Kinh tạng Tây Tạng (Kangyur Đại Học) — 047_མདོ་སྡེ།_ག

པར་འཆི་བ་ཡང་ཡོད། འདི་ལྟ་སྟེ་དཔེར་ན། ཡུལ་མ་ག་དྷཱའི་ཁལ་གསུམ་བྲེ་བཞིའི་ཕྲག་ཉི་
ཤུ་ལ། ཏིལ་ཁལ་དྲུག་ཅུ་རྩ་བཞི་སྟེ། དེ་ལས་ལོ་བརྒྱ་འདས་ཤིང་མིས་ཏིལ་འབྲུ་གཅིག་བོར་ཏེ། རྣམ་གྲངས་དང་ཐབས་དེ་ལྟ་བུས་ཡུལ་མ་ག་དྷཱའི་ཏིལ་ཁལ་དྲུག་ཅུ་རྩ་བཞི་ལས་ཟད་པར་གྱུར་ཀྱང་སེམས་ཅན་དམྱལ་བ་ཆེན་པོ་ཆུ་བུར་ཅན་གྱི་ཚེའི་ཚད་ནི་དེ་ལྟར་མི་ཟད་དོ། །སེམས་ཅན་
དམྱལ་བ་ཆེན་པོ་ཆུ་བུར་ཅན་གྱི་ཚེའི་ཚད་ཉི་ཤུ་གང་ཡིན་པ་དེ་ནི་སེམས་ཅན་དམྱལ་བ་ཆེན་པོ་ཆུ་བུར་རྡོལ་གྱི་ཚེའི་ཚད་གཅིག་ཡིན་ནོ། །སེམས་ཅན་དམྱལ་བ་ཆེན་པོ་ཆུ་བུར་རྡོལ་གྱི་ཚེའི་ཚད་ཉི་ཤུ་གང་ཡིན་པ་དེ་ནི་སེམས་ཅན་དམྱལ་བ་ཆེན་པོ་སོ་ཏམས་ཏམས་ཀྱི་ཚེའི་ཚད་གཅིག་ཡིན་ནོ། །སེམས་
ཅན་དམྱལ་བ་ཆེན་པོ་སོ་ཏམས་ཏམས་ཀྱི་ཚེའི་ཚད་ཉི་ཤུ་གང་ཡིན་པ་དེ་ནི་ཀྱི་ཧུད་ཟེར་གྱི་ཚེའི་ཚད་གཅིག་གོ། །ཀྱི་ཧུད་ཟེར་གྱི་ཉི་ཤུ་གང་ཡིན་པ་དེ་ནི་ཨ་ཆུ་ཟེར་གྱི་གཅིག་གོ། །ཨ་ར་ཌེའི་ཉི་ཤུ་གང་ཡིན་པ་དེ་ནི་མེ་ཏོག་དྲི་ཞིམ་ལྟར་གས་པའི་གཅིག་གོ། །མེ་ཏོག་དྲི་ཞིམ་ལྟར་གས་པའི་ཉི་ཤུ་

གང་ཡིན་པ་དེ་ནི་མེ་ཏོག་དྲི་ངད་འཇམ་ལྟར་གས་པའི་གཅིག་གོ། །མེ་ཏོག་དྲི་ངད་འཇམ་ལྟར་གས་པའི་ཉི་ཤུ་གང་ཡིན་པ་དེ་ནི་ཨུད་པ་ལ་ལྟར་གས་པའི་གཅིག་གོ །ཨུད་པ་ལ་ལྟར་གས་པའི་ཉི་ཤུ་གང་ཡིན་པ་དེ་ནི་ཀུ་མུ་ད་ལྟར་གས་པའི་གཅིག་གོ། །ཀུ་མུ་ད་ལྟར་གས་
པའི་ཉི་ཤུ་གང་ཡིན་པ་དེ་ནི་པད་མ་དཀར་པོ་ལྟར་གས་པའི་གཅིག་གོ། །པད་མ་དཀར་པོ་ལྟར་གས་པའི་ཉི་ཤུ་གང་ཡིན་པ་དེ་ནི་སེམས་ཅན་དམྱལ་བ་ཆེན་པོ་པད་མ་ལྟར་གས་པའི་ཚེའི་ཚད་གཅིག་ཡིན་ནོ། །ཁྱིམ་བདག་དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་
རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་ཚེའི་དབང་པོ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཚེའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་
ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཚེའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་
འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་ནས། ཚེའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་
མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རྒྱུ་གང་དང་རྐྱེན་གང་དག་གིས་ཚེའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་མི་རྟག་པར་
རྗེས་སུ་ལྟ་བར་གནས་པ་ནས། གལ་ཏེ་ཕྱིར་རྒོལ་བར་རྗེས་སུ་ལྟ་བར་གནས་པའི་བར་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཚེའི་དབང་པོ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་

ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཚེའི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ།
སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ཤིང་དོན་མ་ཡིན་པ་བཟློག་ལ། སྣང་བ་བྱས་ཤིང་མུན་པ་བསལ་ཏེ། སེམས་ཅན་དཔག་ཏུ་མེད་པ་རྣམས་སྡུག་བསྔལ་ལས་ཡོངས་སུ་ཐར་བར་བྱས་ནས། བདེ་བ་ལ་བཙུད་པ་ནི་ཚེའི་དབང་པོ་ཤེས་པ་འགོག་པ་ཤེས་པ་སྟེ། དེ་ཡང་གཟོད་མ་
ནས་མ་སྐྱེས་པའི་ཆོས་ཅན་ནོ། །འདི་ནི་ཚེའི་དབང་པོ་ཤེས་པ་འགོག་པ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཚེའི་དབང་པོ་ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས།
དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཚེའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པ་ཤེས་པ་གང་
གིས་ཚེའི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་དུ་བྱས་པའི་འགོག་པ་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་རོ་མྱང་བ་མེད་པར་རྗེས་སུ་ལྟ་བར་གནས་པའམ། གལ་ཏེ་ཉེས་དམིགས་སུ་རྗེས་སུ་ལྟ་བར་གནས་པའམ། གལ་ཏེ་ངེས་པར་
འབྱུང་བར་རྗེས་སུ་ལྟ་བར་གནས་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཚེའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་
ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བདེ་བའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ལུས་ཀྱི་བདེ་བའི་ཚོར་བ་འམ། ཚོར་

བའི་རྣམ་པ་བདེ་བ་གང་ཅུང་ཟད་ཡོད་པ་ཡང་དག་པར་ཡོངས་སུ་སྤྱད་པའམ། མི་འཐུན་པར་ཡོངས་སུ་སྤྱད་པའམ། སྤྱོད་ལམ་པའམ། དུས་ཚིགས་ཀྱིས་ཡོངས་སུ་བསྒྱུར་བ་འདི་ནི་བདེ་བའི་དབང་པོ་ཤེས་པ་ཞེས་བྱའོ། །དེ་ལ་ཤེས་པ་དང་། མཐོང་བ་དང་། གསལ་
བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་བདེ་བའི་དབང་པོ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བདེ་བའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་
ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་སྡུག་བསྔལ་གྱི་དབང་པོ་ཤེས་པ་
ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ལུས་ཀྱི་སྡུག་བསྔལ་གྱི་ཚོར་བའམ། ཚོར་བའི་རྣམ་པ་གང་ཅུང་ཟད་ཡང་དག་པར་ཡོངས་སུ་བསྒྱུར་བའམ། མི་འཐུན་པར་ཡོངས་སུ་བསྒྱུར་བའམ། དུས་ཚིགས་ཀྱིས་ཡོངས་སུ་བསྒྱུར་
བའམ། སྤྱོད་ལམ་པ་འདི་ནི་སྡུག་བསྔལ་གྱི་དབང་པོ་ཞེས་བྱ་སྟེ། དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་སྡུག་བསྔལ་གྱི་དབང་པོ་ཤེས་པ་ཞེས་བྱའོ། །དེ་བཞིན་
གཤེགས་པ་སྡུག་བསྔལ་གྱི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་
བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཡིད་བདེ་བའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སེམས་ལས་བྱུང་བའི་བདེ་བའི་ཚོར་བའམ། ཚོར་བའི་རྣམ་པ་བདེ་བ་གང་ཅུང་

ཟད་ཡང་དག་པར་ཡོངས་སུ་བསྒྱུར་བའམ། མི་འཐུན་པར་ཡོངས་སུ་བསྒྱུར་བའམ། དུས་ཚིགས་ཀྱིས་ཡོངས་སུ་བསྒྱུར་བའམ། སྤྱོད་ལམ་འདི་ནི་ཡིད་བདེ་བའི་དབང་པོ་ཞེས་བྱའོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་
དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་ཡིད་བདེ་བའི་དབང་པོ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཡིད་བདེ་བའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་
བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཡིད་མི་བདེ་བའི་དབང་པོ་ཤེས་པ་ཡང་དག་པ་
ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སེམས་ལས་བྱུང་བ་སྡུག་བསྔལ་གྱི་ཚོར་བའམ། ཚོར་བའི་རྣམ་པ་མི་བདེ་བ་གང་ཅུང་ཟད་ཡང་དག་པར་ཡོངས་སུ་བསྒྱུར་བའམ། མི་འཐུན་པར་ཡོངས་སུ་བསྒྱུར་བའམ། དུས་ཚིགས་ཀྱིས་ཡོངས་
སུ་བསྒྱུར་བའམ། སྤྱོད་ལམ་པ་འདི་ནི་ཡིད་མི་བདེ་བའི་དབང་པོ་ཞེས་བྱའོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་ཡིད་མི་བདེ་བའི་དབང་པོ་ཤེས་པ་ཞེས་བྱ་སྟེ།
དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཡིད་བདེ་བའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །
ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་རྒྱ་ཆེར་བྱའོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བཏང་སྙོམས་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ལུས་ཀྱིའམ། སེམས་

ལས་བྱུང་བའི་ཚོར་བའམ། ཚོར་བའི་རྣམ་པ་བདེ་བ་ཉིད་མ་ཡིན་པའམ། མི་བདེ་བ་ཉིད་མ་ཡིན་པ་གང་ཅུང་ཟད་ཡང་དག་པར་ཡོངས་སུ་བསྒྱུར་བའམ། མི་འཐུན་པར་ཡོངས་སུ་བསྒྱུར་བའམ། དུས་ཚིགས་ཀྱིས་ཡོངས་སུ་བསྒྱུར་བའམ། སྤྱོད་ལམ་པ་འདི་ནི་བཏང་
སྙོམས་ཀྱི་དབང་པོ་ཞེས་བྱའོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་བཏང་སྙོམས་ཀྱི་དབང་པོ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཏོ། །དེ་བཞིན་གཤེགས་པ་བཏང་སྙོམས་ཀྱི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་
ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དད་པའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་དགེ་བའི་ཆོས་རྣམས་ལ་དོན་དུ་གཉེར་བ་ཉིད་དང་། འདུན་པ་དང་། འདོད་
པ་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་ངེས་པར་རྟོགས་པ་དང་། མངོན་པར་རྟོགས་པ་དང་། དང་བ་དང་། ཤིན་ཏུ་དང་བ་དང་། སེམས་རྙོག་པ་མེད་པ་དང་། དད་པའི་དབང་པོ་དང་། དད་པའི་སྟོབས་གང་ཡིན་པ་འདི་ནི་དད་པའི་དབང་པོའོ། །དེ་ལ་ཤེས་པ་དང་།
མཐོང་བ་དང་། གསལ་བ་ནས་མཁས་པའི་བར་གང་ཡིན་པ་འདི་ནི་དད་པའི་དབང་པོ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དད་པའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན།
བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དད་པའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན།

ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་དད་པའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དད་པའི་དབང་པོ་ཤེས་པ་ཀུན་འབྱུང་བ་ཤེས་པ་དེ་ལ་ཡང་
ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། ཁྱིམ་བདག་ཇི་ལྟར་ན་དེ་བཞིན་གཤེགས་པས་དད་པའི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན།
ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རྒྱུ་གང་དག་ཡོད་ན་དད་པའི་དབང་པོ་སྐྱེ་སྟེ། རྒྱུ་དེ་དག་འགོག་པ་ནི་དད་པའི་དབང་པོ་འགོག་པ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དད་པའི་
དབང་པོ་ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་འདི་ལ་ཇི་ལྟར་ན་དེ་བཞིན་གཤེགས་པས་དད་པའི་དབང་པོ་ཤེས་པ་འགོག་
པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པ་ཤེས་པ་གང་གིས་དད་པའི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་དུ་བྱས་པའི་འགོག་པ་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་
ཏོ། །དེ་བཞིན་གཤེགས་པ་དད་པའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ།། །།
བམ་པོ་བདུན་པ། ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ལུས་ཀྱིའམ། སེམས་ལས་བྱུང་བའི་བརྩོན་འགྲུས་ཡང་དག་པ་ཇི་ལྟ་བ་བཞིན་རབ་

ཏུ་མཁྱེན་ཏེ། དེ་ཡང་མཁྱེན་པ་གང་གིས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅིང་། ཟག་པ་མེད་པའི་མཁྱེན་པ་དང་། འཇིག་རྟེན་ལས་འདས་པའི་མཁྱེན་པས་རབ་ཏུ་མཁྱེན་ཏེ། བརྩོན་འགྲུས་འདི་ནི་རྒྱུན་དུ་འཇུག་པའི་འབྲས་བུ་ལ་གནས་པར་འགྱུར། བརྩོན་འགྲུས་
འདི་ནི་ལན་ཅིག་ཕྱིར་འོང་བའི་འབྲས་བུ་ལ་གནས་པར་འགྱུར། བརྩོན་འགྲུས་འདི་ནི་ཕྱིར་མི་འོང་བའི་འབྲས་བུ་ལ་གནས་པར་འགྱུར། བརྩོན་འགྲུས་འདི་ནི་དགྲ་བཅོམ་པ་ལ་གནས་པར་འགྱུར། བརྩོན་འགྲུས་འདི་ནི་རང་སངས་རྒྱས་ལ་གནས་པར་འགྱུར་རོ། །ཞེས་ཁྱིམ་བདག་དེ་ལྟར་ན་དེ་བཞིན་
གཤེགས་པས་བརྩོན་འགྲུས་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་
ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་བརྩོན་འགྲུས་ཀྱི་དབང་པོ་སྐྱེ་བར་འགྱུར་
བ། གལ་ཏེ་དགེ་བའི་བཤེས་གཉེན་ལ་བརྟེན་པའམ། གལ་ཏེ་མལ་སྟན་ལ་གནས་པའམ། གལ་ཏེ་ཡུལ་ལ་གནས་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་པ་
ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་
དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རྒྱུ་གང་དང་རྐྱེན་གང་དག་གིས་བརྩོན་འགྲུས་ཀྱི་དབང་པོ་སྐྱེས་ཏེ། རྒྱུ་དེ་དག་འགོག་པ་ལས་བརྩོན་འགྲུས་ཀྱི་འགོག་པ་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་པོ་ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་

པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་
བདག་འདི་ལ་དེ་བཞིན་གཤེགས་པས་ཤེས་པ་གང་དག་གིས་བརྩོན་འགྲུས་ཀྱི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་དུ་བྱས་པའི་འགོག་པ་ཤེས་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་
པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དྲན་པའི་དབང་པོ་ཤེས་པ་ཡང་
དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་མངོན་པར་བརྗོད་པའི་མཚན་ཉིད་ནི་དྲན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དྲན་པ་སོ་སོ་ཉེ་བར་གཞག་པ་ནི་དྲན་པའི་དབང་པོའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཐམས་
ཅད་དུ་འགྲོ་བ་ནི་དྲན་པའི་དབང་པོའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དྲན་པའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་
རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དྲན་པའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞི་གཤེགས་པས་རྒྱུ་གང་དང་རྐྱེན་གང་དག་གིས་དྲན་པའི་དབང་པོ་སྐྱེ་བའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་
བ་བཞིན་རབ་ཏུ་མཁྱེན་ཏེ། གལ་ཏེ་སྔོན་གྱི་མཐའ་རྗེས་སུ་དྲན་པའམ། གལ་ཏེ་ཕྱི་མའི་མཐའ་ལས་བརྩམས་པའམ། གལ་ཏེ་ད་ལྟར་བྱུང་བའི་དུས་ལས་བརྩམས་པའམ། གལ་ཏེ་ལུས་ལ་དམིགས་པའམ། གལ་ཏེ་ཚོར་བ་ལ་དམིགས་པའམ། གལ་ཏེ་སེམས་ལ་དམིགས་པ་

འམ། གལ་ཏེ་ཆོས་ལ་དམིགས་པའམ། གལ་ཏེ་འདོད་པ་ལ་དམིགས་པའམ། གལ་ཏེ་གནོད་སེམས་ལ་དམིགས་པའམ། གལ་ཏེ་རྣམ་པར་འཚེ་བ་ལ་དམིགས་པའམ། གལ་ཏེ་ངེས་པར་འབྱུང་བ་ལ་དམིགས་པའམ། གལ་ཏེ་གནོད་སེམས་མེད་པ་ལ་དམིགས་
པའམ། གལ་ཏེ་རྣམ་པར་མི་འཚེ་བ་ལ་དམིགས་པའམ། གལ་ཏེ་སངས་རྒྱས་ལ་དམིགས་པའམ། གལ་ཏེ་ཆོས་ལ་དམིགས་པའམ། གལ་ཏེ་དགེ་འདུན་ལ་དམིགས་པའམ། ཚུལ་ཁྲིམས་ལ་དམིགས་པ་འམ། ཏིང་ངེ་འཛིན་ལ་དམིགས་པའམ། ཤེས་རབ་ལ་དམིགས་པའམ།
རྣམ་པར་གྲོལ་བ་ལ་དམིགས་པའམ། རྣམ་པར་གྲོལ་བའི་ཡེ་ཤེས་མཐོང་བ་ལ་དམིགས་པའམ། གལ་ཏེ་ཟད་པ་ལ་དམིགས་པའམ། གལ་ཏེ་མི་སྐྱེ་བ་ལ་དམིགས་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དེ་ལ་ཡང་ཞུ་བ་ཞུས་པ་
ན། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དྲན་པའི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་
རྒྱུ་གང་དང་རྐྱེན་གང་དག་གིས་དྲན་པའི་དབང་པོ་སྐྱེས་པའི་རྒྱུ་དེ་དག་འགོག་པ་ལས་དྲན་པའི་དབང་པོ་འགོག་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དེ་ལ་ཡང་ཞེས་བྱ་བ་ནས་ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་
ལྟར་ན་དེ་བཞིན་གཤེགས་པས་དྲན་པའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཤེས་པ་གང་གིས་དྲན་པའི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད།
མངོན་སུམ་དུ་བྱས་པའི་འགོག་པ་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དྲན་པའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་

བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཏིང་ངེ་འཛིན་གྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སེམས་རྩེ་གཅིག་པ་ཉིད་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ།
གལ་ཏེ་བསམ་གཏན་དང་པོའམ། གལ་ཏེ་བསམ་གཏན་གཉིས་པའམ། གལ་ཏེ་བསམ་གཏན་གསུམ་པའམ། གལ་ཏེ་བསམ་གཏན་བཞི་པའམ། གལ་ཏེ་བྱམས་པའམ། གལ་ཏེ་སྙིང་རྗེ་འམ། གལ་ཏེ་དགའ་བའམ། གལ་ཏེ་བཏང་སྙོམས་སམ། གལ་ཏེ་ནམ་མཁའ་མཐའ་ཡས་
སྐྱེ་མཆེད་ལ་སྙོམས་པར་འཇུག་པའམ། གལ་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པའི་བར་རམ། གལ་ཏེ་རྣམ་པར་ཐར་པའམ། གལ་ཏེ་ཟད་པར་གྱི་སྐྱེ་མཆེད་དམ། གལ་ཏེ་ཟིལ་གྱིས་གནོན་པའི་སྐྱེ་མཆེད་དེ་དག་གིས་ཇི་ལྟར་སེམས་རྩེ་གཅིག་པར་མངོན་དུ་
གྱུར་པ་དེ། དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་སེམས་རྩེ་གཅིག་པ་དེ་དག་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས་ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཏིང་
ངེ་འཛིན་གྱི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་སེམས་རྩེ་གཅིག་ཏུ་འགྱུར་བ། གལ་ཏེ་མི་གཙང་བའི་འདུ་ཤེས་ཀྱིས་སམ། གལ་ཏེ་རྣམ་པར་སྔོས་པའི་འདུ་
ཤེས་ཀྱིས་སམ། གལ་ཏེ་རྣམ་པར་རུལ་བའི་འདུ་ཤེས་ཀྱིས་སམ། གལ་ཏེ་རྣམ་པར་ཟོས་པའི་འདུ་ཤེས་ཀྱིས་སམ། གལ་ཏེ་རྣམ་པར་ཚིག་པའི་འདུ་ཤེས་ཀྱིས་སམ། གལ་ཏེ་རུས་གོང་གི་འདུ་ཤེས་ཀྱིས་སམ། གལ་ཏེ་རྣམ་པར་འཐོར་བའི་འདུ་ཤེས་ཀྱིས་སམ། གལ་ཏེ་རྣམ་པར་མི་
ལྡན་པའི་འདུ་ཤེས་ཀྱིས་སམ། གལ་ཏེ་ངེས་པར་འབྱུང་བའི་འདུ་ཤེས་ཀྱིས་སམ། གལ་ཏེ་གནོད་སེམས་མེད་པའི་འདུ་ཤེས་ཀྱིས་སམ། གལ་ཏེ་རྣམ་པར་མི་འཚེ་བའི་འདུ་ཤེས་ཀྱིས་སམ། གལ་ཏེ་སེམས་ཅན་གྱི་འདུ་ཤེས་ཀྱིས་སམ། གལ་ཏེ་ཆོས་ཀྱི་འདུ་ཤེས་ཀྱིས་ཏེ། དེ་དེ་བཞིན་གཤེགས་པས་ཡང་

དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཏིང་ངེ་འཛིན་གྱི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཏིང་ངེ་འཛིན་གྱི་དབང་
པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་ཏིང་ངེ་འཛིན་གྱི་དབང་པོ་སྐྱེས་པའི་རྒྱུ་དེ་དང་རྐྱེན་དེ་དག་འགོག་པ་ལས་ཏིང་ངེ་འཛིན་གྱི་དབང་པོ་འགགས་ཏེ། དེ་དེ་བཞིན་གཤེགས་པས་ཡང་དག་
པ་ཇི་ལྟ་བ་བཞིན་རབ་ཏུ་མཁྱེན་ཏེ། དེ་བཞིན་གཤེགས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཏིང་ངེ་འཛིན་གྱི་
དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཤེས་པ་གང་གིས་ཏིང་ངེ་འཛིན་གྱི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་དུ་བྱས་པའི་འགོག་པ་ཤེས་པ་དེ་ཡང་དག་པ་ཇི་
ལྟ་བ་བཞིན་རབ་ཏུ་མཁྱེན་པ་ནས། དེ་བཞིན་དུ་སྦྱར་ཏེ་ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཤེས་རབ་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སྡུག་
བསྔལ་གྱི་ཕུང་པོ་དཔག་ཏུ་མེད་པ་མཐར་བྱེད་པའི་ཤེས་རབ་ཀྱི་དབང་པོ་དང་འཁོར་བ་དཔག་ཏུ་མེད་པའི་མཐར་བྱེད་པ་དང་། ཕུང་པོ་དག་གི་རིམ་པ་དཔག་ཏུ་མེད་པའི་མཐར་བྱེད་པ་དང་། མི་སྡུག་པ་དང་ཕྲད་པ་དཔག་ཏུ་མེད་པའི་མཐར་བྱེད་པ་དང་། སྡུག་པ་དང་བྲལ་བ་དཔག་ཏུ་མེད་པའི་མཐར་
བྱེད་པ་དང་། སྡུག་བསྔལ་གྱི་སྡུག་བསྔལ་དཔག་ཏུ་མེད་པའི་མཐར་བྱེད་པ་དང་། འགྱུར་བའི་སྡུག་བསྔལ་དཔག་ཏུ་མེད་པའི་མཐར་བྱེད་པ་དང་། འདུ་བྱེད་པའི་སྡུག་བསྔལ་དཔག་ཏུ་མེད་པའི་མཐར་བྱེད་པ་འདི་ནི་ཤེས་རབ་ཀྱི་དབང་པོ་སྟེ། དྲན་པ་ཉེ་བར་གཞག་པ་བཞི་སྐྱེད་པ། ཡང་དག་པར་སྤོང་

བ་བཞི་སྐྱེད་པ། རྫུ་འཕྲུལ་གྱི་རྐང་པ་བཞི་སྐྱེད་པ། དབང་པོ་ལྔ་སྐྱེད་པ། སྟོབས་ལྔ་སྐྱེད་པ། རྗེས་སུ་དྲན་པ་དྲུག་སྐྱེད་པ། བྱང་ཆུབ་ཀྱི་ཡན་ལག་བདུན་སྐྱེད་པ། འཕགས་པའི་ལམ་ཡན་ལག་བརྒྱད་པ་སྐྱེད་པ། ཞི་གནས་དང་ལྷག་མཐོང་སྐྱེད་པ། རིག་པ་སྐྱེད་པ། རྣམ་པར་གྲོལ་བ་སྐྱེད་པ།
རྣམ་པར་གྲོལ་བའི་ཡེ་ཤེས་མཐོང་བ་སྐྱེད་པ། རྣམ་པར་ཐར་པའི་སྒོའི་མཆོག །སྒྲིབ་པ་མེད་པའི་མིག་འཁོར་བའི་སྐྱོན་ཡང་དག་པར་སྟོན་པ། མྱ་ངན་ལས་འདས་པའི་ཡོན་ཏན་ཤིན་ཏུ་བརྗོད་པ། འདས་པའི་དེ་བཞིན་གཤེགས་པ་རྣམས་ཀྱིས་མཆོག་ཏུ་བྱ་བ་བྱས་པ། མ་འོངས་པའི་དེ་བཞིན་
གཤེགས་པ་རྣམས་ཀྱིས་ཀྱང་མཆོག་ཏུ་བྱེད་པར་འགྱུར་བ། ད་ལྟར་གྱི་འཇིག་རྟེན་གྱི་ཁམས་དཔག་ཏུ་མེད་པ་དག་ན། སངས་རྒྱས་བཅོམ་ལྡན་འདས་བཞུགས་ཤིང་གཞེས་པ་དེ་དག་གིས་ཀྱང་། ཤེས་རབ་ཀྱི་དབང་པོ་འདི་མཆོག་ཏུ་མཛད་པ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་
འམ། བླ་ན་མེད་པའི་སངས་རྒྱས་ཀྱི་ཡེ་ཤེས་ཀྱི་ཤེས་རབ་ཀྱི་དབང་པོའི་ཐོག་མ་སྟེ། ཁྱིམ་བདག་དེ་ལྟར་ན་དེ་བཞིན་གཤེགས་པས་ཤེས་རབ་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཤེས་རབ་ཀྱི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་
པར་ལན་གསུང་བ་ནས། དེ་བཞིན་དུ་སྦྱར་ཏེ་ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཤེས་རབ་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ།
རྒྱུ་གང་དང་རྐྱེན་གང་དག་གིས་ཤེས་རབ་ཀྱི་དབང་པོ་ཤེས་པ་ཡང་དག་པར་འགྲུབ་པ་གལ་ཏེ་མི་རྟག་པའི་རྣམ་པས་སམ། དེ་བཞིན་དུ་སྦྱར་ཏེ་ཕྱིར་རྒོལ་བའི་རྣམ་པས་སམ། གལ་ཏེ་མུན་པའི་རྣམ་པས་སམ། གལ་ཏེ་མི་རྟག་པ་དང་རྗེས་སུ་འབྲེལ་བའི་རྣམ་པས་སམ། གལ་ཏེ་དབུས་སུ་སྤྱོད་པའི་
རྣམ་པས་སམ། གལ་ཏེ་མཛའ་བའི་རྣམ་པས་སམ། འདི་ལྟ་སྟེ། གལ་ཏེ་མི་མཛའ་བ་ལ་མཛའ་བཤེས་ལྟ་བུའི་རྣམ་པས་སམ། གལ་ཏེ་སྐྱོན་དུ་བལྟ་བའི་རྣམ་པས་སམ། གལ་ཏེ་སྒྱིད་ལུག་པའི་རྣམ་པས་སམ། གལ་ཏེ་ཡིད་བརྟན་དུ་མི་རུང་བའི་རྣམ་པས་སམ། གལ་ཏེ་ཆུའི་སྲིན་

པོའི་རྣམ་པས་ཏེ། རྣམ་པ་དེ་ལྟ་བུ་དཔག་ཏུ་མེད་པ་འབུམ་དེ་དག་གིས་ཤེས་རབ་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཤེས་རབ་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་
པ་ན། བསྐལ་པར་ལན་གསུང་བ་ན། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཤེས་རབ་ཀྱི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་
བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཤེས་རབ་ཀྱི་དབང་པོ་ནི་སྐྱེད་པའི་ཆོས་ཅན་ཡིན་ལ། སྐྱེད་པའི་ཆོས་ཅན་གང་ཡིན་པ་དེ་ནི་འགོག་པའི་ཆོས་ཅན་ཏེ། ཤེས་རབ་དེ་ཡང་སེམས་ཅན་དཔག་ཏུ་མེད་པ་རྣམས་ཀྱི་དོན་གྱི་ཕྱིར་སྐྱེས་ཤིང་སེམས་ཅན་དཔག་ཏུ་མེད་པ་
རྣམས་ཀྱི་དོན་བྱས་ནས་འགགས། སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ཤིང་དོན་མ་ཡིན་པ་བཟློག་ནས་འགགས། སེམས་ཅན་དཔག་ཏུ་མེད་པ་རྣམས་ཀྱི་སྡུག་བསྔལ་ལས་ཡོངས་སུ་ཐར་བར་མཛད་ནས་འགགས། སེམས་ཅན་དཔག་ཏུ་མེད་པ་རྣམས་བདེ་བ་ལ་བཙུད་ནས་འགགས་
ཏེ། ཤེས་རབ་ཀྱི་དབང་པོ་རྗེས་སུ་དྲན་པ་ན་ཡང་སེམས་ཅན་དཔག་ཏུ་མེད་པ་རྣམས་ཀྱི་དོན་བྱེད་པར་འགྱུར། སེམས་ཅན་དཔག་ཏུ་མེད་པ་རྣམས་ཀྱི་དོན་མ་ཡིན་པ་བཟློག་པར་འགྱུར་ཞིང་འགགས། ཤེས་རབ་ཀྱི་དབང་པོ་རྗེས་སུ་དྲན་པ་ན་ཡང་སེམས་ཅན་དཔག་ཏུ་མེད་པ་རྣམས་སྡུག་བསྔལ་ལས་
ཡོངས་སུ་ཐར་བར་བྱེད་པར་འགྱུར། སེམས་ཅན་དཔག་ཏུ་མེད་པ་རྣམས་བདེ་བ་ལ་བཙུད་པར་འགྱུར་ཞིང་འགགས་ཏེ། ཤེས་རབ་ཀྱི་དབང་པོ་རྗེས་སུ་དྲན་པ་ན་ཡང་སེམས་ཅན་དཔག་ཏུ་མེད་པ་རྣམས་ཀྱི་མུན་པ་སེལ་བར་འགྱུར། སེམས་ཅན་དཔག་ཏུ་མེད་པ་རྣམས་ཀྱི་སྣང་བར་
བྱེད་པར་འགྱུར་ཞིང་འགགས། ཤེས་རབ་ཀྱི་དབང་པོ་རྗེས་སུ་དྲན་པ་ན་ཡང་ལམ་གོལ་བ་འགོག་པར་འགྱུར་ཞིང་ལམ་འབྱེད་པར་འགྱུར་ཏེ། འདི་ནི་ཤེས་རབ་ཀྱི་དབང་པོ་ཤེས་པ་འགོག་པ་ཤེས་པ་ཞེས་བྱའོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་

པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་ཤེས་རབ་ཀྱི་དབང་པོ་ཤེས་པ་འགོག་པ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཁྱིམ་བདག་དེ་ལྟར་ན་དེ་བཞིན་གཤེགས་པས་ཤེས་རབ་ཀྱི་དབང་པོ་ཤེས་པ་འགོག་
པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཤེས་རབ་ཀྱི་དབང་པོ་ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་
བདག་ཇི་ལྟར་ན་དེ་བཞིན་གཤེགས་པས་ཤེས་རབ་ཀྱི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཤེས་པ་གང་གིས་ཤེས་རབ་ཀྱི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་
དུ་བྱས་པའི་འགོག་པ་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་མངོན་པར་ཤེས་པའི་ཤེས་པས་སམ། གལ་ཏེ་ཡོངས་སུ་ཤེས་པའི་ཤེས་པས་སམ། གལ་ཏེ་སྤོང་བའི་ཤེས་པས་སམ། གལ་ཏེ་བསྒོམ་པའི་ཤེས་པས་སམ། གལ་ཏེ་མངོན་སུམ་དུ་བྱས་པའི་ཤེས་པ་
དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཤེས་པ་གང་གིས་ཤེས་རབ་ཀྱི་དབང་པོ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་དུ་བྱས་ནས་འགོག་པ་ཤེས་པ་དེ་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ཡིན་པ་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཏོ། །དེ་བཞིན་གཤེགས་པ་ཤེས་རབ་ཀྱི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་ཞིང་། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བྱེ་བའམ། བསྐལ་པ་བྱེ་བ་ཕྲག་འབུམ་མམ། བསྐལ་པ་ཁྲག་
ཁྲིག་གམ། བསྐལ་པ་གཏམས་སམ། བསྐལ་པ་དཀྲིགས་སམ། བསྐལ་པ་ཁྱད་ཕྱིན་ནས། བསྐལ་པ་དཔག་ཏུ་མེད་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་

པས་མི་ཤེས་པ་ཀུན་ཤེས་པར་བྱེད་པའི་དབང་པོ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་གནས་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་ཤེས་པ་ཀུན་འབྱུང་བ་
ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་ཤེས་པ་འགོག་པ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་
སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གནས་མ་ཡིན་པ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་མ་ཡིན་པ་ཤེས་པ་ཀུན་འབྱུང་བ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན།
གནས་མ་ཡིན་པ་ཤེས་པ་འགོག་པ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་མ་ཡིན་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །འདས་པ་ཤེས་
ཏེ་འདས་པ་ཤེས་པ་ཀུན་འབྱུང་བ་ཤེས་འདས་པ་ཤེས་པ་འགོག་པ་ཤེས། འདས་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མ་འོངས་པ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་
བཞིན་རབ་ཏུ་མཁྱེན་ཏེ། མ་འོངས་པ་ཤེས་པ་ཀུན་འབྱུང་བ་ཤེས། མ་འོངས་པ་ཤེས་པ་འགོག་པ་ཤེས། མ་འོངས་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ད་ལྟར་བྱུང་བ་ལ་མི་ཤེས་པ་དག་ཀུན་ཤེས་
སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ད་ལྟར་བྱུང་བ་ཤེས་པ་ཀུན་འབྱུང་བ་ཤེས། ད་ལྟར་བྱུང་བ་ཤེས་པ་འགོག་པ་ཤེས། ད་ལྟར་བྱུང་བ་ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ལས་ཤེས་པ་ལ་མི་ཤེས་

པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ལས་ཤེས་པ་ཀུན་འབྱུང་བ་ཤེས་པ་ལ་མི་ཤེས་པ་དག་དང་ལས་ཤེས་པ་འགོག་པ་ཤེས་པ་ལ་མི་ཤེས་པ་དག་དང་། ལས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་
ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡང་དག་པར་བླང་བ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཡང་དག་པར་བླང་བ་ཤེས་པ་ཀུན་འབྱུང་བ་ཤེས། ཡང་དག་པར་བླང་བ་ཤེས་པ་འགོག་པ་ཤེས། ཡང་དག་པར་བླང་བ་
ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གནས་དང་གནས་ཀྱི་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གནས་དང་གནས་ཀྱི་ཤེས་པ་ཀུན་འབྱུང་བ་ཤེས། གནས་དང་གནས་
ཀྱི་ཤེས་པ་འགོག་པ་ཤེས། གནས་དང་གནས་ཀྱི་ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །རྒྱུ་དང་རྒྱུའི་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཀུན་འབྱུང་བ་དང་། འགོག་
པ་དང་། འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །རྣམ་པར་སྨིན་པ་ཤེས་པ་ཀུན་འབྱུང་བ་ཤེས། རྣམ་པར་སྨིན་པ་ཤེས་པ་འགོག་པ་ཤེས། རྣམ་པར་སྨིན་པ་ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་
ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཐམས་ཅད་དུ་འགྲོ་བའི་ལམ་ཤེས་པ་ཀུན་འབྱུང་བ་ཤེས། ཐམས་ཅད་དུ་འགྲོ་བའི་ལམ་ཤེས་པ་འགོག་པ་ཤེས། ཐམས་ཅད་དུ་འགྲོ་བའི་ལམ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་
བ་བཞིན་རབ་ཏུ་མཁྱེན་ཏོ། །ཁམས་དུ་མ་ཤེས་ཏེ། ཁམས་དུ་མ་ཤེས་པ་ཀུན་འབྱུང་བ་ཤེས། ཁམས་དུ་མ་ཤེས་པ་འགོག་པ་ཤེས། ཁམས་དུ་མ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁམས་

སྣ་ཚོགས་ཤེས་ཏེ། ཁམས་སྣ་ཚོགས་ཤེས་པ་ཀུན་འབྱུང་བ་ཤེས། ཁམས་སྣ་ཚོགས་ཤེས་པ་འགོག་པ་ཤེས། ཁམས་སྣ་ཚོགས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །འཇིག་
རྟེན་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། འཇིག་རྟེན་ཤེས་པ་ཀུན་འབྱུང་བ་ཤེས། འཇིག་རྟེན་ཤེས་པ་འགོག་པ་ཤེས། འཇིག་རྟེན་ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་
མཁྱེན་ཏོ། །མོས་པ་དུ་མ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། མོས་པ་དུ་མ་ཤེས་པ་ཀུན་འབྱུང་བ་ཤེས། མོས་པ་དུ་མ་ཤེས་པ་འགོག་པ་ཤེས། མོས་པ་དུ་མ་ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་
ཏུ་མཁྱེན་ཏོ། །མོས་པ་སྣ་ཚོགས་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། མོས་པ་སྣ་ཚོགས་ཤེས་པ་ཀུན་འབྱུང་བ་ཤེས། མོས་པ་སྣ་ཚོགས་ཤེས་པ་འགོག་པ་ཤེས། མོས་པ་སྣ་ཚོགས་ཤེས་པ་འགོག་པར་འགྱུར་བའི་ལམ་ཤེས་པ་ཀུན་
ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དབང་པོ་ཤེས་པ་ལ་མི་ཤེས་པ་དག་ཀུན་ཤེས་ཏེ། དབང་པོ་ཤེས་པ་ཀུན་འབྱུང་བ་ཤེས། དབང་པོ་ཤེས་པ་འགོག་པ་ཤེས། དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཏོ། །སྟོབས་ཤེས་པ་ཀུན་འབྱུང་བ་ཤེས། སྟོབས་ཤེས་པ་འགོག་པ་ཤེས། སྟོབས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བརྩོན་འགྲུས་ཤེས་ཏེ། བརྩོན་འགྲུས་ཤེས་པ་ཀུན་འབྱུང་
བཤེས། བརྩོན་འགྲུས་ཤེས་པ་འགོག་པ་ཤེས། བརྩོན་འགྲུས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །རིམ་པ་ཤེས་ཏེ། རིམ་པ་ཤེས་པ་ཀུན་འབྱུང་བ་ཤེས། རིམ་པ་ཤེས་པ་འགོག་པ་ཤེས།

རིམ་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བསམ་གཏན་ཤེས་ཏེ། བསམ་གཏན་ཤེས་པ་ཀུན་འབྱུང་བ་ཤེས། བསམ་གཏན་ཤེས་པ་འགོག་པ་ཤེས། བསམ་གཏན་ཤེས་པ་འགོག་པར་འགྱུར་བའི་
ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །རྣམ་པར་ཐར་པ་ཤེས་ཏེ། རྣམ་པར་ཐར་པ་ཤེས་པ་ཀུན་འབྱུང་བ་ཤེས། རྣམ་པར་ཐར་བ་ཤེས་པ་འགོག་པ་ཤེས། རྣམ་པར་ཐར་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་
པ་དག་ཀུན་ཤེས་སོ། །ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཏིང་ངེ་འཛིན་ཤེས་ཏེ། ཏིང་ངེ་འཛིན་ཤེས་པ་ཀུན་འབྱུང་བ་ཤེས། ཏིང་ངེ་འཛིན་ཤེས་པ་འགོག་པ་ཤེས། ཏིང་ངེ་འཛིན་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་
པ་ཇི་ལྟ་བ་བཞིན་རབ་ཏུ་མཁྱེན་ཏོ། །སྙོམས་པར་འཇུག་པ་ཤེས་ཏེ། སྙོམས་པར་འཇུག་པ་ཤེས་པ་ཀུན་འབྱུང་བ་ཤེས། སྙོམས་པར་འཇུག་པ་ཤེས་པ་འགོག་པ་ཤེས། སྙོམས་པར་འཇུག་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་
དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཀུན་ནས་ཉོན་མོངས་པ་ཤེས་ཏེ། ཀུན་ནས་ཉོན་མོངས་པ་ཤེས་པ་ཀུན་འབྱུང་བ་ཤེས། ཀུན་ནས་ཉོན་མོངས་པ་ཤེས་པ་འགོག་པ་ཤེས། ཀུན་ནས་ཉོན་མོངས་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་
སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། རྣམ་པར་བྱང་བ་ཤེས་ཏེ། རྣམ་པར་བྱང་བ་ཤེས་པ་ཀུན་འབྱུང་བ་ཤེས། རྣམ་པར་བྱང་བ་ཤེས་པ་འགོག་པ་ཤེས། རྣམ་པར་བྱང་བ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་
བ་བཞིན་རབ་ཏུ་མཁྱེན་ཏོ། །རྣམ་པར་གཞག་པ་ཤེས་ཏེ། རྣམ་པར་གཞག་པ་ཤེས་པ་ཀུན་འབྱུང་བ་ཤེས། རྣམ་པར་གཞག་པ་ཤེས་པ་འགོག་པ་ཤེས། རྣམ་པར་གཞག་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་

རབ་ཏུ་མཁྱེན་ཏོ། །སྔོན་གྱི་མཐའ་ཤེས་ཏེ། སྔོན་གྱི་མཐའ་ཤེས་པ་ཀུན་འབྱུང་བ་ཤེས། སྔོན་གྱི་མཐའ་ཤེས་པ་འགོག་པ་ཤེས། སྔོན་གྱི་མཐའ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །
སྔོན་གྱི་གནས་ཤེས་ཏེ། སྔོན་གྱི་གནས་ཤེས་པ་ཀུན་འབྱུང་བ་ཤེས། སྔོན་གྱི་གནས་ཤེས་པ་འགོག་པ་ཤེས། སྔོན་གྱི་གནས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཕྱི་མའི་མཐའ་ཤེས་ཏེ། ཕྱི་མའི་
མཐའ་ཤེས་པ་ཀུན་འབྱུང་བ་ཤེས། ཕྱི་མའི་མཐའ་ཤེས་པ་འགོག་པ་ཤེས། ཕྱི་མའི་མཐའ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །འཆི་བ་ཤེས་ཏེ། འཆི་བ་ཤེས་པ་ཀུན་འབྱུང་བ་ཤེས། འཆི་བ་ཤེས་པ་
འགོག་པ་ཤེས། འཆི་བ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །སྐྱེ་བ་ཤེས་ཏེ། སྐྱེ་བ་ཤེས་པ་ཀུན་འབྱུང་བ་ཤེས། སྐྱེ་བ་ཤེས་པ་འགོག་པ་ཤེས། སྐྱེ་བ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་
ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །འདོད་པའི་ཟག་པ་ཤེས་ཏེ། འདོད་པའི་ཟག་པ་ཤེས་པ་ཀུན་འབྱུང་བ་ཤེས། འདོད་པའི་ཟག་པ་ཤེས་པ་འགོག་པ་ཤེས། འདོད་པའི་ཟག་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་
ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །སྲིད་པའི་ཟག་པ་ཤེས་ཏེ། སྲིད་པའི་ཟག་པ་ཤེས་པ་ཀུན་འབྱུང་བ་ཤེས། སྲིད་པའི་ཟག་པ་ཤེས་པ་འགོག་པ་ཤེས། སྲིད་པའི་ཟག་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་
ཇི་ལྟ་བ་བཞིན་རབ་ཏུ་མཁྱེན་ཏོ། །ལྟ་བའི་ཟག་པ་ཤེས་ཏེ་ལྟ་བའི་ཟག་པ་ཤེས་པ་ཀུན་འབྱུང་བ་ཤེས། ལྟ་བའི་ཟག་པ་ཤེས་པ་འགོག་པ་ཤེས། ལྟ་བའི་ཟག་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །

མ་རིག་པའི་ཟག་པ་ཤེས་ཏེ། མ་རིག་པའི་ཟག་པ་ཤེས་པ་ཀུན་འབྱུང་བ་ཤེས། མ་རིག་པའི་ཟག་པ་ཤེས་པ་འགོག་པ་ཤེས། མ་རིག་པའི་ཟག་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཟད་པ་ཤེས་
ཏེ། ཟད་པ་ཤེས་པ་ཀུན་འབྱུང་བ་ཤེས། ཟད་པ་ཤེས་པ་འགོག་པ་ཤེས། ཟད་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མི་སྐྱེ་བ་ཤེས་ཏེ། མི་སྐྱེ་བ་ཤེས་པ་ཀུན་འབྱུང་བ་ཤེས། མི་སྐྱེ་བ་
ཤེས་པ་འགོག་པ་ཤེས། མི་སྐྱེ་བ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མི་འཇིགས་པ་ཤེས་ཏེ། མི་འཇིགས་པ་ཤེས་པ་ཀུན་འབྱུང་བ་ཤེས། མི་འཇིགས་པ་ཤེས་པ་འགོག་པ་ཤེས། མི་འཇིགས་པ་
ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་དུ་དེ་བཞིན་གཤེགས་པའི་བྱང་ཆུབ་ཀྱི་མཚན་ཉིད་ལ་ཡང་བྱ་ཞིང་། དེ་བཞིན་དུ་སོ་སོ་ཡང་དག་པར་རིག་པ་ལ་ཡང་བྱའོ། །དེ་བཞིན་གཤེགས་པའི་མཚན་ཉིད་
ཤེས་ཏེ། དེ་བཞིན་གཤེགས་པའི་མཚན་ཉིད་ཤེས་པ་ཀུན་འབྱུང་བ་ཤེས། དེ་བཞིན་གཤེགས་པའི་མཚན་ཉིད་ཤེས་པ་འགོག་པ་ཤེས། དེ་བཞིན་གཤེགས་པའི་མཚན་ཉིད་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་
ཏོ། །དེ་བཞིན་གཤེགས་པའི་གནས་པ་ཤེས་ཏེ། དེ་བཞིན་གཤེགས་པའི་གནས་པ་ཤེས་པ་ཀུན་འབྱུང་བ་ཤེས། དེ་བཞིན་གཤེགས་པའི་གནས་པ་ཤེས་པ་འགོག་པ་ཤེས། དེ་བཞིན་གཤེགས་པའི་གནས་པ་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་
ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་དུ་དེ་བཞིན་གཤེགས་པའི་དབང་པོ་ལ་ཡང་བྱའོ། །ལུས་ཀྱི་ལས་ཤེས་པ་དང་། ངག་གི་ལས་ཤེས་པ་དང་། ཡིད་ཀྱི་ལས་མཐའ་ཡས་པ་ཤེས་ཏེ། ཡིད་ཀྱི་ལས་ཤེས་པ་ཀུན་འབྱུང་བ་ཤེས། ཡིད་ཀྱི་ལས་ཤེས་པ་འགོག་པ་ཤེས།

ཡིད་ཀྱི་ལས་ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །སྔོན་དུ་འགྲོ་བ་མཐའ་ཡས་པ་ཤེས་ཏེ། སྔོན་དུ་འགྲོ་བ་ཤེས་པ་ཀུན་འབྱུང་བ་ཤེས། སྔོན་དུ་འགྲོ་བ་ཤེས་པ་འགོག་པ་ཤེས། སྔོན་དུ་འགྲོ་བ་
ཤེས་པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །རྗེས་སུ་འབྲང་བ་མཐའ་ཡས་པ་ཤེས་ཏེ། རྗེས་སུ་འབྲང་བ་ཤེས་པ་ཀུན་འབྱུང་བ་ཤེས། རྗེས་སུ་འབྲང་བ་ཤེས་པ་འགོག་པ་ཤེས། རྗེས་སུ་འབྲང་བ་ཤེས་
པ་འགོག་པར་འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། ཡོངས་སུ་ཉམ་པ་ཤེས་ཏེ། ཡོངས་སུ་ཉམ་པ་ཤེས་པ་ཀུན་འབྱུང་བ་ཤེས། ཡོངས་སུ་ཉམ་པ་ཤེས་པ་འགོག་པ་ཤེས། ཡོངས་སུ་ཉམ་པ་ཤེས་པ་འགོག་པར་
འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཐམས་ཅད་མཁྱེན་པ་ཤེས་ཏེ། ཐམས་ཅད་མཁྱེན་པ་ཤེས་པ་ཀུན་འབྱུང་བ་ཤེས། ཐམས་ཅད་མཁྱེན་པ་ཤེས་པ་འགོག་པ་ཤེས། ཐམས་ཅད་མཁྱེན་པ་ཤེས་པ་འགོག་པར་
འགྱུར་བའི་ལམ་ཤེས་པ་ལ་མི་ཤེས་པ་དག་ཀུན་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །འདི་ནི་མི་ཤེས་པ་ཀུན་ཤེས་པར་བྱེད་པའི་དབང་པོ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་མི་ཤེས་པ་
ཀུན་ཤེས་པར་བྱེད་པའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་
ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཀུན་ཤེས་པའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཀུན་ཤེས་པའི་དབང་པོའི་གནས་ཤེས་པས་མེ་ལོང་ལྟ་བུར་གྱུར་པའི་དཀྱིལ་འཁོར་རབ་ཏུ་མཁྱེན་ཏོ། །ཁྱིམ་

བདག་འདི་ལྟ་སྟེ་དཔེར་ན། སྐྱེས་བུའི་ལག་པས་མེ་ལོང་གི་དཀྱིལ་འཁོར་བཟུང་བར་གཟུགས་ཐམས་ཅད་སྣང་ངོ་། །དེ་བཞིན་དུ་དེ་བཞིན་གཤེགས་པས་ཀུན་ཤེས་པའི་དབང་པོའི་གནས་ཤེས་པ་དེས་སེམས་ཅན་ཐམས་ཅད་ཀྱི་བསམ་པ་རབ་ཏུ་མཁྱེན་ཅིང་། སེམས་ཅན་ཐམས་ཅད་ཀྱི་དབང་པོ་
རབ་ཏུ་མཁྱེན་ཏེ། སེམས་ཅན་འདི་དག་གི་དབང་པོ་ནི་རྣོའོ། །སེམས་ཅན་འདི་དག་གི་དབང་པོ་ནི་འབྲིང་ངོ་། སེམས་ཅན་འདི་དག་གི་དབང་པོ་ནི་རྟུལ་ལོ། །སེམས་ཅན་འདི་དག་གི་དབང་པོ་ནི་མཆོག་ཏུ་རྣོ་བའོ། །སེམས་ཅན་འདི་དག་གི་དབང་པོ་ནི་མཆོག་གི་འབྲིང་ངོ་། །སེམས་ཅན་འདི་
དག་གི་དབང་པོ་ནི་མཆོག་གི་རྟུལ་བའོ། །སེམས་ཅན་འདི་དག་གི་དབང་པོ་ནི་འབྲིང་གི་རྣོ་བའོ། །སེམས་ཅན་འདི་དག་གི་དབང་པོ་ནི་འབྲིང་གི་འབྲིང་ངོ་། །སེམས་ཅན་འདི་དག་གི་དབང་པོ་ནི་འབྲིང་གི་རྟུལ་བའོ། །སེམས་ཅན་འདི་དག་གི་དབང་པོ་ནི་རྟུལ་བའི་རྣོ་བའོ། །སེམས་ཅན་འདི་དག་གི་
དབང་པོ་ནི་རྟུལ་བོའི་འབྲིང་ངོ་། །སེམས་ཅན་འདི་དག་གི་དབང་པོ་ནི་རྟུལ་བའི་རྟུལ་བའོ། །སེམས་ཅན་འདི་དག་གི་དབང་པོ་ནི་འདོད་ཆགས་ཀྱིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་ཞེ་སྡང་གིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་གཏི་མུག་གིས་
ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་འདོད་ཆགས་དང་ཞེ་སྡང་གིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་འདོད་ཆགས་དང་གཏི་མུག་གིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་ཞེ་སྡང་དང་འདོད་ཆགས་ཀྱིས་ཉེ་བར་ཉོན་མོངས་པའོ། །
སེམས་ཅན་འདི་དག་གི་དབང་པོ་ནི་ཞེ་སྡང་དང་གཏི་མུག་གིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་གཏི་མུག་དང་འདོད་ཆགས་ཀྱིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་གཏི་མུག་དང་ཞེ་སྡང་གིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་
པོ་ནི་འདོད་ཆགས་དང་ཞེ་སྡང་དང་གཏི་མུག་གིས་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་ཉེ་བར་ཉོན་མོངས་པའོ། །སེམས་ཅན་འདི་དག་གི་དབང་པོ་ནི་ཉེ་བར་ཉོན་མོངས་པ་མེད་པའོ། །སེམས་ཅན་འདི་དག་གི་དབང་པོ་ནི་ཞི་བའོ། །སེམས་ཅན་འདི་དག་གི་དབང་པོ་ནི་མ་ཞི་

བའོ། །སེམས་ཅན་འདི་དག་གི་དབང་པོ་ནི་རབ་ཏུ་ཞི་བའོ། །སེམས་ཅན་འདི་དག་གི་དབང་པོ་ནི་རབ་ཏུ་མ་ཞི་བའོ། །སེམས་ཅན་འདི་དག་གི་དབང་པོ་ནི་རྙོག་པ་ཅན་ནོ། །སེམས་ཅན་འདི་དག་གི་དབང་པོ་ནི་རྙོག་པ་མེད་པའོ། །སེམས་ཅན་འདི་དག་གི་དབང་པོ་
ནི་དཀྲུགས་པའོ། །སེམས་ཅན་འདི་དག་གི་དབང་པོ་ནི་མ་དཀྲུགས་པའོ། །འདི་དག་གི་དབང་པོ་ནི་གསལ་བའོ། །འདི་དག་གི་དབང་པོ་ནི་མི་གསལ་བའོ། །འདི་དག་གི་དབང་པོ་ནི་གྲོལ་བའོ། །འདི་དག་གི་དབང་པོ་ནི་མ་གྲོལ་བའོ། །འདི་དག་གི་དབང་པོ་ནི་རབ་ཏུ་གྲོལ་བའོ། །འདི་
དག་གི་དབང་པོ་ནི་རབ་ཏུ་མ་གྲོལ་བའོ། །འདི་དག་གི་དབང་པོ་ནི་བདེ་བའོ། །འདི་དག་གི་དབང་པོ་ནི་མི་བདེ་བའོ། །འདི་དག་གི་དབང་པོ་ནི་མ་ཚང་བའོ། །འདི་དག་གི་དབང་པོ་ནི་མ་ཚང་བ་མེད་པའོ། །སེམས་ཅན་འདི་དག་གི་དབང་པོ་ནི་དྲུག་ཆར་ཡོངས་སུ་ཚང་བའོ། །སེམས་ཅན་
འདི་དག་གི་དབང་པོ་ནི་དྲུག་ཆར་ཡོངས་སུ་མ་ཚང་བའོ། །སེམས་ཅན་འདི་དག་གི་དབང་པོ་ནི་ངེས་པའོ། །སེམས་ཅན་འདི་དག་གི་དབང་པོ་ནི་མ་ངེས་པའོ། །སེམས་ཅན་འདི་དག་ནི་ཉན་ཐོས་ཀྱི་དབང་པོ་དང་ལྡན་པའོ། །སེམས་ཅན་འདི་དག་ནི་རང་སངས་རྒྱས་ཀྱི་དབང་པོ་དང་ལྡན་པའོ། །
སེམས་ཅན་འདི་དག་ནི་དེ་བཞིན་གཤེགས་པའི་དབང་པོ་དང་ལྡན་པའོ། །སེམས་ཅན་འདི་དག་གི་དབང་པོ་ནི་འཁོར་བའི་སྤྱོད་པ་དང་ལྡན་པའོ། །སེམས་ཅན་འདི་དག་གི་དབང་པོ་ནི་མྱ་ངན་ལས་འདའ་བའི་སྤྱོད་པ་དང་ལྡན་པའོ། །སེམས་ཅན་འདི་དག་གི་དབང་པོ་ནི་ཐུན་མོང་བའོ། །སེམས་
ཅན་འདི་དག་གི་དབང་པོ་ནི་ཐུན་མོང་མ་ཡིན་པའོ། །སེམས་ཅན་འདི་དག་གི་དབང་པོ་ནི་ཤིན་ཏུ་མགུ་བའོ། །སེམས་ཅན་འདི་དག་གི་དབང་པོ་ནི་ཤིན་ཏུ་མ་མགུ་བའོ། །སེམས་ཅན་འདི་དག་གི་དབང་པོ་ནི་ཚིམ་པའོ། །སེམས་ཅན་འདི་དག་གི་དབང་པོ་ནི་མ་ཚིམ་པའོ། །སེམས་
ཅན་འདི་དག་གི་དབང་པོ་ནི་འཁྲུལ་བའོ། །སེམས་ཅན་འདི་དག་གི་དབང་པོ་ནི་མ་འཁྲུལ་པའོ། །འདི་དག་གི་དབང་པོ་ནི་འཕྱར་བའོ། །འདི་དག་གི་དབང་པོ་ནི་མ་འཕྱར་བའོ། །འདི་དག་གི་དབང་པོ་ནི་རྒྱས་པའོ། །འདི་དག་གི་དབང་པོ་ནི་མ་རྒྱས་པའོ། །སེམས་ཅན་འདི་

དག་གི་དབང་པོ་ནི་གཡེངས་པའོ། །སེམས་ཅན་འདི་དག་གི་དབང་པོ་ནི་མ་གཡེངས་པའོ། །སེམས་ཅན་འདི་དག་གི་དབང་པོ་ནི་ཡངས་པའོ། །སེམས་ཅན་འདི་དག་གི་དབང་པོ་ནི་ཡངས་པ་མ་ཡིན་པའོ། །སེམས་ཅན་འདི་དག་གི་དབང་པོ་ནི་དབུགས་འབྱིན་པའོ། །སེམས་ཅན་
འདི་དག་གི་དབང་པོ་ནི་དབུགས་འབྱིན་པ་མ་ཡིན་པའོ། །འདི་དག་གི་དབང་པོ་ནི་མགྱོགས་པའོ། །འདི་དག་གི་དབང་པོ་ནི་མི་མགྱོགས་པའོ། །སེམས་ཅན་འདི་དག་གི་དབང་པོ་ནི་མྱུར་བའོ། །སེམས་ཅན་འདི་དག་གི་དབང་པོ་ནི་མྱུར་བ་མ་ཡིན་པའོ། །སེམས་ཅན་འདི་དག་གི་དབང་པོ་ནི་རྒྱ་
ཆེ་བའོ། །སེམས་ཅན་འདི་དག་གི་དབང་པོ་ནི་རྒྱ་ཆེ་བ་མ་ཡིན་པའོ། །སེམས་ཅན་འདི་དག་གི་དབང་པོ་ནི་ངེས་པར་འབྱུང་བའོ། །སེམས་ཅན་འདི་དག་གི་དབང་པོ་ནི་ངེས་པར་འབྱུང་བ་མ་ཡིན་པའོ། །སེམས་ཅན་འདི་དག་གི་དབང་པོ་ནི་ངེས་པར་འབྱེད་པའོ། །སེམས་ཅན་འདི་དག་གི་དབང་
པོ་ནི་ངེས་པར་འབྱེད་པ་མ་ཡིན་པ་སྟེ། ཁྱིམ་བདག་དེ་ལྟར་ན་དེ་བཞིན་གཤེགས་པས་ཀུན་ཤེས་པའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཀུན་ཤེས་པའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་
དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཀུན་ཤེས་པའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་
གིས་ཀུན་ཤེས་པའི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པ། གལ་ཏེ་མི་རྟག་པར་རྗེས་སུ་ལྟ་བར་གནས་པའམ། གལ་ཏེ་སྡུག་བསྔལ་བར་རྗེས་སུ་ལྟ་བར་གནས་པ་ནས། དེ་བཞིན་དུ་སྦྱར་ཏེ་ཕྱིར་རྒོལ་བར་རྗེས་སུ་ལྟ་བར་གནས་པའི་བར་གྱི་རྒྱུ་དེ་དང་རྐྱེན་དེ་དག་ཡང་དག་པ་
ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཀུན་ཤེས་པའི་དབང་པོ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་ཞིང་། བསྐལ་པ་བརྒྱ་ནས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དག་ཏུ་ལན་གསུང་སྟེ། དེ་བཞིན་དུ་སྦྱར་ཏེ། དེ་ནི་

ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཀུན་ཤེས་པའི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་
འདི་ལྟར་རབ་ཏུ་མཁྱེན་ཏེ། སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ཤིང་དོན་མ་ཡིན་པ་བཟློག་ལ། སྣང་བ་བྱས་ཤིང་མུན་པ་བསལ་ཏེ། སེམས་ཅན་དཔག་ཏུ་མེད་པ་རྣམས་སྡུག་བསྔལ་ལས་ཡོངས་སུ་ཐར་བར་བྱས་ནས་བདེ་བ་ལ་བཙུད་པ་ནི་ཀུན་ཤེས་པའི་དབང་པོ་ཤེས་པ་འགོག་པ་
ཤེས་པ་སྟེ། དེ་ཡང་གཟོད་མ་ནས་མ་སྐྱེས་པའི་ཆོས་ཅན་ནོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་ཀུན་ཤེས་པའི་དབང་པོ་ཤེས་པ་འགོག་པ་ཤེས་པ་ཞེས་བྱ་སྟེ། དེ་དེ་
བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཀུན་ཤེས་པའི་དབང་པོ་ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་
འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཀུན་ཤེས་པའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་ཀུན་ཤེས་པའི་དབང་པོ་ཤེས་པ་ཡོངས་
སུ་ཤེས། ཁོང་དུ་ཆུད། མངོན་སུམ་དུ་བྱས་པའི་འགོག་པ་གལ་ཏེ་རོ་མྱང་བ་མེད་པར་རྗེས་སུ་ལྟ་བར་གནས་པའམ། གལ་ཏེ་ཉེས་དམིགས་སུ་རྗེས་སུ་ལྟ་བར་གནས་པའམ། གལ་ཏེ་ངེས་པར་འབྱུང་བར་རྗེས་སུ་ལྟ་བར་གནས་པ་དེ། དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཏོ། །དེ་བཞིན་གཤེགས་པ་ཀུན་ཤེས་པའི་དབང་པོ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་

ཇི་ལྟར་ན་དེ་བཞིན་གཤེགས་པས་ཀུན་ཤེས་པ་དང་ལྡན་པའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཕྱོགས་བཅུའི་འཇིག་རྟེན་དུ་ཉན་ཐོས་དང་རང་སངས་རྒྱས་དང་། དེ་བཞིན་གཤེགས་པ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་རྣམས་ཀྱི་མཛད་པ་དག་མཛད་པས་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་
རྟོགས་པ་ནས་མཁས་པའི་བར་གང་ཡིན་པ་འདི་ནི་ཀུན་ཤེས་པ་དང་ལྡན་པའི་དབང་པོ་ཞེས་བྱའོ། །ཁྱིམ་བདག་གཞན་ཡང་དེ་བཞིན་གཤེགས་པས་རྒྱུན་དུ་ཞུགས་པའི་ཀུན་ཏུ་སྦྱོར་བ་གསུམ་སྤངས་པ་ལ་བྱ་བ་ཅི་ཡང་མེད་དོ་ཞེས་རབ་ཏུ་མཁྱེན་ཏོ། །ལན་ཅིག་ཕྱིར་འོང་བའི་འདོད་པའི་འདོད་
ཆགས་དང་གནོད་སེམས་བསྲབས་པ་ལ་བྱ་བ་ཅི་ཡང་མེད་དོ་ཞེས་རབ་ཏུ་མཁྱེན་ཏོ། །ཕྱིར་མི་འོང་བའི་ཀུན་ཏུ་སྦྱོར་བ་ཐ་མའི་ཆ་དང་འཐུན་པ་ལྔ་དག་སྤངས་པ་ལ་བྱ་བ་ཅི་ཡང་མེད་དོ་ཞེས་རབ་ཏུ་མཁྱེན་ཏོ། །དགྲ་བཅོམ་པའི་ཀུན་ཏུ་སྦྱོར་བ་ཐམས་ཅད་སྤངས་པ་ལ་བྱ་བ་ཅི་ཡང་མེད་དོ་ཞེས་རབ་ཏུ་
མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཀུན་ཤེས་པ་དང་ལྡན་པའི་དབང་པོ་ནི་བྱས་པ་སོ་སོར་རྟོགས་ཅིང་མི་སྐྱེ་བ་སོ་སོར་རྟོགས་པ་རབ་ཏུ་མཁྱེན་ཏོ། །དེ་བཞིན་གཤེགས་པ་ཀུན་ཤེས་པ་དང་ལྡན་པའི་དབང་པོ་ཤེས་པ་དེ་ལ་ཡང་ཞུ་བ་ཞུས་
པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །སྟོན་པ་མིག་དང་ལྡན་པས་བྱས་པ་ནད་འདྲར་མཁྱེན། །ཉོན་མོངས་ཐམས་ཅད་སྤངས་པས་དེ་ཡི་
བསླབ་བྱ་མེད། །བསླབ་པ་ཀུན་ལ་བསླབས་པས་དེ་ཡི་བསླབ་བྱ་མེད། །བྱ་བ་བྱས་པ་དེས་མཁྱེན་འདི་ལྟར་རྨོངས་པ་མེད། །སྦྲུལ་གྱི་མཆེ་བ་བཅད་ཅིང་དུག་ཀུན་རྣམ་བཅོམ་པས། །སེམས་ཅན་གནོད་བྱར་མི་རུང་དུག་སོ་དངོས་མེད་པ། །དེ་ལྟར་ཉོན་མོངས་སྤོངས་པ་རློམ་སེམས་མི་

དམིགས་ཏེ། །ཤིན་ཏུ་སྒྲོམ་བུ་སྦས་པའི་སོས་གཟུགས་མི་རུང་བ། །དེ་ཡི་སྡིག་མཐོང་སེམས་ཅན་ཁྱད་པར་མེད་པ་ལྟར། །དེ་ལྟར་ཉོན་མོངས་པ་དག་སྤངས་ཤིང་འདས་པ་མེད། །སྔོན་གྱི་ལས་མངོན་འདུ་བྱེད་སྡུག་བསྔལ་འཁོར་ལོ་སྡིག །གང་གིས་ཚེ་གཞན་དག་
ཏུ་ཕྱིར་ཞིང་སྡུག་བསྔལ་བཟློག །ཁྱིམ་བདག་ཇི་ལྟར་ན་དེ་བཞིན་གཤེགས་པས་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་
བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་སྟོབས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སེམས་ཅན་རྣམས་ཀྱི་སྟོབས་དང་སྟོབས་མ་ཡིན་པ་ཤེས་པ་ཡང་དག་པ་
ཇི་ལྟ་བ་བཞིན་རབ་ཏུ་མཁྱེན་ཏེ། གང་ཟག་འདི་ནི་དད་པའི་སྟོབས་འདི་ཙམ་དང་ལྡན། གང་ཟག་འདི་ནི་བརྩོན་འགྲུས་ཀྱི་སྟོབས་འདི་ཙམ་དང་ལྡན། དྲན་པའི་སྟོབས་འདི་ཙམ་དང་། ཏིང་ངེ་འཛིན་གྱི་སྟོབས་འདི་ཙམ་དང་། གང་ཟག་འདི་ནི་ཤེས་རབ་ཀྱི་སྟོབས་འདི་ཙམ་དང་ལྡན། གང་ཟག་
འདི་ནི་ཐབས་ལ་མཁས་པའི་སྟོབས་འདི་ཙམ་དང་ལྡན། གང་ཟག་འདི་ནི་མོས་པའི་སྟོབས་འདི་ཙམ་དང་ལྡན་ནོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་སྟོབས་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །
དེ་བཞིན་གཤེགས་པ་སྟོབས་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །འདིར་ཆོས་ཉིད་འདི་ལ་འདི་
སྐད་ཅེས་བརྗོད་པར་བྱ་སྟེ། བདག་ཉིད་ཆེན་པོས་དུས་རིང་དག་ནས་སྟོབས་ཤེས་བསྟེན། །སངས་རྒྱས་དཔག་མེད་དག་ལ་མ་ལུས་ཡོངས་སུ་ཞུས། །འཇིག་རྟེན་གསལ་མཛད་དབང་པོ་སྟོབས་དང་སྟོབས་མིན་གསུང་། །སེམས་ཅན་ཀུན་གྱི་ཤེས་གང་མི་

མཆོག་རབ་ཏུ་མཁྱེན། །སེམས་ཅན་དག་གི་དད་བརྩོན་དྲན་ཤེས་ཤེས་རབ་མཁྱེན། །གང་ཞིག་ཆོས་འདི་ལ་འཇུག་འབྱོར་པ་ཅི་འདྲ་བ། །དེ་ཞུས་དེ་བཞིན་གཤེགས་པས་མཁྱེན་པས་ལུང་སྟོན་མཛད། །རྫོགས་སངས་སྟོབས་ཤེས་དེ་ལ་ཡང་དང་ཡང་བསླབས་པས། །
འདིར་ནི་ཞུས་ན་དེ་ཡིས་ཐོགས་མེད་ལུང་སྟོན་མཛད། །རྣམ་འདྲེན་དེ་ནི་ཁང་མཆོག་འདི་ལ་ལོངས་སྤྱོད་འགྱུར།། །།བམ་པོ་བརྒྱད་པ། ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་སྟོབས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་
ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། བརྩོན་འགྲུས་བརྩམས་པས་དོན་དག་འགྲུབ་ཅིང་། ལེ་ལོ་དག་གིས་ནི་མ་ཡིན། བརྩོན་འགྲུས་དག་བརྩམས་པས་གནས་ཤེས་པ་རྟོགས་པར་འགྱུར་ཞིང་། ལེ་ལོ་དག་གིས་ནི་མ་ཡིན། དེ་བཞིན་
དུ་བརྩོན་འགྲུས་དག་བརྩམས་པས་གནས་ཤེས་པས་ཀུན་འབྱུང་བ་ཤེས་པ་རྟོགས་པར་འགྱུར་ཞིང་། ལེ་ལོ་དག་གིས་ནི་མ་ཡིན། བརྩོན་འགྲུས་དག་བརྩམས་པས་གནས་ཤེས་པ་འགོག་པ་ཤེས་པ་རྟོགས་པར་འགྱུར་ཞིང་། ལེ་ལོ་དག་གིས་ནི་མ་ཡིན། བརྩོན་འགྲུས་དག་བརྩམས་
པས་གནས་ཤེས་པ་འགོག་པར་འགྱུར་བའི་ལམ་ཤེས་པ་རྟོགས་པར་འགྱུར་ཞིང་། ལེ་ལོ་དག་གིས་ནི་མ་ཡིན། དེ་བཞིན་དུ་སྦྱར་ཏེ་སྟོབས་བཅུའི་བར་དག་ལ་ཡང་བྱའོ། །བརྩོན་འགྲུས་དག་བརྩམས་པས་ཐམས་ཅད་མཁྱེན་པའི་ཤེས་པ་འགོག་པར་འགྱུར་བའི་ལམ་ཤེས་པ་རྟོགས་པར་
འགྱུར་ཞིང་། ལེ་ལོ་དག་གིས་ནི་མ་ཡིན་ནོ། །དེ་ལ་འདི་སྐད་ཅེས་བྱ་སྟེ། ལུས་དང་པགས་པ་རྒྱུས་པ་རུས་པ་སྐམས་གྱུར་ཅིང་། །བདག་གི་ལུས་དང་ཁྲག་བཅས་ཐམས་ཅད་ཡོངས་སྐམས་ཀྱང་། །ཐམས་ཅད་ཤེས་པ་རྟོགས་པར་མ་བྱས་པར་དུ་ནི། །བརྩོན་འགྲུས་གཏོང་བ་དག་ཏུ་བྱེད་པར་
མི་འགྱུར་རོ། །དེ་ལྟར་ན་བརྩོན་འགྲུས་བརྩམས་པས་གནས་ཤེས་པ་རྟོགས་པར་འགྱུར་ཞིང་། ལེ་ལོ་དག་གིས་མ་ཡིན་ཏེ། བརྩོན་འགྲུས་བརྩམས་པས་དོན་དག་བསྒྲུབ་པར་འགྱུར་ཞིང་། ལེ་ལོ་དག་གིས་ནི་མ་ཡིན། ཐམས་ཅད་མཁྱེན་པའི་ཤེས་པ་འགོག་པར་འགྱུར་བའི་ལམ་ཤེས་པའི་

བར་དུ་འགྱུར་ཞིང་། ལེ་ལོ་དག་གིས་ནི་མ་ཡིན་ནོ། །དེ་ལྟར་ན་དེ་བཞིན་གཤེགས་པས་བརྩོན་འགྲུས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་
དུ་སྦྱར་ཏེ་ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་རིམ་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སེམས་
ཅན་ཐམས་ཅད་ཀྱི་བརྩོན་འགྲུས་ཀྱི་རིམ་པས་ལུས་ཀྱི་དང་སེམས་ལས་བྱུང་བའི་བརྩོན་འགྲུས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། སེམས་ཅན་ཁ་ཅིག་ལུས་ཀྱི་བརྩོན་འགྲུས་དང་ལྡན་ལ། སེམས་ལས་བྱུང་བས་ནི་མ་ཡིན། སེམས་ཅན་ཁ་ཅིག་སེམས་ལས་བྱུང་བའི་བརྩོན་འགྲུས་
དང་ལྡན་ལ། ལུས་ཀྱིས་ནི་མ་ཡིན་ཏེ། དེ་ལ་སེམས་ཅན་གང་དག་བརྩོན་འགྲུས་ཀྱི་ལུས་དང་ལྡན་ལ། སེམས་ལས་བྱུང་བས་ནི་མ་ཡིན་པ་དེ། ལུས་ཉམ་ཆུང་བ་ལས་སྨོད་པར་བྱེད། ལུས་ཉམ་ཆུང་བ་ལས་རྣམ་པར་བྱང་བ་མེད་པར་འཇིག་ཅིང་སྨོད་ལ་སྤྲོ་བ་མི་སྐྱེད་དོ། །གང་དག་
སེམས་ལས་བྱུང་བའི་བརྩོན་འགྲུས་དང་ལྡན་ལ། ལུས་ཀྱིས་ནི་མ་ཡིན་པ་དེ་ནི་སེམས་ཀྱི་དབང་གིས་སྨོད་པར་བྱེད་ཅིང་འཕྱར་བར་འགྱུར་རོ། །གང་དག་ལུས་ཀྱི་དང་སེམས་ལས་བྱུང་བའི་བརྩོན་འགྲུས་དང་ལྡན་པ་དེ་དག་ནི། ཟུང་དུ་མཉམ་ཞིང་ལྡན་པ་ནི་སྨོད་པར་མི་བྱེད་ཅིང་འཕྱར་པར་མི་བྱེད་
ལ། བརྩོན་འགྲུས་བར་མའི་ཤེས་པ་དང་ལྡན་པས་ཚོགས་སྒྲུབ་ཅིང་བྱ་བ་མཐར་བྱེད་ལ། བྱ་བ་ཡང་དག་པར་སྒྲུབ། བདུད་ཀྱི་ཞགས་པ་གཅོད། བདུད་ཕམ་པར་བྱེད། བདུད་ཕྱིར་ཕྱོགས་པར་བྱེད། བདུད་ཀྱི་རིས་དག་སྐྲག་པར་བྱེད། སངས་རྒྱས་ཀྱི་རྒྱུད་འཕེལ་བར་བྱེད། ལམ་སྤྱོད་
པར་བྱེད། མུ་བསྟེན་པར་བྱེད། ཟམ་པ་འདོགས་པར་བྱེད། སྟེགས་འཆའ་བར་བྱེད། ཡེ་ཤེས་ཀྱི་སྒྲོན་མ་འབར་བར་བྱེད། སྣང་བར་བྱེད། མུན་པ་སེལ་བར་བྱེད། ལམ་སྟོན་པར་བྱེད། ཡང་དག་པར་བླང་བའི་བརྩོན་འགྲུས་ལ་ཤིན་ཏུ་གནས་ཤིང་ཡོངས་སུ་མི་ཉམས་པར་བྱེད་དོ། །གང་དག་

ལུས་ཀྱིའམ། སེམས་ལས་བྱུང་བའི་བརྩོན་འགྲུས་དེ་དག་ནི། ཤིང་ཀ་ཏ་ཀའི་འབྲས་བུ་ལྟར་དེ་དག་ཡོངས་སུ་ཉམས་པར་འགྱུར་རོ། །དེ་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་རིམ་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་རིམ་པ་
ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་
གཤེགས་པས་བསམ་གཏན་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཉམས་པའི་ཆ་དང་འཐུན་པའི་བསམ་གཏན་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནས་པའི་ཆ་དང་འཐུན་པའི་བསམ་གཏན་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན། ཁྱད་པར་གྱི་ཆ་དང་འཐུན་པའི་བསམ་གཏན་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ངེས་པར་འབྱེད་པའི་ཆ་དང་འཐུན་པའི་བསམ་གཏན་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཁྱིམ་བདག་དེ་ལྟར་ན་དེ་བཞིན་གཤེགས་པས་བསམ་གཏན་ཤེས་པ་ཡང་དག་
པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་ཡོངས་སུ་ཉམས་པའི་བསམ་གཏན་དེ་དག་གི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། རྒྱུ་གང་དང་རྐྱེན་གང་དག་གིས་གནས་པའི་ཆ་དང་འཐུན་
པར་གྱུར་པ་དེ་དག་གི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། རྒྱུ་གང་དང་རྐྱེན་གང་དག་གིས་ཁྱད་པར་གྱི་ཆ་དང་འཐུན་པར་གྱུར་པའི་བསམ་གཏན་དེ་དག་གི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། རྒྱུ་གང་དང་རྐྱེན་གང་དག་གིས་ངེས་པར་འབྱེད་པའི་
ཆ་དང་འཐུན་པར་གྱུར་བའི་བསམ་གཏན་དེ་དག་གི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། དེ་ལྟར་ན་དེ་བཞིན་གཤེགས་པས་བསམ་གཏན་ཤེས་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པས་བསམ་གཏན་ཤེས་པ་དེ་ལ་ཡང་ཞུ་བ་

ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་རྣམ་པར་ཐར་པ་ཤེས་པ་
ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྣམ་པར་ཐར་པ་བརྒྱད་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བརྒྱད་གང་ཞེ་ན། གཟུགས་ཅན་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་
མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་གཉིས་པའོ། །གཙང་བ་ཉིད་ལ་མོས་པ་འདི་ནི་རྣམ་པར་ཐར་བ་གསུམ་པ་ཡིན་ནོ། །ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པའི་རྣམ་པར་ཐར་པ་དང་། རྣམ་ཤེས་མཐའ་ཡས་
སྐྱེ་མཆེད་ལ་སྙོམས་པར་འཇུག་པའི་རྣམ་པར་ཐར་པ་དང་། ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པའི་རྣམ་པར་ཐར་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པའི་རྣམ་པར་ཐར་པ་དང་། འདུ་ཤེས་དང་ཚོར་བ་འགོག་པའི་རྣམ་པར་ཐར་པ་
བརྒྱད་པ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་རྣམ་པར་ཐར་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་
ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཏིང་ངེ་འཛིན་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཏིང་ངེ་འཛིན་བཞི་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བཞི་གང་ཞེ་ན། འདི་ལྟ་
སྟེ། ཤུགས་ལྡན་ཞེས་བྱ་བའི་ཏིང་ངེ་འཛིན་དང་། སེང་གེ་ཞེས་བྱ་བའི་ཏིང་ངེ་འཛིན་དང་། ཞི་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ཀྱི་རྒྱུན་དང་ལྡན་པ་ཞེས་བྱ་བའི་ཏིང་ངེ་འཛིན་ཏེ། དེ་ལྟར་ན་དེ་བཞིན་གཤེགས་པས་ཏིང་ངེ་འཛིན་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་

མཁྱེན་ཏོ། །དེ་བཞིན་གཤེགས་པ་ཏིང་ངེ་འཛིན་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་
སྙོམས་པར་འཇུག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་བསམ་གཏན་ལ་མངོན་པར་གནས་པ་དང་། དོན་རྟོགས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གང་དག་བསམ་གཏན་དང་པོ་ལ་བརྟེན་ནས།
ཟག་པ་ཟད་ཅིང་དོན་རྟོགས་པའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས་མི་རྟག་པ་ཡིད་ལ་བྱེད་པའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས་སྡུག་བསྔལ་ཡིད་ལ་བྱེད་པའི་སྙོམས་པར་འཇུག་པ་ནས། དེ་བཞིན་དུ་སྦྱར་ཏེ། ཕྱིར་རྒོལ་བ་
ཡིད་ལ་བྱེད་པའི་བར་གྱི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། མཚན་མ་དང་བྲལ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། བདག་མེད་པ་དང་བྲལ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེ