Kinh tạng Tây Tạng (Kangyur Đại Học) — 054_མདོ་སྡེ།_ཐ

ཞན་སྟོན་པར་
མཛད་ལགས་སོ། །བཀའ་སྩལ་པ། རིགས་ཀྱི་བུ་དེ་བས་ན་དེ་བཞིན་གཤེགས་པ་རྟག་པ་ཡིན་ནོ། །རིགས་ཀྱི་བུ་གཞན་ཡང་དཔེར་ན་གསེར་མགར་གྱིས་གསེར་གྱི་འབྱུང་གནས་ནས་གསེར་བཞུ་སྟེ། སྐྱོན་དང་བྲལ་བར་གྱུར་ནས་རྒྱན་བཟང་པོ་ཇི་དང་ཇི་ལྟ་བུའི་གཟུགས་སུ་འདོད་པའི་གསེར་

མགར་བྱེད་དུ་བཅུག་ན་དེ་དང་དེ་ལྟ་བུར་བྱེད་པ་དེ་བཞིན་དུ་དེ་བཞིན་གཤེགས་པས་ཀྱང་སྲིད་པ་ཉི་ཤུ་རྩ་ལྔ་དག་ཏུ་གདུལ་བར་བྱ་བ་རྣམས་ཅི་དང་ཅི་ལྟ་བུར་འདོད་པ་དེ་དང་དེ་ལྟ་བུའི་ཐབས་ཀྱིས་གཟུགས་མངོན་པར་སྤྲུལ་ནས་སེམས་ཅན་རྣམས་སྒྲོལ་བར་མཛད་དོ། །དེ་བས་
ན་དེ་བཞིན་གཤེགས་པའི་སྐུ་ནི་མཐའ་ཡས་ཏེ་རྟག་པ་ཡིན་ནོ། །རིགས་ཀྱི་བུ་གཞན་ཡང་དཔེར་ན་ཨ་མྲའི་ཤིང་ངམ། འཛམ་བུའི་ཤིང་ཡང་རུང་། དུས་ཚིགས་རྣམ་པ་གསུམ་གྱི་དབང་གིས་འགྱུར་ཏེ། རེས་འགའ་ནི་སྦལ་མིག་བྱེ་བ་དང་ལོ་མ་ཁ་འབུ་བར་འགྱུར་རོ། །རེས་འགའ་
ནི་ལོ་མ་རྒྱས་ཤིང་གྲིབ་མ་བསིལ་བར་འགྱུར་རོ། །རེས་འགའ་ནི་ཤིང་སྐམ་པོ་བཞིན་དུ་ལོ་མ་ལྷགས་པར་འགྱུར་ན། ཇི་ག་ཤིང་དེ་དག་ཤི་ཞེས་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཉིད་གདུལ་བར་བྱ་བའི་དབང་གིས་འཇིག་རྟེན་གསུམ་དུ་ཐབས་ཀྱི་སྐུ་རྣམ་པ་གསུམ་དུ་སྟོན་པར་མཛད་དེ། སྐྱེ་བ་ལྟ་བུ་དང་། འཚོ་ཞིང་བཞུགས་པ་ལྟ་བུ་དང་། ཡོངས་སུ་མྱ་ངན་ལས་འདས་པ་ལྟ་བུར་སྟོན་ན། ཇི་ག་དེ་བཞིན་གཤེགས་པ་མི་
རྟག་པ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དེ་བས་ན་དེ་བཞིན་གཤེགས་པ་ནི་རྟག་པ་ཡིན་ནོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པའི་སྐུ་དང་། དེ་བཞིན་གཤེགས་པའི་དགོངས་པའི་ཚིག་ཀྱང་
ཤེས་པར་དཀའོ། །དཔེར་ན་རྒྱལ་པོ་ལ་ལ་ཞིག་གིས་རང་གི་བློན་པོ་ལ་སེན་ད་པ་འོན་ཅིག་ཅེས་དེ་སྐད་བསྒོ་ན། དེ་ལ་སེན་ད་པ་ཞེས་བྱ་བ་ནི་ལན་ཚྭ་དང་། སྐོམ་སྣོད་དང་། རལ་གྲི་དང་། རྟ་རྣམས་ལ་བྱ་སྟེ། འདི་བཞིའི་མིང་སེན་ད་པ་ཞེས་བྱ་ན། འདི་ལྟར་མིང་གཅིག་ལ་
དོན་མང་པོ་ཡོད་པས། གང་གི་ཚེ་རྒྱལ་པོ་བཤོས་གསོལ་བ་ན་སེན་ད་པ་ཞེས་ཟེར་ན་ནི་དེའི་ཚེ་བློན་པོས་སེན་ད་པ་ལན་ཚྭ་ཡིན་པར་རིག་ནས་ལན་ཚྭ་འབུལ་བར་བྱེད་དོ། །གང་གི་ཚེ་རྒྱལ་པོ་བཤོས་གསོལ་ཟིན་ནས་སེན་ད་པ་ཞེས་ཟེར་ན་ནི་དེའི་ཚེ་བློན་པོས་སྐོམ་སྣོད་ཡིན་པར་རིག་ནས་སྐོམ་

སྣོད་འབུལ་བར་བྱེད་དོ། །གང་གི་ཚེ་རྒྱལ་པོ་སྐྱེད་མོས་ཚལ་དུ་འགྲོ་བའི་ཚེ་སེན་ད་པ་ཞེས་ཟེར་ན་ནི་དེའི་ཚེ་བློན་པོས་རྟ་ཡིན་པར་རིག་ནས་རྟ་འབུལ་བར་བྱེད་དོ། །གང་གི་ཚེ་རྒྱལ་པོ་འཐབ་པའི་ཚེ་སེན་ད་པ་ཞེས་ཟེར་ན་ནི་དེའི་ཚེ་བློན་པོས་རལ་གྲི་ཡིན་པར་རིག་ནས་རལ་གྲི་འབུལ་
བར་བྱེད་དེ། དེ་ལྟར་རྒྱལ་པོའི་དགོངས་པའི་ཚིག་རྣམ་པ་བཞི་བློན་པོ་རྣམས་ཀྱིས་ཁོང་དུ་ཆུད་པར་འགྱུར་རོ། །རིགས་ཀྱི་བུ་དེ་བཞིན་དུ་ཐེག་པ་ཆེན་པོ་འདི་ལ་ཡང་མི་རྟག་པ་རྣམ་པ་བཞི་ཞེས་བྱ་བ་ཡོད་པར་ཐེག་པ་ཆེན་པོ་པ་བློན་པོ་དང་འདྲ་བས་དེ་བཞིན་དུ་རིག་པར་བྱ་སྟེ། གང་
གི་ཚེ་དེ་བཞིན་གཤེགས་པ་འཇིག་རྟེན་དུ་བྱུང་ནས་སངས་རྒྱས་ཡོངས་སུ་མྱ་ངན་ལས་འདའོ་ཞེས་སྟོན་ན་ནི་དེའི་ཚེ་ཐེག་པ་ཆེན་པོ་པས་མི་རྟག་པ་སྟོན་ཏོ་སྙམ་དུ་ཤེས་པར་བྱ་སྟེ། མི་རྟག་པའི་འདུ་ཤེས་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་དམ་པའི་ཆོས་ནུབ་པ་
དང་ཞིག་པར་འགྱུར་རོ་ཞེས་སྟོན་ན་ནི་དེའི་ཚེ་སྡུག་བསྔལ་སྟོན་ཏོ་སྙམ་དུ་ཤེས་པར་བྱ་སྟེ། སྡུག་བསྔལ་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་དགེ་སློང་རྣམས་དང་། དགེ་སློང་མ་རྣམས་ལ། ངའི་ལུས་ནད་ཆེན་པོ་མཐའ་ཡས་པས་གཟིར་ཏོ། །དགེ་འདུན་འཇིག་
པར་འགྱུར་རོ་ཞེས་སྟོན་ན་ནི་དེའི་ཚེ་བདག་མེད་པ་སྟོན་ཏོ་སྙམ་དུ་ཤེས་པར་བྱ་སྟེ། བདག་མེད་པ་བསྒོམ་པ་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་ཐར་པ་ནི་མཚན་མ་མེད་པ་དང་། སྟོང་པ་དང་། ཅི་ཡང་མེད་པའོ་ཞེས་སྟོན་ན་ནི་དེའི་ཚེ་ཐར་པ་ནི་སྲིད་པ་ཉི་ཤུ་རྩ་ལྔ་དང་
བྲལ་བ་ཡིན་ནོ་ཞེས་སྟོན་པར་ཤེས་པར་བྱ་སྟེ། དེ་བས་ན་སྟོང་པ་ཞེས་བྱའོ། །གང་གི་ཕྱིར་དེ་ལ་སྡུག་བསྔལ་མེད་པས་ན་དེའི་ཕྱིར་སྡུག་བསྔལ་ཅི་ཡང་མེད་པ་དང་། མཆོག་ཏུ་བདེ་བ་དང་། མཚན་མ་མེད་པ་ཡིན་ནོ། །གང་གི་ཕྱིར་དེ་ལ་མི་རྟག་པ་དང་། མི་བརྟན་པ་དང་། ཐེར་
ཟུག་མ་ཡིན་པ་དང་། ཞི་བའི་རང་བཞིན་མ་ཡིན་པ་མེད་པས་ན་དེའི་ཕྱིར་ཐར་པ་ནི་རྟག་པ་དང་། བརྟན་པ་དང་། ཐེར་ཟུག་དང་། ཞི་བ་སྟེ་དེ་ཉིད་དེ་བཞིན་གཤེགས་པ་ཡིན་ནོ། །གང་གི་ཚེ་དེ་བཞིན་གཤེགས་པ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་

སྟོན་ན་ནི་དེའི་ཚེ་ཡང་དག་པར་རྟག་པ་བསྒོམ་པ་བསྒོམ་པར་བྱའོ། །དགེ་སློང་གང་དག་དེ་ལྟར་སྒོམ་པ་དེ་དག་ནི་ངའི་ཉན་ཐོས་ཡིན་ནོ་ཞེས་ང་ཟེར་རོ། །རྒྱལ་པོའི་བློན་པོ་བཞིན་དུ་དགོངས་པའི་ཚིག་ལ་མཁས་པ་ཡིན་ནོ་ཞེས་ང་ཟེར་རོ། །དེ་ལྟར་རྒྱལ་པོའི་ལུགས་ལ་ཡང་
དགོངས་པའི་ཚིག་ཡོད་ན་ངའི་བསྟན་པ་ལ་དགོངས་པའི་ཚིག་ག་ལ་ཞིག་མེད་དེ། མཁས་པ་མང་པོ་དག་གིས་དེ་ལྟར་རིག་པར་བྱའོ། །ངའི་བསྟན་པ་ནི་འཇིག་རྟེན་ཐམས་ཅད་དང་མི་འཐུན་ནོ། །རིགས་ཀྱི་བུ་གཞན་ཡང་དཔེར་ན་ཤིང་པ་ལ་ཤ་དང་། མྱ་ངན་འཚང་དང་། དོང་
ཀའི་ཤིང་རྣམས་ནི་ཆར་པ་དཀོན་པའི་ཚེ་མེ་ཏོག་ཀྱང་ངན་པར་འགྱུར། འབྲས་བུ་ཡང་ངན་པར་འགྱུར་རོ། །ཆུ་དང་ཐང་ལས་སྐྱེས་པའི་མེ་ཏོག་གཞན་རྣམས་ཀྱང་ཁྲུན་ཐུང་བ་དང་། མདོག་ངན་པ་དང་། གཟི་བྱིན་ཆུང་བ་དང་། དྲི་ཆུང་བར་འགྱུར་ཏེ། དེ་ལྟར་ན་མ་འོངས་པའི་དུས་
ན་མེ་ཏོག་དང་སྨན་རྣམས་གཟི་བྱིན་དང་དྲི་ལ་སོགས་པ་ཉམས་པར་འགྱུར་རོ། །རིགས་ཀྱི་བུ་དེ་བཞིན་དུ་ང་འདས་པའི་འོག་ཏུ་མ་འོངས་པའི་དུས་ན་དུས་ངན་པ་འབྱུང་བའི་ཚེ་དམ་པའི་ཆོས་འཇིག་པ་ན་སེམས་ཅན་རྣམས་བསོད་ནམས་ཆུང་བའི་ཕྱིར་ཆར་པ་དཀོན་པའི་ཚེ་མེ་ཏོག་གཟི་བྱིན་མེད་པར་
འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་དགོངས་པའི་ཚིག་གི་ཚིགས་སུ་བཅད་པའི་དོན་འཇིག་རྟེན་དུ་བརྡ་སྤྲོད་པའི་ཚིགས་སུ་བཅད་པ་དང་། ཚིག་དང་། ཚིག་སིལ་བུའི་ཕྱེད་ཙམ་སྤྲོད་པར་འགྱུར་རོ། །དགེ་སློང་སྡིག་ཅན་རྣམས་ཀྱིས་ཀྱང་རང་ལ་
མཐུ་མེད་པས་དགོངས་པའི་ཚིག་གསང་བའི་ཚིགས་སུ་བཅད་པ་བདུད་རྩིའི་ཚིག་རྣམས་བོར་ནས་གཞན་འདོན་པར་བྱེད་དེ། རྐུན་པོ་དག་གིས་ཕུབ་མ་ཁུར་དུ་ཁྱེར་ལ་ཆེ་བ་ལ་འོས་པའི་རིན་པོ་ཆེ་འདོར་བ་བཞིན་དུ་དགེ་སློང་གཡེལ་བ་རྣམས་ཀྱང་མདོ་འདིའི་ཚིགས་སུ་བཅད་པ་དགོངས་པའི་
ཚིག་རྣམས་འདོར་བར་བྱེད་དོ། །ཀྱེ་མ་མ་འོངས་པའི་དུས་མཆོག་ཏུ་འཇིགས་ཤིང་མཆོག་ཏུ་སྐྲག་ཏུ་རུང་བ་འབྱུང་བར་འགྱུར་རོ། །ཀྱེ་མ་མ་འོངས་པའི་སེམས་ཅན་རྣམས་ཤིན་ཏུ་དཔལ་ཡོན་ཆུང་བ་དག་འབྱུང་བར་འགྱུར་ཏེ། དེ་དག་ནི་མདོ་སྡེ་ཆེན་པོ་འདི་ཉན་པར་མི་འགྱུར་རོ། །

གང་དག་ཉན་པར་བྱེད་པ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ཏེ། དེ་ཁོ་ན་ཉིད་ཀྱི་དོན་འཛིན་པར་འགྱུར་གྱི་ཡི་གེ་ལྷུར་མི་འཛིན་ཏོ། །མདོ་སྡེའི་དོན་ཇི་སྙེད་པ་དེ་ཁོ་ན་སྙེད་གཞན་དག་ལ་སྟོན་པར་བྱེད་ཀྱིས་དོན་མེད་པ་སྟོན་པར་མི་བྱེད་དོ། །རིགས་ཀྱི་བུ་དཔེར་
ན་ཕྱུགས་རྫི་མོ་ཞིག་གིས་ཁེ་ཕྱིན་པར་བྱ་བའི་ཕྱིར་འོ་མའི་གཞི་ལས་ཆུ་བུ་རམ་དང་སྦྱར་བས་བསླད་ནས་ཕྱུགས་ཀྱི་གནས་ནས་འོ་མའི་བུམ་པ་ཁྱེར་ཏེ་སོང་ནས་དེས་ཕྱུགས་རྫི་མོ་ཟླ་ལ་བཙོངས་ལ། དེ་ནས་ཕྱུགས་རྫི་མོ་ཟླ་དེས་ཀྱང་འོ་མ་དེ་ཆུ་གཉིས་འགྱུར་གྱིས་བསླད་ནས་བར་ལོང་མ་ལ་
བཙོངས། བར་ལོང་མ་དེས་ཀྱང་འོ་མ་དེ་ཆུ་གཉིས་འགྱུར་གྱིས་བསླད་ནས་བར་ལོང་མའི་ཟླ་ལ་བཙོངས། བར་ལོང་མའི་ཟླ་དེས་ཀྱང་ཆུ་གཉིས་འགྱུར་གྱིས་བསླད་ནས་གྲོང་ཁྱེར་རམ། ཚོང་འདུས་སུ་ཉོ་བའི་མི་ཞིག་གིས་བུའི་གཙུག་ཕུད་འཇོག་པའི་དུས་སྟོན་གྱི་འོ་ཐུག་བྱ་བའི་ཕྱིར་
འདི་ནི་དཀོན་པ་ཡིན་ནོ་སྙམ་སྟེ་འོ་མ་དེ་ཉོས་ནས་འོ་མ་ཆུས་བསླད་པ་དེས་འོ་ཐུག་བཙོས་ནས་ཟས་ཀྱི་རོ་མཆོག་དེ་རོ་ཆུང་བར་གྱུར་ཏོ། །འོན་ཀྱང་རོ་བྲོ་བ་ཐམས་ཅད་ཀྱི་ནང་ན་བའི་བཅུད་རྣམས་གཙོ་བོ་ཡིན་ལ། དེའི་ནང་ན་ཡང་འོ་མ་དམ་པ་ཡིན་པས་ན་ཟས་ཀྱི་མཆོག་དེ་རོ་ཚ་བས་ཆེས་
སྟོང་འགྱུར་གྱིས་ཞིམ་མོ། །རིགས་ཀྱི་བུ་དེ་བཞིན་དུ་ང་འདས་པའི་འོག་ཏུ་ལོ་བརྒྱ་ཕྲག་དུ་མ་ལོན་པ་ན་གང་གི་ཚེ་དམ་པའི་ཆོས་གནས་པའི་ལྷག་མ་ལོ་བརྒྱད་ཅུ་ལུས་པ་དེའི་ཚེ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་འཛམ་བུའི་གླིང་དུ་སྤྱོད་པར་འགྱུར་ཏེ། དེའི་
ཚེ་དེ་ལྟར་མདོ་སྡེ་སྤྱོད་པ་དེ་ལས་དགེ་སློང་སྡིག་ཅན་མཆོག་ཏུ་གཡེལ་བ་དམ་པའི་ཆོས་ཀྱི་མེ་ཏོག་གི་དྲི་མེད་པར་བྱེད་པ་རྣམས་ཀྱིས་གླེགས་བམ་འཆོས་པར་བྱེད་དེ། མདོ་སྡེ་འདི་ཀློག་པ་ན་དོན་དང་ཚིག་རྟོགས་པར་དཀའ་བ་དགོངས་པའི་ཚིག་གསང་བ་རྣམས་ལས་ན་དང་། མ་དང་།
ཀུ་ལ་སོགས་པ་དགག་པའི་ཡི་གེ་རྣམས་བོར་ཞིང་གཞན་འདོན་པར་བྱེད་དོ། །དགེ་སློང་རང་གི་རྙེད་པ་སྒྲུབ་པར་རུང་བ་མ་ཡིན་པའི་རྫས་འཆང་བ་དེ་དག་ནི་བདུད་ཀྱི་ཕྱོགས་ཡིན་ཏེ། ཕྱུགས་རྫི་མོས་བུ་རམ་གྱི་ཆུས་འོ་མ་བསླད་པ་བཞིན་དུ་མདོ་སྡེ་འདི་མ་རུང་བར་བྱེད་དོ། །གཞན་ཡང་

ཀློག་མི་ཤེས་པ་དང་། ཆོས་སྨྲ་བ་ངན་པ་དང་། ཡི་གེ་ངན་པའི་ཉེས་པ་དང་། ཆོས་ལ་མི་གནས་པ་དང་། བླ་མ་ལ་སྲི་ཞུ་མི་བྱེད་པ་དང་། མི་ངན་པས་ཁྱད་དུ་བསད་པ་དང་། ཚས་ཉེས་པ་དང་། ཡུན་རིངས་པ་དང་། ལག་བརྒྱུད་པའི་ཉེས་པས་
ཚིག་དོན་ཕྱེད་ཕྱེད་ཙམ་དུ་གྱུར་པ་སྤྱོད་ཅིང་མདོ་སྡེའི་ལྷག་མ་ཆུང་ཤས་ཙམ་ཞིག་ལྡུས་པར་ཟད་དོ། །བར་ལོང་མ་ལས་ཉིང་དོར་ཉོས་པའི་འོ་མས་ཟས་ཀྱི་མཆོག་བཙོས་པ་རོ་མེད་པར་གྱུར་ཀྱང་ཟས་ཀྱི་མཆོག་དེ་ནི་རོ་བྲོ་བ་ཐམས་ཅད་ཀྱི་དམ་པ་ཡིན་པ་དེ་བཞིན་དུ་མདོ་སྡེ་ཆེན་པོ་འདི་ཡང་དེ་
ལྟར་ལྷག་མ་ཅུང་ཟད་ཅིག་ལུས་པར་ཟད་མོད་ཀྱི། ཉན་ཐོས་ཀྱི་ཐེག་པའི་མདོ་སྡེ་ཐམས་ཅད་པས་སྟོང་འགྱུར་གྱིས་གཙོ་བོར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། མདོ་སྡེ་དང་ཏིང་ངེ་འཛིན་ཐམས་ཅད་ནི་ཡོངས་སུ་མྱ་ངན་ལས་འདས་པའི་མཐུ་ཡིན་པས་ན་དེའི་ཕྱིར་ཡོངས་སུ་མྱ་ངན་ལས་
འདས་པ་ཆེན་པོ་མཆོག་ཅེས་བྱ་སྟེ་མིང་ཆེ་བ་ཡིན་ནོ། །རིགས་ཀྱི་བུ་གཞན་ཡང་རིགས་ཀྱི་བུའམ། རིགས་ཀྱི་བུ་མོས་སྐྱེས་པའི་རང་བཞིན་དུ་འགྱུར་བར་བསྒོམ་པར་བྱའོ། །ཅིའི་ཕྱིར་ཞེ་ན། བུད་མེད་ཀྱི་རང་བཞིན་ནི་ཆོས་མ་ཡིན་པ་ཐམས་ཅད་ཀྱི་རྒྱུའི་སྒོ་ནས་འབྱུང་ཁུང་ཡིན་ཏེ།
དཔེར་བྱ་ན་སྦྲང་བུའི་གཅིན་གྱིས་ནི་ནམས་ཀྱང་ས་ཆེན་པོ་རླན་པར་ཡང་མི་འགྱུར། ངོམས་པར་ཡང་མི་འགྱུར་བ་དེ་བཞིན་དུ་བུད་མེད་རྣམས་ཀྱང་ནམས་ཀྱང་འདོད་པས་ངོམས་པར་མི་འགྱུར་ཏེ། བུད་མེད་ནི་གལ་ཏེ་ས་ཆེན་པོ་རྒྱ་ཤུག་གི་རུས་པ་ཙམ་མམ། ཡུངས་འབྲུ་ཙམ་གྱི་རི་ལུར་
བྱས་པ་དེ་ལ་རི་ལུ་ཇི་སྙེད་ཡོད་པ་དེ་སྙེད་ཀྱི་སྐྱེས་པ་དང་ལྷན་ཅིག་ཏུ་འདོད་པས་ཞེན་པར་བསྟེན་དུ་ཟིན་ཀྱང་སྦྲང་བུའི་གཅིན་གྱིས་ས་རླན་ཞིང་ངོམས་པར་མི་འགྱུར་བ་བཞིན་དུ་བུད་མེད་རྣམས་འདོད་པས་ངོམས་པར་མི་འགྱུར་རོ། །རིགས་ཀྱི་བུ་གཞན་ཡང་བུད་མེད་ཇི་ལྟར་མི་བཟང་བ་ཉོན་ཅིག །བུད་
མེད་ནི་གལ་ཏེ་སྐྱེས་པ་གང་གཱའི་ཀླུང་གི་བྱེ་མ་སྙེད་དམ། གཏམས་སྙེད་དམ། དཀྲིགས་སྙེད་དང་ལྷན་ཅིག་ཏུ་འདོད་པ་ཞེན་པར་བསྟེན་དུ་ཟིན་ཀྱང་སྦྲང་བུའི་གཅིན་གྱིས་ས་རླན་ཞིང་ངོམས་པར་མི་འགྱུར་བ་བཞིན་དུ་བུད་མེད་རྣམས་ཀྱང་འདོད་པས་ངོམས་པར་མི་འགྱུར་རོ། །རིགས་ཀྱི་བུ་གཞན་

ཡང་དཔེར་ན་རྒྱ་མཚོ་ཆེན་པོ་ནི་སྤྲིན་ཆེན་པོའི་ཆར་འབབ་པའི་ཆུ་དང་། ཆུ་ཀླུང་རྣམས་ཀྱི་ཆུ་དེར་འབབ་ཀྱང་ངོམས་པ་མེད་པ་བཞིན་དུ་བུད་མེད་རྣམས་ཀྱང་འདོད་པས་ངོམས་པ་མེད་དོ། །རིགས་ཀྱི་བུ་གཞན་ཡང་དཔེར་ན་མེ་ཏོག་གི་ཤིང་མྱ་ངན་འཚང་དང་དོང་ཀའི་ཤིང་དང་། པ་ཊ་
ལ་སོགས་པ་མེ་ཏོག་རྒྱས་པ་ན་བུང་བ་རྣམས་མེ་ཏོག་གི་ཁུ་བས་ངོམས་པར་མི་འགྱུར་ཏེ། བུང་བ་རྣམས་ཀྱིས་མཁས་པ་དང་། ཆ་ཕྲ་བ་དང་། ཟབ་མོར་མེ་ཏོག་གི་ཁུ་བ་འཐུང་བར་བྱེད་པ་དེ་བཞིན་དུ་བུད་མེད་རྣམས་ཀྱིས་ཀྱང་སྐྱེས་པ་རྣམས་ཀྱི་ནོར་དང་། འདོད་པ་དང་། ཁུ་བ་
རྣམས་འཐུང་བར་བྱེད་དེ། བུང་བ་བཞིན་དུ་ངོམས་པར་མི་འགྱུར་རོ། །རིགས་ཀྱི་བུ་དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་ནས་བུད་མེད་ཀྱི་རང་བཞིན་ལ་མ་ཆགས་པའི་སེམས་བསྐྱེད་པར་བྱ་སྟེ། སྐྱེས་པའི་རང་བཞིན་དུ་འགྱུར་བར་སེམས་བསྐྱེད་པར་བྱའོ། །ཅིའི་
ཕྱིར་ཞེ་ན། མདོ་འདི་ནི་སྐྱེས་པའི་རང་བཞིན་དེ་བཞིན་གཤེགས་པའི་སྙིང་པོ་ཡང་དག་པར་སྟོན་པའི་ཕྱིར་རོ། །སྐྱེས་པའི་རང་བཞིན་ནི་མི་ཞེས་བྱའོ། །དེ་བཞིན་གཤེགས་པའི་རང་བཞིན་ནི་སྐྱེས་པའོ། །འཇིག་རྟེན་ན་སྐྱེས་པ་ཡོད་པ་གང་ཡིན་པ་དེ་དག་ཀྱང་བདག་ཉིད་ལ་དེ་བཞིན་
གཤེགས་པའི་སྙིང་པོ་ཡོད་པར་མི་ཤེས་པའི་ཕྱིར་སྐྱེས་པའི་རང་བཞིན་མ་ཡིན་ནོ། །དེ་བཞིན་གཤེགས་པའི་སྙིང་པོ་མི་ཤེས་པ་གང་ཡིན་པ་དེ་དག་ནི་བུད་མེད་ཡིན་ནོ་ཞེས་ང་ཟེར་རོ། །དེ་བཞིན་གཤེགས་པའི་སྙིང་པོ་བདག་ལ་ཡོད་དོ་སྙམ་དུ་ཡང་དག་པར་ཤེས་པ་གང་ཡིན་པ་དེ་དག་ནི་
སྐྱེས་པའི་མཆོག་ཏུ་གཏོགས་ཏེ། བུད་མེད་ཡིན་དུ་ཟིན་ཀྱང་སྐྱེས་པའི་མཆོག་ཏུ་གཏོགས་སོ། །དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་དེ་བཞིན་གཤེགས་པའི་སྙིང་པོ་སྟོན་པའི་ཕྱིར་དཔག་ཏུ་མེད་པ་ཡིན་ནོ། །རིགས་ཀྱི་བུའམ་རིགས་ཀྱི་བུ་མོ་མདོ་
སྡེའི་གནས་འདི་མྱུར་དུ་རྟོགས་པར་འདོད་པས་ནི་དེ་བཞིན་གཤེགས་པའི་སྙིང་པོ་ལ་བརྩོན་པར་བྱའོ། །གསོལ་པ། བཅོམ་ལྡན་འདས་དེ་ནི་ལགས་སོ། །བཅོམ་ལྡན་འདས་དེ་ནི་དེ་ལགས་ཏེ། བདག་ཀྱང་དེང་དུ་དེ་བཞིན་གཤེགས་པའི་སྙིང་པོ་བསྒོམ་པའི་སླད་དུ་སྐྱེས་པའི་རང་བཞིན་

ལ་བཞུགས་ལགས་སོ། །མངོན་པར་ཕྱེ་ལགས་སོ། །བརྡ་མཇལ་བར་བགྱིས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །འཇིག་རྟེན་དང་འཐུན་པར་བྱེད་པས་ནི་དེ་ལྟར་བལྟ་བར་བྱའོ། །གསོལ་པ། བཅོམ་ལྡན་འདས་འཇིག་རྟེན་
དང་འཐུན་པ་མ་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དེ་ལྟར་བུང་བ་ཤིང་གི་མེ་ཏོག་ཟ་བ་བཞིན་དུ་ཟབ་མོའི་ཆོས་ཀྱི་ཟས་བཟའ་བར་བྱའོ། །རིགས་ཀྱི་བུ་གཞན་ཡང་དཔེར་ན་སྦྲང་བུའི་གཅིན་ཉུང་ཤས་ཀྱིས་ས་ཆེན་པོ་ངོམས་པར་མི་འགྱུར་བ་དེ་
བཞིན་དུ་སྦྲང་བུའི་གཅིན་དང་འདྲ་བར་མ་འོངས་པའི་དུས་ན་མདོ་སྡེ་ཆེན་པོ་འདི་འཇིག་རྟེན་དུ་ཆུང་ཤས་ཙམ་ཞིག་སྤྱོད་པར་འགྱུར་ཏེ། དམ་པའི་ཆོས་འཇིག་པའི་ཐ་མར་སྦྲང་བུའི་གཅིན་ས་ཆེན་པོ་ལ་སོང་བ་བཞིན་དུ་ཟད་པར་འགྱུར་རོ། །འདི་ནི་དམ་པའི་ཆོས་ནུབ་པའི་ལྟས་བདུན་པ་སྟེ།
ལྟས་གཞན་ཡང་ཡོད་པར་མཁས་པས་ཤེས་པར་བྱའོ། །རིགས་ཀྱི་བུ་གཞན་ཡང་དཔེར་ན་དབྱར་ཟད་པའི་མཇུག་དགུན་གྱི་ཟླ་བ་དང་པོ་ནི་སྟོན་ཞེས་བྱ་སྟེ། སྟོན་གྱི་དུས་ལ་བབ་པ་ན་མ་སྨིན་པ་སྨིན་པར་བྱ་བའི་ཕྱིར་སྤྲིན་རྣམས་ཀྱིས་ཆར་ཕབ་ནས་མྱུར་བ་མྱུར་བར་འགྱེས་པ་དེ་བཞིན་དུ། མདོ་
ཆེན་པོ་འདི་ཡང་སྟོན་གྱི་སྤྲིན་གྱིས་ཆར་བབ་ནས་མྱུར་དུ་འགྱེས་པ་དེ་བཞིན་དུ་ལྷོ་ཕྱོགས་སུ་སོང་ནས་ཡོངས་སུ་མྱ་ངན་ལས་འདས་པ་ཆེན་པོའི་དགོངས་པའི་ཚིག་ཐམས་ཅད་ཀྱི་ཆོས་ཀྱི་ཆར་འབེབས་སོ། །དེ་ནས་ལྷོ་ཕྱོགས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དམ་པའི་ཆོས་
འཇིག་པར་ཤེས་ནས་དགུན་གྱི་དུས་དང་ཉེ་བར་གྱུར་པའི་སྤྲིན་བཞིན་དུ་ཁ་ཆེ་ཡུལ་དུ་སོང་ནས་ས་ལ་ནུབ་པར་གྱུར་ཏེ། ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་བདུད་རྩིའི་མཆོག་གི་དམ་པའི་ཆོས་ཐམས་ཅད་ནུབ་པར་འགྱུར་རོ། །ད་ལྟར་ནི་དེ་བཞིན་གཤེགས་པས་མཁྱེན་པའི་མདོ་སྡེ་འདི་
ལག་ཏུ་འོངས་མོད་ཀྱི་དམ་པའི་ཆོས་ནུབ་པར་འགྱུར་རོ་སྙམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་མཆོག་རྣམས་ཀྱིས་ཤེས་པར་བྱའོ། །གསོལ་པ། དེ་བཞིན་གཤེགས་པ་དང་། རང་སངས་རྒྱས་དང་། ཉན་ཐོས་དང་། བྱང་ཆུབ་སེམས་དཔའི་ཁམས་ཐ་དད་པ་མ་མཆིས་པ་

སེམས་ཅན་ཐམས་ཅད་ཀྱིས་བདེ་བླག་ཏུ་རྟོགས་པར་བགྱི་བའི་སླད་དུ་བཅོམ་ལྡན་འདས་ཀྱིས་གསལ་ཞིང་ཟུར་ཕྱིན་པར་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་ཁྱིམ་བདག་གམ་ཁྱིམ་བདག་གི་བུ་ཞིག་ལ་བ་ལང་གི་ལྷས་མང་པོ་ཡོད་
དེ། བ་ལང་སྤུ་ག་ཐ་དད་པ་དག་བདོག་ལ་དེའི་ནང་ན་བ་སྔོན་མོ་དག་ཀྱང་ཡོད་དེ། བ་དེ་དག་བ་རྫི་གཅིག་འཚོར་བཅུག་གོ། །དེ་ནས་ཁྱིམ་བདག་དེས་ལན་ཅིག་གཅིག་ན་རང་གི་ལྷ་མཆོད་པའི་ཕྱིར་བ་ལང་གི་ལྷས་རྣམས་གཅིག་ཏུ་བསྡུས་ནས་འོ་མ་འཇོར་བཅུག་གོ། །དེ་ནས་
འོ་མ་དེ་དག་དུང་གི་མདོག་བཞིན་དུ་དཀར་པོར་འདུག་པ་མཐོང་ནས་ངོ་མཚར་དུ་བཟུང་སྟེ་བསམས་པ། འདི་ན་བ་འདི་དག་སྤུ་ཁ་ཐ་དད་པར་འདུག་ན། བ་སྔོན་མོ་འདི་རྣམས་ཀྱི་འོ་མ་ཡང་སྔོན་པོར་མི་འདུག་ལ། བ་དཀར་མོ་རྣམས་ཀྱི་ཡང་དེ་དང་འདྲ་སྟེ། དུང་གི་མདོག་ལྟར་འདུག་
གོ་སྙམ་མོ། །དེ་ནས་ཕྱིས་དེས་རྟོགས་ཏེ་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པའི་རྒྱུ་ལས་གྱུར་པ་ཡིན་པར་བལྟ་བར་བྱའོ་སྙམ་མོ། །རིགས་ཀྱི་བུ་དེ་བཞིན་དུ་ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཡང་འོ་མ་དང་འདྲའོ། །
ཅིའི་ཕྱིར་ཞེ་ན། དེ་དག་ནི་ཟག་པ་ཟད་པའི་ཕྱིར་རོ། །སེམས་ཅན་ཐམས་ཅད་ཀྱིས་ནི་ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཐ་དད་པ་དང་། དབྱིབས་ཐ་དད་པར་འཛིན་མོད་ཀྱི། དེ་དག་གིས་ཀྱང་ཁྱིམ་བདག་བཞིན་དུ་མཐར་གྱིས་ཤེས་
པར་འགྱུར་རོ། །རིགས་ཀྱི་བུ་དཔེར་ན་གསེར་ཁུང་ངམ། ཟངས་ཀྱི་ཁུང་ནས་རྡོ་དང་གསེག་མ་མེད་པའི་གསེར་གྱི་རང་བཞིན་རིན་ཐང་མེད་པར་འབྱུང་བ་དེ་བཞིན་དུ། ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་ཐམས་ཅད་ཀྱང་གསེར་དང་འདྲ་བར་རིན་ཐང་དང་རང་
བཞིན་གཅིག་གོ། །ཅིའི་ཕྱིར་ཞེ་ན། རྡོ་དང་གསེག་མ་ལྟ་བུའི་ཉོན་མོངས་པ་དང་བྲལ་བའི་ཕྱིར་ཏེ། དེ་བས་ན་སངས་རྒྱས་ཀྱི་ཡེ་ཤེས་འདི་ལ་ནི་དབྱེར་མེད་དོ། །སེམས་ཅན་ཐམས་ཅད་ལ་སངས་རྒྱས་ཀྱི་ཁམས་ཡོད་པ་ཡང་དེ་དང་འདྲ་སྟེ། ཁྱིམ་བདག་གིས་འོ་མ་ཇི་ལྟ་བ་བཞིན་དུ་དེ་

དག་གིས་ཀྱང་དེ་བཞིན་གཤེགས་པའི་སྙིང་པོའི་མདོ་སྡེ་ཐོས་ནས་ཉོན་མོངས་པའི་རྣམ་པ་ཟད་པར་བྱས་ཏེ་སངས་རྒྱས་ཀྱི་ཁམས་རྟོགས་པར་འགྱུར་རོ། །གསོལ་པ། བཅོམ་ལྡན་འདས་ཅི་ལགས། སེམས་ཅན་ཐམས་ཅད་དང་དེ་བཞིན་གཤེགས་པ་རྣམས་ཐ་དད་པ་
མ་མཆིས་ལགས་སམ། གལ་ཏེ་དེ་བཞིན་གཤེགས་པ་བསྟན་པ་དེ་ལྟར་སྟོན་པར་གྱུར་ན་འདི་ལ་སྐྱོན་ཆེན་པོ་མཆིས་ཏེ། ད་དེའི་གཏན་ཚིགས་བཀའ་སྩལ་དུ་འཚལ་ལགས་སོ། །སེམས་ཅན་ཐམས་ཅད་དང་རང་སངས་རྒྱས་རྣམས་ལྟ་ཞོག་ལགས་ཀྱི། དེ་ལྟར་ན་ཤཱ་རིའི་བུ་དང་
མཽད་གལ་གྱི་བུ་གཉིས་ཅིའི་སླད་དུ་ཉན་ཐོས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བགྱིད་ལགས། རང་སངས་རྒྱས་རྣམས་ཀྱང་ཅིའི་སླད་དུ་རང་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བགྱིད་ལགས། བྱང་
ཆུབ་སེམས་དཔའ་རྣམས་ཀྱང་ཅིའི་སླད་དུ་བྱང་ཆུབ་སེམས་དཔའི་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་ལས་འདའ་བར་བགྱིད་ལགས། བཀའ་སྩལ་པ། སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདས་པ་ཆེན་པོ་ནི་ཉན་ཐོས་དང་། རང་སངས་རྒྱས་དང་། བྱང་
ཆུབ་སེམས་དཔའ་རྣམས་ཀྱི་མ་ཡིན་ཏེ། ཡོངས་སུ་མྱ་ངན་ལས་འདས་པ་ཆེན་པོ་འདི་ལ་ནི་སངས་རྒྱས་རྣམས་མ་གཏོགས་པར་གཞན་དག་གི་གནས་མེད་དོ། །གསོལ་པ། ཇི་ལྟ་བུ་ལགས། བཀའ་སྩལ་པ། དེ་བཞིན་གཤེགས་པ་ནི་བསྐལ་པ་བྱེ་བ་ཕྲག་གྲངས་མེད་པ་མང་པོ་
ཞིག་ན་དེ་བཞིན་གཤེགས་པ་འབྱུང་བ་སྟོན་པར་མཛད་ན། དེ་བཞིན་གཤེགས་པ་དང་། ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཁྱད་པར་ཅི་ཡོད་ཅེ་ན། རིགས་ཀྱི་བུ་དེ་བཞིན་གཤེགས་པའི་མྱ་ངན་ལས་འདས་པ་གསང་བ་ལ་དགྲ་བཅོམ་པ་རྣམས་ཀྱི་
གནས་མེད་དོ་ཞེས་ངས་བསྟན་ཏེ་དེ་ནི་གནས་མེད་པ་ཡིན་ནོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་ཚུལ་གྱིས་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་མེད་དོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། ཐ་དད་

པ་ཁོ་ནར་གདའ་ལགས་སོ། །བཀའ་སྩལ་པ། ཇི་ལྟར་སྣང་གསོལ་པ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱང་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་འདས་པར་འགྱུར་ཏེ། ཆུ་ཀླུང་རྣམས་རྒྱ་མཚོར་འབབ་
པ་བཞིན་དུ་དེ་དག་གི་གནས་ཀྱང་དེ་ལགས་སོ། །དེ་བས་ན་དེ་དག་ཀྱང་རྟག་པ་ཞེས་བགྱིའོ། །བཀའ་སྩལ་པ། དེ་དག་ནི་ངའི་མཆོག་ཏུ་རྟག་པ་ཡིན་ནོ། །གསོལ་པ། བཅོམ་ལྡན་འདས་ཁམས་ཐ་དད་པ་མ་མཆིས་པ་དང་ཐ་དད་པ་ཇི་ལྟ་བུ་ལགས། བཀའ་སྩལ་
པ། ཐ་དད་དོ། །གསོལ་པ། ཇི་ལྟ་བུ་ལགས། བཀའ་སྩལ་པ། དཔེར་ན་བའི་འོ་མ་ནི་མཆོག་ཏུ་མངར་བ་ཡིན་ཏེ་ཁམས་དེ་དང་འདྲའོ། །ཉན་ཐོས་རྣམས་དང་། རང་སངས་རྒྱས་རྣམས་ཀྱི་ཁམས་ནི་ཞོ་དང་འདྲའོ། །བྱང་ཆུབ་སེམས་དཔའ་རྣམས་ཀྱི་ཁམས་ནི་
མར་དང་འདྲའོ། །སངས་རྒྱས་རྣམས་ཀྱི་ཁམས་ནི་མར་གྱི་སྙིང་ཁུ་དང་འདྲ་སྟེ། དེ་ལྟར་ཡོངས་སུ་མྱ་ངན་ལས་འདས་པ་ཆེན་པོ་ལས་གདམས་ངག་སྟོན་པའི་དེ་བཞིན་གཤེགས་པས་རྣམ་པ་བཞིར་བསྟན་ཏོ། །གསོལ་པ། སེམས་ཅན་ཐམས་ཅད་ཀྱི་ཁམས་ཇི་ལྟ་བུ་ལགས།
བཀའ་སྩལ་པ། བ་བེའུ་འབྲངས་མ་ཐག་པའི་འོ་མ་ཁྲག་དང་འདྲེས་པ་བཞིན་དུ་ཉོན་མོངས་པའི་ཁྲག་དང་འདྲེས་པའི་ཁམས་དེས་དེ་བཞིན་གཤེགས་པའི་ཁམས་མར་གྱི་སྙིང་ཁུ་དང་འདྲ་བ་ཁྱབ་པར་འདུག་གོ། །གསོལ་པ། བཅོམ་ལྡན་འདས་ཀྱིས་ཀུ་ཤིའི་གྲོང་ཁྱེར་འདི་ན་གནས་
པའི་གདོལ་པ་འཇིག་རྟེན་གྱི་ཁམས་འདིར་སངས་རྒྱས་སྟོང་དང་ལྷན་ཅིག་ཏུ་དེ་དག་གི་ནང་དུ་དེ་བཞིན་གཤེགས་པ་གཅིག་ཏུ་གྱུར་ཏེ་དེ་བཞིན་གཤེགས་པ་རབ་ཏུ་དགའ་བ་ཞེས་བྱ་བར་འགྱུར་ཏེ། སེམས་བསྐྱེད་པ་གཅིག་ཁོ་ནས་དུས་འདི་སྲིད་ཅིག་ན་མྱུར་དུ་སངས་རྒྱས་སུ་འགྱུར་རོ་ཞེས་
སངས་རྒྱས་སུ་ལུང་བསྟན་པས་ལུང་བསྟན་ལགས་ན། ཅིའི་སླད་དུ་ཤཱ་རིའི་བུ་དང་། མཽད་གལ་གྱི་བུ་གཉིས་ཆེས་མྱུར་དུ་སངས་རྒྱས་སུ་འགྱུར་བས་སངས་རྒྱས་སུ་ལུང་བསྟན་པས་ལུང་མ་བསྟན་ལགས། བཀའ་སྩལ་པ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་

དཔའ་ཁ་ཅིག་དམ་པའི་ཆོས་དབྱུང་བའི་ཕྱིར་ཡུན་རིང་པོར་སྨོན་ལམ་འདེབས་པ་ཡང་ཡོད་ཁ་ཅིག་ནི་མྱུར་བར་སྨོན་ལམ་འདེབས་པ་ཡང་ཡོད་དེ། ང་ནི་དེའི་སྨོན་ལམ་གྱི་དབང་གིས་ན་ཆེས་མྱུར་བར་སངས་རྒྱས་ཀྱི་གནས་མཆོག་ཏུ་ལུང་སྟོན་པར་བྱེད་དོ། །རིགས་ཀྱི་བུ་གཞན་ཡང་
མཉེན་པ་ཆེན་པོ་ལ་ལ་ཞིག་གདོལ་པའི་གྲོང་ཁྱེར་དུ་སོང་སྟེ་རིན་པོ་ཆེ་རིན་ཐང་མེད་པ་འཚོང་བ་ལས་གདོལ་པ་བྱེ་བྲག་མི་ཕྱེད་པ་དེ་དག་གིས་རིན་པོ་ཆེ་དེ་མཐོང་ན་འཕྱས་འདོགས་ཤིང་འཐིང་སླད་བྱེད་དེ། མཉེན་པས་རིན་ཆེ་བ་ཡིན་ནོ་ཞེས་བྱས་ཀྱང་དེ་དག་གི་བརྡ་མི་ཕྲད་ནས་འདི་ནི་ཤེལ་ཡིན་ནོ་ཞེས་དེ་
སྐད་ཟེར་རོ། །རིགས་ཀྱི་བུ་དེ་བཞིན་དུ་ངས་ཀྱང་ཉན་ཐོས་རྣམས་གལ་ཏེ་སངས་རྒྱས་ཀྱི་གནས་སུ་མྱུར་དུ་སངས་རྒྱས་སུ་ལུང་བསྟན་པས་ལུང་བསྟན་དུ་ཟིན་ཀྱང་ནོར་བུ་དཀོན་པ་འཚོང་བའི་མཉེན་པ་བཞིན་དུ་འགྱུར་རོ། །གདོལ་པ་རྣམས་ལྟ་བུ་ནི་མ་འོངས་པའི་དུས་ན་དགེ་སྦྱོང་བླུན་པོ། གཡེལ་བ།
དགེ་བའི་རྩ་བ་སྤངས་པ། འཚོ་བས་ཕོངས་པ། བཀྲེས་ཤིང་སྐོམ་པས་གཟིར་བ། མུ་གེས་མནར་བ། རང་གི་ལུས་ཙམ་གསོ་བར་བྱེད་པ། འཚོ་བ་དོན་དུ་གཉེར་བ། མི་བརྟན་པ་རྣམས་འབྱུང་བར་འགྱུར་བ་དེ་དག་ཡིན་ཏེ། དེ་དག་གིས་ངའི་ཉན་ཐོས་ལུང་བསྟན་པ་ཐོས་ན་འཕྱས་འདོགས་ཤིང་གཤེ་
བར་འགྱུར་ལ་བརྡ་མི་ཕྲད་ནས་ཚུལ་ཁྲིམས་འཆལ་པ་ཡིན་ནོ་ཞེས་བླ་བར་བྱེད་དོ། །ངའི་ཉན་ཐོས་དེ་དག་ནི་དགེ་སྦྱོང་མ་ཡིན་ཏེ་གདོལ་པ་རྣམས་དང་མཉེན་པ་ཇི་ལྟ་བ་བཞིན་ནོ། །རིགས་ཀྱི་བུ་དེ་བས་ན་ང་ནི་སེམས་ཅན་མྱུར་བའི་སྨོན་ལམ་ཅན་རྣམས་ནི་སངས་རྒྱས་སུ་ལུང་སྟོན་པར་བྱེད་དོ། །དམ་པའི་
ཆོས་དབྱུང་བའི་སྦྱོར་བ་ཅན་དེ་དག་ནི་ཇི་ལྟར་འདོད་པ་བཞིན་དུ་ཡུན་རིང་པོ་ཞིག་གིས་སངས་རྒྱས་ཀྱི་གནས་སུ་ལུང་སྟོན་པར་བྱེད་དོ། །གསོལ་པ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཡོག་འཁོར་མི་ཕྱེད་པ་དང་ལྡན་པར་འགྱུར་ལགས། བཀའ་སྩལ་པ། བྱང་ཆུབ་
སེམས་དཔའ་མི་མཆོག་རྣམས་ནི་དམ་པའི་ཆོས་དབྱུང་བར་བྱའོ་སྙམ་དུ་དེའི་སྦྱོར་བ་བརྟན་པོར་བྱས་ན་གཡོག་འཁོར་མི་ཕྱེད་པ་དང་ལྡན་པར་འགྱུར་རོ། །གསོལ་པ། སེམས་ཅན་མ་རུངས་པ་འཇིགས་སུ་རུང་བ། ལྕེ་དང་། རྐན་དང་། ལྐོག་མ་ཚིག་པ་རྣམས་ཅི་ལས་འགྱུར་ལགས།

བཀའ་སྩལ་པ། གཞི་གསུམ་མི་ཤེས་པ་གང་ཡིན་པ་དེ་དག་ནི་སེམས་ཅན་མ་རུངས་པ་འཇིགས་སུ་རུང་བ། ལྕེ་དང་། རྐན་དང་། ལྐོག་མ་ཚིག་པར་འགྱུར་རོ། །དཔེར་ན་མི་དང་དུད་འགྲོའི་ལྕེ་ཚིག་པ་རྣམས་ཀྱིས་རོ་དྲུག་སྟེ། མངར་བ་དང་། སྐྱུར་བ་དང་། ལན་ཚྭའི་རོ་དང་། ཚ་བ་
དང་། ཁ་བ་དང་། བསྐ་བ་རྣམས་ཟ་བ་ན་རོའི་བྱེ་བྲག་མི་ཕྱེད་པ་དེ་བཞིན་དུ་སེམས་ཅན་མི་ཤེས་པ། ལྕེ་དང་། རྐན་དང་། ལྐོག་མ་ཚིག་པ་མ་རུངས་པ་འཇིགས་སུ་རུང་བ། གཞི་གསུམ་རྟག་པར་མི་ཤེས་པ་གང་ཡིན་པ་དེ་དག་ནི། ལྕེ་དང་། རྐན་དང་། ལྐོག་མ་ཚིག་པ་ཞེས་བྱའོ། །
རིགས་ཀྱི་བུ་གཞན་ཡང་དེ་བཞིན་གཤེགས་པ་རྟག་པར་མི་ཤེས་པ་གང་ཡིན་པ་དེ་དག་ནི་དམུས་ལོང་གི་མཆོག་ཡིན་ནོ་ཞེས་ང་ཟེར་རོ། །དེ་བཞིན་གཤེགས་པ་རྟག་པར་ཤེས་པ་གང་ཡིན་པ་དེ་དག་ནི་ཤའི་མིག་དང་ལྡན་པ་ཡིན་དུ་ཟིན་ཀྱང་ལྷའི་མིག་དང་ལྡན་པ་ཡིན་ནོ་ཞེས་ང་ཟེར་རོ། །རིགས་
ཀྱི་བུ་གཞན་ཡང་མདོ་སྡེ་འདི་ཐོས་ནས་དེ་བཞིན་གཤེགས་པ་རྟག་པར་ཤེས་ཤིང་ཁོང་དུ་ཆུད་པ་གང་ཡིན་པ་དེ་དག་ནི་ལྷའི་མིག་དང་ལྡན་པ་ཡིན་ནོ་ཞེས་ང་ཟེར་རོ། །ལྷའི་མིག་དང་ལྡན་པ་ཡིན་དུ་ཟིན་ཀྱང་དེ་བཞིན་གཤེགས་པ་རྟག་པར་མི་ཤེས་པ་གང་ཡིན་པ་དེ་དག་ནི་ཤའི་མིག་དང་ལྡན་པ་ཡིན་
ནོ་ཞེས་ང་ཟེར་རོ། །དེ་དག་ནི་ད་དུང་བསྐལ་པ་བྱེ་བ་མང་པོར་ཡང་བདག་གི་མགོ་མཇུག་ཅི་འདྲ་བ་ཡང་མཐོང་བའམ་བསྟན་པར་མི་ནུས་ཏེ། དེ་བས་ན་དེ་དག་ནི་དེ་བཞིན་གཤེགས་པ་རྟག་པར་བསྒོམ་པ་དང་བྲལ་བའི་ཕྱིར་ཤའི་མིག་དང་ལྡན་པ་ཞེས་ང་ཟེར་རོ། །རིགས་ཀྱི་བུ་གཞན་ཡང་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་ཐམས་ཅད་ཀྱི་ཕ་མ་ལྟ་བུ་ཡིན་ནོ། །ཅིའི་ཕྱིར་ཞེ་ན། སེམས་ཅན་རྐང་གཉིས་དང་། རྐང་མངས་ཐམས་ཅད་ལ་རང་རང་གི་ཡུལ་བཞིན་དུ་ཆོས་སྟོན་ཅིང་ཚིག་གཅིག་གིས་སེམས་ཅན་ཐམས་ཅད་ཀྱིས་རང་རང་གི་
ཡུལ་བཞིན་དུ་ཤེས་པར་འགྱུར་ཏེ། ཀྱེ་མ་བདག་ཅག་གི་རང་བཞིན་དང་འདུ་ཤེས་རྣམས་རྟོགས་པར་བྱ་བའི་ཕྱིར་ཆོས་སྟོན་ཏོ་སྙམ་དུ་འཛིན་ཏོ། །རིགས་ཀྱི་བུ་གཞན་ཡང་དཔེར་ན་ཁྱིམ་བདག་གམ་ཚོང་དཔོན་ཡང་རུང་སྟེ། རང་གི་བུ་ཟླ་བ་བཅུ་དྲུག་ལོན་པ་དང་ལྷན་ཅིག་ཏུ་ལྐུགས་པ་བཞིན་དུ་སྨྲ་བར་བྱེད་དེ།

དེའི་དབང་གིས་བུ་དེ་མིའི་སྐད་སློབ་པར་བྱེད་ན་ཅི་དེའི་ཕ་ལྐུགས་པ་ཞེས་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། བུ་དེའི་དབང་གིས་བགྱིད་པར་བལྟ་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་ལྐུགས་པ་བཞིན་དུ་
གསུང་སྟེ། སེམས་ཅན་ཐམས་ཅད་དམ་པའི་ཆོས་ལ་དགོད་པའི་ཕྱིར་དེ་ལྟ་བུའི་སྐུ་སྟོན་པར་མཛད་ན་ཅི་དེ་བཞིན་གཤེགས་པ་ལྐུགས་པ་ཞེས་བྱའམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་བཞིན་གཤེགས་པ་ནི་རྟག་ཏུ་སེང་གེའི་སྒྲ་སྒྲོགས་པ་ལགས་ན་ལྐུགས་པ་ལྟར་གསུང་
བ་དེ་ནི་འཇིག་རྟེན་དང་འཐུན་པར་མཛད་པར་བལྟ་བར་བགྱི་ལགས་སོ། །དེ་ནས་དེའི་ཚེ་བཅོམ་ལྡན་འདས་ཉིད་ཀྱི་ཞལ་ནས་འོད་ཟེར་སྣ་ཚོགས་བཀྱེ་སྟེ། འོད་ཟེར་དེ་དག་གིས་མགར་བའི་བུ་ཙུན་ད་ལ་ཕོག་ནས་ཀྱེ་མ་དེ་བཞིན་གཤེགས་པ་ལ་ཕྱིན་ཅད་དབུལ་དུ་མེད་པའི་སྦྱིན་པ་ནི་དཀོན་པ་ཡིན་ནོ་
སྙམ་ནས་ཤིན་ཏུ་རིངས་པར་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཚིམ་པར་འགྱུར་བའི་ཞལ་ཟས་ཁྱེར་ཏེ་རང་གི་འཁོར་རྣམས་དང་ལྷན་ཅིག་ཏུ་རིངས་པར་འཛམ་བུ་ཆུ་ཀླུང་གི་གསེར་དྲི་མ་མེད་པའི་སྣོད་དཀྱིལ་དུ་ནོར་བུའི་འབུར་མཐོན་པོ་འོད་ཅན་གྱིས་སྤྲས་པ་རྣམས་དང་། ཁ་
ཅིག་ནི་དངུལ་གྱི་སྣོད་རིན་པོ་ཆེ་སྣ་ཚོགས་ཀྱིས་སྤྲས་པ་རྣམས་ཞལ་ཟས་སྐྱུ་རུམ་སྣ་ཚོགས་དང་སྦྱར་བས་བཀང་བ་དང་། མཆོད་པའི་ཡོ་བྱད་མང་པོ་དག་ཁྱེར་ནས་གྲོང་ཁྱེར་གྱི་བར་ནས་བྱུང་སྟེ་བཅོམ་ལྡན་འདས་ག་ལ་བ་དེར་ཆས་སོ། །དེ་ནས་ལྷའི་བུ་མཐུ་ཆེན་པོ་དང་ལྡན་པ་རྣམས་ཀྱིས་མགར་བའི་
བུ་ཙུན་ད་བསྐོར་ནས་འདི་སྐད་ཅེས་སྨྲས་སོ། །ཙུན་ད་རེ་ཞིག་ཞལ་ཟས་མ་དབུལ་བར་དེ་བཞིན་གཤེགས་པ་ཐང་ཅིག་ཞོག་ཅིག་ཅེས་བྱས་སོ། །དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་འོད་ཟེར་དག་བཀྱེ་སྟེ། འོད་ཟེར་དེ་དག་གིས་ལྷའི་བུ་རྣམས་ལ་ཕོག་ནས་ཙུན་ད་བཏང་ངོ་། །དེ་ནས་ལྷ་ལ་
སོགས་པ་དེར་འདུས་པ་གང་ཡིན་པ་དེ་དག་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ། ཙུན་ད་དང་ལྷན་ཅིག་ཏུ་བཅོམ་ལྡན་འདས་ཀྱི་ཐད་དུ་དོང་ནས་འདི་སྐད་ཅེས་གསོལ་ཏོ། །དགེ་སློང་རྣམས་ཀྱིས་གདུགས་ཚོད་ལ་བབ་ན་གནང་བར་མཛད་དུ་གསོལ། དེ་ནས་དགེ་སློང་

རྣམས་ཀྱིས་གདུགས་ཚོད་ལ་བབ་པར་ཤེས་ནས་སྤྱོད་ལམ་བཟང་པོར་བྱས་ཏེ་ལྷུང་བཟེད་ལག་ཏུ་བླངས་ནས་སྡོད་དོ། །དེ་ནས་མགར་བའི་བུ་ཙུན་དས་སེང་གེའི་ཁྲི་སྣ་ཚོགས་ཚིག་ཏུ་བཟླས་སུ་ཡང་མི་ནུས་པ་འཇིག་རྟེན་གྱི་ཁམས་བདེ་བ་ཅན་གྱི་རྐྱེན་དུ་རུང་བ་ལྟ་བུ་དག་ཀྱང་བཤམས། ཞལ་
ཟས་ཀྱང་སྟ་གོན་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཡང་ཡུན་རིང་དུ་བཞུགས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཙུན་ད་གལ་ཏེ་ང་ཡུན་རིང་དུ་འདུག་པར་འདོད་ན་སྦྱིན་པའི་ཕ་རོལ་
ཏུ་ཕྱིན་པ་ཐ་མའི་དུས་ལ་བབ་ཀྱིས་མྱུར་དུ་ཕུལ་ཅིག །དེ་ནས་ལྷ་དང་མི་ཐམས་ཅད་དང་། བྱང་ཆུབ་སེམས་དཔའ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་མ་ཙུན་ད་སྐྱིད་དེ་ང་འདིས་ཕུལ་བའི་ཞལ་ཟས་དེ་བཞིན་གཤེགས་པས་གསོལ་བར་ཆད་པ་ལྟ། བདག་ཅག་ནི་དཔལ་ཡོན་མེད་དེ།
བདག་ཅག་གིས་ཞལ་ཟས་སྟ་གོན་བྱས་པ་ནི་དོན་མེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཉིད་ཀྱི་བ་སྤུའི་ཁུང་བུ་ཐམས་ཅད་ནས་བ་སྤུ་རེ་རེའི་ཁུང་བུ་ནས་ཀྱང་སངས་རྒྱས་རེ་རེ་མངོན་དུ་སྤྲུལ་ནས་དེར་འཁོར་རེ་རེའི་ནང་དུ་ཡང་དེ་བཞིན་གཤེགས་པ་རེ་རེའི་དགེ་སློང་གི་དགེ་འདུན་དང་བཅས་
པ་ཐམས་ཅད་བཤོས་གསོལ་བ་ལྟ་བུར་བསྟན་ཏོ། །དེ་བཞིན་གཤེགས་པ་ཉིད་ནི་ཙུན་དས་ཕུལ་བའི་ཞལ་ཟས་གསོལ་ལོ། །ཙུན་དས་འབྲས་སཱ་ལུ་ཡུལ་མ་ག་དྷཱའི་ན་ལི་ཏ་བརྒྱད་ལས་ཞལ་ཟས་སྦྱར་བ་ཡང་དེ་བཞིན་གཤེགས་པའི་མཐུས་དགེ་སློང་གི་དགེ་འདུན་ཐམས་ཅད་ཞལ་ཟས་ཀྱིས་
ཁྱེད་པར་མཛད་དོ། །དེ་ནས་ཙུན་ད་ཡང་དགའ་བར་གྱུར་ཏེ། བདག་གི་སྦྱིན་པ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་གསོལ་ནས་ཡོངས་སུ་མྱ་ངན་ལས་འདས་པར་མཛད་དོ་སྙམ་མོ། །འཁོར་དེ་དག་ཐམས་ཅད་འདི་སྙམ་དུ་སེམས་ཏེ། བདག་ཅག་གིས་ཕུལ་བའི་
ཞལ་ཟས་དེ་བཞིན་གཤེགས་པས་བཞེས་ཀྱི་ཙུན་དའི་མ་བཞེས་སོ། །བདག་ཅག་གིས་ཕུལ་བའི་ཞལ་ཟས་གསོལ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་མཛད་དོ་སྙམ་སྟེ་མཆོག་ཏུ་དགའ་བར་གྱུར་ཏོ། །འཁོར་ཆེན་པོ་དེ་ན་དེ་བཞིན་གཤེགས་པ་རྣམས་བཤོས་གསོལ་ཞིང་

བཞུགས་པའི་བར་མཚམས་སྙུང་བུའི་རྩེ་མོའི་ཁྱོན་ཙམ་གྱིས་མཆོད་པར་སྣང་ངོ་། །ཁ་ཅིག་ནི་ཁབ་ཀྱི་རྩེ་མོའི་ཁྱོན་ཙམ་གྱི་ས་ཕྱོགས་དག་ན་བཞུགས་ཤིང་ཞལ་ཟས་དང་མཆོད་པ་རྣམས་འདྲ་བར་མངའ་བར་སྣང་ངོ་། །དེ་ནས་དེའི་ཚེ་ལྷ་དང་མི་དང་ལྷ་མ་ཡིན་དེ་དག་
ངུ་ཞིང་ཆོ་ངེ་འདོན་པར་བྱེད་དེ། བདག་ཅག་གིས་སོ་སོ་ནས་ཕུལ་བའི་ཞལ་ཟས་གསོལ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །ཕྱིན་ཅད་བདག་ཅག་གིས་སུ་ལ་ཞལ་ཟས་དབུལ་བར་བྱ། བདག་ཅག་ནི་མགོན་དང་བྲལ་ཏེ་མགོན་མེད་པར་འགྱུར་རོ་ཞེས་འཛེར་ཏོ། །
དེ་ནས་བཅོམ་ལྡན་འདས་ཀྱིས་འཁོར་དེ་དག་ཐམས་ཅད་ལ་ཚིགས་སུ་བཅད་པ་འདི་དག་གསུངས་སོ།། །།བམ་པོ་བཅུ་གསུམ་པ་སྟེ་ཐ་མ། སངས་རྒྱས་ཆོས་ཉིད་འདི་ཡིན་གྱིས། །གདུང་ཞིང་ངུ་བར་མ་བྱེད་ཅིག །ང་ནི་མྱ་ངན་འདའ་བ་ན། །བསྐལ་པ་བྱེ་བ་ཟད་པར་འགྱུར། །
ང་ཡི་རྟག་བདེ་དམ་པ་ཡི། །མྱ་ངན་འདའ་བ་ང་ལས་ཉོན། །ང་ནི་ཁ་ཟས་མི་ཟ་སྟེ། །བྲུ་བ་ཚ་བ་ཡོང་གིས་མེད། །སེམས་ཅན་ཀུན་ལ་ཕན་བདེ་བའི། །རྗེས་སུ་ཡི་རང་ངས་བཤད་ཀྱིས། །ཐོས་ནས་ཡང་དག་རྫོགས་སངས་རྒྱས། །རྟག་པ་དེ་ཉིད་ཤེས་པར་གྱིས། །གང་ཚེ་
འུག་པ་བྱ་རོག་རྣམས། །ཤིང་གཅིག་ལ་ནི་གནས་ནས་ཀྱང་། །སྤུན་དང་བུ་དང་འདྲ་བར་ནི། །ཕན་ཚུན་རྟག་ཏུ་ཚིམ་པར་བྱེད། །དེའི་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་
བས་གྲོངས། །གང་ཚེ་སྦྲུལ་དང་ནེའུ་ལེ་དག །ཤིང་གཅིག་དྲུང་དུ་གནས་ནས་ཀྱང་། །སྤུན་དང་བུ་དང་འདྲ་བར་ནི། །ཕན་ཚུན་རྟག་ཏུ་ཚིམ་པར་བྱེད། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་
པ། །གཏན་དུ་མྱ་ངན་འདའ་བས་གྲོངས། །གང་ཚེ་སབ་ཏ་པར་ན་ཡི། །མེ་ཏོག་བར་ཤིའི་དྲིར་འགྱུར་ཞིང་། །ཀ་ར་ཀ་ཡི་ཤིང་རྣམས་ལས། །ཏེན་དུ་ཀ་ཡི་འབྲས་བུ་འབྱུང་། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་

ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སྡིག་ཅན་འདོད་ཆེན་པ། །བྱང་ཆུབ་མངོན་པར་རྫོགས་འཚང་རྒྱ། །མཆོག་ཏུ་བདེ་བ་ཐོབ་ནས་ཀྱང་། །ཉེས་པ་ཐམས་ཅད་རྣམ་སྤངས་པ། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་
པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སེམས་ཅན་ཐམས་ཅད་ནི། །བསམ་པ་འཐུན་པར་གནས་གྱུར་ཏེ། །བྱང་ཆུབ་མཆོག་ཏུ་རྫོགས་སངས་རྒྱས། །ཉེས་པ་ཐམས་ཅད་རྣམ་སྤངས་པ། །དེ་ཚེ་སྒྲ་
གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སྦྲང་བུའི་གཅིན་ཙམ་གྱིས། །རྒྱ་མཚོ་བཞི་ཡི་མཐས་ཀླས་པ། །ནགས་ཚལ་རི་རྣམས་བཅས་པ་ཡི། །ས་གཞི་
ངོམས་པར་གྱུར་པ་ན། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །དེ་བས་ན་ཆོས་དང་ལྡན་པ་ཆོས་ལ་གུས་པ་ཁྱེད་མྱ་ངན་མ་བྱེད་ཅིག །མ་ངུ་ཞིག །དེ་བཞིན་
གཤེགས་པ་ནི་རང་ལ་དབང་ཡོད་ཀྱིས་མི་རྟག་པའི་འདུ་ཤེས་མ་བྱེད་པར་རྟག་པ་དང་། ཐེར་ཟུག་པ་དང་། མཆོག་ཏུ་བརྟན་པ་ཡིན་པར་ཡང་དག་པར་ལྟོས་ཤིག །གཞི་གསུམ་རྟག་པའི་གསང་སྔགས་ཀྱི་སྦ་བ་དང་། བསྲུང་བ་འདིས་བསྲུང་བར་གྱིས་ཤིག །གཞི་གསུམ་རྟག་པའི་གསང་
སྔགས་ཀྱིས་ནི་གནམ་ལྕགས་ཀྱིས་ཚིག་པའི་ཤིང་རྣམས་ཀྱང་སྐྱེ་བར་འགྱུར་ཏེ། ཡལ་ག་ཕྲེའུ་དང་། སྦལ་མིག་བྱེ་བ་དང་། ལོ་མ་ཁ་འབུས་པ་དང་ལྡན་པར་འགྱུར་རོ། །འཁོར་བཞི་པོ་ལས་གཞི་གསུམ་རྟག་པར་རྗེས་སུ་ཡི་རང་བའི་གཏམ་འདི་ཕན་ཚུན་ཐོས་ན་བྱང་ཆུབ་ཀྱི་སེམས་བསྐྱེད་མི་དགོས་
པར་འཛིན་ཀྱང་གཞི་གསུམ་མཆོག་ཏུ་རྟག་པའི་རྒྱུས་ན་བྱང་ཆུབ་ཀྱི་རྒྱུར་སྐྱེ་བར་འགྱུར་ཏེ། འདི་ནི་སངས་རྒྱས་ཀྱི་རྗེས་སུ་ཡི་རང་བ་ཞེས་བྱའོ། །གཞི་གསུམ་རྟག་པ་ལས་བྱུང་བའི་རྗེས་སུ་ཡི་རང་བ་འདི་དགེ་སློང་ངམ་དགེ་སློང་མ་གང་དག་སེམས་ཅན་རྣམས་ལ་སྟོན་པར་བྱེད་པ་དེ་དག་ནི་ཡུལ་

འཁོར་གྱི་བསོད་སྙོམས་ཟ་བར་འོས་པ་ཡིན་ནོ། །ཅིག་ཤོས་དག་ནི་འོས་པ་མ་ཡིན་ནོ། །ཇི་ལྟར་རྗེས་སུ་ཡི་རང་བ་འདིས་གཏོལ་བ་དེ་འཇིག་རྟེན་ཐམས་ཅད་དུ་བདེ་བར་གྱུར་པའི་ཆོས་ཀྱི་བདེན་པ་དེས་ནི་དམ་པའི་ཆོས་འདོད་པ་རྣམས་ལ་བགེགས་མེད་པ་དང་། གནོད་པ་མེད་
པར་གྱུར་ཅིག །དེ་ནས་ལྷ་དང་། ལྷ་མ་ཡིན་དང་། མི་དང་བཅས་པའི་འཇིག་རྟེན་གྱིས་དེ་བཞིན་གཤེགས་པ་རྟག་པར་ཁོང་དུ་ཆུད་ནས་རབ་ཏུ་དགའ་བའི་སེམས་དང་། དགེ་བའི་སེམས་དང་། སྒྲིབ་པ་དང་བྲལ་བའི་སེམས་དང་། གཞོལ་བ་མེད་པའི་སེམས་དང་། པད་མ་ཁ་བྱེ་བ་ལྟ་
བུའི་བཞིན་དང་ལྡན་པར་གྱུར་ནས་ལྷའི་མཆོད་པ་ཆེན་པོའི་ལས་བྱས་ཏེ། མེ་ཏོག་དང་། ཕྱེ་མ་དང་། བདུག་པ་དང་། སྤོས་ཀྱིས་བསྒོ་བ་ལ་སོགས་པ་གཏོར་ཏོ། །སིལ་སྙན་ལ་སོགས་པ་ཡང་དཀྲོལ་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་
འོད་སྲུང་ཆེན་པོ་དང་རུས་གཅིག་པ་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་དེང་འདིར་ངོ་མཚར་རྨད་དུ་བྱུང་བ་ཅི་མཐོང་། གསོལ་པ། བཅོམ་ལྡན་འདས་བདག་གིས་སྔོན་ལན་འགའ་ཡང་མ་མཐོང་བའི་ངོ་མཚར་རྨད་དུ་བྱུང་བ་མཐོང་སྟེ། འཁོར་རེ་རེས་ཕུལ་བའི་ཞལ་ཟས་དེ་བཞིན་གཤེགས་
པ་རེ་རེ་དགེ་སློང་གི་དགེ་འདུན་དང་བཅས་པས་གསོལ་བ་མཐོང་བ་ལགས་སོ། །འཁོར་འདི་ན་སྙུང་བུའི་རྩེ་མོ་ཙམ་གྱིས་ཁྱོན་དག་ལ་ཡང་ཇི་ལྟར་བཤམས་པའི་གདན་དག་ལ་དེ་བཞིན་གཤེགས་པ་སྐུ་ཆེན་པོ་དུ་མ་བདེ་བར་བཞུགས་ཏེ་རྗེས་སུ་ཡི་རང་བ་བཅུ་གསུམ་གྱི་ཚིགས་སུ་བཅད་པ་དག་སྟོན་ཅིང་
བཞུགས་པ་མཐོང་ལགས་སོ། །སེམས་ཅན་ཐམས་ཅད་ཀྱིས་ནི་སྒྱུ་འཕྲུལ་འདི་མ་འཚལ་ཏེ། བཅོམ་ལྡན་འདས་ནི་བདག་གིས་ཕུལ་བའི་ཞལ་ཟས་གསོལ་ཞིང་བཞུགས་སོ་སྙམ་དུ་འཛིན་ལགས་སོ། །མི་མཆོག་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་
ལ་སོགས་པས་ནི། ཙུན་དས་དེ་ལྟར་འབྲས་སཱ་ལུ་ཡུལ་མ་ག་དྷཱའི་ན་ལི་ཀ་བརྒྱད་ལས་ཞལ་ཟས་སྦྱར་བ་ཡང་རྡུལ་ཙམ་ཡང་དགེ་སློང་གི་དགེ་འདུན་གྱིས་མི་གསོལ་བ་དང་། དེ་བཞིན་གཤེགས་པ་ཞལ་ཟས་མི་གསོལ་བའི་ཡ་མཚན་རྨད་དུ་བྱུང་བ་འདི་ཡང་དག་པར་འཚལ་ཏེ། འདི་ནི་ཐབས་

ཙམ་དུ་མཛད་པར་བས་སོ་སྙམ་དུ་སེམས་ལགས་སོ། །ཉན་ཐོས་ཀྱི་ཚོགས་རྣམས་ཀྱིས་ནི་ཀྱེ་མ་དེ་བཞིན་གཤེགས་པ་ནི་དཔག་ཏུ་མེད་པ་དང་རྟག་པ་ལགས་སོ་སྙམ་དུ་མ་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་མགར་བའི་བུ་ཙུན་ད་ལ་བཀའ་སྩལ་པ། ཙུན་ད་ཁྱོད་ཀྱིས་ངོ་མཚར་
རྨད་དུ་བྱུང་བ་ཅི་མཐོང་། གསོལ་པ། བཅོམ་ལྡན་འདས་སྔར་ནི་དེ་བཞིན་གཤེགས་པ་ཡ་མཚན་གྱི་མཆོག་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་མངའ་བ་དུ་མ་མཐོང་བ་ལས་ད་ནི་རང་རང་གིས་བསྒྱུར་ནས་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་པོ་དག་ཏུ་སྣང་
ལགས་སོ། །དེ་བཞིན་གཤེགས་པ་ནི་དུག་སྨན་གྱི་སྡོང་པོ་ལྟ་བུའི་སྐུ་གཅིག་པུར་གྱུར་ཏེ། བྱང་ཆུབ་སེམས་དཔའ་རྣམས་ཀྱིས་བསྐོར་བར་གདའ་ལགས་སོ། །བཀའ་སྩལ་པ། སངས་རྒྱས་སྔ་མ་གང་ཡིན་པ་དེ་དག་ནི་སེམས་ཅན་ཐམས་ཅད་ལ་ཕན་པ་དང་། བདེ་བ་དང་། ཡིད་དགའ་བར་བྱ་བ་
དང་བསོད་ནམས་མི་ཟད་པར་བྱ་བའི་ཕྱིར་སྤྲུལ་པ་ཡིན་ཏེ། སྒྱུ་འཕྲུལ་འདི་ནི་བྱང་ཆུབ་སེམས་དཔའ་རྣམས་མ་གཏོགས་པར་སེམས་ཅན་རྣམས་ཀྱིས་མི་ཤེས་སོ། །དེ་ལྟར་ན་བྱང་ཆུབ་སེམས་དཔའི་སྤྱོད་པ་ནི་དཔག་ཏུ་མེད་དོ། །དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དཔག་ཏུ་མེད་
དོ། །བྱང་ཆུབ་སེམས་དཔའ་མི་མཆོག་རྣམས་ལ་ནི་སངས་རྒྱས་ཀྱི་རྣམ་པར་འཕྲུལ་པའི་མཐུ་ཡོད་དོ། །མགར་བའི་བུ་ཙུན་ད་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ཐོབ་པ་ཡིན་ཏེ། བྱང་ཆུབ་སེམས་དཔའ་རྣམས་ཀྱི་མཆོག་གི་མཐར་ཐུག་པ་ནི་དེ་ལྟ་བུ་ཡིན་ནོ། །འོད་སྲུང་ཆེན་པོ་
དང་རུས་གཅིག་པས་གསོལ་པ། བཅོམ་ལྡན་འདས་དེ་ནི་དེ་ལགས་ཏེ། བྱང་ཆུབ་སེམས་དཔའ་རྣམས་ཀྱི་ནང་ན་མི་མཆོག་ཙུན་ད་ལ་བདག་རྗེས་སུ་ཡི་རང་ལགས་སོ། །བཅོམ་ལྡན་འདས་ད་ནི་མདོ་སྡེ་རྣམས་བཤད་པའི་སླད་དུ་གནང་བ་མཛད་པའི་རིགས་སོ། །བཅོམ་ལྡན་འདས་ཅི་ལགས་
མདོ་སྡེ་ཐམས་ཅད་ལྷག་མ་མཆིས་པའི་དོན་ལགས་སམ། འོན་ཏེ་ལྷག་མ་མ་མཆིས་པའི་དོན་ལགས། བཀའ་སྩལ་པ། ལྷག་མ་ཡོད་པའི་དོན་ཀྱང་ཡིན། ལྷག་མ་མེད་པའི་དོན་ཀྱང་ཡིན་ནོ། །གསོལ་པ། སྦྱིན་པ་ཀུན་དུ་བསྔགས་པ་ཡིན། །སྦྱིན་པ་གང་དུའང་སྨད་པ་མེད། །ཅེས་བགྱི་

བ་འདིར་ལྷག་མ་མཆིས་པའི་དོན་དུ་ཇི་ལྟར་བཤད་ལགས། ཚིགས་སུ་བཅད་པའི་དོན་ནི་གང་ལགས། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པའི་བྱེ་བྲག་ནི་ཅི་མཆིས། བཀའ་སྩལ་པ། གཅིག་མ་གཏོགས་པར་སྦྱིན་པ་ནི་ཐམས་ཅད་དུ་བསྔགས་སོ། །
གསོལ་པ། མ་གཏོགས་པ་གང་ལགས། བཀའ་སྩལ་པ། མདོ་སྡེ་འདི་ལས་ཚུལ་ཁྲིམས་འཆལ་པར་བརྩི་བ་གང་ཡིན་པའོ། །གསོལ་པ། བཅོམ་ལྡན་འདས་བཅོམ་ལྡན་འདས་ལ་དེང་བདག་འདི་ཁོ་ན་ཞུ་ལགས་ན་མྱུར་དུ་བཀའ་སྩལ་དུ་གསོལ། བཀའ་སྩལ་པ། འདོད་ཆེན་པ་མ་
གཏོགས་པར་སྦྱིན་པ་ནི་ཐམས་ཅད་དུ་བསྔགས་པ་ཡིན་ནོ། །གསོལ་པ། འདོད་ཆེན་པ་ཇི་ལྟ་བུ་ལགས། བཀའ་སྩལ་པ། དགེ་སློང་ངམ་དགེ་སློང་མའམ། དགེ་བསྙེན་ནམ། དགེ་བསྙེན་མ་ཡང་རུང་སྟེ། ཚིག་ངན་པས་མདོ་སྡེ་སྤངས་ནས་ཕྱིས་བཟོད་པ་གསོལ་བར་ཡང་མི་བྱེད་པ་དེ་ལྟ་བུ་
གང་ཡིན་པ་དེ་ནི་འདོད་ཆེན་པའི་ལམ་དུ་ཞུགས་པ་ཡིན་ནོ། །ཕམ་པ་བཞི་བྱུང་བ་རྣམས་དང་། མཚམས་མེད་པ་ལྔ་བྱེད་བྱེད་པ་གང་ཡིན་པ་དེ་དག་ནི་བདག་ཅག་འཇིགས་པའི་གནས་སུ་ཞུགས་སོ་སྙམ་དུ་ཤེས་ཀྱང་འཇིགས་པར་མི་ལྟ་ལ་དམ་པའི་ཆོས་ཀྱི་ཕྱོགས་ཀྱང་མི་འཛིན། དམ་པའི་ཆོས་
དབྱུང་ངོ་སྙམ་དུ་འབད་པར་ཡང་མི་བྱེད་ལ། དེ་ཉིད་ཀྱི་བསྔགས་པ་མ་ཡིན་པར་ཡང་རྗོད་པར་བྱེད་པ་དེ་དག་ཀྱང་འདོད་ཆེན་པའི་ལམ་དུ་ཞུགས་པ་ཡིན་ནོ། །སངས་རྒྱས་མེད་དོ། །ཆོས་མེད་དོ། །དགེ་འདུན་མེད་དོ་ཞེས་ཟེར་བ་གང་ཡིན་པ་དེ་དག་ཀྱང་འདོད་ཆེན་པའི་ལམ་དུ་ཞུགས་པ་ཡིན་ནོ་ཞེས་
ང་ཟེར་རོ། །འདོད་ཆེན་པ་དེ་དག་མ་གཏོགས་པར་སྦྱིན་པ་ཐམས་ཅད་དུ་བསྔགས་སོ། །གསོལ་པ། དེ་ལ་ཚུལ་ཁྲིམས་འཆལ་པ་ཞེས་བགྱི་བ་གང་དག་ལགས། བཀའ་སྩལ་པ། ཕམ་པ་བཞི་བྱེད་བྱེད་པ་རྣམས་དང་། མཚམས་མེད་པ་ལྔ་བྱེད་བྱེད་པ་རྣམས་དང་། མདོ་སྡེ་སྤོང་བར་བྱེད་པ་
དེ་ཉིད་དོ། །གསོལ་པ། བཅོམ་ལྡན་འདས་ཅི་ལགས་སམ། དེ་དག་རྟག་ཏུ་ཚུལ་ཁྲིམས་འཆལ་པ་ཁོ་ན་ལགས་སམ། བཀའ་སྩལ་པ། འདི་ལ་རྒྱུ་ཡོད་དེ། དེས་ན་ཡེ་རྟག་པ་ཡང་ཡོད། ཡེ་མི་རྟག་པ་ཡང་ཡོད་དེ། གང་དག་གོས་ཚོན་ཅན་གྱི་རྟགས་ཅན་རྣམས་དང་། ལྷན་ཅིག་ཏུ་མི་གནས་

ཤིང་། ཀྱེ་མ་བདག་ཅག་ནི་ཕམ་པ་བྱུང་བ་ཡིན་ཏེ། བདག་ཅག་གི་ཉེས་པ་བྱས་སོ་སྙམ་ནས་འཇིགས་པར་ལྟ་ལ། དེ་དག་དམ་པའི་ཆོས་དབྱུང་བར་བྱའོ་སྙམ་ནས་ཉམས་སུ་ལེན་པར་བྱེད་ཅིང་དམ་པའི་ཆོས་ཀྱི་ཕྱོགས་འཛིན་པ་རྣམས་ཀྱི་བསྔགས་པ་བརྗོད་པར་བྱའོ། །ཆོས་མ་ཡིན་
པའི་ཕྱོགས་རྣམས་ནི་ཚར་གཅད་པར་བྱའོ། །མཚུངས་པ་མེད་པའི་མདོ་སྡེ་རྣམས་ནི་གདོན་པར་བྱའོ་སྙམ་དུ་བརྩོན་པར་བྱེད་པ་གང་ཡིན་པ་དེ་དག་ཚུལ་ཁྲིམས་འཆལ་པ་ཡིན་ནོ་ཞེས་ང་མི་ཟེར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་དཔེར་ན་ཉི་མ་ཤར་ན་ལྷོ་བུར་གྱི་རྡུལ་སངས་པར་འགྱུར་བ་
དེ་བཞིན་དུ་མདོ་སྡེ་ཆེན་པོའི་ཉི་མ་འདི་ཤར་བ་ན་དེ་ལྟར་སྒོམ་བྱེད་པའི་སེམས་ཅན་རྣམས་ཀྱི་སྡིག་པའི་ཕུང་པོ་གྲངས་མེད་པ་བྱས་པ་རྣམས་ཟད་པར་འགྱུར་ཏེ། དེ་ལྟར་ན་དམ་པའི་ཆོས་འབྱིན་པ་ནི་འབྲས་བུ་ཆེ་བ་ཡིན་ནོ། །མཚམས་མེད་པ་བྱེད་བྱེད་པ་རྣམས་དང་། མདོ་སྡེ་སྤོང་བ་གང་ཡིན་པ་དེ་
དག་གལ་ཏེ་ཀྱེ་མ་བདག་ཅག་གིས་མདོ་སྡེ་སྤང་བ་བྱས་པ་འདི་ནི་བདག་ཅག་བརླག་པར་འགྱུར་བ་ཡིན་ཏེ་ཉེས་པ་བྱས་སོ་སྙམ་དུ་འགྱོད་ཅིང་གདུང་བར་གྱུར་ནས། བདག་ཅག་གི་སྐྱབས་ནི་མདོ་སྡེ་འདི་ཉིད་ཡིན་ཏེ། འཁྲ་ས་གཞན་མ་མཐོང་ངོ་སྙམ་དུ་སེམས་བསྐྱེད་པར་བྱེད་ན། དེ་དག་ནི་ཟླ་བ་ཕྱེད་
དམ། ཟླ་བ་གཅིག་གམ། དུས་ཇི་སྲིད་ཀྱི་བར་དུ་མདོ་སྡེ་ལ་སྐྱབས་སུ་མ་སོང་བའི་བར་དུ་ནི་དེ་དག་ལ་བྱིན་པ་འབྲས་བུ་ཆུང་བར་འགྱུར་རོ། །གང་གི་ཚེ་མདོ་སྡེ་ལ་སྐྱབས་སུ་སོང་བ་དེའི་ཚེ་ནི་དེ་དག་ཀྱང་ཡོན་གནས་སུ་འགྱུར་རོ། །གལ་ཏེ་མཚམས་མེད་པ་བྱེད་བྱེད་པ་ཡང་འགྱོད་དེ། ཀྱེ་མ་
བདག་གིས་མི་རིགས་པ་བྱས་ཀྱིས་བདག་གིས་དམ་པའི་ཆོས་དབྱུང་བར་བྱའོ་སྙམ་དུ་སེམས་ན་དེ་ཡང་མཚམས་མེད་པ་བྱེད་བྱེད་པ་མ་ཡིན་པར་རིག་པར་བྱ་སྟེ་དེ་ལ་ནི་ཆུང་ངུ་ཞིག་བྱིན་ན་ཡང་འབྲས་བུ་ཡོད་དོ། །མཆོག་ཏུ་ཚུལ་ཁྲིམས་འཆལ་པ་ཅིག་ཤོས་དེ་དག་ལ་བྱིན་པ་ནི་འབྲས་བུ་ཆུང་ཟད་ཀྱང་
མེད་དོ། །རིགས་ཀྱི་བུ་གཞན་ཡང་ཕམ་པ་བྱེད་བྱེད་པས་ཇི་ལྟར་བྱ་བ་ཉོན་ཅིག །ཕམ་པ་བྱེད་བྱེད་པས་ནི་ཆོས་ཀྱི་དེ་ཁོ་ན་ཉིད་དེ་བཞིན་གཤེགས་པའི་སྙིང་པོ་ཁོང་དུ་ཆུད་པར་བྱས་ནས་དམ་པའི་ཆོས་དབྱུང་བར་བྱའོ་སྙམ་དུ་བསམས་ན་དེ་ལ་བྱིན་པ་ཡང་ཆེས་ཁྱད་པར་ཅན་དུ་འགྱུར་རོ། །རིགས་ཀྱི་བུ་དཔེར་ན་བུད་

མེད་སྦྲུམ་མ་ཞིག་ཡུལ་འཁྲུགས་ནས་ཡུལ་གཞན་དུ་སོང་སྟེ། ལྷ་ཁང་ཞིག་གི་ནང་དུ་བུ་ཁྱེའུ་ཞིག་བཙས་ཏེ། དེ་བདེ་བར་གྱུར་ནས་ཁྱེའུ་དེ་ཁྱེར་ཏེ། བདག་གི་ཡུལ་ཞི་བར་གྱུར་པའི་འོག་ཏུ་དེ་ལོགས་སུ་ཆས་པ་ལས། ཆུ་ཀླུང་ཆེན་པོ་ཞིག་དང་ཕྲད་ནས། ཆུ་དེ་རྒལ་བ་ན་
བུ་དང་བཅས་ཏེ་ཆུའི་ནང་དུ་ཉམ་ཐག་པར་གྱུར་ནས། བདག་ནི་ཤི་ཡང་བླའི། ཁྱེའུ་འདི་ཐར་བར་བྱའོ་སྙམ་ནས་དེ་དེའི་དོན་དུ་འབད་པ་ལས། བུ་དང་ལྷན་ཅིག་ཏུ་ཤི་ན་སྔོན་མཆོག་ཏུ་འཇིགས་པའི་ལས་བྱས་སུ་ཟིན་ཀྱང་། བུ་ལ་བྱམས་ཤིང་ཐར་པར་བྱའོ་སྙམ་པའི་འབྲས་བུས་མཐོ་རིས་སུ་
སྐྱེས་པ་དེ་བཞིན་དུ་ཕམ་པ་བྱེད་བྱེད་པ་དང་། མཚམས་མེད་པ་བྱེད་བྱེད་པ་ལས་དམ་པའི་ཆོས་འབྱིན་པར་བྱེད་པ་དེ་དག་ནི། སྔོན་སྡིག་པའི་ལས་བྱས་སུ་ཟིན་ཀྱང་། དམ་པའི་ཆོས་འབྱིན་པའི་འབྲས་བུས་བུད་མེད་དེ་དང་འདྲ་བར་སེམས་ཅན་ཐམས་ཅད་ཀྱི་ཡོན་གནས་སུ་གྱུར་ཏེ། དམ་པའི་
ཆོས་འབྱིན་པའི་འབྲས་བུ་ནི་དེ་ལྟར་ཆེའོ། །གསོལ་པ། བཅོམ་ལྡན་འདས་འདོད་ཆེན་པར་ལྟུང་བར་གྱུར་པ་ལས། སླད་ཀྱིས་གཞི་གསུམ་ལ་འཆགས་པར་བགྱིད་ཅིང་བཟོད་པ་གསོལ་བར་བགྱིད་ན། ཅི་ལགས་དེ་ལ་སྩལ་པ་ཡང་འབྲས་བུ་ཆེ་བར་འགྱུར་ལགས་སམ། བཀའ་སྩལ་
པ། རིགས་ཀྱི་བུ་དེ་སྐད་མ་ཟེར་ཅིག །དཔེར་ན་མི་ལ་ལ་ཞིག་གིས་ཤིང་ཏོག་ཨ་མྲ་ཟོས་ནས། རུས་པ་ས་ལ་བོར་བའི་འོག་ཏུ་དེས་འདི་སྙམ་དུ་བསམས་ཏེ། ནང་གི་ཚིག་གུ་ཞིམ་ཡང་དག་སྙམ་ནས། དེས་དེའི་ཕྱི་རོལ་གྱི་རུས་པ་བོར་ཏེ་ཚིག་གུ་ཟོས་པ་དང་། དེས་དེའི་རོ་མི་ཞིམ་པར་ཚོར་
ནས་ཡང་བོར་རོ། །དེ་ནས་དེས་ཀྱི་ཧུད་བདག་གིས་ས་བོན་ངན་པ་མ་རུང་བར་བྱས་སོ་སྙམ་དུ་བསམས་ནས། ས་བོན་དེ་ཕྱིར་རུས་པའི་ནང་དུ་བཅུག་ནས་ས་བརྐོས་པའི་འོག་ཏུ་བཅུག་སྟེ། འོ་མ་དང་མར་ཁུས་བླུགས་ལ་ཆར་ཆེན་པོ་བབ་ཏུ་ཟིན་ཀྱང་ས་བོན་ངན་པ་མ་རུང་བར་བྱས་པ་སྐྱེ་བར་མི་
འགྱུར་ཏེ་སྐྱེ་མི་སྲིད་དོ། །དེ་ནས་དེ་ས་བོན་འདི་ནི་མ་རུང་བར་བྱས་པ་ཡིན་ཏེ་སྐྱེ་བར་མི་འགྱུར་རོ་སྙམ་ནས་ངལ་བར་གྱུར་ཏེ་ཅང་མི་ཟེར་བར་འདུག་པ་དེ་བཞིན་དུ། འདོད་ཆེན་པ་ལ་ཡང་ས་བོན་མེད་དེ། འདོད་ཆེན་པ་འཆགས་ཤིང་བཟོད་པ་གསོལ་བའི་སེམས་སྐྱེད་པ་ནི་མི་སྲིད་དོ། །དེ་བས་ན་

འདོད་ཆེན་པ་དེ་ལྟ་བུ་ལ་ནི། ཐམས་ཅད་དུ་སྦྱིན་པ་འབྲས་བུ་ཆེ་བ་མ་ཡིན་ནོ། །དགྲ་བཅོམ་པ་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །རང་སངས་རྒྱས་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །དེ་བཞིན་གཤེགས་པ་རྣམས་ལ་ཕུལ་བའི་འབྲས་བུ་ཡང་ཐ་དད་དོ། །དེ་བས་
ན་ཐམས་ཅད་དུ་སྦྱིན་པའི་འབྲས་བུ་ཆེ་བ་མ་ཡིན་ནོ། །གསོལ་པ། ཅིའི་སླད་དུ། བཅོམ་ལྡན་འདས་ཀྱིས་ཚིགས་སུ་བཅད་པ་འདིའི་དོན་རྣམ་པ་གཉིས་སུ་བཀའ་སྩལ་ལགས། བཀའ་སྩལ་པ། རྒྱུ་ལས་འགྱུར་ཏེ་སྔོན་རྒྱལ་པོའི་ཁབ་ཀྱི་དགེ་བསྙེན་དད་པ་མེད་པ་གཅེར་བུ་པ་ལ་དགའ་བ་
ཞིག་ཡོད་པ་དེས། ང་ལ་སྦྱིན་པ་བྱས་པ་ཅིར་འགྱུར་བ་དྲིས་པ་དེའི་ཚེ། དེ་དྲང་བའི་ཕྱིར་སྦྱིན་པ་ཀུན་ཏུ་བསྔགས་པ་ཡིན་ཞེས་བྱ་བའི་ཚིགས་སུ་བཅད་པ་དེ་དེ་ལ་བསྟན་ཏོ། །དེ་ནི་བྱང་ཆུབ་སེམས་དཔའ་རྣམས་ཀྱི་དོན་དུ་ཚིགས་སུ་བཅད་པའི་དོན་དགོངས་པའི་ཚིག་ཏུ་བསྟན་ཏེ། དུས་ཐམས་
ཅད་དུ་ཚིགས་སུ་བཅད་པའི་དོན་འདྲ་བར་བསྟན་པ་མ་ཡིན་ནོ། །ཐམས་ཅད་ཅེས་བྱ་བ་ནི་སྐབས་དང་སྦྱར་ཏེ་ཚིག་གི་ལྷག་མ་ཡོད་པར་རིག་པར་བྱའོ། །བྱང་ཆུབ་སེམས་དཔའ་མི་མཆོག་གིས་ནི། ཚུལ་ཁྲིམས་འཆལ་བ་རྣམས་ཞིང་གི་ངོ་བཞིན་དུ་ཚར་གཅད་པར་བྱའོ། །རིགས་ཀྱི་བུ་གཞན་
ཡང་ངས་སྔོན་ཚིགས་སུ་བཅད་པ་འདི་བསྟན་ཏེ། འདི་ལྟ་སྟེ། ཆུ་ཀླུང་ཆུ་ཀུན་གྱ་གྱུར་འབབ། །ནགས་ཚལ་ཀུན་ནི་ཤིང་ཉིད་ཡིན། །བུད་མེད་ཀུན་ལ་གཡོ་སྒྱུ་ཡོད། །དབང་ཕྱུག་ཐམས་ཅད་བདེ་བ་ཡིན། །བུད་མེད་རྣམས་ཀྱི་སེམས་ནི་གཡོ་སྒྱུ་ཅན་དང་འཇིགས་སུ་རུང་བ་ཡིན་ནོ། །
དེ་བས་ན་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་སླར་ཚིགས་སུ་བཅད་དེ་གསོལ་པ། ཆུ་ཀུན་གྱ་གྱུར་འབབ་མ་ལགས། །ནགས་ཚལ་ཀུན་ཀྱང་ཤིང་མ་ལགས། །བུད་མེད་ཀུན་ལའང་
གཡོ་མ་མཆིས། །དབང་ཕྱུག་ཀུན་ཀྱང་བདེ་མ་ལགས། །དེ་བས་ན་བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་དེ་ནི་ལེགས་པར་བཀའ་སྩལ་པ་མ་ལགས་ཏེ། འདི་ལ་རྒྱུ་ཅི་མཆིས་པ་བཀའ་སྩལ་འཚལ་ལགས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་

འདི་ན་གླིང་ཐ་དད་པ་ནུབ་ཀྱི་བ་ལང་སྤྱོད་ཅེས་བགྱི་བ་མཆིས་ཏེ། དེ་ན་ཆུ་ཀླུང་གི་མིང་དྲང་པོར་འབབ་ཅེས་བགྱི་བ་ཤིང་མཁན་གྱི་ཐིག་སྐུད་བཞིན་དུ་ནུབ་ཕྱོགས་ཀྱི་རྒྱ་མཚོ་ནས་ཤར་ཕྱོགས་ཀྱི་རྒྱ་མཚོར་དྲང་པོར་འབབ་པ་ཞིག་མཆིས་ལ། ཐམས་ཅད་ཅེས་བགྱི་བ་ནི་
ཤིན་ཏུ་རྒྱས་པའི་ལུང་ལས་ལྷག་མ་ཡོད་པའི་དོན་ལགས་པར་བཅོམ་ལྡན་འདས་ཀྱིས་བཀའ་སྩལ་ན་ཆུ་ཀླུང་དྲང་པོར་འབབ་ཅེས་བགྱི་བ་དེ་ཤིན་ཏུ་རྒྱས་པའི་ལུང་གི་མདོ་གང་ལས་བཤད་པ་བཅོམ་ལྡན་འདས་བདེན་པ་གསུང་བས་བཀའ་སྩལ་དུ་གསོལ། དཔེར་ན། ནོར་གྱི་འབྱུང་ཁུང་གི་རྒྱུས་
མཁན་འབྱུང་ཁུང་ལ་མི་མཁས་པ་ཞིག་གིས། དེ་ཁོ་ན་ན་གསེར་མཆིས་བཞིན་དུ་འདི་ནི་གསེར་མ་མཆིས་སོ་ཞེས་མཆི་བས་ནི་གནས་ཀྱི་ཕྱོགས་ཆའི་བྱེ་བྲག་ཙམ་ཉི་ཚེ་ཤེས་པར་བགྱི་འཚལ་ལགས་སོ། །ནགས་ཚལ་ཀུན་ནི་ཤིང་ཉིད་ཡིན་ཞེས་བགྱི་བ་ནི་ལྷག་མ་ཡོད་པའི་དོན་ལགས་ལ།
ནགས་ཚལ་ནི་རྣམ་པ་མང་དུ་མཆིས་ཏེ། འདི་ལྟ་སྟེ། གསེར་དང་བཻ་དཱུརྱའི་ནགས་ཚལ་ཡང་མཆིས་ལགས་སོ། །དེ་བཞིན་དུ་བུད་མེད་ཀུན་ལ་གཡོ་སྒྱུ་ཡོད་ཅེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཏེ། བུད་མེད་ལ་ཡང་ཚུལ་ཁྲིམས་དང་ལྡན་པ་དང་། འདོད་ཆགས་དང་བྲལ་
བ་དང་། སེར་སྣ་མ་མཆིས་པ་དུ་མ་མཆིས་ལགས་སོ། །དབང་ཕྱུག་ཐམས་ཅད་བདེ་བ་ཡིན་ཞེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཏེ། དབང་ཕྱུག་ཅེས་བགྱི་བ་ནི་འཁོར་ལོས་སྒྱུར་བའི་རྒྱལ་པོ་དང་། སངས་རྒྱས་རྣམས་དབང་ཕྱུག་གི་མཆོག་ལགས་མོད་ཀྱི། དེ་དག་ཀྱང་
འཆི་འཕོའི་དབང་དུ་འགྱུར་ཞིང་ཟད་པའི་ཆོས་ཅན་ལགས་ལ། ཚངས་པའི་དབང་ཕྱུག་འདི་དག་ཀྱང་ལྟུང་བའི་ཆོས་ཅན་ལགས་ཏེ། དེ་བས་ན་དེ་དག་ནི་དབང་ཕྱུག་མ་ལགས་ཞེས་བདག་མཆིས་ལགས་སོ། །རྟག་པ་དང་བརྟན་པའི་དབང་ཕྱུག་གང་ལགས་པ་དེ་ནི་མྱ་ངན་ལས་འདས་པ་
མཆོག་ཏུ་བདེ་བའི་དབང་ཕྱུག་ལགས་སོ། །བཀའ་སྩལ་པ། འཇམ་དཔལ་དཔེར་ན་སྨན་པ་ཞིག་གིས་ཁྱིམ་བདག་གི་བུ་ཞིག་གི་ནད་གསོ་བར་བྱེད་དེ། སྨན་མར་བསྐོལ་ནས་དེ་འཐུང་དུ་བཅུག་པ་ན་ནད་པ་དེ་མར་མང་དུ་འཐུང་བར་སྩོལ་ལོ། །དེ་ནས་སྨན་པ་དེས་དེ་ལ་སྨྲས་པ། ཉམ་སྟོབས་

དང་ལྡན་པས་ནི་མར་མང་དུ་བཏུང་བར་བརྩལ་ཀྱང་། དེས་འཇུ་བར་ནུས་ཀྱི་ཁྱོད་ནི་ཉམ་སྟོབས་མེད་པས་མར་ཧ་ཅང་མང་དུ་མ་འཐུང་ཤིག །མར་ནི་ནད་སེལ་བ་ཡང་ཡིན་མོད་ཀྱི་མང་དུ་འཐུངས་ན། དེ་ཉིད་ཀྱིས་ཁྱོད་ཡེ་འདྲོག་ཏུ་འཆི་བར་འགྱུར་རོ་ཞེས་བྱས་ན། ཅི་སྨན་པ་ཕན་པར་
འདོད་ཅིང་སྙིང་བརྩེ་བ་དེས་ཡང་དག་པའི་དོན་དེ་མ་རུང་བར་བྱས་པ་ཡིན་ནམ། དེ་བཞིན་དུ་སངས་རྒྱས་བཅོམ་ལྡན་འདས་ཀྱིས་ཀྱང་། རྒྱལ་པོ་དང་། བློན་པོ་དང་། བཙུན་མོ་རྣམས་ཀྱི་ང་རྒྱལ་བསལ་བ་དང་། ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོ་རྣམས་གཞན་དང་གཡེམ་པ་
ལ་འཇིགས་པ་དང་། སྐྱོ་བ་སྐྱེད་པའི་ཕྱིར་སྨན་པ་བཞིན་དུ་དེ་བཞིན་གཤེགས་པས་རྒྱལ་པོ་གསལ་རྒྱལ་ལས་བརྩམས་ནས། ཆུ་ཀླུང་ཆུ་ནི་གྱ་གྱུར་འབབ་ཅེས་ཚིགས་སུ་བཅད་པ་འདི་བཀའ་སྩལ་ཏེ། །ཆུ་ཀླུང་གྱ་གྱུར་འབབ་ཅེས་བྱ་བ་ལ་དེ་བཞིན་གཤེགས་པ་འཁྲུལ་པ་མེད་དོ། །
གང་གི་ཚེ་འཁྲུལ་པ་ཞིག་ཏུ་གྱུར་ན་གནམ་ས་ལོག་པར་འགྱུར་རོ། །དེ་བས་ན་ཐམས་ཅད་སྨོས་ཏེ་གསུངས་པ་ནི། ལྷག་མ་ཡོད་པ་ཡང་ལྷག་མ་མེད་པ་དང་འདྲ་བར་གསུངས་སོ། །འཇམ་དཔལ་བྱང་ཆུབ་སེམས་དཔའི་ཁྱུ་མཆོག་དམ་པ་ཁྱོད་ཀྱིས་སེམས་ཅན་ཐམས་ཅད་ལ་ཕན་པའི་
ཕྱིར། ཤེས་རབ་རྒྱས་པར་བྱ་བ་འདི་ལེགས་སོ་ལེགས་སོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཡང་ཚིགས་སུ་བཅད་དེ་གསོལ་པ། བདག་གིས་བྱས་དང་མ་བྱས་རྣམས། །བརྟག་པར་བྱ་ཡི་གཞན་དག་གི། །བྱས་དང་མ་བྱས་རྣམས་དང་ནི། །གཞན་གྱི་
མི་འཐུན་བརྟག་མི་བྱ། །ཞེས་བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི་ལེགས་པར་བཀའ་སྩལ་པ་མ་ལགས་ཏེ། འདི་ལ་ཅིའི་སླད་དུ། དེ་སྐད་ཅེས་བཀའ་སྩལ་པའི་རྒྱུ་བཀའ་སྩལ་འཚལ་ལགས་སོ། །བཅོམ་ལྡན་འདས་ཀྱིས་གསུང་རབ་ཡན་
ལག་དགུ་ལས་འདི་ན་གཅེར་བུ་པ་སེམས་ཅན་དམྱལ་བ་ཐམས་ཅད་དང་། ཡ་མཚན་ཅན་དགུ་བཅུ་རྩ་དྲུག་པོ་རྣམས་ལ་ནི་ལམ་ངན་པར་ཞུགས་པ་ཡིན་ནོ། །སངས་རྒྱས་ཀྱི་སྲས་ཐམས་ཅད་ནི་མྱ་ངན་ལས་འདས་པ་ལ་ཞུགས་པ་ཡིན་ནོ། །དྲང་པོ་དང་། ཚུལ་ཁྲིམས་དང་། ཆོ་ག་དང་

ལྡན་པ་དང་། དབང་པོ་ཐུལ་བ་གང་ཡིན་པ་དེ་དག་ཐམས་ཅད་ནི་མཐོ་རིས་སུ་འགྲོ་བ་དང་། ཆོས་ཀྱི་སྤྱོད་ཡུལ་ཅན་ཡིན་ནོ་ཞེས་བདག་བསྟོད་པ་དང་། གཞན་སྨོད་པ་དང་། གཞན་བཤུང་བ་བཀའ་སྩལ་ཏེ། བཅོམ་ལྡན་འདས་ཀྱིས་དེ་ལྟར་གཞན་དང་མི་
འཐུན་པ་རྣམས་ཀྱང་བཀའ་སྩལ་ལ། གཞན་དག་དང་མི་འཐུན་པ་ཞེས་བགྱི་བ་ཡང་མ་ལགས་པ་དེ་ཅི་ལྟ་བུ་ལགས། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ངས་གཞན་གྱི་མི་འཐུན་བརྟག་མི་བྱ། །ཞེས་བསྟན་
པ་དེ་གང་ལས་ནི་བརྩམས་ཅིའི་ཕྱིར་ནི་བསྟན་ཅེ་ན། མ་སྐྱེས་དགྲ་ལས་བརྩམས་ནས་བསྟན་པ་ཡིན་ཏེ། སངས་རྒྱས་བཅོམ་ལྡན་འདས་ནི་རྒྱུ་མེད་པར་དོན་དང་འགལ་བ་སྟོན་པར་མི་མཛད་ཀྱི་རྒྱུ་དང་བཅས་པར་སྟོན་པར་མཛད་དེ། སྔོན་མ་སྐྱེས་དགྲས་ཕ་བསད་ནས་ངའི་ཐད་དུ་འོངས་ནས།
འདི་ལྟར་བརྙས་ཐབས་སུ་དྲི་བ་དྲིས་ཏེ་ཅི་ལགས། བཅོམ་ལྡན་འདས་ཐམས་ཅད་མཁྱེན་པ་ལགས་སམ། འོན་ཏེ་ཐམས་ཅད་མཁྱེན་པ་མ་ལགས། གལ་ཏེ་ཐམས་ཅད་མཁྱེན་པ་ལགས་ན། ཅིའི་སླད་དུ་ལྷ་སྦྱིན་རབ་ཏུ་ཕྱུང་ལགས། དེ་ཚེ་རབས་སྟོང་ཕྲག་མང་པོར་ཕྱི་བཞིན་འབྲང་ཞིང་
གནོད་པ་བགྱིད་པར་གཟིགས་ན། ད་ལྟར་ཡང་རྒོལ་དུ་འོང་བར་ཐམས་ཅད་མཁྱེན་པ་ཁྱོད་ཀྱིས་ཇི་ལྟར་མ་གཟིགས་ཞེས་ཟེར་ནས་ངས་དེ་ལ་འདི་སྐད་དུ། གཞན་དང་མི་འཐུན་བརྟག་མི་བྱ། །ཞེས་བྱ་བའི་ཚིགས་སུ་བཅད་པ་བསྟན་ཏོ། །ད་ནི་རྒྱལ་པོ་ཆེན་པོ་ཁྱོད་བདག་གིས་ཕ་བསད་
དེ་མཚམས་མེད་པའི་ལས་ཀྱི་རབ་དུག་ཆེན་པོ་བྱས་པ་དེ་སྦྱང་བར་གྱིས་ཤིག །རྒྱལ་པོ་གཞན་གྱི་ཉེས་པ་ལ་མ་རྟོག་པར་དེ་ལྟ་བུ་ཁོང་དུ་ཆུད་པར་གྱིས་ཤིག་ཅེས་བྱས་སོ། །གཞན་ཡང་མི་འཐུན་པ་བརྟག་པར་ཡང་བྱ་སྟེ། ཚུལ་ཁྲིམས་དང་ཆོ་ག་ལ་བརྟེན་པ་གང་ཡིན་པ་དེ་དག་གི་
སྐྱོན་བརྟག་པ་ལྷུར་བླང་བར་བྱ་སྟེ། དེ་ནི་སངས་རྒྱས་ཀྱི་བསྟན་པ་ཡིན་ནོ། །གཞན་གྱི་མི་འཐུན་པ་ལ་རྟོག་པ་རྣམས་ཀྱིས་ནི་བདག་དང་གཞན་དག་གི་བྱས་པ་དང་མ་བྱས་པ་ནི། བདག་དང་གཞན་དག་གི་ཡིན་པར་ཤེས་པར་བྱའོ། །དེ་ལྟ་བུའི་ཚུལ་གྱིས་གཞན་གྱིས་བྱས་པ་རྟག་ཏུ་

ཡང་དག་པར་མཐོང་བ་གང་ཡིན་པ་དེ་དག་ནི་ངའི་ཉན་ཐོས་ཡིན་ནོ་ཞེས་ང་ཟེར་རོ། །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །ཆད་པ་དག་གིས་ཐམས་ཅད་སྐྲག །ཀུན་ལ་སྲོག་ནི་ཕངས་པ་ཡིན། །བདག་
གི་ཉམས་ལས་དཔག་བྱ་ཞིང་། །བརྡེག་པར་མི་བྱ་གསད་མི་བྱ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །ཆད་པས་ཐམས་ཅད་སྐྲག་མི་འགྱུར། །སྲོག་ཀྱང་ཀུན་ལ་ཕངས་མ་ལགས། །བདག་གི་ཉམས་ལས་
དཔག་བགྱི་ཞིང་། །ཐབས་ཀྱིས་བགྱི་བ་རྟོགས་པར་བགྱི། །དེ་བས་ན་བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི་ལེགས་པར་བཀའ་སྩལ་པ་མ་ལགས་ཏེ། དགྲ་བཅོམ་དང་ནི་འཁོར་ལོས་སྒྱུར། །གླང་ཆེན་བུད་མེད་རིན་ཆེན་དང་། །ཁྱིམ་བདག་
རིན་ཆེན་རྟ་རྣམས་ནི། །གནོད་པ་ཅིས་ཀྱང་མི་ཚུགས་སོ། །འདི་རྣམས་ལ་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ན་སུས་ཀྱང་གནོད་པ་བགྱིད་པའི་རྔོ་མི་ཐོགས་ཏེ། དགྲ་དྲག་ཤུལ་གྱི་སྟོབས་ཅན་རྣམས་ཀྱིས་ཀྱང་། དེ་དག་ལ་གནོད་པས་ཚུགས་མི་
སྲིད་ལགས་སོ། །དེ་དག་ནི་ལྷ་དང་། བདུད་དང་། ཚངས་པ་རྣམས་ཀྱིས་ཀྱང་མི་འཇིགས་ལགས་སོ། །དེ་བས་ན་སེམས་ཅན་དེ་དག་ནི་ཅིས་ཀྱང་མི་ཚུགས་པ་ཞེས་བགྱི་ལགས་སོ། །གཡུལ་ངོར་གཅིག་ཏུ་དཔའ་བ་དང་། གཅིག་ཏུ་ཁྱིམ་ཐབ་ལ་མི་འཁྲུལ་བའི་ཆུང་མ་
དང་། སེང་གེ་དང་། སིན་དུ་པའི་རྟ་ཅང་ཤེས་དང་། དགེ་སློང་ཚུལ་ཁྲིམས་དང་ལྡན་པ་འདི་རྣམས་ནི་གནོད་པས་ཚུགས་པ་ལགས་ཀྱིས་ཀྱང་ཅིས་ཀྱང་མི་འཇིགས་ལགས་སོ། །དེ་ལ་ཆད་པ་དག་གིས་ཐམས་ཅད་སྐྲག་ཅེས་བགྱི་བ་ནི། འདིར་ལྷག་མ་ཡོད་པའི་དོན་ལགས་
པས་ན་མདོར་བསྡུས་པ་ལགས་སོ། །བདག་གི་ཉམས་ལས་དཔག་བྱ་ཞིང་། ཞེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཏེ། དགྲ་བཅོམ་པ་རྣམས་ནི་བདག་དང་མི་མཉམ་མོ། །ཞེས་དེ་ལྟར་འཇིག་རྟེན་དུ་གྲགས་ལགས་སོ། །གལ་ཏེ་དགྲ་བཅོམ་པ་རྣམས་ཀྱི་བདག་ཏུ་འདུ་

ཤེས་པ་དང་། དགྲ་བཅོམ་པ་རྣམས་ཀྱི་སྲོག་ཏུ་འདུ་ཤེས་པ་གསུངས་པ་ལགས་སོ་ཞེས་དེ་ལྟ་བུའི་བློ་ཆུང་ངུ་རྣམས་ཀྱིས་ནི་དགྲ་བཅོམ་པ་གནས་ངན་པར་བཞག་པ་ལགས་ཏེ། དེ་ལྟར་བགྱིས་པས་སྲོག་ཏུ་འདུ་ཤེས་པའི་ལྟ་བ་ངན་པས་རྨོངས་པའི་འབྲས་བུས་མྱུར་
དུ་མནར་མེད་པར་སྐྱེ་བར་འགྱུར་ལགས་སོ། །གཅིག་ཏུ་ན་གལ་ཏེ་དགྲ་བཅོམ་པ་རྣམས་གསད་པའི་སེམས་བསྐྱེད་དུ་ལགས་ཀྱང་། སེམས་ཅན་དེ་དག་གིས་གསོད་པར་འགྱུར་མི་སྲིད་དེ། སེམས་ཅན་མང་པོ་ལོག་ཀྱང་དེ་དག་གསོད་པའི་རྔོ་མི་ཐོགས་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། སྲོག་ཆགས་རྣམས་ལ་སྙིང་བརྩེ་བའི་ཕྱིར་བདག་དང་འདྲ་བར་བལྟའོ། །དགྲ་བཅོམ་པ་ནི་འཚེ་བ་མེད་པའི་སྒོ་ནས་དཔག་ཏུ་མེད་པ་དང་། མཚུངས་པ་མེད་པར་བལྟ་བར་བྱ་སྟེ། དེ་དག་ལ་གསད་པའི་སེམས་བསྐྱེད་པར་མི་བྱའོ། །དེ་ལྟར་ན་སངས་
རྒྱས་ནི་རྒྱུ་མེད་པར་དོན་དང་འགལ་བ་མི་སྟོན་ཏེ། ཚིགས་སུ་བཅད་པ་འདི་ནི་རྒྱལ་པོའི་ཁབ་ཀྱི་རི་དགས་ཀྱི་རྔོན་པ་ལས་བརྩམས་ནས་བསྟན་ཏེ། དེས་རི་དགས་བསད་ནས་ཤ་དང་ལྡན་པའི་ཟས་ཀྱི་སྦྱིན་པ་ལ་ང་སྤྱན་དྲངས་ནས། ངས་ཀྱང་དེས་སྤྱན་དྲངས་པ་ལ་གནང་ནས། སྒྲ་གཅན་ཟིན་
དང་འདྲ་བར་ལྟ་བའི་ཚུལ་གྱིས་ཚིགས་སུ་བཅད་པ་འདི་སྐད་ཅེས་བྱས་སོ། །ཆད་པ་དག་གིས་ཐམས་ཅད་སྐྲག །ཀུན་ལ་སྲོག་ནི་ཕངས་པ་ཡིན། །བདག་གི་ཉམས་ལས་དཔག་བྱ་ཞིང་། །བརྡེག་པར་མི་བྱ་གསད་མི་བྱ། །མིག་རྒྱང་རིང་དུ་ལྟོས་ལ་རིང་དུ་འཚོ་བར་གྱིས་ཤིག །
འཚེ་བ་མེད་པའི་རྟགས་ཀྱི་དོན་ཁོང་དུ་ཆུད་པར་གྱིས་ཤིག །བྱང་ཆུབ་སེམས་དཔའ་རྣམས་ཀྱི་ནང་ན་མིའི་ཁྱུ་མཆོག་འཇམ་དཔལ་ལེགས་སོ་ལེགས་སོ། །སེམས་ཅན་ཐམས་ཅད་ལ་ཕན་པའི་ཕྱིར་དགོངས་པའི་ཚིག་འདི་དྲིས་པ་དེ་ནི་ལེགས་སོ། །དེ་ནས་བཅོམ་ལྡན་འདས་ལ་འཇམ་
དཔལ་གཞོན་ནུར་གྱུར་པས་ཚིགས་སུ་བཅད་དེ་འདི་སྐད་ཅེས་གསོལ་ཏོ། །མ་ལ་མཆོད་པའི་ཚུལ་གྱིས་ནི། །ཕ་མ་གཉིས་ལ་མཆོད་བགྱིས་ན། །བླ་མ་ལ་ཡང་གུས་གྱུར་ལ། །མནར་མེད་འཇིགས་པར་ཇི་ལྟར་མཆི། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་འདི་

སྐད་ཅེས་བཀའ་སྩལ་ཏོ། །འདིར་ནི་སྲེད་པ་མ་ཞེས་བྱ། །གཏི་མུག་ལ་ནི་ཕ་ཞེས་བྱ། །ཆོས་འདི་གཉིས་ལ་གང་མཆོད་པ། །དེ་ནི་མནར་མེད་འཇིགས་པར་འགྲོ། །དེ་ནས་བཅོམ་ལྡན་འདས་ཀྱིས་ཡང་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པ་འདི་སྐད་
ཅེས་བཀའ་སྩལ་ཏོ། །གཞན་གྱི་དབང་གྱུར་ཐམས་ཅད་སྡུག །རང་དབང་ཅན་ནི་ཐམས་ཅད་བདེ། །ང་རྒྱལ་དབང་གྱུར་ཀུན་མི་ཟད། །དགའ་བ་ཐམས་ཅད་བཟང་བ་ཡིན། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །
བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི་ལེགས་པར་བཀའ་སྩལ་པ་མ་ལགས་ཏེ། འདི་ན་ཁྱིམ་བདག་ལ་ལ་ཞིག་གིས་བདག་གི་བུ་བྱིས་པའི་སློབ་དཔོན་ལ་གཏད་ན་ཅི་ལགས། ཁྱེའུ་དེ་གཞན་གྱི་དབང་དུ་གྱུར་པ་ཞེས་མི་བགྱི་ལགས་སམ། དེ་ལ་གཞན་གྱི་
དབང་དུ་གྱུར་པ་མ་ལགས་སོ་ཞེས་བགྱིས་ན་ཡང་དོན་དང་འགལ་བར་འགྱུར་ལ་དེ་ལ་རང་དབང་ཅན་ལགས་སོ་ཞེས་བགྱིས་ན་ཡང་དོན་དང་འགལ་བར་འགྱུར་ཏེ། ཆོས་འདི་ནི་ཤིན་ཏུ་བརྟག་དཀའ་བ་ལགས་སོ། །འདི་ན་རྒྱལ་པོའི་བུ་ལ་ལ་བཅོས་སུ་མི་རུང་བར་གྱུར་ཏེ། དེ་ཅི་
ཡང་སློབ་མི་འཚལ་ནས་རང་དགའ་དང་རང་ཉམ་དུ་འཁྱམ་པ་དེ་ལ་རང་དབང་ཅན་ཞེས་བགྱིས་ན་ནི་དོན་དང་ཚབས་ཆེར་འགལ་བར་འགྱུར་ལ་གཞན་གྱི་དབང་དུ་གྱུར་ཏོ་ཞེས་བགྱིས་ན་ནི་དོན་དང་འགལ་བར་མི་འགྱུར་ཏེ། ཆོས་འདི་ནི་ཤིན་ཏུ་བརྟག་དཀའ་བ་ལགས་སོ། །གཞན་ཡང་
དབང་དུ་གྱུར་ཅེས་བགྱི་བའི་ཚིག་བླ་དགས་ནི་དེ་རང་དབང་དུ་གྱུར་ན་སྡིག་པ་བགྱིད་པ་དང་། འགུམ་པར་འགྱུར་བས་ན། བཀའ་སྩལ་པ་འདི་ནི་ལྷག་མ་ཡོད་པའི་དོན་ལགས་ཏེ། དེ་བས་ན་གཞན་གྱི་དབང་དུ་གྱུར་པ་ཐམས་ཅད་སྡུག་པ་ཡང་མ་ལགས་ལ། རང་དབང་ཅན་ཐམས་
ཅད་བདེ་བ་ཡང་མ་ལགས་སོ། །ང་རྒྱལ་དབང་གྱུར་ཀུན་མི་ཟད། །ཅེས་བགྱི་བ་དེ་ཡང་ལྷག་མ་ཡོད་པའི་དོན་ལགས་ཀྱི་ང་རྒྱལ་གྱི་དབང་དུ་གྱུར་པ་ཀུན་མི་ཟད་པ་ཡང་མ་ལགས་ཏེ། འདི་ན་ལ་ལ་ཞིག་ང་རྒྱལ་གྱི་དབང་གིས་རབ་ཏུ་བྱུང་ན་ཅི་ལགས། རབ་ཏུ་བྱུང་བ་དེ་ལ་ང་རྒྱལ་གྱི་

དབང་དུ་གྱུར་པ་ཀུན་མི་ཟད་ཅེས་བགྱི་ལགས་སམ། དེ་ནི་ང་རྒྱལ་མ་མཆིས་པ་དང་། བསོད་ནམས་དང་ལྡན་པ་དང་། ཚུལ་ཁྲིམས་དང་ཆོ་ག་དང་ལྡན་པ་དང་། དབང་པོ་བསྲུངས་པ་ལགས་ཏེ། དེ་བས་ན་ང་རྒྱལ་གྱི་དབང་དུ་གྱུར་པ་ཀུན་མི་ཟད་པ་ཡང་མ་ལགས་སོ། །
དགའ་བ་ཐམས་ཅད་བཟང་བ་ཡིན། །ཞེས་བགྱི་བ་དེ་ཡང་ལྷག་པ་ཡོད་པའི་དོན་ལགས་ཀྱི་དགའ་བ་ཐམས་ཅད་ཀྱང་བཟང་བ་མ་ལགས་ཏེ། བསྟན་པ་འདི་ལ་ཕམ་པ་བྱུང་བ་རྣམས་གོས་ཚོན་ཅན་གྱི་རྟགས་ཅན་རྣམས་དང་ལྷན་ཅིག་འཁོད་པ་བདག་ཉིད་ཀྱིས་རུང་བར་མཐོང་ཡང་སེམས་ཅན་དམྱལ་བ་
རྣམས་སུ་སྐྱེ་བར་འགྱུར་ཏེ། དེ་ལྟ་བུ་དག་ལ་བཟང་ཞེས་བགྱིས་ན་དོན་དང་འགལ་བར་འགྱུར་ལགས་སོ། །ཕམ་པ་བྱེད་བྱེད་པ་དེ་དག་གོས་དཀར་པོ་གྱོན་དུ་འཇུག་པ་དེ་དག་ནི་བཟང་པོའི་མཆོག་དོན་རྒྱ་ཆེན་པོ་བགྱིས་པ་ལགས་སོ། །ཕམ་པ་བགྱིས་པ་རྣམས་ནི་མི་བཟང་བ་ཞེས་བགྱི་སྟེ།
དེ་དག་ཕུང་བར་བགྱིད་པ་དེ་དག་ནི་མི་བཟང་བ་ཞེས་བགྱིའོ། །དེ་བས་ན་དགའ་བ་ཐམས་ཅད་བཟང་བ་མ་ལགས་ན་ལྷའི་ཡང་ལྷ་སངས་རྒྱས་དེ་བཞིན་གཤེགས་པས་ཅི་ལས་དགོངས་ཏེ། དེ་སྐད་ཅེས་བཀའ་སྩལ་ལགས། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་
འདི་སྐད་ཅེས་བཀའ་སྩལ་ཏོ། །སངས་རྒྱས་ནི་རྒྱུ་མེད་པའི་དོན་དང་འགལ་བར་མི་གསུང་གི་རྒྱུ་དང་བཅས་རྐྱེན་དང་བཅས་པར་གསུང་སྟེ། རྒྱལ་པོའི་ཁབ་ན་ཁྱིམ་བདག་ཀོ་ཏ་ཀའི་བུ་མོ་རབ་བཟང་ཕའི་ཁྱིམ་དུ་སོང་ནས་རབ་ཏུ་འབྱུང་བའི་སེམས་སྐྱེས་ཏེ། དེ་བཞིན་གཤེགས་པའི་ཐད་དུ་སོང་
ནས་བུད་མེད་དུ་གྱུར་པ་ནི་གཞན་གྱི་དབང་དུ་གྱུར་པ་ཡིན་ལ། སྐྱེས་པར་གྱུར་པ་ནི་རང་དབང་ཅན་ཡིན་ནོ་སྙམ་དུ་བསམས་ནས། དེ་བཞིན་གཤེགས་པ་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་སོང་སྟེ། དེའི་རྟོག་པ་ཐུགས་སུ་ཆུད་ནས་བཅོམ་ལྡན་འདས་ཀྱིས་གཞན་
གྱི་དབང་གྱུར་ཐམས་ཅད་སྡུག །ཅེས་ཚིགས་སུ་བཅད་པ་དེ་སྐད་གསུངས་སོ། །བྱང་ཆུབ་སེམས་དཔའ་རྣམས་ཀྱི་ནང་ན་མིའི་ཁྱུ་མཆོག་འཇམ་དཔལ་ལེགས་སོ་ལེགས་སོ། །སེམས་ཅན་ཐམས་ཅད་ལ་ཕན་པའི་ཕྱིར་དགོངས་པའི་ཚིག་འདི་ང་ལ་ཞུས་པ་ལེགས་སོ། །དེ་ནས་

བཅོམ་ལྡན་འདས་ཀྱིས་ཡང་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་བཀའ་སྩལ་པ། ཐམས་ཅད་ཟས་ལ་རྟེན་པ་ཡིན། །སེར་སྣ་མེད་པ་ཐམས་ཅད་གཡོ། །ཟས་ཀྱི་ཉེས་པས་ནད་དུ་འགྱུར། །ཚངས་པར་སྤྱོད་དང་འགྲོགས་ན་བདེ། །འཇམ་དཔལ་གྱིས་
གསོལ་པ། བཅོམ་ལྡན་འདས་ཅི་ལགས། ཙུན་དའི་སྦྱིན་པ་ཆེར་གསོལ་ནས་ཞལ་ཟས་ཀྱི་ཉེས་པས་བསྙེངས་ལགས་སམ། དེ་ནས་བཅོམ་ལྡན་འདས་ཀྱིས་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །སེམས་ཅན་ཐམས་ཅད་ཀྱང་ཟས་ལ་རྟེན་པ་མ་ཡིན་ནོ། །སེར་སྣ་
མེད་པ་ཐམས་ཅད་ཀྱང་གཡོ་བ་མ་ཡིན་ནོ། །ཐམས་ཅད་ལ་ཡང་ཟས་ཀྱི་ཉེས་པས་ནད་དུ་འགྱུར་བ་མ་ཡིན་ནོ། །ཆོས་སྤྱོད་པ་རྣམས་དང་འགྲོགས་སོ་ཅོག་ཀྱང་བདེ་བ་མ་ཡིན་ནོ། །འཇམ་དཔལ་གང་གི་ཚེ་ཁྱོད་ནད་ཀྱིས་ཐེབས་པ་དེའི་ཚེ་ང་ཡང་ནད་ཀྱིས་ཐེབས་སོ། །དགྲ་བཅོམ་
དང་ནི་རང་སངས་རྒྱས། །བྱང་ཆུབ་སེམས་དཔའ་དེ་བཞིན་གཤེགས། །དེ་དག་རྟག་ཏུ་ཟས་མེད་དེ། །དེ་ནི་སངས་རྒྱས་ཆོས་ཉིད་དོ། །དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་རྣམས་ནི་ཞལ་
ཟས་ཀྱང་མི་གསོལ་ལ་སྦྱིན་པ་འབུམ་ཕྲག་མང་པོ་ཡང་བཞེས་པར་མཛད་དོ། །སྦྱིན་པ་བླང་བར་བྱ་བའི་གདམས་ངག་ཀྱང་སྟོན་པར་མཛད་དོ། །སེམས་ཅན་རྣམས་སེམས་ཅན་དམྱལ་བ་དང་། །དུད་འགྲོ་དང་། ཡི་དགས་ཀྱི་རྒྱ་མཚོ་ལས་ངེས་པར་བསྒྲལ་བའི་ཕྱིར་སྦྱིན་པའི་ཕ་རོལ་ཏུ་ཕྱིན་
པ་བསྔགས་པར་ཡང་མཛད་ལ་གསོལ་བར་ཡང་མི་མཛད་དོ། །དེ་བཞིན་གཤེགས་པ་ལོ་དྲུག་གི་བར་དུ་དཀའ་བ་སྤྱད་པས་ཉམ་ཆུང་བར་གྱུར་ཏོ། །ཞེས་སངས་རྒྱས་ལ་སེམས་ཅན་ཐམས་ཅད་དང་འདྲ་བར་བལྟ་བར་མི་བྱའོ། །འདོད་པའི་ཆུ་བོ་ལས་རྒལ་བ་དེ་དག་ནི་བརྟན་པོ་ཡིན་ཏེ་དཔའ་
བོ་དེ་དག་ནི་མིའི་ཡུལ་ལ་སྤྱོད་པ་མ་ཡིན་ནོ། །དེ་བཞིན་དུ་ངའི་ཉན་ཐོས་རྣམས་ཀྱི་སྟོབས་དང་སྤྱོད་ཡུལ་ཡང་བསམ་གྱིས་མི་ཁྱབ་པོ། །སེམས་ཅན་ཐམས་ཅད་ཟས་ལ་རྟེན། །ཅེས་བྱ་བ་ཡང་ལྷག་མ་ཡོད་པའི་དོན་ཡིན་པར་ཤེས་པར་བྱའོ། །སེར་སྣ་མེད་པ་ཐམས་ཅད་གཡོ་བ་ཡིན་ཞེས་བྱ་བ་

དེ་ཡང་ལྷག་མ་ཡོད་པའི་དོན་ཡིན་ཏེ་བདག་ལ་སེར་སྣ་བྱེད་པ་མི་གཡོ་བའི་བདེ་བར་འགྲོ་བ་དམ་པ་འགའ་ཡང་ཡོད་དོ། །ཐམས་ཅད་ཟས་ཀྱི་ཉེས་པས་ནད་དུ་འགྱུར་ཞེས་བྱ་བ་དེ་ཡང་ལྷག་མ་ཡོད་པའི་དོན་ཡིན་ཏེ་ཚེར་མས་ཟུག་པ་ལ་སོགས་པའི་ནད་གློ་བུར་དག་ཀྱང་ཡོད་དོ། །
ཆོས་སྤྱོད་པ་རྣམས་དང་འགྲོགས་པ་ཐམས་ཅད་བདེ་ཞེས་བྱ་བ་དེ་ཡང་ལྷག་མ་ཡོད་པའི་དོན་ཡིན་ཏེ། འཇིག་རྟེན་པ་རྣམས་ལ་ཡང་ཆོས་འཛིན་པ་རྣམས་དང་འཚམ་པའི་ཆོས་རྣམ་པ་མང་པོ་དག་ཡོད་དེ་དེ་དག་ལ་ཡང་བྱ་བ་སྣ་ཚོགས་ཡོད་མོད་ཀྱི་སྨྱུང་བ་རྣམ་པ་སྣ་ཚོགས་ཅན་ལུས་ཉོན་མོངས་
པ་དེ་དག་དང་གལ་ཏེ་ལ་ལ་ཞིག་འགྲོགས་པར་གྱུར་ན་ཅི་བདེ་བ་ལ་སྟེན་པར་འགྱུར་རམ། དེ་ལྟ་ན་ནི་དོན་དང་འགལ་བར་འགྱུར་རོ། །དེ་བས་ན་སངས་རྒྱས་ནི་རྒྱུ་མེད་པར་དོན་དང་འགལ་བ་སྟོན་པར་མི་མཛད་དེ་གདུལ་བར་བྱ་བའི་དབང་གིས་རྒྱུ་དང་བཅས་རྐྱེན་དང་བཅས་པར་སྟོན་པར་ཤེས་པར་
གྱིས་ཤིག །འཇིག་རྟེན་ལས་འདས་པའི་ཆོས་ནི་མཆོག་ཏུ་བདེ་བ་ཡིན་ནོ། །ཚིགས་སུ་བཅད་པ་འདི་ནི་གྲོང་ཁྱེར་གྱེན་དུ་རྒྱལ་ཞེས་བྱ་བའི་བྲམ་ཟེ་ལུག་དཔལ་ཞེས་བྱ་བ་ལས་བརྩམས་ནས་བསྟན་པ་ཡིན་ཏེ། བྲམ་ཟེ་ལུག་དཔལ་ཞག་བཞི་པའི་སྨྱུང་བ་བྱེད་ཅིང་ངའི་ཐད་དུ་འོངས་ནས་ངས་
དེའི་ཞག་བཞི་པའི་སྨྱུང་བའི་ལྟ་བ་བསལ་བའི་ཕྱིར་སེམས་ཅན་ཐམས་ཅད་ཟས་ལ་རྟེན་ཅེས་བྱ་བའི་ཚིགས་སུ་བཅད་པ་འདི་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་
འདས་ཐམས་ཅད་མ་ལུས་པ་ཇི་ལྟ་བུ་ལགས། ཐམས་ཅད་ཅེས་བགྱི་བ་ཡང་ཇི་ལྟ་བུ་ལགས། བཀའ་སྩལ་པ། མ་ལུས་པའི་དོན་ནི་དགེ་བའི་ཕྱོགས་ཐམས་ཅད་རྟག་པའོ་བདེ་བའོ་ཞེས་བྱ་བ་ལྟ་བུའོ། །དེ་ལྟར་ན་ཁ་ཅིག་ནི་ལྷག་མ་ཡོད་པའོ། །ཁ་ཅིག་ནི་ལྷག་མ་མེད་པ་ཡིན་པར་
ཆོས་འདོད་པའི་རིགས་ཀྱི་བུས་རིགས་པར་བྱའོ། །གསོལ་པ། ཀྱེ་མ་དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་པ་ལགས་ཏེ་བདག་ཤིན་ཏུ་རངས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དེ་ལྟར་ཆ་ཕྲ་བར་བརྟག་

དགོས་སོ། །གསོལ་པ། བཅོམ་ལྡན་འདས་ད་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་བསོད་ནམས་ཇི་ལྟར་སྐྱེ་བ་བཀའ་སྩལ་དུ་གསོལ། བཀའ་སྩལ་པ། སངས་རྒྱས་ཀྱི་ཡུལ་འདི་ནི་བསམ་གྱིས་མི་ཁྱབ་པའི་ཕྱིར་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མདོ་
སྡེ་འདིའི་མིང་ཡང་ཚིག་ཙམ་དུ་ཡང་ཉན་པ་རྣམས་ལ་བརྗོད་པར་མི་ནུས་སོ། །དེ་ནས་བཅོམ་ལྡན་འདས་ལ་ལྷ་དང་མི་དང་ལྷ་མ་ཡིན་རྣམས་ཀྱིས་ཚིག་འཐུན་པར་ཚིགས་སུ་བཅད་དེ་གསོལ་པ། སངས་རྒྱས་བསམ་ཡས་བསམ་ཡས་ཆོས་གསུང་བ། །ཆོས་དང་དགེ་འདུན་རྟག་ཏུ་ཁྱོད་ལ་
རྟེན། །དེ་ཕྱིར་དགེ་སློང་འོད་སྲུང་ཀུན་དགའ་བོ། །མ་མཆིས་བར་དུ་མགོན་པོ་བཞུགས་པར་གསོལ། །བི་དེ་ཧ་ཡི་རྒྱལ་པོ་མ་སྐྱེས་དགྲ། །ཁྱོད་ཀྱི་མཛའ་མཆོག་ཐུགས་འདྲ་ཆེ་བ་ཡང་། །ད་དུང་མ་མཆིས་མཐར་ཐུག་ཁྱོད་མ་གཤེགས། །ཀུན་མཁྱེན་ཁྱོད་ཀྱིས་བདག་ཅག་ཐེ་
ཚོམ་ཆོད། །དེ་ནས་བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །ང་ཡི་སྲས་མཆོག་ཐུ་བོ་འོད་སྲུང་དང་། །བློ་ལྡན་ཀུན་དགའ་ཁྱོད་ཀྱི་ཐེ་ཙོམ་གཅོད། །ཁྱོད་ཀྱིས་ང་ཡི་ཞལ་ལྟོས་རྟག་པ་དང་། །མི་རྟག་ཤེས་བྱོས་མྱ་ངན་མ་བྱེད་ཅིག །དེ་ནས་འཁོར་དེ་དག་ཐམས་
ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ་བླ་ན་མེད་པ་ཡང་དག་པར་རྫོགས་པ་བྱང་ཆུབ་ཏུ་སྨོན་ལམ་བཏབ་ནས་དེར་སེམས་ཅན་གང་གཱའི་ཀླུང་གཏམས་ཕྲག་དཀྲིགས་སྙེད་ཀྱི་བྱེ་མའི་གྲངས་སྙེད་ཀྱིས་སེམས་བསྐྱེད་ནས་བྱང་ཆུབ་སེམས་དཔའི་ས་དང་པོའི་གནས་ཐོབ་བོ། །དེ་ནས་བཅོམ་ལ