Kinh tạng Tây Tạng (Kangyur Đại Học) — 047_མདོ་སྡེ།_ག

་ན་རྒྱལ་པོ་བདུད་རྩིས་དབང་བསྐུར་ཞེས་བྱ་བར་གྱུར་ཏོ། །ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་འདི་ལྟ་བུ་དག་བཏབ་སྟེ། བདག་སངས་རྒྱས་ཀྱི་ཞིང་གང་དུ་སྐྱེས་པ་དེར་སངས་རྒྱས་བྱུང་བར་སེམས་ཅན་དག་ཤིན་ཏུ་ཤེས་པར་གྱུར་ཅིག །སྨོན་ལམ་
དེ་ལྟ་བུས་བྱང་ཆུབ་སེམས་དཔའི་སྤྱད་པ་སྤྱོད་པ་ན། འདི་ལྟར་དེ་གནོད་སེམས་མེད་པའི་སེམས་སུ་གྱུར་པའི་ཕྱིར་ཤེས་པ་དེ་ལ་མངོན་པར་ཞེན་པས་སེམས་ཅན་ཁྲི་ཕྲག་དཔག་ཏུ་མེད་པ་དག་བཏུལ་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སྨོན་ལམ་ཡོངས་སུ་

རྫོགས་པར་བྱ་ཞིང་ཡོངས་སུ་སྦྱང་བར་བྱའོ། །མཽད་གལ་གྱི་བུ་ངས་རྣམ་པར་གནས་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་རྣམས་ལ་རྣམ་པར་གནས་པ་ཤེས་པ་ཇི་ལྟར་
ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་རྒྱ་ཆེ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་ཞེས་བྱ་བ་
ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བརྗོད་དུ་མེད་པ་དགུ་བཅུ་རྩ་དྲུག་ཏུ་གྱུར་ཏོ། །དེའི་ཚེ་སངས་རྒྱས་ཀྱི་ཞིང་གྲོང་ཁྱེར་རྒྱ་ཆེ་བ་དེར་ཐམས་ཅད་ནས་ཐམས་ཅད་དུ་སེམས་ཅན་
དམྱལ་བ་མ་བྱུང་། དུད་འགྲོའི་སྐྱེ་གནས་མེད། གཤིན་རྗེའི་འཇིག་རྟེན་མེད། སེམས་ཅན་གྱི་མདོག་ཐ་དད་པ་ཉིད་གང་ཡང་མེད་དེ། སེམས་ཅན་དེ་དག་ཐམས་ཅད་ཀྱི་མདོག་གཅིག་ཏུ་གྱུར་ཏེ། འདི་ལྟ་སྟེ། གསེར་གྱི་མདོག་གོ། །སེམས་ཅན་གྱི་དབྱིབས་ཐ་དད་པ་ཉིད་གང་ཡང་མེད་དེ།
སེམས་ཅན་དེ་དག་ཐམས་ཅད་ནྱ་གྲོ་དྷའི་ཚད་དུ་གྱུར་ཏོ། །སེམས་ཅན་གྱི་ལོངས་སྤྱོད་ཐ་དད་པ་ཉིད་གང་ཡང་མེད་དེ་སེམས་ཅན་དེ་དག་ཐམས་ཅད་ལོངས་སྤྱོད་གཅིག་ཏུ་གྱུར་ཏོ། །སེམས་ཅན་གྱི་ཚེའི་ཚད་ཐ་དད་པ་ཉིད་གང་ཡང་མེད་དེ་སེམས་ཅན་དེ་དག་ཐམས་ཅད་ཚེའི་ཚད་ངེས་པར་གྱུར་ཏེ། འདི་
ལྟ་སྟེ། སེམས་ཅན་རྣམས་ཚེའི་ཚད་ལོ་བྱེ་བ་ཁྲག་ཁྲིག་ཕྲག་བརྒྱད་ཅུར་གྱུར་ཏོ། །སེམས་ཅན་གང་ཡང་དུས་བྱེད་པ་ལས་ལྷག་པར་འདའ་བ་མེད་པར་གྱུར། སེམས་ཅན་གང་ཡང་ཡ་ང་བ་མ་སྤངས་པས་དུས་བྱེད་པར་མ་གྱུར་ཏེ། སེམས་ཅན་དེ་དག་ཐམས་ཅད་ཁྱད་པར་དུ་འགྲོ་བའི་དུས་བྱེད་
པར་གྱུར་ཏོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་མཽད་གལ་གྱི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་སེམས་ཅན་དེ་དག་ཐམས་ཅད་བྱེ་བྲག་མ་མཆིས་པར་གྱུར་པ་ལགས་ན། སེམས་ཅན་དེ་དག་དེ་ནས་གུམ་ནས་ཇི་ལྟར་ཁྱད་པར་དུ་

མཆི་བར་འགྱུར་ལགས། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ལེགས་སོ་ལེགས་སོ། །ཆོས་འདི་དག་ལ་འགྲོ་བ་ཞེས་བྱ་བ་མི་སྣང་སྟེ། ཆོས་འདི་དག་ལ་
ཉན་ཐོས་རྣམས་ཀྱི་འགྲོ་བ་སྣང་བ་མ་ཡིན། རང་སངས་རྒྱས་རྣམས་ཀྱི་འགྲོ་བ་སྣང་བ་མ་ཡིན། བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ཀྱི་གང་རེ་ཤིག་བྱང་ཆུབ་སེམས་དཔའ་སེམས་དང་པོ་བསྐྱེད་པ་དེ་དག་ཐམས་ཅད་ཀྱི་འགྲོ་བ་ཡང་འདི་མ་ཡིན་ན། ཉན་ཐོས་རྣམས་ལྟ་
སྨོས་ཀྱང་ཅི་དགོས། མཽད་གལ་གྱི་བུ་བྱང་ཆུབ་སེམས་དཔའ་གང་རྒྱལ་ཚབ་ཀྱིས་ལ་གནས་པ་དེའི་ས་ཡང་མ་ཡིན་ཏེ། མཽད་གལ་གྱི་བུ་བྱང་ཆུབ་སེམས་དཔའ་འདི་དག་གི་དགེ་བའི་རྩ་བ་བསྐྱེད་པའི་སྟོབས་ཀྱང་སྣང་ངོ་། །མཽད་གལ་གྱི་བུ་འཇིག་རྟེན་གྱི་ཁམས་དེར་དགེ་བའི་རྩ་བའི་ཆོས་གང་
ཡང་རུང་བས་འགྲོ་བ་མ་ཡིན་ཏེ། འོན་ཀྱང་བྱང་ཆུབ་སེམས་དཔའ་དེ་དག་གི་བློ་ཉིན་མཚན་དུ་འཕེལ་ཞིང་ཡོངས་སུ་མི་ཉམས་ཏེ། དེས་ན་ཁྱད་པར་དུ་འགྲོ་བ་ཞེས་བྱའོ། །དེའི་ཚེ་དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་དེའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་ཡིད་གཉིས་ལས་
ཡང་དག་པར་འདས་པ་ཞེས་བྱ་བ་ཞིག་བྱུང་སྟེ། །དེ་རྒྱལ་སྲིད་བྱེད་དོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པའི་འཁོར་གྱི་བུད་མེད་འབུམ་ཕྲག་བརྒྱད་ཅུ་ཡོད་དོ། །བློན་པོ་ཡང་སྟོང་ཐམ་པ་ཡོད་དོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པ་བུད་མེད་
ཁྲི་ཕྲག་བརྒྱད་ཅུ་པོ་དེ་དག་དང་ལྷན་ཅིག་ཏུ་ཧ་ཅང་ཡང་སྲེད་པ་མེད་པའི་གྲོང་ཁྱེར་གྱི་སྐྱེད་མོས་ཚལ་གྱི་སོས་ཀའི་དུས་ཀྱི་ཤིང་གི་མེ་ཏོག་རྒྱས་པ་དབེན་ཞིང་དགའ་བ་བསིལ་བའི་ཚལ་དུ་སོང་ནས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེའི་སྨོན་ལམ་འདི་ལྟ་བུ་དག་བཏབ་བོ། །བདག་དང་ཉེ་བའི་
སེམས་ཅན་གང་དག་ནོར་མེད་པ་དེ་དག་བདག་གིས་རྒྱལ་པོའི་མཛོད་ནས་ནོར་དང་ལྡན་པར་བྱའོ། །ཞེས་དེ་ལྟ་བུའི་བསམ་པས་རྒྱལ་སྲིད་བྱེད་དོ། །རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ཚུལ་ཁྲིམས་འཆལ་བའི་འདུ་ཤེས་མི་འཇུག་ཚུལ་ཁྲིམས་དང་ལྡན་པའི་འདུ་ཤེས་ཡང་དག་པར་མི་སྤྱོད།

དྲན་པ་དང་ལྡན་པའི་འདུ་ཤེས་ཡང་དག་པར་མི་སྤྱོད་དེ་འདོད་པའི་འདོད་ཆགས་ཀུན་ནས་དཀྲིས་པའི་སེམས་ལ་ཀུན་ཏུ་མི་གནས། ཞེ་སྡང་ཀུན་ནས་དཀྲིས་པའི་སེམས་དང་། གཏི་མུག་ཀུན་ནས་དཀྲིས་པའི་སེམས་ལ་ཀུན་ཏུ་མི་གནས་ཏེ་ཡོངས་སུ་དག་པའི་ཡིད་ཀྱིས་རྟག་ཏུ་བྱང་ཆུབ་ཀྱི་སེམས་དང་བྲལ་
བས་ནམས་ཀྱང་མི་གནས་སོ། །འོང་བ་དང་འགྲོ་བ་དང་གནས་པ་དང་འདུག་པ་དང་ཉལ་བ་དང་གཉིད་ལོག་པ་ན་དེ་རྒྱགས་པའང་མེད་ན་བག་མེད་པ་ལྟ་ག་ལ་ཞིག་ཡོད། གཞན་དུ་ན་བྱང་ཆུབ་ཀྱི་སེམས་ཀྱི་རྒྱུན་རབ་ཏུ་འཇུག་སྟེ། སེམས་ཅན་སྡུག་བསྔལ་བ་རྣམས་ལ་བྱམས་པ་དང་ལྡན། སེམས་ཅན་
ཉོན་མོངས་པ་རྣམས་ལ་སྙིང་རྗེ་དང་ལྡན་སེམས་ཅན་བདེ་བ་རྣམས་ལ་དགའ་བ་དང་ལྡན། སེམས་ཅན་བྱ་བ་ཡོངས་སུ་རྫོགས་པ་རྣམས་ལ་བཏང་སྙོམས་དང་ལྡན་པར་སེམས་བསྐྱེད་དོ། །མཚན་མོ་ཉལ་བ་ན་སེམས་སྐྱེད་པར་བྱེད་པ་ནི་འཇིག་རྟེན་ན་བདག་གི་དགེ་བའི་རྩ་བ་བསྐྱེད་པར་བྱ་བའི་ཡོན་གནས་
ཡོངས་སུ་འཛིན་པ་སུ་ཡོད་གང་ལ་བདག་ཤེས་པར་བྱ། བསམ་གཏན་དང་པོ་ལ་ཇི་ལྟར་སྙོམས་པར་འཇུག་པར་བྱ། བསམ་གཏན་དང་པོ་ལས་ཇི་ལྟར་ལྡང་བར་བྱ། དེ་བཞིན་དུ་བསམ་གཏན་བཞི་པའི་བར་ལ་ཇི་ལྟར་སྙོམས་པར་འཇུག་པར་བྱ། བསམ་གཏན་བཞི་པ་ལས་ཇི་ལྟར་
ལྡང་བར་བྱ། དེ་བཞིན་དུ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དག་གི་གནས་ཤེས་པ་ལ་ཇི་ལྟར་སྙོམས་པར་འཇུག་པར་བྱ། གནས་ཤེས་པ་ལ་ཇི་ལྟར་ལྡང་བར་བྱ། དེ་བཞིན་དུ་ཇི་ལྟར་གནས་ཤེས་པ་ཀུན་འབྱུང་བ་ཤེས་པ་དང་། ཇི་ལྟ་བུར་གནས་
ཤེས་པ་འགོག་པ་ཤེས་པ་དང་། ཇི་ལྟར་གནས་ཤེས་པ་འགོག་པར་འགྱུར་བའི་ལམ་ཤེས་པ་ལ་སྙོམས་པར་འཇུག་པར་བྱ། ཇི་ལྟར་གནས་ཤེས་པ་འགོག་པར་འགྱུར་བའི་ལམ་ཤེས་པ་ལས་ལྡང་བར་བྱ། དེ་བཞིན་དུ་གནས་ཤེས་པ་དང་། ཀུན་འབྱུང་བ་དང་། འགོག་
པ་དང་། ལམ་དང་། དེ་བཞིན་དུ་ཐམས་ཅད་མཁྱེན་པའི་ཤེས་པ་ལ་ཇི་ལྟར་སྙོམས་པར་འཇུག་པར་བྱ། ཇི་ལྟར་ལྡང་བར་བྱ། དེ་བཞིན་དུ་ཀུན་འབྱུང་བ་དང་། འགོག་པ་དང་། ལམ་ཤེས་པ་ལ་ཡང་བྱའོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པའི་གཉེན་རྙིང་བ་

སྣག་གི་གཉེན་མཚམས་སྔོན་གྱི་ལྷ་ཞིག་གིས་རྒྱལ་པོའི་ཕོ་བྲང་དེ་སྣང་བར་བྱས་ནས་ལུས་མ་སྦས་པར་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ། རྒྱལ་པོ་ཆེན་པོ་ལེགས་སོ་ལེགས། །མི་ཡི་བདག་པོ་ཁྱོད་ལེགས་སོ། །འཇིག་
རྟེན་ཀུན་ལ་ཕན་འདོད་པ། །ཁྱོད་ཀྱི་སེམས་ཀྱི་བསམ་པ་ལེགས། །དེ་བཞིན་གཤེགས་པ་འཇིག་རྟེན་བཞུགས། །མཚན་ནི་ནྱ་གྲོ་དྷ་ཞེས་བོད། །སངས་རྒྱས་དེ་དྲུང་དེ་སོང་ལ། །སྐྱེ་བོའི་བདག་པོས་ཡོངས་སུ་ཞུས། །ལྷ་དེ་ཡི་ནི་ཚིག་དེ་དག །མི་ཡི་བདག་པོས་ཐོས་ནས་སུ། །
སེམས་དགའ་ཡིད་ནི་མགུ་གྱུར་ནས། །ལྷ་ལ་མངོན་པར་སྨྲས་པ་ནི། །འཇིག་རྟེན་གསལ་བར་མཛད་པ་ཡི། །རྐང་གཉིས་མཆོག་ནི་ཡུལ་གང་ན། །བཞུགས་པ་དེར་ནི་བདག་མཆི་ཞིང་། །བསྙེན་བཀུར་དག་ནི་རབ་ཏུ་བྱ། །དེ་ནས་ལྷ་དེས་རྒྱལ་པོ་ཡིད་གཉིས་ལས་ཡང་དག་པར་
འདས་པ་དེ་ལ་ཚིགས་སུ་བཅད་དེ་སྨྲས་པ། ཤར་ཕྱོགས་འདི་ཡི་ཕྱོགས་ཆ་ན། །གྲོང་ཁྱེར་ལྷུན་པོ་འབྱུང་བ་ཡོད། །དེ་ན་མགོན་པོ་དེ་བཞུགས་ཏེ། །སྲོག་ཆགས་རྣམས་ལ་ཆོས་སྟོན་ཏོ། །དེ་ནི་འཇིག་རྟེན་ཡོན་གནས་ཏེ། །ཕ་རོལ་དག་གི་ཕུལ་བས་འཚོ། །སེམས་ཅན་རྣམས་ལ་
ཐུགས་བརྩེའི་ཕྱིར། །ཡོན་གནས་སོ་སོར་བཞེས་པར་མཛད། །བསྐལ་པ་བྱེ་བ་སྟོང་ཕྲག་ཏུ། །དེ་བཞིན་གཤེགས་པ་དེ་བཞུགས་ཏེ། །རྒྱལ་པོ་ཆེན་པོ་དེ་བཞིན་གཤེགས། །འཁྲུག་པ་མི་མངའ་འདོད་ཆགས་བྲལ། །སེམས་ཅན་ཀུན་ལ་ཐུགས་བརྩེའི་ཕྱིར། །ཡོན་ནི་སོ་
སོར་བཞེས་པར་མཛད། །ཡོངས་སུ་གསོལ་ནས་སྟོན་པར་མཛད། །ཡོན་གྱི་འབྲས་བུ་འདི་ཡིན་ནོ། །ཐུབ་པ་འཇིག་རྟེན་ཀུན་ལ་མཁས། །འཇིག་རྟེན་གསུམ་གྱི་བསོད་ནམས་ཞིང་། །དེ་དྲུང་སོང་ལ་བསྙེན་བཀུར་གྱིས། །དེ་ནི་ཁྱོད་ཀྱི་ལུང་སྟོན་མཛད། །དེ་ནས་རྒྱལ་པོ་
ཡིད་གཉིས་ལས་ཡང་དག་པར་འདས་པ་ལྷ་དེས་བསྐུལ་བ་དྲན་ནས། དེའི་མཚན་མོ་འདས་ཏེ། དེའི་བློན་པོ་རྣམས་བསྡུས་སོ། །བསྡུས་ནས་སྨྲས་པ། གྲོང་གི་གཙོ་བོ་དག་གང་ཤེས་པར་གྱིས་ཤིག །ཤར་ཕྱོགས་ཀྱི་ཕྱོགས་ཆ་ན་གྲོང་ཆེན་པོ་ལྷུན་པོ་འབྱུང་བ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་ནྱ་གྲོ་དྷ་ཞེས་བྱ་བ་བཞུགས་སོ། །དེ་ལ་བསྙེན་བཀུར་བྱ་བར་འདོང་གིས། བཞོན་པ་བཟང་པོ་དག་མྱུར་དུ་སྦྱོར་ཅིག་དེ་བཞིན་གཤེགས་པ་དེ་བལྟ་བའི་ཕྱིར་དེ་རིང་ཉིད་འདོང་ངོ་། །བློན་པོ་དེ་དག་གིས་ལྷ་བཀའ་བཞིན་འཚལ་ཞེས་རྒྱལ་པོ་ཡིད་གཉིས་ལས་
ཡང་དག་པར་འདས་པ་དེའི་ལྟར་མཉན་ནས་བཞོན་པ་བཟང་པོ་དག་སྦྱར་ཏོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པས་བཙུན་མོ་ལ་བཀའ་སྩལ་པ། ཆུང་མ་གང་ཤེས་པར་གྱིས་ཤིག །ང་དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་བལྟ་བའི་ཕྱིར་འགྲོ་ཡིས་བག་ཡོད་
པར་སྒྲུབས་ཤིག །དེས་སྨྲས་པ། དེ་བཞིན་གཤེགས་པ་དེ་བདག་ཅག་གིས་བལྟ་བར་རྔོ་ཐོགས་སམ། སྨྲས་པ་ཆུང་མ་ནུས་སོ། །སྨྲས་པ། ལྷ་དེ་ལྟ་ན་དེ་བཞིན་གཤེགས་པ་དེ་བལྟ་བའི་ཕྱིར་བདག་ཅག་ཀྱང་མཆིའོ། །སྨྲས་པ་ཆུང་མ་གང་གིས་དུས་ལ་དབབ་པར་ཤེས་ན་
འདོང་ངོ་། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་བལྟ་བར་འདོད་པ་དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་དེ་བལྟ་བའི་ཕྱིར་རྒྱལ་སྲིད་ལྟོས་པ་མེད་པ་དང་། ཡོངས་སུ་འཛིན་པ་ལྟོས་པ་མེད་པས་རང་རང་གི་གྲོང་ཁྱེར་ནས་བྱུང་ངོ་། །
དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་སངས་རྒྱས་ཀྱི་སྤྱན་སྒྲིབ་པ་མེད་པས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་རང་གི་གྲོང་ཁྱེར་ནས་བྱུང་བ་གཟིགས་སོ། །གཟིགས་ནས་རྒྱལ་པོའི་ལམ་ཐམས་ཅད་དཔག་བསམ་གྱི་རས་བཅོས་བུ་མངོན་པར་སྤྲུལ་པ་རྣམས་ཀྱིས་ཡང་དག་
པར་གཡོགས་སོ། །ཡུལ་དང་ཕྱོགས་རྣམས་སུ་ཡང་མཚོ་དང་མཚེའུ་དང་རྫིང་དག་མངོན་པར་སྤྲུལ་ཏོ། །རྒྱལ་པོ་དེའི་ལམ་ལག་མཐིལ་ལྟར་མཉམ་པར་གྱུར་ཅིང་དཔག་བསམ་གྱི་རས་བཅོས་བུ་མངོན་པར་སྤྲུལ་པས་ཤིན་ཏུ་གཡོགས་ཤིང་རླུང་བསིལ་བ་དག་རབ་ཏུ་ལྡང་ངོ་། །གནས་གཙང་
མའི་ལྷ་རྣམས་ལ་བཀའ་སྩལ་པ། སོང་ལ་རྒྱལ་པོ་ཡིད་གཉིས་ལས་ཡང་དག་པར་འདས་པའི་ལམ་སྤོས་ཆུས་ཆག་ཆག་ཐོབ་ཤིག །སྟེང་དུ་ཡང་རས་བཅོས་བུ་སྣ་ཚོགས་ཀྱི་བླ་བྲེ་བྲེས་ཤིག །དེ་འོང་བའི་རིམ་གྲོ་ཡོངས་སུ་སྤྱད་པར་གྱིས་ཤིག །དེ་ནས་གནས་གཙང་མའི་ལྷ་དག་དེ་བཞིན་

གཤེགས་པ་ནྱ་གྲོ་དྷའི་རྒྱལ་པོ་ལྟར་མཉན་ནས། རྫུ་འཕྲུལ་གྱི་སྟོབས་ཀྱིས་འབད་པས་རྒྱལ་པོ་ཡིད་གཉིས་ལས་ཡང་དག་པར་འདས་པ་ལ་མཆོད་པ་བྱེད་དོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པ་རྒྱལ་པོའི་ལམ་གྱི་འབྱོར་པ་དེ་དག་མཐོང་ནས་བློན་
པོ་དག་ལ་སྨྲས་པ། གྲོང་གི་གཙོ་བོ་དག་མིའི་གཟུགས་ལས་འདས་པའི་སྐྱེས་བུ་ལྷའི་གཟུགས་དང་ལྡན་པ་ང་ལ་མཆོད་པ་བྱེད་པ་འདི་དག་ག་ལས་འོངས་གང་བདག་ལ་མཆོད་པ་བྱེད་པའི་རྒྱུ་འདི་དག་ནི། དེ་དག་བདག་གི་དྲུང་ན་མེད་དོ། །དེ་ནས་གཉེན་རྙིང་བ་སྣག་གི་གཉེན་མཚམས་ལྷ་
དེས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ། ལྷ་འདི་དག་ནི་འཇིག་རྟེན་གྱི། །མགོན་པོ་དེ་ཡི་རིམ་གྲོ་པ། །དེ་བཞིན་གཤེགས་པའི་བཀའ་ཡིས་སུ། །མཆོད་པ་དམ་པ་བྱེད་པ་ཡིན། །རྒྱལ་པོ་ཕོ་བྲང་ནས་བྱུང་བ། །སངས་རྒྱས་ཀྱིས་
ནི་ལྷ་གཟིགས་སོ། །ཁྱོད་ནི་འོང་བར་ཤེས་ནས་སུ། །ལྷ་རྣམས་ཀྱིས་ནི་རབ་ཏུ་བརྒྱུགས། །བཞུད་ལ་བྱང་ཆུབ་སེམས་དཔའ་ཡི། །མཆོད་པ་དག་ནི་དམ་པ་མཛོད། །འཇིག་རྟེན་མགོན་པོ་སྐྱོབ་པ་ཡིས། །ཁྱོད་ལ་དེ་ནི་ཐུགས་བརྩེའི་ཕྱིར། །དེ་ཡིས་ལྷ་ནི་དེ་དག་བཏང་། །མཆོད་
པ་དག་ནི་དམ་པ་བྱེད། །སངས་རྒྱས་མཐོང་བར་འདོད་པ་ཡི། །རྒྱལ་པོའི་ལམ་ནི་རྒྱན་གྱིས་བརྒྱན། །རྒྱལ་པོ་ཆེན་པོ་མངོན་བྱུང་ཤིག །གང་ཟག་མཆོག་ལ་བྱང་ཆུབ་སེམས། །ཉན་ཐོས་རྣམས་ཀྱིས་མདུན་བདར་ཅིང་། །མཆོད་པ་བྱེད་པ་མ་མཐོང་ངམ། །དེ་ནས་རྒྱལ་པོ་ཡིད་གཉིས་
ལས་ཡང་དག་པར་འདས་པས་ལྷ་དེའི་ཚིག་ཐོས་ནས་ཤིང་རྟ་ལས་བབས་ཏེ། གོས་ཕྲག་པ་གཅིག་ཏུ་གཟར། རྒྱན་བཀྲོལ། ནོར་བུའི་མཆིལ་ལྷམ་ཕུད་ནས། །བཅོམ་ལྡན་འདས་ཕྱོགས་ག་ལ་བཞུགས་པའི་ཕྱོགས་དེར་ཐལ་མོ་སྦྱར་བ་བཏུད་ནས། དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་ལ་
ཕྱག་འཚལ་ལོ། །ཕྱག་འཚལ་ལོ། །ཕྱག་འཚལ་ལོ་ཞེས་ཆེད་དུ་རྗོད་པ་འདི་ལན་གསུམ་དུ་བརྗོད་དོ། །དེ་བཞིན་གཤེགས་པ་ནྱ་གྲོ་དྷའི་རྒྱལ་པོ་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བདར་བས། རྒྱལ་པོ་ཡིད་གཉིས་ལས་ཡང་དག་པར་འདས་པ་ཕྱག་འཚལ་བར་བྱེད་པ་

གཟིགས་སོ། །གཟིགས་ནས་ཀྱང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་གིས་ནི་འཇིག་རྟེན་མགོན་པོ་ལ། །དགའ་བའི་སེམས་ཀྱིས་གོམ་པ་གཅིག་བོར་བ། །འཛམ་བུའི་ཆུ་ཀླུང་གསེར་སྲང་འབུམ་གྲངས་རྙེད། །དེ་ནི་དེ་དང་མཚུངས་པ་ཡོད་མ་ཡིན།
གང་དག་གིས་ནི་འཇིག་རྟེན་མགོན་པོ་ལ། །དགའ་བའི་སེམས་ཀྱིས་གོམ་པ་གཅིག་བོར་བ། །འཛམ་བུའི་ཆུ་ཀླུང་གསེར་སྲང་བྱེ་བ་གཉིས། །དེ་ནི་དེ་དང་མཚུངས་པ་ཡོད་མ་ཡིན། །གང་དག་གིས་ནི་འཇིག་རྟེན་མགོན་པོ་ལ། །བསྙེན་བཀུར་བྱ་ཕྱིར་གོམ་པ་གཅིག་བོར་
བ། །འཛམ་བུའི་ཆུ་ཀླུང་གསེར་སྲང་བྱེ་བ་དག །དེ་ནི་དེ་དང་མཚུངས་པ་ཡོད་མ་ཡིན། །དེ་ནས་གནས་གཙང་མའི་ལྷ་དག་གིས། བཅོམ་ལྡན་འདས་འཁོར་དང་བཅས་པ་ཀུན་ལ་ཀུན་ཏུ་དགབ་པར་བྱ་བའི་དོན་དུ་གོས་འབུམ་ཕྲག་བརྒྱད་ཅུ་དག་མངོན་པར་སྤྲུལ་ཏོ། །དེ་ནས་
རྒྱལ་པོ་ཡིད་གཉིས་ལས་ཡང་དག་པར་འདས་པས་དེ་བཞིན་གཤེགས་པ་ལ་དེ་ལྟ་བུའི་མཆོད་པ་མཐོང་ནས་འདི་སྙམ་དུ་སེམས་ཏེ། གདུགས་འདི་དག་ག་ལས་འོངས་ཤིག་སྙམ་མོ། །དེའི་སེམས་བསྐྱེད་མ་ཐག་ཏུ་གདུགས་དེ་དག་མི་སྣང་བར་གྱུར་ནས། དེ་འདི་སྙམ་དུ་སེམས་ཏེ།
གདུགས་འདི་དག་གར་སོང་སྙམ་མོ། །དེ་ནས་ལྷ་དེ་དག་གིས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ། གདུགས་ནི་གང་ནས་མ་སྐྱེས་ཤིང་། །གང་དུ་ཡང་ནི་འགགས་མ་གྱུར། །ཆོས་ཀུན་དངོས་པོ་འདི་འདྲ་སྟེ། །དེ་ནི་སངས་རྒྱས་རྣམ་པར་
མཁྱེན། །འཇིག་རྟེན་གསལ་མཛད་འདི་འདྲ་སྟེ། །ཆོས་ཉིད་དེ་དག་འདི་འདྲའོ། །གང་དག་དེ་ནི་རྣམ་ཤེས་པ། །དེ་དག་སངས་རྒྱས་ཐུགས་ལས་བྱུང་། །དེ་ནི་བདུད་ཀྱི་ཞགས་བཅད་ནས། །སངས་རྒྱས་ལམ་དུ་ཉེ་བར་ཞུགས། །འཇིག་རྟེན་གསལ་བར་མཛད་པ་མཐོང་། །བདུད་
འདུལ་བར་ནི་འགྲོ་བར་འགྱུར། །ལྷ་རྣམས་དང་ནི་མི་ཆེན་གྱིས། །ལུང་བསྟན་འདི་ནི་ཐོས་ནས་སུ། །བྱང་ཆུབ་སེམས་དཔའི་ཆོས་ཉིད་དག །དཔའ་བོ་ཆེན་པོས་ལུང་བསྟན་པ། །དེ་ནི་བཅིངས་མེད་གྲོལ་བ་མེད། །ལམ་ཆེན་ལ་ནི་བྱ་བ་བྱས། །སངས་རྒྱས་ཆོས་ནི་བླ་ན་མེད། །དཔའ་

བོ་ཆེན་པོས་ལུང་བསྟན་པ། །འཇིག་རྟེན་མགོན་པོ་སྐྱོབ་པ་ཡི། །དེ་ཡི་གསུང་ནི་ཐོས་ནས་སུ། །འོངས་པ་མེད་ཅིང་བྱུང་བ་མེད། །གནས་པ་མེད་པར་རྣམ་པར་ཤེས། །དེ་ཡི་ལུང་བསྟན་ཐོས་ནས་སུ། །ཆོས་ནི་གང་ཡང་མ་བྱུང་ཞིང་། །འགགས་པ་
མེད་ཅིང་མི་གནས་པར། །ལྷ་དག་གིས་ནི་རྣམ་པར་མཐོང་། །དེ་ཡི་གསུང་དེ་ཐོས་ནས་སུ། །སྐྱེ་བོ་མང་པོ་དེ་ཀུན་དག །སྟོང་པའི་ཆོས་ནི་རྣམ་ཤེས་ཏེ། །འགགས་པ་མེད་ཅིང་མ་འོངས་མེད། །ཆོས་གང་འདས་པའང་མ་ཡིན་ཏེ། །རྣམ་པར་ཤེས་མེད་མ་འོངས་མེད། །
ཆོས་རྣམས་ཀུན་གྱི་ངོ་བོ་ཉིད། །རྒྱལ་བའི་སྲས་དག་རྣམ་པར་ཤེས། །དེ་ཡི་ཚིག་དེ་ཐོས་ནས་སུ། །ཆོས་ནི་ཐམས་ཅད་མཚན་ཉིད་གཅིག །སངས་རྒྱས་བྱང་ཆུབ་ཐུབ་ཆེན་གང་། །ཐམས་ཅད་དེ་ལ་རབ་ཏུ་ཞུགས། །དེ་ཡི་ཚིག་དེ་ཐོས་ནས་སུ། །དེ་ཚེ་དེ་བཞིན་གཤེགས་བྱུང་
གང་། །རྒྱལ་བ་བྱེ་བ་སྤྲུལ་མཛད་ནས། །སྟོང་པའི་ཆོས་ནི་རབ་ཏུ་སྟོན། །ལྷ་ནི་ཁྲི་ཕྲག་བརྒྱད་ཅུ་དག །དེ་དག་ལ་ནི་དེ་བཞིན་གཤེགས། །འཇིག་རྟེན་གསལ་མཛད་བྱང་ཆུབ་ལམ། །སྦྱོང་བར་མཛད་པས་ལུང་བསྟན་ཏོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་རྒྱལ་པོ་ཡིད་གཉིས་
ལས་ཡང་དག་པར་འདས་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་ཡིད་གཉིས་ལས་ཡང་དག་པར་འདས་པ་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་འདས་པའི་དགེ་བའི་རྩ་བ་དག་
ཡང་དག་པར་བསྡུ་བའི་དོན་དུ་ཆོས་ཐམས་ཅད་ལ་སྐྱེ་བ་མེད་པའི་ཆོས་འཐོབ་པར་བྱ་བའི་ཕྱིར་འབད་པར་བྱའོ། །མཽད་གལ་གྱི་བུ་ངས་རྣམ་པར་གནས་པ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་རྣམས་ལ་རྣམ་པར་གནས་པ་ཤེས་པ་ཀུན་འབྱུང་བ་ཤེས་པ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་

པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་འོད་ཟེར་དཔག་མེད་ཅེས་བྱ་བ་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་
བཅོམ་ལྡན་འདས་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་འོད་ཟེར་དཔག་མེད་དེའི་ཉན་ཐོས་འདུས་པ་དང་པོ་ནི་ཉན་ཐོས་བྱེ་བ་ཕྲག་དགུ་བཅུ་བྱུང་ངོ་། །ཉན་ཐོས་འདུས་པ་གཉིས་པ་ནི་ཉན་ཐོས་བྱེ་བ་ཕྲག་དགུ་བཅུ་རྩ་བཞི་བྱུང་ངོ་། །ཉན་ཐོས་འདུས་པ་གསུམ་པ་ནི་ཉན་ཐོས་བྱེ་བ་ཕྲག་
དགུ་བཅུ་རྩ་དྲུག་བྱུང་ངོ་། །དེ་བཞིན་གཤེགས་པ་འོད་ཟེར་དཔག་མེད་དེའི་གསུང་རབ་ལ་ཁྱིམ་བདག་དབེན་པ་འདོད་པ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཆོས་ཀྱི་དགེ་མཚན་དང་ལྡན་པ། ལེགས་པར་གསུངས་པ་ཡོངས་སུ་ཚོལ་བ་ལ་མངོན་པར་བརྩོན་པ། ལེགས་པར་གསུངས་
པའི་དོན་དུ་དེའི་ཡོངས་སུ་མ་བཏང་བ་ཅི་ཡང་མེད་པ་ཞིག་བྱུང་ངོ་། །དེ་བཞིན་གཤེགས་པ་འོད་ཟེར་དཔག་མེད་ཅེས་བྱ་བ་འགྲོ་བ་ཐམས་ཅད་ཀྱི་ཐེ་ཙོམ་གཅོད་པ། དེ་སེམས་ཅན་དམྱལ་བའི་ལམ་དང་། དུད་འགྲོའི་སྐྱེ་གནས་ཀྱི་ལམ་དང་། གཤིན་རྗེའི་འཇིག་རྟེན་གྱི་ལམ་དང་། མིའི་
ལམ་དང་། མཐོ་རིས་ཀྱི་ལམ་དང་། མྱ་ངན་ལས་འདས་པའི་ལམ་སྟེ། ལམ་དེ་དག་རབ་ཏུ་སྟོན་པ་ཞིག་འཇིག་རྟེན་དུ་བྱུང་ངོ་། །ཞེས་དེས་བར་སྣང་ལས་སྒྲ་བྱུང་བ་ཐོས་སོ། །དེས་སྒྲ་དེ་ཐོས་ནས་གོས་ཕྱོགས་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བར་
སྣང་ལ་ཕྱོགས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་རིང་བར་སྣང་འདི་དག་ལ། །ཚིག་སྙན་གཏོང་བ་སུ་ཞིག་ལགས། །འདྲེན་པ་དེ་ནི་ག་ལ་བཞུགས། །དོན་དེ་ཁྱོད་ཀྱིས་བདག་ལ་གསུངས། །དེས་ཡང་བར་སྣང་ལས་སྒྲ་ཐོས། །ཤར་ཕྱོགས་ལོགས་ཀྱི་
ཕྱོགས་ཆ་ན། །གྲོང་ཁྱེར་ལྷུན་པོ་རྒྱལ་མཚན་དགའ། །ཞེས་བྱ་ཡོད་དེ་རྐང་གཉིས་བཞུགས། །ཐེ་ཙོམ་ཐམས་ཅད་གཅོད་པར་མཛད། །དེས་ཡང་ཐལ་མོ་སྦྱར་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དཔག་ཚད་བྱེ་བ་ཇི་སྙེད་ཡོད། །དཔག་ཚད་ཇི་སྙེད་དག་ཏུ་འགྲོ། །དཔག་

ཚད་ཇི་སྙེད་སོང་བས་སུ། །དེ་བཞིན་གཤེགས་པ་མཐོང་བར་འགྱུར། །དེས་ཡང་བར་སྣང་ལ་འདུག་པ་ལས་སྒྲ་ཐོས་པ། དཔག་ཚད་བྱེ་བ་ཕྲག་བཅུ་དང་། །དཔག་ཚད་བརྒྱ་ཕྲག་བཅུ་དག་ན། །གང་ན་རྫོགས་སངས་རྒྱས་བཞུགས་པ། །དེར་ནི་སོང་
སྟེ་ཡོངས་སུ་ཞུས། །དེས་སྒྲ་དེ་ཐོས་ནས་བློན་པོ་རྣམས་ལ་སྨྲས་པ། གྲོང་གི་གཙོ་བོ་དག །བཞོན་པ་བཟང་པོ་མྱུར་དུ་སྦྱོར་ཅིག །ཤར་གྱི་ཕྱོགས་ཀྱི་ཕྱོགས་ཆ་ན་དཔག་ཚད་བྱེ་བ་ཕྲག་བཅུ་དང་། དཔག་ཚད་སྟོང་ན་གྲོང་ཁྱེར་ལྷུན་པོའི་རྒྱལ་མཚན་ཞེས་བྱ་བ་ཡོད་དེ། དེ་ན་དེ་བཞིན་
གཤེགས་པ་འོད་ཟེར་དཔག་མེད་ཅེས་བྱ་བ་བཞུགས་ཤིང་ཉེ་བར་གནས་ཏེ། དེར་དེ་བཞིན་གཤེགས་པ་དེ་ལ་བལྟ་བ་དང་བསྙེན་བཀུར་བྱ་བའི་ཕྱིར་འདོང་ངོ་། །བློན་པོ་དག་གིས་བཀའ་བཞིན་འཚལ་ཞེས་ཁྱིམ་བདག་དབེན་པ་འདོད་པའི་ལྟར་མཉན་ནས་བཞོན་པ་བཟང་པོ་དག་
བཤམས་སོ། །བཤམས་ནས་གསོལ་པ། ཇོ་བོ་གང་གི་དུས་ལ་དབབ་པར་མཁྱེན་ན་བཞོན་པ་བཟང་པོ་དག་བཤམས་ལགས་སོ། །དེ་ནས་ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུ་བཞོན་པ་བཟང་པོ་ལ་ཞོན་ཏེ་རང་གི་གྲོང་ཁྱེར་ནས་བྱུང་ངོ་། །དེ་གང་དང་གང་
དུ་འགྲོ་བ་དེ་དང་དེར་སྐྱེ་བོ་ཐམས་ཅད་ཕྱི་བཞིན་འབྲང་ངོ་། །དེ་བཅོམ་ལྡན་འདས་དེ་བཞིན་གཤེགས་པ་འོད་ཟེར་དཔག་མེད་ག་ལ་བ་དེར་སོང་སྟེ། སངས་རྒྱས་ཀྱི་མཐུས་གནས་གཙང་མའི་ལྷ་དེ་དག་གིས་རིམ་གྲོ་ཡོངས་སུ་སྤྱད་པར་བྱེད་དོ། །དེའི་ཚེ་གྲོང་ཁྱེར་ལྷུན་པོའི་རྒྱལ་མཚན་གྱི་
ཕྱོགས་ན་སྐྱེད་མོས་ཚལ་ཀུན་ནས་མཛེས་པ་ཞེས་བྱ་བ་དེ་ན་དེ་བཞིན་གཤེགས་པ་དེ་བཞུགས་ཏེ། འདི་ལྟར་དེ་བཞིན་གཤེགས་པ་བཞུགས་པས་སྐྱེད་མོས་ཚལ་དེ་དཔལ་འབར་ཞིང་ལྷན་ནེ་ལྷང་ངེ་བར་རྒྱང་རིང་པོ་ཉིད་ནས་མཐོང་ངོ་། །དེ་བཞོན་པའི་ས་ཇི་ཙམ་པ་དེ་ཙམ་དུ་བཞོན་
པས་སོང་སྟེ། བཞོན་པ་ལས་བབས་ནས་རྐང་ཐང་བས་ཡོངས་སུ་བསྐོར་ཅིང་རྐང་ཐང་བས་མདུན་དུ་བདར་ནས། རྐང་ཐང་བས་སྐྱེད་མོས་ཚལ་ཀུན་ནས་མཛེས་པར་ཞུགས་སོ། །དེ་སྐྱེད་མོས་ཚལ་དེར་ཞུགས་པ་ན། སངས་རྒྱས་ཀྱི་མཐུས་རླུང་བསིལ་བ་བདེ་བ་དག་ལངས་

ཤིང་སྤོས་ཆུའི་ཆར་དག་མངོན་པར་རབ་ཏུ་བབ་པོ། །དེ་ནས་དེ་བཞིན་གཤེགས་པ་འོད་ཟེར་དཔག་མེད་དེས་ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུའི་བསམ་པ་ཐུགས་སུ་ཆུད་ནས། བདུད་རྩིའི་འོད་བསིལ་བ་བཏང་ངོ་། །དེའི་བདུད་རྩིའི་བསིལ་བ་དེས་དེ་ལམ་གྱིས་
དུབ་པ་མེད་པར་མཛད་དོ། །དེ་བཞིན་གཤེགས་པས་དེའི་ལུས་དུབ་པ་མེད་པར་ཐུགས་སུ་ཆུད་ནས་ཤིང་ཏལ་གཅིག་ཙམ་དུ་ནམ་མཁའ་ལ་མངོན་པར་འཕགས་ཏེ་འཆག་གོ། །ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུ་དེས་བཅོམ་ལྡན་འདས་དེ་བཞིན་གཤེགས་པ་འོད་
ཟེར་དཔག་མེད་དེ་མཛེས་ཤིང་སྡུག །དབང་པོ་ཞི་ཐུགས་ཞི་བ་བར་སྣང་ལ་འཆག་ཅིང་བཞུགས་པ་མཐོང་ངོ་། །མཐོང་ནས་ཀྱང་ཚིགས་སུ་བཅད་དེ་གསོལ་པ། ཇི་ལྟར་ཐོས་པ་དེ་བཞིན་མཐོང་། །དེ་བས་ཀྱང་ནི་ལྷག་པར་བཟང་། །འཇིག་རྟེན་དག་ན་ཁྱོད་དང་ནི། །ཡེ་ཤེས་
ཡོན་ཏན་འདྲ་མ་མཆིས། །དེ་ལ་དེ་བཞིན་གཤེགས་པ་འོད་ཟེར་དཔག་མེད་དེས་སླར་ཚིགས་སུ་བཅད་དེ་བཀའ་སྩལ་པ། ཁྱིམ་བདག་ཁྱོད་ཀྱིས་ཚིག་སྨྲས་པ། །དབེན་པར་འགྱུར་བ་ཡིན་ཏེ་ལེགས། །ཇི་ལྟར་འདིར་ནི་ཡུན་རིང་དུ། །དགེ་བའི་རྩ་བ་ཤིན་ཏུ་བསྟེན། །འཇིག་
རྟེན་དག་ན་ང་འདྲ་མེད། །ང་ལས་ལྷག་འགྱུར་ག་ལ་ཡོད། །ཁྱིམ་བདག་ཅུང་ཟད་ཡིད་ལ་ནི། །ཞུ་བ་གང་དག་འདོད་པ་ཞུས། །དེས་པ་ཁྱོད་ཀྱི་འདོད་པ་གང་། །ང་ཡིས་ཁྱོད་ཀྱི་སེམས་རངས་བྱ། །ང་ལ་ཅུང་ཟད་གང་འདྲི་བ། །དེ་རིང་ཐེ་ཙོམ་མེད་པར་བྱ། །དེ་ནས་ཁྱིམ་
བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུས་དེ་བཞིན་གཤེགས་པ་འོད་ཟེར་དཔག་མེད་དེ་ལ་ཚིགས་སུ་བཅད་དེ་གསོལ་པ། ཇི་ལྟར་བསམ་གཏན་ལངས་ནས་མཆིས། །བསམ་གཏན་བསམ་གཏན་ཡོན་ཏན་དགའ། །འདི་ལ་ཡིད་གཞོལ་ཇི་ལྟར་འགྱུར། །ཞུས་པ་
དེ་དག་བདག་ལ་གསུངས། །དགེ་བའི་རྩ་བ་གང་གིས་ནི། །ཤེས་པ་དེ་ནི་རྟོགས་པར་འགྱུར། །ལྡན་པ་དང་ནི་ཤེས་པའི་རྒྱུ། །ཞུས་པ་དེ་དག་བདག་ལ་གསུངས། །དེ་ལ་དེ་བཞིན་གཤེགས་པ་འོད་ཟེར་དཔག་མེད་དེས་ལུང་བསྟན་པ་ཚིགས་སུ་བཅད་པ་གཅིག་གིས་

ཡོངས་སུ་མགུ་བར་མཛད་དེ། མཚན་མེད་བྱས་པའི་བསམ་གཏན་ནི། །ལྡང་བ་ལ་ཡང་ཤིན་ཏུ་ངེས། །ཤེས་པ་གང་གིས་བསམ་གཏན་དེ། །སོ་སོར་ཐོབ་ནས་རབ་ཏུ་ཤེས། །ཞུ་བ་ལུང་བསྟན་ཐོས་ནས་སུ། །འཇིག་རྟེན་མགོན་པོ་སྐྱོབ་པ་ཡིས། །
ཁྱིམ་བདག་དཔའ་བོ་མཁས་པ་ནི། །སྐྱེ་བ་མེད་ལ་རབ་ཏུ་བཞག །དེ་ནི་སངས་རྒྱས་ཆོས་དག་ལ། །སོམ་ཉི་ཐེ་ཙོམ་མེད་པར་གནས། །འཁོར་དེ་སྣང་བར་བྱས་ནས་སུ། །འདྲེན་པ་ལ་ནི་འདི་སྐད་གསོལ། །བཅོམ་ལྡན་འདས་ཀྱིས་བཀའ་གསུང་དག །ཇི་ལྟར་རྣམ་
པར་འཚལ་བར་འགྱུར། །དེ་ནས་དེ་བཞིན་གཤེགས་པ་འོད་ཟེར་དཔག་མེད་དེས་ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུ་ལ་ཚིགས་སུ་བཅད་དེ་བཀའ་སྩལ་པ། གང་གཱའི་བྱེ་སྙེད་སེམས་ཅན་དག །ང་ཡིས་ལེགས་བཤད་ཐོས་ནས་སུ། །ཡང་དག་པ་ནི་
ཇི་བཞིན་ཤེས། །སྐྱེ་བ་མེད་ལ་རབ་ཏུ་བཀོད། །མཽད་གལ་གྱི་བུ་དེ་ཇི་སྙམ་དུ་སེམས། ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་ཁྱིམ་བདག་དབེན་པ་འདོད་པ་ཞེས་བྱ་བ་ཤིང་སཱ་ལ་
ཆེན་པོ་ལྟ་བུར་གྱུར་ཏོ། །འགྲོ་བ་ཐམས་ཅད་ལ་ཕན་པའི་ཕྱིར་ཞུ་བ་ཡོངས་སུ་ཞུས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་ཕན་པར་འདོད་པས་བསམ་གཏན་ལ་མཁས་པར་བྱ། བསམ་གཏན་གྱི་ལྡང་བ་ལ་
མཁས་པར་བྱ། ལྡང་བ་ཤེས་པ་ཀུན་འབྱུང་བ་ཤེས་པའི་དགེ་བའི་རྩ་བ་གང་ཡང་དག་པར་འདུ་བར་འགྱུར་བའི་དགེ་བའི་རྩ་བ་དེ་དག་ཤིན་ཏུ་གཞག་པར་བྱ། ཤིན་ཏུ་གཟུང་བར་བྱ། མཽད་གལ་གྱི་བུ་ངས་རྣམ་པར་གནས་པ་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་
སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནས་དེ་བཞིན་དུ་སྦྱར་ཏེ། ཇི་ལྟར་ཡང་དག་པར་རབ་ཏུ་བཤད་པར་བྱ་སྙམ་ནས། དགེ་བའི་རྩ་བ་རྒྱ་ཆེ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་

བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་དགྲ་ངེས་པར་བཅོམ་པ་ཞེས་བྱ་བ་འབའ་ཞིག་ཁོ་ནས་སངས་རྒྱས་ཀྱི་ཞིང་ལ་རྒྱལ་སྲིད་བྱེད་པ་ཞིག་བྱུང་ངོ་། །རྒྱལ་པོ་དགྲ་ངེས་པར་བཅོམ་པ་དེ་དང་ཉེ་
བ་ཞིག་ན། དེ་བཞིན་གཤེགས་པ་བདེ་མཛད་ཅེས་བྱ་བ་ཞིག་བྱུང་ངོ་། །དེ་བཞིན་གཤེགས་པ་བདེ་མཛད་དེའི་འཁོར་ཉན་ཐོས་ཁྲི་ཕྲག་དཔག་ཏུ་མེད་པ་དང་བྱང་ཆུབ་སེམས་དཔའ་ཁྲི་ཕྲག་དཔག་ཏུ་མེད་པ་དག་བྱུང་ངོ་། །བྱང་ཆུབ་སེམས་དཔའ་དེ་དག་གི་ནང་དུ་བྱང་ཆུབ་སེམས་
དཔའ་མོས་པའི་སྟོབས་དང་ལྡན་པ་ཞེས་བྱ་བ་ལ་སོགས་པ་བྱུང་ངོ་། །དེའི་ཚེ་སངས་རྒྱས་ཀྱི་ཞིང་དེར་སེམས་ཅན་དག་ཐེག་པ་གསུམ་ལ་ཡང་དག་པར་རབ་ཏུ་གནས་པར་གྱུར་ཏེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། སངས་རྒྱས་ཀྱི་ཐེག་པའོ། །
སེམས་ཅན་གང་དག་སངས་རྒྱས་ཀྱི་ཐེག་པ་འདི་ལ་ཡང་དག་པར་རབ་ཏུ་གནས་པ་དེས་ཉན་ཐོས་ཀྱི་ཐེག་པ་ལ་ཡང་དག་པར་རབ་ཏུ་གནས་པའི་སེམས་ཅན་དེ་དག་ཡང་དང་ཡང་དུ་སངས་རྒྱས་ཀྱི་ཐེག་པ་ལ་སྤྲོ་བ་རབ་ཏུ་སྐྱེད་པར་བྱེད་དེ། གྲོགས་པོ་དག་ཐེག་པ་ཆེན་པོ་ནི་དགའ་བར་བྱ་བ་
ཡིན་ཏེ། གང་ལ་མི་ཤེས་པའམ་མ་མཐོང་བའམ། མ་རིག་པའམ་མངོན་སུམ་དུ་མ་བྱས་པའམ། ཉེ་བར་སྐྱེ་བའམ། ཉེ་བར་འདུག་པའམ་འགགས་པ་གང་ཡང་མེད་དོ། །དེ་ལ་གང་ཉན་ཐོས་ཀྱི་ཐེག་པ་པའི་སེམས་ཅན་དེ་དག་ཡོངས་སུ་མི་དགའ་བའི་བློ་སྐྱེས་ཏེ། འཁོར་བར་ཤིན་
ཏུ་རྒྱུག་པའི་སེམས་ཅན་སྔོན་གྱི་མཐའ་མི་ཤེས་པའི་འགྲོ་བ་འདི་དག་ལ་རེ་ཞིག་སུ་ཞིག་སྤྲོ་བར་འགྱུར་སྙམ་ནས་དེ་ནས་བྱང་ཆུབ་སེམས་དཔའ་ཐེག་པ་ལ་ཡང་དག་པར་རབ་ཏུ་གནས་པའི་སེམས་ཅན་དེ་དག་དང་ཆོས་འཐུན་པས་རྩོད་པར་བྱེད་དེ། ཀྱེ་མ་ཚེ་དང་ལྡན་པ་ཁྱེད་ཅག་ཅི་སྔོན་ཡུན་རིང་པོ་
ནས་སྡུག་བསྔལ་དང་སྡུག་བསྔལ་ཤིན་ཏུ་བསྐྱེད་པ་འདི་ཤེས་སམ། སྨྲས་པ་ཚེ་དང་ལྡན་པ་དག་མ་ཡིན་ནོ། །སྨྲས་པ་ཁྱེད་ཅག་ལ་གང་གི་ཚེ་ཡོངས་སུ་བཟུང་བ་དང་བཅས་པ་རྙེད་པ་དེའི་ཚེ་ཁྱེད་ཅག་འཇིགས་སམ། ཁྱེད་ཅག་སྤྲོ་བ་ཆེན་པོ་མ་བྱས་པ་ལ་རྟོག་ལ་བྱས་པ་ལ་ནི་མི་རྟོག །

ཚེ་དང་ལྡན་པ་དག་བྱས་པ་བཏང་ནས་མ་བྱས་པ་ལ་རྟོག་པ་དེ་ནི་འཇིགས་པར་འགྱུར། གང་ཞིག་བྱས་པ་ལ་རྟོག་ཅིང་མ་བྱས་པ་ལ་མ་ཡིན་དེ་འདི་སྙམ་དུ་སེམས་ཏེ། བདག་གིས་མང་དུ་བྱས་སོ། །དེ་བྱས་པ་རྟོགས་པ་དེ་ནི་འཇིགས་པ་མེད་དོ། །ཚེ་དང་
ལྡན་པ་དག་བཅོམ་ལྡན་འདས་ཀྱིས་གསུངས་པའི་དོན་བདག་ཅག་གིས་འདི་ལྟར་ཤེས་ཏེ། བྱས་པ་བྱས་པ་ལ་ཡོངས་སུ་བརྟག་པར་བྱ་སྟེ། བྱས་པ་བྱས་པ་ལ་གང་ཡོངས་སུ་རྟོག་པ་དེ་ནི་བདག་གིས་མང་དུ་བྱས་སོ་ཞེས་མི་ཤེས་སོ། །ཚེ་དང་ལྡན་པ་དག་སྔོན་བྱུང་བ་འདས་པའི་དུས་ན་
དྲང་སྲོང་རྟ་དམར་ཞེས་བྱ་བ་ཞིག་བྱུང་སྟེ། དེ་འདི་སྙམ་དུ་སེམས་སོ། །འཇིག་རྟེན་གྱི་མཐར་སོང་ནས་ཕྱིས་འཆི་བའི་དུས་བྱའོ་སྙམ་ནས་དེ་འཇིག་རྟེན་གྱི་མཐར་འགྲོ་བར་ཆས་སོ། །དེའི་གོམ་པ་འདི་ལྟ་བུར་འདོར་ཏེ་རི་རབ་ཀྱི་རྩེ་མོ་གཅིག་ནས་རི་རབ་ཀྱི་རྩེ་མོ་གཞན་ལ་གོམ་པ་འདོར་རོ། །མགྱོགས་
པ་དེ་ལྟ་བུ་དང་ལྡན་པར་གྱུར་ཏེ། འདི་ལྟ་སྟེ་དཔེར་ན་རྫུ་འཕྲུལ་གྱི་སེམས་ཀྱིས་འགྲོ་བ་བཞིན་ནོ། །དེ་འཇིག་རྟེན་གྱི་མཐར་མ་སོན་པར་འཆི་བའི་དུས་བྱས་སོ། །ཚེ་དང་ལྡན་པ་དག་རྐང་པས་འཇིག་རྟེན་གྱི་མཐར་འགྲོའོ་ཞེས་སངས་རྒྱས་བཅོམ་ལྡན་འདས་མི་གསུང་སྟེ། ཡེ་ཤེས་ཀྱིས་
འཇིག་རྟེན་གྱི་མཐར་འགྲོའོ། །ཚེ་དང་ལྡན་པ་ཁྱེད་གང་སྡུག་བསྔལ་དང་སྡུག་བསྔལ་ལ་ཡང་དག་པར་ཤེས་པ་དེ་ཁྱེད་ཀྱིས་མ་འོངས་པ་ཡོངས་སུ་རྟོག་ན་སྡུག་བསྔལ་དང་སྡུག་བསྔལ་གྱི་འདུ་ཤེས་སུ་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྲེད་
པ་ཟད་པའི་མཐར་འགྲོ་བར་བྱེད་ཀྱི་འཇིག་རྟེན་གྱི་མཐའ་འདོགས་པར་ནི་མི་བྱེད་དེ། དེ་དག་ལ་སྡུག་བསྔལ་དང་སྡུག་བསྔལ་གྱི་འདུ་ཤེས་མེད་དོ། །དེ་ལྟར་ཉན་ཐོས་ཀྱི་ཐེག་པ་ལ་ཡང་དག་པར་རབ་ཏུ་གནས་པའི་དགེ་སློང་མང་པོ་དེ་དག་ལ་ཐེག་པ་ཆེན་པོ་ལ་ཡང་དག་པར་རབ་ཏུ་གནས་
པའི་དགེ་སློང་དེ་དག་གིས་བཟློག་པར་མ་ནུས་སོ། །དེ་ཅིའི་ཕྱིར་ཞེ་ན། དགེ་སློང་དེ་དག་ལ་མོས་པའི་སྟོབས་མེད་དེ། གང་མོས་པའི་སྟོབས་མེད་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་ཏུ་སྐལ་བ་མེད་དོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་

དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་དོན་བྱེད་པར་འདོད་པས་མོས་པའི་སྟོབས་ལ་མངོན་པར་བརྩོན་པར་བྱའོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་མོས་པའི་སྟོབས་དང་ལྡན་པ་ཞེས་བྱ་བ་བྱང་ཆུབ་སེམས་དཔའི་ཐེག་པ་ལ་ཡང་དག་པར་རབ་
ཏུ་གནས་པའི་དགེ་སློང་ཞིག་བྱུང་བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་མོས་པའི་སྟོབས་དང་ལྡན་པ་ཞེས་བྱ་བ་དགེ་སློང་དུ་གྱུར་ཏོ། །མཽད་གལ་གྱི་བུ་ངས་རྣམ་པར་གནས་པ་ཤེས་པ་འགོག་པར་འགྱུར་བའི་ལམ་ཤེས་
པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནས་སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་སྣ་ཚོགས་གྲངས་མེད་ཅིང་
དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་ཅིང་གྲངས་མེད་བསམ་གྱིས་མི་ཁྱབ་གཞལ་དུ་མེད་གཞལ་གྱིས་མི་ལང་བརྗོད་དུ་མེད་པའི་འཁོར་བ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཚངས་པའི་
བླ་མ་ཞེས་བྱ་བ་ནས་སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་སྟེ། །དགེ་སློང་གི་དགེ་འདུན་གྱི་འཁོར་དཔག་ཏུ་མེད་པ་དང་། བྱང་ཆུབ་སེམས་དཔའི་འཁོར་དཔག་ཏུ་མེད་དོ། །དེར་བྱང་ཆུབ་སེམས་དཔའ་རིག་པ་དང་ལྡན་པ་ཞེས་བྱ་བ་ཅིག་བྱུང་སྟེ། དེས་ཚོར་
བ་ཐམས་ཅད་གདུལ་བའི་དོན་དུ་ཚོར་བ་བདག་གི་དོན་རྟོགས་ཏེ། དེ་དེ་ལྔར་རྣམ་པར་ཤེས་ནས་རྫུ་འཕྲུལ་གྱི་སངས་རྒྱས་ཀྱི་ཞིང་ཐམས་ཅད་སྣང་བར་བྱས་སོ། །གྲོགས་པོ་དག་ཚོར་བ་རྣམས་གདུལ་བའི་དོན་དུ་ཡུན་རིང་པོར་བརྗོད་དུ་མེད་པར་སངས་རྒྱས་ཀྱི་ཞིང་གི་སེམས་ཅན་
རྣམས་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་དག་གདུལ་བའི་དོན་དུ་རིག་པ་ཞེས་བརྗོད་དེ། སེམས་ཅན་འདོད་ཆགས་སྤྱོད་པ་རྣམས་ཀྱི་འདོད་ཆགས་འདུལ། །སེམས་ཅན་ཞེ་སྡང་སྤྱོད་པ་རྣམས་ཀྱི་ཞེ་སྡང་འདུལ། སེམས་ཅན་གཏི་མུག་སྤྱོད་པ་རྣམས་གྱི་གཏི་

མུག་འདུལ། སེམས་ཅན་ཆ་མཉམ་པར་སྤྱོད་པ་རྣམས་ཀྱི་ཉོན་མོངས་པ་ཐམས་ཅད་འདུལ་ལོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་རིག་པ་དང་ལྡན་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་
བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་རིག་པ་དང་ལྡན་པ་ཞེས་བྱ་བར་གྱུར་ཏོ། །སངས་རྒྱས་ཀྱི་ཞིང་གི་སེམས་ཅན་དེ་དག་ཐམས་ཅད་ངས་ཚིག་གིས་བྱང་ཆུབ་ཏུ་འདུལ་ཏེ། དེ་བཞིན་གཤེགས་པ་དེ་དག་ཐམས་ཅད་སེམས་ཅན་རྣམས་ཀྱི་དོན་མཛད་ནས་ཕུང་པོ་
ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་བསྟན་པ་དངོས་པོ་གསུམ་པོ་དང་པོ་མངོན་པར་རྫོགས་པར་སངས་རྒྱས་པ་དང་། ཞུགས་པ་དང་། ཡོངས་སུ་མྱ་ངན་ལས་འདས་པ་རྣམས་
ངས་ཡོངས་སུ་བཟུང་ངོ་། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་ཀྱི་བསྟན་པ་ཡོངས་སུ་གཟུང་བར་བྱ། གནས་ཤེས་པ་འགོག་པར་འགྱུར་བའི་ལམ་ཤེས་པ་ཡང་གཟུང་བར་བྱའོ། །མཽད་གལ་གྱི་བུ་དེ་ཙམ་གྱིས་ན་བྱང་ཆུབ་
སེམས་དཔས་དམ་པའི་ཆོས་ཡོངས་སུ་བཟུང་བར་འགྱུར་ཏེ། གང་ལམ་ཡོངས་སུ་འཛིན་པ་དེ་ནི་བསྟན་པ་ཡོངས་སུ་བཟུང་བར་འགྱུར་རོ། །བྱིས་པ་སོ་སོའི་སྐྱེ་བོ་དག་ཡང་དག་པ་མ་ཡིན་པའི་ལམ་ལ་སྡུག་བསྔལ་ཞེས་ཚིག་ཏུ་བརྗོད་ཀྱང་སྡུག་བསྔལ་སོ་སོར་མི་ཤེས། སྡུག་
བསྔལ་གྱི་རྒྱུ་ཚིག་ཏུ་བརྗོད་ཀྱང་སྡུག་བསྔལ་གྱི་རྒྱུ་ཡོངས་སུ་མི་ཤེས། མི་རྟག་པ་ཞེས་ཚིག་ཏུ་བརྗོད་ཀྱང་སྡུག་བསྔལ་འགོག་པ་སོ་སོར་མི་ཤེས། སྡུག་བསྔལ་ལས་འབྲོས་ཀྱང་སྡུག་བསྔལ་ལས་ཡོངས་སུ་མ་ཐར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་
དཔའ་ཆེན་པོས་རྒྱུ་དང་འབྲས་བུ་ལ་མཁས་པར་བྱའོ། །མཽད་གལ་གྱི་བུ་རྒྱུ་དང་འབྲས་བུ་ལ་མཁས་པའི་བྱང་ཆུབ་སེམས་དཔའ་ནི་རྒྱུ་འགོག་པའི་ལམ་སྟོན་པར་བྱེད་དོ། །སྔོན་གྱི་སྦྱོར་བ་གསུམ་པོ་འདི་དག་ནི་འཇིག་རྟེན་ཤེས་པ་ལ་སྦྱར་བར་བྱའོ། །མཽད་གལ་གྱི་བུ་ངས་འཇིག་རྟེན་ཤེས་པར་བྱ་བའི་

དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་དུ་མ་མངོན་པར་འདུས་བྱས་ཏེ། སྦྱིན་པའི་ཕ་རོལ་ཏུ་ཕྱིན་པ་དང་ཡང་དག་པར་ལྡན་པར་བྱས། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་
ཡང་དག་པར་ལྡན་པར་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་ཅིང་གྲངས་མེད། བསམ་གྱིས་མི་ཁྱབ་གཞལ་དུ་མེད། གཞལ་གྱིས་མི་ལང་བའི་འཁོར་བ་དེའི་ཕ་རོལ་གྱི་ཡང་ཆེས་ཕ་རོལ་ན། དེད་དཔོན་སྙིང་རྗེ་ཅན་ཞེས་བྱ་བ་མཛངས་
ཤིང་གསལ་ལ་ཡིད་གཞུངས། ཕྱོགས་དང་ཕྱོགས་མཚམས་ལ་མཁས། དོན་དང་དོན་མ་ཡིན་པ་ལ་མཁས། རྒྱུ་སྐར་དང་ཉིན་མོ་ལ་མཁས། སྐད་ཅིག་དང་ཐང་ཅིག་ཡུད་ཙམ་ལ་མཁས། ཐབས་དང་ཐབས་མ་ཡིན་པ་ལ་མཁས་པ་ཞིག་བྱུང་ངོ་། །དེ་སྡོམ་པ་མནོས་
ཤིང་དགེ་མཚན་དང་བཀྲ་ཤིས་དང་ལྡན་པར་བྱས་ནས་ཚོང་པ་ལྔ་བརྒྱ་དང་ལྷན་ཅིག་ཏུ་རྒྱ་མཚོ་ཆེན་པོར་ཞུགས་སོ། །དེ་ཚོང་པ་དེད་དཔོན་གྱི་ཡོངས་སུ་འདྲེན་པ་ཡིན་ཏེ། དེ་ཚོང་པ་དེ་དག་དང་འཇིག་རྟེན་གྱི་གཏམ་སྨྲའོ། །འཇིག་རྟེན་གྱི་ཁམས་འདི་ནས་ཤར་ཕྱོགས་ལོགས་
ཀྱི་འཇིག་རྟེན་གྱི་ཁམས་དཔག་ཏུ་མེད་པ་ན་ལ་ལ་ནི་སྐྱེ། ལ་ལ་ནི་འགག །ལ་ལ་ནི་འཇིག །ལ་ལ་ནི་འབྱུང་། ལ་ལ་ནི་ཞིག་ནས་འདུག །ལ་ལ་ནི་བྱུང་ནས་འདུག་སྟེ། གྲོགས་པོ་དག་འཇིག་རྟེན་གྱི་ཁམས་དེ་དག་གི་མཐའ་མེད་དོ། །དེ་བཞིན་དུ་ཕྱོགས་བཅུའི་འཇིག་
རྟེན་གྱི་ཁམས་དེ་དག་ན་སེམས་ཅན་རིགས་ཕུན་སུམ་ཚོགས་པ་དག་ཡོད། སེམས་ཅན་རིགས་དམའ་བ་དག་ཡོད། སེམས་ཅན་ཁ་ཅིག་ནི་ཕྱུག །ཁ་ཅིག་ནི་དབུལ། སེམས་ཅན་ཁ་ཅིག་ནི་བྲན་བྱེད། ཁ་ཅིག་ནི་ཇོ་བོ་བྱེད་དེ། དེ་ལྟར་སྤྱི་ཤེས་པ་དང་། ཁྱད་པར་
ཤེས་པ་རྣམ་པ་དུ་མ་འདི་ནི་འཇིག་རྟེན་ཤེས་པ་ཞེས་བྱའོ། །གྲོགས་པོ་དག་དེ་ལྟ་བས་ན་འཇིག་རྟེན་དང་འཇིག་རྟེན་ལས་འདས་པ་ཤེས་པ་ལ་འབད་པར་བྱའོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དེད་དཔོན་སྙིང་རྗེ་ཅན་ཞེས་བྱ་བར་གྱུར་པ་དེ་གཞན་ཡིན་པར་

སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་དེད་དཔོན་སྙིང་རྗེ་ཅན་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་འཇིག་རྟེན་དང་འཇིག་རྟེན་ལས་འདས་པ་ཤེས་པ་ལ་རྣལ་འབྱོར་དུ་བྱའོ། །མཽད་གལ་གྱི་བུ་ཇི་
ལྟར་ན་བྱང་ཆུབ་སེམས་དཔས་འཇིག་རྟེན་ཤེས་པ་ཀུན་འབྱུང་བ་ཤེས་པ་ལ་བསླབ་པར་བྱ་ཞེ་ན། མཽད་གལ་གྱི་བུ་འདི་ལ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་དགེ་བའི་བཤེས་གཉེན་ལ་བསྟེན་
པར་བྱ་ཞིང་། བརྩོན་འགྲུས་མི་གཏང་བར་བྱའོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས། དེའི་ཕ་རོལ་གྱི་ཡང་ཆེས་ཕ་རོལ་ན། བྱང་ཆུབ་སེམས་དཔའ་འོད་འཕགས་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་རབ་ཏུ་གནས་
པ། དེ་བཞིན་གཤེགས་པ་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་པ་དགེ་བ་རྣམ་པ་སྣ་ཚོགས་དང་ལྡན་པ་ཞིག་བྱུང་ངོ་། །དེ་ཉལ་བའི་རྨི་ལམ་ན་དེ་བཞིན་གཤེགས་པ་དང་ལྷན་ཅིག་ཏུ་གཏམ་ཡང་དག་པར་སྨྲ་བར་འགྱུར་བ་ལ་མ་གཏོགས་པར་གཞན་ཅི་ཡང་མི་མཐོང་
སྟེ། ཇི་ལྟར་འདིར་དེ་བཞིན་གཤེགས་པ་དང་ཡང་དག་པར་འགྲོགས་པ་བྱས་ཤིང་། ཡོངས་སུ་འདྲིས་པར་བྱས་སོ། །དེའི་ཚེ་དེ་བཞིན་གཤེགས་པ་ཐོགས་མེད་སྟོན་ཞེས་བྱ་བ་འཇིག་རྟེན་དུ་བྱུང་སྟེ། དེ་དེ་བཞིན་གཤེགས་པ་ཐོགས་མེད་སྟོན་དེ་དང་ལྷན་ཅིག་བར་
སྐབས་སུ་གཏམ་འདི་ལྟ་བུ་ཞིག་བྱས་སོ། །བཅོམ་ལྡན་འདས་འཇིག་རྟེན་ཤེས་པ་ཀུན་འབྱུང་བ་ཤེས་པ་ཇི་ལྟར་ཡང་དག་པར་རྟོགས་པར་འགྱུར། འཇིག་རྟེན་ཤེས་པ་ཀུན་འབྱུང་བ་ཤེས་པ་དེའི་རྒྱུ་མཚན་ཕན་པར་འགྱུར་བ་ནི་གང་ལགས། བཀའ་སྩལ་པ་རིགས་ཀྱི་བུ་
ཁྱོད་སྐྱེ་བོ་མང་པོ་ལ་ཕན་པར་ཞུགས། སྐྱེ་བོ་མང་པོ་ལ་བདེ་བའི་ཕྱིར་དེ་བཞིན་གཤེགས་པ་ལ་དོན་འདི་ཡོངས་སུ་ཞུ་བར་སེམས་པ་ནི་ལེགས་སོ་ལེགས་སོ། །རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ། དེ་བཞིན་དུ་སྦྱར་ཏེ། བཅོམ་ལྡན་འདས་ལེགས་སོ་ཞེས་

གསོལ་ནས། བྱང་ཆུབ་སེམས་དཔའ་འོད་འཕགས་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ལ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱ་བར་འདོད་པས་ཤེས་པ་རྟོགས་པར་བྱ་བའི་ཕྱིར། བསྟན་བཅོས་ཐམས་ཅད་ཁོང་དུ་ཆུད་པར་བྱ་བ་ལ་མངོན་པར་བརྩོན་པར་བྱ། གཞན་ཡང་འཇིག་རྟེན་གྱི་ཀུན་ཏུ་སྤྱོད་པ་ལ་བརྩོན་པར་བྱ། གཞན་ཡང་དགེ་མཚན་དང་ལྡན་པར་བྱ། འདི་ལྟ་སྟེ། བྱང་ཆུབ་སེམས་
དཔའ་སྤྱད་པ་སྤྱོད་པ་ན་ཕྱིས་འབྱུང་བའི་སྔོན་གྱི་རབས་གྲུབ་པའི་མཐའ་འདི་ལ་བསླབ་པར་བྱ། གཞན་ཡང་གང་ཟག་གི་ཐ་སྙད་དང་། གྲོང་དང་། ཡུལ་གྱི་ཐ་སྙད་ལ་བསླབ་པར་བྱ། གང་དང་གང་དུ་འགྲོ་བ་དེ་དང་དེའི་ཐ་སྙད་ལ་བསླབ་པར་བྱ་སྟེ། ཇི་ཙམ་དུ་གང་
འཇིག་རྟེན་གྱི་ཤེས་པ་དང་། ཐམས་ཅད་དུ་ཤེས་པ་ལ་མཁས་པར་བྱའོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་འཕགས་ཞེས་བྱ་བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་
ཕྱིར་ཞེ་ན། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་འཕགས་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན། བྱང་ཆུབ་སེམས་དཔས་འཇིག་རྟེན་ཤེས་པ་ཀུན་འབྱུང་བ་ཤེས་པ་ལ་བསླབ་པར་བྱའོ།། །།བམ་པོ་ཉི་ཤུ་པ། མཽད་གལ་གྱི་བུ་
གཞན་ཡང་འཇིག་རྟེན་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས།
དེའི་ཕ་རོལ་གྱི་ཡང་ཆེས་ཕ་རོལ་ན། གཟུགས་ཀྱིས་འཚོ་བ་སྐྱེ་བོ་ཐམས་ཅད་ཀྱི་ངོ་བོའི་རྗེས་སུ་འཇུག་པ་ཞེས་བྱ་བ་གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བྱུང་ངོ་། །དེ་སྐྱེས་བུ་གང་དང་གང་དུ་རྗེས་སུ་འགྲོ་བར་

འགྱུར་བ་དེ་དང་། དེ་ཉིད་དུ་དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་ཞེས་བྱ་བ་ཡོ་བྱད་
ཐམས་ཅད་དང་ལྡན་པ་ཞིག་བྱུང་སྟེ། ཚོང་པ་ལྔ་བརྒྱ་དང་ལྷན་ཅིག་ཏུ་རྒྱ་མཚོ་ཆེན་པོར་ཞུགས་སོ། །དེ་རྒྱ་མཚོའི་དབུས་སུ་ཕྱིན་པ་དང་། ཆུ་སྲིན་གྱིས་གྲུ་མིད་པར་བྱེད་དེ། དེའི་ཁར་གྲུ་དེ་འཇུག་གོ། །དེ་ནས་ཚོང་པ་དེ་དག་ལྷ་གང་དང་གང་ལ་དད་ཅིང་མོས་པ་དེ་དང་དེ་དག་ལ་ཕྱག་འཚལ་ཞིང་
ངུ་སྟེ། ཁ་ཅིག་ནི་ཞི་བ་ལ། ཁ་ཅིག་ནི་སྐེམ་བྱེད་ལ། ཁ་ཅིག་ནི་དབང་ཕྱུག་ཆེན་པོ་ལ། ཁ་ཅིག་ནི་དབང་པོ་ལ། ཁ་ཅིག་ནི་ཆུ་ལྷ་ལ། ཁ་ཅིག་ནི་སྐྱེ་དགུའི་བདག་པོ་ལ། ཁ་ཅིག་ནི་ཚངས་པ་ལ། ཁ་ཅིག་ནི་བདེ་བྱེད་ལ། ཁ་ཅིག་ནི་ཉི་མ་ལ། ཁ་ཅིག་ནི་ཟླ་བ་ལ། ཁ་ཅིག་ནི་རྒྱ་མཚོ་
ཆེན་པོ་དེ་ཉིད་ལ་ཕྱག་འཚལ་བར་བྱེད། ཁ་ཅིག་ནི་བདག་ཅག་ལ་མགོན་སྐྱབས་འདི་དག་མེད་པས་ཤི་ཡང་རུང་ཞེས་ཅང་མི་ཟེར་བར་འཁོད་ཀྱང་དེ་དག་གང་ཡང་སྐྱོབ་པར་མ་གྱུར་ཏོ། །དེ་ནས་དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་དེ་འདི་སྙམ་དུ་སེམས་ཏེ། ཀྱེ་མ་ཚོང་པ་
འདི་དག་ཐམས་ཅད་ནི་སྐྱབས་ངན་པ་ལ་རྟེན་ཏོ། །མགོན་སྐྱབས་མ་ཡིན་པ་ལ་འདུ་ཤེས་སུ་གྱུར་ཏེ། ལོག་པར་མོས་པ་འདི་ལས་ཐམས་ཅད་ཀྱི་ངོ་བོའི་རྗེས་སུ་འཇུག་སྟེ། བདག་ཡང་དག་པར་སྟོན་པ་ལྟ་བུར་བྱེད་ཀྱང་ངོ་བོ་ཉིད་ནི་སུ་ལ་ཡང་མི་སྟོན་ཏོ། །མཽད་གལ་གྱི་བུ་
དེ་བཞིན་དུ་འདུ་བྱེད་ཐམས་ཅད་ལ་ཇི་ལྟ་ཇི་ལྟ་བ་བཞིན་དུ་རྟོག་ན་དེ་ལྟ་དེ་ལྟར་དངོས་པོ་མེད་པར་མཐོང་ངོ་། །འདུ་བྱེད་རྣམས་ལ་ངེས་པ་གང་ཡང་མེད་དེ། གལ་ཏེ་གཙང་བར་འདོད་པའི་གཙང་བས་མཚན་མ་སྤངས་ཏེ། མི་གཙང་བའི་མཚན་མ་ལ་བརྟེན་པར་བྱའོ། །དེ་བཞིན་དུ་སྦྱར་
ཏེ། མཚན་མ་སྤང་ཞིང་མཚན་མ་མེད་པ་ལ་བརྟེན་པར་བྱ་སྟེ། འདི་ན་ཐར་བའི་ལམ་མོ། །མཽད་གལ་གྱི་བུ་ངས་ཁམས་དུ་མ་ལ་མོས་པ་ཤེས་པར་བྱ་བའི་དོན་དུ་རྟག་པ་ནི་འཆིང་བ་ཡིན་ལ། མི་རྟག་པ་ནི་ཐར་པའོ། །བདག་ནི་འཆིང་བ་ཡིན་ལ། བདག་མེད་པ་ནི་ཐར་པའོ། །མཚན་

མ་ནི་འཆིང་བ་ཡིན་ལ། མཚན་མ་མེད་པ་ནི་ཐར་པའོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་ཡོངས་སུ་མྱ་ངན་ལས་འདའ་བར་འདོད་པ་དང་། སེམས་ཅན་ཡང་ཡོངས་སུ་མྱ་ངན་ལས་བཟླ་བར་ཡོངས་སུ་རྟོག་ན་གཙང་བའི་ཁ་དོག་ཏུ་སྟོན་པར་བྱེད་ལ། གལ་ཏེ་མི་གཙང་བར་
ཡོངས་སུ་རྟོག་ན་མི་གཙང་བའི་ཁ་དོག་ཏུ་སྟོན་པར་བྱེད། གལ་ཏེ་བདེ་བར་རམ། གལ་ཏེ་སྡུག་བསྔལ་དུའམ། གལ་ཏེ་རྟག་པར་རམ། གལ་ཏེ་མི་རྟག་པར་རམ། གལ་ཏེ་བདག་ཏུའམ། གལ་ཏེ་བདག་མེད་པའམ། གལ་ཏེ་མཚན་མར་རམ། གལ་ཏེ་མཚན་མ་མེད་པར་རྟོག་
ན་མཚན་མ་མེད་པའི་ཁ་དོག་ཏུ་སྟོན་པར་བྱེད་དོ། །མཽད་གལ་གྱི་བུ་དེ་ལ་གཙང་བར་རྟོག་པ་ནི་འཆིང་བ་ཡིན་ལ། མི་གཙང་བར་རྟོག་པ་ནི་ཐར་པའོ། །བདེ་བར་རྟོག་པ་ནི་འཆིང་བ་ཡིན་ལ། སྡུག་བསྔལ་བར་རྟོག་པ་ནི་ཐར་པའོ། །དེ་བཞིན་དུ་སྦྱར་ཏེ། ཉོན་མོངས་པར་གྱུར་ཏོ། །
གང་དེ་དག་བདག་གིས་ཉོན་མོངས་པ་འདི་ལས་ཐར་བར་བྱའོ་སྙམ་མོ། །དེའི་ཚེ་དེ་བཞིན་གཤེགས་པ་མུན་པ་ཐམས་ཅད་འཇོམས་པ་ཞེས་བྱ་བ་འཇིག་རྟེན་དུ་བྱུང་སྟེ། དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་དེས་དེ་ཐོས་མ་ཐག་ཏུ་དད་པར་གྱུར་ནས། དེས་ཚོང་པ་དེ་དག་ལ་འདི་
སྐད་ཅེས་སྨྲས་སོ། །ཁྱེད་ཅག་འདི་ལྟར་དད་པའི་སྐྱབས་ཀུན་ལ་སུས་ཀྱང་སྐྱབས་སུ་འགྱུར་བ་མེད་ཀྱིས་ཁྱེད་ཅག་ཚུར་ཤོག །ང་གང་ལ་སྐྱབས་སུ་ཉེ་བར་འགྲོ་བ་དེ་ལ་སྐྱབས་སུ་དེང་ཤིག །དེ་དག་གིས་སྨྲས་པ། ཁྱོད་གང་ལ་སྐྱབས་སུ་བཞུད། དེས་སྨྲས་པ། གྲོགས་པོ་དག་དེ་
བཞིན་གཤེགས་པ་མུན་པ་ཐམས་ཅད་འཇོམས་པ་ཞེས་བྱ་བ་བཞུགས་ཏེ། ང་དེ་ལ་སྐྱབས་སུ་འགྲོ་ཡིས་ཁྱེད་ཅག་ཚུར་ཤོག །དེ་བཞིན་གཤེགས་པ་མུན་པ་ཐམས་ཅད་འཇོམས་པ་དེ་ལ་ཕྱག་འཚོལ་ཅིག་སྐྱབས་སུ་དེང་ཤིག །ཁྱེད་ཅག་ཐམས་ཅད་ཀྱི་བློ་ངེས་པར་བྱོས་ལ་དེ་བཞིན་
གཤེགས་པ་མུན་པ་ཐམས་ཅད་འཇོམས་པ་དེ་ལ་ཕྱག་འཚལ་ལོ་ཞེས་ཚིག་དེ་སྐད་བརྗོད་ཅིང་། དེ་དག་ཐམས་ཅད་འཆི་བས་འཇིགས་སྐྲག་པས་མོས་པ་མཆོག་བསྐྱེད་ནས་དེ་བཞིན་གཤེགས་པ་མུན་པ་ཐམས་ཅད་འཇོམས་པ་དེ་ལ་ཕྱག་འཚལ་ལོ་ཞེས་ཚིག་དེ་སྐད་བརྗོད་དོ། །

ཆུ་སྲིན་དེས་སངས་རྒྱས་ཀྱི་སྒྲ་ཐོས་ནས་རྣ་བར་སྙན་པར་གྱུར་ཏེ། དེའི་ཁ་བཙུམས་པ་དང་། དེ་ནས་ཚོང་པ་དེ་དག་ཐམས་ཅད་ཉོན་མོངས་པ་དེ་ལས་ཐར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་ཞེས་བྱ་
བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་མོས་པ་དུ་མ་ཤེས་པ་མངོན་པར་རྫོགས་པ་ཤེས་པར་
འདོད་པས་དངོས་པོར་འཛིན་པ་བསལ་བར་བརྩོན་པར་བྱའོ། །མཽད་གལ་གྱི་བུ་ངས་མོས་པ་དུ་མ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་
བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེམས་ཅན་གྱི་གཉེན་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་སེམས་ཅན་གྱི་གཉེན་དེའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་རྟག་ཏུ་བརྩོན་ཞེས་
བྱ་བ་བརྩོན་འགྲུས་བརྩམས་པ། སེམས་ཞུམ་པ་མེད་པ། གོ་ཆ་ཆེན་པོ་བགོས་པ། སངས་རྒྱས་ཀྱི་ཞིང་དཔག་ཏུ་མེད་པར་སྨོན་ལམ་ཡོངས་སུ་དག་པ་དང་ལྡན་པ། སངས་རྒྱས་ཀྱི་ཞིང་གྲངས་མེད་ཅིང་བསམ་གྱིས་མི་ཁྱབ། གཞལ་དུ་མེད། བརྗོད་དུ་མེད་པར་སྨོན་ལམ་ཡོངས་སུ་དག་པ་དང་
ལྡན་པ་ཞིག་བྱུང་ངོ་། །དེ་འདི་སྙམ་དུ་སེམས་ཏེ། སེམས་ཅན་དག་མོས་པ་སྣ་ཚོགས་དང་མོས་པ་དུ་མ་ཤེས་པའི་རྒྱུ་ནི་གང་རྐྱེན་ནི་གང་། སེམས་ཅན་དག་མོས་པ་སྣ་ཚོགས་གང་དང་ལྡན་སྙམ་མོ། །དེ་འདི་སྙམ་དུ་སེམས་ཏེ། སེམས་ཅན་དག་ཡུལ་གང་དང་གང་ལ་མང་དུ་བསྟེན་པ་
དེ་ཉིད་ལ་མོས་ཤིང་དེ་ཉིད་ལ་དགའ་སྟེ། དེ་དང་དེ་ཉིད་ཀྱིས་མངོན་པར་དགའ། དེ་ལ་གཞོལ་བར་འགྱུར། དེ་ལ་འབབ་དེ་ལ་བབ་སྟེ་ཡུལ་གཞན་ལ་ཡང་མི་འཐུན་པར་འགྱུར་རོ། །དེ་ནས་དེ་ཡུལ་དེ་མ་དམིགས་པ་ན་ཡང་གཞན་གང་ལ་གོམས་པ་ཡོད་ནས། དེ་ལ་ཡང་དེ་ཉིད་ཡིན་པར་

འཛིན་ཏེ་དེ་ལ་མོས་པར་ཡང་འགྱུར་རོ། །ཡུལ་གཞན་དང་གཞན་དུ་འགྱུར་ན་ཡང་དེའི་མོས་པ་ལྡོག་པར་འགྱུར་ཏེ། དེ་ཡོན་ཏན་དུ་མཐོང་ངོ་། །ཡོན་ཏན་དུ་འཛིན་པ་ལས་སེམས་ཅན་དག་དེར་གཞོལ་བར་འགྱུར་ལ། སྐྱོན་དུ་འཛིན་པ་ལས་ཞེ་འགྲས་པར་འགྱུར་རོ། །དེ་ལྟ་བས་
ན་ཡུལ་གྱི་ཡོན་ཏན་དེ་ལ་སེམས་གཞོལ་བར་མི་བྱ། སྐྱོན་དུ་འཛིན་པ་ལ་ཞེ་སྡང་བར་མི་བྱ། ཡུལ་རྣམས་ལ་སོ་སོར་བརྟགས་པས་བཏང་སྙོམས་སུ་བྱའོ། །བྱང་ཆུབ་སེམས་དཔའ་རྟག་ཏུ་བརྩོན་པ་ནི་ཡུལ་གྱི་ཡོན་ཏན་ལ་ཡང་རྗེས་སུ་ཆགས་པ་མེད། སྐྱོན་ལ་ཡང་ཞེ་འགྲས་པ་མེད་དེ།
སོ་སོར་བརྟགས་པས་བཏང་སྙོམས་སུ་བྱེད་པ་ནི་བྱང་ཆུབ་སེམས་དཔའི་ཆོས་རྣམས་ལས་ཕྱིར་མི་ལྡོག་པར་འགྱུར་རོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན། བྱང་ཆུབ་སེམས་དཔའ་རྟག་ཏུ་བརྩོན་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། དེ་
ཅིའི་ཕྱིར་ཞེ་ན། དེ་བཞིན་གཤེགས་པ་མར་མེ་མཛད་དེ་དེའི་ཚེ་དེའི་དུས་ན། བྱང་ཆུབ་སེམས་དཔའ་རྟག་ཏུ་བརྩོན་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་ཡུལ་ཐམས་ཅད་ལ་མོས་པ་རྣམ་པར་སྤང་ཞིང་། མྱ་ངན་ལས་འདས་པ་ལ་མོས་པར་བྱ་
སྟེ། མོས་པ་འདི་ནི་མཆོག་ཡིན་ནོ། །མཽད་གལ་གྱི་བུ་ངས་མོས་པ་དུ་མ་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ན་
འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དྲང་སྲོང་རིན་པོ་ཆེའི་དཔལ་ཀུན་ལས་འཕགས་པ་ཞེས་བྱ་བ་སེམས་ཅན་ལམ་གོལ་བ་ལ་རབ་ཏུ་ཞུགས་པ་རྣམས་ལ་ལམ་ཡང་དག་པར་སྟོན་པ་ཞིག་འཇིག་རྟེན་དུ་བྱུང་ངོ་། །དེ་སེམས་ཅན་མོས་པ་དུ་མ་དང་། མོས་
པ་དུ་མ་ལ་མངོན་པར་ཞེན་པ་རྣམས་ཀྱི་སྐྱོན་བསྟན་པའི་ཕྱིར་མོས་པ་དུ་མ་ཤེས་པ་འགོག་པ་ཤེས་པ་ཡང་དག་པར་རབ་ཏུ་སྟོན་ཏོ། །མོས་པ་དང་འགོག་པའི་ཆོས་དེ་དག་ཐམས་ཅད་དང་། རང་གི་མོས་པ་ལ་ལྷག་པར་ཆགས་པ་བསྐྱེད་པར་མི་བྱ་སྟེ། མོས་པ་དེ་དག་ཐམས་ཅད་ནི་

སླུ་བ་ཡིན་ནོ། །ཁྱེད་ཅག་གི་མོས་པ་དེ་གཞན་ཡིན་ལ་ཆོས་ཀྱི་ངོ་བོ་ཡང་གཞན་ཡིན་ཏེ། ཡང་མོས་པ་དེ་དག་ལས་ལྡོག་གོ། །དེ་རྣམ་གྲངས་དེས་སྲོག་ཆགས་སྟོང་ཕྲག་མང་པོ་དག་སྡུག་བསྔལ་ལས་ཡོངས་སུ་ཐར་བར་བྱའོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་
དྲང་སྲོང་རིན་པོ་ཆེའི་དཔལ་ཀུན་ལས་འཕགས་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དྲང་སྲོང་རིན་པོ་ཆེའི་དཔལ་ཀུན་ལས་འཕགས་ཞེས་བྱ་བར་གྱུར་ཏོ། །མཽད་གལ་གྱི་བུ་ངས་མངོན་པར་ཤེས་ཏེ། འདས་
པའི་དུས་ན་ང་གཟུགས་ལ་མོས་ནས་བུད་མེད་གཟུགས་བལྟ་ན་སྡུག་པ་མཆོག་ཁྲི་ཕྲག་དཔག་ཏུ་མེད་པ་དག་ཡོངས་སུ་བཏང་ངོ་། །ཡང་ང་སྒྲ་ལ་མོས་པར་གྱུར་ནས། ང་སྒྲ་ལ་མོས་པས་དེ་བཞིན་གཤེགས་པའི་མཆོད་རྟེན་ལ་རོལ་མོའི་སྒྲ་རྣམ་པ་སྣ་ཚོགས་དག་གིས་མཆོད་པ་
བྱས་ཀྱང་དེས་ང་ཡོངས་སུ་མ་མགུའོ། །ཡང་ང་དྲི་ལ་མོས་པར་གྱུར་ནས། ང་དྲི་ལ་མོས་པས་དྲི་མང་པོ་དག་ཡོངས་སུ་གཏད་པར་བྱས་ཀྱང་དེས་ང་ཡོངས་སུ་མ་མགུའོ། །ཡང་ང་རོ་ལ་མོས་པར་གྱུར་ནས་ང་རོ་ལ་མོས་པས་འབྲུ་མང་པོ་སྣ་ཚོགས་དང་རོའི་བྱེ་བྲག་རྣམ་པ་སྣ་ཚོགས་
དག་ཡོངས་སུ་བཏང་ཡང་དེས་ང་ཡོངས་སུ་མ་མགུའོ། །ཡང་ང་རེག་བྱ་ལ་མོས་པར་གྱུར་ནས། ང་རེག་བྱ་ལ་མོས་པས་གོས་འཇམ་པོ་སྣ་ཚོགས་དག་ཡོངས་སུ་བཏང་ཡང་དེས་ང་ཡོངས་སུ་མ་མགུའོ། །མཽད་གལ་གྱི་བུ་ང་ཆོས་ལ་མོས་ནས་ཤེས་པ་རྣམ་པ་སྣ་ཚོགས་དག་བསླབས་
ཀྱང་དེ་དག་གིས་ང་ཡོངས་སུ་མ་མགུའོ། །མཽད་གལ་གྱི་བུ་གང་མྱ་ངན་ལས་འདས་པ་ལ་མོས་པ་དེ་ནི། མོས་པ་དེ་ལས་ཡོངས་སུ་ཉམས་པ་མེད་དོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་མོས་པ་དུ་མ་ཤེས་པ་ལ་བསླབ་པར་བྱ་སྟེ། མོས་པ་
ཐམས་ཅད་ཀྱང་འགོག་པའི་ཆོས་ཅན་དུ་བལྟའོ། །མཽད་གལ་གྱི་བུ་ངས་མོས་པ་དུ་མ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་

བ་དཔག་ཏུ་མེད་པ་ནས། །དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཆོས་ཀྱི་སྤྲིན་གྱི་ཆར་རབ་ཏུ་འབེབས་པ་ཞེས་བྱ་བ་འཇིག་རྟེན་དུ་བྱུང་སྟེ། ཉན་ཐོས་ཀྱི་ཐེག་པ་པ་དང་། རང་སངས་རྒྱས་ཀྱི་ཐེག་པ་པ་དང་། བྱང་ཆུབ་སེམས་དཔའི་ཐེག་པ་པའི་ཚོགས་དཔག་ཏུ་མེད་པ་དག་གིས་ཡོངས་
སུ་བསྐོར་ཏོ། །དེའི་ཚེ་ཚོགས་དེའི་ནང་ན་བྱང་ཆུབ་སེམས་དཔའ་ས་འཛིན་ཞེས་བྱ་བ་ཞིག་བྱུང་སྟེ། བྱང་ཆུབ་སེམས་དཔའི་ཡོན་ཏན་དཔག་ཏུ་མེད་པ་དང་ལྡན་པ་དབང་པོ་རྣོ་བ། སེམས་རེ་རེ་བསྐྱེད་པས་བསྐལ་པ་གྲངས་མེད་པའི་དགེ་བའི་རྩ་བ་མངོན་པར་འདུ་བྱེད་པ། སེམས་རེ་རེ་བསྐྱེད་པས་སེམས་
ཅན་གྲངས་མེད་པ་དག་ཉན་ཐོས་ཀྱི་ཐེག་པ་ལ་རབ་ཏུ་བཙུད། དེ་བཞིན་དུ་རང་སངས་རྒྱས་ཀྱི་ཐེག་པ་དང་། དེ་བཞིན་དུ་སེམས་རེ་རེ་བསྐྱེད་པས་བྱང་ཆུབ་སེམས་དཔའ་ཁྲི་ཕྲག་གྲངས་མེད་པ་དག་ཕྱིར་མི་ལྡོག་པར་རབ་ཏུ་བཙུད་དོ། །དེའི་ཚེ་སེམས་ཅན་ཁྲི་ཕྲག་དཔག་ཏུ་མེད་པ་དག་ནི་ཉན་
ཐོས་ཀྱི་ཐེག་པ་ལ་རབ་ཏུ་གནས་སོ། །སེམས་ཅན་ཁྲི་ཕྲག་དཔག་ཏུ་མེད་པ་དག་ནི་རང་སངས་རྒྱས་ཀྱི་ཐེག་པ་ལ་རབ་ཏུ་གནས་སོ། །སེམས་ཅན་ཁྲི་ཕྲག་དཔག་ཏུ་མེད་པ་དག་ནི་བྱང་ཆུབ་སེམས་དཔའི་ཐེག་པ་ལ་རབ་ཏུ་གནས་སོ། །དེ་ནས་བྱང་ཆུབ་སེམས་དཔའ་ས་འཛིན་དེ་འདི་སྙམ་
དུ་སེམས་ཏེ། ཀྱེ་མ་དེ་བཞིན་གཤེགས་པ་ཆོས་ཀྱི་སྤྲིན་གྱི་ཆར་རབ་ཏུ་འབེབས་པས་གང་གིས་སེམས་ཅན་གང་དེ་དག་ངེས་པར་འབྱུང་བར་བཅོམ་ལྡན་འདས་ཀྱིས་ལུང་བསྟན་པ་མཛད་པས། རང་རང་གི་འཁོར་འདི་དག་ཉིད་ལུང་བསྟན་པ་ཐོས་ནས་ཡི་རངས་པར་གྱུར་ཅིག་སྙམ་མོ། །དེ་
ནས་དེ་བཞིན་གཤེགས་པ་ཆོས་ཀྱི་སྤྲིན་གྱི་ཆར་རབ་ཏུ་འབེབས་པས་སེམས་ཅན་དེ་དག་ཇི་ལྟར་སྨོན་པ་བཞིན་དུ་ལུང་བསྟན་ཏོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་བྱང་ཆུབ་སེམས་དཔའ་ས་འཛིན་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་
ཆུབ་སེམས་དཔའ་ས་འཛིན་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའི་ཐེག་པ་ལ་ཡང་དག་པར་རབ་ཏུ་གནས་པའི་སེམས་ཅན་དག་ཡོངས་སུ་གཟུང་བར་བྱའོ། །མཽད་གལ་གྱི་བུ་ངས་མོས་པ་སྣ་ཚོགས་ཤེས་པར་བྱ་བའི་དོན་དུ་བྱང་ཆུབ་སེམས་དཔའི་སྤྱད་

པ་སྤྱོད་པ་ན་དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་ཉེ་བར་ཞི་འཕགས་ཞེས་བྱ་བ། རིག་པ་དང་ཞབས་སུ་ལྡན་
པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་ཉེ་བར་ཞི་འཕགས་དེའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་ནོར་བུ་
འཛིན་ཞེས་བྱ་བ་དེ་བཞིན་གཤེགས་པ་དཔག་ཏུ་མེད་པ་རྣམས་ལ་ཡུན་རིང་དུ་ཚངས་པར་སྤྱད་པ། དགེ་བའི་རྩ་བ་དཔག་ཏུ་མེད་པས་གང་བ། སྙིང་རྗེ་ཆེན་པོ་ཐོབ་པ་ཞིག་བྱུང་སྟེ། དེ་དེ་བཞིན་གཤེགས་པ་དེའི་རིམ་གྲོ་པར་གྱུར་ཏོ། །དེ་དེ་བཞིན་གཤེགས་པ་དེ་ལ་ཡིད་དུ་
འཐད་དེ། ཡིད་དུ་མི་འཐད་པ་མ་ཡིན་པས་རིམ་གྲོ་པ་བྱས་ཤིང་། བཤད་པ་ཡང་འཛིན་ལ། རང་གི་དོན་ཀྱང་མི་གཏོང་ངོ་། །དེས་བཅོམ་ལྡན་འདས་ཀྱི་རིམ་གྲོ་པ་བྱས་ཏེ། མངོན་པར་ཤེས་པ་ལྔ་བསྒྲུབས་པས་དེ་ཕ་རོལ་གྱི་སེམས་ལ་མཁས་སོ། །བཅོམ་ལྡན་འདས་
དེ་བཞིན་གཤེགས་པ་ཉེ་བར་ཞི་འཕགས་དེའི་ཐུགས་ཀྱིས་སེམས་མཁྱེན་པ་མཛད་ནས་གང་གི་ཚེ་དེ་བཞིན་གཤེགས་པ་དེ་དབེན་པ་ལ་བཞུགས་པས་བཞུགས་པ་དེའི་ཚེ་དེ་རང་གི་དོན་མི་གཏོང་ངོ་། །དེ་བཞིན་གཤེགས་པ་དེ་བཞུགས་པ་གང་གིས་བཞུགས་པ་དེ་ཉིད་ཀྱིས་དེ་ཡང་
འདུག་པས་འདུག་གོ། །དེ་བཞིན་གཤེགས་པ་ཉེ་བར་ཞི་འཕགས་དེ་ཡང་དེའི་བསམ་པ་ཐུགས་སུ་ཆུད་ནས། དེ་ལྟ་བུའི་ཚུལ་གྱིས་བཞུགས་པས་བཞུགས་སོ། །ནོར་བུ་འཛིན་དེའི་འགྲོ་བའི་ཡུལ་ཅི་ཙམ་པ་དེ་ཙམ་དུ་བཞུགས་པས་བཞུགས་ཏེ། བྱང་ཆུབ་སེམས་དཔའ་ནོར་བུ་
འཛིན་དེ་ཡང་དེའི་རྗེས་སུ་འབྲང་ངོ་། །དེ་ལྟར་དེ་བཞིན་གཤེགས་པ་དེས་བྱང་ཆུབ་སེམས་དཔའ་སངས་རྒྱས་ཀྱི་བཞུགས་པ་ལ་བསླབས་སོ། །དེ་དེ་བཞིན་གཤེགས་པ་དེའི་ཁམས་སྣ་ཚོགས་ཤེས་པ་དེའི་ནང་དུ་ཆུད་དོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་བྱང་ཆུབ་

སེམས་དཔའ་ནོར་བུ་འཛིན་ཞེས་བྱ་བ་གང་གིས། དེ་བཞིན་གཤེགས་པ་དེའི་ཁམས་སྣ་ཚོགས་ཡང་དག་པར་དྲན་པར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་ནོར་བུ་འཛིན་ཞེས་བྱ་བར་གྱུར་ཏེ། དེ་བཞིན་གཤེགས་པ་དེའི་
མོས་པ་སྣ་ཚོགས་ཤེས་པ་རྗེས་སུ་རྟོགས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་དེ་བཞིན་གཤེགས་པ་བཞུགས་པ་རྗེས་སུ་རྟོགས་པར་བྱའོ། །མཽད་གལ་གྱི་བུ་ངས་མོས་པ་སྣ་ཚོགས་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་
པ་སྤྱོད་པ་ན་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་སྤྱན་མཛེས་ཞེས་བྱ་བ་ནས། སངས་རྒྱས་བཅོམ་ལྡན་འདས་
ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་སྤྱན་མཛེས་དེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བྱེ་བ་ཕྲག་དགུ་བཅུ་རྩ་དགུ་བྱུང་སྟེ། སངས་རྒྱས་ཀྱི་ཞིང་དེར་རྣམ་པ་ཐམས་ཅད་དུ་སེམས་ཅན་དམྱལ་བ་མ་བྱུང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་།
ལྷ་མ་ཡིན་གྱི་རིས་དག་མ་བྱུང་སྟེ། རྣམ་པ་ཐམས་ཅད་ཀྱི་ཐམས་ཅད་དུ་མི་ཁོམ་པ་མ་བྱུང་ངོ་། །སངས་རྒྱས་ཀྱི་ཞིང་དེར་གཅིག་ཏུ་ཡོངས་སུ་དག་པར་གྱུར་ཏེ། སངས་རྒྱས་ཀྱི་ཞིང་དེར་ཀུན་ནས་ཉོན་མོངས་པའི་ལས་ཅུང་ཟད་ཀྱང་མེད་དོ། །དེ་ལྟར་དེ་བཞིན་གཤེགས་པ་དེས་སྔོན་བྱང་ཆུབ་
སེམས་དཔའི་སྤྱད་པ་སྤྱོད་པ་ན་སེམས་ཅན་དཔག་ཏུ་མེད་པ་དག་ཡོངས་སུ་སྨིན་པར་མཛད་དོ། །དེའི་ཚེ་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་ཆུ་ལྷ་ཞེས་བྱ་བ་ཁྱིམ་ན་གནས་པ་ཞིག་བྱུང་སྟེ། བཅོམ་ལྡན་འདས་དེ་བཞིན་གཤེགས་པ་སྤྱན་མཛེས་དེའི་དགེ་བསྙེན་རིགས་ལ་ཐུགས་བརྟན་
པ་ཡིན་ཏེ། འདི་ལྟ་སྟེ་དཔེར་ན། བཅོམ་ལྡན་འདས་འོད་སྲུང་གི་བུ་རིགས་རྫ་མཁན་དང་། ངའི་སྦྲང་ཚལ་བཀྲ་བ་ལྟ་བུའོ། །དེ་ནས་བྱང་ཆུབ་སེམས་དཔའ་ཆུ་ལྷ་དེས་བཅོམ་ལྡན་འདས་དེ་བཞིན་གཤེགས་པ་སྤྱན་མཛེས་དེའི་དྲུང་དུ་སོང་ནས་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་

ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་ཆུ་ལྷ་དེས་སྐྱེ་བོའི་ཚོགས་མང་པོ་དེ་དག་གི་མདུན་དུ་བཅོམ་ལྡན་འདས་དེ་བཞིན་གཤེགས་པ་སྤྱན་མཛེས་དེ་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། སྟོབས་བཅུ་སྒྲ་གྲགས་ལྷ་མིའི་འཇིག་
རྟེན་དག་ན་འདྲ་མ་མཆིས། །རྒྱལ་བ་འགྲོ་བའི་བསམ་པ་མཁྱེན་ཅིང་ལྷག་པར་མོས་པ་རབ་ཏུ་མཁྱེན། །རྒྱལ་བ་འདྲེན་པ་མོས་པ་སྣ་ཚོགས་དང་ནི་དེ་འགོག་རབ་ཏུ་མཁྱེན། །ཇི་ལྟར་ལྷག་པར་མོས་པ་སྣ་ཚོགས་འགོག་པར་འགྱུར་བ་དེ་དག་གསུངས། །ཇི་ལྟར་རྣམ་འདྲེན་ཁྱོད་སྲས་སེམས་
ཅན་ཀུན་གྱི་མོས་པ་སྣ་ཚོགས་དག །ཡང་དག་འགོག་འགྱུར་མངོན་པར་འཚལ་བ་དེ་དག་བདེ་གཤེགས་བདག་ལ་གསུངས། །རྒྱལ་བ་ཐམས་ཅད་གཟིགས་པ་ལྷ་དང་མི་ཡི་བསམ་པ་ཀུན་ལ་མཁས། །འཇིག་རྟེན་ཐམས་ཅད་ལ་ནི་ཕན་ཕྱིར་སྤྱན་མཛེས་དེས་ནི་ལུང་བསྟན་པ། །གང་ཚེ་
འགོག་པར་འགྱུར་བ་ཡོངས་སུ་མཁྱེན་ནས་འགྲོ་བའི་དོན་ཆེན་མཛད། །དེ་བཞིན་གཤེགས་པས་འགྲོ་བའི་མོས་པ་སྣ་ཚོགས་ལུས་པ་མེད་པར་མཁྱེན། །ཇི་ལྟར་གཞོལ་བའི་རིས་ནི་འབབ་པའི་ཆུ་དག་འབབ་པར་འགྱུར་བ་ལྟར། །ཡུལ་ནི་གང་དང་གང་ལ་མི་ཡིས་ཕྱིར་བསྟེན་དེ་ལ་དེ་མོས་སོ། །
དེ་ནི་བདེ་གཤེགས་བསྟན་པ་ཐོབ་ཅིང་དགེ་བའི་བཤེས་གཉེན་སངས་རྒྱས་ལ། །རིམ་པར་སྟེན་བྱེད་ཡུལ་ལ་མངོན་པར་ཆགས་པ་དོན་མེད་ཡོངས་སུ་ཤེས། །དེ་ནི་འཆིང་བ་ཤེས་ཤིང་ཡུལ་གྱི་སྐྱོན་ཡང་ཤེས་ནས་ཡོངས་སུ་སྤོང་། །ཡུལ་གྱི་སྐྱོན་དག་ཡོངས་སུ་མཐོང་བ་འགག་པར་བྱེད་
ཅིང་ཕྱིར་མི་སྐྱེ། །གང་དག་ཡུལ་འདི་མཐོང་ནས་ཡང་དང་ཡང་དུ་གོམས་པ་འགོག་མི་བྱེད། །དེ་དག་ཡུལ་གྱི་རོ་མཆོག་དག་གིས་ཟིལ་ནོན་སྡུག་བསྔལ་སྐྱེད་པར་བྱེད། །དེ་ལྟ་བས་ན་མཁས་པའི་མི་དག་འགྲོ་ལ་ཕན་བསམས་བྱང་ཆུབ་མཆོག །མངོན་པར་འདོད་པ་དེས་ནི་བསྒྲིམས་ཏེ་ཡུལ་དག་
ཡོངས་སུ་ཤེས་པར་བྱ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་ཆུ་ལྷ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་ཆུ་ལྷ་ཞེས་བྱ་བར་གྱུར་ཏོ། །ངས་དེར་ཡུལ་དེ་དག་ཡོངས་སུ་ཤེས་

པས་དེ་ཕྱིན་ཆད་ང་ནམས་ཀྱང་སྐྱོན་མ་བྱུང་ངོ་། །དེ་ཅིའི་ཕྱིར་ཞེ་ན། དེ་ལྟར་ངས་དེ་དག་དོན་མེད་པར་ཡོངས་སུ་ཤེས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་ཡུལ་དོན་མེད་པར་གྱུར་པ་ཡོངས་སུ་ཤེས་པར་བྱའོ། །མཽད་གལ་གྱི་བུ་ངས་མོས་པ་སྣ་ཚོགས་ཤེས་པ་
འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་དཔག་ཏུ་མེད་པ་དག་བསྐྱེད་དོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེམས་
ཅན་ཐམས་ཅད་བྱང་ཆུབ་ཏུ་སྒྲོལ་བ་ལ་མཁས་པ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་གང་ཡང་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་
པས་ཡོངས་སུ་སྨིན་པར་མ་བྱས་ཀྱི། སེམས་ཅན་ཐམས་ཅད་བྱང་ཆུབ་ཀྱི་སེམས་ཡང་དག་པར་འཛིན་དུ་བཙུད་དོ། །བླ་ན་མེད་པ་ཡང་དག་པར་རྫོགས་པའི་སངས་རྒྱས་དེའི་སངས་རྒྱས་ཀྱི་ཞིང་དེར་སེམས་ཅན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་རབ་ཏུ་
གནས་པར་གྱུར་ཏོ། །སེམས་ཅན་དེ་དག་ལ་དེ་བཞིན་གཤེགས་པ་དེས་ཕ་རོལ་ཏུ་ཕྱིན་པ་དྲུག་ལས་བརྩམས་ཏེ་ཆོས་སྟོན་ཏོ། །དེ་བཞིན་གཤེགས་པ་སེམས་ཅན་ཐམས་ཅད་བྱང་ཆུབ་ཏུ་སྒྲོལ་བ་ལ་མཁས་པ་དེས་སེམས་ཅན་དཔག་ཏུ་མེད་པ་དག་ཕྱིར་མི་ལྡོག་པ་ཉིད་ལ་བཙུད་ཅིང་།
བསྐལ་པ་གྲངས་མེད་པར་གནས་ནས་ཕྱིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །སེམས་ཅན་གང་བྱུང་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་
དཔག་ཏུ་མེད་པའི་དོན་བྱས་ཏེ། ཡོངས་སུ་མྱ་ངན་ལས་འདས་སོ། །དེའི་ཚེ་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་ལྷའི་ཟླ་བ་ཞེས་བྱ་བ་ཞིག་བྱུང་ངོ་། །བྱང་ཆུབ་སེམས་དཔའ་ལྷའི་ཟླ་བ་དེས་སངས་རྒྱས་ཀྱི་ཞིང་བཅུའི་རྡུལ་ཕྲ་མོ་སྙེད་ཀྱི་ཕྱོགས་བཅུའི་འཇིག་རྟེན་གྱི་ཁམས་

སུ་བྱང་ཆུབ་སེམས་དཔའ་ཁྲི་ཕྲག་དཔག་ཏུ་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཙུད་ནས་ཡོངས་སུ་མྱ་ངན་ལས་འདས་སོ། །དེའི་ཚེ་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་དྲི་མེད་ཟླ་བ་ཞེས་བྱ་བ་ཞིག་བྱུང་སྟེ། བྱང་ཆུབ་སེམས་དཔའ་ལྷའི་
ཟླ་བ་དེས་ཡོངས་སུ་སྨིན་པར་བྱས། ཡོངས་སུ་རྫོགས་པར་བྱས་སོ། །དེ་འདི་སྙམ་དུ་སེམས་སོ། །གང་གི་ཚེ་བྱང་ཆུབ་སེམས་དཔའ་ལྷའི་ཟླ་བ་དེས་སེམས་ཅན་ཁྲི་ཕྲག་དཔག་ཏུ་མེད་པ་དག་བྱང་ཆུབ་ལ་བཙུད། སངས་རྒྱས་ཀྱི་རྒྱུད་ཡང་དག་པར་སྤེལ་ཏོ། །བདག་གིས་ཀྱང་བྱང་ཆུབ་སེམས་
དཔའ་དེའི་རྗེས་སུ་བསླབ་པར་བྱ། བདག་གིས་ཀྱང་སངས་རྒྱས་ཀྱི་རྒྱུད་ཡང་དག་པར་སྤེལ་བར་བྱའོ་སྙམ་མོ། །དེས་ཕྱོགས་བཅུའི་འཇིག་རྟེན་དེ་ན་སེམས་ཅན་ཐམས་ཅད་ཀྱི་བསམ་པ་ཤེས་ནས། སེམས་ཅན་རྣམས་ཀྱི་མོས་པ་ཇི་ལྟ་བ་བཞིན་དུ་སྤྲུལ་པ་མངོན་པར་སྤྲུལ་ཏོ། །ལྷ་དག་ལ་
མོས་པ་ནི་ལྷའི་སྤྲུལ་པ་མངོན་པར་སྤྲུལ། ཀླུ་དག་ལ་མོས་པ་དང་། གནོད་སྦྱིན་དག་ལ་མོས་པ་དང་། དྲི་ཟ་དག་ལ་མོས་པ་དང་། ལྷ་མ་ཡིན་དག་ལ་མོས་པ་དང་། མིའམ་ཅི་དག་ལ་མོས་པ་དང་། ལྟོ་འཕྱེ་ཆེན་པོ་དག་ལ་མོས་པ་ནི་ལྟོ་འཕྱེ་ཆེན་པོའི་སྤྲུལ་པ་མངོན་པར་སྤྲུལ་ཏོ། །དེ་ལྟར་གང་དང་གང་
ལ་མོས་པ་དེ་དང་དེ་དག་གི་རྗེས་སུ་འཐུན་པའི་སྤྲུལ་པ་མངོན་པར་སྤྲུལ་ཏེ། སངས་རྒྱས་ཀྱི་ཞིང་དེར་སེམས་ཅན་ཇི་སྙེད་པ་དེ་དག་ཡུན་མི་རིང་བར་ལ་ལ་ནི་ཉན་ཐོས་ཀྱི་ཐེག་པ། ལ་ལ་ནི་རང་སངས་རྒྱས་ཀྱི་ཐེག་པར་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་ལྟར་སེམས་ཅན་དེ་དག་ཐམས་ཅད་
སངས་རྒྱས་ཀྱི་ཞིང་དུ་དགེ་བའི་རྩ་བ་རྣམས་ལ་རབ་ཏུ་བཙུད་དོ། །དེར་ཡང་བྱང་ཆུབ་སེམས་དཔའ་རྣམས་ཀྱིས་དད་པ་བསྐྱེད་དེ། དགེ་བའི་རྩ་བ་དེས་སེམས་ཅན་ཐམས་ཅད་ཀྱི་མོས་པ་སྣ་ཚོགས་ཤེས་པ་ཐོབ་བོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་དྲི་མེད་ཟླ་བ་ཞེས་
བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་དྲི་མེད་ཟླ་བ་ཞེས་བྱ་བར་གྱུར་ཏེ། ངས་སེམས་ཅན་དེ་སྙེད་ཅིག་ཐེག་པ་གསུམ་གྱིས་བཏུལ་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་སེམས་ཅན་ཡོངས་སུ་སྨིན་པར་

བྱ་བ་ལ་བརྩོན་པར་བྱའོ། །མཽད་གལ་གྱི་བུ་ངས་མོས་པ་སྣ་ཚོགས་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་
པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་ལྷའི་ཟླ་བ་ཞེས་བྱ་བ་འབའ་ཞིག་ཁོ་ནས་འཛམ་བུའི་གླིང་གི་དབང་ཕྱུག་གིས་དབང་བྱེད་པ། ཆོས་གྱི་བདག་པོ་ཆོས་དང་ལྡན་པ། ཆོས་ཀྱིས་མི་འཐུན་པ་མེད་པར་རྒྱལ་སྲིད་བྱེད་པ་ཞིག་བྱུང་ངོ་། །བུ་ཡང་སྟོང་ཐམ་པ་ཡོད་དེ། དཔའ་ཞིང་རྟུལ་
ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་དག་བྱུང་ངོ་། །དེའི་ཚེ་དེ་བཞིན་གཤེགས་པ་འཇིག་རྟེན་སྒྲོན་མ་ཞེས་བྱ་བ་ཞིག་བྱུང་ངོ་། །དེ་བཞིན་གཤེགས་པ་འཇིག་རྟེན་སྒྲོན་མ་ཞེས་བྱ་བ་དེ་བྱང་ཆུབ་སེམས་དཔའི་ཐེག་པ་ཡང་དག་པར་རབ་ཏུ་སྟོན་ཏེ།
ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་ལས་བརྩམས་ཏེ་མི་སྟོན་ཏོ། །དེ་ཅིའི་ཕྱིར་ཞེ་ན། དེ་ལྟར་དེ་བཞིན་གཤེགས་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་ཐམས་ཅད་བྱང་ཆུབ་སེམས་དཔའི་ཐེག་པ་ལ་ཡང་དག་པར་འཛིན་དུ་བཙུད་དེ།
སེམས་ཅན་དེ་དག་ཐམས་ཅད་བྱང་ཆུབ་སེམས་དཔའི་ཐེག་པ་ལ་ཡང་དག་པར་རབ་ཏུ་གནས་སོ། །དེ་བཞིན་གཤེགས་པ་དེས་དེ་དག་ལ་བྱང་ཆུབ་སེམས་དཔའི་ཐེག་པ་ཉིད་བསྟན་ཏེ། སེམས་ཅན་དེ་དག་ཐམས་ཅད་བྱང་ཆུབ་སེམས་དཔའི་ཐེག་པ་ལ་ངེས་པར་བྱུང་ངོ་། །དེའི་ཚེ་དེ་
བཞིན་གཤེགས་པ་དེའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་དཔའ་བའི་སྟོབས་ཞེས་བྱ་བ་ཚོགས་དེ་ཐམས་ཅད་ཀྱི་གཙོ་བོ་བྱེད་པ་ཞིག་བྱུང་ངོ་། །དེའི་ཚེ་དེ་བཞིན་གཤེགས་པ་དེའི་བདུད་ཤུགས་འཆང་ཞེས་བྱ་བ་གང་བྱང་ཆུབ་སེམས་དཔའི་ཚོགས་དེ་དག་གི་བར་ཆད་བྱེད་པར་ཉེ་བར་
གནས་པ་ཞིག་བྱུང་ངོ་། །དེ་བྱང་ཆུབ་སེམས་དཔའ་དེ་དག་གི་ཐམས་ཅད་མཁྱེན་པ་ཉིད་དང་ཡང་དག་པར་ལྡན་པའི་གཏམ་ཟེར་རོ། །དེ་ནས་བདུད་ཤུགས་འཆང་དེ་འདི་སྙམ་དུ་སེམས་ཏེ། འདི་ལྟར་དེ་བཞིན་གཤེགས་པ་འཇིག་རྟེན་སྒྲོན་མ་འདིས་ཡུན་མི་རིང་བར་བདག་གི་ཡུལ་སྟོངས་པར་འགྱུར་ཏེ།

གང་བདག་གིས་དེའི་བར་ཆད་བྱའོ་སྙམ་ནས། དེ་སངས་རྒྱས་ཀྱི་གཟུགས་སུ་མངོན་པར་སྤྲུལ་ནས་འཁོར་གྱི་ནང་དུ་ཞུགས་ཏེ། བྱང་ཆུབ་སེམས་དཔའི་ཚོགས་དེ་དག་གི་ནང་དུ་འདུག་ནས་ཐམས་ཅད་མཁྱེན་པ་ཉིད་དང་ཡང་དག་པར་ལྡན་པའི་གཏམ་ངན་པ་བསྔགས་ལ། འདོད་པའི་ཡོན་ཏན་
དང་ཡང་དག་པར་ལྡན་པའི་གཏམ་ཟེར་རོ། །བྱང་ཆུབ་སེམས་དཔའ་དེ་དག་ལ་ཡང་འདོད་པའི་ཡོན་ཏན་ལྔ་པོ་དག་ཉེ་བར་འབུལ་ཏེ། མིག་གིས་བལྟ་བར་བྱ་བ་གཟུགས་མང་པོ་དང་། བཟའ་བ་དང་། བཅའ་བའི་ཡོ་བྱད་དང་། མེ་ཏོག་གི་ཡོ་བྱད་དང་། བལྡག་པའི་ཡོ་བྱད་དང་། རོལ་མོའི་
ཡོ་བྱད་དང་། གླུ་དབྱངས་ཀྱི་ཡོ་བྱད་དང་། གར་གྱི་ཡོ་བྱད་རྣམས་འབུལ་བར་བྱེད་དོ། །དེ་ནས་བྱང་ཆུབ་སེམས་དཔའ་དཔའ་བའི་སྟོབས་དེ་འདི་སྙམ་དུ་སེམས་ཏེ། གང་བདག་གིས་བདུད་ཤུགས་འཆང་འདི་བདག་གི་ཤུགས་ཀྱིས་གདུལ་བར་བྱའོ་སྙམ་ནས། འདི་ལྟ་བུའི་རྫུ་འཕྲུལ་
མངོན་པར་འདུ་བྱ་བ་མངོན་པར་འདུ་བྱེད་དེ། དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་བདུད་ཤུགས་འཆང་གི་མགུལ་དུ་ཁྱི་རོ་ཞིག་བཏགས་སོ། །ཤུགས་འཆང་གི་གཟུགས་ཀྱིས་བདུད་ཀྱི་གནས་དེར་སོང་ངོ་། །སོང་ནས་བདུད་ཀྱི་གནས་དེར་ཞུགས་ཏེ།
ལྷའི་བུ་མོ་ཁྲི་ཕྲག་དགུ་བཅུ་རྩ་དགུ་དག་བྱང་ཆུབ་ཡང་དག་པར་འཛིན་དུ་བཅུག་གོ། །དེ་བྱང་ཆུབ་སེམས་དཔའི་ཡང་དག་པར་ལྡན་པའི་གཏམ་དེ་ལྟ་བུ་དག་ཀྱང་བྱས་ཏེ། འདི་ལྟར་ལ