་དེར་སླར་མ་བྱུང་ངོ་། །དེས་ཡང་སྨོན་ལམ་འདི་སྐད་དུ་བཏབ་སྟེ། གང་བདག་གིས་བྱང་ཆུབ་སེམས་དཔའི་སྤྱད་པ་སྤྱོད་པ་ན་སའི་ཕྱོགས་སུ་
རྐང་པའི་མཐིལ་གྱིས་རེག་པར་གྱུར་པ་དེ་དག་བསྐལ་པ་བརྗེས་ཀྱི་བར་དུ་མཆོད་རྟེན་དུ་གྱུར་པར་ཤོག་ཤིག །སེམས་ཅན་གང་གིས་མཆོད་རྟེན་དེའི་གནས་མཐོང་ཡང་རུང་། ཐོས་ཀྱང་རུང་། དེར་སོང་ཡང་རུང་། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་ལས་ཕྱིར་མི་ལྡོག་པར་གྱུར་ཅིག །མཆོད་རྟེན་གྱི་གནས་དེ་ཇི་སྲིད་དུ་འདུག་པ་དེའི་བར་དུ་སངས་རྒྱས་ཀྱི་ཞིང་དེར་དམ་པའི་ཆོས་ནུབ་པར་མི་འགྱུར་བར་ཤོག་ཤིག །མཆོད་རྟེན་གྱི་གནས་ཇི་སྲིད་དུ་འདུག་པ་དེ་སྲིད་དུ་སངས་རྒྱས་ཀྱི་ཞིང་དེ་ན་སེམས་ཅན་རྣམས་
དམ་པའི་ཆོས་ཉན་པ་རྒྱུན་མི་འཆད་པར་ཤོག་ཤིག །སེམས་ཅན་གང་གིས་བདག་གི་མིང་ཐོས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིག་ཅེས་བྱས་ནས་དེའི་སྨོན་ལམ་དེ་ཡོངས་སུ་རྫོགས་པར་གྱུར་ཏེ། དེ་སྤྱོད་པ་ལ་ཞུགས་པས་
སངས་རྒྱས་ཀྱི་ཞིང་དེ་འདྲ་བར་ཀུན་འཛིན་ཅིང་ཡོངས་སུ་སྦྱངས་སོ། །སངས་རྒྱས་བྱེ་བ་ཕྲག་བཅྭ་བརྒྱད་ཀྱི་སྨོན་ལམ་ཇི་ལྟ་བུ་ཇི་སྙེད་པ་དེ་དག་ཐམས་ཅད་ཀྱང་དེས་བཟུང་ངོ་། །སངས་རྒྱས་བྱེ་བ་ཕྲག་བཅྭ་བརྒྱད་ཀྱི་ཚེའི་ཚད་ཇི་སྲིད་པ་དེ་དག་ཐམས་ཅད་ཀྱང་དེས་ཡོངས་སུ་བཟུང་ངོ་། །སངས་
རྒྱས་བྱེ་བ་ཕྲག་བཅྭ་བརྒྱད་ཀྱི་ཉན་ཐོས་འདུས་པ་ཇི་སྙེད་པ་དེ་སྙེད་ཀྱི་ཉན་ཐོས་འདུས་པའང་དེས་ཡོངས་སུ་བཟུང་ངོ་། །སངས་རྒྱས་བྱེ་བ་ཕྲག་བཅྭ་བརྒྱད་ཀྱི་བྱང་ཆུབ་སེམས་དཔའི་ཚོགས་ཇི་སྙེད་པ་དེ་སྙེད་ཀྱི་བྱང་ཆུབ་སེམས་དཔའི་ཚོགས་ཀྱང་དེས་ཡོངས་སུ་བསྡུས་སོ། །སངས་རྒྱས་བྱེ་བ་ཕྲག་
བཅྭ་བརྒྱད་དེ་དག་གི་སངས་རྒྱས་ཀྱི་ཞིང་གི་ཕུན་སུམ་ཚོགས་པ་ཇི་སྙེད་པ་དེ་དག་ཐམས་ཅད་ཀྱང་དེས་ཡོངས་སུ་བཟུང་ངོ་། །དེས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྗོད་དུ་མེད་པ་ཡོངས་སུ་སྦྱངས་ནས། དེ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་དེ་ག་ལ་བ་དེར་
སོང་སྟེ་ཕྱིན་ནས་དེ་བཞིན་གཤེགས་པ་ཡེ་ཤེས་འབྱུང་གནས་དེའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་ཤེས་རབ་བླ་མས་དེ་བཞིན་གཤེགས་པ་ཡེ་ཤེས་འབྱུང་གནས་དེ་ལ་འདི་སྐད་ཅེས་གསོལ་ཏོ། །གང་
བཅོམ་ལྡན་འདས་ཀྱི་སྲས་རྣམས་ཡབ་ལས་སྐྱེས་པ་དེ་དག་སྤུན་ལགས་ཏེ། བཅོམ་ལྡན་འདས་བདག་གི་ནུ་བོ་དེ་དག་ལ་དེ་བཞིན་གཤེགས་པས་ཅི་ནས་ཀྱང་བྱང་ཆུབ་སེམས་དཔའ་དག་སྐྱེ་བོ་མང་པོ་ལ་སྨན་པར་འཇུག་པ་དེ་ལྟ་བུའི་ཆོས་བཤད་དུ་གསོལ། །དེ་སྐད་ཅེས་གསོལ་པ་དང་།

དེ་བཞིན་གཤེགས་པ་ཡེ་ཤེས་འབྱུང་གནས་དེས་བྱང་ཆུབ་སེམས་དཔའ་ཤེས་རབ་བླ་མ་དེ་ལ་འདི་སྐད་ཅེས་བཀའ་སྩལ་ཏོ། །ཤེས་རབ་བླ་མ་ཁྱོད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཞུགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱང་སངས་
རྒྱས་ཀྱི་བྱ་བ་བྱེད་པ་ལེགས་སོ། །ལེགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་འབྱུང་གནས་ཀྱིས་དགེ་སློང་གི་དགེ་འདུན་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་བྱང་ཆུབ་སེམས་དཔའ་ཤེས་རབ་བླ་མས་ཇི་ལྟ་བུར་ལས་བྱས་པ་ལ་ལྟོས། དགེ་
སློང་བྱང་ཆུབ་སེམས་དཔའ་ཤེས་རབ་བླ་མས་སེམས་ཅན་ཇི་སྙེད་སྨིན་པར་བྱས་པ་ནི་རྩིས་མཁན་ནམ་རྩིས་མཁན་གྱི་སློབ་མས་བསྐལ་པར་ཡང་རུང་། བསྐལ་པ་བརྒྱར་ཡང་རུང་། བསྐལ་པ་ཁྲག་ཁྲིག་ཏུ་ཡང་རུང་སྟེ། དེ་དག་གིས་རྩི་བར་མི་ནུས་སོ། །འཇམ་དཔལ་དེ་ན་བྱང་
ཆུབ་སེམས་དཔའ་ཤེས་རབ་བླ་མ་དེས་སེམས་ཅན་ཚད་མེད་པ་ཉན་ཐོས་ཀྱི་མྱ་ངན་ལས་འདའ་བར་ཡོངས་སུ་མྱ་ངན་ལས་བཟླས་སོ། །དེའི་ཉིས་འགྱུར་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་དོ། །བྱང་
ཆུབ་སེམས་དཔའ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཚད་མེད་པའི་སེམས་ཅན་རྣམས་ཡོངས་སུ་མྱ་ངན་ལས་བཟླས་ཏེ། ཡོངས་སུ་མྱ་ངན་ལས་འདས་སོ། །དེ་ལྟ་བུར་བྱང་ཆུབ་སེམས་དཔའ་སེམས་
དཔའ་ཆེན་པོ་ཤེས་རབ་བླ་མ་དེས་སེམས་ཅན་རྣམས་ཡོངས་སུ་མྱ་ངན་ལས་བཟླས་སོ། །སེམས་ཅན་ཤིན་ཏུ་མང་པོ་བྱང་ཆུབ་ལ་རབ་ཏུ་བཀོད་དོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་ཤེས་རབ་བླ་མ་ཞེས་བྱ་བར་གྱུར་པ་དེ་གཞན་
ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྱང་ཆུབ་སེམས་དཔའ་ཤེས་རབ་བླ་མ་ཞེས་བྱ་བར་གྱུར་ཏོ། །འཇམ་དཔལ་དེ་ལྟར་དེ་བཞིན་གཤེགས་པ་

དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྒྲིབ་པ་མེད་པའི་སངས་རྒྱས་ཀྱི་རྣམ་པར་ཐར་པ་ལ་གནས་པས་ཐབས་མཁས་པ་དང་ལྡན་པར་གྱུར་ཏོ། །དེ་ལྟ་བས་ན་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་
ཐབས་མཁས་པ་དང་ལྡན་པར་བྱའོ། །ཐབས་མཁས་པ་ཡོངས་སུ་རྫོགས་པར་བྱ་བའི་ཕྱིར་བྱང་ཆུབ་སེམས་དཔའ་ལ་ཆོས་ཐམས་ཅད་ལ་དབང་དང་ལྡན་པའི་ཏིང་ངེ་འཛིན་བཤད་པར་བྱའོ། །ཆོས་ཐམས་ཅད་ལ་དབང་དང་ལྡན་པའི་ཏིང་ངེ་འཛིན་ལ་རབ་ཏུ་གནས་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་སེམས་བསྐྱེད་པ་གཅིག་གིས་ཀྱང་སངས་རྒྱས་ཀྱི་ཞིང་བརྗོད་དུ་མེད་པར་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བྱས་ནས། དེ་དག་ཀུན་དུ་སྤྱད་པ་སྤྱོད་པ་ནི་འཇམ་དཔལ་འདི་ལྟ་སྟེ། དཔེར་ན་མཚོ་ཆུས་གང་ནས་འགགས་པ་མེད་ཅིང་ཆུ་འབབ་པ་ནི་
ས་གང་ལོགས་སུ་གཞོལ་བ་དེར་འབབ་བོ། །དེ་བཞིན་དུ་ཆོས་ཐམས་ཅད་ལ་དབང་དང་ལྡན་པའི་ཏིང་ངེ་འཛིན་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ག་ལས་གར་བལྟས་པ་དེ་དང་དེར་སངས་རྒྱས་ཀྱི་ཆོས་རྣམས་ཀྱིས་རླན་པར་བྱེད་དེ། དེ་ལྟར་ན་བྱང་ཆུབ་
སེམས་དཔའ་དེ་སངས་རྒྱས་ཀྱི་ཆོས་ཐམས་ཅད་ལ་དམིགས་པ་ཡིན་ནོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་དོ། །བཅོམ་ལྡན་ཆོས་རྣམས་གཉིས་མ་མཆིས། །ཆོས་རྣམས་བྱེ་བྲག་མཆིས་མ་ལགས། །
དེ་ནི་ཆོས་ཀྱི་མཚན་ཉིད་དེ། །ཆོས་ཀུན་མཚན་ཉིད་མ་མཆིས་ལགས། །ནམ་མཁའ་ཇི་ལྟར་ནམ་མཁའ་ཡིས། །དཔེར་བགྱིར་རུང་བ་མ་ལགས་ཏེ། །ཆོས་ཀྱི་དཔེར་ཡང་དེ་བཞིན་དུ། །རྣམ་པ་ཐམས་ཅད་བགྱིར་མི་རུང་། །ཆོས་ལ་ཆོས་ཀྱིས་མཐོང་མ་མཆིས། །ཆོས་
ཀྱིས་ཆོས་རྣམས་མི་རིག་སྟེ། །ཤེས་པ་པོ་དང་ཆོས་རྣམས་ཀྱང་། །གཉིས་ཀ་འདི་ནི་ཡོང་མ་མཆིས། །སངས་རྒྱས་ཆོས་དང་སངས་རྒྱས་སུ། །མི་མཁས་གང་དག་རྣམ་པར་རིག །དེ་དག་སངས་རྒྱས་དེ་བཞིན་དུ། །སངས་རྒྱས་ཆོས་རྣམས་མི་རིག་ལགས། །སངས་རྒྱས་

ཆོས་དང་སངས་རྒྱས་ཞེས། །དེ་ནི་བྱིས་པའི་སྤྱོད་ཡུལ་ཏེ། །སངས་རྒྱས་ཆོས་དང་སངས་རྒྱས་ནི། །སུས་ཀྱང་རྟོགས་པར་རྔོ་མི་ཐོགས། །ཇི་ལྟར་ཚིག་གིས་བརྗོད་པ་ལྟར། །ཆོས་འདི་དག་ལ་གདགས་མ་མཆིས། །ཆོས་དེ་གདགས་པ་མ་ལགས་ཏེ། །བདག་དང་འདྲ་བར་
རྟོགས་པར་བགྱི། །བདག་ནི་གདགས་སུ་མ་མཆིས་ཏེ། །འོན་ཀྱང་བདག་ཅེས་སྨྲ་བ་བཞིན། །ཆོས་རྣམས་ལ་ནི་བཏགས་པ་ཡང་། །བདག་དང་འདྲ་བར་རྟོགས་པར་བགྱི། །བདག་ནི་བཏགས་པར་མ་མཆིས་ཏེ། །འོན་ཀྱང་བདག་ཅེས་སྨྲ་བ་བཞིན། །ཆོས་རྣམས་བཏགས་པ་
མ་མཆིས་པར། །མཁས་པ་རྣམས་ཀྱིས་རྟག་ཏུ་རྟོགས། །ཇི་ལྟར་ནམ་མཁའི་རི་མོ་ནི། །མ་བྱུང་འབྱུང་བར་མི་འགྱུར་ཏེ། །དེ་བཞིན་ཆོས་རྣམས་གདགས་པ་ཡང་། །མ་བྱུང་འབྱུང་བར་མི་འགྱུར་ལགས། །རྫས་མ་ལགས་པའི་འདོགས་པ་ཡིས། །མི་གང་
འདི་ལ་འདོགས་པ་ནི། །མཛངས་པ་རྣམས་ཀྱིས་མི་བསྔགས་ཏེ། །དེ་ནི་མཁས་པས་དཔྱ་བ་ལགས། །འདོགས་པ་དེ་བཞིན་ཆོས་རྣམས་ལ། །མི་གང་འདི་ལ་འདོགས་པ་ནི། །མཛངས་པ་རྣམས་ཀྱིས་མི་བསྔགས་ཏེ། །མཁས་པས་དེ་ནི་དཔྱ་བ་ལགས། །འགྲོ་བ་
མ་མཆིས་འགྲོ་བའི་སྒྲས། །སངས་རྒྱས་རྣམས་ཀྱིས་བསྟན་པ་ནི། །ནམ་མཁའི་རི་མོ་བྲིས་པ་ལྟར། །དེ་བཞིན་ཆོས་རྣམས་རྟོགས་པར་བགྱི། །བར་སྣང་བྱ་རྗེས་ཇི་བཞིན་དུ། །འགྲོ་དེ་ངེས་པར་མ་མཆིས་ལགས། །སྦལ་པའི་སྤུ་ཡི་ལ་བ་ལྟར། །དེ་བཞིན་ཞི་བའི་
ཆོས་ཉིད་བལྟ། །བཞིན་གྱི་གཟུགས་བརྙན་མེ་ལོང་ལ། །རང་བཞིན་སྟོན་པར་མཁས་པས་བཤད། །དཀྱིལ་འཁོར་དེ་ན་བཞིན་གཟུགས་ལྟར། །དེ་བཞིན་ཆོས་རྣམས་ཐམས་ཅད་བལྟ། །ཇི་ལྟར་མི་དག་རི་ཡི་བར་མཆིས་ཏེ། །སྐད་ཕྱུང་ནས་ནི་བྲག་ཕུག་དགྲ་ཡང་གྲག །
བྲག་ཅ་དེ་ལ་བྱེད་པ་མ་མཆིས་ལྟར། །དེ་བཞིན་ཆོས་ལ་བྱེད་པ་སུ་མ་མཆིས། །ཆོས་འདི་དག་ནི་རྒྱལ་བས་དེ་ལྟར་བསྟན། །མཆིས་པ་མ་ལགས་འདི་ལ་བྱེད་མ་མཆིས། །རང་བྱུང་འདི་དག་རྟོགས་ནས་རབ་བསྟན་ཏེ། །དེ་བཞིན་གཤེགས་པས་ཤིན་ཏུ་ངོ་མཚར་

མཛད། །རྒྱལ་བས་བསྟན་པའི་ཆོས་རྣམས་གང་རྟོགས་པ། །མི་ཡི་འདྲེན་པ་དེ་དག་ངོ་མཚར་ཏེ། །མིག་དང་ལྡན་པས་བསྟན་ནས་ལོང་བ་གང་། །གཟུགས་རྣམས་མཐོང་བ་བཞིན་དུ་ངོ་མཚར་ལགས། །ལོང་བ་གཞན་གྱིས་བསྟན་པའི་གཟུགས་རྣམས་ལ། །
མཐོང་བར་གྱུར་ན་དེ་ནི་ངོ་མཚར་ཏེ། །དེ་བཞིན་འདྲེན་པ་ཁྱོད་ཀྱི་གསུང་ཐོས་ནས། །གང་དག་དད་པར་གྱུར་པ་ངོ་མཚར་ལགས། །ཆོས་རྣམས་བསྟན་པ་དག་ཀྱང་དེ་བཞིན་དུ། །ཐར་པར་འཚལ་བས་རབ་ཏུ་རྟོགས་པར་བགྱི། །གང་དག་ཆོས་རྣམས་རིག་པར་མི་འགྱུར་བ། །དེ་
དག་གིས་ནི་དེ་བཞིན་གཤེགས་པ་མཐོང་། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་པ་དེ་དག་སྨྲས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱིས་པ་སོ་སོའི་སྐྱེ་བོ་གང་ཆོས་ཐམས་ཅད་ངོ་བོ་ཉིད་མ་
མཆིས་པར་སྟོན་པ་དང་། ཆོས་ཐམས་ཅད་ངོ་བོ་ཉིད་མ་མཆིས་པར་སྨྲ་བ་དེ་དག་ནི་བཅོམ་ལྡན་འདས་ཀྱི་ལྡེམ་པོ་ངག་མ་འཚལ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་རྣམས་ནི་ཐོག་མ་ནས་དམིགས་སུ་མ་མཆིས་ན་ངོ་བོ་ཉིད་མ་མཆིས་པར་བསྟན་དུ་ག་ལ་མཆིས། བཅོམ་
ལྡན་འདས་ཆོས་གང་དམིགས་སུ་མ་མཆིས་པ་དེ་དག་ནི་གང་ཡང་བགྲང་བར་མ་བགྱིས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་ནམ་མཁའ་དང་མཚུངས་ཏེ་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་ལགས་སོ། །བཅོམ་ལྡན་འདས་གཟུགས་
ཞེས་བགྱི་བ་འདི་ནི་གཉིས་སུ་མ་མཆིས་པ་ལ་བགྲང་བར་བགྱིས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གཟུགས་ནི་ནམ་མཁའ་དང་མཚུངས་ཏེ་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་པ་ལགས་སོ། །བཅོམ་ལྡན་འདས་དཔེར་བགྱི་ན་ནམ་
མཁའ་ལ་གཉིས་སུ་མི་དམིགས་པ་དེ་བཞིན་དུ་གཟུགས་ལ་ཡང་གཉིས་སུ་མི་དམིགས་ལགས་སོ། །བཅོམ་ལྡན་འདས་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་གཉིས་སུ་མ་མཆིས་ཏེ། གཉིས་སུ་དབྱེར་མ་མཆིས་ལགས་

སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རྣམ་པར་ཤེས་པ་ནི་ནམ་མཁའ་དང་མཚུངས་ཏེ། བཅོམ་ལྡན་འདས་གཟུགས་གང་ལགས་པ་དང་། རྣམ་པར་ཤེས་པ་གང་ལགས་པ་དང་། གཉིས་སུ་མ་མཆིས་པ་གང་ལགས་པ་དང་། འདུས་མ་བྱས་པ་གང་ལགས་
པ་དེ་ནི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་པ་ལགས་སོ། །བཅོམ་ལྡན་འདས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་གང་ལགས་པ་དང་། གཉིས་སུ་མ་མཆིས་པ་དང་། གཉིས་སུ་དབྱེར་མ་མཆིས་པ་གང་ལགས་པ་དང་། བཅོམ་
ལྡན་འདས་འདུས་བྱས་གང་ལགས་པ་དང་། འདུས་མ་བྱས་གང་ལགས་པ་དེ་དག་ནི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་པ་ལགས་སོ། །འདི་ནི་འདུས་བྱས་སོ། །འདི་ནི་འདུས་མ་བྱས་སོ་ཞེས་བགྱི་བ་དེ་ཡང་བཅོམ་ལྡན་འདས་གཉིས་སུ་མ་མཆིས་པ་ལ་བགྲང་བར་བགྱི་ལགས་
སོ། །བཅོམ་ལྡན་འདས་སྒྲིབ་པ་མ་མཆིས་པའི་རྣམ་པར་ཐར་པ་འདི་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཉིས་སུ་མེད་པར་སྤྱོད་པ་ཞེས་བགྱི་སྟེ། བཅོམ་ལྡན་འདས་འདས་པའི་དགེ་བའི་རྩ་བ་གང་ལགས་པ་དང་། མ་འོངས་པའི་དགེ་བའི་རྩ་བ་གང་ལགས་པ་དང་། ད་ལྟར་
བྱུང་བའི་དགེ་བའི་རྩ་བ་གང་ལགས་པ་དེ་ནི་གཉིས་སུ་མ་མཆིས་པའི་ཚིག་བླ་དགས་ལགས་སོ། །འདོད་པའི་ཁམས་དང་ལྡན་པ་གང་ལགས་པ་རྣམས་དང་། གཟུགས་ཀྱི་ཁམས་དང་ལྡན་པ་གང་ལགས་པ་རྣམས་དང་། གཟུགས་མ་མཆིས་པའི་ཁམས་དང་ལྡན་པ་གང་ལགས་པ་རྣམས་དང་། མྱ་ངན་
ལས་འདས་པའི་དབྱིངས་དང་ལྡན་པ་གང་ལགས་པའི་དགེ་བའི་རྩ་བ་དེ་དག་ཀྱང་གཉིས་སུ་མ་མཆིས་པའི་ཚིག་བླ་དགས་ལགས་སོ། །ཟག་པ་དང་བཅས་པའི་དགེ་བའི་རྩ་བ་གང་ལགས་པ་རྣམས་དང་། ཟག་པ་མེད་པའི་དགེ་བའི་རྩ་བ་གང་ལགས་པ་དེ་དག་ཀྱང་གཉིས་སུ་མ་མཆིས་པའི་ཚིག་བླ་
དགས་ལགས་སོ། །ཉན་ཐོས་ཀྱི་དགེ་བའི་རྩ་བ་གང་ལགས་པ་རྣམས་དང་། རང་སངས་རྒྱས་ཀྱི་དགེ་བའི་རྩ་བ་གང་ལགས་པ་རྣམས་དང་། སངས་རྒྱས་ཀྱི་དགེ་བའི་རྩ་བ་གང་ལགས་པ་དེ་དག་ནི་གཉིས་སུ་མ་མཆིས་ཤིང་གཉིས་སུ་དབྱེར་མ་མཆིས་ལགས་སོ། །དགེ་བའི་རྩ་བ་གང་ལགས་པ་

དང་མི་དགེ་བའི་རྩ་བ་གང་ལགས་པ་དེ་ཡང་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་ལགས་སོ། །འཁོར་བ་གང་ལགས་པ་དང་མྱ་ངན་ལས་འདས་པ་གང་ལགས་པ་དེ་དག་ཀྱང་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་ལགས་སོ། །བཅོམ་ལྡན་འདས་
དེ་ལྟར་གཉིས་སུ་མ་མཆིས་པའི་ཆོས་ཀྱི་ཚུལ་འདི་ལ་ནེམ་ནུར་མ་མཆིས་ཤིང་ཐེ་ཚོམ་མི་འཚལ་བ་དེ་ནི་གཉིས་སུ་མ་མཆིས་པ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱིའོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །གང་དག་
རྒྱལ་བའི་མི་གཉིས་ཚུལ་རྟོགས་པ། །དེ་དག་ཐེ་ཚོམ་མ་མཆིས་བདེ་བར་གཤེགས། །དེ་དག་རྒ་ཤི་མ་མཆིས་གནས་མཐོང་སྟེ། །དེ་དག་རྒྱལ་བ་ཉན་ཐོས་བཅས་པ་མཆོད། །མི་གཉིས་བྱེ་བྲག་མ་མཆིས་ཆོས་ཉིད་དུ། །བདེ་བར་གཤེགས་པས་ཆོས་ཀུན་བསྟན་པ་མཛད། །གཞན་
མ་ལགས་པའི་ཚིག་འདི་ཐོས་ནས་སུ། །མཁས་པ་རྣམས་ཀྱི་ཐེ་ཚོམ་མ་མཆིས་གྱུར། །གང་དག་སྐྱོན་བྲལ་ཞི་བར་རབ་ཞུགས་པ། །མཚུངས་པ་མེད་པར་བྱང་ཆུབ་རབ་ཏུ་བསྟན། །དེ་ནི་སྟོན་པའི་ཡུལ་ལ་རབ་ཞུགས་ཏེ། །དེ་དག་སྟོན་པའི་བཀའ་ལ་རབ་ཏུ་གནས། །གང་དག་
འདི་ནི་གཟུགས་ཞེས་བྱ་ཞེས་བརྗོད། །ཚོར་བ་དང་ནི་འདུ་ཤེས་སེམས་པ་དག །དེ་ནི་འདུས་བྱས་རྣམ་ཤེས་དེ་སྐད་སྟོན། །དེ་དག་སྟོན་པའི་བཀའ་ལ་གནས་མ་ལགས། །གང་དག་དགེ་བ་རབ་ཏུ་བཟང་ཞེའམ། །དགེ་བ་མ་ཡིན་ཆོས་རྣམས་ངན་ཞེས་མཆི། །དེ་དག་
སྟོན་པའི་བཀའ་ལ་མི་གནས་ཏེ། །དེ་དག་གཉིས་ལ་སྤྱོད་པའི་མི་ཞེས་བསྟན། །ཁམས་གསུམ་པ་ཞེས་གང་དག་བརྗོད་པའི་མི། །དེ་དག་ཐུབ་པའི་བསྟན་པ་བརྩོན་མ་བགྱིས། །དམ་པའི་དོན་དུ་ཁམས་གཅིག་མ་མཆིས་ན། །དེ་ལ་གསུམ་དུ་མཆིས་པར་ག་ལ་འགྱུར། །
གང་དག་དེ་བཞིན་འདི་དག་འདུས་བྱས་ཏེ། །ཅིག་ཤོས་འདུས་མ་བྱས་ཞེས་རྣམ་གཉིས་སྨྲ། །དེ་དག་བདེ་གཤེགས་བསྟན་པའི་ཆོས་རྣམས་ལ། །ནན་ཏན་བགྱིད་པ་སྤྲོ་བའི་མི་མ་ལགས། །འདི་ནི་མི་གཉིས་ཆོས་ཞེས་གང་སྨྲ་བ། །དེ་དག་སྟོན་པའི་བཀའ་ལ་

མི་གནས་ཏེ། །བདེ་བར་གཤེགས་པས་ཆོས་རྣམས་གང་བསྟན་པ། །དེ་ལ་གཉིས་དང་མི་གཉིས་ཆོས་མ་མཆིས། །གང་དག་བདེ་གཤེགས་བསྟན་ཅེས་སྨྲ་བགྱིད་པ། །སྟོན་དང་དེ་དག་དམིགས་སུ་མ་མཆིས་ཏེ། །གང་གིས་བསྟན་པ་དེ་ཡང་སྟོན་མ་མཆིས། །གང་ལ་བཤད་པ་དེ་ཡང་
མཆིས་མ་ལགས། །གང་བསྟན་དེ་ཡང་དམིགས་སུ་མ་མཆིས་ལགས། །གང་ལ་རིག་བགྱི་དེ་ཡང་སྐྱེ་མ་མཆིས། །ཀུན་དུ་ཐམས་ཅད་ཅི་ཡང་དམིགས་མ་མཆིས། །རྒྱལ་བའི་སྲས་རྣམས་དེ་ལྟར་རྟོགས་པར་བགྱིད། །ཆོས་གང་བདེ་བར་གཤེགས་པ་སྟོན་པ་ཡང་། །དེ་ལ་ཆོས་དེ་
དམིགས་པར་མི་འགྱུར་ཏེ། །སྟོང་པ་སྟོང་ཉིད་ཅི་ཡང་ཡོང་མི་དམིགས། །མཚན་མེད་མཚན་མ་མེད་ཉིད་ཀྱང་དེ་བཞིན། །གང་དུ་སྨོན་པ་མེད་པར་བཤད་པ་ཡང་། །དེ་ལ་སྨོན་པ་མེད་པ་མི་དམིགས་ལགས། །དེ་བཞིན་གྲོལ་དང་གྲོལ་བར་བགྱིད་མི་དམིགས། །བདེ་བར་གཤེགས་
པས་དེ་འདྲའི་ཆོས་བསྟན་ཏེ། །བདེ་བར་གཤེགས་པས་དེ་འདྲའི་ཆོས་བསྟན་པ། །གང་དག་དེ་མ་རྟོགས་ནས་གཞན་རྟོགས་པ། །དེ་དག་སྐྱེ་བོ་རྟག་ཏུ་བཅིངས་ནས་སུ། །སྲིན་བུ་བ་རྒྱ་བགྱིད་བཞིན་གནོན་པ་བགྱིད། །གང་ཟག་དམ་པ་སྟོན་པ་ཐུགས་རྗེ་ཅན། །འཇིག་རྟེན་མགོན་པོ་སྲོག་
ཆགས་ཕན་བཞེད་པས། །སྔོན་ཆད་དཀའ་བ་སྤྱད་པ་བརྒྱ་སྤྱད་དེ། །ཐུགས་རྗེ་རབ་ཏུ་བསྐྱེད་ནས་ཀུན་དུ་བྱུང་། །གང་གིས་འགྲོ་བ་རྟོག་ལྡན་མགུ་བགྱིད་པ། །ལམ་མཆོག་དེ་ནི་དེ་ཡིས་རབ་ཏུ་བསྟན། །དགའ་སེམས་བདེ་གཤེགས་འཐུན་པའི་བརྟུལ་ཞུགས་ཅན། །དེ་དག་བདེ་
གཤེགས་བསྟན་པའི་འགྲོ་བས་མཆིས། །འོང་དང་འགྲོ་བར་སྒྲ་ཡིས་བཤད་པ་ཡང་། །དེ་ལ་འོང་བ་དམིགས་སུ་ཡོད་མ་མཆིས། །བདག་གིས་བསྟན་པ་དེ་ཡང་མི་དམིགས་ལ། །བདེ་བར་གཤེགས་པས་ཆོས་ཉིད་རབ་ཏུ་བསྟན། །ཞི་དང་ཞི་བ་གང་ནའང་ཡོང་མ་མཆིས། །
རབ་ཏུ་མ་ཞི་དེ་ཡང་མཆིས་མ་ལགས། །ཞི་བའི་སྟོན་པའང་དེ་བཞིན་མ་མཆིས་ལགས། །ཞི་བ་གང་ལགས་དེ་ཡང་ཡོང་མི་དམིགས། །ཀུན་ནས་ཉོན་མོངས་གང་ནའང་མ་མཆིས་ཏེ། །ཀུན་ནས་ཉོན་མོངས་གྱུར་པའང་མཆིས་མ་ལགས། །ཤེས་ལྡན་གང་ལགས་དེ་ཡང་མ་མཆིས་

ཏེ། །གང་གིས་བསྟན་པ་དེ་ཡང་མཆིས་མ་ལགས། །དེ་བཞིན་ཆོས་རྒྱལ་བ་ཡིས་ཤིན་ཏུ་བསྟན། །སྟོན་པ་དང་ནི་བརྗོད་པའང་མ་མཆིས་ཏེ། །མིང་དུ་བསྟན་པའང་དེ་བཞིན་མཆིས་མ་ལགས། །དེ་ལྟར་རྒྱལ་བའི་ཆོས་ཉིད་རྟོགས་པར་བགྱིད། །
སྟོན་དང་བསྟན་པ་ཚོར་དང་ཚོར་བགྱིད་དང་། །འདྲེན་དང་འདྲེན་པ་ཞི་དང་ཞི་བགྱིད་པ། །ནམ་མཁའ་བར་སྣང་བྱ་ཡི་རྗེས་འདྲ་བར། །ཐུབ་པས་ཡང་དག་ཆོས་ཉིད་རབ་ཏུ་བསྟན། །དེ་བཞིན་ཆོས་ཉིད་ལ་ཡང་གང་རྟོགས་པ། །དེས་ནི་དེ་བཞིན་གཤེགས་པ་ཡང་མཐོང་
ཞིང་། །དེ་ཡིས་མི་ཡི་གཙོ་བོར་བཀུར་སྟི་བགྱིས། །སངས་རྒྱས་ས་ལ་མཁས་ཤིང་རྣམ་པར་རྟོགས། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཆོས་བཤད་པ་འདི་རྣམས་སུས་ཤེས་པར་འགྱུར།
གསོལ་པ། བཅོམ་ལྡན་འདས་མ་སྐྱེས་མ་འགགས་པས་ཆོས་བཤད་པ་འདི་རྣམས་འཚལ་བར་འགྱུར་རོ། །བཀའ་སྩལ་པ། འཇམ་དཔལ་གལ་ཏེ་མ་སྐྱེས་མ་འགགས་པས་ཤེས་པར་འགྱུར་ན་ཇི་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས་ནས་ཆོས་བཤད་པར་འགྱུར། །གསོལ་པ། བཅོམ་ལྡན་འདས་གལ་ཏེ་བདག་ཀྱང་གཞན་ལ། བྱང་ཆུབ་ཀྱང་གཞན་ན་ནི་བདག་བྱང་ཆུབ་མངོན་པར་རྫོགས་པར་འཚང་རྒྱ་ལགས་སོ། །བཀའ་སྩལ་པ། འཇམ་དཔལ་དེ་སྐད་དུ་བཤད་
ན་བྱིས་པ་སོ་སོའི་སྐྱེ་བོ་རྣམས་སྐྲག་པར་འགྱུར་རོ། །གསོལ་པ། གལ་ཏེ་སྐྲག་པའི་ཆོས་འགའ་ཞིག་མཆིས་ན་ནི་དེ་ལ་སྐྲག་པར་ཡང་འགྱུར་ན་བཅོམ་ལྡན་འདས་ཆོས་ཐམས་ཅད་ལ་སྐྲག་པ་མ་མཆིས་ལགས་སོ། །བཀའ་སྩལ་པ། འཇམ་དཔལ་སྐྲག་ཅེས་བྱ་བ་དེ་
ཆོས་གང་གི་ཚིག་བླ་དགས་ཡིན། །གསོལ་པ། བཅོམ་ལྡན་འདས་སྐྲག་ཅེས་བགྱི་བ་དེ་ནི་ཕྱིན་ཅི་ལོག་གི་ཚིག་བླ་དགས་ལགས་སོ། །བཀའ་སྩལ་པ། འཇམ་དཔལ་ཕྱིན་ཅི་ལོག་ཅེས་བྱ་བ་དེ་ནི་ཆོས་གང་གི་ཚིག་བླ་དགས་ཡིན། གསོལ་པ། བཅོམ་ལྡན་

འདས་ཕྱིན་ཅི་ལོག་ཅེས་བགྱི་བ་དེ་ནི་ཡང་དག་པ་ཉིད་ཀྱི་མཐའི་ཚིག་བླ་དགས་ལགས་སོ། །བཀའ་སྩལ་པ། འཇམ་དཔལ་ཡང་དག་པ་ཉིད་ཀྱི་མཐའ་ནི་སྐྲག་པར་མི་འགྱུར་རོ། །གསོལ་པ། བཅོམ་ལྡན་འདས་དེ་དེ་ལྟ་ལགས་ཏེ། ཡང་དག་པ་ཉིད་ཀྱི་མཐའ་ནི་སྐྲག་
པར་མི་འགྱུར་ཏེ། མི་སྐྲག་པ་ཞེས་བཤད་པ་ལགས་སོ། །བཅོམ་ལྡན་འདས་འདི་ལྟ་སྟེ། དཔེར་བགྱི་ན་ཡང་དག་པའི་མཐའ་ཡང་ཡང་དག་པའི་མཐའ་ཞེས་བརྗོད་ལགས་མོད་ཀྱི། དོན་དམ་པར་ན་ཡང་དག་པའི་མཐའ་ཡང་མི་དམིགས་ཏེ། དེ་བཞིན་དུ་བཅོམ་ལྡན་
འདས་སྐྲག་པ་ཡང་མི་དམིགས། མི་སྐྲག་པ་ཡང་མི་དམིགས་ལགས་སོ། །བཅོམ་ལྡན་འདས་ཆོས་ཐམས་ཅད་བརྗོད་དུ་མ་མཆིས་ཏེ། བརྗོད་དུ་མ་མཆིས་པ་ཡང་མི་དམིགས་ལགས་སོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་ཚིགས་སུ་བཅད་པ་འདི་དག་
གསོལ་ཏོ། །ཆོས་རྣམས་ཐམས་ཅད་མི་སྐྲག་སྟེ། །མི་སྐྲག་པ་ཡང་མ་མཆིས་ལགས། །ཆོས་རྣམས་བརྗོད་པ་ཙམ་དུ་བས། །ཡང་དག་མཚན་ཉིད་དེ་མ་ལགས། །མ་སྐྱེས་པ་ཡི་བུ་ལ་ཡང་། །བུ་ཞེས་གདགས་པར་འགྱུར་མོད་ཀྱི། །དེ་ན་བུ་ནི་རྙེད་མི་འགྱུར། །
ཀུན་རྫོབ་ཆོས་རྣམས་དེ་འདྲ་ལགས། །ཇི་ལྟར་མོ་ཤམ་བུ་རྣམས་ནི། །འཆི་བར་འགྱུར་བ་མི་དམིགས་པ། །དེ་བཞིན་ཀུན་རྫོབ་ཆོས་རྣམས་ཀྱང་། །རྣམ་པ་ཀུན་ཏུ་མི་དམིགས་ལགས། །ཀུན་རྫོབ་རྣམས་ཀྱང་ཀུན་རྫོབ་ཏུ། །མ་བྱུང་འབྱུང་བར་མི་འགྱུར་ཏེ། །ཇི་
ལྟར་བར་སྣང་ནམ་མཁའ་ལ། །རི་མོ་བྲིས་པ་མ་མཆིས་བཞིན། །ཀུན་རྫོབ་ལ་ཡང་ཀུན་རྫོབ་ཅེས། །མི་གང་རྗེས་སུ་འབྲང་བ་ནི། །དེ་ལ་ཕྱིན་ཅི་ལོག་ཅེས་ཀྱང་། །མིག་ལྡན་རྣམ་པར་མཐོང་བ་སྨྲ། །ཀུན་རྫོབ་དང་ནི་དམ་པའི་དོན། །དེ་དག་གཉི་ག་མི་རྟོགས་ཏེ། །གང་
གིས་དེ་དག་མི་རྟོགས་པ། །དེ་ནི་ཆོས་ཉིད་མི་རྟོགས་སོ། །གང་དག་ཆོས་ཉིད་མི་རྟོགས་པ། །དེ་དག་སོ་སོའི་སྐྱེ་བོར་གསུངས། །དེ་དག་འཇིག་རྟེན་མགོན་ཀུན་ཀྱིས། །མུ་སྟེགས་གཞན་ཞེས་རབ་ཏུ་གསུངས། །གང་གིས་ཆོས་ཉིད་རིག་པ་ནི། །དེ་དག་སངས་རྒྱས་བསྟན་ལ་

སྐྱེས། །བདུད་སྟོང་བྱེ་བ་རྣམས་ཀྱིས་ཀྱང་། །དེ་ལ་བསྐྱོད་པར་རྔོ་མི་ཐོགས། །གང་དག་བླ་མེད་སངས་རྒྱས་ས། །ཞི་བ་དེ་ནི་རྣམ་རྟོགས་པ། །མཁས་པ་དེ་དག་སྐྲག་པ་དང་། །མི་སྐྲག་པར་ནི་རྨོངས་མི་འགྱུར། །གང་དག་སངས་རྒྱས་བྱེ་བ་ལས། །ཞི་བའི་ས་
ལ་སྤྱད་བགྱིས་པ། །མཁས་པ་དེ་དག་སྐྲག་པ་དང་། །མི་སྐྲག་པར་ཡང་རྟོགས་མི་བགྱིད། །གཉིས་སུ་མ་མཆིས་ས་ཐོབ་ནས། །མཁས་པ་གང་དག་མི་ཞེན་པ། །དེ་ནི་མི་དབང་སྲས་ལགས་ཏེ། །ཆོས་ཀྱི་སྤྲུལ་པ་ཐུགས་ཀྱི་སྲས། །རྟོགས་ཤིང་མངོན་བགྱིས་མཐོང་བ་དང་། །
ཆོས་མཆོག་གང་གིས་རྙེད་དེ་དག །གུམ་ནའང་མྱ་ངན་མི་བགྱིད་ལ། །དགའ་བར་འགྱུར་བའང་མ་མཆིས་ལགས། །འགུམ་པ་ལ་ཡང་དགའ་མི་བགྱིད། །འཚོ་བའང་ཡོངས་སུ་ཚོལ་མི་བགྱིད། །བཏང་སྙོམས་སྨྲ་བ་དཔའ་བོ་དག །དགེ་བའི་ཆོས་ནི་མང་པོ་བགྱིད། །བྱང་
ཆུབ་ཆེད་དུ་ལམ་སྦྱོང་ཞིང་། །སངས་རྒྱས་རིགས་འཛིན་འདི་དག་ནི། །སངས་རྒྱས་སྤྱོད་ཡུལ་གང་ལགས་པ། །ཡབ་ཀྱི་རྗེས་སུ་རབ་ཏུ་སློབ། །བརྩོན་འགྲུས་ལྡན་ཞིང་འཇིགས་མ་མཆིས། །སེམས་ཅན་ཀུན་ལ་སྨན་སླད་དུ། །ཐམས་ཅད་མཁྱེན་པ་ཡོངས་ཚོལ་ཏེ། །ཞི་བ་མྱ་ངན་
འདའ་བར་ཞུགས། །འཇིག་རྟེན་ཤིན་ཏུ་བསྲེགས་པ་ལ། །དེ་དག་མྱ་ངན་འདའ་སྟོན་ཏེ། །བདག་ཉིད་ལ་ནི་མི་ལྟ་ཞིང་། །བདེ་དང་སྡུག་བསྔལ་མི་གནས་ལགས། །ཇི་ལྟར་མགོ་ལ་མེ་འབར་བ། །ཞི་བར་བགྱིད་པ་ཚོལ་བ་བཞིན། །སེམས་ཅན་ཀུན་གྱི་དོན་སླད་དུ། །དེ་དག་
དེ་བཞིན་ཆོས་རྣམས་ཚོལ། །འགྲོ་ལ་དགའ་བས་ཉིན་མཚན་དུ། །དེ་གང་རང་བྱུང་ཤིན་ཏུ་ཚོལ། །བསྐལ་པ་བྱེ་བ་སྟོང་དུ་ཡང་། །ནམས་ཀྱང་བརྩོན་འགྲུས་མི་འདོར་རོ། །བུ་དང་ཆུང་མ་ནོར་དང་འབྲུ། །མགོ་དང་དེ་བཞིན་རྒྱལ་པོའི་སྲིད། །ཞུམ་པ་མ་མཆིས་
ཀུན་བཏང་ཞིང་། །དེ་དག་གཏོང་བ་རབ་ཏུ་བསྒོམས། །སྲོག་ཆགས་ཀུན་གྱི་དོན་སླད་དུ། །དེ་དག་བྱང་ཆུབ་མཆོག་རེག་འགྱུར། །བློ་མཆོག་ལྡན་པ་དེ་དག་ནི། །མཐོང་ཞིང་ཐོས་པ་རྙེད་པར་དཀའ། །དེ་ནས་འཁོར་དེར་བྱང་ཆུབ་སེམས་དཔའ་ཐམས་ཅད་ཟིལ་གྱིས་

གནོན་པ་ཞེས་བྱ་བ་འདུས་ཏེ་འདུག་པར་གྱུར་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། དཔེར་བགྱི་ན་བར་སྣང་ལ་རྒྱུ་བའི་བྱ་རྟེན་པ་མ་མཆིས་ཤིང་ནམ་མཁའི་ཁམས་ལ་མི་ཆགས་པར་གང་དང་གང་དུ་འཚལ་བ་དེ་དང་དེར་མཆི་བ་དེ་
བཞིན་དུ་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ཡང་ཆོས་ཀྱི་དབྱིངས་ལ་གནས་ཏེ་མི་ཆགས་པར་ཆོས་འཆད་ལགས་སོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་འདི་ཆོས་ཀྱི་དབྱིངས་ལ་ཞུགས་ནས་ཇི་སྲིད་ལགས། དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་ལ་འདི་སྐད་ཅེས་བཀའ་སྩལ་ཏོ། །ཐམས་ཅད་ཟིལ་གྱིས་གནོན་པ་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་གང་དག་གང་ཡོངས་སུ་མྱ་ངན་ལས་འདས་པ་ཡང་འཇམ་དཔལ་གཞོན་ནུར་གྱུར་པ་
འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཙུད་དེ། དེ་བཞིན་གཤེགས་པ་དེ་དག་ཐམས་ཅད་ཀྱང་སངས་རྒྱས་ཀྱི་ཞིང་ཡོངས་སུ་དག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་ངན་ལས་འདས་སོ། །རིགས་ཀྱི་བུ་
སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཀྱི་དཔལ་ཞེས་བྱ་བ་འཇིག་རྟེན་དུ་
བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་འབྱུང་གནས་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་བླ་མ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་
པ་ཡེ་ཤེས་མཐོང་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་སྤྱོད་ཡུལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་མཛོད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་

རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཡེ་ཤེས་དཔལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེང་གེ་སྒྲོག་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་
པ་སེང་གེ་རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེང་གེ་བློ་གྲོས་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སྟོབས་རབ་ཏུ་འཇོམས་པ་ཞེས་བྱ་བ་འཇིག་རྟེན་དུ་བྱུང་ངོ་། །
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཤུགས་འཆང་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དཔལ་བརྩེགས་སྙིང་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་
དཔལ་བརྩེགས་རྣམ་པར་འཇོམས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཆོག་ཏུ་དགའ་བའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སྟོབས་ཀྱི་ཤུགས་
རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་རབ་ཏུ་ཞི་བར་སྤྱོད་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཞི་བའི་འོད་ཟེར་ཏོག་གི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཐའ་ཡས་བློ་གྲོས་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཐའ་ཡས་འདུལ་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་པད་
མའི་ཏོག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མ་མེད་པའི་ཞལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཟླ་འོད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་

ཕ་རོལ་ན་དེ་བཞིན་གཤེགས་པ་དྲི་མ་མེད་པའི་འོད་ཟེར་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དོགས་པ་ཐམས་ཅད་ལེགས་པར་འཇོམས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་
པ་སྣང་བྱེད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བདུད་རྩི་འཆང་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་
དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བདུད་རྩི་གྲགས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མ་མེད་པའི་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཕྱིར་མི་ལྡོག་
པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མ་མེད་པའི་མིག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲི་མཆོག་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་
ཆེས་ཕ་རོལ་ན་དེ་བཞིན་གཤེགས་པ་དྲི་མཆོག་དཔལ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དྲིའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་བློ་གྲོས་སྤོས་ཞེས་བྱ་བ་
འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཨུད་པ་ལའི་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མཐའ་ཡས་སྣང་བའི་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་
ཆེས་ཕ་རོལ་ན་དེ་བཞིན་གཤེགས་པ་དགྲ་ཐམས་ཅད་འདུལ་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མངོན་པར་འཕགས་པའི་རི་རྒྱལ་བ་རྒྱན་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་

གཤེགས་པ་ཚངས་པའི་ཏོག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཚངས་པས་སྐྱབས་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པ་གཅིག་ལ་སངས་རྒྱས་དྲུག་ཁྲི་འཇིག་རྟེན་དུ་བྱུང་སྟེ།
དེ་དག་གི་ཐོག་མ་ནི་འོད་ཅེས་བྱ། ཐ་མར་ནི་དེ་བཞིན་གཤེགས་པ་གྲགས་པའི་འོད་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་སངས་རྒྱས་བྱེ་བ་ཕྲག་བཞི་འཇིག་རྟེན་དུ་བྱུང་སྟེ། དེ་དག་གི་ཐོག་མར་ནི་དེ་བཞིན་གཤེགས་པ་མར་མེ་མཛད་ཅེས་བྱ་བ་འཇིག་
རྟེན་དུ་བྱུང་ངོ་། །དེ་དག་གི་ཐ་མར་ནི་དེ་བཞིན་གཤེགས་པ་སྤྱན་རིག་ཅེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པ་གཅིག་ལ་སངས་རྒྱས་བྱེ་བ་ཕྲག་དགུ་བྱུང་སྟེ། དེ་དག་གི་ཐོག་མར་ནི་དེ་བཞིན་གཤེགས་པ་བདེ་སྤྱན་ཞེས་བྱ་བ་འཇིག་རྟེན་དུ་བྱུང་ངོ་། །
ཐ་མར་ནི་དེ་བཞིན་གཤེགས་པ་རྣམ་པར་འབྱེད་པས་རྣམ་པར་ཕྱེ་བ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགའ་མཆོག་ཅེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དགའ་མཆོག་དེའི་སངས་རྒྱས་ཀྱི་ཞིང་ན་གྲགས་སྦྱིན་
ཞེས་བྱ་བ་དང་། དཔའ་མཁས་ཞེས་བྱ་བ་དང་། ཚངས་པའི་མིག་ཅེས་བྱ་བ་དང་། ཙན་དན་ཞེས་བྱ་བ་དང་། རབ་མཛེས་ཞེས་བྱ་བ་དང་། སེང་གེ་འཛིན་ཅེས་བྱ་བ་དང་། ཀུན་ནས་མཛེས་ཞེས་བྱ་བ་དང་། སྤོབས་པ་མཐའ་ཡས་ཞེས་བྱ་བ་དང་། བློ་གྲོས་མི་ཞན་ཞེས་བྱ་བ་དང་།
དེས་པ་ཞེས་བྱ་བ་དང་། འགྲོགས་ན་བདེ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཤིང་འགྲོགས་ན་བདེ་བ་ཡོན་ཏན་འབུམ་ཕྲག་མང་པོ་དང་ལྡན་པ་བཅུ་གཅིག་ཚངས་པར་སྤྱད་པ་སྤྱོད་དོ། །དེའི་ཚེ་ན་ཡང་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཉི་མས་བྱིན་ཞེས་བྱ་བ་
མཁས་ཤིང་ཡིད་རྣོ་བ་ཤེས་རབ་ཀྱི་རང་བཞིན་ཅན་ཞིག་ཡོད་དེ། དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཉི་མས་བྱིན་གྲོགས་པོ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ལྔ་བརྒྱ་ཙམ་དང་ལྷན་ཅིག་ཏུ་རིན་ཆེན་ལྡན་ཞེས་བྱ་བའི་གྲོང་ཁྱེར་ཆེན་པོ་ནས་ཕྱི་རོལ་དུ་འཁྱམ་པའི་ཕྱིར་བྱུང་ནས་

དོང་སྟེ། དེ་དག་དགའ་བ་སྣ་ཚོགས་ཞེས་བྱ་བའི་ཚལ་ག་ལ་བ་དེར་ཕྱིན་ཏོ། །དེའི་ཚེ་དགའ་བ་སྣ་ཚོགས་ཞེས་བྱ་བའི་ཚལ་དེ་ནི་བྱང་ཆུབ་སེམས་དཔའ་བཅུ་གཅིག་འཇིག་རྟེན་རྣམས་ཀྱི་དོན་ལ་སེམས་ཕན་པར་སེམས། བདེ་བར་སེམས་ཤིང་འཁོད་པ་བྲམ་ཟེའི་རིགས་ཤིང་སཱ་ལ་
ཆེན་པོ་ལྟ་བུའི་བུ་ཉི་མས་བྱིན་དེ་དགའ་བ་སྣ་ཚོགས་ཞེས་བྱ་བའི་ཚལ་དེ་ན་འཁྱམ་པས་དགའ་བ་སྣ་ཚོགས་ཀྱི་ཚལ་དེ་ན་འཁོད་པའི་སྐྱེས་བུ་དམ་པ་དེ་དག་དེས་ཤིང་འགྲོགས་ན་བདེ་ལ་མི་རྒོད་མ་ཁེངས་མི་གཡེང་། མུ་ཅོར་མི་སྨྲ། སྨྲ་བ་མི་མངའ་ཞིང་དྲན་པ་ཉེ་བར་གཞག་ལ། ཤེས་རབ་
ཅན། ཤེས་རབ་དང་ལྡན་པ། ཤིན་ཏུ་གྲིམས་པར་གནས་པར་མཐོང་ངོ་། །མཐོང་ནས་དེས་དགེ་བའི་རྩ་བ་བསྐྱེད་ཅིང་ཡུན་རིང་པོར་ཤེས་རབ་ཡོངས་སུ་བསྒོམས་པ་དང་འཕགས་པའི་རིགས་ལ་བསྟེན་པས་སྐྱེས་བུ་དམ་པ་དེ་དག་ལ་སེམས་རབ་ཏུ་དང་བར་གྱུར་ཏོ། །དེ་སེམས་རབ་
ཏུ་དང་བས་སྐྱེས་བུ་དམ་པ་བཅུ་གཅིག་པོ་དེ་དག་ག་ལ་བ་དེར་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་གཡོག་རྣམས་དང་ལྷན་ཅིག་ཏུ་དོང་ངོ་། །སྐྱེས་བུ་དམ་པ་གྲགས་བྱིན་དེས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་བྲམ་
ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་དེའི་འགྲོ་བ་དང་། ལྡོག་པ་དང་། ལྟ་བ་དང་། སྨྱང་བ་དང་། བསྐུམ་པའི་སྤྱོད་པ་ཀུན་ཀྱང་ཚངས་པར་སྤྱད་པ་ཡུན་རིང་དུ་སྤྱད་པའི་སྤྱོད་ལམ་བཞིན་ཏེ། སྐྱེས་བུ་དམ་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྣོད་དུ་འགྱུར་
རོ་སྙམ་དུ་སེམས་སོ། །དེ་ནས་རིགས་ཀྱི་བུ་གྲགས་བྱིན་གྱིས་སྐྱེས་བུ་དམ་པ་བཅུ་གཅིག་པོ་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་འདི་ལྟར་ཉི་མས་བྱིན་སྐྱེས་བུ་དམ་པ་སངས་རྒྱས་ཀྱི་སྲས་ཀྱི་ཚུལ་དུ་འགྲོ་བ། བླ་ན་མེད་པ་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་
པ་འོང་གིས་བྱང་ཆུབ་སེམས་དཔའ་འདི་ལ་སྐྱེས་བུ་དམ་པ་རྣམས་ཀྱིས་སྙིང་རྗེ་བསྐྱེད་ལ་གདམས་པ་དང་། རྗེས་སུ་བསྟན་པས་ཅི་ནས་རིགས་ཀྱི་བུ་འདི་སྐྱེ་བོ་ཕལ་པོ་ཆེའི་དོན་བྱེད་ཅིང་སྣང་བ་སྟོན་པ་སྣང་བར་བྱ་བའི་ཕྱིར་ལེགས་པར་དགོངས་ཤིག །དེ་ནས་བྲམ་ཟེའི་རིགས་ཤིང་སཱ་

ལ་ཆེན་པོ་ལྟ་བུའི་བུ་ཉི་མས་བྱིན་སྐྱེས་བུ་དམ་པ་བཅུ་གཅིག་པོ་དེ་དག་གི་གན་དུ་སོང་ནས་འདི་དག་ནི་སྟོན་པའོ། །འདི་དག་ནི་འཕགས་པའོ་ཞེས་སྐྱེས་བུ་དམ་པ་དེ་དག་ལ་སྟོན་པར་འདུ་ཤེས་བསྐྱེད་དེ། དེས་སྐྱེས་བུ་དམ་པ་དེ་དག་གི་རྐང་པ་ལ་མགོ་བོས་ཕྱག་འཚལ་ནས་
ཕྱོགས་གཅིག་ཏུ་འགྲེང་ངོ་། །དེ་ནས་རིགས་ཀྱི་བུ་གྲགས་བྱིན་གྱིས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་ལ་ཀྱེ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཁྱོད་འདུག་ཅིག་ཅེས་སྨྲས་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་སྐྱེས་བུ་
དམ་པ་དེ་དག་ལ་ཤིན་ཏུ་རི་མོ་བསྐྱེད་དེ་འདུག་པ་ནི་འདི་ལྟ་སྟེ། དཔེར་ན་རིགས་ཀྱི་མནའ་མ་གྱོས་སྒྱུག་གི་མདུན་ན་འདུག་པ་བཞིན་དུ་དམ་པ་དེ་དག་ལ་རི་མོ་སྐྱེས་པར་གྱུར་ཏོ། །འདི་ལྟ་སྟེ། དཔེར་ན་ནད་པ་ནད་ཀྱིས་བཏབ་ནས་ཡུན་རིང་མོ་ལས་སྨན་པ་མཐོང་ན་དབུགས་བྱུང་བ་དེ་བཞིན་དུ་
བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་ཡང་རིགས་ཀྱི་བུ་དེ་དག་མཐོང་མ་ཐག་ཏུ་དབུགས་བྱུང་བར་གྱུར་ཏོ། །འདི་ལྟ་སྟེ། དཔེར་ན་གསད་པ་ལ་ཐུག་པའི་མི་གསད་དུ་བཀྲི་བ་ལས་དོན་བྱ་བར་འདོད་ཕན་པར་འདོད་བདེ་བར་འདོད་པའི་མི་ལ་ལ་ཞིག་བྱུང་སྟེ། དེས་དེ་གསད་
པ་ལས་ཐར་བར་བྱས་ནས་དེ་མི་དེ་ལ་འདི་ནི་བདག་གི་སྐྱབས། བདག་ལ་སྙིང་བརྩེ་བ་ཅན་ཞེས་དེ་བྱས་པ་གཟོ་བ་ཆེར་སྐྱེས་པ་བཞིན་དུ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཡང་སྐྱེས་བུ་དམ་པ་དེ་དག་ལ་བདག་གི་སྐྱབས། བདག་ལ་སྙིང་བརྩེ་བ་ཅན་ནོ་ཞེས་བྱས་པ་གཟོ་བ་
སྐྱེས་སོ། །དེ་ན