Kinh tạng Tây Tạng (Kangyur Đại Học) — 054_མདོ་སྡེ།_ཐ

ས་རིགས་ཀྱི་བུ་གྲགས་བྱིན་གྱིས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ལ་སྨྲས་པ། ཉི་མས་བྱིན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་རྙེད་པར་དཀའོ། །འདི་ལྟ་སྟེ། དཔེར་ན་ཨུ་དུམ་
ཝཱ་རའི་མེ་ཏོག་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་བར་འགྱུར་བ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་སྟེ། གང་འཇིག་རྟེན་ཐམས་ཅད་དང་མི་འཐུན་པ། འཇིག་རྟེན་ཐམས་ཅད་དང་

འགལ་བ། ཟབ་པ་མཐོང་བར་དཀའ་བ། རྟོགས་པར་དཀའ་བ། བརྟག་ཏུ་མེད་པ། མུ་སྟེགས་ཅན་གཞན་ཐམས་ཅད་ཀྱི་རྟོག་གེའི་སྤྱོད་ཡུལ་མ་ཡིན་པ། ཉན་ཐོས་རྣམས་ཀྱིས་མ་ཆུད་པ། རང་སངས་རྒྱས་རྣམས་ཀྱིས་མི་ཤེས་པ། བྱང་ཆུབ་སེམས་དཔའ་རྣམས་ཀྱི་
སྤྱོད་ཡུལ་མ་ཡིན་པའི་ཆོས་སྟོན་ཏོ། །དེ་བཞིན་གཤེགས་པ་དེ་ལ་ཁྱོད་ཀྱིས་གུས་པ་བསྐྱེད་པར་བྱའོ། །བསྟི་སྟང་དང་བཅས། རི་མོ་དང་བཅས་པ་ལ་ནི་ཤེས་རབ་ཡང་དག་པར་གནས་ཤིང་བྱམས་པ་བསྐྱེད། ཡེ་ཤེས་རབ་ཏུ་འབྱུང་། རིག་པ་བསྐྱེད། མངོན་པར་ཤེས་
པ་མངོན་དུ་འགྱུར། བྱང་ཆུབ་ཀྱི་ཕྱོགས་ཀྱི་ཆོས་རྣམས་མདུན་ན་གནས་པར་འགྱུར་རོ། །དེ་བཞིན་གཤེགས་པ་འཇིག་རྟེན་ཐམས་ཅད་དང་མི་འཐུན་པའི་ཆོས་ཇི་ལྟར་སྟོན་ཅེ་ན། ཉི་མས་བྱིན་ཆོས་ཐམས་ཅད་ནི་ནམ་མཁའ་ལ་བྲིས་པ་བཞིན་དུ་དངོས་པོ་མེད་པ་སྟེ། ཆོས་དེ་
དག་ནི་འཇིག་རྟེན་ཐམས་ཅད་དང་མི་འཐུན་པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་བྱུང་མི་འབྱུང་བ་དེ་བཞིན་དུ་ཉི་མས་བྱིན་གཟུགས་ནི་ནམ་མཁའ་ལྟ་བུ་སྟེ་ངོ་བོ་ཉིད་ཀྱིས་འགགས་པའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་
པར་ཤེས་པ་ཡང་ནམ་མཁའ་ལྟ་བུ་སྟེ་ངོ་བོ་ཉིད་ཀྱིས་འགགས་པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་སྐྱེས་པ་སྟེ། དེ་བཞིན་དུ་གཟུགས་ཀྱང་མ་སྐྱེས་པའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་
སྐྱེས་པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་འགགས་པ་སྟེ། དེ་བཞིན་དུ་ཉི་མས་བྱིན་གཟུགས་ཀྱང་མ་འགགས་པའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་མ་འགགས་པའོ། །ཉི་མས་བྱིན་འདི་ལྟ་
སྟེ། དཔེར་ན་ནམ་མཁའ་ལ་བྲིས་པ་ནི་མི་འོང་མི་འགྲོ་བ་དེ་བཞིན་དུ་ཉི་མས་བྱིན་གཟུགས་ཀྱང་མི་འོང་མི་འགྲོ་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མི་འོང་མི་འགྲོ་བའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་ནི་བྲིས་པ་

མ་སྐྱེས་མ་བྱུང་བ་དེ་བཞིན་དུ་གཟུགས་ཀྱང་མ་སྐྱེས་མ་བྱུང་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་སྐྱེས་མ་བྱུང་ངོ་། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་འཕོས་མ་སྐྱེས་པ་དེ་བཞིན་དུ་གཟུགས་
ཀྱང་མ་འཕོས་མ་སྐྱེས་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་མ་འཕོས་མ་སྐྱེས་སོ། །ཉི་མས་བྱིན་འདི་ལྟ་སྟེ་དཔེར་ན་ནམ་མཁའ་ལ་བྲིས་པ་ནི་མ་བྱུང་ཀུན་ནས་མ་བྱུང་བ་དེ་བཞིན་དུ་གཟུགས་ཀྱང་མ་བྱུང་ཀུན་ནས་མ་བྱུང་སྟེ། ཚོར་བ་དང་། འདུ་
ཤེས་དང་། འདུ་བྱེད་དང་། རྣམ་པར་ཤེས་པའང་མ་བྱུང་ཀུན་ནས་མ་བྱུང་ངོ་། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་སྐྱེས་ཤིང་མེད་པ་དེ་བཞིན་དུ་གཟུགས་ཀྱང་མ་སྐྱེས་ཤིང་མེད་པ་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའང་
མ་སྐྱེས་ཤིང་མེད་པའོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་མ་གྲུབ་མངོན་པར་མ་གྲུབ་པ་དེ་བཞིན་དུ་གཟུགས་ཀྱང་མ་གྲུབ་མངོན་པར་མ་གྲུབ་སྟེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་གྲུབ་མངོན་པར་མ་གྲུབ་བོ། །ཉི་
མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་བརྗོད་དུ་མེད་ཅིང་བརྗོད་པ་མ་ཡིན་པ་དེ་བཞིན་དུ་གཟུགས་ཀྱང་བརྗོད་དུ་མེད་ཅིང་བརྗོད་པ་མ་ཡིན་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་བརྗོད་དུ་མེད་ཅིང་བརྗོད་པ་མ་ཡིན་ནོ། །ཉི་མས་བྱིན་འདི་
ལྟ་སྟེ། དཔེར་ན་ནམ་མཁའ་ལ་བྲིས་པ་བཏགས་པ་མེད་ཅིང་གདགས་པ་མ་ཡིན་པ་དེ་བཞིན་དུ་གཟུགས་ཀྱང་བཏགས་པ་མེད་ཅིང་གདགས་པ་མ་ཡིན་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་བཏགས་པ་མེད་ཅིང་གདགས་པ་མ་ཡིན་ནོ། །ཉི་མས་བྱིན་
འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་ཐ་སྙད་ཙམ་སྟེ། ནམ་མཁའ་ལ་བྲིས་པ་ཐ་སྙད་ཙམ་ལས་གཞན་མ་ཡིན་པ་དེ་བཞིན་དུ་གཟུགས་ཀྱང་ཐ་སྙད་ཙམ་སྟེ། གཟུགས་ཐ་སྙད་ཙམ་ལས་གཞན་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་

ཡང་ཐ་སྙད་ཙམ་སྟེ། ཐ་སྙད་ཙམ་ལས་རྣམ་པར་ཤེས་པ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་འདི་ལྟར་ཀུན་རྫོབ་ཙམ་སྟེ། ཀུན་རྫོབ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་ཉི་མས་བྱིན་གཟུགས་ཀྱང་འདི་ལྟར་
ཀུན་རྫོབ་ཙམ་སྟེ། ཀུན་རྫོབ་ལས་གཟུགས་གཞན་མ་ཡིན། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་འདི་ལྟར་ཀུན་རྫོབ་ཙམ་སྟེ། ཀུན་རྫོབ་ལས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་
བྲིས་པ་ནི་འདི་ལྟར་མིང་ཙམ་སྟེ། མིང་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ཀྱང་མིང་ཙམ་སྟེ། མིང་ཙམ་ལས་གཞན་མ་ཡིན་ནོ། །དེ་བཞིན་དུ་རྣམ་པར་ཤེས་པའི་བར་དུ་ཡང་འདི་ལྟར་མིང་ཙམ་སྟེ། མིང་ཙམ་ལས་རྣམ་པར་ཤེས་པའི་བར་དུ་
གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་འདི་ལྟར་བརྗོད་པ་ཙམ་སྟེ། བརྗོད་པ་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ཀྱང་འདི་ལྟར་བརྗོད་པ་ཙམ་སྟེ། བརྗོད་པ་ཙམ་ལས་གཟུགས་གཞན་མ་ཡིན་ནོ། །
དེ་བཞིན་དུ་རྣམ་པར་ཤེས་པའི་བར་དུ་ཡང་འདི་ལྟར་བརྗོད་པ་ཙམ་སྟེ། བརྗོད་པ་ཙམ་ལས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་འདི་ལྟར་བཏགས་པ་ཙམ་སྟེ། བཏགས་པ་ཙམ་ལས་ནམ་མཁའ་ལ་བྲིས་
པ་གཞན་མ་ཡིན་པ་དེ་བཞིན་དུ་གཟུགས་ཀྱང་འདི་ལྟར་བཏགས་པ་ཙམ་སྟེ། བཏགས་པ་ཙམ་ལས་གཟུགས་གཞན་མ་ཡིན་ནོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་འདི་ལྟར་བཏགས་པ་ཙམ་སྟེ། བཏགས་པ་ཙམ་ལས་ཚོར་བ་
དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་འདི་ལྟར་འདུ་ཤེས་ཙམ་སྟེ། འདུ་ཤེས་ཙམ་ལས་ནམ་མཁའ་ལ་བྲིས་པ་གཞན་མ་ཡིན་པ་དེ་བཞིན་དུ་གཟུགས་ནས་རྣམ་པར་

ཤེས་པའི་བར་དུ་ཡང་འདི་ལྟར་འདུ་ཤེས་ཙམ་སྟེ། འདུ་ཤེས་ཙམ་ལས་གཟུགས་ནས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ནམ་མཁའ་ལ་བྲིས་པ་ནི་བརྡ་ཙམ་སྟེ། བརྡ་ཙམ་ལས་ནམ་མཁའ་ལ་བྲིས་པ་
གཞན་མ་ཡིན་པ་དེ་བཞིན་དུ་གཟུགས་ནས་རྣམ་པར་ཤེས་པའི་བར་དུ་ཡང་འདི་ལྟར་བརྡ་ཙམ་སྟེ། བརྡ་ཙམ་ལས་གཟུགས་ནས་རྣམ་པར་ཤེས་པའི་བར་དུ་གཞན་མ་ཡིན་ནོ། །ཉི་མས་བྱིན་འདི་ལྟ་སྟེ། དཔེར་ན་ཚིག་གང་གིས་ནམ་མཁའ་ལ་བྲིས་པར་བརྗོད་པའི་ཚིག་ནི་
དོན་དམ་པར་མི་དམིགས་པ་དེ་བཞིན་དུ་འདི་ལྟ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཞེས་བྱ་བའི་ཆོས་དེ་དག་ཀྱང་འདས་པའི་དེ་བཞིན་གཤེགས་པ་རྣམས་ཀྱིས་ཀྱང་མ་དམིགས། མ་བྱོན་པ་དང་། ད་ལྟར་གྱི་དེ་བཞིན་
གཤེགས་པ་རྣམས་ཀྱིས་ཀྱང་མ་དམིགས་སོ། །ཉི་མས་བྱིན་ཡེ་ཤེས་དེ་རྟོགས་པར་བྱ་བའི་ཕྱིར་སངས་རྒྱས་བཅོམ་ལྡན་འདས་རྣམས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྡུག་ཅིང་ཕངས་པའི་དངོས་པོ་ཐམས་ཅད་ཡོངས་སུ་བཏང་ཡང་ཞུམ་པར་མི་འགྱུར་ཏེ། གང་ཡེ་ཤེས་
འདི་ལ་གནས་པ་དེ་དག་ནི་འཇིག་རྟེན་དུ་རྟོགས་པར་མི་བལྟའོ། །གང་ཡེ་ཤེས་འདི་ལ་གནས་པ་དེ་དག་ནི་འཇིག་རྟེན་གྱི་གྲངས་སུ་མི་འགྲོའོ། །གང་ཡེ་ཤེས་འདི་ལ་གནས་པ་དེ་དག་ནི་གདགས་པར་བྱ་བ་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་བྱང་ཆུབ་མངོན་པར་
རྫོགས་པར་སངས་རྒྱས་སོ། །གང་ཡེ་ཤེས་འདི་ལ་གནས་པ་དེ་དག་ནི་འཁོར་བ་ལས་བསྐྱོད་པ་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་འཁོར་བའི་ཆོས་ཅན་ཡང་མ་ཡིན་ནོ། །མྱ་ངན་ལས་འདས་པའི་ཆོས་ཅན་ཡང་མ་ཡིན་ནོ། །གང་ཡེ་ཤེས་འདི་ལ་གནས་པ་
དེ་དག་ནི་ཀུན་ནས་ཉོན་མོངས་པའི་ཆོས་ཅན་མ་ཡིན། རྣམ་པར་བྱང་བའི་ཆོས་ཅན་མ་ཡིན་ནོ། །གང་ཡེ་ཤེས་འདི་ལ་གནས་པ་དེ་དག་ནི་ཞི་བར་སྤྱོད་པ་ཡང་མ་ཡིན། མ་ཞི་བར་སྤྱོད་པ་ཡང་མ་ཡིན་ནོ། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་གྱིས་

སྐྱེས་བུ་དམ་པ་གྲགས་བྱིན་གྱིས་བཤད་པ་ལ་ལེགས་སོ་ཞེས་ཤིན་ཏུ་བསྟོད་དེ་རྗེས་སུ་ཡི་རང་ངོ་། །དེ་ནས་ཡང་སྐྱེས་བུ་དམ་པ་བཅུ་གཅིག་པོ་དེ་དག་གིས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དེ་རབ་ཏུ་དགའ་བར་བྱ་བའི་ཕྱིར་བྲམ་ཟེའི་རིགས་ཤིང་སཱ་ལ་ཆེན་པོ་
ལྟ་བུའི་བུ་ཉི་མས་བྱིན་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ཆོས་ཟབ་མོ་འདི་ཐོས་ཀྱང་མ་སྐྲག་སྐྲག་པར་མ་གྱུར། ཤིན་ཏུ་སྐྲག་པར་མ་གྱུར། མ་མྱོས་མྱོས་པར་མ་གྱུར་པ་ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་གང་ལ་བསླབ་པར་བྱ་བའི་ས་ནི་འདི་ཡིན་
ནོ། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཟབ་མོ་གོས་པ་མེད་པའི་ཆོས་བསྟན་པ་འདི་ཐོས་ནས་ཚིམ་ཞིང་མགུ་སྟེ་ཡི་རངས་ནས་རབ་ཏུ་དགའ་སྟེ། དགའ་བ་དང་། ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་ཟབ་མོ་མཐར་ཕྱིན་པར་གྱུར་ཏོ།། །།བམ་
པོ་བདུན་པ་སྟེ་ཐ་མ། དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་དང་། སྐྱེས་བུ་དམ་པ་བཅུ་གཅིག་པོ་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་མཆོག་ཅེས་བྱ་བ་དེ་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་
དེའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་སྐྱེས་བུ་དམ་པ་གྲགས་བྱིན་དེས་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལ་ཚིགས་སུ་བཅད་པ་འདི་དག་གསོལ་ཏོ། །ཞི་བའི་དབྱིངས་ལ་རབ་ཞུགས་ཚུལ་རྣམས་ལ། །མཁས་པ་
འདྲེན་པ་རྣམས་ནི་ལེགས་སོ་ཞེས། །གང་གིས་མི་མཆོག་ཤིན་ཏུ་འཐོབ་འགྱུར་བ། །དེ་ནི་མི་རྣམས་དམ་པ་བསྟན་དུ་གསོལ། །འཇིག་རྟེན་མཁས་པས་བསྟན་པ་ཐོས་ནས་སུ། །བྱང་ཆུབ་མཆོག་ལ་མི་རྣམས་རབ་ཏུ་འཇུག །གང་ཐོས་དྲང་སྲོང་ཆེན་པོར་འགྱུར་བ་དག །ཚུལ་
དེ་སྲོག་ཆགས་རྣམས་ལ་སྨན་སླད་གསུངས། །བདེ་གཤེགས་བདག་གི་རིགས་ལ་གནས་ནས་སུ། །ཐུབ་པས་སངས་རྒྱས་ཡེ་ཤེས་མངོན་པར་བསྟོད། །རྒྱལ་བས་དེ་ཡིད་རབ་ཏུ་དགའ་བར་མཛད། །དེ་དག་ཐོས་ནས་ཤིན་ཏུ་གནས་པར་འགྱུར། །རྒྱལ་བ་བདག་

གིས་ཇི་ཙམ་འཚལ་བ་རྣམས། །འདྲེན་པ་བདག་གིས་ཆོས་རྣམས་བཤད་ལགས་ཏེ། །སྟོན་པས་ཇི་ལྟར་ཆོས་རྣམས་ཀུན་མཁྱེན་པ། །འདྲེན་པས་ལེགས་པར་མ་ལུས་བསྟན་དུ་གསོལ། །དེ་ལ་དགའ་མཆོག་འཇིག་རྟེན་འདྲེན་པ་ཡིས། །རྒྱལ་
སྲས་སྤྱོད་པ་གང་ལ་སྤྱད་པས་ན། །མི་ཡི་གཙོ་བོ་འདྲེན་པར་འགྱུར་བ་ཡི། །སངས་རྒྱས་ཆོས་རྣམས་མ་ལུས་ངེས་པར་བསྟན། །ཐམས་ཅད་ཆོས་ཞེས་བྱ་བ་མཚན་ཉིད་གཅིག །མཚན་ཉིད་བྲལ་ཞིང་མཚན་ཉིད་མེད་པ་སྟེ། །ཞི་བ་ང་མེད་མི་གཡོ་ཡོན་ཏན་མེད། །
སྤོབས་པ་མེད་ཅིང་ཞི་བ་འཚོ་བ་མེད། །ཀུན་ནས་ཉོན་མོངས་རྣམ་པར་བྱང་བས་སྟོང་། །དངོས་པོ་ཉིད་མེད་ཅུང་ཟད་མེད་པ་སྟེ། །འདི་ནི་བསྟན་པ་མ་ཡིན་སྟོན་པ་མེད། །བཤད་པ་མེད་ཅིང་འཆད་པར་བྱེད་པའང་མེད། །ཚོར་བ་མ་ཡིན་ཚོར་བ་པོ་ཡང་མེད། །ཤེས་
པ་མ་ཡིན་ཤེས་པར་བྱེད་པའང་མེད། །སུ་ལའང་མ་ཡིན་གང་གིས་ཀྱང་མིན་ཏེ། །འདི་དག་མ་བྱས་བྱེད་དུ་བཅུག་པའང་མེད། །སུས་ཀྱང་བླངས་པ་མེད་ཅིང་བཏང་བའང་མེད། །སུས་ཀྱང་བསྒྲགས་པ་མེད་ལ་ཐོས་པའང་མེད། །སུས་ཀྱང་མི་ཤེས་རྣམ་པར་ཤེས་པའང་མེད། །
འདི་དག་དངོས་པོར་སུས་ཀྱང་མཐོང་བ་མེད། །འདི་ནི་ཞི་བ་མ་ཡིན་རྒོད་པའང་མིན། །ཞི་བར་མི་བྱེད་ཞི་བར་བྱས་པའང་མེད། །བྱེད་པ་མ་ཡིན་བྱེད་པ་མེད་པའང་མིན། །སེམས་པ་མེད་ཅིང་ཚོར་བར་བྱེད་པའང་མེད། །འདུས་བྱས་མ་ཡིན་འདུས་མ་བྱས་པའང་མིན། །འཕོ་
བ་མ་ཡིན་མི་འཕོ་བ་ཡང་མིན། །འོངས་པ་མེད་ཅིང་འགྲོ་བ་ཡོད་པ་མིན། །འདི་ནི་ཀུན་དུ་མི་འཆི་སྐྱེ་བ་མེད། །སྐྱེ་བ་མེད་ཅིང་བསྐྱེད་པའང་མ་ཡིན་ཏེ། །འདི་ནི་འགགས་པ་མེད་ལ་འགགས་པའང་མིན། །འདི་ནི་བརྟན་པ་མེད་ཅིང་བཤིག་པའང་མེད། །དེ་ལྟར་རྒྱལ་
བའི་ཆོས་རྣམས་བཤིག་པའང་མེད། །དེ་ལྟར་རྒྱལ་བའི་ཆོས་རྣམས་ཤེས་པར་གྱིས། །འདྲེན་པ་བདེ་བར་གཤེགས་པ་གང་འདས་པ། །དེ་དག་གིས་ཀྱང་ཚུལ་འདི་རབ་ཏུ་བསྟན། །འདྲེན་པ་སངས་རྒྱས་མ་བྱོན་འབྱུང་བ་རྣམས། །དེ་དག་ཀྱང་ནི་ཚུལ་འདི་འཆད་པར་

འགྱུར། །རྣམ་པར་འདྲེན་པ་ད་ལྟར་གང་བྱུང་བ། །རྒྱལ་བ་དེ་དག་ཀུན་ཀྱང་ཚུལ་འདི་སྟོན། །ཆོས་ཉིད་འདི་དག་རབ་ཏུ་ཤེས་པ་ཡི། །བྱང་ཆུབ་སེམས་དཔའ་འཇིགས་པ་མེད་པར་འགྱུར། །ཞི་བའི་ས་ཡང་རབ་ཏུ་ཤེས་འགྱུར་ཏེ། །མཁས་པས་ཤེས་པར་དཀའ་བ་རབ་ཏུ་བསྟན། །
རྒྱལ་བའི་ཐུགས་སྲས་ཇི་ཙམ་ཤེས་པ་དག །འགྲོ་བ་གཙེས་པ་འདི་ལ་མྱ་ངན་མེད། །དེ་ལ་སྙིང་རྗེ་བླ་ན་མེད་པ་སྟེ། །འགྲོ་བ་ཀུན་ལ་བྱམས་པར་ཤིན་ཏུ་གནས། །སྟོང་པ་ཉིད་ལ་གནས་པར་གྱུར་པས་ན། །རྒྱལ་བའི་བསྟན་པ་དག་ལ་ཐེ་ཚོམ་མེད། །མཚན་མ་མེད་
པར་གནས་པར་གྱུར་པས་ན། །དེ་ལ་སྨོན་ལམ་འདེབས་པའང་ཡོང་མེད་དེ། །རླུང་རྣམས་ནམ་མཁའ་དག་ལ་མི་ཐོགས་བཞིན། །དཔའ་བོ་དེ་དག་འགྲོ་བར་མི་ཆགས་སོ། །བསྐལ་པ་མང་པོར་བྱེ་བར་ཀུན་འཁོར་ཞིང་། །སེམས་ཅན་བྱེ་བ་མང་པོ་སྟོན་པར་བྱེད། །ཀུན་དུ་ཀུན་
ནས་ཉོན་མོངས་མི་འགྱུར་ཏེ། །དེ་ནི་བྱང་ཆུབ་དམ་པ་འཚང་རྒྱ་ནུས། །གལ་ཏེ་བདུད་ཀྱིས་སངས་རྒྱས་བྱེ་བསྟན་ཏེ། །དེ་དག་ཉན་ཐོས་ཀྱིས་ཤེས་སྨྲ་ན་ཡང་། །ངས་ནི་ཆོས་ཉིད་ཡང་དག་རབ་རྟོགས་ཏེ། །ཁྱོད་ནི་འདྲེན་པ་མིན་ཞེས་དེ་སྨྲའོ། །དྲི་མ་མེད་པའི་ཡེ་ཤེས་མིག་སྦྱངས་
ཏེ། །བདག་ནི་ཐེ་ཚོམ་མ་ལུས་རྣམ་པར་བྱང་། །སྟོང་པར་བདག་ནི་གཞན་དྲིང་གི་མི་འཇོག །ཁྱོད་ནི་གང་ཟག་མཆོག་མིན་ཕར་དེང་ཤིག །དེ་ལྟར་རྒྱལ་བས་ཆོས་ཉིད་བསྟན་པས་ན། །གང་ལ་འདྲེན་པའི་སྲས་རྣམས་གནས་པ་ལ། །བྱེ་བ་ཁྲག་ཁྲིག་བདུད་ཀྱིས་ཐུབ་དཀའ་སྟེ། །
ཇི་ལྟར་རི་བོ་བསྐྱོད་པར་མི་ནུས་བཞིན། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལས་སྟོང་པ་ཉིད་དང་ལྡན་པའི་ཚིགས་སུ་བཅད་པ་དེ་དག་ཐོས་ནས་འདི་ལྟ་བུའི་དགེ་བའི་རྩ་བའི་ཤུགས་ཐོབ་སྟེ།
དགེ་བའི་རྩ་བ་ཇི་ལྟ་བུའི་ཐོབ་པས་ཏ་ལ་བདུན་སྲིད་དུ་ནམ་མཁའ་ལ་འཕགས་ཏེ། དེས་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་པ་དག་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་དཔག་ཏུ་མེད་པ་རྣམས་ཐབས་མཁས་པ་རྣམ་པ་ཐ་དད་པས་བྱང་ཆུབ་སེམས་དཔའ་ཡང་

དག་པར་སྒྲུབ་པ་མཐོང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་རྣམས་དགའ་ལྡན་གྱི་གནས་ནས་ཤི་འཕོས་ཏེ། ཡུམ་གྱི་ལྷུམས་སུ་ཞུགས་པ་ཡང་མཐོང་། བྱང་ཆུབ་སེམས་དཔའ་བྱེ་བ་དཔག་ཏུ་མེད་པ་རྣམས་ལྷ་འབུམ་གྱིས་མཆོད་ཅིང་ཡུམ་
གྱི་རུམ་དུ་འགྲོ་བ་ཡང་མཐོང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་རྣམས་བཙས་ནས་གོམ་པ་བདུན་འདོར་བ་ཡང་མཐོང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་རྣམས་མངོན་པར་འབྱུང་བ་ཡང་མཐོང་། བྱང་ཆུབ་སེམས་དཔའ་བྱེ་བ་
ཁྲག་ཁྲིག་འབུམ་ཕྲག་དཔག་ཏུ་མེད་པ་རྣམས་བྱང་ཆུབ་མངོན་པར་རྫོགས་པར་བྱང་ཆུབ་པ་ཡང་མཐོང་། སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་ལ་བརྒྱ་བྱིན་དང་ཚངས་པ་དག་གིས་ཆོས་ཀྱི་འཁོར་ལོ་བསྐོར་བར་གསོལ་པ་ཡང་མཐོང་། སངས་རྒྱས་བཅོམ་ལྡན་འདས་དཔག་
ཏུ་མེད་པ་རྣམས་ཆོས་ཀྱི་འཁོར་ལོ་བསྐོར་བ་ཡང་མཐོང་། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་སྤྱོད་ལམ་དཔག་ཏུ་མེད་པ་རྣམས་ཀྱིས་སེམས་ཅན་རྣམས་འདུལ་བ་ཡང་མཐོང་། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ཕྱོགས་བཅུའི་འཇིག་རྟེན་ན་
ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བ་ཡང་མཐོང་ངོ་། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་བར་སྣང་ལ་འདུག་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལ་
ཚིགས་སུ་བཅད་པས་མངོན་པར་བསྟོད་པ། ལེགས་སོ་ལེགས་སོ་རྐང་གཉིས་ཀུན་གྱི་མཆོག །འདྲེན་པ་ཁྱོད་ཀྱིས་འདི་དག་ཆོས་བསྟན་པ། །བར་སྣང་གནས་ཀྱི་བྱ་ཡི་རྗེས་བཞིན་དུ། །དངོས་བྲལ་མཚུངས་མེད་ཅི་ཡང་མ་ལགས་པ། །མཚན་མ་མ་མཆིས་ནམ་
མཁར་བྲིས་པ་བཞིན། །དེ་ལྟར་བདེ་བར་གཤེགས་པས་ཆོས་བསྟན་ཏེ། །སྤྲུལ་པ་དག་གིས་ཇི་ལྟར་གཞན་སྤྲུལ་བཞིན། །ཡང་དག་ཏུ་ན་རྒྱལ་བས་བསྟན་མ་མཆིས། །སོས་ཀའི་དུས་ཀྱི་སྨིག་རྒྱུ་ཇི་བཞིན་དུ། །སྣང་ཡང་ཡང་དག་པར་ནི་མཆིས་མ་ལགས།

དེ་བཞིན་བདེ་བར་གཤེགས་པས་ཆོས་བསྟན་ཏེ། །སྟོན་པ་གང་ལགས་དེ་ཡང་དེ་དང་འདྲ། །སྔོན་ཆད་ཐེ་ཚོམ་ནེམ་ནུར་གང་བྱུང་བ། །དེ་ཡང་འདྲེན་པའི་དྲུང་དུ་བྲལ་གྱུར་ཏེ། །བདེ་བར་གཤེགས་པས་གསུངས་པའི་ཆོས་ཀྱང་རིག །འགྲོ་བ་སྒྲོལ་མཛད་རྣམ་པར་འདྲེན་
པར་ཤོག །སྟོབས་བཅུ་དག་གིས་བསྒྲུབས་པ་ཅི་འདྲ་བར། །རྒྱལ་བའི་ཞིང་མཆོག་བཟང་པོ་སྦྱང་བར་བགྱི། །སངས་རྒྱས་རྒྱལ་བ་རྐང་གཉིས་གཙོར་གྱུར་ཏེ། །སྐྱེ་བོ་མ་རྟོགས་པ་རྣམས་རྟོགས་པར་བགྱི། །སྲིད་པའི་རྒྱ་མཚོས་ཁྱེར་བའི་འགྲོ་བ་རྣམས། །གནས་དང་སྐྱབས་དང་
རྟེན་ཀྱང་མ་མཆིས་པའི། །སྐྱབས་སུ་འགྱུར་ཞིང་སྡུག་བསྔལ་ཐར་བགྱི་སྟེ། །རྒ་ཤི་བྲལ་བའི་གནས་ཀྱང་བསྟན་པར་བགྱི། །བྱེ་བ་ཁྲག་ཁྲིག་བདུད་ཀྱི་སྤྱོད་ཡུལ་ནི། །ཐམས་ཅད་རྒྱལ་བའི་སྤྱོད་ཡུལ་དུ་ཡང་བགྱི། །སེམས་ཅན་བདུད་ཀྱི་ཡུལ་ནས་བཏོན་ནས་སུ། །དྲང་སྲོང་ཆེན་པོའི་
ཡུལ་དུ་དྲང་བར་བགྱི། །བདེ་བར་གཤེགས་པས་ཞི་བའི་ཆོས་བསྟན་པ། །གང་གིས་ཐོས་ནས་གང་ལའང་མི་རེག་པ། །དེ་དག་མཆོག་གི་ཚུལ་ལ་གནས་པར་འགྱུར། །འདྲེན་པ་སྲོག་ཆགས་རྣམས་ཀྱི་སྟོན་པར་འགྱུར། །ཆོས་ཉིད་འདི་ལྟར་མི་གང་རབ་རྟོགས་ཤིང་། །སྟོན་པ་རྒྱལ་
བའི་དབང་པོའི་སྤྱན་སྔ་ནས། །བསྟན་བཅོས་ཀུན་ལ་མཁས་ཤིང་འཇིགས་བྲལ་བ། །དེ་དག་བླ་ན་མེད་པའི་བདེ་གཤེགས་འགྱུར། །སྟོང་པ་འདི་ཉིད་གང་གིས་རབ་རྟོགས་ཤིང་། །སྟོང་པར་དམིགས་པའི་འདུ་ཤེས་བྲལ་གྱུར་ན། །དེ་དག་མ་སྨས་བདེ་བར་གཤེགས་པར་འགྱུར། །
སྲོག་ཆགས་བྱེ་བ་མང་པོ་འགྲོལ་བར་བགྱིད། །མཁས་པ་བཙོག་པ་ལ་ནི་མི་དགའ་སྟེ། །ཟས་ཀྱི་རོ་རྣམས་ལ་ཡང་ཆགས་མ་མཆིས། །རྟོགས་པ་དགོན་པའི་གནས་ལ་ཤིན་ཏུ་མོས། །དེ་དག་རྐང་གཉིས་དམ་པ་མཁས་པར་འགྱུར། །སྦྱངས་པ་གང་དག་སྟོབས་བཅུས་བསྔགས་པ་དག །དེ་
དག་རྟག་ཏུ་རབ་ཏུ་གནས་པར་འགྱུར། །འཕགས་པའི་རིགས་ལ་དེ་དག་རྟག་ཏུ་དགའ། །རབ་ཏུ་དགའ་བས་བྱང་ཆུབ་མཆོག་ཀྱང་ཐོབ། །དེ་དག་ཆོས་རྣམས་བདེ་བར་གཤེགས་པས་བསྔགས། །དེ་ལ་མཁས་པ་གནས་པས་འདི་མཐོང་སྟེ། །ཞི་བ་གང་ལ་བདེ་གཤེགས་གནས་པ་ཡི། །

བྱང་ཆུབ་དེ་ནི་འཇིག་རྟེན་འདྲེན་པས་བསྔགས། །འདྲེན་པ་ཁྱོད་ལས་སྟོང་པ་དེང་ཐོས་ཏེ། །ཡེ་ཤེས་བླ་ན་མེད་པའང་བདག་གིས་བསྒྲུབས། །སངས་རྒྱས་རྐང་གཉིས་གཙོ་བོར་འགྱུར་བར་བགྱི། །མི་མཁས་འགྲོ་བ་དག་ཀྱང་རྣམ་པར་དགྲོལ། །ཐུབ་
པ་ཁྱོད་ལ་བདག་ནི་སྐྱབས་སུ་མཆི། །གང་ལ་ལོག་པའི་བློ་གྲོས་མི་དམིགས་ཤིང་། །ཆོས་རྣམས་ཀུན་ལ་ཁྱོད་ནི་ཐེ་ཚོམ་བྲལ། །དེ་སླད་འཇིག་རྟེན་ཁྱོད་དང་འདྲ་མ་མཆིས། །འདྲེན་པ་བདེ་བར་གཤེགས་ལ་གང་བསྟོད་པའི། །བསོད་ནམས་མི་ཆུང་བདག་གིས་བསགས་པས་
ན། །བདག་ནི་དེ་ཡི་དགེ་བའི་ལས་འདི་ཡིས། །མི་ཡི་གཙོ་བོ་འདྲེན་པར་འགྱུར་བར་ཤོག །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་གྱིས་བཅོམ་ལྡན་འདས་དེ་བཞིན་གཤེགས་པ་དགའ་མཆོག་དེ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་
ནས་དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམས་ཀྱང་སྨྱོས་པ་དང་གླེན་པར་མ་གྱུར་ཏོ། །གང་དང་གང་དུ་སྐྱེས་པ་དེ་དང་དེར་འདྲེན་པ་སྐྱེས་བུ་ཆེན་པོར་གྱུར་ཏོ། །ནམས་ཀྱང་ལོག་པར་ལྟུང་བར་མ་གྱུར་ཏོ། །ནམས་ཀྱང་གཞན་གྱི་དྲིང་ལ་འཇོག་པར་མ་གྱུར་ཏོ། །ནམས་ཀྱང་གཞན་གྱི་
ངོར་ལྟ་བར་མ་གྱུར་ཏོ། །ནམས་ཀྱང་བསྐལ་པ་བརྗོད་དུ་མེད་པར་ཐ་ན་སེ་གོལ་གཏོགས་པ་ཙམ་གྱི་བར་དུ་སེམས་ཅན་རྣམས་ཡོངས་སུ་སྨིན་པར་མ་བྱས་པར་མ་གྱུར་ཏོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རིགས་ཀྱི་བུ་གྲགས་བྱིན་ཞེས་བྱ་བར་
གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཐམས་ཅད་ཟིལ་གྱིས་གནོན་པ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་བཟང་སྐྱོང་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་བུ་གྲགས་བྱིན་ཞེས་བྱ་བར་གྱུར་ཏོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་
སེམས། དེའི་ཚེ་དེའི་དུས་ན་མཁས་པའི་སྙིང་པོར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དཀོན་མཆོག་འབྱུང་གནས་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་བུ་མཁས་པའི་སྙིང་པོ་ཞེས་བྱ་བར་གྱུར་ཏོ། །

ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་ཙན་དན་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྐྱོབ་བྱིན་ཞེས་བྱ་བ་དེ་དེའི་ཚེ་དེའི་དུས་ན་རིགས་ཀྱི་
བུ་ཙན་དན་སྙིང་པོ་ཞེས་བྱ་བར་གྱུར་ཏོ། །ཐམས་ཅད་ཟིལ་གྱིས་གནོན་པ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རིགས་ཀྱི་བུ་ཚངས་པའི་མིག་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེད་
དཔོན་བཟང་པོ་དེ་དེའི་ཚེ་དེའི་དུས་ན་རིགས་ཀྱི་བུ་ཚངས་པའི་མིག་ཅེས་བྱ་བར་གྱུར་ཏོ། །དེ་བཞིན་དུ་སྦྱར་ཏེ། གང་རིགས་ཀྱི་བུ་དེས་པ་ཞེས་བྱ་བར་གྱུར་པ་དེ་ནི་བྱང་ཆུབ་སེམས་དཔའ་མེས་བྱིན་ཡིན་ནོ། །གང་དེའི་ཚེ་དེའི་དུས་ན་རིགས་ཀྱི་བུ་བློ་གྲོས་འཆང་ཞེས་བྱ་བར་གྱུར་པ་དེ་ནི་བྱང་ཆུབ་སེམས་
དཔའ་བཟང་སྐྱོང་ཡིན་ནོ། །དེའི་ཚེ་དེའི་དུས་ན་གང་རིགས་ཀྱི་བུ་ཀུན་དུ་འཛིན་པར་གྱུར་པ་དེ་ནི་བྱང་ཆུབ་སེམས་དཔའ་དབང་པོས་བྱིན་ཡིན་ནོ། །དེའི་ཚེ་དེའི་དུས་ན་གང་རིགས་ཀྱི་བུ་སྤོབས་པ་མཐའ་ཡས་སུ་གྱུར་པ་དེ་ནི་བྱང་ཆུབ་སེམས་དཔའ་ཆུའི་ལྷ་ཡིན་ནོ། །ཐམས་ཅད་ཟིལ་གྱིས་གནོན་པ་
འདི་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་ཐམས་ཅད་ཟིལ་གྱིས་གནོན་པ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་དེའི་ཚེ་དེའི་དུས་ན་བྲམ་
ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་ཉི་མས་བྱིན་ཞེས་བྱ་བར་གྱུར་ཏོ། །ཐམས་ཅད་ཟིལ་གྱིས་གནོན་པ་དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱི་དྲིང་ལ་མི་འཇོག་པ་དང་། གཞན་གྱིས་མི་བཀྲི་བར་འདོད་པ་དང་། གཞན་གྱི་ངོར་མི་བལྟ་བར་འདོད་
ན་ཆོས་ཀྱི་དབྱིངས་ལ་རབ་ཏུ་འཇུག་པའི་ཕྱིར་དགེ་བའི་བཤེས་གཉེན་རྣམས་ལ་བསྟེན་པར་བྱ། འགྲོགས་པར་བྱ། བསྙེན་བཀུར་བྱའོ། །ཆོས་ཟབ་མོ་མཉན་པའི་ཕྱིར་ཡོངས་སུ་འདྲི་བའི་ངང་ཚུལ་ཅན་དུ་བྱའོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་

ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་སྟོབས་བསྐྱེད་པས་ཆོས་ཀྱི་དབྱིངས་ལ་ཞུགས་པའི་བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་འདིས་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་རྩ་བ་བསྐྱེད་ལགས།
སངས་རྒྱས་བཅོམ་ལྡན་འདས་ཇི་སྙེད་ཅིག་ལ་ཡོངས་སུ་ཞུ་བ་ཞུས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ས་དང་།
རྩྭ་དང་། ཤིང་དང་། ཡལ་ག་དང་། ལོ་མ་རྣམས་རྡུལ་ཕྲ་རབ་ཏུ་བྱས་ཀྱང་བགྲང་བར་ནུས་ཀྱི། བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པས་སངས་རྒྱས་བཅོམ་ལྡན་འདས་དེ་དག་ལས་དགེ་བའི་རྩ་བ་བསྐྱེད་པ་དང་། སངས་རྒྱས་བཅོམ་ལྡན་འདས་རྣམས་ལ་
ཆོས་ཀྱི་དབྱིངས་སུ་ཡོངས་སུ་ཞུགས་པ་དང་། ཆོས་ཀྱི་དབྱིངས་ལ་འཇུག་པ་དང་། ཐབས་མཁས་པ་ལ་འཇུག་པ་ཡོངས་སུ་དྲིས་པ་ནི་བགྲང་བར་མི་ནུས་སོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད། དཔག་ཏུ་མེད། བསམ་གྱིས་མི་ཁྱབ།
མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་ཞི་བའི་ཕུང་པོའི་བསྐལ་པ་ལ་སངས་རྒྱས་ཀྱི་ཞིང་དཔག་ཏུ་མེད་ཅིང་སངས་རྒྱས་ཀྱི་ཞིང་ཚད་མེད་པར་ཡོངས་སུ་དག་པ་དང་ལྡན་པ་བརྗོད་དུ་མེད་པའི་སངས་རྒྱས་ཀྱི་ཞིང་ཡོངས་སུ་དག་པ་དང་
ལྡན་པར་དེ་བཞིན་གཤེགས་པ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དབང་པོའི་རྒྱལ་མཚན་ཞེས་བྱ་བ་
འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དབང་པོའི་རྒྱལ་མཚན་དེའི་སངས་རྒྱས་ཀྱི་ཞིང་དེ་ན་ཡང་དགེ་སློང་དཔའ་སྲ་ཞེས་བྱ་བ་མཁས་པ། ཡིད་གཞུངས་པ། བྱེ་བྲག་ཕྱེད་པ། རྟོགས་པ། ཤེས་རབ་ཀྱི་རང་བཞིན་ཅན་ཞིག་བྱུང་སྟེ། བཅོམ་ལྡན་འདས་དེ་བཞིན་

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་རྒྱལ་མཚན་དེ་ལ་རིམ་གྲོ་བྱེད་པར་གྱུར་ཏོ། །དེས་དེ་བཞིན་གཤེགས་པ་དབང་པོའི་རྒྱལ་མཚན་དེ་ལ་ལོ་བྱེ་བ་ཁྲག་ཁྲིག་བརྒྱད་ཅུའི་བར་དུ་ཤིན་ཏུ་གུས་པར་བྱས་ཏེ་བཤད་པ་རྣམས་ཀྱང་གཟུངས་སུ་
འཛིན་ཅིང་རང་གི་དོན་ཀྱང་མི་གཏོང་སྟེ། དེས་དེ་བཞིན་གཤེགས་པ་ལ་ལོ་བྱེ་བ་ཁྲག་ཁྲིག་བརྒྱད་ཅུའི་བར་དུ་ཐམས་ཅད་མཁྱེན་པ་ཉིད་ཀྱི་སེམས་ཀྱིས་རིམ་གྲོ་བྱས་ཏེ། དེའི་དགེ་བའི་རྩ་བས་སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་མཉེས་པར་བྱས་ནས་དེ་བཞིན་གཤེགས་
པ་དེ་དག་ཐམས་ཅད་ཀྱི་རིམ་གྲོ་བྱེད་པར་གྱུར་ཏེ། དེ་བཞིན་གཤེགས་པ་དེ་དག་ཐམས་ཅད་ལའང་ཐམས་ཅད་མཁྱེན་པ་ཉིད་ཀྱི་སེམས་ཀྱིས་བསྙེན་བཀུར་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱིས་ཐོག་མ་དང་། བར་དང་། ཐ་མར་དུས་གསུམ་དུ་བསྟན་པ་རྣམས་
ཡོངས་སུ་བཟུང་བར་གྱུར་ཏོ། །དེའི་འོག་ཏུ་ཞི་བའི་སྙིང་པོ་ཞེས་བྱ་བའི་བསྐལ་པ་དེ་ལ་སངས་རྒྱས་བྱེ་བ་ཕྲག་དགུ་བྱུང་སྟེ། སངས་རྒྱས་བཅོམ་ལྡན་འདས་དེ་དག་ཐམས་ཅད་བྱང་ཆུབ་སེམས་དཔའ་དེས་ཡང་མཉེས་པར་བྱས་ནས་དེ་བཞིན་གཤེགས་པ་དེ་དག་ཐམས་ཅད་ཀྱི་རིམ་གྲོ་བྱེད་པར་གྱུར་
ཏེ། དེ་དག་ཐམས་ཅད་ལ་ཡང་ཐམས་ཅད་མཁྱེན་པ་ཉིད་ཀྱི་སེམས་ཀྱིས་རིམ་གྲོ་བྱས་ནས་དེ་བཞིན་གཤེགས་པ་དེ་དག་ཐམས་ཅད་ཀྱི་ཐོག་མ་དང་། བར་དང་། ཐ་མ་དུས་གསུམ་དུ་བསྟན་པ་རྣམས་ཡོངས་སུ་བཟུང་ངོ་། །དེའི་འོག་ཏུ་ཟླ་འོད་ཅེས་བྱ་བའི་བསྐལ་པ་བྱུང་སྟེ། དེ་ལ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་མཁས་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་དེའི་ཚེའི་ཚད་ནི་བསྐལ་པ་བྱེ་བ་ཕྲག་བརྒྱད་ཅུར་གྱུར་ཏེ། དེ་ལ་ཡང་བྱང་ཆུབ་
སེམས་དཔའ་དཔའ་སྲ་དེས་བསྐལ་པ་བྱེ་བ་བརྒྱད་ཅུའི་བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །དེ་ལ་དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་ཞེས་བྱ་བ་དེས་བསྐལ་པ་བརྒྱད་ཅུའི་བར་དུ་ཇི་ལྟར་ཆོས་ཀྱི་དབྱིངས་ལ་འཇུག་པར་འགྱུར་ཏེ།

ནམ་མཁའ་ལ་བྲིས་པ་ལྟ་བུར་ཆོས་ཀྱི་དབྱིངས་སུ་འཇུག་པ་བསྟན་ཏོ། །བསྐལ་པ་བྱེ་བ་བརྒྱད་ཅུའི་བར་དུ་ཆོས་ཐམས་ཅད་ནམ་མཁའ་ལ་བྲིས་པ་ལྟ་བུར་བསྟན་ཏེ། དཔའ་སྲ་འབྱུང་བ་ཆེན་པོ་བཞི་ནི་གཞན་དུ་འགྱུར་ཡང་སྲིད་ཀྱི་ནམ་མཁའ་ལ་བྲིས་པ་ལྟ་བུའི་ཆོས་ཐམས་
ཅད་ནི་ཆུང་ཟད་ཀྱང་གཞན་དུ་འགྱུར་བ་མེད་དོ། །དེ་ནས་བྱང་ཆུབ་སེམས་དཔའ་དཔའ་སྲ་ཆོས་ཀྱི་དབྱིངས་ལ་འཇུག་པ་འདི་ཐོས་ནས་འདི་ལྟ་བུའི་དགེ་བའི་རྩ་བའི་ཤུགས་ཐོབ་སྟེ། ཇི་ལྟ་བུའི་དགེ་བའི་རྩ་བའི་ཤུགས་ཐོབ་པས་ནམ་མཁའ་ལ་ཏ་ལ་བདུན་སྲིད་དུ་འཕགས་ཏེ། དེས་ཕྱོགས་
བཅུའི་འཇིག་རྟེན་གྱི་ཁམས་དཔག་ཏུ་མེད་པ་ན་བྱང་ཆུབ་སེམས་དཔའ་དཔག་ཏུ་མེད་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མཐོང་། ཁ་ཅིག་ནི་བླ་ན་མེད་པའི་ཆོས་ཀྱི་འཁོར་ལོ་བསྐོར། ཁ་ཅིག་ནི་རྫུ་འཕྲུལ་གྱི་ཆོ་འཕྲུལ་རྣམ་པ་
དུ་མས་སེམས་ཅན་རྣམས་འདུལ། ཁ་ཅིག་ནི་ཚེའི་འདུ་བྱེད་འདོར། ཁ་ཅིག་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བ་མཐོང་ནས་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་དེ་ལ་ཟབ་མོའི་
ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཞི་བ་བྱང་ཆུབ་མཚུངས་མེད་བཙལ་སླད་དུ། །བདག་གིས་སངས་རྒྱས་འདས་པ་བྱེ་སྟོང་ལ། །ཤིན་ཏུ་གུས་པ་ཆེན་པོ་བསྐྱེད་ནས་སུ། །སྔོན་གྱི་འདྲེན་པ་དག་ལ་བསྙེན་བཀུར་བགྱིས། །སེམས་ནི་ནམས་ཀྱང་གཞན་
དུ་མ་བསམས་ཏེ། །རྟག་པར་ཡིད་ནི་སྟོང་པ་ཉིད་ལ་བཞག །ཆོས་རྣམས་སྟོང་པར་བདེ་བར་གཤེགས་པས་བསྟན། །དེ་དག་ཆོས་ཀྱང་ཡིད་ཀྱིས་རྣམ་པར་བསམས། །བདག་ཏུ་སྨྲ་བ་མི་གང་མི་མཁས་པ། །མུ་སྟེགས་ཅན་ཀུན་བདག་གིས་ཟིལ་གྱིས་མནན། །ཆོས་རྣམས་
ཐམས་ཅད་ཆུ་ཡི་ཟླ་བ་བཞིན། །དེ་ལ་བདག་ནི་ཐེ་ཚོམ་ཅང་མ་མཆིས། །མིག་འདི་དམ་པའི་དོན་དུ་སྟོང་པར་ནི། །བདེ་བར་གཤེགས་པས་བཤད་པ་ཐོས་ནས་རྟོགས། །མིག་འདི་མིག་ཏུ་མཆིས་པ་མ་ལགས་ཏེ། །མཛངས་པ་མ་ལགས་མི་རྣམས་འདི་ལ་སླད། །ངེས་པར་

སྣ་ལྕེ་རྣ་བ་དེ་བཞིན་ཏེ། །ལུས་ཀྱང་ངོ་བོ་ཉིད་ཀྱིས་མཆིས་མ་ལགས། །དེ་བཞིན་སེམས་དང་སེམས་པའང་སྟོང་པ་ཉིད། །སེམས་ནི་དབེན་ཞིང་རབ་ཏུ་སྟོང་པ་ལགས། །གཟུགས་ཀྱང་གཟུགས་ཀྱིས་རྣམ་པར་དབེན་ཞིང་སྟོང་། །སྒྲ་དང་དྲི་དང་རོ་དང་རེག་ཀྱང་སྟོང་། །
ཆོས་རྣམས་ཐམས་ཅད་ངོ་བོ་ཉིད་སྟོང་སྟེ། །སྐྱེ་མཆེད་དེ་དག་ངོ་བོ་ཉིད་ཀྱིས་སྟོང་། །དེ་བཞིན་ཁམས་ཀྱང་ཁམས་རྣམས་ཉིད་ཀྱིས་སྟོང་། །བདེན་པའང་བདེན་པས་དེ་བཞིན་སྟོང་པ་སྟེ། །འདི་ལ་མཛངས་པ་མ་ལགས་འགྲོ་བ་རྣམས་ཀྱང་བསླད། །གང་ནའང་
སྟོང་པར་རིག་པ་མ་མཆིས་པར། །ནམ་མཁའ་བར་སྣང་བྱ་ཡི་རྗེས་དང་མཚུངས། །གང་ནའང་ངོ་བོ་ཉིད་ནི་མ་མཆིས་པ། །དེ་ནི་ནམས་ཀྱང་གཞན་གྱི་རྒྱུར་མི་འགྱུར། །གང་གིས་ངོ་བོ་ཉིད་ནི་མི་རྙེད་པར། །རང་བཞིན་དེ་མེད་ཇི་ལྟར་གཞན་གྱི་རྐྱེན། །རང་བཞིན་
མེད་པ་གཞན་གྱིས་ཅི་ཞིག་སྐྱེད། །རྒྱུ་དེ་བདེ་བར་གཤེགས་པས་བསྟན་པའོ། །ཐམས་ཅད་ཆོས་ཀྱང་མི་གཡོ་བརྟན་པར་གནས། །མི་འགྱུར་འཚེ་བ་མ་མཆིས་ཞི་བ་སྟེ། །ཇི་ལྟར་ནམ་མཁའ་རིག་པ་མ་མཆིས་ལྟར། །དེ་ལ་མི་མཛངས་འགྲོ་བ་མྱོས་པར་འགྱུར། །
ཇི་ལྟར་རི་བོ་དག་ནི་མི་སྒུལ་བ། །དེ་བཞིན་ཆོས་རྣམས་རྟག་ཏུ་བསྐྱོད་མི་ནུས། །འཆི་འཕོ་མ་མཆིས་སྐྱེ་བ་མ་མཆིས་པའི། །ཆོས་རྣམས་དེ་ལྟར་རྒྱལ་བས་རབ་ཏུ་བསྟན། །གང་གིས་ཡང་དག་ཆོས་རྣམས་ངེས་རྟོགས་པ། །དེས་ནི་རྒྱལ་བ་རྣམ་འདྲེན་བསྙེན་བཀུར་བགྱིས། །
གང་ལ་འདི་འདྲའི་ནན་ཏན་མ་མཆིས་པ། །དེ་དག་རྒྱལ་བའི་ཆོས་ཉིད་མཆོད་མ་བགྱིས། །གང་གིས་ཚུལ་བཞིན་རབ་ཏུ་ཆོས་རྟོགས་པ། །དེས་ནི་རྒྱལ་བ་བདེ་གཤེགས་བཀུར་སྟིར་བགྱིས། །དེ་དག་རྒྱལ་བ་ཆོས་ཀྱིས་མཆོད་བགྱིས་ཏེ། །བྱང་ཆུབ་མཆོག་ཏུ་དེ་དག་
འཚང་ཡང་རྒྱ། །གང་གིས་ཚུལ་བཞིན་ཆོས་རྣམས་རབ་རྟོགས་པ། །མཁས་པ་དེ་དག་རྒྱལ་བའི་རིགས་ཀྱང་འཛིན། །བདེ་བར་གཤེགས་པའི་བསྟན་པ་དེས་བཟུང་སྟེ། །བྱང་ཆུབ་དམ་པ་མཆོག་ཏུ་འཚང་ཡང་རྒྱ། །རྒྱལ་བ་བརྒྱ་ཡིས་སྟོང་པ་ཉིད་བཤད་དེ། །

བྱང་ཆུབ་སེམས་དཔའ་ཁྲག་ཁྲིག་རྣམས་ཀྱིས་བཟུང་། །བདེ་བར་གཤེགས་པའི་ཤུལ་འདིར་བྱང་ཆུབ་ཕྱིར། །དེ་ལ་མཁས་པ་ཐེ་ཚོམ་གཞར་མི་འབྱུང་། །བདེ་བར་གཤེགས་པས་ཆོས་རྣམས་གང་བསྟན་པ། །ཆོས་ཉིད་དེ་ནི་དེ་རིང་བདག་གིས་
འཚལ། །འདྲེན་པ་མི་རྣམས་ཀྱི་ཡང་མཆོག་ཏུ་འགྱུར། །ཤིན་ཏུ་སྡུག་བསྔལ་སྐྱེ་བོ་རྣམ་པར་དགྲོལ། །འདི་ལྟར་སྟོང་པ་ཉིད་ནི་རིག་པས་ན། །བདག་གིས་དེ་རིང་ཆོས་ཀྱི་ཡབ་ལ་མཆོད། །གང་སླད་མི་ཡི་གཙོ་བོ་ཁྱོད་འཕགས་པས། །དེ་བཞིན་གཤེགས་པ་དེ་ལ་སྐྱབས་
སུ་མཆི། །དེ་ནས་བྱང་ཆུབ་སེམས་དཔའ་དཔའ་སྲས་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་མཁས་པའི་རྒྱལ་པོ་ལ་སྟོང་པ་ཉིད་དང་ལྡན་པའི་ཚིགས་སུ་བཅད་པ་དེ་དག་གིས་མངོན་པར་བསྟོད་པའི་དགེ་བའི་རྩ་བ་དེས་གང་དང་གང་དུ་སྐྱེས་པ་དེ་དང་དེར་ཡང་གཟུངས་དང་།
ཞི་གནས་དང་། ཤེས་རབ་ཀྱིས་སེམས་ཅན་ཐམས་ཅད་ཟིལ་གྱིས་མནན་ཏོ། །འཇམ་དཔལ་དེའི་ཚེ་དེའི་དུས་ན་བྱང་ཆུབ་སེམས་དཔའ་དཔའ་སྲར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་
དཔའ་ཐམས་ཅད་ཟིལ་གྱིས་གནོན་པ་འདི་ནི་དེའི་ཚེ་དེའི་དུས་ན་བྱང་ཆུབ་སེམས་དཔའ་དཔའ་སྲ་ཞེས་བྱ་བར་གྱུར་ཏོ། །དེ་ལྟ་བས་ན་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བརྗོད་དུ་མེད་པ་རྣམས་ཡོངས་སུ་སྦྱང་བར་འདོད་པས་སྟོང་པ་ཉིད་རྣམ་པར་
ཐར་པའི་སྒོ་ལ་བསླབ་པར་བྱའོ། །དེ་ལ་སློབ་པའི་ཚེ་ཡང་སེམས་གང་ལ་ཡང་མི་ཆགས་མི་ཐོགས་ཏེ། དེའི་སེམས་མ་ཆགས་ཤིང་ཐོགས་པ་མེད་པས་བྱ་བ་གང་དང་གང་ལ་དམིགས་པ་དེ་དང་དེ་ཡང་མངོན་སུམ་དུ་འགྱུར་རོ། །འཇམ་དཔལ་ང་སྟོང་པ་ཉིད་འདི་ལ་སློབ་པ་ན། ཡེ་
ཤེས་ཇི་ལྟ་བུ་རབ་ཏུ་ཐོབ་པས་ཇི་ལྟར་བསམས་པ་དེ་བཞིན་དུ་འགྱུར་ཞིང་གར་འདོད་པ་དེར་འགྱུར་བའི་ཡེ་ཤེས་དེ་ལྟ་བུ་རབ་ཏུ་ཐོབ་བོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བཅུ་འདས་པ་ན་རྟག་ཏུ་སྣང་བར་བྱས་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་

སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤུགས་འཆང་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བཅྭ་བརྒྱད་འདས་པ་ན་རིན་ཆེན་ཡོད་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་
ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དག་པའི་སྤྱན་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་དྲུག་ཅུ་འདས་པ་ན། དགེ་བ་བསགས་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་སེམས་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྒྱ་འདས་པ་ན་བཻ་དཱུརྱའི་སྙིང་པོ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་
བཞིན་གཤེགས་པ་གསེར་གྱི་ཕུང་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་ས་ཡ་ཕྲག་གཉིས་འདས་པ་ན་གསེར་དུ་སྣང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་ཞེས་བྱ་བར་ཤེས་སོ། །འཇམ་དཔལ་སངས་རྒྱས་ཀྱི་ཞིང་འདི་ནས་ཤར་གྱི་ཕྱོགས་ཆར་སངས་རྒྱས་ཀྱི་ཞིང་སྟོང་བརྒྱད་བརྒྱ་འདས་པ་ན་ཞི་བ་སྤྱོད་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འབུམ་འདས་པ་ན་སྤྲིན་གྱི་ཁ་དོག་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་ཀྱི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སུམ་བརྒྱ་འདས་པ་ན་ཡིད་དུ་འོང་བའི་དྲི་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིའི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་སུམ་ཁྲི་བརྒྱད་སྟོང་འདས་པ་ན་མེ་ལོང་དཀྱིལ་འཁོར་སྣང་
ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་
བྱེ་བ་ཕྲག་བརྒྱད་ཅུ་འདས་པ་ན་ཟླ་བ་སྣང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒ་ཤི་འཇོམས་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་
སངས་རྒྱས་ཀྱི་ཞིང་བྱེ་བ་ཕྲག་དགུ་བཅུ་འདས་པ་ན་དུས་ལས་འདས་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སྦྱོང་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་
ཤར་གྱི་ཕྱོགས་ཆར་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་འདས་པ་ན། ཚེ་མཉམ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་མཆོག་
ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པ་ཕྲག་སུམ་ཅུ་རྩ་བརྒྱད་འདས་པ་ན་ཞི་བའི་ཆོ་ག་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་བློ་གྲོས་དག་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་དྲུག་ཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་མ་སྨད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་

ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་བཀོད་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་རིན་པོ་ཆེ་
ཀུན་དུ་གནས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་འཕགས་པའི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་
སངས་རྒྱས་ཀྱི་ཞིང་བརྗོད་དུ་མེད་པ་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་དཀོན་མཆོག་འབྱུང་གནས་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་བརྟུལ་ཞུགས་སྤྱད་ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བཅྭ་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ཡིད་གྲུབ་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་
ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ཕུད་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་ཉི་ཤུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ངེས་པར་
སོང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ཕུད་འབྱུང་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་
ཉི་ཤུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་གྲོང་རྡལ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཟིལ་གྱིས་གནོན་པ་ཞེས་

བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་བདེ་བའི་དྲི་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་
རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གནས་མེད་པར་སྤྱོད་ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་
ཁམས་འདས་པ་ན་མེ་ཏོག་བཀྲམ་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་ཕྱུག་ཅེས་བྱ་བར་ཤེས་སོ། །འཇམ་དཔལ་ཤར་
གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ཙམ་པའི་ཁ་དོག་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་གྲགས་པའི་ལྷ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་ལྷས་སྤྲུལ་པ་ཞེས་བྱ་བའི་འཇིག་རྟེན་གྱི་ཁམས་ཡོད་
དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་མི་གནས་པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་
ཁམས་འདས་པ་ན་རབ་ཏུ་གྲུབ་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་ཀྱི་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་

སངས་རྒྱས་ཀྱི་ཞིང་བརྗོད་དུ་མེད་པ་བདུན་ཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་མ་སྨད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་སྨན་གྱི་རྒྱལ་པོ་ཞེས་བྱ་བར་
ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་བདུན་ཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་གསེར་དུ་སྣང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་
བཞིན་གཤེགས་པ་མི་རྟག་གཟི་བརྗིད་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་གསེར་གྱིས་རབ་ཏུ་བརྒྱན་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་གསོལ་བ་བྱེད་པ་ཞེས་
བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་གསེར་གྱི་གཙུག་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་ཉོན་མོངས་དྲི་མ་སྦྱངས་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་
སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདས་པ་ན་མངོན་པར་འཕགས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དཔལ་གྱི་སྙིང་པོ་ཞེས་བྱ་བར་
ཤེས་སོ། །འཇམ་དཔལ་ཤར་གྱི་ཕྱོགས་ཆར་སྣང་བ་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དཔལ་བརྩེགས་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་
བརྗོད་དུ་མེད་པ་སུམ་ཅུ་རྩ་གཅིག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་གྲགས་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་ཉོན་མོངས་པ་ཞི་བར་བྱེད་པ་ཞེས་བྱ་བར་ཤེས་སོ། །འཇམ་

དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་གཟི་བརྗིད་ཅན་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་བློ་གྲོས་འཛིན་
ཅེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་དྲུག་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཚངས་པ་འབྱུང་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་
གཤེགས་པ་དཔལ་གྱི་གཟི་བརྗིད་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་བདུན་གྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་སངས་རྒྱས་དགྱེས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།
དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་བློ་གྲོས་རྒྱལ་པོ་ཞེས་བྱ་བར་ཤེས་སོ། །འཇམ་དཔལ་སངས་རྒྱས་ཀྱི་ཞིང་འདི་ནས་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་རིན་ཆེན་
སྒོ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་འཇིག་རྟེན་སློབ་དཔོན་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་
སངས་རྒྱས་ཀྱི་ཞིང་འདས་པ་ན་རིན་པོ་ཆེའི་རྩེ་མོ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་སྐར་རྒྱལ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་
བརྗོད་དུ་མེད་པ་སུམ་ཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་རིན་ཆེན་མེ་ཏོག་ཤིན་ཏུ་རྒྱས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་ས་དང་མཉམ་པ་ཞེས་བྱ་བར་ཤེས་སོ། །འཇམ་

དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་བཞིའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཤིན་ཏུ་མཛེས་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དོན་ཐམས་ཅད་གཟིགས་
པ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་བརྗོད་དུ་མེད་པ་སུམ་ཅུ་རྩ་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཙན་དན་གྱི་དྲི་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ང་ལ་སེམས་ཅན་རྣམས་ཀྱིས་དེ་བཞིན་གཤེགས་
པ་མཐའ་ཡས་སྣང་བ་ཞེས་བྱ་བར་ཤེས་སོ། །འཇམ་དཔལ་ཤར་གྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་འདས་པ་ན་ཟིལ་གྱིས་མི་ནོན་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་
ང་ལ་སེམས་ཅན་རྣམས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་ཞེས་བྱ་བར་ཤེས་སོ། །འཇམ་དཔལ་དེ་ལྟ་བུའི་རྣམ་གྲངས་སུ་སངས་རྒྱས་ཀྱི་ཞིང་ཐ་དད་པ་རྣམས་སུ་སངས་རྒྱས་ཀྱི་བྱ་བ་བྱེད་པའི་ཚེ་ང་ལ་སེམས་ཅན་རྣམས་ཀྱིས་
མིང་ཐ་དད་པར་ཤེས་པ་ནི་བརྗོད་དུ་མེད་པའི་བསྐལ་པར་སྨྲས་ཀྱང་ཤར་གྱི་ཕྱོགས་ཆའི་སངས་རྒྱས་ཀྱི་ཞིང་གི་མཐའ་རྟོགས་པར་མི་ནུས་སོ། །དེ་བཞིན་དུ་ཕྱོགས་ཆ་ཐམས་ཅད་ཀྱི་སངས་རྒྱས་ཀྱི་ཞིང་དུ་ང་ལ་སེམས་ཅན་རྣམས་ཀྱིས་མིང་ཐ་དད་པའི་དེ་བཞིན་གཤེགས་པར་ཤེས་པ་
ཡང་བརྗོད་དུ་མེད་པའི་བསྐལ་པར་སྨྲས་ཀྱང་སངས་རྒྱས་ཀྱི་ཞིང་ཐ་དད་པའི་མཐའ་བདེ་བར་མི་རིག་གོ། །འཇམ་དཔལ་སེམས་ཅན་དགེ་བའི་རྩ་བ་ཆུང་བ་རྣམས་ཀྱིས་ངའི་སངས་རྒྱས་ཀྱི་ཞིང་ཚད་མེད་པ་ཐོས་ན་མོས་པར་འགྱུར་རོ། །འཇམ་དཔལ་བྱང་ཆུབ་སེམས་དཔའ་གང་ཐེག་པ་
འདི་ལ་ཡང་དག་པར་ཞུགས་པ་དང་། ཐེག་པ་འདི་ལ་ཡང་དག་པར་ཞུགས་པའི་དགེ་བའི་བཤེས་གཉེན་རབ་ཏུ་མགུ་བར་བྱས་པ་དེ་དག་ཀྱང་འཇམ་དཔལ་ངའི་སངས་རྒྱས་ཀྱི་ཞིང་ཚད་མེད་པ་ཐོས་ན་ཐེ་ཚོམ་སྐྱེ་བར་འགྱུར་ན་ཉན་ཐོས་ཀྱི་ཐེག་པ་ཅན་དང་། རང་སངས་རྒྱས་ཀྱི་ཐེག་པ་

ཅན་དང་། དེ་མ་ཡིན་པའི་བྱིས་པ་སོ་སོའི་སྐྱེ་བོ་རྣམས་ལྟ་ཅི་སྨོས། འཇམ་དཔལ་ངས་མངོན་པར་ཤེས་པ་འདས་པའི་དུས་ན་བསྐལ་པ་དཔག་ཏུ་མེད་གྲངས་མེད། བསམ་གྱིས་མི་ཁྱབ་པ་དེའི་ཕ་རོལ་གྱི་ཡང་ཆེས་ཕ་རོལ་ན་ཡོན་ཏན་རབ་ཏུ་བསྐྱེད་པ་ཞེས་བྱ་
བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་མཐའ་ཡས་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་དེའི་དུས་ན་ང་ནི་བྲམ་ཟེའི་བུ་མོ་བློ་གྲོས་མཐའ་ཡས་ཞེས་བྱ་བར་གྱུར་ཏོ། །དེ་བཞིན་གཤེགས་པ་བརྩོན་
འགྲུས་མཐའ་ཡས་དེ་ཡང་བྱང་ཆུབ་སེམས་དཔའ་ཁྲག་ཁྲིག་བརྒྱད་ཅུས་ཡོངས་སུ་བསྐོར་བར་གྱུར་ཏེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཐེག་པ་དཔག་ཏུ་མེད་པ་ལ་ཡང་དག་པར་ཞུགས་པ་ནས་ཐེག་པ་བརྗོད་དུ་མེད་པའི་བར་ལ་
ཡང་དག་པར་ཞུགས་པ་ཤ་སྟག་སྟེ། དེ་དག་ལ་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་དེའི་རང་གི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་འཆད་དེ། ང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་བཅོམ་ལྡན་
འདས་དེ་བཞིན་གཤེགས་པ་བརྩོན་འགྲུས་མཐའ་ཡས་དེ་ལ་རིམ་གྲོ་དང་བསྙེན་བཀུར་བྱས་སོ། །དེ་ནས་ངས་དེའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་ཐོས་ནས་བདག་གི་སངས་རྒྱས་ཀྱི་ཞིང་ཡང་དེ་བས་ཀྱང་ཤིན་ཏུ་རྒྱ་ཆེ་བ་དེ་འདྲ་བར་གྱུར་ཅིག་ཅེས་དེ་ལྟ་བུའི་སྨོན་ལམ་བཏབ་
ནས་བདག་གིས་དགེ་བའི་རྩ་བ་ཐམས་ཅད་ཀྱང་སངས་རྒྱས་ཀྱི་ཞིང་རྒྱ་ཆེར་ཡོངས་སུ་དག་པར་བྱ་བའི་ཕྱིར་བསྔོས་ཏེ། བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། སངས་རྒྱས་ཀྱི་ཞིང་ཚད་
མེད་པ་ཡོངས་སུ་དག་པར་ལུང་བསྟན་མོད་ཀྱི་འོན་ཀྱང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་སངས་རྒྱས་ཀྱི་ཞིང་རྒྱ་ཆེར་ཡོངས་སུ་དག་པར་བྱ་བའི་ཕྱིར་བརྩོན་འགྲུས་མ་བཏང་བར་གྱུར་ནས་དེ་ལྟར་ངས་དེའི་འོག་ཏུ་སངས་རྒྱས་བྱེ་བ་ཁྲག་ཁྲིག་ཚད་མེད་པ་རྣམས་ལ་

བསྙེན་བཀུར་བྱས་ཏེ། དེའི་དགེ་བའི་རྩ་བ་བསགས་པས་ང་སངས་རྒྱས་ཀྱི་ཞིང་རྒྱ་ཆེར་ཡོངས་སུ་དག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །
བརྗོད་ཀྱིས་མི་ལང་འཁོར་བ་ན། །བསམ་གྱིས་མི་ཁྱབ་འདས་པའི་དུས། །སངས་རྒྱས་ཞིང་གི་རྒྱ་བསྐྱེད་ཕྱིར། །དེ་ན་ང་ཡིས་བརྩོན་འགྲུས་བརྩམས། །བརྩོན་འགྲུས་མཐའ་ཡས་ཞེས་བྱ་བ། །གང་ཟག་མཚུངས་པ་མེད་པ་བྱུང་། །སེམས་ཅན་བྱེ་བ་རྣམ་པར་འདུལ། །ལྷར་
བཅས་འཇིག་རྟེན་རྣམས་ལ་སྟོན། །སངས་རྒྱས་ཆོས་ལ་དབང་བྱེད་ཅིང་། །སྟོབས་རྣམས་ཀྱི་ཡང་ཕ་རོལ་ཕྱིན། །མི་འཇིགས་པ་ལ་ཤིན་ཏུ་གནས། །སོ་སོ་ཡང་དག་རིག་ལ་མཁས། །གནས་དང་གནས་མིན་དབང་ཡང་ཐོབ། །ལས་དང་ཡེ་ཤེས་རྟོགས་པར་རིག །
ལས་རྣམས་ཡང་དག་འཛིན་པ་དང་། །རྣམ་པར་སྨིན་ལ་ཐེ་ཚོམ་མེད། །ཁམས་རྣམས་དུ་མར་ཤེས་པ་དང་། །རྣམ་པར་འདྲེན་པ་ཤིན་ཏུ་ལྡན། །སེམས་ཅན་རྣམས་ཀྱི་དད་པ་རྣམས། །མ་ལུས་ཡང་དག་རབ་ཏུ་མཁྱེན། །སེམས་ཅན་རྣམས་ཀྱི་དབང་པོ་
ཡི། །རིམ་པ་བཞིན་དུ་ཡང་དག་མཁྱེན། །དབང་པོ་མཆོག་དང་ཐ་མ་རྣམས། །མ་ལུས་པར་ཡང་རབ་ཏུ་མཁྱེན། །བསམ་གཏན་ཡེ་ཤེས་རྣམ་ཐར་དང་། །ཏིང་ངེ་འཛིན་གྱི་ཕ་རོལ་ཕྱིན། །སྙོམས་པར་འཇུག་དང་ཚད་མེད་ལ། །རྐང་གཉིས་དམ་པ་ཤིན་
ཏུ་བསླབས། །སངས་རྒྱས་རྣམས་ཀྱི་ཏིང་ངེ་འཛིན། །དེས་ནི་མི་མཁྱེན་གང་ཡང་མེད། །ཐམས་ཅད་མཁྱེན་ཅིང་ཐམས་ཅད་གཟིགས། །གཟིགས་པ་ལ་ཡང་སྒྲིབ་པ་མེད། །དེ་བཞིན་གཤེགས་པ་དེ་ལ་ངས། །སངས་རྒྱས་ཞིང་གི་རྒྱ་དྲིས་ཏེ། །སངས་
རྒྱས་ཞིང་གི་རྒྱ་ཆེ་བ། །བསྐལ་པ་ཆེན་པོ་བདག་ལ་གསུངས། །ཀུན་ནས་ཉོན་མོངས་རྣམ་པར་བྱང་། །མ་ལུས་ཡང་དག་རབ་ཏུ་མཁྱེན། །གང་རྣམས་ཁྱོད་ཀྱིས་མི་མཁྱེན་པ། །དེ་འདྲའི་ཆོས་ནི་ཡོང་མ་མཆིས། །སངས་རྒྱས་ཞིང་གི་སྐྱོན་རྣམས་དང་། །

ཡོན་ཏན་ཐམས་ཅད་རབ་ཏུ་མཁྱེན། །སངས་རྒྱས་བསྟན་པ་རྒྱ་ཆེ་བ། །རྐང་གཉིས་གཙོ་བོས་བཤད་དུ་གསོལ། །སེམས་ཅན་རྣམས་ཀྱི་སྨིན་པ་དང་། །ཇི་ལྟར་མི་རྣམས་འཚང་རྒྱ་བ། །ཉོན་མོངས་གང་གིས་ཉོན་མོངས་པས། །མི་མཁས་
འཁོར་བར་རབ་ཏུ་འཁོར། །མི་རྣམས་གང་གིས་ཉོན་མོངས་པ། །ཉོན་མོངས་དེ་དག་ཁྱོད་ཀྱིས་མཁྱེན། །དེ་ཡི་ལམ་དང་བསམ་པ་རྣམས། །འདྲེན་པ་ཁྱོད་ཀྱིས་རྣམ་པར་མཁྱེན། །ཇི་ལྟར་ཏིང་འཛིན་འབྱུང་བ་དང་། །བྱུང་ནས་ཇི་ལྟར་གནས་པ་དང་། །ཇི་
ལྟར་དེ་ལས་ལྡང་བ་རྣམས། །སྟོན་པ་ཁྱོད་ཀྱིས་རབ་ཏུ་མཁྱེན། །བསམ་གཏན་རྣམས་དང་ཚད་མེད་པ། །ཇི་སྙེད་ཏིང་ངེ་འཛིན་རྣམས་དང་། །ཞི་གནས་དང་ནི་ལྷག་མཐོང་རྣམས། །རྣམ་པ་ཐམས་ཅད་ཤིན་ཏུ་མཁྱེན། །ཇི་ལྟར་ཆོས་ལ་འདོགས་པ་དང་། གང་
གི་རྐྱེན་གྱིས་བཤད་པ་ཡང་། །དེ་ཡང་སྟོན་པས་རབ་མཁྱེན་ཏེ། །དེ་ལ་ཐེ་ཚོམ་མི་མངའ་ཁྱོད། །ཁྱོད་ཀྱིས་བསྐལ་པ་བྱེར་སྤྱད་པས། །ཡེ་ཤེས་འདི་ལས་ངེས་པར་འབྱུང་། །སྟོན་པས་སྟོབས་ཀྱི་མཐུ་ཡང་བརྙེས། །དྲང་སྲོང་ཆེན་པོ་སྟོབས་དང་ལྡན། །བསྐལ་པ་སྟོང་
ཕྲག་བྱེ་བ་ཡི། །བདག་དང་ཕ་རོལ་རྣམས་ཀྱི་ཡང་། །སྤྱོད་པ་དཔག་ཏུ་མ་མཆིས་ཤིང་། །བསམ་གྱིས་མི་ཁྱབ་ཐམས་ཅད་མཁྱེན། །གང་དུ་བྱང་ཆུབ་ཅི་འདྲ་བ། །སྐྱེ་བ་ཐམས་ཅད་དུ་ཡང་འཇུག །དེ་དག་མ་ལུས་འདྲེན་པ་ཡིས། །ཇི་ལྟ་བུ་ཡང་རབ་ཏུ་མཁྱེན། །གང་དུ་
ཇི་འདྲ་སྐྱེ་བ་དང་། །གང་དུ་རིགས་ཀྱང་ཅི་འདྲ་བ། །ཇི་ལྟར་ཀུན་དུ་སྤྱད་པ་རྣམས། །དེ་དག་འདྲེན་པས་རབ་ཏུ་མཁྱེན། །ཐ་མའི་ཆོས་རྣམས་ཅི་འདྲ་བ། །འདྲེན་པས་འཁོར་བ་དེ་རྣམས་ཀྱང་། །འགྲོ་བ་གང་དུ་སྐྱེ་བ་ནི། །དེ་བཞིན་གཤེགས་པས་རབ་ཏུ་མཁྱེན། །ཅི་འདྲ་བ་ཡི་
ཡེ་ཤེས་ཀྱིས། །སྔོན་ཆད་རྣམ་པར་ལུང་བསྟན་པ། །མཁས་པ་ཁྱོད་ཀྱིས་དེ་མཁྱེན་པས། །དེ་ལ་ཐེ་ཚོམ་མི་མངའ་ཁྱོད། །ཚུལ་ཁྲིམས་གང་དང་ཆོས་གང་དང་། །ཅི་འདྲའི་སྤྱོད་པ་སྤྱད་པ་དང་། །ཡེ་ཤེས་གང་ལ་ཞུགས་པ་ཡང་། །དེ་དག་འདྲེན་པས་རབ་

ཏུ་མཁྱེན། །གང་དང་གང་གི་ལས་ཀྱིས་སུ། །སྐྱེ་བ་རྣམས་སུ་འགྲོ་བར་འགྱུར། །རྣམ་སྨིན་ཅི་འདྲ་འཐོབ་པ་ཡང་། །དེ་དག་མགོན་པོས་རབ་ཏུ་མཁྱེན། །གང་དུ་གནས་པ་དེ་དག་གི། །རྒྱུན་དུ་མཆི་བར་ངེས་པ་ཡང་། །དེ་ཡང་ཁྱོད་ཀྱིས་མ་ལུས་མཁྱེན། །དེ་
སླད་ཡིད་གཉིས་མི་མངའ་ཁྱོད། །གང་གི་ལུས་ཀྱིས་སེམས་གང་སྐྱེས། །དེ་ཡང་ཁྱོད་ཀྱིས་རྣམ་པར་མཁྱེན། །སེམས་དེའི་རྒྱུ་ནི་གང་ལགས་པ། །དེ་ཡང་འདྲེན་པས་ཤིན་ཏུ་མཁྱེན། །སྔོན་ཆད་གནས་པ་མཁྱེན་པ་ནི། །ཁྱོད་དང་འདྲ་བ་ཡོང་མ་མཆིས། །སངས་རྒྱས་
བྱེ་བ་སྟོང་རྣམས་དང་། །འདྲེན་པ་ཁྱོད་ནི་དེ་དང་འདྲ། །སྲོག་ཆགས་སོ་སོའི་དགེ་བ་རྣམས། །རྗེས་སུ་དྲན་པས་རབ་ཏུ་མཁྱེན། །དེ་སླད་སངས་རྒྱས་ཆོས་རྣམས་ལ། །འདྲེན་པའི་ཡེ་ཤེས་ཐོགས་མི་མངའ། །གང་དང་གང་གིས་ལུས་ཀྱིས་སུ། །ཇི་ལྟ་བུ་ཡི་རྒྱུད་དུ་
མཆི། །དེ་ཡང་ཐམས་ཅད་མཁྱེན་པས་མཁྱེན། །དེ་སླད་རྒྱལ་བས་ལྷག་མ་མཆིས། །འདྲེན་པ་ཆོས་རྣམས་ཐམས་ཅད་ལ། །ཁྱོད་ནི་ཐེ་ཚོམ་ཡོང་མི་མངའ། །སེམས་ཅན་ཀུན་གྱི་སྤྱོད་ཡུལ་ཡང་། །སངས་རྒྱས་སྤྱན་གྱིས་རབ་ཏུ་གཟིགས། །སྐྱེ་བ་དང་ནི་འཆི་
འཕོ་མཁྱེན། །ཁྱོད་འདྲ་བ་ནི་ཡོང་མི་གདའ། །ལྷར་བཅས་འཇིག་རྟེན་ཐམས་ཅད་ན། །ཐུབ་པ་ཁྱོད་ལས་ལྷག་མ་མཆིས། །ཟག་པ་ཟད་པའང་རབ་ཏུ་མཁྱེན། །མ་ལུས་པ་ཡང་རྟོགས་པར་གྱུར། །ཉོན་མོངས་ཐམས་ཅད་ཡོངས་སུ་སྤངས། །ཁྱོད་ཀྱིས་བག་ཆགས་
ཀུན་ཀྱང་བཅོམ། །སེམས་ཅན་ཀུན་གྱི་ཉོན་མོངས་དང་། །སྤྱོད་པ་རྣམས་ཀྱང་འདྲེན་པས་མཁྱེན། །གང་ལ་ཉོན་མོངས་སྤྱོད་ཡུལ་དང་། །ཉོན་མོངས་འདི་དག་གར་འབྱུང་མཁྱེན། །ཉོན་མོངས་དག་ལ་སྤྱད་པས་ན། །བག་ཆགས་རྗེས་སུ་འཇུག་པ་རྣམས། །དེ་
དག་ཀུན་ཀྱང་ཁྱེད་མཁྱེན་ཏེ། །དེ་ལས་ཁྱོད་ནི་ཕ་རོལ་ཕྱིན། །བདག་དང་ཕ་རོལ་རྣམས་ཀྱི་ཡང་། །ཉོན་མོངས་གང་གིས་སྤོང་བ་ཡི། །ལམ་དེ་རྣམས་ཀྱང་རབ་ཏུ་མཁྱེན། །དེ་སླད་ཁྱོད་ནི་ལམ་ལ་མཁས། །འཇིག་རྟེན་ཀུན་མགོན་རྣམ་འདྲེན་པ། །མཐའ་ཡས་

བརྩོན་འགྲུས་དེ་བསྟོད་ནས། །བསྐལ་བྱེ་ཁྲག་ཁྲིག་མཐའ་ཡས་པར། །འགྲོ་བ་གཉིས་སུ་དེ་སྐྱེས་སོ། །འདི་ནས་ལྷ་རིས་ང་སྐྱེས་ཏེ། །རྟག་པར་ལྷ་ཡི་དབང་པོར་གྱུར། །བྱེ་བ་མཐའ་ཡས་ལྷ་རྣམས་ལ། །རྒྱལ་བའི་ཡེ་ཤེས་འཐོབ་པར་
བསྟན། །ལྷ་ཡི་གནས་ནས་ཤི་འཕོས་ཏེ། །མི་ཡི་དབང་པོ་རྒྱལ་པོར་གྱུར། །སེམས་ཅན་ཁྲག་ཁྲིག་མཐའ་ཡས་པ། །རྒྱལ་བའི་ཡེ་ཤེས་ཐོབ་པར་བསྟན། །དེ་དག་ང་ཡི་ཆོས་ཐོས་ནས། །བསྟི་སྟང་མཚུངས་མེད་བསྐྱེད་ནས་སུ། །སེམས་ནི་ཐམས་ཅད་
ཉེར་གཞག་སྟེ། །དྲི་མེད་སེམས་ཀྱིས་དེ་དག་ཉན། །སེམས་ཅན་བྱེ་བ་མཐའ་ཡས་པ། །བྱང་ཆུབ་མཆོག་ལ་ངེས་པར་གྱུར། །ང་ཡི་ཚིག་ཐོས་རྟོགས་པ་ནི། །སངས་རྒྱས་བྱང་ཆུབ་ངེས་པར་གྱུར། །སངས་རྒྱས་བྱེ་བ་མཐའ་ཡས་པ། །སངས་རྒྱས་ཞིང་གི་རྒྱ་
བཤད་ཀྱང་། །བསྐལ་པ་ཁྲག་ཁྲིག་མཐའ་ཡས་སུ། །རྒྱ་ཆེན་བཤད་པ་མི་ཟད་དོ། །སངས་རྒྱས་ཡོན་ཏན་གང་བརྗོད་དང་། །དྲང་སྲོང་ཆེན་པོས་ཞིང་བསྔགས་པ། །ཐམས་ཅད་རང་བཞིན་སྟོང་པར་བཤད། །དེ་དག་མ་སྐྱེས་མི་འགག་བསྟན། །གང་འདིར་
སངས་རྒྱས་བསྔགས་པ་དང་། །སངས་རྒྱས་ཡོན་ཏན་གང་བསྟན་དང་། །བདེ་བར་གཤེགས་པས་ཞིང་བརྗོད་པ། །གང་གིས་བཤད་པའང་དེ་དང་འདྲ། །ཆོས་རྣམས་ཞི་བར་བདེ་གཤེགས་བཤད། །ཞི་བའི་རང་བཞིན་དེ་མི་རྙེད། །གང་ལ་བཤད་པ་དེ་
ཡང་སྟོང་། །འདི་ལ་མགོན་མེད་འགྲོ་བ་མྱོས། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུའི་བུ་མོ་བློ་གྲོས་མཐའ་ཡས་ཀྱིས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མཐའ་ཡས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་བུད་མེད་
ཀྱི་དབང་པོ་ལས་གྱུར་ཏེ། དེ་ཕྱིན་ཆད་བུད་མེད་ཀྱི་ལུས་སུ་མི་སྐྱེ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཚད་མེད་པ་ཡོངས་སུ་སྦྱང་བར་འདོད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་

པར་རྫོགས་པར་འཚང་རྒྱ་བར་འདོད་པས་བྱང་ཆུབ་སེམས་དཔའི་རྣམ་པར་ཐར་པ་སྒྲུབ་པའི་སྟོང་པ་ཉིད་སྒྲིབ་པ་མེད་པ་ལ་བསླབ་པར་བྱའོ། །ཆོས་ཀྱི་རྣམ་གྲངས་འདི་བཤད་པའི་ཚེ། སངས་རྒྱས་ཀྱི་ཞིང་འདི་ཐམས་ཅད་རྣམ་པར་འགྱུར་བ་དྲུག་ཏུ་གཡོས་ཏེ། འགུལ་རབ་ཏུ་
འགུལ། ཀུན་དུ་རབ་ཏུ་འགུལ། གཡོས་རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག །འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་འུར་རབ་ཏུ་འུར་འུར། ཀུན་དུ་རབ་ཏུ་འུར་འུར། ཆེམ་ཆེམ་རབ་ཏུ་ཆེམ་ཆེམ། ཀུན་
དུ་རབ་ཏུ་ཆེམ་ཆེམ། ཤར་ཕྱོགས་དམའ་ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། དབུས་དམའ་ན་མཐའ་མཐོ། མཐའ་དམའ་ན་དབུས་མཐོ་བར་གྱུར་ཏོ། །སྲོག་ཆགས་
བྱེ་བ་ཁྲག་ཁྲིག་ཕྲག་དྲུག་ཅུ་རྩ་དྲུག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཚད་མེད་པ་ཕྲག་བརྒྱ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །བྱང་ཆུབ་སེམས་
དཔའ་བྱེ་བ་ཁྲག་ཁྲིག་དཔག་ཏུ་མེད་པ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་དཔག་ཏུ་མེད་པ་རྣམས་དང་། ལྷ་དང་མིར་བཅས་པའི་སྐྱེ་དགུ་སྔོན་སེམས་མ་བསྐྱེད་པ་རྣམས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བཅོམ་ལྡན་
འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་པོ་དེ་དག་དང་། དགེ་སློང་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་
མཆོག་འབྱུང་གནས་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་ཞུས་ཏེ་སྐད་གསར་ཆད་ཀྱིས་བཅོས་ནས་སླད་ཀྱིས་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཨཱརྱ་སུ་བརྞྞ་སཱུ་ཏྲ་མ་ཧཱ་ཡཱ་ན་ནཱ་མ་སཱུ་ཏྲ། བོད་སྐད་དུ། འཕགས་པ་གསེར་གྱི་མདོ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་
དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་ཀྱི་སེམས་ཅི་ལྟར་བལྟ་བར་བགྱི།
བཅོམ་ལྡན་འདས་ཀྱིས་བཀའ་སྩལ་པ། ཚེ་དང་ལྡན་པ་ཀུན་དགའ་བོ་བྱང་ཆུབ་ཀྱི་སེམས་ནི་གསེར་དང་རང་བཞིན་འདྲ་བར་གནས་པར་བལྟ་བར་བགྱིའོ། །གསེར་རང་བཞིན་གྱིས་རྣམ་པར་དག་པ་ལྟར་བྱང་ཆུབ་ཀྱི་སེམས་རང་བཞིན་གྱིས་རྣམ་པར་དག་པར་གནས་སོ། །མགར་
བས་གསེར་ལ་བཟོའི་བྱེ་བྲག་ཐ་དད་པར་བྱས་ཀྱང་གསེར་རང་བཞིན་མི་འགྱུར་བ་ལྟར། བྱང་ཆུབ་ཀྱི་སེམས་ལ་ཡོན་ཏན་ཁྱད་པར་སྣ་ཚོགས་པར་སྣང་ཡང་དོན་དམ་པར་བྱང་ཆུབ་ཀྱི་སེམས་ལས་མ་གཡོས་པས་རང་བཞིན་མི་འགྱུར་བའི་ཕྱིར་རོ། །དེ་ནས་བཅོམ་ལྡན་
འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་ཉིད་རྣམ་པར་དག །བདག་དང་གཞན་གྱི་དོན་ལ་བརྩོན། །དངོས་མེད་ངོ་བོ་ཉིད་དུ་སྒོམ། །ཤེས་རབ་སྐྱེ་བའི་རྒྱུ་ལ་མོས། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་
པ་ཀུན་དགའ་བོ་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་གསེར་གྱི་མདོ་
ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། ༄༅༅། །རྒྱ་གར་སྐད་དུ། ཨཱརྱ་སུ་བརྞྞ་བཱ་ལུ་ཀོ་པ་མ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གསེར་གྱི་བྱེ་མ་ལྟ་བུ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་།

བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་
འདུན་ཆེན་པོ་དང་། བྱང་ཆུབ་སེམས་དཔའ་སྟོང་ཕྲག་མང་པོ་དག་དང་ཐབས་ཅིག་ཏུ་བཞུགས་ཏེ། དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་
ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དཔག་ཏུ་མ་མཆིས་པ་ལགས་སམ། བཅོམ་ལྡན་འདས་ཅི་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཡོན་ཏན་དཔག་ཏུ་མ་མཆིས་པ་དང་ལྡན་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་
དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་དོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡོན་ཏན་དཔག་ཏུ་མེད་པ་དང་ལྡན་ནོ། །ཚེ་དང་ལྡན་པ་ཀུན་
དགའ་བོས་ལན་གཉིས་སུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དཔག་ཏུ་མ་མཆིས་པ་ལགས་སམ། བཅོམ་ལྡན་འདས་ཅི་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཡོན་ཏན་དཔག་ཏུ་མ་མཆིས་པ་དང་ལྡན་ལགས་སམ། བཅོམ་ལྡན་འདས་ཀྱིས་ཀྱང་ལན་གཉིས་ལན་གསུམ་དུ་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་དོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡོན་ཏན་དཔག་ཏུ་མེད་པ་དང་ཡང་ལྡན་ནོ། །ཀུན་དགའ་བོ་ཁྱོད་དེ་བཞིན་
གཤེགས་པ་རྣམས་ཀྱི་དཔག་ཏུ་མེད་པ་མཉན་པའམ། དེ་བཞིན་གཤེགས་པ་རྣམས་ཀྱི་ཡུལ་ཤེས་པ་འམ། དེ་བཞིན་གཤེགས་པ་རྣམས་ཀྱི་ཡོན་ཏན་ཤེས་པར་འདོད་དམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་
འདི་སྐད་ཅེས་གསོལ་ཏོ། །དགེ་སློང་རྣམས་ལ་བཅོམ་ལྡན་འདས་ཀྱིས་བསྟན་དུ་གསོལ། བདེ་བར་གཤེགས་པས་བསྟན་དུ་གསོལ། དགེ་སློང་རྣམས་ཀྱིས་མངོན་སུམ་དུ་ཐོས་ན་ཡང་དག་པར་འཛིན་པར་འགྱུར་ལགས་སོ། །དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་མཽད་གལ་གྱི་བུ་ཆེན་པོ་རྫུ་འཕྲུལ་ཇི་ལྟ་བུས་ཕྱོགས་དང་ཕྱོགས་མཚམས་དག་ཏུ་འགྲོ་བ་ཤེས་སམ། ཀུན་དགའ་བོས་གསོལ་པ། མཽད་གལ་གྱི་བུ་ཆེན་པོ་རྫུ་འཕྲུལ་
ཇི་ལྟ་བུས་ཕྱོགས་དང་ཕྱོགས་མཚམས་དག་ཏུ་མཆི་བ་བཅོམ་ལྡན་འདས་ཀྱིས་བསྟན་དུ་གསོལ། བདེ་བར་གཤེགས་པས་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ལ་དོན་འདི་དཔེས་བསྟན་པར་བྱའོ། །དེ་ཅིའི་ཕྱིར་
ཞེ་ན། ཀུན་དགའ་བོ་སྐྱེས་བུ་མཁས་པ་གང་དག་དཔེས་དོན་རྟོགས་པར་འགྱུར་བ་ཡོད་པའི་ཕྱིར་རོ། །ཀུན་དགའ་བོ་དཔེར་ན་རྫིང་དཔག་ཚད་བརྒྱད་སྟོང་པ་ཆུས་གང་བ། བྱ་ཁྭས་བཏུང་དུ་རུང་བར་མུ་དང་ཁ་ད་ཆད་དུ་འདུག་པ། པད་མའི་ལོ་མས་ཁེབས་པ་ཞིག་ཡོད་
ལ་དེ་ནས་མི་ལ་ལ་ཞིག་གིས་རླུང་གི་ཤུགས་ལས་འདས་པའི་རྟ་མཆོག་དག་དང་ལྡན་པའི་ལྕགས་ཀྱི་ཤིང་རྟ་ལ་ཞོན་ཏེ། དེ་ཡང་མུ་ཁྱུད་ཀྱི་ཤིང་ཡང་ཆུ་ལ་མི་རེག །རྟ་རྣམས་ཀྱི་རྨིག་པ་ཡང་ཆུ་ལ་མི་རེག །པད་མའི་ལོ་མ་རྣམས་ཀྱང་རྟའི་རྨིག་པ་དག་གིས་མི་བརྟོལ་བ་

ཙམ་གྱི་སྟོབས་དང་ཤུགས་དང་མགྱོགས་པ་དེ་ལྟ་བུས་རྒྱུག་ལ། ཀུན་དགའ་བོ་དེ་ནས་རྫིང་དེའི་ནང་ནས་སྦྲུལ་གདུག་པ་ཞིག་བྱུང་ནས་ཤིང་རྟ་དེ་མཚོའི་ནང་ནས་ཕྱིར་མ་ལོག་པ་དེའི་བར་སྐབས་སུ་ཤིང་རྟ་དེ་ལན་བརྒྱད་བསྐོར་ན། ཀུན་དགའ་བོ་སྦྲུལ་གདུག་པས་ཤིང་རྟ་ལན་ཅིག་
བསྐོར་བའི་ཡུན་ཇི་ཙམ་པ་དེའི་བར་སྐབས་སུ་ཀུན་དགའ་བོ་ཁྱོད་ཆོས་བསྟན་པ་རྣམ་པ་བརྒྱད་སྟོན་ཅིང་དོན་ཀྱང་གོ་བར་བྱེད་དོ། །ཀུན་དགའ་བོ་ཁྱོད་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་མཽད་གལ་གྱི་བུ་ཆེན་པོ་ཆོས་བསྟན་པ་རྣམ་པ་བརྒྱད་སྟོན་ཅིང་དོན་ཀྱང་གོ་བར་
བྱེད་དོ། །ཀུན་དགའ་བོ་མཽད་གལ་གྱི་བུ་ཆེན་པོ་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་གནས་བརྟན་ཤ་ར་དྭ་ཏིའི་བུ་ཆོས་བསྟན་པ་རྣམ་པ་བརྒྱད་སྟོན་ཅིང་དོན་ཀྱང་གོ་བར་བྱེད་དོ། །གནས་བརྟན་ཤ་ར་དྭ་ཏིའི་བུ་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་
སུ་རང་སངས་རྒྱས་ཆོས་བསྟན་པ་རྣམ་པ་གྲངས་མེད་པ་སྟོན་ཏོ། །རང་སངས་རྒྱས་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་བྱང་ཆུབ་སེམས་དཔའ་ཆོས་བསྟན་པ་རྣམ་པ་གྲངས་མེད་བསམ་གྱིས་མི་ཁྱབ་བརྗོད་དུ་མེད་པ་སྟོན་ཅིང་དོན་ཀྱང་གོ་བར་བྱེད་དོ། །ཀུན་
དགའ་བོ་བྱང་ཆུབ་སེམས་དཔའ་ཚིག་གཅིག་སྨྲ་བའི་ཡུན་ཇི་ཙམ་པ་དེའི་བར་སྐབས་སུ་ཀུན་དགའ་བོ་གནས་བརྟན་མཽད་གལ་གྱི་བུ་ཆེན་པོ་འཇིག་རྟེན་གྱི་ཁམས་བརྒྱད་ཁྲི་འདའོ། །ཀུན་དགའ་བོ་རྫུ་འཕྲུལ་གྱི་སྟོབས་བསྐྱེད་པ་དེ་ལྟ་བུའི་འགྲོས་ཀྱིས་ཉིན་མཚན་བདུན་གྱི་བར་
དུ་ངལ་མི་བསོ་བར་ཤར་ཕྱོགས་སུ་འཇིག་རྟེན་གྱི་ཁམས་ཇི་སྙེད་དུ་འགྲོ་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། དེ་བཞིན་དུ་ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་མཚམས་ད