Kinh tạng Tây Tạng (Kangyur Đại Học) — 054_མདོ་སྡེ།_ཐ

ད་ལགས་སོ། །བཅོམ་ལྡན་འདས་བདག་ནི་ད་གཟོད་ཡིག་རྩིས་ཀྱི་གནས་སུ་ཞུགས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །དམ་པའི་ཆོས་འདོད་པས་ནི་དེ་ལྟར་འདོད་པར་བྱ་དགོས་སོ། །རིགས་ཀྱི་བུ་དེ་ལ་ཟལ་མོ་ཞེས་བྱ་བ་ནི་རྣམ་
པ་གཉིས་ཏེ། སྡུག་བསྔལ་དང་། མི་རྟག་པ་དང་། བདག་མེད་པ་རྣམས་ཀྱི་ཟལ་མོ་རྣམས་དང་། བཞད་དང་འགྲོགས་པའི་ཟལ་མོ་རྣམས་ཏེ་དེ་ནི་བྱའི་དོན་ཏོ། །གསོལ་པ། སྡུག་བསྔལ་དང་། མི་རྟག་པ་དང་། བདག་མེད་པ་ལ་ཇི་ལྟར་ཟལ་མོ་ཞེས་བགྱི་ལགས།
བཀའ་སྩལ་པ། ཆོས་ཁ་ཅིག་ནི་མི་རྟག་ལ་ཆོས་ཁ་ཅིག་ནི་རྟག་པའི་ཕྱིར་དང་། ཆོས་ཁ་ཅིག་ནི་སྡུག་བསྔལ་ལ་ཆོས་ཁ་ཅིག་ནི་བདེ་བའི་ཕྱིར་དང་། ཆོས་ཁ་ཅིག་ནི་བདག་མེད་ལ་ཆོས་ཁ་ཅིག་ནི་བདག་ཡོད་པའི་ཕྱིར་ཏེ། དཔེར་ན་བུ་རམ་ཤིང་དང་། འབྲས་སཱ་ལུ་དང་། འབྲུ་དང་།
ཁྲེ་དང་། ཁྲེ་རྒོད་དང་། སྲན་མ་དང་། སྲན་སྡེའུ་དང་། སྲན་གྲེའུ་ལ་སོགས་པ་འབྲུའི་སྣ་གྲངས་རྣམས་མེ་ཏོག་གི་དུས་ནས་འབྲས་བུའི་དུས་ཀྱི་བར་དུ་མི་རྟག་པའི་ཁོངས་སུ་འདུས་སོ། །ཕུབ་མ་མེད་པར་གྱུར་ནས་ནི་སེམས་ཅན་ཐམས་ཅད་ལ་ཕན་འདོགས་པར་འགྱུར་ལ་

འབྲུའི་གྲངས་ཀྱི་ཁོངས་སུ་འདུས་ཏེ། དེས་ན་རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། རང་བཞིན་དུ་གྱུར་པའི་ཕྱིར་རོ། །གསོལ་པ། བཅོམ་ལྡན་འདས་ཅི་ལགས། དེ་དག་སླད་ཀྱིས་མ་མཆིས་པར་མི་འགྱུར་ལགས་སམ། དེ་དག་སླད་ཀྱིས་མ་མཆིས་
པར་མི་འགྱུར་བ་དེ་བཞིན་དུ་དེ་བཞིན་གཤེགས་པ་རྟག་པ་ཞེས་བགྱི་ལགས་སམ། བཀའ་སྩལ་པ། དེ་བཞིན་གཤེགས་པ་རི་རབ་བཞིན་ཞེས་དཔེར་བླང་མོད་ཀྱི། རིའི་རྒྱལ་པོ་རི་རབ་ཀྱང་འཇིག་པའི་བསྐལ་པས་འཇིག་པར་འགྱུར་བ་དེ་བཞིན་དུ་དེ་བཞིན་གཤེགས་པ་
ལ་ཁྱོད་དེ་ལྟར་མ་འཛིན་ཅིག །མྱ་ངན་ལས་འདས་པ་མ་གཏོགས་པར་འཇིག་རྟེན་ཐམས་ཅད་ན་འཇིག་པར་མི་འགྱུར་བ་ཅུང་ཟད་ཀྱང་མེད་ཀྱིས་འཇིག་རྟེན་དང་འཐུན་པའི་ཚུལ་གྱིས་ཀུན་རྫོབ་ཀྱི་ཐ་སྙད་ཀྱི་རྗེས་སུ་འཇུག་པར་གྱིས་ཤིག །གསོལ་པ། བཅོམ་ལྡན་འདས་
ལེགས་སོ་ལེགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི་མི་རྟག་པའི་
ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་ནི་རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཕན་འདོགས་པར་ཡང་འགྱུར་ཏེ། ཅིའི་ཕྱིར་ཞེ་ན། བདག་
ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་ཤིང་ཨ་མྲའམ་ཤིང་ཏ་ལ་ཡང་རུང་སྟེ། མེ་ཏོག་གི་དུས་ནས་འབྲས་བུའི་དུས་ཀྱི་བར་དུ་ནི་མི་རྟག་པའི་
ཆོས་ཀྱི་ཁོངས་སུ་འདུས་སོ། །འབྲས་བུ་སྨིན་པར་གྱུར་ནས་ནི་སེམས་ཅན་ཐམས་ཅད་ལ་ཕན་འདོགས་པར་འགྱུར་ཏེ། རྟག་པའི་ཆོས་ཀྱི་ཁོངས་སུ་འདུས་པར་འགྱུར་རོ། །རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་

བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་ནི་རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་
ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ཏེ། དེ་ཅིའི་ཕྱིར་ཞེ་ན། བདག་ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་
ཀྱི་བུ་གཞན་ཡང་དཔེར་ན་གསེར་ཁུང་ངམ་ཟངས་ཁུང་ཡང་རུང་སྟེ། བརྐོ་བའི་དུས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །གསེག་མ་དང་། རྡོ་དང་། སྐྱོན་རྣམས་མེད་པར་གྱུར་ནས་ནི་སེམས་ཅན་ཐམས་ཅད་ལ་ཕན་འདོགས་པར་འགྱུར་ཏེ། རྟག་པའི་རྫས་རིན་
པོ་ཆེའི་ཁོངས་སུ་འདུས་སོ། །རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་
སོ། །མདོ་སྡེ་རིན་པོ་ཆེ་འདི་ཐོས་ནས་ནི་རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ཏེ། ཅིའི་ཕྱིར་ཞེ་ན། བདག་ལ་དེ་བཞིན་
གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་བུ་རམ་ཤིང་ངམ་ཏིལ་ཡང་རུང་སྟེ། ཁུ་བ་དང་མར་དུ་གྱུར་པའི་དུས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །
བུ་རམ་ཤིང་གི་ཚིགས་མ་དང་། ཏིལ་གྱི་ཚིགས་མ་མེད་པར་གྱུར་ནས་ནི་སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ལ་རྫས་རྟག་པའི་ཁོངས་སུ་ཡང་འདུས་པར་འགྱུར་རོ། །རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་ཀྱི་བསྒོམ་

པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་སེམས་ཅན་རྣམས་ཀྱིས་མ་ཐོས་ཀྱི་བར་དུ་ནི་མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་ནི་རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་
པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ། སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་ཏེ། ཅིའི་ཕྱིར་ཞེ་ན། བདག་ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་
ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་ཆུ་ཀླུང་ཐམས་ཅད་ནི་རྒྱ་མཚོའི་ཁོངས་སུ་འདུས་སོ། །རིགས་ཀྱི་བུ་དེ་བཞིན་དུ་མདོ་སྡེ་ཐམས་ཅད་དང་། ཏིང་ངེ་འཛིན་ཐམས་ཅད་དང་། ཐེག་པ་ཆེན་པོ་ནི་ཡོངས་སུ་མྱ་ངན་ལས་
འདས་པ་ཆེན་པོའི་མདོ་སྡེ་འདིའི་ཁོངས་སུ་འདུས་སོ། །ཅིའི་ཕྱིར་ཞེ་ན། འདི་ལས་དེ་བཞིན་གཤེགས་པའི་སྙིང་པོ་ཤིན་ཏུ་ཡོངས་སུ་མཐར་ཐུག་པ་གསལ་བར་བསྟན་པའི་ཕྱིར་ཏེ། མཆོག་ཏུ་མཐར་ཕྱིན་པ་གང་ཡིན་པ་དེ་ནི་རྒྱུ་ཞེས་བྱའོ། །དེ་བས་ན་ཆོས་ཁ་
ཅིག་ནི་མི་རྟག་ལ་ཆོས་ཁ་ཅིག་ནི་རྟག་ཅེས་བྱའོ། །གསོལ་པ། སངས་རྒྱས་ལ་ཡང་མྱ་ངན་གྱི་ཟུག་རྔུ་མཛད་པ་མངའོ་ཞེས་སྨོས་ཏེ། རྫོགས་པའི་སངས་རྒྱས་ཀྱི་ནི་མིའི་མྱ་ངན་ལྟ་བུ་ཡང་མ་ལགས། ལྷའི་མྱ་ངན་ལྟ་བུ་ཡང་མ་ལགས། བདུད་ཀྱི་མྱ་ངན་ལྟ་བུ་ཡང་
མ་ལགས། སངས་རྒྱས་ནི་དུད་འགྲོར་སྐྱེས་པ་ལྟ་བུ་ཡང་མྱ་ངན་མི་མཛད་ལགས་ན་ཇི་ལྟ་བུ་ཞིག་ལགས། བཀའ་སྩལ་པ། འདུ་ཤེས་མེད་པ་པ་རྣམས་ཀྱི་འདུ་ཤེས་ཀྱང་ཇི་ལྟ་བུ་ཞིག །འདུ་ཤེས་མེད་ན་ནི་གསོན་པ་ཡང་མི་རིགས་ཏེ། འདུ་ཤེས་མེད་པ་པ་རྣམས་
ནི་གསོན་པོ་ཡིན་ནོ། །ཕུང་པོ་དང་། ཁམས་དང་། སྐྱེ་མཆེད་རྣམས་མེད་པ་དེ་དག་ལ་འདུ་ཤེས་ག་ལ་ཞིག་ཡོད་དེ། དཔེར་ན་ཤིང་རྣམས་ལ་ལྷ་རྣམས་གནས་མོད་ཀྱི། ལྷ་དེ་དག་ཤིང་གི་ཡལ་ག་རྣམས་སམ་རྩ་བ་རྣམས་གང་ན་གནས་པ་མི་མངོན་པ་དེ་བཞིན་དུ་

བསྟན་པ་ཡང་ཟབ་བོ། །དེ་བཞིན་གཤེགས་པ་ཡང་ཟབ་བོ། །སྒྲ་གཅན་ཟིན་ལ་བྱ་བ་བཞིན་དུ་བྱམས་པས་རྟག་ཏུ་མྱ་ངན་བྱེད་པ་ནི་འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་མྱ་ངན་བྱེད་པ་དང་འདྲའོ། །དེ་དག་ནི་སངས་རྒྱས་རྣམས་ཀྱི་སྤྱོད་ཡུལ་ཡིན་ཏེ་སངས་རྒྱས་
རྣམས་ཀྱི་དེ་ལྟ་བུ་ཡིན་ནོ། །སངས་རྒྱས་རྣམས་ཀྱི་ཆོས་ཉིད་ཅི་འདྲ་བ་དང་། སྐུ་ཅི་འདྲ་བ་དང་། རང་བྱུང་རྣམས་ཀྱི་གསུང་ཅི་འདྲ་བ་དང་། ཐུགས་ཅི་འདྲ་བ་ནི་སངས་རྒྱས་རྣམས་ཀྱིས་མཁྱེན་པར་ཟད་དེ་ཡིད་ཀྱི་རང་བཞིན་ལ་མྱ་ངན་ག་ལ་ཡོད། མྱ་ངན་མེད་ན་ཡང་བསྟན་པ་
ཤིན་ཏུ་རྒྱས་པ་ཡོད་པ་དང་འགལ་ལོ། །མྱ་ངན་མེད་དོ་ཞེས་བྱས་ན་ནི་སྒྲ་གཅན་ཟིན་དང་འདྲ་བར་གཟིགས་ཞེས་བྱ་བ་བརྫུན་པར་འགྱུར་རོ། །ཆོས་ཐམས་ཅད་བརྫུན་པའོ་ཞེས་བྱ་བ་ནི་བསམ་གྱིས་མི་ཁྱབ་པར་བསྟན་ཏོ། །དེ་བཞིན་དུ་སངས་རྒྱས་བཅོམ་ལྡན་འདས་ཀྱང་
བསམ་གྱིས་མི་ཁྱབ་བོ། །ཆོས་ཀྱང་བསམ་གྱིས་མི་ཁྱབ་བོ། །བསྟན་པ་ཡང་བསམ་གྱིས་མི་ཁྱབ་སྟེ། དེ་ལྟར་ན་སངས་རྒྱས་རྣམས་ཀྱི་ཡང་དག་པའི་ཆོས་ཉིད་ནི་དེ་ཡིན་ནོ། །ཇི་སྲིད་དུ་ནམ་མཁའ་ཡིན་པ་དེ་སྲིད་དུ་ཁྱིམ་གནས་པ་ཡང་མེད། ཀ་བ་ཡང་མེད།
རྡུལ་ཡང་མེད་དེ། ནམ་མཁའི་ངོ་བོ་ཉིད་ཁོ་ནར་འདུག་པ་དེ་མཐོང་ནས་བྱིས་པའི་རང་བཞིན་ཅན་རྣམས་ཀྱིས་ནམ་མཁའ་ཇི་ལྟར་འདུག་པ་དེ་བཞིན་དུ་སེམས་ཡོངས་སུ་བསྒྱུར་བར་བྱའོ། །དེ་ལྟར་བསམ་གྱིས་མི་ཁྱབ་པ་ལ་མྱ་ངན་ག་ལ་ཡོད། མྱ་ངན་མེད་པར་ཡང་
སྒྲ་གཅན་ཟིན་བཞིན་དུ་གཟིགས་ཞེས་བྱ་བ་དོན་མེད་པར་འགྱུར་ཏེ། དེ་བཞིན་གཤེགས་པའི་མྱ་ངན་ནི་ནམ་མཁའ་དང་འདྲའོ། །སྒྱུ་མ་ལ་སེམས་གཞན་མེད་པ་བཞིན་དུ་དེ་བཞིན་གཤེགས་པ་ལ་མྱ་ངན་མངའ་ཞེས་བྱ་བ་དེ་ཡང་སྒྱུ་མའི་ཚུལ་ཙམ་དུ་ཟད་ན་ཡོངས་སུ་མྱ་
ངན་ལས་འདས་པ་ལྟ་ལ་མྱ་ངན་ག་ལ་ཡོད། མི་རྟག་པ་ལ་ནི་མྱ་ངན་ཡོད་དེ། དེ་དག་གི་སེམས་ལས་གྱུར་པ་ཡིན་ནོ། །དེ་བས་ན་དེ་བཞིན་གཤེགས་པ་ནི་རྟག་གོ། །མི་རྟག་པ་ལ་ནི་མྱ་ངན་ཡོད་ན་དེ་བཞིན་གཤེགས་པ་ནི་མི་རྟག་པ་མ་ཡིན་པས་ན་མྱ་ངན་ཡོད་ཅེས་བྱ་བ་

དང་། མེད་ཅེས་བྱ་བར་རྟོགས་པར་མི་ནུས་ཏེ། །དེ་བཞིན་གཤེགས་པ་ནི་མྱ་ངན་དང་བྲལ་བ་ཡིན་ནོ། །དམའ་བས་ནི་དམའ་བ་ཤེས་ཀྱི་དམའ་བས་ནི་འབྲིང་མི་ཤེས་སོ། །འབྲིང་གིས་ནི་འབྲིང་ཤེས་ཀྱི་འབྲིང་གིས་ནི་རབ་མི་ཤེས་སོ། །རབ་ཀྱིས་ནི་དམའ་
བ་དང་། འབྲིང་དང་། རབ་རྣམས་ཤེས་སོ། །ཉན་ཐོས་དང་རང་སངས་རྒྱས་རྣམས་ཀྱིས་ནི་རང་གི་སའི་བདག་ཤེས་པར་ཟད་དོ། །སངས་རྒྱས་རྣམས་ཀྱིས་ནི་ཐམས་ཅད་ཐུགས་སུ་ཆུད་དེ། དེ་བས་ན་ཡང་དག་པར་རྫོགས་པའི་སངས་རྒྱས་རྣམས་ནི་ཡེ་ཤེས་སྒྲིབ་པ་མི་
མངའ་བ་ཞེས་བྱའོ། །དེ་ལྟར་ན་ལྷའི་ཡུལ་དང་སའི་སྟེང་དག་ཏུ་སྒྱུ་མ་རྣམ་པ་སྣ་ཚོགས་སྟོན་ཏོ། །དེ་ལྟར་སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་དང་འཐུན་པར་སྟོན་ཏོ་སྙམ་དུ་ཤེས་ནས་ཤའི་མིག་དང་ལྡན་པའི་བྱིས་པ་རྣམས་ཀྱིས་ཀྱང་ཐོགས་པ་མེད་པའི་ཡེ་ཤེས་
ཐོབ་པར་བྱ་བའི་ཕྱིར་མཁས་པའི་ཤེས་པ་ལ་གནས་པར་བྱའོ། །དེ་ལྟར་ན་མྱ་ངན་དང་མྱ་ངན་མེད་པ་ཞེས་བྱ་བ་ནི་རྫོགས་པའི་སངས་རྒྱས་ཀྱིས་བརྟགས་པ་ཡིན་གྱི་བྱིས་པ་རྣམས་ཀྱི་ཡུལ་མ་ཡིན་ནོ། །དེ་བས་ན་ཆོས་ཁ་ཅིག་ནི་བདག་ཡོད་ལ་ཆོས་ཁ་ཅིག་ནི་བདག་མེད་དེ།
འདི་ནི་ཟལ་མོ་ལྟ་བུར་བསྟན་པ་ཡིན་ནོ། །རིགས་ཀྱི་བུ་གཞན་ཡང་སངས་རྒྱས་ཀྱི་སྤྱོད་ཡུལ་བྱ་བཞད་གཟས་ལ་འགྲོ་བ་ལྟ་བུ་བསྟན་པར་བྱ་སྟེ། དཔེར་ན་བྱ་བཞད་རྣམས་དང་ཟལ་མོ་རྣམས་ནི་དབྱར་ཆུ་ཀླུང་རྣམས་ཀྱི་ཆུ་ཤིན་ཏུ་བྲུག་པའི་ཚེ་རང་གི་སྒོ་ངའི་ཚིས་བྱ་བའི་ཕྱིར་
ཐང་ག་ལས་གཞི་བརྟན་པོར་གནས་འཆའ་བར་བྱེད་ལ། སྤྱོད་ཡུལ་གང་ཡིན་པ་དེར་འདོང་བར་བྱེད་དེ་དེ་ནི་དེ་དག་གི་ཆོས་ཉིད་དོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྐྱེས་ནས་སེམས་ཅན་བྱེ་བ་ཕྲག་མང་པོ་དམ་པའི་ཆོས་
ལ་བཀོད་དེ། བཞད་དང་ཟལ་མོ་བཞིན་དུ་གདུལ་བར་བྱ་བ་ཇི་སྙེད་ཡོད་པ་དེ་དག་གི་དོན་རྣམས་བྱས་ཟིན་ནས་གདུལ་བར་བྱ་བ་གཞན་དག་ག་ལ་ཡོད་པ་དེར་སྣང་བར་གྱུར་ཏོ། །དེ་ལྟར་ན་ཆོས་ཁ་ཅིག་ནི་སྡུག་བསྔལ་ལ་ཆོས་ཁ་ཅིག་ནི་བདེ་ཞེས་བྱ་སྟེ། འདུ་བྱེད་གང་ཡིན་པ་དེ་དག་

ནི་སྡུག་བསྔལ་བ་དང་འཇིག་པ་ཡིན་ནོ། །མྱ་ངན་ལས་འདས་པ་གང་ཡིན་པ་དེ་ནི་མཆོག་ཏུ་བདེ་བ་ཡིན་ཏེ། འདུ་བྱེད་སྤངས་པའི་ཕྱིར་བདེ་བ་དང་ལྡན་ནོ། །གསོལ་པ། དེ་ཇི་ལྟ་བུ་ལགས། བཀའ་སྩལ་པ། ཇི་ལྟ་བ་བཞིན་ནོ། །གསོལ་པ། མྱ་ངན་ལས་འདས་
པ་ཐོབ་པའི་སེམས་ཅན་རྣམས་ཇི་ལྟར་དེ་བདེ་བ་ལགས། བཀའ་སྩལ་པ། རིགས་ཀྱི་བུ་ངས་བསྟན་པ་ལ་རྒ་བ་དང་འཆི་བ་ནི་འདུ་བྱེད་རྣམས་ལས་བྱུང་བའོ། །བག་ཡོད་པ་ནི་འཆི་བ་མེད་པའི་གནས་སོ། །བག་མེད་པ་ནི་འཆི་བའི་གནས་སོ། །བག་ཡོད་པ་དང་ལྡན་
པ་རྣམས་ནི་འཆི་བར་མི་འགྱུར་རོ། །བག་མེད་པ་དང་ལྡན་པ་རྣམས་ནི་རྟག་ཏུ་ཤི་བ་དང་འདྲའོ། །བག་མེད་པ་དང་ལྡན་པ་གང་ཡིན་པ་དེ་ནི་འདུ་བྱེད་ཡིན་ཏེ་དེ་ནི་མཆོག་ཏུ་སྡུག་བསྔལ་བའོ། །མྱ་ངན་ལས་འདས་པ་ནི་འཆི་བ་མེད་པའོ། །བག་མེད་པ་དང་ལྡན་པ་
རྣམས་ནི་འདུ་བྱེད་དུ་གྱུར་པ་ཡིན་ཏེ་དེ་དག་ནི་མཆོག་ཏུ་སྡུག་བསྔལ་བའོ། །མྱ་ངན་ལས་འདས་པ་གང་ཡིན་པ་དེ་དག་ནི་འཆི་བ་མེད་པ་ཡིན་ནོ་ཞེས་ང་ཟེར་རོ། །བག་ཡོད་པ་དང་ལྡན་པ་གང་ཡིན་པ་དེ་དག་ནི་འདུ་བྱེད་དུ་གྱུར་པ་མ་ཡིན་ཏེ། དེ་དག་ནི་འདུ་བྱེད་རྣམས་ལ་སྤྱོད་
ཀྱང་རྒ་བ་མེད་པ་དང་། འཆི་བ་མེད་པ་དང་། གཞིག་ཏུ་མེད་པ་ཞེས་ང་ཟེར་རོ། །དེ་ལ་བག་མེད་པ་དང་ལྡན་པ་རྣམས་ནི་གང་ཡིན། བག་ཡོད་པ་དང་ལྡན་པ་རྣམས་ནི་གང་ཡིན་ཞེ་ན། འཇིག་རྟེན་པ་རྣམས་ནི་བག་མེད་པ་དང་ལྡན་པ་ཡིན་ཏེ་ཤི་བ་དང་འདྲའོ། །འཇིག་
རྟེན་ལས་འདས་པ་རྣམས་ནི་རྒ་བ་མེད་པ་དང་འཆི་བ་མེད་པའོ། །བག་ཡོད་པ་དང་ལྡན་པ་རྣམས་ནི་མྱ་ངན་ལས་འདས་པ་མཆོག་ཏུ་བདེ་བ་ཐོབ་པའོ། །དེ་བས་ན་ཆོས་ཁ་ཅིག་ནི་སྡུག་བསྔལ་ལ་ཆོས་ཁ་ཅིག་ནི་བདེ་བ་ཡིན་ནོ་ཞེས་ངས་བསྟན་ཏོ། །ཆོས་ཁ་ཅིག་ནི་བདག་
མེད་ལ་ཆོས་ཁ་ཅིག་ནི་བདག་ཡོད་པ་ནི་དཔེར་ན་ས་ལ་འདུག་པའི་མི་ལྷའི་མིག་མེད་པས་ནམ་མཁའ་ལ་བྱ་འཕུར་བའི་རྗེས་མི་མཐོང་བ་དེ་བཞིན་དུ། ཉོན་མོངས་པ་ལ་གནས་པ་རྣམས་ཀྱིས་བདག་ཉིད་ལ་སྙིང་པོའི་མཆོག་ཡོད་པ་བདག་གིས་མི་མཐོང་སྟེ། དེ་བས་ན་ངས་

དགོངས་པའི་ཚིག་གིས་བདག་མེད་དོ་ཞེས་བསྟན་ཏོ། །ལྷའི་མིག་མེད་པའི་མི་རྣམས་ཀྱིས་ནི་བདག་ལ་བདག་ཡོད་དུ་ཟིན་ཀྱང་མི་མཐོང་སྟེ་ཉོན་མོངས་པ་ཡིན་ནོ་ཞེས་ང་ཟེར་རོ། །ཉོན་མོངས་པའི་རྣམ་པའི་འདུ་བྱེད་རྣམས་གང་ཡིན་པའི་ཆོས་དེ་དག་ནི་མི་རྟག་
པ་ཞེས་བྱའོ། །དེ་བས་ན་ཆོས་ཁ་ཅིག་ནི་མི་རྟག་པའོ་ཞེས་ངས་བསྟན་ཏོ། །རྒྱུ་དེས་ན། ཤེས་རབ་ལྡན་པ་རི་ཀར་འདུག་པ་ཡིས། །བྱིས་པ་ས་ལ་འདུག་པ་ལེགས་པར་མཐོང་། །ཤེས་རབ་ཁང་བཟངས་སྟེང་ན་འདུག་པ་ཡིས། །མྱ་ངན་མེད་ཀྱང་སྐྱེ་དགུ་མྱ་ངན་མཐོང་། །
ཞེས་བྱ་བ་ལྟ་བུ་སྟེ། དེ་ལྟར་ཉོན་མོངས་པའི་རྣམ་པ་བཅད་ནས་ཤེས་རབ་ཅན་རི་ཀ་ན་གནས་པས་ཉོན་མོངས་པའི་རྣམ་པ་དང་འབྲེལ་བའི་བྱིས་པ་མཐོང་བ་བཞིན་ནོ། །གསོལ་པ། ཤེས་རབ་ཁང་ཐོག་མཆིས་པ་གང་དག་ལགས། །མྱ་ངན་མ་མཆིས་གང་ལགས་འཇིག་རྟེན་
ན། །མྱ་ངན་མ་མཆིས་མྱ་ངན་འདས་པ་ལ། །མྱ་ངན་དག་ནི་ཇི་ལྟར་མཆིས་པར་འགྱུར། །གལ་ཏེ་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ན་བྱིས་པ་རྣམས་ཀྱིས་ཇི་ལྟར་མཐོང་ལགས། ཤེས་རབ་ཀྱི་ཁང་བཟངས་ཀྱི་སྟེང་དུ་ཡང་ཇི་ལྟར་བཞུགས་
ལགས། མི་རི་ཀ་ན་མཆིས་པས་ནི་མཐོང་དུ་རུང་སྟེ། འདི་ནི་མཆིས་ན་གདོད་རུང་བ་ལགས་ན་ཡོངས་སུ་མྱ་ངན་ལས་འདས་པས་ཇི་ལྟར་མཐོང་ལགས། བཀའ་སྩལ་པ། ཤེས་རབ་ཀྱི་ཁང་བཟངས་ནི་མྱ་ངན་ལས་འདས་པའོ། །མྱ་ངན་མེད་པ་ནི་དེ་བཞིན་གཤེགས་
པའོ། །མྱ་ངན་གྱི་ཤས་ཆེ་བ་ནི་སྐྱེ་དགུ་རྣམས་ཡིན་ཏེ། དེ་དག་ནི་མྱ་ངན་ཅན་ཡིན་ལ་དེ་བཞིན་གཤེགས་པ་ནི་མྱ་ངན་མེད་པའོ། །རི་ཞེས་བྱ་བ་ནི་ཐར་པ་ཡིན་ཏེ་རི་རབ་བཞིན་དུ་བརྟན་པའི་ཕྱིར་རོ། །ས་ཞེས་བྱ་བ་ནི་འདུ་བྱེད་རྣམས་སོ། །བྱིས་པ་ཐམས་ཅད་ནི་ས་ལ་
འཁོད་པའོ། །ཤེས་རབ་ཅན་ཞེས་བྱ་བ་ནི་རྫོགས་པའི་སངས་རྒྱས་ཀྱི་དོན་ཏེ། དེ་བཞིན་གཤེགས་པ་ནི་མྱ་ངན་མེད་ཅིང་བརྟན་པའི་ཕྱིར་རོ། །སངས་རྒྱས་ནི་མྱ་ངན་ཅན་གྱི་ནང་ན་མྱ་ངན་མེད་པ་སྟེ། སེམས་ཅན་རྣམས་ཀྱི་མྱ་ངན་གྱི་ཟུག་རྔུ་སེལ་བའོ། །གསོལ་པ།

གལ་ཏེ་དེ་བཞིན་གཤེགས་པ་མྱ་ངན་ལས་མ་འདས་ན་ནི་ད་དུང་མྱ་ངན་མངའ་སྟེ། རྫོགས་པར་སངས་མ་རྒྱས་པ་ཞེས་བགྱིའོ། །བཀའ་སྩལ་པ། རྒྱུ་ཡོད་དེ་གང་ན་གདུལ་བར་བྱ་བ་རྣམས་ཡོད་པ་དེར་ནི་རྫོགས་པའི་སངས་རྒྱས་སྣང་སྟེ་དེར་སྐྱེ་བ་ལྟ་བུར་སྟོན་ཏོ། །དེ་བས་ན་དེ་
བཞིན་གཤེགས་པ་ནི་རྟག་པ་ཡིན་ཏེ་སངས་རྒྱས་བྱ་བཞད་དང་ཟལ་མོ་ལྟ་བུ་ཞེས་བྱའོ།། །།བམ་པོ་བཅུ་གཅིག་པ། རིགས་ཀྱི་བུ་དཔེར་ན་ཟླ་བ་ནི་ཉིན་པར་སྣང་བ་ན་ཁ་ཅིག་ཏུ་ལྟུང་བ་ལྟ་བུར་སྣང་སྟེ། དེ་ནས་སེམས་ཅན་རྣམས་ཀྱིས་ཟླ་བ་ལྷུང་ངོ་སྙམ་དུ་
འཛིན་ཏོ། །ཟླ་བ་ནི་མེད་པར་མི་འགྱུར་ཏེ། གླིང་གཞན་དུ་འཆར་བར་འགྱུར་ལ་དེར་ཡང་ཟླ་བ་སྐྱེས་པ་མེད་དོ། །སེམས་ཅན་རྣམས་ཀྱིས་ནི་ཟླ་བ་ཤར་ཏོ་སྙམ་དུ་འཛིན་ཏེ། ཟླ་བ་ནི་ལྟུང་བ་ལྟ་བུར་སྣང་ཡང་འཇིག་པར་མི་འགྱུར་ལ་འཆར་བ་ལྟ་བུར་སྣང་ཡང་སྐྱེ་བ་མེད་དེ། རིའི་
རྒྱལ་པོ་རི་རབ་ཀྱིས་བསྒྲིབས་པས་མི་སྣང་བར་ཟད་ལ། ཟླ་བ་ནི་རང་བཞིན་གྱིས་སྐྱེས་ཟིན་པ་ཡིན་ཏེ་སྣང་བྱེད་རྣམས་ཀྱི་ཆོས་ཉིད་ནི་དེ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ན་འཛམ་བུའི་གླིང་ལ་ལར་ནི་ཕ་མ་ཕྲད་པ་ལས་སྐྱེས་པར་ཡང་སྣང་སྟེ་སེམས་ཅན་རྣམས་ཀྱིས་སྐྱེས་སོ་སྙམ་དུ་འཛིན་ལ། དེ་བཞིན་གཤེགས་པ་ལ་ནི་སྐྱེས་པ་མེད་དོ། །འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདའ་བ་ལྟ་བུར་སྣང་ལ་དེ་བཞིན་
གཤེགས་པ་ལ་ནི་འཆི་བ་མེད་དོ། །སེམས་ཅན་རྣམས་ཀྱིས་ནི་ཤིའོ་སྙམ་དུ་འཛིན་ཏེ། དེ་བཞིན་གཤེགས་པ་ནི་ལྷུང་བ་སྐྱེ་བ་ལྟ་བུར་སྣང་ཡང་སྐྱེ་བ་ཡང་མེད། འཆི་བ་ཡང་མེད་དོ། །གདུལ་བར་བྱ་བའི་དབང་གིས་ནི་ཟླ་བ་བཞིན་དུ་ཡང་རྒྱུ་བར་མཛད་དོ། །ཟླ་
བ་ནི་གླིང་ཁ་ཅིག་ཏུ་ཟླ་བ་ཉ་བ་ཡོངས་སུ་རྒྱས་པ་ལྟ་བུར་སྣང་སྟེ་སེམས་ཅན་རྣམས་ཟླ་བ་ཉའོ་སྙམ་དུ་འཛིན་ཏོ། །ཟླ་བ་ནི་གླིང་ཁ་ཅིག་ཏུ་ཡི་གེ་ཏ་འདྲ་བར་ཟླ་བ་ཚེས་པར་ཡང་སྣང་སྟེ་འཛམ་བུའི་གླིང་པ་རྣམས་ཀྱིས་དེང་ཟླ་བ་ཚེས་གཅིག་ཡིན་ནོ་སྙམ་དུ་འཛིན་ཏོ། །དེ་ནས་ཟླ་

བ་ཕྱེད་པར་འཛིན་ཏོ། །དེ་ནས་ཚེས་བཅྭ་ལྔ་ཡིན་ནོ་སྙམ་སྟེ་ཟླ་བ་ཉ་བར་འཛིན་ཏོ། །ཁ་ཅིག་གིས་ནི་ཟླ་བ་ཕྱེད་ཡིན་པར་འཛིན་ཏེ། ཟླ་བ་ནི་ཕྱེད་དུ་འགྱུར་ཞིང་འཆར་བ་ཡང་མེད། ལྟུང་བ་ཡང་མེད་དེ། ཟླ་བ་ནི་རི་རབ་ཀྱི་རྐྱེན་གྱིས་དེ་ལྟར་སྣང་ངོ་། །རིགས་
ཀྱི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདའ་བ་ལྟ་བུར་སྣང་སྟེ། སེམས་ཅན་རྣམས་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ་སྙམ་དུ་འཛིན་ཏོ། །
འཛམ་བུའི་གླིང་ལ་ལར་ནི་ཟླ་བ་ཚེས་པ་བཞིན་དུ་སྐྱེ་བ་ལྟ་བུར་སྣང་སྟེ། སེམས་ཅན་རྣམས་ཀྱིས་ཁྱེའུ་འདི་སྐྱེས་སོ་སྙམ་དུ་འཛིན་ཏོ། །ཟླ་བ་ཚེས་གཉིས་དང་འདྲ་བར་ནི་ལྷའི་ཐད་དུ་འགྲོ་བར་འཛིན་ཏོ། །ཟླ་བ་ཚེས་གསུམ་དང་འདྲ་བར་ནི་ཡི་གེ་སློབ་པའི་སར་འགྲོ་བར་འཛིན་
ཏོ། །ཟླ་བ་ཚེས་བརྒྱད་ལྟ་བུར་ནི་རབ་ཏུ་འབྱུང་བར་སྟོན་ཏོ། །ཟླ་བ་ཉ་བ་ལྟ་བུར་ནི་འོད་ཀྱིས་མུན་པ་བསལ་བ་བཞིན་དུ་བདུད་བྱེ་བ་སྙེད་བརླག་ནས་ལམ་མེར་བཞུགས་སོ། །ཟླ་བ་ནུབ་པ་ལྟ་བུར་ནི་ཡོངས་སུ་མྱ་ངན་ལས་འདའ་བར་སྟོན་ཏེ། ཟླ་བ་གཟའ་རྣམས་ཀྱིས་བསྐོར་བ་
བཞིན་དུ་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་ཏོ། །དེར་ཁ་ཅིག་གིས་ནི་ལྷུང་བར་འཛིན། ཁ་ཅིག་གིས་ནི་སྐྱེ་བར་འཛིན་ལ་སྐྱེས་པ་ཡང་མེད། འགགས་པ་ཡང་མེད་དེ། དེ་བཞིན་གཤེགས་པ་ནི་ཟླ་བ་ཉ་བ་བཞིན་དུ་དུས་ཐམས་ཅད་དུ་རྟག་པ་ཡིན་
ནོ། །དེ་བས་ན་དེ་བཞིན་གཤེགས་པ་རྟག་པ་དང་བརྟན་པ་ཞེས་བྱའོ། །དཔེར་ན་ཟླ་བ་ནི་ཐམས་ཅད་དུ་སྣང་སྟེ། ཆུ་དང་དགོན་པ་དང་ཁྱིམ་དང་གྲོང་ཁྱེར་དང་། ཆུ་ར་ཆུས་གང་བ་རྣམས་དང་། ཁྲོན་པ་དང་། གཞན་ཡང་དཔག་ཚད་སྟོང་སྲིད་དུ་ཡང་རུང་སེམས་ཅན་
རྣམས་གང་དུ་འགྲོ་བ་དེ་དག་ཐམས་ཅད་དུ་སྣང་སྟེ། དེར་བྱིས་པ་རྣམས་ཀྱིས་ཡིད་ལ་ཟླ་བ་འདི་ནི་བདག་ཁོ་ནའི་ཕྱི་བཞིན་འབའ་ཞིག་ཏུ་འོང་ངོ་སྙམ་དུ་འཛིན་ཏོ། །གང་གི་ཚེ་ཁྱིམ་གྱི་ནང་དུ་མཐོང་བ་དེའི་ཚེ་ནི་ད་ནི་འདི་ན་སྣང་ན་དེ་ཟླ་བ་འདི་དེ་ཉིད་ཡིན་ནམ། འོན་ཏེ་གཞན་

ཞིག་ཡིན་ཞིག་གུ་སྙམ་དུ་རྟོག་གོ། །དེ་ལ་བྱིས་པ་ཁ་ཅིག་གིས་ནི་ཟླ་བ་ཆུ་ར་ཙམ་དུ་འཛིན་ཏོ། །བར་མ་རྣམས་ཀྱིས་ནི་ཤིང་རྟའི་འཕང་ལོའི་ཚད་ཙམ་དུ་འཛིན་ཏོ། །རབ་རྣམས་ཀྱིས་ནི་ཟླ་བ་དཔག་ཚད་ལྔ་བཅུ་པ་ཙམ་ལ་ཟླུམ་པོ་ཡིན་པར་ཤེས་སོ། །དུད་འགྲོ་རྣམས་
ཀྱིས་ནི་ཟླ་བ་སྲིན་བུ་མེ་ཁྱེར་ཙམ་དུ་མཐོང་སྟེ། སྐྱེ་གནས་ཐམས་ཅད་དང་ལྡན་པའི་དུད་འགྲོ་རྣམས་ཀྱིས་ཟླ་བ་ལ་རང་རང་གི་རྣམ་པར་ཤེས་པས་བརྟགས་ནས་སོ་སོར་མཐོང་ངོ་། །དེ་བཞིན་དུ་དེ་བཞིན་གཤེགས་པ་ཡང་འཇིག་རྟེན་དུ་བྱུང་ན་ཐམས་ཅད་དུ་སྣང་སྟེ། སེམས་
ཅན་ཁ་ཅིག་གིས་དེ་བཞིན་གཤེགས་པ་ཟླ་བ་དང་འདྲ་བར་འཛིན་ཏེ། བདག་ལ་ཐུགས་བརྩེ་བའི་ཕྱིར་བདག་གི་ཁྱིམ་གྱི་ཕུགས་ན་བཞུགས་སོ་སྙམ་མོ། །དུད་འགྲོ་རྣམས་ཀྱིས་ནི་རང་རང་གི་སྐྱེ་གནས་ཀྱི་ལུས་ལྟ་བུར་མཐོང་ངོ་། །སེམས་ཅན་ལྐུགས་པ་རྣམས་ཀྱིས་ནི་དེ་
བཞིན་གཤེགས་པ་ལྐུགས་པར་མཐོང་ངོ་། །འོན་པ་དང་ལག་རྡུམ་རྣམས་ཀྱིས་ཀྱང་བདག་ཉིད་དང་འདྲ་བར་མཐོང་ངོ་། །སྐད་དང་། འདུ་ཤེས་དང་། ཡི་གེ་ཐ་དད་པ་རྣམས་ཀྱིས་ཀྱང་བདག་ཅག་དང་འདྲའོ་སྙམ་དུ་འཛིན་ཏེ་བདག་གི་སྐད་དུ་སྨྲའོ། །བདག་གི་འདུ་ཤེས་དང་
འཐུན་ནོ། །བདག་གི་ཁ་ཟས་ཟའོ་སྙམ་དུ་འཛིན་ཏོ། །ལུས་ཆེ་བ་རྣམས་ཀྱང་དེ་བཞིན་གཤེགས་པ་ནི་བདག་ཅག་དང་འདྲའོ་སྙམ་དུ་འཛིན་ཏོ། །ཁ་ཅིག་གིས་ནི་ཉན་ཐོས་དང་རང་སངས་རྒྱས་ཡིན་ནོ་སྙམ་དུ་འཛིན་ཏོ། །ཁ་ཅིག་གིས་ནི་ཡ་མཚན་ཅན་ཐམས་ཅད་
ཀྱི་ནང་དུ་རབ་ཏུ་བྱུང་བར་མཐོང་ངོ་། །ཁ་ཅིག་གིས་ནི་དེ་བཞིན་གཤེགས་པ་བདག་ཅག་གི་ཕྱིར་འཇིག་རྟེན་དུ་བྱུང་ངོ་སྙམ་དུ་འཛིན་ཏོ། །དཔེར་ན་ཟླ་བ་རང་བཞིན་དུ་གནས་པས་སོ་སོའི་རང་བཞིན་དུ་ཐམས་ཅད་མགུ་བར་བྱེད་པ་དེ་བཞིན་དུ། དེ་བཞིན་གཤེགས་པ་ཡང་
ཆོས་ཀྱི་སྐུ་ཡིན་བཞིན་དུ་ཐབས་ཀྱི་སྐུ་དུག་སྨན་གྱི་སྡོང་པོ་དང་འདྲ་བར་འཛིན་ཅིང་སེམས་ཅན་རྣམས་མགུ་བར་མཛད་དེ། འཇིག་རྟེན་ཐམས་ཅད་དང་འཐུན་པར་མཛད་པ་དག་གིས་སྐྱེས་པའི་རབས་སྟོང་ཕྲག་མང་པོ་སྟོན་པར་མཛད་དོ། །དེ་བས་ན་དེ་བཞིན་གཤེགས་པ་

ནི་ཐམས་ཅད་དུ་སྐྱེ་བ་སྟོན་པའི་ཕྱིར་སྐྱེས་པའི་རབས་ཀྱི་ཟླ་བ་ཞེས་བྱའོ། །དེ་བས་ན་དེ་བཞིན་གཤེགས་པ་རྟག་པ་དང་བརྟན་པ་ཡིན་ནོ། །རིགས་ཀྱི་བུ་གཞན་ཡང་དཔེར་ན་ཟླ་བ་དང་ལྷ་མ་ཡིན་གྱི་དབང་པོ་སྒྲ་གཅན་ཕྲད་པའི་ཚེ་འཇིག་རྟེན་པ་རྣམས་ཀྱི་ཟླ་བ་
གཟས་ཟིན་ཏོ་སྙམ་དུ་འཛིན་ཏེ། སྒྲ་གཅན་ནི་ཟླ་བ་ལ་འཛིན་པར་ཡང་མི་བྱེད་ལ། དེས་ནི་དེ་ལ་ཟ་བར་ཡང་མི་ནུས་ཏེ་སྒྲ་གཅན་གྱི་ལག་པས་ཟླ་བ་བསྒྲིབས་ནས་འོད་མི་སྣང་བར་བྱེད་པར་ཟད་དེ། ཟླ་བ་ལ་རྨ་ཡང་མེད། ཉོན་མོངས་པ་ཡང་མེད་དོ། །ཇི་ཙམ་དུ་སྒྲ་གཅན་གྱི་ལག་པས་
ཟླ་བ་བཀབ་པ་དེ་ཙམ་དུ་ཟླ་བའི་འོད་མི་སྣང་བར་འགྱུར་ལ། སྒྲ་གཅན་གྱིས་ཟླ་བ་བཏང་བའི་ཚེ་ནི་ཁ་ནས་བྱུང་བ་ལྟ་བུར་སྣང་སྟེ། མི་རྣམས་ཀྱིས་ཟླ་བ་ནི་སྡུག་བསྔལ་ཞིང་འདུག་གོ་སྙམ་དུ་འཛིན་ཏོ། །ཟླ་བ་ནི་རང་བཞིན་ཁོ་ནར་འདུག་བཞིན་དུ་བདག་ཉིད་སྒྲ་གཅན་དང་ལྷན་ཅིག་
འདུག་པར་སྟོན་ཏེ། འདི་ནི་འཇིག་རྟེན་གྱི་ཆོས་ཉིད་དོ། །སྒྲ་གཅན་བྱེ་བ་སྙེད་ཀྱིས་ཀྱང་ཟླ་བ་གསད་པའམ་གཞིག་པར་མི་ནུས་ཏེ་ཟླ་བ་རང་ཉིད་དེ་ལྟར་སྟོན་ཏོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཟླ་བ་ལྟ་བུར་སྟོན་
པར་མཛད་དེ། མ་འོངས་པའི་དུས་ཀྱི་དོན་དུ་ངན་སེམས་ཀྱིས་ཁྲག་ཕྱུང་བའི་མཚམས་མེད་པའི་ལས་བསྟན་པའི་ཕྱིར་དེ་ལ་སོགས་པའི་འདོད་ཆེན་པའི་མཐའ་དང་དགེ་འདུན་གྱི་དབྱེན་གྱི་ཆོས་ཐ་དད་པ་ཡང་སྟོན་པར་མཛད་དོ། །དེ་བཞིན་གཤེགས་པའི་སྐུ་ལ་ནི་བདུད་བྱེ་བ་ཕྲག་
འབུམ་གྱིས་ཀྱང་ཁྲག་དབྱུང་བར་མི་ནུས་ལ། དེ་བཞིན་གཤེགས་པའི་སྐུ་ལ་ནི་ཁྲག་དང་། རུས་པ་དང་། རྒྱུས་པ་ཡང་མེད་དེ། སྡུག་བསྔལ་བའི་བག་ཀྱང་མེད་དོ། །སེམས་ཅན་རྣམས་ཀྱིས་ནི་གཞི་གསུམ་མ་རུང་ངོ་། །དེ་བཞིན་གཤེགས་པ་ལ་རྨ་བྱུང་ངོ་སྙམ་དུ་
འཛིན་ཏོ། །དེ་བཞིན་གཤེགས་པ་ནི་རང་བཞིན་ཁོ་ནར་བཞུགས་མོད་ཀྱི། དེ་ལྟར་འཇིག་རྟེན་དང་འཐུན་པར་སྟོན་ཏོ། །འདི་ལྟ་སྟེ། མི་ལ་ལས་མི་ཞིག་ལ་འབྲེང་པའམ། དབྱུག་པས་བསྣུན་ཏེ་ཁྲག་ཕྱུང་བའམ། གསད་པའི་སེམས་ཀྱིས་དེ་བསད་ནས། དེའི་འོག་

ཏུ་དེ་བཞིན་གཤེགས་པས་ལས་དེ་བཙན་པར་མཛད་པར་དགོངས་ཏེ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ན། མི་དེའི་སེམས་ཐུགས་སུ་ཆུད་ནས་མཚམས་མེད་པའི་ལས་ཡང་དག་པར་སྟོན་པར་མཛད་དོ། །དེ་ལྟར་ན་དེ་བཞིན་གཤེགས་པ་ནི་མ་འོངས་པའི་
དོན་གྱི་ཕྱིར་ལས་ཀྱི་རྣམ་པར་དབྱེ་བ་སྟོན་པར་མཛད་དོ། །དཔེར་ན་སྨན་པ་ལ་ལ་ཞིག་གིས་རང་གི་བུ་ལ་རྩ་བའི་མིང་གི་རྣམ་གྲངས་སློབ་པར་བྱེད་དེ། འདི་ནི་རྩ་བ་ལྔའོ། །འདི་ནི་ཁ་བའོ་ཞེས་རྩ་བའི་རྣམ་པར་དབྱེ་བ་དག་གི་སྒོ་ནས་ངོ་སྟོན་པར་བྱེད་དེ། ཁྱེའུ་དེས་ཀྱང་དེ་ལྟར་བསླབས་
ནས་རྩ་བའི་རྣམ་པར་དབྱེ་བ་ཤེས་པར་གྱུར་ལ། དེ་ནས་སྨན་པ་དེ་ཤི་ནས་ཁྱེའུ་དེ་ན་རེ། ཀྱི་ཧུད་ཕ་ཅིག་ཀྱི་ཧུད་ཕ་ཅིག་ཁྱོད་ཀྱིས་བདག་རྩ་བའི་རྣམ་པར་དབྱེ་བ་བསླབས་ཏེ་རྩ་བ་འདི་ནི་འདི་འདྲའོ། །ལོ་མ་ནི་འདི་འདྲའོ་ཞེས་དེ་སྐད་ཟེར་བ་དེ་བཞིན་དུ་དེ་བཞིན་གཤེགས་པས་
ཀྱང་བསླབ་པའི་གཞི་ཐམས་ཅད་ཀྱི་སྤྲུལ་པ་སྤྲུལ་པར་མཛད་དེ། གསོར་རུང་བ་དང་། གསོར་མི་རུང་བ་དང་། མཚམས་མེད་པ་དང་། མདོ་སྡེ་སྤོང་བ་དང་། འདོད་ཆེན་པའི་མཐའ་རྣམས་སྟོན་པར་མཛད་དེ། མ་འོངས་པའི་དུས་ན་འདི་ལྟ་བུར་འགྱུར་རོ་ཞེས་བྱ་བའི་དོན་
ཏོ། །དེ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་དགེ་སློང་རྣམས་ཀྱིས་སྨན་པའི་བུ་བཞིན་དུ་དེ་བཞིན་གཤེགས་པས་མདོ་སྡེ་ལས་འདི་སྐད་ཅེས་བཀའ་སྩལ་ཏེ། ལས་འདི་ནི་འདི་ཡིན་ནོ་སྙམ་དུ་ཤེས་སོ། །དཔེར་ན་ཟླ་བ་ལ་གཟའ་འཇུག་པ་ན་མི་
རྣམས་ཀྱིས་ནི་ཟླ་བ་དྲུག་ཅིང་ཟླ་བ་ལ་གཟའ་འཇུག་པར་ཤེས་སོ། །སྟེང་གི་ལྷ་རྣམས་ཀྱིས་ནི་ཉིན་གཅིག་བཞིན་དུ་ཟླ་བ་ལ་གཟའ་འཇུག་པ་ཤེས་ཏེ། ཅིའི་ཕྱིར་ཞེ་ན། དེ་དག་གི་ལོ་ཚིགས་རིང་ལ་མི་རྣམས་ཀྱི་ལོ་ཚིགས་ཐུང་བའི་ཕྱིར་རོ། །རིགས་ཀྱི་བུ་དེ་བཞིན་དུ་ལྷ་
རྣམས་དང་མི་རྣམས་ཀྱིས་ནི་དེ་བཞིན་གཤེགས་པ་སྐུ་ཚེ་ཐུང་ངོ་སྙམ་དུ་འཛིན་ཏོ། །ཇི་ལྟར་ལྷ་གོང་མ་གོང་མ་རྣམས་ཀྱིས་སྐད་ཅིག་སྐད་ཅིག་ལ་ཟླ་བ་ལ་གཟའ་འཇུག་པར་འཛིན་པ་དེ་བཞིན་དུ། ལྷ་གོང་མ་གོང་མ་རྣམས་ཀྱིས་སྐད་ཅིག་སྐད་ཅིག་ལ་དེ་བཞིན་གཤེགས་པ་

ཡོངས་སུ་མྱ་ངན་ལས་འདའ་བ་བྱེ་བ་སྙེད་ཀྱང་སྟོན་པར་མཛད་དོ། །ཉོན་མོངས་པ་དང་། ཕུང་པོ་དང་ལྷ་དང་འཆི་བདག་གི་བདུད་བྱེ་བ་སྙེད་ཀྱང་སྟོན་པ་དང་། སྐྱེས་པའི་རབས་སྟོང་སྙེད་ཀྱང་སྟོན་པ་དང་། འཇིག་རྟེན་དང་འཐུན་པར་བྱ་བ་མང་པོ་དག་སྟོན་པར་ཤེས་
སོ། །དེ་ལྟར་ན་དེ་བཞིན་གཤེགས་པ་ནི་དཔག་ཏུ་མེད་པ་ཡིན་ཏེ། དེ་བས་ན་རྟག་པ་དང་བརྟན་པ་ཡིན་ནོ། །དཔེར་ན་ཟླ་བ་ནི་སེམས་ཅན་ཐམས་ཅད་ཀྱི་ཡིད་དུ་འོང་ཞིང་བལྟ་ན་སྡུག་པ་ཡིན་པས་ན་དེའི་ཕྱིར་མིང་ཟླ་བ་ཞེས་བྱའོ། །འདོད་པའི་དབང་དུ་གྱུར་པ་འདོད་ཆགས་དང་།
ཞེ་སྡང་དང་། གཏི་མུག་སྤྱོད་པ་རྣམས་ཀྱི་ཡིད་དུ་འོང་བ་ནི་མ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་རང་བཞིན་གྱིས་སེམས་ཅན་ཆོས་འདོད་པ་རྣམས་ཀྱི་ཡིད་དུ་འོང་བ་དང་མཆོག་ཏུ་བལྟ་ན་སྡུག་པ་ཡིན་ནོ། །སྡང་
བའི་སེམས་དང་ལྡན་པ་གཞན་དག་གི་ཡིད་དུ་འོང་བ་ནི་མ་ཡིན་ཏེ། དེ་བས་ན་དེ་བཞིན་གཤེགས་པ་ཟླ་བ་དང་འདྲ་བ་ཡིན་ནོ། །དཔེར་ན་ཉི་མ་དུས་ཚིགས་གསུམ་དུ་འགྱུར་ཞིང་འཕོ་སྟེ། དགུན་དང་། དབྱར་དང་སོ་གའི་དུས་གསུམ་དུ་རྒྱུ་བར་བྱེད་ལ། དགུན་ནི་ཉི་མ་མྱུར་བ་ཁོ་ནར་
འགྲོའོ། །དབྱར་ནི་ཉི་མ་འབྲིང་ཙམ་དུ་འགྲོའོ། །སོས་ཀའི་ནི་ཉི་མ་རིང་དུ་ཐོགས་ཤིང་འགྲོ་སྟེ་འོད་ཤིན་ཏུ་ཚའོ། །དེ་བཞིན་གཤེགས་པ་ཡང་འཇིག་རྟེན་གསུམ་དུ་སྐྱེ་བ་རྣམ་པ་གསུམ་སྟོན་པར་མཛད་དེ། སེམས་ཅན་ཚེ་ཐུང་ངུ་རྣམས་ཀྱི་ནང་དུ་ནི་མཆོག་ཏུ་སྐུ་ཚེ་ཐུང་བར་
སྟོན་ཏེ། སེམས་ཅན་རྣམས་ཀྱིས་སངས་རྒྱས་སྐུ་ཚེ་ཐུང་ངོ་སྙམ་དུ་འཛིན་ཏོ། །ཉན་ཐོས་ཀྱི་ཐེག་པ་པ་རྣམས་ལ་ནི་དགུན་གྱི་ཉི་མ་བཞིན་དུ་སྐུ་ཚེ་ཐུང་བར་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་དབྱར་གྱི་ཉི་མ་བཞིན་དུ་སྐུ་ཚེ་འབྲིང་དུ་སྟོན་ཏོ། །སངས་
རྒྱས་རྣམས་ལ་ནི་སོ་གའི་ཉི་མ་བཞིན་དུ་བསྐལ་པའམ་བསྐལ་པ་ལས་ལྷག་པར་བཞུགས་པར་སྣང་ངོ་། །རིགས་ཀྱི་བུ་ཐེག་པ་ཆེན་པོ་འདི་ལས་དགོངས་པའི་ཚིག་དེ་བཞིན་གཤེགས་པའི་གསང་བའི་དམ་པའི་ཆོས་ཀྱི་ཆར་ངས་ཡང་དག་པར་བསྟན་པར་བྱ་སྟེ། མ་འོངས་པའི་

དུས་ན་དམ་པའི་ཆོས་ཐེག་པ་ཆེན་པོའི་མདོའི་སྡེ་ཚན་གྱི་ཕན་པའི་གདམས་ངག་སྟོན་པ་གང་ཡིན་པ་དེ་དག་ནི་དབྱར་གྱི་ནམ་གྱི་སྤྲིན་དང་འདྲ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །ཉན་ཐོས་དང་རང་སངས་རྒྱས་རྣམས་ནི་དགོངས་པའི་ཚིག་
ཐོས་ན་དགུན་གྱི་གྲང་ནད་ཀྱིས་ཐེབས་པ་དང་འདྲ་སྟེ། དེའི་ཕྱིར་ངས་སྐུ་ཚེ་ཐུང་བ་དང་ངེས་པར་མྱོང་བར་འགྱུར་བ་ཡང་དག་པར་བསྟན་ཏོ། །སངས་རྒྱས་ཀྱི་ཚེ་བསྟན་པ་སངས་རྒྱས་ཀྱི་གནས་རྒྱ་ཆེན་པོ་ལས་ནི་སོ་གའི་ཉི་མ་བཞིན་དུ་ངས་རྟག་པ་དང་བརྟན་པར་བསྟན་ཏོ། །ང་ནི་ཉི་མ་
བཞིན་དུ་གང་དུ་ཡང་ལྟུང་བ་མེད་དེ། ཉི་ཟླའི་ཆོས་ཉིད་ཀྱང་སྤྱོད་དོ། །དེ་ལྟར་ན་དེ་བཞིན་གཤེགས་པ་ནི་འཇིག་རྟེན་གསུམ་དུ་ཡང་དག་པར་སྣང་སྟེ། འདི་ནི་སངས་རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ་གཞན་ཡང་པ་བ་སངས་དང་། ཕུར་བུ་དང་། མིག་དམར་
དང་། མཇུག་རིངས་དང་། གཟའ་ལྷག་ལ་སོགས་པ་ཉི་མ་དང་ཟླ་བ་གཉིས་དང་ལྷན་ཅིག་འགྲོ་བ་ན་སེམས་ཅན་རྣམས་ཀྱིས་བལྟ་བར་མི་ནུས་ལ་དེ་དག་ཀྱང་ལྡོག་པར་ཡང་མི་འགྱུར། ལྟུང་བར་ཡང་མི་འགྱུར་ཏེ། དེ་དག་གི་འོད་ཆེས་ཆ་ཕྲ་ལ་ཉི་མ་དང་ཟླ་བའི་འོད་ཤིན་ཏུ་
ཆེ་བས་ཟིལ་གྱིས་ནོན་པའི་ཕྱིར་རོ། །དེ་བཞིན་དུ་དེ་བཞིན་གཤེགས་པ་ནི་རྟག་ཏུ་ཉན་ཐོས་དང་རང་སངས་རྒྱས་ཀྱི་གཟའི་ཚོགས་རྣམས་དང་ལྷན་ཅིག་ཏུ་སྐྱེ་བ་ལྟ་བུར་ཡང་སྟོན་ལ་ཡོངས་སུ་མྱ་ངན་ལས་འདའ་བར་ཡང་སྟོན་མོད་ཀྱི། ཉན་ཐོས་དང་རང་སངས་རྒྱས་དེ་དག་མི་རྟག་པ་ཡང་
མ་ཡིན་མི་བརྟན་པ་ཡང་མ་ཡིན་ཏེ། དེ་དག་ནི་རྟག་པ་དང་བརྟན་པ་ཡིན་བཞིན་དུ་ཉིན་པར་གྱི་གཟའ་དང་འདྲ་བར་སེམས་ཅན་གྱིས་མཐོང་བར་མི་ནུས་སོ། །ཉི་མ་དང་འདྲ་བ་འདི་ནི་རང་སངས་རྒྱས་རྣམས་ཀྱི་ཆོས་ཉིད་ཡིན་ནོ། །དཔེར་ན་ཉི་མ་དང་ཟླ་བ་སྤྲིན་གྱིས་གཡོགས་པའི་
ཚེ་མི་སྣང་སྟེ། སེམས་ཅན་རྣམས་ཀྱིས་མི་སྣང་ངོ་སྙམ་དུ་འཛིན་མོད་ཀྱི། དེ་གཉིས་མེད་པར་ཡང་མི་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་འཇིག་རྟེན་ན་མི་བཞུགས་པའི་ཚེ་ཉི་ཟླ་སྤྲིན་གྱིས་གཡོགས་པ་བཞིན་དུ་གཞི་གསུམ་འཇིག་པ་ལྟ་བུར་སྣང་

མོད་ཀྱི། གཞི་གསུམ་མེད་པར་ཡང་མི་འགྱུར་ལ་རྟག་པ་དང་བརྟན་པ་དང་ཐེར་ཟུག་པར་འདུག་བཞིན་དུ་ཉེས་པ་རྣམས་ཀྱིས་ཀྱང་གོས་པར་མི་འགྱུར་བ་འདི་ནི་སངས་རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ་དཔེར་ན་ཟླ་བ་ཡར་གྱི་ངོ་ཡང་མ་ཡིན། མར་གྱི་ངོ་ཡང་མ་ཡིན་
པ་གནམ་སྟོང་གི་ཉིན་པར་ཉི་མ་དང་ཟླ་བ་མེད་པའི་སྐབས་སུ་གཟའ་མཇུག་རིངས་གཟི་བརྗིད་དྲག་པོ་དང་ལྡན་པ་ཞེས་བྱ་བ་ཤར་ནས་འཇིག་རྟེན་ཐམས་ཅད་ཀྱིས་མ་ཚོར་བར་སྐད་ཅིག་གཅིག་ཁོ་ན་ལ་མི་སྣང་བར་འགྱུར་རོ། །རིགས་ཀྱི་བུ་དེ་བཞིན་དུ་རང་སངས་རྒྱས་རྣམས་ཀྱང་སངས་རྒྱས་
རྣམས་མི་བཞུགས་པའི་ཚེ་གནམ་སྟོང་གི་ཉིན་པར་གཟའ་མཇུག་རིངས་འཆར་བ་བཞིན་དུ་བྱུང་ནས་སེམས་ཅན་བྱེ་བ་ཕྲག་མང་པོ་དམ་པའི་ཆོས་ལ་བཀོད་ནས་མི་སྣང་བར་འགྱུར་ལ། མཇུག་རིངས་ཀྱང་རྟག་ཏུ་ཡོད་དེ་སེམས་ཅན་རྣམས་ཀྱིས་ནི་མཐོང་བར་མི་ནུས་སོ། །དེ་བཞིན་དུ་
རང་སངས་རྒྱས་རྣམས་ཀྱང་རྟག་ཏུ་ཡོད་བཞིན་དུ་དེ་དག་སེམས་ཅན་རྣམས་ཀྱིས་མཐོང་བར་མི་ནུས་ཏེ། བདག་ཉིད་ཡང་དག་པར་སྟོན་ཅིང་མི་མངོན་པར་བྱེད་པ་འདི་ནི་དེ་དག་གི་ཆོས་ཉིད་དོ། །རིགས་ཀྱི་བུ་དཔེར་ན་ཉི་མ་ཤར་ན་ལྷོ་བུར་མེད་པར་འགྱུར་བ་དེ་བཞིན་དུ་ཡོངས་སུ་མྱ་ངན་
ལས་འདས་པ་ཆེན་པོའི་མདོ་ཆེན་པོ་འདི་བྱུང་ན་ཐོས་པ་ཙམ་གྱིས་ཀྱང་ཕམ་པ་རྣམས་དང་། མཚམས་མེད་པའི་ལས་རྣམས་ཀྱི་སྡིག་པའི་ཕུང་པོ་མྱུར་དུ་མེད་པར་འགྱུར་རོ། །དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་བསམ་གྱིས་མི་ཁྱབ་པའི་ཡུལ་འདི་ནི་དེ་བཞིན་
གཤེགས་པའི་སྙིང་པོ་སྟོན་པ་ཡིན་པའི་ཕྱིར་དཔག་ཏུ་མེད་དོ། །དེ་བས་ན་རིགས་ཀྱི་བུའམ་རིགས་ཀྱི་བུ་མོ་རྣམས་ཀྱིས་དེ་བཞིན་གཤེགས་པ་རྟག་གོ། །དམ་པའི་ཆོས་ནུབ་པར་མི་འགྱུར་རོ། །དགེ་འདུན་མེད་པར་མི་འགྱུར་རོ་སྙམ་དུ་མདོའི་ཤེས་པ་ལ་དེ་ལྟར་བརྩོན་པར་བྱའོ། །དེ་ལྟར་བྱས་ཀྱང་དེ་
དག་ཀྱང་ང་དང་འདྲ་བར་སངས་རྒྱས་ཀྱི་གནས་སུ་གསོན་པར་འགྱུར་རོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟ་བུ་ལགས། བཀའ་སྩལ་པ། སེམས་བསྐྱེད་པ་ཡང་རུང་། སེམས་མ་བསྐྱེད་པ་ཡང་རུང་སྟེ། བྱང་ཆུབ་སེམས་དཔའ་སེམས་

དཔའ་ཆེན་པོ་རྣམས་སུ་འགྱུར་རོ། །གསོལ་པ། དེ་ཅི་ལྟ་བུ་ལགས། བཀའ་སྩལ་པ། རིགས་ཀྱི་བུ་དཔེར་ན་དགུན་མར་འཁྱགས་པ་ཉི་ཚན་གྱིས་ཀྱང་བཞུ་མི་ནུས་པ་དེ་བཞིན་དུ་མདོ་སྡེ་དང་། ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་འབྲས་
བུའི་སྒོ་ནས་ནི་སེམས་བསྐྱེད་པ་རྣམས་ཀྱིས་ཀྱང་བྱང་ཆུབ་ཐོབ་པར་མི་འགྱུར་རོ། །སེམས་མ་བསྐྱེད་པས་ཀྱང་བྱང་ཆུབ་ཐོབ་པར་མི་འགྱུར་རོ། །དེ་ཅིའི་ཕྱིར་ཞེ་ན། དགུན་གྱི་ཉི་མ་བཞིན་དུ་བརྩོན་འགྲུས་ཞན་པའི་ཕྱིར་རོ། །མདོ་སྡེ་བསྒོམ་པར་བྱ་བ་བསྒོམས་
པའི་འབྲས་བུའི་མཆོག་ནི་དཔེར་ན་སོ་གའི་ཉི་མ་ཚ་བའི་ཚེ་ཉི་མ་མ་ཤར་བར་མཚན་མོ་ཡང་མར་ཤིན་ཏུ་འཁྱགས་པ་ཡང་ཞུ་བར་བྱེད་ལ་རྒྱ་མཚོ་ཆེན་པོ་ཡང་དྲོ་བར་བྱེད་དོ། །དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་དག་གིས་ཡོངས་སུ་མྱ་ངན་ལས་འདས་
པ་ཆེན་པོའི་མདོ་འདི་ཐོས་མ་ཐག་ཏུ་འགྲན་ཏོར་དུ་བྱས་ཀྱང་རུང་། གཞན་གྱིས་བྱེད་དུ་བཅུག་ཀྱང་རུང་། གཞན་གྱིས་དྲིང་འཇོག་ཀྱང་རུང་། རྙེད་པ་དང་། བཀུར་སྟི་དང་། ཚིགས་སུ་བཅད་པའི་དོན་དུ་བྱས་ཀྱང་རུང་སྟེ། བདག་ལ་བྱང་ཆུབ་མི་དགོས་
སོ་སྙམ་པའམ། སེམས་བསྐྱེད་པར་ཡང་མི་འདོད་དུ་ཟིན་ཀྱང་གང་ཟག་དེ་འདྲ་བའི་ལུས་ཀྱི་བ་སྤུའི་ཁུང་བུ་ཐམས་ཅད་དུ་བྱང་ཆུབ་ཀྱི་རྒྱུས་སོ་གའི་ཉི་མ་བཞིན་དུ་འཇུག་པར་འགྱུར་རོ། །དེ་བས་ན་རིགས་ཀྱི་བུ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་
པོ་ཡིན་ནོ་ཞེས་ང་ཟེར་རོ། །དེ་ལྟར་ན་བྱང་ཆུབ་ཟད་མི་ཤེས་པའི་མདོ་ཆེན་པོ་འདི་ནི་བསོད་ནམས་ཀྱི་ཕུང་པོ་ཆེན་པོ་ཡིན་ཏེ། དེ་བས་ན་ཆེ་བ་ཞེས་བྱའོ། །སྔ་བ་དང་ཡངས་པ་དང་སོ་གའི་ཉི་མ་བཞིན་དུ་གཟི་བརྗིད་དང་ལྡན་པ་ཡིན་ཏེ། དེ་བས་ན་ཡོངས་སུ་མྱ་ངན་ལས་
འདས་པ་ཆེན་པོ་ཞེས་བྱའོ། །དེ་ཅིའི་ཕྱིར་ཞེ་ན། འདི་ལས་དེ་བཞིན་གཤེགས་པའི་སྙིང་པོ་རྟག་པར་བསྟན་པའི་ཕྱིར་རོ། །རིགས་ཀྱི་བུ་གཞན་ཡང་སྐར་མ་དང་སྲིན་བུ་མེ་ཁྱེར་གྱི་འོད་ནི་ཉི་ཟླའི་འོད་ལས་འདས་ཏེ་ཐལ་ལེར་སྣང་བར་མི་འགྱུར་རོ། །ཉི་ཟླའི་འོད་

ནི་འོད་ཐམས་ཅད་ལས་འདས་ཏེ་ལམ་མེར་འདུག་གོ། །དེ་བཞིན་དུ་གཞན་གྱི་འོད་རྣམས་ནི་མདོ་སྡེ་ཐམས་ཅད་དང་ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་འོད་ལས་འདས་
ཏེ་ཐལ་ལེར་མི་འདུག་གོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་འོད་ནི་འོད་ཐམས་ཅད་ལས་འདས་ཏེ་ཐལ་ལེར་སྣང་ལ། སེམས་ཅན་ཐམས་ཅད་ཀྱི་སྤུ་དྲུང་དུ་ཞུགས་ནས་བྱང་ཆུབ་ཀྱི་སེམས་མི་དགོས་སོ་སྙམ་སྟེ་མ་བསྐྱེད་དུ་ཟིན་ཀྱང་བྱང་ཆུབ་ཀྱི་
རྒྱུ་ངེས་པར་ཐོབ་པར་འགྱུར་ཏེ། དེ་བས་ན་མིང་ཡང་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། བྱང་ཆུབ་ཀྱི་སེམས་མི་དགོས་པར་འཛིན་ཀྱང་སེམས་ཅན་ཐམས་ཅད་ཀྱི་ལུས་ཀྱི་བ་སྤུའི་ཁུང་བུ་ཐམས་ཅད་དུ་ཞུགས་ནས་བྱང་ཆུབ་ཀྱི་རྒྱུ་མངོན་
པར་འགྲུབ་པར་འགྱུར་ཞེས་བགྱི་བ་འདི་ལ་གཏན་ཚིགས་བཀའ་སྩལ་འཚལ་ལགས་སོ། །བཅོམ་ལྡན་འདས་བསྟན་པ་འདི་ལ་ཕམ་པ་བགྱིད་པ་དང་། མཚམས་མ་མཆིས་པ་བགྱིད་པ་དང་། མདོ་སྡེ་སྤོང་བ་དང་། འདོད་ཆེན་པ་དག་ཀྱང་གདའ་
ལགས་ན། གལ་ཏེ་སེམས་མ་བསྐྱེད་དེ་མི་དགོས་པར་འཛིན་ཀྱང་བྱང་ཆུབ་པའི་བྱང་ཆུབ་ཀྱི་རྒྱུར་འགྱུར་དུ་ལགས་ན་སངས་རྒྱས་ཀྱིས་གསུངས་པ་ལ་བྱེ་བྲག་ཅི་མཆིས་ཏེ། ཡང་ན་བཞི་པོ་དེ་དག་མ་མཆིས་ཞེས་བཤད་འཚལ་ལགས་སོ། །ཡང་ན་དེས་སྡིག་པ་
འབྱང་བར་འགྱུར་ཞེས་བཤད་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདོད་ཆེན་པ་མ་གཏོགས་པར་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདི་རྣ་ལམ་དུ་གྲག་པར་ཐོས་པ་ཙམ་གྱིས་ཀྱང་ཐམས་ཅད་ལ་བྱང་ཆུབ་ཀྱི་རྒྱུ་ཡོད་པར་
འགྱུར་ཏེ། སངས་རྒྱས་གྲངས་མེད་པ་ལ་བཀུར་སྟི་བྱས་པ་རྣམས་ཀྱིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཐོས་པར་ནུས་ལ། དགེ་བའི་རྩ་བ་ངན་ངོན་མ་ཡིན་པས་བྱང་ཆུབ་ཀྱི་རྒྱུ་ཐོབ་པར་འགྱུར་རོ། །དེ་བས་ན་དེ་བཞིན་གཤེགས་པའི་སྙིང་

པོ་ཡང་དག་པར་སྟོན་པའི་ཕྱིར་མདོ་ཆེན་པོ་མཐུ་ཆེ་བ་ཡིན་ནོ། །གསོལ་པ། སེམས་མ་བསྐྱེད་དེ་མི་དགོས་པར་འཛིན་པས་ཇི་ལྟར་བྱང་ཆུབ་པའི་བྱང་ཆུབ་ཀྱི་རྒྱུར་འགྱུར་ལགས། བཀའ་སྩལ་པ། བྱང་ཆུབ་ཏུ་སེམས་བསྐྱེད་ནས་མི་དགོས་པར་འཛིན་ཅིང་
མདོ་སྡེ་ཁྱད་དུ་གསོད་པ་གང་ཡིན་པ་དེ་དག་ལ་ནི་རྨི་ལམ་དུ་སྲིན་པོ་ཆེན་པོ་འཇིགས་པའི་གཟུགས་ཅན་གྱིས་བསྡིགས་ཏེ། འདི་སྐད་དུ་ངས་མ་བསད་པར་སྐྱེན་པར་བྱང་ཆུབ་ཏུ་སེམས་སྐྱེད་ཅིག་ཅེས་ཀྱང་ཟེར་རོ། །དེ་ནས་དེ་དག་རྨི་ལམ་དུ་འཇིགས་ཤིང་སྐྲག་སྟེ་སད་
ནས་ནང་པར་བྱང་ཆུབ་ཏུ་སེམས་སྐྱེད་པར་བྱེད་དེ། དེ་དག་ཤི་ནས་སེམས་ཅན་དམྱལ་བ་རྣམས་སུ་འཚེད་པའམ། ཡི་དགས་ཀྱི་འཇིག་རྟེན་ནས་མཐོ་རིས་སུ་སྐྱེས་ཀྱང་རུང་སྟེ། རྗེས་སུ་དྲན་ནས་དེའི་འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོར་འགྱུར་
རོ། །དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་མཐུ་ཆེ་སྟེ་མི་དགོས་པར་འཛིན་ཅིང་སེམས་མ་བསྐྱེད་ཀྱང་བྱང་ཆུབ་ཀྱི་རྒྱུ་སྐྱེད་པར་བྱེད་དོ། །རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ཏེ། ཐེག་པ་ཆེན་པོ་འདི་ལ་རྒྱུ་མེད་པ་མ་ཡིན་ནོ། །
དེ་བས་ན་ངའི་བསྟན་པ་ནི་སངས་རྒྱས་ཀྱིས་གསུངས་པ་ཞེས་བྱའོ། །རིགས་ཀྱི་བུ་གཞན་ཡང་ནམ་མཁའ་ལས་སྤྲིན་ཆེན་པོ་ཆར་འབེབས་པ་ན་ས་ཆེན་པོ་ཆུས་གང་བར་འགྱུར་ལ། གྲམ་པའི་ས་ཕྱོགས་སུ་ནི་ཆར་ཆེན་པོ་བབ་ཏུ་ཟིན་ཀྱང་ཆུ་ཅུང་ཟད་ཀྱང་
གནས་པར་མི་འགྱུར་ཏེ་གར་གཞོལ་བར་འབབ་ལ། བབ་ནས་ཀྱང་དེར་གནས་པར་འགྱུར་ཏེ། སེམས་ཅན་ཐམས་ཅད་ལ་ཡང་ཕན་འདོགས་པར་འགྱུར་བ་དེ་བཞིན་དུ་མདོ་སྡེ་ཆེན་པོ་འདི་ལས་དམ་པའི་ཆོས་ཀྱི་ཆར་འབབ་མོད་ཀྱི། འདོད་ཆེན་པ་ལ་ནི་བྱང་ཆུབ་
ཀྱི་རྒྱུ་སྐྱེ་བར་མི་འགྱུར་ཏེ་སྐྱེ་མི་སྲིད་དོ། །གཞན་དག་ལ་ནི་ས་གཞོལ་བའི་ཆུ་བཞིན་དུ་སྐྱེད་པར་བྱེད་དོ། །རིགས་ཀྱི་བུ་གཞན་ཡང་དཔེར་ན་སྲན་སྡེའུ་འམ། སྲན་གྲེའུའམ། སྲན་མའམ། སྤའི་ས་བོན་ཚིག་པ་རྣམས་ལ་སྤྲིན་ཆེན་པོའི་ཆར་སྟོང་དུ་བབ་

ཀྱང་མྱུ་གུ་སྐྱེ་བར་མི་ནུས་ཏེ། དེ་དག་ལས་མྱུ་གུ་འབྱུང་མི་སྲིད་དོ། །དེ་བཞིན་དུ་འདོད་ཆེན་པ་རྣམས་ཀྱིས་ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་སུ་ཟིན་ཀྱང་བྱང་ཆུབ་ཀྱི་རྒྱུ་ཐོབ་མི་སྲིད་དེ། དེ་དག་ནི་དགེ་བའི་རྩ་བ་ཟད་པ་ཡིན་
པའི་ཕྱིར་ས་བོན་ཚིག་པ་དང་འདྲའོ། །རིགས་ཀྱི་བུ་དཔེར་ན་ཀ་ཏ་ཀའི་འབྲས་བུ་ཆུ་རྙོག་པ་ཅན་གྱི་ནང་དུ་བཅུག་ན་རྙོག་པ་བསལ་ཏེ་ཆུ་དང་བར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདི་ཡང་ཀ་ཏ་ཀའི་འབྲས་བུ་བཞིན་དུ་སེམས་ཅན་རྣམས་
ཀྱི་ཕམ་པ་རྣམས་དང་། མཚམས་མེད་པའི་ལས་རྣམས་ཀྱི་ལས་ཀྱི་འདམ་རྫབ་དང་རྙོག་པ་བསལ་ནས་བྱང་ཆུབ་ཀྱི་རྒྱུ་ལ་འགོད་པར་བྱེད་དེ། འདོད་ཆེན་པ་ནི་མ་གཏོགས་སོ། །ཀ་ཏ་ཀའི་འབྲས་བུས་ཀྱང་རྙོག་པ་དང་བར་བྱེད་པར་ཟད་ཀྱི། ལོ་སྟོང་
གི་བར་དུ་བདར་དུ་ཟིན་ཀྱང་འདམ་རྫབ་དེ་ལས་ཆུ་དབྱུང་བ་ནི་མི་ནུས་སོ། །དེ་བཞིན་དུ་འདོད་ཆེན་པ་ཡང་དགེ་བའི་རྩ་བ་ཟད་ཅིང་གཞི་མེད་པར་འགྱུར་བ་ཡིན་པས་དེ་ནི་ཡོངས་སུ་མྱ་ངན་ལས་འདས་པ་ཆེན་པོ་འདི་ལོ་བྱེ་བར་ཐོས་སུ་ཟིན་ཀྱང་བྱང་ཆུབ་ཀྱི་རྒྱུ་སྐྱེད་པར་
ཡང་ཡེ་མི་ནུས་ཏེ། དེ་ལ་དགེ་བ་མེད་པའི་ཕྱིར་རོ། །རིགས་ཀྱི་བུ་དཔེར་ན་དུག་སྨན་གྱི་སྡོང་པོ་སྨན་གྱི་རྒྱལ་པོ་ཆེན་པོ་ནི་དར་བའམ། བུ་རམ་མམ། ཞུན་མར་རམ། འོ་མའམ། ཆུ་དང་སྦྱར་རམ། ཕྱེའམ། ལྡེ་གུའམ། ཐུག་པར་བྱས་སམ། ཁ་བསྐུས་
སམ། དུད་པས་བདུགས་སམ། མིག་བསྐུས་སམ། དྲི་ཚོར་རམ། མཐོང་ངམ། རེག་པར་གྱུར་ཀྱང་རུང་སྟེ། སེམས་ཅན་ཐམས་ཅད་ཀྱི་ནད་སེལ་བར་བྱེད་ལ། ཤིང་ལྗོན་པ་དེ་འདི་སྙམ་དུ་བདག་གི་ལོ་མ་ཁྱེར་ན་རུང་ངོ་། །རྩ་བ་ཁྱེར་ན་མི་རུང་ངོ་སྙམ་པའམ།
བདག་གི་རྩ་བ་ཁྱེར་ན་རུང་ངོ་། །ལོ་མ་ཁྱེར་ན་མི་རུང་ངོ་སྙམ་པའམ། སྡོང་བུ་ཁྱེར་ན་རུང་ངོ་། །ཤུན་པགས་ཁྱེར་ན་མི་རུང་ངོ་སྙམ་པའམ། ཤུན་པགས་ཁྱེར་ན་རུང་ངོ་། །སྡོང་བུ་ཁྱེར་ན་མི་རུང་ངོ་སྙམ་དུ་མི་སེམས་ཏེ་དེ་དེ་ལྟར་སེམས་མི་སྐྱེད་མོད་ཀྱི། འོན་ཀྱང་དེ་ནི་

སྨན་ཁོ་ན་ཡིན་ཏེ་ནད་ཐམས་ཅད་སེལ་བར་བྱེད་དོ། །རིགས་ཀྱི་བུ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཡང་སེམས་ཅན་ཐམས་ཅད་ཀྱི་སྡིག་པའི་ལས་ཀྱི་ནད་རྣམས་སེལ་བར་བྱེད་དེ། ཕམ་པར་བྱེད་པ་རྣམས་ཀྱང་རུང་། མཚམས་
མེད་པ་བྱེད་པ་རྣམས་ཀྱང་རུང་། འདི་ལས་ཕྱི་རོལ་པ་རྣམས་ཀྱང་རུང་སྟེ། བྱང་ཆུབ་དགོས་པར་མི་འཛིན་ཅིང་སེམས་མ་བསྐྱེད་ཀྱང་བྱང་ཆུབ་ཀྱི་རྒྱུ་སྐྱེད་པར་བྱེད་དོ། །དེ་ཅིའི་ཕྱིར་ཞེ་ན། སྡིག་པ་ཐམས་ཅད་ཀྱི་དུག་སྨན་གྱི་སྡོང་པོའི་སྨན་ནི་ཡོངས་སུ་མྱ་ངན་ལས་
འདས་པ་ཆེན་པོའི་མདོ་ཆེན་པོ་ཡིན་པའི་ཕྱིར་རོ། །ལུས་བསྒོས་པ་རྣམས་ཀྱང་རུང་། ལུས་མ་བསྒོས་པ་རྣམས་ཀྱང་རུང་སྟེ། མདོ་སྡེ་འདིའི་མིང་ཙམ་ཐོས་ན་ཡང་མདོ་སྡེ་འདི་ནི་ཡོད་དོ་སྙམ་དུ་ཤེས་ན་སྡིག་པའི་ནད་ཐམས་ཅད་འབྱང་བར་འགྱུར་རོ། །གསོར་མི་
རུང་བའི་ནད་ཨ་ནརྒ་ལ་ཞེས་བྱ་བ་དེ་ནི་ཇི་ལྟར་བྱས་ཀྱང་གསོར་མི་རུང་ངོ་། །དེ་ཅིའི་ཕྱིར་ཞེ་ན། དེ་ནི་འཆི་བར་འགྱུར་བའི་ནད་ཡིན་པའི་ཕྱིར་ཏེ། དུས་མ་ཡིན་པར་འཆི་བའི་ནད་མ་ཡིན་ནོ། །དེ་བཞིན་དུ་འདོད་ཆེན་པ་ཡང་མདོ་སྡེ་འདིས་བྱང་ཆུབ་ཏུ་གཞོག་པར་མི་
ནུས་ཏེ། དེ་ནི་རྒྱུ་མེད་པ་དང་ཤི་བ་ཡིན་པའི་ཕྱིར་རོ། །དཔེར་ན་ལག་མཐིལ་རྨ་མེད་པ་ལ་དུག་གིས་མི་ཚུགས་ལ་རྨ་ཡོད་པ་ལ་ནི་དུག་གིས་ཚུགས་པར་འགྱུར་བ་དེ་བཞིན་དུ། འདིར་ཡང་འདོད་ཆེན་པ་ལ་བྱང་ཆུབ་ཀྱི་རྒྱུ་མི་སྐྱེའོ། །དེ་ལ་རྨ་ཞེས་བྱ་བ་ནི་བྱང་ཆུབ་ཀྱི་
རྒྱུའོ། །དུག་ཅེས་བྱ་བ་ནི་མཆོག་ཏུ་བདེ་བའོ། །ལག་མཐིལ་རྨ་མེད་པ་ལྟ་བུ་ནི་འདོད་ཆེན་པ་སྡིག་ཅན་ཡིན་ནོ། །དཔེར་ན་རྡོ་རྗེ་རིན་པོ་ཆེ་གཟི་བྱིན་ཆེན་པོ་ནི་ཅིས་ཀྱང་གཅག་མི་ནུས་ལ་སྣ་གྲངས་གཞན་ཐམས་ཅད་ནི་དེས་ཆོམས་པར་འགྱུར་མོད་ཀྱི་ལུག་རུ་ནི་མི་ཆོད་དོ། །དེ་
བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདིས་ཀྱང་ཤིན་ཏུ་སྡིག་པའི་ལས་བྱེད་པ་འདོད་ཆེན་པ་ནི་བྱང་ཆུབ་ཏུ་གཞག་པར་མི་ནུས་ཏེ། རྒྱུ་མེད་པའི་ཕྱིར་རྡོ་རྗེས་ལུག་རུ་ལ་མི་ཚུགས་པ་བཞིན་ནོ། །དཔེར་ན་ཤིང་ས་ལ་ཀི་དང་། དོང་ཀའི་ཤིང་དང་། ཀ་ན་ག་པྲ་བྷ་དང་། ཤིང་

བལ་གྱི་ཤིང་དང་། བལ་མི་ཀི་དང་། ཀར་ན་བལ་ལྱ་དང་། སྐན་ད་སྟ་བ་དང་། ཀེ་ཏ་ཀི་དང་། པད་ཏྲ་ཀ་དང་། བི་ར་ན་དང་། རོ་ཙ་ན་རྣམས་ནི་བཅད་དེ་དུམ་བུར་གཏུབས་ནས་ཁྱེར་ཏེ་ཁྱིམ་དུ་བཞག་ཀྱང་གལ་ཏེ་ཆུའི་རླན་དང་ཕྲད་ཕན་ཅད་མྱུར་དུ་སྐྱེ་བར་འགྱུར་ཏེ།
ལོ་མ་ཁ་འབུ་བ་དང་། སྙེ་མ་དང་ལྡན་ཞིང་ཡལ་ག་དང་སྡོང་བུ་དང་ལྡན་ཏེ་ཤིང་ལྗོན་པ་ཞེས་བྱ་བའི་གྲངས་སུ་གཏོགས་པར་འགྱུར་རོ། །དེ་བཞིན་དུ་བསྟན་པ་འདི་ལ་ཡང་ཕམ་པ་བྱེད་པ་རྣམས་དང་། མཚམས་མེད་པ་བྱེད་པ་རྣམས་ཤིང་ཏ་ལའི་མགོ་བཅད་པ་བཞིན་དུ་གྱུར་པ་ལས།
མདོ་སྡེ་འདི་ཐོས་མ་ཐག་ཏུ་སེམས་བསྐྱེད་པ་དགོས་པར་མི་འཛིན་གྱིས་ཀྱང་མི་མཆོག་དེ་དག་ནི་ཤིང་ས་ལ་ཀི་དང་། དོང་ཀའི་ཤིང་ལ་སོགས་པ་བཞིན་དུ་བྱང་ཆུབ་ཏུ་འཁྲུང་བར་འགྱུར་རོ། །དཔེར་ན་སེང་ལྡེང་དང་ཏིན་དུ་ཀའི་ཤིང་ལྗོན་པ་རྣམས་ནི་བཅད་ཕན་ཅད་ས་བོན་ཚིག་པ་བཞིན་དུ་
སྐྱེ་བར་མི་འགྱུར་བ་དེ་བཞིན་དུ་འདོད་ཆེན་པའི་སེམས་ཅན་རྣམས་ཀྱིས་ཀྱང་མདོ་སྡེ་འདི་ལན་མང་དུ་ཐོས་ཀྱང་ས་བོན་ཚིག་པ་བཞིན་དུ་བྱང་ཆུབ་ཏུ་འཁྲུང་བར་མི་འགྱུར་རོ། །དཔེར་ན་སྤྲིན་ཆེན་པོ་ལས་ཆར་བབ་ཏུ་ཟིན་ཀྱང་ས་ཕྱོགས་བྱིལ་པོར་འདུག་པ་ལ་ཆུ་མི་ཆགས་པ་བཞིན་
དུ་མདོ་སྡེ་ཆེན་པོའི་སྤྲིན་འདི་ལས་ཆོས་ཀྱི་ཆར་འབབ་མོད་ཀྱི་འདོད་ཆེན་པ་ལ་བྱང་ཆུབ་ཀྱི་རྒྱུ་མི་འཆགས་ཏེ། དེ་ནི་རྡོ་རྗེ་བཞིན་དུ་བྱིལ་པོར་འདུག་པའི་ཕྱིར་རོ། །འདོད་ཆེན་པ་རྣམས་ཀྱིས་ནི་དགེ་བ་བྱས་པ་ནི་མི་མཐོང་གི། སྨད་པ་དང་། བཤུང་བའི་སྡིག་པ་གང་ཡིན་པ་ནི་
མཐོང་ངོ་། །ལེགས་པར་བྱས་པ་ནི་བྱང་ཆུབ་ཀྱི་དོན་ཏོ། །མི་འོང་བ་ནི་མི་ཕྲད་པའི་དོན་ཏོ། །དགོངས་པ་ནི་དགེ་བའི་དོན་ཏོ། །དགོངས་པ་ལས་ཁྱད་པར་དུ་འཕགས་པའི་དགེ་བ་སུ་ལ་མི་འོང་ཞེ་ན། ལས་བཟང་པོ་ནི་འདོད་ཆེན་པ་ལ་མི་འོང་ངོ་། །དགེ་བའི་སེམས་སུ་ལ་མི་འོང་ཞེ་
ན། འདོད་ཆེན་པ་ཞེས་གྲགས་པ་ནི་དགེ་བ་མེད་པའི་སེམས་ཅན་ང་རྒྱལ་གྱི་དབང་དུ་གྱུར་པ་ཡིན་ཏེ། འདོད་ཆེན་པ་དེ་ལ་མི་འོང་ངོ་། །གཞིའི་ཡན་ལག་ཅི་ཞེ་ན། མདོ་སྡེ་སྤོང་བའོ། །དེ་བས་ན་མདོ་སྡེ་སྤོང་བ་ནི་འཇིགས་སུ་རུང་བ་ཡིན་ཏེ། དེས་འཇིགས་པར་གྱིས་ཤིག །དེ་ཡི་ཕྱིར་ན་

མཁས་པ་བརྟན་པོ་རྣམས། །ལམ་པོ་ཆེ་ན་འདུ་བྱེད་ཡོད་པས་འཇིགས། །བྱིས་པ་རྣམས་ནི་ལམ་ཆེན་འཇིགས་པ་མེད། །ང་རྒྱལ་དབང་གིས་མི་བཟད་འགྲོ་བར་འགྱུར། །དེས་ན་བློ་ངན་རྣམས་ཀྱིས་དེ་མི་ཐོབ། །སྤྲེའུ་རྣམས་ཟླ་བ་སྙབ་པར་བྱེད་པ་བཞིན། །མི་
ཡི་དབང་པོ་ལམ་ཆེན་ཞུགས་པ་ལྟར། །མཁས་པ་བརྟན་པོ་རྣམས་ཀྱིས་ཐོབ་པར་འགྱུར། །གང་གིས་བྱས་པ་མི་མཐོང་ཞེ་ན། འདོད་ཆེན་པ་སྡིག་ཅན་གྱིས་བྱས་པ་མི་མཐོང་སྟེ། དེས་འཁོར་བའི་མཐའི་བར་གྱི་བྱས་པ་མི་མཐོང་ངོ་། །ངས་དེའི་དོན་མདོར་བསྡུས་ཏེ་བསྟན་
གྱི། མཆོག་ཏུ་འཇིགས་སུ་རུང་བས་འཇིགས་པར་གྱིས་ཤིག །གང་གི་ཚེ་སེམས་ཅན་ཐམས་ཅད་སེམས་རྩེ་གཅིག་ཏུ་འཐུན་པར་གྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་སྲིད་ན། དེའི་ཚེ་འདོད་ཆེན་པ་སྡིག་ཅན་
བྱང་ཆུབ་མཆོག་ཏུ་མངོན་པར་རྫོགས་པར་འཚང་རྒྱ་ཡང་སྲིད་པ་ཞིག་ན། དེ་ནི་བྱས་པ་མི་མཐོང་བ་ཡིན་ཏེ། དཔའ་བོ་ཁྱོད་ཀྱིས་དེ་ལྟར་ཤེས་པར་གྱིས་ཤིག །སུའི་བྱས་པ་ཆུད་མི་ཟ་ཞེ་ན། དེ་བཞིན་གཤེགས་པའི་བྱས་པ་ཆུད་མི་ཟའོ། །གང་གི་ཚེ་འཁོར་བ་ན་
གནས་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེའི་ཚེ་དེ་བཞིན་གཤེགས་པའི་བྱས་པ་ཆུད་ཟ་བར་འགྱུར་ཏེ། དེའི་ཚེ་གཏན་དུ་ཡོངས་སུ་མྱ་ངན་ལས་འདས་པ་ཡོངས་སུ་མྱ་ངན་ལས་འདས་ནས་མར་མེ་
དང་ཤིང་ཟད་པའི་མེ་བཞིན་དུ་སངས་རྒྱས་མི་རྟག་པར་འགྱུར་རོ། །དེ་བཞིན་དུ་འདོད་ཆེན་པའི་སྡིག་པའི་ལས་ཀྱང་སྨད་པ་དང་བཤུང་བ་ཡིན་ནོ། །བྱང་ཆུབ་ཀྱི་རྒྱུའི་བསོད་ནམས་གང་ཡིན་པ་དེ་གལ་ཏེ་བྱང་ཆུབ་སེམས་དཔའ་སྤོང་བར་བྱེད་ན་དེ་ཡང་ཐེག་པ་ཆེན་པོ་ལ་སྨོད་པ་
དང་བཤུང་བ་ཞེས་བྱའོ། །དེ་སྟེ་མི་སྤོང་ན་ནི་དེ་ལྟ་ན་རྫོགས་པའི་སངས་རྒྱས་ཞེས་བྱ་བའི་མིང་ཐོགས་པར་འགྱུར་ཏེ། དེ་ནི་སངས་རྒྱས་རྣམས་ཀྱི་ཆོས་ཉིད་ཡིན་ནོ། །འོ་མ་དང་ནི་སྡིག་པའི་ལས། །མོད་ལ་ལྡང་བར་མི་འགྱུར་ཏེ། །མེ་ན་ཐལ་བས་གཡོགས་པ་ལ། །བྱིས་

པ་སོང་ན་ཚིག་པ་བཞིན། །འདོད་ཆེན་པ་ལོང་བ་གཅིག་པུ་དགྲ་བཅོམ་པ་ཡིན་པར་འདོད་པ་ནི་ལམ་མི་ཟད་པ་ཆེན་པོར་འགྲོ་འདོད་དོ། །བྱམས་པ་དང་ལྡན་པའི་དགྲ་བཅོམ་པ་ཡིན་པར་འདོད་ལ་ཤིན་ཏུ་རྒྱས་པ་སུན་དབྱུང་བར་འདོད་དེ། དགྲ་བཅོམ་པ་
ཡིན་པར་འདོད་ཅིང་ཉན་ཐོས་ཀྱི་ཐེག་པ་སུན་ཕྱུང་ནས་ང་ནི་བྱང་ཆུབ་སེམས་དཔའ་སྟེ། ཤིན་ཏུ་རྒྱས་པ་སྟོན་པ་ཡིན་ནོ། །སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོའི་ཡོན་ཏན་རྣམས་ཡོད་དོ། །སངས་རྒྱས་ཡོད་དོ་ཞེས་ཟེར་ཞིང་སངས་རྒྱས་སུ་ལུང་སྟོན་པར་
བྱེད་དེ། ང་དང་ཁྱེད་ཀྱིས་ཉོན་མོངས་པའི་རྣམ་པ་ཆུའི་བུམ་པ་བཞིན་དུ་གཞོམ་པར་བྱའོ། །ཐེ་ཚོམ་མེད་པར་བྱང་ཆུབ་བསྒོམ་པར་བྱ་སྟེ། མདོ་སྡེའི་མན་ངག་ནི་དེ་ལྟ་བུ་ཡིན་ནོ་ཞེས་ཟེར་རོ། །དཔེར་ན་རྒྱལ་པོའི་ཕོ་ཉ་གཙང་ཞིང་སྙིང་ཉེ་ལ་སྨྲ་མཁས་ཤིང་གཟི་བྱིན་ཆེ་བ།
དགྲའི་ནང་དུ་རང་གི་སྲོག་དང་བསྡོས་ཏེ་རྒྱལ་པོ་ལ་ཚིག་རྫོགས་པར་སྨྲ་བ་དེ་བཞིན་དུ་ཤེས་རབ་ཅན་ཤིན་ཏུ་རྒྱས་པ་གཅེས་པར་འཛིན་པ་ནི་བྱིས་པ་རྣམས་ཀྱི་ནང་དུ་རང་གི་སྲོག་དང་བསྡོས་ནས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པས་སངས་རྒྱས་སུ་ལུང་
སྟོན་པར་བྱེད་དོ། །དགོན་པ་པ་མདོ་སྡེ་སྤོང་བ། བྱིས་པ་བླུན་པོ་དགྲ་བཅོམ་པ་ཡིན་པར་འདོད་པ་གང་ཡིན་པ་དེ་ལ་དགྲ་བཅོམ་པ་དང་འདྲ་བར་ལྟ་ཞིང་སེམས་ཅན་ཆེན་པོ་དང་འདྲ་བར་ལྟ་སྟེ། འདོད་ཆེན་པ་དགེ་སློང་སྡིག་ཅན་དེ་དགོན་པ་ན་གནས་ཤིང་བདག་ཉིད་དགྲ་བཅོམ་པ་དང་
འདྲ་བར་རྩི་བར་བྱེད་དེ། དགོན་པ་ན་གནས་པའི་དགེ་སློང་རྣམས་གཞན་གྱིས་བོས་པ་མི་བཟོད་ལ་རྐྱེན་བཞི་ལས་ཤིན་ཏུ་རྒྱས་པ་ནི་བདུད་ཀྱིས་སྨྲས་པ་ཡིན་ནོ། །བཅོམ་ལྡན་འདས་ནི་མི་རྟག་གོ། །ཆོས་དང་དགེ་འདུན་ཡང་མེད་པར་འགྱུར་རོ། །དམ་པའི་ཆོས་མེད་པར་འགྱུར་
བའི་ལྟས་དེ་ལྟ་བུ་དག་ཀྱང་སྣང་ངོ་ཞེས་བྱ་བ་འདི་ཐེག་པ་ཆེན་པོ་ལས་ལེགས་པར་བཤད་དོ་ཞེས་ཟེར་ཏེ། དེ་སྐད་དུ་དམ་པའི་ཆོས་མ་ཡིན་པར་སྨྲ་བ་ནི་འོ་མ་བཞིན་དུ་མོད་ལ་ལྡང་བར་མི་འགྱུར་ཏེ། མེ་ཐལ་བས་བཀབ་པ་ལ་བབ་པ་བཞིན་དུ་བྱིས་པ་འདོད་ཆེན་པ་རྣམས་ཕྱིས་ཚིག་པར་འགྱུར་

རོ། །དེ་ལྟར་ན་སངས་རྒྱས་ཀྱི་བསྟན་པ་ཐེག་པ་ཆེན་པོ་ཆ་ཕྲ་བ་ཡིན་ཏེ། མདོ་སྡེ་འདི་ནི་ཀ་ཏ་ཀའི་འབྲས་བུ་དང་འདྲའོ། །རིགས་ཀྱི་བུ་དཔེར་ན་མེ་ཏོག་པད་མ་ཁ་ཟུམ་པ་ཉི་མའི་འོད་ཀྱིས་ཕོག་ན་ཁ་འབྱེ་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཐོས་
མ་ཐག་ཏུ་བྱང་ཆུབ་ཀྱི་སེམས་མིང་ཙམ་བསྐྱེད་པ་ཡང་མི་དགོས་པར་འཛིན་པའི་སེམས་ཅན་ཐམས་ཅད་ཀྱང་དབང་མེད་པར་བྱང་ཆུབ་ཀྱི་རྒྱུ་སྤུ་དྲུང་ཐམས་ཅད་དུ་འཇུག་པར་འགྱུར་རོ། །འདོད་ཆེན་པ་རྣམས་ལ་ཡང་དེ་བཞིན་གཤེགས་པའི་སྙིང་པོ་ཡོད་མོད་ཀྱི་འོན་ཀྱང་གཡོགས་མ་
བཞིན་དུ་སྟུག་པོར་འདུག་གོ། །དཔེར་ན་དར་གྱི་སྲིན་བུ་རང་ཉིད་ཀྱིས་ཀུན་ནས་དཀྲིས་ཏེ། སྒོམ་བཏོད་པར་ཕྱིར་འབྱུང་མི་ནུས་པ་དེ་བཞིན་དུ་དེ་བཞིན་གཤེགས་པའི་སྙིང་པོ་ཡང་དེའི་ལས་ཀྱི་ཉེས་པས་འདོད་ཆེན་པའི་ཁོང་ནས་དབྱུང་བར་མི་ནུས་སོ། །དེ་བས་ན་འཁོར་བའི་མཐའ་ལས་
བྱང་ཆུབ་ཀྱི་རྒྱུ་མི་འཐོབ་བོ། །རིགས་ཀྱི་བུ་དཔེར་ན་པད་མ་དང་ཨུད་པ་ལ་དང་ཀུ་མུ་ད་དང་པད་མ་དཀར་པོ་རྣམས་འདམ་གྱི་ནང་ནས་སྐྱེས་ཀྱང་འདམ་གྱིས་མི་གོས་པ་དེ་བཞིན་དུ་མདོ་སྡེ་ཆེན་པོ་འདི་ལ་ཡང་ཐེག་པ་ཆེན་པོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་གྲངས་
སུ་གཏོགས་སོ། །ཅིའི་ཕྱིར་མི་གོས་ཞེ་ན། དེ་བཞིན་གཤེགས་པའི་སྙིང་པོའི་བྱིན་གྱི་རླབས་ཀྱིས་མི་གོས་སོ། །དཔེར་ན་སེར་བུ་བསིལ་བ་ལངས་པའི་ཚེ་དབང་མེད་པར་སེམས་ཅན་ཐམས་ཅད་ཀྱི་སྤུ་དྲུང་ཐམས་ཅད་དུ་ཞུགས་ནས་ཚ་བ་ཐམས་ཅད་ཞི་བར་བྱེད་པ་དེ་བཞིན་དུ་མདོ་ཆེན་པོ་འདི་
ཡང་སེམས་ཅན་ཐམས་ཅད་ཀྱི་སྤུ་དྲུང་ཐམས་ཅད་དུ་ཞུགས་ནས་དབང་མེད་པར་བྱང་ཆུབ་ཀྱི་རྒྱུ་ལ་འཇོག་པར་བྱེད་དེ། འདོད་ཆེན་པ་སེམས་བསྐྱེད་པ་དགོས་པར་མི་འཛིན་པ་ནི་མ་གཏོགས་སོ། །རིགས་ཀྱི་བུ་དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ལ་མཁས་པ་ནི་ནད་པ་
ཐམས་ཅད་གསོ་བར་བྱེད་མོད་ཀྱི། གསོར་མི་རུང་བ་ནི་གསོ་བར་མི་ནུས་པ་དེ་བཞིན་དུ་མདོ་སྡེ་དང་ཏིང་ངེ་འཛིན་ཐམས་ཅད་ཀྱང་འདོད་ཆགས་དང་། ཞེ་སྡང་དང་། གཏི་མུག་གི་ནད་ཀྱིས་ཐེབས་པ་ཐམས་ཅད་གསོ་བར་བྱེད་ལ། ཉོན་མོངས་པའི་ཟུག་རྔུ་ཐམས་ཅད་ཀྱང་སེལ་

བར་བྱེད་མོད་ཀྱི། ཕམ་པ་བྱེད་པ་རྣམས་དང་། མཚམས་མེད་པ་བྱེད་པ་རྣམས་ནི་གསོ་བར་མི་ནུས་སོ། །དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ནི་སེམས་ཅན་ཐམས་ཅད་ཀྱི་ནད་གསོ་བར་བྱེད་མོད་ཀྱི། དེས་ཀྱང་འཆི་བའི་དུས་ལ་
བབ་པའི་ནད་གསོ་མི་ནུས་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཡང་སེམས་ཅན་ཐམས་ཅད་ཀྱི་ཉོན་མོངས་པའི་ནད་ཐམས་ཅད་བསལ་ནས་སེམས་ཅན་རྣམས་བྱང་ཆུབ་ཀྱི་རྒྱུ་ལ་འགོད་པར་བྱེད་མོད་ཀྱི། འཆི་བའི་དུས་ལ་བབ་པ་ལྟ་བུའི་འདོད་ཆེན་པོ་
ནི་མ་གཏོགས་སོ། །དཔེར་ན་དམུས་ལོང་གིས་ཉི་ཟླའི་འོད་ཀྱང་མི་ཤེས་ན་གསལ་བར་ལྟ་ག་ལ་མཐོང་སྟེ། སྨན་པ་ཆེན་པོས་ཀྱང་མིག་རྟུལ་བ་རྣམས་ཀྱིས་མིག་བཅོས་ནས་མཐོང་བར་ཟད་དེ། དམུས་ལོང་ནི་མ་གཏོགས་སོ། །དེ་བཞིན་དུ་ཡོངས་སུ་མྱ་ངན་ལས་འདས་པ་
ཆེན་པོའི་མདོ་ཆེན་པོ་འདི་ཡང་ལོང་བ་ལྟ་བུའི་ཉན་ཐོས་དང་རང་སངས་རྒྱས་ཐམས་ཅད་ཀྱི་མིག་བཅོས་ནས་མྱུར་བ་ཁོ་ནས་ཐེག་པ་ཆེན་པོའི་མིག་མཐོང་བར་བྱེད་ལ། ཕམ་པར་བྱེད་པ་རྣམས་དང་མཚམས་མེད་པ་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱང་བྱང་ཆུབ་
ལ་འགོད་པར་བྱེད་མོད་ཀྱི། ཤིན་ཏུ་དམུས་ལོང་དུ་འདུག་པ་འདོད་ཆེན་པ་ནི་མ་གཏོགས་སོ། །རིགས་ཀྱི་བུ་དཔེར་ན་སྨན་པ་ཆེན་པོ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ནི་སྨན་སྣར་བླུགས་པ་དང་། ཁོང་དུ་བཏུང་བ་དང་། ལུས་ལ་བསྐུ་བ་དང་། དུད་པས་
བདུག་པའི་ལས་རྣམས་ཀྱིས་སེམས་ཅན་ཐམས་ཅད་ཀྱི་ནད་སེལ་བར་བྱེད་དོ། །མགོན་མེད་པ་རྣམས་དང་བདག་ཅག་ལ་སྨན་མི་དགོས་སོ་སྙམ་སྟེ། སེམས་མི་བསྐྱེད་པ་རྣམས་ཀྱང་ཁྱིམ་དག་གི་ནང་ངམ། རྩྭ་དག་གི་ཁྲོད་དུ་བཞག་སྟེ། སྔགས་དང་། སྨན་དང་། སྨན་
གནོད་སེལ་གྱི་མཐུས་དུག་རྣམས་དང་། ནད་རྣམས་སེལ་བར་བྱེད་ལ། བུད་མེད་སྦྲུམ་མ་བུ་བཙའ་བར་འདོད་ན་བཙར་མི་བཏུབ་པ་རྣམས་ཀྱང་སྨན་གནོད་སེལ་གྱི་མཐུས་བདེ་བར་བཙའ་བར་བྱེད་ལ། བྱིས་པ་ཡང་ནད་མེད་པར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་

པོའི་མདོ་ཆེན་པོ་འདི་གླེགས་བམ་དུ་བྱས་པ་སེམས་ཅན་ཐམས་ཅད་ཀྱི་ཁྱིམ་ན་འཆང་བ་དེ་དག་ཀྱང་ཐེག་པ་ཆེན་པོའི་མཐུས་བདེ་བར་བྱེད་ལ་མདོ་ཆེན་པོ་འདིས་བྱང་ཆུབ་སེམས་དཔའ་སེམས་དཔའ་ཆེན་པོར་ཡང་འགྱུར་རོ། །ཕམ་པ་བྱེད་པ་རྣམས་དང་། མཚམས་མེད་པ་བྱེད་པ་སེམས་
བསྐྱེད་མི་དགོས་པར་འཛིན་པ་རྣམས་ཀྱང་བྱང་ཆུབ་ལ་འགོད་པར་བྱེད་དེ། འདོད་ཆེན་པ་ཤི་བ་དང་འདྲ་བ་ནི་མ་གཏོགས་སོ། །གསོལ་པ། ཕམ་པ་བགྱིད་པ་རྣམས་དང་། མཚམས་མ་མཆིས་པ་མི་བཟད་པ་ཏ་ལའི་མགོ་བཅད་པ་དང་འདྲ་བ་དེ་དག་བདག་ཅག་གིས་བྱང་ཆུབ་ཏུ་
སེམས་བསྐྱེད་མི་དགོས་སོ་སྙམ་དུ་འཛིན་ན་སེམས་མ་བསྐྱེད་པར་དེ་དག་ལ་བྱང་ཆུབ་ཀྱི་རྒྱུ་ཇི་ལྟར་སྐྱེ་བར་འགྱུར་ལགས། བཀའ་སྩལ་པ། རིགས་ཀྱི་བུ་དེ་དག་ནི་རྨི་ལམ་དུ་ཡང་རུང་། ཤི་བའི་འོག་ཏུ་ཡང་རུང་སྟེ། སེམས་ཅན་དམྱལ་བ་རྣམས་སུ་འཚེད་པ་ན་འདི་སྙམ་
དུ་སེམས་ཏེ། བདག་ཅག་གིས་ནི་མ་ལེགས་པ་བྱས་སོ། །གལ་ཏེ་འདི་ནས་ཐར་བར་འགྱུར་བ་ཞིག་ཡོད་ན་ནི་ཤིན་ཏུ་འཇིགས་པ་འདི་མཐོང་བས་བདག་ཅག་གང་དང་གང་དུ་སྐྱེས་པ་དེ་དང་དེར་བྱང་ཆུབ་ཏུ་སེམས་བསྐྱེད་པར་བྱའོ་སྙམ་དུ་སེམས་ཏེ། དམ་པའི་ཆོས་
དབྱུང་བར་སེམས་པ་ནི་འབྲས་བུ་ཆེ་བ་ཡིན་ནོ། །དཔེར་ན་བྱིས་པ་ལ་ལ་ཤེད་བྱེ་ནས་བདག་ཉིད་ཤེས་པར་བྱེད་ཅིང་འདི་ལྟར་བདག་མའི་མངལ་ན་འདུག་པའི་ཚེ་སྨན་པ་འདིས་སྔགས་དང་སྨན་གནོད་སེལ་གྱི་མཐུས་བདག་གི་མ་བདེ་བར་བྱས་པས་ན་སྲོག་འདི་ནི་ཁྱོད་ཀྱི་དྲིན་ནོ། །
ཀྱེ་མ་བདག་གི་མ་གང་གིས་བདག་ཟླ་བ་བཅུ་གཉིས་ཀྱི་བར་དུ་མའི་མངལ་ན་འཆང་ཞིང་ཤིན་ཏུ་ཉོན་མོངས་པར་གྱུར་ནས་དེའི་འོག་ཏུ་དེས་བདག་ཤིན་ཏུ་ཚེགས་ཆེན་པོས་བཙས་པ་དང་། བདག་མངལ་གྱི་དྲི་མ་ལྗན་ལྗིན་དང་། ཁྲག་གིས་ཡོག་པ་བཀྲུས་པ་དང་། བདག་
གི་མཆུ་ཁ་ཆུ་ནལ་ནལ་པོར་གཤེར་བར་འདུག་པ་ལ་འོ་བྱས་པ་དང་། ཐབས་ཅི་ཡོད་པས་གསོས་པ་ནི་མཆོག་ཏུ་དཀའ་བ་བྱེད་བྱེད་པ་ཡིན་ཏེ། ད་ནི་ཁྱོད་ཀྱི་བཀའ་དྲིན་ལ་བདག་སྐྱེས་པས་བླ་མའི་མཆོད་པ་བྱ་དགོས་ཏེ་དེ་དང་འཚམ་པར་བྱའོ་ཞེས་ཟེར་བ་དེ་བཞིན་དུ་ཕམ་

པ་བྱེད་བྱེད་པ་རྣམས་དང་། མཚམས་མེད་པ་བྱེད་བྱེད་པ་རྣམས་འཆི་བའི་ཚེ་དྲན་པ་མ་བརྗེད་པའི་འབྲས་བུས་ལྷའི་འཇིག་རྟེན་དུ་སྐྱེ་བར་འགྱུར་ཏེ། དེ་ནས་ཕམ་པ་བྱེད་བྱེད་པ་དང་། མཚམས་མེད་པ་བྱེད་བྱེད་པ་ཡང་དྲན་པ་མ་བརྗེད་པའི་འབྲས་བུས་སེམས་ཅན་དམྱལ་
བའམ། མིའི་འཇིག་རྟེན་དུ་བྱང་ཆུབ་ཀྱི་རྒྱུར་འགྱུར་ཏེ། འདོད་ཆེན་པ་ནི་མ་གཏོགས་སོ། །དཔེར་ན་སྨན་པའམ། སྨན་པའི་བུ་རྒྱུད་ཕྱི་མ་ཤེས་པས་སྦྲུལ་གདུག་པ་དང་། མི་གདུག་པ་དང་། ཀླུ་བྱ་གག་ཅེས་བྱ་བ་ལ་སོགས་པ་སྨན་གནོད་སེལ་དང་། རིག་སྔགས་ཀྱི་མཐུས་
རང་གི་ལམ་ལ་དབང་བྱ་བ་བཞིན་དུ་བཏུལ་ནས་དུག་མེད་པར་བྱེད་དེ། ཀླུ་ཤིན་ཏུ་དྲག་པོ་ནི་མ་གཏོགས་སོ། །དེ་བཞིན་དུ་མདོ་སྡེ་ཆེན་པོ་སྨན་གནོད་སེལ་དང་འདྲ་བ་འདིས་ཀྱང་ཕམ་པ་བྱེད་པ་རྣམས་དང་། མཚམས་མེད་པའི་ལས་བྱེད་པའི་སྡིག་ཅན་གྱི་ཀླུ་མཆོག་ཏུ་
དྲག་པོ་སེམས་བསྐྱེད་མི་དགོས་པར་འཛིན་པ་རྣམས་བཏུལ་ནས་བྱང་ཆུབ་ཀྱི་གནས་ཆེན་པོར་འགོད་པར་བྱེད་དེ། དེ་བས་ན་སེམས་ཅན་ཐམས་ཅད་ཀྱི་བདེ་བ་བསྐྱེད་པའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོའི་མིང་སྨན་གནོད་སེལ་ཆེན་པོ་ཡོན་ཏན་གྱི་ཚུལ་ཅན་
ཞེས་བྱ་སྟེ། འདོད་ཆེན་པའི་ཀླུ་དྲག་པོ་མི་བཟད་པ་ནི་མ་གཏོགས་སོ། །དཔེར་ན་སྨན་པས་དུག་སྨན་ཟུག་རྔུ་འབྱིན་པའི་སྨན་གྱི་རྒྱལ་པོ་བསྒྲུབས་ཏེ། དེས་རྔ་བོ་ཆེ་ལ་བསྐུས་ནས་ཕོ་བྲང་འཁོར་དུ་རྔ་དེ་བརྡུངས་ན་སྒྲ་དེའི་མཐུས་སྐྱེ་བོ་ཇི་སྙེད་ཀྱིས་སྒྲ་ཐོས་པ་དེ་དག་གི་ཟུག་རྔུ་
ཐམས་ཅད་དབྱུང་བར་འགྱུར་ཏེ། དེ་ཉིད་ན་འཆི་བའི་དུས་ལ་ཉེ་བ་རྣམས་ཀྱིས་ནི་འབྱུང་བར་མི་འགྱུར་རོ། །དེ་ཅིའི་ཕྱིར་ཞེ་ན། དེ་དག་གི་ལས་ཀྱི་རྣམ་པར་སྨིན་པ་མི་བཟད་པ་ཡོད་པའི་ཕྱིར་རོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་
སྒྲ་གང་དུ་ཐོས་ཀྱང་རུང་སྟེ། འདུ་བྱེད་ཀྱི་ཕོ་བྲང་འཁོར་ན་གནས་པའི་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྱིན་པར་བྱེད་ལ་འདུ་བྱེད་པ་མེད་པར་ཡང་བྱེད་དོ། །ཕོ་བྲང་འཁོར་ན་གནས་པ་དེ་དག་གི་ཡིད་ལ་འདི་

སྙམ་དུ་ཟུག་རྔུ་འབྱུང་བར་མི་འགྱུར་རོ་སྙམ་དུ་སེམས་མོད་ཀྱི་དེ་དག་གི་ཡིད་ལ་ཟུག་རྔུ་རྣམས་འབྱུང་བར་འགྱུར་རོ་སྙམ་དུ་ཇི་ག་སེམས་སམ། དེ་བཞིན་དུ་ཅིག་ཤོས་རྣམས་ལ་ཡང་འདོད་ཆགས་དང་། ཞེ་སྡང་དང་། གཏི་མུག་གི་ཟུག་རྔུ་རྣམས་འབྱུང་བར་འགྱུར་རོ་
སྙམ་པའི་སེམས་མེད་དེ། དེ་དག་གི་སེམས་ནི་འདོད་པ་རྣམས་ལ་གནས་སོ། །དེ་བཞིན་དུ་ཕམ་པ་བྱེད་པ་རྣམས་དང་། མཚམས་མེད་པའི་ལས་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱི་ཡང་བྱང་ཆུབ་ཀྱི་རྒྱུ་སྐྱེད་པར་བྱེད་དེ། འདོད་ཆེན་པ་འཆི་བའི་དུས་
ལ་བབ་པ་དང་འདྲ་བ་ནི་མ་གཏོགས་སོ། །རིགས་ཀྱི་བུ་དཔེར་ན་མཚན་མོ་མུན་པའི་ནང་ན་འཛམ་བུའི་གླིང་པའི་སེམས་ཅན་རྣམས་ཞིང་བླས་ལ་སོགས་པའི་ལས་བྱ་བ་ལ་འཇུག་པ་མེད་དེ། ཉི་མ་འཆར་བ་སྡོད་ཅིང་འཁོད་དོ། །དེ་ནས་ཉི་མ་ཤར་བ་དང་ཞིང་བླས་ལ་སོགས་པ་
བྱེད་པ་འཇུག་གོ། །དེ་བཞིན་དུ་ཐེག་པ་ཆེན་པོ་པ་རྣམས་ཀྱིས་ཀྱང་མདོ་སྡེ་དང་། ཏིང་ངེ་འཛིན་ཐམས་ཅད་ཐོས་ཤིང་བསྒོམས་ནས་ཞིང་བླས་བྱེད་འདོད་པའི་སེམས་ཅན་མཚན་མོ་སྡོད་པ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་ཉི་མ་འཆར་བ་སྡོད་
དོ། །དེ་ནས་མདོ་ཆེན་པོ་འདི་ལས་དགོངས་པའི་ཚིག་ཐོས་ནས་དམ་པའི་ཆོས་ཀྱི་གནས་སུ་ལས་རྩོམ་པར་བྱེད་དོ། །དེ་ནས་ཞིང་བླས་ཇི་ལྟར་བྱས་པ་ལ་ཆར་ཆེན་པོ་བབ་པས་ལོ་ཐོག་སྐྱེ་བར་འགྱུར་ལ་ལོ་ཡང་ལེགས་པར་འགྱུར་རོ། །དེ་བཞིན་དུ་དམ་པའི་ཆོས་ཀྱི་ཞིང་
བླས་བྱས་པ་ལ་དེ་བཞིན་གཤེགས་པའི་སྙིང་པོའི་མདོ་ཆེན་པོའི་སྤྲིན་ཆེན་པོ་ལས་ཐོས་པའི་ཆོས་ཀྱི་ཆར་བབ་ན་རིམས་ནད་རྣམ་པ་བརྒྱད་ལས་རྣམ་པར་གྲོལ་བ་དང་། བདེ་བ་དང་། ལོ་ལེགས་པ་དང་། ཡིད་དུ་འོང་བར་བྱེད་པའི་ལུང་བསྟན་པ་ཆེན་པོའི་ལོ་ཐོག་སྐྱེ་བར་
འགྱུར་ཏེ། དམ་པའི་ཆོས་པད་མ་དཀར་པོའི་མདོ་ཆེན་པོ་ལས་ཉན་ཐོས་ཆེན་པོ་བརྒྱད་ཅུ་དཔྱིད་ཟླ་ར་བ་ལ་འབྲུ་རྣམས་མཐར་ཐུག་པ་བཞིན་དུ་ལུང་བསྟན་པ་ཆེན་པོའི་ལོ་ཐོག་སྐྱེ་བའི་མཐར་ཐུག་པ་དང་འདྲ་བར་འགྱུར་ཏེ་འདོད་ཆེན་པ་ནི་མ་གཏོགས་སོ།། །།

བམ་པོ་བཅུ་གཉིས་པ། རིགས་ཀྱི་བུ་དཔེར་ན་སྨན་པ་ཆེན་པོས་འབྱུང་པོས་ཟིན་པའམ། སྦྲུལ་གྱིས་ཟིན་པའི་དོན་དུ་སྨན་གྱི་རི་ལུའམ། སྨན་གནོད་སེལ་རྒྱང་གྲགས་མང་པོ་ཞིག་ཏུ་བསྐུར་ཏེ། འདི་སྐད་དུ་སྨན་འདི་མྱུར་དུ་ཁྱེར་ལ་ཁྱེར་ནས་ཀྱང་དེའི་དཔྱད་གྱིས་
ཤིག་དང་། དེ་ལྟར་བྱས་ན་དེའི་ལྷ་དང་། ཀླུ་དང་། གནོད་སྦྱིན་དང་། སྲིན་པོའི་གདོན་རྣམས་མེད་པར་འགྱུར་རོ། །དེ་སྟེ་མ་ཁྱེར་ན་བདག་ཉིད་འགྲོ་བར་བྱའི་དེར་བར་མ་དོར་ཆུད་ཟོས་ན་མི་རུང་ངོ་ཞེས་ཀྱང་ཟེར་ལ། དེ་ནས་སྨན་པའམ། སྨན་པའི་ཕྲིན་པ་དེ་ཐག་རིང་པོ་ཞིག་
ནས་མཐོང་ནས་སྔགས་དེའི་གཟི་བྱིན་དང་། མཐུས་གནོད་པ་ཐམས་ཅད་ཞི་བར་འགྱུར་ཏེ། དེ་ཡང་བདེ་བར་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་མཐུ་ཆེ་བ་འདི་ཡི་གེར་བྲིས་པ་ཞིག་ག་ཞིག་གི་གནས་ཞིག་ན་ཡོད་དོ། །ཞེས་དགེ་སློང་
ངམ། དགེ་སློང་མའམ། འདི་ལས་ཕྱི་རོལ་པ་གཞན་གྱིས་ཤེས་སམ། གཞན་ལས་ཐོས་ན་དེ་དག་གི་བྱང་ཆུབ་ཀྱི་རྒྱུར་འགྱུར་ལ། ཕམ་པ་བྱེད་པ་དང་། མཚམས་མེད་པའི་ལས་བྱེད་པའི་འབྱུང་པོ་དང་། ཤ་ཟའི་གདོན་གྱིས་ཟིན་པ་ཇི་སྙེད་ཀྱིས་ཐོས་ཀྱང་རུང་སྟེ། དེ་
དག་ཐམས་ཅད་ཀྱང་སྨན་པ་ཆེན་པོ་མཐོང་བ་བཞིན་དུ་གནོད་པ་དང་བྲལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྟག་པའི་མདོ་སྡེ་ཆེན་པོའི་མཐུའི་རྒྱུས་དེ་ལྟར་འགྱུར་ཏེ། དེ་ལྟ་ན་གང་དག་གིས་མདོ་སྡེ་ཆེན་པོ་
གླེགས་བམ་ལ་བྲིས་པ་བཀླགས་སམ། ཐོས་སམ་བྲིས་ཀྱང་རུང་། དེ་དག་ལྟ་བྱང་ཆུབ་སེམས་དཔའ་སེམས་དཔའ་ཆེན་པོར་ཅི་སྟེ་མི་འགྱུར། འདོད་ཆེན་པ་ནི་མ་གཏོགས་སོ། །དཔེར་ན་འོན་པས་སྒྲ་མི་ཐོས་པ་དེ་བཞིན་དུ་འདོད་ཆེན་པས་ཀྱང་མདོ་སྡེ་འདི་ཐོས་པར་མི་ནུས་ཏེ།
དེ་ལ་རྒྱུ་མེད་པའི་ཕྱིར་རོ། །རིགས་ཀྱི་བུ་གཞན་ཡང་དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ཞིག་གིས་རྒྱལ་པོ་ཆེན་པོ་མཐོང་ནས་རྒྱལ་པོ་ཆེན་པོ་ཁྱོད་ལ་གྲོངས་ལ་ཐུག་པ་ཙམ་གྱི་སྙུན་གྱིས་ཐེབས་པར་འགྱུར་རོ་ཞེས་ལུང་བསྟན་པ་དང་། རྒྱལ་པོ་དེས་དེ་

ལ་བཀའ་སྩལ་པ། ཁྱོད་ཀྱིས་མ་མཐོང་བར་ནད་ཚབས་པོ་ཆེ་འབྱུང་བར་ཇི་ལྟར་ཤེས། དེ་ནས་སྨན་པ་དེས་རྒྱལ་པོ་ལ་གསོལ་པ། གལ་ཏེ་ཐུགས་མི་ཆེས་ན་སྨན་གསོལ་ཅིག་དང་མངོན་ནོ་ཞེས་བྱས་ན། འོན་ཀྱང་རྒྱལ་པོ་དེ་སྨན་འཐུང་དུ་ཡང་མ་བཏུབ་བོ། །དེ་ནས་སྨན་
པ་ཆེན་པོ་དེས་རིག་པའི་སྟོབས་ཀྱིས་གཞང་ཀར་གཞང་འབྲུམ་འཐོན་པར་བྱས་སོ། །དེ་ནས་རྒྱལ་པོ་དེས་གཞང་འབྲུམ་དེ་དག་མཐོང་ནས་སྐྲག་ཅིང་མི་དགའ་སྟེ་སྐྱི་བུང་ཞེས་བྱས་ནས་སྨན་པའི་ཚིག་བདེན་ནོ་སྙམ་དུ་སེམས་ཏེ། གཞང་འབྲུམ་འཐོན་པར་ཤེས་ནས་ཀྱེ་མ་སྨན་པ་རིག་
པའི་སྟོབས་ངོ་མཚར་ཏོ་སྙམ་སྟེ། སྨན་པ་དེ་ལ་ཕ་མ་ལ་གུས་པར་བྱ་བ་བཞིན་དུ་བཀུར་སྟི་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་ནི་སེམས་བསྐྱེད་མི་དགོས་པར་འཛིན་པའི་སེམས་ཅན་ཐམས་ཅད་ལ་ཡང་སྨན་པ་ཆེན་པོས་རྒྱལ་པོ་ལ་བྱ་བ་བཞིན་དུ་བདེ་བླག་
ཏུ་བྱང་ཆུབ་ཀྱི་རྒྱུ་ལ་འཇོག་པར་བྱེད་དེ། དེ་དག་ལ་རྨི་ལམ་དུའམ་འཆི་བའི་ཚེ་ཡང་རུང་སྟེ། སེམས་ཅན་དེ་དག་གིས་མི་ཤེས་བཞིན་དུ་བྱང་ཆུབ་ཀྱི་རྒྱུ་འཇུག་པར་འགྱུར་རོ། །འདོད་ཆེན་པ་ནི་མ་གཏོགས་ཏེ། སྨན་པ་ཆེན་པོས་ཀྱང་འདི་ནི་གསོར་མི་རུང་ངོ་སྙམ་ནས་ལས་མི་བཟད་པ་དང་
ལྡན་པའི་འཆི་བར་འགྱུར་བའི་ནད་གསོ་བར་མི་བྱེད་དོ། །འཆི་བར་འགྱུར་བ་དང་འདྲ་བ་ནི་འདོད་ཆེན་པ་ཡིན་ནོ། །རིགས་ཀྱི་བུ་དཔེར་ན་སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ཞིག་གིས་རང་གི་བུ་ཐོག་མར་རྒྱུད་ཀྱི་ཡན་ལག་ཐང་དང་། ཆུ་དང་། རི་ལས་སྐྱེས་པའི་སྨན་
རྣམས་སློབ་པར་བྱེད་ཀྱིས་ཐོག་མ་ཡན་ལག་སློབ་པ་ཙམ་ན་རྒྱུད་ཕྱི་མ་སློབ་པར་མི་བྱེད་དེ། གང་གི་ཚེ་ཚེའི་རིག་བྱེད་ཡན་ལག་བརྒྱད་བསླབས་ཟིན་པ་དེའི་ཚེ་ནི་རྒྱུད་ཕྱི་མ་ལས་སྔགས་དང་སྨན་གྲུབ་པའི་ལས་སློབ་པར་བྱེད་པ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀྱང་ཉིད་ཀྱི་སྲས་དགེ་སློང་དག་ལ་ཐོག་མའི་ཡན་ལག་ཉོན་མོངས་པའི་རྣམ་པ་སྦྱང་བ་དང་། ལུས་སྙིང་པོ་མེད་པར་བསྒོམ་པ་དང་། ཐང་དང་ཆུ་དང་། རི་ལས་སྐྱེས་པ་ལྟ་བུ་རྣམ་པ་གསུམ་བསྒོམ་པ་སློབ་པར་མཛད་དོ། །དེ་ལ་ཐང་ཞེས་བྱ་བ་ནི་ལུས་ཀྱི་སྡུག་བསྔལ་རྣམ་པ་དུ་

མ་རྣམས་སོ། །ཆུ་ཞེས་བྱ་བ་ནི་ལུས་འདི་ཆུའི་ཆུ་བུར་ལྟ་བུར་མི་རྟག་པའོ། །རི་ཞེས་བྱ་བ་ནི་ཉོན་མོངས་པའི་རྣམ་པ་རྣམས་ལ་བདག་མེད་པ་སྟེ། དེ་བས་ན་དེ་བཞིན་གཤེགས་པ་ནི་ལུས་འདི་ནི་བདག་མེད་པའོ་ཞེས་སློབ་པར་མཛད་དོ། །གལ་ཏེ་དགེ་སློང་རྣམས་ཀྱི་
གསུང་རབ་ཡན་ལག་དགུའི་དོན་མ་མཐོང་ན་ནི་ཐེག་པ་ཆེན་པོའི་མཆོག་འདི་སློབ་པར་མི་མཛད་དོ། །ད་ནི་སྨན་པ་ཆེན་པོ་བཞིན་དུ་དེ་བཞིན་གཤེགས་པའི་གསུང་རབ་ཡན་ལག་དགུ་ལ་དོན་གྱི་བྱ་བ་བྱས་ཟིན་པའི་དགེ་སློང་རྣམས་ལ་དེ་བཞིན་གཤེགས་པའི་སྙིང་པོའི་རྒྱུད་ཕྱི་མ་ལས་དེ་
བཞིན་གཤེགས་པའི་སྙིང་པོ་རྟག་གོ་ཞེས་སྟོན་པར་མཛད་དེ། དེ་ལྟར་དེ་བཞིན་གཤེགས་པས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་བསྟན་པ་ཐོས་ན་སེམས་བསྐྱེད་མི་དགོས་པར་འཛིན་པའི་སེམས་ཅན་རྣམས་ལ་ཡང་བྱང་ཆུབ་ཀྱི་རྒྱུར་འགྱུར་ཏེ། འདོད་ཆེན་པ་ནི་མ་
གཏོགས་སོ། །རིགས་ཀྱི་བུ་དེ་ལྟར་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་དེ་ལྟར་བསམ་གྱིས་མི་ཁྱབ་སྟེ། སྨན་པ་ཆེན་པོ་བཞིན་དུ་སྨན་པ་རྣམས་ཀྱི་མཆོག་ཏུ་གྱུར་པ་ཡིན་ཏེ། མདོ་སྡེ་འདི་ནི་མདོ་སྡེའི་རྒྱལ་པོའི་མཆོག་ཡིན་ནོ། །རིགས་ཀྱི་བུ་གཞན་ཡང་
གྲུ་ནི་སེམས་ཅན་བསྒྲལ་བའི་ཕྱིར་ཕ་རོལ་གྱི་འགྲམ་ནས་ཚུ་རོལ་གྱི་འགྲམ་དུ་འོང་ཞིང་། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བ་དེ་བཞིན་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་ལས་འདས་ནས་གྲུ་ཕ་རོལ་དུ་འགྲོ་བ་བཞིན་དུ་སེམས་ཅན་
རྣམས་སྒྲོལ་དུ་གཤེགས་ཏེ། གང་དང་གང་དུ་གདུལ་བར་བྱ་བ་རྣམས་ཡོད་པ་དེ་དང་དེར་རྫོགས་པའི་སངས་རྒྱས་སྟོན་པར་མཛད་དོ། །དེ་བས་ན་ཇི་ལྟར་གྲུ་གང་དང་གང་དུ་སེམས་ཅན་སྒྲོལ་བར་འདོད་པ་དེ་དང་དེར་འགྲོ་བ་དེ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། དེ་བས་ན་
མཉེན་པ་ཆེན་པོ་ཞེས་བྱའོ། །དེ་ནས་དེ་བཞིན་གཤེགས་པ་རྟག་པ་དང་བརྟན་པ་ཡིན་ནོ། །གྲུ་ཡོད་ན་མཉེན་པས་སྒྲོལ་བར་བྱེད་ལ། དེ་བཞིན་གཤེགས་པ་རྟག་པར་ཡོད་པ་དང་ད་དུང་དུ་སེམས་ཅན་སྒྲོལ་ཞིང་སྐྱེ་བར་འགྱུར་རོ། །རིགས་ཀྱི་བུ་གཞན་ཡང་དཔེར་ན་རྒྱ་མཚོ་ཆེན་པོའི་ནང་

དུ་གྲུ་བོ་ཆེ་འགྲོ་བ་རླུང་དང་ཕྲད་ན་དྲང་པོར་འགྲོ་ཞིང་སྐད་ཅིག་ཙམ་གྱིས་དཔག་ཚད་དུ་མར་འགྲོ་ལ། གལ་ཏེ་རླུང་དང་མ་ཕྲད་ན་ནི་ལོ་དུ་མར་ཡང་མལ་གཅིག་ན་འདུག་པའམ། ཡང་ན་བུབ་པར་འགྱུར་བ་དེ་བཞིན་དུ་མི་ཤེས་པའི་རྒྱ་མཚོ་ཆེན་པོར་ལྷུང་བའི་སེམས་ཅན་རྣམས་ཀྱང་
ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་རླུང་གི་རྒྱལ་པོ་དང་ཕྲད་ན་ནི་གྲུ་བཞིན་དུ་མྱུར་བ་ཁོ་ནར་བྱང་ཆུབ་ཀྱི་ཕ་རོལ་ཏུ་ཕྱིན་པར་འགྱུར་རོ། །གང་དག་མདོའི་རླུང་གི་རྒྱལ་པོ་འདི་དང་མ་ཕྲད་པ་དེ་དག་ནི་གྲུ་རྒྱ་མཚོ་ཆེན་པོར་བུབ་པ་བཞིན་དུ་འཁོར་བའི་འཁོར་ལོར་བརླག་
པར་འགྱུར་རོ། །རིགས་ཀྱི་བུ་གཞན་ཡང་དཔེར་ན་རྒྱ་མཚོ་ཆེན་པོ་འཇིགས་པའི་གནས་སུ་རླུང་དང་མ་ཕྲད་ན་དེ་ནི་ཤི་བ་ཉིད་འདི་ཡིན་ནོ་སྙམ་སྟེ། དཀོས་ཐག་པར་གྱུར་པའི་སེམས་ཅན་རྣམས་མི་ཤེས་བཞིན་དུ་རླུང་གི་རྒྱལ་པོས་ཡུད་ཙམ་གྱིས་ཁྱེར་ནས་དེ་དག་འདི་སྙམ་དུ་སེམས་ཏེ།
ཀྱེ་མ་བདག་ཅག་ཐར་བར་གྱུར་པ་འདི་ནི་ངོ་མཚར་ཆེའོ་སྙམ་པ་དེ་བཞིན་དུ། མདོ་ཆེན་པོ་འདིའི་མདོའི་རླུང་གི་རྒྱལ་པོ་འདི་ཡང་མི་ཤེས་པའི་རྒྱ་མཚོ་ཆེན་པོ་ན་འཁོད་པའི་སེམས་ཅན་བྱང་ཆུབ་ཏུ་སེམས་བསྐྱེད་མི་དགོས་པར་འཛིན་པ་རྣམས་མི་ཤེས་བཞིན་དུ་བྱང་ཆུབ་ཀྱི་རྒྱུ་ལ་འགོད་པར་བྱེད་
དོ། །རིགས་ཀྱི་བུ་གཞན་ཡང་དཔེར་ན་སྦྲུལ་གྱི་པགས་པ་རྙིང་པ་བོར་ན་ཇི་ག་ཤི་བའམ། མེད་པར་སོང་བ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་པགས་པ་རྙིང་པ་འདོར་བཞིན་དུ་
ཐབས་ཀྱི་སྐུ་དུག་སྨན་གྱི་སྡོང་པོ་རྙིང་པ་སྤོང་བར་མཛད་པ་ལ། ཇི་ག་དེ་བཞིན་གཤེགས་པ་མི་རྟག་པར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། སྦྲུལ་པགས་པ་བརྗེས་པ་བཞིན་དུ་འཛམ་བུའི་གླིང་ཁ་ཅིག་ཏུ་ཐབས་ཀྱི་སྐུ་གཞན་བོར་ནས་ཐབས་ཀྱི་སྐུ་ག