Kinh tạng Tây Tạng (Kangyur Đại Học) — 054_མདོ་སྡེ།_ཐ

་པ་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་ཤི་བའི་འདུ་ཤེས་བཞིན་དུ་དེ་ལྟར་མ་འཛིན་ཅིག །གང་དག་རྟག་ཏུ་དེ་བཞིན་གཤེགས་པ་རྟག་པ་དང་། བརྟན་པ་དང་ཐེར་ཟུག་པའོ་སྙམ་དུ་འཛིན་པ་དེ་དག་གི་ཁྱིམ་ན་ནི་དེ་བཞིན་གཤེགས་པ་

བཞུགས་ཏེ་འདི་ནི་གཞན་གྱི་ལྷག་པའི་བསམ་པ་ཞེས་བྱའོ། །འདྲི་བའི་དབང་ཞེས་བྱ་བ་ནི་འདི་ན་ལ་ལ་ཞིག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་བར་བྱེད་དེ། བཅོམ་ལྡན་འདས་ཇི་ལྟར་བགྱིས་ན་
བདག་གིས་སུ་ལ་ཡང་ཅི་ཡང་མ་སྩལ་བར་འཇིག་རྟེན་དུ་སྦྱིན་པ་པོར་གྲགས་པའི་གཏམ་སྙན་པ་ཐོབ་པར་འགྱུར་ལགས། དེ་བཞིན་གཤེགས་པས་དེ་ལ་དེ་སྐད་ཅེས་བཀའ་སྩལ་ཏོ། །ཆགས་པ་མེད་པ་ལ་བྲན་དང་བྲན་མོ་བླང་བར་སྟོབས་ཤིག །གཏན་དུ་ཚངས་
པར་སྤྱོད་པ་ལ་བུ་མོའི་སྦྱིན་པ་གྱིས་ཤིག །ཤ་མི་ཟ་བ་ལ་ཤ་ཟར་ཆུག་ཤིག །ཆང་མི་འཐུང་བ་ལ་ཆང་འཐུང་དུ་ཆུག་ཤིག །དུས་སུ་ཟ་བ་ལ་དུས་མ་ཡིན་པར་ཟས་བྱིན་ཅིག །མེ་ཏོག་ཕྲེང་དང་རྒྱན་མི་ཐོགས་པ་ལ་ཕྱེ་མ་དང་། སྤོས་དང་། མེ་ཏོག་དང་། བདུག་
པ་རྣམས་བྱིན་ཅིག །དེ་དག་གི་དུས་ཤེས་པར་གྱིས་ལ་མགྲོན་དུ་བོས་ཤིག་དང་། ཁྱོད་ཀྱིས་དེ་ལྟར་བྱས་ན་འཇིག་རྟེན་འདིར་སྦྱིན་བདག་གི་རྒྱལ་པོ་ཡིན་ནོ། །ཞེས་གྲགས་པ་ཆེན་པོར་འགྱུར་ཏེ་བསོད་ནམས་འཕེལ་བར་ནི་མི་འགྱུར་རོ།། །།བམ་པོ་
ལྔ་པ། དེ་ནས་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །ཤ་མི་འཚལ་བ་ལ་གཟུད་པ་ནི་ཆེད་ཆེར་བགྱི་བ་ལགས་ན་ཤ་མི་འཚལ་བ་ལ་ཤ་འཚལ་དུ་སྩལ་ན་ནོངས་པར་མི་འགྱུར་ལགས་སམ། བཀའ་སྩལ་པ། རིགས་ཀྱི་བུ་ལེགས་སོ་
ལེགས་སོ། །ཁྱོད་ཀྱིས་ངའི་དགོངས་པ་རིག་སྟེ། དམ་པའི་ཆོས་སྲུང་བས་ནི་དེ་ལྟར་བྱ་དགོས་སོ། །རིགས་ཀྱི་བུ་ད་ཕྱིན་ཅད་ངའི་ཉན་ཐོས་རྣམས་ཤ་ཟ་བར་མི་གནང་ངོ་། །ཡུལ་འཁོར་གྱི་བསོད་སྙོམས་ནི་བུའི་ཤ་དང་འདྲའོ་ཞེས་བྱ་ན་ཤ་བཟའ་བར་ངས་ཇི་ལྟར་གནང་།
ཤ་ཟ་བ་ནི་བྱམས་པ་ཆེན་པོ་ཆད་པར་འགྱུར་རོ། །ཞེས་ངས་བསྟན་ཏོ། །གསོལ་པ། བཅོམ་ལྡན་འདས་འོ་ན་ཇི་ལྟར་མུ་གསུམ་ཡོངས་སུ་དག་པའི་ཤ་བཟའ་བར་གནང་ལགས། བཀའ་སྩལ་པ། མུ་གསུམ་ཡོངས་སུ་དག་པ་འདི་ནི་ངས་རིམ་གྱིས་བསླབ་པའི་གཞི་

བསྡམ་པའི་ཕྱིར་དེང་ངས་བོར་རོ། །གསོལ་པ། བཅོམ་ལྡན་འདས་ཅི་ལས་དགོངས་ཏེ་དོན་ཆེད་ཀྱི་མུ་དགུ་དང་། ཤ་རྣམ་པ་བཅུ་སྤང་བ་བཀའ་སྩལ་ལགས། བཀའ་སྩལ་པ། ཚིག་བཞག་པ་དེ་དག་ཀྱང་ཤ་མི་བཟའ་བར་བསྡམ་པའི་ཕྱིར་བཅད་དོ། །གསོལ་པ།
བཅོམ་ལྡན་འདས་ཅི་ལས་དགོངས་ཏེ་ཤ་དང་ཉ་ཤ་བཟའ་བ་ཡང་ཁ་ཟས་བཟང་པོར་གསུངས་ལགས། བཀའ་སྩལ་པ། ངས་ནི་ཤ་དང་ཉ་ཤ་ཁ་ཟས་བཟང་པོར་མ་གསུངས་ཀྱི། ངས་ནི་བུ་རམ་ཤིང་དང་། འབྲས་སཱ་ལུ་དང་། འབྲུ་དང་། གྲོ་དང་། ནས་དང་།
སྲན་སྡེའུ་དང་། སྲན་གྲེའུ་རྣམས་དང་། དངར་བག་ཁ་ར་དང་། ལི་ཁ་ར་དང་། སྦྲང་རྩི་དང་། མར་དང་། འོ་མ་དང་། འབྲུ་མར་རྣམས་ཁ་ཟས་བཟང་པོར་གསུངས་སོ། །ངས་ནི་ལུས་གཡོགས་པའི་ཕྱིར་གོས་སྣ་ཚོགས་ཀྱང་ཁ་དོག་ངན་པར་བསྒྱུར་བར་བྱའོ། །
ཞེས་བསྟན་ན་ཤ་བཟའ་བའི་རོ་ལ་ཆགས་པ་ལྟ་ཅི་སྨོས། གསོལ་པ། དེ་ལྟ་ན་ནི་བའི་བཅུད་རྣམ་ལྔ་དང་། ཏིལ་དང་། འབྲུ་མར་ཤིང་གི་ཁུ་བ་དང་། དུང་དང་། ཟབ་དར་ལ་སོགས་པ་ཡང་ཁྲིམས་སུ་བཅའ་བའི་རིགས་ལགས་སོ། །བཀའ་སྩལ་པ། གཅེར་
བུ་པའི་ལྟ་བ་མ་འཛིན་ཅིག །ང་ནི་འདུ་ཤེས་གཞན་གྱིས་ད་ཁྱོད་ལ་བསླབ་པའི་གཞི་བཅའ་བར་བྱ་སྟེ། མུ་གསུམ་གྱི་ཤ་ཡང་མི་བཟའ་བར་བསྡམས་སོ། །དོན་ཆེད་དུ་བྱས་པ་ཁྱོད་ཀྱིས་རིག་པ་དེ་ཡང་བསྡམས་སོ། །ཤ་རྣམ་པ་བཅུ་ལ་མ་གཏོགས་པ་དེ་ཡང་སྤངས་སོ། །
ཤི་བའི་ཤ་ཡང་སྤངས་སོ། །ཤ་ཟ་བ་ནི་འགྲོ་ཡང་རུང་འདུག་ཀྱང་རུང་སྟེ། སྲོག་ཆགས་ཐམས་ཅད་དེའི་དྲི་ཚོར་ནས་དེས་འཇིགས་ཏེ། དཔེར་ན་མིས་ཤིང་ཀུན་ནམ་སྒོག་སྐྱ་ཟོས་ན་མིའོ་ཅོག་གི་སེམས་མ་དད་པར་འགྱུར་ཞིང་མི་འཐུན་པར་འགྱུར་ལ། མི་མང་པོ་ཚོགས་པའམ།
སྐྱེ་བོ་མང་པོས་གང་བའི་ནང་དུ་སེམས་ཅན་དེ་དག་གིས་ཆེ་གེ་མོ་ཞིག་གིས་ཟོས་སོ། །ཞེས་ཤེས་པ་དེ་བཞིན་དུ་སྲོག་ཆགས་ཐམས་ཅད་ཀྱིས་ཤ་ཟ་བའི་མི་ངོ་ཤེས་ཏེ། དེ་དག་གིས་དྲི་ཚོར་ནས་འཆི་བའི་འཇིགས་པས་སྐྲག་པར་འགྱུར་ཏེ། དེ་རྒྱུ་ཞིང་འགྲོ་བ་ན་ཆུ་དང་། སྐམ་ས་

དང་། ནམ་མཁའ་ལ་གནས་པའི་སྐྱེ་བོ་རྣམས་སྐྲག་སྟེ། བདག་ཅག་འདིས་གསད་དུ་འོང་ངོ་སྙམ་ནས་འཁམས་ནས་ཀྱང་འཆི་བར་འགྱུར་རོ། །རྒྱུ་དེ་དག་གིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤ་མི་ཟའོ། །གདུལ་བར་
བྱ་བའི་དབང་གིས་ནི་ཤ་ཟ་བ་ལྟ་བུར་ཡང་སྟོན་མོད་ཀྱི། ཁ་ཟས་ཐ་མལ་པ་ཡང་མི་ཟ་ན་ཤ་ལྟ་ཅི་སྨོས། རིགས་ཀྱི་བུ་ང་འདས་པའི་འོག་ཏུ་ལོ་བརྒྱ་ཕྲག་མང་པོ་འདས་པ་ན་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་རྣམས་མེད་པར་
གྱུར་ལ། དམ་པའི་ཆོས་གཏན་ཞིག་པའི་ཚེ་དགེ་སློང་འདུལ་བ་དང་མ་མོ་འཛིན་པ། རྟོག་པ་སྣ་ཚོགས་ཅན། རང་གི་ལུས་གསོ་བར་བྱེད་པ། ཤ་སྣ་ཚོགས་གཅེས་པར་འཛིན་པ། ཁམས་འཁྲུགས་པ་དང་། བཀྲེས་པ་དང་། སྐོམ་པས་གཟིར་བ། ཆ་ལུགས་
འཇིགས་འཇིགས་ལྟར་འདུག་པ། བ་ལང་རྫི་འདྲ་བ། བྱ་བ་འདྲ་བ། ཆོས་གོས་ཚོན་ཅན་གྱི་རྟགས་འཆང་བ། བྱི་ལའི་བརྟུལ་ཞུགས་སྤྱོད་པ། བདག་ནི་དགྲ་བཅོམ་པ་ཡིན་ནོ། །ཞེས་ཁས་འཆེ་བ། གནོད་པ་མང་པོས་ཉེན་པ། རང་གི་གཅིན་དང་ཕྱི་སས་ལུས་གོས་པ།
ཐུབ་པ་བཞིན་དུ་ཆ་ལུགས་བཟང་པོར་འཆོས་པ། དགེ་སྦྱོང་མ་ཡིན་པར་དགེ་སྦྱོང་ལྟར་འཆོས་པ། དམ་པའི་ཆོས་ལྟར་བཅོས་མའི་ཡི་གེ་འཆང་བ་དག་འབྱུང་བར་འགྱུར་ཏེ། དེ་དག་གིས་ངས་བཅས་པའི་འདུལ་བ་དང་། ཆོ་ག་དང་། སྤྱོད་ཡུལ་དང་ལྡན་པའི་ཚུལ་དང་།
རུང་བ་མ་ཡིན་པ་ལ་ཆགས་པ་ལས་རྣམ་པར་གྲོལ་བ། ཐར་པའི་དེ་ཁོ་ན་ཉིད་ཀྱི་ཡི་གེ་བཤིག་ནས་འདུལ་བ་དང་། མདོ་སྡེ་སོ་སོ་ནས་ཅི་དགའ་མགུར་འཆོས་ཤིང་སྨྲ་བར་བྱེད་དེ། འདི་ལྟར་བདག་ཅག་གི་འདུལ་བ་ལས་བཅོམ་ལྡན་འདས་ཀྱིས་ཤའི་བཅུད་ཀྱི་སྦྱིན་པ་ནི་
རུང་བ་ཡིན་ནོ་ཞེས་གསུངས་སོ་ཞེས་ཟེར་ཞིང་། ཤཱཀྱའི་བུའི་དགེ་སྦྱོང་རྣམས་བདག་ཉིད་ཀྱིས་རང་བཟོར་བྱེད་ཅིང་འགལ་བར་སྨྲ་བ་དག་འབྱུང་བར་འགྱུར་རོ། །རིགས་ཀྱི་བུ་གཞན་ཡང་རུང་བ་མ་ཡིན་པའི་འབྲས་རྗེན་པ་དང་། ཤ་དང་ཉ་ཤ་ལེན་པ་དང་། སྣམས་སུ་སྦྱོར་བ་དང་། འབྲུ་

མར་གྱི་སྣོད་དང་། གདུགས་བྱེད་པ་དང་། ལྷམ་བྱེད་པ་དང་། རྒྱལ་པོ་ལ་སྟེན་པ་དང་། མོ་ཡིག་འཆང་བ་དང་། སྨན་པའི་དཔྱད་ལ་བརྩོན་པ་དང་། བྲན་དང་། བྲན་མོ་དང་། གསེར་དང་། དངུལ་དང་། བྱི་རུ་དང་། དུང་དང་། མན་ཤེལ་དང་། མུ་ཏིག་གི་དོ་
ཤལ་དང་། ཤིང་ཐོག་རྣམས་ལེན་པ་དང་། རིག་པ་དང་། རི་མོ་མཁན་དང་། གཟུགས་མཁན་དང་། བསྐྱེད་ཤིང་འཛུགས་པ་དང་། གསང་སྔགས་དང་། སྨན་དང་བྱིས་པའི་རྩེད་མོ་དང་། གར་ཐབས་ཀྱི་ཡན་ལག་དང་། མིག་འཕྲུལ་དང་། རེངས་པར་བྱ་བའི་
ཕྱིར་སྦྱོར་བ་དང་། གླུ་གར་དང་། མེ་ཏོག་ཕྲེང་དང་། སོ་རྩི་དང་། སྨན་མར་ཆེན་པོ་བསྐོལ་བ་དང་། སྤོས་དང་བྱུག་པ་འཆང་བ་དང་། འགྲོས་འཆོས་པ་རྣམས་སློབ་པ་དང་། སྒེག་པའི་སྦྱོར་བ་ལ་བརྩོན་པ་དག་འབྱུང་བར་འགྱུར་ཏེ། དེ་དག་སྤངས་པ་ལ་ནི་དགེ་སློང་ཞེས་ང་ཟེར་
རོ། །གསོལ་པ། བཅོམ་ལྡན་འདས་འོ་ན་ཇི་ལྟར་བགྱི་ལགས། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གཞན་གྱིས་སྩལ་པས་འཚོ་བ་རྣམས་ཀྱིས་ཡུལ་གང་མ་བརྟགས་པའི་ཟས་མོད་པ་དེར་བསོད་སྙོམས་ཤ་དང་འདྲེས་པ་
ཇི་ལྟར་དག་པར་བགྱི་ལགས། བཀའ་སྩལ་པ། རིགས་ཀྱི་བུ་ཅི་ནས་འདུལ་བ་དང་མི་འགལ་བར་ཆུས་བཀྲུས་ཏེ་བཟའ་བར་བྱའོ། །ཞེས་ངས་བསྟན་ཏོ། །ཡུལ་དེ་ལྟ་བུ་ན་ཟས་དང་། སྐོམ་ཤའི་ཟས་ཀྱིས་ཤས་ཆེར་འདྲེས་པར་སྣང་བ་དེ་ལྟ་བུ་ནི་སྤང་བར་
བྱའོ། །སྣོད་གཅིག་ལ་གཅིག་རེག་སྟེ་ཁ་ཟས་དངོས་མ་འདྲེས་པ་དེ་ལ་ནི་ཉེས་པ་མེད་དོ། །ཤའམ། ཉ་ཤའམ། རི་དགས་ཀྱི་ཤའམ། རྨིག་པ་སྐམ་པོའམ། ཤའི་བག་གཞན་གྱིས་འབགས་པ་རྣམས་ཀྱང་ལྟུང་བྱེད་དུ་འགྱུར་རོ། །ཞེས་ང་ཟེར་རོ། །སྔར་ནི་དོན་གྱི་
དམིགས་བྱུང་བའི་སྐབས་སུ་བསྟན་ཏོ། །ད་འདིར་ནི་ཤ་ཟ་བ་ལས་གནོད་པར་འགྱུར་བར་ངས་བསྟན་ཏོ། །འདི་ནི་ང་ཡོངས་སུ་མྱ་ངན་ལས་འདའ་བའི་ཚེ་མང་དུ་བཤད་པ་ཡིན་ཏེ། འདི་ནི་འདྲི་བའི་དབང་ཞེས་བྱའོ། །དེ་ལ་དོན་གྱི་དམིགས་བྱུང་བའི་དབང་ཞེས་བྱ་བ་ནི་དགེ་སློང་

ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་དག་ང་ལ་འདི་སྐད་ཅེས་འདྲི་བར་བྱེད་དེ། དེ་བཞིན་གཤེགས་པས་ཐོག་མར་མགོ་གཅིག་ཁོ་ནར་བཀའ་སྩལ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་དོན་དང་ཚིག་འདི་རྣམས་ཅིའི་སླད་དུ་བཀའ་མ་སྩལ། བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་སྒོ་དེ་ལྟར་བཀའ་སྩལ་པ་ནི་ལེགས་པར་གསུངས་པ་མ་ལགས་སོ། །ཞེས་ཟེར་ན་ཉེས་པར་
འགྱུར་རོ་ཞེས་ང་ཟེར་རོ། །སྲུང་བ་ཞེས་བྱ་བ་ནི་ཇི་སྐད་བཤད། འདུལ་བ་ཞེས་བྱ་བ་ནི་ཇི་སྐད་བཤད། སོ་སོར་ཐར་པ་ཞེས་བྱ་བ་ནི་ཇི་སྐད་བཤད་ཅེ་ན། ཉེས་པ་གཞན་ཡང་དུ་མ་ཡོད་དེ་དེ་དག་ཉོན་ཅིག །དེ་ལ་སོ་སོར་ཐར་པ་ཇི་སྐད་བཤད་ཅེ་ན། སོ་སོར་ཐར་པ་ཞེས་བྱ་བ་ནི་
ཆོག་ཤེས་པ་དང་། ཡོ་བྱད་བསྙུངས་པ་དང་། ལེན་པ་མེད་པའོ། །གཅིག་ཏུ་ན་སོ་སོར་ཐར་པ་ཞེས་བྱ་བ་ནི་གཉི་གའི་དོན་ལས་གསོ་བར་བྱེད་པའི་ཕྱིར་རོ། །ལོག་པའི་ཚིག་ལས་གྲོལ་བར་བྱེད་པས་ན་ཐར་པའོ། །སྲུང་བ་ཞེས་བྱ་བ་ནི་རུང་བ་མ་ཡིན་པ་ཐམས་ཅད་ཀྱིས་འཚོ་
བས་འགྲོ་བ་བཞི་པོ་རྣམས་སུ་ལྟུང་བར་བྱེད་པ་དང་། སེམས་ཅན་དམྱལ་བ་མནར་མེད་པ་ལ་སོགས་པ་འཇིགས་པའི་གནས་ཐམས་ཅད་དུ་བཙོ་བར་འགྱུར་བ་དེ་ལས་སྲུང་བའི་ཕྱིར་རོ། །འདུལ་བ་ཞེས་བྱ་བ་ནི་ཐོབ་པར་བྱེད་པ་དང་། འདུལ་བར་བྱེད་པ་དང་། ཆོ་ག་སྟོན་པའི་ཕྱིར་
དང་། རྫས་ངན་པ་ལེན་པ་ལ་ངེས་པར་འབྱུང་བ་མེད་པའི་ཕྱིར་རྫས་ངན་པ་ལེན་པ་ཡང་མེད། རྫས་ངན་པ་སྦྱིན་པ་ཡང་མེད་པ་དེ་ནི་འདུལ་བ་ཞེས་བྱའོ། །འོ་ན་འདུལ་བའི་བསླབ་པའི་གཞི་དེ་ཅིའི་ཕྱིར་ཅིག་ཅར་མ་བཅས་ཤེ་ན། དེའི་ཚེ་ཁ་ཅིག་ཕམ་པ་བཞིའི་ཉེས་པ་བྱུང་བ་དག་ཀྱང་
ཡོད། དགེ་འདུན་གྱི་ལྷག་མ་བཅུ་གསུམ་གྱི་ཉེས་པ་བྱུང་བ་དག་ཀྱང་ཡོད། སྤང་བའི་ལྟུང་བ་སུམ་ཅུའི་ཉེས་པ་བྱུང་བ་དག་ཀྱང་ཡོད། ལྟུང་བའི་ཉི་ཚེ་བ་དགུ་བཅུ་རྩ་གཅིག་གི་ཉེས་པ་བྱུང་བ་དག་ཀྱང་ཡོད། སོ་སོར་བཤགས་པར་བྱ་བ་བཞིའི་ཉེས་པ་བྱུང་བ་དག་ཀྱང་ཡོད། བསླབ་

པ་མང་པོའི་ཆོས་ཀྱི་ཉེས་པ་བྱུང་བ་དག་ཀྱང་ཡོད། རྩོད་པ་ཞི་བར་བྱ་བ་བདུན་གྱི་ཉེས་པ་བྱུང་བ་དག་ཀྱང་ཡོད། རྟག་ཏུ་བསླབ་པ་ཐམས་ཅད་ལས་འགལ་བར་བྱེད་པ་དག་ཀྱང་ཡོད། མཚམས་མེད་པ་བྱེད་པ་དག་ཀྱང་ཡོད། མདོ་སྡེ་སྤོང་བ་དག་ཀྱང་ཡོད། འདོད་ཆེན་པོའི་
མཐར་ཐུག་པའི་རྒྱུའི་མཚན་ཉིད་རྫོགས་པ་དག་ཀྱང་ཡོད་དེ། འདི་ན་དགེ་སློང་སྡིག་པའི་ལས་བྱེད་པ་ཆོས་ཐམས་ཅད་ལས་ཐལ་བ་དེ་དག་གཞན་དག་གིས་བསྐུལ་ན་ཡང་། བདག་ཉིད་མཁས་པ་ཡིན་པར་མངོན་པའི་ང་རྒྱལ་བྱེད་ཅིང་འཆགས་པར་མི་བྱེད་དེ། གསོར་
རུང་བ་ཡང་གསུངས་ཏེ། གསོར་མི་རུང་བར་བྱེད་པ་དག་ཀྱང་ཡོད། ཁ་ཅིག་ནི་རུ་སྦལ་གྱི་ལུས་བཞིན་དུ་སྦེད་པ་ཡང་ཡོད་དེ། དེ་ལྟར་བདག་གི་ཉེས་པ་ཡུན་རིང་དུ་བཅབས་པའི་ཉེས་པ་འབྱུང་ཞིང་སྡིག་པ་བསགས་པར་འགྱུར་བས་ན། དེའི་ཕྱིར་དེ་བཞིན་གཤེགས་པ་ཐམས་ཅད་
མཁྱེན་པ་ཡིན་པས། སྡིག་ཅན་རྣམས་ལ་གནས་རེ་རེ་ནས་འདྲི་བར་མཛད་དེ། ཐོག་མ་ཁོ་ནར་གཅིག་བཅས་པ་ན་བསླབ་པའི་གཞི་ཐམས་ཅད་ཅིག་ཅར་འཆའ་བར་མི་མཛད་དོ། །གསོལ་པ། དེ་བཞིན་གཤེགས་པས་མཁྱེན་བཞིན་དུ་དེ་དག་མནར་མེད་པ་ཤིན་ཏུ་
འཇིགས་པའི་སར་གཏང་བར་མཛད་དམ་ཅི་ལགས། དཔེར་གསོལ་ན་འདྲོན་པོ་དག་ཅིག་ཤུལ་དུ་ཞུགས་ཏེ་ཤུལ་དྲང་པོ་མ་འཚལ་བ་ལས། དེར་ཤུལ་གཅིག་ནི་ལོགས་ཤིག་ཏུ་མཆི་བ་ལགས་ལ། དེ་དག་གིས་ཀྱང་ཤུལ་བོར་ཏེ་ལོག་པར་ཞུགས་ཤིང་མ་རུང་བར་གྱུར་
ཀྱང་བདག་ཅག་ནི་ཤུལ་ལོག་པར་ཞུགས་སོ་སྙམ་དུ་མ་ཚོར་ནས། འདི་ནི་ཤུལ་བཟང་པོ་ལགས་སོ་སྙམ་དུ་འཛིན་ཅིང་དོང་ལ། ཕས་རྒྱུ་བའི་འདྲོན་པོ་ཡང་མ་མཐོང་བ་དེ་བཞིན་དུ་ཆོས་ལ་རྨོངས་པའི་སེམས་ཅན་དམ་པའི་ཆོས་ཀྱི་དེ་ཁོ་ན་ཉིད་མ་མཐོང་བ་རྣམས་ལ་བཅོམ་ལྡན་འདས་
ཀྱིས་ཐོག་མ་ཁོ་ནར་ཤུལ་བསྟན་འཚལ་བ་ལས་སྔར་ནོངས་པ་རྔམས་ཆེ་ཆུང་མ་བསྟན་པས་དགེ་སློང་རྣམས་ཉེས་པ་རྣམས་ཀྱི་ནང་དུ་ལྟུང་བར་གྱུར་ན། འདི་ལྟར་བཅོམ་ལྡན་འདས་བདེན་པའི་འདྲོན་པོ་བདེན་པའི་ལམ་གྱི་ཁྱད་པར་ཡང་དག་པར་གཟིགས་པ། ཆོས་ཀྱི་ལམ་གྱི་ཡོན་ཏན་

གྱི་ཁྱད་པར་གྱི་ཕན་ཡོན་ཡང་དག་པར་གཟིགས་པ། ལྷའི་ཡང་ལྷ་བཅོམ་ལྡན་འདས་ཀྱིས་དེའི་ཆེད་དུ་བསླབ་པའི་གཞི་བཅའ་བ་བསྟན་དུ་གསོལ། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་ཁྱོད་དེ་བཞིན་གཤེགས་པ་ལ་དེ་སྐད་མ་ཟེར་ཅིག །
དེ་བཞིན་གཤེགས་པ་ནི་ཡོན་ཏན་གྱི་ཁྱད་པར་གྱི་ཆོས་བཅུ་ཡང་དག་པར་གཟིགས་པ་ཡིན་ལ། སེམས་ཅན་ཐམས་ཅད་ལ་ཡང་སྒྲ་གཅན་ཟིན་བཞིན་དུ་གཟིགས་ན། ཇི་ལྟར་དགེ་སློང་རྣམས་མནར་མེད་པར་འགྲོ་བར་མཛད། དེ་བཞིན་གཤེགས་པ་ནི་གལ་ཏེ་སེམས་
ཅན་གཅིག་གི་རྒྱུ་དེ་འདྲ་བ་ཞིག་གཟིགས་ན་ཡང་། དེས་ངེས་པར་བསྒྲལ་བའི་ཕྱིར་བསྐལ་པའམ་བསྐལ་པ་ལས་ལྷག་པར་ཡང་སེམས་ཅན་དམྱལ་བར་བཞུགས་སྤྱོད་ན། ཐུགས་བརྩེ་བ་དང་ལྡན་པ་ཇི་ལྟར་ཉིད་ཀྱི་སྲས་རྣམས་ལ་སླུ་བར་མཛད། འོད་སྲུང་ཆེན་པོ་དང་རུས་གཅིག་
པ་དཔེར་ན་གྲོང་ཁྱེར་རམ་རི་ཁྲོད་ཀྱི་གྲོང་ཞིག་ན་ཐ་ག་པ་ཞིག་ཡོད་ན། དེ་ནི་དེར་རས་བཏག་པའི་ཡོ་བྱད་ཐགས་ཆ་གང་ཁ་རྒལ་བ་འདོར་བར་བྱེད་པ་དང་། དཔེར་ན་འཁོར་ལོས་སྒྱུར་བའི་རྒྱལ་པོ་ནི་ཐོག་མ་ཁོ་ནར་དགེ་བ་བཅུའི་ལས་ཀྱི་ལམ་རྣམས་ཅིག་ཅར་སྦྱོང་བར་མི་བྱེད་ཀྱི།
སེམས་ཅན་གང་དང་གང་ཆོས་མ་ཡིན་པ་ལ་སྟེན་པ་དེ་དང་དེ་དག་འཁོར་ལོ་རིན་པོ་ཆེས་བཏུལ་ནས། དམ་པའི་ཆོས་ལ་འགོད་པ་དེ་བཞིན་དུ། སངས་རྒྱས་བཅོམ་ལྡན་འདས་ཀྱང་ཐོག་མ་ཁོ་ནར་སོ་སོར་ཐར་པའི་བསླབ་པའི་གཞི་ཅིག་ཅར་འཆའ་བར་མི་མཛད་ཀྱི། དགེ་སློང་
གང་དང་གང་གིས་ཉེས་པ་ཅི་དང་ཅི་བྱས་པའི་དོན་གྱི་དམིགས་བྱུང་བ་དེ་དང་དེ་གླེང་གཞིར་མཛད་ནས། །བསླབ་པའི་གཞི་འཆའ་བར་མཛད་ལ་སེམས་ཅན་ཆོས་འདོད་པ་གང་ཡིན་པ་རྣམས་ཀྱིས་དེ་དང་དེ་མཐོང་ན་ཡིད་ཆེས་པར་འགྱུར་ཏེ་དེ་དག་དཔང་དུ་འཇོག་གོ། །དེ་ལྟར་ན་
ཤིན་ཏུ་བརྟག་དཀའ་བའི་ཆོས་ཡང་དག་པར་གཟིགས་ནས་ཐ་ག་པ་དང་། འཁོར་ལོས་སྒྱུར་བའི་རྒྱལ་པོའི་ཆོས་ཉིད་ཇི་ལྟ་བ་བཞིན་དུ། ཆོས་ཀྱི་འཁོར་ལོ་སྐོར་བའི་སངས་རྒྱས་རྣམས་ཀྱི་ཆོས་ཉིད་ཀྱང་དེ་དང་འདྲ་སྟེ། དེ་ལྟར་ན་སངས་རྒྱས་བཅོམ་ལྡན་འདས་རྣམས་

བསམ་གྱིས་མི་ཁྱབ་བོ། །ཆོས་བསྟན་པ་ཡང་བསམ་གྱིས་མི་ཁྱབ་བོ། །དེ་བཞིན་དུ་ཉན་པ་པོ་རྣམས་དང་། ཡིད་ཆེས་པ་རྣམས་ཀྱང་བསམ་གྱིས་མི་ཁྱབ་སྟེ། འདི་ནི་དོན་གྱི་དམིགས་བྱུང་བའི་དབང་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ནི་དོན་གྱི་དམིགས་བྱུང་བའི་ཕྱིར་དང་། ང་ཡོངས་སུ་མྱ་ངན་ལས་འདའ་བའི་ཕྱིར། ཆོས་ཀྱི་རྣམ་གྲངས་འདི་བཞིའི་ཆོས་སྟོན་པར་བྱེད་དེ། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ནི་དོན་གྱི་དམིགས་བྱུང་བའི་དབང་ཞེས་བྱ་བ་ཡིན་པར་རིག་
པར་བྱའོ། །བདག་གི་ལྷག་པའི་བསམ་པ་ཞེས་བྱ་བ་ནི་དེང་ངའི་ལྷག་པའི་བསམ་པ་བསྟན་པ་བཤད་པས་ན། བདག་གི་ལྷག་པའི་བསམ་པ་ཞེས་བྱ་བ་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །གཞན་གྱི་ལྷག་
པའི་བསམ་པ་ཞེས་བྱ་བ་ཡང་ངས་དགེ་སློང་རྣམས་ཀྱི་བསམ་པ་རྟོགས་ནས་ང་ནི་རྟག་གོ་ཞེས་བསྟན་པས་ན། གཞན་གྱི་ལྷག་པའི་བསམ་པ་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །འདྲི་བའི་དབང་ཞེས་བྱ་བ་ཡང་བྱང་
ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་ཆ་ཕྲ་བའི་ཡེ་ཤེས་དང་ལྡན་པ་འོད་སྲུང་ཆེན་པོ་དང་རུས་གཅིག་པ་ཁྱོད་ཀྱི་དབང་དུ་བྱས་ནས། ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔོན་མ་ཐོས་པའི་ཚིག་ཡི་གེ་འབྲུ་གཅིག་པའི་ཐིག་ལེའི་གཏམ་དགོངས་པའི་
ཚིག་གསང་བ་སྣ་ཚོགས་བསྟན་པས་ན། དེའི་ཕྱིར་འདྲི་བའི་དབང་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །དེ་ལ་ལ་ལ་ཞིག་འདི་ལྟར་ན་ནི་སླུ་བར་འགྱུར་ལ། འདི་ལྟར་ན་ནི་སླུ་བར་མི་འགྱུར་རོ་སྙམ་དུ་རྟོག་སྟེ། དཔེར་
ན་མི་ལ་ལ་ཞིག་ནམ་མཁའ་ཞེས་ཀྱང་ཟེར། སྟོང་པ་ཞེས་ཀྱང་ཟེར། ཅི་ཡང་མེད་པ་ཞེས་ཀྱང་ཟེར། ཐོགས་པ་མེད་པ་ཞེས་ཀྱང་ཟེར་ཏེ། དེ་དེ་སྐད་ཟེར་ན་གཞན་དག་ལ་སླུ་བ་མ་ཡིན་ནོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་རིགས་ཀྱི་བུ་འམ་

རིགས་ཀྱི་བུ་མོ་བཅོམ་ལྡན་འདས་ཀྱིས་གསུངས་པའི་རྟག་པ་འདི་ལ་མོས་ནས། ཆོས་ཀྱི་སྣ་གྲངས་བཞི་པོ་རྣམས་རྗོད་པར་བྱེད་ན། གཞན་དག་ལ་སླུ་བ་མ་ཡིན་ནོ། །ལྕགས་ཀྱི་གར་བུ་མེ་འབར་བ། །རྡུང་བའི་ཚེ་ན་ཁད་ཀྱིས་ནི། །
གྲངས་པར་འགྱུར་ཡང་མེ་ཡི་དྲོད། །གང་དུ་སོང་བ་མི་རིག་ལྟར། །དེ་བཞིན་ཡང་དག་རྣམ་གྲོལ་བ། །འདོད་པའི་འདམ་དང་ཆུ་བོ་རྒལ། །མི་གཡོ་བདེ་བ་ཐོབ་རྣམས་ཀྱང་། །གང་དུ་སོང་བ་གདགས་སུ་མེད། །ཡང་བཀའ་སྩལ་པ། རིགས་ཀྱི་བུ་དེ་ལྟར་ཁྱོད་
དེ་བཞིན་གཤེགས་པ་རྣམས་མེད་པར་འགྱུར་བའི་འདུ་ཤེས་སུ་ལྟ་བས་སྙིང་མི་དགར་མ་བྱེད་ཅིག །ལྕགས་དང་མདོ་ལྕགས་ཞེས་བྱ་བ་ནི་དོན་ཐ་དད་པ་མ་ཡིན་ཏེ། ལྕགས་མེར་འབར་བ་ལས་གྲངས་པར་གྱུར་པ་བཞིན་དུ། དེ་བཞིན་གཤེགས་པ་རྣམས་མེད་པར་
འགྱུར་བའི་གནས་མེད་དོ། །ལྕགས་མེར་འབར་བ་ལས་གྲངས་པ་བཞིན་དུ་ཉོན་མོངས་པའི་རྣམ་པ་ཞི་བར་འགྱུར་མོད་ཀྱི། གང་གི་ཚེ་ལྕགས་མེར་འབར་བ་གྲངས་པར་འགྱུར་བ་ན། ཚ་ཚ་འཕྲོ་བ་ཐམས་ཅད་དང་བཅས་ཏེ་མེད་པར་འགྱུར་ན་ནི། དེའི་ཚེ་དེ་བཞིན་
གཤེགས་པ་ཡང་མི་རྟག་པར་འགྱུར་ན། ལྕགས་དེ་འོད་དང་བཅས་པར་མེད་པར་འགྱུར་བ་ནི་མི་སྲིད་དོ། །དེ་བཞིན་དུ་དེ་བཞིན་གཤེགས་པ་ཡང་མྱ་ངན་ལས་འདས་པ་ཆེན་པོ་འདི་དང་བཅས་ཏེ་མི་རྟག་པར་འགྱུར་བ་ནི་མི་སྲིད་དེ། ཇི་ལྟར་ལྕགས་ཀྱི་མེ་གྲངས་པར་
འགྱུར་བ་དེ་བཞིན་དུ་དེ་བཞིན་གཤེགས་པ་ཡང་བསྐལ་པ་མང་པོ་གྲངས་མེད་པ་བྱེ་བ་སྙེད་དུ་བསགས་པའི་ཉོན་མོངས་པ་རྣམས་ཟད་ནས། རྟག་པ་དང་བརྟན་པ་དང་ཐེར་ཟུག་པར་འགྱུར་ཏེ། དེ་ལྟར་ན་ཡང་དག་པར་རྣམ་པར་གྲོལ་བའི་དེ་བཞིན་གཤེགས་པ་ནི་རྟག་པ་དང་བརྟན་
པ་དང་ཐེར་ཟུག་པ་ཡིན་ནོ། །འདོད་པའི་འདམ་ནི་ཉོན་མོངས་པ་རྣམས་ཞེས་བྱ་བའི་དོན་ཏེ། ཉོན་མོངས་པའི་འདམ་དེ་ལས་བསྐལ་པ་གྲངས་མེད་པས་རྒལ་བས་ན། དེའི་ཕྱིར་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ལ་དེ་བཞིན་གཤེགས་པའི་གནས་གདགས་

པར་མི་ནུས་ཏེ། དེ་བས་ན། ཡང་དག་ཤེས་དང་རྣམ་གྲོལ་བ། །འདོད་པའི་འདམ་དང་ཆུ་བོ་རྒལ། །མི་གཡོ་བདེ་བ་ཐོབ་རྣམས་ཀྱང་། །གང་དུ་སོང་བ་གདགས་སུ་མེད། །གསོལ་པ། བཅོམ་ལྡན་འདས་ཅི་ལགས། ཇི་ལྟར་ལྕགས་གྲངས་པར་གྱུར་
ཀྱང་སླད་ཀྱིས་ཡང་ཞུགས་ཀྱིས་ཚ་བར་འགྱུར་བ་བཞིན་དུ་གལ་ཏེ་དེ་བཞིན་གཤེགས་པ་ཡང་དེ་དང་འདྲ་བར་གྱུར་ན་ནི་མི་རྟག་པར་འགྱུར་ལགས་སོ། །བཀའ་སྩལ་པ། དེ་བཞིན་གཤེགས་པ་ནི་རྟག་སྟེ། བདག་ཉིད་མེ་ལྟ་བུར་གྱུར་ནས། ལྕགས་དང་འདྲ་བའི་
སེམས་ཅན་མང་པོ་རྣམས་ཡེ་ཤེས་ཀྱི་མེས་བརྡ་སྤྲད་ནས་ཡང་དག་པ་མ་ཡིན་པའི་ཉོན་མོངས་པ་རྣམས་ཟད་པར་མཛད་དོ། །གསོལ་པ། བཅོམ་ལྡན་འདས་ལེགས་ལགས་སོ། །ལེགས་ལགས་སོ། །དེ་བཞིན་གཤེགས་པའི་རྟག་པ་ཉིད་མ་ལུས་པར་བཤད་དུ་
གསོལ། བཀའ་སྩལ་པ། རིགས་ཀྱི་བུ་གཞན་ཡང་དཔེར་ན་འཁོར་ལོས་སྒྱུར་བའི་རྒྱལ་པོ་རང་གི་བཙུན་མོའི་འཁོར་དུ་སོང་བ་ལས་ཐང་ཅིག་སྐྱེད་མོས་ཚལ་གཞན་ཞིག་ཏུ་བྱུང་སྟེ། དེ་དེར་སོང་ནས། རྩེ་བར་བྱེད་པ་ན་གང་གི་ཚེ་རྒྱལ་པོ་དེ་བཙུན་མོའི་འཁོར་ནས་མི་སྣང་
བར་གྱུར་པ་དེའི་ཚེ་ཤིའོ་སྙམ་པའི་འདུ་ཤེས་བསྐྱེད་པར་མི་བྱའོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ནི་ཆོས་ཉིད་ལས་ཉམས་པར་མི་འགྱུར་ཏེ། རྒྱལ་པོ་དང་འདྲ་བར་འཛམ་བུའི་གླིང་དུ་དེ་བཞིན་གཤེགས་པ་མི་རྟག་པར་གྱུར་ཏོ། །ཞེས་གྲོངས་པའི་འདུ་ཤེས་
བསྐྱེད་པར་མི་བྱའོ། །ཇི་ལྟར་རྒྱལ་པོ་བཙུན་མོའི་འཁོར་ནས་སྐྱེད་མོས་ཚལ་དུ་སོང་སྟེ་རྩེ་བ་དེ་བཞིན་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཉོན་མོངས་པའི་རྣམ་པ་ཉིད་ཀྱི་བཙུན་མོའི་འཁོར་ལྟ་བུ་ལས་ངེས་པར་འབྱུང་སྟེ། ཉོན་
མོངས་པ་མེད་པར་བཅོམ་ལྡན་འདས་གཟུངས་སྣ་ཚོགས་དང་། བྱང་ཆུབ་ཀྱི་ཡན་ལག་གི་མེ་ཏོག་སྣ་ཚོགས་དང་ལྡན་པའི་སྐྱེད་མོས་ཚལ་དུ་གཤེགས་ནས། དེ་བཞིན་གཤེགས་པ་ཉོན་མོངས་པ་དང་བྲལ་བ་ཉིད་ཀྱི་སྐུའི་ཐབས་སྟོན་པ་སྣ་ཚོགས་ཀྱིས་རོལ་པར་མཛད་

དོ། །གསོལ་པ། དེ་བཞིན་གཤེགས་པ་བསྐལ་པ་གྲངས་མེད་པ་བྱེ་བ་སྙེད་ཀྱིས་ཉོན་མོངས་པའི་རྒྱ་མཚོ་ངེས་པར་རྒལ་ཅེས་བགྱི་བ་འདི་ལ་གཏན་ཚིགས་བཀའ་སྩལ་འཚལ་ལོ། །ད་ལྟར་མངོན་སུམ་དུ་དེ་བཞིན་གཤེགས་པ་སྒྲ་གཅན་ཟིན་
གྱི་མ་དང་ལྷན་ཅིག་ཏུ་འདོད་པ་རྣམས་སྟེན་པ་དང་། སྒྲ་གཅན་ཟིན་གྱི་ཡབ་ཏུ་གྱུར་པར་ཡང་བསྟན་ཏེ། དེ་བས་ན་དེ་བཞིན་གཤེགས་པ་ནི་བསྐལ་པ་དུ་མ་བྱེ་བ་སྙེད་ཀྱིས་འདོད་པའི་ཆུ་བོ་ལས་ངེས་པར་རྒལ་བ་མ་ལགས་སོ། །བཀའ་སྩལ་པ། རིགས་ཀྱི་བུ་ཁྱོད་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟ་མངོན་སུམ་དུ་སྒྲ་གཅན་ཟིན་གྱི་མ་དང་ལྷན་ཅིག་ཏུ་འདོད་པ་རྣམས་བསྟེན་པ་དང་། སྒྲ་གཅན་ཟིན་གྱི་ཡབ་ཏུ་གྱུར་པར་ཡང་བསྟན་ཏེ། དེ་བས་ན་དེ་བཞིན་གཤེགས་པ་ནི་བསྐལ་པ་དུ་མ་བྱེ་བ་
སྙེད་ཀྱིས་འདོད་པའི་ཆུ་བོ་ལས་ངེས་པར་རྒལ་བ་མ་ཡིན་ནོ། །ཞེས་དེ་སྐད་མ་ཟེར་ཅིག །ཡོངས་སུ་མྱ་ངན་ལས་འདས་པ་ཆེན་པོ་ནི་རྟག་པ་ཆེན་པོ་ཞེས་བྱ་སྟེ། སེམས་གུད་དུ་མ་གཡེང་བར་ཉོན་ལ་ཐོས་ནས་ཀྱང་། གཞན་དག་ལ་སྟོན་ཅིག །དེས་སྐྲག་པར་ཡང་མ་
བྱེད་ཅིག །ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་རིའི་རྒྱལ་པོ་རི་རབ་དེ་ལྟར་མཐོ་ཞིང་དེ་ལྟར་ཐག་གྲུ་ཆེ་བ་ཡུངས་འབྲུའི་ཁོང་དུ་འཇུག་པར་བྱེད་ལ། རི་རབ་ལ་གནས་པའི་སེམས་ཅན་རྣམས་ལ་ཡང་གནོད་པར་
མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འདིས་རིའི་རྒྱལ་པོ་རི་རབ་ཡུངས་འབྲུའི་ཁོང་དུ་བཅུག་
སྟེ་སྦས་སོ། །སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དེ། མདོ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡུལ་ནི་དེ་ལྟ་བུ་ཡིན་ནོ། །རིགས་ཀྱི་བུ་དེ་བས་ཀྱང་ལྷག་

པར་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡུངས་འབྲུའི་ཁོང་དུ་འཇུག་པར་བྱེད་ལ། སེམས་ཅན་གཅིག་ལ་ཡང་གནོད་པར་མི་འགྱུར་ཏེ།
སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་། ཡང་དག་པར་རྗེས་སུ་མཐོང་ངོ་། །དེ་ནས་ཡང་
རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རང་གི་བ་སྤུའི་ཁུང་བུར་འཇོག་པར་བྱེད་ལ། སེམས་
ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་། ཡང་དག་
པར་མཐོང་ངོ་། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་འཇིག་རྟེན་གྱི་ཁམས་འདི་ན་འདུག་བཞིན་དུ། ཕྱོགས་བཅུའི་འཇིག་རྟེན་གྱི་ཁམས་རྣམས་ཁབ་ཀྱི་རྩེ་མོས་རྒྱ་ཤུག་གི་
ལོ་མ་བཞིན་དུ་བླངས་ཏེ། འཇིག་རྟེན་གྱི་ཁམས་གཞན་དུ་འདོར་བར་བྱེད་ལ། སེམས་ཅན་གཅིག་ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་
ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་། ཡང་དག་པར་མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་

ཆུབ་སེམས་དཔའ་སེམས་དཔའ་ཆེན་པོས་ནི་ཕྱོགས་བཅུའི་འཇིག་རྟེན་གྱི་ཁམས་རྣམས་ལག་པ་གཡས་པས་བླངས་ཏེ། རྫ་མཁན་གྱི་འཁོར་ལོ་བཞིན་དུ་འཇིག་རྟེན་གྱི་ཁམས་རྡུལ་ཕྲ་མོའི་རྡུལ་སྙེད་ཀྱི་ཕ་རོལ་གྱི་ཡང་ཆེས་ཕ་རོལ་དུ་འཕེན་པར་བྱེད་ལ། སེམས་ཅན་གཅིག་
ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་
དེ་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ཕྱོགས་བཅུའི་འཇིག་རྟེན་གྱི་ཁམས་རྣམས་རང་གི་ལུས་ལ་འཇུག་པར་བྱེད་ལ་སེམས་ཅན་གཅིག་ལ་ཡང་
གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ་། །དེ་ནས་ཡང་རང་
གི་གནས་སུ་འཇོག་པར་བྱེད་དོ། །རིགས་ཀྱི་བུ་གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ཕྱོགས་བཅུའི་འཇིག་རྟེན་གྱི་ཁམས་རྣམས་རྡུལ་ཕྲ་རབ་ཀྱི་ཁོང་དུ་འཇུག་པར་བྱེད་ལ། སེམས་ཅན་གཅིག་
ལ་ཡང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང་། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ་། །སེམས་ཅན་གཞན་དག་གིས་ནི་འདིས་འདི་ལྟར་བྱས་སོ་སྙམ་དུ་ཡང་དག་པར་ཤེས་ཤིང་། ཡང་དག་པར་
མཐོང་ངོ་། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི། བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་ལ་སོགས་པའི་སྒྱུ་འཕྲུལ་ཆེན་པོའི་སྟོབས་རྣམ་པ་སྣ་ཚོགས་སྟོན་པས་ན། མྱ་ངན་ལས་

འདས་པ་ཆེན་པོ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ཀྱིས་ཀྱང་འདི་འདྲ་བ་ཞིག་གོ། །དེ་འདྲ་བ་ཞིག་གོ། །འདི་ལྟར་བྱས་སོ། །འདི་ལྟ་བུ་ཞིག་བྱས་སོ། །
སྙམ་དུ་ཤེས་པར་མི་ནུས་ན། རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པས་འདོད་པ་རྣམས་སྤྱད་དོ། །སྒྲ་གཅན་ཟིན་གྱི་ཕར་གྱུར་ཏོ་སྙམ་དུ་ཤེས་རེ་སྐན། རིགས་ཀྱི་བུ་གཞན་ཡང་དེང་ངས་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་ནས། སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་གང་ན་ཉི་མ་དང་། ཟླ་བ་ཐེར་འབུམ་ཡོད་པ་དང་། འཛམ་བུའི་གླིང་ཐེར་འབུམ་ཡོད་པའི་སྟོང་ཁམས་དག་ཏུ་ཆོ་འཕྲུལ་ཆེན་པོ་བསྟན་པར་བྱའོ། །དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་དཔའ་བར་འགྲོ་བའི་ཏིང་ངེ་འཛིན་གྱི་
ལུགས་བཞིན་དུ་རྒྱས་པར་སྦྱར་བར་བྱའོ། །ང་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་འཛམ་བུའི་གླིང་ལ་ལར་ནི་ཡོངས་སུ་མྱ་ངན་ལས་འདས་པ་ཆེན་པོ་བྱེད་པ་ལྟ་བུར་སྟོན་ལ། ཡོངས་སུ་མྱ་ངན་ལས་འདས་པ་ཆེན་པོར་གཏན་དུ་ཡོངས་སུ་མྱ་ངན་
ལས་འདའ་བར་ཡང་མི་བྱེད་དོ། །འཛམ་བུའི་གླིང་ལ་ལར་ནི་ངས་ཕ་མ་གཉིས་ཀྱི་ཟླ་མཚན་གྱི་དུས་སུ་མངལ་དུ་སྐྱེ་བར་སྟོན་ཏེ། དེ་གཉིས་ཀྱིས་ཀྱང་བདག་ཅག་གཉིས་ཀྱི་བུར་འགྱུར་རོ་སྙམ་དུ་ཡང་དག་པར་ཤེས་སོ། །ང་ནི་བསྐལ་པ་མང་པོ་བྱེ་བ་ཕྲག་
གྲངས་མེད་པ་ནས་ལན་འགའ་ཡང་འཁྲིག་པ་ལས་མ་སྐྱེས་ཏེ། འཁྲིག་པ་ལས་སྐྱེས་པའི་ལུས་ལས་རྒལ་བས་ན་ཤའི་ལུས་མ་ཡིན་གྱི་ཆོས་ཀྱི་སྐུ་ཡིན་ནོ། །འཁྲིག་པའི་མངལ་དུ་འཇུག་པ་འདི་ནི་འཇིག་རྟེན་དང་འཐུན་པར་བྱ་བའི་ཐབས་ཙམ་དུ་ཟད་དོ། །རིགས་ཀྱི་བུ་
འཛམ་བུའི་གླིང་ལ་ལར་ནི་ང་བུ་བཙའ་བའི་པང་དུ་བུར་སྐྱེ་བར་ཡང་སྟོན་ཅིང་། སྐྱེད་མོས་ཚལ་གྱི་གནས་སུ་བཙའ་བའི་བུ་ལྟ་བུར་གྱུར་ཏེ། སྐྱེན་པར་ལངས་ནས་བྱང་ཕྱོགས་སུ་ཁ་བལྟས་ཏེ། གོམ་པ་བདུན་བོར་ནས་ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་གྱི་

བླ་ན་མེད་པར་འགྱུར་བར་བྱའོ་ཞེས་ཟེར་ཏེ། སེམས་ཅན་རྣམས་ཀྱིས་ནི་བྱིས་པ་བཙས་མ་ཐག་ཏུ་གོམ་པ་བདུན་འདོར་བ་སྔོན་ཅད་བདག་གིས་མ་མཐོང་སྟེ། ཀྱེ་མ་བདག་གི་བུ་ནི་ལྷའི་བུ་ཞིག་གོ་སྙམ་དུ་ཡང་དག་པར་ཤེས་སོ། །སེམས་ཅན་མང་པོ་
གཞན་དག་ཀྱང་ངོ་མཚར་དུ་འཛིན་ཏེ། འོན་ཀྱང་ང་ནི་བསྐལ་པ་བྱེ་བ་ཕྲག་གྲངས་མེད་པ་ནས། བྱིས་པའི་དངོས་པོ་ལས་ལོག་པས་ནམས་ཀྱང་བྱིས་པར་མ་གྱུར་ཏེ། ང་ནི་ཆོས་ཀྱི་སྐུ་ཡིན་གྱི་རུས་པ་དང་རྒྱུས་པ་དང་ཤ་དང་ཁྲག་གི་ལུས་མ་ཡིན་ལ། བྱིས་པར་འགྱུར་བ་
ཡང་སྟོན་པ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །བྱང་ནས་ལངས་ཏེ་ལྷོའི་ཕྱོགས་ཆ་ལོགས་སུ་གོམ་པ་བདུན་བོར་ནས་འཇིག་རྟེན་ཐམས་ཅད་དུ་ཡོན་གནས་སུ་འགྱུར་བར་བྱའོ། །ཞེས་ཟེར་རོ། །ནུབ་ཀྱི་ཕྱོགས་ཆ་ལོགས་སུ་གོམ་པ་བདུན་བོར་ནས། སྐྱེ་
བ་དང་། རྒ་བ་དང་། ན་བ་དང་། འཆི་བ་རྣམས་སྤངས་ཏེ་ལུས་ཀྱི་ཐ་མར་གཏུག་པར་བྱའོ་ཞེས་ཟེར་རོ། །ཤར་ཕྱོགས་སུ་ཁ་བལྟས་ཏེ་གོམ་པ་བདུན་བོར་ནས། སེམས་ཅན་ཐམས་ཅད་ཀྱི་ཐོག་མར་འགྲོ་བར་བྱའོ། །ཞེས་ཟེར་རོ། །ཕྱོགས་མཚམས་རྣམས་སུ་གོམ་པ་
བདུན་བདུན་བོར་ནས། ཉོན་མོངས་པ་རྣམ་པ་སྣ་ཚོགས་ཀྱི་རང་བཞིན་གྱི་བདུད་བཅོམ་སྟེ། དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བར་བྱའོ་ཞེས་ཟེར་རོ། །སྟེང་གི་ཕྱོགས་ཆ་ལོགས་སུ་གོམ་པ་བདུན་བོར་ནས་མྱུར་དུ་ནམ་མཁའ་བཞིན་དུ་རུང་བ་མ་ཡིན་པའི་ཆོས་
ཐམས་ཅད་ཀྱིས་ལུས་མི་གོས་པར་བྱའོ་ཞེས་ཟེར་རོ། འོག་གི་ཕྱོགས་ཆ་ལོགས་སུ་གོམ་པ་བདུན་བོར་ནས་སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར། སྤྲིན་ཆེན་པོ་ལྟར་ཆོས་ཀྱི་ཆར་དབབ་པར་བྱ་སྟེ། དེ་དག་བདེ་བ་དང་ལྡན་པར་བྱའོ། །ཚུལ་
ཁྲིམས་འཆལ་པ་རྣམས་ལ་ནི་སེར་བ་ལྟ་བུར་འགྱུར་བར་བྱའོ། །ཞེས་ཟེར་རོ། །འཛམ་བུའི་གླིང་ལ་ལར་ནི་ང་གཙུག་ཕུད་འཆའ་བར་སྟོན་ཏེ། སེམས་ཅན་རྣམས་ཀྱིས་བྱིས་པའི་གཙུག་ཕུད་བཅས་སོ་སྙམ་དུ་ཡང་དག་པར་ཤེས་མོད་ཀྱི། ལྷ་དང་བཅས་པའི་འཇིག་

རྟེན་ན་ངའི་མགོ་བོ་ནས་འཛིན་ཅིང་སྐྲ་གཅོད་ནུས་པའི་མི་སུ་ཡང་མེད་དེ། སྔོན་བསྐལ་པ་གྲངས་མེད་པ་ནས་ཀྱང་ངས་གཙུག་ཕུད་བཅའ་བའི་མཐར་གཏུགས་ཟིན་པས་ན། སྤུ་གྲིས་ངའི་སྐྲ་གཅོད་པར་འགྱུར་བ་ནི་མི་སྲིད་དོ། །འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་
ཟད་དེ། གཙུག་ཕུད་བཅའ་བ་ནི་བྱིས་པ་འབའ་ཞིག་ལ་བྱ་བ་ཡིན་ནོ། །འཛམ་བུའི་གླིང་ལ་ལར་ནི་ང་དབང་ཕྱུག་ཆེན་པོའི་ལྷ་ཁང་དུ་འགྲོ་བར་ཡང་སྟོན་ཏེ། དེར་དབང་ཕྱུག་ཆེན་པོ་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱིས་ང་མཐོང་ན་ངའི་ཞབས་
ལ་ཕྱག་འཚལ་ཏེ་ཐལ་མོ་སྦྱར་ཞིང་འདུག་གོ། །ང་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་ལྷ་དང་མི་དང་ལྷ་མ་ཡིན་རྣམས་ཀྱི་ལྷའི་ཡང་ལྷ་ཡིན་པས་ན། ནམས་ཀྱང་དབང་ཕྱུག་ཆེན་པོའི་ལྷ་ཁང་དུ་མི་འགྲོ་སྟེ། དེར་འགྲོ་བ་ལྟ་བུར་བསྟན་པ་འདི་ནི་འཇིག་རྟེན་དང་འཐུན་པའི་
བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་རྣ་བ་དབུག་པ་བསྟན་མོད་ཀྱི། ངའི་རྣ་བ་འབིགས་ནུས་པའི་མི་མེད་དོ། །འཛམ་བུའི་གླིང་ལ་ལར་ནི་ངས་རྣ་ཆ་གདུབ་ཀོར་སེང་གེ་ཅན་ཐོགས་པར་བསྟན་ཏེ། དེས་སེམས་ཅན་རྣམས་ཀྱིས་བྱིས་པ་འདི་ནི་རྣ་ཆ་གདུབ་
ཀོར་སེང་གེ་ཅན་ཐོགས་པའོ་སྙམ་དུ་ཡང་དག་པར་ཤེས་མོད་ཀྱི། ང་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་། བྱིས་པའི་དངོས་པོ་ལས་ལོག་པས་ན་ང་ལ་རྣ་ཆ་གདུབ་ཀོར་སེང་གེ་ཅན་བཏགས་པ་མེད་དེ། རྣ་ཆ་གདུབ་ཀོར་སེང་གེ་ཅན་ཐོགས་པར་བསྟན་པ་
ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་ཡི་གེ་སློབ་པའི་སར་འགྲོ་བ་བསྟན་མོད་ཀྱི། འཇིག་རྟེན་གསུམ་ན་ངའི་མཁན་པོར་རུང་བ་མ་མཐོང་སྟེ། ང་ཉིད་སེམས་ཅན་ཐམས་ཅད་ཀྱི་མཁན་པོ་ཡིན་ནོ། །དེ་བས་ན་ངའི་མིང་ཐམས་ཅད་མཁྱེན་
པ་ཞེས་བྱའོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་ཡི་གེ་སློབ་པའི་ས་ན་གནས་པ་ལས་འདས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་ན། འོན་ཀྱང་སེམས་ཅན་རྣམས་ཀྱིས་ཁྱེའུ་འདི་ཡི་གེ་སློབ་པའི་སར་སོང་ངོ་སྙམ་དུ་ཡང་དག་པར་

ཤེས་ཏེ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་པར་ཁོང་དུ་ཆུད་པར་གྱིས་ཤིག །འཛམ་བུའི་གླིང་ལ་ལར་ནི་ངས་གླང་པོ་ཆེ་དང་། རྟ་དང་། ཤིང་རྟ་དང་། དཔུང་བུ་ཆུང་དང་། རིན་པོ་ཆེ་སྣ་ཚོགས་དང་། གཏེར་དང་། རྒྱལ་སྲིད་ཀྱི་དབང་ཕྱུག་
རྣམས་ཀྱང་བསྟན། རྒྱལ་ཚབ་བྱེད་པ་ཡང་བསྟན་ཏེ། ངས་ནི་སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་། འདོད་པའི་ལོངས་སྤྱོད་རྣམས་སྤངས་མོད་ཀྱི། སེམས་ཅན་རྣམས་ཀྱིས་རྒྱལ་ཚབ་ནི་འདོད་པ་རྣམས་ལ་ལོངས་སྤྱོད་དོ་སྙམ་དུ། ཡང་དག་པར་ཤེས་སོ། །
འཛམ་བུའི་གླིང་ལ་ལར་ནི་ངས་འཁོར་ལོས་སྒྱུར་བའི་རྒྱལ་པོར་གྱུར་པ་བསྟན་ཏེ། ངས་ནི་བསྐལ་པ་བྱེ་བ་ཕྲག་མང་པོ་གྲངས་མེད་པ་ནས་དེ་སྤངས་ནས་ཆོས་ཀྱི་འཁོར་ལོ་བསྐོར་ཏེ། ངས་དེ་བུའི་ཤ་བཞིན་དུ་བོར་ནས་རྒྱལ་སྲིད་ཀྱི་ལོངས་སྤྱོད་ཡོངས་སུ་འཛིན་པ་སྤངས་ན། འོན་
ཀྱང་སེམས་ཅན་རྣམས་ཀྱིས་འཁོར་ལོས་སྒྱུར་བའི་རྒྱལ་པོ་སྙམ་དུ་ཡང་དག་པར་ཤེས་ཏེ། འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་རྒན་པོ་དང་། ནད་པ་དང་། ཤི་བ་མཐོང་ནས་སྐྱོ་བར་གྱུར་ཏེ། གར་ཐབས་ལྟ་བུའི་
བདེ་བ་ཐམས་ཅད་སྤངས་ནས་རབ་ཏུ་འབྱུང་བ་བསྟན་ཏེ། སེམས་ཅན་རྣམས་ཀྱིས་ཀྱེ་མ་གཞོན་ནུ་ནི་རབ་ཏུ་བྱུང་ངོ་སྙམ་དུ་ཡང་དག་པར་ཤེས་སོ། །ངས་ནི་བསྐལ་པ་བྱེ་བ་ཕྲག་གྲངས་མེད་པ་ནས་རབ་ཏུ་བྱུང་བའི་བྱ་བ་མཐར་གཏུགས་ཟིན་མོད་ཀྱི། སྐྱོ་བར་གྱུར་ནས་རབ་ཏུ་
བྱུང་བ་ལྟ་བུར་སྟོན་པ་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །ངས་བསྙེན་པར་རྫོགས་པ་ལྟ་བུར་བསྟན་པ་དེ་ཡང་འཇིག་རྟེན་ངེས་པར་བསྒྲལ་བའི་ཕྱིར་རོ། །ངས་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཉིད་
ལ་སོགས་པ་དང་། མཐར་གྱིས་གནས་པའི་སྙོམས་པར་འཇུག་པ་རྣམས་ཀྱང་བསྟན་ཏེ། སེམས་ཅན་རྣམས་ཀྱིས་ཀྱེ་མ་མྱུར་བ་ཁོ་ནར་བླ་ན་མེད་པའི་དགྲ་བཅོམ་པར་གྱུར་ཏོ་སྙམ་དུ་ཡང་དག་པར་ཤེས་སོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་དགྲ་

བཅོམ་པའི་བྱ་བ་མཐར་གཏུགས་ཟིན་མོད་ཀྱི་བྱང་ཆུབ་ཀྱི་ཤིང་དྲུང་དུ་རྩྭ་བཏིང་བ་ལ་འདུག་པ་དང་། བདུད་འདུལ་བར་བསྟན་པ་འདི་ནི་འཇིག་རྟེན་ངེས་པར་བསྒྲལ་བའི་ཕྱིར་ཏེ། བདུད་ཕམ་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་དུ་སེམས་
ཅན་རྣམས་ཀྱིས་ཡང་དག་པར་ཤེས་སོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཉོན་མོངས་པའི་རྣམ་པ་དང་། ལྷ་དང་རང་བཞིན་གྱི་བདུད་ཕམ་པར་བྱས་ནས་བདུད་རྩིའི་མཆོག་རྟོགས་སོ། །ངས་ནི་བཤང་བ་དང་། གཅི་བ་དང་། དབུགས་རྔུབ་པ་དང་། དབུགས་
འབྱུང་བའི་བྱ་བ་སྟོན་མོད་ཀྱི། ངའི་ལུས་ལ་རྒྱུ་བ་དང་། འཐུན་པ་དང་། རྣམ་པར་སྨིན་པ་མེད་དོ། །སེམས་ཅན་རྣམས་ཀྱིས་ནི་མི་དང་འདྲའོ་སྙམ་དུ་ཡང་དག་པར་ཤེས་ཏེ། འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །སེམས་ཅན་རྣམས་ཀྱིས་ང་ཁ་ཟས་ཟའོ་
སྙམ་དུ་ཡང་དག་པར་ཤེས་མོད་ཀྱི། ངའི་ལུས་ལ་བཀྲེས་པས་ཉམ་ཆུང་བ་མེད་དེ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །ངས་ནི་བསྐལ་པ་བྱེ་བ་ཕྲག་གྲངས་མེད་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབས་ཏེ་སྲེད་པ་རྣམ་པར་སྤངས་ཀྱང་ཉལ་བ་ལྟ་བུར་སྟོན་ཏེ།
འོན་ཀྱང་ངའི་ལུས་ལ་གཉིད་དང་། སྐྱིགས་བུ་དང་། ཀླལ་བ་དང་། རུ་ཤིང་ན་བ་དང་། ཀླད་པ་ན་བ་རྣམས་མེད་དོ། །ཉལ་བར་བྱེད་པ་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འགྲེང་བ་དང་། འཆག་པ་དང་། མིག་འཛུམས་པ་དང་། རྐང་པ་སྨྱང་བ་དང་། ལུས་ཀྱི་སྤྱོད་ལམ་
བྱེད་པར་སྣང་མོད་ཀྱི། ངའི་ལུས་ལ་དེ་ལྟ་བུའི་གནོད་པ་རྣམས་མེད་དོ། །རྐང་པ་འཁྲུ་བ་དང་། སྣུམ་གྱིས་བྱུག་པ་དང་། ཆུ་སྤྱད་པ་དང་། སོ་ཤིང་ཟ་བ་དང་། མིག་སྨན་གྱིས་སྐུད་པར་སྣང་མོད་ཀྱི་ངའི་ལུས་ལ་དེ་ལྟ་བུའི་གནོད་པ་རྣམས་མེད་དོ། །རྐང་པ་པད་མའི་འདབ་མའི་མདོག་འདྲ་བ་
དང་། ཁ་ནས་ཨུད་པ་ལའི་དྲི་འབྱུང་བ་དང་། མིག་དཔེ་མེད་པར་བཟང་བ་དེ་དག་ཀྱང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །སེམས་ཅན་རྣམས་ཀྱིས་ནི་ཐམས་ཅད་མིའི་ཚུལ་དང་འདྲའོ་སྙམ་དུ་ཡང་དག་པར་ཤེས་སོ། །ཕྱག་དར་ཁྲོད་ཀྱི་གོས་ས་ལས་བླངས་ཏེ་འཁྲུ་བ་ལྟ་བུར་སྣང་མོད་ཀྱི་

ང་ལ་དེ་དགོས་པ་མེད་དོ། །སེམས་ཅན་རྣམས་ཀྱིས་ནི་མིའི་དངོས་པོར་ཡང་དག་པར་ཤེས་ཏེ། སྒྲ་གཅན་ཟིན་གྱི་ཕར་བསྟན་པ་དང་། ཟས་གཙང་མ་དང་། སྒྱུ་འཕྲུལ་ཕ་མར་བསྟན་པ་ཡང་འཇིག་རྟེན་གྱི་དོན་ཡིན་ནོ། །འཇིག་རྟེན་གྱི་བདེ་བ་མྱོང་
ནས་ངེས་པར་བྱུང་སྟེ། ནགས་ཚལ་དུ་རབ་ཏུ་བྱུང་བ་དང་། རྒྱལ་པོའི་བུ་གཽ་ཏམ་ཞེས་བྱ་བ་ནི་འདོད་པ་དང་། འདོད་པ་མ་ཡིན་པ་དང་། བདེ་བ་དང་། བདེ་བ་མ་ཡིན་པ་བྱེ་བྲག་ཕྱེད་པར་གྱུར་ནས་མྱ་ངན་ལས་འདས་པའི་བདེ་བ་ཚོལ་ལོ། །ཞེས་བྱ་བ་འདི་ཡང་བྱིས་པའི་སེམས་
ཅན་རྣམས་ངེས་པར་བསྒྲལ་བའི་ཕྱིར་རོ། །དེ་བཞིན་གཤེགས་པ་ནི་འཁྲིག་པ་ལས་བྱུང་བ་མ་ཡིན་ཏེ་སྒྲ་གཅན་ཟིན་གྱི་ཕར་གྱུར་པར་བསྟན་པ་དང་། རང་གི་ཕ་མ་བསྟན་པ་ཡང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །ལྷ་དང་མི་དང་ལྷ་མ་ཡིན་རྣམས་ཀྱིས་ནི་མིའི་
དེ་བཞིན་གཤེགས་པའོ་སྙམ་དུ་ཡང་དག་པར་ཤེས་སོ། །རིགས་ཀྱི་བུ་འཛམ་བུའི་གླིང་ལ་ལར་ནི་ང་ཡང་དང་ཡང་དུ་ཡོངས་སུ་མྱ་ངན་ལས་འདའ་བ་ལྟ་བུར་སྟོན་ཏེ་འོན་ཀྱང་གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་མི་བྱེད་དོ། །རེས་འགའ་ནི་སེམས་
ཅན་རྣམས་ཀྱིས་དེ་བཞིན་གཤེགས་པ་གྲོངས་སོ་སྙམ་དུ་ཡང་དག་པར་ཤེས་མོད་ཀྱི་དེ་བཞིན་གཤེགས་པ་ནི་དུས་ཐམས་ཅད་དུ་རྟག་པ་དང་། བརྟན་པ་དང་། ཐེར་ཟུག་པ་ཡིན་ཏེ། ཡོངས་སུ་མྱ་ངན་ལས་འདའ་བར་སྟོན་པ་ནི་སངས་རྒྱས་རྣམས་ཀྱི་ཆོས་ཉིད་དོ། །འཛམ་བུའི་གླིང་ལ་
ལར་ནི་སྐྱེ་བར་སྟོན་ཏེ་སེམས་ཅན་རྣམས་ཀྱིས་སྐྱེས་སོ་སྙམ་དུ་ཡང་དག་པར་ཤེས་སོ། །ང་ནི་བསྐལ་པ་བྱེ་བ་ཕྲག་གྲངས་མེད་པ་ནས་བྱ་བ་བྱས་ཟིན་མོད་ཀྱི་དེར་ཡང་གོ་འཕང་ཐམས་ཅད་ཀྱི་དོན་ཐོབ་པའི་མཐར་ཐུག་པར་བསྟན་ཏེ་འདི་ནི་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །
འཛམ་བུའི་གླིང་ལ་ལར་ནི་ངས་ཚུལ་ཁྲིམས་འཆལ་པ་ཕམ་པ་བྱུང་བ་ལྟ་བུར་བསྟན་ཏེ། སེམས་ཅན་རྣམས་ཀྱིས་ཀྱེ་མ་ཕམ་པ་བྱུང་བའོ་སྙམ་དུ་ཡང་དག་པར་ཤེས་མོད་ཀྱི་ང་ནི་སྔན་ཆད་གཡེལ་བར་གྱུར་པ་མེད་དོ། །འཛམ་བུའི་གླིང་ལ་ལར་ནི་ངས་བདག་ཉིད་དེ་བཞིན་གཤེགས་པ་

ལ་ངན་སེམས་ཀྱིས་ཁྲག་བྱུང་བ་དང་། དགྲ་བཅོམ་པ་གསོད་པ་དང་། ཕ་མ་གསོད་པ་དང་། བདག་ཉིད་དགེ་འདུན་གྱི་དབྱེན་བྱེད་པར་བསྟན་ཏེ་སེམས་ཅན་རྣམས་ཀྱིས་ཀྱེ་མ་སེམས་ཅན་འདི་མཚམས་མེད་པ་ལྔའི་ལས་བྱེད་པ་ཡིན་ནོ་སྙམ་དུ་ཡང་དག་པར་ཤེས་མོད་ཀྱི། ང་
ཡང་དེ་ལྟ་བུའི་ལས་བྱེད་པ་མ་ཡིན་ལ་ལྷ་དང་བཅས་པའི་འཇིག་རྟེན་ན་ཡང་སུས་ཀྱང་དགེ་འདུན་འབྱེད་མི་ནུས་སོ། །འཛམ་བུའི་གླིང་ལ་ལར་ནི་ངས་དམ་པའི་ཆོས་སྤོང་བ་དང་། བདག་ཉིད་འདོད་ཆེན་པོར་སྟོན་ཏེ། སེམས་ཅན་རྣམས་ཀྱིས་ཀྱེ་མ་སེམས་ཅན་འདི་ནི་དམ་པའི་ཆོས་སྤོང་
བ་དང་འདོད་ཆེན་པའོ་སྙམ་དུ་ཡང་དག་པར་ཤེས་ལ། འདོད་ཆེན་པ་ལྟ་བུར་བསྟན་པ་ནི་མ་འོངས་པའི་སེམས་ཅན་རྣམས་ཀྱི་ཕྱིར་ཏེ། འཇིག་རྟེན་པ་ནི་རྟག་ཏུ་འདོད་ཆེན་པ་ཡིན་གྱི། སངས་རྒྱས་ནི་འདོད་ཆེན་པ་མ་ཡིན་ནོ། །འཛམ་བུའི་གླིང་ལ་ལར་ནི་ངས་དམ་པའི་ཆོས་འཛིན་
པར་བསྟན་ཏེ་སེམས་ཅན་རྣམས་ཀྱིས་ཀྱེ་མ་དམ་པའི་ཆོས་ཀྱི་ཕྱོགས་འཛིན་པའོ་སྙམ་དུ་ཡང་དག་པར་ཤེས་སོ། །འདི་ནི་སངས་རྒྱས་རྣམས་ཀྱི་རང་བཞིན་ཏེ། འདི་ནི་ཆོས་ཉིད་ཡིན་པས་ངོ་མཚར་ཆེ་བ་མེད་དོ། །འཛམ་བུའི་གླིང་ལ་ལར་ནི་ང་བདུད་བགེགས་བྱེད་པ་ལྟ་བུར་
སྟོན་ཏེ། སེམས་ཅན་རྣམས་ཀྱིས་ཀྱེ་མ་བདུད་སྡིག་ཅན་སྙམ་དུ་ཡང་དག་པར་ཤེས་ལ། པད་མ་ཆུས་མི་གོས་པ་བཞིན་དུ་ང་ལ་བདུད་ཀྱི་ཉེས་པས་མི་གོས་སོ། །འཛམ་བུའི་གླིང་ལ་ལར་ནི་བུད་མེད་ཀྱི་གཟུགས་ཀྱིས་འཚང་རྒྱ་བར་སྟོན་ཏེ། སེམས་ཅན་ཡིད་གཉིས་ཟ་བ་
རྣམས་ཀྱིས་བུད་མེད་འཚང་རྒྱ་བར་བྱེད་དོ་སྙམ་དུ། ཡང་དག་པར་ཤེས་ལ། དེ་བཞིན་གཤེགས་པ་ནི་རྟག་ཏུ་སྐྱེས་པ་ཁོ་ན་ཡིན་བཞིན་དུ་སེམས་ཅན་རྣམས་གདུལ་བའི་ཕྱིར་གཉི་གར་ཡང་སྟོན་ཏོ། །དེ་བཞིན་དུ་གཟུགས་དུ་མའི་ཐབས་ཀྱི་ཕྱོགས་ལ་འཇུག་པ་བསྟན་ཏེ་དེ་
དག་ཐམས་ཅད་ཀྱང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །འཛམ་བུའི་གླིང་ལ་ལར་ནི་ངས་འགྲོ་བ་བཞི་པོ་རྣམས་སུ་སྐྱེ་བར་བསྟན་ཏེ་དེའི་ལས་བྱེད་པ་ཡང་མ་ཡིན་ནོ། །དུད་འགྲོའི་སྐྱེས་གནས་སུ་འཇུག་པ་ཡང་འཇིག་རྟེན་དང་འཐུན་པར་བྱ་བ་ཙམ་དུ་ཟད་དོ། །

འཛམ་བུའི་གླིང་ལ་ལར་ནི་ངས་ཚངས་པའི་གཟུགས་བསྟན་ཏེ། ཚངས་པ་ལ་དད་པའི་སེམས་ཅན་རྣམས་ལ་བགེགས་བྱ་བ་བསྟན་ནས་དམ་པའི་ཆོས་ལ་དགོད་པར་བྱེད་ལ། དེའི་ལས་བྱེད་པ་ཡང་མ་ཡིན་ཏེ་སེམས་ཅན་རྣམས་ཀྱིས་ཚངས་པའི་བདག་པོའོ་
སྙམ་དུ་ཡང་དག་པར་ཤེས་སོ། །དེ་བཞིན་དུ་ལྷ་ཐམས་ཅད་ཀྱི་གནས་སུ་དེའི་གཟུགས་ཀྱི་བགེགས་བྱས་ནས་སེམས་ཅན་ཐམས་ཅད་དམ་པའི་ཆོས་ལ་འགོད་པར་བྱེད་དེ། སེམས་ཅན་རྣམས་ཀྱིས་ལྷ་ཐམས་ཅད་ཀྱི་གནས་ཀྱི་བདག་པོའོ་སྙམ་དུ་ཡང་དག་པར་ཤེས་སོ། །འཛམ་
བུའི་གླིང་ལ་ལར་ནི་ངས་སྨད་འཚོང་མ་རྣམས་ངེས་པར་བསྒྲལ་བའི་ཕྱིར་སྨད་འཚོང་མའི་ཁྱིམ་དུ་འགྲོ་བ་བསྟན་ལ། ང་ལ་འདོད་པའི་ཉེས་པ་ཡང་མི་སྐྱེ་སྟེ། ཆུའི་ནང་གི་པད་མ་བཞིན་དུ་ང་ལ་འདོད་པ་རྣམས་ཀྱི་ཉེས་པས་མི་གོས་སོ། །ང་ནི་འདོད་པ་ལ་ཆགས་པའི་སེམས་ཅན་རྣམས་
འདོད་པའི་ཆུ་བོ་ལས་ངེས་པར་བསྒྲལ་བའི་ཕྱིར་བཞི་མདོ་དང་སུམ་མདོ་ཐམས་ཅད་དུ་ཡང་སྣང་མོད་ཀྱི་དེའི་ལས་བྱེད་པ་ཡང་མ་ཡིན་ཏེ། སེམས་ཅན་རྣམས་ཀྱིས་ནི་འདི་ནི་ཡུལ་རྒྱུ་བ་ཡིན་ནོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་དམངས་མོ་རྣམས་དམ་
པའི་ཆོས་ལ་གཟུད་པའི་ཕྱིར་ང་རོལ་མོའི་གནས་སུ་འགྲོ་བར་བྱེད་མོད་ཀྱི། ང་ནི་ལས་དེ་བྱེད་པ་ཡང་མ་ཡིན་ནོ། །འཛམ་བུའི་གླིང་ལ་ལར་ནི་བྱིས་པ་རྣམས་ངེས་པར་བསྒྲལ་བའི་ཕྱིར་ཡི་གེ་སློབ་པའི་སར་སོང་སྟེ། གྲྭ་དཔོན་བྱེད་ཅིང་བྱིས་པ་རྣམས་སློབ་པར་བྱེད་དོ། །འཛམ་བུའི་གླིང་
ལ་ལར་ནི་སེམས་ཅན་དེ་དག་བསྒྲལ་བའི་ཕྱིར་ང་ཆང་འཐུང་བར་བྱེད། རྒྱན་པོས་རྩེ་བར་བྱེད། གཡེངས་པ་ལ་དགའ་བར་བྱེད་དེ། ལས་ཆེན་པོ་དེ་དག་བྱེད་མོད་ཀྱི། ང་ནི་ལས་ཆེན་པོ་དེ་བྱེད་པ་ཡང་མ་ཡིན་ལ། སེམས་ཅན་རྣམས་ཀྱིས་ནི་འདི་ནི་ལས་དེ་བྱེད་པ་ཡིན་ནོ་སྙམ་དུ་ཡང་
དག་པར་ཤེས་སོ། །འཛམ་བུའི་གླིང་ལ་ལར་ནི་བྱ་རྒོད་དང་ཁྭ་ཏ་རྣམས་ངེས་པར་བསྒྲལ་བའི་ཕྱིར་ང་དུར་ཁྲོད་དུ་འགྲོ་བར་བྱེད་མོད་ཀྱི། དེར་ང་ལྟ་བའི་འདུ་ཤེས་མི་འཇུག་གོ། །འཛམ་བུའི་གླིང་ལ་ལར་ནི་དམ་པའི་ཆོས་གནས་པར་བྱ་བའི་ཕྱིར་ང་ཁྱིམ་བདག་ཏུ་ཡང་སྟོན་ཏོ། །དམ་

པའི་ཆོས་སྐྱོང་བ་དང་། འཇིག་རྟེན་སྐྱོང་བ་བསྲུང་བའི་ཕྱིར་བློན་པོ་རྣམས་ཀྱི་ནང་དུ་བློན་པོར་བཀུར་རོ། །གཞོན་ནུ་རྣམས་ལ་དམ་པའི་ཆོས་ཡང་དག་པར་བསྟན་པའི་ཕྱིར་གཞོན་ནུ་རྣམས་ཀྱི་ནང་དུ་གཞོན་ནུར་བཀུར་རོ། །དམ་པའི་ཆོས་ཀྱི་རྒྱལ་པོའི་ཆོས་ལུགས་ཡང་དག་
པར་བསྟན་པའི་ཕྱིར་རྒྱལ་པོ་རྣམས་ཀྱི་ནང་དུ་རྒྱལ་པོར་བཀུར་རོ། །འཛམ་བུའི་གླིང་ལ་ལར་ནི་ནད་ཀྱི་བར་གྱི་བསྐལ་པའི་ནང་དུ་སེམས་ཅན་རྣམས་ལ་སྨན་བྱིན་ནས་དེ་དག་དམ་ཆོས་ལ་གཟུད་པར་བྱེད་དེ། སེམས་ཅན་རྣམས་ཀྱིས་ནད་ཀྱི་བར་གྱི་བསྐལ་པའོ་སྙམ་དུ་
ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་མུ་གེའི་བར་གྱི་བསྐལ་པའི་ནང་དུ་བཀྲེས་ཤིང་ཉམ་ཆུང་བའི་སེམས་ཅན་རྣམས་བདུད་རྩིའི་ཟས་ཀྱིས་ཚིམ་པར་བྱས་ནས་དམ་པའི་ཆོས་ལ་འཛུད་པར་བྱེད་དེ། སེམས་ཅན་རྣམས་ཀྱིས་མུ་གེའི་བར་གྱི་བསྐལ་པའོ་སྙམ་
དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་མཚོན་གྱི་བར་གྱི་བསྐལ་པ་བསྟན་ཏེ། དེ་དག་ཚོགས་ཤིང་གཅིག་ལ་གཅིག་གསོད་པའི་དུས་ལ་བབ་པ་ན་དེ་དག་དམ་པའི་ཆོས་ལ་འཛུད་པར་བྱེད་དེ། སེམས་ཅན་རྣམས་ཀྱིས་མཚོན་གྱི་བར་གྱི་བསྐལ་པའོ་སྙམ་དུ་
ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་སེམས་ཅན་རྟག་པའི་འདུ་ཤེས་ཅན་རྣམས་ལ་མི་རྟག་པའི་འདུ་ཤེས་བསྟན་པའི་ཕྱིར་སྲེག་པའི་བསྐལ་པ་སྟོན་ཏེ། སེམས་ཅན་རྣམས་ཀྱིས་སྲེག་པའི་བསྐལ་པའོ་སྙམ་དུ་ཡང་དག་པར་ཤེས་སོ། །འཛམ་བུའི་གླིང་ལ་ལར་ནི་
སེམས་ཅན་རྣམས་ལ་སྒྲ་སྐད་བསྟན་ཏེ། དེ་དག་སྒྲ་སྐད་ཀྱིས་དྲངས་ནས་ངེས་པར་སྒྲོལ་བར་བྱེད་དོ། །འཛམ་བུའི་གླིང་ལ་ལར་ནི་སེམས་ཅན་རྣམས་ངེས་པར་བསྒྲལ་བའི་ཕྱིར་བདག་ཉིད་ཁམས་བཞི་པོ་རྣམས་སུ་སྒྱུར་བར་བྱེད་ཅིང་། སེམས་ཅན་རྣམས་ཀྱི་ནད་བསལ་བའི་
ཕྱིར་བདག་ཉིད་སྨན་དང་ཤིང་ཐམས་ཅད་དུ་སྒྱུར་བར་བྱེད་དོ། །འཛམ་བུའི་གླིང་ལ་ལར་ནི་ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་བར་ཡང་སྟོན་ཏེ། ཐམས་ཅད་དུ་མཁན་པོ་བྱེད་ཅིང་མཆོད་པར་འགྱུར་རོ། །དེ་བཞིན་གཤེགས་པ་ནི་སྔོན་བསྐལ་པ་བྱེ་བ་ཕྲག་གྲངས་མེད་

པ་ནས་རབ་ཏུ་འབྱུང་བའི་དེ་ཁོ་ན་ཉིད་ཀྱི་དོན་མཐར་ཐུག་ཟིན་བཞིན་དུ་ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་བ་སྟོན་ཏེ། དེ་དག་ངེས་པར་བསྒྲལ་བའི་ཕྱིར་རོ། །དེ་བཞིན་གཤེགས་པ་ནི་རྟག་ཏུ་རང་བཞིན་གྱི་སྐུར་གནས་མོད་ཀྱི། སེམས་
ཅན་ཐམས་ཅད་ངེས་པར་བསྒྲལ་བའི་ཕྱིར་བཟོའི་གནས་ཐམས་ཅད་དུ་ཡང་སློབ་དཔོན་བྱེད་དེ། རིག་སྔགས་དང་གསང་སྔགས་དང་སྤྲུལ་པ་ཐམས་ཅད་ཀྱང་སྟོན་ལ། ཡ་མཚན་ཅན་ཐམས་ཅད་ཀྱིས་རྒྱགས་པ་དང་། ང་རྒྱལ་བཅོམ་ནས་དེ་དག་ལ་ཤིང་བལ་ལྟ་བུར་
སྙིང་པོ་མེད་པ་ཡང་དག་པར་སྟོན་ཅིང་དེ་དག་དམ་པའི་ཆོས་ལ་འཛུད་པར་བྱེད་པ་འདི་ནི་འཇིག་རྟེན་དང་འཐུན་པར་བྱ་བ་ཡིན་ཏེ། དེར་སེམས་ཅན་ལྟ་བའི་འདུ་ཤེས་ཅན་རྣམས་ཀྱིས་སེམས་ཅན་འདི་ནི་འཇིག་རྟེན་པའོ་སྙམ་དུ་ཡང་དག་པར་ཤེས་མོད་ཀྱི། དེ་བཞིན་གཤེགས་
པ་ནི་འཇིག་རྟེན་པ་མ་ཡིན་གྱི། འཇིག་རྟེན་ལས་འདས་པའི་ཆོས་གཟིགས་པ་ཡིན་ནོ། །འཛམ་བུའི་གླིང་ལ་ལར་ནི་འཇིག་རྟེན་དང་འཐུན་པར་བྱ་བས་ངེས་པར་བསྒྲལ་བར་བྱ་བའི་ཕྱིར་བྲན་དང་བྲན་མོར་ཡང་སྟོན་ཏེ་སེམས་ཅན་རྣམས་ཀྱིས་བྲན་དང་བྲན་མོའོ་སྙམ་དུ་ཡང་དག་
པར་ཤེས་པ་དེ་ནི་རིགས་དམའ་བར་སྟོན་པ་ཡིན་ནོ། །འཛམ་བུའི་གླིང་ལ་ལར་ནི་ངས་འཇིག་རྟེན་གྱི་བྱ་བ་ཐམས་ཅད་བསྟན་ཏེ་སེམས་ཅན་རྣམས་ཀྱིས་སེམས་ཅན་འདི་ནི་འཇིག་རྟེན་ལྷུར་བྱེད་པ་ཡིན་ནོ་སྙམ་དུ་ཡང་དག་པར་ཤེས་སོ། །དེ་ལྟར་སྟོན་དུ་ཟིན་ཀྱང་དེ་བཞིན་གཤེགས་
པ་ནི་ལས་དེ་བྱེད་པ་མ་ཡིན་ཏེ་འཇིག་རྟེན་ཐམས་ཅད་དང་འཐུན་པར་བྱ་བ་ནི་འཇིག་རྟེན་བསྒྲལ་བའི་ཕྱིར་རོ། །དེ་བཞིན་དུ་བྱང་གི་སྒྲ་མི་སྙན་དང་། ཤར་གྱི་ལུས་འཕགས་དང་། ནུབ་ཀྱི་བ་ལང་སྤྱོད་རྣམས་དང་། སྲིད་པ་ཉི་ཤུ་རྩ་ལྔ་དག་ཏུ་ཡང་འཇིག་རྟེན་པ་དང་འཐུན་པར་བྱ་
བའི་སྒོ་ནས་དེ་དང་དེ་དག་དེ་བཞིན་དུ་སྦྱར་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྗོད་པ་ཡང་དཔའ་བར་འགྲོ་བའི་ཏིང་ངེ་འཛིན་གྱི་ལུགས་བཞིན་དུ་སྦྱར་བར་བྱའོ། །དེ་བཞིན་གཤེགས་པས་བྱ་བ་ཆེན་པོ་ཐམས་ཅད་བསྟན་པའི་ཕྱིར་ཡོངས་སུ་མྱ་ངན་ལས་

འདས་པ་ཆེན་པོ་ཞེས་བྱ་སྟེ། འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱ་བ་ཆེན་པོ་ཐམས་ཅད་དང་ཆོ་འཕྲུལ་ཆེན་པོ་དང་། མི་འཇིགས་པ་ལ་འགོད་པར་བྱེད་པས་ན་རྟག་པ་ཆེན་པོ་ཞེས་བྱ་སྟེ། ཇི་ལྟར་བྱེད་ཅེས་འདྲི་བར་མི་བྱའོ། །དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྒྲ་གཅན་ཟིན་གྱི་ཕར་གྱུར་པར་བསྟན་པའི་ཐབས་ལ་འཇུག་པ་ལྟ་བུར་འཇིག་རྟེན་དང་འཐུན་པར་མཛད་དོ་སྙམ་དུ་ཁོང་དུ་ཆུད་པར་བྱ་སྟེ། བསྐལ་པ་བྱེ་བ་ཕྲག་དུ་མ་ནས་འདོད་པའི་ཆུ་བོ་ལས་རྒལ་ཟིན་པས་ན་དེའི་ཕྱིར་
དེ་བཞིན་གཤེགས་པ་ནི་རྟག་པ་དང་། བརྟན་པ་དང་། ཐེར་ཟུག་པ་ཡིན་ནོ། །གསོལ་པ། འདིར་ཇི་ལྟར་མར་མེ་གུམ་པ་གང་དུ་འཆི་བའི་གནས་གདགས་སུ་མ་མཆིས་པར་བཀའ་སྩལ་པ་དེ་བཞིན་དུ་དེ་བཞིན་གཤེགས་པའི་མྱ་ངན་ལས་འདས་པའི་གནས་ཀྱང་དེ་དང་འདྲ་བར་
གསུངས་ན། ཇི་ལྟར་དེ་བཞིན་གཤེགས་པ་རྟག་པ་དང་། བརྟན་པ་དང་། ཐེར་ཟུག་པ་ལགས། བཀའ་སྩལ་པ། རིགས་ཀྱི་བུ་མྱ་ངན་ལས་འདས་པ་ནི་མར་མེའི་གནས་དང་འདྲ་བར་མ་བཤད་དེ། རིགས་ཀྱི་བུ་འདི་ལྟར་སྐྱེས་པ་འམ་བུད་མེད་གང་ཡང་རུང་བ་ཞིག་གིས་སྣོད་
ཆེན་པོའམ་ཆུང་ངུ་ཡང་རུང་སྟེ། མར་རམ་ཏིལ་མར་གྱིས་བཀང་ནས་མར་མེ་སྦར་ན་མར་མེའི་མེ་ལྕེ་དེ་ཏིལ་མར་ཇི་སྲིད་ཡོད་པ་དེ་སྲིད་དུ་འབར་ལ། ཏིལ་མར་ཟད་ནས་མར་མེ་ཟད་པར་འགྱུར་རོ། །དེ་ལ་ཉོན་མོངས་པ་ཟད་པ་ནི་མར་མེ་ཟད་པ་དང་འདྲ་བར་བསྟན། དེ་བཞིན་
གཤེགས་པ་ནི་སྣོད་བཞིན་དུ་རྟག་པ་ཡིན། ཉོན་མོངས་པ་ཟད་པ་ནི་མར་མེ་དང་ཏིལ་མར་འདྲ་ན། ཅི་སྣོད་ཀྱང་མར་མེ་དང་མགོ་མཉམ་དུ་མེད་པར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། སྣོད་ནི་མ་མཆིས་པར་མི་འགྱུར་ལགས་ན། ཅི་
ལགས་དེ་བཞིན་གཤེགས་པ་ཡང་སྣོད་དང་འདྲ་བར་བས་པར་འགྱུར་རམ། གལ་ཏེ་དེ་བཞིན་གཤེགས་པ་ཡང་ཏིལ་མར་གྱི་སྣོད་དང་འདྲ་ན་ནི་དེ་བཞིན་གཤེགས་པ་ཡང་ཟད་པར་འགྱུར་བར་བཀའ་སྩལ་པར་མི་འགྱུར་ལགས་སམ། བཀའ་སྩལ་པ། དེ་བཞིན་གཤེགས་པ་ནི་སྣོད་དང་

འདྲ་བ་མ་ཡིན་ཏེ། མཆོག་ཏུ་རྟག་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། དེ་བས་ན་མྱ་ངན་ལས་འདས་པ་ནི་རྟག་ཏུ་མཆོག་ཏུ་བདེ་བ་ཡིན་ནོ། །རིགས་ཀྱི་བུ་གཞན་ཡང་མར་མེའི་གནས་དང་འདྲ་བ་ནི་དགྲ་བཅོམ་པ་ཡིན་ཏེ། དེ་བས་ན་མྱ་ངན་ལས་འདས་
པའི་གནས་དགྲ་བཅོམ་པ་ཉིད་ཐོབ་པ་ནི་འབྲས་བུའི་མཆོག་ཅེས་བྱའོ། །དགྲ་བཅོམ་པ་ཐམས་ཅད་ནི་ཟང་ཟིང་ལ་ཞེན་པ་དང་བྲལ་ཏེ། ཟང་ཟིང་མེད་པ་དང་། མར་མེའི་གནས་བཞིན་དུ་མཐར་ཐུག་པ་དང་། ཟང་ཟིང་མེད་པ་ལ་དགའ་བ་ཡིན་ནོ། །ཕྱིར་མི་འོང་བ་ཡང་ཟང་ཟིང་མེད་
པའི་དོན་ཡིན་པར་ངས་དགོངས་པའི་ཚིག་གིས་བསྟན་ཏེ། མྱ་ངན་ལས་འདས་པའི་གནས་ནི་མ་ཡིན་ནོ། །གསོལ་པ། ཕྱིར་མི་འོང་བ་ཞེས་བཀའ་སྩལ་པ་དེའི་དོན་ཅི་ལགས། བཀའ་སྩལ་པ། ཡང་སྲིད་པ་མི་ལེན་པ་གང་ཡིན་པ་དེ་ནི་ཕྱིར་མི་འོང་བ་ཞེས་བྱའོ། །གསོལ་པ། བཅོམ་
ལྡན་འདས་ཕྱིར་མི་འོང་བ་ཞེས་བགྱི་བ་ལགས་ན། ཕྱིར་མི་འོང་བ་གང་ལགས་པ་དེ་ལ་ཡང་། ཡང་སྲིད་པ་ལེན་པ་མཆིས་པར་འགྱུར་ན། ཅིའི་སླད་དུ་ཕྱིར་མི་འོང་བ་ཡང་སླར་འདི་རང་བཞིན་གྱིས་མི་གཙང་བའི་སྲིན་བུ་འཚལ་བའི་ལུས་ཅན་དུ་སྐྱེ་བར་མི་འགྱུར་ལགས། བཀའ་
སྩལ་པ། ལུས་དེ་ནི་མི་ལེན་མོད་ཀྱི་དུག་སྨན་བཞིན་དུ་ལུས་ལེན་ཏོ། །དེ་བས་ན་ཕྱིར་མི་འོང་བ་ཞེས་བྱའོ། །ཕྱིར་མི་འོང་བ་ཞེས་བྱ་བ་ནི་ལུས་ཞེས་བྱ་བའི་ཐ་ཚིག་གོ། །ཕྱིར་འོང་བ་ཞེས་བྱ་བ་ནི་ཕན་ཚུན་འགྲོ་ཞེས་བྱ་བའི་ཐ་ཚིག་གོ། །གསོལ་པ། བཅོམ་ལྡན་འདས་ཅི་
ལགས། བཅོམ་ལྡན་འདས་ཀྱིས་བསྟན་པ་ལ་གསང་བ་མཆིས་སམ། དགོངས་པའི་ཚིག་དགོངས་པའི་ཚིག་ཅེས་གསང་བར་མི་མཛད་དུ་གསོལ། བཅོམ་ལྡན་འདས་ཅི་ལགས། སངས་རྒྱས་ཀྱི་གསུང་མིག་འཕྲུལ་མཁན་གྱི་འཁྲུལ་འཁོར་དང་། སྒྱུ་མ་མཁན་གྱིས་བགྱིས་
པའི་འཁྲུལ་འཁོར་གྱི་སྒྱུ་མའི་བུད་མེད་དང་འདྲ་ལགས་སམ། བཀའ་སྩལ་པ། ངའི་བསྟན་པ་ལ་ནི་གསང་བ་མེད་དེ། སངས་རྒྱས་ཀྱི་གསུང་ནི་སྟོན་གྱི་ཟླ་བ་རྒྱས་པ་བཞིན་དུ་སྐྱོན་མེད་པ་དང་། མཚན་མས་མ་བཏབ་པ་དང་། རྨོངས་པ་མེད་པ་དང་། གསང་བ་དང་། གསང་ཆེན་

དང་བྲལ་བ་དང་། གསལ་བ་ཡིན་ནོ།། །།བམ་པོ་དྲུག་པ། རིགས་ཀྱི་བུ་དཔེར་ན་ཁྱིམ་བདག་བྲན་གཟའ་ཅན་ནོར་བྱེ་བ་བདོག་པ་ཞིག་ལ་བུ་གཅིག་པ་སྡུག་ཅིང་ཕངས་ལ་གཅེས་ཤིང་ཡིད་དུ་འོང་བ་ཞིག་ཡོད་དེ། དེས་བུ་དེ་བུའི་སློབ་དཔོན་ལས་ཕྱིར་བཀུག་
ནས་བུ་ལ་བྱམས་པའི་ཕྱིར་བདག་ཉིད་ཀྱིས་བསྒྲིམས་ཏེ་ཡི་གེ་ཕྱེད་པ་སློབ་པར་བྱེད་ན། དེས་བསྒྲིམས་ཏེ་ཡི་གེ་ཕྱེད་པ་བསླབས་སུ་ཟིན་ཀྱང་ཅི་བརྡ་སྤྲོད་པའི་དོན་གྱིས་བྱེ་བྲག་སྟོན་པར་ནུས་སམ། བསྟན་པར་ནུས་སུ་ཟིན་ཀྱང་ཅི་དེས་ཡི་གེ་ཕྱེད་པ་བསླབས་པས་བརྡ་སྤྲོད་པའི་
དོན་ཤེས་པར་འགྱུར་རམ། ཅི་ཁྱིམ་བདག་བྲན་གཟའ་ཅན་རང་གི་བུ་ལ་གསང་བར་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། བུའི་ཤེས་པའི་རྩལ་དང་། ཡིད་རྣོ་རྟུལ་དེ་འདྲ་བ་དང་། ཤེས་པའི་རྩལ་དང་མི་ལྡན་པའི་རྒྱུས་ན་དེ་ལ་གསང་བ་དང་
འདྲ་བར་གདའ་བར་གྱུར་ལགས་སོ། །དེ་ལ་ཡིད་མི་བདེ་བ་དང་། གཡོ་བ་དང་། སེར་སྣ་གང་ལགས་པ་དེ་ནི་གསང་བ་ལགས་པར་རིག་པར་བགྱིའོ། །དད་པ་དང་དགའ་བས་བུ་གཅིག་པའི་འདུ་ཤེས་དང་ལྡན་པ་གང་ལགས་པ་དེ་ནི་གསང་བ་ཞེས་མི་བགྱི་ལགས་
སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ལེགས་སོ། །སྡང་བ་དང་། གཡོ་དང་སེར་སྣ་དང་ལྡན་པ་གང་ཡིན་པ་དེ་ནི་གསང་བ་ཡིན་ཏེ། དེའི་སྟོབས་དང་བྱམས་པས་ཀྱང་ཁྱིམ་བདག་བྲན་གཟའ་ཅན་དེ་སྟོན་པར་མི་བྱེད་པ་དེ་བཞིན་
དུ་ཁྱིམ་བདག་བྲན་གཟའ་ཅན་ལྟར། ང་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམས་པ་དང་ལྡན་མོད་ཀྱི། བྱིས་པ་དེ་དག་གིས་མི་བཟོད་པའི་ཕྱིར་ང་དགོངས་པའི་ཚིག་མི་སྟོན་ཏེ། ངས་ཡི་གེ་ཕྱེད་པ་དང་འདྲ་བར་ནི་གསུང་རབ་ཡན་ལག་དགུ་སྟོན་ཏོ། །བརྡ་
སྤྲོད་དང་འདྲ་བར་ནི་སྟོབས་བཅུ་དང་། འཕགས་པའི་བདེན་པ་བཞི་དང་། འཕགས་པའི་ལམ་ཡན་ལག་བརྒྱད་པ་དང་ཐེག་པ་ཆེན་པོ་ཤིན་ཏུ་རྒྱས་པའི་བརྡ་སྤྲོད་པ་བསྟན་ཏོ། །རིགས་ཀྱི་བུ་གཞན་ཡང་གང་གི་ཚེ་ཡི་གེ་ཕྱེད་པ་བསླབས་ནས་སྒྲ་རིག་པའི་འོས་སུ་གྱུར་པ་དེའི་ཚེ་ཁྱིམ་

བདག་བྲན་གཟའ་ཅན་གྱིས་གལ་ཏེ་བརྡ་སྤྲོད་པའི་དོན་སློབ་པར་མི་བྱེད་ན་ནི་དེ་ལྟ་ན་སེར་སྣ་བྱེད་པའི་ཕྱིར་གསང་བ་ཞེས་བྱའོ། །གལ་ཏེ་བརྡ་སྤྲོད་པའི་དོན་བསྟན་ན་ནི་བྱིས་པས་བརྡ་སྤྲོད་པ་རྫོགས་པར་ལོབས་པར་འགྱུར་བ་དེ་བཞིན་དུ་ང་ཡང་ཉན་
ཐོས་རྣམས་ལ་ཇི་སྲིད་དུ་ཐེག་པ་ཆེན་པོའི་སྣོད་དུ་མ་གྱུར་པ་དེ་སྲིད་དུ་གསུང་རབ་ཡན་ལག་དགུ་སྟོན་ཏེ། གལ་ཏེ་ངས་སེམས་ཅན་སྣོད་དུ་གྱུར་པ་རྣམས་ལ་ཐེག་པ་ཆེན་པོ་བསླབ་པ་གསང་བར་བྱས་ན་ནི་དེ་ལྟར་ན་ང་ལ་བརྡ་སྤྲོད་པ་དང་འདྲ་བར་གསང་བར་བྱས་སོ། །ཞེས་སྨྲ་
བའི་རིགས་སོ། །ད་ནི་ངས་བརྡ་སྤྲོད་པ་དང་འདྲ་བར་དེ་བཞིན་གཤེགས་པ་རྟག་པ་དང་། བརྟན་པར་བསྟན་ཏེ། ཁྱིམ་བདག་བྲན་གཟའ་ཅན་དང་འདྲ་བར་རང་གི་སྲས་ཚར་ཕྱིན་པར་མཛད་དོ། །དེ་ལྟར་ན་རིག་པ་ཐམས་ཅད་ཚར་ཕྱིན་པར་བྱེད་པ་བཞིན་དུ་ཚར་ཕྱིན་པར་བྱེད་དོ། །
རིགས་ཀྱི་བུ་གཞན་ཡང་དཔེར་ན་དབྱར་གྱི་སྤྲིན་ཆེན་པོ་རྣམས་འབྲུག་དི་རི་རི་སྒྲོགས་ཤིང་ཆར་ཆེན་པོ་འབེབས་སུ་ཟིན་ཀྱང་། སེམས་ཅན་ཁ་ཅིག་གི་ས་བོན་མ་སྐྱེས་ན་ཅི་དེ་ལ་སྤྲིན་ཆེན་པོ་རྣམས་ཀྱིས་ཉེས་སམ། ཅི་སྤྲིན་ཆེན་པོ་རྣམས་ཆར་མི་འབེབས་སམ་དེ་བཞིན་དུ་
དེང་ངས་ཡོངས་སུ་མྱ་ངན་ལས་འདས་པ་ཆེན་པོ་གསང་ཆེན་མ་ལུས་པར་བསྟན་ཀྱང་སེམས་ཅན་སྣོད་དུ་མ་གྱུར་པ་གང་ཡིན་པ་དེ་དག་གིས་མི་ཐོས་སོ། །ཡང་བཀའ་སྩལ་པ། གང་དག་ལ་ནི་ཡོངས་བསགས་མེད། །གང་དག་གི་ནི་ཟས་མི་རྟོགས། །མཁའ་ལ་བྱ་
རྣམས་རྗེས་འདྲ་བར། །དེ་དག་རྗེས་གཅད་དཀའ་བ་ཡིན། །བསྟན་པ་འདིའི་དོན་ཇི་ལྟ་བུ་ཞེ་ན། སུ་དག་ལ་ནི་ཡོངས་བསགས་མེད། །སུ་དག་གི་ནི་ཟོས་མི་རྟོགས། །གང་དག་གི་ནི་རྗེས་གཅད་དཀའ། །སུ་སོང་གང་དུ་སོང་བ་ན། །དེ་དག་རྗེས་གཅད་དཀའ་བ་ཡིན། །
དེ་ལ་རིན་པོ་ཆེ་ལ་སོགས་པ་ནི་བསགས་པའོ། །ཡོངས་ཞེས་བྱ་བ་ནི་ཕྲད་ཀྱི་བྱེ་བྲག་གི་ཐ་ཚིག་གོ། །ཡོངས་ཞེས་བྱ་བ་ནི་བསྡུས་པའི་དོན་ཏེ་འདིར་རྫས་བཟང་པོ་བསྒྲུབས་པའི་ཐ་ཚིག་གོ། །བསགས་པ་ཞེས་བྱ་བ་དང་། ནོར་ཞེས་བྱ་བ་ནི་དོན་གཅིག་གོ། །གང་ནོར་

ཡོངས་སུ་བསགས་པར་བྱེད་པ་དེ་ནི་དེ་དག་གི་ཡོངས་སུ་བསགས་པ་ཞེས་བྱའོ། །དེ་ལ་ཡོངས་སུ་བསགས་པ་ཞེས་བྱ་བ་ནི་རྣམ་པ་གཉིས་ཏེ། འདུས་བྱས་ཡོངས་སུ་བསགས་པ་དང་། འདུས་མ་བྱས་ཡོངས་སུ་བསགས་པའོ། །དེ་ལ་ཉན་ཐོས་ནི་
འདུས་བྱས་ཡོངས་སུ་བསགས་པའི་རྣམ་པའོ། །དེ་བཞིན་གཤེགས་པ་ནི་འདུས་མ་བྱས་པའི་ཡོངས་སུ་བསགས་པའི་རྣམ་པའོ། །དགེ་འདུན་ནི་རྣམ་པ་གཉིས་ཏེ། འདུས་བྱས་ཀྱི་དགེ་འདུན་དང་། འདུས་མ་བྱས་ཀྱི་དགེ་འདུན་ནོ། །དེ་ལ་འདུས་བྱས་ཀྱི་དགེ་འདུན་
ཞེས་བྱ་བ་ནི་ཉན་ཐོས་ཀྱི་དགེ་འདུན་ཡིན་ཏེ། ཉན་ཐོས་ཀྱི་དགེ་འདུན་ལ་ནི་ཡོངས་སུ་བསགས་པ་ཡང་མེད་ན། བྲན་དང་བྲན་མོ་ལ་སོགས་པ་རྫས་ངན་པ་རྣམས་དང་མཛོད་དང་བང་བ་ཡོངས་སུ་འཛིན་པ་ལྟ་ག་ལ་ཡོད་དེ། འོས་མ་ཡིན་པས་ན་དེ་ནི་ལན་ཚྭ་དང་། ཏིལ་ཙམ་ཡང་
ཡོངས་སུ་བསགས་པར་མི་བྱེད་དོ། །གང་དག་བཅོམ་ལྡན་འདས་ཀྱིས་བདག་ཅག་ལ་བྲན་དང་བྲན་མོ་ལ་སོགས་པ་འཆང་དུ་གནང་ངོ་། །ཞེས་ཟེར་བ་དེ་དག་གི་ལྕེ་ནི་ལྐུགས་པར་འགྱུར་སྲིད་དོ། །ཉན་ཐོས་དེ་དག་ནི་ཡོངས་སུ་བསགས་པ་མེད་པའི་རྣམ་པ་ཡིན་ཏེ། དེ་དག་ནི་
ཟས་ཡོངས་སུ་ཤེས་པའོ། །གང་དག་ཟས་ལ་ཞེན་པ་མེད་པ་དེ་དག་ནི་ཟས་ཡོངས་སུ་ཤེས་པ་ཡིན་ནོ། །དེ་དག་ནི་འགྲོ་བའི་ལམ་དུ་རྗེས་གཅད་པར་དཀའོ། །དེ་དག་ནི་མྱུར་བ་ཁོ་ནར་སངས་རྒྱས་ཉིད་དུ་ཉེ་བར་གནས་སོ། །དེ་དག་གི་འགྲོ་བ་ནི་རྗེས་གཅད་དཀའོ་ཞེས་དེ་བཞིན་
གཤེགས་པ་གསུང་ངོ་། །ཡང་བཀའ་སྩལ་པ། གལ་ཏེ་འདུས་བྱས་ཀྱི་དགེ་འདུན་ལ་ཡང་ཡོངས་སུ་བསགས་པ་མེད་ན། འདུས་མ་བྱས་པའི་དགེ་འདུན་ལྟ་ག་ལ་ཡོད། འདུས་མ་བྱས་པའི་དགེ་འདུན་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ལ་གསང་བའི་ཆོས་
བསྟན་པ་ག་ལ་ཡོད། གསང་བ་གང་ཡིན་པ་དེ་ནི་ཡོངས་སུ་བསགས་པའོ། །རྗེས་གཅད་དུ་མེད་པ་ནི་མི་གཡོ་བའི་བདེ་བ་སྟེ། མྱ་ངན་ལས་འདས་པའི་དོན་ཏོ། །དེ་ལ་ནི་ནམ་མཁའ་ཡང་མེད། ལོ་དང་ཉི་མ་དང་ཟླ་བ་རྣམས་ཀྱིས་ཀྱང་བྱར་མེད། མཇུག་རིངས་དང་། སྐར་

མའི་ཚོགས་རྣམས་དང་། རི་རྣམས་དང་། དུས་དང་། སྤྲིན་རྣམས་ཀྱང་མེད་དེ། སྐྱེ་བའི་རྒྱུན་ཆད་པ་འཆི་བ་དང་། ན་བ་དང་། རྒ་བ་དང་། སྲིད་པ་ཉི་ཤུ་རྩ་ལྔ་སྤངས་པ་སྡུག་བསྔལ་གྱི་རྣམ་པ་དང་ཉོན་མོངས་པ་དང་བྲལ་བ་སྟེ། དེ་བཞིན་གཤེགས་
པ་རྟག་པ་དང་། བརྟན་པ་དང་། བདེ་བ་དང་། མི་གཡོ་བ་དང་། གནས་མེད་པ་ནི་ཡོངས་སུ་མྱ་ངན་ལས་འདས་པ་སྟེ། དེར་འགྲོ་བའི་ཕྱིར་དེང་དེ་བཞིན་གཤེགས་པ་གྲོང་ཁྱེར་ཆེན་པོར་གཤེགས་སོ། །ཆེན་པོ་ཞེས་བྱ་བ་དང་། ཆེ་བ་ཞེས་བྱ་བ་ནི་དོན་གཅིག་གོ། །ཆེན་པོ་ཞེས་བྱ་
བ་ནི་ལྷག་མ་དང་བཅས་པའི་ཚིག་བླ་དགས་ཏེ། འདི་ན་མི་ལ་ལ་ཚེ་དཔག་ཏུ་མེད་པར་གྱུར་ན་མི་དེ་སྐྱེས་བུ་ཆེན་པོ་ཞེས་བྱ་བའི་གྲངས་སུ་གཏོགས་ཏེ། གལ་ཏེ་ཆོས་དང་ལྡན་ན་མི་དེ་སྐྱེས་བུ་ཐམས་ཅད་ཀྱི་མཆོག་ཡིན་ནོ། །ཡང་འདིར་སྐྱེས་བུ་ཆེན་པོའི་རྣམ་པར་རྟོགས་པ་བརྒྱད་ཀྱིས་སྐྱེས་
བུ་གཅིག་པུར་འགྱུར་ཏེ། སྐྱེས་བུ་ཆེན་པོ་དུ་མ་ཡོད་པའི་ནང་ན་གང་ལ་སྐྱེས་བུ་ཆེན་པོའི་རྣམ་པར་རྟོགས་པ་བརྒྱད་ཡོད་པ་དེ་ནི་སྐྱེས་བུ་ཆེན་པོ་ཐམས་ཅད་ཀྱི་ནང་ན་ཡང་སྐྱེས་བུ་ཆེན་པོའོ། །ཞེས་ངས་བཤད་པས་ན་དེའི་ཕྱིར་ཆེ་བ་ཞེས་བྱའོ། །ལྷག་མ་དང་བཅས་པའི་མྱ་ངན་ལས་འདས་
པ་ཞེས་བྱ་བ་ལ་གང་ལ་སྨན་བྱེད་པ་དེ་ནི་མྱ་ངན་ལས་འདས་པ་ཞེས་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་དཔེར་ན། འདི་ན་མི་ལ་ལ་ཞིག་གདུག་པའི་ཟུག་རྔུས་ཕོག་སྟེ། བབ་རྡོའི་གནོད་པས་ཐེབས་ནས་བབ་རྡོའི་གནོད་པས་ཐེབས་པའི་མི་དེ་ཟུག་རྔུ་འབྱིན་པའི་སྨན་པ་
ཆེན་པོ་ཞིག་གིས་གསོས་ཏེ། གདུག་པའི་ཟུག་རྔུ་བསལ་ནས་བདེ་བར་བྱས་ཏེ་དེ་གནོད་པ་མེད་པར་སྔ་མཁོ་བཞིན་དུ་བྱས་ནས་སྨན་པ་དེས་མི་དེ་བོར་ཏེ་ཡུལ་གཞན་ནམ། གྲོང་གཞན་ནམ། ཁྱིམ་གཞན་གང་ན་རྨས་པ་ཡོད་པ་དང་། གང་ན་རྨའི་ལས་བྱར་ཡོད་པ་དེ་ན་གནས་པ་དེ་
བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་པ་ཆེན་པོ་ཟུག་རྔུ་འབྱིན་པས་ཀྱང་འཛམ་བུའི་གླིང་པའི་སེམས་ཅན་བསྐལ་པ་བྱེ་བ་ཕྲག་གྲངས་མེད་པ་ཚུན་ཆད་ནས་འདོད་ཆགས་དང་ཞེ་སྡང་དང་། གཏི་མུག་ལ་སོགས་པ་ཉོན་མོངས་པའི་

དུག་གིས་ཕོག་པའི་སེམས་ཅན་ཤིན་ཏུ་རྨས་པ་ཐམས་ཅད་ཀྱི་ཟུག་རྔུ་རྣམས་ཐེག་པ་ཆེན་པོའི་མདོའི་སྡེ་ཚན་སྣ་ཚོགས་ཀྱི་དགེ་བའི་རྩ་བའི་སྨན་རྣམས་ཀྱིས་གསོ་བར་མཛད་དོ། །གསོས་ནས་ཀྱང་དེ་རྣམས་མྱ་ངན་ལས་བཟླས་ཏེ་གང་ན་སེམས་ཅན་རྨས་པ་རྣམས་ཡོད་པ་དེར་བཅོམ་
ལྡན་འདས་ཡང་དག་པར་སྣང་བར་འགྱུར་རོ། །དེ་བས་ན་མྱ་ངན་ལས་འདས་པ་ཆེན་པོ་ནི་ཡང་དག་པའི་དོན་ལ་རྟོན་པ་ཡིན་ནོ། །ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི་སྲིད་པ་ཐམས་ཅད་ན་ཐར་པའི་གྲོང་ཁྱེར་གྱི་ཚིག་བླ་དགས་ཡིན་ཏེ། གང་ན་འདུལ་བར་བྱ་བ་རྣམས་
ཡོད་པ་དེར་རྫོགས་པར་སངས་རྒྱས་པར་སྣང་བ་འདི་ནི་ཚིག་གྲགས་པའོ། །གསལ་བའོ། །ཡང་དག་པའི་དོན་ནི་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། བཅོམ་ལྡན་འདས་ཅི་ལགས། སྨན་པས་རྨས་པ་ཐམས་ཅད་སོས་པར་བགྱིས་ནས་ཡུལ་
དང་། གྲོང་ཁྱེར་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་གཞན་གང་ན་རྨས་པ་རྣམས་མཆིས་པ་དེར་སྣང་བར་འགྱུར་རོ། །ཞེས་བགྱི་ལགས་སམ། བཀའ་སྩལ་པ། རིགས་ཀྱི་བུ་སྲོག་ཆགས་རྨས་པ་ཐམས་ཅད་ཀྱི་ནད་གསོ་བར་བྱེད་ཅེས་དེ་སྐད་མ་ཟེར་
ཅིག །གསོར་མི་རུང་བའི་སེམས་ཅན་གཞན་རྣམས་ནི་གསོ་བར་མི་བྱེད་དོ། །དེ་ཅིའི་ཕྱིར་ཞེ་ན། དེ་དག་གི་ནད་ནི་གསོར་མི་རུང་བ་ཡིན་ཏེ། དེ་དག་དེ་བཞིན་དུ་དེ་བཞིན་གཤེགས་པ་ནི་གསོར་མི་རུང་བའི་ནད་འདོད་ཆེན་པ་མ་གཏོགས་པ་ནད་ཐམས་ཅད་གསོ་བར་
མཛད་དེ། གང་མྱ་ངན་ལས་འདས་པ་དེ་དག་གསོས་པ་ཡིན་ནོ། །གསོལ་པ། ཐར་པ་ཇི་ལྟ་བུ་ལགས། གཟུགས་ཅན་ལགས་སམ། གཟུགས་མ་མཆིས་པ་ལགས། བཀའ་སྩལ་པ། ཁ་ཅིག་ནི་གཟུགས་ཅན་ནོ། །ཁ་ཅིག་ནི་གཟུགས་ཅན་མ་ཡིན་པ་སྟེ།
གཟུགས་ཅན་མ་ཡིན་པ་ནི་ཉན་ཐོས་དང་རང་སངས་རྒྱས་རྣམས་ཀྱིའོ། །སངས་རྒྱས་བཅོམ་ལྡན་འདས་རྣམས་ཀྱི་ནི་གཟུགས་ཅན་ཡིན་ནོ། །ཐར་པ་དེ་ནི་གཟུགས་དང་གཟུགས་མེད་པ་ཡིན་ལ། གཟུགས་ཡིན་ནོ་ཞེས་བྱར་ཡང་མི་རུང་ངོ་། །གསོལ་པ། ཅིའི་

སླད་དུ་ལགས། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ་དཔེར་ན་འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་ཀྱི་ལུས་ནི་གཟུགས་དང་གཟུགས་མེད་པ་ཡིན་ལ། གཟུགས་ཡིན་ནོ་ཞེས་བྱར་ཡང་མི་རུང་བ་བཞིན་ནོ། །གསོལ་
པ། འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་གཟུགས་དང་། གཟུགས་མ་མཆིས་པ་ལགས་ལ་གཟུགས་ཀྱང་མ་ལགས་ན། དེ་དག་ཇི་ལྟར་མཆིས་པ་དང་། ཇི་ལྟར་རྒྱུ་བ་བསྟན་དུ་གསོལ། བཀའ་སྩལ་པ། འདི་ནི་སངས་རྒྱས་ཀྱི་ཡུལ་ཡིན་ཏེ། ཉན་ཐོས་
དང་རང་སངས་རྒྱས་ཀྱི་ཡུལ་མ་ཡིན་གྱིས་ཞོག་ཤིག །དེ་བཞིན་དུ་ཐར་པ་ཡང་གཟུགས་དང་གཟུགས་མེད་པ་ཡིན་ལ། གཟུགས་ཀྱང་མ་ཡིན་པས་ན་སངས་རྒྱས་ཀྱི་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ནོ། །གསོལ་པ། བཅོམ་
ལྡན་འདས་དེ་བཞིན་གཤེགས་པས་ཡོངས་སུ་མྱ་ངན་ལས་འདས་པ་ཆེན་པོའི་ཚུལ་གྱིས་ཐར་པ་བསྟན་དུ་གསོལ། བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཐར་པ་ཞེས་བྱ་བ་ནི་འཆིང་བ་ཐམས་ཅད་དང་བྲལ་བའོ། །ཡང་བཀའ་སྩལ་པ།
ཐར་པ་ཞེས་བྱ་བ་གང་ཡིན་པ་དེ་ནི་མ་སྐྱེས་པའི་ཕྱིར་དེ་ནི་འཆིང་བ་ཐམས་ཅད་དང་ཤིན་ཏུ་བྲལ་བ་སྟེ། ཇི་ལྟར་ཕ་མ་ཕྲད་པའི་ཡོན་ཏན་ལས་བུ་སྐྱེ་བ་དེ་བཞིན་དུ་སྐྱེས་པ་མ་ཡིན་ཏེ། ཐར་པ་ནི་རང་གི་ཡུལ་དུ་གནས་པའོ། །མ་སྐྱེས་པ་ཞེས་བྱ་བ་ནི་འདི་ལྟར་མར་གྱི་སྙིང་ཁུ་
རང་བཞིན་གྱིས་རང་གི་ངོ་བོ་ཉིད་དུ་འདུག་པ་དེ་བཞིན་དུ་དེ་བཞིན་གཤེགས་པ་ནི་ཡབ་ཡུམ་འཁྲིག་པ་ལས་བྱུང་བ་ཡང་མ་ཡིན་ལ། དེ་བཞིན་གཤེགས་པས་ནི་གདུལ་བར་བྱ་བའི་དབང་གིས་ཡབ་ཡུམ་གཉིས་ཀྱང་བསྟན་ཏོ། །ཐར་པ་གང་ཡིན་པ་དེ་ནི་དེ་བཞིན་གཤེགས་
པས་ཏེ་མ་བྱུང་བ་བྱུང་བའི་ཕྱིར་རོ། །དཔེར་ན་སྲན་སྡེའུའམ། སྲན་གྲེའུ་དཔྱིད་ཟླ་ར་བའི་ངོའམ། དབྱར་གྱི་དུས་སམ། སྟོན་ཟླ་ཐ་ཆུངས་ཀྱི་ངོ་ལ་ས་བོན་བཏབ་ན། དེ་དག་ལས་མྱུ་གུ་འབྱུང་བར་འགྱུར་བ་དེ་བཞིན་དུ་ཐར་པ་ནི་དེ་ལྟ་མ་ཡིན་ནོ། །མ་བྱུང་བ་གང་ཡིན་

པ་དེ་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ་མ་བྱུང་བའོ། །དེ་བཞིན་གཤེགས་པ་ནི་མ་བྱུང་བ་ཁོ་ན་སྟེ་དེ་བཞིན་གཤེགས་པ་ནི་མྱུ་གུ་ཡོད་པ་དང་། མེད་པར་འགྱུར་བ་བཞིན་དུ་ཡོངས་སུ་བརྟག་པར་མི་བྱའོ། །དེ་བཞིན་གཤེགས་པ་ནི་རང་
བཞིན་གྱིས་མ་བྱུང་བ་སྟེ། དེ་བས་ན་མ་བྱུང་བའོ། །མ་བྱུང་བ་ཞེས་བྱ་བ་ནི་མ་བྱས་པའོ། །མ་བྱས་པ་ཞེས་བྱ་བ་ནི་ཇི་ལྟར་གྲོང་ཁྱེར་དང་། གྲྭའི་ཡང་ཏོག་དང་། སྒོ་ཁང་བྱེད་པ་དེ་བཞིན་དུ་ཐར་པ་ནི་དེ་ལྟ་མ་ཡིན་ཏེ། མ་བྱས་པ་གང་ཡིན་པ་དེ་ནི་ཐར་པའོ། །
དེ་ནི་དེ་བཞིན་གཤེགས་པའོ། །འདུས་མ་བྱས་འདུས་མ་བྱས་ཞེས་བྱ་བ་ནི་ཇི་ལྟར་རྫ་མཁན་གྱིས་སྣོད་བྱས་ནས། དེའི་འོག་ཏུ་ཞིག་པར་འགྱུར་བ་བཞིན་དུ་ཐར་པ་ནི་དེ་ལྟ་མ་ཡིན་ནོ། །ཐར་པ་ནི་སྐྱེ་བ་ཡང་མེད། འགག་པ་ཡང་མེད་དོ། །ཐར་པ་གང་ཡིན་པ་དེ་
ནི་དེ་བཞིན་གཤེགས་པ་སྟེ། སྐྱེ་བ་ཡང་མེད། འཆི་བ་ཡང་མེད་དོ། །གང་མ་སྐྱེས་པ་དང་། མ་ཞི་བ་དང་། རྒ་བ་མེད་པ་དང་། འཆི་བ་མེད་པ་དང་། འདུས་མ་བྱས་པ་དེ་ནི་དེ་བཞིན་གཤེགས་པ་སྟེ། དེ་བས་ན་དེ་བཞིན་གཤེགས་པ་ནི་ཡོངས་སུ་མྱ་ངན་ལས་
འདས་པ་ཆེན་པོར་འགྲོ་བའོ། །རྒ་བ་མེད་པ་དང་། འཆི་བ་མེད་པ་ཞེས་བྱ་བ་ནི་མགོ་དཀར་བ་དང་། རྒ་བ་དང་། ན་བ་དང་། འཆི་བའི་ཆོས་དང་འདུས་བྱས་ཀྱི་རང་བཞིན་གྱི་རྟོག་པ་དེ་ལྟ་བུ་ནི་ཐར་པ་མ་ཡིན་གྱི། གང་ལ་གོང་དུ་སྨོས་པ་རྣམས་མེད་པ་ནི་ཐར་པ་ཡིན་ཏེ།
དེ་བས་ན་རྒ་བ་མེད་པ་ཞེས་བྱའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ལ་ནི་མགོ་དཀར་བ་དང་། རྒ་བ་དང་། འདུས་བྱས་རྣམ་པར་འགྱུར་བ་མེད་དོ། །དེ་བས་ན་དེ་བཞིན་གཤེགས་པ་ནི་རྒ་བ་མེད་པའི་སྐུ་ཡིན་ན་
འཆི་བར་ལྟ་ག་ལ་འགྱུར། ནད་མེད་པ་ནད་མེད་པ་ཞེས་བྱ་བ་ནི་གློ་བུར་གྱི་ནད་བཞི་བརྒྱ་རྩ་བཞིས་གནོད་པར་གྱུར་པ་དང་། ཉེས་དམིགས་དུ་མ་དང་ལྡན་པའི་ལུས་གང་ལ་མེད་པ་དེ་ལྟ་བུའི་རང་བཞིན་ཏེ། དེ་བས་ན་ཐར་པ་ནི་ནད་མེད་པའོ། །ཐར་པ་གང་ཡིན་པ་དེ་

ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ལ་ཡང་ནད་ཀྱི་བག་ཡོང་མེད་ན་ཆོས་ཀྱི་སྐུ་ལ་ནད་ག་ལ་ཡོད། དེ་བས་ན་དེ་བཞིན་གཤེགས་པ་ནི་ནད་མེད་པའོ། །འཆི་བ་མེད་པ་འཆི་བ་མེད་པ་ཞེས་བྱ་བ་ནི་གང་ལ་མིའི་ལུས་བཞིན་དུ་འཆི་
བ་མེད་པའོ། །དེ་ནི་ཐར་པ་ཡིན་ཏེ། དེ་ལ་ནི་དུས་འདི་ཙམ་གྱིས་ན་ཟད་པའི་མཐར་འགྱུར་བའམ། འཆི་བའི་མཐར་འགྱུར་རོ། །ཞེས་བྱ་བའི་མིང་ཡང་མེད་དེ་འཆི་བ་དང་བྲལ་བ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །དེ་ལྟ་བུའི་ཡོན་ཏན་
དང་ལྡན་པ་ལ་འཆི་བར་འགྱུར་བ་ཞེས་བྱ་བ་དེ་ནི་མི་སྲིད་དེ། སྐུ་རྡོ་རྗེ་ལྟར་མཁྲེགས་པ་མི་རྟག་པར་ག་ལ་ཞིག་འགྱུར་ཏེ། དེ་བས་ན་འཆི་བ་མེད་པ་ནི་དེ་བཞིན་གཤེགས་པའོ། །ཉོན་མོངས་པ་ཅན་ཉོན་མོངས་པ་ཅན་ཞེས་བྱ་བ་ལ་ཐར་པ་ནི་ནུར་ནུར་པོ་མི་གཙང་བས་མ་རུང་བར་གྱུར་
པ་མ་ཡིན་ཏེ། ཐར་པ་ནི་ཇི་ལྟར་མེ་ཏོག་ཀུ་མུ་ད་དཀར་པོ་བཞིན་དུ་གསལ་བའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །འདོད་པའི་ཉེས་པ་སྣ་ཚོགས་བསྟན་པ་ནི་ཐབས་ཡིན་པར་བལྟ་བར་བྱའོ། །དེ་བས་ན་དེ་བཞིན་གཤེགས་པ་ནི་ཉོན་
མོངས་པ་ཅན་མ་ཡིན་པའོ། །ཟག་པ་མེད་པ་ཟག་པ་མེད་པ་ཞེས་བྱ་བ་ནི། རྨ་མེད་པའི་དོན་ཏེ། དེ་ནི་ཐར་པ་ཡིན་ནོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་སྟེ། དེ་བས་ན་ཟག་པ་མེད་པ་ཞེས་བྱའོ། །གནོད་པ་མེད་པ་གནོད་པ་མེད་པ་ཞེས་བྱ་བ་
ནི་ཇི་ལྟར་བཀྲེས་པས་གཡོས་བྱེད་པ་མ་མཐོང་ན་གནོད་པར་འགྱུར་བ་དེ་བཞིན་དུ་ཐར་པ་ནི་དེ་ལྟ་མ་ཡིན་ཏེ། གནོད་པ་མེད་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །ཞི་བ་ཞི་བ་ཞེས་བྱ་བ་ནི་འཇིག་རྟེན་པ་རྣམས་ཀྱི་ནི་ལྷའི་
གཟུགས་ལ་ཞི་བ་ཞི་བ་ཞེས་བྱ་བས་ན་དེ་ནི་བརྫུན་ཏེ། ཐར་པ་མ་ཡིན་ནོ། །རང་བཞིན་གྱིས་ཞི་བ་གང་ཡིན་པ་དེ་ནི་ཐར་པ་སྟེ། གང་གི་ཕྱིར་སེམས་ཅན་ཐམས་ཅད་ཀྱི་ཞི་བའི་མཆོག་ཡིན་པས་ན། དེའི་ཕྱིར་ཞི་བ་ཞེས་བྱའོ། །ཞི་བ་གང་ཡིན་པ་དེ་ནི་ཐར་པའོ། །ཐར་

པ་གང་ཡིན་པ་དེ་ནི་དེ་བཞིན་གཤེགས་པའོ། །བདེ་བ་བདེ་བ་ཞེས་བྱ་བ་ནི་ཇི་ལྟར་ཆོམ་རྐུན་གྱིས་འཇིགས་ནས་ལམ་བདེ་བར་འགྲོ་བ་བཞིན་དུ་ཐར་པ་ནི་དེ་ལྟ་མ་ཡིན་ཏེ། རང་བཞིན་གྱིས་བདེ་བ་དེ་ལ་ནི་འཇིགས་པའི་མིང་ཡང་མེད་དེ། དེ་བས་ན་བཅོས་མ་མ་ཡིན་པའི་
བདེ་བ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པའོ། །སེམས་ཅན་ཐམས་ཅད་ལ་བདེ་བ་བྱེད་པ་ནི་དེ་བཞིན་གཤེགས་པའོ། །གཉེན་པོ་མེད་པ་གཉེན་པོ་མེད་པ་ཞེས་བྱ་བ་ལ་གཉེན་པོ་མེད་པ་ཞེས་བྱ་བ་ནི་ཇི་ལྟར་རྒྱལ་པོ་ཤིར་དོགས་ཤིང་འཇིགས་
པ་བཞིན་དུ་ཐར་པ་ནི་དེ་ལྟ་མ་ཡིན་ཏེ། ཐར་པ་ནི་ཡེ་རང་བཞིན་གྱིས་གཉེན་པོ་མེད་པའོ། །གཉེན་པོ་མེད་པ་ཞེས་བྱ་བ་ནི་འཁོར་ལོས་སྒྱུར་བའི་རྒྱལ་པོ་ལྟ་བུ་སྟེ། དེ་ལ་གཞན་སླར་འཇིགས་པར་བྱེད་ནུས་པ་སུ་ཡང་མེད་དེ་ཡོད་མི་སྲིད་དོ། །དེ་བཞིན་དུ་ཐ