Kinh tạng Tây Tạng (Kangyur Đại Học) — 054_མདོ་སྡེ།_ཐ

་མེད། འབྲི་བ་ཡང་མེད། ལེན་པ་ཡང་མེད། འགོད་པ་ཡང་མེད། ཟད་པ་ཡང་མེད། འགོག་པ་ཡང་མེད། འགྲིབ་པ་ཡང་མེད། འཕེལ་བ་ཡང་མེད། རིགས་ཀྱང་མ་ཡིན།
རིགས་མེད་པ་ཡང་མ་ཡིན། འགྱུར་བ་ཡང་མ་ཡིན། འཛིན་པ་ཡང་མ་ཡིན། འདོར་བ་ཡང་མ་ཡིན། གཟུང་བ་ཡང་མ་ཡིན། གཏོང་བ་ཡང་མ་ཡིན། ཕྲ་བ་ཡང་མ་ཡིན། ཟབ་པ་ཡང་མ་ཡིན། མུན་པ་ཡང་མ་ཡིན། སྣང་བ་ཡང་མ་ཡིན། ཉིན་པར་ཡང་མ་ཡིན།

མཚན་མོ་ཡང་མ་ཡིན། རིང་པོ་ཡང་མ་ཡིན། ཐུང་ངུ་ཡང་མ་ཡིན། ཉེ་བ་ཡང་མ་ཡིན། རིང་བ་ཡང་མ་ཡིན། ཡངས་པ་ཡང་མ་ཡིན། དོག་པ་ཡང་མ་ཡིན། གཅིག་པུ་ཡང་མ་ཡིན། ཐུན་མོང་ཡང་མ་ཡིན། གཟུགས་ཀྱང་མ་ཡིན།
སྔ་བ་ཡང་མ་ཡིན། འཕྱི་བ་ཡང་མ་ཡིན། འགྲོ་བ་ཡང་མ་ཡིན། འོང་བ་ཡང་མ་ཡིན། འཕོ་བ་ཡང་མ་ཡིན། མི་འཕོ་བ་ཡང་མ་ཡིན། འཆི་འཕོ་བ་ཡང་མ་ཡིན། སྐྱེ་བ་ཡང་མ་ཡིན་ཏེ། དེ་ལྟར་འདུས་མ་བྱས་པའི་དབྱིངས་དེ་ནི་མི་འཁྲུགས་པ་ཞེས་བྱའོ། །དེའི་
ཕྱིར་དེའི་མིང་མི་འཁྲུགས་པའི་བློ་གྲོས་ཞེས་བྱ་བར་གྱུར་ཏོ། །དྲང་སྲོང་མི་འཁྲུགས་པའི་བློ་གྲོས་དེས་དེ་བཞིན་གཤེགས་པ་རྣམ་པར་སྣང་མཛད་དེ་ལ་ཡང་མི་འཁྲུགས་པའི་དབྱིངས་ཀུན་དྲིས་སོ། །དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དེས་ལོ་བྱེ་བ་ཁྲག་ཁྲིག་དྲུག་ཅུའི་བར་དུ་མི་འཁྲུགས་པའི་དབྱིངས་དེ་བསྟན་པ་བཤད་དེ། དེས་མི་འཁྲུགས་པའི་དབྱིངས་ཐོས་མ་ཐག་ཏུ་འདི་ལྟ་བུའི་དགེ་བའི་རྩ་བའི་ཤུགས་རྙེད་དེ། དེ་ལྟ་བུའི་དགེ་བའི་རྩ་བའི་ཤུགས་ཀྱིས་ནམ་མཁའ་ལ་ཏ་ལ་བདུན་སྲིད་དུ་འཕགས་
ནས་དྲང་སྲོང་མི་འཁྲུགས་པའི་བློ་གྲོས་དེ་བར་སྣང་ལ་འདུག་སྟེ། སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་བཟོད་པའི་ཕ་རོལ་ཏུ་ཕྱིན་པའི་བསྔགས་པ་བརྗོད་པ་མཐོང་ངོ་། །བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་
དཔག་ཏུ་མེད་པ་ཡང་མཐོང་ངོ་། །དེ་བཞིན་གཤེགས་པ་རེ་རེའི་འཁོར་རེ་རེ་ན་ཡང་བྱང་ཆུབ་སེམས་དཔའ་ཁྲག་ཁྲིག་དཔག་ཏུ་མེད་པ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་དང་། ཡོངས་སུ་རྫོགས་པར་འགྱུར་བ་དང་། མི་འཁྲུགས་པའི་དབྱིངས་ལ་གནས་པ་
དང་། མི་སྐྱེ་བའི་ཆོས་ལ་བཟོད་པའི་ཕ་རོལ་ཏུ་ཕྱིན་པ་རྫོགས་པའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་ཚད་མེད་པ་རྣམས་མཐོང་ངོ་། །དེ་བཞིན་གཤེགས་པ་རེ་རེའི་ཆོས་བསྟན་པ་རེ་རེ་ལ་ཡང་བྱང་ཆུབ་སེམས་དཔའ་ཁྲག་ཁྲིག་དཔག་ཏུ་མེད་པ་རྣམས་བཟོད་པའི་ཕ་

རོལ་ཏུ་ཕྱིན་པ་ཡོངས་སུ་རྫོགས་པ་དང་། ཡོངས་སུ་རྫོགས་པར་འགྱུར་བ་དང་། མི་འཁྲུགས་པའི་དབྱིངས་ལ་གནས་པ་དང་། མི་སྐྱེ་བའི་ཆོས་ལ་བཟོད་པ་དང་། ངེས་པའི་སྟོབས་བསྐྱེད་པ་ལ་ཞུགས་པ་དང་། ངེས་པའི་སྟོབས་བསྐྱེད་པའི་རྗེས་སུ་འཇུག་པ་མཐོང་ངོ་། །མཐོང་
ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དེ་ལ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །བདེ་གཤེགས་ཆོས་ཚུལ་ཇི་བཞིན་ཐོས་ནས་སུ། །མི་མཆོག་བདག་གིས་བཟོད་པ་ཞི་བ་རྙེད། །བགྱིད་པོ་གང་
ཡང་མ་མཆིས་བགྱིད་མ་མཆིས། །ཆོས་ཉིད་དག་ལ་གནས་པར་ཐེ་ཚོམ་བྲལ། །བདག་གིས་འཇིག་རྟེན་རིག་ཁྱོད་གསུང་ཐོས་ནས། །ཆོས་འདི་ཐམས་ཅད་ནམ་མཁའི་དབྱིངས་འདྲར་འཚལ། །བདག་གིས་རིང་ནས་སྟོར་རྙེད་འཐུན་བགྱིས་ཏེ། །གཏེར་ཆེན་ཇི་ལྟར་
ཡུན་རིང་སྟོན་པ་བཞིན། །དེང་བདག་བཟོད་པའི་ཤུགས་ནི་རྒྱ་ཆེན་སྐྱེས། །ཆོས་ཀྱི་ཚུལ་ནི་ཡང་དག་ཇི་བཞིན་འཚལ། །དེ་རིང་བདག་གིས་ཐེ་ཚོམ་དོགས་ཀུན་སྤངས། །འཇིག་རྟེན་མཁྱེན་པ་ཁྲག་ཁྲིག་མཐའ་ཡས་མཐོང་། །ཇི་ལྟར་བྱ་རྣམས་སྒོ་ང་འཕྲུགས་ནས་ནི། །སྒོ་
ངའི་སྟེང་ངམ་ཞབས་སུ་མཆུས་བརྟོལ་ཏེ། །རང་གི་སྒོ་ང་བཅག་ནས་བྱུང་བ་བཞིན། །བདེ་གཤེགས་ཁྱོད་གསུང་ཐོས་ནས་བདག་ཀྱང་བྱུང་། །བདག་གིས་ཇི་ལྟར་འདོད་པའི་ས་ཀུན་བོར། །འཇིག་རྟེན་མཁྱེན་པ་ཁྲག་ཁྲིག་མཐའ་ཡས་མཐོང་། །རྒྱལ་བ་བྱེ་བ་མཐའ་ཡས་བཟོད་
སྟོབས་གནས། །བདེ་གཤེགས་ཡེ་ཤེས་མངའ་བས་བདག་ལུང་བསྟན། །བདེ་གཤེགས་མཐའ་ཡས་ཕྱོགས་བཅུའི་འཇིག་རྟེན་ན། །རྒྱལ་སྲས་ལུང་བསྟན་དེ་དག་དེ་བཞིན་སྟོན། །བཟོད་སྟོབས་རྙེད་པས་སེང་གེའི་སྒྲ་སྒྲོག་པ། །ནམ་མཁའི་བྱ་ལམ་འདིར་མཆིས་
བདག་གིས་མཐོང་། །ནམ་མཁའ་འདི་ལ་མཆིས་ནས་བདག་གིས་ཀྱང་། །རྒྱལ་བ་བདེ་བར་གཤེགས་པ་མཐའ་ཡས་ཀྱིས། །བཟོད་ཐོབ་སྲས་ལ་བདེ་གཤེགས་རང་བྱུང་འགྱུར། །སྐྱེ་བོ་བདུད་ཞགས་འགྲོལ་ཞེས་ལུང་སྟོན་མཐོང་། །ནམ་མཁའི་བྱ་ལམ་འདིར་

མཆིས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མཐའ་ཡས་རྣམས། །དགྲ་ཡི་ཚོགས་བཅོམ་ཀུན་མཁྱེན་ལེགས་འཆང་སྲས། །འགྲོ་མགོན་ཟིལ་མི་ནོན་འགྱུར་ལུང་སྟོན་མཐོང་། །བདག་གིས་རྒྱལ་སྲས་སྤྱད་པ་སྤྱོད་པ་དག །འགྲོ་
ཕན་བྱང་ཆུབ་རྡུལ་མེད་བཙལ་སླད་དུ། །རྒྱལ་སྲིད་རིན་ཆེན་མགོ་མིག་གཏོང་བ་དང་། །མཐུ་རྙེད་བརྟན་པ་ཐུབ་པའི་ཁུར་ཁྱེར་མཐོང་། །རྒྱལ་སྲས་དགའ་ལྡན་གནས་ནས་ཤི་འཕོས་ཏེ། །ལྷ་ཡི་བུ་མོ་བརྒྱ་ཡིས་གླུ་བླངས་ཤིང་། །བཀྲ་ཤིས་བཅས་པའི་དབྱངས་ཀྱིས་མངོན་
བསྟོད་ནས། །རྒྱལ་རིགས་དྲང་སྲོང་བྲམ་ཟེའི་རིགས་སྐྱེ་མཐོང་། །བདག་གིས་རྒྱལ་སྲས་ཟླ་བཅུ་མངལ་གནས་པ། །ལྷ་ཡི་གནས་ན་ལྷ་ཡི་བུ་བཞིན་དུ། །སྙིང་རྗེས་ཆོས་སྟོན་ལྷ་རྣམས་རབ་ཏུ་འདུལ། །མངལ་ན་གནས་པ་མི་ཡིས་མངོན་མཆོད་མཐོང་། །བདག་གིས་རྒྱལ་
སྲས་ཡུམ་གྱི་ལྷུམས་ནས་སུ། །ལྷ་རྣམས་ཀྱིས་ཀྱང་མངོན་པར་མཆོད་ཅིང་བྱུང་། །སེམས་དགེ་བས་ན་མི་གཙང་རྡུལ་མི་ཆགས། །རིན་ཆེན་ཉེས་པས་མི་གོས་བཞིན་དུ་མཐོང་། །བདག་གིས་རྒྱལ་སྲས་རྒྱལ་སྲིད་རིན་ཆེན་བདུན། །བརྒྱ་ཕྲག་བཅུ་པོ་བུ་ཡི་ཚོགས་རྣམས་དང་། །
རྟ་དང་གླང་པོས་གང་བའི་ས་སྤངས་ཏེ། །བདུད་ཀྱི་ཞགས་བཅད་མངོན་པར་བྱུང་བ་མཐོང་། །བདག་གིས་རྒྱལ་སྲས་འགྲོ་ལ་སྨན་སླད་དུ། །ཁྲག་ཁྲིག་བདུད་རྣམས་ཟིལ་མནན་བྱང་ཆུབ་རེག །ཉོན་མོངས་རིང་བསགས་རྣམ་མང་དཔའ་བོས་སྤངས། །བདེ་གཤེགས་ཉི་མ་བཞིན་
དུ་ལྷན་པ་མཐོང་། །བདག་གིས་རྒྱལ་སྲས་རང་གིས་ཉོན་མོངས་བཏུལ། །མཚུངས་མེད་དམ་པ་ཆོས་ཀྱི་འཁོར་ལོ་བསྐོར། །ལྷ་མི་སེམས་ཅན་ཁྲག་ཁྲིག་རྣམས་བཏུལ་ཞིང་། །ཟད་མཐར་འགྲོ་བ་ལན་གསུམ་སྐོར་བ་མཐོང་། །བདག་གིས་རྒྱལ་བ་སྟོང་ཕྲག་མཐའ་ཡས་
པ། །རྒྱལ་བའི་ཞིང་རྣམས་རྒྱུ་ཞིང་སེམས་ཅན་འདུལ། །འགྲོ་ལ་སྨན་སླད་འགྲོ་བ་སྟོང་པར་མཛད། །པད་མ་ཉི་བཞིན་སེམས་ཅད་སད་མཛད་མཐོང་། །བདག་གིས་རྒྱལ་བ་སྟོང་ཕྲག་མཐའ་ཡས་པ། །སེམས་ཅན་བཏུལ་ནས་སངས་རྒྱས་མཛད་པ་མཛད། །ལྕེ་སྟེང་

བྱུང་བའི་མཆིལ་མ་མིས་བོར་བཞིན། །དེ་བཞིན་གཤེགས་ཚོགས་གནས་སུ་འདོར་བ་མཐོང་། །བདག་གིས་སངས་རྒྱས་སྟོང་ཕྲག་མཐའ་ཡས་པ། །ཞི་བར་འགྲོ་བ་མེ་ལ་ཆུས་བཏབ་བཞིན། །འགྲོ་བ་སྡུག་བསྔལ་ཁུར་སྐྱོ་མྱ་ངན་བཟླས། །སྟོབས་བཅུ་ཉོན་མོངས་ཀུན་སྤངས་
འདས་པ་མཐོང་། །བདག་གིས་རྒྱལ་བ་སྟོང་ཕྲག་མཐའ་ཡས་པ། །འགྲོ་ལ་སྨན་དོན་མཛད་ཅིང་སྐུ་གདུང་བྲལ། །མྱ་ངན་འདས་ཀྱང་སྐྱེ་བོ་མྱ་ངན་ཟློ། །མྱ་ངན་འདས་ཀྱང་བསྟན་པ་རྗོད་པ་མཐོང་། །དེ་ལྟར་འགྲོ་ལ་སྨན་སླད་སྐྱབས་སུ་མཆི། །དགེ་བ་བསགས་པ་འདི་
ཡིས་སངས་རྒྱས་གྱུར། །བདག་ཉིད་གྲོལ་ནས་སེམས་ཅན་ཁྲག་ཁྲིག་དགྲོལ། །མགོན་མེད་བདུད་ཞགས་བཅིངས་པ་ཞི་བར་བགྱི། །དེ་ནས་དྲང་སྲོང་མི་འཁྲུགས་པའི་བློ་གྲོས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམ་པར་སྣང་མཛད་དེ་ལ་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་རྣམས་ཀྱིས་མངོན་པར་བསྟོད་ནས། དགེ་བའི་རྩ་བ་དེས་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྐལ་པ་བརྗོད་དུ་མེད་པར་ནམ་ཡང་གཏི་མུག་པར་མ་གྱུར། ནམ་ཡང་འདོད་པ་མ་སྤྱད། ནམ་
ཡང་བུད་མེད་ཀྱི་དབང་དུ་མ་གྱུར། ནམ་ཡང་བདུད་ཀྱི་སྤྱོད་ཡུལ་ལ་མ་སྤྱད། ནམ་ཡང་མངལ་གྱི་གནས་སུ་མ་ཞུགས། རྟག་ཏུ་རྒྱུན་མི་འཆད་པར་རྫུས་ཏེ་སྐྱེས། ནམ་ཡང་བདུད་ཀྱི་ལས་ཀྱིས་མ་བསྒྲིབས། ནམ་ཡང་བདུད་ཀྱི་ལས་ཀྱི་དབང་དུ་འགྲོ་བར་མ་གྱུར། ནམ་
ཡང་བྱང་ཆུབ་ཀྱི་སེམས་དང་བྲལ་བར་མ་གྱུར། ནམ་ཡང་འཁོར་བས་སྐྱོ་བའི་སེམས་མ་བསྐྱེད། སེམས་ཅན་ཐམས་ཅད་ལ་ཕན་པ་དང་ལྡན་པ་མ་ཡིན་པ་ནམ་ཡང་ཕན་པ་མེད་པའི་སེམས་མ་བསྐྱེད་དོ། །བསྐལ་པ་བརྗོད་དུ་མེད་པར་ནམ་ཡང་སངས་རྒྱས་དང་བྲལ་བའི་ཡིད་
ལ་བྱེད་པ་མ་བསྐྱེད། ནམ་ཡང་ཆགས་པ་དང་ལྡན་པའི་ཡིད་ལ་བྱེད་པ་མ་བསྐྱེད། བསྐལ་པ་བརྗོད་དུ་མེད་པར་ནམ་ཡང་སྐྱེ་བ་དང་ལྡན་པའི་ཡིད་ལ་བྱེད་པ་མ་བསྐྱེད། ནམ་ཡང་འབྱུང་བ་མ་བཙལ། ནམ་ཡང་ཐམས་ཅད་མཁྱེན་པའི་སེམས་དང་བྲལ་བར་མ་གྱུར།

ནམ་ཡང་དམན་པའི་སེམས་དང་ལྡན་པར་མ་གྱུར། ནམ་ཡང་ཐམས་ཅད་མཁྱེན་པ་ཡིད་ལ་བྱེད་པ་དང་བྲལ་བར་མ་གྱུར། ནམ་ཡང་དགེ་བའི་བཤེས་གཉེན་དང་བྲལ་བར་མ་གྱུར། ནམ་ཡང་ཐམས་ཅད་མཁྱེན་པ་ཉིད་དུ་དམིགས་པར་མ་གྱུར། ནམ་ཡང་
དགེ་བའི་བཤེས་གཉེན་དང་མི་ལྡན་པར་མ་གྱུར། ནམ་ཡང་དགེ་བའི་བཤེས་གཉེན་རྣམས་ལ་དངོས་པོར་མ་དམིགས། དེ་ནམ་ཡང་འདུས་བྱས་དང་འདུས་མ་བྱས་ཀྱི་ཆོས་རྣམས་ཐ་དད་པར་མ་བསམས། དེས་ནམ་ཡང་དུས་གསུམ་མཉམ་པ་ལས་ལམ་ལོག་པར་མ་བསྟེན།
དེས་ནམ་ཡང་དུས་གསུམ་དམིགས་པར་མ་གྱུར་ཏོ། །འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་མི་འཁྲུགས་པའི་བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན།
དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དྲང་སྲོང་མི་འཁྲུགས་པའི་བློ་གྲོས་ཞེས་བྱ་བར་གྱུར་ཏེ། དེ་སྒྲིབ་པ་མེད་པའི་རྣམ་པར་ཐར་པ་ལ་སྤྱད་པས་ཇི་ལྟར་ངས་བརྗོད་པ་བཞིན་དུ་དེ་ཙམ་དུ་རྒྱ་ཆེར་སངས་རྒྱས་ཀྱི་ཞིང་ཡོངས་སུ་དག་པར་བྱས་སོ། །འཇམ་དཔལ་དེ་
ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་རྒྱ་ཆེར་ཡོངས་སུ་སྤྱོད་པར་འདོད་པས་སྒྲིབ་པ་མེད་པའི་རྣམ་པར་ཐར་པའི་ཕྱིར་རྩོམ་པ་མི་འདོར་རོ། །སྒྲིབ་པ་མེད་པའི་རྣམ་པར་ཐར་པ་ལ་མོས་པར་བྱའོ། །ཡང་འཇམ་དཔལ་དེ་བཞིན་གཤེགས་པ་དོན་
ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱོད་པ་སྤྱོད་པ་ན། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་དཔག་ཏུ་མེད་པ་རྒྱ་ཆེན་པོ་མངོན་པར་འདུས་བྱས་སོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་དཔག་ཏུ་མེད་ཅིང་རྒྱ་
ཆེན་པོ་བསྐྱེད་དེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གྲངས་མེད་ཅིང་བསམ་གྱིས་མི་ཁྱབ་པ་ནས་བརྗོད་དུ་མེད་པའི་བར་དུ་རྒྱ་ཆེན་པོ་མངོན་པར་འདུས་བྱས་སོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་བསམ་གྱིས་མི་

ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་རྒྱ་ཆེན་པོ་བསྐྱེད་དོ། །འཇམ་དཔལ་སྔོན་བྱུང་བ་འདས་པའི་དུས་བསྐལ་པ་དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་ན་རིན་ཆེན་བྱུང་བ་ཞེས་བྱ་བའི་བསྐལ་
པ་ལ་དེ་བཞིན་གཤེགས་པ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་བཟང་པོའི་ལྷ་ཞེས་བྱ་བ་འཇིག་རྟེན་དུ་བྱུང་སྟེ། འཇམ་
དཔལ་དེ་བཞིན་གཤེགས་པ་བཟང་པོའི་ལྷ་དེའི་ཚེའི་ཚད་ནི་བསྐལ་པ་ཁྲག་ཁྲིག་ཕྲག་བརྒྱད་ཅུར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དེ་བཞིན་གཤེགས་པ་བཟང་པོའི་ལྷའི་གསུང་རབ་ལ་དགེ་སློང་མོས་པའི་བློ་གྲོས་ཞེས་བྱ་བ་ཞིག་བྱུང་སྟེ། ཤིན་དུ་རྟོགས་པ་དང་ལྡན་
པ། ཤིན་དུ་བློ་གྲོས་དང་ལྡན་པ། ཤིན་དུ་དྲན་པ་དང་ལྡན་པ། ཤིན་དུ་བརྩོན་འགྲུས་དང་ལྡན་པ། ཤིན་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྟོབས་བསྐྱེད་པ་རྙེད་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། རྒྱལ་པོའི་རིགས་ལས་རབ་ཏུ་བྱུང་སྟེ། གཟུགས་
བཟང་བ་མཛེས་པ། བལྟ་ན་སྡུག་པ། དེ་བཞིན་གཤེགས་པ་བཟང་པོའི་ལྷ་དེ་མ་གཏོགས་པར་སངས་རྒྱས་ཀྱི་ཞིང་དེ་ན་མོས་པའི་བློ་གྲོས་ཇི་ཙམ་དུ་མཛེས་པ་དེ་ཙམ་གྱིས་མཛེས་པའི་སེམས་ཅན་སུ་ཡང་མེད་དེ། དེ་བལྟ་བས་ཆོག་མི་ཤེས་པ་སངས་རྒྱས་ཁྲག་ཁྲིག་དཔག་ཏུ་
མེད་པ་ལ་བསྙེན་བཀུར་བྱས་པ། ཡོངས་སུ་སྦྱང་བ་བྱས་པ། ཚད་མེད་པའི་ཆོས་ཉིད་ལས་ངེས་པར་བྱུང་བ་བྱང་ཆུབ་སེམས་དཔའི་ཏིང་ངེ་འཛིན་བཞི་རྙེད་དེ། འདོད་པ་བཞིན་རྙེད་ཅིང་ཉོན་མོངས་པ་མེད་པར་རྙེད། ཚེགས་མེད་པར་རྙེད་ནས་འདྲིས་པར་བྱས་ཏེ། རེ་
ཞིག་ནི་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་སེམས་མི་འཇུག་གོ། །སྟོབས་བཅུའི་ཕ་རོལ་ཏུ་སོན་པས་འདོད་ན་སངས་རྒྱས་ཀྱི་ཞིང་ཚད་མེད་པ་རྣམས་སུ་འགྲོའོ། །དེ་ནས་དགེ་སློང་མོས་པའི་བློ་གྲོས་དེ་དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཟང་པོའི་ལྷ་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་བཟང་པོའི་ལྷའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འདུག་གོ། །ཕྱོགས་
གཅིག་ཏུ་འདུག་ནས་ཀྱང་དགེ་སློང་མོས་པའི་བློ་གྲོས་དེས་དེ་བཞིན་གཤེགས་པ་བཟང་པོའི་ལྷ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟིངས་ཆེན་པོ་བཅའ་བར་འཚལ་བ་དང་ཟམ་པ་ཆེན་པོ་གདགས་པར་འཚལ་བ་དང་། འཁོར་བའི་རྒྱ་མཚོ་ལས་རྒལ་བར་འཚལ་བ་དང་།
སེམས་ཅན་ཐམས་ཅད་བསྒྲལ་བར་འཚལ་བ་དང་། སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་སྦྱང་བར་འཚལ་བ་དང་། སངས་རྒྱས་ཀྱི་ཞིང་གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། གཞལ་དུ་མ་མཆིས། བརྗོད་དུ་མ་མཆིས་པ་ཡོངས་སུ་སྦྱང་
བར་འཚལ་བ་དང་། སངས་རྒྱས་ཀྱི་ཞིང་མཐའ་ཡས་པ་ཡོངས་སུ་དག་པ་བསྒྲུབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་གང་ལ་བརྩོན་པར་བགྱི། དེ་སྐད་ཅེས་གསོལ་པ་དང་། དེ་བཞིན་གཤེགས་པ་བཟང་པོའི་ལྷས་དགེ་སློང་མོས་པའི་བློ་གྲོས་དེ་ལ་འདི་
སྐད་ཅེས་བཀའ་སྩལ་ཏོ། །དགེ་སློང་དེ་དག་དང་ཡོན་ཏན་ཚད་མེད་པ་གཞན་ཡང་བསྒྲུབ་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྒྲིབ་པ་མེད་པའི་རྣམ་པར་ཐར་པ་ཁོང་དུ་ཆུད་པར་བྱ་བའི་ཕྱིར་བརྩོན་འགྲུས་བརྩམ་མོ། །མཚན་མོར་འདུ་ཤེས་ཡིད་ལ་མི་བྱེད་པ་
དང་། ཉིན་པར་འདུ་ཤེས་དང་། གྲང་བར་འདུ་ཤེས་དང་། དྲོ་བར་འདུ་ཤེས་དང་། བཀྲེས་པར་འདུ་ཤེས་དང་། ཟས་སུ་འདུ་ཤེས་དང་། སྐོམ་དུ་འདུ་ཤེས་དང་། བཏུང་བར་འདུ་ཤེས་དང་། གོས་སུ་འདུ་ཤེས་པ་ཡིད་ལ་མི་བྱེད་པ་དང་། སྟོབས་སུ་འདུ་ཤེས་པ་
ཡིད་ལ་མི་བྱེད་ཅིང་འདུ་ཤེས་ཐམས་ཅད་ཡིད་ལ་མི་བྱེད་པར་སྒྲིབ་པ་མེད་པའི་རྣམ་པར་ཐར་པ་མངོན་དུ་བྱས་ཏེ་བརྩོན་འགྲུས་བརྩམ་མོ། །སྒྲིབ་པ་མེད་པའི་རྣམ་པར་ཐར་པ་དེ་ཁོང་དུ་ཆུད་པར་བྱ་བའི་ཕྱིར་བརྩོན་འགྲུས་བརྩམས་ཏེ། དེས་བརྩོན་འགྲུས་བརྩམས་ན་སྒྲིབ་པ་མེད་

པའི་རྣམ་པར་ཐར་པ་མངོན་དུ་འགྱུར་རོ། །སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་དཔག་ཏུ་མེད་པ་རྣམས་ཡོངས་སུ་དག་པར་འགྱུར་རོ། །དེ་བཞིན་དུ་སྦྱར་ཏེ། སངས་རྒྱས་ཀྱི་ཞིང་བརྗོད་དུ་མེད་པའི་བར་དུ་
ཡོངས་སུ་དག་པར་འགྱུར་རོ། །དེ་ནས་དགེ་སློང་མོས་པའི་བློ་གྲོས་དེ་ལ་དེ་བཞིན་གཤེགས་པ་བཟང་པོའི་ལྷ་དེས་དེ་བཞིན་དུ་བསྟན་ཅིང་གདམས་ནས་དེས་འདུ་ཤེས་ཐམས་ཅད་ཡིད་ལ་མ་བྱས་ཏེ། །སྒྲིབ་པ་མེད་པའི་རྣམ་པར་ཐར་པ་རྟོགས་པར་བྱ་བའི་ཕྱིར་བསྐལ་པ་ཁྲག་ཁྲིག་ཕྲག་
བརྒྱད་ཀྱི་བར་དུ་བརྩོན་འགྲུས་བརྩམས་ནས་སྤྱོད་དོ། །དེ་ནས་བསྐལ་པ་ཁྲག་ཁྲིག་ཕྲག་བརྒྱད་འདས་པ་དང་། །དེ་སྒྲིབ་པ་མེད་པའི་རྣམ་པར་ཐར་པ་ལ་རབ་ཏུ་གནས་པར་གྱུར་ནས། བྱང་ཆུབ་སེམས་དཔའི་དབང་བཅུས་ངེས་པར་བྱུང་སྟེ། དེས་སྤྲུལ་པ་ཁྲག་ཁྲིག་ཚད་མེད་པ་མངོན་
པར་སྤྲུལ་ནས་ལྷ་ལ་དད་པ་རྣམས་ལ་ལྷར་མངོན་པར་སྤྲུལ། ཀླུ་ལ་དད་པ་རྣམས་ལ་ཀླུར། གནོད་སྦྱིན་ལ་དད་པ་རྣམས་ལ་གནོད་སྦྱིན་དུ། དྲི་ཟ་ལ་དད་པ་རྣམས་ལ་དྲི་ཟར། གྲུལ་བུམ་ལ་དད་པ་རྣམས་ལ་གྲུལ་བུམ་དུ། ལྷ་མ་ཡིན་ལ་དད་པ་རྣམས་ལ་ལྷ་མ་ཡིན་དུ། ནམ་མཁའ་ལྡིང་ལ་དད་
པ་རྣམས་ལ་ནམ་མཁའ་ལྡིང་དུ། མིའམ་ཅི་ལ་དད་པ་རྣམས་ལ་མིའམ་ཅིར། ལྟོ་འཕྱེ་ཆེན་པོ་ལ་དད་པ་རྣམས་ལ་ལྟོ་འཕྱེ་ཆེན་པོར་མངོན་པར་སྤྲུལ་ཏོ། །དེ་ལྟར་དགེ་སློང་མོས་པའི་བློ་གྲོས་དེས་སངས་རྒྱས་ཀྱི་ཞིང་དེ་ན་སེམས་ཅན་སྤྲུལ་པ་ཇི་ལྟ་བུ་ལ་དད་པ་བཞིན་དུ་རྟག་ཏུ་རྒྱུན་མི་འཆད་པར་མངོན་
པར་སྤྲུལ་ཏེ། དེས་དེར་སེམས་ཅན་ཚད་མེད་པ་ཡོངས་སུ་སྨིན་པར་བྱེད་པའི་སྦྱོར་བས་མྱུར་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཟང་པོའི་ལྷ་དེས་དགེ་སློང་མོས་པའི་བློ་
གྲོས་དེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མཁྱེན་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་ཀྱི་གཏམ་གྱིས་ཡང་དག་པར་དགའ་བར་བྱས། ཡང་དག་པར་འཛིན་དུ་བཅུག །ཡང་དག་པར་རབ་ཏུ་མགུ་བར་བྱས་ནས། དེའི་བརྩོན་འགྲུས་ཀྱི་

ཕ་རོལ་ཏུ་ཕྱིན་པ་ཤིན་ཏུ་བསྔགས་སོ། །དེ་བཞིན་གཤེགས་པ་བཟང་པོའི་ལྷ་དེས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་གཏམ་གྱིས་དེ་ཡང་དག་པར་དགའ་བར་བྱས། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་
དག་པར་རབ་ཏུ་མགུ་བར་བྱས་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་འདི་ལྟ་བུ་རྙེད་དེ། དེ་ལྟ་བུའི་དགེ་བའི་ཤུགས་ཀྱིས་ནམ་མཁའ་ལ་ཏ་ལ་བདུན་སྲིད་དུ་འཕགས་ཏེ་འདུག་གོ། །འཇམ་དཔལ་དེ་ནས་དགེ་སློང་མོས་པའི་བློ་གྲོས་བར་སྣང་ལ་
འདུག་ནས་འདི་འདྲ་བའི་ཡེ་ཤེས་རྙེད་དེ། གང་གིས་ཕྱོགས་བཅུའི་འཇིག་རྟེན་ན་འཇིག་རྟེན་གྱི་ཁམས་དཔག་ཏུ་མེད་པ་རྣམས་སུ་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་སྔོན་གྱི་སྤྱོད་པ་ཤེས། སངས་རྒྱས་ཀྱི་ཞིང་ཐམས་ཅད་ན་སེམས་ཅན་ཐམས་ཅད་ཀྱི་དབང་པོ་
མཆོག་དང་མཆོག་མ་ཡིན་པ་ཤེས། སེམས་ཅན་དེ་དག་ཐམས་ཅད་ཀྱི་སེམས་དང་སྤྱོད་པ་ཤེས་སོ། །དེས་ཡེ་ཤེས་དེ་རྙེད་ནས་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་ཐེ་ཚོམ་མེད་ཅིང་སངས་རྒྱས་བཅོམ་ལྡན་འདས་དེ་དག་གི་སྔོན་གྱི་སྤྱོད་པ་ལའང་ཐེ་ཚོམ་མེད་དེ། དེ་བཞིན་
གཤེགས་པ་བཟང་པོའི་ལྷ་དེ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་རྣམས་ཀྱིས་མངོན་པར་བསྟོད་དོ། །སྟོབས་བཅུ་སྟོབས་འཆང་སྟོབས་རབ་སྟོབས་ལྡན་པ། །ནོར་མང་བགེད་ཅིང་སྲས་རྣམས་ནོར་ལྡན་མཛད། །བདེ་གཤེགས་ཁྱོད་ཀྱི་སྲས་རྣམས་
ནོར་མང་རྙེད། །འགྲོ་འདི་ཤིན་དུ་སྡུག་བསྔལ་ནོར་ལྡན་མཛད། །བདེ་གཤེགས་ཁྱོད་ཀྱི་ནོར་རྣམས་གཏོར་ཅིང་གོས། །རྒྱལ་བ་ཁྱོད་ཀྱི་སྲས་མཆོག་ནོར་རྙེད་ནས། །དགའ་ཞིང་འགྲོ་ལ་སྨན་པའི་སྤྱོད་མཆོག་སྤྱོད། །རྒྱལ་མཆོག་རྒྱལ་བ་དག་དང་འདྲ་བར་འགྱུར། །ཐུབ་མཆོག་
ཁྱོད་སྲས་ཡོན་ཏན་བརྒྱས་ལྡན་པ། །སྤྱོད་པའི་ངེས་པ་མཆོག་འདི་རྣམ་སྤྱོད་ལ། །སྐྱེ་བར་ནུབ་ཅིང་རྒ་ཤིས་གཙེས་པ་དང་། །འགྲོ་བ་སྡུག་བསྔལ་བརྒྱ་ལྡན་གཟིར་བ་རྣམས། །སྡུག་བསྔལ་བདག་མེད་སྟོང་པར་རྟོགས་པས་ན། །ཤི་འཕོས་འགྲོར་མཆིས་འཁོར་བའི་

འགྲོར་ཆགས་པ། །མཐོང་ནས་འགྲོ་བ་སྡུག་བསྔལ་བདེར་འགོད་ཅིང་། །དེ་དག་སྙིང་རྗེ་རླབས་ཆེན་རྙེད་པར་འགྱུར། །འགྲོ་ལ་སྨན་སེམས་སྙིང་རྗེ་བསྐྱེད་ནས་སུ། །འཁོར་བའི་སྲེད་པ་བཅོམ་ཡང་སྐྱེ་བ་འཛིན། །དགེ་བ་ཚད་མེད་རྣམས་ཀྱང་དྲན་སོགས་ཤིང་། །འགྲོ་བ་རྣམས་ལ་
སྨན་བདེ་ཞི་བར་བགྱིད། །ལོག་པའི་ལམ་མཆིས་སེམས་ཅན་སྟོང་རྣམས་ནི། །སྟོབས་བཅུས་བསྟན་པའི་ལམ་མཆོག་རྣམས་སུ་སྟེ། །ཞི་བའི་གྲོང་ཁྱེར་ཞི་བདེ་དགེ་བ་ནི། །གང་ནས་སྔོན་གྱི་རང་བྱུང་གཤེགས་པར་དགོད། །དེ་དག་སྟོང་པ་ཚད་མེད་གཏོང་བ་ནི། །མགོ་ལག་མིག་བཟང་
བུ་སྡུག་དེ་བཞིན་དུ། །ཚུལ་ཁྲིམས་བཟོད་དང་བརྩོན་འགྲུས་ཏིང་ངེ་འཛིན། །ཐོས་དྲན་མཁས་ཤིང་མོས་དང་སྟོབས་ལ་གནས། །ཤིང་དབང་དྲུང་དུ་བདུད་སྡེ་བཅས་པར་བཏུལ། །དཔེ་མེད་ཡེ་ཤེས་གོ་འཕང་མཆོག་དེར་རྙེད། །རང་འབྱུང་སེམས་ཅན་སྟོང་རྣམས་ཁྲིད་ནས་སུ། །མི་
འཆི་བྱུང་ཞི་བདེ་བ་ཞི་བར་གཤེགས། །ནམ་མཁའ་འདི་ལ་དེ་རིང་བདག་མཆིས་ནས། །ཕྱོགས་བཅུའི་སྟོབས་བཅུ་མ་ནོར་དེ་བཞིན་གསུང་། །རྒྱལ་སྲས་རྒྱལ་བའི་ཡོན་ཏན་སྤྱོད་སྤྱད་ནས། །ཤིན་དུ་ལུང་སྟོན་པ་ནི་དུ་མ་མཐོང་། །དེ་དག་རང་གི་སྤྱོད་ཐོས་དགའ་མགུ་སྟེ། །རབ་
ཏུ་འཛུམ་དམུལ་ཡིད་གཉིས་ཐེ་ཚོམ་བྲལ། །ཐལ་མོ་སྦྱར་ཏེ་མངོན་པར་ལུས་བཏུད་ནས། །སྟོབས་བཅུ་ཡོན་ཏན་མངའ་བ་མཁའ་ལས་བསྟོད། །དེ་རིང་ནམ་མཁའ་འདིར་མཆིས་བདག་གིས་མཐོང་། །འཁོར་བ་བརྒྱར་ནི་རྒྱལ་སྲས་དགེ་སྤྱད་ནས། །དགའ་ལྡན་ལྷ་ཡི་གནས་ནས་
ཤི་འཕོས་ཏེ། །དྲི་བྲལ་དཔེ་མེད་གླང་ཆེན་མཆོག་གྱུར་ནས། །ལྷ་ཡི་གནས་ནས་རབ་ཏུ་བབས་ནས་སུ། །ཡུམ་བདེ་ཉལ་བའི་ལྷུམས་སུ་ཞུགས་པ་ལ། །ལྷ་རྣམས་སྟོང་གིས་ཤིན་དུ་རབ་མཆོད་ཅིང་། །ལྷ་མི་ལྷ་མོ་རྣམས་ཀྱིས་གཙོར་བགྱིས་བསྟོད། །དེ་དག་ཡུམ་གྱི་
ལྷུམས་སུ་ཞུགས་པ་ན། །ལྷ་ཡི་གནས་འདྲ་རབ་ཏུ་མཛེས་པར་གྱུར། །མངལ་གྱིས་མི་གོས་ཆུ་ལས་པད་མ་ལྟར། །ཡུམ་ལ་བདེ་ཞིང་ཡང་བར་གནས་ནས་སུ། །ལྷ་རྣམས་བརྒྱ་ལ་རབ་ཏུ་ཆོས་བཤད་དེ། །ལྷ་མཆོག་འཁོར་རྣམས་དགེ་བའི་ལམ་དུ་བཙུད། །དེ་དག་ཆོས་ཚིག་

རྒྱ་ཆེན་ཐོས་ནས་སུ། །སྐོམ་པས་ཆུ་ལ་ས་བཞིན་བདུད་རྩི་འཐུང་། །ནམ་མཁའི་ངོས་འདིར་བདག་མཆིས་མཐོང་བ་ནི། །རྒྱལ་སྲས་དྲི་མེད་བློ་གྲོས་དྲན་མཁས་པ། །ཡུམ་གྱི་ཕྱག་གིས་ཤིང་གི་ཡལ་ག་གཟུང་། །མཆན་ཁུང་ནས་ནི་བྱུང་བ་རབ་ཏུ་མཐོང་། །
ལྷ་དང་མི་ཡི་དབང་པོས་རབ་མཆོད་ཅིང་། །ས་ཡི་སྟེང་ན་འཇིགས་མེད་གོམ་པ་འདོར། །དེ་ཡིས་ཐམས་ཅད་ཕྱོགས་སུ་བལྟས་ནས་སུ། །འཛུམ་དམུལ་ཚིག་སྨྲས་ང་འདྲ་ཁམས་གསུམ་མེད། །ནམ་མཁའི་ངོས་འདིར་བདག་མཆིས་མཐོང་བ་ནི། །རྒྱལ་སྲས་མང་པོ་འགྲོ་ལ་སྨན་
དགའ་བ། །གྲོང་དང་གྲོང་ཁྱེར་རིན་ཆེན་བལྟམས་པ་ཡི། །རབ་ཏུ་འབྱོར་ཅིང་ལྡན་པའི་ས་བོར་ཏེ། བལ་གླང་རྨིག་པས་བཅིངས་པ་བཅད་པ་ལྟར། །བློ་གྲོས་མཆོག་གིས་ཁྱིམ་ཆགས་བསལ་བཅོམ་སྟེ། །འགྲོ་ལ་སྨན་སླད་དཔའ་བོ་མངོན་པར་བྱུང་། །སྡུག་བསྔལ་ཞི་ཞིང་སྲིད་ཟད་
བདུད་རྩི་ཚོལ། །ནམ་མཁའི་ངོས་འདིར་བདག་མཆིས་མཐོང་བ་ནི། །རྒྱལ་སྲས་བརྟུལ་ཞུགས་དཀའ་ཐུབ་དྲག་སྤྱད་དེ། །སྐྱིལ་མོ་ཀྲུང་བཅས་བྱང་ཆུབ་ཤིང་དབང་དྲུང་། །གཡོ་ཅན་བདུད་བཏུལ་བྱང་ཆུབ་དམ་པ་རེག །རྒྱལ་བ་ཐམས་ཅད་དང་ནི་མཉམ་རྙེད་ནས། །ཞི་དགའ་བདེ་
གནས་ཞིང་མཆོག་ལྟ་བཞིན་དུ། །སྨོན་ལམ་རྒྱ་ཆེན་བདག་གིས་འདིར་རྫོགས་ཏེ། །འཁོར་བརྒྱར་ལེགས་སྤྱད་བརྟུལ་ཞུགས་འདི་གྲུབ་བོ། །ནམ་མཁའི་ངོས་འདིར་བདག་མཆིས་མཐོང་བ་ནི། །ཕྱོགས་བཅུའི་སྟོབས་བཅུ་ཤིན་ཏུ་མང་པོ་དག །འཁོར་ལོ་རྒྱ་ཆེན་རབ་ཏུ་བསྐོར་བ་ནི། །
ཕ་རོལ་རྒོལ་འདུལ་འཁོར་བའི་སྡུག་བསྔལ་ཞི། །སྐལ་ཡོད་འགྲོ་བ་རྣམས་ཀྱི་ཉོན་མོངས་བཅོམ། །མུན་པའི་རྡུལ་བསལ་འགྲོ་རྣམས་བདེ་བ་བྱིན། །འཇིག་རྟེན་གཙོ་བོ་རྣམས་ཀྱིས་དེ་ཐོས་ནས། །འཁོར་བའི་རྒྱུད་བསལ་མ་སོང་ཕྱོགས་སུ་སོང་། །དེ་རིང་ནམ་མཁའ་འདི་ལ་
བདག་མཆིས་ནས། །རྒྱལ་བ་བརྒྱ་དག་ལྷ་མི་འཁོར་འདུལ་ཞིང་། །ལྷ་མི་གནས་ནས་འགྲོ་ལ་སྙིང་བརྩེ་ཡིད། །འཇིག་རྟེན་དག་ན་རབ་ཏུ་ཞུགས་པ་མཐོང་། །རྒྱལ་བ་བརྒྱ་ཕྲག་དུ་མ་གཞན་དག་ཀྱང་། །འཁོར་བ་ཟད་སོང་ཞི་བར་རྡུལ་མེད་གནས། །ལྷ་མི་བརྒྱ་རྣམས་ཡིད་དགར་

གྱུར་ནས་སུ། །རིང་བསྲེལ་དམ་པ་དེ་ལ་མཆོད་པ་མཐོང་། །འཇིག་རྟེན་གཙོ་བོ་རྐང་གཉིས་མཆོག་ཁྱོད་ལ། །ལྷ་དང་མི་དང་ཁྱིམ་བདག་ཁྱོད་དྲུང་མཆིས། །ཞལ་ནས་ཞི་རབ་ཆོས་ཀྱི་རང་བཞིན་ཐོས། །ཁྱོད་ཀྱི་སྤྱོད་ལྡན་མྱུར་དུ་སྐྱབས་སུ་འགྲོ། །མི་དབང་ཁྱོད་ཀྱི་ཡོན་ཏན་ཡང་
དག་བསྟོད། །ཁྱུ་མཆོག་ཕན་བྱེད་སྟོབས་བཅུ་ཡོན་ཏན་འཆང་། །ཞི་བར་ལྡན་ཞིང་དུལ་བ་ཞི་བ་རྙེད། །འཁོར་བའི་རྒྱུད་བྲལ་འཇིགས་མེད་ཕྱོགས་སུ་སོང་། །བདེ་གཤེགས་མི་ཡི་སེང་གེ་ཁྱོད་ཀྱི་མཐུས། །བློ་མཆོག་ཁྱོད་ཀྱང་སྟེང་གི་མཁར་གནས་པ། །མངོན་ཤེས་ལྔ་ལས་ཉམས་
པ་མེད་རྙེད་ནས། །ཕྱོགས་བཅུར་འཁོར་རྒྱུད་རབ་འབྱམས་རྣམ་མང་བ། །མཚུངས་མེད་དུ་མ་དེ་རིང་མཐོང་བ་ནི། །རྒྱལ་བའི་ཡོན་ཏན་སྣ་ཚོགས་དྲི་མེད་སྤྱོད། །ཡང་དག་ཡོན་ཏན་གྱིས་ནི་དེ་དག་བསྟོད། །རྒྱལ་བ་ཁྱོད་ཀྱི་ཡོན་ཏན་མཐའ་མི་རྙེད། །དེ་ནས་དགེ་སློང་མོས་པའི་བློ་
གྲོས་དེས་དེ་བཞིན་གཤེགས་པ་བཟང་པོའི་ལྷ་དེ་ལ་ཚུལ་དང་འཐུན་པའི་ཚིགས་སུ་བཅད་པ་དེ་དག་གིས་བསྟོད་ནས་དགེ་བའི་རྩ་བ་དེས་ཕྱིན་ཆད་བསྐལ་པ་བརྗོད་དུ་མེད་པར་ནམས་ཀྱང་མངོན་པར་ཤེས་པ་ལྔ་དང་བྲལ་བར་མ་གྱུར་ཏེ། མངོན་པར་ཤེས་པ་ལྔ་དང་ལྡན་པར་གྱུར་པས་སངས་
རྒྱས་ཀྱི་ཞིང་དེ་དག་ཐམས་ཅད་ན་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་སྟོངས་པར་བྱས། ལྷ་མ་ཡིན་གྱི་རིས་ཐམས་ཅད་ཡོངས་སུ་ཆད་ཅིང་མི་ཁོམ་པ་ཐམས་ཅད་ཆད་པར་གྱུར་ཏོ། །དེ་སྨོན་ལམ་གྱི་དབང་གིས་སངས་རྒྱས་ཀྱི་ཞིང་དེར་ཡང་དང་
ཡང་སྐྱེས་པ་ན་སེམས་ཅན་རྣམས་ཀྱིས་སངས་རྒྱས་ཐོག་མར་བྱུང་བ་བཞིན་དུ་ཤིན་ཏུ་ངོ་མཚར་དུ་ཤེས་ཏེ། གང་དང་གང་དུ་སྐྱེས་པར་གྱུར་པ་དེ་དང་དེར་གང་དེ་བཞིན་གཤེགས་པ་བྱུང་བ་དེ་ན་ལྟས་འབྱུང་བ་དེ་དག་དེ་སྐྱེ་བའི་ལྟས་སུ་བྱུང་ངོ་། །དེ་བཞིན་གཤེགས་པ་མངོན་པར་རྫོགས་
པར་འཚང་རྒྱ་བ་ན་ལྟས་གང་འབྱུང་བ་དེ་དག་ཀྱང་མངོན་པར་ཤེས་པ་ལྔ་ཐོབ་ནས་བྱུང་ངོ་། །དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བ་ན་ལྟས་གང་བྱུང་བ་དེ་དག་དེས་མངོན་པར་ཤེས་པ་ལྔ་བཤད་པའི་ཚེ་འང་ལྟས་དེ་དག་བྱུང་ངོ་། །དེ་བཞིན་གཤེགས་པ་ཚེའི་འདུ་བྱེད་འདོར་བའི་ཚེ་

ལྟས་གང་བྱུང་བ་དེ་ཚེའི་འདུ་བྱེད་འདོར་བའི་ཚེ་ཡང་ལྟས་དེ་དག་བྱུང་ངོ་། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་ཚེ་ལྟས་གང་བྱུང་བ་དེ་འཆི་བའི་དུས་བྱེད་པ་ན་ཡང་ལྟས་དེ་དག་བྱུང་ངོ་། །དེས་ཚེ་རབས་རེ་རེ་ལ་ཡང་སེམས་ཅན་བྱེ་བ་ཁྲག་
ཁྲིག་བརྒྱ་སྟོང་དཔག་ཏུ་མེད་པ་ཐེག་པ་ཆེན་པོ་ལ་བཏུལ། སེམས་ཅན་བྱེ་བ་ཁྲག་ཁྲིག་བརྒྱ་སྟོང་དུ་མ་ནི་ཉན་ཐོས་ཀྱི་ཐེག་པ་ལ་བཏུལ་ཏོ། །རེ་ཞིག་ནི་བྱང་ཆུབ་སེམས་དཔའ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཏེ། སངས་
རྒྱས་ཀྱི་བྱ་བ་དེ་ལྟ་བུ་དག་སེམས་ཅན་རྣམས་ལ་བསྟན་ཏོ། །འཇམ་དཔལ་དེའི་ཚེ་དེའི་དུས་ན་དགེ་སློང་མོས་པའི་བློ་གྲོས་ཞེས་བྱ་བར་གྱུར་པ་དེ་གཞན་ཡིན་པ་སྙམ་དུ་ཡིད་གཉིས་དང་ཐེ་ཚོམ་ཟ་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན།
འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་མོས་པའི་བློ་གྲོས་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་སྒྲུབ་པའི་བྱང་ཆུབ་སེམས་དཔའ་སེམས་དཔའ་ཆེན་པོས་
དགེ་སློང་མོས་པའི་བློ་གྲོས་དེ་བརྩོན་འགྲུས་ཀྱི་སྟོབས་གང་དང་ལྡན་པར་གྱུར་པའི་བརྩོན་འགྲུས་ཀྱི་སྟོབས་དེ་ལྟ་བུ་དང་ལྡན་པར་བྱའོ། །བརྩོན་འགྲུས་ཀྱི་སྟོབས་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཚེགས་ཆུང་ངུས་སེམས་མཉམ་པར་གཞོག་པར་
འགྱུར་རོ། །དེ་ཅིའི་ཕྱིར་ཞེ་ན། བརྩོན་འགྲུས་ཀྱི་སྟོབས་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དབང་པོའི་དོན་ལས་སེམས་སླར་སྡུད་དེ། དབང་པོའི་དོན་ལ་ཡང་དབང་པོའི་དོན་མི་དམིགས་ཤིང་དབང་པོའི་དོན་ནི་དབང་པོའི་དོན་གྱི་ངོ་བོ་ཉིད་ཀྱིས་
སྟོང་པར་མཐོང་། དབང་པོའི་དོན་དང་དབང་པོའི་མཚན་མ་ཡང་མི་དམིགས། གང་གིས་དབང་པོའི་མཚན་མར་དམིགས་པ་དེ་ཡང་མི་དམིགས་སོ།། །།བམ་པོ་གསུམ་པ། འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་ཚད་མེད།

གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་བདུད་རྩི་སྙིང་པོ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་བདུད་རྩིའི་སྙིང་པོའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མཐའ་ཡས་རྣམ་པར་གནོན་པ་ཞེས་བྱ་
བ་འཇིག་རྟེན་དུ་བྱུང་ངོ་། །འཇམ་དཔལ་དེ་བཞིན་གཤེགས་པ་མཐའ་ཡས་རྣམ་པར་གནོན་པ་དེ་བྱུང་བའི་ཚེ། ཐམས་ཅད་ཀྱི་ཐམས་ཅད་དུ་འཕགས་པའི་བདེན་པ་དང་བྲལ་བའི་སྒྲ་མ་བྱུང་ངོ་། །གང་སེམས་ཅན་ཐམས་ཅད་ཀྱི་སྒྲ་དེ་ཡང་སྡུག་བསྔལ་དང་། ཀུན་འབྱུང་བ་
དང་། འགོག་པ་དང་། ལམ་འཕགས་པའི་བདེན་པ་རྣམས་སྟོན་ཏོ། །དེ་བཞིན་གཤེགས་པ་མཐའ་ཡས་རྣམ་པར་གནོན་པ་དེའི་རིམ་གྲོ་བྱེད་པ་དགེ་སློང་སྙན་པའི་སྒྲ་དབྱངས་ཞེས་བྱ་བ་ཞིག་ཡོད་དེ། དོན་ཤེས། ཆོས་ཤེས། དུས་ཤེས། ཚོད་ཤེས། བདག་ཤེས།
འཁོར་ཤེས། གང་ཟག་རབ་དང་ཐ་མ་ཤེས་ཏེ། དེ་བཞིན་གཤེགས་པ་མཐའ་ཡས་རྣམ་པར་གནོན་པ་ལ་བསྐལ་པ་བྱེ་བ་ཕྲག་དགུ་བཅུའི་བར་དུ་ཡིད་དུ་འོང་བས་བསྙེན་བཀུར་བྱས་ཏེ། ཡིད་དུ་མི་འོང་བས་མ་ཡིན་ནོ། །དེས་བཤད་པ་རྣམས་ཀྱང་བཟུང་སྟེ། བདག་
གི་དོན་ཡང་མི་གཏོང་ངོ་། །དེས་བསྐལ་པ་བྱེ་བ་ཕྲག་དགུ་བཅུ་པོ་དེ་དག་གི་བར་དུ་འདོད་པའི་འདུ་ཤེས་མ་བསྐྱེད། གནོད་སེམས་ཀྱི་འདུ་ཤེས་མ་བསྐྱེད། རྣམ་པར་འཚེ་བའི་འདུ་ཤེས་མ་བསྐྱེད། སྲོག་དང་ལྡན་པ་དང་། གང་ཟག་དང་ལྡན་པའི་རྟོག་པ་མ་བསྐྱེད།
དངོས་པོ་དང་ལྡན་པ་ཡང་མ་ཡིན། ཆོས་དང་ལྡན་པ་ཡང་མ་ཡིན། ཆོས་མ་ཡིན་པ་དང་ལྡན་པ་ཡང་མ་ཡིན། འདོད་པའི་རྣམ་པར་རྟོག་པ་ཡང་མ་བསྐྱེད། གནོད་སེམས་ཀྱི་རྣམ་པར་རྟོག་པ་ཡང་མ་ཡིན། རྣམ་པར་འཚེ་བའི་རྣམ་པར་རྟོག་པ་ཡང་མ་ཡིན། ཉེ་དུ་

ལ་རྟོག་པ་ཡང་མ་ཡིན། ཉེ་དུ་མ་ཡིན་པ་ལ་རྟོག་པ་ཡང་མ་ཡིན། ཤེས་པ་ལ་རྟོག་པ་ཡང་མ་ཡིན། མི་ཤེས་པ་ལ་རྟོག་པ་ཡང་མ་ཡིན། ལྗོངས་ལ་རྟོག་པ་ཡང་མ་ཡིན། མི་དགའ་བར་རྟོག་པ་ཡང་མ་བསྐྱེད། སེམས་ཅན་དང་ལྡན་
པའི་རྟོག་པ་ཡང་མ་བསྐྱེད། སྲོག་དང་ལྡན་པ་ཡང་མ་ཡིན། གང་ཟག་དང་ལྡན་པ་ཡང་མ་ཡིན། དངོས་པོ་དང་ལྡན་པ་ཡང་མ་ཡིན། ཆོས་དང་ལྡན་པ་ཡང་མ་ཡིན། ཆོས་མ་ཡིན་པ་དང་ལྡན་པ་ཡང་མ་ཡིན། མཚན་མ་དང་ལྡན་པ་ཡང་མ་ཡིན། མཚན་མ་
མེད་པ་དང་ལྡན་པ་ཡང་མ་ཡིན། སྨོན་ལམ་དང་ལྡན་པ་ཡང་མ་ཡིན། སྨོན་ལམ་མ་ཡིན་པ་དང་ལྡན་པ་ཡང་མ་ཡིན། འཁོར་བ་དང་ལྡན་པ་ཡང་མ་ཡིན། མྱ་ངན་ལས་འདས་པ་དང་ལྡན་པ་ཡང་མ་ཡིན། ཡེ་ཤེས་དང་ལྡན་པ་ཡང་མ་ཡིན། ཡེ་ཤེས་མ་
ཡིན་པ་དང་ལྡན་པ་ཡང་མ་ཡིན། སངས་རྒྱས་དང་ལྡན་པ་ཡང་མ་ཡིན། སངས་རྒྱས་མ་ཡིན་པ་དང་ལྡན་པ་ཡང་མ་ཡིན། རང་སངས་རྒྱས་དང་ལྡན་པ་ཡང་མ་ཡིན། རང་སངས་རྒྱས་མ་ཡིན་པ་དང་ལྡན་པ་ཡང་མ་ཡིན། ཉན་ཐོས་དང་ལྡན་པ་ཡང་མ་ཡིན། ཉན་
ཐོས་མ་ཡིན་པ་དང་ལྡན་པ་ཡང་མ་ཡིན། སོ་སོའི་སྐྱེ་བོ་དང་ལྡན་པ་ཡང་མ་ཡིན། སོ་སོའི་སྐྱེ་བོ་མ་ཡིན་པ་དང་ལྡན་པ་ཡང་མ་ཡིན། རྣམ་པར་རྟོག་པ་དང་ལྡན་པ་ཡང་མ་ཡིན། རྣམ་པར་རྟོག་པ་མེད་པ་དང་ལྡན་པའི་རྣམ་པར་རྟོག་པའང་མ་བསྐྱེད་དེ། འདུ་ཤེས་ཐམས་ཅད་
དང་བྲལ་བའི་ཏིང་ངེ་འཛིན་བསྒོམས། རྟོག་པ་དང་བྲལ་བའི་ཏིང་ངེ་འཛིན་བསྒོམས་ནས་དགེ་བའི་རྩ་བ་དེས་སངས་རྒྱས་བཅོམ་ལྡན་འདས་རྣམས་ལ་ནམས་ཀྱང་བསྙེན་བཀུར་མ་བྱས་པར་མ་གྱུར་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ལ་བསྙེན་བཀུར་བྱས། སངས་
རྒྱས་བཅོམ་ལྡན་འདས་དེ་དག་ཐམས་ཅད་ལ་དེས་གཡོག་དང་བསྙེན་བཀུར་བྱས་པས་དངོས་པོ་མེད་པའི་ངོ་བོ་ཉིད་ཀྱི་ཏིང་ངེ་འཛིན་ལ་བསྙེན་ཅིང་བསྒོམས་ཏེ། མང་དུ་བྱས་པས་དེ་ཕྱིན་ཆད་བསྐལ་པ་བརྗོད་དུ་མེད་པའི་བར་དུ་སངས་རྒྱས་མེད་པའི་ཞིང་དུ་ནམ་ཡང་མ་སྐྱེས། ནམ་ཡང་

ཞིང་དུ་འདུ་ཤེས་དང་སངས་རྒྱས་སུ་འདུ་ཤེས་ཀྱང་མ་སྐྱེས། ནམ་ཡང་བྱང་ཆུབ་ཀྱི་སེམས་རྒྱུན་དུ་མི་འབྱུང་བར་མ་གྱུར། རྟག་ཏུ་རྒྱུན་མི་འཆད་པར་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་དང་གཡོག་བྱས། སངས་རྒྱས་ཀྱི་ཞིང་ཐམས་ཅད་དུ་སྤྲུལ་པས་སེམས་ཅན་
རྣམས་ཡོངས་སུ་སྨིན་པར་བྱས། གང་དང་གང་དུ་སྤྲུལ་པ་སྤྲུལ་པ་དེ་དང་དེ་ན་སེམས་ཅན་རྣམས་ཀྱིས་སངས་རྒྱས་བྱུང་བ་སྙམ་དུ་ཤེས་ཏེ། རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སེམས་ཅན་དེ་དག་ལ་སྟོན་ཏོ། །གང་དང་གང་དུ་སྤྲུལ་པ་སྤྲུལ་པ་དེ་དང་དེར་སེམས་ཅན་ཇི་ལྟ་བུ་ལ་མོས་པ་
དེ་ལྟ་བུར་སྤྲུལ་པ་སྤྲུལ་ཏེ་འདུལ་བའི་སེམས་ཅན་རྣམས་ཀྱི་རྒྱུད་དང་སྦྱར་ཏེ་རྣམ་པར་འདུལ་བའི་ཕྱིར་སངས་རྒྱས་ཀྱི་ཞིང་དུ་སྤྲུལ་པ་རྣམ་པ་དུ་མར་སྤྲུལ་ཏོ། །སྤྲུལ་པ་དེ་དག་གིས་ཀྱང་གཞན་ཡང་སྤྲུལ་ཏེ་བསྟན་ཏོ། །འཇམ་དཔལ་འདི་ལྟ་སྟེ་དཔེར་ན་སྒྱུ་མ་མཁན་གྱིས་སྤྲུལ་པ་མངོན་
པར་སྤྲུལ་ཏེ། སྒྱུ་མ་མཁན་གྱིས་སྤྲུལ་པ་དེ་དག་གིས་ཀྱང་སྤྲུལ་པ་གཞན་མངོན་པར་སྤྲུལ་པ་དེ་བཞིན་དུ། འཇམ་དཔལ་དགེ་སློང་སྙན་པའི་སྒྲ་དབྱངས་ཀྱིས་ཀྱང་སྤྲུལ་པ་མངོན་པར་སྤྲུལ་ཏེ། སྤྲུལ་པ་དེ་དག་གིས་ཀྱང་གཞན་མངོན་པར་སྤྲུལ་ཏོ། །འཇམ་དཔལ་དེ་ཇི་སྙམ་དུ་
སེམས། དེའི་ཚེ་དེའི་དུས་ན་དགེ་སློང་སྙན་པའི་སྒྲ་དབྱངས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ། དེའི་ཚེ་དེའི་དུས་ན་དགེ་སློང་སྙན་པའི་
སྒྲ་དབྱངས་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་དངོས་པོ་མེད་པའི་ངོ་བོ་ཉིད་ཀྱི་ཏིང་ངེ་འཛིན་ལ་བསྟེན་པར་བྱ། བསྒོམ་པར་བྱ། མང་དུ་བྱའོ། །བྱང་ཆུབ་སེམས་
དཔའི་ཏིང་ངེ་འཛིན་དངོས་པོ་མེད་པའི་ངོ་བོ་ཉིད་འདི་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་བྱང་ཆུབ་སེམས་དཔའ་ལ་འབྱུང་ངོ་། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་ཚད་མེད་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་

དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པའི་སྙིང་པོ་ཞེས་བྱ་བའི་བསྐལ་པ་བྱུང་སྟེ། བསྐལ་པའི་སྙིང་པོའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མཚུངས་པ་མེད་པའི་གཟི་བརྗིད་འོད་ཅེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་མཚུངས་པ་མེད་
པའི་གཟི་བརྗིད་འོད་དེའི་འོད་ཀྱིས་ཤར་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། ལྷོ་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། ནུབ་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་
བར་གྱུར། བྱང་ཕྱོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣང་བར་གྱུར། དེ་བཞིན་དུ་ཤར་ལྷོ་དང་། ལྷོ་ནུབ་དང་། ནུབ་བྱང་དང་། བྱང་ཤར་དང་། སྟེང་དང་། འོག་དང་ཕྱོགས་བཅུ་ཀུན་དུ་ཕྱོགས་རེ་རེར་ཡང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་
གྱི་ཁམས་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེའི་འོད་ཀྱིས་སྣང་བར་གྱུར་ཏོ། །སེམས་ཅན་གང་དེའི་འོད་ཀྱིས་རེག་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་བཞིན་གཤེགས་པ་མཚུངས་
པ་མེད་པའི་གཟི་བརྗིད་འོད་དེའི་འཇིག་རྟེན་གྱི་ཁམས་ན་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་རྣམས་ཀྱིས་ཕྱིར་མི་ལྡོག་པའི་ཐེག་པ་ལ་ཡང་དག་པར་ཞུགས་པར་གྱུར་ཏེ། དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས། བྱང་ཆུབ་སེམས་དཔའ་དེ་དག་
ཕལ་ཆེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་བརྗོད་དུ་མེད་པ་རྣམས་ཐེག་པ་གསུམ་གྱིས་རབ་ཏུ་འགོད་དོ། །ཡང་དེའི་ཚེ་དེའི་དུས་ན་སངས་རྒྱས་ཀྱི་ཞིང་དེ་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བ་ཞིག་བྱུང་སྟེ།

འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་ཇི་སྙེད་ཡོད་པ་དེ་དག་ཐམས་ཅད་ཀྱི་མཆོག་བྱེད་དེ། དེས་བྱང་ཆུབ་སེམས་དཔའ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་གི་དམ་པའི་ཆོས་དུས་དང་པོ་དང་། བར་མ་
དང་། ཐ་མ་གསུམ་དུ་གཟུང་ངོ་ཞེས་དེ་ལྟར་སྨོན་ལམ་བཏབ་བོ། །འཇམ་དཔལ་དེ་ན་བྱང་ཆུབ་སེམས་དཔའ་དེ་དག་ཐམས་ཅད་དུས་ཇི་ལྟ་བ་བཞིན་དུ་སོ་སོའི་འཇིག་རྟེན་གྱི་ཁམས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། སེམས་
ཅན་དཔག་ཏུ་མེད་ཅིང་བརྗོད་དུ་མེད་པ་རྣམས་ཀྱི་དོན་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་དམ་པའི་ཆོས་དགེ་སློང་སྤྲིན་གྱི་རྒྱལ་པོ་དེས་དུས་ཐོག་མ་དང་། བར་མ་དང་། ཐ་མ་གསུམ་
དུ་བཟུང་ངོ་། །དེ་དག་མྱ་ངན་ལས་འདས་པའི་འོག་ཏུ་འཇིག་རྟེན་དུ་སྙིགས་མ་ལྔ་བྱུང་སྟེ། སེམས་ཅན་སྐལ་བ་མེད་པར་གྱུར་ནས་དམ་པའི་ཆོས་ནུབ་པ་དེའི་ཚེ། བྱང་ཆུབ་སེམས་དཔའ་དེ་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པར་གྱུར་ཏེ། དེ་བསྟན་བཅོས་གང་འཇིག་རྟེན་
གྱི་དོན་དུ་འགྱུར་བ་ཆོས་དང་ལྡན་པ་དེ་ཁོང་དུ་ཆུད་ནས་རབ་ཏུ་སྟོན་པ་འདི་ལྟ་སྟེ། སྙན་ཚིག་གི་རིག་བྱེད་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྲིད་སྲུང་གི་རིག་བྱེད་དང་། སྒྲའི་བསྟན་བཅོས་རྣམས་དང་། གཏན་ཚིགས་ཀྱི་བསྟན་བཅོས་རྣམས་དང་། གསོ་
བའི་བསྟན་བཅོས་རྣམས་དང་། ནོར་སྦྱར་དང་དུག་དང་སྔགས་དང་སྨན་གྱི་རྒྱུད་དང་། དུས་འཁོར་བ་དང་། དུས་དང་། གཟའ་དང་། རྒྱུ་སྐར་ཤེས་པ་ཡང་རབ་ཏུ་སྟོན་ཏོ། །སེམས་ཅན་རྣམས་ལ་ཕན་པ་དང་ལྡན་པའི་བཟོའི་གནས་ཐམས་ཅད་ཀྱང་སྟོན་ཏོ། །ནམ་སངས་རྒྱས་བྱུང་
བ་དེ་ན་དེའི་འཁོར་ལོས་སྒྱུར་བའི་རྒྱལ་པོར་གྱུར་ཏེ། རྒྱལ་པོའི་སྲིད་བོར་ནས་འཁོར་དང་བཅས་ཏེ། ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །རབ་ཏུ་བྱུང་ནས་དེ་བཞིན་གཤེགས་པ་དེ་དག་གིས་བསྟན་པ་ཡང་ཀུན་འཛིན། ཡོངས་སུ་མྱ་ངན་ལས་འདས་པ་དེ་དག་གི་རིང་བསྲེལ་ལ་

ཡང་མཆོད་པ་རྣམ་པ་མང་པོས་རབ་ཏུ་སྦྱོར་བར་གྱུར་ཏོ། །སྐྱེ་བོའི་ཚོགས་དཔག་ཏུ་མེད་པ་རྣམས་སངས་རྒྱས་ལ་མཆོད་པ་བྱེད་དུ་འཇུག་པར་གྱུར། དམ་པའི་ཆོས་དང་ལྡན་པ་དང་། སངས་རྒྱས་མཆོད་པ་དང་ལྡན་པ་དང་། སེམས་ཅན་ཡོངས་སུ་སྨིན་
པར་བྱེད་པ་དང་ལྡན་པ་དང་། བདག་གི་དགེ་བའི་རྩ་བ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་ཞིང་སེམས་ཅན་ཐམས་ཅད་དང་ཐུན་མོང་དུ་བྱས་ནས་སངས་རྒྱས་ཀྱི་ཞིང་ཡོངས་སུ་དག་པའི་ཕྱིར་ཡང་ཡོངས་སུ་བསྔོས་སོ། །འཇམ་དཔལ་བྱང་ཆུབ་སེམས་དཔའ་
སྤྲིན་གྱི་རྒྱལ་པོ་དེས་བྱང་ཆུབ་སེམས་དཔའ་དེ་ཐམས་ཅད་བྱང་ཆུབ་མངོན་པར་སངས་རྒྱས་པ་ལ་དེ་ལྟ་བུའི་ཚུལ་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས། བཞུགས་པ་དང་ཡོངས་སུ་མྱ་ངན་ལས་འདས་པ་དེ་དག་ཐམས་ཅད་དང་། དེ་བཞིན་གཤེགས་པ་ཚད་མེད་པ་གཞན་གྱི་
ཡང་དམ་པའི་ཆོས་དུས་ཐོག་མ་དང་། བར་མ་དང་། ཐ་མ་གསུམ་དུ་བཟུང་སྟེ། འོན་ཀྱང་དེ་ལ་སངས་རྒྱས་བཅོམ་ལྡན་འདས་དེ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ངེས་པར་
འབྱུང་བ་མ་ཡིན་པའི་ཕྱིར་རོ། །དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེ་ཡང་དེའི་ཚེ་མྱ་ངན་ལས་མ་འདས་ཏེ། དེ་ནས་བྱང་ཆུབ་སེམས་དཔའ་སྤྲིན་གྱི་རྒྱལ་པོ་དེ་བཅོམ་ལྡན་འདས་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་ཀྱི་ཞིང་སངས་རྒྱས་ཀྱི་
ཞིང་དུ་སྨོན་ལམ་གྱི་དབང་གིས་ཡང་དང་ཡང་སྐྱེས་ནས། དེའི་དགེ་བའི་རྩ་བ་ཡོངས་སུ་སྨིན་པའི་སྟོབས་དེས་དེ་བཞིན་གཤེགས་པ་དེ་མཐོང་མ་ཐག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱས་ཏེ། དེའི་ཚེ་དེ་བཞིན་གཤེགས་པ་དེས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ལུང་བསྟན་ཏོ། །དགེ་བའི་རྩ་བ་གང་ལ་བརྟེན་པས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་ཅེ་ན། འདི་ལྟ་སྟེ། དུས་གསུམ་མཉམ་པ་ཉིད་ལ་འཇུག་པ་དང་། དུས་གསུམ་གྱི་ཆོས་ཐམས་ཅད་མཉམ་པར་མཐོང་བས་དགེ་སློང་སྤྲིན་གྱི་

རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །འདུས་བྱས་དང་འདུས་མ་བྱས་ཀྱི་ཆོས་རྣམས་ཐ་དད་པར་མི་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ངོ་བོ་ཉིད་དང་བྲལ་བར་མཐོང་བས་དགེ་སློང་སྤྲིན་གྱི་
རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་མ་སྐྱེས་མ་འགགས་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་འོང་བ་ཡང་མ་ཡིན་འགྲོ་བ་ཡང་མ་ཡིན་པར་མཐོང་བས་དགེ་སློང་
སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་གནས་པ་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་མྱ་ངན་ལས་འདས་པ་དང་མཚུངས་པར་མཐོང་བས་དགེ་སློང་སྤྲིན་གྱི་རྒྱལ་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་བརྗོད་དུ་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ལ་བདག་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་
པ་ཡོངས་སུ་དག་གོ། །ཆོས་ཐམས་ཅད་ལ་སེམས་ཅན་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ལ་སྲོག་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །
ཆོས་ཐམས་ཅད་ལ་གང་ཟག་མེད་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་ནམ་མཁའ་དང་མཚུངས་པར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །ཆོས་ཐམས་ཅད་
ཆོས་ཀྱི་དབྱིངས་ལས་བྱུང་བར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་གོ། །དེ་ལྟར་ཆོས་ཀྱི་དབྱིངས་ལས་ཆོས་ཐམས་ཅད་བྱུང་བར་མཐོང་བས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་སྟེ། དེ་ལྟར་དེ་ཤེས་རབ་

ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་འདི་ལྟ་བུའི་དགེ་བའི་རྩ་བའི་ཤུགས་རྙེད་དེ། དེ་ལྟ་བུའི་དགེ་བའི་རྩ་བའི་ཤུགས་རྙེད་པས་ཏ་ལ་བདུན་སྲིད་དུ་ནམ་མཁའ་ལ་འཕགས་ཏེ། དེ་བར་སྣང་ལ་འདུག་ནས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་
ན་སངས་རྒྱས་བཅོམ་ལྡན་འདས་མཐོང་བ་ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། ལ་ལ་ནི་བླ་ན་མེད་པའི་ཆོས་ཀྱི་འཁོར་ལོ་སྐོར། ལ་ལ་ནི་རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སེམས་ཅན་རྣམས་འདུལ། ལ་ལ་ནི་ཚེའི་
འདུ་བྱེད་འདོར། ལ་ལ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་མཐོང་སྟེ། མཐོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚུངས་པ་མེད་པའི་གཟི་བརྗིད་འོད་དེ་ལ་ཤེས་
རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པས་མངོན་པར་བསྟོད་དོ། །བསྐལ་པ་བྱེ་བ་མང་པོར་འཁོར་བ་ན། །སྦྱིན་པ་མཐའ་ཡས་པ་དག་རྒྱ་ཆེར་སྩལ། །བདེ་བར་གཤེགས་པའི་བསྟན་པ་རབ་འདྲི་ཞིང་། །སྦྱིན་གནས་མང་པོ་དག་ལ་བདག་གིས་བསྙེན། །
འཇིག་རྟེན་རིག་པ་འཇིག་རྟེན་མངོན་གྲགས་པ། །སྤྱན་ལྡན་དྲི་མེད་ཅེས་བགྱི་མཁྱེན་པ་དེ། །རི་རབ་བརྩེགས་འདྲ་བསོད་ནམས་བརྒྱ་ཡི་མཚན། །བྱང་ཆུབ་འཚལ་སླད་དེ་ལ་རིམ་གྲོ་བགྱིས། །བྱེ་བ་ཁྲག་ཁྲིག་དྲུག་ཅུ་མཐའ་ཡས་པ། །དེ་ཡི་དགེ་འདུན་བདེ་གཤེགས་
སྲས་ལ་ཡང་། །ལོ་བྱེ་ཁྲག་ཁྲིག་བདུན་ཅུའི་བར་དུ་ནི། །རྒྱལ་བ་ཉན་ཐོས་བཅས་ལ་བསྙེན་བཀུར་བགྱིས། །དགའ་ཞིང་མོས་པ་མངོན་པར་བསྐྱེད་ནས་སུ། །ཟས་སྐོམ་རྣམ་མང་ཡིད་དུ་འོང་བ་དག །བདེ་བར་གཤེགས་ལ་བདག་གིས་དབུལ་བ་ཕུལ། །འོན་ཀྱང་བདེ་
གཤེགས་དེས་བདག་ལུང་མ་བསྟན། །འདས་པའི་དུས་ཚེ་སངས་རྒྱས་བྱུང་བ་ནི། །མཁྱེན་པ་འཇིག་རྟེན་མགོན་པོ་མྱ་ངན་སེལ། །མེ་རྩེ་སྤྲིན་ཅེས་བྱ་བའི་དེ་བཞིན་གཤེགས། །ཉན་ཐོས་བཅས་པ་རྒྱལ་དེ་བསྙེན་བཀུར་བགྱིས། །འདྲེན་པ་དེ་ལ་ལོ་བྱེ་དྲུག་ཅུ་བཞིར། །

བདག་གིས་འཁོར་དང་བཅས་ལ་བཀུར་སྟི་བགྱིས། །བདག་གིས་ཡེ་ཤེས་ཡངས་པ་མ་སྦྱངས་པས། །འོན་ཀྱང་བདེ་གཤེགས་དེས་བདག་ལུང་མ་བསྟན། །འདས་པའི་དུས་ན་འདྲེན་པ་བྱུང་བ་ནི། །ཡེ་ཤེས་རྒྱ་མཚོ་ཞེས་ཀྱང་ཕྱོགས་སུ་གྲགས། །ཆོས་རྒྱལ་དེ་ཡི་འཁོར་
དུ་གྱུར་པ་ནི། །བྱེ་བ་ཁྲག་ཁྲིག་དྲུག་ཅུར་ཚང་བ་ལགས། །བདག་གིས་རྒྱལ་མཆོག་ཉན་ཐོས་བཅས་དེ་ལ། །ལོ་བྱེ་དགུ་བཅུའི་བར་དུ་བསྙེན་བཀུར་བགྱིས། །བྱང་ཆུབ་དམ་པ་འཚལ་བའི་སླད་དུ་འདིར། །བདག་གིས་སྦྱིན་པ་མཐའ་ཡས་རྒྱ་ཆེར་སྩལ། །མྱ་ངན་འདས་
པར་གྱུར་ནས་ལོ་ལྔ་ནས། །བདེ་གཤེགས་ཉན་ཐོས་དག་ལ་བཀུར་སྟི་བགྱིས། །བཤོས་དང་སྐྱེམས་ཀྱི་རྣམ་པར་རབ་ཏུ་སྦྱར། །འོན་ཀྱང་བདེ་གཤེགས་དེས་བདག་ལུང་མ་བསྟན། །འདས་པའི་དུས་ན་ཁ་ལོ་སྒྱུར་བྱུང་བ། །མཁས་པ་ཡེ་ཤེས་རི་བོ་དེ་བཞིན་གཤེགས། །
དེ་ཡི་ཞིང་རྣམས་མཚུངས་མེད་བསམ་མི་ཁྱབ། །འཇིག་རྟེན་ཁམས་རྣམས་ཁྲག་ཁྲིག་ཐམས་ཅད་ནས། །སྐྱོབ་པ་བདེ་གཤེགས་དེ་ཡི་འདུས་པ་ནི། །ཡང་དག་མཐོང་བའི་ཉན་ཐོས་རྣམས་སུ་གྱུར། །ཁྲག་ཁྲིག་བདུན་དུ་སངས་རྒྱས་ཞིང་རྣམས་ནི། །ལ་ལས་བཏགས་
ནས་ཕྲ་རབ་རྡུལ་བགྱིས་ལ། །དེ་ནི་མི་གང་ལ་ལས་བྱུང་བ་ཡིས། །ཕྲ་རབ་རྡུལ་དུ་བགྱིས་པའི་རྡུལ་དེ་ཐོགས། །མི་དེས་ཤིན་ཏུ་རྡུལ་ཕྲན་དེ་ཐོགས་ཏེ། །ཤར་གྱི་ཕྱོགས་སུ་མགྱོགས་ལྡན་དེ་མཆིས་པ། །གང་གཱའི་ཀླུང་གི་བྱེ་སྙེད་སངས་རྒྱས་ཞིང་། །དེ་ཡི་གོམ་པ་
གཅིག་གིས་དེ་དག་རྒལ། །དེ་བཞིན་མི་དེ་བསྐལ་པ་བརྒྱར་མཆིས་ནས། །མཐའ་མར་ཤིན་ཏུ་ཕྲ་བའི་རྡུལ་གཅིག་བོར། །དེ་བཞིན་ཤིན་ཏུ་ཕྲ་བའི་རྡུལ་དེ་ཀུན། །ཤར་གྱི་ཕྱོགས་སུ་མཆིས་ནས་ཐམས་ཅད་བོར། །དེ་བཞིན་མ་ལུས་ཕྱོགས་བཅུ་ཐམས་ཅད་དུ། །ཇི་སྙེད་
ཀྱི་ནི་རྡུལ་ཕྲན་ཀུན་བོར་ཏེ། །དེ་དག་ཞིང་རྣམས་གང་དུ་བོར་བ་དང་། །གང་དུ་རྡུལ་ཕྲན་མ་བོར་དེ་དག་རྣམས། །གྲོང་ཁྱེར་གཅིག་ཏུ་དེ་ཀུན་བགྱིས་ནས་སུ། །དེ་ནི་ཡུངས་ཀར་དག་གིས་གང་བར་བགྱིས། །གལ་ཏེ་འཇིག་རྟེན་ཁམས་རྣམས་ཐམས་ཅད་ཀྱང་། །

ཡུངས་འབྲུས་གང་བ་ལ་ལ་སུ་སྤྲོ་བས། །བཏགས་ནས་ཤིན་ཏུ་ཕྲ་བའི་རྡུལ་དུ་བགྱིས། །ཐམས་ཅད་ཀྱང་ནི་ཇི་ལྟར་སྔ་མ་བཞིན། །དེ་བཞིན་ཐམས་ཅད་ཕྱོགས་ཀྱི་ཞིང་རྣམས་ཀྱང་། །སྟོང་དུ་བསྒྱུར་ཅིང་བསྒྲེ་བ་བགྱིས་པ་ཡང་། །དེ་ཡི་ཐ་མ་འཚལ་
བར་ནུས་ཀྱང་གདའ། །སྐྱོབ་པ་དེ་ཡི་ཞིང་ནི་ཚད་མ་མཆིས། །བདེ་གཤེགས་དེ་ལ་དགྲ་བཅོམ་མངའ་བ་ནི། །ཉན་ཐོས་ཁྲག་ཁྲིག་བསམ་གྱིས་མི་ཁྱབ་རྣམས། །རྒྱལ་བ་དེ་ཡང་ཉན་ཐོས་བཅས་པར་མཆོད། །དེ་བཞིན་གཤེགས་དེས་བདག་ལ་ལུང་མ་བསྟན། །འདས་
པའི་དུས་ན་འདྲེན་པ་བྱུང་བ་ནི། །འཇིག་རྟེན་མཆོད་རྟེན་ཞེས་ནི་ཕྱོགས་སུ་གྲགས། །གང་ཟག་མཆོག་དེ་བདག་གིས་མཆོད་ན་ཡང་། །དེ་བཞིན་གཤེགས་དེས་བདག་ལ་ལུང་མ་བསྟན། །མ་སྨད་པ་ཡི་བདེ་གཤེགས་སངས་རྒྱས་བརྒྱད། །རྒྱལ་བ་གྲགས་འཆང་འཇིགས་
མཛད་དེས་པ་དང་། །སཱ་ལའི་རྒྱལ་པོ་ནོར་བཟངས་འོད་ཆེན་དང་། །ཏོག་གི་རྒྱལ་པོ་བསོད་ནམས་བརྒྱ་ཡི་མཚན། །བདག་གིས་འདྲེན་པ་དེ་དག་ཉན་ཐོས་བཅས། །བྱང་ཆུབ་མཆོག་རབ་འཚལ་སླད་བཀུར་སྟི་བགྱིས། །འོན་ཀྱང་ཤེས་རབ་མཐར་ཕྱིན་མ་སྦྱངས་པས། །
དེ་བཞིན་གཤེགས་དེས་བདག་ལ་ལུང་མ་བསྟན། །བསྐལ་པ་གཅིག་ལ་མཐུ་ཆེན་བདེ་བར་གཤེགས། །ཐམས་ཅད་གཟིགས་པ་སྟོང་ཕྲག་དྲུག་བྱུང་སྟེ། །བདག་གིས་གང་ཟག་མཆོག་དེ་ཀུན་མཆོད་ཀྱང་། །བདེ་གཤེགས་དེ་དག་གིས་ཀྱང་ལུང་མ་བསྟན། །འདས་པའི་
དུས་ན་འདྲེན་པ་བྱུང་བ་ནི། །ཟླས་བྱིན་ཞེས་ཀྱང་ཕྱོགས་བཅུར་གྲགས་པ་སྟེ། །རྒྱལ་བ་ཉན་ཐོས་བཅས་ལ་བཀུར་སྟི་བགྱིས། །དེ་བཞིན་གཤེགས་དེས་བདག་ལ་ལུང་མ་བསྟན། །འདས་པའི་དུས་ན་འདྲེན་པ་བྱུང་བ་ནི། །ཙན་དན་དམ་པ་བདེ་གཤེགས་འཕྲུལ་ཆེན་
ཏེ། །མི་ཡི་དམ་པ་དེ་ལའང་བསྙེན་བཀུར་བགྱིས། །གང་ཟག་མཆོག་དེས་བདག་ལ་ལུང་མ་བསྟན། །འདྲེན་པ་འཇིག་རྟེན་མཁྱེན་པ་སྔོན་བྱུང་བ། །གློག་སྤྲིན་ཞེས་བགྱི་ཕྱོགས་སུ་གྲགས་པ་སྟེ། །རྒྱལ་བ་དེ་ཡང་ཉན་ཐོས་བཅས་པར་མཆོད། །དེ་བཞིན་

གཤེགས་དེས་བདག་ལ་ལུང་མ་བསྟན། །སྔོན་གྱི་སངས་རྒྱས་རྐང་གཉིས་མཆོག་བྱུང་བ། །ཐེ་ཙོམ་ཀུན་གྱི་བཅིངས་པ་གཅོད་མཛད་པ། །སྤྲིན་སྦྱིན་རྣམ་འདྲེན་བདེ་བར་གཤེགས་པ་སྟེ། །དེ་ལ་རིམ་གྲོ་བགྱིས་ཀྱང་ལུང་མ་བསྟན། །སྔོན་གྱི་སངས་རྒྱས་རྣམ་
འདྲེན་སྡིག་མི་མངའ། །དགྲ་བཅོམ་ཞེས་ཀྱང་ཕྱོགས་སུ་གྲགས་པ་སྟེ། །འཇིག་རྟེན་མཁས་པ་དེ་ལ་མཆོད་བགྱིས་ཀྱང་། །དེ་བཞིན་གཤེགས་དེས་བདག་ལ་ལུང་མ་བསྟན། །སྔོན་གྱི་སངས་རྒྱས་ཁྲག་ཁྲིག་མཐའ་ཡས་པ། །འཇིག་རྟེན་མགོན་པོ་མཚུངས་
མེད་ཉན་ཐོས་བཅས། །བྱང་ཆུབ་མཆོག་འཚལ་བཀུར་སྟི་རབ་བགྱིས་ཀྱང་། །བདེ་གཤེགས་དེ་དག་གིས་ཀྱང་ལུང་མ་བསྟན། །མཚུངས་མེད་འདྲེན་པ་རྣམས་ལ་བསྙེན་བཀུར་བགྱིས། །ཤེས་རབ་དམ་པ་མཆོག་ནི་བདག་གིས་སྦྱངས། །ཆོས་ཀྱི་ཚུལ་དང་མཚན་
ཉིད་དེ་རྟོགས་ནས། །དེས་ན་དྲི་མེད་ཏོག་གིས་བདག་ལུང་བསྟན། །འདི་ལྟར་བདག་གིས་དེ་རིང་ཆོས་ཉིད་མཐོང་། །ཐེ་ཙོམ་མ་ལུས་པར་ནི་ཐམས་ཅད་བཅད། །སྒྱུ་མ་སྨིག་རྒྱུ་ཆུ་ཟླ་འདྲ་བ་རུ། །ཆོས་རྣམས་ཐམས་ཅད་སྐྱེ་བ་བདག་གིས་མཐོང་། །ཇི་ལྟར་མི་
རྣམས་རི་ཡི་བར་ན་ཡང་། །ཡིད་དུ་འོང་བའི་གླུ་དབྱངས་སྐད་འབྱིན་ཏེ། །སྐད་ཅིག་ཏུ་ནི་བྲག་ཅ་གཞན་ཡང་འབྱུང་། །དེ་ཡི་སྒྲ་ལ་བྱེད་པ་པོ་མ་མཆིས། །རི་ཡི་བར་ནི་ཇི་ལྟར་བྲག་ཅ་བཞིན། །དེ་བཞིན་བདག་གིས་ཆོས་རྣམས་ཡང་དག་མཐོང་། །དེ་ལ་བདག་ནི་
ཐེ་ཚོམ་མ་མཆིས་ཏེ། །དེས་ན་གང་ཟག་མཆོག་དེས་བདག་ལུང་བསྟན། །ནམ་མཁའ་བར་སྣང་ཇི་ལྟར་བྱ་ཡི་རྗེས། །དེ་དག་མ་མཆིས་མ་བྱུང་འབྱུང་མི་འགྱུར། །རྒྱལ་བས་བསྟན་པ་དེ་བཞིན་མཐོང་བས་ན། །དེས་ན་གང་ཟག་མཆོག་གིས་བདག་ལུང་བསྟན། །
ཆོས་འདི་ཐམས་ཅད་བར་སྣང་ནམ་མཁའ་བཞིན། །དེ་རྣམས་གང་ལའང་མངོན་པར་ཆགས་མ་མཆིས། །ཕྱོགས་ནས་མཆིས་ཤིང་གང་དུའང་མཆིས་མ་མཆིས། །དེས་ན་གང་ཟག་མཆོག་གིས་བདག་ལུང་བསྟན། །ཇི་ལྟར་རྨི་ལམ་ན་ནི་སྐོམ་པའི་མིས། །ཆུ་

གྲང་དང་བ་དེ་ཡིས་འཚལ་ན་ཡང་། །སྐོམ་པ་ཆད་ཅིང་ཞི་བར་མི་འགྱུར་བ། །དེ་བཞིན་བདག་གིས་འདོད་པའི་ཡོན་ཏན་རྟོགས། །རྔ་བརྡུངས་དེ་ལས་སྒྲ་རྣམས་རབ་འབྱུང་སྟེ། །སྐྱེ་བོ་བྱིས་པ་རྣམས་ནི་དགའ་བར་གྱུར། །དེ་ཡང་ཀོ་བ་དང་ནི་
ཤིང་ལས་ཀྱང་། །སྒྲ་དེ་མི་རྙེད་དེ་བཞིན་ཆོས་ཉིད་དོ། །ཇི་ལྟར་པི་ཝང་ལེན་པ་སྦྲེངས་པ་ཡི། །རྒྱུད་ལས་སྙན་པའི་སྒྲ་ཡང་ཤིན་ཏུ་གཏོང་། །ཤིང་དང་རྒྱུད་རྣམས་ལས་ཀྱང་མ་ལགས་ཏེ། །སྒྲ་དེ་མི་རྙེད་དེ་བཞིན་ཆོས་ཉིད་དོ། །གཟུགས་དང་སྒྲ་དང་རོ་དང་དྲི་
རེག་ཀྱང་། །པི་ཝང་དག་གི་སྒྲ་འདྲར་མཐོང་བས་ན། །ཐེ་ཚོམ་དོགས་པ་ཐམས་ཅད་ཀུན་དུ་བཅོམ། །དེ་བས་འཇིག་རྟེན་འདྲེན་པས་བདག་ལུང་བསྟན། །ས་དང་ཤིང་དང་མུན་ཛ་བལ་བ་ཛ། །དེ་བཞིན་འོད་མ་རྩྭ་དང་ཆུར་བརྟེན་ཏེ། །བར་སྣང་ལ་ནི་དེ་དག་
ཀུན་བསྐོར་ནས། །འཇིག་རྟེན་ཀུན་རྫོབ་ཁྱིམ་དུ་གྱུར་ཅེས་བརྗོད། །དེ་བཞིན་རུས་པ་སེན་མོ་རྒྱུས་པ་རྣམས། །སྤུ་དང་སྐྲ་དང་ཁྲག་རྣག་པགས་པ་ཡིས། །ནམ་མཁའ་དག་ཀྱང་ཀུན་ནས་བསྐོར་ནས་ནི། །དེ་བཞིན་ཀུན་རྫོབ་ལུས་སུ་གྱུར་ཅེས་བརྗོད། །གཟུགས་
ནི་དབུ་བ་འདྲ་སྟེ་སྙིང་པོ་མེད། །ཚོར་བ་རྣམས་ནི་ཆུ་ཡི་ཆུ་བུར་འདྲ། །འདུ་ཤེས་རྣམས་ནི་སྨིག་རྒྱུ་འདྲ་བ་མཐོང་། །དེ་ལ་བྱིས་པའི་རང་བཞིན་སྐྱེ་བོས་ནོར། །སེམས་པ་དག་ནི་ཆུ་ཤིང་སྙིང་པོ་འདྲ། །རྣམ་ཤེས་རྣམ་པ་ཀུན་དུ་སྒྱུ་མ་བཞིན། །གང་གིས་འགྲོ་བ་
ལྷར་བཅས་འཁྱམ་བྱས་པ། །དེ་ལྟར་མཐོང་བས་རྒྱལ་བས་ལུང་ཡང་བསྟན། །དེ་ནས་དགེ་སློང་སྤྲིན་གྱི་རྒྱལ་པོ་དེས་དེ་བཞིན་གཤེགས་པ་མཚུངས་པ་མེད་པའི་གཟི་བརྗིད་འོད་དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་འདི་དག་གིས་མངོན་
པར་བསྟོད་ནས། དགེ་བའི་རྩ་བ་དེས་བསྐལ་པ་བརྗོད་དུ་མེད་པར་ནམས་ཀྱང་ཆོས་ལ་རྨོངས་པར་མ་གྱུར། ནམས་ཀྱང་ཚུལ་ཁྲིམས་ལ་སྙིང་པོར་འདུ་ཤེས་པར་མ་གྱུར། ཏིང་ངེ་འཛིན་རྣམས་ལ་སྙིང་པོར་འདུ་ཤེས་པར་མ་གྱུར་ཏེ། རྟག་ཏུ་རྒྱུན་མི་འཆད་པར་ཤེས་

རབ་ཀྱི་ཕ་རོལ་ཏུ་ཕྱིན་པ་ལ་གཞོལ་བར་གྱུར་ཏོ། །ནམ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དངོས་པོར་མ་དམིགས་ཏེ། འདི་ལྟ་སྟེ། དཔེར་ན་མི་ཞིག་གཟིངས་ལས་རྒྱ་མཚོ་ཆེན་པོ་རྒལ་ནས་གཟིངས་བོར་ཏེ་གར་དགའ་བར་འགྲོ་བ་དེ་བཞིན་དུ་དགེ་སློང་སྤྲིན་གྱི་
རྒྱལ་པོ་དེའང་ཤེས་རབ་ཀྱི་ཕ་རོལ་ཏུ་ཕྱིན་པ་ཤེས་པར་བྱེད་མོད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་ཞེན་པར་མི་བྱེད་དོ། །འདི་ལྟ་སྟེ་དཔེར་ན་མི་ཞིག་མེ་འདོད་པ་དེས་མེས་དགོས་པ་བྱེད་མོད་ཀྱི་ཚིག་པའི་ཉེས་པའང་སྲུང་བ་དེ་བཞིན་དུ། བྱང་ཆུབ་སེམས་
དཔའ་སྤྲིན་གྱི་རྒྱལ་པོ་དེའང་ཤེས་རབ་ཀྱི་ཕ་རོལ་ཏུ་ཕྱིན་པས་ཆོས་རྣམས་མཐོང་མོད་ཀྱི། མངོན་པར་ཞེན་པའི་ཉེས་པའང་བསྲུང་ངོ་། །ཤེས་རབ་ཀྱི་ཕ་རོལ་ཏུ་ཕྱིན་པ་གཞན་ལའང་སྟོན་མོད་ཀྱི། མངོན་པར་ཞེན་པའི་ཉེས་པ་ལས་ཀྱང་ཟློག་པར་བྱེད་དོ། །ཤེས་རབ་ཀྱི་
ཕ་རོལ་ཏུ་ཕྱིན་པས་སངས་རྒྱས་ཀྱི་ཞིང་ཚད་མེད་པར་སངས་རྒྱས་ཀྱི་བྱ་བ་བྱེད་མོད་ཀྱི། དེས་སེམས་ཅན་དེ་དག་དང་། སངས་རྒྱས་དེ་དག་ཏུ་འཛིན་པའང་མེད་དོ། །འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བར་གྱུར་པ་དེ་
གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་ཐབས་མཁས་པ་གང་
དང་ལྡན་པས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཐབས་མཁས་པ་དེ་དང་ལྡན་པར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ། །དེ་ལྟ་བུའི་ཐབས་མཁས་པ་དང་ལྡན་པའི་བྱང་ཆུབ་སེམས་
དཔའ་ནི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་སྦྱོང་ངོ་། །སངས་རྒྱས་ཀྱི་ཞིང་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་ཡོངས་སུ་སྦྱོང་ངོ་། །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་

པ་ལ་བཀའ་སྩལ་པ། འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བྱང་ཆུབ་སེམས་དཔའི་ཏིང་ངེ་འཛིན་ཞི་བ་ཞེས་བྱ་བ་བསྒོམས་ཏེ། རབ་ཏུ་གོམས་པར་བྱས། ལམ་དུ་བྱས། རྟེན་དུ་བྱས། ནན་ཏན་
དུ་བྱས། རབ་ཏུ་འདྲིས་པར་བྱས། ལེགས་པར་བརྩམས་ཤིང་རབ་ཏུ་རྫོགས་པར་བྱས་ཏེ། དེས་སྦྱིན་པའི་ཕ་རོལ་ཏུ་ཕྱིན་པ་ཞི་བ་དང་རབ་ཏུ་ཞི་བར་རྟོགས་སོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་
དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཞི་བ་དང་རབ་ཏུ་ཞི་བར་རྟོགས་སོ། །འདི་ལྟ་སྟེ། དཔེར་ན་འདུས་མ་བྱས་ཀྱི་ཁམས་ཞི་བ་དང་རབ་ཏུ་ཞི་བ་དེ་བཞིན་དུ་ཕ་རོལ་ཏུ་ཕྱིན་པ་དྲུག་ཀྱང་ཞི་བ་དང་རབ་ཏུ་ཞི་བར་རྟོགས་སོ། །འདི་ལྟ་སྟེ།
དཔེར་ན་འདུས་མ་བྱས་ཀྱི་ཁམས་མི་སྐྱེ་མི་འགག་པ་དེ་བཞིན་དུ་ཕ་རོལ་ཏུ་ཕྱིན་པ་དྲུག་ཀྱང་མི་སྐྱེ་མི་འགག་གོ། །འདི་ལྟ་སྟེ། དཔེར་ན་བདག་ཐམས་ཅད་ཀྱི་ཐམས་ཅད་དུ་མི་དམིགས་པ་དེ་བཞིན་དུ་ཕ་རོལ་ཏུ་ཕྱིན་པ་དྲུག་ཀྱང་ཐམས་ཅད་ཀྱི་ཐམས་ཅད་དུ་མི་དམིགས་ཏེ། ཕ་རོལ་ཏུ་
ཕྱིན་པ་དྲུག་ཇི་ལྟ་བ་དེ་བཞིན་དུ་ཆོས་ཐམས་ཅད་ཀྱང་མི་སྐྱེ་མི་འགག་གོ། །ཆོས་ཐམས་ཅད་ནི་ཞི་བ་སྟེ་ཞི་བ་དེ་ཡང་མི་དམིགས། གང་གི་ཞི་བ་དེ་ཡང་མི་དམིགས་སོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད། བསམ་གྱིས་མི་ཁྱབ། མཚུངས་པ་མེད།
གཞལ་དུ་མེད། བརྗོད་དུ་མེད་པའི་ཕ་རོལ་གྱི་ཡང་ཆེས་ཕ་རོལ་ན། ཉི་མ་སྣང་བ་ཞེས་བྱ་བའི་བསྐལ་པ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་
བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཐམས་ཅད་ཟིལ་གྱིས་གནོན་པ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་དེའི་རིམ་གྲོ་བྱེད་པ་དགེ་སློང་ཞི་བའི་བློ་གྲོས་ཞེས་བྱ་བ་ཞིག་

ཡོད་དེ། དེས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་ལ་ལོ་བྱེ་བ་ཕྲག་བརྒྱད་ཅུར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་ཡིད་དུ་འོང་བས་རིམ་གྲོ་བྱས་ཏེ། ཡིད་དུ་མི་འོང་བས་མ་ཡིན་ནོ། །དེ་བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཟིལ་གྱིས་གནོན་པ་དེའི་གན་དུ་སོང་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཞི་བ་སངས་རྒྱས་ཀྱི་ས་ལ་སློབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་གང་ལ་བརྩོན་པར་བགྱི། དེ་སྐད་ཅེས་གསོལ་པ་དང་། དེ་བཞིན་གཤེགས་
པ་ཐམས་ཅད་ཟིལ་གྱིས་གནོན་པས་དགེ་སློང་ཞི་བའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཞི་བའི་བློ་གྲོས་སངས་རྒྱས་ཀྱི་ས་ལ་སློབ་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་བརྩོན་པར་བྱའོ། །དགེ་སློང་ཇི་ལྟར་
སྤྱད་པས་བདག་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་ཞེས་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ངོ་བོ་ཉིད་མི་དམིགས་པར་བྱའི་སྦྱིན་པ་མི་སྦྱིན་པར་ནི་མི་བྱའོ། །སྦྱིན་གནས་ཀྱི་ངོ་བོ་ཉིད་མི་དམིགས་པར་བྱའི་སྦྱིན་གནས་མི་འཚལ་བར་ནི་མི་བྱའོ། །
སྦྱིན་བདག་གི་ངོ་བོ་ཉིད་དམིགས་པར་མི་བྱའི་སྦྱིན་བདག་ཏུ་མི་འགྱུར་བར་ནི་མི་བྱའོ། །དེས་ལས་ཀྱི་རང་བཞིན་མི་དམིགས་པར་བྱའི་ལས་བདག་གིར་བྱ་བ་དང་འགལ་བར་ནི་མི་བྱའོ། །བསླབ་པའི་ངོ་བོ་ཉིད་མི་དམིགས་པར་བྱའི་སངས་རྒྱས་ཀྱི་ཡེ་ཤེས་ལ་མི་བསླབ་པར་ནི་མི་
བྱའོ། །སྦྱིན་པ་དེ་ཡང་བྱང་ཆུབ་ཏུ་བསྔོ་བར་བྱ་སྟེ། བྱང་ཆུབ་ཀྱི་ངོ་བོ་ཉིད་དམིགས་པར་མི་བྱ། བསྔོ་བའི་ངོ་བོ་ཉིད་ཀྱང་དམིགས་པར་མི་བྱ། དགེ་བའི་རྩ་བ་རྣམས་མི་བསྔོ་བར་ཡང་མི་བྱའོ། །དགེ་སློང་འདི་ལྟ་སྟེ། དཔེར་ན་ཆུའི་ནང་ན་ཟླ་བའི་གཟུགས་བརྙན་
སྣང་བ་དེ་ཟླ་བར་ཡང་ཤེས་པར་མི་བྱ། དེ་ཟླ་བ་མ་ཡིན་པར་ཡང་ཤེས་པར་མི་བྱ་བ་དེ་བཞིན་དུ་བྱ་བ་ཐམས་ཅད་ལ་ཡང་ཤེས་པར་བྱའོ། །བྱ་བ་དེ་ལྟ་བུས་སྦྱིན་པ་བྱིན་ན་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་ནས་དགེ་སློང་ཞི་བའི་བློ་གྲོས་དེ་ལ་དེ་བཞིན་

གཤེགས་པ་ཐམས་ཅད་ཟིལ་གྱིས་གནོན་པས་སྦྱིན་པ་དེ་ལྟ་བུས་སྦྱིན་པའི་ཕ་རོལ་ཏུ་ཕྱིན་པ་བསྟན་པས་སྦྱིན་པ་ཡོངས་སུ་བསྔོ་བའི་ཡེ་ཤེས་དཔག་ཏུ་མེད་པ་དང་ལྡན་པར་གྱུར་ཏོ། །འཇམ་དཔལ་དེའི་ཚེ་དེའི་དུས་ན་གང་བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ཟིལ་གྱིས་གནོན་པ་དེས་སྦྱིན་པ་བསྔོ་བའི་སྣང་བ་བསམ་གྱིས་མི་ཁྱབ་པ་རྙེད་པར་བྱ་བའི་ཕྱིར་གདམས་པ་དགེ་སློང་ཞི་བའི་བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་
བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་ཞི་བའི་བློ་གྲོས་ཞེས་བྱ་བར་གྱུར་ཏོ། །དེ་ཡང་དེ་ཕྱིན་ཆད་བསྐལ་པ་བརྗོད་དུ་མེད་པར་ནམ་ཡང་སྦྱིན་པའི་ཕ་རོལ་ཏུ་ཕྱིན་པ་བསྔོ་བ་བསམ་གྱིས་མི་ཁྱབ་པ་དང་བྲལ་བར་མ་གྱུར། བྱང་ཆུབ་མངོན་པར་
རྫོགས་པར་སངས་མ་རྒྱས་ཀྱི་བར་དུ་རྟག་ཏུ་རྒྱུན་མི་འཆད་པར་བྱང་ཆུབ་སེམས་དཔའི་ཡོན་ཏན་གཞན་ཚད་མེད་པ་དང་མ་བྲལ་བར་གྱུར་ཏོ། །དེ་ཉིད་དེའི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པ་དང་། སངས་རྒྱས་ཀྱི་ཞིང་གྲངས་མེད་པ་ཡོངས་སུ་དག་པ་
ནས་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་དག་པའི་རྒྱུར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་ཀྱི་ཞིང་དཔག་ཏུ་མེད་པ་ནས་བརྗོད་དུ་མེད་པའི་བར་དུ་ཡོངས་སུ་སྦྱོང་བར་འདོད་པས་དེ་ལྟར་སྦྱིན་པ་དང་།
སྦྱིན་པའི་ཕ་རོལ་ཏུ་ཕྱིན་པ་ལ་བརྩོན་པར་བྱའོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གཟི་བརྗིད་དཔག་ཏུ་

མེད་ཅེས་བྱ་བ་འཇིག་རྟེན་དུ་བྱུང་སྟེ། འཇམ་དཔལ་དེ་བཞིན་གཤེགས་པ་གཟི་བརྗིད་དཔག་མེད་ཀྱི་གསུང་རབ་ལ་དགེ་སློང་རབ་ཏུ་ཞི་བའི་བློ་གྲོས་ཞེས་བྱ་བ་སངས་རྒྱས་ཁྲག་ཁྲིག་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ་ཞིག་བྱུང་སྟེ། དེ་ནས་དགེ་སློང་རབ་ཏུ་ཞི་བའི་བློ་
གྲོས་དེ་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་དཔག་མེད་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་དགེ་སློང་རབ་ཏུ་ཞི་བའི་བློ་གྲོས་དེས་
དེ་བཞིན་གཤེགས་པ་གཟི་བརྗིད་དཔག་མེད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་བྱང་ཆུབ་ཀྱི་ཕྱིར་སྤྱོད་པས་སྦྱིན་པའི་ཕ་རོལ་ཏུ་ཕྱིན་པ་ལ་ཇི་ལྟར་སྤྱད་པར་བགྱི། བྱང་ཆུབ་སེམས་དཔའ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པའི་
སྦྱིན་པའི་ཕ་རོལ་ཏུ་ཕྱིན་པ་ཇི་ལྟར་ཡོངས་སུ་དག་པར་འགྱུར། དེ་སྐད་ཅེས་གསོལ་པ་དང་། དེ་བཞིན་གཤེགས་པ་གཟི་བརྗིད་དཔག་མེད་ཀྱིས་དགེ་སློང་རབ་ཏུ་ཞི་བའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །རབ་ཏུ་ཞི་བའི་བློ་གྲོས་བྱང་ཆུབ་ཀྱི་ཕྱིར་སྤྱོད་པའི་
བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་ཁོང་དུ་ཆུད་པར་བྱ། སྦྱིན་པའི་ངོ་བོ་ཉིད་མེད་པར་ཁོང་དུ་ཆུད་པར་བྱ། ལེན་པའི་ངོ་བོ་ཉིད་མེད་པར་ཁོང་དུ་ཆུད་པར་བྱ། སྦྱིན་བདག་ངོ་བོ་ཉིད་མེད་པར་ཁོང་དུ་ཆུད་པར་བྱ།
སྦྱིན་གནས་ངོ་བོ་ཉིད་མེད་པར་ཁོང་དུ་ཆུད་པར་བྱ། སྦྱིན་གནས་མཆོད་པ་ངོ་བོ་ཉིད་མེད་པར་ཁོང་དུ་ཆུད་པར་བྱ། བསྔོ་བ་ངོ་བོ་ཉིད་མེད་པར་ཁོང་དུ་ཆུད་པར་བྱ། གང་བསྔོ་བ་དེ་ཡང་ངོ་བོ་ཉིད་མེད་པར་ཁོང་དུ་ཆུད་པར་བྱ། གང་དུ་བསྔོ་བ་དང་གང་གིས་བསྔོ་བ་དེ་ཡང་ངོ་བོ་ཉིད་
མེད་པར་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། སྦྱིན་པ་ནི་སྦྱིན་པའི་ངོ་བོ་ཉིད་ཀྱིས་སྟོང་ངོ་། །ལེན་པ་ནི་ལེན་པའི་ངོ་བོ་ཉིད་ཀྱིས་སྟོང་ངོ་། །སྦྱིན་གནས་ཀྱང་སྦྱིན་གནས་ཀྱི་ངོ་བོ་ཉིད་ཀྱིས་སྟོང་ངོ་། །སྦྱིན་པའི་འབྲས་བུ་ཡང་སྦྱིན་པའི་འབྲས་བུའི་ངོ་བོ་ཉིད་

ཀྱིས་སྟོང་ངོ་། །བསྔོ་བ་ཡང་བསྔོ་བའི་ངོ་བོ་ཉིད་ཀྱིས་སྟོང་ངོ་། །བྱང་ཆུབ་ཀྱང་བྱང་ཆུབ་ཀྱི་ངོ་བོ་ཉིད་ཀྱིས་སྟོང་ངོ་། །དེ་ལྟར་སྟོང་པ་ཉིད་ལ་མོས་པ་ནི་བྱ་བ་ཚད་མེད་པའི་བསམ་པས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པར་འགྱུར་ཏེ།
སྦྱིན་པའི་ཡང་ཕ་རོལ་ཏུ་ཕྱིན་པའི་མིང་འཐོབ་ཅིང་འབགས་པ་མེད་པར་འགྱུར་རོ། །རབ་ཏུ་ཞི་བའི་བློ་གྲོས་འདི་ལྟ་སྟེ། དཔེར་ན་སྒྱུ་མ་མཁན་གྱིས་བུད་མེད་རིན་པོ་ཆེ་མངོན་པར་སྤྲུལ་ན། དེ་ཡང་བུད་མེད་རིན་པོ་ཆེའི་གྲངས་སུ་འགྲོ་མོད་ཀྱི། དེ་ལ་བུད་མེད་རིན་པོ་
ཆེའི་མིང་མ་དམིགས་པ་དེ་བཞིན་དུ། རབ་ཏུ་ཞི་བའི་བློ་གྲོས་སྦྱིན་པ་ལ་སྦྱིན་པའི་ངོ་བོ་ཉིད་མི་དམིགས་མོད་ཀྱི། སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་བའི་གྲངས་སུ་ཡང་འགྲོ། ལེན་པ་ངོ་བོ་ཉིད་ཀྱིས་མི་དམིགས་མོད་ཀྱི་ལེན་པ་ཞེས་བྱ་བའི་གྲངས་སུ་ཡང་འགྲོ། སྦྱིན་
བདག་ངོ་བོ་ཉིད་ཀྱང་མི་དམིགས་མོད་ཀྱི་སྦྱིན་བདག་ཅེས་བྱ་བའི་གྲངས་སུ་ཡང་འགྲོ། སྦྱིན་པའི་འབྲས་བུ་ཡང་ངོ་བོ་ཉིད་ཀྱིས་མི་དམིགས་མོད་ཀྱི། སྦྱིན་པའི་འབྲས་བུ་ཞེས་བྱ་བའི་གྲངས་སུ་ཡང་འགྲོ། བྱང་ཆུབ་ཀྱང་ངོ་བོ་ཉིད་ཀྱིས་མི་དམིགས་མོད་ཀྱི། བྱང་ཆུབ་
ཅེས་བྱ་བའི་གྲངས་སུ་ཡང་འགྲོ། བྱང་ཆུབ་སེམས་དཔའ་ངོ་བོ་ཉིད་ཀྱིས་མི་དམིགས་མོད་ཀྱི། བྱང་ཆུབ་སེམས་དཔའ་ཞེས་བྱ་བའི་གྲངས་སུ་ཡང་འགྲོའོ། །རབ་ཏུ་ཞི་བའི་བློ་གྲོས་འདི་ལྟར་བྱང་ཆུབ་སེམས་དཔའ་ནི་བྱ་བའི་ངོ་བོ་ཉིད་མི་དམིགས་མོད་ཀྱི་བྱ་བ་ཡང་ཆུད་
མི་གསོན་ཏེ། དེ་ཙམ་གྱིས་དེའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །དེ་ནས་དགེ་སློང་རབ་ཏུ་ཞི་བའི་བློ་གྲོས་དེ་བཞིན་གཤེགས་པ་གཟི་བརྗིད་དཔག་མེད་ཀྱིས་དེ་ལྟ་བུའི་ཚུལ་གྱིས་སྦྱིན་པའི་ཕ་རོལ་ཏུ་ཕྱིན་པ་འཛིན་དུ་བཅུག་ནས་ཞི་བའི་ས་ཡོངས་སུ་
འཛིན་པ་ཐོབ་སྟེ། དགེ་བའི་རྩ་བ་དེས་ནམ་ཡང་མ་ཞི་བའི་ས་ལ་མི་སྤྱོད་དོ། །གང་མྱ་ངན་ལས་འདས་པའི་ཞི་བ་དེ་སྦྱིན་པའི་ཞི་བའོ་ཞེས་དེ་ལྟར་མཐོང་བས་ཞི་བའི་ཆོས་རྣམས་མངོན་དུ་གྱུར་ཏོ། །འཇམ་དཔལ་དེའི་ཚེ་དེའི་དུས་ན་དགེ་སློང་རབ་ཏུ་ཞི་བའི་བློ་གྲོས་ཞེས་

བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་དོགས་ཤིང་ཡིད་གཉིས་དང་ཐེ་ཚོམ་ཟ་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ། དེའི་ཚེ་དེའི་དུས་ན་དགེ་སློང་རབ་ཏུ་ཞི་བའི་བློ་གྲོས་ཞེས་བྱ་བར་གྱུར་ཏོ། །
འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་མྱ་ངན་ལས་འདས་པའི་མཉམ་པ་ཉིད་ཀྱིས་སྦྱིན་པ་མཉམ་པ་ཉིད་དུ་གྱུར་པར་སྦྱིན་པ་སྦྱིན་པར་བྱའོ། །དེ་ལྟར་ན་དེའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ཡིན་ནོ། །སྦྱིན་པའི་ཕ་རོལ་ཏུ་ཕྱིན་
པ་ལ་བསླབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་པར་འགྱུར་རོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་སྦྱིན་པ་དང་ཚུལ་ཁྲིམས་མཚུངས་སོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་
ཏུ་མེད་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེའི་ཚེ་དེའི་དུས་ན་རིན་པོ་ཆེ་དག་པ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་རིན་པོ་ཆེ་དག་པའི་བསྐལ་པ་དེ་ལ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བརྩོན་འགྲུས་དཔེ་
མེད་ཅེས་བྱ་བ་བྱུང་ངོ་། །དེའི་ཚེ་དེའི་དུས་ན་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་ཁྱབ་འཇུག་གིས་བྱིན་ཞེས་བྱ་བ་ཞིག་བྱུང་སྟེ། སངས་རྒྱས་བྱེ་བ་ཁྲག་ཁྲིག་དཔག་ཏུ་མེད་པ་རྣམས་ལ་བསྙེན་བཀུར་བྱས་ཤིང་དགེ་བའི་རྩ་བ་བསྐྱེད་པའི་རིགས་ཆེན་པོར་སྐྱེས་པ། བྲམ་
ཟེའི་གསང་ཚིག་ཁ་ཏོན་དུ་འདོན་ཅིང་བཟུང་བ་རིག་བྱེད་གསུམ་གྱི་ཕ་རོལ་དུ་སོན་པ། སྒྲ་ངེས་པར་སྦྱོར་བ་དང་། ཤེས་གསལ་དང་བཅས་པ་དང་། ཡི་གེ་རབ་ཏུ་དབྱེ་བ་དང་བཅས་པ་དང་། སྔོན་བྱུང་བའི་གཏམ་ལྔ་པོ་རྣམས་དང་། བརྡ་སྤྲོད་པ་དང་། འཇིག་རྟེན་རྒྱང་པ་ན་པ་དང་།

མཆོད་སྦྱིན་གྱི་རྒྱུད་དང་། བུད་མེད་དང་། སྐྱེས་པའི་མཚན་ལ་མཆོག་ཏུ་མཁས་པར་གྱུར་པ། རང་གི་རིགས་ཀྱི་འདུལ་བ་ལ་རྗེས་སུ་གནང་བ། ཡོངས་སུ་གྲགས་པ། རབ་ཏུ་བྱུང་བའི་སློབ་དཔོན་དུ་གྱུར་པ་ཞིག་ཡོད་དེ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་
ཁྱབ་འཇུག་གིས་བྱིན་དེས་སངས་རྒྱས་བརྩོན་འགྲུས་དཔེ་མེད་ཅེས་བྱ་བ་འཇིག་རྟེན་དུ་འབྱུང་ངོ་ཞེས་ཐོས་ནས་དེ་འདི་སྙམ་དུ་སེམས་ཏེ། བདག་ཅག་གི་གསང་ཚིག་ལས་བྱུང་བ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ནི་འགྲོ་བ་གཉིས་སུ་འགྱུར་ཏེ། གསུམ་དུ་
འགྱུར་བ་མེད་དོ། །གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བ་གླིང་བཞི་ལས་ཆེས་རྣམ་པར་རྒྱལ་ཞིང་ཆོས་ཅན་ཆོས་ཀྱི་རྒྱལ་པོ་སྟེ་རིན་པོ་ཆེ་བདུན་དང་ལྡན་ནོ། །དེ་ལ་རིན་པོ་ཆེ་འདི་བདུན་འབྱུང་བ་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་
དང་། བུད་མེད་རིན་པོ་ཆེ་དང་། ནོར་བུ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་། རིན་པོ་ཆེ་དེ་བདུན་ནོ། །དེ་