Kinh tạng Tây Tạng (Kangyur Đại Học) — 054_མདོ་སྡེ།_ཐ

་རྙེད་པར་བྱས་ཏེ། དེ་ནི་སངས་རྒྱས་ཀྱིས་བསྟན་པ་མནོད་ཅིང་སྔོན་གྱི་ངན་པ་ཡོན་པོ་མཐོང་བར་བྱས་སོ། །དགེ་སློང་ཕལ་མང་པོ་རྣམས་ཀུན་དགའ་གཞའ་སྟེ་ཁྱིམ་ནས་བྱུང་བར་གནང་སྟེ། ཚུལ་ཁྲིམས་ནོད་པ་ཐོབ་ཟིན་ནས་ལྷ་དང་མི་དང་འཇིག་རྟེན་
གྱིས་བསྐྱོད་ཅིང་བསྒྱུར་མི་ནུས་སོ། །ཤཱ་རིའི་བུ་གང་ལ་སོགས་པ་སད་དུ་རུང་བ་ཞེས་བྱས་ན་དེ་ནི་མུར་འདུག་གི་མིང་དང་། མུར་འདུག་གི་ཆོས་ལ་སྲེད་པའོ། །ཤཱ་རིའི་བུ་གང་ལ་སོགས་པ་མུར་འདུག་གི་ཆོས་ལ་སྲེད་པ་ཡིན། དེ་ནི་ཐོབ་པ་ཡོད་དུ་འཛིན་པ་དང་། བདག་ཏུ་ལྟ་བ་དང་། གང་
ཟག་ཏུ་ལྟ་བ་དང་། སེམས་ཅན་དུ་ལྟ་བ་དང་། ཡོན་པོ་ལ་འདོད་ཆགས་པ་དང་། ཉིད་ཀྱི་མཚན་མ་སྟོང་པའི་ཆོས་ལ་ཐེ་ཚོམ་གྱི་སེམས་སྐྱེ་བ་དང་། ཡོན་པོ་སྒྱུ་མ་མི་བདེན་པའི་སེམས་སྒྱུ་མའི་ཆོས་རྣམ་པ་མང་པོ་མནོས་པ་སྤྱད་དེ། མཆོག་གི་གཞུང་སྟོང་པར་འཇུག་མི་ཕོད་ཅིང་ཡོན་

པོའི་ལམ་རྣམས་སྤྱོད་པ་སྟེ། མི་དེའི་མིང་མུར་འདུག་གི་ཆོས་ལ་སྲེད་པ་ཞེས་བྱའོ། །ཤཱ་རིའི་བུ་སད་དུ་མི་རུང་བ་ནི་ཁ་དོག་རྣམ་པ་མང་པོ་སྤྱོད་པ་མི་གོས་སྐྱ་བོ་ཅན་ཡང་རུང་། ཆོས་གོས་བགོས་པ་ཡང་རུང་། དེ་ལྟ་བུ་མི་བདེན་པ་ཐོབ་བོ། །ཡོད་པར་མཐོང་བ་ཀུན་གྱི་མིང་
མུར་འདུག་ཅེས་བྱའོ། །ངའི་ཆོས་ཀྱི་ནང་ནས་བྱུང་ལ་ཚུལ་ཁྲིམས་མནོས་པ་དེ་ལྟ་བུའི་མི་ནི་སད་པའི་རིགས་སོ། །ཅིའི་ཕྱིར་ཞེ་ན། ཐོབ་པ་ཡོད་པར་འཛིན་པ་ནི་ངའི་ཆོས་ཀྱི་ནང་ན་ཡོན་པོ་ལ་ལྟ་བ་ཡིན་ཏེ་དེའི་མིང་དགྲ་ཆེན་པོ་ཞེས་བྱའོ། །འཇིག་རྟེན་ཐམས་ཅད་ཀྱི་ནང་ན་ལྷ་
དང་མིའི་དགྲའོ། །དེའི་མིང་འཇིག་རྟེན་ཐམས་ཅད་ཀྱི་དགྲ་སྡང་བ་སྟེ། སངས་རྒྱས་རྣམས་ཀྱི་དགྲ་ཆེན་པོའོ། །ཤཱ་རིའི་བུ་ཡོན་པོ་ལྟ་བུའི་མི་དེ་ངས་ཀྱང་ཁྱིམ་ནས་བྱུང་ཞིང་ཚུལ་ཁྲིམས་མནོད་དུ་མ་གནང་ངོ་། །ཤཱ་རིའི་བུ་ཆོས་སོ་ཅོག་ཐམས་ཅད་ལ་བདག་ཏུ་ལྟ་བ་མེད་དོ། །མི་
ལ་ལ་ཞིག་གིས་དེ་ལ་བཟོད་པ་སྐྱེ་བ་དང་། ཆོས་སོ་ཅོག་སྟོང་པ་དང་བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་པར་མི་ནུས་ཤིང་ཡིད་ཆེས་ཤིང་ཤེས་པར་མ་ནུས་པའི་ཆོས་ཀྱི་ནང་དུ་ཡོན་ལེན་ན་མིང་མི་གཙང་བ་ཞེས་བྱ་སྟེ། མི་དེས་སངས་རྒྱས་ལ་
ཡོན་མི་འབུལ་ཆོས་ལ་ཡོན་མི་འབུལ། དགེ་འདུན་ལ་ཡོན་མི་འབུལ་བར་ནན་གྱིས་ངའི་ཆོས་སུ་ཞུགས་ཏེ་ལུས་ནི་དགེ་སྦྱོང་ཡིན་ལ་སེམས་ནི་མུར་འདུག་ཡིན་ཏེ། ཆོས་རྐུ་བའི་མི་ཞེས་བྱའོ། །ཤཱ་རིའི་བུ་མ་འོངས་པའི་དུས་ན་དགེ་སྦྱོང་ཞིག་ཡོད་པ་ལུས་མི་འཆོས། ཚུལ་ཁྲིམས་མི་སྤྱོད།
སེམས་མི་འཆོས། ཤེས་རབ་མི་སྤྱོད་དེ་ཡང་དག་པར་གཤེགས་པས་བཤད་དོ་ཅོག་དང་ཡང་དག་པར་གཤེགས་པས་སྤྱད་དོ་ཅོག་ལ་ཡང་བྲུན་ཏོ་བརྙས་སོ། །ཡང་དག་པར་གཤེགས་པས་ནི་རྟག་པར་མཆོག་གི་གཞུང་གི་སྟོང་པ་ལ་རི་མོ་གུས་ཤིང་ཡོན་གསོལ་ཏེ་རྟག་པར་སྤྱོད་པ་ལ་
སྲེད་ན། དགེ་སློང་དེ་རྣམས་ཀྱིས་ཡང་དག་པར་གཤེགས་པས་ཡང་དག་པའི་དབྱིངས་མཐའ་ཡུན་དུ་སྟོང་པའི་ཆོས་སྤྱོད་པ་ལ་ཡང་ཞིང་བྲུན་ཏོ། །ཤཱ་རིའི་བུ་དེའི་ཚེ་དགེ་སློང་ལ་ལ་ཉོན་མོངས་པའི་ལས་སྤྱོད་པ་ཡོད་ན་ཡང་ཀུན་གྱིས་བརྙས་ཏེ་བྲུན་ཏོ། །ད་ངའི་སློབ་མ་སྟོང་པ་སྤྱོད་པ་ཡོད་ན་

ངས་དགའོ་ཞེས་བསྟོད་དེ། སེམས་བདེ་བར་བབ་པ། དེའི་ཚེ་མི་དེས་སྟོང་པ་སྤྱོད་པ་ཡང་བརྙས་ཏེ། མི་སྲ་མི་མཁྲངས་འབའ་ཞིག་གིས་དོན་ཚོལ་ལོ། །བདག་ཏུ་ལྟ་བ་ཡོད་པ་དང་། ཆོས་སོ་ཅོག་ཡོད་པ་སྤྱད་དེ། དེ་ལྟ་བུ་ལ་སོགས་པའི་དོན་གྱིས་ཕལ་
གྱི་སེམས་དགའ་བར་བྱས་སོ། །ལ་ལ་ཞིག་གིས་ཆོས་སོ་ཅོག་སྟོང་པར་བཤད་ན་མི་དེ་ལ་ཡང་བརྙས་སོ། །ཅིའི་ཕྱིར་ཞེ་ན། ཤཱ་རིའི་བུ་ཆོས་ནི་དེ་བཞིན་པའི་རིགས་ཏེ། སེམས་ཀྱི་དགེ་བའི་རྩ་བ་ཆད་དུ་བྱེད་ན་ཕྱི་མོ་གཟུགས་མངོན་པར་བྱུང་ངོ་། །ཡང་དག་པའི་བདེན་པ་དམ་
པའི་ཆོས་འཇིག་རྟེན་ན་འདུག་ན་གནོད་པ་མེད་དེ། དཔེར་མི་གཏི་མུག་གིས་སྤོས་ཙན་དན་དང་ཤིང་ངན་པ་གཉིས་འདྲ་བར་འཛིན་པ་དང་མཚུངས་སོ། །ཤཱ་རིའི་བུ་སངས་རྒྱས་བསོད་སྐྱབས་ཀྱིས་བཤད་པ། མ་འོངས་པའི་དུས་ན་སངས་རྒྱས་ཤཱཀྱ་ཐུབ་པའི་སློབ་མ་རྣམས་ཀྱིས་
གསོ་བའི་ཁེའི་ཕྱིར་གོས་སྐྱ་བོ་ཅན་རྣམས་ལ་མཆོག་གི་གཞུང་སྟོང་པ་བཤད་ན། དེའི་ཚེ་ཁྱིམ་ན་འདུག་པ་དང་། ཁྱིམ་ནས་བྱུང་བ་གཏི་མུག་མང་པོས་མ་མནོས་སོ། །ལོག་གལ་ནས་ཡིད་མི་ཆེས་ཤིང་སླར་འཕྱ་སྐུར་ནས་བསོད་ནམས་ཆེན་པོ་སྟོར་ཏོ། །རྒྱུ་རྐྱེན་འདི་ལྟ་བུ་སྤྱད་
པས་ན་མཐར་ལམ་ངན་པར་ལྟུང་ངོ་། །ཤཱ་རིའི་བུ་དེའི་ཚེ་འགལ་བ་མང་པོ་ཡོད་དོ། །རྩོད་པ་འཆང་། བདག་ཏུ་ལྟ་བ་འཆང་། གང་ཟག་འཆང་། སེམས་ཅན་འཆང་། ཚེར་འཛིན་པ་འཆང་། སྲོག་ཏུ་འཛིན་པ་འཆང་ངོ་། །དགེ་བའི་ཆོས་ཉུང་ངུ་བྱེད་པས་གསོ་བའི་ཁེ་
འབའ་ཞིག་ལ་སྲེད་དེ། བདེན་པར་གཏི་མུག་ཡིན་ན་རང་ན་རེ་ཤེས་རབ་ཡོད་ཅེས་ཟེར་རོ། །གཅིག་ལ་གཅིག་ལོག་གལ་དེ་རྟག་པར་འཐབ་རྩོད་ཅིང་དོན་ཡོད་པ་ལ་གཅོད་པ་སྲེད་དེ། ཁོན་དང་ཕྲག་དོག་གི་སེམས་སྐྱེས་ནས་མི་དེས་དགེ་སྦྱོང་གི་སེམས་བཏང་སྟེ་གསོ་བའི་ཁེ་འབའ་
ཞིག་ཚོལ་ལོ། །འཚོ་ནམ་གྱི་དོན་མང་པོ་ལ་སྲེད་དེ་སྦྱར་བ་གཅིག་པུ་མ་ཡིན་ནོ། །རྟག་པར་མི་གཞན་གྱི་གཡོ་འཚང་ཚོལ་བ་ལ་སྲེད་དེ། རང་གི་ཉེས་པ་སྦས་ནས་ལེགས་པའི་དོན་བརྗོད་ཅིང་བཤད་དོ། །ད་ལྟར་གྱི་དགེ་སློང་ནི་ལེགས་པའི་དོན་སྦས་བཅབས་ཏེ་རང་གི་ཉེས་

པ་ངན་པ་ཕྱུང་ངོ་། །དེ་ཙམ་གྱི་ཚེ་ཀུན་གྱིས་ཚུལ་ཁྲིམས་ལྕི་བས་བསྲུང་ཞིང་གཟུང་མི་ནུས་ཏེ་ཁོང་དུ་ཆུད་པ་མེད་དོ། །གཞུང་གི་བསོད་ནམས་བཤིག་སྟེ་ཆོས་སོ་ཅོག་མི་འགྱུར་ཞིང་ཉིད་ཀྱི་མཚན་སྟོང་པ་ལ་ཇི་ལྟ་བུར་བྱ་མི་ནུས་ཞེས་འཛེར་ཏོ། །རྩེད་མོ་བྱེད་པའི་མི་འདའ་རས་པ་བསྒྱུར་
ཅིང་བསྟན་པ་མང་པོ་བྱས་ནས་ཅི་ཡང་ཤེས་པ་མེད་པར་མཐོང་ན་ཤིན་ཏུ་བགད་དོ། །ཅིའི་ཕྱིར་ཞེ་ན། རྩེད་མོའི་ཆོས་མི་ཤེས་པས་འཐབ་སྟེ་ངོ་མཚར་སྙམ་སྟེ། ཡོད་དཀོན་པའི་སེམས་སྐྱེས་ནས་དངངས་དོགས་ཏེ་ཆེར་བགད་དོ། །དེ་ལྟ་སྟེ་ཤཱ་རིའི་བུ་དེའི་ཚེ་ཡང་དག་པའི་བདེན་པའི་
དགེ་སློང་གིས་སྟོང་པ་ཞི་བའི་ཆོས་འཆད་ན་སྲོག་གསོ་བའི་ཁེ་ཚོལ་བ་ཀུན་གྱིས་ཁྲེལ་ཏེ་བགད་དོ། །ཅིའི་ཕྱིར་ཞེ་ན། མི་དེས་སངས་རྒྱས་ཀྱི་ཆོས་ཀྱི་གཞུང་མ་རིག་པས་སྟོང་པའི་ཆོས་བཤད་པ་ཐོས་ནས་དངངས་དོགས་ཤིང་འཇིགས་སྐྲག་གོ། ཤཱ་རིའི་བུ་ཁྱོད་ཀྱིས་མི་འདི་ལ་ལྟོས་
དང་། བདེ་སྐྱིད་པའི་གནས་ལ་རྒུད་པའི་མྱ་ངན་སྐྱེས་སོ། །རྒུད་པའི་མྱ་ངན་གྱི་གནས་ལ་ནི་བདེ་སྐྱིད་པའི་སེམས་སྐྱེས་ཏེ། མི་དེ་ཕྱིན་ཅི་ལོག་པས་དགེ་བའི་ཆོས་ནི་ལོག་པར་སྤྱད། ངན་པའི་ཆོས་ནི་མ་ལོག་པར་སྤྱད་དོ། །ཤཱ་རིའི་བུ་དེ་ལྟ་བུའི་མི་གཏི་མུག་ལ་སེར་སྣ་དང་། འདོད་
ཆགས་དང་། ཞེ་སྡང་དང་། གཏི་མུག་མང་དུ་སྲེལ་ཏེ། ཆོ་ག་ཚང་ནས་མི་དགེ་བ་གསུམ་གྱི་རྩ་བ་སྤྱད་དོ། །ཤཱ་རིའི་བུ་ངས་ཚུལ་ཁྲིམས་འཛིན་པའི་དགེ་སློང་ལ་ཕན་བསོད་པ་བྱ་བའི་ཕྱིར་ཚུལ་ཁྲིམས་ཉིས་བརྒྱ་ལྔ་བཅུའི་ཆོས་ཡིག་བཤད་དོ། །དེ་ལྟ་བུའི་མི་གཏི་མུག་གིས་
འཇིག་རྟེན་གྱི་རྒྱུ་རྐྱེན་ཆུང་ངུ་སྤྱད་དེ། ཁྱིམ་ན་འདུག་པ་ལ་བཤད་དེ་ཡི་གེར་ཡང་བྲིས་ནས་གོས་སྐྱ་བོ་ཅན་ལ་ཡང་བསྟན་ཏོ། །ཤཱ་རིའི་བུ་དེ་ལྟ་བུའི་མི་གཏི་མུག་གིས་བཤད་པ་ཆོས་སོ་ཅོག་སྟོང་པ་དང་། རང་གི་མཚན་མ་བྱ་ག་ལ་ནུས་ཞེས་འཛེར་ཏོ། །ཅིའི་ཕྱིར་ཞེ་ན། དེ་ལྟ་བུའི་མི་གཏི་
མུག་གིས་འཇུག་པ་དང་། བརྐམ་པ་དང་། མྱ་ངན་འཁྲུག་ཡང་བསལ་མི་ནུས་ན། མ་རིག་པའོ་ཅོག་ཆོ་ག་མ་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེའི་ཚེ་ཚུལ་ཁྲིམས་ལུགས་འཛིན་པའི་དགེ་སློང་དགེ་བ་སློབ་མི་ནུས་སོ། །ཆོས་སོ་ཅོག་སྟོང་པར་ཡང་ལེགས་པར་མི་སློབ་བོ། །མདོ་

སྡེ་ཁ་ཏོན་དང་ལེགས་པར་མི་སློབ་བོ། །ཤཱ་རིའི་བུ་ཚུལ་ཁྲིམས་ལུགས་འཛིན་པའི་དགེ་སློང་གིས་ལེགས་པར་སློབ་མི་ནུས་ཞེས་བྱ། ཡང་དག་གཤེགས་པས་ཆོས་ཡི་གེ་ནང་ན་བསླབས་བཤད་པ་གསུམ་ཡོད་དེ། དགེ་བའི་ཚུལ་ཁྲིམས་བསླབ། དགེ་བའི་
སེམས་བསླབ། དགེ་བའི་ཤེས་རབ་བསླབས་ཏེ། མི་དེས་བསླབ་པ་གསུམ་ལ་དགེ་བའི་བསླབ་མ་ནུས་ཏེ། མང་པོ་ཐོས་པ་རྒྱུ་རྐྱེན་འབའ་ཞིག་སྤྱད་ནས་མི་གཞན་ལ་ཡང་བརྙས་ཏེ། མི་དེ་ནི་དགེ་བའི་ཆོས་སྒྲིབ་ཅིང་གཅོད་པ་ཡིན་ཏེ། དེ་ལྟ་བུའི་མི་གཏི་མུག་གིས་ཆོས་བཞིན་དུ་ལན་གློན་
ཞིང་འདྲི་བར་ཡང་མི་ནུས་ན། མཐའ་ཡུན་དུ་ཅི་ཡང་མེད་པ་ལ་བརྩོན་འགྲུས་སྤྱོད་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་ཙམ་གྱི་ཚེ་ཚུལ་ཁྲིམས་ཞིག་པའི་དགེ་སློང་ནི་གོས་སྐྱ་བོ་ཅན་གྱི་གཡོག་བྱེད་ཅིང་། ཕོ་ཉར་མངགས་ཤིང་གདུལ་བ་དང་། སྨན་གྱི་ཆོས་ཀྱིས་བདག་རང་གསོ་
བར་བྱེད་དོ། །ཤཱ་རིའི་བུ་ད་ཁྱོད་ལྟོས་ཤིག་དང་། མི་ངན་པ་དེས་ངའི་ཆོས་ལས་ཁྱིམ་ནས་བྱུང་ནས། ཚུལ་ཁྲིམས་མནོས་ནས་ཡོན་མནོད་པ་ཐོབ་ནས་སླར་ང་ལ་དགྲར་འཛིན་ཏོ། །ཤཱ་རིའི་བུ་དེའི་ཚེ་གནམ་ངོས་བཞིའི་ལྷའི་རྒྱལ་པོ་དང་དབང་པོ་དང་། ཚངས་པའི་རྒྱལ་པོ་ཆེན་པོ་དང་། བརྒྱ་
སྟོང་ཁྲི་འབུམ་གྱི་ལྷ་གཞན་ཀུན་ཀྱང་ངའི་ཆོས་ཀྱི་ནང་ན་དེ་ལྟ་བུ་ཞིག་ཉམས་པ་མཐོང་ནས་ཀུན་ཤིན་ཏུ་མྱ་ངན་བྱེད་ཅིང་མི་དགའ་སྟེ། ངུས་ནས་མཆི་མ་བབ་བོ། །ཤཱ་རིའི་བུ་དེ་བདེན་པར་ན་ང་ལ་རྟེན་ཅིང་གོས་སྐྱ་བོ་ཅན་གྱི་མཚན་མ་སྦྱོར་ཞིང་བྱེད་པའི་མི་རིགས་སོ། །ཅིའི་ཕྱིར་ཞེ་ན། སངས་རྒྱས་
ཤཱཀྱ་ཐུབ་པའི་སློབ་མ་རྣམས་དང་། ལྷ་དང་། ཀླུ་དང་། ལྷ་མ་ཡིན་གྱིས་བཀོལ་ཞིང་བདག་པོ་ཡང་བྱ་བ་རིགས་ན། ཀླུ་དང་ལྷ་མ་ཡིན་གྱིས་ངའི་སློབ་མ་ལ་བཀོལ་ཞིང་བདག་པོ་མ་བྱས་ན་དེ་ལྟ་བུའི་མི་གཏི་མུག་གོས་སྐྱ་བོ་ཅན་ལ་ཉེ་བསྙེན་པས་ཆོས་སོ་ཅོག་གི་གཞུང་སྟོང་པ་བཤད་སྦྱངས་ཏེ་
ཁོང་དུ་ཆུད་པར་ནུས་ཞེས་ཟེར་ན་བདེན་པ་ཡོང་མེད་དོ། །ཤཱ་རིའི་བུ་དེའི་ཚེ་ཚུལ་ཁྲིམས་ཞིག་པའི་དགེ་སློང་གིས་ཆང་ཕོར་བུ་གང་ཞིག་ཐོབ་ནའང་གོས་སྐྱ་བོ་རྣམས་ལ་སངས་རྒྱས་ཀྱིས་དྲངས་བཤད་དོ། །ཁྱོད་ཀྱི་ཡིད་ལ་ཇི་སྙམ། འདོད་ཆགས་དང་། ཞེ་སྡང་དང་། གཏི་མུག་མང་པོ་དང་

ཆོས་ཡིག་ཀློག་པ་ལ་སྲེད་པ་མང་བ་དང་། ཐ་མལ་པའི་ཡི་གེའི་ཁེ་ལ་བརྐམ་ཞིང་སྤྱོད་པ་མི་གཙང་མི་གདང་བའི་མི་དེ་ལྟ་བུའི་མིས་ཅི་ཡང་མེད་པ་ཡུན་དུ་སྟོང་པའི་ཆོས་ཡིད་ཆེས་པར་ནུས་ཤིང་། དགེ་སྦྱོང་གི་འབྲས་བུ་ཆོ་ག་ཚང་བ་ཐོབ་པར་ནུས་སམ་མི་ནུས། བཅོམ་ལྡན་འདས་མི་
ནུས་ལགས་སོ། །ཤཱ་རིའི་བུ་དགེ་སློང་ལ་ལ་ཞིག་གིས་གོས་དང་ཁ་ཟས་དང་མལ་ཆ་དང་། རྩི་སྨན་ཐོབ་པ་ལ་ཕྱོགས་ན་ཚུལ་ཁྲིམས་འཛིན་པ་གཙང་གདང་སྟེ། མང་པོ་འཛིས་པ་དང་། ཅལ་ཅོལ་གྱི་ཚིག་ལ་མི་སྲེད། ཕྱི་ལོགས་ཀྱི་གཞུང་ལ་མ་ཆགས་ཏེ། ཉིན་མཚན་དུ་བརྩོན་
འགྲུས་པ་ནི་མགོ་ཚིག་པའི་ར་མདའ་བྱེད་པ་བཞིན་ཏེ། སེམས་གཅིག་ཏུ་དྲང་པོའི་འཕྲུལ་གྱི་ལམ་བརྒྱད་འགྲུས་པར་སྤྱད་ན་མི་དེས་འོན་ཀྱང་སྟོང་པའི་ཆོས་ཅི་ཡང་ཐོབ་པ་མེད་པའི་ཁོང་དུ་ཆུད་པར་དཀའ་ན། དེ་ལྟ་བུའི་མི་གཏི་མུག་ཟབ་མོ་འདོད་པ་མེད་པ་ཡིད་ཆེས་ཤིང་ཤེས་པ་
མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཁྱོད་ལྟོས་ཤིག་དང་། མི་དེ་ཡང་དག་པར་གཤེགས་པའི་བླ་ན་མེད་པའི་གཞུང་མ་ཤེས་པས་ན། ངའི་དྲང་པོའི་ཆོས་བཤིག་སྟེ་བདག་རང་གི་ལུས་དང་མི་གཞན་གྱི་རྒུད་པའི་མྱ་ངན་ཆེན་པོ་བྱས་སོ། །དེ་ལྟ་བུའི་དགྲ་ཆེན་པོ་ནི་འཇིག་རྟེན་
གྱི་དགྲ་ཆེན་པོ་ཡིན་ཏེ། ཆོས་ཀྱི་ཡི་གེ་འདིའི་ནང་ན་ཡང་ཡོང་བྲལ་བའི་རིགས་ཞེས་བཤད་དོ། །དེ་ལྟ་བུས་མིས་ནི་སངས་རྒྱས་ཀྱི་དྲིན་ཀྱང་མི་ཤེས་ཏེ་རང་གི་བསམས་པ་བདག་ལ་སོགས་པ་ཁྱིམ་ནས་བྱུང་སྟེ། ཆོས་འདིའི་ནང་ན་སྤྱད་པའི་མི་རིགས་པ་རྣམས་ནི་སྤྱད་པ་མི་རིགས་སོ་སྙམ་དུ་
སེམས་སོ། །དེ་ལྟ་བས་ན་ཤཱ་རིའི་བུ་ཡང་དག་པར་གཤེགས་པས་མ་འོངས་པའི་དུས་ལ་ཇི་ལྟ་བུ་ངན་པ་གཅད་པའི་ཕྱིར་ཆོས་འདི་ལྟ་བུ་བཤད་དོ། །དགེ་སློང་ལ་ལ་ཞིག་ཚུལ་ཁྲིམས་མནོས་སོ་ཅོག་ཞིག་ཅིང་། ཆོས་བཤིག་དྲལ་ལ་དྲང་པོའི་མཐོང་བ་བཤིག་པ་ཞིག་གིས་ཆོས་
ཡིག་འདི་ཐོས་ན་འཇིགས་སྐྲག་སྟེ། ཚུལ་ཁྲིམས་སླར་ཟློག་གོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་མི་ནི་སེ་གོལ་གཅིག་གཏོགས་པ་ཙམ་གྱི་བར་དུ་འཕགས་པའི་མི་གཟུགས་དང་། ཆོས་གོས་ཅན་འདུག་པའི་ནང་ན་འདུག་པ་མི་རིགས། ལ་ལ་ཞིག་གིས་ཆོས་ཡིག་འདི་ཐོས་

ཏེ་སེམས་དགའ་གཞའ་ན། མི་དེའི་མིང་སངས་རྒྱས་རྣམས་ཡོན་གསོལ། སངས་རྒྱས་ཀྱི་ལམ་སྲུང་ཞིང་རིམ་གྲོ་བྱེད་པ་ཞེས་བྱ་བ་ཅིའི་ཕྱིར་ཞེ་ན། ཤཱ་རིའི་བུ་དེའི་མིང་སངས་རྒྱས་ལམ་ཡང་དག་པའི་དབྱིངས་ཞེས་བྱའོ། །ཕོ་དག་པ་མོ་དགེ་བ་ལ་ལ་ཞིག་དགེ་སྦྱོང་གི་ཆོས་
ཐོས་པར་འདོད་ན། ཆོས་ཡིག་འདི་ཉོན་ཅིག་དང་། བརྒྱ་སྟོང་ཁྲི་འབུམ་གྱི་དཔག་ཚད་འདས་པ་རིགས་སོ། །ཅིའི་ཕྱིར་ཞེ་ན། ཡང་དག་པར་གཤེགས་པ་སངས་རྒྱས་རྣམས་ཡུན་རིང་པོ་ཞིག་ལོན་ན། གདོད་འཇིག་རྟེན་དུ་འབྱུང་ངོ་། །འཇིག་རྟེན་དུ་འབྱུང་མོད་ཀྱི་བར་བར་དུ་ཟད་དོ། །
ལེའུ་དགུ་སྟེ་དོགས་པ་བྱེ་བྲག་ཕྱེད་པའི་ལེའུའོ།། །།སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། མི་རྣམ་གསུམ་ཞིག་ཡོད་པས་ཆོས་ཡིག་བཤད་པ་འདི་ཐོས་ན་སེམས་ལ་མི་དགའ་མི་དད་དོ། །གསུམ་གང་ལ་སོགས་པ་ཞེས་བྱས་ན། གཅིག་ནི་ཚུལ་ཁྲིམས་
ཞིག་པའི་དགེ་སློང་ངོ་། །གཉིས་ནི་དགེ་སློང་ཡར་སྐྱེ་བའི་མིའོ། །གསུམ་ནི་ཆོས་འཆད་པ་མི་གཙང་བ་དང་། བདག་ཏུ་ལྟ་བ་ལ་འདོད་ཆགས་ཏེ། །མི་དེས་འདི་ལྟ་བུ་བདེན་པའི་མཚན་མ་ཟབ་མོ་ཆོས་ཡིག་བཞིན་དུ་མི་འགལ་བ་ཡོང་སྤངས་ནས། དམུས་ལོང་གི་སྡེ་དང་གྲོགས་ཀྱི་ཚང་
བར་གང་རྒྱས་སོ། །དེ་ལྟ་བས་ན་ཤཱ་རིའི་བུ་ངའི་ཆོས་ཡིག་འདི་བསླབས་ཏེ་ཁྱོད་ལ་གཏམས་བཅོལ་ཏོ། །ཅིའི་ཕྱིར་ནས་ཤེས་བྱས་ན། ཆོས་ཀྱི་ཡི་གེ་འདི་ཡང་དག་པར་གཤེགས་པའི་ཕྱི་ན། གཙང་གདང་བར་ཚུལ་ཁྲིམས་འཛིན་པའི་དགེ་སློང་སེམས་ལ་འདི་ལྟ་བུ་ཆོས་ཡི་གེ་ཟབ་མོ་
ལ་དགའ་ཞིང་དད་པ་སྐྱེ་བར་ནུས་པ་ཚུལ་ཁྲིམས་གཙང་གདང་བས་རྟག་པར་བསྡུ་ཞིང་འཛིན་པར་བྱའོ། །ཚུལ་ཁྲིམས་ཞིག་པ་ནི་རྟག་པར་བསྲིངས་སྤང་ངོ་། །ཅིའི་ཕྱིར་ཞེ་ན། གཏི་མུག་གིས་ཡང་དག་པའི་བདེན་པའི་དྲང་པོའི་ཚིག་བཤད་པ་ཐོས་ན་སྡུག་བསྔལ་ཡིན་པར་འཛིན་ཏོ། །ཤཱ་
རིའི་བུ་ཚུལ་ཁྲིམས་ཞིག་པའི་དགེ་སློང་གིས་བྱད་གཟུགས་ཅིར་གྲུབ་པ་ཡང་དག་པར་གཤེགས་པས་ཞིབ་ཏུ་རྒྱ་ཆེར་བཤད་ཟིན་ཏོ། །ཤཱ་རིའི་བུ་ཚུལ་ཁྲིམས་བཤིག་པའི་དགེ་སློང་ནི་ཆོས་ཀྱི་ཚུལ་ཁྲིམས་འཛིན་པའི་ཆོ་ག་ལ་མ་དད་དོ། །གཏི་མུག་གི་མི་ནི་ཤེས་རབ་ལ་མི་དགའོ། །སེར་སྣ་ཅན་གྱི་མི་

ནི་སྦྱིན་པ་བཤད་པ་ལ་ཐོས་པར་མི་དགའོ། །ལེ་ལོ་ཡར་སྐྱེ་བ་ནི་དྲེགས་ཤིང་ལེ་ལོ་མེད་པའི་ཆོས་འདི་ཐོས་སུ་མི་དགའ་སྟེ། ཐོས་སུ་ཟིན་ནའང་དངངས་སྐྲག་པ་ནི་ཁུང་ཟབ་མོར་ལྷུང་བ་དང་མཚུངས་སོ། །འཇིག་རྟེན་གྱི་ཁེ་ལ་སྲེད་པ་ནི་ཞིམ་པོའི་རོ་ལ་འདོད་ཆགས་ཏེ། ཟས་ལ་
ཞེ་བསྐྲད་པ་ཐོས་ན། སེམས་ལ་མྱ་ངན་འཁྲུག་གོ། །མི་ལ་ལ་ཞིག་ཐ་མལ་པའི་ཡི་གེ་ཀློག་པ་ལ་སྲེད་ན། དེ་ལས་ན་ཐུབ་ཅིང་བདེན་དུ་ཟིན་པའི་འདུ་ཤེས་སྐྱེའོ། །ཚིག་ལ་འདོད་ཆགས་པ་ནི་ཅལ་ཅོལ་འཆད་པ་ལ་སྲེད་པའོ། །རང་བཟོའི་ཚིག་གི་སྙན་དངགས་འཆད་པ་ལ་
སྲེད་པ་ནི་སངས་རྒྱས་མཆོག་གི་གཞུང་ལ་གཙང་མའི་སེམས་མེད་པའི་སྟེང་དུ་ཆོས་འདི་ལ་ཡིད་མི་ཆེས་མི་གུས་སོ། །ཤཱ་རིའི་བུ་དཔེར་མི་མ་ནིང་དང་མཚུངས་སོ། །སྐྱེས་པའི་སྤྱད་པ་མེད་ན། སྐྱེས་པའི་ནང་དུ་ཕྱིན་པ་དང་མ་ནིང་གི་འདུ་ཤེས་སྐྱེད་དེ། སེམས་འདི་སྙམ་དུ་བྱེད་དོ། །
མི་འདི་གཞན་ལ་སོགས་པ་ཡང་བདག་དང་མི་མཚུངས་པ་མེད་སྙམ་བྱེད་དོ། །དེ་ལྟ་སྟེ་ཐ་མལ་པའི་ཡི་གེ་ལ་སྲེད་ཆགས་པ་ནི་རྟག་པར་ཚིག་རང་བཟོའི་སྙན་དངགས་པ་བརྒྱན་པ་ལ་སྲེད་དེ། སངས་རྒྱས་ཀྱི་མཆོག་གི་གཞུང་ལ་སེམས་ཀྱིས་རི་མོ་མི་གུས་སོ། །ཤཱ་རིའི་བུ་དེའི་ནང་ན་མི་ལ་
ལ་གཙང་གདང་བའི་ཆོས་ཡིག་འཆང་བ་ཡོད་ན་མི་དེ་ལ་ཡང་རི་མོ་མི་གུས་ཏེ། གཙང་གདང་བའི་ཚུལ་ཁྲིམས་འཛིན་པའི་དགེ་སློང་ལའང་ཡང་ཞིང་བཏུས་ཏེ། ཅིའི་ཕྱིར་ཞེ་ན། ཤཱ་རིའི་བུ་མུར་འདུག་གི་ཆོས་ཡི་གེ་ལ་ནི་ཡང་དག་པའི་ཚིག་བདེན་པ་མེད་དོ། །ཆོས་ཀྱིས་དྲེགས་ཤིང་ལེ་ལོ་
དང་མཐོང་ཞིང་རང་ཆེ་འདོད་པའི་རིགས་སོ། །ཅིའི་ཕྱིར་ཞེ་ན། དོན་དེ་ནི་སྐྱོ་བྲལ་བའི་མིའི་ཕྱིར་མ་ཡིན་ནོ། །མྱ་ངན་ལས་འདས་པ་མིའི་ཕྱིར་མ་ཡིན་ཏེ། མི་དེས་ཡིད་ཆེས་པ་ལ་སོགས་པ་རྩ་བ་བཞི་ཉམས་པས་ན། གནས་སོ་ཅོག་ལེགས་པའི་དོན་ཡོད་པར་ཡིད་མི་ཆེས་པ་ནི་མ་ནིང་
དང་མཚུངས་ཏེ། མི་གཞན་ཀུན་ལ་བདག་དང་མཚུངས་ཞེས་ཟེར་རོ། །ཤཱ་རིའི་བུ་དམུས་ལོང་གིས་ཁ་དོག་རྣམས་མི་མཐོང་བ་དང་མཚུངས་སོ། །དེ་ནི་ནག་པོའི་ཁ་དོག་དཀར་པོའི་ཁ་དོག་སྟེ། དཀར་ནག་གི་ཁ་དོག་མཐོང་བ་མ་མཐོང་ངོ་། །བཟང་པོའི་ཁ་དོག་མ་མཐོང་ངོ་། །མི་

སྡུག་པའི་ཁ་དོག་ཀྱང་མི་མཐོང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་རྨ་མཐིང་གའི་ཁ་དོག་ཀྱང་མི་མཐོང་། རིང་ཐུང་སྦོམ་ཕྲ་ལ་སོགས་པའི་གཟུགས་མི་མཐོང་། སྐར་མ་ཉི་ཟླ་མ་མཐོང་སྟེ། ཉི་ཟླ་དང་སྐར་མ་མཐོང་
བ་དེ་ལྟ་བུའི་མི་ལོང་བས་ཐལ་བྱུང་སེམས་འདི་སྙམ་བྱས་སོ། །དཀར་གནག་གི་ཁ་དོག་མེད། དཀར་གནག་གི་ཁ་དོག་མཐོང་བ་མེད། བཟང་པོ་དང་མི་སྡུག་པའི་ཁ་དོག་བྱས་པ་མེད། སྔོན་པོ་དང་། སེར་པོ་དང་། དམར་པོ་དང་། མཐིང་ག་དང་། རིང་ཐུང་དང་། ཕྲ་སྦོམ་དང་།
ཟབ་མི་ཟབ་དང་། ཉི་ཟླ་དང་། སྐར་མའི་ཁ་དོག་མེད། ཉི་ཟླ་སྐར་མ་མཐོང་བ་མེད་པས་ན་གཞན་ཀུན་ཀྱང་བདག་དང་མཚུངས་སྙམ་དུ་འཛིན་ཏོ། །མི་དམུས་ལོང་གི་སེམས་ཕྱིན་ཅི་ལོག་པས་གནས་སོ་ཅོག་ཐམས་ཅད་ཀུན་ལ་མུན་གནག་ཆེ་ཟེར་རོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་
སློང་ལེ་ལོ་ཡར་སྐྱེ་བའི་མི་མུར་འདུག་གི་བཤད་པར་ལྟུང་ངོ་། །དགེ་སློང་ཡང་དེ་དང་མཚུངས་ཏེ། སངས་རྒྱས་ཀྱི་ཟབ་མོ་ཆོས་ལ་ཡིད་མ་ཆེས་མ་དད་དེ། ཁོང་དུ་ཆུད་པར་མ་ནུས་སོ། །ཆོས་སོ་ཅོག་སྟོང་ཞིང་ཅིའང་མེད་པ་ཐོས་ན་ཡིད་མི་ཆེས་མ་དད་དོ། །ཁོང་དུ་ཆུད་པར་མ་
ནུས་སོ། །ཤཱ་རིའི་བུ་མི་གཞན་བཞིན་དུ་ཁྱོད་ལ་སོགས་པའང་ཡོན་པོའི་དབྱིངས་སུ་ལྟུང་ཞིང་དྲང་པོའི་ཆོས་མི་ཐོབ་ཀྱིས་དོགས་སོ། །དྲང་པོའི་ཆོས་འདི་སྤྱོད་པ་ནི་མིང་ཡང་དག་པའི་བདེན་པའི་དགེ་སྦྱོང་ཞེས་བྱའོ། །ཁྱོད་ཀྱིས་ཐོབ་བོ་ཅོག་ལ་མི་དེས་ཡིད་མི་ཆེས་པ་དཔེར་མི་
དམུས་ལོང་ན་རེ་དཀར་གནག་ལ་སོགས་པའི་ཁ་དོག་མེད་ཅེས་ཟེར་བ་དང་མཚུངས་སོ། །ཤཱ་རིའི་བུ་མི་དེས་དེ་ལྟ་བུའི་ཡོན་པོའི་དབྱིངས་སུ་བཞུགས་ཏེ་མུར་འདུག་གི་བཤད་པ་བཙལ་ནས་མང་པོའི་འཇིགས་པའི་ཚིག་ལ་སྲེད་དེ། མྱ་ངན་འཁྲུག་པའི་རང་བཞིན་ངན་པ་དང་། ཆོས་ངན་པ་
སྐྱེས་ཤིང་འཕེལ་ཏོ། །མི་དེས་ཆོས་སོ་ཅོག་སྟོང་ཡང་ཡིད་ཆེས་པར་མི་འགྱུར་ན་ཁོང་དུ་མི་ཆུད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཁྱོད་ཀྱི་ཡིད་ལ་ཇི་སྙམ་ཝས་སེང་གེ་ལྟར་བྱས་ན་བསྒྲགས་ཟིན་ཏམ། ད་བསྒྲག་གམ། ཕྱིས་བསྒྲག །སེང་གེའི་འགྲོས་བྱས་ན་ད་འགྲོ་བ་དང་། ཕྱིས་

འགྲོ་བ་དང་། འགྲོས་ཟིན་པ་ནུས་སམ་མི་ནུས། བཅོམ་ལྡན་འདས་མི་ནུས་ལགས་སོ། །ཅིའི་ཕྱིར་ཞེས་བགྱིས་ན་ཝའི་ཁ་དོག་དང་སྟོབས་དང་། སྒྲ་སྐད་སེང་གེ་ཙམ་མི་ཕོད་དོ། །ཝས་ནི་ཝའི་སྒྲ་འབའ་ཞིག་བགྱི་ནུས་སོ། །སྒྲ་ཞིག་བགྱིར་བཏབ་ན་ཝའི་སྒྲ་འབའ་ཞིག་འབྱུང་སྟེ་
སེང་གེའི་སྒྲ་མ་ལགས་སོ། །དེ་ཡིན་ནོ། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ལེ་ལོ་ཡར་སྐྱེ་བའི་དགེ་སློང་རང་དོན་དམ་པ་ཡིན་སྙམ་འཛིན་ཏོ། །ཆོས་འཆད་མི་གཙང་བ་ནི་འཛི་གེན་ཇིའི་བཤད་པ་མནོས་ཏེ། དོན་གཅིག་ལ་ཆགས་ཏེ་དམ་དུ་བཟུང་སྟེ་མ་བཏང་ངོ་། །འཇིག་རྟེན་གྱི་
ཁེ་ལ་བརྐམ་ཞིང་རིན་ཆེ་སྟེ་ཐ་མལ་པའི་ཡི་གེ་ཀློག་པ་ལ་སྲེད་པས་ཆོས་སོ་ཅོག་གི་བདེན་པ་ཁོང་དུ་ཆུད་པར་མ་ནུས་སོ། །མཚན་མ་མེད་པའི་ཆོས་ལ་ཡིད་ཆེས་ཤིང་མནོད་ནུས་ཞེ་ན། བདེན་པ་ཡོང་མེད་དོ། །ཤཱ་རིའི་བུ་དགེ་སློང་ལ་ལ་ཞིག་ལོ་གྲངས་ཀྱིས་རྒན་ཞིང་ལེགས་པ་ཡོད་ལ་
དགེ་སློང་གི་ནང་ན་ཀླུ་སྟེ། ཤེས་རབ་ཟབ་མོ་ཡོད་པ་དེ་ལྟ་བུའི་མིས་ཅིའང་མེད་པ་ཉིད་ཀྱི་མཚན་མ་སྟོང་པའི་ཆོས་དང་། བདག་ཏུ་ལྟ་བ་མེད་པ་དང་། གང་ཟག་མེད་པའི་ཆོས་ལ་ཡིད་ཆེས་པར་ནུས་སོ། །ཇི་ལྟ་ཞེ་ན། མི་དེ་མང་པོ་འཛིས་པའི་ཚིག་གོ་ཅོག་དང་དགེ་འདུན་ལ་མི་སྲེད་དོ། །
ཆོས་ཡིག་ཀློག་པ་དང་། གཉིད་ཀྱིས་ལོག་པ་དང་། དོན་མང་པོ་ལ་མི་སྲེད། གོས་སྐྱ་བོ་ཅན་གྱི་འཚོ་ནམ་དང་དོན་མི་བྱེད། ཕོ་ཉར་མངག་ཅིང་ཡི་གེ་ཁྱེར་ཞིང་སྐྱེལ་བ་མི་བྱེད། སྨན་གྱི་ཆོས་མི་བྱེད། སྨན་དཔྱད་མི་ཀློག །ཚོང་སྤོགས་མི་བྱེད། འཇིག་རྟེན་གྱི་ཚིག་བརྗོད་ཅིང་སྨྲ་བ་
ལ་མི་སྲེད་དོ། །འཇིག་རྟེན་ལས་འབྱུང་བ་བཤད་པ་འབའ་ཞིག་ལ་དད་ཅིང་དགའོ། །མི་ཆོས་སོ་ཅོག་སྟོང་པར་ཡིད་ཆེས་པར་ནུས་ཏེ། ཆོས་སོ་ཅོག་མེད་ཅིང་མི་ལྡན་མི་འཇུག་གོ། །མི་དེ་ལྟ་བས་ན་གདོད་ཡང་དག་པའི་བདེན་པའི་དབྱིངས་སུ་གྲུབ་པར་ནུས་ཏེ། བདེན་པ་བཞིན་གྱི་ཡང་
དག་པའི་སེང་གེའི་སྒྲ་ནུས་ཏེ། ཝའི་སྒྲ་མ་ཡིན་ནོ། །ཤཱ་རིའི་བུ་དགེ་སློང་ལ་ལ་ཞིག་ཐ་མལ་པའི་ཡི་གེའི་གཞུང་ལ་ཆགས་པའི་ཞིག་ཡོད་ན་མི་དེས་སངས་རྒྱས་ཀྱི་ཟབ་མོ་དམ་པའི་མཆོག་བཏང་སྟེ། མུར་འདུག་གི་ཆོས་ཁ་ཏོན་དང་། གཟུགས་སུ་འཛིན་པ་ཞེས་བྱའོ། །ཕལ་

མང་པོའི་ཕྱིར་བཤད་ནའང་ཝའི་སྒྲ་འབའ་ཞིག་ཟེར་རོ། །ཤཱ་རིའི་བུ་དེ་ལྟ་བུའི་མི་ངན་པ་ནི་མིང་རུལ་པའི་དགེ་སྦྱོང་ཞེས་བྱའོ། །ཅིའི་ཕྱིར་ཞེ་ན། མུར་འདུག་གི་གཞུང་ཡིན་གྱི། སངས་རྒྱས་ཀྱི་ཆོས་མ་ཡིན་པའི་ཕྱིར་རོ། །ཤཱ་རིའི་བུ་མུར་འདུག་གི་ཆོས་ལ་
ཆགས་པའི་དགེ་སློང་ནི་བདག་རང་སངས་རྒྱས་ཀྱི་སློབ་མ་ཡིན་ཞེས་བརྗོད་པར་མི་རིགས་སོ། །ཅིའི་ཕྱིར་ཞེ་ན། དགེ་སློང་ཤཱཀྱའི་བུ་ནི་འཛི་གེན་ཇིའི་ཆོས་མི་འཆད་དེ། ཕལ་མང་པོའི་ནང་ན་སངས་རྒྱས་ཀྱི་ཆོས་འབའ་ཞིག་འཆད་དོ། །མི་ལ་ལ་ཞིག་མི་གཙང་བའི་ཚིག་ལ་
ཆགས་ན་སེང་གེའི་སྒྲ་དབྱངས་ཀྱང་ཝའི་སྒྲ་སྐད་དུ་གྲགས་ཏེ། མི་དེ་སངས་རྒྱས་ཀྱི་ཆོས་ཀྱི་མཆོག་གི་གཞུང་ཤེས་པར་མི་ནུས་སོ། །ཤཱ་རིའི་བུ་ངས་ཁྱོད་ལ་བྱེ་བྲག་ཕྱེད་པར་བསྒོའོ། །མི་ལ་ལ་ཞིག་ཚུལ་ཁྲིམས་འཛིན་པ་དང་། བསམ་གཏན་ཐུབ་པ་དང་། ཤེས་རབ་ཆོ་ག་ཚང་
སྟེ། མི་འཇུང་། མི་བརྐམ། ཞེ་སྡང་གཏི་མུག་གིས་མ་ཞེན། གཙང་སྒྱུ་མི་སྲེལ། ངན་པས་སྐྱེས་པའི་སེམས་ཡོད། ཡང་དག་པའི་བདེན་པའི་ཚིག་སྨྲ་ཞིང་རྟག་པར་འབའ་ཞིག་གནས་ལ་སྲེད། ཉལ་ཞིང་གཉིད་ལོག་པ་ལ་མི་སྲེད། སྟོང་པ་མཚན་མ་མེད་པ་དང་། སྨོན་པ་
མེད་པ་དང་། འགོག་པ་མེད་པའི་སྤྱོད་པ་ལ་སྲེད་དོ། །ཟབ་མོ་འདོད་པའི་སེམས་སྐྱེས་ཏེ། སངས་རྒྱས་ཀྱི་ཆོས་ཀྱི་མཆོག་གི་གཞུང་ཤེས་པ་བཙལ་ནས། འཇིག་རྟེན་གྱི་ཚིག་ལ་ནི་མི་དགའ་འཇིག་རྟེན་ལས་འབྱུང་བའི་ཚིག་ལ་དད་དེ། ཚུལ་ཁྲིམས་རྣམས་རྫོགས་པར་བཟུང་
ནས། དོན་ངན་པ་ཐམས་ཅད་དང་། ངན་པའི་བཤེས་གཉེན་ཀུན་བསྲིངས་སྤངས་ཏེ། དེ་ལྟ་བུའི་ཆོས་ལ་གནས་པས་སྟོང་པ་ཅི་ཡང་མེད་པའི་ཆོས་ཤེས་པར་ནུས་སོ། །ཅིའི་ཕྱིར་ཞེ་ན། ཤཱ་རིའི་བུ་སྤྱད་པ་དེའི་མིང་ནི་མི་ཆེན་པོའི་སྤྱོད་པ་ཞེས་བྱ་སྟེ། གསོ་བའི་ཁེ་ལ་བརྐམ་
ཞིང་སྲེད་པའི་ཁེ་མ་ཡིན་ཏེ། གཏི་མུག་བླུན་པོའི་ཐ་མལ་པའི་སྤྱོད་པ་མ་ཡིན་ནོ། །སུན་བྱུང་ཞིང་ཞིགས་པའི་དགེ་སྦྱོང་གི་སྤྱོད་པ་མ་ཡིན་ནོ། །སྤང་ཕུབ་ཀྱི་དགེ་སྦྱོང་གི་སྤྱོད་པ་མ་ཡིན་ནོ། །སྒྱུ་མ་མིང་གི་དགེ་སྦྱོང་གི་སྤྱོད་པ་མ་ཡིན་ནོ། །ཤཱ་རིའི་བུ་ཆོས་སོ་ཅོག་གི་བདེན་པའི་མཚན་མའི་

མཐའ་ཡུན་དུ་སྟོང་པ་ཉིད་སངས་རྒྱས་ཀྱི་ལམ་ཡིན་ཏེ། འཇིག་རྟེན་གྱི་ནོར་ཁེ་ལ་སྲེད་པ་དང་། ཆོས་མི་གཙང་བ་ཐོབ་པར་མི་ནུས་སོ། །ཤཱ་རིའི་བུ་དེའི་མིང་ནི་ཤེས་རབ་ཆེན་པོའི་ས་ཞེས་བྱ་སྟེ། མུར་འདུག་ལ་བརྐམ་སྲེད་པའི་ཆོས་མ་ཡིན་ནོ། །བདག་ཏུ་ལྟ་བ་དང་། གང་ཟག་
ཏུ་འཆད་པའི་ས་ཡིན་ནོ། །ཤཱ་རིའི་བུ་བདེན་པར་བདག་ཏུ་ལྟ་བ་ཡིན། གང་ཟག་ཏུ་ལྟ་བ་ཡོད་དུ་ཟིན་ན་བདག་ཏུ་ལྟ་བ་དང་། གང་ཟག་ཏུ་ལྟ་བ་འཆད་པ་ལ་བདེན་པའི་མཚན་མ་ཡོད་པའི་རིགས་ཀྱིས་བདེན་པ་བཞིན་དུ་འདྲི་བ་རིགས་སོ། །བདག་ཏུ་ལྟ་བ་ཡོད་དུ་ཟིན་ན། ཁ་དོག་ཇི་
ལྟ་བུ་ཡིན། སྔོན་པོ། སེར་པོ། དམར་པོ། དཀར་པོའམ། ལུས་ཀྱི་ནང་དུ་འདུག་གམ། ལུས་ཀྱི་ཕྱི་རོལ་དུ་འདུག་གམ། ལུས་ཆུབ་པར་འདུག་གམ། མར་གསོ་མ་ལ་འདུག་པ་དང་མཚུངས་སམ། ཤཱ་རིའི་བུ་གསོ་མའི་ནང་ན་མར་ཡོད་པ་ནི་འབྱུང་དུ་ཡང་རུང་། བསྟན་དུ་
ཡང་རུང་། བདག་ཏུ་ལྟ་བ་ནང་ལོགས་ན་འདུག་ཏུ་ཟིན་ན། བདག་ཏུ་ལྟ་བ་ཡོད་པར་འཆད་པས་བཤད་པ་རིགས། བསྟན་པ་རིགས་ཏེ། གསོ་མའི་ནང་ནས་མར་འབྱུང་ཞིང་མར་བསྟན་པ་དང་མཚུངས་སོ། །མཆོག་གི་གཞུང་གི་ནང་ནས་ནི་བདག་ཏུ་ལྟ་བ་བཙལ་ཀྱང་རྙེད་པར་མི་རུང་
ངོ་། །དེ་ལྟ་བས་ན་ཤེས་པར་བྱོས་ཤིག །བདག་ཏུ་ལྟ་བ་དང་། གང་ཟག་ཡོད་པར་འཆད་པའི་མི་དེ་ལ་དགེ་སྦྱོང་གི་ཁྲིམས་ཀྱང་མེད་ན། དགེ་སློང་གི་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ་ཤེས་པར་བྱོས་ཤིག །ཡོན་པོ་ལ་འདོད་ཆགས་པ་ནི་བདག་ཏུ་ལྟ་བ་ལ་ཆགས།
སེམས་ཅན་ལ་ཆགས། ཚེ་སྲོག་ལ་ཆགས་ཏེ། སྤྱི་བོའི་ཆོས་སུ་ལྷུང་ངོ་། །མི་དེ་དེ་ལྟ་བུར་ཡོན་པོ་ལ་འདོད་ཆགས་པས་ན། གསོ་བའི་ཁེ་ལ་བརྐམ་པའི་སེམས་ཀྱང་བསམ་མི་ནུས་ན་མྱ་ངན་འཁྲུག་པའི་ཞིབ་མོ་ལྟ་སྨོས་ཀྱང་ཅི་དགོས། ཤཱ་རིའི་བུ་སྟོང་པ་ཁོང་དུ་ཆུད་པ་ལ་
འདོད་ཆགས་དང་། ཞེ་སྡང་དང་གཏི་མུག་དང་གསོ་བའི་ཁེ་བཀབ་ཅེས་ཟེར་ན་བདེན་པ་ཡོང་མེད་དོ། །སྤྱི་བོ་ཆོས་སུ་ཡོང་མི་ལྟུང་ངོ་། །ཤཱ་རིའི་བུ་བདག་ཏུ་ལྟ་བའི་སེམས་ལ་ཆགས་པ་ནི་ཚེ་སྲོག་ཡོད་ཅེས་ཟེར་བ་སྟེ། ཚེ་སྲོག་གི་རྒྱུ་རྐྱེན་གྱིས་ན་གསོ་བའི་ཁེས་དཀྲིས་ཏེ་ལམ་བསྒྲིབས་

བཅད་དོ། །ཤཱ་རིའི་བུ་བདག་ཏུ་ལྟ་བ་དང་། གང་ཟག་ཏུ་ལྟ་བ་ནི་ངའི་ཆོས་ལ་ཁྱིམ་ནས་བྱུང་བ་སྟེ། ཆོས་བྱེད་མོད་ཀྱི་དེ་ལྟ་བུའི་མི་གཏི་མུག་གཙང་གདང་བའི་ནང་ནས་ནི་ཁྱིམ་ནས་བྱུང་བ་མ་ཡིན་ནོ། །ཅིའི་ཕྱིར་ཞེ་ན། འཛི་གེན་ཇིའི་ཁྱིམ་ནས་བྱུང་
བ་ནི་ཀུན་ངའི་སེམས་ལ་ཆགས་ཏེ་ཐོབ་པ་ཡོད་པར་འཛིན་ཏོ། །ཤཱ་རིའི་བུ་ཐོབ་པ་ཡོད་པར་འཛིན་པ་ནི་ཐོག་མ་ཞེས་བྱ་བ་མེད་པའི་ཚེ་རབས་ཚུན་ཆད་རྟག་པར་དེ་ལྟ་མཐོང་བ་ཡོད་དེ། ཁྱིམ་ནས་བྱུང་དུ་ཟིན་ཀྱང་ཡོད་དེ་ཅི་མི་འཆད་དོ། །དེའི་མིང་མུར་འདུག་གི་ཞར་ལས་ཁྱིམ་
ནས་བྱུང་ཞེས་བྱའི། མིང་འཕགས་པའི་ཞར་ལས་ཁྱིམ་ནས་བྱུང་བ་ཞེས་མི་བྱའོ། །ཅིའི་ཕྱིར་ཞེ་ན། བཀབ་པའི་མིས་ཆོས་ཆེན་པོ་ལ་ཡིད་ཆེས་ཤིང་དད་པར་མི་ནུས་ཏེ། གཙང་གདང་བའི་ཆོས་ཆེན་པོ་ཡང་དག་པའི་བདེན་པའི་འདུ་ཤེས་མེད་དོ། །ཤཱ་རིའི་བུ་དེ་ལྟ་བུའི་
ཆོས་བཤིག་པའི་སྡིག་ལྕི་བ་རྒྱུ་རྐྱེན་གྱིས་ཁ་ན་མ་ཐོ་བའི་ལྷག་མ་མ་ཟད་པས་ཆོས་སོ་ཅོག་བདེན་པའི་མཚན་མ་ཡིད་ཆེས་ཤིང་ཤེས་པར་མི་ནུས་ཏེ། མི་དགེ་བའི་ལས་གཡོས་ནས་བར་བར་ནི་དྲང་པོའི་འཕྲུལ་གྱི་ལམ་བརྒྱད་ལ་སྐུར། བར་བར་ནི་དགེ་སློང་ལ་ངན་པའི་སེམས་
བསྐྱེད་དེ། དེའི་མི་བདེན་པའི་ཉེས་པ་བྱུང་སྟེ། བར་བར་ནི་ཚུལ་ཁྲིམས་བཤིག་མཐོང་བ་བཤིག །སྲོག་བཤིག །ཆོ་ག་བཤིག་ཅེས་ཟེར། བར་བར་ནི་གཞན་གྱི་ཉེས་པ་མ་མཐོང་བར་མི་བདེན་པའི་ཡིད་མ་ཡིན་མ་སྐྱེས། བར་བར་ཞེ་སྡང་ཕྲག་དོག་གི་སེམས་རྟོག་པ་སྤྱད་དེ་གཞན་
གྱི་ངན་པ་བཤད། བར་བར་ནི་སངས་རྒྱས་ཀྱི་ཆོས་ཡི་གེ་གཞུང་ཚུལ་ཤེས་ཟེར་མ་ནུས་པས་སངས་རྒྱས་ཀྱི་ཆོས་མ་ཡིན་ཞེས་ཟེར་རོ། །དེ་ལྟ་བུའི་མིས་ཆོས་བཤིག་པའི་ངན་པའི་ལམ་འབྱོར་གྲུབ་པས་སངས་རྒྱས་ཀྱི་མཆོག་གི་གཞུང་ལ་སེམས་ཐོགས་པ་མེད་པར་མི་ནུས་ཏེ། མི་འཇུག་
མི་དགའོ། །དེ་ལྟ་བུའི་སྡིག་ལྕི་བའི་ལན་གྱི་ལྷག་མའི་རྒྱུ་རྐྱེན་གྱིས་བརྩོན་འགྲུས་སྤྱད་མོད་ཀྱི། འོན་ཀྱང་རྐྱེན་ཏོ་ཅོག་གི་མཚན་མ་ལེན་མི་ནུས་ན་སེམས་ལ་བཏགས་པའི་མལ་གྱི་འབྲས་བུ་ཐོབ་པར་མི་ནུས་པ་ལྟ་སྨོས་ཀྱང་ཅི་དགོས། གཅིག་ཏུ་ན་བདག་ཏུ་ལྟ་བ་དང་། གང་ཟག་ཏུ་ལྟ་བ་ལ་

གནས་བརྟེན་ཏེ། དེ་ལྟ་བུའི་ལྟ་བ་ནི་སངས་རྒྱས་མན་ཆད་ཀྱིས་ཀྱང་དེའི་རྩ་བའི་ཕྱི་མོ་ཕྱིན་པར་སེམས་མི་ནུས་ན་བུ་ཐོབ་པར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ་དེ་ལྟ་བུའི་བརྐམ་ཆགས་པའི་མི་དགེ་བ་ཡོན་པོ་མཐོང་བ་ཡོད་ན་དེ་ནི་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་།
སེམས་ཅན་དུ་ལྟ་བ་དང་། ཚེ་སྲོག་ཏུ་ལྟ་བའོ། །གཅིག་ཏུ་ན་མཆོག་གི་གཞུང་སྟོང་པ་ལ་དངངས་སྐྲག་ཅིང་དོགས་པ་སྟེ། མི་དེས་སྔོན་ཆད་ཀྱི་ཚེ་ལ་ཆོས་བཤིག་པའི་སྡིག་རྐྱེན་འབྱོར་པར་མངོན་ནོ། །ཤཱ་རིའི་བུ་མི་ལ་ལ་ཞིག་དེ་ལྟ་བུར་ངན་པ་ཡོན་པོ་མི་དགེ་བའི་འདོད་ཆགས་ན། དེ་ནི་བདག་
ཏུ་ལྟ་བ་ལ་ཆགས། གང་ཟག་ལ་ཆགས། ཚེ་སྲོག་ལ་ཆགས་ཏེ། མི་དེ་ལྟ་བུ་ནི་བརྒྱ་སྟོང་འབུམ་གྱི་སངས་རྒྱས་ཀྱིས་འཁོར་ལོ་གསུམ་སྤྱད་དེ། མངོན་པར་བསྟན་ཀྱང་གོ་བར་བྱ་བ་དང་། ལམ་གྱི་འབྲས་བུ་ཐོབ་པར་བྱ་མི་ནུས་སོ། །ཤཱ་རིའི་བུ་གཉིས་ན་རལ་གྲི་རྣོན་པོས་ལྕེ་བཅད་
ཀྱང་སླའོ། །གཞན་གྱི་དོན་མཐོང་བ་མི་རིགས་ཏེ། དེའི་ཉེས་པ་ཚུལ་ཁྲིམས་བཤིག་པ། མཐོང་བ་བཤིག་པ། སྲོག་བཤིག་པ། ཆོ་ག་བཤིག་པ་མི་བརྗོད་དོ། །ཤཱ་རིའི་བུ་མ་འོངས་པའི་དུས་ན། དགེ་སློང་དག་ཅིག་ཡོད་པས་ཚུལ་ཁྲིམས་ཉིས་བརྒྱ་ལྔ་བཅུ་དགེ་བར་བསྲུངས་
ན། མི་དེས་ལེ་ལོའི་སེམས་བསྐྱེད་དེ་འདི་སྙམ་དུ་བསམ་པ་བྱས་སོ། །བདག་ནི་ཚུལ་ཁྲིམས་འཛིན་པ་ཡིན། མི་གཞན་ནི་དེ་ལྟ་མ་ཡིན་གྱིས་གཞན་ལ་བརྙས་སོ་ཞེས་སེམས་ལ་རི་མོ་གུས་པ་མེད་དོ། །བདག་ནི་མང་པོ་ཐོས་པ་ཡིན་ཕ་བི་ནི་མང་པོ་ཐོས་པ་མ་ཡིན་སྙམ་དུ་སེམས་སོ། །ཤཱ་
རིའི་བུ་དེའི་ཚེ་ན་དགེ་སློང་ཚུལ་ཁྲིམས་འཛིན་པ་ཆེད་ཆེར་སེམས་པ་མང་སྟེ། ཨ་ལན་ཞའི་ལས་སྤྱོད་པ་མང་ངོ་། །ཚུལ་ཁྲིམས་དགེ་བར་སྲུང་ནུས་ཏེ་བཤད་པ་བཞིན་དུའང་སྤྱོད་དེ། སེམས་འགྲུས་པར་ཆོས་ཡིག་བཀླགས་ནས་སངས་རྒྱས་ཀྱི་ཆོས་ལ་ཕྱག་འཚལ་ལོ། །དེ་ལྟ་བུའི་
མི་ལ་སོགས་པ་མང་པོ་ཐོས་པ་སྐྱེས་པས། ཨ་ལན་ཞ་ལ་ལྟོས་པས་ཞེ་སྡང་ལ་སྲེད་དེ། སེམས་རྟག་པར་དྲི་མ་རྟོག་པས་ཟབ་ཏུ་འཇུག་བརྐམ་པ་དང་། ཞེ་སྡང་གདུག་པའི་སེམས་སྲེལ་ཏོ། །ཐེག་ཆེ་ཞིང་བླུན་པས་ཅི་ཡང་ཤེས་པ་མེད་དེ། རྒྱུ་རྐྱེན་ཆུང་ངུ་སྤྱད་པས་དོན་ཆེན་པོ་

གཡོས་ཏེ། དེའི་ཞེ་སྡང་གིས་སེམས་བཀབ་ནས་གཅིག་གི་ཉེས་པ་གཅིག་བྱུང་སྟེ། དེ་ནི་ཚུལ་ཁྲིམས་བཤིག་པ་དང་། མཐོང་བ་བཤིག་པ་དང་། སྲོག་བཤིག་པ་དང་། ཆོ་ག་བཤིག་པའོ། །ཤཱ་རིའི་བུ་དེ་ལྟ་བུའི་དགེ་འདུན་གྱི་ནང་ན་དགེ་སློང་ངེས་
པ་ཡོད་པས་སེམས་ལ་ཡོན་པོ་མེད་དེ་བར་ན་གནས་ཤིང་འདུག་ན། དེ་ཡང་ངན་པ་དེ་དག་གི་ནང་ན་འདུག་པས་གཅིག་ལ་གཅིག་སྐུར་བརྗོད་པས་འཐབ་རྩོད་མི་ཆད་དེ་བསམ་གཏན་ན་འདུག་པ་དང་། ཆོས་ཡིག་ཀློག་པ་ཡང་བདེན་པ་མ་ཐོས་ནས་ཁྱིམ་ན་འདུག་པ་དང་། ཁྱིམ་ནས་
བྱུང་བ་ཀུན་ཀྱང་དཀྲུགས་བསྐྱོད་དོ། །དེ་ལྟ་སྟེ། ཤཱ་རིའི་བུ་དགེ་སློང་ལོ་གཅིག་ལོ་གཉིས་ལོ་གསུམ་ལོ་དགུ་ལ་ཐུག་པ་མང་དུ་ཡོད་ན། སྟེང་ན་འདུག་པ་ཡང་ཞིང་བརྙས་ཏེ་རི་མོ་གུས་པ་མེད་དོ། །མི་དེ་ཚུལ་ཁྲིམས་མནོས་ན་དགེ་སྦྱོང་སློབ་མ་ཡང་ཆོས་བཞིན་མི་བྱེད་པ་མང་། མཁན་
པོ་དང་ཨཱ་ཙརྱ་ལ་རི་མོ་གུས་པ་མི་བྱེད་དོ། །ཤཱ་རིའི་བུ་དེའི་ཚེ་དགེ་སློང་གཞོན་ནུ་དང་སྔར་ཁྱིམ་ནས་བྱུང་བ་ལ་གནས་རྟེན་མེད་པ་གཅིག་གིས་གཅིག་བརྙས་ཏེ། ལོ་བཅུ་ལོན་པའི་དགེ་སློང་ལ་སློབ་མ་ཕལ་བཅད་པ་རྣམས་གཞན་གྱི་སློབ་མ་ཀུན་གྱིས་རི་མོ་གུས་པ་མེད་དོ། །ཆོ་གའི་ཆོས་
ཀྱང་ཆོས་བཞིན་མི་བྱེད་དོ། །ཤཱ་རིའི་བུ་དེའི་ཚེ་མི་ངན་པ་རྣམས་ཀྱིས་འདོད་ཆགས་ཞེ་སྡང་ཆོ་ག་གཙང་བས་གཅིག་ལ་གཅིག་བརྙས་ཡང་སྟེ། རི་མོ་གུས་པ་མེད་ཅིང་གཅིག་ལ་གཅིག་ལོག་གལ་བས་ན་ངའི་ཆོས་དེངས་སོ། །ཤཱ་རིའི་བུ་དེའི་ཚེ་མི་གཏི་མུག་རྣམས་ཀྱིས་ཆོས་བཤིག་
པའི་སྡིག་ལས་བསྐྱོད་པ་མང་པོ་སྡིག་བསྐྱོད་པས་མཐར་ལམ་ངན་པར་ལྟུང་ངོ་། །ཤཱ་རིའི་བུ་ཁྱོད་ལ་ངས་བྱེ་བྲག་ཕྱེད་པར་བསྒོའོ། །རང་གི་བསོད་ནམས་བཙལ་དུ་ཟིན་ན། དགེ་སློང་དགེ་བ་ནི་དེའི་ཚེ་ཕལ་གྱི་ནང་དུ་ཞག་གཅིག་ཀྱང་འཇུག་པ་མི་རིགས་སོ། །དགྲ་བཅོམ་པ་མྱ་
ངན་ཚོད་ཟིན་པ་དང་། དགེ་སློང་ངན་པའི་དེར་དོན་ཡོད་པ་ནི་མ་གཏོགས་སོ། །ཅིའི་ཕྱིར་ཞེ་ན། ཤཱ་རིའི་བུ་དེ་ཙམ་གྱི་ཚེའི་མི་འདོད་ཆགས་དང་ཞེ་སྡང་དང་གཏི་མུག་གདུག་པ་བདོ་སྟེ། མི་གསོན་པས་འཇིགས་སྐྲག་ཕོངས་གཏིང་ལ་ཐུག་པས་དགེ་བ་མི་བཙལ་ཏེ། རང་སོ་སོར་རི་

དང་ཚལ་སྟོང་དབེན་པར་གནས་ཏེ། ཚེ་ཟད་ན་གཅན་གཟན་བཞིན་ཤིའོ། །ཤཱ་རིའི་བུ་ཁྱོད་ལ་ངས་བྱེ་བྲག་ཕྱེད་པར་བསྒོའོ། །ངའི་ཡང་དག་པའི་ཆོས་འདི་འཇིག་རྟེན་ན་འདུག་པ་རིང་པོ་མི་ཐོགས་སོ། །ཅིའི་ཕྱིར་ཞེ་ན། སེམས་ཅན་གྱི་ལེགས་པའི་དཔལ་གྱི་དགེ་བའི་རྩ་
བ་ཟད་ཟིན་ཏེ། རྙོག་པའི་དུས་ཉེ་བ་ན་འདུག་གོ། །བདག་གིས་བསོད་ནམས་བཙལ་དུ་ཟིན་ན་དགེ་སློང་དགེ་བས་འདི་ལྟ་བུའི་སྐྱོ་བའི་སེམས་བསྐྱེད་པའི་རིགས་སོ། །བདག་ནམ་ཞིག་ཇི་ལྟ་བུར་ཆོས་ཞིག་འཁྲུགས་པ་མཐོང་། འདི་ལྟ་བུའི་དགེ་སྦྱོང་གི་ཚེ་དུས་ངན་པའི་བགེགས་
ལ་བབ་པ་མཐོང་ན་བདག་གིས་བརྩོན་འགྲུས་པའི་སེམས་བསྐྱེད་དེ། མྱུར་དུ་ལམ་གྱི་འབྲས་བུ་ཐོབ་པར་བྱའོ། །ཤཱ་རིའི་བུ་ངའི་ཆོས་ལ་དོན་དཀའ་བ་གཞན་མེད་དེ། གོས་དང་། ཁ་ཟས་དང་། མལ་ཆ་དང་། རྩི་སྨན་མི་བསམ་མོ། །ཁྱེད་ལ་སོགས་པ་ཇི་ནས་ཀྱང་
སངས་རྒྱས་ཀྱི་ལམ་གྲུབ་པར་སྤྱོད་པ། འཇིག་རྟེན་གྱི་ནོར་གྱི་ཁེ་དང་ཡོན་རིན་ཆེར་མ་འཛིན་ཅིག །ཤཱ་རིའི་བུ་ད་ཁྱོད་ལེགས་པར་ཉོན་ཅིག་དང་ངས་ཁྱོད་ལ་བསྒོའོ། །དགེ་སློང་ལ་ལ་ཞིག་གི་སེམས་གཅིག་ཏུ་ལམ་སྤྱོད་ན་སྟོང་གསུམ་གྱི་གནམ་གྱི་ལྷ་ཀུན་སེམས་འཐུན་པར་
སྐྱིད་པའི་ཡོ་བྱད་དོ་ཅོག་སྦྱར་ཏེ་སྤྱིས་ཡོན་གསོལ་ལོ། །ཤཱ་རིའི་བུ་མི་གཞན་གྱིས་བསམ་གཏན་ན་འདུག་པའི་དགེ་སློང་ལ་ཡོན་ཕུལ་བས་ནི་གནམ་གྱི་ལྷས་ཡོན་ཕུལ་བ་ཙམ་མི་ཕོད་དོ། །དེ་ལྟ་བས་ན་ཤཱ་རིའི་བུ་ཁྱོད་རང་ཡོན་མི་ཐོབ་པའི་མྱ་ངན་སེམས་པར་ཡང་དག་པར་བསླབས་པ་
བཞིན་དུ་མ་གལ་བར་སྤྱད་དེ། མཆོག་གི་གཞུང་སྟོང་པ་སྤྱད་པ་ལ་མིའི་ཉེས་པ་མྱ་ངན་མ་འབྱུང་ཤིག །ཅིའི་ཕྱིར་ཞེ་ན། ཤཱ་རིའི་བུ་བག་ཚ་བའི་བགེགས་ཆེན་པོ་ནི་སྟོང་པ་ཐོབ་པ་སྟེ། དགེ་སློང་ལ་ལ་ནི་ངའི་ཆོས་སྤྱོད་པའི་ཞར་ལས་ཁྱིམ་ནས་བྱུང་སྟེ། ཚུལ་ཁྲིམས་མནོས་ཤིང་ཆོས་
འདི་ལ་བརྩོན་འགྲུས་སྤྱོད་ན། ལྷ་དང་ལྷ་མ་ཡིན་རྣམས་དང་། མི་རྣམས་ཀྱིས་མི་དྲན་མོད་ཀྱི་སེམས་གཅིག་ཏུ་འགྲུས་པར་ལམ་སྤྱོད་ནུས། མཐར་ཡང་གོས་དང་། ཟས་ཅི་དགོས་པ་མི་སེམས་སོ། །ཅིའི་ཕྱིར་ཞེ་ན། ཡང་དག་པར་གཤེགས་པའི་དཔལ་གྱི་མཛོད་དཔག་ཏུ་མེད་དེ་ཟད་དཀའོ། །

ཤཱ་རིའི་བུ་ཡང་དག་པར་གཤེགས་པ་འདས་པའི་ཕྱི་ན་སྤུ་དཀར་པོའི་མཚན་གྱི་ནང་ན་བརྒྱ་སྟོང་འབུམ་གྱི་ཆ་ལས། དེའི་ཆ་གཅིག་གིས་སྐུ་གདུང་དང་སློབ་མ་རྣམས་ལ་ཡོན་འབུལ་ལོ། །ཤཱ་རིའི་བུ་འཇིག་རྟེན་ཐམས་ཅད་ཀྱི་མི་ཀུན་ཁྱིམ་ནས་བྱུང་སྟེ། ཆོས་བཞིན་དུ་
སྤྱད་དུ་ཟིན་ཀྱང་སྤུ་དཀར་པོ་མཚན་གྱི་བརྒྱ་སྟོང་འབུམ་གྱི་ཆ་དེ་གཅིག་ཀྱང་མི་ཟད་དོ། །ཤཱ་རིའི་བུ་ཡང་དག་པར་གཤེགས་པ་ནི་དེ་ལྟ་བུའི་དཔལ་ཡོན་དཔག་ཏུ་མེད་དེ། དགེ་སློང་རྣམས་ཀྱིས་ཁ་ཟས་དང་རྫས་ཅི་དགོས་པ་རྣམས་ཐོབ་ན་ཕྱོགས་པས་ཀུན་ཆོ་ག་ཚང་བར་རུང་ངོ་། །ཤཱ་རིའི་
བུ་དགེ་སློང་དེ་དག་གི་རྣམས་འདི་སྙམ་དུ་བསམ་པ་རིགས་སོ། །རྫས་ཅི་དགོས་པ་དང་ཡོན་པོའི་སྲོག་རྣམས་ཀྱི་ཆོས་ངན་པ་སྤྱད་པའི་མི་རིགས་སོ། །ཤཱ་རིའི་བུ་གོས་ལྷན་པ་ཅན་གྱི་དགེ་སློང་ལུད་དང་ཕྱག་དར་གྱི་ནང་ནས་ངན་པ་རྙིང་པ་བསྡུས་ཏེ་བླངས་ན་སེམས་འདི་སྙམ་བགྱིད་པར་རིགས་སོ། །
འདི་སྤྱད་དེ་ལྷག་པའི་བསྒྲིབས་པ་དང་། འཕགས་པའི་ལམ་སྤྱད་ན་བདག་གི་ད་ངན་པ་རྙིང་པ་འདི་སྤྱད་དེ། དྲུབས་ལ་ཆོས་གོས་སུ་བྱས་ཏེ། བརྩོན་འགྲུས་སུ་སྤྱད་དེ། ཕལ་ཐ་མལ་པ་ནི་ནུབ་གཅིག་ཀྱང་འདི་གྱོན་པའི་མི་རིགས་སོ། །དགེ་སློང་དེས་དག་པར་བཀྲུས་ནས་རིང་དུ་གྱོན་ནས།
དགེ་སློང་གོས་ལྷན་པ་ཅན་དེ་ལ་འདོད་ཆགས་པའི་སེམས་སྐྱེས་ན་མོད་བཞིན་དོར་བའི་རིགས་ཏེ། ངས་གྱོན་དུ་མི་གནང་ན་གོས་གཞན་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ་དགེ་སློང་དེས་གོས་དེ་ལ་དགེ་སློང་གི་ཆོས་མ་ཡིན་པ་སྐྱེད་དེ། དགེ་སློང་དེ་ཡང་འགྲོ་བའི་མི་
རིགས་པར་འཛིན་ན། རྫས་གཞན་ལྟ་སྨོས་ཀྱང་ཅི་དགོས། ཤཱ་རིའི་བུ་དེའི་ཚེ་དགེ་སློང་དེ་ནི་ལྕགས་དམར་པོ་ཚ་བའི་ཞགས་མས་ལུས་བཅིངས་ཀྱང་སླའི། གོས་ལྷན་པ་ཅན་འདི་བགོ་བ་མི་རིགས་པར་འཛིན་ཏོ། །ཇི་ལྟ་ཞེ་ན། གོས་འདི་ལ་སེམས་སྲེད་ཅིང་ཞེན་པའི་ཕྱིར་རོ། །ཤཱ་རིའི་བུ་
གོས་ལྷན་པ་ཅན་གྱི་དགེ་སློང་ནི་སེམས་འདི་སྙམ་བྱ་བའི་རིགས་སོ། །གོས་ལྷན་པ་ཅན་འདི་བགོས་ཏེ། གྲང་བ་དང་ཚ་བ་བསྒྲིབས་པ་ལམ་སྤྱོད་པ་ལ་བཏང་ན། བདག་སླར་གོས་མ་བགོས་ན། མཐའ་རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་པའི་

འབྲས་བུ་དང་། དགྲ་བཅོམ་པའི་འབྲས་བུ་ཐོབ་བོ། །ཤཱ་རིའི་བུ་དེ་ལྟ་བུའི་གོས་ལྷན་པ་ཅན་གྱི་དགེ་སློང་གཅིག་ཏུ་ལམ་ཚོལ་བ་ངས་ཀྱང་གྱོན་དུ་གནང་ངོ་། །ཤཱ་རིའི་བུ་ཟན་སློང་བའི་དགེ་སློང་ནི་ཆོས་སོ་ཅོག་ལ་རྣམ་པར་བརྟག་པ་མེད་དོ། །རྟག་པར་སེམས་བསྡུས་ཏེ། འགྱོད་ཅིང་འཁྲུག་ཏུ་
མི་གཞུག་གོ། །གྲོང་ཁྱིམ་དུ་འཇུག་ན་བསམ་གཏན་གྲུབ་པ་རྣམས་སྤྱད་དེ། རང་བརྒྱན་ལ་ཟན་བསླངས་ཏེ། ཐོབ་ཟིན་པ་དང་སེམས་མི་ཞེན་མི་བསྒོ་བར་ཟན་ཅི་ཐོབ་པ་ཁྱེར་ཏེ་གྲོང་ཁྱིམ་ནས་བྱུང་ལ་ཆུ་གཙང་མའི་འགྲམ་ལམ་སྤྱད་དུ་རུང་བའི་གནས་སུ་འདུག་ལ། ཟས་ངོས་ཅིག་ཏུ་བཞག་སྟེ།
རྐང་པ་བཀྲུས་ཏེ་འདུག་ནས་ཟས་མདུན་དུ་བཞག་སྟེ། སྐྱོ་ཞིང་བྲལ་བའི་འདུ་ཤེས་དང་། མི་གཙང་བའི་འདུ་ཤེས་དང་། རྐྱག་་རྫབ་ཀྱི་འདུ་ཤེས་དང་། མནམ་རུལ་བའི་འདུ་ཤེས་དང་། སྐྱུགས་པའི་འདུ་ཤེས་དང་། རྨ་བསྐུས་པའི་འདུ་ཤེས་དང་། ཐོབ་པས་སྐྱོབ་པའི་འདུ་ཤེས་དང་། བུའི་
ཤ་སྙམ་གྱི་འདུ་ཤེས་དང་། ཤིང་ཏོག་རུལ་བའི་འདུ་ཤེས་དང་། ཕྱིར་ཞིང་ལྕི་བའི་འདུ་ཤེས་བསྐྱེད་པ་རིགས་སོ། །གཅིག་ཏུ་ན་ལུས་ལ་འཆི་བའི་འདུ་ཤེས་དང་། སྔོ་བའི་འདུ་ཤེས་དང་། རྣགས་པའི་འདུ་ཤེས་དང་། རུལ་ཞིགས་པའི་འདུ་ཤེས་བསྐྱེད་པའི་རིགས་སོ། །ཤཱ་རིའི་བུ་དགེ་སློང་
གིས་འདི་ལྟ་བུའི་འདུ་ཤེས་བསྐྱེད་པའི་རིགས་སོ། །འདོད་ཆགས་ཀྱི་སེམས་མེད་པ་ལ་སྤྱད་ལ་དེ་ནས་གདོད་པ་ཟས་ཏེ། ལུས་བརྟན་ཞིང་བཀྲེས་སྐོམ་པའི་ནན་བསླད་དུ་ཟད་དོ། །ལམ་སྤྱད་པར་ཐོབ་པར་བྱའོ། །སེམས་འདི་སྙམ་དུ་བྱ་བའི་རིགས་སོ། །ངས་ཟས་འདི་ཐོབ་པ་ནི་སྔོན་ཆད་
ཀྱི་སྡུག་བསྔལ་བཤིག་ལ་ཕྱིན་ཆད་ཀྱི་སྡུག་བསྔལ་མི་སྐྱེ་ཞིང་། སེམས་དགའ་སྐྱིད་པ་ཐོབ་ལ་ནད་མེད་པ་སྤྱད་དེ། ལུས་ཉམས་ཀྱང་གཞོར་ཞིང་འགྲོ་བ་སྟབས་བདེ་བརྟན་པའི་ཕྱིར་རོ། །ང་ཟན་འདི་ཐོབ་ན་བདག་རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་།
ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུ་དང་། སྐྱེ་བ་མེད་པའི་ཆོས་ཀྱི་བཟོད་པ་ཐོབ་པའི་རིགས་སོ། །ཤཱ་རིའི་བུ་དགེ་སློང་དེ་ལྟ་བུར་ཟ་བའི་ངས་ཟས་སློང་དུ་གནང་ངོ་། །ཤཱ་རིའི་བུ་སློང་བའི་དགེ་སློང་ཟན་ཐོབ་བོ་ཅོག་གི་རོ་ལ་ཆགས་པ་ནི་སེམས་སྐྱེས་ཏེ། ཞིམ་མངར་རོ་སྙམ་དུ་དེ་

སྙམ་གྱི་སེམས་བྱེད་ཅིང་། བདག་ཟས་འདི་ཟོས་པས་མདངས་བཟང་པོ་དང་། ཉམས་སྟོབས་དར་བ་ཐོབ་སྙམ་དུ་སེམས་ཏེ། བདག་གི་ཟན་འདི་ཟོས་ལ་འཕགས་པའི་ལམ་འགྲུས་པར་སྤྱོད་དོ་ཞེས་དེ་སྙམ་གྱི་སེམས་མི་བྱེད་པ་ལྟ་བུའི་དགེ་སློང་ནི་ངས་ཆུ་རྔུབ་ཅིང་ལེན་དུ་མི་གནང་
ན། ཁ་ཟས་ལྟ་སྨོས་ཀྱང་ཅི་དགོས། ཤཱ་རིའི་བུ་ཟས་ལ་ཉེས་པ་དང་། ངན་པ་ཡང་མི་མཐོང་བར་ཐལ་བྱུང་ཟ་བས་ནི་གཉིས་ན་རང་གི་ལག་པས་བརླ་ཤ་ལས་བཅད་དེ་ཟ་ཡང་སླའོ། །ཅིའི་ཕྱིར་ཞེ་ན། ངས་སྤྱོད་པ་དང་ཐོབ་པས་གཞན་གྱི་ཡོན་ལེན་པ་གནང་གི །མི་གཞན་ལེན་དུ་མ་གནང་ངོ་། །
ཤཱ་རིའི་བུ་ཇི་ལྟ་བུར་མིང་སྤྱོད་པ་ཞེས་བྱ། དགེ་སློང་ལ་ལ་ཞིག་མི་འགྱུར་བར་བརྟན་ཏེ། སེམས་གཅིག་པ་ལ་ངས་ད་ལྟར་གྱི་དུས་ལ་བདུད་ངན་པས་མངག་པ་རྣམས་བཅད་དེ། ལྷག་མ་མེད་པར་མྱ་ངན་ལས་འདས་པར་འཇུག་པའི་འཕྲུལ་གྱི་ལམ་སྤྱད་པ་ནི་མགོ་མེས་ཚིག་པའི་ར་མདའ་བྱ་བ་
བཞིན་ནོ། །གཅིག་ཏུ་ན་མི་དགེ་བ་ངན་པའི་ཆོས་བཅད་བསལ་བ་དེའི་མིང་སྤྱོད་པ་ཞེས་བྱའོ། །ཡང་གཅིག་ཏུ་ན་སེམས་གཅིག་ཏུ་སྟོང་པ་མཚན་མ་མེད་པ་སྨོན་པ་མེད་པར་ཡིད་ཆེས་ཤིང་ཤེས་པར་ནུས་ཏེ། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་
འོང་བའི་འབྲས་བུ་དང་། དགྲ་བཅོམ་པའི་འབྲས་བུ་ཐོབ་པའི་ཕྱིར། མྱ་ངན་འཁྲུག་པའི་མི་རྣམས་ཆད་པ་དེའི་མིང་སྤྱོད་པ་ཞེས་བྱའོ། །དགེ་བའི་ཆོས་རྣམས་ཚོལ་ཞིང་རྟག་པར་གསོལ་འདྲི་དེའི་མིང་སྤྱོད་པ་ཞེས་བྱའོ། །ཡང་གཅིག་ཏུ་ན་ཐམས་ཅད་གྲོལ་ཐར་པར་སེམས་བསྐྱོད་ནུས་པའི་
མིང་སྤྱོད་པ་ཞེས་བྱའོ། །སེམས་འཁྲུག་པར་ལམ་ལ་བཏང་བའི་ཆོས་རྣམས་སྤྱད་སྦྱངས་ཏེ། ཆོས་སོ་ཅོག་གི་བཤད་པ་བཞིན་དུ་སྤྱོད་ཅིང་སྤྱད་པ་གཅིག་ཏུ་སངས་རྒྱས་ཀྱི་ལམ་ཚོལ་བ་ཡོད་དོ། །ཤཱ་རིའི་བུ་ཡང་སངས་རྒྱས་ཀྱི་ཆོས་ཀྱི་ནང་ན་དེ་ལྟ་བུའི་མིང་སྤྱོད་པ་ཞེས་བྱའོ། །ཇི་ལྟ་བུར་ཐོབ་ཅེས་
བྱ་བ་དེ་ནི་རྒྱུན་དུ་ཞུགས་པ་ཐོབ་སྟེ། ལམ་ངན་པ་གསུམ་ལས་ཐར་བའི་མིང་ཐོབ་པ་ཞེས་བྱའོ། །ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་མྱ་ངན་འཁྲུག་པ་རྣམས་ཆོད་དེ་ལམ་ཚོལ་བ་ཞི་ཟིན་ཅེས་བྱའོ་ཅོག་འབྱོར་ཟིན་ན། བསླབ་པ་གསུམ་དགེ་བར་ལོབས་པ་དེའི་མིང་སློབ་

པ་སྟེ། ངས་མི་དེ་ཡོན་ལེན་དུ་གནང་ངོ་། །མི་དེ་ལྟ་བུས་ཡོན་བླངས་པ་དེའི་དགེ་བར་ཡོན་བླངས་པ་ཞེས་བྱའོ། །ཤཱ་རིའི་བུ་གཙང་གདང་བར་ཚུལ་ཁྲིམས་བསྲུངས་པ་དང་། ཡོན་བདག་ཕྱེ་བསྟན་པ་དང་། མདོ་སྡེའི་ཡི་གེ་ཁ་ཏོན་དང་ཀློག་པ་ཐོས་ཏེ་དེ་ནི་མདོའི་སྡེ། དབྱངས་ཀྱིས་བསྙད་
པའི་སྡེ། ལུང་དུ་བསྟན་པའི་སྡེ། ཚིགས་སུ་བཅད་པའི་སྡེ། ཆེད་དུ་བརྗོད་པའི་སྡེ། གླེང་གཞིའི་སྡེ། དེ་ལྟ་བུའི་ཚིག་གི་ཆོས་ཡིན་ནོ། །སྐྱེས་པ་རབས་ཀྱི་སྡེ། ཤིན་ཏུ་རྒྱས་པའི་སྡེ། རྨད་དུ་བྱུང་བའི་སྡེ། རྟོགས་པ་བརྗོད་པའི་སྡེའོ། །མི་དེས་ཡང་གཅིག་ཏུ་ན་ཚུལ་ཁྲིམས་གཙང་གདང་
བར་གཟུང་ནུས་ཏེ། སྐྱོན་མེད་ཅིང་མི་སྨེ་མི་རྙོག །མི་ཆགས་པ་ལ་རང་དབང་བས་མཛངས་པས་བསྔགས་པ་རང་གིས་ཆོ་ག་ཚང་བར་ནུས་ཏེ། བསམ་གཏན་ཐུབ་པ་བཞིན་དུ་མི་འགལ་ལ། དུས་དུས་སུ་བསམ་གཏན་ན་འདུག་པ་སྲེད་པ་དེ་ལྟ་བུའི་དགེ་སློང་ནི་ངས་ཀྱང་ཡོན་དུ་གནང་ངོ་། །ཤཱ་རིའི་
བུ་ལུས་ཀྱིས་ཆོས་རིག་ན་དོགས་ཤིང་འགྱོད་པ་མེད་པ་ངས་དེ་ལྟ་བུའི་མི་སྟན་མཐོན་པོར་འདུག་ཅིང་ཆོས་བཤད་དུ་གནང་ངོ་། །ཐ་མལ་པ་ཕལ་ཡིན་མོད་ཀྱི་ཚུལ་ཁྲིམས་གཙང་གདང་བ་གཟུང་ལ་སེམས་མུར་འདུག་གི་ཆོས་ཀྱི་གཞུང་ལ་མ་ཆགས་ཏེ། སེམས་གཅིག་ཏུ་འགྲུས་པར་དགེ་བར་དགེ་སྦྱོང་
གི་རབ་ནི་འབྲས་བུ་བཅད་དེ་གསོ་བའི་ཁེ་ལ་མ་ཆགས། ངེས་པར་བཤད་པ་ལ་བཟའ་མཁས་ཏེ། མང་དུ་ཐོས་པའི་དཔེ་རྒྱ་ཡངས་པ་ནི་དཔེ་རྒྱ་མཚོ་ཆེན་པོ་དང་མཚུངས། སྲོག་སྟོར་ལ་ཐུག་ཀྱང་བརྫུན་ཚིག་མི་ཟེར། འཐབ་ཅིང་རྩོད་པ་ལ་མི་སྲེད་དེ་རང་ལ་ཡང་ཕན། གཞན་ལ་ཡང་ཕན།
གཙང་གདང་བའི་མཆོག་གི་གཞུང་འབའ་ཞིག་འཆད་ཅིང་བཤད་དོ། །མཆོག་དེ་བཞིན་ལ་དེ་བཞིན་དུ་སྤྱོད་པའོ། །ཤཱ་རིའི་བུ་དེ་ལྟ་བུར་འཆད་པ་ནི་ངས་ཆོས་འཆད་དུ་གནང་ངོ་། །ཡང་དག་པར་གཤེགས་པས་ཅི་བཤད་པ་ཆོས་སོ་ཅོག་དང་མི་འགལ་མི་ལྡོག་པར་བྱ་ནུས་པ་སྟེ། དེ་ཚུལ་
ཁྲིམས་དང་། བསམ་གཏན་དང་། ཤེས་རབ་དང་། གྲོལ་ཐར་དང་། ཤེས་མཐོང་བ་ལས་ཀྱང་གྲོལ་ཐར་ཏོ། །ཤཱ་རིའི་བུ་ཁེ་ཚོལ་བའི་དགེ་སློང་ནི་སངས་རྒྱས་ཀྱི་ཕྱིར་ཁྱིམ་ནས་ཚུལ་ཁྲིམས་ཀྱི་ལེའུ་བཤིག་ན་ཆོས་བཤད་པ་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ་ངའི་ཆོས་ཀྱི་ཡི་གེའི་ནང་ན་བཤད་

པ་མི་ལ་ལ་ཞིག་བདག་དགེ་བར་མ་ཞི་ལ་བདག་གི་བག་བྱ་མི་ནུས་པར་མི་གཞན་དགེ་བར་ཞི་བ་དང་བདག་གི་བྱ་ནུས་ཞེ་ན། བདེན་པ་ཡང་མེད་དོ། །དཔེར་ན་མི་ཞིག་བདག་རང་འདམ་རྫབ་ཏུ་ནུབ་ལ། མི་གཞན་དབྱུང་བར་བྱ་བ་དང་མཚུངས་ཏེ། བདེན་པ་ཡང་མེད་དོ། །
མི་ལ་ལ་ཞིག་བདག་གི་དགེ་བར་ཞི་བར་ནུས་ཤིང་འདམ་རྫབ་ན་ཕྱིན་ནུས་པས་མི་གཞན་དབྱུང་བར་བྱ་བ་ནི་བདེན་པ་ཡོད་དོ། །དེ་ལྟ་བས་ན་ཤཱ་རིའི་བུ་ངས་ཁྱོད་ལ་བྱེ་བྲག་ཕྱེད་པར་བསྒོའོ། །ཡང་དག་པར་གཤེགས་པ་ལ་འཕྱ་ཞིང་སྐུར་ན་དེའི་སྡིག་མི་ཡང་ངོ་། །བདེན་པར་སྨྲ་བའི་
དགེ་སློང་ནི་ཆོས་འཆད་དུ་གནང་བའི་རིགས་སོ། །བརྫུན་མི་ཟེར་བའི་ཚུལ་ཁྲིམས་འཛིན་པའི་དགེ་སློང་གིས་ནི་ཆོས་ཀྱི་སྦྱིན་པ་ནུས་སོ། །ཤཱ་རིའི་བུ་ཁྲི་སྟན་མཐོན་པོ་ལས་ཆོས་འཆད་ཅིང་ཡང་དག་པར་ངེས་པར་ཐེ་ཙོམ་གཅོད་པ་ནི་ནང་གི་བླ་མའི་དོན་ཡིན་ནོ། །ལ་ལ་ཞིག་ཚུལ་ཁྲིམས་
འཛིན་པ་མི་གཙང་ལ། མུར་འདུག་གི་གཞུང་ལ་ཆགས་པ་ནི་ངས་མ་གནང་ངོ་། །བརྫུན་ཟེར་བ་དང་འཇིག་རྟེན་གྱི་སྐྱིད་པ་རིན་ཆེར་འཛིན་པ་དང་། ཡོན་གྱི་ཁེ་ཚོལ་བ་དང་། འཐབ་རྩོད་པ་ལ་སྲེད་པ་ནི་ངས་ཀྱང་མ་གནང་ངོ་། །ངས་གཙང་གདང་བར་ཚུལ་ཁྲིམས་འཛིན་པ་དང་། སེམས་དྲང་
དཀན་པ་དང་། ཆོས་སོ་ཅོག་གི་བདེན་པའི་མཚན་མ་ཁོང་དུ་ཆུད་པ་ནི་ཁྲི་སྟན་མཐོན་པོར་ཆོས་འཆད་དུ་གནང་ངོ་། །ཤཱ་རིའི་བུ་ཚུལ་ཁྲིམས་ཞིག་པའི་དགེ་སློང་ཉིས་ན་ཁྲིམས་གཏང་སླའི། འཕགས་པའི་མཚན་མ་དང་ཆོས་གོས་སུ་སྡིག་གི་དྲི་མ་སྦས་བཅབས་ལ་གསང་སྟེ། ངན་པ་མང་པོ་བྱ་
ཞིང་མི་གཞན་གྱི་ཡིད་ཆེས་པའི་སྦྱིན་པ་ལ་མ་ཆགས་ཤིག །ཤཱ་རིའི་བུ་རྒྱུ་རྐྱེན་ཆུང་ངུའི་ཕྱིར་ཡུན་རིང་དུ་སེམས་ཅན་དམྱལ་བའི་ལུས་མནོས་པར་འགྱུར་རོ། །ལེའུ་བཅུ་སྟེ་ཐབས་བཅོལ་བའི་ལེའུའོ།། །།དེའི་ཚེ་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས་
དེ་ཙམ་གྱི་དུས་ན་དགེ་སློང་རྣམས་ཀྱི་དགེ་བའི་ཆོས་ལ་ཇི་ལྟ་བུར་བརྩོན་འགྲུས་དང་། སངས་རྒྱས་ཀྱིས་དགའ་བོ་ལ་བཀའ་སྩལ་པ། རེ་ཞིག་ཞོག་ལ་མ་འདྲི་ཤིག །ཅིའི་ཕྱིར་ཞེ་ན། སངས་རྒྱས་ཀྱིས་དཔག་ཏུ་མེད་པའི་ཡེ་ཤེས་ཀྱི་ཆོས་ཡིག་བཤད་དོ་ཅོག་དེ་ཙམ་གྱི་ཚེའི་དགེ་

སློང་གིས་ཡིད་ཆེས་པར་མི་ནུས་ན་འགྲུས་པར་སྤྱོད་མི་ནུས་པ་ལྟ་སྨོས་ཀྱང་ཅི་དགོས། དགའ་བོ་ཡང་དག་པར་གཤེགས་པའི་བྱ་བ་ཡོད་པའི་ཆོས་ཀྱི་ཤེས་རབ་ཡོད་དོ་ཅོག་རང་སངས་རྒྱས་དང་། དགྲ་བཅོམ་པ་ཐམས་ཅད་ལ་སོགས་པ་གོ་ཞིང་ཤེས་པར་མི་ནུས་སོ། །དགའ་བོ་ཡང་དག་
པར་གཤེགས་པས་མཁྱེན་ཏོ་ཅོག་གི་ཆོས་ཁྱོད་ལ་བཤད་དུ་ཟིན་ན་ཁྱོད་བསླད་ཅིང་རྨོངས་སུ་རུང་ན་ཡིད་ཆེས་པར་མི་རུང་བ་ལྟ་སྨོས་ཀྱང་ཅི་དགོས། ཡང་དག་པར་གཤེགས་པས་དེ་ལྟར་དེ་ལྟ་བུའི་ཆོས་ཡིག་བཤད་པ་ནི། དེའི་ཚེ་མི་གཏི་མུག་གིས་ཡིད་ཀྱང་མི་ཆེས་ན་ཡིད་ཆེས་ཤིང་གཏི་མུག་གི་ལན་
བཤད་མི་ནུས་པ་ལྟ་སྨོས་ཀྱང་ཅི་དགོས། དགའ་བོ་ཆོས་ཀྱིས་དེ་བཞིན་པའི་རིགས་ཏེ། བདག་གི་ལུས་དང་བ་ཡིན་ན་གཞན་ལ་ཡང་ངན་ཅེས་ཟེར་རོ། །ད་ལྟར་གྱི་བར་དུ་ལེ་ལོའི་དགེ་སློང་ལ་དེ་ཙམ་གྱི་ཚེ་རབས་ཀྱི་བར་དུ་བརྩོན་འགྲུས་པའི་དགེ་སློང་གིས་ཐུབ་པར་མི་ནུས་སོ། །ཚུལ་ཁྲིམས་
འཛིན་ཏོ་ཅོག་དང་། ཤེས་རབ་བསྐྲུན་དུ་མི་རུང་ངོ་། །ཡང་དག་པར་གཤེགས་པས་མི་དེ་ཉེས་པ་ངན་པ་བྱས་སོ་ཅོག་བཤད་དུ་ཟིན་ན་ལུས་གྱུར་ཅིང་མནོས་སོ་ཅོག་མི་དེས་ཡིད་མི་ཆེས་ཏེ། སྡིག་ལྕི་བ་གཡོ་བར་འགྱུར་རོ། །ཁྱོད་ལ་སོགས་ཡང་འཇིགས་སྐྲག་སྟེ། དེས་ངན་པ་མནོས་སོ་ཅོག་ནི་
དཔག་ཏུ་མི་ནུས་སོ། །དགའ་བོ་ཡང་དག་པར་གཤེགས་པས་ཟབ་མོའི་ཆོས་ནོད་པ་ནི་དཀའོ། །ཁྱོད་ཀྱི་ཡིད་ལ་ཇི་སྙམ། ཁྲི་སྟན་བཟང་པོ་ལ་ཕག་གུ་སྲེད་དམ་མི་སྲེད། བཅོམ་ལྡན་འདས་མི་སྲེད་ལེགས་སོ། །དགའ་བོ་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཀྱི་ཆོས་འདི་ཟབ་མོ་དམ་པ་སྟེ།
ཤེས་རབ་ཅན་སྲེད་པ་ནི་མི་དེས་ཡིད་ཆེས་ཤིང་ཤེས་ལ་ཁོང་དུ་ཆུབ་པ་མ་ནུས་པས། ཁྱིམ་ནས་བྱུང་ཟིན་པ་དང་། རང་ན་རེ་དགེ་སྦྱོང་ཞེས་ཟེར་ཏེ། བདེན་པ་བཞིན་དུ་བསྟན་བསླབས་པ་མནོད་མ་ནུས་སོ། །ཆོས་འདི་ལ་སེམས་བཅོས་མ་ནུས་སོ། །ཞིམ་པོའི་རོ་མ་ཐོབ་སྟེ། ལག་པ་བརྡབས་ནས་སོང་སྟེ།
ལམ་ངན་པར་ལྷུང་ཞིང་འདུག་པ་ནི་དཔེར་ཕག་གུས་ཁྲི་སྟན་བཟང་པོ་བཏང་བ་དང་མཚུངས་སོ། །ཅིའི་ཕྱིར་ཞེ་ན། དགའ་བོ་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་ཤིན་ཏུ་གཙང་གདང་བ་བསྟན་དཀའ་བས་ཡིད་ཆེས་ཤིང་ཤེས་པར་ནུས་པ་མ་ཡིན་ཏེ། གདུལ་བ་གདབ་དཀའ་བ་དང་། ཤེས་རབ་

མེད་པ་དང་། དགང་བར་དཀའ་བ་དང་། གསོ་བར་དཀའ་བ་དང་། ཚུལ་ཁྲིམས་ཞིག་པ་དང་། གདམས་དཀའ་བ་དང་། ཡོན་པོའི་ཆོས་ལ་ཆགས་པ་དང་། ཡོན་པོའི་སྤྱད་པ་སྤྱོད་པ་དང་། ནོར་གྱི་ཁེ་ཆེད་ཆེར་འཛིན་པ་དང་། གོས་དང་ཟས་རབ་པོ་སྙམ་དུ་འཛིན་པ་དང་།
ཆོ་ག་ཞིག་པ་དང་། ཚུལ་ཁྲིམས་ཞིག་པ་དང་། སྐྱེ་བོའི་ཆོས་སུ་ལྟུང་བ་དང་། ངན་པ་ཞིག་པ་དང་། ལེ་ལོ་ཅན་དང་། འདོད་རྒྱུ་ཆུང་ངུ་དང་། ཁྲེལ་མེད་པ་ངོ་ཚ་བའི་ཁ་ན་བརྗོད་པ་དང་། མཚོན་ནམ་ལས་ཀྱི་དོན་ལས་འབྲེལ་བ་དང་། དགེ་སྦྱོང་གི་ནང་ན་གོས་སྐྱ་བོ་ཅན་དང་། དགེ་སྦྱོང་གི་ནང་ན་
སུན་བྱུང་བ་དང་། དགེ་སྦྱོང་གི་ནང་ན་ཡོན་པོའི་ལམ་སྤྱོད་པ་དང་། དགེ་སྦྱོང་མ་ཡིན་པར་རང་ན་རེ་དགེ་སྦྱོང་ཡིན་ཞེས་ཟེར་བ་དང་། བདུད་ཀྱིས་བསླུས་པ་དང་། མུར་འདུག་གི་གཞུང་དང་འཐུན་པ་དང་། བཤད་པ་བཞིན་དུ་མི་སྤྱོད་པ་དང་། མང་པོ་འཛིན་པ་ལ་སྲེད་པ་དང་། ཚིག་ཅལ་ཅོལ་ལ་སྲེད་
པ་དང་། བདུད་ཀྱི་དོན་དང་ལྡན་པར་སྤྱོད་པ་དང་། བདུད་ཀྱི་རྒྱུད་དཀྲུགས་པ་དང་། མྱ་ངན་འཁྲུག་པ་མདོ་རལ་བ་དང་། བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དུ་ལྟ་བ་དང་། ཕྱིན་ཅི་ལོག་ཅན་གྱིས་ངའི་ཆོས་འདི་ལ་ཡིད་ཆེས་ཤིང་ཤེས་ལ་ཁོང་དུ་ཆུད་པར་ནུས་ཞེ་ན། བདེན་པ་ཡོང་
མེད་དོ། །ཅིའི་ཕྱིར་ཞེ་ན། དགའ་བོ་ངའི་བླ་ན་མེད་པ་གཡུང་དྲུང་རྫོགས་པའི་བྱང་ཆུབ་གཙང་གདང་བ་སྙིང་ཚིམ་པར་རྒྱ་ཆེ་བས་མི་ངན་པ་འདི་དང་འཚབ་པར་མི་རུང་ངོ་། །དགའ་བོ་དཔེར་ན་བརྒྱ་སྟོང་འབུམ་གྱི་སྟོང་གསུམ་གྱི་སྟོང་ཆེན་པོའི་ཁམས་བར་ཡངས་ཤིང་རིང་བ་དང་མཚུངས་སོ། །ངན་བཞིན་
པའི་མི་འདིས་དགེ་སློང་གི་ཆོས་བསྲིངས་པ་ཡང་དེ་བཞིན་ནོ། །མི་འགལ་བའི་བཟོད་པ་དང་མྱ་ངན་ལས་འདས་པ་མི་ཐོབ་པ་ལྟ་སྨོས་ཀྱང་ཅི་དགོས། དགའ་བོ་དེ་ལྟ་བུའི་དོན་འདི་ནི་བཤད་ཀྱིས་མི་ཟད་དོ། །མ་འོངས་པའི་དུས་ཀྱི་དགེ་སྦྱོང་ངན་བཞིན་པ་ཐ་མ་ཤིན་ཏུ་འཇུང་བརྐམ་སྲེལ་ཏོ། །ཤིན་
ཏུ་ཞེ་སྡང་སྲེལ་ཏོ། །ཤིན་ཏུ་ཡིད་མི་ཆེས་པ་སྲེལ་ཏོ། །གདུག་པ་གསུམ་བདོ་བར་སེམས་ལ་སྤྱོད་པ་རྩིང་ཞིང་ཞེ་གནག་པས་བཅོས་གདུལ་དཀའ་སྟེ། དགའ་བོ་དཔེར་ན་ཞིང་གཤིན་པ་ལེགས་པར་སྨིན་པ་ལ་རང་གི་མེས་བསྲེགས་པ་དང་མཚུངས། ཁ་ཟས་ཞིམ་དཀར་ལ་རང་གིས་དུག་བླུགས་

པ་དང་མཚུངས། ཁང་ཁྱིམ་ཅི་ཡང་ཡོད་པ་ལ་རང་གིས་མེས་བསྲེགས་ན། དེ་ལྟ་བུར་རིགས་སམ་མི་རིགས། བཅོམ་ལྡན་འདས་མི་རིགས་ལགས་སོ། །དགའ་བོ་དེ་ལྟ་བུ་མ་འོངས་པའི་དུས་ཀྱི་མི་གཏི་མུག་ངའི་ཆོས་ཀྱི་ཞར་གྱིས་ཡོན་ལེན་པ་ཐོབ་ན་ཡང་དག་པར་གཤེགས་པ་ལེགས་པའི་
དོན་ལ་ཡིད་མི་ཆེས་མི་ཤེས་པའི་སྟེང་དུ་འདི་ལྟ་བུ་ལ་སོགས་པའི་ཆོས་ཀྱི་ཡི་གེ་ཡིད་ཆེས་པར་མི་ནུས་སོ། །བདེན་པ་བཞིན་དུ་བཤད་པའི་ཉེས་པར་བཟོད་པར་མནགས་མི་ནུས་སོ། །རྨའི་ཤུ་བ་དང་ཤུས་ན་ངའི་ཚིག་ལ་བཟློག་སྟེ། དེ་ལྟ་བུའི་མི་གཏི་མུག་ནི་སངས་རྒྱས་ལ་རྟེན་ཅིང་རང་
འཚོལ་ཆོས་དེ་ཟློག་གོ། །དགའ་བོ་དེ་ཙམ་གྱི་ཚེ་ན་འཛམ་བུའི་གླིང་གི་ནང་ན་དེ་ལྟ་བུའི་མི་གཏི་མུག་གིས་དེ་ན་ལྟག་པོར་གང་ངོ་། །དགའ་བོ་རེ་ཞིག་ཞོག །དེ་ལྟ་བུའི་མི་གཏི་མུག་ཅན་ངན་པ་སྐྱེ་བར་འདོད་པ་དང་། རྒ་བར་འདོད་པ་དང་། ངན་པའི་དོན་སྤྱོད་པ་བཙལ་བ་ཅི་དགོས། དེ་
ནས་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས་ཆོས་ཀྱི་ཡི་གེ་འདི་མིང་ཅི་ཞེས་བགྱི། ཇི་ལྟ་བུ་གུས་པས་གཟུངས་སུ་གཟུང་། སངས་རྒྱས་ཀྱིས་དགའ་བོ་ལ་བཀའ་སྩལ་པ། ཆོས་ཀྱི་ཡི་གེ་འདིའི་མིང་སངས་རྒྱས་ཀྱི་མཛོད་ཅེས་བྱའོ། །མིང་བརྩོན་འགྲུས་གཡོ་བ་
སྤྱོད་ཅེས་ཀྱང་བྱའོ། །མིང་ཚུལ་ཁྲིམས་ཉམས་ཞིག་པའི་ཁྲིམས་ཐུལ་ཅེས་ཀྱང་བྱའོ། །ཆོས་སོ་ཅོག་ལ་གཏམས་སྩལ་ཅེས་ཀྱང་བྱའོ། །གུས་པར་གཟུངས་སུ་ཟུང་ཤིག །དགའ་བོ་མི་ལ་ལ་ཞིག་གིས་ཆོས་ཀྱི་ཡི་གེ་འདི་ཁ་ཏོན་དང་། གཟུངས་སུ་བཟུང་ན་ལེགས་པའི་དོན་ཐོབ་པ་ནི་
དཔག་ཏུ་མེད། མུ་མེད། ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གིས་ཡིད་ཆེས་ཤིང་ཁ་ཏོན་དང་། བཀླགས་ལ་མི་ལ་བསྟན་པ་ཡང་མི་ནུས་ན། དེ་ལ་སེམས་དགའ་གཞའ་བ་མི་ནུས་པ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། དགའ་བོ་དཔེར་རྐུན་པོ་ངན་པ་རྒྱལ་པོ་དང་།
རྒྱལ་པོ་ཆེན་པོའི་ཐད་དུ་རང་འབྱུང་དུ་མི་སྤོབས་པ་དང་མཚུངས་སོ། །གཞན་གྱི་རྫས་བརྐུས་ན་བདག་རྐུན་པོ་ཡིན་ཞེས་མི་ཟེར་རོ། །དེ་ལྟ་སྟེ། དགའ་བོ་ཚུལ་ཁྲིམས་ཞིག་པའི་དགེ་སློང་གིས་དགེ་སྦྱོང་གི་ཆོས་མ་ཡིན་པར་འབྱོར་གྲུབ་ན། འོན་ཀྱང་བདག་ངན་པ་ཞེས་མི་ཟེར་ན། མི་

གཞན་ལ་རང་ན་རེ་སྡིག་གིས་ཞེས་འཆད་མི་ཕོད་པ་ལྟ་སྨོས་ཀྱང་ཅི་དགོས། དགའ་བོ་འདི་ལྟ་བུའི་ཆོས་ཀྱི་ཡི་གེ་ནི་ཚུལ་ཁྲིམས་ཞིག་པའི་དགེ་སློང་རང་ཐུལ་འཁྲུགས་པར་ནུས་ན། ཁྲེལ་དྲིན་ཡོད་པ་དང་། ཚུལ་ཁྲིམས་འཛིན་པའི་དགེ་སློང་གིས་རང་སྐྱེ་ཞིང་
འཕེལ་བ་འཐོབ་བོ། །ཆོས་ཀྱི་ཡི་གེ་འདི་བཤད་པའི་ཚེ། ལྷ་དགུ་ཁྲི་ཀུན་གྱིས་ཆོས་སོ་ཅོག་ལ་ཆོས་ཀྱི་མིག་གཙང་མ་ཐོབ་ནས་བདུད་ངན་པ་དང་གཉེན་བཤེས་རྣམས་ཀུན་མྱ་ངན་ཆེན་པོ་འཁྲུགས་པ་ནི་དཔེར་ཁུང་ཆེན་པོ་རྣམ་པ་བཅུ་དྲུག་ཏུ་ལྷུང་བ་དང་མཚུངས་ཏེ། སྐད་ཆེར་ངུས་ཏེ་
སྨྲས་པ། དགེ་སྦྱོང་གཽ་ཏ་མཱི་ངས་ཤེས་སོ། །ངས་ཚོར་རོ། །ངས་རྟག་པར་ཉིན་མཚན་དུ་སྨོན་པ། སངས་རྒྱས་འདས་པའི་ཕྱི་ན་ཚུལ་ཁྲིམས་འཛིན་པ་བཤིག་སྟེ། ཚུལ་ཁྲིམས་བཤིག་པ་ཡང་བསྟངས། དགེ་སློང་ངན་པ་རྣམས་སངས་རྒྱས་ཀྱི་ཆོས་མི་ཤེས་ཤིང་ཁ་ཏོན་དང་། ཀློག་པ་
འབའ་ཞིག་ཤེས་པར་བྱའོ། །སངས་རྒྱས་ཀྱི་ཆོས་ལ་བདེན་པའི་སེམས་བཤིག་ལ་ཚིག་གིས་འདི་སངས་རྒྱས་ཀྱི་ཆོས་མ་ཡིན་ཏེ་ཕྱོགས་བཞིའི་གཞུང་མེད་དོ་ཞེས་བྱའོ། །གཽ་ཏ་མཱི་ང་ལྟར་ལྷ་དང་མི་དང་ཕལ་མང་པོ་ཀུན་ཚོགས་པའི་ནང་ན་ཆོས་འདི་ལ་བསྲུངས་བྲན་ཏེ་ངའི་སྨོན་ལམ་བཀག་གོ། །
བདུད་ཀྱིས་བཤད་ཟིན་ནས་མི་དགའ་བའི་མྱ་ངན་འཁྲུག་པ་སྲེལ་ཏེ་ཕྱོད་ཅེས་མི་གནང་ངོ་། །དེ་ནས་བཅོམ་ལྡན་འདས་ཀྱིས་དོན་འདི་གསལ་བར་བྱ་བའི་ཕྱིར་ཚིགས་སུ་བཅད་དེ་གསུངས་པ། ངས་སུ་ཆོས་རྣམས་བཤད་དོ་ཅོག །མཆོག་གི་གཞུང་བཞིན་མི་འགལ་ཏེ། །བྱ་བ་ཡོད་པ་མི་སྲ་བ། །
དཔེ་རུ་རྨི་ལམ་མཐོང་དང་མཚུངས། །ངས་ད་ཆོས་ཡིག་འདི་བཤད་པ། །མ་འོངས་དོན་ནི་སྤྱོད་ཅིང་བསྐྲད། །མཆོག་གི་གཞུང་བཞིན་མི་འགལ་ཏེ། །མི་ངན་རྣམས་ཀྱི་ནན་ཏུར་བྱས། །དེ་ཡི་ཚེ་དུས་ངན་པ་ལ། །དགེ་སློང་སེམས་ནི་འཁྲུག་ཅིང་གཡོ། །འཐབ་ཅིང་རྩོད་ཅིང་ཡིད་མི་ཆེས། །མྱ་ངན་
འདས་པ་ཐོབ་མི་ནུས། །དགེ་སློང་དང་ནི་གོས་སྐྱ་ཅན། །འཆད་དོ་ཅོག་ལ་མི་མཚུངས་མེད། །དེ་ཚེ་ང་ཡི་ཆོས་འདི་ནི། །ཐ་མལ་ཆོས་དང་ཐ་དད་མེད། །བཤད་ནི་ཁྱིམ་ན་འདུག་ཕྱིར་བཤད། །ཁྱོད་ཀྱིས་ང་ཡི་ཡོད་དཀོན་ཞེས། །ང་ཡི་སངས་རྒྱས་ཆོས་ལས་སུ། །ཐོག་མ་ལམ་གྱི་མཆོག་འབྲས་ཐོབ། །

དེ་ནས་དགེ་སློང་ཞིག་ན་རེ། །ངས་བཤད་ལམ་དང་མི་འཐུན་ན། །མི་དེ་ང་དང་འཐུན་པ་ཡིན། །ང་ནི་ཡང་དག་ཆོས་མཐོང་བའོ། །ཆོས་མཐོང་དང་ནི་མ་མཐོང་བ། །གོས་སྐྱ་ཅན་གྱིས་སྤྱད་པས་སུ། །སོ་སོ་རང་གི་ཆོས་ནང་གི། །དེ་ཡི་འགྲོ་ཞིང་བརྗོད་པ་སྐྱེས། །ལ་ལ་ན་རེ་ཐམས་ཅད་ཡོད། །
ལ་ལ་ན་རེ་ཐམས་ཅད་སྟོང་། །དྲང་པོ་ལམ་ལ་མི་གནས་པས། །རང་བཞིན་ངན་པས་ངའི་ཆོས་བཤིག །ཁྱོད་མི་དེ་ལ་མ་ཉེ་ཤིག །ང་ལ་འོངས་ཏེ་བསྙེན་པར་རུང་། །ཁྱོད་ལ་ཡང་དག་ཆོས་བཤད་ན། །རང་བཞིན་སྨྱུར་ཏེ་ལམ་ཐོབ་བོ། །དེ་ལྟ་བུ་ཡི་སྒྲ་སྐད་རྣམས། །ཉེ་རིང་ཀུན་དུ་ཁྱབ་པར་གྲམ། །
སེམས་འཐུན་ཞིང་ནི་གྲོགས་ལྡོག་པས། །དུས་སུ་བསྟན་པའི་ཆོས་ཀུན་བཤིག །དཔེ་རུ་རྐུན་པོ་ངན་པ་རྣམས། །ངན་པ་འཐུན་པ་གྲོགས་སུ་བྱས། །ལོག་ཅིང་འགལ་བ་ཡུལ་ས་དང་། །མཁར་ཡུལ་དང་ནི་གྲོང་ཁྱིམ་བཤིག །དེ་ཡི་ཚེ་ཡི་དགེ་སློང་རྣམས། །དབྱེ་ཞིང་བསྟན་པ་རུང་ཐོབ་ཀྱང་། །དབང་པོ་
རྟུལ་བའི་ཟམ་ཆགས་པས། །ཤེས་རབ་ཉུང་ཞིང་མི་རྟེན་པ། །ཡང་དག་གཤེགས་པ་སྤྱོད་པ་བཞིན། །ཆོས་བཤད་པ་ཡང་མི་ཤེས་ཏེ། །ཟག་པ་ཡོད་པ་གར་སྐྱེ་བཤད། །ཡང་ན་དེ་ནི་ལམ་ཐོབ་ཡིན། །མང་པོ་ཚོགས་པའི་ནང་དུ་འདུག །དགེ་སློང་རྣམས་ནི་མང་དུ་ཡོད། །ཀུན་ན་རེ་ནི་
ཤེས་རབ་ཡོད། །ཤེས་རབ་ཚོལ་བ་མི་གཅིག་མེད། །མང་པོ་ཚོགས་པ་དེ་ནང་ན། །དགེ་སློང་ལ་ལ་གཅིག་འགའ་ཞིག །ཡང་དག་བདེན་པ་ཤེས་པ་ཡོད། །ཀུན་གྱིས་སྤྱོད་དེ་ཤེས་རབ་མེད། །ལྷ་དང་ལྷ་མ་སྲིན་གྱིས་མཐོང་། །ཆོས་ཀྱི་རྒྱལ་པོའི་ལམ་ཁྱེ་ཤིག །ཐམས་ཅད་མྱ་ངན་
འཁྲུག་པ་སྲེལ། །གཅིག་ལ་གཅིག་ཕྱོགས་མཆི་མས་ངུ་། །དེ་ནང་ཤིང་ལྷ་ཡོད་པ་ཀུན། །ཤིང་གི་ཁ་ལས་ས་ལ་བབས། །ཀུན་ཀྱང་ཤཱཀྱ་སེང་གེ་ཡི། །དམ་པའི་ཆོས་ནི་མཐའ་ཀུན་མེད། །སངས་རྒྱས་ལ་སོགས་དཀོན་མཆོག་གསུམ། །འཇིག་རྟེན་ཡུན་རིང་མ་ལོན་པར། །ཇི་ལྟ་
བུར་ནི་དེ་རིང་ཀུན། །ཟད་པ་ཐམས་ཅད་གྱེས་ཤིང་ཞིག །ཡང་དག་གཤེགས་པ་ཆོས་བཤད་པ། །ང་ལ་སོགས་པ་སླར་མི་ཐོས། །བླུན་རྨོངས་མེད་པས་ཤེས་པས་སུ། །བླ་མ་ལ་ནི་མེད་སྙམ་སྟེ། །དེ་ཚེ་ས་ཡི་ལྷ་རྣམས་དང་། །སྒྲ་སྐད་ཆེན་པོ་ཕྱུང་ནས་སུ། །ཡང་དག་གཤེགས་

ཀྱི་ཆོས་སྒྲོན་ཆེན། །དེ་ནི་མི་དེ་ཟད་ཅེས་ཟེར། །ལྷ་དང་ལྷ་མ་སྲིན་གྱི་རྣམས། །མ་མཐོང་མ་ཐོས་རྗེས་སུ་འཛེར། །ཕྱིན་ཅད་འགྱོད་པ་མ་བྱེད་ཅིག །སངས་རྒྱས་ལམ་ནི་མེད་ཟིན་པ། །སངས་རྒྱས་བསྐལ་པ་གྲངས་མེད་དུ། །བདག་ཀྱང་གསོད་ལ་གཞན་ཡང་གསོད། །
སྡུག་བསྔལ་ཐམས་ཅད་བཟོད་པར་མནོས། །སངས་རྒྱས་གྲུབ་པས་སྨོན་ལམ་བསྐྱེད། །ཤཱཀྱ་སེང་གེ་འཕྲུལ་ཅན་གྱིས། །སེམས་ཅན་ཐམས་ཅད་ཀུན་བསྒྲལ་བ། །གཙང་གདང་ཆོས་མེད་ཟད་དུ་བྱེད། །གཏི་མུག་ངན་པའི་དགྲ་རྣམས་ཀུན། །དེ་ནི་དེ་ཡི་མཐུ་ཐོབ་སྟེ། །བྱམས་ཤིང་སྙིང་
རྗེའི་སེམས་མེད་པས། །གཅིག་གིས་གཅིག་ལ་སྐུར་ཅིང་དཀྲུགས། །བདུད་ཀྱིས་བཀོལ་བའི་བདུད་མི་རྣམས། །དབང་པོ་རྟུལ་བས་དབྱེ་ཆོས་དཀའ། །གཅམ་སྒྱུ་མི་དྲན་ལེ་ལོའི་སེམས། །ཞེ་སྡང་སངས་རྒྱས་ཆོས་ཀྱང་བཤིག །ཚལ་ནགས་སྟོང་པ་འབའ་ཞིག་ལ། །བསམ་གཏན་ཐུབ་
སྟེ་གསུམ་ལོན་ན། །རང་ན་རེ་ནི་དགྲ་བཅོམ་ཡིན། །བསམ་གཏན་ཐུབ་སྟེ་གསུམ་མེད་ན། །ལམ་ཐོབ་པ་ལྟ་སྨོས་ཅི་དགོས། །ལམ་མཐོང་ཐོབ་ཅེས་བྱ་བ་ནི། །ཤི་ན་མྱ་ངན་འདས་ཞེས་ཟེར། །མི་ཀུན་ཡིད་ཆེས་མཆོད་རྟེན་བརྩིགས། །སེམས་ཅན་དམྱལ་བར་སོང་ཞེས་ཟེར། །དེ་ལྟའི་གཏི་མུག་
སྟོང་པ་འགས། །གཅིག་ལ་གཅིག་ནི་བརྙས་ཤིང་ཁྲོ། །ངས་སུ་བསྐལ་པ་གྲངས་མེད་དུ། །ཐོབ་བོ་ཅོག་ནི་ད་ཟད་ཀྱི། །ད་ལྟར་ནམ་མཁའི་ལྷ་རྣམས་ཀྱིས། །ཤཱཀྱའི་རིགས་ཀྱི་སེང་གེ་མཐོང་། །དམ་པའི་ཆོས་ནི་ཉམས་ཤིང་ཞིག །སྒྲ་བསྐྱོད་ཀུན་གྱིས་མཆི་མས་ངུ་།།ངོས་བཞི་ལྷ་རྗེས་དེ་ཐོས་ན། །
ཀུན་ཀྱང་མྱ་ངན་འཁྲུག་པ་སྲེལ། །དེ་ཚེ་ལྷ་དང་ལྷ་མ་སྲིན། །ཐམས་ཅད་ཀྱང་ནི་འོངས་ཏེ་བབས། །ཡང་དག་པ་ན་མཁར་གནས་སུ། །འབར་བའི་ལྷ་སྲིན་ཀུན་འོངས་ཏེ། །ཀུན་གྱིས་མཆི་མས་ཆེར་ངུས་ཏེ། །འཇིགས་སུ་རུང་བའི་སྒྲ་སྐད་ཕྱུང་། །རིན་ཆེན་བདུན་གྱི་མཁར་རྣམས་ཡོད། །བྱི་དོར་བརྒྱན་པ་ཤིན་
ཏུ་བཟང་། །ཁ་དོག་སྟོར་ཏེ་ས་དང་མཚུངས། །ལྷ་རྣམས་འཁོར་བར་མ་དད་ནས། །མི་དགའ་ཆོ་ངེ་ཆེ་རུ་ངུས། །རང་གི་གནས་ནས་ཀུན་འོངས་འདུས། །སོ་སོ་མྱ་ངན་འཁྲུག་པ་སྲེལ། །གཅིག་གིས་གཅིག་མཐོང་སྨྲ་མི་ཕོད། །ཀུན་གྱི་གནས་ཀྱི་སྟེང་ནས་འོངས། །ལྷན་ཅིག་ང་སྐྱེས་གནས་སུ་ཕྱིན། །འགྲོ་ལྡོག་

ས་ལ་ཉལ་འདུག་ག་གནས། །འདི་སྐད་ཀྱི་ནི་སྒྲ་དབྱངས་བསྐྱོད། །ལྷན་ཅིག་འཛམ་བུའི་གླིང་དུ་དོང་། །དེ་ལྟའི་འཇིགས་སྐྲག་ཆེན་པོ་མཐོང་། །སངས་རྒྱས་བུ་རྣམས་འཐབ་ཅིང་རྩོད། །ཆོས་བཤིག་སྡེ་ནི་སོ་སོར་གྱེས། །ལྷ་སྲིན་དང་ནི་རིན་ཆེན་མཁར། །ཞག་བདུན་བར་དུ་འོད་མདངས་མེད། །
སོ་སོ་ལྷན་ཅིག་འཁོད་ཅིང་ངུ་། །ཞག་བདུན་བར་དུ་མ་ལངས་སོ། །ཇི་ལྟ་བུ་ནི་བརྩོན་འགྲུས་ཆེ། །དཔའ་ཞིང་རྟུལ་ལ་འཇིག་རྟེན་བཙུན། །བདག་ཅག་ད་ལྟར་འདི་ན་འཁོད། །ད་ཕྱིན་ཆད་ནི་མི་མཐོང་ངོ་། །ཀུན་འགྲོགས་ཏེ་ནི་གྱི་ཧྭན་དོང་། །གཅིག་ལ་གཅིག་ཕྱོགས་མཆི་མས་ངུ་། །སངས་
རྒྱས་འདི་རུ་བདེན་བཞིན་བཤད། །བདག་ཅག་རྣམས་ནི་དེ་ནང་ན། །འཇིག་རྟེན་མུན་པའི་ལོང་བ་རྣམས། །གཅིག་ལ་གཅིག་ནི་བརྙས་ཁྲོ་ལྷོང་། །ངན་པའི་ལས་རྣམས་འབའ་ཞིག་བསྐྱོད། །སླར་ཡང་ལམ་ངན་པ་རུ་ལྷུང་། །ལྷ་རྣམས་ཕོ་བྲང་བཟང་པོ་ཀུན། །འཕགས་པ་དེ་ནི་སྟོབས་སུ་བྱེད། །
བདག་ཅག་ལྷ་དང་ལྷ་མ་སྲིན། །བསྐལ་པའི་ར་མདའ་ཡང་མེད་དོ། །དེ་ཡི་ཚེ་ནི་འཛམ་བུའི་གླིང་། །ཉམས་ཤིང་ཞིག་ལ་བརྗིད་མདངས་མེད། །བགྲོད་པའི་མདངས་དང་ཤིང་དྲུང་དང་། །རི་དང་ཕུག་ན་དགེ་མི་བྱེད། །འཇིག་རྟེན་ཐམས་ཅད་ཟད་པར་ན། །ཀུན་ཀྱང་ཤིན་ཏུ་དཀྲུགས་ཅིང་གཡོ། །ལྷ་དང་ལྷ་
མིན་དབང་པོ་རྣམས། །སྒྲ་སྐད་འཇིགས་ཤིང་སྐྲག་ཏུ་རུང་། །དེ་ཚེ་སུམ་ཅུ་རྩ་གསུམ་ལྷ། །ལག་བསྒྲེང་བཞིན་དུ་མི་དགའ་ངུ་། །སོ་སོའི་ཕོ་བྲང་ནང་ན་ཡང་། །སྐད་ཕྱུང་བསྐྱོད་དེ་ངུ་ཞིང་འབོད། །ལྷ་རྣམས་ཀྱི་ནི་ཕོ་བྲང་ན། །བདག་ཅག་བརྗོད་ཅིང་བཤད་པ་དེ། །གཞའ་རུ་འཕྲུལ་ཆེན་རྗེ་དང་བྲལ། །
བདག་ཅག་ཕྱི་རུ་ཆོས་བཤད་པ། །རྩ་གསུམ་ལྷ་ཁམས་ཟླ་དྲུག་ཏུ། །རྩེའུ་དེའི་ཁ་ཟས་མི་ཟ་ཞིང་། །སིལ་གྱི་དབྱངས་ནི་མི་སྙན་ཏེ། །མི་དགའ་མི་ངན་ཤི་བ་བཞིན། །ལྷ་མ་ཡིན་པ་ཐམས་ཅད་ཀྱིས། །དེ་ལྟ་བུ་ཡི་གཏམ་ཐོས་ནས། །གཅིག་གིས་གཅིག་བྲན་ཀུན་སོགས་ཏེ། །རྩ་གསུམ་ལྷ་ལ་རྒོལ་དུ་
ཆས། །དེ་ཚེ་འཛམ་གླིང་རྒྱལ་པོ་དག །ཕན་ཚུན་འཐབ་ཅིང་རྩོད་པར་འགྱུར། །ལྷ་རྣམས་དང་ནི་ལྷ་མིན་ཀྱང་། །དེ་བཞིན་ཕན་ཚུན་འཐབ་ཅིང་རྩོད། །དེའི་ཚེ་དགེ་སློང་དགེ་སློང་མ། །ལས་སུ་ལམ་ངན་ལྷུང་བ་མང་། །དེ་ལས་ཐར་པར་ཉུང་ངུ་ཡོད། །ཚུལ་ཁྲིམས་བཤིག་པའི་སེམས་ཅན་རྣམས། །དགེ་སློང་ངན་པ་

བཞིན་དུ་འབྲང་། །དེ་ཡི་རྒྱུ་རྐྱེན་སྤྱད་པས་ན། །ཀུན་ཀྱང་ལམ་ངན་པ་ལ་ཕྱོགས། །དགེ་བསྙེན་ངན་པ་རྣམས་ཀུན་ཀྱང་། །མཁན་པོ་ངན་པའི་ཕྱིར་འབྲངས་པས། །དེ་ཡང་ལམ་ངན་པ་རུ་སོང་། །འཇིག་རྟེན་ཐམས་ཅད་འཁྲུགས་གཡོས་པས། །ལ་ལ་མཁར་དང་གྲོང་དུ་ཞུགས། །
ལ་ལ་རི་དང་ཚལ་དུ་ཕྱིན། །ཤར་ནུབ་ཏུ་ནི་མྱ་ངན་སྲེལ། །དེ་ཡི་ཚེ་དང་སྲོག་ལ་གནོད། །དེ་ཡི་ཚེ་ནི་དགྲ་དག་དང་། །བག་ཚའི་ལམ་ནི་རྣམ་མང་ཡོད། །ཁྲེ་ནས་རྣམ་ལྔ་བསྐྱེད་མི་འཁྲུང་། །འཁྲུངས་སུ་ཟིན་ཀྱང་སྲིན་གྱིས་ཟོས། །དེ་ཡི་ཚེ་ནི་འཇིག་རྟེན་རྣམས། །བཀྲེས་པས་ལྟོགས་ཏེ་ཤི་བ་མང་། །ཡི་
དགས་ངན་དུ་ལྷུང་བ་རྣམས། །ཡུན་དུ་སྡུག་བསྔལ་ཉོན་ཡང་མོངས། །དེ་ཡི་ཚེ་ན་མི་རྣམས་ཀྱིས། །སངས་རྒྱས་ཀྱི་ནི་མཆོད་རྟེན་དང་། །ཕྱོགས་བཞིའི་དགེ་འདུན་སྦྱིན་པའི་ནོར། །ཐུགས་ཐུབ་ཏུ་ནི་ཀུན་བགོས་ཟོས། །ད་ནི་དགེ་འདུན་དེ་བཞིན་ནོ། །དགའ་བོ་ཁྱོད་ལ་སོགས་པ་རྣམས། །མུགས་ཏེ་
བྱུང་ལ་བརྩོན་འགྲུས་སྤྱོད། །ཕྱི་མའི་ཚེ་དུས་ཟད་པ་ན། །དེ་ལྟ་བུ་ཡི་ཆོས་ངན་རྣམས། །མཐོང་བར་བྱ་བ་མི་རིགས་སོ། །ཐ་མལ་པ་ནི་ཐམས་ཅད་ཀུན། །གཏི་མུག་བླུན་པོ་ཤེས་རབ་མེད། །ཐ་མལ་པ་ཡི་ལས་རྣམས་སྤྱོད། །སྨྱུར་ཏེ་ལམ་ངན་ནང་དུ་ལྷུང་། །ཁྱེད་རྣམས་འཁྲུག་པར་ཁ་ཏོན་ལྷོགས། །དེ་
ཡི་མིག་ནི་ཤེས་རབ་རྒྱུ། །ཤེས་རབ་ཀྱི་ནི་ཡོན་གྱིས་སུ། །སྨྱུར་ཏེ་རྒྱལ་བའི་གནས་སུ་ཕྱིན། །ངས་སུ་འཇིག་རྟེན་དྲུག་པོ་མཐོང་བསླབས་པ། །ཁྱེད་རྣམས་ཀྱང་ནི་དེ་བཞིན་བསླབས། །འཇིག་རྟེན་བསྒྲིབས་བགས་དོན་བཅད་ན། །སྨྱུར་ཏེ་རྒྱལ་བའི་གནས་སུ་ཕྱིན། །འཕགས་པའི་ལམ་བརྒྱད་འགྲུས་སྤྱད་ན། །
སྨྱུར་ཏེ་མྱ་ངན་འདས་པ་ཐོབ། །ཆོས་བཙལ་བདག་གིས་བསོད་ནམས་བཙལ། །ངས་བཤད་ཅོག་ནི་དེ་བཞིན་ནོ། །བསྐལ་པ་འདི་ནི་འདས་ཕྱི་ན། །བསྐལ་པ་དྲུག་ཅུར་སངས་རྒྱས་མེད། །སངས་རྒྱས་སྒྲ་དང་སྐད་ཀྱང་མེད། །ལམ་ཐོབ་མེད་པ་སྨོས་ཅི་དགོས། །དེ་ཚེ་དུས་ཀྱི་མི་རྣམས་ཀུན། །བཀྲེས་ལྟོགས་བྲུ་བས་
ཉེན་པས་སུ། །སྲི་ཞུ་བྱམས་པ་སེམས་མེད་དེ། །མ་དང་བུ་ཡི་ཤ་ཡང་ཟ། །དེ་ཚེ་ཁྱིམ་གྱི་བྱིས་པ་རྣམས། །གཞན་གྱིས་ཟོས་དོགས་རིམ་གྲོ་རྟག །དེ་ལྟ་བུ་ཡི་དུས་ངན་ཐོས། །སུ་ཞིག་སྐྱེ་ཤི་ལས་ཀྱང་བསྐྱེད། །སྡུག་བསྔལ་ཕྱི་མོ་གཏི་མུག་ཡིན། །ལྔ་ཕུང་ཕྱི་མོ་འདོད་ཆགས་ཡིན། །འདོད་ཆགས་ལྔ་ལ་མ་དད་ན། །

འདོད་ཅིང་ཆགས་པ་རྣམས་ཀུན་ཆོད། །དཔལ་གྱི་འབྲས་བུ་ལམ་ཐོབ་སྟེ། །འདོད་ཅིང་ཆགས་པའི་སེམས་ཟབ་སྐྱེས། །འདོད་ཆགས་ཀྱི་ནི་རྒྱུ་རྐྱེན་གྱིས། །ངན་པ་གཡོས་པས་ལམ་ངན་ལྷུང་། །ཟག་མེད་ཆོས་ནི་སྟོང་པ་ཞི། །འཇིག་རྟེན་སྲ་མཁྲང་མེད་པར་འགྱུར། །དེ་ལྟ་བུ་ནི་ཤེས་རིག་ན། །ཁྱེད་ལ་སོགས་
པས་སྨྱུར་སྤྱོད་རིགས། །སེམས་མེད་སེམས་ཀྱི་འདུ་ཤེས་སྐྱེས། །བདག་ཉིད་ཤིན་ཏུ་འཇིགས་ཤིང་སྐྲག །བདག་གིས་བྱམས་བསམས་མ་བྱས་པ། །དེ་ཡི་དོན་ནི་ཇི་ལྟ་བུ། །དེ་ལྟ་བུ་ཡི་ཐ་མལ་རྣམས། །བསམས་ཤིང་མནོས་ཏེ་འགྲོས་དཔགས་ན། །བདག་གིས་ཇི་ལྟ་བུ་རུ་བྱས། །དེ་བཞིན་རྟག་པར་མཆི་མས་
ངུ་། །ཕུང་མེད་ཕུང་པོའི་འདུ་ཤེས་སྐྱེས། །ང་མེད་ང་ཡི་འདུ་ཤེས་སྐྱེས། །ཉིད་ཀྱི་མཚན་མའི་སྟོང་ཆོས་ཐོས། །དེ་ལྟ་བུས་ཀྱང་བསླབ་ཅིང་རྨོངས། །སངས་རྒྱས་ཀྱིས་སུ་བདེན་བཤད་པ། །ཕུང་པོ་རྣམས་ཀྱི་གཞུང་མ་རིག །ཐོས་ན་མི་འགྱུར་སྙམ་དུ་འཛིན། །འཇིགས་པའི་གནས་འཇིགས་སེམས་པ་མེད། །ངས་
འདས་མ་འོངས་ད་ལྟར་བཤད། །ཕུང་པོ་རྣམས་ནི་ཀུན་སྟོང་ཞིང་། །དུས་གསུམ་ཟད་པར་མཉམ་སྙོམས་ཏེ། །དཔེ་རུ་ནམ་མཁའ་སྟོང་པ་བཞིན། །འདས་པའི་སངས་རྒྱས་ཡོད་དོ་ཅོག །དེས་ཀྱང་ཉིན་མཚན་སྟོང་པར་བཤད། །མ་འོངས་དུས་ཀྱི་སངས་རྒྱས་རྣམས། །དེས་ཀྱང་ཉིན་མཚན་སྟོང་པར་བཤད། །
ང་འདྲ་འཇིག་རྟེན་མངོན་པར་འབྱུང་། །ཆོས་རྣམས་ཐམས་ཅད་ཀུན་བཤད་ཀྱང་། །ངོ་བོ་ཉིད་དང་མཚན་ཉིད་སྟོང་། །དུས་གསུམ་ལ་ནི་མི་མཚུངས་པ། །སངས་རྒྱས་བདེན་གཞུངས་བཤད་དོ་ཅོག །མ་འོངས་མིས་ནི་མི་ཤེས་ཏེ། །ང་དང་སེམས་ཅན་ལ་ཆགས་པས། །མཐའ་རུ་ངན་པའི་ལམ་དུ་ལྷུང་། །མ་
འོངས་དུས་ནི་དེ་བཞིན་ཏེ། །ངན་ཆེན་ཤིན་ཏུ་འཇིགས་སྐྲག་རུང་། །ཁྱོད་ལ་སོགས་པ་བརྩོན་འགྲུས་སྤྱོད། །དེ་ལྟའི་དུས་ངན་མ་མཐོང་བྱོས། །སངས་རྒྱས་ཆོས་ཀྱི་ཡི་གེ་འདི་བཤད་ཟིན་ནས། རྒན་ཞིང་བཙུན་པ་ཤཱ་རིའི་བུ་དང་། དགེ་སློང་དང་། དགེ་སློང་མ་རྣམས་དང་། འཇིག་རྟེན་གྱི་ལྷ་དང་། མི་
མང་པོ་ཐམས་ཅད་ཀྱིས། སངས་རྒྱས་ཀྱིས་བཤད་དོ་ཅོག་ཐོས་ནས། ཀུན་ཤིན་ཏུ་དགའ་གཞའ་སྟེ། སངས་རྒྱས་ཀྱིས་བཤད་པ་ལ་ཡིད་ཆེས་པར་མནོས་སོ། །སངས་རྒྱས་ཀྱིས་བཤད་པ་སངས་རྒྱས་ཀྱི་མཛོད་རྫོགས་སྷོ།། །།ཤ་ལོ་ཀ་སྟོང་ཉིས་བརྒྱ་སྟེ་བམ་པོ་བཞིར་བྱས་སོ།། །།

༄༅། །རྒྱ་གར་སྐད་དུ། ཨཱརྱ་རཏྣཱ་ཀ་ར་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དཀོན་མཆོག་འབྱུང་གནས་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་
པ་དུས་གཅིག་ན། བཅོམ་ལྡན་འདས་ཡུལ་གནས་བཅས་ན་ནག་པོའི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་དབང་དང་ལྡན་པར་གྱུར་པ། མངོན་པར་ཤེས་པ་མངོན་པར་ཤེས་པའི་དགྲ་བཅོམ་པ་དྲུག་ཁྲི་ཉིས་སྟོང་དང་། འཇམ་དཔལ་གཞོན་ནུར་གྱུར་པ་ལ་སོགས་པ་བྱང་ཆུབ་སེམས་དཔའ་
བརྒྱད་ཁྲི་བཞི་སྟོང་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་དཔག་ཏུ་མེད་པ་ལ་ཡང་དག་པར་ཞུགས་པ། ཐེག་པ་གྲངས་མེད་པ་ལ་ཡང་དག་པར་ཞུགས་པ། ཐེག་པ་བསམ་གྱིས་མི་ཁྱབ་པ་ལ་ཡང་དག་པར་ཞུགས་པ། ཐེག་
པ་མཚུངས་པ་མེད་པ་ལ་ཡང་དག་པར་ཞུགས་པ། ཐེག་པ་གཞལ་དུ་མེད་པ་ལ་ཡང་དག་པར་ཞུགས་པ། ཐེག་པ་བརྗོད་དུ་མེད་པ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་དཔག་ཏུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་
པར་ཞུགས་པ། འཇིག་རྟེན་གྱི་ཁམས་གྲངས་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་
ཞུགས་པ། འཇིག་རྟེན་གྱི་ཁམས་མཚུངས་པ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་ཚད་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ།
འཇིག་རྟེན་གྱི་ཁམས་བརྗོད་དུ་མེད་པའི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ་ཤ་སྟག་གོ། །དེ་ནས་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་ཐམས་ཅད་ཟིལ་གྱིས་གནོན་པ་ལ་སོགས་པས་བཅོམ་ལྡན་འདས་ལ་འདི་སྐད་

ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཐུགས་བརྩེ་བའི་སླད་དུ་རང་གི་སངས་རྒྱས་ཀྱི་ཞིང་ཚད་མེད་པ་ཡོངས་སུ་དག་པ་བཤད་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་འཁོར་འདི་ན་བྱང་ཆུབ་སེམས་དཔའ་ཐེག་པ་ཆེན་པོ་ལ་ཡང་དག་པར་ཞུགས་
པ། ཐེག་པ་དཔག་ཏུ་མ་མཆིས་པ་ལ་ཡང་དག་པར་ཞུགས་པ། ཐེག་པ་གྲངས་མ་མཆིས་པ་ལ་ཡང་དག་པར་ཞུགས་པ། ཐེག་པ་བསམ་གྱིས་མི་ཁྱབ་པ་ལ་ཡང་དག་པར་ཞུགས་པ། ཐེག་པ་མཚུངས་པ་མ་མཆིས་པ་ལ་ཡང་དག་པར་ཞུགས་པ། ཐེག་པ་གཞལ་དུ་མ་མཆིས་
པ་ལ་ཡང་དག་པར་ཞུགས་པ། ཐེག་པ་བརྗོད་དུ་མ་མཆིས་པ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་དཔག་ཏུ་མ་མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ། ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་གྲངས་མ་
མཆིས་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་གྱི་ཁམས་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་ཚད་མ་མཆིས་པ་ཡོངས་སུ་དག་པའི་སྨོན་ལམ་ལ་ཡང་དག་པར་ཞུགས་པ། འཇིག་རྟེན་ག