Kinh tạng Tây Tạng (Kangyur Đại Học) — 054_མདོ་སྡེ།_ཐ

ེ་འབྲུ་མྱོང་བར་བྱེད་དོ། །ཁོ་ར་
ཁོར་ཡུག་གི་སྐྱེད་མོས་ཚལ་དེ་དང་དེ་དག་ན་ཡང་ཁང་ཁྱིམ་དག་ཡོད་ལ། ཁང་པ་རེ་རེ་ལ་ཡང་ཆུ་ཞེང་དུ་དཔག་ཚད་བཞི་བཞི་ཡོད་དེ། རྩིག་པ་ནི་གསེར་དང་། དངུལ་དང་། བཻ་དཱུརྱ་དང་། ཤེལ་ལས་བྱས། ས་གཞི་ནི་ཀེ་ཀེ་རུ་ལས་གྲུབ་པ་སྟེ། ནོར་བུའི་
འཇོ་ཚར་གྱིས་སྤེལ་ཅིང་སྣང་བར་བྱས་པའི་མུ་ཏིག་གི་དོ་ཤལ་སྤྱངས་པ་དང་ལྡན་པ། གསེར་གྱི་རྟ་བབས་ཆེན་པོ་དང་། སྐར་ཁུང་དང་། དྲ་བ་དག་གིས་བརྒྱན་པའི་ཁང་བཟངས་མཐོན་པོ་ས་གཞི་ནི་གསེར་གྱི་བྱེ་མ་བདལ་བ་དང་ལྡན་པ་ཤ་སྟག་གོ། །རྫིང་བུ་རྣམས་
ཀྱང་འདྲུལ་བའི་ལམ་གསེར་གྱི་ཐེམ་སྐས་ཐེམ་པ་བཅྭ་བརྒྱད་དང་ལྡན་པ་དང་། མཐའ་ཐོག་ཐག་ཏུ་གསེར་གྱི་ཆུ་ཤིང་གི་ཕྲེང་བས་མཛེས་པར་བྱས་པའི་ལྷའི་ཙན་དན་གྱི་དྲི་བསུང་ཅན་གྱི་ཆུ་དང་ལྡན་པ་ཤ་སྟག་གོ། །གྲོང་ཁྱེར་ཆེན་པོ་དེ་དག་རེ་རེའི་ནང་ན་ཡང་རྒྱལ་པོ་བརྒྱད་ཁྲི་བཞི་སྟོང་

བརྒྱད་ཁྲི་བཞི་སྟོང་ཡོད་དེ། དེ་དག་ཐམས་ཅད་ཀྱང་བུད་མེད་ཀྱི་ཚོགས་དཔག་ཏུ་མེད་པ་དཔག་ཏུ་མེད་པ་དག་གིས་བསྐོར་ཅིང་། འདོད་པའི་ཡོན་ཏན་ལྔ་དང་ལྡན་ཏེ་རྩེ་ཞིང་དགའ་ལ་དགའ་མགུར་སྤྱོད་དོ། །སེམས་ཅན་གཞན་དག་
ཀྱང་དེ་དང་འདྲ་སྟེ། ས་ཕྱོགས་ཀ་ཙ་ལིན་དའི་གོས་ལྟར་རེག་ན་བདེ་བ། ཙན་དན་གྱི་ཆུས་ཆག་ཆག་བཏབ་པ། མེ་ཏོག་གི་སིལ་མས་གཏོར་བ། གཞན་དག་ན་རྩེ་ཞིང་དགའ་ལ་དགའ་མགུར་སྤྱོད་དོ། །གྲོང་ཁྱེར་ཆེན་པོ་དག་ན་ཐེག་པ་ཆེན་པོའི་སྒྲ་མ་
གཏོགས་པར་ཐེག་པ་གཞན་གྱི་སྒྲ་མེད་དོ། །པད་མ་ཆེན་པོ་དེ་དག་ལ་ཡང་སེང་གེའི་ཁྲི་ཆེན་པོ་རྐང་པ་གསེར་དང་། དངུལ་དང་། བཻ་དཱུརྱ་དང་། ཤེལ་ལས་བྱས་པ། ཀ་ལིང་ཀའི་རས་ཀྱིས་གཡོགས་པ། ཆེ་བ་ལ་འོས་པ། འཇིག་རྟེན་གསུམ་ན་ཕུལ་
དུ་བྱ་བ་ཤ་སྟག་གིས་དཀྲིས་ཏེ། སེང་གེའི་ཁྲི་དེ་དག་ལ་རྒྱལ་པོ་དེ་དག་འཁོད་ཅིང་སེམས་ཅན་གཞན་དག་ཐེག་པ་ཆེན་པོའི་མདོ་སྡེ་རྣམས་སློབ་པར་བྱེད་དེ། རྒྱལ་པོ་དེ་དག་གི་མདུན་ན་ལ་ལ་ནི་ཡི་གེ་འདྲི། ལ་ལ་ནི་ཀློག །ལ་ལ་ནི་ཁ་ཏོན་སློབ་བོ། །
དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཀྱི་བ་སྤུའི་ཁུང་བུ་ནས་སྐྱེས་པའི་པད་མ་དག་ལ་འཁོད་པའི་སེམས་ཅན་དེ་དག་འདོད་པའི་ཡོན་ཏན་ལྔའི་དགའ་བ་དང་ལྡན་ཡང་། དེ་དག་ཡོངས་སུ་སྤངས་ནས་མྱ་ངན་གྱིས་གདུངས་ཏེ་སྨྲེ་སྔགས་
འདོན་ཅིང་། ཀྱི་ཧུད་ཀྱི་ཧུད་ཅེས་བླ་ཞིང་འཁོད་དེ། ཉིས་འགྱུར་དུ་མཆོད་པའི་ཚོགས་འབུལ་བར་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ཏེ། དེ་ལྟ་བུའི་འབྱོར་པའི་རྣམ་པ་
དག་སྟོན་ཅིང་མཆོད་པའི་ཚོགས་ཆེན་པོ་དང་། ཞལ་ཟས་ཆེས་རྒྱ་ཆེ་བ་དག་ཁྱེར་ཏེ་འོངས་ནས། ཞལ་ཟས་དེ་དག་དང་། པད་མ་དེ་དག་གི་དྲི་བསུང་ཚོར་བ་གང་ཡིན་པ་དེ་དག་ཀྱང་ཉོན་མོངས་པ་དང་བྲལ་བར་གྱུར་ཏོ། །བྱང་ཆུབ་སེམས་དཔའི་མཐུ་ཆེན་པོས་འཇིག་རྟེན་

གྱི་ཁམས་ཐམས་ཅད་ཀྱང་མཐོང་བར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཀྱི་ལུས་ཀྱི་ཚད་ཀྱང་ནམ་མཁའ་དང་མཉམ་པར་འདུག་སྟེ། སུས་ཀྱང་མཐོང་བར་མི་ནུས་སོ། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་ལུས་ཆེན་མཐའ་ཡས་བཅོམ་ལྡན་འདས་ཀྱི་ཐད་དུ་སོང་སྟེ། ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བདག་གིས་ཕུལ་བའི་ཞལ་ཟས་བཅོམ་ལྡན་འདས་ཀྱིས་བཞེས་སུ་གསོལ། དེ་ནས་བཅོམ་ལྡན་འདས་ཅང་མི་
གསུང་བར་གྱུར་ཏེ། ལན་གཉིས་ལན་གསུམ་དུ་གསོལ་ཀྱང་། བཅོམ་ལྡན་འདས་ཅང་མི་གསུང་བར་བཞུགས་ནས་བྱང་ཆུབ་སེམས་དཔའ་དེ་ལངས་ཏེ་ཕྱོགས་གཅིག་ཏུ་འདུག་གོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ལོགས་ནས་ཀྱང་
བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཞེས་བྱ་བ་འཁོར་གྱི་ཚོགས་ཆེན་པོ་དང་ལྡན་པ་ཤ་སྟག་ལྷགས་ཏེ། དེ་དག་གི་པད་མ་དང་། གྲོང་ཁྱེར་གྱི་ཚད་ཀྱང་སྔ་མ་སྔ་མ་ལས་ཉིས་འགྱུར་ཉིས་འགྱུར་གྱིས་ཆེ་བ་དང་། འབྱོར་པ་ཉིས་འགྱུར་ཉིས་
འགྱུར་གྱིས་ཆེ་བ་ཤ་སྟག་དང་ཆས་ཏེ། དེ་དག་དེར་ལྷགས་ནས་བཅོམ་ལྡན་འདས་ལ་པད་མ་དག་གིས་མཆོད་པ་བྱས་ཏེ་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །ཤིང་སཱ་ལ་ཟུང་གི་དྲུང་གྲུབ་པའི་གནས་དེ་ཉིད་ན་དཀྱིལ་འཁོར་སུམ་ཅུ་རྩ་གཉིས་ཀྱི་ཚད་ཀྱི་ཁྱོན་
གྱི་ས་གཞི་ལ། སེམས་ཅན་མི་འཁོད་པའི་གོ་སྐབས་ཅི་ཡང་མེད་དོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལུས་ཆེ་བ་རང་རང་གི་གཡོག་འཁོར་དག་དང་བཅས་པ་དེ་རྣམས་ཀྱང་། ཁ་ཅིག་ནི་ས་ཕྱོགས་སྨྱུང་བུའི་རྩེ་མོའི་ཁྱོན་ཙམ་ལ་འཁོད་དོ། །
ཁ་ཅིག་ནི་ཁབ་ཀྱི་རྩེ་མོའི་ཁྱོན་ཙམ་ལ་འཁོད་དོ། །ཁ་ཅིག་ནི་རྡུལ་ཕྲ་རབ་ཀྱི་ཁྱོན་ཙམ་ལ་བག་ཡངས་སུ་འཁོད་དོ། །འཇིག་རྟེན་གྱི་ཁམས་རྡུལ་ཕྲ་རབ་ཀྱི་རྡུལ་སྙེད་དག་ན་བྱང་ཆུབ་སེམས་དཔའ་འཁོད་པ་གང་ཡིན་པ་དེ་དག་ཀྱང་ཐབས་དེ་ལྟ་བུར་ལྷགས་ཏེ་འཁོད་དོ།

འཛམ་བུའི་གླིང་གི་སེམས་ཅན་ཡང་ཚེ་དང་ལྡན་པ་འོད་སྲུང་དང་། གནས་བརྟན་ཀུན་དགའ་བོ་དང་། རྒྱལ་པོ་མ་སྐྱེས་དགྲ་རྣམས་མ་གཏོགས་པར་དེར་མ་འོངས་པ་སུ་ཡང་མེད་དེ། ཐ་ན་མི་གདུག་པ་དང་། སྦྲུལ་གདུག་པ་དང་། སྡིག་པ་
དང་། སྡོམ་ལ་སོགས་པ་ལས་མི་བཟད་པ་བཅུ་དྲུག་བྱེད་པ་ཡན་ཆད་ཀྱང་དེར་ལྷགས་སོ། །སྦྱིན་བྱེད་མའི་བུ་དང་། ལྷ་མ་ཡིན་རྟག་ཏུ་འཁོན་གྱི་བསམ་པ་ཅན་ཐམས་ཅད་ཀྱང་སྡིག་པའི་ལས་སྤངས་ནས་གཅིག་ལ་གཅིག་བུ་དང་། མ་དང་། སྲིང་མོ་དང་འདྲ་བར་
སེམས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་སེམས་ཅན་ཐམས་ཅད་ཀྱང་གཅིག་ལ་གཅིག་བུ་གཅིག་པ་ལ་བྱ་བ་བཞིན་དུ་བྱམས་པར་བྱེད་དེ། འདོད་ཆེན་པོ་ནི་མ་གཏོགས་སོ། །མི་མཇེད་ཀྱི་འཇིག་རྟེན་གྱི་ཁམས་འདི་ཡང་དེ་
བཞིན་གཤེགས་པའི་མཐུས་བོང་བ་དང་། རྡོ་དང་། གསེག་མ་དང་། རྡུ་བ་དང་། ཚེར་མ་མེད་པར་གྱུར་ཏེ། ཤིང་ལྗོན་པ་རིན་པོ་ཆེའི་འཁྲི་ཤིང་གིས་དཀྲིས་པ། མཉེན་ཞིང་རེག་ན་འཇམ་པ་དག་དང་ལྡན་ཞིང་། འཇིག་རྟེན་གྱི་ཁམས་བདེ་བ་ཅན་དང་འདྲ་བར་གྱུར་
ཏོ། །སེམས་ཅན་དེར་ལྷགས་པ་ཐམས་ཅད་ཀྱིས་ཀྱང་དེ་ན་འཁོད་བཞིན་དུ། ཇི་ལྟར་མེ་ལོང་གི་ངོས་ལ་རང་གི་གཟུགས་བརྙན་སྣང་བ་བཞིན་དུ། རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་དང་། སངས་རྒྱས་ཀྱི་ཞིང་འབྱོར་པ་དང་ལྡན་པ་གཞན་དག་ཀྱང་
མཐོང་ངོ་། །དེ་ནས་དེ་བཞིན་གཤེགས་པའི་ཞལ་ནས་འོད་ཟེར་ཁ་དོག་སྣ་ཚོགས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་གྱི་ཁ་དོག་ལྟ་བུ་དང་། མེ་ལྕེ་ལྟ་བུ་དག་བྱུང་བ་གང་ཡིན་པ་དེ་དག་གིས་བྱ་བ་གང་ཡིན་པ་དེ་དག་གི་བྱ་
བ་ཐམས་ཅད་བྱས་ཏེ་ཕྱིར་ལོག་ནས། བཅོམ་ལྡན་འདས་ཉིད་ཀྱི་ཞལ་དུ་ཞུགས་ཏེ་མི་སྣང་བར་གྱུར་ཏོ། །འཁོར་ཐམས་ཅད་ཀྱི་འོད་ཀྱང་དེས་ཟིལ་གྱིས་གནོན་པར་གྱུར་ཏོ། །དེ་ནས་ལྷ་དང་། མི་དང་། ལྷ་མ་ཡིན་དང་བཅས་པའི་འཇིག་རྟེན་གྱིས་འོད་ཟེར་དེ་དག་བཅོམ་

ལྡན་འདས་ཀྱི་ཞལ་དུ་མི་སྣང་བར་གྱུར་པ་མཐོང་ནས། འཇིགས་ཤིང་སྐྱི་བུང་ཞེས་བྱས་ཏེ། རྒྱུ་མེད་པར་བཅོམ་ལྡན་འདས་ཀྱི་འོད་ཟེར་རྣམས་ཕྱིར་ལོག་ནས་མི་སྣང་བར་འགྱུར་བའི་མི་རིགས་ན། གོར་མ་ཆག་པར་ཕྱོགས་བཅུ་དག་ཏུ་བྱ་བ་རྣམས་ཟིན་ནས་ད་ནི་
གདོན་མི་ཟ་བར་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ། །བཅོམ་ལྡན་འདས་ཀྱིས་གང་ལས་ཀྱང་ཞལ་ཟས་མ་བཞེས་ན། ཀྱེ་མ་སེམས་ཅན་ཐམས་ཅད་ལ་ཚད་མེད་པ་བཞི་སྤངས་སམ། ཅི་སྨྱུང་བར་བཞུགས་པར་ཆད་དམ།
ཀྱེ་མ་ཅི་ཉི་མ་དང་ཟླ་བ་ནུབ་བམ། ཅི་དམ་པའི་ཆོས་ཀྱི་གྲུ་བྱིང་ངམ། ཀྱི་ཧུད་ཀྱི་ཧུད་ཅེས་བླ་ཞིང་འཁོད་དོ། །དེ་ནས་དེ་དག་རང་རང་གི་ཡན་ལག་རྣམས་རྨས་པར་བྱས་པའི་ཁྲག་གིས་ས་གཞི་འདམ་དུ་གྱུར་ཏོ། །ཆུ་ཀླུང་གསེར་ལྡན་ཡང་ཁྲག་ཏུ་འབབ་
པར་གྱུར་ཏོ། །དེ་ནས་འཁོར་དེ་དག་གི་ནང་ན་གྲོང་ཁྱེར་ཀུ་ཤི་པ་མགར་བའི་བུ་དགེ་བསྙེན་སྐུལ་བྱེད་ཅེས་བྱ་བ་དེ་མགར་བའི་བུ་བཅྭ་ལྔ་དང་ཐབས་ཅིག་ཏུ་ལངས་ཏེ། རང་རང་གི་སྤྱོད་ལམ་བཅོས་ནས་འཇིག་རྟེན་དག་ལ་བལྟས་ཏེ་བླ་གོས་ཕྲག་པ་གཅིག་ཏུ་
གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། མཆི་མ་མི་ཐུབ་བཞིན་དུ་ཞབས་ལ་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་ནི་སེམས་ཅན་ཐམས་ཅད་ངེས་པར་བསྒྲལ་བའི་སླད་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་དབུལ་བར་འཚལ་ཏེ། བདག་ནི་མགོན་མ་
མཆིས་པ་ལགས། རྩ་ལག་མ་མཆིས་པ་ལགས། སྐྱབས་མ་མཆིས་པ་ལགས། ཕོངས་ཏེ་རེ་བ་ལགས་ན། བཅོམ་ལྡན་འདས་ཀྱིས་བདག་གིས་ཕུལ་བའི་ཞལ་ཟས་བཞེས་ཏེ། ཡོངས་སུ་མྱ་ངན་ལས་མི་འདའ་བར་མཛད་དུ་གསོལ། བཅོམ་ལྡན་འདས་

དཔེར་གསོལ་ན་ཁྱིམ་བདག་གམ་བྲམ་ཟེ་ཤིན་ཏུ་དབུལ་པོ་འགའ་ཞིག་གཞན་གྱི་ཡུལ་དུ་མཆིས་ལ། བདག་ཉིད་སྤྲོ་བ་བསྐྱེད་དེ་མཐར་གྱིས་ཞིང་ལས་བརྩམས་ནས། དེས་རྨོན་གླང་རྨོ་སྐྱེན་པ་ཐོང་གཤོལ་དང་སྦྱར་བ་དག་གིས་ཞིང་ལ་རྡོ་དང་།
རྡུ་བ་དང་། ཚེར་མ་མ་མཆིས་པར་བགྱིས་ཏེ། རེ་བ་ཆེན་པོ་བསྐྱེད་ནས་སྤྲིན་ཆེན་པོ་ལས་ཆར་འབབ་པ་སྡོད་ཅིང་མཆིས་པ་དེ་བཞིན་དུ། བཅོམ་ལྡན་འདས་བདག་ནི་ལུས་ཀྱི་ཞིང་ལ་ཉེས་པ་གསུམ་དང་། བཞི་དང་བྲལ་བའི་ཡིད་དང་ངག་གི་རྨོན་གླང་དང་ཤེས་པའི་ཐོང་
གཤོལ་གྱིས་ཉོན་མོངས་པ་རྣམ་པ་སྣ་ཚོགས་ཀྱི་རྡོ་དང་། རྡུ་བ་དང་། ཚེར་མ་མ་མཆིས་པར་བགྱིས་ནས། ཁྱོད་ཀྱི་ཆོས་ཀྱི་སྤྲིན་ཆེན་པོ་ལས་ཆོས་ཀྱི་ཆར་པ་འབབ་པ་ལ་སྡོད་ཅིང་མཆིས་ཏེ། དགེ་སློང་གི་དགེ་འདུན་དང་བཅས་པར་སྤྱན་འདྲེན་ན། བདག་གི་དབུལ་བ་བསལ་
བ་དང་། སེམས་ཅན་ཐམས་ཅད་ལ་སྨན་པའི་སླད་དུ། བདག་གིས་ཕུལ་བའི་ཞལ་ཟས་བཞེས་སུ་གསོལ། བདག་ནི་མགོན་མ་མཆིས་པ། སྐྱབས་མ་མཆིས་པ་ལགས་ན། དེ་བཞིན་གཤེགས་པས་བདག་ལ་སྒྲ་གཅན་ཟིན་བཞིན་དུ་གཟིགས་པར་གསོལ།
དེ་ནས་བཅོམ་ལྡན་འདས་ཐམས་ཅད་མཁྱེན་པ་རྒྱལ་བ་གང་ཟག་བླ་ན་མེད་པས་མགར་བའི་བུ་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ཀྱི་ཞལ་ཟས་ཐ་མ་སྦྱིན་
པའི་ཕ་རོལ་ཏུ་ཕྱིན་པ་ཆེན་པོ་བཞེས་པར་མཛད་དོ། །དེ་ནས་ལྷ་དང་། མི་དང་། ལྷ་མ་ཡིན་དེ་དག་གིས་སྐུལ་བྱེད་ཀྱིས་ཕུལ་བའི་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་བཞེས་སོ་ཞེས་
ཐོས་ནས་ངོ་མཚར་རྨད་དུ་བྱུང་བའི་ཆོས་ཐོབ་སྟེ། ལེགས་སོ་ལེགས་སོ་ཞེས་སྐད་ཆེན་པོ་ཕྱུང་ནས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །ཀྱེ་མགར་བའི་བུ་སྐུལ་བྱེད་ཁྱོད་སྐྱིད་དེ་བ་ཁྱོད་ཀྱིས་མི་ལུས་ཐོབ་པ་ནི་ཕན་ཐོགས་པར་གྱུར་ཏོ། །ལེགས་པར་ཐོབ་

བོ། །སྐུལ་བྱེད་འཇིག་རྟེན་ན་ཨུ་དུམ་བཱ་རའི་མེ་ཏོག་བཞིན་དུ་མཛེས་པ་ནི་རྙེད་པར་དཀའོ། །དེ་བས་ཀྱང་ཆེས་དེ་བཞིན་གཤེགས་པ་འབྱུང་བ་རྙེད་པར་དཀའོ། །དེ་བས་ཀྱང་དད་པ་རྙེད་པ་ཤིན་ཏུ་དཀའོ། །དེ་བས་ཀྱང་ཆེས་ཆོས་ཐོས་པ་རྙེད་པར་དཀའོ། །དེ་
བས་ཀྱང་ཆེས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་དབུལ་བ་རྙེད་པར་དཀའོ། །དེ་བས་ན་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཐོབ་པ་མགར་བའི་བུ་སྐུལ་བྱེད་ཁྱོད་ལ་ཕྱག་འཚལ་ལོ། །དཔེར་ན་སྟོན་ཟླ་འབྲིང་པོ་ཉ་ལ་སྤྲིན་མེད་པའི་ཚེ་ཟླ་བའི་དཀྱིལ་འཁོར་
དྲི་མ་མེད་པ་མཛེས་པ་མཐོང་བ་ན་ཟླ་བ་འབའ་ཞིག་མངོན་དུ་སྣང་བ་དེ་བཞིན་དུ། ཁྱོད་ཀྱིས་ཕུལ་བའི་ཞལ་ཟས་ཀྱི་ཐ་མ་དེ་བཞིན་གཤེགས་པས་བཞེས་པས་ན་ཁྱོད་འབའ་ཞིག་སེམས་ཅན་ཐམས་ཅད་ལ་མངོན་དུ་སྣང་ངོ་། །ཁྱོད་ལ་ཡང་དང་ཡང་དུ་ཕྱག་འཚལ་ལོ། །
སྐུལ་བྱེད་ཁྱོད་ནི་མིའི་ལུས་བྱེད་བཞིན་དུ་ལྷའི་ཡང་ལྷ་ཡིན་ནོ། །དེ་བཞིན་གཤེགས་པའི་སྲས་སྒྲ་གཅན་ཟིན་དང་འདྲའོ་ཞེས་བྱས་ནས་ཚིགས་སུ་བཅད་པ་འདི་དག་ཀྱང་སྨྲས་སོ། །ཁྱོད་ནི་མི་མ་ཡིན་ཏེ་ལྷ་མཆོག་ཡིན། །མི་མཆོག་གཙོ་བོ་ཁྱད་པར་འཕགས་
པ་སྟེ། །དེ་ཕྱིར་ཁྱོད་ལ་གསོལ་བ་འདི་སྐད་འདེབས། །སྟོན་པ་ཡོངས་སུ་མྱ་ངན་འདའ་བར་ཆས། །བདག་ཅག་ཀུན་ལ་བརྩེ་བས་སྐུལ་བྱེད་ཁྱོད། །སྐྱེ་བོ་རྣམས་ལ་ཡུན་དུ་ཕན་པའི་ཕྱིར། །འདིར་ནི་སྟོན་པ་དཔག་མེད་མགོན་པོ་ལ། །བཞུགས་ཤིང་རྒྱུན་དུ་
བདུད་རྩི་སྟོན་ཅེས་གསོལ། །སྲིད་ལས་རྣམ་གྲོལ་མྱ་ངན་འདའ་བཞེད་ལ། །གལ་ཏེ་ཁྱོད་ཀྱིས་དེ་རིང་མ་གསོལ་ན། །བདག་ཅག་ཐམས་ཅད་མ་རུང་ཤེས་པར་གྱིས། །དེ་བས་ཕན་ཕྱིར་མགོན་ལ་གསོལ་བ་ཐོབ། །དེ་ནས་ལ་ལ་ཞིག་ཕ་མ་གཉིས་ཤི་བ་ལས་
ཕྱིར་སོས་ཏེ་གསོན་པོར་འདུག་པ་མཐོང་ན་མཆོག་ཏུ་དགའ་བར་གྱུར་པ་དེ་ཁོ་ན་བཞིན་དུ་མགར་བའི་བུ་སྐུལ་བྱེད་དེ་མཆོག་ཏུ་དགའ་བར་གྱུར་ནས་ལག་པ་བརྐྱང་སྟེ། བཅོམ་ལྡན་འདས་ལ་མགོ་བོས་ཕྱག་འཚལ་ནས་ལངས་ཏེ་ཚིགས་སུ་བཅད་པ་འདི་དག་སྨྲས་སོ། །

ཀྱེ་མ་དེང་བདག་རྙེད་པ་ལེགས་པར་རྙེད། །མི་ཡི་འཇིག་རྟེན་སྐྱེས་པ་འབྲས་བུ་ཡོད། །ད་ནི་རྙེད་ལ་སོགས་ལས་འབྲལ་མི་འགྱུར། །མི་བཟད་དམྱལ་བར་ཡང་ནི་ལྟུང་མི་འགྱུར། །དེང་འདིར་རྙེད་པ་ཆེན་པོ་རྙེད་པ་འདི། །གསེར་གྱི་ཕུང་པོ་
བས་ཀྱང་ལྷག་པ་ཡིན། །དཔའ་བོ་བདེ་གཤེགས་མགོན་དང་ཕྲད་པས་ན། །ཕྱིན་ཆད་བདག་ནི་དུད་འགྲོའི་འཇིགས་པ་མེད། །སངས་རྒྱས་ལ་ནི་དད་པ་གཏིང་ཟུག་པ། །དེང་རྙེད་ཨུ་དུམ་བཱ་རའི་མེ་ཏོག་བཞིན། །རབ་འཇིགས་ཡི་དགས་འགྲོ་བ་ཡོངས་
སྤངས་ཤིང་། །ལྷ་མིན་སྐྱེ་བའི་ས་བོན་མི་བཟད་བཅོམ། །དེ་བཞིན་གཤེགས་འབྱུང་དཀོན་དང་དེང་ཕྲད་པ། །ཁབ་ཀྱི་རྩེ་མོར་ཡུངས་འབྲུ་ཆགས་པ་བཞིན། །དེ་ལ་ཕ་རོལ་ཕྱིན་མཆོག་སྦྱིན་ཕུལ་བས། །རྟག་ཏུ་ལྷ་ཡི་འགྲོ་བར་འཕར་བར་གྱུར། །ཆུ་གནས་
པད་མ་ཆུས་མི་ཆགས་པ་ལྟར། །དྲང་སྲོང་ཆེན་པོ་འཇིག་རྟེན་ཆོས་རྣམས་ཀྱིས། །ཆགས་མེད་ཕྲད་པས་སྲིད་རྩེའི་ས་བོན་ཀུན། །དྲུངས་ཕྱུང་བདག་ཉིད་འཁོར་བའི་མཚོ་ཆེན་རྒལ། །རྒྱ་མཚོའི་ནང་གི་རུ་སྦལ་ཞར་བའི་མགྲིན། །གཉའ་ཤིང་མིག་ཏུ་ཆུད་དཀའ་
འདྲ་བ་ལས། །བདེ་གཤེགས་དེང་ཕྲད་དེ་ལ་སྦྱིན་པ་ཕུལ། །དེ་ན་བདག་གིས་ཉོན་མོངས་གསོག་ཀུན་བཅོམ། །ལྷ་རྣམས་ཀྱིས་ནི་ཞལ་ཟས་བཟང་པོ་དག །ཕུལ་ཡང་བདེ་གཤེགས་མ་བཞེས་བདག་ལས་ནི། །ཨེ་རཎྜ་ཡི་མེ་ཏོག་འདྲ་བཞེས་དེས། །
བདག་ནི་འཇིག་རྟེན་རབ་མཆོག་དཔལ་ཡོན་ཅན། །ཚངས་པ་བརྒྱ་བྱིན་ལ་སོགས་འཇིག་རྟེན་འདི། །ཐམས་ཅད་ལྷགས་ཏེ་གུས་པར་བདག་ལ་མཆོད། །ཁྱུ་མཆོག་གནས་སུ་སོན་པ་གང་ཡིན་འདི། །སྐྱེ་བ་འདི་ཉིད་ལ་ནི་བདག་གིས་ཐོབ། །དེ་ནས་ཐལ་མོ་
སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །མགོན་ཁྱོད་མྱ་ངན་འདའ་བ་མཐོང་ནས་ནི། །འཇིག་རྟེན་འདི་ཀུན་སྡུག་བསྔལ་གཟིར་བར་གྱུར། །དབང་མེད་ཀྱི་ཧུད་ཅེས་ནི་སྐད་ཆེར་བླ། །འདི་དག་མ་དོར་རྟག་ཏུ་སྲས་བཞིན་གཟིགས། །ལྷུན་པོའི་གསེར་གྱི་

རྩེ་མོ་རབ་མཐོ་བ། །མཚོ་ཆེན་དབུས་ན་མཛེས་པར་གནས་པ་ལྟར། །ཆོས་ཀྱི་མངའ་བདག་ཁྱོད་ནི་ཆོས་སྟོན་ཅིང་། །དགེ་འདུན་དབུས་སུ་མཛེས་པར་བཞུགས་སུ་གསོལ། །ཇི་ལྟར་ཉི་མ་གཟི་ཅན་ཤར་བ་ན། །འོད་ཟེར་དག་གིས་སྤྲིན་སྲབ་སེལ་བ་ལྟར། །
དྲང་སྲོང་ཆེན་པོ་ཡེ་ཤེས་སྒྲོན་ཆེན་གྱིས། །སྐྱེ་བོ་མང་པོའི་མྱ་ངན་དེང་བསལ་མཛོད། །སེམས་ཅན་འདི་དག་ངུད་མོས་མིག་སྐྲངས་ཤིང་། །སྡུག་བསྔལ་གཅིག་པུའི་རྒྱ་མཚོའི་གཏིང་དུ་ཞུགས། །དེ་ཕྱིར་དད་པ་རྙེད་དཀའ་སྐྱེད་མཛད་ཅིང་། །འདི་རྣམས་སྡུག་
བསྔལ་ཆོད་ལ་ཡུན་དུ་བཞུགས། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་བཀའ་སྩལ་པ། སྐུལ་བྱེད་དེ་ནི་དེ་བཞིན་ནོ། །དེ་ནི་དེ་བཞིན་ཏེ། སངས་རྒྱས་འབྱུང་བ་ནི་ཨུ་དུམ་བཱ་རའི་མེ་ཏོག་བཞིན་ཤིན་ཏུ་རྙེད་པར་དཀའོ། །དད་པ་ཡང་རྙེད་པར་དཀའོ། །ཆོས་
ཐོས་པ་ཡང་རྙེད་པར་དཀའོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚེ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཡང་རྙེད་པར་དཀའོ། །སྐུལ་བྱེད་གཞན་ཡང་ཁྱོད་མ་ངུ་མྱ་ངན་མ་བྱེད་པར་བདག་གིས་དེ་བཞིན་
གཤེགས་པ་ལ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཐོབ་བོ་སྙམ་དུ་དགའ་བ་སྐྱེད་ཅིག་དང་། དེ་བཞིན་གཤེགས་པ་ལ་བཅོམ་ལྡན་འདས་བཞུགས་སུ་གསོལ་ཞེས་དེ་སྐད་དུ་ཁྱོད་གསོལ་བ་མ་འདེབས་ཤིག །སངས་རྒྱས་རྣམས་ཀྱི་ཆོས་
ཀྱི་དེ་ཁོ་ན་ཉིད་ལ་རྟོགས་ཤིག །མི་རྟག་པ་ཉིད་ལ་འཇུག་པར་གྱིས་ཤིག །འདུ་བྱེད་རྣམས་ཀྱི་རང་བཞིན་ཤེས་པར་གྱིས་ཤིག་ཅེས་བཀའ་སྩལ་ནས་ཚིགས་སུ་བཅད་པ་འདི་དག་གསུངས་སོ། །ཚེ་ནི་ཤིན་ཏུ་རིང་ཡང་འཇིག་པར་འགྱུར། །འདིར་ནི་ཐམས་ཅད་
ངེས་པར་འཆི་བར་འགྱུར། །འཚོ་བའི་འཇིག་རྟེན་འཇིག་པའི་ཆོས་ཅན་ཡིན། །འབྱོར་པ་ཐམས་ཅད་རྒུད་པར་གཞོལ་བར་འགྱུར། །རྟག་ཏུ་ལང་ཚོ་རྒ་བས་ངེས་པར་འཇོམས། །གཟུགས་བཟང་ནད་མེད་ནད་ཀྱིས་འཇིག་པར་འགྱུར། །སྲོག་ནི་འཆི་བས་རྩ་ནས་

འབྱིན་པར་བྱེད། །འཇིག་རྟེན་ཀུན་ན་རྟག་པ་ཅི་ཡང་མེད། །དབང་ཕྱུག་མི་རྟག་ཚེ་ཡང་མི་རྟག་སྟེ། །སྐྱེ་བོ་སྡུག་བསྔལ་འཁོར་ལོར་རྟག་ཏུ་འཁོར། །འཇིག་རྟེན་གསུམ་ན་བརྟན་པོ་ཅི་ཡང་མེད། །སྲིད་པ་དག་ན་འགྲོ་ཀུན་སྲོག་ཏུ་འདུག །
སྲིད་པ་འཇིག་པའི་ཆོས་ཅན་རབ་གཡོ་བ། །འདི་དག་ན་ནི་བདེ་བ་ཅི་ཡང་མེད། །རྒ་དང་འཆི་དང་ནད་དང་རྒུད་རྣམས་ཀྱི། །འཇིགས་པས་རྟག་ཏུ་ཀུན་ནས་གཙེ་བར་བྱེད། །སྲིད་པ་མཐའ་མེད་མི་བརྟན་སྙིང་པོ་མེད། །ཐམས་ཅད་དགྲ་དང་འཁུ་བར་ཤེས་པར་
གྱིས། །དེ་ན་འཁོར་ཞིང་ཉོན་མོངས་དྲ་བ་ཡིས། །འཇིག་རྟེན་དཀྲིས་ཏེ་དར་གྱི་སྲིན་བུ་བཞིན། །འཇིག་རྟེན་དག་ན་ཐེར་ཟུག་གནོད་པའི་གཞི། །རྟག་ཏུ་འབྲས་ལྟར་སྡུག་བསྔལ་འབྲེལ་པ་གང་། །མི་གཙང་ལུས་དང་འདོད་པ་དེ་དག་ལ། །ཕན་འདོད་སྡུག་བསྔལ་
བསལ་འདོད་སུ་ཞིག་དགའ། །མི་རྟག་འདོད་པ་རྣམས་ལ་ཆགས་པ་མེད། །ཚུལ་བཞིན་རྟོག་པས་འདོད་ཆགས་འབྲལ་བར་འགྱུར། །དེ་ནས་ཡང་དག་མཐོང་ན་འདོད་ཆགས་འབྲལ། །དེ་དག་སྤངས་བཅད་གྲོལ་བ་ཉིད་དུ་འགྱུར། །ང་ནི་སྲིད་པའི་ཆུ་ཆེན་ལེགས་
པར་རྒལ། །ང་ནི་སྡུག་བསྔལ་རྣམས་འདས་བདེ་བར་ཞུགས། །དེ་ཕྱིར་ངས་ནི་མཐའ་ཡས་སྤྲོས་མེད་པ། །ཆགས་པ་ཀུན་བསལ་ཐར་པ་ཐོབ་པར་གྱུར། །ང་ལ་རྒ་དང་ན་དང་འཆི་བ་མེད། །ང་ལ་རྟག་ཏུ་ཚེ་ཡང་ཟད་པ་མེད། །ང་ནི་མེ་ལྟར་འབར་ཏེ་འགྲོ་
འགྱུར་གྱིས། །ཁྱོད་ཀྱིས་ང་ནི་མེད་འགྱུར་མ་སེམས་ཤིག །དེ་བཞིན་གཤེགས་ཉིད་ལྷུན་པོ་འདྲ་བར་ལྟོས། །ང་དེང་ཡང་དག་མྱ་ངན་འདའ་བར་འགྱུར། །བདེ་མཆོག་དེ་ནི་ང་ཡིས་ཆོས་ཉིད་དེ། །རྒྱལ་རྣམས་སྤྱོད་ཡུལ་ཡིན་གྱིས་ཁྱོད་མ་ངུ་། །དེ་ནས་བཅོམ་
ལྡན་འདས་ལ་མགར་བའི་བུ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ནི་དེ་ལགས་སོ། །དེ་ནི་དེ་ལགས་ཏེ། མྱ་ངན་ལས་འདས་པ་ནི་བདག་གིས་ཀྱང་བསམ་གྱིས་མི་ཁྱབ་ལགས་ན། སྦྲང་བུ་དང་འདྲ་བའི་སེམས་ཅན་ཐེག་པ་དམན་པ་

གཞན་དག་གིས་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱེ་མ་བདག་དེང་དུ་བྱང་ཆུབ་སེམས་དཔའ་མི་མཆོག་སྐལ་བ་ཆེན་པོ་དང་ལྡན་པ། མཆོད་པར་འོས་པ་འཇམ་དཔལ་གཞོན་ནུར་གྱུར་པ་ལ་སོགས་པ་དང་། ཟག་པ་ཟད་པ་རྣམས་དང་མཉམ་པ་
ཉིད་དུ་གྱུར་ཏོ། །བཅོམ་ལྡན་འདས་དཔེར་གསོལ་ན། གསར་དུ་བསྙེན་པར་རྫོགས་པ་གཞོན་ནུ་ཡང་རབ་ཏུ་བྱུང་བ་དེ་ཉིད་ཀྱི་ཉིན་པར་ནས་དགེ་འདུན་གྱི་ནང་ན་དགེ་འདུན་དུ་བགྲང་ཞིང་ཡང་དག་པར་འདུས་པར་འགྱུར་བ་དེ་བཞིན་དུ། བདག་ཀྱང་དེ་བཞིན་
གཤེགས་པའི་མཐུས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གྲངས་སུ་གཏོགས་ཤིང་ཡང་དག་པར་འདུས་ལགས་སོ། །བཅོམ་ལྡན་འདས་བདག་ནི་དེ་བཞིན་གཤེགས་པ་ཡུན་དུ་བཞུགས་པར་འཚལ་གྱི། ཁ་ཟས་ཚིག་པ་བཞིན་དུ་མྱ་ངན་ལས་
འདའ་བར་གཤེགས་པར་ནི་མི་འཚལ་ལགས་སོ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །སྐུལ་བྱེད་ཁྱོད་འདི་སྐད་དུ་བདག་ནི་དེ་བཞིན་གཤེགས་པ་ཡུན་དུ་བཞུགས་པར་འཚལ་གྱི། ཁ་ཟས་ཚིག་
པ་བཞིན་དུ་མྱ་ངན་ལས་འདའ་བར་གཤེགས་པར་ནི་མི་འཚལ་ལོ་ཞེས་དེ་སྐད་མ་ཟེར་ཅིག །འདུ་བྱེད་ཀྱི་རང་བཞིན་བལྟ་བར་བྱ་མོད། དེ་ལྟར་ལྟ་བ་གང་ཡིན་པ་དེ་ནི་སྟོང་པ་ཉིད་བསྒོམ་པ་ཡོངས་སུ་རྫོགས་པར་འགྱུར་ཏེ། དམ་པའི་ཆོས་འདོད་པས་ནི་དེ་ལྟར་བསླབ་
པར་བྱའོ། །སྐུལ་བྱེད་ཀྱིས་སྨྲས་པ། བཙུན་པ་འཇམ་དཔལ་འོ་ན་ཇི་ལྟར་དེ་བཞིན་གཤེགས་པ་ལྷའི་ཡང་ལྷ་མཆོག་ཏུ་གྱུར་པ་ལ་གལ་ཏེ་འདུ་བྱེད་དུ་གྱུར་ན་ལྷའི་ཡང་ལྷར་འོས་པ་མ་ཡིན་ནོ། །འདུ་བྱེད་རྣམས་ནི་ཆུ་བུར་བཞིན་དུ་ཤེས་ཤིང་ཤིང་རྟའི་འཕང་ལོ་བཞིན་
དུ་འཁོར་བ་ཡིན་ནོ། །ལྷ་རྣམས་ནི་མཆོག་ཏུ་ཚེ་རིང་ཞེས་གྲགས་ལ། དེ་བཞིན་གཤེགས་པས་ནི་ལོ་བརྒྱ་ཡང་མ་ཐུབ་སྟེ། དེ་བས་ན་དེ་བཞིན་གཤེགས་པ་ལྷའི་ཡང་ལྷར་འོས་པ་མ་ཡིན་ནོ། །དཔེར་ན་མི་ལ་ལ་ཞིག་གྲོང་དཔོན་བྱེད་པ་ལས་དེ་མཐར་གྱིས་དབང་

ཕྱུག་ཆེན་པོར་གྱུར་ནས་བློན་པོ་ཆེན་པོའི་དབང་ཕྱུག་ལས་ཀྱང་འདས་ཏེ། རང་གི་དབང་ཕྱུག་གི་འབྲས་བུ་ཆོས་ཀྱིས་རྙེད་པ་ལ་ལོངས་སྤྱོད་པ་ལས། དེ་ཕྱིར་ཡང་བསོད་ནམས་ཟད་ཅིང་དབང་ཕྱུག་ལས་ཉམས་པར་གྱུར་ན། གཞན་གྱིས་
བཀོལ་ཞིང་བརྙས་པར་འགྱུར་བ་དེ། ཅིའི་ཕྱིར་ཞེ་ན། དབུལ་པོར་གྱུར་པའི་ཕྱིར་རོ། །དེ་དང་འདྲ་བར་གལ་ཏེ་དེ་བཞིན་གཤེགས་པ་འདུ་བྱེད་དུ་གྱུར་དུ་ཟིན་ན། འཆི་བའི་རྒྱུ་ཡིན་པའི་ཕྱིར་ལྷའི་ཡང་ལྷར་འོས་པ་མ་ཡིན་ནོ། །བཙུན་པ་འཇམ་དཔལ་དེ་བས་ན་
ལྷའི་ཡང་ལྷ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དེ་ལྟར་འདུ་བྱེད་དང་འདྲ་བར་མ་ལྟ་ཤིག །འཇམ་དཔལ་གཞན་ཡང་ཅི་ཁྱོད་ཤེས་བཞིན་དུ། དེ་བཞིན་གཤེགས་པ་ལ་འདུ་བྱེད་ཀྱི་རང་བཞིན་དུ་རྟོག་པར་བྱེད་དམ།
འོན་ཏེ་མ་ཤེས་པས་རྟོག་པར་བྱེད། གལ་ཏེ་དེ་བཞིན་གཤེགས་པ་འདུ་བྱེད་དང་འདྲ་ན་ནི་འཇིག་རྟེན་གསུམ་པོ་དག་ན་ཆོས་ཀྱི་དབང་ཕྱུག་བརྙེས་པ་ལྷའི་ཡང་ལྷ་མཛད་པའི་འོས་མ་ཡིན་ནོ། །དཔེར་ན་རྒྱལ་པོའི་དབང་པོ་ལ་ལ་ཞིག་ལ་གྱད་སྟོང་གི་མཆོག་ཏུ་གྱུར་
པའི་གྱད་ཅིག་ཡོད་ལ། དེ་གྱད་ཐམས་ཅད་ཀྱིས་མི་ཐུབ་པའི་ཕྱིར་གྱད་སྟོང་ཐུབ་ཅེས་བྱ་བའི་མིང་ཐོབ་སྟེ། དེ་ལ་གྱད་ཟླ་མེད་པའི་ཕྱིར་བླ་ནས་དབང་ཐང་ཆེན་པོ་འགྲུབ་ན་ཅི་གྱད་སྟོང་ཐུབ་པ་དེའི་མིང་དེ་ཐོས་ན་སྐད་གྲགས་པ་དེ་མི་བདེན་པ་ཡིན་ནམ། འོན་ཏེ་ཡོན་ཏན་
ཡོད་ན་ནི་ཡོན་ཏན་ཅན་གྱི་མིང་ཐོབ་པ་ཡིན་ནོ། །དེ་བཞིན་དུ་དེ་བཞིན་གཤེགས་པ་ཡང་ཉོན་མོངས་པའི་བདུད་དང་། ཕུང་པོའི་བདུད་དང་། ལྷའི་བུའི་བདུད་དང་། རང་བཞིན་གྱི་བདུད་ཀྱི་གྱད་ཐམས་ཅད་བཅོམ་པས་ན་གྱད་སྟོང་ཐུབ་བཞིན་དུ་ཡང་དག་པའི་ཡོན་ཏན་
གྱི་སྒོ་ནས་འཇིག་རྟེན་གསུམ་པོ་དག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་ཡིན་གྱིས། བཙུན་པ་འཇམ་དཔལ་ཁྱོད་དེ་བཞིན་གཤེགས་པ་ལ་འདུ་བྱེད་དང་འདྲ་བར་ཡོངས་སུ་མ་རྟོག་ཤིག །དཔེར་ན་ལ་ལ་ཞིག་

ཕྱུག་ཅིང་ནོར་མང་བའི་རིགས་སུ་སྐྱེ་བ་བླངས་ལ་ཚེ་ཐུང་བར་འགྱུར་བ་ཞིག་སྟེ། དེ་སྐར་མཁན་དག་གིས་མཐོང་ནས་ཁྱེའུ་འདི་ནི་ཚེ་ཐུང་ངོ་ཞེས་བསྟན་ཏེ། དེའི་ཕ་མས་དེ་སྐད་ཐོས་ན་འདི་ནི་བདག་ཅག་གི་ཁྱིམ་དུ་ཕན་པར་འགྱུར་བ་མ་ཡིན་ནོ་སྙམ་ནས། གྲངས་སུ་
ཡང་མི་རྩི་ཞིང་དེ་ལ་བྱམས་པར་མི་བྱེད་དོ། །དེ་ལྟར་སྐྱེས་པ་འམ། བུད་མེད་དམ། ལྷ་འམ། ཚངས་པ་ཡང་རུང་སྟེ། གང་ཚེ་ཐུང་བ་དེ་ལ་ཁྱད་དུ་གསོད་པར་གྱུར་ན། གལ་ཏེ་དེ་བཞིན་གཤེགས་པ་ཆོས་འབའ་ཞིག་ལ་ཡང་དག་པར་གཞོལ་བ་ཉིད་འདུ་
བྱེད་དུ་གྱུར་དུ་ཟིན་ན་འཇིག་རྟེན་ཐམས་ཅད་ཀྱིས་བརྙས་པར་འགྱུར་རོ། །ཆོས་ཐམས་ཅད་ཀྱི་ནང་ན་ནི་ཕྱིར་ལྟུང་བ་མེད་ཅིང་ཟད་པ་མེད་པ་ལ་ཐར་པ་ཞེས་བཤད་ན། གལ་ཏེ་དེ་ལྟར་གྱུར་ན་དོན་མེད་པར་གྱུར་གྱིས། བཙུན་པ་འཇམ་དཔལ་དེ་བཞིན་གཤེགས་པ་
འདུ་བྱེད་དུ་གྱུར་ཅེས་དེ་སྐད་དུ་མ་གསུང་ཤིག །དཔེར་ན་བུད་མེད་གཞོན་ནུ་དབུལ་མོ། བཀྲེན་མ། མགོན་མེད་པ། ནད་ཀྱིས་ཐེབས་པ། བར་མ་དོར་སྡུག་བསྔལ་བར་གྱུར་པ། སྦྲུམ་པས་ཉེན་པ་ཞིག་མགོན་མེད་པ་ཁང་པ་ཞིག་ཏུ་སོང་བ་ལས། བུ་མོ་དེ་བུ་བྱུང་
ནས། དེ་ན་སྔ་ནས་གནས་པ་གཞན་དག་གིས་དེ་དེའི་ནང་ནས་བསྐྲད་དེ། ཉོན་མོངས་མ་དེ་བུ་བཙས་མ་ཐག་ཏུ་བྱིས་པ་ཁ་དམར་ཁྱེར་ནས་ལོ་ལེགས་པའི་ཡུལ་ཞིག་ཏུ་ཆས་ཏེ་སོང་བ་ལས། ལམ་དུ་ཤ་སྦྲང་དང་། སྦྲང་བུ་དང་། རླུང་དང་། ཉི་ཚན་དང་། སྡིག་
སྦྲུལ་གྱི་གནོད་པས་ཉེན་པར་གྱུར་ཏེ། གང་གཱའི་ཀླུང་ཆེན་པོ་རྒལ་བར་འདོད་པ་ལས་དེ་རྒལ་བར་མ་ནུས་སོ། །ཁྱེའུ་དེ་ཁྱེར་བཞིན་དུ་གང་གཱའི་ནང་དུ་ཤི་ནས། དེ་བུ་དེ་ལ་བྱམས་པའི་བསོད་ནམས་ཀྱི་ཁྱད་པར་གྱིས་ལུས་དང་བྲལ་ཏེ་ཤི་བའི་འོག་ཏུ་ཚངས་པའི་
འཇིག་རྟེན་དུ་སྐྱེས་ཏེ། བྱམས་པའི་བསོད་ནམས་ཀྱི་ཁྱད་པར་ཇི་ལྟ་བུ་ཞིག་གིས་སྐྱེས་ཞེ་ན། བདག་ནི་ཤི་ཡང་བླའི་ཁྱེའུ་འདི་ཉེ་ཞོ་མེད་པར་ཐར་བར་བྱའོ་སྙམ་པའི་བསོད་ནམས་ཀྱི་ཁྱད་པར་གྱིས་སྐྱེས་པ་དེ་བཞིན་དུ། བཙུན་པ་འཇམ་དཔལ་སྐྱེས་བུ་དམ་པ་དམ་

པའི་ཆོས་དབྱུང་བར་འདོད་པས་དེ་བཞིན་གཤེགས་པ་འདུ་བྱེད་དུ་གྱུར་པར་བལྟ་བར་མི་བྱ་ཞིང་། འདུ་ཤེས་ཀྱང་བསྒྱུར་བར་མི་བྱའོ། །གལ་ཏེ་དེ་ལྟ་བུའི་མིག་ལུས་ལ་མེད་ན་ཡང་། བཅོམ་ལྡན་འདས་ནི་བསམ་གྱིས་མི་ཁྱབ་པོ་སྙམ་དུ་ཡང་
དག་པའི་ལྟ་བ་ཅན་དུ་བྱའོ། །སེམས་ཅན་ཐམས་ཅད་ལ་ཕན་པའི་གདམས་ངག་སྟོན་པས་ནི་དེ་བཞིན་གཤེགས་པ་འདུས་མ་བྱས་པ་ཡིན་ནོ་ཞེས་བསྟན་པར་བྱའོ། །དམ་པའི་ཆོས་འབྱིན་པར་བྱེད་པས་ནི་ཇི་ལྟར་བུད་མེད་གཞོན་ནུ་དབུལ་མོས་གང་གཱའི་ཀླུང་ལས་
བུ་བསྒྲལ་བའི་ཕྱིར་རང་གི་སྲོག་དང་བསྡོས་ཏེ་འབད་པ་དེ་བཞིན་དུ་བྱའོ། །དམ་པའི་ཆོས་དབྱུང་བའི་ཐབས་བྱ་བའི་ཕྱིར་དེ་བཞིན་གཤེགས་པ་ནི་འདུས་མ་བྱས་པའོ་སྙམ་དུ་སེམས་བསྐྱེད་པར་བྱའོ། །དེ་བཞིན་གཤེགས་པ་འདུས་མ་བྱས་པར་མཐོང་ན་བདག་
ཉིད་ཀྱིས་དོན་དུ་བྱ་བའི་ཐར་པའི་དོན་རྟོགས་པར་འགྱུར་རོ། །བཙུན་པ་འཇམ་དཔལ་དཔེར་ན་མི་ལ་ལ་ཞིག་ལམ་དུ་འགྲོ་བས་དུབ་པར་གྱུར་ཏེ། ཁྱིམ་གྱི་ནང་དུ་ཉལ་བ་ལས། དེའི་ཚེ་ཁྱིམ་དེ་ཐོག་ཐག་ནས་མེ་ཆེན་པོ་འབར་ཏེ། མི་དེ་མེས་ཚིག་ན་ད་ནི་སྲོག་མེད་
ཟིན་ནོ་སྙམ་ནས། ངོ་ཚ་ཤེས་པ་དང་། ཁྲེལ་ཡོད་པ་དང་ལྡན་པས་བདག་ཉིད་གོས་ཀྱིས་དམ་དུ་དཀྲིས་ཏེ། སེམས་དྲན་པ་དང་ལྡན་བཞིན་དུ་ཤི་ནས། དེ་ངོ་ཚ་ཤེས་ཤིང་ཁྲེལ་ཡོད་པར་སེམས་པའི་བསོད་ནམས་ཀྱི་འབྲས་བུས་སུམ་ཅུ་རྩ་གསུམ་པའི་རྒྱལ་
སྲིད་ནི་ལན་བརྒྱད་ཅུ་བྱས། ཚངས་པའི་རྒྱལ་སྲིད་ནི་ལན་འབུམ་བྱས། མིའི་འཇིག་རྟེན་དུ་ཡང་འཁོར་ལོས་སྒྱུར་བའི་རྒྱལ་སྲིད་ལ་ལན་དུ་མ་བྱས་ཏེ། ངན་སོང་རྣམས་སུ་ཡང་མི་སྐྱེ་ལ་ལན་མང་དུ་བདེ་བ་གཅིག་ནས་གཅིག་ཏུ་བརྒྱུད་པ་འབའ་ཞིག་ཐོབ་པ་དེ་བཞིན་དུ།
འཇམ་དཔལ་ཁྱོད་སྐྱེས་བུ་དམ་པ་དག་ལྟར་འཛེམ་པར་གྱིས་ཤིག །ངོ་ཚ་ཤེས་པར་གྱིས་ཤིག །དེ་བཞིན་གཤེགས་པ་འདུ་བྱེད་ཀྱི་ཐབས་ལ་འཇུག་པ་སྤྱོད་དུ་མ་གཞུག་ཤིག །དགེ་སློང་ཚུལ་ཁྲིམས་ཕུན་སུམ་ཚོགས་པ་དེ་བཞིན་གཤེགས་པ་འདུས་མ་

བྱས་པ་ལ། དེ་བཞིན་གཤེགས་པ་འདུས་བྱས་ཡིན་ནོ་ཞེས་ཟེར་བས་ནི་མུ་སྟེགས་པར་གྱུར་ཏེ་ཤི་ཡང་བླའོ། །དེ་བཞིན་གཤེགས་པ་འདུས་མ་བྱས་ཡིན་བཞིན་དུ་དེ་བཞིན་གཤེགས་པ་འདུས་བྱས་ཡིན་ནོ་ཞེས་ཟེར་བ་གང་ཡིན་པ་དེ་དག་ནི་བརྫུན་དུ་སྨྲ་བ་ཡིན་ནོ། །
དེ་བཞིན་གཤེགས་པ་འདུས་བྱས་པ་ཡིན་ནོ་ཞེས་ཟེར་བ་རྣམས་ནི་རང་གི་ཁྱིམ་དང་འདྲ་བར་སེམས་ཅན་དམྱལ་བར་འགྲོ་བར་འགྱུར་རོ། །བཙུན་པ་འཇམ་དཔལ་དེ་བཞིན་གཤེགས་པ་ལ་འདུས་བྱས་དང་འདྲ་བར་མ་ལྟ་ཞིག །ད་ཕྱིན་ཆད་འཁོར་བར་རྒྱུ་བ་ན་མི་
ཤེས་པ་ལ་བཟླས་ཏེ་བཅོམ་ལྡན་འདས་ནི་འདུས་མ་བྱས་པའོ་སྙམ་པའི་ཤེས་པ་འབའ་ཞིག་རྟོགས་པར་གྱིས་ཤིག །དེ་ལྟར་བྱས་པ་དང་བསྒོམ་པ་དེའི་འབྲས་བུས་ཁྱོད་མྱུར་བ་ཁོ་ནར་དེ་བཞིན་གཤེགས་པ་བཞིན་དུ་མཚན་སུམ་ཅུ་རྩ་གཉིས་དང་ལྡན་པར་འགྱུར་
རོ། །དེ་ནས་འཇམ་དཔལ་གཞོན་ནུར་གྱུར་པས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །ཚེ་རིང་བར་གྱུར་ཅིག །རིགས་ཀྱི་བུས་ནི་དེ་ལྟར་བྱ་བ་ཡིན་ནོ། །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་རྟག་པ་དང་།
ཐེར་ཟུག་དང་། འདུས་མ་བྱས་པ་དང་བརྟན་པར་ཤེས་སོ། །དེ་ལྟར་ཁྱོད་ཀྱིས་འདི་ཁོ་ན་ལྟར་འདུས་བྱས་ཁོང་རླག་ཏུ་གཏང་བའི་སྒོ་ནས་ཤེས་པ་ལས་ན། ཁྱོད་ཀྱང་རིང་པོ་མི་ཐོགས་པར་དེ་བཞིན་གཤེགས་པ་ཇི་ལྟ་བ་བཞིན་དུ་འགྱུར་རོ། །སངས་རྒྱས་ཉིད་
ཀྱིས་ཀྱང་དེ་ལྟར་འུ་བུ་ཅག་གཉིས་ཀྱིས་ཁྱད་པར་དུ་འཕགས་པའི་བསྔགས་པ་བརྗོད་དོ་ཞེས་ཕྱིས་བསྔགས་པར་འགྱུར་རོ། །སྐུལ་བྱེད་དེ་བཞིན་གཤེགས་པའི་བཤོས་སྨྱུར་ཅིག །སྦྱིན་པ་ཐམས་ཅད་ཀྱི་ནང་ན་ནི་སྨྱུར་ཏེ་སྦྱིན་པ་མཆོག་ཡིན་ནོ། །དེ་ལ་སྨྱུར་ཏེ་སྦྱིན་
ཞེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པ་ཐམས་ཅད་ཀྱི་ས་བོན་ལས་མྱུ་གུ་འབྱུང་བར་བྱ་བའི་ཕྱིར་གང་གི་ཚེ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་ཡང་རུང་སྟེ། དོན་འགའ་ཞིག་གི་ཕྱིར་ལམ་དུ་ཞུགས་ནས་དུབ་པར་གྱུར་པ་དེ་དག་ལ་ཅི་ཡོད་

པ་དང་། དེའི་རྐྱེན་དུ་འཚམ་པ་དང་། བརྟགས་པའི་སྦྱིན་པ་བྱེད་པ་དེ་ནི་སྨྱུར་ཏེ་སྦྱིན་པ་ཞེས་བྱའོ། །སྐུལ་བྱེད་དེ་བཞིན་དུ་ཁྱོད་ཀྱིས་ཅི་ཡོད་པ་ལས་ཞལ་ཟས་ཀྱི་ཐ་མ་མང་ཡང་རུང་ཉུང་ཡང་རུང་། དེ་བཞིན་གཤེགས་པ་དགེ་སློང་གི་དགེ་འདུན་
དང་བཅས་པ་ཁྱེད་པར་ཡོད་ཀྱང་རུང་ཁྱེད་པར་མེད་ཀྱང་རུང་སྟེ་འདྲིམ་དུ་ཆུག་ཅིག །བཅོམ་ལྡན་འདས་ཡོངས་སུ་མྱ་ངན་ལས་འདའ་བར་གཤེགས་སུ་ཉེའོ། །དེ་ནས་སྐུལ་བྱེད་ཀྱིས་སྨྲས་པ། བཙུན་པ་འཇམ་དཔལ་ཁྱོད་ཁ་ཟས་ལ་ཆགས་སམ་ཅི་ན་ཞལ་
ཟས་མང་ཡང་རུང་ཉུང་ཡང་རུང་བྲིམས་ཤིག་ཅེས་བདག་གི་གཞེན་འདེབས་པར་བྱེད། བཅོམ་ལྡན་འདས་ཀྱིས་ལོ་དྲུག་གི་བར་དུ་དཀའ་བ་སྤྱོད་པ་མཛད་མཛད་ན་ཅི་ད་སྐད་ཅིག་ཙམ་ཡང་གཞེས་མི་སྤྱོད་དམ། དེ་བཞིན་གཤེགས་པ་ནི་ཆོས་ཀྱི་སྐུ་ཡིན་ཏེ་ཞལ་ཟས་
ཀྱི་སྐུ་མ་ཡིན་ན། ཅི་བཅོམ་ལྡན་འདས་ཞལ་ཟས་གསོལ་ལམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྐུལ་བྱེད་ཀྱིས་ཇི་སྐད་སྨྲས་པ་དེ་ནི་དེ་བཞིན་ནོ། །སྐུལ་བྱེད་ལེགས་སོ། །ལེགས་སོ། །ཁྱོད་ནི་ཐེག་པ་ཆེན་པོ་ལ་ཤེས་རབ་
ཆེ་བའོ། །ཁྱོད་ནི་ཐེག་པ་ཆེན་པོ་ལ་ཤེད་བྱེད་པའོ། །འཇམ་དཔལ་གྱིས་ཀྱང་འདི་སྐད་ཅེས་སྨྲས་སོ། །གལ་ཏེ་དེ་ལྟར་བཞེད་པར་གྱུར་ན་དེ་བཞིན་གཤེགས་པ་སྐུ་ཚེ་རིང་བར་ཤོག་ཤིག །སྐུལ་བྱེད་ཀྱིས་སྨྲས་པ། ཅི་བདག་འབའ་ཞིག་ལ་བཅོམ་
ལྡན་འདས་མཉེས་སམ། འོན་ཏེ་སེམས་ཅན་ཐམས་ཅད་ལ་ཡང་མཉེས། འཇམ་དཔལ་གྱིས་སྨྲས་པ། ཅི་བཅོམ་ལྡན་འདས་ལྟ་ཁྱོད་དང་། བདག་དང་། སེམས་ཅན་ཐམས་ཅད་ལ་ཡང་མི་མཉེས་སམ། སྐུལ་བྱེད་ཀྱིས་སྨྲས་པ། དེ་སྐད་མ་ཟེར་ཅིག །
གང་ལ་མགུ་བ་ཡོད་པ་དེ་ལ་ཕྱིན་ཅི་ལོག་གི་འདུ་ཤེས་ཡོད་དེ། འུ་བུ་ཅག་ནི་དེ་ལ་སྤྱོད་དོ། །དེ་བཞིན་གཤེགས་པ་ལ་ནི་མཉེས་པ་འམ་དགྱེས་པ་མེད་དོ། །འདི་ལྟར་དེ་བཞིན་གཤེགས་པ་ནི་བ་བེའུ་ལ་བྱམས་པའི་ཕྱིར་རྩྭ་ཟོས་ཤིང་ཟོས་ཤིང་གྲོང་ཉིད་དུ་འོང་བ་དེ་

ལྟ་བུའི་བྱམས་པ་དང་ལྡན་པ་མ་ཡིན་གྱི། སེམས་ཅན་ཐམས་ཅད་ལ་ཡང་སྒྲ་གཅན་ཟིན་དང་འདྲ་བར་གཟིགས་ཏེ། སངས་རྒྱས་ཀྱི་ཤེས་རབ་ཀྱི་ཡུལ་ནི་དེ་ལྟ་བུ་ཡིན་ནོ། །བཙུན་པ་འཇམ་དཔལ་དཔེར་ན་རྟ་ཅང་ཤེས་དང་སྦྱར་བའི་ཤིང་རྟ་རྒྱུག་པའི་ཟླ་
ལ་བོང་བུའི་ཤིང་རྟ་རྒྱུག་པ་མི་སྲིད་པ་དེ་བཞིན་དུ། འུ་བུ་ཅག་བོང་བུའི་ཤིང་རྟ་དང་འདྲ་བ་དག་གིས་དེ་བཞིན་གཤེགས་པའི་ཤེས་རབ་དང་འདྲ་བ་དང་། དགོངས་པའི་ཚིག་དང་མཉམ་དུ་འགྲོ་བར་ནུས་རེ་སྐན། དཔེར་ན་ནམ་མཁའ་ལྡིང་དཔག་ཚད་དུ་མར་འགྲོ་
བ་ནམ་མཁའ་ལ་གནས་པས་ཆུའི་ནང་ན་ཉ་དང་རུ་སྦལ་འཁོད་པ་རྣམས་མེ་ལོང་གི་ངོས་ལ་རང་གི་གཟུགས་བརྙན་སྣང་བ་བཞིན་དུ་གསལ་བར་མཐོང་ཡང་། བྱིས་པ་རྣམས་ཀྱིས་ནི་མིག་མི་གསལ་བའི་ཕྱིར་དེའི་མིག་གི་རྩལ་བརྗོད་པར་མི་ནུས་པ་དེ་བཞིན་དུ་
དེ་བཞིན་གཤེགས་པའི་ཡང་དེ་རང་འདྲའོ། །འཇམ་དཔལ་གྱིས་སྨྲས་པ། སྐུལ་བྱེད་དེ་ནི་དེ་བཞིན་ཏེ། བདག་གིས་ནི་བྱང་ཆུབ་སེམས་དཔའ་རྣམས་ཀྱི་ཆེ་བ་ཉིད་གླེང་བའི་ཕྱིར་དེ་སྐད་དུ་བརྒལ་བར་ཟད་དོ། །དེ་ནས་དེའི་ཚེ་བཅོམ་ལྡན་འདས་ཀྱི་ཞལ་
ནས་འོད་ཟེར་རྣམ་པ་སྣ་ཚོགས་བཀྱེ་ནས། དེ་དག་གིས་འཇམ་དཔལ་གཞོན་ནུར་གྱུར་པའི་ལུས་ལ་ཕོག་གོ །དེ་ནས་འཇམ་དཔལ་གྱིས་དེ་རྟོགས་ནས་མགར་བའི་བུ་སྐུལ་བྱེད་ལ་སྨྲས་པ། སྐུལ་བྱེད། དེ་བཞིན་གཤེགས་པ་ཡོངས་སུ་མྱ་ངན་ལས་
འདའ་བར་རིངས་ཀྱིས། དུས་སུ་བཅོམ་ལྡན་འདས་ལ་བཤོས་འདྲིམ་དུ་ཆུག་ཤིག །མ་ཐོགས་ཤིག །རྒྱུ་མེད་པར་བཅོམ་ལྡན་འདས་ཀྱི་ཞལ་ནས་འོད་ཟེར་རྣམས་འབྱུང་བར་མི་འགྱུར་རོ། །དེ་ནས་སྐུལ་བྱེད་ཅང་མི་ཟེར་བར་འདུག་གོ། །དེ་ནས་བཅོམ་ལྡན་
འདས་ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད་ང་ཡོངས་སུ་མྱ་ངན་ལས་འདའ་བར་འགྲོར་ངེས། དགེ་སློང་གི་དགེ་འདུན་ལ་དུས་སུ་ཟས་འདྲིམ་དུ་ཆུག་ཤིག་ཅེས་ལན་གཉིས་ལན་གསུམ་དུ་བཀའ་སྩལ་ཏོ། །དེ་ནས་སྐུལ་བྱེད་ཀྱིས་འདི་སྐད་

སྨྲས་སོ། །ཀྱེ་མ་བཅོམ་ལྡན་འདས་མི་བཞུགས་ན་ནི་འཇིག་རྟེན་སྟོངས་པར་འགྱུར་རོ། །བདག་ཅག་ཐམས་ཅད་ཀྱིས་ངུ་ཞིང་བཅོམ་ལྡན་འདས་ལ་གསོལ་བ་གདབ་བོ། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་འདི་སྐད་ཅེས་
བཀའ་སྩལ་ཏོ། །སྐུལ་བྱེད་མ་ངུ་ཤིག །དེ་ལྟར་ལུས་ལ་རྨ་མ་འབྱིན་ཅིག །མིའི་ལུས་ལ་ཆུ་ཤིང་བཞིན་དུ་སྙིང་པོ་མེད་པར་རྟོགས་ཤིག །སྨིག་རྒྱུ་བ་དང་། དབུ་བ་རྡོས་པ་དང་། སྒྱུ་མ་དང་། རྫ་མཁན་གྱིས་བྱས་པའི་སྣོད་དང་། གློག་ལྟ་བུར་ཁོང་དུ་
ཆུད་པར་གྱིས་ཤིག །འདུས་བྱས་ནི་ཉེས་པ་གྲངས་མེད་པའི་འབྱུང་གནས་ཡིན་ནོ་སྙམ་དུ་ཤེས་པར་གྱིས་ཤིག །འདུས་བྱས་ཀྱི་རང་བཞིན་ལ་ལྟོས་ཤིག །དེ་ནས་བཅོམ་ལྡན་འདས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་དང་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ། དེ་བཞིན་གཤེགས་པ་ཡུན་རིང་དུ་བཞུགས་སུ་མི་གནང་ན་བདག་ཅིའི་སླད་དུ་མི་ངུ་ལགས། འཇིག་རྟེན་སྟོངས་ཀྱིས་མ་མཆིས་སོ། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་འདི་སྐད་
ཅེས་བཀའ་སྩལ་ཏོ། །ང་ནི་ཁྱོད་ལ་སྙིང་བརྩེ་བ་དང་། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་ཡོངས་སུ་མྱ་ངན་ལས་འདའ་བར་བྱེད་དེ། འདི་ནི་སངས་རྒྱས་རྣམས་ཀྱི་ཆོས་ཉིད་དང་འདུས་བྱས་ཀྱི་ཆོས་ཉིད་དོ། །འདུ་བྱེད་ཐམས་ཅད་མི་རྟག་གོ་ཞེས་བྱ་
བའི་ཚིགས་སུ་བཅད་པ་ཁོང་དུ་ཆུད་པར་གྱིས་ཤིག །ཆོས་ཐམས་ཅད་ནི་འདུ་བྱེད་དང་འདྲེས་པའི་ཕྱིར་སྡུག་བསྔལ་བའོ་སྙམ་དུ་རྟོགས་ཤིག །ཆོས་ཐམས་ཅད་ནི་བདག་མེད་པའོ་སྙམ་དུ་དཔྱོད་ཅིག །མི་བརྟན་པ། བརྙན་མ། ཕྱིན་ཅི་ལོག་པའོ་སྙམ་དུ་སོམས་
ཤིག །ལུས་འདི་ནི་ཉེས་དམིགས་མཐའ་ཡས་པ་དང་ལྡན་པའོ་སྙམ་དུ་ཤེས་པར་གྱིས་ཤིག །འདི་ནི་དབུ་བ་དང་འདྲ་བར་ལྟོས་ལ་མ་ངུ་ཤིག །ཡི་མ་ཆད་ཅིག །དེ་ནས་བཅོམ་ལྡན་འདས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་

ནི་དེ་བཞིན་དུ་མཇལ་ལགས་ན་ཧ་ཅང་སྡུག་བསྔལ་ཆེན་པོ་མི་བཟོད་ལགས་སོ། །བཅོམ་ལྡན་འདས་ཐབས་ཀྱིས་ཡོངས་སུ་མྱ་ངན་ལས་འདའ་བར་མཛད་པ་ལ་ནི་བདག་གློ་བ་རངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྐུལ་བྱེད་
ལེགས་སོ་ལེགས་སོ། །རིགས་ཀྱི་བུས་ནི་ངའི་མྱ་ངན་ལས་འདས་པ་ཐབས་དེ་ལྟར་བལྟ་བར་བྱའོ། །སྐུལ་བྱེད་སངས་རྒྱས་གཤེགས་པ་ནི་བྱ་བཞད་གཟས་ལ་འགྲོ་བ་ལྟ་བུར་ཤེས་པར་གྱིས་ཤིག །སྐུལ་བྱེད་ཚེ་རིང་བ་དང་ཚེ་རིང་བ་མ་ཡིན་པའི་
རྟགས་ཤེས་པར་གྱིས་ཤིག །སྐུལ་བྱེད་ཆོས་ཐམས་ཅད་ནི་སྒྱུ་མའི་ཆོས་ཅན་ནོ། །དེ་བཞིན་གཤེགས་པ་ནི་ཆོས་ཐམས་ཅད་ལ་ཐབས་ཀྱི་ཆོས་ཅན་ཡིན་ལ། དེ་རྣམས་ཀྱིས་ཀྱང་གོས་པར་མི་འགྱུར་བ་དེ་ནི་སངས་རྒྱས་བཅོམ་ལྡན་འདས་རྣམས་ཀྱི་
རང་བཞིན་ནོ། །སྐུལ་བྱེད་ཁྱོད་སྲིད་པའི་རྒྱ་མཚོ་ལས་ངེས་པར་རྒལ་བར་བྱ་བའི་ཕྱིར་ཞལ་ཟས་སྨྱུར་ཏེ་འོན་ཅིག །ལྷ་དང་ལྷ་མ་ཡིན་དང་མི་རྣམས་ཀྱིས་ཀྱང་ང་ལ་རང་རང་གི་མཆོད་པ་བྱས་ནས་མི་གཡོ་བའི་བདེ་བ་ཐོབ་པར་གྱུར་ཅིག །ཁྱོད་ཀྱིས་ཀྱང་སྣོད་དུ་
གྱུར་པ་ལ་དུས་སུ་སྦྱིན་པ་གྱིས་ཤིག །མ་ཐོགས་ཤིག །སྣོད་དུ་གྱུར་པ་དང་ང་དང་དེ་བཞིན་གཤེགས་པ་ཞེས་བྱ་བ་ནི་དོན་ཐ་དད་པ་མ་ཡིན་ནོ། །དེ་ནས་སྐུལ་བྱེད་ཀྱིས་ཀྱང་སེམས་ཅན་ཐམས་ཅད་ངེས་པར་བསྒྲལ་བའི་ཕྱིར་མགོ་སྨད་དེ་མཆི་མ་བླགས་
ནས་གསོལ་པ། ལེགས་ལགས་སོ། །ལེགས་ལགས་སོ། །བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་དུ་བདག་གིས་བགྱིའོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་ཇི་ལྟར་བལྟ་བ་དེ་ནི་བདག་ཅག་སྦྲང་བུ་དང་
འདྲ་བ་རྣམས་ཀྱི་ཡུལ་ཡང་མ་ལགས། ཉན་ཐོས་དང་རང་སངས་རྒྱས་ཀྱི་ཡུལ་ཡང་མ་ལགས་སོ་ཞེས་གསོལ་ཏོ། །དེ་ནས་མྱ་ངན་བྱེད་ཅིང་ངུ་བཞིན་དུ་གཡོག་འཁོར་དང་བཅས་པས་བཅོམ་ལྡན་འདས་ལ་བསྐོར་བ་བྱས་ཏེ་མཆོད་པ་ཆེན་པོའི་ལས་བྱས་ནས་བཅོམ་

ལྡན་འདས་དང་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཏེ་ཞལ་ཟས་ལེན་དུ་སོང་ངོ་།། །།བམ་པོ་གསུམ་པ། དེ་ནས་དེའི་ཚེ་ས་ཆེན་པོ་གཡོས་རབ་ཏུ་གཡོས། འགུལ་རབ་ཏུ་འགུལ། འཁྲུགས་
རབ་ཏུ་འཁྲུགས། འཁོར་རབ་ཏུ་འཁོར། འུར་འུར་རབ་ཏུ་འུར་འུར། ཤིག་ཤིག་རབ་ཏུ་ཤིག་ཤིག །མེར་མེར་རབ་ཏུ་མེར་མེར། ལྡེམ་ལྡེམ་རབ་ཏུ་ལྡེམ་ལྡེམ་མོ། །དེ་ལ་སོགས་པ་བྱས་ཏེ། མི་མཁྲིས་པའི་ནད་ཀྱིས་བརྒྱལ་བའི་གནོད་པས་ཐེབས་
པ་བཞིན་དུ་ས་ཆེན་པོ་འདི་རྒྱ་མཚོ་དུག་ཅན་པའི་མཐས་གཏུགས་པ་ཚངས་པའི་འཇིག་རྟེན་མན་ཆད་ཐོག་ཐག་ཏུ་རབ་ཏུ་གཡོས་སོ། །དེ་ནས་ལྷ་དང་། ལྷ་མ་ཡིན་དང་། མི་དེ་དག་ཐམས་ཅད་མགོ་རྨོངས་ཏེ། འཇིགས་ཤིང་སྐྱི་བུང་ཞེས་བྱས་ནས། ངུ་བཞིན་
དུ་ཚིག་འཐུན་པར་ཚིགས་སུ་བཅད་པ་འདི་དག་གསོལ་ཏོ། །མགོན་པོ་ཁྱོད་ལ་བདག་ཅག་རྣམས། །མགོ་བོས་ཕྱག་འཚལ་གསོལ་བ་འདེབས། །རྒྱལ་བ་ཁྱུ་མཆོག་ཁྱོད་དང་ནི། །བྲལ་ན་བདག་ཅག་མགོན་མེད་འགྱུར། །དེང་ཁྱོད་མྱ་ངན་འདའ་
འགྱུར་འདི་བསམས་ན། །བདག་ཅག་སྡུག་བསྔལ་ཤིན་ཏུ་གཏིང་ཟབ་བྱིང་། །ཐུབ་པ་བདག་ཅག་སྙིང་ནི་སྟོར་བར་གྱུར། །བ་བཞོན་རྐུན་ཁྱེར་བེའུ་ལ་ཆགས་པ་བཞིན། །མགོན་མེད་དབུལ་པོའི་མི་ནི་ལ་ལ་ཞིག །ནད་ཀྱིས་ཐེབས་ལ་སྨན་པ་མེད་པ་དང་། །
རང་དགར་བྱེད་ཅིང་ཁ་ཟས་གནོད་པ་རྣམས། །ཟ་བ་ཇི་ལྟར་འཆི་བར་འགྱུར་བ་བཞིན། །སྐྱེ་བོ་འདི་དག་ཉོན་མོངས་ནད་ཀྱིས་ཐེབས། །ཁྱོད་མེད་ཁྱོད་ཀྱི་ཆོས་ཀྱི་གསོས་མེད་པས། །ལྟ་བའི་ཉེས་པ་བྱེད་འདྲར་འཆི་བར་འགྱུར། །དེ་བས་ཕན་ཕྱིར་འཇིག་
རྟེན་མ་དོར་ཅིག །ཇི་ལྟར་གྲོང་ཁྱེར་རྒྱལ་དང་བྲལ་བ་དང་། །དབུལ་པོ་རྣམས་ལ་མུ་གེ་བྱུང་བ་དང་། །ཇི་ལྟར་དགོན་པར་སྐོམ་གྱིས་གདུངས་པ་བཞིན། །ཁྱོད་འདས་འོག་ཏུ་བདག་ཅག་དེ་འདྲར་འགྱུར། །སེམས་ཅན་གཅེས་ཁྱོད་མྱ་ངན་འདའ་བཞེད་པས། །

ས་གཞི་རབ་ཏུ་གཡོས་ཤིང་ཕྱོགས་ཀྱང་འཆོལ། །རྒྱ་མཚོ་ཆེན་པོ་དག་ཀྱང་རྣམ་པར་འཁྲུགས། །བདག་ཅག་ཀུན་ཀྱང་སྡུག་ཅིང་བསྔལ་བར་གྱུར། །དྲང་སྲོང་ཆེན་པོ་དེང་ཁྱོད་མྱ་ངན་ལས། །འདས་ན་ཉི་མའང་ས་ལ་ལྟུང་ཡང་དག །རྒྱ་མཚོ་ཆེན་
པོ་དག་ཀྱང་སྐམ་པར་འགྱུར། །བདག་ཅག་ཀུན་ཀྱང་དེང་དུ་འགུམ་ལགས་གྲང་། །ཇི་ལྟར་སྟོབས་ལྡན་མིས་ནི་སྒོ་གསེབ་ནས། །གླང་ཆེན་ཁྱེར་ཏེ་ནང་དུ་འཛུལ་བགྱིད་ན། །ཤིན་ཏུ་ཉོན་མོངས་འགྱུར་བ་དེ་བཞིན་དུ། །བདག་ཅག་ཐམས་ཅད་རབ་ཏུ་ཉོན་
མོངས་གྱུར། །ཇི་ལྟར་བུ་གཅིག་འགུམ་པར་མི་འཚལ་ཞིང་། །མྱ་ངན་ཁྱོད་འདའ་བདག་ཅག་དེ་མི་འཚལ། །གལ་ཏེ་ཁྱོད་ནི་མྱ་ངན་འདའ་བ་ལས། །མི་གཞེས་བདག་ཅག་ཐམས་ཅད་ཕོངས་པར་འགྱུར། །ཁྱོད་ནི་མྱ་ངན་འདས་ལམ་གཤེགས་མཐོང་
བས། །དུད་འགྲོ་མང་པོའང་གཡར་ངན་ཆེར་བགྱིད་ན། །བདག་ཅག་ཇི་ལྟར་གཡར་ངན་མི་འཚལ་ལགས། །བདག་ཅག་མཆིལ་མ་བཞིན་དུ་མ་དོར་ཅིག །ཉི་མ་འཆར་ཀར་རང་གི་འོད་གསལ་བས། །མུན་ནག་རྣམ་པར་བཅོམ་པ་དེ་བཞིན་དུ། །
འཕྲུལ་ཅན་ཁྱོད་ཀྱིས་སྡུག་བསྔལ་མུན་བསལ་ཏེ། །དགེ་འདུན་དབུས་སུ་རི་རབ་བཞིན་དུ་བཞུགས། །བཅོམ་ལྡན་འདས་དཔེར་གསོལ་ན། རྒྱལ་པོ་ལ་ལ་ཞིག་གི་བུ་སྡུག་ཅིང་ཕངས་པ་ཞིག་མཆིས་ལ། དེས་དེ་ཆོས་ལུགས་ཀྱི་བསྟན་བཅོས་བསླབས་ནས།
འདི་སོད་ཅིག་ཅེས་བཀའ་སྩལ་པ་དེ་བཞིན་དུ་བདག་ཅག་བཅོམ་ལྡན་འདས་དམ་པའི་ཆོས་ཀྱི་འཁོར་ལོས་སྒྱུར་བའི་སྲས་རྣམས་ཀྱང་ཡང་དག་པའི་ལྟ་བ་བསྐྱེད་ནས་བཀུམ་གྱིས་མ་མཆིས་ན། བཅོམ་ལྡན་འདས་རྒྱལ་པོའི་བུ་ཇི་བཞིན་དུ་བདག་ཅག་མི་འགུམ་པར་
བཅོམ་ལྡན་འདས་དེའི་སླད་དུ་ཡུན་རིང་དུ་བཞུགས་སུ་གསོལ། ཇི་ལྟར་ལ་ལ་ཞིག་གཞུང་གིས་རྩོད་པའི་བསྟན་བཅོས་ལ་བསྟེན་པ་ན་སྐྲག་པར་འགྱུར་བ་དེ་བཞིན་དུ་ཁྱོད་ཀྱིས་སྐྲག་པར་མ་མཛད་ཅིག །དེ་ཁོ་ན་ཉིད་མཁྱེན་བཞིན་དུ་བདག་ཅག་སེམས་ཅན་དམྱལ་

བར་མཆི་བར་མ་མཛད་ཅིག །དམ་པའི་ཆོས་ཀྱི་བདུད་རྩིའི་བཅུད་ཀྱིས་ཚིམ་པར་མཛད་ཅིང་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། ཇི་ལྟར་རྒྱལ་པོའི་བཙོན་རར་གནོད་པའི་ལས་རྣམས་ཀྱིས་དང་པོ་ཉོན་མོངས་པ་ན། ལ་ལ་
ཞིག་གིས་ཁྱོད་ཀྱིས་ན་ཚ་ཇི་ལྟ་བུ་ཞིག་མྱོང་ཞེས་སྨྲས་ན། དེས་དེ་ལ་སྨྲས་པ། དེ་ནི་དེ་བཞིན་ཏེ། གང་གི་ཚེ་བདག་སྡུག་བསྔལ་གྱི་ཚོར་བ་ལས་ཐར་བར་འགྱུར་བ་དེའི་ཚེ་མྱ་ངན་ལས་འདས་པ་ཡིན་ཏེ། བདེ་བ་ཉམས་སུ་མྱོང་བར་འགྱུར་རོ་ཞེས་མཆི་བ་དེ་
བཞིན་དུ་བདག་ཅག་ཐམས་ཅད་ཀྱང་ཁྱོད་བཞུགས་ན། རྒྱལ་པོའི་བཙོན་ར་ནས་ཐར་བ་བཞིན་དུ་མྱ་ངན་ལས་འདས་པ་ལགས་ན། དེའི་སླད་དུ་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། བཅོམ་ལྡན་འདས་དཔེར་གསོལ་ན་སྨན་པ་ཚེའི་རིག་བྱེད་
ཡན་ལག་བརྒྱད་ལ་མཁས་པས། བདག་གི་བུ་ལ་ནི་རྒྱུད་ཕྱི་མ་སློབ་པར་བགྱིད་ཀྱི། སློབ་མ་ལ་ནི་བདག་དང་མཉམ་པར་འགྱུར་དུ་དོགས་ནས་སློབ་པར་མི་བགྱིད་པ་དེ་བཞིན་དུ། ཆོས་ཀྱི་རྒྱལ་པོ་སྨན་པ་ཆེན་པོ་སེར་སྣ་མི་མངའ་བ་ཁྱོད་ཀྱིས་ཐེག་པ་ཆེན་པོའི་
རྒྱུད་ཕྱི་མ་ལ་དེ་ལྟར་མི་མཛད་པར་བཅོམ་ལྡན་འདས་ཡུན་རིང་དུ་བཞུགས་སུ་གསོལ། དེ་བཞིན་དུ་ཤིང་རྟ་པ་ཤིང་རྟའི་རིག་བྱེད་ལ་མཁས་པས། བདག་གི་བུ་ལ་ནི་རྒྱུད་ཕྱི་མ་སྒྲ་གྲག་པར་ཕོག་པའི་དཔྱད་ཐམས་ཅད་སློབ་པར་བགྱིད་ཀྱི། སློབ་མ་ལ་ནི་སློབ་
པར་མི་བགྱིད་པ་དང་། རིག་པའི་གནས་གཞན་དག་ལ་ཡང་དེ་བཞིན་དུ་སྦྱར་རོ། །བཅོམ་ལྡན་འདས་དཔེར་གསོལ་ན་བྱིས་པ་འམ། རྒན་པོ་འམ། ནད་པ་ལ་ལ་ཞིག་ལམ་བཟང་པོ་ལས་གོལ་ཏེ། ལམ་ངན་པར་མཆིས་ན་ཤིན་ཏུ་སྡུག་བསྔལ་བར་འགྱུར་བ་
དེ་བཞིན་དུ། བཅོམ་ལྡན་འདས་སེམས་ཅན་ལམ་ངན་པར་མཆིས་པ་རྣམས་ལུས་དང་བྲལ་བའི་འོག་ཏུ་སེམས་ཅན་དམྱལ་བ་རྣམས་སུ་སྡུག་བསྔལ་མྱོང་བར་འགྱུར་ལགས་ན། བཅོམ་ལྡན་འདས་ལམ་སྟོན་པ་ཡུན་རིང་དུ་བཞུགས་སུ་གསོལ། ཡ་མཚན་ཅན་

དགུ་བཅུ་རྩ་དྲུག་དང་། ཚིགས་སུ་བཅད་པ་བཞི་བཅུ་རྩ་ལྔ་ལ་ཡང་དེ་བཞིན་དུ་རྒྱས་པར་སྦྱར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་ཁྱེད་ལྷ་དང་མི་རྣམས་ལྟར་བྱིས་པའི་སྨྲེ་སྔགས་འདོན་པ་དག་མ་བྱེད་པར་བརྩོན་
འགྲུས་རྩོམས་ཤིག །དེ་ནས་ལྷ་དང་། ལྷ་མ་ཡིན་དང་། མི་རྣམས་ཀྱིས་བཅོམ་ལྡན་འདས་ཀྱི་གསུང་བློ་གྲོས་དང་ལྡན་པ་དང་། དེ་ཁོ་ན་ཉིད་དུ་འགྲོ་བ་ཐོས་ནས་ཇི་ལྟར་བུ་གཅིག་པ་ཤི་ནས་དུར་ཁྲོད་དུ་བོར་བ་བཞིན་དུ་དེ་དག་སྡུག་བསྔལ་བར་གྱུར་ཏོ། །
དེ་ནས་བཅོམ་ལྡན་འདས་ཀྱིས་དེ་དག་ལ་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་ངེས་པར་བདེ་གྱུར་ཅིག །མྱ་ངན་མ་བྱེད་མ་ངུ་ཤིག །འདི་ནི་སངས་རྒྱས་རྣམས་ཀྱི་ཆོས། །ཐམས་ཅད་མི་སྨྲ་འཁོད་པར་གྱིས། །བག་མེད་པར་ནི་མ་
གནས་པར། །བག་ཡོད་པ་ལ་དགའ་བར་གྱིས། །ཁྱེད་སྟོང་པ་དང་སྟོང་པ་མ་ཡིན་པ་འམ། རྟག་པ་དང་མི་རྟག་པ་འམ། སྐྱབས་དང་སྐྱབས་མ་ཡིན་པ་འམ། འགྲོ་བ་དང་མི་འགྲོ་བ་འམ། རྟེན་དང་རྟེན་མ་ཡིན་པ་འམ། ཐེར་ཟུག་དང་ཐེར་ཟུག་
མ་ཡིན་པ་འམ། བརྟན་པ་དང་བརྟན་པ་མ་ཡིན་པ་འམ། སེམས་ཅན་དང་སེམས་ཅན་མེད་པ་འམ། ཡང་དག་པ་དང་ཡང་དག་པ་མ་ཡིན་པ་འམ། བདེན་པ་དང་བདེན་པ་མ་ཡིན་པ་འམ། མྱ་ངན་ལས་འདས་པ་དང་མྱ་ངན་ལས་འདས་པ་མ་ཡིན་པ་འམ།
གསང་བ་དང་གསང་བ་མ་ཡིན་པ་འམ། གཉིས་དང་གཉིས་སུ་མེད་པ་འམ། དེ་བཞིན་དུ་ཆོས་རྣམ་པ་དུ་མ་དག་ལ་སོམ་ཉི་འམ། ཡིད་གཉིས་སམ། ཐེ་ཚོམ་ཟ་བ་ཅི་དང་ཅི་ཡོད་པ་དེ་དང་དེ་དག་ང་ལ་ཞུས་ཤིག་དང་ཐམས་ཅད་གཅད་པར་བྱའོ། །བདུད་
རྩིའི་མཆོག་ཀྱང་ཁྱེད་ལ་བསྟན་པར་བྱ་སྟེ། དེའི་འོག་ཏུ་ཡོངས་སུ་མྱ་ངན་ལས་འདའ་བར་བྱའོ། །དགེ་སློང་དག་སངས་རྒྱས་འབྱུང་བ་རྙེད་པར་དཀའོ། །མིའི་ལུས་ཐོབ་པ་རྙེད་པར་དཀའོ། །དལ་བ་ཕུན་སུམ་ཚོགས་པ་རྙེད་པར་དཀའོ། །བཟོད་པ་དང་

ཚུལ་ཁྲིམས་ཕུན་སུམ་ཚོགས་པ་མ་ཞིག་མ་རལ་བ་ཡང་ཤིན་ཏུ་རྙེད་པར་དཀའོ། །འཇིག་རྟེན་ན་དགྲ་བཅོམ་པ་འཐོབ་པ་ནི་གསེར་གྱི་ཕྱེ་མ་དང་། ཨུ་དུམ་བཱ་རའི་མེ་ཏོག་བཞིན་དུ་རྙེད་པར་དཀའོ། །དགེ་སློང་དག་འདི་ལྟ་སྟེ། ས་ནི་
ཐམས་ཅད་ཀྱི་སྒོ་ནས་སེམས་ཅན་ཐམས་ཅད་ཀྱི་འཚོ་བ་ཡིན་ཏེ། དེ་བཞིན་དུ་ངའི་ཆོས་བསྟན་པ་རྣམ་པ་སྣ་ཚོགས་གསང་བ་ཐར་པའི་གྲོང་ཁྱེར་གྱི་བདུད་རྩིའི་ཟས་ཀྱང་དེ་དང་འདྲ་བར་བལྟ་བར་བྱའོ། །སེམས་ཅན་ཐམས་ཅད་དང་ངའི་སྲས་དགེ་སློང་ཐམས་
ཅད་ལ་དམ་པའི་ཆོས་མང་པོ་བརྟན་པོར་བཞག་གོ །གཞན་ཡང་སེམས་ཅན་ཐམས་ཅད་ལ་ཕན་པའི་ཕྱིར་དེ་བཞིན་གཤེགས་པའི་ཡོན་ཏན་ཆེ་བ་ཉིད་བསྒྲགས་ཏེ། ཡི་གེ་འབྲུ་གཅིག་པའི་ཐིག་ལེའི་གཏམ་ཡང་བཞག་ནས་ཡོངས་སུ་མྱ་ངན་ལས་འདའ་བར་
བྱའོ། །དེ་ནས་དགེ་སློང་དེ་དག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ་ཞེས་ཐོས་ནས་མི་དགའ་བར་གྱུར་ཏེ། སྐྱི་བུང་ཞེས་བྱས་ནས་མིག་མཆི་མས་གང་བཞིན་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་
འདས་ལ་ལན་མང་དུ་བསྐོར་བ་བྱས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྡུག་བསྔལ་བ་དང་། མི་རྟག་པ་དང་། བདག་མེད་པ་དང་། རྗེས་ཐམས་ཅད་ཀྱི་ནང་ན་གླང་པོ་ཆེའི་རྗེས་ཆེས་མཆོག་ཡིན་པར་བསྟན་ཏོ་ཞེས་
གསུངས་ཏེ། དེ་ལྟར་མི་རྟག་པའི་འདུ་ཤེས་བརྟེན་ཅིང་བསྒོམས་ཏེ་མང་དུ་བགྱིས་པས་འདོད་པའི་འདོད་ཆགས་ཐམས་ཅད་ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་འགྱུར། གཟུགས་མེད་པའི་འདོད་ཆགས་ཐམས་ཅད་ཟད་པར་འགྱུར།
མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་མ་ལུས་པ་ཡང་དག་པར་ཆད་པར་འགྱུར་བ་ལགས་སོ། །བཅོམ་ལྡན་འདས་དཔེར་གསོལ་ན་སྟོན་གྱི་དུས་སུ་ཞིང་པས་རྨོས་ཆེར་བཏབ་སྟེ་རྩ་བ་འཛིངས་པ་ཐམས་ཅད་སེལ་བར་བགྱིད་པ་དེ་

བཞིན་དུ། བཅོམ་ལྡན་འདས་མི་རྟག་པའི་འདུ་ཤེས་བརྟེན་ཅིང་བསྒོམས་ཏེ་མང་དུ་བགྱིས་པས་འདོད་པའི་འདོད་ཆགས་ཐམས་ཅད་ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་འགྱུར། གཟུགས་མེད་པའི་འདོད་ཆགས་ཐམས་ཅད་
ཟད་པར་འགྱུར། མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་མ་ལུས་པར་ཡང་དག་པར་ཟད་པར་འགྱུར་རོ། །ཞིང་ལས་ཐམས་ཅད་ཀྱི་ནང་ན་ནི་སྟོན་གྱི་ཞིང་ལས་མཆོག་ཏུ་བསྟན་ཏོ་ཞེས་བྱ་བ་ལ་སོགས་པ་གླང་པོ་ཆེའི་རྗེས་ལྟ་
བུའི་མདོ་ལས་འབྱུང་བ་བཞིན་དུ་རྒྱས་པར་སྦྱར་རོ། །བཅོམ་ལྡན་འདས་དཔེར་གསོལ་ན། རྒྱལ་པོ་འཆི་བའི་ཚེ་བདག་གི་བཙོན་ར་བསལ་ཏེ། སེམས་ཅན་རྣམས་བཙོན་རའི་གནོད་པས་སྙོན་སྨོངས་པ་ལས་ཐར་བར་བགྱིས་ནས་དེའི་འོག་ཏུ་འཆི་བར་
བགྱིད་པ་དེ་བཞིན་དུ། བཅོམ་ལྡན་འདས་ཁྱོད་ཀྱིས་ཀྱང་སེམས་ཅན་མི་ཤེས་པ་རྣམ་པ་སྣ་ཚོགས་ཀྱི་བཙོན་རར་བྲུབས་པ་རྣམས་ཀྱིས་མི་ཤེས་པའི་འཆིང་བ་རྣམས་བཅད་ནས། དེའི་འོག་ཏུ་ཡོངས་སུ་མྱ་ངན་ལས་འདའ་བར་གཤེགས་སུ་གསོལ། བཅོམ་
ལྡན་འདས་གཞན་ཡང་དཔེར་གསོལ་ན། སེམས་ཅན་འབྱུང་པོ་དང་ཤ་ཟའི་གདོན་གྱིས་བརླམས་པ་ལས། སྨན་པ་ཆེན་པོ་དང་ཕྲད་ན་འབྱུང་པོ་དང་ཤ་ཟའི་གདོན་རྣམས་ཀྱིས་ཐེབས་པ་ཐམས་ཅད་ལས་ཐར་བར་འགྱུར་བ་དེ་བཞིན་དུ། ཁྱོད་དང་མཇལ་ན་ཉན་
ཐོས་ཀྱི་ཚོགས་ཐམས་ཅད་མི་ཤེས་པ་རྣམ་པ་སྣ་ཚོགས་ཀྱི་འབྱུང་པོ་དང་ཤ་ཟའི་གདོན་རྣམས་ལས་ཡོངས་སུ་ཐར་བར་འགྱུར་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཁོང་དུ་ཆུད་པར་བགྱིད་ལགས་སོ། །བཅོམ་ལྡན་འདས་དཔེར་གསོལ་ན་གླང་པོ་ཆེའི་འདུལ་
སྦྱོང་གི་མཁན་པོས་སྤོས་ཀྱི་གླང་པོ་ཆེ་ཞགས་པ་ཆེན་པོས་བཅིངས་པ་ལས་གླང་པོ་ཆེའི་ཞགས་པ་དེ་བཅད་དེ་བྲོས་པ་དེ་བཞིན་དུ། བཅོམ་ལྡན་འདས་བདག་ཅག་ཀྱང་བདག་ཏུ་འཛིན་པ་དང་། བདག་གིར་འཛིན་པ་དང་། ཕྲག་དོག་དང་། དངན་འཐེན་དང་།

སེར་སྣ་དང་། གཡོའི་ཞགས་པ་ཆེན་པོ་བཅད་ནས་གླང་པོ་ཆེའི་འདུལ་སྦྱོང་གི་མཁན་པོ་ཆེན་པོ་དེ་བཞིན་གཤེགས་པའི་ལག་ཏུ་འོངས་ནས། སེམས་ཅན་ཐམས་ཅད་ལས་ཉོན་མོངས་པའི་གླང་པོ་ལྔ་བཅུ་རྩ་བདུན་ཡོངས་སུ་བསལ་བར་
བགྱིའོ། །བཅོམ་ལྡན་འདས་དཔེར་གསོལ་ན་གྲང་བའི་རིམས་ཀྱིས་ཐེབས་པ་སྨན་པ་ཆེན་པོའི་ཐད་དུ་མཆིས་ན་སྡུག་བསྔལ་ལས་ཐར་བར་འགྱུར་བ་དེ་བཞིན་དུ། བཅོམ་ལྡན་འདས་བདག་ཅག་ཀྱང་ཉོན་མོངས་པ་དང་། ལོག་པར་ལྟ་བ་དང་། ལོག་པའི་
འཚོ་བའི་ཉེས་དམིགས་མཐའ་ཡས་པའི་གྲང་བའི་རིམས་ནད་ཅན་གྱི་ལུས་དང་ལྡན་པ་ལས་སྨན་པ་ཆེན་པོ་བཅོམ་ལྡན་འདས་ཀྱི་ཐད་དུ་མཆིས་ནས་སྡུག་བསྔལ་ཐམས་ཅད་ལས་རྣམ་པར་ཐར་བར་གྱུར་ཏེ་མི་གཡོ་བའི་བདེ་བ་ཡང་ཐོབ་ལགས་སོ། །བཅོམ་ལྡན་
འདས་གཞན་ཡང་དཔེར་གསོལ་ན་མི་ཞིག་གིས་འབྲས་སྐྱེམས་འཚལ་ཏེ་ར་རོ་བར་གྱུར་ནས་བདག་ཉིད་ཀྱིས་ཀྱང་བདག་ཉིད་མ་འཚལ་ཏེ། ཆོས་ཀྱང་མ་འཚལ། ཆོས་མ་ལགས་པ་ཡང་མ་འཚལ། འདི་ནི་བདག་གི་མའོ། །འདི་ནི་བདག་གི་སྲིང་མོའོ། །
འདི་ནི་བདག་གི་བུ་མོའོ་སྙམ་དུ་ཡང་མ་འཚལ་ལ། སྨད་ཅིང་བླ་སྟེ་ཕྱི་ས་དང་གཅིན་གྱིས་རང་གི་ལུས་ཀུན་བསྒོས་ཤིང་མཆིས་པ་ལས། དེའི་འོག་ཏུ་བདག་ཉིད་སངས་ཏེ་གཞི་ཅི་ལས་གྱུར་པ་ལ་མཁས་པར་གྱུར་ནས་ཆང་ནི་ཅིར་ཡང་མི་རུང་ངོ་སྙམ་དུ་སེམས་ཏེ།
བདག་ནི་སྡིག་པ་ཐམས་ཅད་ལས་ཐར་ཏོ་སྙམ་ནས་ཆང་བཏུང་བ་ཅིར་ཡང་མི་རུང་བར་ཤས་ཆེར་བསྒོམས་ཏེ་སྤོང་བར་བགྱིད་པ་དེ་བཞིན་དུ། བཅོམ་ལྡན་འདས་འཚོ་བའི་འཇིག་རྟེན་འདི་ནི་ཟློས་གར་མཁན་བཞིན་དུ་ཐོག་མ་མ་མཆིས་པ་ན་འཁོར་བ་ན་འཁོར་ཞིང་
ཡོངས་སུ་འཁྱམ་པ་ན་འདི་ནི་བདག་གི་མའོ། །འདི་ནི་བདག་གི་སྲིང་མོའོ། །འདི་ནི་བདག་གི་བུ་མོའོ་སྙམ་དུ་མ་འཚལ་ནས། མ་དང་སྲིང་མོ་དང་བུ་མོ་རྣམས་དང་ལྷན་ཅིག་ཏུ་འདོད་པའི་འདུ་ཤེས་སྤྱོད་པར་བགྱིད་དེ། འབྲས་སྐྱེམས་ཀྱིས་ར་རོ་བར་གྱུར་པ་དེ་བཞིན་

དུ་སྡུག་བསྔལ་རྙེད་པར་གྱུར་ལ། དེ་ནས་ངོ་ཚ་ཤེས་པའི་མི་དེ་དག་འབྲས་སྐྱེམས་ཀྱིས་ར་རོ་བ་ལས་སངས་པ་བཞིན་ཅིར་ཡང་མི་རུང་བར་ཤས་ཆེར་བསྒོམས་ནས་སྡུག་བསྔལ་ལས་ཡང་དག་པར་འདའ་བར་འགྱུར་ལགས་སོ། །གཞན་ཡང་ཨེ་རཎྜ་ལ་ནི་
སྙིང་པོ་མཆིས་མི་སྲིད་པ་དེ་བཞིན་དུ་ལུས་འདི་ལ་ཡང་བདག་དང་། སེམས་ཅན་དང་། སྲོག་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་དང་། བྱེད་པ་པོ་མཆིས་མི་སྲིད་དེ། དེ་ལྟ་བུར་བདག་ཅག་གིས་བདག་མ་མཆིས་པའི་འདུ་ཤེས་
བསྒོམས་ཏེ་མང་དུ་བགྱིས་ལགས་སོ། །དཔེར་གསོལ་ན་ཕུབ་མ་སྐོན་པ་བྱེད་པ་སྙེད་བོར་བ་ནི་ཅིར་ཡང་མི་གཅེས་པ་དེ་བཞིན་དུ་ལུས་འདི་ལ་ཡང་བདག་མ་མཆིས་སོ། །དཔེར་གསོལ་ན་ཁ་སྲལ་གྱི་མེ་ཏོག་ལ་དྲི་བདའ་བ་མ་མཆིས་པ་དེ་བཞིན་དུ་ལུས་འདི་ལ་ཡང་
བདག་མ་མཆིས་ཏེ། དེ་ལྟར་བདག་ཅག་གིས་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །བཅོམ་ལྡན་འདས་ཀྱིས་ཀྱང་དགེ་སློང་དག་ཆོས་ཐམས་ཅད་ནི་བདག་མེད་པ་སྟེ། དེ་ལྟར་སྒོམས་ཤིག་དང་། དེ་ལྟར་བསྒོམས་པ་རྣམས་
ཀྱིས་བདག་ཏུ་འཛིན་པ་སྤང་བར་འགྱུར་རོ། །བདག་ཏུ་འཛིན་པ་ཡོངས་སུ་སྤངས་ན་མྱ་ངན་ལས་འདས་པ་ཐོབ་པར་འགྱུར་རོ་ཞེས་བཀའ་སྩལ་ཏེ། བཅོམ་ལྡན་འདས་དེ་ལྟར་ཆོས་ཐམས་ཅད་བདག་མ་མཆིས་པའི་སླད་དུ་བདག་མ་མཆིས་པའི་འདུ་ཤེས་བསྒོམས་ཏེ་མང་
དུ་བགྱིས་ལགས་སོ། །གཞན་ཡང་ཇི་ལྟར་ནམ་མཁའ་ལ་བྱའི་རྗེས་གདའ་མི་སྲིད་པ་དེ་བཞིན་དུ་བདག་མ་མཆིས་པའི་འདུ་ཤེས་བསྒོམས་ན་ལྟ་བའི་རྣམ་པ་ཐམས་ཅད་དང་བྲལ་བར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བསྒོམ་པ་དེ་ལྟར་
བསྒོམ་པ་ཁྱོད་ཀྱིས་ཤེས་སམ། དགེ་སློང་རྣམས་ཀྱིས་གསོལ་པ། བཅོམ་ལྡན་འདས་སྡུག་བསྔལ་དང་། མི་རྟག་པ་དང་། བདག་མེད་པའི་འདུ་ཤེས་དེ་མ་ལགས་པ་བསྒོམས་ན་ནི་ཇི་ལྟར་མི་ར་རོ་ཞིང་འཁྱམ་པས་ལྷ་ཁང་དང་། སྤོ་དང་། ས་གཞི་དང་།

ཉི་མ་དང་། ཟླ་བ་དང་། ཤིང་དང་། རི་རྣམས་མི་འཁོར་བཞིན་དུ་འཁོར་བར་མཐོང་བ་དེ་བཞིན་དུ་གང་དག་གིས་སྡུག་བསྔལ་དང་། མི་རྟག་པ་དང་། བདག་མེད་པའི་འདུ་ཤེས་མ་བསྒོམས་པའི་སེམས་ཅན་འཇིག་རྟེན་པ་དེ་དག་ནི་ར་རོ་བ་
དང་འདྲ་བར་བལྟ་བར་བགྱིའོ། །བཅོམ་ལྡན་འདས་བདག་ཅག་གིས་ནི་ཡང་དག་པར་བསྒོམས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ནི་དཔེ་འདིའི་དོན་དེ་ངས་བཤད་པར་བྱའོ། །ཁྱེད་ཀྱིས་ཚིགས་སུ་བཅད་པའི་དོན་
འདི་ལ་དོན་ནི་འདིའོ། །ཡི་གེ་ནི་འདིའོ་ཞེས་གསལ་བར་མི་ཤེས་ཏེ། ཇི་ལྟར་མི་ར་རོ་བས་ལྷ་ཁང་དང་། སྤོ་དང་། ས་གཞི་དང་། ཉི་མ་དང་། ཟླ་བ་དང་། ཤིང་དང་། རི་རྣམས་མི་འཁོར་བཞིན་དུ་འཁོར་བར་མཐོང་བ་དེ་བཞིན་དུ་འདུ་ཤེས་ཕྱིན་ཅི་ལོག་དུ་མས་
ཟིན་ཅིང་ཀུན་ཏུ་རྨོངས་པ་རྣམས་བདག་གོ་སྙམ་པ་དང་། རྟག་གོ་སྙམ་པ་དང་། བདེའོ་སྙམ་པ་དང་། སྡུག་གོ་སྙམ་པའི་འདུ་ཤེས་ཀུན་ཏུ་སྤྱོད་དོ། །དེ་ལ་བདག་ཅེས་བྱ་བ་ནི་སངས་རྒྱས་ཞེས་བྱ་བའི་དོན་ཏོ། །རྟག་ཅེས་བྱ་བ་ནི་ཆོས་ཀྱི་སྐུ་ཞེས་བྱ་བའི་དོན་ཏོ། །
བདེ་ཞེས་བྱ་བ་ནི་མྱ་ངན་ལས་འདས་པ་ཞེས་བྱ་བའི་དོན་ཏོ། །སྡུག་ཅེས་བྱ་བ་ནི་ཆོས་ཀྱི་ཚིག་བླ་དགས་སོ། །དགེ་སློང་དག་ཁྱེད་ཀྱིས་བཅོམ་ལྡན་འདས་བདག་ཅག་གིས་ནི་སྡུག་བསྔལ་དང་། མི་རྟག་པ་དང་། བདག་མེད་པའི་འདུ་ཤེས་བསྒོམས་ལགས་
སོ་ཞེས་རྒྱགས་པ་དང་ང་རྒྱལ་གྱིས་དྲེགས་པར་མ་བྱེད་ཅིག །དེ་ལྟར་རྣམ་པ་གསུམ་བསྒོམས་པར་གྱུར་ན་ནི་ངའི་བསྟན་པ་ལ་ཁྱེད་ཀྱིས་བསྒོམ་པ་རྣམ་པ་གསུམ་བསྒོམས་པ་དེ་བསྒོམ་པ་དོན་མེད་པར་འགྱུར་རོ། །སྡུག་བསྔལ་ཤེས་པར་བྱ་བ་བསྒོམ་པ་རྣམ་
པ་གསུམ་པོ་ནི་ཁྱད་པར་དང་ཁྱད་པར་གྱི་ཡང་ཁྱད་པར་རོ། །སྡུག་བསྔལ་ལ་བདེའོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །བདེ་བ་ལ་སྡུག་བསྔལ་ལོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །མི་རྟག་པ་ལ་རྟག་གོ་སྙམ་དུ་འདུ་ཤེས་པ་ནི་ཕྱིན་ཅི་ལོག་

པའོ། །རྟག་པ་ལ་མི་རྟག་གོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པའོ། །བདག་མེད་པ་ལ་བདག་ཏུ་འདུ་ཤེས་པ་ནི་ཕྱིན་ཅི་ལོག་པའོ། །བདག་ཡོད་པ་ལ་བདག་མེད་པར་འདུ་ཤེས་པ་ནི་ཕྱིན་ཅི་ལོག་པའོ། །མི་སྡུག་པ་ལ་སྡུག་གོ་སྙམ་དུ་འདུ་ཤེས་པ་ནི་
ཕྱིན་ཅི་ལོག་པའོ། །སྡུག་པ་ལ་མི་སྡུག་གོ་སྙམ་དུ་འདུ་ཤེས་པ་ནི་ཕྱིན་ཅི་ལོག་པ་སྟེ། ཕྱིན་ཅི་ལོག་བཞི་པོ་འདི་དག་ཡང་དག་པར་མ་ཤེས་པར་ཁྱེད་ཀྱིས་བསྒོམ་པར་བྱ་བ་བསྒོམས་ཏེ་མང་དུ་བྱས་སོ། །ཁྱེད་ཀྱིས་བདེ་བ་ལ་སྡུག་བསྔལ་བར་བསྒོམས་
སོ། །རྟག་པ་ལ་མི་རྟག་པ་དང་། བདག་ཡོད་པ་ལ་བདག་མེད་པ་དང་། །སྡུག་པ་ལ་མི་སྡུག་པར་བསྒོམས་སོ། །འཇིག་རྟེན་པ་རྣམས་ལ་ཡང་བདེ་བ་དང་། བདག་དང་། རྟག་པ་དང་། སྡུག་པ་རྣམས་ཡོད་དོ། །འཇིག་རྟེན་ལས་འདས་པ་
རྣམས་ལ་ཡང་བདེ་བ་དང་། བདག་དང་། རྟག་པ་དང་། སྡུག་པ་རྣམས་ཡོད་དེ། འདི་ལ་ཕན་ཚུན་མི་འཐུན་པ་ཡོད་དོ། །ཡི་གེ་ཞེས་བྱ་བ་ནི་འཇིག་རྟེན་པ་ཞེས་བྱ་བའི་ཐ་ཚིག་གོ །དོན་ཅེས་བྱ་བ་ནི་འཇིག་རྟེན་ལས་འདས་པའི་ཡེ་ཤེས་སོ། །
དེ་ནས་བཅོམ་ལྡན་འདས་ལ་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདུ་ཤེས་བཞི་ལ་སོགས་པ་ཕྱིན་ཅི་ལོག་དེ་བཞིན་གཤེགས་པས་ལུགས་སུ་བཞག་པ་རྣམས་ནི་བདག་ཅག་གིས་ཡུན་རིང་མོ་ཞིག་ནས་མཐོང་ཡང་མཐོང་།
བསྒོམས་ཀྱང་བསྒོམས་ལགས་ན། ད་ཇི་ལྟར་འཚལ་བ་བཀའ་སྩལ་དུ་གསོལ། དེ་བཞིན་གཤེགས་པ་བསྐལ་པ་འམ། བསྐལ་པ་ལས་ལྷག་པར་ཡང་བཞུགས་སུ་གསོལ། དེ་བཞིན་གཤེགས་པས་ཅི་དང་ཅི་སྐད་དུ་བཀའ་སྩལ་པ་དེ་དང་དེ་དག་དེ་
བཞིན་དུ་བདག་ཅག་གིས་བགྱི་བར་འཚལ་ལོ། །གལ་ཏེ་དེ་བཞིན་གཤེགས་པ་བཞུགས་སུ་མི་གནང་ན། བདག་ཅག་ཀྱང་སྦྲུལ་གདུག་པ་དང་ཁྱིམ་གཅིག་གི་ནང་དུ་ལྷན་ཅིག་མཆིས་པ་མི་འཚལ་ཏེ། དེ་བཞིན་གཤེགས་པ་མི་བཞུགས་ན་ཚངས་པར་སྤྱོད་

ཅིང་མཆིས་པའི་རྔོ་མི་ཐོགས་ཀྱིས། ཁྱོད་ཉིད་ཀྱི་སླད་བཞིན་དུ་བདག་ཅག་ཀྱང་ཡོངས་སུ་མྱ་ངན་ལས་འདའ་བར་འཚལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་དེ་སྐད་
མ་ཟེར་ཅིག །དགེ་སློང་དག་ངས་འོད་སྲུང་གི་ལག་ཏུ་བསྟན་པ་གཏད་པར་བྱ་སྟེ། འདི་ནི་དེ་བཞིན་གཤེགས་པ་དང་འདྲ་བར་དགེ་སློང་རྣམས་ཀྱི་རྟེན་ལྟ་བུར་འགྱུར་རོ། །དགེ་སློང་རྣམས་དང་སེམས་ཅན་རྣམས་ཀྱི་སྐྱབས་ལྟ་བུར་འགྱུར་རོ། །དཔེར་
ན་རྒྱལ་པོ་གྲོང་ཁྱེར་མང་པོའི་མངའ་བདག་གྲོང་ཁྱེར་གཅིག་ཏུ་སོང་སྟེ། ཁྱིམ་བདག་གཅིག་རྒྱལ་པོར་དབང་བསྐུར་བ་དེ་བཞིན་དུ་འཇིག་རྟེན་གྱི་ཁམས་འདིར་ངས་འོད་སྲུང་ཆེན་པོ་དབང་བསྐུར་རོ། །དགེ་སློང་དག་ཁྱེད་ཀྱིས་སྡུག་བསྔལ་དང་། མི་རྟག་པ་དང་།
བདག་མེད་པ་དང་། མི་སྡུག་པའི་འདུ་ཤེས་ཇི་ལྟར་བསྒོམ་ཞེ་ན། དགེ་སློང་དག་དཔེར་ན་སོ་གའི་དུས་ལ་བབ་པ་ན་སྐྱེ་བོ་རྣམས་ཀྱིས་ནགས་ཚལ་གྱི་ནང་དུ་ཆུ་བསྐྱིལ་ཏེ། རང་རང་གི་རྐྱལ་པའི་ཡོ་བྱད་ཐོགས་ནས་ཆུའི་ནང་དུ་རྩེ་བར་བྱེད་ལ། ཆུ་དེའི་ནང་དུ་
གཅིག་གིས་ནོར་བུ་རིན་པོ་ཆེ་བཻ་དཱུརྱ་རིགས་དང་ལྡན་པ་ཞིག་བཞག་ནས། བཻ་དཱུརྱ་དེ་འདོད་པའི་ཕྱིར་དེ་དག་ཐམས་ཅད་ཀྱིས་རྐྱལ་པ་རྣམས་བོར་ཏེ། ཆུ་དེའི་ནང་དུ་འཛུལ་ནས་དེའི་ནང་ན་གྱོ་མོ་འམ་གསེག་མ་ཅི་ཡོད་པ་དག་ལ་ནོར་བུ་ཡིན་སྙམ་སྟེ་བླངས་ནས་ནོར་བུ་
བདག་གིས་རྙེད་དོ། །བདག་གིས་རྙེད་དོ་ཞེས་ཟེར་ཞིང་སོ་སོ་ནས་སྟེང་དུ་བྱུང་སྟེ། རྫིང་གི་འགྲམ་དུ་འཁོད་ནས་འདི་ནི་ནོར་བུ་མ་ཡིན་ནོ་སྙམ་པའི་འདུ་ཤེས་སྐྱེས་པར་གྱུར་ལ། རྫིང་བུ་དེའི་ཆུ་ཡང་ནོར་བུའི་འོད་ཀྱིས་ཟླ་བའི་འོད་བཞིན་དུ་མཛེས་པར་འདུག་སྟེ། དེ་དག་
གིས་མཛེས་པ་དེ་མཐོང་ནས། ཨེ་མ་ནོར་བུ་སྙམ་དུ་ཡོན་ཏན་གྱི་འདུ་ཤེས་སྐྱེ་བར་འགྱུར་ཏེ། དེ་དག་གི་ནང་ནས་ཐབས་ལ་མཁས་ཤིང་ཡིད་རྣོ་བ་གཅིག་གིས་ནོར་བུ་དེ་ཡང་དག་པར་རྙེད་པ་དེ་བཞིན་དུ། དགེ་སློང་དག་ཁྱེད་ཀྱིས་ཐམས་ཅད་སྡུག་བསྔལ་བའོ། །

ཐམས་ཅད་བདག་མེད་པའོ། །ཐམས་ཅད་མི་རྟག་པའོ། །ཐམས་ཅད་མི་སྡུག་པའོ་ཞེས་ཐམས་ཅད་ཀྱི་མུ་བཟུང་ནས་བསྒོམས་ཤིང་མང་དུ་བྱས་པ་གང་ཡིན་པ་དེ་དག་ཐམས་ཅད་རྫིང་གི་ནང་གི་གྱོ་མོ་དང་གསེག་མ་བཞིན་དུ་ནོར་ཅིང་དོན་མེད་པར་གྱུར་ཏ་རེ།
སྐྱེས་བུ་ཐབས་ལ་མཁས་པ་བཞིན་དུ་གྱིས་ཤིག །ཁྱེད་ཀྱིས་ཐམས་ཅད་ཀྱི་མུ་བཟུང་ནས་གང་དང་གང་བསྒོམས་པ་དེ་དང་དེ་ཉིད་ལ་བདེ་བ་དང་། བདག་དང་། རྟག་པ་དང་། སྡུག་པ་ཡོད་དེ། རྣམ་པ་བཞི་པོ་དེ་དག་ནི་ཕྱིན་ཅི་མ་ལོག་པ་ཞེས་བརྗོད་པར་
བྱའོ། །དེ་བས་ན་ནོར་བུ་དང་འདྲ་བར་ཆོས་ཀྱི་དེ་ཁོ་ན་ཉིད་རྟག་པའི་འདུ་ཤེས་སྒོམས་ཤིག །དེ་ནས་བཅོམ་ལྡན་འདས་ལ་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དགེ་སློང་དག་ཆོས་ཐམས་ཅད་ནི་བདག་མེད་པ་སྟེ།
དེ་ལྟར་སྒོམས་ཤིག་དང་། དེ་ལྟར་བསྒོམ་པ་རྣམས་ཀྱིས་ནི་བདག་ཏུ་འཛིན་པ་སྤོང་བར་འགྱུར་རོ། །བདག་ཏུ་འཛིན་པ་སྤངས་ནི་མྱ་ངན་ལས་འདས་པ་ཐོབ་པར་འགྱུར་རོ་ཞེས་བཀའ་སྩལ་ལགས་ན། བཀའ་སྩལ་པ་དེའི་དོན་ཇི་ལྟ་བུ་ལགས། བཅོམ་
ལྡན་འདས་དེ་བཞིན་གཤེགས་པས་དེའི་རྣམ་པར་དབྱེ་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་དགེ་སློང་དེ་དག་ལ་བཀའ་སྩལ་པ། དགེ་སློང་དག་ལེགས་སོ་ལེགས་སོ། །དགེ་སློང་དག་བདག་གི་ཐེ་ཚོམ་ངེས་པར་གཅོད་པར་འདོད་པས་ནི་དེ་སྐད་
ཅེས་དྲི་དགོས་ཏེ་ལེགས་སོ། །དགེ་སློང་དག་དཔེར་ན་གྲོང་ཁྱེར་འགའ་ཞིག་ན་རྒྱལ་པོ་ཤེས་རབ་འཆལ་པ་ཞིག་རྒྱལ་པོ་བྱེད་དེ། རྒྱལ་པོ་དེ་ལ་སྨན་པ་ངན་པ་ཞིག་བདོག་ལ་དེ་ཡང་སྨན་པ་འཆལ་པ་ཞིག་སྟེ་བླ་ནས་དབང་ཐང་ཆེར་དབང་ལ་རྒྱལ་པོས་ཀྱང་བཀུར་བ་ཞིག་ཡོད་པ་དེས་འོ་མ་འབའ་
ཞིག་སྨན་ཡིན་པར་འཛིན་ལ། ནད་ཀྱི་གཞི་ནི་མི་ཤེས་ནས་འོ་མའི་དཔྱད་ལོག་པར་ཟིན་པ་དེ་སྐྱེ་བོ་ཐམས་ཅད་ཀྱི་རླུང་ནད་ཀྱི་སྣ་གྲངས་རྣམས་ལ་ཡང་གཏོང་བར་བྱེད། མཁྲིས་པའི་ནད་རྣམས་དང་། བད་ཀན་གྱི་ནད་རྣམས་ལ་ཡང་གཏོང་བར་བྱེད་དེ། དེ་

དེ་ལྟར་བྱེད་ཀྱང་སྨན་པ་གཅེས་པ་ཁོ་ནར་འགྱུར་ལ་རྒྱལ་པོ་དེ་ཡང་འཆལ་པའི་བྱེ་བྲག་མི་ཕྱེད་པ་ཞིག་གོ། །དེ་ནས་སྨན་པ་ཚེའི་རིགས་བྱེད་ཡན་ལག་བརྒྱད་ལ་མཁས་པ་རྒྱུད་ཕྱི་མ་ཤེས་པ་གཞན་ཞིག་ཡུལ་གཞན་ནས་གསར་དུ་འོངས་ནས་སྨན་པ་
དེའི་ཐད་དུ་རྟེན་བཅས་ཏེ་སྨྲས་པ། ཁྱོད་ཀྱི་མིང་ཐོས་ནས་སློབ་པར་འཚལ་བའི་སླད་དུ་བདག་མཆིས་ཀྱིས། ཁྱོད་ཀྱིས་བདག་གི་མཁན་པོ་མཛད་དུ་གསོལ། །དེ་ནས་སྨན་པ་འཆལ་པ་དེས་དེ་སྐད་ཅེས་ཐོས་ནས་སྨན་པ་གསར་དུ་འོངས་པ་དེ་ལ་སྨྲས་པ།
ལོ་བཞི་བཅུ་རྩ་བརྒྱད་ཀྱི་བར་དུ་ང་ལ་ལེགས་པར་བསྒྲིམས་ཏེ་དཀའ་བ་སྤྱད་པས་རིམ་གྲོ་གྱིས་ལ། དེའི་འོག་ཏུ་སློབས་ཤིག་དང་ཁྱོད་སྨན་པར་འགྱུར་རོ། །དེ་ནས་དེས་དེ་བཞིན་དུ་མཉན་ཏེ། དེ་ལྟར་བགྱིའོ་ཞེས་བྱས་ནས། དེས་མཐར་གྱིས་སྨན་པ་
འཆལ་པ་དེ་མགུ་བར་བྱས་ཏེ། རྒྱལ་པོའི་ཕོ་བྲང་དུ་སོང་ནས་རྒྱལ་པོ་དེ་ལ་འདི་སྐད་ཅེས་གསོལ་ཏེ། རྒྱལ་པོ་ཆེན་པོ་ཁྱེད་ཀྱིས་རྟག་ཏུ་བསྟན་བཅོས་ཐམས་ཅད་ལ་བརྩོན་པར་མཛོད་ཅིག་དང་། དེ་ལྟར་མཛད་ན་རྒྱལ་པོ་རྒྱལ་པོར་འོས་པར་འགྱུར་རོ། །
རྒྱལ་པོས་ཀྱང་དེ་ནི་བདེན་ཏེ་རྣར་འོང་ངོ་ཞེས་བྱས་ནས། རྒྱལ་པོ་དེས་སྨན་པ་འཆལ་པ་དེ་དང་སྨན་པ་ཅིག་ཤོས་ཀྱི་བྱེ་བྲག་ཕྱེད་པར་གྱུར་ནས། སྨན་པ་ངན་པ་དེ་ཡུལ་ཕྱོགས་ནས་བསྐྲད་དེ། སྨན་པ་བཟང་པོ་ཅིག་ཤོས་བཀུར་བར་གྱུར་ལ། དེ་ནས་སྨན་
པ་དེས་ད་ནི་དུས་ལ་བབ་བོ་སྙམ་ནས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་གལ་ཏེ་བདག་ལ་མཉེས་པར་གྱུར་ན་གསོལ་བ་སྣ་གཅིག་གསོལ་གྱིས་གལ་ཏེ་རྒྱལ་པོ་ཆེན་པོ་ཡང་དགྱེས་པ་ལྟ་ན་གནང་བར་མཛད་དུ་གསོལ། རྒྱལ་པོས་སྨན་པ་ལ་
བཀའ་སྩལ་པ། ངའི་ལག་པ་གཡས་པ་མན་ཅད་ནོར་རོ་ཅོག་ལས་གསོལ་ཅིག །སྨན་པས་རྒྱལ་པོ་ལ་གསོལ་པ། རྒྱལ་པོ་ཆེན་པོའི་སྨན་པ་འཆལ་པ་དེའི་འོ་མའི་དཔྱད་གང་ལགས་པ་དེ་ནི་དུག་ཧ་ལ་ཧ་ལ་ལགས་ན། དེས་གློ་བར་མ་ཆུད་ཀྱིས་རྒྱལ་པོ་

ཁྱོད་ཀྱི་ཡུལ་ཁམས་ཐམས་ཅད་དུ་བཀས་བཏགས་ལ། སྔོན་གྱི་སྨན་པ་དེའི་འོ་མའི་དཔྱད་གང་ཡིན་པ་དེ་ནི་དུག་ཧ་ལ་ཧ་ལ་ཡིན་གྱིས། སུ་སྨན་དུ་འོ་མ་འཐུང་བ་དེ་མགོ་བོ་བཅད་དོ་ཞེས་བཀའ་གདགས་པར་གསོལ། དེ་ལྟར་མ་བགྱིས་ན་སེམས་
ཅན་རྣམས་དུས་མ་ཡིན་པའི་འཆི་བས་འཆི་བར་འགྱུར་རོ། །བདག་ནི་འཚོ་བར་འགྱུར་བ་དང་། ནད་མ་མཆིས་པར་འགྱུར་བར་འཚལ་ཏེ། ལྷ་བདག་ནི་གསོལ་བ་དེ་འཚལ་ལགས་སོ། །དེ་ནས་རྒྱལ་པོས་སྨན་པ་དེ་ལ་བཀའ་སྩལ་པ། དེ་ལྟ་ན་གསོལ་
བ་ཆུང་ངུ་ཞིག་གསོལ་ཏེ་བཀའ་གདགས་པར་བྱའོ་ཞེས་བྱས་ནས་བཀའ་ཡང་བཏགས་སོ། །དེ་ནས་བཀའ་བཏགས་པ་བཞིན་དུ་ཐམས་ཅད་དུ་ལུགས་སུ་ཆུད་པར་གྱུར་ཏོ། །དེ་ནས་སྨན་པ་དེས་རྒྱལ་པོ་དེ་ལ་ཡང་འདི་སྐད་ཅེས་གསོལ་ཏེ། ད་དུང་ཡང་
ལན་གཉིས་ལན་གསུམ་གྱི་བར་དུ་དེ་བཞིན་དུ་བཀའ་གདགས་པར་གསོལ་ཞེས་བྱས་ནས་སྨན་པ་དེས་རོ་མངར་བ་དང་། སྐྱུར་བ་དང་། ལན་ཚྭའི་རོ་དང་། ཚ་བ་དང་། བསྐ་བ་དང་། ཁ་བ་རྣམས་ཀྱིས་མི་རྣམས་ཀྱི་ནད་སོས་པར་བྱས་སོ། །དེ་ནས་རེ་ཞིག་
ན་རྒྱལ་པོ་ནད་ཀྱིས་ཐེབས་ནས་སྨན་པ་དེ་བཀུག་སྟེ་བསྒོ་བ། ང་ནི་ཤི་ལ་ཐུག་གིས་རྒྱལ་པོའི་རྐྱེན་དང་འཚམ་པའི་གསོལ་བ་ཅི་འདོད་པ་ཁྱོད་ལ་སྦྱིན་ནོ་ཞེས་བྱས་སོ། །དེ་ནས་སྨན་པ་དེས་རྒྱལ་པོ་དེ་ལ་གསོལ་པ། རྒྱལ་པོ་ཆེན་པོ་བདག་ནི་བརྫུན་དུ་སྨྲ་བ་ལགས་
སོ། །འོ་མ་ནི་བདུད་རྩི་ལགས་ཏེ། ཁྱེད་ཀྱིས་ཞལ་ཟས་འོ་མ་དང་སྦྱར་བ་གསོལ་འཚལ་ལོ། །དེ་ནས་རྒྱལ་པོ་དེས་སྨན་པ་དེ་ལ་བཀའ་སྩལ་པ། ཅི་ཁྱོད་མཁྲིས་པས་མྱོས་པར་བྱས་སམ། འོན་ཏེ་ང་སླུ་བར་བྱེད་དམ་ཅི་ན། སྔར་ནི་འོ་མ་དུག་ཡིན་ཟེར་ལ་ད་
ནི་འོ་མ་སྨན་གྱི་མཆོག་ཡིན་ནོ་ཞེས་ཟེར། ཀྱེ་མ་སྨན་པ་སྔ་མ་བསྐྲད་པས་ཕུང་ངོ་། །དེས་ཀྱང་འོ་མའི་དཔྱད་བསྔགས་པ་ལས་ན། དེ་ནི་སྨན་པ་ཆེན་པོ་ཡིན་གྱིས་སྨན་པ་ངན་པ་མ་ཡིན་ནོ། །ཁྱོད་ཀྱིས་འོ་མའི་དཔྱད་བྱས་པ་ནི་ཁྱོད་བདག་བསྐྲད་པའི་རྒྱུ་ཡིན་

ནོ་ཞེས་བྱས་སོ། །སྨན་པས་གསོལ་པ། རྒྱལ་པོ་ཆེན་པོ་དེ་ལྟར་གཞན་དུ་མི་དགོངས་པར་གསོལ། དཔེར་ན་ཤིང་ངམ། རྩིག་པ་ལ་སྲིན་བུས་བརྐོས་ཏེ་ཡི་གེའི་འབྲུ་འདྲ་བར་གྱུར་པ་མཐོང་ཡང་མཁས་པ་རྣམས་ཀྱིས་སྲིན་བུས་ཡི་གེ་ཤེས་སོ་
ཞེས་བརྗོད་པར་མི་བགྱི། ཡི་གེ་སྦྱར་བ་ལྟ་བུར་གྱུར་ཀྱང་ཡ་མཚན་དུ་གཟུང་བར་མི་བགྱི་བ་དེ་བཞིན་དུ། ཁྱོད་ཀྱི་སྨན་པ་སྔ་མའི་འོ་མའི་དཔྱད་ཀྱི་ལས་ཀྱང་སྲིན་བུས་བརྐོས་པའི་ཡི་གེ་བཞིན་དུ་བལྟ་བར་བགྱི་སྟེ། དེ་ནི་འོ་མ་སོ་སོའི་བྱེ་བྲག་ཀྱང་མ་འཚལ་བ་
ལགས་སོ། །རྒྱལ་པོས་སྨན་པ་དེ་ལ་སྨྲས་པ། ཀྭའི་སྨན་པ་ངན་པ་དེས་འོ་མ་སོ་སོའི་བྱེ་བྲག་ཇི་ལྟར་མི་ཤེས། སྨན་པས་གསོལ་པ། རྒྱལ་པོ་ཆེན་པོ་འོ་མ་ནི་བདུད་རྩི་ཡང་ལགས་དུག་ཀྱང་ལགས་ཏེ། དེ་ལ་བདུད་རྩི་ཞེས་བགྱི་བ་ནི་བ་གང་བེའུ་ཧ་ཅང་
སྟོབས་དང་ལྡན་པ་མ་ལགས་པ་དང་། ཆང་གི་སྙིགས་མ་མི་འཐུང་བ་དང་། ནགས་ཁུང་དང་། གཤོང་དང་། ཆུ་འདམ་རྫབ་ཅན་ན་མི་གནས་པ་དང་། བ་ལང་རྫིས་ནུ་མ་མ་བཞིབས་པ་དང་། རྩྭ་བརྔས་པ་མ་གསན་པ་དང་། རང་གི་ཁྱུ་ན་འདུག་པ་དང་།
མ་ཧེའི་ཁྱུ་དང་ལྷན་ཅིག་མི་འགྲོགས་པ་དང་། དེ་ལ་སོགས་པ་བའི་ཡོན་ཏན་རྣམས་དང་ལྡན་ལ། དེའི་འོ་མ་ལྷག་མ་ཟག་མ་བཅད་པར་རན་ཙམ་བཞོས་པའི་འོ་མ་དེ་ནི་ནད་དོ་ཅོག་ཞི་བར་བགྱིད་པ་ལགས་སོ། །དེ་ནས་རྒྱལ་པོ་ངོ་མཚར་དུ་གྱུར་ནས་
སྨན་པ་དེ་ལ་བཀའ་སྩལ་པ། མཁན་པོ་ད་ནི་ངས་ཁྱོད་ཀྱི་འོ་མའི་དཔྱད་བཟང་པོ་ཡང་ཤེས་སོ། །ངན་པ་ཡང་ཤེས་སོ། །དེ་ནས་རྒྱལ་པོས་བཀའ་བཏགས་ཏེ་འོ་མ་འཐུང་ཤིག་ཅེས་བསྒོ་བ་དང་། འབངས་ཐམས་ཅད་ཀྱིས་རྒྱལ་པོས་ཕྱིར་ཡང་འོ་མ་འཐུང་
ཤིག་ཅེས་བསྒོ་བ་ཐོས་ནས་སེམས་འཁྲུགས་ཏེ། ཅི་རྒྱལ་པོ་གདོན་གྱིས་ཐེབས་སམ། འོན་ཏེ་བདག་ཅག་ལ་མཐོ་འཚམ་མམ་ཞེས་ཟེར་ཞིང་དེ་ལྟར་གྲོང་ཁྱེར་གྱི་མི་དང་། འབངས་ཐམས་ཅད་རྒྱལ་པོའི་དྲུང་དུ་ལྷགས་ཏེ། རྒྱལ་པོས་དེ་དག་མཐོང་ནས་སྨྲས་པ།

སྨན་པ་འདི་ན་རེ་འོ་མ་དེ་འདྲའོ་ཞེས་ཟེར་ན་ཁྱེད་གཤེར་ཅི་ཡོད་ཅེས་བྱས་སོ། །དེ་ནས་རྒྱལ་པོ་དང་། གྲོང་ཁྱེར་གྱི་མི་དང་། འབངས་ཐམས་ཅད་མགུ་བར་གྱུར་ནས། སྨན་པ་ལ་མི་མཚུངས་པའི་བསྙེན་བཀུར་བྱས་ནས། འོ་མའི་དཔྱད་ལ་ཡང་སྟེན་པར་
བྱེད་པ་དེ་བཞིན་དུ། དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་
པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྨན་པ་བཟང་པོ་དང་འདྲ་བར་འཇིག་རྟེན་དུ་བྱུང་ནས། མུ་སྟེགས་པ་སྨན་པ་ངན་པ་དང་འདྲ་བ་ཐམས་ཅད་ཀྱི་ཐད་དུ་གཤེགས་ཏེ། ཐམས་ཅད་ངེས་པར་བཏུལ་ཞིང་ངེས་པར་བཤིག་ནས་རྒྱལ་པོ་དུ་མ་
མགུ་བར་མཛད་དེ། མུ་སྟེགས་པ་རྣམས་ཚར་གཅད་པའི་ཕྱིར་བདག་མེད་དོ། །སེམས་ཅན་མེད་དོ། །སྲོག་མེད་དོ། །གང་ཟག་མེད་དོ་ཞེས་གསུང་ངོ་། །མུ་སྟེགས་པ་རྣམས་ཀྱིས་བདག་བསྟན་པ་ནི་སྲིན་བུས་བརྐོས་པའི་ཡི་གེ་དང་འདྲ་སྟེ། དེའི་
ཕྱིར་ངས་སེམས་ཅན་ཐམས་ཅད་ལ་བདག་མེད་དོ་ཞེས་བསྟན་པ་སྟོན་པར་མཛད་དོ། །བདག་མེད་པ་ནི་སངས་རྒྱས་ཀྱི་ཚིག་ཡིན་ནོ་ཞེས་ཆོས་ཀྱི་བཀའ་འདོགས་པར་མཛད་ནས། ཡང་གདུལ་བར་བྱ་བ་རྣམས་ཀྱི་དབང་དང་། སེམས་ཅན་རྣམས་ལ་ཕན་པའི་
ཕྱིར་དུས་མཁྱེན་པར་མཛད་ནས། ཆོས་ཐམས་ཅད་བདག་མེད་པར་བསྟན་པའི་སྐབས་དེ་ཉིད་དུ་སྨན་པ་བཟང་པོའི་བཞིན་དུ་བདག་ཡོད་དོ་ཞེས་ཡང་དག་པར་སྟོན་པར་མཛད་དེ། འཇིག་རྟེན་པ་རྣམས་ཀྱི་བདག་མཐེ་བོ་ཙམ་དང་། ཁྲེ་རྒོད་ཀྱི་འབྲུ་ཙམ་ཞེས་བྱ་
བ་དེ་ལྟ་བུ་ནི་མ་ཡིན་ནོ། །འཇིག་རྟེན་པ་རྣམས་ཀྱི་བདག་ཏུ་ལྟ་བ་གང་ཡིན་པ་དེ་ལྟ་བུ་ཡང་མ་ཡིན་ཏེ། འདིར་ཆོས་ཐམས་ཅད་ནི་བདག་མེད་པ་ཞེས་བྱའོ། །ཆོས་ཐམས་ཅད་ནི་བདག་མེད་པ་ཡང་མ་ཡིན་ཏེ། བདག་ནི་དེ་ཁོ་ན་ཉིད་དོ། །བདག་ནི་རྟག་པ་ཉིད་དོ།

བདག་ནི་ཡོན་ཏན་ཉིད་དོ། །བདག་ནི་ཐེར་ཟུག་པ་ཉིད་དོ། །བདག་ནི་བརྟན་པ་ཉིད་དོ། །བདག་ནི་ཞི་བ་ཉིད་དོ་ཞེས་སྨན་པ་བཟང་པོའི་འོ་མ་བཞིན་དུ། དེ་བཞིན་གཤེགས་པ་ཡང་དེ་ཁོ་ན་ཉིད་དང་ལྡན་པ་སྟོན་པར་མཛད་དེ། དེ་སྒོམ་པ་
ལ་འཁོར་བཞི་པོ་རྣམས་ཀྱིས་བརྩོན་པར་གྱིས་ཤིག །དགེ་སློང་དག་གཞན་ཡང་ཚུལ་ཁྲིམས་ཀྱི་གཞི་མ་གཏོགས་པར་ཐེ་ཚོམ་དང་སོམ་ཉི་ཅི་དང་ཅི་ཡོད་པ་དེ་དག་ཁྱེད་ཀྱིས་ང་ལ་ཞུས་ཤིག་དང་། ངས་ལེགས་པར་གསུངས་པས་ཁྱེད་རངས་པར་བྱའོ། །
ང་ནི་བསྒོམ་པ་ཐམས་ཅད་ལས་གྲོལ་བ་དང་། རང་བཞིན་གྱིས་སྟོང་པ་ཆེན་པོ་སྟོན་ཏེ། དགེ་སློང་ཁྱེད་དེ་བཞིན་གཤེགས་པས་བདག་ཅག་ལ་རང་བཞིན་གྱིས་སྟོང་པ་ཆེན་པོ་མ་བསྟན་ཏོ་ཞེས་དེ་སྐད་མ་ཟེར་ཅིག །དགེ་སློང་དག་གཞན་ཡང་ཚུལ་ཁྲིམས་
ཀྱི་གཞི་མ་གཏོགས་པར་ཐེ་ཚོམ་དང་སོམ་ཉི་ཅི་དང་ཅི་ཡོད་པ་དེ་དག་ཁྱེད་ཀྱིས་ང་ལ་ཞུས་ཤིག །དེ་ནས་དགེ་སློང་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ལ་ཞུ་བ་ནི་བདག་ཅག་གི་ཡུལ་མ་ལགས་ཏེ། བདག་ཅག་གིས་རྔོ་མི་ཐོགས་ལགས་སོ། །སངས་རྒྱས་བཅོམ་ལྡན་འདས་ཀྱང་བསམ་གྱིས་མི་ཁྱབ། ཏིང་ངེ་འཛིན་རྣམས་ཀྱང་བསམ་གྱིས་མི་ཁྱབ། ཁྱོད་ཀྱི་གདམས་ངག་ཀྱང་བསམ་
གྱིས་མི་ཁྱབ་པས་ན། བདག་ཅག་གིས་ཞུ་བའི་རྔོ་མི་ཐོགས་ལགས་སོ། །བཅོམ་ལྡན་འདས་དཔེར་གསོལ་ན། མི་ལ་ལ་རྒས་ཤིང་འཁོགས་ལ་གཏུགས་པ། ལོ་བརྒྱ་ཉི་ཤུ་རྩ་དྲུག་ལོན་པ། ནད་ཀྱིས་ཐེབས་པ། མལ་ཁྲི་ལ་མཆིས་པའི་
ནད་པ་ཞིག་མཆིས་ལ། མི་ལ་ལ་ཞིག་གིས་དེའི་སུག་པ