Kinh tạng Tây Tạng (Kangyur Đại Học) — 047_མདོ་སྡེ།_ག

གིས་མཛེས་ཏེ། ལྷ་རྣམས་ཀྱི་དགའ་བའི་ཚལ་བཞིན་ནོ། །རྟག་པར་རྒྱུན་དུ་དུང་དང་རྫ་རྔ་དང་ཁར་རྔ་དང་པི་ཝང་རྒྱུད་གསུམ་པ་དང་ཕྱོགས་མང་པོར་ཐོས་པའི་པི་ཝང་དང་། པི་ཝང་རྒྱུད་གཅིག་པ་དང་། ན་ཀུ་ལ་དང་། ཤིན་ཏུ་དབྱངས་སྙན་དང་། ཅང་ཏེའུ་དང་། བྲོ་གར་
གྱི་རྒྱུད་དང་། བན་དུ་ར་དང་། བུམ་རྔ་དང་། གདུ་བུ་དང་། རོལ་མོ་མན་དུ་གའི་སྒྲ་སྣ་ཚོགས་ཀྱི་གླུ་དབྱངས་རྣམས་ཀྱིས་མངོན་པར་དགའ་བ་མི་མ་ཡིན་པ་དང་། ལྷའི་གནས་ལྟར་ལྷའི་རྒྱན་གྱི་ཤིང་གིས་ཀུན་ཏུ་ཁེབས་པ་སྤོས་དང་། ཕྲེང་བ་དང་གོས་ཀྱི་ཤིང་གིས་ཤིན་ཏུ་ཁེབས་པ། འདོད་
པའི་འབྲས་བུའི་ཤིང་དང་ལྡན་པ་འཕགས་པའི་སྐྱེ་བོ་གནས་ཤིང་འཕགས་པ་མ་ཡིན་པའི་སྐྱེ་བོ་མེད་དོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་དེ་བཞིན་གཤེགས་པ་དྲི་མེད་ཏོག་ཅེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་
གཤེགས་པ་དྲི་མེད་ཏོག་དེའི་སྐུ་ཚེའི་ཚད་དཔག་ཏུ་མེད་པར་གྱུར་ཏོ། །སེམས་ཅན་དེ་དག་ཀྱང་འཚོ་བ་བདེ་བར་གྱུར་ཏེ། འདོད་ཆགས་ཆུང་། ཞེ་སྡང་ཆུང་། གཏི་མུག་ཆུང་། ངོ་ཚ་ཤེས་ཤིང་ཁྲེལ་ཡོད་པ་དང་ལྡན། འཕགས་པས་བསྒྲུབས་པའི་ངོ་ཚ་དང་ལྡན་ཏེ། གང་ཕལ་ཆེར་དེ་བཞིན་
གཤེགས་པ་དྲི་མེད་ཏོག་དེ་དང་ལས་ལྷན་ཅིག་བསགས་པ་ཡིན་ནོ། །དེར་བཅོམ་ལྡན་འདས་དེ་བཞིན་གཤེགས་པ་དྲི་མེད་ཏོག་དེ་བཞུགས་ནས་བསྙེན་བཀུར་བྱས། རྗེད་ཅིང་མཆོད་སྒྲ་གྲགས་སྙན་པ་ཡང་དག་པར་བྱུང་། གྲགས་པ་རྣམ་པར་གྲགས་ཏེ། ཇི་ལྟར་འདིར་འཕགས་པའི་སྐྱེ་བོ་ཡང་
དག་པར་འདུ་བ་བྱུང་བ་བཞིན་ནོ། །དེ་བཞིན་གཤེགས་པ་དྲི་མེད་ཏོག་དེའི་སངས་རྒྱས་ཀྱི་ཞིང་དེ་འཇིག་རྟེན་གྱི་ཁམས་བརྗོད་དུ་མེད་པ་ཅིག་བྱུང་ངོ་། །དེར་དེ་བཞིན་གཤེགས་པ་དྲི་མེད་ཏོག་དེ་གྲོང་ནས་གྲོང་དུ། གྲོང་ཁྱེར་ནས་གྲོང་ཁྱེར་དུ། གྲོང་རྡལ་ནས་གྲོང་རྡལ་དུ་སྤྱད་པ་སྤྱོད་དོ། །དེ་གང་

དང་གང་དུ་གཤེགས་ནས་སླར་བཞུད་པའི་ཚེ་དེ་དག་ངུ་ཞིང་མཆི་མ་འབྱིན་ཏོ། །གང་དང་གང་དུ་གཤེགས་པ་དེ་དང་དེར་དགའ་བར་འགྱུར་ཏེ་ཡིད་དུ་འོང་ཞིང་བླ་མར་སེམས་སོ། །དེ་གང་དང་གང་དུ་ཆོས་སྟོན་པ་དེ་དང་དེར་སེམས་ཅན་བྱེ་བ་ཁྲག་ཁྲིག་མཐའ་ཡས་པ་དག་འདུལ་བར་འགྱུར་ཏེ།
ལ་ལ་ནི་ཉན་ཐོས་ཀྱི་ཐེག་པས། ལ་ལ་ནི་རང་སངས་རྒྱས་ཀྱི་ཐེག་པས། ལ་ལ་ནི་བླ་ན་མེད་པ་སངས་རྒྱས་ཀྱི་ཐེག་པས་འདུལ་བར་མཛད་དོ། །དེ་བཞིན་གཤེགས་པ་དྲི་མེད་ཏོག་དེ་ཆོས་སྟོན་པ་ན་ཡན་ལག་བརྒྱད་དང་ལྡན་པའི་གསུང་ཞལ་ནས་འབྱུང་ཞིང་སྒྲ་དབྱངས་ཀྱི་ཡན་ལག་ལྔ་
བརྒྱས་ཡང་དག་པར་བསྡུས་པ་དེ་མངོན་པར་བྱུང་བས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་འདིར་མངོན་པར་གོ་བར་མཛད་དོ། །གང་གི་ཚེ་བཅོམ་ལྡན་འདས་དེ་བཞིན་གཤེགས་པ་དྲི་མེད་ཏོག་ཆོས་སྟོན་པ་དེའི་ཚེ་ཐམས་ཅད་དང་ལྡན་པའི་སངས་རྒྱས་ཀྱི་ཞིང་དེར་སྤོས་ཆུས་ཆག་ཆག་བཏབ་
པར་འགྱུར་རོ། །དེ་བཞིན་གཤེགས་པ་དེའི་ཕྲིན་ལས་མངོན་པར་འདུ་མཛད་པས། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་དྲི་མེད་ཏོག་དེ་ཆོས་སྟོན་པ་དེའི་ཚེ་བར་སྣང་ལས་ལྷའི་སིལ་སྙན་གྱི་སྒྲ་དག་རབ་ཏུ་འབྱུང་ངོ་། །དེ་ལ་སེམས་ཅན་གང་འདོད་པ་ལ་དགའ་བ་དེ་དག་ནི་
ཡིད་དུ་འོང་བའི་སྒྲ་དབྱངས་སྙན་ཅིང་བདེ་བ་ལ་མངོན་པར་དགའ་བ་དག་ཐོས་སོ། །སྒྲ་དབྱངས་གང་ལྟ་བུ་ལ་དགའ་ཞིང་འདོད་པ་དེ་འདྲ་བའི་སྒྲ་ཐོས་སོ། །གལ་ཏེ་མྱ་ངན་ལས་འདས་པའི་དགའ་བ་འདོད་ན་དགའ་བ་དེ་ཁ་ན་མ་ཐོ་བ་མེད་ཅིང་བདེ་བར་སོ་སོ་ཡང་དག་པར་མྱོང་བར་འགྱུར་རོ། །
སེམས་ཅན་གང་དག་ཆོས་འདོད་པར་གྱུར་ན་དེ་དག་མི་རྟག་པའི་སྒྲ་ཐོས་ཤིང་སྡུག་བསྔལ་གྱི་སྒྲ་དང་། བདག་མེད་པའི་སྒྲ་དང་། ཞི་བའི་སྒྲ་ཐོས་སོ། །མྱ་ངན་ལས་འདས་པའི་སྒྲ་ཐོས། སངས་རྒྱས་ཀྱི་སྒྲ་དང་། ཆོས་ཀྱི་སྒྲ་དང་། དགེ་འདུན་གྱི་སྒྲ་ཐོས་སོ། །སངས་རྒྱས་རྗེས་
སུ་དྲན་པའི་སྒྲ་ཐོས་སོ། །དེ་བཞིན་དུ་སྦྱར་ཏེ། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། གཏོང་བ་རྗེས་སུ་དྲན་པ་དང་། ལྷ་རྗེས་སུ་དྲན་པའི་སྒྲ་ཐོས་སོ། །དེ་བཞིན་གཤེགས་པ་དེའི་ཕྲིན་ལས་རྣམ་པར་སྨིན་པ་མངོན་པར་

བསྒྲུབས་པ་ཉིད་ཀྱིས་ཆོས་ཉན་པ་དེ་དག་ལ་རླུང་བསིལ་བ་ལྡང་ངོ་། །རླུང་བསིལ་བ་གང་དག་ལངས་པས་ཆོས་ཉན་པ་དག་དགའ་བ་སྐྱེའོ། །གང་གི་ཚེ་དེ་བཞིན་གཤེགས་པ་དེ་ཆོས་སྟོན་པ་ན། དེ་བཞིན་གཤེགས་པ་དེའི་རྣམ་པར་སྨིན་པ་མངོན་པར་གྲུབ་པའི་
རླུང་ལངས་པ་དེ་ཉིད་ཀྱིས་དེའི་ཚེ་ཆོས་འདོད་པའི་སེམས་ཅན་དེ་དག་ཐམས་ཅད་ཀྱི་སྒྲིབ་པ་ལྔ་ཐམས་ཅད་ནས་ཐམས་ཅད་རྣམ་པ་ཐམས་ཅད་ནས་ཐམས་ཅད་དུ་མི་འབྱུང་ངོ་། །དེའི་ཚེ་དེ་བཞིན་གཤེགས་པ་དེའི་རིམ་གྲོ་པ་དགེ་སློང་དཔལ་འབྱུང་ཞེས་བྱ་བ་འཁོར་དེ་ཉིད་ན་དེ་བཞིན་གཤེགས་
པ་དེའི་སྣམ་ལོགས་ན་འདུག་པར་གྱུར་ཏེ་དེ་ཆོས་ལ་ཆུད་པའི་ཡིད་ཀྱིས་དེ་བཞིན་གཤེགས་པའི་འཁོར་དེ་མཐོང་ངོ་། །གང་ལ་དཀྲུགས་པའི་སྒྲའམ། འཁྲུགས་པའི་སྒྲའམ། མ་དང་བའི་སྒྲ་མེད་ཅིང་དེ་རྣམ་པར་དང་བའི་ཡིད་ཀྱིས་སེམས་ཡང་དག་པར་བསྐྱེད་དེ་ཇི་ལྟར་དེ་བཞིན་
གཤེགས་པ་དྲི་མེད་ཏོག་ད་ལྟར་འཁོར་བཞི་དག་ལ་ཆོས་སྟོན་པ་ལྟར་བདག་མ་འོངས་པའི་དུས་ན་དེ་བཞིན་གཤེགས་པའི་ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པ་འཁོར་གྱི་དཀྱིལ་འཁོར་འདི་ལྟ་བུས་ཡོངས་སུ་བསྐོར་ཅིང་ཆོས་སྟོན་པར་གྱུར་ཅིག་སྙམ་མོ། །དེ་ནས་དེ་བཞིན་གཤེགས་པ་དྲི་མེད་ཏོག་
དེས་རིམ་གྲོ་པ་དགེ་སློང་དེའི་བསམ་པ་ལ་གཟིགས་ནས་འོད་བཏང་ངོ་། །འོད་གང་གིས་རེག་མ་ཐག་ཏུ་དགེ་སློང་དཔལ་འབྱུང་དེ་སྙིང་རྗེ་ཆེན་པོ་དང་ལྡན་པའི་ཏིང་ངེ་འཛིན་ཐོབ་པོ། །ཏིང་ངེ་འཛིན་གང་གི་མཐུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །མཽད་
གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་དཔལ་འབྱུང་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་དཔལ་འབྱུང་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་སྙོམས་
པར་འཇུག་པའི་མཁས་པ་ལ་རྣལ་འབྱོར་དུ་བྱའོ། །མཽད་གལ་གྱི་བུ་ངས་སྙོམས་པར་འཇུག་པ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་

རྣམས་ལ་སྙོམས་པར་འཇུག་པ་ཤེས་པ་ཀུན་འབྱུང་བ་ཤེས་པ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས་དགེ་བའི་རྩ་བ་རྒྱ་ཆེ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་
ཆེས་ཕ་རོལ་ན་བྲམ་ཟེ་དྲི་མེད་མིག་ཅེས་བྱ་བ་ཤིང་སཱ་ལ་ཆེན་པོ་ལྟ་བུ་ཕྱུག་ཅིང་ནོར་ཆེ་ལ་ལོངས་སྤྱོད་ཆེ་བ་ལོངས་སྤྱོད་མང་བ། བདག་གིར་བྱ་བ་མང་བ། ནོར་དང་ཡོ་བྱད་མང་བ། ཕ་མ་གཙང་བ། ཆུང་མ་གཙང་བ། མངལ་གྱི་སྐྱོན་གྱིས་མ་གོས་པ་རིགས་དམའ་བའི་ཁ་ན་མ་ཐོ་བ་མེད་པ།
འདོན་པ་པོ་གཞུང་འཛིན་པ་རིག་པ་གསུམ་དང་། སྒྲ་ངེས་པར་སྦྱོར་བ་དང་བཅས་པ། ཤེས་གསལ་དང་བཅས་པ། ཡི་གེ་དང་བཅས་པ། རབ་ཏུ་དབྱེ་བ་དང་བཅས་པ་ལྔ་པ་སྟེ། སྔོན་བྱུང་བའི་ཕ་རོལ་ཏུ་ཕྱིན་པ་གནས་དང་བརྡ་སྤྲོད་པ་དང་། འཇིག་རྟེན་རྒྱང་ཕན་པ་དང་། མཆོད་
སྦྱིན་གྱི་རྒྱུད་དང་། སྐྱེས་བུ་ཆེན་པོའི་མཚན་ཉིད་ཀྱི་རྒྱུད་རིག་པ་གསུམ་གྱི་གསུང་རབ་ལ་སོ་སོའི་སློབ་དཔོན་རྣམས་ཀྱིས་རྗེས་སུ་གནང་བ་ཞིག་བྱུང་ངོ་། །དེའི་ཚེ་དེ་བཞིན་གཤེགས་པ་བཅིངས་པ་ཐམས་ཅད་རབ་ཏུ་རྣམ་པར་འགྲོལ་བ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་
འཇིག་རྟེན་དུ་བྱུང་ངོ་། །དེ་བཞིན་གཤེགས་པ་བཅིངས་པ་ཐམས་ཅད་རབ་ཏུ་རྣམ་པར་འགྲོལ་བ་དེའི་གསུང་རབ་དེ་ལ་སེམས་ཅན་རྣམས་ཀྱི་ཚེའི་ཚད་དཔག་ཏུ་མེད་པར་གྱུར་ཏོ། །དེ་བཞིན་གཤེགས་པ་བཅིངས་པ་ཐམས་ཅད་རབ་ཏུ་རྣམ་པར་འགྲོལ་བ་དེའི་ཉན་ཐོས་ཀྱི་འཁོར་སྟོང་ཕྲག་དཔག་
ཏུ་མེད་པ་དག་བྱུང་ངོ་། །བྱང་ཆུབ་སེམས་དཔའི་འཁོར་དཔག་ཏུ་མེད་པ་དག་བྱུང་ངོ་། །དེ་བཞིན་གཤེགས་པ་བཅིངས་པ་ཐམས་ཅད་རབ་ཏུ་རྣམ་པར་འགྲོལ་བ་དེའི་ཉན་ཐོས་འདུས་པ་དང་། བྱང་ཆུབ་སེམས་དཔའ་འདུས་པ་དཔག་ཏུ་མེད་པ་དག་བྱུང་ངོ་། །དེར་དེ་བཞིན་གཤེགས་པ་
བཅིངས་པ་ཐམས་ཅད་རབ་ཏུ་རྣམ་པར་འགྲོལ་བ་དེ་སྙོམས་པར་འཇུག་པ་ཤེས་པ་ཀུན་འབྱུང་བ་ཤེས་པ་ལས་བརྩམས་ནས་ཆོས་སྟོན་ཏེ། བྱང་ཆུབ་སེམས་དཔས་ཏིང་ངེ་འཛིན་ལ་མཁས་པར་བྱ། སྙོམས་པར་འཇུག་པ་ཤེས་པ་ཀུན་འབྱུང་བ་ཤེས་པ་ལ་ཡང་མཁས་པར་བྱའོ། །དགེ་སློང་དག་ཇི་

ལྟར་ན་བྱང་ཆུབ་སེམས་དཔའ་སྙོམས་པར་འཇུག་པ་ཤེས་པ་ཀུན་འབྱུང་བ་ཤེས་པ་ལ་མཁས་པར་བྱ་ཞེ་ན། འདི་ལ་བྱང་ཆུབ་སེམས་དཔས་བསམ་གཏན་དང་པོའི་རྗེས་སུ་འཐུན་པའི་ཆོས་རྣམས་ལ་མངོན་པར་བརྩོན་པར་བྱའོ། །བསམ་གཏན་དང་པོ་དེ་ནི་གང་
ཡིན། བསམ་གཏན་དང་པོ་དེ་ལ་ཇི་ལྟར་སྙོམས་པར་འཇུག་པའི་མིང་འཐོབ་ཅེ་ན། འདི་ལ་བྱང་ཆུབ་སེམས་དཔས་འདི་ལྟར་རབ་ཏུ་ཤེས་པར་བྱ་སྟེ། འདོད་པའི་རྣམ་པར་རྟོག་པ་ལས་ངེས་པར་འབྱུང་བ་ནི་རྣམ་པར་རྟོག་པའི་གཉེན་པོའོ། །ངེས་པར་འབྱུང་བའི་རྣམ་པར་རྟོག་པ་
དེས་འདོད་པའི་རྣམ་པར་རྟོག་པ་བཟློག་སྟེ། དེ་འདིའི་གཉེན་པོའོ། །སྙོམས་པར་འཇུག་པས་དེ་ལ་སྙོམས་པར་འཇུག་པ་ཞེས་བྱའོ། །གནོད་སེམས་ཀྱི་རྣམ་པར་རྟོག་པའི་གཉེན་པོ་ནི་གནོད་སེམས་མེད་པའི་རྣམ་པར་རྟོག་པ་སྟེ། དེ་འདི་ལ་སྙོམས་པར་འཇུག་པ་ཡིན་པས་དེ་
ལ་སྙོམས་པར་འཇུག་པ་ཞེས་བྱའོ། །རྣམ་པར་འཚེ་བའི་རྣམ་པར་རྟོག་པའི་གཉེན་པོར་ནི་རྣམ་པར་འཚེ་བ་མེད་པའི་རྣམ་པར་རྟོག་པ་སྟེ། རྣམ་པར་འཚེ་བ་མེད་པའི་རྣམ་པར་རྟོག་པས་རྣམ་པར་འཚེ་བའི་རྣམ་པར་རྟོག་པ་ཟློག་པར་བྱེད་དོ། །དེ་འདི་ལ་སྙོམས་པར་འཇུག་པ་ཡིན་
པས་དེ་ལ་སྙོམས་པར་འཇུག་པ་ཞེས་བྱ་སྟེ། །དེས་བསམ་གཏན་དང་པོ་ལ་སྙོམས་པར་འཇུག་གོ། །བསམ་གཏན་གཉིས་པའི་གཉེན་པོ་ནི་རྣམ་པར་རྟོག་པ་དང་། རྣམ་པར་དཔྱོད་པ་ཡིན་ལ་དེ་དག་གི་གཉེན་པོ་ནི་ཏིང་ངེ་འཛིན་གྱིས་བསྐྱེད་པའི་དགའ་བ་ཡིན་ནོ། །དེ་འདི་ལ་སྙོམས་པར་
འཇུག་པ་ཡིན་པས་དེ་ལ་སྙོམས་པར་འཇུག་པ་ཞེས་བྱའོ། །བསམ་གཏན་གསུམ་པའི་ཏིང་ངེ་འཛིན་གྱིས་བསྐྱེད་པའི་དགའ་བའི་གཉེན་པོ་ནི་དེའི་དགའ་བ་མེད་པ་བདེ་བའི་གཉེན་པོ་སྟེ། དེ་འདི་ལ་སྙོམས་པར་འཇུག་པ་ཡིན་པས་དེ་ལྟ་བས་ན་སྙོམས་པར་འཇུག་པ་ཞེས་བྱའོ། །བསམ་གཏན་
བཞི་པ་ལ་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པའི་ཚོར་བ་འཇུག་སྟེ་དེ་ནི་བདེ་བ་དང་སྡུག་བསྔལ་གྱི་གཉེན་པོའོ། །དེ་འདི་ལ་སྙོམས་པར་འཇུག་པ་ཡིན་པས་དེ་ལ་སྙོམས་པར་འཇུག་པ་ཞེས་བྱའོ།། །།བམ་པོ་བཅྭ་བརྒྱད་པ། ནམ་མཁའ་མཐའ་ཡས་སྐྱེ་

མཆེད་ཀྱི་གཉེན་པོ་ནི་གཟུགས་ཀྱི་འདུ་ཤེས་དང་། ཐོགས་པའི་འདུ་ཤེས་སོ། །དེའི་གཉེན་པོ་ནི་ནམ་མཁའི་འདུ་ཤེས་སྙོམས་པར་འཇུག་པ་ཞེས་བྱའོ། །རྣམ་ཤེས་མཐའ་ཡས་སྐྱེ་མཆེད་ཀྱི་གཉེན་པོ་ནི་ནམ་མཁའི་འདུ་ཤེས་སོ། །དེ་འདི་ལ་སྙོམས་པར་འཇུག་པ་ཡིན་པས་དེ་ལ་སྙོམས་པར་འཇུག་
པ་ཞེས་བྱའོ། །ཅི་ཡང་མེད་པའི་སྐྱེ་མཆེད་ཀྱི་གཉེན་པོ་ནི་རྣམ་ཤེས་ཀྱི་འདུ་ཤེས་སོ། །དེ་འདི་ལ་སྙོམས་པར་འཇུག་པ་ཡིན་པས་དེ་ལ་སྙོམས་པར་འཇུག་པ་ཞེས་བྱའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་གཉེན་པོ་ནི་ཅི་ཡང་མེད་པའི་སྐྱེ་མཆེད་དོ། །དེ་འདི་ལ་སྙོམས་པར་
འཇུག་པ་ཡིན་པས་དེ་ལ་སྙོམས་པར་འཇུག་པ་ཞེས་བྱའོ། །འགོག་པ་ལ་སྙོམས་པར་འཇུག་པའི་གཉེན་པོ་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དོ། །དེ་འདི་ལ་སྙོམས་པར་འཇུག་པ་ཡིན་པས་དེ་ལ་སྙོམས་པར་འཇུག་པ་ཞེས་བྱའོ། །དེའི་ཀུན་འབྱུང་གང་ཞེ་ན་འདི་ལྟ་སྟེ་འདུན་
པའོ། །སྙོམས་པར་འཇུག་པ་ཤེས་པ་ཀུན་འབྱུང་བ་ཤེས་པའི་རྒྱུ་ནི་འདུན་པའོ། །དེའི་ཚེ་བྱང་ཆུབ་སེམས་དཔའ་བློ་གྲོས་ཟབ་མོ་ཞེས་བྱ་བ་དེ་བཞིན་གཤེགས་པ་དེའི་སྣམ་ལོགས་ན་འདུག་ཅིང་དེ་བཞིན་གཤེགས་པ་དེ་ལ་བསིལ་ཡབ་ཀྱིས་གཡོབ་བོ། །དེ་འདི་སྙམ་དུ་སེམས་ཏེ་བདག་མ་
འོངས་པའི་དུས་ན་མ་དུལ་བ་རྣམས་འདུལ་བ་དང་། མ་ཞི་བ་རྣམས་ཞི་བར་བྱེད་པ་དང་། བཅིངས་པ་རྣམས་གྲོལ་བར་བྱེད་པ་དང་། མ་རྒལ་བ་རྣམས་སྒྲོལ་བར་བྱེད་པའི་དེ་བཞིན་གཤེགས་པར་གྱུར་ཅིག་སྙམ་མོ། །བྲམ་ཟེ་དྲི་མ་མེད་པའི་མིག་ཤིང་སཱ་ལ་ཆེན་པོ་ལྟ་བུ་དེ་ཡང་འདི་སྙམ་དུ་སེམས་
ཏེ་བདག་མ་འོངས་པའི་དུས་ན་མ་དུལ་བ་རྣམས་འདུལ་བ་དང་། མ་ཞི་བ་རྣམས་ཞི་བར་བྱེད་པ་དང་། བཅིངས་པ་རྣམས་གྲོལ་བར་བྱེད་པ་དང་། མ་རྒལ་བ་རྣམས་སྒྲོལ་བར་བྱེད་པའི་དེ་བཞིན་གཤེགས་པར་གྱུར་ཅིག་སྙམ་མོ། །དེ་ནས་དེ་བཞིན་གཤེགས་པ་བཅིངས་པ་ཐམས་ཅད་
རབ་ཏུ་རྣམ་པར་འགྲོལ་བ་ཞེས་བྱ་བས་བྱང་ཆུབ་སེམས་དཔའ་ཡང་དག་པར་འཛིན་པ་གཉིས་ལ་ཆེད་དུ་བརྗོད་པ་འདི་ཆེད་དུ་བརྗོད་དོ། །སེམས་ཅན་གང་དག་སྡུག་བསྔལ་མཐོང་ནས་སྙིང་རྗེ་ཆེ་སྐྱེས་པ། །དེ་དག་རིན་ཆེན་ཀུན་གྱིས་མཆོད་པ་བྱས་པས་དེ་མི་ནུས། གང་ཚེ་སེམས་ཅན་ཀུན་

གྱིས་ཕྱོགས་བཅུའི་འཇིག་རྟེན་དག་ཏུ་མེད། །བུས་ནས་བདེ་གཤེགས་མཆོད་ཀྱང་དེ་ཡིས་མཆོད་པར་མི་འགྱུར་རོ། །དེ་ཡི་སེམས་གཅིག་བསྐྱེད་པའི་ཡོན་ཏན་མཐའ་དག་ཚིག་གིས་སུ། །བརྗོད་པར་མི་ནུས་ཡོན་ཏན་ཟད་པར་བྱ་ལྟ་ག་ལ་ནུས། །དེ་ལྟ་བས་ན་མཁས་
པའི་མི་ཡིས་སངས་རྒྱས་ཆོས་ཚོལ་ན། །ཡོན་ཏན་རྣམས་ལ་འབད་བྱ་དེ་བཞིན་གཤེགས་པ་ཡོན་ཏན་མཆོད། །སངས་རྒྱས་ཆོས་ཚོལ་བ་ན་དེས་ནི་ལུས་ལ་བསྲུངས་པ་མེད། །འདྲེན་པའི་གཏོང་ལ་བསླབས་པས་ཡང་དང་ཡང་དུ་ཡོངས་བཏང་ངོ་། །རྐང་གཉིས་མཆོག་ནི་དངོས་པོ་ཀུན་ལ་
ཡོངས་སུ་བསླབས་པས་སུ། །འདི་ལྟར་སངས་རྒྱས་ཆོས་ཉིད་བྱང་ཆུབ་མཆོག་ནི་ང་ཡིས་བརྙེས། །གང་དག་ཆོས་རྣམས་སྐྱེ་བ་ཇི་ལྟ་བཞིན་དུ་རྣམ་ཤེས་ན། །བུ་དེ་མི་ཡི་དབང་པོ་ཡབ་ཀྱི་རིགས་ནི་འཕེལ་བར་བྱེད། །མཉམ་པའི་ཆོས་རྟོགས་པ་ནི་བདུད་ཀྱིས་བཅིངས་པ་གཅོད་བྱེད་ཅིང་། །
བདུད་ཀྱི་ཞགས་པ་ལས་གྲོལ་སེམས་ཅན་གཞན་ཡང་རབ་གྲོལ་བྱེད། །དེ་ལྟ་བས་ན་བྱང་ཆུབ་ཚོལ་བས་དངོས་ཀུན་ཡོངས་སུ་སྤོང་། །བྱང་ཆུབ་ཞི་བ་ཚོལ་ན་ཆོས་ཀྱི་ཚུལ་ལ་བསླབ་པར་གྱིས། །དེ་ནས་བྱང་ཆུབ་སེམས་དཔའ་དེ་གཉིས་བཅོམ་ལྡན་འདས་ཀྱིས་རྗེས་སུ་བསྟན་པ་ཐོས་ནས། དེའི་
ཚེ་དངོས་པོ་ཐམས་ཅད་ཡོངས་སུ་གཏོང་བ་ལ་བློ་ངེས་ཤིང་དེ་གཉིས་ཕྱིར་མི་ལྡོག་པར་གྱུར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྲམ་ཟེ་དྲི་མེད་མིག་ཅེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། དེ་བཞིན་
གཤེགས་པ་འོད་སྲུང་དེ། དེའི་ཚེ་དེའི་དུས་ན་བྲམ་ཟེ་དྲི་མེད་མིག་ཅེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་བློ་གྲོས་ཟབ་མོ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་
སེམས་དཔའ་བློ་གྲོས་ཟབ་མོ་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་སྙོམས་པར་འཇུག་པ་ལ་མཁས་པར་བྱ་ཞིང་དེ་བཞིན་དུ་བྱང་ཆུབ་སེམས་དཔས་བསླབ་པར་བྱའོ། །མཽད་གལ་གྱི་བུ་ངས་སྙོམས་པར་འཇུག་པ་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་

སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་རྣམས་ལ་སྙོམས་པར་འཇུག་པ་ཤེས་པ་འགོག་པ་ཤེས་པ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་
འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས་དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་རྡུལ་དང་དྲི་མ་དང་མུན་པ་འཇོམས་པ་ཞེས་བྱ་བ་ནས་རྒྱ་ཆེར་སྦྱར་ཏེ། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་
གཤེགས་པ་རྡུལ་དང་དྲི་མ་དང་མུན་པ་འཇོམས་པ་དེའི་སྐུ་ཚེའི་ཚད་ནི་ལོ་སྟོང་ཕྲག་བརྒྱད་ཅུར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་དང་དྲི་མ་དང་མུན་པ་འཇོམས་པ་དེའི་ཉན་ཐོས་འདུས་པ་གསུམ་བྱུང་སྟེ། ཉན་ཐོས་འདུས་པ་གཅིག་ནི་དགྲ་བཅོམ་
པ་ཟག་པ་ཟད་པ་ནས་རྒྱ་ཆེར་སྦྱར་ཏེ་མཉམ་པ་ཉིད་ཤེས་ཤིང་རྣམ་པར་གྲོལ་བའི་བར་བྱེ་བ་ཕྲག་དགུ་བཅུ་རྩ་དྲུག་གོ། །གཉིས་པ་ནི་དགུ་བཅུ་རྩ་བཞིའོ། །གསུམ་པ་ནི་དགུ་བཅུ་རྩ་གཉིས་སོ། །དེའི་བྱང་ཆུབ་སེམས་དཔའ་འདུས་པ་གསུམ་བྱུང་སྟེ། དེ་དག་ཐམས་ཅད་ཐེག་པ་ཆེན་པོ་ལ་ཡང་
དག་པར་རབ་ཏུ་གནས་པ། ཐེག་པ་དཔག་ཏུ་མེད་པ་ལ་ཡང་དག་པར་རབ་ཏུ་གནས་པ། ཐེག་པ་གྲངས་མེད་པ་ལ་ཡང་དག་པར་རབ་ཏུ་གནས་པ། ཐེག་པ་བསམ་གྱིས་མི་ཁྱབ་ཅིང་གཞལ་དུ་མེད་པ་ལ་ཡང་དག་པར་རབ་ཏུ་གནས་པ། སངས་རྒྱས་ཀྱི་ཞིང་ཡོངས་སུ་དག་པ་དཔག་ཏུ་
མེད་པར་སྨོན་ལམ་གྱིས་ཡང་དག་པར་རབ་ཏུ་གནས་པ་དེ་བཞིན་དུ་སྦྱར་ཏེ། སངས་རྒྱས་ཀྱི་ཞིང་ཡོངས་སུ་དག་པ་བརྗོད་དུ་མེད་པའི་བར་ལ་སྨོན་ལམ་གྱིས་ཡང་དག་པར་རབ་ཏུ་གནས་པ་རྣམས་སོ། །དེ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནི་ལོ་བྱེ་བ་ཕྲག་བརྒྱད་ཅུར་གནས་སོ། །
དེའི་ཚེ་འཁོར་ལོས་སྒྱུར་བའི་རྒྱལ་པོ་གསེར་གྱི་རྒྱལ་མཚན་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་ངོ་། །དེའི་རིན་པོ་ཆེ་སྣ་བདུན་བྱུང་བ་ནི་འདི་དག་ཡིན་ཏེ། འདི་ལྟ་སྟེ་འཁོར་ལོ་རིན་པོ་ཆེ་དང་དེ་བཞིན་དུ་སྦྱར་ཏེ། བློན་པོ་རིན་པོ་ཆེའི་བར་བདུན་པོ་དེ་དག་ཡིན་ནོ། །དེའི་བུ་

སྟོང་ཐམ་པ་ཡོད་དེ་དཔའ་ཞིང་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ། དེ་ཐམས་ཅད་སའི་དཀྱིལ་འཁོར་འདི་འབའ་ཞིག་ཁོ་ནས་ཆད་པ་མེད་ཅིང་། མཚོན་གྱིས་བདའ་བ་མེད་ལ་རང་གི་ཆོས་ཀྱིས་ཤིན་ཏུ་
གནས་སོ། །རྒྱལ་པོ་གསེར་གྱི་རྒྱལ་མཚན་གྱི་ཡུལ་རྣམ་པར་རྒྱལ་བྱེད་དེར། སེམས་ཅན་ཐམས་ཅད་དགེ་བ་བཅུའི་ལས་ཀྱི་ལམ་དང་ལྡན་པར་གྱུར་ཏོ། །དེའི་ཚེ་སངས་རྒྱས་ཀྱི་ཞིང་དེར་སེམས་ཅན་དམྱལ་བ་དག་མ་བྱུང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་
དག་མ་བྱུང་། ལྷ་མ་ཡིན་གྱི་རིས་དག་མ་བྱུང་ངོ་། །དེའི་ཚེ་སངས་རྒྱས་ཀྱི་ཞིང་དེར་སེམས་ཅན་ཐམས་ཅད་དགེ་བ་བཅུའི་ལས་ཀྱི་ལམ་རྣམས་དང་ལྡན་པར་གྱུར་ཅིང་། །སེམས་ཅན་དེ་དག་ཐམས་ཅད་ཀྱང་ཚེ་ངེས་པར་གྱུར་ཏེ། སེམས་ཅན་རྣམས་ཀྱི་ཚེའི་ཚད་ལོ་སྟོང་ཕྲག་བརྒྱད་ཅུར་གྱུར་
ཏོ། །དེའི་ཚེ་བྱང་ཆུབ་སེམས་དཔའ་དྲི་མེད་གཏོང་ཞེས་བྱ་བ་ཞིག་བྱུང་སྟེ། དེ་བྱང་ཆུབ་སེམས་དཔའ་སྟོང་ཕྲག་བརྒྱད་ཅུ་དག་དང་ལྷན་ཅིག་ཏུ་བྱང་ཆུབ་སེམས་དཔའི་སྤྱད་པ་སྤྱོད་དོ། །དེ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་དེའི་རིང་བསྲེལ་ལ་མཆོད་པ་བྱ་བར་སྤྲོ་བར་གྱུར་
ཏེ། དེ་བཞིན་གཤེགས་པ་དེའི་རིང་བསྲེལ་ལ་མཆོད་པ་བྱེད་པ་ནི་ལོ་ལྔར་བྱས་ཤིང་ཡོངས་སུ་བཟུང་ངོ་། །དེར་ལོ་ལྔར་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་འདུས་ཏེ། དེ་དག་ལ་བྱང་ཆུབ་སེམས་དཔའ་དྲི་མེད་གཏོང་། བདག་གི་དངོས་པོ་ཐམས་ཅད་གཏོང་བར་བྱེད་དེ། ཚེ་དང་ལྡན་པ་དག་
གང་ལ་ཡོ་བྱད་གང་དགོས་པ་དེ་བདག་ཉིད་ཀྱིས་གཏང་བར་བགྱིའོ། །ཇི་ཙམ་དུ་ཤ་དང་ཁྲག་དགོས་ན་ཡང་གཏོང་ན་ཡོ་བྱད་གཞན་ལྟ་སྨོས་ཀྱང་ཅི་དགོས། དེའི་ཚེ་རྒྱལ་པོ་དྲི་མེད་ཟླ་བ་ཞེས་བྱ་བ་བྱང་ཆུབ་སེམས་དཔའ་དེ་ལ་མངོན་པར་དད་ནས། དེས་འཁོར་གྱི་བཙུན་མོ་སྟོང་ཕྲག་བརྒྱད་ཅུ་དང་། བདག་ཉིད་
ཀྱང་དགེ་འདུན་ལ་ཕུལ་བར་གྱུར་ཏོ། །དེས་དགེ་སློང་རེ་རེ་དག་ལ་བདག་གི་བཙུན་མོ་དེ་དག་སླར་བླུ་བའི་ཕྱིར་ཆོས་གོས་དང་ལྷམ་ཟུང་དང་། གདུགས་དང་། རིལ་བ་སྤྱི་བླུགས་ཚོས་པ་དང་། ལུས་ལ་བགོ་བ་དང་། སྟེང་ནས་དགབ་པ་དང་། གདིང་བ་དང་། ལོངས་སྤྱོད་ཐམས་ཅད་ཕུལ་ལོ། །དགེ་

སློང་གི་དགེ་འདུན་ལ་ཇི་སྲིད་འཚོའི་བར་དུ་ཆོས་གོས་དང་བསོད་སྙོམས་དང་། མལ་ཆ་དང་ན་བའི་གསོས་སྨན་གྱི་རྐྱེན་གྱི་ཡོ་བྱད་རྣམས་མངོན་པར་སྦྱར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་དྲི་མེད་གཏོང་ཞེས་བྱ་བ་གང་གིས་དེ་བཞིན་གཤེགས་པ་
ཡོངས་སུ་མྱ་ངན་ལས་འདས་པ་དེའི་བསྟན་པ་ཡོངས་སུ་བཟུང་ཞིང་ལོ་ལྔར་བྱས་པར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་དྲི་མེད་གཏོང་ཞེས་བྱ་བར་གྱུར་ཏོ། །ངས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་དེའི་བསྟན་པ་ཡོངས་
སུ་བཟུང་ཞིང་དེ་ཡང་ལོ་ལྔར་བྱས་སོ། །དགེ་སློང་གི་དགེ་འདུན་དེ་དག་གི་བདེ་བའི་རིམ་གྲོ་བྱས་ཤིང་། ང་རྟག་ཏུ་སེམས་ཤིན་ཏུ་མཉམ་པར་བཞག་པར་གྱུར་ཏོ། །དགེ་བའི་རྩ་བ་དེ་དག་ཐམས་ཅད་ཀྱང་སྙོམས་པར་འཇུག་པ་འགོག་པ་མངོན་དུ་བྱ་བར་ཡོངས་སུ་བསྔོས་སོ། །དགེ་བའི་རྩ་བ་དེས་ངས་སྙོམས་
པར་འཇུག་པ་ཤེས་པ་འགོག་པ་ཤེས་པ་མངོན་དུ་བྱས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སྙོམས་པར་འཇུག་པར་ཤེས་པ་འགོག་པ་ཤེས་པ་མངོན་དུ་བྱ་བར་འདོད་པས་དེ་བཞིན་གཤེགས་པ་ལ་མཆོད་པ་བྱ་བར་སྤྲོ་བར་བྱ། དགེ་སློང་གི་དགེ་འདུན་ལ་ཡང་རིམ་གྲོ་ཡོངས་སུ་
སྤྱད་པའི་ཕྱིར་སེམས་སྦྱང་བར་བྱའོ། །མཽད་གལ་གྱི་བུ་ངས་སྙོམས་པར་འཇུག་པ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་སྙོམས་པར་འཇུག་པ་ཤེས་པ་འགོག་པར་འགྱུར་བའི་ལམ་ཤེས་པ་ཐོབ་ནས་སེམས་ཅན་རྣམས་ལ་
ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས་དེའི་ཕ་རོལ་གྱི་ཡང་ཆེས་ཕ་རོལ་ན། རྒྱལ་པོ་ཀུན་ནས་མཛེས་པ་ཞེས་བྱ་བ་ཆོས་ཀྱི་རྒྱལ་པོ་ཆོས་དང་ལྡན་པ་ནས་རྒྱ་ཆེར་
སྦྱར་ཏེ། ཤིན་ཏུ་གནས་པའི་བར་ཞིག་བྱུང་ངོ་། །དེ་འདས་པའི་དུས་ན་དེ་བཞིན་གཤེགས་པ་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་པ། བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་ཐེག་པ་ལ་ཡང་དག་པར་རབ་ཏུ་གནས་པ་དེ་འབའ་ཞིག་ཁོ་ནས་གླིང་བཞི་པའི་འཇིག་

རྟེན་གྱི་ཁམས་ཀྱི་བར་ལ་དབང་ཕྱུག་གིས་དབང་བྱེད་པ་དང་ལྡན་པ་སྐྱོན་ཐམས་ཅད་དང་བྲལ་ཞིང་ཡོན་ཏན་ཐམས་ཅད་དང་ལྡན་ནོ། །དེ་ནས་རྒྱལ་པོ་ཀུན་ནས་མཛེས་པ་དེ་འདི་སྙམ་དུ་སེམས་ཏེ། སྔོན་གྱི་འཁོར་ལོས་སྒྱུར་བ་རྣམས་ཀྱི་སྒྲུབ་པ་ཅི་འདྲ་བ་ཞིག་ཏུ་གྱུར།
བདག་སྒྲུབ་པ་གང་གིས་རྒྱལ་སྲིད་བྱ། བདག་འཁོར་ལོས་སྒྱུར་བའི་སྒྲུབ་པའི་ཆོས་སྤྱོད་པས་མི་འདའ་བར་བྱ། བདག་ཆོས་སྤྱད་པས་སྡིག་པའི་འགྲོ་བར་འགྱུར་བ་ནས་བདག་དབང་ཕྱུག་དང་ལྡན་པ་ལས་ངན་སོང་གི་སར་འཇུག་པའི་བར་དུ་མི་འགྲོ་བ་དག་རྒྱལ་པོའི་མིང་དོན་མེད་པར་མི་འགྱུར་
བར་བྱ་སྙམ་ནས། སྐྱོན་དེ་དག་ཡང་དག་པར་མཐོང་སྟེ། བློན་པོ་རྣམས་ལ་སྨྲས་པ། འདི་ལྟར་གྲོང་གི་གཙོ་བོ་ཁྱེད་ཅག་ངའི་བྲན་ཡིན་ཏེ། རྒྱལ་སྲིད་སོ་སོར་སྲུང་བ་ཆོས་ཀྱི་རྒྱུད་སྟོན་པ་ཁྱེད་ལ་སྔོན་གྱི་རྒྱལ་པོས་བསྒྲུབས་པ་གང་གིས་རྒྱལ་སྲིད་རྗེས་སུ་བསྟན་པ་དང་། ཡོངས་སུ་སྦྱངས་
པ་དང་སོ་སོར་བསྲུངས་པ་ང་འདྲི་ཡིས་ཇི་ལྟར་བདག་རྒྱལ་པོའི་སྒྲུབ་པ་རྒྱལ་སྲིད་མི་ཟད་པ་དང་། མི་ཉམས་པ་དང་། མི་འདའ་བ་དང་། རྗེས་སུ་སྟོན་པ་དེ་ཁྱོད་ཀྱིས་བདག་ལ་སྟོན་ཅིག་དེ་དག་གིས་འདི་སྐད་སྨྲས་སོ། །ལྷ་བདག་ཅག་གིས་དེའི་དོན་མ་འཚལ་ཏོ། །ལྷའི་ཉེན་ཀོར་ན་དྲང་སྲོང་མངོན་པར་ཤེས་པ་
ཁྱིམ་གྱི་གནས་ནས་མངོན་པར་བྱུང་བ། ཆོས་ལ་མཁས་པ། བསྟན་བཅོས་ལ་མཁས་པ་རབ་ཏུ་དགའ་བའི་མིག་ཅན་ཞིག་མཆིས་ཏེ། དེ་བསྒྲུབས་པ་གང་གིས་སྔོན་གྱི་རྒྱལ་པོའི་རྒྱལ་སྲིད་རྗེས་སུ་བསྟན་པ་དང་། ཡོངས་སུ་སྦྱངས་པ་དང་སོ་སོར་བསྲུངས་པ་འཚལ་ཏེ། ལྷ་དེ་དག་བསྡུར་གསོལ་
བསྡུས་ནས་འཁོར་ལོས་སྒྱུར་བའི་སྒྲུབ་པ་སྔོན་གྱི་རབས་ཡོངས་སུ་སྨྲར་གསོལ། འོན་ཏང་འཁོར་ལོས་སྒྱུར་བའི་རྒྱུད་སྔོན་གྱི་རབས་འབྱུང་བར་འགྱུར་ལགས་སོ། །དེ་ནས་རྒྱལ་པོ་ཀུན་ནས་མཛེས་པ་བློན་པོ་དེ་དག་གི་ལྟར་མཉན་ནས་གང་འདི་དང་ཉེ་བ་ན་སྔོན་གྱི་མི་ཡུལ་གྱི་ཁྱིམ་གྱི་གནས་ནས་མངོན་པར་
བྱུང་བ་དེ་དག་བཀུར་སྟི་ཆེན་པོས་རྒྱལ་པོའི་ཕོ་བྲང་རྒྱ་མཚོ་ཅན་དུ་སྡུད་པར་བྱེད་དོ། །རྒྱལ་པོའི་ཕོ་བྲང་རྒྱ་མཚོ་ཅན་དེ་ཡང་འབྱོར་པ་དང་། རྒྱས་པ་དང་། དགེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་ཞིང་། དེར་དེའི་སྐྱེ་བོ་དག་ཀུན་ཏུ་འདུས་པར་གྱུར་ཏོ། །དེའི་ཚེ་རྒྱལ་པོ་ཀུན་

ནས་མཛེས་པ་དེའི་དྲུང་དུ་དྲང་སྲོང་ཁྲི་ཕྲག་བརྒྱད་ཅུ་ཕལ་ཆེར་ལྔ་མངོན་པར་ཤེས་ཤིང་དགེ་བའི་རྩ་བ་ཡུན་རིང་དུ་སྤྱད་པ། སྐྱེ་དགུ་ལ་ཕན་པར་འདོད་པ་དག་ཅིག་བྱུང་ངོ་། །རྒྱལ་པོ་ཀུན་ནས་མཛེས་པ་དེ་སྲོག་ཆགས་ཁྲི་རྣམས་དང་ལྷན་ཅིག་དཔུང་གི་ཚོགས་དང་། གྲོང་རྡལ་གྱི་ཡུལ་མི་
དང་ལྷན་ཅིག་ཏུ་གུས་པ་ཆེན་པོས་དེ་དག་དཔག་ཚད་དུ་བསུའོ། །གང་རྒྱལ་པོ་དེའི་ཡོངས་སུ་སྤྱོད་པའི་བཙུན་མོ་དང་། འཁོར་གྱི་སླས་བུད་མེད་ཁྲི་ཕྲག་བརྒྱད་ཅུ་པོ་དེ་དག་དང་ལྷན་ཅིག་ཏུ་དྲང་སྲོང་དེ་དག་ལ་སྟོན་པའི་འདུ་ཤེས་བསྐྱེད་ནས། དྲང་སྲོང་དེ་དག་ག་ལ་བ་དེར་སོང་སྟེ་ཕྱིན་ནས། དྲང་
སྲོང་དེ་དག་གི་རྐང་པ་ལ་མགོ་བོས་ཕྱག་འཚལ་ཏེ། དྲང་སྲོང་དེ་དག་དང་ཡང་དག་པར་སྨྲ་བ་ལ་ཞུགས་སོ། །དེའི་ཚེ་འཁོར་ལོས་སྒྱུར་བའི་བསྒྲུབ་པའི་དོན་དུ་སྔོན་གྱི་རབས་འདོན་པའི་མི་སྲོག་ཆགས་སྟོང་ཕྲག་བརྒྱད་ཅུ་ཙམ་འདུས་སོ། །དེ་དག་ཐམས་ཅད་ལ་རྒྱལ་པོ་ཀུན་ནས་མཛེས་པ་དེ་ཞེས་
ཆེན་པོར་བྱེད་དོ། །དྲང་སྲོང་དེ་དག་དང་སྔོན་གྱི་རབས་འདོན་པའི་མི་དེ་དག་འཁོར་ལོས་སྒྱུར་བ་དེའི་སྒྲུབ་པའི་སྔོན་གྱི་རབས་ཀྱི་ངོ་བོ་དེ་དག་སྨྲ་བར་བྱེད་དེ། འཁོར་ལོས་སྒྱུར་བའི་སྒྲུབ་པའི་སྔོན་གྱི་རབས་གང་གིས་རྒྱལ་སྲིད་བྱས་པ་དང་། རྗེས་སུ་བསྐྱངས་པ་དང་། རྗེས་སུ་བསྟན་པ་སྨྲས་སོ། །དེ་
དྲང་སྲོང་དེ་དག་དང་སྔོན་གྱི་རབས་འདོན་པ་དེ་དག་གི་ལྟར་མཉན་ནས་འཁོར་ལོས་སྒྱུར་བའི་སྒྲུབ་པ་འཕགས་པས་རྒྱལ་སྲིད་བྱེད་དོ། །སེམས་ཅན་ཐམས་ཅད་ལ་ཡང་བྱམས་པའི་སེམས་ཉེ་བར་བཞག་སྟེ། དེས་དེ་དག་རྒྱལ་སྲིད་ཀྱི་ཆོས་ཀྱི་རྗེས་སུ་བསྟན་ཅིང་ཚངས་པའི་གནས་བཞི་བསྐྱེད་དོ། །སྐྱེ་བོ་
ཐམས་ཅད་ལ་ཡང་ཚངས་པའི་གནས་བཞི་བསྐྱེད་དུ་བཙུད་དེ་དེ་དག་ཐམས་ཅད་ཀྱང་ཚངས་པའི་འཇིག་རྟེན་དུ་སྐྱེས་ཏེ། དེ་ན་སྙོམས་པར་འཇུག་པ་ཤེས་པ་འགོག་པར་འགྱུར་བའི་ལམ་ཤིན་ཏུ་བསྒོམས་ཏེ། ཚངས་པའི་འཇིག་རྟེན་དེ་ནས་ཤི་ནས། ཀུན་ནས་མཛེས་པ་དེ་དང་། ཐམས་ཅད་དང་ལྡན་
པའི་སྐྱེ་བོ་དག་དགེ་བའི་རྩ་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ནས་ཡོངས་སུ་མྱ་ངན་ལས་འདས་ཏེ། བྱང་ཆུབ་སེམས་དཔའ་ཀུན་ནས་མཛེས་པ་དེ་ནི་མ་གཏོགས་སོ། །མཽད་གལ་

གྱི་བུ་དེ་ཇི་སྙམ་དུ་སེམས། རྒྱལ་པོ་ཀུན་ནས་མཛེས་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན། རྒྱལ་པོ་ཀུན་ནས་མཛེས་པ་ཞེས་བྱ་བར་གྱུར་ཏོ། །དེའི་ཚེ་ཡང་ངས་ཆོས་ཀྱི་རྒྱལ་སྲིད་བྱས་ཤིང་ཚངས་པའི་འཇིག་རྟེན་
བསྐྱེད། ད་ལྟར་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སྙོམས་པར་འཇུག་པ་འགོག་པར་འགྱུར་བའི་ལམ་རབ་ཏུ་བསྟན་ཏེ། སྐྱེ་བོའི་ཚོགས་མང་པོ་དག་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་
བཟླས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དང་། སེམས་ཅན་རྣམས་ལ་སྟོན་པར་འདོད་པས་ཡོངས་སུ་འདྲི་བའི་རང་བཞིན་ཅན་དུ་བྱའོ། །མཽད་གལ་གྱི་བུ་ངས་ཀུན་ནས་ཉོན་མོངས་པ་ཤེས་
པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་ཀུན་ནས་ཉོན་མོངས་པ་ཤེས་པ་མངོན་པར་རྫོགས་པར་ཤེས་ནས་སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས་དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་
བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས་དེ་བཞིན་དུ་སྦྱར་ཏེ། དེའི་ཕ་རོལ་གྱི་ཡང་ཆེས་ཕ་རོལ་ན་དྲང་སྲོང་དབང་པོ་བསྡམས་པ་ཞེས་བྱ་བ་འདོད་ཆགས་དང་མ་བྲལ་བ། སོ་སོར་བརྟགས་པ་དེས་དབང་པོ་འཛིན་པ་ཞིག་བྱུང་སྟེ། བསྒོམས་པའི་སྟོབས་ཀྱིས་ནི་མ་ཡིན་ནོ། །དེ་བདག་
གི་དབང་པོ་ཡུལ་རྣམས་ལ་ཀུན་ནས་ཉོན་མི་མོངས་པར་བྱ་བའི་ཕྱིར་དགོན་པ་ནས་དགོན་པ་ཉིད་དུ་ཚལ་ནས་ཚལ་ཏུ་ནགས་ནས་ནགས་སུ་འགྲོའོ། །དེ་ཡུན་རིང་ཞིག་འདས་ནས་རེ་ཤིག་ཅིག་ན་བུད་མེད་ཅིག་མཐོང་བར་གྱུར་ཏོ། །དེའི་དབང་པོ་དེ་དག་སྡོམ་པས་གནས་ཤིང་མ་བསྒོམས་པས་བུད་མེད་དེ་མཐོང་
མ་ཐག་ཏུ་འདོད་པའི་འདོད་ཆགས་ཀྱིས་ཀུན་ནས་ཉོན་མོངས་པར་གྱུར་ཏོ། །དེའི་འདོད་པའི་འདོད་ཆགས་སྐྱེས་པ་དེའི་ཚེ་དྲན་པ་རྙེད་དེ་དེ་འདི་སྙམ་དུ་སེམས་སོ། །སོ་སོར་རྟོག་པ་འདིས་བདག་གི་དབང་པོ་བཟུང་གི །ཤེས་པས་སོ་སོར་བརྟགས་པས་ནི་མ་ཡིན་ནོ་སྙམ་མོ། །དེ་འདི་སྙམ་དུ་སེམས་ཏེ་

ཤེས་པ་གང་གིས་དབང་པོ་སོ་སོར་བསྲུངས་ཏེ། ཀུན་ནས་ཉོན་མོངས་པར་མི་འགྱུར་བའི་འཕགས་པའི་ཡེ་ཤེས་བཙལ་བར་བྱའོ་སྙམ་མོ། །དེ་དེའི་ཚེ་དེ་ལྟར་སོ་སོར་རྟོག་པ་ན་བར་དེར་བདག་ཉིད་ཀྱི་ཤེས་པ་སྐྱེས་ཏེ། འདི་ལྟར་སྐྱེས་པའི་ཆོས་ཀུན་ནས་ཉོན་མོངས་པ་ཤེས་པར་བྱ་བ་དེ་དག་གང་ཡིན། གང་
ལ་བུད་མེད་ཀྱི་ཆོས་ཀུན་ནས་ཉོན་མོངས་པ་ཤེས་པར་བྱ་བ་དེ་དག་གང་ཡིན། དེ་དེ་ལྟར་སོ་སོར་རྟོག་པ་ན་ཀུན་ནས་ཉོན་མོངས་པའི་ཆོས་དེ་མི་དམིགས་ཤིང་། གང་ལ་ཀུན་ནས་ཉོན་མོངས་པའི་ཆོས་དེ་ཡང་མི་དམིགས་སོ། །དེ་དེའི་ཚེ་འདོད་པ་རྣམས་ལ་འདོད་ཆགས་དང་བྲལ་བ་རྗེས་སུ་ཐོབ་བོ། །
དེས་ཀུན་ནས་ཉོན་མོངས་པ་ཤེས་པ་འདི་ལ་ཀུན་ནས་ཉོན་མོངས་པའི་ཆོས་གང་ཡང་མེད་ཅིང་། འདིར་གང་ལ་ཡང་ཀུན་ནས་ཉོན་མོངས་པའི་ཆོས་གང་ཡང་མེད་པར་འཕགས་པའི་ཡེ་ཤེས་འདིས་ཐེ་ཙོམ་མེད་པ་རྗེས་སུ་ཐོབ་བོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དྲང་སྲོང་དབང་པོ་
བསྡམས་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དྲང་སྲོང་དབང་པོ་བསྡམས་པ་ཞེས་བྱ་བར་གྱུར་ཏོ། །ཀུན་ནས་ཉོན་མོངས་པ་ཡོངས་སུ་ཤེས་པ་དེས། ང་ད་ལྟར་བྱུང་བའི་ཉོན་མོངས་པ་དམིགས་པ་རྣམས་ལ་ཀུན་
ནས་ཉོན་མོངས་པ་མེད་དོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་འཕགས་པའི་ཡེ་ཤེས་ཀྱིས་ཀུན་ནས་ཉོན་མོངས་པ་ཡོངས་སུ་ཤེས་པར་བྱའོ། །མཽད་གལ་གྱི་བུ་ངས་ཀུན་ནས་ཉོན་མོངས་པ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་
སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་རྣམས་ལ་ཀུན་ནས་ཉོན་མོངས་པ་ཤེས་པ་ཀུན་འབྱུང་བ་ཤེས་པ་ཇི་ལྟར་ཡང་དག་པར་རབ་ཏུ་བསྟན་པར་བྱ། སེམས་ཅན་རྣམས་གང་གིས་ཀུན་ནས་ཉོན་མོངས་པ་ཤེས་པ་ཀུན་
འབྱུང་བ་ཤེས་པ་ཐོབ་པར་འགྱུར་སྙམ་ནས། དགེ་བའི་རྩ་བ་རྒྱ་ཆེ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས་དེ་བཞིན་དུ་སྦྱར་ཏེ། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མི་ཤེས་

པ་སྟོན་པ་ཞེས་བྱ་བ་ནས། རྒྱ་ཆེར་སྦྱར་ཏེ་སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་འཁོར་བརྒྱ་ཕྲག་སྟོང་དུ་མ་དག་གིས་ཡོངས་སུ་བསྐོར་ཅིང་མདུན་དུ་བདར་བ་དེར་འདི་ལྟ་སྟེ། ཀུན་ནས་ཉོན་མོངས་པ་ཤེས་པ་ཀུན་འབྱུང་བ་ཤེས་པ་ལས་བརྩམས་
ནས་ཆོས་སྟོན་ཏོ། །དེའི་ཚེ་བྱང་ཆུབ་སེམས་དཔའ་ཟླ་བ་བས་ལྷག་པའི་འོད་ཅེས་བྱ་བ་སྙིང་རྗེ་ཅན་སེམས་ཅན་འདྲེན་པ་མེད་པ་རྣམས་ཀྱི་འདྲེན་པར་འགྱུར་བར་འདོད་པ་སྟོན་པ་དང་བྲལ་བ་རྣམས་ཀྱི་སྟོན་པར་འགྱུར་བར་འདོད་པ། མུན་པ་རྣམས་ལ་སྣང་བར་བྱེད་པར་འདོད་པ་མིག་ཕྱུང་བ་རྣམས་ལ་
མིག་སྐྱེད་པར་འདོད་པ། ལམ་རབ་ཏུ་ཉམས་པ་རྣམས་ལ་ལམ་ཡང་དག་པར་སྟོན་པར་འདོད་པ། འཁོར་བར་རབ་ཏུ་ཞུགས་པ་རྣམས་ལ་འཁོར་བ་ལས་འདའ་བར་འདོད་པ། སྙིང་རྗེ་ཆེན་པོ་ཐོབ་པས་ལུས་ཡོངས་སུ་གཏོང་བ་ལ་ལུས་དང་སྲོག་ལ་མི་ལྟ་བ་ཞིག་འཁོར་དེ་ཉིད་དུ་འདུས་ཏེ་
འདུག་པར་གྱུར་ཏོ། །སེམས་ཅན་དག་གི་དོན་གྱི་ཕྱིར་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་དེ་བཞིན་གཤེགས་པ་མི་ཤེས་པ་སྟོན་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་
ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། སེམས་ཅན་སྙིང་པོ་དཔལ་ཆེ་གཟི་ཆེ་འོད་ཆ་ལྡན། །སེམས་ཅན་རྣམས་ལ་ཐུགས་བརྩེ་མགོན་པོ་ཐུགས་རྗེ་ཅན། །མཁས་པ་འཇིགས་མེད་སངས་རྒྱས་ཡེ་ཤེས་ཁྱོད་ལ་ཞུ། །སངས་རྒྱས་བྱང་ཆུབ་ཚོལ་བར་སྤྱད་མཆོག་སྤྱོད་པའི་ཚེ། །རྣམ་
འདྲེན་བྱང་ཆུབ་སེམས་དཔས་ལས་དགེ་ཅི་བགྱི་ན། །མཁས་པ་ཉོན་མོངས་ཀུན་འབྱུང་ཤེས་མཆོག་ཇི་ལྟར་འཐོབ། །མགོན་པོ་ཀུན་འབྱུང་མཁྱེན་པ་ཇི་ལྟར་བདག་ཐོས་འཚལ། །ལེགས་ཞུས་དེ་ནི་ཐུགས་རྗེ་བསྐྱེད་དེ་བདག་ལ་གསུངས། །སྟོན་པ་འཇིག་རྟེན་ཀུན་མཁྱེན་ཐོབ་པ་ཐུགས་རྗེ་ཅན།
དེ་ཡིས་རྟོག་ལམ་བཅད་དེ་དེ་ཉིད་མཁྱེན་པས་བསྟན། །ཀུན་ནས་ཉོན་མོངས་ཤེས་ལ་སོ་སོར་བགེད་པར་ལྡན། །ནད་པ་ལ་ནི་ཟས་སྐོམ་གོས་ཀྱིས་བགེད་བྱས་པ། །དགེ་བའི་ལས་དེས་བྱས་པ་བྱང་ཆུབ་ཡོངས་སུ་བསྔོ། །བློ་ལྡན་ཤེས་པ་དེས་ནི་ཉོན་མོངས་རྒྱུ་ཤེས་སོ། །མཽད་གལ་གྱི་བུ་དེ་ཇི་

སྙམ་དུ་སེམས། དེའི་ཚེ་དེའི་དུས་ན། བྱང་ཆུབ་སེམས་དཔའ་ཟླ་བ་ལས་ལྷག་པའི་འོད་དུ་གྱུར་པ་དེ་གཞན་ཡིན་པར་སེམས་ན། དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་ཟླ་བ་ལས་ལྷག་པའི་འོད་ཅེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་
དགེ་བའི་རྩ་བ་མངོན་པར་འདུས་བྱས་ཏེ། བྱང་ཆུབ་སེམས་དཔའ་རྣམས་ལ་སོ་སོར་བགེད་པ་བྱས་ནས་དབྱེ་བ་མེད་པར་བྱང་ཆུབ་ཏུ་ཡོངས་སུ་བསྔོ་བར་བྱའོ། །མཽད་གལ་གྱི་བུ་ངས་ཀུན་ནས་ཉོན་མོངས་པ་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་
བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས་དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་
དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། རྒྱལ་པོ་བློ་གྲོས་དག་པ་ཞེས་བྱ་བ་ཞིག་བྱུང་ངོ་། །དེའི་བློན་པོ་རྟོག་པ་ཞི་བ་ཞེས་བྱ་བ་མཇལ་དུ་མ་དང་ཐབ་མོ་ལ་དབང་བ་ཞིག་བྱུང་ངོ་། །དེ་བྱ་བ་ཐམས་ཅད་ཀྱི་འཇིག་པ་རྟོག་སྟེ། དེ་ཡང་ཚིག་བརྗོད་པ་ཙམ་གྱིས་ཕ་
རོལ་གྱི་བྱ་བ་འཇིག་པར་བྱེད། གང་སེམས་བསྐྱེད་པ་དེ་ཚིག་བརྗོད་ཅིང་ཚིག་སྨྲས་པས། དེའི་བྱ་བ་ངེས་པར་བྱེད་དེ་འདི་ལྟ་སྟེ་དཔེར་ན་མི་དག་གང་བསམས་པ་དེ་སྨྲའོ། །སྐྱེས་བུ་མཁས་པ་དག་འདི་ནས་དེ་ཉིད་ལུང་སྟོན་ཅིང་འཆད་དོ། །དེ་བཞིན་དུ་རྒྱལ་པོའི་བློན་པོ་རྟོག་པ་ཞི་བ་དེ་ཚིག་ཐམས་ཅད་
འགོག་པར་རྟོག་གོ། །དེ་ནས་རྒྱལ་པོ་བློ་གྲོས་དག་པ་དེའི་བྱ་བ་གང་བྱུང་བ་དེ་དག་ཐམས་ཅད་བློན་པོ་རྟོག་པ་ཞི་བ་ལ་འཆོལ་ལོ། །དེ་དེ་དག་བྱེད་དེ་བྱ་བ་གཞན་དུ་འགྱུར་བ་ནི་མེད་དོ། །དེ་ལྟར་རྒྱལ་པོ་དེའི་བློན་པོ་རྒྱལ་པོ་བློ་གྲོས་རྣམ་དག་དེའི་ཤིན་ཏུ་ངེས་པའི་ཕྱིར་གནོད་པ་མེད་པ་ཞིག་བྱུང་བར་གྱུར་
ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བློན་པོ་རྟོག་པ་ཞི་བ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན། དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་རྒྱལ་པོའི་བློན་པོ་རྟོག་པ་ཞི་བ་ཞེས་བྱ་བར་གྱུར་ཏོ། །ངས་རྒྱལ་སྲིད་འཇིག་པ་དེ་བྱ་བ་

ཡོངས་སུ་བརྟགས་པས་ཤིན་ཏུ་འཕེལ་བར་བྱས་ཤིང་ཡོངས་སུ་བསྐྱངས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་སྲིད་པ་འཇིག་པའི་མཐའ་ལས་ཀུན་འབྱུང་བ་ཐམས་ཅད་ཀྱི་ཆོས་གང་ཡིན་པ་དེ་ཐམས་ཅད་ནི་འགོག་པའི་ཆོས་ཅན་ནོ་ཞེས་ཡོངས་སུ་བརྟག་
པར་བྱའོ། །མཽད་གལ་གྱི་བུ་ངས་ཀུན་ནས་ཉོན་མོངས་པ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀུན་ནས་ཉོན་མོངས་པ་ཤེས་པ་
འགོག་པར་འགྱུར་བའི་ལམ་ཤེས་པ་སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་
ཆེས་ཕ་རོལ་ན། དེ་བཞིན་གཤེགས་པ་བློ་གྲོས་དཀར་བ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་བློ་གྲོས་དཀར་བ་དེའི་སྐུ་ཚེའི་ཚད་ལོ་བྱེ་བ་ཕྲག་དགུ་བཅུར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་བློ་གྲོས་དཀར་བ་དེའི་ཉན་ཐོས་འདུས་པ་དང་པོ་ནི་ཁྲི་ཕྲག་བརྒྱད་ཅུ་བྱུང་ངོ་། །ཉན་ཐོས་འདུས་པ་གཉིས་པ་ནི་དགྲ་བཅོམ་པ་ཁྲི་བྱུང་ངོ་། །ཉན་ཐོས་འདུས་པ་གསུམ་པ་ནི་ཉན་ཐོས་འབུམ་ཕྲག་དྲུག་ཅུ་རྩ་བརྒྱད་བྱུང་ངོ་། །དེའི་ཚེ་རྒྱལ་པོ་མཁས་པའི་ཚུལ་གྱི་བུ་
གཞོན་ནུ་བྱང་ཆུབ་སེམས་དཔའ་རི་བོང་ཚིག་ཅེས་བྱ་བ་བལྟ་ན་སྡུག་པ་བསྐལ་པ་གྲངས་མེད་པ་བདུན་ཅུ་རྩ་བདུན་དུ་དགེ་བའི་རྩ་བ་བསྐྱེད་པ་ཞིག་བྱུང་ངོ་། །དེ་བཞིན་གཤེགས་པ་བློ་གྲོས་དཀར་བ་དེས་ས་ལ་ཞབས་བཞག་པ་ན། ས་ཆེན་པོ་འདི་རྣམ་པར་སྒྲ་འབྱིན་ལ། ཞབས་ཀྱི་འོག་ཏུ་གསེར་
གྱི་པད་མ་འདབ་མ་སྟོང་ཡོད་པ་འབྱུང་ཞིང་བྱུང་མ་ཐག་ཏུ་ནུབ་པར་གྱུར་ཏོ། །དེའི་ཚེ་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་སངས་རྒྱས་ཀྱི་འོད་ཀྱིས་རྒྱས་པར་གྱུར་ཏོ། །སངས་རྒྱས་ཀྱི་ཞིང་དེར་ཐམས་ཅད་དུ་ཉིན་གཅིག་ལ་སྤོས་ཆུའི་ཆར་ལན་གསུམ་མངོན་པར་འབབ་བོ། །

རླུང་གང་དག་ལྡང་བ་དེ་དག་ཐམས་ཅད་ཀྱང་ལྷའི་སྤོས་དང་ལྡན་པ་ལྡང་ངོ་། །སངས་རྒྱས་ཀྱི་ཞིང་དེར་སྒྲ་གང་དག་འབྱུང་བ་དེ་དག་ཐམས་ཅད་མི་རྟག་པའི་སྒྲར་གོ་བར་བྱེད། སྡུག་བསྔལ་གྱི་སྒྲ་དང་། བདག་མེད་པའི་སྒྲར་གོ་བར་བྱེད་ཞི་བའི་སྒྲ་དང་། བདུད་རྩིའི་སྒྲར་གོ་བར་བྱེད་དོ། །
སེམས་ཅན་དེ་དག་ཐམས་ཅད་སྒྲ་དེ་ལྟ་བུ་ཐོས་སོ། །སེམས་ཅན་དེ་དག་ཐམས་ཅད་ཉལ་བ་ན་སངས་རྒྱས་ཀྱི་སྐུའི་ཞལ་ཉེ་བར་སྟོན་པར་མཛད་དེ། བྱང་ཆུབ་སེམས་དཔའ་རི་བོང་ཚིག་གི་རྨི་ལམ་དུ་དེ་བཞིན་གཤེགས་པ་བློ་གྲོས་དཀར་བ་འཇིག་རྟེན་དུ་བྱུང་བར་མཐོང་ངོ་དེ་མཐོང་མ་ཐག་ཏུ་
དེ་བཞིན་གཤེགས་པ་དེ་ལ་གཞལ་དུ་མེད་པའི་དགའ་བ་སྐྱེས་ཏེ། དེ་དགའ་བ་སྐྱེས་ནས་གྲོང་མི་བསྡུས་སོ། །བསྡུས་ནས་སྨྲས་པ། གྲོགས་པོ་དག་ཤེས་པར་གྱིས་ཤིག །དེ་བཞིན་གཤེགས་པ་རིག་པ་དང་ཞབས་སུ་ལྡན་པ་བློ་གྲོས་དཀར་བ་ཞེས་བྱ་བ་ནས་རྒྱ་ཆེར་སྦྱར་ཏེ། སངས་རྒྱས་
བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་རྒྱ་ཆེར་ཀུན་ནས་ཉོན་མོངས་པ་རབ་ཏུ་སྟོན་པར་མཛད་དེ། ཀུན་ནས་ཉོན་མོངས་པ་འདོད་ཆགས་དང་། ཀུན་ནས་ཉོན་མོངས་པ་ཞེ་སྡང་དང་། ཀུན་ནས་ཉོན་མོངས་པ་གཏི་མུག་དང་། ཀུན་ནས་ཉོན་མོངས་པ་ཉེས་པར་སྤྱད་པ་དང་། ཉོན་མོངས་
པ་དེ་དག་གི་རྒྱུ་དང་བཅས་པ་སྟོན་པར་མཛད། ཀུན་ནས་ཉོན་མོངས་པ་དེ་དག་གི་འཇིག་པ་ཡང་དག་པར་རབ་ཏུ་སྟོན་པར་མཛད། ཀུན་ནས་ཉོན་མོངས་པ་དེ་དག་གི་ངེས་པར་འབྱུང་བ་ཡང་ཡང་དག་པར་རབ་ཏུ་སྟོན་པར་མཛད་དོ། །དེ་བཞིན་གཤེགས་པ་བློ་གྲོས་དཀར་བ་དེ་ག་ལ་བ་དེར་ཁྱོད་དང་འདོང་
བར་བྱའོ། །དེ་ནས་བྱང་ཆུབ་སེམས་དཔའ་རི་བོང་ཚིག་སྲོག་ཆགས་བྱེ་བ་ཁྲག་ཁྲིག་ཁྲི་ཕྲག་དཔག་ཏུ་མེད་པ་དང་། ལྷན་ཅིག་ཏུ་དེ་བཞིན་གཤེགས་པ་བློ་གྲོས་དཀར་བ་དེ་ག་ལ་བ་དེར་དོང་ངོ་། །གཞོན་ནུ་རི་བོང་ཚིག་གིས་བཅོམ་ལྡན་འདས་དེ་བཞིན་གཤེགས་པ་བློ་གྲོས་དཀར་བ་དེ་རྒྱང་རིང་པོ་ཉིད་
ནས་མཛེས་ཤིང་སྡུག་པ། དབང་པོ་ཞི་བ་ཐུགས་ཞི་བ། དུལ་བ་དང་། ཞི་གནས་མཆོག་བརྙེས་པ་དུལ་བ་དང་། ཞི་གནས་མཆོག་བརྙེས་པ་སྦས་པ་གླང་པོ་དབང་པོ་ཐུལ་བ། མཚོ་ལྟར་དང་བ། །དང་ཞིང་རྙོག་པ་མེད་པ། གསེར་གྱི་མཆོད་སྡོང་ལྟ་བུ། རྒྱ་མཚོ་ལྟར་རིན་པོ་ཆེས་ཡོངས་

སུ་གང་བ། དབང་པོ་ལྟར་ལྷས་ཡོངས་སུ་བསྐོར་བ། ཚངས་པ་ལྟར་ཐུགས་ཞི་བར་མཐོང་ངོ་། །མཐོང་ནས་བཅོམ་ལྡན་འདས་དེ་ལ་དད་པ་ཤིན་ཏུ་བསྐྱེད་དེ། སེམས་བསྐྱེད་པ་བདག་གིས་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་སང་སྤྱན་དྲང་ངོ་སྙམ་ནས།
དེ་བཞིན་གཤེགས་པ་བློ་གྲོས་དཀར་བ་དེ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་བློ་གྲོས་དཀར་བ་དེའི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས། གཞོན་ནུ་རི་བོང་ཚིག་གིས་བཅོམ་ལྡན་འདས་དེ་བཞིན་
གཤེགས་པ་བློ་གྲོས་དཀར་བ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བར་དགོངས་ཏེ། དགེ་སློང་གི་དགེ་འདུན་དང་ཐབས་ཅིག་ཏུ། སང་གདུགས་ཚོད་ལ་གཤེགས་པར་ཅི་གནང་། བཅོམ་ལྡན་འདས་དེ་བཞིན་གཤེགས་པ་བློ་གྲོས་དཀར་བ་
དེས་གཞོན་ནུ་རི་བོང་ཚིག་དེ་ལ་ཐུགས་བརྩེ་བར་དགོངས་ནས་གནང་ངོ་། །དེ་ནས་གཞོན་ནུ་རི་བོང་ཚིག་བཅོམ་ལྡན་འདས་དེ་བཞིན་གཤེགས་པ་བློ་གྲོས་དཀར་བ་དེ་འཛུམ་པ་མཛད་པས་གནང་བར་རིག་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བདག་གི་ཁྱིམ་ག་ལ་
བ་དེར་སོང་སྟེ་ཕྱིན་ནས། དེའི་མཚན་མོ་བཟའ་བ་དང་། བཅའ་བ་དང་། མྱང་བ་དང་། ཞིམ་པོ་གྱ་ནོམ་པ་རབ་ཏུ་མང་པོ་དག་མངོན་པར་འདུས་བྱས་སོ། །དགེ་སློང་རེ་རེ་ལ་ཡང་རས་བཅོས་བུ་སྟོང་ཕྲག་བརྒྱད་བརྒྱད་བསྡོགས་སོ། །དེ་མཚན་མོ་དེ་འདས་ནས་བཅོམ་ལྡན་འདས་ལ་
དུས་ལ་བབ་བོ་ཞེས་གསོལ་ཏེ། བཅོམ་ལྡན་འདས་གཞོན་ནུ་རི་བོང་ཚིག་གི་དུས་ལ་བབ་ལགས་སོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་གཞོན་ནུ་རི་བོང་ཚིག་གི་ཁྱིམ་དུ་གཤེགས་ནས་གདན་བཤམས་པ་དེ་ལ་བཞུགས་སོ། །དེ་ནས་གཞོན་ནུ་རི་བོང་ཚིག་
གིས་བཅོམ་ལྡན་འདས་དེ་བཞིན་གཤེགས་པ་བློ་གྲོས་དཀར་བ་དེ་དགེ་སློང་གི་དགེ་འདུན་དང་བཅས་པ་གདན་ལ་བཞུགས་པར་རིག་ནས། བཟའ་བ་དང་། བཅའ་བ་དང་། མྱང་བ་ཞིམ་པོ་མང་པོས་ཡང་དག་པར་བྲིམས་ཤིང་ཡང་དག་པར་ཚིམ་པར་བྱས་སོ། །དེ་ནས་བཅོམ་ལྡན་འདས་

དེ་བཞིན་གཤེགས་པ་བློ་གྲོས་དཀར་བས་ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་པས་ཟས་ཀྱི་སྣོད་གཅིག་ལས་སངས་རྒྱས་ལ་སོགས་པ་དགེ་སློང་གི་དགེ་འདུན་དང་བཅས་པ་ཐམས་ཅད་ཡང་དག་པར་ཚིམ་པར་གྱུར་ཏོ། །
དེ་ནས་གཞོན་ནུ་རི་བོང་ཚིག་གིས་རྫུ་འཕྲུལ་གྱི་ཆོ་འཕྲུལ་དེ་ལྟ་བུ་དག་མཐོང་ནས། ཀྱེ་མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། རྫུ་འཕྲུལ་གྱི་ཆོ་འཕྲུལ་འདི་ལྟ་བུས་སེམས་ཅན་གདུལ་བར་གྱུར་ཅིག་ཅེས་སྨོན་ལམ་བཏབ་བོ། །དེ་
ནས་དེ་བཞིན་གཤེགས་པ་བློ་གྲོས་དཀར་བ་དེས་གཞོན་ནུ་རི་བོང་ཚིག་གིས་འདི་ལྟ་བུའི་སེམས་བསྐྱེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དེ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་དགེ་བའི་རྩ་བའི་ཤུགས་ཀྱིས་
ཏ་ལ་བདུན་སྲིད་ཙམ་དུ་ནམ་མཁའ་ལ་མངོན་པར་འཕགས་ནས་དེ་བཞིན་གཤེགས་པ་བློ་གྲོས་དཀར་བ་དེ་ལ་ཚིགས་སུ་བཅད་དེ་གསོལ་པ། བདེ་གཤེགས་མཁས་མཆོག་ཡེ་ཤེས་དམ་པ་དཔག་ཏུ་མེད། །གང་གིས་མགོན་པོ་མཐོང་སྟེ་བདག་གིས་དགེ་བ་བགྱིས། །མི་
མཆོག་དཔག་ཏུ་མེད་ལ་འདི་ལྟར་བསྟོད་པ་ནི། །ཡོན་ཏན་མཆོག་རབ་མངའ་བ་ཁྱོད་འདྲ་འཇིག་རྟེན་མེད། །འདི་ལྟར་བདག་ཀྱང་ཡོན་ཏན་དཔག་ཏུ་མེད་གྱུར་ཅིག །འགྲོ་བ་ཀུན་གྱི་སྡུག་བསྔལ་ཐར་བགྱིད་འདྲེན་པ་དང་། །ལམ་ཆེན་ཡན་ལག་བརྒྱད་དང་ལྡན་པ་ཞི་བ་
ཡིས། །སེམས་ཅན་སྡུག་བསྔལ་ལས་འདྲེན་མྱ་ངན་འདས་བགྱིད་ཤོག །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་གཞོན་ནུ་རི་བོང་ཚིག་ཅེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན། གཞོན་ནུ་རི་བོང་ཚིག་ཅེས་བྱ་
བར་གྱུར་ཏོ། །ངས་ཀུན་ནས་ཉོན་མོངས་པ་བསལ་ནས་དེ་བཞིན་གཤེགས་པ་བློ་གྲོས་དཀར་བ་དེ་དགེ་སློང་གི་དགེ་འདུན་དང་བཅས་པར་མཆོད་སྟོན་གསོལ། །ཚིགས་སུ་བཅད་པས་ཀྱང་བསྟོད་དོ། །མཽད་གལ་གྱི་བུ་དེ་ལྟ་བས་ན། བྱང་ཆུབ་སེམས་དཔས་ཀུན་ནས་ཉོན་མོངས་པ་ཐམས་

ཅད་བསལ་ནས་དེ་བཞིན་གཤེགས་པ་ལ་བཀུར་སྟི་བྱ། མཽད་གལ་གྱི་བུ་བྱང་ཆུབ་སེམས་དཔའ་གང་ཀུན་ནས་ཉོན་མོངས་པ་ཐམས་ཅད་སེལ་བ་དེ་ནི་གནོད་སེམས་ཅན་དུ་མི་འགྱུར་རོ། །མཽད་གལ་གྱི་བུ་ངས་རྣམ་པར་བྱང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་
དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་རྣམས་ལ་རྣམ་པར་བྱང་བ་ཤེས་པ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས་དགེ་བའི་རྩ་བ་རྣམ་པ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །
མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས་དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་དྲི་མེད་ཏོག་ཅེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་དྲི་མེད་ཏོག་དེའི་སྐུ་ཚེའི་ཚད་ལོ་བྱེ་བ་ཕྲག་
དྲུག་ཅུར་གྱུར་ཏོ། །དེ་བཞིན་གཤེགས་པ་དྲི་མེད་ཏོག་དེའི་ཉན་ཐོས་འདུས་པ་དང་པོ་ནི་ཉན་ཐོས་དྲུག་འབུམ་བྱུང་ངོ་། །ཉན་ཐོས་འདུས་པ་གཉིས་པ་ནི་ཉན་ཐོས་བརྒྱད་འབུམ་བྱུང་ངོ་། །ཉན་ཐོས་འདུས་པ་གསུམ་པ་ནི་ས་ཡ་ཐམ་པ་བྱུང་ངོ་། །བྱང་ཆུབ་སེམས་དཔའ་འདུས་པ་ནི་དེའི་
ཉིས་གྱུར་ཏོ། །དེའི་ཚེ་རྒྱལ་པོའི་བུ་ལྗོན་པ་ཞེས་བྱ་བ་སངས་རྒྱས་ཁྲི་ཕྲག་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་པ་སངས་རྒྱས་ཀྱི་ཞིང་ཡོངས་སུ་དག་པར་སྨོན་ལམ་གྱིས་ཡང་དག་པར་རབ་ཏུ་གནས་པ་སངས་རྒྱས་ཀྱི་ཞིང་བརྗོད་དུ་མེད་པར་སྨོན་ལམ་གྱིས་ཡང་དག་པར་རབ་ཏུ་གནས་པ་
ཞིག་བྱུང་ངོ་། །དེས་འདི་ལྟར་སྨོན་ལམ་བཏབ་སྟེ། གང་གི་ཚེ་སེམས་ཅན་དག་མགོན་མེད་པར་གྱུར་ཅིག་སྐྱབས་མེད་པ་དང་། དཔུང་གཉེན་མེད་པ་དང་། ངན་སོང་ལ་གཞོལ་བ་དང་། ངན་སོང་ལ་འབབ་པ་དང་། ངན་སོང་ལ་བབ་པར་གྱུར་པ་དེའི་ཚེ་བདག་གིས་བསྐྱེད་པ་འདི་སེམས་ཅན་
གནས་མེད་པ་དེ་རྣམས་ཀྱི་གནས་སུ་གྱུར་ཅིག །སེམས་ཅན་མགོན་མེད་པ་རྣམས་ཀྱི་མགོན་དུ་གྱུར་ཅིག །སེམས་ཅན་ངན་སོང་དུ་རབ་ཏུ་ལྷུང་བ་རྣམས་ཀྱི་འདྲེན་པར་གྱུར་ཅིག །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བུ་ལྗོན་པ་ཞེས་བྱ་བར་གྱུར་པ་དེ་གཞན་ཡིན་པར་

སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོའི་བུ་ལྗོན་པ་ཞེས་བྱ་བར་གྱུར་ཏོ། །ངས་དམ་པའི་ཆོས་རྣམ་པར་འཇིག་པའི་དུས་སུ་སེམས་ཅན་རྣམས་རྗེས་སུ་བསྲུང་བར་བྱ་བའི་ཕྱིར་དང་། སེམས་ཅན་ལ་ཕན་པར་བྱ་བའི་ཕྱིར་འདི་ལྟར་དགེ་བའི་རྩ་བ་རྒྱ་ཆེ་ཞིང་འདི་ལྟར་བདག་
ཉིད་ཆེ་བ་དེ་དག་ཡོངས་སུ་བསྔོས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སྙིང་རྗེ་ཆེན་པོ་དང་ཡོངས་སུ་ལྡན་པའི་སེམས་ཀྱིས་སེམས་ཅན་རྣམས་ཀྱི་དོན་དང་། སེམས་ཅན་སྡུག་བསྔལ་བ་རྣམས་ཡོངས་སུ་སྨིན་པར་བྱ་བའི་དོན་དུ་དགེ་བའི་རྩ་བ་ཡོངས་སུ་བསྔོ་བར་བྱ་ཞིང་། དགེ་
བའི་རྩ་བ་རྣམས་ལ་ཆགས་པར་ཡང་མི་བྱའོ། །མཽད་གལ་གྱི་བུ་ངས་རྣམ་པར་བྱང་བ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་བཞིན་དུ་སྦྱར་ཏེ། ཡང་དག་པར་རབ་ཏུ་བསྟན་པར་བྱ་བའི་བར་དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་
པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས་དེའི་ཕ་རོལ་གྱི་ཡང་ཆེས་ཕ་རོལ་ན། དེ་བཞིན་གཤེགས་པ་ཆོས་ཀྱི་སྤྲིན་གྱི་ཆར་གྱིས་རྒྱལ་སྲིད་ཤིན་ཏུ་ཚིམ་པ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་ཆོས་
ཀྱི་སྤྲིན་གྱི་ཆར་གྱིས་རྒྱལ་སྲིད་ཤིན་ཏུ་ཚིམ་པ་དེའི་སྐུ་ཚེའི་ཚད་ལོ་བྱེ་བར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་སྤྲིན་གྱི་ཆར་གྱིས་རྒྱལ་སྲིད་ཤིན་ཏུ་ཚིམ་པ་དེའི་ཉན་ཐོས་འདུས་པ་ཉན་ཐོས་ཁྲི་ཕྲག་དཔག་ཏུ་མེད་པ་དག་བྱུང་ངོ་། །རྣམ་གྲངས་འདིས་
ན་ཉན་ཐོས་འདུས་པ་དཔག་ཏུ་མེད་པ་དག་བྱུང་ངོ་། །བྱང་ཆུབ་སེམས་དཔའ་འདུས་པ་ཡང་དེ་བཞིན་ནོ། །ཉན་ཐོས་ཤེས་རབ་ཀྱིས་རྣམ་པར་མ་གྲོལ་བ་གང་ཡང་མེད་དེ། །ཐམས་ཅད་ཀྱང་རྣམ་པར་ཐར་པ་བརྒྱད་ལ་བསམ་གཏན་པ་ཤ་སྟག་གོ །བྱང་ཆུབ་སེམས་དཔའ་གང་སངས་རྒྱས་ཀྱི་ཞིང་ཚད་
མེད་པ་ཡོངས་སུ་དག་པ་བརྗོད་དུ་མེད་པར་ཡང་དག་པར་རབ་ཏུ་གནས་པར་མ་གྱུར་པ་གང་ཡང་མེད་དོ། །དེའི་ཚེ་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བྱང་ཆུབ་སེམས་དཔའ་གནས་མེད་པའི་སྒྲ་དབྱངས་ལ་ལྷག་པར་མོས་པ་ཡང་དག་པར་གནས་པ་ཞེས་བྱ་བ་ཞིག་བྱུང་ངོ་། །དེ་དེ་བཞིན་གཤེགས་པ་ཆོས་

ཀྱི་སྤྲིན་གྱི་ཆར་གྱིས་རྒྱལ་སྲིད་ཤིན་ཏུ་ཚིམ་པ་དེ་ལ་ཡིད་དུ་འཐད་དེ། ཡིད་དུ་མི་འཐད་པ་མ་ཡིན་པས་ལོ་བྱེ་བ་ཐམ་པར་རིམ་གྲོ་པ་བྱས་ཏེ་བཤད་པ་ཡང་འཛིན་ལ་རང་གི་དོན་ཀྱང་མི་གཏོང་ངོ་། །དེ་དེ་བཞིན་གཤེགས་པ་ཆོས་ཀྱི་སྤྲིན་གྱི་ཆར་གྱིས་རྒྱལ་སྲིད་ཤིན་ཏུ་ཚིམ་པ་དེས་བྱང་
ཆུབ་ཀྱི་སེམས་ཀྱིས་རིམ་གྲོ་པ་བྱེད་པ་འདི་དེ་བཞིན་གཤེགས་པར་འགྱུར་བར་ཡོངས་སུ་གཟིགས་ཀྱང་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་དེ་བྱང་ཆུབ་ཀྱི་སེམས་ལ་མངོན་པར་ཞེན་པའི་ཕྱིར་རོ། །མཽད་གལ་གྱི་བུ་དེ་ཇི་སྙམ་
དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་གནས་མེད་པའི་སྒྲ་དབྱངས་ལ་ལྷག་པར་མོས་པ་ཡང་དག་པར་རབ་ཏུ་གནས་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྱང་ཆུབ་སེམས་དཔའ་གནས་མེད་པའི་སྒྲ་དབྱངས་ལ་ལྷག་པར་
མོས་པ་ཡང་དག་པར་གནས་པ་ཞེས་བྱ་བར་གྱུར་ཏོ། །ཡང་དག་པའི་བྱང་ཆུབ་ཀྱི་སེམས་ཀྱིས་ང་དེ་བཞིན་གཤེགས་པ་དེའི་རིམ་གྲོ་པ་བྱས་ཀྱང་ང་བྱང་ཆུབ་ཀྱི་སེམས་ལ་མངོན་པར་ཞེན་པའི་ཕྱིར། དེ་བཞིན་གཤེགས་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་
ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་བྱང་ཆུབ་ཀྱི་སེམས་དེ་ལ་ཡང་མངོན་པར་ཞེན་པ་མེད་པར་བྱའོ། །མཽད་གལ་གྱི་བུ་ངས་རྣམ་པར་བྱང་བ་ཤེས་པ་འགོག་པར་འགྱུར་བ་ཤེས་པར་བྱ་བའི་དོན་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ནས། སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས། དགེ་བའི་རྩ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས་རྒྱ་ཆེར་སྦྱར་ཏེ། དེའི་ཕ་རོལ་གྱི་ཡང་ཆེས་ཕ་རོལ་ན་བྲམ་ཟེ་སྤྲིན་སྒྲོགས་ཞེས་བྱ་བ་
ཤིང་སཱ་ལ་ཆེན་པོ་ལྟ་བུ་ཞིག་བྱུང་སྟེ། ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ནས་ནོར་རྫས་དང་། ཡོ་བྱད་མང་བ་ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། གསེར་དང་། དངུལ་གྱི་བར་དག་རབ་ཏུ་མང་བ། འདོན་པ། གཞུང་འཛིན་པ། སྒྲ་ངེས་པར་

སྦྱོར་བ་དང་བཅས་པ། ཤེས་གསལ་དང་བཅས་པ། ཡི་གེ་དང་བཅས་པ། རབ་ཏུ་དབྱེ་བ་དང་། ལྔ་པ་སྔོན་བྱུང་བ་རྣམས་དང་། གནས་དང་། ལུང་སྟོན་པ་དང་། འཇིག་རྟེན་རྒྱང་ཕན་དང་། མཆོད་སྦྱིན་གྱི་རྒྱུད་དང་། སྐྱེས་བུ་ཆེན་པོའི་མཚན་ཉིད་དང་། རིག་པ་གསུམ་གྱི་
ཁམས་དགེ་མཚན་དང་ལྡན་ཞིང་། དགེ་བ་གང་ཡིན་པ་ཚོལ་བ་རང་གི་སློབ་དཔོན་གྱིས་འཐུན་པའི་རྒྱུད་གནང་ཞིང་དམ་བཅས་པ་ཞིག་བྱུང་ངོ་། །དེའི་ཚེ་དེ་བཞིན་གཤེགས་པ་བདུད་རྩིའི་རྒྱལ་པོ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུད་རྩིའི་རྒྱལ་པོ་དེའི་སྐུ་ཚེའི་ཚད་ལོ་བདུན་སྟོང་དུ་གྱུར་ཏོ། །ཉན་ཐོས་འདུས་པ་ལྔ་བྱུང་སྟེ། ཉན་ཐོས་འདུས་པ་གཅིག་ནི་དགྲ་བཅོམ་པ་ཟག་པ་ཟད་པ་ནས་དེ་བཞིན་དུ་སྦྱར་ཏེ། མཉམ་པ་ཉིད་ཤེས་པས་རྣམ་
པར་གྲོལ་བའི་བར་དུ་དུང་ཕྱུར་ཕྲག་དགུ་བྱུང་ངོ་། །འདུས་པ་གཉིས་པ་ནི་དུང་ཕྱུར་ཐམ་པའོ། །འདུས་པ་གསུམ་པ་ནི་དགྲ་བཅོམ་པ་དུང་ཕྱུར་ཕྲག་སྟོང་བྱུང་ངོ་། །འདུས་པ་བཞི་པ་དང་ལྔ་པ་ལ་ཉན་ཐོས་དགྲ་བཅོམ་པ་ཁྲག་ཁྲིག་དཔག་ཏུ་མེད་པ་དག་བྱུང་ངོ་། །བྱང་ཆུབ་སེམས་
དཔའ་འདུས་པ་གསུམ་བྱུང་སྟེ། དེའི་ཉིས་འགྱུར་རོ། །སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་སེམས་ཀྱི་མི་དམན་པ་ཅན་ཞེས་བྱ་བ་སངས་རྒྱས་ཁྲི་ཕྲག་དཔག་ཏུ་མེད་པ་དག་ལ་དགེ་བའི་རྩ་བ་བསྐྱེད་པ་ཞིག་བྱུང་ངོ་། །དེ་འདི་སྙམ་དུ་སེམས་ཏེ། ཨེ་མ་འཇིག་རྟེན་གནས་པ་འདི་
ནི་མུན་པར་གྱུར་པ་ཡིན་ཏེ། གང་སྐྱེ་བའི་ཆོས་རྣམས་འགོག་པར་མི་མཐོང་ལ་འགགས་པ་རྣམས་ཀྱང་མི་སྐྱེ་བར་རྣམ་པར་མི་ཤེས་སོ། །ཆོས་གང་དག་སྐྱེ་ལ་དེ་དག་འགོག་ཅིང་མི་སྐྱེ་བ་མི་མཐོང་ལ་རྣམ་པར་མི་ཤེས་སོ། །འཇིག་རྟེན་ན་དགེ་སྦྱོང་ངམ་བྲམ་ཟེ་སུ་ཡོད་གང་དེའི་
དྲུང་དུ་བདག་སོང་སྟེ། ཡོངས་སུ་དྲི་བར་བྱའོ་སྙམ་པ་ལས་བར་སྣང་ལས་དེ་བཞིན་གཤེགས་པ་བདུད་རྩིའི་ཐིགས་པའི་རྒྱལ་པོ་ཞེས་བྱ་བ། ཐམས་ཅད་མཁྱེན་པ་ཐམས་ཅད་གཟིགས་པ་དེ་མི་མཁྱེན་པའམ། ཐུགས་སུ་མ་ཆུད་པའམ། མ་གཟིགས་པ་ཅི་ཡང་

མེད་ལ། དེ་འགགས་པའི་ཆོས་རྣམས་ཀྱི་མི་འགྲོ་བ་མེད་པར་རབ་ཏུ་མཁྱེན་པ་ཞིག་འཇིག་རྟེན་དུ་བྱུང་ངོ་ཞེས་དེས་ཐོས་སོ། །དེ་འདི་སྙམ་དུ་སེམས་ཏེ། མི་དམན་པ་བདག་དེ་བཞིན་གཤེགས་པ་བདུད་རྩིའི་ཐིགས་པའི་རྒྱལ་པོའི་དྲུང་དུ་སོང་སྟེ། དོན་འདི་
ཡོངས་སུ་ཞུ་བར་བྱའོ། །དེ་བཞིན་གཤེགས་པ་དེ་ཇི་ལྟ་བ་བཞིན་དུ་ལུང་སྟོན་ཏེ། བདག་གིས་དོན་དེ་ལྟར་གཟུང་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་སེམས་མི་དམན་པ་ཅན་དེ་སྐྱེ་བོའི་ཚོགས་མང་པོ་དང་ལྷན་ཅིག །བྲམ་ཟེ་འབུམ་ཕྲག་དྲུག་དང་། རྒྱལ་རིགས་
ཤིང་སཱ་ལ་ཆེན་པོ་ལྟ་བུ་ཁྲི་ཕྲག་བརྒྱད་ཅུ་རྩ་བཞི་དང་ལྷན་ཅིག །དེ་དག་ལ་སོགས་པ་བྲམ་ཟེ་ཁྲི་ཕྲག་དཔག་ཏུ་མེད་པ་དག་དང་ལྷན་ཅིག་ཏུ་དེ་བཞིན་གཤེགས་པ་བདུད་རྩིའི་ཐིགས་པའི་རྒྱལ་པོ་དེ་ག་ལ་བ་དེར་དོང་ངོ་། །དེ་བཞིན་གཤེགས་པ་བདུད་རྩིའི་ཐིགས་པའི་རྒྱལ་པོ་དེས་བྱང་ཆུབ་
སེམས་དཔའ་སེམས་མི་དམན་པ་ཅན་དེ་སྐྱེ་བོའི་ཚོགས་མང་པོ་དག་དང་ལྷན་ཅིག་ཏུ་རྒྱང་རིང་པོ་ཉིད་ནས་འོང་བ་གཟིགས་སོ། །གཟིགས་ནས་ཀྱང་ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ། མངོན་པར་འདུ་མཛད་པས།
ཐམས་ཅད་དང་ལྡན་པའི་སངས་རྒྱས་ཀྱི་ཞིང་གསེར་གྱི་འོད་ཀྱི་མདོག་གིས་རྒྱས་པར་མཛད་དོ། །ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་པས། འདི་དག་ནི་ལྷ། འདི་དག་ནི་མི་ཞེས་ལྷ་དང་མི་
རྣམས་ཀྱི་བྱེ་བྲག་གམ། ཐ་དད་ཏུ་བྱ་བ་མེད་དོ། །སྐྱེ་བོའི་ཚོགས་ཆེན་པོ་དེ་དག་ཐ་ན་སེམས་ཅན་གང་གི་ལུད་པའི་སྒྲ་ཡང་མེད་པར་མཛད་དེ། འཁོར་དེ་རབ་ཏུ་ཞི་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་མི་དམན་པ་ཅན་གྱིས་འཁོར་དེ་དག་རབ་ཏུ་ཞི་བ་རིག་ཅིང་སྒྲ་འབྱུང་བ་
མ་ཐོས་ནས། དེ་འདི་སྙམ་དུ་སེམས་ཏེ། སྒྲ་གང་དག་འབྱུང་བ་མེད་ན་དེ་དག་འགོག་པ་མེད་ཆོས་གང་དག་འགགས་ན། དེ་གང་ཡང་སྐྱེ་བ་མེད་དོ་སྙམ་མོ། །དེ་འདི་སྙམ་དུ་སེམས་ཏེ། འདི་ལྟར་སྒྲ་འབྱུང་བ་མེད་ན་འགག་པ་མེད་དེ། མེད་པའི་ཕྱིར་ངེས་པར་འགོག་པའི་ཆོས་ཀྱང་མེད་ལ། དེ་

ཡང་དག་པར་ཡོད་པ་མ་ཡིན་པའི་ཕྱིར་སྐྱེ་བ་མེད་དོ་སྙམ་མོ། །དེ་ཡང་འདི་སྙམ་དུ་སེམས་ཏེ། ཆོས་འདི་དག་གང་སྐྱེས་པ་དེ་དག་གི་རང་བཞིན་ཅི་ཡིན་དེ་འདི་ལྟར་བློ་སྐྱེས་ཏེ། སྲིད་པའི་ཆོས་སྐྱེས་པ་འདི་དག་གི་རང་བཞིན་གང་ཡང་མེད་དེ། འདི་དག་སྐྱེས་པ་མེད་ལ་འགགས་པ་ཡང་མེད་དོ་སྙམ་མོ། །
དེ་དེའི་ཚེ་ཆོས་དེ་དག་གི་རང་བཞིན་མ་དམིགས་པ་ན། མི་སྐྱེ་བའི་ཆོས་ལ་བཟོད་པ་ཐོབ་བོ། །དེ་ནས་དེ་བཞིན་གཤེགས་པ་བདུད་རྩིའི་ཐིགས་པའི་རྒྱལ་པོ་དེས། བྱང་ཆུབ་སེམས་དཔའ་སེམས་མི་དམན་པ་ཅན་མི་སྐྱེ་བའི་ཆོས་ལ་བཟོད་པ་ཐོབ་པར་ཐུགས་སུ་ཆུད་ནས། ལེགས་སོ་ཞེས་བྱ་བ་རྗེས་སུ་
གནང་སྟེ། རིགས་ཀྱི་བུ་ཁྱོད་ཀྱིས་འདི་ལྟར་ཆོས་འདིའི་དོན་ཇི་ལྟ་བ་བཞིན་རྣམ་པར་ཤེས་པ་རིགས་ཀྱི་བུ་ལེགས་སོ་ལེགས་སོ། མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་མི་དམན་པ་ཅན་ཞེས་བྱ་བ་དེ་གཞན་ཡིན་པར་སེམས་ན་དེ་དེ་ལྟར་མི་བལྟ་སྟེ།
ང་དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་མི་དམན་པ་ཅན་ཞེས་བྱ་བར་གྱུར་ཏོ། །དགེ་བའི་རྩ་བ་དེས་ང་བསྐལ་པ་གྲངས་མེད་པ་བདུན་ཅུ་རྩ་དྲུག་ཏུ་ནམས་ཀྱང་ལོག་པར་མ་ལྷུང་། ནམས་ཀྱང་ཆོས་ལ་མ་རྨོངས། ནམས་ཀྱང་མི་དགེ་བའི་སེམས་ཆགས་པ་ལས་སྐྱེས་པའམ། ཞེ་སྡང་ལས་སྐྱེས་
པའམ། གཏི་མུག་ལས་སྐྱེས་པ་མ་བྱུང་ངོ་། །རྟག་པར་རྒྱུན་དུ་ཐམས་ཅད་མཁྱེན་པ་ཉིད་ཀྱི་སེམས་སུ་རབ་ཏུ་ཞུགས་ཏེ། སེམས་དང་བ་དེས་ངའི་བག་ཆགས་སྤངས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་ཆོས་རྣམས་ཀྱི་འགོག་པ་སོ་སོར་བརྟག་པར་བྱ་སྟེ། བག་ཆགས་
ཡང་དག་པར་འཇོམས་པར་འགྱུར་རོ། །མཽད་གལ་གྱི་བུ་ངས་རྣམ་པར་བྱང་བ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་
རྣམས་ལ་ཇི་ལྟར་ཡང་དག་པར་རབ་ཏུ་བསྟན་པར་བྱ་སྙམ་ནས་དགེ་བའི་རྩ་བ་རྒྱ་ཆེ་བ་སྣ་ཚོགས་དཔག་ཏུ་མེད་པ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་དྲི་མེད་དབང་བསྐུར་ཞེས་བྱ་བ་ཆོས་ཀྱི་རྒྱལ་

པོ་ཆོས་དང་ལྡན་པ་ཞིག་བྱུང་སྟེ། རིན་པོ་ཆེ་སྣ་བདུན་དང་ལྡན་པ་ནས་རྒྱ་ཆེར་སྦྱར་ཏེ། ཤིན་ཏུ་གནས་པའི་བར་དུའོ། །དེ་འཇིག་རྟེན་གང་དག་ན་དགེ་སྦྱོང་དང་བྲམ་ཟེའི་དབེན་པའི་གནས་མལ་ན་འདུག་ཅིང་དེ་བློན་པོ་གཉིས་དང་། དེ་ལས་གཞན་པའི་མཁས་པ་ཀུན་དང་རྣམ་པར་དཔྱོད་
པར་བྱེད། ཡོངས་སུ་འདྲི་བར་བྱེད་དོ། །དེའི་ཚེ་རྒྱལ་པོ་དྲི་མེད་དབང་བསྐུར་དེ་དང་ཉེ་བ་ཞིག་ན་དེ་བཞིན་གཤེགས་པ་དྲི་མེད་སྤྱན་ཞེས་བྱ་བ་རིག་པ་དང་ཞབས་སུ་ལྡན་པ་ནས་སངས་རྒྱས་བཅོམ་ལྡན་འདས་ཀྱི་བར་ཞིག་བཞུགས་སོ། །དེ་ཆོས་སྟོན་པ། ཐོག་མར་དགེ་བ། བར་དུ་དགེ་བ། ཐ་མར་
ཡང་དགེ་བ། དོན་བཟང་པོ། །ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཚངས་པར་སྤྱོད་པ་རབ་ཏུ་སྟོན་ཏོ། །རྒྱལ་པོ་དྲི་མེད་དབང་བསྐུར་དེ་འདི་དང་ཉེ་བ་ཞིག་ན། དེ་བཞིན་གཤེགས་པ་དྲི་མེད་སྤྱན་ཞེས་བྱ་བ་ཆོས་སྟོན་ཏོ་ཞེས་ཐོས་སོ། །དེ་
བཞིན་གཤེགས་པའི་འཁོར་དགེ་སློང་གི་དགེ་འདུན་དཔག་ཏུ་མེད་ཅེས་དེ་སྐད་ཀྱང་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། དེ་བཞིན་གཤེགས་པ་དེ་ནི་ངེས་པར་ཐུན་མོང་མ་ཡིན་པའི་ཡེ་ཤེས་དང་ལྡན་པས་མཁས་པའོ། །གང་གི་འཁོར་དེ་སྙེད་ཅིག་ཡོད་པ་དེ་ལ་ཆོས་དང་འཐུན་
པས་ཕྱིར་བརྒལ་བར་འདི་ལ་སུ་ཡང་ནུས་པ་མེད་དོ། །གང་བདག་དེ་བཞིན་གཤེགས་པ་དྲི་མེད་སྤྱན་དེའི་དྲུང་དུ་སོང་སྟེ། རྣམ་པར་བྱང་བ་ཤེས་པ་ཡང་དག་པར་འདུ་བ་ཤེས་པ་ཡོངས་སུ་ཞུ་བར་བྱའོ་སྙམ་ནས་དེ་སྲོག་ཆགས་འབུམ་ཕྲག་བརྒྱད་དང་ལྷན་ཅིག་བློན་པོ་སྟོང་ཐམ་པ་དང་ལྷན་ཅིག །བུད་
མེད་འབུམ་ཕྲག་བརྒྱད་དང་ལྷན་ཅིག་ཏུ་དེ་བཞིན་གཤེགས་པ་དྲི་མེད་སྤྱན་ག་ལ་བ་དེར་དོང་ངོ་། །དེའི་ཚེ་དེ་བཞིན་གཤེགས་པ་དེ་སྲོག་ཆགས་ཁྲི་ཕྲག་དཔག་ཏུ་མེད་པ་དག་གིས་ཡོངས་སུ་བསྐོར་བ་ལ་ཆོས་སྟོན་ཏེ། འཁོར་དེ་སྒྲ་ཆུང་ལ་སེམས་ཅན་ཐམས་ཅད་ཀྱི་བསམས་ཤིང་རྣ་བ་བླགས་ཏེ་
ཆོས་ཉན་ཏོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་སྒྲ་ཐ་ན་ལུད་པའི་སྒྲ་ཙམ་ཡང་མེད་དོ། །རྒྱལ་པོ་དེ་སྔོན་གྱི་དགེ་བའི་རྩ་བ་བསགས་པས་དེ་བུད་མེད་འབུམ་ཕྲག་བརྒྱད་ཀྱི་ནང་ན་འདུག་བཞིན་དུ་བསམ་གཏན་བཞི་པའི་བར་ལ་སྙོམས་པར་ཞུགས་སོ། །དེས་དེ་བཞིན་གཤེགས་པ་དེ་མཐོང་

བ་ཙམ་ཉིད་ཀྱིས་དབང་པོ་དེ་དག་ཞི། སྤྱོད་ལམ་ཞི་བར་ཤེས་ནས་དེ་བཞིན་གཤེགས་པ་དེ་ལ་གཞལ་དུ་མེད་པའི་དགའ་བ་བསྐྱེད་ཅིང་། དེ་བཞིན་གཤེགས་པ་དེའི་འཁོར་འདི་སྙེད་ཅིག་ཡོད་པ་ལ་ཕྱིར་བརྒལ་བར་སུས་ཀྱང་མི་ནུས་སོ། །དེ་ཅིའི་ཕྱིར་ཞེ་ན་འཁོར་འདི་སྙེད་ཅིག་ཡོད་པའི་ཕྱིར་རོ།
འདི་ལྟར་དེ་བཞིན་གཤེགས་པ་དེའི་སྤྱོད་ལམ་ཞི་སྟེ། སྤྱོད་ལམ་དེ་དང་འདྲ་བ་གང་ཡང་མེད་དོ། །ཐུན་མོང་མ་ཡིན་ནོ། །རྣམ་གྲངས་དེས་ན་དེ་བཞིན་གཤེགས་པ་དེ་ནི་ཐེ་ཙོམ་མེད་པར་ཐུན་མོང་མ་ཡིན་པའི་ཡེ་ཤེས་དང་ལྡན་པའོ་སྙམ་མོ། །དེ་འཁོར་དེ་དག་དང་བཙུན་མོའི་འཁོར་དེ་དག་དང་ལྷན་
ཅིག་ཏུ་དེ་བཞིན་གཤེགས་པ་དྲི་མེད་སྤྱན་དེ་ག་ལ་བ་དེར་དོང་ངོ་། །དེ་ནས་དེ་བཞིན་གཤེགས་པ་དྲི་མེད་སྤྱན་གྱིས་རྒྱང་རིང་པོ་ཉིད་ནས་འདི་སྐད་བཀའ་སྩལ་ཏེ། རྒྱལ་པོ་ཆེན་པོ་ཚུར་སྤྱོན་རྒྱལ་པོ་ཆེན་པོ་ལེགས་པར་བྱོན་ཏོ། །རྒྱལ་པོ་ཆེན་པོ་དེ་བཞིན་གཤེགས་པ་མཐོང་བར་བྱ་བའི་ཕྱིར། ཡུན་
རིང་པོ་ནས་འབད་པར་བྱས་སོ། །རྒྱལ་པོ་ཆེན་པོ་ཁྱོད་དེ་བཞིན་གཤེགས་པ་མཐོང་ནས་དོན་ཡོད་པར་འགྱུར་རོ། །རྒྱལ་པོ་ཆེན་པོ་ཁྱོད་འབྲས་བུ་དང་བཅས་པར་འགྲོ་ཞིང་། དེ་བཞིན་གཤེགས་པ་ལ་ཞུས་པ་ལུང་བསྟན་པས་བརྣག་པ་ཡོངས་སུ་རྫོགས་པར་འགྱུར་རོ། །དེ་ནས་
རྒྱལ་པོ་དྲི་མེད་དབང་བསྐུར་དེས་འཁོར་དང་ལྷན་ཅིག་ཏུ་དེ་བཞིན་གཤེགས་པ་དེའི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །དེའི་ཚེ་ཚངས་རིས་ཀྱི་ལྷ་བྱེ་བ་ཕྲག་བརྒྱད་ཅུ་དེ་བཞིན་གཤེགས་པ་དེའི་སྟེང་གི་བར་སྣང་ལ་ཐལ་མོ་སྦྱར་ཏེ་འཁོད་དོ། །འདོད་
པ་ན་སྤྱོད་པའི་ལྷ་གང་དག་གི་མིག་གིས་ཀྱང་མཐོང་བར་མི་འགྱུར་ན། མིར་གྱུར་པས་ལྟ་སྨོས་ཀྱང་ཅི་དགོས། དེས་ན་དེ་བཞིན་གཤེགས་པ་དྲི་མེད་སྤྱན་དེས་ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ། མངོན་པར་
འདུ་མཛད་པས་རྒྱལ་པོ་དྲི་མེད་དབང་བསྐུར་གྱིས་མིའི་འཁོར་དེ་དང་འདོད་པ་ན་སྤྱོད་པའི་ལྷའི་འཁོར་དེ་དང་། ཚངས་རིས་ཀྱི་ལྷའི་འཁོར་དེ་དག་མཐོང་ངོ་། །མཐོང་ནས་འདི་སྙམ་དུ་སེམས་ཏེ། དེ་བཞིན་གཤེགས་པ་དྲི་མེད་སྤྱན་དེ་ལ་ཕྱིར་རྒོལ་བར་སུས་ཀྱང་མི་ནུས་ཏེ། འདི་ནི་གནས་

མ་ཡིན་ནོ། །གང་འདོད་པ་ན་སྤྱོད་པའི་ལྷ་འདི་དག་ཐམས་ཅད་ཐལ་མོ་སྦྱར་བ་དང་། ཚངས་རིས་ཀྱི་ལྷ་འདི་དག་བར་སྣང་ལ་ཐལ་མོ་སྦྱར་ཏེ་འདུག་པས་ཕྱིར་བརྒལ་བར་གང་ལྷ་དག་གིས་ཀྱང་མི་ནུས་ན་མིར་གྱུར་པས་ལྟ་སྨོས་ཀྱང་ཅི་དགོས་སྙམ་ནས་དེ་སྟན་ལས་ལངས་ཏེ། པུས་
མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་དེ་བཞིན་གཤེགས་པ་དྲི་མེད་སྤྱན་དེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་དེ་བཞིན་གཤེགས་པ་དྲི་མེད་སྤྱན་དེ་ལ་ཚིགས་སུ་བཅད་དེ་མངོན་པར་བསྟོད་པ།། །།བམ་པོ་བཅུ་དགུ་པ།
མཁྱེན་རབ་ཆེན་པོ་ཆོས་ཀུན་ཕ་རོལ་གཤེགས་ལ་ཕྱག་འཚལ་ལོ། །ལྷར་བཅས་འཇིག་རྟེན་གང་དག་ཁྱོད་ལ་ཐལ་མོ་སྦྱར་ནས་མཆིས། །ལྷ་དང་མི་དང་དྲི་ཟ་མིའམ་ཅི་དང་ལྟོ་འཕྱེ་ཆེ། །སངས་རྒྱས་ལ་ནི་ཐམས་ཅད་ཐལ་མོ་སྦྱར་ནས་ལྟ་ཞིང་མཆིས། །འདི་ཀུན་བཅོམ་ལྡན་འདས་ཀྱི་མཁྱེན་
རབ་ཀུན་ཏུ་གཟིགས་ནས་མཆིས། །དེས་ན་ལྷར་བཅས་འཇིག་རྟེན་ཐལ་མོ་སྦྱར་ནས་ཕྱག་འཚལ་བགྱིད། །མཁྱེན་རབ་ཆེན་པོ་ཁྱོད་ཀྱི་མཁྱེན་རབ་ཐོབ་ཕྱིར་ཕྱག་འཚལ་ཏེ། །འདི་ཀུན་བཅོམ་ལྡན་འདས་ཀྱི་མཁྱེན་རབ་ཀུན་དུ་བཟུང་ནས་མཆིས། །ཁྱོད་ཀྱི་གཟུགས་དང་འདྲ་བ་མ་མཆིས་
མཁྱེན་རབ་འདྲ་མ་མཆིས། །འདི་ཀུན་རྐང་གཉིས་མཆོག་ལ་ཡིད་ཀྱིས་ཤེས་པར་བགྱིས་ནས་མཆིས། །ཇི་ལྟར་ཐོས་བཞིན་དེ་ལྟར་མཐོང་སྟེ་དེ་བས་ལྷག་པར་བཟང་། །བདག་གིས་བདེ་གཤེགས་མཐོང་བའི་བདག་ནི་མི་ཉིད་ལེགས་པར་རྙེད། །ལྷ་ཀླུ་གནོད་སྦྱིན་ལྷ་མ་ཡིན་དང་དེ་བཞིན་སྲིན་
པོ་དག །འཇིག་རྟེན་གསུམ་ན་ཁྱོད་དང་འདྲ་བ་མ་མཆིས་སོ། །འདྲེན་པ་གང་ལ་བདག་གིས་སྔོན་གྱི་བརྒལ་བའི་སེམས་བྱུང་བ། །འཇིག་རྟེན་འདྲེན་པ་མཐོང་བ་ཙམ་གྱིས་དེ་ཉིད་མ་མཆིས་སོ། །བརྩོན་ཆེན་མཁྱེན་རབ་ཐུགས་བརྩེར་ལྡན་པ་ཁྱོད་ལ་ཞུ་བགྱི་བ། །དགེ་བའི་ལས་གང་
བགྱིས་པས་སྐྱོན་རྣམས་ཀུན་གྱིས་གོས་མི་འགྱུར། །དེ་ནས་དེ་བཞིན་གཤེགས་པ་དྲི་མེད་སྤྱན་གྱིས་རྒྱལ་པོ་བདུད་རྩི་དབང་བསྐུར་དེའི་ཤེས་རབ་འདི་ལྟ་བུ་འབྱུང་པོ་ཐམས་ཅད་ལ་ཕན་པ་དང་བདེ་བ་དེ་གསན་ནས། གསུང་མ་འཁྲུལ་བ་དང་སྤོབས་པ་གྲོལ་བས་རྒྱལ་པོ་བདུད་རྩིའི་དབང་བསྐུར་དེ་ལ་སླར་

ཚིགས་སུ་བཅད་དེ་བཀའ་སྩལ་པ། འཇིག་རྟེན་ཀུན་ལ་ཕན་བྱེད་ཞུ་བ་ཞུས་པ་ལེགས་སོ་ལེགས། །ཁྱེད་ཀྱི་དོན་དེ་བཤད་ཀྱི་ཇི་ལྟ་བ་བཞིན་ང་ལ་ཉོན། །འབར་བ་ལྟ་བུར་ཡེ་ཤེས་གང་གིས་ཉོན་མོངས་སྲེག་པར་བྱེད། །དེ་ནི་ཤེས་ནས་ཡང་དག་བསྡུས་ཏེ་དེ་འདྲར་སྒྲུབ་བྱེད་ན། །ཉོན་མོངས་
དག་ལས་རྣམ་གྲོལ་ཤེས་པ་དེ་ལ་མི་ཆགས་ཏེ། །ཇི་ལྟར་ཕ་རོལ་ཕྱིན་པ་གཟིངས་ལ་ལྟོས་མེད་བོར་ནས་འགྲོ། །དེ་བཞིན་རྒྱལ་བའི་མཁྱེན་པས་སྡུག་བསྔལ་རྒྱུ་ནི་སྲེག་བྱེད་ལ། །ཤེས་པ་དེ་ལ་གནས་པར་མི་བྱེད་འདི་ནི་དགེ་བའི་ལམ། །བྱང་ཆུབ་སེམས་དཔའ་འཇིགས་མེད་མཁས་
པ་དེ་ནི་འདིར་སློབ་ན། །རྟག་ཏུ་མཉམ་པར་གཞག་ཅིང་རྣམ་གཡེང་འདི་དག་མེད་པར་འགྱུར། །བྱང་ཆུབ་གཞོལ་བའི་སེམས་ཀྱིས་འཆག་པ་དང་ནི་གནས་པ་དང་། །མཁས་པ་ཤེས་རབ་བཅས་པ་འདུག་དང་མལ་དུ་ཉལ་བར་བྱེད། །ཆོས་ཀུན་ངོ་བོ་ཉིད་ཀྱིས་ངོ་བོ་མེད་པར་རབ་ཏུ་ཤེས། །
མཁས་པ་ཆོས་རྣམས་ཐམས་ཅད་ལ་ནི་གནས་པར་མི་བྱེད་དོ། །འཇིག་རྟེན་མགོན་པོ་སྐྱོབ་པ་དེ་ཡི་གསུང་དེ་ཐོས་ནས་སུ། །ཡིད་ལ་བརྣག་པ་དགའ་ཞིང་སྟོན་པ་ལ་ནི་མངོན་པར་བསྟོད། །འཇིག་རྟེན་སྤྱོད་བཅོམ་འཇིག་རྟེན་གསལ་མཛད་ཁྱོད་ལ་ཕྱག་འཚལ་ལོ། །འདྲེན་པ་རང་གི་
གྲོལ་བས་སེམས་ཅན་དག་གི་སྡུག་བསྔལ་བཀྲོལ། །དེད་དཔོན་བླ་ན་མེད་པ་བརྩོན་འགྲུས་ཆེན་པོ་མྱུར་མཛད་པ། །འདྲེན་པ་རང་གི་རྒལ་བས་སེམས་ཅན་མང་པོ་དེ་དག་བསྒྲལ། །ཁྱོད་ཀྱིས་མ་རིག་པ་ཡི་སྦུབས་བཅོམ་ཁྱོད་ཀྱིས་སྣང་བ་བསྟན། །ཁྱོད་ཀྱིས་འོད་དཔག་མེད་པས་
སངས་རྒྱས་ཞིང་ནི་རབ་ཏུ་སྣང་། །ཁྱོད་ཀྱི་འོད་ཀྱིས་ཀུན་མཁྱེན་སངས་རྒྱས་ཞིང་ནི་དཔག་ཏུ་མེད། །གྲངས་མེད་བྱེ་བ་དག་ཏུ་སྣང་བས་རྟག་ཏུ་ཁྱབ་པར་མཛད། །སྒྲ་གཅན་ཟླ་བ་བཏང་ལྟར་ནམ་མཁའི་དཀྱིལ་ན་དྲི་མ་མེད། །ཟླ་བ་རྣམ་པར་སྣང་ལྟར་དེ་བཞིན་སངས་རྒྱས་རྣམ་པར་སྣང་། །
ལྷ་མ་ཡིན་གྱི་ཞགས་བཅད་ནམ་མཁའི་དཀྱིལ་ན་དྲི་མ་མེད། །ཉི་མའི་འོད་ཟེར་བརྒྱ་དག་རྣམ་ཤར་བར་སྣང་གསལ་བྱེད་ལྟར། །བདུད་ཀྱི་ཞགས་པ་བཅད་ནས་སངས་རྒྱས་ཉི་མ་ཡང་དག་འཕགས། །བདུད་ཕྱོགས་ངེས་པར་བཅོམ་ནས་སངས་རྒྱས་ལམ་ལ་རྣམ་སྣང་མཛད། །སྲིན་

བུ་མེ་ཁྱེར་འོད་པས་ཉི་འོད་ཡང་དག་འཕགས་པ་ལྟར། །རྒྱལ་བའི་ཉི་མ་ཡང་དག་འཕགས་པས་མུ་སྟེགས་སྣང་བར་མཛད། །འདི་ལྟར་འཇིག་རྟེན་མགོན་པོ་འོད་མཛད་པ་ལ་སྐྱབས་སུ་མཆི། །མུན་པར་བྱེད་པ་བཅོམ་ནས་ཀུན་ཏུ་སྣང་བ་རྣམ་པར་བསྟན། །ཉི་མ་
ཀུན་མིག་སྣང་ལྟར་སངས་རྒྱས་སྤྱན་ནི་རྣམ་པར་སྣང་། །སྟོན་ཀའི་སྤྲིན་ལས་ཉི་མ་ཤར་ལྟར་རྣམ་པར་སྣང་བར་མཛད། །དེ་ནས་རྒྱལ་པོ་བདུད་རྩིས་དབང་བསྐུར་གྱི་ཞུ་བ་ལུང་བསྟན་པ་འདིས་མངོན་པར་དགའ་ནས་བཅོམ་ལྡན་འདས་དེ་བཞིན་གཤེགས་པ་དྲི་མེད་སྤྱན་དེ་ལ་ཚིགས་སུ་བཅད་
དེ་མངོན་པར་བསྟོད་པའི་དགེ་བའི་རྩ་བ་དེས་བསྐལ་པ་གྲངས་མེད་པ་དགུ་བཅུ་རྩ་དྲུག་ཏུ་ལོག་པར་མ་སོང་ཞིང་ནམས་ཀྱང་རིགས་ངན་དག་ཏུ་མ་སྐྱེས། ནམས་ཀྱང་སོ་སྔོར་མ་གྱུར་མིག་སེར་པོར་མ་ཡིན་འཇིགས་པའི་མིག་ཏུ་མ་ཡིན། རྣམ་པར་འཁྲུལ་པའི་མིག་ཏུ་མ་ཡིན་ཏེ། རྟག་པར་
རྒྱུན་དུ་བདག་ཉིད་འོད་ཅན་དུ་གྱུར། འདྲེན་པ་དང་ཤེས་པ་དང་ཆོ་འཕྲུལ་ཅན་དུ་གྱུར། སངས་རྒྱས་ཀྱིས་གནང་། སངས་རྒྱས་ཀྱི་ཞིང་གང་དུ་སྐྱེས་པ་དེར་སངས་རྒྱས་འབྱུང་བ་ཤིན་ཏུ་ཤེས། དེར་སྲོག་ཆགས་ཤིན་ཏུ་འཁོར་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དཔག་ཏུ་མེད་པ་དག་ཐེག་པ་
གསུམ་སྟེ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། བླ་ན་མེད་པའི་སངས་རྒྱས་ཀྱི་ཐེག་པས་འདུལ་བར་བྱེད་དོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན། རྒྱལ་པ་བདུད་རྩིས་དབང་བསྐུར་ཞེས་བྱ་བར་གྱུར་པ་དེ་གཞན་ཡིན་པར་ཐེ་ཙོམ་མམ་ཡིད་གཉིས་ཟ་ན་དེ་ལྟར་མི་
བལྟ་སྟེ། ང་དེའི་ཚེ་དེའི་དུས