Kinh tạng Tây Tạng (Kangyur Đại Học) — 054_མདོ་སྡེ།_ཐ

ལ་བུ་སྟོང་ཚང་བ་ཡོད་དེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་
པ་རྣམས་སོ། །དེས་གླིང་བཞི་པའི་འཇིག་རྟེན་ཆད་པ་དང་། མཚོན་གྱིས་མ་ཡིན་པར་ཆོས་ཀྱིས་ཕབ་སྟེ་རབ་ཏུ་གནས་སོ། །གལ་ཏེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་འགྱུར་རོ་སྙམ་ནས་དེ་འདི་སྙམ་དུ་སེམས་ཏེ་
འདི་འདྲ་བའི་སྐྱེས་བུ་ཆེན་པོ་དག་འཇིག་རྟེན་ན་མཐོང་བ་རྙེད་པར་དཀའ་སྟེ། བདག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་དཔེ་མེད་ག་ལ་བ་དེར་འགྲོའོ། །བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་

དེ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ནམ་འོན་ཏེ་མི་ལྡན་པའི་བར་དུ་ཤེས་པར་བྱའོ། །དེ་སྟེ་ལྡན་ན་ནི་རྫོགས་པའི་སངས་རྒྱས་སུ་གདོན་མི་ཟ་བར་རིག་པར་བྱའོ། །ཇི་སྟེ་མི་ལྡན་ན་ཡང་དེ་ལྟ་བུའི་སྐྱེས་བུ་དམ་པ་དག་མཐོང་བའང་ལེགས་སོ་སྙམ་མོ། །དེ་ནས་
བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཁྱབ་འཇུག་གིས་བྱིན་བྲམ་ཟེའི་བུ་སྟོང་ཕྲག་དྲུག་ཅུས་ཡོངས་སུ་བསྐོར་ཅིང་མདུན་དུ་བདར་ནས། དེ་བཞིན་གཤེགས་པ་བརྩོན་འགྲུས་དཔེ་མེད་དེ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་
དཔེ་མེད་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་ནས། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཁྱབ་འཇུག་གིས་བྱིན་དེས་དེ་བཞིན་གཤེགས་པ་བརྩོན་འགྲུས་དཔེ་མེད་དེ་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་དཔག་ཏུ་མ་མཆིས་པ་ལ་ཡང་དག་པར་ཞུགས་པ། ཐེག་པ་གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། གཞལ་དུ་མ་མཆིས།
བརྗོད་དུ་མ་མཆིས་པ་ལ་ཡང་དག་པར་ཞུགས་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཇི་ལྟར་ཡོངས་སུ་སྦྱང་བར་བགྱི། བཅོམ་ལྡན་འདས་ཇི་ལྟར་བསླབས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་སྦྱོང་བར་བགྱིད།
ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་ཡོངས་སུ་སྦྱངས་པ་ལགས། དེ་སྐད་ཅེས་གསོལ་པ་དང་། དེ་བཞིན་གཤེགས་པ་བརྩོན་འགྲུས་དཔེ་མེད་དེས་ཁྱབ་འཇུག་གིས་བྱིན་བྲམ་ཟེའི་རིགས་ཤིང་སཱ་ལ་
ཆེན་པོ་ལྟ་བུ་དེ་ལ་འདི་སྐད་ཅེས་བཀའ་སྩལ་ཏོ། །བྲམ་ཟེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སློབ་པར་འདོད་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་སྦྱོང་བར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྲོག་གཅོད་པ་སྤང་བར་བྱ་སྟེ།

དེས་སྲོག་གཅོད་པ་མི་དམིགས་པར་བྱའོ། །དེས་མ་བྱིན་པར་ལེན་པའང་སྤང་བར་བྱ་སྟེ། མ་བྱིན་པར་ལེན་པ་མི་དམིགས་པར་བྱའོ། །འདོད་པ་ལ་ལོག་པར་གཡེམ་པ་ཡང་སྤང་བར་བྱ་སྟེ། འདོད་པ་ལ་ལོག་པར་གཡེམ་པ་མི་དམིགས་པར་བྱའོ། །
བརྫུན་དུ་སྨྲ་བ་ཡང་སྤང་བར་བྱ་སྟེ། བརྫུན་དུ་སྨྲ་བ་མི་དམིགས་པར་བྱའོ། །ཕྲ་མའི་ཚིག་ཀྱང་སྤང་བར་བྱ་སྟེ། ཕྲ་མའི་ཚིག་ཀྱང་མི་དམིགས་པར་བྱའོ། །ངག་རྩུབ་པོ་ཡང་སྤང་བར་བྱ་སྟེ། ངག་རྩུབ་པོ་ཡང་མི་དམིགས་པར་བྱའོ། །ཚིག་ཀྱལ་པ་ཡང་སྤང་བར་
བྱ་སྟེ། ཚིག་ཀྱལ་པ་ཡང་མི་དམིགས་པར་བྱའོ། །བརྣབ་སེམས་ཀྱང་སྤང་བར་བྱ་སྟེ། བརྣབ་སེམས་ཀྱང་མི་དམིགས་པར་བྱའོ། །གནོད་སེམས་ཀྱང་སྤང་བར་བྱ་སྟེ། གནོད་སེམས་ཀྱང་མི་དམིགས་པར་བྱའོ། །ཡང་དག་པར་ལྟ་བ་ཅན་དུ་ཡང་བྱ་སྟེ་ཡང་
དག་པར་ལྟ་བ་མི་དམིགས་པར་བྱའོ། །ཆོས་ཇི་སྙེད་པ་དེ་ཐམས་ཅད་ཀྱང་ཤེས་པར་བྱ་སྟེ། དེ་དག་མི་དམིགས་པར་བྱ་ཞིང་མངོན་པར་མི་ཞེན་པར་བྱ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །དེ་
ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་བྱང་ཆུབ་སེམས་དཔའ་རབ་ཏུ་ཞི་བའི་ས་ལ་སྣང་བ་ཐོབ་པར་འགྱུར་ཏེ། ཆོས་གང་ཡང་མི་འཛིན་ཅིང་ཆོས་གང་ལ་ཡང་མངོན་པར་མི་ཞེན་ཏོ། །ཆོས་གང་ལ་ཡང་དམིགས་པའི་ཕྱིར་ཉེ་བར་གནས་པ་མ་ཡིན་ནོ། །གང་
དེ་ལྟར་མཐོང་བ་དེས་ནི་རྟེན་ཅིང་འབྲེལ་བར་འབྱུང་བ་མཐོང་ངོ་། །གང་གིས་རྟེན་ཅིང་འབྲེལ་བར་འབྱུང་བ་མཐོང་བ་དེས་ནི་ཆོས་གང་ཡང་མི་མཐོང་ངོ་། །གང་གིས་ཆོས་གང་ཡང་མི་མཐོང་བ་དེ་ཅི་ཡང་མི་ཤེས་སོ། །གང་ཅི་ཡང་མི་ཤེས་པ་དེ་བྱང་ཆུབ་ཀྱི་ཕྱིར་སྤྱོད་དོ། །
གང་བྱང་ཆུབ་ཀྱི་ཕྱིར་སྤྱོད་པ་དེ་ཅི་ལའང་མི་སྤྱོད་དོ། །གང་ཅི་ལའང་མི་སྤྱོད་པ་དེ། བྱང་ཆུབ་མངོན་པར་རྫོགས་པར་འཚང་རྒྱའོ། །གང་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་ཅིའང་འཚང་མི་རྒྱ་སྟེ། གང་ཅིའང་འཚང་མི་རྒྱ་བ་དེ་ནི་ཚུལ་ཁྲིམས་ཡོངས་སུ་

དག་པ་ཞེས་བྱའོ། །གང་དེ་ལྟར་ངེས་པ་མེད་པའི་ཆོས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དེ་ནི་ཚུལ་ཁྲིམས་ཡོངས་སུ་དག་པ་ཞེས་བྱའོ། །གང་ཚུལ་ཁྲིམས་ཡོངས་སུ་དག་པ་དེས་ནི་ཆོས་ཉིད་མཐོང་ངོ་། །གང་གིས་ཆོས་ཉིད་མཐོང་བ་དེ་ནི་ཞི་བ་ཞེས་བྱའོ། །
རབ་ཏུ་ཞི་བ་ཞེས་བྱའོ། །ཉེ་བར་ཞི་བ་ཞེས་བྱའོ། །ཞི་གནས་ཀྱི་མཆོག་ཐོབ་པ་ཞེས་བྱའོ། །ཞི་གནས་དམ་པ་ཐོབ་པ་ཞེས་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་དེས་རབ་ཏུ་ཞི་བའི་ས་བསྟན་པ་ཁྱབ་འཇུག་གིས་བྱིན་བྲམ་ཟེའི་
རིགས་ཤིང་སཱ་ལ་ཆེན་པོ་ལྟ་བུས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་དཔེ་མེད་དེ་ལ་ཞི་བ་དང་མཐུན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །ཁྱོད་ཀྱིས་འདོད་ཆགས་དེ་བཞིན་ཞེ་སྡང་ཞི། །ཁྱོད་ནི་གཏི་མུག་བྲལ་ཞིང་ཟག་པའང་
བས། །རྣམ་པར་འདྲེན་པ་ཞི་བའི་ས་ལ་བཞུགས། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །ང་རྒྱལ་ཞི་ཞིང་དྲེགས་དང་རྣམ་པར་བྲལ། །དྲི་མེད་ཉི་མ་བཞིན་དུ་སྣང་མཛད་དེ། །རྟག་པར་རབ་ཏུ་ཞི་བའི་ཆོས་རྣམས་སྟོན། །སེམས་ཞི་བདེ་གཤེགས་ཁྱོད་
ལ་ཕྱག་འཚལ་ལོ། །གང་ན་ཉོན་མོངས་རབ་ཏུ་མི་སྐྱེ་བ། །ཞི་བའི་ས་ལ་བཅོམ་ལྡན་རབ་བསྟེན་ཅིང་། །ཞི་བའི་ས་ལ་སྲས་རྣམས་གནས་སུ་བཙུད། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །གཟུགས་རྣམས་ཞི་བར་བཅོམ་ལྡན་རབ་ཏུ་གསུང་། །དེ་བཞིན་
ཚོར་བ་འདུ་ཤེས་སེམས་པ་རྣམས། །རྣམ་པར་ཤེས་པའི་རྒྱུད་ཀྱང་ཞི་བར་གསུངས། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །འདུས་བྱས་འདི་ཞི་འདུས་མ་བྱས་པའང་ཞི། །ཁྱོད་ཀྱི་སྤྱོད་ཡུལ་ཆོ་ག་དེ་བཞིན་ཞི། །བརྩོན་འགྲུས་ཞི་ཞིང་སྤྱོད་པའང་དེ་བཞིན་
ཏེ། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །སངས་རྒྱས་ཞི་བའི་ཡུལ་རྣམས་རབ་ཏུ་མཁྱེན། །དེ་ནི་སྲོག་ཆགས་ཐ་མའི་ས་མ་ལགས། །འགྲོ་བ་དེར་ནི་ཉན་ཐོས་མཁས་མི་མཆི། །རང་རྒྱལ་དག་གིས་དེ་ནི་ཡོངས་མི་རྟོགས། །གང་ཟག་མཆོག་ཁྱོད་

འགྲོ་བ་གང་མཁྱེན་པ། །དེ་ནས་ས་དང་ཆུ་དང་རླུང་མ་མཆིས། །དེར་འབྱུང་རྣམས་ཀྱི་འགྲོ་བ་མ་མཆིས་བཤད། །དེ་ན་ཉི་ཟླ་རྣམས་ཀྱང་འགྲོ་མ་མཆིས། །དེ་མཁའ་མ་ལགས་བར་དང་ས་མ་ལགས། །ཐམས་ཅད་དངོས་པོ་མ་མཆིས་འདི་
ཡང་བཤད། །སངས་རྒྱས་ཐམས་ཅད་སྤྱོད་ཡུལ་དེ་བཞིན་ཏེ། །བདེ་བར་གཤེགས་པས་རབ་ཏུ་ཞི་བ་བཤད། །ཞི་བ་ཐོབ་མཛད་ཞི་འགྲོ་བླ་ན་མེད། །རབ་ཞི་དྲི་མ་ཐམས་ཅད་འཁྲུ་བ་སྟེ། །གང་འདྲིར་འཁྲུས་བགྱིད་མྱ་ངན་ཡོང་འདའ་ཞིང་། །རྒྱལ་བ་སྐྱོབ་པ་ཀུན་གྱི་
སྤྱོད་ཡུལ་མཆི། །འགྲོ་བ་རྣམས་ཀྱི་བསམ་པ་ཀུན་མཁྱེན་ཅིང་། །དེ་དག་སྤྱོད་པ་བདེ་གཤེགས་རབ་མཁྱེན་ཏེ། །ཆོས་འདི་རྣམས་ནི་རང་བཞིན་ཞི་བར་མཁྱེན། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །ཞི་ལ་དགྱེས་ཤིང་ཡིད་ཞི་དེ་བཞིན་གཤེགས། །
ཞུགས་ལ་ཆབ་བཞིན་དུ་ནི་བསིལ་བར་གྱུར། །ཞི་བའི་ས་ལ་འགྲོ་བ་རབ་འཛུད་པ། །སེམས་ཞི་བདེ་གཤེགས་ཁྱོད་ལ་ཕྱག་འཚལ་ལོ། །རྣམ་པར་འདྲེན་པ་ཐ་མའི་ལུས་འཛིན་ཅིང་། །ཐུབ་པ་ཁྱོད་ནི་འཁོར་བའི་བཅིངས་ཀུན་པས། །མྱ་ངན་འདས་པའི་བདེ་བ་ཁྱོད་
མཁྱེན་ཏེ། །མྱ་ངན་འདས་ཁྱོད་བདེ་གཤེགས་ཁྱོད་ལ་འདུད། །ཞི་གནས་ཐུགས་སུ་ཆུད་རྟོགས་མགོན་བསྟོད་པའི། །བསོད་ནམས་མི་ཉུང་བདག་གིས་གང་བསགས་པ། །དཔེ་མེད་ཤིན་ཏུ་བསྒྲུབས་པའི་ལམ་དེ་ཡིས། །ཞི་བ་སངས་རྒྱས་ས་དེ་ཐོབ་པར་ཤོག །
མགོན་ལ་ཞི་བར་འཐུན་པའི་སྒྲ་དག་གིས། །བདེ་གཤེགས་སྟོན་པ་ཞི་དགྱེས་བསྟོད་པས་སུ། །ཞི་བའི་ས་དེ་ཤིན་ཏུ་ཐོབ་པར་ཤོག །རྒལ་ནས་སྐྱེ་བོ་མི་མཁས་བསྒྲལ་བར་བགྱི། །དེ་ནས་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཁྱབ་འཇུག་གིས་བྱིན་དེས་དེ་བཞིན་
གཤེགས་པ་བརྩོན་འགྲུས་དཔེ་མེད་དེ་ལ་ཞི་བ་དང་འཐུན་པར་ཚིགས་སུ་བཅད་པས་མངོན་པར་བསྟོད་ནས། དགེ་བའི་རྩ་བ་དེས་ཕྱིན་ཆད་སངས་རྒྱས་ཁྲག་ཁྲིག་དཔག་ཏུ་མེད་པ་རྣམས་མཉེས་པར་བྱས། སངས་རྒྱས་ཀྱི་ཞིང་བརྗོད་དུ་མེད་པ་རྣམས་ཡོངས་སུ་སྦྱངས། སེམས་

ཅན་ཁྲག་ཁྲིག་དཔག་ཏུ་མེད་པ་དུ་མ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱས་ཏེ། ཡོངས་སུ་དག་པའི་སངས་རྒྱས་ཀྱི་ཞིང་དུ་སྐྱེ་བ་ཡང་དག་པར་འཛིན་དུ་བཙུད་དོ། །འཇམ་དཔལ་དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཁྱབ་འཇུག་
གིས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཁྱབ་འཇུག་གིས་བྱིན་ཞེས་བྱ་བར་
གྱུར་ཏོ། །འཇམ་དཔལ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཕ་རོལ་ཏུ་ཕྱིན་པ་དྲུག་ཞི་བར་རབ་ཏུ་བརྟག་པར་བྱའོ། །ཞི་བའི་ལམ་ཀུན་དུ་བསྟེན་པར་བྱའོ། །རྒོད་པར་མི་འགྱུར་བར་བྱའོ། །བྱང་ཆུབ་སེམས་དཔའི་ཏིང་ངེ་འཛིན་ཞི་གནས་བསྙེན་པར་བྱའོ། །
བསྟེན་པར་བྱའོ། །བསྒོམ་པར་བྱའོ། །མང་དུ་བྱའོ། །འཇམ་དཔལ་ཞི་བར་སྤྱོད་པ་ལ་ནི་ཡོངས་སུ་མྱ་ངན་ལས་འདའ་བ་སྟེ། མ་ཞི་བར་སྤྱོད་པ་ལ་ནི་འཁོར་བའོ། །འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་
པ་ནི་ཡུན་རིང་པོར་བཟོད་པ་ལ་བསྟེན་ཅིང་བསྙེན་ཏེ་བསྒོམས་ནས་མང་དུ་བྱས་སོ།། །།བམ་པོ་བཞི་པ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་
མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེའི་ཚེ་དེའི་དུས་ན་པད་མའི་འབྱུང་གནས་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་བསྐལ་པ་པད་མའི་འབྱུང་གནས་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་
ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བློ་གྲོས་མཐའ་ཡས་ཞེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་

པ་བློ་གྲོས་མཐའ་ཡས་དེའི་སངས་རྒྱས་ཀྱི་ཞིང་ཚད་མེད་པར་ཡོངས་སུ་དག་པ་བཤད་དུ་མི་ནུས་པ་ནི་འདི་ལྟ་སྟེ། དཔེར་ན་ད་ལྟར་བཅོམ་ལྡན་འདས་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་བཞིན་ནོ། །བཅོམ་ལྡན་འདས་དེ་
བཞིན་གཤེགས་པ་བློ་གྲོས་མཐའ་ཡས་དེའི་སངས་རྒྱས་ཀྱི་ཞིང་དུ་ཐེག་པ་ཆེན་པོ་ལ་ཡང་དག་པར་ཞུགས་པ་མ་གཏོགས་པར་སེམས་ཅན་གཞན་རྣམས་མི་སྐྱེའོ། །དེ་བཞིན་གཤེགས་པ་དེ་ཐེག་པ་ཆེན་པོ་ལ་བརྩམས་ནས་ཆོས་སྟོན་ཏེ། སངས་རྒྱས་ཀྱི་ཞིང་རྒྱ་ཆེ་བ་དང་།
སངས་རྒྱས་ཀྱི་ཞིང་ཡོངས་སུ་དག་པའང་འཆད་དོ། །འཇམ་དཔལ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་བློ་གྲོས་མཐའ་ཡས་དེའི་གསུང་རབ་ལ་དགེ་སློང་རྟག་ཏུ་རྣམ་པར་ལྟ་བ་ཞེས་བྱ་བ་ཞིག་བྱུང་སྟེ། བསྡུ་བའི་དངོས་པོ་བཞི་དང་ལྡན་ཞིང་བསྡུ་བའི་
དངོས་པོ་བཞིས་སེམས་ཅན་རྣམས་སྡུད་དོ། །འཕགས་པའི་རིགས་བཞི་ལ་རབ་ཏུ་གནས་པར་གྱུར། སོ་སོ་ཡང་དག་པར་རིག་པ་བཞི་རྙེད་པར་གྱུར། ཚངས་པའི་གནས་པ་བཞི་དང་ལྡན་པར་གྱུར་ཏེ། བྱམས་པ་ཆེན་པོ་ལ་གནས་པ་དང་། སྙིང་རྗེ་ཆེན་པོ་ལ་གནས་པ་དང་།
དགའ་བ་ཆེན་པོ་ལ་གནས་པ་དང་། བཏང་སྙོམས་ཆེན་པོ་ལ་གནས་པ་དང་། ཉོན་མོངས་པ་མེད་པར་གནས་པ་དང་བྲལ་བར་ཡང་མ་གྱུར་ཏོ། །འཇམ་དཔལ་བཅོམ་ལྡན་འདས་དེ་བཞིན་གཤེགས་པ་བློ་གྲོས་མཐའ་ཡས་དེའི་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་
ཇི་སྙེད་ཡོད་པ་དེ་དག་གི་ནང་ན་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བ་ནི་མཆོག་ཅེས་བྱའོ། །བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བ་དེ་དེ་བཞིན་གཤེགས་པ་བློ་གྲོས་མཐའ་ཡས་དེའི་བསྟན་པ་ཀུན་འཛིན་པར་གྱུར་ཏེ། དེ་བཞིན་གཤེགས་པ་བློ་གྲོས་མཐའ་ཡས་དེ་
ལ་ཇི་ལྟ་བ་དེ་བཞིན་དུ་སངས་རྒྱས་བཅོམ་ལྡན་འདས་བརྗོད་དུ་མེད་པ་རྣམས་ཀྱི་བསྟན་པ་ཀུན་བཟུང་ངོ་། །དེ་འདི་ལྟར་བཟོད་པ་ལ་རབ་ཏུ་གནས་པས་དེ་བཞིན་གཤེགས་པ་རེ་རེའི་སངས་རྒྱས་ཀྱི་ཞིང་ན་ཡང་སེམས་ཅན་དཔག་ཏུ་མེད་པ་རྣམས་བླ་ན་མེད་པ་ཡང་དག་པར་རྫོགས་

པའི་བྱང་ཆུབ་ལ་ཡང་དག་པར་བཙུད་དེ། །དེ་བཟོད་པ་ལ་གནས་ནས་སངས་རྒྱས་ཀྱི་ཞིང་ལ་ལར་སངས་རྒྱས་སུ་སྟོན། ལ་ལར་བྱང་ཆུབ་སེམས་དཔའི་སྤྱོད་པ་སྟོན། ལ་ལར་དང་པོར་སེམས་བསྐྱེད་པ་སྟོན་ཏེ། འཇམ་དཔལ་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བ་དེ་ལྟ་བུའི་
རྫུ་འཕྲུལ་དང་ལྡན་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་
དེའི་ཚེ་དེའི་དུས་ན་བྱང་ཆུབ་སེམས་དཔའ་རྟག་ཏུ་རྣམ་པར་ལྟ་བ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཇི་ལྟར་ན་སངས་རྒྱས་ཀྱི་
ཆོས་འདི་མྱུར་དུ་ནུབ་པར་མི་འགྱུར་ཞེས་སངས་རྒྱས་ཀྱི་བསྟན་པ་ཡོངས་སུ་གཟུང་བ་ལ་ནན་ཏན་བྱའོ། །འཇམ་དཔལ་དེ་སངས་རྒྱས་ཀྱི་བསྟན་པ་ཡོངས་སུ་གཟུང་བའི་ཕྱིར་སློབ་མ་སངས་རྒྱས་ཀྱི་བསྟན་པ་དེ་ཡོངས་སུ་གཟུང་བ་ལ་ཞུགས་པ་ཡིན་ནོ། །དེ་ནས་དེའི་ཚེ་བཅོམ་ལྡན་
འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །མི་ཡི་སེང་གེ་མི་མཆོག་འཇིག་རྟེན་མཁས། །འདས་པ་ཀུན་གྱིས་བཟོད་པ་རབ་ཏུ་བསྔགས། །འཇིག་རྟེན་ཕན་འདོད་གང་དག་མ་བྱུང་བ། །མི་མཆོག་ཀུན་ཀྱང་བཟོད་པ་བསྔགས་པར་འགྱུར། །བཟོད་པའི་སྟོབས་
དང་ལྡན་པར་གྱུར་པ་ནི། །དགྲ་མེད་བྱང་ཆུབ་ལ་ཡང་གཞོལ་བ་སྟེ། །བླ་ན་མེད་པའི་བཟོད་པ་བསྟེན་པས་ན། །འདྲེན་པ་མྱུར་དུ་བྱང་ཆུབ་ཐོབ་པར་འགྱུར། །མི་ཡི་སེང་གེ་དེ་དག་མི་འཇིགས་བཟོད། །བླ་ན་མེད་པའི་བྱང་ཆུབ་ཚོལ་བའི་ཚེ། །མགོ་དང་ལག་དང་རྐང་པ་རྣམས་
ཀྱང་བྱིན། །མཁས་པ་རྣམས་ནི་སྐྱོ་བར་འགྱུར་བ་མེད། །བཟོད་པའི་སྟོབས་ཀྱིས་དགྲ་རྣམས་ཀུན་ཀྱང་ཐུལ། །བཟོད་པའི་སྟོབས་ཀྱིས་ཉོན་མོངས་རྣམས་ལས་རྒྱལ། །བཟོད་པ་རབ་ཏུ་བསྟེན་པས་རང་འབྱུང་འགྱུར། །བཟོད་པས་མི་འཆི་གོ་འཕང་རྙེད་པར་འོང་། །བཟོད་པ་བསྟེན་པས་རབ་ཏུ་

གཟུགས་བཟང་འགྱུར། །བཟོད་པ་བསྟེན་པས་མི་ཡི་དབང་པོར་འོང་། །བཟོད་ལ་བསྟེན་པས་མཚན་བཟང་འཆང་བ་ཡི། །འཇིག་རྟེན་རང་བྱུང་དེ་བཞིན་གཤེགས་པར་འགྱུར། །བཟོད་པའི་སྟོབས་ཀྱིས་ཉེས་ལས་རྒྱལ་བར་བྱེད། །བཟོད་པའི་སྟོབས་ནི་དེ་དག་སྟོབས་ཀྱི་མཆོག །
བཟོད་པ་བསྟེན་པས་དེ་དག་དགྲར་རྒོལ་མེད། །འཇིག་རྟེན་མཁྱེན་པ་འགྲོ་ལ་ཕན་འདོད་པ། །རང་བྱུང་གང་རྣམས་འདས་པར་གྱུར་པ་དག །བཟོད་ལ་གནས་ཏེ་བདུད་རྣམས་རབ་བཏུལ་ནས། །འཇིག་རྟེན་ཕན་སེམས་བྱང་ཆུབ་རབ་རྙེད་དེ། །བླ་ན་མེད་པའི་སྟོབས་ནི་བཟོད་པའོ། །
བཟོད་པའི་སྟོབས་དང་མཚུངས་པ་ཡོད་མ་ཡིན། །སྟོབས་ཅན་དེ་ནི་བཟོད་པ་བསྟེན་པས་ན། །ཆོས་རྣམས་གང་ཡང་ཅི་ལྟ་བཞིན་དུ་བཟོད། །དེ་ལ་ཕན་སེམས་སྟོབས་དང་ལྡན་ཞེས་གསུང་། །བཟོད་ལ་གནས་པས་ཐེ་ཚོམ་རྣམས་ཀྱང་གཅོད། །བཟོད་ལ་གནས་པས་ཡེ་ཤེས་
དག་པར་འགྱུར། །བཟོད་ལ་གནས་པས་ཐེ་ཚོམ་མེད་པ་སྟེ། །རྟག་ཏུ་བཟོད་པའི་སྟོབས་མཆོག་བསྙེན་པར་གྱིས། །བཟོད་པ་འདི་ནི་རྒྱལ་བས་རབ་ཏུ་བསྔགས། །བཟོད་པ་དེས་ཀྱང་བསམས་པ་ཀུན་འགྲུབ་སྟེ། །དེ་བས་མཚུངས་མེད་བཟོད་ལ་བསྟེན་གྱིས་དང་། །རིང་
པོར་མི་ཐོགས་འཇིག་རྟེན་མཁྱེན་པར་འགྱུར། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔས་བཟོད་པ་གཉིས་ལ་བསྟེན་པར་བྱ་སྟེ། གཞན་ལས་འགྱུར་བ་མེད་པར་བཟོད་པ་དང་། ཆོས་རྣམས་ལ་རྗེས་སུ་འཐུན་པར་བཟོད་པའོ། །འཇམ་དཔལ་ཡང་བཅོམ་ལྡན་འདས་དེ་
བཞིན་གཤེགས་པ་དོན་ཐམས་ཅད་གྲུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བརྩོན་འགྲུས་མཉམ་པ་ཉིད་རབ་ཏུ་རྟོགས་པར་གྱུར་ཏེ། བརྩོན་འགྲུས་ཇི་ལྟ་བར་ལེ་ལོ་ཡང་དེ་བཞིན། ལེ་ལོ་ཇི་ལྟ་བར་བརྩོན་འགྲུས་ཀྱང་དེ་བཞིན་ནོ། །ཆོས་དེ་གཉི་ག་ལ་ཡང་མཚན་
ཉིད་གཅིག་སྟེ། རབ་ཏུ་ཞི་བ། མྱ་ངན་ལས་འདས་པ་དང་མཉམ་པ། གཡོ་བ་དང་རློམ་སེམས་མེད་པ། སྐྱོད་པ་མེད་པ། འགྱུར་བ་མེད་པ། བྱེད་པ་མེད་པ། སེམས་པ་མེད་པ། སེམས་པ་དང་བྲལ་བ། ཕན་ཚུན་དུ་མི་སེམས་པ་སྟེ། ཇི་ལྟར་བདག་མི་སེམས་པ་

ལྟ་བུ་སྟེ། དེ་ནི་མཚན་ཉིད་མེད་པ། བཏགས་པ་མེད་པ། བརྗོད་དུ་མེད་པ། གཟུང་དུ་མེད་པ། འདུ་ཤེས་མེད་པ། འདུ་ཤེས་དང་བྲལ་བ། སེམས་པ་མེད་པ། སེམས་པ་དང་བྲལ་བ། མི་ཚོར་བ་ཚོར་བ་མེད་པ། རྣམ་པར་མི་ཤེས་པ། རྣམ་པར་ཤེས་པ་མེད་པ། མི་གོས་
པ། ཀུན་ནས་ཉོན་མོངས་པ་ཅན་མ་ཡིན་པ། མི་གནས་པ་ཤེས་པར་བྱེད་པ་མེད་པའོ། །ཆོས་དེ་དག་རྟོགས་པར་བྱ་བའི་ཕྱིར་བརྩོན་འགྲུས་བརྩམས་ཤིང་བརྟུལ་བ་བརྟན་པར་གྱུར་ཏོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་
གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན། དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་
མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཟླ་འོད་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཟླ་འོད་རྒྱལ་པོ་དེའི་འོད་ཀྱིས་སངས་རྒྱས་ཀྱི་ཞིང་གྲངས་མེད་པ་སྣང་བར་གྱུར་ཏོ། །འོད་དེ་
ལ་སྒྲིབ་པར་བྱེད་ནུས་པའི་ཆོས་གང་ཡང་མེད་དེ་སྒྲིབ་པ་ཐམས་ཅད་ལས་ཐལ་ནས་སྣང་བར་བྱེད་དོ། །འོད་དེ་ཡང་བདེ་བས་བསིལ་བ་རེག་ན་བདེ་བ། དགེ་བའི་རྩ་བས་བསྐྱེད་པ་སྟེ། དེ་བཞིན་གཤེགས་པ་དེའི་སྔོན་གྱི་སྨོན་ལམ་གྱིས་སེམས་ཅན་གང་འོད་དེས་རེག་པ་རྣམས་སྔོན་མ་རྙེད་
པའི་བདེ་བ་རྙེད་པར་གྱུར། སྔོན་བྱས་པའི་དགེ་བའི་རྩ་བ་རྣམས་ཀྱང་རྗེས་སུ་དྲན་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དེ་བཞིན་གཤེགས་པ་དེའི་རིམ་གྲོ་བྱེད་པ་དགེ་སློང་དེས་པ་ཞེས་བྱ་བ་ཞིག་ཡོད་དེ། དེ་བཞིན་གཤེགས་པ་དེ་ལ་ལོ་བྱེ་བ་ཁྲག་ཁྲིག་སུམ་ཅུ་རྩ་དྲུག་གི་
བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །བཤད་པའང་འཛིན་ཅིང་བདག་གི་དོན་ཡང་མི་གཏོང་ངོ་། །དེས་བཅོམ་ལྡན་འདས་དེ་བཞིན་གཤེགས་པ་ཟླ་འོད་རྒྱལ་པོ་དེ་ལ་ལོ་བྱེ་བ་ཁྲག་ཁྲིག་ཕྲག་སུམ་ཅུ་རྩ་དྲུག་གི་བར་དུ་འདི་ལྟར་བརྩོན་

འགྲུས་མཉམ་པ་ཉིད་བརྩམས་ཀུན་འདྲི་སྟེ། བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོས་ཇི་ལྟར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རབ་ཏུ་རྟོགས་པར་བགྱི། ཇི་ཙམ་གྱིས་བརྩོན་འགྲུས་
མཉམ་པ་ཉིད་ཁོང་དུ་ཆུད་པར་འགྱུར་བ་ལགས། དེ་ལ་དེ་བཞིན་གཤེགས་པ་ཟླ་འོད་རྒྱལ་པོས་ལོ་བྱེ་བ་ཁྲག་ཁྲིག་ཕྲག་སུམ་ཅུ་རྩ་དྲུག་གི་བར་དུ་བརྩོན་འགྲུས་མཉམ་པ་ཉིད་མཚན་ཉིད་གཅིག་པ་ལ་བརྩམས་ཏེ། བསྟན་པའི་ཚིག་བྱེ་བ་ཁྲག་ཁྲིག་ཕྲག་བརྒྱ་སྟོང་གིས་ལུང་བསྟན་ཏོ། །
དེ་ནས་དགེ་སློང་དེས་པ་དེས་དེ་བཞིན་གཤེགས་པ་དེ་ལས་བརྩོན་འགྲུས་མཉམ་པ་ཉིད་ཐོས་ནས་བརྩོན་འགྲུས་མཉམ་པ་ཉིད་ཀྱི་མཆོག་དང་ལྡན་པར་གྱུར། དེས་བརྩོན་འགྲུས་ཀྱི་མཉམ་པ་ཉིད་རྟོགས་ནས་བཅོམ་ལྡན་འདས་དེ་བཞིན་གཤེགས་པ་ཟླ་འོད་རྒྱལ་པོ་དེ་ལ་བརྩོན་འགྲུས་
མཉམ་པ་ཉིད་དང་འཐུན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །ལྷ་དང་བཅས་དང་མི་དང་བདུད། །ལྷ་མིན་བཅས་རིས་འཇིག་རྟེན་ན། །འདྲེན་པ་ཁྱོད་དང་འདྲ་མ་མཆིས། །མི་འདྲ་ལྷག་པ་ག་ལ་མཆིས། །སྡིག་མ་མཆིས་པའི་འགྲོར་གཤེགས་པ། །
བདེ་གཤེགས་མཚུངས་མཉམ་ཐུགས་ལྡན་པ། །བདེ་གཤེགས་ཁྱོད་ཀྱི་སྒྲུབ་པ་ནི། །མ་སྨད་མི་གཡོ་ཟླ་མ་མཆིས། །ཁྱོད་ལ་ལེ་ལོ་བརྩོན་འགྲུས་མཚུངས། །རྣམ་པར་འདྲེན་པ་ཆོས་འདི་དག །བྲག་ཅ་དང་ནི་མཚུངས་འདྲ་ཞེས། །བཅོམ་ལྡན་འདས་ནི་འདུད་ཅིང་སྟོན།
ཆོས་རྣམས་བྱེ་བྲག་མེད་མཁྱེན་ནས། །ཁྱོད་ཀྱི་བརྩོན་འགྲུས་ཞན་མ་མཆིས། །བརྩོན་འགྲུས་སྟོབས་ནི་ཕ་རོལ་ཕྱིན། །བདེ་གཤེགས་རྐང་གཉིས་གཙོ་ཕྱག་འཚལ། །བརྩོན་འགྲུས་དག་གི་མཉམ་ཉིད་འདི། །གང་གིས་རབ་རྟོགས་སྨྲ་བའི་རྟག །ཁྲག་ཁྲིག་བདུད་རྣམས་བཏུལ་
ནས་སུ། །བྱང་ཆུབ་དམ་པ་དེ་དག་རེག །སྟོབས་བཅུ་འཇིག་རྟེན་སྣང་མཛད་ཀུན། །བརྩོན་འགྲུས་མཉམ་ལ་བརྟེན་ནས་སུ། །རྐང་གཉིས་དམ་པ་རབ་རྙེད་དེ། །གཞན་ཡང་དེ་བཞིན་རྙེད་པར་མཛད། །འཇིག་རྟེན་མགོན་པོ་ཐམས་ཅད་ཀྱིས། །བརྩོན་འགྲུས་མཉམ་ཉིད་

ཤིན་ཏུ་བསྔགས། །སྲིད་པ་མཐར་ཕྱིན་སྲིན་འགགས་པ། །བཅོམ་ལྡན་འདས་ཀྱང་དེ་བཞིན་བསྟོད། །གང་ཟག་གང་དག་མི་སྐྱོ་བར། །ཞི་གནས་བརྩོན་འགྲུས་བརྩམས་གྱུར་པ། །མི་མཁས་འགྲོ་བ་རྟོགས་བགྱིའི་སླད། །དེ་དག་བྱང་ཆུབ་རྙེད་པར་འགྱུར། །ཞི་གནས་སྟོབས་
ཀྱི་ཕ་རོལ་ཕྱིན། །བརྩོན་འགྲུས་མཉམ་རྙེད་འགྲོ་མཆོག་གང་། །འཇིག་རྟེན་མགོན་ཁྱོད་དེ་ཡི་ཡབ། །དེ་དག་རྣམས་ནི་ཁྱོད་ཀྱི་སྲས། །དེ་དག་རྙེད་པ་ལེགས་རྙེད་དེ། །མིར་ནི་ཡང་དག་ལེགས་པར་མཆིས། །དེ་དག་བརྩོན་འགྲུས་མཉམ་ཉིད་འདི། །སེམས་ལ་ཡང་དག་འགྲུབ་
པར་འགྱུར། །གང་རྣམས་བརྩོན་འགྲུས་མཉམ་ཉིད་ལ། །འཇིག་རྟེན་སྒྲོན་མ་སེམས་འཇུག་པ། །དེ་དག་རང་འབྱུང་བདེ་བར་གཤེགས། །སྟོབས་བཅུའི་སྟོབས་རྣམས་འབྱུང་བར་འགྱུར། །དེ་ནས་དགེ་སློང་དེས་པ་དེས་བཅོམ་ལྡན་འདས་དེ་བཞིན་གཤེགས་པ་ཟླ་འོད་རྒྱལ་པོ་དེ་ལ་
བརྩོན་འགྲུས་མཉམ་པ་ཉིད་དང་འཐུན་པའི་ཚིགས་སུ་བཅད་པ་དེ་དག་གིས་མངོན་པར་བསྟོད་ནས། བརྩོན་འགྲུས་མཉམ་པ་ཉིད་རྟོགས་ཏེ། དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམ་ཡང་བརྩོན་འགྲུས་མཉམ་པ་ཉིད་ལ་མི་གནས་པར་མ་གྱུར་ཏེ། རྟག་ཏུ་རྒྱུན་མི་འཆད་པར་
ཐབས་མཁས་པ་དང་ལྡན་པར་གྱུར་ཏོ། །དེའི་ཚེ་དེའི་དུས་ན་དགེ་སློང་དེས་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཡིད་གཉིས་དང་། སོམ་ཉི་དང་། ཐེ་ཚོམ་ཟ་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་
གྲུབ་པ་དེ་དེའི་ཚེ་དེའི་དུས་ན་དགེ་སློང་དེས་པ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་བརྩོན་འགྲུས་མཉམ་པ་ཉིད་ལ་བརྩོན་པར་བྱའོ། །བརྩོན་འགྲུས་མཉམ་པ་ཉིད་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ནི་
བསམ་གཏན་གྱི་ཕ་རོལ་ཏུ་ཕྱིན་པ་མངོན་དུ་འགྱུར་ཏེ། བསྒོམ་པ་ཡོངས་སུ་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། བརྩོན་འགྲུས་མཉམ་པ་ཉིད་རྙེད་པར་བྱ་བའི་ཕྱིར་སེམས་རྩེ་གཅིག་པར་གྱུར་ཏེ་དེའི་ཕྱིར་དེ་ཞི་བ་མཆོག་ཏུ་འགྱུར་རོ། །འཇམ་དཔལ་སྔོན་བྱུང་བ་འདས་པའི་དུས་

ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་
པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཞི་གནས་ཡང་དག་འཕགས་ཞེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་ཞི་གནས་ཡང་
དག་འཕགས་དེའི་སངས་རྒྱས་ཀྱི་ཞིང་ན་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་འདོད་པ་ན་སྤྱོད་པའི་ཉོན་མོངས་པ་རྒྱུ་བ་མེད་པར་གྱུར་ཏེ་སེམས་ཅན་དེ་དག་ཐམས་ཅད་ལ་འདོད་པའི་ཀུན་ནས་དཀྲིས་པ་མི་སྐྱེའོ། །འཇམ་དཔལ་དེའི་ཚེ་དེའི་དུས་ན་བཅོམ་ལྡན་འདས་དེ་
བཞིན་གཤེགས་པ་ཞི་གནས་ཡང་དག་འཕགས་ཞེས་བྱ་བ་དེའི་གསུང་རབ་དེ་ལ་དེ་བཞིན་གཤེགས་པ་དེའི་རིམ་གྲོ་བྱེད་པ་དགེ་སློང་བསམ་གཏན་སྤྱོད་ཡུལ་ཞེས་བྱ་བ་ཞིག་བྱུང་སྟེ། དེས་དེ་བཞིན་གཤེགས་པ་ཞི་གནས་ཡང་དག་འཕགས་ལ་བསྐལ་པ་བཅྭ་བརྒྱད་ཀྱི་བར་དུ་ཡིད་
དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །དགེ་སློང་བསམ་གཏན་སྤྱོད་ཡུལ་དེ་ལ་ཆོས་ཐམས་ཅད་བསམ་གཏན་གྱི་དམིགས་པར་གྱུར་ཏོ། །དེ་ལྟར་དགེ་སློང་བསམ་གཏན་སྤྱོད་ཡུལ་དེས་བསྐལ་པ་བཅྭ་བརྒྱད་ཀྱི་བར་དུ་ཞི་གནས་ལ་བསྒོམས་པར་གྱུར་ཏོ། །
དེ་ཞི་གནས་ཀྱི་སྟོབས་དེ་དང་ལྡན་པས་རྩོམ་པ་ཐམས་ཅད་ལ་དབང་ཐོབ་པར་གྱུར་ཏོ། །དེ་ཆོས་གང་དང་གང་ལ་དམིགས་པར་བྱེད་པ་ཆོས་དེ་དང་དེ་ཞི་བར་ཀུན་བསྒོམས་ཏེ། མྱ་ངན་ལས་འདས་པ་དང་མཚུངས་པ། མཚན་ཉིད་མེད་པ། ཆོས་ཀྱི་དབྱིངས་སུ་ངེས་པ། ནམ་མཁའ་དང་
མཉམ་ཞིང་མཚུངས་པ་སྟེ། གང་དམིགས་པའི་མཚན་ཉིད་དུ་གྱུར་པ་སེམས་ཀྱང་དེའི་མཚན་ཉིད་དུ་གྱུར་པའོ། །གང་སེམས་ཀྱི་མཚན་ཉིད་དུ་གྱུར་པ་དེ་རྩེ་གཅིག་པའི་མཚན་ཉིད་དུ་གྱུར་པའོ། །གང་རྩེ་གཅིག་པའི་མཚན་ཉིད་དུ་གྱུར་པ་དེ་བྱང་ཆུབ་ཀྱི་མཚན་ཉིད་དུ་གྱུར་པའོ། །གང་བྱང་

ཆུབ་ཀྱི་མཚན་ཉིད་དུ་གྱུར་པ་དེ་བྱང་ཆུབ་ཀྱི་ཕྱོགས་ཀྱི་ཆོས་ཀྱི་མཚན་ཉིད་དུ་གྱུར་པའོ། །གང་བྱང་ཆུབ་ཀྱི་ཕྱོགས་ཀྱི་ཆོས་ཀྱི་མཚན་ཉིད་དུ་གྱུར་པ་དེ་བྱང་ཆུབ་སེམས་དཔའི་མཚན་ཉིད་དུ་གྱུར་པའོ། །གང་བྱང་ཆུབ་སེམས་དཔའི་མཚན་ཉིད་དུ་གྱུར་པ་དེ་ཞི་བའི་མཚན་ཉིད་དུ་གྱུར་པ་སྟེ། དེ་ནི་
ཆོས་ཐམས་ཅད་ཞི་བ་ལ་ནེམ་ནུར་མེད་ཅིང་ཐེ་ཚོམ་མི་ཟའོ། །དེ་དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམ་ཡང་འདོད་པ་ན་སྤྱོད་པའི་ཉོན་མོངས་པ་དང་ལྡན་པར་མ་གྱུར་ཏེ། སྨོན་ལམ་གྱི་སྟོབས་ཀྱིས་ནི་ལན་མང་དུ་འདོད་པའི་ཁམས་སུ་སྐྱེས་སོ། །དེ་ཅིའི་ཕྱིར་ཞེ་ན། འདོད་པའི་
ཁམས་ན་སེམས་ཅན་སྣོད་དུ་འགྱུར་བ་མང་བས་དོན་གྱི་དབང་འདི་ལ་བརྟེན་ནས་འདོད་པའི་ཁམས་སུ་སྐྱེས་ཏེ། སྙིང་རྗེ་ཆེན་པོས་ཡོངས་སུ་ནོན་ཅིང་སྙིང་བརྩེ་བའི་ཕྱིར་རོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་བསམ་གཏན་སྤྱོད་ཡུལ་ཞེས་བྱ་བར་གྱུར་པ་
དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་བསམ་གཏན་སྤྱོད་ཡུལ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པའི་བྱང་ཆུབ་སེམས་དཔས་ཞི་གནས་དང་འཐུན་པའི་ལྷག་མཐོང་བསྒོམ་པར་བྱའོ། །ཞི་གནས་དང་འཐུན་པའི་ལྷག་མཐོང་སྒོམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་རབ་ཏུ་ཞི་བའི་ཤེས་རབ་ཀྱི་ཕ་རོལ་ཏུ་ཕྱིན་
པ་ཡང་དག་པར་འགྲུབ་བོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་པ་ནས་བརྗོད་དུ་མེད་པའི་བར་དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཏོག་གི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་བཅོམ་ལྡན་འདས་དེ་བཞིན་གཤེགས་པ་ཏོག་གི་རྒྱལ་པོ་

དེའི་ཚེའི་ཚད་ནི་ལོ་བྱེ་བ་ཁྲག་ཁྲིག་ཕྲག་དགུ་བཅུར་གྱུར་ཏོ། །འཇམ་དཔལ་ཡང་དེ་བཞིན་གཤེགས་པ་ཏོག་གི་རྒྱལ་པོ་དེའི་གསུང་རབ་ལ་དགེ་སློང་ཡེ་ཤེས་བླ་མ་ཞེས་བྱ་བ་དང་། བསམ་གཏན་བླ་མ་ཞེས་བྱ་བ་གཉིས་ཉན་ཐོས་ཀྱི་ཟུང་མཆོག་གི་ཟུང་། བཟང་
པོའི་ཟུང་ཤིག་བྱུང་སྟེ། དགེ་སློང་ཡེ་ཤེས་བླ་མ་ནི་ཤེས་རབ་ཅན་གྱི་མཆོག་ཏུ་གྱུར། དགེ་སློང་བསམ་གཏན་བླ་མ་ནི་རྫུ་འཕྲུལ་ཅན་གྱི་མཆོག་ཏུ་གྱུར་ཏོ། །དེ་ནས་དགེ་སློང་ཡེ་ཤེས་བླ་མ་ནི་དེ་བཞིན་གཤེགས་པ་ཏོག་གི་རྒྱལ་པོ་དེའི་ཉན་ཐོས་རྣམས་ལྟ་བ་ཕུན་སུམ་ཚོགས་པ་ལ་རབ་
ཏུ་འདུལ། དགེ་སློང་བསམ་གཏན་བླ་མ་ནི་མཆོག་གི་དོན་རྙེད་པར་རབ་ཏུ་འདུལ་ཏེ། ཕྱོགས་གང་ན་དགེ་སློང་ཡེ་ཤེས་བླ་མ་དང་། དགེ་སློང་བསམ་གཏན་བླ་མ་དེ་འཁོད་པའི་ཕྱོགས་དེར་བཅོམ་ལྡན་འདས་དེ་བཞིན་གཤེགས་པ་ཏོག་གི་རྒྱལ་པོ་མཛད་པ་ཆུང་བར་གྱུར་ཏོ། །དགེ་
སློང་ཡེ་ཤེས་བླ་མ་ནི་སེམས་ཅན་རྣམས་བྱང་ཆུབ་སེམས་དཔའི་ཐེག་པ་ལ་ཡང་དག་པར་འཛུད། དགེ་སློང་བསམ་གཏན་བླ་མ་ནི་སྤྱོད་པ་ལ་ཡང་དག་པར་འཛུད། དགེ་སློང་ཡེ་ཤེས་བླ་མ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་འདོམས། དགེ་སློང་བསམ་གཏན་བླ་མ་ནི་ཐབས་
མཁས་པ་ལ་འདོམས། དགེ་སློང་ཡེ་ཤེས་བླ་མ་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་འདོམས། དགེ་སློང་བསམ་གཏན་བླ་མ་ནི་བསམ་གཏན་གྱི་ཕ་རོལ་ཏུ་ཕྱིན་པ་ལ་འདོམས། དགེ་སློང་ཡེ་ཤེས་བླ་མ་ནི་ལྷག་མཐོང་ལ་
འདོམས། དགེ་སློང་བསམ་གཏན་བླ་མ་ནི་ཞི་གནས་ལ་འདོམས། དགེ་སློང་ཡེ་ཤེས་བླ་མ་ནི་སེམས་ཅན་གྱི་བསམ་པ་ཤེས་པ་ལ་འདོམས། དགེ་སློང་བསམ་གཏན་བླ་མ་ནི་རབ་ཏུ་ཞི་བའི་ཡེ་ཤེས་ལ་འདོམས། དགེ་སློང་ཡེ་ཤེས་བླ་མ་ནི་སྟོབས་ཀྱི་ཡེ་ཤེས་ལ་འདོམས། དགེ་སློང་
བསམ་གཏན་བླ་མ་ནི་མི་འཇིགས་པའི་ཡེ་ཤེས་ལ་འདོམས། དགེ་སློང་ཡེ་ཤེས་བླ་མ་ནི་སོ་སོ་ཡང་དག་པར་རིག་པ་བཞི་ལ་རབ་ཏུ་འདུལ། དགེ་སློང་བསམ་གཏན་བླ་མ་ནི་སོ་སོ་ཡང་དག་པར་རིག་པ་བཞི་ལ་སྙོམས་པར་འཇུག་པའི་ཡེ་ཤེས་ལ་འདོམས། དགེ་སློང་ཡེ་ཤེས་བླ་མ་ནི་

ནན་ཏན་ལ་འདོམས། དགེ་སློང་བསམ་གཏན་བླ་མ་ནི་སེམས་བཅོས་པ་དང་བསྡུ་བའི་ཕྱིར་འདོམས། དགེ་སློང་ཡེ་ཤེས་བླ་མ་ནི་དོན་དམ་པའི་ཡེ་ཤེས་ལ་འདོམས། དགེ་སློང་བསམ་གཏན་བླ་མ་ནི་ཀུན་རྫོབ་ཤེས་པ་ལ་འདོམས། དགེ་སློང་ཡེ་ཤེས་བླ་མ་ནི་ཐབས་ཤེས་པ་ལ་འདོམས།
དགེ་སློང་བསམ་གཏན་བླ་མ་ནི་ཐབས་ཤེས་པ་ཐོབ་པར་བྱ་བའི་ཕྱིར་འདོམས། དགེ་སློང་ཡེ་ཤེས་བླ་མ་ནི་སེམས་ཅན་འདུལ་བའི་ཕྱིར་འདོམས། དགེ་སློང་བསམ་གཏན་བླ་མ་ནི་བསམ་གཏན་གྱིས་འདུལ་བར་འདོམས། དགེ་སློང་ཡེ་ཤེས་བླ་མ་ནི་ཐམས་ཅད་མཁྱེན་པ་ལ་འདོམས།
དགེ་སློང་བསམ་གཏན་བླ་མ་ནི་རྣམ་པ་ཐམས་ཅད་མཁྱེན་པ་ཉིད་ལ་འདོམས་ཏེ། དེ་ལྟར་དགེ་སློང་གཉིས་ཀྱི་ཡོན་ཏན་གྱི་ཁྱད་པར་ནི་བསྐལ་པ་བརྗོད་དུ་མེད་པར་བཤད་ཀྱང་ཡོན་ཏན་གྱི་ཁྱད་པར་ཟད་པར་མི་ནུས་ཏེ། དགེ་སློང་དེ་གཉིས་དེ་ཙམ་དུ་ཡོན་ཏན་བསམ་གྱིས་མི་ཁྱབ་པ་དང་ལྡན་
ནོ། །དེ་ལྟར་དགེ་སློང་དེ་གཉིས་ཀྱིས་བཅོམ་ལྡན་འདས་དེ་བཞིན་གཤེགས་པ་ཏོག་གི་རྒྱལ་པོའི་བསྟན་པ་ཡོངས་སུ་བཟུང་བར་གྱུར་ཏོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས་བསྐལ་པ་ཁྲག་ཁྲིག་བརྒྱད་ཀྱི་བར་དུ་དེ་བཞིན་གཤེགས་པའི་བསྟན་པ་དགེ་སློང་ཉན་
ཐོས་གཉིས་པོ་དེས་བཟུང་ནས་གནས་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དགེ་སློང་ཡེ་ཤེས་བླ་མ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་
གྲུབ་པ་དེ་དེའི་ཚེ་དེའི་དུས་ན་ཤེས་རབ་ཅན་གྱི་མཆོག་དགེ་སློང་ཡེ་ཤེས་བླ་མ་ཞེས་བྱ་བར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་རྫུ་འཕྲུལ་ཅན་གྱི་མཆོག་དགེ་སློང་བསམ་གཏན་བླ་མ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་
བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་སེང་གེའི་རྩལ་གྱིས་བཞུད་པ་དེ་དེའི་ཚེ་དེའི་དུས་ན་དགེ་སློང་བསམ་གཏན་བླ་མ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་

མཁས་པ་ལ་བརྩོན་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ས་ཞི་བར་ངེས་པར་འབྱུང་བར་འགྱུར་རོ། །དེ་བྱང་ཆུབ་སེམས་དཔའི་ས་ཞི་བ་ལ་བསྙེན་ཅིང་
གོམས་པར་བྱས། མང་དུ་བྱས་པས་གང་ལ་དམིགས་པར་བྱེད་པ་དེ་ཐམས་ཅད་སངས་རྒྱས་ཀྱི་སྐུར་ཤེས་སོ། །འཇམ་དཔལ་འདི་ལྟ་སྟེ་དཔེར་ན་སྨན་གསེར་འོད་ཀྱིས་མིག་བསྐུས་པའི་མིས་གཟུགས་ཅི་མཐོང་བ་དེ་ཐམས་ཅད་གསེར་གྱི་ཁ་དོག་ཏུ་མཐོང་སྟེ། ཁ་དོག་གཞན་དུ་མ་ཡིན་
པ་དེ་བཞིན་དུ་འཇམ་དཔལ་བྱང་ཆུབ་སེམས་དཔའ་ཏིང་ངེ་འཛིན་ཞི་བ་ལ་བསྙེན་ཅིང་བསྒོམས་ཏེ་མང་དུ་བྱས་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པ་གང་ལ་དམིགས་པར་བྱེད་པ་དང་། ཐམས་ཅད་ཀྱང་སངས་རྒྱས་ཀྱི་སྐུར་མཐོང་ངོ་། །འཇམ་དཔལ་འདི་ལྟ་
སྟེ་དཔེར་ན་ཡོངས་སུ་དག་པའི་ནོར་བུ་རིན་པོ་ཆེ་སྣོད་གང་དུ་བཞག་པའི་སྣོད་དེ་ཐམས་ཅད་དེའི་ཁ་དོག་ཏུ་གནས་པ་དེ་བཞིན་དུ། འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཞི་བ་ལ་བསྙེན་ཅིང་བསྒོམས་ཏེ་མང་དུ་བྱས་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་
པ་གང་དང་སེམས་ཕྲད་པ་དེ་ཐམས་ཅད་སངས་རྒྱས་ཀྱི་སྐུར་མཐོང་ངོ་། །འཇམ་དཔལ་འདི་ལྟ་སྟེ། དཔེར་ན་སྐྱེས་བུ་གང་དང་གང་ལ་མང་དུ་རྟོགས་པ་རྨི་ལམ་ན་ཡང་དེ་དག་ཤེས་པ་དེ་བཞིན་དུ། འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཞི་བ་ལ་བསྙེན་ཅིང་བསྒོམས་ཏེ་
མང་དུ་བྱས་པས་ཆོས་གང་མངོན་དུ་གྱུར་པ་དེ་དག་སངས་རྒྱས་ཀྱི་སྐུར་མཐོང་ངོ་། །འཇམ་དཔལ་འདི་ལྟ་སྟེ། དཔེར་ན་སྐྱེས་བུ་བཟོ་ཅི་དང་ཅི་ལ་སློབ་པ་དེ་དང་དེ་ཚར་ཕྱིན་པར་འགྱུར་བ་དེ་བཞིན་དུ། འཇམ་དཔལ་བྱང་ཆུབ་སེམས་དཔའི་ཏིང་ངེ་འཛིན་ཞི་བ་ལ་སློབ་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་སངས་རྒྱས་མཐོང་བར་གནས་པར་འགྱུར་རོ། །དེ་སྦྱིན་པ་སྦྱིན་པ་ན་སྦྱིན་གནས་ཐམས་ཅད་སངས་རྒྱས་ཀྱི་སྐུར་བྱིན་གྱིས་རློབ་སྟེ། དེའི་སྦྱིན་པ་དེ་ཡང་དེ་བཞིན་གཤེགས་པ་ལ་ཕུལ་བར་འགྱུར་རོ། །དེས་སྦྱིན་པ་དེ་ཡང་དེ་བཞིན་

གཤེགས་པ་ལ་ཕུལ་བར་ཤེས་ཏེ། དེ་ལྟར་དེའི་སྦྱིན་པའི་ཕ་རོལ་ཏུ་ཕྱིན་པ་འབྲས་བུ་ཆེ་བར་འགྱུར་རོ། །དེ་ཐམས་ཅད་དུ་སངས་རྒྱས་ཀྱི་གཟུགས་ལ་དད་པས་ཚུལ་ཁྲིམས་ཡོངས་སུ་དག་པར་འགྱུར་རོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་
མེད་པ་ནས་བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་པད་མ་བླ་མ་ཞེས་བྱ་བའི་བསྐལ་པ་བྱུང་སྟེ། ཡང་འཇམ་དཔལ་པད་མའི་བླ་མའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ།
འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དཔའ་སྲ་རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་སྟེ། ཡང་འཇམ་དཔལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དཔའ་སྲ་རྣམ་པར་གནོན་པ་དེའི་རིམ་གྲོ་བྱེད་པ་དགེ་སློང་ལེགས་པར་བརྟགས་སྤྱོད་ཅེས་བྱ་བ་ཞིག་བྱུང་སྟེ། དེས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ལ་རབ་ཏུ་དགའ་བ་དང་གུས་པས་བསྙེན་བཀུར་བྱས་སོ། །དེའི་ཚེ་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་
བ་འཛིན་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ། འབྲུ་དང་མཛོད་དང་བང་བ་མང་བ། སངས་རྒྱས་ཁྲག་ཁྲིག་ཕྲག་བརྒྱད་ཅུ་ལ་དགེ་བའི་རྩ་བ་བསྐྱེད་པ། དགེ་སློང་ལེགས་པར་བརྟགས་སྤྱོད་དང་ཡུན་རིང་པོ་ནས་ལྷན་ཅིག་སྤྱད་ཅིང་ལྷན་ཅིག་བསྟེན་པ། ལྷན་ཅིག་འགྲོགས་ཤིང་གནས་
པ། ལས་ལྷན་ཅིག་བསགས་པ་ཞིག་ཡོད་དོ། །དེ་ནས་དགེ་སློང་ལེགས་པར་བརྟགས་སྤྱོད་དེ་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ག་ལ་བ་དེར་སོང་སྟེ་ཕྱིན་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཤེས་པར་
གྱིས་ཤིག །ད་ལྟར་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ཞེས་བྱ་བ་འཇིག་རྟེན་དུ་བྱུང་ནས་དེ་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ།

ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་གྱིས་རྒྱལ་རིགས་ཚུར་ཤོག །བཅོམ་ལྡན་འདས་དཔའ་སྲ་རྣམ་པར་གནོན་པ་དེ་ག་ལ་བ་དེར་འདོང་ངོ་། །དེ་བཞིན་གཤེགས་པ་དེ་མཐོང་ན་དགེ་བའི་རྩ་བ་སོགས་ཤིང་ཆོས་ཐོས་པར་འགྱུར་རོ། །དེ་ནས་རྒྱལ་
རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་དགེ་སློང་ལེགས་པར་བརྟགས་སྤྱོད་དང་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེ་ག་ལ་བ་དེར་དོང་ངོ་། །དེ་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེས་བཅོམ་ལྡན་འདས་དེ་བཞིན་
གཤེགས་པ་དཔའ་སྲ་རྣམ་པར་གནོན་པ་དེ་མཐོང་མ་ཐག་ཏུ་འདི་ལྟར་དེའང་སྔོན་གྱི་དེ་བཞིན་གཤེགས་པ་དེ་ལ་བསྙེན་བཀུར་བྱས་པའི་ཕྱིར། དགེ་བའི་བཤེས་གཉེན་གྱིས་ཡོངས་སུ་བཟུང་བའི་ཕྱིར། དགེ་བའི་བཤེས་གཉེན་དང་སྐལ་བ་མཉམ་པར་སྤྱད་པའི་ཕྱིར། ཡུན་རིང་
པོར་དགེ་བའི་བཤེས་གཉེན་གྱིས་བསྟན་པ་ལས་འགལ་བར་མ་བྱས་པའི་ཕྱིར་དེ་སེམས་རབ་ཏུ་དད་དེ། བསྐལ་པ་བྱེ་བ་དཔག་ཏུ་མེད་པར་ཚུལ་ཁྲིམས་ཡང་དག་པར་བསྒྲུབས་ཤིང་ཆོས་ཐམས་ཅད་མཉམ་པ་ཉིད་ལ་མོས་ཏེ། སྦྱིན་པ་པོ་དང་སྦྱིན་བདག་ཏུ་གྱུར་ཅིང་སྦྱིན་པ་དང་ཚུལ་ཁྲིམས་
ལ་རྣམ་པར་རྩེ་བ་དེས་བཅོམ་ལྡན་འདས་དཔའ་སྲ་རྣམ་པར་གནོན་པ་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་དུ་བདག་གི་རིགས་དང་མིང་ནས་སྨོས་ཏེ་གསོལ་ཏོ། །བཅོམ་ལྡན་འདས་བདག་ནི་འགྲོ་བ་འཛིན་ཅེས་བགྱིའོ། །བདེ་བར་གཤེགས་པ་བདག་ནི་འགྲོ་བ་
འཛིན་ཅེས་བགྱིའོ། །བཙུན་པ་བཅོམ་ལྡན་འདས་བདག་ནི་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ཅེས་བགྱི་བ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་
འགྲོ་བ་འཛིན་དེ་ལ་འདི་སྐད་ཅེས་བཀའ་སྩལ་ཏོ། །འགྲོ་བ་འཛིན་ཁྱོད་ནི་བདེ་བ་དང་ལྡན་པ་ཡིན་ལ། ལྷ་དང་ལྷ་མ་ཡིན་དང་། གནོད་སྦྱིན་དང་། དྲི་ཟ་དང་། མི་དང་། སེམས་ཅན་གཞན་དག་ནི་འཁོར་བའི་བདེ་བ་འདོད་ན་འགྲོ་བ་འཛིན་ཁྱོད་དོན་གྱི་དབང་ཅི་ཞིག་མཐོང་བས་དེ་

བཞིན་གཤེགས་པའི་ཞབས་ལ་ཕྱག་འཚལ་ཏེ་མིང་ནས་འབྱིན། དེ་སྐད་ཅེས་བཀའ་སྩལ་པ་དང་། རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་རིགས་ཤིང་སཱ་ལ་
ཆེན་པོ་ལྟ་བུ་འགྲོ་བ་འཛིན་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཐམས་ཅད་མཁྱེན་པ་ཐོབ་པར་འཚལ། སྒྲིབ་པ་མ་མཆིས་པའི་ཡེ་ཤེས་སྐྱེད་པར་འཚལ། མུན་ནག་ལ་སྣང་བ་བགྱིད་པར་འཚལ། ལམ་གོལ་བར་
ཞུགས་པའི་སེམས་ཅན་རྣམས་ལ་ལམ་སྟོན་པར་འཚལ། དེད་པ་རྣམས་དྲང་བར་འཚལ། ཤེས་རབ་མ་མཆིས་པ་རྣམས་ལ་ཤེས་རབ་རབ་ཏུ་བསྟན་པར་འཚལ། ནོར་མ་མཆིས་པའི་སེམས་ཅན་རྣམས་ནོར་དང་ལྡན་པར་བགྱིད་པར་འཚལ། སེམས་ཅན་དབུལ་པོ་རྣམས་
ལ་འཕགས་པའི་ནོར་གྱིས་ཕྱུག་པོར་བགྱིད་པར་འཚལ། བྱིང་བ་རྣམས་ལ་གཟིངས་སྩལ་བར་འཚལ། གཟིངས་བཅིང་བར་འཚལ། གྲུ་སྦྱར་བར་འཚལ། སྟེགས་གཟུགས་པར་འཚལ། ཟམ་པ་གདགས་པར་འཚལ། སྐྲག་པ་རྣམས་ཀྱི་དཔུང་གཉེན་དུ་འགྱུར་
བར་འཚལ། སྐྱབས་མ་མཆིས་པ་རྣམས་ཀྱི་སྐྱབས་སུ་འགྱུར་བར་འཚལ། མགོན་མ་མཆིས་པ་རྣམས་ཀྱི་མགོན་དུ་འགྱུར་བར་འཚལ། རྟེན་མ་མཆིས་པ་རྣམས་ཀྱི་རྟེན་དུ་འགྱུར་བར་འཚལ། གནས་མ་མཆིས་པ་རྣམས་ཀྱི་གནས་སུ་འགྱུར་བར་འཚལ། མི་ངོམས་པ་
རྣམས་ངོམས་པར་བགྱིད་པར་འཚལ། ཆོ་ག་མ་འཚལ་བ་རྣམས་ཚིམ་པར་བགྱིད་པར་འཚལ། ཚིག་པ་རྣམས་ཞི་བར་བགྱིད་པར་འཚལ། སྔངས་པ་རྣམས་རབ་ཏུ་དགའ་བར་བགྱིད་པར་འཚལ། ན་བ་རྣམས་ལ་གསོས་བགྱིད་པར་འཚལ། འགུམ་པ་དག་གསོ་བར་
འཚལ་ལགས་སོ། །བཅོམ་ལྡན་འདས་གང་ལ་སྦྱིན་པ་སྩལ་བས་ཐར་པའི་འབྲས་བུར་འགྱུར་བ་དང་། གང་ལ་བགྱི་བ་བགྱིས་པས་མི་འཆི་བ་ལ་གཞོལ་བར་འགྱུར་བའི་སྦྱིན་པའི་གནས་ནི་དེ་བཞིན་གཤེགས་པ་འདྲ་བ་འཇིག་རྟེན་ཐམས་ཅད་ན་གཞན་གང་ཡང་མ་མཐོང་

ལགས་སོ། །དེའི་སླད་དུ་བཅོམ་ལྡན་འདས་བདག་ཞབས་ལ་ཕྱག་འཚལ་བ་བགྱིད་དོ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་དཔའ་སྲ་རྣམ་པར་གནོན་པས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེ་ལ་འདི་སྐད་ཅེས་བཀའ་སྩལ་ཏོ། །
འདི་ལྟར་ཁྱོད་སངས་རྒྱས་ཀྱི་ཆོས་ཟབ་མོ་འདི་ལྟ་སྟེ། ཐམས་ཅད་མཁྱེན་པ་ལ་སེམས་འཇུག་པ་ལེགས་སོ་ལེགས་སོ། །འགྲོ་བ་འཛིན་ཁྱོད་ཀྱི་སྤོབས་པ་ལེགས་སོ། །དམ་བཅས་པ་ལེགས་སོ། །ཡིད་ལ་བྱེད་པ་བཟང་ངོ་། །ཡང་དག་པར་ཞུགས་པ་མཚུངས་པ་མེད་དོ། །
བསམ་པ་མཉམས་སོ། །ཁྱོད་ཀྱི་སེམས་ཀྱི་རྒྱུད་ནི་སྣུམ་མོ། །དེ་ལྟ་བས་ན་འགྲོ་བ་འཛིན་དགེ་བའི་བཤེས་གཉེན་ལ་བསྙེན་པར་བྱའོ། །ཚུལ་ཁྲིམས་ལ་རབ་ཏུ་གནས་ཏེ་སྦྱིན་པ་སྦྱིན་ནོ། །འགྲོ་བ་འཛིན་ཆོས་འདི་གཉིས་ལ་བརྩོན་པར་བྱ་སྟེ། གང་བྱང་ཆུབ་སེམས་དཔའི་ཐེག་པ་
ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ། ཚུལ་ཁྲིམས་ལ་གནས་ཏེ་སྦྱིན་པ་སྦྱིན་ན་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་པ་སྟེ། བྱང་ཆུབ་ལ་ཡང་ཉེ་བར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། གཏོང་བ་ལ་མོས་ཤིང་ཚུལ་ཁྲིམས་ལ་
གནས་པའི་བྱང་ཆུབ་སེམས་དཔའ་ལ་བྱང་ཆུབ་རྙེད་པར་མི་དཀའ་བའི་ཕྱིར་རོ། །དེ་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་དེས་བཅོམ་ལྡན་འདས་དེ་ལ་སྦྱིན་པ་དང་། ཚུལ་ཁྲིམས་དང་ལྡན་པའི་གཏམ་ཐོས་ནས། སངས་རྒྱས་ཀྱི་ཞིང་ཡོངས་སུ་དག་པ་དང་།
སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་རྒྱ་ཆེར་བཏབ་བོ། །དེའི་ཚེ་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེ་ལ་དེས་སྦྱིན་པ་དང་། ཚུལ་ཁྲིམས་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །རྐང་གཉིས་གཙོ་བོ་འདོད་པ་རྣམས་
བོར་ནས། །ལམ་མཆོག་དམ་པ་འདི་ནི་རབ་ཏུ་སྟོན། །ལེགས་པར་བཤད་པའི་ཆོས་དེ་ཐོས་ནས་སུ། །བྱང་ཆུབ་མཆོག་ཏུ་སེམས་ཀྱིས་སྨོན་ལམ་འདེབས། །དཔའ་བོ་གང་དག་བླ་མེད་བྱང་ཆུབ་ཞུགས། །དང་བའི་ཡིད་ཀྱིས་སྤྱད་པ་སྤྱོད་བགྱིད་ཅིང་། །བྱང་ཆུབ་བླ་མེད་ཞི་བ་ཞུགས་

ནས་སུ། །འགྲོ་ལ་སྨན་པའི་སླད་དུ་ཆོས་སྤྱོད་པ། །དེ་དག་རྗེས་སུ་བདག་ནི་སློབ་འཚལ་བས། །རྒྱལ་བ་རྣམས་ལ་དད་པས་བསླབ་པར་བགྱི། །འགྲོ་བ་བཅིངས་པ་རྣམས་ནི་དགྲོལ་སླད་དུ། །བླ་ན་མེད་པའི་བྱང་ཆུབ་ཐོབ་པར་བགྱི། །མདོངས་པར་གྱུར་པ་རྣམས་ཀྱི་མིག་དབྱེ་
སླད། །ལོག་པའི་ལམ་དུ་མཆིས་པ་སླར་བཟློག་སླད། །བླ་ན་མེད་པའི་ལམ་དུ་དགོད་འཚལ་བས། །སྟོན་ལ་ཕྱག་འཚལ་བགྱི་བ་བདག་གིས་བགྱི། །སྔོན་གྱི་སངས་རྒྱས་བརྒྱ་ལ་བདག་གིས་སྤྱད། །སྔོན་གྱི་རྒྱལ་བའི་ལམ་དུ་མཆི་བར་སེམས། །དེ་བཞིན་གཤེགས་པའི་
དགེ་འདུན་བསྙེན་པར་འཚལ། །སྟོན་པ་ལ་ནི་ཕྱག་འཚལ་བགྱི་བ་བགྱི། །སྔོན་གྱི་རྒྱལ་བའི་རྗེས་སུ་སློབ་འཚལ་ཏེ། །ཞི་བ་རྟོགས་པའི་རྗེས་སུ་མཆི་བར་འཚལ། །ཉོན་མོངས་པ་རྣམས་མ་ལུས་འདོར་འཚལ་ཏེ། །དེ་བས་རྒྱལ་བ་རྣམས་ལ་བགྱི་བ་བགྱི། །ལམ་སྟོར་སེམས་
ཅན་རབ་ཏུ་མདོངས་པ་རྣམས། །བདག་གིས་མཆོག་གི་ལམ་ལ་དགོད་པར་འཚལ། །བདེ་བ་དམ་པར་རབ་ཏུ་གཞག་པར་འཚལ། །དེ་བས་རྒྱལ་བ་རྣམས་ལ་བགྱི་བ་བགྱི། །འགྲོ་བ་ཐམས་ཅད་དགའ་བར་བདག་བགྱིད་འཚལ། །ཤུལ་རྣམས་ཆབ་ཀྱིས་ཆག་ཆག་གདབ་
པར་འཚལ། །བསིལ་བའི་ས་དེ་རབ་ཏུ་བསྟན་པར་འཚལ། །དེ་བས་རྒྱལ་བ་ལ་ནི་མཆོད་པ་བགྱི། །འགྲོ་བ་རྣམས་ནི་ཉོན་མོངས་སྲེད་པས་སྐོམ། །ཉོན་མོངས་མེ་ཡིས་ཚིག་པའི་སེམས་ཅན་ཀུན། །ཞི་བ་མ་མཐོང་མགོན་མེད་དུབ་པ་རྣམས། །དགྲོལ་བར་འཚལ་བས་བདག་
ནི་བགྱི་བ་བགྱི། །འདོད་པའི་ཡོན་ཏན་དག་གིས་མི་ངོམས་པས། །ཆགས་པའི་སྟོབས་ཀྱིས་འཁོར་བར་འཁོར་གྱུར་ཅིང་། །ཡོངས་འཛིན་ཚོལ་བའི་སེམས་ཅན་བྱིས་པ་རྣམས། །དགྲོལ་བར་འཚལ་བས་བདག་ནི་བགྱི་བ་བགྱིད། །ཞེ་སྡང་སྟོབས་ཀྱིས་བྱིས་པ་རྣམ་པར་
རྨོངས། །ལེགས་པར་མ་བསྡམས་སེམས་ཀྱིས་ཞེ་སྡང་སྐྱེད། །དེ་དག་བདག་གིས་ཡོངས་སུ་དགྲོལ་སླད་དུ། །རྒྱལ་བ་རྣམས་ལ་བགྱི་བ་རྒྱ་ཆེན་བགྱི། །གཏི་མུག་སྟོབས་ཀྱིས་སེམས་ཅན་བྱིས་པ་བསྒྲིབས། །བགྱི་དང་མི་བགྱི་མ་འཚལ་གྱུར་པ་རྣམས། །དེ་དག་བདག་གིས་ཡོངས་

སུ་དགྲོལ་སླད་དུ། །རྒྱལ་བ་ལ་ནི་བགྱི་བ་རྒྱ་ཆེན་བགྱི། །ཕྲག་དོག་སྟོབས་ཀྱིས་བྱིས་པ་རྣམས་བྱུང་སྟེ། །ཞི་བ་མ་འཚལ་སྲིད་པར་བཅིངས་གྱུར་པ། །དེ་དག་བདག་གིས་ཡོངས་སུ་དགྲོལ་སླད་དུ། །རྒྱལ་བ་རྣམས་ལ་བགྱི་བ་རྒྱ་ཆེན་བགྱི། །སེར་སྣའི་སྟོབས་ཀྱིས་བྱིས་པ་
རྣམས་བྱུང་སྟེ། །གཏོང་དང་ཐར་དང་འབྲས་བུ་མ་འཚལ་བས། །ཀུན་ནས་སོགས་ཤིང་སྡུག་བསྔལ་མྱོང་གྱུར་པ། །དེ་དག་སླད་དུ་མཆོད་པ་ཤིན་ཏུ་བགྱི། །ཉོན་མོངས་སྟོབས་ཀྱིས་བྱིས་པ་རྣམས་གཙེས་ཏེ། །མ་འཚལ་བས་ནི་སྡིག་པའི་སུག་ལས་བགྱིད། །དེ་སླད་འགྲོ་བ་རྣམས་སུ་
སྡུག་བསྔལ་མྱོང་། །དེ་དག་སླད་དུ་བདག་ནི་མཆོད་པ་བགྱི། །སེམས་ཅན་གང་དག་ཁྱོད་ཀྱི་བསྟན་ལ་དད། །དེ་དག་རྣམས་ཀྱང་ཉེས་པ་འདིས་མི་རེག །རྒྱལ་བ་དེ་དག་རྗེས་སུ་སློབ་འཚལ་བས། །དེ་སླད་རྒྱལ་བ་རྣམས་ལ་བགྱི་བ་བགྱིད། །སུ་དག་འདོད་ཆགས་བྲལ་བ་རབ་ཚོལ་
ཞིང་། །རང་འབྱུང་འགྱུར་ཞེས་སྤྱོད་པ་རྣམས་སྤྱོད་པ། །དེ་དག་གི་ཡང་རྗེས་སུ་བདག་སློབ་སྟེ། །དེ་བས་རྒྱལ་བ་བགྱི་བ་བདག་བགྱིད་ལགས། །སུ་དག་ཐམས་ཅད་མཁྱེན་ཉིད་རབ་ཚོལ་ཞིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་
བ་ལ་ནི་མཆོད་པ་རྒྱ་ཆེན་བགྱི། །སུ་དག་སྟོབས་རྣམས་ཡོངས་སུ་ཚོལ་བ་ན། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་སྟེ། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །སུ་དག་འཇིགས་པ་མ་མཆིས་རབ་ཚོལ་ཞིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །
དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །སུ་དག་སོ་སོ་ཡང་དག་རིག་ཚོལ་ཞིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །སུ་དག་དབང་པོ་ལྔ་རྣམས་རབ་ཚོལ་ཞིང་། །
རྒྱལ་བ་ལ་ནི་མཆོད་པ་རྒྱ་ཆེན་བགྱིད། །དེ་དག་གི་ཡང་རྗེས་སུ་བདག་སློབ་ཅིང་། །རྒྱལ་བ་ལ་ནི་མཆོད་པ་རྒྱ་ཆེན་བགྱི། །བདེ་གཤེགས་རྣམས་ཀྱི་བཅྭ་བརྒྱད་ཆོས་གང་དག །རྒྱལ་བའི་སྐུ་ལ་མ་འདྲེས་མངའ་བ་རྣམས། །སུ་དག་ཚོལ་ཞིང་སངས་རྒྱས་རྣམས་མཆོད་པ། །དེ་དག་རྗེས་

སུ་སློབ་ཅིང་མཆོད་པར་བགྱི། །སྤྱོད་ཡུལ་སྤྱོད་དང་དབང་པོ་དྲུག་དག་པ། །ཡེ་ཤེས་རྣམ་དག་ཏིང་འཛིན་རྣམ་དག་དང་། །ཚུལ་ཁྲིམས་ཏིང་ངེ་འཛིན་རྣམས་རབ་ཚོལ་ཞིང་། །དེར་ནི་བདག་གིས་སངས་རྒྱས་འདྲེན་པ་མཆོད། །དེ་ནས་དགེ་སློང་ལེགས་པར་བརྟགས་སྤྱོད་ཀྱིས་རྒྱལ་རིགས་
ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ལས་སྟོབས་བཅུའི་བསྔགས་པ་བརྗོད་པ་ཐོས་ནས་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཀྱང་དེ་བཞིན་སྤོབས་ལགས་སོ། །བདེ་བར་གཤེགས་པ་བདག་ཀྱང་
དེ་བཞིན་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་པར་བརྟགས་སྤྱོད་སྤོབས་པར་གྱིས་ཤིག །དེ་ནས་དགེ་སློང་ལེགས་པར་བརྟགས་སྤྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་དེ་ལ་སྟོབས་བཅུ་དང་ལྡན་པའི་ཚིགས་སུ་
བཅད་པ་དག་གིས་མངོན་པར་བསྟོད་དོ། །བདེ་བར་གཤེགས་པས་བསྐལ་པ་བྱེར་སྤྱད་པས། །མ་ཉམས་འདུས་མ་བྱས་པའི་གནས་བརྙེས་པ། །དེ་ཐོབ་བགྱིད་སླད་འདྲེན་པ་སྤྱད་པར་བགྱི། །མི་མཆོག་ཁྱོད་འདྲའི་སངས་རྒྱས་ཐོབ་པར་ཤོག །སྤྱད་པ་སྤྱོད་ཚེ་འདས་པའི་རྣམ་པར་འདྲེན། །
སངས་རྒྱས་བྱེ་བ་ཁྲག་ཁྲིག་ཁྱོད་ཀྱིས་མཆོད། །རྒྱལ་བ་དེ་དག་རིམ་གྲོ་མཛད་ནས་སུ། །མཚུངས་པ་མ་མཆིས་བླ་མེད་བྱང་ཆུབ་བརྙེས། །འདྲེན་པ་དུང་དང་རྔ་ཆེན་ཁར་རྔ་ཡིས། །རྒྱལ་བ་བྱེ་བ་སྟོང་དག་རབ་མཆོད་པས། །དེ་སླད་དབྱངས་ཀྱིས་ཁམས་གསུམ་གོ་བར་མཛད། །འགྲོ་
བ་རྣམས་ཀྱི་ཡིད་ཀྱང་ཤིན་ཏུ་ཆགས། །རྒྱུད་སྒྲ་འཇམ་པོ་ཤིན་ཏུ་དྲངས་སྤྱོད་ཅིང་། །སྟོབས་བཅུའི་མཆོད་རྟེན་རྣམས་ལ་བླངས་པས་ན། །དེ་སླད་རྒྱལ་བ་ཡིད་མཆི་དགའ་བ་ཡི། །དབྱངས་ཀྱིས་སེམས་ཅན་ཁྲག་ཁྲིག་རྣམ་པར་འགྲེལ། །བདེ་གཤེགས་རྣམས་ཀྱི་སྤྱན་སྔར་
བཞུགས་ནས་སུ། །གླུ་དང་རོལ་མོའི་སྒྲ་སྙན་ཀུན་བླངས་པས། །དེ་སླད་འདྲེན་པ་ཁྱོད་ཀྱི་གསུང་ཡང་མཉེན། །སྐྱེས་པ་བུད་མེད་རྣམས་ཀྱི་སེམས་ཀྱང་སྡུད། །ཟས་མཆོག་མཚུངས་པ་མ་མཆིས་ཡིད་མཆི་རྣམས། །ཁྱོད་ཀྱིས་རྒྱལ་བ་ཉན་ཐོས་བཅས་རྣམས་གསོལ། །ཟས་སྐོམ་ཤིན་ཏུ་

རྣམ་མང་ལེགས་མཛད་པས། །དེ་སླད་ལོངས་སྤྱོད་མང་པོ་རྣམས་ཀྱང་བརྙེས། །ལ་བ་འཇམ་པོ་དུ་ཀུལ་ཀ་ཤི་པ། །གསེར་གྱི་ཁ་དོག་དྲི་མེད་ཡིད་མཆི་བ། །ན་བཟའ་རིགས་ཆེ་མཛེས་ལ་ཕུལ་བས་ན། །དེ་སླད་བདེ་གཤེགས་སྐུ་མདོག་བསམ་མི་ཁྱབ། །དགའ་ཞིང་གུས་
པ་བཟང་པོ་བསྐྱེད་ནས་སུ། །སྔན་ཆད་སྦྱིན་གནས་བླ་མ་བསྙེན་བཀུར་ཅིང་། །ཟས་དང་སྐོམ་རྣམས་རྒྱ་ཆེར་ཕུལ་བས་ན། །འཇིག་རྟེན་འདྲེན་པས་མཐོ་བ་བདུན་ཀྱང་བརྙེས། །ལྷ་ཟས་རོ་འདྲ་ཡིད་དུ་མཆི་བ་རྣམས། །རྒྱལ་བ་ཉན་ཐོས་བཅས་ལ་གསོལ་བས་ན། །དེ་སླད་རོ་ཡི་རོ་མཆོག་
མཚན་རྣམས་ཀྱང་། །འཇིག་རྟེན་མཁྱེན་པས་ཡིད་དུ་མཆི་བ་བརྙེས། །རྟག་ཏུ་བདེ་གཤེགས་རྣམས་ཀྱི་མཆོད་རྟེན་ལ། །མེ་ཏོག་དྲི་རབ་དེ་བཞིན་འབྲས་བུའི་མཆོག །ཁ་དོག་ལྡན་པ་འཇམ་ཞིང་མཛེས་པ་ཕུལ། །དེ་སླད་འདྲེན་པས་འབྲས་བུ་མཆོག་བརྙེས་སོ། །དྲི་དང་བྱུག་པ་བདེ་
གཤེགས་མཆོད་རྟེན་ལ། །ཁྱོད་ཀྱིས་རྟག་ཏུ་ཡིད་དུ་མཆི་བ་ཕུལ། །དེ་སླད་བདེ་གཤེགས་སྐུ་ལ་དྲི་དག་ནི། །ཇི་ལྟར་ཙན་དན་སྣོད་བཞིན་རབ་ཏུ་གསུང་། །སྤྲི་ཀ་གུར་ཀུམ་དྲི་རབ་བཟང་པོ་དག །བདེ་གཤེགས་མཆོད་རྟེན་དག་ལ་ཕུལ་བས་ན། །དེ་སླད་སྐུ་ལས་གུར་ཀུམ་སྤོས་རབ་
རྣམས། །ཕྱོགས་བཅུ་ཀུན་ཏུ་དྲི་དེ་ལྡང་བར་གྱུར། །མེ་ཏོག་ཕྲེང་མཆོག་མཛེས་ཤིང་སྣ་ཚོགས་པ། །རྟག་ཏུ་བདེ་བར་གཤེགས་པའི་སྐུ་ལ་བཏགས། །དེ་སླད་ཁྱོད་ཀྱིས་གསུང་འཇམ་བཤད་པ་རྣམས། །ཨུད་པ་ལ་ཡི་ཕྲེང་བ་བཞིན་དུ་ལེན། །འཇིག་རྟེན་མགོན་པོ་བདེ་གཤེགས་
གསུང་བ་ལ། །གཏམ་སྨྲ་རྣམས་ཀྱི་བར་ཆད་མ་མཛད་པས། །དེ་སླད་འཁོར་ལ་ཚིག་རྣམས་སྟོན་པ་ན། །གཞན་གྱིས་བར་ཆད་བགྱི་བ་ཡོངས་མ་མཆིས། །སེམས་ཀྱང་ཐམས་ཅད་ཉེ་བར་བཞག་ནས་སུ། །རང་བྱུང་བ་ཡི་ཆོས་རྣམས་བཤད་པ་གསན། །ཡིད་ནི་ཀུན་ཏུ་གར་ཡང་མ་
གཡེངས་པས། །དེ་སླད་སྟོན་པས་བཤད་པ་ཆབ་མི་འཚལ། །སྔོན་གྱི་བདེ་བར་གཤེགས་པས་ཆོས་བསྟན་ལ། །སྨན་བཞིན་དུ་ནི་འདུ་ཤེས་ཉེར་བཞག་སྟེ། །བདག་ཉིད་ལ་ནི་ནད་པར་འདུ་ཤེས་བསྐྱེད། །དེ་སླད་ཁྱོད་ཀྱི་གསུང་བསྟན་ཀུན་གྱིས་བཟུང་། །བདེ་བར་གཤེགས་པ་ལ་ནི་སྨན་

པར་བསྒོམས། །བདག་ཉིད་ལ་ཡང་ནད་པར་འདུ་ཤེས་བསྐྱེད། །ཆོས་ལ་སྨན་ཡིན་སྙམ་དུ་ཉེར་བཞག་ནས། །ཇི་སྙེད་དུས་ཀྱི་རྒྱལ་བ་ཁྱོད་ཀྱིས་མཆོད། །བདེ་བར་གཤེགས་པ་དག་ལས་ཆོས་གསན་ནས། །གང་གིས་སེར་སྣ་ནམ་ཡང་མ་བསྟེན་ན། །དེ་དག་ཐམས་ཅད་དེ་བཞིན་
གཤེགས་པ་ཡིས། །རབ་ཏུ་བསྟན་ཅིང་རྒྱལ་བ་མཉེས་པར་མཛད། །བདེ་བར་གཤེགས་པ་དག་ལས་ཆོས་གསན་པས། །སེར་སྣ་མ་མཆིས་གྱུར་པས་ཤིན་ཏུ་བསྟན། །དེ་སླད་འདྲེན་པ་འཁོར་ལ་འཆད་པ་ན། །ཁྱོད་ཀྱི་སྤོབས་པ་དག་ནི་ཤིན་ཏུ་བརྗོད། །རྫོགས་པའི་བྱང་ཆུབ་དམ་པ་
འཚལ་སླད་དུ། །སྔོན་ཆད་ཁྱོད་ཀྱིས་ཆོས་རྣམས་གང་བསྙེན་པ། །འདྲེན་པ་བདག་ཀྱང་དེ་དག་ཡོངས་སུ་ཚོལ། །འདྲེན་པའི་ཡོན་ཏན་ཡང་དག་རབ་བསྔགས་པས། །དེས་ནི་རྐང་གཉིས་མཆོག་ཏུ་འགྱུར་བར་ཤོག །སེམས་ཅན་ཐམས་ཅད་རྣམ་པར་འདྲེན་གྱུར་ཅིག །དེ་ནས་
བཅོམ་ལྡན་འདས་དེ་བཞིན་གཤེགས་པ་དཔའ་སྲ་རྣམ་པར་གནོན་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཉིས་ཀྱིས་མངོན་པར་བསྟོད་པའི་ཚེ་མ་ཐོས་པར་ཡང་མི་དགོངས། དམས་པར་ཡང་མི་དགོངས་པ་དེ་ནི་རྒྱ་མཚོ་བཞིན་དུ་བརྟན་པ་ཉིད་དུས་ལས་མི་ཡོལ་ལོ། །དེ་
མ་ཐོས་པར་ཡང་མི་དགོངས་དམས་པར་ཡང་མི་དགོངས་ནས་བྱང་ཆུབ་སེམས་དཔའ་ཤིན་ཏུ་བརྟགས་སྤྱོད་དང་། འགྲོ་བ་འཛིན་དེ་གཉིས་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་དག་ལེགས་སོ་ལེགས་སོ། །སྐྱེས་བུ་དམ་པ་དག་དེ་དེ་བཞིན་ནོ། །སྐྱེས་བུ་དམ་པ་
ཁྱེད་ཀྱིས་དེ་བཞིན་གཤེགས་པའི་ཡོན་ཏན་དང་ལྡན་པའི་ཚིགས་སུ་བཅད་པ་སྨྲས་པས། སེམས་ཅན་བྱེ་བ་ཁྲག་ཁྲིག་གིས་སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་དགེ་བའི་རྩ་བ་བསྐྲུན་ཅིང་བསྐྱེད་དེ། ཁམས་སོ་སོར་སོང་བའི་
སེམས་ཅན་རྣམས་རིག་ནས་ཇི་ལྟ་བུར་འཐུན་པར་སྤྲུལ་པས་ཆོས་བསྟན་པའི་ཕྱིར་ཡོངས་སུ་བསྔོས་སོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་ལེགས་པར་བརྟགས་སྤྱོད་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་

དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཤིན་ཏུ་མཐོར་བཞུད་དེ་དེའི་ཚེ་དེའི་དུས་ན་བྱང་ཆུབ་སེམས་དཔའ་ལེགས་པར་བརྟགས་སྤྱོད་ཅེས་བྱ་བར་གྱུར་ཏོ། །འཇམ་དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་རིགས་ཤིང་སཱ་ལ་ཆེན་པོ་
ལྟ་བུ་འགྲོ་བ་འཛིན་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་རྒྱལ་རིགས་ཤིང་སཱ་ལ་ཆེན་པོ་ལྟ་བུ་འགྲོ་བ་འཛིན་ཅེས་བྱ་བར་གྱུར་ཏོ། །
འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་སྦྱང་བར་འདོད་པ་དང་། ཆོ་འཕྲུལ་རྣམ་པ་མང་པོས་སེམས་ཅན་ཡོངས་སུ་སྨིན་པར་བྱེད་འདོད་པས་དེ་བཞིན་གཤེགས་པའི་ཡོན་ཏན་ཡོངས་སུ་བརྗོད་པ་ལ་རྣལ་འབྱོར་
དུ་བྱའོ། །མངོན་པར་བརྩོན་པར་བྱའོ། །འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པས་བྱང་ཆུབ་སེམས་དཔའི་སྤྱད་པ་སྤྱོད་པ་ན་སངས་རྒྱས་རྗེས་སུ་དྲན་པ་བསྟེན་ཅིང་བསྒོམས་ཏེ་མང་དུ་བྱས་སོ།། །།བམ་པོ་ལྔ་པ། འཇམ་དཔལ་སྔོན་བྱུང་
བ་འདས་པའི་དུས་ན་བསྐལ་པ་དཔག་ཏུ་མེད་ཅིང་བསམ་གྱིས་མི་ཁྱབ་པ་ནས་བརྗོད་དུ་མེད་པའི་བར་དུ་དེའི་ཕ་རོལ་གྱི་ཡང་ཆེས་ཕ་རོལ་དེའི་ཚེ་དེའི་དུས་ན་ཨུད་པ་ལ་འབྱུང་བ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་ཨུད་པ་ལ་འབྱུང་བ་ཞེས་པའི་བསྐལ་པ་དེ་ལ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤིན་ཏུ་ཕྲ་སེམས་
ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཤིན་ཏུ་ཕྲ་སེམས་དེའི་གསུང་རབ་ལ་དགེ་སློང་ཞི་བའི་བློ་གྲོས་ཞེས་བྱ་བ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཞིག་བྱུང་སྟེ། སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་ཐམས་ཅད་ཀྱི་མཆོག་ཏུ་

གྱུར་ཏོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་དེ་དེ་བཞིན་གཤེགས་པ་ཤིན་ཏུ་ཕྲ་སེམས་དེ་ག་ལ་བ་དེར་སོང་ནས་བཅོམ་ལྡན་འདས་དེ་བཞིན་གཤེགས་པ་ཤིན་ཏུ་ཕྲ་སེམས་དེའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་
འདུག་ནས་དགེ་སློང་ཞི་བའི་བློ་གྲོས་དེས་བཅོམ་ལྡན་འདས་དེ་བཞིན་གཤེགས་པ་ཤིན་ཏུ་ཕྲ་སེམས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕྱིར་མི་ལྡོག་ཅིང་མྱུར་དུ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་ཤིན་ཏུ་ཕྲ་སེམས་ཀྱིས་དགེ་སློང་ཞི་བའི་བློ་གྲོས་དེ་ལ་འདི་སྐད་ཅེས་བཀའ་སྩལ་ཏོ། །འདི་ལ་དགེ་སློང་བྱང་ཆུབ་སེམས་དཔའ་སེམས་དཔའ་ཆེན་
པོ་ཕྱིར་མི་ལྡོག་པ་ཐོབ་པར་འདོད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཟབ་མོ་ལ་བཟོད་པར་མངོན་པར་བརྩོན་པར་བྱའོ། །ཟབ་མོ་ལ་བཟོད་པར་མོས་པ་དེ་ནི་བཟོད་པས་ཆོས་དེ་དག་ལ་འདོད་པར་བྱེད་དོ། །འདོད་
པར་བྱེད་པས་སྒྲུབ་པར་འགྱུར་རོ། །སྒྲུབ་པས་ནན་ཏན་བྱེད་དོ། །ཇི་ལྟར་དེ་བཞིན་གཤེགས་པས་གསུངས་པ་དེ་བཞིན་དུ་ཆོས་དེ་དག་ཁོང་དུ་ཆུད་པར་བྱ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱིར་མི་ལྡོག་པར་འགྱུར་བའི་ཆོས་གཅིག་གོ། །ཞི་བའི་བློ་གྲོས་
བྱང་ཆུབ་སེམས་དཔའ་སེམས་དཔའ་ཆེན་པོ་གང་བཟོད་པ་དེ་ལ་བློ་རབ་ཏུ་གནས་པར་འགྱུར་བ་དེ་སེམས་ཅན་རྣམས་ལ་སྙིང་རྗེ་ཆེན་པོ་གནས་པར་འགྱུར་རོ། །དེ་ཅིའི་ཕྱིར་ཞེ་ན། བཟོད་པ་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་སངས་རྒྱས་རྣམས་ཀྱིས་ཀྱང་བཟོད་པ་འདི་
ལས་བསྐྱོད་མི་ནུས་སོ། །འདི་ལྟར་ཡང་ཞི་བའི་བློ་གྲོས་ཆོས་དེ་དག་གི་ཆོས་ཉིད་ནི་འདི་ཡིན་ཏེ། མ་ནོར་བ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དོ། །འདི་ལ་གནས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་ཐེ་ཚོམ་མེད་པར་འགྱུར་ཏེ། འདི་ནི་བླ་ན་མེད་པ་ཡང་

དག་པར་རྫོགས་པའི་བྱང་ཆུབ་བོ། །བཟོད་པ་འདི་ཐོབ་པས་སངས་རྒྱས་ཞེས་བྱ་སྟེ། འདིས་ཆོས་ཐམས་ཅད་ཀྱི་ངོ་བོ་ཉིད་རྟོགས་པ་ཡིན། འདིས་ཆོས་ཐམས་ཅད་ཀྱི་ཚུལ་མཐོང་བར་བྱ་བ་ཡིན། འདིས་ཆོས་ཐམས་ཅད་ཀྱི་ཡུལ་རྟོགས་པ་ཡིན་ཏེ། དེ་བས་ན་སངས་རྒྱས་
ཞེས་བྱའོ། །འདི་ནི་ཆོས་རྣམས་ཀྱི་ཆོས་ཉིད་མ་ཡིན་ནོ་ཞེས་དེ་ལ་སུས་ཀྱང་བསྒྱུར་བའམ་བཟློག་པར་མི་ནུས་སོ། །ཞི་བའི་བློ་གྲོས་འདི་ལྟ་སྟེ། དཔེར་ན་སྐྱེས་པའམ་བུད་མེད་ཀྱང་རུང་ཟས་ཟོས་པ་དེ་ལ་སུས་ཀྱང་ཁྱོད་ཀྱིས་ཟས་མ་ཟོས་སོ་ཞེས་བསྒྱུར་མི་ནུས་སོ། །དེ་ཅིའི་ཕྱིར་ཞེ་ན། དེ་མངོན་སུམ་སྟེ།
གཞན་གྱི་རྐྱེན་མ་ཡིན་པ་དེ་བཞིན་དུ་ཞི་བའི་བློ་གྲོས་ཆོས་ཉིད་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ལ་འདི་ནི་ཆོས་རྣམས་ཀྱི་ཆོས་ཉིད་མ་ཡིན་ནོ་ཞེས་སུས་ཀྱང་འཛིན་དུ་གཞུག་པར་མི་ནུས་སོ། །དེ་ཅིའི་ཕྱིར་ཞེ་ན། གཞན་གྱི་རྐྱེན་གྱིས་མ་ཡིན་གྱི། ཆོས་ཉིད་དེ་ལ་མངོན་སུམ་པའི་ཕྱིར་
རོ། །ཞི་བའི་བློ་གྲོས་འདི་ལྟ་སྟེ། དཔེར་ན་སྐྱེས་པའམ་བུད་མེད་ཀྱང་རུང་སྟེ། སྐོམ་འཐུངས་པ་དེ་ལ་ཁྱོད་ཀྱིས་སྐོམ་མ་འཐུངས་སོ་ཞེས་སུས་ཀྱང་བསླུ་བའམ་ལོག་པར་འཛིན་དུ་གཞུག་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་དེ་ལ་མངོན་སུམ་སྟེ། གཞན་གྱི་རྐྱེན་མ་ཡིན་པ་དེ་བཞིན་དུ་ཆོས་
ཉིད་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ཡང་འདི་ཆོས་རྣམས་ཀྱི་ཆོས་ཉིད་མ་ཡིན་ནོ་ཞེས་སུས་ཀྱང་བསྒྱུར་བའམ་བསླུ་བར་མི་ནུས་སོ། །ཞི་བའི་བློ་གྲོས་འདི་ལྟ་སྟེ། དཔེར་ན་བདེན་པ་མཐོང་བའི་ཉན་ཐོས་ལ་འདི་ལམ་མ་ཡིན་ནོ། །འདི་ནི་ལམ་གྱི་འབྲས་བུ་མ་ཡིན་ནོ་ཞེས་དེ་ལ་
སུས་ཀྱང་བསླུ་བའམ་ལོག་པར་འཛིན་དུ་གཞུག་མི་ནུས་པ་དེ་བཞིན་དུ་ཞི་བའི་བློ་གྲོས་ཆོས་ཉིད་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་ཆོས་ཉིད་མ་ཡིན་ནོ་ཞེས་སུས་ཀྱང་དེ་ལ་བསླུ་བའམ་ལོག་པར་འཛིན་དུ་གཞུག་མི་ནུས་སོ། །དེ་ཅིའི་ཕྱིར་ཞེ་ན། དེ་ནི་མངོན་
སུམ་སྟེ། གཞན་གྱི་རྐྱེན་མ་ཡིན་པས་ཇི་ལྟར་སངས་རྒྱས་ཀྱིས་བསྟན་པ་དེ་བཞིན་དུ་ཆོས་རྣམས་ལ་བཟོད་དོ། །ཞི་བའི་བློ་གྲོས་འདི་ཇི་སྙམ་དུ་སེམས། གང་གིས་སོ་སོའི་སྐྱེ་བོ་ཡང་མ་དམིགས། སོ་སོའི་སྐྱེ་བོའི་ཆོས་ཀྱང་མ་ཡིན། ཉན་ཐོས་ཀྱང་མ་ཡིན། ཉན་ཐོས་ཀྱི་ཆོས་ཀྱང་མ་ཡིན།

རང་སངས་རྒྱས་ཀྱང་མ་ཡིན། རང་སངས་རྒྱས་ཀྱི་ཆོས་ཀྱང་མ་ཡིན། བྱང་ཆུབ་སེམས་དཔའ་ཡང་མ་ཡིན། བྱང་ཆུབ་སེམས་དཔའི་ཆོས་ཀྱང་མ་ཡིན། སངས་རྒྱས་ཀྱང་མ་ཡིན། སངས་རྒྱས་ཀྱི་ཆོས་ཀྱང་མ་དམིགས་ན་དེ་ཆོས་གང་ལ་ཡང་གནས་པ་མ་ཡིན་ནམ། གསོལ་པ། བཅོམ་
ལྡན་འདས་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དེས་གང་ལ་གནས་པར་འགྱུར་བའི་ཆོས་དེའང་མི་དམིགས་ཏེ། ཆོས་རྣམས་མི་དམིགས་པ་ནི་མི་གནས་པ་ཞེས་བགྱིའོ། །བཅོམ་ལྡན་འདས་དེས་བཀའ་སྩལ་པ། ཞི་བའི་བློ་གྲོས་ལེགས་སོ་ལེགས་སོ། །ཞི་བའི་བློ་གྲོས་འདི་
ལྟ་སྟེ། དཔེར་ན་ནམ་མཁའ་ནི་ཅི་ལ་ཡང་མི་གནས་པ་དེ་བཞིན་དུ་ཞི་བའི་བློ་གྲོས་ཆོས་ཐམས་ཅད་ཀྱང་མི་གནས་པའོ། །ཞི་བའི་བློ་གྲོས་ཆོས་ཐམས་ཅད་ནི་ནམ་མཁའ་དང་མཚུངས་པ་སྟེ་མི་གནས་པའོ། །ཞི་བའི་བློ་གྲོས་རྗེས་སུ་འཐུན་པའི་བཟོད་པ་འདི་ནི་གསུམ་སྟེ། གསུམ་གང་ཞེ་ན།
ཆུང་ངུ་རྗེས་སུ་འཐུན་པའི་བཟོད་པ་དང་། འབྲིང་དུ་རྗེས་སུ་འཐུན་པའི་བཟོད་པ་དང་། ཆེར་རྗེས་སུ་འཐུན་པའི་བཟོད་པའོ། །ཆུང་ངུ་རྗེས་སུ་འཐུན་པའི་བཟོད་པ་ནི་ཤུགས་དང་ལྡན་པའི་ཏིང་ངེ་འཛིན་དུ་བཤད་པར་བྱ། འབྲིང་དུ་རྗེས་སུ་འཐུན་པའི་བཟོད་པ་ནི་ཞི་གནས་ཀྱི་ཏིང་ངེ་འཛིན་དུ་
བཤད་པར་བྱ། ཆེར་རྗེས་སུ་འཐུན་པའི་བཟོད་པ་ནི་ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་དུ་བཤད་པར་བྱའོ། །དེ་ཅིའི་ཕྱིར་ཞེ་ན། ཆུང་ངུ་རྗེས་སུ་འཐུན་པའི་བཟོད་པ་ལས་ནི་དགེ་བའི་རྩ་བའི་ཤུགས་སྐྱེའོ། །འབྲིང་དུ་རྗེས་སུ་འཐུན་པའི་བཟོད་པ་ལས་ནི་རབ་ཏུ་ཞི་བ་དམིགས་པར་
འགྱུར་རོ། །ཆེར་རྗེས་སུ་འཐུན་པའི་བཟོད་པ་ལས་ནི་རབ་ཏུ་སྣང་བ་ལ་སེམས་འཇུག་སྟེ། དེའི་དམིགས་པ་ཐམས་ཅད་ཡོངས་སུ་རྟོགས་པར་འགྱུར། ཆོས་ཉིད་ལ་རབ་ཏུ་གནས་པར་འགྱུར། ཆོས་ཉིད་ལ་རབ་ཏུ་གནས་པས་ན་དོན་རྣམས་ལེགས་པར་ཡོངས་སུ་ཟིན་པར་འགྱུར་རོ། །དེ་ནི་དེའི་
དོན་སོ་སོ་ཡང་དག་པར་རིག་པ་ཡིན་ནོ། །དེས་ཆོས་ཐམས་ཅད་ཀྱི་མཚན་ཉིད་གཅིག་ཏུ་རྟོགས་པར་འགྱུར་ཏེ། དེ་ནི་དེའི་དོན་སོ་སོ་ཡང་དག་པར་རིག་པ་ཡིན་ནོ། །ཆོས་དེ་རྣམས་ཀྱང་སྐྱེ་བོ་རྣམས་ཀྱི་ངེས་པའི་ཚིག་བཞིན་དུ་འཆད་དེ། ངེས་པའི་ཚིག་དེ་ལ་ཡང་མངོན་པར་ཞེན་པར་མི་བྱེད་དོ། །

སྐྱེ་བོ་དེ་དང་དེ་དག་ངེས་པའི་ཚིག་དེ་དག་ལ་མོས་པར་བྱས་ཀྱང་དེ་ལ་མངོན་པར་ཞེན་པར་མི་བྱེད་པ་དེ་ནི་དེའི་ངེས་པའི་ཚིག་སོ་སོ་ཡང་དག་པར་རིག་པ་ཡིན་ནོ། །དེའི་ངེས་པའི་ཚིག་ལ་དུས་ཇི་ལྟ་བ་བཞིན་དུ་སྤོབས། ཇི་ལྟར་ཆོས་ཉན་པ་རྣམས་ཀྱིས་གོ་བ་དེ་ལྟ་བུར་སྤོབས། །
ཆོས་རྣམས་ཀྱི་ཆོས་ཉིད་ཇི་ལྟ་བ་དེ་བཞིན་སྤོབས། ཆོས་རྣམས་ཀྱི་ངོ་བོ་ཉིད་སྟོང་པ་ཇི་ལྟ་བ་བཞིན་སྤོབས། ཇི་ལྟར་ཆོས་རྣམས་མི་སྐྱེ་མི་འགག་པ་དེ་བཞིན་སྤོབས། ཇི་ལྟར་ཆོས་རྣམས་འགྲོ་བ་ཡང་མེད། འོང་བ་ཡང་མེད་པ་དེ་བཞིན་སྤོབས། ཇི་ལྟར་ཆོས་རྣམས་འཆི་འཕོ་བའང་མེད།
སྐྱེ་བའང་མེད་པ་དེ་བཞིན་སྤོབས། ཇི་ལྟར་ཆོས་རྣམས་ཡོད་པ་མ་ཡིན་པ་དེ་ལྟ་བུར་སྤོབས། ཇི་ལྟར་ཆོས་རྣམས་མི་རིག་ཅིང་མི་སྣང་བ་དེ་ལྟ་བུར་སྤོབས། ཇི་ལྟར་འཆད་པའང་མེད་ཉན་པའང་མི་དམིགས་པ་དེ་ལྟ་བུར་སྤོབས། ཇི་ལྟར་ལས་ཀྱང་མེད་ལས་ཀྱི་རྣམ་པར་སྨིན་པ་ཡང་མེད་པ་
དེ་ལྟར་སྤོབས། ཇི་ལྟར་འཁོར་བ་ཡང་མེད་མྱ་ངན་ལས་འདས་པ་ཡང་མི་དམིགས་པ་དེ་ལྟ་བུར་སྤོབས། ཇི་ལྟར་གང་ཡང་འཁོར་བ་ཡང་མེད། མྱ་ངན་ལས་འདས་པར་འགྱུར་བའང་མི་དམིགས་པ་དེ་ལྟ་བུར་སྤོབས། ཇི་ལྟར་བྱང་ཆུབ་དང་བྱང་ཆུབ་པར་བྱ་བ་མི་དམིགས་པ་དེ་ལྟ་བུར་སྤོབས།
ཇི་ལྟར་ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བའང་མི་དམིགས་པ་དེ་ལྟ་བུར་སྤོབས། ཇི་ལྟར་ཆོས་གང་ལའང་ཐོབ་པ་མི་དམིགས་པ་དེ་ལྟ་བུར་སྤོབས། ཇི་ལྟར་སོ་སོའི་སྐྱེ་བོའི་ཆོས་རྣམས་སྤོང་བ་མེད་ཅིང་ཉན་ཐོས་ཀྱི་ཆོས་རྣམས་ཀྱང་ཐོབ་པ་མེད་པ་དེ་ལྟ་བུར་སྤོབས། ཇི་ལྟར་
ཉན་ཐོས་ཀྱི་ཆོས་རྣམས་ལས་མི་འདའ་ཞིང་རང་སངས་རྒྱས་ཀྱི་ཆོས་རྣམས་ཀྱང་ཐོབ་པར་མི་འགྱུར་བ་དེ་ལྟ་བུར་སྤོབས། ཇི་ལྟར་རང་སངས་རྒྱས་ཀྱི་ཆོས་རྣམས་ལས་མི་འདའ་ཞིང་སངས་རྒྱས་ཀྱི་ཆོས་རྣམས་ཀྱང་རྙེད་པར་མི་འགྱུར་བ་དེ་ལྟར་སྤོབས་སོ། །ཇི་ལྟར་སངས་རྒྱས་ཀྱི་ཆོས་རྣམས་ཀྱང་
མི་འདོར་ཞིང་མྱ་ངན་ལས་ཀྱང་ཡོངས་སུ་མི་འདའ་བ་དེ་ལྟར་སྤོབས་ཏེ། དེ་ནི་དེའི་སྤོབས་པ་སོ་སོ་ཡང་དག་པ་རིག་པ་ཡིན་ནོ། །སྤོབས་པ་སོ་སོ་ཡང་དག་པར་རིག་པ་དེ་ཡང་ཆོས་གང་ལ་ཡང་སྤོབས་པར་འགྱུར་བ་མེད་དེ། དེ་ལྟར་ན་ཆེར་རྗེས་སུ་འཐུན་པའི་བཟོད་པའི་ཐོབ་པས་ཐམས་ཅད་ལ་དབང་

བྱེད་པ་སྒྲུབ་པར་འགྱུར་རོ། །ཆེར་རྗེས་སུ་འཐུན་པའི་བཟོད་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་ལ་གནས་ནས་དེ་རེ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ཏེ། སངས་རྒྱས་རྣམས་
ཀྱི་བྱ་བ་རྣམས་ཀྱང་བྱེད་དོ། །དེ་བཞིན་གཤེགས་པའི་ཆོ་ག་དང་སྤྱོད་ཡུལ་ཅི་འདྲ་བ་བྱང་ཆུབ་སེམས་དཔའ་དེའི་ཆོ་ག་དང་སྤྱོད་ཡུལ་ཡང་དེ་འདྲ་བར་འགྱུར་རོ། །དེ་བཞིན་གཤེགས་པའི་བཞུད་པ་དང་ལྡོག་པ་ཅི་འདྲ་བ་དེའི་འགྲོ་བ་དང་ལྡོག་པ་ཡང་དེ་དང་འདྲ་བར་འགྱུར་རོ། །ཇི་ལྟ་བུར་དེ་བཞིན་གཤེགས་
པའི་གཟིགས་པ་དང་། རྣམ་པར་གཟིགས་པ་དང་། སྨྱང་བ་དང་། བསྐུམ་པ་དང་། ཆོས་གོས་སྣམ་སྦྱར་དང་། ཆིག་རྐྱང་དང་། ལྷུང་བཟེད་བསྣམས་པ་དང་། ཟོས་པ་དང་འཐུངས་པ་ཅི་འདྲ་བར་དེའི་ལྟ་བ་དང་། ཀུན་ཏུ་ལྟ་བ་ནས་ཉལ་བ་དང་སྨྲ་བ་དང་ཅང་མི་ཟེར་བ་དེ་འདྲ་བར་འགྱུར་རོ། །ཀུན་ཏུ་སྤྱོད་པ་གང་གིས་དེ་བཞིན་
གཤེགས་པ་ཀུན་དུ་སྤྱོད་པ་དེའི་སྤྱོད་པའང་དེ་འདྲ་བར་འགྱུར་རོ། །ཆེར་འཐུན་པའི་བཟོད་པ་ཐོབ་པས་ལུས་དེ་ཉིད་ཀྱིས་བྱང་ཆུབ་མངོན་པར་རྫོགས་པར་སངས་རྒྱས་ནས་འདོད་ན་བསྐལ་པ་བརྗོད་དུ་མེད་པའི་བར་དུ་འདུག་གོ། །དེ་ལྟར་ཆེར་འཐུན་པའི་བཟོད་པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སངས་
རྒྱས་ཞེས་བྱའོ། །དེ་སྐད་ཅེས་བཀའ་སྩལ་པ་དང་། དགེ་སློང་ཞི་བའི་བློ་གྲོས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་དང་པོ་སེམས་བསྐྱེད་པའི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་ན་ཅི་དང་པོ་སེམས་བསྐྱེད་པ་དེ་ཉིད་ཀྱིས་
བྱང་ཆུབ་སེམས་དཔའ་ལགས་སམ། བཀའ་སྩལ་པ། ཞི་བའི་བློ་གྲོས་དེ་ནི་མ་ཡིན་ནོ། །ཞི་བའི་བློ་གྲོས་སེམས་གང་གིས་ཐོག་མ་ཆོས་ལ་ངེས་པར་འགྱུར་བའི་སེམས་དེས་དང་པོ་སེམས་བསྐྱེད་པའི་བྱང་ཆུབ་སེམས་དཔའ་ཞེས་བྱའོ། །དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་དེ་བཞིན་གཤེགས་པ་ཤིན་
ཏུ་ཕྲ་སེམས་དེ་ལ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཆོས་གང་སྐྱེ་བ་མ་མཆིས་འབྱུང་མ་མཆིས། །འཆི་འཕོ་མ་མཆིས་རྒ་བར་མི་འགྱུར་བ། །སྐྱེས་བུ་རྒྱལ་བ་སེང་གེ་དེ་སྟོན་ཅིང་། །དྲང་སྲོང་ཆེན་པོས་སེམས་ཅན་དེ་ལ་བཀོད། །

གང་ལ་དངོས་པོ་ཅི་ཡང་མ་མཆིས་ཤིང་། །གཞན་གྱི་དངོས་པོའང་སུས་ཀྱང་མ་རྙེད་པ། །ནང་ན་མ་ལགས་སླད་རོལ་དག་ན་ཡང་། །དངོས་པོ་མི་རྙེད་དེ་ལ་མགོན་པོས་བཀོད། །བདེ་བར་གཤེགས་པས་ཞི་བའི་བློ་གསུངས་ཀྱང་། །འགྲོ་བ་གང་ཡང་རྙེད་པར་མི་འགྱུར་ཏེ། །དེ་དག་འགྲོ་ལས་
གྲོལ་བར་རྣམ་པར་གསུངས། །གྲོལ་ནས་སེམས་ཅན་མང་པོ་རབ་ཏུ་འགྲོལ། །ཆོས་ཀུན་བདག་མ་མཆིས་པར་སྟོན་མཛད་ཅིང་། །སེམས་ཅན་འཛིན་ལས་འཇིག་རྟེན་རྣམ་པར་འགྲོལ། །བདག་ཉིད་འགྲོ་ལས་གྲོལ་ཞིང་འགྲོ་གྲོལ་བས། །དེ་སླད་ཕ་རོལ་གཤེགས་ཀྱང་རྒལ་མ་མཆིས། །དྲང་སྲོང་ཆེན་པོ་
སྲིད་པའི་ཕ་རོལ་བྱོན། །ཕ་རོལ་གཤེགས་པའང་གང་ཡང་རྙེད་མི་འགྱུར། །ཕ་རོལ་མ་མཆིས་ཚུ་རོལ་མ་མཆིས་ན། །ཕ་རོལ་སོང་ངོ་ཞེས་ཀྱང་གསུང་དུ་བརྗོད། །གང་གིས་ཚིག་ཏུ་སྨྲ་བ་དེ་མ་མཆིས། །གང་སྨྲས་དེ་ཡི་ཚིག་ཀྱང་ཡོང་མ་མཆིས། །གང་ལ་སྨྲས་པ་དེ་ཡང་རྙེད་མི་འགྱུར། །གང་གིས་རིག་པ་དེ་ཡང་མཆིས་མ་ལགས། །ལོག་
པར་རྟོག་ལ་ཆགས་པའི་དབང་གིས་སུ། །འདིར་ནི་འགྲོ་བ་འདི་ཀུན་རབ་ཏུ་འཁྱམས། །མི་གང་ཞིག་གིས་ཞི་བའི་ཆོས་རིག་པ། །དེས་ནི་རང་བྱུང་དེ་བཞིན་གཤེགས་པ་མཐོང་། །ཆོས་མཆོག་ཞི་བའི་རྣམས་ཀྱང་རབ་ཏུ་རྟོགས། །དགའ་བ་རྙེད་ནས་སེམས་ཅན་ཚིམ་པར་བགྱིད། །ཉོན་མོངས་བརྒལ་ནས་དེ་ནི་རྒྱལ་བར་འགྱུར། །
བདག་ཉིད་རྒྱལ་བར་གྱུར་ཅིང་བདག་མི་གནས། །དེས་ནི་རྒྱལ་བའི་བྱང་ཆུབ་རབ་ཏུ་རྟོགས། །སངས་རྒྱས་ནས་ནི་འགྲོ་བ་རྟོགས་པ་མཛད། །གང་ནས་བླ་མེད་བྱང་ཆུབ་མཆི་བ་ཡི། །ཤུལ་དེར་སེམས་ཅན་ལམ་གོལ་ཞུགས་པ་བགྱི། །རྒྱལ་བ་ཞི་གནས་འགྲོ་བ་ཞི་བར་མཛད། །འབྱུང་བའི་ངོ་བོ་རྣམ་པར་གྲོལ་བར་