Kinh tạng Tây Tạng (Kangyur Đại Học) — 047_མདོ་སྡེ།_ག

ན་ནས་སྨོན་
ལམ་དང་བྲལ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། རྒྱུན་ཏུ་འཇུག་པའི་འབྲས་བུ་མངོན་སུམ་དུ་བྱ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་བར་ལ་སྙོམས་པར་འཇུག་པ་
སྟེ། དེ་བཞིན་དུ་བསམ་གཏན་གཉིས་པ་ལ་བརྟེན་པ་ནས། བསམ་གཏན་བཞི་པ་ལ་བརྟེན་པ་དང་། འདུ་ཤེས་མེད་པའི་སྙོམས་པར་འཇུག་པ་དང་། ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པ་དང་། རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་
པ་དང་། ཅུང་ཟད་མེད་པའི་སྐྱེ་མཆེད་ལ་སྙོམས་པར་འཇུག་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་དང་། འདུ་ཤེས་དང་ཚོར་བ་འགོག་པའི་སྙོམས་པར་འཇུག་པའི་བར་ལ་ཡང་རྒྱ་ཆེར་བྱ་སྟེ། དེ་དེ་བཞིན་གཤེགས་པས་ཡང་དག་

པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་སྙོམས་པར་འཇུག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་
ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཀུན་ནས་ཉོན་མོངས་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདོད་ཆགས་ཀྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན།
འདོད་ཆགས་དང་ཞེ་སྡང་གིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། འདོད་ཆགས་དང་གཏི་མུག་གིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཞེ་སྡང་དང་འདོད་ཆགས་ཀྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་
མཁྱེན། ཞེ་སྡང་དང་གཏི་མུག་གིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གཏི་མུག་དང་འདོད་ཆགས་ཀྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཆ་མཉམ་པས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན།
ཁྲོ་བས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཁོན་དང་ཡོངས་སུ་གདུང་བ་དང་། ཕྲག་དོག་དང་། སེར་སྣ་དང་། གཡོ་དང་། སྒྱུ་དང་། ངོ་ཚ་མེད་པ་དང་། ཁྲེལ་མེད་པ་དང་། ཁེངས་པ་དང་། ཉེས་རྩོམ་དང་། རྒྱགས་པ་དང་། བག་མེད་པ་
དང་། ང་རྒྱལ་ལས་ཀྱང་ལྷག་པའི་ང་རྒྱལ་གྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ང་རྒྱལ་གྱི་ཡང་ང་རྒྱལ་གྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ལོག་པའི་ང་རྒྱལ་གྱིས་ཀུན་ནས་ཉོན་མོངས་པ་དང་། མངོན་པའི་ང་
རྒྱལ་གྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ལྷག་པའི་ང་རྒྱལ་གྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཅུང་ཟད་སྙམ་པའི་ང་རྒྱལ་གྱིས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཁ་གསག་

དང་། གཞོགས་སློང་དང་། ཐོབ་ཀྱིས་འཇལ་བས་ཀུན་ནས་ཉོན་མོངས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། རྙེད་པས་རྙེད་པར་བྱེད་འདོད་པས་ཀུན་ནས་ཉོན་མོངས་པ་དང་། སྡིག་འདོད་པས་ཀུན་ནས་ཉོན་མོངས་པ་དང་། འདོད་ཆེན་དང་། འདོད་པ་དང་། དྲན་པས་ཀུན་ནས་
ཉོན་མོངས་པ་དང་། སྤྱོད་པ་མ་ཡིན་པས་ཀུན་ནས་ཉོན་མོངས་པ་དང་། མི་སྙན་པར་སྨྲ་བ་ཉིད་ཀྱིས་ཀུན་ནས་ཉོན་མོངས་པ་དང་། མི་བཟོད་པས་ཀུན་ནས་ཉོན་མོངས་པ་དང་། སྦེད་པས་ཀུན་ནས་ཉོན་མོངས་པ་དང་། ཡོངས་སུ་སྦེད་པས་ཀུན་ནས་ཉོན་མོངས་པ་དང་། ཆོས་
མ་ཡིན་པའི་འདོད་ཆགས་ཀྱིས་ཀུན་ནས་ཉོན་མོངས་པ་དང་། ཆགས་པ་དང་མི་འཐུན་པར་ཆགས་པས་ཀུན་ནས་ཉོན་མོངས་པ་དང་། འཇིག་ཚོགས་ལ་ལྟ་བས་ཀུན་ནས་ཉོན་མོངས་པ་དང་། ཐེ་ཙོམ་གྱིས་ཀུན་ནས་ཉོན་མོངས་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་
འཛིན་པས་ཀུན་ནས་ཉོན་མོངས་པ་དང་། འདོད་པ་ལ་འདུན་པས་ཀུན་ནས་ཉོན་མོངས་པ་དང་། གནོད་སེམས་ཀྱིས་ཀུན་ནས་ཉོན་མོངས་པ་དང་། རྨུགས་པ་དང་གཉིད་ཀྱིས་ཀུན་ནས་ཉོན་མོངས་པ་དང་། རྒོད་པ་དང་། འགྱོད་པ་དང་། ཡིད་གཉིས་ཀྱིས་ཀུན་ནས་ཉོན་མོངས་པ་
དང་། མི་དགའ་བས་ཀུན་ནས་ཉོན་མོངས་པ་དང་། དགའ་བས་ཀུན་ནས་ཉོན་མོངས་པ་དང་། གླལ་བས་ཀུན་ནས་ཉོན་མོངས་པ་དང་། བཟའ་བ་མ་བསྡམས་པས་ཀུན་ནས་ཉོན་མོངས་པ་དང་། སེམས་ལས་བྱུང་བ་ཀུན་ནས་ཉོན་མོངས་པ་དང་། སེམས་ཀུན་ནས་ཉོན་མོངས་པ་
དང་། འདུ་ཤེས་སྣ་ཚོགས་ཀྱིས་ཀུན་ནས་ཉོན་མོངས་པ་དང་། བདག་ལ་དབང་མེད་པས་ཀུན་ནས་ཉོན་མོངས་པ་དང་། ལུས་ཀྱི་གནས་ངན་ལེན་གྱིས་ཀུན་ནས་ཉོན་མོངས་པ་དང་། ཐོགས་པས་ཀུན་ནས་ཉོན་མོངས་པ་དང་། ཆོག་མི་ཤེས་པས་ཀུན་ནས་ཉོན་མོངས་པ་སྟེ། ཁྱིམ་
བདག་དེ་ལྟར་ན་དེ་བཞིན་གཤེགས་པས་ཀུན་ནས་ཉོན་མོངས་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཀུན་ནས་ཉོན་མོངས་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་ལོངས་སྤྱོད་

པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་རྣམ་པར་བྱང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་
པས་འདོད་པ་ལ་འདུན་པའི་གཉེན་པོ་ནི་མི་གཙང་བའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གནོད་སེམས་ཀྱི་གཉེན་པོ་ནི་བྱམས་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། རྨུགས་པ་དང་གཉིད་ཀྱི་གཉེན་པོ་ནི་བརྩོན་འགྲུས་རྩོམ་པའོ་ཞེས་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན། རྒོད་པའི་གཉེན་པོ་ནི་ཞི་གནས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། འགྱོད་པའི་གཉེན་པོ་ནི་ཤེས་རབ་ཚོལ་བའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཐེ་ཙོམ་གྱི་གཉེན་པོ་ནི་ཆོས་རྣམས་ལ་རྣམ་པར་ངེས་པ་ཁོང་དུ་ཆུད་པའོ་ཞེས་ཡང་དག་པ་ཇི་ལྟ་
བ་བཞིན་རབ་ཏུ་མཁྱེན། མི་དགའ་བའི་གཉེན་པོ་ནི་ཕན་ཡོན་སྟོན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། དགའ་བའི་གཉེན་པོ་ནི་བདག་བསྡུས་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གླལ་བའི་གཉེན་པོ་ནི་བརྩོན་འགྲུས་རྩོམ་པའོ་ཞེས་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན། བཟའ་བ་མ་བསྡམས་པའི་གཉེན་པོ་ནི་ཟས་ལ་མི་འཐུན་པའི་འདུ་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཀུན་ནས་ཉོན་མོངས་པའི་གཉེན་པོ་ནི་སེམས་རབ་ཏུ་བསྡུས་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། འདུ་ཤེས་སྣ་ཚོགས་ཀྱི་གཉེན་པོ་ནི་
མཚན་མ་མེད་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཡིད་ལ་མི་བྱེད་པའི་གཉེན་པོ་ནི་ཆོས་རྣམས་ལ་དོན་དུ་བྱེད་པ་ཉིད་དོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ལུས་ཀྱི་གནས་ངན་ལེན་གྱི་གཉེན་པོ་ནི་སྡོམ་པའི་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཆགས་པའི་
གཉེན་པོ་ནི་དགེ་བའི་བཤེས་གཉེན་ལ་བརྟེན་པའོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། མུ་སྟེགས་ཀྱི་ཤེས་པ་ཉིད་དག་ལ་ཆགས་པའི་གཉེན་པོ་ནི་མི་འཐུན་པའི་འདུ་ཤེས་སོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཁྱིམ་བདག་དེ་ལྟར་ན་དེ་བཞིན་གཤེགས་པས་རྣམ་པར་བྱང་བ་ཤེས་པ་

ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་རྣམ་པར་བྱང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་
བདག་ཇི་ལྟར་ན་དེ་བཞིན་གཤེགས་པས་རྣམ་པར་གཞག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། འདི་ལྟར་བསམ་གཏན་དང་པོ་ལས་ལྡང་བར་བྱ་ཞིང་། བསམ་གཏན་དང་པོ་ལས་ལངས་
ནས། ཆོས་འདི་དག་ལ་ཡང་དག་པར་སྤྱོད་པ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། བསམ་གཏན་དང་པོ་ལས་ལངས་པའི་སེམས་དབེན་པ་ལ་གཞོལ་བར་གྱུར་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། བསམ་གཏན་དང་པོ་ལས་ལངས་པའི་སེམས་དགའ་བར་
བྱེད་པའི་ཆོས་གང་ཡིན་པ་དང་། བསམ་གཏན་དང་པོ་ལས་ལངས་པའི་མངོན་པར་རྗོད་པར་བྱེད་པའི་ཆོས་གང་ཡིན་པ་དང་། དེ་དང་པོའི་ཆོས་གང་ཡིན་པ་ཡང་དག་པར་སྤྱོད་པའི་ཆོས་དེ་དག་རབ་ཏུ་མཁྱེན། སེམས་གང་གཞོལ་བར་གྱུར་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན།
ཆོས་གང་དག་ལ་དགའ་བའི་ཆོས་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། གང་དག་ལ་མི་དགའ་བའི་ཆོས་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། ཆོས་གང་ཡིད་ལ་བྱས་ཤིང་ལྡང་བ་དེ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། དེ་བཞིན་དུ་བསམ་གཏན་
གཉིས་པ་དང་། གསུམ་པ་དང་། བསམ་གཏན་བཞི་པ་དང་། དེ་བཞིན་དུ་རྣམ་པར་ཐར་པ་རྣམས་དང་། དེ་བཞིན་དུ་ཏིང་ངེ་འཛིན་རྣམས་དང་། དེ་བཞིན་དུ་སྙོམས་པར་འཇུག་པ་རྣམས་ཀྱི་སྟེ། དེ་ལྟར་ན་དེ་བཞིན་གཤེགས་པས་རྣམ་པར་ལྡང་བ་ཤེས་པ་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཏོ། །དེ་བཞིན་གཤེགས་པ་རྣམ་པར་ལྡང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས་རྒྱ་ཆེར་བྱ་སྟེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་

ལྟར་ན་དེ་བཞིན་གཤེགས་པས་སྔོན་གྱི་མཐའ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སྔོན་གྱི་བསྐལ་པ་རབ་ཏུ་མཁྱེན་ཏེ། བསྐལ་པ་གང་མིང་དུ་བཏགས་པར་གྱུར་པ་དེ། རྐྱེན་གང་དག་གིས་མིང་
དུ་བཏགས་ནས་ཡང་དག་པར་གནས་པའི་བསྐལ་པ་དེ་དག་ནི་འདི་ལྟ་སྟེ། དཔེར་ན། བསྐལ་པ་བཟང་པོ་འདིའི་མིང་བསྐལ་པས་པད་མ་སྟོང་མཐོང་ཞེས་བཏགས་པ་དེ་བཞིན་དུ་བསྐལ་པ་དེ་དག་གི་སོ་སོ་རབ་ཏུ་མཁྱེན། སངས་རྒྱས་བཅོམ་ལྡན་འདས་དེ་དག་གི་མཚན་བཙུན་པར་
བཏགས་པ་ཡང་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། འདིར་ཤཱཀྱའི་རིགས་ལས་ཐུབ་པ་འཁྲུངས་པ་ལ། ཤཱཀྱ་ཐུབ་པ་ཞེས་མཚན་བཏགས་པ་དེ་བཞིན་དུ། དེ་བཞིན་གཤེགས་པས་བསྐལ་པ་དེ་དག་དང་། སངས་རྒྱས་དེ་དག་གི་མཚན་བཏགས་པ་རབ་ཏུ་མཁྱེན།
དེ་བཞིན་གཤེགས་པས་དེར་ཡང་སེམས་ཅན་ཐམས་ཅད་ཀྱི་མིང་དུ་བཏགས་པ་རབ་ཏུ་མཁྱེན་ཏོ། །དེ་བཞིན་གཤེགས་པ་སྔོན་གྱི་མཐའ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་
པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པ་སྔོན་གྱི་གནས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་དག་རབ་ཏུ་
མཁྱེན་ཏེ། གང་དུ་བདག་ཡུན་རིང་པོར་གནས་ཤིང་། དེ་ནས་ཀྱང་སྔོན་གྱི་གནས་གང་ལ་ཕྱིར་ཞིང་གནས་པ། གལ་ཏེ་སེམས་ཅན་དམྱལ་བར་རམ། གལ་ཏེ་དུད་འགྲོའི་སྐྱེ་གནས་སུའམ། གལ་ཏེ་གཤིན་རྗེའི་འཇིག་རྟེན་དུའམ། གལ་ཏེ་མིར་རམ། གལ་ཏེ་ལྷར་རམ། གལ་ཏེ་
ཡི་དགས་སུའམ། གལ་ཏེ་སེང་གེར་རམ། གལ་ཏེ་སྟག་ཏུའམ། གལ་ཏེ་གཟིག་ཏུའམ། གལ་ཏེ་ནམ་མཁའ་ལ་རྒྱུ་བར་རམ། གལ་ཏེ་བྱའི་ཚོགས་སུའམ། གལ་ཏེ་སྦྲུལ་གདུག་པའི་ཚོགས་སུའམ། གལ་ཏེ་སྦྲུལ་གྱི་ཚོགས་སུའམ། གལ་ཏེ་སྲེ་མོའི་ཚོགས་སུ་

འམ། གལ་ཏེ་ས་ལ་རྒྱུ་བར་རམ། གལ་ཏེ་བར་སྣང་ལ་རྒྱུ་བར་རམ། གལ་ཏེ་རྐང་མེད་དུའམ། གལ་ཏེ་རྐང་གཉིས་པར་རམ། གལ་ཏེ་རྐང་བཞི་པར་རམ། གལ་ཏེ་རྐང་མངས་སུའམ། གལ་ཏེ་ཆུ་ལ་རྒྱུ་བར་རམ། གལ་ཏེ་སྐམས་ལ་རྒྱུ་བར་རམ། གལ་ཏེ་གནོད་སྦྱིན་གྱི་ཚོགས་སུའམ།
གལ་ཏེ་ཤ་ཟའི་ཚོགས་སུའམ། གལ་ཏེ་སྲིན་པོའི་ཚོགས་སུའམ། གལ་ཏེ་འབྱུང་པོའི་ཚོགས་སུའམ། གལ་ཏེ་ལྷ་མ་ཡིན་གྱི་ཚོགས་སུའམ། གལ་ཏེ་ནམ་མཁའ་ལྡིང་གི་ཚོགས་སུའམ། གལ་ཏེ་མིའམ་ཅིའི་ཚོགས་སུའམ། གལ་ཏེ་ལྟོ་འཕྱེ་ཆེན་པོའི་ཚོགས་སུའམ། གལ་
ཏེ་མི་མ་ཡིན་པའི་ཚོགས་སུའམ། གལ་ཏེ་ཕྲེང་བ་འཆང་བའི་ཚོགས་སུའམ། གལ་ཏེ་ལག་ན་གཞོང་ཐོགས་ཀྱི་ལྷར་རམ། གལ་ཏེ་རྟག་ཏུ་མྱོས་པའི་ལྷར་རམ། གལ་ཏེ་ལུས་རྒྱན་ཐོགས་པའི་ལྷར་རམ། གལ་ཏེ་རྒྱལ་ཆེན་བཞིའི་རིས་ཀྱི་ལྷར་རམ། གལ་ཏེ་སུམ་ཅུ་རྩ་གསུམ་གྱི་
ལྷར་རམ། གལ་ཏེ་འཐབ་བྲལ་གྱི་ལྷ་ནས་དེ་བཞིན་དུ་སྦྱར་ཏེ། དགའ་ལྡན་དུའམ། གལ་ཏེ་འཕྲུལ་དགར་རམ། གལ་ཏེ་གཞན་འཕྲུལ་དབང་བྱེད་དུའམ། གལ་ཏེ་ཚངས་པར་རམ། གལ་ཏེ་ཚངས་རིས་སུའམ། གལ་ཏེ་ཚངས་པ་མདུན་ན་འདོན་དུའམ། གལ་ཏེ་ཚངས་པ་ཀུན་
འཁོར་དུའམ། གལ་ཏེ་ཚངས་པ་ཆེན་པོར་རམ། གལ་ཏེ་འོད་དུའམ། གལ་ཏེ་འོད་ཆུང་ངུའམ། གལ་ཏེ་ཚད་མེད་འོད་དུའམ། གལ་ཏེ་འོད་གསལ་དུའམ། གལ་ཏེ་དགེ་བར་རམ། ཆུང་དགེར་རམ། ཚད་མེད་དགེར་རམ། དགེ་རྒྱས་སུའམ། ཆེ་བར་རམ། ཆུང་ཆེར་རམ།
ཚད་མེད་ཆེར་རམ། འབྲས་བུ་ཆེ་བར་རམ། འདུ་ཤེས་མེད་པའི་སེམས་ཅན་དུའམ། གལ་ཏེ་ནམ་མཁའ་མཐའ་ཡས་སྐྱེ་མཆེད་དུའམ། གལ་ཏེ་རྣམ་ཤེས་མཐའ་ཡས་སྐྱེ་མཆེད་དུའམ། གལ་ཏེ་ཅི་ཡང་མེད་པའི་སྐྱེ་མཆེད་དུའམ། གལ་ཏེ་འདུ་ཤེས་མེད་འདུ་ཤེས་མེད་མིན་
སྐྱེ་མཆེད་དུ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པས་འདས་པའི་དུས་ཀྱི་དགེ་བའི་རྩ་བ་གང་དག་མངོན་པར་འདུས་བྱས་པ། གལ་ཏེ་སྦྱིན་པའི་ཕ་རོལ་ཏུ་ཕྱིན་པ་དང་། སོ་སོ་ཡང་དག་པར་ལྡན་པའམ། གལ་ཏེ་ཚུལ་

ཁྲིམས་ཀྱི་ཕ་རོལ་ཏུ་ཕྱིན་པ་དང་སོ་སོ་ཡང་དག་པར་ལྡན་པའམ། གལ་ཏེ་བཟོད་པའི་ཕ་རོལ་ཏུ་ཕྱིན་པ་དང་། སོ་སོ་ཡང་དག་པར་ལྡན་པའམ། གལ་ཏེ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། སོ་སོ་ཡང་དག་པར་ལྡན་པའམ། གལ་ཏེ་བསམ་གཏན་
གྱི་ཕ་རོལ་ཏུ་ཕྱིན་པ་དང་། སོ་སོ་ཡང་དག་པར་ལྡན་པའམ། གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། སོ་སོ་ཡང་དག་པར་ལྡན་པ་དེ་དག་ཐམས་ཅད་རབ་ཏུ་མཁྱེན། དེ་བཞིན་གཤེགས་པས་འདས་པའི་དུས་སུ་འཁོར་བ་གང་དག་ལ་གནས་ནས། གང་དུ་སངས་རྒྱས་བཅོམ་ལྡན་འདས་
ངེས་པར་གནས་པ་དེ་དག་ལ་བསྙེན་བཀུར་བྱས་ཤིང་། ཡོངས་སུ་ཞུས་ནས་མཁྱེན་པ་གང་དག་བསྒྲུབས་པ་འདི་ལྟ་སྟེ། ཐབས་ལ་མཁས་པ་དང་། བཟོའི་ཤེས་པ་དང་། སྙོམས་པར་འཇུག་པའི་ཤེས་པ་བསྒྲུབས་པ་དེ་དང་དེ་དག་ཐམས་ཅད་རབ་ཏུ་མཁྱེན་ཏོ། །ཟག་པ་ཟད་པ་ཤེས་པ་མ་
གཏོགས་པར་བཟོའམ། བཟོ་ཤེས་པའམ། ལས་སམ། ལས་ཤེས་པ་གང་དག་དེ་བཞིན་གཤེགས་པས་སྔོན་མ་བསྐྱེད་པ་མེད་དེ། སྔོན་མངོན་པར་འདུས་མ་བྱས་པ་གང་ཡང་མེད་དོ། །དེ་ལྟ་བས་ན་འདིར་གང་གི་ཡེ་ཤེས་མཐོང་བ་ཐོགས་པ་མེད་པར་འཇུག་པ་དེ་ནི་ཙན་དན་གྱི་
ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཕྱི་མའི་མཐའ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་
འདི་ལ་དེ་བཞིན་གཤེགས་པས་མ་འོངས་པའི་བསྐལ་པའི་སངས་རྒྱས་རྣམས་དང་། སེམས་ཅན་རྣམས་ཀྱི་མིང་དུ་བཏགས་པ་རབ་ཏུ་མཁྱེན། རྒྱུ་གང་དང་རྐྱེན་གང་དག་གིས་སངས་རྒྱས་བཅོམ་ལྡན་འདས་རྣམས་དང་། སེམས་ཅན་དེ་རྣམས་ཀྱི་མིང་དུ་བཏགས་པར་འགྱུར་བ་དེ་
ཐམས་ཅད་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་བཞིན་གཤེགས་པ་ཕྱི་མའི་མཐའ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་

སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་འཆི་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སེམས་ཅན་གང་དག་སྐྱེས་ནས་འཆི་བར་འགྱུར་བ། འཆི་བ་དང་།
འཆི་འཕོ་བ་དང་། འཆི་བར་བྱེད་པ་དང་། གསོད་པ་དང་། དུས་བྱེད་པ་དང་། ཕུང་པོ་འཇིག་པ་དང་། ལུས་འདོར་བ་དང་། སྲོག་གི་དབང་པོ་ཡང་དག་པར་གཅོད་པ་དང་། རིས་ལྷན་ཅིག་འཐུན་པ་འབྱེད་པ། དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་
ཏེ། སེམས་ཅན་འདི་དག་ནི་ཚེའི་ཚད་ཡོངས་སུ་མ་རྫོགས་པར་འཆི་བར་འགྱུར། སེམས་ཅན་འདི་དག་ནི་ཕ་རོལ་གྱི་གནོད་པས་འཆི་བར་འགྱུར། སེམས་ཅན་འདི་དག་ནི་ཡ་ང་བ་སྤོང་བས་འཆི་བར་འགྱུར། སེམས་ཅན་འདི་དག་ནི་ཡ་ང་བ་མ་སྤངས་པས་འཆི་བར་འགྱུར། སེམས་
ཅན་འདི་དག་ནི་དུས་ཚིགས་ཀྱིས་བསྒྱུར་ནས་འཆི་བར་འགྱུར། སེམས་ཅན་འདི་དག་ནི་བསོད་ནམས་ཟད་པས་འཆི་བར་འགྱུར་རོ། །ཞེས་དེ་ལྟར་ན་དེ་བཞིན་གཤེགས་པས་འཆི་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་འཆི་བ་ཤེས་པ་དེ་
ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་སྐྱེ་བ་ཤེས་པ་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རིགས་ཀྱི་བུའམ་རིགས་ཀྱི་བུ་མོ་འཆི་བ་ན། སྐྱེ་བའི་མཚན་མ་འདི་དག་འབྱུང་བར་འགྱུར་ཏེ། གང་དུ་འདིས་སྐྱེ་བར་བྱེད་པ་སེམས་ཅན་དམྱལ་བའི་མཚན་མ་དག་མཐོང་བ་ནི་
སེམས་ཅན་དམྱལ་བར་འགྲོའོ། །དུད་འགྲོའི་མཚན་མ་དག་མཐོང་བ་ནི་དུད་འགྲོའི་སྐྱེ་གནས་སུ་འགྲོའོ། །གཤིན་རྗེའི་འཇིག་རྟེན་གྱི་མཚན་མ་དག་མཐོང་བ་ནི་གཤིན་རྗེའི་འཇིག་རྟེན་དུ་འགྲོའོ། །མིའི་མཚན་མ་དག་མཐོང་བ་ནི་མིའི་འཇིག་རྟེན་དུ་འགྲོའོ། །ལྷའི་མཚན་མ་དག་མཐོང་

བ་ནི་མཐོ་རིས་སུ་འགྲོའོ། །མི་སྐྱེ་བའི་མཚན་མ་དག་མཐོང་བ་ནི་མྱ་ངན་ལས་འདས་པར་འགྲོའོ་ཞེས། ཁྱིམ་བདག་དེ་ལྟར་ན་དེ་བཞིན་གཤེགས་པས་སྐྱེ་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་སྐྱེ་བ་ཤེས་པ་དེ་ལ་ཡང་ཞུ་བ་
ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་འདོད་པའི་ཟག་པ་
ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། འདོད་པའི་ཟག་པ་ནི་ཡོངས་སུ་རྟོག་པ་ལས་བྱུང་བའི་ངོ་བོ་ཉིད་དང་བྲལ་བ་ཡང་དག་པ་མ་ཡིན་པ། སོ་སོ་ཉེ་བར་གཞོག་པ། དགེ་བའི་རྩ་བ་རྣམ་
པར་འཇིག་པར་བྱེད་པ། བཅིངས་པ་ལྷོད་ཀྱང་རབ་ཏུ་ཐར་བར་དཀའ་བ་མི་བཤེས་ཀྱང་བཤེས་པ་ལྟར་སྣང་བ། བར་དུ་གཅོད་པར་བྱེད་པ་མི་འཐུན་པ་རྣམ་པ་དུ་མ་དག་ཏུ་མཚུངས་པའོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་
པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་འདོད་པའི་ཟག་པ་ཤེས་པ་ཞེས་བྱ་སྟེ། ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་འདོད་པའི་ཟག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་
འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་སྲིད་པའི་ཟག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ།
སྲིད་པ་ལ་སྲེད་པ་དང་། སྲིད་པ་ལ་རྟག་ཏུ་མངོན་པར་དགའ་བ་དང་། སྲིད་པའི་བྱ་བ་ལ་ཆགས་པ་དང་། སྲིད་པ་ལ་རོ་མྱང་བར་བལྟས་པ་དང་། སྲིད་པ་གང་གི་དབང་གིས་སྔོན་གྱི་མཐའ་མ་ཤེས་ཏེ། སྡུག་བསྔལ་ཉམས་སུ་མྱོང་ལ་སྲིད་པ་དེའི་སྡུག་བསྔལ་ལ་ཆགས་ཤིང་རབ་ཏུ་མི་ཤེས།

སྡུག་བསྔལ་སྤང་བ་རབ་ཏུ་མི་ཤེས་པའོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་སྲིད་པའི་ཟག་པ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་སྲིད་པའི་ཟག་པ་ཤེས་པ་དེ་ལ་ཡང་
ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ལྟ་བའི་ཟག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་
ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ལམ་གོལ་བར་ཞུགས་པ་ནི་འདི་དག་ཡིན་ཏེ། འདི་ལྟ་སྟེ། ཆད་པར་ལྟ་བ་དང་། རྟག་པར་ལྟ་བའོ། །དེ་ཅིའི་ཕྱིར་ཞེ་ན། གང་ཆད་པའི་ཆོས་དེ་གང་ཡང་མེད་ཅིང་། གང་འཇིག་རྟེན་འདི་ནས་འཇིག་
རྟེན་ཕ་རོལ་ཏུ་འཕོ་བའི་ཆོས་དེ་ཡང་མི་དམིགས་ཏེ། གཞན་དུ་ན་ལས་ཚོགས་པ་དག་གིས་སྐྱེ་སྟེ། ཁྱིམ་བདག་འདི་ལྟ་སྟེ་དཔེར་ན། ཆུ་ཆེན་པོ་འབབ་པ་ན་སྒྲ་འབྱུང་ལ། དེའི་སྒྲ་འབྱུང་བ་ལ་བྱེད་པ་པོ་སུ་ཡང་མེད་དེ། གཞན་དུ་ན་ཚོགས་པའི་སྦྱོར་བས་འབྱུང་ངོ་། །ཁྱིམ་བདག་
དེ་བཞིན་དུ་རྐྱེན་ཡོད་ན། འཁོར་བའི་རྒྱུན་དུ་འཇུག་སྟེ། ཉོན་མོངས་པ་དག་ཡོད་ན་ལས་བྱེད་ལ། ལས་ཡོད་ན་རྣམ་པར་སྨིན་པ་མངོན་པར་འགྲུབ་ཅིང་འདིར་སོ་སོར་མྱོང་བར་མངོན་པར་འདུ་བྱེད་པ་གང་ཡང་མེད་དེ། གཞན་དུ་ན་རྐྱེན་དེ་དག་ཡོད་ཅིང་ཚོགས་པས་འགྲུབ་
བོ། །དེ་ལ་བུས་པ་ཐོས་པ་དང་མི་ལྡན་པ་སོ་སོའི་སྐྱེ་བོ་དག་འདི་སྙམ་དུ་སེམས་ཏེ། ངས་ལས་འདི་མངོན་པར་འདུ་བྱས་པ་གང་ངའི་རྣམ་པར་སྨིན་པ། སོ་སོ་ཡང་དག་པར་མྱང་བར་བྱའོ་ཞེས་དེ་ལྟར་ང་རྒྱལ་ལ་མངོན་པར་ཞེན་པ་ཡོད་པས་འཁོར་བའི་རྒྱུན་མི་འཆད་དོ། །དེ་ལ་
ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་ལྟ་བའི་ཟག་པ་ཤེས་པ་ཞེས་བྱ་སྟེ། ཁྱིམ་བདག་དེ་ལྟར་ན་དེ་བཞིན་གཤེགས་པས་ལྟ་བའི་ཟག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ལྟ་བའི་ཟག་པ་ཤེས་པ་དེ་ལ་ཡང་ཞུ་བ་

ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་མ་རིག་པའི་ཟག་པ་
ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། མ་རིག་པ་ནི་ཇི་ལྟ་བ་བཞིན་དུ་མཐོང་བ་ལ་སྒྲིབ་པ་དང་། ཆོད་པ་དང་། མུན་པ་དང་། མིག་མ་ཡིན་པར་བྱེད་པ་དང་། ཤེས་རབ་འགོག་
པ་དང་། ཕོངས་པའི་ཕྱོགས་དང་། མྱ་ངན་ལས་འདས་པར་ཡང་དག་པར་འཇུག་པར་མི་བྱེད་པའོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་མ་རིག་པའི་ཟག་པ་ཞེས་བྱ་སྟེ། ཁྱིམ་བདག་དེ་ལྟར་ན་དེ་བཞིན་གཤེགས་པས་མ་རིག་པའི་
ཟག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་མ་རིག་པའི་ཟག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་
པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཟད་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། གང་ཉོན་མོངས་པ་ཟད་པ་དེ་ཟག་པ་ཟད་པའོ། །གང་ཟག་པ་ཟད་པ་དེ་ཉོན་
མོངས་པ་ཟད་ཅིང་དེ་སྡུག་བསྔལ་ཟད་པའོ། །གང་སྡུག་བསྔལ་ཟད་པ་དེ་མྱ་ངན་ལས་འདས་པ་ཞེས་བྱ་སྟེ། འཁོར་བའི་ལམ་དུ་མི་འཇུག་གོ། །དེ་ལྟར་ན་དེ་བཞིན་གཤེགས་པས་ཟད་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་ཤེས་པ་ནས་མཁས་པའི་བར་
གང་ཡིན་པ་འདི་ནི་ཟད་པ་ཤེས་པ་ཞེས་བྱའོ། །དེ་བཞིན་གཤེགས་པ་ཟད་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་

ཇི་ལྟར་ན་དེ་བཞིན་གཤེགས་པས་མི་སྐྱེ་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སྲེད་པའི་རྐྱེན་གྱིས་སྡུག་བསྔལ་འགྲུབ་ལ། ཤེས་པའི་དབང་གིས་དེའི་སྤོང་བ་འགྲུབ་སྟེ། དེ་ལྟར་ན་དེ་བཞིན་གཤེགས་
པས་མི་སྐྱེ་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་ཤེས་པ་གང་གིས་ཉོན་མོངས་པ་སྤོང་བ་ཡོངས་སུ་མཁྱེན་ཏེ། དེ་ནི་མི་སྐྱེ་བ་ཤེས་པའོ། །དེ་ལ་ཤེས་པ་ནས་མཁས་པའི་བར་གང་ཡིན་པ་འདི་ནི་མི་སྐྱེ་བ་ཤེས་པ་ཞེས་བྱ་སྟེ། དེ་དེ་
བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་མི་སྐྱེ་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་
ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཆོས་ཐམས་ཅད་ལ་གཞན་ལ་རག་མ་ལུས་པའི་ཤེས་པ་ལ་དམིགས་ནས། ངས་མངོན་པར་རྫོགས་པར་སངས་མ་རྒྱས་པའི་ཆོས་གང་
ཡང་མེད་དེ། གང་ཕ་རོལ་དག་གིས་དེ་ཆོས་འདི་དག་ལ་མངོན་པར་རྫོགས་པར་སངས་མ་རྒྱས་སོ་ཞེས་རྒོལ་བ་ལ་བསྙེངས་པ་མི་མངའོ། །དེ་ལྟར་དེ་བཞིན་གཤེགས་པ་མ་ལུས་པར་ཐུགས་སུ་ཆུད་པ་ལ་བཞུགས་སོ། །དེ་བཞིན་གཤེགས་པ་མ་ལུས་པར་ཐུགས་སུ་ཆུད་པ་དེ་ལ་ཡང་ཞུ་བ་ཞུས་
པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དོན་སོ་སོ་ཡང་དག་པར་རིག་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་
བདག་འདི་ལ་དེ་བཞིན་གཤེགས་པས་དོན་སོ་སོ་ཡང་དག་པར་རིག་པ་ཤེས་པ་འདི་ལྟར་རབ་ཏུ་མཁྱེན་ཏེ། ཡི་གེ་འདི་ནི་དོན་འདི་སྟོན་ཏེ། འདི་ལྟ་སྟེ་ཆོས་ཀྱི་དོན་དང་། སེམས་ཅན་གྱི་དོན་དང་། སྲོག་མེད་པའི་དོན་དང་། གང་ཟག་མེད་པའི་དོན་དང་། སྟོང་པ་ཉིད་ཡོངས་སུ་བསྟན་པའི་དོན་དང་། མཚན་

མ་དང་བྲལ་བའི་དོན་དང་། སྨོན་ལམ་དང་བྲལ་བ་སྟེ། དེ་ཡང་འདིར་བརྗོད་པར་བྱ་ཞིང་འདི་ལྟར་མངོན་དུ་དཔྱད་པར་བྱ་སྟེ། འདི་ལྟ་སྟེ། མི་རྟག་པ་ཞེའམ། སྡུག་བསྔལ་བ་ཞེའམ། བདག་མེད་པ་ཞེའམ། མཚན་མ་དང་བྲལ་བ་ཞེའམ། སྨོན་པ་དང་བྲལ་བ་ཞེའམ།
ཞི་བ་ཞེའམ། རློམ་སེམས་མེད་པ་ཞེའམ། བདག་འདུལ་བ་ཞེའམ། མངོན་པར་འདུ་མི་བྱེད་པ་ཞེའམ། སྤྲོས་པ་མེད་པ་ཞེས་བྱའོ། །ཡི་གེ་འདི་དག་ནི་དུས་དང་ལྡན་པར་སོ་སོར་བརྗོད་པར་བྱ་སྟེ། བདག་ཏུ་མངོན་པར་ཆགས་པ་དག་གི་དུས་སུ་ནི་སྟོང་པ་ཉིད་དོ། །མཚན་མ་ལ་མངོན་པར་ཆགས་
པ་དག་གི་དུས་སུ་ནི་མཚན་མ་མེད་པའོ། །སྨོན་ལམ་ལ་མངོན་པར་ཆགས་པ་དག་གི་དུས་སུ་ནི་སྨོན་པ་མེད་པའོ། །བསམ་པ་རྣམ་པར་སྤྱོད་པ་དག་ལ་ནི་སྤོབས་པ་སོ་སོ་ཡང་དག་པར་རིག་པའོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་སོ་སོ་ཡང་དག་པར་རིག་
པ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་སོ་སོ་ཡང་དག་པར་རིག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་
འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དེ་བཞིན་གཤེགས་པའི་མཚན་ཉིད་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་དེ་བཞིན་གཤེགས་པའི་མཚན་ཉིད་བཞི་ཡང་དག་པ་
ཇི་ལྟ་བ་བཞིན་རབ་ཏུ་མཁྱེན་ཏེ། འདི་ལྟ་སྟེ། གླང་པོ་ཆེ་ལྟར་གཟིགས་པ་ཉིད་དང་། སེང་གེ་ལྟར་རྣམ་པར་བསྒྱིངས་པ་ཉིད་དང་། སེམས་ཅན་ཐམས་ཅད་ཀྱི་བསམ་པ་ལ་འཇུག་པ་ཉིད་དང་། སེམས་ཅན་ཐམས་ཅད་ཀྱི་ལམ་དང་རྗེས་སུ་འཐུན་པ་ཉིད་དོ། །དེ་ལ་ཤེས་པ་དང་། མཐོང་བ་ནས་
མཁས་པའི་བར་གང་ཡིན་པ་འདི་ནི་དེ་བཞིན་གཤེགས་པའི་མཚན་ཉིད་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། དེ་བཞིན་གཤེགས་པ་མཚན་ཉིད་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་

བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དེ་བཞིན་གཤེགས་པའི་གནས་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སེམས་
ཅན་ཐམས་ཅད་ཀྱི་དོན་དུ་བྱམས་པ་བསྒོམ་པར་མཛད་དེ། ངས་སེམས་ཅན་འདི་དག་གི་སྐྱེ་བའི་འཇིགས་པ་ལས་བསྐྱབ་པར་བྱ། རྒ་བའི་འཇིགས་པ་དང་། ནད་ཀྱི་འཇིགས་པ་དང་། འཆི་བའི་འཇིགས་པ་ལས་བསྐྱབ་པར་བྱ། སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར། བྱམས་
པ་བསྒོམ་པ་འདི་ནི་དེ་བཞིན་གཤེགས་པའི་གནས་པ་དང་པོའོ། །ཀྱེ་ཨེ་མ་སེམས་ཅན་འདི་དག་ནི་སྡུག་བསྔལ་བ་སྟེ། དེ་དག་གི་སྡུག་བསྔལ་བསལ་བའི་དོན་དུ་ཆོས་བསྟན་པར་བྱའོ། །གཞན་མ་ཡིན་པ་འཕགས་པའི་ལམ་གྱིས་ཐར་བར་བྱའོ། །ཞེས་ཐུགས་རྗེ་བསྐྱེད་པར་མཛད་དོ། །གཞན་མ་
ཡིན་པའི་ལམ་འདི་ནི་དེ་བཞིན་དུ་སྡུག་བསྔལ་ལས་ཡོངས་སུ་ཐར་བར་བྱེད་པའོ་ཞེས་དགྱེས་པ་བསྐྱེད་པར་མཛད་དོ། །དགྱེས་པ་དེ་སྡུག་བསྔལ་ཐམས་ཅད་ལས་བཏང་སྙོམས་སུ་མཛད་ཅིང་། སེམས་པ་མེད་པའི་བཏང་སྙོམས་བསྐྱེད་པར་མཛད་དེ། འདི་དག་ནི་དེ་བཞིན་གཤེགས་པའི་གནས་པ་
བཞི་པའོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་དེ་བཞིན་གཤེགས་པའི་གནས་པ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དེ་བཞིན་གཤེགས་པའི་གནས་པ་ཤེས་པ་དེ་ལ་ཡང་
ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་དེ་བཞིན་གཤེགས་པའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་
མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་བསྐལ་པ་བྱེ་བ་དཔག་ཏུ་མེད་པར་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་བསྒྲུབ་པ་ལ་དོན་དུ་གཉེར་བ་ཉིད་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། དང་བའི་སེམས་དང་། རྙོག་པ་མེད་པའི་སེམས་དང་། དཀྲུགས་པ་མེད་པའི་

སེམས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བྱང་ཆུབ་ཀྱི་སེམས་ལ་གཞོལ་བ་དང་། སེམས་རབ་ཏུ་བསྡུས་པ་དང་། སེམས་ཀྱི་རྒྱུན་བརྗེད་པ་མེད་པ་དང་། སེམས་ཀྱི་རྒྱུན་མ་གཡེངས་པ་དང་། ཉོན་མོངས་པ་མེད་པར་གྱུར་པའི་ཤེས་རབ་སྟེ། དེ་དེ་བཞིན་གཤེགས་
པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པའི་བར་གང་ཡིན་པ་འདི་ནི། དེ་བཞིན་གཤེགས་པའི་དབང་པོ་ཤེས་པ་ཞེས་བྱ་སྟེ། ཁྱིམ་བདག་དེ་ལྟར་ན་
དེ་བཞིན་གཤེགས་པས་དེ་བཞིན་གཤེགས་པའི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་དེ་བཞིན་གཤེགས་པའི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་
འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ལུས་ཀྱི་ལས་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ལུས་ཀྱི་ལས་དགེ་བ་ཡང་དག་པ་ཇི་ལྟ་བ་བཞིན་
རབ་ཏུ་མཁྱེན་ཏེ། སྲོག་གཅོད་པ་སྤོང་བ་དང་། མ་བྱིན་པར་ལེན་པ་སྤོང་བ་དང་། འདོད་པས་ལོག་པར་གཡེམ་པ་སྤོང་བ་སྟེ། ཁྱིམ་བདག་དེ་ལྟར་ན་དེ་བཞིན་གཤེགས་པས་ལུས་ཀྱི་ལས་དགེ་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་ཇི་ལྟར་ན་དེ་བཞིན་གཤེགས་
པས་ལུས་ཀྱི་ལས་མི་དགེ་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། འདི་ལ་སྲོག་གཅོད་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཁྱིམ་བདག་དེ་ལྟར་ན་དེ་བཞིན་
གཤེགས་པས་ལུས་ཀྱི་ལས་མི་དགེ་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ལུས་ཀྱི་ལས་ལུང་དུ་མ་བསྟན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། འདི་ལ་དེ་བཞིན་གཤེགས་པས་ལུས་ཀྱི་ལས་བསམས་པ་ལས་བྱུང་བའི་

རྣམ་པར་སྨིན་པ་མ་ཡིན་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་ལུས་ཀྱི་ལས་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ལུས་ཀྱི་ལས་ཤེས་
པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ།། །།བམ་པོ་དགུ་པ། ཁྱིམ་བདག་ཇི་ལྟར་ན་དེ་བཞིན་གཤེགས་པས་ངག་གི་ལས་ཤེས་པ་ཡང་དག་
པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ངག་གི་ལས་དགེ་བ་རྣམ་པ་བཞི་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། བརྫུན་དུ་སྨྲ་བ་སྤངས་པ་དང་། ཕྲ་མ་སྨྲ་བ་སྤངས་པ་དང་། ངག་རྩུབ་པོ་སྨྲ་བ་སྤངས་པ་དང་། ཚིག་ཀྱལ་པ་སྤངས་པ་སྟེ། ངག་གི་ལས་ཀྱི་
དགེ་བ་རྣམ་པ་བཞི་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་པ་སྟེ། ཁྱིམ་བདག་དེ་ལྟར་ན་དེ་བཞིན་གཤེགས་པས་ངག་གི་ལས་མི་དགེ་བ་རྣམ་པ་བཞི་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་ཇི་ལྟར་
ན་དེ་བཞིན་གཤེགས་པས་ངག་གི་ལས་ལུང་དུ་མ་བསྟན་པ་རྣམ་པ་བཞི་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཡང་དག་པར་ཡོངས་སུ་སྤྱད་པ་དང་། མི་འཐུན་པར་ཡོངས་སུ་སྤྱད་པ་དང་། དུས་ཚིགས་ཀྱིས་རྣམ་པར་བསྒྱུར་བ་དང་། སྤྱོད་
ལམ་ལས་བྱུང་བའི་ངག་གི་ལས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་ཤེས་པ་ནས་མཁས་པའི་བར་གང་ཡིན་པ་འདི་ནི་ངག་གི་ལས་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ངག་གི་ལས་ཤེས་པ་དེ་ལ་
ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཡིད་ཀྱི་ལས་ཤེས་པ་ཡང་དག་པ་ཇི་ལྟ་

བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་ཡིད་ཀྱི་ལས་དགེ་བ་རྣམ་པ་གསུམ་རབ་ཏུ་མཁྱེན་ཏེ། བརྣབ་སེམས་མེད་པ་དང་། གནོད་སེམས་མེད་པ་དང་། ཡང་དག་པའི་ལྟ་བའོ། །ཡིད་ཀྱི་ལས་མི་དགེ་བ་རྣམ་པ་གསུམ་རབ་ཏུ་མཁྱེན་ཏེ།
བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །ཡིད་ཀྱི་ལས་ལུང་དུ་མ་བསྟན་པ་རྣམ་པ་གསུམ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། ཡང་དག་པར་ཡོངས་སུ་སྤྱད་པ་དང་། མི་འཐུན་པར་ཡོངས་སུ་སྤྱད་པ་དང་། སྤྱོད་ལམ་ལས་བྱུང་བ་དང་། དུས་ཚིགས་ཀྱིས་
རྣམ་པར་བསྒྱུར་བའོ། །དེ་ལ་ཤེས་པ་ནས་མཁས་པའི་བར་གང་ཡིན་པ་འདི་ནི་ཡིད་ཀྱི་ལས་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཡིད་ཀྱི་ལས་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས།
ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་སྔོན་དུ་འགྲོ་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པའི་སྟོབས་བཅུ་ཤེས་
པ་སྔོན་དུ་འགྲོ་བར་བྱས་ནས། ལུས་ཀྱི་ལས་རྩོམ་ངག་གི་ལས་རྩོམ་ཡིད་ཀྱི་ལས་རྩོམ་མོ། །ཁྱིམ་བདག་གཞན་ཡང་དེ་བཞིན་གཤེགས་པས་གལ་ཏེ་ཟད་པ་ཤེས་པའམ། གལ་ཏེ་མི་སྐྱེ་བ་ཤེས་པའམ། གལ་ཏེ་འཁོར་བ་ཤེས་པའམ། གལ་ཏེ་མྱ་ངན་ལས་འདས་པ་ཤེས་པ་སྔོན་དུ་འགྲོ་
བར་བྱས་པ་ནས་ཡིད་ཀྱི་ལས་རྩོམ་པའི་བར་དུའོ། །དེ་ལ་ཤེས་པ་ནས་མཁས་པའི་བར་གང་ཡིན་པ་འདི་ནི་སྔོན་དུ་འགྲོ་བ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་སྔོན་དུ་འགྲོ་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་
པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་རྗེས་སུ་འཇུག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་

འདི་ལ་དེ་བཞིན་གཤེགས་པས་ལུས་ཀྱི་ལས་ཐམས་ཅད་དེ་བཞིན་གཤེགས་པའི་སྟོབས་བཅུའི་རྗེས་སུ་འཇུག་པ་ཡིན་ནོ་ཞེས་རབ་ཏུ་མཁྱེན་ཏེ། ལུས་ཀྱི་ལས་གང་དེ་བཞིན་གཤེགས་པའི་སྟོབས་བཅུ་དག་གིས་ཡོངས་སུ་ཤེས་པ་མ་བསྐྱེད་པའམ། མི་གནས་པའམ། མི་འགག་པ་དེ་མེད་དེ། དེ་
བཞིན་དུ་ངག་གི་ལས་དང་ཡིད་ཀྱི་ལས་ལ་ཡང་བྱའོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་རྗེས་སུ་འཇུག་པ་ཤེས་པ་ཞེས་བྱའོ། །ཁྱིམ་བདག་གཞན་ཡང་དེ་བཞིན་གཤེགས་པས་གང་དམིགས་པར་མཛད་པའི་མཁྱེན་པ་དེས། རྣམ་པར་དཔྱོད་པར་མཛད་
དེ། བྱམས་པ་དང་ལྡན་པའི་ཐུགས་ཀྱིས་སེམས་ཅན་ལ་དམིགས་པ་གནོད་པ་མེད་པར་འཇིག་རྟེན་གནས་པ་ལ་གཟིགས་པ་ན། ལམ་གོལ་བར་རབ་ཏུ་ཞུགས་པ་སྲིད་པ་དང་། འགྲོ་བ་ཐམས་ཅད་གནོད་པ་དང་། རྒ་བ་དང་། ན་བ་དང་། འཆི་བ་ཡོད་པ་དག་གིས་ཉེན་པར་ཐུགས་སུ་ཆུད་ནས་ཐམས་ཅད་
དུ་མཁྱེན་པས་དཔྱོད་པར་མཛད་པ་ནི་ཕུང་པོ་ཀུན་སྤངས་པ་མ་གཏོགས་པར་གཞན་དུ་ཅུང་ཟད་ཀྱང་གནོད་པ་མེད་པར་མ་གཟིགས་ཏེ། དེའི་མཁྱེན་པ་དེས་ཐམས་ཅད་ཀྱི་རྗེས་སུ་འཇུག་གོ། །གནོད་པ་ཡང་གང་ཀུན་ནས་མནར་སེམས་དང་། གནོད་པ་སྤོང་བའི་ཕྱིར་གནོད་པ་མེད་པ་ཡོངས་སུ་མཁྱེན་ཏོ། །
དེ་ལྟར་ན་དེ་བཞིན་གཤེགས་པས་རྗེས་སུ་འཇུག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པས་རྗེས་སུ་འཇུག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་།
འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཡོངས་སུ་མི་ཉམ་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དག་ལས་ཡོངས་སུ་མི་ཉམ་
མོ། །ཁྱིམ་བདག་གཞན་ཡང་དེ་བཞིན་གཤེགས་པས་ཤེས་པ་གང་ཐུགས་སུ་ཆུད་པ་དེ་ལས་ཡོངས་སུ་མི་ཉམ་སྟེ། འདི་ལྟ་སྟེ། འདོད་ཆགས་སྤང་བ་ཤེས་པ་དང་། ཞེ་སྡང་སྤང་བ་ཤེས་པ་དང་། གཏི་མུག་སྤང་བ་ཤེས་པ་དེ་ལས་ཀྱང་ཡོངས་སུ་མི་ཉམ་མོ། །ཤེས་པ་གང་ཐུགས་སུ་ཆུད་པ་

དེ་ནི་དྲན་པ་ཉེ་བར་གཞག་པ་ཤེས་པ་ནས། དེ་བཞིན་དུ་སྦྱར་ཏེ་ལམ་ཤེས་པ་དང་། རྗེས་སུ་དྲན་པ་ཤེས་པ་དང་། ཞི་གནས་ཤེས་པ་དང་། ལྷག་མཐོང་ཤེས་པ་དང་། རིག་པ་ཤེས་པ་དང་། རྣམ་པར་གྲོལ་བ་ཤེས་པ་དང་། ཟད་པ་ཤེས་པ་དང་། མི་སྐྱེ་བ་ཤེས་པ་དང་། ཡོངས་
སུ་ཤེས་པ་ཤེས་པ་དང་། སྤང་བ་ཤེས་པ་དང་། བསྒོམ་པ་ཤེས་པ་དང་། མངོན་སུམ་དུ་བྱ་བ་ཤེས་པ་དང་། རྫུ་འཕྲུལ་གྱི་རྣམ་པ་ཤེས་པ་དང་། ལྷའི་མིག་ཤེས་པ་དང་། ལྷའི་རྣ་བ་ཤེས་པ་དང་། ཕ་རོལ་གྱི་སེམས་ཤེས་པ་དང་། སྔོན་གྱི་གནས་ཤེས་པ་དང་། ཟག་པ་ཟད་པ་ཤེས་པ་དང་།
རྒྱུ་ཤེས་པ་དང་། འབྲས་བུ་ཤེས་པ་དང་། འཇུག་པ་ཤེས་པ་དང་། ལྡོག་པ་ཤེས་པ་དང་། ཕུང་པོ་ཤེས་པ་དང་། ཁམས་ཤེས་པ་དང་། སྐྱེ་མཆེད་ཤེས་པ་དང་། རྟེན་ཅིང་འབྲེལ་བར་འབྱུང་བ་ཤེས་པ་དང་། དབང་པོ་ཤེས་པ་དང་། སྟོབས་ཤེས་པ་དང་། བདེན་པ་ཤེས་པ་དང་། འཁོར་བ་ཤེས་པ་
དང་། མྱ་ངན་ལས་འདས་པ་ཤེས་པ་དང་། དུས་ཤེས་པ་དང་། དུས་མ་ཡིན་པ་ཤེས་པ་དང་། རིག་པ་ཤེས་པ་དང་། མངོན་སུམ་པ་ཤེས་པ་དང་། བཟོད་པ་ཤེས་པ་དང་། རིང་བ་ཤེས་པ་དང་། ཉེ་བ་ཤེས་པ་དང་། འབྱུང་བ་ཤེས་པ་དང་། མི་འབྱུང་བ་ཤེས་པ་དང་། བསྒོམས་པ་ཤེས་པ་
དང་། མ་བསྒོམས་པ་ཤེས་པ་དང་། ཟད་པ་ཤེས་པ་དང་། ཀུན་ནས་མནར་སེམས་ཤེས་པ་དང་། ཀུན་རྫོབ་ཤེས་པ་དང་། དོན་དམ་པ་ཤེས་པའི་བར་ཏེ། དེ་ལྟར་ན་སངས་རྒྱས་ནི་ཤེས་པ་མཐའ་ཡས་པ་དེ་ལས་ཡོངས་སུ་མི་ཉམ་མོ། །དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་
འདི་ནི་ཡོངས་སུ་མི་ཉམ་པ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པས་ཡོངས་སུ་མི་ཉམ་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཀུན་འབྱུང་བ་དང་།
འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཉིད་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་གཞན་ལས་མ་གསན་པར་ཆོས་ཐམས་ཅད་བདག་ཉིད་ཀྱིས་མངོན་

པར་རྫོགས་པར་སངས་རྒྱས་ཏེ། དེ་ལ་དེ་བཞིན་གཤེགས་པ་ཡང་དག་པར་རྣམ་པར་རྟོགས་པ་ལ་མཁས་པས་ཆོས་ཉན་པ་པོའི་དབང་གིས་དུས་དང་དུས་མ་ཡིན་པ་ལ་མཁས། སེམས་ཅན་དག་གི་བསམ་པ་ལ་མཁས་པས་དུས་ལས་མི་འདའ་བ་ལ་མཁས། ཡོངས་སུ་སྨིན་པར་བྱ་བ་ལ་མཁས་
པས་སྣོད་ལ་མཁས། ཆོས་སྟོན་པས་ཆོས་ཉན་པ་པོ་དག་གི་ཐབས་དང་། ཆོས་ཡང་དག་པར་ཐོབ་པར་བྱ་བ་ལ་མཁས་པ་སྟེ། དེ་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་
སེམས་ཅན་ཐམས་ཅད་ཀྱི་དབང་པོ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། སེམས་ཅན་འདི་དག་ནི་འདོད་ཆགས་ཀྱི་བསམ་པ་ཅན་ནོ། །སེམས་ཅན་འདི་དག་ནི་ཞེ་སྡང་གི་བསམ་པ་ཅན་ནོ། །སེམས་ཅན་འདི་དག་ནི་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་འདོད་ཆགས་
དང་ཞེ་སྡང་གི་བསམ་པ་ཅན་ནོ། །སེམས་ཅན་འདི་དག་ནི་འདོད་ཆགས་དང་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་ཞེ་སྡང་དང་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་གཏི་མུག་དང་འདོད་ཆགས་ཀྱི་བསམ་པ་ཅན་ནོ། །སེམས་ཅན་འདི་དག་ནི་གཏི་མུག་དང་ཞེ་
སྡང་གི་བསམ་པ་ཅན་ནོ། །སེམས་ཅན་འདི་དག་ནི་འདོད་ཆགས་དང་ཞེ་སྡང་དང་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་བསམ་པ་དགེ་ལ་སྦྱོར་བ་གནག་གོ། །སེམས་ཅན་འདི་དག་ནི་བསམ་པ་གནག་ལ་སྦྱོར་བ་དགེ་བའོ། །སེམས་ཅན་འདི་དག་ནི་བསམ་པ་གནག་ལ་སྦྱོར་བ་ཡང་
གནག་པའོ། །སེམས་ཅན་འདི་དག་ནི་བསམ་པ་དགེ་ལ་སྦྱོར་བ་ཡང་དགེའོ། །སེམས་ཅན་འདི་དག་ནི་ཟང་ཟིང་ལ་གདུ་བའོ། །སེམས་ཅན་འདི་དག་ནི་ཆོས་ལ་གདུ་ལ་ཟང་ཟིང་ལ་མི་གདུ་བའོ། །གང་ཟག་འདིས་ནི་དགེ་བའི་རྩ་བ་འདི་ལྟ་བུ་ཞིག་མངོན་པར་འདུས་བྱས།
སེམས་ཅན་འདི་དག་གིས་ནི་དགེ་བའི་རྩ་བ་འདི་ལྟ་བུ་ཞིག་མངོན་པར་འདུས་བྱས། གང་ཟག་འདི་ནི་ལམ་འདི་ལྟ་བུ་ཞིག་གིས་ཀུན་ནས་ཉོན་མོངས་པར་འགྱུར། གང་ཟག་འདི་ནི་ལམ་འདི་ལྟ་བུ་ཞིག་གིས་རྣམ་པར་དག་པར་འགྱུར། གང་ཟག་འདི་ནི་བྱམས་པ་འདི་ལྟ་བུ་ཞིག་གིས་ཀུན་ནས་ཉོན་མོངས་པར་

འགྱུར། གང་ཟག་འདི་ནི་བྱམས་པ་འདི་ལྟ་བུ་ཞིག་གིས་རྣམ་པར་དག་པར་འགྱུར་རོ་ཞེས་དེ་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཐམས་ཅད་མཁྱེན་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་
པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་
ཐམས་ཅད་མཁྱེན་པ་ཤེས་པ་ཡང་དག་པར་འགྲུབ་པ་གལ་ཏེ་མི་རྟག་པར་རྗེས་སུ་ལྟ་བར་གནས་པའམ། གལ་ཏེ་སྡུག་བསྔལ་བར་རྗེས་སུ་ལྟ་བར་གནས་པའམ། གལ་ཏེ་ནད་དུ་རྗེས་སུ་ལྟ་བར་གནས་པའམ། གལ་ཏེ་འབྲས་སུ་རྗེས་སུ་ལྟ་བར་གནས་པའམ། གལ་ཏེ་ཟུག་རྔུར་རྗེས་སུ་ལྟ་བར་གནས་
པའམ། གལ་ཏེ་སྡིག་པར་རྗེས་སུ་ལྟ་བར་གནས་པའམ། ཉམས་པར་རྗེས་སུ་ལྟ་བར་གནས་པའམ། གལ་ཏེ་གཡོ་བར་རྗེས་སུ་ལྟ་བར་གནས་པའམ། རབ་ཏུ་འཇིག་པར་རམ། ཉེས་པར་རམ། འགོ་བའི་ནད་དུའམ། སྟོང་པ་ཉིད་དུའམ། བདག་མེད་པར་རམ། གལ་ཏེ་རོ་མྱང་བ་མེད་
པར་རྗེས་སུ་ལྟ་བར་གནས་པའམ། གལ་ཏེ་ཉེས་དམིགས་སུ་རྗེས་སུ་ལྟ་བར་གནས་པའམ། གལ་ཏེ་གནོད་པར་རྗེས་སུ་ལྟ་བར་གནས་པའམ། གལ་ཏེ་ཕྱིར་རྒོལ་བར་རྗེས་སུ་ལྟ་བར་གནས་པའི་བར་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་
པ་ཐམས་ཅད་མཁྱེན་པ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན།
ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ཤིང་དོན་མ་ཡིན་པ་བཟློག་ལ། སྣང་བ་བྱས་ཤིང་མུན་པ་བསལ་ཏེ། སེམས་ཅན་དཔག་ཏུ་མེད་པ་རྣམས་སྡུག་བསྔལ་ལས་ཡོངས་སུ་ཐར་བར་བྱས་ནས། བདེ་བ་ལ་

བཙུད་པ་ནི་ཐམས་ཅད་མཁྱེན་པ་ཤེས་པ་འགོག་པ་སྟེ། དེ་ཡང་གཟོད་མ་ནས་མ་སྐྱེས་པའི་ཆོས་ཅན་ནོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཐམས་ཅད་མཁྱེན་པ་
ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་འགོག་པར་འགྱུར་བའི་ལམ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་
ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། ཤེས་པ་གང་གིས་ཐམས་ཅད་མཁྱེན་པ་ཤེས་པ་ཡོངས་སུ་ཤེས། ཁོང་དུ་ཆུད། མངོན་སུམ་དུ་བྱས་པའི་འགོག་པ་གལ་ཏེ་རོ་མྱང་བ་མེད་པར་རྗེས་སུ་ལྟ་བར་གནས་པའམ། གལ་ཏེ་ཉེས་དམིགས་སུ་རྗེས་སུ་ལྟ་
བར་གནས་པ་འམ། གལ་ཏེ་ངེས་པར་འབྱུང་བར་རྗེས་སུ་ལྟ་བར་གནས་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཐམས་ཅད་མཁྱེན་པ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་
ནས། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་ཁྲིའམ། བསྐལ་པ་བྱེ་བའམ། བསྐལ་པ་ཐེར་འབུམ་འམ། བསྐལ་པ་གཏམས་སམ། བསྐལ་པ་དཀྲིགས་སམ། བསྐལ་པ་ཡིད་ཡལ་ཏམ། བསྐལ་པ་ཁྱད་ཕྱིན་ཏམ། བསྐལ་པ་དཔག་ཏུ་མེད་པར་ལན་གསུང་ངོ་། །
བསྐལ་པ་གྲངས་མེད་པ་དང་། བསྐལ་པ་བསམ་གྱིས་མི་ཁྱབ་པ་དང་། གཞལ་དུ་མེད་པ་དང་། གཞལ་གྱིས་མི་ལང་བར་ལན་གསུང་ངོ་། །བསྐལ་པ་བརྗོད་དུ་མེད་པར་ལན་གསུང་ངོ་། །བསྐལ་པ་དཔག་ཏུ་མེད་པའི་ཡང་དཔག་ཏུ་མེད་པར་ལན་གསུང་སྟེ། བསྐལ་པ་དཔག་ཏུ་མེད་
པའི་གྲངས་མེད་པ་དང་། དཔག་ཏུ་མེད་པའི་བསམ་གྱིས་མི་ཁྱབ་པ་དང་། དཔག་ཏུ་མེད་པའི་གཞལ་དུ་མེད་པ་དང་། དཔག་ཏུ་མེད་པའི་གཞལ་གྱིས་མི་ལང་བ་དང་། དཔག་ཏུ་མེད་པའི་ཡང་བརྗོད་དུ་མེད་པར་ལན་གསུང་ངོ་། །བསྐལ་པ་དཔག་ཏུ་མེད་པའི་གྲངས་མེད་པ་དང་། གྲངས་མེད་པའི་

གྲངས་མེད་པ་དང་། གྲངས་མེད་པའི་བསམ་གྱིས་མི་ཁྱབ་པ་དང་། གྲངས་མེད་པའི་གཞལ་དུ་མེད་པ་དང་། གྲངས་མེད་པའི་གཞལ་གྱིས་མི་ལང་བ་དང་། གྲངས་མེད་པའི་བརྗོད་དུ་མེད་པ་དང་། བསམ་གྱིས་མི་ཁྱབ་པའི་གྲངས་མེད་པ་དང་། བསམ་གྱིས་མི་ཁྱབ་པའི་གཞལ་
དུ་མེད་པ་དང་། བསམ་གྱིས་མི་ཁྱབ་གཞལ་གྱིས་མི་ལང་བ་དང་། བསམ་གྱིས་མི་ཁྱབ་པའི་བརྗོད་དུ་མེད་པ་དང་། གཞལ་དུ་མེད་པའི་དཔག་ཏུ་མེད་པ་དང་། གཞལ་དུ་མེད་པའི་གྲངས་མེད་པ་དང་། གཞལ་དུ་མེད་པའི་བསམ་གྱིས་མི་ཁྱབ་པ་དང་། གཞལ་དུ་མེད་པའི་གཞལ་དུ་མེད་པ་དང་།
གཞལ་དུ་མེད་པའི་གཞལ་གྱིས་མི་ལང་བ་དང་། གཞལ་དུ་མེད་པའི་བརྗོད་དུ་མེད་པ་དང་། གཞལ་གྱིས་མི་ལང་བའི་དཔག་ཏུ་མེད་པ་དང་། གཞལ་གྱིས་མི་ལང་བའི་གྲངས་མེད་པ་དང་། གཞལ་གྱིས་མི་ལང་བའི་བསམ་གྱིས་མི་ཁྱབ་པ་དང་། གཞལ་གྱིས་མི་ལང་བའི་གཞལ་དུ་མེད་པ་
དང་། གཞལ་གྱིས་མི་ལང་བའི་གཞལ་གྱིས་མི་ལང་བ་དང་། གཞལ་གྱིས་མི་ལང་བའི་བརྗོད་དུ་མེད་པ་དང་། བརྗོད་དུ་མེད་པའི་དཔག་ཏུ་མེད་པ་དང་། བརྗོད་དུ་མེད་པའི་གྲངས་མེད་པ་དང་། བརྗོད་དུ་མེད་པའི་བསམ་གྱིས་མི་ཁྱབ་པ་དང་། བརྗོད་དུ་མེད་པའི་གཞལ་དུ་མེད་པ་དང་། བརྗོད་
དུ་མེད་པའི་གཞལ་གྱིས་མི་ལང་བ་དང་། བརྗོད་དུ་མེད་པའི་བརྗོད་དུ་མེད་པར་ལན་གསུང་སྟེ། དེའི་སྤོབས་པ་ཟད་མི་ཤེས་སོ། །ཁྱིམ་བདག་དེ་ཅིའི་ཕྱིར་ཞེ་ན། དེ་བཞིན་གཤེགས་པ་དེས་ཆོས་ཀྱི་དབྱིངས་བླ་ན་མེད་པ། མཁྱེན་རབ་ཀྱིས་ཤིན་ཏུ་ཐུགས་སུ་ཆུད་དེ། གང་ཐུགས་སུ་ཆུད་
པའི་དེ་བཞིན་གཤེགས་པ་ཐམས་ཅད་མཁྱེན་པ་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་སྟེ། སྤོབས་པ་མི་ཟད་དོ། །དེ་ལྟ་བས་ན་འདིར་གང་གི་ཡེ་ཤེས་མཐོང་བ་ཐོགས་པ་མེད་པར་འཇུག་པ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་
འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་དེ་ལ་དེ་བཞིན་གཤེགས་པས་གནས་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། ནམ་མཁའི་བྱ་རྗེས་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་གཤེགས་པས་གནས་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །

ཁྱིམ་བདག་དེ་ལ་དེ་བཞིན་གཤེགས་པས་གནས་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། བུད་མེད་གཞོན་ནུ་དག་གི་རྨི་ལམ་ན་བུ་བཙས་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་ཤེས་པ་ཀུན་འབྱུང་བ་ཤེས་པ་ཇི་སྙེད་
པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། བུད་མེད་གཞོན་ནུ་དག་གི་རྨི་ལམ་ན་བུ་ཤི་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་
ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། བུད་མེད་གཞོན་ནུ་དག་གི་རྨི་ལམ་ན་བུའི་མྱ་ངན་བྱེད་པ་ཇི་སྙེད་པ་ཉིད་
ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་མ་ཡིན་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། ནམ་མཁའ་
ལ་རི་མོ་བྲིས་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་མ་ཡིན་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་མ་ཡིན་པ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་
ལྟ་སྟེ་དཔེར་ན། རྨི་ལམ་ན་ཚོན་སྦྱོར་བ་ཇི་སྙེད་པ་ཉིད་ནི་མིང་ཙམ་སྟེ། ཁྱིམ་བདག་དེ་བཞིན་དུ་དེ་བཞིན་གཤེགས་པས་གནས་མ་ཡིན་པ་ཤེས་པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་མ་ཡིན་པ་ཤེས་པ་
འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་རི་མོ་འདྲི་བའི་བྱེ་བྲག་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་མ་ཡིན་པ་ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་

གཤེགས་པས་གནས་མ་ཡིན་པ་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་རི་མོ་མཁན་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་མ་ཡིན་པ་ཤེས་པ་འགོག་པར་འགྱུར་བའི་
ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་འདས་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་འདོད་པའི་དགའ་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་འདས་
པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་འདས་པ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་འདོད་ཆགས་ཀྱི་དགའ་བ་ལ་འདུན་པ་ཇི་སྙེད་པ་ཉིད་ནི་མིང་ཙམ་སྟེ།
དེ་བཞིན་དུ་དེ་བཞིན་གཤེགས་པས་འདས་པ་ཤེས་པ་ཀུན་འབྱུང་བ་ཤེས་པ་གང་ཡིན་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་འདས་པ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་
དགའ་བ་དང་བྲལ་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་འདས་པ་ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་འདས་པ་ཤེས་པ་འགོག་པར་འགྱུར་བའི་ལམ་ཤེས་པ་འདི་
ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་དགའ་བ་དང་བྲལ་བའི་བརྗོད་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་འདས་པ་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་
བཞིན་གཤེགས་པས་མ་འོངས་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་ཡུལ་དུ་འཇུག་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་མ་འོངས་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་

དེ་ལ་དེ་བཞིན་གཤེགས་པས་མ་འོངས་པ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་སྐོམ་འདོད་པ་དེ་བཞིན་དུ་དེ་བཞིན་གཤེགས་པས་མ་འོངས་པ་ཤེས་པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་
ལ་དེ་བཞིན་གཤེགས་པས་མ་འོངས་པ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་ཡུལ་དག་མ་ཐོབ་པར་ཞིག་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་མ་འོངས་པ་ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་
དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་མ་འོངས་པ་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་མ་འོངས་པའི་ཡུལ་ཚོལ་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་མ་
འོངས་པ་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ད་ལྟར་བྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་སྡུག་པ་དང་ཕྲད་པ་ཇི་སྙེད་པ་ཉིད་ནི་མིང་ཙམ་སྟེ།
དེ་བཞིན་དུ་དེ་བཞིན་གཤེགས་པས་ད་ལྟར་བྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ད་ལྟར་བྱུང་བ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་སྐྱེ་བོ་སྡུག་པ་དང་ཕྲད་པར་ཚོལ་བ་
ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ད་ལྟར་བྱུང་བ་ཤེས་པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ད་ལྟར་བྱུང་བ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་
དཔེར་ན། རྨི་ལམ་ན་སྡུག་པ་ཤི་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ད་ལྟར་བྱུང་བ་ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ད་ལྟར་བྱུང་བ་ཤེས་པ་འགོག་པར་འགྱུར་

བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་སྡུག་པ་དང་འགྲོགས་པའི་དགའ་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ད་ལྟར་བྱུང་བ་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་
ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ལས་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་བསྐྱོད་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་གཤེགས་པས་ལས་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་
དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ལས་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་ནོར་ཚོལ་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ལས་ཤེས་པ་ཀུན་འབྱུང་བ་ཤེས་པ་ཇི་སྙེད་
པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ལས་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ནོར་ཆུད་ཟོས་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ལས་
ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ལས་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་འགྱོད་པ་བསལ་བ་ཇི་སྙེད་པ་
ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ལས་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཡང་དག་པར་བླང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་
མའི་སྐྱེས་བུའི་རྨི་ལམ་ན་འདུན་ཁང་བྱེད་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཡང་དག་པར་བླང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཡང་དག་པར་བླང་བ་ཤེས་པ་ཀུན་འབྱུང་བ་ཤེས་

པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་གཏེར་རྙེད་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཡང་དག་པར་བླང་བ་ཤེས་པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་
ལ་དེ་བཞིན་གཤེགས་པས་ཡང་དག་པར་བླང་བ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ནོར་ཟད་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཡང་དག་པར་བླང་བ་ཤེས་པ་འགོག་པ་ཤེས་པ་ཇི་སྙེད་
པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཡང་དག་པར་བླང་བ་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ནོར་རབ་ཏུ་གཏོང་བ་ཇི་སྙེད་པ་ཉིད་ནི་མིང་ཙམ་
སྟེ། དེ་བཞིན་དུ་དེ་བཞིན་གཤེགས་པས་ཡང་དག་པར་བླང་བ་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་དང་གནས་ཀྱི་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་
ན། སྒྱུ་མའི་སྐྱེས་བུའི་རྨི་ལམ་ན་གནས་བྱེད་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་གནས་དང་གནས་ཀྱི་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་དང་གནས་ཀྱི་ཤེས་པ་ཀུན་
འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་སྡུག་པ་དང་ཕྲད་པར་དགའ་བ་ཇི་སྙེད་པ་ཉིད་ནི་མིང་ཙམ་པ་ནས། ཇི་སྙེད་པ་ཉིད་ཀྱང་མིང་ཙམ་གྱི་བར་དུ་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་དང་
གནས་ཀྱི་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་སྡུག་པ་དང་བྲལ་བ་ཇི་སྙེད་པ་ཉིད་ནི་མིང་ཙམ་སྟེ། ཁྱིམ་བདག་དེ་བཞིན་དུ་དེ་བཞིན་གཤེགས་པས་གནས་དང་གནས་ཀྱི་ཤེས་པ་འགོག་པ་ཤེས་པ་ཇི་སྙེད་པ་ཉིད་

ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་གནས་དང་གནས་ཀྱི་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་གཏེར་རྙེད་པ་ཇི་སྙེད་པ་ཉིད་ནི་མིང་ཙམ་སྟེ།
དེ་བཞིན་དུ་དེ་བཞིན་གཤེགས་པས་གནས་དང་གནས་ཀྱི་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་རྒྱུ་དང་རྒྱུའི་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་
བུའི་རྨི་ལམ་ན་ཆུང་མ་ལ་བྱམས་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་རྒྱུ་དང་རྒྱུའི་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་རྒྱུ་དང་རྒྱུའི་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་
ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཁྱེའུ་ཚོལ་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པ་ནས་དེ་བཞིན་དུ་སྦྱར་ཏེ། ཚིག་ཐམས་ཅད་ལ་ཡང་རྒྱ་ཆེར་བྱའོ། །ཁྱིམ་བདག་དེ་ལ་དེ་བཞིན་གཤེགས་པས་རྒྱུ་དང་རྒྱུའི་ཤེས་པ་འགོག་པ་ཤེས་པ་འདི་
ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཁྱེའུ་ཤི་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་རྒྱུ་དང་རྒྱུའི་ཤེས་པ་འགོག་པ་ཤེས་པ་ནས་དེ་བཞིན་དུ་སྦྱར་ཏེ་མིང་ཙམ་གྱི་བར་དུའོ། །ཁྱིམ་བདག་དེ་ལ་དེ་བཞིན་གཤེགས་པས་རྒྱུ་དང་
རྒྱུའི་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཁྱེའུ་ཤི་བ་ལས་སྨྲེ་སྔགས་འདོན་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པ་ནས་མིང་ཙམ་གྱི་བར་དུ་རབ་ཏུ་མཁྱེན་ཏོ། །ཁྱིམ་བདག་
དེ་ལ་དེ་བཞིན་གཤེགས་པས་རྣམ་པར་སྨིན་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་སྨིག་རྒྱུ་མཐོང་བ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་རྣམ་པར་སྨིན་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་

ཏོ། །ཁྱིམ་བདག་དེ་ལ་དེ་བཞིན་གཤེགས་པས་རྣམ་པར་སྨིན་པ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་སྨིག་རྒྱུ་དག་ལ་ཆུའི་ལྟེང་ཀའི་འདུ་ཤེས་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་རྣམ་པར་
སྨིན་པ་ཤེས་པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་རྣམ་པར་སྨིན་པ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཆུའི་ལྟེང་ཀ་སྐམས་པའི་འདུ་ཤེས་ཇི་
སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་རྣམ་པར་སྨིན་པ་ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་རྣམ་པར་སྨིན་པ་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་
མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་སྨིག་རྒྱུའི་ཆུ་དང་བྲལ་བའི་འདུ་ཤེས་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པ་ནས་མིང་ཙམ་གྱི་བར་དུ་དེ་བཞིན་དུ་སྦྱར་རོ། །ཁྱིམ་བདག་དེ་ལ་དེ་བཞིན་གཤེགས་པས་ཐམས་ཅད་དུ་འགྲོ་
བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ལམ་སྟོན་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་
བདག་དེ་ལ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་དོན་ལ་བརྩོན་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་
པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཡུལ་གཞན་དུ་འགྲོར་མེད་པ་ཇི་སྙེད་

པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་པ་འགོག་པ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་པ་འགོག་པར་འགྱུར་
བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཕྱོགས་དུ་མར་དོན་གྲུབ་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་
ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཁམས་དུ་མ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཁམས་དུ་མ་ཤེས་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཁམས་དུ་མ་ཤེས་
པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཁམས་དུ་མ་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཚོན་རྩིའི་ཁ་དོག་སྣ་ཚོགས་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་
དུ་དེ་བཞིན་གཤེགས་པ་ནས་དེ་བཞིན་དུ་སྦྱར་ཏེ་མིང་ཙམ་གྱི་བར་དུའོ། །ཁྱིམ་བདག་དེ་ལ་དེ་བཞིན་གཤེགས་པས་ཁམས་དུ་མ་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཁ་དོག་དུ་མའི་བྱེ་བྲག་ཤེས་པ་ཇི་སྙེད་པ་ཉིད་ནི་མིང་ཙམ་
སྟེ། ཁྱིམ་བདག་དེ་བཞིན་དུ་དེ་བཞིན་གཤེགས་པས་ཁམས་དུ་མ་ཤེས་པ་འགོག་པ་ཤེས་པ་ནས། དེ་བཞིན་དུ་སྦྱར་ཏེ་མིང་ཙམ་གྱི་བར་དུའོ། །ཁྱིམ་བདག་དེ་ལ་དེ་བཞིན་གཤེགས་པས་ཁམས་དུ་མ་ཤེས་པ་འགོག་པར་འགྱུར་བའི་ལམ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་
དཔེར་ན། སྒྱུ་མའི་སྐྱེས་བུའི་རྨི་ལམ་ན་ཚོན་རྩི་མཐོང་བའི་ཤེས་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཁམས་དུ་མ་ཤེས་པ་འགོག་པར་འགྱུར་བའི་ལམ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་

གཤེགས་པས་ཁམས་སྣ་ཚོགས་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་ཟ་མ་ཏོག་ཅིག་གི་ནང་ནས་གཟུགས་རྣམ་པ་སྣ་ཚོགས་དག་འབྱིན་པ་ཇི་སྙེད་པ་ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཁམས་སྣ་ཚོགས་ཤེས་པ་
ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །དེ་ལ་དེ་བཞིན་གཤེགས་པས་ཁམས་སྣ་ཚོགས་ཤེས་པ་ཀུན་འབྱུང་བ་ཤེས་པ་འདི་ལྟར་རབ་ཏུ་མཁྱེན་ཏེ། འདི་ལྟ་སྟེ་དཔེར་ན། རྨི་ལམ་ན་སྒྱུ་མ་མཁན་རྣམ་པ་སྣ་ཚོགས་སུ་རྩེ་བས་སྐྱེ་བོའི་ཚོགས་དགའ་བར་བྱེད་པ་ཇི་སྙེད་པ་
ཉིད་ནི་མིང་ཙམ་སྟེ། དེ་བཞིན་དུ་དེ་བཞིན་གཤེགས་པས་ཁམས་སྣ་ཚོགས་ཤེས་པ་ཀུན་འབྱུང་བ་ཤེས་པ་ཇི་སྙེད་པ་ཉིད་ཀྱང་མིང་ཙམ་དུ་དེ་ལྟར་རབ་ཏུ་མཁྱེན་ཏོ། །ཁྱིམ་བདག་དེ་ལ་དེ་བཞིན་གཤེགས་པས་ཁམས་སྣ་ཚོགས་ཤེས་པ་འགོག་པ་ཤེས་པ་འདི་ལྟར་རབ་ཏུ་མཁྱེན་
ཏེ། འདི་ལྟ་སྟེ་དཔེར་ན། སྒྱུ་མའི་སྐྱེས་བུའི་རྨི་ལམ་ན་འཆི་བ་སྟོན་པ་ཇི་སྙེད་པ་ཉིད་ནི་མིང་ཙམ