Kinh tạng Tây Tạng (Kangyur Đại Học) — 054_མདོ་སྡེ།_ཐ

ྱི་ཁམས་མཚུངས་
པ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གཞལ་དུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་
བརྗོད་དུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་ཤ་སྟག་མཆིས་པ་དེ་དག་བཅོམ་ལྡན་འདས་ལས་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པ་ཐོས་ན། འཇིག་རྟེན་གྱི་ཁམས་དཔག་ཏུ་མ་མཆིས་པའི་
སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པ་ལ་ཡང་དག་པར་འཇུག་པ་དང་། འཇིག་རྟེན་གྱི་ཁམས་གྲངས་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པ་ལ་ཡང་དག་པར་འཇུག་པ་དང་། འཇིག་རྟེན་གྱི་ཁམས་བསམ་གྱིས་མི་ཁྱབ་པའི་སངས་རྒྱས་

ཀྱི་ཞིང་ཚད་མ་མཆིས་པ་ཡོངས་སུ་དག་པ་ལ་ཡང་དག་པར་འཇུག་པ་དང་། འཇིག་རྟེན་གྱི་ཁམས་མཚུངས་པ་མ་མཆིས་པ་དང་། གཞལ་དུ་མ་མཆིས་པ་དང་། བརྗོད་དུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་
དག་པར་འཇུག་པའི་སླད་དུ་བརྩོན་འགྲུས་རྒྱ་ཆེར་རྩོམ་ཞིང་དེ་དག་གོ་ཆ་སྲ་བར་འགྱུར། གོ་ཆ་སྟོབས་དང་ལྡན་པར་འགྱུར། གོ་ཆ་རྡོ་རྗེ་ལྟ་བུར་འགྱུར། གོ་ཆ་མི་ཤིགས་པར་འགྱུར། གོ་ཆ་མི་ལྡོག་པར་འགྱུར། གོ་ཆ་མི་ཟློགས་པར་འགྱུར། ཡི་དམ་བརྟན་པར་འགྱུར། ཡི་
དམ་སྟོབས་དང་ལྡན་པར་འགྱུར། ཡི་དམ་མི་འཁྲུགས་པར་འགྱུར། ཡི་དམ་མི་ལྡོག་པར་འགྱུར། ཡི་དམ་མི་ཟློགས་པར་འགྱུར། སྟོབས་བསྐྱེད་པ་ཐོབ་པར་འགྱུར། བགྱིད་པ་ཐམས་ཅད་སངས་རྒྱས་བཅོམ་ལྡན་འདས་ཐམས་ཅད་ཀྱིས་རབ་ཏུ་བསྟོད་པར་འགྱུར། དེ་དག་འཆི་
བའི་ཕྱོགས་སུ་མུན་པ་མ་མཆིས་པར་འགྱུར། བྱང་ཆུབ་སེམས་དཔའི་སྤྱོད་པ་བླ་ན་མེད་པ་སྤྱོད་པ་ན་ཞུམ་པ་མ་མཆིས། རྒོད་པ་མ་མཆིས། སྒྱིད་ལུག་པ་མ་མཆིས། སེམས་ཅན་རྣམས་ཀྱི་བསམ་པ་ལ་འཇུག་པ་ལ་དེ་དག་གི་བྱང་ཆུབ་ཐོགས་པ་མ་མཆིས་པར་འགྱུར། སེམས་ཅན་
རྣམས་ཀྱི་བསམ་པའི་སྒྲུབ་པ་འཚལ་བས་འཐུན་པར་ཆོས་སྟོན་པར་འགྱུར། སེམས་ཅན་རྣམས་ཀྱི་གན་དུ་མཆི་བའི་དུས་འཚལ་པ་ལ་གནས་པར་འགྱུར། སེམས་ཅན་འདུལ་བའི་ཆོ་ག་ལ་མཁས་པར་འགྱུར། སངས་རྒྱས་ཀྱི་ཐེག་པ་པ་ལ་སེམས་ཅན་རྣམས་འཛུད་པའི་ཐབས་
ལ་མཁས་པར་འགྱུར། བརྗོད་པ་ཐམས་ཅད་ལ་མ་ཆགས་པར་འགྱུར། མདོར་བསྡུས་པ་དང་རྒྱས་པ་ལ་མཁས་པས་ཉེ་བ་དང་། རིང་བར་འདུ་ཤེས་པ་མ་མཆིས་པར་འགྱུར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་
གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ལེགས་སོ་ལེགས་སོ། །ཁྱོད་ནི་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་དཔག་ཏུ་མེད་པ་ལ་ཡང་དག་པར་ཞུགས་པ། ཐེག་པ་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་དུ་མེད་པ་ལ་ཡང་

དག་པར་ཞུགས་པ་རྣམས་དང་། འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་རྣམས་དང་། འཇིག་རྟེན་གྱི་ཁམས་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་དུ་མེད་པའི་
སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་རྣམས་དང་། སྙིང་བརྩེ་བ་དོན་འདོད་པ་སྙིང་རྗེ་ཅན་འཇིག་རྟེན་ཐམས་ཅད་ལ་ཕན་པ་དང་བདེ་བར་རབ་ཏུ་སྦྱོར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཅེས་སྤྲས་བྱེད་པ་
སྟེ། །འཇམ་དཔལ་གང་དེ་བཞིན་གཤེགས་པ་ལ་གསོལ་བ་འདེབས་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་དགེ་བའི་རྩ་བའི་སྟོབས་བསྐྱེད་པས་སྤོབས་སོ། །འཇམ་དཔལ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བཅོམ་ལྡན་འདས་
ལེགས་སོ་ལེགས་སོ། །ཞེས་གསོལ་ཏེ། འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །འཇམ་དཔལ་ཤར་གྱི་ཕྱོགས་ཆ་ན་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་
སྙེད་ཀྱི་སངས་རྒྱས་ཀྱི་ཞིང་འདས་པ་ན་འཇིག་རྟེན་གྱི་ཁམས་ཟིལ་གྱིས་མི་ནོན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ་འཇིག་རྟེན་གྱི་ཁམས་དཔག་
ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་པ། འཇིག་རྟེན་གྱི་ཁམས་མཚུངས་པ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་དང་ལྡན་པ། འཇིག་རྟེན་གྱི་ཁམས་གཞལ་དུ་མེད་པའི་སངས་རྒྱས་ཀྱི་ཞིང་ཚད་མེད་པ་
ཡོངས་སུ་དག་པའི་སྨོན་ལམ་དང་ལྡན་པ། འཇིག་རྟེན་གྱི་ཁམས་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་དང་ལྡན་ནོ། །འཇམ་དཔལ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ་གང་

གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་ཐོས་ན། དེ་ཐམས་ཅད་ཀྱང་འཇིག་རྟེན་གྱི་ཁམས་དཔག་ཏུ་
མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་རྙེད་པར་འགྱུར་རོ། །འཇིག་རྟེན་གྱི་ཁམས་གྲངས་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་པར་འགྱུར་རོ། །འཇམ་དཔལ་ངས་
གང་གི་ཚེ་འཇིག་རྟེན་གྱི་ཁམས་མར་མེ་ཅན་གྱི་ཚོང་འདུས་ཀྱི་དབུས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལས་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་ཐོས་པ་དེའི་ཚེ་མི་སྐྱེ་
བའི་ཆོས་ལ་བཟོད་པ་ཐོབ་བོ། །གང་གི་ཚེ་ངས་མི་སྐྱེ་བའི་ཆོས་ལ་བཟོད་པ་ཐོབ་པ་དེའི་ཚེ་དེ་བཞིན་གཤེགས་པ་མར་མེ་མཛད་དེས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། ལེགས་སོ་ལེགས་སོ། །སྐྱེས་བུ་དམ་པ་ཁྱོད་མ་འོངས་པའི་དུས་བསྐལ་པ་
གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་ཞིང་འཇིག་རྟེན་གྱི་ཁམས་གྲངས་མེད་བསམ་གྱིས་མི་ཁྱབ་
མཚུངས་པ་མེད་གཞལ་དུ་མེད་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་དང་ལྡན་པར་འགྱུར་རོ་ཞེས་འཇམ་དཔལ་དེ་བཞིན་གཤེགས་པ་མར་མེ་མཛད་དེ་ལས་ངས་རང་གི་ལུང་བསྟན་པ་ཐོས་ནས། དགེ་བའི་རྩ་བའི་ཤུགས་ཀྱིས་ཏ་ལ་བདུན་སྲིད་ཀྱི་
ནམ་མཁའ་ལ་འཕགས་ཏེ། སངས་རྒྱས་ཀྱི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་པ་ལ་ཆོས་སྟོན་པ་དེ་ངས་མཐོང་ངོ་། །དེ་མཐོང་ནས་

བར་སྣང་ལ་འདུག་བཞིན་དུ་དེ་བཞིན་གཤེགས་པ་དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཡེ་ཤེས་གཟིགས་པ་དཔག་མེད་ཐོགས་པ་མེད། །བདེ་གཤེགས་མ་སྨད་འཇིག་རྟེན་མིག་ཏུ་གྱུར། །ཁྱོད་ཀྱི་ཡེ་ཤེས་ཐོགས་པ་མེད་པར་འཇུག །བདེ་
གཤེགས་ཁྱོད་ཀྱིས་འཇིག་རྟེན་མ་གཟིགས་མེད། །བདེ་གཤེགས་ཁྱོད་ཀྱི་འོད་ནི་ཟིལ་མི་ནོན། །སངས་རྒྱས་ཞིང་བྱེ་བསམ་མི་ཁྱབ་པར་འགྲོ། །རི་དང་བྲག་གི་རྩེ་མོ་ཐལ་བྱུང་སྟེ། །རྒྱལ་བའི་འོད་ལ་སྒྲིབ་པར་བྱེད་པ་མེད། །འབྲས་བུ་ཇི་ལྟར་ལག་མཐིལ་གཞག་པ་
བཞིན། །བདེ་བར་གཤེགས་པ་སངས་རྒྱས་མཐའ་ཡས་སྟོན། །སངས་རྒྱས་ཞིང་རྣམས་སྣ་ཚོགས་རྣམ་མང་ལ། །རྒྱལ་བའི་སྲས་རྣམས་སྒྲིབ་པ་མེད་པར་འགྱུར། །འཇིག་རྟེན་མགོན་པོ་ཕྱོགས་བཅུའི་འཇིག་རྟེན་ན། །ཕུང་མེད་བྱང་ཆུབ་རབ་ཞི་རེག་འགྱུར་ཞེས། །
རྒྱལ་སྲས་བསོད་ནམས་བྱས་ལ་ལུང་སྟོན་པ། །བར་སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་བྱང་ཆུབ་སེམས་དཔའ་དག །ནམ་མཁའི་ངོས་ལ་འདུག་ཅིང་སེམས་དང་བས། །ཉོན་མོངས་རྒྱལ་བ་རྒྱལ་བ་ཡབ་ལ་བསྟོད། །བར་
སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་བྱང་ཆུབ་སེམས་དཔའ་དག །དགའ་ལྡན་གནས་ནས་དཔག་མེད་ཤི་འཕོས་ནས། །ཕྲ་བའི་བློ་རྣམས་ཐ་མའི་མངལ་འཇུག་པ། །བར་སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་
འཇིག་རྟེན་བྱང་ཆུབ་སེམས་དཔའ་དག །མ་ཡི་གཡས་ལོགས་རུམ་ན་གནས་གྱུར་ཏེ། །ལྷ་ཡིས་རབ་ཏུ་མཆོད་ཅིང་བྱུང་བ་དག །བར་སྣང་འདི་ན་དེང་འདུག་བདག་གིས་མཐོང་། །ཕྱོགས་བཅུའི་འཇིག་རྟེན་བྱང་ཆུབ་སེམས་དཔའ་དག །བདུད་ཀྱི་སྡེ་དང་དཔུང་རྣམས་
ཕམ་བྱས་ནས། །བྱང་ཆུབ་སེམས་དཔའ་བླ་མེད་བྱང་ཆུབ་སེམས། །བར་སྣང་འདི་ན་དེང་འདུག་བདག་གིས་མཐོང་། །འཇིག་རྟེན་མགོན་པོ་ཕྱོགས་བཅུའི་འཇིག་རྟེན་ན། །མེ་ལ་ཆུ་བཏབ་ཞི་བར་འགྱུར་བ་བཞིན། །ཡང་བྱུང་རབ་ཞི་མྱ་ངན་ཡོངས་འདའ་བ། །བར་

སྣང་འདི་ན་དེང་འདུག་བདག་གིས་མཐོང་། །སྟོབས་བཅུ་མི་དབང་ཁྱོད་ཀྱི་གཟི་བརྗིད་ཀྱིས། །འཇིག་རྟེན་ན་ནི་སྒྲིབ་པ་གང་ཡང་མེད། །རྒྱལ་བ་ཚད་མེད་ཞིང་ཡང་དེ་བཞིན་ཏེ། །ཐོགས་པ་མེད་པར་ནམ་མཁའ་འདི་ནས་མཐོང་། །ཇི་ལྟར་མི་དག་
རྨི་ལམ་འདོད་སྤྱོད་དང་། །སོས་ཀ་ཇི་ལྟར་སྨིག་རྒྱུ་འབྱུང་བ་དང་། །ལ་ལས་ཆུ་ནང་ཟླ་བ་མཐོང་བ་བཞིན། །ཞིང་དང་སངས་རྒྱས་དེ་དག་བདག་གིས་མཐོང་། །གང་ཚེ་བདག་གིས་སངས་རྒྱས་ཞིང་ཡོངས་དག །དེ་ཚེ་སྒྲིབ་པ་མེད་པའི་ཡེ་ཤེས་ཐོབ། །སྒྲིབ་པ་མེད་པའི་
ཡེ་ཤེས་སྐྱེས་པའི་ཚེ། །དེ་ནི་མི་དབང་བྱང་ཆུབ་བདག་ལུང་བསྟན། །འགྲོ་བ་ཐམས་ཅད་བྲག་ཅ་འདྲ་བ་སྟེ། །སྐྱེ་བོ་མཁས་པ་དག་ལ་མི་སླུས་སོ། །དེ་རིང་མགོན་པོ་ཁྱོད་ཀྱི་གསུང་ཐོས་ནས། །ཆོས་ཀྱི་མིང་དང་ཡང་དག་ཉིད་ཀྱང་རྟོགས། །ང་ནི་སྒྲིབ་མེད་རྣམ་གྲོལ་སྤྱོད་
པ་ན། །མཚུངས་མེད་བསམ་ཡས་སངས་རྒྱས་ཞིང་ཡང་དག །རྒྱལ་བ་ཚད་མེད་དེ་བཞིན་ཞིང་རྣམས་ན། །མི་དབང་གཟིགས་ཤིང་བཞུགས་པར་ངས་མཐོང་ངོ་། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སྒྲིབ་པ་མེད་པའི་རྣམ་པར་ཐར་པ་
ལ་བསླབ་པར་བྱའོ། །སྒྲིབ་པ་མེད་པའི་རྣམ་པར་ཐར་བ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྣམ་པར་ཐར་པར་ཡང་མི་འཛིན། འདི་ན་རྣམ་པར་ཐར་པ་མེད་པར་ཡང་མི་འཛིན། སྒྲིབ་པར་ཡང་མི་འཛིན། འདི་ན་སྒྲིབ་པ་མེད་ཅེས་ཀྱང་མི་འཛིན། བྱང་
ཆུབ་སེམས་དཔའ་མེད་པར་ཡང་མི་འཛིན། བྱང་ཆུབ་སེམས་དཔའ་འདི་ན་མེད་པར་ཡང་མི་འཛིན། སྤྱོད་པ་མེད་པར་ཡང་མི་འཛིན། སྤྱོད་པ་འདི་ནའོ་ཞེས་ཀྱང་མི་འཛིན། སངས་རྒྱས་ཀྱི་ཞིང་མེད་པར་ཡང་མི་འཛིན། སངས་རྒྱས་ཀྱི་ཞིང་འདི་ནའོ་ཞེས་ཀྱང་མི་འཛིན།
དཔག་ཏུ་མེད་པ་མེད་པར་ཡང་མི་འཛིན། དཔག་ཏུ་མེད་པ་འདི་ནའོ་ཞེས་ཀྱང་མི་འཛིན། གྲངས་མེད་པ་མེད་པར་ཡང་མི་འཛིན། གྲངས་མེད་པ་འདི་ནའོ་ཞེས་ཀྱང་མི་འཛིན། བསམ་གྱིས་མི་ཁྱབ་པ་མེད་པར་ཡང་མི་འཛིན། བསམ་གྱིས་མི་ཁྱབ་པ་འདི་ནའོ་ཞེས་ཀྱང་

མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་མི་འཛིན། གཞལ་དུ་མེད་པ་འདི་ནའོ་ཞེས་ཀྱང་མི་འཛིན། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་
ཞེས་ཀྱང་མི་འཛིན་ཏོ། །འཇམ་དཔལ་འདི་ལྟ་སྟེ། དཔེར་ན་མི་ཞིག་གཉིད་ཀྱིས་ལོག་པའི་རྨི་ལམ་དུ་འདོད་པའི་ཡོན་ཏན་ལྔ་ལ་ཀུན་ཏུ་སྤྱོད་པ་རྨིས་ལ་མི་དེ་ཡང་བྱིས་པའི་རང་བཞིན་ཅན་མ་ཡིན། བླུན་པའི་རང་བཞིན་ཅན་མ་ཡིན་གྱི་མཁས་པ་རྟོགས་པ་ཤེས་རབ་དང་ལྡན་
པའི་རང་བཞིན་ཅན་ཏེ། ཉལ་བ་སད་ནས་འདོད་པའི་ཡོན་ཏན་མེད་པར་ཡང་མི་འཛིན། འདོད་པའི་ཡོན་ཏན་འདི་ནའོ་ཞེས་ཀྱང་མི་འཛིན། འདོད་པའི་དགའ་བ་མེད་པར་ཡང་མི་འཛིན། འདོད་པའི་དགའ་བ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་
སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་པ་འདི་ནའོ་ཞེས་ཀྱང་མི་འཛིན་ཏོ། །དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་
འདི་ནའོ་ཞེས་ཀྱང་མི་འཛིན་པའི་བར་དུའོ། །འཇམ་དཔལ་འདི་ལྟ་སྟེ་དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པས་སྐྱེ་བོ་ཕལ་པོ་ཆེའི་མདུན་དུ་སྒྱུ་མ་སྣ་ཚོགས་འདི་ལྟ་སྟེ། གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་
ཚོགས་བསྟན་ལ། དེ་ལ་མི་བྱིས་པའི་རང་བཞིན་ཅན་མ་ཡིན་པ། བླུན་པའི་རང་བཞིན་ཅན་མ་ཡིན་པ་མཁས་པ་རྟོགས་པ། བྱེ་བྲག་ཕྱེད་པ། ཤེས་རབ་དང་ལྡན་པའི་རང་བཞིན་ཅན་དེ་དག་གིས་དེ་མཐོང་ན། གླང་པོ་ཆེའི་ཚོགས་མེད་པར་ཡང་མི་འཛིན། གླང་པོ་ཆེའི་ཚོགས་
འདི་ནའོ་ཞེས་ཀྱང་མི་འཛིན། རྟའི་ཚོགས་མེད་པར་ཡང་མི་འཛིན། རྟའི་ཚོགས་འདི་ནའོ་ཞེས་ཀྱང་མི་འཛིན། ཤིང་རྟའི་ཚོགས་མེད་པར་ཡང་མི་འཛིན། ཤིང་རྟའི་ཚོགས་འདི་ནའོ་ཞེས་ཀྱང་མི་འཛིན། དཔུང་བུ་ཆུང་གི་ཚོགས་མེད་པར་ཡང་མི་འཛིན། དཔུང་བུ་

ཆུང་གི་ཚོགས་འདི་ནའོ་ཞེས་ཀྱང་མི་འཛིན། སྒྱུ་མ་མེད་པར་ཡང་མི་འཛིན། སྒྱུ་མ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ་འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པར་ཡང་
མི་འཛིན། རྣམ་པར་ཐར་པ་འདི་ནའོ་ཞེས་ཀྱང་མི་འཛིན་ཏོ། །དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན་པའི་བར་དུའོ། །འཇམ་དཔལ་འདི་ལྟ་སྟེ། དཔེར་ན་ནམ་ཐང་ཞིང་སྤྲིན་མེད་པའི་ནམ་མཁའ་ལས་
མཚོའི་ཆུ་ཤིན་ཏུ་དང་བའི་ནང་དུ་ཟླ་བའི་དཀྱིལ་འཁོར་གྱི་གཟུགས་བརྙན་འབྱུང་བ་དེ་ལ་མི་གང་དག་བྱིས་པའི་རང་བཞིན་ཅན་མ་ཡིན་པ། བླུན་པའི་རང་བཞིན་ཅན་མ་ཡིན་པ། མཁས་པ་བྱེ་བྲག་ཕྱེད་པ། རྟོགས་པ། ཤེས་རབ་དང་ལྡན་པའི་རང་བཞིན་ཅན་དེ་དག་
གིས་དེ་མཐོང་ན་ཟླ་བའི་དཀྱིལ་འཁོར་མེད་པར་ཡང་མི་འཛིན། ཟླ་བའི་དཀྱིལ་འཁོར་འདི་ནའོ་ཞེས་ཀྱང་མི་འཛིན། གཟུགས་བརྙན་མེད་པར་ཡང་མི་འཛིན། གཟུགས་བརྙན་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་
པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་པ་འདི་ནའོ་ཞེས་ཀྱང་མི་འཛིན་ཏོ། །དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན། ཡང་
དག་པར་འགྲུབ་པ་མེད་པར་ཡང་མི་འཛིན། ཡང་དག་པར་འགྲུབ་པ་འདི་ནའོ་ཞེས་ཀྱང་མི་འཛིན་པའི་བར་དུའོ། །འཇམ་དཔལ་འདི་ལྟ་སྟེ། དཔེར་ན་སོས་ཀའི་ཟླ་བ་ཐ་མའི་ཚེ་ནམ་ཐང་ཞིང་སྤྲིན་མེད་པའི་ནམ་མཁའ་ལ་སྨིག་རྒྱུ་རྒྱུ་ཞིང་གཡོ་བ་དེ་ལ་མི་གང་དག་བྱིས་པའི་རང་
བཞིན་ཅན་མ་ཡིན་པ། བླུན་པའི་རང་བཞིན་ཅན་མ་ཡིན་པ། མཁས་པ། རྟོགས་པ། བྱེ་བྲག་ཕྱེད་པ། ཤེས་རབ་ཀྱི་རང་བཞིན་ཅན་དེ་དག་གིས་དེ་མཐོང་ན། སྨིག་རྒྱུ་བ་མེད་པར་ཡང་མི་འཛིན། སྨིག་རྒྱུ་བ་འདི་ནའོ་ཞེས་ཀྱང་མི་འཛིན། གཡོ་བ་མེད་པར་ཡང་མི་འཛིན།

གཡོ་བ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སྤྱོད་པ་མེད་པར་ཡང་མི་འཛིན། སྤྱོད་པ་འདི་ནའོ་ཞེས་ཀྱང་མི་འཛིན། སངས་རྒྱས་ཀྱི་ཞིང་མེད་པར་ཡང་མི་འཛིན།
སངས་རྒྱས་ཀྱི་ཞིང་འདི་ནའོ་ཞེས་ཀྱང་མི་འཛིན་དཔག་ཏུ་མེད་པ་མེད་པར་ཡང་མི་འཛིན། དཔག་ཏུ་མེད་པ་འདི་ནའོ་ཞེས་ཀྱང་མི་འཛིན། གྲངས་མེད་པ་མེད་པར་ཡང་མི་འཛིན། གྲངས་མེད་པ་འདི་ནའོ་ཞེས་ཀྱང་མི་འཛིན། བསམ་གྱིས་མི་ཁྱབ་པ་མེད་པར་ཡང་མི་འཛིན།
བསམ་གྱིས་མི་ཁྱབ་པ་འདི་ནའོ་ཞེས་ཀྱང་མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་མི་འཛིན། གཞལ་དུ་མེད་པ་འདི་ནའོ་ཞེས་ཀྱང་མི་འཛིན། བརྗོད་དུ་མེད་པ་མེད་པར་ཡང་མི་
འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན། ཡོངས་སུ་དག་པ་མེད་པར་ཡང་མི་འཛིན། ཡོངས་སུ་དག་པ་འདི་ནའོ་ཞེས་ཀྱང་མི་འཛིན། ཡང་དག་པར་འགྲུབ་པ་མེད་པར་ཡང་མི་འཛིན། ཡང་དག་པར་འགྲུབ་པ་འདི་ནའོ་ཞེས་ཀྱང་མི་འཛིན་ཏོ། །འཇམ་དཔལ་འདི་ལྟ་
སྟེ། དཔེར་ན་སྤྲིན་མེད་ཅིང་སྤྲིན་དང་བྲལ་ཏེ་ནམ་ཐང་བའི་ནམ་མཁའི་དཀྱིལ་ནས་སྤྲིན་བྱུང་བས་ནམ་མཁའ་ཐམས་ཅད་ཡོག་པ་དེ་མཁས་པའི་རང་བཞིན་ཅན་གྱི་མིས་མཐོང་ན། སྤྲིན་གྱི་དཀྱིལ་འཁོར་མེད་པར་ཡང་མི་འཛིན། སྤྲིན་གྱི་དཀྱིལ་འཁོར་འདི་ནའོ་ཞེས་ཀྱང་མི་འཛིན། ཀུན་
ཁེབས་པ་མེད་པར་ཡང་མི་འཛིན། ཀུན་ཁེབས་པ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་པ་འདི་ནའོ་ཞེས་ཀྱང་མི་
འཛིན། སྒྲིབ་པ་མེད་པ་མེད་པར་ཡང་མི་འཛིན། སྒྲིབ་པ་མེད་པ་འདི་ནའོ་ཞེས་ཀྱང་མི་འཛིན། བྱང་ཆུབ་སེམས་དཔའ་མེད་པར་ཡང་མི་འཛིན། བྱང་ཆུབ་སེམས་དཔའ་འདི་ནའོ་ཞེས་ཀྱང་མི་འཛིན། སྤྱོད་པ་མེད་པར་ཡང་མི་འཛིན། སྤྱོད་པ་མེད་པ་འདི་ནའོ་ཞེས་ཀྱང་མི་འཛིན། སངས་

རྒྱས་ཀྱི་ཞིང་མེད་པར་ཡང་མི་འཛིན། སངས་རྒྱས་ཀྱི་ཞིང་འདི་ནའོ་ཞེས་ཀྱང་མི་འཛིན། དཔག་ཏུ་མེད་པ་མེད་པར་ཡང་མི་འཛིན། དཔག་ཏུ་མེད་པ་འདི་ནའོ་ཞེས་ཀྱང་མི་འཛིན། གྲངས་མེད་པ་མེད་པར་ཡང་མི་འཛིན། གྲངས་མེད་པ་འདི་ནའོ་ཞེས་ཀྱང་མི་འཛིན། བསམ་
གྱིས་མི་ཁྱབ་པ་མེད་པར་ཡང་མི་འཛིན། བསམ་གྱིས་མི་ཁྱབ་པ་འདི་ནའོ་ཞེས་ཀྱང་མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་མི་འཛིན། གཞལ་དུ་མེད་པ་འདི་ནའོ་ཞེས་ཀྱང་མི་འཛིན།
བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན། ཡོངས་སུ་དག་པ་མེད་པར་ཡང་མི་འཛིན། ཡོངས་སུ་དག་པ་འདི་ནའོ་ཞེས་ཀྱང་མི་འཛིན། ཡང་དག་པར་འགྲུབ་པ་མེད་པ་ཡང་མི་འཛིན། ཡང་དག་པར་འགྲུབ་པ་འདི་ནའོ་ཞེས་ཀྱང་མི་འཛིན་ཏོ། །
འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་བདག་གི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་རམ་ཞེས་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་
སེམས་དཔའ་ཆེན་པོའི་སངས་རྒྱས་ཀྱི་ཞིང་དཔག་ཏུ་མེད་པ་བསྒྲིམ་མི་དགོས་པར་ཡོངས་སུ་དག་པར་འགྱུར་རོ། །སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་བདག་གི་སངས་རྒྱས་ཀྱི་ཞིང་གྲངས་མེད་པ་ཡོངས་སུ་དག་པར་འགྱུར་རམ། དེ་བཞིན་
དུ་སྦྱར་ཏེ། ཅི་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་དག་པར་འགྱུར་རམ་སྙམ་དུ་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་བརྗོད་དུ་མེད་པ་བསྒྲིམ་མི་དགོས་པར་ཡོངས་སུ་དག་པར་
འགྱུར་རོ། །འཇམ་དཔལ་འདི་ལྟ་སྟེ། དཔེར་ན་ནམ་ལངས་པའི་དུས་ཀྱི་ཚེ། ཅི་ཉི་མ་འཆར་རམ་སྙམ་དུ་སེམས་ལ་མི་བྱ་སྟེ། འོན་ཀྱང་ནམ་ལངས་པའི་དུས་ཀྱི་ཚེ། བསྒྲིམ་མི་དགོས་པར་ཉི་མ་འཆར་བ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་

བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་བདག་གི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་སྙམ་དུ་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཞིང་དཔག་ཏུ་མེད་པ་
ནས་བརྗོད་དུ་མེད་པའི་བར་དུ་བསྒྲིམ་མི་དགོས་པར་ཡོངས་སུ་དག་པར་འགྱུར་རོ། །འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པས་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་གོ། །སངས་རྒྱས་ཀྱི་ཞིང་གྲངས་མེད་པ་དང་།
བསམ་གྱིས་མི་ཁྱབ་པ་དང་། མཚུངས་པ་མེད་པ་དང་། གཞལ་དུ་མེད་པ་དང་། བརྗོད་དུ་མེད་པ་ཡོངས་སུ་དག་གོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཇི་ཙམ་དུ་རྒྱ་ཆེར་ཡོངས་སུ་དག་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་སངས་རྒྱས་ཀྱི་ཞིང་ཇི་ཙམ་དུ་རྒྱ་ཆེར་ཡོངས་སུ་དག་པ་ནི་ཚིག་གི་གོ་བར་སླ་བ་མ་ཡིན་ནོ། །གསོལ་པ། བཅོམ་ལྡན་འདས་དཔེར་བགྱིར་རུང་ལགས་སམ།
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་རུང་ངོ་། །འཇམ་དཔལ་འདི་ལྟ་སྟེ། དཔེར་ན་སངས་རྒྱས་ཀྱི་ཞིང་བརྗོད་དུ་མེད་པ་བཞི་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་གྲོང་ཁྱེར་གཅིག་ཏུ་གྱུར་པ་ལ་འདི་ལྟ་སྟེ། ཕྱེའམ་ཕྱེ་མའི་རྣམ་པ་གཞན་གྱིས་གང་བ་
བཞིན་དུ་ཡུངས་ཀར་གྱིས་གང་བར་གྱུར་ཏེ། མི་ལ་ལ་ཞིག་གིས་ཡུངས་ཀར་དེ་རྡུལ་ཕྲ་རབ་ཏུ་བཏགས་ནས་ཡུངས་འབྲུ་རེ་རེ་ཡང་ཡུངས་འབྲུ་ཇི་སྙེད་པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་ལ། དེས་རྡུལ་ཕྲ་རབ་དེ་དག་ཕྲག་པ་ལ་ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་བོར་བས་

འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདའ་ལ། གོམ་པ་འདོར་བ་འདི་འདྲ་བ་དང་ལྡན་ཞིང་། འདི་ལྟ་སྟེ། སེམས་ཀྱི་མགྱོགས་པའི་རྫུ་འཕྲུལ་ལྟ་བུའི་མགྱོགས་པ་དང་ལྡན་ཏེ། གོམ་པ་འདོར་བ་དེ་ལྟ་བུ་དང་ལྡན་པས་བསྐལ་པ་གང་གཱའི་ཀླུང་གི་བྱེ་མ་
སྙེད་དུ་སོང་ཞིང་རྡུལ་ཕྲ་རབ་ཀྱི་རྡུལ་གཅིག་བོར་ལ་དེ་ལྟ་བུའི་ཚུལ་གྱིས་ཤར་ཕྱོགས་སུ་རྡུལ་ཕྲ་རབ་ཀྱི་རྡུལ་དེ་ཐམས་ཅད་བོར་ཏེ་དེ་བཞིན་དུ་ལྷོ་དང་། ནུབ་དང་། བྱང་དང་། ཕྱོགས་མཚམས་རྣམས་སུ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་བོར་ཞིང་དེ་བཞིན་དུ་སྟེང་དང་། འོག་གི་ཕྱོགས་སུ་
ཡང་རྡུལ་ཕྲ་རབ་ཀྱི་རྡུལ་དེ་སྙེད་བོར་ན། འཇམ་དཔལ་དེ་ཇི་སྙམ་དུ་སེམས། ཡུངས་ཀར་གྱི་རྡུལ་ཕྲ་རབ་ཀྱི་རྡུལ་གང་དུ་བོར་བ་དང་མ་བོར་བའི་འཇིག་རྟེན་གྱི་ཁམས་གང་མང་། གསོལ་པ། བཅོམ་ལྡན་འདས་རྡུལ་ཕྲ་རབ་ཀྱི་རྡུལ་བོར་བའི་འཇིག་རྟེན་གྱི་ཁམས་དེ་ནི་ཉུང་ལགས་
ཀྱི་མ་བོར་བ་དེ་ནི་ཆེས་མང་ལགས་སོ། །བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་རབ་ཀྱི་རྡུལ་བོར་བ་དང་། གང་དུ་མ་བོར་བའི་འཇིག་རྟེན་གྱི་ཁམས་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ལ། འདི་ལྟ་སྟེ། ཕྱེའམ་ཕྱེ་མའི་རྣམ་པ་གཞན་གྱིས་གང་བ་བཞིན་
དུ་ཡུངས་ཀར་གྱིས་གང་བ་དེ་ལ་མི་ལ་ལ་ཞིག་གིས་ཡུངས་འབྲུ་དེ་དག་བཏགས་ཏེ། ཡུངས་འབྲུ་རེ་རེ་ཡང་ཡུངས་འབྲུ་དེ་དག་ཇི་སྙེད་པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་ཏེ། དེས་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་ཕྲག་པ་ལ་ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་
བོར་བས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདའ་ཞིང་། འདི་ལྟ་སྟེ། སེམས་ཀྱི་མགྱོགས་པའི་རྫུ་འཕྲུལ་ལྟ་བུའི་མགྱོགས་པ་དང་ལྡན་པ་དེ་ལྟ་བུའི་གོམ་པ་འདོར་ཞིང་དེ་ལྟ་བུའི་མགྱོགས་པས། གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་སོང་སྟེ་རྡུལ་ཕྲ་རབ་ཀྱི་རྡུལ་
གཅིག་བོར་ཞིང་དེ་ལྟ་བུའི་ཚུལ་གྱིས་ཤར་ཕྱོགས་སུ་རྡུལ་ཕྲ་རབ་དེ་ཐམས་ཅད་བོར་ལ། དེ་བཞིན་དུ་ལྷོ་ཕྱོགས་སུ་རྡུལ་ཕྲ་རབ་ཀྱི་རྡུལ་དེ་སྙེད་འདོར་ཞིང་། ནུབ་དང་། བྱང་དང་། བྱང་ཤར་དང་། ཤར་ལྷོ་དང་། ལྷོ་ནུབ་དང་། ནུབ་བྱང་གི་མཚམས་དང་། སྟེང་དང་། འོག་གི་ཕྱོགས་

དང་། ཕྱོགས་མཚམས་སུ་རྡུལ་ཕྲ་རབ་དེ་སྙེད་བོར་ན། འཇམ་དཔལ་དེ་ཇི་སྙམ་དུ་སེམས། གང་དུ་རྡུལ་ཕྲ་རབ་དེ་དག་བོར་བ་དང་། གང་དུ་མ་བོར་བའི་འཇིག་རྟེན་གྱི་ཁམས་གང་མང་། གསོལ་པ། བཅོམ་ལྡན་འདས་གང་དུ་རྡུལ་ཕྲ་རབ་དེ་དག་བོར་བ་ནི་ཉུང་ལགས་ཀྱི་མ་
བོར་བའི་འཇིག་རྟེན་གྱི་ཁམས་དེ་ནི་ཆེས་མང་ལགས་སོ། །བཀའ་སྩལ་པ། འཇམ་དཔལ་འཇིག་རྟེན་གྱི་ཁམས་གང་དུ་རྡུལ་ཕྲ་རབ་བོར་བ་དང་གང་དུ་མ་བོར་བ་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ལ། འདི་ལྟ་སྟེ། ཕྱེའམ་ཕྱེ་མའི་རྣམ་པ་གཞན་གྱིས་གང་བ་བཞིན་དུ་ཡུངས་
ཀར་གྱིས་གང་ལ། མི་ལ་ལ་ཞིག་གིས་ཡུངས་འབྲུ་དེ་དག་བཏགས་ནས། ཡུངས་འབྲུ་རེ་རེ་ཡང་ཡུངས་འབྲུ་དེ་དག་ཇི་སྙེད་པ་དེ་སྙེད་ཀྱི་རྡུལ་ཕྲ་རབ་ཀྱི་རྡུལ་དུ་བྱས་ཏེ། དེས་རྡུལ་ཕྲ་རབ་དེ་ཐམས་ཅད་ཕྲག་པ་ལ་ཐོགས་ནས་ཤར་ཕྱོགས་སུ་སོང་སྟེ། གོམ་པ་གཅིག་བོར་བས་འཇིག་རྟེན་གྱི་
ཁམས་གང་གཱའི་ཀླུང་གི་བྱེ་མ་སྙེད་འདའ་ཞིང་འདི་ལྟ་སྟེ། སེམས་ཀྱི་མགྱོགས་པའི་རྫུ་འཕྲུལ་ལྟ་བུའི་མགྱོགས་པ་དང་ལྡན་ཏེ། གོམ་པ་དེ་ལྟ་བུར་འདོར་བ་དང་། དེ་ལྟ་བུའི་མགྱོགས་པ་དང་ལྡན་པས་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་སོང་སྟེ་རྡུལ་ཕྲ་རབ་གཅིག་བོར་ལ། དེ་ལྟ་བུའི་
ཚུལ་གྱིས་ཤར་ཕྱོགས་སུ་རྡུལ་ཕྲ་རབ་དེ་ཐམས་ཅད་བོར་ལ་དེ་བཞིན་དུ་ལྷོ་ཕྱོགས་སུ་རྡུལ་ཕྲ་རབ་དེ་སྙེད་བོར་ཞིང་། ནུབ་དང་། བྱང་དང་། བྱང་ཤར་དང་། ཤར་ལྷོ་དང་། ལྷོ་ནུབ་དང་། ནུབ་བྱང་གི་མཚམས་དང་། སྟེང་དང་། འོག་གི་ཕྱོགས་དང་། ཕྱོགས་མཚམས་རེ་རེར་ཡང་རྡུལ་ཕྲ་རབ་
དེ་སྙེད་བོར་ན་འཇམ་དཔལ་དེ་ཇི་སྙམ་དུ་སེམས། གང་རྡུལ་ཕྲ་རབ་དེ་བོར་བ་དང་གང་དུ་མ་བོར་བའི་འཇིག་རྟེན་གྱི་ཁམས་དེ་དག་གང་མང་གསོལ་པ། བཅོམ་ལྡན་འདས་གང་དུ་རྡུལ་ཕྲ་རབ་བོར་བ་ནི་ཉུང་ལགས་ཀྱི་མ་བོར་བ་དེ་ནི་ཆེས་མང་ལགས་སོ། །བཀའ་སྩལ་པ། འཇམ་དཔལ་འཇིག་
རྟེན་གྱི་ཁམས་གང་དུ་རྡུལ་ཕྲ་རབ་མ་བོར་བ་དང་གང་དུ་བོར་བ་དེ་དག་ཐམས་ཅད་གྲོང་ཁྱེར་གཅིག་ཏུ་གྱུར་ནས་ཡུངས་ཀར་གྱིས་གང་བ་ནི་ཇི་ལྟ་བ་སྔར་དཔེ་བསྟན་པ་དེ་བཞིན་དུ་རྒྱས་པར་བྱས་ཏེ་སྟོང་ཕྲག་སུམ་ཅུར་བསྒྱུར་བ། འཇམ་དཔལ་དེ་ཐམས་ཅད་ཀྱི་ཐ་མའི་རྡུལ་ཕྲ་རབ་ཀྱི་ཕུང་པོ་བཞག་པ་དེ་

སྙེད་ཀྱི་འཇིག་རྟེན་གྱི་ཁམས་རབ་འབྱམ་གྱི་རྒྱ་ཇི་ཙམ་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པའི་བྱང་ཆུབ་ཀྱི་ཤིང་གི་རྒྱ་ཡང་དེ་ཙམ་མོ། །བྱང་ཆུབ་ཀྱི་ཤིང་དེ་ནི་རིན་པོ་ཆེ་སྣ་བདུན་ཏེ། འབྲས་བུ་ནི་ཡིད་བཞིན་གྱི་
ནོར་བུའོ། །བྱང་ཆུབ་ཀྱི་ཤིང་དེའི་ཡལ་ག་ནི་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཡོད་དོ། །ཡལ་ག་གཅིག་ཅིང་ཡང་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཀྱི་ཡལ་ག་ཕྲེའུ་ཡོད་དེ། ཡལ་ག་ཕྲེའུ་གཅིག་ཅིང་ཡང་ཐ་མའི་རྡུལ་ཕྲ་རབ་ཀྱི་རྡུལ་སྙེད་ཀྱི་འབྲས་བུ་ཡོད་དོ། །འབྲས་བུ་རེ་རེ་ལ་ཡང་ཆ་ཤས་ནི་
དཔག་ཏུ་མེད་དོ། །འཇམ་དཔལ་བྱང་ཆུབ་ཀྱི་ཤིང་དེ་ནི་དེ་བཞིན་གཤེགས་པ་དོན་ཐམས་ཅད་གྲུབ་པའི་ལེགས་པར་སྤྱད་པའི་འབྲས་བུར་གྲུབ་པ་སྟེ། དེ་ནི་མིག་ཡོངས་སུ་མ་སྦྱངས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་མི་འགྱུར་རོ། །འཇམ་དཔལ་འདི་ལྟ་སྟེ། དཔེར་ན་བར་སྣང་
གི་གནོད་སྦྱིན་རྣམས་ཀྱི་གཞལ་མེད་ཁང་དག་མི་རྣམས་ཀྱི་མིག་ལམ་དུ་སྣང་བར་མི་འགྱུར་བ་དེ་བཞིན་དུ་བྱང་ཆུབ་ཀྱི་ཤིང་དེ་ཡང་མིག་ཡོངས་སུ་མ་སྦྱངས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་མི་འགྱུར་རོ། །འཇམ་དཔལ་བྱང་ཆུབ་ཀྱི་ཤིང་དེ་ལ་སེམས་ཅན་རྣམས་མི་ཐོགས་པར་
འགྲོ་སྟེ། འཇམ་དཔལ་འདི་ལྟ་སྟེ། དཔེར་ན་བར་སྣང་གི་གནོད་སྦྱིན་དག་གི་གཞལ་མེད་ཁང་རྣམས་ལ་མི་ཐོགས་པར་འགྲོ་བ་དེ་བཞིན་དུ་འཇམ་དཔལ་བྱང་ཆུབ་ཀྱི་ཤིང་དེ་ལ་སེམས་ཅན་རྣམས་མི་ཐོགས་པར་འགྲོ་སྟེ། བྱང་ཆུབ་ཀྱི་ཤིང་དེ་ཡང་ཡོངས་སུ་དག་པའི་ལས་དང་ལྡན་པའི་སེམས་
ཅན་རྣམས་ཀྱི་ལས་ཀྱི་རྣམ་པར་སྨིན་པས་ཡོངས་སུ་གྲུབ་པའི་ཕྱིར་རོ། །འཇམ་དཔལ་ཡང་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་འཇིག་རྟེན་གྱི་ཁམས་ནི་ཤར་ཕྱོགས་སུ་ཡང་ཐ་མའི་རྡུལ་ཕྲ་རབ་ཀྱི་རྡུལ་ཇི་སྙེད་པ་དེ་སྙེད་ཡོངས་སུ་དག་གོ། །ལྷོར་ཡང་དེ་སྙེད། ནུབ་ཏུ་ཡང་དེ་སྙེད། བྱང་
དུ་ཡང་དེ་སྙེད། ཤར་ལྷོར་ཡང་དེ་སྙེད། ལྷོ་ནུབ་ཏུ་ཡང་དེ་སྙེད། ནུབ་བྱང་དུ་ཡང་དེ་སྙེད། བྱང་ཤར་དུ་ཡང་དེ་སྙེད། སྟེང་དང་འོག་གི་ཕྱོགས་སུ་ཡང་དེ་སྙེད་ཀྱི་འཇིག་རྟེན་གྱི་ཁམས་ཡོངས་སུ་དག་སྟེ། སངས་རྒྱས་ཀྱི་ཞིང་དེ་དེ་ཙམ་དུ་རྒྱ་ཆེར་ཡོངས་སུ་དག་གོ། །སྒྲིབ་པ་མེད་པའི་

རྣམ་པར་ཐར་པ་ལ་བརྟེན་ན་དེའི་བརྒྱར་བགྲངས་པ་དེ་སྙེད་དུ་རང་གི་སངས་རྒྱས་ཀྱི་ཞིང་ཡོངས་སུ་དག་གོ། །འཇམ་དཔལ་བྱང་ཆུབ་ཀྱི་ཤིང་དེའི་འབྲས་བུ་འབྱུང་བ་དང་། སྐྱེ་བ་དང་། རྒྱས་པ་དང་། འགས་པ་རྒྱུན་མི་འཆད་ཅིང་བར་སྐབས་མེད་དེ། འཇམ་དཔལ་འདི་ལྟ་སྟེ། དཔེར་
ན་བྱིས་པ་ལྔ་བརྒྱ་ཙམ་རྩེ་ན་ཁ་ཅིག་འགྲེང་། ཁ་ཅིག་འདུག་པའི་རྒྱུན་མི་ཆད་ཅིང་བར་སྐབས་མེད་པ་དེ་བཞིན་དུ་འཇམ་དཔལ་བྱང་ཆུབ་ཀྱི་ཤིང་དེའི་འབྲས་བུ་འབྱུང་བ་དང་། སྐྱེ་བ་དང་། སྨིན་པ་དང་། འགས་པ་ཡང་རྒྱུན་མི་འཆད་ཅིང་བར་སྐབས་མེད་དོ། །འཇམ་དཔལ་འདི་ལྟ་
སྟེ། དཔེར་ན་ཆར་གྱི་འབྲུ་རགས་པ་འབབ་པའི་ཚེ། ཆུ་ལ་ཆུའི་ཆུ་བུར་ཁ་ཅིག་འབྱུང་། ཁ་ཅིག་འཇིག་པ་རྒྱུན་མི་འཆད་ཅིང་བར་སྐབས་མེད་པ་དེ་བཞིན་དུ་འབྲས་བུ་དེ་དག་འབྱུང་བ་དང་། སྐྱེ་བ་དང་། རྒྱས་པ་དང་། འགས་པ་ཡང་རྒྱུན་མི་འཆད་ཅིང་བར་སྐབས་མེད་དེ། འབྲས་
བུ་འགས་པ་དེའི་ཆ་ཤས་གཅིག་ལས་ཀྱང་གང་གཱའི་ཀླུང་གི་བྱེ་མ་སྙེད་ཀྱི་བྱང་ཆུབ་སེམས་དཔའ་འབྱུང་སྟེ། མཚན་སུམ་ཅུ་རྩ་གཉིས་དང་ལྡན་པ། ལུས་དཔེ་བྱད་བཟང་པོ་བརྒྱད་ཅུས་བརྒྱན་པ། སྲེད་མེད་ཀྱི་བུ་ལྟར་ལུས་མཁྲེགས་པ། སྲིད་པ་ཐ་མ་པར་གྱུར་པའི་སེམས་ཅན་འཇིག་
རྟེན་གྱི་ཁམས་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པར་ཡོངས་སུ་དག་པའི་སྨོན་ལམ་དང་ལྡན་པའི་བར་དུ་སྟེ། དེ་དག་ཐམས་ཅད་ཀྱིས་ཀྱང་དེ་ཙམ་དུ་རྒྱ་ཆེར་སངས་རྒྱས་ཀྱི་ཞིང་ཡོངས་སུ་དག་པར་སྦྱངས་ཏེ། དེ་དག་དེ་ནས་བྱུང་ནས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་པའི་བྱང་ཆུབ་སེམས་དཔའ་དེ་དག་ལ་དེ་བཞིན་གཤེགས་པ་དོན་ཐམས་ཅད་གྲུབ་པས་རང་གི་སངས་རྒྱས་ཀྱི་ཞིང་
ཡོངས་སུ་དག་པ་འཆད་དེ། དུས་གསུམ་མཉམ་པ་ཉིད་ཀྱང་སྟོན་ཏོ། །དེ་དག་ཀྱང་སངས་རྒྱས་ཀྱི་ཞིང་ཡོངས་སུ་དག་པ་ཉན་ཅིང་ཀུན་འཛིན་ཏེ། ཐོས་མ་ཐག་ཏུ་མངོན་པར་ཤེས་པ་ལྔ་ཐོབ་བོ། །མངོན་པར་ཤེས་པ་ཐོབ་མ་ཐག་ཏུ་དེ་བཞིན་གཤེགས་པ་དོན་ཐམས་ཅད་གྲུབ་པ་དེའི་

ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པ་དེ་ལ་ལན་གསུམ་བསྐོར་བ་བྱས་ནས་འདོང་ངོ་། །དེ་དག་རྫུ་འཕྲུལ་གྱི་སྟོབས་ཀྱིས་རང་རང་གི་སངས་རྒྱས་ཀྱི་ཞིང་དུ་སོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱའོ། །འཇམ་དཔལ་དེ་བཞིན་གཤེགས་པ་དོན་ཐམས་ཅད་གྲུབ་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བྱང་ཆུབ་སེམས་དཔའི་ཏིང་ངེ་འཛིན་གསུམ་བསྒོམས་ཏེ་རབ་ཏུ་གོམས་པར་བྱས། ལམ་དུ་བྱས། རྟེན་དུ་བྱས། རུས་ཤིང་བཞིན་དུ་བྱས། རབ་ཏུ་
རྟོགས་པར་བྱས་ཤིང་ལེགས་པར་བརྩམས་སོ། །ཏིང་ངེ་འཛིན་གསུམ་གང་ཞེ་ན། བྱང་ཆུབ་སེམས་དཔའི་ཏིང་ངེ་འཛིན་ཤུགས་ལྡན་ཞེས་བྱ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཞི་གནས་ཞེས་བྱ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ལ་
དབང་བྱེད་པ་ཞེས་བྱའོ། །འཇམ་དཔལ་སྔོན་བྱུང་བ་འདས་པའི་དུས་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན། མེ་ཏོག་གི་ཚོགས་ཞེས་བྱ་བའི་བསྐལ་པ་བྱུང་
སྟེ། མེ་ཏོག་གི་ཚོགས་ཀྱི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ།
སངས་རྒྱས་བཅོམ་ལྡན་འདས་དཀོན་མཆོག་དམ་པ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་དམ་པ་དེ་ལ་ཉན་ཐོས་ཐོག་མར་འདུས་པ་ནི་ཉན་ཐོས་ཁྲག་ཁྲིག་ཕྲག་བརྒྱད་ཅུ་ཡོད་དེ། དགྲ་བཅོམ་པ་
ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་

པར་ཀུན་ཏུ་སྦྱོར་བ་ཡོངས་སུ་ཟད་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ་སོན་པ་ཤ་སྟག་གོ། །བྱང་ཆུབ་སེམས་དཔའ་འདུས་པ་ནི་དེའི་ཉིས་འགྱུར་ཡོད་དེ། ཐམས་ཅད་ཀྱང་འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་
སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གྲངས་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་བསམ་གྱིས་མི་ཁྱབ་པ་དང་། མཚུངས་པ་མེད་པ་དང་། གཞལ་དུ་མེད་པ་དང་།
བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ཡང་དག་པར་ཞུགས་པ་ཤ་སྟག་གོ། །ཡང་ཉན་ཐོས་འདུས་པ་གཉིས་པ་ལ་ནི་ཉན་ཐོས་ཁྲག་ཁྲིག་ཡོད་དོ། །བྱང་ཆུབ་སེམས་དཔའ་འདུས་པ་ནི་དེའི་ཉིས་འགྱུར་ཡོད་དོ། །ཉན་ཐོས་འདུས་པ་གསུམ་པ་ལ་ནི་
ཉན་ཐོས་ཁྲག་ཁྲིག་ཕྲག་བརྒྱ་ཡོད་དེ། ཐམས་ཅད་ཀྱང་དགྲ་བཅོམ་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ་སོན་པའི་བར་དུའོ། །བྱང་ཆུབ་སེམས་དཔའ་འདུས་པ་ནི་དེའི་ཉིས་འགྱུར་ཡོད་དོ། །ཉིན་རེ་ཞིང་ཆོས་
སྟོན་པ་ཐམས་ཅད་ལ་ཉན་ཐོས་འདུས་པ་དང་། བྱང་ཆུབ་སེམས་དཔའ་འདུས་པ་རྣམས་ཀྱིས་མཉམ་དུ་དེ་བཞིན་གཤེགས་པ་དེས་ཆོས་བསྟན་པ་ཀུན་ཤེས་སོ། །འཇམ་དཔལ་དེ་བཞིན་གཤེགས་པ་དཀོན་མཆོག་དམ་པ་དེའི་ཉན་ཐོས་འདུས་པ་ནི་རྩིས་མཁན་ནམ་རྩིས་མཁན་གྱི་སློབ་མ་མཁས་
པས་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་སྟོང་ཕྲག་བརྒྱའམ། བསྐལ་པ་བྱེ་བའམ། བསྐལ་པ་ཁྲག་ཁྲིག་གམ། བསྐལ་པ་གཏམས་སམ། བསྐལ་པ་དཀྲིགས་སམ། བསྐལ་པ་འགྱུར་ཡས་ཀྱི་བར་དུ་ཡང་ཉན་ཐོས་འདུས་པ་འདི་སྙེད་ཅེའམ། ཉན་
ཐོས་འདུས་པ་བརྒྱ་ཕྲག་འདི་སྙེད་ཅེའམ། ཉན་ཐོས་འདུས་པ་སྟོང་ཕྲག་འདི་སྙེད་ཅེའམ། ཉན་ཐོས་འདུས་པ་བརྒྱ་སྟོང་ཕྲག་འདི་སྙེད་ཅེའམ། ཉན་ཐོས་འདུས་པ་བྱེ་བ་ཕྲག་འདི་སྙེད་ཅེའམ། ཉན་ཐོས་འདུས་པ་ཁྲག་ཁྲིག་ཕྲག་འདི་སྙེད་ཅེའམ། ཉན་ཐོས་འདུས་པ་གཏམས་ཕྲག་འདི་སྙེད་ཅེ་

འམ། ཉན་ཐོས་འདུས་པ་དཀྲིགས་ཕྲག་འདི་སྙེད་ཅེའམ། ཉན་ཐོས་འདུས་པ་ཁྱད་ཕྱིན་ཕྲག་འདི་སྙེད་ཅེའམ། ཉན་ཐོས་འདུས་པ་འགྱུར་ཡས་ཕྲག་འདི་སྙེད་ཡོད་ཅེས་བརྩི་བར་མི་ནུས་སོ། །འཇམ་དཔལ་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ཀྱི་སྐར་མའི་གཟུགས་ལ་སྐར་མའི་གཟུགས་འདི་སྙེད་ཅེའམ། སྐར་མའི་གཟུགས་བརྒྱ་ཕྲག་འདི་སྙེད་ཅེའམ། སྐར་མའི་གཟུགས་སྟོང་ཕྲག་འདི་སྙེད་ཅེའམ། སྐར་མའི་གཟུགས་བརྒྱ་སྟོང་ཕྲག་འདི་སྙེད་ཅེའམ། བྱེ་བ་ཕྲག་འདི་སྙེད་ཅེའམ། ཁྲག་ཁྲིག་ཕྲག་འདི་སྙེད་
ཅེའམ། གཏམས་ཕྲག་འདི་སྙེད་ཅེའམ། དཀྲིགས་ཕྲག་འདི་སྙེད་ཅེའམ། འགྱུར་ཡས་ཕྲག་འདི་སྙེད་ཡོད་ཅེས་རྩིས་མཁན་ནམ། རྩིས་མཁན་གྱི་སློབ་མ་མཁས་པས་ཀྱང་བགྲང་བར་མི་ནུས་ཏེ། འོན་ཀྱང་སྐར་མའི་གཟུགས་དཔག་ཏུ་མེད་པའི་གྲངས་སུ་འགྲོ་བ་དེ་བཞིན་དུ་འཇམ་དཔལ་
ཉན་ཐོས་འདུས་པ་དེ་རྣམས་ཀྱི་མཐའ་ཡང་རྟོགས་པར་མི་ནུས་སོ། །འཇམ་དཔལ་དེའི་དུས་ན་རྒྱལ་པོ་བདེ་གནས་བློ་གྲོས་ཞེས་བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་ཞིག་ཡོད་པ་དེ་སངས་རྒྱས་ཀྱི་ཞིང་དེ་ཐམས་ཅད་ལ་དབང་ཞིང་བདག་པོ་བྱེད་དེ། ལས་ཀྱི་རྣམ་པར་སྨིན་པ་ལས་བྱུང་བའི་རྫུ་འཕྲུལ་
ཐོབ་པ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་དམ་པ་དེ་ཉན་ཐོས་དང་། བྱང་ཆུབ་སེམས་དཔའི་དགེ་འདུན་དུ་བཅས་པ་ལ་ལོ་བྱེ་བ་ཁྲག་ཁྲིག་ཕྲག་དྲུག་ཅུའི་བར་དུ་རོ་སྣ་བརྒྱ་པའི་ཞལ་ཟས་སྦྱར་ཏེ་རིམ་གྲོ་བྱས་སོ། །ཡུལ་ཀ་ཤི་པའི་ན་བཟའ་
གསོལ་ཞིང་ཡོ་བྱད་ཐམས་ཅད་ཀྱང་སྦྱར་ཏེ། འདི་ལྟར་ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་ཀྱིས་རྩ་བའི་རིམ་གྲོ་བྱས་སོ། །དེས་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པ་དེ་ལ་རོ་སྣ་བརྒྱ་པའི་ཟས་ཀྱིས་རིམ་གྲོ་བྱས་པས་
དགེ་བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་སོ། །དགེ་བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་པས་དགེ་བའི་རྩ་བའི་ཤུགས་རྒྱ་ཆེ་ཞིང་དཔག་ཏུ་མེད་པ་བསྐྱེད་དོ། །དགེ་བའི་རྩ་བ་རྒྱ་ཆེ་ཞིང་གྲངས་མེད་པ་མངོན་པར་འདུས་བྱས་སོ། །དགེ་བའི་རྩ་བ་རྒྱ་ཆེ་

ཞིང་གྲངས་མེད་པ་མངོན་པར་འདུས་བྱས་ནས། དགེ་བའི་རྩ་བའི་ཤུགས་རྒྱ་ཆེ་ཞིང་གྲངས་མེད་པ་བསྐྱེད་པར་གྱུར་ཏོ། །སྦྱིན་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པའི་ཡང་བརྗོད་དུ་མེད་པ་མངོན་
པར་འདུས་བྱས་ནས། སྦྱིན་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྒྱ་ཆེ་ཞིང་བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་པར་གྱུར་ཏོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་དཔག་ཏུ་མེད་པ་རྒྱ་
ཆེན་པོ་མངོན་པར་འདུས་བྱས་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་དཔག་ཏུ་མེད་པ་རྒྱ་ཆེན་པོ་མངོན་པར་འདུས་བྱས་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་དཔག་ཏུ་མེད་པ་རྒྱ་ཆེན་པོ་བསྐྱེད་དོ། །དེ་བཞིན་དུ་སྦྱར་ཏེ། ཚུལ་
ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གྲངས་མེད། བསམ་གྱིས་མི་ཁྱབ་མཚུངས་པ་མེད། གཞལ་དུ་མེད། བརྗོད་དུ་མེད་ཅིང་རྒྱ་ཆེར་མངོན་པར་འདུས་བྱས་སོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གྲངས་མེད་པ་ནས་བརྗོད་དུ་མེད་ཅིང་རྒྱ་ཆེ་བའི་བར་
དུ་མངོན་པར་འདུས་བྱས་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྒྱ་ཆེ་ཞིང་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་དོ། བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་ཞིང་གྲངས་མེད།
དཔག་ཏུ་མེད་པ་མངོན་པར་འདུས་བྱས་ཏེ། ཇི་ལྟར་སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མངོན་པར་འདུས་བྱས་པ་དེ་བཞིན་དུ་བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་ཡང་རྒྱས་པར་བྱའོ། །
ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་ཞིང་དཔག་ཏུ་མེད་པ་མངོན་པར་འདུས་བྱས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྒྱ་ཆེ་ཞིང་

དཔག་ཏུ་མེད་པ་བསྐྱེད་དོ། །དེ་བཞིན་དུ་སྦྱར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེ་བ་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་མངོན་པར་འདུས་བྱས་ཏེ། ཤེས་རབ་ཀྱི་ཕ་རོལ་ཏུ་
ཕྱིན་པ་དང་ལྡན་པའི་དགེ་བའི་རྩ་བ་བརྗོད་དུ་མེད་པའི་བར་དུ་མངོན་པར་འདུས་བྱས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་དོ། །འཇམ་དཔལ་རྒྱལ་པོ་བདེ་
གནས་བློ་གྲོས་ཀྱིས་དེ་ལྟ་བུར་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་རྣམས་བསྐྱེད་ནས། དགའ་བ་དང་། དད་པ་དང་། མཆོག་ཏུ་དགའ་བ་མང་བས་ཏ་ལ་བདུན་སྲིད་དུ་ནམ་མཁའ་ལ་འཕགས་ནས། བཅོམ་ལྡན་འདས་དེ་བཞིན་གཤེགས་པ་དཀོན་མཆོག་དམ་པ་དེ་ལ་ཕ་རོལ་
ཏུ་ཕྱིན་པ་དང་ལྡན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྟོབས་བཅུ་ཤེས་རབ་མཐའ་ཡས་པ། །ཆུ་བོ་བཞི་རྒལ་མིའི་སེང་གེ །ཁྱོད་ལ་ཕུལ་བ་དཔག་མེད་འགྱུར། །སྦྱིན་པ་དེ་ཡང་ཟིལ་མི་ནོན། །བ་ཚྭ་མེད་པའི་ཞིང་དག་ལ། །རྡོ་དང་བོང་བ་གྱོ་མོ་མེད། །
ཀུན་སྦྱངས་རབ་ཏུ་རྨོས་པས་ན། །མི་མཉམ་མེད་ཕྱོགས་རྩྭ་མེད་པར། །ཇི་ལྟར་ས་བོན་བཏབ་ནས་སུ། །རྨེད་པའི་མི་དེ་བདེར་ཉལ་ཡང་། །དུས་སུ་རྩ་བ་བརྟན་པར་ཟུག །མྱུ་གུ་སྔོན་པོར་འབྱུང་བར་བྱེད། གྲུ་ཡིས་ས་ལ་ཆུས་བཏབ་པས། །ལོ་མ་སྡོང་བུ་རྣམས་ཀྱང་འབྱུང་། །དུས་
ཚིགས་དུས་ཀྱི་རིམ་བཞིན་དུ། །ངེས་པར་འབྲས་བུ་སྨིན་པར་འགྱུར། །དེ་བཞིན་འདོད་ཆགས་ཞེ་སྡང་བཅོམ། །གཏི་མུག་བྲལ་བ་ངེས་པའི་བློས། །མ་སྨད་ཡོན་ཏན་ཞིང་ཁྱོད་ལ། །ཤེས་རབ་གཤོལ་གྱིས་རྨོས་པ་ནི། །ས་བོན་ཉུང་ངུ་བཏབ་ན་ཡང་། །དེ་བཞིན་སྦྱིན་བདག་མི་བརྩོན་
ཡང་། །ཕ་རོལ་ཕྱིན་པ་ཡོངས་རྫོགས་ཤིང་། །ཐམས་ཅད་མཁྱེན་པའི་མྱུ་གུ་སྐྱེ། །མགོན་པོ་ཁྱོད་ལ་སྦྱིན་ཕུལ་ན། །བྱམས་པ་སྙིང་རྗེ་ཉོན་མོངས་མེད། །རྣམ་པར་ཐར་པའི་སྒོ་གསུམ་དང་། །ཐ་མར་འབྲས་བུ་མྱ་ངན་འདའ། །སུམ་ཅུ་རྩ་གཉིས་མཚན་མངའ་བ། །ས་ལ་དོང་ཀ་མེན་རྒྱས་

བཞིན། །བདག་གིས་དགེ་བའི་རྩ་བསགས་པས། །ཇི་ལྟར་བདེ་གཤེགས་དེ་བཞིན་ཤོག །ཇི་ལྟར་བསོད་ནམས་མཚན་མངའ་བ། །ལེགས་སྤྱད་བསགས་པ་ཐུབ་པའི་ཏོག །ཇི་ལྟར་མི་མཆོག་དམ་པ་བཞིན། །བདག་ཀྱང་བདེ་གཤེགས་དེ་བཞིན་གྱུར། །ཇི་ལྟར་དཔེ་མེད་བློ་
ཅན་ཁྱོད། །ཤེས་རབ་གནས་ལ་ཁྱོད་གནས་ནས། །ལྟ་བར་རབ་ཏུ་བྱིང་བ་ཡི། །སྐྱེ་བོ་མ་ལོག་འགོད་པར་མཛད། །བདག་ཀྱང་བྱང་ཆུབ་རེག་ནས་ནི། །དེ་བཞིན་བདེ་ལ་རབ་གནས་ཏེ། །ལོག་པའི་ལམ་སོང་སྐྱེ་བོ་རྣམས། །བདེན་པ་བཞི་ཡི་ལམ་དུ་འགོད། །ཇི་
ལྟར་ཁྱོད་ནི་ཕུང་པོ་མེད། །བླ་མེད་ཕུང་པོ་ཟད་པར་ཞུགས། །བྱིས་པ་ཕུང་པོས་བཅིངས་པ་རྣམས། །ཐམས་ཅད་ཕུང་པོ་འདོར་དུ་བཙུད། །བདག་ཀྱང་ཕུང་པོ་མེད་པ་དང་། །ཕུང་མེད་བྱང་ཆུབ་མཆོག་ཐོབ་ནས། །ཕུང་པོས་བཅིངས་པའི་སྐྱེ་བོ་རྣམས། །ཕུང་པོ་འདོར་བར་
རབ་ཏུ་འགོད། །ཇི་ལྟར་ཁྱོད་ཀྱིས་ཉོན་མོངས་སྤངས། །ཆུ་ཡིས་མེ་རྣམས་ཞི་བ་བཞིན། །ཉོན་མོངས་མེ་ཡིས་འབར་བ་ཡི། །སྐྱེ་བོ་སྡུག་བསྔལ་ཐར་བར་མཛད། །བདག་ཀྱང་བྱང་ཆུབ་རབ་རེག་སྟེ། །ཁྲོ་གླེན་འདོད་མེ་མ་ཞི་ཞེས། །ཉེ་བར་ཞི་བའི་ལམ་སྟོར་བའི། །སྐྱེ་བོ་རབ་ཏུ་
ཞི་བར་འགོད། །སེར་སྣའི་ཞགས་པས་བཅིངས་པ་དང་། །ཕྲག་དོག་ཀུན་སྦྱོར་མུན་པས་བསྒྲིབས། །སྲིད་པར་ཆགས་པ་མགོན་མེད་རྣམས། །ཡན་ལག་བརྒྱད་ཀྱི་ལམ་ལ་དགོད། །ཇི་ལྟར་རང་བྱུང་ཁྱོད་ཉིད་ནི། །སྟོབས་བཅུ་ཡེ་ཤེས་རབ་གནས་ཏེ། །སྲིད་སྐོམ་སེམས་ཅན་ཁྲག་
ཁྲིག་ལ། །སྟོབས་བཅུ་ཡེ་ཤེས་ངོམས་པར་མཛད། །བདག་ཀྱང་བྱང་ཆུབ་རབ་རེག་ཅིང་། །བླ་མེད་ཡེ་ཤེས་ཐོབ་ནས་སུ། །སྲིད་སྐོམ་སེམས་ཅན་ཁྲག་ཁྲིག་ལ། །སྟོབས་བཅུ་ཡེ་ཤེས་ངོམས་པར་བགྱི། །འཇམ་དཔལ་དེ་ལྟར་རྒྱལ་པོ་བདེ་གནས་བློ་གྲོས་ཀྱིས་བཅོམ་ལྡན་འདས་
དེ་བཞིན་གཤེགས་པ་དཀོན་མཆོག་དམ་པ་དེ་ལ་ལོ་བྱེ་བ་ཁྲག་ཁྲིག་ཕྲག་དྲུག་ཅུའི་བར་དུ་ཟས་རོ་སྣ་བརྒྱ་པ་སྦྱར་ཅིང་། ཡུལ་ཀ་ཤི་པའི་ན་བཟའ་གསོལ་ཏེ་བར་སྣང་ལ་འདུག་ནས་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། དགེ་བའི་རྩ་བའི་ཤུགས་ཚད་མེད། གྲངས་མེད།

བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་བསྐྱེད་ནས། དགེ་བའི་རྩ་བའི་ཤུགས་དེས་བསྐལ་པ་བརྗོད་དུ་མེད་པར་ནམ་ཡང་སེམས་ཅན་དམྱལ་བར་མ་སྐྱེས། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ལྷ་མ་ཡིན་གྱི་
རིས་སུ་ཡང་མ་སྐྱེས། མི་ཁོམ་པ་རྣམས་སུ་མ་སྐྱེས། རིགས་དམའ་བར་མ་སྐྱེས། དབུལ་པོའི་རིགས་སུ་མ་སྐྱེས་སོ། །བསྐལ་པ་བརྗོད་དུ་མེད་པར་ནམ་ཡང་ལུས་ལ་རླུང་ལས་གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པའི་ནད་མ་བྱུང་ངོ་། །ནམ་ཡང་དབང་
པོ་མ་ཚང་བར་མ་གྱུར། ནམ་ཡང་མིག་སེར་བ་དང་། འཇིགས་པའི་མིག་དང་། མིག་ཡོ་བ་དང་། བཞིན་ཡོ་བར་མ་གྱུར་ཏོ། །ནམ་ཡང་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་མ་བརྒྱན་པར་མ་གྱུར། ནམ་ཡང་དཔེ་བྱད་བཟང་པོ་བརྒྱད་ཅུ་དང་བྲལ་བར་མ་གྱུར། ལྷའི་
ནང་དུ་ལྷར་གྱུར་ཏམ། མིའི་ནང་དུ་མིར་གྱུར་ན། ནམ་ཡང་དབང་པོ་དང་ཕྱུག་པོ་མ་བྱས་པར་མ་གྱུར། ནམ་ཡང་སྨོན་ལམ་ཕུན་སུམ་ཚོགས་པ་དང་བྲལ་བར་མ་གྱུར། ནམ་ཡང་སངས་རྒྱས་མེད་པའི་སངས་རྒྱས་ཀྱི་ཞིང་དུ་མ་སྐྱེས། ནམ་ཡང་ནད་མེད་པ་དང་། གཟུགས་དང་ལོངས་སྤྱོད་
དང་། གཡོག་འཁོར་དང་། ཕྱུག་པས་དེ་སྔོན་དྲེགས་པར་མ་གྱུར། ནམ་ཡང་བུད་མེད་ཀྱི་དྲེགས་པ་དང་གོས་ཀྱི་དྲེགས་པ་མ་སྐྱེས། ནམ་ཡང་སྦྱིན་བདག་མ་བྱས་པར་མ་གྱུར། དེ་ནམ་ཡང་ཚུལ་ཁྲིམས་ཀྱི་དྲེགས་པ་མ་སྐྱེས། ནམ་ཡང་ཚུལ་ཁྲིམས་དང་ལྡན་པ་མ་ཡིན་པར་མ་གྱུར། དེ་ནམ་
ཡང་ཐོས་པས་དྲེགས་པ་མ་སྐྱེས། ནམ་ཡང་མང་དུ་ཐོས་པ་མ་ཡིན་པར་མ་གྱུར། ནམ་ཡང་འདོད་པའི་འདུ་ཤེས་མ་སྐྱེས། ནམ་ཡང་བཙུན་མོའི་འཁོར་གྱིས་མ་བསྐོར་བར་མ་གྱུར། ནམ་ཡང་ཚངས་པར་མི་སྤྱོད་པར་མ་གྱུར་ཏེ། བསམས་མ་ཐག་ཏུ་བུ་རྙེད་པར་གྱུར་ཏོ། །ནམ་ཡང་
གནོད་སེམས་ཀྱི་འདུ་ཤེས་མ་སྐྱེས། ནམ་ཡང་རྣམ་པར་འཚེ་བའི་འདུ་ཤེས་མ་སྐྱེས་ཏེ། དེ་ལྟར་རྒྱལ་པོ་དེས་ཤུགས་དང་ལྡན་པའི་ཏིང་ངེ་འཛིན་འདི་བསྐྱེད་ནས། བྱང་ཆུབ་སེམས་དཔའི་ཡོན་ཏན་འདི་རྣམས་དང་གཞན་ཡང་རབ་ཏུ་བསྒྲུབས་སོ། །འདི་ཇི་སྙམ་དུ་སེམས། འཇམ་

དཔལ་དེའི་ཚེ་དེའི་དུས་ན་རྒྱལ་པོ་བདེ་གནས་བློ་གྲོས་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་དེ་ནི་དེའི་ཚེ་དེའི་དུས་ན་རྒྱལ་པོ་བདེ་
གནས་བློ་གྲོས་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔས་སྦྱིན་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་བཙལ་བར་བྱའོ་ཞེས་དེ་ལྟར་བསླབ་པར་བྱའོ། །འཇམ་དཔལ་ཐེག་པ་ཆེན་པོ་ལ་ཡང་
དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པ་དེས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་རྒྱ་ཆེན་པོ་མངོན་པར་འདུས་བྱས་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་
ཤུགས་རྒྱ་ཆེན་པོ་བསྐྱེད་པར་བྱའོ།། །།བམ་པོ་གཉིས་པ། འཇམ་དཔལ་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད། དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་ན་རྒྱལ་པོའི་དྲང་སྲོང་ཚངས་པའི་
ལྷ་ཞེས་བྱ་བ་དང་། མེས་བྱིན་ཞེས་བྱ་བ་གཉིས་བྱུང་སྟེ། དེ་གཉིས་གནས་ཤིག་ན་འཁོད་དེ། དེ་དག་དགོན་པ་ནས་དགོན་པར། ནགས་ཚལ་ནས་ནགས་ཚལ་དུ། གཤོང་ནས་གཤོང་དུ། ནགས་ཐིབས་པོ་ནས་ཐིབས་པོར་འགྲོ་ཞིང་བདག་ཅག་བུད་མེད་དང་ལྷན་ཅིག་གནས་པར་
གྱུར་ན་བདག་ཅག་འདོད་ཆགས་ཀྱི་རྒྱུ་ལས་བྱུང་བའི་བསླབ་པ་ལས་འགལ་བར་འགྱུར། ཡོངས་སུ་བཟུང་བ་དང་བཅས་པ་དང་ལྷན་ཅིག་ཏུ་འགྲོགས་ན་ཡང་བདག་ཅག་གནོད་སེམས་ཀྱི་རྒྱུ་ལས་བྱུང་བའི་བསླབ་པ་ལས་འགལ་བར་འགྱུར། ཡོངས་སུ་བཟུང་བ་དང་བཅས་པའམ་ཡོངས་སུ་བཟུང་བ་ལ་
ཉེས་པར་མི་ལྟ་བ་དང་ལྷན་ཅིག་འགྲོགས་པར་གྱུར་ན་ཡང་། བདག་ཅག་གཏི་མུག་གི་རྒྱུ་ལས་བྱུང་བའི་བསླབ་པ་ལས་འགལ་བར་འགྱུར་རོ་ཞེས་དེ་ལྟ་བུའི་ཉེས་པ་རྣམས་མཐོང་ནས། དགོན་པ་ནས་དགོན་པར། ནགས་ཚལ་ནས་ནགས་ཚལ། གཤོང་ནས་གཤོང་། ནགས་ཐིབས་

པོ་ནས་ཐིབས་པོར་རྒྱུའོ། །འཇམ་དཔལ་དེའི་དུས་ན་རྒྱལ་པོ་སྡེ་མི་ཕམ་པ་ཞེས་བྱ་བ་ཞིག་ཡོད་དེ། དེ་རྒྱལ་པོར་དབང་བསྐུར་བའི་ཚེ་ཁྱིམ་གྱི་གནས་ནས་མངོན་པར་བྱུང་བ་རྣམས་རྩྭ་དང་། ཤིང་དང་ཆུ་ལ་ཅི་བདེར་སྤྱོད་དུ་གནང་སྟེ། རྗེས་སུ་ཡི་རང་ངོ་ཞེས་
ཚིག་དེ་སྐད་ཅེས་སྨྲས་པས། དྲང་སྲོང་དེ་གཉིས་ཀྱང་རྒྱལ་པོ་སྡེ་མི་ཕམ་པའི་ཡུལ་ཁམས་ན་གནས་སོ། །དེའི་ཚེ་རྒྱལ་པོ་སྡེ་མི་ཕམ་པ་ལ་ཆོམ་རྐུན་ནོར་འཕྲོག་པས་གནོད་པའི་ལས་བྱས་ཏེ་བྲོས་པ་དང་། དྲང་སྲོང་དེ་དག་གིས་ཆོམ་རྐུན་བྲོས་པ་མཐོང་ངོ་། །ཆོམ་རྐུན་དེ་
དག་གིས་ཀྱང་དྲང་སྲོང་ནགས་ཀྱི་ནང་ན་གནས་པར་མཐོང་ནས་ཆོམ་རྐུན་དེ་དག་གིས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །དྲང་སྲོང་ཁྱེད་ལ་བདག་ཅག་མཐོང་ངམ་ཞེས་ལ་ལ་ཞིག་གིས་དྲིས་ན་ཁྱེད་ཀྱིས་མ་སྟོན་ཅིག །དེ་ནས་དྲང་སྲོང་ཚངས་པའི་ལྷས་དྲང་སྲོང་མེས་བྱིན་ལ་སྨྲས་
པ། ཀྱེ་མའོ་མེས་བྱིན་བྱུང་བ་འདི་ནི་ཤིན་ཏུ་དཀའ་ན་ཇི་ལྟར་བྱ། གལ་ཏེ་འདི་མ་མཐོང་ངོ་ཞེས་སྨྲས་ན་ནི་གཞན་བསླུས་པར་འགྱུར། ཇི་སྟེ་བསྟན་ན་ནི་གནོད་པ་བྱས་པར་ཡང་འགྱུར་ན། འདི་ཇི་ལྟར་བྱ་ཁྱོད་སྨྲོས་ཤིག །དེ་སྐད་ཅེས་སྨྲས་པ་དང་། དྲང་སྲོང་མེས་བྱིན་གྱིས་དྲང་
སྲོང་ཚངས་པའི་ལྷ་ལ་འདི་སྐད་ཅེས་སྨྲས་སོ། །ཀྱེ་ཚངས་པའི་ལྷ་འདི་ལ་གནོད་པར་འགྱུར་བར་མ་འཛིན་ཅིག །དེ་ཅིའི་ཕྱིར་ཞེ་ན། ཚངས་པའི་ལྷ་གང་ལ་ལ་དག་ལུས་དང་སྲོག་ལ་ལྟ་བ་དང་བཅས་པར་གནས་པ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཟིན་
ནས་འདུག་གོ། །ཚངས་པའི་ལྷ་འདི་ལྟ་སྟེ། དཔེར་ན་གོས་སྣུམ་ཅན་ལ་རྡུལ་རེག་ན་ཆགས་པར་འགྱུར་བ་དེ་བཞིན་དུ་ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་ལྟ་བ་དང་བཅས་པར་གནས་པ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ནས་འདུག་གོ། །
ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་མི་ལྟ་བ་དེ་དག་ལ་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ཅིང་འདུག་པར་མི་འགྱུར་རོ། །ཚངས་པའི་ལྷ་འདི་ལྟ་སྟེ། དཔེར་ན་གོས་ཡོངས་སུ་དག་པ་ལ་རྡུལ་གྱིས་རེག་ཀྱང་སྤྲུགས་མ་ཐག་ཏུ་དེ་མེད་པར་འགྱུར་

བ་དེ་བཞིན་དུ་ཚངས་པའི་ལྷ་གང་དག་ཁ་ཅིག་ལུས་དང་སྲོག་ལ་མི་ལྟ་བ་དེ་དག་ནི་ཡོངས་སུ་ཟག་པ་བྱུང་བ་བྱུང་བ་རྣམས་ཀྱིས་སེམས་ཀུན་ཏུ་ཟིན་ཅིང་གནས་པར་མི་འགྱུར་རོ། །དེ་བས་ན་ཚངས་པའི་ལྷ་བདག་ཅག་ཀྱང་ལུས་དང་སྲོག་ལ་མི་བལྟ་བར་བྱའོ། །ཚངས་པའི་ལྷ་གལ་ཏེ་བདག་
ཅག་ལུས་དང་སྲོག་ལ་མ་བལྟས་ན་བདག་ཅག་ཡོངས་སུ་ཟག་པ་འབྱུང་བ་དེས་སེམས་ཟིན་ནས་གནས་པར་མི་འགྱུར་རོ། །ཀྱེ་ཚངས་པའི་ལྷ་ལུས་དང་སྲོག་ལ་ལྟ་བ་དང་བཅས་པའི་བརྟུལ་ཞུགས་འགྲུབ་བོ་ཞེས་སངས་རྒྱས་བཅོམ་ལྡན་འདས་རྣམས་ཀྱིས་བཀའ་མ་སྩལ་ཏོ། །དེ་
ནས་དྲང་སྲོང་ཚངས་པའི་ལྷ་ལ་དྲང་སྲོང་མེས་བྱིན་གྱིས་ལུས་དང་སྲོག་ལ་མི་ལྟ་བ་བསྟན་པས་ལུས་དང་སྲོག་ལ་མི་ལྟ་བ་རྙེད་དོ། །དེ་ནས་རྒྱལ་པོ་སྡེ་མི་ཕམ་པས་ཆོམ་རྐུན་དེ་དག་ཚོལ་ཞིང་ནགས་སྟུག་པོ་དེར་ཕྱིན་ཏེ། རྒྱལ་པོ་སྡེ་མི་ཕམ་པས་ནགས་སྟུག་པོའི་ནང་ན་དྲང་སྲོང་དེ་དག་གནས་
པ་མཐོང་ངོ་། །མཐོང་ནས་དྲང་སྲོང་དེ་དག་ག་ལ་བ་དེར་སོང་སྟེ། མི་ཁ་ཅིག་ནགས་སྟུག་པོ་དེར་ཆོམ་རྐུན་ཚོལ་དུ་བཀྱེའོ། །དེ་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་དག་གི་རྐང་པ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་
པོ་སྡེ་མི་ཕམ་པས་དྲང་སྲོང་དེ་གཉིས་ལ་འདི་སྐད་ཅེས་སྨྲས་སོ། །དྲང་སྲོང་ཁྱེད་གཉིས་ཀྱིས་ཆོམ་རྐུན་ནགས་སྟུག་པོ་འདིའི་ནང་དུ་འོངས་པའམ་ཕྱིར་བྱུང་བ་ལྟ་མཐོང་ངམ། དེ་སྐད་ཅེས་སྨྲས་པ་དང་། དྲང་སྲོང་དེ་གཉིས་ཀྱིས་རྒྱལ་པོ་སྡེ་མི་ཕམ་པ་ལ་འདི་སྐད་ཅེས་སྨྲས་སོ། །
རྒྱལ་པོ་བདག་ཅག་གིས་བདག་ཉིད་ཀྱང་མི་མཐོང་ན་ཆོམ་རྐུན་ལྟ་ག་ལ་མཐོང་། རྒྱལ་པོ་སྡེ་མི་ཕམ་པ་དང་དྲང་སྲོང་དེ་དག་གཏམ་འདི་བྱས་པ་དང་། རྒྱལ་པོའི་མི་དེ་དག་གིས་ཆོམ་རྐུན་དེ་དག་ཟིན་ཏེ། དེ་དག་གིས་དེ་དག་ཟིན་ནས་རྒྱལ་པོ་སྡེ་མི་ཕམ་པ་ག་ལ་བ་དེར་འོངས་ཏེ་ཕྱིན་
ནས་འདི་སྐད་ཅེས་སྨྲས་སོ། །ཆོམ་རྐུན་དེ་དག་བཟུང་སྟེ་མཆིས་པ་འདི་ལགས་ཞེས་བྱས་སོ། །དེ་ནས་རྒྱལ་པོ་སྡེ་མི་ཕམ་པས་དྲང་སྲོང་དེ་གཉིས་ཀྱིས་སྨྲས་པའི་དོན་ཁོང་དུ་མ་ཆུད་ནས་དྲང་སྲོང་དེ་གཉིས་ལ་སྨྲས་པ། ཁྱེད་ནི་བརྫུན་ཟེར་བ་ཡིན་ཏེ། དྲང་སྲོང་མ་ཡིན་ནོ་ཞེས་དེ་

གཉིས་ཀྱི་རྐང་པ་དང་ལག་པ་གཅོད་དུ་བཅུག་གོ། །འོན་ཀྱང་དྲང་སྲོང་དེ་དག་གིས་གཞན་ལ་གནོད་པ་མ་བྱས་སོ། །དེ་ནས་ཡང་དྲང་སྲོང་མེས་བྱིན་རྐང་ལག་བཅད་པ་དང་། རྒྱལ་པོ་སྡེ་མི་ཕམ་པ་ལ་འདི་སྐད་སྨྲས་སོ། །ཀྱེ་རྒྱལ་པོ་ཁྱོད་ཉིད་ལ་བདག་ཀུན་དུ་
བཙལ་ན་རྒྱལ་པོ་སྡེ་མི་ཕམ་པ་ཞེས་བྱ་བའི་རྒྱལ་པོ་གང་ཡིན་ཅི་མིག་རྒྱལ་པོ་སྡེ་མི་ཕམ་པའམ། འོན་ཏེ་རྒྱལ་པོ་སྡེ་མི་ཕམ་པ་མིག་ལས་གཞན་ནམ། ཅི་རྒྱལ་པོ་སྡེ་མི་ཕམ་པ་དེ་རྣ་བའམ། སྣའམ། ལྕེའམ། ལུས་སམ། ཡིད་དམ། འོན་ཏེ་རྒྱལ་པོ་སྡེ་མི་ཕམ་པ་དེ་རྣ་བ་དང་།
སྣ་དང་། ལྕེ་དང་། ལུས་དང་། ཡིད་དང་། རྣམ་པར་ཤེས་པ་ལས་གཞན་ནམ་ཞེས་དྲང་སྲོང་དེས་བདག་མི་དམིགས་པར་བསྟན་པ་དང་། ཡང་དག་པ་ཇི་ལྟ་བ་བཞིན་རྟོག་གོ། །དེ་ནས་རྒྱལ་པོ་སྡེ་མི་ཕམ་པས་ཡང་དག་པ་ཇི་ལྟ་བ་བཞིན་དུ་བརྟགས་ན་བདག་ཉིད་མ་དམིགས་
སོ། །དོན་དམ་པར་བདག་ཉིད་མ་དམིགས་པས་འགྱོད་པ་ཆེན་པོ་དང་ལྡན་པར་འགྱུར་ཏེ། ཉེས་པ་མེད་པའི་དྲང་སྲོང་གིས་བཤད་པའི་དོན་མ་ཤེས་པས་འཕྲལ་དུ་སྡིག་པའི་ལས་བྱས་པ་དེས་ཆོས་ཉིད་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ནས་སྡུག་བསྔལ་ཞིང་ཡིད་མི་བདེ་སྟེ་
འགྱོད་ནས་སའི་ཕྱོགས་དེ་ན་འགྲེ་ཞིང་ལྡོག་གོ། །དེ་ནས་དྲང་སྲོང་མེས་བྱིན་དེས་རྒྱལ་པོ་སྡེ་མི་ཕམ་པ་འགྱོད་པར་རིག་ནས་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཇི་ལྟར་བདག་ཉིད་མི་དམིགས་པ་དེ་བཞིན་དུ་སུའི་རྐང་ལག་བཅད་པ་དེ་ཡང་མི་དམིགས་སོ། །དེ་ནས་རྒྱལ་
པོ་སྡེ་མི་ཕམ་པ་ལ་དྲང་སྲོང་མེས་བྱིན་གྱིས་སྟོང་པ་ཉིད་བསྟན་པས་ཀུན་ནས་དཀྲིས་པ་དེ་མྱུར་དུ་བསལ་ཏེ། ཆོས་རྣམས་ཀྱི་ངོ་བོ་ཉིད་ཀྱི་མཚན་ཉིད་མྱུར་དུ་རྟོགས་ནས་དེས་དེ་གཉིས་ལ་སྟོན་པར་འདུ་ཤེས་བསྐྱེད་དོ། །དྲང་སྲོང་དེ་དག་གིས་དེ་ལ་ཚུལ་ཁྲིམས་ཀྱི་གཏམ་བརྗོད་
དེ། རྒྱལ་པོ་ཆེན་པོ་ཚུལ་ཁྲིམས་ཡོངས་སུ་དག་པའི་ཕྱིར་ཚུལ་ཁྲིམས་དང་ལྡན་པའི་སེམས་ལ་སྨོན་པ་འགྲུབ་སྟེ། རྒྱལ་པོ་ཆེན་པོ་ཚུལ་ཁྲིམས་སུ་ཡོངས་སུ་དག་པའི་མཐུ་ལ་གཟིགས། རྒྱལ་པོ་ཆེན་པོ་བདེན་པ་དང་། བདེན་པའི་ཚིག་གང་གིས་བསྐལ་པ་བརྗོད་དུ་མེད་པར་

ཡང་སེམས་མ་རུང་བར་བྱས་པར་མི་དྲན་པ་ལྟ་ན་བདེན་པ་དང་བདེན་པའི་ཚིག་དེས་བདག་ཅག་གཉིས་ཀྱི་ལག་པ་གཡས་པ་སྔ་མ་བཞིན་དུ་གྱུར་ཅིག་ཅེས་བྱས་མ་ཐག་ཏུ་བདེན་པའི་བྱིན་གྱི་རླབས་ཀྱིས། དེ་གཉིས་ཀྱི་ལག་པ་གཡས་པ་སྔ་མ་བཞིན་དུ་གྱུར་ཏོ། །རྒྱལ་པོ་ཆེན་པོ་
བདེན་པ་དང་བདེན་པའི་ཚིག་གང་གིས་བསྐལ་པ་བརྗོད་དུ་མེད་པར་ལུས་ཀྱི་ལས་མ་རུང་བར་བྱས་པར་མི་དྲན་པ་ལྟ་ན། བདེན་པ་དང་བདེན་པའི་ཚིག་དེས་བདག་ཅག་གཉིས་ཀྱི་ལག་པ་གཡོན་པ་སྔ་མ་བཞིན་དུ་གྱུར་ཅིག་ཅེས་བྱས་མ་ཐག་ཏུ་བདེན་པའི་བྱིན་གྱི་རླབས་ཀྱིས། དེ་གཉིས་ཀྱི་
ལག་པ་གཡོན་པ་སྔ་མ་བཞིན་དུ་གྱུར་ཏོ། །རྒྱལ་པོ་ཆེན་པོ་བདེན་པ་དང་བདེན་པའི་ཚིག་གང་གིས་བསྐལ་པ་བརྗོད་དུ་མེད་པར་འཚོ་བ་མ་རུང་བར་བྱས་པར་མི་དྲན་པ་ལྟ་ན། བདེན་པ་དང་བདེན་པའི་ཚིག་དེས་བདག་ཅག་གཉིས་ཀྱི་རྐང་པ་སྔ་མ་བཞིན་དུ་གྱུར་ཅིག་ཅེས་བྱས་པ་དང་།
འདི་ལྟར་དྲང་སྲོང་མེས་བྱིན་དེའི་བདེན་པའི་བྱིན་གྱི་རླབས་ཀྱིས། དྲང་སྲོང་དེ་གཉིས་ཀྱི་རྐང་པ་དང་ལག་པ་སྔ་མ་བཞིན་དུ་གྱུར་ཏོ། །དེ་ནས་རྒྱལ་པོ་སྡེ་མི་ཕམ་པས་དེ་གཉིས་ཀྱི་བདེན་པའི་བྱིན་གྱིས་བརླབས་ཀྱི་རྫུ་འཕྲུལ་མཐོང་ནས་སྤུ་ཟིང་ཞེས་བྱེད་པར་གྱུར་ཏོ། །དེ་ནས་དྲང་
སྲོང་མེས་བྱིན་གྱིས་བདེན་པའི་བྱིན་གྱིས་བརླབས་ཐོས་པས་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་ཡོངས་སུ་དག་པར་བྱ་བའི་ཕྱིར་བརྩོན་པར་གྱུར་ཏོ། །དེ་དེ་ན་འདུག་བཞིན་དུ་འཕགས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་པར་གྱུར་ཏོ། །དེས་དེ་ཉིད་
ནས་ཕྱོགས་བཅུའི་འཇིག་རྟེན་གྱི་ཁམས་ན་ཚད་མེད་པའི་སངས་རྒྱས་བྱེ་བ་ཁྲག་ཁྲིག་མཐོང་སྟེ། ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། ལ་ལ་ནི་བླ་ན་མེད་པའི་ཆོས་ཀྱི་འཁོར་ལོ་སྐོར། ལ་ལ་ནི་རྫུ་འཕྲུལ་གྱི་ཆོ་འཕྲུལ་རྣམ་པ་དུ་
མས་སེམས་ཅན་རྣམས་ལ་འདོམས། ལ་ལ་ནི་ཚེའི་འདུ་བྱེད་འདོར། ལ་ལ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པའི་དེ་བཞིན་གཤེགས་པ་དེ་དག་ཐམས་ཅད་ཀྱི་སྤྱན་སྔ་ན་དྲང་སྲོང་མེས་བྱིན་རིམ་གྲོ་དང་བསྙེན་བཀུར་

བྱེད་པ་མཐོང་ངོ་། །དེས་དྲང་སྲོང་མེས་བྱིན་དེ་རྫུ་འཕྲུལ་གྱི་ཆོ་འཕྲུལ་རྣམ་པ་དུ་མས་སངས་རྒྱས་བཅོམ་ལྡན་འདས་དེ་དག་གི་བསྟན་པ་སེམས་ཅན་རྣམས་ལ་སྟོན་ཅིང་བླ་ན་མེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རབ་ཏུ་བརྗོད་པ་མཐོང་ངོ་། །དེ་ནས་རྒྱལ་
པོ་སྡེ་མི་ཕམ་པས་དེ་བཞིན་གཤེགས་པ་དེ་རྣམས་དང་སེམས་ཅན་བྱེ་བ་ཁྲག་ཁྲིག་དུ་མ་མཐོང་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་ཤུགས་རྣམས་ཀྱིས་ཏ་ལ་བདུན་སྲིད་ཙམ་དུ་ནམ་མཁའ་ལ་འཕགས་ཏེ་བར་སྣང་ལ་འདུག་ནས། དྲང་སྲོང་མེས་བྱིན་དེ་
དང་སངས་རྒྱས་བཅོམ་ལྡན་འདས་དེ་རྣམས་ལ་རྫུ་འཕྲུལ་གྱི་ཆོ་འཕྲུལ་དང་ལྡན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིགས་སུ་བཅད་པ་རྣམས་ཀྱིས་མངོན་པར་བསྟོད་དོ། །ཇི་ལྟར་དྲི་མེད་མེ་ལོང་དཀྱིལ་འཁོར་ལ། །ལུས་ལ་མཆིས་པའི་ཉེས་དང་
ཡོན་ཏན་གདའ། །དེ་བཞིན་ཚུལ་ཁྲིམས་ཡང་དག་དགེ་བ་ལ། །སེམས་ལ་མཆིས་པའི་ཉེས་དང་ཡོན་ཏན་གདའ། །འདོད་བཞིན་འབྲས་བུ་འབྱུང་བའི་ཤིང་ཆེན་ལྟར། །བསམས་པ་བཞིན་དུ་འབྲས་བུ་ཀུན་ཀྱང་སྦྱིན། །དེ་བཞིན་ཚུལ་ཁྲིམས་ཕུང་པོ་གཙང་དག་
པས། །བསམས་པ་བཞིན་དུ་འབྲས་བུ་ཀུན་ཀྱང་སྦྱིན། །ཇི་ལྟར་ས་ལ་རབ་ཏུ་ལས་བྱས་ཏེ། །བསམས་པ་བཞིན་དུ་སྣོད་ཀྱི་རྣམ་པར་གྱུར། །དེ་བཞིན་ཚུལ་ཁྲིམས་ཕུང་པོ་ཡོངས་སྦྱངས་པས། །བསམས་པ་བཞིན་དུ་ཡོན་ཏན་ཐམས་ཅད་སྦྱིན། །ཇི་ལྟར་ཡིད་བཞིན་
ནོར་བུ་བྱི་དོར་བགྱིས། །བསམས་པ་བཞིན་དུ་ལོངས་སྤྱོད་སྣ་ཚོགས་སྦྱིན། །དེ་བཞིན་ཚུལ་ཁྲིམས་ཕུང་པོ་བྱི་དོར་བགྱིས། །བསམས་པ་བཞིན་དུ་ཡོན་ཏན་ཐམས་ཅད་སྦྱིན། །རྒྱལ་སྲས་རྣམས་ཀྱིས་ཐོག་མར་སྤྱད་གསུངས་པ། །ཚུལ་ཁྲིམས་ཡོངས་དག་ཐོག་མའི་
རྐང་པ་སྟེ། །རྒྱལ་བ་རྣམས་ནི་དྲི་མེད་རྐང་པ་དེས། །བྱང་ཆུབ་ཞི་བ་མཆོག་རྣམས་ཡང་དག་གྲུབ། །ཇི་ལྟར་ཤིང་རྒྱལ་ནྱ་གྲོ་གཞོན་ནུ་འདིར། །ས་གཞི་མཉམ་པར་བཙུགས་ཤིང་རབ་བསྐྱེད་ན། །ཡལ་ག་བྱུང་ཞིང་མངོན་པར་རབ་ཏུ་སྐྱེ། །མེ་ཏོག་འབྲས་བུར་ལྡན་ཞིང་

ཁྱད་པར་འཛིན། །དེ་བཞིན་ཚུལ་ཁྲིམས་ཕུང་པོར་སུ་གནས་པ། །རྒྱལ་བའི་སྲས་དེ་ཡོན་ཏན་རྣམས་ཀྱིས་སྐྱེ། །ཐམས་ཅད་མཁྱེན་པའི་ཡེ་ཤེས་འདིར་རེག་ནས། །འགྲོ་བ་སྡུག་བསྔལ་རྣམས་ལས་ཐར་བྱེད་འགྱུར། །ཚུལ་ཁྲིམས་ལྡན་པས་དཔལ་དང་གཟི་བརྗིད་རྙེད། །
ཚུལ་ཁྲིམས་ལྡན་པ་གཟུགས་རབ་མཛེས་པར་འགྱུར། །ཚུལ་ཁྲིམས་དག་ལ་རྒྱལ་སྲས་རྟག་དགའ་བ། །རྙེད་པར་དཀའ་བའི་ཆོས་ཀྱང་རབ་ཏུ་སྐྱེད། །སྤྱོད་པ་ཡོངས་དག་ཚུལ་ཁྲིམས་ཀུན་སྤྱོད་པ། །དྲི་མེད་ཁྲིམས་ལྡན་དྲང་སྲོང་མེས་བྱིན་འདི། །སངས་རྒྱས་ཡོན་ཏན་
མངའ་བ་བརྒྱ་དག་གིས། །ཀུན་ཏུ་བསྟོད་པ་མཛད་པར་བདག་གིས་མཐོང་། །ཚུལ་ཁྲིམས་ཡོངས་དག་ཀུན་དུ་སྤྱོད་པ་ལ། །སངས་རྒྱས་བརྒྱས་ནི་མངོན་པར་བསྟོད་གྱུར་དང་། །ཇི་ལྟར་བདག་གི་སློབ་དཔོན་མེས་བྱིན་ལ། །སངས་རྒྱས་བརྒྱ་ཡིས་མངོན་པར་བསྟོད་
པ་ལྟར། །དེ་བཞིན་ཚུལ་ཁྲིམས་གཟི་བརྗིད་ལྡན་པ་བདག །ལེགས་པར་སྤྱད་པ་བརྒྱ་ཡིས་མངོན་པར་བསྟོད། །སྐྱེས་ནས་བདག་གི་ཁྲིམས་སྟོབས་གདུང་མེད་དེ། །རིམས་ནད་བཏབ་པ་གསོ་བ་བྱས་པ་བཞིན། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །
ཕྱོགས་བཅུའི་འཇིག་རྟེན་བཞུགས་པའི་བདེ་བར་གཤེགས། །བྱེ་བ་ཁྲག་ཁྲིག་མང་པོ་རྒྱུ་བ་དང་། །ཚུལ་ཁྲིམས་བསྔགས་པ་ཡོངས་སུ་བརྗོད་པ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །བླ་
མེད་བྱང་ཆུབ་རིམ་པར་སངས་རྒྱས་ཏེ། །བདུད་རྣམས་བྱེ་བ་ཁྲག་ཁྲིག་བཏུལ་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །དགྲ་བཅོམ་བསྟོད་ཅིང་མཚུངས་མེད་འཁོར་ལོ་མཆོག །འགྲོ་ལ་ཕན་
ཕྱིར་རྒྱལ་བས་བསྐོར་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་དག །སྐྱེ་བོ་མུན་པས་བསྒྲིབས་ཤིང་མི་མཁས་པ། །བདེ་གཤེགས་སྡུག་བསྔལ་བརྒྱ་ལས་འགྲེལ་བ་མཐོང་། །དྲི་མེད་ཚུལ་ཁྲིམས་གནས་

པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །སེམས་ཅན་ཁྲག་ཁྲིག་བཏུལ་ཏེ་མཛད་པ་མཛད། །བདེ་གཤེགས་དད་པས་བསྒྲལ་ཕྱིར་བཞུགས་པ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་
གཤེགས་བྱེ་བ་ཁྲག་ཁྲིག་མང་པོ་རྣམས། །འགྲོ་བའི་དོན་ཆེན་མཛད་པ་མཛད་ནས་སུ། །ཡང་འབྱུང་མེད་པར་མྱ་ངན་འདའ་བ་མཐོང་། །དྲི་མེད་ཚུལ་ཁྲིམས་གནས་པས་བདག་གིས་ཀྱང་། །བདེ་གཤེགས་བྱེ་བ་ཁྲག་ཁྲིག་མང་པོ་རྣམས། །མྱ་ངན་འདས་ནས་རིང་བསྲེལ་
རབ་རྒྱས་ཤིང་། །སྐྱེ་བོ་བདེ་བས་མངོན་དུ་ཚིམ་མཛད་མཐོང་། །དེ་རིང་སློབ་དཔོན་ཁྱོད་ཀྱི་གསུང་ཐོས་ནས། །བདག་གི་མིག་ཀྱང་བསམ་མི་ཁྱབ་པར་དག །དེ་ཕྱིར་ཕྱོགས་བཅུ་དག་གི་རྒྱལ་བ་རྣམས། །སྒྲིབ་པ་མེད་པའི་མིག་གི་སྟོབས་ཀྱིས་མཐོང་། །བདག་གི་
མཚུངས་མེད་ཚུལ་ཁྲིམས་ཡོངས་དག་པས། །དེ་ལས་བདག་གི་སྒྲིབ་མེད་མིག་འདི་སྐྱེས། །ཚུལ་ཁྲིམས་ཕུང་པོ་ཡོངས་སུ་སྦྱངས་པ་ལས། །སྒྲིབ་པ་མེད་པའི་མིག་ནི་བདག་གིས་ཐོབ། །འདི་ལྟར་ཐལ་སྦྱར་སློབ་དཔོན་མཆོག་ཁྱོད་ལ། །གང་གི་མཐུ་ཆེ་བ་ནི་དེ་འདྲ་
བ། །དེ་ལ་ཐལ་མོ་མངོན་སྦྱར་ཕྱག་འཚལ་ཅིང་། །མཚུངས་མེད་རྡུལ་བྲལ་བྱང་ཆུབ་རེག་པར་བགྱི། །དེ་ནས་རྒྱལ་པོ་སྡེ་མི་ཕམ་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་དེ་རྙེད་པས་དེ་བཞིན་གཤེགས་པ་དེ་དག་ཐམས་ཅད་ཀྱིས་རབ་ཏུ་
བསྔགས་པར་གྱུར་ཏོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བའི་ཤུགས་རྙེད་པས་ཕྱོགས་བཅུ་མུན་པ་མེད་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་མཐོང་སྟེ། གང་སངས་རྒྱས་བཅོམ་ལྡན་འདས་དེ་དག་གིས་ཆོས་བསྟན་
པ་དེ་དག་ཐམས་ཅད་ཀྱང་ལེན་ཅིང་འཛིན་ཏོ། །དེ་ཚུན་ཆད་ནམས་ཀྱང་དྲན་པ་ཉམས་པར་མ་གྱུར་ཏེ། བསྐལ་པ་བརྗོད་དུ་མེད་པའི་བར་དུ་དུས་ཐམས་ཅད་དུའང་ཐོས་པ་འཛིན་པར་གྱུར་ཏོ། །དེ་ལ་ཆོས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་མངོན་དུ་གྱུར་ཏོ། །འདི་

ལྟར་སྒྲིབ་པ་མེད་པའི་ཆོས་ལ་བཟོད་པ་ཁོང་དུ་ཆུད་ཅིང་སེམས་ལ་ཀུན་ནས་དཀྲིས་པ་མེད་པས་གང་དང་གང་དུ་སྐྱེས་པ་དེ་དང་དེར་སྐྱེས་མ་ཐག་ཏུ་ཕྱོགས་བཅུའི་འཇིག་རྟེན་ཚད་མེད་པའི་འཇིག་རྟེན་གྱི་ཁམས་ན་སངས་རྒྱས་བཅོམ་ལྡན་འདས་རྣམས་མཐོང་སྟེ། སངས་རྒྱས་བཅོམ་
ལྡན་འདས་དེ་དག་དང་ལྷན་ཅིག་ཏུ་སྨྲ་ཞིང་གཏམ་ཟེར་ཏེ། འདི་ལྟར་མུན་པ་མེད་པའི་ལུས་དང་ལྡན་པའི་ཕྱིར་སངས་རྒྱས་བཅོམ་ལྡན་འདས་དེ་དག་གིས་བོད་ཅིང་ཡང་དག་པར་མགུ་བར་བྱས་པ་ཡིན་ནོ། །འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་མེས་
བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དྲི་མ་མེད་པའི་སྤྱན་དེ་དེའི་ཚེ་དེའི་དུས་ན་དྲང་སྲོང་མེས་བྱིན་ཞེས་བྱ་བར་གྱུར་ཏོ། །འཇམ་དཔལ་འདི་ཇི་སྙམ་དུ་སེམས།
དེའི་ཚེ་དེའི་དུས་ན་དྲང་སྲོང་ཚངས་པའི་ལྷ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་སྤྱན་མཆོག་དེ་དེའི་ཚེ་དེའི་དུས་ན་དྲང་སྲོང་ཚངས་པའི་ལྷ་ཞེས་བྱ་བར་གྱུར་ཏོ། །འཇམ་
དཔལ་འདི་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་སྡེ་མི་ཕམ་པ་ཞེས་བྱ་བ་གང་ཚུལ་ཁྲིམས་ཡོངས་སུ་དག་པ་ཐོས་མ་ཐག་ཏུ་ཀུན་ནས་དཀྲིས་པ་བསལ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན།
དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་རྒྱལ་པོ་སྡེ་མི་ཕམ་པ་ཞེས་བྱ་བར་གྱུར་ཏོ། །འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་མ་ཉམས་པར་བྱའོ། །ཚུལ་ཁྲིམས་ལ་སྐྱོན་མེད་པ་དང་། ཚུལ་ཁྲིམས་
ཤིན་ཏུ་བསྡམས་པ་དང་། ཚུལ་ཁྲིམས་མ་འདྲེས་པ་དང་། ཚུལ་ཁྲིམས་རྣམ་པར་དག་པ་དང་། ཚུལ་ཁྲིམས་ཡོངས་སུ་དག་པ་དང་། ཚུལ་ཁྲིམས་རྫོགས་པར་བྱ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དེ་ལ་ཆགས་པར་མི་བྱ། ཚུལ་ཁྲིམས་ཀྱི་ཕ་རོལ་ཏུ་ཕྱིན་

པ་ལ་མཆོག་ཏུ་འཛིན་པར་མི་བྱའོ། །དེ་ལྟར་ཚུལ་ཁྲིམས་ཡོངས་སུ་དག་པ་ལ་སྒྲིབ་པ་མེད་པའི་རྣམ་པར་ཐར་པ་མངོན་དུ་འགྱུར་རོ། །སྒྲིབ་པ་མེད་པའི་རྣམ་པར་ཐར་པ་མངོན་དུ་གྱུར་པས་ཇི་ལྟར་བདག་གིས་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་
དག་པར་འགྱུར་སྙམ་སེམས་ལ་མི་བྱ་སྟེ། འོན་ཀྱང་སྒྲིབ་པ་མེད་པའི་རྣམ་པར་ཐར་པ་མངོན་དུ་གྱུར་ན་བསྒྲིམ་མི་དགོས་པར་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་དག་པར་འགྱུར་ཏེ། སངས་རྒྱས་ཀྱི་ཞིང་གྲངས་མེད། བསམ་གྱིས་མི་ཁྱབ་མཚུངས་པ་མེད།
གཞལ་དུ་མེད། བརྗོད་དུ་མེད་པ་ཡོངས་སུ་དག་པར་འགྱུར་རོ། །འདི་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་ན། བཟོད་པའི་ཕ་རོལ་ཏུ་ཕྱིན་པ་ཡང་ཡོངས་སུ་དག་པར་འགྱུར་རོ། །དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་ལ་མཆོག་ཏུ་འཛིན་པ་མེད་ན་དེའི་
བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པར་འགྱུར་ཏེ། དེ་ལྟར་མཆོག་ཏུ་འཛིན་པ་གང་གིས་ཀྱང་ཚུལ་ཁྲིམས་ལ་མཆོག་ཏུ་འཛིན་པ་མེད་དོ། །འཇམ་དཔལ་སྔོན་བྱུང་བ་འདས་པའི་དུས་ན་བསྐལ་པ་དཔག་ཏུ་མེད་པ་ནས་བརྗོད་དུ་མེད་པའི་བར་དུ་དེའི་ཕ་རོལ་གྱི་ཡང་ཆེས་ཕ་རོལ་
ན་མི་འཆི་བ་ཀུན་དུ་འཕགས་པ་ཞེས་བྱ་བའི་བསྐལ་པ་བྱུང་སྟེ། འཇམ་དཔལ་མི་འཆི་བ་ཀུན་དུ་འཕགས་པའི་བསྐལ་པ་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ།
སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་འཇིག་རྟེན་དུ་བྱུང་ངོ་། །འཇམ་དཔལ་དེའི་ཚེ་དེའི་དུས་ན་དྲང་སྲོང་མི་འཁྲུགས་པའི་བློ་གྲོས་ཞེས་བྱ་བ་ཞིག་ཡོད་དེ། འཇམ་དཔལ་ཅིའི་ཕྱིར་དྲང་སྲོང་
དེ་མི་འཁྲུགས་པའི་བློ་གྲོས་ཞེས་བྱ་ཞེ་ན། འཇམ་དཔལ་སྔོན་བྱུང་བ་བསྐལ་པ་མི་འཆི་བ་ཀུན་དུ་འཕགས་པ་དེའི་ཕ་རོལ་གྱི་ཡང་ཆེས་ཕ་རོལ་ན་བསྐལ་པ་གྲངས་མེད་བརྗོད་དུ་མེད་པ་ན་དེ་བཞིན་གཤེགས་པ་རྣམ་པར་རྒྱལ་བ་དང་ལྡན་པ་ཞེས་བྱ་བ་བྱུང་སྟེ། དེའི་ཚེའི་ཚད་དཔག་ཏུ་མེད་

དེ། སངས་རྒྱས་ཀྱི་ཞིང་བརྗོད་དུ་མེད་ཅིང་ཚད་མེད་པ་ཡོངས་སུ་དག་པ་དང་ལྡན་ནོ། །ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་རྒྱལ་བ་དང་ལྡན་པ་དེའི་སངས་རྒྱས་ཀྱི་ཞིང་ན་བློ་གྲོས་འབར་བ་ཞེས་བྱ་བ་བྲམ་ཟེའི་རིགས་ཤིང་སཱ་ལ་
ཆེན་པོ་ལྟ་བུ་སངས་རྒྱས་ཁྲག་ཁྲིག་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་པ་ཞིག་ཡོད་དེ། བློ་གྲོས་འབར་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེ་ལ་མི་ཕྱེད་པའི་གཡོག་སངས་རྒྱས་ཁྲག་ཁྲིག་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པའི་བྲམ་ཟེ་ཁྲག་ཁྲིག་ཕྲག་བརྒྱད་
ཅུ་ཡོད་དོ། །ཡང་འཇམ་དཔལ་བློ་གྲོས་འབར་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེས་བཅོམ་ལྡན་འདས་དེ་བཞིན་གཤེགས་པ་རྣམ་པར་རྒྱལ་བ་དང་ལྡན་པ་དེ་ལ་ལོ་བྱེ་བ་ཁྲག་ཁྲིག་དགུ་བཅུར་མི་འཁྲུགས་པའི་དབྱིངས་ཞུས་ཏེ། བཅོམ་ལྡན་འདས་ཀྱིས་མི་འཁྲུགས་
པའི་དབྱིངས་མི་འཁྲུགས་པའི་དབྱིངས་ཞེས་གསུངས་ན་བཅོམ་ལྡན་འདས་མི་འཁྲུགས་པའི་དབྱིངས་དེ་གང་ལགས། ཅིའི་སླད་དུ་མི་འཁྲུགས་པའི་དབྱིངས་ཞེས་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་རྣམ་པར་རྒྱལ་བ་དང་ལྡན་པས་བློ་
གྲོས་འབར་བ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འབར་བ་མི་འཁྲུགས་པའི་དབྱིངས་མི་འཁྲུགས་པའི་དབྱིངས་ཞེས་བྱ་བ་དེ་ནི་འདུས་མ་བྱས་པའི་དབྱིངས་ཀྱི་ཚིག་བླ་དགས་སོ། །བློ་གྲོས་འབར་བ་ཅིའི་ཕྱིར་དབྱིངས་དེ་མི་འཁྲུགས་
པའི་དབྱིངས་ཞེས་བྱ་ཞེ་ན། བློ་གྲོས་འབར་བ་འདུས་མ་བྱས་པའི་དབྱིངས་ནི་སྩོགས་པ་ཡང