Kinh tạng Tây Tạng (Kangyur Đại Học) — 054_མདོ་སྡེ།_ཐ

ྱང་བྱ། །ཞེས་ཀྱང་གསུང་ངམ། ཚིག་གི་དོན་འདི་གཉིས་ནི་དཔྱད་འཚལ་ལགས་སོ། །དེ་མ་ལགས་ན་དེ་ལྟར་བགྱིས་དང་ཆད་པའི་གནས་སུ་འགྱུར་ལགས་སོ། །བཅོམ་ལྡན་འདས་
དགེ་སློང་ཚུལ་ཁྲིམས་དང་ལྡན་པ་རྣམས་སླུ་བར་མཛད་ལགས་སམ། འདི་ལ་ནོངས་པ་མང་དུ་མཆིས་ལགས་ན། བཅོམ་ལྡན་འདས་ཀྱིས་མདོ་མང་པོ་དག་ལས་ཚུལ་ཁྲིམས་འཆལ་པ་རྣམས་ཆད་པས་གཅད་པར་བཀའ་སྩལ་ན། ཅི་ལགས་དེ་བཞིན་གཤེགས་པས་འདིར་དགོངས་ཏེ་
གསུངས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་བྱ་བ་ནི་མ་འོངས་པའི་དུས་ཀྱི་བྱང་ཆུབ་སེམས་དཔའ་རྣམས་ཀྱི་ཕྱིར་ངས་

བསྟན་པ་ཡིན་གྱི། ཉན་ཐོས་ཀྱི་ཐེག་པ་པ་རྣམས་ཀྱི་ཕྱིར་དེ་སྐད་བསྟན་པ་ནི་མ་ཡིན་ནོ། །རིགས་ཀྱི་བུ་ངས་སྔར་བསྟན་པ་དམ་པའི་ཆོས་ནུབ་པའི་དུས་དང་། ཚུལ་ཁྲིམས་དང་ལྡན་པ་འགྲིབ་པའི་དུས་དང་། ཚུལ་ཁྲིམས་འཆལ་པའི་ཕྱོགས་རྣམ་པར་འཕེལ་བའི་དུས་དང་། ངེས་པར་
གྲོལ་བ་དང་། ཆགས་པ་མེད་པ་ཟད་པའི་དུས་དང་། བྲན་དང་བྲན་མོ་ལ་སོགས་པ་རྫས་ངན་པ་དུ་མ་ཡོངས་སུ་འཛིན་པར་བྱེད་པའི་དུས་ན་སྐྱེས་བུ་བཞིའི་ནང་ནས་གཅིག་ཙམ་ཡང་བྲན་དང་བྲན་མོ་ལ་སོགས་པ་རྫས་ངན་པ་དུ་མ་ཡོངས་སུ་འཛིན་པའི་དགེ་འདུན་གྱི་ནང་དུ་ཁྱིམ་ནས་ཁྱིམ་མེད་པར་
རབ་ཏུ་བྱུང་ནས། དེ་རྣམས་ཀྱི་རུང་བ་དང་། རུང་བ་མ་ཡིན་པ་དང་། འདུལ་བ་དང་། འདུལ་བ་མ་ཡིན་པའི་བྱེ་བྲག་ཀྱང་ཤེས། དེ་དག་གི་གཡེལ་བ་དང་། བདག་ཉིད་ཀྱི་ཉེས་པ་མང་པོའི་གཞི་ཡང་ཤེས་ཏེ། སྤྱོད་པ་འདི་ནི་བཅོམ་ལྡན་འདས་ཀྱི་སྤྱོད་པ་མ་ཡིན་ནོ་སྙམ་དུ་ཡང་ཤེས་
ནས་ཡུལ་དང་དུས་ལ་བལྟས་ཏེ་གསར་བུ་རྣམས་ལས་གསུང་རབ་ཡན་ལག་དགུ་སློབ་པར་བྱེད་ཅིང་། དེ་དག་ཕམ་པ་བྱུང་བ་ཡིན་པར་ཤེས་སུ་ཟིན་ཀྱང་དམ་པའི་ཆོས་དབྱུང་བར་བྱའོ་སྙམ་སྟེ་ཁ་རོག་པར་འདུག་ནས་དེ་འབའ་ཞིག་སེམས་ཤིང་དམ་པའི་ཆོས་བསྲུང་བ་ཁོ་ནའི་ཕྱིར་འཇིག་
རྟེན་དུ་འབྱུང་ངོ་། །རིགས་ཀྱི་བུ་དཔེར་ན་འགའ་ཞིག་གི་རྒྱལ་པོ་ཞིག་ཤི་ནས་དེའི་བུ་རྣམས་ཀྱི་ནང་ན་རྒྱལ་པོ་ནུས་པ་མེད་དེ། རྒྱལ་པོ་དེ་ཉིད་ཀྱི་ཁམས་ཀྱི་གདོལ་པ་འབྲུག་སྒྲ་ལྟ་བུའི་སིལ་སྙན་དང་ལྡན་པ་ཞིག་གིས་གདོལ་པ་དག་དེང་དེ་མཐུས་རྒྱལ་སྲིད་ཕྲོགས་ནས་རྒྱལ་པོ་བྱེད་ལ།
གདོལ་པ་དེ་ཡང་རང་བཞིན་གྱིས་ནོར་དང་ལྡན་པ་ཞིག་སྟེ། དེ་ནས་གདོལ་པ་དེ་རྒྱལ་པོ་བྱེད་པ་ན་བྲམ་ཟེ་དང་ཁྱིམ་བདག་དེ་ན་གནས་པ་རྣམས་གདོལ་པས་བཀོལ་ན་མི་རུང་ངོ་སྙམ་ནས་ཡུལ་བོར་ཏེ། གང་ན་རྒྱལ་པོའི་རིགས་རྒྱལ་པོ་བྱེད་པའི་ཡུལ་དེར་འགྲོ་བར་བྱེད་ལ། བྲམ་ཟེ་དང་
ཁྱིམ་བདག་གཞན་ཁ་ཅིག་ནི་བདག་གི་ཡུལ་འདོར་མ་ཕོད་ནས་ཇི་ལྟར་ཤིང་གང་དུ་སྐྱེས་པ་དེ་ཉིད་དུ་སྐམ་པར་འགྱུར་བ་བཞིན་དུ་དེ་དག་ཀྱང་ཤིང་དང་འདྲ་བར་ཡུལ་དེ་ཉིད་ན་འཁོད་དོ། །དེ་ནས་གདོལ་པ་དེས་མི་མང་པོ་བྱེར་རོ་སྙམ་ནས་གདོལ་པ་རྣམས་ལམ་ཐམས་ཅད་བསྲུང་དུ་བཅུག་

སྟེ། མི་ལྷག་མ་རྣམས་བསྲུང་བའི་ཕྱིར་ཡང་བྲམ་ཟེ་གཙང་སྦྲ་ཅན་རིག་བྱེད་ཀྱི་མཐར་ཕྱིན་པ་གང་ངའི་རྒྱལ་སྲིད་ཀྱི་ཕྱེད་ལོངས་སྤྱད་པར་འདོད་པ་དེས་ནི་ངའི་མདུན་ན་འདོན་གྱིས་ཤིག་ཅེས་བསྒྲགས་ཏེ། དེ་ལྟར་གྲོང་ཁྱེར་དུ་ཞག་བདུན་གྱི་བར་དུ་རྔ་བོ་ཆེ་བརྡུངས་
ཀྱང་བྲམ་ཟེ་གཙང་སྦྲ་ཅན་གདོལ་པའི་བླ་མཁྱེན་བྱེད་པ་སུ་ཡོད་ཅེས་ཟེར་ནས་སུ་ཡང་མ་བཏུབ་བོ། །དེ་ནས་གདོལ་པ་དེས་བསྒོ་བ། གལ་ཏེ་སུའང་དེ་ལྟར་བྱེད་དུ་མི་བཏུབ་ན་བྲམ་ཟེ་ཐམས་ཅད་གདོལ་པའི་ཁྱིམ་དུ་གདོལ་པ་རྣམས་དང་ལྷན་ཅིག་ཏུ་ཟན་ཟོ་ཤིག །ཉོལ་ཅིག །གལ་
ཏེ་མི་བཏུབ་ན་དེ་ཡང་ངས་ནན་གྱིས་བྱེད་དུ་གཞུག་གོ། །དེ་སྟེ་ལ་ལ་ཞིག་བཏུབ་ན་ནི་ངས་རྒྱལ་སྲིད་ཀྱི་ཕྱེད་ཀྱང་སྦྱིན་ནོ། །སུམ་ཅུ་རྩ་གསུམ་པའི་ལྷ་རྣམས་ཀྱི་བདུད་རྩི་འཐུངས་ན་ལྷར་འགྱུར་བ་ཐོབ་པར་འགྱུར་བ་འཇིག་རྟེན་ན་དཀོན་པ་གང་ཡིན་པ་དེ་ང་དང་ལྷན་ཅིག་ཏུ་འཐུངས་ལ་ལྷར་
འགྱུར་བར་བྱའོ་ཞེས་བསྒོའོ། །དེ་ནས་དེར་བྲམ་ཟེའི་གཞོན་ནུ་གཙང་སྦྲ་ཅན་ཐོར་ཚུགས་དང་ལྡན་པ། རིགས་བྱེད་ཀྱི་མཐར་ཕྱིན་པ། གཞོན་ནུ་ཚངས་པར་སྤྱོད་པ་ཞིག་གིས་བསྒོ་བ་དེ་ཐོས་ནས་རང་གི་ཐོར་ཚུགས་བཤིག་སྟེ། གདོལ་པ་དེའི་ཐད་དུ་སོང་ནས་དེ་ལ་ཕྱག་འཚལ་ཏེ་སྨྲས་
པ། རྒྱལ་པོའི་ཞལ་སྔ་ནས་བཀའ་ཅི་སྩལ་པ་དེ་བཞིན་དུ་བགྱིའོ་ཞེས་བྱས་ཏེ། དེ་ནས་རྒྱལ་པོ་དེས་དེ་མདུན་ན་འདོན་དུ་དབང་བསྐུར་ཏོ། །དེ་ནས་བྲམ་ཟེ་རྣམས་ན་རེ་གདོལ་པའི་མདུན་ན་འདོན་པར་ཁས་བླངས་པ་ངན་པ་འདི་ངན་པ་འདི་ཞེས་འཛེར་ཏོ། །དེ་ནས་དེ་བཞིན་དུ་རྒྱལ་པོས་དེ་ལ་
རྒྱལ་སྲིད་ཀྱི་ཕྱེད་བྱིན་ནས་དེ་དང་ལྷན་ཅིག་ཏུ་རྒྱལ་པོ་བྱེད་དོ། །དེ་ནས་སྐབས་ཤིག་ཏུ་བྲམ་ཟེ་དེས་གདོལ་པའི་རྒྱལ་པོ་དེ་ལ་སྨྲས་པ། རྒྱལ་པོ་ཆེན་པོ་བདག་གི་བྲམ་ཟེའི་ཚུལ་བོར་ནས་ཁྱོད་ཀྱི་མདུན་ན་འདོན་བགྱི་བར་ཁས་བླངས་ཏེ་ཁྱོད་ལ་རིག་པ་རེ་རེ་ནས་བསླབ་སྙམ་ན་ཁྱོད་ད་དུང་བདག་
ལ་ཐུགས་མི་བསྟེན་ཏོ། །དེ་ནས་རྒྱལ་པོ་དེས་དེ་ལ་སྨྲས་པ། ཁྱོད་ལ་ང་ཅི་སྟེ་ཡིད་མི་རྟོན། འདི་ལྟ་བུའི་ཡོན་ཏན་དང་ལྡན་པ་ཁྱོད་ལ་ཡིད་རྟོན་གྱིས། ད་ནི་རྒྱལ་པོ་ཤི་བ་དེའི་བདུད་རྩིའི་བུམ་པ་འདི་ཕྱེད་ཕྱེད་མཉམ་དུ་བཏུང་ངོ་ཞེས་བྱས་སོ། །དེ་ནས་ཐོག་མ་ཁོ་ནར་བློན་པོ་དེས་འཐུངས་

པའི་འོག་ཏུ་བདུད་རྩི་དེའི་ནང་དུ་ཐབས་ཀྱིས་བཏུང་བ་གཞན་བླུགས་ནས་རྒྱལ་པོ་དེས་འཐུངས་པ་དང་། བརྒྱལ་ཏེ་ཤི་བ་བཞིན་དུ་འདུག་གོ། །དེ་ནས་བྲམ་ཟེ་དེས་རྒྱལ་པོ་སྔ་མའི་བུ་རྒྱལ་པོ་ནུས་པ་རྒྱལ་པོར་བཅུག་ནས་སྨྲས་པ། རྒྱལ་སྲིད་འདི་ལོང་ལ་ཆུད་མ་ཟོས་པར་གྱིས་ཤིག །
གདོལ་པ་ནི་རྒྱལ་སྲིད་འདི་ལ་རྒྱལ་པོའི་འོས་མ་ཡིན་ཏེ། ཁྱོད་ཉིད་རྒྱལ་པོར་འོས་པ་ཡིན་ནོ། །གདོལ་པས་རྒྱལ་པོ་བྱ་བ་ནི་མི་སྲིད་དོ་ཞེས་བྱས་སོ། །དེ་ནས་གདོལ་པ་དེ་བརྒྱལ་བ་ལས་སངས་པར་འགྱུར་བའི་སྨན་བྱིན་ཏེ་སོས་པར་བྱས་ནས་དེ་སྤྱུགས་ཏེ་འགལ་བ་བྱེད་པའི་ཆད་པས་བཅད་
དོ། །དེ་ལྟར་བྲམ་ཟེ་དེས་རྒྱལ་སྲིད་སླར་བཙུགས་ཏེ་གདོལ་པ་དེ་སྤྱུགས་ན་དེ་བྲམ་ཟེ་ལས་ཉམས་པར་ཡང་མ་གྱུར་ལ། བྲམ་ཟེ་དང་ཁྱིམ་བདག་རྣམས་ཀྱང་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ་ཞེས་ཟེར་ཞིང་དེ་ལ་ལེགས་སོ་ལེགས་སོ་ཞེས་བྱས་ཏེ། མཆོད་པར་བྱེད་
པ་དེ་བཞིན་དུ་བྱང་ཆུབ་སེམས་དཔའ་ཡང་ང་འདས་པའི་འོག་ཏུ་དམ་པའི་ཆོས་དབྱུང་བའི་དོན་དུ་ཐབས་ཅི་ཡང་བྱེད་དེ། རྫས་ངན་པ་འདུན་ཅིང་སྤྱོད་པ་ངན་པ་དང་ལྡན་པའི་དགེ་འདུན་གྱི་ནང་དུ་ཚུལ་ཁྲིམས་འཆལ་པ་དག་དང་ཚུལ་འཐུན་པར་ཡང་སྟོན་ཏེ། ཚུལ་ཁྲིམས་འཆལ་པ་དེ་རྣམས་
ཀྱི་ཆོས་གོས་དང་། གླེགས་བམ་དང་། ཡོ་བྱད་དེ་རྣམས་དེ་དག་ལས་ཕྲོགས་ནས་དགེ་སློང་ཚུལ་ཁྲིམས་དང་ལྡན་པ་རྣམས་ལ་སྦྱིན་པར་གང་གིས་ནུས་པ་དང་། སྒྲུབ་པ་དང་། གཙོ་བོ་དང་། འབྲུ་བསྡུ་བ་ཡང་བསྟེན་ཏེ་རུང་བ་མ་ཡིན་པ་བརྒྱད་ཀྱི་དངོས་པོ་ལེན་པར་བྱེད་པ་རྣམས་མེད་པར་བྱེད་པར་
གང་གིས་ནུས་པ་དང་། བྲམ་ཟེས་གདོལ་པའི་རྒྱལ་པོ་ལ་བྱས་པ་བཞིན་དུ་དེ་དག་དང་ལྷན་ཅིག་ཏུ་སྐབས་དབྱེ་བ་དང་། གསོ་སྦྱོང་དང་ཐལ་མོ་སྦྱར་བས་གདུད་པའི་ལས་བྱེད་ཅིང་འགལ་བ་བྱེད་པ་ཚར་གཅོད་པར་གང་གིས་ནུས་པ་དང་། གཡེལ་བ་རྣམས་ཀྱང་དག་པའི་དགེ་འདུན་དུ་བསྒྱུར་
ཞིང་སྐྱེ་བོ་མང་པོ་ལ་ཕན་པའི་ཕྱིར་ཐེག་པ་ཆེན་པོའི་མདོའི་སྡེ་ཚན་སྟོན་པར་གང་གིས་ནུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡིན་པ་དེའི་ཆེད་དུ་ཚིགས་སུ་བཅད་པ་དེ་དག་གསུངས་པ་ཡིན་ཏེ། དེ་ལྟར་བྱེད་པ་ལ་ནི་དམ་པའི་ཆོས་འབྱིན་པའི་ཕྱིར་བྲམ་ཟེ་དང་ཁྱིམ་བདག་རྣམས་མགུ་

བར་འགྱུར་ཏེ། བྲམ་ཟེ་ཡིན་བཞིན་དུ་འདིས་རྒྱལ་སྲིད་དང་། དམ་པའི་བཙུགས་སོ་སྙམ་ནས་དེ་ལ་མཆོད་པ་བྱེད་དོ། །གང་དེ་ལྟར་སྟོན་པ་དེ་ནི་བྱང་ཆུབ་སེམས་དཔའ་ཁོ་ན་ཡིན་ཏེ། ཐབས་དང་སྦྱར་ཞིང་བྱེད་པས་ན་དེ་ལ་ཉེས་པ་བསྐྱེད་པར་མི་བྱའོ། །དེ་ལ་ཉེས་པ་
བསྐྱེད་ན་ཕྱིར་ཉེས་པ་ཐོབ་པར་འགྱུར་ཏེ། བཤགས་པར་འོས་པའི་ཉེས་པ་ལྟ་བུར་འགྱུར་ལ་ང་རྒྱལ་གྱི་དབང་གིས་འཆགས་པར་ཡང་མི་བྱེད་དོ། །བྱང་ཆུབ་སེམས་དཔའ་སློབ་དཔོན་དེ་ནི་མཆོག་ཏུ་གཡེལ་བ་ལྟ་བུར་སྟོན་ཀྱང་ཉེས་པར་མི་འགྱུར་ཏེ། དགོངས་པའི་ཚིག་འདི་ནི་བྱང་ཆུབ་
སེམས་དཔའི་ཆེད་དུ་བསྟན་ཏོ། །རྒན་ནམ་ཡང་ན་གཞོན་ཡང་རུང་། །གང་ལས་ཆོས་ནི་རྟོགས་འགྱུར་བ། །བྲམ་ཟེ་སྲེག་སྦྱིན་མེ་བཞིན་དུ། །དེ་ལ་བཀུར་སྟིས་ཕྱག་ཀྱང་བྱ། །རྫོགས་སངས་རྒྱས་ཀྱིས་བསྟན་པ་ཡི། །ཆོས་ནི་གང་ལས་རྟོགས་འགྱུར་བ། །དབང་ཆེན་ལྷ་
ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་བྱ་བ་ནི་ཉན་ཐོས་རྣམས་ཀྱི་ཆེད་དུ་བསྟན་པ་མ་ཡིན་གྱི། བྱང་ཆུབ་སེམས་དཔའ་རྣམས་ཀྱི་ཆེད་དུ་བསྟན་པ་ཡིན་ནོ། །གསོལ་པ། བཅོམ་ལྡན་འདས་ཅི་ལགས། བྱང་ཆུབ་སེམས་དཔའ་གཡེལ་བ་དེ་ལྟ་བུ་དག་བསྙེན་
པར་རྫོགས་པར་རུང་ངམ། འོན་ཏེ་མི་རུང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག །དེ་ཉིད་དེ་དག་གི་བསྙེན་པར་རྫོགས་པ་ཡིན་ཏེ། དེ་དག་གི་ཉེས་པ་གང་དང་གང་བཤགས་པ་དེ་དག་ནི་བཤགས་བཟོད་པ་ཡིན་ནོ། །རིགས་ཀྱི་བུ་དཔེར་
ན་རྫིང་རྙིང་པ་རལ་པའི་ཆུ་ནི་ཐམས་ཅད་ཟགས་པར་འགྱུར་རོ། །དེ་ཅིའི་ཕྱིར་ཞེ་ན། སྐྱེ་བོ་ཆོས་བཞིན་དུ་བྱེད་པ་རྣམས་ནི་འགྲིབས། སྐྱེ་བོ་ཆོས་བཞིན་དུ་མི་བྱེད་པ་རྣམས་ནི་འཕེལ་བའི་ཕྱིར་རོ། །གལ་ཏེ་རྫིང་དེ་ལ་ལ་ཞིག་གིས་ཕྱིར་བཅོས་ན་ནི་དེས་དེའི་ནང་ནས་ཆུ་འཛག་པར་མི་འགྱུར་
བ་དེ་བཞིན་དུ་བྱང་ཆུབ་སེམས་དཔའ་ཡང་དགེ་སློང་ཚུལ་ཁྲིམས་དང་ལྡན་པ་རྣམས་མེད་པའི་ཕྱིར་དང་། དགེ་འདུན་གྱི་སྒྲུབ་པ་ཉམས་པའི་ཕྱིར་དང་། ཐེག་པ་ལ་གཡེལ་བ་ཡོངས་སུ་འཕེལ་བའི་ཕྱིར་གཡེལ་བ་རྣམས་དང་ལྷན་ཅིག་ཏུ་བསྙེན་པར་རྫོགས་པ་དང་། སྐབས་འབྱེད་པ་དང་།

གསོ་སྦྱོང་དང་། ཐལ་མོ་སྦྱར་བས་གདུད་པའི་ལས་བྱེད་པས་རྫིང་ཟག་པ་བཞིན་དུ་ཚུལ་ཁྲིམས་དང་ཆོ་ག་ཟགས་པར་འགྱུར་མོད་ཀྱི་རིགས་ཀྱི་བུ་བྱང་ཆུབ་སེམས་དཔའ་དམ་པའི་ཆོས་འབྱིན་པར་འདོད་པ་དང་། ཚུལ་ཁྲིམས་དང་ལྡན་པའི་མི་ནི་རྫིང་བཅོས་པ་བཞིན་དུ་དེ་ཉིད་བསྙེན་
པར་རྫོགས་པ་ཡིན་ཏེ། དྲི་མ་མེད་པ་དང་བཤགས་པས་བདག་ཉིད་དག་པར་བྱས་ནས་མདོ་སྡེ་དང་འདུལ་བ་དེ་ཁོ་ན་ཉིད་ཀྱིས་རྫིང་བཅོས་པ་བཞིན་དུ་འཆོས་པར་བྱེད་དོ།། །།བམ་པོ་བརྒྱད་པ། གསོལ་པ། བཅོམ་ལྡན་འདས་ཀྱིས་ཨ་མྲའི་འབྲས་བུ་རྣམ་པ་བཞི་ལྟ་
བུའི་མདོ་ལས་གསུངས་པའི་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་དེ་ཇི་ལྟར་རྟོགས་པར་བགྱི་ལགས། བཀའ་སྩལ་པ། རིགས་ཀྱི་བུ་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་ནི་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ་ཆེན་
པོ་ལས་རྟོགས་པར་བྱའོ། །གསོལ་པ། ཇི་ལྟར་རྟོགས་པར་བགྱི་ལགས། བཀའ་སྩལ་པ། ཁྱིམ་བདག་ཞིང་པ་ལ་ལ་ཞིག་གིས་འབྲས་སཱ་ལུ་དང་། འབྲུ་དང་། ཁྲེ་རྒོད་ཀྱི་ཞིང་ལ་ཐོག་མ་ཁོ་ནར་ཞིང་གི་རྡོ་དང་སྙེ་ལོང་རྣམས་བསལ་ཏེ་དག་པར་བྱས་པ་དེ་ལ་དེ་ཕྱིན་ཆད་ནས་ནམ་འབྲས་བུར་
མ་གྱུར་གྱི་བར་དུ་ཤའི་མིག་གིས་ཞིང་གི་གྲངས་སུ་རྩི་བར་བྱེད་ལ་འབྲས་བུར་གྱུར་པའི་ཚེ་ནི་ཕུབ་མ་དང་། ཁོང་སྟོང་དང་། འབྲས་བུ་དང་། སྙིང་པོའི་བྱེ་བྲག་དང་། འདི་ནི་འབྲུ་ཡིན་ནོ། །འདི་ནི་འབྲུ་མ་ཡིན་ནོ་སྙམ་དུ་ཡང་དག་པར་ཤེས་པ་དེ་བཞིན་དུ་གཞི་ཆེན་པོ་བརྒྱད་ནི་དགེ་འདུན་གྱི་སྐྱོན་ཡིན་ཏེ། དེ་
རྣམས་ཞིང་གི་རྡོ་དང་སྙེ་ལོང་བཞིན་དུ་བསལ་ནས་དེའི་འོག་ཏུ་ཤའི་མིག་གིས་དགེ་འདུན་གྱི་ནང་དུ་ཚུལ་ཁྲིམས་དང་ལྡན་པའི་དགེ་སློང་གི་གྲངས་སུ་རྩི་བར་བྱེད་དོ། །སུ་ཡང་རུང་སྟེ་ནམ་སྐྱོན་ཅན་དུ་མ་གྱུར་པ་དང་། ཡོན་ཏན་གྱི་འབྲས་བུ་གསལ་བར་མ་གྱུར་གྱི་བར་དུ་འདི་ནི་འབྲས་བུའོ། །
འདི་ནི་འབྲུ་ངན་པའོ་ཞེས་བྱ་བ་དེ་ལྟ་བུར་ཤའི་མིག་གིས་རྟོགས་པར་མི་ནུས་ཏེ། དེའི་དུས་ཀྱི་བར་སྐབས་སུ་ནི་ཞིང་བཞིན་དུ་དགེ་འདུན་གྱི་གྲངས་སུ་མགོ་མཉམ་དུ་རྩི་བར་འགྱུར་རོ། །དེ་ཅིའི་ཕྱིར་ཞེ་ན། ཞིང་གི་སྐྱོན་ནི་ཞིང་གི་རྡོ་ཡིན་ལ། དགེ་འདུན་གྱི་སྐྱོན་ནི་གཞི་ཆེན་པོ་བརྒྱད་ཡིན་

པའི་ཕྱིར་རོ། །ཉེས་པའི་མཆོག་སྦྲུལ་གདུག་པ་ལྟ་བུ་དང་བྲལ་བའི་དགེ་འདུན་ནི་ཞིང་ཞེས་བྱ་སྟེ། དགེ་སློང་སུ་ཡང་རུང་ཞིང་རྣམ་པར་དག་པ་ལྟ་བུར་གྱུར་པ་དེ་ནི་ལྷ་བཞིན་དུ་མཆོད་པར་བྱ་བ་དང་ཡོན་གནས་སུ་བྱ་བ་ཡིན་ནོ། །འབྲས་བུར་གྱུར་པ་དེའི་སྔ་རོལ་དུ་ནི་ཤའི་
མིག་གིས་སྐྱོན་དང་ཡོན་ཏན་རྟོགས་པར་མི་ནུས་སོ། །རིགས་ཀྱི་བུ་གཞན་ཡང་དཔེར་ན་གྲོང་གིས་ཁོར་གཅིག་གི་ནང་ན་ཤིང་ཀ་ར་ཀ་མང་པོ་ཡང་ཡོད། དེའི་ནང་ན་ཤིང་ཏེན་ཏུ་ཀ་གཅིག་ཀྱང་ཡོད་ལ་ཏེན་ཏུ་ཀའི་ཤིང་དེ་ལ་ཡང་འབྲས་བུ་ཡོད། ཀ་ར་ཀའི་ཤིང་དེ་དག་ལ་ཡང་འབྲས་
བུ་ཡོད་པ་ལས། དེ་ནས་བུ་མོ་གཞོན་ནུ་དབུལ་མོ་ཤིང་ཏོག་ཐུ་བ་ཞིག་གིས་ཏེན་ཏུ་ཀའི་འབྲས་བུ་བཏུས་ནས་ཀ་ར་ཀའི་འབྲས་བུ་ཡང་དེའི་བཅུ་འགྱུར་ཙམ་དུ་བཏུས་ཏེ། ཏེན་ཏུ་ཀའི་འབྲས་བུ་ཡིན་ནོ་སྙམ་ནས་དེ་རྣམས་ཀྱིས་སྐོན་པ་བཀང་སྟེ་གྲོང་དེ་ཉིད་དུ་འཚོང་བར་བྱེད་ལ། དེ་ནས་
བྱིས་པ་རྣམས་ཀྱིས་འབྲས་བུ་རྣམ་པ་གཉི་ག་ཏེན་ཏུ་ཀའི་འབྲས་བུ་ཡིན་ནོ་སྙམ་ནས་ཉོས་ཏེ་ཟོས་པ་དང་ཤིའོ། །དེ་ན་བྱེ་བྲག་ཕྱེད་པའི་མི་ཏེན་ཏུ་ཀའི་འབྲས་བུ་ཟ་འདོད་པ་གང་ཡིན་པ་དེ་དག་གིས་ནི་བུ་མོ་གཞོན་ནུ་དེ་ལ་ལེགས་པར་དྲིས་ཏེ། ཆེ་ཞེ་འདི་དག་ཕྱོགས་གང་ལོགས་ནས་བླངས་
ཞེས་བྱས་པ་དང་། དེས་དེ་དག་ལ་ས་ཕྱོགས་བསྟན་ཏེ། དེ་དག་ལ་ས་ཕྱོགས་བསྟན་པ་དང་། དེ་ན་ཀ་ར་ཀའི་ཤིང་ནི་མང་ལ་ཏེན་ཏུ་ཀའི་ཤིང་ནི་གཅིག་པུ་ལས་མེད་པར་ཤེས་ཏེ། འདི་དག་ནི་དེ་ནས་བླངས་སོ་སྙམ་དུ་རིག་ལ། ཏེན་ཏུ་ཀའི་འབྲས་བུ་དེ་དག་བཙལ་ཏེ་མ་རྙེད་ནས་ཀ་ར་ཀའི་
འབྲས་བུས་འཇིགས་ཤིང་སྐྲག་སྟེ། འཇིགས་པ་དེ་ཉིད་ཀྱིས་འཕྱ་བར་བྱེད་ཅིང་མ་ཉོས་པར་ཕྱིར་དོང་བ་དེ་བཞིན་དུ་རིགས་ཀྱི་བུ་དགེ་འདུན་གང་དག་གཞི་ཆེན་པོ་བརྒྱད་ཤེས་བཞིན་དུ་སྤྱོད་པར་བྱེད་པ་དེར་སྤྱོད་པར་བྱེད་པ་དེས་གལ་ཏེ་ཚུལ་ཁྲིམས་དང་ལྡན་པའི་དགེ་སློང་དག་འཁོད་ན། དེ་དག་
ཇི་ལྟར་ཀ་ར་ཀའི་ཚལ་ན་ཏེན་ཏུ་ཀའི་ཤིང་འདུག་པ་བཞིན་དུ་དེ་དག་མཐོང་ན། དེ་ཚུལ་ཁྲིམས་དང་ལྡན་པ་ཡིན་དུ་ཟིན་ཀྱང་། དགེ་བསྙེན་ཤེས་རབ་ཅན་གྱིས་དེ་དག་ལ་ཕྱག་མི་བྱ་ཞིང་མཆོད་པའི་གནས་སུ་མི་བྱའོ། །གལ་ཏེ་དེ་དག་ལ་ཕྱག་བྱ་བར་འདོད་ན་ཅི་ཁྱོད་གཞི་ཆེན་པོ་

བརྒྱད་ལེན་པར་བྱེད་དམ། འོན་ཏེ་ལེན་པར་མི་བྱེད་ཅེས་དྲིས་ནས་གདོད་ཕྱག་བྱ་སྟེ། ལེན་པར་བྱེད་པ་གང་ཡིན་པ་དེ་དག་དང་ལྷན་ཅིག་ཏུ་སྐབས་དབྱེ་བ་དང་གསོ་སྦྱོང་གི་ལས་རྣམས་བྱེད་དམ་མི་བྱེད་ཅེས་དྲི་བར་བྱའོ། །གལ་ཏེ་འདི་སྐད་ཅེས་ཟེར་ཏེ། དགེ་འདུན་གྱི་གཞི་
ཆེན་པོ་བརྒྱད་ནི་ལེན་པར་བྱེད་དེ། བཅོམ་ལྡན་འདས་སེམས་ཅན་ཐམས་ཅད་ལ་ཐུགས་བརྩེ་བས་ཀྱང་རྒྱལ་བུ་རྒྱལ་བྱེད་ཀྱི་ཚལ་དུ་གསེར་དངུལ་དག་བཞེས་སོ་ཟེར་ལ་དེའི་ནང་ན་ཁ་ཅིག་ལེན་པར་མི་བྱེད་དེ། བདག་ཅག་ནི་ལེན་པར་བྱེད་པ་དག་དང་ལྷན་ཅིག་ཏུ་སྐབས་འབྱེད་
པ་དང་། གསོ་སྦྱོང་དང་། ཐལ་མོ་སྦྱར་བས་གདུད་པའི་ལས་ཀྱང་མི་བྱེད། ཐུག་པ་ཡང་མི་འཐུང་། དེ་དག་ལས་རྙེད་པ་དང་། བཀུར་སྟི་ཡང་མི་ལེན་ནོ་ཞེས་ཟེར་བ་དང་། ལྷའི་ཡང་ལྷ་སངས་རྒྱས་བཅོམ་ལྡན་འདས་དེས་ཀྱང་བཞེས་ན་དགེ་འདུན་གྱིས་བཞེས་པ་ལ་
མི་བཟོད་པ་ཅི་ཡོད་ཅེས་དེ་སྐད་ཟེར་དུ་ཟིན་ཀྱང་དེ་དག་དང་ལྷན་ཅིག་ཏུ་ཁྱེད་སྐབས་འབྱེད་པ་དང་། གསོ་སྦྱོང་དང་། ཐལ་མོ་སྦྱར་བས་གདུད་པའི་ལས་མ་བྱས་གྲང་ཞེས་སྨྲ་བར་བྱེད་དེ། གལ་ཏེ་ཚིག་ཉན་དུ་མི་བཏུབ་པ་དེ་དག་ནི་ཡང་དག་པའི་མདོ་སྡེ་ཤེས་པ་ཡིན་ནོ། །ལེན་པར་
བྱེད་པ་བྱིས་པ་དང་འདྲ་བ་དེ་དག་ནི་སེམས་ཅན་དམྱལ་བ་པ་ཡིན་པར་རིག་པར་བྱ་སྟེ། སེམས་ཅན་དེ་དག་ནི་བྱིས་པ་འཆི་བ་དང་འདྲའོ། །རིགས་ཀྱི་བུ་གཞན་ཡང་དཔེར་ན་གྲོང་ཁྱེར་ཆེན་པོ་ཞིག་གི་སྤོས་ཀྱི་ཚོང་འདུས་དག་ན་སྤོས་མ་དུ་ར་ཀ་དང་། གཞན་ཡང་སྤོས་ཀྱི་སྣ་གྲངས་དང་།
སྨན་རྣམས་ཚོང་བ་དག་འཚོང་བར་བྱེད་ལ། དེ་ན་ཉོ་བའི་སེམས་ཅན་རྣམས་ཀྱིས་གངས་ཀྱི་རི་ལས་བྱུང་བའི་སྨན་ཅི་འདྲ་བ་མི་ཤེས་ནས་དེ་དག་གིས་དྲིས་ཏེ། གལ་ཏེ་གངས་ཀྱི་རི་ལས་བྱུང་བའི་སྤོས་མ་དུ་ར་ཀ་ལྟ་ཅུང་ཟད་ཅི་ཡོད་ན་བྱིན་ཅིག་ཅེས་བྱས་པ་དང་། དེ་གངས་ཀྱི་རི་ལས་
བྱུང་བའི་སྤོས་ལྟར་བཅོས་པ་ལ་གངས་ཀྱི་རི་ལས་བྱུང་བའི་སྤོས་ཡིན་ནོ་ཞེས་བྱས་ཏེ་བྱིན་ནས། དེ་དག་གིས་འདི་ནི་གངས་ཀྱི་རི་ལས་བྱུང་བ་ཡིན་ནོ་སྙམ་དུ་ཡང་དག་པར་ཡིད་ཆེས་ཏེ། བཅོས་མའི་སྤོས་རྣམས་ལེན་པར་བྱེད་པ་དེ་བཞིན་དུ། ཚུལ་ཁྲིམས་འཆལ་པའམ།

ཚུལ་ཁྲིམས་དང་ལྡན་པ་ཡང་རུང་སྟེ། དེ་དག་ལ་འདི་དག་ནི་ཉན་ཐོས་ཀྱི་དགེ་འདུན་ཡང་དག་པ་ཡིན་ནོ། །འདི་དག་ནི་དགེ་འདུན་ཡང་དག་པ་ཡིན་ནོ། །འདི་དག་ནི་དགེ་འདུན་འཐུན་པ་ཡིན་ནོ་སྙམ་དུ་བསམས་ཏེ། ཤའི་མིག་དང་ལྡན་པའི་དགེ་
བསྙེན་དེས་དེ་དག་ལ་ཕྱག་ཀྱང་བྱའོ། །སྦྱིན་པ་ཡང་སྦྱིན་པར་བྱའོ། །ཤའི་མིག་དང་ལྡན་པའི་དགེ་བསྙེན་གྱིས་སྤོས་ཀྱི་ཚོང་འདུས་སུ་གངས་ཀྱི་རི་ལས་བྱུང་བའི་སྨན་བཞིན་དུ་བཅོས་མ་མ་ཡིན་པ་རྟོགས་པར་དཀའོ། །དེ་བཞིན་དུ་ལྷའི་མིག་མེད་པ་བྱེ་བྲག་མི་ཕྱེད་པས་
གངས་ཀྱི་རི་ལས་བྱུང་བའི་སྨན་བཞིན་དུ་འདི་ནི་ཚུལ་ཁྲིམས་དང་ལྡན་པའོ། །འདི་ནི་ཚུལ་ཁྲིམས་འཆལ་པའོ། །དགེ་འདུན་འདི་དག་གཞི་ཆེན་པོ་བརྒྱད་ཀྱི་ཉེས་པ་དང་བྲལ་བ་ཡིན་ནོ་སྙམ་དུ་རྟོགས་པར་མི་ནུས་སོ། །ཚུལ་ཁྲིམས་དང་ལྡན་པ་དང་ཚུལ་ཁྲིམས་འཆལ་པ་
ནི་ལྷའི་མིག་དང་ལྡན་པ་རྣམས་ཀྱི་ཡུལ་ཡིན་གྱི། ཤའི་མིག་དང་ལྡན་པ་རྣམས་ཀྱི་ཡུལ་མ་ཡིན་ནོ། །གལ་ཏེ་མ་དག་པ་མཐོང་ན་ནི་ཇི་སྲིད་དུ་བཤགས་སུ་རུང་བའི་ཉེས་པ་བྱུང་བ་མ་བཤགས་ཀྱི་བར་དུ་དེ་དག་ལ་ཕྱག་ཀྱང་མི་བྱའོ། །སྦྱིན་པ་ཡང་སྦྱིན་པར་མི་བྱའོ། །གཞི་
ཆེན་པོ་བརྒྱད་ལེན་པའི་དགེ་འདུན་དག་ལ་ཇི་སྲིད་དུ་བདག་ཉིད་ཀྱི་ཉེས་པ་བཤགས་སུ་རུང་བ་བཤགས་པས་གངས་ཀྱི་རི་ལས་བྱུང་བའི་སྨན་བཞིན་དུ་དག་པར་མ་གྱུར་གྱི་བར་དུ་གོས་ཚོན་ཅན་བགོས་པ་ཙམ་ལ་ཡིད་བརྟེན་ཏེ་ཕྱག་མི་བྱའོ། །དེ་དག་ལ་སྦྱིན་པ་ཡང་སྦྱིན་པར་
མི་བྱའོ། །གསོལ་པ། བཅོམ་ལྡན་འདས་ལེགས་ལགས་སོ། །ལེགས་ལགས་སོ། །བཅོམ་ལྡན་འདས་ཀྱི་བཀའ་འདི་ནི་ལེགས་པར་གསུངས་པ་ལགས་ཏེ། རྡོ་རྗེ་རིན་པོ་ཆེ་བཞིན་དུ་སྤྱི་བོས་མནོད་པར་འཚལ་ལོ། །འདི་ལ་བཅོམ་ལྡན་འདས་ཀྱིས་
གསུངས་པ། དགེ་སློང་དག་བཞི་པོ་འདི་དག་ནི་རྟེན་བཞིན་ཡིན་ཏེ། བཞི་གང་ཞེ་ན། དགེ་སློང་དག་ཁྱོད་ཀྱི་རྟེན་ནི་ཆོས་ཉིད་ཡིན་གྱི་གང་ཟག་མ་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ། །དགེ་སློང་དག་ཁྱེད་ཀྱི་རྟེན་

ནི་ཡེ་ཤེས་ཡིན་གྱི་རྣམ་པར་ཤེས་པ་མ་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་དོན་ཡིན་གྱི་ཡི་གེ་མ་ཡིན་ནོ། །བདག་ཅག་ལ་ནི་རྟེན་བཞི་པོ་འདི་དག་ཚད་མ་ཡིན་གྱི་གང་ཟག་བཞི་པོ་རྣམས་ཚད་མ་མ་ཡིན་ནོ་ཞེས་བགྱི་བ་ལེགས་པར་གསུངས་སོ། །བཀའ་སྩལ་པ། ཆོས་ཉིད་
ཅེས་བྱ་བ་ནི་དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པའོ། །དེ་བཞིན་གཤེགས་པ་རྟག་པ་དང་། བརྟན་པ་དང་། ཐེར་ཟུག་པའོ་ཞེས་བྱ་བ་འདི་ནི་སངས་རྒྱས་ཐམས་ཅད་ཀྱི་ཆོས་ཉིད་དོ། །དེ་བཞིན་གཤེགས་པ་མི་རྟག་པར་མཐོང་བ་གང་ཡིན་པ་དེ་དག་ནི་ཆོས་ཉིད་མི་ཤེས་
པ་ཡིན་ནོ་ཞེས་ང་ཟེར་རོ། །དེ་དག་ནི་གང་ཟག་ཡིན་ནོ་ཞེས་ང་ཟེར་རོ། །དེ་དག་ནི་ཚད་མ་མ་ཡིན་ནོ་ཞེས་ང་ཟེར་རོ། །དེ་མ་ཡིན་པའི་གང་ཟག་བཞི་པོ་རྣམས་ནི་ཚད་མ་ཡིན་ནོ། །གང་ཟག་བཞི་པོ་དགོངས་པའི་ཚིག་ལ་མཁས་པ་དང་། དེ་བཞིན་གཤེགས་པའི་
གསང་བའི་དེ་ཁོ་ན་ཉིད་ཤེས་པ་དང་། རྟག་པ་ཡིན་པར་ཤེས་པ་གང་ཡིན་པ་དེ་དག་ནི་དེ་བཞིན་གཤེགས་པ་མི་རྟག་གོ་ཞེས་སེམས་སྐྱེད་ཀྱང་མི་སྲིད་དེ། གང་ཟག་བཞི་པོ་དེ་དག་ནི་རང་ཉིད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཡིན་ནོ། །སེམས་ཅན་གཞན་གང་དག་དེ་བཞིན་གཤེགས་པ་རྟག་གོ་ཞེས་བྱ་བའི་དགོངས་པའི་ཚིག་ཐམས་ཅད་ལ་མཁས་པའི་གང་ཟག་དེ་དག་ཀྱང་ཚད་མ་དང་རྟེན་དུ་གྱུར་པ་ཡིན་ནོ་ཞེས་ང་ཟེར་ན་བཞི་པོ་དེ་དག་ལྟ་རྟེན་ཅི་སྟེ་མ་ཡིན། དགེ་སློང་དག་ཁྱེད་ཀྱི་རྟེན་ནི་ཆོས་
ཉིད་ཡིན་ཏེ། ཉན་ཐོས་རྣམས་ཀྱི་མངོན་པར་ཤེས་པ་ཞེས་བྱ་བའི་དོན་དང་། ཆོས་ཉིད་མ་བརྗེད་པར་གྱིས་ཤིག་ཅེས་བྱ་བའི་དོན་ཏོ། །ཆོས་ཉིད་ཅེས་བྱ་བ་ནི་དེ་བཞིན་གཤེགས་པ་རྟག་གོ་ཞེས་བྱ་བ་ལ་བརྩོན་པར་བྱ་བ་ཡིན་གྱི་གང་ཟག་ལ་བརྩོན་པ་མ་ཡིན་ཏེ། གལ་ཏེ་གང་
ཟག་ཚུལ་ཁྲིམས་འཆལ་པ་ཟང་ཟིང་ལ་བརྐམ་པ་རྣམས་དེ་བཞིན་གཤེགས་པ་མི་རྟག་གོ་ཞེས་ཟེར་ན་གང་ཟག་དེ་དག་ནི་ཚད་མ་མ་ཡིན་ནོ་ཞེས་བྱ་བའི་དོན་ཏོ། །དགེ་སློང་དག་ཁྱེད་ཀྱི་རྟེན་ནི་ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ་ཞེས་བྱ་བ་ལ། ངེས་པའི་དོན་ཞེས་

བྱ་བ་ནི་ཐེག་པ་ཆེན་པོ་རྣམས་ཡིན་ཏེ། དགོངས་པའི་ཚིག་དེ་བཞིན་གཤེགས་པའི་གསང་བ་ཐོས་ན། ཐེ་ཙོམ་གྱི་ཉེས་པ་མེད་པའི་ཕྱིར་ངེས་པ་ཞེས་བྱ་སྟེ། ཡེ་ཤེས་ཀྱི་རྒྱ་མཚོ་ཆེན་པོ་ལས་རྒལ་ཅིང་། དེ་ལས་བྱུང་ཞེས་བྱ་བའི་དོན་ཏོ། །ངེས་
པའི་ཡེ་ཤེས་ཐེག་པ་ཆེན་པོ་ཞེས་བྱ་བ་ནི་ཐོགས་པ་མེད་པའི་ཡེ་ཤེས་ལ་བྱའོ། །ཐོགས་པའི་ཡེ་ཤེས་ནི་ཉན་ཐོས་ཀྱི་ཐེག་པ་པའོ། །ངེས་པའི་ཡེ་ཤེས་ནི་ཡེ་ཤེས་ཆེན་པོ་དང་ཐེག་པ་ཆེན་པོ་ཞེས་བྱ་སྟེ། བྱང་ཆུབ་སེམས་དཔའ་གང་དག་དེ་བཞིན་གཤེགས་པ་རྟག་པར་ཡང་དག་
པར་ཁོང་དུ་ཆུད་པ་དེ་དག་ངེས་པར་བྱེད་པས་ན། དེའི་ཕྱིར་བྱང་ཆུབ་སེམས་དཔའ་རྣམས་ཀྱི་ཚིག་ནི་ཚད་མ་ཡིན་གྱི་དྲང་བའི་དོན་ནི་དེ་ལྟ་མ་ཡིན་ནོ། །དེ་བཞིན་གཤེགས་པ་ནི་ཤའི་སྐུ་ཡིན་ཏེ། བུད་ཤིང་ཟད་པའི་མེ་བཞིན་དུ་ཡོངས་སུ་མྱ་ངན་ལས་འདས་སོ་ཞེས་བྱ་བ་འདི་ནི་
ཉན་ཐོས་ཀྱི་ཐེག་པ་ཡིན་ཏེ་ཚད་མ་མ་ཡིན་ནོ། །མདོ་སྡེ་དེ་དག་ནི་གདུལ་བར་བྱ་བའི་དབང་གིས་གསུངས་པ་ཡིན་ཏེ། ཉན་ཐོས་ཀྱི་ཐེག་པ་ནི་ཡི་གེའི་ཕྱེད་སྦྱར་བ་དང་འདྲ་ཞིང་བྱེ་བྲག་ཏུ་འབྱེད་པ་ཡིན་ཏེ། སློབ་དཔོན་བྱེད་པ་མ་ཡིན་ནོ། །ཉན་ཐོས་ཀྱི་ཐེག་པ་པ་རྣམས་ནི་དྲང་
བའི་དོན་རྣམས་ཀྱི་གྲངས་སུ་གཏོགས་སོ། །ཡེ་ཤེས་ལས་གསུངས་པའི་དེ་བཞིན་གཤེགས་པའི་ཆེ་བ་ཉིད་ཁོང་དུ་མ་ཆུད་པའི་ཤེས་པ་གང་ཡིན་པ་དེ་ནི་ཉན་ཐོས་ཀྱི་ཐེག་པ་ཡིན་ཏེ། དེ་བས་ན་དྲང་བའི་དོན་ནི་ཚད་མ་མ་ཡིན་ནོ། །གང་ཟག་བཞི་པོ་དེ་དག་ཚད་མ་མ་ཡིན་ཏེ།
ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ། །དེ་བས་ན་དེ་དག་ནི་རྟེན་དུ་གྱུར་པ་དང་ངེས་པའི་དོན་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་ཡེ་ཤེས་ཡིན་ནོ་ཞེས་བྱ་བ་ནི་དེ་བཞིན་གཤེགས་པའི་ཚིག་བླ་དགས་སོ། །ཆོས་ཀྱི་སྐུ་གང་ཡིན་པ་དེ་ནི་ཚད་མ་མ་ཡིན་ནོ། །ཐབས་ཀྱི་སྐུ་
གང་ཡིན་པ་དེ་ནི་ཚད་མ་མ་ཡིན་ནོ། །ཐབས་ཀྱི་སྐུ་ལ་བལྟས་ན་དེ་བཞིན་གཤེགས་པའི་སྐུ་ལ་ཕུང་པོ་དང་། ཁམས་དང་། སྐྱེ་མཆེད་རྣམས་ཇི་ལྟར་ཡོད། གལ་ཏེ་མེད་ན་ཡང་སྐུ་གདུང་གི་ཕུང་པོ་ག་ལས་འོངས། དེ་བས་ན་སྐུ་གདུང་གི་ཕྱིར་འཇིག་རྟེན་ན་མཆོད་རྟེན་འབྱུང་

བ་ཡོད་ཀྱི་ཆོས་ཀྱི་སྐུ་ནི་འབྱུང་བ་མེད་དོ། །དེ་བཞིན་གཤེགས་པ་ཤའི་སྐུའོ་ཞེས་བྱ་བ་ནི་རྣམ་པར་ཤེས་པ་བརྟག་པ་ལས་བསྟན་ཏེ། རྣམ་པར་ཤེས་པ་ནི་ཚད་མ་མ་ཡིན་ནོ། །དེ་བས་ན་རྣམ་པར་ཤེས་པ་ཚད་མ་མ་ཡིན་ཞེས་བྱའོ། །སེམས་ཅན་གང་དག་དེ་ལྟར་རྟོག་པ་དེ་དག་ཀྱང་ཚད་
མ་མ་ཡིན་ནོ། །དེ་ལྟ་བུའི་མདོ་སྡེ་རྣམས་ཀྱང་ཚད་མ་མ་ཡིན་ནོ། །དགེ་སློང་དག་ཁྱེད་ཀྱི་རྟེན་ནི་དོན་ཡིན་ནོ་ཞེས་བྱ་བ་ལ་དོན་ཞེས་བྱ་བ་ནི་གསལ་བའི་དོན་ཏོ། །གསལ་བའི་དོན་ཞེས་བྱ་བ་ནི་སྣང་བའི་དོན་ཏོ། །སྣང་བའི་དོན་ཞེས་བྱ་བ་ནི་ཞན་པ་མ་ཡིན་པའི་དོན་ཏོ། །ཞན་པ་མ་ཡིན་པའི་དོན་
ཞེས་བྱ་བ་ནི་དེ་བཞིན་གཤེགས་པ་རྟག་ཅེས་བྱ་བའི་དོན་ཏོ། །དེ་བཞིན་གཤེགས་པ་རྟག་པའི་དོན་ཞེས་བྱ་བ་ནི་ཆོས་རྟག་པའི་དོན་ཏོ། །ཆོས་རྟག་པའི་དོན་ཞེས་བྱ་བ་ནི་དགེ་འདུན་རྟག་པའི་དོན་ཏེ་དོན་ནི་དེ་ཡིན་ནོ། །རྟེན་ནི་དེ་ཡིན་ནོ། །ཡི་གེ་མ་ཡིན་ནོ་ཞེས་བྱ་བ་ནི་ཆོག་མི་
ཤེས་པ་དང་། ཡོ་བྱད་མ་བསྙུངས་པ་དང་། འདོད་ཆེན་དང་། ཚུལ་འཆོས་པ་དང་། ཁ་གསག་མེད་པར་འགྱུར་བའི་རང་བཟོའི་ཡི་གེ་དང་། ཚིག་སྣ་ཚོགས་སངས་རྒྱས་ཀྱིས་གསུངས་པ་མ་ཡིན་པའི་མདོ་སྡེའི་རྣམས་ཡིན་ཏེ། བཅོམ་ལྡན་འདས་ཀྱིས་བདག་ཅག་
ལ་ཐུགས་བརྩེ་ནས་མུ་གེ་བྱུང་བའི་ཚེ་ཉིད་ཀྱི་སྲས་རྣམས་ཉོན་མོངས་པར་མི་འགྱུར་བར་མཛད་པའི་ཕྱིར་བྲན་དང་བྲན་མོ་ལ་སོགས་པ་དང་། གཡོས་སུ་བྱས་པ་རྣམ་པ་དུ་མ་གནང་བའི་བསླབ་པའི་གཞི་གསུངས་ཏེ། བྲན་དང་བྲན་མོ་ལ་སོགས་པ་དང་། གསེར་དང་། དངུལ་
དང་། བ་ལང་དང་། མ་ཧེ་དང་། འབྲུ་རྣམས་བསྡུ་བ་དང་། ཉོ་ཚོང་དང་། ཞིང་རྨོ་བ་ལ་སོགས་པ་ངས་གནང་ངོ་ཞེས་གསུངས་སོ་ཞེས་བྱ་བ་ལ་སོགས་པ་དེ་དག་ནི་ཡི་གེ་ཞེས་བྱ་སྟེ། དེ་ལྟ་བུའི་མདོ་སྡེ་དང་འདུལ་བ་ནི་ཚད་མ་མ་ཡིན་ནོ། །དེ་བས་ན་ཡི་གེ་འདོན་པའི་གང་
ཟག་དེ་དག་ཀྱང་ཚད་མ་མ་ཡིན་ཏེ། དེའི་ཕྱིར་དགེ་སློང་དག་ཁྱོད་ཀྱི་རྟེན་ནི་དོན་ཡིན་ནོ་ཞེས་གསུངས་སོ། །དོན་མེད་པ་ཞེས་བྱ་བ་ནི་གཞི་གསུམ་ལ་འཇིག་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པ་ལ་སོགས་པའི་མི་རྟག་པ་ཉིད་ཡོད་པར་ལྟ་བ་

སྟེ། འདི་ནི་དོན་མེད་པ་ཞེས་བྱའོ། །འདི་ནི་ཡི་གེ་ཞེས་བྱའོ། །དེ་བས་ན་དགེ་སློང་དག་ཁྱེད་ཀྱི་རྟེན་ནི་དོན་ཡིན་གྱི་ཡི་གེ་མ་ཡིན་ནོ་ཞེས་གསུངས་སོ། །དོན་གྱི་ཕྱོགས་ནི་ཐེག་པ་ཆེན་པོ་པ་རྣམས་ཡིན་ཏེ། དེ་བས་ན་ཐེག་པ་ཆེན་པོ་པ་རྣམས་ཚད་མ་
ཡིན་གྱི་འདི་ལས་ཕྱི་རོལ་པ་ཡི་གེ་ལ་རྟེན་པ་རྣམས་ནི་དེ་ལྟ་མ་ཡིན་ཏེ། དེ་བས་ན་དེ་དག་ནི་རྟེན་མ་ཡིན་མོད་ཀྱི། ཤའི་མིག་དང་ལྡན་པ་རྣམས་ཀྱི་ཕྱིར་བཞག་པ་ཡིན་ནོ། །གསོལ་པ། སྔར་བཀའ་སྩལ་པའི་གང་ཟག་བཞི་པོ་རྣམས་རྟེན་དུ་གྱུར་པ་ཞེས་བགྱི་ལགས་
སམ། བཀའ་སྩལ་པ། རིགས་ཀྱི་བུ་དེ་ནི་དེ་བཞིན་ཏེ། བཞི་པོ་རྣམས་རྟེན་ཡིན་པར་རིག་པར་བྱའོ། །དེ་མ་ཡིན་པ་བཞི་པོ་རྣམས་ནི་བདུད་ཡིན་ནོ་ཞེས་ང་ཟེར་རོ། །གསོལ་པ། ཅིའི་སླད་དུ་དེ་ལྟ་ལགས། བཀའ་སྩལ་པ། དེ་དག་ནི་བདུད་ཀྱིས་སྨྲས་པའི་
མདོ་སྡེ་འཛིན་པའི་ཕྱིར་རོ། །གསོལ་པ་དེ་ཇི་ལྟ་བུ་ལགས། བཀའ་སྩལ་པ། ཇི་ལྟར་བདུད་བཞི་དེ་བཞིན་གཤེགས་པ་ལ་བདོ་ཞིང་འདི་ནི་བདུད་ཀྱིས་སྨྲས་པ་ཡིན་གྱི། སངས་རྒྱས་ཀྱིས་གསུངས་པ་མ་ཡིན་ནོ། །སེམས་ཅན་འདི་དག་ནི་བདུད་དང་འཐུན་པར་བྱེད་
པ་ཡིན་གྱི། སངས་རྒྱས་དང་འཐུན་པར་བྱེད་པ་མ་ཡིན་ནོ་ཞེས་ཟེར་བ་ལྟ་བུའོ། །གསོལ་པ། བཅོམ་ལྡན་འདས་བདག་ནི་བདུད་ཀྱིས་སྨྲས་པ་དང་སངས་རྒྱས་ཀྱིས་གསུངས་པ་ཁོང་དུ་ཆུད་པར་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་
བུ་བདུད་སྡིག་ཅན་གྱིས་ནི་ང་འདས་པའི་འོག་ཏུ་ལོ་བདུན་བརྒྱ་ལོན་པ་ན་ངའི་བསྟན་པ་ཕྱེ་ཞིང་ཕྱེ་ཞིང་བཤིག་པར་འགྱུར་ཏེ། དམ་པའི་ཆོས་ནུབ་པའི་ཚེ་བདུད་སྡིག་ཅན་ཟག་པ་ཅན་གྱིས་ཟག་པ་མེད་པ་ལྟ་བུར་བསྒྱུར་ཏེ། བྱ་བའི་རྟགས་ཀྱི་ཚུལ་སྦེད་པ་བཞིན་དུ་དགེ་སློང་གི་
གཟུགས་དང་། དགེ་སློང་མའི་གཟུགས་དང་། དགེ་བསྙེན་གྱི་གཟུགས་དང་། དགེ་བསྙེན་མའི་གཟུགས་དང་། རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་ཀྱི་གཟུགས་

དང་། སངས་རྒྱས་ཀྱི་གཟུགས་ཀྱིས་བཤིག་པར་འགྱུར་ཏེ། དེ་འདི་སྐད་ཅེས་ཟེར་ཞིང་སངས་རྒྱས་ནི་དགའ་ལྡན་གྱི་གནས་ནས་ཤི་འཕོས་ཏེ། རྒྱལ་པོ་ཟས་གཙང་དང་བཙུན་མོ་སྒྱུ་འཕྲུལ་ཕྲད་པ་ན་ཟླ་མཚན་གྱི་བྱེ་བྲག་གིས་འཁྲིག་པའི་ཆོས་ལས་སྐྱེས་སོ་ཞེས་ཟེར་ལ།
དེ་བཞིན་གཤེགས་པ་ནི་འཁྲིག་པ་ལས་སྐྱེ་མི་སྲིད་དོ། །དེ་ལ་མིང་ཙམ་དུ་སྐྱེས་པ་ལས་སྔོན་དཀའ་ཐུབ་སྤྱད་པའི་ཡོན་ཏན་གྱིས་ལྷ་དང་། མི་དང་། ལྷ་མ་ཡིན་དང་བཅས་པའི་འཇིག་རྟེན་གྱིས་མཆོད་ཅིང་བརྗོད་པར་འགྱུར་ཏེ། བདག་ནི་ཆུང་མ་དང་འདོད་པ་རྣམ་པ་སྣ་ཚོགས་
ཀྱི་སྦྱིན་པ་བྱིན་པས་ན་སངས་རྒྱས་སུ་གྱུར་ཏོ་ཞེས་ཟེར་བ་དེ་ལྟ་བུ་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ནི་གདུལ་བར་བྱ་བའི་དབང་གིས་སྐྱེས་པ་ལྟ་བུར་བདག་ཉིད་ཀྱིས་
བསྟན་མོད་ཀྱི། འཁྲིག་པ་ལས་སྐྱེས་པ་མ་ཡིན་ནོ། །དེ་བཞིན་གཤེགས་པས་ཡབ་ཡུམ་གཉིས་ཡོད་པ་ལྟ་བུར་བསྟན་པ་འདི་ནི་འཇིག་རྟེན་དང་འཐུན་པར་མཛད་པ་ཡིན་ནོ་ཞེས་ཟེར་བ་དེ་ལྟ་བུ་ནི་དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་
ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །
དེ་བཞིན་གཤེགས་པ་འཇིག་རྟེན་དུ་བྱུང་ནས་ཕྱོགས་དང་ཕྱོགས་མཚམས་རྣམས་སུ་གོམ་པ་བདུན་བདུན་གཤེགས་པར་བསྟན་ཏོ་ཞེས་བྱ་བ་འདི་ནི་ཡིད་ཆེས་པར་བྱ་བར་མི་རུང་སྟེ། དེ་ལྟ་བུའི་མདོ་སྡེ་དང་འདུལ་བ་ནི་བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་
པ་བྱུང་ནས་ཕྱོགས་དང་ཕྱོགས་མཚམས་རྣམས་སུ་གོམ་པ་བདུན་བདུན་གཤེགས་པར་བསྟན་པ་ནི་དེ་བཞིན་གཤེགས་པའི་ཐབས་ཀྱི་སྐུ་འཛིན་པ་ཡིན་ནོ་ཞེས་ཟེར་བ་དེ་ལྟ་བུ་ནི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་།

འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་
བཞིན་གཤེགས་པ་ལྷ་ཁང་དུ་གཤེགས་ཏེ་བྱོན་ནས་ལྷ་རྣམས་ཀྱི་ཞབས་ལ་ཕྱག་བཞེས་ཏེ། ལྷ་རྣམས་ནི་དེ་བཞིན་གཤེགས་པའི་ཞབས་ལ་མགོ་བོས་ཕྱག་མི་འཚལ་ལོ། །ལྷ་རྣམས་ལ་མཆོད་པ་མཛད་པའི་འོག་ཏུ་དེ་བཞིན་གཤེགས་པར་གྱུར་ནས་མངོན་པར་སངས་རྒྱས་ཏེ།
ལྷ་རྣམས་ནི་སྔ། འདི་ནི་འཕྱི་བས་ན་དེའི་ཕྱིར་མངོན་པར་རྫོགས་པར་སངས་རྒྱས་པ་ཞེས་བྱའོ་ཞེས་ཟེར་བ་ལ་སོགས་པ་ནི་བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་པ་ལྷ་ཁང་དུ་གཤེགས་ཏེ་བྱོན་པ་མཐོང་ནས་དབང་ཕྱུག་དང་། དབང་ཕྱུག་ཆེན་པོ་དང་། ཚངས་
པ་དང་། བརྒྱ་བྱིན་ལ་སོགས་པ་ལྷ་ཐམས་ཅད་ཀྱིས་ཐལ་མོ་ལེགས་པར་སྦྱར་ཏེ་ཞབས་ལ་སྤྱི་བོས་གཏུགས་སོ་ཞེས་ཟེར་བ་ལྟ་བུ་ནི་དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་
སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་རྒྱལ་ཚབ་ཏུ་གྱུར་ཏེ་ཉེ་འདབ་
ཀྱི་རྒྱལ་པོའི་བུ་མོ་དག་དང་ལྷན་ཅིག་ཏུ་འདོད་པ་ཤིན་ཏུ་བསྟེན་ཏོ་ཞེས་ཟེར་བ་ལ་སོགས་པ་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །དེ་བཞིན་གཤེགས་པས་ནི་ལྷའི་བུ་མོ་རམ་བྷ་ལྟ་བུའི་བུད་མེད་དག་ཀྱང་མཆིལ་མ་བཞིན་དུ་བོར་ནས་ཁྱིམ་ནས་ཁྱིམ་
མེད་པར་རབ་ཏུ་བྱུང་ངོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་སངས་རྒྱས་ཀྱིས་གསུངས་པ་ཡིན་པར་རིག་པར་བལྟ་བར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །

སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འཇིག་རྟེན་ཐམས་ཅད་ལ་ཐུགས་བརྩེ་བའི་ཕྱིར་རྒྱལ་
བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱིག་དང་། གསེར་དང་། བྲན་དང་། བྲན་མོ་དང་། བ་ལང་དང་། མ་ཧེ་དང་། ར་དང་། ལུག་དང་། བྱ་གག་དང་། ཕག་དང་། ཁྱི་དང་། བྱི་ལ་དང་། སྦྲུལ་དང་། ནེའུ་ལེ་དང་། ཟངས་དང་།
ལྕགས་ཟངས་དང་། ནོར་བུ་དང་། མུ་ཏིག་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། འཚོག་ཆས་རྣམ་པ་སྣ་ཚོགས་དང་། ཞིང་ས་དང་། ཚོང་འདུས་དང་། སྲང་དང་། ཉོ་ཚོང་བྱེད་པ་དང་། ཁྱེའུ་དང་། བུ་མོ་དང་།
མཛོད་དང་། བང་བ་རྣམས་བཞེས་སོ་ཞེས་ཟེར་བ་དེ་ལྟ་བུ་ནི་བདུད་ཀྱིས་སྨྲས་པའི་མདོ་སྡེ་དང་། འདུལ་བ་ཡིན་པར་རིག་པར་བྱའོ། །རྒྱལ་བུ་རྒྱལ་བྱེད་ཀྱི་ཚལ་ན་འདམ་བུ་དང་། ཨེ་རཎྜའི་ཚལ་དང་། ཤིང་པི་ཙུ་མརྡའི་དྲུང་ན་བཞུགས་པའི་ཚེ་བྲམ་ཟེ་ལུག་དཔལ་དང་།
ཀོ་ས་ལའི་རྒྱལ་པོ་གསལ་རྒྱལ་ལས་བརྩམས་ཏེ་བཀའ་སྩལ་པ། དབྱིག་དང་། གསེར་དང་། བྲན་དང་། བྲན་མོ་དང་། བ་ལང་དང་། མ་ཧེ་དང་། ར་དང་། ལུག་དང་། བྱ་གག་དང་། ཕག་དང་། ཁྱི་དང་། བྱི་ལ་དང་། སྦྲུལ་དང་། ནེའུ་ལེ་དང་། ཟངས་
དང་། ལྕགས་ཟངས་དང་། ནོར་བུ་དང་། མུ་ཏིག་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། ནོར་དང་། འཚོག་ཆས་རྣམ་པ་སྣ་ཚོགས་འཆང་བ་དང་། ཞིང་ས་དང་། ཚོང་འདུས་དང་། སྲང་དང་། ཉོ་ཚོང་བྱེད་པ་དང་།
ཁྱེའུ་དང་། བུ་མོ་དང་། མཛོད་དང་། བང་བ་འཆང་བ་དང་། རང་ལག་དར་ཏེ་གཡོས་བྱེད་པ་དང་། འཚེད་པ་དང་། འཚེད་དུ་འཇུག་པ་དང་། ལྟས་དང་། ཡན་ལག་གི་རིག་པ་དང་། མོ་ཡིག་དང་། ཁ་ཏོན་འདོན་པ་དང་། བྱ་ལྟས་ཤེས་པ་དང་། སྒྲ་གཅན་

དང་། ཉི་མ་དང་། ཟླ་བ་དང་། པ་བ་སངས་དང་། གཟའ་ལྷག་རྒྱུ་བ་དང་། མེ་ཏོག་གི་ཤིང་རྟ་དང་། ལག་སྲུབས་ལྟ་བ་དང་། རྨི་ལྟས་དང་། སྐྱེས་པ་དང་། བུད་མེད་དང་། མ་ནིང་གི་མཚན་མ་ལྟ་བ་དང་། སྒྱུ་རྩལ་དྲུག་ཅུ་རྩ་བཞི་དང་། རིག་
པའི་གནས་བཅོ་བརྒྱད་དང་། མཁན་བཟོ་བ་དང་། བཟོའི་ལས་ཐམས་ཅད་སྟོན་པ་དང་། སྒྲུང་གཏམ་བྱེད་པ་དང་། སྤོས་ཀྱི་ཕྱེ་མས་འདེབས་པ་དང་། མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་འཆང་བ་དང་། མགོ་བོ་ལ་འོ་བྱེད་པ་
དང་། ཚུལ་འཆོས་པ་དང་། ཁ་གསག་བྱེད་པ་དང་། ཆོག་མི་ཤེས་པ་དང་། འདོད་ཆེན་ཅན་དང་། འདུ་འཛི་ལ་དགའ་བ་དང་། སྨྲ་འདོད་པ་དང་། ནོར་དང་། འབྲུ་དང་། ཤ་དང་། ཉ་ཤ་དང་། དུག་སྦྱོར་བ་དང་། སྤོས་ཀྱི་ཏིལ་མར་དང་། སྨན་གྱི་སྦུ་གུ་
དང་། གདུགས་དང་། ལྷམ་དང་། ཏ་ལའི་ལོ་མའི་བསིལ་ཡབ་དང་། ཆབ་སྣོད་དང་། བུ་དོན་དང་། བེང་དཔུང་འཆང་བ་དང་། ཤིང་ཏོག་སྡུད་པ་དང་། སོ་རྩི་དང་། སྨན་མར་དང་། བཙོ་བའི་ཕྱེ་མ་བཟང་པོ་དང་། ཀ་ཀོ་ལ་དང་། འབྲས་བུ་ཚ་བ་སྟེན་པ་དང་། རྒྱལ་
པོ་ལ་སྟེན་པ་དང་། གཞན་ལ་སྟེན་པ་དང་། དྲོད་མི་ཐུབ་པ་དང་། མི་སྨྲ་བ་དང་། བུད་མེད་ལྟར་རྟོག་པའི་ཤས་ཆེ་བ་དང་། མང་དུ་སྨྲ་བ་དང་། ངུ་བ་དང་། བཟང་ངན་དཔྱོད་པ་དང་། སུན་འབྱིན་པ་དང་། འགྲོས་འཆོས་པ་དང་། གོས་དཀར་པོ་དང་། ཨར་མོ་ནིག་དང་། ཁང་
བཟངས་དང་། གཙང་ཁང་ཕྱུར་པོའི་ལས་ལ་སོགས་པ་བྱེད་པ་དང་། རུང་བ་མ་ཡིན་པ་དང་། རྫས་ངན་པ་ཡོངས་སུ་འཛིན་པ་དང་། སྦྱིན་པ་པོའི་བསྔགས་པ་བརྗོད་པ་དང་། ཆང་སྟེན་པ་དང་། སྨད་འཚོང་མའི་ཁྱིམ་དུ་འགྲོ་བ་དང་། དེ་ལྟ་བུ་བྱེད་པ་དམ་པ་མ་ཡིན་པ་ཚུལ་
ངན་པ་དང་ལྡན་པ་དེ་དག་ལ་ནི་གོས་དཀར་པོ་དག་བྱིན་ལ་འཇིག་རྟེན་པའི་ལས་རྣམས་བྱེད་དུ་གཞུག་པར་ངས་གནང་ངོ་། །ཡང་ན་འབྲས་སཱ་ལུའི་ཞིང་གི་རྡོ་བསལ་བ་བཞིན་དུ་ཡུལ་ཕྱོགས་ནས་བསྐྲད་པར་ངས་གནང་ངོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་སངས་རྒྱས་ཀྱིས་

གསུངས་པ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་
དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་ནི་ཚངས་པ་དང་། འབྱུང་པོ་དང་། སྐེམ་བྱེད་དང་། གཞོན་ནུ་དང་། འཇིག་རྟེན་གྱི་མེས་པོ་དང་། ཀ་ཏ་ཡ་ན་ལ་སོགས་པའི་ལྷའི་གནས་ཐམས་ཅད་དུ་དེ་དག་གི་རྒྱགས་པ་གཞོམ་པའི་ཕྱིར་མི་གཤེགས་ཏེ་གཤེགས་མི་སྲིད་དོ། །ཡ་མཚན་
ཅན་ཐམས་ཅད་ཀྱི་ནང་དུ་རབ་ཏུ་མི་འབྱུང་ངོ་། །སེམས་ཅན་ཐམས་ཅད་ཀྱི་ཀུན་ཏུ་རྟོག་པའི་སྟོན་པ་མ་ཡིན་ནོ། །གསང་སྔགས་དང་རིག་སྔགས་ཐམས་ཅད་མི་འཆང་ངོ་། །ཁོལ་པོ་དང་། བྲན་དང་། བྲན་མོ་དང་། འདུམ་པ་དང་། འཐབ་པ་སྦྱོར་བ་མི་མཛད་དོ། །སྐྱེས་པ་དང་། བུད་མེད་དང་། སྨན་དང་།
རྒྱལ་པོ་དང་། བློན་པོ་གཅེས་པར་མི་མཛད་དོ། །གལ་ཏེ་དེ་བཞིན་གཤེགས་པ་དེ་ལྟ་བུར་གྱུར་ན་དེ་བཞིན་གཤེགས་པ་ཡང་མ་ཡིན་ཏེ་ལོག་པར་ལྟ་བ་ཞེས་བརྗོད་པར་བྱའོ། །དེ་བཞིན་གཤེགས་པ་ནི་སྟེའུ་དང་ཙན་དན་དུ་མཚུངས་ཏེ་སུ་ལ་ཡང་ཚར་གཅོད་པར་མི་མཛད། ཕན་འདོགས་པ་ཡང་མི་མཛད་
དོ། །དེ་བས་ན་དེ་བཞིན་གཤེགས་པ་ནི་དབུ་མའི་ལམ་གཟིགས་པ་ཞེས་བྱའོ་ཞེས་ཟེར་བ་དེ་ལྟ་བུ་ནི་མགོ་རྨོངས་པར་བྱེད་པའི་མདོ་སྡེ་བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་པ་ནི་ལྷའི་གནས་ཐམས་ཅད་དུ་གཤེགས་སོ། །ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་
ངོ་། །སེམས་ཅན་ཐམས་ཅད་ཀྱི་ཀུན་ཏུ་རྟོག་པ་སྟོན་ཏོ། །གསང་སྔགས་དང་། རིག་སྔགས་དང་། སྨན་ནོ་ཅོག་ལྟ་བུར་གྱུར་པ་དེ་དག་སྦྱོར་བར་མཛད་དོ། །འདུན་མའི་ནང་དང་། རོལ་མོའི་གནས་སུ་གཤེགས་སོ། །བྲན་དང་། བྲན་མོ་དང་། སེམས་ཅན་ཐམས་ཅད་སྡུད་པར་
མཛད་དོ། །གཞོན་ནུ་དང་། གཞོན་ནུ་མ་དང་། བཙུན་མོའི་འཁོར་དང་། ཕོ་བྲང་འཁོར་གྱི་མི་དང་། ཡུལ་མི་དང་། ཁྱིམ་བདག་དང་། བྲམ་ཟེ་དང་། ཡི་དགས་དང་། མགོན་མེད་པ་དང་། སྐྱེས་པ་དང་། བུད་མེད་རྣམས་ཀྱི་ལུས་རྣམ་པ་སྣ་ཚོགས་ཀྱང་

སྟོན་ལ། འཇིག་རྟེན་ཐམས་ཅད་སྡུག་བསྔལ་ལས་བསྒྲལ་བའི་ཕྱིར་དེ་དང་དེར་གཤེགས་པ་ན་ཡང་པད་མ་ཆུས་མི་ཆགས་པ་བཞིན་དུ་ལྟ་བ་རྣམས་ཀྱིས་གོས་པར་མི་འགྱུར་བར་ཁོང་དུ་ཆུད་པ་སྟེ། འདི་ནི་འཇིག་རྟེན་ཐམས་ཅད་དང་འཐུན་པར་མཛད་པ་
ཡིན་ནོ་ཞེས་ཟེར་བ་དེ་ལྟ་བུ་ནི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་
གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །འདི་ལྟར་ངེད་ཀྱི་འདུལ་བ་ལས་ནི་སྡིག་པ་དང་། ཉེས་བྱས་དང་། ཉེས་པ་ཡང་བ་དང་། ལྕི་བ་དང་། ཉེས་པ་སྦོམ་པོ་དག་རང་བཞིན་གྱིས་སྤང་བར་བྱ་བ་
ཡིན་པའི་ཕྱིར་སྤང་བར་བཅོམ་ལྡན་འདས་ཀྱིས་གསུངས་ཏེ། དེ་ལྟ་བུ་ནི་ངེད་ཀྱི་འདུལ་བ་དང་འཐུན་པ་ཡིན་གྱི་ཁྱེད་ཀྱི་འདུལ་བ་དང་འཐུན་པ་མ་ཡིན་ན། ཅིའི་ཕྱིར་བདག་ཅག་ཉིད་ཀྱི་འདུལ་བ་ལས་འགལ་བར་བྱས་ཏེ། ཁྱེད་ཀྱི་འདུལ་བ་བླང་བར་བྱ། ཁྱེད་ཀྱི་འདུལ་བ་ནི་རང་བཟོ་བྱས་
པ་ཡིན་ལ། ངེད་ཀྱི་འདུལ་བ་ནི་བཅོམ་ལྡན་འདས་ཀྱིས་གསུངས་པ་ཡིན་ནོ། །བཅོམ་ལྡན་འདས་ཀྱིས་ནི་གསུང་རབ་ཡན་ལག་དགུ་ལས་ཕྱག་རྒྱ་དགུ་མཛད་ཅེས་གྲགས་ཏེ། བཅོམ་ལྡན་འདས་ཀྱིས་ཕྱག་རྒྱ་དགུ་པོ་དེ་རྣམས་ཀྱིས་ཕྱག་རྒྱས་བཏབ་པོ། །བདག་ཅག་གིས་ནི་
ཤིན་ཏུ་རྒྱས་པ་ཞེས་བྱ་བའི་སྒྲ་ཚིག་དང་། ཡི་གེ་དང་། ཐིག་ལེ་གཅིག་ཀྱང་སྔོན་མ་ཐོས་སོ། །བཅོམ་ལྡན་འདས་ཀྱིས་མདོ་སྡེ་དུ་ཞིག་གསུངས། མདོ་སྡེ་བཅུ་ཞིག་གསུངས་སམ། བདག་ཅག་གི་གསུང་རབ་ལ་ནི་ཤིན་ཏུ་རྒྱས་པ་ཞེས་བྱ་བའི་སྒྲ་ཡང་མེད་དོ། །འདི་
དག་ནི་མ་ལུས་པར་ལྷས་བྱིན་གྱིས་བྱས་པ་ཡིན་ཏེ། དོན་ཐམས་ཅད་མ་རུངས་པར་བྱས་ནས་རྩོད་པར་བྱེད་དེ། ཤིན་ཏུ་རྒྱས་པ་ནི་རང་གིས་རང་བཟོར་བྱས་པས་མི་བཙན་གྱི་ངེད་ཀྱི་འདུལ་བ་ནི་དམ་པ་ཡིན་ནོ། །ངེད་ཀྱི་ནི་འདི་ལྟ་བུ་ཡིན་ནོ། །ངེད་ཀྱི་ནི་འདི་ལྟ་བུ་ཡིན་ནོ་

ཞེས་བསྟན་པ་མ་རུང་བར་བྱ་བའི་ཕྱིར་སྦྱར་བ་ཤིན་ཏུ་རྒྱས་པ་སྤོང་བར་བྱེད་པ་འདི་ནི་བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །མ་འོངས་པའི་དུས་ན་ཡང་ངེད་ཀྱི་འདུལ་བ་ནི་འདི་ལྟ་བུ་ཡིན་ནོ། །ངེད་ཀྱི་འདུལ་བ་ལས་ནི་བཅོམ་ལྡན་འདས་ཀྱིས་
འདི་སྐད་ཅེས་གསུངས་སོ་ཞེས་ལོག་པའི་འདུལ་བ་དང་མདོ་སྡེ་སྨྲ་བའི་དགེ་སློང་དག་འབྱུང་བར་འགྱུར་རོ། །ངས་ནི་ཐེག་པ་ཆེན་པོ་གསུང་རབ་ཡན་ལག་དགུ་ལས་རྒྱུད་ཕྱི་མ་ཐེག་པ་ཆེན་པོ་ཤིན་ཏུ་རྒྱས་པར་བསྟན་ཏོ། །ངའི་དྲུང་ན་ལྷན་ཅིག་ཏུ་སྒྲུབ་པ་གང་ཡིན་པ་དེ་དག་
ནི་ལོག་པའི་འདུལ་བ་དང་། ལྟ་བ་སྨྲ་བ་མ་ཡིན་ནོ། །ངའི་བསྟན་པ་ནི་རུང་བ་མ་ཡིན་པ་ཐམས་ཅད་སྤངས་པ། རྣམ་པར་དག་པ། དྲི་མ་མེད་པ། ཟླ་བ་ཉ་བ་དང་འདྲ་བ་ཡིན་ཏེ། མདོ་སྡེ་རེ་རེ་དང་། འདུལ་བ་རེ་རེ་དང་། བསླབ་པའི་གཞི་རེ་རེའི་དོན་གང་
གཱའི་ཀླུང་གི་བྱེ་མ་སྙེད་དུ་བསྟན་ལ་དེ་དག་ཀྱང་སྒྲའི་རྣམ་གྲངས་རྣམ་པ་སྣ་ཚོགས་ཀྱིས་བསྟན་ཏོ། །ངེད་ཀྱི་འདུལ་བ་ལ་བསླབ་པའི་གཞི་གང་དང་གང་མེད་པ་དེ་དང་དེ་དག་ནི་བཅོམ་ལྡན་འདས་ཀྱིས་མ་གསུངས་སོ་ཞེས་དེ་སྐད་ཟེར་བ་གང་ཡིན་པ་དེ་དང་དེ་དག་ལ་ནི་ཉེས་
པ་འབྱུང་བར་འགྱུར་རོ། །གང་དག་བདག་ཅག་གིས་གཟུང་བས་མི་ལང་སྟེ། ཆོག་ཤེས་པ་དང་། ཡོ་བྱད་བསྙུངས་པ་ལྷུར་ལེན་པ་དང་། སངས་རྒྱས་ཀྱིས་གསུངས་པ་ཡིན་པར་འོས་པ་གང་དང་གང་ཡིན་པ་དེ་དང་དེ་དག་ནི་སེམས་ཅན་ཐམས་ཅད་ལ་ཕན་པ་
དང་ཐུགས་བརྩེ་བའི་ཕྱིར་ཐེག་པ་ཆེན་པོའི་ཚུལ་དུ་གསུངས་པས་ན་བདག་ཅག་གིས་ཀྱང་ཤིན་ཏུ་རྒྱས་པ་ཞེས་བྱ་བ་བཤད་པར་བྱའོ། །ཞེས་དེ་ལྟར་དམ་འཆའ་བར་བྱེད་པ་གང་ཡིན་པ་དེ་དག་གི་སྟོན་པ་ནི་ང་ཡིན་གྱི་དེ་མ་ཡིན་པ་རྣམས་ཀྱི་སྟོན་པ་ནི་ང་མ་ཡིན་ནོ། །དེ་དག་
ནི་ངའི་ཕྱིར་རབ་ཏུ་བྱུང་བ་མ་ཡིན་ཏེ། དེ་དག་ཐམས་ཅད་ནི་མུ་སྟེགས་པའི་བུ་ཡིན་ནོ་ཞེས་ཟེར་བ་དེ་ལྟ་བུ་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ་ཞེས་དེ་སྐད་སྨྲོས་ཤིག །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་

སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་
པ་ནི་ཡོན་ཏན་དཔག་ཏུ་མེད་པ་དང་ལྡན་པ་མ་ཡིན་ནོ། །མི་རྟག་གོ། །ཡོངས་སུ་མྱ་ངན་ལས་འདས་པའོ། །སྟོང་པར་གྱུར་པའོ། །བདག་མེད་པ་སྟོན་པའོ། །འཇིག་རྟེན་དང་འཐུན་པར་བྱེད་པ་མ་ཡིན་ནོ་ཞེས་ཟེར་བ་དེ་ལྟ་བུའི་མདོ་སྡེ་ནི་བདུད་ཀྱིས་སྨྲས་པའི་མདོ་སྡེ་
དང་འདུལ་བ་ཡིན་པར་རིག་པར་བྱའོ། །སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་ཅིང་ཡོན་ཏན་བསམ་གྱིས་མི་ཁྱབ། དཔག་ཏུ་མེད། གྲངས་མེད་པ་དང་ལྡན་པ་ཡིན་ནོ། །རྟག་པའོ། །བརྟན་པའོ། །ཐེར་ཟུག་པའོ་ཞེས་ང་ཟེར་རོ་ཞེས་དེ་སྐད་
སྨྲ་བ་ལ་ནི་ཏ་ལའི་མགོ་བཅད་པ་བཞིན་དུ་ཕམ་པར་གྱུར་པ་ཞེས་བརྗོད་པར་མི་བྱའོ། །ཕམ་པའི་ཆོས་བཞི་ཞེས་བྱ་བ་ནི་བཅོམ་ལྡན་འདས་ཀྱིས་གསུངས་པ་རྣམ་པ་བཞི་ཅར་ལྟ་ཅི་སྨོས་ཏེ། ཕམ་པ་བཞིའི་ནང་ནས་ཕམ་པ་གང་ཡང་རུང་བ་ཞིག་བྱུང་ན་ཡང་རྡོ་ཆག་པའི་འཕྲོ་བཞིན་
དུ་འགྱུར་རོ་ཞེས་རྒྱུད་ཕྱི་མའི་ཡང་ཕྱི་མ་གཞུང་རྫོགས་པ་ལས་མིའི་ཆོས་ལས་བླ་མར་གྱུར་པའི་སྐབས་ནས་གསུངས་པ་ཡིན་ནོ། །དེ་ཅིའི་སླད་དུ་ཞེ་ན། བདག་ནི་འབྲས་བུ་ཐོབ་པ་ཡིན་ནོ་ཞེས་འཆབ་པའི་དོན་ཏོ། རྒྱུད་ཕྱི་མའི་ཡང་ཕྱི་མ་ལས་མིའི་ཆོས་སུ་དབབ་པ་ངས་
གསུངས་པ་ནི་འདི་ན་དགེ་སློང་འདོད་པ་ཉུང་བ་ཆོག་ཤེས་པ་ལ་ལ་ཞིག་གནས་པ་དེ་རྒྱལ་པོའམ། རྒྱལ་པོའི་བློན་པོ་ཆེན་པོ་དག་གིས་མཐོང་ན་འབྲས་བུ་ཐོབ་པ་ཡིན་པར་སེམས་ཏེ། ཚིགས་སུ་བཅད་པའི་ཚུལ་སྦྱར་བའི་ཐབས་སྣ་ཚོགས་ཀྱིས་སྟོད་པར་བྱེད་ཅེས་
བཙུན་པ་འདི་ནི་ལུས་དང་བྲལ་ཏེ་ཤི་བའི་འོག་ཏུ་སངས་རྒྱས་སུ་འགྱུར་རོ་ཞེས་ཟེར་བ་དགེ་སློང་དེས་དེ་དག་ལས་མངོན་སུམ་དུ་ཐོས་ནས་འདི་སྐད་ཅེས་ཟེར་ཏེ། འབྲས་བུ་མ་ཐོབ་པའི་གང་ཟག་ལ་འབྲས་བུ་ཐོབ་པ་བཞིན་དུ་བསྟོད་པར་མ་བྱེད་ཅིག །ཆེ་འདོད་པ་ནི་སངས་

རྒྱས་ཀྱིས་སྨད་དོ། །ཅང་མི་སྨྲ་བ་ནི་སངས་རྒྱས་ཀྱིས་བསྔགས་སོ། །བདག་ནི་ཇི་སྲིད་འཚོའི་བར་དུ་ཡང་ཆོས་འདི་ལྟ་བུ་ལ་དགའ་བ་མ་ཡིན་གྱིས་འདི་ལྟར་བདག་ཆེ་འདོད་པ་ལ་གཞག་པར་མ་བྱེད་ཅིག །བདག་ནི་འབྲས་བུ་ཐོབ་པ་མ་ཡིན་པར་བདག་ཉིད་ཀྱིས་ཤེས་སོ་
ཞེས་ཟེར་བ་དང་། རྒྱལ་པོ་ཤེས་རབ་ཅན་གྱིས་བཙུན་པ་འདི་ནི་འབྲས་བུ་ཐོབ་པ་སྟེ། སངས་རྒྱས་ཡིན་ནོ་སྙམ་ནས་འཇིག་རྟེན་ཐམས་ཅད་དུ་མཁས་པ་རྣམས་ཀྱི་ནང་དུ་སྒྲོགས་པར་བྱེད་ཅིང་བཙུན་མོའི་འཁོར་དང་སྲས་རྣམས་ལ་ཡང་སྙན་དངགས་བཞིན་དུ་མདོ་རྣམས་
སློབ་ཏུ་འཇུག་སྟེ། དེ་ལྟར་བྱས་ན་ཡང་སྟོད་པར་བྱེད་པའི་རྒྱལ་པོ་དང་བློན་པོ་རྣམས་ལ་བསོད་ནམས་མང་དུ་འཕེལ་བར་འགྱུར་རོ། །དགེ་སློང་དེ་ནི་ཚངས་པར་སྤྱོད་པ་ཚུལ་ཁྲིམས་དང་ལྡན་པ་ཙམ་དུ་ཟད་དེ་དགེ་སློང་དེ་ཡང་ཕམ་པ་བྱུང་བ་མ་ཡིན་ནོ་ཞེས་ང་ཟེར་རོ། །མིའི་
ཆོས་ལས་བླ་མར་གྱུར་པ་བྱེད་པ་ཡང་མ་ཡིན་ཏེ་ཚུལ་ཁྲིམས་དང་ལྡན་པ་འདོད་པ་ཉུང་བ་ཞེས་ང་ཟེར་རོ། །དེ་ལྟར་བསྟོད་དུ་ཟིན་ཀྱང་རང་གི་དད་པའི་སེམས་དང་བས་ན་སངས་རྒྱས་ཀྱི་གསུང་རབ་དང་འཐུན་པར་བྱེད་པའི་དགེ་སློང་ལ་ནི་ཉེས་པ་ཆུང་ཟད་ཀྱང་མེད་དོ་ཞེས་ང་ཟེར་རོ། །
གཞན་ཡང་འདི་ན་དགེ་སློང་ལ་ལ་དེ་བཞིན་གཤེགས་པའི་སྙིང་པོའི་མདོ་སྡེ་ཆེན་པོ་སྟོན་པར་བྱེད་དོ། །སེམས་ཅན་ཐམས་ཅད་ལ་ནི་སངས་རྒྱས་ཀྱི་ཁམས་ཡོད་ལ་ཁམས་དེ་རང་རང་གི་ལུས་ལ་འཆང་སྟེ། སེམས་ཅན་རྣམས་ཀྱིས་ཉོན་མོངས་པའི་རྣམ་པ་ཟད་པར་བྱས་
ནས་སངས་རྒྱས་སུ་འགྱུར་ཏེ་འདོད་ཆེན་པ་ནི་མ་གཏོགས་སོ། །དེ་ལ་རྒྱལ་པོའམ་རྒྱལ་པོའི་བློན་པོ་འགའ་ཞིག་འདི་སྐད་ཅེས་ཟེར་ཏེ། དགེ་སློང་ཁྱོད་སངས་རྒྱས་སུ་འགྱུར་རམ་མི་འགྱུར། སངས་རྒྱས་ཀྱི་ཁམས་ཁྱོད་ལ་ཡོད་དམ་མེད་ཅེས་ཟེར་བ་ལ། དགེ་སློང་
དེ་ན་རེ་ཚེ་དང་ལྡན་པ་བདག་སངས་རྒྱས་སུ་འགྱུར་རམ་མི་འགྱུར་བ་ལྟ་སུས་ཤེས་མོད་ཀྱི་འོན་ཀྱང་བདག་གི་ལུས་ལ་སངས་རྒྱས་ཀྱི་ཁམས་ནི་ཡོད་དོ་ཞེས་ཟེར་རོ། །དེ་ནས་དེས་དགེ་སློང་དེ་ལ་སྨྲས་པ། དགེ་སློང་ཁྱོད་འདོད་ཆེན་པ་ཁོ་ན་མ་ཡིན་ན་བདག་ནི་སངས་རྒྱས་སུ་

འགྱུར་རོ་སྙམ་དུ་སོམས་ཤིག །དེ་ནས་དགེ་སློང་དེས་དེ་ལ་སྨྲས་པ། ཚེ་དང་ལྡན་པ་ཆོས་དེ་ནི་བདག་གི་ལུས་ལ་གོར་མ་ཆག་པར་ཡོད་དོ་ཞེས་གལ་ཏེ་དེ་སྐད་ཟེར་ན། དགེ་སློང་དེ་ལ་མིའི་ཆོས་ལས་བླ་མར་གྱུར་པའི་ཉེས་པ་ཡོད་ཅེས་བྱའམ་མེད་ཅེས་བྱ་
ཞེ་ན། ཁམས་ཡོད་དོ་ཟིན་ཀྱང་སྦྱིན་པ་དང་། ཚུལ་ཁྲིམས་དང་། ཤེས་པ་དང་། ཆོས་དང་ལྡན་པ་རྣམས་ལ་ཡོད་པར་ཟད་དོ་ཞེས་བརྗོད་པར་བྱའོ། །གཞན་ཡང་དགེ་སློང་རབ་ཏུ་བྱུང་ནས་སེམས་པར་བྱེད་དེ། ཀྱེ་མ་བདག་སངས་རྒྱས་སུ་འགྱུར་རམ་མི་འགྱུར་སྙམ་
པའམ། བདག་གིས་ནི་སངས་རྒྱས་ཉིད་ཐོབ་པར་འགྱུར་བར་མངོན་ནོ་སྙམ་དུ་སེམས་ན་འབྲས་བུ་མ་ཐོབ་ཏུ་ཟིན་ཀྱང་བསོད་ནམས་མང་པོ་འཕེལ་བར་འགྱུར་རོ། །གལ་ཏེ་དེ་ལྟ་མ་ཡིན་ན། དགེ་སློང་ཐམས་ཅད་ཀྱང་མིའི་ཆོས་ལས་བླ་མར་འགྱུར་རོ། །དེ་ཅིའི་ཕྱིར་ཞེ་ན།
ངས་བསྐལ་པ་བྱེ་བ་ཕྲག་བརྒྱད་ཅུའི་བར་དུ་རུང་བ་མ་ཡིན་པའི་དངོས་པོ་ཡོངས་སུ་འཛིན་པ་སྤངས་ཏེ། ཆོག་ཤེས་པ་དང་། ཡོ་བྱད་བསྙུངས་པའི་མཆོག་ལ་གནས་ནས་དེ་བཞིན་གཤེགས་པའི་སྙིང་པོ་ཡོད་པར་བསྒོམས་ཏེ་མངོན་པར་རྫོགས་པར་སངས་རྒྱས་ནས་ཆོས་ཀྱི་ཕུང་པོ་
འབུམ་སྟོན་པའི་སངས་རྒྱས་བཅོམ་ལྡན་འདས་སྙིང་རྗེ་ཆེན་པོ་དང་ལྡན་པར་གྱུར་པའི་ཕྱིར་རོ་ཞེས་ཟེར་བ་དེ་ལྟ་བུ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་
པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །
ཕམ་པ་བཞི་ཡང་མེད། དགེ་འདུན་གྱི་ལྷག་མ་བཅུ་གསུམ་ཡང་མེད། མ་ངེས་པ་གཉིས་ཀྱང་མེད། སྤང་བའི་ལྟུང་བྱེད་སུམ་ཅུ་ཡང་མེད། ལྟུང་བྱེད་འབའ་ཞིག་པ་དགུ་བཅུ་རྩ་གཅིག་ཀྱང་མེད། སོ་སོར་བཤགས་པར་བྱ་བ་བཞི་ཡང་མེད། བསླབ་པར་བྱ་བ་མང་

པོ་ཡང་མེད། རྩོད་པ་ཞི་བར་བྱ་བའི་ཆོས་བདུན་ཡང་མེད། ཉེས་བྱས་རྣམས་ཀྱང་མེད། ཉེས་པ་སྦོམ་པོ་རྣམས་ཀྱང་མེད། མཚམས་མེད་པ་དང་། འདོད་ཆེན་པ་ཡང་མེད་དེ། སྔར་སྨོས་པའི་བསླབ་པའི་གཞི་དེ་རྣམས་མེད་བཞིན་དུ་གལ་ཏེ་འགལ་བར་བྱས་པས་དགེ་
སློང་དག་སེམས་ཅན་དམྱལ་བར་འགྲོ་བར་འགྱུར་ན། དེ་དག་ནི་མུ་སྟེགས་ཅན་ཡིན་ནོ། །གང་དག་ལ་དེ་རྣམས་མེད་ན་དེ་ལྟ་ན་ནི་མཐོ་རིས་སུ་འགྲོ་བར་འགྱུར་རོ། །བཅོམ་ལྡན་འདས་ཀྱིས་ནི་བསྡིགས་པའི་ཕྱིར་འདུལ་བ་ལས་བསླབ་པའི་གཞི་རྣམས་བཀའ་སྩལ་ཏོ། །མི་ཚངས་པར་
སྤྱོད་པ་བསྟེན་པར་འདོད་པ་གང་ཡིན་པ་དེ་ནི་གོས་ཚོན་ཅན་དང་། ཆོས་གོས་སྤངས་ཏེ་གོས་དཀར་པོ་བགོས་ནས་དེ་ལྟ་བུ་བྱས་པའི་འོག་ཏུ་དེ་བདག་ཉིད་ཀྱིས་བསམས་པ། བདག་གིས་ནི་རང་གི་ཡོན་ཏན་ཆུང་བའི་ཕྱིར་མནོག་ཆུང་བའི་འདོད་པ་བསྟེན་གྱིས་མེད་དོ། །འོན་ཀྱང་བཅོམ་ལྡན་
འདས་བཞུགས་པའི་ཚེ་ཡང་དགེ་སློང་དག་གིས་འདོད་པ་རྣམས་བསྟེན་ནས་མཐོ་རིས་དང་ཐར་པ་ཐོབ་པར་གྱུར་ན། ཅི་བདག་ཆོས་ཉིད་ལ་ཞུགས་པ་ཡིན་ནམ། འདི་ནི་གནའ་ནས་ལུགས་ཀྱིས་ཡོད་པ་ཁོ་ནའོ་སྙམ་དུ་དེ་ལྟར་སྒོམ་པའི་དགེ་སློང་ནི་ཕམ་པ་བྱུང་དུ་ཟིན་ཀྱང་ཐར་པ་ཐོབ་པར་འགྱུར་
རོ། །བསླབ་པའི་གཞི་ལྔ་ལས་འགལ་བར་བྱས་པ་དང་། རུང་བ་མ་ཡིན་པ་ཐམས་ཅད་ཡོངས་སུ་བཟུང་ཡང་དེ་དང་འདྲའོ། །དེ་བཞིན་གཤེགས་པས་ཉེས་བྱས་ཀྱི་ཉེས་པ་བྱུང་བས་ཀྱང་སུམ་ཅུ་རྩ་གསུམ་པའི་ལྷ་རྣམས་ཀྱི་ལོ་གྲངས་པས་ཀྱང་ལྷག་པར་ལོ་བརྒྱད་ཁྲིའི་བར་དུ་སེམས་
ཅན་དམྱལ་བར་འཚེད་པར་འགྱུར་རོ་ཞེས་གསུངས་མོད་ཀྱི། དེ་ཡང་བསྡིགས་པར་ཟད་དེ་ཕམ་པ་ལས་ན་གཅིག་གི་དམའ་བ་ཉེས་པ་སྦོམ་པོའི་སྐྱོན་གང་ཡིན་པ་དེ་ཡང་མི་བཟད་པ་མ་ཡིན་ཏེ་འདུལ་བ་འཛིན་པ་མང་པོ་རྣམས་ཀྱིས་བརྫུན་དུ་སྨྲས་མོད་ཀྱི། དེ་ནི་མི་བཙན་ནོ་ཞེས་དེ་བཞིན་
གཤེགས་པས་གསུངས་སོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་བདུད་ཀྱིས་སྨྲས་པ་ཡིན་པར་རིག་པར་བྱའོ། །བསླབ་པའི་གཞི་ཐམས་ཅད་ཀྱི་ནང་ན་ནི་ཉེས་བྱས་ཆུང་བ་ཡིན་ལ་དེ་ལྟར་ཆུང་བའི་ཉེས་བྱས་བྱུང་དུ་ཟིན་ཀྱང་བདག་ལ་མ་བྱུང་ངོ་ཞེས་སྙོན་པར་བྱེད་དེ། ཉེས་པ་

བྱུང་བ་རུ་སྦལ་བཞིན་དུ་སྦེད་པར་བྱེད་པ་དེ་ལྟ་བུའི་གང་ཟག་ལ་བསྟེན་པར་མི་བྱའོ། །བརྫུན་དུ་སྨྲ་བའི་ཆོས་གཅིག་འགལ་བར་བྱས་པའི་སྐྱེ་བོ་འཇིག་རྟེན་ཕ་རོལ་སྤངས་པས་ནི་མི་བྱ་བ་ཅི་ཡང་མེད་དེ། མི་བྱ་བའི་བག་ཅི་ཡང་མི་སྟེན་པ་མེད་ཅེས་བྱ་བའི་དོན་ཏོ། །སངས་
རྒྱས་ཀྱི་བསྟན་པ་ནི་དེ་ལྟར་ཆ་ཕྲ་བ་ཡིན་ན་ཉེས་པ་སྦོམ་པོ་མི་སྡོམ་པར་ལྟ་ག་ལ་མཛད། གལ་ཏེ་དེ་ཙམ་ཡང་སྡོམ་པར་མི་བྱེད་པ་ནི་མཆོག་ཏུ་མ་བསྡམས་པ་ཡིན་ནོ། །ཇི་ཞིག་བཟུང་སྟེ་ཚུལ་ཁྲིམས་སྲུང་ཞེ་ན། སངས་རྒྱས་ཀྱི་ཁམས་ཡོད་ལ་གསུང་རབ་ཡན་ལག་དགུའི་ཚུལ་གྱིས་
སངས་རྒྱས་སུ་འགྱུར་བའི་རྟོག་པ་གཅིག་པུས་སེམས་ཅན་ཐམས་ཅད་ལ་སངས་རྒྱས་ཀྱི་ཁམས་ཡོད་དོ་ཞེས་བྱ་བ་དང་། ཤིན་ཏུ་རྒྱས་པ་ལས་བདག་མེད་པའི་མཆོག་ཡོད་དོ་ཞེས་སྨྲ་བ་ནི་གསུང་རབ་ཡན་ལག་དགུའི་ཚུལ་གྱིས་མདོ་སྡེ་སྤོང་བ་མ་ཡིན་ནོ། །གཞན་དུ་ན་ནི་དེ་ལྟར་འགྱུར་
རོ། །གསོལ་པ། སེམས་ཅན་ཐམས་ཅད་ལ་སངས་རྒྱས་ཀྱི་ཁམས་མཆིས་པར་གསུང་རབ་ཡན་ལག་དགུ་ལས་ངེས་པར་བསྟན་ན་གང་ཟག་ཏུ་ལྟ་བར་ཇི་ལྟར་མི་གྱུར་ལགས། བདག་གིས་ཐོས་པ་བཞིན་དུ་ཇི་ལྟར་གཟུང་བར་བགྱི། དེ་ལྟར་ན་ནི་མིའི་ཆོས་ལས་བླ་མར་ཡང་
འགྱུར་ལགས་སོ། །བཀའ་སྩལ་པ། ཇི་ལྟར་རྒྱ་མཚོའི་ནང་ན་རིན་པོ་ཆེ་ཡོན་ཏན་བརྒྱད་དང་ལྡན་པ་སྣ་ཚོགས་མེད་དོ་ཞེས་སྨྲ་བ་དེ་བཞིན་དུ་གསུང་རབ་ཡན་ལག་དགུ་ཤིན་ཏུ་རྒྱས་པའི་ཡེ་ཤེས་ཀྱི་རྒྱ་མཚོ་ཆེན་པོ་ལ་སངས་རྒྱས་ཀྱི་ཁམས་མེད་དོ་ཞེས་ཟེར་བ་ཡང་དེ་དང་འདྲ་སྟེ། སངས་
རྒྱས་ཀྱི་གསུང་འདི་ནི་དེ་དག་གི་ཡུལ་མ་ཡིན་ལ་སངས་རྒྱས་ཀྱི་གསུང་ནི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་བྱ་བའི་གཏན་ཚིགས་དང་། རྟགས་རྣམས་ཀྱི་སྒོ་ནས་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡུལ་ཡང་མ་ཡིན་པར་མངོན་ནོ། །
ཐེག་པ་ཆེན་པོ་ལས་ནི་བདག་དང་སྲོག་བཤིག་པ་ཡང་མེད་དེ། དེ་བས་ན་སངས་རྒྱས་ནི་དབུ་མའི་ལམ་ཞེས་བྱའོ། །གང་དག་བདག་གི་ལུས་ལ་སངས་རྒྱས་ཀྱི་ཁམས་ཡོད་དེ། བདག་གིས་སངས་རྒྱས་ཐོབ་པར་འགྱུར་མོད་ཀྱི་ཉོན་མོངས་པ་ཟད་པར་བྱ་དགོས་སོ་ཞེས་དེ་སྐད་ཟེར་བ་དེ་དག་ནི་

ངའི་ཉན་ཐོས་ཡིན་ནོ། །ཅིག་ཤོས་ནི་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཡིན་ནོ་ཞེས་ང་ཟེར་རོ། །ངས་དེ་སྐད་ཅེས་བསྟན་པའི་ཕྱིར་འདི་སྐད་ཅེས་ཟེར་ཏེ། བཅོམ་ལྡན་འདས་ཀྱིས་དམ་པའི་ཆོས་ཐོབ་པར་འགྱུར་བའི་སངས་རྒྱས་ཀྱི་ས་ནས་གཟིགས་པས་ན་བདག་ཀྱང་སངས་
རྒྱས་བཅོམ་ལྡན་འདས་སུ་འགྱུར་རོ་ཞེས་ཟེར་བ་གང་ཡིན་པ་དེ་མིའི་ཆོས་ལས་བླ་མའི་ཉེས་པར་འགྱུར་རམ་ཞེ་ན་མིའི་ཆོས་ལས་བླ་མར་གྱུར་པའི་ཉེས་པར་མི་འགྱུར་ཏེ། དེ་ནི་རིམ་གྱིས་སངས་རྒྱས་སུ་འགྱུར་རོ་ཞེས་ང་ཟེར་རོ། །དེ་ལྟར་ན་སངས་རྒྱས་ཀྱི་གསུང་ནི་ཆ་ཕྲ་ཞིང་ཟབ་པ་ཡིན་ནོ། །
གསོལ་པ། འདི་ན་རྒྱལ་པོ་ལ་ལ་ཞིག་འདི་སྐད་ཅེས་མཆི་སྟེ། ཇི་ལྟར་ན་དགེ་སློང་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཞེས་བགྱི་ཞེས་མཆི་བ་ལ་ལན་གདབ་འཚལ་ལགས་སོ། །བཀའ་སྩལ་པ། འདི་ན་དགེ་སློང་རྙེད་པ་དང་བཀུར་སྟིའི་ཕྱིར་རམ། ཟང་ཟིང་གི་ཕྱིར་ཚུལ་
འཆོས་པ་དང་། ཁ་གསག་བྱེད་པ་ཡོད་དེ། ཇི་ལྟར་བྱས་ན་བདག་བསོད་སྙོམས་པ་ཡིན་པར་གཞན་དག་གིས་ཤེས་པར་འགྱུར་ཞིག་གུ་དེ་ལྟར་བྱས་དང་རྙེད་པ་ཐོབ་པར་འགྱུར་རོ་སྙམ་སྟེ། བསྔགས་པ་འདོད་པ་རྨོངས་པའི་རང་བཞིན་ཅན་དུ་གྱུར་པས་བདག་གིས་འབྲས་བུ་མ་ཐོབ་པར་བདག་
གིས་འབྲས་བུ་ཐོབ་པར་གཞན་གྱིས་ཤེས་པར་བྱའོ། །བདག་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པར་གཞན་དག་གིས་ཤེས་པར་བྱའོ། །དགེ་བསྙེན་མདུན་ན་འཁོད་པ་རྣམས་ཀྱང་སྐྱེ་བོ་ཐམས་ཅད་ཀྱིས་བདག་དེ་ལྟ་བུ་ཡིན་པར་
ཤེས་པར་འགྱུར་བའི་ཚིག་སྨྲར་གཞུག་གོ་སྙམ་ནས་ཆོས་ཐོབ་པར་བྱ་བའི་ཕྱིར་མ་ཡིན་པར་ཡིད་ལ་བྱེད་པ་དེ་ལྟ་བུ་རྙེད་པ་དང་། བཀུར་སྟི་དང་། བླ་མའི་མཆོད་པ་དང་། ཕྱག་བྱ་བ་དང་། ཟང་ཟིང་གི་ཕྱིར་དགྲ་བཅོམ་པ་འདྲ་བར་ཕན་ཚུན་ལྟ་བའི་ཐབས་དང་། མིག་འཛུམས་
པ་དང་། འགྲོས་རྣམས་འཆོས་པར་བྱེད་ཅིང་། ཆོས་གོས་དང་། སྣམ་སྦྱར་དང་། ལྷུང་བཟེད་རྣམས་འཆང་ལ། མལ་ཆ་དང་། སྟན་སར་པའི་སྟེང་ན་འདུག་པ་དང་། སྐྱེ་བོ་དག་གིས་བདག་དགེ་སློང་བཟང་པོ་དགེ་སློང་དཀའ་ཐུབ་ཅན་ཡིན་ནོ་ཞེས་བརྗོད་པར་འགྱུར་བར་

བྱའོ། །འོན་ཀྱང་བདག་འཁོར་དང་སློབ་མ་དག་དང་ལྡན་པར་འགྱུར་རོ། །དེ་ནས་སྡེ་ཚན་བཅས་དང་། བཟའ་བ་དང་། བཅའ་བ་དང་། བལྡག་པ་དང་། བཏུང་བའི་ཡོ་བྱད་རྣམས་རྙེད་པར་འགྱུར་རོ། །བུད་མེད་རྣམས་ཀྱིས་ཀྱང་བཀུར་བར་
འགྱུར་རོ་སྙམ་པའི་སེམས་ཀྱི་རྟོག་པས་ནང་མི་དང་གཡོག་འཁོར་རྣམས་ལ་ཤེས་པར་བྱེད་དེ། དེ་ལྟ་བུར་འཆབ་པའི་དགེ་སློང་ངམ། དགེ་སློང་མ་ནི་མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཡིན་ནོ་ཞེས་ང་ཟེར་རོ། །གཞན་ཡང་འདི་ན་དགེ་སློང་ལ་ལ་དམ་པའི་ཆོས་
དབྱུང་བར་བྱའོ་སྙམ་པའི་སེམས་ཀྱིས་མལ་ཆ་དང་སྟན་སར་པ་ལ་འདུག་ཅིང་། སྐྱེ་བོ་ཐམས་ཅད་ཀྱིས་ཀྱེ་མ་དགེ་སློང་འདི་ནི་དགེ་བ་བཟང་པོ་ཞིག་གོ་སྙམ་དུ་བདག་དགྲ་བཅོམ་པ་མ་ཡིན་པར་དགྲ་བཅོམ་པ་དང་འདྲ་བར་ཤེས་པར་བྱའོ། །བདག་དེ་ལྟ་བུ་ཡིན་པར་ཤེས་པ་
དང་། དགེ་སློང་མང་པོ་དག་བདག་གི་འཁོར་དུ་འགྱུར་བ་འདི་ལས་ཕྱི་རོལ་པ་དག་ཀྱང་དགེ་བསྙེན་དུ་འགྱུར་རོ། །ཚུལ་ཁྲིམས་འཆལ་པ་རྣམས་ཀྱང་ཞུམ་པར་འགྱུར་རོ། །དེ་ནས་བདག་གིས་དམ་པའི་ཆོས་ཀྱང་དབྱུང་བར་བྱའོ། །དེ་བཞིན་གཤེགས་པའི་
ཆེ་བ་ཉིད་ཀྱང་བསྟན་པར་བྱའོ། །ཤིན་ཏུ་རྒྱས་པའི་མདོ་སྡེ་རྣམས་ཀྱང་བསྒྲག་པར་བྱའོ། །སེམས་ཅན་ཐམས་ཅད་ཀྱང་ངེས་པར་བསྒྲལ་བར་བྱའོ། །འདུལ་བ་དང་འདུལ་བ་མ་ཡིན་པའི་བྱེ་བྲག་ཀྱང་ཕྱེད་པར་བྱའོ། །བདག་ལ་སངས་རྒྱས་སུ་འགྱུར་བའི་ས་བོན་དེ་བཞིན་
གཤེགས་པའི་སྙིང་པོ་ཞེས་བྱ་བ་ཡོད་དེ། བདག་གིས་སངས་རྒྱས་ཐོབ་པར་འགྱུར་རོ། །བདག་གིས་ཉོན་མོངས་པའི་རྣམ་པ་རྣམས་རྣམ་པར་གཞོམ་པར་བྱའོ། །དགེ་བསྙེན་ཁྱེད་རྣམས་ལ་ཡང་སངས་རྒྱས་ཀྱི་ཁམས་ཡོད་དེ། བདག་ཅག་ཀུན་ཀྱང་སངས་རྒྱས་སུ་འགྱུར་ཞིང་དེ་བཞིན་
གཤེགས་པའི་ས་ཐོབ་པར་འགྱུར་རོ། །ཉོན་མོངས་པའི་རྣམ་པ་རྣམས་ཟད་པར་བྱའོ་སྙམ་དུ་སེམས་པ་དེ་ལྟ་བུ་ནི་དམ་པའི་ཆོས་ཀྱི་རྟོག་པའི་སྒོ་ནས་བྱང་ཆུབ་སེམས་དཔའ་ཡིན་ཏེ། མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་མ་ཡིན་ནོ་ཞེས་ང་ཟེར་རོ། །ཉེས་བྱས་ཀྱི་ཉེས་པ་བྱུང་བས་ཀྱང་

སུམ་ཅུ་རྩ་གསུམ་པའི་ལྷ་རྣམས་ཀྱི་ལོ་གྲངས་པས་ཀྱང་ལྷག་པར་ལོ་བརྒྱད་ཁྲིའི་བར་དུ་སེམས་ཅན་དམྱལ་བར་འཚེད་པར་འགྱུར་ན་ཉེས་པ་སྦོམ་པོ་ལྟ་ཅི་སྨོས་ཏེ། ཐེག་པ་ཆེན་པོ་འདི་ལ་ནི་ཉེས་པ་སྦོམ་པོའི་ཉེས་པ་བྱུང་བ་དང་བསྟེན་པར་མི་བྱའོ། །ཉེས་པ་སྦོམ་པོ་ཞེས་བྱ་བ་ནི་
བཅོམ་ལྡན་འདས་ཀྱི་མཆོད་རྟེན་བསྲུང་བའི་ཕྱིར་གཞན་ཡོངས་སུ་གཟུང་བ་ལ་མེ་ཏོག་གི་ཕྲེང་བ་བཏགས་པ་དེ་རྙིངས་ནས་སྲད་བུ་དགོས་པའི་ཕྱིར་ལེན་པར་བྱེད་དེ། དགེ་སློང་རྣམས་ལ་འཛེམ་ནས་དགེ་སློང་རྣམས་ལ་མ་དྲིས་པར་དགེ་སློང་གིས་བླངས་ན་ཉེས་པ་སྦོམ་པོའི་
ཉེས་པ་ཅན་དུ་འགྱུར་རོ། །གལ་ཏེ་འདི་ལྟ་ཞིག་གིས་ཅིར་ཡང་མི་འགྱུར་རོ་སྙམ་དུ་འཛིན་ཏེ། ལེན་པར་བྱེད་ན་ཡང་དེ་ལྟ་བུ་དག་དང་བསྟེན་པར་མི་བྱའོ། །རྐུ་བའི་སེམས་ཀྱིས་མཆོད་རྟེན་བཤིག་ན་ཡང་ཉེས་པ་སྦོམ་པོའི་ཉེས་པ་ཅན་དུ་འགྱུར་ཏེ། དེ་ལྟ་བུ་དག་
དང་བསྟེན་པར་མི་བྱའོ། །འདི་ན་ཁྱིམ་བདག་གམ་བློན་པོ་ལ་ལ་ཞིག་གིས་གལ་ཏེ་ཆོས་ཀྱི་བསམ་པས་སྐུ་གདུང་ལ་བཀུར་སྟི་བྱའམ། ཕག་གུ་དགོས་པའི་ཕྱིར་མཆོད་རྟེན་རྙིང་པ་བཤིག་སྟེ། བླངས་ནས་ཁྱིམ་བདག་གམ་བློན་པོ་དེས་མཆོད་རྟེན་དེ་ལས་གསེར་
དངུལ་ཞིག་བྱུང་ན། དེ་དགེ་སློང་འགའ་ཞིག་གི་ལག་ཏུ་གཏད་པ་ལས་དགེ་སློང་དེས་དེ་བླངས་ཏེ། བདག་གི་ནོར་དུ་བྱས་ལ་རྩོད་པར་བྱེད་ན་དགེ་སློང་དེ་ལ་ལེགས་པ་མ་ཡིན་ནོ། །དགེ་བསྙེན་དེ་དག་ནི་ཆོས་ལ་གནས་པ་ཡིན་ནོ། །དགེ་སློང་དེ་ནི་ཡིད་བརྟན་དུ་མི་རུང་སྟེ་
བསྟེན་པར་མི་བྱའོ། །མ་ནིང་ཡིན་པར་ཤེས་པར་བྱའོ། །མཚན་གཉིས་པ་ཡིན་པར་ཤེས་པར་བྱའོ། །མཚན་གཉིས་པ་ཞེས་བྱ་བ་ནི་གང་ལ་མཚན་གཉིས་ཡོད་པ་སྟེ། གང་གི་ཚེ་སྐྱེས་པའི་འདོད་ཆགས་སྐྱེས་པ་དེའི་ཚེ་ནི་བུད་མེད་དང་འདོད་པ་སྤྱོད་པར་བྱེད་ལ། གང་གི་ཚེ་
བུད་མེད་ཀྱི་འདོད་ཆགས་སྐྱེས་པ་དེའི་ཚེ་ནི་སྐྱེས་པ་དང་འདོད་པ་སྤྱོད་པར་བྱེད་དོ། །དེ་བས་ན་མཚན་གཉིས་པ་ཞེས་བྱ་སྟེ་དེ་དང་ཡང་བསྟེན་པར་མི་བྱའོ། །དེ་ལྟར་དེ་ལྟ་བུ་དག་དང་ཡང་བསྟེན་པར་མི་བྱ་ན་བསླབ་པའི་གཞི་ལྔའི་ཉེས་པ་བྱེད་པ་དེ་དག་ལྟ་ལ་བསྟན་དུ་ག་ལ་རུང་།། །།

བམ་པོ་དགུ་པ། དགེ་སློང་རྣམས་ཀྱིས་ནི་ཐོག་མར་དགེ་སྦྱོང་གི་ཆོས་ཀྱིས་གྲོག་སྦུར་རྣམས་ལ་ཡང་སྙིང་རྗེ་བྱའོ། །དགེ་སྦྱོང་གི་ཆོས་ཀྱིས་ཆང་གི་དྲི་བྲོ་བའི་བཏུང་བ་ཡང་སྤང་བར་བྱའོ། །དགེ་སྦྱོང་གི་ཆོས་ཀྱིས་རྨི་ལམ་དུ་ཡང་བརྫུན་དུ་སྨྲ་བའི་
སེམས་བསྐྱེད་པར་མི་བྱའོ། །དགེ་སྦྱོང་གི་ཆོས་ཀྱིས་རྨི་ལམ་དུ་ཡང་བུད་མེད་དང་ཕྲད་པའི་སེམས་བསྐྱེད་པར་མི་བྱའོ། །གསོལ་པ། ཅི་ལགས། རྨི་ལམ་དུ་བུད་མེད་དང་ཕྲད་པར་གྱུར་ན་མི་ཚངས་པར་སྤྱོད་པའི་ནོངས་པར་འགྱུར་ལགས་སམ། བཀའ་སྩལ་པ། མི་
འགྱུར་ཏེ། གལ་ཏེ་བློ་གྲོས་དང་དྲན་པ་དང་ལྡན་པ་འདོད་པ་དྲི་ང་བ་དག་ལ་མི་ཚངས་པར་སྤྱོད་པའི་སེམས་མི་སྐྱེད་ན་དེ་ནི་ཉོན་མོངས་པ་དང་བུད་མེད་ཀྱི་གཏམ་སྨད་པས་རྟོག་པ་ཡང་དག་པར་ཆད་པའི་ཕྱིར་སེམས་སྐྱེད་མི་སྲིད་དོ། །རྨི་ལམ་དུ་ཕྲད་པར་གྱུར་ན་ཡང་ནང་པར་སད་ན་མུ་
གེ་འབྱུང་བའི་ཚེ་དགེ་སློང་གིས་རང་གི་བུའི་ཤའི་ཟས་ཟོས་པ་བཞིན་དུ་འགྱོད་པར་འགྱུར་ན་དེ་ལ་གཙང་ངོ་སྙམ་པའི་བློ་ལྟ་ག་ལ་འབྱུང་། གལ་ཏེ་སེམས་སྐྱེས་ན་ཡང་ཕྱིར་གཞིལ་བར་བྱའོ་ཞེས་ཟེར་བ་དེ་ལྟ་བུའི་ཆོས་ཀྱི་སྒོ་ནི་སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཡིན་
པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་
དཔའ་ཡིན་པར་རིག་པར་བྱའོ། །དཔའ་བོའི་འདུག་སྟངས་དང་། མི་སྨྲ་བར་འདུག་པ་དང་། གཡང་སར་མཆོང་བ་དང་། དུག་ཟ་བ་དང་། སྨྱུང་བར་འདུག་པ་དང་། བདག་ཉིད་འཆིང་བར་བྱེད་པ་དང་། བདག་ཉིད་གསོད་པར་བྱེད་པ་དང་། ཞེ་ནོམ་བྱེད་དུ་འཇུག་པ་དང་།
རིག་སྔགས་དང་གསང་སྔགས་ཟློས་པ་དང་། སྐྲུན་པའི་ལས་བྱེད་པར་བཅོམ་ལྡན་འདས་ཀྱིས་གནང་ངོ་། །གདོལ་པའི་བུ་དང་། མ་ནིང་དང་། མཚན་གཉིས་པ་དང་། ཡན་ལག་ཉམས་པ་ཐམས་ཅད་རབ་ཏུ་འབྱུང་བར་བཅོམ་ལྡན་འདས་ཀྱིས་གནང་ངོ་། །དེ་བཞིན་

གཤེགས་པས་ནི་བའི་བཅུད་རྣམ་ལྔ་དང་། སྦྲང་རྩི་དང་། འབྲུ་མར་ལ་སོགས་པ་དང་། ཟབ་དར་དང་། དུང་དང་། ལྷམ་དང་། འབྲུ་ལ་སོགས་པ་སྤངས་ཏེ། ཤིང་ངོ་ཅོག་ལ་སྲོག་དང་འདུ་ཤེས་ཡོད་པར་གཟིགས་ནས་ཡོངས་སུ་མྱ་ངན་ལས་འདས་སོ་ཞེས་ཟེར་བ་དེ་ལྟ་བུ་ནི་
བདུད་ཀྱིས་སྨྲས་པའི་མདོ་སྡེ་དང་འདུལ་བ་ཡིན་པར་རིག་པར་བྱ་སྟེ། དཔའ་བོའི་འདུག་སྟངས་ཀྱིས་གནས་པ་དང་། འཆག་པ་ལ་སོགས་པ་ཆོས་ཀྱི་བྱ་བ་རྣམས་ནི་མ་གཏོགས་སོ། །དུག་ཟ་བ་དང་། མེར་མཆོང་བ་དང་། སྨྱུང་བར་འདུག་པ་དང་། གཡང་སར་མཆོང་བ་
དང་། བདག་ཉིད་འཆིང་བར་བྱེད་པ་དང་། བདག་ཉིད་གསོད་པར་བྱེད་པ་དང་། ཞེ་ནོམ་བྱེད་དུ་འཇུག་པ་དང་། རིག་སྔགས་དང་། གསང་སྔགས་ཟློས་པ་དང་། སྐྲུན་པའི་ལས་བྱེད་པ་རྣམས་ནི་ངས་མ་གནང་ངོ་། །བའི་བཅུད་རྣམ་ལྔ་དང་། སྦྲང་རྩི་དང་། འབྲུ་
མར་ལ་སོགས་པ་དང་། ཟབ་དར་དང་། དུང་དང་། ལྷམ་དང་། འབྲུ་ལ་སོགས་པ་ལ་ཤའི་འདུ་ཤེས་མེད་པ་དང་། ཤིང་ཐམས་ཅད་ལ་སྲོག་མེད་པའི་འདུ་ཤེས་དང་། སེམས་པའི་འདུ་ཤེས་མེད་པར་ངས་གནང་ངོ་། །གཞན་དུ་ལྟ་བ་གང་ཡིན་པ་དེ་དག་ནི་མུ་
སྟེགས་ཅན་གྱི་ཉན་ཐོས་ཡིན་ནོ། །ངའི་བཀའ་བཞིན་དུ་བྱེད་པ་གང་ཡིན་པ་དེ་དག་ནི་ངའི་ཉན་ཐོས་ཡིན་ནོ་ཞེས་ང་ཟེར་རོ། །ཁམས་བཞི་ལ་ནི་སྲོག་དང་འདུ་ཤེས་ཡོད་ཅེས་ང་མི་ཟེར་རོ་ཞེས་ཟེར་བ་དེ་ལྟ་བུའི་མདོ་སྡེ་དང་འདུལ་བ་ནི་སངས་རྒྱས་ཀྱིས་གསུངས་པའི་མདོ་སྡེ་
ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་འཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་བ་ཚད་མར་བྱེད་པའི་སེམས་ཅན་གང་
ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །རིགས་ཀྱི་བུ་འདི་ནི་ངས་བདུད་ཀྱིས་སྨྲས་པ་དང་། སངས་རྒྱས་ཀྱིས་གསུངས་པའི་བྱེ་བྲག་རྒྱས་པར་བསྟན་པ་ཡིན་ནོ། །གསོལ་པ། བཅོམ་ལྡན་འདས་བདག་ནི་དེང་གདོད་སངས་རྒྱས་ཀྱི་བཀའ་

བཞིན་ལ་ཞུགས་ལགས་སོ། །བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་ལེགས་ཏེ་མཁས་པས་ནི་དེ་ལྟར་བྱ་དགོས་སོ། །ཡང་བཀའ་སྩལ་པ། རིགས་ཀྱི་བུ་འདི་ནི་སྡུག་བསྔལ་ལོ་ཞེས་བྱ་བ་ནི་འཕགས་པ་རྣམས་ཀྱི་
བདེན་པ་ཞེས་མི་བྱ་སྟེ། སྡུག་བསྔལ་དེ་ཡང་གང་ཞེ་ན། སྡུག་བསྔལ་ཞེས་བྱ་བ་ནི་བ་ལང་དང་། བོང་བུ་ལ་སོགས་པ་དང་། སེམས་ཅན་དམྱལ་བ་པ་རྣམས་ལ་ཡང་ཡོད་དེ། གལ་ཏེ་སྡུག་བསྔལ་དེ་བདེན་པ་ཡིན་དུ་ཟིན་ན་དེ་རྣམས་ཀྱི་ཡང་བདེན་པ་ཡིན་པར་འགྱུར་
རོ། །སྡུག་བསྔལ་ཞེས་བྱ་བ་འདི་ནི་ཀྱེ་མ་སྡུག་བསྔལ་ཤེས་པ་ཞེས་བྱ་བ་ལ་དེ་བཞིན་གཤེགས་པ་རྟག་པའོ། །ཆོས་ཀྱི་སྐུ་ཡིན་ཏེ་ཤའི་སྐུ་མ་ཡིན་ནོ་ཞེས་དེ་བཞིན་གཤེགས་པའི་ཆེ་བ་ཉིད་ཤེས་པ་ནི་སྡུག་བསྔལ་ཤེས་པའོ། །དེ་མ་ཐོབ་ཀྱི་བར་དུ་སེམས་ཅན་
རྣམས་ཀྱིས་ཆོས་མ་ཡིན་པ་ལ་ཆོས་ཡིན་ནོ་སྙམ་དུ་ཡོངས་སུ་བརྟགས་ནས་འཁོར་བའི་འཁོར་ལོ་ཤིན་ཏུ་སྡུག་བསྔལ་བའི་གནས་སུ་ཡུན་རིང་པོར་སྡུག་བསྔལ་ཉམས་སུ་མྱོང་ནས་ངན་འགྲོར་འགྲོ་བར་འགྱུར་རོ། །གང་གི་ཚེ་དེ་བཞིན་གཤེགས་པ་རྟག་པར་ཤེས་པ་དེའི་
ཚེ་ནི་ཡི་གེ་འབྲུ་གཉིས་པོ་ཇི་ལྟ་བུར་ཐོས་ཀྱང་རུང་སྟེ་བདེ་འགྲོར་འགྲོ་བར་འགྱུར་རོ། །དེ་ནས་ཐར་པ་ཡང་ཐོབ་པར་འགྱུར་རོ། །དེས་ན་འདི་ནི་རྫུ་འཕྲུལ་གྱི་བདེ་བ་ཡིན་ནོ་སྙམ་དུ་རང་གིས་རྟོགས་པར་འགྱུར་ཏེ། དེ་བཞིན་གཤེགས་པ་རྟག་ཅེས་བྱ་བ་ཐོས་པ་ཙམ་གྱི་རྒྱུ་དེས་
ན་བདག་འདིར་འོངས་སོ། །དེ་བཞིན་གཤེགས་པ་རྟག་པར་མ་ཤེས་ཀྱི་བར་དུ་ནི་ཡུན་དེ་སྲིད་ཀྱི་བར་བདག་སྡུག་བསྔལ་རྣམས་ཀྱི་ནང་དུ་འཁོར་ཏོ། །ད་ནི་སྡུག་བསྔལ་ཤེས་སོ་ཞེས་བྱ་བ་འདི་ནི་བདེན་པ་ཡིན་ནོ། །གཞན་དག་གི་སྡུག་བསྔལ་བསྒོམ་པ་ནི་དོན་མེད་པའོ། །
འདི་ནི་སྡུག་བསྔལ་ཀུན་འབྱུང་བའོ་ཞེས་བྱ་བ་ནི་ཆོས་ཀྱི་དེ་ཁོ་ན་ཉིད་ལ་དེ་ཁོ་ན་ཉིད་མ་ཤེས་ནས། ཆོས་ལ་དགོས་པའི་ཕྱིར་བྲན་དང་བྲན་མོ་ལ་སོགས་པ་རྫས་ངན་པ་དུ་མ་ལེན་པར་བྱེད་ཅིང་ཆོས་མ་ཡིན་པ་ལ་ཆོས་ཡིན་ནོ་སྙམ་དུ་འཛིན་ཏེ། དམ་པའི་ཆོས་ནུབ་པར་བྱེད་ཅིང་དམ་

པའི་ཆོས་མི་སྣང་བར་བྱེད་པར་འགྱུར་ཏེ། དམ་པའི་ཆོས་གནས་པར་བྱ་བའི་ཐབས་མི་ཤེས་པས་འདི་ལྟར་འཛིན་ཏེ། དམ་པའི་ཆོས་འཇིག་པར་འགྱུར་ཞེས་བྱ་བ་མེད་དོ་སྙམ་ནས་དེའི་འབྲས་བུས་འཁོར་བའི་སྡུག་བསྔལ་རྣམས་ཀྱི་ནང་དུ་ཡོངས་སུ་འཁྱམ་མོ། །དེ་ནས་མཐོ་རིས་དང་ཐར་པ་ཐོབ་པར་འགྱུར་ཏེ།
མཐོ་རིས་དང་ཐར་པ་ཐོབ་པའི་སྡུག་བསྔལ་ཀུན་འབྱུང་བའི་དེ་ཁོ་ན་ཉིད་བདག་གིས་མ་ཤེས་པས་དམ་པའི་ཆོས་འཇིག་པའི་རྒྱུར་གྱུར་ཏེ་ཉེས་པར་སྨྲས་པའི་ཚིག་གིས་ཡུན་འདི་སྲིད་ཀྱི་བར་དུ་ཉོན་མོངས་པར་གྱུར་ཏོ་སྙམ་དུ་ཤེས་པ་འདི་ནི་སྡུག་བསྔལ་ཀུན་འབྱུང་བ་ཤེས་པ་ཞེས་
བརྗོད་པར་བྱའོ། །གཞན་དག་གི་ནི་དེ་ལྟ་མ་ཡིན་ནོ། །འདི་ནི་སྡུག་བསྔལ་འགོག་པ་ཞེས་བྱ་བ་ལ་སྟོང་པ་ཉིད་སྒོམ་པ་ནི་གཏན་དུ་སྟོང་པ་ཉིད་སྒོམ་པ་ཐམས་ཅད་ཟད་པ་དེ་བཞིན་གཤེགས་པའི་སྙིང་པོ་མེད་པར་བྱེད་པ་དེ་ལྟ་བུ་མ་ཡིན་ཏེ། སྡུག་བསྔལ་འགོག་པ་སྒོམ་
པ་ནི་ཡ་མཚན་ཅན་ཐམས་ཅད་ལ་ཡང་དོན་དང་འགལ་བའི་སྟོང་པ་ཉིད་ཡོད་དེ། དེ་རྣམས་ཀྱི་ཡང་སྡུག་བསྔལ་འགོག་པ་ཞེས་བྱ་བར་འགྱུར་རོ། །སེམས་ཅན་ཐམས་ཅད་ལ་ནི་དེ་བཞིན་གཤེགས་པའི་སྙིང་པོ་ཡོད་དེ། དེ་ནི་གསལ་བར་མི་མངོན་ནོ། །གང་གི་ཚེ་ཉོན་
མོངས་པ་ཟད་པ་དེའི་ཚེ་དེ་བཞིན་གཤེགས་པའི་སྙིང་པོ་ལ་འཇུག་པ་ཁྱེད་ཀྱིས་མཐོང་བར་འགྱུར་རོ། །གང་གི་ཚེ་སེམས་གཅིག་བསྐྱེད་པའི་ལས་ཀྱི་འབྲས་བུས་བདག་གིས་ཆོས་ཀྱི་དབང་ཕྱུག་རྟག་པ་དང་བདེ་བ་འཐོབ་བོ་སྙམ་དུ་ཁྱོད་ཀྱིས་ཤེས་པར་གྱུར་པ་དེ་ནི་སྡུག་
བསྔལ་འགོག་པ་བསྒོམ་པར་བྱ་བ་ལ་སྒོམ་པ་ཡིན་ནོ། །དེ་བཞིན་གཤེགས་པའི་སྙིང་པོ་བདག་མེད་པར་བསྒོམས་ཤིང་གཏན་དུ་སྟོང་པ་ཉིད་བསྒོམས་པས་ནི་སྡུག་བསྔལ་རྣམས་མི་འགག་པར་ཕྱེ་མ་ལེབ་མར་མེའི་ནང་དུ་སོང་བ་བཞིན་དུ་འགྱུར་རོ། །དེ་ལྟ་མ་ཡིན་
པར་དེ་བཞིན་གཤེགས་པའི་སྙིང་པོ་ཡོད་པར་བསྒོམས་པའི་སེམས་ཅན་རྣམས་ནི་ཉོན་མོངས་པ་རྣམས་ཡོད་བཞིན་དུ་ཉོན་མོངས་པའི་རྣམ་པ་འགོག་པར་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྙིང་པོའི་རྐྱེན་གྱི་ཕྱིར་ཏེ། དེ་ཤེས་པ་ནི་ཡང་དག་པར་

རྫོགས་པའི་སངས་རྒྱས་ཀྱི་བཀའ་ལས་སྡུག་བསྔལ་འགོག་པའི་ཚིག་བདེན་པ་ཞེས་བྱའོ། །གཞན་ནི་བསྒོམ་པ་མ་ཡིན་པ་ལ་བསྒོམ་པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་ཞེས་བྱ་བ་ནི་དེ་བཞིན་གཤེགས་པ་དང་། ཆོས་དང་། དགེ་
འདུན་དང་། ཐར་པ་རྣམས་ཏེ། འདི་ལྟར་དེ་རྣམས་ལ་ཕྱིན་ཅི་ལོག་བཞིས་ཕྱིན་ཅི་ལོག་ཏུ་གྱུར་པའི་དངོས་པོ་ནི་ཐར་པའོ། །ཐར་པ་ལ་ཡང་ཅི་ཡང་མེད་དོ་སྙམ་པ་དེ་ནི་འདི་ལྟར་སྒྱུ་མར་འདུག་སྟེ་འཁོར་བའི་སྡུག་བསྔལ་གྱི་ནང་དུ་ཡོངས་སུ་འཁྱམ་པ་ཡིན་ལ། བསྒོམ་ཉེས་པ་
དེའི་འབྲས་བུས་ནི་ཡུན་རིང་པོར་སྡུག་བསྔལ་ཉམས་སུ་མྱོང་བར་འགྱུར་རོ། །ད་ནི་བདག་གིས་དེ་བཞིན་གཤེགས་པ་དང་། ཆོས་དང་། དགེ་འདུན་དང་། ཐར་པ་རྣམས་རྟག་པ་དང་། བརྟན་པ་དང་། ཐེར་ཟུག་པ་དང་། འཇིག་པར་མི་འགྱུར་བར་སེམས་གཅིག་
བསྐྱེད་པའི་འབྲས་བུས་དབང་ཕྱུག་རྟག་པའི་འབྲས་བུ་ཐོབ་བོ། །ཕྱིན་ཅི་ལོག་བཞི་པོ་སྡུག་བསྔལ་བ་དང་། བདག་མེད་པ་དང་། མི་གཙང་བ་རྣམས་ཆོས་མ་ཡིན་པ་ལ་ཆོས་ཡིན་ནོ་སྙམ་དུ་འཛིན་པས་ལྟ་བ་ངན་པའི་འབྲས་བུ་མྱོང་བ་འདི་ནི་སྡུག་བསྔལ་འགོག་པར་འགྱུར་
བའི་ལམ་ཞེས་བྱའོ། །གཞི་གསུམ་རྟག་པར་བསྒོམ་པ་བསྒྲུབ་པའི་ཕྱིར་མི་རྟག་པ་སྒོམ་པ་གང་ཡིན་པ་དེ་དག་ནི་མི་བདེན་པའི་བསྒོམ་པ་ལ་སྒོམ་པ་ཡིན་ནོ། །དེ་ལྟར་རྟག་པར་སྒོམ་པ་གང་ཡིན་པ་དེ་དག་ནི་ངའི་ཉན་ཐོས་ཡིན་ཏེ། འཕགས་པའི་བདེན་པ་བཞི་ཤེས་
པའོ་ཞེས་ང་ཟེར་རོ། །འདི་རྣམས་ནི་འཕགས་པའི་བདེན་པ་བཞི་ཡིན་པར་རིག་པར་བྱའོ། །གསོལ་པ། བཅོམ་ལྡན་འདས་འཕགས་པའི་བདེན་པ་བཞིའི་ལམ་འདིའི་ཚུལ་གྱིས་བསྒོམ་པར་བགྱི་བ་བདག་གིས་ད་གཟོད་རྟོགས་ལགས་སོ། །བཀའ་སྩལ་པ།
སྡ